অট্ঠকথা > সুত্তপিটক (অট্ঠকথা) > খুদ্দকনিকায (অট্ঠকথা)

তত্থ ¶ ‘‘বুদ্ধৰংসসংৰণ্ণনা হেস্সতি সারভূতা’’তি ৰুত্তত্তা বুদ্ধৰংসো তাৰ ৰৰত্থপেতব্বো. তত্রিদং ৰৰত্থানং – ইতো হেট্ঠা কপ্পসতসহস্সাধিকেসু চতূসু অসঙ্খ্যেয্যেসু উপ্পন্নানং পঞ্চৰীসতিযা বুদ্ধানং উপ্পন্নকপ্পাদিপরিচ্ছেদৰসেন পৰেণিৰিত্থারকথা ‘‘বুদ্ধৰংসো নামা’’তি ৰেদিতব্বো.

স্ৰাযং কপ্পপরিচ্ছেদো নামপরিচ্ছেদো গোত্তপরিচ্ছেদো জাতিপরিচ্ছেদো নগরপরিচ্ছেদো পিতুপরিচ্ছেদো ¶ মাতুপরিচ্ছেদো বোধিরুক্খপরিচ্ছেদো ধম্মচক্কপ্পৰত্তনপরিচ্ছেদো অভিসমযপরিচ্ছেদো সাৰকসন্নিপাতপরিচ্ছেদো অগ্গসাৰকপরিচ্ছেদো উপট্ঠাকপরিচ্ছেদো অগ্গসাৰিকাপরিচ্ছেদো পরিৰারভিক্খুপরিচ্ছেদো রংসিপরিচ্ছেদো সরীরপ্পমাণপরিচ্ছেদো বোধিসত্তাধিকারপরিচ্ছেদো ব্যাকরণপরিচ্ছেদো বোধিসত্তপধানপরিচ্ছেদো আযুপরিচ্ছেদো পরিনিব্বানপরিচ্ছেদোতি ইমেহি পাল়িযা আগতেহি বাৰীসতিযা পরিচ্ছেদেহি পরিচ্ছিন্নো ৰৰত্থিতো.

পাল়িঅনারুল়্হো পন সম্বহুলৰারোপেত্থ আনেতব্বো. সো অগারৰাসপরিচ্ছেদো পাসাদত্তযপরিচ্ছেদো নাটকিত্থিপরিচ্ছেদো অগ্গমহেসিপরিচ্ছেদো পুত্তপরিচ্ছেদো যানপরিচ্ছেদো অভিনিক্খমনপরিচ্ছেদো ¶ পধানপরিচ্ছেদো উপট্ঠাকপরিচ্ছেদো ৰিহারপরিচ্ছেদোতি দসধা ৰৰত্থিতো হোতি.

তং সম্বহুলৰারম্পি, যথাট্ঠানে মযং পন;

দস্সেত্ৰাৰ গমিস্সাম, তত্থ তত্থ সমাসতো.

কেনাযং দেসিতো কত্থ, কস্সত্থায চ দেসিতো;

কিমত্থায কদা কস্স, ৰচনং কেন চাভতো.

সব্বমেতং ৰিধিং ৰত্ৰা, পুব্বমেৰ সমাসতো;

পচ্ছাহং বুদ্ধৰংসস্স, করিস্সামত্থৰণ্ণনন্তি.

তত্থ কেনাযং দেসিতোতি অযং বুদ্ধৰংসো কেন দেসিতো? সব্বধম্মেসু অপ্পটিহতঞাণচারেন দসবলেন চতুৰেসারজ্জৰিসারদেন ধম্মরাজেন ¶ ধম্মস্সামিনা তথাগতেন সব্বঞ্ঞুনা সম্মাসম্বুদ্ধেন দেসিতো.

কত্থ দেসিতোতি? কপিলৰত্থুমহানগরে নিগ্রোধারামমহাৰিহারে পরমরুচিরসন্দস্সনে দেৰমনুস্সনযননিপাতভূতে রতনচঙ্কমে চঙ্কমন্তেন দেসিতো.

কস্সত্থায ¶ চ দেসিতোতি? দ্ৰাসীতিযা ঞাতিসহস্সানং অনেককোটীনঞ্চ দেৰমনুস্সানং অত্থায দেসিতো.

কিমত্থায দেসিতোতি? চতুরোঘনিত্থরণত্থায দেসিতো.

কদা দেসিতোতি ভগৰা হি পঠমবোধিযং ৰীসতিৰস্সানি অনিবদ্ধৰাসো হুত্ৰা যত্থ যত্থ ফাসুকং হোতি, তত্থ তত্থেৰ গন্ত্ৰা ৰসি. কথং? পঠমং ৰস্সং ইসিপতনে ধম্মচক্কং (সং. নি. ৫.১০৮১; মহাৰ. ১৩ আদযো; পটি. ম. ২.৩০) পৰত্তেত্ৰা অট্ঠারস ব্রহ্মকোটিযো অমতপানং পাযেত্ৰা বারাণসিং উপনিস্সায ইসিপতনে মিগদাযে ৰসি. দুতিযং ৰস্সং রাজগহং উপনিস্সায ৰেল়ুৰনে মহাৰিহারে. ততিযচতুত্থানিপি তত্থেৰ. পঞ্চমং ৰেসালিং উপনিস্সায মহাৰনে কূটাগারসালাযং. ছট্ঠং মকুলপব্বতে. সত্তমং তাৰতিংসভৰনে. অট্ঠমং ভগ্গেসু সংসুমারগিরিং উপনিস্সায ভেসকল়াৰনে. নৰমং কোসম্বিযং. দসমং পালিলেয্যকৰনসণ্ডে. একাদসমং নাল়াযং ব্রাহ্মণগামে. দ্ৰাদসমং ৰেরঞ্জাযং. তেরসমং চালিযপব্বতে. চুদ্দসমং জেতৰনমহাৰিহারে. পঞ্চদসমং কপিলৰত্থুমহানগরে. সোল়সমং আল়ৰকং দমেত্ৰা চতুরাসীতিপাণসহস্সানি অমতপানং পাযেত্ৰা আল়ৰিযং. সত্তরসমং রাজগহেযেৰ. অট্ঠারসমং চালিযপব্বতেযেৰ. তথা একূনৰীসতিমং ৰীসতিমং পন ৰস্সং রাজগহেযেৰ ৰসি. তেন ¶ ৰুত্তং – ‘‘ভগৰা হি পঠমবোধিযং ৰীসতিৰস্সানি অনিবদ্ধৰাসো হুত্ৰা যত্থ যত্থ ফাসুকং হোতি, তত্থ তত্থেৰ গন্ত্ৰা ৰসী’’তি. ততো পট্ঠায পন সাৰত্থিংযেৰ উপনিস্সায জেতৰনমহাৰিহারে চ পুব্বারামে চ ধুৰপরিভোগৰসেন ৰসি.

যদা পন সত্থা বুদ্ধো হুত্ৰা বারাণসিযং ইসিপতনে মিগদাযে পঠমং ৰস্সং ৰসিত্ৰা ৰুট্ঠৰস্সো পৰারেত্ৰা উরুৰেলং গন্ত্ৰা তত্থ তযো মাসে ৰসন্তো তেভাতিকজটিলে দমেত্ৰা ভিক্খুসহস্সেহি কতপরিৰারো ¶ ফুস্সমাসপুণ্ণমাযং রাজগহং গন্ত্ৰা দ্ৰে মাসে তত্থেৰ ৰসি, তদা বারাণসিতো নিক্খন্তস্স পনস্স পঞ্চ মাসা জাতা. সকলো হেমন্তো অতিক্কন্তো. উদাযিত্থেরস্স আগতদিৰসতো সত্তট্ঠদিৰসা ৰীতিৰত্তা. সো পন ফগ্গুনীপুণ্ণমাসিযং চিন্তেসি – ‘‘অতিক্কন্তো হেমন্তো, ৰসন্তকালো অনুপ্পত্তো, সমযো তথাগতস্স কপিলপুরং গন্তু’’ন্তি. সো এৰং চিন্তেত্ৰা কুলনগরগমনত্থায সট্ঠিমত্তাহি গাথাহি গমনৰণ্ণং ৰণ্ণেসি. অথ সত্থা চস্স ৰচনং সুত্ৰা ঞাতিসঙ্গহং কাতুকামো হুত্ৰা অঙ্গমগধৰাসীনং কুলপুত্তানং দসহি সহস্সেহি কপিলৰত্থুৰাসীনং দসহি সহস্সেহীতি সব্বেহেৰ ৰীসতিযা খীণাসৰসহস্সেহি পরিৰুতো রাজগহতো নিক্খমিত্ৰা দিৰসে দিৰসে যোজনং গচ্ছন্তো রাজগহতো সট্ঠিযোজনং কপিলৰত্থুপুরং ¶ দ্ৰীহি মাসেহি সম্পাপুণিত্ৰা তত্থ ঞাতীনং ৰন্দাপনত্থং যমকপাটিহারিযং অকাসি. তদাযং বুদ্ধৰংসো দেসিতো.

কস্স ৰচনন্তি? সাৰকপচ্চেকবুদ্ধানং অসাধারণং সম্মাসম্বুদ্ধস্সেৰ ৰচনং.

কেনাভতোতি? আচরিযপরম্পরায আভতো. অযঞ্হি সারিপুত্তত্থেরো ভদ্দজী তিস্সো কোসিযপুত্তো সিগ্গৰো মোগ্গলিপুত্তো সুদত্তো ধম্মিকো দাসকো সোণকো রেৰতোতি এৰমাদীহি যাৰ ততিযসঙ্গীতিকালা আভতো, ততো উদ্ধম্পি তেসংযেৰ সিস্সানুসিস্সেহীতি এৰং তাৰ আচরিযপরম্পরায যাৰজ্জকালা আভতোতি ৰেদিতব্বো.

‘‘কেনাযং দেসিতো কত্থ, কস্সত্থায চ দেসিতো;

কিমত্থায কদা কস্স, ৰচনং কেন চাভতো’’তি. –

এৰং ¶ ¶ আভতস্স পনস্স ইদানি অত্থৰণ্ণনা হোতি, সা পনাযং অত্থৰণ্ণনা যস্মা দূরেনিদানং অৰিদূরেনিদানং সন্তিকেনিদানন্তি, ইমানি তীণি নিদানানি দস্সেত্ৰাৰ ৰণ্ণিতা সুৰণ্ণিতা নাম হোতি. যে চ নং সুণন্তি, তেহি সমুদাগমতো ¶ পট্ঠায ৰিঞ্ঞাতত্তা সুৰিঞ্ঞাতাৰ হোতি, তস্মা তানি নিদানানি দস্সেত্ৰাৰ ৰণ্ণযিস্সাম.

তত্থ আদিতো পট্ঠায তাৰ তেসং নিদানানং পরিচ্ছেদো ৰেদিতব্বো. তত্রাযং সঙ্খেপতো অত্থদীপনা – দীপঙ্করদসবলস্স পাদমূলে কতাভিনীহারস্স মহাসত্তস্স যাৰ ৰেস্সন্তরত্তভাৰা চৰিত্ৰা তুসিতভৰনে নিব্বত্তি, তাৰ পৰত্তা কথা দূরেনিদানং নাম. তুসিতভৰনতো চৰিত্ৰা যাৰ বোধিমণ্ডে সব্বঞ্ঞুতঞ্ঞাণপ্পত্তি, তাৰ পৰত্তা কথা অৰিদূরেনিদানং নাম. ‘‘একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে’’তি চ, ‘‘রাজগহে ৰিহরতি ৰেল়ুৰনে কলন্দকনিৰাপে’’তি চ, ‘‘ৰেসালিযং ৰিহরতি মহাৰনে কূটাগারসালায’’ন্তি চ এৰং মহাবোধিমণ্ডে সব্বঞ্ঞুতঞ্ঞাণপ্পত্তিতো যাৰ পরিনিব্বানমঞ্চা এতস্মিং অন্তরে ভগৰা যত্থ যত্থ ৰিহাসি, তং তং সন্তিকেনিদানং নামাতি ৰেদিতব্বং. এত্তাৰতা সঙ্খেপেনেৰ তিণ্ণং দূরাৰিদূরসন্তিকেনিদানানং ৰসেন বাহিরনিদানৰণ্ণনা সমত্তা হোতীতি.

‘‘ব্রহ্মা ¶ চ লোকাধিপতী সহম্পতী, কতঞ্জলী অনধিৰরং অযাচথ;

সন্তীধ সত্তাপ্পরজক্খজাতিকা, দেসেহি ধম্মং অনুকম্পিমং পজ’’ন্তি. –

আদিনযপ্পৰত্তস্স অব্ভন্তরনিদানস্স অত্থৰণ্ণনা হোতি.

এত্থ ¶ ‘‘একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে’’তিআদিসুত্তন্তেসু ৰিয – ‘‘একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং বুদ্ধৰংসং অপুচ্ছী’’তি এৰমাদিনা নযেন নিদানং অৰত্ৰা কস্মা ‘‘ব্রহ্মা চ লোকাধিপতী সহম্পতী, কতঞ্জলী অনধিৰরং অযাচথা’’তিআদিনা নযেন নিদানং ৰুত্তন্তি? ৰুচ্চতে – ভগৰতো সব্বধম্মদেসনাকারণভূতায ব্রহ্মুনো ধম্মদেসনাযাচনায সন্দস্সনত্থং ৰুত্তন্তি.

‘‘কদাযং ধম্মদেসনত্থং, অজ্ঝিট্ঠো ব্রহ্মুনা জিনো;

কদা কত্থ চ কেনাযং, গাথা হি সমুদীরিতা’’তি.

ৰুচ্চতে ¶ – বুদ্ধভূতস্স পন ভগৰতো অট্ঠমে সত্তাহে সত্থা ধম্মদেসনত্থায ব্রহ্মুনা অজ্ঝিট্ঠো আযাচিতো. তত্রাযং অনুপুব্বিকথা – মহাপুরিসো কির কতাভিনীহারো মহাভিনিক্খমনদিৰসে ৰিৰটপাকটবীভচ্ছসযনাসনচেটিকা নাটকিত্থিযো দিস্ৰা অতীৰ সংৰিগ্গহদযো পটেকদেসাৰচ্ছন্নং ছন্নং আমন্তেত্ৰা – ‘‘অরিনরৰরমন্থকং কণ্ডকং নাম তুরঙ্গৰরমাহরা’’তি কণ্ডকং আহরাপেত্ৰা ছন্নসহাযো ৰরতুরঙ্গমারুয্হ নগরদ্ৰারে অধিৰত্থায দেৰতায নগরদ্ৰারে ৰিৰটে নগরতো নিক্খমিত্ৰা তীণি রজ্জানি তেন রত্তাৰসেসেন অতিক্কমিত্ৰা অনোমসত্তো অনোমায নাম নদিযা তীরে ঠত্ৰা ছন্নমেৰমাহ ¶ – ‘‘ছন্ন, ত্ৰং মম ইমানি অঞ্ঞেহি অসাধারণানি আভরণানি কণ্ডকঞ্চ ৰরতুরঙ্গমাদায কপিলপুরং গচ্ছাহী’’তি ছন্নং ৰিস্সজ্জেত্ৰা অসিতোরগনীলুপ্পলসদিসেনাসিনা সকেসমকুটং ছিন্দিত্ৰা আকাসে উক্খিপিত্ৰা দেৰদত্তিযং পত্তচীৰরং গহেত্ৰা সযমেৰ পব্বজিত্ৰা অনুপুব্বেন চারিকং চরমানো অনিলবলসমুদ্ধুততরঙ্গভঙ্গং অসঙ্গং গঙ্গং নদিং উত্তরিত্ৰা মণিগণরংসিজালৰিজ্জোতিতরাজগহং রাজগহং নাম নগরং পৰিসিত্ৰা তত্থ ইস্সরিযমদমত্তং জনং পরিহাসেন্তো ৰিয চ উদ্ধতৰেসস্স জনস্স লজ্জমুপ্পাদযমানো ৰিয চ ৰযকন্তীহি নাগরজনহদযানি অত্তনি বন্ধন্তো ৰিয চ দ্ৰতিংসৰরমহাপুরিসলক্খণৰিরাজিতায রূপসিরিযা সব্বজননযনানি ৰিলুম্পমানো ৰিয চ রূপীপাদসঞ্চরো পুঞ্ঞসঞ্চযো ৰিয চ পব্বতো ৰিয চ গমনেন নিস্সঙ্গো সন্তিন্দ্রিযো সন্তমানসো ¶ যুগমত্তং পেক্খমানো রাজগহং পিণ্ডায চরিত্ৰা যাপনমত্তং ভত্তং গহেত্ৰা নগরতো নিক্খমিত্ৰা পণ্ডৰপব্বতপস্সে ছাযূদকসম্পন্নে সুচিভূমিভাগে পরমরমণীযে পৰিৰিত্তে ওকাসে নিসীদিত্ৰা পটিসঙ্খানবলেন মিস্সকভত্তং পরিভুঞ্জিত্ৰা পণ্ডৰগিরানুসারেন বিম্বিসারেন মগধমহারাজেন মহাপুরিসস্স সন্তিকং গন্ত্ৰা নামগোত্তং পুচ্ছিত্ৰা তেন পমুদিতহদযেন ‘‘মম রজ্জভাগং গণ্হাহী’’তি রজ্জেন নিমন্তিযমানো – ‘‘অলং, মহারাজ, ন ময্হং রজ্জেনত্থো অহং রজ্জং পহায লোকহিতত্থায পধানমনুযুঞ্জিত্ৰা লোকে ৰিৰটচ্ছদো বুদ্ধো ভৰিস্সামীতি নিক্খন্তো’’তি ৰত্ৰা তেন চ ‘‘বুদ্ধো হুত্ৰা সব্বপঠমং মম ৰিজিতং ওসরেয্যাথা’’তি ৰুত্তো ‘সাধূ’তি তস্স পটিঞ্ঞং দত্ৰা আল়ারঞ্চ উদকঞ্চ উপসঙ্কমিত্ৰা তেসং ধম্মদেসনায সারং অৰিন্দন্তো ততো পক্কমিত্ৰা উরুৰেলাযং ছব্বস্সানি দুক্করকারিকং করোন্তোপি অমতং অধিগন্তুং অসক্কোন্তো ওল়ারিকাহারপটিসেৰনেন সরীরং সন্তপ্পেসি.

তদা ¶ পন উরুৰেলাযং সেনানিগমে সেনানিগমকুটুম্বিকস্স ধীতা সুজাতা নাম দারিকা ৰযপ্পত্তা একস্মিং নিগ্রোধরুক্খে পত্থনমকাসি – ‘‘সচাহং সমজাতিকং কুলঘরং গন্ত্ৰা পঠমগব্ভে পুত্তং লভিস্সামি, বলিকম্মং করিস্সামী’’তি. তস্সা সা পত্থনা সমিজ্ঝি. সা ৰেসাখপুণ্ণমদিৰসে ‘‘অজ্জ বলিকম্মং করিস্সামী’’তি পাতোৰ পাযাসং অনাযাসং পরমমধুরং সম্পটিপাদেসি. বোধিসত্তোপি তদহেৰ কতসরীরপটিজগ্গনো ভিক্খাচারকালং আগমযমানো পাতোৰ গন্ত্ৰা তস্মিং নিগ্রোধরুক্খমূলে নিসীদি. অথ খো পুণ্ণা নাম দাসী তস্সা ধাতী রুক্খমূলসোধনত্থায গতা বোধিসত্তং পাচীনলোকধাতুং ওলোকযমানং নিসিন্নং সঞ্ঝাপ্পভানুরঞ্জিতৰরকনকগিরিসিখরসদিসসরীরসোভং তিমিরনিকরনিধানকরং কমলৰনৰিকসনকরং ঘনৰিৰরমুপগতং দিৰসকরমিৰ তরুৰরমুপগতং মুনিদিৰসকরমদ্দস. সরীরতো চস্স নিক্খন্তাহি পভাহি সকলঞ্চ তং রুক্খং সুৰণ্ণৰণ্ণং দিস্ৰা তস্সা এতদহোসি – ‘‘অজ্জ অম্হাকং ¶ দেৰতা রুক্খতো ওরুয্হ সহত্থেনেৰ বলিং পটিগ্গহেতুকামা হুত্ৰা নিসিন্না’’তি. সা ৰেগেন গন্ত্ৰা সুজাতায এতমত্থং আরোচেসি.

ততো ¶ সুজাতা সঞ্জাতসদ্ধা হুত্ৰা সব্বালঙ্কারেন অলঙ্করিত্ৰা সতসহস্সগ্ঘনিকং সুৰণ্ণপাতিং পরমমধুরস্স মধুপাযাসস্স পূরেত্ৰা অপরায সুৰণ্ণপাতিযা পিদহিত্ৰা সীসেনাদায নিগ্রোধরুক্খাভিমুখী অগমাসি. সা গচ্ছন্তী দূরতোৰ তং বোধিসত্তং রুক্খদেৰতমিৰ সকলং তং রুক্খং সরীরপ্পভায সুৰণ্ণৰণ্ণং কত্ৰা পুঞ্ঞসঞ্চযমিৰ রূপৰন্তং নিসিন্নং দিস্ৰা পীতিসোমনস্সজাতা সুজাতা ‘‘রুক্খদেৰতা’’তি সঞ্ঞায দিট্ঠট্ঠানতো পট্ঠায ওনতোনতা গন্ত্ৰা সীসতো তং সুৰণ্ণপাতিং ওতারেত্ৰা মহাসত্তস্স হত্থে ঠপেত্ৰা পঞ্চপতিট্ঠিতেন ৰন্দিত্ৰা – ‘‘যথা মম মনোরথো নিপ্ফন্নো, এৰং তুম্হাকম্পি নিপ্ফজ্জতূ’’তি ৰত্ৰা পক্কামি.

অথ খো বোধিসত্তোপি সুৰণ্ণপাতিং গহেত্ৰা নেরঞ্জরায নদিযা তীরং গন্ত্ৰা সুপ্পতিট্ঠিতস্স নাম তিত্থস্স তীরে সুৰণ্ণপাতিং ঠপেত্ৰা ন্হত্ৰা পচ্চুত্তরিত্ৰা একূনপঞ্ঞাসপিণ্ডে করোন্তো তং পাযাসং পরিভুঞ্জিত্ৰা – ‘‘সচাহং অজ্জ বুদ্ধো ভৰিস্সামি, অযং সুৰণ্ণপাতি পটিসোতং গচ্ছতূ’’তি খিপি. সা পাতি পটিসোতং গন্ত্ৰা কাল়স্স নাম নাগরাজস্স ভৰনং পৰিসিত্ৰা তিণ্ণং বুদ্ধানং থালকানি উক্খিপিত্ৰা তেসং হেট্ঠা অট্ঠাসি.

মহাসত্তো তত্থেৰ ৰনসণ্ডে দিৰাৰিহারং ৰীতিনামেত্ৰা সাযন্হসমযে সোত্থিযেন নাম তিণহারকেন মহাপুরিসস্স আকারং ঞত্ৰা দিন্না অট্ঠ তিণমুট্ঠিযো গহেত্ৰা বোধিমণ্ডমারুয্হ দক্খিণদিসাভাগে অট্ঠাসি. সো পন পদেসো পদুমিনিপত্তে উদকবিন্দু ৰিয অকম্পিত্থ. মহাপুরিসো – ‘‘অযং পদেসো মম গুণং ধারেতুং অসমত্থো’’তি ¶ পচ্ছিমদিসাভাগমগমাসি. সোপি তথেৰ কম্পিত্থ. পুন উত্তরদিসাভাগমগমাসি. সোপি তথেৰ কম্পিত্থ. পুন পুরত্থিমদিসাভাগমগমাসি. তত্থ পল্লঙ্কপ্পমাণট্ঠানং নিচ্চলং অহোসি. মহাপুরিসো – ‘‘ইদং ঠানং কিলেসৰিদ্ধংসনট্ঠান’’ন্তি সন্নিট্ঠানং কত্ৰা তানি তিণানি অগ্গে গহেত্ৰা চালেসি. তানি তূলিকগ্গেন পরিচ্ছিন্নানি ৰিয অহেসুং. বোধিসত্তো – ‘‘বোধিং অপত্ৰাৰ ইমং পল্লঙ্কং ন ভিন্দিস্সামী’’তি চতুরঙ্গৰীরিযং অধিট্ঠহিত্ৰা পল্লঙ্কং আভুজিত্ৰা বোধিক্খন্ধং পিট্ঠিতো কত্ৰা পুরত্থাভিমুখো নিসীদি.

তঙ্খণঞ্ঞেৰ ¶ সব্বলোকাভিহারো মারো বাহুসহস্সং মাপেত্ৰা দিযড্ঢযোজনসতিকং হিমগিরিসিখরসদিসং ¶ গিরিমেখলং নাম অরিৰরৰারণং ৰরৰারণং অভিরুয্হ নৰযোজনিকেন ধনুঅসিফরসুসরসত্তিসবলেনাতিবহলেন মারবলেন সম্পরিৰুতো সমন্তা পব্বতো ৰিয অজ্ঝোত্থরন্তো মহাসপত্তং ৰিয মহাসত্তং সমুপাগমি. মহাপুরিসো সূরিযে ধরন্তেযেৰ অতিতুমূলং মারবলং ৰিধমিত্ৰা ৰিকসিতজযসুমনকুসুমসদিসস্স চীৰরস্স উপরি পতমানেহি রত্তপৰালঙ্কুরসদিসরুচিরদস্সনেহি বোধিরুক্খঙ্কুরেহি পীতিযা ৰিয পূজিযমানো এৰ পঠমযামে পুব্বেনিৰাসানুস্সতিঞাণং লভিত্ৰা মজ্ঝিমযামে দিব্বচক্খুঞাণং ৰিসোধেত্ৰা পচ্ছিমযামে পটিচ্চসমুপ্পাদে ঞাণং ওতারেত্ৰা ৰট্টৰিৰট্টং সম্মসন্তো অরুণোদযে বুদ্ধো হুত্ৰা –

‘‘অনেকজাতিসংসারং, সন্ধাৰিস্সং অনিব্বিসং;

গহকারং গৰেসন্তো, দুক্খা জাতি পুনপ্পুনং.

‘‘গহকারক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, গহকূটং ৰিসঙ্খতং;

ৰিসঙ্খারগতং চিত্তং, তণ্হানং খযমজ্ঝগা’’তি. (ধ. প. ১৫৩-১৫৪) –

ইমং উদানং উদানেত্ৰা সত্তাহং ৰিমুত্তিসুখপটিসেৰনেন ৰীতিনামেত্ৰা অট্ঠমে দিৰসে সমাপত্তিতো ৰুট্ঠায দেৰতানং কঙ্খং ঞত্ৰা তাসং কঙ্খাৰিধমনত্থং আকাসে উপ্পতিত্ৰা যমকপাটিহারিযং দস্সেত্ৰা তাসং কঙ্খং ৰিধমিত্ৰা পল্লঙ্কতো ঈসকং পাচীননিস্সিতে উত্তরদিসাভাগে ঠত্ৰা – ‘‘ইমস্মিং ৰত মে পল্লঙ্কে সব্বঞ্ঞুতঞ্ঞাণং পটিৰিদ্ধ’’ন্তি চত্তারি অসঙ্খ্যেয্যানি কপ্পসতসহস্সঞ্চ পূরিতানং পারমীনং ফলাধিগমট্ঠানং পল্লঙ্কঞ্চেৰ বোধিরুক্খঞ্চ অনিমিসেহি অক্খীহি ওলোকযমানো সত্তাহং ৰীতিনামেসি, তং ঠানং অনিমিসচেতিযং নাম জাতং.

অথ পল্লঙ্কস্স চ ঠিতট্ঠানস্স চ অন্তরে পুরত্থিমপচ্ছিমতো আযতে রতনচঙ্কমে চঙ্কমন্তো সত্তাহং ৰীতিনামেসি, তং ঠানং রতনচঙ্কমচেতিযং ¶ নাম জাতং. ততো পচ্ছিমদিসাভাগে দেৰতা রতনঘরং নাম মাপেসুং, তত্থ পল্লঙ্কেন নিসীদিত্ৰা অভিধম্মপিটকং ৰিসেসতো চেত্থ অনন্তনযসমন্তপট্ঠানং ৰিচিনন্তো সত্তাহং ৰীতিনামেসি. তং ঠানং রতনঘরচেতিযং নাম ¶ জাতং. এৰং বোধিসমীপেযেৰ চত্তারি সত্তাহানি ৰীতিনামেত্ৰা পঞ্চমে সত্তাহে বোধিরুক্খমূলা যেন অজপালনিগ্রোধো তেনুপসঙ্কমি; তত্থাপি ধম্মং ৰিচিনন্তোযেৰ ৰিমুত্তিসুখঞ্চ পটিসংৰেদেন্তো অজপালনিগ্রোধে সত্তাহং ৰীতিনামেসি.

এৰং ¶ অপরং সত্তাহং মুচলিন্দে নিসীদি. তস্স নিসিন্নমত্তস্সেৰ ভগৰতো সকলচক্কৰাল়গব্ভং পূরেন্তো মহাঅকালমেঘো উদপাদি. তস্মিং পন উপ্পন্নে মুচলিন্দো নাগরাজা চিন্তেসি – ‘‘অযং মহামেঘো সত্থরি ময্হং ভৰনং পৰিট্ঠমত্তে উপ্পন্নো ৰাসাগারমস্স লদ্ধুং ৰট্টতী’’তি. সো সত্তরতনমযং দেৰৰিমানসদিসং দিব্বৰিমানং নিম্মিনিতুং সমত্থোপি এৰং কতে – ‘‘ন ময্হং মহপ্ফলং ভৰিস্সতি, দসবলস্স কাযৰেয্যাৰচ্চং করিস্সামী’’তি অতিমহন্তং অত্তভাৰং কত্ৰা সত্থারং সত্তক্খত্তুং ভোগেহি পরিক্খিপিত্ৰা উপরি মহন্তং ফণং কত্ৰা অট্ঠাসি. অথ ভগৰা পরিক্খেপস্স অন্তোৰ মহতি ওকাসে সব্বরতনমযে পচ্চগ্ঘপল্লঙ্কে উপরি ৰিনিগ্গলন্তৰিৰিধসুরভিকুসুমদামৰিতানে ৰিৰিধসুরভিগন্ধৰাসিতে গন্ধকুটিযং ৰিহরন্তো ৰিয ৰিহাসি. এৰং ভগৰা তং সত্তাহং তত্থ ৰীতিনামেত্ৰা ততো অপরং সত্তাহং রাজাযতনে নিসীদি. তত্থাপি ৰিমুত্তিসুখপটিসংৰেদিযেৰ. এত্তাৰতা সত্তসত্তাহানি পরিপুণ্ণানি অহেসুং. এত্থন্তরে ভগৰা ঝানসুখেন ফলসুখেন চ ৰীতিনামেসি.

অথস্স সত্তসত্তাহাতিক্কমে – ‘‘মুখং ধোৰিস্সামী’’তি চিত্তং উপ্পজ্জি. সক্কো দেৰানমিন্দো অগদহরীতকং আহরিত্ৰা অদাসি. অথস্স সক্কো নাগলতাদন্তকট্ঠঞ্চ মুখধোৰনউদকঞ্চ অদাসি. ততো ভগৰা দন্তকট্ঠং খাদিত্ৰা অনোতত্তদহোদকেন মুখং ধোৰিত্ৰা রাজাযতনমূলে নিসীদি. তস্মিং সমযে চতূহি লোকপালেহি উপনীতে পচ্চগ্ঘে সেলমযে পত্তে তপুস্সভল্লিকানং ৰাণিজানং মন্থঞ্চ মধুপিণ্ডিকঞ্চ পটিগ্গহেত্ৰা পরিভুঞ্জিত্ৰা পচ্চাগন্ত্ৰা অজপালনিগ্রোধরুক্খমূলে নিসীদি. অথস্স তত্থ নিসিন্নমত্তস্সেৰ অত্তনা অধিগতস্স ধম্মস্স গম্ভীরভাৰং পচ্চৰেক্খন্তস্স সব্ববুদ্ধানং আচিণ্ণো – ‘‘অধিগতো খো ম্যাযং ধম্মো গম্ভীরো দুদ্দসো দুরনুবোধো সন্তো পণীতো অতক্কাৰচরো নিপুণো পণ্ডিতৰেদনীযো’’তি (ম. নি. ২.২৮১; সং. নি. ১.১৭২; মহাৰ. ৭) পরেসং ধম্মং অদেসেতুকামতাকারপ্পত্তো পরিৰিতক্কো উদপাদি.

অথ ¶ ¶ ব্রহ্মা সহম্পতি দসবলস্স চেতসা চেতোপরিৰিতক্কমঞ্ঞায – ‘‘নস্সতি ৰত, ভো, লোকো, ৰিনস্সতি ৰত, ভো, লোকো’’তি (সং. নি. ১.১৭২; ম. নি. ১.২৮২; মহাৰ. ৮) ৰাচং নিচ্ছারেন্তো দসসহস্সচক্কৰাল়ব্রহ্মগণপরিৰুতো সক্কসুযামসন্তুসিতপরনিম্মিতৰসৰত্তীহি অনুগতো আগন্ত্ৰা ভগৰতো পুরতো পাতুরহোসি. সো অত্তনো পতিট্ঠানত্থায পথৰিং নিম্মিনিত্ৰা দক্খিণং জাণুমণ্ডলং পথৰিযং নিহন্ত্ৰা জলজামলাৰিকলকমলমকুলসদিসং দসনখসমোধানসমুজ্জলমঞ্জলিং সিরস্মিং কত্ৰা – ‘‘দেসেতু, ভন্তে ¶ , ভগৰা ধম্মং, দেসেতু সুগতো ধম্মং, সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো’’তি (সং. নি. ১.১৭২; মহাৰ. ৮) –

‘‘পাতুরহোসি মগধেসু পুব্বে, ধম্মো অসুদ্ধো সমলেহি চিন্তিতো;

অপাপুরেতং অমতস্স দ্ৰারং, সুণন্তু ধম্মং ৰিমলেনানুবুদ্ধং.

‘‘সেলে যথা পব্বতমুদ্ধনিট্ঠিতো, যথাপি পস্সে জনতং সমন্ততো;

তথূপমং ধম্মমযং সুমেধ, পাসাদমারুয্হ সমন্তচক্খু;

সোকাৰতিণ্ণং জনতমপেতসোকো, অৰেক্খস্সু জাতিজরাভিভূতং.

‘‘উট্ঠেহি ৰীর ৰিজিতসঙ্গাম, সত্থৰাহ অনণ ৰিচর লোকে;

দেসস্সু ভগৰা ধম্মং, অঞ্ঞাতারো ভৰিস্সন্তী’’তি. (ম. নি. ১.২৮২; সং. নি. ১.১৭২; মহাৰ. ৮) –

‘‘ননু তুম্হেহি ‘বুদ্ধো বোধেয্যং তিণ্ণো তারেয্যং মুত্তো মোচেয্য’’’ন্তি –

‘‘কিং ¶ মে অঞ্ঞাতৰেসেন, ধম্মং সচ্ছিকতেনিধ;

সব্বঞ্ঞুতং পাপুণিত্ৰা, তারযিস্সং সদেৰক’’ন্তি. (বু. ৰং. ২.৫৫) –

পত্থনং কত্ৰা পারমিযো পূরেত্ৰা সব্বঞ্ঞুভাৰং পত্তোতি চ, ‘‘তুম্হেহি ধম্মে অদেসিযমানে কো হি নাম অঞ্ঞো ধম্মং দেসেস্সতি, কিমঞ্ঞং লোকস্স সরণং তাণং লেণং পরাযন’’ন্তি চ এৰমাদীহি অনেকেহি নযেহি ভগৰন্তং ধম্মদেসনত্থং অযাচি. তেন ৰুত্তং – ‘‘বুদ্ধভূতস্স ¶ পন ভগৰতো অট্ঠমে সত্তাহে সত্থা ধম্মদেসনত্থায ব্রহ্মুনা আযাচিতো’’তি.

ইদানি ‘‘কদা কত্থ চ কেনাযং, গাথা হি সমুদীরিতা’’তি ইমেসং পঞ্হানং ৰিস্সজ্জনায ওকাসো অনুপ্পত্তো. তত্থ কদা ৰুত্তাতি? পঠমমহাসঙ্গীতিকালে ৰুত্তা. পঠমমহাসঙ্গীতি নামেসা সঙ্গীতিক্খন্ধে (চূল়ৰ. ৪৩৭) ৰুত্তনযেনেৰ ৰেদিতব্বা. কত্থ কেন ৰুত্তাতি? ভগৰতি কির পরিনিব্বুতে রাজগহনগরে ৰেভারপব্বতপস্সে সত্তপণ্ণিগুহাদ্ৰারে ৰিজিতসব্বসত্তুনা অজাতসত্তুনা মগধমহারাজেন ধম্মসঙ্গাযনত্থং কারিতে পরিপুণ্ণচন্দমণ্ডলসঙ্কাসে ¶ দট্ঠব্বসারমণ্ডে মণ্ডপে ধম্মাসনগতেনাযস্মতা আনন্দত্থেরেন ‘‘ব্রহ্মা চ লোকাধিপতী’’তি অযং গাথা ৰুত্তাতি ৰেদিতব্বা. অযমেত্থ গাথাসম্বন্ধো.

‘‘কদাযং ধম্মদেসনত্থং, অজ্ঝিট্ঠো ব্রহ্মুনা জিনো;

কদা কত্থ চ কেনাযং, গাথা হি সমুদীরিতা’’তি. –

অযম্পি গাথা ৰুত্তত্থা হোতি. এৰং ইমিনা সম্বন্ধেন ৰুত্তায পনস্সা অনুত্তানপদৰণ্ণনং করিস্সাম.

তত্থ ব্রহ্মাতি ব্রূহিতো তেহি তেহি গুণৰিসেসেহীতি ব্রহ্মা. অযং পন ব্রহ্ম-সদ্দো মহাব্রহ্মব্রাহ্মণতথাগতমাতাপিতুসেট্ঠাদীসু দিস্সতি. তথা হি ‘‘দ্ৰিসহস্সো ব্রহ্মা’’তিআদীসু (ম. নি. ৩.১৬৬) মহাব্রহ্মাতি অধিপ্পেতো.

‘‘তমোনুদো ¶ বুদ্ধো সমন্তচক্খু, লোকন্তগূ সব্বভৰাতিৰত্তো;

অনাসৰো সব্বদুক্খপ্পহীনো, সচ্চৰ্হযো ব্রহ্মে উপাসিতো মে’’তি. (সু. নি. ১১৩৯) –

এত্থ ব্রাহ্মণো. ‘‘ব্রহ্মাতি খো, ভিক্খৰে, তথাগতস্সেতং অধিৰচন’’ন্তি এত্থ তথাগতো. ‘‘ব্রহ্মাতি মাতাপিতরো পুব্বাচরিযাতি ৰুচ্চরে’’তি (অ. নি. ৩.৩১; ৪.৬৩; ইতিৰু. ১০৬; জা. ২.২০.১৮১) এত্থ মাতাপিতরো. ‘‘ব্রহ্মচক্কং পৰত্তেতী’’তি (ম. নি. ১.১৪৮; সং. নি. ২.২১; অ. নি. ৪.৮; ৫.১১; পটি. ম. ২.৪৪) এত্থ সেট্ঠো অধিপ্পেতো. ইধ পন পঠমজ্ঝানং পণীতং ভাৰেত্ৰা পঠমজ্ঝানভূমিযং নিব্বত্তো কপ্পাযুকো মহাব্রহ্মা অধিপ্পেতো (ম. নি. অট্ঠ. ১.৩). চ-সদ্দো সম্পিণ্ডনত্থো, ব্রহ্মা চ অঞ্ঞে চ দসসু চক্কৰাল়সহস্সেসু ব্রহ্মানো চাতি অত্থো, পদপূরণমত্তো ৰা. লোকাধিপতীতি এত্থ লোকোতি সঙ্খারলোকো সত্তলোকো ওকাসলোকোতি তযো ¶ লোকা. তেসু ইধ সত্তলোকো অধিপ্পেতো. তস্স ইস্সরো অধিপতীতি লোকাধিপতি, লোকেকদেসস্সাপি অধিপতি লোকাধিপতীতি ৰুচ্চতি দেৰাধিপতি নরাধিপতি ৰিয.

সহম্পতীতি সো কির কস্সপস্স ভগৰতো সাসনে সহকো নাম থেরো পঠমজ্ঝানং নিব্বত্তেত্ৰা ¶ অপরিহীনজ্ঝানো জীৰিতপরিযোসানে পঠমজ্ঝানভূমিযং কপ্পাযুকমহাব্রহ্মা হুত্ৰা নিব্বত্তো, তত্র পন নং ‘‘সহম্পতি ব্রহ্মা’’তি সঞ্জানন্তি. ‘‘সহকপতী’’তি ৰত্তব্বে অনুস্সরাগমং কত্ৰা রুল়্হীৰসেন ‘‘সহম্পতী’’তি ৰদন্তি. কতঞ্জলীতি কতঞ্জলিকো, অঞ্জলিপুটং সিরসি কত্ৰাতি অত্থো. অনধিৰরন্তি অচ্চন্তৰরো অধিৰরো নাস্স অত্থীতি অনধিৰরো, ন ততো অধিকো ৰরো অত্থীতি ৰা অনধিৰরো, অনুত্তরোতি অত্থো, তং অনধিৰরং. অযাচথাতি অযাচিত্থ অজ্ঝেসি.

ইদানি যস্সত্থায সো ভগৰন্তং অযাচি, তমত্থং দস্সেতুং ‘‘সন্তীধ সত্তা’’তিআদি ৰুত্তং. তত্থ সন্তীতি সংৰিজ্জন্তি উপলব্ভন্তি, বুদ্ধচক্খুস্স আপাথং আগচ্ছন্তা অত্থীতি অত্থো. ইধাতি অযং দেসাপদেসে নিপাতো ¶ . স্ৰাযং কত্থচি সাসনং উপাদায ৰুচ্চতি. যথাহ – ‘‘ইধেৰ, ভিক্খৰে, সমণো, ইধ দুতিযো সমণো, ইধ ততিযো সমণো, ইধ চতুত্থো সমণো, সুঞ্ঞা পরপ্পৰাদা সমণেভি অঞ্ঞেহী’’তি (ম. নি. ১.১৩৯; দী. নি. ২.২১৪; অ. নি. ৪.২৪১). কত্থচি ওকাসং, যথাহ –

‘‘ইধেৰ তিট্ঠমানস্স, দেৰভূতস্স মে সতো;

পুনরাযু চ মে লদ্ধো, এৰং জানাহি মারিসা’’তি. (দী. নি. ২.৩৬৯) –

কত্থচি পদপূরণমত্তমেৰ হোতি. যথাহ – ‘‘ইধাহং, ভিক্খৰে, ভুত্তাৰী অস্সং পৰারিতো’’তি (ম. নি. ১.৩০). কত্থচি লোকং উপাদায, যথাহ – ‘‘ইধ তথাগতো লোকে উপ্পজ্জতি বহুজনহিতায বহুজনসুখাযা’’তি (অ. নি. ১.১৭০). ইধাপি লোকমেৰ উপাদায ৰুত্তোতি ৰেদিতব্বো. তস্মা ইমস্মিং সত্তলোকেতি অত্থো. সত্তাতি রূপাদীসু খন্ধেসু ছন্দরাগেন সত্তা ৰিসত্তা আসত্তা লগ্গা লগিতাতি সত্তা, সত্তাতি পাণিনো ৰুচ্চন্তি. রুল়্হীসদ্দেন পন ৰীতরাগেসুপি অযং ৰোহারো ৰত্ততিযেৰ.

অপ্পরজক্খজাতিকাতি পঞ্ঞামযে অক্খিম্হি অপ্পং পরিত্তং রাগদোসমোহরজং এতেসং এৰংসভাৰা চ তেতি অপ্পরজক্খজাতিকা, অপ্পং রাগাদিরজমেৰ ৰা যেসং তে অপ্পরজক্খা, তে অপ্পরজক্খসভাৰা অপ্পরজক্খজাতিকাতি এৰমেত্থ অত্থো দট্ঠব্বো. তেসং অপ্পরজক্খজাতিকানং. ‘‘সত্তান’’ন্তি ¶ ৰিভত্তিৰিপরিণামং কত্ৰা – ‘‘দেসেহি ধম্ম’’ন্তি ইমিনা সম্বন্ধং কত্ৰা অত্থো দট্ঠব্বো. দেসেহীতি আযাচনৰচনমেতং, দেসেহি কথেহি উপদিসাতি ¶ অত্থো. ধম্মন্তি এত্থ অযং ধম্ম-সদ্দো পরিযত্তিসমাধিপঞ্ঞাপকতিসভাৰসুঞ্ঞতাপুঞ্ঞআপত্তিঞেয্যচতুসচ্চধম্মাদীসু দিস্সতি. তথা হি – ‘‘ইধ ভিক্খু ধম্মং পরিযাপুণাতি সুত্তং গেয্যং ৰেয্যাকরণং…পে… ৰেদল্ল’’ন্তিআদীসু (ম. নি. ১.২৩৯; অ. নি. ৪.১০২) পরিযত্তিযং দিস্সতি. ‘‘এৰংধম্মা তে ভগৰন্তো অহেসু’’ন্তিআদীসু সমাধিম্হি.

‘‘যস্সেতে চতুরো ধম্মা, ৰানরিন্দ যথা তৰ;

সচ্চং ধম্মো ধিতি চাগো, দিট্ঠং সো অতিৰত্ততী’’তি. –

আদীসু ¶ (জা. ১.২.১৪৭) পঞ্ঞায. ‘‘জাতিধম্মা জরাধম্মা, অথো মরণধম্মিনো’’তিআদীসু (অ. নি. ৩.৩৯) পকতিযং. ‘‘কুসলা ধম্মা, অকুসলা ধম্মা, অব্যাকতা ধম্মা’’তিআদীসু (ধ. স. তিকমাতিকা) সভাৰে. ‘‘তস্মিং খো পন সমযে ধম্মা হোন্তি খন্ধা হোন্তী’’তিআদীসু (ধ. স. ১২১) সুঞ্ঞতাযং. ‘‘ধম্মো সুচিণ্ণো সুখমাৰহাতী’’তিআদীসু (সু. নি. ১৮৪; থেরগা. ৩০৩; জা. ১.১০.১০২; ১.১৫.৩৮৫) পুঞ্ঞে. ‘‘দ্ৰে অনিযতা ধম্মা’’তিআদীসু আপত্তিযং. ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তী’’তিআদীসু (মহানি. ১৫৬; চূল়নি. মোঘরাজমাণৰপুচ্ছানিদ্দেস ৮৫) ঞেয্যে. ‘‘দিট্ঠধম্মো পত্তধম্মো ৰিদিতধম্মো’’তিআদীসু (দী. নি. ১.২৯৯; মহাৰ. ২৭, ৫৭) চতুসচ্চধম্মে. ইধাপি চতুসচ্চধম্মে দট্ঠব্বো (ম. নি. অট্ঠ. ১.সুত্তনিক্খেপৰণ্ণনা; ধ. স. অট্ঠ. চিত্তুপ্পাদকণ্ড ১). অনুকম্পাতি অনুকম্পং অনুদ্দযং করোহি. ইমন্তি পজং নিদ্দিসন্তো আহ. পজন্তি পজাতত্তা পজা, তং পজং, সত্তনিকাযং সংসারদুক্খতো মোচেহীতি অধিপ্পাযো. কেচি পন –

কতঞ্জলী ব্রহ্মগণেহি যাচিতো’’তি. –

পঠন্তি. এত্তাৰতা সব্বসো অযং গাথা ৰুত্তত্থা হোতি.

অথ ভগৰতো তং ব্রহ্মুনো সহম্পতিস্স আযাচনৰচনং সুত্ৰা অপরিমিতসমযসমুদিতকরুণাবলস্স দসবলস্স পরহিতকরণনিপুণমতিচারস্স সব্বসত্তেসু ওকাসকরণমত্তেন মহাকরুণা উদপাদি. তং পন ভগৰতো করুণুপ্পত্তিং দস্সেন্তেহি সঙ্গীতিকালে সঙ্গীতিকারকেহি –

‘‘সম্পন্নৰিজ্জাচরণস্স ¶ ¶ তাদিনো, জুতিন্ধরস্সন্তিমদেহধারিনো;

তথাগতস্সপ্পটিপুগ্গলস্স, উপ্পজ্জি কারুঞ্ঞতা সব্বসত্তে’’তি. –

তত্থ সম্পন্নৰিজ্জাচরণস্সাতি সম্পন্নং নাম তিৰিধং পরিপুণ্ণসমঙ্গিমধুরৰসেন. তত্থ –

‘‘সম্পন্নং ¶ সালিকেদারং, সুৰা ভুঞ্জন্তি কোসিয;

পটিৰেদেমি তে ব্রহ্মে, ন নং ৰারেতুমুস্সহে’’তি. (জা. ১.১৪.১) –

ইদং পরিপুণ্ণসম্পন্নং নাম. ‘‘ইমিনা পাতিমোক্খসংৰরেন উপেতো হোতি সমুপেতো উপগতো সমুপগতো সম্পন্নো সমন্নাগতো’’তি (ৰিভ. ৫১১) ইদং সমঙ্গিসম্পন্নং নাম. ‘‘ইমিস্সা, ভন্তে, মহাপথৰিযা হেট্ঠিমতলং সম্পন্নং, সেয্যথাপি খুদ্দমধুং অনীলকং, এৰমস্সাদ’’ন্তি (পারা. ১৮) ইদং মধুরসম্পন্নং নাম. ইধ পরিপুণ্ণসম্পন্নম্পি সমঙ্গিসম্পন্নম্পি যুজ্জতি (ম. নি. অট্ঠ. ১.৬৪). ৰিজ্জাতি পটিপক্খধম্মে ৰিজ্ঝনট্ঠেন ৰিদিতকরণট্ঠেন ৰিন্দিতব্বট্ঠেন চ ৰিজ্জা. তা পন তিস্সোপি ৰিজ্জা অট্ঠপি ৰিজ্জা. তিস্সো ৰিজ্জা ভযভেরৰসুত্তে (ম. নি. ১.৫০ আদযো) আগতনযেনেৰ ৰেদিতব্বা, অট্ঠ অম্বট্ঠসুত্তে (দী. নি. ১.২৭৮ আদযো). তত্র হি ৰিপস্সনাঞাণেন মনোমযিদ্ধিযা চ সহ ছ অভিঞ্ঞা পরিগ্গহেত্ৰা অট্ঠ ৰিজ্জা ৰুত্তা. চরণন্তি সীলসংৰরো ইন্দ্রিযেসু গুত্তদ্ৰারতা ভোজনে মত্তঞ্ঞুতা জাগরিযানুযোগো সদ্ধা হিরী ওত্তপ্পং বাহুসচ্চং আরদ্ধৰীরিযতা উপট্ঠিতস্সতিতা পঞ্ঞাসম্পন্নতা চত্তারি রূপাৰচরজ্ঝানানীতি ইমে পন্নরস ধম্মা ৰেদিতব্বা. ইমেযেৰ হি পন্নরস ধম্মা যস্মা এতেহি চরতি অরিযসাৰকো গচ্ছতি অমতং দিসং, তস্মা ‘‘চরণ’’ন্তি ৰুত্তা. যথাহ – ‘‘ইধ, মহানাম, অরিযসাৰকো সীলৰা হোতী’’তি (ম. নি. ২.২৪) সব্বং মজ্ঝিমপণ্ণাসকে ৰুত্তনযেনেৰ ৰেদিতব্বং. ৰিজ্জা চ চরণঞ্চ ৰিজ্জাচরণানি, সম্পন্নানি পরিপুণ্ণানি ৰিজ্জাচরণানি যস্স সোযং সম্পন্নৰিজ্জাচরণো, ৰিজ্জাচরণেহি সম্পন্নো সমঙ্গীভূতো, সমন্নাগতোতি ৰা সম্পন্নৰিজ্জাচরণো. উভযথাপি অত্থো যুজ্জতেৰ, তস্স সম্পন্নৰিজ্জাচরণস্স (পারা. অট্ঠ. ১.১ ৰেরঞ্জকণ্ডৰণ্ণনা).

তাদিনোতি ‘‘ইট্ঠেপি তাদী অনিট্ঠেপি তাদী’’তিআদিনা নযেন মহানিদ্দেসে (মহানি. ৩৮, ১৯২) আগততাদিলক্খণেন তাদিনো, ইট্ঠানিট্ঠাদীসু অৰিকারস্স তাদিসস্সাতি অত্থো. জুতিন্ধরস্সাতি ¶ ¶ জুতিমতো, যুগন্ধরে সরদসমযে সমুদিতদিৰসকরাতিরেকতরসস্সিরিকসরীরজুতিৰিসরধরস্সাতি অত্থো. ‘‘পঞ্ঞাপজ্জোতধরস্সা’’তি ৰা ৰত্তুং ৰট্টতি. ৰুত্তঞ্হেতং –

‘‘চত্তারো ¶ লোকে পজ্জোতা, পঞ্চমেত্থ ন ৰিজ্জতি;

দিৰা তপতি আদিচ্চো, রত্তিমাভাতি চন্দিমা.

‘‘অথ অগ্গি দিৰারত্তিং, তত্থ তত্থ পভাসতি;

সম্বুদ্ধো তপতং সেট্ঠো, এসা আভা অনুত্তরা’’তি. (সং. নি. ১.২৬, ৮৫);

তস্মা উভযথাপি সরীরপঞ্ঞাজুতিৰিসরধরস্সাতি অত্থো. অন্তিমদেহধারিনোতি সব্বপচ্ছিমসরীরধারিনো, অপুনব্ভৰস্সাতি অত্থো.

তথাগতস্সাতি এত্থ অট্ঠহি কারণেহি ভগৰা ‘‘তথাগতো’’তি ৰুচ্চতি. কতমেহি অট্ঠহি? তথা আগতোতি তথাগতো, তথা গতোতি তথাগতো, তথলক্খণং আগতোতি তথাগতো, তথধম্মে যাথাৰতো অভিসম্বুদ্ধোতি তথাগতো, তথদস্সিতায তথাগতো, তথৰাদিতায তথাগতো, তথাকারিতায তথাগতো, অভিভৰনট্ঠেন তথাগতোতি.

কথং ভগৰা তথা আগতোতি তথাগতো? যথা যেন অভিনীহারেন দানপারমিং পূরেত্ৰা সীলনেক্খম্মপঞ্ঞাৰীরিযখন্তিসচ্চঅধিট্ঠানমেত্তুপেক্খাপারমিং পূরেত্ৰা ইমা দস পারমিযো দস উপপারমিযো দস পরমত্থপারমিযোতি সমত্তিংস পারমিযো পূরেত্ৰা অঙ্গপরিচ্চাগং জীৰিতপরিচ্চাগং ধনরজ্জপুত্তদারপরিচ্চাগন্তি ইমে পঞ্চ মহাপরিচ্চাগে পরিচ্চজিত্ৰা যথা ৰিপস্সিআদযো সম্মাসম্বুদ্ধা আগতা, তথা অম্হাকম্পি ভগৰা আগতোতি তথাগতো. যথাহ –

‘‘যথেৰ লোকম্হি ৰিপস্সিআদযো, সব্বঞ্ঞুভাৰং মুনযো ইধাগতা;

তথা অযং সক্যমুনীপি আগতো, তথাগতো ৰুচ্চতি তেন চক্খুমা’’তি.

কথং তথা গতোতি তথাগতো? যথা সম্পতিজাতা ৰিপস্সিআদযো সমেহি পাদেহি পথৰিযং পতিট্ঠায উত্তরাভিমুখা সত্তপদৰীতিহারেন গতা, তথা অম্হাকম্পি ভগৰা গতোতি তথাগতো. যথাহ –

‘‘মুহুত্তজাতোৰ ¶ ¶ ¶ গৰম্পতী যথা, সমেহি পাদেহি ফুসী ৰসুন্ধরং;

সো ৰিক্কমী সত্তপদানি গোতমো, সেতঞ্চ ছত্তং অনুধারযুং মরূ.

‘‘গন্ত্ৰান সো সত্তপদানি গোতমো, দিসা ৰিলোকেসি সমা সমন্ততো;

অট্ঠঙ্গুপেতং গিরমব্ভুদীরযী, সীহো যথা পব্বতমুদ্ধনিট্ঠিতো’’তি.

কথং তথলক্খণং আগতোতি তথাগতো? সব্বেসং রূপারূপধম্মানং সলক্খণং সামঞ্ঞলক্খণঞ্চ তথং অৰিতথং ঞাণগতিযা আগতো অৰিরজ্ঝিত্ৰা পত্তো অনুবুদ্ধোতি তথাগতো.

‘‘সব্বেসং পন ধম্মানং, সকসামঞ্ঞলক্খণং;

তথমেৰাগতো যস্মা, তস্মা সত্থা তথাগতো’’তি.

কথং তথধম্মে যাথাৰতো অভিসম্বুদ্ধোতি তথাগতো? তথধম্মা নাম চত্তারি অরিযসচ্চানি. যথাহ – ‘‘চত্তারিমানি, ভিক্খৰে, তথানি অৰিতথানি অনঞ্ঞথানি. কতমানি চত্তারি? ‘ইদং দুক্খ’ন্তি, ভিক্খৰে, তথমেতং অৰিতথমেতং অনঞ্ঞথমেত’’ন্তি (সং. নি. ৫.১০৯০) ৰিত্থারো. তানি চ ভগৰা অভিসম্বুদ্ধো, তস্মা তথানং অভিসম্বুদ্ধত্তা ‘‘তথাগতো’’তি ৰুচ্চতি. অভিসম্বুদ্ধত্থো হি এত্থ গতসদ্দো.

‘‘তথনামানি সচ্চানি, অভিসম্বুজ্ঝি নাযকো;

তস্মা তথানং সচ্চানং, সম্বুদ্ধত্তা তথাগতো’’.

কথং তথদস্সিতায তথাগতো? ভগৰা হি অপরিমাণাসু লোকধাতূসু অপরিমাণানং সত্তানং চক্খুসোতঘাণজিৰ্হাকাযমনোদ্ৰারেসু আপাথং আগচ্ছন্তং রূপসদ্দগন্ধরসফোট্ঠব্বধম্মারম্মণং তথাগতো সব্বাকারতো জানাতি পস্সতীতি, এৰং তথদস্সিতায তথাগতো. অথ ৰা যং লোকে তথং, তং লোকস্স তথেৰ দস্সেতি. ততোপি ভগৰা তথাগতো. এত্থ তথদস্সিঅত্থে ‘‘তথাগতো’’তি পদসম্ভৰো ৰেদিতব্বো.

‘‘তথাকারেন ¶ যো ধম্মে, জানাতি অনুপস্সতি;

তথদস্সীতি সম্বুদ্ধো, তস্মা ৰুত্তো তথাগতো’’.

কথং ¶ ¶ তথৰাদিতায তথাগতো? যঞ্চ অভিসম্বোধিযা পরিনিব্বানস্স চ অন্তরে পঞ্চচত্তালীসৰস্সপরিমাণকালে সুত্তাদিনৰঙ্গসঙ্গহিতং ভাসিতং লপিতং তথাগতেন, সব্বং তং একতুলায তুলিতং ৰিয তথমেৰ অৰিতথমেৰ হোতি. তেনেৰাহ –

‘‘যঞ্চ, চুন্দ, রত্তিং তথাগতো অনুত্তরং সম্মাসম্বোধিং অভিসম্বুজ্ঝতি, যঞ্চ রত্তিং অনুপাদিসেসায নিব্বানধাতুযা পরিনিব্বাযতি, যং এতস্মিং অন্তরে ভাসতি লপতি নিদ্দিসতি, সব্বং তং তথেৰ হোতি, নো অঞ্ঞথা. তস্মা ‘তথাগতো’তি ৰুচ্চতী’’তি.

এত্থ পন গদঅত্থো হি গতসদ্দো. এৰং তথৰাদিতায তথাগতো. আগদনং আগদো, ৰচনন্তি অত্থো. তথো অৰিপরীতো আগদো অস্সাতি তথাগতো. দ-কারস্স ত-কারং কত্ৰা ৰুত্তো.

‘‘তথাৰাদী জিনো যস্মা, তথধম্মপ্পকাসকো;

তথামাগদনঞ্চস্স, তস্মা বুদ্ধো তথাগতো’’.

কথং তথাকারিতায তথাগতো? ভগৰা হি যং যং ৰাচং অভাসি, তং তং এৰ কাযেন করোতি, ৰাচায কাযো অনুলোমেতি, কাযস্সপি ৰাচা. তেনেৰাহ –

‘‘যথা ৰাদী, ভিক্খৰে, তথাগতো তথা কারী, যথা কারী তথা ৰাদী…পে… তস্মা ‘তথাগতো’তি ৰুচ্চতী’’তি (অ. নি. ৪.২৩; চূল়নি. পোসালমাণৰপুচ্ছানিদ্দেস ৮৩).

যথা চ ৰাচা গতা, কাযোপি তথা গতো, যথা কাযো গতো, ৰাচাপি তথা গতা. এৰং তথাকারিতায তথাগতো.

‘‘যথা ৰাচা গতা তস্স, তথা কাযো গতো যতো;

তথাৰাদিতায সম্বুদ্ধো, সত্থা তস্মা তথাগতো’’.

কথং অভিভৰনট্ঠেন তথাগতো? উপরি ভৰগ্গং হেট্ঠা অৰীচিং পরিযন্তং কত্ৰা তিরিযং অপরিমাণাসু লোকধাতূসু সব্বসত্তে অভিভৰতি সীলেনপি সমাধিনাপি পঞ্ঞাযপি ৰিমুত্তিযাপি ¶ ৰিমুত্তিঞাণদস্সনেনপি, ন ¶ তস্স তুলা ৰা পমাণং ৰা অত্থি, অথ খো অতুলো অপ্পমেয্যো অনুত্তরো. তেনেৰাহ –

‘‘সদেৰকে, ভিক্খৰে, লোকে…পে… তথাগতো অভিভূ অনভিভূতো অঞ্ঞদত্থু দসো ৰসৰত্তী, তস্মা ‘তথাগতো’তি ৰুচ্চতী’’তি (অ. নি. ১.২৩; পোসালমাণৰপুচ্ছানিদ্দেস ৮৩).

তত্রেৰং পদসিদ্ধি ৰেদিতব্বা – অগদো ৰিয অগদো. কো পনেস? দেসনাৰিলাসো চেৰ পুঞ্ঞুস্সযো চ. তেন হেস মহানুভাৰো ভিসক্কো দিব্বাগদেন সপ্পে ৰিয সব্বপরপ্পৰাদিনো সদেৰকঞ্চ লোকং অভিভৰতি, ইতি সব্বলোকাভিভৰনতো অৰিপরীতো দেসনাৰিলাসো চেৰ ¶ পুঞ্ঞুস্সযো চ অগদো অস্সাতি দ-কারস্স ত-কারং কত্ৰা ‘‘তথাগতো’’তি ৰেদিতব্বো. এৰং অভিভৰনট্ঠেন তথাগতো.

‘‘তথো অৰিপরীতো চ, অগদো যস্স সত্থুনো;

ৰসৰত্তীতি সো তেন, হোতি সত্থা তথাগতো’’.

অপ্পটিপুগ্গলস্সাতি পটিপুগ্গলৰিরহিতস্স, অঞ্ঞো কোচি ‘‘অহং বুদ্ধো’’তি এৰং পটিঞ্ঞং দাতুং সমত্থো নামস্স পুগ্গলো, নত্থীতি অপ্পটিপুগ্গলো, তস্স অপ্পটিপুগ্গলস্স. উপ্পজ্জীতি উপ্পন্নো উদপাদি. কারুঞ্ঞতাতি করুণায ভাৰো কারুঞ্ঞতা. সব্বসত্তেতি নিরৰসেসসত্তপরিযাদানৰচনং, সকলে সত্তনিকাযেতি অত্থো. এত্তাৰতা অযম্পি গাথা ৰুত্তত্থা হোতি.

অথ ভগৰা ব্রহ্মুনা ধম্মদেসনত্থায আযাচিতো সত্তেসু কারুঞ্ঞতং উপ্পাদেত্ৰা ধম্মং দেসেতুকামো মহাব্রহ্মানং গাথায অজ্ঝভাসি –

‘‘অপারুতা তেসং অমতস্স দ্ৰারা, যে সোতৰন্তো পমুঞ্চন্তু সদ্ধং;

ৰিহিংসসঞ্ঞী পগুণং ন ভাসিং, ধম্মং পণীতং মনুজেসু ব্রহ্মে’’তি. (ম. নি. ১.২৮৩; দী. নি. ২.৭১; সং. নি. ১.১৭২; মহাৰ. ৯);

অথ ¶ খো ব্রহ্মা সহম্পতি ‘‘কতাৰকাসো খোম্হি ভগৰতা ধম্মদেসনাযা’’তি ঞত্ৰা দসনখসমোধানসমুজ্জলং অঞ্জলিং সিরসি কত্ৰা ভগৰন্তং অভিৰাদেত্ৰা পদক্খিণং কত্ৰা ব্রহ্মগণপরিৰুতো পক্কামি. অথ সত্থা তস্স ব্রহ্মুনো পটিঞ্ঞং দত্ৰা – ‘‘কস্স নু খো অহং পঠমং ¶ ধম্মং দেসেয্য’’ন্তি (ম. নি. ১.২৮৩; মহাৰ. ১০) চিন্তেন্তো – ‘‘আল়ারো পণ্ডিতো সো ইমং ধম্মং খিপ্পং আজানিস্সতী’’তি চিত্তং উপ্পাদেত্ৰা পুন ওলোকেন্তো তস্স সত্তাহং কালঙ্কতভাৰং ঞত্ৰা উদকস্স চ অভিদোসকালঙ্কতভাৰং ঞত্ৰা পুন – ‘‘কহং নু খো এতরহি পঞ্চৰগ্গিযা ভিক্খূ ৰিহরন্তী’’তি পঞ্চৰগ্গিযে আৰজ্জেন্তো ‘‘বারাণসিযং ইসিপতনে মিগদাযে’’তি ঞত্ৰা আসাল়্হিযং পভাতায রত্তিযা কালস্সেৰ পত্তচীৰরমাদায অট্ঠারসযোজনিকং মগ্গং পটিপন্নো অন্তরামগ্গে উপকং নাম আজীৰকং দিস্ৰা তস্স অত্তনো বুদ্ধভাৰমাৰিকত্ৰা তংদিৰসমেৰ সাযন্হসমযে ইসিপতনমগমাসি. তত্থ পঞ্চৰগ্গিযানং অত্তনো বুদ্ধভাৰং পকাসেত্ৰা পঞ্ঞত্তৰরবুদ্ধাসনগতো পঞ্চৰগ্গিযে ভিক্খূ আমন্তেত্ৰা ধম্মচক্কপ্পৰত্তনসুত্তন্তং (সং. নি. ৫.১০৮১; মহাৰ. ১৩ আদযো; পটি. ম. ২.৩০) দেসেসি.

তেসু ¶ অঞ্ঞাসিকোণ্ডঞ্ঞত্থেরো দেসনানুসারেন ঞাণং পেসেত্ৰা সুত্তপরিযোসানে অট্ঠারসহি ব্রহ্মকোটীহি সদ্ধিং সোতাপত্তিফলে পতিট্ঠাসি. সত্থা তত্থেৰ ৰস্সং উপগন্ত্ৰা পুনদিৰসে ৰপ্পত্থেরং সোতাপত্তিফলে পতিট্ঠাপেসি. এতেনেৰ উপাযেন সব্বে তে সোতাপত্তিফলে পতিট্ঠাপেত্ৰা পুন পঞ্চমিযং পক্খস্স পঞ্চপি তে থেরে সন্নিপাতেত্ৰা অনত্তলক্খণসুত্তন্তং (সং. নি. ৩.৫৯; মহাৰ. ২০ আদযো) দেসেসি, দেসনাপরিযোসানে পঞ্চপি থেরা অরহত্তে পতিট্ঠহিংসু.

অথ সত্থা তত্থেৰ যসস্স কুলপুত্তস্স উপনিস্সযং দিস্ৰা গেহং পহায নিক্খন্তং দিস্ৰা – ‘‘এহি যসা’’তি (মহাৰ. ২৬) পক্কোসিত্ৰা তস্মিঞ্ঞেৰ রত্তিভাগে সোতাপত্তিফলে পতিট্ঠাপেত্ৰা পুনদিৰসে অরহত্তে চ পতিট্ঠাপেত্ৰা অপরেপি তস্স সহাযকে চতুপণ্ণাসজনে এহিভিক্খুপব্বজ্জায পব্বাজেত্ৰা অরহত্তে পতিট্ঠাপেসি. এৰং লোকে একসট্ঠিযা অরহন্তেসু জাতেসু সত্থা ৰুট্ঠৰস্সো পৰারেত্ৰা ভিক্খূ আমন্তেত্ৰা এতদৰোচ –

‘‘পরত্থং ¶ চত্তনো অত্থং, করোন্তা পথৰিং ইমং;

ব্যাহরন্তা মনুস্সানং, ধম্মং চরথ ভিক্খৰো.

‘‘ৰিহরথ ৰিৰিত্তেসু, পব্বতেসু ৰনেসু চ;

পকাসযন্তা সদ্ধম্মং, লোকস্স সততং মম.

‘‘করোন্তা ¶ ধম্মদূতেয্যং, ৰিখ্যাপযথ ভিক্খৰো;

সন্তি অত্থায সত্তানং, সুব্বতা ৰচনং মম.

‘‘সব্বং পিদহথ দ্ৰারং, অপাযানমনাসৰা;

সগ্গমোক্খস্স মগ্গস্স, দ্ৰারং ৰিৰরথাসমা.

‘‘দেসনাপটিপত্তীহি, করুণাদিগুণালযা;

বুদ্ধিং সদ্ধঞ্চ লোকস্স, অভিৰড্ঢেথ সব্বসো.

‘‘গিহীনমুপকরোন্তানং, নিচ্চমামিসদানতো;

করোথ ধম্মদানেন, তেসং পচ্চূপকারকং.

‘‘সমুস্সযথ সদ্ধম্মং, দেসযন্তা ইসিদ্ধজং;

কতকত্তব্বকম্মন্তা, পরত্থং পটিপজ্জথা’’তি.

এৰঞ্চ পন ৰত্ৰা ভগৰা তে ভিক্খূ দিসাসু ৰিস্সজ্জেত্ৰা সযং উরুৰেলং গচ্ছন্তো অন্তরামগ্গে কপ্পাসিকৰনসণ্ডে তিংস ভদ্দৰগ্গিযকুমারে ৰিনেসি. তেসু যো সব্বপচ্ছিমকো, সো সোতাপন্নো, সব্বসেট্ঠো অনাগামী, একোপি অরহা ৰা পুথুজ্জনো ৰা নাহোসি. তেপি সব্বে এহিভিক্খুপব্বজ্জায পব্বাজেত্ৰা দিসাসু পেসেত্ৰা সযং উরুৰেলং গন্ত্ৰা অড্ঢুড্ঢানি পাটিহারিযসহস্সানি দস্সেত্ৰা উরুৰেলকস্সপাদযো সহস্সজটিলপরিৰারে তেভাতিকজটিলে দমেত্ৰা এহিভিক্খুভাৰেন পব্বাজেত্ৰা ¶ গযাসীসে নিসীদাপেত্ৰা আদিত্তপরিযাযদেসনায (সং. নি. ৪.২৮; মহাৰ. ৫৪) অরহত্তে পতিট্ঠাপেত্ৰা তেন অরহন্তসহস্সেন ভগৰা পরিৰুতো ‘‘বিম্বিসারস্স রঞ্ঞো পটিঞ্ঞং মোচেস্সামী’’তি রাজগহনগরূপচারে লট্ঠিৰনুয্যানং নাম অগমাসি. ততো উয্যানপালকো রঞ্ঞো আরোচেসি. রাজা – ‘‘সত্থা আগতো’’তি সুত্ৰা দ্ৰাদসনহুতেহি ব্রাহ্মণগহপতিকেহি পরিৰুতো দসবলং ঘনৰিৰরগতমিৰ দিৰসকরং ¶ ৰনৰিৰরগতং মুনিৰরদিৰসকরং উপসঙ্কমিত্ৰা চক্কালঙ্কততলেসু জলজামলাৰিকলকমলকোমলেসু দসবলস্স পাদেসু মকুটমণিজুতিৰিসরৰিজ্জোতিনা সিরসা নিপতিত্ৰা একমন্তং নিসীদি সদ্ধিং পরিসায.

অথ খো তেসং ব্রাহ্মণগহপতিকানং এতদহোসি – ‘‘কিং নু খো মহাসমণো উরুৰেলকস্সপে ¶ ব্রহ্মচরিযং চরতি, উদাহু উরুৰেলকস্সপো মহাসমণে’’তি? অথ খো ভগৰা তেসং চেতোপরিৰিতক্কমঞ্ঞায থেরং গাথায অজ্ঝভাসি –

‘‘কিমেৰ দিস্ৰা উরুৰেলৰাসি, পহাসি অগ্গিং কিসকোৰদানো;

পুচ্ছামি তং কস্সপ এতমত্থং, কথং পহীনং তৰ অগ্গিহুত্ত’’ন্তি. (মহাৰ. ৫৫);

থেরো ভগৰতো অধিপ্পাযং ৰিদিত্ৰা –

‘‘রূপে চ সদ্দে চ অথো রসে চ, কামিত্থিযো চাভিৰদন্তি যঞ্ঞা;

এতং মলন্তী উপধীসু ঞত্ৰা, তস্মা ন যিট্ঠে ন হুতে অরঞ্জি’’ন্তি. (মহাৰ. ৫৫) –

ইমং গাথং ৰত্ৰা অত্তনো সাৰকভাৰপ্পকাসনত্থং তথাগতস্স পাদেসু সিরসা নিপতিত্ৰা – ‘‘সত্থা মে, ভন্তে, ভগৰা, সাৰকোহমস্মী’’তি ৰত্ৰা একতালদ্ৰিতাল…পে… সত্ততালপ্পমাণং ৰেহাসং সত্তক্খত্তুং অব্ভুগ্গন্ত্ৰা পাটিহারিযং কত্ৰা আকাসতো ওরুয্হ ভগৰন্তং ৰন্দিত্ৰা একমন্তং নিসীদি.

অথ খো মহাজনো তস্স তং পাটিহারিযং দিস্ৰা – ‘‘অহো মহানুভাৰা বুদ্ধা নাম, এৰং থামগতদিট্ঠিকো অত্তানং ‘অরহা অহ’ন্তি মঞ্ঞমানো উরুৰেলকস্সপোপি দিট্ঠিজালং ভিন্দিত্ৰা তথাগতেন দমিতো’’তি দসবলস্স গুণকথং কথেসি. তং সুত্ৰা সত্থা – ‘‘নাহমিদানিযেৰ ইমং উরুৰেলকস্সপং দমেমি, অতীতেপি এস মযা দমিতোযেৰা’’তি আহ. অথ খো সো মহাজনো উট্ঠাযাসনা ভগৰন্তং ৰন্দিত্ৰা সিরসি অঞ্জলিং পগ্গহেত্ৰা এৰমাহ – ‘‘ভন্তে, ইদানি অম্হেহি এস ¶ দমিতো দিট্ঠো, কথং পনেস অতীতে ভগৰতা দমিতো’’তি. ততো সত্থা তেন মহাজনেন যাচিতো ¶ ভৰন্তরেন পটিচ্ছন্নং মহানারদকস্সপজাতকং (জা. ২.২২.১১৫৩) কথেত্ৰা চত্তারি অরিযসচ্চানি পকাসেসি. ততো সত্থু ধম্মকথং সুত্ৰা রাজা বিম্বিসারো একাদসনহুতেহি সদ্ধিং সোতাপত্তিফলে পতিট্ঠাসি, একনহুতং উপাসকত্তং পটিৰেদেসি. রাজা সরণং গন্ত্ৰা স্ৰাতনায ভগৰন্তং সদ্ধিং ভিক্খুসঙ্ঘেন নিমন্তেত্ৰা ভগৰন্তং তিক্খত্তুং পদক্খিণং কত্ৰা ৰন্দিত্ৰা পক্কামি.

পুনদিৰসে ¶ ভগৰা ভিক্খুসহস্সপরিৰুতো মরুগণপরিৰুতো ৰিয দসসতনযনো দেৰরাজা, ব্রহ্মগণপরিৰুতো ৰিয মহাব্রহ্মা রাজগহং পাৰিসি. রাজা বুদ্ধপ্পমুখস্স ভিক্খুসঙ্ঘস্স দানং দত্ৰা ভোজনপরিযোসানে ভগৰন্তং এতদৰোচ – ‘‘অহং, ভন্তে, তীণি রতনানি ৰিনা ৰসিতুং ন সক্খিস্সামি, ৰেলায ৰা অৰেলায ৰা ভগৰতো সন্তিকং আগমিস্সামি, লট্ঠিৰনং নাম অতিদূরে, ইদং পন অম্হাকং ৰেল়ুৰনং নাম উয্যানং পৰিৰেককামানং নাতিদূরং নচ্চাসন্নং গমনাগমনসম্পন্নং নিজ্জনসম্বাধং পৰিৰেকসুখং ছাযূদকসম্পন্নং সীতলসিলাতলসমলঙ্কতং পরমরমণীযভূমিভাগং সুরভিকুসুমতরুৰরনিরন্তরং রমণীযপাসাদহম্মিযৰিমানৰিহারড্ঢুযোগমণ্ডপাদিপটিমণ্ডিতং. ইদং মে, ভন্তে, ভগৰা পটিগ্গণ্হাতু নৰতপনঙ্গারসঙ্কাসেন সুৰণ্ণভিঙ্গারেন সুরভিকুসুমৰাসিতং মণিৰণ্ণউদকং গহেত্ৰা ৰেল়ুৰনারামং পরিচ্চজন্তো দসবলস্স হত্থে উদকং পাতেসি. তস্মিং আরামপটিগ্গহণে ‘‘বুদ্ধসাসনস্স মূলানি ওতিণ্ণানী’’তি পীতিৰসং গতা নচ্চন্তী ৰিয অযং মহাপথৰী কম্পি. জম্বুদীপে পন ঠপেত্ৰা ৰেল়ুৰনমহাৰিহারং অঞ্ঞং পথৰিং কম্পেত্ৰা গহিতসেনাসনং নাম নত্থি. অথ সত্থা ৰেল়ুৰনারামং পটিগ্গহেত্ৰা রঞ্ঞো ৰিহারদানানুমোদনমকাসি –

‘‘আৰাসদানস্স পনানিসংসং, কো নাম ৰত্তুং, পুরিসো সমত্থো;

অঞ্ঞত্র বুদ্ধা পন লোকনাথা, যুত্তো মুখানং নহুতেন চাপি.

‘‘আযুঞ্চ ¶ ৰণ্ণঞ্চ সুখং বলঞ্চ, ৰরং পসত্থং পটিভানমেৰ;

দদাতি নামাতি পৰুচ্চতে সো, যো দেতি সঙ্ঘস্স নরো ৰিহারং.

‘‘দাতা নিৰাসস্স নিৰারণস্স, সীতাদিনো জীৰিতুপদ্দৰস্স;

পালেতি আযুং পন তস্স যস্মা, আযুপ্পদো হোতি তমাহু সন্তো.

‘‘অচ্চুণ্হসীতে ¶ ৰসতো নিৰাসে, বলঞ্চ ৰণ্ণো পটিভা ন হোতি;

তস্মা হি সো দেতি ৰিহারদাতা, বলঞ্চ ৰণ্ণং পটিভানমেৰ.

‘‘দুক্খস্স সীতুণ্হসরীসপা চ, ৰাতাতপাদিপ্পভৰস্স লোকে;

নিৰারণা নেকৰিধস্স নিচ্চং, সুখপ্পদো হোতি ৰিহারদাতা.

‘‘সীতুণ্হৰাতাতপডংসৰুট্ঠি ¶ , সরীসপাৰাল়মিগাদিদুক্খং;

যস্মা নিৰারেতি ৰিহারদাতা, তস্মা সুখং ৰিন্দতি সো পরত্থ.

‘‘পসন্নচিত্তো ভৰভোগহেতুং, মনোভিরামং মুদিতো ৰিহারং;

যো দেতি সীলাদিগুণোদিতানং, সব্বং দদো নাম পৰুচ্চতে সো.

‘‘পহায মচ্ছেরমলং সলোভং, গুণালযানং নিলযং দদাতি;

খিত্তোৰ সো তত্থ পরেহি সগ্গে, যথাভতং জাযতি ৰীতসোকো.

‘‘ৰরে ¶ চারুরূপে ৰিহারে উল়ারে, নরো কারযে ৰাসযে তত্থ ভিক্খূ;

দদেয্যন্নপানঞ্চ ৰত্থঞ্চ নেসং, পসন্নেন চিত্তেন সক্কচ্চ নিচ্চং.

‘‘তস্মা মহারাজ ভৰেসু ভোগে, মনোরমে পচ্চনুভুয্য ভিয্যো;

ৰিহারদানস্স ফলেন সন্তং, সুখং অসোকং অধিগচ্ছ পচ্ছা’’তি.

ইচ্চেৰং মুনিরাজা নররাজস্স বিম্বিসারস্স ৰিহারদানানুমোদনং কত্ৰা উট্ঠাযাসনা ভিক্খুসঙ্ঘপরিৰুতো পরমদস্সনীযায অত্তনো সরীরপ্পভায সুৰণ্ণরসসেকপিঞ্ছরানি ৰিয নগরৰনৰিমানাদীনি কুরুমানো অনোপমায বুদ্ধলীল়ায অনন্তায বুদ্ধসিরিযা ৰেল়ুৰনমহাৰিহারমেৰ পাৰিসীতি.

‘‘অকীল়নে ৰেল়ুৰনে ৰিহারে, তথাগতো তত্থ মনোভিরামে;

নানাৰিহারেন ৰিহাসি ধীরো, ৰেনেয্যকানং সমুদিক্খমানো’’.

অথেৰং ¶ ভগৰতি তস্মিং ৰিহরন্তে সুদ্ধোদনমহারাজা ‘‘পুত্তো মে ছব্বস্সানি দুক্করকারিকং কত্ৰা পরমাভিসম্বোধিং পত্ৰা পৰত্তিতৰরধম্মচক্কো রাজগহং পত্ৰা ৰেল়ুৰনমহাৰিহারে ৰিহরতী’’তি সুত্ৰা অঞ্ঞতরং মহামচ্চং আমন্তেসি – ‘‘এহি, ভণে, পুরিসসহস্সপরিৰারো রাজগহং গন্ত্ৰা মম ৰচনেন ‘পিতা ৰো সুদ্ধোদনমহারাজা তং দট্ঠুকামো’তি ৰত্ৰা পুত্তং মে গণ্হিত্ৰা এহী’’তি. সো ‘‘সাধু, দেৰা’’তি রঞ্ঞো পটিস্সুণিত্ৰা পুরিসসহস্সপরিৰারো সট্ঠিযোজনমগ্গং গন্ত্ৰা ধম্মদেসনৰেলায ৰিহারং পাৰিসি. সো ‘‘তিট্ঠতু তাৰ রঞ্ঞা পহিতসাসন’’ন্তি পরিসপরিযন্তে ঠিতো সত্থু ধম্মদেসনং সুত্ৰা যথাঠিতোৰ সদ্ধিং পুরিসসহস্সেন ¶ অরহত্তং পত্ৰা পব্বজ্জং যাচি. ভগৰা – ‘‘এথ, ভিক্খৰো’’তি হত্থং পসারেসি. তে সব্বে তঙ্খণঞ্ঞেৰ ইদ্ধিমযপত্তচীৰরধরা ৰস্সসট্ঠিকত্থেরা ৰিয আকপ্পসম্পন্না হুত্ৰা ভগৰন্তং পরিৰারেসুং. রাজা ‘‘নেৰ ¶ গতো আগচ্ছতি, ন চ সাসনং সুয্যতী’’তি চিন্তেত্ৰা তেনেৰ নীহারেন নৰক্খত্তুং অমচ্চে পেসেসি. তেসু নৰসু পুরিসসহস্সেসু একোপি রঞ্ঞো নারোচেসি, ন সাসনং ৰা পহিণি. সব্বে অরহত্তং পত্ৰাৰ পব্বজিংসু.

অথ রাজা চিন্তেসি – ‘‘কো নু খো মম ৰচনং করিস্সতী’’তি সব্বরাজবলং ওলোকেন্তো উদাযিং অদ্দস. সো কির রঞ্ঞো সব্বত্থসাধকো অমচ্চো অব্ভন্তরিকো অতিৰিস্সাসিকো বোধিসত্তেন সদ্ধিং একদিৰসেযেৰ জাতো সহপংসুকীল়িতো সহাযো. অথ নং রাজা আমন্তেসি – ‘‘তাত উদাযি, অহং মম পুত্তং দট্ঠুকামো নৰপুরিসসহস্সানি পেসেসিং, একপুরিসোপি আগন্ত্ৰা সাসনমত্তম্পি আরোচেতা নত্থি, দুজ্জানো খো পন মে জীৰিতন্তরাযো, অহং জীৰমানোৰ পুত্তং দট্ঠুমিচ্ছামি. সক্খিস্সসি মে পুত্তং দস্সেতু’’ন্তি? সো ‘‘সক্খিস্সামি, দেৰ, সচে পব্বজিতুং লভিস্সামী’’তি আহ. ‘‘তাত, ত্ৰং পব্বজিত্ৰা ৰা অপব্বজিত্ৰা ৰা ময্হং পুত্তং দস্সেহী’’তি. সো ‘‘সাধু, দেৰা’’তি রঞ্ঞো সাসনং আদায রাজগহং গন্ত্ৰা সত্থু ধম্মদেসনং সুত্ৰা সদ্ধিং পুরিসসহস্সেন অরহত্তং পত্ৰা এহিভিক্খুভাৰে পতিট্ঠায ফগ্গুনীপুণ্ণমাসিযং চিন্তেসি – ‘‘অতিক্কন্তো হেমন্তো, ৰসন্তসমযো অনুপ্পত্তো, সুপুপ্ফিতা ৰনসণ্ডা, পটিপজ্জনক্খমো মগ্গো, কালো দসবলস্স ঞাতিসঙ্গহং কাতু’’ন্তি চিন্তেত্ৰা ভগৰন্তং উপসঙ্কমিত্ৰা সট্ঠিমত্তাহি গাথাহি ভগৰতো কুলনগরং গমনত্থায গমনৰণ্ণং ৰণ্ণেসি –

‘‘অঙ্গারিনো দানি দুমা ভদন্তে, ফলেসিনো ছদনং ৰিপ্পহায;

তে অচ্চিমন্তোৰ পভাসযন্তি, সমযো মহাৰীর অঙ্গীরসানং.

‘‘দুমা ¶ ৰিচিত্তা সুৰিরাজমানা, রত্তঙ্কুরেহেৰ চ পল্লৰেহি;

রতনুজ্জলমণ্ডপসন্নিভাসা, সমযো মহাৰীর অঙ্গীরসানং.

‘‘সুপুপ্ফিতগ্গা কুসুমেহি ভূসিতা, মনুঞ্ঞভূতা সুচিসাধুগন্ধা;

রুক্খা ৰিরোচন্তি উভোসু পস্সেসু, সমযো মহাৰীর অঙ্গীরসানং.

‘‘ফলেহিনেকেহি সমিদ্ধিভূতা, ৰিচিত্তরুক্খা উভতোৰকাসে;

খুদ্দং পিপাসম্পি ৰিনোদযন্তি, সমযো মহাৰীর অঙ্গীরসানং.

‘‘ৰিচিত্তমালা ¶ সুচিপল্লৰেহি, সুসজ্জিতা মোরকলাপসন্নিভা;

রুক্খা ৰিরোচন্তি উভোসু পস্সেসু, সমযো মহাৰীর অঙ্গীরসানং.

‘‘ৰিরোচমানা ফলপল্লৰেহি, সুসজ্জিতা ৰাসনিৰাসভূতা;

তোসেন্তি অদ্ধানকিলন্তসত্তে, সমযো মহাৰীর অঙ্গীরসানং.

‘‘সুফুল্লিতগ্গা ৰনগুম্বনিস্সিতা, লতা অনেকা সুৰিরাজমানা;

তোসেন্তি সত্তে মণিমণ্ডপাৰ, সমযো মহাৰীর অঙ্গীরসানং.

‘‘লতা অনেকা দুমনিস্সিতাৰ, পিযেহি সদ্ধিং সহিতা ৰধূৰ;

পলোভযন্তী হি সুগন্ধগন্ধা, সমযো মহাৰীর অঙ্গীরসানং.

‘‘ৰিচিত্তনীলাদিমনুঞ্ঞৰণ্ণা ¶ , দিজা সমন্তা অভিকূজমানা;

তোসেন্তি মঞ্জুস্সরতা রতীহি, সমযো মহাৰীর অঙ্গীরসানং.

‘‘মিগা চ নানা সুৰিরাজমানা, উত্তুঙ্গকণ্ণা চ মনুঞ্ঞনেত্তা;

দিসা সমন্তা মভিধাৰযন্তি, সমযো মহাৰীর অঙ্গীরসানং.

‘‘মনুঞ্ঞভূতা চ মহী সমন্তা, ৰিরাজমানা হরিতাৰ সদ্দলা;

সুপুপ্ফিরুক্খা মোল়িনিৰলঙ্কতা, সমযো মহাৰীর অঙ্গীরসানং.

‘‘সুসজ্জিতা মুত্তমযাৰ ৰালুকা, সুসণ্ঠিতা চারুসুফস্সদাতা;

ৰিরোচযন্তেৰ দিসা সমন্তা, সমযো মহাৰীর অঙ্গীরসানং.

‘‘সমং সুফস্সং সুচিভূমিভাগং, মনুঞ্ঞপুপ্ফোদযগন্ধৰাসিতং;

ৰিরাজমানং সুচিমঞ্চ সোভং, সমযো মহাৰীর অঙ্গীরসানং.

‘‘সুসজ্জিতং নন্দনকাননংৰ, ৰিচিত্তনানাদুমসণ্ডমণ্ডিতং;

সুগন্ধভূতং পৰনং সুরম্মং, সমযো মহাৰীর অঙ্গীরসানং.

‘‘সরা ৰিচিত্তা ৰিৰিধা মনোরমা, সুসজ্জিতা পঙ্কজপুণ্ডরীকা;

পসন্নসীতোদকচারুপুণ্ণা, সমযো মহাৰীর অঙ্গীরসানং.

‘‘সুফুল্লনানাৰিধপঙ্কজেহি ¶ ¶ , ৰিরাজমানা সুচিগন্ধগন্ধা;

পমোদযন্তেৰ নরামরানং, সমযো মহাৰীর অঙ্গীরসানং.

‘‘সুফুল্লপঙ্কেরুহসন্নিসিন্না, দিজা সমন্তা মভিনাদযন্তা;

মোদন্তি ভরিযাহি সমঙ্গিনো তে, সমযো মহাৰীর অঙ্গীরসানং.

‘‘সুফুল্লপুপ্ফেহি রজং গহেত্ৰা, অলী ৰিধাৰন্তি ৰিকূজমানা;

মধুম্হি গন্ধো ৰিদিসং পৰাযতি, সমযো মহাৰীর অঙ্গীরসানং.

‘‘অভিন্ননাদা মদৰারণা চ, গিরীহি ধাৰন্তি চ ৰারিধারা;

সৰন্তি নজ্জো সুৰিরাজিতাৰ সমযো মহাৰীর অঙ্গীরসানং.

‘‘গিরী সমন্তাৰ পদিস্সমানা, মযূরগীৰা ইৰ নীলৰণ্ণা;

দিসা রজিন্দাৰ ৰিরোচযন্তি, সমযো মহাৰীর অঙ্গীরসানং.

‘‘মযূরসঙ্ঘা গিরিমুদ্ধনস্মিং, নচ্চন্তি নারীহি সমঙ্গিভূতা;

কূজন্তি নানামধুরস্সরেহি, সমযো মহাৰীর অঙ্গীরসানং.

‘‘সুৰাদিকা নেকদিজা মনুঞ্ঞা, ৰিচিত্তপত্তেহি ৰিরাজমানা;

গিরিম্হি ঠত্ৰা অভিনাদযন্তি, সমযো মহাৰীর অঙ্গীরসানং.

‘‘সুফুল্লপুপ্ফাকরমাভিকিণ্ণা ¶ , সুগন্ধনানাদললঙ্কতা চ;

গিরী ৰিরোচন্তি দিসা সমন্তা, সমযো মহাৰীর অঙ্গীরসানং.

‘‘জলাসযা নেকসুগন্ধগন্ধা, সুরিন্দউয্যানজলাসযাৰ;

সৰন্তি নজ্জো সুৰিরাজমানা, সমযো মহাৰীর অঙ্গীরসানং.

‘‘ৰিচিত্ততিত্থেহি অলঙ্কতা চ, মনুঞ্ঞনানামিগপক্খিপাসা;

নজ্জো ৰিরোচন্তি সুসন্দমানা, সমযো মহাৰীর অঙ্গীরসানং.

‘‘উভোসু পস্সেসু জলাসযেসু, সুপুপ্ফিতা চারুসুগন্ধরুক্খা;

ৰিভূসিতগ্গা সুরসুন্দরী চ, সমযো মহাৰীর অঙ্গীরসানং.

‘‘সুগন্ধনানাদুমজালকিণ্ণং ¶ , ৰনং ৰিচিত্তং সুরনন্দনংৰ;

মনোভিরামং সততং গতীনং, সমযো মহাৰীর অঙ্গীরসানং.

‘‘সম্পন্ননানাসুচিঅন্নপানা, সব্যঞ্জনা সাদুরসেন যুত্তা;

পথেসু গামে সুলভা মনুঞ্ঞা, সমযো মহাৰীর অঙ্গীরসানং.

‘‘ৰিরাজিতা আসি মহী সমন্তা, ৰিচিত্তৰণ্ণা কুসুমাসনস্স;

রত্তিন্দগোপেহি অলঙ্কতাৰ সমযো মহাৰীর অঙ্গীরসানং.

‘‘ৰিসুদ্ধসদ্ধাদিগুণেহি ¶ যুত্তা, সম্বুদ্ধরাজং অভিপত্থযন্তা;

বহূহি তত্থেৰ জনা সমন্তা, সমযো মহাৰীর অঙ্গীরসানং.

‘‘ৰিচিত্রআরামসুপোক্খরঞ্ঞো, ৰিচিত্রনানাপদুমেহি ছন্না;

ভিসেহি খীরংৰ রসং পৰাযতি, সমযো মহাৰীর অঙ্গীরসানং.

‘‘ৰিচিত্রনীলচ্ছদনেনলঙ্কতা, মনুঞ্ঞরুক্খা উভতোৰকাসে;

সমুগ্গতা সত্তসমূহভূতা, সমযো মহাৰীর অঙ্গীরসানং.

‘‘ৰিচিত্রনীলব্ভমিৰাযতং ৰনং, সুরিন্দলোকে ইৰ নন্দনং ৰনং;

সব্বোতুকং সাধুসুগন্ধপুপ্ফং, সমযো মহাৰীর অঙ্গীরসানং.

‘‘সুভঞ্জসং যোজনযোজনেসু, সুভিক্খগামা সুলভা মনুঞ্ঞা;

জনাভিকিণ্ণা সুলভন্নপানা, সমযো মহাৰীর অঙ্গীরসানং.

‘‘পহূতছাযূদকরম্মভূতা, নিৰাসিনং সব্বসুখপ্পদাতা;

ৰিসালসালা চ সভা চ বহূ, সমযো মহাৰীর অঙ্গীরসানং.

‘‘ৰিচিত্তনানাদুমসণ্ডমণ্ডিতা, মনুঞ্ঞউয্যানসুপোক্খরঞ্ঞো;

সুমাপিতা সাধুসুগন্ধগন্ধা, সমযো মহাৰীর অঙ্গীরসানং.

‘‘ৰাতো ¶ মুদূসীতলসাধুরূপো, নভা চ অব্ভা ৰিগতা সমন্তা;

দিসা চ সব্বাৰ ৰিরোচযন্তি, সমযো মহাৰীর অঙ্গীরসানং.

‘‘পথে ¶ রজোনুগ্গমনত্থমেৰ, রত্তিং পৰস্সন্তি চ মন্দৰুট্ঠী;

নভে চ সূরো মুদুকোৰ তাপো, সমযো মহাৰীর অঙ্গীরসানং.

‘‘মদপ্পবাহা মদহত্থিসঙ্ঘা, করেণুসঙ্ঘেহি সুকীল়যন্তি;

দিসা ৰিধাৰন্তি চ গজ্জযন্তা, সমযো মহাৰীর অঙ্গীরসানং.

‘‘ৰনং সুনীলং অভিদস্সনীযং, নীলব্ভকূটং ইৰ রম্মভূতং;

ৰিলোকিতানং অতিৰিম্হনীযং, সমযো মহাৰীর অঙ্গীরসানং.

‘‘ৰিসুদ্ধমব্ভং গগনং সুরম্মং, মণিমযেহি সমলঙ্কতাৰ;

দিসা চ সব্বা অতিরোচযন্তি, সমযো মহাৰীর অঙ্গীরসানং.

‘‘গন্ধব্বৰিজ্জাধরকিন্নরা চ, সুগীতিযন্তা মধুরস্সরেন;

চরন্তি তস্মিং পৰনে সুরম্মে, সমযো মহাৰীর অঙ্গীরসানং.

‘‘কিলেসসঙ্ঘস্স ভিতাসকেহি, তপস্সিসঙ্ঘেহি নিসেৰিতং ৰনং;

ৰিহারআরামসমিদ্ধিভূতং, সমযো মহাৰীর অঙ্গীরসানং.

‘‘সমিদ্ধিনানাফলিনো ¶ ৰনন্তা, অনাকুলা নিচ্চমনোভিরম্মা;

সমাধিপীতিং অভিৰড্ঢযন্তি, সমযো মহাৰীর অঙ্গীরসানং.

‘‘নিসেৰিতং নেকদিজেহি নিচ্চং, গামেন গামং সততং ৰসন্তা;

পুরে পুরে গামৰরা চ সন্তি, সমযো মহাৰীর অঙ্গীরসানং.

‘‘ৰত্থন্নপানং সযনাসনঞ্চ, গন্ধঞ্চ মালঞ্চ ৰিলেপনঞ্চ;

তহিং সমিদ্ধা জনতা বহূ চ, সমযো মহাৰীর অঙ্গীরসানং.

‘‘পুঞ্ঞিদ্ধিযা সব্বযসগ্গপত্তা, জনা চ তস্মিং সুখিতা সমিদ্ধা;

পহূতভোগা ৰিৰিধা ৰসন্তি, সমযো মহাৰীর অঙ্গীরসানং.

‘‘নভে চ অব্ভা সুৰিসুদ্ধৰণ্ণা, দিসা চ চন্দো সুৰিরাজিতোৰ;

রত্তিঞ্চ ৰাতো মুদুসীতলো চ, সমযো মহাৰীর অঙ্গীরসানং.

‘‘চন্দুগ্গমে ¶ সব্বজনা পহট্ঠা, সকঙ্গণে চিত্রকথা ৰদন্তা;

পিযেহি সদ্ধিং অভিমোদযন্তি, সমযো মহাৰীর অঙ্গীরসানং.

‘‘চন্দস্স রংসীহি নভং ৰিরোচি, মহী চ সংসুদ্ধমনুঞ্ঞৰণ্ণা;

দিসা চ সব্বা পরিসুদ্ধরূপা, সমযো মহাৰীর অঙ্গীরসানং.

‘‘দূরে ¶ চ দিস্ৰা ৰরচন্দরংসিং, পুপ্ফিংসু পুপ্ফানি মহীতলস্মিং;

সমন্ততো গন্ধগুণত্থিকানং, সমযো মহাৰীর অঙ্গীরসানং.

‘‘চন্দস্স রংসীহি ৰিলিম্পিতাৰ, মহী সমন্তা কুসুমেনলঙ্কতা;

ৰিরোচি সব্বঙ্গসুমালিনীৰ, সমযো মহাৰীর অঙ্গীরসানং.

‘‘কুচন্তি হত্থীপি মদেন মত্তা, ৰিচিত্তপিঞ্ছা চ দিজা সমন্তা;

করোন্তি নাদং পৰনে সুরম্মে, সমযো মহাৰীর অঙ্গীরসানং.

‘‘পথঞ্চ সব্বং পটিপজ্জনক্খমং, ইদ্ধঞ্চ রট্ঠং সধনং সভোগং;

সব্বত্থুতং সব্বসুখপ্পদানং, সমযো মহাৰীর অঙ্গীরসানং.

‘‘ৰনঞ্চ সব্বং সুৰিচিত্তরূপং, সুমাপিতং নন্দনকাননংৰ;

যতীন পীতিং সততং জনেতি, সমযো মহাৰীর অঙ্গীরসানং.

‘‘অলঙ্কতং দেৰপুরংৰ রম্মং, কপীলৰত্থুং ইতি নামধেয্যং;

কুলনগরং ইধ সস্সিরিকং, সমযো মহাৰীর অঙ্গীরসানং.

‘‘মনুঞ্ঞঅট্টালৰিচিত্তরূপং, সুফুল্লপঙ্কেরুহসণ্ডমণ্ডিতং;

ৰিচিত্তপরিখাহি পুরং সুরম্মং, সমযো মহাৰীর অঙ্গীরসানং.

‘‘ৰিচিত্তপাকারঞ্চ ¶ তোরণঞ্চ, সুভঙ্গণং দেৰনিৰাসভূতং;

মনুঞ্ঞৰীথি সুরলোকসন্নিভং, সমযো মহাৰীর অঙ্গীরসানং.

‘‘অলঙ্কতা সাকিযরাজপুত্তা, ৰিরাজমানা ৰরভূসনেহি;

সুরিন্দলোকে ইৰ দেৰপুত্তা, সমযো মহাৰীর অঙ্গীরসানং.

‘‘সুদ্ধোদনো ¶ মুনিৰরং অভিদস্সনায, অমচ্চপুত্তে দসধা অপেসযি;

বলেন সদ্ধিং মহতা মুনিন্দ, সমযো মহাৰীর অঙ্গীরসানং.

‘‘নেৰাগতং পস্সতি নেৰ ৰাচং, সোকাভিভূতং নরৰীরসেট্ঠং;

তোসেতুমিচ্ছামি নরাধিপত্তং, সমযো মহাৰীর অঙ্গীরসানং.

‘‘তংদস্সনেনব্ভুতপীতিরাসি, উদিক্খমানং দ্ৰিপদানমিন্দং;

তোসেহি তং মুনিন্দ গুণসেট্ঠং, সমযো মহাৰীর অঙ্গীরসানং.

‘‘আসায কস্সতে খেত্তং, বীজং আসায ৰপ্পতি;

আসায ৰাণিজা যন্তি, সমুদ্দং ধনহারকা;

যায আসায তিট্ঠামি, সা মে আসা সমিজ্ঝতু.

‘‘নাতিসীতং ¶ নাতিউণ্হং, নাতিদুব্ভিক্খছাতকং;

সদ্দলা হরিতা ভূমি, এস কালো মহামুনী’’তি.

অথ নং সত্থা – ‘‘কিং নু খো, উদাযি, গমনৰণ্ণং ৰণ্ণেসী’’তি আহ. ‘‘ভন্তে, তুম্হাকং পিতা সুদ্ধোদনমহারাজা দট্ঠুকামো, করোথ ঞাতকানং সঙ্গহ’’ন্তি আহ. ‘‘সাধু, উদাযি, করিস্সামি ঞাতিসঙ্গহং, তেন হি ভিক্খুসঙ্ঘস্স আরোচেহি ¶ , গমিযৰত্তং পূরেস্সন্তী’’তি আহ. ‘‘সাধু, ভন্তে’’তি থেরো ভিক্খুসঙ্ঘস্স আরোচেসি.

সত্থা অঙ্গমগধৰাসীনং কুলপুত্তানং দসহি সহস্সেহি, কপিলৰত্থুৰাসীনং দসহি সহস্সেহীতি সব্বেহেৰ ৰীসতিযা খীণাসৰভিক্খুসহস্সেহি পরিৰুতো রাজগহা নিক্খমিত্ৰা দিৰসে দিৰসে যোজনং যোজনং গচ্ছন্তো দ্ৰীহি মাসেহি কপিলৰত্থুপুরং সম্পাপুণি. সাকিযাপি অনুপ্পত্তেযেৰ ভগৰতি – ‘‘অম্হাকং ঞাতিসেট্ঠং পস্সিস্সামা’’তি ভগৰতো ৰসনট্ঠানং ৰীমংসমানা ‘‘নিগ্রোধসক্কস্সারামো রমণীযো’’তি সল্লক্খেত্ৰা সব্বং পটিজগ্গনৰিধিং কারেত্ৰা গন্ধপুপ্ফহত্থা পচ্চুগ্গমনং করোন্তা সব্বালঙ্কারেহি সমলঙ্কতগত্তা গন্ধপুপ্ফচুণ্ণাদীহি পূজযমানা ভগৰন্তং পুরক্খত্ৰা নিগ্রোধারামমেৰ অগমংসু.

তত্র ভগৰা ৰীসতিযা খীণাসৰসহস্সেহি পরিৰুতো পঞ্ঞত্তৰরবুদ্ধাসনে নিসীদি. সাকিযা ¶ পন মানজাতিকা মানত্থদ্ধা, ‘‘সিদ্ধত্থকুমারো অম্হেহি দহরতরো, অম্হাকং কনিট্ঠো ভাতা, পুত্তো, ভাগিনেয্যো, নত্তা’’তি চিন্তেত্ৰা দহরদহরে রাজকুমারে আহংসু – ‘‘তুম্হে ৰন্দথ, মযং তুম্হাকং পিট্ঠিতো পিট্ঠিতো নিসীদিস্সামা’’তি. তেস্ৰেৰং নিসিন্নেসু ভগৰা তেসং অজ্ঝাসযং ওলোকেত্ৰা – ‘‘ইমে ঞাতকা অত্তনো মোঘজিণ্ণভাৰেন ন মং ৰন্দন্তি, ন পনেতে জানন্তি ‘বুদ্ধো নাম কীদিসো, বুদ্ধবলং নাম কীদিস’ন্তি ৰা, ‘বুদ্ধো নাম এদিসো, বুদ্ধবলং নাম এদিস’ন্তি ৰা, হন্দাহং অত্তনো বুদ্ধবলং ইদ্ধিবলঞ্চ দস্সেন্তো পাটিহারিযঞ্চ করেয্যং, আকাসে দসসহস্সচক্কৰাল়ৰিত্থতং সব্বরতনমযং চঙ্কমং মাপেত্ৰা তত্থ চঙ্কমন্তো মহাজনস্স অজ্ঝাসযং ওলোকেত্ৰা ধম্মঞ্চ দেসেয্য’’ন্তি চিন্তেসি. তেন ৰুত্তং সঙ্গীতিকারকেহি ভগৰতো পরিৰিতক্কদস্সনত্থং –

‘‘ন হেতে জানন্তি সদেৰমানুসা, বুদ্ধো অযং কীদিসকো নরুত্তমো;

ইদ্ধিবলং পঞ্ঞাবলঞ্চ কীদিসং, বুদ্ধবলং লোকহিতস্স কীদিসং.

‘‘ন ¶ ¶ হেতে জানন্তি সদেৰমানুসা, বুদ্ধো অযং এদিসকো নরুত্তমো;

ইদ্ধিবলং পঞ্ঞাবলঞ্চ এদিসং, বুদ্ধবলং লোকহিতস্স এদিসং.

‘‘হন্দাহং দস্সযিস্সামি, বুদ্ধবলমনুত্তরং;

চঙ্কমং মাপযিস্সামি, নভে রতনমণ্ডিত’’ন্তি.

তত্থ ন হেতে জানন্তীতি ন হি এতে জানন্তি. ন-কারো পটিসেধত্থো. হি-কারো কারণত্থে নিপাতো. যস্মা পনেতে মম ঞাতিআদযো দেৰমনুস্সা মযা বুদ্ধবলে চ ইদ্ধিবলে চ অনাৰিকতে ন জানন্তি ‘‘এদিসো বুদ্ধো, এদিসং ইদ্ধিবল’’ন্তি, তস্মা অহং মম বুদ্ধবলঞ্চ ইদ্ধিবলঞ্চ দস্সেয্যন্তি অত্থো. সদেৰমানুসাতি এত্থ দেৰাতি উপপত্তিদেৰা অধিপ্পেতা. সহ দেৰেহীতি সদেৰা. কে তে? মানুসা, সদেৰা এৰ মানুসা সদেৰমানুসা. অথ ৰা দেৰোতি সম্মুতিদেৰো, সুদ্ধোদনো রাজা অধিপ্পেতো. সহ দেৰেন রঞ্ঞা সুদ্ধোদনেনাতি সদেৰা. মানুসাতি ঞাতিমানুসা, সদেৰা সসুদ্ধোদনা মানুসা সদেৰমানুসা সরাজানো ৰা এতে মম ঞাতিমানুসা মম বলং ন ৰিজানন্তীতি অত্থো. সেসদেৰাপি সঙ্গহং গচ্ছন্তিযেৰ. সব্বেপি দেৰা দেৰনট্ঠেন ‘‘দেৰা’’তি ৰুচ্চন্তি. দেৰনং নাম ধাতুঅত্থো কীল়াদি. অথ ৰা দেৰা চ মানুসা চ দেৰমানুসা, সহ দেৰমানুসেহি সদেৰমানুসা. কে তে? লোকাতি ৰচনসেসো দট্ঠব্বো. বুদ্ধোতি চতুসচ্চধম্মে বুদ্ধো অনুবুদ্ধোতি বুদ্ধো. যথাহ –

‘‘অভিঞ্ঞেয্যং ¶ অভিঞ্ঞাতং, ভাৰেতব্বঞ্চ ভাৰিতং;

পহাতব্বং পহীনং মে, তস্মা বুদ্ধোস্মি ব্রাহ্মণা’’তি. (ম. নি. ২.৩৯৯; সু. নি. ৫৬৩);

ইধ পন কত্তুকারকে বুদ্ধসদ্দসিদ্ধি দট্ঠব্বা. অধিগতৰিসেসেহি দেৰমনুস্সেহি ‘‘সম্মাসম্বুদ্ধো ৰত সো ভগৰা’’তি এৰং বুদ্ধত্তা ঞাতত্তা বুদ্ধো. ইধ কম্মকারকে বুদ্ধসদ্দসিদ্ধি দট্ঠব্বা. বুদ্ধমস্স অত্থীতি ৰা বুদ্ধো, বুদ্ধৰন্তোতি অত্থো. তং সব্বং সদ্দসত্থানুসারেন ৰেদিতব্বং. কীদিসকোতি কীদিসো কিংসরিক্খকো কিংসদিসো কিংৰণ্ণো কিংসণ্ঠানো দীঘো ৰা রস্সো ৰাতি অত্থো.

নরুত্তমোতি ¶ নরানং নরেসু ৰা উত্তমো পৰরো সেট্ঠোতি নরুত্তমো. ইদ্ধিবলন্তি এত্থ ইজ্ঝনং ইদ্ধি নিপ্ফত্তিঅত্থেন পটিলাভট্ঠেন চ ইদ্ধি. অথ ৰা ইজ্ঝন্তি তায সত্তা ইদ্ধা ৰুদ্ধা উক্কংসগতা হোন্তীতি ¶ ইদ্ধি. সা পন দসৰিধা হোতি. যথাহ –

‘‘ইদ্ধিযোতি দস ইদ্ধিযো. কতমা দস? অধিট্ঠানা ইদ্ধি, ৰিকুব্বনা ইদ্ধি, মনোমযা ইদ্ধি, ঞাণৰিপ্ফারা ইদ্ধি, সমাধিৰিপ্ফারা ইদ্ধি, অরিযা ইদ্ধি, কম্মৰিপাকজা ইদ্ধি, পুঞ্ঞৰতো ইদ্ধি, ৰিজ্জামযা ইদ্ধি, তত্থ তত্থ সম্মাপযোগপচ্চযা ইজ্ঝনট্ঠেন ইদ্ধী’’তি (পটি. ম. ৩.১০).

তাসং ইদং নানত্তং – পকতিযা একো বহুকং আৰজ্জেতি, সতং ৰা সহস্সং ৰা আৰজ্জিত্ৰা ঞাণেন অধিট্ঠাতি ‘‘বহুকো হোমী’’তি (পটি. ম. ৩.১০) এৰং ৰিভজিত্ৰা দস্সিতা ইদ্ধি অধিট্ঠানৰসেন নিপ্ফন্নত্তা অধিট্ঠানা ইদ্ধি নাম. তস্সাযমত্থো – অভিঞ্ঞাপাদকং চতুত্থজ্ঝানং সমাপজ্জিত্ৰা ততো ৰুট্ঠায সচে সতং ইচ্ছতি ‘‘সতং হোমি, সতং হোমী’’তি কামাৰচরপরিকম্মচিত্তেহি পরিকম্মং কত্ৰা পুন অভিঞ্ঞাপাদকং ঝানং সমাপজ্জিত্ৰা ততো ৰুট্ঠায পুন আৰজ্জিত্ৰা অধিট্ঠাতি, অধিট্ঠানচিত্তেন সহেৰ সতং হোতি. সহস্সাদীসুপি এসেৰ নযো.

তত্থ পাদকজ্ঝানচিত্তং নিমিত্তারম্মণং পরিকম্মচিত্তানি সতারম্মণানি ৰা সহস্সাদীসু অঞ্ঞতরারম্মণানি ৰা, তানি চ খো ৰণ্ণৰসেন, নো পণ্ণত্তিৰসেন. অধিট্ঠানচিত্তম্পি সতারম্মণমেৰ, তং পন অপ্পনাচিত্তং ৰিয গোত্রভুঅনন্তরমেৰ উপ্পজ্জতি রূপাৰচরচতুত্থঝানিকং ¶ . সো পন পকতিৰণ্ণং ৰিজহিত্ৰা কুমারৰণ্ণং ৰা দস্সেতি নাগৰণ্ণং ৰা দস্সেতি. সুপণ্ণৰণ্ণং ৰা…পে… ৰিৰিধম্পি সেনাব্যূহং ৰা দস্সেতীতি (পটি. ম. ৩.১৩) এৰং আগতা ইদ্ধি পকতিৰণ্ণৰিজহনৰিকারৰসেন পৰত্তত্তা ৰিকুব্বনিদ্ধি নাম.

‘‘ইধ ভিক্খু ইমম্হা কাযা অঞ্ঞং কাযং অভিনিম্মিনাতি রূপিং মনোমযং সব্বঙ্গপচ্চঙ্গিং অহীনিন্দ্রিয’’ন্তি (পটি. ম. ৩.১৪) ইমিনা নযেন আগতা ইদ্ধি সরীরস্সেৰ অব্ভন্তরে অঞ্ঞস্স মনোমযস্স সরীরস্স নিপ্ফত্তিৰসেন পৰত্তত্তা মনোমযিদ্ধি নাম.

ঞাণুপ্পত্তিতো পুব্বে ৰা পচ্ছা ৰা তঙ্খণে ৰা তেন অত্তভাৰেন পটিলভিতব্বঅরহত্তঞাণানুভাৰেন নিব্বত্তো ৰিসেসো ¶ ঞাণৰিপ্ফারো ইদ্ধি নাম. আযস্মতো বাকুলস্স চ আযস্মতো সংকিচ্চস্স চ ঞাণৰিপ্ফারা ইদ্ধি, তেসং ৰত্থু চেত্থ কথেতব্বং (অ. নি. অট্ঠ. ১.১.২২৬).

সমাধিতো পুব্বে ৰা পচ্ছা ৰা তঙ্খণে ৰা সমথানুভাৰেন নিব্বত্তো ৰিসেসো সমাধিৰিপ্ফারা ইদ্ধি নাম. আযস্মতো সারিপুত্তস্স সমাধিৰিপ্ফারা ইদ্ধি (উদা. ৩৪), আযস্মতো সঞ্জীৰস্স সমাধিৰিপ্ফারা ইদ্ধি (ম. নি. ১.৫০৭), আযস্মতো খাণুকোণ্ডঞ্ঞস্স সমাধিৰিপ্ফারা ইদ্ধি (ধ. প. অট্ঠ. ১.খাণুকোণ্ডঞ্ঞত্থেরৰত্থু), উত্তরায উপাসিকায সমাধিৰিপ্ফারা ইদ্ধি (ধ. প. অট্ঠ. ২.উত্তরাউপাসিকাৰত্থু; অ. নি. অট্ঠ. ১.১.২৬২), সামাৰতিযা উপাসিকায সমাধিৰিপ্ফারা ইদ্ধীতি (ধ. প. অট্ঠ. ১.সামাৰতীৰত্থু; অ. নি. অট্ঠ. ১.১.২৬০-২৬১) তেসং ৰত্থূনেত্থ কথেতব্বানি, গন্থৰিত্থারদোসপরিহারত্থং পন মযা ন ৰিত্থারিতানি.

কতমা অরিযা ইদ্ধি? ইধ ভিক্খু সচে আকঙ্খতি ‘‘পটিক্কূলে অপ্পটিক্কূলসঞ্ঞী ¶ ৰিহরেয্য’’ন্তি অপ্পটিক্কূলসঞ্ঞী তত্থ ৰিহরতি, সচে আকঙ্খতি ‘‘অপ্পটিক্কূলে পটিক্কূলসঞ্ঞী ৰিহরেয্য’’ন্তি পটিক্কূলসঞ্ঞী তত্থ ৰিহরতি…পে… উপেক্খকো তত্থ ৰিহরতি সতো সম্পজানোতি (পটি. ম. ৩.১৭). অযঞ্হি চেতোৰসিপ্পত্তানং অরিযানংযেৰ সম্ভৰতো অরিযা ইদ্ধি নাম.

কতমা কম্মৰিপাকজা ইদ্ধি? সব্বেসং পক্খীনং সব্বেসং দেৰানং পঠমকপ্পিকানং মনুস্সানং একচ্চানঞ্চ ¶ ৰিনিপাতিকানং ৰেহাসগমনাদিকা কম্মৰিপাকজা ইদ্ধি নাম. কতমা পুঞ্ঞৰতো ইদ্ধি? রাজা চক্কৰত্তী ৰেহাসং গচ্ছতি সদ্ধিং চতুরঙ্গিনিযা সেনায. জটিলকস্স গহপতিস্স অসীতিহত্থো সুৰণ্ণপব্বতো নিব্বত্তি. অযং পুঞ্ঞৰতো ইদ্ধি নাম. ঘোসকস্স গহপতিনো (ধ. প. অট্ঠ. ১.কুম্ভঘোসকসেট্ঠিৰত্থু) সত্তসু ঠানেসু মারণত্থায উপক্কমে কতেপি অরোগভাৰো পুঞ্ঞৰতো ইদ্ধি. মেণ্ডকসেট্ঠিস্স (ধ. প. অট্ঠ. ২.মেণ্ডকসেট্ঠিৰত্থু) অট্ঠকরীসমত্তে পদেসে সত্তরতনমযানং মেণ্ডকানং পাতুভাৰো পুঞ্ঞৰতো ইদ্ধি.

কতমা ৰিজ্জামযা ইদ্ধি? ৰিজ্জাধরা ৰিজ্জং পরিজপ্পিত্ৰা ৰেহাসং গচ্ছন্তি, আকাসে অন্তলিক্খে হত্থিম্পি দস্সেন্তি…পে… ৰিৰিধম্পি সেনাব্যূহং দস্সেন্তীতি (পটি. ম. ৩.১৮). আদিনযপ্পৰত্তা ৰিজ্জামযা ইদ্ধি নাম. তং তং কম্মং কত্ৰা নিব্বত্তো ¶ ৰিসেসো ‘সম্মাপযোগপচ্চযা ইজ্ঝনট্ঠেন ইদ্ধী’তি অযং তত্থ তত্থ সম্মাপযোগপচ্চযা ইজ্ঝনট্ঠেন ইদ্ধি নাম. ইমিস্সা দসৰিধায ইদ্ধিযা বলং ইদ্ধিবলং নাম, ইদং ময্হং ইদ্ধিবলং ন জানন্তীতি অত্থো (ৰিসুদ্ধি. ২.৩৭৫ আদযো).

পঞ্ঞাবলন্তি সব্বলোকিযলোকুত্তরগুণৰিসেসদাযকং অরহত্তমগ্গপঞ্ঞাবলং অধিপ্পেতং, তম্পি এতে ন জানন্তি. কেচি ‘‘ছন্নং অসাধারণঞাণানমেতং অধিৰচনং পঞ্ঞাবল’’ন্তি ৰদন্তি. বুদ্ধবলন্তি এত্থ বুদ্ধবলং নাম বুদ্ধানুভাৰো, দসবলঞাণানি ৰা. তত্থ দসবলঞাণানি নাম ঠানাট্ঠানঞাণং, অতীতানাগতপচ্চুপ্পন্নকম্মৰিপাকজাননঞাণং, সব্বত্থগামিনিপটিপদাঞাণং, অনেকধাতুনানাধাতুলোকজাননঞাণং, নানাধিমুত্তিকঞাণং, আসযানুসযঞাণং, ঝানৰিমোক্খসমাধিসমাপত্তীনং সংকিলেসৰোদানৰুট্ঠানেসু যথাভূতঞাণং, পুব্বেনিৰাসানুস্সতিঞাণং, চুতূপপাতঞাণং, আসৰক্খযঞাণন্তি ইমানি দস. ইমেসং দসন্নং ঞাণানং অধিৰচনং বুদ্ধবলন্তি. এদিসন্তি ঈদিসং, অযমেৰ ৰা পাঠো.

হন্দাতি ৰৰস্সগ্গত্থে নিপাতো. অহন্তি অত্তানং নিদ্দিসতি. কিং ৰুত্তং হোতি? যস্মা পনেতে মম ঞাতকা বুদ্ধবলং ৰা বুদ্ধগুণে ৰা ন জানন্তি, কেৰলং অত্তনো ¶ মোঘজিণ্ণভাৰং নিস্সায মানৰসেন সব্বলোকজেট্ঠসেট্ঠং মং ন ৰন্দন্তি. তস্মা তেসং মানকেতু অত্থি, তং ভঞ্জিত্ৰা ৰন্দনত্থং বুদ্ধবলং দস্সেয্যন্তি ৰুত্তং হোতি. দস্সযিস্সামীতি দস্সেয্যং. ‘‘দস্সেস্সামী’’তি চ পাঠো, সোযেৰত্থো. বুদ্ধবলন্তি বুদ্ধানুভাৰং, বুদ্ধঞাণৰিসেসং ৰা. অনুত্তরন্তি নিরুত্তরং. চঙ্কমন্তি চঙ্কমিতব্বট্ঠানং ৰুচ্চতি. মাপযিস্সামীতি মাপেয্যং. ‘‘চঙ্কমনং মাপেস্সামী’’তি চ পাঠো, সোযেৰত্থো. নভেতি আকাসে. সব্বরতনমণ্ডিতন্তি সব্বেহি রতিজননট্ঠেন রতনেহি মুত্তা-মণি-ৰেল়ুরিয-সঙ্খ-সিলা-পৰাল়-রজত-সুৰণ্ণ-মসারগল্ল-লোহিতঙ্কেহি ¶ দসহি দসহি মণ্ডিতো অলঙ্কতো সব্বরতনমণ্ডিতো, তং সব্বরতনমণ্ডিতং. ‘‘নভে রতনমণ্ডিত’’ন্তি পঠন্তি কেচি.

অথেৰং ভগৰতা চিন্তিতমত্তে দসসহস্সচক্কৰাল়ৰাসিনো ভুম্মাদযো দেৰা পমুদিতহদযা সাধুকারমদংসু. তমত্থং পকাসেন্তেহি সঙ্গীতিকারকেহি –

‘‘ভুম্মা ¶ মহারাজিকা তাৰতিংসা, যামা চ দেৰা তুসিতা চ নিম্মিতা;

পরনিম্মিতা যেপি চ ব্রহ্মকাযিকা, আনন্দিতা ৰিপুলমকংসু ঘোস’’ন্তি. –

তত্থ ভুম্মাতি ভুম্মট্ঠা, পাসাণপব্বতৰনরুক্খাদীসু ঠিতা. মহারাজিকাতি মহারাজপক্খিকা. ভুম্মট্ঠানং দেৰতানং সদ্দং সুত্ৰা আকাসট্ঠকদেৰতা, ততো অব্ভৰলাহকা দেৰতা, ততো উণ্হৰলাহকা দেৰতা, ততো সীতৰলাহকা দেৰতা, ততো ৰস্সৰলাহকা দেৰতা, ততো ৰাতৰলাহকা দেৰতা, ততো চত্তারো মহারাজানো, ততো তাৰতিংসা, ততো যামা, ততো তুসিতা, ততো নিম্মানরতী, ততো পরনিম্মিতৰসৰত্তী, ততো ব্রহ্মকাযিকা, ততো ব্রহ্মপুরোহিতা, ততো মহাব্রহ্মানো, ততো পরিত্তাভা, ততো অপ্পমাণাভা, ততো আভস্সরা, ততো পরিত্তসুভা, ততো অপ্পমাণসুভা, ততো সুভকিণ্হা, ততো ৰেহপ্ফলা, ততো অৰিহা, ততো অতপ্পা, ততো সুদস্সা, ততো সুদস্সী, ততো অকনিট্ঠা দেৰতা সদ্দং সুত্ৰা মহন্তং সদ্দং অকংসু. অসঞ্ঞিনো চ অরূপাৰচরসত্তে চ ঠপেত্ৰা সোতাযতনপৰত্তিট্ঠানে সব্বে দেৰমনুস্সনাগাদযো পীতিৰসং গতহদযা উক্কুট্ঠিসদ্দমকংসূতি অত্থো. আনন্দিতাতি পমুদিতহদযা, সঞ্জাতপীতিসোমনস্সা হুত্ৰাতি অত্থো. ৰিপুলন্তি পুথুলং.

অথ সত্থা চিন্তিতসমনন্তরমেৰ ওদাতকসিণসমাপত্তিং সমাপজ্জিত্ৰা – ‘‘দসসু চক্কৰাল়সহস্সেসু আলোকো হোতূ’’তি ¶ অধিট্ঠাসি. তেন অধিট্ঠানচিত্তেন সহেৰ আলোকো অহোসি পথৰিতো পট্ঠায যাৰ অকনিট্ঠভৰনা. তেন ৰুত্তং –

‘‘ওভাসিতা চ পথৰী সদেৰকা, পুথূ চ লোকন্তরিকা অসংৰুতা;

তমো চ তিব্বো ৰিহতো তদা অহু, দিস্ৰান অচ্ছেরকং পাটিহীর’’ন্তি.

তত্থ ¶ ¶ ওভাসিতাতি পকাসিতা. পথৰীতি এত্থাযং পথৰী চতুব্বিধা – কক্খল়পথৰী, সসম্ভারপথৰী, নিমিত্তপথৰী, সম্মুতিপথৰীতি. তাসু ‘‘কতমা চাৰুসো, অজ্ঝত্তিকা পথৰীধাতু? যং অজ্ঝত্তং পচ্চত্তং কক্খল়ং খরিগত’’ন্তিআদীসু (ৰিভ. ১৭৩) ৰুত্তা অযং কক্খল়পথৰী নাম. ‘‘যো পন ভিক্খু পথৰিং খণেয্য ৰা খণাপেয্য ৰা’’তিআদীসু (পাচি. ৮৫) ৰুত্তা সসম্ভারপথৰী, যে চ কেসাদযো ৰীসতি কোট্ঠাসা, অযোলোহাদযো চ বাহিরা; সাপি ৰণ্ণাদীহি সম্ভারেহি সদ্ধিং পথৰীতি সসম্ভারপথৰী নাম. ‘‘পথৰীকসিণমেকো সঞ্জানাতী’’তিআদীসু (দী. নি. ৩.৩৬০) নিমিত্তপথৰী ‘‘আরম্মণপথৰী’’তিপি ৰুচ্চতি. পথৰীকসিণঝানলাভী দেৰলোকে নিব্বত্তো আগমনৰসেন ‘‘পথৰীদেৰো’’তি নামং লভতি. ৰুত্তঞ্হেতং – ‘‘আপো চ দেৰা পথৰী’’তিআদীসু (দী. নি. ২.৩৪০) অযং সম্মুতিপথৰী, পঞ্ঞত্তিপথৰী নামাতি ৰেদিতব্বা. ইধ পন সসম্ভারপথৰী অধিপ্পেতা (ম. নি. অট্ঠ. ১.২ পথৰীৰারৰণ্ণনা).

সদেৰকাতি সদেৰলোকা. ‘‘সদেৰতা’’তিপি পাঠো অত্থি চে সুন্দরতরং, সদেৰকো মনুস্সলোকো ওভাসিতোতি অত্থো. পুথূতি বহূ. লোকন্তরিকাতি অসুরকাযনরকানমেতং অধিৰচনং, তা পন তিণ্ণং চক্কৰাল়ানং অন্তরা একা লোকন্তরিকা হোতি, তিণ্ণং সকটচক্কানং অঞ্ঞমঞ্ঞং আহচ্চ ঠিতানং মজ্ঝে ওকাসো ৰিয একেকো লোকন্তরিকনিরযো, পরিমাণতো অট্ঠযোজনসহস্সো হোতি. অসংৰুতাতি হেট্ঠা অপ্পতিট্ঠা. তমো চাতি অন্ধকারো. তিব্বোতি বহলো ঘনো. চন্দিমসূরিযালোকাভাৰতো নিচ্চন্ধকারোৰ হোতি. ৰিহতোতি ৰিদ্ধস্তো. তদাতি যদা পন ভগৰা সত্তেসু কারুঞ্ঞতং পটিচ্চ পাটিহারিযকরণত্থং আলোকং ফরি, তদা সো তমো তিব্বো লোকন্তরিকাসু ঠিতো, ৰিহতো ৰিদ্ধস্তো অহোসীতি অত্থো.

অচ্ছেরকন্তি অচ্ছরাপহরণযোগ্গং, ৰিম্হযৰসেন অঙ্গুলীহি পহরণযোগ্গন্তি অত্থো. পাটিহীরন্তি পটিপক্খহরণতো পাটিহীরং. পটিহরতি সত্তানং দিট্ঠিমানোপগতানি ¶ চিত্তানীতি ৰা পাটিহীরং, অপ্পসন্নানং সত্তানং পসাদং পটিআহরতীতি ৰা পাটিহীরং. ‘‘পাটিহের’’ন্তিপি পাঠো, সোযেৰত্থো. এত্থ আলোকৰিধানৰিসেসস্সেতং অধিৰচনং. দিস্ৰান অচ্ছেরকং ¶ পাটিহীরন্তি এত্থ দেৰা চ মনুস্সা চ লোকন্তরিকাসু নিব্বত্তসত্তাপি চ তং ভগৰতো পাটিহারিযং দিস্ৰা পরমপ্পীতিসোমনস্সং অগমংসূতি ইদং ৰচনং আহরিত্ৰা অত্থো দট্ঠব্বো, ইতরথা ন পুব্বেন ৰা পরং, ন পরেন ৰা পুব্বং যুজ্জতি.

ইদানি ¶ ন কেৰলং মনুস্সলোকেসুযেৰ আলোকো অত্থি, সব্বত্থ তিৰিধেপি সঙ্খারসত্তোকাসসঙ্খাতে লোকে আলোকোযেৰাতি দস্সনত্থং –

ইমস্মিং লোকে পরস্মিঞ্চোভযস্মিং,

অধো চ উদ্ধং তিরিযঞ্চ ৰিত্থত’’ন্তি. – অযং গাথা ৰুত্তা;

তত্থ দেৰাতি সম্মুতিদেৰা উপপত্তিদেৰা ৰিসুদ্ধিদেৰাতি সব্বেপি দেৰা ইধ সঙ্গহিতা. দেৰা চ গন্ধব্বা চ মনুস্সা চ রক্খসা চ দেৰগন্ধব্বমনুস্সরক্খসা. সহ দেৰগন্ধব্বমনুস্সরক্খসেহীতি সদেৰগন্ধব্বমনুস্সরক্খসো. কো পন সো? লোকো, তস্মিং সদেৰগন্ধব্বমনুস্সরক্খসে লোকে. আভাতি আলোকো. উল়ারাতি এত্থাযং উল়ার-সদ্দো মধুরসেট্ঠৰিপুলাদীসু দিস্সতি. তথা হেস ‘‘উল়ারানি খাদনীযভোজনীযানি খাদন্তি ভুঞ্জন্তী’’তিআদীসু (ম. নি. ১.৩৬৬) মধুরে দিস্সতি. ‘‘উল়ারায খো পন ভৰং ৰচ্ছাযনো পসংসায সমণং গোতমং পসংসতী’’তিআদীসু (ম. নি. ১.২৮৮) সেট্ঠে. ‘‘অতিক্কম্ম দেৰানং দেৰানুভাৰং অপ্পমাণো উল়ারো ওভাসো’’তিআদীসু (দী. নি. ২.৩২; ম. নি. ৩.২০১) ৰিপুলে. স্ৰাযং ইধ সেট্ঠে দট্ঠব্বো (দী. নি. অট্ঠ. ৩.১৪২; ৰি. ৰ. অট্ঠ. ১). ৰিপুলাতি অপ্পমাণা. অজাযথাতি উপ্পজ্জি উদপাদি পৰত্তিত্থ. ইমস্মিং লোকে পরস্মিঞ্চাতি ইমস্মিং মনুস্সলোকে চ পরস্মিং দেৰলোকে চাতি অত্থো. উভযস্মিন্তি তদুভযস্মিং, অজ্ঝত্তবহিদ্ধাদীসু ৰিয দট্ঠব্বং. অধো চাতি অৰীচিআদীসু নিরযেসু. উদ্ধন্তি ভৰগ্গতোপি উদ্ধং অজটাকাসেপি. তিরিযঞ্চাতি তিরিযতোপি দসসু চক্কৰাল়সহস্সেসু. ৰিত্থতন্তি ৰিসটং. অন্ধকারং ৰিধমিত্ৰা ৰুত্তপ্পকারং লোকঞ্চ ¶ পদেসঞ্চ অজ্ঝোত্থরিত্ৰা আভা ¶ পৰত্তিত্থাতি অত্থো. অথ ৰা তিরিযঞ্চ ৰিত্থতন্তি তিরিযতো ৰিত্থতং মহন্তং, অপ্পমাণং পদেসং আভা ফরিত্ৰা অট্ঠাসীতি অত্থো.

অথ ভগৰা দসসহস্সচক্কৰাল়েসু আলোকফরণং কত্ৰা অভিঞ্ঞাপাদকং চতুত্থজ্ঝানং সমাপজ্জিত্ৰা ততো ৰুট্ঠায আৰজ্জিত্ৰা অধিট্ঠানচিত্তেন আকাসমব্ভুগ্গন্ত্ৰা তেসং ঞাতীনং সীসেসু পাদপংসুং ওকিরমানো ৰিয মহতিযা দেৰমনুস্সপরিসায মজ্ঝে যমকপাটিহারিযং দস্সেতি. তং পন পাল়িতো এৰং ৰেদিতব্বং (পটি. ম. ১.১১৬) –

‘‘কতমং ¶ তথাগতস্স যমকপাটিহীরে ঞাণং? ইধ তথাগতো যমকপাটিহীরং করোতি অসাধারণং সাৰকেহি উপরিমকাযতো অগ্গিক্খন্ধো পৰত্ততি, হেট্ঠিমকাযতো উদকধারা পৰত্ততি. হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততি…পে… পুরত্থিমকাযতো অগ্গিক্খন্ধো পৰত্ততি, পচ্ছিমকাযতো উদকধারা পৰত্ততি. পচ্ছিমকাযতো অগ্গিক্খন্ধো পৰত্ততি, পুরত্থিমকাযতো উদকধারা পৰত্ততি…পে… দক্খিণঅক্খিতো অগ্গিক্খন্ধো পৰত্ততি, ৰামঅক্খিতো উদকধারা পৰত্ততি. ৰামঅক্খিতো অগ্গিক্খন্ধো পৰত্ততি, দক্খিণঅক্খিতো উদকধারা পৰত্ততি…পে… দক্খিণকণ্ণসোততো অগ্গিক্খন্ধো পৰত্ততি, ৰামকণ্ণসোততো উদকধারা পৰত্ততি. ৰামকণ্ণসোততো অগ্গিক্খন্ধো পৰত্ততি, দক্খিণকণ্ণসোততো উদকধারা পৰত্ততি…পে… দক্খিণনাসিকাসোততো অগ্গিক্খন্ধো পৰত্ততি, ৰামনাসিকাসোততো উদকধারা পৰত্ততি. ৰামনাসিকাসোততো অগ্গিক্খন্ধো পৰত্ততি, দক্খিণনাসিকাসোততো উদকধারা পৰত্ততি…পে… দক্খিণঅংসকূটতো অগ্গিক্খন্ধো পৰত্ততি, ৰামঅংসকূটতো উদকধারা পৰত্ততি. ৰামঅংসকূটতো অগ্গিক্খন্ধো পৰত্ততি, দক্খিণঅংসকূটতো উদকধারা পৰত্ততি…পে… দক্খিণহত্থতো অগ্গিক্খন্ধো পৰত্ততি, ৰামহত্থতো উদকধারা পৰত্ততি. ৰামহত্থতো অগ্গিক্খন্ধো পৰত্ততি, দক্খিণহত্থতো উদকধারা পৰত্ততি…পে… দক্খিণপস্সতো অগ্গিক্খন্ধো পৰত্ততি, ৰামপস্সতো উদকধারা পৰত্ততি. ৰামপস্সতো ¶ অগ্গিক্খন্ধো পৰত্ততি, দক্খিণপস্সতো উদকধারা পৰত্ততি…পে… দক্খিণপাদতো অগ্গিক্খন্ধো পৰত্ততি, ৰামপাদতো উদকধারা পৰত্ততি. ৰামপাদতো অগ্গিক্খন্ধো পৰত্ততি, দক্খিণপাদতো উদকধারা পৰত্ততি…পে… অঙ্গুলঙ্গুলেহি অগ্গিক্খন্ধো পৰত্ততি, অঙ্গুলন্তরিকাহি উদকধারা পৰত্ততি. অঙ্গুলন্তরিকাহি অগ্গিক্খন্ধো পৰত্ততি, অঙ্গুলঙ্গুলেহি উদকধারা পৰত্ততি…পে… একেকলোমতো অগ্গিক্খন্ধো পৰত্ততি, একেকলোমতো উদকধারা পৰত্ততি. লোমকূপতো লোমকূপতো অগ্গিক্খন্ধো পৰত্ততি, লোমকূপতো লোমকূপতো উদকধারা পৰত্ততি – ছন্নং ৰণ্ণানং নীলানং পীতকানং লোহিতকানং ওদাতানং মঞ্জিট্ঠানং পভস্সরানং.

‘‘ভগৰা চঙ্কমতি, নিম্মিতো তিট্ঠতি ৰা নিসীদতি ৰা সেয্যং ৰা কপ্পেতি. ভগৰা তিট্ঠতি, নিম্মিতো চঙ্কমতি ৰা নিসীদতি ৰা সেয্যং ৰা কপ্পেতি. ভগৰা নিসীদতি, নিম্মিতো চঙ্কমতি ৰা তিট্ঠতি ৰা সেয্যং ৰা কপ্পেতি. ভগৰা সেয্যং কপ্পেতি, নিম্মিতো চঙ্কমতি ৰা তিট্ঠতি ৰা নিসীদতি ৰা. নিম্মিতো চঙ্কমতি, ভগৰা তিট্ঠতি ৰা নিসীদতি ৰা সেয্যং ৰা কপ্পেতি. নিম্মিতো তিট্ঠতি, ভগৰা চঙ্কমতি ৰা নিসীদতি ৰা সেয্যং ৰা কপ্পেতি. নিম্মিতো নিসীদতি, ভগৰা চঙ্কমতি ৰা ¶ তিট্ঠতি ৰা সেয্যং ৰা কপ্পেতি. নিম্মিতো সেয্যং কপ্পেতি, ভগৰা চঙ্কমতি ৰা তিট্ঠতি ৰা নিসীদতি ৰা, ইদং তথাগতস্স যমকপাটিহীরে ঞাণন্তি ৰেদিতব্বং’’.

তস্স পন ভগৰতো তেজোকসিণসমাপত্তিৰসেন উপরিমকাযতো অগ্গিক্খন্ধো পৰত্ততি. আপোকসিণসমাপত্তিৰসেন হেট্ঠিমকাযতো উদকধারা পৰত্ততীতি পুন উদকধারায পৰত্তট্ঠানতো অগ্গিক্খন্ধো পৰত্ততি, অগ্গিক্খন্ধস্স পৰত্তট্ঠানতো উদকধারা পৰত্ততীতি দস্সেতুং, ‘‘হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততী’’তি ৰুত্তন্তি ৰেদিতব্বা. এসেৰ নযো সেসপদেসুপি. অগ্গিক্খন্ধো পনেত্থ উদকধারায অসম্মিস্সোৰ অহোসি. তথা উদকধারা অগ্গিক্খন্ধেন. রস্মীসু পন দুতিযা দুতিযা রস্মি পুরিমায পুরিমায যমকা ৰিয একক্খণে পৰত্ততি. দ্ৰিন্নঞ্চ চিত্তানং একক্খণে পৰত্তি নাম ¶ নত্থি, বুদ্ধানং পন ভৰঙ্গপরিৰাসস্স লহুকতায পঞ্চহাকারেহি চিণ্ণৰসিতায এতা রস্মিযো একক্খণে ৰিয পৰত্তন্তি, তস্সা পন রস্মিযা আৰজ্জনপরিকম্মাধিট্ঠানানি ৰিসুংযেৰ. নীলরস্মিঅত্থায হি ভগৰা ¶ নীলকসিণং সমাপজ্জতি. পীতরস্মিআদীনং অত্থায পীতকসিণাদীনি সমাপজ্জতি.

এৰং ভগৰতো যমকপাটিহীরে কযিরমানে সকলস্সাপি দসসহস্সচক্কৰাল়স্স অলঙ্কারকরণকালো ৰিয অহোসি. তেন ৰুত্তং –

‘‘সত্তুত্তমো অনধিৰরো ৰিনাযকো, সত্থা অহূ দেৰমনুস্সপূজিতো;

মহানুভাৰো সতপুঞ্ঞলক্খণো, দস্সেসি অচ্ছেরকং পাটিহীর’’ন্তি.

তত্থ সত্তুত্তমোতি অত্তনো সীলাদীহি গুণেহি সব্বেসু সত্তেসু উত্তমো পৰরো সেট্ঠোতি সত্তুত্তমো, সত্তানং ৰা উত্তমো সত্তুত্তমো. সত্তন্তি হি ঞাণস্স নামং, তেন দসবলচতুৰেসারজ্জছঅসাধারণঞাণসঙ্খাতেন সত্তেন সেট্ঠো উত্তমোতি সত্তুত্তমো, সমানাধিকরণৰসেন সত্তো উত্তমোতি ৰা সত্তুত্তমো. যদি এৰং ‘‘উত্তমসত্তো’’তি ৰত্তব্বং উত্তম-সদ্দস্স পুব্বনিপাতপাঠতো. ন পনেস ভেদো অনিযমতো বহুলৰচনতো চ নরুত্তমপুরিসুত্তমনরৰরাদি-সদ্দা ৰিয দট্ঠব্বো. অথ ৰা সত্তং উত্তমং যস্স সো সত্তুত্তমো, ইধাপি চ উত্তম-সদ্দস্স পুব্বনিপাতো ভৰতি. উত্তমসত্তোতি ৰিসেসনস্স পুব্বনিপাতপাঠতো ‘‘চিত্তগূ পদ্ধগূ’’তি এত্থ ৰিযাতি নাযং দোসো. উভযৰিসেসনতো ৰা আহিতগ্গিআদিপাঠো ৰিয দট্ঠব্বো. ৰিনাযকোতি বহূহি ৰিনযনূপাযেহি সত্তে ৰিনেতি দমেতীতি ৰিনাযকো. সত্থাতি ¶ দিট্ঠধম্মিকসম্পরাযিকত্থেহি যথারহং সত্তে অনুসাসতীতি সত্থা. অহূতি অহোসি. দেৰমনুস্সপূজিতোতি দিব্বেহি পঞ্চকামগুণেহি দিব্বন্তি কীল়ন্তীতি দেৰা. মনস্স উস্সন্নত্তা মনুস্সা, দেৰা চ মনুস্সা চ দেৰমনুস্সা, দেৰমনুস্সেহি ¶ পূজিতো দেৰমনুস্সপূজিতো. পুপ্ফাদিপূজায চ পচ্চযপূজায চ পূজিতো, অপচিতোতি অত্থো. কস্মা পন দেৰমনুস্সানমেৰ গহণং কতং, ননু ভগৰা তিরচ্ছানগতেহিপি আরৰাল়কাল়াপলালধনপালপালিলেয্যকনাগাদীহি সাতাগিরাল়ৰকহেমৰতসূচিলোমখরলোমযক্খাদীহি ৰিনিপাতগতেহিপি পূজিতোযেৰাতি? সচ্চমেৰেতং, উক্কট্ঠপরিচ্ছেদৰসেন সব্বপুগ্গলপরিচ্ছেদৰসেন চেতং ৰুত্তন্তি ৰেদিতব্বং. মহানুভাৰোতি মহতা বুদ্ধানুভাৰেন সমন্নাগতো. সতপুঞ্ঞলক্খণোতি অনন্তেসু চক্কৰাল়েসু সব্বে সত্তা একেকং পুঞ্ঞকম্মং সতক্খত্তুং করেয্যুং এত্তকেহি জনেহি কতকম্মং বোধিসত্তো সযমেৰ এককো সতগুণং কত্ৰা নিব্বত্তো. তস্মা ‘‘সতপুঞ্ঞলক্খণো’’তি ৰুচ্চতি. কেচি পন ‘‘সতেন সতেন পুঞ্ঞকম্মেন নিব্বত্তএকেকলক্খণো’’তি ৰদন্তি. ‘‘এৰং সন্তে যো কোচি বুদ্ধো ভৰেয্যা’’তি তং অট্ঠকথাসু পটিক্খিত্তং. দস্সেসীতি ¶ সব্বেসং দেৰমনুস্সানং অতিৰিম্হযকরং যমকপাটিহারিযং দস্সেসি.

অথ সত্থা আকাসে পাটিহারিযং কত্ৰা মহাজনস্স চিত্তাচারং ওলোকেত্ৰা তস্স অজ্ঝাসযানুকূলং ধম্মকথং চঙ্কমন্তো কথেতুকামো আকাসে দসসহস্সচক্কৰাল়ৰিত্থতং সব্বরতনমযং রতনচঙ্কমং মাপেসি. তেন ৰুত্তং –

‘‘সো যাচিতো দেৰৰরেন চক্খুমা, অত্থং সমেক্খিত্ৰা তদা নরুত্তমো;

চঙ্কমং মাপযি লোকনাযকো, সুনিট্ঠিতং সব্বরতননিম্মিত’’ন্তি.

তত্থ সোতি সো সত্থা. যাচিতোতি পঠমমেৰ অট্ঠমে সত্তাহে ধম্মদেসনায যাচিতোতি অত্থো. দেৰৰরেনাতি সহম্পতিব্রহ্মুনা. চক্খুমাতি এত্থ চক্খতীতি চক্খু, সমৰিসমং ৰিভাৰযতীতি অত্থো. তং পন চক্খু দুৰিধং – ঞাণচক্খু, মংসচক্খূতি. তত্থ ঞাণচক্খু পঞ্চৰিধং – বুদ্ধচক্খু, ধম্মচক্খু, সমন্তচক্খু, দিব্বচক্খু, পঞ্ঞাচক্খূতি. তেসু বুদ্ধচক্খু নাম আসযানুসযঞাণঞ্চেৰ ইন্দ্রিযপরোপরিযত্তঞাণঞ্চ, যং ‘‘বুদ্ধচক্খুনা লোকং ৰোলোকেন্তো’’তি (দী. নি. ২.৬৯; ম. নি. ১.২৮৩; ২.৩৩৯; সং. নি. ১.১৭২; মহাৰ. ৯) আগতং. ধম্মচক্খু নাম হেট্ঠিমা ¶ তযো মগ্গা তীণি চ ফলানি, যং ‘‘ৰিরজং ৰীতমলং ধম্মচক্খুং উদপাদী’’তি (দী. নি. ১.৩৫৫; সং. নি. ৫.১০৮১; মহাৰ. ১৬; পটি. ম. ২.৩০) আগতং. সমন্তচক্খু নাম সব্বঞ্ঞুতঞ্ঞাণং ¶ , যং ‘‘তথূপমং ধম্মমযং, সুমেধ, পাসাদমারুয্হ সমন্তচক্খূ’’তি (দী. নি. ২.৭০; ম. নি. ১.২৮২; ২.৩৩৮; সং. নি. ১.১৭২; মহাৰ. ৮) আগতং. দিব্বচক্খু নাম আলোকৰড্ঢনেন উপ্পন্নাভিঞ্ঞাচিত্তেন সম্পযুত্তঞাণং, যং ‘‘দিব্বেন চক্খুনা ৰিসুদ্ধেনা’’তি (ম. নি. ১.১৪৮, ২৮৪, ৩৮৫, ৪৩২; ২.৩৪১; ৩.৮২, ২৬১; মহাৰ. ১০) আগতং. পঞ্ঞাচক্খু নাম ‘‘চক্খুং উদপাদি, ঞাণং উদপাদী’’তি (সং. নি. ৫.১০৮২; মহাৰ. ১৫; কথা. ৪০৫; পটি. ম. ২.৩০) এত্থ পুব্বেনিৰাসাদিঞাণং পঞ্ঞাচক্খূতি আগতং.

মংসচক্খু নাম ‘‘চক্খুঞ্চ পটিচ্চ রূপে চা’’তি (ম. নি. ১.২০৪, ৪০০; ৩.৪২১, ৪২৫-৪২৬; সং. নি. ২.৪৩; ৪.৬০; কথা. ৪৬৫, ৪৬৭) এত্থ পসাদমংসচক্খু ৰুত্তং (দী. নি. অট্ঠ. ১.২১৩). তং পন দুৰিধং – সসম্ভারচক্খু পসাদচক্খূতি. তেসু য্ৰাযং অক্খিকূপকে অক্খিপত্তকেহি পরিৰারিতো মংসপিণ্ডো যত্থ চতস্সো ধাতুযো ৰণ্ণগন্ধরসোজা সম্ভৰো জীৰিতং ভাৰো চক্খুপসাদো কাযপসাদোতি ¶ সঙ্খেপতো তেরস সম্ভারা হোন্তি. ৰিত্থারতো পন সম্ভৰমানানি চতুসমুট্ঠানানি ছত্তিংস জীৰিতং ভাৰো চক্খুপসাদো কাযপসাদোতি ইমে কম্মসমুট্ঠানা চত্তারো চাতি সসম্ভারা হোন্তি, ইদং সসম্ভারচক্খু নাম. যং পন সেতমণ্ডলপরিচ্ছিন্নেন কণ্হমণ্ডলেন পরিৰারিতে দিট্ঠমণ্ডলে সন্নিৰিট্ঠং রূপদস্সনসমত্থং পসাদমত্তং, ইদং পসাদচক্খু নাম. সব্বানি পনেতানি একৰিধানি অনিচ্চতো সঙ্খততো, দুৰিধানি সাসৰানাসৰতো লোকিযলোকুত্তরতো, তিৰিধানি ভূমিতো উপাদিণ্ণত্তিকতো, চতুব্বিধানি একন্তপরিত্তঅপ্পমাণানিযতারম্মণতো, পঞ্চৰিধানি রূপনিব্বানারূপসব্বারম্মণানারম্মণৰসেন, ছব্বিধানি হোন্তি বুদ্ধচক্খাদিৰসেন. ইচ্চেৰমেতানি ৰুত্তপ্পকারানি চক্খূনি অস্স ভগৰতো সন্তীতি ভগৰা চক্খুমাতি ৰুচ্চতি. অত্থং সমেক্খিত্ৰাতি চঙ্কমং মাপেত্ৰা, ধম্মদেসনানিমিত্তং দেৰমনুস্সানং হিতত্থং উপপরিক্খিত্ৰা উপধারেত্ৰাতি অধিপ্পাযো. মাপযীতি মাপেসি. লোকনাযকোতি সগ্গমোক্খাভিমুখং লোকং নযতীতি লোকনাযকো. সুনিট্ঠিতন্তি সুট্ঠু নিট্ঠিতং, পরিযোসিতন্তি অত্থো. সব্বরতননিম্মিতন্তি দসৰিধরতনমযং.

ইদানি ¶ ভগৰতো তিৰিধপাটিহারিযসম্পত্তিদস্সনত্থং –

‘‘ইদ্ধী চ আদেসনানুসাসনী, তিপাটিহীরে ভগৰা ৰসী অহু;

চঙ্কমং মাপযি লোকনাযকো, সুনিট্ঠিতং সব্বরতননিম্মিত’’ন্তি. – ৰুত্তং;

তত্থ ¶ ইদ্ধীতি ইদ্ধিৰিধং ইদ্ধিপাটিহারিযং নাম. তং পন একোপি হুত্ৰা বহুধা হোতি, বহুধাপি হুত্ৰা একো হোতীতিআদিনযপ্পৰত্তং (দী. নি. ১.২৩৯; ম. নি. ১.১৪৭; পটি. ম. ৩.১০). আদেসনাতি পরস্স চিত্তাচারং ঞত্ৰা কথনং আদেসনাপাটিহারিযং, তং সাৰকানঞ্চ বুদ্ধানঞ্চ সততধম্মদেসনা. অনুসাসনীতি অনুসাসনিপাটিহারিযং, তস্স তস্স অজ্ঝাসযানুকূলমোৰাদোতি অত্থো. ইতি এতানি তীণি পাটিহারিযানি. তত্থ ইদ্ধিপাটিহারিযেন অনুসাসনিপাটিহারিযং মহামোগ্গল্লানস্স আচিণ্ণং, আদেসনাপাটিহারিযেন অনুসাসনিপাটিহারিযং ধম্মসেনাপতিস্স, অনুসাসনিপাটিহারিযং পন বুদ্ধানং সততধম্মদেসনা. তিপাটিহীরেতি ¶ এতেসু তীসু পাটিহারিযেসূতি অত্থো. ভগৰাতি ইদং গুণৰিসিট্ঠসত্তুত্তমগরুগারৰাধিৰচনং. ৰুত্তঞ্হেতং পোরাণেহি –

‘‘ভগৰাতি ৰচনং সেট্ঠং, ভগৰাতি ৰচনমুত্তমং;

গরুগারৰযুত্তো সো, ভগৰা তেন ৰুচ্চতী’’তি. (ৰিসুদ্ধি. ১.১৪২; ম. নি. অট্ঠ. ১.মূলপরিযাযসুত্তৰণ্ণনা; পারা. অট্ঠ. ১.১ ৰেরঞ্জকণ্ডৰণ্ণনা; ইতিৰু. অট্ঠ. নিদানৰণ্ণনা; মহানি. অট্ঠ. ৫০);

ৰসীতি এতস্মিং তিৰিধেপি পাটিহারিযে ৰসিপ্পত্তো, চিণ্ণৰসীতি অত্থো. ৰসিযো নাম পঞ্চ ৰসিযো – আৰজ্জনসমাপজ্জনঅধিট্ঠানৰুট্ঠানপচ্চৰেক্খণসঙ্খাতা. তত্র যং যং ঝানং যথিচ্ছকং যদিচ্ছকং যাৰতিচ্ছকং আৰজ্জতি আৰজ্জনায দন্ধাযিতত্তং নত্থীতি সীঘং আৰজ্জেতুং সমত্থতা আৰজ্জনৰসী নাম. তথা যং যং ঝানং যথিচ্ছকং…পে… সমাপজ্জতি সমাপজ্জনায দন্ধাযিতত্তং নত্থীতি সীঘং সমাপজ্জনসমত্থতা সমাপজ্জনৰসী নাম. দীঘং কালং ঠপেতুং সমত্থতা অধিট্ঠানৰসী নাম. তথেৰ লহুং ৰুট্ঠাতুং সমত্থতা ৰুট্ঠানৰসী নাম. পচ্চৰেক্খণৰসী ¶ পন পচ্চৰেক্খণজৰনানেৰ হোন্তি তানি আৰজ্জনানন্তরানেৰ হুত্ৰা উপ্পজ্জন্তীতি আৰজ্জনৰসিযা এৰ ৰুত্তানি. ইতি ইমাসু পঞ্চসু ৰসীসু চিণ্ণৰসিতা ৰসী নাম হোতি. তেন ৰুত্তং – ‘‘তিপাটিহীরে ভগৰা ৰসী অহূ’’তি.

ইদানি তস্স রতনচঙ্কমস্স নিম্মিতৰিধানস্স দস্সনত্থং –

‘‘দসসহস্সীলোকধাতুযা, সিনেরুপব্বতুত্তমে;

থম্ভেৰ দস্সেসি পটিপাটিযা, চঙ্কমে রতনামযে’’তি. – আদিগাথাযো ৰুত্তা;

তত্থ ¶ দসসহস্সীলোকধাতুযাতি দসসু চক্কৰাল়সহস্সেসু. সিনেরুপব্বতুত্তমেতি মহামেরুসঙ্খাতে সেট্ঠপব্বতে. থম্ভেৰাতি থম্ভে ৰিয দসচক্কৰাল়সহস্সেসু যে সিনেরুপব্বতা, তে পটিপাটিযা ঠিতে সুৰণ্ণথম্ভে ৰিয কত্ৰা তেসং উপরি চঙ্কমং মাপেত্ৰা দস্সেসীতি অত্থো. রতনামযেতি রতনমযে.

১৩. দসসহস্সী অতিক্কম্মাতি রতনচঙ্কমং পন ভগৰা মাপেন্তো তস্স একং কোটিং সব্বপরিযন্তং পাচীনচক্কৰাল়মুখৰট্টিং একং কোটিং পচ্ছিমচক্কৰাল়মুখৰট্টিং অতিক্কমিত্ৰা ঠিতং কত্ৰা মাপেসি. তেন ৰুত্তং –

‘‘দসসহস্সী অতিক্কম্ম, চঙ্কমং মাপযী জিনো;

সব্বসোণ্ণমযা পস্সে, চঙ্কমে রতনামযে’’তি.

তত্থ জিনোতি কিলেসারিজযনতো জিনো. সব্বসোণ্ণমযা পস্সেতি তস্স পন এৰং নিম্মিতস্স চঙ্কমস্স ¶ উভযপস্সেসু সুৰণ্ণমযা পরমরমণীযা মরিযাদভূমি অহোসি, মজ্ঝে মণিমযাতি অধিপ্পাযো.

১৪. তুলাসঙ্ঘাটাতি তুলাযুগল়া, তা নানারতনমযাতি ৰেদিতব্বা. অনুৰগ্গাতি অনুরূপা. সোৰণ্ণফলকত্থতাতি সোৰণ্ণমযেহি ফলকেহি অত্থতা, তুলাসঙ্ঘাতানং উপরি সুৰণ্ণমযো পদরচ্ছদোতি অত্থো. ৰেদিকা সব্বসোৰণ্ণাতি ৰেদিকা পন সব্বাপি সুৰণ্ণমযা, যা পনেসা চঙ্কমনপরিক্খেপৰেদিকা, সা একাৰ অঞ্ঞেহি রতনেহি অসম্মিস্সাতি অত্থো. দুভতো পস্সেসু নিম্মিতাতি উভোসু পস্সেসু নিম্মিতা. দ-কারো পদসন্ধিকরো.

১৫. মণিমুত্তাৰালুকাকিণ্ণাতি ¶ মণিমুত্তামযৰালুকাকিণ্ণা. অথ ৰা মণযো চ মুত্তা চ ৰালুকা চ মণিমুত্তাৰালুকা. তাহি মণিমুত্তাৰালুকাহি আকিণ্ণা সন্থতাতি মণিমুত্তাৰালুকাকিণ্ণা. নিম্মিতোতি ইমিনাকারেন নিম্মিতো কতো. রতনামযোতি সব্বরতনমযো, চঙ্কমোতি অত্থো. ওভাসেতি দিসা সব্বাতি সব্বাপি দস দিসা ওভাসেতি পকাসেতি. সতরংসীৰাতি সহস্সরংসিআদিচ্চো ৰিয. উগ্গতোতি উদিতো. যথা পন অব্ভুগ্গতো সহস্সরংসি সব্বাপি দস দিসা ওভাসেতি, এৰমেৰ এসোপি সব্বরতনমযো চঙ্কমো ওভাসেতীতি অত্থো.

ইদানি ¶ পন নিট্ঠিতে চঙ্কমে তত্থ ভগৰতো পৰত্তিদস্সনত্থং –

‘‘তস্মিং চঙ্কমনে ধীরো, দ্ৰত্তিংসৰরলক্খণো;

ৰিরোচমানো সম্বুদ্ধো, চঙ্কমে চঙ্কমী জিনো.

‘‘দিব্বং মন্দারৰং পুপ্ফং, পদুমং পারিছত্তকং;

চঙ্কমনে ওকিরন্তি, সব্বে দেৰা সমাগতা.

‘‘পস্সন্তি তং দেৰসঙ্ঘা, দসসহস্সী পমোদিতা;

নমস্সমানা নিপতন্তি, তুট্ঠহট্ঠা পমোদিতা’’তি. – গাথাযো ৰুত্তা;

তত্থ ধীরোতি ধিতিযুত্তো. দ্ৰত্তিংসৰরলক্খণোতি সুপ্পতিট্ঠিতপাদতলাদীহি দ্ৰত্তিংসমহাপুরিসলক্খণেহি সমন্নাগতোতি অত্থো. দিব্বন্তি দেৰলোকে ভৰং জাতং দিব্বং. পারিছত্তকন্তি দেৰানং তাৰতিংসানং কোৰিল়াররুক্খস্স নিস্সন্দেন সমন্তা যোজনসতপরিমাণো পরমদস্সনীযো পারিচ্ছত্তকরুক্খো নিব্বত্তি. যস্মিং পুপ্ফিতে সকলং দেৰনগরং একসুরভিগন্ধৰাসিতং হোতি, তস্স কুসুমরেণুওকিণ্ণানি নৰকনকৰিমানানি পিঞ্জরানি হুত্ৰা খাযন্তি. ইমস্স পন পারিচ্ছত্তকরুক্খস্স পুপ্ফঞ্চ পারিচ্ছত্তকন্তি ৰুত্তং. চঙ্কমে ওকিরন্তীতি তস্মিং রতনচঙ্কমে অৰকিরন্তি, তেন ৰুত্তপ্পকারেন পুপ্ফেন তস্মিং চঙ্কমে চঙ্কমমানং ভগৰন্তং পূজেন্তীতি অত্থো. সব্বে দেৰাতি কামাৰচরদেৰাদযো দেৰা. তেনাহ ‘‘পস্সন্তি ¶ তং দেৰসঙ্ঘা’’তি. তং ভগৰন্তং রতনচঙ্কমনে চঙ্কমন্তং সকেসু আলযেসুপি পস্সন্তীতি অত্থো. দসসহস্সীতি ভুম্মত্থে পচ্চত্তৰচনং, দসসহস্সিযং দেৰসঙ্ঘা তং পস্সন্তীতি অত্থো. পমোদিতাতি পমুদিতা. নিপতন্তীতি ¶ সন্নিপতন্তি. তুট্ঠহট্ঠাতি পীতিৰসেন তুট্ঠহট্ঠা. পমোদিতাতি ইদানি ৰত্তব্বেহি তাৰতিংসাদিদেৰেহি সদ্ধিন্তি সম্বন্ধো দট্ঠব্বো, ইতরথা পুনরুত্তিদোসতো ন মুচ্চতি. অথ ৰা পমোদিতা তং ভগৰন্তং পস্সন্তি, তুট্ঠহট্ঠা পমোদিতা তহিং তহিং সন্নিপতন্তীতি অত্থো.

ইদানি যে পস্সিংসু যে সন্নিপতিংসু, তে সরূপতো দস্সেতুং –

‘‘তাৰতিংসা চ যামা চ, তুসিতা চাপি দেৰতা;

নিম্মানরতিনো দেৰা, যে দেৰা ৰসৰত্তিনো;

উদগ্গচিত্তা সুমনা, পস্সন্তি লোকনাযকং.

‘‘সদেৰগন্ধব্বমনুস্সরক্খসা ¶ , নাগা সুপণ্ণা অথ ৰাপি কিন্নরা;

পস্সন্তি তং লোকহিতানুকম্পকং, নভেৰ অচ্চুগ্গতচন্দমণ্ডলং.

‘‘আভস্সরা সুভকিণ্হা, ৰেহপ্ফলা অকনিট্ঠা চ দেৰতা;

সুসুদ্ধসুক্কৰত্থৰসনা, তিট্ঠন্তি পঞ্জলীকতা.

‘‘মুঞ্চন্তি পুপ্ফং পন পঞ্চৰণ্ণিকং, মন্দারৰং চন্দনচুণ্ণমিস্সিতং;

ভমেন্তি চেলানি চ অম্বরে তদা, অহো জিনো লোকহিতানুকম্পকো’’তি. –

তত্থ উদগ্গচিত্তাতি পীতিসোমনস্সৰসেন উদগ্গচিত্তা. সুমনাতি উদগ্গচিত্তত্তা এৰ সুমনা. লোকহিতানুকম্পকন্তি লোকহিতঞ্চ লোকানুকম্পকঞ্চ. লোকহিতেন ৰা অনুকম্পকং লোকহিতানুকম্পকং. নভেৰ অচ্চুগ্গতচন্দমণ্ডলন্তি এত্থ আকাসে অভিনৰোদিতং পরিপুণ্ণং সব্বোপদ্দৰৰিনিমুত্তং সরদসমযে চন্দমণ্ডলং ৰিয বুদ্ধসিরিযা ৰিরোচমানং নযনানন্দকরং পস্সন্তীতি অত্থো.

আভস্সরাতি উক্কট্ঠপরিচ্ছেদৰসেন ৰুত্তং. পরিত্তাভঅপ্পমাণাভআভস্সরাপরিত্তমজ্ঝিমপণীতভেদেন দুতিযজ্ঝানেনাভিনিব্বত্তা সব্বেৰ গহিতাতি ¶ ৰেদিতব্বা. সুভকিণ্হাতি ইদং উক্কট্ঠপরিচ্ছেদৰসেনেৰ ৰুত্তং, তস্মা পরিত্তসুভঅপ্পমাণসুভসুভকিণ্হাপরিত্তাদিভেদেন ততিযজ্ঝানেন নিব্বত্তা সব্বেৰ গহিতাতি ৰেদিতব্বা. ৰেহপ্ফলাতি ৰিপুলা ফলাতি ৰেহপ্ফলা. তে চতুত্থজ্ঝাননিব্বত্তা অসঞ্ঞসত্তেহি একতলৰাসিনো. হেট্ঠা পন পঠমজ্ঝাননিব্বত্তা ব্রহ্মকাযিকাদযো দস্সিতা. তস্মা ইধ ন দস্সিতা. চক্খুসোতানমভাৰতো অসঞ্ঞসত্তা চ অরূপিনো চ ইধ ন উদ্দিট্ঠা. অকনিট্ঠা চ দেৰতাতি ইধাপি উক্কট্ঠপরিচ্ছেদৰসেনেৰ ৰুত্তং. তস্মা অৰিহাতপ্পসুদস্সাসুদস্সিঅকনিট্ঠসঙ্খাতা পঞ্চপি সুদ্ধাৰাসা গহিতাতি ৰেদিতব্বা. সুসুদ্ধসুক্কৰত্থৰসনাতি সুট্ঠু সুদ্ধানি সুসুদ্ধানি সুক্কানি ওদাতানি. সুসুদ্ধানি সুক্কানি ৰত্থানি নিৰত্থানি চেৰ পারুতানি চ যেহি ¶ তে সুসুদ্ধসুক্কৰত্থৰসনা, পরিদহিতপরিসুদ্ধপণ্ডরৰত্থাতি অত্থো. ‘‘সুসুদ্ধসুক্কৰসনা’’তিপি পাঠো. পঞ্জলীকতাতি কতপঞ্জলিকা কমলমকুলসদিসং অঞ্জলিং সিরসি কত্ৰা তিট্ঠন্তি.

মুঞ্চন্তীতি ¶ ওকিরন্তি. পুপ্ফং পনাতি কুসুমং পন. ‘‘পুপ্ফানি ৰা’’তিপি পাঠো, ৰচনৰিপরিযাসো দট্ঠব্বো, অত্থো পনস্স সোযেৰ. পঞ্চৰণ্ণিকন্তি পঞ্চৰণ্ণং – নীলপীতলোহিতোদাতমঞ্জিট্ঠকৰণ্ণৰসেন পঞ্চৰণ্ণং. চন্দনচুণ্ণমিস্সিতন্তি চন্দনচুণ্ণেন মিস্সিতং. ভমেন্তি চেলানীতি ভমযন্তি ৰত্থানি. অহো জিনো লোকহিতানুকম্পকোতি ‘‘অহো জিনো লোকহিতো অহো চ লোকহিতানুকম্পকো অহো কারুণিকো’’তি এৰমাদীনি থুতিৰচনানি উগ্গিরন্তা. মুঞ্চন্তি পুপ্ফং ভমযন্তি চেলানীতি সম্বন্ধো.

ইদানি তেহি পযুত্তানি থুতিৰচনানি দস্সেতুং ইমা গাথাযো ৰুত্তা –

‘‘তুৰং সত্থা চ কেতূ চ, ধজো যূপো চ পাণিনং;

পরাযনো পতিট্ঠা চ, দীপো চ দ্ৰিপদুত্তমো.

‘‘দসসহস্সীলোকধাতুযা, দেৰতাযো মহিদ্ধিকা;

পরিৰারেত্ৰা নমস্সন্তি, তুট্ঠহট্ঠা পমোদিতা.

‘‘দেৰতা দেৰকঞ্ঞা চ, পসন্না তুট্ঠমানসা;

পঞ্চৰণ্ণিকপুপ্ফেহি, পূজযন্তি নরাসভং.

‘‘পস্সন্তি তং দেৰসঙ্ঘা, পসন্না তুট্ঠমানসা;

পঞ্চৰণ্ণিকপুপ্ফেহি, পূজযন্তি নরাসভং.

‘‘অহো ¶ অচ্ছরিযং লোকে, অব্ভুতং লোমহংসনং;

ন মেদিসং ভূতপুব্বং, অচ্ছেরং লোমহংসনং.

‘‘সকসকম্হি ভৰনে, নিসীদিত্ৰান দেৰতা;

হসন্তি তা মহাহসিতং, দিস্ৰানচ্ছেরকং নভে.

‘‘আকাসট্ঠা চ ভূমট্ঠা, তিণপন্থনিৰাসিনো;

কতঞ্জলী নমস্সন্তি, তুট্ঠহট্ঠা পমোদিতা.

‘‘যেপি দীঘাযুকা নাগা, পুঞ্ঞৰন্তো মহিদ্ধিকো;

পমোদিতা নমস্সন্তি, পূজযন্তি নরুত্তমং.

‘‘সঙ্গীতিযো ¶ পৰত্তেন্তি, অম্বরে অনিলঞ্জসে;

চম্মনদ্ধানি ৰাদেন্তি, দিস্ৰানচ্ছেরকং নভে.

‘‘সঙ্খা চ পণৰা চেৰ, অথোপি ডিণ্ডিমা বহূ;

অন্তলিক্খস্মিং ৰজ্জন্তি, দিস্ৰানচ্ছেরকং নভে.

‘‘অব্ভুতো ৰত নো অজ্জ, উপ্পজ্জি লোমহংসনো;

ধুৰমত্থসিদ্ধিং লভাম, খণো নো পটিপাদিতো.

‘‘বুদ্ধোতি তেসং সুত্ৰান, পীতি উপ্পজ্জি তাৰদে;

বুদ্ধো বুদ্ধোতি কথযন্তা, তিট্ঠন্তি পঞ্জলীকতা.

‘‘হিঙ্কারা সাধুকারা চ, উক্কুট্ঠি সম্পহংসনং;

পজা চ ৰিৰিধা গগনে, ৰত্তন্তি পঞ্জলীকতা.

‘‘গাযন্তি সেল়েন্তি চ ৰাদযন্তি চ, ভুজানি পোথেন্তি চ নচ্চযন্তি চ;

মুঞ্চন্তি পুপ্ফং পন পঞ্চৰণ্ণিকং, মন্দারৰং চন্দনচুণ্ণমিস্সিতং.

‘‘যথা তুয্হং মহাৰীর, পাদেসু চক্কলক্খণং;

ধজৰজিরপটাকা, ৰড্ঢমানঙ্কুসাচিত’’ন্তি.

তত্থ ইধলোকপরলোকহিতত্থং সাসতীতি সত্থা. কেতূতি কেতুনো অপচিতিকাতব্বট্ঠেন কেতু ৰিযাতি কেতু. ধজোতি ইন্দধজো সমুস্সযট্ঠেন দস্সনীযট্ঠেন চ তুৰং ধজো ৰিযাতি ধজোতি. অথ ¶ ৰা যথা হি লোকে যস্স কস্সচি ধজং দিস্ৰাৰ – ‘‘অযং ধজো ইত্থন্নামস্সা’’তি ধজৰা ধজীতি পঞ্ঞাযতি, এৰমেৰ ভগৰা পঞ্ঞানিব্বানাধিগমায ভগৰন্তং দিস্ৰাৰ নিব্বানাধিগমো পঞ্ঞাযতি. তেন ৰুত্তং – ‘‘ধজো যূপো চা’’তি. কূটদন্তসুত্তে ৰুত্তানং দানাদিআসৰক্খযঞাণপরিযোসানানং সব্বযাগানং যজনত্থায সমুস্সিতো যূপো তুৰন্তি অত্থো. পরাযনোতি পটিসরণং. পতিট্ঠাতি যথা মহাপথৰী সব্বপাণীনং আধারভাৰেন পতিট্ঠা নিস্সযভূতা, এৰং তুৰম্পি পতিট্ঠাভূতা. দীপো চাতি পদীপো. যথা চতুরঙ্গে তমসি ৰত্তমানানং সত্তানং আরোপিতো পদীপো রূপসন্দস্সনো হোতি. এৰং অৰিজ্জন্ধকারে ৰত্তমানানং সত্তানং পরমত্থসন্দস্সনো পদীপো তুৰন্তি অত্থো. অথ ৰা মহাসমুদ্দে ভিন্ননাৰানং সত্তানং সমুদ্দদীপো ¶ যথা পতিট্ঠা ¶ হোতি, এৰং তুৰম্পি সংসারসাগরে অলব্ভনেয্যপতিট্ঠে ওসীদন্তানং পাণীনং দীপো ৰিযাতি দীপোতি অত্থো.

দ্ৰিপদুত্তমোতি দ্ৰিপদানং উত্তমো দ্ৰিপদুত্তমো, এত্থ পন নিদ্ধারণলক্খণস্স অভাৰতো ছট্ঠীসমাসস্স পটিসেধো নত্থি, নিদ্ধারণলক্খণায ছট্ঠিযা সমাসো পটিসিদ্ধো. সম্মাসম্বুদ্ধো পন অপদানং দ্ৰিপদানং চতুপ্পদানং বহুপ্পদানং রূপীনং অরূপীনং সঞ্ঞীনং অসঞ্ঞীনং নেৰসঞ্ঞীনাসঞ্ঞীনং উত্তমোৰ. কস্মা পনিধ ‘‘দ্ৰিপদুত্তমো’’তি ৰুত্তোতি চে? সেট্ঠতরৰসেন. ইমস্মিঞ্হি লোকে সেট্ঠো নাম উপ্পজ্জমানো অপদচতুপ্পদবহুপ্পদেসুপি নুপ্পজ্জতি. অযং দ্ৰিপদেসুযেৰ উপ্পজ্জতি. কতরদ্ৰিপদেসূতি? মনুস্সেসু চেৰ দেৰেসু চ. মনুস্সেসু উপ্পজ্জমানো তিসহস্সিমহাসহস্সিলোকধাতু ৰসে কত্তুং সমত্থো বুদ্ধো হুত্ৰা নিব্বত্ততি. দেৰেসু উপ্পজ্জমানো দসসহস্সিলোকধাতু ৰসৰত্তী মহাব্রহ্মা হুত্ৰা নিব্বত্ততি. সো তস্স কপ্পিযকারকো ৰা আরামিকো ৰা সম্পজ্জতি. ইতি ততোপি সেট্ঠতরৰসেন ‘‘দ্ৰিপদুত্তমো’’তি ৰুত্তো.

দসসহস্সিলোকধাতুযাতি দসসহস্সিসঙ্খাতায লোকধাতুযা. মহিদ্ধিকাতি মহতিযা ইদ্ধিযা যুত্তা, মহানুভাৰাতি অত্থো. পরিৰারেত্ৰাতি ভগৰন্তং সমন্ততো পরিক্খিপিত্ৰা. পসন্নাতি সঞ্জাতসদ্ধা. নরাসভন্তি নরপুঙ্গৰং. অহো অচ্ছরিযন্তি এত্থ অন্ধস্স পব্বতারোহনং ৰিয নিচ্চং ন হোতীতি অচ্ছরিযং, অচ্ছরাযোগ্গন্তি ৰা অচ্ছরিযং, ‘‘অহো, ইদং ৰিম্হয’’ন্তি অচ্ছরং পহরিতুং যুত্তন্তি অত্থো. অব্ভুতন্তি ¶ অভূতপুব্বং অভূতন্তি অব্ভুতং. উভযম্পেতং ৰিম্হযাৰহস্সাধিৰচনং. লোমহংসনন্তি লোমানং উদ্ধগ্গভাৰকরণং. ন মেদিসং ভূতপুব্বন্তি ন মযা ঈদিসং ভূতপুব্বং, অব্ভুতং দিট্ঠন্তি অত্থো. দিট্ঠন্তি ৰচনং আহরিত্ৰা গহেতব্বং. অচ্ছেরন্তি অচ্ছরিযং.

সকসকম্হি ভৰনেতি অত্তনো অত্তনো ভৰনে. নিসীদিত্ৰানাতি উপৰিস্স. দেৰতাতি ইদং পন ৰচনং দেৰানম্পি দেৰধীতানম্পি সাধারণৰচনন্তি ৰেদিতব্বং. হসন্তিতাতি তা দেৰতা মহাহসিতং হসন্তি, পীতিৰসং গতহদযতায মিহিতমত্তং অকত্ৰা অট্টহাসং হসন্তীতি অত্থো. নভেতি আকাসে.

আকাসট্ঠাতি আকাসে ৰিমানাদীসু ঠিতা, এসেৰ নযো ভূমট্ঠেসুপি. তিণপন্থনিৰাসিনোতি ¶ তিণগ্গেসু চেৰ পন্থেসু চ নিৰাসিনো. পুঞ্ঞৰন্তোতি মহাপুঞ্ঞা. মহিদ্ধিকাতি মহানুভাৰা. সঙ্গীতিযো পৰত্তেন্তীতি দেৰনাটকসঙ্গীতিযো পৰত্তেন্তি, তথাগতং পূজনত্থায পযুজ্জন্তীতি অত্থো. অম্বরেতি আকাসে. অনিলঞ্জসেতি অনিলপথে, অম্বরস্স অনেকত্থত্তা ¶ ‘‘অনিলঞ্জসে’’তি ৰুত্তং, পুরিমস্সেৰ ৰেৰচনং. চম্মনদ্ধানীতি চম্মৰিনদ্ধানি. অযমেৰ ৰা পাঠো, দেৰদুন্দুভিযোতি অত্থো. ৰাদেন্তীতি ৰাদযন্তি দেৰতা.

সঙ্খাতি ধমনসঙ্খা. পণৰাতি তনুমজ্ঝতুরিযৰিসেসা. ডিণ্ডিমাতি তিণৰাখুদ্দকভেরিযো ৰুচ্চন্তি. ৰজ্জন্তীতি ৰাদযন্তি. অব্ভুতো ৰত নোতি অচ্ছরিযো ৰত নু. উপ্পজ্জীতি উপ্পন্নো. লোমহংসনোতি লোমহংসনকরো. ধুৰন্তি যস্মা পন অব্ভুতো অযং সত্থা লোকে উপ্পন্নো, তস্মা ধুৰং অৰস্সং অত্থসিদ্ধিং লভামাতি অধিপ্পাযো. লভামাতি লভিস্সাম. খণোতি অট্ঠক্খণৰিরহিতো নৰমো খণোতি অত্থো. নোতি অম্হাকং. পটিপাদিতোতি পটিলদ্ধো.

বুদ্ধোতি তেসং সুত্ৰানাতি বুদ্ধোতি ইদং ৰচনং সুত্ৰা তেসং দেৰানং পঞ্চৰণ্ণা পীতি উদপাদীতি অত্থো. তাৰদেতি তস্মিং কালে. হিঙ্কারাতি হিঙ্কারসদ্দা, হিংহিন্তি যক্খাদযো পহট্ঠকালে করোন্তি. সাধুকারাতি সাধুকারসদ্দা চ পৰত্তন্তি. উক্কুট্ঠীতি উক্কুট্ঠিসদ্দো চ উন্নাদসদ্দো চাতি অত্থো. পজাতি দেৰাদযো অধিপ্পেতা. কেচি ‘‘পটাকা ৰিৰিধা গগনে ৰত্তন্তী’’তি পঠন্তি. গাযন্তীতি বুদ্ধগুণপটিসংযুত্তং গীতং গাযন্তি.

সেল়েন্তীতি ¶ মুখেন সেল়িতসদ্দং করোন্তি. ৰাদযন্তীতি ¶ মহতী ৰিপঞ্চিকামকরমুখাদযো ৰীণা চ তুরিযানি চ তথাগতস্স পূজনত্থায ৰাদেন্তি পযোজেন্তি. ভুজানি পোথেন্তীতি ভুজে অপ্ফোটেন্তি. লিঙ্গৰিপরিযাসো দট্ঠব্বো. নচ্চন্তি চাতি অঞ্ঞে চ নচ্চাপেন্তি সযঞ্চ নচ্চন্তি.

যথা তুয্হং মহাৰীর, পাদেসু চক্কলক্খণন্তি এত্থ যেন পকারেন যথা. মহাৰীরিযেন যোগতো মহাৰীরো. পাদেসু চক্কলক্খণন্তি তৰ উভোসু পাদতলেসু সহস্সারং সনেমিকং সনাভিকং সব্বাকারপরিপূরং চক্কলক্খণং সোভতীতি অত্থো. চক্ক-সদ্দো পনাযং সম্পত্তিরথঙ্গইরিযাপথদানরতনধম্মখুরচক্কলক্খণাদীসু দিস্সতি. ‘‘চত্তারিমানি, ভিক্খৰে, চক্কানি যেহি সমন্নাগতানং দেৰমনুস্সান’’ন্তিআদীসু (অ. নি. ৪.৩১) সম্পত্তিযং দিস্সতি. ‘‘চক্কংৰ ৰহতো পদ’’ন্তিআদীসু (ধ. প. ১) রথঙ্গে. ‘‘চতুচক্কং নৰদ্ৰার’’ন্তিআদীসু (সং. নি. ১.২৯) ইরিযাপথে. ‘‘দদং ভুঞ্জ চ মা চ পমাদো, চক্কং ৰত্তয সব্বপাণিন’’ন্তি (জা. ১.৭.১৪৯) এত্থ দানে. ‘‘দিব্বং চক্করতনং পাতুভূত’’ন্তি (দী. নি. ২.২৪৩; ৩.৮৫; ম. নি. ৩.২৫৬) এত্থ রতনচক্কে. ‘‘মযা পৰত্তিতং চক্ক’’ন্তি (সু. নি. ৫৬২; বু. ৰং. ২৮.১৭) এত্থ পন ধম্মচক্কে. ‘‘ইচ্ছাহতস্স ¶ পোসস্স, চক্কং ভমতি মত্থকে’’তি (জা. ১.১.১০৪; ১.৫.১০৩) এত্থ খুরচক্কে, পহরণচক্কেতি অত্থো. ‘‘পাদতলেসু চক্কানি জাতানী’’তি (দী. নি. ২.৩৫; ৩.২০০, ২০৪; ম. নি. ২.৩৮৬) এত্থ লক্খণে. ইধাপি লক্খণচক্কে দট্ঠব্বো (ম. নি. অট্ঠ. ১.১৪৮; অ. নি. অট্ঠ. ১.১.১৮৭; ২.৪.৮; পটি. ম. অট্ঠ. ২.২.৪৪). ধজৰজিরপটাকা, ৰড্ঢমানঙ্কুসাচিতন্তি ধজেন চ ৰজিরেন চ পটাকায চ ৰড্ঢমানেন চ অঙ্কুসেন চ আচিতং অলঙ্কতং পরিৰারিতং পাদেসু চক্কলক্খণন্তি অত্থো. চক্কলক্খণে পন গহিতে সেসলক্খণানি গহিতানেৰ হোন্তি. তথা অসীতি অনুব্যঞ্জনানি ব্যামপ্পভা চ. তস্মা তেহি দ্ৰত্তিংসমহাপুরিসলক্খণাসীতিঅনুব্যঞ্জনব্যামপ্পভাহি সমলঙ্কতো ভগৰতো কাযো সব্বফালিফুল্লো ৰিয পারিচ্ছত্তকো ৰিকসিতপদুমং ৰিয কমলৰনং ৰিৰিধরতনৰিচিত্তং ৰিয নৰকনকতোরণং তারামরীচিৰিরাজিতমিৰ গগনতলং ইতো চিতো চ ৰিধাৰমানা ৰিপ্ফন্দমানা ছব্বণ্ণবুদ্ধরস্মিযো মুঞ্চমানো অতিৰিয সোভতি.

ইদানি ¶ ভগৰতো রূপকাযধম্মকাযসম্পত্তিদস্সনত্থং –

‘‘রূপে সীলে সমাধিম্হি, পঞ্ঞায চ অসাদিসো;

ৰিমুত্তিযা অসমসমো, ধম্মচক্কপ্পৰত্তনে’’তি. – অযং গাথা ৰুত্তা;

তত্থ রূপেতি অযং রূপ-সদ্দো খন্ধভৰনিমিত্তপচ্চযসরীরৰণ্ণসণ্ঠানাদীসু ¶ দিস্সতি. যথাহ – ‘‘যং কিঞ্চি রূপং অতীতানাগতপচ্চুপ্পন্ন’’ন্তি (ম. নি. ১.৩৬১; ৩.৮৬, ৮৯; ৰিভ. ২; মহাৰ. ২২) এত্থ রূপক্খন্ধে দিস্সতি. ‘‘রূপূপপত্তিযা মগ্গং ভাৰেতী’’তি (ধ. স. ১৬০-১৬১; ৰিভ. ৬২৪) এত্থ রূপভৰে. ‘‘অজ্ঝত্তং অরূপসঞ্ঞী বহিদ্ধা রূপানি পস্সতী’’তি (দী. নি. ৩.৩৩৮; ম. নি. ২.২৪৯; অ. নি. ১.৪৩৫-৪৪২; ধ. স. ২০৪-২০৫) এত্থ কসিণনিমিত্তে. ‘‘সরূপা, ভিক্খৰে, উপ্পজ্জন্তি পাপকা অকুসলা ধম্মা নো অরূপা’’তি (অ. নি. ২.৮৩) এত্থ পচ্চযে. ‘‘আকাসো পরিৰারিতো রূপন্ত্ৰেৰ সঙ্খং গচ্ছতী’’তি (ম. নি. ১.৩০৬) এত্থ সরীরে. ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (ম. নি. ১.২০৪, ৪০০; ৩.৪২১, ৪২৫-৪২৬; সং. নি. ৪.৬০; কথা. ৪৬৫) এত্থ ৰণ্ণে. ‘‘রূপপ্পমাণো রূপপ্পসন্নো’’তি (অ. নি. ৪.৬৫) এত্থ সণ্ঠানে. ইধাপি সণ্ঠানে দট্ঠব্বো (অ. নি. অট্ঠ. ১.১.১ রূপাদিৰগ্গৰণ্ণনা). সীলেতি চতুব্বিধে সীলে. সমাধিম্হীতি তিৰিধেপি সমাধিম্হি. পঞ্ঞাযাতি লোকিযলোকুত্তরায পঞ্ঞায. অসাদিসোতি অসদিসো অনুপমো. ৰিমুত্তিযাতি ফলৰিমুত্তিযা ¶ . অসমসমোতি অসমা অতীতা বুদ্ধা তেহি অসমেহি বুদ্ধেহি সীলাদীহি সমোতি অসমসমো. এত্তাৰতা ভগৰতো রূপকাযসম্পত্তি দস্সিতা.

ইদানি ভগৰতো কাযবলাদিং দস্সেতুং –

‘‘দসনাগবলং কাযে, তুয্হং পাকতিকং বলং;

ইদ্ধিবলেন অসমো, ধম্মচক্কপ্পৰত্তনে’’তি. – ৰুত্তং;

তত্থ দসনাগবলন্তি দসছদ্দন্তনাগবলং. দুৰিধঞ্হি তথাগতস্স বলং – কাযবলং, ঞাণবলঞ্চাতি. তত্থ কাযবলং হত্থিকুলানুসারেন ৰেদিতব্বং. কথং?

‘‘কাল়াৰকঞ্চ ¶ গঙ্গেয্যং, পণ্ডরং তম্বপিঙ্গলং;

গন্ধমঙ্গলহেমঞ্চ, উপোসথছদ্দন্তিমে দসা’’তি.(ম. নি. অট্ঠ. ১.১৪৮; সং. নি. অট্ঠ. ২.২.২২; অ. নি. অট্ঠ. ৩.১০.২১; দী. নি. অট্ঠ. ২.১৯৮; ৰিভ. অট্ঠ. ৭৬০; উদা. অট্ঠ. ৭৫; চূল়নি. অট্ঠ. ৮১; পটি. ম. অট্ঠ. ২.২.৪৪) –

ইমানি দস হত্থিকুলানি ৰেদিতব্বানি. কাল়াৰকোতি পকতিহত্থিকুলং. যং দসন্নং পুরিসানং কাযবলং, তং একস্স কাল়াৰকস্স হত্থিনো বলং. যং দসন্নং কাল়াৰকানং বলং, তং একস্স গঙ্গেয্যস্সাতি এতেনেৰ উপাযেন যাৰ ছদ্দন্তবলং নেতব্বন্তি. যং দসন্নং ছদ্দন্তানং বলং, তং একস্স তথাগতস্স বলং, নারাযনবলং ৰজিরবলন্তি ইদমেৰ ৰুচ্চতি. তদেতং পকতিহত্থিগণনায হত্থিকোটিসহস্সানং বলং, পুরিসগণনায দসন্নং ¶ পুরিসকোটিসহস্সানং বলং হোতি. ইদং তাৰ তথাগতস্স পকতিকাযবলং, ঞাণবলং পন অপ্পমেয্যং দসবলঞাণং চতুৰেসারজ্জঞাণং অট্ঠসু পরিসাসু অকম্পনঞাণং চতুযোনিপরিচ্ছেদকঞাণং পঞ্চগতিপরিচ্ছেদকঞাণং চুদ্দস বুদ্ধঞাণানীতি এৰমাদিকং ঞাণবলং. ইধ পন কাযবলং অধিপ্পেতং. কাযে, তুয্হং পাকতিকং বলন্তি তঞ্চ পন তৰ কাযে পাকতিকবলন্তি অত্থো. তস্মা ‘‘দসনাগবল’’ন্তি দসছদ্দন্তনাগবলন্তি অত্থো.

ইদানি ঞাণবলং দস্সেন্তো ‘‘ইদ্ধিবলেন অসমো, ধম্মচক্কপ্পৰত্তনে’’তি আহ. তত্থ ইদ্ধিবলেন অসমোতি ৰিকুব্বনাধিট্ঠানাদিনা ইদ্ধিবলেন ¶ অসমো অসদিসো অনুপমো. ধম্মচক্কপ্পৰত্তনেতি দেসনাঞাণেপি অসমোতি অত্থো.

ইদানি ‘‘যো এৰমাদিগুণসমন্নাগতো সত্থা, সো সব্বলোকেকনাযকো, তং সত্থারং নমস্সথা’’তি তথাগতস্স পণামনে নিযোগদস্সনত্থং –

‘‘এৰং সব্বগুণূপেতং, সব্বঙ্গসমুপাগতং;

মহামুনিং কারুণিকং, লোকনাথং নমস্সথা’’তি. – ৰুত্তং;

তত্থ এৰন্তি ৰুত্তপ্পকারনিদস্সনে নিপাতো. সব্বগুণূপেতন্তি এত্থ সব্বোতি অযং নিরৰসেসৰাচী. গুণোতি অযং গুণ-সদ্দো অনেকেসু অত্থেসু ¶ দিস্সতি. তথা হেস – ‘‘অনুজানামি, ভিক্খৰে, অহতানং ৰত্থানং দিগুণং সঙ্ঘাটি’’ন্তি (দী. নি. অট্ঠ. ১.৫৪৬; মহাৰ. ৩৪৮) এত্থ পটলত্থে দিস্সতি. ‘‘অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তী’’তি (সং. নি. ১.৪) এত্থ রাসত্থে. ‘‘সতগুণা দক্খিণা পাটিকঙ্খিতব্বা’’তি (ম. নি. ৩.৩৭৯) এত্থ আনিসংসত্থে. ‘‘অন্তং অন্তগুণং’’ (দী. নি. ২.৩৭৭; ম. নি. ১.১১০, ৩০২; ২.১১৪; ৩.১৫৪, ৩৪৯; খু. পা. ৩.দ্ৰত্তিংসাকার) ‘‘কযিরা মালাগুণে বহূ’’তি (ধ. প. ৫৩) এত্থ বন্ধনত্থে. ‘‘অট্ঠগুণসমুপেতং, অভিঞ্ঞাবলমাহরি’’ন্তি (বু. ৰং. ২.২৯) এত্থ সম্পত্তিঅত্থে. ইধাপি সম্পত্তিঅত্থে দট্ঠব্বো (দী. নি. অট্ঠ. ১.৫৪৬; ম. নি. অট্ঠ. ১.১৬৬; চূল়নি. অট্ঠ. ১৩৬). তস্মা সব্বেহি লোকিযলোকুত্তরেহি গুণেহি সব্বসম্পত্তীহি উপেতং সমন্নাগতন্তি অত্থো. সব্বঙ্গসমুপাগতন্তি সব্বেহি বুদ্ধগুণেহি গুণঙ্গেহি ৰা সমুপাগতং সমন্নাগতং. মহামুনিন্তি অঞ্ঞেহি পচ্চেকবুদ্ধাদীহি মুনীহি অধিকভাৰতো মহন্তো মুনীতি ৰুচ্চতি মহামুনি. কারুণিকন্তি ¶ করুণাগুণযোগতো কারুণিকং. লোকনাথন্তি সব্বলোকেকনাথং, সব্বলোকেহি ‘‘অযং নো দুক্খোপতাপস্স আহন্তা সমেতা’’তি এৰমাসীসীযতীতি অত্থো.

ইদানি দসবলস্স সব্বনিপচ্চাকারস্স অরহভাৰদস্সনত্থং –

‘‘অভিৰাদনং থোমনঞ্চ, ৰন্দনঞ্চ পসংসনং;

নমস্সনঞ্চ পূজঞ্চ, সব্বং অরহসী তুৰং.

‘‘যে ¶ কেচি লোকে ৰন্দনেয্যা, ৰন্দনং অরহন্তি যে;

সব্বসেট্ঠো মহাৰীর, সদিসো তে ন ৰিজ্জতী’’তি. – ৰুত্তং;

তত্থ অভিৰাদনন্তি অঞ্ঞেহি অত্তনো অভিৰাদনকারাপনং. থোমনন্তি পরম্মুখতো থুতি. ৰন্দনন্তি পণামনং. পসংসনন্তি সম্মুখতো পসংসনং. নমস্সনন্তি অঞ্জলিকরণং, মনসা নমস্সনং ৰা. পূজনন্তি মালাগন্ধৰিলেপনাদীহি পূজনঞ্চ. সব্বন্তি সব্বম্পি তং ৰুত্তপ্পকারং সক্কারৰিসেসং তুৰং অরহসি যুত্তোতি অত্থো. যে কেচি লোকে ৰন্দনেয্যাতি যে কেচি লোকে ৰন্দিতব্বা ৰন্দনীযা ৰন্দনং অরহন্তি. যেতি যে পন লোকে ¶ ৰন্দনং অরহন্তি. ইদং পন পুরিমপদস্সেৰ ৰেৰচনং. সব্বসেট্ঠোতি সব্বেসং তেসং সেট্ঠো উত্তমো, ত্ৰং মহাৰীর সদিসো তে লোকে কোচি ন ৰিজ্জতীতি অত্থো.

অথ ভগৰতি যমকপাটিহারিযং দস্সেত্ৰা রতনচঙ্কমং মাপেত্ৰা তত্র চঙ্কমমানে আযস্মা সারিপুত্তো রাজগহে ৰিহরতি গিজ্ঝকূটে পব্বতে পঞ্চহি পরিৰারভিক্খুসতেহি. অথ থেরো ভগৰন্তং ওলোকেন্তো অদ্দস কপিলপুরে আকাসে রতনচঙ্কমে চঙ্কমমানং. তেন ৰুত্তং –

‘‘সারিপুত্তো মহাপঞ্ঞো, সমাধিজ্ঝানকোৰিদো;

গিজ্ঝকূটে ঠিতোযেৰ, পস্সতি লোকনাযক’’ন্তি. – আদি;

তত্থ সারিপুত্তোতি রূপসারিযা নাম ব্রাহ্মণিযা পুত্তোতি সারিপুত্তো. মহাপঞ্ঞোতি মহতিযা সোল়সৰিধায পঞ্ঞায সমন্নাগতোতি মহাপঞ্ঞো. সমাধিজ্ঝানকোৰিদোতি এত্থ সমাধীতি চিত্তং সমং আদহতি আরম্মণে ঠপেতীতি সমাধি. সো তিৰিধো হোতি সৰিতক্কসৰিচারো অৰিতক্কৰিচারমত্তো অৰিতক্কঅৰিচারো সমাধীতি. ঝানন্তি পঠমজ্ঝানং দুতিযজ্ঝানং ততিযজ্ঝানং চতুত্থজ্ঝানন্তি ¶ ইমেহি পঠমজ্ঝানাদীহি মেত্তাঝানাদীনিপি সঙ্গহিতানেৰ হোন্তি, ঝানম্পি দুৰিধং হোতি লক্খণূপনিজ্ঝানং আরম্মণূপনিজ্ঝানন্তি. তত্থ অনিচ্চাদিলক্খণং উপনিজ্ঝাযতীতি ৰিপস্সনাঞাণং ‘‘লক্খণূপনিজ্ঝান’’ন্তি ৰুচ্চতি. পঠমজ্ঝানাদিকং পন আরম্মণূপনিজ্ঝানতো পচ্চনীকঝাপনতো ৰা ঝানন্তি ৰুচ্চতি. সমাধীসু চ ঝানেসু চ কোৰিদোতি সমাধিজ্ঝানকোৰিদো, সমাধিজ্ঝানকুসলোতি অত্থো. গিজ্ঝকূটেতি এৰংনামকে পব্বতে ঠিতোযেৰ পস্সতীতি পস্সি.

৪৪. সুফুল্লং ¶ সালরাজং ৰাতি সমৰট্টক্খন্ধং সমুগ্গতৰিপুলকোমলফলপল্লৰঙ্কুরসমলঙ্কতসাখং সব্বফালিফুল্লং সালরাজং ৰিয সীলমূলং সমাধিক্খন্ধং পঞ্ঞাসাখং অভিঞ্ঞাপুপ্ফং ৰিমুত্তিফলং দসবলসালরাজং ওলোকেসীতি এৰং ওলোকপদেন সম্বন্ধো. চন্দংৰ গগনে যথাতি অব্ভাহিমধূমরজোরাহুপসগ্গৰিনিমুত্তং তারগণপরিৰুতং সরদসমযে পরিপুণ্ণং ৰিয ¶ রজনিকরং সব্বকিলেসতিমিরৰিধমনকরং ৰেনেয্যজনকুমুদৰনৰিকসনকরং মুনিৰররজনিকরং ওলোকেতীতি অত্থো. যথাতি নিপাতমত্তং. মজ্ঝন্হিকেৰ সূরিযন্তি মজ্ঝন্হিকসমযে সিরিযা পটুতরকিরণমালিনং অংসুমালিনমিৰ ৰিরোচমানং. নরাসভন্তি নরৰসভং.

৪৫. জলন্তন্তি দদ্দল়্হমানং, সরদসমযং পরিপুণ্ণচন্দসস্সিরিকচারুৰদনসোভং লক্খণানুব্যঞ্জনসমলঙ্কতৰরসরীরং পরমায বুদ্ধসিরিযা ৰিরোচমানন্তি অত্থো. দীপরুক্খং ৰাতি আরোপিতদীপং দীপরুক্খমিৰ. তরুণসূরিযংৰ উগ্গতন্তি অভিনৰোদিতাদিচ্চমিৰ, সোম্মভাৰেন জলন্তন্তি অত্থো. সূরিযস্স তরুণভাৰো পন উদযং পটিচ্চ ৰুচ্চতি. ন হি চন্দস্স ৰিয হানিৰুদ্ধিযো অত্থি. ব্যামপ্পভানুরঞ্জিতন্তি ব্যামপ্পভায অনুরঞ্জিতং. ধীরং পস্সতি লোকনাযকন্তি সব্বলোকেকধীরং পস্সতি নাযকন্তি অত্থো.

অথাযস্মা ধম্মসেনাপতি অতিসীতলসলিলধরনিকরপরিচুম্বিতকূটে নানাৰিধসুরভিতরুকুসুমৰাসিতকূটে পরমরুচিরচিত্তকূটে গিজ্ঝকূটে পব্বতে ঠত্ৰাৰ দসহি চক্কৰাল়সহস্সেহি আগতেহি দেৰব্রহ্মগণেহি পরিৰুতং ভগৰন্তং অনুত্তরায বুদ্ধসিরিযা অনোপমায ¶ বুদ্ধলীল়ায সব্বরতনমযে চঙ্কমে চঙ্কমমানং দিস্ৰা – ‘‘হন্দাহং ভগৰন্তং উপসঙ্কমিত্ৰা বুদ্ধগুণপরিদীপনং বুদ্ধৰংসদেসনং যাচেয্য’’ন্তি চিন্তেত্ৰা অত্তনা সদ্ধিং ৰসমানানি পঞ্চ ভিক্খুসতানি সন্নিপাতেসি. তেন ৰুত্তং –

‘‘পঞ্চন্নং ভিক্খুসতানং, কতকিচ্চান তাদিনং;

খীণাসৰানং ৰিমলানং, খণেন সন্নিপাতযী’’তি.

তত্থ পঞ্চন্নং ভিক্খুসতানন্তি পঞ্চ ভিক্খুসতানি, উপযোগত্থে সামিৰচনং দট্ঠব্বং. কতকিচ্চানন্তি চতূসু সচ্চেসু চতূহি মগ্গেহি পরিঞ্ঞাপহানসচ্ছিকিরিযভাৰনাৰসেন পরিনিট্ঠিতসোল়সকিচ্চানন্তি অত্থো. খীণাসৰানন্তি পরিক্খীণচতুরাসৰানং. ৰিমলানন্তি ৰিগতমলানং ¶ , খীণাসৰত্তা ৰা ৰিমলানং পরমপরিসুদ্ধচিত্তসন্তানানন্তি অত্থো. খণেনাতি খণেযেৰ. সন্নিপাতযীতি সন্নিপাতেসি.

ইদানি ¶ তেসং ভিক্খূনং সন্নিপাতে গমনে চ কারণং দস্সনত্থং –

‘‘লোকপ্পসাদনং নাম, পাটিহীরং নিদস্সযি;

অম্হেপি তত্থ গন্ত্ৰান, ৰন্দিস্সাম মযং জিনং.

‘‘এথ সব্বে গমিস্সাম, তুচ্ছিস্সাম মযং জিনং;

কঙ্খং ৰিনোদযিস্সাম, পস্সিত্ৰা লোকনাযক’’ন্তি. – ইমা গাথাযো ৰুত্তা;

তত্থ লোকপ্পসাদনং নামাতি লোকস্স পসাদকরণতো লোকপ্পসাদনং পাটিহীরং ৰুচ্চতি. ‘‘উল্লোকপ্পসাদনং নামাতিপি পাঠো, তস্স লোকৰিৰরণপাটিহারিযন্তি অত্থো. তং পন উদ্ধং অকনিট্ঠভৰনতো হেট্ঠা যাৰ অৰীচি এত্থন্তরে একালোকং কত্ৰা এত্থন্তরে সব্বেসম্পি সত্তানং অঞ্ঞমঞ্ঞং দস্সনকরণাধিট্ঠানন্তি ৰুচ্চতি. নিদস্সযীতি দস্সেসি. অম্হেপীতি মযম্পি. তত্থাতি যত্থ ভগৰা, তত্থ গন্ত্ৰানাতি অত্থো. ৰন্দিস্সামাতি মযং ভগৰতো পাদে সিরসা ৰন্দিস্সাম. এত্থ পন অম্হেপি, মযন্তি ইমেসং দ্ৰিন্নং সদ্দানং পুরিমস্স গমনকিরিযায সম্বন্ধো দট্ঠব্বো, পচ্ছিমস্স ৰন্দনকিরিযায. ইতরথা হি পুনরুত্তিদোসতো ন মুচ্চতি.

এথাতি আগচ্ছথ. কঙ্খং ¶ ৰিনোদযিস্সামাতি এত্থাহ – খীণাসৰানং পন কঙ্খা নাম কাচিপি নত্থি, কস্মা থেরো এৰমাহাতি? সচ্চমেৰেতং, পঠমমগ্গেনেৰ সমুচ্ছেদং গতা. যথাহ –

‘‘কতমে ধম্মা দস্সনেন পহাতব্বাতি? চত্তারো দিট্ঠিগতসম্পযুত্তচিত্তুপ্পাদা ৰিচিকিচ্ছাসহগতো চিত্তুপ্পাদো অপাযগমনীযো লোভো দোসো মোহো মানো তদেকট্ঠা চ কিলেসা’’তি (ধ. স. ১৪০৫ থোকং ৰিসদিসং).

ন পনেসা ৰিচিকিচ্ছাসঙ্খাতা কঙ্খাতি, কিন্তু পঞ্ঞত্তিঅজাননং নাম. থেরো পন ভগৰন্তং বুদ্ধৰংসং পুচ্ছিতুকামো, সো পন বুদ্ধানংযেৰ ৰিসযো, ন পচ্চেকবুদ্ধবুদ্ধসাৰকানং, তস্মা থেরো অৰিসযত্তা এৰমাহাতি ৰেদিতব্বং. ৰিনোদযিস্সামাতি ৰিনোদেস্সাম.

অথ ¶ ¶ খো তে ভিক্খূ থেরস্স ৰচনং সুত্ৰা অত্তনো অত্তনো পত্তচীৰরমাদায সুৰম্মিতা ৰিয মহানাগা পভিন্নকিলেসা ছিন্নবন্ধনা অপ্পিচ্ছা সন্তুট্ঠা পৰিৰিত্তা অসংসট্ঠা সীলসমাধিপঞ্ঞাৰিমুত্তিৰিমুত্তিঞাণদস্সনসম্পন্না তরমানা সন্নিপত্তিংসু. তেন ৰুত্তং –

‘‘সাধূতি তে পটিস্সুত্ৰা, নিপকা সংৰুতিন্দ্রিযা;

পত্তচীৰরমাদায, তরমানা উপাগমু’’ন্তি.

তত্থ সাধূতি অযং সাধু-সদ্দো আযাচনসম্পটিচ্ছনসম্পহংসনসুন্দরাদীসু দিস্সতি. তথা হেস – ‘‘সাধু মে, ভন্তে ভগৰা, সংখিত্তেন ধম্মং দেসেতূ’’তিআদীসু (সং. নি. ৪.৯৫; ৫.৩৮২; অ. নি. ৪.২৫৭) আযাচনে দিস্সতি. ‘‘সাধু, ভন্তেতি খো সো ভিক্খু ভগৰতো ভাসিতং অভিনন্দিত্ৰা অনুমোদিত্ৰা’’তিআদীসু (ম. নি. ৩.৮৬) সম্পটিচ্ছনে. ‘‘সাধু সাধু, সারিপুত্তা’’তিআদীসু (দী. নি. ৩.৩৪৯) সম্পহংসনে.

‘‘সাধু ধম্মরুচি রাজা, সাধু পঞ্ঞাণৰা নরো;

সাধু মিত্তানমদ্দুব্ভো, পাপস্সাকরণং সুখ’’ন্তি. –

আদীসু (জা. ২.১৮.১০১) সুন্দরে. ইধ সম্পটিচ্ছনে. তস্মা সাধু সুট্ঠূতি থেরস্স ৰচনং সম্পটিচ্ছিত্ৰাতি অত্থো (দী. নি. অট্ঠ. ১.১৮৯; ম. নি. অট্ঠ. ১.১ সুত্তনিক্খেপৰণ্ণনা; সং. নি. অট্ঠ. ১.১১৫ অগ্গিকভারদ্ৰাজসুত্তৰণ্ণনা). নিপকাতি পণ্ডিতা পঞ্ঞৰন্তা. সংৰুতিন্দ্রিযাতি ইন্দ্রিযেসু গুত্তদ্ৰারা, ইন্দ্রিযসংৰরসমন্নাগতাতি অত্থো. তরমানাতি তুরিতা. উপাগমুন্তি থেরং উপসঙ্কমিংসু.

৫০-১. ইদানি ¶ ধম্মসেনাপতিস্স পৰত্তিং দস্সেন্তেহি সঙ্গীতিকারকেহি ‘‘খীণাসৰেহি ৰিমলেহী’’তিআদিগাথাযো ৰুত্তা তত্থ দন্তেহীতি কাযেন চ চিত্তেন চ দন্তেহি. উত্তমে দমেতি অরহত্তে, নিমিত্তত্থে ভুম্মং দট্ঠব্বং. তেহি ভিক্খূহীতি পঞ্চহি ভিক্খুসতেহি. মহাগণীতি সীলাদীহি চ সঙ্খ্যাৰসেন চ মহন্তো গণো অস্স অত্থীতি মহাগণী, নানাপদৰসেন ৰা সীলাদীহি গুণেহি মহন্তো গণোতি মহাগণো, মহাগণো অস্স অত্থীতি মহাগণী. লল়ন্তো দেৰোৰ গগনেতি ইদ্ধিৰিলাসেন ৰিলাসেন্তো দেৰো ৰিয গগনতলে ভগৰন্তং উপসঙ্কমীতি অত্থো.

৫২. ইদানি ¶ ‘‘তে ইত্থম্ভূতা উপসঙ্কমিংসূ’’তি উপসঙ্কমৰিধানদস্সনত্থং ‘‘উক্কাসিতঞ্চ খিপিত’’ন্তিআদি ¶ আরদ্ধং. তত্থ উক্কাসিতঞ্চাতি উক্কাসিতসদ্দঞ্চ. খিপিতন্তি খিপিতসদ্দঞ্চ. অজ্ঝুপেক্খিযাতি উপেক্খিত্ৰা, তং উভযং অকত্ৰাতি অধিপ্পাযো. সুব্বতাতি সুৰিমলধুতগুণা. সপ্পতিস্সাতি সহপতিস্সযা, নীচৰুত্তিনোতি অত্থো.

৫৩. সযম্ভুন্তি সযমেৰ অঞ্ঞাপদেসং ৰিনা পারমিযো পূরেত্ৰা অধিগতবুদ্ধভাৰন্তি অত্থো. অচ্চুগ্গতন্তি অভিনৰোদিতং. চন্দং ৰাতি চন্দং ৰিয, নভে জলন্তং ভগৰন্তং গগনে চন্দং ৰিয পস্সন্তীতি এৰং পদসম্বন্ধো দট্ঠব্বো. ইধাপি যথা-সদ্দো নিপাতমত্তোৰ.

৫৪. ৰিজ্জুং ৰাতি ৰিজ্জুঘনং ৰিয. যদি চিরট্ঠিতিকা অচিরপ্পভা অস্স তাদিসন্তি অত্থো. গগনে যথাতি আকাসে যথা, ইধাপি যথা-সদ্দো নিপাতমত্তোৰ. ইতো পরম্পি ঈদিসেসু ঠানেসু যথা-সদ্দো নিপাতমত্তোতি দট্ঠব্বো.

৫৫. রহদমিৰ ৰিপ্পসন্নন্তি অতিগম্ভীরৰিত্থতং মহারহদং ৰিয অনাৰিলং ৰিপ্পসন্নং সলিলং. সুফুল্লং পদুমং যথাতি সুৰিকসিতপদুমৰনং রহদমিৰাতি অত্থো দট্ঠব্বো. ‘‘সুফুল্লং কমলং যথা’’তিপি পাঠো, তস্স কমনীযভাৰেন সুফুল্লং কমলৰনমিৰাতি অত্থো.

৫৬. অথ তে ভিক্খূ ধম্মসেনাপতিপ্পমুখা অঞ্জলিং সিরসি কত্ৰা দসবলস্স চক্কালঙ্কততলেসু পাদেসু নিপতিংসূতি অত্থো. তেন ৰুত্তং – ‘‘অঞ্জলিং পগ্গহেত্ৰান, তুট্ঠহট্ঠা পমোদিতা’’তিআদি. তত্থ নিপতন্তীতি নিপতিংসু, ৰন্দিংসূতি অত্থো. চক্কলক্খণেতি ¶ চক্কং লক্খণং যস্মিং পাদে সো পাদো চক্কলক্খণো, তস্মিং চক্কলক্খণে. জাতিৰসেন ‘‘পাদে’’তি ৰুত্তং, সত্থুনো চক্কালঙ্কততলেসু পাদেসু নিপতিংসূতি অত্থো.

৫৭. ইদানি তেসং কেসঞ্চি থেরানং নামং দস্সেন্তেহি ‘‘সারিপুত্তো মহাপঞ্ঞো, কোরণ্ডসমসাদিসো’’তিআদি গাথাযো ৰুত্তা. তত্থ কোরণ্ডসমসাদিসোতি কোরণ্ডকুসুমসদিসৰণ্ণো, যদি এৰং ‘‘কোরণ্ডসমো’’তি ৰা, ‘‘কোরণ্ডসদিসো’’তি ৰা ৰত্তব্বং, কিং দ্ৰিক্খত্তুং ¶ ‘‘সমসাদিসো’’তি ৰুত্তন্তি চে? নাযং দোসো, তাদিসো কোরণ্ডসমত্তা কোরণ্ডসদিসভাৰেনেৰ কোরণ্ডসমসাদিসো. ন পনাধিকৰচনৰসেনাতি অধিপ্পাযো. সমাধিজ্ঝানকুসলোতি এত্থ অযং কুসল-সদ্দো তাৰ অরোগ্যানৰজ্জছেকসুখৰিপাকাদীসু দিস্সতি. অযঞ্হি ‘‘কচ্চি নু ভোতো কুসলং, কচ্চি ভোতো অনাময’’ন্তিআদীসু (জা. ১.১৫.১৪৬; ২.২০.১২৯) আরোগ্যে দিস্সতি. ‘‘কতমো পন, ভন্তে, কাযসমাচারো কুসলো ¶ ? যো খো, মহারাজ, কাযসমাচারো অনৰজ্জো’’তি (ম. নি. ২.৩৬১) এৰমাদীসু অনৰজ্জে. ‘‘কুসলো ত্ৰং রথস্স অঙ্গপচ্চঙ্গান’’ন্তিআদীসু (ম. নি. ২.৮৭) ছেকে. ‘‘কুসলস্স কম্মস্স কতত্তা উপচিতত্তা’’তিআদীসু (ধ. স. ৪৩১ আদযো) সুখৰিপাকে. ইধ পন ছেকে দট্ঠব্বো. ৰন্দতেতি ৰন্দিত্থ.

৫৮. গজ্জিতাতি গজ্জন্তীতি গজ্জিতা. কালমেঘো ৰাতি নীলসলিলধরো ৰিয গজ্জিতা ইদ্ধিৰিসযেতি অধিপ্পাযো. নীলুপ্পলসমসাদিসোতি নীলকুৰলযসদিসৰণ্ণো. হেট্ঠা ৰুত্তনযেনেৰেত্থাপি অত্থো ৰেদিতব্বো. মোগ্গল্লানোতি এৰং গোত্তৰসেন লদ্ধনামো কোলিতো.

৫৯. মহাকস্সপোপি চাতি উরুৰেলকস্সপনদীকস্সপগযাকস্সপকুমারকস্সপে খুদ্দানুখুদ্দকে থেরে উপাদায অযং মহা, তস্মা ‘‘মহাকস্সপো’’তি ৰুত্তো. পি চাতি সম্ভাৰনসম্পিণ্ডনত্থো. উত্তত্তকনকসন্নিভোতি সন্তত্তসুৰণ্ণসদিসছৰিৰণ্ণো. ধুতগুণেতি এত্থ কিলেসধুননতো ধম্মো ধুতো নাম, ধুতগুণো নাম ধুতধম্মো. কতমো পন ধুতধম্মো নাম? অপ্পিচ্ছতা, সন্তুট্ঠিতা, সল্লেখতা, পৰিৰেকতা, ইদমট্ঠিকতাতি ইমে ধুতঙ্গচেতনায পরিৰারভূতা পঞ্চ ধম্মা ‘‘অপ্পিচ্ছংযেৰ নিস্সাযা’’তিআদিৰচনতো ধুতধম্মা নাম. অথ ৰা কিলেসে ধুননতো ঞাণং ধুতং নাম, তস্মিং ধুতগুণে. অগ্গনিক্খিত্তোতি ¶ অগ্গো সেট্ঠো কোটিভূতোতি ঠপিতো. ‘‘এতদগ্গং, ভিক্খৰে, মম সাৰকানং ভিক্খূনং ধুতৰাদানং যদিদং মহাকস্সপো’’তি (অ. নি. ১.১৮৮, ১৯১) ঠানন্তরে ঠপিতোতি অত্থো. অযং পন অগ্গ-সদ্দো আদিকোটিকোট্ঠাসসেট্ঠাদীসু দিস্সতি. তথা হেস – ‘‘অজ্জতগ্গে, সম্ম দোৰারিক ¶ , আৰরামি দারং নিগণ্ঠানং নিগণ্ঠীন’’ন্তিআদীসু (ম. নি. ২.৭০) আদিম্হি দিস্সতি. ‘‘তেনেৰ অঙ্গুলগ্গেন তং অঙ্গুলগ্গং পরামসেয্য’’ (কথা. ৪৪১), ‘‘উচ্ছগ্গং ৰেল়গ্গ’’ন্তিআদীসু কোটিযং. ‘‘অম্বিলগ্গং ৰা মধুরগ্গং ৰা’’ (সং. নি. ৫.৩৭৪) ‘‘অনুজানামি, ভিক্খৰে, ৰিহারগ্গেন ৰা পরিৰেণগ্গেন ৰা ভাজেতু’’ন্তিআদীসু (চূল়ৰ. ৩১৮) কোট্ঠাসে. ‘‘যাৰতা, ভিক্খৰে, সত্তা অপদা ৰা দ্ৰিপদা ৰা…পে… তথাগতো তেসং অগ্গমক্খাযতী’’তিআদীসু (অ. নি. ৪.৩৪) সেট্ঠে. স্ৰাযমিধ সেট্ঠে দট্ঠব্বো. কোটিযম্পি ৰত্ততি. থেরো অত্তনো ঠানে সেট্ঠো চেৰ কোটিভূতো চ. তেন ৰুত্তং – ‘‘অগ্গনিক্খিত্তো’’তি, অগ্গো সেট্ঠো কোটিভূতোতি অত্থো (দী. নি. অট্ঠ. ১.২৫০ সরণগমনকথা; পারা. অট্ঠ. ১.১৫). থোমিতোতি পসংসিতো দেৰমনুস্সাদীহি. সত্থু ৰণ্ণিতোতি সত্থারা ৰণ্ণিতো থুতো, ‘‘কস্সপো, ভিক্খৰে, চন্দূপমো কুলানি উপসঙ্কমতি অপকস্সেৰ ¶ কাযং অপকস্স চিত্তং নিচ্চনৰকো কুলেসু অপ্পগব্ভো’’তি এৰমাদীহি অনেকেহি সুত্তনযেহি (সং. নি. ২.১৪৬) ৰণ্ণিতো পসত্থো, সোপি ভগৰন্তং ৰন্দতীতি অত্থো.

৬০. দিব্বচক্খূনন্তি দিব্বং চক্খু যেসং অত্থি তে দিব্বচক্খূ, তেসং দিব্বচক্খূনং ভিক্খূনং অগ্গো সেট্ঠোতি অত্থো. যথাহ – ‘‘এতদগ্গং, ভিক্খৰে, মম সাৰকানং ভিক্খূনং দিব্বচক্খুকানং যদিদং অনুরুদ্ধো’’তি (অ. নি. ১.১৮৮, ১৯২). অনুরুদ্ধত্থেরো ভগৰতো চূল়পিতুনো অমিতোদনস্স নাম সক্কস্স পুত্তো মহানামস্স কনিট্ঠভাতা মহাপুঞ্ঞো পরমসুখুমালো, সো অত্তসত্তমো নিক্খমিত্ৰা অগারস্মা অনগারিযং পব্বজিতো, তস্স পব্বজ্জানুক্কমো সঙ্ঘভেদকক্খন্ধকে (চূল়ৰ. ৩৩০ আদযো) আগতোৰ. অৰিদূরে ৰাতি ভগৰতো সন্তিকেযেৰ.

৬১. আপত্তিঅনাপত্তিযাতি আপত্তিযঞ্চ অনাপত্তিযঞ্চ কোৰিদো. সতেকিচ্ছাযাতি সপ্পটিকম্মাযপি অপ্পটিকম্মাযপি চাতি অত্থো. তত্থ সপ্পটিকম্মা সা ছব্বিধা হোতি, অপ্পটিকম্মা সা পারাজিকাপত্তি. ‘‘আপত্তিঅনাপত্তিযা, সতেকিচ্ছায কোৰিদো’’তিপি পাঠো, সোযেৰ অত্থো. ৰিনযেতি ¶ ৰিনযপিটকে. অগ্গনিক্খিত্তোতি ‘‘এতদগ্গং, ভিক্খৰে ¶ , মম সাৰকানং ভিক্খূনং ৰিনযধরানং যদিদং, উপালী’’তি (অ. নি. ১.২১৯, ২২৮) এতদগ্গট্ঠানে ঠপিতোতি অত্থো. উপালীতি উপালিত্থেরো. সত্থু ৰণ্ণিতোতি সত্থারা ৰণ্ণিতো পসত্থো. থেরো কির তথাগতস্সেৰ সন্তিকে ৰিনযপিটকং উগ্গণ্হিত্ৰা ভারুকচ্ছকৰত্থুং (পারা. ৭৮), অজ্জুকৰত্থুং (পারা. ১৫৮), কুমারকস্সপৰত্থুন্তি (ম. নি. ১.২৪৯) ইমানি তীণি ৰত্থূনি সব্বঞ্ঞুতঞ্ঞাণেন সদ্ধিং সংসন্দিত্ৰা কথেসি. তস্মা থেরো ৰিনযধরানং অগ্গোতি এৰমাদিনা নযেন সত্থারা ৰণ্ণিতোতি ৰুত্তো.

৬২. সুখুমনিপুণত্থপটিৰিদ্ধোতি পটিৰিদ্ধসুখুমনিপুণত্থো, পটিৰিদ্ধদুদ্দসনিপুণত্থোতি অত্থো. কথিকানং পৰরোতি ধম্মকথিকানং সেট্ঠো. ‘‘এতদগ্গং, ভিক্খৰে, মম সাৰকানং ভিক্খূনং ধম্মকথিকানং যদিদং পুণ্ণো মন্তাণিপুত্তো’’তি (অ. নি. ১.১৮৮, ১৯৬) এতদগ্গপাল়িযং আরোপিতো. তেন ৰুত্তং ‘‘কথিকানং পৰরো’’তি. গণীতি সসঙ্ঘো. থেরস্স কির সন্তিকে পব্বজিতা কুলপুত্তা পঞ্চসতা অহেসুং. সব্বেপি তে দসবলস্স জাতভূমিকা জাতরট্ঠৰাসিনো সব্বেৰ খীণাসৰা সব্বেৰ দসকথাৰত্থুলাভিনো. তেন ৰুত্তং ‘‘গণী’’তি. ইসীতি এসতি গৰেসতি কুসলে ধম্মেতি ইসি. মন্তাণিযা পুত্তোতি মন্তাণিযা নাম ব্রাহ্মণিযা পুত্তো. পুণ্ণোতি তস্স নামং. ৰিস্সুতোতি অত্তনো অপ্পিচ্ছতাদীহি গুণেহি ৰিস্সুতো.

অঞ্ঞাসিকোণ্ডঞ্ঞত্থেরো ¶ পন সত্থরি অভিসম্বোধিং পত্ৰা পৰত্তিতৰরধম্মচক্কে অনুপুব্বেন আগন্ত্ৰা রাজগহং উপনিস্সায ৰিহরন্তে কপিলৰত্থুং আগন্ত্ৰা অত্তনো ভাগিনেয্যং পুণ্ণং নাম মাণৰং পব্বাজেত্ৰা ভগৰন্তং ৰন্দিত্ৰা আপুচ্ছিত্ৰা নিৰাসত্থায সযং ছদ্দন্তদহং গতো. পুণ্ণো পন ভগৰন্তং দস্সনায থেরেন সদ্ধিং আগন্ত্ৰা – ‘‘ময্হং পব্বজিতকিচ্চং মত্থকং পাপেত্ৰাৰ দসবলস্স সন্তিকং গমিস্সামী’’তি কপিলপুরেযেৰ ওহীনো, সো যোনিসোমনসিকারং করোন্তো নচিরস্সেৰ অরহত্তং পত্ৰা ভগৰন্তং উপসঙ্কমি. এত্থ পন অনুরুদ্ধত্থেরো চ উপালিত্থেরো চ ইমে দ্ৰে থেরা ভগৰতো কপিলৰত্থুপুরং পৰিসিত্ৰা ঞাতিসমাগমদিৰসে পব্বজিতা ৰিয দস্সিতা, তং পন খন্ধকপাল়িযা অট্ঠকথায চ ন সমেতি. ৰীমংসিত্ৰা গহেতব্বং.

অথ ¶ সত্থা সারিপুত্তত্থেরাদীনং ¶ পঞ্চন্নং ভিক্খুসতানং চিত্তাচারমঞ্ঞায অত্তনো গুণে কথেতুমারভি. তেন ৰুত্তং –

‘‘এতেসং চিত্তমঞ্ঞায, ওপম্মকুসলো মুনি;

কঙ্খচ্ছেদো মহাৰীরো, কথেসি অত্তনো গুণ’’ন্তি.

তত্থ ওপম্মকুসলোতি উপমায কুসলো. কঙ্খচ্ছেদোতি সব্বসত্তানং সংসযচ্ছেদকো.

ইদানি তে অত্তনো গুণে কথেসি, তে দস্সেতুং –

‘‘চত্তারো তে অসঙ্খ্যেয্যা, কোটি যেসং ন নাযতি;

সত্তকাযো চ আকাসো, চক্কৰাল়া চনন্তকা;

বুদ্ধঞাণং অপ্পমেয্যং, ন সক্কা এতে ৰিজানিতু’’ন্তি. – ৰুত্তং;

তত্থ চত্তারোতি গণনপরিচ্ছেদো. এতেতি ইদানি ৰত্তব্বে অত্থে নিদস্সেতি. অসঙ্খ্যেয্যাতি সঙ্খ্যাতুমসক্কুণেয্যত্তা অসঙ্খ্যেয্যা, গণনপথং ৰীতিৰত্তাতি অত্থো. কোটীতিআদি ৰা অন্তো ৰা মরিযাদা. যেসন্তি যেসং চতুন্নং অসঙ্খ্যেয্যানং. ন নাযতীতি ন পঞ্ঞাযতি. ইদানি তে ৰুত্তপ্পকারে চত্তারো অসঙ্খ্যেয্যে দস্সেতুং ‘‘সত্তকাযো’’তিআদি ৰুত্তং. সত্তকাযোতি সত্তসমূহো, সত্তকাযো অনন্তো অপরিমাণো অপ্পমেয্যো. তথা আকাসো আকাসস্সাপি অন্তো নত্থি. তথা চক্কৰাল়ানি অনন্তানি এৰ. বুদ্ধঞাণং সব্বঞ্ঞুতঞ্ঞাণং অপ্পমেয্যং. ন সক্কা এতে ৰিজানিতুন্তি যস্মা পনেতে অনন্তা, তস্মা ন সক্কা ৰিজানিতুং.

৬৫. ইদানি ¶ সত্থা অত্তনো ইদ্ধিৰিকুব্বনে সঞ্জাতচ্ছরিযব্ভুতানং দেৰমনুস্সাদীনং কিন্নামেতং অচ্ছরিযং, ইতোপি ৰিসিট্ঠতরং অচ্ছরিযং অব্ভুতং অত্থি, মম তং সুণাথাতি ধম্মদেসনং ৰড্ঢেন্তো –

‘‘কিমেতং অচ্ছরিযং লোকে, যং মে ইদ্ধিৰিকুব্বনং;

অঞ্ঞে বহূ অচ্ছরিযা, অব্ভুতা লোমহংসনা’’তি. – আদিমাহ;

তত্থ ¶ কিন্তি পটিক্খেপৰচনং.এতন্তি ইদং ইদ্ধিৰিকুব্বনং সন্ধাযাহ. যন্তি অযং যং-সদ্দো ‘‘যং তং অপুচ্ছিম্হ অকিত্তযী নো, অঞ্ঞং তং পুচ্ছাম তদিঙ্ঘ ব্রূহী’’তিআদীসু (সু. নি. ১০৫৮; মহানি. ১১০; চূল়নি. মেত্তগূমাণৰপুচ্ছা ৭৭) উপযোগৰচনে দিস্সতি ¶ . ‘‘অট্ঠানমেতং, ভিক্খৰে, অনৰকাসো; যং একিস্সা লোকধাতুযা দ্ৰে অরহন্তো সম্মাসম্বুদ্ধা’’তি (অ. নি. ১.২৭৭; ৰিভ. ৮০৯; মি. প. ৫.১.১) এত্থ কারণৰচনে. ‘‘যং ৰিপস্সী ভগৰা কপ্পে উদপাদী’’তি (দী. নি. ২.৪) এত্থ ভুম্মে. ‘‘যং খো মে, ভন্তে, দেৰানং তাৰতিংসানং সম্মুখা সুতং সম্মুখা পটিগ্গহিতং, আরোচেমি তং ভগৰতো’’তিআদীসু (দী. নি. ২.২৯৩) পচ্চত্তৰচনে. ইধাপি পচ্চত্তৰচনে দট্ঠব্বো (দী. নি. অট্ঠ. ২.৪). অঞ্ঞে বহূ মম অচ্ছরিযা অব্ভুতৰিসেসা সন্তীতি দীপেতি.

‘‘যদাহং তুসিতে কাযে, সন্তুসিতো নামহং তদা;

দসসহস্সী সমাগম্ম, যাচন্তি পঞ্জলী মম’’ন্তি. – আদিমাহ;

তত্থ যদাতি যস্মিং কালে. অহন্তি অত্তানং নিদ্দিসতি. তুসিতে কাযেতি তুসিতসঙ্খাতে দেৰনিকাযে. যদা পনাহং সমত্তিংসপারমিযো পূরেত্ৰা পঞ্চমহাপরিচ্চাগে পরিচ্চজিত্ৰা ঞাতত্থচরিযলোকত্থচরিযবুদ্ধত্থচরিযানং কোটিং পত্ৰা সত্তসতকমহাদানানি দত্ৰা সত্তক্খত্তুং পথৰিং কম্পেত্ৰা ৰেস্সন্তরত্তভাৰতো চৰিত্ৰা দুতিযে চিত্তৰারে তুসিতভৰনে নিব্বত্তো তদাপি সন্তুসিতো নাম দেৰরাজা অহোসিং. দসসহস্সী সমাগম্মাতি দসসহস্সচক্কৰাল়েসু দেৰতা সন্নিপতিত্ৰাতি অত্থো. যাচন্তি পঞ্জলী মমন্তি মং উপসঙ্কমিত্ৰা, ‘‘মারিস, তযা দস পারমিযো পূরেন্তেন ন সক্কসম্পত্তিং ন মার ন ব্রহ্ম ন চক্কৰত্তিসম্পত্তিং পত্থেন্তেন পূরিতা, লোকনিত্থরণত্থায পন বুদ্ধত্তং পত্থযমানেন পূরিতা, সো তৰ কালো, মারিস, বুদ্ধত্তায সমযো ¶ , মারিস, বুদ্ধত্তাযা’’তি (জা. অট্ঠ. ১.নিদানকথা, অৰিদূরেনিদানকথা) যাচন্তি মমন্তি. তেন ৰুত্তং –

‘‘কালো খো তে মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি.

তত্থ ¶ কালো তেতি কালো তৰ, অযমেৰ ৰা পাঠো. উপ্পজ্জাতি পটিসন্ধিং গণ্হ, ‘‘ওক্কমা’’তিপি পাঠো. সদেৰকন্তি সদেৰকং লোকন্তি অত্থো. তারযন্তোতি এত্থ পারমিযো পূরেন্তোপি তারযতি নাম, পারমিযো মত্থকং পাপেন্তোপি তারযতি নাম, ৰেস্সন্তরত্তভাৰতো চৰিত্ৰা ¶ তুসিতপুরে পটিসন্ধিং গহেত্ৰা সট্ঠিৰস্সসতসহস্সাধিকানি সত্তপণ্ণাসৰস্সকোটিযো তত্থ তিট্ঠন্তোপি তারযতি নাম, দেৰতাহি যাচিতো পঞ্চৰিধং মহাৰিলোকিতং ৰিলোকেত্ৰা মহামাযাদেৰিযা কুচ্ছিস্মিং পটিসন্ধিং গণ্হন্তোপি দসমাসে গব্ভৰাসং ৰসন্তোপি তারযতি নাম, একূনতিংস ৰস্সানি অগারমজ্ঝে তিট্ঠন্তোপি তারযতি নাম. রাহুলভদ্দস্স জাতদিৰসে ছন্নসহাযো কণ্ডকং আরুয্হ নিক্খমন্তোপি তীণি রজ্জানি অতিক্কমিত্ৰা অনোমায নাম নদিযা তীরে পব্বজন্তোপি তারযতি নাম, ছব্বস্সানি পধানং করোন্তোপি ৰিসাখপুণ্ণমাযং মহাবোধিমণ্ডং আরুয্হ মারবলং ৰিধমিত্ৰা পঠমযামে পুব্বেনিৰাসং অনুস্সরিত্ৰা মজ্ঝিমযামে দিব্বচক্খুং ৰিসোধেত্ৰা পচ্ছিমযামে দ্ৰাদসঙ্গং পটিচ্চসমুপ্পাদং অনুলোমপটিলোমতো সম্মসিত্ৰা সোতাপত্তিমগ্গং পটিৰিজ্ঝন্তোপি তারযতি নাম, সোতাপত্তিফলক্খণেপি, সকদাগামিমগ্গক্খণেপি, সকদাগামিফলক্খণেপি, অনাগামিমগ্গক্খণেপি, অনাগামিফলক্খণেপি, অরহত্তমগ্গক্খণেপি, অরহত্তফলক্খণেপি তারযতি নাম, যদা অট্ঠারসদেৰতাকোটিসহস্সেহি পঞ্চৰগ্গিযানং অমতপানং অদাসি, ততো পট্ঠায তারযি নামাতি ৰুচ্চতি. তেন ৰুত্তং –

‘‘সদেৰকং তারযন্তো, বুজ্ঝস্সু অমতং পদ’’ন্তি.

অথ মহাসত্তো দেৰতাহি যাচিযমানোপি দেৰতানং পটিঞ্ঞং অদত্ৰাৰ কালদীপদেসকুলজনেত্তিআযুপরিচ্ছেদৰসেন পঞ্চৰিধং মহাৰিলোকনং নাম ৰিলোকেসি. তত্থ ‘‘কালো নু খো, ন কালো’’তি পঠমং কালং ৰিলোকেসি. তত্থ ৰস্সসতসহস্সতো উদ্ধং আযুকালো কালো নাম ন হোতি. কস্মা? জাতিজরামরণাদীনং অপাকটত্তা, বুদ্ধানঞ্চ ধম্মদেসনা নাম তিলক্খণমুত্তা নাম নত্থি, তেসং অনিচ্চং দুক্খমনত্তাতি কথেন্তানং ‘‘কিন্নামেতে কথেন্তী’’তি ন সদ্দহন্তি, ততো অভিসমযো ন হোতি, তস্মিং অসতি অনিয্যানিকং ¶ সাসনং হোতি ¶ . তস্মা সো অকালো. ৰস্সসততো ঊনো আযুকালোপি কালো ন হোতি. কস্মা? তদা সত্তা উস্সন্নকিলেসা হোন্তি, উস্সন্নকিলেসানঞ্চ দিন্নো ওৰাদো ওৰাদট্ঠানে ন তিট্ঠতি, তস্মা সোপি অকালো. ৰস্সসতসহস্সতো পট্ঠায হেট্ঠা ৰস্সসততো পট্ঠায উদ্ধং আযুকালো কালো নাম. ইদানি ৰস্সসতাযুকা মনুস্সাতি অথ বোধিসত্তো ‘‘নিব্বত্তিতব্বকালো’’তি অদ্দস.

ততো দীপং ওলোকেন্তো ‘‘জম্বুদীপেযেৰ বুদ্ধা নিব্বত্তন্তী’’তি দীপং পস্সি. ততো জম্বুদীপো নাম মহা দসযোজনসহস্সপরিমাণো, কতরস্মিং নু খো পদেসে বুদ্ধা নিব্বত্তন্তী’’তি দেসং ৰিলোকেন্তো মজ্ঝিমদেসং পস্সি. ততো কুলং ৰিলোকেন্তো ‘‘বুদ্ধা নাম লোকসম্মতে কুলে নিব্বত্তন্তি, ইদানি খত্তিযকুলং লোকসম্মতং, তত্থ নিব্বত্তিস্সামি, সুদ্ধোদনো নাম মে রাজা পিতা ভৰিস্সতী’’তি কুলং অদ্দস. ততো মাতরং ৰিলোকেন্তো ‘‘বুদ্ধমাতা নাম লোলা সুরাধুত্তা ন হোতি, অখণ্ডপঞ্চসীলাতি অযঞ্চ মহামাযা নাম দেৰী এদিসা, অযং মে মাতা ভৰিস্সতীতি কিত্তকং অস্সা আযূ’’তি আৰজ্জেন্তো দসন্নং মাসানং উপরি সত্তদিৰসানি পস্সি. ইতি ইমং পঞ্চৰিধৰিলোকনং ৰিলোকেত্ৰা – ‘‘কালো মে, মারিস, বুদ্ধভাৰাযা’’তি দেৰতানং পটিঞ্ঞং দত্ৰা তত্থ যাৰতাযুকং ঠত্ৰা ততো চৰিত্ৰা সক্যরাজকুলে ¶ মাযাদেৰিযা কুচ্ছিযং পটিসন্ধিং অগ্গহেসি (জা. অট্ঠ. ১.নিদানকথা, অৰিদূরেনিদানকথা; অপ. অট্ঠ. ১.নিদানকথা, অৰিদূরেনিদানকথা). তেন ৰুত্তং –

‘‘তুসিতা কাযা চৰিত্ৰান, যদা ওক্কমি কুচ্ছিযং;

দসসহস্সীলোকধাতু, কম্পিত্থ ধরণী তদা’’তি. – আদি;

তত্থ ওক্কমীতি ওক্কমিং পাৰিসিং. কুচ্ছিযন্তি মাতুকুচ্ছিম্হি. দসসহস্সীলোকধাতু, কম্পিত্থাতি সতো সম্পজানো পন বোধিসত্তো মাতুকুচ্ছিং ওক্কমন্তো একূনৰীসতিযা পটিসন্ধিচিত্তেসু মেত্তাপুব্বভাগস্স সোমনস্সসহগতঞাণসম্পযুত্তঅসঙ্খারিককুসলচিত্তস্স সদিস মহাৰিপাকচিত্তেন আসাল়্হিপুণ্ণমাযং উত্তরাসাল়্হনক্খত্তেনেৰ পটিসন্ধিং অগ্গহেসি. তদা দসসহস্সীলোকধাতু সকলাপি ¶ কম্পি সঙ্কম্পি সম্পকম্পীতি অত্থো. ধরণীতি ধারেতি সব্বে থাৰরজঙ্গমেতি ধরণী, পথৰী.

৬৯. সম্পজানোৰ নিক্খমিন্তি এত্থ যদা পনাহং সতো সম্পজানোৰ মাতুকুচ্ছিতো ধম্মাসনতো ওতরন্তো ধম্মকথিকো ৰিয নিস্সেণিতো ওতরন্তো পুরিসো ৰিয চ দ্ৰে হত্থে চ পাদে ¶ চ পসারেত্ৰা ঠিতকোৰ মাতুকুচ্ছিসম্ভৰেন কেনচি অসুচিনা অমক্খিতোৰ নিক্খমিং. সাধুকারং পৰত্তেন্তীতি সাধুকারং পৰত্তযন্তি, সাধুকারং দেন্তীতি অত্থো. পকম্পিত্থাতি কম্পিত্থ, ওক্কমনেপি মাতুকুচ্ছিতো নিক্খমনেপি দসসহস্সী পকম্পিত্থাতি অত্থো.

৭০. অথ ভগৰা গব্ভোক্কন্তিআদীসু অত্তনা সমসমং অদিস্ৰা গব্ভোক্কন্তিআদীসু অত্তনো অচ্ছরিযদস্সনত্থং ‘‘ওক্কন্তি মে সমো নত্থী’’তি ইমং গাথমাহ. তত্থ ওক্কন্তীতি গব্ভোক্কন্তিযং, ভুম্মত্থে পচ্চত্তৰচনং, পটিসন্ধিগ্গহণেতি অত্থো. মেতি মযা. সমোতি সদিসো নত্থি. জাতিতোতি এত্থ জাযতি এতায মাতুযাতি মাতা ‘‘জাতী’’তি ৰুচ্চতি, ততো জাতিতো মাতুযাতি অত্থো. অভিনিক্খমেতি মাতুকুচ্ছিতো অভিনিক্খমনে পসৰে সতীতি অত্থো. সম্বোধিযন্তি এত্থ পসত্থা সুন্দরা বোধি সম্বোধি. অযং পন বোধি-সদ্দো রুক্খমগ্গনিব্বানসব্বঞ্ঞুতঞ্ঞাণাদীসু দিস্সতি – ‘‘বোধিরুক্খমূলে পঠমাভিসম্বুদ্ধো’’তি (মহাৰ. ১; উদা. ১) চ, ‘‘অন্তরা চ গযং অন্তরা চ বোধি’’ন্তি (ম. নি. ১.২৮৫; ২.৩৪১; মহাৰ. ১১) চ আগতট্ঠানে হি রুক্খো বোধীতি ৰুচ্চতি. ‘‘বোধি ¶ ৰুচ্চতি চতূসু মগ্গেসু ঞাণ’’ন্তি (চূল়নি. খগ্গৰিসাণসুত্তনিদ্দেস ১২১) আগতট্ঠানে মগ্গো. ‘‘পত্ৰান বোধিং অমতং অসঙ্খত’’ন্তি আগতট্ঠানে নিব্বানং. ‘‘পপ্পোতি বোধিং ৰরভূরিমেধসো’’তি (দী. নি. ৩.২১৭) আগতট্ঠানে সব্বঞ্ঞুতঞ্ঞাণং. ইধ পন ভগৰতো অরহত্তমগ্গঞাণং অধিপ্পেতং (ম. নি. অট্ঠ. ১.১৩; পারা. অট্ঠ. ১.১১; উদা. অট্ঠ. ২০; চরিযা. অট্ঠ. নিদানকথা). অপরে ‘‘সব্বঞ্ঞুতঞ্ঞাণ’’ন্তিপি ৰদন্তি, তস্সং সম্বোধিযং অহং সেট্ঠোতি অত্থো.

কস্মা পন ভগৰা সম্বোধিং পটিচ্চ অত্তানং পসংসতীতি? সব্বগুণদাযকত্তা. ভগৰতো হি সম্বোধি সব্বগুণদাযিকা সব্বেপি নিরৰসেসে বুদ্ধগুণে ¶ দদাতি, ন পন অঞ্ঞেসং. অঞ্ঞেসং পন কস্সচি অরহত্তমগ্গো অরহত্তফলমেৰ দেতি, কস্সচি তিস্সো ৰিজ্জা, কস্সচি ছ অভিঞ্ঞা, কস্সচি চতস্সো পটিসম্ভিদা, কস্সচি সাৰকপারমিঞাণং, পচ্চেকবুদ্ধানং পচ্চেকবোধিঞাণমেৰ দেতি. বুদ্ধানং পন সব্বগুণসম্পত্তিং দেতি. তস্মা ভগৰা সব্বগুণদাযকত্তা ‘‘সম্বোধিযং অহং সেট্ঠো’’তি অত্তানং পসংসতি. অপি চ ভূমিং চালেত্ৰা সম্বোধিং পাপুণি, তস্মা ‘‘সম্বোধিযং অহং সেট্ঠো’’তি ৰদতি. ধম্মচক্কপ্পৰত্তনেতি এত্থ ধম্মচক্কং পন দুৰিধং হোতি – পটিৰেধঞাণঞ্চ দেসনাঞাণঞ্চাতি. তত্থ পঞ্ঞাপভাৰিতং অত্তনো অরিযফলাৰহং পটিৰেধঞাণং, করুণাপভাৰিতং সাৰকানং অরিযফলাৰহং দেসনাঞাণং. পটিৰেধঞাণং লোকুত্তরং কুসলং উপেক্খাসহগতং অৰিতক্কঅৰিচারং, দেসনাঞাণং লোকিযং অব্যাকতং ¶ , উভযম্পি পনেতং অঞ্ঞেহি অসাধারণং. ইধ পন দেসনাঞাণং অধিপ্পেতং (পটি. ম. অট্ঠ. ২.২.৪৪).

৭১. ইদানি ভগৰতো গব্ভোক্কমনেৰ পথৰিকম্পনাদিকং পৰত্তিং সুত্ৰা ‘‘অহো অচ্ছরিযং লোকে’’তি দেৰতাহি অযং গাথা ৰুত্তা. তত্থ বুদ্ধানং গুণমহন্ততাতি অহো বুদ্ধানং গুণমহন্তভাৰো, অহো বুদ্ধানং মহানুভাৰোতি অত্থো দসসহস্সীলোকধাতু, ছপ্পকারং পকম্পথাতি দসসু চক্কৰাল়সহস্সেসু মহাপথৰী ছপ্পকারং পকম্পিত্থ চলিত্থ. কথং? পুরত্থিমতো উন্নমতি পচ্ছিমতো ওনমতি, পচ্ছিমতো উন্নমতি পুরত্থিমতো ওনমতি, উত্তরতো উন্নমতি দক্খিণতো ওনমতি, দক্খিণতো উন্নমতি উত্তরতো ওনমতি, মজ্ঝিমতো উন্নমতি পরিযন্ততো ওনমতি, পরিযন্ততো উন্নমতি মজ্ঝিমতো ওনমতীতি এৰং ছপ্পকারং অনিলবলচলিতজলতরঙ্গভঙ্গসঙ্ঘট্টিতা ৰিয নাৰা চতুনহুতাধিকদ্ৰিযোজনসতসহস্সবহলা পথৰিসন্ধারকজলপরিযন্তা অচেতনাপি সমানা সচেতনা ৰিয অযং মহাপথৰী পীতিযা নচ্চন্তী ৰিয অকম্পিত্থাতি অত্থো. ওভাসো ¶ চ মহা আসীতি অতিক্কম্মেৰ দেৰানং দেৰানুভাৰং উল়ারো ওভাসো অহোসীতি অত্থো. অচ্ছেরং লোমহংসনন্তি অচ্ছেরঞ্চ লোমহংসনঞ্চ অহোসীতি অত্থো.

৭২. ইদানি পথৰিকম্পনালোকপাতুভাৰাদীসু অচ্ছরিযেসু ৰত্তমানেসু ভগৰতো পৰত্তিদস্সনত্থং ‘‘ভগৰা তম্হি সমযে’’তিআদিগাথাযো ৰুত্তা. তত্থ লোকজেট্ঠোতি লোকসেট্ঠো. সদেৰকন্তি ¶ সদেৰকস্স লোকস্স, সামিঅত্থে উপযোগৰচনং দট্ঠব্বং. দস্সযন্তোতি পাটিহারিযং দস্সেন্তো.

৭৩. চঙ্কমন্তোৰাতি দসলোকধাতুসহস্সানি অজ্ঝোত্থরিত্ৰা ঠিতে তস্মিং রতনমযে চঙ্কমে চঙ্কমমানোৰ কথেসি. লোকনাযকোতি অথ সত্থা মনোসিলাতলে সীহনাদং নদন্তো সীহো ৰিয গজ্জন্তো পাৰুস্সকমেঘো ৰিয চ আকাসগঙ্গং ওতারেন্তো ৰিয চ অট্ঠঙ্গসমন্নাগতেন (দী. নি. ২.২৮৫, ৩০১) সৰনীযেন কমনীযেন ব্রহ্মস্সরেন নানানযৰিচিত্তং চতুসচ্চপটিসংযুত্তং তিলক্খণাহতং মধুরধম্মকথং কথেসীতি অত্থো.

অন্তরা ন নিৰত্তেতি, চতুহত্থে চঙ্কমে যথাতি এত্থ সত্থারা পন নিম্মিতস্স তস্স চঙ্কমস্স একা কোটি পাচীনচক্কৰাল়মুখৰট্টিযং একা পচ্ছিমচক্কৰাল়মুখৰট্টিযং এৰং ঠিতে তস্মিং রতনচঙ্কমে চঙ্কমমানো সত্থা উভো কোটিযো পত্ৰাৰ নিৰত্ততি, অন্তরা উভো কোটিযো অপত্ৰা ন নিৰত্ততি. যথা চতুহত্থপ্পমাণে চঙ্কমে চঙ্কমমানো উভো কোটিযো সীঘমেৰ পত্ৰা নিৰত্ততি, এৰং অন্তরা ন নিৰত্ততীতি অত্থো. কিং পন ভগৰা দসসহস্সযোজনপ্পমাণাযামং চঙ্কমং রস্সমকাসি ¶ , তাৰমহন্তং ৰা অত্তভাৰং নিম্মিনীতি? ন পনেৰমকাসি. অচিন্তেয্যো বুদ্ধানং বুদ্ধানুভাৰো. অকনিট্ঠভৰনতো পট্ঠায যাৰ অৰীচি, তাৰ একঙ্গণা অহোসি. তিরিযতো চ দসচক্কৰাল়সহস্সানি একঙ্গণানি অহেসুং. দেৰা মনুস্সে পস্সন্তি, মনুস্সাপি দেৰে পস্সন্তি. যথা সব্বে দেৰমনুস্সা পকতিযা চঙ্কমমানং পস্সন্তি, এৰং ভগৰন্তং চঙ্কমমানং পস্সিংসূতি. ভগৰা পন চঙ্কমন্তোৰ ধম্মং দেসেতি অন্তরাসমাপত্তিঞ্চ সমাপজ্জতি.

অথ আযস্মা সারিপুত্তো অপরিমিতসমযসমুপচিতকুসলবলজনিতদ্ৰত্তিংসৰরলক্খণোপসোভিতং অসীতানুব্যঞ্জনৰিরাজিতং ৰরসরীরং সরদসমযে পরিপুণ্ণং ৰিয রজনিকরং সব্বফালিফুল্লং ৰিয চ যোজনসতুব্বেধং পারিচ্ছত্তকং অট্ঠারসরতনুব্বেধং ব্যামপ্পভাপরিক্খেপসস্সিরিকং ৰরকনকগিরিমিৰ জঙ্গমং অনোপমায বুদ্ধলীল়ায অনোপমেন বুদ্ধসিরিৰিলাসেন চঙ্কমন্তং দসসহস্সিদেৰগণপরিৰুতং ভগৰন্তং অদ্দস. দিস্ৰান অযং ¶ পন সকলাপি দসসহস্সী লোকধাতু সন্নিপতিতা, মহতিযা পনেত্থ ধম্মদেসনায ভৰিতব্বং, বুদ্ধৰংসদেসনা পন বহূপকারা ভগৰতি পসাদাৰহা, যংনূনাহং দসবলস্স অভিনীহারতো ¶ পট্ঠায বুদ্ধৰংসং পরিপুচ্ছেয্য’’ন্তি চিন্তেত্ৰা একংসং চীৰরং কত্ৰা ভগৰন্তং উপসঙ্কমিত্ৰা দসনখসমুজ্জলং জলজামলাৰিকল-কমল-মকুলসদিসং অঞ্জলিং সিরসি কত্ৰা ভগৰন্তং ‘‘কীদিসো তে মহাৰীরা’’তিআদিকং পরিপুচ্ছি. তেন ৰুত্তং –

‘‘সারিপুত্তো মহাপঞ্ঞো, সমাধিজ্ঝানকোৰিদো;

পঞ্ঞায পারমিপ্পত্তো, পুচ্ছতি লোকনাযকং.

‘‘কীদিসো তে মহাৰীর, অভিনীহারো নরুত্তম;

কম্হি কালে তযা ধীর, পত্থিতা বোধিমুত্তমা’’তি. –

আদি. কা নামাযং অনুসন্ধীতি? পুচ্ছানুসন্ধি নাম. তিস্সো হি অনুসন্ধিযো – পুচ্ছানুসন্ধি অজ্ঝাসযানুসন্ধি যথানুসন্ধীতি. তত্থ ‘‘এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘কিং নু খো, ভন্তে, ওরিমং তীরং কিং পারিমং তীর’’ন্তি (সং. নি. ৪.২৪১) এৰং পুচ্ছন্তানং ভগৰতা ৰিস্সজ্জিতসুত্তৰসেন পুচ্ছানুসন্ধি ৰেদিতব্বা.

‘‘অথ খো অঞ্ঞতরস্স ভিক্খুনো এৰং চেতসো পরিৰিতক্কো উদপাদি ‘ইতি কির, ভো, রূপং অনত্তা, ৰেদনা অনত্তা, সঞ্ঞা অনত্তা, সঙ্খারা অনত্তা, ৰিঞ্ঞাণং অনত্তা, অনত্তকতানি ¶ কম্মানি কমত্তানং ফুসিস্সন্তী’তি. অথ খো ভগৰা তস্স ভিক্খুনো চেতসা চেতোপরিৰিতক্কমঞ্ঞায ভিক্খূ আমন্তেসি – ঠানং খো পনেতং, ভিক্খৰে, ৰিজ্জতি, যং ইধেকচ্চো মোঘপুরিসো অৰিদ্ৰা অৰিজ্জাগতো তণ্হাধিপতেয্যেন চেতসা সত্থুসাসনং অতিধাৰিতব্বং মঞ্ঞেয্য ‘ইতি কির, ভো, রূপং অনত্তা, ৰেদনা অনত্তা, সঞ্ঞা অনত্তা, সঙ্খারা অনত্তা, ৰিঞ্ঞাণং অনত্তা, অনত্তকতানি কম্মানি কমত্তানং ফুসিস্সন্তী’তি…পে… তং কিং মঞ্ঞথ, ভিক্খৰে, রূপং নিচ্চং ৰা অনিচ্চং ৰা’’তি (ম. নি. ৩.৯০) এৰং পরেসং অজ্ঝাসযং ৰিদিত্ৰা ভগৰতা ৰুত্তৰসেন অজ্ঝাসযানুসন্ধি ৰেদিতব্বা.

যেন ¶ পন ধম্মেন আদিম্হি দেসনা উট্ঠিতা, তস্স ধম্মস্স অনুরূপধম্মৰসেন ৰা পটিক্খেপৰসেন ৰা যেসু সুত্তেসু উপরিদেসনা আগচ্ছতি, তেসং ৰসেন যথানুসন্ধি ৰেদিতব্বা. তেন ৰুত্তং ‘‘পুচ্ছানুসন্ধী’’তি.

তত্থ পঞ্ঞায পারমিপ্পত্তোতি সাৰকপারমিঞাণস্স মত্থকং পত্তো. পুচ্ছতীতি অপুচ্ছি. তত্থ পুচ্ছা নাম অদিট্ঠজোতনাপুচ্ছা, দিট্ঠসংসন্দনাপুচ্ছা, ৰিমতিচ্ছেদনাপুচ্ছা, অনুমতিপুচ্ছা, কথেতুকম্যতাপুচ্ছাতি পঞ্চৰিধা হোতি. তত্থাযং থেরস্স কতমা পুচ্ছাতি চে? যস্মা পনাযং বুদ্ধৰংসো কপ্পসতসহস্সাধিকঅসঙ্খ্যেয্যোপচিতপুঞ্ঞসম্ভারানং পচ্চেকবুদ্ধানং ¶ কপ্পসতসহস্সাধিকঅসঙ্খ্যেয্যোপচিতপুঞ্ঞসম্ভারানং দ্ৰিন্নং অগ্গসাৰকানঞ্চ কপ্পসতসহস্সোপচিতপুঞ্ঞসম্ভারানং সেসমহাসাৰকানং ৰা অৰিসযো, সব্বঞ্ঞুবুদ্ধানংযেৰ ৰিসযো, তস্মা থেরস্স অদিট্ঠজোতনা পুচ্ছাতি ৰেদিতব্বা.

কীদিসোতি পুচ্ছনাকারো, কিংপকারোতি অত্থো. তেতি তৰ. অভিনীহারোতি অভিনীহারো নাম বুদ্ধভাৰত্থং মানসং বন্ধিত্ৰা ‘‘বুদ্ধব্যাকরণং অলদ্ধা ন উট্ঠহিস্সামী’’তি ৰীরিযমধিট্ঠায নিপজ্জনং. তেন ৰুত্তং –

‘‘কীদিসো তে মহাৰীর, অভিনীহারো নরুত্তমা’’তি.

কম্হি কালেতি তস্মিং কালে. পত্থিতাতি ইচ্ছিতা অভিকঙ্খিতা, ‘‘বুদ্ধো বোধেয্যং মুত্তো মোচেয্য’’ন্তিআদিনা নযেন বুদ্ধভাৰায পণিধানং কদা কতন্তি অপুচ্ছি. বোধীতি সম্মাসম্বোধি, অরহত্তমগ্গঞাণস্স চ সব্বঞ্ঞুতঞ্ঞাণস্স চেতং অধিৰচনং. উত্তমাতি সাৰকবোধিপচ্চেকবোধীহি সেট্ঠত্তা উত্তমাতি ৰুত্তা. উভিন্নমন্তরা ম-কারো পদসন্ধিকরো.

ইদানি ¶ বুদ্ধভাৰকারকে ধম্মে পুচ্ছন্তো –

‘‘দানং সীলঞ্চ নেক্খম্মং, পঞ্ঞাৰীরিযঞ্চ কীদিসং;

খন্তিসচ্চমধিট্ঠানং, মেত্তুপেক্খা চ কীদিসা.

‘‘দস পারমী তযা ধীর, কীদিসী লোকনাযক;

কথং উপপারমী পুণ্ণা, পরমত্থপারমী কথ’’ন্তি. – আহ;

তত্থ ¶ দানপারমিযং তাৰ বাহিরভণ্ডপরিচ্চাগো পারমী নাম, অঙ্গপরিচ্চাগো উপপারমী নাম, জীৰিতপরিচ্চাগো পরমত্থপারমী নামাতি. এস নযো সেসপারমীসুপি. এৰং দস পারমিযো দস উপপারমিযো দস পরমত্থপারমিযোতি সমত্তিংস পারমিযো হোন্তি. তত্থ বোধিসত্তস্স দানপারমিতায পূরিতত্তভাৰানং পরিমাণং নাম নত্থি. একন্তেন পনস্স সসপণ্ডিতজাতকে –

‘‘ভিক্খায উপগতং দিস্ৰা, সকত্তানং পরিচ্চজিং;

দানেন মে সমো নত্থি, এসা মে দানপারমী’’তি. (চরিযা. ১.১৪৩ তস্সুদ্দানং) –

এৰং পরং জীৰিতপরিচ্চাগং করোন্তস্স দানপারমী পরমত্থপারমী নাম জাতা.

তথা সীলপারমিতায পূরিতত্তভাৰানং পরিমাণং নাম নত্থি. একন্তেনেৰ পনস্স সঙ্খপালজাতকে –

‘‘সূলেহি ¶ ৰিনিৰিজ্ঝন্তে, কোট্টযন্তেপি সত্তিভি;

ভোজপুত্তে ন কুপ্পামি, এসা মে সীলপারমী’’তি. (চরিযা. ২.৯১) –

এৰং অত্তপরিচ্চাগং করোন্তস্স সীলপারমী পরমত্থপারমী নাম জাতা.

তথা মহারজ্জং পহায নেক্খম্মপারমিযা পূরিতত্তভাৰানং পরিমাণং নাম নত্থি. একন্তেন পনস্স চূল়সুতসোমজাতকে –

‘‘মহারজ্জং ¶ হত্থগতং, খেল়পিণ্ডংৰ ছড্ডযিং;

চজতো ন হোতি লগ্গনং, এসা মে নেক্খম্মপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং নিস্সঙ্গতায রজ্জং ছড্ডেত্ৰা নিক্খমন্তস্স নেক্খম্মপারমী পরমত্থপারমী নাম জাতা.

তথা মহোসধপণ্ডিতকালাদীসু পঞ্ঞাপারমিযা পূরিতত্তভাৰানং পরিমাণং নাম নত্থি. একন্তেন পনস্স সত্তুভত্তকপণ্ডিতকালে –

‘‘পঞ্ঞায ৰিচিনন্তোহং, ব্রাহ্মণং মোচযিং দুখা;

পঞ্ঞায মে সমো নত্থি, এসা মে পঞ্ঞাপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

অন্তোভস্তগতং ¶ সপ্পং দস্সেন্তস্স পঞ্ঞাপারমী পরমত্থপারমী নাম জাতা.

তথা ৰীরিযপারমিতায পূরিতত্তভাৰানং পরিমাণং নাম নত্থি. একন্তেন পনস্স মহাজনকজাতকে –

‘‘অতীরদস্সী জলমজ্ঝে, হতা সব্বেৰ মানুসা;

চিত্তস্স অঞ্ঞথা নত্থি, এসা মে ৰীরিযপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং মহাসমুদ্দং তরন্তস্স ৰীরিযপারমী পরমত্থপারমী নাম জাতা.

‘‘অচেতনংৰ কোট্টেন্তে, তিণ্হেন ফরসুনা মমং;

কাসিরাজে ন কুপ্পামি, এসা মে খন্তিপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং ¶ অচেতনভাৰেন ৰিয মহাদুক্খং অধিৰাসেন্তস্স খন্তিপারমী পরমত্থপারমী নাম জাতা.

‘‘সচ্চৰাচংনুরক্খন্তো, চজিত্ৰা মম জীৰিতং;

মোচেসিং একসতং খত্তিযে, এসা মে সচ্চপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং জীৰিতং চজিত্ৰা সচ্চং অনুরক্খন্তস্স সচ্চপারমী পরমত্থপারমী নাম জাতা.

‘‘মাতা ¶ পিতা ন মে দেস্সা, অত্তা মে ন চ দেস্সিযো;

সব্বঞ্ঞুতং পিযং ময্হং, তস্মা ৰতং অধিট্ঠহি’’ন্তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা; চরিযা ৩.৬৫) –

এৰং জীৰিতম্পি পরিচ্চজিত্ৰা ৰতং অধিট্ঠহন্তস্স অধিট্ঠানপারমী পরমত্থপারমী নাম জাতা.

‘‘ন মং কোচি উত্তসতি, নপি ভাযামি কস্সচি;

মেত্তাবলেনুপত্থদ্ধো, রমামি পৰনে তদা’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা; চরিযা. ৩.১১৩) –

এৰং ¶ জীৰিতম্পি অনোলোকেত্ৰা মেত্তাযন্তস্স মেত্তাপারমী পরমত্থপারমী নাম জাতা.

‘‘সুসানে সেয্যং কপ্পেমি, ছৰট্ঠিকং উপনিধাযহং;

গামণ্ডলা উপগন্ত্ৰা, রূপং দস্সেন্তিনপ্পক’’ন্তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা; চরিযা. ৩.১১৯) –

এৰং গামদারকেসু নিট্ঠুভনাদীহি চেৰ মালাগন্ধূপহারাদীহি চ সুখদুক্খং উপ্পাদেন্তেসুপি উপেক্খং অনতিৰত্তন্তস্স উপেক্খাপারমী পরমত্থপারমী নাম জাতা. অযমেত্থ সঙ্খেপো, ৰিত্থারো পন চরিযাপিটকতো গহেতব্বো.

ইদানি থেরেন পুট্ঠস্স ভগৰতো ব্যাকরণং দস্সেন্তেহি সঙ্গীতিকারকেহি –

‘‘তস্স পুট্ঠো ৰিযাকাসি, করৰীকমধুরগিরো;

নিব্বাপযন্তো হদযং, হাসযন্তো সদেৰকং.

‘‘অতীতবুদ্ধানং জিনানং দেসিতং, নিকীলিতং বুদ্ধপরম্পরাগতং;

পুব্বেনিৰাসানুগতায বুদ্ধিযা, পকাসযী লোকহিতং সদেৰকে’’তি. – ৰুত্তং;

তত্থ তস্স পুট্ঠো ৰিযাকাসীতি তেন ধম্মসেনাপতিনা পুট্ঠো হুত্ৰা তস্স ব্যাকাসি, অত্তনো অভিনীহারতো পট্ঠায অভিসম্বোধিপরিযোসানং সব্বং বুদ্ধৰংসং কথেসীতি অত্থো. করৰীকমধুরগিরোতি করৰীকসকুণস্স ৰিয মধুরা গিরা যস্স সো করৰীকমধুরগিরো, করৰীকমধুরমঞ্জুস্সরোতি অত্থো. তত্রিদং করৰীকানং মধুরস্সরতা – করৰীকসকুণা কির মধুররসং ¶ অম্বপক্কং মুখতুণ্ডকেন পহরিত্ৰা পগ্ঘরিতং ফলরসং পিৰিত্ৰা পক্খেন তাল়ং দত্ৰা ৰিকূজমানে চতুপ্পদা মদমত্তা ৰিয লল়িতুং আরভন্তি, গোচরপসুতাপি চতুপ্পদগণা মুখগতানিপি তিণানি ছড্ডেত্ৰা তং নাদং সুণন্তি, ৰাল়মিগা খুদ্দকমিগে অনুবন্ধমানা উক্খিত্তং পাদং অনিক্খিপিত্ৰা ¶ চিত্তকতা ৰিয তিট্ঠন্তি, অনুবন্ধমিগাপি মরণভযং হিত্ৰা তিট্ঠন্তি, আকাসে পক্খন্দন্তা পক্খিনোপি পক্খে পসারেত্ৰা তিট্ঠন্তি, উদকে মচ্ছাপি কণ্ণপটলং অচালেন্তা তং সদ্দং সুণমানা তিট্ঠন্তি. এৰং মধুরস্সরা করৰীকা (দী. নি. অট্ঠ. ২.৩৮; ম. নি. অট্ঠ. ২.৩৮৬). নিব্বাপযন্তো হদযন্তি কিলেসগ্গিসন্তত্তসব্বজনমানসং ¶ ধম্মকথামতধারায সীতিভাৰং জনযন্তোতি অত্থো. হাসযন্তোতি তোসযন্তো. সদেৰকন্তি সদেৰকং লোকং.

অতীতবুদ্ধানন্তি অতীতানং বুদ্ধানং. অম্হাকং ভগৰতো অভিনীহারস্স পুরতো পন তণ্হঙ্করো মেধঙ্করো সরণঙ্করো দীপঙ্করোতি চত্তারো বুদ্ধা একস্মিং কপ্পে নিব্বত্তিংসু. তেসং অপরভাগে কোণ্ডঞ্ঞাদযো তেৰীসতি বুদ্ধাতি সব্বে দীপঙ্করাদযো চতুৰীসতি বুদ্ধা ইধ ‘‘অতীতবুদ্ধা’’তি অধিপ্পেতা, তেসং অতীতবুদ্ধানং. জিনানন্তি তস্সেৰ ৰেৰচনং. দেসিতন্তি কথিতং. চতুৰীসতিযা বুদ্ধানং চতুসচ্চপটিসংযুত্তং ধম্মকথং. নিকীলিতন্তি তেসং চরিতং কপ্পজাতিগোত্তাযুবোধিসাৰকসন্নিপাতউপট্ঠাকমাতাপিতুপুত্তভরিযাপরিচ্ছেদাদিকং নিকীলিতং নাম. বুদ্ধপরম্পরাগতন্তি দীপঙ্করদসবলতো পট্ঠায যাৰ কস্সপপরম্পরতো আগতং দেসিতং নিকীলিতং ৰাতি অত্থো. পুব্বেনিৰাসানুগতায বুদ্ধিযাতি একম্পি জাতিং দ্ৰেপি জাতিযোতি (ম. নি. ১.১৪৮, ৩৮৪, ৪২১; ২.২৩৩; ৩.৮২; পারা. ১২) এৰং ৰিভত্তং পুব্বে নিৰুট্ঠক্খন্ধসন্তানসঙ্খাতং পুব্বেনিৰাসং অনুগতা উপগতা তায পুব্বেনিৰাসানুগতায বুদ্ধিযা, পুব্বেনিৰাসানুস্সতিঞাণেনাতি অত্থো. পকাসযীতি ব্যাকাসি. লোকহিতন্তি সব্বলোকহিতং বুদ্ধৰংসং. সদেৰকেতি সদেৰকে লোকেতি অত্থো.

৮০. অথ ভগৰা করুণাসীতলেন হদযেন সদেৰকং লোকং সৰনে নিযোজেন্তো ‘‘পীতিপামোজ্জজনন’’ন্তিআদিমাহ. তত্থ পীতিপামোজ্জজননন্তি পীতিপামোজ্জকরং পীতিযা পুব্বভাগং পামোজ্জং, পঞ্চৰণ্ণায পীতিযা জননন্তি অত্থো. সোকসল্লৰিনোদনন্তি সোকসঙ্খাতানং সল্লানং ৰিনোদনং ৰিদ্ধংসনং. সব্বসম্পত্তিপটিলাভন্তি ¶ সব্বাপি দেৰমনুস্সসম্পত্তিআদযো সম্পত্তিযো পটিলভন্তি এতেনাতি সব্বসম্পত্তিপটিলাভো, তং সব্বসম্পত্তিপটিলাভং বুদ্ধৰংসদেসনন্তি অত্থো. চিত্তীকত্ৰাতি ¶ চিত্তে কত্ৰা, বুদ্ধানুস্সতিং পুরক্খত্ৰাতি অত্থো. সুণাথাতি নিসামেথ নিবোধথ. মেতি মম.

৮১. মদনিম্মদনন্তি জাতিমদাদীনং সব্বমদানং নিম্মদনকরং. সোকনুদন্তি সোকো নাম ঞাতিব্যসনাদীহি ফুট্ঠস্স চিত্তসন্তাপো. কিঞ্চাপি অত্থতো দোমনস্সমেৰ হোতি, এৰং সন্তেপি অন্তোনিজ্ঝানলক্খণো, চেতসো পরিনিজ্ঝাযনরসো, অনুসোচনপচ্চুপট্ঠানো, তং সোকং নুদতীতি সোকনুদো, তং সোকনুদং. সংসারপরিমোচনন্তি সংসারবন্ধনতো পরিমোচনকরং. ‘‘সংসারসমতিক্কম’’ন্তিপি পাঠো, তস্স সংসারসমতিক্কমকরন্তি অত্থো.

সব্বদুক্খক্খযন্তি ¶ এত্থ দুক্খ-সদ্দো দুক্খৰেদনা-দুক্খৰত্থু-দুক্খারম্মণ-দুক্খপচ্চয-দুক্খট্ঠানাদীসু দিস্সতি. অযঞ্হি ‘‘দুক্খস্স চ পহানা’’তিআদীসু (দী. নি. ১.২৩২; ম. নি. ১.৩৮৩, ৪৩০; পারা. ১১) দুক্খৰেদনাযং দিস্সতি. ‘‘জাতিপি দুক্খা জরাপি দুক্খা’’তিআদীসু (দী. নি. ২.৩৮৭; সং. নি. ৫.১০৮১) দুক্খৰত্থুস্মিং. ‘‘যস্মা চ খো, মহালি, রূপং দুক্খং দুক্খানুপতিতং দুক্খাৰক্কন্ত’’ন্তিআদীসু (সং. নি. ৩.৬০) দুক্খারম্মণে. ‘‘দুক্খো পাপস্স উচ্চযো’’তিআদীসু (ধ. প. ১১৭) দুক্খপচ্চযে. ‘‘যাৰঞ্চিদং, ভিক্খৰে, ন সুকরা অক্খানেন পাপুণিতং যাৰ দুক্খা নিরযা’’তিআদীসু (ম. নি. ৩.২৫০) দুক্খট্ঠানে. ইধ পনাযং দুক্খৰত্থুস্মিং দুক্খপচ্চযেপি চ দট্ঠব্বো. তস্মা জাতিআদিসব্বদুক্খক্খযকরন্তি অত্থো (ধ. স. অট্ঠ. ২ আদযো). মগ্গন্তি এত্থ কুসলত্থিকেহি মগ্গীযতি, কিলেসে ৰা মারেন্তো গচ্ছতীতি মগ্গোতি বুদ্ধৰংসদেসনা ৰুচ্চতি, তং নিব্বানস্স মগ্গভূতং বুদ্ধৰংসদেসনং. সক্কচ্চন্তি সক্কচ্চং চিত্তীকত্ৰা, ওহিতসোতা হুত্ৰাতি অত্থো. পটিপজ্জথাতি অধিতিট্ঠথ, সুণাথাতি অত্থো. অথ ৰা পীতিপামোজ্জজননং সোকসল্লৰিনোদনং সব্বসম্পত্তিপটিলাভহেতুভূতং ইমং বুদ্ধৰংসদেসনং সুত্ৰা ইদানি মদনিম্মদনাদিগুণৰিসেসাৰহং সব্বদুক্খক্খযং বুদ্ধভাৰমগ্গং পটিপজ্জথাতি ¶ সব্বেসং দেৰমনুস্সানং বুদ্ধত্তং পণিধায উস্সাহং জনেতি. সেসমেত্থ উত্তানমেৰাতি.

ইতি মধুরত্থৰিলাসিনিযা বুদ্ধৰংস-অট্ঠকথায

রতনচঙ্কমনকণ্ডৰণ্ণনা নিট্ঠিতা.

নিট্ঠিতা চ সব্বাকারেন অব্ভন্তরনিদানস্সত্থৰণ্ণনা.

‘‘কপ্পে চ সতসহস্সে, চতুরো চ অসঙ্খিযে;

অমরং নাম নগরং, দস্সনেয্যং মনোরম’’ন্তি. –

আদিনযপ্পৰত্তায বুদ্ধৰংসৰণ্ণনায ওকাসো অনুপ্পত্তো. সা পনেসা বুদ্ধৰংসৰণ্ণনা যস্মা সুত্তনিক্খেপং ৰিচারেত্ৰা ৰুচ্চমানা পাকটা হোতি, তস্মা সুত্তনিক্খেপৰিচারণা তাৰ ৰেদিতব্বা. চত্তারো হি সুত্তনিক্খেপা অত্তজ্ঝাসযো পরজ্ঝাসযো পুচ্ছাৰসিকো অট্ঠুপ্পত্তিকোতি. তত্থ যানি সুত্তানি ভগৰা পরেহি অনজ্ঝিট্ঠো কেৰলং অত্তনো অজ্ঝাসযেন কথেসি. সেয্যথিদং – আকঙ্খেয্যসুত্তং (ম. নি. ১.৬৪ আদযো) ৰত্থসুত্তন্তি (ম. নি. ১.৭০ আদযো) এৰমাদীনি, তেসং অত্তজ্ঝাসযো নিক্খেপো.

যানি ৰা পন ‘‘পরিপক্কা খো রাহুলস্স ৰিমুত্তিপরিপাচনীযা ধম্মা, যংনূনাহং রাহুলং উত্তরিং আসৰানং খযে ৰিনেয্য’’ন্তি (সং. নি. ৪.১২১) এৰং পরেসং অজ্ঝাসযং খন্তিং মনং বুজ্ঝনকভাৰঞ্চ ওলোকেত্ৰা পরজ্ঝাসযৰসেন কথিতানি. সেয্যথিদং – রাহুলোৰাদসুত্তং ধম্মচক্কপ্পৰত্তনসুত্তন্তি (সং. নি. ৫.১০৮১; মহাৰ. ১৩ আদযো; পটি. ম. ২.৩০) এৰমাদীনি, তেসং পরজ্ঝাসযো নিক্খেপো.

ভগৰন্তং উপসঙ্কমিত্ৰা তে তে দেৰমনুস্সা পঞ্হং পুচ্ছন্তি. এৰং পুট্ঠেন পন ভগৰতা যানি কথিতানি দেৰতাসংযুত্ত (সং. নি. ১.১ আদযো) বোজ্ঝঙ্গসংযুত্তাদীনি (সং. নি. ৫.১৮২ আদযো) তেসং পুচ্ছাৰসিকো নিক্খেপো.

যানি ৰা পন উপ্পন্নং কারণং পটিচ্চ দেসিতানি ধম্মদাযাদ- (ম. নি. ১.২৯ আদযো) পুত্তমংসূপমাদীনি (সং. নি. ২.৬৩), তেসং অট্ঠুপ্পত্তিকো নিক্খেপো. এৰমেতেসু চতূসু সুত্তনিক্খেপেসু ইমস্স বুদ্ধৰংসস্স পুচ্ছাৰসিকো নিক্খেপো. পুচ্ছাৰসেন হি ভগৰতা অযং ¶ নিক্খিত্তো. কস্স পুচ্ছাৰসেন? আযস্মতো সারিপুত্তত্থেরস্স. ৰুত্তঞ্হেতং অস্মিং নিদানস্মিং এৰ –

‘‘সারিপুত্তো ¶ ¶ মহাপঞ্ঞো, সমাধিজ্ঝানকোৰিদো;

পঞ্ঞায পারমিপ্পত্তো, পুচ্ছতি লোকনাযকং;

কীদিসো তে মহাৰীর, অভিনীহারো নরুত্তমা’’তি. (বু. ৰং. ১.৭৪-৭৫) –

আদি. তেনেসা বুদ্ধৰংসদেসনা পুচ্ছাৰসিকাতি ৰেদিতব্বা.

তত্থ কপ্পে চ সতসহস্সেতি এত্থ কপ্প-সদ্দো পনাযং অভিসদ্দহনৰোহারকালপঞ্ঞত্তিছেদনৰিকপ্পনলেসসমন্তভাৰআযুকপ্পমহাকপ্পাদীসু দিস্সতি. তথা হি ‘‘ওকপ্পনীযমেতং ভোতো গোতমস্স. যথা তং অরহতো সম্মাসম্বুদ্ধস্সা’’তিআদীসু (ম. নি. ১.৩৮৭) অভিসদ্দহনে দিস্সতি. ‘‘অনুজানামি, ভিক্খৰে, পঞ্চহি সমণকপ্পেহি ফলং পরিভুঞ্জিতু’’ন্তি এৰমাদীসু (চূল়ৰ. ২৫০) ৰোহারে. ‘‘যেন সুদং নিচ্চকপ্পং ৰিহরামী’’তিআদীসু (ম. নি. ১.৩৮৭) কালে. ‘‘ইচ্চাযস্মা কপ্পো’’তি (সু. নি. ১০৯৮; চূল়নি. কপ্পমাণৰপুচ্ছা ১১৭; কপ্পমাণৰপুচ্ছানিদ্দেস ৬১) চ, ‘‘নিগ্রোধকপ্পো ইতি তস্স নামং, তযা কতং ভগৰা ব্রাহ্মণস্সা’’তি চ এৰমাদীসু (সু. নি. ৩৪৬) পঞ্ঞত্তিযং. ‘‘অলঙ্কতো কপ্পিতকেসমস্সূ’’তি এৰমাদীসু (জা. ২.২২.১৩৬৮) ছেদনে. ‘‘কপ্পতি দ্ৰঙ্গুলকপ্পো’’তিআদীসু (চূল়ৰ. ৪৪৬) ৰিকপ্পে. ‘‘অত্থি কপ্পো নিপজ্জিতু’’ন্তিআদীসু (অ. নি. ৮.৮০) লেসে. ‘‘কেৰলকপ্পং জেতৰনং ওভাসেত্ৰা’’তিআদীসু সমন্তভাৰে. ‘‘তিট্ঠতু, ভন্তে, ভগৰা কপ্পং, তিট্ঠতু সুগতো কপ্প’’ন্তি (দী. নি. ২.১৭৮; উদা. ৫১) এত্থ আযুকপ্পে. ‘‘কীৰ দীঘো নু খো, ভন্তে, কপ্পো’’তি (সং. নি. ২.১২৮-১২৯) এত্থ মহাকপ্পে. আদিসদ্দেন ‘‘সত্থুকপ্পেন ৰত কির, ভো, মযং সাৰকেন সদ্ধিং মন্তযমানা ন জানিম্হা’’তি (ম. নি. ১.২৬০) এত্থ পটিভাগে. ‘‘কপ্পো নট্ঠো হোতি. কপ্পকতোকাসো জিণ্ণো হোতী’’তি (পাচি. ৩৭১) এত্থ ৰিনযকপ্পে. ইধ পন মহাকপ্পে দট্ঠব্বো. তস্মা কপ্পে চ সতসহস্সেতি মহাকপ্পানং সতসহস্সানন্তি অত্থো (দী. নি. অট্ঠ. ১.২৯; ৩.২৭৫; সং. নি. অট্ঠ. ১.১.১; অ. নি. অট্ঠ. ২.৩.১২৮; খু. পা. অট্ঠ. ৫.মঙ্গলসুত্ত, এৰমিচ্চাদিপাঠৰণ্ণনা; সু. নি. অট্ঠ. ২.মঙ্গলসুত্তৰণ্ণনা; চরিযা. অট্ঠ. নিদানকথা.১; চূল়নি. অট্ঠ. খগ্গৰিসাণসুত্তনিদ্দেসৰণ্ণনা). ¶ চতুরো চ অসঙ্খিযেতি ‘‘চতুন্নং অসঙ্খ্যেয্যানং মত্থকে’’তি ৰচনসেসো দট্ঠব্বো. কপ্পসতসহস্সাধিকানং চতুন্নং অসঙ্খ্যেয্যানং মত্থকেতি অত্থো. অমরং নাম নগরন্তি ‘‘অমর’’ন্তি চ ‘‘অমরৰতী’’তি ¶ চ লদ্ধনামং নগরং অহোসি. কেচি পনেত্থ অঞ্ঞেনাপি পকারেন ৰণ্ণযন্তি, কিং তেহি, নামমত্তং পনেতং তস্স নগরস্স. দস্সনেয্যন্তি সুৰিভত্তৰিচিত্র-চচ্চরদ্ৰার-চতুক্কসিঙ্ঘাটিক-পাকার-পরিক্খেপপাসাদ- হম্মিয-ভৰন-সমলঙ্কতত্তা দস্সনীযং. মনোরমন্তি সমসুচিপরমরমণীযভূমিভাগত্তা ছাযূদকসম্পন্নত্তা ¶ সুলভাহারত্তা সব্বোপকরণযুত্তত্তা চ সমিদ্ধত্তা দেৰমনুস্সাদীনং মনো রমযতীতি মনোরমং.

দসহি সদ্দেহি অৰিৰিত্তন্তি হত্থিসদ্দেন অস্সসদ্দেন রথসদ্দেন ভেরিসদ্দেন সঙ্খসদ্দেন মুদিঙ্গসদ্দেন ৰীণাসদ্দেন গীতসদ্দেন সম্মতাল়সদ্দেন ‘‘ভুঞ্জথ পিৰথ খাদথা’’তি দসমেন সদ্দেনাতি; ইমেহি দসহি সদ্দেহি অৰিৰিত্তং অহোসি, সব্বকালং অনুপমুস্সৰসমজ্জনাটকা কীল়ন্তীতি অত্থো. অন্নপানসমাযুতন্তি অন্নেন চতুব্বিধেনাহারেন চ পানেন চ সুট্ঠু আযুতং অন্নপানসমাযুতং, ইমিনা সুভিক্খতা দস্সিতা, বহুঅন্নপানসমাযুতন্তি অত্থো.

ইদানি তে দস সদ্দে ৰত্থুতো দস্সনত্থং –

‘‘হত্থিসদ্দং অস্সসদ্দং, ভেরিসঙ্খরথানি চ;

খাদথ পিৰথ চেৰ, অন্নপানেন ঘোসিত’’ন্তি. – ৰুত্তং;

তত্থ হত্থিসদ্দন্তি হত্থীনং কোঞ্চনাদসদ্দেন, করণত্থে উপযোগৰচনং দট্ঠব্বং. এস নযো সেসপদেসুপি. ভেরিসঙ্খরথানি চাতি ভেরিসদ্দেন চ সঙ্খসদ্দেন চ রথসদ্দেন চাতি অত্থো. লিঙ্গৰিপরিযাসেন ৰুত্তং, ‘খাদথ পিৰথা’তি এৰমাদিনযপ্পৰত্তেন অন্নপানপটিসংযুত্তেন ঘোসিতং অভিনাদিতন্তি অত্থো. এত্থাহ – তেসং পন সদ্দানং একদেসোৰ দস্সিতো, ন সকলোতি? ন একদেসো সকলো দসৰিধো দস্সিতোৰ. কথং? ভেরিসদ্দেন মুদিঙ্গসদ্দো সঙ্গহিতো, সঙ্খসদ্দেন ৰীণাগীতসম্মতাল়সদ্দা সঙ্গহিতাতি দসেৰ দস্সিতা.

এৰং একেন পরিযাযেন নগরসম্পত্তিং ৰণ্ণেত্ৰা পুন তমেৰ দস্সেতুং –

‘‘নগরং ¶ সব্বঙ্গসম্পন্নং, সব্বকম্মমুপাগতং, সত্তরতনসম্পন্নং, নানাজনসমাকুলং;

সমিদ্ধং দেৰনগরংৰ, আৰাসং পুঞ্ঞকম্মিন’’ন্তি. – ৰুত্তং;

তত্থ ¶ সব্বঙ্গসম্পন্নন্তি পাকারগোপুরট্টালকাদিসব্বনগরাৰযৰসম্পন্নং, পরিপুণ্ণসব্বৰিত্তূপকরণধনধঞ্ঞতিণকট্ঠোদকন্তি ৰা অত্থো. সব্বকম্মমুপাগতন্তি সব্বকম্মন্তেন উপগতং, সমুপগতসব্বকম্মন্তন্তি অত্থো. সত্তরতনসম্পন্নন্তি ¶ পরিপুণ্ণমুত্তাদিসত্তরতনং, চক্কৰত্তিনিৰাসভূমিতো ৰা হত্থিরতনাদীহি সত্তরতনেহি সম্পন্নং. নানাজনসমাকুলন্তি নানাৰিধদেসভাসেহি জনেহি সমাকুলং. সমিদ্ধন্তি মনুস্সোপভোগসব্বোপকরণেহি সমিদ্ধং ফীতং. দেৰনগরং ৰাতি দেৰনগরং ৰিয আলকমন্দা ৰিয অমরৰতী সমিদ্ধন্তি ৰুত্তং হোতি. আৰাসং পুঞ্ঞকম্মিনন্তি আৰসন্তি এত্থ পুঞ্ঞকম্মিনো জনাতি আৰাসো. ‘‘আৰাসো’’তি ৰত্তব্বে ‘‘আৰাস’’ন্তি লিঙ্গভেদং কত্ৰা ৰুত্তন্তি ৰেদিতব্বং. পঞ্ঞাযতি তেনাতি পুঞ্ঞং, কুলরূপমহাভোগিস্সরিযৰসেন পঞ্ঞাযতীতি অত্থো. পুনাতীতি ৰা পুঞ্ঞং. সব্বকুসলমলরজাপৰাহকত্তা পুঞ্ঞং কম্মং যেসং অত্থি তে পুঞ্ঞকম্মিনো, তেসং পুঞ্ঞকম্মিনং আৰাসভূতন্তি অত্থো.

তত্থ সুমেধো নাম ব্রাহ্মণো পটিৰসতি উভতো সুজাতো মাতিতো চ পিতিতো চ, সংসুদ্ধগহণিকো যাৰ সত্তমা কুলপরিৰট্টা অক্খিত্তো অনুপকুট্ঠো জাতিৰাদেন, অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, সো তিণ্ণং ৰেদানং পারগূ অহোসি সনিঘণ্ডুকেটুভানং সাক্খরপ্পভেদানং ইতিহাসপঞ্চমানং পদকো ৰেয্যাকরণো অনৰযো লোকাযতমহাপুরিসলক্খণেসু. তস্স পন দহরকালেযেৰ মাতাপিতরো কালমকংসু. অথস্স রাসিৰড্ঢকো অমচ্চো আযপোত্থকং আহরিত্ৰা সুৰণ্ণরজতমণিমুত্তাদিৰিৰিধরতনভরিতে গব্ভে ৰিৰরিত্ৰা – ‘‘এত্থকং তে, কুমার, মাতু সন্তকং, এত্থকং পিতু সন্তকং, এত্থকং অয্যকপয্যকান’’ন্তি যাৰ সত্তমা কুলপরিৰট্টা ধনং আচিক্খিত্ৰা – ‘‘এতং পটিপজ্জাহী’’তি নিয্যাতেসি. সো ‘‘সাধূ’’তি সম্পটিচ্ছিত্ৰা পুঞ্ঞানি করোন্তো অগারং অজ্ঝাৰসি. তেন ৰুত্তং –

‘‘নগরে ¶ অমরৰতিযা, সুমেধো নাম ব্রাহ্মণো;

অনেককোটিসন্নিচযো, পহূতধনধঞ্ঞৰা.

‘‘অজ্ঝাযকো মন্তধরো, তিণ্ণং ৰেদান পারগূ;

লক্খণে ইতিহাসে চ, সধম্মে পারমিং গতো’’তি.

তত্থ নগরে অমরৰতিযাতি অমরৰতীসঙ্খাতে নগরে. সুমেধো নামাতি এত্থ ‘‘মেধা’’তি পঞ্ঞা ¶ ৰুচ্চতি. সা তস্স সুন্দরা পসত্থাতি সুমেধোতি পঞ্ঞাযিত্থ. ব্রাহ্মণোতি ব্রহ্মং অণতি সিক্খতীতি ব্রাহ্মণো, মন্তে সজ্ঝাযতীতি অত্থো ¶ . অক্খরচিন্তকা পন ‘‘ব্রহ্মুনো অপচ্চং ব্রাহ্মণো’’তি ৰদন্তি. অরিযা পন বাহিতপাপত্তা ব্রাহ্মণাতি. অনেককোটিসন্নিচযোতি কোটীনং সন্নিচযো কোটিসন্নিচযো, অনেকো কোটিসন্নিচযো যস্স সোযং অনেককোটিসন্নিচযো, অনেককোটি ধনসন্নিচযোতি অত্থো. পহূতধনধঞ্ঞৰাতি বহুলধনধঞ্ঞৰা. পুরিমং ভূমিগতগব্ভগতধনধঞ্ঞৰসেন ৰুত্তং, ইদং নিচ্চপরিভোগূপগতধনধঞ্ঞৰসেন ৰুত্তন্তি ৰেদিতব্বং.

অজ্ঝাযকোতি ন ঝাযতীতি অজ্ঝাযকো, ঝানভাৰনারহিতোতি অত্থো. ৰুত্তঞ্হেতং – ‘‘ন দানিমে ঝাযন্তীতি. ন দানিমে ঝাযন্তীতি খো, ৰাসেট্ঠ, ‘অজ্ঝাযকা অজ্ঝাযকা’ ত্ৰেৰ ততিযং অক্খরং উপনিব্বত্ত’’ন্তি (দী. নি. ৩.১৩২) এৰং পঠমকপ্পিককালে ঝানৰিরহিতানং ব্রাহ্মণানং গরহৰচনং উপ্পন্নং. ইদানি মন্তং ঝাযতীতি অজ্ঝাযকো, মন্তে পরিৰত্তেতীতি ইমিনা অত্থেন পসংসৰচনং কত্ৰা ৰোহরন্তি. মন্তে ধারেতীতি মন্তধরো. তিণ্ণং ৰেদানন্তি ইরুৰেদযজুৰেদসামৰেদানং তিণ্ণং ৰেদানং. অযং পন ৰেদ-সদ্দো ঞাণসোমনস্সগন্থেসু দিস্সতি. তথা হেস – ‘‘যং ব্রাহ্মণং ৰেদগুমাভিজঞ্ঞা, অকিঞ্চনং কামভৰে অসত্ত’’ন্তিআদীসু (সু. নি. ১০৬৫) ঞাণে দিস্সতি. ‘‘যে ৰেদজাতা ৰিচরন্তি লোকে’’তিআদীসু (অ. নি. ৪.৫৭) সোমনস্সে. ‘‘তিণ্ণং ৰেদানং পারগূ সনিঘণ্ডুকেটুভান’’ন্তিআদীসু (দী. নি. ১.২৫৬) গন্থে. ইধাপি গন্থে (ম. নি. অট্ঠ. ১.৭৫). পারগূতি তিণ্ণং ৰেদানং ওট্ঠপহতকরণমত্তেন পারং গতোতি পারগূ. লক্খণেতি ইত্থিলক্খণপুরিসলক্খণমহাপুরিসলক্খণাদিকে লক্খণে. ইতিহাসেতি ইতিহ আস, ইতিহ আসাতি ঈদিসৰচনপটিসংযুত্তে ¶ পুরাণসঙ্খাতে গন্থৰিসেসে. সধম্মেতি ব্রাহ্মণানং সকে ধম্মে, সকে আচরিযকে ৰা. পারমিং গতোতি পারং গতো, দিসাপামোক্খো আচরিযো অহোসীতি অত্থো.

অথেকদিৰসং সো দসগুণগণারাধিতপণ্ডিতো সুমেধপণ্ডিতো উপরিপাসাদৰরতলে রহোগতো হুত্ৰা পল্লঙ্কং আভুজিত্ৰা নিসিন্নো চিন্তেসি – ‘‘পুনব্ভৰে পটিসন্ধিগ্গহণং নাম দুক্খং, তথা নিব্বত্তনিব্বত্তট্ঠানে সরীরভেদনং, অহঞ্চ জাতিধম্মো, জরাধম্মো, ব্যাধিধম্মো, মরণধম্মো, এৰংভূতেন মযা অজাতিং অজরং অব্যাধিং অমরণং সুখং সিৰং নিব্বানং পরিযেসিতুং ¶ ৰট্টতি, অৰস্সং ভৰচারকতো মুচ্চিত্ৰা নিব্বানগামিনা একেন মগ্গেন ভৰিতব্ব’’ন্তি. তেন ৰুত্তং –

‘‘রহোগতো ¶ নিসীদিত্ৰা, এৰং চিন্তেসহং তদা;

দুক্খো পুনব্ভৰো নাম, সরীরস্স চ ভেদনং.

‘‘জাতিধম্মো জরাধম্মো, ব্যাধিধম্মো সহং তদা;

অজরং অমরং খেমং, পরিযেসিস্সামি নিব্বুতিং.

‘‘যংনূনিমং পূতিকাযং, নানাকুণপপূরিতং;

ছড্ডযিত্ৰান গচ্ছেয্যং, অনপেক্খো অনত্থিকো.

‘‘অত্থি হেহিতি সো মগ্গো, ন সো সক্কা ন হেতুযে;

পরিযেসিস্সামি তং মগ্গং, ভৰতো পরিমুত্তিযা’’তি.

এত্থ পন গাথাসম্বন্ধঞ্চ অনুত্তানপদানমত্থঞ্চ ৰত্ৰাৰ গমিস্সাম. তত্থ রহোগতোতি রহসি গতো, রহসি ঠানে নিসিন্নো. এৰং চিন্তেসহন্তি এৰং চিন্তেসিং অহং. এৰন্তি ইমিনা চিন্তনাকারং দস্সেতি. তদাতি তস্মিং সুমেধপণ্ডিতকালে. ‘‘এৰং চিন্তেসহ’’ন্তি ভগৰা ইমিনা অত্তনা সদ্ধিং সুমেধপণ্ডিতং একত্তং করোতি. তস্মা তদা সো সুমেধো অহমেৰাতি পকাসেন্তো ‘‘এৰং চিন্তেসহং তদা’’তি ভগৰা উত্তমপুরিসৰসেনাহ. জাতিধম্মোতি জাতিসভাৰো. এস নযো সেসপদেসুপি. নিব্বুতিন্তি নিব্বানং.

যংনূনাতি ¶ পরিৰিতক্কনত্থে নিপাতো, যদি পনাহন্তি অত্থো. পূতিকাযন্তি পূতিভূতং কাযং. নানাকুণপপূরিতন্তি মুত্ত-করীস-পুব্বলোহিত-পিত্ত-সেম্হ-খেল়সিঙ্ঘাণিকাদিঅনেককুণপপূরিতং. অনপেক্খোতি অনালযো. অত্থীতি অৰস্সং উপলব্ভতি. হেহিতীতি ভৰিস্সতি, পরিৰিতক্কনৰচনমিদং. ন সো সক্কা ন হেতুযেতি তেন মগ্গেন ন সক্কা ন ভৰিতুং. সো পন মগ্গো হেতুযেতি হেতুভাৰায ন ন হোতি, হেতুযেৰাতি অত্থো. ভৰতো পরিমুত্তিযাতি ভৰবন্ধনৰিমুত্তিযাতি অত্থো.

ইদানি অত্তনা পরিৰিতক্কিতমত্থং সম্পাদযিতুং ‘‘যথাপী’’তি আদিমাহ. যথা হি লোকে দুক্খস্স পটিপক্খভূতং সুখং নাম অত্থি, এৰং ভৰে সতি তপ্পটিপক্খেন ৰিভৰেনাপি ভৰিতব্বং ¶ , যথা চ উণ্হে সতি তস্স ৰূপসমভূতং সীতলম্পি অত্থি, এৰং রাগাদিঅগ্গীনং ৰূপসমেন নিব্বানেন ভৰিতব্বং. যথা চ পাপস্স লামকস্স ধম্মস্স পটিপক্খভূতো কল্যাণো অনৰজ্জধম্মোপি ¶ অত্থিযেৰ, এৰমেৰ পাপিকায জাতিযা সতি সব্বজাতিখেপনতো অজাতিসঙ্খাতেন নিব্বানেনাপি ভৰিতব্বমেৰাতি. তেন ৰুত্তং –

‘‘যথাপি দুক্খে ৰিজ্জন্তে, সুখং নামপি ৰিজ্জতি;

এৰং ভৰে ৰিজ্জমানে, ৰিভৰোপিচ্ছিতব্বকো.

‘‘যথাপি উণ্হে ৰিজ্জন্তে, অপরং ৰিজ্জতি সীতলং;

এৰং তিৰিধগ্গি ৰিজ্জন্তে, নিব্বানং ইচ্ছিতব্বকং.

‘‘যথাপি পাপে ৰিজ্জন্তে, কল্যাণমপি ৰিজ্জতি;

এৰমেৰ জাতি ৰিজ্জন্তে, অজাতিপিচ্ছিতব্বক’’ন্তি.

তত্থ যথাপীতি ওপম্মত্থে নিপাতো. সুখন্তি কাযিকচেতসিকসুখং, সুট্ঠু দুক্খং খণতীতি সুখং. ভৰেতি জননে. ৰিভৰোতি অজননং, জননে ৰিজ্জমানে অজননধম্মোপি ইচ্ছিতব্বো. তিৰিধগ্গি ৰিজ্জন্তেতি তিৰিধে রাগাদিকে অগ্গিম্হি ৰিজ্জমানেতি অত্থো. নিব্বানন্তি তস্স তিৰিধস্স রাগাদিঅগ্গিস্স নিব্বাপনং উপসমনং নিব্বানঞ্চ ইচ্ছিতব্বং. পাপেতি অকুসলে লামকে. কল্যাণমপীতি কুসলমপি. এৰমেৰাতি এৰমেৰং. জাতি ৰিজ্জন্তেতি ¶ জাতিযা ৰিজ্জমানাযাতি অত্থো. লিঙ্গভেদঞ্চ ৰিভত্তিলোপঞ্চ কত্ৰা ৰুত্তং. অজাতিপীতি জাতিখেপনং অজাতিনিব্বানম্পি ইচ্ছিতব্বং.

অথাহং পরম্পি চিন্তেসিং – ‘‘যথা নাম গূথরাসিম্হি নিমুগ্গেন পুরিসেন দূরতোৰ কমলকুৰলযপুণ্ডরীকসণ্ডমণ্ডিতং ৰিমলসলিলং তল়াকং দিস্ৰা – ‘কতরেন নু খো মগ্গেন তত্থ গন্তব্ব’ন্তি তল়াকং গৰেসিতুং যুত্তং. যং তস্স অগৰেসনং, ন সো তস্স তল়াকস্স দোসো, তস্স পুরিসস্সেৰ দোসো. এৰমেৰ কিলেসমলধোৰনে অমতমহাতল়াকে ৰিজ্জমানে যং তস্স অগৰেসনং, ন সো অমতসঙ্খাতস্স নিব্বানমহাতল়াকস্স দোসো, পুরিসস্সেৰ দোসো. যথা পন চোরেহি সংপরিৰারিতো পুরিসো পলাযনমগ্গে ৰিজ্জমানেপি সচে সো ন পলাযতি, ন সো তস্স মগ্গস্স দোসো, তস্স পুরিসস্সেৰ দোসো. এৰমেৰ কিলেসচোরেহি পরিৰারেত্ৰা গহিতস্স পুরিসস্স ৰিজ্জমানেযেৰ নিব্বানমহানগরগামিম্হি সিৰে মহামগ্গে তস্স মগ্গস্স অগৰেসনং ¶ নাম ন মগ্গস্স দোসো, পুরিসস্সেৰ দোসো. যথা ব্যাধিপীল়িতো পুরিসো ৰিজ্জমানে ব্যাধিতিকিচ্ছকে ৰেজ্জে সচে তং ৰেজ্জং গৰেসিত্ৰা তং ব্যাধিং ন তিকিচ্ছাপেতি, ন ¶ সো ৰেজ্জস্স দোসো, তস্স পুরিসস্সেৰ দোসো. এৰমেৰ পন যো কিলেসব্যাধিপরিপীল়িতো কিলেসৰূপসমমগ্গকোৰিদং ৰিজ্জমানমেৰ আচরিযং ন গৰেসতি, তস্সেৰ দোসো, ন কিলেসব্যাধিৰিনাযকস্স আচরিযস্স দোসো’’তি. তেন ৰুত্তং –

‘‘যথা গূথগতো পুরিসো, তল়াকং দিস্ৰান পূরিতং;

ন গৰেসতি তং তল়াকং, ন দোসো তল়াকস্স সো.

‘‘এৰং কিলেসমলধোৰং, ৰিজ্জন্তে অমতন্তল়ে;

ন গৰেসতি তং তল়াকং, ন দোসো অমতন্তল়ে.

‘‘যথা অরীহি পরিরুদ্ধো, ৰিজ্জন্তে গমনম্পথে;

ন পলাযতি সো পুরিসো, ন দোসো অঞ্জসস্স সো.

‘‘এৰং কিলেসপরিরুদ্ধো, ৰিজ্জমানে সিৰে পথে;

ন গৰেসতি তং মগ্গং, ন দোসো সিৰমঞ্জসে.

‘‘যথাপি ¶ ব্যাধিতো পুরিসো, ৰিজ্জমানে তিকিচ্ছকে;

ন তিকিচ্ছাপেতি তং ব্যাধিং, ন দোসো সো তিকিচ্ছকে.

‘‘এৰং কিলেসব্যাধীহি, দুক্খিতো পতিপীল়িতো;

ন গৰেসতি তং আচরিযং, ন দোসো সো ৰিনাযকে’’তি.

তত্থ গূথগতোতি গূথকূপগতো, গূথেন গতো মক্খিতো ৰা. কিলেসমলধোৰন্তি কিলেসমলসোধনে, ভুম্মত্থে পচ্চত্তৰচনং. অমতন্তল়েতি অমতসঙ্খাতস্স তল়াকস্স, সামিঅত্থে ভুম্মৰচনং দট্ঠব্বং, অনুস্সরং পক্খিপিত্ৰা ৰুত্তং. অরীহীতি পচ্চত্থিকেহি. পরিরুদ্ধোতি সমন্ততো নিরুদ্ধো. গমনম্পথেতি গমনপথে. ছন্দাৰিনাসত্থং অনুস্সরাগমনং কত্ৰা ৰুত্তং. ন পলাযতীতি যদি ন পলাযেয্য. সো পুরিসোতি সো চোরেহি পরিরুদ্ধো পুরিসো. অঞ্জসস্সাতি ¶ মগ্গস্স. মগ্গস্স হি –

‘‘মগ্গো ¶ পন্থো পথো পজ্জো, অঞ্জসং ৰটুমাযনং;

নাৰা উত্তরসেতু চ, কুল্লো চ ভিসি সঙ্কমো’’তি. (চূল়নি. পারাযনত্থুতিগাথানিদ্দেস ১০১) –

বহূনি নামানি. স্ৰাযমিধ অঞ্জসনামেন ৰুত্তো. সিৰেতি সব্বুপদ্দৰাভাৰতো সিৰে. সিৰমঞ্জসেতি সিৰস্স অঞ্জসস্সাতি অত্থো. তিকিচ্ছকেতি ৰেজ্জে. ন তিকিচ্ছাপেতীতি ন তিকিচ্ছাপেয্য. ন দোসো সো তিকিচ্ছকেতি তিকিচ্ছকস্স দোসো নত্থি, ব্যাধিতস্সেৰ দোসোতি অত্থো. দুক্খিতোতি সঞ্জাতকাযিকচেতসিকদুক্খো. আচরিযন্তি মোক্খমগ্গাচরিযং. ৰিনাযকেতি আচরিযস্স.

এৰং পনাহং চিন্তেত্ৰা উত্তরিম্পি এৰং চিন্তেসিং – ‘‘যথাপি মণ্ডনকজাতিকো পুরিসো কণ্ঠে আসত্তং কুণপং ছড্ডেত্ৰা সুখী গচ্ছেয্য, এৰং মযাপি ইমং পূতিকাযং ছড্ডেত্ৰা অনপেক্খেন নিব্বানমহানগরং পৰিসিতব্বং. যথা চ নরনারিযো উক্কারভূমিযং উচ্চারপস্সাৰং কত্ৰা ন তং উচ্ছঙ্গেন ৰা আদায দসন্তে ৰা ৰেঠেত্ৰা আদায গচ্ছন্তি, অথ খো জিগুচ্ছমানা ওলোকেতুম্পি অনিচ্ছন্তা অনপেক্খা ছড্ডেত্ৰা গচ্ছন্তি, এৰং মযাপি ইমং পূতিকাযং অনপেক্খেন ছড্ডেত্ৰা অমতং নিব্বাননগরং পৰিসিতুং ৰট্টতি. যথা চ নাৰিকা নাম জজ্জরং নাৰং উদকগাহিনিং ছড্ডেত্ৰা অনপেক্খাৰ গচ্ছন্তি, এৰমহম্পি ইমং নৰহি ৰণমুখেহি পগ্ঘরন্তং কাযং ছড্ডেত্ৰা অনপেক্খো নিব্বানমহানগরং পৰিসিস্সামি ¶ . যথা চ কোচি পুরিসো মুত্তামণিৰেল়ুরিযাদীনি নানাৰিধানি রতনানি আদায চোরেহি সদ্ধিং মগ্গং গচ্ছন্তো অত্তনো রতনৰিনাসভযেন তে চোরে ছড্ডেত্ৰা খেমং মগ্গং গণ্হাতি, এৰমযম্পি পূতিকাযো রতনৰিলোপকচোরসদিসো. সচাহং এত্থ তণ্হং করিস্সামি, অরিযমগ্গকুসলধম্মরতনানি মে নস্সিস্সন্তি, তস্মা মযা ইমং মহাচোরসদিসং করজকাযং ছড্ডেত্ৰা নিব্বানমহানগরং পৰিসিতুং ৰট্টতী’’তি. তেন ৰুত্তং –

‘‘যথাপি কুণপং পুরিসো, কণ্ঠে বদ্ধং জিগুচ্ছিয;

মোচযিত্ৰান গচ্ছেয্য, সুখী সেরী সযংৰসী.

‘‘তথেৰিমং পূতিকাযং, নানাকুণপসঞ্চযং;

ছড্ডযিত্ৰান গচ্ছেয্যং, অনপেক্খো অনত্থিকো.

‘‘যথা ¶ ¶ উচ্চারট্ঠানম্হি, করীসং নরনারিযো;

ছড্ডযিত্ৰান গচ্ছন্তি, অনপেক্খা অনত্থিকা.

‘‘এৰমেৰাহং ইমং কাযং, নানাকুণপপূরিতং;

ছড্ডযিত্ৰান গচ্ছিস্সং, ৰচ্চং কত্ৰা যথা কুটিং.

‘‘যথাপি জজ্জরং নাৰং, পলুগ্গং উদগাহিনিং;

সামী ছড্ডেত্ৰা গচ্ছন্তি, অনপেক্খা অনত্থিকা.

‘‘এৰমেৰাহং ইমং কাযং, নৰচ্ছিদ্দং ধুৰস্সৰং;

ছড্ডযিত্ৰান গচ্ছিস্সং, জিণ্ণনাৰংৰ সামিকা.

‘‘যথাপি পুরিসো চোরেহি, গচ্ছন্তো ভণ্ডমাদিয;

ভণ্ডচ্ছেদভযং দিস্ৰা, ছড্ডযিত্ৰান গচ্ছতি.

‘‘এৰমেৰ ইমং কাযো, মহাচোরসমো ৰিয;

পহাযিমং গমিস্সামি, কুসলচ্ছেদনাভযা’’তি.

তত্থ যথাপি কুণপং পুরিসোতি যথাপি দহরো যুৰা মণ্ডনকজাতিকো পুরিসো অহিকুণপেন ৰা কুক্কুরকুণপেন ৰা মনুস্সকুণপেন ৰা কণ্ঠে আসত্তেন অট্টীযিত্ৰা হরাযিত্ৰা জিগুচ্ছিত্ৰা তং কুণপং মোচেত্ৰা ¶ গচ্ছেয্য. সুখীতি সুখিতো. সেরীতি যথিচ্ছকৰিহারী. নানাকুণপসঞ্চযন্তি অনেকৰিধকুণপরাসিভূতং ‘‘নানাকুণপপূরিত’’ন্তিপি পাঠো.

উচ্চারট্ঠানম্হীতি উচ্চারেন্তি ৰচ্চং করোন্তি এত্থাতি উচ্চারো, উচ্চারো চ সো ঠানং চেতি উচ্চারট্ঠানং. অথ ৰা উস্সাসিয্যতীতি উস্সাসো, ৰচ্চস্সেতং নামং, তস্স ঠানং উস্সাসট্ঠানং, তস্মিং উস্সাসট্ঠানম্হি, উক্কারট্ঠানেতি অত্থো. ৰচ্চং কত্ৰা যথা কুটিন্তি ৰচ্চং কত্ৰা কুটিং নরনারিযো ৰিযাতি অত্থো.

জজ্জরন্তি জিণ্ণং. পলুগ্গন্তি পলুজ্জন্তিং, ৰিকিরন্তিন্তি অত্থো. উদগাহিনিন্তি উদকগাহিনিং ¶ . সামীতি নাৰাসামিকা. নৰচ্ছিদ্দন্তি চক্খুসোতাদীহি নৰহি ৰণমুখেহি ছিদ্দাৰচ্ছিদ্দেহি যুত্তত্তা নৰচ্ছিদ্দং. ধুৰস্সৰন্তি ধুৰনিস্সন্দং, নিচ্চং পগ্ঘরণাসুচিন্তি অত্থো.

ভণ্ডমাদিযাতি যংকিঞ্চি রতনাদিকং ভণ্ডং আদিয. ভণ্ডচ্ছেদভযং ¶ দিস্ৰাতি ভণ্ডস্স অচ্ছিন্দনেন ভযং দিস্ৰাতি অত্থো. এৰমেৰাতি সো ভণ্ডমাদায গচ্ছন্তো পুরিসো ৰিয. অযং কাযোতি অযং পন কুচ্ছিতানং পরমজেগুচ্ছানং আযোতি কাযো. আযোতি উপত্তিট্ঠানং. আযন্তি ততোতি আযো, কুচ্ছিতা কেসাদযো. ইতি কুচ্ছিতানং কেসাদীনং আযোতি কাযো. মহাচোরসমো ৰিযাতি চক্খুআদীহি রূপাদীসু পিযরূপেসু সারজ্জনাদিৰসেন পাণাতিপাতাদিন্নাদানাদিচোরো হুত্ৰা সব্বকুসলং ৰিলুম্পতীতি মহাচোরসমো. তস্মা যথা সো রতনভণ্ডমাদায চোরেহি সদ্ধিং গচ্ছন্তো পুরিসো তে চোরে পহায গচ্ছতি, এৰমেৰাহম্পি ইমং মহাচোরসমং কাযং পহায অত্তনো সোত্থিভাৰকরং মগ্গং গৰেসিতুং গমিস্সামীতি অত্থসম্বন্ধো ৰেদিতব্বো. কুসলচ্ছেদনাভযাতি কুসলধম্মৰিলোপনভযেনাতি অত্থো.

অথেৰং সুমেধপণ্ডিতো নানাৰিধাহি উপমাহি নেক্খম্মকারণং চিন্তেত্ৰা পুনপি চিন্তেসি – ‘‘ইমং মহাধনরাসিং সংহরিত্ৰা ময্হং পিতুপিতামহাদযো পরলোকং গচ্ছন্তা এককহাপণম্পি গহেত্ৰা ন গতা, মযা পন গহেত্ৰা গমনকারণং কাতুং ৰট্টতী’’তি গন্ত্ৰা রঞ্ঞো আরোচেসি ¶ – ‘‘অহং, মহারাজ, জাতিজরাদীহি উপদ্দুতহদযো অগারস্মা অনগারিযং পব্বজিস্সামি, ময্হং অনেককোটিসতসহস্সং ধনং অত্থি, তং দেৰো পটিপজ্জতূ’’তি. রাজা আহ – ‘‘ন ময্হং তে ধনেন অত্থো, ত্ৰংযেৰ যথিচ্ছকং করোহী’’তি.

সো চ ‘‘সাধু দেৰা’’তি নগরে ভেরিং চরাপেত্ৰা মহাজনস্স দানং দত্ৰা ৰত্থুকামে চ কিলেসকামে চ পহায অমরৰরনগরসদিসতো অমরনগরতো নিক্খমিত্ৰা এককোৰ নানামিগগণৰন্তে হিমৰন্তে ধম্মিকং নাম পব্বতং নিস্সায অস্সমং কত্ৰা তত্থ পণ্ণসালং কত্ৰা পঞ্চদোসৰিৰজ্জিতং চঙ্কমং মাপেত্ৰা অট্ঠগুণসমুপেতং অভিঞ্ঞাবলং সমাহরিতুং নৰদোসসমন্নাগতং সাটকং পজহিত্ৰা দ্ৰাদসগুণমুপাগতং ৰাকচীরং নিৰাসেত্ৰা পব্বজি. এৰং পন সো পব্বজিতো অট্ঠদোসসমাকিণ্ণং পণ্ণসালং পহায দসগুণসমন্নাগতং রুক্খমূলং উপগন্ত্ৰা সব্বধঞ্ঞৰিকতিং পহায পৰত্তফলভোজনো হুত্ৰা নিসজ্জট্ঠানচঙ্কমনৰসেন পধানং পদহন্তো সত্তাহব্ভন্তরেযেৰ অট্ঠন্নং সমাপত্তীনং পঞ্চন্নঞ্চ অভিঞ্ঞানং লাভী অহোসি. তেন ৰুত্তং –

‘‘এৰাহং ¶ চিন্তযিত্ৰান, নেককোটিসতং ধনং;

নাথানাথানং দত্ৰান, হিমৰন্তমুপাগমিং.

‘‘হিমৰন্তস্সাৰিদূরে, ধম্মিকো নাম পব্বতো;

অস্সমো সুকতো ময্হং, পণ্ণসালা সুমাপিতা.

‘‘চঙ্কমং ¶ তত্থ মাপেসিং, পঞ্চদোসৰিৰজ্জিতং.

অট্ঠগুণসমুপেতং, অভিঞ্ঞাবলমাহরিং.

‘‘সাটকং পজহিং তত্থ, নৰদোসমুপাগতং;

ৰাকচীরং নিৰাসেসিং, দ্ৰাদসগুণমুপাগতং.

‘‘অট্ঠদোসসমাকিণ্ণং, পজহিং পণ্ণসালকং;

উপাগমিং রুক্খমূলং, গুণে দসহুপাগতং.

‘‘ৰাপিতং রোপিতং ধঞ্ঞং, পজহিং নিরৰসেসতো;

অনেকগুণসম্পন্নং, পৰত্তফলমাদিযিং.

‘‘তত্থপ্পধানং ¶ পদহিং, নিস্সজ্জট্ঠানচঙ্কমে;

অব্ভন্তরম্হি সত্তাহে, অভিঞ্ঞাবলপাপুণি’’ন্তি.

তত্থ এৰাহন্তি এৰং অহং, হেট্ঠা ৰুত্তপ্পকারেন চিন্তেত্ৰাতি অত্থো. নাথানাথানন্তি সনাথানমনাথানঞ্চ অড্ঢানঞ্চেৰ দলিদ্দানঞ্চ ‘‘অত্থিকা গণ্হন্তূ’’তি সহ কোট্ঠাগারেহি দত্ৰাতি অত্থো. হিমৰন্তস্সাৰিদূরেতি হিমৰন্তপব্বতরাজস্স অৰিদূরে সমীপে. ধম্মিকো নাম পব্বতোতি এৰংনামকো পব্বতো. কস্মা পনাযং ধম্মিকোতি? যেভুয্যেন পন বোধিসত্তা ইসিপব্বজ্জং পব্বজিত্ৰা তং পব্বতং উপনিস্সায অভিঞ্ঞাযো নিব্বত্তেত্ৰা সমণধম্মং অকংসু. তস্মা সমণধম্মস্স নিস্সযভূতত্তা ‘‘ধম্মিকো’’ত্ৰেৰ পাকটো অহোসি. অস্সমো সুকতো ময্হন্তিআদিনা সুমেধপণ্ডিতেন অস্সমপণ্ণসালা চঙ্কমা সহত্থা মাপিতা ৰিয ৰুত্তা, ন চ পন সহত্থা মাপিতা, কিন্তু সক্কেন দেৰেন পেসিতে ৰিস্সকম্মুনা দেৰপুত্তেন নিম্মিতা. ভগৰা ¶ পন তদা অত্তনো পুঞ্ঞানুভাৰেন নিব্বত্তং তং সম্পদং সন্ধায – ‘‘সারিপুত্ত, তস্মিং পব্বতে –

‘অস্সমো সুকতো ময্হং, পণ্ণসালা সুমাপিতা;

চঙ্কমং তত্থ মাপেসিং, পঞ্চদোসৰিৰজ্জিত’’’ন্তি. – আদিমাহ;

তত্থ পণ্ণসালাতি পণ্ণছদনসালা. তত্থাতি তস্মিং অস্সমপদে. পঞ্চদোসৰিৰজ্জিতন্তি পঞ্চহি চঙ্কমদোসেহি ৰিৰজ্জিতং. কতমে পঞ্চ চঙ্কমদোসা নাম? থদ্ধৰিসমতা, অন্তোরুক্খতা, গহনচ্ছন্নতা, অতিসম্বাধতা, অতিৰিসালতাতি ইমেহি পঞ্চহি ¶ দোসেহি ৰিৰজ্জিতং. উক্কট্ঠপরিচ্ছেদেন দীঘতো সট্ঠিরতনো ৰিত্থারতো দিযড্ঢরতনো চঙ্কমো ৰুত্তো. অথ ৰা পঞ্চদোসৰিৰজ্জিতন্তি পঞ্চহি নীৰরণদোসেহি ৰিৰজ্জিতং পরিহীনং অভিঞ্ঞাবলমাহরিন্তি ইমিনা উত্তরপদেন সম্বন্ধো দট্ঠব্বো (ধ. স. অট্ঠ. নিদানকথা, সুমেধকথা). অট্ঠগুণসমুপেতন্তি ‘‘এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে’’তি এৰং ৰুত্তেহি অট্ঠগুণেহি (দী. নি. ১.২৪৪-২৪৫; ম. নি. ১.৩৮৪-৩৮৬, ৪৩১-৪৩৩; পারা. ১২-১৪) সমন্নাগতং অভিঞ্ঞাবলং আহরিং আনেসিন্তি অত্থো.

কেচি ¶ পন ‘‘অট্ঠহি সমণসুখেহি উপেতং, অট্ঠিমানি সমণসুখানি নাম ধনধঞ্ঞপরিগ্গহাভাৰো, অনৰজ্জপিণ্ডপাতপরিযেসনভাৰো, নিব্বুতপিণ্ডভুঞ্জনভাৰো, রট্ঠং পীল়েত্ৰা ধনধঞ্ঞাদীসু গণ্হন্তেসু রাজপুরিসেসু রট্ঠপীল়নকিলেসাভাৰো, উপকরণেসু নিচ্ছন্দরাগভাৰো, চোরৰিলোপনে নিব্ভযভাৰো, রাজরাজমহামত্তেহি অসংসট্ঠভাৰো, চতূসু দিসাসু অপ্পটিহতভাৰোতি ইমেহি অট্ঠহি সমণসুখেহি (অপ. অট্ঠ. ১.দূরেনিদান, সুমেধকথা; ধ. স. অট্ঠ. নিদানকথা) উপেতং সমুপেতং অস্সমং মাপেসি’’ন্তি অস্সমেন সম্বন্ধং কত্ৰা ৰদন্তি, তং পাল়িযা ন সমেতি.

সাটকন্তি ৰত্থং. তত্থাতি তস্মিং অস্সমে. নৰদোসমুপাগতন্তি, সারিপুত্ত, তত্থ ৰসন্তো অত্তনো নিৰত্থপারুতং মহগ্ঘসাটকং পজহিং পরিচ্চজিং. সাটকং পজহন্তো চ তত্থ নৰ দোসে দিস্ৰা পজহিন্তি দীপেতি. তাপসপব্বজ্জং পব্বজিতানঞ্হি সাটকস্মিং নৰ দোসা পকাসিতা. কতমে নৰ? সাটকস্স মহগ্ঘভাৰো, পরপটিবদ্ধভাৰো, পরিভোগেন লহুকং কিলিস্সনভাৰো, কিলিট্ঠো চ ধোৰিতব্বো পুন রজিতব্বো চ হোতি পরিভোগেন জীরণভাৰো, জিণ্ণস্স পুন তুন্নকরণং ¶ ৰা অগ্গল়দানং ৰা কাতব্বং হোতি পুন পরিযেসনায দুরভিসম্ভৰভাৰো, তাপসপব্বজ্জায অননুচ্ছৰিকভাৰো, পচ্চত্থিকানং সাধারণভাৰো, যথা নং ন পচ্চত্থিকা গণ্হন্তি, এৰং গোপেতব্বো হোতি পরিদহতো ৰিভূসনট্ঠানভাৰো, গহেত্ৰা চরন্তস্স মহিচ্ছভাৰোতি এতেহি নৰহি দোসেহি (অপ. অট্ঠ. ১.দূরেনিদান, সুমেধকথা) উপগতং সাটকং পহায ৰাকচীরং নিৰাসেসিন্তি দীপেতি. ৰাকচীরন্তি মুঞ্জতিণং হীরাহীরং কত্ৰা গন্থেত্ৰা কতং ৰাকমযচীরং নিৰাসনপারুপনত্থায আদিযিন্তি অত্থো. দ্ৰাদসগুণমুপাগতন্তি দ্ৰাদসহি আনিসংসেহি উপেতং. এত্থ গুণ-সদ্দো আনিসংসট্ঠো ‘‘সতগুণা দক্খিণা পাটিকঙ্খিতব্বা’’তিআদীসু (ম. নি. ৩.৩৭৯) ৰিয. ম-কারো পদসন্ধিকরো. ৰাকচীরস্মিং দ্ৰাদসানিসংসা ¶ অপ্পগ্ঘতা, অপরাযত্ততা, সহত্থা কাতুং সক্কুণেয্যতা, পরিভোগেন জিণ্ণেপি সিব্বিতব্বাভাৰো, চোরভযাভাৰো পরিযেসন্তস্স সুখেন করণভাৰো, তাপসপব্বজ্জায সারুপ্পভাৰো, সেৰমানস্স ৰিভূসনট্ঠানাভাৰো, চীৰরপ্পচ্চযে অপ্পিচ্ছভাৰো ¶ , পরিভোগসুখভাৰো, ৰাকুপ্পত্তিযা সুলভভাৰো, ৰাকচীরে নট্ঠেপি অনপেক্খভাৰোতি ইমেহি দ্ৰাদসহি গুণেহি সম্পন্নং (অপ. অট্ঠ. ১.দূরেনিদান, সুমেধকথা; ধ. স. অট্ঠ. নিদানকথা).

অথ সুমেধপণ্ডিতো তত্থ পণ্ণসালাযং ৰিহরন্তো পচ্চূসসমযে পচ্চুট্ঠায অত্তনো নিক্খমনকারণং পচ্চৰেক্খমানো এৰং কির চিন্তেসি – ‘‘অহং পন নৰকনককটকনূপুরাদিসঙ্ঘট্টনসদ্দসম্মিস্সিত-মধুরহসিতকথিতগেহজনরমণীযং উল়ারৰিভৰসোভিতং সুরৰরভৰনাকারমগারং খেল়পিণ্ডং ৰিয পহায ৰিৰেকারামতায সব্বজনপাপপৰাহনং তপোৰনং পৰিট্ঠোস্মি, ইধ পন মে পণ্ণসালায ৰাসো দুতিযো ঘরাৰাসো ৰিয হোতি, হন্দাহং রুক্খমূলে ৰসেয্য’’ন্তি. তেন ৰুত্তং –

‘‘অট্ঠদোসসমাকিণ্ণং, পজহিং পণ্ণসালক’’ন্তি.

তত্থ অট্ঠদোসসমাকিণ্ণন্তি অট্ঠহি দোসেহি সমাকিণ্ণং সংযুত্তং. কতমেহি অট্ঠহি? মহাসম্ভারেহি নিপ্ফাদনীযতা, তিণপণ্ণমত্তিকাদীহি নিচ্চং পটিজগ্গনীযতা, সেনাসনং নাম মহল্লকস্স পাপুণাতীতি অৰেলায ৰুট্ঠাপিযমানস্স চিত্তেকগ্গতা ন হোতীতি ৰুট্ঠাপনীযভাৰো, সীতুণ্হস্স পটিঘাতেন কাযস্স সুখুমালকরণভাৰো, ঘরং পৰিট্ঠেন যং কিঞ্চি পাপং সক্কা কাতুন্তি গরহপটিচ্ছাদনকরণভাৰো, ‘‘ময্হমিদ’’ন্তি সপরিগ্গহভাৰো, গেহস্স অত্থিভাৰো সদুতিযকৰাসো, ঊকামঙ্গুলঘরগোল়িকাদীনং সাধারণতায বহুসাধারণভাৰোতি ¶ ইতি ইমে অট্ঠ আদীনৰে (অপ. অট্ঠ. ১.দূরেনিদান, সুমেধকথা) দিস্ৰা মহাসত্তো পণ্ণসালং পজহিং.

গুণে দসহুপাগতন্তি ছন্নং পটিক্খিপিত্ৰা দসহি গুণেহি উপেতং, রুক্খমূলং উপগতোস্মীতি অত্থো. কতমেহি দসহি? অপ্পসমারম্ভতা, উপগমনমত্তমেৰেত্থ হোতীতি সুলভানৰজ্জতা, অভিণ্হং তরুপণ্ণৰিকারদস্সনেন অনিচ্চসঞ্ঞাসমুট্ঠাপনতা, সেনাসনমচ্ছেরাভাৰো, তত্থ হি পাপং করোন্তো লজ্জতীতি পাপকরণারহাভাৰো, পরিগ্গহকরণাভাৰো, দেৰতাহি সহ ৰাসো, ছন্নপটিক্খেপো, পরিভোগসুখতা, রুক্খমূলসেনাসনস্স গতগতট্ঠানে সুলভতায অনপেক্খভাৰোতি ইতি ইমে দস গুণে (অপ. অট্ঠ. ১.দূরেনিদান, সুমেধকথা) দিস্ৰা রুক্খমূলং উপগতোস্মীতি ৰদতি. আহ চ –

‘‘ৰণ্ণিতো ¶ বুদ্ধসেট্ঠেন, নিস্সযোতি চ ভাসিতো;

নিৰাসো পৰিৰিত্তস্স, রুক্খমূলসমো কুতো.

‘‘আৰাসমচ্ছেরহরে, দেৰতাপরিপালিতে;

পৰিৰিত্তে ৰসন্তো হি, রুক্খমূলম্হি সুব্বতো.

‘‘অভিরত্তানি ¶ নীলানি, পণ্ডূনি পতিতানি চ;

পস্সন্তো তরুপণ্ণানি, নিচ্চসঞ্ঞং পনূদতি.

‘‘তস্মা হি বুদ্ধদাযজ্জং, ভাৰনাভিরতালযং;

ৰিৰিত্তং নাতিমঞ্ঞেয্য, রুক্খমূলং ৰিচক্খণো’’তি. (ৰিসুদ্ধি. ১.৩২);

অথ সুমেধপণ্ডিতো পণ্ণসালায দিট্ঠদোসো হুত্ৰা রুক্খমূলসেনাসনে লদ্ধানিসংসো ৰিহরন্তো উত্তরিপি চিন্তেসি – ‘‘আহারত্থায মে গামগমনং আহারপরিযেসনদুক্খং, নাহং কেনচি পারিজুঞ্ঞেন নিক্খমিত্ৰা আহারত্থায পব্বজিতো, আহারপরিযেসনমূলস্স চ দুক্খস্স পমাণং নত্থি, যংনূনাহং পৰত্তফলেন যাপেয্য’’ন্তি. ইমং পন অত্থৰিসেসং দীপেন্তো –

৩২-৩৩. ‘‘ৰাপিতং রোপিতং ধঞ্ঞং, পজহিং নিরৰসেসতো.

অনেকগুণসম্পন্নং, পৰত্তফলমাদিযি’’ন্তি. – আদিমাহ;

তত্থ ¶ ৰাপিতন্তি ৰপিত্ৰা নিপ্ফন্নং. রোপিতন্তি রোপিত্ৰা নিপ্ফন্নং, ৰপনরোপনৰসেন দুৰিধাৰ সস্সনিপ্ফত্তি, তং দুৰিধম্পি অত্তনো অপ্পিচ্ছতায পহায পৰত্তফলেন যাপেসিং. পৰত্তফলন্তি সযমেৰ পতিতফলং. আদিযিন্তি পরিভুঞ্জিং.

‘‘পৰত্তফলসন্তুট্ঠো, অপরাযত্তজীৰিকো;

পহীনাহারলোলুপ্পো, হোতি চাতুদ্দিসো মুনি.

‘‘জহাতি রসতণ্হঞ্চ, আজীৰো তস্স সুজ্ঝতি;

তস্মা হি নাতিমঞ্ঞেয্য, পৰত্তফলভোজন’’ন্তি. (ৰিসুদ্ধি. ১.২৬ থোকং ৰিসদিসং) –

এৰং পৰত্তমানো সুমেধপণ্ডিতো নচিরস্সেৰ অন্তোসত্তাহে অট্ঠ সমাপত্তিযো পঞ্চ অভিঞ্ঞাযো চ পাপুণি. ইমমত্থং পকাসেন্তেন ‘‘তত্থপ্পধানং ¶ পদহি’’ন্তিআদি ৰুত্তং. তত্থ তত্থাতি তস্মিং অস্সমে. পধানন্তি ৰীরিযং, ৰীরিযঞ্হি পদহিতব্বতো পধানভাৰকরণতো ৰা ‘‘পধান’’ন্তি ৰুচ্চতি. পদহিন্তি ৰীরিযমারভিং. নিস্সজ্জট্ঠানচঙ্কমেতি নিসজ্জায চ ঠানেন চ চঙ্কমেন চ.

সুমেধপণ্ডিতো পন সেয্যং পটিক্খিপিত্ৰা নিসজ্জট্ঠানচঙ্কমেহেৰ রত্তিন্দিৰং ৰীতিনামেত্ৰা সত্তাহব্ভন্তরেযেৰ অভিঞ্ঞাবলং পাপুণি. এৰং পন অভিঞ্ঞাবলং পত্ৰা সুমেধতাপসে সমাপত্তিসুখেন ৰীতিনামেন্তে তদা সব্বজনসঙ্গহকরো মারবলভযংকরো ঞাণদীপঙ্করো দীপঙ্করো নাম সত্থা লোকে উদপাদি.

সঙ্খেপেনেৰ তস্সাযমানুপুব্বিকথা – অযং কির দীপঙ্করো নাম মহাসত্তো সমত্তিংস পারমিযো পূরেত্ৰা ৰেস্সন্তরত্তভাৰসদিসে অত্তভাৰে ঠিতো পথৰিকম্পনাদীনি মহাদানানি দত্ৰা আযুপরিযোসানে ¶ তুসিতপুরে নিব্বত্তিত্ৰা তত্থ যাৰতাযুকং ঠত্ৰা দসসহস্সচক্কৰাল়দেৰতাহি সন্নিপতিত্ৰা –

‘‘কালো খো তে মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি. (বু. ৰং. ১.৬৭) –

ৰুত্তে ¶ ততো সো দেৰতানং ৰচনং সুত্ৰা চ পঞ্চ মহাৰিলোকনানি ৰিলোকেত্ৰা ততো চুতো রম্মৰতীনগরে অত্তনো যসৰিভূতিযা ৰিজিতৰাসুদেৰস্স নরদেৰস্স সুদেৰস্স নাম রঞ্ঞো কুলে সুমেধায দেৰিযা কুচ্ছিস্মিং আসাল়্হিপুণ্ণমিযা উত্তরাসাল়্হনক্খত্তেন পটিসন্ধিং গহেত্ৰা মহতা পরিৰারেন পরিহরিযমানো মহাদেৰিযা কুচ্ছিম্হি মণিকূটগতো ৰিয কেনচি অসুচিনা অমক্খিতো দস মাসে ৰসিত্ৰা সলিলধরৰিৰরগতো সরদকালচন্দো ৰিয তস্সা উদরতো নিক্খমি.

তস্স পন দীপঙ্করকুমারস্স পটিসন্ধিক্খণেপি ৰিজাতক্খণেপি দ্ৰত্তিংস পুব্বনিমিত্তানি পাটিহারিযানি পাতুরহেসুং. সব্বসব্বঞ্ঞুবোধিসত্তেসু মাতুকুচ্ছিং ওক্কমন্তেসু নিক্খমন্তেসু সম্বুজ্ঝন্তেসু ধম্মচক্কং পৰত্তন্তেসূতি ইমেসু ¶ চতূসু ঠানেসু দ্ৰত্তিংস পাটিহারিযানি পৰত্তন্তেৰ. তস্মা মযা পাকটত্তা দীপঙ্করকুমারস্স জাতিযং দস্সিতানি –

‘‘দীপঙ্করে চারুকরে কুমারে, সিৰংকরে সন্তিকরেৰ জাতে;

পকম্পি সঙ্কম্পি তদা সমন্তা, সহস্সসঙ্খ্যা দসলোকধাতু.

‘‘চক্কৰাল়সহস্সেসু, দসসহস্সেৰ দেৰতা;

একস্মিং চক্কৰাল়স্মিং, তদা সন্নিপতিংসু তা.

‘‘বোধিসত্তং মহাসত্তং, জাতমত্তন্তু দেৰতা;

পঠমং পটিগ্গণ্হিংসু, পচ্ছা তং মনুজা পন.

‘‘অৰাদিতা কেনচি চম্মনদ্ধা, সুপোক্খরা দুন্দুভিযো চ ৰীণা;

অঘট্টিতানাভরণানি তস্মিং, খণে সমন্তা মধুরং রৰিংসু.

‘‘ছিজ্জিংসু সব্বত্থ চ বন্ধনানি, সযং ৰিগচ্ছিংসু চ সব্বরোগা;

রূপানি পস্সিংসু চ জাতিঅন্ধা, সদ্দং সমন্তা বধিরা সুণিংসু.

‘‘অনুস্সতিং জাতিজল়া মনুস্সা, লভিংসু যানং পদসাৰ পঙ্গুলা;

ৰিদেসযাতা সযমেৰ নাৰা, সপট্টনং সীঘমুপাগমিংসু.

‘‘আকাসট্ঠং ¶ ¶ ভূমিগতঞ্চ সব্বং, সযং সমন্তা রতনং ৰিরোচি;

নিব্বাযি ঘোরে নিরযে হুতাসো, নদীসু তোযম্পি চ নপ্পৰত্তি.

‘‘লোকন্তরে ¶ দুক্খনিরন্তরেপি, পভা উল়ারা ৰিপুলা অহোসি;

তথা তদা সন্ততরঙ্গমালো, মহাসমুদ্দো মধুরোদকোযং.

‘‘ন ৰাযি ৰাতো ফরুসো খরো ৰা, সম্ফুল্লপুপ্ফা তরৰো অহেসুং;

ৰিরোচি চন্দো অধিকং সতারো, ন চাপি উণ্হো সূরিযো অহোসি.

‘‘খগা নভম্হাপি চ রুক্খতো চ, হট্ঠাৰ হেট্ঠা পথৰিং ভজিংসু;

মহাচতুদ্দীপগতো চ মেঘো, পৰস্সি তোযং মধুরং সমন্তা.

‘‘ঠত্ৰাৰ দিব্বে ভৰনে সকস্মিং, পসন্নচিত্তা পন দেৰতাযো;

নচ্চিংসু গাযিংসু চ ৰাদযিংসু, সেল়িংসু তা কেল়িমকংসু চেৰ.

‘‘সযং কির দ্ৰারমহাকৰাটা, খণেৰ তস্মিং ৰিৰটা অহেসুং;

মহাজনে নেৰ খুদা পিপাসা, পীল়েসি লোকং কির কঞ্চি কঞ্চি.

‘‘যে নিচ্চৰেরা পন পাণিসঙ্ঘা, তে মেত্তচিত্তং পরমং লভিংসু;

কাকা উলূকেহি চরিংসু সদ্ধিং, কোণা ৰরাহেহি অকংসু কেল়িং.

‘‘ঘোরাপি সপ্পানমুখাপি সপ্পা, কীল়িংসু কামং নকুলেহি সদ্ধিং;

গণ্হিংসু মজ্জারসিরেসু যূকা, ৰিস্সত্থচিত্তা ঘরমূসিকাপি.

‘‘বুদ্ধন্তরেনাপি ¶ অলদ্ধতোযে, পিসাচলোকে ৰিগতা পিপাসা;

খুজ্জা অহেসুং সমচারুকাযা, মূগা চ ৰাচং মধুরং লপিংসু.

‘‘পসন্নচিত্তা ¶ পন পাণিসঙ্ঘা, তদঞ্ঞমঞ্ঞং পিযমালপিংসু;

অস্সা চ হেসিংসু পহট্ঠচিত্তা, গজ্জিংসু মত্তা ৰরৰারণাপি.

‘‘সুরভিচন্দনচুণ্ণসমাকুলা ¶ , কুসুমকুঙ্কুমধূপসুগন্ধিনী;

ৰিৰিধচারুমহদ্ধজমালিনী, দসসহস্সি অহোসি সমন্ততো’’তি.

তত্র হিস্স দসসহস্সিলোকধাতুকম্পো সব্বঞ্ঞুতঞ্ঞাণপটিলাভস্স পুব্বনিমিত্তং, দেৰতানং একচক্কৰাল়ে সন্নিপাতো ধম্মচক্কপ্পৰত্তনকালে একপ্পহারেনেৰ সন্নিপতিত্ৰা ধম্মপটিগ্গহণস্স পুব্বনিমিত্তং, পঠমং দেৰতানং পটিগ্গহণং চতুন্নং রূপাৰচরজ্ঝানানং পটিলাভস্স পুব্বনিমিত্তং, পচ্ছা মনুস্সানং পটিগ্গহণং চতুন্নং অরূপাৰচরজ্ঝানানং পটিলাভস্স পুব্বনিমিত্তং, চম্মনদ্ধদুন্দুভীনং সযমেৰ ৰজ্জনং মহন্তিযা ধম্মভেরিযা অনুসাৰনস্স পুব্বনিমিত্তং, ৰীণাভরণানং সযমেৰ ৰজ্জনং অনুপুব্বৰিহারপটিলাভস্স পুব্বনিমিত্তং, বন্ধনানং সযমেৰ ছেদো অস্মিমানসমুচ্ছেদস্স পুব্বনিমিত্তং, মহাজনস্স সব্বরোগৰিগমো চতুসচ্চফলপটিলাভস্স পুব্বনিমিত্তং, জচ্চন্ধানং রূপদস্সনং দিব্বচক্খুপটিলাভস্স পুব্বনিমিত্তং, বধিরানং সদ্দস্সৰনং দিব্বসোতধাতুপটিলাভস্স পুব্বনিমিত্তং.

জাতিজল়ানং অনুস্সতুপ্পাদো চতুসতিপট্ঠানপটিলাভস্স পুব্বনিমিত্তং, পঙ্গুলানং পদসা গমনং চতুরিদ্ধিপাদপটিলাভস্স পুব্বনিমিত্তং, ৰিদেসগতানং নাৰানং সপট্টনাগমনং চতুপটিসম্ভিদাধিগমস্স, রতনানং সযমেৰ ৰিরোচনং ধম্মোভাসপটিলাভস্স, নিরযে অগ্গিনিব্বাযনং একাদসগ্গিনিব্বাযনস্স, নদীসু তোযস্স নপ্পৰত্তনং চতুৰেসারজ্জপটিলাভস্স, লোকন্তরে আলোকো অৰিজ্জন্ধকারং ৰিধমেত্ৰা ঞাণলোকদস্সনস্স, মহাসমুদ্দস্স ¶ মধুরোদকতা নিব্বানরসেন একরসভাৰস্স, ৰাতস্স অৰাযনং দ্ৰাসট্ঠিদিট্ঠিগতভেদনস্স, তরূনং পুপ্ফিতভাৰো ৰিমুত্তিপুপ্ফেহি পুপ্ফিতভাৰস্স পুব্বনিমিত্তং.

চন্দস্স অতিৰিরোচনং বহুজনকন্ততায পুব্বনিমিত্তং, সূরিযস্স নাতিউণ্হৰিমলভাৰো কাযিকচেতসিকসুখুপ্পত্তিযা, খগানং নগাদীহি পথৰিগমনং ওৰাদং সুত্ৰা মহাজনস্স পাণেহি সরণগমনস্স, মহতো চতুদ্দীপগতমেঘস্স পৰস্সনং মহতো ধম্মৰস্সস্স, দেৰতানং সকসকভৰনেস্ৰেৰ ঠত্ৰা নচ্চাদীহি কীল়নং বুদ্ধভাৰং পত্ৰা উদানুদানস্স, দ্ৰারকৰাটানং সযমেৰ ৰিৰরণং অট্ঠঙ্গিকমগ্গদ্ৰারৰিৰরণস্স, খুদাপীল়নস্স অভাৰো ৰিমুত্তিসুখেন সুখিতভাৰস্স, ৰেরীনং মেত্তচিত্তপটিলাভো চতুব্রহ্মৰিহারপটিলাভস্স, দসসহস্সিলোকধাতুযা ¶ একধজমালিতা অরিযধজমালিতায পুব্বনিমিত্তং, সেসৰিসেসা পন সেসবুদ্ধগুণপটিলাভস্স পুব্বনিমিত্তানীতি ৰেদিতব্বা.

অথ ¶ দীপঙ্করকুমারো মহতিযা সম্পত্তিযা পরিচারিযমানো অনুক্কমেন ভদ্দং যোব্বনং পত্ৰা তিণ্ণং উতূনং অনুচ্ছৰিকেসু তীসু পাসাদেসু দেৰলোকসিরিং ৰিয রজ্জসিরিমনুভৰন্তো উয্যানকীল়ায গমনসমযে অনুক্কমেন জিণ্ণব্যাধিমতসঙ্খাতে তযো দেৰদূতে দিস্ৰা সঞ্জাতসংৰেগো নিৰত্তিত্ৰা সুদস্সননগরসদিসৰিভৰসোভং রম্মৰতী নাম নগরং পাৰিসি. নগরং পৰিসিত্ৰা পুন চতুত্থৰারে হত্থাচরিযং পক্কোসাপেত্ৰা এতদৰোচ – ‘‘অহং, তাত, উয্যানদস্সনত্থায নিক্খমিস্সামি হত্থিযানানি কপ্পাপেহী’’তি. সো ‘‘সাধু, দেৰা’’তি পটিসুণিত্ৰা চতুরাসীতিহত্থিসহস্সানি কপ্পাপেসি. অথ ৰিস্সকম্মো নাম দেৰপুত্তো বোধিসত্তং নানাৰিরাগৰসননিৰাসনং আমুক্কমুত্তাহারকেযূরং রুচিরনৰকনককটকমকুটকুণ্ডলধরং পরমসুরভিকুসুমমালসমলঙ্কতসিরোরুহং সমলঙ্করি কির. অথ দীপঙ্করকুমারো দেৰকুমারো ৰিয চতুরাসীতিযা হত্থিসহস্সেহি পরিৰুতো হত্থিক্খন্ধৰরগতো মহতা বলকাযেন পরিৰুতো রতিজননং উয্যানং পৰিসিত্ৰা হত্থিক্খন্ধতো ওরুয্হ তং উয্যানমনুসঞ্চরিত্ৰা পরমরুচিরদস্সনে সকহদযসীতলে সিলাতলে নিসীদিত্ৰা পব্বজ্জায চিত্তং উপ্পাদেসি ¶ . তঙ্খণঞ্ঞেৰ সুদ্ধাৰাসখীণাসৰো মহাব্রহ্মা অট্ঠ সমণপরিক্খারে আদায মহাপুরিসস্স চক্খুপথে পাতুরহোসি.

মহাপুরিসো তং দিস্ৰা – ‘‘কিমিদ’’ন্তি পুচ্ছিত্ৰা, ‘‘সমণপরিক্খারো’’তি সুত্ৰা অলঙ্কারভণ্ডং ওমুঞ্চিত্ৰা পসাধনভণ্ডাগারিকস্স হত্থে দত্ৰা মঙ্গলখগ্গমাদায সদ্ধিং মকুটেন কেসে ছিন্দিত্ৰা অন্তলিক্খে আকাসে উক্খিপি. অথ সক্কো দেৰরাজা সুৰণ্ণচঙ্কোটকেন তং কেসমকুটং আদায সিনেরুমুদ্ধনি তিযোজনপ্পমাণং ইন্দনীলমণিমযং মকুটচেতিযং নাম অকাসি. অথ মহাপুরিসো দেৰদত্তিযং অরহত্তধজং কাসাৰং পরিদহিত্ৰা সাটকযুগং আকাসে খিপি. তং ব্রহ্মা পটিগ্গহেত্ৰা ব্রহ্মলোকে দ্ৰাদসযোজনিকং সব্বরতনমযং চেতিযমকাসি. দীপঙ্করকুমারং পন পব্বজন্তং একা পুরিসকোটি অনুপব্বজি. তায পন পরিসায পরিৰুতো বোধিসত্তো দস মাসে পধানচরিযং অচরি. অথ ৰিসাখপুণ্ণমায অঞ্ঞতরং নগরং পিণ্ডায পাৰিসি.

তস্মিং কির নগরে তংদিৰসং দেৰতানং বলিকরণত্থায নিরুদকপাযাসং পচিংসু. তস্স পন মহাসত্তস্স সপরিসস্স পিণ্ডায পৰিট্ঠস্স মনুস্সা অদংসু. তং কির সব্বেসং কোটিসঙ্খ্যাযানং ভিক্খূনং পরিযত্তং অহোসি. মহাপুরিসস্স পন পত্তে দেৰতা দিব্বোজং পক্খিপিংসু. তং পরিভুঞ্জিত্ৰা তত্থেৰ ¶ সালৰনে দিৰাৰিহারং ৰীতিনামেত্ৰা সাযন্হসমযে পটিসল্লানা ৰুট্ঠায গণং ৰিস্সজ্জেত্ৰা সুনন্দেন নামাজীৰকেন দিন্না অট্ঠ তিণমুট্ঠিযো গহেত্ৰা ¶ পিপ্ফলিবোধিরুক্খমূলং গন্ত্ৰা তিণসন্থরং সন্থরিত্ৰা নৰুতিহত্থং বোধিক্খন্ধং পিট্ঠিতো কত্ৰা পল্লঙ্কং আভুজিত্ৰা চতুরঙ্গৰীরিযং অধিট্ঠহিত্ৰা বোধিরুক্খমূলে নিসীদি.

ততো মারবলং ৰিধমিত্ৰা রত্তিযা পঠমযামে পুব্বেনিৰাসং অনুস্সরিত্ৰা মজ্ঝিমযামে দিব্বচক্খুং ৰিসোধেত্ৰা পচ্ছিমযামে অনুলোমপটিলোমৰসেন পচ্চযাকারং সম্মসিত্ৰা আনাপানচতুত্থজ্ঝানং সমাপজ্জিত্ৰা ততো ৰুট্ঠায পঞ্চসু খন্ধেসু অভিনিৰিসিত্ৰা উদযব্বযৰসেন সমপঞ্ঞাস লক্খণানি দিস্ৰা যাৰ গোত্রভুঞাণং ৰিপস্সনং ৰড্ঢেত্ৰা অরুণোদযে অরিযমগ্গেন সকলবুদ্ধগুণে পটিৰিজ্ঝিত্ৰা বুদ্ধসীহনাদং নদিত্ৰা সত্তসত্তাহং বোধিসমীপেযেৰ ৰীতিনামেত্ৰা ব্রহ্মুনো ধম্মদেসনং পটিঞ্ঞায সুনন্দারামে ধম্মচক্কং পৰত্তেত্ৰা কোটিসতানং দেৰমনুস্সানং ধম্মামতং পাযেত্ৰা চতুদ্দীপিকমহামেঘো ৰিয ধম্মৰস্সং ¶ ৰস্সেন্তো মহাজনস্স বন্ধনমোক্খং করোন্তো জনপদচারিকং ৰিচরি.

তদা কির সুমেধপণ্ডিতো সমাপত্তিসুখেন ৰীতিনামেন্তো নেৰ পথৰিকম্পনমদ্দস ন তানি নিমিত্তানি. তেন ৰুত্তং –

‘‘এৰং মে সিদ্ধিপ্পত্তস্স, ৰসীভূতস্স সাসনে;

দীপঙ্করো নাম জিনো, উপ্পজ্জি লোকনাযকো.

‘‘উপ্পজ্জন্তে চ জাযন্তে, বুজ্ঝন্তে ধম্মদেসনে;

চতুরো নিমিত্তে নাদ্দসং, ঝানরতিসমপ্পিতো’’তি.

তত্থ এৰন্তি ইদানি ৰত্তব্বং নিদস্সেতি. মেতি মম. সিদ্ধিপ্পত্তস্সাতি পঞ্চাভিঞ্ঞাসিদ্ধিপ্পত্তস্স. ৰসীভূতস্সাতি ভূতৰসিস্স, চিণ্ণৰসীভাৰমুপগতস্সাতি অত্থো. সাসনেতি ৰিৰেকমানসানং সাসনে, অনাদরলক্খণে সামিৰচনং দট্ঠব্বং. জিনোতি কিলেসারিজযনেন জিনো.

উপ্পজ্জন্তেতি পটিসন্ধিগ্গহণে. জাযন্তেতি মাতুকুচ্ছিতো নিক্খমনে. বুজ্ঝন্তেতি অনুত্তরং সম্মাসম্বোধিং অভিসম্বুজ্ঝন্তে. ধম্মদেসনেতি ধম্মচক্কপ্পৰত্তনে. চতুরো ¶ নিমিত্তেতি চত্তারি নিমিত্তানি. দীপঙ্করস্স দসবলস্স পটিসন্ধি-জাতি-বোধি-ধম্মচক্কপ্পৰত্তনেসু চতূসু ঠানেসু দসসহস্সিলোকধাতুকম্পনাদীনি নিমিত্তানীতি অত্থো. এত্থাহ – তানি পন বহূনি নিমিত্তানি, কস্মা ¶ ‘‘চতুরো নিমিত্তে’’তি ৰুত্তং, অযুত্তং ননূতি? নাযুত্তং, যদিপি এতানি বহূনি নিমিত্তানি, চতূসু ঠানেসু পন পৰত্তত্তা ‘‘চতুরো নিমিত্তে’’তি ৰুত্তং. নাদ্দসন্তি নাদ্দসিং. ইদানি তেসং চতুন্নং নিমিত্তানং অদস্সনে কারণং নিদ্দিসন্তো ‘‘ঝানরতিসমপ্পিতো’’তি আহ. ঝানরতীতি সমাপত্তিসুখস্সেতং অধিৰচনং. ঝানরতিযা সমপ্পিতত্তা সমঙ্গীভূতত্তা তানি নিমিত্তানি নাদ্দসন্তি অত্থো.

অথ তস্মিং কালে দীপঙ্করদসবলো চতূহি খীণাসৰসতসহস্সেহি পরিৰুতো অনুপুব্বেন চারিকং চরমানো পরমরম্মং রম্মং নাম নগরং পত্ৰা সুদস্সনমহাৰিহারে পটিৰসতি. রম্মনগরৰাসিনো ‘‘দীপঙ্করো কির দসবলো অনুত্তরং সম্মাসম্বোধিং পত্ৰা পৰত্তিতৰরধম্মচক্কো অনুপুব্বেন ¶ চারিকং চরমানো রম্মনগরং পত্ৰা সুদস্সনমহাৰিহারে পটিৰসতী’’তি সুত্ৰা সপ্পিআদীনি ভেসজ্জানি গহেত্ৰা ভুত্তপাতরাসা সুদ্ধুত্তরাসঙ্গা পুপ্ফধূপগন্ধহত্থা যেন বুদ্ধো তেনুপসঙ্কমিংসু, উপসঙ্কমিত্ৰা সত্থারং ৰন্দিত্ৰা পুপ্ফাদীহি পূজেত্ৰা একমন্তং নিসীদিত্ৰা অতিমধুরং ধম্মকথং সুত্ৰা স্ৰাতনায ভগৰন্তং নিমন্তেত্ৰা উট্ঠাযাসনা দসবলং পদক্খিণং কত্ৰা পক্কমিংসু.

তে পুনদিৰসে অসদিসমহাদানং সজ্জেত্ৰা মণ্ডপং কারেত্ৰা ৰিমলকোমলেহি নীলুপ্পলেহি ছাদেত্ৰা চতুজ্জাতিগন্ধেন পরিভণ্ডং কারেত্ৰা লাজপঞ্চমানি সুরভিকুসুমানি ৰিকিরিত্ৰা মণ্ডপস্স চতূসু কোণেসু সীতলমধুরৰারিপুণ্ণা চাটিযো ঠপেত্ৰা কদলিপণ্ণেহি পিদহিত্ৰা মণ্ডপোপরি জযসুমনকুসুমসদিসং পরমরুচিরদস্সনং চেলৰিতানং বন্ধিত্ৰা সুৰণ্ণমণিরজততারকাহি রচযিত্ৰা তত্থ গন্ধদামপুপ্ফদামপত্তদামরতনদামানি ওলম্বেত্ৰা ধূপেহি দুদ্দিনং কত্ৰা সকলঞ্চ তং রম্মং রম্মনগরং সম্মট্ঠং সফলকদলিযো চ পুপ্ফসমলঙ্কতে পুণ্ণঘটে চ ঠপাপেত্ৰা নানাৰিরাগা ধজপটাকাযো চ সমুস্সাপেত্ৰা মহাৰীথিযা উভোসু পস্সেসু সাণিপাকারেহি পরিক্খিপিত্ৰা দীপঙ্করদসবলস্স আগমনমগ্গং অলঙ্করোন্তা উদকপরিভিন্নট্ঠানেসু পংসুং পক্খিপিত্ৰা চিক্খল্লকম্পি পথৰিং অসমং সমং কত্ৰা মুত্তাসদিসাহি ৰালুকাহি আকিরন্তি, লাজপঞ্চমেহি চ পুপ্ফেহি আকিরন্তি, সফলকদলিকমুকে চ পতিট্ঠাপেন্তি.

অথ তস্মিং কালে সুমেধতাপসো অত্তনো অস্সমপদতো উগ্গন্ত্ৰা রম্মনগরৰাসীনং তেসং মনুস্সানং উপরিভাগেন আকাসেন গচ্ছন্তো তে হট্ঠপহট্ঠে মগ্গং সোধেন্তে চ অলঙ্করোন্তে চ দিস্ৰা – ‘‘কিং নু খো কারণ’’ন্তি চিন্তেত্ৰা সব্বেসং পস্সন্তানঞ্ঞেৰ ¶ আকাসতো ওরুয্হ একমন্তে ¶ ঠত্ৰা তে মনুস্সে পুচ্ছি – ‘‘অম্ভো! কস্সত্থায তুম্হে ইমং মগ্গং সোধেথা’’তি? তেন ৰুত্তং –

‘‘পচ্চন্তদেসৰিসযে, নিমন্তেত্ৰা তথাগতং;

তস্স আগমনং মগ্গং, সোধেন্তি তুট্ঠমানসা.

‘‘অহং তেন সমযেন, নিক্খমিত্ৰা সকস্সমা;

ধুনন্তো ৰাকচীরানি, গচ্ছামি অম্বরে তদা.

‘‘ৰেদজাতং ¶ জনং দিস্ৰা, তুট্ঠহট্ঠং পমোদিতং;

ওরোহিত্ৰান গগনা, মনুস্সে পুচ্ছি তাৰদে.

‘‘তুট্ঠহট্ঠো পমুদিতো, ৰেদজাতো মহাজনো;

কস্স সোধীযতি মগ্গো, অঞ্জসং ৰটুমাযন’’ন্তি.

তত্থ পচ্চন্তদেসৰিসযেতি মজ্ঝিমদেসস্সেৰ একপস্সে পচ্চন্তদেসসঞ্ঞিতে জনপদে. তস্স আগমনং মগ্গন্তি তেন আগন্তব্বং মগ্গন্তি অত্থো. অহং তেন সমযেনাতি অহং তস্মিং সমযে, ভুম্মত্থে চেতং করণৰচনং দট্ঠব্বং. সকস্সমাতি অত্তনো অস্সমপদতো নিক্খমিত্ৰা. ধুনন্তোতি ওধুনন্তো. ‘‘তেন সমযেন’’ চ, ‘‘তদা’’ চাতি ইমেসং দ্ৰিন্নং পদানং একত্থত্তা পুরিমস্স নিক্খমনকিরিযায পচ্ছিমস্স চ গমনকিরিযায সদ্ধিং সম্বন্ধো ৰেদিতব্বো, ইতরথা পুনরুত্তিদোসা ন মুচ্চতি. তদাতি তস্মিং সমযে.

ৰেদজাতন্তি সঞ্জাতসোমনস্সং. তুট্ঠহট্ঠং পমোদিতন্তি ইমানি তীণি পদানি অঞ্ঞমঞ্ঞৰেৰচনানি অঞ্ঞমঞ্ঞস্স অত্থদীপনানি. অথ ৰা সুখেন তুট্ঠং, পীতিযা হট্ঠং, পামোজ্জেন পমুদিতং. ওরোহিত্ৰানাতি ওতরিত্ৰা. মনুস্সে পুচ্ছীতি মানুসে পুচ্ছি. অযমেৰ ৰা পাঠো. তাৰদেতি তদা, তঙ্খণেযেৰাতি অত্থো. ইদানি পুচ্ছিতমত্থং দস্সেন্তেন ‘‘তুট্ঠহট্ঠো পমুদিতো’’তিআদি ৰুত্তং. তত্থ অযং মহাজনো তুট্ঠহট্ঠো পমোদিতহদযো হুত্ৰা মগ্গং সোধেতি, কিং কারণা সোধেতি, কস্সত্থায ৰা সোধেতীতি? এৰং ‘‘সোধেতি’’ সদ্দং আহরিত্ৰা অত্থো দট্ঠব্বো, ইতরথা ন যুজ্জতি. সোধীযতীতি সুদ্ধভাৰো করীযতি. মগ্গো অঞ্জসং ৰটুমাযনন্তি মগ্গস্সেৰেতানি ৰেৰচনানি.

এৰং ¶ তেন সুমেধতাপসেন পুট্ঠা তে মনুস্সা আহংসু – ‘‘ভন্তে ¶ সুমেধ, কিং ন জানাথ দীপঙ্করো নাম বুদ্ধো অনুত্তরং সম্মাসম্বোধিং পত্ৰা পৰত্তিতৰরধম্মচক্কো জনপদচারিকং চরমানো অনুক্কমেন অম্হাকং নগরং পত্ৰা সুদস্সনমহাৰিহারে পটিৰসতি, মযং তং ভগৰন্তং নিমন্তযিত্ৰা তস্সেৰ বুদ্ধস্স ভগৰতো আগমনমগ্গং সোধেমা’’তি. ততো তং সুত্ৰা সুমেধপণ্ডিতো চিন্তেসি – ‘‘বুদ্ধোতি খো পনেস ঘোসোপি দুল্লভো, পগেৰ বুদ্ধুপ্পাদো, তেন হি মযাপি ইমেহি মনুস্সেহি সদ্ধিং দসবলস্স আগমনমগ্গং সোধেতুং ৰট্টতী’’তি. সো তে মনুস্সে ¶ আহ – ‘‘সচে, ভো, তুম্হে ইমং মগ্গং বুদ্ধস্স সোধেথ, ময্হম্পি একং ওকাসং দেথ, অহম্পি তুম্হেহি সদ্ধিং বুদ্ধস্স মগ্গং সোধেস্সামী’’তি. ততো তে ‘‘সাধূ’’তি সম্পটিচ্ছিত্ৰা – ‘‘অযং সুমেধপণ্ডিতো মহিদ্ধিকো মহানুভাৰো’’তি জানমানা দুব্বিসোধনং উদকসম্ভিন্নং অতিৰিয ৰিসমং একং ওকাসং সল্লক্খেত্ৰা – ‘‘ইমং ওকাসং তুম্হে সোধেথ অলঙ্করোথ চা’’তি অদংসু. ততো সুমেধপণ্ডিতো বুদ্ধারম্মণং পীতিং উপ্পাদেত্ৰা চিন্তেসি – ‘‘অহং পন ইমং ওকাসং ইদ্ধিযা পরমদস্সনীযং কাতুং পহোমি, এৰং কতে পন মং ন পরিতোসেস্সতি. অজ্জ পন মযা কাযৰেয্যাৰচ্চং কাতুং ৰট্টতী’’তি পংসুং আহরিত্ৰা তং পদেসং পূরেতি.

তস্স পন তস্মিং পদেসে অসোধিতে ৰিপ্পকতেযেৰ রম্মনগরৰাসিনো মনুস্সা ভগৰতো কালমারোচেসুং – ‘‘নিট্ঠিতং, ভন্তে, ভত্ত’’ন্তি. এৰং তেহি কালে আরোচিতে দসবলো জযসুমনকুসুমসদিসৰণ্ণং দুপট্টচীৰরং তিমণ্ডলং পটিচ্ছাদেত্ৰা নিৰাসেত্ৰা তস্সুপরি সুৰণ্ণপামঙ্গেন জযসুমনকুসুমকলাপং পরিক্খিপন্তো ৰিয ৰিজ্জুলতাসস্সিরিকং কাযবন্ধনং বন্ধিত্ৰা কনকগিরিসিখরমত্থকে লাখারসং পরিসিঞ্চন্তো ৰিয সুৰণ্ণচেতিযং পৰাল়জালেন পরিক্খিপন্তো ৰিয চ সুৰণ্ণগ্ঘিকং রত্তকম্বলেন পটিমুঞ্চন্তো ৰিয চ সরদসমযরজনিকরং রত্তৰলাহকেন পটিচ্ছাদেন্তো ৰিয চ লাখারসেন তিন্তকিংসুককুসুমসদিসৰণ্ণং রত্তৰরপংসুকূলচীৰরং পারুপিত্ৰা গন্ধকুটিদ্ৰারতো কঞ্চনগুহতো সীহো ৰিয নিক্খমিত্ৰা গন্ধকুটিপমুখে অট্ঠাসি. অথ সব্বে ভিক্খূ অত্তনো অত্তনো পত্তচীৰরমাদায ভগৰন্তং পরিৰারযিংসু. তে পন পরিৰারেত্ৰা ঠিতা ভিক্খূ এৰরূপা অহেসুং –

‘‘অপ্পিচ্ছা পন সন্তুট্ঠা, ৰত্তারো ৰচনক্খমা;

পৰিৰিত্তা অসংসট্ঠা, ৰিনীতা পাপগরহিনো.

‘‘সব্বেপি সীলসম্পন্না, সমাধিজ্ঝানকোৰিদা;

পঞ্ঞাৰিমুত্তিসম্পন্না, তিপঞ্চচরণাযুতা.

‘‘খীণাসৰা ¶ ৰসিপ্পত্তা, ইদ্ধিমন্তো যসস্সিনো;

সন্তিন্দ্রিযা দমপ্পত্তা, সুদ্ধা খীণপুনব্ভৰা’’তি.

ইতি ¶ ¶ ভগৰা সযং ৰীতরাগো ৰীতরাগেহি ৰীতদোসো ৰীতদোসেহি ৰীতমোহো ৰীতমোহেহি পরিৰুতো অতিৰিয ৰিরোচিত্থ. অথ সত্থা মহানুভাৰানং খীণাসৰানং ছল়ভিঞ্ঞানং চতূহি সতসহস্সেহি পরিৰুতো মরুগণপরিৰুতো দসসতনযনো ৰিয ব্রহ্মগণপরিৰুতো হারিতমহাব্রহ্মা ৰিয চ অপরিমিতসমযসমুপচিতকুসলবলজনিতায অনোপমায বুদ্ধলীল়ায তারাগণপরিৰুতো সরদসমযরজনিকরো ৰিয চ গগনতলং তং মগ্গং অলঙ্কতপটিযত্তং পটিপজ্জি.

‘‘সুৰণ্ণৰণ্ণায পভায ধীরো, সুৰণ্ণৰণ্ণে কির মগ্গরুক্খে;

সুৰণ্ণৰণ্ণে কুসুমে করোন্তো, সুৰণ্ণৰণ্ণো পটিপজ্জি মগ্গং’’.

সুমেধতাপসোপি তেন অলঙ্কতপটিযত্তেন মগ্গেন আগচ্ছন্তস্স দীপঙ্করস্স ভগৰতো দ্ৰত্তিংসমহাপুরিসলক্খণপটিমণ্ডিতং অসীতিযা অনুব্যঞ্জনেহি অনুরঞ্জিতং ব্যামপ্পভায পরিক্খেপং সস্সিরিকং ইন্দনীলমণিসদিসং আকাসে নানপ্পকারা ৰিজ্জুলতা ৰিয ছব্বণ্ণবুদ্ধরস্মিযো ৰিস্সজ্জেন্তং রূপসোভগ্গপ্পত্তং অত্তভাৰং অক্খীনি উম্মীলেত্ৰা ওলোকেত্ৰা – ‘‘অজ্জ মযা দসবলস্স জীৰিতপরিচ্চাগং কাতুং ৰট্টতী’’তি, ‘‘মা ভগৰা কললে অক্কমি, মণিমযফলকসেতুং অক্কমন্তো ৰিয সদ্ধিং চতূহি খীণাসৰসতসহস্সেহি মম পিট্ঠিং অক্কমন্তো গচ্ছতু, তং মে ভৰিস্সতি দীঘরত্তং হিতায সুখাযা’’তি কেসে মোচেত্ৰা অজিনজটাৰাকচীরানি কাল়ৰণ্ণে কললে পত্থরিত্ৰা তত্থেৰ কললপিট্ঠে নিপজ্জি. তেন ৰুত্তং –

‘‘তে মে পুট্ঠা ৰিযাকংসু, বুদ্ধো লোকে অনুত্তরো;

দীপঙ্করো নাম জিনো, উপ্পজ্জি লোকনাযকো;

তস্স সোধীযতি মগ্গো, অঞ্জসং ৰটুমাযনং.

‘‘বুদ্ধোতি ৰচনং সুত্ৰান, পীতি উপ্পজ্জি তাৰদে;

বুদ্ধো বুদ্ধোতি কথযন্তো, সোমনস্সং পৰেদযিং.

‘‘তত্থ ¶ ¶ ঠত্ৰা ৰিচিন্তেসিং, তুট্ঠো সংৰিগ্গমানসো;

ইধ বীজানি রোপিস্সং, খণো ৰে মা উপচ্চগা.

‘‘যদি বুদ্ধস্স সোধেথ, একোকাসং দদাথ মে;

অহম্পি সোধযিস্সামি, অঞ্জসং ৰটুমাযনং.

‘‘অদংসু ¶ তে মমোকাসং, সোধেতুং অঞ্জসং তদা;

বুদ্ধো বুদ্ধোতি চিন্তেন্তো, মগ্গং সোধেমহং তদা.

‘‘অনিট্ঠিতে মমোকাসে, দীপঙ্করো মহামুনি;

চতূহি সতসহস্সেহি, ছল়ভিঞ্ঞেহি তাদিহি;

খীণাসৰেহি ৰিমলেহি, পটিপজ্জি অঞ্জসং জিনো.

‘‘পচ্চুগ্গমনা ৰত্তন্তি, ৰজ্জন্তি ভেরিযো বহূ;

আমোদিতা নরমরূ, সাধুকারং পৰত্তযুং.

‘‘দেৰা মনুস্সে পস্সন্তি, মনুস্সাপি চ দেৰতা;

উভোপি তে পঞ্জলিকা, অনুযন্তি তথাগতং.

‘‘দেৰা দিব্বেহি তুরিযেহি, মনুস্সা মানুসেহি চ;

উভোপি তে ৰজ্জযন্তা, অনুযন্তি তথাগতং.

‘‘দিব্বং মন্দারৰং পুপ্ফং, পদুমং পারিছত্তকং;

দিসোদিসং ওকিরন্তি, আকাসনভগতা মরূ.

‘‘দিব্বং চন্দনচুণ্ণঞ্চ, ৰরগন্ধঞ্চ কেৰলং;

দিসোদিসং ওকিরন্তি, আকাসনভগতা মরূ.

‘‘চম্পকং সরলং নীপং, নাগপুন্নাগকেতলং;

দিসোদিসং উক্খিপন্তি, ভূমিতলগতা নরা.

‘‘কেসে ¶ মুঞ্চিত্ৰাহং তত্থ, ৰাকচীরঞ্চ চম্মকং;

কললে পত্থরিত্ৰান, অৰকুজ্জো নিপজ্জহং.

‘‘অক্কমিত্ৰান মং বুদ্ধো, সহ সিস্সেহি গচ্ছতু;

মা নং কললে অক্কমিত্থ, হিতায মে ভৰিস্সতী’’তি.

তত্থ ¶ ৰিযাকংসূতি ব্যাকরিংসু. ‘‘দীপঙ্করো নাম জিনো, তস্স সোধীযতি পথো’’তিপি পাঠো. সোমনস্সং পৰেদযিন্তি সোমনস্সমনুভৰিন্তি অত্থো. তত্থ ঠত্ৰাতি যস্মিং পদেসে আকাসতো ওতরি, তত্থেৰ ঠত্ৰা. সংৰিগ্গমানসোতি পীতিৰিম্হিতমানসো. ইধাতি ইমস্মিং দীপঙ্করে পুঞ্ঞক্খেত্তে. বীজানীতি কুসলবীজানি. রোপিস্সন্তি রোপিস্সামি. খণোতি অট্ঠক্খণৰিরহিতো নৰমো খণসন্নিপাতো. অতিদুল্লভো সো মযা পটিলদ্ধো. ৰেতি নিপাতমত্তং. মা উপচ্চগাতি সো মা অচ্চগমা, মা অতিক্কমীতি অত্থো. দদাথাতি ¶ দেথ. তেতি যে মে পুট্ঠা মনুস্সা, তেতি অত্থো. সোধেমহং তদাতি সোধেমি অহং তদা. অনিট্ঠিতেতি অপরিযোসিতে ৰিপ্পকতে. খীণাসৰেহীতি এত্থ চত্তারো আসৰা – কামাসৰো, ভৰাসৰো, দিট্ঠাসৰো, অৰিজ্জাসৰোতি (চূল়নি. জতুকণ্ণিমাণৰপুচ্ছানিদ্দেস ৬৯) ইমে চত্তারো আসৰা যেসং খীণা পহীনা সমুচ্ছিন্না পটিপ্পস্সদ্ধা অভব্বুপ্পত্তিকা ঞাণগ্গিনা দড্ঢা, তে খীণাসৰা, তেহি খীণাসৰেহি. খীণাসৰত্তাযেৰ ৰিমলেহি.

দেৰা মনুস্সে পস্সন্তীতি এত্থ দেৰানং মনুস্সদস্সনে ৰত্তব্বং নত্থি, পকতিদস্সনৰসেন পন যথা মনুস্সা ইধ ঠত্ৰা পস্সন্তি, এৰং দেৰাপি মনুস্সে পস্সন্তীতি অত্থো. দেৰতাতি দেৰে. উভোপীতি উভো দেৰমনুস্সা. পঞ্জলিকাতি কতপঞ্জলিকা, উভোপি হত্থে সিরসি পতিট্ঠাপেত্ৰাতি অত্থো. অনুযন্তি তথাগতন্তি তথাগতস্স পচ্ছতো যন্তি, অনুযোগে সতি সামিঅত্থে উপযোগৰচনং হোতীতি লক্খণং. তেন ৰুত্তং ‘‘অনুযন্তি তথাগত’’ন্তি. ৰজ্জযন্তাতি ৰাদেন্তা.

মন্দারৰন্তি মন্দারৰপুপ্ফং. দিসোদিসন্তি দিসতো দিসতো. ওকিরন্তীতি অৰকিরন্তি. আকাসনভগতাতি আকাসসঙ্খাতে নভসি গতা. অথ ৰা আকাসং গতা সগ্গগতাৰ. ‘‘নভো’’তি হি সগ্গো ৰুচ্চতি. মরূতি অমরা. সরলন্তি সরলতরুকুসুমং. নীপন্তি কদম্বপুপ্ফং. নাগপুন্নাগকেতকন্তি নাগপুন্নাগকেতকপুপ্ফানি চ. ভূমিতলগতাতি ভূমিগতা.

কেসে ¶ মুঞ্চিত্ৰাহন্তি অহং কেসে বদ্ধা কলাপকুটিলজটা মুঞ্চিত্ৰা, ৰিপ্পকিরিত্ৰাতি অত্থো. তত্থাতি ময্হং দিন্নে ওকাসে. চম্মকন্তি চম্মক্খণ্ডং. কললেতি চিক্খল্লকদ্দমে. অৰকুজ্জোতি অধোমুখো হুত্ৰা. নিপজ্জহন্তি নিপজ্জিং ¶ অহং. মা নন্তি এত্থ মাতি পটিসেধত্থে নিপাতো. নন্তি পদপূরণত্থে নিপাতো, বুদ্ধো কললে মা অক্কমিত্থাতি অত্থো. হিতায মে ভৰিস্সতীতি তং কললে অনক্কমনং দীঘরত্তং মম হিতত্থায ভৰিস্সতীতি. ‘‘সুখায মে ভৰিস্সতী’’তিপি পাঠো.

ততো ¶ সুমেধপণ্ডিতো কললপিট্ঠে নিপন্নো এৰং চিন্তেসি – ‘‘সচাহং ইচ্ছেয্যং সব্বকিলেসে ঝাপেত্ৰা সঙ্ঘনৰকো হুত্ৰা রম্মনগরং পৰিসেয্যং, অঞ্ঞাতকৰেসেন পন মে কিলেসে ঝাপেত্ৰা নিব্বানপ্পত্তিযা কিচ্চং নত্থি, যংনূনাহং দীপঙ্করদসবলো ৰিয পরমাভিসম্বোধিং পত্ৰা ধম্মনাৰং আরোপেত্ৰা মহাজনং সংসারসাগরা উত্তারেত্ৰা পচ্ছা পরিনিব্বাযেয্যং, ইদং মে পতিরূপ’’ন্তি. ততো অট্ঠ ধম্মে সমোধানেত্ৰা বুদ্ধভাৰায অভিনীহারং কত্ৰা নিপজ্জি. তেন ৰুত্তং –

‘‘পথৰিযং নিপন্নস্স, এৰং মে আসি চেতসো;

ইচ্ছমানো অহং অজ্জ, কিলেসে ঝাপযে মম.

‘‘কিং মে অঞ্ঞাতৰেসেন, ধম্মং সচ্ছিকতেনিধ;

সব্বঞ্ঞুতং পাপুণিত্ৰা, বুদ্ধো হেস্সং সদেৰকে.

‘‘কিং মে একেন তিণ্ণেন, পুরিসেন থামদস্সিনা;

সব্বঞ্ঞুতং পাপুণিত্ৰা, সন্তারেস্সং সদেৰকং.

‘‘ইমিনা মে অধিকারেন, কতেন পুরিসুত্তমে;

সব্বঞ্ঞুতং পাপুণিত্ৰা, তারেমি জনতং বহুং.

‘‘সংসারসোতং ছিন্দিত্ৰা, ৰিদ্ধংসেত্ৰা তযো ভৰে;

ধম্মনাৰং সমারুয্হ, সন্তারেস্সং সদেৰক’’ন্তি.

তত্থ পথৰিযং নিপন্নস্সাতি পুথৰিযা নিপন্নস্স. অযমেৰ ৰা পাঠো. চেতসোতি চেতসো পরিৰিতক্কো ¶ অহোসীতি অত্থো. ‘‘এৰং মে আসি চেতনা’’তিপি পাঠো. ইচ্ছমানোতি আকঙ্খমানো. কিলেসেতি কিলিস্সন্তি উপতাপেন্তীতি কিলেসা, রাগাদযো দস. ঝাপযেতি ঝাপেয্যং, মম কিলেসে ঝাপযে অহন্তি অত্থো.

কিন্তি পটিক্খেপৰচনং. অঞ্ঞাতৰেসেনাতি অপাকটৰেসেন, অৰিঞ্ঞাতেন পটিচ্ছন্নেন. ইধ পন ভিক্খূ ৰিয আসৰক্খযং কত্ৰা কিং, বুদ্ধকরে ধম্মে ¶ পূরেত্ৰা পটিসন্ধিজাতিবোধিধম্মচক্কপ্পৰত্তনেসু মহাপথৰিকম্পনং কত্ৰা বুদ্ধো বোধেতা, তিণ্ণো তারেতা, মুত্তো মোচেতা ভৰেয্যন্তি অধিপ্পাযো. সদেৰকেতি সদেৰকে লোকে.

থামদস্সিনাতি অত্তনো থামবলং পস্সমানেন. সন্তারেস্সন্তি সন্তারেস্সামি. সদেৰকন্তি ¶ সদেৰকং সত্তনিকাযং, সদেৰকং লোকং ৰা. অধিকারেনাতি অধিৰিসিট্ঠেন কারেন, বুদ্ধস্স মম জীৰিতং পরিচ্চজিত্ৰা কললপিট্ঠে সযনেনাধিকারেনাতি অত্থো.

সংসারসোতন্তি কম্মকিলেসৰসেন যোনিগতিৰিঞ্ঞাণট্ঠিতিনৰসত্তাৰাসেসু ইতো চিতো চ সংসরণং সংসারো. যথাহ –

‘‘খন্ধানঞ্চ পটিপাটি, ধাতুআযতনানঞ্চ;

অব্বোচ্ছিন্নং ৰত্তমানা, সংসারোতি পৰুচ্চতী’’তি. (ৰিসুদ্ধি. ২.৬১৯; দী. নি. অট্ঠ. ২.৯৫ অপসাদনাৰণ্ণনা; সং. নি. অট্ঠ. ২.২.৬০; অ. নি. অট্ঠ. ২.৪.১৯৯; ধ. স. অট্ঠ. নিদানকথা; ৰিভ. অট্ঠ. ২২৬ সঙ্খাপদনিদ্দেস; সু. নি. অট্ঠ. ২.৫২৩; উদা. অট্ঠ. ৩৯; ইতিৰু. অট্ঠ. ১৪, ৫৮; থেরগা. অট্ঠ. ১.৬৭, ৯৯; চূল়নি. অট্ঠ. ৬; পটি. ম. অট্ঠ. ২.১.১১৭);

সংসারো চ সো সোতং চেতি সংসারসোতং, তং সংসারসোতং. অথ ৰা সংসারস্স সোতং সংসারসোতং, সংসারকারণং তণ্হাসোতং ছিন্দিত্ৰাতি অত্থো. তযো ভৰেতি কামরূপারূপভৰে. তিভৰনিব্বত্তককম্মকিলেসা তযো ভৰাতি অধিপ্পেতা. ধম্মনাৰন্তি অরিযং অট্ঠঙ্গিকং মগ্গং. সো হি চতুরোঘুত্তরণট্ঠেন ‘‘ধম্মনাৰা’’তি ৰুচ্চতি. সমারুয্হাতি আরুয্হ. সন্তারেস্সন্তি সন্তারেস্সামি. যস্মা পন বুদ্ধত্তং পত্থেন্তস্স –

‘‘মনুস্সত্তং ¶ লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা;

অট্ঠধম্মসমোধানা, অভিনীহারো সমিজ্ঝতি’’.

তত্থ মনুস্সত্তন্তি মনুস্সত্তভাৰেযেৰ ঠত্ৰা বুদ্ধত্তং পত্থেন্তস্স পত্থনা সমিজ্ঝতি, ন নাগজাতিআদীসু ঠিতানং. কস্মাতি চে? অহেতুকভাৰতো.

লিঙ্গসম্পত্তীতি মনুস্সত্তভাৰে ৰত্তমানস্সাপি পুরিসলিঙ্গে ঠিতস্সেৰ পত্থনা সমিজ্ঝতি, ন ইত্থিযা ৰা পণ্ডকনপুংসকউভতোব্যঞ্জনকানং ৰা সমিজ্ঝতি ¶ . কস্মাতি চে? লক্খণপারিপূরিযা অভাৰতো. ৰুত্তঞ্হেতং – ‘‘অট্ঠানমেতং, ভিক্খৰে, অনৰকাসো, যং ইত্থী অরহং অস্স সম্মাসম্বুদ্ধো’’তি (ম. নি. ৩.১৩০; অ. নি. ১.২৭৯; ৰিভ. ৮০৯) ৰিত্থারো. তস্মা ইত্থিলিঙ্গে ঠিতস্স মনুস্সজাতিকস্সাপি পত্থনা ন সমিজ্ঝতি.

হেতূতি পুরিসস্সাপি তস্মিং অত্তভাৰে অরহত্তপ্পত্তিযা হেতুসম্পন্নস্সেৰ পত্থনা সমিজ্ঝতি, নো ইতরস্স.

সত্থারদস্সনন্তি সচে জীৰমানকবুদ্ধস্সেৰ সন্তিকে পত্থেতি পত্থনা সমিজ্ঝতি. পরিনিব্বুতে ভগৰতি চেতিযস্স সন্তিকে ৰা বোধিরুক্খমূলে ৰা পটিমায ৰা পচ্চেকবুদ্ধবুদ্ধসাৰকানং ৰা সন্তিকে পত্থনা ন সমিজ্ঝতি. কস্মা? ভব্বাভব্বকে ঞত্ৰা কম্মৰিপাকপরিচ্ছেদকঞাণেন ¶ পরিচ্ছিন্দিত্ৰা ব্যাকাতুং অসমত্থত্তা. তস্মা বুদ্ধস্স সন্তিকেযেৰ পত্থনা সমিজ্ঝতি.

পব্বজ্জাতি বুদ্ধস্স ভগৰতো সন্তিকে পত্থেন্তস্সাপি কম্মকিরিযৰাদীসু তাপসেসু ৰা ভিক্খূসু ৰা পব্বজিতস্সেৰ পত্থনা সমিজ্ঝতি, নো গিহিলিঙ্গে ঠিতস্স. কস্মা? পব্বজিতাযেৰ হি বোধিসত্তা সম্বোধিং অধিগচ্ছন্তি, ন গহট্ঠা. তস্মা আদিম্হি পণিধানকালেপি পব্বজিতেনেৰ ভৰিতব্বং.

গুণসম্পত্তীতি পব্বজিতস্সাপি অট্ঠসমাপত্তিলাভিনো পঞ্চাভিঞ্ঞস্সেৰ সমিজ্ঝতি, ন পন ইমায গুণসম্পত্তিযা ৰিরহিতস্স. কস্মা? নিগ্গুণস্স তদভাৰতো.

অধিকারোতি ¶ গুণসম্পন্নেনাপি যেন অত্তনো জীৰিতং বুদ্ধানং পরিচ্চত্তং হোতি, তস্স ইমিনা অধিকারেন সম্পন্নস্সেৰ সমিজ্ঝতি, ন ইতরস্স.

ছন্দতাতি অভিনীহারসম্পন্নস্সাপি যস্স বুদ্ধকারকধম্মানং অত্থায মহন্তো ছন্দো ৰাযামো চ উস্সাহো চ পরিযেট্ঠি চ, তস্সেৰ সমিজ্ঝতি, ন ইতরস্স. তত্রিদং ছন্দমহন্ততায ওপম্মং – সচে হি এৰমস্স, ‘‘যো পন সকলচক্কৰাল়গব্ভং একোদকীভূতং অত্তনো বাহুবলেন উত্তরিত্ৰা পারং গন্তুং সমত্থো, সো বুদ্ধত্তং পাপুণাতি. যো পনিমং অত্তনো দুক্করং ন মঞ্ঞতি ‘অহং ইমং উত্তরিত্ৰা পারং গমিস্সামী’’’তি এৰং মহতা ছন্দেন উস্সাহেন সমন্নাগতো হোতি, তস্স পত্থনা সমিজ্ঝতি, ন ইতরস্স (সু. নি. অট্ঠ. ১.খগ্গৰিসাণসুত্তৰণ্ণনা; অপ. অট্ঠ. ১.দূরেনিদান, সুমেধকথা; চরিযা. অট্ঠ. পকিণ্ণককথা).

সুমেধপণ্ডিতো ¶ পন ইমে অট্ঠ ধম্মে সমোধানেত্ৰাৰ বুদ্ধভাৰায অভিনীহারং কত্ৰা নিপজ্জি. দীপঙ্করোপি ভগৰা আগন্ত্ৰা সুমেধপণ্ডিতস্স সীসভাগে ঠত্ৰা কললপিট্ঠে নিপন্নং সুমেধতাপসং দিস্ৰা – ‘‘অযং তাপসো বুদ্ধত্তায অভিনীহারং কত্ৰা নিপন্নো, ইজ্ঝিস্সতি নু খো এতস্স পত্থনা, উদাহু নো’’তি অনাগতংসঞাণং পেসেত্ৰা উপধারেন্তো – ‘‘ইতো কপ্পসতসহস্সাধিকানি চত্তারি অসঙ্খ্যেয্যানি অতিক্কমিত্ৰা গোতমো নাম বুদ্ধো ভৰিস্সতী’’তি ঞত্ৰা ঠিতকোৰ পরিসমজ্ঝে ব্যাকাসি – ‘‘পস্সথ নো, তুম্হে ভিক্খৰে, ইমং উগ্গতপং তাপসং কললপিট্ঠে নিপন্ন’’ন্তি. ‘‘এৰং, ভন্তে’’তি. অযং বুদ্ধত্তায অভিনীহারং কত্ৰা নিপন্নো, সমিজ্ঝিস্সতি ইমস্স তাপসস্স পত্থনা, অযঞ্হি ইতো কপ্পসতসহস্সাধিকানং চতুন্নং অসঙ্খ্যেয্যানং মত্থকে গোতমো নাম বুদ্ধো লোকে ভৰিস্সতি. তস্মিং পনস্স অত্তভাৰে কপিলৰত্থু নাম নগরং নিৰাসো ভৰিস্সতি, মহামাযা নাম দেৰী মাতা, সুদ্ধোদনো নাম রাজা পিতা, উপতিস্সো চ কোলিতো চ দ্ৰে অগ্গসাৰকা, আনন্দো নাম উপট্ঠাকো, খেমা চ উপ্পলৰণ্ণা চ দ্ৰে অগ্গসাৰিকা ভৰিস্সন্তি ¶ . অযং পরিপক্কঞাণো হুত্ৰা মহাভিনিক্খমনং নিক্খমিত্ৰা মহাপধানং পদহিত্ৰা নিগ্রোধমূলে সুজাতায নাম কুমারিযা দিন্নং পাযাসং পটিগ্গহেত্ৰা নেরঞ্জরায তীরে পরিভুঞ্জিত্ৰা বোধিমণ্ডং আরুয্হ অস্সত্থরুক্খমূলে অভিসম্বুজ্ঝিস্সতীতি. তেন ৰুত্তং –

‘‘দীপঙ্করো লোকৰিদূ, আহুতীনং পটিগ্গহো;

উস্সীসকে মং ঠত্ৰান, ইদং ৰচনমব্রৰি.

‘‘পস্সথ ¶ ইমং তাপসং, জটিলং উগ্গতাপনং;

অপরিমেয্যিতো কপ্পে, বুদ্ধো লোকে ভৰিস্সতি.

‘‘অহূ কপিলৰ্হযা রম্মা, নিক্খমিত্ৰা তথাগতো;

পধানং পদহিত্ৰান, কত্ৰা দুক্করকারিকং.

‘‘অজপালরুক্খমূলস্মিং, নিসীদিত্ৰা তথাগতো;

তত্থ পাযাসং পগ্গয্হ, নেরঞ্জরমুপেহিতি.

‘‘নেরঞ্জরায তীরম্হি, পাযাসং অদ সো জিনো;

পটিযত্তৰরমগ্গেন, বোধিমূলমুপেহিতি.

‘‘ততো ¶ পদক্খিণং কত্ৰা, বোধিমণ্ডং অনুত্তরো;

অস্সত্থরুক্খমূলম্হি, বুজ্ঝিস্সতি মহাযসো.

‘‘ইমস্স জনিকা মাতা, মাযা নাম ভৰিস্সতি;

পিতা সুদ্ধোদনো নাম, অযং হেস্সতি গোতমো.

‘‘অনাসৰা ৰীতরাগা, সন্তচিত্তা সমাহিতা;

কোলিতো উপতিস্সো চ, অগ্গা হেস্সন্তি সাৰকা;

আনন্দো নামুপট্ঠাকো, উপট্ঠিস্সতিমং জিনং.

‘‘খেমা উপ্পলৰণ্ণা চ, অগ্গা হেস্সন্তি সাৰিকা;

অনাসৰা ৰীতরাগা, সন্তচিত্তা সমাহিতা.

‘‘বোধি তস্স ভগৰতো, অস্সত্থোতি পৰুচ্চতি;

চিত্তো চ হত্থাল়ৰকো, অগ্গা হেস্সন্তুপট্ঠকা;

উত্তরা নন্দমাতা চ, অগ্গা হেস্সন্তুপট্ঠিকা’’তি.

তত্থ লোকৰিদূতি সব্বথা ৰিদিতলোকত্তা পন লোকৰিদূ. ভগৰা হি সভাৰতো সমুদযতো ¶ নিরোধতো নিরোধূপাযতোতি সব্বথাপি লোকং ¶ অৰেদি অঞ্ঞাসি পটিৰিজ্ঝি. তস্মা লোকৰিদূতি ৰুচ্চতি. যথাহ –

‘‘তস্মা হৰে লোকৰিদূ সুমেধো, লোকন্তগূ ৰূসিতব্রহ্মচরিযো;

লোকস্স অন্তং সমিতাৰি ঞত্ৰা, নাসীসতী লোকমিমং পরঞ্চা’’তি. (সং. নি. ১.১০৭; অ. নি. ৪.৪৬);

অপি চ তযো লোকা – সঙ্খারলোকো, সত্তলোকো, ওকাসলোকোতি. তত্থ সঙ্খারলোকো নাম পটিচ্চসমুপ্পন্না পথৰিআদযো ধম্মা. সত্তলোকো নাম সঞ্ঞিনো অসঞ্ঞিনো নেৰসঞ্ঞিনাসঞ্ঞিনো চ সত্তা. ওকাসলোকো নাম সত্তানং নিৰাসট্ঠানং. ইমে পন তযোপি লোকা ভগৰতা যথাসভাৰতো ৰিদিতা, তস্মা লোকৰিদূতি ৰুচ্চতি. আহুতীনং পটিগ্গহোতি দানানং পটিগ্গহেতুং অরহত্তা দক্খিণেয্যত্তা আহুতীনং পটিগ্গহো. উস্সীসকে মং ঠত্ৰানাতি মম ¶ সীসসমীপে ঠত্ৰা. ইদং ইদানি ৰত্তব্বং ৰচনং অব্রৰীতি অত্থো. জটিলন্তি জটা অস্স সন্তীতি জটিলো, তং জটিলং. উগ্গতাপনন্তি উগ্গতাপসং. অহূতি অহনি, অথাতি অত্থো. অযমেৰ ৰা পাঠো. কপিলৰ্হযাতি কপিলঅৰ্হযা অভিধানা. রম্মাতি রমণীযতো. পধানন্তি ৰীরিযং. এহিতীতি এস্সতি গমিস্সতি. সেসগাথাসু উত্তানমেৰাতি.

ততো সুমেধপণ্ডিতো – ‘‘ময্হং কির পত্থনা সমিজ্ঝিস্সতী’’তি সঞ্জাতসোমনস্সো অহোসি. মহাজনো দীপঙ্করদসবলস্স ৰচনং সুত্ৰা – ‘‘সুমেধতাপসো কির বুদ্ধবীজঙ্কুরো’’তি হট্ঠতুট্ঠো অহোসি. এৰঞ্চস্স অহোসি – ‘‘যথা নাম পুরিসো নদিং তরন্তো উজুকেন তিত্থেন তরিতুং অসক্কোন্তো হেট্ঠাতিত্থেন উত্তরতি, এৰমেৰ মযং দীপঙ্করদসবলস্স সাসনে মগ্গফলং অলভমানা অনাগতে যদা ত্ৰং বুদ্ধো ভৰিস্সসি, তদা তৰ সম্মুখা মগ্গফলং সচ্ছিকাতুং সমত্থা ভৰেয্যামা’’তি পত্থনং অকংসু. দীপঙ্করদসবলো বোধিসত্তং মহাসত্তং পসংসিত্ৰা অট্ঠহি পুপ্ফমুট্ঠীহি পূজেত্ৰা পদক্খিণং কত্ৰা পক্কামি. তেপি চতুসতসহস্সা খীণাসৰা বোধিসত্তং পুপ্ফেহি চ গন্ধেহি চ পূজেত্ৰা পদক্খিণং কত্ৰা পক্কমিংসু. দেৰমনুস্সা পন তথেৰ পূজেত্ৰা ৰন্দিত্ৰা পক্কমিংসু.

অথ সব্বলোকমতিদীপঙ্করো দীপঙ্করো ভগৰা চতূহি খীণাসৰসতসহস্সেহি পরিৰুতো রম্মনগরৰাসীহি পূজিযমানো দেৰতাহি অভিৰন্দিযমানো সঞ্ঝাপ্পভানুরঞ্জিতৰরকনকগিরিসিখরো ৰিয জঙ্গমমানো অনেকেসু পাটিহারিযেসু ¶ ৰত্তমানেসু তেন অলঙ্কতপটিযত্তেন ¶ মগ্গেন গন্ত্ৰা নানাসুরভিকুসুমগন্ধৰাসিতং চুণ্ণসম্মোদগন্ধং সমুস্সিতধজপটাকং গন্ধানুবদ্ধহদযেহি ভমরগণেহি গুম্বগুম্বাযমানং ধূপন্ধকারং অমরপুরসদিসসোভং অভিরম্মং রম্মনগরং পৰিসিত্ৰা পঞ্ঞত্তে মহারহে বুদ্ধাসনে যুগন্ধরমত্থকে সরদসমযরুচিরকররজনিকরো তিমিরনিকরনিধনকরো কমলৰনৰিকসনকরো দিৰসকরো ৰিয দসবলদিৰসকরো নিসীদি. ভিক্খুসঙ্ঘোপি পটিপাটিযা অত্তনো অত্তনো পত্তাসনে নিসীদি. রম্মনগরৰাসিনো পন উপাসকা সদ্ধাদিগুণসম্পন্না নানাৰিধখজ্জাদীহি সমলঙ্কতং ৰণ্ণগন্ধরসসম্পন্নং অসদিসং সুখনিদানং দানং বুদ্ধপ্পমুখস্স ভিক্খুসঙ্ঘস্স অদংসু.

অথ ¶ খো বোধিসত্তো দসবলস্স ব্যাকরণং সুত্ৰা বুদ্ধভাৰং করতলগতমিৰ মঞ্ঞমানো পমুদিতহদযো সব্বেসু পটিক্কন্তেসু সযনা ৰুট্ঠায – ‘‘পারমিযো ৰিচিনিস্সামী’’তি পুপ্ফরাসিমত্থকে পল্লঙ্কং আভুজিত্ৰা নিসীদি. এৰং নিসিন্নে মহাসত্তে সকলদসসহস্সচক্কৰাল়দেৰতা সাধুকারং দত্ৰা – ‘‘অয্য সুমেধতাপস, পোরাণকবোধিসত্তানং পল্লঙ্কং আভুজিত্ৰা – ‘পারমিযো ৰিচিনিস্সামী’তি নিসিন্নকালে যানি পুব্বনিমিত্তানি নাম পঞ্ঞাযন্তি, তানি সব্বানিপি অজ্জ পাতুভূতানি নিস্সংসযেন ত্ৰং বুদ্ধো ভৰিস্সসি, মযমেতং জানাম – ‘যস্সেতানি নিমিত্তানি পঞ্ঞাযন্তি, সো একন্তেনেৰ বুদ্ধো ভৰিস্সতি’ তস্মা ত্ৰং অত্তনো ৰীরিযং দল়্হং কত্ৰা পগ্গণ্হা’’তি বোধিসত্তং নানপ্পকারাহি থুতীহি অভিত্থৰিংসু. তেন ৰুত্তং –

‘‘ইদং সুত্ৰান ৰচনং, অসমস্স মহেসিনো;

আমোদিতা নরমরূ, বুদ্ধবীজং কির অযং.

‘‘উক্কুট্ঠিসদ্দা ৰত্তন্তি, অপ্ফোটেন্তি হসন্তি চ;

কতঞ্জলী নমস্সন্তি, দসসহস্সী সদেৰকা.

‘‘যদিমস্স লোকনাথস্স, ৰিরজ্ঝিস্সাম সাসনং;

অনাগতম্হি অদ্ধানে, হেস্সাম সম্মুখা ইমং.

‘‘যথা মনুস্সা নদিং তরন্তা, পটিতিত্থং ৰিরজ্ঝিয;

হেট্ঠাতিত্থে গহেত্ৰান, উত্তরন্তি মহানদিং.

‘‘এৰমেৰ মযং সব্বে, যদি মুঞ্চামিমং জিনং;

অনাগতম্হি অদ্ধানে, হেস্সাম সম্মুখা ইমং.

‘‘দীপঙ্করো ¶ ¶ লোকৰিদূ, আহুতীনং পটিগ্গহো;

মম কম্মং পকিত্তেত্ৰা, দক্খিণং পাদমুদ্ধরি.

‘‘যে তত্থাসুং জিনপুত্তা, পদক্খিণমকংসু মং;

দেৰা মনুস্সা অসুরা চ, অভিৰাদেত্ৰান পক্কমুং.

‘‘দস্সনং মে অতিক্কন্তে, সসঙ্ঘে লোকনাযকে;

সযনা ৰুট্ঠহিত্ৰান, পল্লঙ্কং আভুজিং তদা.

‘‘সুখেন ¶ সুখিতো হোমি, পামোজ্জেন পমোদিতো;

পীতিযা চ অভিস্সন্নো, পল্লঙ্কং আভুজিং তদা.

‘‘পল্লঙ্কেন নিসীদিত্ৰা, এৰং চিন্তেসহং তদা;

ৰসীভূতো অহং ঝানে, অভিঞ্ঞাসু পারমিং গতো.

‘‘সহস্সিযম্হি লোকম্হি, ইসযো নত্থি মে সমা;

অসমো ইদ্ধিধম্মেসু, অলভিং ঈদিসং সুখং.

‘‘পল্লঙ্কাভুজনে ময্হং, দসসহস্সাধিৰাসিনো;

মহানাদং পৰত্তেসুং, ধুৰং বুদ্ধো ভৰিস্সসি.

‘‘যা পুব্বে বোধিসত্তানং, পল্লঙ্কৰরমাভুজে;

নিমিত্তানি পদিস্সন্তি, তানি অজ্জ পদিস্সরে.

‘‘সীতং ব্যপগতং হোতি, উণ্হঞ্চ উপসম্মতি;

তানি অজ্জ পদিস্সন্তি, ধুৰং বুদ্ধো ভৰিস্সসি.

‘‘দসসহস্সী লোকধাতু, নিস্সদ্দা হোন্তি নিরাকুলা;

তানি অজ্জ পদিস্সন্তি, ধুৰং বুদ্ধো ভৰিস্সসি.

‘‘মহাৰাতা ¶ ন ৰাযন্তি, ন সন্দন্তি সৰন্তিযো;

তানি অজ্জ পদিস্সন্তি, ধুৰং বুদ্ধো ভৰিস্সসি.

‘‘থলজা দকজা পুপ্ফা, সব্বে পুপ্ফন্তি তাৰদে;

তেপজ্জ পুপ্ফিতা সব্বে, ধুৰং বুদ্ধো ভৰিস্সসি.

‘‘লতা ৰা যদি ৰা রুক্খা, ফলভারা হোন্তি তাৰদে;

তেপজ্জ ফলিতা সব্বে, ধুৰং বুদ্ধো ভৰিস্সসি.

‘‘আকাসট্ঠা চ ভূমট্ঠা, রতনা জোতন্তি তাৰদে;

তেপজ্জ রতনা জোতন্তি, ধুৰং বুদ্ধো ভৰিস্সসি.

‘‘মানুস্সকা চ দিব্বা চ, তুরিযা ৰজ্জন্তি তাৰদে;

তেপজ্জুভো অভিরৰন্তি, ধুৰং বুদ্ধো ভৰিস্সসি.

‘‘ৰিচিত্তপুপ্ফা ¶ গগনা, অভিৰস্সন্তি তাৰদে;

তেপি অজ্জ পৰস্সন্তি, ধুৰং বুদ্ধো ভৰিস্সসি.

‘‘মহাসমুদ্দো ¶ আভুজতি, দসসহস্সী পকম্পতি;

তেপজ্জুভো অভিরৰন্তি, ধুৰং বুদ্ধো ভৰিস্সসি.

‘‘নিরযেপি দসসহস্সে, অগ্গী নিব্বন্তি তাৰদে;

তেপজ্জ নিব্বুতা অগ্গী, ধুৰং বুদ্ধো ভৰিস্সসি.

‘‘ৰিমলো হোতি সূরিযো, সব্বা দিস্সন্তি তারকা;

তেপি অজ্জ পদিস্সন্তি, ধুৰং বুদ্ধো ভৰিস্সসি.

‘‘অনোৰট্ঠেন উদকং, মহিযা উব্ভিজ্জি তাৰদে;

তম্পজ্জুব্ভিজ্জতে মহিযা, ধুৰং বুদ্ধো ভৰিস্সসি.

‘‘তারাগণা ¶ ৰিরোচন্তি, নক্খত্তা গগনমণ্ডলে;

ৰিসাখা চন্দিমাযুত্তা, ধুৰং বুদ্ধো ভৰিস্সসি.

‘‘বিলাসযা দরীসযা, নিক্খমন্তি সকাসযা;

তেপজ্জ আসযা ছুদ্ধা, ধুৰং বুদ্ধো ভৰিস্সসি.

‘‘ন হোন্তি অরতী সত্তানং, সন্তুট্ঠা হোন্তি তাৰদে;

তেপজ্জ সব্বে সন্তুট্ঠা, ধুৰং বুদ্ধো ভৰিস্সসি.

‘‘রোগা তদুপসম্মন্তি, জিঘচ্ছা চ ৰিনস্সসি;

তানি অজ্জ পদিস্সন্তি, ধুৰং বুদ্ধো ভৰিস্সসি.

‘‘রোগা তদা তনু হোতি, দোসো মোহো ৰিনস্সসি;

তেপজ্জ ৰিগতা সব্বে, ধুৰং বুদ্ধো ভৰিস্সসি.

‘‘ভযং তদা ন ভৰতি, অজ্জপেতং পদিস্সতি;

তেন লিঙ্গেন জানাম, ধুৰং বুদ্ধো ভৰিস্সসি.

‘‘রজোনুদ্ধংসতী উদ্ধং, অজ্জপেতং পদিস্সতি;

তেন লিঙ্গেন জানাম, ধুৰং বুদ্ধো ভৰিস্সসি.

‘‘অনিট্ঠগন্ধো পক্কমতি, দিব্বগন্ধো পৰাযতি;

সোপজ্জ ৰাযতী গন্ধো, ধুৰং বুদ্ধো ভৰিস্সসি.

‘‘সব্বে ¶ দেৰা পদিস্সন্তি, ঠপযিত্ৰা অরূপিনো;

তেপজ্জ সব্বে দিস্সন্তি, ধুৰং বুদ্ধো ভৰিস্সসি.

‘‘যাৰতা নিরযা নাম, সব্বে দিস্সন্তি তাৰদে;

তেপজ্জ সব্বে দিস্সন্তি, ধুৰং বুদ্ধো ভৰিস্সসি.

‘‘কুট্টা ¶ ¶ কৰাটা সেলা চ, ন হোন্তাৰরণা তদা;

আকাসভূতা তেপজ্জ, ধুৰং বুদ্ধো ভৰিস্সসি.

‘‘চুতী চ উপপত্তী চ, খণে তস্মিং ন ৰিজ্জতি;

তানিপজ্জ পদিস্সন্তি, ধুৰং বুদ্ধো ভৰিস্সসি.

‘‘দল়্হং পগ্গণ্হ ৰীরিযং, মা নিৰত্ত অভিক্কম;

মযম্পেতং ৰিজানাম, ধুৰং বুদ্ধো ভৰিস্সসী’’তি.

তত্থ ইদং সুত্ৰান ৰচনন্তি ইদং দীপঙ্করস্স ভগৰতো বোধিসত্তস্স ব্যাকরণৰচনং সুত্ৰা. অসমস্সাতি সমস্স সদিসস্স অভাৰতো অসমস্স. যথাহ –

‘‘ন মে আচরিযো অত্থি, সদিসো মে ন ৰিজ্জতি;

সদেৰকস্মিং লোকস্মিং, নত্থি মে পটিপুগ্গলো’’তি. (ম. নি. ১.২৮৫; ২.৩৪১; মহাৰ. ১১; কথা. ৪০৫; মি. প. ৪.৫.১১);

মহেসিনোতি মহন্তে সীলসমাধিপঞ্ঞাক্খন্ধে এসি গৰেসীতি মহেসী, তস্স মহেসিনো. নরমরূতি নরা চ অমরা চ, উক্কট্ঠনিদ্দেসো পনাযং সব্বেপি দসসহস্সিলোকধাতুযা নাগসুপণ্ণযক্খাদযোপি আমোদিতাৰ. বুদ্ধবীজং কির অযন্তি অযং কির বুদ্ধঙ্কুরো উপ্পন্নোতি আমোদিতাতি অত্থো.

উক্কুট্ঠিসদ্দাতি উন্নাদসদ্দা ৰত্তন্তি. অপ্ফোটেন্তীতি হত্থেহি বাহা অভিহনন্তি. দসসহস্সীতি দসসহস্সিলোকধাতুযো. সদেৰকাতি সহ দেৰেহি সদেৰকা দসসহস্সী নমস্সন্তীতি অত্থো. যদিমস্সাতি যদি ইমস্স, অযমেৰ ৰা পাঠো. ৰিরজ্ঝিস্সামাতি যদি ন সম্পাপুণিস্সাম. অনাগতম্হি অদ্ধানেতি অনাগতে কালে. হেস্সামাতি ভৰিস্সাম. সম্মুখাতি সম্মুখীভূতা. ইমন্তি ইমস্স, সামিঅত্থে উপযোগৰচনং.

নদিং ¶ তরন্তাতি নদীতরণকা, ‘‘নদিতরন্তা’’তিপি পাঠো. পটিতিত্থন্তি পটিমুখতিত্থং. ৰিরজ্ঝিযাতি ৰিরজ্ঝিত্ৰা. যদি মুঞ্চামাতি যদি ইমং ভগৰন্তং মুঞ্চিত্ৰা অকতকিচ্চা গমিস্সামাতি ¶ অত্থো. মম কম্মং পকিত্তেত্ৰাতি মম ভাৰিতমত্থং ব্যাকরিত্ৰা. দক্খিণং ¶ পাদমুদ্ধরীতি দক্খিণং পাদং উক্খিপি, ‘‘কতপদক্খিণো’’তিপি পাঠো.

জিনপুত্তাতি দীপঙ্করস্স সত্থুনো সাৰকা. দেৰা মনুস্সা অসুরা চ, অভিৰাদেত্ৰান পক্কমুন্তি দেৰাদযো সব্বেপি ইমে মং তিক্খত্তুং পদক্খিণং কত্ৰা পুপ্ফাদীহি পূজেত্ৰা সুপ্পতিট্ঠিতপঞ্চঙ্গা ৰন্দিত্ৰা নিৰত্তিত্ৰা পুনপ্পুনং ওলোকেত্ৰা মধুরত্থব্যঞ্জনাহি নানপ্পকারাহি থুতীহি ৰণ্ণেন্তা পক্কমিংসু. ‘‘নরা নাগা চ গন্ধব্বা, অভিৰাদেত্ৰান পক্কমু’’ন্তিপি পাঠো.

দস্সনং মে অতিক্কন্তেতি মম দস্সনৰিসযং ভগৰতি অতিক্কন্তে. ‘‘জহিতে দস্সনূপচারে’’তিপি পাঠো. সসঙ্ঘেতি সদ্ধিং সঙ্ঘেন সসঙ্ঘো, তস্মিং সসঙ্ঘে. সযনা ৰুট্ঠহিত্ৰানাতি নিপন্নট্ঠানতো কললতো উট্ঠহিত্ৰা. পল্লঙ্কং আভুজিন্তি কতপল্লঙ্কো হুত্ৰা পুপ্ফরাসিম্হি নিসীদিন্তি অত্থো. ‘‘হট্ঠো হট্ঠেন চিত্তেন, আসনা ৰুট্ঠহিং তদা’’তিপি পাঠো, সো উত্তানত্থোৰ.

পীতিযা চ অভিস্সন্নোতি পীতিপরিপ্ফুটো. ৰসীভূতোতি ৰসীভাৰপ্পত্তো. ঝানেতি রূপাৰচরারূপাৰচরঝানেসু. সহস্সিযম্হীতি দসসহস্সিযং. লোকম্হীতি লোকধাতুযা. মে সমাতি মযা সদিসা. অৰিসেসেন ‘‘মে সমা নত্থী’’তি ৰত্ৰা ইদানি তমেৰ নিযমেন্তো ‘‘অসমো ইদ্ধিধম্মেসূ’’তি আহ. তত্থ ইদ্ধিধম্মেসূতি পঞ্চসু ইদ্ধিধম্মেসূতি অত্থো. অলভিন্তি পটিলভিং. ঈদিসং সুখন্তি ঈদিসং সোমনস্সং.

অথ সুমেধতাপসো দসবলস্স ব্যাকরণং সুত্ৰা বুদ্ধভাৰং করতলগতকালমিৰ মঞ্ঞমানো পমুদিতহদযো দসসু লোকধাতুসহস্সেসু সুদ্ধাৰাসমহাব্রহ্মানো অতীতবুদ্ধদস্সাৰিনো নিযতবোধিসত্তানং ব্যাকরণে উপ্পজ্জমানপাটিহারিযদস্সনেন তথাগতৰচনস্স অৰিতথতং পকাসেন্তো মং পরিতোসযন্তা ইমা গাথাযো আহংসূতি দস্সেন্তো ভগৰা ‘‘পল্লঙ্কাভুজনে ময্হ’’ন্তিআদিমাহ.

তত্থ ¶ পল্লঙ্কাভুজনে ময্হন্তি মম পল্লঙ্কাভুজনে. অযমেৰ ৰা পাঠো. দসসহস্সাধিৰাসিনোতি দসসহস্সিৰাসিনো মহাব্রহ্মানো. যা পুব্বেতি যানি পুব্বে, ৰিভত্তিলোপং কত্ৰা ৰুত্তন্তি ৰেদিতব্বং. পল্লঙ্কৰরমাভুজেতি ৰরপল্লঙ্কাভুজনে. নিমিত্তানি পদিস্সন্তীতি নিমিত্তানি ¶ পদিস্সিংসূতি অত্থো. অতীতৰচনে ৰত্তব্বে ৰত্তমানৰচনং ৰুত্তং. কিঞ্চাপি ৰুত্তং, অতীতৰসেন অত্থো গহেতব্বো. তানি অজ্জ পদিস্সরেতি পুব্বেপি নিযতবোধিসত্তানং পল্লঙ্কাভুজনে ¶ যানি নিমিত্তানি উপ্পজ্জিংসু, তানি নিমিত্তানি অজ্জ পদিস্সরে. তস্মা ত্ৰং ধুৰমেৰ বুদ্ধো ভৰিস্সসীতি অত্থো. ন পন তানিযেৰ নিমিত্তানি উপ্পজ্জিংসু, তংসদিসত্তা ‘‘তানি অজ্জ পদিস্সরে’’তি ৰুত্তন্তি ৰেদিতব্বং.

সীতন্তি সীতত্তং. ব্যপগতন্তি গতং ৰিগতং. তানীতি সীতৰিগমনউণ্হুপসমনানীতি অত্থো. নিস্সদ্দাতি অসদ্দা অনিগ্ঘোসা. নিরাকুলাতি অনাকুলা, অযমেৰ ৰা পাঠো. ন সন্দন্তীতি ন ৰহন্তি নপ্পৰত্তন্তি. সৰন্তিযোতি নদিযো. তানীতি অৰাযনঅসন্দনানি. থলজাতি পথৰিতলপব্বতরুক্খেসু জাতানি. দকজাতি ওদকানি পুপ্ফানি. পুপ্ফন্তীতি পুব্বে বোধিসত্তানং পুপ্ফিংসু, অতীতত্থে ৰত্তমানৰচনং হেট্ঠা ৰুত্তনযেনেৰ ৰেদিতব্বং. তেপজ্জ পুপ্ফিতানীতি তানি পুপ্ফানি অজ্জ পুপ্ফিতানীতি অত্থো.

ফলভারাতি ফলধরা. তেপজ্জাতি তেপি অজ্জ, পুল্লিঙ্গৰসেন ‘‘তেপী’’তি ৰুত্তং, ‘‘লতা ৰা রুক্খা ৰা’’তি ৰুত্তত্তা. ফলিতাতি সঞ্জাতফলা. আকাসট্ঠা চ ভূমট্ঠা চাতি আকাসগতা চ ভূমিগতা চ রতনানীতি মুত্তাদীনি রতনানি. জোতন্তীতি ওভাসন্তি. মানুস্সকাতি মনুস্সানং সন্তকা মানুস্সকা. দিব্বাতি দেৰানং সন্তকা দিব্বা. তুরিযাতি আততং ৰিততং আততৰিততং সুসিরং ঘনন্তি পঞ্চ তুরিযানি. তত্থ আততং নাম চম্মপরিযোনদ্ধেসু ভেরিআদীসু একতলতুরিযং. ৰিততং নাম উভযতলং. আততৰিততং নাম সব্বতো পরিযোনদ্ধং মহতিৰল্লকিআদিকং. সুসিরং নাম ৰংসাদিকং. ঘনং নাম সম্মতাল়াদিকং. ৰজ্জন্তীতি হেট্ঠা ৰুত্তনযেন ৰজ্জিংসু, অতীতত্থে ৰত্তমানৰচনং ৰেদিতব্বং. এস নযো উপরি ঈদিসেসু ৰচনেসুপি. অভিরৰন্তীতি তত্র তত্র কুসলেহি সুমুঞ্চিতা সুপ্পতাল়িতা সুৰাদিতা ৰিয অভিরৰন্তি, অভিনদন্তীতি অত্থো.

ৰিচিত্তপুপ্ফাতি ¶ ৰিচিত্রানি নানাগন্ধৰণ্ণানি পুপ্ফানি. অভিৰস্সন্তীতি অভিৰস্সিংসু, নিপতিংসূতি অত্থো. তেপীতি তানিপি ৰিচিত্রপুপ্ফানি অভিৰস্সন্তানি পদিস্সন্তি, দেৰব্রহ্মগণেহি ওকিরিযমানানীতি অধিপ্পাযো. আভুজতীতি ওসক্কতি. তেপজ্জুভোতি ¶ তেপি অজ্জ উভো মহাসমুদ্দদসসহস্সিযো. অভিরৰন্তীতি অভিনদন্তি. নিরযেতি নিরযেসু. দসসহস্সাতি অনেকদসসহস্সা. নিব্বন্তীতি সম্মন্তি, সন্তিং উপেন্তীতি অত্থো. তারকাতি নক্খত্তানি ¶ . তেপি অজ্জ পদিস্সন্তীতি তেপি সূরিযস্স ৰিমলভাৰা তারকা অজ্জ দিৰা দিস্সন্তি.

অনোৰট্ঠেনাতি অনোৰট্ঠে, ভুম্মত্থে করণৰচনং. অথ ৰা অনোৰট্ঠেতি অনভিৰট্ঠেপি. নাতি নিপাতমত্তং ‘‘সুত্ৰা ন দূতৰচন’’ন্তিআদীসু ৰিয. তম্পজ্জুব্ভিজ্জতেতি তম্পি উদকং অজ্জ উব্ভিজ্জতি, উব্ভিজ্জিত্ৰা উট্ঠহতীতি অত্থো. মহিযাতি পথৰিযা, নিস্সক্কৰচনং. তারাগণাতি গহনক্খত্তাদযো সব্বে তারগণা. নক্খত্তাতি নক্খত্ততারকা চ. গগনমণ্ডলেতি সকলগগনমণ্ডলং ৰিরোচন্তীতি অত্থো. বিলাসযাতি বিলাসযা অহিনকুলকুম্ভীলগোধাদযো. দরীসযাতি ঝরাসযা. অযমেৰ ৰা পাঠো. নিক্খমন্তীতি নিক্খমিংসু. সকাসযাতি অত্তনো অত্তনো আসযতো. ‘‘তদাসযা’’তিপি পাঠো. তস্স তদা তস্মিং কালে, আসযতো, বিলতোতি অত্থো. ছুদ্ধাতি সুছুদ্ধা সুৰুদ্ধারিতা, নিক্খন্তাতি অত্থো.

অরতীতি উক্কণ্ঠা. সন্তুট্ঠাতি পরমেন সন্তুট্ঠেন সন্তুট্ঠা. ৰিনস্সতীতি ৰিগচ্ছতি. রাগোতি কামরাগো. তদা তনু হোতীতি ওরমত্তকো হোতি, ইমিনা পরিযুট্ঠানাভাৰং দীপেতি. ৰিহতাতি ৰিনট্ঠা. তদাতি পুব্বে, বোধিসত্তানং পল্লঙ্কাভুজনেতি অত্থো. ন ভৰতীতি ন হোতি. অজ্জপেতন্তি অজ্জ তৰ পল্লঙ্কাভুজনেপি এতং ভযং ন হোতেৰাতি অত্থো. তেন লিঙ্গেন জানামাতি তেন কারণেন সব্বেৰ মযং জানাম, যং ত্ৰং বুদ্ধো ভৰিস্সসীতি অত্থো.

অনুদ্ধংসতীতি ন উগ্গচ্ছতি. অনিট্ঠগন্ধোতি দুগ্গন্ধো. পক্কমতীতি পক্কমি ৰিগচ্ছি. পৰাযতীতি পৰাযি. সোপজ্জাতি সোপি দিব্বগন্ধো অজ্জ. পদিস্সন্তীতি ¶ পদিস্সিংসু. তেপজ্জাতি তেপি সব্বে দেৰা অজ্জ. যাৰতাতি পরিচ্ছেদনত্থে ¶ নিপাতো, যত্তকাতি অত্থো. কুট্টাতি পাকারা. ন হোন্তাৰরণাতি আৰরণকরা ন অহেসুং. তদাতি পুব্বে. আকাসভূতাতি তে কুট্টকৰাটপব্বতা আৰরণং তিরোকরণং কাতুং অসক্কোন্তা, অজটাকাসভূতাতি অত্থো. চুতীতি মরণং. উপপত্তীতি পটিসন্ধিগ্গহণং. খণেতি পুব্বে বোধিসত্তানং পল্লঙ্কাভুজনক্খণে. ন ৰিজ্জতীতি নাহোসি. তানিপজ্জাতি তানিপি অজ্জ চৰনভৰনানীতি অত্থো. মা নিৰত্তীতি মা পটিক্কমি. অভিক্কমাতি পরক্কম. সেসমেত্থ উত্তানমেৰাতি.

ততো সুমেধপণ্ডিতো দীপঙ্করস্স দসবলস্স চ দসসহস্সচক্কৰাল়দেৰতানঞ্চ ৰচনং সুত্ৰা ভিয্যোসোমত্তায সঞ্জাতুস্সাহো হুত্ৰা চিন্তেসি – ‘‘বুদ্ধা নাম অমোঘৰচনা, নত্থি বুদ্ধানং কথায অঞ্ঞথত্তং. যথা হি আকাসে খিত্তস্স লেড্ডুস্স পতনং ধুৰং, জাতস্স মরণং, অরুণে ¶ উগ্গতে সূরিযস্স অব্ভুগ্গমনং, আসযা নিক্খন্তস্স সীহস্স সীহনাদনদনং, গরুগব্ভায ইত্থিযা ভারমোরোপনং ধুৰং অৰস্সম্ভাৰী, এৰমেৰ বুদ্ধানং ৰচনং নাম ধুৰং অমোঘং, অদ্ধা অহং বুদ্ধো ভৰিস্সামীতি. তেন ৰুত্তং –

‘‘বুদ্ধস্স ৰচনং সুত্ৰা, দসসহস্সীনচূভযং;

তুট্ঠহট্ঠো পমুদিতো, এৰং চিন্তেসহং তদা.

‘‘অদ্ৰেজ্ঝৰচনা বুদ্ধা, অমোঘৰচনা জিনা;

ৰিতথং নত্থি বুদ্ধানং, ধুৰং বুদ্ধো ভৰামহং.

‘‘যথা খিত্তং নভে লেড্ডু, ধুৰং পততি ভূমিযং;

তথেৰ বুদ্ধসেট্ঠানং, ৰচনং ধুৰসস্সতং;

ৰিতথং নত্থি বুদ্ধানং, ধুৰং বুদ্ধো ভৰামহং.

‘‘যথাপি সব্বসত্তানং, মরণং ধুৰসস্সতং;

তথেৰ বুদ্ধসেট্ঠানং, ৰচনং ধুৰসস্সতং;

ৰিতথং নত্থি বুদ্ধানং, ধুৰং বুদ্ধো ভৰামহং.

‘‘যথা ¶ রত্তিক্খযে পত্তে, সূরিযুগ্গমনং ধুৰং;

তথেৰ বুদ্ধসেট্ঠানং, ৰচনং ধুৰসস্সতং;

ৰিতথং নত্থি বুদ্ধানং, ধুৰং বুদ্ধো ভৰামহং.

‘‘যথা ¶ নিক্খন্তসযনস্স, সীহস্স নদনং ধুৰং;

তথেৰ বুদ্ধসেট্ঠানং, ৰচনং ধুৰসস্সতং;

ৰিতথং নত্থি বুদ্ধানং, ধুৰং বুদ্ধো ভৰামহং.

‘‘যথা আপন্নসত্তানং, ভারমোরোপনং ধুৰং;

তথেৰ বুদ্ধসেট্ঠানং, ৰচনং ধুৰসস্সতং;

ৰিতথং নত্থি বুদ্ধানং, ধুৰং বুদ্ধো ভৰামহ’’ন্তি.

তত্থ ¶ বুদ্ধস্স ৰচনং সুত্ৰা, দসসহস্সী ন চূভযন্তি দীপঙ্করসম্মাসম্বুদ্ধস্স চ দসসহস্সচক্কৰাল়দেৰতানঞ্চ ৰচনং সুত্ৰা. উভযন্তি উভযেসং, সামিঅত্থে পচ্চত্তৰচনং, উভযৰচনং ৰা. এৰং চিন্তেসহন্তি এৰং চিন্তেসিং অহং.

অদ্ৰেজ্ঝৰচনাতি দ্ৰেধা অপ্পৰত্তৰচনা, একংসৰচনাতি অত্থো. ‘‘অচ্ছিদ্দৰচনা’’তিপি পাঠো, তস্স নিদ্দোসৰচনাতি অত্থো. অমোঘৰচনাতি অৰিতথৰচনা. ৰিতথন্তি ৰিতথৰচনং নত্থীতি অত্থো. ধুৰং বুদ্ধো ভৰামহন্তি অহং একংসেনেৰ বুদ্ধো ভৰিস্সামীতি নিযতৰসেন অৰস্সম্ভাৰিৰসেন চ ৰত্তমানৰচনং কতন্তি ৰেদিতব্বং.

সূরিযুগ্গমনন্তি সূরিযস্স উদযনং, অযমেৰ ৰা পাঠো. ধুৰসস্সতন্তি একংসভাৰী চেৰ সস্সতঞ্চ. নিক্খন্তসযনস্সাতি সযনতো নিক্খন্তস্স. আপন্নসত্তানন্তি গরুগব্ভানং, গব্ভিনীনন্তি অত্থো. ভারমোরোপনন্তি ভারওরোপনং, গব্ভস্স ওরোপনন্তি অত্থো. ম-কারো পদসন্ধিকরো. সেসমেত্থাপি উত্তানমেৰাতি.

‘‘স্ৰাহং অদ্ধা বুদ্ধো ভৰিস্সামী’’তি এৰং কতসন্নিট্ঠানো বুদ্ধকারকে ধম্মে উপধারেতুং – ‘‘কহং নু খো বুদ্ধকারকা ধম্মা’’তি, উদ্ধং অধো দিসাসু ৰিদিসাসূতি অনুক্কমেন সকলং ধম্মধাতুং ৰিচিনন্তো পুব্বে পোরাণকেহি বোধিসত্তেহি আসেৰিতনিসেৰিতং পঠমং দানপারমিং দিস্ৰা এৰং অত্তানং ওৰদি – ‘‘সুমেধপণ্ডিত, ত্ৰং ইতো পট্ঠায পঠমং দানপারমিং পূরেয্যাসি. যথা হি নিকুজ্জিতো উদককুম্ভো নিস্সেসং কত্ৰা উদকং ৰমতিযেৰ ন পচ্চাহরতি, এৰমেৰ ধনং ৰা যসং ৰা পুত্তদারং ¶ ৰা অঙ্গপচ্চঙ্গং ৰা অনোলোকেত্ৰা সব্বত্থ যাচকানং সব্বং ইচ্ছিতিচ্ছিতং নিস্সেসং কত্ৰা দদমানো বোধিমূলে নিসীদিত্ৰা বুদ্ধো ভৰিস্সসী’’তি পঠমং দানপারমিং দল়্হং কত্ৰা অধিট্ঠাসি. তেন ৰুত্তং –

‘‘হন্দ ¶ বুদ্ধকরে ধম্মে, ৰিচিনামি ইতো চিতো;

উদ্ধং অধো দস দিসা, যাৰতা ধম্মধাতুযা.

‘‘ৰিচিনন্তো তদা দক্খিং, পঠমং দানপারমিং;

পুব্বকেহি মহেসীহি, অনুচিণ্ণং মহাপথং.

‘‘ইমং ¶ ত্ৰং পঠমং তাৰ, দল়্হং কত্ৰা সমাদিয;

দানপারমিতং গচ্ছ, যদি বোধিং পত্তুমিচ্ছসি.

‘‘যথাপি কুম্ভো সম্পুণ্ণো, যস্স কস্সচি অধো কতো;

ৰমতেৰুদকং নিস্সেসং, ন তত্থ পরিরক্খতি.

‘‘তথেৰ যাচকে দিস্ৰা, হীনমুক্কট্ঠমজ্ঝিমে;

দদাহি দানং নিস্সেসং, কুম্ভো ৰিয অধো কতো’’তি.

তত্থ হন্দাতি ৰৰস্সগ্গত্থে নিপাতো. বুদ্ধকরে ধম্মেতি বুদ্ধত্তকরে ধম্মে. বুদ্ধত্তকরা নাম ধম্মা দানপারমিতাদযো দস ধম্মা. ৰিচিনামীতি ৰিচিনিস্সামি, ৰীমংসিস্সামি উপপরিক্খিস্সামীতি অত্থো. ইতো চিতোতি ইতো ইতো, অযমেৰ ৰা পাঠো. তত্থ তত্থ ৰিচিনামীতি অত্থো. উদ্ধন্তি দেৰলোকে. অধোতি মনুস্সলোকে. দস দিসাতি দসসু দিসাসু; কত্থ নু খো তে বুদ্ধকারকধম্মা উদ্ধং অধো তিরিযং দিসাসু ৰিদিসাসূতি অধিপ্পাযো. যাৰতা ধম্মধাতুযাতি এত্থ যাৰতাতি পরিচ্ছেদৰচনং. ধম্মধাতুযাতি সভাৰধম্মস্স, পৰত্তনীতি ৰচনসেসো দট্ঠব্বো. কিং ৰুত্তং হোতি? যাৰতিকা সভাৰধম্মানং কামরূপারূপধম্মানং পৰত্তি, তাৰতিকং ৰিচিনিস্সামীতি ৰুত্তং হোতি.

ৰিচিনন্তোতি ৰীমংসন্তো উপপরিক্খন্তো. পুব্বকেহীতি পোরাণেহি বোধিসত্তেহি. অনুচিণ্ণন্তি অজ্ঝাচিণ্ণং আসেৰিতং. সমাদিযাতি সমাদিযনং করোহি, অজ্জ পট্ঠায অযং পঠমং দানপারমী পূরেতব্বা মযাতি এৰং সমাদিযাতি অত্থো. দানপারমিতং গচ্ছাতি দানপারমিং গচ্ছ, পূরযাতি অত্থো. যদি ¶ বোধিং পত্তুমিচ্ছসীতি বোধিমূলমুপগন্ত্ৰা অনুত্তরং সম্মাসম্বোধিং পত্তুং ইচ্ছসি চে. যস্স কস্সচীতি উদকস্স ৰা খীরস্স ৰা যস্স কস্সচি সম্পুণ্ণো. সম্পুণ্ণসদ্দযোগে সতি সামিৰচনং ইচ্ছন্তি ¶ সদ্দৰিদূ. করণত্থে ৰা সামিৰচনং, যেন কেনচীতি অত্থো. অধো কতোতি হেট্ঠামুখীকতো. ন তত্থ পরিরক্খতীতি তস্মিং ৰমনে ন পরিরক্খতি, নিস্সেসং উদকং ৰমতেৰাতি অত্থো. হীনমুক্কট্ঠমজ্ঝিমেতি হীনমজ্ঝিমপণীতে. ম-কারো পদসন্ধিকরো. কুম্ভো ৰিয অধো কতোতি হেট্ঠামুখীকতো ৰিয কুম্ভো. যাচকে উপগতে দিস্ৰা – ‘‘ত্ৰং, সুমেধ, অত্তনো অনৰসেসেত্ৰা সব্বধনপরিচ্চাগেন দানপারমিং, অঙ্গপরিচ্চাগেন উপপারমিং, জীৰিতপরিচ্চাগেন পরমত্থপারমিঞ্চ পূরেহী’’তি এৰং অত্তনাৰ অত্তানং ওৰদি.

অথস্স ¶ ‘‘ন এত্তকেহেৰ বুদ্ধকারকেহি ধম্মেহি ভৰিতব্ব’’ন্তি উত্তরিম্পি উপধারযতো দুতিযং সীলপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায সীলপারমিং পূরেয্যাসি. যথা চমরী মিগো নাম জীৰিতম্পি অনোলোকেত্ৰা অত্তনো ৰালমেৰ রক্খতি, এৰং ত্ৰম্পি ইতো পট্ঠায জীৰিতম্পি অনোলোকেত্ৰা সীলমেৰ রক্খন্তো বুদ্ধো ভৰিস্সসী’’তি দুতিযং সীলপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, দুতিযং সীলপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং দুতিযং তাৰ, দল়্হং কত্ৰা সমাদিয;

সীলপারমিতং গচ্ছ, যদি বোধিং পত্তুমিচ্ছসি.

‘‘যথাপি চমরী ৰালং, কিস্মিঞ্চি পটিলগ্গিতং;

উপেতি মরণং তত্থ, ন ৰিকোপেতি ৰালধিং.

‘‘তথেৰ ত্ৰং চতূসু ভূমীসু, সীলানি পরিপূরয;

পরিরক্খ সব্বদা সীলং, চমরী ৰিয ৰালধি’’ন্তি.

তত্থ ন হেতেতি ন হি এতেযেৰ. বোধিপাচনাতি মগ্গপরিপাচনা সব্বঞ্ঞুতঞ্ঞাণপরিপাচনা ৰা. দুতিযং ¶ সীলপারমিন্তি সীলং নাম সব্বেসং কুসলধম্মানং পতিট্ঠা, সীলে পতিট্ঠিতো কুসলধম্মেহি ন পরিহাযতি, সব্বেপি ¶ লোকিযলোকুত্তরগুণে পটিলভতি. তস্মা সীলপারমী পূরেতব্বাতি দুতিযং সীলপারমিং অদ্দক্খিন্তি অত্থো.

আসেৰিতনিসেৰিতন্তি ভাৰিতঞ্চেৰ বহুলীকতঞ্চ. চমরীতি চমরী মিগো. কিস্মিঞ্চীতি যত্থ কত্থচি রুক্খলতাকণ্টকাদীসু অঞ্ঞতরস্মিং. পটিলগ্গিতন্তি পটিৰিলগ্গিতং. তত্থাতি যত্থ ৰিলগ্গিতং, তত্থেৰ ঠত্ৰা মরণং উপগচ্ছতি. ন ৰিকোপেতীতি ন ছিন্দতি. ৰালধিন্তি ৰালং ছিন্দিত্ৰা ন গচ্ছতি, তত্থেৰ মরণং উপেতীতি অত্থো.

চতূসু ¶ ভূমীসু সীলানীতি চতূসু ঠানেসু ৰিভত্তসীলানি, পাতিমোক্খসংৰরইন্দ্রিযসংৰরআজীৰপারিসুদ্ধিপচ্চযসন্নিস্সিতৰসেনাতি অত্থো. ভূমিৰসেন পন দ্ৰীসুযেৰ ভূমীসু পরিযাপন্নং তম্পি চতুসীলমেৰাতি. পরিপূরযাতি খণ্ডছিদ্দসবলাদিঅভাৰেন পরিপূরয. সব্বদাতি সব্বকালং. চমরী ৰিযাতি চমরী মিগো ৰিয. সেসমেত্থাপি উত্তানত্থমেৰাতি.

অথস্স ‘‘ন এত্তকেহেৰ বুদ্ধকারকেহি ধম্মেহি ভৰিতব্ব’’ন্তি উত্তরিম্পি উপধারযতো ততিযং নেক্খম্মপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায নেক্খম্মপারমিম্পি পূরেয্যাসি. যথাপি সুচিরং বন্ধনাগারে ৰসমানো পুরিসো ন তত্থ সিনেহং করোতি, অথ খো উক্কণ্ঠিতো অৰসিতুকামো হোতি, এৰমেৰ ত্ৰম্পি সব্বভৰে বন্ধনাগারসদিসে কত্ৰা পস্স, সব্বভৰেহি উক্কণ্ঠিতো মুচ্চিতুকামো হুত্ৰা নেক্খম্মাভিমুখোৰ হোতি, এৰং বুদ্ধো ভৰিস্সসী’’তি ততিযং নেক্খম্মপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, ততিযং নেক্খম্মপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং ততিযং তাৰ, দল়্হং কত্ৰা সমাদিয;

নেক্খম্মপারমিতং গচ্ছ, যদি বোধিং পত্তুমিচ্ছসি.

‘‘যথা অন্দুঘরে পুরিসো, চিরৰুট্ঠো দুখট্টিতো;

ন তত্থ রাগং জনেতি, মুত্তিংযেৰ গৰেসতি.

‘‘তথেৰ ¶ ¶ ত্ৰং সব্বভৰে, পস্স অন্দুঘরে ৰিয;

নেক্খম্মাভিমুখো হোতি, ভৰতো পরিমুত্তিযা’’তি.

তত্থ অন্দুঘরেতি বন্ধনাগারে. চিরৰুট্ঠোতি চিরকালং ৰুট্ঠো. দুখট্টিতোতি দুক্খপীল়িতো. ন ¶ তত্থ রাগং জনেতীতি তত্থ অন্দুঘরে রাগং সিনেহং ন জনেতি ন উপ্পাদেতি. ‘‘ইমং অন্দুঘরং মুঞ্চিত্ৰা নাহং অঞ্ঞত্থ গমিস্সামী’’তি এৰং তত্থ রাগং ন জনেতি, কিন্তু মুত্তিংযেৰ মোক্খমেৰ গৰেসতীতি অধিপ্পাযো. নেক্খম্মাভিমুখোতি নিক্খমনাভিমুখো হোতি. ভৰতোতি সব্বভৰেহি. পরিমুত্তিযাতি পরিমোচনত্থায. নেক্খম্মাভিমুখো হুত্ৰা, সম্বোধিং পাপুণিস্সসী’’তিপি পাঠো. সেসমেত্থ উত্তানত্থমেৰাতি.

অথস্স ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো চতুত্থং পঞ্ঞাপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায পঞ্ঞাপারমিম্পি পূরেয্যাসি. হীনমজ্ঝিমুক্কট্ঠেসু কঞ্চি অৰজ্জেত্ৰা সব্বেপি পণ্ডিতে উপসঙ্কমিত্ৰা পঞ্হং পুচ্ছেয্যাসি. যথাপি পিণ্ডচারিকো ভিক্খু হীনাদিভেদেসু কুলেসু কিঞ্চি কুলং অৰিৰজ্জেত্ৰা পটিপাটিযা পিণ্ডায চরন্তো খিপ্পং যাপনমত্তং লভতি, এৰমেৰ ত্ৰম্পি সব্বে পণ্ডিতে উপসঙ্কমিত্ৰা পুচ্ছন্তো বুদ্ধো ভৰিস্সসী’’তি চতুত্থং পঞ্ঞাপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, চতুত্থং পঞ্ঞাপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং চতুত্থং তাৰ, দল়্হং কত্ৰা সমাদিয;

পঞ্ঞাপারমিতং গচ্ছ, যদি বোধিং পত্তুমিচ্ছসি.

‘‘যথা হি ভিক্খু ভিক্খন্তো, হীনমুক্কট্ঠমজ্ঝিমে;

কুলানি ন ৰিৰজ্জেন্তো, এৰং লভতি যাপনং.

‘‘তথেৰ ¶ ত্ৰং সব্বকালং, পরিপুচ্ছং বুধং জনং;

পঞ্ঞায পারমিং গন্ত্ৰা, সম্বোধিং পাপুণিস্সসী’’তি.

তত্থ ¶ ভিক্খন্তোতি পিণ্ডায চরন্তো. হীনমুক্কট্ঠমজ্ঝিমেতি হীনমুক্কট্ঠমজ্ঝিমানি কুলানীতি ¶ অত্থো. লিঙ্গৰিপরিযাসো কতো. ন ৰিৰজ্জেন্তোতি ন পরিহরন্তো, ঘরপটিপাটিং মুঞ্চিত্ৰা চরন্তো ৰিৰজ্জেতি নাম, এৰমকত্ৰাতি অত্থো. যাপনন্তি যাপনমত্তং পাণধারণং আহারং লভতীতি অত্থো. পরিপুচ্ছন্তি – ‘‘কিং, ভন্তে, কুসলং, কিং অকুসলং; কিং সাৰজ্জং, কিং অনৰজ্জ’’ন্তিআদিনা (দী. নি. ৩.৮৪, ২১৬) নযেন তত্থ তত্থ অভিঞ্ঞাতে পণ্ডিতে জনে উপসঙ্কমিত্ৰা পরিপুচ্ছন্তোতি অত্থো. বুধং জনন্তি পণ্ডিতং জনং. ‘‘বুধে জনে’’তিপি পাঠো. পঞ্ঞায পারমিন্তি পঞ্ঞায পারং. ‘‘পঞ্ঞাপারমিতং গন্ত্ৰা’’তিপি পাঠো. সেসমেত্থাপি উত্তানমেৰাতি.

অথস্স ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো পঞ্চমং ৰীরিযপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায ৰীরিযপারমিম্পি পূরেয্যাসি. যথাপি সীহো মিগরাজা সব্বইরিযাপথেসু দল়্হৰীরিযো হোতি, এৰং ত্ৰম্পি সব্বভৰেসু সব্বইরিযাপথেসু দল়্হৰীরিযো অনোলীনৰীরিযো সমানো বুদ্ধো ভৰিস্সসী’’তি পঞ্চমং ৰীরিযপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, পঞ্চমং ৰীরিযপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং পঞ্চমং তাৰ, দল়্হং কত্ৰা সমাদিয;

ৰীরিযপারমিতং গচ্ছ, যদি বোধিং পত্তুমিচ্ছসি.

‘‘যথাপি সীহো মিগরাজা, নিসজ্জট্ঠানচঙ্কমে;

অলীনৰীরিযো হোতি, পগ্গহিতমনো সদা.

‘‘তথেৰ ত্ৰং সব্বভৰে, পগ্গণ্হ ৰীরিযং দল়্হং;

ৰীরিযপারমিতং গন্ত্ৰা, সম্বোধিং পাপুণিস্সসী’’তি.

তত্থ ¶ অলীনৰীরিযোতি অনোলীনৰীরিযো. সব্বভৰেতি ¶ জাতজাতভৰে, সব্বেসু ভৰেসূতি অত্থো. আরদ্ধৰীরিযো হুত্ৰা, সম্বোধিং পাপুণিস্সসীতিপি পাঠো. সেসমেত্থাপি উত্তানমেৰাতি.

অথস্স ¶ ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো ছট্ঠমং খন্তিপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায খন্তিপারমিং পরিপূরেয্যাসি, সম্মাননেপি অৰমাননেপি খমোৰ ভৰেয্যাসি. যথা হি পথৰিযং নাম সুচিম্পি পক্খিপন্তি অসুচিম্পি, ন চ তেন পথৰী সিনেহং ৰা পটিঘং ৰা করোতি, খমতি সহতি অধিৰাসেতিযেৰ, এৰমেৰ ত্ৰম্পি সব্বেসং সম্মাননাৰমাননেসু খমো সমানো বুদ্ধো ভৰিস্সসী’’তি ছট্ঠমং খন্তিপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, ছট্ঠমং খন্তিপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং ছট্ঠমং তাৰ, দল়্হং কত্ৰা সমাদিয;

তত্থ অদ্ৰেজ্ঝমানসো, সম্বোধিং পাপুণিস্সসি.

‘‘যথাপি পথৰী নাম, সুচিম্পি অসুচিম্পি চ;

সব্বং সহতি নিক্খেপং, ন করোতি পটিঘং তযা.

‘‘তথেৰ ত্ৰম্পি সব্বেসং, সম্মানাৰমানক্খমো;

খন্তিপারমিতং গন্ত্ৰা, সম্বোধিং পাপুণিস্সসী’’তি.

তত্থ তত্থাতি তস্সং খন্তিপারমিযং. অদ্ৰেজ্ঝমানসোতি একংসমানসো. সুচিম্পীতি চন্দনকুঙ্কুমগন্ধমালাদিসুচিম্পি. অসুচিম্পীতি অহিকুক্কুরমনুস্সকুণপগূথমুত্তখেল়সিঙ্ঘাণিকাদিঅসুচিম্পি. সহতীতি খমতি, অধিৰাসেতি. নিক্খেপন্তি নিক্খিত্তং. পটিঘন্তি কোধং. তযাতি তায ৰুত্তিযা, তায নিক্খিত্ততায ৰা. ‘‘পটিঘং দয’’ন্তিপি পাঠো, তস্স তেন নিক্খেপেন পটিঘানুরোধং ন করোতীতি অত্থো. সম্মানাৰমানক্খমোতি সব্বেসং ¶ সম্মাননাৰমাননসহো ত্ৰম্পি ¶ ভৰাতি অত্থো. ‘‘তথেৰ ত্ৰম্পি সব্বভৰে, সম্মাননৰিমানক্খমো’’তিপি পঠন্তি. ‘‘খন্তিযা পারমিং গন্ত্ৰা’’তিপি পাঠো, তস্সা খন্তিযা পারমিপূরণৰসেন গন্ত্ৰাতি অত্থো. সেসমেত্থাপি উত্তানমেৰাতি. ইতো পরং এত্তকম্পি অৰত্ৰা যত্থ যত্থ ৰিসেসো অত্থি, তং তমেৰ ৰত্ৰা পাঠন্তরং দস্সেত্ৰা গমিস্সামাতি.

অথস্স ¶ ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো সত্তমং সচ্চপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায সচ্চপারমিম্পি পূরেয্যাসি, অসনিযা মত্থকে পতমানাযপি ধনাদীনং অত্থায ছন্দাদীনং ৰসেন সম্পজানমুসাৰাদং নাম মা ভাসি. যথাপি ওসধীতারকা নাম সব্বউতূসু অত্তনো গমনৰীথিং ৰিজহিত্ৰা অঞ্ঞায ৰীথিযা ন গচ্ছতি, সকৰীথিযাৰ গচ্ছতি, এৰমেৰ ত্ৰম্পি সচ্চং পহায মুসাৰাদং নাম অৰদন্তোযেৰ বুদ্ধো ভৰিস্সসী’’তি সত্তমং সচ্চপারমিং দল়্হং কত্ৰা অধিট্ঠাসি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, সত্তমং সচ্চপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং সত্তমং তাৰ, দল়্হং কত্ৰা সমাদিয;

তত্থ অদ্ৰেজ্ঝৰচনো, সম্বোধিং পাপুণিস্সসি.

‘‘যথাপি ওসধী নাম, তুলাভূতা সদেৰকে;

সমযে উতুৰস্সে ৰা, ন ৰোক্কমতি ৰীথিতো.

‘‘তথেৰ ত্ৰম্পি সচ্চেসু, মা ৰোক্কম হি ৰীথিতো;

সচ্চপারমিতং গন্ত্ৰা, সম্বোধিং পাপুণিস্সসী’’তি.

তত্থ তত্থাতি সচ্চপারমিযং. অদ্ৰেজ্ঝৰচনোতি অৰিতথৰচনো. ওসধী নামাতি ওসধীতারকা, ওসধগহণে ওসধীতারকং উদিতং দিস্ৰা ওসধং গণ্হন্তি. তস্মা ‘‘ওসধীতারকা’’তি ৰুচ্চতি. তুলাভূতাতি পমাণভূতা. সদেৰকেতি সদেৰকস্স লোকস্স. সমযেতি ¶ ৰস্সসমযে. উতুৰস্সেতি হেমন্তগিম্হেসু. ‘‘সমযে উতুৰট্টে’’তিপি পাঠো. তস্স সমযেতি গিম্হে. উতুৰট্টেতি হেমন্তে চ ৰস্সানে চাতি অত্থো. ন ¶ ৰোক্কমতি ৰীথিতোতি তং তং উতুম্হি অত্তনো গমনৰীথিতো ন ৰোক্কমতি ন ৰিগচ্ছতি, ছ মাসে পচ্ছিমং দিসং গচ্ছতি, ছ মাসে পুব্বং দিসং গচ্ছতীতি. অথ ৰা ওসধী নামাতি সিঙ্গিৰেরপিপ্ফলিমরিচাদিকং ওসধং. ন ৰোক্কমতীতি যং যং ফলদানসমত্থং ওসধং, তং তং ফলদানং ওক্কম্ম অত্তনো ¶ ফলং অদত্ৰা ন নিৰত্ততি. ৰীথিতোতি গমনৰীথিতো, পিত্তহরো পিত্তং হরতেৰ, ৰাতহরো ৰাতং হরতেৰ, সেম্হহরো সেম্হং হরতেৰাতি অত্থো. সেসমেত্থাপি উত্তানমেৰাতি.

অথস্স ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো অট্ঠমং অধিট্ঠানপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায অধিট্ঠানপারমিম্পি পূরেয্যাসি, যং অধিট্ঠাসি, তস্মিং অধিট্ঠানে নিচ্চলো ভৰেয্যাসি, যথা পব্বতো নাম সব্বদিসাসু ৰাতে পহরন্তেপি ন কম্পতি ন চলতি, অত্তনো ঠানেযেৰ তিট্ঠতি, এৰমেৰ ত্ৰম্পি অত্তনো অধিট্ঠানে নিচ্চলো হোন্তোৰ বুদ্ধো ভৰিস্সসী’’তি অট্ঠমং অধিট্ঠানপারমিং দল়্হং কত্ৰা অধিট্ঠাসীতি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, অট্ঠমং অধিট্ঠানপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং অট্ঠমং তাৰ, দল়্হং কত্ৰা সমাদিয;

তত্থ ত্ৰং অচলো হুত্ৰা, সম্বোধিং পাপুণিস্সসি.

‘‘যথাপি পব্বতো সেলো, অচলো সুপ্পতিট্ঠিতো;

ন কম্পতি ভুসৰাতেহি, সকট্ঠানেৰ তিট্ঠতি.

‘‘তত্থেৰ ত্ৰম্পি অধিট্ঠানে, সব্বদা অচলো ভৰ;

অধিট্ঠানপারমিতং গন্ত্ৰা, সম্বোধিং পাপুণিস্সসী’’তি.

তত্থ ¶ সেলোতি সিলামযো. অচলোতি নিচ্চলো সুপ্পতিট্ঠিতোতি অচলত্তাৰ সুট্ঠু পতিট্ঠিতো. ‘‘যথাপি পব্বতো অচলো, নিখাতো সুপ্পতিট্ঠিতো’’তিপি পাঠো. ভুসৰাতেহীতি বলৰৰাতেহি. সকট্ঠানেৰাতি অত্তনো ঠানেযেৰ, যথাঠিতট্ঠানেযেৰাতি অত্থো. সেসমেত্থাপি উত্তানমেৰাতি.

অথস্স ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো নৰমং মেত্তাপারমিং দিস্ৰা এতদহোসি ¶ – ‘‘সুমেধপণ্ডিত, ত্ৰং ইতো পট্ঠায মেত্তাপারমিং পূরেয্যাসি, হিতেসুপি অহিতেসুপি একচিত্তোৰ ¶ ভৰেয্যাসি. যথাপি উদকং নাম পাপজনস্সপি কল্যাণজনস্সপি সীতভাৰং একসদিসং কত্ৰা ফরতি, এৰমেৰ ত্ৰম্পি সব্বসত্তেসু মেত্তচিত্তেন একচিত্তোৰ হুত্ৰা বুদ্ধো ভৰিস্সসী’’তি নৰমং মেত্তাপারমিং দল়্হং কত্ৰা অধিট্ঠাসীতি. তেন ৰুত্তং –

‘‘ন হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, নৰমং মেত্তাপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং নৰমং তাৰ, দল়্হং কত্ৰা সমাদিয;

মেত্তায অসমো হোতি, যদি বোধিং পত্তুমিচ্ছসি.

‘‘যথাপি উদকং নাম, কল্যাণে পাপকে জনে;

সমং ফরতি সীতেন, পৰাহেতি রজোমলং.

‘‘তথেৰ ত্ৰং হিতাহিতে, সমং মেত্তায ভাৰয;

মেত্তাপারমিতং গন্ত্ৰা, সম্বোধিং পাপুণিস্সসী’’তি.

তত্থ অসমো হোহীতি মেত্তাভাৰনায অসদিসো হোহি. তত্থ ‘‘ত্ৰং সমসমো হোহী’’তিপি পাঠো, সো উত্তানত্থোৰ. সমন্তি তুল্যং. ফরতীতি ফুসতি. পৰাহেতীতি ৰিসোধেতি. রজোতি আগন্তুকরজং. মলন্তি সরীরে উট্ঠিতং সেদমলাদিং. ‘‘রজমল’’ন্তিপি পাঠো, সোযেৰত্থো. হিতাহিতেতি ¶ হিতে চ অহিতে চ, মিত্তে চ অমিত্তে চাতি অত্থো. মেত্তায ভাৰযাতি মেত্তং ভাৰয ৰড্ঢেহি. সেসমেত্থাপি উত্তানমেৰাতি.

অথস্স ‘‘ন এত্তকেহেৰ বুদ্ধকারকধম্মেহি ভৰিতব্ব’’ন্তি উত্তরিম্পি উপধারযতো দসমং উপেক্খাপারমিং দিস্ৰা এতদহোসি – ‘‘সুমেধপণ্ডিত, ত্ৰং ইতো পট্ঠায উপেক্খাপারমিং পরিপূরেয্যাসি, সুখেপি দুক্খেপি মজ্ঝত্তোৰ ভৰেয্যাসি. যথাপি পথৰী নাম সুচিম্পি অসুচিম্পি চ পক্খিপমানে মজ্ঝত্তাৰ হোতি, এৰমেৰ ত্ৰম্পি সুখদুক্খেসু মজ্ঝত্তোৰ হোন্তো বুদ্ধো ভৰিস্সসী’’তি ¶ দসমং উপেক্খাপারমিং দল়্হং কত্ৰা অধিট্ঠাসি. তেন ৰুত্তং –

‘‘ন ¶ হেতে এত্তকাযেৰ, বুদ্ধধম্মা ভৰিস্সরে;

অঞ্ঞেপি ৰিচিনিস্সামি, যে ধম্মা বোধিপাচনা.

‘‘ৰিচিনন্তো তদা দক্খিং, দসমং উপেক্খাপারমিং;

পুব্বকেহি মহেসীহি, আসেৰিতনিসেৰিতং.

‘‘ইমং ত্ৰং দসমং তাৰ, দল়্হং কত্ৰা সমাদিয;

তুলাভূতো দল়্হো হুত্ৰা, সম্বোধিং পাপুণিস্সসি.

‘‘যথাপি পথৰী নাম, নিক্খিত্তং অসুচিং সুচিং;

উপেক্খতি উভোপেতে, কোপানুনযৰজ্জিতা.

‘‘তথেৰ ত্ৰং সুখদুক্খে, তুলাভূতো সদা ভৰ;

উপেক্খাপারমিতং গন্ত্ৰা, সম্বোধিং পাপুণিস্সসী’’তি.

তত্থ তুলাভূতোতি মজ্ঝত্তভাৰে ঠিতো যথা তুলায দণ্ডো সমং তুলিতো সমং তিট্ঠতি, ন নমতি ন উন্নমতি, এৰমেৰ ত্ৰম্পি সুখদুক্খেসু তুলাসদিসো হুত্ৰা সম্বোধিং পাপুণিস্সসি. কোপানুনযৰজ্জিতাতি পটিঘানুরোধৰজ্জিতা. ‘‘দযাকোপৰিৰজ্জিতা’’তিপি পাঠো, সোযেৰত্থো. সেসং খন্তিপারমিযং ৰুত্তনযেনেৰ ৰেদিতব্বং.

ততো সুমেধপণ্ডিতো ইমে দস পারমিধম্মে ৰিচিনিত্ৰা ততো পরং চিন্তেসি – ‘‘ইমস্মিং ¶ লোকে বোধিসত্তেহি পরিপূরেতব্বা বোধিপাচনা বুদ্ধত্তকরা ধম্মা এত্তকাযেৰ, ন ইতো ভিয্যো, ইমা পন পারমিযো উদ্ধং আকাসেপি নত্থি, ন হেট্ঠা পথৰিযম্পি, ন পুরত্থিমাদীসু দিসাসুপি অত্থি, ময্হংযেৰ পন হদযমংসন্তরেযেৰ পতিট্ঠিতা’’তি. এৰং তাসং অত্তনো হদযে পতিট্ঠিতভাৰং দিস্ৰা সব্বাপি তা দল়্হং কত্ৰা অধিট্ঠায পুনপ্পুনং সম্মসন্তো অনুলোমপটিলোমং সম্মসি, পরিযন্তে গহেত্ৰা আদিম্হি পাপেসি, আদিম্হি গহেত্ৰা পরিযন্তে ঠপেসি, মজ্ঝে গহেত্ৰা উভতো ওসাপেসি, উভতো কোটীসু গহেত্ৰা মজ্ঝে ওসাপেসি. বাহিরভণ্ডপরিচ্চাগো পারমিযো নাম, অঙ্গপরিচ্চাগো উপপারমিযো নাম, জীৰিতপরিচ্চাগো পরমত্থপারমিযো নামাতি দস পারমিযো দস উপপারমিযো দস পরমত্থপারমিযোতি সমত্তিংস পারমিযো যমকতেলং ৰিনিৰট্টেন্তো ৰিয সম্মসি. তস্স দস পারমিযো সম্মসন্তস্স ধম্মতেজেন ¶ চতুনহুতাধিকদ্ৰিযোজনসতসহস্সবহলা ৰিপুলা অযং মহাপথৰী হত্থিনা অক্কন্তনল়কলাপো ৰিয উপ্পীল়িযমানং উচ্ছুযন্তং ৰিয চ মহাৰিরৰং ৰিরৰমানা সঙ্কম্পি সম্পকম্পি সম্পৰেধি. কুলালচক্কং ¶ ৰিয তেলযন্তচক্কং ৰিয চ পরিব্ভমি. তেন ৰুত্তং –

‘‘এত্তকাযেৰ তে লোকে, যে ধম্মা বোধিপাচনা;

ততুদ্ধং নত্থি অঞ্ঞত্র, দল়্হং তত্থ পতিট্ঠহ.

‘‘ইমে ধম্মে সম্মসতো, সভাৰসরসলক্খণে;

ধম্মতেজেন ৰসুধা, দসসহস্সী পকম্পথ.

‘‘চলতী রৰতী পথৰী, উচ্ছুযন্তংৰ পীল়িতং;

তেলযন্তে যথা চক্কং, এৰং কম্পতি মেদনী’’তি.

তত্থ এত্তকাযেৰাতি নিদ্দিট্ঠানং দসন্নং পারমিতানং অনূনাধিকভাৰস্স দস্সনত্থং ৰুত্তং. ততুদ্ধন্তি ততো দসপারমীহি উদ্ধং নত্থি. অঞ্ঞত্রাতি অঞ্ঞং, লক্খণং সদ্দসত্থতো গহেতব্বং. ততো দসপারমিতো অঞ্ঞো বুদ্ধকারকধম্মো নত্থীতি অত্থো. তত্থাতি তাসু দসসু পারমীসু. পতিট্ঠহাতি পতিট্ঠ, পরিপূরেন্তো তিট্ঠাতি অত্থো.

ইমে ধম্মেতি পারমিধম্মে. সম্মসতোতি উপপরিক্খন্তস্স, অনাদরত্থে সামিৰচনং দট্ঠব্বং. সভাৰসরসলক্খণেতি সভাৰসঙ্খাতেন সরসলক্খণেন সম্মসন্তস্সাতি অত্থো. ধম্মতেজেনাতি পারমিপৰিচযঞাণতেজেন. ৰসুধাতি ৰসূতি রতনং ৰুচ্চতি, তং ধারেতি ধীযতি ৰা এত্থাতি ৰসুধা ¶ . কা সা? মেদনী. পকম্পথাতি পকম্পিত্থ. সুমেধপণ্ডিতে পন পারমিযো ৰিচিনন্তে তস্স ঞাণতেজেন দসসহস্সী পকম্পিত্থাতি অত্থো.

চলতীতি ছপ্পকারা কম্পি. রৰতীতি নদতি ৰিকূজতি. উচ্ছুযন্তংৰ পীল়িতন্তি নিপ্পীল়িতং উচ্ছুযন্তং ৰিয. ‘‘গুল়যন্তংৰ পীল়িত’’ন্তিপি পাঠো, সোযেৰত্থো. তেলযন্তেতি তেলপীল়নযন্তে. যথা চক্কন্তি চক্কিকানং মহাচক্কযন্তং ৰিয. এৰন্তি যথা তেলপীল়নচক্কযন্তং পরিব্ভমতি কম্পতি, এৰং অযং মেদনী কম্পতীতি অত্থো. সেসমেত্থ উত্তানমেৰাতি.

এৰং ¶ মহাপথৰিযা কম্পমানায রম্মনগরৰাসিনো মনুস্সা ভগৰন্তং ¶ পরিৰিসযমানা সণ্ঠাতুং অসক্কোন্তা যুগন্ধরৰাতব্ভাহতা মহাসালা ৰিয মুচ্ছিতা পপতিংসু. ঘটাদীনি কুলালভণ্ডানি পৰট্টেন্তানি অঞ্ঞমঞ্ঞং পহরন্তানি চুণ্ণৰিচুণ্ণানি অহেসুং. মহাজনো ভীততসিতো সত্থারং উপসঙ্কমিত্ৰা – ‘‘কিং নু খো ভগৰা ‘নাগাৰট্টো অযং, ভূতযক্খদেৰতাসু অঞ্ঞতরাৰট্টো ৰা’তি ন হি মযং এতং জানাম. অপি চ খো সব্বোপি অযং মহাজনো ভযেন উপদ্দুতো, কিং নু খো ইমস্স লোকস্স পাপকং ভৰিস্সতি, উদাহু কল্যাণং, কথেথ নো এতং কারণ’’ন্তি পুচ্ছিংসু.

অথ সত্থা তেসং কথং সুত্ৰা – ‘‘তুম্হে মা ভাযিত্থ, মা খো চিন্তযিত্থ, নত্থি ৰো ইতোনিদানং ভযং, যো সো মযা অজ্জ সুমেধপণ্ডিতো ‘অনাগতে গোতমো নাম বুদ্ধো ভৰিস্সতী’তি ব্যাকতো, সো ইদানি পারমিযো সম্মসতি, তস্স সম্মসন্তস্স ধম্মতেজেন সকলদসসহস্সী লোকধাতু একপ্পহারেন কম্পতি চেৰ ৰিরৰতি চা’’তি আহ. তেন ৰুত্তং –

‘‘যাৰতা পরিসা আসি, বুদ্ধস্স পরিৰেসনে;

পৰেধমানা সা তত্থ, মুচ্ছিতা সেতি ভূমিযং.

‘‘ঘটানেকসহস্সানি, কুম্ভীনঞ্চ সতা বহূ;

সঞ্চুণ্ণমথিতা তত্থ, অঞ্ঞমঞ্ঞং পঘট্টিতা.

‘‘উব্বিগ্গা তসিতা ভীতা, ভন্তা ব্যথিতমানসা;

মহাজনা সমাগম্ম, দীপঙ্করমুপাগমুং.

‘‘কিং ¶ ভৰিস্সতি লোকস্স, কল্যাণমথ পাপকং;

সব্বো উপদ্দুতো লোকো, তং ৰিনোদেহি চক্খুম.

‘‘তেসং তদা সঞ্ঞাপেসি, দীপঙ্করো মহামুনি;

ৰিস্সত্থা হোথ মা ভাথ, ইমস্মিং পথৰিকম্পনে.

‘‘যমহং অজ্জ ব্যাকাসিং, বুদ্ধো লোকে ভৰিস্সতি;

এসো সম্মসতী ধম্মং, পুব্বকং জিনসেৰিতং.

‘‘তস্স ¶ সম্মসতো ধম্মং, বুদ্ধভূমিং অসেসতো;

তেনাযং কম্পিতা পথৰী, দসসহস্সী সদেৰকে’’তি.

তত্থ যাৰতাতি যাৰতিকা. আসীতি ¶ অহোসি. ‘‘যা তদা পরিসা আসী’’তিপি পাঠো, তস্স যা তত্থ পরিসা ঠিতা আসীতি অত্থো. পৰেধমানাতি কম্পমানা. সাতি সা পরিসা. তত্থাতি তস্মিং পরিৰেসনট্ঠানে. সেতীতি সযিত্থ.

ঘটাতি ঘটানং, সামিঅত্থে পচ্চত্তৰচনং, ঘটানং নেকসহস্সানীতি অত্থো. সঞ্চুণ্ণমথিতাতি চুণ্ণা চেৰ মথিতা চ, মথিতসঞ্চুণ্ণাতি অত্থো. অঞ্ঞমঞ্ঞং পঘট্টিতাতি অঞ্ঞমঞ্ঞং পহটা. উব্বিগ্গাতি উত্রাসহদযা. তসিতাতি সঞ্জাততাসা. ভীতাতি ভযভীতা. ভন্তাতি ফন্দনমানসা, ৰিব্ভন্তচিত্তাতি অত্থো. সব্বানি পনেতানি অঞ্ঞমঞ্ঞৰেৰচনানি. সমাগম্মাতি সমাগন্ত্ৰা. অযমেৰ ৰা পাঠো.

উপদ্দুতোতি উপহতো. তং ৰিনোদেহীতি তং উপদ্দুতভযং ৰিনোদেহি, ৰিনাসযাতি অত্থো. চক্খুমাতি পঞ্চহি চক্খূহি চক্খুম. তেসং তদাতি তে জনে তদা, উপযোগত্থে সামিৰচনং. সঞ্ঞাপেসীতি ঞাপেসি বোধেসি. ৰিসত্থাতি ৰিস্সত্থচিত্তা. মা ভাথাতি মা ভাযথ. যমহন্তি যং অহং সুমেধপণ্ডিতং. ধম্মন্তি পারমিধম্মং. পুব্বকন্তি পোরাণং. জিনসেৰিতন্তি জিনেহি বোধিসত্তকালে সেৰিতন্তি অত্থো. বুদ্ধভূমিন্তি পারমিধম্মং. তেনাতি তেন সম্মসনকারণেন. কম্পিতাতি চলিতা. সদেৰকেতি সদেৰকে লোকে.

ততো মহাজনো তথাগতস্স ৰচনং সুত্ৰা হট্ঠতুট্ঠো মালাগন্ধৰিলেপনাদীনি আদায রম্মনগরতো ¶ নিক্খমিত্ৰা বোধিসত্তং উপসঙ্কমিত্ৰা মালাগন্ধাদীহি পূজেত্ৰা ৰন্দিত্ৰা পদক্খিণং কত্ৰা রম্মনগরমেৰ পাৰিসি. অথ খো বোধিসত্তো দস পারমিযো সম্মসিত্ৰা ৰীরিযং দল়্হং কত্ৰা অধিট্ঠায নিসিন্নাসনা ৰুট্ঠাসি. তেন ৰুত্তং –

‘‘বুদ্ধস্স ¶ ৰচনং সুত্ৰা, মনো নিব্বাযি তাৰদে;

সব্বে মং উপসঙ্কম্ম, পুনাপি মং অভিৰন্দিসুং.

‘‘সমাদিযিত্ৰা ¶ বুদ্ধগুণং, দল়্হং কত্ৰান মানসং;

দীপঙ্করং নমস্সিত্ৰা, আসনা ৰুট্ঠহিং তদা’’তি.

তত্থ মনো নিব্বাযীতি মহাজনস্স পথৰিকম্পনে উব্বিগ্গহদযস্স তত্থ কারণং সুত্ৰা মনো নিব্বাযি, সন্তিং অগমাসীতি অত্থো. ‘‘জনো নিব্বাযী’’তিপি পাঠো, সো উত্তানোযেৰ. সমাদিযিত্ৰাতি সম্মা আদিযিত্ৰা, সমাদাযাতি অত্থো. বুদ্ধগুণন্তি পারমিযো. সেসং উত্তানমেৰ.

অথ খো বোধিসত্তং দযিতসব্বসত্তং আসনা ৰুট্ঠহন্তং সকলদসসহস্সচক্কৰাল়দেৰতা সন্নিপতিত্ৰা দিব্বেহি মালাগন্ধাদীহি পূজেত্ৰা – ‘‘অয্য সুমেধতাপস, তযা অজ্জ দীপঙ্করদসবলস্স পাদমূলে মহতি পত্থনা পত্থিতা, সা তে অনন্তরাযেন সমিজ্ঝতু, মা তে তত্থ ভযং ৰা ছম্ভিতত্তং ৰা অহোসি. সরীরে তে অপ্পমত্তকোপি রোগো মা উপ্পজ্জতু, খিপ্পং পারমিযো পূরেত্ৰা সম্মাসম্বোধিং পটিৰিজ্ঝ. যথা পুপ্ফূপগফলূপগা রুক্খা সমযে পুপ্ফন্তি চেৰ ফলন্তি চ, তথেৰ ত্ৰম্পি তং সমযং অনতিক্কমিত্ৰা খিপ্পং সম্বোধিং ফুসস্সূ’’তিআদীনি থুতিমঙ্গলানি পযিরুদাহংসু, এৰং পযিরুদাহিত্ৰা বোধিসত্তং অভিৰাদেত্ৰা অত্তনো অত্তনো দেৰট্ঠানমেৰ অগমংসু. বোধিসত্তোপি দেৰতাহি অভিত্থুতো – ‘‘অহং দস পারমিযো পূরেত্ৰা কপ্পসতসহস্সাধিকানং চতুন্নং অসঙ্খ্যেয্যানং মত্থকে বুদ্ধো ভৰিস্সামী’’তি ৰীরিযং দল়্হং কত্ৰা অধিট্ঠায আকাসমব্ভুগ্গন্ত্ৰা ইসিগণৰন্তং হিমৰন্তং অগমাসি. তেন ৰুত্তং –

‘‘দিব্বং মানুসকং পুপ্ফং, দেৰা মানুসকা উভো;

সমোকিরন্তি পুপ্ফেহি, ৰুট্ঠহন্তস্স আসনা.

‘‘ৰেদযন্তি ¶ চ তে সোত্থিং, দেৰা মানুসকা উভো;

মহন্তং পত্থিতং তুয্হং, তং লভস্সু যথিচ্ছিতং.

‘‘সব্বীতিযো ৰিৰজ্জন্তু, সোকো রোগো ৰিনস্সতু;

মা তে ভৰন্ত্ৰন্তরাযা, ফুস খিপ্পং বোধিমুত্তমং.

‘‘যথাপি সমযে পত্তে, পুপ্ফন্তি পুপ্ফিনো দুমা;

তথেৰ ত্ৰং মহাৰীর, বুদ্ধঞাণেহি পুপ্ফসু.

‘‘যথা ¶ ¶ যে কেচি সম্বুদ্ধা, পূরযুং দসপারমী;

তথেৰ ত্ৰং মহাৰীর, পূরয দসপারমী.

‘‘যথা যে কেচি সম্বুদ্ধা, বোধিমণ্ডম্হি বুজ্ঝরে;

তথেৰ ত্ৰং মহাৰীর, বুজ্ঝস্সু জিনবোধিযং.

‘‘যথা যে কেচি সম্বুদ্ধা, ধম্মচক্কং পৰত্তযুং;

তথেৰ ত্ৰং মহাৰীর, ধম্মচক্কং পৰত্তয.

‘‘পুণ্ণমাযে যথা চন্দো, পরিসুদ্ধো ৰিরোচতি;

তথেৰ ত্ৰং পুণ্ণমনো, ৰিরোচ দসসহস্সিযং.

‘‘রাহুমুত্তো যথা সূরিযো, তাপেন অতিরোচতি;

তথেৰ লোকা মুচ্চিত্ৰা, ৰিরোচ সিরিযা তুৰং.

‘‘যথা যা কাচি নদিযো, ওসরন্তি মহোদধিং;

এৰং সদেৰকা লোকা, ওসরন্তু তৰন্তিকে.

‘‘তেহি থুতপ্পসত্থো সো, দস ধম্মে সমাদিয;

তে ধম্মে পরিপূরেন্তো, পৰনং পাৰিসী তদা’’তি.

তত্থ ¶ দিব্বন্তি মন্দারৰপারিচ্ছত্তকসন্তানকুসেসযাদিকং দিব্বকুসুমং দেৰা মানুসকা চ মানুসপুপ্ফং গহেত্ৰাতি অত্থো. সমোকিরন্তীতি মমোপরি সমোকিরিংসূতি অত্থো. ৰুট্ঠহন্তস্সাতি ৰুট্ঠহতো. ৰেদযন্তীতি নিৰেদযিংসু সঞ্ঞাপেসুং. সোত্থিন্তি সোত্থিভাৰং. ইদানি ৰেদযিতাকারদস্সনত্থং ‘‘মহন্তং পত্থিতং তুয্হ’’ন্তিআদি ৰুত্তং. তযা পন, সুমেধপণ্ডিত, মহন্তং ঠানং পত্থিতং, তং যথাপত্থিতং লভস্সূতি অত্থো.

সব্বীতিযোতি এন্তীতি ঈতিযো, সব্বা ঈতিযো সব্বীতিযো, উপদ্দৰা. ৰিৰজ্জন্তূতি মা হোন্তু. সোকো রোগো ৰিনস্সতূতি সোচনসঙ্খাতো সোকো রুজনসঙ্খাতো রোগো চ ৰিনস্সতু. তেতি তৰ. মা ভৰন্ত্ৰন্তরাযাতি মা ভৰন্তু অন্তরাযা. ফুসাতি অধিগচ্ছ পাপুণাহি. বোধিন্তি অরহত্তমগ্গঞাণং সব্বঞ্ঞুতঞ্ঞাণম্পি ৰট্টতি. উত্তমন্তি সেট্ঠং সব্ববুদ্ধগুণদাযকত্তা অরহত্তমগ্গঞাণং ‘‘উত্তম’’ন্তি ৰুত্তং.

সমযেতি ¶ তস্স তস্স রুক্খস্স পুপ্ফনসমযে সম্পত্তেতি অত্থো. পুপ্ফিনোতি ¶ পুপ্ফনকা. বুদ্ধঞাণেহীতি অট্ঠারসহি বুদ্ধঞাণেহি. পুপ্ফসূতি পুপ্ফস্সু. পূরযুন্তি পূরযিংসু. পূরযাতি পরিপূরয. বুজ্ঝরেতি বুজ্ঝিংসু. জিনবোধিযন্তি জিনানং বুদ্ধানং বোধিযা, সব্বঞ্ঞুবোধিমূলেতি অত্থো. পুণ্ণমাযেতি পুণ্ণমাসিযং. পুণ্ণমনোতি পরিপুণ্ণমনোরথো.

রাহুমুত্তোতি রাহুনা সোব্ভানুনা মুত্তো. তাপেনাতি পতাপেন, আলোকেন. লোকা মুচ্চিত্ৰাতি লোকধম্মেহি অলিত্তো হুত্ৰাতি অত্থো. ৰিরোচাতি ৰিরাজ. সিরিযাতি বুদ্ধসিরিযা. ওসরন্তীতি মহাসমুদ্দং পৰিসন্তি. ওসরন্তূতি উপগচ্ছন্তু. তৰন্তিকেতি তৰ সন্তিকং. তেহীতি দেৰেহি. থুতপ্পসত্থোতি থুতো চেৰ পসত্থো চ, থুতেহি ৰা দীপঙ্করাদীহি পসত্থোতি থুতপ্পসত্থো. দস ধম্মেতি দস পারমিধম্মে. পৰনন্তি মহাৰনং, ধম্মিকপব্বতে মহাৰনং পাৰিসীতি অত্থো. সেসগাথা সুউত্তানা এৰাতি.

ইতি মধুরত্থৰিলাসিনিযা বুদ্ধৰংস-অট্ঠকথায

সুমেধপত্থনাকথাৰণ্ণনা নিট্ঠিতা.

রম্মনগরৰাসিনোপি ¶ তে উপাসকা বুদ্ধপ্পমুখস্স ভিক্খুসঙ্ঘস্স মহাদানং দত্ৰা পুন ভগৰন্তং ভুত্তাৰিং ওনীতপত্তপাণিং মালাগন্ধাদীহি পূজেত্ৰা ৰন্দিত্ৰা দানানুমোদনং সোতুকামা উপনিসীদিংসু. অথ সত্থা তেসং পরমমধুরং হদযঙ্গমং দানানুমোদনমকাসি –

‘‘দানং নাম সুখাদীনং, নিদানং পরমং মতং;

নিব্বানং পন সোপানং, পতিট্ঠাতি পৰুচ্চতি.

‘‘দানং তাণং মনুস্সানং, দানং বন্ধু পরাযনং;

দানং দুক্খাধিপন্নানং, সত্তানং পরমা গতি.

‘‘দুক্খনিত্থরণট্ঠেন ¶ , দানং নাৰাতি দীপিতং;

ভযরক্খণতো দানং, নগরন্তি চ ৰণ্ণিতং.

‘‘দানং ¶ দুরাসদট্ঠেন, ৰুত্তমাসিৰিসোতি চ;

দানং লোভমলাদীহি, পদুমং অনুপলিত্ততো.

‘‘নত্থি দানসমো লোকে, পুরিসস্স অৰস্সযো;

পটিপজ্জথ তস্মা তং, কিরিযাজ্ঝাসযেন চ.

‘‘সগ্গলোকনিদানানি, দানানি মতিমা ইধ;

কো হি নাম নরো লোকে, ন দদেয্য হিতে রতো.

‘‘সুত্ৰা দেৰেসু সম্পত্তিং, কো নরো দানসম্ভৰং;

ন দজ্জা সুখপ্পদং দানং, দানং চিত্তপ্পমোদনং.

‘‘দানেন ¶ পটিপন্নেন, অচ্ছরাপরিৰারিতো;

রমতে সুচিরং কালং, নন্দনে সুরনন্দনে.

‘‘পীতিমুল়ারং ৰিন্দতি দাতা, গারৰমস্মিং গচ্ছতি লোকে;

কিত্তিমনন্তং যাতি চ দাতা, ৰিস্সসনীযো হোতি চ দাতা.

‘‘দত্ৰা দানং যাতি নরো সো, ভোগসমিদ্ধিং দীঘঞ্চাযু;

সুস্সরতম্পি চ ৰিন্দতি রূপং, সগ্গে সদ্ধিং কীল়তি দেৰেহি;

ৰিমানেসু ঠত্ৰা নানা, মত্তমযূরাভিরুতেসু.

‘‘চোরারিরাজোদকপাৰকানং, ধনং অসাধারণমেৰ দানং;

দদাতি তং সাৰকঞাণভূমিং, পচ্চেকভূমিং পন বুদ্ধভূমি’’ন্তি. –

এৰমাদিনা নযেন দানানুমোদনং কত্ৰা দানানিসংসং পকাসেত্ৰা তদনন্তরং সীলকথং কথেসি. সীলং নামেতং ইধলোকপরলোকসম্পত্তীনং মূলং.

‘‘সীলং সুখানং পরমং নিদানং, সীলেন সীলী তিদিৰং পযাতি;

সীলঞ্হি সংসারমুপাগতস্স, তাণঞ্চ লেণঞ্চ পরাযনঞ্চ.

‘‘অৰস্সযো ¶ সীলসমো জনানং, কুতো পনঞ্ঞো ইধ ৰা পরত্থ;

সীলং গুণানং পরমা পতিট্ঠা, যথা ধরা থাৰরজঙ্গমানং.

‘‘সীলং কিরেৰ কল্যাণং, সীলং লোকে অনুত্তরং;

অরিযৰুত্তিসমাচারো, যেন ৰুচ্চতি সীলৰা’’. (জা. ১.৩.১১৮);

সীলালঙ্কারসমো ¶ অলঙ্কারো নত্থি, সীলগন্ধসমো গন্ধো নত্থি, সীলসমং কিলেসমলৰিসোধনং নত্থি, সীলসমং পরিল়াহূপসমং নত্থি, সীলসমং কিত্তিজননং নত্থি, সীলসমং সগ্গারোহণসোপানং নত্থি, নিব্বাননগরপ্পৰেসনে চ সীলসমং দ্ৰারং নত্থি. যথাহ –

‘‘সোভন্তেৰং ¶ ন রাজানো, মুত্তামণিৰিভূসিতা;

যথা সোভন্তি যতিনো, সীলভূসনভূসিতা.

‘‘সীলগন্ধসমো গন্ধো, কুতো নাম ভৰিস্সতি;

যো সমং অনুৰাতে চ, পটিৰাতে চ ৰাযতি. (ৰিসুদ্ধি. ১.৯);

‘‘ন পুপ্ফগন্ধো পটিৰাতমেতি, ন চন্দনং তগ্গরমল্লিকা ৰা;

সতঞ্চ গন্ধো পটিৰাতমেতি, সব্বা দিসা সপ্পুরিসো পৰাযতি.

‘‘চন্দনং তগরং ৰাপি, উপ্পলং অথ ৰস্সিকী;

এতেসং গন্ধজাতানং, সীলগন্ধো অনুত্তরো. (ধ. প. ৫৪-৫৫; মি. প. ৫.৪.১);

‘‘ন গঙ্গা যমুনা চাপি, সরভূ ৰা সরস্ৰতী;

নিন্নগা ৰাচিরৰতী, মহী ৰাপি মহানদী.

‘‘সক্কুণন্তি ৰিসোধেতুং, তং মলং ইধ পাণিনং;

ৰিসোধযতি সত্তানং, যং ৰে সীলজলং মলং.

‘‘ন তং সজলদা ৰাতা, ন চাপি হরিচন্দনং;

নেৰ হারা ন মণযো, ন চন্দকিরণঙ্কুরা.

‘‘সমযন্তীধ ¶ সত্তানং, পরিল়াহং সুরক্খিতং;

যং সমেতি ইদং অরিযং, সীলং অচ্চন্তসীতলং.

‘‘অত্তানুৰাদাদিভযং, ৰিদ্ধংসযতি সব্বদা;

জনেতি কিত্তিহাসঞ্চ, সীলং সীলৰতো সদা.

‘‘সগ্গারোহণসোপানং, অঞ্ঞং সীলসমং কুতো;

দ্ৰারং ৰা পন নিব্বান, নগরস্স পৰেসনে.

‘‘গুণানং ¶ মূলভূতস্স, দোসানং বলঘাতিনো;

ইতি সীলস্স জানাথ, আনিসংসমনুত্তর’’ন্তি. (ৰিসুদ্ধি. ১.৯);

এৰং ভগৰা সীলানিসংসং দস্সেত্ৰা – ‘‘ইদং পন সীলং নিস্সায অযং সগ্গো লভতী’’তি দস্সনত্থং তদনন্তরং সগ্গকথং কথেসি. অযং সগ্গো নাম ইট্ঠো কন্তো মনাপো একন্তসুখো নিচ্চমেত্থ কীল়া নিচ্চং সম্পত্তিযো লভন্তি. চাতুমহারাজিকা দেৰা নৰুতিৰস্সসতসহস্সানি দিব্বসুখং দিব্বসম্পত্তিং পটিলভন্তি. তাৰতিংসা তিস্সো ৰস্সকোটিযো সট্ঠি চ ৰস্সসতসহস্সানীতি এৰমাদিসগ্গগুণপটিসংযুত্তকথং কথেসি. এৰং সগ্গকথায ¶ পলোভেত্ৰা পুন – ‘‘অযম্পি সগ্গো অনিচ্চো অধুৰো ন তত্থ ছন্দরাগো কাতব্বো’’তি কামানং আদীনৰং ওকারং সংকিলেসং নেক্খম্মে আনিসংসঞ্চ পকাসেত্ৰা অমতপরিযোসানং ধম্মকথং কথেসি. এৰং তস্স মহাজনস্স ধম্মং দেসেত্ৰা একচ্চে সরণেসু চ একচ্চে পঞ্চসীলেসু চ একচ্চে সোতাপত্তিফলে চ একচ্চে সকদাগামিফলে একচ্চে অনাগামিফলে একচ্চে চতূসুপি ফলেসু একচ্চে তীসু ৰিজ্জাসু একচ্চে ছসু অভিঞ্ঞাসু একচ্চে অট্ঠসু সমাপত্তীসু পতিট্ঠাপেত্ৰা উট্ঠাযাসনা রম্মনগরতো নিক্খমিত্ৰা সুদস্সনমহাৰিহারমেৰ পাৰিসি. তেন ৰুত্তং –

‘‘তদা তে ভোজযিত্ৰান, সসঙ্ঘং লোকনাযকং;

উপগচ্ছুং সরণং তস্স, দীপঙ্করস্স সত্থুনো.

‘‘সরণাগমনে কঞ্চি, নিৰেসেতি তথাগতো;

কঞ্চি পঞ্চসু সীলেসু, সীলে দসৰিধে পরং.

‘‘কস্সচি ¶ দেতি সামঞ্ঞং, চতুরো ফলমুত্তমে;

কস্সচি অসমে ধম্মে, দেতি সো পটিসম্ভিদা.

‘‘কস্সচি ৰরসমাপত্তিযো, অট্ঠ দেতি নরাসভো;

তিস্সো কস্সচি ৰিজ্জাযো, ছল়ভিঞ্ঞা পৰেচ্ছতি.

‘‘তেন যোগেন জনকাযং, ওৰদতি মহামুনি;

তেন ৰিত্থারিকং আসি, লোকনাথস্স সাসনং.

‘‘মহাহনুসভক্খন্ধো ¶ , দীপঙ্করসনামকো;

বহূ জনে তারযতি, পরিমোচেতি দুগ্গতিং.

‘‘বোধনেয্যং জনং দিস্ৰা, সতসহস্সেপি যোজনে;

খণেন উপগন্ত্ৰান, বোধেতি তং মহামুনী’’তি.

তত্থ তেতি রম্মনগরৰাসিনো উপাসকা. সরণন্তি এত্থ সরণং সরণগমনং সরণস্স গন্তা চ ৰেদিতব্বা. সরতি হিংসতি ৰিনাসেতীতি সরণং, কিং তং? রতনত্তযং. তং পন সরণগতানং তেনেৰ সরণগমনেন ভযং সন্তাসং দুক্খং দুগ্গতিং পরিক্কিলেসং হনতি হিংসতি ৰিনাসেতীতি সরণন্তি ৰুচ্চতীতি. ৰুত্তঞ্হেতং –

‘‘যে কেচি বুদ্ধং সরণং গতাসে, ন তে গমিস্সন্তি অপাযভূমিং;

পহায মানুসং দেহং, দেৰকাযং পরিপূরেস্সন্তি. (দী. নি. ২.৩৩২; সং. নি. ১.৩৭);

‘‘যে ¶ কেচি ধম্মং সরণং গতাসে, ন তে গমিস্সন্তি অপাযভূমিং;

পহায মানুসং দেহং, দেৰকাযং পরিপূরেস্সন্তি. (দী. নি. ২.৩৩২; সং. নি. ১.৩৭);

‘‘যে কেচি সঙ্ঘং সরণং গতাসে, ন তে গমিস্সন্তি অপাযভূমিং;

পহায মানুসং দেহং, দেৰকাযং পরিপূরেস্সন্তী’’তি. (দী. নি. ২.৩৩২; সং. নি. ১.৩৭);

সরণগমনং ¶ নাম রতনত্তযপরাযনাকারপ্পৰত্তো চিত্তুপ্পাদো. সরণস্স গন্তা নাম তংসমঙ্গীপুগ্গলো. এৰং তাৰ সরণং সরণগমনং সরণস্স গন্তা চাতি ইদং তযং ৰেদিতব্বং.

তস্সাতি তং দীপঙ্করং, উপযোগত্থে সামিৰচনং দট্ঠব্বং. ‘‘উপগচ্ছুং সরণং তত্থা’’তিপি পাঠো. সত্থুনোতি সত্থারং. সরণাগমনে কঞ্চীতি কঞ্চি পুগ্গলং সরণগমনে নিৰেসেতীতি অত্থো. কিঞ্চাপি পচ্চুপ্পন্নৰসেন ৰুত্তং, অতীতকালৰসেন পন অত্থো গহেতব্বো. এস নযো সেসেসুপি. ‘‘কস্সচি সরণাগমনে’’তিপি পাঠো, তস্সপি সোযেৰত্থো. কঞ্চি পঞ্চসু সীলেসূতি ¶ কঞ্চি পুগ্গলং পঞ্চসু ৰিরতিসীলেসু নিৰেসেসীতি অত্থো. ‘‘কস্সচি পঞ্চসু সীলেসূ’’তিপি পাঠো, সোযেৰত্থো. সীলে দসৰিধে পরন্তি অপরং পুগ্গলং দসৰিধে সীলে নিৰেসেসীতি অত্থো. ‘‘কস্সচি কুসলে দসা’’তিপি পাঠো, তস্স কঞ্চি পুগ্গলং দস কুসলধম্মে সমাদপেসীতি অত্থো. কস্সচি দেতি সামঞ্ঞন্তি এত্থ পরমত্থতো সামঞ্ঞন্তি মগ্গো ৰুচ্চতি. যথাহ –

‘‘কতমঞ্চ, ভিক্খৰে, সামঞ্ঞং? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. ইদং ৰুচ্চতি, ভিক্খৰে, সামঞ্ঞ’’ন্তি (সং. নি. ৫.৩৬).

চতুরো ফলমুত্তমেতি চত্তারি উত্তমানি ফলানীতি অত্থো. ম-কারো পদসন্ধিকরো. লিঙ্গৰিপরিযাসেন ৰুত্তং. যথোপনিস্সযং চত্তারো মগ্গে চত্তারি চ সামঞ্ঞফলানি কস্সচি অদাসীতি অত্থো. কস্সচি অসমে ধম্মেতি কস্সচি অসদিসে চত্তারো পটিসম্ভিদাধম্মে অদাসি.

কস্সচি ৰরসমাপত্তিযোতি কস্সচি পন নীৰরণৰিগমেন পধানভূতা অট্ঠ সমাপত্তিযো অদাসি. তিস্সো কস্সচি ৰিজ্জাযোতি কস্সচি পুগ্গলস্স উপনিস্সযৰসেন দিব্বচক্খুঞাণপুব্বেনিৰাসানুস্সতিঞাণআসৰক্খযঞাণানং ৰসেন তিস্সো ৰিজ্জাযো. ছল়ভিঞ্ঞা পৰেচ্ছতীতি ছ অভিঞ্ঞাযো কস্সচি অদাসি.

তেন যোগেনাতি তেন নযেন তেনানুক্কমেন চ. জনকাযন্তি জনসমূহং. ওৰদতীতি ওৰদি. কালৰিপরিযাসেন ৰুত্তন্তি ৰেদিতব্বং. ইতো উপরিপি ঈদিসেসু ৰচনেসু অতীতকালৰসেনেৰ অত্থো গহেতব্বো ¶ . তেন ৰিত্থারিকং আসীতি তেন দীপঙ্করস্স ভগৰতো ওৰাদেন অনুসাসনিযা ৰিত্থারিকং ৰিত্থতং ৰিসালীভূতং সাসনং অহোসি.

মহাহনূতি ¶ মহাপুরিসানং কির দ্ৰেপি হনূনি পরিপুণ্ণানি দ্ৰাদসিযা পক্খস্স চন্দসদিসাকারানি হোন্তীতি মহন্তানি হনূনি যস্স সো মহাহনু, সীহহনূতি ৰুত্তং হোতি. উসভক্খন্ধোতি উসভস্সেৰ খন্ধো যস্স ভৰতি, সো উসভক্খন্ধো. সুৰট্টিতসুৰণ্ণালিঙ্গসদিসরুচিরক্খন্ধো সমৰট্টচারুক্খন্ধোতি অত্থো. দীপঙ্করসনামকোতি দীপঙ্করসনামো ¶ . বহূ জনে তারযতীতি বহূ বুদ্ধৰেনেয্যে জনে তারেসি. পরিমোচেতীতি পরিমোচেসি. দুগ্গতিন্তি দুগ্গতিতো. নিস্সক্কত্থে উপযোগৰচনং.

ইদানি তারণপরিমোচনকরণাকারদস্সনত্থং ‘‘বোধনেয্যং জন’’ন্তি গাথা ৰুত্তা. তত্থ বোধনেয্যং জনন্তি বোধনেয্যং পজং, অযমেৰ ৰা পাঠো. দিস্ৰাতি বুদ্ধচক্খুনা ৰা সমন্তচক্খুনা ৰা দিস্ৰা. সতসহস্সেপি যোজনেতি অনেকসতসহস্সেপি যোজনে ঠিতং. ইদং পন দসসহস্সিযংযেৰ সন্ধায ৰুত্তন্তি দট্ঠব্বং.

দীপঙ্করো কির সত্থা বুদ্ধত্তং পত্ৰা বোধিমূলে সত্তসত্তাহং ৰীতিনামেত্ৰা অট্ঠমে সত্তাহে মহাব্রহ্মুনো ধম্মজ্ঝেসনং পটিঞ্ঞায সুনন্দারামে ধম্মচক্কং পৰত্তেত্ৰা কোটিসতং দেৰমনুস্সানং ধম্মামতং পাযেসি. অযং পঠমো অভিসমযো অহোসি.

অথ সত্থা অত্তনো পুত্তস্স সমৰট্টক্খন্ধস্স উসভক্খন্ধস্স নাম ঞাণপরিপাকং ঞত্ৰা তং অত্রজং পমুখং কত্ৰা রাহুলোৰাদসদিসং ধম্মং দেসেত্ৰা দেৰমনুস্সানং নৰুতিকোটিযো ধম্মামতং পাযেসি. অযং দুতিযো অভিসমযো অহোসি.

পুন ভগৰা অমরৰতীনগরদ্ৰারে মহাসিরীসরুক্খমূলে যমকপাটিহারিযং কত্ৰা মহাজনস্স বন্ধনামোক্খং কত্ৰা দেৰগণপরিৰুতো দিৰসকরাতিরেকজুতিৰিসরভৰনে তাৰতিংসভৰনে পারিচ্ছত্তকমূলে পরমসীতলে পণ্ডুকম্বলসিলাতলে নিসীদিত্ৰা সব্বদেৰগণপীতিসঞ্জননিং অত্তনো ¶ জননিং সুমেধাদেৰিং পমুখং কত্ৰা সব্বলোকৰিদিতৰিসুদ্ধিদেৰো দেৰদেৰো দীপঙ্করো ভগৰা সব্বসত্তহিতকরং পরমাতিরেকগম্ভীরসুখুমং বুদ্ধিৰিসদকরং সত্তপ্পকরণং অভিধম্মপিটকং দেসেত্ৰা নৰুতিদেৰকোটিসহস্সানং ধম্মামতং পাযেসি. অযং ততিযো অভিসমযো অহোসি. তেন ৰুত্তং –

‘‘পঠমাভিসমযে বুদ্ধো, কোটিসতমবোধযি;

দুতিযাভিসমযে নাথো, নৰুতিকোটিমবোধযি.

‘‘যদা চ দেৰভৰনম্হি, বুদ্ধো ধম্মমদেসযি;

নৰুতিকোটিসহস্সানং, ততিযাভিসমযো অহূ’’তি.

দীপঙ্করস্স ¶ ¶ পন ভগৰতো তযো সাৰকসন্নিপাতা অহেসুং. তত্থ সুনন্দারামে কোটিসতসহস্সানং পঠমো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, দীপঙ্করস্স সত্থুনো;

কোটিসতসহস্সানং, পঠমো আসি সমাগমো’’তি.

অথাপরেন সমযেন দসবলো চতূহি ভিক্খুসতসহস্সেহি পরিৰুতো গামনিগমনগরপটিপাটিযা মহাজনানুগ্গহং করোন্তো চারিকং চরমানো অনুক্কমেন একস্মিং পদেসে মহাজনকতসক্কারং সব্বলোকৰিস্সুতং অমনুস্সপরিগ্গহিতং অতিভযানকং ওলম্বাম্বুধরপরিচুম্বিতকূটং ৰিৰিধসুরভিতরুকুসুমৰাসিতকূটং নানামিগগণৰিচরিতকূটং নারদকূটং নাম পরমরমণীযং পব্বতং সম্পাপুণি. সো কির পব্বতো নারদেন নাম যক্খেন পরিগ্গহিতো অহোসি. তত্থ পন তস্স যক্খস্স অনুসংৰচ্ছরং মহাজনো মনুস্সবলিং উপসংহরতি.

অথ দীপঙ্করো কির ভগৰা তস্স মহাজনস্স উপনিস্সযসম্পত্তিং দিস্ৰা ততো ভিক্খুসঙ্ঘং চাতুদ্দিসং পেসেত্ৰা অদুতিযো অসহাযো মহাকরুণাবলৰসঙ্গতহদযো তঞ্চ যক্খং ৰিনেতুং তং নারদপব্বতং অভিরুহি. অথ সো মনুস্সভক্খো সকহিতনিরপেক্খো পরৰধদক্খো যক্খো মক্খং অসহমানো কোধপরেতমানসো দসবলং ভিংসাপেত্ৰা পলাপেতুকামো তং পব্বতং চালেসি. সো কির পব্বতো তেন ¶ চালিযমানো ভগৰতো আনুভাৰেন তস্সেৰ মত্থকে পতমানো ৰিয অহোসি.

ততো সো ভীতো – ‘‘হন্দ নং অগ্গিনা ঝাপেস্সামী’’তি মহন্তং অতিভীমদস্সনং অগ্গিক্খন্ধং নিব্বত্তেসি. সো অগ্গিক্খন্ধো পটিৰাতে খিত্তো ৰিয অত্তনোৰ দুক্খং জনেসি, ন পন ভগৰতো চীৰরে অংসুমত্তম্পি দড্ঢুং সমত্থো অহোসি. যক্খো পন ‘‘সমণো দড্ঢো, ন দড্ঢো’’তি ওলোকেন্তো দসবলং সরদসমযৰিমলকরনিকরং সব্বজনরতিকরং রজনিকরমিৰ সীতলজলতলগতকমলকণ্ণিকায নিসিন্নং ৰিয ভগৰন্তং দিস্ৰা চিন্তেসি – ‘‘অহো অযং সমণো মহানুভাৰো, যং যং ইমস্সাহং অনত্থং করোমি, সো সো মমূপরিযেৰ পততি, ইমং পন সমণং মুঞ্চিত্ৰা অঞ্ঞং মে পটিসরণং পরাযনং নত্থি, পথৰিযং উপক্খলিতা পথৰিংযেৰ নিস্সায উট্ঠহন্তি, হন্দাহং ইমংযেৰ সমণং সরণং গমিস্সামী’’তি.

অথেৰং ¶ পন সো চিন্তেত্ৰা ভগৰতো চক্কালঙ্কততলেসু পাদেসু সিরসা নিপতিত্ৰা – ‘‘অচ্চযো মং, ভন্তে, অচ্চগমা’’তি ৰত্ৰা ভগৰন্তং সরণমগমাসি. অথস্স ভগৰা অনুপুব্বিকথং কথেসি. সো দেসনাপরিযোসানে দসহি যক্খসহস্সেহি সদ্ধিং সোতাপত্তিফলে পতিট্ঠহি. তস্মিং কির দিৰসে সকলজম্বুদীপতলৰাসিনো মনুস্সা ¶ তস্স বলিকম্মত্থং একেকগামতো একেকং পুরিসং আহরিংসু. অঞ্ঞঞ্চ বহুতিলতণ্ডুলকুলত্থমুগ্গমাসাদিং সপ্পিনৰনীততেলমধুফাণিতাদিঞ্চ আহরিংসু. অথ সো যক্খো তং দিৰসং আভততণ্ডুলাদিকং সব্বং তেসংযেৰ দত্ৰা তে বলিকম্মত্থায আনীতমনুস্সে দসবলস্স নিয্যাতেসি.

অথ সত্থা তে মনুস্সে এহিভিক্খুপব্বজ্জায পব্বাজেত্ৰা অন্তোসত্তাহেযেৰ সব্বে অরহত্তে পতিট্ঠাপেত্ৰা মাঘপুণ্ণমায কোটিসতভিক্খুমজ্ঝগতো চতুরঙ্গসমন্নাগতে সন্নিপাতে পাতিমোক্খমুদ্দিসি. চতুরঙ্গানি নাম সব্বেৰ এহিভিক্খূ হোন্তি, সব্বে ছল়ভিঞ্ঞা হোন্তি, সব্বে অনামন্তিতাৰ আগতা, পন্নরসূপোসথদিৰসো চাতি ইমানি চত্তারি অঙ্গানি নাম. অযং দুতিযো সন্নিপাতো অহোসি. তেন ৰুত্তং –

‘‘পুন ¶ নারদকূটম্হি, পৰিৰেকগতে জিনে;

খীণাসৰা ৰীতমলা, সমিংসু সতকোটিযো’’তি.

তত্থ পৰিৰেকগতেতি গণং পহায গতে. সমিংসূতি সন্নিপতিংসু.

যদা পন দীপঙ্করো লোকনাযকো সুদস্সননামকে পব্বতে ৰস্সাৰাসমুপগঞ্ছি, তদা কির জম্বুদীপৰাসিনো মনুস্সা অনুসংৰচ্ছরং গিরগ্গসমজ্জং করোন্তি. তস্মিং কির সমজ্জে সন্নিপতিতা মনুস্সা দসবলং দিস্ৰা ধম্মকথং সুত্ৰা তত্র পসীদিত্ৰা পব্বজিংসু. মহাপৰারণদিৰসে সত্থা তেসং অজ্ঝাসযানুকূলং ৰিপস্সনাকথং কথেসি. তং সুত্ৰা তে সব্বে সঙ্খারে সম্মসিত্ৰা ৰিপস্সনানুপুব্বেন মগ্গানুপুব্বেন চ অরহত্তং পাপুণিংসু. অথ সত্থা নৰুতিকোটিসহস্সেহি সদ্ধিং পৰারেসি. অযং ততিযো সন্নিপাতো অহোসি. তেন ৰুত্তং –

‘‘যম্হি কালে মহাৰীরো, সুদস্সনসিলুচ্চযে;

নৰুতিকোটিসহস্সেহি, পৰারেসি মহামুনি.

‘‘অহং ¶ তেন সমযেন, জটিলো উগ্গতাপনো;

অন্তলিক্খম্হি চরণো, পঞ্চাভিঞ্ঞাসু পারগূ’’তি. (ধ. স. অট্ঠ. নিদানকথা);

অযং গাথা অট্ঠসালিনিযা ধম্মসঙ্গহট্ঠকথায নিদানৰণ্ণনায দীপঙ্করবুদ্ধৰংসে লিখিতা. ইমস্মিং পন বুদ্ধৰংসে নত্থি. নত্থিভাৰোযেৰ পনস্সা যুত্ততরো. কস্মাতি চে? হেট্ঠা সুমেধকথাসু কথিতত্তাতি.

দীপঙ্করে কির ভগৰতি ধম্মং দেসেন্তে দসসহস্সানঞ্চ ৰীসতিসহস্সানঞ্চ ধম্মাভিসমযো অহোসিযেৰ. একস্স পন দ্ৰিন্নং তিণ্ণং চতুন্নন্তি চ আদিৰসেন অভিসমযানং অন্তো নত্থি. তস্মা দীপঙ্করস্স ভগৰতো সাসনং ৰিত্থারিকং বাহুজঞ্ঞং অহোসি. তেন ৰুত্তং –

‘‘দসৰীসসহস্সানং ¶ , ধম্মাভিসমযো অহু;

একদ্ৰিন্নং অভিসমযা, গণনাতো অসঙ্খিযা’’তি.

তত্থ দসৰীসসহস্সানন্তি দসসহস্সানং ৰীসতিসহস্সানঞ্চ. ধম্মাভিসমযোতি চতুসচ্চধম্মপ্পটিৰেধো. একদ্ৰিন্নন্তি একস্স চেৰ দ্ৰিন্নঞ্চ ¶ , তিণ্ণং চতুন্নং…পে… দসন্নন্তিআদিনা নযেন অসঙ্খ্যেয্যাতি অত্থো. এৰং অসঙ্খ্যেয্যাভিসমযত্তা চ ৰিত্থারিকং মহন্তপ্পত্তং বহূহি পণ্ডিতেহি দেৰমনুস্সেহি নিয্যানিকন্তি জঞ্ঞং জানিতব্বং অধিসীলসিক্খাদীহি ইদ্ধঞ্চ সমাধিআদীহি ফীতঞ্চ অহোসি. তেন ৰুত্তং –

‘‘ৰিত্থারিকং বাহুজঞ্ঞং, ইদ্ধং ফীতং অহূ তদা;

দীপঙ্করস্স ভগৰতো, সাসনং সুৰিসোধিত’’ন্তি.

তত্থ সুৰিসোধিতন্তি সুট্ঠু ভগৰতা সোধিতং ৰিসুদ্ধং কতং. দীপঙ্করং কির সত্থারং সব্বকালং ছল়ভিঞ্ঞানং মহিদ্ধিকানং ভিক্খূনং চত্তারি সতসহস্সানি পরিৰারেন্তি. তেন চ সমযেন যে সেক্খা কালকিরিযং করোন্তি, তে গরহিতা ভৰন্তি, সব্বে খীণাসৰা হুত্ৰাৰ পরিনিব্বাযন্তীতি অধিপ্পাযো. তস্মা হি তস্স ভগৰতো সাসনং সুপুপ্ফিতং সুসমিদ্ধং খীণাসৰেহি ভিক্খূহি অতিৰিয সোভিত্থ. তেন ৰুত্তং –

‘‘চত্তারি ¶ সতসহস্সানি, ছল়ভিঞ্ঞা মহিদ্ধিকা;

দীপঙ্করং লোকৰিদুং, পরিৰারেন্তি সব্বদা.

‘‘যে কেচি তেন সমযেন, জহন্তি মানুসং ভৰং;

অপ্পত্তমানসা সেখা, গরহিতা ভৰন্তি তে.

‘‘সুপুপ্ফিতং পাৰচনং, অরহন্তেহি তাদিহি;

খীণাসৰেহি ৰিমলেহি, উপসোভতি সব্বদা’’তি.

তত্থ চত্তারি সতসহস্সানীতি গণনায দস্সিতা এৰং দস্সিতগণনা ইমে ভিক্খূতি দস্সনত্থং ‘‘ছল়ভিঞ্ঞা মহিদ্ধিকা’’তি ৰুত্তন্তি এৰমত্থো গহেতব্বো. অথ ৰা ছল়ভিঞ্ঞা মহিদ্ধিকাতি ছল়ভিঞ্ঞানং মহিদ্ধিকানন্তি সামিঅত্থে পচ্চত্তৰচনং দট্ঠব্বং. পরিৰারেন্তি সব্বদাতি নিচ্চকালং দসবলং পরিৰারেন্তি, ভগৰন্তং মুঞ্চিত্ৰা কত্থচি ন গচ্ছন্তীতি অধিপ্পাযো. তেন সমযেনাতি তস্মিং সমযে. অযং পন সময-সদ্দো সমৰাযাদীসু নৰসু অত্থেসু দিস্সতি. যথাহ –

‘‘সমৰাযে ¶ ¶ খণে কালে, সমূহে হেতুদিট্ঠিসু;

পটিলাভে পহানে চ, পটিৰেধে চ দিস্সতী’’তি. (দী. নি. অট্ঠ. ১.১; ম. নি. অট্ঠ. ১.মূলপরিযাযসুত্তৰণ্ণনা; সং. নি. অট্ঠ. ১.১.১; অ. নি. অট্ঠ. ১.১.১; ধ. স. অট্ঠ. ১ কামাৰচরকুসলপদভাজনীয; খু. পা. অট্ঠ. মংগলসুত্তৰণ্ণনা, এৰমিচ্চাদিপাঠৰণ্ণনা; পটি. ম. অট্ঠ. ২.১.১৮৪);

ইধ সো কালে দট্ঠব্বো; তস্মিং কালেতি অত্থো. মানুসং ভৰন্তি মনুস্সভাৰং. অপ্পত্তমানসাতি অপ্পত্তং অনধিগতং মানসং যেহি তে অপ্পত্তমানসা. মানসন্তি রাগস্স চ চিত্তস্স চ অরহত্তস্স চ অধিৰচনং. ‘‘অন্তলিক্খচরো পাসো, য্ৰাযং চরতি মানসো’’তি (সং. নি. ১.১৫১; মহাৰ. ৩৩) হি এত্থ পন রাগো ‘‘মানসো’’তি ৰুত্তো. ‘‘চিত্তং মনো মানসং হদযং পণ্ডর’’ন্তি (ধ. স. ৬; ৰিভ. ১৮৪; মহানি. ১; চূল়নি. পারাযনানুগীতিগাথানিদ্দেস ১১৪) এত্থ চিত্তং. ‘‘অপ্পত্তমানসো সেখো, কালং কযিরা জনেসুতা’’তি ¶ (সং. নি. ১.১৫৯) এত্থ অরহত্তং. ইধাপি অরহত্তমেৰ অধিপ্পেতং (ধ. স. অট্ঠ. ৫ কামাৰচরকুসলনিদ্দেসৰারকথা; মহানি. অট্ঠ. ১). তস্মা অপ্পত্তঅরহত্তফলাতি অত্থো. সেখাতি কেনট্ঠেন সেখা? সেখধম্মপটিলাভট্ঠেন সেখা. ৰুত্তঞ্হেতং – ‘‘কিত্তাৰতা নু খো, ভন্তে, সেখো হোতীতি? ইধ, ভিক্খৰে, ভিক্খু সেখায সম্মাদিট্ঠিযা সমন্নাগতো হোতি…পে… সেখেন সম্মাসমাধিনা সমন্নাগতো হোতি. এত্তাৰতা খো, ভিক্খৰে, ভিক্খু সেখো হোতী’’তি (সং. নি. ৫.১৩). অপি চ সিক্খন্তীতি সেখা. ৰুত্তঞ্হেতং – ‘‘সিক্খতি, সিক্খতীতি খো, ভিক্খু, তস্মা সেখোতি ৰুচ্চতি. কিঞ্চ সিক্খতি? অধিসীলম্পি সিক্খতি অধিচিত্তম্পি অধিপঞ্ঞম্পি সিক্খতীতি খো, ভিক্খু, তস্মা সেখোতি ৰুচ্চতী’’তি (অ. নি. ৩.৮৬).

সুপুপ্ফিতন্তি সুট্ঠু ৰিকসিতং. পাৰচনন্তি পসত্থং ৰচনং, ৰুদ্ধিপ্পত্তং ৰা ৰচনং পৰচনং, পৰচনমেৰ পাৰচনং, সাসনন্তি অত্থো. উপসোভতীতি অভিরাজতি অতিৰিরোচতি. সব্বদাতি সব্বকালং. ‘‘উপসোভতি সদেৰকে’’তিপি পাঠো.

তস্স দীপঙ্করস্স ভগৰতো রম্মৰতী নাম নগরং অহোসি, সুদেৰো নাম খত্তিযো পিতা, সুমেধা নাম দেৰী মাতা, সুমঙ্গলো চ তিস্সো চাতি দ্ৰে অগ্গসাৰকা, সাগতো নাম উপট্ঠাকো, নন্দা চ সুনন্দা চাতি দ্ৰে অগ্গসাৰিকা, বোধি তস্স ভগৰতো পিপ্ফলিরুক্খো অহোসি, অসীতিহত্থুব্বেধো, সতসহস্সৰস্সানি আযূতি. কিং পনিমেসং জাতনগরাদীনং দস্সনে পযোজনন্তি চে? ৰুচ্চতে – যস্স যদি নেৰ জাতনগরং ন পিতা ন মাতা পঞ্ঞাযেয্য, ইমস্স পন নেৰ জাতনগরং ¶ ন পিতা ন মাতা পঞ্ঞাযতি, দেৰো ৰা সক্কো ৰা যক্খো ৰা মারো ৰা ব্রহ্মা ৰা এস মঞ্ঞে, দেৰানম্পি ঈদিসং পাটিহারিযং অনচ্ছরিযন্তি ¶ মঞ্ঞমানা ন সোতব্বং ন সদ্দহিতব্বং মঞ্ঞেয্যুং, ততো অভিসমযো ন ভৰেয্য, অসতি অভিসমযে নিরত্থকো বুদ্ধুপ্পাদো ভৰেয্য, অনিয্যানিকং সাসনং. তস্মা সব্ববুদ্ধানং জাতনগরাদিকো পরিচ্ছেদো দস্সেতব্বো. তেন ৰুত্তং –

‘‘নগরং রম্মৰতী নাম, সুদেৰো নাম খত্তিযো;

সুমেধা নাম জনিকা, দীপঙ্করস্স সত্থুনো.

‘‘সুমঙ্গলো চ তিস্সো চ, অহেসুং অগ্গসাৰকা;

সাগতো নামুপট্ঠাকো, দীপঙ্করস্স সত্থুনো.

‘‘নন্দা ¶ চেৰ সুনন্দা চ, অহেসুং অগ্গসাৰিকা;

বোধি তস্স ভগৰতো, পিপ্ফলীতি পৰুচ্চতি.

‘‘অসীতিহত্থমুব্বেধো, দীপঙ্করো মহামুনি;

সোভতি দীপরুক্খোৰ, সালরাজাৰ ফুল্লিতো.

‘‘সতসহস্সৰস্সানি, আযু তস্স মহেসিনো;

তাৰতা তিট্ঠমানো সো, তারেসি জনতং বহুং.

‘‘জোতযিত্ৰান সদ্ধম্মং, সন্তারেত্ৰা মহাজনং;

জলিত্ৰা অগ্গিক্খন্ধোৰ, নিব্বুতো সো সসাৰকো.

‘‘সা চ ইদ্ধি সো চ যসো, তানি চ পাদেসু চক্করতনানি;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ সুদেৰো নাম খত্তিযোতি সুদেৰো নামস্স খত্তিযো পিতা অহোসীতি অত্থো. জনিকাতি জনেত্তি. পিপ্ফলীতি পিলক্খকপীতনরুক্খো বোধি. অসীতিহত্থমুব্বেধোতি অসীতিহত্থং উচ্চগ্গতো. দীপরুক্খো ৰাতি সম্পজ্জলিতদীপমালাকুলো দীপরুক্খো ৰিয আরোহপরিণাহসণ্ঠানপারিপূরিসম্পন্নো দ্ৰত্তিংসৰরলক্খণানুব্যঞ্জনসমলঙ্কতসরীরো ৰিপ্ফুরিতরংসিজালাৰিসরতারাগণসমুজ্জলমিৰ গগনতলং ভগৰা ¶ ধরমানকালে সোভতীতি সোভিত্থ. সালরাজাৰ ফুল্লিতোতি পুপ্ফিতো সব্বফালিফুল্লো সালরাজরুক্খো ৰিয চ সব্বফালিফুল্লো যোজনসতুব্বেধো পারিচ্ছত্তো ৰিয চ অসীতিহত্থুব্বেধো ভগৰা অতিৰিয সোভতি.

সতসহস্সৰস্সানীতি ৰস্সসতসহস্সানি তস্স আযূতি অত্থো. তাৰতা তিট্ঠমানোতি তাৰতকং কালং তিট্ঠমানো. জনতন্তি ¶ জনসমূহং. সন্তারেত্ৰা মহাজনন্তি তারযিত্ৰা মহাজনং. ‘‘সন্তারেত্ৰা সদেৰক’’ন্তিপি পাঠো, তস্স সদেৰকং লোকন্তি অত্থো. সা চ ইদ্ধীতি সা চ সম্পত্তি আনুভাৰো. সো চ যসোতি সো চ পরিৰারো. সব্বং তমন্তরহিতন্তি তং সব্বং ৰুত্তপ্পকারং সম্পত্তিজাতং অন্তরহিতং অপগতন্তি অত্থো. ননু রিত্তা সব্বসঙ্খারাতি সব্বে পন সঙ্খতধম্মা ননু রিত্তা তুচ্ছা, নিচ্চসারাদিরহিতাতি অত্থো.

এত্থ ¶ পন নগরাদিপরিচ্ছেদো পাল়িযমাগতোৰ. সম্বহুলৰারো পন নাগতো, সো আনেত্ৰা দীপেতব্বো. সেয্যথিদং – পুত্তপরিচ্ছেদো, ভরিযাপরিচ্ছেদো, পাসাদপরিচ্ছেদো, অগারৰাসপরিচ্ছেদো, নাটকিত্থিপরিচ্ছেদো, অভিনিক্খমনপরিচ্ছেদো, পধানপরিচ্ছেদো, ৰিহারপরিচ্ছেদো, উপট্ঠাকপরিচ্ছেদোতি. এতেসম্পি দীপনে কারণং হেট্ঠা ৰুত্তমেৰ. তস্স পন দীপঙ্করস্স ভরিযানং তিসতসহস্সং অহোসি. তস্স অগ্গমহেসী পদুমা নাম, তস্স পন পুত্তো উসভক্খন্ধো নাম. তেন ৰুত্তং –

‘‘ভরিযা পদুমা নাম, ৰিবুদ্ধপদুমাননা;

অত্রজো উসভক্খন্ধো, দীপঙ্করস্স সত্থুনো.

‘‘হংসা কোঞ্চা মযূরাখ্যা, পাসাদাপি তযো মতা;

দসৰস্সসহস্সানি, অগারং অৰসী কির.

‘‘হত্থিযানেন নিক্খন্তো, নন্দারামে জিনো ৰসী;

নন্দো নামস্সুপট্ঠাকো, লোকানন্দকরো কিরা’’তি.

সব্ববুদ্ধানং পন পঞ্চ ৰেমত্তানি হোন্তি আযুৰেমত্তং পমাণৰেমত্তং কুলৰেমত্তং পধানৰেমত্তং রস্মিৰেমত্তন্তি. তত্থ আযুৰেমত্তং নাম কেচি দীঘাযুকা ¶ হোন্তি কেচি অপ্পাযুকা. তথা হি দীপঙ্করস্স পন ভগৰতো ৰস্সসতসহস্সং আযুপ্পমাণং অহোসি, অম্হাকং ভগৰতো ৰস্সসতং.

পমাণৰেমত্তং নাম কেচি দীঘা হোন্তি কেচি রস্সা. তথা হি দীপঙ্করো অসীতিহত্থপ্পমাণো অহোসি, অম্হাকং পন ভগৰা অট্ঠারসহত্থপ্পমাণো.

কুলৰেমত্তং নাম কেচি খত্তিযকুলে নিব্বত্তন্তি কেচি ব্রাহ্মণকুলে. তথা হি দীপঙ্করাদযো খত্তিযকুলে নিব্বত্তিংসু, ককুসন্ধকোণাগমনাদযো ব্রাহ্মণকুলে.

পধানৰেমত্তং নাম কেসঞ্চি পধানং ইত্তরমেৰ হোতি যথা কস্সপস্স ভগৰতো ¶ , কেসঞ্চি অদ্ধনিযং অম্হাকং ভগৰতো ৰিয.

রস্মিৰেমত্তং ¶ নাম মঙ্গলস্স ভগৰতো সরীরস্মি দসসহস্সিলোকধাতুং ফরিত্ৰা অট্ঠাসি, অম্হাকং ভগৰতো ব্যামমত্তং. তত্র রস্মিৰেমত্তং অজ্ঝাসযপটিবদ্ধং হোতি. যো যত্তকং ইচ্ছসি, তস্স তত্তকং সরীরপ্পভা ফরতি. মঙ্গলস্স পন ‘‘দসসহস্সিলোকধাতুং ফরতূ’’তি অজ্ঝাসযো অহোসি. পটিৰিদ্ধগুণেসু পন কস্সচি ৰেমত্তং নাম নত্থি (দী. নি. অট্ঠ. ২.১২ আদযো).

তথা সব্ববুদ্ধানং চত্তারি অৰিজহিতট্ঠানানি নাম হোন্তি. বোধিপল্লঙ্কো অৰিজহিতো একস্মিংযেৰ ঠানে হোতি. ধম্মচক্কপ্পৰত্তনট্ঠানং ইসিপতনে মিগদাযে অৰিজহিতমেৰ হোতি. দেৰোরোহণকালে সঙ্কস্সনগরদ্ৰারে পঠমপাদক্কমো অৰিজহিতোৰ হোতি. জেতৰনে গন্ধকুটিযা চত্তারি মঞ্চপাদট্ঠানানি অৰিজহিতানেৰ হোন্তি. ৰিহারোপি অৰিজহিতোৰ. সো পন খুদ্দকো ৰা মহন্তো ৰা হোতি.

অপরং পন অম্হাকংযেৰ ভগৰতো সহজাতপরিচ্ছেদঞ্চ নক্খত্তপরিচ্ছেদঞ্চ ৰিসেসং. অম্হাকং সব্বঞ্ঞুবোধিসত্তেন কির সদ্ধিং রাহুলমাতা আনন্দত্থেরো ছন্নো কণ্ডকো অস্সরাজা নিধিকুম্ভা মহাবোধিরুক্খো কাল়ুদাযীতি ইমানি সত সহজাতানি. মহাপুরিসো কির উত্তরাসাল়্হনক্খত্তেনেৰ মাতুকুচ্ছিং ওক্কমি, মহাভিনিক্খমনং নিক্খমি ¶ , ধম্মচক্কং পৰত্তেসি, যমকপাটিহারিযং অকাসি. ৰিসাখনক্খত্তেন জাতো চ অভিসম্বুদ্ধো চ পরিনিব্বুতো চ, মাঘনক্খত্তেন তস্স সাৰকসন্নিপাতো চেৰ আযুসঙ্খারৰোসজ্জনঞ্চ অহোসি, অস্সযুজনক্খত্তেন দেৰোরোহণন্তি এত্তকং আহরিত্ৰা দীপেতব্বং. অযং সম্বহুলৰারপরিচ্ছেদো. সেসগাথা সউত্তানা এৰাতি.

ইতি ভগৰা দীপঙ্করো যাৰতাযুকং ঠত্ৰা সব্ববুদ্ধকিচ্চং কত্ৰা অনুক্কমেন অনুপাদিসেসায নিব্বানধাতুযা পরিনিব্বাযি.

যস্মিং কির কপ্পে দীপঙ্করদসবলো উদপাদি, তস্মিং অঞ্ঞেপি তণ্হঙ্করো, মেধঙ্করো, সরণঙ্করোতি তযো বুদ্ধা অহেসুং. তেসং সন্তিকে বোধিসত্তস্স ব্যাকরণং নত্থি. তস্মা তে ইধ ন দস্সিতা. অট্ঠকথাযং পন তম্হা কপ্পা আদিতো পট্ঠাযুপ্পন্নুপ্পন্নে সব্ববুদ্ধে দস্সেতুং ইদং ৰুত্তং –

‘‘তণ্হঙ্করো মেধঙ্করো, অথোপি সরণঙ্করো;

দীপঙ্করো চ সম্বুদ্ধো, কোণ্ডঞ্ঞো দ্ৰিপদুত্তমো.

‘‘মঙ্গলো ¶ চ সুমনো চ, রেৰতো সোভিতো মুনি;

অনোমদস্সী পদুমো, নারদো পদুমুত্তরো.

‘‘সুমেধো চ সুজাতো চ, পিযদস্সী মহাযসো;

অত্থদস্সী ধম্মদস্সী, সিদ্ধত্থো লোকনাযকো.

‘‘তিস্সো ফুস্সো চ সম্বুদ্ধো, ৰিপস্সী সিখি ৰেস্সভূ;

ককুসন্ধো কোণাগমনো, কস্সপো চাপি নাযকো.

‘‘এতে ¶ অহেসুং সম্বুদ্ধা, ৰীতরাগা সমাহিতা;

সতরংসীৰ উপ্পন্না, মহাতমৰিনোদনা;

জলিত্ৰা অগ্গিক্খন্ধাৰ, নিব্বুতা তে সসাৰকা’’তি. (অপ. অট্ঠ. ১.দূরেনিদানকথা; চরিযা. অট্ঠ. নিদানকথা; জা. অট্ঠ. ১.দূরেনিদানকথা);

এত্তাৰতা নাতিসঙ্খেপৰিত্থারৰসেন কতায

মধুরত্থৰিলাসিনিযা বুদ্ধৰংস-অট্ঠকথায

দীপঙ্করবুদ্ধৰংসৰণ্ণনা নিট্ঠিতা.

দীপঙ্করে ¶ ¶ কির ভগৰতি পরিনিব্বুতে তস্স সাসনং ৰস্সসতসহস্সং পৰত্তিত্থ. অথ বুদ্ধানুবুদ্ধানং সাৰকানং অন্তরধানেন সাসনম্পিস্স অন্তরধাযি. অথস্স অপরভাগে একমসঙ্খ্যেয্যমতিক্কমিত্ৰা একস্মিং কপ্পে কোণ্ডঞ্ঞো নাম সত্থা উদপাদি. সো পন ভগৰা সোল়সঅসঙ্খ্যেয্যং কপ্পানঞ্চ সতসহস্সং পারমিযো পূরেত্ৰা বোধিঞাণং পরিপাচেত্ৰা ৰেস্সন্তরত্তভাৰসদিসে অত্তভাৰে ঠত্ৰা ততো চৰিত্ৰা তুসিতপুরে নিব্বত্তিত্ৰা তত্থ যাৰতাযুকং ঠত্ৰা দেৰতানং পটিঞ্ঞং দত্ৰা তুসিতপুরতো চৰিত্ৰা রম্মৰতীনগরে সুনন্দস্স নাম রঞ্ঞো কুলে সুজাতায নাম দেৰিযা কুচ্ছিস্মিং পটিসন্ধিং অগ্গহেসি. তস্সপি পটিসন্ধিক্খণে দীপঙ্করবুদ্ধৰংসে ৰুত্তপ্পকারানি দ্ৰত্তিংস পাটিহারিযানি নিব্বত্তিংসু. সো দেৰতাহি কতারক্খসংৰিধানো দসন্নং মাসানং অচ্চযেন মাতুকুচ্ছিতো নিক্খমিত্ৰা সব্বসত্তুত্তরো উত্তরাভিমুখো সত্তপদৰীতিহারেন গন্ত্ৰা সব্বা চ দিসা ৰিলোকেত্ৰা আসভিং ৰাচং নিচ্ছারেসি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি (দী. নি. ২.৩১; ম. নি. ৩.২০৭).

ততো কুমারস্স নামকরণদিৰসে নামং করোন্তা ‘‘কোণ্ডঞ্ঞো’’তি নামমকংসু. সো হি ভগৰা কোণ্ডঞ্ঞগোত্তো অহোসি. তস্স কির তযো পাসাদা অহেসুং – রাম, সুরাম, সুভনামকা পরমরমণীযা. তেসু তীণি সতসহস্সানি নাটকিত্থীনং নচ্চগীতৰাদিতকুসলানং সব্বকালং পচ্চুপট্ঠিতানি অহেসুং. তস্স রুচিদেৰী নাম ¶ অগ্গমহেসী অহোসি. ৰিজিতসেনো নামস্স পুত্তো অহোসি. সো দসৰস্সসহস্সানি অগারং অজ্ঝাৰসি.

সো পন জিণ্ণব্যাধিমতপব্বজিতে দিস্ৰা আজঞ্ঞরথেন নিক্খমিত্ৰা পব্বজিত্ৰা দস মাসে পধানচরিযং চরি. কোণ্ডঞ্ঞকুমারং পন পব্বজন্তং দস জনকোটিযো অনুপব্বজিংসু. সো তেহি পরিৰুতো দস মাসে পধানচরিযং চরিত্ৰা ৰিসাখপুণ্ণমায সুনন্দগামে সমসহিতঘনপযোধরায যসোধরায নাম সেট্ঠিধীতায দিন্নং পরমমধুরং মধুপাযাসং পরিভুঞ্জিত্ৰা ফলপল্লৰঙ্কুরসমলঙ্কতে ¶ সালৰনে দিৰাৰিহারং ৰীতিনামেত্ৰা ¶ সাযন্হসমযে গণং পহায সুনন্দকাজীৰকেন দিন্না অট্ঠ তিণমুট্ঠিযো গহেত্ৰা সালকল্যাণিরুক্খং তিক্খত্তুং পদক্খিণং কত্ৰা পুব্বদিসাভাগং ওলোকেত্ৰা বোধিরুক্খং পিট্ঠিতো কত্ৰা অট্ঠপণ্ণাসহত্থৰিত্থতং তিণসন্থরং সন্থরিত্ৰা পল্লঙ্কং আভুজিত্ৰা চতুরঙ্গৰীরিযং অধিট্ঠায মারবলং ৰিধমিত্ৰা রত্তিযা পঠমযামে পুব্বেনিৰাসানুস্সতিঞাণং ৰিসোধেত্ৰা মজ্ঝিমযামে দিব্বচক্খুং ৰিসোধেত্ৰা পচ্ছিমযামে পচ্চযাকারং সম্মসিত্ৰা আনাপানচতুত্থজ্ঝানতো ৰুট্ঠায পঞ্চসু খন্ধেসু অভিনিৰিসিত্ৰা উদযব্বযৰসেন সমপঞ্ঞাস লক্খণানি দিস্ৰা যাৰ গোত্রভুঞাণং ৰিপস্সনং ৰড্ঢেত্ৰা চত্তারি মগ্গঞাণানি চত্তারি চ ফলঞাণানি চতস্সো পটিসম্ভিদা চতুযোনিপরিচ্ছেদকঞাণং পঞ্চগতিপরিচ্ছেদকঞাণং ছ অসাধারণঞাণানি সকলে চ বুদ্ধগুণে পটিৰিজ্ঝিত্ৰা পরিপুণ্ণসঙ্কপ্পো বোধিমূলে নিসিন্নোৰ –

‘‘অনেকজাতিসংসারং, সন্ধাৰিস্সং অনিব্বিসং;

গহকারং গৰেসন্তো, দুক্খা জাতি পুনপ্পুনং.

‘‘গহকারক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, গহকূটং ৰিসঙ্খতং;

ৰিসঙ্খারগতং চিত্তং, তণ্হানং খযমজ্ঝগা. (ধ. প. ১৫৩-১৫৪);

‘‘অযোঘনহতস্সেৰ, জলতো জাতৰেদসো;

অনুপুব্বূপসন্তস্স, যথা ন ঞাযতে গতি.

‘‘এৰং সম্মা ৰিমুত্তানং, কামবন্ধোঘতারিনং;

পঞ্ঞাপেতুং গতী নত্থি, পত্তানং অচলং সুখ’’ন্তি. (উদা. ৮০) –

এৰং উদানং উদানেত্ৰা সত্তসত্তাহং বোধিমূলেযেৰ ফলসমাপত্তিসুখেন ৰীতিনামেত্ৰা অট্ঠমে সত্তাহে ব্রহ্মুনো অজ্ঝেসনং পটিচ্চ – ‘‘কস্স নু খো অহং পঠমং ধম্মং দেসেয্য’’ন্তি (ম. নি. ১.২৮৪; ২.৩৪১; মহাৰ. ১০) উপধারেন্তো অত্তনা সদ্ধিং পব্বজিতা দস ভিক্খুকোটিযো অদ্দস. ‘‘ইমে পন কুলপুত্তা সমুপচিতকুসলমূলা মং পব্বজন্তং ¶ অনুপব্বজিতা মযা সদ্ধিং পধানং চরিত্ৰা মং উপট্ঠহিংসু, হন্দাহং ইমেসং সব্বপঠমং ধম্মং দেসেয্য’’ন্তি ¶ এৰং উপধারেত্ৰা – ‘‘ইদানি পন তে কত্থ ৰসন্তী’’তি ওলোকেন্তো – ‘‘ইতো অট্ঠারসযোজনিকে ¶ অরুন্ধৰতীনগরে দেৰৰনে ৰিহরন্তী’’তি দিস্ৰা – ‘‘তেসং ধম্মং দেসেতুং গমিস্সামী’’তি পত্তচীৰরমাদায সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰ বোধিমূলে অন্তরহিতো দেৰৰনে পাতুরহোসি.

তস্মিঞ্চ সমযে তা দস ভিক্খুকোটিযো অরুন্ধৰতীনগরং উপনিস্সায দেৰৰনে ৰিহরন্তি. তে পন ভিক্খূ দসবলং দূরতোৰ আগচ্ছন্তং দিস্ৰা পসন্নমানসা পচ্চুগ্গন্ত্ৰা, ভগৰতো পত্তচীৰরং পটিগ্গহেত্ৰা, বুদ্ধাসনং পঞ্ঞাপেত্ৰা, সত্থু গারৰং কত্ৰা, ভগৰন্তং ৰন্দিত্ৰা, পরিৰারেত্ৰা একমন্তং নিসীদিংসু. তত্র কোণ্ডঞ্ঞো দসবলো মুনিগণপরিৰুতো বুদ্ধাসনে নিসিন্নো তিদসগণপরিৰুতো দসসতনযনো ৰিয ৰিমলগগনতলগতো সরদসমযরজনিকরো ৰিয তারাগণপরিৰুতো পুণ্ণচন্দো ৰিয ৰিরোচিত্থ. অথ সত্থা তেসং সব্ববুদ্ধনিসেৰিতং অনুত্তরং তিপরিৰট্টং দ্ৰাদসাকারং ধম্মচক্কপ্পৰত্তনসুত্তন্তং কথেত্ৰা দসভিক্খুকোটিপ্পমুখা সতসহস্সদেৰমনুস্সকোটিযো ধম্মামতং পাযেসি. তেন ৰুত্তং –

‘‘দীপঙ্করস্স অপরেন, কোণ্ডঞ্ঞো নাম নাযকো;

অনন্ততেজো অমিতযসো, অপ্পমেয্যো দুরাসদো.

‘‘ধরণূপমো খমনেন, সীলেন সাগরূপমো;

সমাধিনা মেরূপমো, ঞাণেন গগনূপমো.

‘‘ইন্দ্রিযবলবোজ্ঝঙ্গ-মগ্গসচ্চপ্পকাসনং;

পকাসেসি সদা বুদ্ধো হিতায সব্বপাণিনং.

‘‘ধম্মচক্কং পৰত্তেন্তে, কোণ্ডঞ্ঞে লোকনাযকে;

কোটিসতসহস্সানং, পঠমাভিসমযো অহূ’’তি.

তত্থ দীপঙ্করস্স অপরেনাতি দীপঙ্করস্স সত্থুনো অপরভাগেতি অত্থো. কোণ্ডঞ্ঞো নামাতি অত্তনো গোত্তৰসেন সমধিগতনামধেয্যো. নাযকোতি ৰিনাযকো. অনন্ততেজোতি অত্তনো সীলগুণঞাণপুঞ্ঞতেজেন অনন্ততেজো. হেট্ঠতো অৰীচি উপরি ভৰগ্গং তিরিযতো অনন্তা লোকধাতুযো এত্থন্তরে একপুগ্গলোপি ¶ তস্স ¶ মুখং ওলোকেত্ৰা ঠাতুং সমত্থো নাম নত্থি. তেন ৰুত্তং ¶ ‘‘অনন্ততেজো’’তি. অমিতযসোতি অনন্তপরিৰারো. তস্স হি ভগৰতো ৰস্সসতসহস্সানি যাৰ পরিনিব্বানসমযং এত্থন্তরে ভিক্খুপরিসায গণনপরিচ্ছেদো নাম নাহোসি. তস্মা ‘‘অমিতযসো’’তি ৰুচ্চতি. অমিতগুণকিত্তিপি ‘‘অমিতযসো’’তি ৰুচ্চতি. অপ্পমেয্যোতি গুণগণপরিমাণৰসেন নপ্পমেয্যোতি অপ্পমেয্যো. যথাহ –

‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩; চরিযা. অট্ঠ. নিদানকথা);

তস্মা অপ্পমেয্যগুণগণত্তা ‘‘অপ্পমেয্যো’’তি ৰুচ্চতি. দুরাসদোতি দুরুপসঙ্কমনীযো, আসজ্জ ঘট্টেত্ৰা উপসঙ্কমিতুমসক্কুণেয্যভাৰতো দুরাসদো, দুরভিভৰনীযোতি অত্থো.

ধরণূপমোতি ধরণীসমো. খমনেনাতি খন্তিযা, চতুনহুতাধিকদ্ৰিযোজনসতসহস্সবহলা মহাপথৰী ৰিয পকতিৰাতেন লাভালাভইট্ঠানিট্ঠাদীহি অকম্পনভাৰতো ‘‘ধরণূপমো’’তি ৰুচ্চতি. সীলেন সাগরূপমোতি সীলসংৰরেন ৰেলানাতিক্কমনভাৰেন সাগরসমো. ‘‘মহাসমুদ্দো, ভিক্খৰে, ঠিতধম্মো ৰেলং নাতিৰত্ততী’’তি (অ. নি. ৮.১৯; চূল়ৰ. ৩৮৪; মি. প. ৬.২.১০) হি ৰুত্তং.

সমাধিনা মেরূপমোতি সমাধিপটিপক্খভূতধম্মজনিতকম্পাভাৰতো মেরুনা গিরিৰরেন সমো, সদিসোতি অত্থো. মেরুগিরিৰরো ৰিয থিরতরসরীরোতি ৰা. ঞাণেন গগনূপমোতি এত্থ ভগৰতো ঞাণস্স অনন্তভাৰেন অনন্তাকাসেন উপমা কতা. চত্তারি অনন্তানি ৰুত্তানি ভগৰতা. যথাহ –

‘‘সত্তকাযো চ আকাসো, চক্কৰাল়া চনন্তকা;

বুদ্ধঞাণং অপ্পমেয্যং, ন সক্কা এতে ৰিজানিতু’’ন্তি. (বু. ৰং. ১.৬৪);

তস্মা অনন্তস্স ঞাণস্স অনন্তেন আকাসেন উপমা কতাতি.

ইন্দ্রিযবলবোজ্ঝঙ্গমগ্গসচ্চপ্পকাসনন্তি ¶ এতেসং ইন্দ্রিযবলবোজ্ঝঙ্গমগ্গসচ্চানং গহণেন সতিপট্ঠানসম্মপ্পধানিদ্ধিপাদাপি গহিতাৰ হোন্তি. তস্মা ইন্দ্রিযাদীনং চতুসঙ্খেপানং ৰসেন সত্তত্তিংসবোধিপক্খিযধম্মানং ¶ পকাসনধম্মং পকাসেসি, দেসেসীতি অত্থো. হিতাযাতি হিতত্থং. ধম্মচক্কং ¶ পৰত্তেন্তেতি দেসনাঞাণে পৰত্তিযমানে.

ততো অপরভাগে মহামঙ্গলসমাগমে দসসু চক্কৰাল়সহস্সেসু দেৰতাযো সুখুমে অত্তভাৰে মাপেত্ৰা ইমস্মিঞ্ঞেৰ চক্কৰাল়ে সন্নিপতিংসু. তত্থ কির অঞ্ঞতরো দেৰপুত্তো কোণ্ডঞ্ঞদসবলং মঙ্গলপঞ্হং পুচ্ছি. তস্স ভগৰা মঙ্গলানি কথেসি. তত্থ নৰুতিকোটিসহস্সানি অরহত্তং পাপুণিংসু. সোতাপন্নাদীনং গণনপরিচ্ছেদো নাম নাহোসি. তেন ৰুত্তং –

‘‘ততো পরম্পি দেসেন্তে, নরমরূনং সমাগমে;

নৰুতিকোটিসহস্সানং, দুতিযাভিসমযো অহূ’’তি.

তত্থ ততো পরম্পীতি ততো অপরভাগেপি. দেসেন্তেতি ভগৰতি ধম্মং দেসেন্তে. নরমরূনন্তি নরানঞ্চেৰ অমরানঞ্চ, যদা পন ভগৰা গগনতলে তিত্থিযমানমদ্দনং যমকপাটিহারিযং করোন্তো ধম্মং দেসেসি তদা অসীতিকোটিসহস্সানি অরহত্তং পাপুণিংসু. তীসু ফলেসু পতিট্ঠিতা গণনপথং ৰীতিৰত্তা. তেন ৰুত্তং –

‘‘তিত্থিযে অভিমদ্দন্তো, যদা ধম্মমদেসযি;

অসীতিকোটিসহস্সানং, ততিযাভিসমযো অহূ’’তি.

তত্থ তদা-সদ্দং আনেত্ৰা অত্থো দট্ঠব্বো. যদা ভগৰা ধম্মং দেসেসি, তদা অসীতিকোটিসহস্সানং ধম্মাভিসমযো অহূতি.

কোণ্ডঞ্ঞো কির সত্থা অভিসম্বোধিং পত্ৰা পঠমৰস্সং চন্দৰতীনগরং উপনিস্সায চন্দারামে ৰিহাসি. তত্থ সুচিন্ধরস্স নাম ব্রাহ্মণমহাসালস্স পুত্তো ভদ্দমাণৰো নাম যসোধরব্রাহ্মণস্স পুত্তো সুভদ্দমাণৰো চ কোণ্ডঞ্ঞস্স বুদ্ধস্স সম্মুখা ধম্মদেসনং সুত্ৰা পসন্নমানসা দসহি মাণৰকসহস্সেহি সদ্ধিং তস্স সন্তিকে পব্বজিত্ৰা অরহত্তং পাপুণিংসু.

অথ ¶ কোণ্ডঞ্ঞো সত্থা জেট্ঠমাসপুণ্ণমায সুভদ্দত্থেরপ্পমুখেন কোটিসতসহস্সেন পরিৰুতো পাতিমোক্খমুদ্দিসি, সো পঠমো সন্নিপাতো অহোসি. ততো অপরভাগে কোণ্ডঞ্ঞসত্থুনো পুত্তে ৰিজিতসেনে ¶ নাম অরহত্তং পত্তে তংপমুখস্স কোটিসহস্সস্স মজ্ঝে ভগৰা পাতিমোক্খং উদ্দিসি, সো দুতিযো সন্নিপাতো অহোসি. অথাপরেন সমযেন দসবলো জনপদচারিকং চরন্তো উদেনরাজানং নাম নৰুতিকোটিজনপরিৰারং পব্বাজেসি সদ্ধিং তায পরিসায. তস্মিং পন অরহত্তং পত্তে তংপমুখেহি নৰুতিযা অরহন্তকোটীহি ভগৰা পরিৰুতো পাতিমোক্খং উদ্দিসি, সো ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, কোণ্ডঞ্ঞস্স মহেসিনো;

খীণাসৰানং ৰিমলানং, সন্তচিত্তান তাদিনং.

‘‘কোটিসতসহস্সানং, পঠমো আসি সমাগমো;

দুতিযো কোটিসহস্সানং, ততিযো নৰুতিকোটিন’’ন্তি.

তদা ¶ কির অম্হাকং বোধিসত্তো ৰিজিতাৰী নাম চক্কৰত্তী হুত্ৰা চন্দৰতীনগরে পটিৰসতি. সো কির অনেকনরৰরপরিৰুতো সলিলনিধিনিৰসনং সমেরুযুগন্ধরং অপরিমিতৰসুধরং ৰসুন্ধরং অদণ্ডেন অসত্থেন ধম্মেন পরিপালেতি. অথ কোণ্ডঞ্ঞো বুদ্ধোপি কোটিসতসহস্সখীণাসৰপরিৰুতো জনপদচারিকং চরমানো অনুপুব্বেন চন্দৰতীনগরং সম্পাপুণি.

সো ৰিজিতাৰী কির রাজা – ‘‘সম্মাসম্বুদ্ধো কির অম্হাকং নগরং অনুপ্পত্তো’’তি সুত্ৰা পচ্চুগ্গন্ত্ৰা ভগৰতো ৰসনট্ঠানং সংৰিদহিত্ৰা স্ৰাতনায সদ্ধিং ভিক্খুসঙ্ঘেন নিমন্তেত্ৰা পুনদিৰসে ভত্তৰিধিং সুট্ঠু পটিযাদেত্ৰা কোটিসতসহস্সসঙ্খস্স বুদ্ধপ্পমুখস্স ভিক্খুসঙ্ঘস্স মহাদানং অদাসি. বোধিসত্তো ভগৰন্তং ভোজেত্ৰা অনুমোদনাৰসানে – ‘‘ভন্তে, তেমাসং মহাজনসঙ্গহং করোন্তো ইধেৰ ৰসথা’’তি যাচিত্ৰা তযো মাসে নিরন্তরং বুদ্ধপ্পমুখস্স ভিক্খুসঙ্ঘস্স অসদিসমহাদানং অদাসি.

অথ সত্থা বোধিসত্তং – ‘‘অনাগতে গোতমো নাম বুদ্ধো ভৰিস্সতী’’তি ব্যাকরিত্ৰা ধম্মমস্স দেসেসি. সো সত্থু ধম্মকথং সুত্ৰা ¶ রজ্জং নিয্যাতেত্ৰা পব্বজিত্ৰা তীণি পিটকানি উগ্গহেত্ৰা অট্ঠ সমাপত্তিযো পঞ্চ চ অভিঞ্ঞাযো উপ্পাদেত্ৰা অপরিহীনজ্ঝানো ব্রহ্মলোকে নিব্বত্তি. তেন ৰুত্তং –

‘‘অহং ¶ তেন সমযেন, ৰিজিতাৰী নাম খত্তিযো;

সমুদ্দং অন্তমন্তেন, ইস্সরিযং ৰত্তযামহং.

‘‘কোটিসতসহস্সানং, ৰিমলানং মহেসিনং;

সহ লোকগ্গনাথেন, পরমন্নেন তপ্পযিং.

‘‘সোপি মং বুদ্ধো ব্যাকাসি, কোণ্ডঞ্ঞো লোকনাযকো;

অপরিমেয্যিতো কপ্পে, বুদ্ধো লোকে ভৰিস্সতি.

‘‘পধানং পদহিত্ৰান, কত্ৰা দুক্করকারিকং;

অস্সত্থমূলে সম্বুদ্ধো, বুজ্ঝিস্সতি মহাযসো.

‘‘ইমস্স জনিকা মাতা, মাযা নাম ভৰিস্সতি;

পিতা সুদ্ধোদনো নাম, অযং হেস্সতি গোতমো.

‘‘কোলিতো উপতিস্সো চ, অগ্গা হেস্সন্তি সাৰকা;

আনন্দো নামুপট্ঠাকো, উপট্ঠিস্সতি তং জিনং.

‘‘খেমা উপ্পলৰণ্ণা চ, অগ্গা হেস্সন্তি সাৰিকা;

বোধি তস্স ভগৰতো, অস্সত্থোতি পৰুচ্চতি.

‘‘চিত্তো চ হত্থাল়ৰকো, অগ্গা হেস্সন্তুপট্ঠকা;

নন্দমাতা চ উত্তরা, অগ্গা হেস্সন্তুপট্ঠিকা;

আযু ৰস্সসতং তস্স, গোতমস্স যসস্সিনো.

‘‘ইদং ¶ সুত্ৰান ৰচনং, অসমস্স মহেসিনো;

আমোদিতা নরমরূ, বুদ্ধবীজং কির অযং.

‘‘উক্কুট্ঠিসদ্দা ৰত্তন্তি, অপ্ফোটেন্তি হসন্তি চ;

কতঞ্জলী নমস্সন্তি, দসসহস্সিদেৰতা.

‘‘যদিমস্স ¶ ¶ লোকনাথস্স, ৰিরজ্ঝিস্সাম সাসনং;

অনাগতম্হি অদ্ধানে, হেস্সাম সম্মুখা ইমং.

‘‘যথা মনুস্সা নদিং তরন্তা, পটিতিত্থং ৰিরজ্ঝিয;

হেট্ঠাতিত্থে গহেত্ৰান, উত্তরন্তি মহানদিং.

‘‘এৰমেৰ মযং সব্বে, যদি মুঞ্চামিমং জিনং;

অনাগতম্হি অদ্ধানে, হেস্সাম সম্মুখা ইমং.

‘‘তস্সাহং ৰচনং সুত্ৰা, ভিয্যো চিত্তং পসাদযিং;

তমেৰ অত্থং সাধেন্তো, মহারজ্জং জিনে অদং;

মহারজ্জং দদিত্ৰান, পব্বজিং তস্স সন্তিকে.

‘‘সুত্তন্তং ৰিনযং চাপি, নৰঙ্গং সত্থুসাসনং;

সব্বং পরিযাপুণিত্ৰান, সোভযিং জিনসাসনং.

‘‘তত্থপ্পমত্তো ৰিহরন্তো, নিসজ্জট্ঠানচঙ্কমে;

অভিঞ্ঞাপারমিং গন্ত্ৰা, ব্রহ্মলোকমগঞ্ছহ’’ন্তি.

তত্থ অহং তেন সমযেনাতি অহং তস্মিং সমযে. ৰিজিতাৰী নামাতি এৰংনামকো চক্কৰত্তিরাজা অহোসিং. সমুদ্দং অন্তমন্তেনাতি এত্থ চক্কৰাল়পব্বতং সীমং মরিযাদং কত্ৰা ঠিতং সমুদ্দং অন্তং কত্ৰা ইস্সরিযং ৰত্তযামীতি অত্থো. এত্তাৰতা ন পাকটং হোতি.

রাজা কির চক্কৰত্তী চক্করতনানুভাৰেন ৰামপস্সেন সিনেরুং কত্ৰা সমুদ্দস্স উপরিভাগেন অট্ঠযোজনসহস্সপ্পমাণং পুব্বৰিদেহং গচ্ছতি. তত্থ রাজা চক্কৰত্তী – ‘‘পাণো ন হন্তব্বো, অদিন্নং নাদাতব্বং, কামেসুমিচ্ছা ন চরিতব্বা, মুসা ন ভাসিতব্বা, মজ্জং ন পাতব্বং, যথাভুত্তঞ্চ ভুঞ্জথা’’তি (দী. নি. ২.২৪৪; ৩.৮৫; ম. নি. ৩.২৫৭) ওৰাদং দেতি. এৰং ওৰাদে দিন্নে তং চক্করতনং ৰেহাসং অব্ভুগ্গন্ত্ৰা পুরত্থিমং সমুদ্দং অজ্ঝোগাহতি. যথা যথা চ তং অজ্ঝোগাহতি, তথা তথা সংখিত্তঊমিৰিপ্ফারং হুত্ৰা ওগচ্ছমানং মহাসমুদ্দসলিলং যোজনমত্তং ওগ্গন্ত্ৰা অন্তোসমুদ্দং উভোসু ¶ পস্সেসু ৰেল়ুরিযমণিভিত্তি ¶ ৰিয পরমদস্সনীযং হুত্ৰা তিট্ঠতি, এৰং পুরত্থিমসাগরপরিযন্তং গন্ত্ৰা তং চক্করতনং পটিনিৰত্ততি. পটিনিৰত্তমানে চ তস্মিং সা ¶ পরিসা অগ্গতো হোতি, মজ্ঝে রাজা চক্কৰত্তী অন্তে চক্করতনং হোতি. তম্পি জলং জলন্তেন ৰিযোগং অসহমানমিৰ নেমিমণ্ডলপরিযন্তং অভিহনন্তমেৰ তীরমুপগচ্ছতি.

এৰং রাজা চক্কৰত্তী পুরত্থিমসমুদ্দপরিযন্তং পুব্বৰিদেহং অভিৰিজিনিত্ৰা দক্খিণসমুদ্দপরিযন্তং জম্বুদীপং ৰিজেতুকামো চক্করতনদেসিতেন মগ্গেন দক্খিণসমুদ্দাভিমুখো গচ্ছতি. তং দসসহস্সযোজনপ্পমাণং জম্বুদীপং অভিৰিজিনিত্ৰা দক্খিণসমুদ্দতো পচ্চুত্তরিত্ৰা সত্তযোজনসহস্সপ্পমাণং অপরগোযানং ৰিজেতুং হেট্ঠা ৰুত্তনযেনেৰ গন্ত্ৰা তম্পি সাগরপরিযন্তং অভিৰিজিনিত্ৰা পচ্ছিমসমুদ্দতোপি উত্তরিত্ৰা অট্ঠযোজনসহস্সপ্পমাণং উত্তরকুরুং ৰিজেতুং তথেৰ গন্ত্ৰা তং সমুদ্দপরিযন্তং কত্ৰা তথেৰ অভিৰিজিয উত্তরসমুদ্দতোপি পচ্চুত্তরতি. এত্তাৰতা রঞ্ঞা চক্কৰত্তিনা সাগরপরিযন্তায পথৰিযা ইস্সরিযং অধিগতং হোতি. তেন ৰুত্তং সমুদ্দং অন্তমন্তেন, ইস্সরিযং ৰত্তযামহ’’ন্তি.

কোটিসতসহস্সানন্তি কোটিসতসহস্সানি. অযমেৰ ৰা পাঠো. ৰিমলানন্তি খীণাসৰানং. সহ লোকগ্গনাথেনাতি সদ্ধিং দসবলেন কোটিসতসহস্সানন্তি অত্থো. পরমন্নেনাতি পণীতেন অন্নেন. তপ্পযিন্তি তপ্পেসিং. অপরিমেয্যিতো কপ্পেতি ইতো পট্ঠায সতসহস্সকপ্পাধিকানি তীণি অসঙ্খ্যেয্যানি অতিক্কমিত্ৰা একস্মিং ভদ্দকপ্পেতি অত্থো.

পধানন্তি ৰীরিযং. তমেৰ অত্থং সাধেন্তোতি তমেৰ বুদ্ধকারকমত্থং দানপারমিং পূরেন্তো সাধেন্তো নিপ্ফাদেন্তোতি অত্থো. মহারজ্জন্তি চক্কৰত্তিরজ্জং. জিনেতি ভগৰতি, সম্পদানত্থে ৰা ভুম্মং দট্ঠব্বং. অদন্তি অদাসিং. এৰমত্থং সাধেন্তোতি ইমিনা সম্বন্ধো দট্ঠব্বো. ‘‘মহারজ্জং জিনে দদি’’ন্তি পঠন্তি কেচি. দদিত্ৰানাতি চজিত্ৰা. সুত্তন্তন্তি সুত্তন্তপিটকং. ৰিনযন্তি ৰিনযপিটকং. নৰঙ্গন্তি সুত্তগেয্যাদিনৰঙ্গং. সোভযিং জিনসাসনন্তি আগমাধিগমেহি লোকিযেহি সমলঙ্করিং. তত্থাতি তস্স ভগৰতো সাসনে. অপ্পমত্তোতি সতিসম্পন্নো. ব্রহ্মলোকমগঞ্ছহন্তি ¶ ব্রহ্মলোকং অগঞ্ছিং অহং.

ইমস্স পন কোণ্ডঞ্ঞবুদ্ধস্স রম্মৰতী নাম নগরং অহোসি, সুনন্দো নাম রাজা পিতা, সুজাতা নাম দেৰী মাতা, ভদ্দো চ সুভদ্দো চ দ্ৰে ¶ অগ্গসাৰকা, অনুরুদ্ধো নামুপট্ঠাকো, তিস্সা চ উপতিস্সা চ দ্ৰে অগ্গসাৰিকা, সালকল্যাণিরুক্খো বোধি, অট্ঠাসীতিহত্থুব্বেধং সরীরং ¶ , ৰস্সসতসহস্সানি আযুপ্পমাণং অহোসি, তস্স রুচিদেৰী নাম অগ্গমহেসী অহোসি, ৰিজিতসেনো নামস্স পুত্তো, চন্দো নামুপট্ঠাকো রাজা. চন্দারামে কির ৰসীতি. তেন ৰুত্তং –

‘‘নগরং রম্মৰতী নাম, সুনন্দো নাম খত্তিযো;

সুজাতা নাম জনিকা, কোণ্ডঞ্ঞস্স মহেসিনো.

‘‘ভদ্দো চেৰ সুভদ্দো চ, অহেসুং অগ্গসাৰকা;

অনুরুদ্ধো নামুপট্ঠাকো, কোণ্ডঞ্ঞস্স মহেসিনো.

‘‘তিস্সা চ উপতিস্সা চ, অহেসুং অগ্গসাৰিকা;

সালকল্যাণিকো বোধি, কোণ্ডঞ্ঞস্স মহেসিনো.

‘‘সো অট্ঠাসীতি হত্থানি, অচ্চুগ্গতো মহামুনি;

সোভতে উল়ুরাজাৰ, সূরিযো মজ্ঝন্হিকে যথা.

‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘খীণাসৰেহি ৰিমলেহি, ৰিচিত্তা আসি মেদনী;

যথা হি গগনমুল়ূভি, এৰং সো উপসোভথ.

‘‘তেপি নাগা অপ্পমেয্যা, অসঙ্খোভা দুরাসদা;

ৰিজ্জুপাতংৰ দস্সেত্ৰা, নিব্বুতা তে মহাযসা.

‘‘সা চ অতুলিযা জিনস্স ইদ্ধি, ঞাণপরিভাৰিতো চ সমাধি;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ সালকল্যাণিকোতি সালকল্যাণিরুক্খো, সো বুদ্ধকালে চেৰ চক্কৰত্তিকালে চ নিব্বত্ততি, নাঞ্ঞদা. সো একাহেনেৰ উট্ঠাতি কির. খীণাসৰেহি ৰিমলেহি, ৰিচিত্তা আসি মেদনীতি অযং মেদনী খীণাসৰেহি এককাসাৰপজ্জোতা ৰিচিত্তা পরমদস্সনীযা অহোসি. যথা ¶ হীতি ওপম্মত্থে নিপাতো. উল়ূভীতি ¶ নক্খত্তেহি, তারাগণেহি ¶ গগনতলং ৰিয খীণাসৰেহি ৰিচিত্তা অযং মেদনী সোভিত্থাতি অত্থো.

অসঙ্খোভাতি অট্ঠহি লোকধম্মেহি অক্খোভা অৰিকারা. ৰিজ্জুপাতংৰ দস্সেত্ৰাতি ৰিজ্জুপাতং ৰিয দস্সযিত্ৰা, ‘‘ৰিজ্জুপ্পাতংৰা’’তিপি পাঠো. কোণ্ডঞ্ঞবুদ্ধস্স কির কালে পরিনিব্বাযমানা ভিক্খূ সত্ততালপ্পমাণমাকাসমব্ভুগ্গন্ত্ৰা অসিতজলধরৰিৰরগতা ৰিজ্জুলতা ৰিয সমন্ততো ৰিজ্জোতমানা তেজোধাতুং সমাপজ্জিত্ৰা নিরুপাদানা দহনা ৰিয পরিনিব্বাযিংসু. তেন ৰুত্তং ‘‘ৰিজ্জুপাতংৰ দস্সেত্ৰা’’তি. অতুলিযাতি অতুল্যা অসদিসা. ঞাণপরিভাৰিতোতি ঞাণেন ৰড্ঢিতো. সেসগাথা হেট্ঠা ৰুত্তনযত্তা উত্তানা এৰাতি.

‘‘কোণ্ডঞ্ঞো নাম সম্বুদ্ধো, চন্দারামে মনোরমে;

নিব্বাযি চেতিযো তস্স, সত্তযোজনিকো কতো.

‘‘ন হেৰ ধাতুযো তস্স, সত্থুনো, ৰিকিরিংসু তা;

ঠিতা একঘনা হুত্ৰা, সুৰণ্ণপটিমা ৰিয’’.

সকলজম্বুদীপৰাসিনো মনুস্সা সমাগন্ত্ৰা সত্তযোজনিকং সত্তরতনমযং হরিতালমনোসিলায মত্তিকাকিচ্চং তেলসপ্পীহি উদককিচ্চং কত্ৰা নিট্ঠাপেসুন্তি.

কোণ্ডঞ্ঞবুদ্ধৰংসৰণ্ণনা নিট্ঠিতা.

কোণ্ডঞ্ঞে ¶ কির সত্থরি পরিনিব্বুতে তস্স সাসনং ৰস্সসতসহস্সং পৰত্তিত্থ. বুদ্ধানুবুদ্ধানং সাৰকানং অন্তরধানেন সাসনমস্স অন্তরধাযি. কোণ্ডঞ্ঞস্স পন অপরভাগে একমসঙ্খ্যেয্যমতিক্কমিত্ৰা একস্মিংযেৰ কপ্পে চত্তারো বুদ্ধা নিব্বত্তিংসু মঙ্গলো, সুমনো, রেৰতো, সোভিতোতি. তত্থ মঙ্গলো পন লোকনাযকো কপ্পসতসহস্সাধিকানি সোল়স অসঙ্খ্যেয্যানি পারমিযো পূরেত্ৰা তুসিতপুরে নিব্বত্তিত্ৰা তত্থ যাৰতাযুকং ঠত্ৰা পঞ্চসু পুব্বনিমিত্তেসু উপ্পন্নেসু বুদ্ধকোলাহলং নাম ¶ উদপাদি, তদা দসসহস্সচক্কৰাল়ে দেৰতাযো একস্মিং চক্কৰাল়ে সন্নিপতিত্ৰা আযাচন্তি –

‘‘কালো ¶ খো তে মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি. (বু. ৰং. ১.৬৭);

এৰং দেৰেহি আযাচিতো কতপঞ্চৰিলোকনো তুসিতা কাযা চৰিত্ৰা সব্বনগরুত্তমে উত্তরনগরে অনুত্তরস্স উত্তরস্স নাম রঞ্ঞো কুলে উত্তরায নাম দেৰিযা কুচ্ছিস্মিং পটিসন্ধিং গণ্হি. তদা অনেকানি পাটিহারিযানি পাতুরহুং. তানি দীপঙ্করবুদ্ধৰংসে ৰুত্তনযেনেৰ ৰেদিতব্বানি. তস্সা উত্তরায কির মহাদেৰিযা কুচ্ছিস্মিং সব্বলোকমঙ্গলস্স মঙ্গলস্স মহাসত্তস্স পটিসন্ধিগ্গহণতো পট্ঠায সরীরপ্পভা রত্তিন্দিৰং অসীতিহত্থপ্পমাণং পদেসং ফরিত্ৰা চন্দালোকসূরিযালোকেহি অনভিভৰনীযা হুত্ৰা অট্ঠাসি. সা চ অঞ্ঞেনালোকেন ৰিনা অত্তনো সরীরপ্পভাসমুদযেনেৰ অন্ধকারং ৰিধমিত্ৰা অট্ঠসট্ঠিযা ধাতীহি পরিচারিযমানা ৰিচরতি.

সা কির দেৰতাহি কতারক্খা দসন্নং মাসানং অচ্চযেন পরমসুরভিকুসুমফলধরসাখাৰিটপে কমলকুৰলযসমলঙ্কতে রুরু-সীহ-ব্যগ্ঘ-গজ-গৰয-মহিংসপসদৰিৰিধমিগগণৰিচরিতে পরমরমণীযে উত্তরমধুরুয্যানে নাম মঙ্গলুয্যানে মঙ্গলমহাপুরিসং ৰিজাযি ¶ . সো জাতমত্তোৰ মহাসত্তো সব্বা দিসা ৰিলোকেত্ৰা উত্তরাভিমুখো সত্তপদৰীতিহারেন গন্ত্ৰা আসভিং ৰাচং নিচ্ছারেসি. তস্মিঞ্চ খণে সকলদসসহস্সিলোকধাতূসু দেৰতা দিস্সমানসরীরা দিব্বমালাদীহি সমলঙ্কতগত্তা তত্থ তত্থ ঠত্ৰা জযমঙ্গলথুতিৰচনানি সম্পৰত্তেসুং. পাটিহারিযানি ৰুত্তনযানেৰ. নামগ্গহণদিৰসে পনস্স লক্খণপাঠকা সব্বমঙ্গলসম্পত্তিযা জাতোতি ‘‘মঙ্গলকুমারো’’ ত্ৰেৰ নামং করিংসু.

তস্স কির যসৰা রুচিমা সিরিমাতি তযো পাসাদা অহেসুং. যসৰতীদেৰিপ্পমুখানি তিংসনাটকিত্থিসহস্সানি অহেসুং. তত্থ মহাসত্তো নৰৰস্সসহস্সানি দিব্বসুখসদিসং সুখং অনুভৰিত্ৰা যসৰতিযা অগ্গমহেসিযা কুচ্ছিস্মিং সীলৰং নাম পুত্তং লভিত্ৰা চত্তারি নিমিত্তানি দিস্ৰা অলঙ্কতং পণ্ডরং নাম সুন্দরতুরঙ্গৰরমারুয্হ মহাভিনিক্খমনং নিক্খমিত্ৰা ¶ পব্বজি. তং পন পব্বজন্তং তিস্সো মনুস্সকোটিযো অনুপব্বজিংসু. তেহি পরিৰুতো মহাপুরিসো অট্ঠ মাসে পধানচরিযমচরি.

ততো ৰিসাখপুণ্ণমায উত্তরগামে উত্তরসেট্ঠিনো ধীতায উত্তরায নাম দিন্নং পক্খিত্তদিব্বোজং মধুপাযাসং পরিভুঞ্জিত্ৰা সুরভিকুসুমালঙ্কতে নীলোভাসে মনোরমে সালৰনে দিৰাৰিহারং ৰীতিনামেত্ৰা উত্তরেন নাম আজীৰকেন দিন্না অট্ঠ তিণমুট্ঠিযো গহেত্ৰা অসিতঞ্জনগিরিসঙ্কাসং অক্কন্তৰরকনকজালকূটংৰ সীতচ্ছাযং ৰিৰিধমিগগণসম্পাতৰিরহিতং মন্দমালুতেরিতায ঘনসাখায সমলঙ্কতং নচ্চন্তমিৰ পীতিযা ৰিরোচমানং নাগবোধিং উপসঙ্কমিত্ৰা মত্তৰরনাগগামী নাগবোধিং পদক্খিণং কত্ৰা পুব্বুত্তরপস্সে ঠত্ৰা অট্ঠপণ্ণাসহত্থৰিত্থতং তিণসন্থরং সন্থরিত্ৰা তত্থ পল্লঙ্কং আভুজিত্ৰা চতুরঙ্গসমন্নাগতং ৰীরিযং অধিট্ঠহিত্ৰা সবলং মারবলং ৰিদ্ধংসেত্ৰা পুব্বেনিৰাসদিব্বচক্খুঞাণানি পটিলভিত্ৰা পচ্চযাকারসম্মসনং ¶ কত্ৰা খন্ধেসু অনিচ্চাদিৰসেন অভিনিৰিসিত্ৰা অনুক্কমেন অনুত্তরং সম্মাসম্বোধিং পত্ৰা –

‘‘অনেকজাতিসংসারং, সন্ধাৰিস্সং অনিব্বিসং;

গহকারং গৰেসন্তো, দুক্খা জাতি পুনপ্পুনং.

‘‘গহকারক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, গহকূটং ৰিসঙ্খতং;

ৰিসঙ্খারগতং চিত্তং, তণ্হানং খযমজ্ঝগা’’তি. (ধ. প. ১৫৩-১৫৪) –

মঙ্গলস্স পন সম্মাসম্বুদ্ধস্স অঞ্ঞেহি বুদ্ধেহি অধিকতরা সরীরপ্পভা অহোসি. যথা পন অঞ্ঞেসং সম্মাসম্বুদ্ধানং সমন্তা অসীতিহত্থপ্পমাণা ৰা ব্যামপ্পমাণা ৰা সরীরপ্পভা অহোসি, ন এৰং তস্স. তস্স পন ভগৰতো সরীরপ্পভা নিচ্চকালং দসসহস্সিলোকধাতুং ফরিত্ৰা অট্ঠাসি. তরুগিরিঘরপাকারঘটকৰাটাদযো সুৰণ্ণপট্টপরিযোনদ্ধা ৰিয অহেসুং. নৰুতিৰস্সসতসহস্সানি আযু তস্স অহোসি. এত্তকং কালং চন্দসূরিযতারকাদীনং পভা নত্থি. রত্তিন্দিৰপরিচ্ছেদো ন পঞ্ঞাযিত্থ. দিৰা সূরিযালোকেন ৰিয সত্তা নিচ্চং বুদ্ধালোকেনেৰ সব্বকম্মানি ¶ করোন্তা ৰিচরিংসু. সাযং পুপ্ফনককুসুমানং পাতো চ রৰনকসকুণাদীনঞ্চ ৰসেন লোকো রত্তিন্দিৰপরিচ্ছেদং সল্লক্খেসি.

কিং পন অঞ্ঞেসং বুদ্ধানং অযমানুভাৰো নত্থীতি? নো নত্থি. তেপি হি আকঙ্খমানা দসসহস্সিলোকধাতুং ততো ৰা ভিয্যো আভায ফরেয্যুং. মঙ্গলস্স পন ভগৰতো পুব্বপত্থনাৰসেন অঞ্ঞেসং ব্যামপ্পভা ৰিয সরীরপ্পভা নিচ্চমেৰ দসসহস্সিলোকধাতুং ফরিত্ৰা অট্ঠাসি. সো কির বোধিসত্তকালে ৰেস্সন্তরত্তভাৰসদিসে অত্তভাৰে সপুত্তদারো ৰঙ্কপব্বতসদিসে পব্বতে ৰসি. অথেকো সব্বজনৰিহেঠকো খরদাঠিকো নাম মনুস্সভক্খো মহেসক্খো যক্খো মহাপুরিসস্স দানজ্ঝাসযতং সুত্ৰা ব্রাহ্মণৰণ্ণেন উপসঙ্কমিত্ৰা মহাসত্তং দ্ৰে দারকে যাচি. মহাসত্তো ‘‘দদামি ব্রাহ্মণস্স পুত্তকে’’তি হট্ঠপহট্ঠো উদকপরিযন্তং পথৰিং কম্পেন্তো দ্ৰে দারকে অদাসি. অথ খো যক্খো তস্স পস্সন্তস্সেৰ মহাপুরিসস্স তং ব্রাহ্মণৰণ্ণং পহায অনলজালপিঙ্গলৰিরূপনযনো ৰিসমৰিরূপকুটিলভীমদাঠো চিপিটকৰিরূপনাসো কপিলফরুসদীঘকেসো নৰদড্ঢতালক্খন্ধসদিসকাযো হুত্ৰা তে দারকে মুল়ালকলাপং ৰিয গহেত্ৰা খাদি. মহাপুরিসস্স যক্খং ওলোকেত্ৰা মুখে ৰিৰটমত্তে অগ্গিজালং ৰিয লোহিতধারং উগ্গিরন্তং তস্স মুখং দিস্ৰাপি কেসগ্গমত্তম্পি দোমনস্সং ন উপ্পজ্জি. ‘‘সুদিন্নং ৰত মে দান’’ন্তি চিন্তযতো পনস্স সরীরে মহন্তং পীতিসোমনস্সং উদপাদি. সো ‘‘ইমস্স মে নিস্সন্দেন অনাগতে ইমিনা নীহারেন রস্মিযো নিক্খমন্তূ’’তি পত্থনমকাসি. তস্স তং পত্থনং নিস্সায বুদ্ধভূতস্স সরীরতো রস্মিযো নিক্খমিত্ৰা এত্তকং ঠানং ফরিংসু.

অপরম্পি পুব্বচরিযং তস্স অত্থি. অযং কির বোধিসত্তকালে একস্স বুদ্ধস্স চেতিযং দিস্ৰা – ‘‘ইমস্স বুদ্ধস্স মম ¶ জীৰিতং পরিচ্চজিতুং ৰট্টতী’’তি দণ্ডদীপিকাৰেঠননিযামেন সকলসরীরং ¶ ৰেঠাপেত্ৰা রতনমত্তমকুল়ং সতসহস্সগ্ঘনিকং সুৰণ্ণপাতিং সুগন্ধসপ্পিস্স পূরাপেত্ৰা তত্থ সহস্সৰট্টিযো জালেত্ৰা তং সীসেনাদায সকলসরীরং জালাপেত্ৰা জিনচেতিযং পদক্খিণং করোন্তো সকলরত্তিং ৰীতিনামেসি. এৰং যাৰ অরুণুগ্গমনা ৰাযমন্তস্স লোমকূপমত্তম্পি উসুমং ন গণ্হি. পদুমগব্ভং পৰিট্ঠকালো ¶ ৰিয অহোসি. ধম্মো হি নামেস অত্তানং রক্খন্তং রক্খতি. তেনাহ ভগৰা –

‘‘ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী’’তি. (থেরগা. ৩০৩; জা. ১.১০.১০২; ১.১৫.৩৮৫);

ইমস্সাপি কম্মস্স নিস্সন্দেন তস্স সরীরোভাসো দসসহস্সিলোকধাতুং ফরিত্ৰা অট্ঠাসি (ধ. স. অট্ঠ. নিদানকথা). তেন ৰুত্তং –

‘‘কোণ্ডঞ্ঞস্স অপরেন, মঙ্গলো নাম নাযকো;

তমং লোকে নিহন্ত্ৰান, ধম্মোক্কমভিধারযি.

‘‘অতুলাসি পভা তস্স, জিনেহঞ্ঞেহি উত্তরিং;

চন্দসূরিযপ্পভং হন্ত্ৰা, দসসহস্সী ৰিরোচতী’’তি.

তত্থ তমন্তি লোকন্ধকারঞ্চ হদযতমঞ্চ. নিহন্ত্ৰানাতি অভিভৰিত্ৰা. ধম্মোক্কন্তি এত্থ অযং পন উক্কা-সদ্দো সুৰণ্ণকারমূসাদীসু অনেকেসু অত্থেসু দিস্সতি. তথাহি ‘‘সণ্ডাসেন জাতরূপং গহেত্ৰা উক্কামুখে পক্খিপেয্যা’’তি (ম. নি. ৩.৩৬০) আগতট্ঠানে সুৰণ্ণকারানং মূসা ‘‘উক্কা’’তি ৰেদিতব্বা. ‘‘উক্কং বন্ধেয্য, উক্কং বন্ধিত্ৰা উক্কামুখং আলিম্পেয্যা’’তি আগতট্ঠানে কম্মারানং অঙ্গারকপল্লং. ‘‘কম্মারানং যথা উক্কা, অন্তো ঝাযতি নো বহী’’তি (জা. ২.২২.৬৪৯) আগতট্ঠানে কম্মারুদ্ধনং. ‘‘এৰংৰিপাকো উক্কাপাতো ভৰিস্সতী’’তি (দী. নি. ১.২৪, ২০৮) আগতট্ঠানে ৰাযুৰেগো ‘‘উক্কা’’তি ৰুচ্চতি. ‘‘উক্কাসু ধারিযমানাসূ’’তি (দী. নি. ১.১৫৯) আগতট্ঠানে দীপিকা ‘‘উক্কা’’তি ৰুচ্চতি. ইধাপি দীপিকা উক্কাতি অধিপ্পেতা (ম. নি. অট্ঠ. ১.৭৬ আদযো). তস্মা ইধ ধম্মমযং উক্কং অভিধারযি, অৰিজ্জন্ধকারপটিচ্ছন্নস্স অৰিজ্জন্ধকারাভিভূতস্স লোকস্স ধম্মমযং উক্কং ধারেসীতি অত্থো.

অতুলাসীতি ¶ ¶ অতুল্যা আসি. অযমেৰ ৰা পাঠো, অঞ্ঞেহি বুদ্ধেহি অসদিসা অহোসীতি অত্থো. জিনেহঞ্ঞেহীতি জিনেহি অঞ্ঞেহি ¶ . চন্দসূরিযপ্পভং হন্ত্ৰাতি চন্দসূরিযানং পভং অভিহন্ত্ৰা. দসসহস্সী ৰিরোচতীতি চন্দসূরিযালোকং ৰিনা বুদ্ধালোকেনেৰ দসসহস্সী ৰিরোচতীতি অত্থো.

মঙ্গলসম্মাসম্বুদ্ধো পন অধিগতবোধিঞাণো বোধিমূলেযেৰ সত্তসত্তাহানি ৰীতিনামেত্ৰা ব্রহ্মুনো ধম্মাযাচনং সম্পটিচ্ছিত্ৰা – ‘‘কস্স নু খো অহং ইমং ধম্মং দেসেয্য’’ন্তি (ম. নি. ১.২৮৪; ২.৩৪১; মহাৰ. ১০) উপধারেন্তো অত্তনা সহ পব্বজিতানং ভিক্খূনং তিস্সো কোটিযো উপনিস্সযসম্পন্নং অদ্দস. অথস্স এতদহোসি – ‘‘ইমে কুলপুত্তা মং পব্বজন্তং অনুপব্বজিতা উপনিস্সযসম্পন্না চ, তে মযা ৰিসাখপুণ্ণমায ৰিৰেকত্থিকেন ৰিস্সজ্জিতা সিরিৰড্ঢননগরং উপনিস্সায সিরিৰনগহনং গন্ত্ৰা ৰিহরন্তি, হন্দাহং তত্থ গন্ত্ৰা ধম্মং তেসং দেসেস্সামী’’তি অত্তনো পত্তচীৰরং গহেত্ৰা হংসরাজা ৰিয গগনতলমব্ভুগ্গন্ত্ৰা সিরিৰনগহনে পচ্চুট্ঠাসি. তে চ ভিক্খূ ভগৰন্তং ৰন্দিত্ৰা অন্তেৰাসিকৰত্তং দস্সেত্ৰা ভগৰন্তং পরিৰারেত্ৰা নিসীদিংসু. তেসং ভগৰা সব্ববুদ্ধনিসেৰিতং ধম্মচক্কপ্পৰত্তনসুত্তন্তং কথেসি. ততো তিস্সো ভিক্খুকোটিযো অরহত্তং পাপুণিংসু. দেৰমনুস্সানং কোটিসতসহস্সানং ধম্মাভিসমযো অহোসি. তেন ৰুত্তং –

‘‘সোপি বুদ্ধো পকাসেসি, চতুরো সচ্চৰরুত্তমে;

তে তে সচ্চরসং পীত্ৰা, ৰিনোদেন্তি মহাতমং.

‘‘পত্ৰান বোধিমতুলং, পঠমে ধম্মদেসনে;

কোটিসতসহস্সানং, ধম্মাভিসমযো অহূ’’তি.

তত্থ চতুরোতি চত্তারি. সচ্চৰরুত্তমেতি সচ্চানি চ ৰরানি চ সচ্চৰরানি, সচ্চানি উত্তমানীতি অত্থো. ‘‘চত্তারো সচ্চৰরুত্তমে’’তিপি পাঠো, তস্স চত্তারি সচ্চৰরানি উত্তমানীতি অত্থো. তে তেতি তে তে দেৰমনুস্সা বুদ্ধেন ভগৰতা ৰিনীতা. সচ্চরসন্তি চতুসচ্চপটিৰেধামতরসং পিৰিত্ৰা. ৰিনোদেন্তি মহাতমন্তি তেন তেন মগ্গেন পহাতব্বং মোহতমং ৰিনোদেন্তি, ৰিদ্ধংসেন্তীতি অত্থো. পত্ৰানাতি পটিৰিজ্ঝিত্ৰা. বোধিন্তি এত্থ পনাযং বোধি-সদ্দো –

‘‘মগ্গে ¶ ¶ ফলে চ নিব্বানে, রুক্খে পঞ্ঞত্তিযং তথা;

সব্বঞ্ঞুতে চ ঞাণস্মিং, বোধিসদ্দো পনাগতো’’.

তথা ¶ হি পনেস – ‘‘বোধি ৰুচ্চতি চতূসু মগ্গেসু ঞাণ’’ন্তিআদীসু (চূল়নি. খগ্গৰিসাণসুত্তনিদ্দেস ১২১) মগ্গে আগতো. ‘‘উপসমায অভিঞ্ঞায সম্বোধায সংৰত্ততী’’তি (ম. নি. ১.৩৩; ৩.৩২৩; মহাৰ. ১৩; সং. নি. ৫.১০৮১; পটি. ম. ২.৩০) এত্থ ফলে. ‘‘পত্ৰান বোধিং অমতং অসঙ্খত’’ন্তি এত্থ নিব্বানে. ‘‘অন্তরা চ গযং অন্তরা চ বোধি’’ন্তি (ম. নি. ১.২৮৫; ২.৩৪১; মহাৰ. ১১) এত্থ অস্সত্থরুক্খে. ‘‘বোধি খো রাজকুমারো ভোতো গোতমস্স পাদে সিরসা ৰন্দতী’’তি এত্থ (ম. নি. ২.৩২৪; চূল়ৰ. ২৬৮) পঞ্ঞত্তিযং. ‘‘পপ্পোতি বোধিং ৰরভূরিমেধসো’’তি (দী. নি. ৩.২১৭) এত্থ সব্বঞ্ঞুতঞ্ঞাণে. ইধাপি সব্বঞ্ঞুতঞ্ঞাণে দট্ঠব্বো. অরহত্তমগ্গঞাণেপি ৰট্টতি (ম. নি. অট্ঠ. ১.১৩; উদা. অট্ঠ. ১; পারা. অট্ঠ. ১.১১; চরিযা. অট্ঠ. নিদানকথা). অতুলন্তি তুলরহিতং পমাণাতীতং, অপ্পমাণন্তি অত্থো. সম্বোধিং পত্ৰা ধম্মং দেসেন্তস্স তস্স ভগৰতো পঠমে ধম্মদেসনেতি অত্থো গহেতব্বো.

যদা পন চিত্তং নাম নগরং উপনিস্সায ৰিহরন্তো চম্পকরুক্খমূলে কণ্ডম্বরুক্খমূলে অম্হাকং ভগৰা ৰিয তিত্থিযানং মানমদ্দনং যমকপাটিহারিযং কত্ৰা সুরাসুরযুৰতিরতিসম্ভৰনে রুচিরনৰকনকরজতমযৰরভৰনে তাৰতিংসভৰনে পারিচ্ছত্তকরুক্খমূলে পণ্ডুকম্বলসিলাতলে নিসীদিত্ৰা অভিধম্মং কথেসি, তদা কোটিসতসহস্সানং দেৰতানং ধম্মাভিসমযো অহোসি, অযং দুতিযো অভিসমযো. যদা পন সুনন্দো নাম চক্কৰত্তিরাজা সুরভিনগরে পূরিতচক্কৰত্তিৰত্তো হুত্ৰা চক্করতনং পটিলভি. তং কির মঙ্গলদসবলে লোকে উপ্পন্নে চক্করতনং ঠানা ওসক্কিতং দিস্ৰা সুনন্দো রাজা ৰিগতানন্দো ব্রাহ্মণে পরিপুচ্ছি – ‘‘ইমং চক্করতনং মম কুসলেন নিব্বত্তং, কস্মা ঠানা ওসক্কিত’’ন্তি? ততো তে তস্স রঞ্ঞো ওসক্কনকারণং ব্যাকরিংসু. ‘‘চক্কৰত্তিরঞ্ঞো আযুক্খযেন ৰা পব্বজ্জূপগমনেন ৰা বুদ্ধপাতুভাৰেন ৰা চক্করতনং ঠানা ওসক্কতীতি ৰত্ৰা তুয্হং পন, মহারাজ, আযুক্খযো নত্থি, অতিদীঘাযুকো ত্ৰং, মঙ্গলো পন সম্মাসম্বুদ্ধো লোকে উপ্পন্নো, তেন তে চক্করতনং ওসক্কিত’’ন্তি. তং সুত্ৰা সুনন্দো চক্কৰত্তিরাজা সপরিজনো ¶ তং চক্করতনং সিরসা ৰন্দিত্ৰা আযাচি – ‘‘যাৰাহং তৰানুভাৰেন মঙ্গলদসবলং সক্করিস্সামি, তাৰ ত্ৰং মা অন্তরধাযস্সূ’’তি. অথ নং চক্করতনং যথাঠানেযেৰ অট্ঠাসি.

ততো ¶ সমুপাগতানন্দো সুনন্দো চক্কৰত্তিরাজা ছত্তিংসযোজনপরিমণ্ডলায পরিসায পরিৰুতো সব্বলোকমঙ্গলং মঙ্গলদসবলং উপসঙ্কমিত্ৰা সসাৰকসঙ্ঘং সত্থারং মহাদানেন সন্তপ্পেত্ৰা অরহন্তানং কোটিসতসহস্সানং কাসিকৰত্থানি দত্ৰা তথাগতস্স সব্বপরিক্খারে দত্ৰা সকললোকৰিম্হযকরং ভগৰতো পূজং কত্ৰা মঙ্গলং সব্বলোকনাথং উপসঙ্কমিত্ৰা দসনখসমোধানসমুজ্জলং ¶ ৰিমলকমলমকুল়সমমঞ্জলিং সিরসি কত্ৰা ৰন্দিত্ৰা ধম্মস্সৰনত্থায একমন্তং নিসীদি. পুত্তোপি তস্স অনুরাজকুমারো নাম তথেৰ নিসীদি.

তদা সুনন্দচক্কৰত্তিরাজপ্পমুখানং তেসং ভগৰা অনুপুব্বিকথং কথেসি. সুনন্দো চক্কৰত্তী সদ্ধিং পরিসায সহ পটিসম্ভিদাহি অরহত্তং পাপুণি. অথ সত্থা তেসং পুব্বচরিযং ওলোকেন্তো ইদ্ধিমযপত্তচীৰরস্স উপনিস্সযং দিস্ৰা চক্কজালসমলঙ্কতং দক্খিণহত্থং পসারেত্ৰা – ‘‘এথ, ভিক্খৰো’’তি আহ. সব্বে তঙ্খণংযেৰ দুৰঙ্গুলকেসা ইদ্ধিমযপত্তচীৰরধরা ৰস্সসট্ঠিকত্থেরা ৰিয আকপ্পসম্পন্না হুত্ৰা ভগৰন্তং পরিৰারযিংসু. অযং ততিযো অভিসমযো অহোসি. তেন ৰুত্তং –

‘‘সুরিন্দদেৰভৰনে, বুদ্ধো ধম্মমদেসযি;

কোটিসতসহস্সানং, দুতিযাভিসমযো অহু.

‘‘যদা সুনন্দো চক্কৰত্তী, সম্বুদ্ধং উপসঙ্কমি;

তদা আহনি সম্বুদ্ধো, ধম্মভেরিং ৰরুত্তমং.

‘‘সুনন্দস্সানুচরা জনতা, তদাসুং নৰুতিকোটিযো;

সব্বেপি তে নিরৰসেসা, অহেসুং এহিভিক্খুকা’’তি.

তত্থ সুরিন্দদেৰভৰনেতি পুন দেৰিন্দভৰনেতি অত্থো. ধম্মন্তি অভিধম্মং. আহনীতি অভিহনি. ৰরুত্তমন্তি ৰরো ভগৰা উত্তমং ধম্মভেরিন্তি অত্থো. অনুচরাতি নিবদ্ধচরা সেৰকা. আসুন্তি অহেসুং. ‘‘তদাসি নৰুতিকোটিযো’’তিপি ¶ পাঠো. তস্স জনতা আসি, সা জনতা কিত্তকাতি চে, নৰুতিকোটিযোতি অত্থো.

অথ মঙ্গলে কির লোকনাথে মেখলে পুরে ৰিহরন্তে তস্মিংযেৰ পুরে সুদেৰো চ ধম্মসেনো চ মাণৰকা মাণৰকসহস্সপরিৰারা তস্স ভগৰতো সন্তিকে এহিভিক্খুপব্বজ্জায পব্বজিংসু ¶ . মাঘপুণ্ণমায দ্ৰীসু অগ্গসাৰকেসু সপরিৰারেসু অরহত্তং পত্তেসু সত্থা কোটিসতসহস্সভিক্খুগণমজ্ঝে পাতিমোক্খং উদ্দিসি, অযং পঠমো সন্নিপাতো অহোসি. পুন উত্তরারামে নাম অনুত্তরে ঞাতিসমাগমে পব্বজিতানং কোটিসতসহস্সানং সমাগমে পাতিমোক্খং উদ্দিসি, অযং দুতিযো সন্নিপাতো অহোসি. সুনন্দচক্কৰত্তিভিক্খুগণসমাগমে নৰুতিকোটিসহস্সানং ভিক্খূনং মজ্ঝে পাতিমোক্খং উদ্দিসি, অযং ততিযো সন্নিপাতো অহোসি. তেন ৰুত্তং –

‘‘সন্নিপাতা ¶ তযো আসুং, মঙ্গলস্স মহেসিনো;

কোটিসতসহস্সানং, পঠমো আসি সমাগমো.

‘‘দুতিযো কোটিসতসহস্সানং, ততিযো নৰুতিকোটিনং;

খীণাসৰানং ৰিমলানং, তদা আসি সমাগমো’’তি.

তদা অম্হাকং বোধিসত্তো সুরুচিব্রাহ্মণগামে সুরুচি নাম ব্রাহ্মণো হুত্ৰা তিণ্ণং ৰেদানং পারগূ সনিঘণ্ডুকেটুভানং সাক্খরপ্পভেদানং ইতিহাসপঞ্চমানং পদকো ৰেয্যাকরণো লোকাযতমহাপুরিসলক্খণেসু অনৰযো অহোসি. সো সত্থারং উপসঙ্কমিত্ৰা দসবলস্স মধুরধম্মকথং সুত্ৰা ভগৰতি পসীদিত্ৰা সরণং গন্ত্ৰা – ‘‘স্ৰে ময্হং ভিক্খং গণ্হথা’’তি সসাৰকসঙ্ঘং ভগৰন্তং নিমন্তেসি. সো ভগৰতা ‘‘ব্রাহ্মণ, কিত্তকেহি ভিক্খূহি তে অত্থো’’তি ৰুত্তো – ‘‘কিত্তকা পন ৰো, ভন্তে, পরিৰারা ভিক্খূ’’তি আহ. তদা পঠমসন্নিপাতোৰ হোতি, তস্মা ‘‘কোটিসতসহস্স’’ন্তি ৰুত্তে – ‘‘যদি এৰং, ভন্তে, সব্বেহিপি সদ্ধিং ময্হং ভিক্খং গণ্হথা’’তি নিমন্তেসি. সত্থা অধিৰাসেসি.

ব্রাহ্মণো ভগৰন্তং স্ৰাতনায নিমন্তেত্ৰা অত্তনো ঘরং গচ্ছন্তো চিন্তেসি – ‘‘অহং এত্তকানং ভিক্খূনং যাগুভত্তৰত্থাদীনি দাতুং সক্কোমি, নিসীদনট্ঠানং ¶ পন কথং ভৰিস্সতী’’তি. তস্স কির সা চিন্তনা চতুরাসীতিযোজনসহস্সপ্পমাণে মেরুমত্থকে ঠিতস্স দেৰরাজস্স দসসতনযনস্স পণ্ডুকম্বলসিলাসনস্স উণ্হাকারং জনেসি. অথ সক্কো দেৰরাজা আসনস্স উণ্হভাৰং দিস্ৰা – ‘‘কো নু খো মং ইমম্হা ঠানা চাৰেতুকামো’’তি সমুপ্পন্নপরিৰিতক্কো দিব্বেন চক্খুনা মনুস্সলোকং ওলোকেন্তো মহাপুরিসং দিস্ৰা – ‘‘অযং মহাসত্তো বুদ্ধপ্পমুখং ভিক্খুসঙ্ঘং নিমন্তেত্ৰা তস্স নিসীদনত্থায চিন্তেসি, মযাপি তত্থ গন্ত্ৰা ¶ পুঞ্ঞকোট্ঠাসং গহেতুং ৰট্টতী’’তি ৰড্ঢকীৰণ্ণং নিম্মিনিত্ৰা ৰাসিফরসুহত্থো মহাপুরিসস্স পুরতো পাতুরহোসি. সো ‘‘অত্থি নু খো কস্সচি ভতিযা কত্তব্বকম্ম’’ন্তি আহ.

মহাসত্তো দিস্ৰা ‘‘কিং কম্মং কাতুং সক্খিস্সসী’’তি আহ. ‘‘মম অজাননসিপ্পং নাম নত্থি, যো যো যং যং ইচ্ছতি মণ্ডপং ৰা পাসাদং ৰা অঞ্ঞং ৰা কিঞ্চি নিৰেসনাদিকং, তস্স তস্স তং তং কাতুং সমত্থোম্হী’’তি. ‘‘তেন হি ময্হং কম্মং অত্থী’’তি. ‘‘কিং, অয্যা’’তি? ‘‘স্ৰাতনায মযা কোটিসতসহস্সভিক্খূ নিমন্তিতা, তেসং নিসীদনমণ্ডপং করিস্সসী’’তি? ‘‘অহং নাম করেয্যং, সচে মে ভতিং দাতুং সক্খিস্সথা’’তি. ‘‘সক্খিস্সামি, তাতা’’তি. ‘‘যদি এৰং, সাধু, করিস্সামী’’তি ৰত্ৰা একং পদেসং ওলোকেসি. সো দ্ৰাদসযোজনপ্পমাণো পদেসো কসিণমণ্ডলং ৰিয সমতলো পরমরমণীযো অহোসি. পুন সো ‘‘এত্তকে ঠানে সত্তরতনমযো দট্ঠব্বসারমণ্ডো মণ্ডপো উট্ঠহতূ’’তি ¶ চিন্তেত্ৰা ওলোকেসি. ততো তাৰদেৰ মণ্ডপসদিসো পথৰিতলং ভিন্দিত্ৰা মণ্ডপো উট্ঠহি. তস্স সোৰণ্ণমযেসু থম্ভেসু রজতমযা ঘটকা অহেসুং, রজতমযেসু থম্ভেসু সোৰণ্ণমযা ঘটকা, মণিত্থম্ভেসু পৰাল়মযা ঘটকা, পৰাল়মযেসু থম্ভেসু মণিমযা ঘটকা, সত্তরতনমযেসু থম্ভেসু সত্তরতনমযা ঘটকা অহেসুং.

ততো মণ্ডপস্স অন্তরন্তরাপি কিঙ্কিণিকজালা ওলম্বতূ’’তি ওলোকেসি, সহ ওলোকনেন কিঙ্কিণিকজালা ওলম্বি, যস্স মন্দৰাতেরিতস্স পঞ্চঙ্গিকস্সেৰ তুরিযস্স পরমমনোরমো মধুরো সদ্দো নিচ্ছরতি, দিব্বসঙ্গীতিৰত্তনকালো ৰিয অহোসি. ‘‘অন্তরন্তরা দিব্বগন্ধদামপুপ্ফদামপত্তদামসত্তরতনদামানি ওলম্বন্তূ’’তি চিন্তেসি, সহ চিন্তায দামানি ওলম্বিংসু. ‘‘কোটিসতসহস্সসঙ্খানং ভিক্খূনং আসনানি চ ¶ কপ্পিযমহগ্ঘপচ্চত্থরণানি আধারকানি চ পথৰিং ভিন্দিত্ৰা উট্ঠহন্তূ’’তি চিন্তেসি, তাৰদেৰ উট্ঠহিংসু. ‘‘কোণে কোণে একেকা উদকচাটি উট্ঠহতূ’’তি চিন্তেসি, তঙ্খণংযেৰ উদকচাটিযো পরমসীতলেন মধুরেন সুৰিসুদ্ধসুগন্ধকপ্পিযৰারিনা পুণ্ণা কদলিপণ্ণপিহিতমুখা উট্ঠহিংসু. সো দসসতনযনো এত্তকং মাপেত্ৰা ব্রাহ্মণস্স সন্তিকং গন্ত্ৰা – ‘‘এহি, অয্য, তৰ মণ্ডপং দিস্ৰা ময্হং ভতিং দেহী’’তি আহ. মহাপুরিসো গন্ত্ৰা তং মণ্ডপং ওলোকেসি. তস্স ওলোকেন্তস্সেৰ সকলসরীরং পঞ্চৰণ্ণায পীতিযা নিরন্তরং ফুটং অহোসি.

অথস্স মণ্ডপং ওলোকযতো এতদহোসি – ‘‘নাযং মণ্ডপো মনুস্সভূতেন কতো, ময্হং অজ্ঝাসযং ময্হং গুণং আগম্ম অদ্ধা সক্কস্স দেৰরঞ্ঞো ভৰনং উণ্হং অহোসি, ততো সক্কেন ¶ দেৰানমিন্দেন অযং মণ্ডপো নিম্মিতো’’তি. ‘‘ন খো পন মে যুত্তং এৰরূপে মণ্ডপে একদিৰসংযেৰ দানং দাতুং, সত্তাহং দস্সামী’’তি চিন্তেসি. বাহিরকদানং নাম তত্তকম্পি সমানং বোধিসত্তানং হদযং তুট্ঠিং কাতুং ন সক্কোতি, অলঙ্কতসীসং ৰা ছিন্দিত্ৰা অঞ্জিতানি ৰা অক্খীনি উপ্পাটেত্ৰা হদযমংসং ৰা উব্বট্টেত্ৰা দিন্নকালে বোধিসত্তানং চাগং নিস্সায তুট্ঠি নাম হোতি. অম্হাকং বোধিসত্তস্স হি সিৰিজাতকে (জা. ১.১৫.৫২ আদযো) দেৰসিকং পঞ্চকহাপণসতসহস্সানি ৰিস্সজ্জেত্ৰা চতূসু নগরদ্ৰারেসু নগরমজ্ঝেতি পঞ্চসু ঠানেসু দানং দেন্তস্স তং দানং চাগতুট্ঠিং উপ্পাদেতুং নাসক্খি. যদা পনস্স ব্রাহ্মণৰণ্ণেন আগন্ত্ৰা সক্কো দেৰরাজা অক্খীনি যাচি, তদা সো তানি চক্খূনি উপ্পাটেত্ৰা অদাসি, দদমানস্সেৰ হাসো উপ্পজ্জি, কেসগ্গমত্তম্পি চিত্তস্স অঞ্ঞথত্তং নাহোসি. এৰং সব্বঞ্ঞুবোধিসত্তানং বাহিরদানং নিস্সায তিত্তি নাম নত্থি. তস্মা সোপি মহাপুরিসো – ‘‘মযা কোটিসতসহস্সসঙ্খানং ভিক্খূনং দানং দাতুং ৰট্টতী’’তি চিন্তেত্ৰা তস্মিং মণ্ডপে নিসীদাপেত্ৰা সত্তাহং গৰপানং নাম দানং অদাসি.

এত্থ গৰপানন্তি ¶ মহন্তে মহন্তে কোলম্বে খীরস্স পূরেত্ৰা উদ্ধনেসু আরোপেত্ৰা ঘনপাকপক্কে খীরে থোকথোকে তণ্ডুলে পক্খিপিত্ৰা পক্কমধুসক্খরচুণ্ণসপ্পীহি অভিসঙ্খতভোজনং ৰুচ্চতি. ইদমেৰ চতুমধুরভোজনন্তিপি ৰুচ্চতি. মনুস্সাযেৰ পন পরিৰিসিতুং নাসক্খিংসু. দেৰাপি ¶ একন্তরিকা হুত্ৰা পরিৰিসিংসু. দ্ৰাদসযোজনপ্পমাণম্পি তং ঠানং তে ভিক্খূ গণ্হিতুং নপ্পহোসিযেৰ, তে পন ভিক্খূ অত্তনো অত্তনো অনুভাৰেন নিসীদিংসু. পরিযোসানদিৰসে সব্বেসং ভিক্খূনং পত্তে ধোৰাপেত্ৰা ভেসজ্জত্থায সপ্পিনৰনীতমধুফাণিতাদীনং পূরেত্ৰা তিচীৰরেহি সদ্ধিং অদাসি. তত্থ সঙ্ঘনৰকভিক্খুনা লদ্ধচীৰরসাটকা সতসহস্সগ্ঘনিকা অহেসুং.

অথ সত্থা অনুমোদনং করোন্তো – ‘‘অযং মহাপুরিসো এৰরূপং মহাদানং অদাসি, কো নু খো ভৰিস্সতী’’তি উপধারেন্তো – ‘‘অনাগতে কপ্পসতসহস্সাধিকানং দ্ৰিন্নং অসঙ্খ্যেয্যানং মত্থকে গোতমো নাম বুদ্ধো ভৰিস্সতী’’তি দিস্ৰা ততো মহাসত্তং আমন্তেত্ৰা – ‘‘ত্ৰং এত্তকং নাম কালং অতিক্কমিত্ৰা গোতমো নাম বুদ্ধো ভৰিস্সসী’’তি ব্যাকাসি. অথ মহাপুরিসো ভগৰতো ব্যাকরণং সুত্ৰা পমুদিতহদযো – ‘‘অহং কির বুদ্ধো ভৰিস্সামি, ন মে ঘরাৰাসেন অত্থো, পব্বজিস্সামী’’তি চিন্তেত্ৰা তথারূপং সম্পত্তিং খেল়পিণ্ডং ৰিয পহায সত্থু সন্তিকে পব্বজিত্ৰা বুদ্ধৰচনং উগ্গণ্হিত্ৰা অভিঞ্ঞা চ অট্ঠ সমাপত্তিযো চ নিব্বত্তেত্ৰা অপরিহীনজ্ঝানো যাৰতাযুকং ঠত্ৰা আযুপরিযোসানে ব্রহ্মলোকে নিব্বত্তি. তেন ৰুত্তং –

‘‘অহং ¶ তেন সমযেন, সুরুচী নাম ব্রাহ্মণো;

অজ্ঝাযকো মন্তধরো, তিণ্ণং ৰেদান পারগূ.

‘‘তমহং উপসঙ্কম্ম, সরণং গন্ত্ৰান সত্থুনো;

সম্বুদ্ধপ্পমুখং সঙ্ঘং, গন্ধমালেন পূজযিং;

পূজেত্ৰা গন্ধমালেন, গৰপানেন তপ্পযিং.

‘‘সোপি মং বুদ্ধো ব্যাকাসি, মঙ্গলো দ্ৰিপদুত্তমো;

অপরিমেয্যিতো কপ্পে, অযং বুদ্ধো ভৰিস্সতি.

‘‘পধানং পদহিত্ৰান…পে… হেস্সাম সম্মুখা ইম’’ন্তি. –

‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

‘‘তদা ¶ ¶ পীতিমনুব্রূহন্তো, সম্বোধিৰরপত্তিযা;

বুদ্ধে দত্ৰান মং গেহং, পব্বজিং তস্স সন্তিকে.

‘‘সুত্তন্তং ৰিনযং চাপি, নৰঙ্গং সত্থুসাসনং;

সব্বং পরিযাপুণিত্ৰা, সোভযিং জিনসাসনং.

‘‘তত্থপ্পমত্তো ৰিহরন্তো, ব্রহ্মং ভাৰেত্ৰ ভাৰনং;

অভিঞ্ঞাপারমিং গন্ত্ৰা, ব্রহ্মলোকমগঞ্ছহ’’ন্তি.

তত্থ গন্ধমালেনাতি গন্ধেহি চেৰ মালেহি চ. গৰপানেনাতি ইদং ৰুত্তমেৰ. ‘‘ঘতপানেনা’’তিপি কেচি পঠন্তি. তপ্পযিন্তি তপ্পেসিং. উত্তরিং ৰতমধিট্ঠাসিন্তি ভিয্যোপি ৰতমধিট্ঠাসিং. দসপারমিপূরিযাতি দসন্নং পারমীনং পূরণত্থায. পীতিন্তি হদযতুট্ঠিং. অনুব্রূহন্তোতি ৰড্ঢেন্তো. সম্বোধিৰরপত্তিযাতি বুদ্ধত্তপ্পত্তিযা. বুদ্ধে দত্ৰানাতি বুদ্ধস্স পরিচ্চজিত্ৰা ¶ . মং গেহন্তি মম গেহং, সব্বং সাপতেয্যং চতুপচ্চযত্থায বুদ্ধস্স ভগৰতো পরিচ্চজিত্ৰাতি অত্থো. তত্থাতি তস্মিং বুদ্ধসাসনে. ব্রহ্মন্তি ব্রহ্মৰিহারভাৰনং ভাৰেত্ৰা.

মঙ্গলস্স পন ভগৰতো নগরং উত্তরং নাম অহোসি, পিতাপিস্স উত্তরো নাম রাজা খত্তিযো, মাতাপি উত্তরা নাম, সুদেৰো চ ধম্মসেনো চ দ্ৰে অগ্গসাৰকা, পালিতো নাম উপট্ঠাকো, সীৰলা চ অসোকা চ দ্ৰে অগ্গসাৰিকা, নাগরুক্খো বোধি, অট্ঠাসীতিহত্থুব্বেধং সরীরং অহোসি, নৰুতিৰস্সসহস্সং আযুপরিমাণং, ভরিযা পনস্স যসৰতী নাম, সীৰলো নাম পুত্তো, অস্সযানেন নিক্খমি. উত্তরারামে ৰসি. উত্তরো নাম উপট্ঠাকো, তস্মিং পন নৰুতিৰস্সসহস্সানি ঠত্ৰা পরিনিব্বুতে ভগৰতি একপ্পহারেনেৰ দসচক্কৰাল়সহস্সানি একন্ধকারানি অহেসুং. সব্বচক্কৰাল়েসু মনুস্সানং মহন্তং আরোদনপরিদেৰনং অহোসি. তেন ৰুত্তং –

‘‘উত্তরং নাম নগরং, উত্তরো নাম খত্তিযো;

উত্তরা নাম জনিকা, মঙ্গলস্স মহেসিনো.

‘‘সুদেৰো ধম্মসেনো চ, অহেসুং অগ্গসাৰকা;

পালিতো নামুপট্ঠাকো, মঙ্গলস্স মহেসিনো.

‘‘সীৰলা ¶ চ অসোকা চ, অহেসুং অগ্গসাৰিকা;

বোধি তস্স ভগৰতো, নাগরুক্খোতি ৰুচ্চতি.

‘‘অট্ঠাসীতি ¶ রতনানি, অচ্চুগ্গতো মহামুনি;

ততো নিদ্ধাৰতী রংসী, অনেকসতসহস্সিযো.

‘‘নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘যথাপি সাগরে ঊমী, ন সক্কা তা গণেতুযে;

তথেৰ সাৰকা তস্স, ন সক্কা তে গণেতুযে.

‘‘যাৰ ¶ অট্ঠাসি সম্বুদ্ধো, মঙ্গলো লোকনাযকো;

ন তস্স সাসনে অত্থি, সকিলেসমরণং তদা.

‘‘ধম্মোক্কং ধারযিত্ৰান, সন্তারেত্ৰা মহাজনং;

জলিত্ৰা ধুমকেতূৰ, নিব্বুতো সো মহাযসো.

‘‘সঙ্খারানং সভাৰত্তং, দস্সযিত্ৰা সদেৰকে;

জলিত্ৰা অগ্গিক্খন্ধোৰ, সূরিযো অত্থঙ্গতো যথা’’তি.

তত্থ ততোতি তস্স মঙ্গলস্স সরীরতো. নিদ্ধাৰতীতি নিদ্ধাৰন্তি, ৰচনৰিপরিযাযো দট্ঠব্বো. রংসীতি রস্মিযো. অনেকসতসহস্সিযোতি অনেকসতসহস্সা. ঊমীতি ৰীচিযো তরঙ্গা. গণেতুযেতি গণেতুং সঙ্খাতুং. এত্তকা সাগরে ঊমিযোতি যথা ন সক্কা গণেতুং, এৰং তস্স ভগৰতো সাৰকাপি ন সক্কা গণেতুং, অথ খো গণনপথং ৰীতিৰত্তাতি অত্থো. যাৰাতি যাৰতকং কালং. সকিলেসমরণং তদাতি সহ কিলেসেহি সকিলেসো, সকিলেসস্স মরণং সকিলেসমরণং, তং নত্থি. তদা কির তস্স ভগৰতো সাসনে সাৰকা সব্বে অরহত্তং পত্ৰাযেৰ পরিনিব্বাযিংসু. পুথুজ্জনা ৰা সোতাপন্নাদযো ৰা হুত্ৰা ন কালমকংসূতি অত্থো. কেচি ‘‘সম্মোহমারণং তদা’’তি পঠন্তি.

ধম্মোক্কন্তি ধম্মদীপকং. ধূমকেতূতি অগ্গি ৰুচ্চতি, ইধ পন পদীপো দট্ঠব্বো তস্মা পদীপো ৰিয জলিত্ৰা নিব্বুতোতি অত্থো. মহাযসোতি মহাপরিৰারো ¶ . কেচি ‘‘নিব্বুতো সো সসাৰকো’’তি পঠন্তি. সঙ্খারানন্তি সঙ্খাতধম্মানং সপ্পচ্চযধম্মানং. সভাৰত্তন্তি ¶ অনিচ্চাদিসামঞ্ঞলক্খণং. সূরিযো অত্থঙ্গতো যথাতি যথা সহস্সকিরণো দিৰসকরো সব্বং তমগণং ৰিধমিত্ৰা সব্বঞ্চ লোকং ওভাসেত্ৰা অত্থমুপগচ্ছতি, এৰং মঙ্গলদিৰসকরোপি ৰেনেয্যকমলৰনৰিকসনকরো সব্বং অজ্ঝত্তিকবাহিরলোকতমং ৰিধমিত্ৰা অত্তনো সরীরপ্পভায জলিত্ৰা অত্থঙ্গতোতি অত্থো. সেসগাথা সব্বত্থ উত্তানা এৰাতি.

মঙ্গলবুদ্ধৰংসৰণ্ণনা নিট্ঠিতা.

এৰং ¶ একপ্পহারেনেৰ দসসহস্সিলোকধাতুং একন্ধকারং কত্ৰা তস্মিং ভগৰতি পরিনিব্বুতে তস্স অপরভাগে নৰুতিৰস্সসহস্সাযুকেসু মনুস্সেসু অনুক্কমেন পরিহাযিত্ৰা দসৰস্সেসু জাতেসু পুন ৰড্ঢিত্ৰা অনুক্কমেন অসঙ্খ্যেয্যাযুকা হুত্ৰা পুন পরিহাযিত্ৰা নৰুতিৰস্সসহস্সাযুকেসু জাতেসু সুমনো নাম বোধিসত্তো পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা মেখলনগরে সুদত্তস্স নাম রঞ্ঞো কুলে সিরিমায নাম দেৰিযা কুচ্ছিস্মিং পটিসন্ধিং অগ্গহেসি. পাটিহারিযানি পুব্বে ৰুত্তনযানেৰ.

সো অনুক্কমেন ৰুদ্ধিপ্পত্তো সিরিৰড্ঢনসোমৰড্ঢনইদ্ধিৰড্ঢননামধেয্যেসু তীসু পাসাদেসু তেসট্ঠিযা নাটকিত্থিসতসহস্সেহি পরিচারিযমানো সুরযুৰতীহি পরিচারিযমানো দেৰকুমারো ৰিয নৰৰস্সসহস্সানি দিব্বসুখসদিসং ৰিসযসুখমনুভৰমানো ৰটংসিকায নাম দেৰিযা অনুপমং নাম নিরুপমং পুত্তং জনেত্ৰা চত্তারি নিমিত্তানি দিস্ৰা হত্থিযানেন নিক্খমিত্ৰা পব্বজি. তং পন পব্বজন্তং তিংসকোটিযো অনুপব্বজিংসু.

সো তেহি পরিৰুতো দসমাসে পধানচরিযং চরিত্ৰা ৰিসাখপুণ্ণমায অনোমনিগমে অনোমসেট্ঠিনো ধীতায অনুপমায নাম দিন্নং পক্খিত্তদিব্বোজং ¶ পাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা অনুপমাজীৰকেন দিন্না অট্ঠ তিণমুট্ঠিযো গহেত্ৰা নাগবোধিং উপগন্ত্ৰা তং পদক্খিণং কত্ৰা অট্ঠহি তিণমুট্ঠীহি তিংসহত্থৰিত্থতং তিণসন্থরং কত্ৰা তত্থ পল্লঙ্কং আভুজিত্ৰা নিসীদি. ততো মারবলং ¶ ৰিধমিত্ৰা সব্বঞ্ঞুতঞ্ঞাণং পটিৰিজ্ঝিত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি (ধ. প. ১৫৩-১৫৪) উদানং উদানেসি. তেন ৰুত্তং –

‘‘মঙ্গলস্স অপরেন, সুমনো নাম নাযকো;

সব্বধম্মেহি অসমো, সব্বসত্তানমুত্তমো’’তি.

তত্থ ¶ মঙ্গলস্স অপরেনাতি মঙ্গলস্স ভগৰতো অপরভাগে. সব্বধম্মেহি অসমোতি সব্বেহিপি সীলসমাধিপঞ্ঞাধম্মেহি অসমো অসদিসো.

সুমনো কির ভগৰা বোধিসমীপেযেৰ সত্তসত্তাহানি ৰীতিনামেত্ৰা ধম্মদেসনত্থং ব্রহ্মাযাচনং সম্পটিচ্ছিত্ৰা – ‘‘কস্স নু খো অহং পঠমং ধম্মং দেসেয্য’’ন্তি (দী. নি. ২.৭২; ম. নি. ১.২৮৪; ২.৩৪১; মহাৰ. ১০) উপধারেন্তো অত্তনা সহ পব্বজিতানং তিংসকোটিযো চ অত্তনো কনিট্ঠভাতিকং ৰেমাতিকং সরণকুমারঞ্চ পুরোহিতপুত্তং ভাৰিতত্তমাণৰকঞ্চ উপনিস্সযসম্পন্নে দিস্ৰা – ‘‘এতেসং পঠমং ধম্মং দেসেয্য’’ন্তি চিন্তেত্ৰা হংসরাজা ৰিয গগনপথেন মেখলুয্যানে ওতরিত্ৰা উয্যানপালং পেসেত্ৰা অত্তনো কনিট্ঠভাতিকং সরণকুমারঞ্চ পুরোহিতপুত্তং ভাৰিতত্তকুমারঞ্চ পক্কোসাপেত্ৰা তেসং পরিৰারভূতা সত্ততিংসকোটিযো অত্তনা সহ পব্বজিতা তিংসকোটিযো চ অঞ্ঞে চ বহূ দেৰমনুস্সকোটিযো চাতি এৰং কোটিসতসহস্সং ধম্মচক্কপ্পৰত্তনেন ধম্মামতং পাযেসি. তেন ৰুত্তং –

‘‘তদা অমতভেরিং সো, আহনী মেখলে পুরে;

ধম্মসঙ্খসমাযুত্তং, নৰঙ্গং জিনসাসন’’ন্তি.

তত্থ অমতভেরিন্তি অমতাধিগমায নিব্বানাধিগমায ভেরিং. আহনীতি ৰাদযি, ধম্মং দেসেসীতি অত্থো. সাযং অমতভেরী নাম অমতপরিযোসানং নৰঙ্গং বুদ্ধৰচনং. তেনেৰাহ – ‘‘ধম্মসঙ্খসমাযুত্তং, নৰঙ্গং জিনসাসন’’ন্তি. তত্থ ধম্মসঙ্খসমাযুত্তন্তি চতুসচ্চধম্মকথাসঙ্খৰরসমাযুত্তং.

সুমনো ¶ পন লোকনাযকো অভিসম্বোধিং পাপুণিত্ৰা পটিঞ্ঞানুরূপং পটিপদং পটিপজ্জমানো মহাজনস্স ভৰবন্ধনমোক্খত্থায কুসলরতনস্স কিলেসচোরেহি ৰিলুপ্পমানস্স পরিত্তানত্থং সীলৰিপুলপাকারং সমাধিপরিখাপরিৰারিতং ৰিপস্সনাঞাণদ্ৰারং সতিসম্পজঞ্ঞদল়্হকৰাটং সমাপত্তিমণ্ডপাদিপটিমণ্ডিতং বোধিপক্খিযজনসমাকুলং অমতৰরনগরং মাপেসি. তেন ৰুত্তং –

‘‘নিজ্জিনিত্ৰা ¶ কিলেসে সো, পত্ৰা সম্বোধিমুত্তমং;

মাপেসি নগরং সত্থা, সদ্ধম্মপুরৰরুত্তম’’ন্তি.

তত্থ নিজ্জিনিত্ৰাতি ৰিজিনিত্ৰা অভিভুয্য, কিলেসাভিসঙ্খারদেৰপুত্তমারে ৰিদ্ধংসেত্ৰাতি অত্থো ¶ . সোতি সো সুমনো ভগৰা. ‘‘ৰিজিনিত্ৰা কিলেসে হী’’তিপি পাঠো. তত্থ হি-কারো পদপূরণমত্তে নিপাতো. পত্ৰাতি অধিগন্ত্ৰা. ‘‘পত্তো’’তিপি পাঠো. নগরন্তি নিব্বাননগরং. সদ্ধম্মপুরৰরুত্তমন্তি সদ্ধম্মসঙ্খাতং পুরৰরেসু উত্তমং সেট্ঠং পধানভূতং. অথ ৰা সদ্ধম্মমযেসু পুরেসু পৰরেসু উত্তমং সদ্ধম্মপুরৰরুত্তমং. পুরিমস্মিং অত্থৰিকপ্পে ‘‘নগর’’ন্তি তস্সেৰ ৰেৰচনন্তি দট্ঠব্বং. পটিৰিদ্ধধম্মসভাৰানং সেক্খাসেক্খানং অরিযপুগ্গলানং পতিট্ঠানং গোচরনিৰাসট্ঠেন নিব্বানং ‘‘নগর’’ন্তি ৰুচ্চতি. তস্মিং পন সদ্ধম্মৰরনগরে সো সত্থা অৰিচ্ছিন্নং অকুটিলং উজুং পুথুলঞ্চ ৰিত্থতঞ্চ সতিপট্ঠানমযং মহাৰীথিং মাপেসি. তেন ৰুত্তং –

‘‘নিরন্তরং অকুটিলং, উজুং ৰিপুলৰিত্থতং;

মাপেসি সো মহাৰীথিং, সতিপট্ঠানৰরুত্তম’’ন্তি.

তত্থ নিরন্তরন্তি কুসলজৰনসঞ্চরণানন্তরভাৰতো নিরন্তরং. অকুটিলন্তি কুটিলভাৰকরদোসৰিরহিততো অকুটিলং. উজুন্তি অকুটিলত্তাৰ উজুং. পুরিমপদস্সেৰ অত্থদীপকমিদং ৰচনং. ৰিপুলৰিত্থতন্তি আযামতো চ ৰিত্থারতো চ পুথুলৰিত্থতং, পুথুলৰিত্থতভাৰো লোকিযলোকুত্তরসতিপট্ঠানৰসেন দট্ঠব্বো. মহাৰীথিন্তি মহামগ্গং. সতিপট্ঠানৰরুত্তমন্তি সতিপট্ঠানঞ্চ তং ৰরেসু উত্তমঞ্চাতি সতিপট্ঠানৰরুত্তমং. অথ ৰা ৰরং সতিপট্ঠানমযং উত্তমৰীথিন্তি অত্থো.

ইদানি তস্স নিব্বানমহানগরস্স তস্সং সতিপট্ঠানৰীথিযং চত্তারি সামঞ্ঞফলানি চতস্সো পটিসম্ভিদা ছ অভিঞ্ঞা অট্ঠ সমাপত্তিযোতি ইমানি ¶ মহগ্ঘরতনানি উভোসু পস্সেসু ধম্মাপণে পসারেসি. তেন ৰুত্তং –

‘‘ফলে চত্তারি সামঞ্ঞে, চতস্সো পটিসম্ভিদা;

ছল়ভিঞ্ঞাট্ঠসমাপত্তী, পসারেসি তত্থ ৰীথিয’’ন্তি.

ইদানি ¶ ভগৰা ইমানি রতনভণ্ডানি যে পন অপ্পমত্তা সতিমন্তো পণ্ডিতা হিরিওত্তপ্পৰীরিযাদীহি সমন্নাগতা, তে আদীযন্তীতি তেসং রতনানং হরণূপাযং দস্সেন্তো –

‘‘যে অপ্পমত্তা অখিলা, হিরিৰীরিযেহুপাগতা;

তে তে ইমে গুণৰরে, আদিযন্তি যথাসুখ’’ন্তি. – আহ;

তত্থ ¶ যেতি অনিযমুদ্দেসো. অপ্পমত্তাতি পমাদস্স পটিপক্খভূতেন সতিযা অৰিপ্পৰাসলক্খণেন অপ্পমাদেন সমন্নাগতা. অখিলাতি পঞ্চচেতোখিলরহিতা. হিরিৰীরিযেহুপাগতাতি কাযদুচ্চরিতাদীহি হিরীযতীতি হিরী, লজ্জাযেতং অধিৰচনং. ৰীরস্স ভাৰো ৰীরিযং, তং উস্সাহলক্খণং. তেহি হিরিৰীরিযেহি উপাগতা সমন্নাগতা ভব্বপুগ্গলা. তেতি ইদং পুব্বে অনিযমুদ্দেসস্স নিযমুদ্দেসো. পুন তেতি ৰুত্তপ্পকারে গুণরতনৰিসেসে তে কুলপুত্তা আদিযন্তি পটিলভন্তি অধিগচ্ছন্তীতি অত্থো. সব্বং পন সুমনো ভগৰা কতৰিদিতমনো ধম্মভেরিং আহনিত্ৰা ধম্মনগরং মাপেত্ৰা ইমিনা নযেন পঠমমেৰ সতসহস্সকোটিযো বোধেসি. তেন ৰুত্তং –

‘‘এৰমেতেন যোগেন, উদ্ধরন্তো মহাজনং;

বোধেসি পঠমং সত্থা, কোটিসতসহস্সিযো’’তি.

তত্থ উদ্ধরন্তোতি সংসারসাগরতো অরিযমগ্গনাৰায সমুদ্ধরন্তো. কোটিসতসহস্সিযোতি সতসহস্সকোটিযোতি অত্থো. ৰিপরিযাযেন নিদ্দিট্ঠং.

যদা পন সুমনো লোকনাযকো সুনন্দৰতীনগরে অম্বরুক্খমূলে তিত্থিযমদমানমদ্দনং যমকপাটিহারিযং কত্ৰা সত্তানং কোটিসহস্সং ধম্মামতং ¶ পাযেসি. অযং দুতিযো অভিসমযো অহোসি. তেন ৰুত্তং –

‘‘যম্হি কালে মহাৰীরো, ওৰদী তিত্থিযে গণে;

কোটিসহস্সা ভিসমিংসু, দুতিযে ধম্মদেসনে’’তি.

তত্থ তিত্থিযে গণেতি তিত্থিযভূতে গণে, তিত্থিযানং গণে ৰা ‘‘তিত্থিযে অভিমদ্দন্তো, বুদ্ধো ধম্মমদেসযী’’তি পঠন্তি কেচি.

যদা পন দসসু চক্কৰাল়সহস্সেসু দেৰতা ইমস্মিং চক্কৰাল়ে সন্নিপতিত্ৰা মনুস্সা চ নিরোধকথং সমুট্ঠাপেসুং – ‘‘কথং নিরোধং সমাপজ্জন্তি, কথং নিরোধসমাপন্না হোন্তি, কথং ¶ নিরোধা ৰুট্ঠহন্তী’’তি? এৰং সমাপজ্জনঅধিট্ঠানৰুট্ঠানাদীসু ৰিনিচ্ছযং কাতুং অসক্কোন্তা সহ মনুস্সেহি ছসু কামাৰচরদেৰলোকেসু দেৰা চ নৰসু ব্রহ্মলোকেসু ব্রহ্মানো চ দ্ৰেল়্হকজাতা দ্ৰিধা অহেসুং. ততো নরসুন্দরেন অরিন্দমেন নাম রঞ্ঞা সদ্ধিং সাযন্হসমযে সুমনদসবলং ¶ সব্বলোকনাথং উপসঙ্কমিংসু; উপসঙ্কমিত্ৰা অরিন্দমো রাজা ভগৰন্তং নিরোধপঞ্হং পুচ্ছি. ততো ভগৰতা নিরোধপঞ্হে ৰিস্সজ্জিতে নৰুতিপাণকোটিসহস্সানং ধম্মাভিসমযো অহোসি. অযং ততিযো অভিসমযো অহোসি. তেন ৰুত্তং –

‘‘যদা দেৰা মনুস্সা চ, সমগ্গা একমানসা;

নিরোধপঞ্হং পুচ্ছিংসু, সংসযং চাপি মানসং.

‘‘তদাপি ধম্মদেসনে, নিরোধপরিদীপনে;

নৰুতিকোটিসহস্সানং, ততিযাভিসমযো অহূ’’তি.

তস্স পন সুমনস্স ভগৰতো তযো সাৰকসন্নিপাতা অহেসুং. তত্থ পঠমসন্নিপাতে মেখলনগরং উপনিস্সায ৰস্সং ৰসিত্ৰা পঠমপৰারণায অরহন্তানং কোটিসহস্সেন এহিভিক্খুপব্বজ্জায পব্বজিতেন সদ্ধিং ভগৰা পৰারেসি, অযং পঠমো সন্নিপাতো অহোসি. অথাপরেন সমযেন সঙ্কস্সনগরস্সাৰিদূরে অরিন্দমরাজকুসলবলনিব্বত্তে যোজনপ্পমাণে কনকপব্বতে নিসিন্নো সরদসমযরুচিরকরনিকরো দিৰসকরো ৰিয যুগন্ধরপব্বতে মুনিৰরদিৰসকরো অরিন্দমরাজানং পরিৰারেত্ৰা ¶ আগতানং পুরিসানং নৰুতিকোটিসহস্সানি দমেত্ৰা সব্বে এহিভিক্খুপব্বজ্জায পব্বাজেত্ৰা তস্মিংযেৰ দিৰসে অরহত্তং পত্তেহি ভিক্খূহি পরিৰুতো চতুরঙ্গসমন্নাগতে সন্নিপাতে পাতিমোক্খং উদ্দিসি. অযং দুতিযো সন্নিপাতো অহোসি. যদা পন সক্কো দেৰরাজা সুগতদস্সনত্থায উপসঙ্কমি, তদা সুমনো ভগৰা অসীতিযা অরহন্তকোটিসহস্সেহি পরিৰুতো পাতিমোক্খং উদ্দিসি, অযং ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, সুমনস্স মহেসিনো;

খীণাসৰানং ৰিমলানং, সন্তচিত্তান তাদিনং.

‘‘ৰস্সংৰুট্ঠস্স ভগৰতো, অভিঘুট্ঠে পৰারণে;

কোটিসতসহস্সেহি, পৰারেসি তথাগতো.

‘‘ততো পরং সন্নিপাতে, ৰিমলে কঞ্চনপব্বতে;

নৰুতিকোটিসহস্সানং, দুতিযো আসি সমাগমো.

‘‘যদা ¶ সক্কো দেৰরাজা, বুদ্ধদস্সনুপাগমি;

অসীতিকোটিসহস্সানং, ততিযো আসি সমাগমো’’তি.

তত্থ ¶ অভিঘুট্ঠে পৰারণেতি লিঙ্গৰিপল্লাসো দট্ঠব্বো, অভিঘুট্ঠায পৰারণাযাতি অত্থো. ততোপরন্তি ততো অপরভাগে. কঞ্চনপব্বতেতি কনকমযে পব্বতে. বুদ্ধদস্সনুপাগমীতি বুদ্ধদস্সনত্থমুপাগমি. তদা কির অম্হাকং বোধিসত্তো অতুলো নাম নাগরাজা অহোসি মহিদ্ধিকো মহানুভাৰো. সো ‘‘লোকে বুদ্ধো উপ্পন্নো’’তি সুত্ৰা ঞাতিগণপরিৰুতো সকভৰনা নিক্খমিত্ৰা কোটিসতসহস্সভিক্খুপরিৰারস্স সুমনস্স ভগৰতো দিব্বেহি তুরিযেহি উপহারং কারেত্ৰা মহাদানং পৰত্তেত্ৰা পচ্চেকদুস্সযুগানি দত্ৰা সরণেসু পতিট্ঠাসি. সোপি নং সত্থা ‘‘অনাগতে বুদ্ধো ভৰিস্সতী’’তি ব্যাকাসি. তেন ৰুত্তং –

‘‘অহং তেন সমযেন, নাগরাজা মহিদ্ধিকো;

অতুলো নাম নামেন, উস্সন্নকুসলসঞ্চযো.

‘‘তদাহং নাগভৰনা, নিক্খমিত্ৰা সঞাতিভি;

নাগানং দিব্বতুরিযেহি, সসঙ্ঘং জিনমুপট্ঠহিং.

‘‘কোটিসতসহস্সানং ¶ , অন্নপানেন তপ্পযিং;

পচ্চেকদুস্সযুগং দত্ৰা, সরণং তমুপাগমিং.

‘‘সোপি মং বুদ্ধো ব্যাকাসি, সুমনো লোকনাযকো;

অপরিমেয্যিতো কপ্পে, অযং বুদ্ধো ভৰিস্সতি.

‘‘পধানং পদহিত্ৰান…পে… হেস্সাম সম্মুখা ইমং’’.

যথা কোণ্ডঞ্ঞবুদ্ধৰংসে, এৰং অট্ঠ গাথা ৰিত্থারেতব্বাতি.

‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা’’তি.

তস্স ¶ পন সুমনস্স ভগৰতো মেখলং নাম নগরং অহোসি, সুদত্তো নাম রাজা পিতা, সিরিমা নাম দেৰী মাতা, সরণো চ ভাৰিতত্তো চ দ্ৰে অগ্গসাৰকা, উদেনো নামুপট্ঠাকো, সোণা চ উপসোণা চ দ্ৰে অগ্গসাৰিকা, নাগরুক্খো বোধি, নৰুতিহত্থুব্বেধং সরীরং, নৰুতিযেৰ ৰস্সসহস্সানি আযুপ্পমাণং অহোসি, ৰটংসিকা নামস্স মহেসী দেৰী, অনূপমো নাম পুত্তো অহোসি, হত্থিযানেন নিক্খমি. উপট্ঠাকো অঙ্গরাজা. অঙ্গারামে ৰসীতি. তেন ৰুত্তং –

‘‘নগরং ¶ মেখলং নাম, সুদত্তো নাম খত্তিযো;

সিরিমা নাম জনিকা, সুমনস্স মহেসিনো.

‘‘নৰৰস্সসহস্সানি, অগারং অজ্ঝ সো ৰসি;

চন্দো সুচন্দো ৰটংসো চ, তযো পাসাদমুত্তমা.

‘‘তেসট্ঠিসতসহস্সানি, নারিযো সমলঙ্কতা;

ৰটংসিকা নাম নারী, অনূপমো নাম অত্রজো.

‘‘নিমিত্তে চতুরো দিস্ৰা, হত্থিযানেন নিক্খমি;

অনূনদসমাসানি, পধানং পদহী জিনো.

‘‘ব্রহ্মুনা যাচিতো সন্তো, সুমনো লোকনাযকো;

ৰত্তি চক্কং মহাৰীরো, মেখলে পুরমুত্তমে.

‘‘সরণো ভাৰিতত্তো চ, অহেসুং অগ্গসাৰকা;

উদেনো নামুপট্ঠাকো, সুমনস্স মহেসিনো.

‘‘সোণা ¶ চ উপসোণা চ, অহেসুং অগ্গসাৰিকা;

সোপি বুদ্ধো অমিতযসো, নাগমূলে অবুজ্ঝথ.

‘‘ৰরুণো চেৰ সরণো চ, অহেসুং অগ্গুপট্ঠকা;

চালা চ উপচালা চ, অহেসুং অগ্গুপট্ঠিকা.

‘‘উচ্চত্তনেন ¶ সো বুদ্ধো, নৰুতিহত্থমুগ্গতো;

কঞ্চনগ্ঘিযসঙ্কাসো, দসসহস্সী ৰিরোচতি.

‘‘নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘তারণীযে তারযিত্ৰা, বোধনীযে চ বোধযি;

পরিনিব্বাযি সম্বুদ্ধো, উল়ুরাজাৰ অত্থমি.

‘‘তে চ খীণাসৰা ভিক্খূ, সো চ বুদ্ধো অসাদিসো;

অতুলপ্পভং দস্সযিত্ৰা, নিব্বুতা তে মহাযসা.

‘‘তঞ্চ ঞাণং অতুলিযং, তানি চ অতুলানি রতনানি;

সব্বং তমন্তরহিতং, ননু রিত্তা সব্বসঙ্খারা.

‘‘সুমনো যসধরো বুদ্ধো, অঙ্গারামম্হি নিব্বুতো;

তত্থেৰ তস্স জিনথূপো, চতুযোজনমুগ্গতো’’তি.

তত্থ ¶ কঞ্চনগ্ঘিযসঙ্কাসোতি ৰিৰিধরতনৰিচিত্তকঞ্চনমযগ্ঘিকসদিসরূপসোভো. দসসহস্সী ৰিরোচতীতি তস্স পভায দসসহস্সীপি লোকধাতু ৰিরোচতীতি অত্থো. তারণীযেতি তারযিতব্বে, তারযিতুং ৰুত্তে সব্বে বুদ্ধৰেনেয্যেতি অত্থো. উল়ুরাজাৰাতি চন্দো ৰিয. অত্থমীতি অত্থঙ্গতো. কেচি ‘‘অত্থং গতো’’তি পঠন্তি. অসাদিসোতি অসদিসো. মহাযসাতি মহাকিত্তিসদ্দা মহাপরিৰারা চ. তঞ্চ ঞাণন্তি তং সব্বঞ্ঞুতঞ্ঞাণঞ্চ. অতুলিযন্তি অতুল্যং অসদিসং. সেসং সব্বত্থ উত্তানমেৰাতি.

সুমনবুদ্ধৰংসৰণ্ণনা নিট্ঠিতা.

সুমনস্স ¶ ¶ পন ভগৰতো অপরভাগে সাসনে চস্স অন্তরহিতে নৰুতিৰস্সসহস্সাযুকা মনুস্সা অনুক্কমেন পরিহাযিত্ৰা দসৰস্সাযুকা হুত্ৰা পুন অনুক্কমেন ৰড্ঢিত্ৰা অসঙ্খ্যেয্যাযুকা হুত্ৰা পুন পরিহাযমানা সট্ঠিৰস্সসহস্সাযুকা অহেসুং. তদা রেৰতো নাম সত্থা উদপাদি. সোপি পারমিযো পূরেত্ৰা অনেকরতনসমুজ্জলিতভৰনে তুসিতভৰনে নিব্বত্তিত্ৰা ততো চৰিত্ৰা সব্বধনধঞ্ঞৰতিসুধঞ্ঞৰতীনগরে সব্বালঙ্কারসমলঙ্কতঅমিতরুচিরপরিৰারপরিৰুতস্স সিরিৰিভৰসমুদযেনাকুলস্স সব্বসমিদ্ধিৰিপুলস্স ৰিপুলস্স নাম রঞ্ঞো কুলে সব্বজননযনালিপালিসমাকুলায সম্ফুল্লনযনকুৰলযসস্সিরিকসিনিদ্ধৰদনকমলাকরসোভাসমুজ্জলায সুরুচিরমনোহরগুণগণৰিপুলায ৰিপুলায নাম অগ্গমহেসিযা কুচ্ছিস্মিং পটিসন্ধিং গহেত্ৰা দসন্নং মাসানং অচ্চযেন চিত্তকূটপব্বততো সুৰণ্ণহংসরাজা ৰিয মাতুকুচ্ছিতো নিক্খমি.

তস্স পটিসন্ধিযং জাতিযঞ্চ পাটিহারিযানি পুব্বে ৰুত্তনযানেৰ অহেসুং. সুদস্সনরতনগ্ঘিআৰেল়নামকা তযো চস্স পাসাদা অহেসুং. সুদস্সনাদেৰিপ্পমুখানি তেত্তিংস ইত্থিসহস্সানি পচ্চুপট্ঠিতানি অহেসুং. তাহি পরিৰুতো সো সুরযুৰতীহি পরিৰুতো দেৰকুমারো ৰিয ছব্বস্সসহস্সানি ৰিসযসুখমনুভৰমানো অগারং ¶ অজ্ঝাৰসি. সো সুদস্সনায নাম দেৰিযা ৰরুণে নাম তনযে জাতে চত্তারি নিমিত্তানি দিস্ৰা নানাৰিরাগতনুৰরৰসননিৰসনো আমুক্কমুত্তাহারমণিকুণ্ডলো ৰরকেযূরমকুটকটকধরো পরমসুরভিগন্ধকুসুমসমলঙ্কতো পরমরুচিরকরনিকরো সরদসমযরজনিকরো ৰিয তারাগণপরিৰুতো ৰিয চন্দো তিদসগণপরিৰুতো ৰিয দসসতনযনো ব্রহ্মগণপরিৰুতো ৰিয চ হারিতমহাব্রহ্মা চতুরঙ্গিনিযা মহতিযা সেনায পরিৰুতো আজঞ্ঞরথেন মহাভিনিক্খমনং নিক্খমিত্ৰা সব্বাভরণানি ওমুঞ্চিত্ৰা ভণ্ডাগারিকস্স হত্থে দত্ৰা জলজামলাৰিকলনীলকুৰলযদলসদিসেনাতিনিসিতেনাতিতিখিণেনাসিনা সকেসমকুটং ছিন্দিত্ৰা আকাসে খিপি. তং সক্কো দেৰরাজা সুৰণ্ণচঙ্কোটকেন ¶ পটিগ্গহেত্ৰা তাৰতিংসভৰনং নেত্ৰা সিনেরুমুদ্ধনি সত্তরতনমযং চেতিযং অকাসি.

মহাপুরিসো ¶ পন দেৰদত্তানি কাসাযানি পরিদহিত্ৰা পব্বজি, একা চ নং পুরিসকোটি অনুপব্বজি. সো তেহি পরিৰুতো সত্তমাসে পধানচরিযং চরিত্ৰা ৰিসাখপুণ্ণমায অঞ্ঞতরায সাধুদেৰিযা নাম সেট্ঠিধীতায দিন্নং মধুপাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা সাযন্হসমযে অঞ্ঞতরেনাজীৰকেন দিন্না অট্ঠ তিণমুট্ঠিযো গহেত্ৰা মত্তৰরনাগগামী নাগবোধিং পদক্খিণং কত্ৰা তেপণ্ণাসহত্থৰিত্থতং তিণসন্থরং সন্থরিত্ৰা চতুরঙ্গৰীরিযং অধিট্ঠায নিসীদিত্ৰা মারবলং ৰিধমিত্ৰা সব্বঞ্ঞুতঞ্ঞাণং পটিৰিজ্ঝিত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি (ধ. প. ১৫৩-১৫৪) উদানং উদানেসি. তেন ৰুত্তং –

‘‘সুমনস্স অপরেন, রেৰতো নাম নাযকো;

অনুপমো অসদিসো, অতুলো উত্তমো জিনো’’তি.

রেৰতো কির সত্থা বোধিসমীপেযেৰ সত্তসত্তাহানি ৰীতিনামেত্ৰা ধম্মদেসনত্থং ব্রহ্মাযাচনং সম্পটিচ্ছিত্ৰা – ‘‘কস্স নু খো অহং পঠমং ধম্মং দেসেয্য’’ন্তি (দী. নি. ২.৭২; ম. নি. ১.২৮৪; ২.৩৪১; মহাৰ. ১০) উপধারেন্তো অত্তনা সহ পব্বজিতভিক্খুকোটিযো অঞ্ঞে চ বহূ দেৰমনুস্সে উপনিস্সযসম্পন্নে দিস্ৰা আকাসেন গন্ত্ৰা ৰরুণারামে ওতরিত্ৰা তেহি পরিৰুতো গম্ভীরং নিপুণং তিপরিৰট্টং অপ্পটিৰত্তিযং অঞ্ঞেন অনুত্তরং ধম্মচক্কং পৰত্তেত্ৰা ভিক্খূনং কোটি অরহত্তে পতিট্ঠাপেসি. তীসু মগ্গফলেসু পতিট্ঠিতানং গণনপরিচ্ছেদো নত্থি. তেন ৰুত্তং –

‘‘সোপি ধম্মং পকাসেসি, ব্রহ্মুনা অভিযাচিতো;

খন্ধধাতুৰৰত্থানং, অপ্পৰত্তং ভৰাভৰে’’তি.

তত্থ ¶ খন্ধধাতুৰৰত্থানন্তি পঞ্চন্নং খন্ধানং অট্ঠারসন্নং ধাতূনং নামরূপৰৰত্থানাদিৰসেন ৰিভাগকরণং. সভাৰলক্খণসামঞ্ঞলক্খণাদিৰসেন রূপারূপধম্মপরিগ্গহো খন্ধধাতুৰৰত্থানং নাম. অথ ৰা ফেণপিণ্ডূপমং রূপং পরিমদ্দনাসহনতো ছিদ্দাৰছিদ্দাদিভাৰতো চ উদকপুব্বুল়কং ৰিয ¶ ৰেদনা মুহুত্তরমণীযভাৰতো, মরীচিকা ৰিয সঞ্ঞা ৰিপ্পলম্ভনতো, কদলিক্খন্ধো ৰিয সঙ্খারা অসারকতো, মাযা ৰিয ৰিঞ্ঞাণং ৰঞ্চনকতো’’তি এৰমাদিনাপি নযেন অনিচ্চানুপস্সনাদিৰসেনপি খন্ধধাতুৰৰত্থানং ৰেদিতব্বং (ৰিভ. অট্ঠ. ২৬ কমাদিৰিনিচ্ছযকথা). অপ্পৰত্তং ভৰাভৰেতি এত্থ ভৰোতি ৰড্ঢি, অভৰোতি হানি. ভৰোতি সস্সতদিট্ঠি ¶ , অভৰোতি উচ্ছেদদিট্ঠি. ভৰোতি খুদ্দকভৰো, অভৰোতি মহাভৰো. ভৰোতি কামভৰো, অভৰোতি রূপারূপভৰোতি এৰমাদিনা নযেন ভৰাভৰানং অত্থো ৰেদিতব্বো (ম. নি. অট্ঠ. ২.২২৩; সং. নি. অট্ঠ. ৩.৫.১০৮০; উদা. অট্ঠ. ২০). তেসং ভৰাভৰানং অপ্পৰত্তিহেতুভূতং ধম্মং পকাসেসীতি অত্থো. অথ ৰা ভৰতি অনেনাতি ভৰো, তীসু ভৰেসু উপ্পত্তিনিমিত্তং কম্মাদিকং. উপপত্তিভৰো অভৰো নাম. উভযত্থ নিকন্তিযা পহানকরং অপ্পৰত্তং ধম্মং দেসেসীতি অত্থো. তস্স পন রেৰতবুদ্ধস্স তযোৰ অভিসমযা অহেসুং. পঠমো পনস্স গণনপথং ৰীতিৰত্তো. তেন ৰুত্তং –

‘‘তস্সাভিসমযা তীণি, অহেসুং ধম্মদেসনে;

গণনায ন ৰত্তব্বো, পঠমাভিসমযো অহূ’’তি.

তত্থ তীণীতি তযো, লিঙ্গৰিপল্লাসো কতো, অযং পঠমো অভিসমযো অহোসি.

অথাপরেন সমযেন নগরুত্তরে উত্তরে নগরে সব্বারিন্দমো অরিন্দমো নাম রাজা অহোসি. সো কির ভগৰন্তং অত্তনো নগরমনুপ্পত্তং সুত্ৰা তীহি জনকোটীহি পরিৰুতো ভগৰতো পচ্চুগ্গমনং কত্ৰা স্ৰাতনায নিমন্তেত্ৰা বুদ্ধপ্পমুখস্স ভিক্খুসঙ্ঘস্স সত্তাহং মহাদানং পৰত্তেত্ৰা তিগাৰুতৰিত্থতং দীপপূজং কত্ৰা ভগৰন্তং উপসঙ্কমিত্ৰা নিসীদি. অথ ভগৰা তস্স মনোনুকূলং ৰিচিত্তনযং ধম্মং দেসেসি. তত্থ দেৰমনুস্সানং কোটিসহস্সস্স দুতিযাভিসমযো অহোসি. তেন ৰুত্তং –

‘‘যদা অরিন্দমং রাজং, ৰিনেসি রেৰতো মুনি;

তদা কোটিসহস্সানং, দুতিযাভিসমযো অহূ’’তি.

অথাপরেন ¶ ¶ সমযেন রেৰতো সত্থা উত্তরনিগমং নাম উপনিস্সায ৰিহরন্তো সত্তাহং নিরোধসমাপত্তিং সমাপজ্জিত্ৰা নিসীদি. তদা কির উত্তরনিগমৰাসিনো মনুস্সা যাগুভত্তখজ্জকভেসজ্জপানকাদীনি আহরিত্ৰা ভিক্খুসঙ্ঘস্স মহাদানং দত্ৰা ভিক্খূ পরিপুচ্ছিংসু – ‘‘কুহিং, ভন্তে, ভগৰা’’তি? ততো তেসং ভিক্খূ আহংসু – ‘‘ভগৰা, আৰুসো, নিরোধসমাপত্তিং সমাপন্নো’’তি. অথাতীতে তস্মিং সত্তাহে ভগৰন্তং নিরোধসমাপত্তিতো ৰুট্ঠিতং ¶ সরদসমযে সূরিযো ৰিয অত্তনো অনূপমায বুদ্ধসিরিযা ৰিরোচমানং দিস্ৰা নিরোধসমাপত্তিযা গুণানিসংসং পুচ্ছিংসু. ভগৰা চ তেসং নিরোধসমাপত্তিযা গুণানিসংসং কথেসি. তদা দেৰমনুস্সানং কোটিসতং অরহত্তে পতিট্ঠাসি. অযং ততিযো অভিসমযো অহোসি. তেন ৰুত্তং –

‘‘সত্তাহং পটিসল্লানা, ৰুট্ঠহিত্ৰা নরাসভো;

কোটিসতং নরমরূনং, ৰিনেসি উত্তমে ফলে’’তি.

সুধঞ্ঞৰতীনগরে পঠমমহাপাতিমোক্খুদ্দেসে এহিভিক্খুপব্বজ্জায পব্বজিতানং অরহন্তানং গণনপথং ৰীতিৰত্তানং পঠমো সন্নিপাতো অহোসি. মেখলনগরে কোটিসতসহস্সসঙ্খাতানং এহিভিক্খুপব্বজ্জায পব্বজিতানং অরহন্তানং দুতিযো সন্নিপাতো অহোসি. রেৰতস্স পন ভগৰতো ধম্মচক্কানুৰত্তকো ৰরুণো নাম অগ্গসাৰকো পঞ্ঞৰন্তানং অগ্গো আবাধিকো অহোসি. তত্থ গিলানপুচ্ছনত্থায সম্পত্তমহাজনস্স লক্খণত্তযপরিদীপকং ধম্মং দেসেত্ৰা কোটিসতসহস্সং পুরিসানং এহিভিক্খুপব্বজ্জায পব্বাজেত্ৰা অরহত্তে পতিট্ঠাপেত্ৰা চতুরঙ্গিনিকে সন্নিপাতে পাতিমোক্খং উদ্দিসি. অযং ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, রেৰতস্স মহেসিনো;

খীণাসৰানং ৰিমলানং, সুৰিমুত্তান তাদিনং.

‘‘অতিক্কন্তা গণনপথং, পঠমং যে সমাগতা;

কোটিসতসহস্সানং, দুতিযো আসি সমাগমো.

‘‘যোপি পঞ্ঞায অসমো, তস্স চক্কানুৰত্তকো;

সো তদা ব্যাধিতো আসি, পত্তো জীৰিতসংসযং.

‘‘তস্স ¶ গিলানপুচ্ছায, যে তদা উপগতা মুনী;

কোটিসতসহস্সা অরহন্তো, ততিযো আসি সমাগমো’’তি.

তত্থ চক্কানুৰত্তকোতি ধম্মচক্কানুৰত্তকো. পত্তো জীৰিতসংসযন্তি এত্থ জীৰিতে সংসযং জীৰিতসংসযং, জীৰিতক্খযং ¶ পাপুণাতি ৰা, ন ৰা পাপুণাতীতি এৰং জীৰিতসংসযং পত্তো, ব্যাধিতস্স ¶ বলৰভাৰেন মরতি, ন মরতীতি জীৰিতে সংসযং পত্তোতি অত্থো. যে তদা উপগতা মুনীতি ইতি দীঘভাৰে সতি ভিক্খূনং উপরি হোতি, রস্সে অনুস্সরেন সদ্ধিং ৰরুণস্স উপরি হোতি.

তদা অম্হাকং বোধিসত্তো রম্মৰতীনগরে অতিদেৰো নাম ব্রাহ্মণো হুত্ৰা ব্রাহ্মণধম্মে পারং গতো রেৰতং সম্মাসম্বুদ্ধং দিস্ৰা তস্স ধম্মকথং সুত্ৰা সরণেসু পতিট্ঠায সিলোকসহস্সেন দসবলং কিত্তেত্ৰা সহস্সগ্ঘনিকেন উত্তরাসঙ্গেন ভগৰন্তং পূজেসি. সোপি নং বুদ্ধো ব্যাকাসি – ‘‘ইতো কপ্পসতসহস্সাধিকানং দ্ৰিন্নং অসঙ্খ্যেয্যানং মত্থকে গোতমো নাম বুদ্ধো ভৰিস্সতী’’তি. তেন ৰুত্তং –

‘‘অহং তেন সমযেন, অতিদেৰো নাম ব্রাহ্মণো;

উপগন্ত্ৰা রেৰতং বুদ্ধং, সরণং তস্স গঞ্ছহং.

‘‘তস্স সীলং সমাধিঞ্চ, পঞ্ঞাগুণমনুত্তমং;

থোমযিত্ৰা যথাথামং, উত্তরীযমদাসহং.

‘‘সোপি মং বুদ্ধো ব্যাকাসি, রেৰতো লোকনাযকো;

অপরিমেয্যিতো কপ্পে, অযং বুদ্ধো ভৰিস্সতি.

‘পধানং পদহিত্ৰান…পে… হেস্সাম সম্মুখা ইম’’’ন্তি. –

‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

‘‘তদাপি তং বুদ্ধধম্মং, সরিত্ৰা অনুব্রূহযিং;

আহরিস্সামি তং ধম্মং, যং ময্হং অভিপত্থিত’’ন্তি.

তত্থ ¶ সরণং তস্স গঞ্ছহন্তি তং সরণং অগঞ্ছিং অহং, উপযোগত্থে সামিৰচনং. পঞ্ঞাগুণন্তি ¶ পঞ্ঞাসম্পত্তিং. অনুত্তমন্তি সেট্ঠং. ‘‘পঞ্ঞাৰিমুত্তিগুণমুত্তম’’ন্তিপি পাঠো, সো উত্তানোৰ. থোমযিত্ৰাতি থোমেত্ৰা ৰণ্ণযিত্ৰা. যথাথামন্তি যথাবলং. উত্তরীযন্তি ¶ উত্তরাসঙ্গং. অদাসহন্তি অদাসিং অহং. বুদ্ধধম্মন্তি বুদ্ধভাৰকরং ধম্মং, পারমীধম্মন্তি অত্থো. সরিত্ৰাতি অনুস্সরিত্ৰা. অনুব্রূহযিন্তি অভিৰড্ঢেসিং. আহরিস্সামীতি আনযিস্সামি. তং ধম্মন্তি তং বুদ্ধত্তং. যং ময্হং অভিপত্থিতন্তি যং মযা অভিপত্থিতং বুদ্ধত্তং, তং আহরিস্সামীতি অত্থো.

তস্স পন রেৰতস্স ভগৰতো নগরং সুধঞ্ঞৰতী নাম অহোসি, পিতা ৰিপুলো নাম খত্তিযো, মাতা ৰিপুলা নাম, ৰরুণো চ ব্রহ্মদেৰো চ দ্ৰে অগ্গসাৰকা, সম্ভৰো নাম উপট্ঠাকো, ভদ্দা চ সুভদ্দা চ দ্ৰে অগ্গসাৰিকা, নাগরুক্খো বোধি, সরীরং অসীতিহত্থুব্বেধং অহোসি, আযু সট্ঠিৰস্সসহস্সানি, সুদস্সনা নাম অগ্গমহেসী, ৰরুণো নাম পুত্তো, আজঞ্ঞরথেন নিক্খমি.

‘‘তস্স দেহাভিনিক্খন্তং, পভাজালমনুত্তরং;

দিৰা চেৰ তদা রত্তিং, নিচ্চং ফরতি যোজনং.

‘‘ধাতুযো মম সব্বাপি, ৰিকিরন্তূতি সো জিনো;

অধিট্ঠাসি মহাৰীরো, সব্বসত্তানুকম্পকো.

‘‘মহানাগৰনুয্যানে, মহতো নগরস্স সো;

পূজিতো নরমরূহি, পরিনিব্বাযি রেৰতো’’তি.

‘‘নগরং সুধঞ্ঞৰতী নাম, ৰিপুলো নাম খত্তিযো;

ৰিপুলা নাম জনিকা, রেৰতস্স মহেসিনো.

‘‘ৰরুণো ব্রহ্মদেৰো চ, অহেসুং অগ্গসাৰকা;

সম্ভৰো নামুপট্ঠাকো, রেৰতস্স মহেসিনো.

‘‘ভদ্দা ¶ চেৰ সুভদ্দা চ, অহেসুং অগ্গসাৰিকা;

সোপি বুদ্ধো অসমসমো, নাগমূলে অবুজ্ঝথ.

‘‘পদুমো ¶ কুঞ্জরো চেৰ, অহেসুং অগ্গুপট্ঠকা;

সিরিমা চেৰ যসৰতী, অহেসুং অগ্গুপট্ঠিকা.

‘‘উচ্চত্তনেন সো বুদ্ধো, অসীতিহত্থমুগ্গতো;

ওভাসেতি দিসা সব্বা, ইন্দকেতুৰ উগ্গতো.

‘‘তস্স সরীরে নিব্বত্তা, পভামালা অনুত্তরা;

দিৰা ৰা যদি ৰা রত্তিং, সমন্তা ফরতি যোজনং.

‘‘সট্ঠিৰস্সসহস্সানি ¶ , আযু ৰিজ্জতি তাৰদে;

তাৰতা দিট্ঠমানো সো, তারেসি জনতং বহুং.

‘‘দস্সযিত্ৰা বুদ্ধবলং অমতং লোকে পকাসযং;

নিব্বাযি অনুপাদানো, যথগ্গুপাদানসঙ্খযা.

‘‘সো চ কাযো রতননিভো, সো চ ধম্মো অসাদিসো;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ ওভাসেতীতি পকাসযতি. উগ্গতোতি উস্সিতো. পভামালাতি পভাৰেলা. যথগ্গীতি অগ্গি ৰিয. উপাদানসঙ্খযাতি ইন্ধনক্খযা. সো চ কাযো রতননিভোতি সো চ তস্স ভগৰতো কাযো সুৰণ্ণৰণ্ণো. ‘‘তঞ্চ কাযং রতননিভ’’ন্তিপি পাঠো, লিঙ্গৰিপল্লাসেন ৰুত্তং. সোযেৰ পনস্সত্থো. সেসগাথাসু সব্বত্থ উত্তানমেৰাতি.

রেৰতবুদ্ধৰংসৰণ্ণনা নিট্ঠিতা.

তস্স ¶ ¶ পন অপরভাগে তস্স সাসনেপি অন্তরহিতে সোভিতো নাম বোধিসত্তো কপ্পসতসহস্সাধিকানি চত্তারি অসঙ্খ্যেয্যানি পারমিযো পূরেত্ৰা তুসিতপুরে নিব্বত্তিত্ৰা তত্থ যাৰতাযুকং ঠত্ৰা দেৰেহি আযাচিতো তুসিতপুরতো চৰিত্ৰা সুধম্মনগরে সুধম্মরাজস্স কুলে সুধম্মায নাম দেৰিযা কুচ্ছিস্মিং পটিসন্ধিং অগ্গহেসি. সো দসন্নং মাসানং অচ্চযেন সুধম্মুয্যানে মাতুকুচ্ছিতো পরিসুদ্ধৰিরাজিতঘনমেঘপটলতো পুণ্ণচন্দো ৰিয নিক্খমি. তস্স পটিসন্ধিযং জাতিযঞ্চ পাটিহারিযানি পুব্বে ৰুত্তপ্পকারানি.

সো দসৰস্সসহস্সানি অগারং অজ্ঝাৰসিত্ৰা সত্তত্তিংসনাটকিত্থিসহস্সানং অগ্গায অগ্গমহেসিযা মখিলদেৰিযা কুচ্ছিস্মিং সীহকুমারে নাম পুত্তে উপ্পন্নে চত্তারি নিমিত্তানি দিস্ৰা সঞ্জাতসংৰেগো পাসাদেযেৰ পব্বজিত্ৰা তত্থেৰ আনাপানস্সতিসমাধিং ভাৰেত্ৰা চত্তারি ঝানানি পটিলভিত্ৰা সত্তাহং তত্থেৰ পধানচরিযমচরি. ততো মখিলমহাদেৰিযা দিন্নং পরমমধুরং মধুপাযাসং পরিভুঞ্জিত্ৰা অভিনিক্খমনত্থায চিত্তমুপ্পাদেসি – ‘‘অযং পাসাদো অলঙ্কতপটিযত্তো মহাজনস্স পস্সন্তস্সেৰ ¶ আকাসেন গন্ত্ৰা বোধিরুক্খং মজ্ঝেকত্ৰা পথৰিযং ওতরতু, ইমা চ ইত্থিযো মযি বোধিমূলে নিসিন্নে অৰুত্তা সযমেৰ পাসাদতো নিক্খমন্তূ’’তি. সহচিত্তুপ্পাদা পাসাদো চ সুধম্মরাজভৰনতো উপ্পতিত্ৰা অসিতঞ্জনসঙ্কাসমাকাসমব্ভুগ্গঞ্ছি. সো সমোসরিতসুরভিকুসুমদামসমলঙ্কতপাসাদতলো সকলম্পি গগনতলং সমলঙ্কুরুমানো ৰিয কনকরসধারাসদিসরুচিরকরনিকরো দিৰসকরো ৰিয চ সরদসমযরজনিকরো ৰিয চ ৰিরোচমানো ৰিলম্বমানৰিৰিধৰিচিত্তকিঙ্কিণিকজালো যস্স কির ৰাতেরিতস্স সুকুসলজনৰাদিতস্স পঞ্চঙ্গিকস্স তুরিযস্স ৰিয সদ্দো ৰগ্গু চ রজনীযো চ কমনীযো চ অহোসি.

দূরতো পট্ঠায সুয্যমানেন মধুরেন সরেন সত্তানং সোতানি ওদহমানো ঘরচচ্চরচতুক্কৰীথিআদীসু ঠত্ৰা পৰত্তিতকথাসল্লাপেসু মনুস্সেসু নাতিনীচেন নাতিউচ্চেন তরুৰরৰনমত্থকাৰিদূরেনাকাসেন পলোভযমানো ¶ ৰিয তরুৰরসাখানানারতনজুতিৰিসরসমুজ্জলেন ৰণ্ণেন ¶ জননযনানি আকড্ঢেন্তো ৰিয চ পুঞ্ঞানুভাৰং সমুগ্ঘোসযন্তো ৰিয চ গগনতলং পটিপজ্জি. তত্থ নাটকিত্থিযোপি পঞ্চঙ্গিকস্স ৰরতুরিযস্স মধুরেন সরেন উপগাযিংসু চেৰ ৰিলপিংসু চ. চতুরঙ্গিনী কিরস্স সেনাপি অলঙ্কার-কাযাভরণ-জুতি-সমুদয-সমুজ্জোতনানাৰিরাগ-সুরভিকুসুমৰসনাভরণসোভিতা অমরৰরসেনা ৰিয পরমরুচিরদস্সনা ধরণী ৰিয গগনতলেন পাসাদং পরিৰারেত্ৰা অগমাসি.

ততো পাসাদো গন্ত্ৰা অট্ঠাসীতিহত্থুব্বেধং উজুৰিপুলৰট্টক্খন্ধং কুসুমপল্লৰমকুলসমলঙ্কতং নাগরুক্খং মজ্ঝেকত্ৰা ওতরিত্ৰা ভূমিযং পতিট্ঠহি. নাটকিত্থিযো চ কেনচি অৰুত্তাৰ ততো পাসাদতো ওতরিত্ৰা পক্কমিংসু. অনেকগুণসোভিতো কির সোভিতোপি মহাপুরিসো মহাজনকতপরিৰারোযেৰ রত্তিযা তীসু যামেসু তিস্সো ৰিজ্জাযো উপ্পাদেসি. মারবলং পনস্স ধম্মতাবলেনেৰ যথাগতমগমাসি. পাসাদো পন তত্থেৰ অট্ঠাসি. সোভিতো পন ভগৰতা সম্বোধিং পত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি উদানং উদানেত্ৰা বোধিসমীপেযেৰ সত্তসত্তাহং ৰীতিনামেত্ৰা ব্রহ্মুনো ধম্মজ্ঝেসনং পটিজানিত্ৰা – ‘‘কস্স নু খো পঠমং ধম্মং দেসেয্য’’ন্তি বুদ্ধচক্খুনা ওলোকেন্তো অত্তনো ৰেমাতিকে কনিট্ঠভাতিকে অসমকুমারঞ্চ সুনেত্তকুমারঞ্চ দিস্ৰা – ‘‘ইমে দ্ৰে কুমারা উপনিস্সযসম্পন্না গম্ভীরং নিপুণং ধম্মং পটিৰিজ্ঝিতুং সমত্থা, হন্দাহং ইমেসং ধম্মং দেসেয্য’’ন্তি আকাসেনাগন্ত্ৰা সুধম্মুয্যানে ওতরিত্ৰা দ্ৰেপি কুমারে উয্যানপালেন পক্কোসাপেত্ৰা তেহি সপরিৰারেহি পরিৰুতো মহাজনমজ্ঝে ধম্মচক্কং পৰত্তেসি. তেন ৰুত্তং –

‘‘রেৰতস্স অপরেন, সোভিতো নাম নাযকো;

সমাহিতো সন্তচিত্তো, অসমো অপ্পটিপুগ্গলো.

‘‘সো ¶ জিনো সকগেহম্হি, মানসং ৰিনিৰত্তযি;

পত্ৰান কেৰলং বোধিং, ধম্মচক্কং পৰত্তযি.

‘‘যাৰ হেট্ঠা অৰীচিতো, ভৰগ্গা চাপি উদ্ধতো;

এত্থন্তরে একপরিসা, অহোসি ধম্মদেসনে.

‘‘তায ¶ পরিসায সম্বুদ্ধো, ধম্মচক্কং পৰত্তযি;

গণনায ন ৰত্তব্বো, পঠমাভিসমযো অহূ’’তি.

তত্থ ¶ সকগেহম্হীতি অত্তনো ভৰনেযেৰ, অন্তোপাসাদতলেযেৰাতি অত্থো. মানসং ৰিনিৰত্তযীতি চিত্তং পরিৰত্তেসি, সকগেহে ঠত্ৰা সত্তদিৰসব্ভন্তরেযেৰ পুথুজ্জনভাৰতো চিত্তং ৰিনিৰত্তেত্ৰা বুদ্ধত্তং পাপুণীতি অত্থো. হেট্ঠাতি হেট্ঠতো. ভৰগ্গাতি অকনিট্ঠভৰনতো. তায পরিসাযাতি তস্সা পরিসায মজ্ঝে. গণনায ন ৰত্তব্বোতি গণনপথমতীতাতি অত্থো. পঠমাভিসমযোতি পঠমো ধম্মাভিসমযো. অহূতি গণনায ন ৰত্তব্বা পরিসা অহোসীতি অত্থো. ‘‘পঠমে অভিসমিংসুযেৰা’’তিপি পাঠো, তস্স পঠমধম্মদেসনে অভিসমিংসু যে জনা, তে গণনায ন ৰত্তব্বাতি অত্থো.

অথাপরেন সমযেন সুদস্সননগরদ্ৰারে চিত্তপাটলিযা মূলে যমকপাটিহারিযং কত্ৰা নৰকনকমণিমযভৰনে তাৰতিংসভৰনে পারিচ্ছত্তকমূলে পণ্ডুকম্বলসিলাতলে নিসীদিত্ৰা অভিধম্মং দেসেসি. দেসনাপরিযোসানে নৰুতিকোটিসহস্সানং ধম্মাভিসমযো অহোসি. অযং দুতিযো অভিসমযো অহোসি. তেন ৰুত্তং –

‘‘ততো পরম্পি দেসেন্তে, মরূনঞ্চ সমাগমে;

নৰুতিকোটিসহস্সানং, দুতিযাভিসমযো অহূ’’তি.

অথাপরেন সমযেন সুদস্সননগরে জযসেনো নাম রাজকুমারো যোজনপ্পমাণং ৰিহারং কারেত্ৰা অসোকস্সকণ্ণচম্পকনাগপুন্নাগৰকুলসুরভিচূতপনসাসনসালকুন্দ- সহকারকরৰীরাদিতরুৰরনিরন্তরং আরামং রোপেত্ৰা বুদ্ধপ্পমুখস্স ভিক্খুসঙ্ঘস্স নিয্যাতেসি. দানানুমোদনং কত্ৰা যাগং ৰণ্ণেত্ৰা ভগৰা ধম্মং দেসেসি. তদা কোটিসতসহস্সসত্তনিকাযস্স ধম্মাভিসমযো অহোসি. অযং ততিযাভিসমযো অহোসি. তেন ৰুত্তং –

‘‘পুনাপরং রাজপুত্তো, জযসেনো নাম খত্তিযো;

আরামং রোপযিত্ৰান, বুদ্ধে নিয্যাতযী তদা.

‘‘তস্স ¶ ¶ যাগং পকিত্তেন্তো, ধম্মং দেসেসি চক্খুমা;

তদা কোটিসহস্সানং, ততিযাভিসমযো অহূ’’তি.

পুন উগ্গতো নাম রাজা সুনন্দনগরে সুনন্দং নাম ৰিহারং কারেত্ৰা বুদ্ধপ্পমুখস্স ভিক্খুসঙ্ঘস্স অদাসি. তস্মিং দানে এহিভিক্খুপব্বজ্জায পব্বজিতানং কোটিসতং অরহন্তানং সন্নিপাতো ¶ , তেসং মজ্ঝে সোভিতো ভগৰা পাতিমোক্খং উদ্দিসি. অযং পঠমো সন্নিপাতো অহোসি. পুন মেখলানগরে ধম্মগণো ধম্মগণারামং নাম পৰরারামং মহাৰিহারং কারেত্ৰা বুদ্ধপ্পমুখস্স ভিক্খুসঙ্ঘস্স দত্ৰা সহ সব্বপরিক্খারেহি দানং অদাসি. তস্মিং সমাগমে এহিভিক্খুভাৰেন পব্বজিতানং নৰুতিযা অরহন্তকোটীনং সন্নিপাতে পাতিমোক্খং উদ্দিসি. অযং দুতিযো সন্নিপাতো অহোসি. যদা পন ভগৰা দসসতনযনপুরে ৰস্সং ৰসিত্ৰা পৰারণায সুরৰরপরিৰুতো ওতরি, তদা অসীতিযা অরহন্তকোটীহি সদ্ধিং চতুরঙ্গিকে সন্নিপাতে পৰারেসি. অযং ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, সোভিতস্স মহেসিনো;

খীণাসৰানং ৰিমলানং, সন্তচিত্তান তাদিনং.

‘‘উগ্গতো নাম সো রাজা, দানং দেতি নরুত্তমে;

তম্হি দানে সমাগঞ্ছুং, অরহন্তা সতকোটিযো.

‘‘পুনাপরং পুরগণো, দেতি দানং নরুত্তমে;

তদা নৰুতিকোটীনং, দুতিযো আসি সমাগমো.

‘‘দেৰলোকে ৰসিত্ৰান, যদা ওরোহতী জিনো;

তদা অসীতিকোটীনং, ততিযো আসি সমাগমো’’তি.

তদা কির অম্হাকং বোধিসত্তো রম্মৰতীনগরে উভতো সুজাতো ‘সুজাতো’ নাম ব্রাহ্মণো হুত্ৰা সোভিতস্স ভগৰতো ধম্মদেসনং সুত্ৰা সরণেসু পতিট্ঠায বুদ্ধপ্পমুখস্স ভিক্খুসঙ্ঘস্স তেমাসং মহাদানমদাসি. সোপি নং ‘‘অনাগতে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

‘‘অহং ¶ তেন সমযেন, সুজাতো নাম ব্রাহ্মণো;

তদা সসাৰকং বুদ্ধং, অন্নপানেন তপ্পযিং.

‘‘সোপি মং বুদ্ধো ব্যাকাসি, সোভিতো লোকনাযকো;

অপরিমেয্যিতো কপ্পে, অযং বুদ্ধো ভৰিস্সতি.

‘‘পধানং ¶ ¶ পদহিত্ৰান…পে… হেস্সাম সম্মুখা ইমং.

‘‘তস্সাপি ৰচনং সুত্ৰা, হট্ঠো সংৰিগ্গমানসো;

তমেৰত্থমনুপ্পত্তিযা, উগ্গং ধিতিমকাসহ’’ন্তি.

তত্থ তমেৰত্থমনুপ্পত্তিযাতি তস্স বুদ্ধত্তস্স অনুপ্পত্তিঅত্থং, তস্স পন সোভিতবুদ্ধস্স – ‘‘অনাগতে অযং গোতমো নাম বুদ্ধো ভৰিস্সতী’’তি ৰচনং সুত্ৰা ‘‘অৰিতথৰচনা হি বুদ্ধা’’তি বুদ্ধত্তপ্পত্তিঅত্থন্তি অত্থো. উগ্গন্তি তিব্বং ঘোরং. ধিতিন্তি ৰীরিযং. অকাসহন্তি অকাসিং অহং.

তস্স পন সোভিতস্স ভগৰতো সুধম্মং নাম নগরং অহোসি, পিতা সুধম্মো নাম রাজা, মাতা সুধম্মা নাম দেৰী, অসমো চ সুনেত্তো চ দ্ৰে অগ্গসাৰকা, অনোমো নামুপট্ঠাকো, নকুলা চ সুজাতা চ দ্ৰে অগ্গসাৰিকা, নাগরুক্খো বোধি, অট্ঠপণ্ণাসহত্থুব্বেধং সরীরং অহোসি, নৰুতিৰস্সসহস্সানি আযুপ্পমাণং, মখিলা নামস্স মহাদেৰী, সীহকুমারো নাম অত্রজো, নাটকিত্থীনং সত্তত্তিংসসহস্সানি নৰৰস্সসহস্সানি অগারং অজ্ঝাৰসি. পাসাদেন অভিনিক্খমি. জযসেনো নাম রাজা উপট্ঠাকো. সেতারামে কির ৰসীতি. তেন ৰুত্তং –

‘‘সুধম্মং নাম নগরং, সুধম্মো নাম খত্তিযো;

সুধম্মা নাম জনিকা, সোভিতস্স মহেসিনো.

‘‘অসমো চ সুনেত্তো চ, অহেসুং অগ্গসাৰকা;

অনোমো নামুপট্ঠাকো, সোভিতস্স মহেসিনো.

‘‘নকুলা চ সুজাতা চ, অহেসুং অগ্গসাৰিকা;

বুজ্ঝমানো চ সো বুদ্ধো, নাগমূলে অবুজ্ঝথ.

‘‘অট্ঠপণ্ণাসরতনং ¶ , অচ্চুগ্গতো মহামুনি;

ওভাসেতি দিসা সব্বা, সতরংসীৰ উগ্গতো.

‘‘তথা ¶ সুফুল্লং পৰনং, নানাগন্ধেহি ধূপিতং;

তথেৰ তস্স পাৰচনং, সীলগন্ধেহি ধূপিতং.

‘‘যথাপি সাগরো নাম, দস্সনেন অতপ্পিযো;

তথেৰ তস্স পাৰচনং, সৰনেন অতপ্পিযং.

‘‘নৰুতিৰস্সসহস্সানি ¶ , আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘ওৰাদং অনুসিট্ঠিঞ্চ, দত্ৰান সেসকে জনে;

হুতাসনোৰ তাপেত্ৰা, নিব্বুতো সো সসাৰকো.

‘‘সো চ বুদ্ধো অসমসমো, তেপি সাৰকা বলপ্পত্তা;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ সতরংসীৰাতিআদিচ্চো ৰিয, সব্বা দিসা ওভাসেতীতি অত্থো. পৰনন্তি মহাৰনং. ধূপিতন্তি ৰাসিতং গন্ধিতং. অতপ্পিযোতি অতিত্তিকরো, অতিত্তিজননো ৰা. তাৰদেতি তস্মিং কালে, তাৰতকং কালন্তি অত্থো. তারেসীতি তারযী. ওৰাদন্তি সকিং ৰাদো ওৰাদো নাম. অনুসিট্ঠিন্তি পুনপ্পুনং ৰচনং অনুসিট্ঠি নাম. সেসকে জনেতি সচ্চপ্পটিৰেধং অপ্পত্তস্স সেসজনস্স, সামিঅত্থে ভুম্মৰচনং. হুতাসনোৰ তাপেত্ৰাতি অগ্গি ৰিয তপ্পেত্ৰা. অযমেৰ ৰা পাঠো, উপাদানক্খযা ভগৰা পরিনিব্বুতোতি অত্থো. সেসগাথাসু সব্বত্থ উত্তানমেৰাতি.

সোভিতবুদ্ধৰংসৰণ্ণনা নিট্ঠিতা.

সোভিতবুদ্ধে ¶ ¶ পন পরিনিব্বুতে তস্স অপরভাগে একমসঙ্খ্যেয্যং বুদ্ধুপ্পাদরহিতং অহোসি. অতীতে পন তস্মিং অসঙ্খ্যেয্যে একস্মিং কপ্পে তযো বুদ্ধা নিব্বত্তিংসু অনোমদস্সী, পদুমো, নারদোতি. তত্থ অনোমদস্সী ভগৰা সোল়স অসঙ্খ্যেয্যানি কপ্পসতসহস্সঞ্চ পারমিযো পূরেত্ৰা তুসিতপুরে নিব্বত্তিত্ৰা দেৰেহি অভিযাচিতো ততো চৰিত্ৰা চন্দৰতিযং নাম রাজধানিযং যসৰা নামস্স রঞ্ঞো কুলে সমুস্সিতচারুপযোধরায যসোধরায নাম অগ্গমহেসিযা কুচ্ছিস্মিং পটিসন্ধিং অগ্গহেসি. অনোমদস্সিকুমারে কির যসোধরায দেৰিযা কুচ্ছিগতে তস্স পুঞ্ঞপ্পভাৰেন পভা অসীতিহত্থপ্পমাণং ¶ ঠানং ফরিত্ৰা অট্ঠাসি. চন্দসূরিযপ্পভাহি অনভিভৰনীযাৰ অহোসি. সা দসন্নং মাসানং অচ্চযেন বোধিসত্তং সুচন্দনুয্যানে ৰিজাযি. পাটিহারিযানি হেট্ঠা ৰুত্তনযানেৰ.

নামগ্গহণদিৰসে পনস্স নামং গণ্হন্তা, যস্মা জাতিযং আকাসতো সত্ত রতনানি পতিংসু, তস্মা অনোমানং রতনানং উপ্পত্তিহেতুভূতত্তা ‘‘অনোমদস্সী’’তি নামমকংসু. সো অনুক্কমেন ৰুদ্ধিপ্পত্তো দিব্বেহি কামগুণেহি পরিচারিযমানো দসৰস্সসহস্সানি অগারং অজ্ঝাৰসি. তস্স কির সিরি উপসিরি সিরিৰড্ঢোতি তযো পাসাদা অহেসুং. সিরিমাদেৰিপ্পমুখানি তেৰীসতি ইত্থিসহস্সানি পচ্চুপট্ঠিতানি অহেসুং. সো সিরিমায দেৰিযা উপৰাণে নাম পুত্তে জাতে চত্তারি নিমিত্তানি দিস্ৰা সিৰিকাযানেন মহাভিনিক্খমনং নিক্খমিত্ৰা পব্বজি. তং তিস্সো জনকোটিযো অনুপব্বজিংসু.

তেহি পরিৰুতো মহাপুরিসো দস মাসে পধানচরিযং চরি. ততো ৰিসাখপুণ্ণমায অনুপমব্রাহ্মণগামে পিণ্ডায চরিত্ৰা অনুপমসেট্ঠিধীতায দিন্নং মধুপাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা অনোমনামাজীৰকেন দিন্না অট্ঠ তিণমুট্ঠিযো গহেত্ৰা অজ্জুনরুক্খবোধিং পদক্খিণং কত্ৰা অট্ঠত্তিংসহত্থৰিত্থতং তিণসন্থরং সন্থরিত্ৰা চতুরঙ্গৰীরিযং অধিট্ঠায পল্লঙ্কং আভুজিত্ৰা সমারং মারবলং ৰিদ্ধংসেত্ৰা তীসু যামেসু তিস্সো ৰিজ্জা উপ্পাদেত্ৰা ¶ – ‘‘অনেকজাতিসংসারং…পে… তণ্হানং খযমজ্ঝগা’’তি উদানং উদানেসি. তেন ৰুত্তং –

‘‘সোভিতস্স ¶ অপরেন, সম্বুদ্ধো দ্ৰিপদুত্তমো;

অনোমদস্সী অমিতযসো, তেজস্সী দুরতিক্কমো.

‘‘সো ছেত্ৰা বন্ধনং সব্বং, ৰিদ্ধংসেত্ৰা তযো ভৰে;

অনিৰত্তিগমনং মগ্গং, দেসেসি দেৰমানুসে.

‘‘সাগরোৰ অসঙ্খোভো, পব্বতোৰ দুরাসদো;

আকাসোৰ অনন্তো সো, সালরাজাৰ ফুল্লিতো.

‘‘দস্সনেনপি তং বুদ্ধং, তোসিতা হোন্তি পাণিনো;

ব্যাহরন্তং গিরং সুত্ৰা, অমতং পাপুণন্তি তে’’তি.

তত্থ অনোমদস্সীতি অনুপমদস্সনো, অমিতদস্সনো ৰা. অমিতযসোতি অমিতপরিৰারো, অমিতকিত্তি ৰা. তেজস্সীতি সীলসমাধিপঞ্ঞাতেজেন সমন্নাগতো. দুরতিক্কমোতি দুপ্পধংসিযো, অঞ্ঞেন দেৰেন ৰা মারেন ৰা কেনচি ৰা অতিক্কমিতুং অসক্কুণেয্যোতি অত্থো. সো ¶ ছেত্ৰা বন্ধনং সব্বন্তি সব্বং দসৰিধং সংযোজনং ছিন্দিত্ৰা. ৰিদ্ধংসেত্ৰা তযো ভৰেতি তিভৰূপগং কম্মং কম্মক্খযকরঞাণেন ৰিদ্ধংসেত্ৰা, অভাৰং কত্ৰাতি অত্থো. অনিৰত্তিগমনং মগ্গন্তি নিৰত্তিযা পৰত্তিযা পটিপক্খভূতং নিব্বানং অনিৰত্তীতি ৰুচ্চতি, তং অনিৰত্তিং গচ্ছতি অনেনাতি অনিৰত্তিগমনো. তং অনিৰত্তিগমনং অট্ঠঙ্গিকং মগ্গং দেসেসীতি অত্থো. ‘‘দস্সেতী’’তিপি পাঠো, সোযেৰত্থো. দেৰমানুসেতি দেৰমনুস্সানং, সামিঅত্থে উপযোগৰচনং দট্ঠব্বং.

অসঙ্খোভোতি খোভেতুং চালেতুং অসক্কুণেয্যোতি অক্খোভিযো. যথা হি সমুদ্দো চতুরাসীতিযোজনসহস্সগম্ভীরো অনেকযোজনসহস্সভূতাৰাসো অক্খোভিযো, এৰং অক্খোভিযোতি অত্থো. আকাসোৰ অনন্তোতি যথা পন আকাসস্স অন্তো নত্থি, অথ খো অনন্তো অপ্পমেয্যো অপারো, এৰং ভগৰাপি বুদ্ধগুণেহি অনন্তো অপ্পমেয্যো অপারো. সোতি সো ভগৰা. সালরাজাৰ ফুল্লিতোতি সব্বলক্খণানুব্যঞ্জনসমলঙ্কতসরীরত্তা সুফুল্লিতসালরাজা ৰিয সোভতীতি অত্থো. দস্সনেনপি তং বুদ্ধন্তি তস্স বুদ্ধস্স দস্সনেনাপীতি অত্থো. ঈদিসেসুপি ¶ সামিৰচনং পযুজ্জন্তি সদ্দসত্থৰিদূ. তোসিতাতি পরিতোসিতা পীণিতা. ব্যাহরন্তন্তি ব্যাহরন্তস্স, সামিঅত্থে ¶ উপযোগৰচনং. অমতন্তি নিব্বানং. পাপুণন্তীতি অধিগচ্ছন্তি. তেতি যে তস্স গিরং ধম্মদেসনং সুণন্তি, তে অমতং পাপুণন্তীতি অত্থো.

ভগৰা পন বোধিমূলে সত্তসত্তাহং ৰীতিনামেত্ৰা ব্রহ্মুনা আযাচিতো ধম্মদেসনায বুদ্ধচক্খুনা লোকং ওলোকেন্তো অত্তনা সহ পব্বজিতে তিকোটিসঙ্খে জনে উপনিস্সযসম্পন্নে দিস্ৰা – ‘‘কত্থ নু খো তে এতরহি ৰিহরন্তী’’তি উপধারেন্তো সুভৰতীনগরে সুদস্সনুয্যানে ৰিহরন্তে দিস্ৰা আকাসেন গন্ত্ৰা সুদস্সনুয্যানে ওতরি. সো তেহি পরিৰুতো সদেৰমনুস্সায পরিসায মজ্ঝে ধম্মচক্কং পৰত্তেসি. তত্থ কোটিসতানং পঠমাভিসমযো অহোসি. তেন ৰুত্তং –

‘‘ধম্মাভিসমযো তস্স, ইদ্ধো ফীতো তদা অহু;

কোটিসতানি অভিসমিংসু, পঠমে ধম্মদেসনে’’তি.

তত্থ ফীতোতি ফাতিপ্পত্তো বাহুজঞ্ঞৰসেন. কোটিসতানীতি কোটীনং সতানি কোটিসতানি. ‘‘কোটিসতযো’’তিপি পাঠো, তস্স সতকোটিযোতি অত্থো.

অথাপরেন ¶ সমযেন ওসধীনগরদ্ৰারে অসনরুক্খমূলে যমকপাটিহারিযং কত্ৰা অসুরেহি দুরভিভৰনে তাৰতিংসভৰনে পণ্ডুকম্বলসিলাযং নিসিন্নো তেমাসং অভিধম্মৰস্সং ৰস্সাপযি. তদা অসীতিদেৰতাকোটিযো অভিসমিংসু. তেন ৰুত্তং –

‘‘ততো পরং অভিসমযে, ৰস্সন্তে ধম্মৰুট্ঠিযো;

অসীতিকোটিযোভিসমিংসু, দুতিযে ধম্মদেসনে’’তি.

তত্থ ৰস্সন্তেতি বুদ্ধমহামেঘে ৰস্সন্তে. ধম্মৰুট্ঠিযোতি ধম্মকথাৰস্সৰুট্ঠিযো.

ততো অপরেন সমযেন মঙ্গলপঞ্হানিদ্দেসে অট্ঠসত্ততি কোটিযো অভিসমিংসু. সো ততিযো অভিসমযো অহোসি. তেন ৰুত্তং –

‘‘ততো ¶ ¶ পরম্পি ৰস্সন্তে, তপ্পযন্তে চ পাণিনং;

অট্ঠসত্ততিকোটীনং, ততিযাভিসমযো অহূ’’তি.

তত্থ ৰস্সন্তেতি ধম্মকথাসলিলধারং ৰস্সন্তে. তপ্পযন্তেতি ধম্মামতৰস্সেন তপ্পযন্তে, তপ্পনং করোন্তে ভগৰতীতি অত্থো.

অনোমদস্সিস্সপি ভগৰতো তযো সাৰকসন্নিপাতা অহেসুং. তত্থ সোরেয্যনগরে ইসিদত্তস্স রঞ্ঞো ধম্মে দেসিযমানে পসীদিত্ৰা এহিভিক্খুপব্বজ্জায পব্বজিতানং অট্ঠন্নং অরহন্তসতসহস্সানং মজ্ঝে পাতিমোক্খং উদ্দিসি. অযং পঠমো সন্নিপাতো অহোসি. রাধৰতীনগরে সুন্দরিন্ধরস্স নাম রঞ্ঞো ধম্মে দেসিযমানে এহিভিক্খুপব্বজ্জায পব্বজিতানং সত্তন্নং অরহন্তসতসহস্সানং মজ্ঝে পাতিমোক্খং উদ্দিসি. অযং দুতিযো সন্নিপাতো অহোসি. পুন সোরেয্যনগরেযেৰ সোরেয্যরঞ্ঞা সহ এহিভিক্খুপব্বজ্জায পব্বজিতানং ছন্নং অরহন্তসতসহস্সানং মজ্ঝে পাতিমোক্খং উদ্দিসি. অযং ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, তস্সাপি চ মহেসিনো;

অভিঞ্ঞাবলপ্পত্তানং, পুপ্ফিতানং ৰিমুত্তিযা.

‘‘অট্ঠসতসহস্সানং, সন্নিপাতো তদা অহু;

পহীনমদমোহানং, সন্তচিত্তান তাদিনং.

‘‘সত্তসতসহস্সানং, দুতিযো আসি সমাগমো;

অনঙ্গণানং ৰিরজানং, উপসন্তান তাদিনং.

‘‘ছন্নং সতসহস্সানং, ততিযো আসি সমাগমো;

অভিঞ্ঞাবলপ্পত্তানং, নিব্বুতানং তপস্সিন’’ন্তি.

তত্থ ¶ তস্সাপি চ মহেসিনোতি তস্স মহেসিনো অনোমদস্সিস্সাপি. ‘‘তস্সাপি দ্ৰিপদুত্তমো’’তিপি পাঠো, তস্সপি দ্ৰিপদুত্তমস্সাতি অত্থো. লক্খণং সদ্দসত্থতো গহেতব্বং. অভিঞ্ঞাবলপ্পত্তানন্তি অভিঞ্ঞানং বলপ্পত্তানং, চিণ্ণৰসিতায খিপ্পনিসন্তিভাৰেন অভিঞ্ঞাসু ¶ থিরভাৰপ্পত্তানন্তি অত্থো. পুপ্ফিতানন্তি সব্বফালিফুল্লভাৰেন অতিৰিয সোভগ্গপ্পত্তানং. ৰিমুত্তিযাতি অরহত্তফলৰিমুত্তিযা.

অনঙ্গণানন্তি ¶ এত্থ অযং অঙ্গণ-সদ্দো কত্থচি কিলেসেসু দিস্সতি. যথাহ – ‘‘তত্থ কতমানি তীণি অঙ্গণানি? রাগো অঙ্গণং দোসো অঙ্গণং মোহো অঙ্গণ’’ন্তি (ৰিভ. ৯২৪). ‘‘পাপকানং খো এতং, আৰুসো, অকুসলানং ইচ্ছাৰচরানং অধিৰচনং যদিদং অঙ্গণ’’ন্তি (ম. নি. ১.৬০). কত্থচি কিস্মিঞ্চি মলে? যথাহ – ‘‘তস্সেৰ রজস্স ৰা অঙ্গণস্স ৰা পহানায ৰাযমতী’’তি (ম. নি. ১.১৮৪). কত্থচি তথারূপে ভূমিভাগে ‘‘চেতিযঙ্গণং বোধিযঙ্গণং রাজঙ্গণ’’ন্তি. ইধ পন কিলেসেসু দট্ঠব্বো. তস্মা নিক্কিলেসানন্তি অত্থো (ম. নি. অট্ঠ. ১.৫৭). ৰিরজানন্তি তস্সেৰ ৰেৰচনং. তপস্সিনন্তি কিলেসক্খযকরো অরিযমগ্গসঙ্খাতো তপো যেসং অত্থি তে তপস্সিনো, তেসং তপস্সীনং, খীণাসৰানন্তি অত্থো.

তদা অম্হাকং বোধিসত্তো একো মহেসক্খো যক্খসেনাপতি অহোসি মহিদ্ধিকো মহানুভাৰো অনেককোটিসতসহস্সানং যক্খানং অধিপতি. সো ‘‘বুদ্ধো লোকে উপ্পন্নো’’তি সুত্ৰা আগন্ত্ৰা পরমরুচিরদস্সনং সত্তরতনমযং অভিরুচিররজনিকরমণ্ডলসদিসং মণ্ডপং নিম্মিনিত্ৰা তত্থ সত্তাহং মহাদানং বুদ্ধপ্পমুখস্স সঙ্ঘস্স অদাসি. অথ নং ভগৰা ভত্তানুমোদনসমযে ‘‘অনাগতে কপ্পসতসহস্সাধিকে একস্মিং অসঙ্খ্যেয্যে অতিক্কন্তে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

‘‘অহং তেন সমযেন, যক্খো আসিং মহিদ্ধিকো;

নেকানং যক্খকোটীনং, ৰসৰত্তিম্হি ইস্সরো.

‘‘তদাপি তং বুদ্ধৰরং, উপগন্ত্ৰা মহেসিনং;

অন্নপানেন তপ্পেসিং, সসঙ্ঘং লোকনাযকং.

‘‘সোপি মং তদা ব্যাকাসি, ৰিসুদ্ধনযনো মুনি;

অপরিমেয্যিতো কপ্পে, অযং বুদ্ধো ভৰিস্সতি.

‘‘পধানং ¶ পদহিত্ৰান…পে… হেস্সাম সম্মুখা ইমং.

‘‘তস্সাপি ¶ ৰচনং সুত্ৰা, হট্ঠো সংৰিগ্গমানসো;

উত্তরিং ৰতমধিট্ঠাসিং, দসপারমিপূরিযা’’তি.

তত্থ ¶ উত্তরিং ৰতমধিট্ঠাসিন্তি পারমিপূরণত্থায ভিয্যোপি দল়্হতরং পরক্কমমকাসীতি অত্থো.

তস্স পন অনোমদস্সিস্স ভগৰতো চন্দৰতী নাম নগরং অহোসি, যসৰা নাম রাজা পিতা, যসোধরা নাম মাতা, নিসভো চ অনোমো চ দ্ৰে অগ্গসাৰকা, ৰরুণো নামুপট্ঠাকো, সুন্দরী চ সুমনা চ দ্ৰে অগ্গসাৰিকা, অজ্জুনরুক্খো বোধি, সরীরং অট্ঠপণ্ণাসহত্থুব্বেধং অহোসি, ৰস্সসতসহস্সং আযু, সিরিমা নাম অগ্গমহেসী, উপৰাণো নামস্স পুত্তো, দসৰস্সসহস্সানি অগারং অজ্ঝাৰসি. সো সিৰিকাযানেন নিক্খমি. সিৰিকাযানেন গমনং পন সোভিতবুদ্ধৰংসৰণ্ণনায পাসাদগমনে ৰুত্তনযেনেৰ ৰেদিতব্বং. ধম্মকো নাম রাজা উপট্ঠাকো. ধম্মারামে কির ভগৰা ৰিহাসীতি. তেন ৰুত্তং –

‘‘নগরং চন্দৰতী নাম, যসৰা নাম খত্তিযো;

মাতা যসোধরা নাম, অনোমদস্সিস্স সত্থুনো.

‘‘নিসভো চ অনোমো চ, অহেসুং অগ্গসাৰকা;

ৰরুণো নামুপট্ঠাকো, অনোমদস্সিস্স সত্থুনো.

‘‘সুন্দরী চ সুমনা চ, অহেসুং অগ্গসাৰিকা;

বোধি তস্স ভগৰতো, অজ্জুনোতি পৰুচ্চতি.

‘‘অট্ঠপণ্ণাসরতনং, অচ্চুগ্গতো মহামুনি;

পভা নিদ্ধাৰতী তস্স, সতরংসীৰ উগ্গতো.

‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘সুপুপ্ফিতং ¶ পাৰচনং, অরহন্তেহি তাদিহি;

ৰীতরাগেহি ৰিমলেহি, সোভিত্থ জিনসাসনং.

‘‘সো চ সত্থা অমিতযসো, যুগানি তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ ¶ পভা নিদ্ধাৰতীতি তস্স সরীরতো পভা নিক্খমতি. সরীরপ্পভা পনস্স নিচ্চকালং দ্ৰাদসযোজনপ্পমাণং পদেসং ফরিত্ৰা তিট্ঠতি. যুগানি তানীতি অগ্গসাৰকযুগাদীনি যুগল়ানি. সব্বং ¶ তমন্তরহিতন্তি ৰুত্তপ্পকারং সব্বম্পি অনিচ্চমুখং পৰিট্ঠং ৰিনট্ঠন্তি অত্থো. ‘‘ননু রিত্তকমেৰ সঙ্খারা’’তিপি পাঠো, তস্স ননু রিত্তকা তুচ্ছকাযেৰ সব্বে সঙ্খারাতি অত্থো. ম-কারো পদসন্ধিকরো. সেসগাথাসু সব্বত্থ উত্তানমেৰাতি.

ইমস্স পন অনোমদস্সিস্স ভগৰতো সন্তিকে সারিপুত্তো চ মহামোগ্গল্লানো চাতি ইমে দ্ৰে অগ্গসাৰকা অগ্গসাৰকভাৰত্থায পণিধানমকংসু. ইমেসং পন থেরানং ৰত্থু চেত্থ কথেতব্বং. মযা গন্থৰিত্থারভযেন ন উদ্ধটন্তি.

অনোমদস্সীবুদ্ধৰংসৰণ্ণনা নিট্ঠিতা.

অনোমদস্সিস্স ¶ পন ভগৰতো অপরভাগে ৰস্সসতসহস্সাযুকা মনুস্সা অনুক্কমেন পরিহাযিত্ৰা দসৰস্সাযুকা হুত্ৰা পুন অনুক্কমেন ৰড্ঢিত্ৰা অসঙ্খ্যেয্যাযুকা হুত্ৰা পুন পরিহাযমানা ৰস্সসতসহস্সাযুকা অহেসুং. তথা পদুমো নাম সত্থা লোকে উপ্পজ্জি. সোপি পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা চম্পকনগরে অসমস্স নাম রঞ্ঞো কুলে রূপাদীহি অসমায অসমায নাম অগ্গমহেসিযা কুচ্ছিস্মিং পটিসন্ধিং অগ্গহেসি. সো দসন্নং মাসানং অচ্চযেন চম্পকুয্যানে মাতুকুচ্ছিতো নিক্খমি. জাতে পন কুমারে আকাসতো সকলজম্বুদীপে সমুদ্দপরিযন্তে পদুমৰস্সং নিপতি. তেনস্স নামগ্গহণদিৰসে নামং গণ্হন্তা নেমিত্তকা চ ঞাতকা চ ‘‘মহাপদুমকুমারো’’ত্ৰেৰ নামমকংসু. সো দসৰস্সসহস্সানি অগারং অজ্ঝাৰসি. নন্দুত্তর-ৰসুত্তর-যসুত্তরানামকা তযো পাসাদা অহেসুং. উত্তরাদেৰিপ্পমুখানি তেত্তিংস ইত্থিসহস্সানি পচ্চুপট্ঠিতানি অহেসুং.

অথ ¶ মহাসত্তো উত্তরায নাম মহাদেৰিযা রম্মকুমারে নাম উপ্পন্নে চত্তারি নিমিত্তানি দিস্ৰা আজঞ্ঞরথেন মহাভিনিক্খমনং নিক্খমি. তং পব্বজন্তং একা পুরিসকোটি অনুপব্বজি. সো তেহি পরিৰুতো অট্ঠ মাসে পধানচরিযং চরিত্ৰা ৰিসাখপুণ্ণমায ধঞ্ঞৰতীনগরে সুধঞ্ঞসেট্ঠিস্স ধীতায ধঞ্ঞৰতিযা নাম দিন্নং মধুপাযাসং পরিভুঞ্জিত্ৰা মহাসালৰনে দিৰাৰিহারং ৰীতিনামেত্ৰা সাযন্হসমযে তিত্থকাজীৰকেন দিন্না অট্ঠ তিণমুট্ঠিযো গহেত্ৰা মহাসোণবোধিং উপসঙ্কমিত্ৰা অট্ঠত্তিংসহত্থৰিত্থতং তিণসন্থরকং পঞ্ঞপেত্ৰা পল্লঙ্কং আভুজিত্ৰা চতুরঙ্গৰীরিযং অধিট্ঠায মারবলং ¶ ৰিধমিত্ৰা তীসু যামেসু তিস্সো ৰিজ্জা সচ্ছিকত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি (ধ. প. ১৫৩-১৫৪) উদানং উদানেত্ৰা সত্তসত্তাহং বোধিসমীপেযেৰ ৰীতিনামেত্ৰা ব্রহ্মুনো আযাচনং অধিৰাসেত্ৰা ধম্মদেসনায ভাজনভূতে পুগ্গলে উপপরিক্খন্তো অত্তনা সহ পব্বজিতে কোটিসঙ্খে ভিক্খূ দিস্ৰা তঙ্খণেযেৰ অনিলপথেন গন্ত্ৰা ধঞ্ঞৰতীনগরসমীপে ধনঞ্জযুয্যানে ওতরিত্ৰা তেহি পরিৰুতো তেসং মজ্ঝে ধম্মচক্কং পৰত্তেসি. তদা কোটিসতানং অভিসমযো অহোসি. তেন ৰুত্তং –

‘‘অনোমদস্সিস্স ¶ অপরেন, সম্বুদ্ধো দ্ৰিপদুত্তমো;

পদুমো নাম নামেন, অসমো অপ্পটিপুগ্গলো.

‘‘তস্সাপি অসমং সীলং, সমাধিপি অনন্তকো;

অসঙ্খ্যেয্যং ঞাণৰরং, ৰিমুত্তিপি অনূপমা.

‘‘তস্সাপি অতুলতেজস্স, ধম্মচক্কপ্পৰত্তনে;

অভিসমযা তযো আসুং, মহাতমপৰাহনা’’তি.

তত্থ অসমং সীলন্তি অঞ্ঞেসং সীলেন অসদিসং, উত্তমং সেট্ঠন্তি অত্থো. সমাধিপি অনন্তকোতি সমাধিপি অপ্পমেয্যো, তস্স অনন্তভাৰো লোকৰিৰরণযমকপাটিহারিযাদীসু দট্ঠব্বো. ঞাণৰরন্তি সব্বঞ্ঞুতঞ্ঞাণং, অসাধারণঞাণানি ৰা. ৰিমুত্তিপীতি অরহত্তফলৰিমুত্তিপি ভগৰতো. অনূপমাতি উপমাৰিরহিতা. অতুলতেজস্সাতি অতুলঞাণতেজস্স. ‘‘অতুলঞাণতেজা’’তিপি পাঠো. তস্স ‘‘তযো অভিসমযা’’তি ইমিনা ¶ উত্তরপদেন সম্বন্ধো দট্ঠব্বো. মহাতমপৰাহনাতি মহামোহৰিনাসকা, মোহন্ধকারৰিদ্ধংসকাতি অত্থো.

অথাপরেন সমযেন পদুমো ভগৰা অত্তনো কনিট্ঠভাতরং সালকুমারঞ্চ উপসালকুমারঞ্চ ঞাতিসমাগমে সপরিৰারে পব্বাজেত্ৰা তেসং ধম্মং দেসেন্তো নৰুতি কোটিযো ধম্মামতং পাযেসি. যদা পন রম্মত্থেরস্স ধম্মং দেসেসি, তদা অসীতিকোটীনং ততিযো অভিসমযো অহোসি. তেন ৰুত্তং –

‘‘পঠমাভিসমযে বুদ্ধো, কোটিসতমবোধযি;

দুতিযাভিসমযে ধীরো, নৰুতিকোটিমবোধযি.

‘‘যদা চ পদুমো বুদ্ধো, ওৰদী সকমত্রজং;

তদা অসীতিকোটীনং, ততিযাভিসমযো অহূ’’তি.

যদা ¶ পন সুভাৰিতত্তো নাম রাজা পদুমস্স বুদ্ধস্স বুদ্ধপদুমৰদনস্স সন্তিকে কোটিসতসহস্সপরিৰারো এহিভিক্খুপব্বজ্জায পব্বজিতো, তস্মিং সন্নিপাতে ভগৰা পাতিমোক্খং উদ্দিসি, সো পন পঠমো সন্নিপাতো অহোসি.

অথাপরেন ¶ সমযেন মহাপদুমো মুনিৰসভো উসভসমগতী উসভৰতীনগরং উপনিস্সায ৰস্সং উপগঞ্ছি. নগরৰাসিনো মনুস্সা ভগৰন্তং দস্সনকামা উপসঙ্কমিংসু. তেসং ভগৰা ধম্মং দেসেসি. তত্থ চ বহৰো মনুস্সা পসন্নচিত্তা পব্বজিংসু. ততো দসবলো তেহি চ অঞ্ঞেহি চ তীহি ভিক্খুসতসহস্সেহি সদ্ধিং ৰিসুদ্ধিপৰারণং পৰারেসি. সো দুতিযো সন্নিপাতো অহোসি. যে পন তত্থ ন পব্বজিংসু, তে কথিনানিসংসং সুত্ৰা পাটিপদে পঞ্চসু মাসেসু পঞ্চানিসংসদাযকং কথিনচীৰরমদংসু. ততো তং ভিক্খূ ধম্মসেনাপতিং অগ্গসাৰকং ৰিসালমতিং সালত্থেরং কথিনত্থারত্থং যাচিত্ৰা কথিনচীৰরং তস্সাদংসু. থেরস্স কথিনচীৰরে কযিরমানে ভিক্খূ সিব্বনে সহাযকা অহেসুং. পদুমো পন সম্মাসম্বুদ্ধো সূচিচ্ছিদ্দে সুত্তানি আৰুনিত্ৰা অদাসি. নিট্ঠিতে পন চীৰরে ভগৰা তীহি ভিক্খুসতসহস্সেহি চারিকং পক্কামি.

অথাপরেন ¶ সমযেন সীহৰিক্কন্তগামী পুরিসসীহো ৰিয বুদ্ধসীহো গোসিঙ্গসালৰনসদিসে পরমসুরভিকুসুমফলভারৰিনমিতসাখাৰিটপে ৰিমলকমলকুৰলযসমলঙ্কতে সিসিরমধুরৰারিৰাহেন পরিপূরিতে রুরু-চমর-সীহ-ব্যগ্ঘ-অজ-হয-গৰয-মহিংসাদি ৰিৰিধমিগগণৰিচরিতে সুরভিকুসুমগন্ধাৰবদ্ধহদযাহি ভমরমধুকরযুৰতীহি অনুভূতপ্পচারাহি সমন্ততো গুম্বগুম্বাযমানে ফলরসপমুদিতহদযাহি কাকলিসদিসমধুরৰিরুতাহি কোকিলৰধূহি উপগীযমানে পরমরমণীযে ৰিৰিত্তে ৰিজনে যোগানুকূলে পৰনে ৰস্সাৰাসমুপগঞ্ছি. তস্মিং ৰিহরন্তং সপরিৰারকং দসবলং তথাগতং ধম্মরাজং বুদ্ধসিরিযা ৰিরোচমানং দিস্ৰা মনুস্সা তস্স ধম্মং সুত্ৰা পসীদিত্ৰা এহিভিক্খুপব্বজ্জায পব্বজিংসু. তদা দ্ৰীহি ভিক্খুসতসহস্সেহি পরিৰুতো পৰারেসি. সো ততিযো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, পদুমস্স মহেসিনো;

কোটিসতসহস্সানং, পঠমো আসি সমাগমো.

‘‘কথিনত্থারসমযে, উপ্পন্নে কথিনচীৰরে;

ধম্মসেনাপতিত্থায, ভিক্খূ সিব্বিংসু চীৰরং.

‘‘তদা তে ৰিমলা ভিক্খূ, ছল়ভিঞ্ঞা মহিদ্ধিকা;

তীণি সতসহস্সানি, সমিংসু অপরাজিতা.

‘‘পুনাপরং ¶ ¶ সো নরাসভো, পৰনে ৰাসং উপাগমি;

তদা সমাগমো আসি, দ্ৰিন্নং সতসহস্সিন’’ন্তি.

তত্থ কথিনত্থারসমযেতি কথিনচীৰরত্থরণসমযে. ধম্মসেনাপতিত্থাযাতি ধম্মসেনাপতিসালত্থেরত্থং. অপরাজিতাতি ন পরাজিতা, ৰিভত্তিলোপো দট্ঠব্বো. সোতি সো মহাপদুমো. পৰনেতি মহাৰনে. ৰাসন্তি ৰস্সাৰাসং. উপাগমীতি উপাগতো. দ্ৰিন্নং সতসহস্সিনন্তি দ্ৰিন্নং সতসহস্সানং. ‘‘তদা আসি সমাগমো’’তিপি পাঠো যদি অত্থি সুন্দরো ভৰেয্য.

তদা তথাগতে তস্মিং ৰনসণ্ডে ৰসন্তে অম্হাকং বোধিসত্তো সীহো হুত্ৰা সত্তাহং নিরোধসমাপত্তিং সমাপজ্জিত্ৰা নিসিন্নং দিস্ৰা পসন্নচিত্তো ¶ হুত্ৰা পদক্খিণং কত্ৰা সঞ্জাতপীতিসোমনস্সো তিক্খত্তুং সীহনাদং নদিত্ৰা সত্তাহং বুদ্ধারম্মণং পীতিং অৰিজহিত্ৰা পীতিসুখেনেৰ গোচরায অপক্কমিত্ৰা জীৰিতপরিচ্চাগং কত্ৰা পযিরুপাসমানো অট্ঠাসি. অথ সত্থা তস্স সত্তাহস্স অচ্চযেন নিরোধসমাপত্তিতো ৰুট্ঠায নরসীহো সীহং ওলোকেত্ৰা – ‘‘ভিক্খুসঙ্ঘেপিস্স চিত্তপ্পসাদো হোতূতি সঙ্ঘো আগচ্ছতূ’’তি চিন্তেসি. অনেককোটিভিক্খূ তাৰদেৰ আগঞ্ছিংসু. সীহো সঙ্ঘেপি চিত্তং পসাদেসি. অথ সত্থা তস্স চিত্তং ওলোকেত্ৰা – ‘‘অনাগতে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

‘‘অহং তেন সমযেন, সীহো আসিং মিগাধিভূ;

পৰিৰেকমনুব্রূহন্তং, পৰনে অদ্দসং জিনং.

‘‘ৰন্দিত্ৰা সিরসা পাদে, কত্ৰান তং পদক্খিণং;

তিক্খত্তুং অভিনাদিত্ৰা, সত্তাহং জিনমুপট্ঠহং.

‘‘সত্তাহং ৰরসমাপত্তিযা, ৰুট্ঠহিত্ৰা তথাগতো;

মনসা চিন্তযিত্ৰান, কোটিভিক্খূ সমানযি.

‘‘তদাপি সো মহাৰীরো, তেসং মজ্ঝে ৰিযাকরি;

অপরিমেয্যিতো কপ্পে, অযং বুদ্ধো ভৰিস্সতি.

‘‘পধানং ¶ পদহিত্ৰান…পে… হেস্সাম সম্মুখা ইমং.

‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা’’তি.

তত্থ ¶ পৰিৰেকমনুব্রূহন্তন্তি নিরোধসমাপত্তিং সমাপন্নন্তি অত্থো. পদক্খিণন্তি তিক্খত্তুং পদক্খিণং কত্ৰা. অভিনাদিত্ৰাতি তিক্খত্তুং সীহনাদং নদিত্ৰা. উপট্ঠহন্তি উপট্ঠহিং. অযমেৰ ৰা পাঠো. ৰরসমাপত্তিযাতি নিরোধসমাপত্তিতো ৰুট্ঠহিত্ৰা. মনসা চিন্তযিত্ৰানাতি ‘‘সব্বেপি ভিক্খূ ইধ আগচ্ছন্তূ’’তি মনসাৰ চিন্তেত্ৰা. সমানযীতি সমাহরি.

তস্স পন পদুমস্স ভগৰতো চম্পকং নাম নগরং অহোসি. অসমো নাম রাজা পিতা অহোসি, মাতাপি তস্স অসমা নাম, সালো ¶ চ উপসালো চ দ্ৰে অগ্গসাৰকা, ৰরুণো নামুপট্ঠাকো, রাধা চ সুরাধা চ দ্ৰে অগ্গসাৰিকা, মহাসোণরুক্খো বোধি, অট্ঠপণ্ণাসহত্থুব্বেধং সরীরং, আযু ৰস্সসতসহস্সং অহোসি, রূপাদীহি গুণেহি অনুত্তরা উত্তরা নামস্স অগ্গমহেসী, রম্মকুমারো নামস্স অতিরম্মো তনযো অহোসি. তেন ৰুত্তং –

‘‘চম্পকং নাম নগরং, অসমো নাম খত্তিযো;

অসমা নাম জনিকা, পদুমস্স মহেসিনো.

‘‘সালো চ উপসালো চ, অহেসুং অগ্গসাৰকা;

ৰরুণো নামুপট্ঠাকো, পদুমস্স মহেসিনো.

‘‘রাধা চেৰ সুরাধা চ, অহেসুং অগ্গসাৰিকা;

বোধি তস্স ভগৰতো, মহাসোণোতি ৰুচ্চতি.

‘‘অট্ঠপণ্ণাসরতনং, অচ্চুগ্গতো মহামুনি;

পভা নিদ্ধাৰতী তস্স, অসমা সব্বতো দিসা.

‘‘চন্দপ্পভা সূরিযপ্পভা, রতনগ্গিমণিপ্পভা;

সব্বাপি তা হতা হোন্তি, পত্ৰা জিনপভুত্তমং.

‘‘ৰস্সসতসহস্সানি ¶ , আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘পরিপক্কমানসে সত্তে, বোধযিত্ৰা অসেসতো;

সেসকে অনুসাসিত্ৰা, নিব্বুতো সো সসাৰকো.

‘‘উরগোৰ তচং জিণ্ণং, ৰদ্ধপত্তংৰ পাদপো;

জহিত্ৰা সব্বসঙ্খারে, নিব্বুতো সো যথা সিখী’’তি.

তত্থ ¶ রতনগ্গিমণিপ্পভাতি রতনপ্পভা চ অগ্গিপ্পভা চ মণিপ্পভা চ. হতাতি অভিভূতা. জিনপভুত্তমন্তি জিনস্স সরীরপ্পভং উত্তমং পত্ৰা হতাতি অত্থো. পরিপক্কমানসেতি পরিপক্কিন্দ্রিযে ৰেনেয্যসত্তে. ৰদ্ধপত্তন্তি পুরাণপত্তং. পাদপো ৰাতি পাদপো ৰিয. সব্বসঙ্খারেতি সব্বেপি ¶ অজ্ঝত্তিকবাহিরে সঙ্খারে. ‘‘হিত্ৰা সব্বসঙ্খার’’ন্তিপি পাঠো, সোযেৰত্থো. যথা সিখীতি অগ্গি ৰিয নিরুপাদানো নিব্বুতিং সুগতো গতোতি. সেসমেত্থ গাথাসু হেট্ঠা ৰুত্তনযত্তা উত্তানমেৰাতি.

পদুমবুদ্ধৰংসৰণ্ণনা নিট্ঠিতা.

পদুমবুদ্ধে ¶ পন পরিনিব্বুতে তস্স সাসনে চ অন্তরহিতে ৰস্সসতসহস্সাযুকা মনুস্সা অনুক্কমেন পরিহাযমানা দসৰস্সাযুকা অহেসুং. পুন ৰড্ঢিত্ৰা অসঙ্খ্যেয্যাযুকা হুত্ৰা পরিহাযমানা নৰুতিৰস্সসহস্সাযুকা অহেসুং. তদা দসবলধরো তেৰিজ্জো চতুৰেসারজ্জৰিসারদো ৰিমুত্তিসারদো নারদো নাম নরসত্তুত্তমো সত্থা লোকে উদপাদি. সো চত্তারি অসঙ্খ্যেয্যানি কপ্পসতসহস্সঞ্চ পারমিযো পূরেত্ৰা তুসিতভৰনে নিব্বত্তিত্ৰা ততো চৰিত্ৰা ধঞ্ঞৰতী নাম নগরে সকৰীরিযৰিজিতৰাসুদেৰস্স সুদেৰস্স নাম রঞ্ঞো কুলে অগ্গমহেসিযা নিরূপমায অনোমায নাম দেৰিযা কুচ্ছিস্মিং পটিসন্ধিং অগ্গহেসি. সো দসন্নং মাসানং অচ্চযেন ধনঞ্জযুয্যানে মাতুকুচ্ছিতো নিক্খমি. নামগ্গহণদিৰসে পন নামকরণে কযিরমানে সকলজম্বুদীপে মনুস্সানং উপভোগক্খমানি অনুরূপানি আভরণানি আকাসতো কপ্পরুক্খাদীহি পতিংসু. তেনস্স নরানং অরহানি আভরণানি অদাসীতি ‘‘নারদো’’তি নামং অকংসু.

সো নৰৰস্সসহস্সানি অগারমজ্ঝে ৰসি. ৰিজিতো ৰিজিতাৰী ৰিজিতাভিরামোতি তিণ্ণং উতূনং অনুচ্ছৰিকা তযো পাসাদা অহেসুং. তস্স নারদকুমারস্স কুলসীলাচাররূপসম্পন্নং মনোনুকূলং ৰিজিতসেনং ¶ নাম অতিৰিয ধঞ্ঞং খত্তিযকঞ্ঞং অগ্গমহেসিং অকংসু. তং আদিং কত্ৰা ৰীসতিসহস্সাধিকং ইত্থীনং সতসহস্সং অহোসি. তস্সা ৰিজিতসেনায দেৰিযা সব্বলোকানন্দকরে নন্দুত্তরকুমারে নাম জাতে সো চত্তারি নিমিত্তানি দিস্ৰা চতুরঙ্গিনিযা মহতিযা সেনায পরিৰুতো নানাৰিরাগতনুৰরৰসননিৰসনো ¶ আমুক্কমুত্তাহারমণিকুণ্ডলো ৰরকেযূরমকুটকটকধরো পরমসুরভিগন্ধকুসুমসমলঙ্কতো পদসাৰ উয্যানং গন্ত্ৰা সব্বাভরণানি ওমুঞ্চিত্ৰা ভণ্ডাগারিকস্স হত্থে দত্ৰা সযমেৰ ৰিমলনীলকুৰলযদলসদিসেনাতিনিসিতেনাসিনা পরমরুচিররতনৰিচিত্তং সকেসমকুটং ছিন্দিত্ৰা গগনতলে খিপি. তং সক্কো দেৰরাজা সুৰণ্ণচঙ্কোটকেন পটিগ্গহেত্ৰা তাৰতিংসভৰনং নেত্ৰা তিযোজনুব্বেধং সিনেরুমুদ্ধনি সত্তরতনমযং চেতিযং অকাসি.

মহাপুরিসো ¶ পন দেৰদত্তানি কাসাযানি ৰত্থানি পরিদহিত্ৰা তত্থেৰ উয্যানে পব্বজি. পুরিসসতসহস্সা চ তং অনুপব্বজিংসু. সো সত্তাহং তত্থেৰ পধানচরিযং চরিত্ৰা ৰিসাখপুণ্ণমায ৰিজিতসেনায অগ্গমহেসিযা দিন্নং পাযাসং পরিভুঞ্জিত্ৰা তত্থেৰ উয্যানে দিৰাৰিহারং কত্ৰা সুদস্সনুয্যানপালেন দিন্না অট্ঠ তিণমুট্ঠিযো গহেত্ৰা মহাসোণবোধিং পদক্খিণং কত্ৰা অট্ঠপণ্ণাসহত্থৰিত্থতং তিণসন্থরং সন্থরিত্ৰা নিসীদিত্ৰা মারবলং ৰিধমিত্ৰা তীসু যামেসু তিস্সো ৰিজ্জা উপ্পাদেত্ৰা সব্বঞ্ঞুতঞ্ঞাণং পটিৰিজ্ঝিত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি উদানং উদানেত্ৰা সত্তসত্তাহানি ৰীতিনামেত্ৰা ব্রহ্মুনো যাচিতো পটিঞ্ঞং দত্ৰা ধনঞ্জযুয্যানে অত্তনা সহ পব্বজিতেহি সতসহস্সভিক্খূহি পরিৰুতো তত্থ ধম্মচক্কং পৰত্তেসি. তদা কোটিসতসহস্সানং ধম্মাভিসমযো অহোসি. তেন ৰুত্তং –

‘‘পদুমস্স অপরেন, সম্বুদ্ধো দ্ৰিপদুত্তমো;

নারদো নাম নামেন, অসমো অপ্পটিপুগ্গলো.

‘‘সো বুদ্ধো চক্কৰত্তিস্স, জেট্ঠো দযিতওরসো;

আমুক্কমালাভরণো, উয্যানং উপসঙ্কমি.

‘‘তত্থাসি রুক্খো যসৰিপুলো, অভিরূপো ব্রহ্মা সুচি;

তমজ্ঝপ্পত্ৰা উপনিসীদি, মহাসোণস্স হেট্ঠতো.

‘‘তত্থ ঞাণৰরুপ্পজ্জি, অনন্তং ৰজিরূপমং;

তেন ৰিচিনি সঙ্খারে, উক্কুজ্জমৰকুজ্জকং.

‘‘তত্থ ¶ ¶ সব্বকিলেসানি, অসেসমভিৰাহযি;

পাপুণী কেৰলং বোধিং, বুদ্ধঞাণে চ চুদ্দস.

‘‘পাপুণিত্ৰান সম্বোধিং, ধম্মচক্কং পৰত্তযি;

কোটিসতসহস্সানং, পঠমাভিসমযো অহূ’’তি.

তত্থ চক্কৰত্তিস্সাতি চক্কৰত্তিরঞ্ঞো. জেট্ঠোতি পুব্বজো. দযিতওরসোতি দযিতো পিযো ¶ ওরসো পুত্তো, দযিতো ওরসি গহেত্ৰা লালিতো পুত্তো দযিতওরসো নাম. আমুক্কমালাভরণোতি আমুক্কমুত্তাহারকেযূরকটকমকুটকুণ্ডলমালো. উয্যানন্তি বহিনগরে ধনঞ্জযুয্যানং নামারামং অগমাসি.

তত্থাসি রুক্খোতি তস্মিং উয্যানে একো কির রুক্খো রত্তসোণো নাম অহোসি. সো কির নৰুতিহত্থুব্বেধো সমৰট্টক্খন্ধো সম্পন্নৰিৰিধৰিটপসাখো নীলবহলৰিপুলপলাসো সন্দচ্ছাযো দেৰতাধিৰুট্ঠত্তা ৰিগতৰিৰিধৰিহগগণসঞ্চারো ধরণীতলতিলকভূতো তরুরজ্জং ৰিয কুরুমানো পরমরমণীযদস্সনো রত্তকুসুমসমলঙ্কতসব্বসাখো দেৰমনুস্সনযনরসাযনভূতো অহোসি. যসৰিপুলোতি ৰিপুলযসো, সব্বলোকৰিখ্যাতো অত্তনো সম্পত্তিযা সব্বত্থ পাকটো ৰিস্সুতোতি অত্থো. কেচি ‘‘তত্থাসি রুক্খো ৰিপুলো’’তি পঠন্তি. ব্রহাতি মহন্তো, দেৰানং পারিচ্ছত্তকসদিসোতি অত্থো. তমজ্ঝপ্পত্ৰাতি তং সোণরুক্খং পত্ৰা অধিপত্ৰা উপগম্মাতি অত্থো. হেট্ঠতোতি তস্স রুক্খস্স হেট্ঠা.

ঞাণৰরুপ্পজ্জীতি ঞাণৰরং উদপাদি. অনন্তন্তি অপ্পমেয্যং অপ্পমাণং. ৰজিরূপমন্তি ৰজিরসদিসং তিখিণং, অনিচ্চানুপস্সনাদিকস্স ৰিপস্সনাঞাণস্সেতং অধিৰচনং. তেন ৰিচিনি সঙ্খারেতি তেন ৰিপস্সনাঞাণেন রূপাদিকে সঙ্খারে ৰিচিনি. উক্কুজ্জমৰকুজ্জকন্তি সঙ্খারানং উদযঞ্চ ৰযঞ্চ ৰিচিনীতি অত্থো. তস্মা পচ্চযাকারং সম্মসিত্ৰা আনাপানচতুত্থজ্ঝানতো ৰুট্ঠায পঞ্চসু খন্ধেসু অভিনিৰিসিত্ৰা উদযব্বযৰসেন সমপঞ্ঞাস লক্খণানি দিস্ৰা যাৰ গোত্রভুঞাণং ৰিপস্সনং ৰড্ঢেত্ৰা অরিযমগ্গানুক্কমেন সকলে বুদ্ধগুণে পটিলভীতি অত্থো.

তত্থাতি ¶ ¶ সোণরুক্খে. সব্বকিলেসানীতি সব্বেপি কিলেসে, লিঙ্গৰিপরিযাসং কত্ৰা ৰুত্তং. কেচি ‘‘তত্থ সব্বকিলেসেহী’’তি পঠন্তি. অসেসন্তি নিরৰসেসং. অভিৰাহযীতি মগ্গোধিনা চ কিলেসোধিনা চ সব্বে কিলেসে অভিৰাহযি, ৰিনাসমুপনেসীতি অত্থো. বোধীতি অরহত্তমগ্গঞাণং. বুদ্ধঞাণে চ চুদ্দসাতি বুদ্ধঞাণানি চুদ্দস. তানি কতমানীতি? মগ্গফলঞাণানি অট্ঠ, ছ অসাধারণঞাণানীতি এৰমিমানি চুদ্দস বুদ্ধঞাণানি নাম, চ-সদ্দো সম্পিণ্ডনত্থো, তেন অপরানিপি চতস্সো পটিসম্ভিদাঞাণানি চতুৰেসারজ্জঞাণানি চতুযোনিপরিচ্ছেদকঞাণানি পঞ্চগতিপরিচ্ছেদকঞাণানি দসবলঞাণানি সকলে চ বুদ্ধগুণে পাপুণীতি অত্থো.

এৰং বুদ্ধত্তং পত্ৰা ব্রহ্মাযাচনং অধিৰাসেত্ৰা ধনঞ্জযুয্যানে অত্তনা সহ পব্বজিতে সতসহস্সভিক্খূ সম্মুখে কত্ৰা ধম্মচক্কং পৰত্তেসি. তদা কোটিসতসহস্সস্স পঠমাভিসমযো ¶ অহোসি. তদা কির মহাদোণনগরে দোণো নাম নাগরাজা গঙ্গাতীরে পটিৰসতি মহিদ্ধিকো মহানুভাৰো মহাজনেন সক্কতো গরুকতো মানিতো পূজিতো. সো যস্মিং ৰিসযে জনপদৰাসিনো মনুস্সা তস্স বলিকম্মং ন করোন্তি, তেসং ৰিসযং অৰস্সেন ৰা অতিৰস্সেন ৰা সক্খরৰস্সেন ৰা ৰিনাসেতি.

অথ তীরদস্সনো নারদো সত্থা দোণস্স নাগরাজস্স ৰিনযনে বহূনং পাণীনং উপনিস্সযং দিস্ৰা মহতা ভিক্খুসঙ্ঘেন পরিৰারিতো তস্স নাগরাজস্স নিৰাসট্ঠানমগমাসি. ততো তং মনুস্সা দিস্ৰা এৰমাহংসু – ‘‘ভগৰা, এত্থ ঘোরৰিসো উগ্গতেজো মহিদ্ধিকো মহানুভাৰো নাগরাজা পটিৰসতি, সো তং মা ৰিহেঠেস্সতি ন গন্তব্ব’’ন্তি. ভগৰা পন তেসং ৰচনং অসুণন্তো ৰিয অগমাসি. গন্ত্ৰা চ তত্থস্স নাগরাজস্স সক্কারত্থায কতে পরমসুরভিগন্ধে পুপ্ফসন্থরে নিসীদি. মহাজনো কির ‘‘নারদস্স চ মুনিরাজস্স দোণস্স চ নাগরাজস্স দ্ৰিন্নম্পি যুদ্ধং পস্সিস্সামা’’তি সন্নিপতি.

অথ অহিনাগো মুনিনাগং তথা নিসিন্নং দিস্ৰা মক্খং অসহমানো সন্দিস্সমানকাযো হুত্ৰা পধূপাযি. দসবলোপি পধূপাযি. পুন নাগরাজা পজ্জলি ¶ . মুনিরাজাপি পজ্জলি. অথ সো নাগরাজা দসবলস্স সরীরতো নিক্খন্তাহি ধূমজালাহি অতিৰিয কিলন্তসরীরো দুক্খং অসহমানো ‘‘ৰিসৰেগেন নং মারেস্সামী’’তি ৰিসং ৰিস্সজ্জেসি. ৰিসস্স ৰেগেন সকলোপি জম্বুদীপো ৰিনস্সেয্য. তং পন ৰিসং দসবলস্স সরীরে একলোমম্পি কম্পেতুং নাসক্খি. অথ সো নাগরাজা – ‘‘কা নু খো সমণস্স পৰত্তী’’তি ওলোকেন্তো সরদসমযে সূরিযং ৰিয চন্দং ৰিয চ পরিপুণ্ণং ছব্বণ্ণাহি বুদ্ধরস্মীহি ৰিরোচমানং ৰিপ্পসন্নৰদনসোভং ভগৰন্তং দিস্ৰা – ‘‘অহো! মহিদ্ধিকো ৰতাযং সমণো, মযা পন অত্তনো বলং অজানন্তেন অপরদ্ধ’’ন্তি চিন্তেত্ৰা তাণং গৰেসী ভগৰন্তংযেৰ ¶ সরণমুপগঞ্ছি. অথ নারদো মুনিরাজা তং নাগরাজং ৰিনেত্ৰা তত্থ সন্নিপতিতস্স মহাজনস্স চিত্তপ্পসাদনত্থং যমকপাটিহারিযং অকাসি. তদা পাণীনং নৰুতিকোটিসহস্সানি অরহত্তে পতিট্ঠহিংসু. সো দুতিযো অভিসমযো অহোসি. তেন ৰুত্তং –

‘‘মহাদোণং নাগরাজং, ৰিনযন্তো মহামুনি;

পাটিহেরং তদাকাসি, দস্সযন্তো সদেৰকে.

‘‘তদা ¶ দেৰমনুস্সানং, তম্হি ধম্মপ্পকাসনে;

নৰুতিকোটিসহস্সানি, তরিংসু সব্বসংসয’’ন্তি.

তত্থ পাটিহেরং তদাকাসীতি অকাসি যমকপাটিহারিযন্তি অত্থো. অযমেৰ ৰা পাঠো. ‘‘তদা দেৰমনুস্সা ৰা’’তিপি পাঠো. তত্থ দেৰমনুস্সানন্তি সামিঅত্থে পচ্চত্তং. তস্মা দেৰানং মনুস্সানঞ্চ নৰুতিকোটিসহস্সানীতি অত্থো. তরিংসূতি অতিক্কমিংসু.

যদা পন অত্তনো পুত্তং নন্দুত্তরকুমারং ওৰদি, তদা অসীতিযা কোটিসহস্সানং ততিযাভিসমযো অহোসি. তেন ৰুত্তং –

‘‘যম্হি কালে মহাৰীরো, ওৰদী সকমত্রজং;

অসীতিকোটিসহস্সানং, ততিযাভিসমযো অহূ’’তি.

যদা পন থুল্লকোট্ঠিতনগরে ভদ্দসালো চ ৰিজিতমিত্তো চ দ্ৰে ব্রাহ্মণসহাযকা অমতরহদং গৰেসমানা পরিসতি নিসিন্নং অতিৰিসারদং নারদসম্মাসম্বুদ্ধং অদ্দসংসু. তে ভগৰতো কাযে দ্ৰত্তিংসমহাপুরিসলক্খণানি ¶ দিস্ৰা – ‘‘অযং লোকে ৰিৰটচ্ছদো সম্মাসম্বুদ্ধো’’তি নিট্ঠং গন্ত্ৰা ভগৰতি সঞ্জাতসদ্ধা সপরিৰারা ভগৰতো সন্তিকে পব্বজিংসু. তেসু পব্বজিত্ৰা অরহত্তং পত্তেসু ভগৰা ভিক্খূনং কোটিসতসহস্সমজ্ঝে পাতিমোক্খং উদ্দিসি, সো পঠমো সন্নিপাতো অহোসি. তেন ৰুত্তং –

‘‘সন্নিপাতা তযো আসুং, নারদস্স মহেসিনো;

কোটিসতসহস্সানং, পঠমো আসি সমাগমো’’তি.

যস্মিং সমযে নারদো সম্মাসম্বুদ্ধো ঞাতিসমাগমে অত্তনো পণিধানতো পট্ঠায বুদ্ধৰংসং কথেসি, তদা নৰুতিকোটিভিক্খুসহস্সানং দুতিযো সন্নিপাতো অহোসি. তেন ৰুত্তং –

‘‘যদা বুদ্ধো বুদ্ধগুণং, সনিদানং পকাসযি;

নৰুতিকোটিসহস্সানি, সমিংসু ৰিমলা তদা’’তি.

তত্থ ¶ ৰিমলাতি ৰিগতমলা, খীণাসৰাতি অত্থো.

যদা ¶ পন মহাদোণনাগরাজস্স ৰিনযনে পসন্নো ৰেরোচনো নাম নাগরাজা গঙ্গায নদিযা তিগাৰুতপ্পমাণং সত্তরতনমযং মণ্ডপং নিম্মিনিত্ৰা সপরিৰারং ভগৰন্তং তত্থ নিসীদাপেত্ৰা সপরিৰারো সজনপদে অত্তনো দানগ্গদস্সনত্থায নিমন্তেত্ৰা নাগনাটকানি চ তাল়াৰচরে ৰিৰিধৰেসালঙ্কারধরে সন্নিপাতেত্ৰা মহাসক্কারেন ভগৰতো সপরিৰারস্স মহাদানং অদাসি. ভোজনাৰসানে ভগৰা মহাগঙ্গং ওতারেন্তো ৰিয অনুমোদনমকাসি. তদা ভত্তানুমোদনে ধম্মং সুত্ৰা পসন্নানং এহিভিক্খুপব্বজ্জায পব্বজিতানং অসীতিভিক্খুসতসহস্সানং মজ্ঝে পাতিমোক্খং উদ্দিসি, সো ততিযো সন্নিপাতো অহোসি. তেন ৰুত্তং –

‘‘যদা ৰেরোচনো নাগো, দানং দদাতি সত্থুনো;

তদা সমিংসু জিনপুত্তা, অসীতিসতসহস্সিযো’’তি.

তত্থ অসীতিসতসহস্সিযোতি সতসহস্সানং অসীতিযো.

তদা ¶ অম্হাকং বোধিসত্তো ইসিপব্বজ্জং পব্বজিত্ৰা হিমৰন্তপস্সে অস্সমং মাপেত্ৰা পঞ্চসু অভিঞ্ঞাসু অট্ঠসু সমাপত্তীসু চ চিণ্ণৰসী হুত্ৰা পটিৰসতি. অথ তস্মিং অনুকম্পায নারদো ভগৰা অসীতিযা অরহন্তকোটীহি দসহি চ অনাগামিফলট্ঠেহি উপাসকসহস্সেহি পরিৰুতো তং অস্সমপদং অগমাসি. তাপসো ভগৰন্তং দিস্ৰাৰ পমুদিতহদযো সপরিৰারস্স ভগৰতো নিৰাসত্থায অস্সমং মাপেত্ৰা সকলরত্তিং সত্থুগুণং কিত্তেত্ৰা ভগৰতো ধম্মকথং সুত্ৰা পুনদিৰসে উত্তরকুরুং গন্ত্ৰা ততো আহারং আহরিত্ৰা সপরিৰারস্স বুদ্ধস্স মহাদানং অদাসি. এৰং সত্তাহং মহাদানং দত্ৰা হিমৰন্ততো অনগ্ঘং লোহিতচন্দনং আহরিত্ৰা তেন লোহিতচন্দনেন ভগৰন্তং পূজেসি. তদা নং দসবলো অমরনরপরিৰুতো ধম্মকথং কথেত্ৰা – ‘‘অনাগতে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

‘‘অহং তেন সমযেন, জটিলো উগ্গতাপনো;

অন্তলিক্খচরো আসিং, পঞ্চাভিঞ্ঞাসু পারগূ.

‘‘তদাপাহং অসমসমং, সসঙ্ঘং সপরিজ্জনং;

অন্নপানেন তপ্পেত্ৰা, চন্দনেনাভিপূজযিং.

‘‘সোপি ¶ মং তদা ব্যাকাসি, নারদো লোকনাযকো;

অপরিমেয্যিতো কপ্পে, বুদ্ধো লোকে ভৰিস্সতি.

‘‘পধানং পদহিত্ৰান…পে… হেস্সাম সম্মুখা ইমং.

‘‘তস্সাপি ¶ ৰচনং সুত্ৰা, ভিয্যো হাসেত্ৰ মানসং;

অধিট্ঠহিং ৰতং উগ্গং, দসপারমিপূরিযা’’তি.

তত্থ তদাপাহন্তি তদাপি অহং. অসমসমন্তি অসমা নাম অতীতা বুদ্ধা, তেহি অসমেহি সমং তুল্যং অসমসমং. অথ ৰা অসমা ৰিসমা, সমা অৰিসমা সাধৰো, তেসু অসমসমেসু সমো ‘‘অসমসমসমো’’তি ৰত্তব্বে একস্স সমসদ্দস্স লোপং কত্ৰা ৰুত্তন্তি ৰেদিতব্বং, অসমাৰিসমসমন্তি অত্থো. সপরিজ্জনন্তি সউপাসকজনং. ‘‘সোপি মং তদা নরমরূনং, মজ্ঝে ব্যাকাসি চক্খুমা’’তিপি পাঠো ¶ , সো উত্তানত্থোৰ. ভিয্যো হাসেত্ৰ মানসন্তি উত্তরিম্পি হাসেত্ৰা তোসেত্ৰা হদযং. অধিট্ঠহিং ৰতং উগ্গন্তি উগ্গং ৰতং অধিট্ঠাসিং. ‘‘উত্তরিং ৰতমধিট্ঠাসিং, দসপারমিপূরিযা’’তিপি পাঠো.

তস্স পন ভগৰতো নারদস্স ধঞ্ঞৰতী নাম নগরং অহোসি, সুদেৰো নাম খত্তিযো পিতা, অনোমা নাম মাতা, ভদ্দসালো চ জিতমিত্তো চ দ্ৰে অগ্গসাৰকা, ৰাসেট্ঠো নাম উপট্ঠাকো, উত্তরা চ ফগ্গুনী চ দ্ৰে অগ্গসাৰিকা, মহাসোণরুক্খো বোধি, সরীরং অট্ঠাসীতিহত্থুব্বেধং অহোসি. তস্স সরীরপ্পভা নিচ্চং যোজনং ফরতি, নৰুতিৰস্সসহস্সানি আযু, তস্স পন ৰিজিতসেনা নাম অগ্গমহেসী, নন্দুত্তরকুমারো নামস্স পুত্তো অহোসি, ৰিজিতো ৰিজিতাৰী ৰিজিতাভিরামোতি তযো পাসাদা অহেসুং. সো নৰৰস্সসহস্সানি অগারং অজ্ঝাৰসি. সো পদসাৰ মহাভিনিক্খমনং নিক্খমীতি. তেন ৰুত্তং –

‘‘নগরং ধঞ্ঞৰতী নাম, সুদেৰো নাম খত্তিযো;

অনোমা নাম জনিকা, নারদস্স মহেসিনো.

‘‘ভদ্দসালো জিতমিত্তো, অহেসুং অগ্গসাৰকা;

ৰাসেট্ঠো নামুপট্ঠাকো, নারদস্স মহেসিনো.

‘‘উত্তরা ¶ ফগ্গুনী চেৰ, অহেসুং অগ্গসাৰিকা;

বোধি তস্স ভগৰতো, মহাসোণোতি ৰুচ্চতি.

‘‘অট্ঠাসীতিরতনানি, অচ্চুগ্গতো মহামুনি;

কঞ্চনগ্ঘিযসঙ্কাসো, দসসহস্সী ৰিরোচতি.

‘‘তস্স ব্যামপ্পভা কাযা, নিদ্ধাৰতি দিসোদিসং;

নিরন্তরং দিৰারত্তিং, যোজনং ফরতে সদা.

‘‘ন ¶ কেচি তেন সমযেন, সমন্তা যোজনে জনা;

উক্কাপদীপে উজ্জালেন্তি, বুদ্ধরংসীহি ওত্থটা.

‘‘নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘যথা ¶ উল়ূহি গগনং, ৰিচিত্তং উপসোভতি;

তথেৰ সাসনং তস্স, অরহন্তেহি সোভতি.

‘‘সংসারসোতং তরণায, সেসকে পটিপন্নকে;

ধম্মসেতুং দল়্হং কত্ৰা, নিব্বুতো সো নরাসভো.

‘‘সোপি বুদ্ধো অসমসমো, তেপি খীণাসৰা অতুলতেজা;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ কঞ্চনগ্ঘিযসঙ্কাসোতি ৰিৰিধরতনৰিচিত্তকঞ্চনমযগ্ঘিকসদিসরূপসোভো. দসসহস্সী ৰিরোচতীতি তস্স পভায দসসহস্সীপি লোকধাতু ৰিরোচতি, ৰিরাজতীতি অত্থো. তমেৰত্থং পকাসেন্তো ভগৰা ‘‘তস্স ব্যামপ্পভা কাযা, নিদ্ধাৰতি দিসোদিস’’ন্তি আহ. তত্থ ব্যামপ্পভা কাযাতি ব্যামপ্পভা ৰিযাতি ব্যামপ্পভা, অম্হাকং ভগৰতো ব্যামপ্পভা ৰিযাতি অত্থো.

ন কেচীতি এত্থ ন-কারো পটিসেধত্থো, তস্স উজ্জালেন্তি-সদ্দেন সম্বন্ধো দট্ঠব্বো. উক্কাতি ¶ দণ্ডদীপিকা. উক্কা ৰা পদীপে ৰা কেচিপি জনা ন উজ্জালেন্তি ন পজ্জালেন্তি. কস্মাতি চে? বুদ্ধসরীরপ্পভায ওভাস