📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

চরিযাপিটক-অট্ঠকথা

গন্থারম্ভকথা

চরিযা সব্বলোকস্স, হিতা যস্স মহেসিনো;

অচিন্তেয্যানুভাৰং তং, ৰন্দে লোকগ্গনাযকং.

ৰিজ্জাচরণসম্পন্না, যেন নীযন্তি লোকতো;

ৰন্দে তমুত্তমং ধম্মং, সম্মাসম্বুদ্ধপূজিতং.

সীলাদিগুণসম্পন্নো, ঠিতো মগ্গফলেসু যো;

ৰন্দে অরিযসঙ্ঘং তং, পুঞ্ঞক্খেত্তং অনুত্তরং.

ৰন্দনাজনিতং পুঞ্ঞং, ইতি যং রতনত্তযে;

হতন্তরাযো সব্বত্থ, হুত্ৰাহং তস্স তেজসা.

ইমস্মিং ভদ্দকপ্পস্মিং, সম্ভতা যা সুদুক্করা;

উক্কংসপারমিপ্পত্তা, দানপারমিতাদযো.

তাসং সম্বোধিচরিযানং, আনুভাৰৰিভাৰনং;

সক্কেসু নিগ্রোধারামে, ৰসন্তেন মহেসিনা.

যং ধম্মসেনাপতিনো, সব্বসাৰককেতুনো;

লোকনাথেন চরিযা-পিটকং নাম দেসিতং.

যং খুদ্দকনিকাযস্মিং, সঙ্গাযিংসু মহেসযো;

ধম্মসঙ্গাহকা সত্থু, হেতুসম্পত্তিদীপনং.

তস্স সম্বোধিসম্ভার-ৰিভাগনযযোগতো;

কিঞ্চাপি দুক্করা কাতুং, অত্থসংৰণ্ণনা মযা.

সহ সংৰণ্ণনং যস্মা, ধরতে সত্থু সাসনং;

পুব্বাচরিযসীহানং, তিট্ঠতেৰ ৰিনিচ্ছযো.

তস্মা তং অৰলম্বিত্ৰা, ওগাহিত্ৰা চ সব্বসো;

জাতকানুপনিস্সায, পোরাণট্ঠকথানযং.

নিস্সিতং ৰাচনামগ্গং, সুৰিসুদ্ধমনাকুলং;

মহাৰিহারৰাসীনং, নিপুণত্থৰিনিচ্ছযং.

নীতনেয্যত্থভেদা চ, পারমী পরিদীপযং;

করিস্সামি তং চরিযা-পিটকস্সত্থৰণ্ণনং.

ইতি আকঙ্খমানস্স, সদ্ধম্মস্স চিরট্ঠিতিং;

ৰিভজন্তস্স তস্সত্থং, নিসামযথ সাধৰোতি.

তত্থ চরিযাপিটকন্তি কেনট্ঠেন চরিযাপিটকং? অতীতাসু জাতীসু সত্থু চরিযানুভাৰপ্পকাসিনী পরিযত্তীতি কত্ৰা, পরিযত্তিঅত্থো হি অযং পিটকসদ্দো, ‘‘মা পিটকসম্পদানেনা’’তিআদীসু (অ. নি. ৩.৬৬) ৰিয. অথ ৰা যস্মা সা পরিযত্তি তস্সেৰ সত্থু পুরিমজাতীসু চরিযানং আনুভাৰপ্পকাসনেন ভাজনভূতা, তস্মাপি ‘‘চরিযাপিটক’’ন্তি ৰুচ্চতি, ভাজনত্থোপি হি পিটকসদ্দো নিদ্দিট্ঠো ‘‘অথ পুরিসো আগচ্ছেয্য, কুদালপিটকং আদাযা’’তিআদীসু (ম. নি. ১.২২৮; অ. নি. ৩.৭০) ৰিয. তং পনেতং চরিযাপিটকং ৰিনযপিটকং, সুত্তন্তপিটকং, অভিধম্মপিটকন্তি তীসু পিটকেসু সুত্তন্তপিটকপরিযাপন্নং. দীঘনিকাযো, মজ্ঝিমনিকাযো, সংযুত্তনিকাযো, অঙ্গুত্তরনিকাযো, খুদ্দকনিকাযোতি পঞ্চসু নিকাযেসু খুদ্দকনিকাযপরিযাপন্নং. সুত্তং, গেয্যং, ৰেয্যাকরণং, গাথা, উদানং, ইতিৰুত্তকং, জাতকং, অব্ভুতধম্মং, ৰেদল্লন্তি নৰসু সাসনঙ্গেসু গাথাসঙ্গহং.

‘‘দ্ৰাসীতি বুদ্ধতো গণ্হিং, দ্ৰেসহস্সানি ভিক্খুতো;

চতুরাসীতি সহস্সানি, যে মে ধম্মা পৰত্তিনো’’তি. (থেরগা. ১০২৭) –

এৰং ধম্মভণ্ডাগারিকেন পটিঞ্ঞাতেসু চতুরাসীতিযা ধম্মক্খন্ধসহস্সেসু কতিপযধম্মক্খন্ধসঙ্গহং. ৰগ্গতো অকিত্তিৰগ্গো, হত্থিনাগৰগ্গো, যুধঞ্জযৰগ্গোতি ৰগ্গত্তযসঙ্গহং. চরিযতো অকিত্তিৰগ্গে দস, হত্থিনাগৰগ্গে দস, যুধঞ্জযৰগ্গে পঞ্চদসাতি পঞ্চতিংসচরিযাসঙ্গহং. তীসু ৰগ্গেসু অকিত্তিৰগ্গো আদি, চরিযাসু অকিত্তিচরিযা. তস্সাপি –

‘‘কপ্পে চ সতসহস্সে, চতুরো চ অসঙ্খিযে;

এত্থন্তরে যং চরিতং, সব্বং তং বোধিপাচন’’ন্তি. –

অযং গাথা আদি. তস্স ইতো পভুতি অনুক্কমেন অত্থসংৰণ্ণনা হোতি.

গন্থারম্ভকথা নিট্ঠিতা.

নিদানকথা

সা পনাযং অত্থসংৰণ্ণনা যস্মা দূরেনিদানং, অৰিদূরেনিদানং, সন্তিকেনিদানন্তি ইমানি তীণি নিদানানি দস্সেত্ৰা ৰুচ্চমানা সুণন্তেহি সমুদাগমতো পট্ঠায সুট্ঠু ৰিঞ্ঞাতা নাম হোতি. তস্মা তেসং নিদানানং অযং ৰিভাগো ৰেদিতব্বো.

দীপঙ্করদসবলস্স পাদমূলস্মিঞ্হি কতাভিনীহারস্স মহাবোধিসত্তস্স যাৰ তুসিতভৰনে নিব্বত্তি, তাৰ পৰত্তো কথামগ্গো দূরেনিদানং নাম. তুসিতভৰনতো পট্ঠায যাৰ বোধিমণ্ডে সব্বঞ্ঞুতঞ্ঞাণপ্পত্তি, তাৰ পৰত্তো কথামগ্গো অৰিদূরেনিদানং নাম. মহাবোধিমণ্ডতো পন পট্ঠায যাৰ পচ্চুপ্পন্নৰত্থু, তাৰ পৰত্তো কথামগ্গো সন্তিকেনিদানং নাম. ইমেসু তীসু নিদানেসু যস্মা দূরেনিদানঅৰিদূরেনিদানানি সব্বসাধারণানি, তস্মা তানি জাতকট্ঠকথাযং (জা. অট্ঠ. ১.দূরেনিদানকথা) ৰিত্থারিতনযেনেৰ ৰিত্থারতো ৰেদিতব্বানি. সন্তিকেনিদানে পন অত্থি ৰিসেসোতি তিণ্ণম্পি নিদানানং অযমাদিতো পট্ঠায সঙ্খেপকথা.

দীপঙ্করস্স ভগৰতো পাদমূলে কতাভিনীহারো বোধিসত্তভূতো লোকনাথো অত্তনো অভিনীহারানুরূপং সমত্তিংসপারমিযো পূরেত্ৰা, সব্বঞ্ঞুতঞ্ঞাণসম্ভারং মত্থকং পাপেত্ৰা, তুসিতভৰনে নিব্বত্তো বুদ্ধভাৰায উপ্পত্তিকালং আগমযমানো, তত্থ যাৰতাযুকং ঠত্ৰা ততো চুতো সক্যরাজকুলে পটিসন্ধিং গহেত্ৰা অনন্তেন পরিহারেন মহন্তেন সিরিসোভগ্গেন ৰড্ঢমানো অনুক্কমেন যোব্বনং পত্ৰা একূনতিংসে ৰযস্মিং কতমহাভিনিক্খমনো, ছব্বস্সানি মহাপধানং পদহিত্ৰা, ৰেসাখপুণ্ণমাযং বোধিরুক্খমূলে নিসিন্নো সূরিযে অনত্থঙ্গমিতেযেৰ মারবলং ৰিধমিত্ৰা পুরিমযামে পুব্বেনিৰাসং অনুস্সরিত্ৰা, মজ্ঝিমযামে দিব্বচক্খুং ৰিসোধেত্ৰা, পচ্ছিমযামে দিযড্ঢকিলেসসহস্সং খেপেত্ৰা, অনুত্তরং সম্মাসম্বোধিমভিসম্বুজ্ঝি.

ততো তত্থেৰ সত্তসত্তাহে ৰীতিনামেত্ৰা, আসাল়্হিপুণ্ণমাযং বারাণসিং গন্ত্ৰা ইসিপতনে মিগদাযে অঞ্ঞাসিকোণ্ডঞ্ঞপ্পমুখা অট্ঠারস ব্রহ্মকোটিযো ধম্মামতং পাযেন্তো, ধম্মচক্কং (সং. নি. ৫.১০৮১; মহাৰ. ১৩ আদযো; পটি. ম. ২.৩০) পৰত্তেত্ৰা, যসাদিকে ৰেনেয্যে অরহত্তে পতিট্ঠাপেত্ৰা, তে সব্বেৰ সট্ঠি অরহন্তে লোকানুগ্গহায ৰিস্সজ্জেত্ৰা, উরুৰেলং গচ্ছন্তো কপ্পাসিকৰনসণ্ডে তিংস ভদ্দৰগ্গিযে সোতাপত্তিফলাদীসু পতিট্ঠাপেত্ৰা, উরুৰেলং গন্ত্ৰা অড্ঢুড্ঢানি পাটিহারিযসহস্সানি দস্সেত্ৰা উরুৰেলকস্সপাদযো সহস্সজটিলপরিৰারে তেভাতিকজটিলে ৰিনেত্ৰা, তেহি পরিৰুতো রাজগহনগরূপচারে লট্ঠিৰনুয্যানে নিসিন্নো বিম্বিসারপ্পমুখে দ্ৰাদসনহুতে ব্রাহ্মণগহপতিকে সাসনে ওতারেত্ৰা, মগধরাজেন কারিতে ৰেল়ুৰনৰিহারে ৰিহরতি.

অথেৰং ভগৰতি ৰেল়ুৰনে ৰিহরন্তে সারিপুত্তমোগ্গল্লানেসু অগ্গসাৰকট্ঠানে ঠপিতেসু সাৰকসন্নিপাতে জাতে, সুদ্ধোদনমহারাজা ‘‘পুত্তো কির মে ছব্বস্সানি দুক্করকারিকং চরিত্ৰা পরমাভিসম্বোধিং পত্ৰা পৰত্তিতৰরধম্মচক্কো রাজগহং নিস্সায ৰেল়ুৰনে ৰিহরতী’’তি সুত্ৰা দসপুরিসসহস্সপরিৰারে, অনুক্কমেন দস অমচ্চে পেসেসি ‘‘পুত্তং মে ইধানেত্ৰা দস্সেথা’’তি. তেসু রাজগহং গন্ত্ৰা সত্থু ধম্মদেসনায অরহত্তে পতিট্ঠিতেসু কাল়ুদাযিত্থেরেন রঞ্ঞো অধিপ্পাযে আরোচিতে ভগৰা ৰীসতিসহস্সখীণাসৰপরিৰুতো রাজগহতো নিক্খমিত্ৰা সট্ঠিযোজনং কপিলৰত্থুং দ্ৰীহি মাসেহি সম্পাপুণি. সক্যরাজানো ‘‘অম্হাকং ঞাতিসেট্ঠং পস্সিস্সামা’’তি সন্নিপতিত্ৰা নিগ্রোধারামং ভগৰতো চ ভিক্খুসঙ্ঘস্স চ ৰসনযোগ্গং কারেত্ৰা, গন্ধপুপ্ফাদিহত্থা পচ্চুগ্গমনং কত্ৰা, সত্থারং নিগ্রোধারামং পৰেসেসুং. তত্র ভগৰা ৰীসতিসহস্সখীণাসৰপরিৰুতো পঞ্ঞত্তৰরবুদ্ধাসনে নিসীদি. সাকিযা মানত্থদ্ধা সত্থু পণিপাতং নাকংসু. ভগৰা তেসং অজ্ঝাসযং ওলোকেত্ৰা মানং ভঞ্জিত্ৰা তে ধম্মদেসনায ভাজনে কাতুং অভিঞ্ঞাপাদকং চতুত্থজ্ঝানং সমাপজ্জিত্ৰা ৰুট্ঠায আকাসং অব্ভুগ্গন্ত্ৰা তেসং সীসে পাদপংসুং ওকিরমানো ৰিয, কণ্ডম্বরুক্খমূলে কতপাটিহারিযসদিসং যমকপাটিহারিযং অকাসি. রাজা তং অচ্ছরিযং দিস্ৰা ‘‘অযং লোকে অগ্গপুগ্গলো’’তি ৰন্দি. রঞ্ঞা পন ৰন্দিতে তে ঠাতুং নাম ন সক্কোন্তি, সব্বেপি সাকিযা ৰন্দিংসু.

তদা কির ভগৰা যমকপাটিহারিযং করোন্তো লোকৰিৰরণপাটিহারিযম্পি অকাসি – যস্মিং ৰত্তমানে মনুস্সা মনুস্সলোকে যথাঠিতা যথানিসিন্নাৰ চাতুমহারাজিকতো পট্ঠায যাৰ অকনিট্ঠভৰনা সব্বে দেৰে তত্থ তত্থ অত্তনো ভৰনে কীল়ন্তে দিব্বানুভাৰেন জোতন্তে মহতিং দিব্বসম্পত্তিং অনুভৰন্তে সন্তানি সমাপত্তিসুখানি অনুভৰন্তে অঞ্ঞমঞ্ঞং ধম্মং সাকচ্ছন্তে চ বুদ্ধানুভাৰেন অত্তনো মংসচক্খুনাৰ পস্সন্তি. তথা হেট্ঠাপথৰিযং অট্ঠসু মহানিরযেসু, সোল়সসু চ উস্সদনিরযেসু, লোকন্তরনিরযে চাতি তত্থ তত্থ মহাদুক্খং অনুভৰমানে সত্তে পস্সন্তি. দসসহস্সিলোকধাতুযং দেৰা মহচ্চদেৰানুভাৰেন তথাগতং উপসঙ্কমিত্ৰা অচ্ছরিযব্ভুতচিত্তজাতা পঞ্জলিকা নমস্সমানা পযিরুপাসন্তি, বুদ্ধগুণপটিসংযুত্তা গাথাযো উদাহরন্তা থোমেন্তি অপ্ফোটেন্তি হসন্তি পীতিসোমনস্সং পৰেদেন্তি. যং সন্ধায ৰুত্তং –

‘‘ভুম্মা মহারাজিকা তাৰতিংসা, যামা চ দেৰা তুসিতা চ নিম্মিতা;

পরনিম্মিতা যেপি চ ব্রহ্মকাযিকা, আনন্দিতা ৰিপুলমকংসু ঘোস’’ন্তি. (বু. ৰং. ১.৬)

তদা হি দসবলো ‘‘অতুলং অত্তনো বুদ্ধবলং দস্সেস্সামী’’তি মহাকরুণায সমুস্সাহিতো আকাসে দসসহস্সচক্কৰাল়সমাগমে চঙ্কমং মাপেত্ৰা, দ্ৰাদসযোজনৰিত্থতে সব্বরতনমযে চঙ্কমে ঠিতো যথাৰুত্তং দেৰমনুস্সনযনৰিহঙ্গানং একনিপাতভূতমচ্ছরিযং অনঞ্ঞসাধারণং বুদ্ধানং সমাধিঞাণানুভাৰদীপনং পাটিহারিযং দস্সেত্ৰা, পুন তস্মিং চঙ্কমে চঙ্কমন্তো ৰেনেয্যানং অজ্ঝাসযানুরূপং অচিন্তেয্যানুভাৰায অনোপমায বুদ্ধলীল়ায ধম্মং দেসেসি. তেন ৰুত্তং –

‘‘ন হেতে জানন্তি সদেৰমানুসা, বুদ্ধো অযং কীদিসকো নরুত্তমো;

ইদ্ধিবলং পঞ্ঞাবলঞ্চ কীদিসং, বুদ্ধবলং লোকহিতস্স কীদিসং.

‘‘ন হেতে জানন্তি সদেৰমানুসা, বুদ্ধো অযং এদিসকো নরুত্তমো;

ইদ্ধিবলং পঞ্ঞাবলঞ্চ এদিসং, বুদ্ধবলং লোকহিতস্স এদিসং.

‘‘হন্দাহং দস্সযিস্সামি, বুদ্ধবলমনুত্তরং;

চঙ্কমং মাপযিস্সামি, নভে রতনমণ্ডিত’’ন্তি. (বু. ৰং. ১.৩-৫);

এৰং তথাগতে অত্তনো বুদ্ধানুভাৰদীপনং পাটিহারিযং দস্সেত্ৰা ধম্মং দেসেন্তে আযস্মা ধম্মসেনাপতি সারিপুত্তো রাজগহে গিজ্ঝকূটপব্বতে ঠিতো দিব্বচক্খুনা পস্সিত্ৰা, তেন বুদ্ধানুভাৰসন্দস্সনেন অচ্ছরিযব্ভুতচিত্তজাতো ‘‘হন্দাহং ভিয্যোসোমত্তায বুদ্ধানুভাৰং লোকস্স পাকটং করিস্সামী’’তি সঞ্জাতপরিৰিতক্কো অত্তনো পরিৰারভূতানং পঞ্চন্নং ভিক্খুসতানং তমত্থং আরোচেত্ৰা ইদ্ধিযা আকাসেন তাৰদেৰ আগন্ত্ৰা সপরিৰারো ভগৰন্তং উপসঙ্কমিত্ৰা পঞ্চপতিট্ঠিতেন ৰন্দিত্ৰা দসনখসমোধানসমুজ্জলমঞ্জলিং সিরসি পগ্গয্হ তথাগতস্স মহাভিনীহারং পারমিপরিপূরণঞ্চ পুচ্ছি. ভগৰা তং কাযসক্খিং কত্ৰা তত্থ সন্নিপতিতমনুস্সানঞ্চেৰ দসসহস্সচক্কৰাল়দেৰব্রহ্মানঞ্চ অত্তনো বুদ্ধানুভাৰং পরিদীপযন্তো বুদ্ধৰংসং দেসেসি. তেন ৰুত্তং –

‘‘সারিপুত্তো মহাপঞ্ঞো, সমাধিজ্ঝানকোৰিদো;

পঞ্ঞায পারমিপ্পত্তো, পুচ্ছতি লোকনাযকং.

‘‘কীদিসো তে মহাৰীর, অভিনীহারো নরুত্তম;

কম্হি কালে তযা ধীর, পত্থিতা বোধিমুত্তমা.

‘‘দানং সীলঞ্চ নেক্খম্মং, পঞ্ঞা ৰীরিযঞ্চ কীদিসং;

খন্তি সচ্চমধিট্ঠানং, মেত্তুপেক্খা চ কীদিসা.

‘‘দস পারমী তযা ধীর, কীদিসী লোকনাযক;

কথং উপপারমী পুণ্ণা, পরমত্থপারমী কথং.

‘‘তস্স পুট্ঠো ৰিযাকাসি, করৰীকমধুরগিরো;

নিব্বাপযন্তো হদযং, হাসযন্তো সদেৰক’’ন্তি. (বু. ৰং. ১.৭৪-৭৮);

এৰং ভগৰতা বুদ্ধৰংসে দেসিতে আযস্মা ধম্মসেনাপতি ‘‘অহো বুদ্ধানং হেতুসম্পদা, অহো সমুদাগমসম্পত্তি, অহো মহাভিনীহারসমিজ্ঝনা, দুক্করং ৰত ভগৰতা কতং এত্তকং কালং এৰং পারমিযো পূরেন্তেন, এৰংৰিধস্স বোধিসম্ভারসম্ভরণস্স অনুচ্ছৰিকমেৰ চেতং ফলং, যদিদং সব্বঞ্ঞুতা বলেসু চ ৰসীভাৰো এৰংমহিদ্ধিকতা এৰংমহানুভাৰতা’’তি বুদ্ধগুণারম্মণং ঞাণং পেসেসি. সো অনঞ্ঞসাধারণং ভগৰতো সীলং সমাধি পঞ্ঞা ৰিমুত্তি ৰিমুত্তিঞাণদস্সনং হিরিওত্তপ্পং সদ্ধাৰীরিযং সতিসম্পজঞ্ঞং সীলৰিসুদ্ধি দিট্ঠিৰিসুদ্ধি সমথৰিপস্সনা তীণি কুসলমূলানি তীণি সুচরিতানি তযো সম্মাৰিতক্কা তিস্সো অনৰজ্জসঞ্ঞাযো তিস্সো ধাতুযো চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা চত্তারো অরিযমগ্গা চত্তারি অরিযফলানি চতস্সো পটিসম্ভিদা চতুযোনিপরিচ্ছেদকঞাণানি চত্তারো অরিযৰংসা চত্তারি ৰেসারজ্জঞাণানি পঞ্চ পধানিযঙ্গানি পঞ্চঙ্গিকো সম্মাসমাধি পঞ্চিন্দ্রিযানি পঞ্চ বলানি পঞ্চ নিস্সরণিযা ধাতুযো পঞ্চ ৰিমুত্তাযতনঞাণানি পঞ্চ ৰিমুত্তিপরিপাচনীযা ধম্মা ছ সারণীযা ধম্মা ছ অনুস্সতিট্ঠানানি ছ গারৰা ছ নিস্সরণিযা ধাতুযো ছ সততৰিহারা ছ অনুত্তরিযানি ছ নিব্বেধভাগিযা সঞ্ঞা ছ অভিঞ্ঞা ছ অসাধারণঞাণানি সত্ত অপরিহানিযা ধম্মা সত্ত অরিযধনানি সত্ত বোজ্ঝঙ্গা সত্ত সপ্পুরিসধম্মা সত্ত নিদ্দসৰত্থূনি সত্ত সঞ্ঞা সত্ত দক্খিণেয্যপুগ্গলদেসনা সত্ত খীণাসৰবলদেসনা অট্ঠ পঞ্ঞাপটিলাভহেতুদেসনা অট্ঠ সম্মত্তানি অট্ঠ লোকধম্মাতিক্কমা অট্ঠ আরম্ভৰত্থূনি অট্ঠ অক্খণদেসনা অট্ঠ মহাপুরিসৰিতক্কা অট্ঠ অভিভাযতনদেসনা অট্ঠ ৰিমোক্খা নৰ যোনিসোমনসিকারমূলকা ধম্মা নৰ পারিসুদ্ধিপধানিযঙ্গানি নৰ সত্তাৰাসদেসনা নৰ আঘাতপ্পটিৰিনযা নৰ পঞ্ঞা নৰ নানত্তদেসনা নৰ অনুপুব্বৰিহারা দস নাথকরণা ধম্মা দস কসিণাযতনানি দস কুসলকম্মপথা দস সম্মত্তানি দস অরিযৰাসা দস অসেক্খা ধম্মা দস রতনানি দস তথাগতবলানি একাদস মেত্তানিসংসা দ্ৰাদস ধম্মচক্কাকারা তেরস ধুতঙ্গগুণা চুদ্দস বুদ্ধঞাণানি পঞ্চদস ৰিমুত্তিপরিপাচনীযা ধম্মা সোল়সৰিধা আনাপানস্সতী সোল়স অপরম্পরিযা ধম্মা অট্ঠারস বুদ্ধধম্মা একূনৰীসতি পচ্চৰেক্খণঞাণানি চতুচত্তালীস ঞাণৰত্থূনি পঞ্ঞাস উদযব্বযঞাণানি পরোপণ্ণাস কুসলধম্মা সত্তসত্ততি ঞাণৰত্থূনি চতুৰীসতিকোটিসতসহস্সসমাপত্তিসঞ্চারিতমহাৰজিরঞাণং অনন্তনযসমন্তপট্ঠানপৰিচযপচ্চৰেক্খণদেসনাঞাণানি তথা অনন্তাসু লোকধাতূসু অনন্তানং সত্তানং আসযাদিৰিভাৰনঞাণানি চাতি এৰমাদিকে অচিন্তেয্যানুভাৰে বুদ্ধগুণে ধম্মন্ৰযতো অনুগচ্ছন্তো অনুস্সরন্তো নেৰ অন্তং, ন পমাণং পস্সি. থেরো হি অত্তনোপি নাম গুণানং অন্তং ৰা পমাণং ৰা আৰজ্জেন্তো ন পস্সতি, সো ভগৰতো গুণানং পমাণং কিং পস্সিস্সতি? যস্স যস্স হি পঞ্ঞা মহতী ঞাণং ৰিসদং, সো সো বুদ্ধগুণে মহন্ততো সদ্দহতি, ইতি থেরো ভগৰতো গুণানং পমাণং ৰা পরিচ্ছেদং ৰা অপস্সন্তো ‘‘মাদিসস্স নাম সাৰকপারমিঞাণে ঠিতস্স বুদ্ধগুণা ঞাণেন পরিচ্ছিন্দিতুং ন সক্কা, পগেৰ ইতরেসং. অহো অচিন্তেয্যা অপরিমেয্যভেদা মহানুভাৰা সব্বঞ্ঞুগুণা, কেৰলং পনেতে একস্স বুদ্ধঞাণস্সেৰ সব্বসো গোচরা, নাঞ্ঞেসং. কথেতুং পন সম্মাসম্বুদ্ধেহিপি ৰিত্থারতো ন সক্কাযেৰা’’তি নিট্ঠমগমাসি. ৰুত্তঞ্হেতং –

‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; উদা. অট্ঠ. ৫৩);

এৰং বুদ্ধানং গুণমহন্ততং নিস্সায উপ্পন্নবলৰপীতিসোমনস্সো পুন চিন্তেসি – ‘‘এৰরূপানং নাম বুদ্ধগুণানং হেতুভূতা বুদ্ধকারকা ধম্মা পারমিযো অহো মহানুভাৰা. কতমাসু নু খো জাতীসু পারমিতা পরিপাচিতা, কথং ৰা পরিপাকং গতা, হন্দাহং ইমমত্থং পুচ্ছন্তো এৰম্পি সমুদাগমতো পট্ঠায বুদ্ধানুভাৰং ইমস্স সদেৰকস্স লোকস্স পাকটতরং করিস্সামী’’তি. সো এৰং চিন্তেত্ৰা ভগৰন্তং ইমং পঞ্হং অপুচ্ছি – ‘‘কতমাসু নু খো, ভন্তে, জাতীসু ইমে বুদ্ধকারকা ধম্মা পরিপাচিতা, কথং ৰা পরিপাকং গতা’’তি? অথস্স ভগৰা তস্মিং রতনচঙ্কমে তিসন্ধিপল্লঙ্কং আভুজিত্ৰা যুগন্ধরপব্বতে বালসূরিযো ৰিয ৰিরোচমানো নিসিন্নো ‘‘সারিপুত্ত, ময্হং বুদ্ধকারকা ধম্মা সমাদানতো পট্ঠায নিরন্তরং সক্কচ্চকারিতায ৰীরিযূপত্থম্ভেন চ সব্বেসু কপ্পেসু ভৰতো ভৰং জাতিতো জাতিং পরিপচ্চন্তাযেৰ অহেসুং, ইমস্মিং পন ভদ্দকপ্পে ইমাসু জাতীসু তে পরিপক্কা জাতা’’তি দস্সেন্তো ‘‘কপ্পে চ সতসহস্সে’’তিআদিনা চরিযাপিটকং বুদ্ধাপদানিযন্তি দুতিযাভিধানং ধম্মপরিযাযং অভাসি. অপরে পন ‘‘রতনচঙ্কমে চঙ্কমন্তো দেৰাতিদেৰো দেৰব্রহ্মাদীহি পূজিযমানো নিগ্রোধারামে ওতরিত্ৰা ৰীসতিসহস্সখীণাসৰপরিৰুতো পঞ্ঞত্তৰরবুদ্ধাসনে নিসিন্নো ভগৰা ৰুত্তনযেনেৰ আযস্মতা সারিপুত্তেন পুচ্ছিতো চরিযাপিটকং দেসেসী’’তি ৰদন্তি. এত্তাৰতা দূরেনিদানঅৰিদূরেনিদানানি সঙ্খেপতো দস্সেত্ৰা চরিযাপিটকস্স সন্তিকেনিদানং ৰিত্থারতো নিদ্দিট্ঠন্তি ৰেদিতব্বং. দূরেনিদানং পন অসঙ্খ্যেয্যৰিভাৰনাযং আৰি ভৰিস্সতীতি.

১. ইদানি ‘‘কপ্পে চ সতসহস্সে’’তিআদিনযপ্পৰত্তায চরিযাপিটকপাল়িযা অত্থসংৰণ্ণনা হোতি. তত্রাযং কপ্প-সদ্দো সউপসগ্গো অনুপসগ্গো চ ৰিতক্কৰিধানপটিভাগপঞ্ঞত্তিকালপরমাযুসমণৰোহারসমন্তভাৰাভিসদ্দহন- ছেদনৰিনিযোগৰিনযকিরিযালেসন্তরকপ্পতণ্হাদিট্ঠিঅসঙ্খ্যেয্যকপ্পমহাকপ্পাদীসু দিস্সতি. তথা হেস ‘‘নেক্খম্মসঙ্কপ্পো অব্যাপাদসঙ্কপ্পো’’তিআদীসু (ম. নি. ৩.১৩৭) ৰিতক্কে আগতো. ‘‘চীৰরে ৰিকপ্পং আপজ্জেয্যা’’তিআদীসু (পারা. ৬৪২) ৰিধানে, অধিকৰিধানং আপজ্জেয্যাতি অত্থো. ‘‘সত্থুকপ্পেন ৰত কির, ভো, সাৰকেন সদ্ধিং মন্তযমানা ন জানিম্হা’’তিআদীসু (ম. নি. ১.২৬০) পটিভাগে. সত্থুসদিসেনাতি অযঞ্হি তত্থ অত্থো. ‘‘ইধাযস্মা, কপ্পো’’তিআদীসু (সু. নি. ১০৯৮) পঞ্ঞত্তিযং. ‘‘যেন সুদং নিচ্চকপ্পং ৰিহরামী’’তিআদীসু (ম. নি. ১.৩৮৭) কালে. ‘‘আকঙ্খমানো, আনন্দ, তথাগতো কপ্পং ৰা তিট্ঠেয্য কপ্পাৰসেসং ৰা’’তিআদীসু (দী. নি. ২.১৭৮; উদা. ৫১) পরমাযুম্হি. আযুকপ্পো হি ইধ কপ্পোতি অধিপ্পেতো. ‘‘অনুজানামি, ভিক্খৰে, পঞ্চহি সমণকপ্পেহি ফলং পরিভুঞ্জিতু’’ন্তিআদীসু (চূল়ৰ. ২৫০) সমণৰোহারে. ‘‘কেৰলকপ্পং জেতৰনং ওভাসেত্ৰা’’তিআদীসু (খু. পা. ৫.১; সু. নি. মঙ্গলসুত্ত) সমন্তভাৰে. ‘‘সদ্ধা সদ্দহনা ওকপ্পনা অভিপ্পসাদো’’তিআদীসু (ধ. স. ১২) অভিসদ্দহনে, সদ্ধাযন্তি অত্থো. ‘‘অলঙ্কতো কপ্পিতকেসমস্সূ’’তিআদীসু (ৰি. ৰ. ১০৯৪; জা. ২.২২.১৩৬৮) ছেদনে. ‘‘এৰমেৰ ইতো দিন্নং, পেতানং উপকপ্পতী’’তিআদীসু (খু. পা. ৭.৭; পে. ৰ. ২০) ৰিনিযোগে. ‘‘কপ্পকতেন অকপ্পকতং সংসিব্বিতং হোতী’’তিআদীসু (পাচি. ৩৭১) ৰিনযকিরিযাযং. ‘‘অত্থি কপ্পো নিপজ্জিতুং, হন্দাহং নিপজ্জামী’’তিআদীসু লেসে. ‘‘আপাযিকো নেরযিকো কপ্পট্ঠো সঙ্ঘভেদকো…পে… কপ্পং নিরযম্হি পচ্চতী’’তি (ইতিৰু. ১৮; চূল়ৰ. ৩৫৪; কথা. ৬৫৭, ৮৬২) চ আদীসু অন্তরকপ্পে.

‘‘ন কপ্পযন্তি ন পুরেক্খরোন্তি, ধম্মাপি তেসং ন পটিচ্ছিতাসে;

ন ব্রাহ্মণো সীলৰতেন নেয্যো, পারঙ্গতো ন পচ্চেতি তাদী’’তি. –

আদীসু (সু. নি. ৮০৯) তণ্হাদিট্ঠীসু. তথা হি ৰুত্তং নিদ্দেসে ‘‘কপ্পাতি উদ্দানতো দ্ৰে কপ্পা তণ্হাকপ্পো দিট্ঠিকপ্পো’’তি (মহানি. ২৮). ‘‘অনেকেপি সংৰট্টকপ্পে অনেকেপি ৰিৰট্টকপ্পে’’তিআদীসু (দী. নি. ১.২৪৪; ম. নি. ১.৬৮) অসঙ্খ্যেয্যকপ্পে. ‘‘চত্তারিমানি, ভিক্খৰে, কপ্পস্স অসঙ্খ্যেয্যানী’’তিআদীসু (অ. নি. ৪.১৫৬) মহাকপ্পে. ইধাপি মহাকপ্পেযেৰ দট্ঠব্বো (দী. নি. অট্ঠ. ১.২৯; ৩.২৭৫; সং. নি. অট্ঠ. ১.১.১; অ. নি. অট্ঠ. ২.৩.১২৮; খু. পা. অট্ঠ. ৫.এৰমিচ্চাদিপাঠৰণ্ণনা).

তত্রাযং পদসিদ্ধি – কপ্পীযতীতি কপ্পো, এত্তকানি ৰস্সানীতি ৰা এত্তকানি ৰস্সসতানীতি ৰা এত্তকানি ৰস্সসহস্সানীতি ৰা এত্তকানি ৰস্সসতসহস্সানীতি ৰা সংৰচ্ছরৰসেন গণেতুং অসক্কুণেয্যত্তা কেৰলং সাসপরাসিউপমাদীহি কপ্পেতব্বো পরিকপ্পেতব্বপরিমাণোতি অত্থো. ৰুত্তঞ্হেতং –

‘‘কীৰ দীঘো নু খো, ভন্তে, কপ্পোতি? দীঘো খো, ভিক্খু, কপ্পো, সো ন সুকরো সঙ্খাতুং ‘এত্তকানি ৰস্সানী’তি ৰা ‘এত্তকানি ৰস্সসতানী’তি ৰা ‘এত্তকানি ৰস্সসহস্সানী’তি ৰা ‘এত্তকানি ৰস্সসতসহস্সানী’তি ৰা. সক্কা পন, ভন্তে, উপমং কাতুন্তি? ‘সক্কা, ভিক্খূ’তি ভগৰা অৰোচ. সেয্যথাপি, ভিক্খু, যোজনং আযামেন যোজনং ৰিত্থারেন যোজনং উব্বেধেন মহাসাসপরাসি. ততো ৰস্সসতস্স ৰস্সসহস্সস্স অচ্চযেন একমেকং সাসপং উদ্ধরেয্য, খিপ্পতরং খো সো, ভিক্খু, মহাসাসপরাসি ইমিনা উপক্কমেন পরিক্খযং পরিযাদানং গচ্ছেয্য, ন ত্ৰেৰ কপ্পো, এৰং দীঘো খো, ভিক্খু, কপ্পো’’তি (সং. নি. ২.১২৮).

স্ৰাযং মহাকপ্পো সংৰট্টাদিৰসেন চতুঅসঙ্খ্যেয্যকপ্পসঙ্গহো. ৰুত্তম্পি চেতং –

‘‘চত্তারিমানি, ভিক্খৰে, কপ্পস্স অসঙ্খ্যেয্যানি. কতমানি চত্তারি? সংৰট্টো, সংৰট্টট্ঠাযী, ৰিৰট্টো, ৰিৰট্টট্ঠাযী’’তি (অ. নি. ৪.১৫৬).

তত্থ তযো সংৰট্টা – তেজোসংৰট্টো, আপোসংৰট্টো, ৰাযোসংৰট্টোতি. তিস্সো সংৰট্টসীমা – আভস্সরা, সুভকিণ্হা, ৰেহপ্ফলাতি. যদা হি কপ্পো তেজেন সংৰট্টতি, আভস্সরতো হেট্ঠা অগ্গিনা ডয্হতি. যদা আপেন সংৰট্টতি, সুভকিণ্হতো হেট্ঠা উদকেন ৰিলীযতি. যদা ৰাযুনা সংৰট্টতি, ৰেহপ্ফলতো হেট্ঠা ৰাতেন ৰিদ্ধংসতি. ৰিত্থারতো পন কোটিসতসহস্সচক্কৰাল়ং ৰিনস্সতি, যং বুদ্ধানং আণাক্খেত্তন্তি ৰুচ্চতি. তেসু তীসু সংৰট্টেসু যথাক্কমং কপ্পৰিনাসকমহামেঘতো যাৰ জালায ৰা উদকস্স ৰা ৰাতস্স ৰা উপচ্ছেদো ইদং একং অসঙ্খ্যেয্যং সংৰট্টো নাম. কপ্পৰিনাসকজালাদিপচ্ছেদতো যাৰ কোটিসতসহস্সচক্কৰাল়পরিপূরকো সম্পত্তিমহামেঘো উট্ঠহতি, ইদং দুতিযং অসঙ্খ্যেয্যং সংৰট্টট্ঠাযী নাম.

সম্পত্তিমহামেঘতো যাৰ চন্দিমসূরিযপাতুভাৰো, ইদং ততিযং অসঙ্খ্যেয্যং ৰিৰট্টো নাম. চন্দিমসূরিযপাতুভাৰতো যাৰ পুন কপ্পৰিনাসকমহামেঘো, ইদং চতুত্থং অসঙ্খ্যেয্যং ৰিৰট্টট্ঠাযী নাম. ইমেসু চতুসট্ঠিঅন্তরকপ্পসঙ্গহং ৰিৰট্টট্ঠাযী. তেন সমানকালপরিচ্ছেদা ৰিৰট্টাদযো ৰেদিতব্বা. ‘‘ৰীসতিঅন্তরকপ্পসঙ্গহ’’ন্তি একে. ইতি ইমানি চত্তারি অসঙ্খ্যেয্যানি একো মহাকপ্পো হোতি. তেন ৰুত্তং ‘‘স্ৰাযং মহাকপ্পো সংৰট্টাদিৰসেন চতুঅসঙ্খ্যেয্যকপ্পসঙ্গহো’’তি.

কপ্পেতি চ অচ্চন্তসংযোগৰসেন উপযোগবহুৰচনং. সতসহস্সেতি কপ্পসদ্দসম্বন্ধেন চাযং পুল্লিঙ্গনিদ্দেসো, ইধাপি অচ্চন্তসংযোগৰসেনেৰ বহুৰচনং. সমানাধিকরণঞ্হেতং পদদ্ৰযং. চতুরো চ অসঙ্খিযেতি এত্থাপি এসেৰ নযো. কস্স পন অসঙ্খিযেতি অঞ্ঞস্স অৰুত্তত্তা কপ্পস্স চ ৰুত্তত্তা পকরণতো কপ্পানন্তি অযমত্থো ৰিঞ্ঞাযতেৰ. ন হি ৰুত্তং ৰজ্জেত্ৰা অৰুত্তস্স কস্সচি গহণং যুত্তন্তি. চ-সদ্দো সম্পিণ্ডনত্থো, মহাকপ্পানং চতুরো অসঙ্খ্যেয্যে সতসহস্সে চ মহাকপ্পেতি অযঞ্হেত্থ অত্থো. অসঙ্খিযেতি এত্থ সঙ্খাতুং ন সক্কাতি অসঙ্খিযা, গণনং অতিক্কন্তাতি অত্থো. ‘‘অসঙ্খ্যেয্যন্তি একো গণনৰিসেসো’’তি একে. তে হি একতো পট্ঠায মহাবলক্খপরিযোসানানি একূনসট্ঠিট্ঠানানি ৰজ্জেত্ৰা দসমহাবলক্খানি অসঙ্খ্যেয্যং নাম, সট্ঠিমট্ঠানন্তরন্তি ৰদন্তি. তং ন যুজ্জতি, সঙ্খ্যাঠানন্তরং নাম গণনৰিসেসো, তস্স অসঙ্খ্যেয্যভাৰাভাৰতো একং ঠানন্তরং অসঙ্খ্যেয্যঞ্চাতি ৰিরুদ্ধমেতং. ননু চ অসঙ্খ্যভাৰেন অসঙ্খ্যেয্যত্তেপি তস্স চতুব্বিধভাৰো ন যুজ্জতীতি? নো ন যুজ্জতি. চতূসু ঠানেসু অসঙ্খ্যেয্যভাৰস্স ইচ্ছিতত্তা. তত্রাযমাদিতো পট্ঠায ৰিভাৰনা –

অতীতে কির একস্মিং কপ্পে তণ্হঙ্করো মেধঙ্করো সরণঙ্করো দীপঙ্করোতি চত্তারো সম্মাসম্বুদ্ধা অনুক্কমেন লোকে উপ্পজ্জিংসু. তেসু দীপঙ্করস্স ভগৰতো কালে অমরৰতী নাম নগরং অহোসি. তত্থ সুমেধো নাম ব্রাহ্মণো পটিৰসতি উভতো সুজাতো মাতিতো চ পিতিতো চ, সংসুদ্ধগহণিকো যাৰ সত্তমা কুলপরিৰট্টা অক্খিত্তো অনুপক্কুট্ঠো জাতিৰাদেন, অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো. সো অঞ্ঞং কম্মং অকত্ৰা ব্রাহ্মণসিপ্পমেৰ উগ্গণ্হি. তস্স দহরকালেযেৰ মাতাপিতরো কালমকংসু. অথস্স রাসিৰড্ঢকো অমচ্চো আযপোত্থকং আহরিত্ৰা সুৰণ্ণরজতমণিমুত্তাদিভরিতে সারগব্ভে ৰিৰরিত্ৰা ‘‘এত্তকং তে, কুমার, মাতুসন্তকং, এত্তকং তে পিতুসন্তকং, এত্তকং তে অয্যকপয্যকান’’ন্তি যাৰ সত্তমা কুলপরিৰট্টা ধনং আচিক্খিত্ৰা ‘‘এতং ধনং পটিপজ্জাহী’’তি আহ. সুমেধপণ্ডিতো চিন্তেসি – ‘‘ইমং এৰং বহুং ধনং সংহরিত্ৰা ময্হং মাতাপিতাদযো পরলোকং গচ্ছন্তা এককহাপণম্পি গহেত্ৰা ন গতা, মযা পন গহেত্ৰা গমনকারণং কাতুং ৰট্টতী’’তি. সো রঞ্ঞো আরোচেত্ৰা নগরে ভেরিং চরাপেত্ৰা মহাজনস্স দানং দত্ৰা হিমৰন্তপ্পদেসং গন্ত্ৰা তাপসপব্বজ্জং পব্বজিত্ৰা সত্তাহেনেৰ অট্ঠ সমাপত্তিযো পঞ্চ চ অভিঞ্ঞাযো নিব্বত্তেত্ৰা সমাপত্তিৰিহারেহি ৰিহরতি.

তস্মিঞ্চ কালে দীপঙ্করদসবলো পরমাভিসম্বোধিং পত্ৰা পৰত্তিতৰরধম্মচক্কো চতূহি খীণাসৰসতসহস্সেহি পরিৰুতো অনুপুব্বেন চারিকং চরমানো রম্মৰতীনগরং নাম পত্ৰা তস্স অৰিদূরে সুদস্সনমহাৰিহারে পটিৰসতি. রম্মৰতীনগরৰাসিনো ‘‘সত্থা কির অম্হাকং নগরং পত্ৰা সুদস্সনমহাৰিহারে পটিৰসতী’’তি সুত্ৰা গন্ধমালাদিহত্থা সত্থারং উপসঙ্কমিত্ৰা ৰন্দিত্ৰা গন্ধমালাদীহি পূজেত্ৰা একমন্তং নিসিন্না ধম্মদেসনং সুত্ৰা স্ৰাতনায নিমন্তেত্ৰা উট্ঠাযাসনা পক্কমিংসু. তে পুনদিৰসে মহাদানং সজ্জেত্ৰা নগরং অলঙ্করিত্ৰা দসবলস্স আগমনমগ্গং হট্ঠতুট্ঠা সোধেন্তি.

তস্মিঞ্চ কালে সুমেধতাপসো আকাসেন গচ্ছন্তো তে হট্ঠতুট্ঠে মনুস্সে দিস্ৰা ‘‘অম্ভো, কস্স তুম্হে ইমং মগ্গং সোধেথা’’তি পুচ্ছি? তেহি ‘‘সম্মাসম্বুদ্ধস্স আগমনমগ্গং সোধেমা’’তি ৰুত্তে অতীতেসু বুদ্ধেসু কতাধিকারত্তা ‘‘বুদ্ধো’’তি ৰচনং সুত্ৰা উপ্পন্নপীতিসোমনস্সো তাৰদেৰ আকাসতো ওরুয্হ ‘‘ময্হম্পি ওকাসং দেথ, অহম্পি সোধেস্সামী’’তি তেহি দস্সিতং ওকাসং ‘‘কিঞ্চাপি অহং ইমং ইদ্ধিযা সত্তরতনৰিচিত্তং কত্ৰা অলঙ্করিতুং পহোমি, অজ্জ পন মযা কাযৰেয্যাৰচ্চং কাতুং ৰট্টতি, কাযারহং পুঞ্ঞং গণ্হিস্সামী’’তি চিন্তেত্ৰা তিণকচৰরাদযো নীহরিত্ৰা পংসুং আহরিত্ৰা সমং করোন্তো সোধেতি. অনিট্ঠিতেযেৰ পন তস্স পদেসস্স সোধনে দীপঙ্করো ভগৰা মহানুভাৰানং ছল়ভিঞ্ঞানং খীণাসৰানং চতূহি সতসহস্সেহি পরিৰুতো তং মগ্গং পটিপজ্জি. সুমেধপণ্ডিতো ‘‘সম্মাসম্বুদ্ধো বুদ্ধসাৰকা চ মা চিক্খল্লং অক্কমন্তূ’’তি অত্তনো ৰাকচীরঞ্চ চম্মখণ্ডঞ্চ জটাকলাপঞ্চ পসারেত্ৰা সযঞ্চ যেন ভগৰা তেন সীসং কত্ৰা অৰকুজ্জো নিপজ্জি. এৰঞ্চ চিন্তেসি – ‘‘সচাহং ইচ্ছিস্সামি, ইমস্স ভগৰতো সাৰকো হুত্ৰা অজ্জেৰ কিলেসে ঘাতেস্সামি. কিং ময্হং এককেনেৰ সংসারমহোঘতো নিত্থরণেন? যংনূনাহম্পি এৰরূপো সম্মাসম্বুদ্ধো হুত্ৰা সদেৰকং লোকং সংসারমহণ্ণৰতো তারেয্য’’ন্তি. ইতি সো অট্ঠঙ্গসমন্নাগতমহাভিনীহারৰসেন চিত্তং পণিধেসি. অথ ভগৰা আগন্ত্ৰা তস্স উস্সীসকে ঠত্ৰা চিত্তাচারং সমিজ্ঝনভাৰঞ্চস্স ঞত্ৰা ‘‘অযং ইতো কপ্পসতসহস্সাধিকানং চতুন্নং অসঙ্খ্যেয্যানং মত্থকে গোতমো নাম সম্মাসম্বুদ্ধো ভৰিস্সতী’’তি সব্বং ইমং ভগৰতো পৰত্তিং ব্যাকরিত্ৰা পক্কামি.

ততো অপরেপি কোণ্ডঞ্ঞভগৰন্তং আদিং কত্ৰা অনুক্কমেন উপ্পন্না যাৰ কস্সপদসবলপরিযোসানা সম্মাসম্বুদ্ধা মহাসত্তং ‘‘বুদ্ধো ভৰিস্সতী’’তি ব্যাকরিংসু. ইতি অম্হাকং বোধিসত্তস্স পারমিযো পূরেন্তস্সেৰ চতুৰীসতি সম্মাসম্বুদ্ধা উপ্পন্না. যস্মিং পন কপ্পে দীপঙ্করদসবলো উদপাদি, তস্মিং অঞ্ঞেপি তযো বুদ্ধা অহেসুং. তেসং সন্তিকে বোধিসত্তস্স ব্যাকরণং নাহোসি, তস্মা তে ইধ ন গহিতা. পোরাণট্ঠকথাযং পন তম্হা কপ্পা পট্ঠায সব্ববুদ্ধে দস্সেতুং ইদং ৰুত্তং –

‘‘তণ্হঙ্করো মেধঙ্করো, অথোপি সরণঙ্করো;

দীপঙ্করো চ সম্বুদ্ধো, কোণ্ডঞ্ঞো দ্ৰিপদুত্তমো.

‘‘মঙ্গলো চ সুমনো চ, রেৰতো সোভিতো মুনি;

অনোমদস্সী পদুমো, নারদো পদুমুত্তরো.

‘‘সুমেধো চ সুজাতো চ, পিযদস্সী মহাযসো;

অত্থদস্সী ধম্মদস্সী, সিদ্ধত্থো লোকনাযকো.

‘‘তিস্সো ফুস্সো চ সম্বুদ্ধো, ৰিপস্সী সিখি ৰেস্সভূ;

ককুসন্ধো কোণাগমনো, কস্সপো চাপি নাযকো.

‘‘এতে অহেসুং সম্বুদ্ধা, ৰীতরাগা সমাহিতা;

সতরংসীৰ উপ্পন্না, মহাতমৰিনোদনা;

জলিত্ৰা অগ্গিক্খন্ধাৰ, নিব্বুতা তে সসাৰকা’’তি. (জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা);

তত্থ দীপঙ্করদসবলস্স চ কোণ্ডঞ্ঞদসবলস্স চ অন্তরে মহাকপ্পানং একং অসঙ্খ্যেয্যং বুদ্ধসুঞ্ঞো লোকো অহোসি, তথা ভগৰতো কোণ্ডঞ্ঞস্স চ ভগৰতো মঙ্গলস্স চ অন্তরে, তথা ভগৰতো সোভিতস্স চ ভগৰতো অনোমদস্সিস্স চ অন্তরে, তথা ভগৰতো নারদস্স চ ভগৰতো পদুমুত্তরস্স চ অন্তরে. ৰুত্তঞ্হেতং বুদ্ধৰংসে (বু. ৰং. ২৮.৩, ৪, ৬, ৯) –

‘‘দীপঙ্করস্স ভগৰতো, কোণ্ডঞ্ঞস্স চ সত্থুনো;

এতেসং অন্তরা কপ্পা, গণনাতো অসঙ্খিযা.

‘‘কোণ্ডঞ্ঞস্স অপরেন, মঙ্গলো নাম নাযকো;

তেসম্পি অন্তরা কপ্পা, গণনাতো অসঙ্খিযা.

‘‘সোভিতস্স অপরেন, অনোমদস্সী মহাযসো;

তেসম্পি অন্তরা কপ্পা, গণনাতো অসঙ্খিযা.

‘‘নারদস্স ভগৰতো, পদুমুত্তরস্স সত্থুনো;

তেসম্পি অন্তরা কপ্পা, গণনাতো অসঙ্খিযা’’তি.

এৰং গণনাতীততায অসঙ্খ্যেয্যত্তেপি চতূসু ঠানেসু মহাকপ্পানং গণনাতিক্কমেন ‘‘চতুরো চ অসঙ্খিযে’’তি ৰুত্তং, ন সঙ্খ্যাৰিসেসেনাতি ৰেদিতব্বং. যস্মা পন পদুমুত্তরদসবলস্স চ সুমেধদসবলস্স চ অন্তরে তিংসকপ্পসহস্সানি, সুজাতদসবলস্স চ পিযদস্সীদসবলস্স চ অন্তরে নৰসহস্সাধিকানং কপ্পানং সট্ঠিসহস্সানি দ্ৰাসীতুত্তরানি অট্ঠ চ সতানি, ধম্মদস্সীদসবলস্স চ সিদ্ধত্থদসবলস্স চ অন্তরে ৰীসতি কপ্পা, সিদ্ধত্থদসবলস্স চ তিস্সদসবলস্স চ অন্তরে একো কপ্পো, ভগৰতো ৰিপস্সিস্স চ ভগৰতো সিখিস্স চ অন্তরে সট্ঠি কপ্পা, ভগৰতো চ ৰেস্সভুস্স ভগৰতো চ ককুসন্ধস্স অন্তরে তিংস কপ্পা, ইতি পদুমুত্তরদসবলস্স উপ্পন্নকপ্পতো পট্ঠায হেট্ঠা তেসং তেসং বুদ্ধানং উপ্পন্নকপ্পেহি ইমিনা চ ভদ্দকপ্পেন সদ্ধিং সতসহস্সমহাকপ্পা. তে সন্ধায ৰুত্তং ‘‘কপ্পে চ সতসহস্সে’’তি. ইমস্মিং পনত্থে ৰিত্থারিযমানে সব্বং বুদ্ধৰংসপাল়িং আহরিত্ৰা সংৰণ্ণেতব্বং হোতীতি অতিৰিত্থারভীরুকস্স মহাজনস্স চিত্তং অনুরক্খন্তা ন ৰিত্থারযিম্হ. অত্থিকেহি বুদ্ধৰংসতো (বু. ৰং. ১.১ আদযো) গহেতব্বো. যোপি চেত্থ ৰত্তব্বো কথামগ্গো, সোপি অট্ঠসালিনিযা (ধ. স. অট্ঠ. সুমেধকথা) ধম্মসঙ্গহৰণ্ণনায জাতকট্ঠকথায (জা. অট্ঠ. ১.দূরেনিদানকথা) চ ৰুত্তনযেনেৰ ৰেদিতব্বো.

এত্থন্তরেতি এত্থ অন্তরসদ্দো –

‘‘নদীতীরেসু সণ্ঠানে, সভাসু রথিযাসু চ;

জনা সঙ্গম্ম মন্তেন্তি, মঞ্চ তঞ্চ কিমন্তর’’ন্তি. (সং. নি. ১.২২৮) –

আদীসু কারণে আগতো. ‘‘অদ্দসা খো মং, ভন্তে, অঞ্ঞতরা ইত্থী ৰিজ্জন্তরিকায ভাজনং ধোৰন্তী’’তিআদীসু (ম. নি. ২.১৪৯) খণে, ৰিজ্জুনিচ্ছরণক্খণেতি অত্থো. ‘‘যস্সন্তরতো ন সন্তি কোপা’’তিআদীসু (উদা. ২০) চিত্তে. ‘‘অন্তরা চ গযং অন্তরা চ বোধি’’ন্তিআদীসু (ম. নি. ১.২৮৫; মহাৰ. ১১) ৰিৰরে. ‘‘ন উপজ্ঝাযস্স ভণমানস্স অন্তরন্তরা কথা ওপাতেতব্বা’’তিআদীসু (মহাৰ. ৬৬) ৰেমজ্ঝে. ইধাপি ৰেমজ্ঝেযেৰ দট্ঠব্বো (দী. নি. অট্ঠ. ১.১; অ. নি. অট্ঠ. ২.৪.৩৬), তস্মা এতস্মিং অন্তরে ৰেমজ্ঝেতি অত্থো. ইদং ৰুত্তং হোতি – যস্মিং মহাকপ্পে অম্হাকং ভগৰা সুমেধপণ্ডিতো হুত্ৰা দীপঙ্করস্স ভগৰতো পাদমূলে –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা’’তি. (বু. ৰং. ২.৫৯) –

এৰং ৰুত্তেহি অট্ঠহি অঙ্গেহি সমন্নাগতং মহাভিনীহারং অকাসি, সমত্তিংস পারমিযো পৰিচিনি সমাদিযি, সব্বেপি বুদ্ধকারকে ধম্মে সম্পাদেতুং আরভি, যম্হি চেতস্মিং ভদ্দকপ্পে সব্বসো পূরিতপারমী হুত্ৰা অনুত্তরং সম্মাসম্বোধিং অভিসম্বুজ্ঝি. ইমেসং দ্ৰিন্নং মহাকপ্পানং অন্তরে যথাৰুত্তপরিচ্ছেদে কালৰিসেসেতি. কথং পনেতং ৰিঞ্ঞাযতীতি? ‘‘কপ্পে চ সতসহস্সে, চতুরো চ অসঙ্খিযে’’তি ইদঞ্হি মহাকপ্পানং পরিচ্ছেদতো অপরিচ্ছেদতো চ সঙ্খ্যাদস্সনং. সা খো পনাযং সঙ্খ্যা সঙ্খ্যেয্যস্স আদিপরিযোসানগ্গহণং ৰিনা ন সম্ভৰতীতি যত্থ বোধিসম্ভারানমারম্ভো যত্থ চ তে পরিযোসিতা তদুভযম্পি অৰধিভাৰেন ‘‘এত্থন্তরে’’তি এত্থ অত্থতো দস্সিতন্তি ৰিঞ্ঞাযতি. অৰধি চ পনাযং অভিৰিধিৰসেন ৰেদিতব্বো, ন মরিযাদাৰসেন, আরম্ভোসানকপ্পানং একদেসেন অন্তোগধত্তা. ননু চ নিপ্পদেসেন তেসং অপরিযাদানতো অভিৰিধি চ ইধ ন সম্ভৰতীতি? ন ইদমেৰং তদেকদেসেপি তব্বোহারতো. যো হি তদেকদেসভূতো কপ্পো, সো নিপ্পদেসতো পরিযাদিন্নোতি.

যং চরিতং, সব্বং তং বোধিপাচনন্তি এত্থ চরিতন্তি চরিযা, সমত্তিংসপারমিসঙ্গহা দানসীলাদিপটিপত্তি, ঞাতত্থচরিযালোকত্থচরিযাবুদ্ধত্থচরিযানং তদন্তোগধত্তা. তথা যা চিমা অট্ঠ চরিযা, সেয্যথিদং – পণিধিসম্পন্নানং চতূসু ইরিযাপথেসু ইরিযাপথচরিযা, ইন্দ্রিযেসু গুত্তদ্ৰারানং অজ্ঝত্তিকাযতনেসু আযতনচরিযা, অপ্পমাদৰিহারীনং চতূসু সতিপট্ঠানেসু সতিচরিযা, অধিচিত্তমনুযুত্তানং চতূসু ঝানেসু সমাধিচরিযা, বুদ্ধিসম্পন্নানং চতূসু অরিযসচ্চেসু ঞাণচরিযা, সম্মা পটিপন্নানং চতূসু অরিযমগ্গেসু মগ্গচরিযা, অধিগতফলানং চতূসু সামঞ্ঞফলেসু পত্তিচরিযা, তিণ্ণং বুদ্ধানং সব্বসত্তেসু লোকত্থচরিযাতি. তত্থ পদেসতো দ্ৰিন্নং বোধিসত্তানং পচ্চেকবুদ্ধবুদ্ধসাৰকানঞ্চ লোকত্থচরিযা, মহাবোধিসত্তানং পন সম্মাসম্বুদ্ধানঞ্চ নিপ্পদেসতো. ৰুত্তঞ্হেতং নিদ্দেসে (চূল়নি. খগ্গৰিসাণসুত্তনিদ্দেস ১২১; পটি. ম. ১.১৯৭) ‘‘চরিযাতি অট্ঠ চরিযাযো ইরিযাপথচরিযা আযতনচরিযা’’তি ৰিত্থারো. ‘‘অধিমুচ্চন্তো সদ্ধায চরতি, পগ্গণ্হন্তো ৰীরিযেন চরতি, উপট্ঠহন্তো সতিযা চরতি, অৰিক্খিপন্তো সমাধিনা চরতি, পজানন্তো পঞ্ঞায চরতি, ৰিজানন্তো ৰিঞ্ঞাণেন চরতি, এৰম্পি পটিপন্নস্স কুসলা ধম্মা আযতন্তীতি আযতনচরিযায চরতি, এৰম্পি পটিপন্নো ৰিসেসমধিগচ্ছতীতি ৰিসেসচরিযায চরতী’’তি যা ইমা অপরাপি অট্ঠ চরিযা ৰুত্তা, তাসং সব্বাসং পারমিতাস্ৰেৰ সমোরোধো ৰেদিতব্বো. তেন ৰুত্তং ‘‘চরিতন্তি চরিযা, সমত্তিংসপারমিসঙ্গহা দানসীলাদিপটিপত্তী’’তি. হেতুচরিযায এৰ পন ইধাধিপ্পেতত্তা মগ্গচরিযাপত্তিচরিযানং ইধ অনৰরোধো ৰেদিতব্বো. তেন ৰুত্তং ‘‘সব্বং তং বোধিপাচন’’ন্তি.

তত্থ সব্ব-সদ্দো সব্বসব্বং আযতনসব্বং সক্কাযসব্বং পদেসসব্বন্তি চতূসু অত্থেসু দিস্সতি. তথা হি ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথমাগচ্ছন্তী’’তিআদীসু (মহানি. ১৫৬; চূল়নি. মোঘরাজমাণৰপুচ্ছানিদ্দেস ৮৫) সব্বসব্বস্মিং. ‘‘সব্বং ৰো, ভিক্খৰে, দেসেস্সামি তং সুণাথ, কিঞ্চ, ভিক্খৰে, সব্বং চক্খুঞ্চেৰ রূপা চ…পে… মনো চেৰ ধম্মা চা’’তি (সং. নি. ৪.২৩) এত্থ আযতনসব্বস্মিং. ‘‘সব্বং সব্বতো সঞ্জানাতী’’তিআদীসু (ম. নি. ১.৬) সক্কাযসব্বস্মিং. ‘‘সব্বেসম্পি ৰো, সারিপুত্ত, সুভাসিতং পরিযাযেনা’’তিআদীসু (ম. নি. ১.৩৪৫) পদেসসব্বস্মিং. ইধাপি পদেসসব্বস্মিং এৰ ৰেদিতব্বো, বোধিসম্ভারভূতস্স চরিতস্স অধিপ্পেতত্তা.

বোধীতি রুক্খোপি অরিযমগ্গোপি নিব্বানম্পি সব্বঞ্ঞুতঞ্ঞাণম্পি. ‘‘বোধিরুক্খমূলে পঠমাভিসম্বুদ্ধো’’তি (মহাৰ. ১; উদা. ১) চ ‘‘অন্তরা চ গযং অন্তরা চ বোধি’’ন্তি (ম. নি. ১.২৮৫; মহাৰ. ১১) চ আগতট্ঠানে বুজ্ঝতি এত্থাতি রুক্খো বোধি. ‘‘বোধি ৰুচ্চতি চতূসু মগ্গেসু ঞাণ’’ন্তি (চূল়নি. খগ্গৰিসাণসুত্তনিদ্দেস ১২১) আগতট্ঠানে চত্তারি অরিযসচ্চানি বুজ্ঝতি এতেনাতি অরিযমগ্গো বোধি. ‘‘পত্ৰান বোধিং অমতং অসঙ্খত’’ন্তি আগতট্ঠানে বুজ্ঝতি এতস্মিং নিমিত্তভূতেতি নিব্বানং বোধি. ‘‘পপ্পোতি বোধিং ৰরভূরিমেধসো’’তি (দী. নি. ৩.২১৭) আগতট্ঠানে সব্বে ধম্মে সব্বাকারেন বুজ্ঝতি এতেনাতি সব্বঞ্ঞুতঞ্ঞাণং বোধি. ইধাপি সব্বঞ্ঞুতঞ্ঞাণং অধিপ্পেতং. অরহত্তমগ্গসব্বঞ্ঞুতঞ্ঞাণানি ৰা ইধ বোধীতি ৰেদিতব্বানি (পারা. অট্ঠ. ১.১১), মহাবোধিযা অধিপ্পেতত্তা ভগৰতো. আসৰক্খযঞাণপদট্ঠানঞ্হি সব্বঞ্ঞুতঞ্ঞাণং সব্বঞ্ঞুতঞ্ঞাণপদট্ঠানঞ্চ আসৰক্খযঞাণং ‘‘মহাবোধী’’তি ৰুচ্চতি. এত্থাযং সঙ্খেপত্থো – যথাৰুত্তকালপরিচ্ছেদে যং মম দানাসীলাদিপটিপত্তিসঙ্খাতং চরিতং, তং সব্বং অনৰসেসং মহাবোধিযা পাচনং সাধকং নিব্বত্তকন্তি. এতেন বোধিসম্ভারানং নিরন্তরভাৰনং দস্সেতি. অথ ৰা সব্বন্তি এত্থন্তরে যথাৰুত্তকালপরিচ্ছেদে যং চরিতং, তং সব্বং সকলমেৰ অনৰসেসং বোধিসম্ভারভূতমেৰ. এতেন সব্বসম্ভারভাৰনং দস্সেতি.

তস্সো হি বোধিসম্ভারেসু ভাৰনা সব্বসম্ভারভাৰনা নিরন্তরভাৰনা চিরকালভাৰনা সক্কচ্চভাৰনা চাতি. তাসু ‘‘কপ্পে চ সতসহস্সে, চতুরো চ অসঙ্খিযে’’তি ইমিনা চিরকালভাৰনা ৰুত্তা. যো চেত্থ অচ্চন্তসংযোগো, তেন পঠমে অত্থৰিকপ্পে সব্বগ্গহণেন চ নিরন্তরভাৰনা, দুতিযে অত্থৰিকপ্পে সব্বং চরিত’’ন্তি ইমিনা সব্বসম্ভারভাৰনা, বোধিপাচন’’ন্তি ইমিনা সক্কচ্চভাৰনা ৰুত্তা হোতি, যথা তং চরিতং সম্মাসম্বোধিং পাচেতি এৰংভূতভাৰদীপনতো. তথা হি তং ‘‘বোধিপাচন’’ন্তি ৰত্তব্বতং অরহতি, ন অঞ্ঞথাতি. কথং পনেত্থ বোধিচরিযায নিরন্তরভাৰো ৰেদিতব্বো? যদি চিত্তনিরন্তরতায তং ন যুজ্জতি, ন হি মহাবোধিসত্তানং মহাভিনীহারতো উদ্ধং বোধিসম্ভারসম্ভরণচিত্ততো অঞ্ঞং চিত্তং নপ্পৰত্ততীতি সক্কা ৰত্তুং. অথ কিরিযমযচিত্তপ্পৰত্তিং সন্ধায ৰুচ্চেয্য, এৰম্পি ন যুজ্জতি, ন হি সব্বানি তেসং কিরিযমযচিত্তানি বোধিসম্ভারসম্ভরণৰসেনেৰ পৰত্তন্তি. এতেনেৰ পযোগনিরন্তরতাপি পটিক্খিত্তাতি দট্ঠব্বা. জাতিনিরন্তরতায পন নিরন্তরভাৰনা ৰেদিতব্বা. যস্সঞ্হি জাতিযং মহাবোধিসত্তেন মহাপণিধানং নিব্বত্তিতং, ততো পট্ঠায যাৰ চরিমত্তভাৰা ন সা নাম জাতি উপলব্ভতি, যা সব্বেন সব্বং বোধিসম্ভারসম্ভতা ন সিযা অন্তমসো দানপারমিমত্তং উপাদায. অযঞ্হি নিযতিপত্থিতানং বোধিসত্তানং ধম্মতা. যাৰ চ তে কম্মাদীসু ৰসীভাৰং ন পাপুণন্তি, তাৰ সপ্পদেসম্পি সম্ভারেসু পযোগমাপজ্জন্তি. যদা পন সব্বসো কম্মাদীসু ৰসীভাৰপ্পত্তা হোন্তি, অথ ততো পট্ঠায নিপ্পদেসতো এৰ বোধিসম্ভারেসু সমীহনং সাতচ্চকিরিযা চ সম্পজ্জতি. সক্কচ্চকারিতা পন সব্বকালং হোতি, এৰং যেন যেন বোধিসত্তানং তত্থ তত্থ যথাধিপ্পাযং সমিজ্ঝনং সম্পজ্জতীতি. এৰমেতায গাথায বোধিসম্ভারেসু সব্বসম্ভারভাৰনা চিরকালভাৰনা নিরন্তরভাৰনা সক্কচ্চভাৰনা চাতি চতস্সোপি ভাৰনা পকাসিতাতি ৰেদিতব্বা.

তত্র যস্মা বোধিসত্তচরিতং বোধিসম্ভারা বোধিচরিযা অগ্গযানং পারমিযোতি অত্থতো একং, ব্যঞ্জনমেৰ নানং, যস্মা চ পরতো ৰিভাগেন ৰক্খমানানং দানপারমিআদীনং চরিতন্তি ইদং অৰিসেসৰচনং, তস্মা সব্ববোধিসম্ভারেসু কোসল্লজননত্থং পারমিযো ইধ সংৰণ্ণেতব্বা. তা পরতো পকিণ্ণককথাযং সব্বাকারেন সংৰণ্ণযিস্সাম.

২. ইতি ভগৰা অত্তনো বোধিসত্তভূমিযং চরিতং আরম্ভতো পট্ঠায যাৰ পরিযোসানা মহাবোধিযা পরিপাচনমেৰাতি অৰিসেসতো দস্সেত্ৰা ইদানি তস্স পরমুক্কংসগমনেন অতিসযতো বোধিপরিপাচনভাৰং দস্সেতুং ইমস্মিং ভদ্দকপ্পে কতিপযা পুব্বচরিযা ৰিভাগতো ৰিভাৰেন্তো ‘‘অতীতকপ্পে’’তিআদিমাহ.

তত্থ অতীতকপ্পেতি ইতো পুরিমে পুরিমতরে ৰা সব্বস্মিং অতিক্কন্তে যথাৰুত্তপরিচ্ছেদে মহাকপ্পে, কপ্পানং সতসহস্সাধিকেসু চতূসু অসঙ্খ্যেয্যেসূতি অত্থো. চরিতন্তি চিণ্ণং দানাদিপটিপত্তিং. ঠপযিত্ৰাতি মুঞ্চিত্ৰা অগ্গহেত্ৰা, অৰত্ৰাতি অত্থো. ভৰাভৰেতি ভৰে চ অভৰে চ, ‘‘ইতিভৰাভৰকথ’’ন্তি (দী. নি. ১.১৭) এত্থ হি ৰুদ্ধিহানিযো ভৰাভৰাতি ৰুত্তা. ‘‘ইতিভৰাভৰতঞ্চ ৰীতিৰত্তো’’তি (উদা. ২০) এত্থ সম্পত্তিৰিপত্তিৰুদ্ধিহানিসস্সতুচ্ছেদপুঞ্ঞপাপানিভৰাভৰাতি অধিপ্পেতানি. ‘‘ইতিভৰাভৰহেতু ৰা, ভিক্খৰে, ভিক্খুনো তণ্হা উপ্পজ্জমানা উপ্পজ্জতী’’তি (অ. নি. ৪.৯; ইতিৰু. ১০৫) এত্থ পন পণীতপণীততরানি সপ্পিনৰনীতাদিভেসজ্জানি ভৰাভৰাতি অধিপ্পেতানি. সম্পত্তিভৰেসু পণীততরা পণীততমা ভৰাভৰাতিপি ৰদন্তি এৰ, তস্মা ইধাপি সো এৰ অত্থো ৰেদিতব্বো, খুদ্দকে চেৰ মহন্তে চ ভৰস্মিন্তি ৰুত্তং হোতি. ইমম্হি কপ্পেতি ইমস্মিং ভদ্দকপ্পে. পৰক্খিস্সন্তি কথযিস্সং. সুণোহীতি ধম্মসেনাপতিং সৰনে নিযোজেতি. মেতি মম সন্তিকে, মম ভাসতোতি অত্থো.

নিদানকথা নিট্ঠিতা.

১. অকিত্তিৰগ্গো

১. অকিত্তিচরিযাৰণ্ণনা

৩. এৰং ভগৰা আযস্মতো সারিপুত্তত্থেরস্স সদেৰমনুস্সায চ পরিসায অত্তনো পুব্বচরিযায সৰনে উস্সাহং জনেত্ৰা ইদানি তং পুব্বচরিতং ভৰন্তরপটিচ্ছন্নং হত্থতলে আমলকং ৰিয পচ্চক্খং করোন্তো ‘‘যদা অহং ব্রহারঞ্ঞে’’তিআদিমাহ.

তত্থ যদাতি যস্মিং কালে. ব্রহারঞ্ঞেতি মহাঅরঞ্ঞে, অরঞ্ঞানিযং, মহন্তে ৰনেতি অত্থো. সুঞ্ঞেতি জনৰিৰিত্তে. ৰিপিনকাননেতি ৰিপিনভূতে কাননে, পদদ্ৰযেনাপি তস্স অরঞ্ঞস্স গহনভাৰমেৰ দীপেতি, সব্বমেতং কারদীপং সন্ধায ৰুত্তং. অজ্ঝোগাহেত্ৰাতি অনুপৰিসিত্ৰা. ৰিহরামীতি দিব্বব্রহ্মঅরিযআনেঞ্জৰিহারেহি সমুপ্পাদিতসুখৰিসেসেন ইরিযাপথৰিহারেন সরীরদুক্খং ৰিচ্ছিন্দিত্ৰা হরামি অত্তভাৰং পৰত্তেমি. অকিত্তি নাম তাপসোতি এৰংনামকো তাপসো হুত্ৰা যদা অহং তস্মিং অরঞ্ঞে ৰিহরামীতি অত্থো. সত্থা তদা অত্তনো অকিত্তিতাপসভাৰং ধম্মসেনাপতিস্স ৰদতি. তত্রাযং অনুপুব্বিকথা –

অতীতে কির ইমস্মিংযেৰ ভদ্দকপ্পে বারাণসিযং ব্রহ্মদত্তে নাম রাজিনি রজ্জং কারেন্তে বোধিসত্তো অসীতিকোটিৰিভৰস্স ব্রাহ্মণমহাসালস্স কুলে নিব্বত্তি, ‘‘অকিত্তী’’তিস্স নামং করিংসু. তস্স পদসা গমনকালে ভগিনীপি জাযি. ‘‘যসৰতী’’তিস্সা নামং করিংসু. সো সোল়সৰস্সকালে তক্কসিলং গন্ত্ৰা সব্বসিপ্পানি উগ্গহেত্ৰা পচ্চাগমাসি. অথস্স মাতাপিতরো কালমকংসু. সো তেসং পেতকিচ্চানি কারেত্ৰা কতিপযদিৰসাতিক্কমেন রতনাৰলোকনং আযুত্তকপুরিসেহি কারযমানো ‘‘এত্তকং মত্তিকং, এত্তকং পেত্তিকং, এত্তকং পিতামহ’’ন্তি সুত্ৰা সংৰিগ্গমানসো হুত্ৰা ‘‘ইদং ধনমেৰ পঞ্ঞাযতি, ন ধনস্স সংহারকা, সব্বে ইমং ধনং পহাযেৰ গতা, অহং পন নং আদায গমিস্সামী’’তি রাজানং আপুচ্ছিত্ৰা ভেরিং চরাপেসি – ‘‘ধনেন অত্থিকা অকিত্তিপণ্ডিতস্স গেহং আগচ্ছন্তূ’’তি.

সো সত্তাহং মহাদানং পৰত্তেত্ৰা ধনে অখীযমানে ‘‘কিং মে ইমায ধনকীল়ায, অত্থিকা গণ্হিস্সন্তী’’তি নিৰেসনদ্ৰারং ৰিৰরিত্ৰা হিরঞ্ঞসুৰণ্ণাদিভরিতে সারগব্ভে ৰিৰরাপেত্ৰা ‘‘দিন্নংযেৰ হরন্তূ’’তি গেহং পহায ঞাতিপরিৰট্টস্স পরিদেৰন্তস্স ভগিনিং গহেত্ৰা বারাণসিতো নিক্খমিত্ৰা নদিং উত্তরিত্ৰা দ্ৰে তীণি যোজনানি গন্ত্ৰা পব্বজিত্ৰা রমণীযে ভূমিভাগে পণ্ণসালং করিত্ৰা ৰসতি. যেন পন দ্ৰারেন তদা নিক্খমি, তং অকিত্তিদ্ৰারং নাম জাতং. যেন তিত্থেন নদিং ওতিণ্ণো, তং অকিত্তিতিত্থং নাম জাতং. তস্স পব্বজিতভাৰং সুত্ৰা বহূ মনুস্সা গামনিগমরাজধানিৰাসিনো তস্স গুণেহি আকড্ঢিযমানহদযা অনুপব্বজিংসু. মহাপরিৰারো অহোসি, মহালাভসক্কারো নিব্বত্তি, বুদ্ধুপ্পাদো ৰিয অহোসি. অথ মহাসত্তো ‘‘অযং লাভসক্কারো মহা, পরিৰারোপি মহন্তো, কাযৰিৰেকমত্তম্পি ইধ ন লভতি, মযা একাকিনা ৰিহরিতুং ৰট্টতী’’তি চিন্তেত্ৰা পরমপ্পিচ্ছভাৰতো ৰিৰেকনিন্নতায চ কস্সচি অজানাপেত্ৰা এককোৰ নিক্খমিত্ৰা অনুপুব্বেন দমিল়রট্ঠং পত্ৰা কাৰীরপট্টনসমীপে উয্যানে ৰিহরন্তো ঝানাভিঞ্ঞাযো নিব্বত্তেসি. তত্রাপিস্স মহালাভসক্কারো উপ্পজ্জি. সো তং জিগুচ্ছন্তো ছড্ডেত্ৰা আকাসেন গন্ত্ৰা কারদীপে ওতরি. তদা কারদীপো অহিদীপো নাম. সো তত্থ মহন্তং কাররুক্খং উপনিস্সায পণ্ণসালং মাপেত্ৰা ৰাসং কপ্পেসি. অপ্পিচ্ছতায পন কত্থচি অগন্ত্ৰা তস্স রুক্খস্স ফলকালে ফলানি খাদন্তো ফলে অসতি পত্তানি উদকসিত্তানি খাদন্তো ঝানসমাপত্তীহি ৰীতিনামেসি.

তস্স সীলতেজেন সক্কস্স পণ্ডুকম্বলসিলাসনং উণ্হাকারং দস্সেসি. সক্কো ‘‘কো নু খো মং ইমম্হা ঠানা চাৰেতুকামো’’তি আৰজ্জেন্তো পণ্ডিতং দিস্ৰা ‘‘কিমত্থং নু খো অযং তাপসো এৰং দুক্করং তপং চরতি, সক্কত্তং নু খো পত্থেতি, উদাহু অঞ্ঞং, ৰীমংসিস্সামি নং. অযঞ্হি সুৰিসুদ্ধকাযৰচীমনোসমাচারো জীৰিতে নিরপেক্খো উদকসিত্তানি কারপত্তানি খাদতি, সচে সক্কত্তং পত্থেতি অত্তনো সিত্তানি কারপত্তানি ময্হং দস্সতি, নো চে, ন দস্সতী’’তি ব্রাহ্মণৰণ্ণেন তস্স সন্তিকং অগমাসি. বোধিসত্তোপি কারপত্তানি সেদেত্ৰা ‘‘সীতলীভূতানি খাদিস্সামী’’তি পণ্ণসালদ্ৰারে নিসীদি. অথস্স পুরতো সক্কো ব্রাহ্মণরূপেন ভিক্খায অত্থিকো হুত্ৰা অট্ঠাসি. মহাসত্তো তং দিস্ৰা ‘‘লাভা ৰত মে, সুলদ্ধং ৰত মে, চিরস্সং ৰত মে যাচকো দিট্ঠো’’তি সোমনস্সপ্পত্তো হুত্ৰা ‘‘অজ্জ মম মনোরথং মত্থকং পাপেত্ৰা দানং দস্সামী’’তি পক্কভাজনেনেৰ আদায গন্ত্ৰা দানপারমিং আৰজ্জেত্ৰা অত্তনো অসেসেত্ৰাৰ তস্স ভিক্খাভাজনে পক্খিপি. সক্কো তং গহেত্ৰা থোকং গন্ত্ৰা অন্তরধাযি. মহাসত্তোপি তস্স দত্ৰা পুন পরিযেট্ঠিং অনাপজ্জিত্ৰা তেনেৰ পীতিসুখেন ৰীতিনামেসি.

দুতিযদিৰসে পন কারপত্তানি পচিত্ৰা ‘‘হিয্যো দক্খিণেয্যং অলভিং, অজ্জ নু খো কথ’’ন্তি পণ্ণসালদ্ৰারে নিসীদি. সক্কোপি তথেৰ আগমি. মহাসত্তো পুনপি তথেৰ দত্ৰা ৰীতিনামেসি. ততিযদিৰসে চ তথেৰ দত্ৰা ‘‘অহো ৰত মে লাভা, বহুং ৰত পুঞ্ঞং পসৰামি, সচাহং দক্খিণেয্যং লভেয্যং, এৰমেৰ মাসম্পি দ্ৰেমাসম্পি দানং দদেয্য’’ন্তি চিন্তেসি. তীসুপি দিৰসেসু ‘‘তেন দানেন ন লাভসক্কারসিলোকং ন চক্কৰত্তিসম্পত্তিং ন সক্কসম্পত্তিং ন ব্রহ্মসম্পত্তিং ন সাৰকবোধিং ন পচ্চেকবোধিং পত্থেমি, অপি চ ইদং মে দানং সব্বঞ্ঞুতঞ্ঞাণস্স পচ্চযো হোতূ’’তি যথাধিকারং চিত্তং ঠপেসি. তেন ৰুত্তং –

৪.

‘‘তদা মং তপতেজেন, সন্তত্তো তিদিৰাভিভূ;

ধারেন্তো ব্রাহ্মণৰণ্ণং, ভিক্খায মং উপাগমি.

৫.

‘‘পৰনা আভতং পণ্ণং, অতেলঞ্চ অলোণিকং;

মম দ্ৰারে ঠিতং দিস্ৰা, সকটাহেন আকিরিং.

৬.

‘‘তস্স দত্ৰানহং পণ্ণং, নিকুজ্জিত্ৰান ভাজনং;

পুনেসনং জহিত্ৰান, পাৰিসিং পণ্ণসালকং.

৭.

‘‘দুতিযম্পি ততিযম্পি, উপগঞ্ছি মমন্তিকং;

অকম্পিতো অনোলগ্গো, এৰমেৰমদাসহং.

৮.

‘‘ন মে তপ্পচ্চযা অত্থি, সরীরস্মিং ৰিৰণ্ণিযং;

পীতিসুখেন রতিযা, ৰীতিনামেমি তং দিৰং.

৯.

‘‘যদি মাসম্পি দ্ৰেমাসং, দক্খিণেয্যং ৰরং লভে;

অকম্পিতো অনোলীনো, দদেয্যং দানমুত্তমং.

১০.

‘‘ন তস্স দানং দদমানো, যসং লাভঞ্চ পত্থযিং;

সব্বঞ্ঞুতং পত্থযানো, তানি কম্মানি আচরি’’ন্তি.

তত্থ তদাতি যদা অহং অকিত্তিনামকো তাপসো হুত্ৰা তস্মিং দীপে কারারঞ্ঞে ৰিহরামি, তদা. মন্তি মম. তপতেজেনাতি সীলপারমিতানুভাৰেন. সীলঞ্হি দুচ্চরিতসংকিলেসস্স তপনতো ‘‘তপো’’তি ৰুচ্চতি, নেক্খম্মৰীরিযপারমিতানুভাৰেন ৰা. তাপি হি তণ্হাসংকিলেসস্স কোসজ্জস্স চ তপনতো ‘‘তপো’’তি ৰুচ্চতি, উক্কংসগতা চ তা বোধিসত্তস্স ইমস্মিং অত্তভাৰেতি. খন্তিসংৰরস্স চাপি পরমুক্কংসগমনতো ‘‘খন্তিপারমিতানুভাৰেনা’’তিপি ৰত্তুং ৰট্টতেৰ. ‘‘খন্তী পরমং তপো’’তি (দী. নি. ২.৯০; ধ. প. ১৮৪) হি ৰুত্তং. সন্তত্তোতি যথাৰুত্তগুণানুভাৰজনিতেন ধম্মতাসিদ্ধেন পণ্ডুকম্বলসিলাসনস্স উণ্হাকারেন সন্তাপিতো. তিদিৰাভিভূতি দেৰলোকাধিপতি, সক্কোতি অত্থো. পণ্ণসালায সমীপে গহিতম্পি কারপণ্ণং পণ্ণসালায অরঞ্ঞমজ্ঝগতত্তা ‘‘পৰনা আভত’’ন্তি ৰুত্তং.

অতেলঞ্চ অলোণিকন্তি দেয্যধম্মস্স অনুল়ারভাৰেপি অজ্ঝাসযসম্পত্তিযা দানধম্মস্স মহাজুতিকভাৰং দস্সেতুং ৰুত্তং. মম দ্ৰারেতি ময্হং পণ্ণসালায দ্ৰারে. সকটাহেন আকিরিন্তি ইমিনা অত্তনো কিঞ্চিপি অসেসেত্ৰা দিন্নভাৰং দস্সেতি.

পুনেসনং জহিত্ৰানাতি ‘‘একদিৰসং দ্ৰিক্খত্তুং ঘাসেসনং ন সল্লেখ’’ন্তি চিন্তেত্ৰা দানপীতিযা তিত্তো ৰিয হুত্ৰা তস্মিং দিৰসে পুন আহারপরিযেট্ঠিং অকত্ৰা.

অকম্পিতোতি সুদূরৰিক্খম্ভিতত্তা মচ্ছরিযেন অচলিতো দানজ্ঝাসযতো চলনমত্তম্পি অকারিতো. অনোলগ্গোতি লোভৰসেন ঈসকম্পি অলগ্গো. ততিযম্পীতি পি-সদ্দেন দুতিযম্পীতি ইমং সম্পিণ্ডেতি. এৰমেৰমদাসহন্তি যথা পঠমং, এৰমেৰং দুতিযম্পি, ততিযম্পি অদাসিং অহং.

ন মে তপ্পচ্চযাতি গাথায ৰুত্তমেৰত্থং পাকটং করোতি. তত্থ তপ্পচ্চযাতি দানপচ্চযা তীসু দিৰসেসু ছিন্নাহারতায সরীরস্মিং যেন ৰেৰণ্ণিযেন ভৰিতব্বং, তম্পি মে সরীরস্মিং ৰিৰণ্ণিযং দানপচ্চযাযেৰ নত্থি. কস্মা? দানৰিসযেন পীতিসুখেন দানৰিসযায এৰ চ রতিযা. ৰীতিনামেমি তং দিৰন্তি তং সকলং তিমত্তদিৰসং ৰীতিনামেমি, ন কেৰলঞ্চ তীণি এৰ দিৰসানি, অথ খো মাসদ্ৰিমাসমত্তম্পি কালং, এৰমেৰ দাতুং পহোমীতি দস্সেতুং ‘‘যদি মাসম্পী’’তিআদি ৰুত্তং. অনোলীনোতি অলীনচিত্তো, দানে অসঙ্কুচিতচিত্তোতি অত্থো.

তস্সাতি ব্রাহ্মণরূপেন আগতস্স সক্কস্স. যসন্তি কিত্তিং, পরিৰারসম্পত্তিং ৰা. লাভঞ্চাতি দেৰমনুস্সেসু চক্কৰত্তিআদিভাৰেন লদ্ধব্বং লাভং ৰা ন পত্থযিং. অথ খো সব্বঞ্ঞুতং সম্মাসম্বোধিং পত্থযানো আকঙ্খমানো তানি তীসু দিৰসেসু অনেকৰারং উপ্পন্নানি দানমযানি পুঞ্ঞকম্মানি দানস্স ৰা পরিৰারভূতানি কাযসুচরিতাদীনি পুঞ্ঞকম্মানি আচরিং অকাসিন্তি.

ইতি ভগৰা তস্মিং অত্তভাৰে অত্তনো সুদুক্করং পুঞ্ঞচরিতমত্তমেৰ ইধ মহাথেরস্স পকাসেসি. জাতকদেসনাযং পন চতুত্থদিৰসে সক্কস্স উপসঙ্কমিত্ৰা বোধিসত্তস্স অজ্ঝাসযজাননং ৰরেন উপনিমন্তনা বোধিসত্তস্স ৰরসম্পটিচ্ছনসীসেন ধম্মদেসনা দেয্যধম্মদক্খিণেয্যানং পুন সক্কস্স অনাগমনস্স চ আকঙ্খমানতা চ পকাসিতা. ৰুত্তঞ্হেতং –

‘‘অকিত্তিং দিস্ৰান সম্মন্তং, সক্কো ভূতপতী ব্রৰি;

কিং পত্থযং মহাব্রহ্মে, একো সম্মসি ঘম্মনি.

‘‘দুক্খো পুনব্ভৰো সক্ক, সরীরস্স চ ভেদনং;

সম্মোহমরণং দুক্খং, তস্মা সম্মামি, ৰাসৰ.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

যেন পুত্তে চ দারে চ, ধনধঞ্ঞং পিযানি চ;

লদ্ধা নরা ন তপ্পন্তি, সো লোভো ন মযী ৰসে.

এতস্মিং তে সুলপিতে…পে… মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

খেত্তং ৰত্থুং হিরঞ্ঞঞ্চ, গৰাস্সং দাসপোরিসং;

যেন জাতেন জীযন্তি, সো দোসো ন মযী ৰসে.

‘‘এতস্মিং তে সুলপিতে…পে… মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

বালং ন পস্সে ন সুণে, ন চ বালেন সংৰসে;

বালেনল্লাপসল্লাপং, ন করে ন চ রোচযে.

‘‘কিং নু তে অকরং বালো, ৰদ কস্সপ কারণং;

কেন কস্সপ বালস্স, দস্সনং নাভিকঙ্খসি.

‘‘অনযং নযতি দুম্মেধো, অধুরাযং নিযুঞ্জতি;

দুন্নযো সেয্যসো হোতি, সম্মা ৰুত্তো পকুপ্পতি;

ৰিনযং সো ন জানাতি, সাধু তস্স অদস্সনং.

‘‘এতস্মিং তে সুলপিতে…পে… মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

ধীরং পস্সে সুণে ধীরং, ধীরেন সহ সংৰসে;

ধীরেনল্লাপসল্লাপং, তং করে তঞ্চ রোচযে.

‘‘কিং নু তে অকরং ধীরো, ৰদ কস্সপ কারণং;

কেন কস্সপ ধীরস্স, দস্সনং অভিকঙ্খসি.

‘‘নযং নযতি মেধাৰী, অধুরাযং ন যুঞ্জতি;

সুনযো সেয্যসো হোতি, সম্মা ৰুত্তো ন কুপ্পতি;

ৰিনযং সো পজানাতি, সাধু তেন সমাগমো.

‘‘এতস্মিং তে সুলপিতে…পে… মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

ততো রত্যা ৰিৰসানে, সূরিযুগ্গমনং পতি;

দিব্বা ভক্খা পাতুভৰেয্যুং, সীলৰন্তো চ যাচকা.

‘‘দদতো মে ন খীযেথ, দত্ৰা নানুতপেয্যহং;

দদং চিত্তং পসাদেয্যং, এতং সক্ক ৰরং ৰরে.

‘‘এতস্মিং তে সুলপিতে…পে… মনসিচ্ছসি.

‘‘ৰরঞ্চে মে অদো সক্ক, সব্বভূতানমিস্সর;

ন মং পুন উপেয্যাসি, এতং সক্ক ৰরং ৰরে.

‘‘বহূহি ৰতচরিযাহি, নরা চ অথ নারিযো;

দস্সনং অভিকঙ্খন্তি, কিং নু মে দস্সনে ভযং.

‘‘তং তাদিসং দেৰৰণ্ণং, সব্বকামসমিদ্ধিনং;

দিস্ৰা তপো পমজ্জেয্যং, এতং তে দস্সনে ভয’’ন্তি. (জা. ১.১৩.৮৩-১০৩);

অথ সক্কো ‘‘সাধু, ভন্তে, ন তে ইতো পট্ঠায সন্তিকং আগমিস্সামী’’তি তং অভিৰাদেত্ৰা পক্কামি. মহাসত্তো যাৰজীৰং তত্থেৰ ৰসন্তো আযুপরিযোসানে ব্রহ্মলোকে নিব্বত্তি.

অনুরুদ্ধত্থেরো তদা সক্কো অহোসি, লোকনাথো অকিত্তিপণ্ডিতো.

তস্স মহাভিনিক্খমনসদিসং নিক্খন্তত্তা নেক্খম্মপারমী. সুৰিসুদ্ধসীলাচারতায সীলপারমী. কামৰিতক্কাদীনং সুট্ঠু ৰিক্খম্ভিতত্তা ৰীরিযপারমী. খন্তিসংৰরস্স পরমুক্কংসগমনতো খন্তিপারমী. পটিঞ্ঞানুরূপং পটিপত্তিযা সচ্চপারমী. সব্বত্থ অচলসমাদানাধিট্ঠানেন অধিট্ঠানপারমী. সব্বসত্তেসু হিতজ্ঝাসযেন মেত্তাপারমী. সত্তসঙ্খারকতৰিপ্পকারেসু মজ্ঝত্তভাৰপ্পত্তিযা উপেক্খাপারমী. তাসং উপকারানুপকারে ধম্মে জানিত্ৰা অনুপকারে ধম্মে পহায উপকারধম্মেসু পৰত্তাপনপুরেচরা সহজাতা চ উপাযকোসল্লভূতা অতিসল্লেখৰুত্তিসাধনী চ পঞ্ঞা পঞ্ঞাপারমীতি ইমাপি দস পারমিযো লব্ভন্তি.

দানজ্ঝাসযস্স পন অতিউল়ারভাৰেন দানমুখেন দেসনা পৰত্তা. তস্মা সব্বত্থ সমকা মহাকরুণা, দ্ৰেপি পুঞ্ঞঞাণসম্ভারা, কাযসুচরিতাদীনি তীণি বোধিসত্তসুচরিতানি, সচ্চাধিট্ঠানাদীনি চত্তারি অধিট্ঠানানি, উস্সাহাদযো চতস্সো বুদ্ধভূমিযো, সদ্ধাদযো পঞ্চ মহাবোধিপরিপাচনীযা ধম্মা, অলোভজ্ঝাসযাদযো ছ বোধিসত্তানং অজ্ঝাসযা, তিণ্ণো তারেস্সামীতিআদযো সত্ত পটিঞ্ঞা ধম্মা, অপ্পিচ্ছস্সাযং ধম্মো, নাযং ধম্মো মহিচ্ছস্সাতিআদযো (দী. নি. ৩.৩৫৮; অ. নি. ৮.৩০) অট্ঠ মহাপুরিসৰিতক্কা (দী. নি. ৩.৩৫৮), নৰ যোনিসোমনসিকারমূলকা ধম্মা, দানজ্ঝাসযাদযো দস মহাপুরিসজ্ঝাসযা, দানসীলাদযো দস পুঞ্ঞকিরিযৰত্থূনীতি এৰমাদযো যে অনেকসতঅনেকসহস্সপ্পভেদা বোধিসম্ভারভূতা মহাবোধিসত্তগুণা. তে সব্বেপি যথারহং ইধ নিদ্ধারেত্ৰা ৰত্তব্বা.

অপি চেত্থ মহন্তং ভোগক্খন্ধং মহন্তঞ্চ ঞাতিপরিৰট্টং পহায মহাভিনিক্খমনসদিসং গেহতো নিক্খমনং, নিক্খমিত্ৰা পব্বজিতস্স বহুজনসম্মতস্স সতো পরমপ্পিচ্ছভাৰেন কুলেসু গণেসু চ অলগ্গতা, অচ্চন্তমেৰ লাভসক্কারসিলোকজিগুচ্ছা, পৰিৰেকাভিরতি, কাযজীৰিতনিরপেক্খো পরিচ্চাগো, অনাহারস্সেৰ সতো দিৰসত্তযম্পি দানপীতিযা পরিতুট্ঠস্স নিব্বিকারসরীরযাপনং, মাসদ্ৰিমাসমত্তম্পি কালং যাচকে সতি আহারং তথেৰ দত্ৰা ‘‘দানগতেনেৰ পীতিসুখেন সরীরং যাপেস্সামী’’তি পরিচ্চাগে অনোলীনৰুত্তিসাধকো উল়ারো দানজ্ঝাসযো, দানং দত্ৰা পুন আহারপরিযেট্ঠিযা অকরণহেতুভূতা পরমসল্লেখৰুত্তীতি এৰমাদযো মহাসত্তস্স গুণানুভাৰা ৰেদিতব্বা. তেনেতং ৰুচ্চতি –

‘‘এৰং অচ্ছরিযা হেতে, অব্ভুতা চ মহেসিনো;

মহাকারুণিকা ধীরা, সব্বলোকেকবন্ধৰা.

‘‘অচিন্তেয্যানুভাৰা চ, সদা সদ্ধম্মগোচরা;

বোধিসত্তা মহাসত্তা, সুচিসল্লেখৰুত্তিনো.

‘‘মহাৰাতসমুদ্ধত-ৰীচিমালো মহোদধি;

অপি লঙ্ঘেয্য ৰেলন্তং, বোধিসত্তা ন ধম্মতং.

‘‘লোকে সঞ্জাতৰদ্ধাপি, ন তে ভাৰিতভাৰিনো;

লিম্পন্তি লোকধম্মেহি, তোযেন পদুমং যথা.

‘‘যেসং ৰে অত্তনি স্নেহো, নিহীযতি যথা যথা;

সত্তেসু করুণাস্নেহো, ৰড্ঢতেৰ তথা তথা.

‘‘যথা চিত্তং ৰসে হোতি, ন চ চিত্তৰসানুগা;

তথা কম্মং ৰসে হোতি, ন চ কম্মৰসানুগা.

‘‘দোসেহি নাভিভূযন্তি, সমুগ্ঘাতেন্তি ৰা ন তে;

চরন্তা বোধিপরিযেট্ঠিং, পুরিসাজানিযা বুধা.

‘‘তেসু চিত্তপ্পসাদোপি, দুক্খতো পরিমোচযে;

পগেৰানুকিরিযা তেসং, ধম্মস্স অনুধম্মতো’’তি.

পরমত্থদীপনিযা চরিযাপিটকসংৰণ্ণনায

অকিত্তিচরিযাৰণ্ণনা নিট্ঠিতা.

২. সঙ্খব্রাহ্মণচরিযাৰণ্ণনা

১১-১২. দুতিযস্মিং পুনাপরন্তি পুন অপরং, ন কেৰলমিদং অকিত্তিচরিযমেৰ, অথ খো পুন অপরং অঞ্ঞং সঙ্খচরিযম্পি পৰক্খিস্সং, সুণোহীতি অধিপ্পাযো. ইতো পরেসুপি এসেৰ নযো. সঙ্খসৰ্হযোতি সঙ্খনামো. মহাসমুদ্দং তরিতুকামোতি সুৰণ্ণভূমিং গন্তুং নাৰায মহাসমুদ্দং তরিতুকামো. উপগচ্ছামি পট্টনন্তি তামলিত্তিপট্টনং উদ্দিস্স গচ্ছামি. সযম্ভুঞাণেন পচ্চেকবোধিযা অধিগতত্তা সযমেৰ ভূতন্তি সযম্ভুং. কিলেসমারাদীসু কেনচিপি ন পরাজিতন্তি অপরাজিতং, তিণ্ণং মারানং মত্থকং মদ্দিত্ৰা ঠিতন্তি অত্থো. তত্তায কঠিনভূমিযাতি ঘম্মসন্তাপেন সন্তত্তায সক্খরৰালুকানিচিতত্তা খরায কক্খল়ায ভূমিযা.

১৩. তন্তি তং পচ্চেকবুদ্ধং. ইমমত্থন্তি ইমং ইদানি ৰক্খমানং ‘‘ইদং খেত্ত’’ন্তিআদিকং অত্থং. ৰিচিন্তযিন্তি তদা সঙ্খব্রাহ্মণভূতো চিন্তেসিন্তি সত্থা ৰদতি. তত্রাযং অনুপুব্বিকথা –

অতীতে অযং বারাণসী মোল়িনী নাম অহোসি. মোল়িনীনগরে ব্রহ্মদত্তে রজ্জং কারেন্তে বোধিসত্তো সঙ্খো নাম ব্রাহ্মণো হুত্ৰা অড্ঢো মহদ্ধনো চতূসু নগরদ্ৰারেসু নগরমজ্ঝে অত্তনো নিৰেসনদ্ৰারেতি ছসু ঠানেসু ছ দানসালাযো কারেত্ৰা দেৰসিকং ছসতসহস্সানি ৰিস্সজ্জেন্তো কপণদ্ধিকাদীনং মহাদানং পৰত্তেসি. সো একদিৰসং চিন্তেসি – ‘‘অহং গেহে ধনে খীণে দানং দাতুং ন সক্খিস্সামি, অপরিক্খীণেযেৰ ধনে নাৰায সুৰণ্ণভূমিং গন্ত্ৰা ধনং আহরিস্সামী’’তি. সো নাৰং ভণ্ডস্স পূরাপেত্ৰা পুত্তদারং আমন্তেত্ৰা ‘‘যাৰাহং আগচ্ছিস্সামি, তাৰ মে দানং অনুপচ্ছিন্দন্তা পৰত্তেয্যাথা’’তি ৰত্ৰা দাসকম্মকরপরিৰুতো উপাহনং আরুয্হ ছত্তেন ধারিযমানেন পট্টনগামাভিমুখো পাযাসি.

তস্মিং খণে গন্ধমাদনে একো পচ্চেকবুদ্ধো সত্তাহং নিরোধসমাপত্তিং সমাপজ্জিত্ৰা নিরোধসমাপত্তিতো ৰুট্ঠায লোকং ৰোলোকেন্তো তং ধনাহরণত্থং গচ্ছন্তং দিস্ৰা ‘‘মহাপুরিসো ধনং আহরিতুং গচ্ছতি, ভৰিস্সতি নু খো অস্স মহাসমুদ্দে অন্তরাযো, নো’’তি আৰজ্জেত্ৰা ‘‘ভৰিস্সতী’’তি ঞত্ৰা ‘‘এস মং দিস্ৰা ছত্তঞ্চ উপাহনঞ্চ ময্হং দত্ৰা উপাহনদাননিস্সন্দেন সমুদ্দে ভিন্নায নাৰায পতিট্ঠং লভিস্সতি, করিস্সামিস্স অনুগ্গহ’’ন্তি আকাসেন গন্ত্ৰা তস্স অৰিদূরে ওতরিত্ৰা মজ্ঝন্হিকসমযে চণ্ডৰাতাতপেন অঙ্গারসন্থতসদিসং উণ্হৰালুকং মদ্দন্তো তস্স অভিমুখং আগঞ্ছি. সো তং দিস্ৰাৰ হট্ঠতুট্ঠো ‘‘পুঞ্ঞক্খেত্তং মে আগতং, অজ্জ মযা এত্থ বীজং রোপেতুং ৰট্টতী’’তি চিন্তেসি. তেন ৰুত্তং ‘‘তমহং পটিপথে দিস্ৰা, ইমমত্থং ৰিচিন্তযি’’ন্তিআদি.

তত্থ ইদং খেত্তন্তিআদি চিন্তিতাকারদস্সনং. খেত্তন্তি খিত্তং বীজং মহপ্ফলভাৰকরণেন তাযতীতি খেত্তং, পুব্বণ্ণাপরণ্ণৰিরুহনভূমি. ইধ পন খেত্তং ৰিযাতি খেত্তং, অগ্গদক্খিণেয্যো পচ্চেকবুদ্ধো. তেনেৰাহ ‘‘পুঞ্ঞকামস্স জন্তুনো’’তি.

১৪. মহাগমন্তি ৰিপুলফলাগমং, সস্সসম্পত্তিদাযকন্তি অত্থো. বীজং ন রোপেতীতি বীজং ন ৰপতি.

১৫.

খেত্তৰরুত্তমন্তি খেত্তৰরেসুপি উত্তমং. সীলাদিগুণসম্পন্না হি ৰিসেসতো অরিযসাৰকা খেত্তৰরা, ততোপি অগ্গভূতো পচ্চেকবুদ্ধো খেত্তৰরুত্তমো. কারন্তি সক্কারং. যদি ন করোমীতি সম্বন্ধো. ইদং ৰুত্তং হোতি – ইদমীদিসং অনুত্তরং পুঞ্ঞক্খেত্তং লভিত্ৰা তত্থ পূজাসক্কারং যদি ন করোমি, পুঞ্ঞেন অত্থিকো নামাহং ন ভৰেয্যন্তি.

১৬-১৭. যথা অমচ্চোতিআদীনং দ্ৰিন্নং গাথানং অযং সঙ্খেপত্থো – যথা নাম যো কোচি রঞ্ঞা মুদ্দাধিকারে ঠপিতো লঞ্ছনধরো অমচ্চপুরিসো সেনাপতি ৰা সো অন্তেপুরে জনে বহিদ্ধা চ বলকাযাদীসু রঞ্ঞো যথানুসিট্ঠং ন পটিপজ্জতি ন তেসং ধনধঞ্ঞং দেতি, তং তং কত্তব্বং ৰত্তং পরিহাপেতি. সো মুদ্দিতো পরিহাযতি মুদ্দাধিকারলদ্ধৰিভৰতো পরিধংসতি, এৰমেৰ অহম্পি পুঞ্ঞকম্মস্স রতো লদ্ধব্বপুঞ্ঞফলসঙ্খাতং পুঞ্ঞকামো দক্খিণায ৰিপুলফলভাৰকরণেন ৰিপুলং দিস্ৰান তং দক্খিণং উল়ারং দক্খিণেয্যং লভিত্ৰা তস্স দানং যদি ন দদামি পুঞ্ঞতো আযতিং পুঞ্ঞফলতো চ পরিধংসামি. তস্মা ইধ মযা পুঞ্ঞং কাতব্বমেৰাতি.

এৰং পন চিন্তেত্ৰা মহাপুরিসো দূরতোৰ উপাহনা ওরোহিত্ৰা ৰেগেন উপসঙ্কমিত্ৰা ৰন্দিত্ৰা ‘‘ভন্তে, ময্হং অনুগ্গহত্থায ইমং রুক্খমূলং উপগচ্ছথা’’তি ৰত্ৰা তস্মিং রুক্খমূলং উপসঙ্কমন্তে তত্থ ৰালুকং উস্সাপেত্ৰা উত্তরাসঙ্গং পঞ্ঞাপেত্ৰা পচ্চেকবুদ্ধে তত্থ নিসিন্নে ৰন্দিত্ৰা ৰাসিতপরিস্সাৰিতেন উদকেন তস্স পাদে ধোৰিত্ৰা, গন্ধতেলেন মক্খেত্ৰা, অত্তনো উপাহনং পুঞ্ছিত্ৰা, গন্ধতেলেন মক্খেত্ৰা, তস্স পাদে পটিমুঞ্চিত্ৰা ‘‘ভন্তে, ইমং উপাহনং আরুয্হ, ইমং ছত্তং মত্থকে কত্ৰা গচ্ছথা’’তি ছত্তুপাহনং অদাসি. সোপিস্স অনুগ্গহত্থায তং গহেত্ৰা পসাদসংৰড্ঢনত্থং পস্সন্তস্সেৰ ৰেহাসং উপ্পতিত্ৰা গন্ধমাদনং অগমাসি. তেন ৰুত্তং –

১৮.

‘‘এৰাহং চিন্তযিত্ৰান, ওরোহিত্ৰা উপাহনা;

তস্স পাদানি ৰন্দিত্ৰা, অদাসিং ছত্তুপাহন’’ন্তি.

বোধিসত্তো তং দিস্ৰা অতিৰিয পসন্নচিত্তো পট্টনং গন্ত্ৰা নাৰং অভিরুহি. অথস্স মহাসমুদ্দং তরন্তস্স সত্তমে দিৰসে নাৰা ৰিৰরমদাসি. উদকং উস্সিঞ্চিতুং নাসক্খিংসু. মহাজনো মরণভযভীতো অত্তনো অত্তনো দেৰতা নমস্সিত্ৰা মহাৰিরৰং ৰিরৰি. বোধিসত্তো একং উপট্ঠাকং গহেত্ৰা সকলসরীরং তেলেন মক্খেত্ৰা সপ্পিনা সদ্ধিং সক্খরচুণ্ণানি যাৰদত্থং খাদিত্ৰা তম্পি খাদাপেত্ৰা তেন সদ্ধিং কূপকযট্ঠিমত্থকং আরুয্হ ‘‘ইমায দিসায অম্হাকং নগর’’ন্তি দিসং ৰৰত্থপেত্ৰা মচ্ছকচ্ছপপরিপন্থতো অত্তানং সচ্চাধিট্ঠানেন পমোচেন্তো তেন সদ্ধিং উসভমত্তট্ঠানং অতিক্কমিত্ৰা পতিত্ৰা সমুদ্দং তরিতুং আরভি. মহাজনো পন তত্থেৰ ৰিনাসং পাপুণি. তস্স তরন্তস্সেৰ সত্ত দিৰসা গতা. সো তস্মিম্পি কালে লোণোদকেন মুখং ৰিক্খালেত্ৰা উপোসথিকো অহোসিযেৰ.

তদা পন ঈদিসানং পুরিসৰিসেসানং রক্খণত্থায চতূহি লোকপালেহি ঠপিতা মণিমেখলা নাম দেৰধীতা অত্তনো ইস্সরিযেন সত্তাহং পমজ্জিত্ৰা সত্তমে দিৰসে তং দিস্ৰা ‘‘সচাযং ইধ মরিস্স, অতিৰিয গারয্হা অভৰিস্স’’ন্তি সংৰিগ্গহদযা সুৰণ্ণপাতিযা দিব্বভোজনস্স পূরেত্ৰা ৰেগেনাগন্ত্ৰা ‘‘ব্রাহ্মণ, ইদং দিব্বভোজনং ভুঞ্জা’’তি আহ. সো তং উল্লোকেত্ৰা ‘‘নাহং ভুঞ্জামি, উপোসথিকোম্হী’’তি পটিক্খিপিত্ৰা তং পুচ্ছন্তো –

‘‘যং ত্ৰং সুখেনাভিসমেক্খসে মং, ভুঞ্জস্সু ভত্তং ইতি মং ৰদেসি;

পুচ্ছামি তং নারি মহানুভাৰে, দেৰী নুসি ত্ৰং উদ মানুসী নূ’’তি. (জা. ১.১০.৪২) –

আহ. সা তস্স পটিৰচনং দেন্তী –

‘‘দেৰী অহং সঙ্খ মহানুভাৰা, ইধাগতা সাগরৰারিমজ্ঝে;

অনুকম্পিকা নো চ পদুট্ঠচিত্তা, তৰেৰ অত্থায ইধাগতাস্মি.

‘‘ইধন্নপানং সযনাসনঞ্চ, যানানি নানাৰিৰিধানি সঙ্খ;

সব্বস্স ত্যাহং পটিপাদযামি, যং কিঞ্চি তুয্হং মনসাভিপত্থিত’’ন্তি. (জা. ১.১০.৪৩-৪৪) –

ইমা গাথা অভাসি. তং সুত্ৰা মহাসত্তো ‘‘অযং দেৰধীতা সমুদ্দপিট্ঠে ময্হং ‘ইদঞ্চিদঞ্চ দম্মী’তি ৰদতি, যঞ্চেসা ময্হং দেতি, তম্পি মম পুঞ্ঞেনেৰ, তং পন পুঞ্ঞং অযং দেৰধীতা জানাতি নু খো, উদাহু ন জানাতি, পুচ্ছিস্সামি তাৰ ন’’ন্তি চিন্তেত্ৰা পুচ্ছন্তো ইমং গাথমাহ –

‘‘যং কিঞ্চি যিট্ঠঞ্চ হুতঞ্চ ময্হং, সব্বস্স নো ইস্সরা ত্ৰং সুগত্তে;

সুস্সোণি সুব্ভূরু ৰিলগ্গমজ্ঝে, কিস্স মে কম্মস্স অযং ৰিপাকো’’তি. (জা. ১.১০.৪৫);

তত্থ যিট্ঠন্তি দানৰসেন যজিতং. হুতন্তি আহুনপাহুনৰসেন দিন্নং. সব্বস্স নো ইস্সরা ত্ৰন্তি অম্হাকং পুঞ্ঞকম্মস্স সব্বস্স ত্ৰং ইস্সরা, ‘‘অযং ইমস্স ৰিপাকো, অযং ইমস্সা’’তি ব্যাকরিতুং সমত্থা. সুস্সোণীতি সুন্দরজঘনে. সুব্ভূরূতি সুন্দরেহি ভমুকেহি ঊরূহি চ সমন্নাগতে. ৰিলগ্গমজ্ঝেতি ৰিলগ্গতনুমজ্ঝে. কিস্স মেতি মযা কতকম্মেসু কতরকম্মস্স অযং ৰিপাকো, যেনাহং অপ্পতিট্ঠে মহাসমুদ্দে অজ্জ পতিট্ঠং লভামীতি.

তং সুত্ৰা দেৰধীতা ‘‘অযং ব্রাহ্মণো ‘যং অত্তনা কুসলকম্মং কতং, তং কম্মং ন জানাতী’তি সঞ্ঞায পুচ্ছতি মঞ্ঞে, কথেস্সামি ন’’ন্তি নাৰাভিরুহনদিৰসে পচ্চেকবুদ্ধস্স ছত্তুপাহনদানপুঞ্ঞমেৰ তস্স কারণন্তি কথেন্তী –

‘‘ঘম্মে পথে ব্রাহ্মণ একভিক্খুং, উগ্ঘট্টপাদং তসিতং কিলন্তং;

পটিপাদযী সঙ্খ উপাহনানি, সা দক্খিণা কামদুহা তৰজ্জা’’তি. (জা. ১.১০.৪৬) –

গাথমাহ.

তত্থ একভিক্খুন্তি একং পচ্চেকবুদ্ধং সন্ধাযাহ. উগ্ঘট্টপাদন্তি উণ্হৰালুকায ঘট্টপাদং, ৰিবাধিতপাদন্তি অত্থো. তসিতন্তি পিপাসিতং. পটিপাদযীতি পটিপাদেসি যোজেসি. কামদুহাতি সব্বকামদাযিকা.

তং সুত্ৰা মহাসত্তো ‘‘এৰরূপেপি নাম অপ্পতিট্ঠে মহাসমুদ্দে মযা দিন্নং ছত্তুপাহনদানং মম সব্বকামদদং জাতং অহো সুদিন্ন’’ন্তি তুট্ঠচিত্তো –

‘‘সা হোতু নাৰা ফলকূপপন্না, অনৰস্সুতা এরকৰাতযুত্তা;

অঞ্ঞস্স যানস্স ন হেত্থ ভূমি, অজ্জেৰ মং মোল়িনিং পাপযস্সূ’’তি. (জা. ১.১০.৪৭) –

গাথমাহ.

তত্থ ফলকূপপন্নাতি মহানাৰতায বহূহি ফলকেহি উপেতা. উদকপ্পৰেসনাভাৰেন অনৰস্সুতা. সম্মা গহেত্ৰা গমনকৰাতেন এরকৰাতযুত্তা.

দেৰধীতা তস্স ৰচনং সুত্ৰা তুট্ঠহট্ঠা দীঘতো অট্ঠউসভং ৰিত্থারতো চতুউসভং গম্ভীরতো ৰীসতিযট্ঠিকং সত্তরতনমযং নাৰং মাপেত্ৰা কূপফিযারিত্তযুত্তানি ইন্দনীলরজতসুৰণ্ণমযাদীনি নিম্মিনিত্ৰা সত্তন্নং রতনানং পূরেত্ৰা ব্রাহ্মণং আলিঙ্গেত্ৰা নাৰং আরোপেসি, উপট্ঠাকং পনস্স ন ওলোকেসি. ব্রাহ্মণো অত্তনা কতকল্যাণতো তস্স পত্তিং অদাসি, সো অনুমোদি. অথ দেৰধীতা তম্পি আলিঙ্গেত্ৰা নাৰায পতিট্ঠাপেত্ৰা তং নাৰং মোল়িনীনগরং নেত্ৰা ব্রাহ্মণস্স ঘরে ধনং পতিট্ঠাপেত্ৰা অত্তনো ৰসনট্ঠানমেৰ অগমাসি. তেনাহ ভগৰা –

‘‘সা তত্থ ৰিত্তা সুমনা পতীতা, নাৰং সুচিত্তং অভিনিম্মিনিত্ৰা;

আদায সঙ্খং পুরিসেন সদ্ধিং, উপানযী নগরং সাধুরম্ম’’ন্তি. (জা. ১.১০.৪৮);

মহাপুরিসস্স হি চিত্তসম্পত্তিযা পচ্চেকবুদ্ধস্স চ নিরোধতো ৰুট্ঠিতভাৰেন সত্তসু চেতনাসু আদিচেতনা দিট্ঠধম্মৰেদনীযা অতিউল়ারফলা চ জাতা. ইদম্পি তস্স দানস্স অপ্পমত্তফলন্তি দট্ঠব্বং. অপরিমাণফলঞ্হি তং দানং বোধিসম্ভারভূতং. তেন ৰুত্তং –

১৯.

‘‘তেনেৰাহং সতগুণতো, সুখুমালো সুখেধিতো;

অপি চ দানং পরিপূরেন্তো, এৰং তস্স অদাসহ’’ন্তি.

তত্থ তেনাতি ততো পচ্চেকবুদ্ধতো, সতগুণতোতি সতগুণেন অহং তদা সঙ্খভূতো সুখুমালো, তস্মা সুখেধিতো সুখসংৰড্ঢো, অপি চ এৰং সন্তেপি দানং পরিপূরেন্তো, এৰং ময্হং দানপারমী পরিপূরেতূতি তস্স পচ্চেকবুদ্ধস্স অত্তনো সরীরদুক্খং অনপেক্খিত্ৰা ছত্তুপাহনং অদাসিন্তি অত্তনো দানজ্ঝাসযস্স উল়ারভাৰং সত্থা পৰেদেসি.

বোধিসত্তোপি যাৰজীৰং অমিতধনগেহং অজ্ঝাৰসন্তো ভিয্যোসোমত্তায দানানি দত্ৰা সীলানি রক্খিত্ৰা আযুপরিযোসানে সপরিসো দেৰনগরং পূরেসি.

তদা দেৰধীতা উপ্পলৰণ্ণা অহোসি, পুরিসো আনন্দত্থেরো, লোকনাথো সঙ্খব্রাহ্মণো.

তস্স সুৰিসুদ্ধনিচ্চসীলউপোসথসীলাদিৰসেন সীলপারমী দানসীলাদীনং পটিপক্খতো নিক্খন্তত্তা কুসলধম্মৰসেন নেক্খম্মপারমী, দানাদিনিপ্ফাদনত্থং অব্ভুস্সহনৰসেন তথা মহাসমুদ্দতরণৰাযামৰসেন চ ৰীরিযপারমী, তদত্থং অধিৰাসনখন্তিৰসেন খন্তিপারমী, পটিঞ্ঞানুরূপপ্পটিপত্তিযা সচ্চপারমী, সব্বত্থ অচলসমাদানাধিট্ঠানৰসেন অধিট্ঠানপারমী, সব্বসত্তেসু হিতজ্ঝাসযৰসেন মেত্তাপারমী, সত্তসঙ্খারকতৰিপ্পকারেসু মজ্ঝত্তভাৰপ্পত্তিযা উপেক্খাপারমী, সব্বপারমীনং উপকারানুপকারে ধম্মে জানিত্ৰা অনুপকারে ধম্মে পহায উপকারধম্মেসু পৰত্তাপনপুরেচরা সহজাতা চ উপাযকোসল্লভূতা পঞ্ঞা পঞ্ঞাপারমীতি ইমাপি পারমিযো লব্ভন্তি.

দানজ্ঝাসযস্স পন অতিউল়ারভাৰেন দানপারমীৰসেন দেসনা পৰত্তা. যস্মা চেত্থ দস পারমিযো লব্ভন্তি, তস্মা হেট্ঠা ৰুত্তা মহাকরুণাদযো বোধিসত্তগুণা ইধাপি যথারহং নিদ্ধারেতব্বা. তথা অত্তনো ভোগসুখং অনপেক্খিত্ৰা মহাকরুণায ‘‘দানপারমিং পূরেস্সামী’’তি দানসম্ভারসংহরণত্থং সমুদ্দতরণং, তত্থ চ সমুদ্দপতিতস্সপি উপোসথাধিট্ঠানং, সীলখণ্ডভযেন দেৰধীতাযপি উপগতায আহারানাহরণন্তি এৰমাদযো মহাসত্তস্স গুণা ৰেদিতব্বা. ইদানি ৰক্খমানেসু সেসচরিতেসু ইমিনাৰ নযেন গুণনিদ্ধারণং ৰেদিতব্বং. তত্থ তত্থ ৰিসেসমত্তমেৰ ৰক্খাম. তেনেতং ৰুচ্চতি –

‘‘এৰং অচ্ছরিযা হেতে, অব্ভুতা চ মহেসিনো…পে…;

পগেৰানুকিরিযা তেসং, ধম্মস্স অনুধম্মতো’’তি.

সঙ্খব্রাহ্মণচরিযাৰণ্ণনা নিট্ঠিতা.

৩. কুরুরাজচরিযাৰণ্ণনা

২০.

ততিযে ইন্দপত্থে পুরুত্তমেতি ইন্দপত্থনামকে কুরুরট্ঠস্স পুরৰরে উত্তমনগরে. রাজাতি ধম্মেন সমেন চতূহি সঙ্গহৰত্থূহি পরিসং রঞ্জেতীতি রাজা. কুসলে দসহুপাগতোতি কুসলেহি দসহি সমন্নাগতো, দানাদীহি দসহি পুঞ্ঞকিরিযৰত্থূহি, দসহি কুসলকম্মপথেহি ৰা যুত্তোতি অত্থো.

২১. কলিঙ্গরট্ঠৰিসযাতি কলিঙ্গরট্ঠসঙ্খাতৰিসযা. ব্রাহ্মণা উপগঞ্ছু মন্তি কলিঙ্গরাজেন উয্যোজিতা অট্ঠ ব্রাহ্মণা মং উপসঙ্কমিংসু. উপসঙ্কমিত্ৰা চ পন আযাচুং মং হত্থিনাগন্তি হত্থিভূতং মহানাগং মং আযাচিংসু. ধঞ্ঞন্তি ধনাযিতব্বসিরিসোভগ্গপ্পত্তং লক্খণসম্পন্নং. মঙ্গলসম্মতন্তি তাযযেৰ লক্খণসম্পত্তিযা মঙ্গলং অভিৰুড্ঢিকারণন্তি অভিসম্মতং জনেহি.

২২. অৰুট্ঠিকোতি ৰস্সরহিতো. দুব্ভিক্খোতি দুল্লভভোজনো. ছাতকো মহাতি মহতী জিঘচ্ছাবাধা ৰত্ততীতি অত্থো. দদাহীতি দেহি. নীলন্তি নীলৰণ্ণং. অঞ্জনসৰ্হযন্তি অঞ্জনসদ্দেন অৰ্হাতব্বং, অঞ্জননামকন্তি অত্থো. ইদং ৰুত্তং হোতি – অম্হাকং কলিঙ্গরট্ঠং অৰুট্ঠিকং, তেন ইদানি মহাদুব্ভিক্খং তত্থ মহন্তং ছাতকভযং উপ্পন্নং, তস্স ৰূপসমত্থায ইমং অঞ্জনগিরিসঙ্কাসং তুয্হং অঞ্জননামকং মঙ্গলহত্থিং দেহি, ইমস্মিঞ্হি তত্থ নীতে দেৰো ৰস্সিস্সতি, তেন তং সব্বভযং ৰূপসম্মিস্সতীতি. তত্রাযং অনুপুব্বিকথা –

অতীতে কুরুরট্ঠে ইন্দপত্থনগরে বোধিসত্তো কুরুরাজস্স অগ্গমহেসিযা কুচ্ছিম্হি পটিসন্ধিং গহেত্ৰা অনুপুব্বেন ৰিঞ্ঞুতং পত্তো, তক্কসিলং গন্ত্ৰা যোগৰিহিতানি সিপ্পাযতনানি ৰিজ্জাট্ঠানানি চ উগ্গহেত্ৰা পচ্চাগতো পিতরা উপরজ্জে ঠপিতো, অপরভাগে পিতু অচ্চযেন রজ্জং পত্ৰা দস রাজধম্মে অকোপেন্তো ধম্মেন রজ্জং কারেসি ধনঞ্জযো নাম নামেন. সো চতূসু নগরদ্ৰারেসু নগরমজ্ঝে নিৰেসনদ্ৰারেতি ছ দানসালাযো কারেত্ৰা দেৰসিকং ছসতসহস্সং ধনং ৰিস্সজ্জেন্তো সকলজম্বুদীপং উন্নঙ্গলং কত্ৰা দানং অদাসি. তস্স দানজ্ঝাসযতা দানাভিরতি সকলজম্বুদীপং পত্থরি.

তস্মিং কালে কলিঙ্গরট্ঠে দুব্ভিক্খভযং ছাতকভযং রোগভযন্তি তীণি ভযানি উপ্পজ্জিংসু. সকলরট্ঠৰাসিনো দন্তপুরং গন্ত্ৰা রাজভৰনদ্ৰারে উক্কুট্ঠিমকংসু ‘‘দেৰং ৰস্সাপেহি দেৰা’’তি. রাজা তং সুত্ৰা ‘‘কিংকারণা এতে ৰিরৰন্তী’’তি অমচ্চে পুচ্ছি. অমচ্চা রঞ্ঞো তমত্থং আরোচেসুং. রাজা পোরাণকরাজানো দেৰে অৰস্সন্তে কিং করোন্তীতি. ‘‘দেৰো ৰস্সতূ’’তি দানং দত্ৰা উপোসথং অধিট্ঠায সমাদিন্নসীলা সিরিগব্ভং পৰিসিত্ৰা দব্বসন্থরে সত্তাহং নিপজ্জন্তীতি. তং সুত্ৰা তথা অকাসি. দেৰো ন ৰস্সি, এৰং রাজা অহং মযা কত্তব্বকিচ্চং অকাসিং, দেৰো ন ৰস্সতি, কিন্তি করোমাতি. দেৰ, ইন্দপত্থনগরে ধনঞ্জযস্স নাম কুরুরাজস্স মঙ্গলহত্থিম্হি আনীতে দেৰো ৰস্সিস্সতীতি. সো রাজা বলৰাহনসম্পন্নো দুপ্পসহো, কথমস্স হত্থিং আনেস্সামাতি. মহারাজ, তেন সদ্ধিং যুদ্ধকিচ্চং নত্থি, দানজ্ঝাসযো সো রাজা দানাভিরতো যাচিতো সমানো অলঙ্কতসীসম্পি ছিন্দিত্ৰা পসাদসম্পন্নানি অক্খীনিপি উপ্পাটেত্ৰা সকলরজ্জম্পি নিয্যাতেত্ৰা দদেয্য, হত্থিম্হি ৰত্তব্বমেৰ নত্থি, অৰস্সং যাচিতো সমানো দস্সতীতি. কে পন যাচিতুং সমত্থাতি? ব্রাহ্মণা, মহারাজাতি. রাজা অট্ঠ ব্রাহ্মণে পক্কোসাপেত্ৰা সক্কারসম্মানং কত্ৰা পরিব্বযং দত্ৰা হত্থিযাচনত্থং পেসেসি. তে সব্বত্থ একরত্তিৰাসেন তুরিতগমনং গন্ত্ৰা কতিপাহং নগরদ্ৰারে দানসালাসু ভুঞ্জন্তা সরীরং সন্তপ্পেত্ৰা রঞ্ঞো দানগ্গং আগমনপথে কালং আগমযমানা পাচীনদ্ৰারে অট্ঠংসু.

বোধিসত্তোপি পাতোৰ ন্হাতানুলিত্তো সব্বালঙ্কারপ্পটিমণ্ডিতো অলঙ্কতৰরৰারণখন্ধগতো মহন্তেন রাজানুভাৰেন দানসালং গন্ত্ৰা ওতরিত্ৰা সত্তট্ঠজনানং সহত্থেন দানং দত্ৰা ‘‘ইমিনাৰ নীহারেন দেথা’’তি ৰত্ৰা হত্থিং অভিরুহিত্ৰা দক্খিণদ্ৰারং অগমাসি. ব্রাহ্মণা পাচীনদ্ৰারে আরক্খস্স বলৰতায ওকাসং অলভিত্ৰা দক্খিণদ্ৰারং গন্ত্ৰা রাজানং আগচ্ছন্তং উল্লোকযমানা দ্ৰারতো নাতিদূরে উন্নতট্ঠানে ঠিতা সম্পত্তং রাজানং হত্থে উক্খিপিত্ৰা জযাপেসুং. রাজা ৰজিরঙ্কুসেন ৰারণং নিৰত্তেত্ৰা তেসং সন্তিকং গন্ত্ৰা তে ব্রাহ্মণে ‘‘কিং ইচ্ছথা’’তি পুচ্ছি. ব্রাহ্মণা ‘‘কলিঙ্গরট্ঠং দুব্ভিক্খভযেন ছাতকভযেন রোগভযেন চ উপদ্দুতং. সো উপদ্দৰো ইমস্মিং তৰ মঙ্গলহত্থিম্হি নীতে ৰূপসম্মিস্সতি. তস্মা ইমং অঞ্জনৰণ্ণং নাগং অম্হাকং দেহী’’তি আহংসু. তমত্থং পকাসেন্তো সত্থা আহ ‘‘কলিঙ্গরট্ঠৰিসযা…পে… অঞ্জনসৰ্হয’’ন্তি. তস্সত্থো ৰুত্তো এৰ.

অথ বোধিসত্তো ‘‘ন মেতং পতিরূপং, যং মে যাচকানং মনোরথৰিঘাতো সিযা, ময্হঞ্চ সমাদানভেদো সিযা’’তি হত্থিক্খন্ধতো ওতরিত্ৰা ‘‘সচে অনলঙ্কতট্ঠানং অত্থি, অলঙ্করিত্ৰা দস্সামী’’তি সমন্ততো ওলোকেত্ৰা অনলঙ্কতট্ঠানং অদিস্ৰা সোণ্ডায নং গহেত্ৰা ব্রাহ্মণানং হত্থেসু ঠপেত্ৰা রতনভিঙ্গারেন পুপ্ফগন্ধৰাসিতং উদকং পাতেত্ৰা অদাসি. তেন ৰুত্তং –

২৩.

‘‘ন মে যাচকমনুপ্পত্তে, পটিক্খেপো অনুচ্ছৰো;

মা মে ভিজ্জি সমাদানং, দস্সামি ৰিপুলং গজং.

২৪.

‘‘নাগং গহেত্ৰা সোণ্ডায, ভিঙ্গারে রতনামযে;

জলং হত্থে আকিরিত্ৰা, ব্রাহ্মণানং অদং গজ’’ন্তি.

তত্থ যাচকমনুপ্পত্তেতি যাচকে অনুপ্পত্তে. অনুচ্ছৰোতি অনুচ্ছৰিকো পতিরূপো. মা মে ভিজ্জি সমাদানন্তি সব্বঞ্ঞুতঞ্ঞাণত্থায সব্বস্স যাচকস্স সব্বং অনৰজ্জং ইচ্ছিতং দদন্তো দানপারমিং পূরেস্সামীতি যং ময্হং সমাদানং, তং মা ভিজ্জি. তস্মা দস্সামি ৰিপুলং গজন্তি মহন্তং ইমং মঙ্গলহত্থিং দস্সামীতি. অদন্তি অদাসিং.

২৫.

তস্মিং পন হত্থিম্হি দিন্নে অমচ্চা বোধিসত্তং এতদৰোচুং – ‘‘কস্মা, মহারাজ, মঙ্গলহত্থিং দদত্থ, ননু অঞ্ঞো হত্থী দাতব্বো, রঞ্ঞা নাম এৰরূপো ওপৰয্হো মঙ্গলহত্থী ইস্সরিযং অভিৰিজযঞ্চ আকঙ্খন্তেন ন দাতব্বো’’তি. মহাসত্তো যং মং যাচকা যাচন্তি, তদেৰ মযা দাতব্বং, সচে পন মং রজ্জং যাচেয্যুং, রজ্জম্পি তেসং দদেয্যং, ময্হং রজ্জতোপি জীৰিততোপি সব্বঞ্ঞুতঞ্ঞাণমেৰ পিযতরং, তস্মা তং হত্থিং অদাসিন্তি আহ. তেন ৰুত্তং ‘‘তস্স নাগে পদিন্নম্হী’’তিআদি. তত্থ তস্সাতি তস্স তেন, তস্মিং নাগে হত্থিম্হি দিন্নে.

২৬. মঙ্গলসম্পন্নন্তি মঙ্গলগুণেহি সমন্নাগতং. সঙ্গামৰিজযুত্তমন্তি সঙ্গামৰিজযা উত্তমং, সঙ্গামৰিজযে ৰা উত্তমং পধানং পৰরং নাগং. কিং তে রজ্জং করিস্সতীতি তস্মিং নাগে অপগতে তৰ রজ্জং কিং করিস্সতি, রজ্জকিচ্চং ন করিস্সতি, রজ্জম্পি অপগতমেৰাতি দস্সেতি.

২৭. রজ্জম্পি মে দদে সব্বন্তি তিট্ঠতু নাগো তিরচ্ছানগতো, ইদং মে সব্বং কুরুরট্ঠম্পি যাচকানং দদেয্যং. সরীরং দজ্জমত্তনোতি রজ্জেপি ৰা কিং ৰত্তব্বং, অত্তনো সরীরম্পি যাচকানং দদেয্যং, সব্বোপি হি মে অজ্ঝত্তিকবাহিরো পরিগ্গহো লোকহিতত্থমেৰ মযা পরিচ্চত্তো. যস্মা সব্বঞ্ঞুতং পিযং ময্হং সব্বঞ্ঞুতা চ দানপারমিং আদিং কত্ৰা সব্বপারমিযো অপূরেন্তেন ন সক্কা লদ্ধুং, তস্মা নাগং অদাসিং অহন্তি দস্সেতি.

এৰম্পি তস্মিং নাগে আনীতে কলিঙ্গরট্ঠে দেৰো ন ৰস্সতেৰ. কলিঙ্গরাজা ‘‘ইদানিপি ন ৰস্সতি, কিং নু খো কারণ’’ন্তি পুচ্ছিত্ৰা ‘‘কুরুরাজা গরুধম্মে রক্খতি, তেনস্স রট্ঠে অন্ৰদ্ধমাসং অনুদসাহং দেৰো ৰস্সতি, রঞ্ঞো গুণানুভাৰো এস, ন ইমস্স তিরচ্ছানগতস্সা’’তি জানিত্ৰা ‘‘মযম্পি গরুধম্মে রক্খিস্সাম, গচ্ছথ ধনঞ্চযকোরব্যস্স সন্তিকে তে সুৰণ্ণপট্টে লিখাপেত্ৰা আনেথা’’তি অমচ্চে পেসেসি. গরুধম্মা ৰুচ্চন্তি পঞ্চ সীলানি, তানি বোধিসত্তো সুপরিসুদ্ধানি কত্ৰা রক্খতি, যথা চ বোধিসত্তো. এৰমস্স মাতা অগ্গমহেসী, কনিট্ঠভাতা উপরাজা, পুরোহিতো ব্রাহ্মণো, রজ্জুগ্গাহকো অমচ্চো, সারথি সেট্ঠি, দোণমাপকো দোৰারিকো, নগরসোভিনী ৰণ্ণদাসীতি. তেন ৰুত্তং –

‘‘রাজা মাতা মহেসী চ, উপরাজা পুরোহিতো;

রজ্জুগ্গাহো সারথী সেট্ঠি, দোণো দোৰারিকো তথা;

গণিকা তে একাদস, গরুধম্মে পতিট্ঠিতা’’তি.

তে অমচ্চা বোধিসত্তং উপসঙ্কমিত্ৰা ৰন্দিত্ৰা তমত্থং আরোচেসুং. মহাসত্তো ‘‘ময্হং গরুধম্মে কুক্কুচ্চং অত্থি, মাতা পন মে সুরক্খিতং রক্খতি, তস্সা সন্তিকে গণ্হথা’’তি ৰত্ৰা তেহি ‘‘মহারাজ, কুক্কুচ্চং নাম সিক্খাকামস্স সল্লেখৰুত্তিনো হোতি, দেথ নো’’তি যাচিতো ‘‘পাণো ন হন্তব্বো, অদিন্নং ন আদাতব্বং, কামেসুমিচ্ছাচারো ন চরিতব্বো, মুসা ন ভণিতব্বং, মজ্জং ন পাতব্ব’’ন্তি সুৰণ্ণপট্টে লিখাপেত্ৰা ‘‘এৰং সন্তেপি মাতু সন্তিকে গণ্হথা’’তি আহ.

দূতা রাজানং ৰন্দিত্ৰা তস্সা সন্তিকং গন্ত্ৰা ‘‘দেৰি, তুম্হে কির গরুধম্মং রক্খথ, তং নো দেথা’’তি ৰদিংসু. বোধিসত্তস্স মাতাপি তথেৰ অত্তনো কুক্কুচ্চস্স অত্থিভাৰং ৰত্ৰাৰ তেহি যাচিতা অদাসি. তথা মহেসিআদযোপি. তে সব্বেসম্পি সন্তিকে সুৰণ্ণপট্টে গরুধম্মে লিখাপেত্ৰা দন্তপুরং গন্ত্ৰা কলিঙ্গরঞ্ঞো দত্ৰা তং পৰত্তিং আরোচেসুং. সোপি রাজা তস্মিং ধম্মে ৰত্তমানো পঞ্চ সীলানি পূরেসি. ততো সকলকলিঙ্গরট্ঠে দেৰো ৰস্সি. তীণি ভযানি ৰূপসন্তানি. রট্ঠং খেমং সুভিক্খং অহোসি. বোধিসত্তো যাৰজীৰং দানাদীনি পুঞ্ঞানি কত্ৰা সপরিসো সগ্গপুরং পূরেসি.

তদা গণিকাদযো উপ্পলৰণ্ণাদযো অহেসুং. ৰুত্তঞ্হেতং –

‘‘গণিকা উপ্পলৰণ্ণা, পুণ্ণো দোৰারিকো তদা;

রজ্জুগ্গাহো চ কচ্চানো, দোণমাপকো চ কোলিতো.

‘‘সারিপুত্তো তদা সেট্ঠি, অনুরুদ্ধো চ সারথি;

ব্রাহ্মণো কস্সপো থেরো, উপরাজানন্দপণ্ডিতো.

‘‘মহেসী রাহুলমাতা, মাযাদেৰী জনেত্তিকা;

কুরুরাজা বোধিসত্তো, এৰং ধারেথ জাতক’’ন্তি. (ধ. প. অট্ঠ. ২.৩৬১ হংসঘাতকভিক্খুৰত্থু);

ইধাপি নেক্খম্মপারমিআদযো সেসধম্মা চ ৰুত্তনযেনেৰ নিদ্ধারেতব্বাতি.

কুরুরাজচরিযাৰণ্ণনা নিট্ঠিতা.

৪. মহাসুদস্সনচরিযাৰণ্ণনা

২৮. চতুত্থে কুসাৰতিম্হি নগরেতি কুসাৰতীনামকে নগরে, যস্মিং ঠানে এতরহি কুসিনারা নিৰিট্ঠা. মহীপতীতি খত্তিযো, নামেন মহাসুদস্সনো নাম. চক্কৰত্তীতি চক্করতনং ৰত্তেতি চতূহি ৰা সম্পত্তিচক্কেহি ৰত্ততি, তেহি চ পরং পৰত্তেতি, পরহিতায চ ইরিযাপথচক্কানং ৰত্তো এতস্মিং অত্থীতিপি চক্কৰত্তী. অথ ৰা চতূহি অচ্ছরিযধম্মেহি সঙ্গহৰত্থূহি চ সমন্নাগতেন, পরেহি অনভিভৰনীযস্স অনতিক্কমনীযস্স আণাসঙ্খাতস্স চক্কস্স ৰত্তো এতস্মিং অত্থীতিপি চক্কৰত্তী. পরিণাযকরতনপুব্বঙ্গমেন হত্থিরতনাদিপমুখেন মহাবলকাযেন পুঞ্ঞানুভাৰনিব্বত্তেন কাযবলেন চ সমন্নাগতত্তা মহব্বলো. যদা আসিন্তি সম্বন্ধো. তত্রাযং অনুপুব্বিকথা –

অতীতে কির মহাপুরিসো সুদস্সনত্তভাৰতো ততিযে অত্তভাৰে গহপতিকুলে নিব্বত্তো ধরমানকস্স বুদ্ধস্স সাসনে একং থেরং অরঞ্ঞৰাসং ৰসন্তং অত্তনো কম্মেন অরঞ্ঞং পৰিট্ঠো রুক্খমূলে নিসিন্নং দিস্ৰা ‘‘ইধ মযা অয্যস্স পণ্ণসালং কাতুং ৰট্টতী’’তি চিন্তেত্ৰা অত্তনো কম্মং পহায দব্বসম্ভারং ছিন্দিত্ৰা নিৰাসযোগ্গং পণ্ণসালং কত্ৰা দ্ৰারং যোজেত্ৰা কট্ঠত্থরণং কত্ৰা ‘‘করিস্সতি নু খো পরিভোগং, ন নু খো করিস্সতী’’তি একমন্তে নিসীদি. থেরো অন্তোগামতো আগন্ত্ৰা পণ্ণসালং পৰিসিত্ৰা কট্ঠত্থরণে নিসীদি. মহাসত্তোপি নং উপসঙ্কমিত্ৰা ‘‘ফাসুকা, ভন্তে, পণ্ণসালা’’তি পুচ্ছি. ফাসুকা, ভদ্দমুখ, পব্বজিতসারুপ্পাতি. ৰসিস্সথ, ভন্তে, ইধাতি? আম, উপাসকাতি. সো অধিৰাসনাকারেনেৰ ‘‘ৰসিস্সতী’’তি ঞত্ৰা ‘‘নিবদ্ধং ময্হং ঘরদ্ৰারং আগন্তব্ব’’ন্তি পটিজানাপেত্ৰা নিচ্চং অত্তনো ঘরেযেৰ ভত্তৰিস্সগ্গং কারাপেসি. সো পণ্ণসালাযং কটসারকং পত্থরিত্ৰা মঞ্চপীঠং পঞ্ঞপেসি, অপস্সেনং নিক্খিপি, পাদকঠলিকং ঠপেসি, পোক্খরণিং খণি, চঙ্কমং কত্ৰা ৰালুকং ওকিরি, পরিস্সযৰিনোদনত্থং পণ্ণসালং কণ্টকৰতিযা পরিক্খিপি, তথা পোক্খরণিং চঙ্কমঞ্চ. তেসং অন্তোৰতিপরিযন্তে তালপন্তিযো রোপেসি. এৰমাদিনা আৰাসং নিট্ঠাপেত্ৰা থেরস্স তিচীৰরং আদিং কত্ৰা সব্বং সমণপরিক্খারং অদাসি. থেরস্স হি তদা বোধিসত্তেন তিচীৰরপিণ্ডপাতপত্তথালকপরিস্সাৰনধমকরণপরিভোগভাজনছত্তুপাহনউদকতুম্বসূচিকত্তর- যট্ঠিআরকণ্টকপিপ্ফলিনখচ্ছেদনপদীপেয্যাদি পব্বজিতানং পরিভোগজাতং অদিন্নং নাম নাহোসি. সো পঞ্চ সীলানি রক্খন্তো উপোসথং করোন্তো যাৰজীৰং থেরং উপট্ঠহি. থেরো তত্থেৰ ৰসন্তো অরহত্তং পত্ৰা পরিনিব্বাযি.

২৯. বোধিসত্তোপি যাৰতাযুকং পুঞ্ঞং কত্ৰা দেৰলোকে নিব্বত্তিত্ৰা ততো চুতো মনুস্সলোকং আগচ্ছন্তো কুসাৰতিযা রাজধানিযা নিব্বত্তিত্ৰা মহাসুদস্সনো নাম রাজা অহোসি চক্কৰত্তী. তস্সিস্সরিযানুভাৰো ‘‘ভূতপুব্বং, আনন্দ, রাজা মহাসুদস্সনো নাম অহোসি খত্তিযো মুদ্ধাৰসিত্তো’’তিআদিনা (দী. নি. ২.২৪২) নযেন সুত্তে আগতো এৰ. তস্স কির চতুরাসীতি নগরসহস্সানি কুসাৰতীরাজধানিপ্পমুখানি, চতুরাসীতি পাসাদসহস্সানি ধম্মপাসাদপ্পমুখানি, চতুরাসীতি কূটাগারসহস্সানি মহাব্যূহকূটাগারপ্পমুখানি, তানি সব্বানি তস্স থেরস্স কতায একিস্সা পণ্ণসালায নিস্সন্দেন নিব্বত্তানি, চতুরাসীতি পল্লঙ্কসহস্সানি নাগসহস্সানি অস্সসহস্সানি রথসহস্সানি তস্স দিন্নস্স মঞ্চপীঠস্স, চতুরাসীতি মণিসহস্সানি তস্স দিন্নস্স পদীপস্স, চতুরাসীতি পোক্খরণিসহস্সানি একপোক্খরণিযা, চতুরাসীতি ইত্থিসহস্সানি পুত্তসহস্সানি গহপতিসহস্সানি চ পত্তথালকাদিপরিভোগারহস্স পব্বজিতপরিক্খারদানস্স, চতুরাসীতি ধেনুসহস্সানি পঞ্চগোরসদানস্স, চতুরাসীতি ৰত্থকোট্ঠসহস্সানি নিৰাসনপারুপনদানস্স, চতুরাসীতি থালিপাকসহস্সানি ভোজনদানস্স নিস্সন্দেন নিব্বত্তানি. সো সত্তহি রতনেহি চতূহি ইদ্ধীহি চ সমন্নাগতো রাজাধিরাজা হুত্ৰা সকলং সাগরপরিযন্তং পথৰিমণ্ডলং ধম্মেন অভিৰিজিয অজ্ঝাৰসন্তো অনেকসতেসু ঠানেসু দানসালাযো কারেত্ৰা মহাদানং পট্ঠপেসি. দিৰসস্স তিক্খত্তুং নগরে ভেরিং চরাপেসি ‘‘যো যং ইচ্ছতি, সো দানসালাসু আগন্ত্ৰা তং গণ্হাতূ’’তি. তেন ৰুত্তং ‘‘তত্থাহং দিৰসে তিক্খত্তুং, ঘোসাপেমি তহিং তহি’’ন্তিআদি.

তত্থ তত্থাতি তস্মিং নগরে. ‘‘তদাহ’’ন্তিপি পাঠো, তস্স তদা অহং, মহাসুদস্সনকালেতি অত্থো. তহিং তহিন্তি তস্মিং তস্মিং ঠানে, তস্স তস্স পাকারস্স অন্তো চ বহি চাতি অত্থো. কো কিং ইচ্ছতীতি ব্রাহ্মণাদীসু যো কোচি সত্তো অন্নাদীসু দেয্যধম্মেসু যং কিঞ্চি ইচ্ছতি. পত্থেতীতি তস্সেৰ ৰেৰচনং. কস্স কিং দীযতু ধনন্তি অনেকৰারং পরিযাযন্তরেহি চ দানঘোসনায পৰত্তিতভাৰদস্সনত্থং ৰুত্তং, এতেন দানপারমিযা সরূপং দস্সেতি. দেয্যধম্মপটিগ্গাহকৰিকপ্পরহিতা হি বোধিসত্তানং দানপারমীতি.

৩০. ইদানি দানঘোসনায তস্স তস্স দেয্যধম্মস্স অনুচ্ছৰিকপুগ্গলপরিকিত্তনং দস্সেতুং ‘‘কো ছাতকো’’তিআদি ৰুত্তং.

তত্থ ছাতকোতি জিঘচ্ছিতো. তসিতোতি পিপাসিতো. কো মালং কো ৰিলেপনন্তিপি ‘‘ইচ্ছতী’’তি পদং আনেত্ৰা যোজেতব্বং. নগ্গোতি ৰত্থৰিকলো, ৰত্থেন অত্থিকোতি অধিপ্পাযো. পরিদহিস্সতীতি নিৰাসিস্সতি.

৩১. কো পথে ছত্তমাদেতীতি কো পথিকো পথে মগ্গে অত্তনো ৰস্সৰাতাতপরক্খণত্থং ছত্তং গণ্হাতি, ছত্তেন অত্থিকোতি অত্থো. কোপাহনা মুদূ সুভাতি দস্সনীযতায সুভা সুখসম্ফস্সতায মুদূ উপাহনা অত্তনো পাদানং চক্খূনঞ্চ রক্খণত্থং. কো আদেতীতি কো তাহি অত্থিকোতি অধিপ্পাযো. সাযঞ্চ পাতো চাতি এত্থ চ-সদ্দেন মজ্ঝন্হিকে চাতি আহরিত্ৰা ৰত্তব্বং. ‘‘দিৰসে তিক্খত্তুং ঘোসাপেমী’’তি হি ৰুত্তং.

৩২. ন তং দসসু ঠানেসূতি তং দানং ন দসসু ঠানেসু পটিযত্তন্তি যোজনা. নপি ঠানসতেসু ৰা পটিযত্তং, অপি চ খো অনেকসতেসু ঠানেসু পটিযত্তং. যাচকে ধনন্তি যাচকে উদ্দিস্স ধনং পটিযত্তং উপক্খটং. দ্ৰাদসযোজনাযামে হি নগরে সত্তযোজনৰিত্থতে সত্তসু পাকারন্তরেসু সত্ত তালপন্তিপরিক্খেপা, তাসু তালপন্তীসু চতুরাসীতি পোক্খরণিসহস্সানি পাটিযেক্কং পোক্খরণিতীরে মহাদানং পট্ঠপিতং. ৰুত্তঞ্হেতং ভগৰতা –

‘‘পট্ঠপেসি খো, আনন্দ, রাজা মহাসুদস্সনো তাসং পোক্খরণীনং তীরে এৰরূপং দানং অন্নং অন্নত্থিকস্স, পানং পানত্থিকস্স, ৰত্থং ৰত্থত্থিকস্স, যানং যানত্থিকস্স, সযনং সযনত্থিকস্স, ইত্থিং ইত্থিত্থিকস্স, হিরঞ্ঞং হিরঞ্ঞত্থিকস্স, সুৰণ্ণং সুৰণ্ণত্থিকস্সা’’তি (দী. নি. ২.২৫৪).

৩৩. তত্থাযং দানস্স পৰত্তিতাকারো – মহাপুরিসো হি ইত্থীনঞ্চ পুরিসানঞ্চ অনুচ্ছৰিকে অলঙ্কারে কারেত্ৰা ইত্থিমত্তমেৰ তত্থ পরিচারৰসেন সেসঞ্চ সব্বং পরিচ্চাগৰসেন ঠপেত্ৰা ‘‘রাজা মহাসুদস্সনো দানং দেতি, তং যথাসুখং পরিভুঞ্জথা’’তি ভেরিং চরাপেসি. মহাজনা পোক্খরণিতীরং গন্ত্ৰা ন্হত্ৰা ৰত্থাদীনি নিৰাসেত্ৰা মহাসম্পত্তিং অনুভৰিত্ৰা যেসং তাদিসানি অত্থি, তে পহায গচ্ছন্তি. যেসং নত্থি, তে গহেত্ৰা গচ্ছন্তি. যে হত্থিযানাদীসুপি নিসীদিত্ৰা যথাসুখং ৰিচরিত্ৰা ৰরসযনেসুপি সযিত্ৰা সম্পত্তিং অনুভৰিত্ৰা ইত্থীহিপি সদ্ধিং সম্পত্তিং অনুভৰিত্ৰা সত্তৰিধরতনপসাধনানি পসাধেত্ৰা সম্পত্তিং অনুভৰিত্ৰা যং যং অত্থিকা, তং তং গহেত্ৰা গচ্ছন্তি, অনত্থিকা ওহায গচ্ছন্তি. তম্পি দানং উট্ঠায সমুট্ঠায দেৰসিকং দীযতেৰ. তদা জম্বুদীপৰাসীনং অঞ্ঞং কম্মং নত্থি, দানং পরিভুঞ্জন্তা সম্পত্তিং অনুভৰন্তা ৰিচরন্তি. ন তস্স দানস্স কালপরিচ্ছেদো অহোসি. রত্তিঞ্চাপি দিৰাপি যদা যদা অত্থিকা আগচ্ছন্তি, তদা তদা দীযতেৰ. এৰং মহাপুরিসো যাৰজীৰং সকলজম্বুদীপং উন্নঙ্গলং কত্ৰা মহাদানং পৰত্তেসি. তেন ৰুত্তং ‘‘দিৰা ৰা যদি ৰা রত্তিং, যদি এতি ৰনিব্বকো’’তিআদি.

তত্থ দিৰা ৰা যদি ৰা রত্তিং, যদি এতীতি এতেনস্স যথাকালং দানং দস্সেতি. যাচকানঞ্হি লাভাসায উপসঙ্কমনকালো এৰ বোধিসত্তানং দানস্স কালো নাম. ৰনিব্বকোতি যাচকো. লদ্ধা যদিচ্ছকং ভোগন্তি এতেন যথাভিরুচিতং দানং. যো যো হি যাচকো যং যং দেয্যধম্মং ইচ্ছতি, তস্স তস্স তংতদেৰ বোধিসত্তো দেতি. ন তস্স মহগ্ঘদুল্লভাদিভাৰং অত্তনো উপরোধং চিন্তেসি. পূরহত্থোৰ গচ্ছতীতি এতেন যাৰদিচ্ছকং দানং দস্সেতি, যত্তকঞ্হি যাচকা ইচ্ছন্তি, তত্তকং অপরিহাপেত্ৰাৰ মহাসত্তো দেতি উল়ারজ্ঝাসযতায চ মহিদ্ধিকতায চ.

৩৪. ‘‘যাৰজীৰিক’’ন্তি এতেন দানস্স কালপরিযন্তাভাৰং দস্সেতি. সমাদানতো পট্ঠায হি মহাসত্তা যাৰপারিপূরি ৰেমজ্ঝে ন কালপরিচ্ছেদং করোন্তি, বোধিসম্ভারসম্ভরণে সঙ্কোচাভাৰেন অন্তরন্তরা অৰোসানাপত্তিতো মরণেনপি অনুপচ্ছেদো এৰ, ততো পরম্পি তথেৰ পটিপজ্জনতো, ‘‘যাৰজীৰিক’’ন্তি পন মহাসুদস্সনচরিতস্স ৰসেন ৰুত্তং. নপাহং দেস্সং ধনং দম্মীতি ইদং ধনং নাম ময্হং ন দেস্সং অমনাপন্তি এৰরূপং মহাদানং দেন্তো গেহতো চ ধনং নীহরাপেমি. নপি নত্থি নিচযো মযীতি মম সমীপে ধননিচযো ধনসঙ্গহো নাপি নত্থি, সল্লেখৰুত্তিসমণো ৰিয অসঙ্গহোপি ন হোমীতি অত্থো. ইদং যেন অজ্ঝাসযেন তস্সিদং মহাদানং পৰত্তিতং, তং দস্সেতুং ৰুত্তং.

৩৫. ইদানি তং উপমায ৰিভাৰেতুং ‘‘যথাপি আতুরো নামা’’তিআদিমাহ. তত্থিদং উপমাসংসন্দনেন সদ্ধিং অত্থদস্সনং – যথা নাম আতুরো রোগাভিভূতো পুরিসো রোগতো অত্তানং পরিমোচেতুকামো ধনেন হিরঞ্ঞসুৰণ্ণাদিনা ৰেজ্জং তিকিচ্ছকং তপ্পেত্ৰা আরাধেত্ৰা যথাৰিধি পটিপজ্জন্তো ততো রোগতো ৰিমুচ্চতি.

৩৬. তথেৰ এৰমেৰ অহম্পি অট্টভূতং সকললোকং কিলেসরোগতো সকলসংসারদুক্খরোগতো চ পরিমোচেতুকামো তস্স ততো পরিমোচনস্স অযং সব্বসাপতেয্যপরিচ্চাগো দানপারমিউপাযোতি জানমানো বুজ্ঝমানো অসেসতো দেয্যধম্মস্স পটিগ্গাহকানঞ্চ ৰসেন অনৰসেসতো মহাদানস্স ৰসেন সত্তানং অজ্ঝাসযং পরিপূরেতুং অত্তনো চ ন ময্হং দানপারমী পরিপুণ্ণা, তস্মা ঊনমনন্তি পৰত্তং ঊনং মনং পূরযিতুং পৰত্তযিতুং ৰনিব্বকে যাচকে অদাসিং তং দানং এৰরূপং মহাদানং দদামি, তঞ্চ খো তস্মিং দানধম্মে তস্স চ ফলে নিরালযো অনপেক্খো অপচ্চাসো কিঞ্চিপি অপচ্চাসীসমানো কেৰলং সম্বোধিমনুপত্তিযা সব্বঞ্ঞুতঞ্ঞাণমেৰ অধিগন্তুং দেমীতি.

এৰং মহাসত্তো মহাদানং পৰত্তেন্তো অত্তনো পুঞ্ঞানুভাৰনিব্বত্তং ধম্মপাসাদং অভিরুয্হ মহাব্যূহকূটাগারদ্ৰারে এৰ কামৰিতক্কাদযো নিৰত্তেত্ৰা তত্থ সোৰণ্ণমযে রাজপল্লঙ্কে নিসিন্নো ঝানাভিঞ্ঞাযো নিব্বত্তেত্ৰা ততো নিক্খমিত্ৰা সোৰণ্ণমযং কূটাগারং পৰিসিত্ৰা তত্থ রজতমযে পল্লঙ্কে নিসিন্নো চত্তারো ব্রহ্মৰিহারে ভাৰেত্ৰা চতুরাসীতি ৰস্সসহস্সানি ঝানসমাপত্তীহি ৰীতিনামেত্ৰা মরণসমযে দস্সনায উপগতানং সুভদ্দাদেৰীপমুখানং চতুরাসীতিযা ইত্থাগারসহস্সানং অমচ্চপারিসজ্জাদীনঞ্চ –

‘‘অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি. (দী. নি. ২.২২১, ২৭২; সং. নি. ১.১৮৬; ২.১৪৩) –

ইমায গাথায ওৰদিত্ৰা আযুপরিযোসানে ব্রহ্মলোকপরাযনো অহোসি.

তদা সুভদ্দাদেৰী রাহুলমাতা অহোসি, পরিণাযকরতনং রাহুলো, সেসপরিসা বুদ্ধপরিসা, মহাসুদস্সনো পন লোকনাথো.

ইধাপি দস পারমিযো সরূপতো লব্ভন্তি এৰ, দানজ্ঝাসযস্স পন উল়ারতায দানপারমী এৰ পাল়িযং আগতা. সেসধম্মা হেট্ঠা ৰুত্তনযা এৰ. তথা উল়ারে সত্তরতনসমুজ্জলে চতুদীপিস্সরিযেপি ঠিতস্স তাদিসং ভোগসুখং অনলঙ্করিত্ৰা কামৰিতক্কাদযো দূরতো ৰিক্খম্ভেত্ৰা তথারূপে মহাদানে পৰত্তেন্তস্সেৰ চতুরাসীতি ৰস্সসহস্সানি সমাপত্তীহি ৰীতিনামেত্ৰা অনিচ্চতাদিপটিসংযুত্তং ধম্মকথং কত্ৰাপি ৰিপস্সনায অনুস্সুক্কনং সব্বত্থ অনিস্সঙ্গতাতি এৰমাদযো গুণানুভাৰা নিদ্ধারেতব্বাতি.

মহাসুদস্সনচরিযাৰণ্ণনা নিট্ঠিতা.

৫. মহাগোৰিন্দচরিযাৰণ্ণনা

পঞ্চমে সত্তরাজপুরোহিতোতি সত্তভূআদীনং সত্তন্নং রাজূনং সব্বকিচ্চানুসাসকপুরোহিতো. পূজিতো নরদেৰেহীতি তেহি এৰ অঞ্ঞেহি চ জম্বুদীপে সব্বেহেৰ খত্তিযেহি চতুপচ্চযপূজায সক্কারসম্মানেন চ পূজিতো. মহাগোৰিন্দব্রাহ্মণোতি মহানুভাৰতায গোৰিন্দস্সাভিসেকেন অভিসিত্ততায চ ‘‘মহাগোৰিন্দো’’তি সঙ্খং গতো ব্রাহ্মণো, অভিসিত্তকালতো পট্ঠায হি বোধিসত্তস্স অযং সমঞ্ঞা জাতা, নামেন পন জোতিপালো নাম. তস্স কির জাতদিৰসে সব্বাৰুধানি জোতিংসু. রাজাপি পচ্চূসসমযে অত্তনো মঙ্গলাৰুধং পজ্জলিতং দিস্ৰা ভীতো অত্তনো পুরোহিতং বোধিসত্তস্স পিতরং উপট্ঠানং আগতং পুচ্ছিত্ৰা ‘‘মা ভাযি, মহারাজ, ময্হং পুত্তো জাতো, তস্সানুভাৰেন ন কেৰলং রাজগেহেযেৰ, সকলনগরেপি আৰুধানি পজ্জলিংসু, ন তং নিস্সায তুয্হং অন্তরাযো অত্থি, সকলজম্বুদীপে পন পঞ্ঞায তেন সমো ন ভৰিস্সতি, তস্সেতং পুব্বনিমিত্ত’’ন্তি পুরোহিতেন সমস্সাসিতো তুট্ঠচিত্তো ‘‘কুমারস্স খীরমূলং হোতূ’’তি সহস্সং দত্ৰা ‘‘ৰযপ্পত্তকালে ময্হং দস্সেথা’’তি আহ. সো ৰুদ্ধিপ্পত্তো অপরভাগে অলমত্থদস্সো সত্তন্নং রাজূনং সব্বকিচ্চানুসাসকো হুত্ৰা পব্বজিত্ৰা চ সত্তে দিট্ঠধম্মিকসম্পরাযিকেহি অনত্থেহি পালেত্ৰা অত্থেহি নিযোজেসি. ইতি জোতিতত্তা পালনসমত্থতায চ ‘‘জোতিপালো’’তিস্স নামং অকংসু. তেন ৰুত্তং ‘‘নামেন জোতিপালো নামা’’তি (দী. নি. ২.৩০৪).

তত্থ বোধিসত্তো দিসম্পতিস্স নাম রঞ্ঞো পুরোহিতস্স গোৰিন্দব্রাহ্মণস্স পুত্তো হুত্ৰা অত্তনো পিতু তস্স চ রঞ্ঞো অচ্চযেন তস্স পুত্তো রেণু, সহাযা চস্স সত্তভূ, ব্রহ্মদত্তো, ৰেস্সভূ, ভরতো, দ্ৰে চ ধতরট্ঠাতি ইমে সত্ত রাজানো যথা অঞ্ঞমঞ্ঞং ন ৰিৰদন্তি. এৰং রজ্জে পতিট্ঠাপেত্ৰা তেসং অত্থধম্মে অনুসাসন্তো জম্বুদীপতলে সব্বেসং রাজূনং অঞ্ঞেসঞ্চ ব্রাহ্মণানং দেৰনাগগহপতিকানং সক্কতো গরুকতো মানিতো পূজিতো অপচিতো উত্তমং গারৰট্ঠানং পত্তো অহোসি. তস্স অত্থধম্মেসু কুসলতায ‘‘মহাগোৰিন্দো’’ত্ৰেৰ সমঞ্ঞা উদপাদি. যথাহ ‘‘গোৰিন্দো ৰত, ভো ব্রাহ্মণো, মহাগোৰিন্দো ৰত, ভো ব্রাহ্মণো’’তি (দী. নি. ২.৩০৫). তেন ৰুত্তং –

৩৭.

‘‘পুনাপরং যদা হোমি, সত্তরাজপুরোহিতো;

পূজিতো নরদেৰেহি, মহাগোৰিন্দব্রাহ্মণো’’তি.

অথ বোধিসত্তস্স পুঞ্ঞানুভাৰসমুস্সাহিতেহি রাজূহি তেসং অনুযুত্তেহি খত্তিযেহি ব্রাহ্মণগহপতিকেহি নেগমজানপদেহি চ উপরূপরি উপনীতো সমন্ততো মহোঘো ৰিয অজ্ঝোত্থরমানো অপরিমেয্যো উল়ারো লাভসক্কারো উপ্পজ্জি, যথা তং অপরিমাণাসু জাতীসু উপচিতৰিপুলপুঞ্ঞসঞ্চযস্স উল়ারাভিজাতস্স পরিসুদ্ধসীলাচারস্স পেসলস্স পরিযোদাতসব্বসিপ্পস্স সব্বসত্তেসু পুত্তসদিসমহাকরুণাৰিপ্ফারসিনিদ্ধমুদুহদযস্স. সো চিন্তেসি – ‘‘এতরহি খো ময্হং মহালাভসক্কারো, যংনূনাহং ইমিনা সব্বসত্তে সন্তপ্পেত্ৰা দানপারমিং পরিপূরেয্য’’ন্তি. সো নগরস্স মজ্ঝে চতূসু দ্ৰারেসু অত্তনো নিৰেসনদ্ৰারেতি ছ দানসালাযো কারেত্ৰা দেৰসিকং অপরিমিতধনপরিচ্চাগেন মহাদানং পৰত্তেসি. যং যং উপাযনং আনীযতি, যঞ্চ অত্তনো অত্থায অভিসঙ্খরীযতি, সব্বং তং দানসালাসু এৰ পেসেসি. এৰং দিৰসে দিৰসে মহাপরিচ্চাগং করোন্তস্স চস্স চিত্তস্স তিত্তি ৰা সন্তোসো ৰা নাহোসি, কুতো পন সঙ্কোচো. দানগ্গঞ্চস্স লাভাসায আগচ্ছন্তেহি দেয্যধম্মং গহেত্ৰা গচ্ছন্তেহি চ মহাসত্তস্স চ গুণৰিসেসে কিত্তযন্তেহি মহাজনকাযেহি অন্তোনগরং বহিনগরঞ্চ সমন্ততো একোঘভূতং কপ্পৰুট্ঠানমহাৰাযুসঙ্ঘট্টপরিব্ভমিতং ৰিয মহাসমুদ্দং এককোলাহলং একনিন্নাদং অহোসি. তেন ৰুত্তং –

৩৮.

‘‘তদাহং সত্তরজ্জেসু, যং মে আসি উপাযনং;

তেন দেমি মহাদানং, অক্খোভং সাগরূপম’’ন্তি.

তত্থ তদাহন্তি যদা সত্তরাজপুরোহিতো মহাগোৰিন্দব্রাহ্মণো হোমি, তদা অহং. সত্তরজ্জেসূতি রেণুআদীনং সত্তন্নং রাজূনং রজ্জেসু. অক্খোভন্তি অব্ভন্তরেহি চ বাহিরেহি চ পচ্চত্থিকেহি অপ্পটিসেধনীযতায কেনচি অক্খোভনীযং. ‘‘অচ্চুব্ভ’’ন্তিপি পাঠো. অতিপুণ্ণদানজ্ঝাসযস্স দেয্যধম্মস্স চ উল়ারভাৰেন ৰিপুলভাৰেন চ অতিৰিয পরিপুণ্ণন্তি অত্থো. সাগরূপমন্তি সাগরসদিসং, যথা সাগরে উদকং সকলেনপি লোকেন হরন্তেন খেপেতুং ন সক্কা, এৰং তস্স দানগ্গে দেয্যধম্মন্তি.

৩৯. ওসানগাথায ৰরং ধনন্তি উত্তমং ইচ্ছিতং ৰা ধনং. সেসং ৰুত্তনযমেৰ.

এৰং মহাসত্তো পঠমকপ্পিকমহামেঘো ৰিয মহাৰস্সং অৰিভাগেন মহন্তং দানৰস্সং ৰস্সাপেন্তো দানব্যাৰটো হুত্ৰাপি সেসং সত্তন্নং রাজূনং অত্থধম্মে অপ্পমত্তো অনুসাসতি. সত্ত চ ব্রাহ্মণমহাসালে ৰিজ্জাসিপ্পং সিক্খাপেতি, সত্ত চ ন্হাতকসতানি মন্তে ৰাচেতি. তস্স অপরেন সমযেন এৰং কল্যাণো কিত্তিসদ্দো অব্ভুগ্গতো ‘‘সক্খি মহাগোৰিন্দো ব্রাহ্মণো ব্রহ্মানং পস্সতি, সক্খি মহাগোৰিন্দো ব্রাহ্মণো ব্রহ্মুনা সাকচ্ছেতি সল্লপতি মন্তেতী’’তি (দী. নি. ২.৩১২). সো চিন্তেসি – ‘‘এতরহি খো ময্হং অযং অভূতো কিত্তিসদ্দো অব্ভুগ্গতো ‘ব্রহ্মানং পস্সতি, সক্খি মহাগোৰিন্দো ব্রাহ্মণো ব্রহ্মুনা সাকচ্ছেতি সল্লপতি মন্তেতী’তি, যংনূনাহং ইমং ভূতং এৰ করেয্য’’ন্তি. সো ‘‘তে সত্ত রাজানো সত্ত চ ব্রাহ্মণমহাসালে সত্ত চ ন্হাতকসতানি অত্তনো পুত্তদারঞ্চ আপুচ্ছিত্ৰা ব্রহ্মানং পস্সেয্য’’ন্তি চিত্তং পণিধায ৰস্সিকে চত্তারো মাসে ব্রহ্মৰিহারভাৰনমনুযুঞ্জি. তস্স চেতসা চেতোপরিৰিতক্কমঞ্ঞায ব্রহ্মা সনঙ্কুমারো পুরতো পাতুরহোসি. তং দিস্ৰা মহাপুরিসো পুচ্ছি –

‘‘ৰণ্ণৰা যসৰা সিরিমা, কো নু ত্ৰমসি মারিস;

অজানন্তা তং পুচ্ছাম, কথং জানেমু তং ময’’ন্তি. (দী. নি. ২.৩১৮);

তস্স ব্রহ্মা অত্তানং জানাপেন্তো –

‘‘মং ৰে কুমারং জানন্তি, ব্রহ্মলোকে সনন্তনং;

সব্বে জানন্তি মং দেৰা, এৰং গোৰিন্দ জানাহী’’তি. (দী. নি. ২.৩১৮) –

ৰত্ৰা তেন –

‘‘আসনং উদকং পজ্জং, মধুসাকঞ্চ ব্রহ্মুনো;

অগ্ঘে ভৰন্তং পুচ্ছাম, অগ্ঘং কুরুতু নো ভৰ’’ন্তি. (দী. নি. ২.৩১৮) –

উপনীতং অতিথিসক্কারং অনত্থিকোপি ব্রহ্মা তস্স চিত্তসম্পহংসনত্থং ৰিস্সাসকরণত্থঞ্চ সম্পটিচ্ছন্তো ‘‘পটিগ্গণ্হাম তে অগ্ঘং, যং, ত্ৰং গোৰিন্দ, ভাসসী’’তি. ৰত্ৰা ওকাসদানত্থং –

‘‘দিট্ঠধম্মহিতত্থায, সম্পরাযসুখায চ;

কতাৰকাসো পুচ্ছস্সু, যংকিঞ্চি অভিপত্থিত’’ন্তি. (দী. নি. ২.৩১৮) –

ওকাসমকাসি.

অথ নং মহাপুরিসো সম্পরাযিকং এৰ অত্থং –

‘‘পুচ্ছামি ব্রহ্মানং সনঙ্কুমারং, কঙ্খী অকঙ্খিং পরৰেদিযেসু;

কত্থট্ঠিতো কিম্হি চ সিক্খমানো, পপ্পোতি মচ্চো অমতং ব্রহ্মলোক’’ন্তি. (দী. নি. ২.৩১৯) –

পুচ্ছি.

তস্স ব্রহ্মা ব্যাকরোন্তো –

‘‘হিত্ৰা মমত্তং মনুজেসু ব্রহ্মে, একোদিভূতো করুণেধিমুত্তো;

নিরামগন্ধো ৰিরতো মেথুনস্মা, এত্থট্ঠিতো এত্থ চ সিক্খমানো;

পপ্পোতি মচ্চো অমতং ব্রহ্মলোক’’ন্তি. (দী. নি. ২.৩১৯) –

ব্রহ্মলোকগামিমগ্গং কথেসি.

তত্থ মং ৰে কুমারং জানন্তীতি ৰে একংসেন মং ‘‘কুমারো’’তি জানন্তি. ব্রহ্মলোকেতি সেট্ঠলোকে. সনন্তনন্তি চিরতনং পোরাণং. এৰং, গোৰিন্দ, জানাহীতি, গোৰিন্দ, এৰং মং ধারেহি.

আসনন্তি ইদং ভোতো ব্রহ্মুনো নিসীদনত্থায আসনং পঞ্ঞত্তং. ইদং উদকং পরিভোজনীযং পাদানং ধোৰনত্থং পানীযং পিপাসহরণত্থায. ইদং পজ্জং পরিস্সমৰিনোদনত্থং পাদব্ভঞ্জনতেলং. ইদং মধুসাকং অতক্কং অলোণিকং অধূপনং উদকেন সেদিতং সাকং সন্ধায ৰদতি. তদা হি বোধিসত্তস্স তং চতুমাসং ব্রহ্মচরিযং অভিসল্লেখৰুত্তিপরমুক্কট্ঠং অহোসি. তস্সিমে সব্বে অগ্ঘে কত্ৰা পুচ্ছাম, তযিদং অগ্ঘং কুরুতু পটিগ্গণ্হাতু নো ভৰং ইদং অগ্ঘন্তি ৰুত্তং হোতি. ইতি মহাপুরিসো ব্রহ্মুনো নেসং অপরিভুঞ্জনং জানন্তোপি ৰত্তসীসে ঠত্ৰা অত্তনো আচিণ্ণং অতিথিপূজনং দস্সেন্তো এৰমাহ. ব্রহ্মাপিস্স অধিপ্পাযং জানন্তো ‘‘পটিগ্গণ্হাম তে অগ্ঘং, যং ত্ৰং, গোৰিন্দ, ভাসসী’’তি আহ.

তত্থ তস্স তে আসনে মযং নিসিন্না নাম হোম, পাদোদকেন পাদা ধোতা নাম হোন্তু, পানীযং পীতা নাম হোম, পাদব্ভঞ্জনেন পাদা মক্খিতা নাম হোন্তু, উদকসাকম্পি পরিভুত্তং নাম হোতূতি অত্থো.

কঙ্খী অকঙ্খিং পরৰেদিযেসূতি অহং সৰিচিকিচ্ছো পরেন সযং অভিসঙ্খতত্তা পরস্স পাকটেসু পরৰেদিযেসু পঞ্হেসু নিব্বিচিকিচ্ছং.

হিত্ৰা মমত্তন্তি ‘‘ইদং মম, ইদং মমা’’তি পৰত্তনকং উপকরণতণ্হং চজিত্ৰা. মনুজেসূতি সত্তেসু. ব্রহ্মেতি বোধিসত্তং আলপতি. একোদিভূতোতি একো উদেতি পৰত্ততীতি একোদিভূতো একীভূতো, একেন কাযৰিৰেকং দস্সেতি. অথ ৰা একো উদেতীতি একোদি, সমাধি. তং ভূতো পত্তোতি একোদিভূতো, উপচারপ্পনাসমাধীহি সমাহিতোতি অত্থো. এতং একোদিভাৰং করুণাব্রহ্মৰিহারৰসেন দস্সেন্তো ‘‘করুণেধিমুত্তো’’তি আহ. করুণজ্ঝানে অধিমুত্তো, তং ঝানং নিব্বত্তেত্ৰাতি অত্থো. নিরামগন্ধোতি কিলেসসঙ্খাতৰিস্সগন্ধরহিতো. এত্থট্ঠিতোতি এতেসু ধম্মেসু ঠিতো, এতে ধম্মে সম্পাদেত্ৰা. এত্থ চ সিক্খমানোতি এতেসু ধম্মেসু সিক্খমানো, এতং ব্রহ্মৰিহারভাৰনং ভাৰেন্তোতি অত্থো. অযমেত্থ সঙ্খেপো, ৰিত্থারো পন পাল়িযং (দী. নি. ২.২৯৩ আদযো) আগতোযেৰাতি.

অথ মহাপুরিসো তস্স ব্রহ্মুনো ৰচনং সুত্ৰা আমগন্ধে জিগুচ্ছন্তো ‘‘ইদানেৰাহং পব্বজিস্সামী’’তি আহ. ব্রহ্মাপি ‘‘সাধু, মহাপুরিস, পব্বজস্সু. এৰং সতি ময্হম্পি তৰ সন্তিকে আগমনং স্ৰাগমনমেৰ ভৰিস্সতি, ত্ৰং, তাত, সকলজম্বুদীপে অগ্গপুরিসো পঠমৰযে ঠিতো, এৰং মহন্তং নাম সম্পত্তিং ইস্সরিযঞ্চ পহায পব্বজনং নাম গন্ধহত্থিনো অযোবন্ধনং ছিন্দিত্ৰা ৰনগমনং ৰিয অতিউল়ারং, বুদ্ধতন্তি নামেসা’’তি মহাবোধিসত্তস্স দল়্হীকম্মং কত্ৰা ব্রহ্মলোকমেৰ গতো. মহাসত্তোপি ‘‘মম ইতো নিক্খমিত্ৰা পব্বজনং নাম ন যুত্তং, অহং রাজকুলানং অত্থং অনুসাসামি, তস্মা তেসং আরোচেত্ৰা সচে তেপি পব্বজন্তি সুন্দরমেৰ, নো চে পুরোহিতট্ঠানং নিয্যাতেত্ৰা পব্বজিস্সামী’’তি চিন্তেত্ৰা রেণুস্স তাৰ রঞ্ঞো আরোচেত্ৰা তেন ভিয্যোসোমত্তায কামেহি নিমন্তিযমানো অত্তনো সংৰেগহেতুং একন্তেন পব্বজিতুকামতঞ্চস্স নিৰেদেত্ৰা তেন ‘‘যদি এৰং অহম্পি পব্বজিস্সামী’’তি ৰুত্তে ‘‘সাধূ’’তি সম্পটিচ্ছিত্ৰা এতেনেৰ নযেন সত্তভূআদযো ছ খত্তিযে, সত্ত চ ব্রাহ্মণমহাসালে, সত্ত চ ন্হাতকসতানি, অত্তনো ভরিযাযো চ আপুচ্ছিত্ৰা সত্তাহমত্তমেৰ তেসং চিত্তানুরক্খণত্থং ঠত্ৰা মহাভিনিক্খমনসদিসং নিক্খমিত্ৰা পব্বজি.

তস্স তে সত্তরাজানো আদিং কত্ৰা সব্বেৰ অনুপব্বজিংসু. সা অহোসি মহতী পরিসা. অনেকযোজনৰিত্থারায পরিসায পরিৰুতো মহাপুরিসো ধম্মং দেসেন্তো গামনিগমজনপদরাজধানীসু চারিকং চরতি, মহাজনং পুঞ্ঞে পতিট্ঠাপেতি. গতগতট্ঠানে বুদ্ধকোলাহলং ৰিয হোতি. মনুস্সা ‘‘গোৰিন্দপণ্ডিতো কির আগচ্ছতী’’তি সুত্ৰা পুরেতরমেৰ মণ্ডপং কারেত্ৰা তং অলঙ্কারাপেত্ৰা পচ্চুগ্গন্ত্ৰা মণ্ডপং পৰেসেত্ৰা নানগ্গরসভোজনেন পতিমানেন্তি. মহালাভসক্কারো মহোঘো ৰিয অজ্ঝোত্থরন্তো উপ্পজ্জি. মহাপুরিসো মহাজনং পুঞ্ঞে পতিট্ঠাপেসি সীলসম্পদায ইন্দ্রিযসংৰরে ভোজনে মত্তঞ্ঞুতায জাগরিযানুযোগে কসিণপরিকম্মে ঝানেসু অভিঞ্ঞাসু অট্ঠসমাপত্তীসু ব্রহ্মৰিহারেসূতি. বুদ্ধুপ্পাদকালো ৰিয অহোসি.

বোধিসত্তো যাৰতাযুকং পারমিযো পূরেন্তো সমাপত্তিসুখেন ৰীতিনামেত্ৰা আযুপরিযোসানে ব্রহ্মলোকে নিব্বত্তি. তস্স তং ব্রহ্মচরিযং ইদ্ধঞ্চেৰ ফীতঞ্চ ৰিত্থারিকং বাহুজঞ্ঞং পুথুভূতং যাৰ দেৰমনুস্সেহি সুপ্পকাসিতং চিরং দীঘমদ্ধানং পৰত্তিত্থ. তস্স যে সাসনং সব্বেন সব্বং আজানিংসু, তে কাযস্স ভেদা পরং মরণা সুগতিং ব্রহ্মলোকং উপপজ্জিংসু. যে ন আজানিংসু, তে অপ্পেকচ্চে পরনিম্মিতৰসৰত্তীনং দেৰানং সহব্যতং উপপজ্জিংসু. অপ্পেকচ্চে নিম্মানরতীনং…পে… তুসিতানং যামানং তাৰতিংসানং চাতুমহারাজিকানং দেৰানং সহব্যতং উপপজ্জিংসু. যে সব্বনিহীনা, তে গন্ধব্বকাযং পরিপূরেসুং. ইতি মহাজনো যেভুয্যেন ব্রহ্মলোকূপগো সগ্গূপগো চ অহোসি. তস্মা দেৰব্রহ্মলোকা পরিপূরিংসু. চত্তারো অপাযা সুঞ্ঞা ৰিয অহেসুং.

ইধাপি অকিত্তিজাতকে (জা. ১.১৩.৮৩ আদযো) ৰিয বোধিসম্ভারনিদ্ধারণা ৰেদিতব্বা – তদা সত্ত রাজানো মহাথেরা অহেসুং, সেসপরিসা বুদ্ধপরিসা, মহাগোৰিন্দো লোকনাথো. তথা রেণুআদীনং সত্তন্নং রাজূনং অঞ্ঞমঞ্ঞাৰিরোধেন যথা সকরজ্জে পতিট্ঠাপনং, তথা মহতি সত্তৰিধে রজ্জে তেসং অত্থধম্মানুসাসনে অপ্পমাদো, ‘‘ব্রহ্মুনাপি সাকচ্ছং সমাপজ্জতী’’তি পৰত্তসম্ভাৰনং যথাভূতং কাতুং চত্তারো মাসে পরমুক্কংসগতো ব্রহ্মচরিযৰাসো. তেন ব্রহ্মুনো অত্তনি সমাপজ্জনং, ব্রহ্মুনো ওৰাদে ঠত্ৰা সত্তহি রাজূহি সকলেন চ লোকেন উপনীতং লাভসক্কারং খেল়পিণ্ডং ৰিয ছড্ডেত্ৰা অপরিমাণায খত্তিযব্রাহ্মণাদিপরিসায অনুপব্বজ্জানিমিত্তায পব্বজ্জায অনুট্ঠানং, বুদ্ধানং সাসনস্স ৰিয অত্তনো সাসনস্স চিরকালানুপ্পবন্ধোতি এৰমাদযো গুণানুভাৰা ৰিভাৰেতব্বাতি.

মহাগোৰিন্দচরিযাৰণ্ণনা নিট্ঠিতা.

৬. নিমিরাজচরিযাৰণ্ণনা

৪০. ছট্ঠে মিথিলাযং পুরুত্তমেতি মিথিলানামকে ৰিদেহানং উত্তমনগরে. নিমি নাম মহারাজাতি নেমিং ঘটেন্তো ৰিয উপ্পন্নো ‘‘নিমী’’তি লদ্ধনামো, মহন্তেহি দানসীলাদিগুণৰিসেসেহি মহতা চ রাজানুভাৰেন সমন্নাগতত্তা মহন্তো রাজাতি মহারাজা. পণ্ডিতো কুসলত্থিকোতি অত্তনো চ পরেসঞ্চ পুঞ্ঞত্থিকো.

অতীতে কির ৰিদেহরট্ঠে মিথিলানগরে অম্হাকং বোধিসত্তো মঘদেৰো নাম রাজা অহোসি. সো চতুরাসীতি ৰস্সসহস্সানি কুমারকীল়ং কীল়িত্ৰা চতুরাসীতি ৰস্সহস্সানি উপরজ্জং কারেত্ৰা চতুরাসীতি ৰস্সসহস্সানি রজ্জং কারেন্তো ‘‘যদা মে সিরস্মিং পলিতানি পস্সেয্যাসি, তদা মে আরোচেয্যাসী’’তি কপ্পকস্স ৰত্ৰা অপরভাগে তেন পলিতানি দিস্ৰা আরোচিতে সুৰণ্ণসণ্ডাসেন উদ্ধরাপেত্ৰা হত্থে পতিট্ঠাপেত্ৰা পলিতং ওলোকেত্ৰা ‘‘পাতুভূতো খো ময্হং দেৰদূতো’’তি সংৰেগজাতো ‘‘ইদানি মযা পব্বজিতুং ৰট্টতী’’তি চিন্তেত্ৰা সতসহস্সুট্ঠানকং গামৰরং কপ্পকস্স দত্ৰা জেট্ঠকুমারং পক্কোসাপেত্ৰা তস্স –

‘‘উত্তমঙ্গরুহা ময্হং, ইমে জাতা ৰযোহরা;

পাতুভূতা দেৰদূতা, পব্বজ্জাসমযো মমা’’তি. (জা. ১.১.৯) –

ৰত্ৰা সাধুকং রজ্জে সমনুসাসিত্ৰা যদিপি অত্তনো অঞ্ঞানিপি চতুরাসীতি ৰস্সসহস্সানি আযু অত্থি, এৰং সন্তেপি মচ্চুনো সন্তিকে ঠিতং ৰিয অত্তানং মঞ্ঞমানো সংৰিগ্গহদযো পব্বজ্জং রোচেতি. তেন ৰুত্তং –

‘‘সিরস্মিং পলিতং দিস্ৰা, মঘদেৰো দিসম্পতি;

সংৰেগং অলভী ধীরো, পব্বজ্জং সমরোচযী’’তি. (ম. নি. অট্ঠ. ২.৩০৯);

সো পুত্তং ‘‘ইমিনাৰ নীহারেন ৰত্তেয্যাসি যথা মযা পটিপন্নং, মা খো ত্ৰং অন্তিমপুরিসো অহোসী’’তি ওৰদিত্ৰা নগরা নিক্খম্ম ভিক্খুপব্বজ্জং পব্বজিত্ৰা চতুরাসীতি ৰস্সসহস্সানি ঝানসমাপত্তীহি ৰীতিনামেত্ৰা আযুপরিযোসানে ব্রহ্মলোকপরাযনো অহোসি. পুত্তোপিস্স বহূনি ৰস্সসহস্সানি ধম্মেন রজ্জং কারেত্ৰা তেনেৰ উপাযেন পব্বজিত্ৰা ব্রহ্মলোকপরাযনো অহোসি. তথা তস্স পুত্তো, তথা তস্স পুত্তোতি এৰং দ্ৰীহি ঊনানি চতুরাসীতি খত্তিযসহস্সানি সীসে পলিতং দিস্ৰাৰ পব্বজিতানি. অথ বোধিসত্তো ব্রহ্মলোকে ঠিতোৰ ‘‘পৰত্ততি নু খো মযা মনুস্সলোকে কতং কল্যাণং ন পৰত্ততী’’তি আৰজ্জেন্তো অদ্দস ‘‘এত্তকং অদ্ধানং পৰত্তং, ইদানি নপ্পৰত্তিস্সতী’’তি. সো ‘‘ন খো পনাহং ময্হং পৰেণিযা উচ্ছিজ্জিতুং দস্সামী’’তি অত্তনো ৰংসে জাতরঞ্ঞো এৰ অগ্গমহেসিযা কুচ্ছিম্হি পটিসন্ধিং গণ্হিত্ৰা অত্তনো ৰংসস্স নেমিং ঘটেন্তো ৰিয নিব্বত্তো. তেন ৰুত্তং ‘‘নেমিং ঘটেন্তো ৰিয উপ্পন্নোতি নিমীতি লদ্ধনামো’’তি.

তস্স হি নামগ্গহণদিৰসে পিতরা আনীতা লক্খণপাঠকা. লক্খণানি ওলোকেত্ৰা ‘‘মহারাজ, অযং কুমারো তুম্হাকং ৰংসং পগ্গণ্হাতি, পিতুপিতামহেহিপি মহানুভাৰো মহাপুঞ্ঞো’’তি ব্যাকরিংসু. তং সুত্ৰা রাজা যথাৰুত্তেনত্থেন ‘‘নিমী’’তিস্স নামং অকাসি, সো দহরকালতো পট্ঠায সীলে উপোসথকম্মে চ যুত্তপ্পযুত্তো অহোসি. অথস্স পিতা পুরিমনযেনেৰ পলিতং দিস্ৰা কপ্পকস্স গামৰরং দত্ৰা পুত্তং রজ্জে সমনুসাসিত্ৰা নগরা নিক্খম্ম পব্বজিত্ৰা ঝানানি নিব্বত্তেত্ৰা ব্রহ্মলোকপরাযনো অহোসি.

নিমিরাজা পন দানজ্ঝাসযতায চতূসু নগরদ্ৰারেসু নগরমজ্ঝে চাতি পঞ্চ দানসালাযো কারেত্ৰা মহাদানং পৰত্তেসি. একেকায দানসালায সতসহস্সং সতসহস্সং কত্ৰা দেৰসিকং পঞ্চসতসহস্সানি পরিচ্চজি, পঞ্চ সীলানি রক্খি, পক্খদিৰসেসু উপোসথকম্মং সমাদিযি, মহাজনম্পি দানাদীসু পুঞ্ঞেসু সমাদপেসি, সগ্গমগ্গং আচিক্খি, নিরযভযেন তজ্জেসি, পাপতো নিৰারেসি. তস্স ওৰাদে ঠত্ৰা মহাজনো দানাদীনি পুঞ্ঞানি কত্ৰা ততো চুতো দেৰলোকে নিব্বত্তি, দেৰলোকো পরিপূরি, নিরযো তুচ্ছো ৰিয অহোসি. তদা পন অত্তনো দানজ্ঝাসযস্স উল়ারভাৰং সৰিসেসং দানপারমিযা পূরিতভাৰঞ্চ পৰেদেন্তো সত্থা –

৪১.

‘‘তদাহং মাপযিত্ৰান, চতুস্সালং চতুম্মুখং;

তত্থ দানং পৰত্তেসিং, মিগপক্খিনরাদিন’’ন্তি. – আদিমাহ;

তত্থ তদাতি তস্মিং নিমিরাজকালে. মাপযিত্ৰানাতি কারাপেত্ৰা. চতুস্সালন্তি চতূসু দিসাসু সম্বন্ধসালং. চতুম্মুখন্তি চতূসু দিসাসু চতূহি দ্ৰারেহি যুত্তং. দানসালায হি মহন্তভাৰতো দেয্যধম্মস্স যাচকজনস্স চ বহুভাৰতো ন সক্কা একেনেৰ দ্ৰারেন দানধম্মং পরিযন্তং কাতুং দেয্যধম্মঞ্চ পরিযোসাপেতুন্তি সালায চতূসু দিসাসু চত্তারি মহাদ্ৰারানি কারাপেসি. তত্থ দ্ৰারতো পট্ঠায যাৰ কোণা দেয্যধম্মো রাসিকতো তিট্ঠতি. অরুণুগ্গং আদিং কত্ৰা যাৰ পকতিযা সংৰেসনকালো, তাৰ দানং পৰত্তেতি. ইতরস্মিম্পি কালে অনেকসতা পদীপা ঝাযন্তি. যদা যদা অত্থিকা আগচ্ছন্তি, তদা তদা দীযতেৰ. তঞ্চ দানং ন কপণদ্ধিকৰনিব্বকযাচকানঞ্ঞেৰ, অথ খো অড্ঢানং মহাভোগানম্পি উপকপ্পনৰসেন মহাসুদস্সনদানসদিসং উল়ারতরপণীততরানং দেয্যধম্মানং পরিচ্চজনতো সব্বেপি সকলজম্বুদীপৰাসিনো মনুস্সা পটিগ্গহেসুঞ্চেৰ পরিভুঞ্জিংসু চ. সকলজম্বুদীপঞ্হি উন্নঙ্গলং কত্ৰা মহাপুরিসো তদা মহাদানং পৰত্তেসি. যথা চ মনুস্সানং, এৰং মিগপক্খিকে আদিং কত্ৰা তিরচ্ছানগতানম্পি দানসালায বহি একমন্তে তেসং উপকপ্পনৰসেন দানং পৰত্তেসি. তেন ৰুত্তং – ‘‘তত্থ দানং পৰত্তেসিং, মিগপক্খিনরাদিন’’ন্তি. ন কেৰলঞ্চ তিরচ্ছানানমেৰ, পেতানম্পি দিৰসে দিৰসে পত্তিং দাপেসি. যথা চ একিস্সা দানসালায, এৰং পঞ্চসুপি দানসালাসু দানং পৰত্তিত্থ. পাল়িযং পন ‘‘তদাহং মাপযিত্ৰান, চতুস্সালং চতুম্মুখ’’ন্তি একং ৰিয ৰুত্তং, তং নগরমজ্ঝে দানসালং সন্ধায ৰুত্তং.

৪২. ইদানি তত্থ দেয্যধম্মং একদেসেন দস্সেন্তো ‘‘অচ্ছাদনঞ্চ সযনং, অন্নং পানঞ্চ ভোজন’’ন্তি আহ.

তত্থ অচ্ছাদনন্তি খোমসুখুমাদিনানাৰিধনিৰাসনপারুপনং. সযনন্তি মঞ্চপল্লঙ্কাদিঞ্চেৰ গোনকচিত্তকাদিঞ্চ অনেকৰিধং সযিতব্বকং, আসনম্পি চেত্থ সযনগ্গহণেনেৰ গহিতন্তি দট্ঠব্বং. অন্নং পানঞ্চ ভোজনন্তি তেসং তেসং সত্তানং যথাভিরুচিতং নানগ্গরসং অন্নঞ্চেৰ পানঞ্চ অৰসিট্ঠং নানাৰিধভোজনৰিকতিঞ্চ. অব্বোচ্ছিন্নং করিত্ৰানাতি আরম্ভতো পট্ঠায যাৰ আযুপরিযোসানা অহোরত্তং অৰিচ্ছিন্নং কত্ৰা.

৪৩-৪. ইদানি তস্স দানস্স সম্মাসম্বোধিং আরব্ভ দানপারমিভাৰেন পৰত্তিতভাৰং দস্সেন্তো যথা তদা অত্তনো অজ্ঝাসযো পৰত্তো, তং উপমায দস্সেতুং ‘‘যথাপি সেৰকো’’তিআদিমাহ. তস্সত্থো – যথা নাম সেৰকপুরিসো অত্তনো সামিকং কালানুকালং সেৰনৰসেন উপগতো লদ্ধব্বধনহেতু কাযেন ৰাচায মনসা সব্বথাপি কাযৰচীমনোকম্মেহি যথা সো আরাধিতো হোতি, এৰং আরাধনীযং আরাধনমেৰ এসতি গৰেসতি, তথা অহম্পি বোধিসত্তভূতো সদেৰকস্স লোকস্স সামিভূতং অনুত্তরং বুদ্ধভাৰং সেৰেতুকামো তস্স আরাধনত্থং সব্বভৰে সব্বস্মিং নিব্বত্তনিব্বত্তভৰে দানপারমিপরিপূরণৰসেন দানেন সব্বসত্তে সন্তপ্পেত্ৰা বোধিসঙ্খাততো অরিযমগ্গঞাণতো জাতত্তা ‘‘বোধিজ’’ন্তি লদ্ধনামং সব্বঞ্ঞুতঞ্ঞাণং পরতো সব্বথা নানূপাযেহি এসিস্সামি গৰেসিস্সামি, তং উত্তমং বোধিং সম্মাসম্বোধিং জীৰিতপরিচ্চাগাদিং যংকিঞ্চি কত্ৰা ইচ্ছামি অভিপত্থেমীতি.

এৰমিধ দানজ্ঝাসযস্স উল়ারভাৰং দস্সেতুং দানপারমিৰসেনেৰ দেসনা কতা. জাতকদেসনাযং পনস্স সীলপারমিআদীনম্পি পরিপূরণং ৰিভাৰিতমেৰ, তথা হিস্স হেট্ঠা ৰুত্তনযেনেৰ সীলাদিগুণেহি অত্তানং অলঙ্করিত্ৰা মহাজনং তত্থ পতিট্ঠপেন্তস্স ওৰাদে ঠত্ৰা নিব্বত্তদেৰতা সুধম্মাযং দেৰসভাযং সন্নিপতিতা ‘‘অহো অম্হাকং নিমিরাজানং নিস্সায মযং ইমং সম্পত্তিং পত্তা, এৰরূপাপি নাম অনুপ্পন্নে বুদ্ধে মহাজনস্স বুদ্ধকিচ্চং সাধযমানা অচ্ছরিযমনুস্সা লোকে উপ্পজ্জন্তী’’তি মহাপুরিসস্স গুণে ৰণ্ণেন্তা অভিত্থৰিংসু. তেন ৰুত্তং –

‘‘অচ্ছেরং ৰত লোকস্মিং, উপ্পজ্জন্তি ৰিচক্খণা;

যদা অহু নিমিরাজা, পণ্ডিতো কুসলত্থিকো’’তি. (জা. ২.২২.৪২১) –

আদি.

তং সুত্ৰা সক্কং দেৰানমিন্দং আদিং কত্ৰা সব্বে দেৰা বোধিসত্তং দট্ঠুকামা অহেসুং. অথেকদিৰসং মহাপুরিসস্স উপোসথিকস্স উপরিপাসাদৰরগতস্স পচ্ছিমযামে পল্লঙ্কং আভুজিত্ৰা নিসিন্নস্স এৰং চেতসো পরিৰিতক্কো উদপাদি ‘‘দানং নু খো ৰরং, উদাহু ব্রহ্মচরিয’’ন্তি. সো তং অত্তনো কঙ্খং ছিন্দিতুং নাসক্খি. তস্মিং খণে সক্কস্স ভৰনং উণ্হাকারং দস্সেসি. সক্কো তং কারণং আৰজ্জেন্তো বোধিসত্তং তথা ৰিতক্কেন্তং দিস্ৰা ‘‘হন্দস্স ৰিতক্কং ছিন্দিস্সামী’’তি আগন্ত্ৰা পুরতো ঠিতো তেন ‘‘কোসি ত্ৰ’’ন্তি পুট্ঠো অত্তনো দেৰরাজভাৰং আরোচেত্ৰা ‘‘কিং, মহারাজ, চিন্তেসী’’তি ৰুত্তে তমত্থং আরোচেসি. সক্কো ব্রহ্মচরিযমেৰ উত্তমং কত্ৰা দস্সেন্তো –

‘‘হীনেন ব্রহ্মচরিযেন, খত্তিযে উপপজ্জতি;

মজ্ঝিমেন চ দেৰত্তং, উত্তমেন ৰিসুজ্ঝতি.

‘‘ন হেতে সুলভা কাযা, যাচযোগেন কেনচি;

যে কাযে উপপজ্জন্তি, অনগারা তপস্সিনো’’তি. (জা. ২.২২.৪২৯-৪৩০) –

আহ.

তত্থ পুথুতিত্থাযতনেসু মেথুনৰিরতিমত্তং হীনং ব্রহ্মচরিযং নাম, তেন খত্তিযকুলে উপপজ্জতি. ঝানস্স উপচারমত্তং মজ্ঝিমং নাম, তেন দেৰত্তং উপপজ্জতি. অট্ঠসমাপত্তিনিব্বত্তনং পন উত্তমং নাম, তেন ব্রহ্মলোকে নিব্বত্ততি. তঞ্হি বাহিরকা ‘‘নিব্বান’’ন্তি কথেন্তি. তেনাহ ‘‘ৰিসুজ্ঝতী’’তি. সাসনে পন পরিসুদ্ধসীলস্স ভিক্খুনো অঞ্ঞতরং দেৰনিকাযং পত্থেন্তস্স ব্রহ্মচরিযচেতনা হীনতায হীনং নাম, তেন যথাপত্থিতে দেৰলোকে নিব্বত্ততি. পরিসুদ্ধসীলস্স অট্ঠসমাপত্তিনিব্বত্তনং মজ্ঝিমং নাম, তেন ব্রহ্মলোকে নিব্বত্ততি. পরিসুদ্ধসীলস্স পন ৰিপস্সনং ৰড্ঢেত্ৰা অরহত্তপ্পত্তি উত্তমং নাম, তেন ৰিসুজ্ঝতীতি. ইতি সক্কো ‘‘মহারাজ, দানতো ব্রহ্মচরিযৰাসোৰ সতগুণেন সহস্সগুণেন সতসহস্সগুণেন মহপ্ফলো’’তি ৰণ্ণেসি. কাযাতি ব্রহ্মগণা. যাচযোগেনাতি যাচনযুত্তেন. ‘‘যাজযোগেনা’’তিপি পাল়ি, যজনযুত্তেন, দানযুত্তেনাতি অত্থো. তপস্সিনোতি তপনিস্সিতকা. ইমাযপি গাথায ব্রহ্মচরিযৰাসস্সেৰ মহানুভাৰতং দীপেতি. এৰঞ্চ পন ৰত্ৰা ‘‘কিঞ্চাপি, মহারাজ, দানতো ব্রহ্মচরিযমেৰ মহপ্ফলং, দ্ৰেপি পনেতে মহাপুরিসকত্তব্বাৰ. দ্ৰীসুপি অপ্পমত্তো হুত্ৰা দানঞ্চ দেহি সীলঞ্চ রক্খাহী’’তি ৰত্ৰা তং ওৰদিত্ৰা সকট্ঠানমেৰ গতো.

অথ নং দেৰগণো ‘‘মহারাজ, কুহিং গতত্থা’’তি আহ. সক্কো ‘‘মিথিলাযং নিমিরঞ্ঞো কঙ্খ ছিন্দিতু’’ন্তি তমত্থং পকাসেত্ৰা বোধিসত্তস্স গুণে ৰিত্থারতো ৰণ্ণেসি. তং সুত্ৰা দেৰা ‘‘মহারাজ, ময্হং নিমিরাজানং দট্ঠুকামম্হা, সাধু নং পক্কোসাপেহী’’তি ৰদিংসু. সক্কো ‘‘সাধূ’’তি সম্পটিচ্ছিত্ৰা মাতলিং আমন্তেসি – ‘‘গচ্ছ নিমিরাজানং ৰেজযন্তং আরোপেত্ৰা আনেহী’’তি. সো ‘‘সাধূ’’তি সম্পটিচ্ছিত্ৰা রথেন গন্ত্ৰা তত্থ মহাসত্তং আরোপেত্ৰা তেন যাচিতো যথাকম্মং পাপকম্মীনং পুঞ্ঞকম্মীনঞ্চ ঠানানি আচিক্খন্তো অনুক্কমেন দেৰলোকং নেসি. দেৰাপি খো ‘‘নিমিরাজা আগতো’’তি সুত্ৰা দিব্বগন্ধৰাসপুপ্ফহত্থা যাৰ চিত্তকূটদ্ৰারকোট্ঠকা পচ্চুগ্গন্ত্ৰা মহাসত্তং দিব্বগন্ধাদীহি পূজেন্তা সুধম্মং দেৰসভং আনযিংসু. রাজা রথা ওতরিত্ৰা দেৰসভং পৰিসিত্ৰা সক্কেন সদ্ধিং একাসনে নিসীদিত্ৰা তেন দিব্বেহি কামেহি নিমন্তিযমানো ‘‘অলং, মহারাজ, ময্হং ইমেহি যাচিতকূপমেহি কামেহী’’তি পটিক্খিপিত্ৰা অনেকপরিযাযেন ধম্মং দেসেত্ৰা মনুস্সগণনায সত্তাহমেৰ ঠত্ৰা ‘‘গচ্ছামহং মনুস্সলোকং, তত্থ দানাদীনি পুঞ্ঞানি করিস্সামী’’তি আহ. সক্কো ‘‘নিমিরাজানং মিথিলং নেহী’’তি মাতলিং আণাপেসি. সো তং ৰেজযন্তরথং আরোপেত্ৰা পাচীনদিসাভাগেন মিথিলং পাপুণি. মহাজনো দিব্বরথং দিস্ৰা রঞ্ঞো পচ্চুগ্গমনং অকাসি. মাতলি সীহপঞ্জরে মহাসত্তং ওতারেত্ৰা আপুচ্ছিত্ৰা সকট্ঠানমেৰ গতো. মহাজনোপি রাজানং পরিৰারেত্ৰা ‘‘কীদিসো, দেৰ, দেৰলোকো’’তি পুচ্ছি. রাজা দেৰলোকসম্পত্তিং ৰণ্ণেত্ৰা ‘‘তুম্হেপি দানাদীনি পুঞ্ঞানি করোথ, এৰং তস্মিং দেৰলোকে উপ্পজ্জিস্সথা’’তি ধম্মং দেসেসি. সো অপরভাগে পুব্বে ৰুত্তনযেন পলিতং দিস্ৰা পুত্তস্স রজ্জং পটিচ্ছাপেত্ৰা কামে পহায পব্বজিত্ৰা চত্তারো ব্রহ্মৰিহারে ভাৰেত্ৰা ব্রহ্মলোকূপগো অহোসি.

তদা সক্কো অনুরুদ্ধো অহোসি. মাতলি আনন্দো. চতুরাসীতি রাজসহস্সানি বুদ্ধপরিসা. নিমিরাজা লোকনাথো.

তস্স ইধাপি হেট্ঠা ৰুত্তনযেনেৰ বোধিসম্ভারা নিদ্ধারেতব্বা. তথা ব্রহ্মলোকসম্পত্তিং পহায পুব্বে অত্তনা পৰত্তিতং কল্যাণৰত্তং অনুপ্পবন্ধেস্সামীতি মহাকরুণায মনুস্সলোকে নিব্বত্তনং, উল়ারো দানজ্ঝাসযো, তদনুরূপা দানাদীসু পটিপত্তি, মহাজনস্স চ তত্থ পতিট্ঠাপনং, যাৰ দেৰমনুস্সানং পত্থটযসতা, সক্কস্স দেৰরাজস্স উপসঙ্কমনে অতিৰিম্হযতা, তেন দিব্বসম্পত্তিযা নিমন্তিযমানোপি তং অনলঙ্করিত্ৰা পুঞ্ঞসম্ভারপরিব্রূহনত্থং পুন মনুস্সৰাসূপগমনং, লাভসম্পত্তীসু সব্বত্থ অলগ্গভাৰোতি এৰমাদযো গুণানুভাৰা নিদ্ধারেতব্বাতি.

নিমিরাজচরিযাৰণ্ণনা নিট্ঠিতা.

৭. চন্দকুমারচরিযাৰণ্ণনা

৪৫. সত্তমে একরাজস্স অত্রজোতি একরাজস্স নাম কাসিরঞ্ঞো ওরসপুত্তো. নগরে পুপ্ফৰতিযাতি পুপ্ফৰতিনামকে নগরে. চন্দসৰ্হযোতি চন্দসদ্দেন অৰ্হাতব্বো, চন্দনামোতি অত্থো.

অতীতে কির অযং বারাণসী পুপ্ফৰতী নাম অহোসি. তত্থ ৰসৰত্তিরঞ্ঞো পুত্তো একরাজা নাম রজ্জং কারেসি. বোধিসত্তো তস্স গোতমিযা নাম অগ্গমহেসিযা কুচ্ছিম্হি পটিসন্ধিং অগ্গহেসি. ‘‘চন্দকুমারো’’তিস্স নামমকংসু. তস্স পদসা গমনকালে অপরোপি পুত্তো উপ্পন্নো, তস্স ‘‘সূরিযকুমারো’’তি নামমকংসু. তস্স পদসা গমনকালে একা ধীতা উপ্পন্না, ‘‘সেলা’’তিস্সা নামমকংসু. ৰেমাতিকা চ নেসং ভদ্দসেনো সূরো চাতি দ্ৰে ভাতরো অহেসুং. বোধিসত্তো অনুপুব্বেন ৰুদ্ধিপ্পত্তো সিপ্পেসু চ ৰিজ্জাট্ঠানেসু চ পারং অগমাসি. তস্স রাজা অনুচ্ছৰিকং চন্দং নাম রাজধীতরং আনেত্ৰা উপরজ্জং অদাসি. বোধিসত্তস্স একো পুত্তো উপ্পন্নো, তস্স ‘‘ৰাসুলো’’তি নামমকংসু. তস্স পন রঞ্ঞো খণ্ডহালো নাম পুরোহিতো, তং রাজা ৰিনিচ্ছযে ঠপেসি. সো লঞ্জৰিত্তকো হুত্ৰা লঞ্জং গহেত্ৰা অস্সামিকে সামিকে করোতি, সামিকে চ অস্সামিকে করোতি. অথেকদিৰসং অট্টপরাজিতো একো পুরিসো ৰিনিচ্ছযট্ঠানে উপক্কোসেন্তো নিক্খমিত্ৰা রাজূপট্ঠানং গচ্ছন্তং বোধিসত্তং দিস্ৰা তস্স পাদেসু নিপতিত্ৰা ‘‘সামি খণ্ডহালো ৰিনিচ্ছযে ৰিলোপং খাদতি, অহং তেন লঞ্জং গহেত্ৰা পরাজযং পাপিতো’’তি অট্টস্সরমকাসি. বোধিসত্তো ‘‘মা ভাযী’’তি তং অস্সাসেত্ৰা ৰিনিচ্ছযং নেত্ৰা সামিকমেৰ সামিকং অকাসি. মহাজনো মহাসদ্দেন সাধুকারমদাসি.

রাজা ‘‘বোধিসত্তেন কির অট্টো সুৰিনিচ্ছিতো’’তি সুত্ৰা তং আমন্তেত্ৰা ‘‘তাত, ইতো পট্ঠায ত্ৰমেৰ অট্টকরণে ৰিনিচ্ছযং ৰিনিচ্ছিনাহী’’তি ৰিনিচ্ছযং বোধিসত্তস্স অদাসি. খণ্ডহালস্স আযো পচ্ছিজ্জি. সো ততো পট্ঠায বোধিসত্তে আঘাতং বন্ধিত্ৰা ওতারাপেক্খো ৰিচরি. সো পন রাজা মুধপ্পসন্নো. সো একদিৰসং সুপিনন্তেন দেৰলোকং পস্সিত্ৰা তত্থ গন্তুকামো হুত্ৰা ‘‘পুরোহিতং ব্রহ্মলোকগামিমগ্গং আচিক্খা’’তি আহ. সো ‘‘অতিদানং দদন্তো সব্বচতুক্কেন যঞ্ঞং যজস্সূ’’তি ৰত্ৰা রঞ্ঞা ‘‘কিং অতিদান’’ন্তি পুট্ঠো ‘‘অত্তনো পিযপুত্তা পিযভরিযা পিযধীতরো মহাৰিভৰসেট্ঠিনো মঙ্গলহত্থিঅস্সাদযোতি এতে চত্তারো চত্তারো কত্ৰা দ্ৰিপদচতুপ্পদে যঞ্ঞত্থায পরিচ্চজিত্ৰা তেসং গললোহিতেন যজনং অতিদানং নামা’’তি সঞ্ঞাপেসি. ইতি সো ‘‘সগ্গমগ্গং আচিক্খিস্সামী’’তি নিরযমগ্গং আচিক্খি.

রাজাপি তস্মিং পণ্ডিতসঞ্ঞী হুত্ৰা ‘‘তেন ৰুত্তৰিধি সগ্গমগ্গো’’তি সঞ্ঞায তং পটিপজ্জিতুকামো মহন্তং যঞ্ঞাৰাটং কারাপেত্ৰা তত্থ বোধিসত্তাদিকে চত্তারো রাজকুমারে আদিং কত্ৰা খণ্ডহালেন ৰুত্তং সব্বং দ্ৰিপদচতুপ্পদং যঞ্ঞপসুতট্ঠানে নেথাতি আণাপেসি. সব্বঞ্চ যঞ্ঞসম্ভারং উপক্খটং অহোসি. তং সুত্ৰা মহাজনো মহন্তং কোলাহলং অকাসি. রাজা ৰিপ্পটিসারী হুত্ৰা খণ্ডহালেন উপত্থম্ভিতো পুনপি তথা তং আণাপেসি. বোধিসত্তো ‘‘খণ্ডহালেন ৰিনিচ্ছযট্ঠানং অলভন্তেন মযি আঘাতং বন্ধিত্ৰা মমেৰ মরণং ইচ্ছন্তেন মহাজনস্স অনযব্যসনং উপ্পাদিত’’ন্তি জানিত্ৰা নানাৰিধেহি উপাযেহি রাজানং ততো দুগ্গহিতগ্গাহতো ৰিৰেচেতুং ৰাযমিত্ৰাপি নাসক্খি. মহাজনো পরিদেৰি, মহন্তং কারুঞ্ঞমকাসি. মহাজনস্স পরিদেৰন্তস্সেৰ যঞ্ঞাৰাটে সব্বকম্মানি নিট্ঠাপেসি. রাজপুত্তং নেত্ৰা গীৰায নামেত্ৰা নিসীদাপেসুং. খণ্ডহালো সুৰণ্ণপাতিং উপনামেত্ৰা খগ্গং আদায ‘‘তস্স গীৰং ছিন্দিস্সামী’’তি অট্ঠাসি. তং দিস্ৰা চন্দা নাম রাজপুত্তস্স দেৰী ‘‘অঞ্ঞং মে পটিসরণং নত্থি, অত্তনো সচ্চবলেন সামিকস্স সোত্থিং করিস্সামী’’তি অঞ্জলিং পগ্গয্হ পরিসায অন্তরে ৰিচরন্তী ‘‘ইদং একন্তেনেৰ পাপকম্মং, যং খণ্ডহালো সগ্গমগ্গোতি করোতি. ইমিনা ময্হং সচ্চৰচনেন মম সামিকস্স সোত্থি হোতু.

‘‘যা দেৰতা ইধ লোকে, সব্বা তা সরণং গতা;

অনাথং তাযথ মমং, যথাহং পতিমা সিয’’ন্তি. –

সচ্চকিরিযমকাসি. সক্কো দেৰরাজা তস্সা পরিদেৰনসদ্দং সুত্ৰা তং পৰত্তিং ঞত্ৰা জলিতং অযোকূটং আদায আগন্ত্ৰা রাজানং তাসেত্ৰা সব্বে ৰিস্সজ্জাপেসি. সক্কোপি তদা অত্তনো দিব্বরূপং দস্সেত্ৰা সম্পজ্জলিতং সজোতিভূতং ৰজিরং পরিব্ভমন্তো ‘‘অরে, পাপরাজ কাল়কণ্ণি, কদা তযা পাণাতিপাতেন সুগতিগমনং দিট্ঠপুব্বং, চন্দকুমারং সব্বঞ্চ ইমং জনং বন্ধনতো মোচেহি, নো চে মোচেস্সসি, এত্থেৰ তে ইমস্স চ দুট্ঠব্রাহ্মণস্স সীসং ফালেস্সামী’’তি আকাসে অট্ঠাসি. তং অচ্ছরিযং দিস্ৰা রাজা ব্রাহ্মণো চ সীঘং সব্বে বন্ধনা মোচেসুং.

অথ মহাজনো এককোলাহলং কত্ৰা সহসা যঞ্ঞাৰাটং অজ্ঝোত্থরিত্ৰা খণ্ডহালস্স একেকং লেড্ডুপ্পহারং দেন্তো তত্থেৰ নং জীৰিতক্খযং পাপেত্ৰা রাজানম্পি মারেতুং আরভি. বোধিসত্তো পুরেতরমেৰ পিতরং পলিস্সজিত্ৰা ঠিতো মারেতুং ন অদাসি. মহাজনো ‘‘জীৰিতং তাৰস্স পাপরঞ্ঞো দেম, ছত্তং পনস্স ন দস্সাম, নগরে ৰাসং ৰা ন দস্সাম, তং চণ্ডালং কত্ৰা বহিনগরে ৰাসাপেস্সামা’’তি রাজৰেসং হারেত্ৰা কাসাৰং নিৰাসাপেত্ৰা হলিদ্দিপিলোতিকায সীসং ৰেঠেত্ৰা চণ্ডালং কত্ৰা চণ্ডালগামং পহিণিংসু. যে পন তং পসুঘাতযঞ্ঞং যজিংসু চেৰ যজাপেসুঞ্চ অনুমোদিংসু চ, সব্বে তে নিরযপরাযনা অহেসুং. তেনাহ ভগৰা –

‘‘সব্বে পতিট্ঠা নিরযং, যথা তং পাপকং করিত্ৰান;

ন হি পাপকম্মং কত্ৰা, লব্ভা সুগতিং ইতো গন্তু’’ন্তি. (জা. ২.২২.১১৪৩);

অথ সব্বাপি রাজপরিসা নাগরা চেৰ জানপদা চ সমাগন্ত্ৰা বোধিসত্তং রজ্জে অভিসিঞ্চিংসু. সো ধম্মেন রজ্জং অনুসাসন্তো তং অত্তনো মহাজনস্স চ অকারণেনেৰ উপ্পন্নং অনযব্যসনং অনুস্সরিত্ৰা সংৰেগজাতো পুঞ্ঞকিরিযাসু ভিয্যোসোমত্তায উস্সাহজাতো মহাদানং পৰত্তেসি, সীলানি রক্খি, উপোসথকম্মং সমাদিযি. তেন ৰুত্তং –

৪৬.

‘‘তদাহং যজনা মুত্তো, নিক্খন্তো যঞ্ঞৰাটতো;

সংৰেগং জনযিত্ৰান, মহাদানং পৰত্তযি’’ন্তি. – আদি;

তত্থ যজনা মুত্তোতি খণ্ডহালেন ৰিহিতযঞ্ঞৰিধিতো ৰুত্তনযেন ঘাতেতব্বতো মুত্তো. নিক্খন্তো যঞ্ঞৰাটতোতি অভিসেককরণত্থায উস্সাহজাতেন মহাজনেন সদ্ধিং ততো যঞ্ঞভূমিতো নিগ্গতো. সংৰেগং জনযিত্ৰানাতি এৰং ‘‘বহুঅন্তরাযো লোকসন্নিৰাসো’’তি অতিৰিয সংৰেগং উপ্পাদেত্ৰা. মহাদানং পৰত্তযিন্তি ছ দানসালাযো কারাপেত্ৰা মহতা ধনপরিচ্চাগেন ৰেস্সন্তরদানসদিসং মহাদানমদাসিং. এতেন অভিসেককরণতো পট্ঠায তস্স মহাদানস্স পৰত্তিতভাৰং দস্সেতি.

৪৭. দক্খিণেয্যে অদত্ৰানাতি দক্খিণারহে পুগ্গলে দেয্যধম্মং অপরিচ্চজিত্ৰা. অপি ছপ্পঞ্চ রত্তিযোতি অপ্পেকদা ছপি পঞ্চপি রত্তিযো অত্তনো পিৰনখাদনভুঞ্জনানি ন করোমীতি দস্সেতি.

তদা কির বোধিসত্তো সকলজম্বুদীপং উন্নঙ্গলং কত্ৰা মহামেঘো ৰিয অভিৰস্সন্তো মহাদানং পৰত্তেসি. তত্থ কিঞ্চাপি দানসালাসু অন্নপানাদিউল়ারুল়ারপণীতপণীতমেৰ যাচকানং যথারুচিতং দিৰসে দিৰসে দীযতি, তথাপি অত্তনো সজ্জিতং আহারং রাজারহভোজনম্পি যাচকানং অদত্ৰা ন ভুঞ্জতি, তং সন্ধায ৰুত্তং ‘‘নাহং পিৰামী’’তিআদি.

৪৮. ইদানি তথা যাচকানং দানে কারণং দস্সেন্তো উপমং তাৰ আহরতি ‘‘যথাপি ৰাণিজো নামা’’তিআদিনা. তস্সত্থো – যথা নাম ৰাণিজো ভণ্ডট্ঠানং গন্ত্ৰা অপ্পেন পাভতেন বহুং ভণ্ডং ৰিক্কিণিত্ৰা ৰিপুলং ভণ্ডসন্নিচযং কত্ৰা দেসকালং জানন্তো যত্থস্স লাভো উদযো মহা হোতি, তত্থ দেসে কালে ৰা তং ভণ্ডং হরতি উপনেতি ৰিক্কিণাতি.

৪৯. সকভুত্তাপীতি সকভুত্ততোপি অত্তনা পরিভুত্ততোপি. ‘‘সকপরিভুত্তাপী’’তিপি পাঠো. পরেতি পরস্মিং পটিগ্গাহকপুগ্গলে. সতভাগোতি অনেকসতভাগো আযতিং ভৰিস্সতি. ইদং ৰুত্তং হোতি – যথা ৰাণিজেন কীতভণ্ডং তত্থেৰ অৰিক্কিণিত্ৰা তথারূপে দেসে কালে চ ৰিক্কিণিযমানং বহুং উদযং ৰিপুলং ফলং হোতি, তথেৰ অত্তনো সন্তকং অত্তনা অনুপভুঞ্জিত্ৰা পরস্মিং পটিগ্গাহকপুগ্গলে দিন্নং মহপ্ফলং অনেকসতভাগো ভৰিস্সতি, তস্মা অত্তনা অভুঞ্জিত্ৰাপি পরস্স দাতব্বমেৰাতি. ৰুত্তঞ্হেতং ভগৰতা – ‘‘তিরচ্ছানগতে দানং দত্ৰা সতগুণা দক্খিণা পাটিকঙ্খিতব্বা. পুথুজ্জনদুস্সীলে দানং দত্ৰা সহস্সগুণা’’তি (ম. নি. ৩.৩৭৯) ৰিত্থারো. অপরম্পি ৰুত্তং ‘‘এৰং চে, ভিক্খৰে, সত্তা জানেয্যুং দানসংৰিভাগস্স ৰিপাকং, যথাহং জানামি, ন অদত্ৰা ভুঞ্জেয্যুং, ন চ নেসং মচ্ছেরমলং চিত্তং পরিযাদায তিট্ঠেয্য. যোপি নেসং অস্স চরিমো আলোপো চরিমং কবল়ং, ততোপি ন অসংৰিভজিত্ৰা ভুঞ্জেয্যু’’ন্তিআদি (ইতিৰু. ২৬).

৫০. এতমত্থৰসং ঞত্ৰাতি এতং দানস্স মহপ্ফলভাৰসঙ্খাতঞ্চেৰ সম্মাসম্বোধিযা পচ্চযভাৰসঙ্খাতঞ্চ অত্থৰসং কারণং জানিত্ৰা. ন পটিক্কমামি দানতোতি দানপারমিতো ঈসকম্পি ন নিৰত্তামি অভিক্কমামি এৰ. কিমত্থং? সম্বোধিমনুপত্তিযাতি সম্বোধিং সব্বঞ্ঞুতঞ্ঞাণং অনুপ্পত্তিযা অনুপ্পত্তিযত্থং, অধিগন্তুন্তি অত্থো.

তদা বোধিসত্তো মহাজনেন পিতরি চণ্ডালগামং পৰেসিতে দাতব্বযুত্তকং পরিব্বযং দাপেসি নিৰাসনানি পারুপনানি চ. সোপি নগরং পৰিসিতুং অলভন্তো বোধিসত্তে উয্যানকীল়াদিঅত্থং বহিগতে উপসঙ্কমতি, পুত্তসঞ্ঞায পন ন ৰন্দতি, ন অঞ্জলিকম্মং করোতি, ‘‘চিরং জীৰ, সামী’’তি ৰদতি. বোধিসত্তোপি দিট্ঠদিৰসে অতিরেকসম্মানং করোতি. সো এৰং ধম্মেন রজ্জং কারেত্ৰা আযুপরিযোসানে সপরিসো দেৰলোকং পূরেসি.

তদা খণ্ডহালো দেৰদত্তো অহোসি, গোতমী দেৰী মহামাযা, চন্দা রাজধীতা রাহুলমাতা, ৰাসুলো রাহুলো, সেলা উপ্পলৰণ্ণা, সূরো মহাকস্সপো, ভদ্দসেনো মহামোগ্গল্লানো, সূরিযকুমারো সারিপুত্তো, চন্দরাজা লোকনাথো.

তস্স ইধাপি পুব্বে ৰুত্তনযেনেৰ যথারহং সেসপারমিযো নিদ্ধারেতব্বা. তদা খণ্ডহালস্স কক্খল়ফরুসভাৰং জানন্তোপি অজ্ঝুপেক্খিত্ৰা ধম্মেন সমেন অট্টস্স ৰিনিচ্ছযো, অত্তানং মারেতুকামস্সেৰ খণ্ডহালস্স তথা যঞ্ঞৰিধানং জানিত্ৰাপি তস্স উপরি চিত্তপ্পকোপাভাৰো, অত্তনো পরিসং গহেত্ৰা পিতু সত্তু ভৰিতুং সমত্থোপি ‘‘মাদিসস্স নাম গরূহি ৰিরোধো ন যুত্তো’’তি অত্তানং পুরিসপসুং কত্ৰা ঘাতাপেতুকামস্স পিতু আণাযং অৰট্ঠানং, কোসিযা অসিং গহেত্ৰা সীসং ছিন্দিতুং উপক্কমন্তে পুরোহিতে অত্তনো পিতরি পুত্তে সব্বসত্তেসু চ মেত্তাফরণেন সমচিত্ততা, মহাজনে পিতরং মারেতুং উপক্কমন্তে সযং পলিস্সজিত্ৰা তস্স জীৰিতদানঞ্চ, দিৰসে দিৰসে ৰেস্সন্তরদানসদিসং মহাদানং দদতোপি দানেন অতিত্তভাৰো, মহাজনেন চণ্ডালেসু ৰাসাপিতস্স পিতু দাতব্বযুত্তকং দত্ৰা পোসনং, মহাজনং পুঞ্ঞকিরিযাসু পতিট্ঠাপনন্তি এৰমাদযো গুণানুভাৰা নিদ্ধারেতব্বাতি.

চন্দকুমারচরিযাৰণ্ণনা নিট্ঠিতা.

৮. সিৰিরাজচরিযাৰণ্ণনা

৫১. অট্ঠমে অরিট্ঠসৰ্হযে নগরেতি অরিট্ঠপুরনামকে নগরে. সিৰি নামাসি খত্তিযোতি সিৰীতি গোত্ততো এৰংনামকো রাজা অহোসি.

অতীতে কির সিৰিরট্ঠে অরিট্ঠপুরনগরে সিৰিরাজে রজ্জং কারেন্তে মহাসত্তো তস্স পুত্তো হুত্ৰা নিব্বত্তি. ‘‘সিৰিকুমারো’’তিস্স নামমকংসু. সো ৰযপ্পত্তো তক্কসিলং গন্ত্ৰা উগ্গহিতসিপ্পো আগন্ত্ৰা পিতু সিপ্পং দস্সেত্ৰা উপরজ্জং লভিত্ৰা অপরভাগে পিতু অচ্চযেন রাজা হুত্ৰা অগতিগমনং পহায দস রাজধম্মে অকোপেত্ৰা রজ্জং কারেন্তো নগরস্স চতূসু দ্ৰারেসু নগরমজ্ঝে নিৰেসনদ্ৰারেতি ছ দানসালাযো কারেত্ৰা দেৰসিকং ছসতসহস্সপরিচ্চাগেন মহাদানং পৰত্তেসি. অট্ঠমীচাতুদ্দসীপন্নরসীসু সযং দানসালং গন্ত্ৰা দানগ্গং ওলোকেতি.

সো একদা পুণ্ণমদিৰসে পাতোৰ সমুস্সিতসেতচ্ছত্তে রাজপল্লঙ্কে নিসিন্নো অত্তনা দিন্নদানং আৰজ্জেন্তো বাহিরৰত্থুং অত্তনা অদিন্নং নাম অদিস্ৰা ‘‘ন মে বাহিরকদানং তথা চিত্তং তোসেতি, যথা অজ্ঝত্তিকদানং, অহো ৰত মম দানসালং গতকালে কোচি যাচকো বাহিরৰত্থুং অযাচিত্ৰা অজ্ঝত্তিকমেৰ যাচেয্য, সচে হি মে কোচি সরীরে মংসং ৰা লোহিতং ৰা সীসং ৰা হদযমংসং ৰা অক্খীনি ৰা উপড্ঢসরীরং ৰা সকলমেৰ ৰা অত্তভাৰং দাসভাৰেন যাচেয্য, তংতদেৰস্স অধিপ্পাযং পূরেন্তো দাতুং সক্কোমী’’তি চিন্তেসি. পাল়িযং পন অক্খীনং এৰ ৰসেন আগতা. তেন ৰুত্তং –

‘‘নিসজ্জ পাসাদৰরে, এৰং চিন্তেসহং তদা’’.

৫২.

‘‘যংকিঞ্চি মানুসং দানং, অদিন্নং মে ন ৰিজ্জতি;

যোপি যাচেয্য মং চক্খুং, দদেয্যং অৰিকম্পিতো’’তি.

তত্থ মানুসং দানন্তি পকতিমনুস্সেহি দাতব্বদানং অন্নপানাদি. এৰং পন মহাসত্তস্স উল়ারে দানজ্ঝাসযে উপ্পন্নে সক্কস্স পণ্ডুকম্বলসিলাসনং উণ্হাকারং দস্সেসি. সো তস্স কারণং আৰজ্জেন্তো বোধিসত্তস্স অজ্ঝাসযং দিস্ৰা ‘‘সিৰিরাজা অজ্জ সম্পত্তযাচকা চক্খূনি চে যাচন্তি, চক্খূনি উপ্পাটেত্ৰা নেসং দস্সামীতি চিন্তেসী’’তি সক্কো দেৰপরিসায ৰত্ৰা ‘‘সো সক্খিস্সতি নু খো তং দাতুং, উদাহু নোতি ৰীমংসিস্সামি তাৰ ন’’ন্তি বোধিসত্তে সোল়সহি গন্ধোদকঘটেহি ন্হত্ৰা সব্বালঙ্কারেহি পটিমণ্ডিতে অলঙ্কতহত্থিক্খন্ধৰরগতে দানগ্গং গচ্ছন্তে জরাজিণ্ণো অন্ধব্রাহ্মণো ৰিয হুত্ৰা তস্স চক্খুপথে একস্মিং উন্নতপ্পদেসে উভো হত্থে পসারেত্ৰা রাজানং জযাপেত্ৰা ঠিতো বোধিসত্তেন তদভিমুখং ৰারণং পেসেত্ৰা ‘‘ব্রাহ্মণ, কিং ইচ্ছসী’’তি পুচ্ছিতো ‘‘তৰ দানজ্ঝাসযং নিস্সায সমুগ্গতেন কিত্তিঘোসেন সকললোকসন্নিৰাসো নিরন্তরং ফুটো, অহঞ্চ অন্ধো, তস্মা তং যাচামী’’তি উপচারৰসেন একং চক্খুং যাচি. তেন ৰুত্তং –

৫৩.

‘‘মম সঙ্কপ্পমঞ্ঞায, সক্কো দেৰানমিস্সরো;

নিসিন্নো দেৰপরিসায, ইদং ৰচনমব্রৰি.

৫৪.

‘‘নিসজ্জ পাসাদৰরে, সিৰিরাজা মহিদ্ধিকো;

চিন্তেন্তো ৰিৰিধং দানং, অদেয্যং সো ন পস্সতি.

৫৫.

‘‘তথং নু ৰিতথং নেতং, হন্দ ৰীমংসযামি তং;

মুহুত্তং আগমেয্যাথ, যাৰ জানামি তং মনং.

৫৬.

‘‘পৰেধমানো পলিতসিরো, ৰলিগত্তো জরাতুরো;

অন্ধৰণ্ণোৰ হুত্ৰান, রাজানং উপসঙ্কমি.

৫৭.

‘‘সো তদা পগ্গহেত্ৰান, ৰামং দক্খিণবাহু চ;

সিরস্মিং অঞ্জলিং কত্ৰা, ইদং ৰচনমব্রৰি.

৫৮.

‘‘‘যাচামি তং মহারাজ, ধম্মিক রট্ঠৰড্ঢন;

তৰ দানরতা কিত্তি, উগ্গতা দেৰমানুসে.

৫৯.

‘‘‘উভোপি নেত্তা নযনা, অন্ধা উপহতা মম;

একং মে নযনং দেহি, ত্ৰম্পি একেন যাপযা’’’তি.

তত্থ চিন্তেন্তো ৰিৰিধং দানন্তি অত্তনা দিন্নং ৰিৰিধং দানং চিন্তেন্তো, আৰজ্জেন্তো দানং ৰা অত্তনা দিন্নং ৰিৰিধং বাহিরং দেয্যধম্মং চিন্তেন্তো. অদেয্যং সো ন পস্সতীতি বাহিরং ৰিয অজ্ঝত্তিকৰত্থুম্পি অদেয্যং দাতুং অসক্কুণেয্যং ন পস্সতি, ‘‘চক্খূনিপি উপ্পাটেত্ৰা দস্সামী’’তি চিন্তেসীতি অধিপ্পাযো. তথং নু ৰিতথং নেতন্তি এতং অজ্ঝত্তিকৰত্থুনোপি অদেয্যস্স অদস্সনং দেয্যভাৰেনেৰ দস্সনং চিন্তনং সচ্চং নু খো, উদাহু, অসচ্চন্তি অত্থো. সো তদা পগ্গহেত্ৰান, ৰামং দক্খিণবাহু চাতি ৰামবাহুং দক্খিণবাহুঞ্চ তদা পগ্গহেত্ৰা, উভো বাহূ উক্খিপিত্ৰাতি অত্থো. রট্ঠৰড্ঢনাতি রট্ঠৰড্ঢীকর. ত্ৰম্পি একেন যাপযাতি একেন চক্খুনা সমৰিসমং পস্সন্তো সকং অত্তভাৰং ত্ৰং যাপেহি, অহম্পি ভৰতো লদ্ধেন একেন যাপেমীতি দস্সেতি.

তং সুত্ৰা মহাসত্তো তুট্ঠমানসো ‘‘ইদানেৰাহং পাসাদে নিসিন্নো এৰং চিন্তেত্ৰা আগতো, অযঞ্চ মে চিত্তং ঞত্ৰা ৰিয চক্খুং যাচতি, অহো ৰত মে লাভা, অজ্জ মে মনোরথো মত্থকং পাপুণিস্সতি, অদিন্নপুব্বং ৰত দানং দস্সামী’’তি উস্সাহজাতো অহোসি. তমত্থং পকাসেন্তো সত্থা আহ –

৬০.

‘‘তস্সাহং ৰচনং সুত্ৰা, হট্ঠো সংৰিগ্গমানসো;

কতঞ্জলী ৰেদজাতো, ইদং ৰচনমব্রৰিং.

৬১.

‘‘‘ইদানাহং চিন্তযিত্ৰান, পাসাদতো ইধাগতো;

ত্ৰং মম চিত্তমঞ্ঞায, নেত্তং যাচিতুমাগতো.

৬২.

‘‘‘অহো মে মানসং সিদ্ধং, সঙ্কপ্পো পরিপূরিতো;

অদিন্নপুব্বং দানৰরং, অজ্জ দস্সামি যাচকে’’’তি.

তত্থ তস্সাতি তস্স ব্রাহ্মণরূপধরস্স সক্কস্স. হট্ঠোতি তুট্ঠো. সংৰিগ্গমানসোতি মম চিত্তং জানিত্ৰা ৰিয ইমিনা ব্রাহ্মণেন চক্খু যাচিতং, এত্তকং কালং এৰং অচিন্তেত্ৰা পমজ্জিতো ৰতম্হীতি সংৰিগ্গচিত্তো. ৰেদজাতোতি জাতপীতিপামোজ্জো. অব্রৰিন্তি অভাসিং. মানসন্তি মনসি ভৰং মানসং, দানজ্ঝাসযো, ‘‘চক্খুং দস্সামী’’তি উপ্পন্নদানজ্ঝাসযোতি অত্থো. সঙ্কপ্পোতি মনোরথো. পরিপূরিতোতি পরিপুণ্ণো.

অথ বোধিসত্তো চিন্তেসি – ‘‘অযং ব্রাহ্মণো মম চিত্তাচারং ঞত্ৰা ৰিয দুচ্চজম্পি চক্খুং মং যাচতি, সিযা নু খো কাযচি দেৰতায অনুসিট্ঠো ভৰিস্সতি, পুচ্ছিস্সামি তাৰ ন’’ন্তি চিন্তেত্ৰা তং ব্রাহ্মণং পুচ্ছি. তেনাহ ভগৰা জাতকদেসনাযং –

‘‘কেনানুসিট্ঠো ইধমাগতোসি, ৰনিব্বক চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুরিসেন দুচ্চজ’’ন্তি.(জা. ১.১৫.৫৩);

তং সুত্ৰা ব্রাহ্মণরূপধরো সক্কো আহ –

‘‘যমাহু দেৰেসু সুজম্পতীতি, মঘৰাতি নং আহু মনুস্সলোকে;

তেনানুসিট্ঠো ইধমাগতোস্মি, ৰনিব্বকো চক্খুপথানি যাচিতুং.

‘‘ৰনিব্বতো ময্হং ৰনিং অনুত্তরং, দদাহি তে চক্খুপথানি যাচিতো;

দদাহি মে চক্খুপথং অনুত্তরং, যমাহু নেত্তং পুরিসেন দুচ্চজ’’ন্তি. (জা. ১.১৫.৫৪-৫৫);

মহাসত্তো আহ –

‘‘যেন অত্থেন আগচ্ছি, যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্রাহ্মণ.

‘‘একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো,

যদিচ্ছসে ত্ৰং তদ তে সমিজ্ঝতূ’’তি. (জা. ১.১৫.৫৬-৫৭);

তত্থ ৰনিব্বকাতি তং আলপতি. চক্খুপথানীতি দস্সনস্স পথভাৰতো চক্খূনমেৰেতং নামং. যমাহূতি যং লোকে ‘‘দুচ্চজ’’ন্তি কথেন্তি. ৰনিব্বতোতি যাচন্তস্স. ৰনিন্তি যাচনং. তে তেতি তে তৰ তস্স অন্ধস্স সঙ্কপ্পা. স চক্খুমাতি সো ত্ৰং মম চক্খূহি চক্খুমা হুত্ৰা. তদ তে সমিজ্ঝতূতি যং ত্ৰং মম সন্তিকা ইচ্ছসি, তং তে সমিজ্ঝতূতি.

রাজা এত্তকং কথেত্ৰা ‘‘অযং ব্রাহ্মণো সক্কেন অনুসিট্ঠো ইধাগতোস্মীতি ভণতি, নূন ইমস্স ইমিনা উপাযেন চক্খু সম্পজ্জিস্সতী’’তি ঞত্ৰা ‘‘ইধেৰ মযা চক্খূনি উপ্পাটেত্ৰা দাতুং অসারুপ্প’’ন্তি চিন্তেত্ৰা ব্রাহ্মণং আদায অন্তেপুরং গন্ত্ৰা রাজাসনে নিসীদিত্ৰা সিৰকং নাম ৰেজ্জং পক্কোসাপেসি. অথ ‘‘অম্হাকং কির রাজা অক্খীনি উপ্পাটেত্ৰা ব্রাহ্মণস্স দাতুকামো’’তি সকলনগরে এককোলাহলং অহোসি. অথ নং রঞ্ঞো ঞাতিসেনাপতিআদযো রাজৰল্লভা অমচ্চা পারিসজ্জা নাগরা ওরোধা চ সব্বে সন্নিপতিত্ৰা নানাউপাযেহি নিৰারেসুং. রাজাপি নে অনুৰারেসি তেনাহ –

‘‘মা নো দেৰ অদা চক্খুং, মা নো সব্বে পরাকরি;

ধনং দেহি মহারাজ, মুত্তা ৰেল়ুরিযা বহূ.

‘‘যুত্তে দেৰ রথে দেহি, আজানীযে চলঙ্কতে;

নাগে দেহি মহারাজ, হেমকপ্পনৰাসসে.

‘‘যথা তং সিৰযো সব্বে, সযোগ্গা সরথা সদা;

সমন্তা পরিকিরেয্যুং, এৰং দেহি রথেসভা’’তি. (জা. ১.১৫.৫৮-৬০);

অথ রাজা তিস্সো গাথা অভাসি –

‘‘যো ৰে দস্সন্তি ৰত্ৰান, অদানে কুরুতে মনো;

ভূম্যং সো পতিতং পাসং, গীৰাযং পটিমুঞ্চতি.

‘‘যো ৰে দস্সন্তি ৰত্ৰান, অদানে কুরুতে মনো;

পাপা পাপতরো হোতি, সম্পত্তো যমসাধনং.

‘‘যঞ্হি যাচে তঞ্হি দদে, যং ন যাচে ন তং দদে;

স্ৰাহং তমেৰ দস্সামি, যং মং যাচতি ব্রাহ্মণো’’তি. (জা. ১.১৫.৬১-৬৩);

তত্থ মা নো, দেৰাতি নোতি নিপাতমত্তং. দেৰ, মা চক্খুং অদাসি. মা নো সব্বে পরাকরীতি অম্হে সব্বে মা পরিচ্চজি. অক্খীসু হি দিন্নেসু ত্ৰং রজ্জং ন করিস্সসি, এৰং তযা মযং পরিচ্চত্তা নাম ভৰিস্সামাতি অধিপ্পাযেন এৰমাহংসু. পরিকিরেয্যুন্তি পরিৰারেয্যুং. এৰং দেহীতি যথা তং অৰিকলচক্খুং সিৰযো চিরং পরিৰারেয্যুং, এৰং দেহি ধনমেৰস্স দেহি, মা অক্খীনি, অক্খীসু হি দিন্নেসু ন তং সিৰযো পরিৰারেস্সন্তীতি দস্সেতি.

পটিমুঞ্চতীতি পটিপৰেসেতি. পাপা পাপতরো হোতীতি লামকা লামকতরো নাম হোতি. সম্পত্তো যমসাধনন্তি যমস্স আণাপৰত্তিট্ঠানং উস্সদনিরযং এস পত্তো নাম হোতি. যঞ্হি যাচেতি যং ৰত্থুং যাচকো যাচতি, দাযকোপি তদেৰ দদেয্য, ন অযাচিতং, অযঞ্চ ব্রাহ্মণো চক্খুং মং যাচতি, ন মুত্তাদিকং ধনং, তং দস্সামীতি ৰদতি.

অথ নং ‘‘আযুআদীসু কিং পত্থেত্ৰা চক্খূনি দেসি দেৰা’’তি পুচ্ছিংসু. মহাপুরিসো ‘‘নাহং দিট্ঠধম্মিকং সম্পরাযিকং ৰা সম্পত্তিং পত্থেত্ৰা দেমি, অপি চ বোধিসত্তানং আচিণ্ণসমাচিণ্ণো পোরাণকমগ্গো এস, যদিদং দানপারমিপূরণং নামা’’তি আহ. তেন ৰুত্তং –

‘‘আযুং নু ৰণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি রাজা সিৰিনং অনুত্তরো, চক্খূনি দজ্জা পরলোকহেতু.

‘‘ন ৰাহমেতং যসসা দদামি, ন পুত্তমিচ্ছে ন ধনং ন রট্ঠং;

সতঞ্চ ধম্মো চরিতো পুরাণো, ইচ্চেৰ দানে রমতে মনো মমা’’তি. (জা. ১.১৫.৬৪-৬৫);

তত্থ পরলোকহেতূতি, মহারাজ, কথং নাম তুম্হাদিসো পণ্ডিতপুরিসো সক্কসম্পত্তিসদিসং সন্দিট্ঠিকং ইস্সরিযং পহায পরলোকহেতু চক্খূনি দদেয্যাতি.

ন ৰাহন্তি ন ৰে অহং. যসসাতি দিব্বস্স ৰা মানুসস্স ৰা ইস্সরিযস্স কারণা, অপিচ সতং বোধিসত্তানং ধম্মো বুদ্ধকারকো চরিতো আচরিতো আচিণ্ণো পুরাতনো ইচ্চেৰ ইমিনা কারণেন দানেযেৰ ঈদিসো মম মনো নিরতোতি.

এৰঞ্চ পন ৰত্ৰা রাজা অমচ্চে সঞ্ঞাপেত্ৰা সিৰকং ৰেজ্জং আণাপেসি – ‘‘এহি, সিৰক, মম উভোপি অক্খীনি ইমস্স ব্রাহ্মণস্স দাতুং সীঘং উপ্পাটেত্ৰা হত্থে পতিট্ঠপেহী’’তি. তেন ৰুত্তং –

৬৩.

‘‘এহি সিৰক উট্ঠেহি, মা দন্ধযি মা পৰেধযি;

উভোপি নযনং দেহি, উপ্পাটেত্ৰা ৰনিব্বকে.

৬৪.

‘‘ততো সো চোদিতো ময্হং, সিৰকো ৰচনংকরো;

উদ্ধরিত্ৰান পাদাসি, তালমিঞ্জংৰ যাচকে’’তি.

তত্থ উট্ঠেহীতি উট্ঠানৰীরিযং করোহি. ইমস্মিং মম চক্খুদানে সহাযকিচ্চং করোহীতি দস্সেতি. মা দন্তযীতি মা চিরাযি. অযঞ্হি অতিদুল্লভো চিরকালং পত্থিতো মযা উত্তমো দানক্খণো পটিলদ্ধো, সো মা ৰিরজ্ঝীতি অধিপ্পাযো. মা পৰেধযীতি ‘‘অম্হাকং রঞ্ঞো চক্খূনি উপ্পাটেমী’’তি চিত্তুত্রাসৰসেন মা ৰেধযি সরীরকম্পং মা আপজ্জি. উভোপি নযনন্তি উভোপি নযনে. ৰনিব্বকেতি যাচকস্স ময্হন্তি মযা. উদ্ধরিত্ৰান পাদাসীতি সো ৰেজ্জো রঞ্ঞো অক্খিকূপতো উভোপি অক্খীনি উপ্পাটেত্ৰা রঞ্ঞো হত্থে অদাসি.

দেন্তো চ ন সত্থকেন উদ্ধরিত্ৰা অদাসি. সো হি চিন্তেসি – ‘‘অযুত্তং মাদিসস্স সুসিক্খিতৰেজ্জস্স রঞ্ঞো অক্খীসু সত্থপাতন’’ন্তি ভেসজ্জানি ঘংসেত্ৰা ভেসজ্জচুণ্ণেন নীলুপ্পলং পরিভাৰেত্ৰা দক্খিণক্খিং উপসিঙ্ঘাপেসি, অক্খি পরিৰত্তি, দুক্খা ৰেদনা উপ্পজ্জি. সো পরিভাৰেত্ৰা পুনপি উপসিঙ্ঘাপেসি, অক্খি অক্খিকূপতো মুচ্চি, বলৰতরা ৰেদনা উদপাদি, ততিযৰারে খরতরং পরিভাৰেত্ৰা উপনামেসি, অক্খি ওসধবলেন পরিব্ভমিত্ৰা অক্খিকূপতো নিক্খমিত্ৰা ন্হারুসুত্তকেন ওলম্বমানং অট্ঠাসি, অধিমত্তা ৰেদনা উদপাদি, লোহিতং পগ্ঘরি, নিৰত্থসাটকাপি লোহিতেন তেমিংসু. ওরোধা চ অমচ্চা চ রঞ্ঞো পাদমূলে পতিত্ৰা ‘‘দেৰ, অক্খীনি মা দেহি, দেৰ, অক্খীনি মা দেহী’’তি মহাপরিদেৰং পরিদেৰিংসু.

রাজা ৰেদনং অধিৰাসেত্ৰা ‘‘তাত, মা পপঞ্চং করী’’তি আহ. সো ‘‘সাধু, দেৰা’’তি ৰামহত্থেন অক্খিং ধারেত্ৰা দক্খিণহত্থেন সত্থকং আদায অক্খিসুত্তকং ছিন্দিত্ৰা অক্খিং গহেত্ৰা মহাসত্তস্স হত্থে ঠপেসি. সো ৰামক্খিনা দক্খিণক্খিং ওলোকেত্ৰা পরিচ্চাগপীতিযা অভিভুয্যমানং দুক্খৰেদনং ৰেদেন্তো ‘‘এহি, ব্রাহ্মণা’’তি ব্রাহ্মণং পক্কোসাপেত্ৰা ‘‘মম ইতো চক্খুতো সতগুণেন সহস্সগুণেন সতসহস্সগুণেন সমন্তচক্খুমেৰ পিযতরং, তস্স মে ইদং অক্খিদানং পচ্চযো হোতূ’’তি ব্রাহ্মণস্স অক্খিং অদাসি. সো তং উক্খিপিত্ৰা অত্তনো অক্খিম্হি ঠপেসি, তং তস্সানুভাৰেন ৰিকসিতনীলুপ্পলং ৰিয হুত্ৰা উপট্ঠাসি. মহাসত্তো ৰামক্খিনা তস্স তং অক্খিং দিস্ৰা ‘‘অহো সুদিন্নং মযা অক্খী’’তি অন্তোসমুগ্গতায পীতিযা নিরন্তরং ফুটসরীরো হুত্ৰা অপরম্পি অদাসি. সক্কোপি তং তথেৰ কত্ৰা রাজনিৰেসনা নিক্খমিত্ৰা মহাজনস্স ওলোকেন্তস্সেৰ নগরা নিক্খমিত্ৰা দেৰলোকমেৰ গতো.

রঞ্ঞো নচিরস্সেৰ অক্খীনি আৰাটভাৰং অপ্পত্তানি কম্বলগেণ্ডুকং ৰিয উগ্গতেন মংসপিণ্ডেন পূরেত্ৰা চিত্তকম্মরূপস্স ৰিয রুহিংসু, ৰেদনা পচ্ছিজ্জি. অথ মহাসত্তো কতিপাহং পাসাদে ৰসিত্ৰা ‘‘কিং অন্ধস্স রজ্জেনাতি অমচ্চানং রজ্জং নিয্যাতেত্ৰা উয্যানং গন্ত্ৰা পব্বজিত্ৰা সমণধম্মং করিস্সামী’’তি চিন্তেত্ৰা অমচ্চানং তমত্থং আরোচেত্ৰা ‘‘মুখধোৰনাদিদাযকো একো পুরিসো ময্হং সন্তিকে হোতু, সরীরকিচ্চট্ঠানেসুপি মে রজ্জুকং বন্ধথা’’তি ৰত্ৰা সিৰিকায গন্ত্ৰা পোক্খরণিতীরে রাজপল্লঙ্কে নিসীদি. অমচ্চাপি ৰন্দিত্ৰা পটিক্কমিংসু. বোধিসত্তোপি অত্তনো দানং আৰজ্জেসি. তস্মিং খণে সক্কস্স আসনং উণ্হাকারং দস্সেসি. সক্কো তং দিস্ৰা ‘‘মহারাজস্স ৰরং দত্ৰা চক্খুং পটিপাকতিকং করিস্সামী’’তি বোধিসত্তস্স সমীপং গন্ত্ৰা পদসদ্দমকাসি. মহাসত্তেন চ ‘‘কো এসো’’তি ৰুত্তে –

‘‘সক্কোহমস্মি দেৰিন্দো, আগতোস্মি তৰন্তিকে;

ৰরং ৰরস্সু রাজীসি, যং কিঞ্চি মনসিচ্ছসী’’তি. (জা. ১.১৫.৭১) –

ৰত্ৰা তেন –

‘‘পহূতং মে ধনং সক্ক, বলং কোসো চনপ্পকো;

অন্ধস্স মে সতো দানি, মরণঞ্ঞেৰ রুচ্চতী’’তি. (জা. ১.১৫.৭২) –

ৰুত্তে অথ নং সক্কো আহ – ‘‘সিৰিরাজ, কিং পন ত্ৰং মরিতুকামো হুত্ৰা মরণং রোচেসি, উদাহু অন্ধভাৰেনা’’তি. অন্ধভাৰেন, দেৰাতি. ‘‘মহারাজ, দানং নাম ন কেৰলং সম্পরাযত্থমেৰ দিয্যতি, দিট্ঠধম্মত্থাযপি পচ্চযো হোতি, তস্মা তৰ দানপুঞ্ঞমেৰ নিস্সায সচ্চকিরিযং করোহি, তস্স বলেনেৰ তে চক্খু উপ্পজ্জিস্সতী’’তি ৰুত্তে ‘‘তেন হি মযা মহাদানং সুদিন্ন’’ন্তি ৰত্ৰা সচ্চকিরিযং করোন্তো –

‘‘যে মং যাচিতুমাযন্তি, নানাগোত্তা ৰনিব্বকা;

যোপি মং যাচতে তত্থ, সোপি মে মনসো পিযো;

এতেন সচ্চৰজ্জেন, চক্খু মে উপপজ্জথা’’তি. (জা. ১.১৫.৭৪) –

আহ.

তত্থ যে মন্তি যে মং যাচিতুমাগচ্ছন্তি, তেসুপি আগতেসু যো ইমং নাম দেহীতি ৰাচং নিচ্ছারেন্তো মং যাচতে, সোপি মে মনসো পিযো. এতেনাতি সচে ময্হং সব্বেপি যাচকা পিযা, সচ্চমেৰেতং মযা ৰুত্তং, এতেন মে সচ্চৰচনেন একং চক্খু উপপজ্জথ উপ্পজ্জতূতি.

অথস্স ৰচনসমনন্তরমেৰ পঠমং চক্খু উদপাদি. ততো দুতিযস্স উপ্পজ্জনত্থায –

‘‘যং মং সো যাচিতুং আগা, দেহি চক্খুন্তি ব্রাহ্মণো;

তস্স চক্খূনি পাদাসিং, ব্রাহ্মণস্স ৰনিব্বতো.

‘‘ভিয্যো মং আৰিসী পীতি, সোমনস্সঞ্চনপ্পকং;

এতেন সচ্চৰজ্জেন, দুতিযং মে উপপজ্জথা’’তি. (জা. ১.১৫.৭৫-৭৬) –

আহ.

তত্থ যং মন্তি যো মং. সোতি সো চক্খুযাচকো ব্রাহ্মণো. আগাতি আগতো. ৰনিব্বতোতি যাচন্তস্স. মং আৰিসীতি ব্রাহ্মণস্স চক্খূনি দত্ৰা অন্ধকালেপি তথারূপং ৰেদনং অগণেত্ৰা ‘‘অহো সুদিন্নং মে দান’’ন্তি পচ্চৰেক্খন্তং মং ভিয্যো অতিরেকতরা পীতি আৰিসি. সোমনস্সঞ্চনপ্পকন্তি অপরিমাণং সোমনস্সং উপ্পজ্জি. এতেনাতি সচে তদা মম অনপ্পকং পীতিসোমনস্সং উপ্পন্নং, সচ্চমেৰেতং মযা ৰুত্তং, এতেন মে সচ্চৰচনেন দুতিযম্পি চক্খু উপপজ্জতূতি.

তংখণঞ্ঞেৰ দুতিযম্পি চক্খু উদপাদি. তানি পনস্স চক্খূনি নেৰ পাকতিকানি, ন দিব্বানি. সক্কব্রাহ্মণস্স হি দিন্নং চক্খুং পুন পাকতিকং কাতুং ন সক্কা, উপহতচক্খুনো চ দিব্বচক্খু নাম নুপ্পজ্জতি, ৰুত্তনযেন পনস্স আদিমজ্ঝপরিযোসানেসু অৰিপরীতং অত্তনো দানপীতিং উপাদায পীতিফরণৰসেন নিব্বত্তানি ‘‘সচ্চপারমিতাচক্খূনী’’তি ৰুত্তানি. তেন ৰুত্তং –

৬৫.

‘‘দদমানস্স দেন্তস্স, দিন্নদানস্স মে সতো;

চিত্তস্স অঞ্ঞথা নত্থি, বোধিযাযেৰ কারণা’’তি.

তত্থ দদমানস্সাতি চক্খূনি দাতুং ৰেজ্জেন উপ্পাটেন্তস্স. দেন্তস্সাতি উপ্পাটিতানি তানি সক্কব্রাহ্মণস্স হত্থে ঠপেন্তস্স. দিন্নদানস্সাতি চক্খুদানং দিন্নৰতো. চিত্তস্স অঞ্ঞথাতি দানজ্ঝাসযস্স অঞ্ঞথাভাৰো. বোধিযাযেৰ কারণাতি তঞ্চ সব্বঞ্ঞুতঞ্ঞাণস্সেৰ হেতূতি অত্থো.

৬৬. সব্বঞ্ঞুতঞ্ঞাণস্স সুদুল্লভতায এৰং সুদুক্করং মযা কতন্তি ন চক্খূনং ন অত্তভাৰস্সপি অপ্পিযতাযাতি দস্সেন্তো ‘‘ন মে দেস্সা’’তি ওসানগাথমাহ. তত্থ অত্তা ন মে ন দেস্সিযোতি পঠমো ন-কারো নিপাতমত্তো. অত্তা ন মে কুজ্ঝিতব্বো, ন অপ্পিযোতি অত্থো. ‘‘অত্তানং মে ন দেস্সিয’’ন্তিপি পাঠো. তস্সত্থো – মে অত্তানং অহং ন দেস্সিযং ন কুজ্ঝেয্যং ন কুজ্ঝিতুং অরহামি ন সো মযা কুজ্ঝিতব্বোতি. ‘‘অত্তাপি মে ন দেস্সিযো’’তিপি পঠন্তি. অদাসহন্তি অদাসিং অহং. ‘‘অদাসিহ’’ন্তিপি পাঠো.

তদা পন বোধিসত্তস্স সচ্চকিরিযায চক্খূসু উপ্পন্নেসু সক্কানুভাৰেন সব্বা রাজপরিসা সন্নিপতিতাৰ অহোসি. অথস্স সক্কো মহাজনমজ্ঝে আকাসে ঠত্ৰা –

‘‘ধম্মেন ভাসিতা গাথা, সিৰীনং রট্ঠৰড্ঢন;

এতানি তৰ নেত্তানি, দিব্বানি পটিদিস্সরে.

‘‘তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তু তে’’তি. (জা. ১.১৫.৭৭-৭৮) –

ইমাহি গাথাহি থুতিং কত্ৰা দেৰলোকমেৰ গতো. বোধিসত্তোপি মহাজনপরিৰুতো মহন্তেন সক্কারেন নগরং পৰিসিত্ৰা রাজগেহদ্ৰারে সুসজ্জিতে মহামণ্ডপে সমুস্সিতসেতচ্ছত্তে রাজপল্লঙ্কে নিসিন্নো চক্খুপটিলাভেন তুট্ঠহট্ঠপমুদিতানং দট্ঠুং আগতানং নাগরানং জানপদানং রাজপরিসায চ ধম্মং দেসেন্তো –

‘‘কো নীধ ৰিত্তং ন দদেয্য যাচিতো, অপি ৰিসিট্ঠং সুপিযম্পি অত্তনো;

তদিঙ্ঘ সব্বে সিৰযো সমাগতা, দিব্বানি নেত্তানি মমজ্জ পস্সথ.

‘‘তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তি মে.

‘‘ন চাগমত্তা পরমত্থি কিঞ্চি, মচ্চানং ইধ জীৰিতে;

দত্ৰান মানুসং চক্খুং, লদ্ধং মে চক্খু অমানুসং.

‘‘এতম্পি দিস্ৰা সিৰযো, দেথ দানানি ভুঞ্জথ;

দত্ৰা চ ভুত্ৰা চ যথানুভাৰং, অনিন্দিতা সগ্গমুপেথ ঠান’’ন্তি. (জা. ১.১৫.৭৯-৮২) –

ইমা গাথা অভাসি. তত্থ ধম্মেন ভাসিতাতি, মহারাজ, ইমা তে গাথা ধম্মেন সভাৰেনেৰ ভাসিতা. দিব্বানীতি দিব্বানুভাৰযুত্তানি. পটিদিস্সরেতি পটিদিস্সন্তি. তিরোকুট্টন্তি পরকুট্টং. তিরোসেলন্তি পরসেলং. সমতিগ্গয্হাতি অতিক্কমিত্ৰা. সমন্তা দসদিসা যোজনসতং রূপদস্সনং অনুভোন্তু সাধেন্তু.

কো নীধাতি কো নু ইধ. অপি ৰিসিট্ঠন্তি উত্তমম্পি সমানং. ন চাগমত্তাতি চাগপ্পমাণতো অঞ্ঞং ৰরং নাম নত্থি. ইধ জীৰিতেতি ইমস্মিং জীৰলোকে. ‘‘ইধ জীৰত’’ন্তিপি পঠন্তি. ইমস্মিং লোকে জীৰমানানন্তি অত্থো. অমানুসন্তি দিব্বচক্খু মযা লদ্ধং, ইমিনা কারণেন ৰেদিতব্বমেতং ‘‘চাগতো উত্তমং নাম নত্থী’’তি. এতম্পি দিস্ৰাতি এতং মযা লদ্ধং দিব্বচক্খুং দিস্ৰাপি.

ইতি ইমাহি চতূহি গাথাহি ন কেৰলং তস্মিংযেৰ খণে, অথ খো অন্ৰদ্ধমাসম্পি উপোসথে মহাজনং সন্নিপাতেত্ৰা ধম্মং দেসেসি. তং সুত্ৰা মহাজনো দানাদীনি পুঞ্ঞানি কত্ৰা দেৰলোকপরাযনো অহোসি.

তদা ৰেজ্জো আনন্দত্থেরো অহোসি, সক্কো অনুরুদ্ধত্থেরো, সেসপরিসা বুদ্ধপরিসা, সিৰিরাজা লোকনাথো.

তস্স ইধাপি ৰুত্তনযেনেৰ যথারহং পারমিযো নিদ্ধারেতব্বা. তথা দিৰসে দিৰসে যথা অদিন্নপুব্বং বাহিরদেয্যধম্মৰত্থু ন হোতি, এৰং অপরিমিতং মহাদানং পৰত্তেন্তস্স তেন অপরিতুট্ঠস্স কথং নু খো অহং অজ্ঝত্তিকৰত্থুকং দানং দদেয্যং, কদা নু খো মং কোচি আগন্ত্ৰা অজ্ঝত্তিকং দেয্যধম্মং যাচেয্য, সচে হি কোচি যাচকো মে হদযমংসস্স নামং গণ্হেয্য, কণযেন নং নীহরিত্ৰা পসন্নউদকতো সনাল়ং পদুমং উদ্ধরন্তো ৰিয লোহিতবিন্দুং পগ্ঘরন্তং হদযং নীহরিত্ৰা দস্সামি. সচে সরীরমংসস্স নামং গণ্হেয্য, অৰলেখনেন তালগুল়পটলং উপ্পাটেন্তো ৰিয সরীরমংসং উপ্পাটেত্ৰা দস্সামি. সচে লোহিতস্স নামং গণ্হেয্য, অসিনা ৰিজ্ঝিত্ৰা যন্তমুখে ৰা পতিত্ৰা উপনীতং ভাজনং পূরেত্ৰা লোহিতং দস্সামি. সচে পন কোচি ‘‘গেহে মে কম্মং নপ্পৰত্ততি, তত্থ মে দাসকম্মং করোহী’’তি ৰদেয্য, রাজৰেসং অপনেত্ৰা তস্স অত্তানং সাৰেত্ৰা দাসকম্মং করিস্সামি. সচে ৰা পন কোচি অক্খীনং নামং গণ্হেয্য, তালমিঞ্জং নীহরন্তো ৰিয অক্খীনি উপ্পাটেত্ৰা তস্স দস্সামীতি এৰং অনঞ্ঞসাধারণৰসীভাৰপ্পত্তানং মহাবোধিসত্তানংযেৰ আৰেণিকা উল়ারতরা পরিৰিতক্কুপ্পত্তি, চক্খুযাচকং লভিত্ৰা অমচ্চপারিসজ্জাদীহি নিৰারিযমানস্সাপি তেসং ৰচনং অনাদিযিত্ৰা অত্তনো পরিৰিতক্কানুরূপং পটিপত্তিযা চ পরমা পীতিপটিসংৰেদনা, তস্সা পীতিমনতায অৰিতথভাৰং নিস্সায সক্কস্স পুরতো সচ্চকিরিযাকরণং, তেন চ অত্তনো চক্খূনং পটিপাকতিকভাৰো, তেসঞ্চ দিব্বানুভাৰতাতি এৰমাদযো মহাসত্তস্স গুণানুভাৰা ৰেদিতব্বাতি.

সিৰিরাজচরিযাৰণ্ণনা নিট্ঠিতা.

৯. ৰেস্সন্তরচরিযাৰণ্ণনা

৬৭. নৰমে যা মে অহোসি জনিকাতি এত্থ মেতি ৰেস্সন্তরভূতং অত্তানং সন্ধায সত্থা ৰদতি. তেনেৰাহ – ‘‘ফুস্সতী নাম খত্তিযা’’তি. তদা হিস্স মাতা ‘‘ফুস্সতী’’তি এৰংনামিকা খত্তিযানী অহোসি. সা অতীতাসু জাতীসূতি সা ততো অনন্তরাতীতজাতিযং. একত্থে হি এতং বহুৰচনং. সক্কস্স মহেসী পিযা অহোসীতি সম্বন্ধো. অথ ৰা যা মে অহোসি জনিকা ইমস্মিং চরিমত্তভাৰে, সা অতীতাসু জাতীসু ফুস্সতী নাম, তত্থ অতীতায জাতিযা খত্তিযা, যত্থাহং তস্সা কুচ্ছিম্হি ৰেস্সন্তরো হুত্ৰা নিব্বত্তিং, ততো অনন্তরাতীতায সক্কস্স মহেসী পিযা অহোসীতি. তত্রাযং অনুপুব্বিকথা –

ইতো হি একনৰুতে কপ্পে ৰিপস্সী নাম সত্থা লোকে উদপাদি. তস্মিং বন্ধুমতীনগরং উপনিস্সায খেমে মিগদাযে ৰিহরন্তে বন্ধুমা রাজা কেনচি রঞ্ঞা পেসিতং মহগ্ঘং চন্দনসারং অত্তনো জেট্ঠধীতায অদাসি. সা তেন সুখুমং চন্দনচুণ্ণং কারেত্ৰা সমুগ্গং পূরেত্ৰা ৰিহারং গন্ত্ৰা সত্থু সুৰণ্ণৰণ্ণং সরীরং পূজেত্ৰা সেসচুণ্ণানি গন্ধকুটিযং ৰিকিরিত্ৰা ‘‘ভন্তে, অনাগতে তুম্হাদিসস্স বুদ্ধস্স মাতা ভৰেয্য’’ন্তি পত্থনং অকাসি. সা ততো চুতা তস্সা চন্দনচুণ্ণপূজায ফলেন রত্তচন্দনপরিপ্ফোসিতেন ৰিয সরীরেন দেৰেসু চ মনুস্সেসু চ সংসরন্তী তাৰতিংসভৰনে সক্কস্স দেৰরঞ্ঞো অগ্গমহেসী হুত্ৰা নিব্বত্তি. অথস্সা আযুপরিযোসানে পুব্বনিমিত্তেসু উপ্পন্নেসু সক্কো দেৰরাজা তস্সা পরিক্খীণাযুকতং ঞত্ৰা তস্সা অনুকম্পায ‘‘ভদ্দে, ফুস্সতি দস তে ৰরে দম্মি, তে গণ্হস্সূ’’তি আহ. তেন ৰুত্তং –

৬৮.

‘‘তস্সা আযুক্খযং ঞত্ৰা, দেৰিন্দো এতদব্রৰি;

‘দদামি তে দস ৰরে, ৰর ভদ্দে যদিচ্ছসী’’’তি.

তত্থ ৰরাতি ৰরস্সু ৰরং গণ্হ. ভদ্দে, যদিচ্ছসীতি, ভদ্দে, ফুস্সতি যং ইচ্ছসি যং তৰ পিযং, তং দসহি কোট্ঠাসেহি ‘‘ৰরং ৰরস্সু পটিগ্গণ্হাহী’’তি ৰদতি.

৬৯. পুনিদমব্রৰীতি পুন ইদং সা অত্তনো চৰনধম্মতং অজানন্তী ‘‘কিং নু মে অপরাধত্থী’’তিআদিকং অভাসি. সা হি পমত্তা হুত্ৰা অত্তনো আযুক্খযং অজানন্তী অযং ‘‘ৰরং গণ্হা’’তি ৰদন্তো ‘‘কত্থচি মম উপ্পজ্জনং ইচ্ছতী’’তি ঞত্ৰা এৰমাহ. তত্থ অপরাধত্থীতি অপরাধো অত্থি. কিং নু দেস্সা অহং তৰাতি কিং কারণং অহং তৰ দেস্সা কুজ্ঝিতব্বা অপ্পিযা জাতা. রম্মা চাৰেসি মং ঠানাতি রমণীযা ইমস্মা ঠানা চাৰেসি. ৰাতোৰ ধরণীরুহন্তি যেন বলৰা মালুতো ৰিয রুক্খং উম্মূলেন্তো ইমম্হা দেৰলোকা চাৰেতুকামোসি কিং নু কারণন্তি তং পুচ্ছতি.

৭০. তস্সিদন্তি তস্সা ইদং. ন চেৰ তে কতং পাপন্তি ন চেৰ তযা কিঞ্চি পাপং কতং যেন তে অপরাধো সিযা. ন চ মে ত্ৰংসি অপ্পিযাতি মম ত্ৰং ন চাপি অপ্পিযা, যেন দেস্সা নাম মম অপ্পিযাতি অধিপ্পাযো.

৭১. ইদানি যেন অধিপ্পাযেন ৰরে দাতুকামো, তং দস্সেন্তো ‘‘এত্তকংযেৰ তে আযু, চৰনকালো ভৰিস্সতী’’তি ৰত্ৰা ৰরে গণ্হাপেন্তো ‘‘পটিগ্গণ্হ মযা দিন্নে, ৰরে দস ৰরুত্তমে’’তি আহ.

তত্থ ৰরুত্তমেতি ৰরেসু উত্তমে অগ্গৰরে.

৭২. দিন্নৰরাতি ‘‘ৰরে দস্সামী’’তি পটিঞ্ঞাদানৰসেন দিন্নৰরা. তুট্ঠহট্ঠাতি ইচ্ছিতলাভপরিতোসেন তুট্ঠা চেৰ তস্স চ সিখাপ্পত্তিদস্সনেন হাসৰসেন হট্ঠা চ. পমোদিতাতি বলৰপামোজ্জেন পমুদিতা. মমং অব্ভন্তরং কত্ৰাতি তেসু ৰরেসু মং অব্ভন্তরং করিত্ৰা. দস ৰরে ৰরীতি সা অত্তনো খীণাযুকভাৰং ঞত্ৰা সক্কেন ৰরদানত্থং কতোকাসা সকলজম্বুদীপতলং ওলোকেন্তী অত্তনো অনুচ্ছৰিকং সিৰিরঞ্ঞো নিৰেসনং দিস্ৰা তত্থ তস্স অগ্গমহেসিভাৰো নীলনেত্ততা নীলভমুকতা ফুস্সতীতিনামং গুণৰিসেসযুত্তপুত্তপটিলাভো অনুন্নতকুচ্ছিভাৰো অলম্বত্থনতা অপলিতভাৰো সুখুমচ্ছৰিতা ৰজ্ঝজনানং মোচনসমত্থতা চাতি ইমে দস ৰরে গণ্হি.

ইতি সা দস ৰরে গহেত্ৰা ততো চুতা মদ্দরঞ্ঞো অগ্গমহেসিযা কুচ্ছিম্হি নিব্বত্তি. জাযমানা চ সা চন্দনচুণ্ণপরিপ্ফোসিতেন ৰিয সরীরেন জাতা. তেনস্সা নামগ্গহণদিৰসে ‘‘ফুস্সতী’’ ত্ৰেৰ নামং করিংসু. সা মহন্তেন পরিৰারেন ৰড্ঢিত্ৰা সোল়সৰস্সকালে উত্তমরূপধরা অহোসি. অথ নং জেতুত্তরনগরে সিৰিমহারাজা পুত্তস্স সঞ্জযকুমারস্সত্থায আনেত্ৰা সেতচ্ছত্তং উস্সাপেত্ৰা তং সোল়সন্নং ইত্থিসহস্সানং জেট্ঠকং কত্ৰা অগ্গমহেসিট্ঠানে ঠপেসি. তেন ৰুত্তং –

৭৩.

‘‘ততো চুতা সা ফুস্সতী, খত্তিযে উপপজ্জথ;

জেতুত্তরম্হি নগরে, সঞ্জযেন সমাগমী’’তি.

সা সঞ্জযরঞ্ঞো পিযা অহোসি মনাপা. অথ সক্কো আৰজ্জেন্তো ‘‘মযা ফুস্সতিযা দিন্নৰরেসু নৰ ৰরা সমিদ্ধা’’তি দিস্ৰা ‘‘পুত্তৰরো ন সমিদ্ধো, তম্পিস্সা সমিজ্ঝাপেস্সামী’’তি চিন্তেত্ৰা বোধিসত্তং তদা তাৰতিংসদেৰলোকে খীণাযুকং দিস্ৰা তস্স সন্তিকং গন্ত্ৰা ‘‘মারিস, তযা মনুস্সলোকে সিৰিসঞ্জযরঞ্ঞো অগ্গমহেসিযা কুচ্ছিম্হি পটিসন্ধিং গণ্হিতুং ৰট্টতী’’তি তস্স চেৰ অঞ্ঞেসঞ্চ চৰনধম্মানং সট্ঠিসহস্সানং দেৰপুত্তানং পটিঞ্ঞং গহেত্ৰা সকট্ঠানমেৰ গতো. মহাসত্তোপি ততো চৰিত্ৰা তত্থুপ্পন্নো. সেসা দেৰপুত্তাপি সট্ঠিসহস্সানং অমচ্চানং গেহেসু নিব্বত্তিংসু. মহাসত্তে কুচ্ছিগতে ফুস্সতিদেৰী চতূসু নগরদ্ৰারেসু নগরমজ্ঝে নিৰেসনদ্ৰারেতি ছ দানসালাযো কারেত্ৰা দেৰসিকং ছসতসহস্সানি ৰিস্সজ্জেত্ৰা দানং দাতুং দোহল়িনী অহোসি. রাজা তস্সা দোহল়ং সুত্ৰা নেমিত্তকে ব্রাহ্মণে পক্কোসাপেত্ৰা পুচ্ছিত্ৰা ‘‘মহারাজ, দেৰিযা কুচ্ছিম্হি দানাভিরতো উল়ারো সত্তো উপ্পন্নো, দানেন তিত্তিং ন পাপুণিস্সতী’’তি সুত্ৰা তুট্ঠমানসো ৰুত্তপ্পকারং দানং পট্ঠপেসি. সমণব্রাহ্মণজিণ্ণাতুরকপণদ্ধিকৰনিব্বকযাচকে সন্তপ্পেসি. বোধিসত্তস্স পটিসন্ধিগ্গহণতো পট্ঠায রঞ্ঞো আযস্স পমাণং নাহোসি. তস্স পুঞ্ঞানুভাৰেন সকলজম্বুদীপে রাজানো পণ্ণাকারং পহিণন্তি. তেন ৰুত্তং –

৭৪.

‘‘যদাহং ফুস্সতিযা কুচ্ছিং, ওক্কন্তো পিযমাতুযা;

মম তেজেন মে মাতা, তদা দানরতা অহু.

৭৫.

‘‘অধনে আতুরে জিণ্ণে, যাচকে অদ্ধিকে জনে;

সমণে ব্রাহ্মণে খীণে, দেতি দানং অকিঞ্চনে’’তি;

তত্থ মম তেজেনাতি মম দানজ্ঝাসযানুভাৰেন. খীণেতি ভোগাদীহি পরিক্খীণে পারিজুঞ্ঞপ্পত্তে. অকিঞ্চনেতি অপরিগ্গহে. সব্বত্থ ৰিসযে ভুম্মং. অধনাদযো হি দানধম্মস্স পৰত্তিযা ৰিসযো.

দেৰী মহন্তেন পরিহারেন গব্ভং ধারেন্তী দসমাসে পরিপুণ্ণে নগরং দট্ঠুকামা হুত্ৰা রঞ্ঞো আরোচেসি. রাজা দেৰনগরং ৰিয নগরং অলঙ্কারাপেত্ৰা দেৰিং রথৰরং আরোপেত্ৰা নগরং পদক্খিণং কারেসি. তস্সা ৰেস্সৰীথিযা মজ্ঝপ্পত্তকালে কম্মজৰাতা চলিংসু. অমচ্চা রঞ্ঞো আরোচেসুং. সো ৰেস্সৰীথিযংযেৰস্সা সূতিঘরং কারেত্ৰা আরক্খং গণ্হাপেসি. সা তত্থ পুত্তং ৰিজাযি. তেনাহ –

৭৬.

‘‘দসমাসে ধারযিত্ৰান, করোন্তে পুরং পদক্খিণং;

ৰেস্সানং ৰীথিযা মজ্ঝে, জনেসি ফুস্সতী মমং.

৭৭. ‘‘ন ময্হং মত্তিকং নামং, নাপি পেত্তিকসম্ভৰং.

জাতেত্থ ৰেস্সৰীথিযং, তস্মা ৰেস্সন্তরো অহূ’’তি.

তত্থ করোন্তে পুরং পদক্খিণন্তি দেৰিং গহেত্ৰা সঞ্জযমহারাজে নগরং পদক্খিণং কুরুমানে. ৰেস্সানন্তি ৰাণিজানং.

ন মত্তিকং নামন্তি ন মাতুআগতং মাতামহাদীনং নামং. পেত্তিকসম্ভৰন্তি পিতু ইদন্তি পেত্তিকং, সম্ভৰতি এতস্মাতি সম্ভৰো, তং পেত্তিকং সম্ভৰো এতস্সাতি পেত্তিকসম্ভৰং, নামং. মাতাপিতুসম্বন্ধৰসেন ন কতন্তি দস্সেতি. জাতেত্থাতি জাতো এত্থ. ‘‘জাতোম্হী’’তিপি পাঠো. তস্মা ৰেস্সন্তরো অহূতি যস্মা তদা ৰেস্সৰীথিযং জাতো, তস্মা ৰেস্সন্তরো নাম অহোসি, ৰেস্সন্তরোতি নামং অকংসূতি অত্থো.

মহাসত্তো মাতু কুচ্ছিতো নিক্খমন্তো ৰিসদো হুত্ৰা অক্খীনি উম্মীলেত্ৰাৰ নিক্খমি. নিক্খন্তমত্তে এৰ মাতু হত্থং পসারেত্ৰা ‘‘অম্ম, দানং দস্সামি, অত্থি কিঞ্চী’’তি আহ. অথস্স মাতা ‘‘তাত, যথাজ্ঝাসযং দানং দেহী’’তি হত্থসমীপে সহস্সত্থৰিকং ঠপেসি. বোধিসত্তো হি উম্মঙ্গজাতকে (জা. ২.২২.৫৯০ আদযো) ইমস্মিং জাতকে পচ্ছিমত্তভাৰেতি তীসু ঠানেসু জাতমত্তোৰ কথেসি. রাজা মহাসত্তস্স অতিদীঘাদিদোসৰিৰজ্জিতা মধুরখীরা চতুসট্ঠিধাতিযো উপট্ঠাপেসি. তেন সদ্ধিং জাতানং সট্ঠিযা দারকসহস্সানম্পি ধাতিযো দাপেসি. সো সট্ঠিদারকসহস্সেহি সদ্ধিং মহন্তেন পরিৰারেন ৰড্ঢতি. তস্স রাজা সতসহস্সগ্ঘনকং কুমারপিল়ন্ধনং কারাপেত্ৰা অদাসি. সো চতুপঞ্চৰস্সিককালে তং ওমুঞ্চিত্ৰা ধাতীনং দত্ৰা পুন তাহি দীযমানং ন গণ্হাতি. তং সুত্ৰা রাজা ‘‘মম পুত্তেন দিন্নং সুদিন্ন’’ন্তি ৰত্ৰা অপরম্পি কারেসি. তম্পি দেতি. দারককালেযেৰ ধাতীনং নৰৰারে পিল়ন্ধনং অদাসি.

অট্ঠৰস্সিককালে পন সযনপীঠে নিসিন্নো চিন্তেসি – ‘‘অহং বাহিরকদানং দেমি, ন তং মং পরিতোসেতি, অজ্ঝত্তিকদানং দাতুকামোম্হি. সচে হি মং কোচি হদযং যাচেয্য, হদযং নীহরিত্ৰা দদেয্যং. সচে অক্খীনি যাচেয্য, অক্খীনি উপ্পাটেত্ৰা দদেয্যং. সচে সকলসরীরে মংসং রুধিরম্পি ৰা যাচেয্য, সকলসরীরতো মংসং ছিন্দিত্ৰা রুধিরম্পি অসিনা ৰিজ্ঝিত্ৰা দদেয্যং. অথাপি কোচি ‘দাসো মে হোহী’তি ৰদেয্য, অত্তানং তস্স সাৰেত্ৰা দদেয্য’’ন্তি. তস্সেৰং সভাৰং সরসং চিন্তেন্তস্স চতুনহুতাধিকদ্ৰিযোজনসতসহস্সবহলা অযং মহাপথৰী উদকপরিযন্তং কত্ৰা কম্পি. সিনেরুপব্বতরাজা ওনমিত্ৰা জেতুত্তরনগরাভিমুখো অট্ঠাসি. তেন ৰুত্তং –

৭৮.

‘‘যদাহং দারকো হোমি, জাতিযা অট্ঠৰস্সিকো;

তদা নিসজ্জ পাসাদে, দানং দাতুং ৰিচিন্তযিং.

৭৯.

‘‘হদযং দদেয্যং চক্খুং, মংসম্পি রুধিরম্পি চ;

দদেয্যং কাযং সাৰেত্ৰা, যদি কোচি যাচযে মমং.

৮০.

‘‘সভাৰং চিন্তযন্তস্স, অকম্পিতমসণ্ঠিতং;

অকম্পি তত্থ পথৰী, সিনেরুৰনৰটংসকা’’তি.

তত্থ সাৰেত্ৰাতি ‘‘অজ্জ পট্ঠায অহং ইমস্স দাসো’’তি দাসভাৰং সাৰেত্ৰা. যদি কোচি যাচযে মমন্তি কোচি মং যদি যাচেয্য. সভাৰং চিন্তযন্তস্সাতি অৰিপরীতং অত্তনো যথাভূতং সভাৰং অতিত্তিমং যথাজ্ঝাসযং চিন্তেন্তস্স মম, মযি চিন্তেন্তেতি অত্থো. অকম্পিতন্তি কম্পিতরহিতং. অসণ্ঠিতন্তি সঙ্কোচরহিতং. যেন হি লোভাদিনা অবোধিসত্তানং চক্খাদিদানে চিত্তুত্রাসসঙ্খাতং কম্পিতং সঙ্কোচসঙ্খাতং সণ্ঠিতঞ্চ সিযা, তেন ৰিনাতি অত্থো. অকম্পীতি অচলি. সিনেরুৰনৰটংসকাতি সিনেরুম্হি উট্ঠিতনন্দনৰনফারুসকৰনমিস্সকৰনচিত্তলতাৰনাদিকপ্পকতরুৰনং সিনেরুৰনং. অথ ৰা সিনেরু চ জম্বুদীপাদীসু রমণীযৰনঞ্চ সিনেরুৰনং, তং ৰনং ৰটংসকং এতিস্সাতি সিনেরুৰনৰটংসকা.

এৰঞ্চ পথৰিকম্পনে ৰত্তমানে মধুরগম্ভীরদেৰো গজ্জন্তো খণিকৰস্সং ৰস্সি, ৰিজ্জুলতা নিচ্ছরিংসু, মহাসমুদ্দো উব্ভিজ্জি, সক্কো দেৰরাজা অপ্ফোটেসি, মহাব্রহ্মা সাধুকারমদাসি, যাৰ ব্রহ্মলোকা এককোলাহলং অহোসি. মহাসত্তো সোল়সৰস্সকালেযেৰ সব্বসিপ্পানং নিপ্ফত্তিং পাপুণি. তস্স পিতা রজ্জং দাতুকামো মাতরা সদ্ধিং মন্তেত্ৰা মদ্দরাজকুলতো মাতুলধীতরং মদ্দিং নাম রাজকঞ্ঞং আনেত্ৰা সোল়সন্নং ইত্থিসহস্সানং জেট্ঠকং অগ্গমহেসিং কত্ৰা মহাসত্তং রজ্জে অভিসিঞ্চি. মহাসত্তো রজ্জে পতিট্ঠিতকালতো পট্ঠায দেৰসিকং ছসতসহস্সানি ৰিস্সজ্জেত্ৰা মহাদানং পৰত্তেন্তো অন্ৰদ্ধমাসং দানং ওলোকেতুং উপসঙ্কমতি. অপরভাগে মদ্দিদেৰী পুত্তং ৰিজাযি. তং কঞ্চনজালেন সম্পটিচ্ছিংসু, তেনস্স ‘‘জালিকুমারো’’ত্ৰেৰ নামং করিংসু. তস্স পদসা গমনকালে সা ধীতরং ৰিজাযি. তং কণ্হাজিনেন সম্পটিচ্ছিংসু, তেনস্সা ‘‘কণ্হাজিনা’’ত্ৰেৰ নামং করিংসু. তেন ৰুত্তং –

৮১.

‘‘অন্ৰদ্ধমাসে পন্নরসে, পুণ্ণমাসে উপোসথে;

পচ্চযং নাগমারুয্হ, দানং দাতুং উপাগমি’’ন্তি.

তত্থ অন্ৰদ্ধমাসেতি অনুঅদ্ধমাসে, অদ্ধমাসে অদ্ধমাসেতি অত্থো. পুণ্ণমাসেতি পুণ্ণমাসিযং, মাসপরিপূরিযা চন্দপরিপূরিযা চ সমন্নাগতে পন্নরসে দানং দাতুং উপাগমিন্তি সম্বন্ধো. তত্রাযং যোজনা – পচ্চযং নাগমারুয্হ অদ্ধমাসে অদ্ধমাসে দানং দাতুং দানসালং উপাগমিং, এৰং উপগচ্ছন্তো চ যদা একস্মিং পন্নরসে পুণ্ণমাসিউপোসথে দানং দাতুং উপাগমিং, তদা কলিঙ্গরট্ঠৰিসযা ব্রাহ্মণা উপগঞ্ছু মন্তি তত্থ পচ্চযং নাগন্তি পচ্চযনামকং মঙ্গলহত্থিং. বোধিসত্তস্স হি জাতদিৰসে একা আকাসচারিনী করেণুকা অভিমঙ্গলসম্মতং সব্বসেতহত্থিপোতকং আনেত্ৰা মঙ্গলহত্থিট্ঠানে ঠপেত্ৰা পক্কামি. তস্স মহাসত্তং পচ্চযং কত্ৰা লদ্ধত্তা ‘‘পচ্চযো’’ত্ৰেৰ নামং করিংসু. তং পচ্চযনামকং ওপৰয্হং হত্থিনাগং আরুয্হ দানং দাতুং উপাগমিন্তি. তেন ৰুত্তং –

৮২.

‘‘কলিঙ্গরট্ঠৰিসযা, ব্রাহ্মণা উপগঞ্ছু মং;

অযাচুং মং হত্থিনাগং, ধঞ্ঞং মঙ্গলসম্মতং.

৮৩.

‘‘অৰুট্ঠিকো জনপদো, দুব্ভিক্খো ছাতকো মহা;

দদাহি পৰরং নাগং, সব্বসেতং গজুত্তম’’ন্তি.

তত্থ ‘‘কলিঙ্গরট্ঠৰিসযা’’তিআদিগাথা হেট্ঠা কুরুরাজচরিতেপি (চরিযা. ১.২১-২২) আগতা এৰ, তস্মা তাসং অত্থো কথামগ্গো চ তত্থ ৰুত্তনযেনেৰ ৰেদিতব্বো. ইধ পন মঙ্গলহত্থিনো সেতত্তা ‘‘সব্বসেতং গজুত্তম’’ন্তি ৰুত্তং. বোধিসত্তো হত্থিক্খন্ধৰরগতো –

৮৪.

‘‘দদামি ন ৰিকম্পামি, যং মং যাচন্তি ব্রাহ্মণা;

সন্তং নপ্পটিগূহামি, দানে মে রমতে মনো’’তি. –

অত্তনো দানাভিরতিং পৰেদেন্তো –

৮৫.

‘‘ন মে যাচকমনুপ্পত্তে, পটিক্খেপো অনুচ্ছৰো;

মা মে ভিজ্জি সমাদানং, দস্সামি ৰিপুলং গজ’’ন্তি. (চরিযা. ১.২৩) –

পটিজানিত্ৰা হত্থিক্খন্ধতো ওরুয্হ অনলঙ্কতট্ঠানং ওলোকনত্থং অনুপরিযাযিত্ৰা অনলঙ্কতট্ঠানং অদিস্ৰা কুসুমমিস্সগন্ধোদকভরিতং সুৰণ্ণভিঙ্গারং গহেত্ৰা ‘‘ভোন্তো ইতো এথা’’তি অলঙ্কতরজতদামসদিসং হত্থিসোণ্ডং তেসং হত্থে ঠপেত্ৰা উদকং পাতেত্ৰা অলঙ্কতৰারণং অদাসি. তেন ৰুত্তং –

৮৬.

‘‘নাগং গহেত্ৰা সোণ্ডায, ভিঙ্গারে রতনামযে;

জলং হত্থে আকিরিত্ৰা, ব্রাহ্মণানং অদং গজ’’ন্তি. (চরিযা. ১.২৪);

তত্থ সন্তন্তি ৰিজ্জমানং দেয্যধম্মং. নপ্পটিগূহামীতি ন পটিচ্ছাদেমি. যো হি অত্তনো সন্তকং ‘‘ময্হমেৰ হোতূ’’তি চিন্তেতি, যাচিতো ৰা পটিক্খিপতি, সো যাচকানং অভিমুখে ঠিতম্পি অত্থতো পটিচ্ছাদেতি নাম. মহাসত্তো পন অত্তনো সীসং আদিং কত্ৰা অজ্ঝত্তিকদানং দাতুকামোৰ, কথং বাহিরং পটিক্খিপতি, তস্মা আহ ‘‘সন্তং নপ্পটিগূহামী’’তি. তেনেৰাহ ‘‘দানে মে রমতে মনো’’তি. সেসং হেট্ঠা ৰুত্তত্থমেৰ.

তস্স পন হত্থিনো চতূসু পাদেসু অলঙ্কারা চত্তারি সতসহস্সানি অগ্ঘন্তি, উভোসু পস্সেসু অলঙ্কারা দ্ৰে সতসহস্সানি, হেট্ঠা উদরে কম্বলং সতসহস্সং, পিট্ঠিযং মুত্তাজালং মণিজালং কঞ্চনজালন্তি তীণি জালানি তীণি সতসহস্সানি, উভো কণ্ণালঙ্কারা দ্ৰে সতসহস্সানি, পিট্ঠিযং অত্থতকম্বলং সতসহস্সং, কুম্ভালঙ্কারো সতসহস্সং, তযো ৰটংসকা তীণি সতসহস্সানি, কণ্ণচূল়ালঙ্কারো সতসহস্সং, দ্ৰিন্নং দন্তানং অলঙ্কারা দ্ৰে সতসহস্সানি, সোণ্ডায সোৰত্থিকালঙ্কারো সতসহস্সং, নঙ্গুট্ঠালঙ্কারো সতসহস্সং, আরোহণনিস্সেণি সতসহস্সং, ভুঞ্জনকটাহং সতসহস্সং, ঠপেত্ৰা অনগ্ঘভণ্ডং ইদং তাৰ এত্তকং চতুৰীসতি সতসহস্সানি অগ্ঘতি. ছত্তপিণ্ডিযং পন মণি, চূল়ামণি, মুত্তাহারে মণি, অঙ্কুসে মণি, হত্থিকণ্ঠৰেঠনমুত্তাহারে মণি, হত্থিকুম্ভে মণীতি ইমানি ছ অনগ্ঘানি, হত্থীপি অনগ্ঘো এৰাতি হত্থিনা সদ্ধিং সত্ত অনগ্ঘানি, তানি সব্বানি ব্রাহ্মণানং অদাসি. তথা হত্থিনো পরিচারকানি পঞ্চ কুলসতানি হত্থিমেণ্ডহত্থিগোপকেহি সদ্ধিং অদাসি. সহ দানেন পনস্স হেট্ঠা ৰুত্তনযেনেৰ ভূমিকম্পাদযো অহেসুং. তেন ৰুত্তং –

৮৭.

‘‘পুনাপরং দদন্তস্স, সব্বসেতং গজুত্তমং;

তদাপি পথৰী কম্পি, সিনেরুৰনৰটংসকা’’তি.

জাতকেপি (জা. ২.২২.১৬৭৩) ৰুত্তং –

‘‘তদাসি যং ভিংসনকং, তদাসি লোমহংসনং;

হত্থিনাগে পদিন্নম্হি, মেদনী সম্পকম্পথা’’তি.

৮৮. তস্স নাগস্স দানেনাতি ছহি অনগ্ঘেহি সদ্ধিং চতুৰীসতিসতসহস্সগ্ঘনিকঅলঙ্কারভণ্ডসহিতস্স তস্স মঙ্গলহত্থিস্স পরিচ্চাগেন. সিৰযোতি সিৰিরাজকুমারা চেৰ সিৰিরট্ঠৰাসিনো চ. ‘‘সিৰযো’’তি চ দেসনাসীসমেতং. তত্থ হি অমচ্চা পারিসজ্জা ব্রাহ্মণগহপতিকা নেগমজানপদা নাগরা সকলরট্ঠৰাসিনো চ সঞ্জযমহারাজং ফুস্সতিদেৰিং মদ্দিদেৰিঞ্চ ঠপেত্ৰা সব্বে এৰ. কুদ্ধাতি দেৰতাৰত্তনেন বোধিসত্তস্স কুদ্ধা. সমাগতাতি সন্নিপতিতা. তে কির ব্রাহ্মণা হত্থিং লভিত্ৰা তং অভিরুহিত্ৰা মহাদ্ৰারেন পৰিসিত্ৰা নগরমজ্ঝেন পাযিংসু. মহাজনেন চ ‘‘অম্ভো ব্রাহ্মণা, অম্হাকং হত্থী কুতো অভিরুল়্হো’’তি ৰুত্তে ‘‘ৰেস্সন্তরমহারাজেন নো হত্থী দিন্নো, কে তুম্হে’’তি হত্থৰিকারাদীহি ঘট্টেন্তা অগমংসু. অথ অমচ্চে আদিং কত্ৰা মহাজনা রাজদ্ৰারে সন্নিপতিত্ৰা ‘‘রঞ্ঞা নাম ব্রাহ্মণানং ধনং ৰা ধঞ্ঞং ৰা খেত্তং ৰা ৰত্থু ৰা দাসিদাসপরিচারিকা ৰা দাতব্বা সিযা, কথঞ্হি নামাযং ৰেস্সন্তরমহারাজা রাজারহং মঙ্গলহত্থিং দস্সতি, ন ইদানি এৰং রজ্জং ৰিনাসেতুং দস্সামা’’তি উজ্ঝাযিত্ৰা সঞ্জযমহারাজস্স তমত্থং আরোচেত্ৰা তেন অনুনীযমানা অননুযন্তা অগমংসু. কেৰলং পন –

‘‘মা নং দণ্ডেন সত্থেন, ন হি সো বন্ধনারহো;

পব্বাজেহি চ নং রট্ঠা, ৰঙ্কে ৰসতু পব্বতে’’তি. (জা. ২.২২.১৬৮৭) –

ৰদিংসু. তেন ৰুত্তং –

‘‘পব্বাজেসুং সকা রট্ঠা, ৰঙ্কং গচ্ছতু পব্বত’’ন্তি.

তত্থ পব্বাজেসুন্তি রজ্জতো বহি ৰাসত্থায উস্সুক্কমকংসু; –

রাজাপি ‘‘মহা খো অযং পটিপক্খো, হন্দ মম পুত্তো কতিপাহং রজ্জতো বহি ৰসতূ’’তি চিন্তেত্ৰা –

‘‘এসো চে সিৰীনং ছন্দো, ছন্দং নপ্পনুদামসে;

ইমং সো ৰসতু রত্তিং, কামে চ পরিভুঞ্জতু.

‘‘ততো রত্যা ৰিৰসানে, সূরিযুগ্গমনং পতি;

সমগ্গা সিৰযো হুত্ৰা, রট্ঠা পব্বাজযন্তু ন’’ন্তি. (জা. ২.২২.১৬৮৮-১৬৮৯) –

ৰত্ৰা পুত্তস্স সন্তিকে কত্তারং পেসেসি ‘‘ইমং পৰত্তিং মম পুত্তস্স আরোচেহী’’তি. সো তথা অকাসি.

মহাসত্তোপি তং সুত্ৰা –

‘‘কিস্মিং মে সিৰযো কুদ্ধা, নাহং পস্সামি দুক্কটং;

তং মে কত্তে ৰিযাচিক্খ, কস্মা পব্বাজযন্তি ম’’ন্তি. (জা. ২.২২.১৭০১) –

কারণং পুচ্ছি. তেন ‘‘তুম্হাকং হত্থিদানেনা’’তি ৰুত্তে সোমনস্সপ্পত্তো হুত্ৰা –

‘‘হদযং চক্খুম্পহং দজ্জং, কিং মে বাহিরকং ধনং;

হিরঞ্ঞং ৰা সুৰণ্ণং ৰা, মুত্তা ৰেল়ুরিযা মণি.

‘‘দক্খিণং ৰাপহং বাহুং, দিস্ৰা যাচকমাগতে;

দদেয্যং ন ৰিকম্পেয্যং, দানে মে রমতে মনো.

‘‘কামং মং সিৰযো সব্বে, পব্বাজেন্তু হনন্তু ৰা;

নেৰ দানা ৰিরমিস্সং, কামং ছিন্দন্তু সত্তধা’’তি. (জা. ২.২২.১৭০৩-১৭০৫) –

ৰত্ৰা ‘‘নাগরা মে একদিৰসং দানং দাতুং ওকাসং দেন্তু, স্ৰে দানং দত্ৰা ততিযদিৰসে গমিস্সামী’’তি ৰত্ৰা কত্তারং তেসং সন্তিকে পেসেত্ৰা ‘‘অহং স্ৰে সত্তসতকং নাম মহাদানং দস্সামি, সত্তহত্থিসতানি সত্তঅস্সসতানি সত্তরথসতানি সত্তইত্থিসতানি সত্তদাসসতানি সত্তদাসিসতানি সত্তধেনুসতানি পটিযাদেহি, নানপ্পকারঞ্চ অন্নপানাদিং সব্বং দাতব্বযুত্তকং উপট্ঠপেহী’’তি সব্বকম্মিকং অমচ্চং আণাপেত্ৰা এককোৰ মদ্দিদেৰিযা ৰসনট্ঠানং গন্ত্ৰা ‘‘ভদ্দে মদ্দি, অনুগামিকনিধিং নিদহমানা, সীলৰন্তেসু দদেয্যাসী’’তি তম্পি দানে নিযোজেত্ৰা তস্সা অত্তনো গমনকারণং আচিক্খিত্ৰা ‘‘অহং ৰনং ৰসনত্থায গমিস্সামি, ত্ৰং ইধেৰ অনুক্কণ্ঠিতা ৰসাহী’’তি আহ. সা ‘‘নাহং, মহারাজ, তুম্হেহি ৰিনা একদিৰসম্পি ৰসিস্সামী’’তি আহ.

দুতিযদিৰসে সত্তসতকং মহাদানং পৰত্তেসি. তস্স সত্তসতকং দানং দেন্তস্সেৰ সাযং অহোসি. অলঙ্কতরথেন মাতাপিতূনং ৰসনট্ঠানং গন্ত্ৰা ‘‘অহং স্ৰে গমিস্সামী’’তি তে আপুচ্ছিত্ৰা অকামকানং তেসং অস্সুমুখানং রোদন্তানংযেৰ ৰন্দিত্ৰা পদক্খিণং কত্ৰা ততো নিক্খমিত্ৰা তং দিৰসং অত্তনো নিৰেসনে ৰসিত্ৰা পুনদিৰসে ‘‘গমিস্সামী’’তি পাসাদতো ওতরি. মদ্দিদেৰী সস্সুসসুরেহি নানানযেহি যাচিত্ৰা নিৰত্তিযমানাপি তেসং ৰচনং অনাদিযিত্ৰা তে ৰন্দিত্ৰা পদক্খিণং কত্ৰা সেসিত্থিযো অপলোকেত্ৰা দ্ৰে পুত্তে আদায ৰেস্সন্তরস্স পঠমতরং গন্ত্ৰা রথে অট্ঠাসি.

মহাপুরিসো রথং অভিরুহিত্ৰা রথে ঠিতো মহাজনং আপুচ্ছিত্ৰা ‘‘অপ্পমত্তা দানাদীনি পুঞ্ঞানি করোথা’’তি ওৰাদমস্স দত্ৰা নগরতো নিক্খমি. বোধিসত্তস্স মাতা ‘‘পুত্তো মে দানৰিত্তকো দানং দেতূ’’তি আভরণেহি সদ্ধিং সত্তরতনপূরানি সকটানি উভোসু পস্সেসু পেসেসি. সোপি অত্তনো কাযারুল়্হমেৰ আভরণভণ্ডং সম্পত্তযাচকানং অট্ঠারস ৰারে দত্ৰা সেসং সব্বমদাসি. নগরা নিক্খমিত্ৰাৰ নিৰত্তিত্ৰা ওলোকেতুকামো অহোসি. অথস্স পুঞ্ঞানুভাৰেন রথপ্পমাণে ঠানে মহাপথৰী ভিজ্জিত্ৰা পরিৰত্তিত্ৰা রথং নগরাভিমুখং অকাসি. সো মাতাপিতূনং ৰসনট্ঠানং ওলোকেসি. তেন কারুঞ্ঞেন পথৰিকম্পো অহোসি. তেন ৰুত্তং ‘‘তেসং নিচ্ছুভমানান’’ন্তিআদি.

৮৯-৯০. তত্থ নিচ্ছুভমানানন্তি তেসু সিৰীসু নিক্কড্ঢন্তেসু, পব্বাজেন্তেসূতি অত্থো. তেসং ৰা নিক্খমন্তানং. মহাদানং পৰত্তেতুন্তি সত্তসতকমহাদানং দাতুং. আযাচিস্সন্তি যাচিং. সাৰযিত্ৰাতি ঘোসাপেত্ৰা. কণ্ণভেরিন্তি যুগলমহাভেরিং. দদামহন্তি দদামি অহং.

৯১. অথেত্থাতি অথেৰং দানে দীযমানে এতস্মিং দানগ্গে. তুমূলোতি এককোলাহলীভূতো. ভেরৰোতি ভযাৰহো. মহাসত্তঞ্হি ঠপেত্ৰা অঞ্ঞেসং সো ভযং জনেতি, তস্স ভযজননাকারং দস্সেতুং. ‘‘দানেনিম’’ন্তিআদি ৰুত্তং. ইমং ৰেস্সন্তরমহারাজানং দানেন হেতুনা সিৰযো রট্ঠতো নীহরন্তি পব্বাজেন্তি, তথাপি পুন চ এৰরূপং দানং দেতি অযন্তি.

৯২-৯৪. ইদানি তং দানং দস্সেতুং ‘‘হত্থি’’ন্তি গাথমাহ. তত্থ গৰন্তি ধেনুং. চতুৰাহিং রথং দত্ৰাতি ৰহন্তীতি ৰাহিনো, অস্সা, চতুরো আজঞ্ঞসিন্ধৰে রথঞ্চ ব্রাহ্মণানং দত্ৰাতি অত্থো. মহাসত্তো হি তথা নগরতো নিক্খমন্তো সহজাতে সট্ঠিসহস্সে অমচ্চে সেসজনঞ্চ অস্সুপুণ্ণমুখং অনুবদ্ধন্তং নিৰত্তেত্ৰা রথং পাজেন্তো মদ্দিং আহ – ‘‘সচে, ভদ্দে, পচ্ছতো যাচকা আগচ্ছন্তি, উপধারেয্যাসী’’তি. সা ওলোকেন্তী নিসীদি. অথস্স সত্তসতকমহাদানং গমনকালে কতদানঞ্চ সম্পাপুণিতুং অসক্কোন্তা চত্তারো ব্রাহ্মণা আগন্ত্ৰা ‘‘ৰেস্সন্তরো কুহি’’ন্তি পুচ্ছিত্ৰা ‘‘দানং দত্ৰা রথেন গতো’’তি ৰুত্তে ‘‘অস্সে যাচিস্সামা’’তি অনুবন্ধিংসু. মদ্দী তে আগচ্ছন্তে দিস্ৰা ‘‘যাচকা, দেৰা’’তি আরোচেসি. মহাসত্তো রথং ঠপেসি. তে আগন্ত্ৰা অস্সে যাচিংসু. মহাসত্তো অস্সে অদাসি. তে তে গহেত্ৰা গতা. অস্সেসু পন দিন্নেসু রথধুরং আকাসেযেৰ অট্ঠাসি. অথ চত্তারো দেৰপুত্তা রোহিতমিগৰণ্ণেনাগন্ত্ৰা রথধুরং সম্পটিচ্ছিত্ৰা অগমংসু. মহাসত্তো তেসং দেৰপুত্তভাৰং ঞত্ৰা –

‘‘ইঙ্ঘ মদ্দি নিসামেহি, চিত্তরূপংৰ দিস্সতি;

মিগরোহিচ্চৰণ্ণেন, দক্খিণস্সা ৰহন্তি ম’’ন্তি. (জা. ২.২২.১৮৬৪) –

মদ্দিযা আহ.

তত্থ চিত্তরূপংৰাতি অচ্ছরিযরূপং ৰিয. দক্খিণস্সাতি সুসিক্খিতঅস্সা ৰিয মং ৰহন্তি.

অথ নং এৰং গচ্ছন্তং অপরো ব্রাহ্মণো আগন্ত্ৰা রথং যাচি. মহাসত্তো পুত্তদারং ওতারেত্ৰা রথং অদাসি. রথে পন দিন্নে দেৰপুত্তা অন্তরধাযিংসু. ততো পট্ঠায পন সব্বেপি পত্তিকাৰ অহেসুং. অথ মহাসত্তো ‘‘মদ্দি, ত্ৰং কণ্হাজিনং গণ্হাহি, অহং জালিকুমারং গণ্হামী’’তি উভোপি দ্ৰে দারকে অঙ্কেনাদায অঞ্ঞমঞ্ঞং পিযসল্লাপা পটিপথং আগচ্ছন্তে মনুস্সে ৰঙ্কপব্বতস্স মগ্গং পুচ্ছন্তা সযমেৰ ওনতেসু ফলরুক্খেসু ফলানি দারকানং দদন্তা অত্থকামাহি দেৰতাহি মগ্গস্স সঙ্খিপিতত্তা তদহেৰ চেতরট্ঠং সম্পাপুণিংসু. তেন ৰুত্তং ‘‘চতুৰাহিং রথং দত্ৰা’’তিআদি.

তত্থ ঠত্ৰা চাতুম্মহাপথেতি অত্তনো গমনমগ্গেন পস্সতো আগতেন তেন ব্রাহ্মণেন আগতমগ্গেন চ ৰিনিৰিজ্ঝিত্ৰা গতট্ঠানত্তা চতুক্কসঙ্খাতে চতুমহাপথে ঠত্ৰা তস্স ব্রাহ্মণস্স রথং দত্ৰা. একাকিযোতি অমচ্চসেৰকাদিসহাযাভাৰেন এককো. তেনেৰাহ ‘‘অদুতিযো’’তি. মদ্দিদেৰিং ইদমব্রৰীতি মদ্দিদেৰিং ইদং অভাসি.

৯৬-৯৯. পদুমং পুণ্ডরীকংৰাতি পদুমং ৰিয, পুণ্ডরীকং ৰিয চ. কণ্হাজিনগ্গহীতি কণ্হাজিনং অগ্গহেসি. অভিজাতাতি জাতিসম্পন্না. ৰিসমং সমন্তি ৰিসমং সমঞ্চ ভূমিপ্পদেসং. এন্তীতি আগচ্ছন্তি. অনুমগ্গে পটিপ্পথেতি অনুমগ্গে ৰা পটিপথে ৰাতি ৰা-সদ্দস্স লোপো দট্ঠব্বো. করুণন্তি ভাৰনপুংসকনিদ্দেসো, করুণাযিতত্তন্তি অত্থো. দুক্খং তে পটিৰেদেন্তীতি ইমে এৰং সুখুমালা পদসা গচ্ছন্তি, দূরেৰ ইতো ৰঙ্কপব্বতোতি তে তদা অম্হেসু কারুঞ্ঞৰসেন অত্তনা দুক্খং পটিলভন্তি, তথা অত্তনো উপ্পন্নদুক্খং পটিৰেদেন্তি ৰাতি অত্থো.

১০০-১. পৰনেতি মহাৰনে. ফলিনেতি ফলৰন্তে. উব্বিদ্ধাতি উদ্ধং উগ্গতা উচ্চা. উপগচ্ছন্তি দারকেতি যথা ফলানি দারকানং হত্থূপগয্হকানি হোন্তি, এৰং রুক্খা সযমেৰ সাখাহি ওনমিত্ৰা দারকে উপেন্তি.

১০২. অচ্ছরিযন্তি অচ্ছরাযোগ্গং, অচ্ছরং পহরিতুং যুত্তং. অভূতপুব্বং ভূতন্তি অব্ভুতং. লোমানং হংসনসমত্থতায লোমহংসনং. সাহুকারন্তি সাধুকারং, অযমেৰ ৰা পাঠো. ইত্থিরতনভাৰেন সব্বেহি অঙ্গেহি অৰযৰেহি সোভতীতি সব্বঙ্গসোভনা.

১০৩-৪. অচ্ছেরং ৰতাতি অচ্ছরিযং ৰত. ৰেস্সন্তরস্স তেজেনাতি ৰেস্সন্তরস্স পুঞ্ঞানুভাৰেন. সঙ্খিপিংসু পথং যক্খাতি দেৰতা মহাসত্তস্স পুঞ্ঞতেজেন চোদিতা তং মগ্গং পরিক্খযং পাপেসুং, অপ্পকং অকংসু, তং পন দারকেসু করুণায কতং ৰিয কত্ৰা ৰুত্তং ‘‘অনুকম্পায দারকে’’তি. জেতুত্তরনগরতো হি সুৰণ্ণগিরিতালো নাম পব্বতো পঞ্চ যোজনানি, ততো কোন্তিমারা নাম নদী পঞ্চ যোজনানি, ততো মারঞ্জনাগিরি নাম পব্বতো পঞ্চ যোজনানি, ততো দণ্ডব্রাহ্মণগামো নাম পঞ্চ যোজনানি, ততো মাতুলনগরং দস যোজনানি, ইতি তং রট্ঠং জেতুত্তরনগরতো তিংস যোজনানি হোতি. দেৰতা বোধিসত্তস্স পুঞ্ঞতেজেন চোদিতা মগ্গং পরিক্খযং পাপেসুং. তং সব্বং একাহেনেৰ অতিক্কমিংসু. তেন ৰুত্তং ‘‘নিক্খন্তদিৰসেনেৰ, চেতরট্ঠমুপাগমু’’ন্তি.

এৰং মহাসত্তো সাযন্হসমযং চেতরট্ঠে মাতুলনগরং পত্ৰা তস্স নগরস্স দ্ৰারসমীপে সালাযং নিসীদি. অথস্স মদ্দিদেৰী পাদেসু রজং পুঞ্ছিত্ৰা পাদে সম্বাহিত্ৰা ‘‘ৰেস্সন্তরস্স আগতভাৰং জানাপেস্সামী’’তি সালতো নিক্খমিত্ৰা তস্স চক্খুপথে সালদ্ৰারে অট্ঠাসি. নগরং পৰিসন্তিযো চ নিক্খমন্তিযো চ ইত্থিযো তং দিস্ৰা পরিৰারেসুং. মহাজনো তঞ্চ ৰেস্সন্তরঞ্চ পুত্তে চস্স তথা আগতে দিস্ৰা রাজূনং আচিক্খি. সট্ঠিসহস্সা রাজানো রোদন্তা পরিদেৰন্তা তস্স সন্তিকং আগন্ত্ৰা মগ্গপরিস্সমং ৰিনোদেত্ৰা তথা আগমনকারণং পুচ্ছিংসু.

মহাসত্তো হত্থিদানং আদিং কত্ৰা সব্বং কথেসি. তং সুত্ৰা তে অত্তনো রজ্জেন নিমন্তযিংসু. মহাপুরিসো ‘‘মযা তুম্হাকং রজ্জং পটিগ্গহিতমেৰ হোতু, রাজা পন মং রট্ঠা পব্বাজেতি, তস্মা ৰঙ্কপব্বতমেৰ গমিস্সামী’’তি ৰত্ৰা তেহি নানপ্পকারং তত্থ ৰাসং যাচিযমানোপি তং অনলঙ্করিত্ৰা তেহি গহিতারক্খো তং রত্তিং সালাযমেৰ ৰসিত্ৰা পুনদিৰসে পাতোৰ নানগ্গরসভোজনং ভুঞ্জিত্ৰা তেহি পরিৰুতো নিক্খমিত্ৰা পন্নরসযোজনমগ্গং গন্ত্ৰা ৰনদ্ৰারে ঠত্ৰা তে নিৰত্তেত্ৰা পুরতো পন্নরসযোজনমগ্গং তেহি আচিক্খিতনিযামেনেৰ অগমাসি. তেন ৰুত্তং –

১০৫.

‘‘সট্ঠিরাজসহস্সানি, তদা ৰসন্তি মাতুলে;

সব্বে পঞ্জলিকা হুত্ৰা, রোদমানা উপাগমুং.

১০৬.

‘‘তত্থ ৰত্তেত্ৰা সল্লাপং, চেতেহি চেতপুত্তেহি;

তে ততো নিক্খমিত্ৰান, ৰঙ্কং অগমু পব্বত’’ন্তি.

তত্থ তত্থ ৰত্তেত্ৰা সল্লাপন্তি তত্থ তেহি রাজূহি সমাগমেহি সদ্ধিং পটিসম্মোদমানা কথং পৰত্তেত্ৰা. চেতপুত্তেহীতি চেতরাজপুত্তেহি. তে ততো নিক্খমিত্ৰানাতি তে রাজানো ততো ৰনদ্ৰারট্ঠানে নিৰত্তেত্ৰা. ৰঙ্কং অগমু পব্বতন্তি অম্হে চত্তারো জনা ৰঙ্কপব্বতং উদ্দিস্স অগমম্হা.

অথ মহাসত্তো তেহি আচিক্খিতমগ্গেন গচ্ছন্তো গন্ধমাদনপব্বতং পত্ৰা তং দিৰসং তত্থ ৰসিত্ৰা ততো উত্তরদিসাভিমুখো ৰেপুল্লপব্বতপাদেন গন্ত্ৰা কেতুমতীনদীতীরে নিসীদিত্ৰা ৰনচরকেন দিন্নং মধুমংসং খাদিত্ৰা তস্স সুৰণ্ণসূচিং দত্ৰা ন্হত্ৰা পিৰিত্ৰা পটিপ্পস্সদ্ধদরথো নদিং উত্তরিত্ৰা সানুপব্বতসিখরে ঠিতস্স নিগ্রোধস্স মূলে থোকং নিসীদিত্ৰা উট্ঠায গচ্ছন্তো নালিকপব্বতং পরিহরন্তো মুচলিন্দসরং গন্ত্ৰা সরতীরেন পুব্বুত্তরকণ্ণং পত্ৰা একপদিকমগ্গেনেৰ ৰনঘটং পৰিসিত্ৰা তং অতিক্কম্ম গিরিৰিদুগ্গানং নদীপভৰানং পুরতো চতুরস্সপোক্খরণিং পাপুণি.

১০৭. তস্মিং খণে সক্কো আৰজ্জেন্তো ‘‘মহাসত্তো হিমৰন্তং পৰিট্ঠো, ৰসনট্ঠানং লদ্ধুং ৰট্টতী’’তি চিন্তেত্ৰা ৰিস্সকম্মং পেসেসি – ‘‘গচ্ছ ৰঙ্কপব্বতকুচ্ছিম্হি রমণীযে ঠানে অস্সমপদং মাপেহী’’তি. সো তত্থ দ্ৰে পণ্ণসালাযো দ্ৰে চঙ্কমে দ্ৰে চ রত্তিট্ঠানদিৰাট্ঠানানি মাপেত্ৰা তেসু তেসু ঠানেসু নানাপুপ্ফৰিচিত্তে রুক্খে ফলিতে রুক্খে পুপ্ফগচ্ছে কদলিৰনাদীনি চ দস্সেত্ৰা সব্বে পব্বজিতপরিক্খারে পটিযাদেত্ৰা ‘‘যেকেচি পব্বজিতুকামা, তে গণ্হন্তূ’’তি অক্খরানি লিখিত্ৰা অমনুস্সে চ ভেরৰসদ্দে মিগপক্খিনো চ পটিক্কমাপেত্ৰা সকট্ঠানমেৰ গতো.

মহাসত্তো একপদিকমগ্গং দিস্ৰা ‘‘পব্বজিতানং ৰসনট্ঠানং ভৰিস্সতী’’তি মদ্দিঞ্চ পুত্তে চ তত্থেৰ ঠপেত্ৰা অস্সমপদং পৰিসিত্ৰা অক্খরানি ওলোকেত্ৰা ‘‘সক্কেন দিন্নোস্মী’’তি পণ্ণসালদ্ৰারং ৰিৰরিত্ৰা পৰিট্ঠো খগ্গঞ্চ ধনুঞ্চ অপনেত্ৰা সাটকে ওমুঞ্চিত্ৰা ইসিৰেসং গহেত্ৰা কত্তরদণ্ডং আদায নিক্খমিত্ৰা পচ্চেকবুদ্ধসদিসেন উপসমেন দারকানং সন্তিকং অগমাসি. মদ্দিদেৰীপি মহাসত্তং দিস্ৰা পাদেসু পতিত্ৰা রোদিত্ৰা তেনেৰ সদ্ধিং অস্সমং পৰিসিত্ৰা অত্তনো পণ্ণসালং গন্ত্ৰা ইসিৰেসং গণ্হি. পচ্ছা পুত্তেপি তাপসকুমারকে করিংসু. বোধিসত্তো মদ্দিং ৰরং যাচি ‘‘মযং ইতো পট্ঠায পব্বজিতা নাম, ইত্থী চ নাম ব্রহ্মচরিযস্স মলং, মা দানি অকালে মম সন্তিকং আগচ্ছা’’তি. সা ‘‘সাধূ’’তি সম্পটিচ্ছিত্ৰা মহাসত্তম্পি ৰরং যাচি ‘‘দেৰ, তুম্হে পুত্তে গহেত্ৰা ইধেৰ হোথ, অহং ফলাফলং আহরিস্সামী’’তি. সা ততো পট্ঠায অরঞ্ঞতো ফলাফলানি আহরিত্ৰা তযো জনে পটিজগ্গি. ইতি চত্তারো খত্তিযা ৰঙ্কপব্বতকুচ্ছিযং সত্তমাসমত্তং ৰসিংসু. তেন ৰুত্তং ‘‘আমন্তযিত্ৰা দেৰিন্দো, ৰিস্সকম্মং মহিদ্ধিক’’ন্তিআদি.

তত্থ আমন্তযিত্ৰাতি পক্কোসাপেত্ৰা. মহিদ্ধিকন্তি মহতিযা দেৰিদ্ধিযা সমন্নাগতং. অস্সমং সুকতন্তি অস্সমপদং সুকতং কত্ৰা. রম্মং ৰেস্সন্তরস্স ৰসনানুচ্ছৰিকং পণ্ণসালং. সুমাপযাতি সুট্ঠু মাপয. আণাপেসীতি ৰচনসেসো. সুমাপযীতি সম্মা মাপেসি.

১১১. অসুঞ্ঞোতি যথা সো অস্সমো অসুঞ্ঞো হোতি, এৰং তস্স অসুঞ্ঞভাৰকরণেন অসুঞ্ঞো হোমি. ‘‘অসুঞ্ঞে’’তি ৰা পাঠো, মম ৰসনেনেৰ অসুঞ্ঞে অস্সমে দারকে অনুরক্খন্তো ৰসামি তত্থ তিট্ঠামি. বোধিসত্তস্স মেত্তানুভাৰেন সমন্তা তিযোজনে সব্বে তিরচ্ছানাপি মেত্তং পটিলভিংসু.

এৰং তেসু তত্থ ৰসন্তেসু কলিঙ্গরট্ঠৰাসী জূজকো নাম ব্রাহ্মণো অমিত্ততাপনায নাম ভরিযায ‘‘নাহং তে নিচ্চং ধঞ্ঞকোট্টনউদকাহরণযাগুভত্তপচনাদীনি কাতুং সক্কোমি, পরিচারকং মে দাসং ৰা দাসিং ৰা আনেহী’’তি ৰুত্তে ‘‘কুতোহং তে ভোতি দুগ্গতো দাসং ৰা দাসিং ৰা লভিস্সামী’’তি ৰত্ৰা তায ‘‘এস ৰেস্সন্তরো রাজা ৰঙ্কপব্বতে ৰসতি. তস্স পুত্তে ময্হং পরিচারকে যাচিত্ৰা আনেহী’’তি ৰুত্তে কিলেসৰসেন তস্সা পটিবদ্ধচিত্ততায তস্সা ৰচনং অতিক্কমিতুং অসক্কোন্তো পাথেয্যং পটিযাদাপেত্ৰা অনুক্কমেন জেতুত্তরনগরং পত্ৰা ‘‘কুহিং ৰেস্সন্তরমহারাজা’’তি পুচ্ছি.

মহাজনো ‘‘ইমেসং যাচকানং অতিদানেন অম্হাকং রাজা রট্ঠা পব্বাজিতো, এৰং অম্হাকং রাজানং নাসেত্ৰা পুনপি ইধেৰ আগচ্ছতী’’তি লেড্ডুদণ্ডাদিহত্থো উপক্কোসন্তো ব্রাহ্মণং অনুবন্ধি. সো দেৰতাৰিগ্গহিতো হুত্ৰা ততো নিক্খমিত্ৰা ৰঙ্কপব্বতগামিমগ্গং অভিরুল়্হো অনুক্কমেন ৰনদ্ৰারং পত্ৰা মহাৰনং অজ্ঝোগাহেত্ৰা মগ্গমূল়্হো হুত্ৰা ৰিচরন্তো তেহি রাজূহি বোধিসত্তস্স আরক্খণত্থায ঠপিতেন চেতপুত্তেন সমাগঞ্ছি. তেন ‘‘কহং, ভো ব্রাহ্মণ, গচ্ছসী’’তি পুট্ঠো ‘‘ৰেস্সন্তরমহারাজস্স সন্তিক’’ন্তি ৰুত্তে ‘‘অদ্ধা অযং ব্রাহ্মণো তস্স পুত্তে ৰা দেৰিং ৰা যাচিতুং গচ্ছতী’’তি চিন্তেত্ৰা ‘‘মা খো, ত্ৰং ব্রাহ্মণ, তত্থ গঞ্ছি, সচে গচ্ছসি, এত্থেৰ তে সীসং ছিন্দিত্ৰা ময্হং সুনখানং ঘাসং করিস্সামী’’তি তেন সন্তজ্জিতো মরণভযভীতো ‘‘অহমস্স পিতরা পেসিতো দূতো, ‘তং আনেস্সামী’তি আগতো’’তি মুসাৰাদং অভাসি. তং সুত্ৰা চেতপুত্তো তুট্ঠহট্ঠো ব্রাহ্মণস্স সক্কারসম্মানং কত্ৰা ৰঙ্কপব্বতগামিমগ্গং আচিক্খি. সো ততো পরং গচ্ছন্তো অন্তরামগ্গে অচ্চুতেন নাম তাপসেন সদ্ধিং সমাগন্ত্ৰা তম্পি মগ্গং পুচ্ছিত্ৰা তেনাপি মগ্গে আচিক্খিতে তেন আচিক্খিতসঞ্ঞায মগ্গং গচ্ছন্তো অনুক্কমেন বোধিসত্তস্স অস্সমপদট্ঠানসমীপং গন্ত্ৰা মদ্দিদেৰিযা ফলাফলত্থং গতকালে বোধিসত্তং উপসঙ্কমিত্ৰা উভো দারকে যাচি. তেন ৰুত্তং –

১১২.

‘‘পৰনে ৰসমানস্স, অদ্ধিকো মং উপাগমি;

অযাচি পুত্তকে ময্হং, জালিং কণ্হাজিনং চুভো’’তি.

এৰং ব্রাহ্মণেন দারকেসু যাচিতেসু মহাসত্তো ‘‘চিরস্সং ৰত মে যাচকো অধিগতো, অজ্জাহং অনৰসেসতো দানপারমিং পূরেস্সামী’’তি অধিপ্পাযেন সোমনস্সজাতো পসারিতহত্থে সহস্সত্থৰিকং ঠপেন্তো ৰিয ব্রাহ্মণস্স চিত্তং পরিতোসেন্তো সকলঞ্চ তং পব্বতকুচ্ছিং উন্নাদেন্তো ‘‘দদামি তৰ ময্হং পুত্তকে, অপি চ মদ্দিদেৰী পন পাতোৰ ফলাফলত্থায ৰনং গন্ত্ৰা সাযং আগমিস্সতি, তায আগতায তে পুত্তকে দস্সেত্ৰা ত্ৰঞ্চ মূলফলাফলং খাদিত্ৰা একরত্তিং ৰসিত্ৰা ৰিগতপরিস্সমো পাতোৰ গমিস্সসী’’তি আহ. ব্রাহ্মণো ‘‘কামঞ্চেস উল়ারজ্ঝাসযতায পুত্তকে দদাতি, মাতা পন ৰচ্ছগিদ্ধা আগন্ত্ৰা দানস্স অন্তরাযম্পি করেয্য, যংনূনাহং ইমং নিপ্পীল়েত্ৰা দারকে গহেত্ৰা অজ্জেৰ গচ্ছেয্য’’ন্তি চিন্তেত্ৰা ‘‘পুত্তা চে তে ময্হং দিন্না, কিং দানি মাতরং দস্সেত্ৰা পেসিতেহি, দারকে গহেত্ৰা অজ্জেৰ গমিস্সামী’’তি আহ. ‘‘সচে, ত্ৰং ব্রাহ্মণ, রাজপুত্তিং মাতরং দট্ঠুং ন ইচ্ছসি, ইমে দারকে গহেত্ৰা জেতুত্তরনগরং গচ্ছ, তত্থ সঞ্জযমহারাজা দারকে গহেত্ৰা মহন্তং তে ধনং দস্সতি, তেন দাসদাসিযো গণ্হিস্সসি, সুখঞ্চ জীৰিস্সসি, অঞ্ঞথা ইমে সুখুমালা রাজদারকা, কিং তে ৰেয্যাৰচ্চং করিস্সন্তী’’তি আহ.

ব্রাহ্মণো ‘‘এৰম্পি মযা ন সক্কা কাতুং, রাজদণ্ডতো ভাযামি, ময্হমেৰ গামং নেস্সামী’’তি আহ. ইমং তেসং কথাসল্লাপং সুত্ৰা দারকা ‘‘পিতা নো খো অম্হে ব্রাহ্মণস্স দাতুকামো’’তি পক্কমিত্ৰা পোক্খরণিং গন্ত্ৰা পদুমিনিগচ্ছে নিলীযিংসু. ব্রাহ্মণো তে অদিস্ৰাৰ ‘‘ত্ৰং ‘দারকে দদামী’তি ৰত্ৰা তে অপক্কমাপেসি, এসো তে সাধুভাৰো’’তি আহ. অথ মহাসত্তো সহসাৰ উট্ঠহিত্ৰা দারকে গৰেসন্তো পদুমিনিগচ্ছে নিলীনে দিস্ৰা ‘‘এথ, তাতা, মা ময্হং দানপারমিযা অন্তরাযং অকত্থ, মম দানজ্ঝাসযং মত্থকং পাপেথ, অযঞ্চ ব্রাহ্মণো তুম্হে গহেত্ৰা তুম্হাকং অয্যকস্স সঞ্জযমহারাজস্স সন্তিকং গমিস্সতি, তাত জালি, ত্ৰং ভুজিস্সো হোতুকামো ব্রাহ্মণস্স নিক্খসহস্সং দত্ৰা ভুজিস্সো ভৰেয্যাসি, কণ্হাজিনে ত্ৰং দাসসতং দাসিসতং হত্থিসতং অস্সসতং উসভসতং নিক্খসতন্তি সব্বসতং দত্ৰা ভুজিস্সা ভৰেয্যাসী’’তি কুমারে অগ্ঘাপেত্ৰা সমস্সাসেত্ৰা গহেত্ৰা অস্সমপদং গন্ত্ৰা কমণ্ডলুনা উদকং গহেত্ৰা সব্বঞ্ঞুতঞ্ঞাণস্স পচ্চযং কত্ৰা ব্রাহ্মণস্স হত্থে উদকং পাতেত্ৰা অতিৰিয পীতিসোমনস্সজাতো হুত্ৰা পথৰিং উন্নাদেন্তো পিযপুত্তদানং অদাসি. ইধাপি পুব্বে ৰুত্তনযেনেৰ পথৰিকম্পাদযো অহেসুং. তেন ৰুত্তং –

১১৩.

‘‘যাচকং উপগতং দিস্ৰা, হাসো মে উপপজ্জথ;

উভো পুত্তে গহেত্ৰান, অদাসিং ব্রাহ্মণে তদা.

১১৪.

‘‘সকে পুত্তে চজন্তস্স, জূজকে ব্রাহ্মণে যদা;

তদাপি পথৰী কম্পি, সিনেরুৰনৰটংসকা’’তি.

অথ ব্রাহ্মণো দারকে অগন্তুকামে লতায হত্থেসু বন্ধিত্ৰা আকড্ঢি. তেসং বন্ধট্ঠানে ছৰিং ছিন্দিত্ৰা লোহিতং পগ্ঘরি. সো লতাদণ্ডেন পহরন্তো আকড্ঢি. তে পিতরং ওলোকেত্ৰা.

‘‘অম্মা চ তাত নিক্খন্তা, ত্ৰঞ্চ নো তাত দস্সসি;

মা নো ত্ৰং তাত অদদা, যাৰ অম্মাপি এতু নো;

তদাযং ব্রাহ্মণো কামং, ৰিক্কিণাতু হনাতু ৰা’’তি. (জা. ২.২২.২১২৬) –

ৰত্ৰা পুনপি অযং এৰরূপো ঘোরদস্সনো কুরূরকম্মন্তো –

‘‘মনুস্সো উদাহু যক্খো, মংসলোহিতভোজনো;

গামা অরঞ্ঞমাগম্ম, ধনং তং তাত যাচতি;

নীযমানে পিসাচেন, কিং নু তাত উদিক্খসী’’তি. (জা. ২.২২.২১৩০-২১৩১) –

আদীনি ৰদন্তা পরিদেৰিংসু. তত্থ ধনন্তি পুত্তধনং.

জূজকো দারকে তথা পরিদেৰন্তেযেৰ পোথেন্তোৰ গহেত্ৰা পক্কামি. মহাসত্তস্স দারকানং করুণং পরিদেৰিতেন তস্স চ ব্রাহ্মণস্স অকারুঞ্ঞভাৰেন বলৰসোকো উপ্পজ্জি, ৰিপ্পটিসারো চ উদপাদি. সো তঙ্খণঞ্ঞেৰ বোধিসত্তানং পৰেণিং অনুস্সরি. ‘‘সব্বেৰ হি বোধিসত্তা পঞ্চ মহাপরিচ্চাগে পরিচ্চজিত্ৰা বুদ্ধা ভৰিস্সন্তি, অহম্পি তেসং অব্ভন্তরো, পুত্তদানঞ্চ মহাপরিচ্চাগানং অঞ্ঞতরং, তস্মা ৰেস্সন্তর দানং দত্ৰা পচ্ছানুতাপো ন তে অনুচ্ছৰিকো’’তি অত্তানং পরিভাসেত্ৰা ‘‘দিন্নকালতো পট্ঠায মম তে ন কিঞ্চি হোন্তী’’তি অত্তানং উপত্থম্ভেত্ৰা দল়্হসমাদানং অধিট্ঠায পণ্ণসালদ্ৰারে পাসাণফলকে কঞ্চনপটিমা ৰিয নিসীদি.

অথ মদ্দিদেৰী অরঞ্ঞতো ফলাফলং গহেত্ৰা নিৰত্তন্তী ‘‘মা মহাসত্তস্স দানন্তরাযো হোতূ’’তি ৰাল়মিগরূপধরাহি দেৰতাহি উপরুদ্ধমগ্গা তেসু অপগতেসু চিরেন অস্সমং পত্ৰা ‘‘অজ্জ মে দুস্সুপিনং দিট্ঠং, দুন্নিমিত্তানি চ উপ্পন্নানি, কিং নু খো ভৰিস্সতী’’তি চিন্তেন্তী অস্সমং পৰিসিত্ৰা পুত্তকে অপস্সন্তী বোধিসত্তস্স সন্তিকং গন্ত্ৰা ‘‘দেৰ, ন খো অম্হাকং পুত্তকে পস্সামি, কুহিং তে গতা’’তি আহ. সো তুণ্হী অহোসি. সা পুত্তকে উপধারেন্তী তহিং তহিং উপধাৰিত্ৰা গৰেসন্তী অদিস্ৰা পুনপি গন্ত্ৰা পুচ্ছি. বোধিসত্তো ‘‘কক্খল়কথায নং পুত্তসোকং জহাপেস্সামী’’তি চিন্তেত্ৰা –

‘‘নূন মদ্দী ৰরারোহা, রাজপুত্তী যসস্সিনী;

পাতো গতাসি উঞ্ছায, কিমিদং সাযমাগতা’’তি. (জা. ২.২২.২২২৫) –

ৰত্ৰা তায চিরাযনকারণে কথিতে পুনপি দারকে সন্ধায ন কিঞ্চি আহ. সা পুত্তসোকেন তে উপধারেন্তী পুনপি ৰাতৰেগেন ৰনানি ৰিচরি. তায একরত্তিযং ৰিচরিতট্ঠানং পরিগ্গণ্হন্তং পন্নরসযোজনমত্তং অহোসি. অথ ৰিভাতায রত্তিযা মহাসত্তস্স সন্তিকং গন্ত্ৰা ঠিতা দারকানং অদস্সনেন বলৰসোকাভিভূতা তস্স পাদমূলে ছিন্নকদলী ৰিয ভূমিযং ৰিসঞ্ঞী হুত্ৰা পতি. সো ‘‘মতা’’তি সঞ্ঞায কম্পমানো উপ্পন্নবলৰসোকোপি সতিং পচ্চুপট্ঠপেত্ৰা ‘‘জানিস্সামি তাৰ জীৰতি, ন জীৰতী’’তি সত্তমাসে কাযসংসগ্গং অনাপন্নপুব্বোপি অঞ্ঞস্স অভাৰেন তস্সা সীসং উক্খিপিত্ৰা ঊরূসু ঠপেত্ৰা উদকেন পরিপ্ফোসিত্ৰা উরঞ্চ মুখঞ্চ হদযঞ্চ পরিমজ্জি. মদ্দীপি খো থোকং ৰীতিনামেত্ৰা সতিং পটিলভিত্ৰা হিরোত্তপ্পং পচ্চুপট্ঠপেত্ৰা ‘‘দেৰ, দারকা তে কুহিং গতা’’তি পুচ্ছি. সো আহ – ‘‘দেৰি, একস্স মে ব্রাহ্মণস্স মং যাচিত্ৰা আগতস্স দাসত্থায দিন্না’’তি ৰত্ৰা তায ‘‘কস্মা, দেৰ, পুত্তে ব্রাহ্মণস্স দত্ৰা মম সব্বরত্তিং পরিদেৰিত্ৰা ৰিচরন্তিযা নাচিক্খী’’তি ৰুত্তে ‘‘পঠমমেৰ ৰুত্তে তৰ চিত্তদুক্খং বহু ভৰিস্সতি, ইদানি পন সরীরদুক্খেন তনুকং ভৰিস্সতী’’তি ৰত্ৰা –

‘‘মং পস্স মদ্দি মা পুত্তে, মা বাল়্হং পরিদেৰসি;

লচ্ছাম পুত্তে জীৰন্তা, অরোগা চ ভৰামসে’’তি. (জা. ২.২২.২২৬০) –

সো সমস্সাসেত্ৰা পুন –

‘‘পুত্তে পসুঞ্চ ধঞ্ঞঞ্চ, যঞ্চ অঞ্ঞং ঘরে ধনং;

দজ্জা সপ্পুরিসো দানং, দিস্ৰা যাচকমাগতং;

অনুমোদাহি মে মদ্দি, পুত্তকে দানমুত্তম’’ন্তি. (জা. ২.২২.২২৬১) –

ৰত্ৰা অত্তনো পুত্তদানং তং অনুমোদাপেসি.

সাপি –

‘‘অনুমোদামি তে দেৰ, পুত্তকে দানমুত্তমং;

দত্ৰা চিত্তং পসাদেহি, ভিয্যো দানং দদো ভৰা’’তি. (জা. ২.২২.২২৬২) –

ৰত্ৰা অনুমোদি.

এৰং তেসু অঞ্ঞমঞ্ঞং সম্মোদনীযং কথং কথেন্তেসু সক্কো চিন্তেসি – ‘‘মহাপুরিসো হিয্যো জূজকস্স পথৰিং উন্নাদেত্ৰা দারকে অদাসি. ইদানি নং কোচি হীনপুরিসো উপসঙ্কমিত্ৰা মদ্দিদেৰিং যাচিত্ৰা গহেত্ৰা গচ্ছেয্য, ততো রাজা নিপ্পচ্চযো ভৰেয্য, হন্দাহং ব্রাহ্মণৰণ্ণেন নং উপসঙ্কমিত্ৰা মদ্দিং যাচিত্ৰা পারমিকূটং গাহাপেত্ৰা কস্সচি অৰিস্সজ্জিযং কত্ৰা পুন নং তস্সেৰ দত্ৰা আগমিস্সামী’’তি. সো সূরিযুগ্গমনৰেলাযং ব্রাহ্মণৰণ্ণেন তস্স সন্তিকং অগমাসি. তং দিস্ৰা মহাপুরিসো ‘‘অতিথি নো আগতো’’তি পীতিসোমনস্সজাতো তেন সদ্ধিং মধুরপটিসন্থারং কত্ৰা ‘‘ব্রাহ্মণ, কেনত্থেন ইধাগতোসী’’তি পুচ্ছি. অথ নং সক্কো মদ্দিদেৰিং যাচি. তেন ৰুত্তং –

১১৫.

‘‘পুনদেৰ সক্কো ওরুয্হ, হুত্ৰা ব্রাহ্মণসন্নিভো;

অযাচি মং মদ্দিদেৰিং, সীলৰন্তিং পতিব্বত’’ন্তি.

তত্থ পুনদেৰাতি দারকে দিন্নদিৰসতো পচ্ছা এৰ. তদনন্তরমেৰাতি অত্থো. ওরুয্হাতি দেৰলোকতো ওতরিত্ৰা. ব্রাহ্মণসন্নিভোতি ব্রাহ্মণসমানৰণ্ণো.

অথ মহাসত্তো ‘‘হিয্যো মে দ্ৰেপি দারকে ব্রাহ্মণস্স দিন্না, অহম্পি অরঞ্ঞে এককোৰ, কথং তে মদ্দিং সীলৰন্তিং পতিব্বতং দস্সামী’’তি অৰত্ৰাৰ পসারিতহত্থে অনগ্ঘরতনং ঠপেন্তো ৰিয অসজ্জিত্ৰা অবজ্ঝিত্ৰা অনোলীনমানসো ‘‘অজ্জ মে দানপারমী মত্থকং পাপুণিস্সতী’’তি হট্ঠতুট্ঠো গিরিং উন্নাদেন্তো ৰিয –

‘‘দদামি ন ৰিকম্পামি, যং মং যাচসি ব্রাহ্মণ;

সন্তং নপ্পটিগূহামি, দানে মে রমতী মনো’’তি. (জা. ২.২২.২২৭৮) –

ৰত্ৰা সীঘমেৰ কমণ্ডলুনা উদকং আহরিত্ৰা ব্রাহ্মণস্স হত্থে উদকং পাতেত্ৰা ভরিযমদাসি. তেন ৰুত্তং –

১১৬.

‘‘মদ্দিং হত্থে গহেত্ৰান, উদকঞ্জলি পূরিয;

পসন্নমনসঙ্কপ্পো, তস্স মদ্দিং অদাসহ’’ন্তি.

তত্থ উদকঞ্জলীতি উদকং অঞ্জলিং, ‘‘উদক’’ন্তি চ করণত্থে পচ্চত্তৰচনং, উদকেন তস্স ব্রাহ্মণস্স অঞ্জলিং পসারিতহত্থতলং পূরেত্ৰাতি অত্থো. পসন্নমনসঙ্কপ্পোতি ‘‘অদ্ধা ইমিনা পরিচ্চাগেন দানপারমিং মত্থকং পাপেত্ৰা সম্মাসম্বোধিং অধিগমিস্সামী’’তি উপন্নসদ্ধাপসাদেন পসন্নচিত্তসঙ্কপ্পো. তঙ্খণঞ্ঞেৰ হেট্ঠা ৰুত্তপ্পকারানি সব্বপাটিহারিযানি পাতুরহেসুং. ‘‘ইদানিস্স ন দূরে সম্মাসম্বোধী’’তি দেৰগণা ব্রহ্মগণা অতিৰিয পীতিসোমনস্সজাতা অহেসুং. তেন ৰুত্তং –

১১৭.

‘‘মদ্দিযা দীযমানায, গগনে দেৰা পমোদিতা;

তদাপি পথৰী কম্পি, সিনেরুৰনৰটংসকা’’তি.

ততো পন দীযমানায মদ্দিযা দেৰিযা রুণ্ণং ৰা দুম্মুখং ৰা ভাকুটিমত্তং ৰা নাহোসি, এৰং চস্সা অহোসি ‘‘যং দেৰো ইচ্ছতি, তং করোতূ’’তি.

‘‘কোমারী যস্সাহং ভরিযা, সামিকো মম ইস্সরো;

যস্সিচ্ছে তস্স মং দজ্জা, ৰিক্কিণেয্য হনেয্য ৰা’’তি. (জা. ২.২২.২২৮২) –

আহ.

মহাপুরিসোপি ‘‘অম্ভো, ব্রাহ্মণ, মদ্দিতো মে সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণমেৰ পিযতরং, ইদং মে দানং সব্বঞ্ঞুতঞ্ঞাণপ্পটিৰেধস্স পচ্চযো হোতূ’’তি ৰত্ৰা অদাসি. তেন ৰুত্তং –

১১৮.

‘‘জালিং কণ্হাজিনং ধীতং, মদ্দিদেৰিং পতিব্বতং;

চজমানো ন চিন্তেসিং, বোধিযাযেৰ কারণা.

১১৯.

ন মে দেস্সা উভো পুত্তা, মদ্দিদেৰী ন দেস্সিযা;

সব্বঞ্ঞুতং পিযং ময্হং, তস্মা পিযে অদাসহ’’ন্তি.

তত্থ চজমানো ন চিন্তেসিন্তি পরিচ্চজন্তো সন্তাপৰসেন ন চিন্তেসিং, ৰিস্সট্ঠো হুত্ৰা পরিচ্চজিন্তি অত্থো.

এত্থাহ – কস্মা পনাযং মহাপুরিসো অত্তনো পুত্তদারে জাতিসম্পন্নে খত্তিযে পরস্স দাসভাৰেন পরিচ্চজি, ন হি যেসং কেসঞ্চিপি ভুজিস্সানং অভুজিস্সভাৰকরণং সাধুধম্মোতি? ৰুচ্চতে – অনুধম্মভাৰতো. অযঞ্হি বুদ্ধকারকে ধম্মে অনুগতধম্মতা, যদিদং সব্বস্স অত্তনিযস্স মমন্তি পরিগ্গহিতৰত্থুনো অনৰসেসপরিচ্চাগো, ন হি দেয্যধম্মপটিগ্গাহকৰিকপ্পরহিতং দানপারমিং পরিপূরেতুং উস্সুক্কমাপন্নানং বোধিসত্তানং মমন্তি পরিগ্গহিতৰত্থুং যাচন্তস্স যাচকস্স ন পরিচ্চজিতুং যুত্তং, পোরাণোপি চাযমনুধম্মো. সব্বেসঞ্হি বোধিসত্তানং অযং আচিণ্ণসমাচিণ্ণধম্মো কুলৰংসো কুলপ্পৰেণী, যদিদং সব্বস্স পরিচ্চাগো. তত্থ চ ৰিসেসতো পিযতরৰত্থুপরিচ্চাগো, ন হি কেচি বোধিসত্তা ৰংসানুগতং রজ্জিস্সরিযাদিধনপরিচ্চাগং, অত্তনো সীসনযনাদিঅঙ্গপরিচ্চাগং, পিযজীৰিতপরিচ্চাগং, কুলৰংসপতিট্ঠাপকপিযপুত্তপরিচ্চাগং, মনাপচারিনীপিযভরিযাপরিচ্চাগন্তি ইমে পঞ্চ মহাপরিচ্চাগে অপরিচ্চজিত্ৰা বুদ্ধা নাম ভূতপুব্বা অত্থি. তথা হি মঙ্গলে ভগৰতি বোধিসত্তভূতে বোধিপরিযেসনং চরমানে চ চরিমত্তভাৰতো ততিযে অত্তভাৰে সপুত্তদারে একস্মিং পব্বতে ৰসন্তে খরদাঠিকো নাম যক্খো মহাপুরিসস্স দানজ্ঝাসযতং সুত্ৰা ব্রাহ্মণৰণ্ণেন উপসঙ্কমিত্ৰা মহাসত্তং দ্ৰে দারকে যাচি.

মহাসত্তো ‘‘দদামি ব্রাহ্মণস্স পুত্তকে’’তি হট্ঠপহট্ঠো উদকপরিযন্তং পথৰিং কম্পেন্তো দ্ৰেপি দারকে অদাসি. যক্খো চঙ্কমনকোটিযং আলম্বনফলকং নিস্সায ঠিতো মহাসত্তস্স পস্সন্তস্সেৰ মুল়ালকলাপং ৰিয দ্ৰে দারকে খাদি. অগ্গিজালং ৰিয লোহিতধারং উগ্গিরমানং যক্খস্স মুখং ওলোকেন্তস্স মহাপুরিসস্স ‘‘ৰঞ্চেসি ৰত মং যক্খো’’তি উপ্পজ্জনকচিত্তুপ্পাদস্স ওকাসং অদেন্তস্স উপাযকোসল্লস্স সুভাৰিতত্তা অতীতধম্মানং অপ্পটিসন্ধিসভাৰতো অনিচ্চাদিৰসেন সঙ্খারানং সুপরিমদ্দিতভাৰতো চ এৰং ইত্তরট্ঠিতিকেন পভঙ্গুনা অসারেন সঙ্খারকলাপেন ‘‘পূরিতা ৰত মে দানপারমী, মহন্তং ৰত মে অত্থং সাধেত্ৰা ইদং অধিগত’’ন্তি সোমনস্সমেৰ উপ্পজ্জি. সো ইদং অনঞ্ঞসাধারণং তস্মিং খণে অত্তনো চিত্তাচারং ঞত্ৰা ‘‘ইমস্স নিস্সন্দেন অনাগতে ইমিনাৰ নীহারেন সরীরতো রস্মিযো নিক্খমন্তূ’’তি পত্থনমকাসি. তস্স তং পত্থনং নিস্সায বুদ্ধভূতস্স সরীরপ্পভা নিচ্চমেৰ দসসহস্সিলোকধাতুং ফরিত্ৰা অট্ঠাসি (ধ. স. অট্ঠ. নিদানকথা). এৰং অঞ্ঞেপি বোধিসত্তা অত্তনো পিযতরং পুত্তদারং পরিচ্চজিত্ৰা সব্বঞ্ঞুতঞ্ঞাণং পটিৰিজ্ঝিংসু.

অপি চ যথা নাম কোচি পুরিসো কস্সচি সন্তিকে গামং ৰা জনপদং ৰা কেণিযা গহেত্ৰা কম্মং করোন্তো অত্তনো অন্তেৰাসিকানং ৰা পমাদেন পূতিভূতং ধনং ধারেয্য, তমেনং সো গাহাপেত্ৰা বন্ধনাগারং পৰেসেয্য. তস্স এৰমস্স ‘‘অহং খো ইমস্স রঞ্ঞো কম্মং করোন্তো এত্তকং নাম ধনং ধারেমি, তেনাহং রঞ্ঞা বন্ধনাগারে পৰেসিতো, সচাহং ইধেৰ হোমি, অত্তানঞ্চ জীযেয্য, পুত্তদারকম্মকরপোরিসা চ মে জীৰিকাপগতা মহন্তং অনযব্যসনং আপজ্জেয্যুং. যংনূনাহং রঞ্ঞো আরোচেত্ৰা অত্তনো পুত্তং ৰা কনিট্ঠভাতরং ৰা ইধ ঠপেত্ৰা নিক্খমেয্যং. এৰাহং ইতো বন্ধনতো মুত্তো নচিরস্সেৰ যথামিত্তং যথাসন্দিট্ঠং ধনং সংহরিত্ৰা রঞ্ঞো দত্ৰা তম্পি বন্ধনতো মোচেমি, অপ্পমত্তোৰ হুত্ৰা উট্ঠানবলেন অত্তনো সম্পত্তিং পটিপাকতিকং করিস্সামী’’তি. সো তথা করেয্য. এৰং সম্পদমিদং দট্ঠব্বং.

তত্রিদং ওপম্মসংসন্দনং – রাজা ৰিয কম্মং, বন্ধনাগারো ৰিয সংসারো, রঞ্ঞা বন্ধনাগারে ঠপিতপুরিসো ৰিয কম্মৰসেন সংসারচারকে ঠিতো মহাপুরিসো, তস্স বন্ধনাগারে ঠিতপুরিসস্স তত্থ পুত্তস্স ৰা ভাতুনো ৰা পরাধীনভাৰকরণেন তেসং অত্তনো চ দুক্খপ্পমোচনং ৰিয মহাপুরিসস্স অত্তনো পুত্তাদিকে পরেসং দত্ৰা সব্বঞ্ঞুতঞ্ঞাণপ্পটিলাভেন সব্বসত্তানং ৰট্টদুক্খপ্পমোচনং, তস্স ৰিগতদুক্খস্স তেহি সদ্ধিং যথাধিপ্পেতসম্পত্তিযং পতিট্ঠানং ৰিয মহাপুরিসস্স অরহত্তমগ্গেন অপগতৰট্টদুক্খস্স বুদ্ধভাৰেন দসবলাদিসব্বঞ্ঞুতঞ্ঞাণসম্পত্তিসমন্নাগমো অত্তনো ৰচনকারকানং ৰিজ্জত্তযাদিসম্পত্তিসমন্নাগমো চাতি এৰং অনৰজ্জসভাৰো এৰ মহাপুরিসানং পুত্তদারপরিচ্চাগো. এতেনেৰ নযেন নেসং অঙ্গজীৰিতপরিচ্চাগে যা চোদনা, সাপি ৰিসোধিতাতি ৰেদিতব্বাতি.

এৰং পন মহাসত্তেন মদ্দিদেৰিযা দিন্নায সক্কো অচ্ছরিযব্ভুতচিত্তজাতো হুত্ৰা –

‘‘সব্বে জিতা তে পচ্চূহা, যে দিব্বা যে চ মানুসা;

নিন্নাদিতা তে পথৰী, সদ্দো তে তিদিৰং গতো. (জা. ২.২২.২২৮৩-২২৮৪);

‘‘দুদ্দদং দদমানানং, দুক্করং কম্ম কুব্বতং;

অসন্তো নানুকুব্বন্তি, সতং ধম্মো দুরন্নযো.

‘‘তস্মা সতঞ্চ অসতং, নানা হোতি ইতো গতি;

অসন্তো নিরযং যন্তি, সন্তো সগ্গপরাযনা’’তি. (জা. ২.২২.২২৮৬-২২৮৭) –

আদিনা নযেন মহাপুরিসস্স দানানুমোদনৰসেন থুতিং অকাসি.

তত্থ পচ্চূহাতি পচ্চত্থিকা. দিব্বাতি দিব্বযসপটিবাহকা. মানুসাতি মনুস্সযসপটিবাহকা. কে পন তেতি? মচ্ছরিযধম্মা, তে সব্বে পুত্তদারং দেন্তেন মহাসত্তেন জিতাতি দস্সেতি. দুদ্দদন্তি পুত্তদারাদিদুদ্দদং দদমানানং তমেৰ দুক্করং কুব্বতং তুম্হাদিসানং কম্মং অঞ্ঞে সাৰকপচ্চেকবোধিসত্তা নানুকুব্বন্তি, পগেৰ অসন্তো মচ্ছরিনো. তস্মা সতং ধম্মো দুরন্নযো সাধূনং মহাবোধিসত্তানং পটিপত্তিধম্মো অঞ্ঞেহি দুরনুগমো.

এৰং সক্কো মহাপুরিসস্স অনুমোদনৰসেন থুতিং কত্ৰা মদ্দিদেৰিং নিয্যাতেন্তো –

‘‘দদামি ভোতো ভরিযং, মদ্দিং সব্বঙ্গসোভনং;

ত্ৰঞ্চেৰ মদ্দিযা ছন্নো, মদ্দী চ পতিনো তৰা’’তি. (জা. ২.২২.২২৮৯) –

ৰত্ৰা তং মদ্দিং পটিদত্ৰা দিব্বত্তভাৰেন জলন্তো তরুণসূরিযো ৰিয আকাসে ঠত্ৰা অত্তানং আচিক্খন্তো –

‘‘সক্কোহমস্মি দেৰিন্দো, আগতোস্মি তৰন্তিকে;

ৰরং ৰরস্সু রাজিসি, ৰরে অট্ঠ দদামি তে’’তি. (জা. ২.২২.২২৯২) –

ৰত্ৰা ৰরেহি নিমন্তেসি. মহাসত্তোপি ‘‘পিতা মং পুনদেৰ রজ্জে পতিট্ঠাপেতু, ৰজ্ঝপ্পত্তং ৰধতো মোচেয্যং, সব্বসত্তানং অৰস্সযো ভৰেয্যং, পরদারং ন গচ্ছেয্যং, ইত্থীনং ৰসং ন গচ্ছেয্যং, পুত্তো মে দীঘাযুকো সিযা, অন্নপানাদিদেয্যধম্মো বহুকো সিযা, তঞ্চ অপরিক্খযং পসন্নচিত্তো দদেয্যং, এৰং মহাদানানি পৰত্তেত্ৰা দেৰলোকং গন্ত্ৰা ততো ইধাগতো সব্বঞ্ঞুতং পাপুণেয্য’’ন্তি ইমে অট্ঠ ৰরে যাচি. সক্কো ‘‘নচিরস্সেৰ পিতা সঞ্জযমহারাজা ইধেৰ আগন্ত্ৰা তং গহেত্ৰা রজ্জে পতিট্ঠাপেস্সতি, ইতরো চ সব্বো তে মনোরথো মত্থকং পাপুণিস্সতি, মা চিন্তযি, অপ্পমত্তো হোহী’’তি ওৰদিত্ৰা সকট্ঠানমেৰ গতো. বোধিসত্তো চ মদ্দিদেৰী চ সম্মোদমানা সক্কদত্তিযে অস্সমে ৰসিংসু.

জূজকেপি কুমারে গহেত্ৰা গচ্ছন্তে দেৰতা আরক্খমকংসু. দিৰসে দিৰসে একা দেৰধীতা রত্তিভাগে আগন্ত্ৰা মদ্দিৰণ্ণেন কুমারে পটিজগ্গি. সো দেৰতাৰিগ্গহিতো হুত্ৰা ‘‘কলিঙ্গরট্ঠং গমিস্সামী’’তি অড্ঢমাসেন জেতুত্তরনগরমেৰ সম্পাপুণি. রাজা ৰিনিচ্ছযে নিসিন্নো ব্রাহ্মণেন সদ্ধিং দারকে রাজঙ্গণেন গচ্ছন্তে দিস্ৰা সঞ্জানিত্ৰা ব্রাহ্মণেন সদ্ধিং তে পক্কোসাপেত্ৰা তং পৰত্তিং সুত্ৰা বোধিসত্তেন কথিতনিযামেনেৰ ধনং দত্ৰা কুমারে কিণিত্ৰা ন্হাপেত্ৰা ভোজেত্ৰা সব্বালঙ্কারপটিমণ্ডিতে কত্ৰা রাজা দারকং ফুস্সতিদেৰী দারিকং উচ্ছঙ্গে কত্ৰা বোধিসত্তস্স রাজপুত্তিযা চ পৰত্তিং সুণিংসু.

তং সুত্ৰা রাজা ‘‘ভূনহচ্চং ৰত মযা কত’’ন্তি সংৰিগ্গমানসো তাৰদেৰ দ্ৰাদসঅক্খোভনীপরিমাণং সেনং সন্নয্হিত্ৰা ৰঙ্কপব্বতাভিমুখো পাযাসি সদ্ধিং ফুস্সতিদেৰিযা চেৰ দারকেহি চ. অনুক্কমেন গন্ত্ৰা পুত্তেন চ সুণিসায চ সমাগঞ্ছি. ৰেস্সন্তরো পিযপুত্তে দিস্ৰা সোকং সন্ধারেতুং অসক্কোন্তো ৰিসঞ্ঞী হুত্ৰা তত্থেৰ পতি, তথা মদ্দী মাতাপিতরো সহজাতা সট্ঠিসহস্সা চ অমচ্চা. তং কারুঞ্ঞং পস্সন্তেসু একোপি সকভাৰেন সন্ধারেতুং নাসক্খি, সকলং অস্সমপদং যুগন্ধরৰাতপমদ্দিতং ৰিয সালৰনং অহোসি. সক্কো দেৰরাজা তেসং ৰিসঞ্ঞিভাৰৰিনোদনত্থং পোক্খরৰস্সং ৰস্সাপেসি, তেমেতুকামা তেমেন্তি, পোক্খরে পতিতৰস্সং ৰিয ৰিনিৰত্তিত্ৰা উদকং গচ্ছতি. সব্বে সঞ্ঞং পটিলভিংসু. তদাপি পথৰিকম্পাদযো হেট্ঠা ৰুত্তপ্পকারা অচ্ছরিযা পাতুরহেসুং. তেন ৰুত্তং –

১২০.

‘‘পুনাপরং ব্রহারঞ্ঞে, মাতাপিতুসমাগমে;

করুণং পরিদেৰন্তে, সল্লপন্তে সুখং দুখং.

১২১.

‘‘হিরোত্তপ্পেন গরুনা, উভিন্নং উপসঙ্কমি;

তদাপি পথৰী কম্পি, সিনেরুৰনৰটংসকা’’তি.

তত্থ করুণং পরিদেৰন্তেতি মাতাপিতরো আদিং কত্ৰা সব্বস্মিং আগতজনে করুণং পরিদেৰমানে. সল্লপন্তে সুখং দুখন্তি সুখদুক্খং পুচ্ছিত্ৰা পটিসন্থারৰসেন আলাপসল্লাপং করোন্তে. হিরোত্তপ্পেন গরুনা উভিন্নন্তি ইমে সিৰীনং ৰচনং গহেত্ৰা অদূসকং ধম্মে ঠিতং মং পব্বাজযিংসূতি চিত্তপ্পকোপং অকত্ৰা উভোসু এতেসু মাতাপিতূসু ধম্মগারৰসমুস্সিতেন হিরোত্তপ্পেনেৰ যথারূপে উপসঙ্কমি. তেন মে ধম্মতেজেন তদাপি পথৰী কম্পি.

অথ সঞ্জযমহারাজা বোধিসত্তং খমাপেত্ৰা রজ্জং পটিচ্ছাপেত্ৰা তঙ্খণঞ্ঞেৰ কেসমস্সুকম্মাদীনি কারাপেত্ৰা ন্হাপেত্ৰা সব্বাভরণৰিভূসিতং দেৰরাজানমিৰ ৰিরোচমানং সহ মদ্দিদেৰিযা রজ্জে অভিসিঞ্চিত্ৰা তাৰদেৰ চ ততো পট্ঠায দ্ৰাদসঅক্খোভনীপরিমাণায চতুরঙ্গিনিযা সেনায চ পুত্তং পরিৰারযিত্ৰা ৰঙ্কপব্বততো যাৰ জেতুত্তরনগরা সট্ঠিযোজনমগ্গং অলঙ্কারাপেত্ৰা দ্ৰীহি মাসেহি সুখেনেৰ নগরং পৰেসেসি. মহাজনো উল়ারং পীতিসোমনস্সং পটিসংৰেদেসি. চেলুক্খেপাদযো পৰত্তিংসু. নগরে চ নন্দিভেরিং চরাপেসুং. অন্তমসো বিল়ারে উপাদায সব্বেসং বন্ধনে ঠিতানং বন্ধনমোক্খো অহোসি. সো নগরং পৰিট্ঠদিৰসেযেৰ পচ্চূসকালে চিন্তেসি – ‘‘স্ৰে ৰিভাতায রত্তিযা মমাগতভাৰং সুত্ৰা যাচকা আগমিস্সন্তি, তেসাহং কিং দস্সামী’’তি. তস্মিং খণে সক্কস্স আসনং উণ্হাকারং দস্সেসি. সো আৰজ্জেন্তো তং কারণং ঞত্ৰা তাৰদেৰ রাজনিৰেসনস্স পুরিমৰত্থুং পচ্ছিমৰত্থুঞ্চ কটিপ্পমাণং পূরেন্তো ঘনমেঘো ৰিয সত্তরতনৰস্সং ৰস্সাপেসি. সকলনগরে জণ্ণুপ্পমাণং ৰস্সাপেসীতি. তেন ৰুত্তং –

১২২.

‘‘পুনাপরং ব্রহারঞ্ঞা, নিক্খমিত্ৰা সঞাতিভি;

পৰিসামি পুরং রম্মং, জেতুত্তরং পুরুত্তমং.

১২৩.

‘‘রতনানি সত্ত ৰস্সিংসু, মহামেঘো পৰস্সথ;

তদাপি পথৰী কম্পি, সিনেরুৰনৰটংসকা.

১২৪.

‘‘অচেতনাযং পথৰী, অৰিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি.

এৰং সত্তরতনৰস্সে ৰুট্ঠে পুনদিৰসে মহাসত্তো ‘‘যেসং কুলানং পুরিমপচ্ছিমৰত্থূসু ৰুট্ঠধনং, তেসঞ্ঞেৰ হোতূ’’তি দাপেত্ৰা অৰসেসং আহরাপেত্ৰা অত্তনো গেহৰত্থুস্মিং ধনেন সদ্ধিং কোট্ঠাগারেসু ওকিরাপেত্ৰা মহাদানং পৰত্তেসি. অচেতনাযং পথৰীতি চেতনারহিতা অযং মহাভূতা পথৰী, দেৰতা পন চেতনাসহিতা. অৰিঞ্ঞায সুখং দুখন্তি অচেতনত্তা এৰ সুখং দুক্খং অজানিত্ৰা. সতিপি সুখদুক্খপচ্চযসংযোগে তং নানুভৰন্তী. সাপি দানবলা ময্হন্তি এৰংভূতাপি সা মহাপথৰী মম দানপুঞ্ঞানুভাৰহেতু. সত্তক্খত্তুং পকম্পথাতি অট্ঠৰস্সিককালে হদযমংসাদীনিপি যাচকানং দদেয্যন্তি দানজ্ঝাসযুপ্পাদে মঙ্গলহত্থিদানে পব্বাজনকালে পৰত্তিতমহাদানে পুত্তদানে ভরিযাদানে ৰঙ্কপব্বতে ঞাতিসমাগমে নগরং পৰিট্ঠদিৰসে রতনৰস্সকালেতি ইমেসু ঠানেসু সত্তৰারং অকম্পিত্থ. এৰং একস্মিংযেৰ অত্তভাৰে সত্তক্খত্তুং মহাপথৰিকম্পনাদিঅচ্ছরিযপাতুভাৰহেতুভূতানি যাৰতাযুকং মহাদানানি পৰত্তেত্ৰা মহাসত্তো আযুপরিযোসানে তুসিতপুরে উপ্পজ্জি. তেনাহ ভগৰা –

‘‘ততো ৰেস্সন্তরো রাজা, দানং দত্ৰান খত্তিযো;

কাযস্স ভেদা সপ্পঞ্ঞো, সগ্গং সো উপপজ্জথা’’তি. (জা. ২.২২.২৪৪০);

তদা জূজকো দেৰদত্তো অহোসি, অমিত্ততাপনা চিঞ্চমাণৰিকা, চেতপুত্তো ছন্নো, অচ্চুততাপসো সারিপুত্তো, সক্কো অনুরুদ্ধো, মদ্দী রাহুলমাতা, জালিকুমারো রাহুলো, কণ্হাজিনা উপ্পলৰণ্ণা, মাতাপিতরো মহারাজকুলানি, সেসপরিসা বুদ্ধপরিসা, ৰেস্সন্তরো রাজা লোকনাথো.

ইধাপি হেট্ঠা ৰুত্তনযেনেৰ যথারহং সেসপারমিযো নিদ্ধারেতব্বা. তথা মহাসত্তে কুচ্ছিগতে মাতু দেৰসিকং ছসতসহস্সানি ৰিস্সজ্জেত্ৰা দানং দাতুকামতাদোহল়ো, তথা দীযমানেপি ধনস্স পরিক্খযাভাৰো, জাতক্খণে এৰ হত্থং পসারেত্ৰা ‘‘দানং দস্সামি, অত্থি কিঞ্চী’’তি ৰাচানিচ্ছারণং, চতুপঞ্চৰস্সিককালে অত্তনো অলঙ্কারস্স ধাতীনং হত্থগতস্স পুন অগ্গহেতুকামতা, অট্ঠৰস্সিককালে হদযমংসাদিকস্স অত্তনো সরীরাৰযৰস্স দাতুকামতাতি এৰমাদিকা সত্তক্খত্তুং মহাপথৰিকম্পনাদিঅনেকচ্ছরিযপাতুভাৰহেতুভূতা ইধ মহাপুরিসস্স গুণানুভাৰা ৰিভাৰেতব্বা. তেনেতং ৰুচ্চতি –

‘‘এৰং অচ্ছরিযা হেতে, অব্ভুতা চ মহেসিনো…পে…;

তেসু চিত্তপ্পসাদোপি, দুক্খতো পরিমোচযে;

পগেৰানুকিরিযা তেসং, ধম্মস্স অনুধম্মতো’’তি.

ৰেস্সন্তরচরিযাৰণ্ণনা নিট্ঠিতা.

১০. সসপণ্ডিতচরিযাৰণ্ণনা

১২৫-৬. দসমে যদা হোমি, সসকোতি অহং, সারিপুত্ত, বোধিপরিযেসনং চরমানো যদা সসপণ্ডিতো হোমি. বোধিসত্তা হি কম্মৰসিপ্পত্তাপি তাদিসানং তিরচ্ছানানং অনুগ্গণ্হনত্থং তিরচ্ছানযোনিযং নিব্বত্তন্তি. পৰনচারকোতি মহাৰনচারী. দব্বাদিতিণানি রুক্খগচ্ছেসু পণ্ণানি যংকিঞ্চি সাকং রুক্খতো পতিতফলানি চ ভক্খো এতস্সাতি তিণপণ্ণসাকফলভক্খো. পরহেঠনৰিৰজ্জিতোতি পরপীল়াৰিরহিতো. সুত্তপোতো চাতি উদ্দপোতো চ. অহং তদাতি যদাহং সসকো হোমি, তদা এতে মক্কটাদযো তযো সহাযে ওৰদামি.

১২৭. কিরিযে কল্যাণপাপকেতি কুসলে চেৰ অকুসলে চ কম্মে. পাপানীতি অনুসাসনাকারদস্সনং. তত্থ পাপানি পরিৰজ্জেথাতি পাণাতিপাতো…পে… মিচ্ছাদিট্ঠীতি ইমানি পাপানি পরিৰজ্জেথ. কল্যাণে অভিনিৰিস্সথাতি দানং সীলং…পে… দিট্ঠুজুকম্মন্তি ইদং কল্যাণং, ইমস্মিং কল্যাণে অত্তনো কাযৰাচাচিত্তানি অভিমুখভাৰেন নিৰিস্সথ, ইমং কল্যাণপটিপত্তিং পটিপজ্জথাতি অত্থো.

এৰং মহাসত্তো তিরচ্ছানযোনিযং নিব্বত্তোপি ঞাণসম্পন্নতায কল্যাণমিত্তো হুত্ৰা তেসং তিণ্ণং জনানং কালেন কালং উপগতানং ওৰাদৰসেন ধম্মং দেসেসি. তে তস্স ওৰাদং সম্পটিচ্ছিত্ৰা অত্তনো ৰসনট্ঠানং পৰিসিত্ৰা ৰসন্তি. এৰং কালে গচ্ছন্তে বোধিসত্তো আকাসং ওলোকেত্ৰা চন্দপারিপূরিং দিস্ৰা ‘‘উপোসথকম্মং করোথা’’তি ওৰদি. তেনাহ –

১২৮.

‘‘উপোসথম্হি দিৰসে, চন্দং দিস্ৰান পূরিতং;

এতেসং তত্থ আচিক্খিং, দিৰসো অজ্জুপোসথো.

১২৯.

‘‘দানানি পটিযাদেথ, দক্খিণেয্যস্স দাতৰে;

দত্ৰা দানং দক্খিণেয্যে, উপৰস্সথুপোসথ’’ন্তি.

তত্থ চন্দং দিস্ৰা ন পূরিতন্তি জুণ্হপক্খচাতুদ্দসিযং ঈসকং অপরিপুণ্ণভাৰেন চন্দং ন পরিপূরিতং দিস্ৰা ততো ৰিভাতায রত্তিযা অরুণুগ্গমনৰেলাযমেৰ উপোসথম্হি দিৰসে পন্নরসে এতেসং মক্কটাদীনং ময্হং সহাযানং দিৰসো অজ্জুপোসথো. তস্মা ‘‘দানানি পটিযাদেথা’’তিআদিনা তত্থ উপোসথদিৰসে পটিপত্তিৰিধানং আচিক্খিন্তি যোজেতব্বং. তত্থ দানানীতি দেয্যধম্মে. পটিযাদেথাতি যথাসত্তি যথাবলং সজ্জেথ. দাতৰেতি দাতুং. উপৰস্সথাতি উপোসথকম্মং করোথ, উপোসথসীলানি রক্খথ, সীলে পতিট্ঠায দিন্নদানং মহপ্ফলং হোতি, তস্মা যাচকে সম্পত্তে তুম্হেহি খাদিতব্বাহারতো দত্ৰা খাদেয্যাথাতি দস্সেতি.

তে ‘‘সাধূ’’তি বোধিসত্তস্স ওৰাদং সিরসা সম্পটিচ্ছিত্ৰা উপোসথঙ্গানি অধিট্ঠহিংসু. তেসু উদ্দপোতো পাতোৰ ‘‘গোচরং পরিযেসিস্সামী’’তি নদীতীরং গতো. অথেকো বাল়িসিকো সত্ত রোহিতমচ্ছে উদ্ধরিত্ৰা ৰল্লিযা আৰুণিত্ৰা নদীতীরে ৰালুকায পটিচ্ছাদেত্ৰা মচ্ছে গণ্হন্তো নদিযা অধো সোতং ভস্সি. উদ্দো মচ্ছগন্ধং ঘাযিত্ৰা ৰালুকং ৰিযূহিত্ৰা মচ্ছে দিস্ৰা নীহরিত্ৰা ‘‘অত্থি নু খো এতেসং সামিকো’’তি তিক্খত্তুং ঘোসেত্ৰা সামিকং অপস্সন্তো ৰল্লিযং ডংসিত্ৰা অত্তনো ৰসনগুম্বে ঠপেত্ৰা ‘‘ৰেলাযমেৰ খাদিস্সামী’’তি অত্তনো সীলং আৰজ্জেন্তো নিপজ্জি. সিঙ্গালোপি গোচরং পরিযেসন্তো একস্স খেত্তগোপকস্স কুটিযং দ্ৰে মংসসূলানি একং গোধং একঞ্চ দধিৰারকং দিস্ৰা ‘‘অত্থি নু খো এতেসং সামিকো’’তি তিক্খত্তুং ঘোসেত্ৰা সামিকং অদিস্ৰা দধিৰারকস্স উগ্গহণরজ্জুকং গীৰাযং পৰেসেত্ৰা মংসসূলে চ গোধঞ্চ মুখেন ডংসিত্ৰা অত্তনো ৰসনগুম্বে ঠপেত্ৰা ‘‘ৰেলাযমেৰ খাদিস্সামী’’তি অত্তনো সীলং আৰজ্জেন্তো নিপজ্জি. মক্কটোপি ৰনসণ্ডং পৰিসিত্ৰা অম্বপিণ্ডং আহরিত্ৰা অত্তনো ৰসনগুম্বে ঠপেত্ৰা ‘‘ৰেলাযমেৰ খাদিস্সামী’’তি অত্তনো সীলং আৰজ্জেন্তো নিপজ্জি. তিণ্ণম্পি ‘‘অহো ইধ নূন যাচকো আগচ্ছেয্যা’’তি চিত্তং উপ্পজ্জি. তেন ৰুত্তং –

১৩০.

‘‘তে মে সাধূতি ৰত্ৰান, যথাসত্তি যথাবলং;

দানানি পটিযাদেত্ৰা, দক্খিণেয্যং গৰেসিসু’’ন্তি.

বোধিসত্তো পন ‘‘ৰেলাযমেৰ নিক্খমিত্ৰা দব্বাদিতিণানি খাদিস্সামী’’তি অত্তনো ৰসনগুম্বেযেৰ নিসিন্নো চিন্তেসি – ‘‘মম সন্তিকং আগতানং যাচকানং তিণানি খাদিতুং ন সক্কা, তিলতণ্ডুলাদযোপি ময্হং নত্থি, সচে মে সন্তিকং যাচকো আগমিস্সতি, অহং তিণেন যাপেমি, অত্তনো সরীরমংসং দস্সামী’’তি. তেনাহ ভগৰা –

১৩১.

‘‘অহং নিসজ্জ চিন্তেসিং, দানং দক্খিণনুচ্ছৰং;

যদিহং লভে দক্খিণেয্যং, কিং মে দানং ভৰিস্সতি.

১৩২.

‘‘ন মে অত্থি তিলা মুগ্গা, মাসা ৰা তণ্ডুলা ঘতং;

অহং তিণেন যাপেমি, ন সক্কা তিণ দাতৰে.

১৩৩.

‘‘যদি কোচি এতি দক্খিণেয্যো, ভিক্খায মম সন্তিকে;

দজ্জাহং সকমত্তানং, ন সো তুচ্ছো গমিস্সতী’’তি.

তত্থ দানং দক্খিণনুচ্ছৰন্তি দক্খিণাভাৰেন অনুচ্ছৰিকং দানং দক্খিণেয্যস্স দাতব্বং দেয্যধম্মং চিন্তেসিং. যদিহং লভেতি যদি অহং কিঞ্চি দক্খিণেয্যং অজ্জ লভেয্যং. কিং মে দানং ভৰিস্সতীতি কিং মম দাতব্বং ভৰিস্সতি. ন সক্কা তিণ দাতৰেতি যদি দক্খিণেয্যস্স দাতুং তিলমুগ্গাদিকং ময্হং নত্থি, যং পন মম আহারভূতং, তং ন সক্কা তিণং দক্খিণেয্যস্স দাতুং. দজ্জাহং সকমত্তানন্তি কিং ৰা ময্হং এতায দেয্যধম্মচিন্তায, ননু ইদমেৰ ময্হং অনৰজ্জং অপরাধীনতায সুলভং পরেসঞ্চ পরিভোগারহং সরীরং সচে কোচি দক্খিণেয্যো মম সন্তিকং আগচ্ছতি, তযিদং সকমত্তানং তস্স দজ্জামহং. এৰং সন্তে ন সো তুচ্ছো মম সন্তিকং আগতো অরিত্তহত্থো হুত্ৰা গমিস্সতীতি.

এৰং মহাপুরিসস্স যথাভূতসভাৰং পরিৰিতক্কেন্তস্স পরিৰিতক্কানুভাৰেন সক্কস্স পণ্ডুকম্বলসিলাসনং উণ্হাকারং দস্সেসি. সো আৰজ্জেন্তো ইমং কারণং দিস্ৰা ‘‘সসরাজং ৰীমংসিস্সামী’’তি পঠমং উদ্দস্স ৰসনট্ঠানং গন্ত্ৰা ব্রাহ্মণৰেসেন অট্ঠাসি. তেন ‘‘কিমত্থং, ব্রাহ্মণ, ঠিতোসী’’তি চ ৰুত্তে সচে কঞ্চি আহারং লভেয্যং, উপোসথিকো হুত্ৰা সমণধম্মং করেয্যন্তি. সো ‘‘সাধূতি তে আহারং দস্সামী’’তি আহ. তেন ৰুত্তং –

‘‘সত্ত মে রোহিতা মচ্ছা, উদকা থলমুব্ভতা;

ইদং ব্রাহ্মণ মে অত্থি, এতং ভুত্ৰা ৰনে ৰসা’’তি. (জা. ১.৪.৬১);

ব্রাহ্মণো ‘‘পগেৰ তাৰ হোতু, পচ্ছা জানিস্সামী’’তি তথেৰ সিঙ্গালস্স মক্কটস্স চ সন্তিকং গন্ত্ৰা তেহিপি অত্তনো ৰিজ্জমানেহি দেয্যধম্মেহি নিমন্তিতো ‘‘পগেৰ তাৰ হোতু, পচ্ছা জানিস্সামী’’তি আহ. তেন ৰুত্তং –

‘‘দুস্স মে খেত্তপালস্স, রত্তিভত্তং অপাভতং;

মংসসূলা চ দ্ৰে গোধা, একঞ্চ দধিৰারকং;

ইদং ব্রাহ্মণ মে অত্থি, এতং ভুত্ৰা ৰনে ৰসা’’তি.

‘‘অম্বপক্কং দকং সীতং, সীতচ্ছাযা মনোরমা;

ইদং ব্রাহ্মণ মে অত্থি, এতং ভুত্ৰা ৰনে ৰসা’’তি. (জা. ১.৪.৬২-৬৩);

তত্থ দুস্সাতি অমুস্স. রত্তিভত্তং অপাভতন্তি রত্তিভোজনতো অপনীতং. মংসসূলা চ দ্ৰে গোধাতি অঙ্গারপক্কানি দ্ৰে মংসসূলানি একা চ গোধা. দধিৰারকন্তি দধিৰারকো.

১৩৪. অথ ব্রাহ্মণো সসপণ্ডিতস্স সন্তিকং গতো. তেনাপি ‘‘কিমত্থমাগতোসী’’তি ৰুত্তে তথেৰাহ. তেন ৰুত্তং ‘‘মম সঙ্কপ্পমঞ্ঞাযা’’তিআদি.

তত্থ মম সঙ্কপ্পমঞ্ঞাযাতি পুব্বে ৰুত্তপ্পকারং পরিৰিতক্কং জানিত্ৰা. ব্রাহ্মণৰণ্ণিনাতি ব্রাহ্মণরূপৰতা অত্তভাৰেন. আসযন্তি ৰসনগুম্বং.

১৩৫-৭. সন্তুট্ঠোতি সমং সব্বভাগেনেৰ তুট্ঠো. ঘাসহেতূতি আহারহেতু. অদিন্নপুব্বন্তি যেহি কেহিচি অবোধিসত্তেহি অদিন্নপুব্বং. দানৰরন্তি উত্তমদানং. ‘‘অজ্জ দস্সামি তে অহ’’ন্তি ৰত্ৰা তুৰং সীলগুণূপেতো, অযুত্তং তে পরহেঠনন্তি তং পাণাতিপাততো অপনেত্ৰা ইদানি তস্স পরিভোগযোগ্গং অত্তানং কত্ৰা দাতুং ‘‘এহি অগ্গিং পদীপেহী’’তিআদিমাহ.

তত্থ অহং পচিস্সমত্তানন্তি তযা কতে অঙ্গারগব্ভে অহমেৰ পতিত্ৰা অত্তানং পচিস্সং. পক্কং ত্ৰং ভক্খযিস্সসীতি তথা পন পক্কং ত্ৰং খাদিস্সসি.

১৩৮-৯. নানাকট্ঠে সমানযীতি সো ব্রাহ্মণৰেসধারী সক্কো নানাদারূনি সমানেন্তো ৰিয অহোসি. মহন্তং অকাসি চিতকং, কত্ৰা অঙ্গারগব্ভকন্তি ৰীতচ্চিকং ৰিগতধূমং অঙ্গারভরিতব্ভন্তরং সমন্ততো জলমানং মম সরীরস্স নিমুজ্জনপ্পহোনকং তঙ্খণঞ্ঞেৰ মহন্তং চিতকং অকাসি, সহসা ইদ্ধিযা অভিনিম্মিনীতি অধিপ্পাযো. তেনাহ ‘‘অগ্গিং তত্থ পদীপেসি, যথা সো খিপ্পং মহাভৰে’’তি.

তত্থ সোতি সো অগ্গিক্খন্ধো সীঘং মহন্তো যথা ভৰেয্য, তথা পদীপেসি. ফোটেত্ৰা রজগতে গত্তেতি ‘‘সচে লোমন্তরেসু পাণকা অত্থি, তে মা মরিংসূ’’তি পংসুগতে মম গত্তে তিক্খত্তুং ৰিধুনিত্ৰা. একমন্তং উপাৰিসিন্তি ন তাৰ কট্ঠানি আদিত্তানীতি তেসং আদীপনং উদিক্খন্তো থোকং একমন্তং নিসীদিং.

১৪০. যদা মহাকট্ঠপুঞ্জো, আদিত্তো ধমধমাযতীতি যদা পন সো দারুরাসি সমন্ততো আদিত্তো ৰাযুৰেগসমুদ্ধটানং জালসিখানং ৰসেন ‘‘ধমধমা’’তি এৰং করোতি. তদুপ্পতিত্ৰা পততি, মজ্ঝে জালসিখন্তরেতি তদা তস্মিং কালে ‘‘মম সরীরস্স ঝাপনসমত্থো অযং অঙ্গাররাসী’’তি চিন্তেত্ৰা উপ্পতিত্ৰা উল্লঙ্ঘিত্ৰা জালসিখানং অব্ভন্তরভূতে তস্স অঙ্গাররাসিস্স মজ্ঝে পদুমপুঞ্জে রাজহংসো ৰিয পমুদিতচিত্তো সকলসরীরং দানমুখে দত্ৰা পততি.

১৪১-২. পৰিট্ঠং যস্স কস্সচীতি যথা ঘম্মকালে সীতলং উদকং যেন কেনচি পৰিট্ঠং তস্স দরথপরিল়াহং ৰূপসমেতি, অস্সাদং পীতিঞ্চ উপ্পাদেতি. তথেৰ জলিতং অগ্গিন্তি এৰং তথা পজ্জলিতং অঙ্গাররাসি তদা মম পৰিট্ঠস্স উসুমমত্তম্পি নাহোসি. অঞ্ঞদত্থু দানপীতিযা সব্বদরথপরিল়াহৰূপসমো এৰ অহোসি. চিরস্সং ৰত মে ছৰিচম্মাদিকো সব্বো সরীরাৰযৰো দানমুখে জুহিতব্বতং উপগতো অভিপত্থিতো মনোরথো মত্থকং পত্তোতি. তেন ৰুত্তং –

১৪৩.

‘‘ছৰিং চম্মং মংসং ন্হারুং, অট্ঠিং হদযবন্ধনং;

কেৰলং সকলং কাযং, ব্রাহ্মণস্স অদাসহ’’ন্তি.

তত্থ হদযবন্ধনন্তি হদযমংসপেসি. তঞ্হি হদযৰত্থুং বন্ধিত্ৰা ৰিয ঠিতত্তা ‘‘হদযবন্ধন’’ন্তি ৰুত্তং. অথ ৰা হদযবন্ধনন্তি হদযঞ্চ বন্ধনঞ্চ, হদযমংসঞ্চেৰ তং বন্ধিত্ৰা ৰিয ঠিতযকনমংসঞ্চাতি অত্থো. কেৰলং সকলং কাযন্তি অনৰসেসং সব্বং সরীরং.

এৰং তস্মিং অগ্গিম্হি অত্তনো সরীরে লোমকূপমত্তম্পি উণ্হং কাতুং অসক্কোন্তো বোধিসত্তোপি হিমগব্ভং পৰিট্ঠো ৰিয হুত্ৰা ব্রাহ্মণরূপধরং সক্কং এৰমাহ – ‘‘ব্রাহ্মণ, তযা কতো অগ্গি অতিসীতলো, কিং নামেত’’ন্তি? পণ্ডিত, নাহং ব্রাহ্মণো, সক্কোহমস্মি, তৰ ৰীমংসনত্থং আগতো এৰমকাসিন্তি. ‘‘সক্ক, ত্ৰং তাৰ তিট্ঠতু, সকলোপি চে লোকো মং দানেন ৰীমংসেয্য, নেৰ মে অদাতুকামতং কথঞ্চিপি উপ্পাদেয্য পস্সেথ ন’’ন্তি বোধিসত্তো সীহনাদং নদি.

অথ নং সক্কো ‘‘সসপণ্ডিত, তৰ গুণা সকলকপ্পম্পি পাকটা হোন্তূ’’তি পব্বতং পীল়েত্ৰা পব্বতরসং আদায চন্দমণ্ডলে সসলক্খণং আলিখিত্ৰা বোধিসত্তং তস্মিং ৰনসণ্ডে তত্থেৰ ৰনগুম্বে তরুণদব্বতিণপীঠে নিপজ্জাপেত্ৰা অত্তনো দেৰলোকমেৰ গতো. তেপি চত্তারো পণ্ডিতা সমগ্গা সম্মোদমানা নিচ্চসীলং উপোসথসীলঞ্চ পূরেত্ৰা যথারহং পুঞ্ঞানি কত্ৰা যথাকম্মং গতা.

তদা উদ্দো আযস্মা আনন্দো অহোসি, সিঙ্গালো মহামোগ্গল্লানো, মক্কটো সারিপুত্তো, সসপণ্ডিতো পন লোকনাথো.

তস্স ইধাপি সীলাদিপারমিযো হেট্ঠা ৰুত্তনযেনেৰ যথারহং নিদ্ধারেতব্বা. তথা সতিপি তিরচ্ছানুপপত্তিযং কুসলাদিধম্মে কুসলাদিতো যথাভূতাৰবোধো, তেসু অণুমত্তম্পি ৰজ্জং ভযতো দিস্ৰা সুট্ঠু অকুসলতো ওরমণং, সম্মদেৰ চ কুসলধম্মেসু অত্তনো পতিট্ঠাপনং, পরেসঞ্চ ‘‘ইমে নাম পাপধম্মা তে এৰং গহিতা এৰং পরামট্ঠা এৰংগতিকা ভৰন্তি এৰংঅভিসম্পরাযা’’তি আদীনৰং দস্সেত্ৰা ততো ৰিরমণে নিযোজনং, ইদং দানং নাম, ইদং সীলং নাম, ইদং উপোসথকম্মং নাম, এত্থ পতিট্ঠিতানং দেৰমনুস্সসম্পত্তিযো হত্থগতা এৰাতিআদিনা পুঞ্ঞকম্মেসু আনিসংসং দস্সেত্ৰা পতিট্ঠাপনং, অত্তনো সরীরজীৰিতনিরপেক্খং, পরেসং সত্তানং অনুগ্গণ্হনং, উল়ারো চ দানজ্ঝাসযোতি এৰমাদযো ইধ বোধিসত্তস্স গুণানুভাৰা ৰিভাৰেতব্বা. তেনেতং ৰুচ্চতি – ‘‘এৰং অচ্ছরিযা হেতে…পে… ধম্মস্স অনুধম্মতো’’তি.

সসপণ্ডিতচরিযাৰণ্ণনা নিট্ঠিতা.

ইদানি ‘‘অকিত্তিব্রাহ্মণো’’তিআদিনা যথাৰুত্তে দসপি চরিযাৰিসেসে উদানেত্ৰা নিগমেতি. তত্থ অহমেৰ তদা আসিং, যো তে দানৰরে অদাতি যো তানি উত্তমদানানি অদাসি, সো অকিত্তিব্রাহণাদিকো অহমেৰ তদা তস্মিং কালে অহোসিং, ন অঞ্ঞোতি. ইতি তেসু অত্তভাৰেসু সতিপি সীলাদিপারমীনং যথারহং পূরিতভাৰে অত্তনো পন তদা দানজ্ঝাসযস্স অতিৰিয উল়ারভাৰং সন্ধায দানপারমিৰসেনেৰ দেসনং আরোপেসি. এতে দানপরিক্খারা, এতে দানস্স পারমীতি যে ইমে অকিত্তিজাতকাদীসু (জা. ১.১৩.৮৩ আদযো) অনেকাকারৰোকারা মযা পৰত্তিতা দেয্যধম্মপরিচ্চাগা মম সরীরাৰযৰপুত্তদারপরিচ্চাগা পরমকোটিকা, কিঞ্চাপি তে করুণূপাযকোসল্লপরিগ্গহিতত্তা সব্বঞ্ঞুতঞ্ঞাণমেৰ উদ্দিস্স পৰত্তিতত্তা দানস্স পরমুক্কংসগমনেন দানপারমী এৰ, তথাপি মম দানস্স পরমত্থপারমিভূতস্স পরিক্খরণতোসন্তানস্স পরিভাৰনাৰসেন অভিসঙ্খরণতো এতে দানপরিক্খারা নাম. যস্স পনেতে পরিক্খারা, তং দস্সেতুং ‘‘জীৰিতং যাচকে দত্ৰা, ইমং পারমি পূরযি’’ন্তি ৰুত্তং. এত্থ হি ঠপেত্ৰা সসপণ্ডিতচরিযং সেসাসু নৰসু চরিযাসু যথারহং দানপারমিদানউপপারমিযো ৰেদিতব্বা, সসপণ্ডিতচরিযে (চরিযা. ১.১২৫ আদযো) পন দানপরমত্থপারমী. তেন ৰুত্তং –

‘‘ভিক্খায উপগতং দিস্ৰা, সকত্তানং পরিচ্চজিং;

দানেন মে সমো নত্থি, এসা মে দানপারমী’’তি. (চরিযা. ১.তস্সুদ্দান);

কিঞ্চাপি হি মহাপুরিসস্স যথাৰুত্তে অকিত্তিব্রাহ্মণাদিকালে অঞ্ঞস্মিঞ্চ মহাজনকমহাসুতসোমাদিকালে দানপারমিযা পূরিতত্তভাৰানং পরিমাণং নাম নত্থি, তথাপি একন্তেনেৰ সসপণ্ডিতকালে দানপারমিযা পরমত্থপারমিভাৰো ৰিভাৰেতব্বোতি.

পরমত্থদীপনিযা চরিযাপিটকসংৰণ্ণনায

দসৰিধচরিযাসঙ্গহস্স ৰিসেসতো

দানপারমিৰিভাৰনস্স

পঠমৰগ্গস্স অত্থৰণ্ণনা নিট্ঠিতা.

২. হত্থিনাগৰগ্গো

১. মাতুপোসকচরিযাৰণ্ণনা

১. দুতিযৰগ্গস্স পঠমে কুঞ্জরোতি হত্থী. মাতুপোসকোতি অন্ধায জরাজিণ্ণায মাতুযা পটিজগ্গনকো. মহিযাতি ভূমিযং. গুণেনাতি সীলগুণেন, তদা মম সদিসো নত্থি.

বোধিসত্তো হি তদা হিমৰন্তপ্পদেসে হত্থিযোনিযং নিব্বত্তি. সো সব্বসেতো অভিরূপো লক্খণসম্পন্নো মহাহত্থী অনেকহত্থিসতসহস্সপরিৰারো অহোসি. মাতা পনস্স অন্ধা. সো মধুরফলাফলানি হত্থীনং হত্থেসু দত্ৰা মাতু পেসেতি. হত্থিনো তস্সা অদত্ৰা সযং খাদন্তি. সো পরিগ্গণ্হন্তো তং পৰত্তিং ঞত্ৰা ‘‘যূথং পহায মাতরমেৰ পোসেস্সামী’’তি রত্তিভাগে অঞ্ঞেসং হত্থীনং অজানন্তানং মাতরং গহেত্ৰা চণ্ডোরণপব্বতপাদং গন্ত্ৰা একং নল়িনিং উপনিস্সায ঠিতায পব্বতগুহায মাতরং ঠপেত্ৰা পোসেসি.

২-৩. পৰনে দিস্ৰা ৰনচরোতি একো ৰনচরকো পুরিসো তস্মিং মহাৰনে ৰিচরন্তো মং দিস্ৰা. রঞ্ঞো মং পটিৰেদযীতি বারাণসিরঞ্ঞো মং আরোচেসি.

সো হি মগ্গমূল়্হো দিসং ৰৰত্থপেতুং অসক্কোন্তো মহন্তেন সদ্দেন পরিদেৰি. বোধিসত্তোপি তস্স সদ্দং সুত্ৰা ‘‘অযং পুরিসো অনাথো, ন খো পনেতং পতিরূপং, যং এস মযি ঠিতে ইধ ৰিনস্সেয্যা’’তি তস্স সন্তিকং গন্ত্ৰা তং ভযেন পলাযন্তং দিস্ৰা ‘‘অম্ভো পুরিস, নত্থি তে মং নিস্সায ভযং, মা পলাযি, কস্মা ত্ৰং পরিদেৰন্তো ৰিচরসী’’তি পুচ্ছিত্ৰা ‘‘সামি, অহং মগ্গমূল়্হো অজ্জ মে সত্তমো দিৰসো’’তি ৰুত্তে ‘‘ভো পুরিস, মা ভাযি, অহং তং মনুস্সপথে ঠপেস্সামী’’তি তং অত্তনো পিট্ঠিযং নিসীদাপেত্ৰা অরঞ্ঞতো নীহরিত্ৰা নিৰত্তি. সোপি পাপো ‘‘নগরং গন্ত্ৰা রঞ্ঞো আরোচেস্সামী’’তি রুক্খসঞ্ঞং পব্বতসঞ্ঞঞ্চ করোন্তোৰ নিক্খমিত্ৰা বারাণসিং অগমাসি. তস্মিং কালে রঞ্ঞো মঙ্গলহত্থী মতো. সো পুরিসো রাজানং উপসঙ্কমিত্ৰা মহাপুরিসস্স অত্তনো দিট্ঠভাৰং আরোচেসি. তেন ৰুত্তং ‘‘তৰানুচ্ছৰো, মহারাজ, গজো ৰসতি কাননে’’তিআদি.

তত্থ তৰানুচ্ছৰোতি তৰ ওপৰয্হং কাতুং অনুচ্ছৰিকো যুত্তো. ন তস্স পরিক্খাযত্থোতি তস্স গহণে গমনুপচ্ছেদনত্থং সমন্ততো খণিতব্বপরিক্খায ৰা করেণুযা কণ্ণপুটেন অত্তানং পটিচ্ছাদেত্ৰা খিত্তপাসরজ্জুযা বন্ধিতব্বআল়কসঙ্খাতআলানেন ৰা যত্থ পৰিট্ঠো কত্থচি গন্তুং ন সক্কোতি, তাদিসৰঞ্চনকাসুযা ৰা অত্থো পযোজনং নত্থি. সহগহিতেতি গহণসমকালং এৰ. এহিতীতি আগমিস্সতি.

রাজা ইমং মগ্গদেসকং কত্ৰা অরঞ্ঞং গন্ত্ৰা ‘‘ইমিনা ৰুত্তং হত্থিনাগং আনেহী’’তি হত্থাচরিযং সহ পরিৰারেন পেসেসি. সো তেন সদ্ধিং গন্ত্ৰা বোধিসত্তং নল়িনিং পৰিসিত্ৰা গোচরং গণ্হন্তং পস্সি. তেন ৰুত্তং –

৪.

‘‘তস্স তং ৰচনং সুত্ৰা, রাজাপি তুট্ঠমানসো;

পেসেসি হত্থিদমকং, ছেকাচরিযং সুসিক্খিতং.

৫.

‘‘গন্ত্ৰা সো হত্থিদমকো, অদ্দস পদুমস্সরে;

ভিসমুল়ালং উদ্ধরন্তং, যাপনত্থায মাতুযা’’তি.

তত্থ ছেকাচরিযন্তি হত্থিবন্ধনাদিৰিধিম্হি কুসলং হত্থাচরিযং. সুসিক্খিতন্তি হত্থীনং সিক্খাপনৰিজ্জায নিট্ঠঙ্গমনেন সুট্ঠু সিক্খিতং.

৬. ৰিঞ্ঞায মে সীলগুণন্তি ‘‘ভদ্দো অযং হত্থাজানীযো ন মন্দো, ন চণ্ডো, ন ৰোমিস্সসীলো ৰা’’তি মম সীলগুণং জানিত্ৰা. কথং? লক্খণং উপধারযীতি সুসিক্খিতহত্থিসিপ্পত্তা মম লক্খণং সমন্ততো উপধারেসি. তেন সো এহি পুত্তাতি ৰত্ৰান, মম সোণ্ডায অগ্গহি.

৭. বোধিসত্তো হত্থাচরিযং দিস্ৰা – ‘‘ইদং ভযং ময্হং এতস্স পুরিসস্স সন্তিকা উপ্পন্নং, অহং খো পন মহাবলো হত্থিসহস্সম্পি ৰিদ্ধংসেতুং সমত্থো, পহোমি কুজ্ঝিত্ৰা সরট্ঠকং সেনাৰাহনং নাসেতুং, সচে পন কুজ্ঝিস্সামি, সীলং মে ভিজ্জিস্সতি, তস্মা সত্তীহি কোট্টিযমানোপি ন কুজ্ঝিস্সামী’’তি চিত্তং অধিট্ঠায সীসং ওনামেত্ৰা নিচ্চলোৰ অট্ঠাসি. তেনাহ ভগৰা ‘‘যং মে তদা পাকতিকং, সরীরানুগতং বল’’ন্তিআদি.

তত্থ পাকতিকন্তি সভাৰসিদ্ধং. সরীরানুগতন্তি সরীরমেৰ অনুগতং কাযবলং, ন উপাযকুসলতাসঙ্খাতঞাণানুগতন্তি অধিপ্পাযো. অজ্জ নাগসহস্সানন্তি অজ্জকালে অনেকেসং হত্থিসহস্সানং সমুদিতানং. বলেন সমসাদিসন্তি তেসং সরীরবলেন সমসমমেৰ হুত্ৰা সদিসং, ন উপমামত্তেন. মঙ্গলহত্থিকুলে হি তদা বোধিসত্তো উপ্পন্নোতি.

৮. যদিহং তেসং পকুপ্পেয্যন্তি মং গহণায উপগতানং তেসং অহং যদি কুজ্ঝেয্যং, তেসং জীৰিতমদ্দনে পটিবলো ভৰেয্যং. ন কেৰলং তেসঞ্ঞেৰ, অথ খো যাৰ রজ্জম্পি মানুসন্তি যতো রজ্জতো তেসং আগতানং মনুস্সানং সব্বম্পি রজ্জং পোথেত্ৰা চুণ্ণৰিচুণ্ণং করেয্যং.

৯. অপি চাহং সীলরক্খাযাতি এৰং সমত্থোপি চ অহং অত্তনি পতিট্ঠিতায সীলরক্খায সীলগুত্তিযা গুত্তো বন্ধো ৰিয. ন করোমি চিত্তে অঞ্ঞথত্তন্তি তস্স সীলস্স অঞ্ঞথত্তভূতং তেসং সত্তানং পোথনাদিৰিধিং ময্হং চিত্তে ন করোমি, তত্থ চিত্তম্পি ন উপ্পাদেমি. পক্খিপন্তং মমাল়কেতি আলানত্থম্ভে পক্খিপন্তং, ‘‘দিস্ৰাপী’’তি ৰচনসেসো. কস্মাতি চে, সীলপারমিপূরিযা ঈদিসেসু ঠানেসু সীলং অখণ্ডেন্তস্স মে নচিরস্সেৰ সীলপারমী পরিপূরেস্সতীতি সীলপারমিপরিপূরণত্থং তস্স অঞ্ঞথত্তং চিত্তে ন করোমীতি যোজনা.

১০. ‘‘যদি তে ম’’ন্তি গাথাযপি সীলরক্খায দল়্হং কত্ৰা সীলস্স অধিট্ঠিতভাৰমেৰ দস্সেতি. তত্থ কোট্টেয্যুন্তি ভিন্দেয্যুং. সীলখণ্ডভযা মমাতি মম সীলস্স খণ্ডনভযেন.

এৰং পন চিন্তেত্ৰা বোধিসত্তে নিচ্চলে ঠিতে হত্থাচরিযো পদুমসরং ওতরিত্ৰা তস্স লক্খণসম্পত্তিং দিস্ৰা ‘‘এহি পুত্তা’’তি রজতদামসদিসায সোণ্ডায গহেত্ৰা সত্তমে দিৰসে বারাণসিং পাপুণি. সো অন্তরামগ্গে ৰত্তমানোৰ রঞ্ঞো সাসনং পেসেসি. রাজা নগরং অলঙ্কারাপেসি. হত্থাচরিযো বোধিসত্তং কতগন্ধপরিভণ্ডং অলঙ্কতপটিযত্তং হত্থিসালং নেত্ৰা ৰিচিত্রসাণিযা পরিক্খিপাপেত্ৰা রঞ্ঞো আরোচেসি. রাজা নানগ্গরসভোজনং আদায গন্ত্ৰা বোধিসত্তস্স দাপেসি. সো ‘‘মাতরং ৰিনা গোচরং ন গণ্হিস্সামী’’তি পিণ্ডং ন গণ্হি. যাচিতোপি অগ্গহেত্ৰা –

‘‘সা নূনসা কপণিকা, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি. –

আহ. তং সুত্ৰা রাজা –

‘‘কা নু তে সা মহানাগ, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি. – পুচ্ছিত্ৰা –

‘‘মাতা মে সা মহারাজ, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি. –

ৰুত্তে অজ্জ সত্তমো দিৰসো ‘‘মাতা মে গোচরং ন লভিত্থা’’তি ৰদতো ইমস্স গোচরং অগণ্হন্তস্স. তস্মা –

‘‘মুঞ্চথেতং মহানাগং, যোযং ভরতি মাতরং;

সমেতু মাতরা নাগো, সহ সব্বেহি ঞাতিভী’’তি. – ৰত্ৰা মুঞ্চাপেসি –

‘‘মুত্তো চ বন্ধনা নাগো, মুত্তদামায কুঞ্জরো;

মুহুত্তং অস্সাসযিত্ৰা, অগমা যেন পব্বতো’’তি.

তত্থ কপণিকাতি ৰরাকা. খাণুং পাদেন ঘট্টেতীতি অন্ধতায পুত্তৰিযোগদুক্খেন চ পরিদেৰমানা তত্থ তত্থ রুক্খকল়িঙ্গরে পাদেন ঘট্টেতি. চণ্ডোরণং পতীতি চণ্ডোরণপব্বতাভিমুখী, তস্মিং পব্বতপাদে পরিব্ভমমানাতি অত্থো. অগমা যেন পব্বতোতি সো হত্থিনাগো বন্ধনা মুত্তো থোকং ৰিস্সমিত্ৰা রঞ্ঞো দসরাজধম্মগাথাহি ধম্মং দেসেত্ৰা ‘‘অপ্পমত্তো হোহি, মহারাজা’’তি ওৰাদং দত্ৰা মহাজনেন গন্ধমালাদীহি পূজিযমানো নগরা নিক্খমিত্ৰা তদহেৰ মাতরা সমাগন্ত্ৰা সব্বং পৰত্তিং আচিক্খি. সা তুট্ঠমানসা –

‘‘চিরং জীৰতু সো রাজা, কাসীনং রট্ঠৰড্ঢনো;

যো মে পুত্তং পমোচেসি, সদা ৰুদ্ধাপচাযিক’’ন্তি. (জা. ১.১১.১২) –

রঞ্ঞো অনুমোদনং অকাসি. রাজা বোধিসত্তস্স গুণে পসীদিত্ৰা নল়িনিযা অৰিদূরে গামং মাপেত্ৰা বোধিসত্তস্স মাতু চস্স নিবদ্ধং ৰত্তং পট্ঠপেসি. অপরভাগে বোধিসত্তো মাতরি মতায তস্সা সরীরপরিহারং কত্ৰা কুরণ্ডকঅস্সমপদং নাম গতো. তস্মিং পন ঠানে হিমৰন্ততো ওতরিত্ৰা পঞ্চসতা ইসযো ৰসিংসু. তং ৰত্তং তেসং দত্ৰা রাজা বোধিসত্তস্স সমানরূপং সিলাপটিমং কারেত্ৰা মহাসক্কারং পৰত্তেসি. জম্বুদীপৰাসিনো অনুসংৰচ্ছরং সন্নিপতিত্ৰা হত্থিমহং নাম করিংসু.

তদা রাজা আনন্দো অহোসি, হত্থিনী মহামাযা, ৰনচরকো দেৰদত্তো, মাতুপোসকহত্থিনাগো লোকনাথো.

ইধাপি দানপারমিআদযো যথারহং নিদ্ধারেতব্বা. সীলপারমী পন অতিসযৰতীতি সা এৰ দেসনং আরুল়্হা. তথা তিরচ্ছানযোনিযং উপ্পন্নোপি ব্রহ্মপুব্বদেৰপুব্বাচরিযআহুনেয্যাদিভাৰেন সব্বঞ্ঞুবুদ্ধেনপি পসত্থভাৰানুরূপং মাতুযা গরুচিত্তং উপট্ঠপেত্ৰা ‘‘মাতা নামেসা পুত্তস্স বহূপকারা, তস্মা মাতুপট্ঠানং নাম পণ্ডিতেন পঞ্ঞত্ত’’ন্তি মনসি কত্ৰা অনেকেসং হত্থিসহস্সানং ইস্সরাধিপতি মহানুভাৰো যূথপতি হুত্ৰা তেহি অনুৰত্তিযমানো এককৰিহারে অন্তরাযং অগণেত্ৰা যূথং পহায এককো হুত্ৰা উপকারিখেত্তং পূজেস্সামীতি মাতুপোসনং, মগ্গমূল়্হপুরিসং দিস্ৰা অনুকম্পায তং গহেত্ৰা মনুস্সগোচরসম্পাপনং, তেন চ কতাপরাধসহনং, হত্থাচরিযপ্পমুখানং অত্তানং বন্ধিতুং আগতপুরিসানং সমত্থোপি সমানো সন্তাসনমত্তেনপি তেসং পীল়না ভৰিস্সতি, ময্হঞ্চ সীলস্স খণ্ডাদিভাৰোতি তথা অকত্ৰা সুদন্তেন ওপৰয্হো ৰিয সুখেনেৰ গহণূপগমনং, মাতরং ৰিনা ন কঞ্চি অজ্ঝোহরিস্সামীতি সত্তাহম্পি অনাহারতা, ইমিনাপাহং বন্ধাপিতোতি চিত্তং অনুপ্পাদেত্ৰা রাজানং মেত্তায ফরণং, তস্স চ নানানযেহি ধম্মদেসনাতি এৰমাদযো ইধ মহাপুরিসস্স গুণানুভাৰা ৰিভাৰেতব্বা. তেন ৰুত্তং – ‘‘এৰং অচ্ছরিযা এতে, অব্ভুতা চ মহেসিনো…পে… ধম্মস্স অনুধম্মতো’’তি.

মাতুপোসকচরিযাৰণ্ণনা নিট্ঠিতা.

২. ভূরিদত্তচরিযাৰণ্ণনা

১১. দুতিযে ভূরিদত্তোতি ভূরিসমদত্তো. দত্তোতি হি তদা বোধিসত্তস্স মাতাপিতূহি কতং নামং. যস্মা পনেসো নাগভৰনে ৰিরূপক্খমহারাজভৰনে তাৰতিংসভৰনে চ উপ্পন্নে পঞ্হে সম্মদেৰ ৰিনিচ্ছিনাতি, একদিৰসঞ্চ ৰিরূপক্খমহারাজে নাগপরিসায সদ্ধিং তিদসপুরং গন্ত্ৰা সক্কং পরিৰারেত্ৰা নিসিন্নে দেৰানমন্তরে পঞ্হো সমুট্ঠাসি. তং কোচি কথেতুং নাসক্খি. সক্কেন পন অনুঞ্ঞাতো পল্লঙ্কৰরগতো হুত্ৰা মহাসত্তোৰ কথেসি. অথ নং দেৰরাজা দিব্বগন্ধপুপ্ফেহি পূজেত্ৰা ‘‘দত্ত, ত্ৰং পথৰিসমায ৰিপুলায পঞ্ঞায সমন্নাগতো ইতো পট্ঠায ভূরিদত্তো নামা’’তি আহ. ভূরীতি হি পথৰিযা নামং, তস্মা ভূরিসমতায ভূতে অত্থে রমতীতি চ ভূরিসঙ্খাতায মহতিযা পঞ্ঞায সমন্নাগতত্তা মহাসত্তো ‘‘ভূরিদত্তো’’তি পঞ্ঞাযিত্থ. মহতিযা পন নাগিদ্ধিযা সমন্নাগতত্তা মহিদ্ধিকো চাতি.

অতীতে হি ইমস্মিংযেৰ কপ্পে বারাণসিরঞ্ঞো পুত্তো পিতরা রট্ঠতো পব্বাজিতো ৰনে ৰসন্তো অঞ্ঞতরায নাগমাণৰিকায সংৰাসং কপ্পেসি. তেসং সংৰাসমন্ৰায দ্ৰে দারকা জাযিংসু – পুত্তো চ ধীতা চ. পুত্তস্স ‘‘সাগরব্রহ্মদত্তো’’তি নামং করিংসু ধীতায ‘‘সমুদ্দজা’’তি. সো অপরভাগে পিতু অচ্চযেন বারাণসিং গন্ত্ৰা রজ্জং কারেসি. অথ ধতরট্ঠো নাম নাগরাজা পঞ্চযোজনসতিকে নাগভৰনে নাগরজ্জং কারেন্তো তং অভূতৰাদিকেন চিত্তচূল়েন নাম কচ্ছপেন ‘‘বারাণসিরাজা অত্তনো ধীতরং তুয্হং দাতুকামো, সা খো পন রাজধীতা সমুদ্দজা নাম অভিরূপা দস্সনীযা পাসাদিকা চা’’তি কথিতং সুত্ৰা ধতরট্ঠো চত্তারো নাগমাণৰকে পেসেত্ৰা তং দাতুং অনিচ্ছন্তং নাগৰিভিংসিকায ভিংসাপেত্ৰা ‘‘দম্মী’’তি ৰুত্তে মহন্তং পণ্ণাকারং পেসেত্ৰা মহতিযা নাগিদ্ধিযা মহন্তেন পরিৰারেন তস্স ধীতরং নাগভৰনং নেত্ৰা অগ্গমহেসিট্ঠানে ঠপেসি.

সা অপরভাগে ধতরট্ঠং পটিচ্চ সুদস্সনো, দত্তো, সুভোগো, অরিট্ঠোতি চত্তারো পুত্তে পটিলভি. তেসু দত্তো বোধিসত্তো, সো পুব্বে ৰুত্তনযেনেৰ সক্কেন তুট্ঠচিত্তেন ‘‘ভূরিদত্তো’’তি গহিতনামত্তা ‘‘ভূরিদত্তো’’ত্ৰেৰ পঞ্ঞাযিত্থ. অথ নেসং পিতা যোজনসতিকং যোজনসতিকং রজ্জং ভাজেত্ৰা অদাসি. মহন্তো যসো অহোসি. সোল়সসোল়সনাগকঞ্ঞাসহস্সানি পরিৰারযিংসু. পিতুপি একযোজনসতমেৰ রজ্জং অহোসি. তযো পুত্তা মাসে মাসে মাতাপিতরো পস্সিতুং আগচ্ছন্তি, বোধিসত্তো পন অন্ৰদ্ধমাসং আগচ্ছতি.

সো একদিৰসং ৰিরূপক্খমহারাজেন সদ্ধিং সক্কস্স উপট্ঠানং গতো ৰেজযন্তপাসাদং সুধম্মদেৰসভং পারিচ্ছত্তককোৰিল়ারং পণ্ডুকম্বলসিলাসনং দেৰচ্ছরাপরিৰারং অতিমনোহরং সক্কসম্পত্তিং দিস্ৰা ‘‘এত্তকমত্তম্পি নাগত্তভাৰে ঠিতস্স দুল্লভং, কুতো সম্মাসম্বোধী’’তি নাগত্তভাৰং জিগুচ্ছিত্ৰা ‘‘নাগভৰনং গন্ত্ৰা উপোসথৰাসং ৰসিত্ৰা সীলমেৰ পগ্গণ্হিস্সামি, তং বোধিপরিপাচনং হোতি, ইমস্মিং দেৰলোকে উপ্পত্তিকারণং ভৰিস্সতী’’তি চিন্তেত্ৰা নাগভৰনং গন্ত্ৰা মাতাপিতরো আহ – ‘‘অম্মতাতা, অহং উপোসথকম্মং করিস্সামী’’তি. তেহি ‘‘ইধেৰ উপোসথং উপৰসাহি, বহিগতানং নাগানং মহন্তং ভয’’ন্তি ৰুত্তে একৰারং তথা কত্ৰা নাগকঞ্ঞাহি উপদ্দুতো পুনৰারে মাতাপিতূনং অনারোচেত্ৰা অত্তনো ভরিযং আমন্তেত্ৰা ‘‘ভদ্দে, অহং মনুস্সলোকং গন্ত্ৰা যমুনাতীরে মহানিগ্রোধরুক্খো অত্থি তস্স অৰিদূরে ৰম্মিকমত্থকে ভোগে আভুজিত্ৰা চতুরঙ্গসমন্নাগতং উপোসথং অধিট্ঠায নিপজ্জিত্ৰা ‘‘উপোসথকম্মং করিস্সামী’’তি নাগভৰনতো নিক্খমিত্ৰা তথা করোতি. তেন ৰুত্তং ‘‘ৰিরূপক্খেন মহারঞ্ঞা, দেৰলোকমগঞ্ছহ’’ন্তিআদি.

তত্থ ৰিরূপক্খেন মহারঞ্ঞাতি ৰিরূপক্খেন নাম নাগাধিপতিমহারাজেন. দেৰলোকন্তি তাৰতিংসদেৰলোকং. অগঞ্ছহন্তি অগঞ্ছিং, উপসঙ্কমিং অহং.

১২. তত্থাতি তস্মিং দেৰলোকে. পস্সিং ত্ৰাহন্তি অদ্দক্খিং অহং তু-সদ্দো নিপাতমত্তো. একন্তং সুখসমপ্পিতেতি একন্তং অচ্চন্তমেৰ সুখেন সমঙ্গীভূতে. ৰুত্তঞ্হেতং ভগৰতা – ‘‘সন্তি, ভিক্খৰে, ছ ফস্সাযতনিকা নাম সগ্গা. যাৰঞ্চিদং, ভিক্খৰে, ন সুকরং অক্খানেন পাপুণিতুং যাৰ সুখা সগ্গা’’তি (ম. নি. ৩.২৫৫) চ. তংসগ্গগমনত্থাযাতি তস্মিং সগ্গস্মিং উপ্পত্তিৰসেন গমনত্থায. সীলব্বতন্তি সীলসঙ্খাতং ৰতং. অথ ৰা সীলব্বতন্তি উপোসথসীলঞ্চেৰ ‘‘মম চম্মং চম্মত্থিকা হরন্তূ’’তিআদিনা অত্তনো সরীরাৰযৰপরিচ্চাগসমাদিযনসঙ্খাতং ৰতঞ্চ.

১৩. সরীরকিচ্চন্তি মুখধোৰনাদিসরীরপটিজগ্গনং. ভুত্ৰা যাপনমত্তকন্তি ইন্দ্রিযানি নিব্বিসেৰনানি কাতুং সরীরট্ঠিতিমত্তকং আহারং আহরিত্ৰা. চতুরো অঙ্গেতি চত্তারি অঙ্গানি. অধিট্ঠাযাতি অধিট্ঠহিত্ৰা. সেমীতি সযামি.

১৪. ছৰিযাতিআদি তেসং চতুন্নং অঙ্গানং দস্সনং. তত্থ চ ছৰিচম্মানং ৰিস্সজ্জনং একং অঙ্গং, সেসানি একেকমেৰ, মংসগ্গহণেনেৰ চেত্থ রুধিরম্পি সঙ্গহিতন্তি দট্ঠব্বং. এতেনাতি এতেহি. হরাতু সোতি যস্স এতেহি ছৰিআদীহি করণীযং অত্থি, তস্স মযা দিন্নমেৰেতং. সব্বং সো হরতূতি অত্তনো অত্তভাৰে অনপেক্খপৰারণং পৰারেতি.

এৰং মহাসত্তস্স ইমিনা নিযামেনেৰ অন্ৰদ্ধমাসং উপোসথকম্মং করোন্তস্স দীঘো অদ্ধা ৰীতিৰত্তো. এৰং গচ্ছন্তে কালে একদিৰসং অঞ্ঞতরো নেসাদব্রাহ্মণো সোমদত্তেন নাম অত্তনো পুত্তেন সহ তং ঠানং পত্ৰা অরুণুগ্গমনসমযে নাগকঞ্ঞাহি পরিৰারিযমানং মহাসত্তং দিস্ৰা তস্স সন্তিকং অগমাসি. তাৰদেৰ নাগকঞ্ঞাযো পথৰিযং নিমুজ্জিত্ৰা নাগভৰনমেৰ গতা. ব্রাহ্মণো মহাসত্তং পুচ্ছি – ‘‘কো নু খো ত্ৰং, মারিস, দেৰো ৰা যক্খো ৰা নাগো ৰা’’তি? বোধিসত্তো যথাভূতং অত্তানং আৰি কত্ৰা সচাযং ইতো গচ্ছেয্য, ইধ মে ৰাসং মহাজনস্স পাকটং করেয্য, তেন মে উপোসথৰাসস্স অন্তরাযোপি সিযা. যংনূনাহং ইতো ইমং নাগভৰনং নেত্ৰা মহতিযা সম্পত্তিযা যোজেয্যং. এৰাযং তত্থেৰ অভিরমিস্সতি, তেন মে উপোসথকম্মং অদ্ধনিযং সিযাতি. অথ নং আহ – ‘‘ব্রাহ্মণ, মহন্তং তে যসং দস্সামি, রমণীযং নাগভৰনং, এহি তত্থ গচ্ছামা’’তি. সামি, পুত্তো মে অত্থি, তস্মিং আগচ্ছন্তে আগমিস্সামীতি. গচ্ছ, ব্রাহ্মণ, পুত্তং আনেহীতি. ব্রাহ্মণো গন্ত্ৰা পুত্তস্স তমত্থং আরোচেত্ৰা তং আনেসি. মহাসত্তো তে উভোপি আদায অত্তনো আনুভাৰেন নাগভৰনং আনেসি. তেসং তত্থ দিব্বো অত্তভাৰো পাতুভৰি. অথ তেসং মহাসত্তো দিব্বসম্পত্তিং দত্ৰা চত্তারি চত্তারি নাগকঞ্ঞাসতানি অদাসি. তে মহতিং সম্পত্তিং অনুভৰিংসু.

বোধিসত্তোপি অপ্পমত্তো উপোসথকম্মং করোতি. অন্ৰদ্ধমাসং মাতাপিতূনং উপট্ঠানং গন্ত্ৰা ধম্মকথং কথেত্ৰা ততো চ ব্রাহ্মণস্স সন্তিকং গন্ত্ৰা আরোগ্যং পুচ্ছিত্ৰা ‘‘যেন তে অত্থো, তং ৰদেয্যাসী’’তি আপুচ্ছিত্ৰা ‘‘অনুক্কণ্ঠমানো অভিরমা’’তি ৰত্ৰা সোমদত্তেনপি সদ্ধিং পটিসন্থারং কত্ৰা অত্তনো নিৰেসনং গচ্ছতি. ব্রাহ্মণো সংৰচ্ছরং তত্থ ৰসিত্ৰা মন্দপুঞ্ঞতায উক্কণ্ঠিত্ৰা অনিচ্ছমানম্পি পুত্তং গহেত্ৰা বোধিসত্তং আপুচ্ছিত্ৰা তেন দীযমানং বহুং ধনং সব্বকামদদং মণিরতনম্পি অলক্খিকতায অগ্গহেত্ৰা ‘‘মনুস্সলোকং গন্ত্ৰা পব্বজিস্সামী’’তি আহ. মহাসত্তো নাগমাণৰকে আণাপেত্ৰা তং সপুত্তকং মনুস্সলোকং পাপেসি. তে উভোপি দিব্বাভরণানি দিব্বৰত্থানি চ ওমুঞ্চিত্ৰা ন্হাযিতুং একং পোক্খরণিং ওতরিংসু, তস্মিং খণে তানি অন্তরধাযিত্ৰা নাগভৰনমেৰ অগমংসু. অথ পঠমনিৰত্থকাসাৰপিলোতিকাৰ সরীরে পটিমুঞ্চি, ধনুসরসত্তিযো গহেত্ৰা অরঞ্ঞং গন্ত্ৰা মিগে ৰধিত্ৰা পুরিমনিযামেনেৰ জীৰিকং কপ্পেসুং.

তেন চ সমযেন অঞ্ঞতরো তাপসো সুপণ্ণরাজতো লদ্ধং অলম্পাযনমন্তং তস্স অনুচ্ছৰিকানি ওসধানি মন্তূপচারঞ্চ অত্তানং উপট্ঠহন্তস্স অঞ্ঞতরস্স ব্রাহ্মণস্স অদাসি. সো ‘‘লদ্ধো মে জীৰিকূপাযো’’তি কতিপাহং ৰসিত্ৰা তাপসং আপুচ্ছিত্ৰা পক্কমন্তো অনুপুব্বেন যমুনাতীরং পত্ৰা তং মন্তং সজ্ঝাযন্তো মহামগ্গেন গচ্ছতি. তদা বোধিসত্তস্স ভৰনতো তস্স পরিচারিকা নাগমাণৰিকা তং সব্বকামদদং মণিরতনং আদায যমুনাতীরে ৰালুকারাসিমত্থকে ঠপেত্ৰা তস্সোভাসেন রত্তিযং কীল়িত্ৰা অরুণুগ্গমনে তস্স ব্রাহ্মণস্স মন্তসদ্দং সুত্ৰা ‘‘সুপণ্ণো’’তি সঞ্ঞায ভযতজ্জিতা মণিরতনং অগ্গহেত্ৰা পথৰিযং নিমুজ্জিত্ৰা নাগভৰনং অগমংসু.

ব্রাহ্মণো তং মণিরতনং আদায পাযাসি. তস্মিং খণে সো নেসাদব্রাহ্মণো পুত্তেন সদ্ধিং মিগৰধায অরঞ্ঞং গচ্ছন্তো তস্স হত্থে তং মণিরতনং দিস্ৰা ‘‘ইদং ভূরিদত্তস্স সব্বকামদদং মণিরতন’’ন্তি সঞ্জানিত্ৰা তং গণ্হিতুকামো তেন সদ্ধিং অল্লাপসল্লাপং কত্ৰা মন্তৰাদিভাৰং জানিত্ৰা এৰমাহ – ‘‘সচে মে ত্ৰং ইমং মণিরতনং দস্সসি, এৰাহং তে মহানুভাৰং নাগং দস্সেস্সামি, যং ত্ৰং গহেত্ৰা গামনিগমরাজধানিযো চরন্তো বহুধনং লচ্ছসী’’তি. ‘‘তেন হি দস্সেত্ৰা গণ্হাহী’’তি ৰুত্তে তং আদায বোধিসত্তং উপোসথকরণট্ঠানে ৰম্মিকমত্থকে ভোগে আভুজিত্ৰা নিপন্নং অৰিদূরে ঠিতো হত্থং পসারেত্ৰা দস্সেসি.

মহাসত্তো তং নেসাদং দিস্ৰা ‘‘অযং উপোসথস্স মে অন্তরাযং করেয্যাতি নাগভৰনং নেত্ৰা মহাসম্পত্তিযং পতিট্ঠাপিতোপি ন ইচ্ছি. ততো অপক্কমিত্ৰা সযং গন্তুকামো মযা দীযমানম্পি মণিরতনং গণ্হিতুং ন ইচ্ছি. ইদানি পন অহিগুণ্ডিকং গহেত্ৰা আগচ্ছতি. সচাহং ইমস্স মিত্তদুব্ভিনো কুজ্ঝেয্যং, সীলং মে খণ্ডং ভৰিস্সতি. মযা খো পন পঠমংযেৰ চতুরঙ্গসমন্নাগতো উপোসথো অধিট্ঠিতো, সো যথাধিট্ঠিতোৰ হোতু. অলম্পাযনো মং ছিন্দতু ৰা মা ৰা, নেৰস্স কুজ্ঝিস্সামী’’তি চিন্তেত্ৰা অক্খীনি নিম্মীলেত্ৰা অধিট্ঠানপারমিং পুরেচারিকং কত্ৰা ভোগন্তরে সীসং পক্খিপিত্ৰা নিচ্চলোৰ হুত্ৰা নিপজ্জি. নেসাদব্রাহ্মণোপি ‘‘ভো অলম্পাযন, ইমং নাগং গণ্হ, মণিং মে দেহী’’তি আহ. অলম্পাযনো নাগং দিস্ৰা তুট্ঠো মণিং কিস্মিঞ্চি অগণেত্ৰা ‘‘গণ্হ, ব্রাহ্মণা’’তি হত্থে খিপি. সো তস্স হত্থতো ভস্সিত্ৰা পথৰিযং পতিতমত্তোৰ পথৰিং পৰিসিত্ৰা নাগভৰনমেৰ গতো. নেসাদব্রাহ্মণো মণিরতনতো ভূরিদত্তেন সদ্ধিং মিত্তভাৰতো চ পরিহাযিত্ৰা নিপ্পচ্চযোৰ পক্কন্তো.

১৫. অলম্পাযনোপি মহানুভাৰেহি ওসধেহি অত্তনো সরীরং মক্খেত্ৰা থোকং খাদিত্ৰা খেল়ং অত্তনো কাযস্মিং পরিভাৰেত্ৰা দিব্বমন্তং জপ্পন্তো বোধিসত্তং উপসঙ্কমিত্ৰা নঙ্গুট্ঠে গহেত্ৰা আকড্ঢিত্ৰা সীসে দল়্হং গণ্হন্তো মুখমস্স ৰিৰরিত্ৰা ওসধং খাদিত্ৰা মুখে সহখেল়ং ওসিঞ্চি. সুচিজাতিকো মহাসত্তো সীলভেদভযেন অকুজ্ঝিত্ৰা অক্খীনি ন উম্মীলেসি. অথ নং ওসধমন্তবলেন নঙ্গুট্ঠে গহেত্ৰা হেট্ঠা সীসং কত্ৰা সঞ্চালেত্ৰা গহিতগোচরং ছড্ডাপেত্ৰা ভূমিযং দীঘসো নিপজ্জাপেত্ৰা মসূরকং মদ্দন্তো ৰিয হত্থেহি পরিমদ্দি. অট্ঠীনি চুণ্ণিযমানানি ৰিয অহেসুং.

পুন নঙ্গুট্ঠে গহেত্ৰা দুস্সং পোথেন্তো ৰিয পোথেসি. মহাসত্তো এৰরূপং দুক্খং অনুভোন্তোপি নেৰ কুজ্ঝিত্থ. অঞ্ঞদত্থু অত্তনো সীলমেৰ আৰজ্জেসি. ইতি সো মহাসত্তং দুব্বলং কত্ৰা ৰল্লীহি পেল়ং সজ্জেত্ৰা মহাসত্তং তত্থ পক্খিপি. সরীরং পনস্স মহন্তং তত্থ ন পৰিসতি. অথ নং পণ্হিযা কোট্টেন্তো পৰেসেত্ৰা পেল়ং আদায একং গামং গন্ত্ৰা গামমজ্ঝে ওতারেত্ৰা ‘‘নাগস্স নচ্চং দট্ঠুকামা আগচ্ছন্তূ’’তি সদ্দমকাসি. সকলগামৰাসিনো সন্নিপতিংসু. তস্মিং খণে অলম্পাযনো ‘‘নিক্খম মহানাগা’’তি আহ. মহাসত্তো চিন্তেসি – ‘‘অজ্জ মযা পরিসং তোসেন্তেন কীল়িতুং ৰট্টতি, এৰং অলম্পাযনো বহুধনং লভিত্ৰা তুট্ঠো মং ৰিস্সজ্জেস্সতি, যং যং এস মং কারেতি, তং তং করিস্সামী’’তি.

অথ নং সো পেল়তো নিক্খমন্তং ‘‘মহা হোহী’’তি আহ, সো মহা অহোসি. ‘‘খুদ্দকো ৰট্টো ৰিফণো একফণো দ্ৰিফণো যাৰ সহস্সফণো উচ্চো নীচো দিস্সমানকাযো অদিস্সমানকাযো দিস্সমানউপড্ঢকাযো নীলো পীতো লোহিতো ওদাতো মঞ্জিট্ঠো হোহি, ধূমং ৰিস্সজ্জেহি, জালসিখং উদকঞ্চ ৰিস্সজ্জেহী’’তি ৰুত্তে তেন ৰুত্তং তং তং আকারং নিম্মিনিত্ৰা নচ্চং দস্সেসি. তং দিস্ৰা মনুস্সা অচ্ছরিযব্ভুতচিত্তজাতা বহুং হিরঞ্ঞসুৰণ্ণৰত্থালঙ্কারাদিং অদংসু. ইতি তস্মিং গামে সতসহস্সমত্তং লভি. সো কিঞ্চাপি মহাসত্তং গণ্হন্তো ‘‘সহস্সং লভিত্ৰা তং ৰিস্সজ্জেস্সামী’’তি আহ. তং পন ধনং লভিত্ৰা ‘‘গামকেপি তাৰ মযা এত্তকং ধনং লদ্ধং, নগরে কির বহুধনং লভিস্সামী’’তি ধনলোভেন ন মুঞ্চি.

সো তস্মিং গামে কুটুম্বং সণ্ঠপেত্ৰা রতনমযং পেল়ং কারেত্ৰা তত্থ মহাসত্তং পক্খিপিত্ৰা সুখযানকং আরুয্হ মহন্তেন পরিৰারেন গামনিগমরাজধানীসু তং কীল়াপেত্ৰা বারাণসিং পাপুণি, নাগরাজস্স মধুলাজং দেতি, অবদ্ধসত্তুঞ্চ দেতি. সো গোচরং ন গণ্হি অৰিস্সজ্জনভযেন. গোচরং অগণ্হন্তম্পি চ নং চত্তারো নগরদ্ৰারে আদিং কত্ৰা তত্থ তত্থ মাসমত্তং কীল়াপেসি. তেন ৰুত্তং ‘‘সংসিতো অকতঞ্ঞুনা’’তিআদি.

তত্থ সংসিতোতি এসো নাগো অমুকস্স নিগ্রোধরুক্খস্স সমীপে ৰম্মিকমত্থকে সযিতোতি এৰং ঠানং দস্সেত্ৰা কথিতো. অকতঞ্ঞুনাতি অত্তনা কতং উপকারং অজানন্তেন মিত্তদুব্ভিনা নেসাদব্রাহ্মণেনাতি অধিপ্পাযো. অলম্পাযনোতি অলম্পাযনৰিজ্জাপরিজপ্পনেন ‘‘অলম্পাযনো’’তি এৰং লদ্ধনামো অহিতুণ্ডিকব্রাহ্মণো. মমগ্গহীতি মং অগ্গহেসি. কীল়েতি মং তহিং তহিন্তি তত্থ তত্থ গামনিগমরাজধানীসু অত্তনো জীৰিকত্থং মং কীল়াপেতি.

১৭. তিণতোপি লহুকো মমাতি অত্তনো জীৰিতপরিচ্চাগো তিণসলাকপরিচ্চাগতোপি লহুকো হুত্ৰা মম উপট্ঠাতীতি অত্থো. পথৰীউপ্পতনং ৰিযাতি সীলৰীতিক্কমো পন চতুনহুতাধিকদ্ৰিযোজনসতসহস্সবহলায মহাপথৰিযা পরিৰত্তনং ৰিয ততোপি তং ভারিযতরং হুত্ৰা ময্হং উপট্ঠাতীতি দস্সেতি.

১৮. নিরন্তরং জাতিসতন্তি মম জাতীনং অনেকসতম্পি অনেকসতাসুপি জাতীসু নিরন্তরমেৰ সীলস্স অৰীতিক্কমনহেতু. মম জীৰিতং চজেয্যং চজিতুং সক্কোমি. নেৰ সীলং পভিন্দেয্যন্তি সীলং পন সমাদিন্নং একম্পি নেৰ ভিন্দেয্যং ন ৰিনাসেয্যং. চতুদ্দীপান হেতূতি চক্কৰত্তিরজ্জসিরিযাপি কারণাতি দস্সেতি.

১৯. ইদানি যদত্থং অত্তনো জীৰিতম্পি পরিচ্চজিত্ৰা তদা সীলমেৰ রক্খিতং, তায চ সীলরক্খায তথা অনত্থকারকেসু নেসাদঅলম্পাযনব্রাহ্মণেসু চিত্তস্স অঞ্ঞথত্তং ন কতং, তং দস্সেতুং ‘‘অপি চা’’তি ওসানগাথমাহ. তং হেট্ঠা ৰুত্তত্থমেৰ.

এৰং পন মহাসত্তে অহিতুণ্ডিকহত্থগতে তস্স মাতা দুস্সুপিনং দিস্ৰা পুত্তঞ্চ তত্থ অপস্সন্তী সোকাভিভূতা অহোসি. অথস্সা জেট্ঠপুত্তো সুদস্সনো তং পৰত্তিং সুত্ৰা সুভোগং ‘‘হিমৰন্তং গন্ত্ৰা পঞ্চসু মহানদীসু সত্তসু মহাসরেসু ভূরিদত্তং উপধারেত্ৰা এহী’’তি পহিণি. কাণারিট্ঠং ‘‘দেৰলোকং গন্ত্ৰা সচে দেৰতাহি ধম্মং সোতুকামাহি ভূরিদত্তো তত্থ নীতো, ততো নং আনেহী’’তি পহিণি. সযং পন ‘‘মনুস্সলোকে গৰেসিস্সামী’’তি তাপসৰেসেন নাগভৰনতো নিক্খমি. অচ্চিমুখী নামস্স ৰেমাতিকা ভগিনী বোধিসত্তে অধিমত্তসিনেহা তং অনুবন্ধি. তং মণ্ডূকচ্ছাপিং কত্ৰা জটন্তরে পক্খিপিত্ৰা মহাসত্তস্স উপোসথকরণট্ঠানং আদিং কত্ৰা সব্বত্থ গৰেসন্তো অনুক্কমেন বারাণসিং পত্ৰা রাজদ্ৰারং অগমাসি. তদা অলম্পাযনো রাজঙ্গণে মহাজনস্স মজ্ঝে রঞ্ঞো ভূরিদত্তস্স কীল়ং দস্সেতুং পেল়ং ৰিৰরিত্ৰা ‘‘এহি মহানাগা’’তি সঞ্ঞমদাসি.

মহাসত্তো সীসং নীহরিত্ৰা ওলোকেন্তো জেট্ঠভাতিকং দিস্ৰা পেল়তো নিক্খম্ম তদভিমুখো পাযাসি. মহাজনো ভীতো পটিক্কমি. সো গন্ত্ৰা তং অভিৰাদেত্ৰা নিৰত্তিত্ৰা পেল়মেৰ পাৰিসি. অলম্পাযনো ‘‘ইমিনা অযং তাপসো দট্ঠো’’তি সঞ্ঞায ‘‘মা ভাযি, মা ভাযী’’তি আহ. সুদস্সনো ‘‘অযং নাগো ময্হং কিং করিস্সতি, মযা সদিসো অহিতুণ্ডিকো নাম নত্থী’’তি তেন ৰাদপ্পটিৰাদং সমুট্ঠাপেত্ৰা ‘‘ত্ৰং ইমং নাগং গহেত্ৰা গজ্জসি, অহং তং ইমায মণ্ডূকচ্ছাপিযা ইচ্ছন্তো নাসযিস্সামী’’তি ভগিনিং পক্কোসিত্ৰা হত্থং পসারেসি. সা তস্স সদ্দং সুত্ৰা জটন্তরে নিপন্না তিক্খত্তুং মণ্ডূকৰস্সিতং ৰস্সিত্ৰা নিক্খমিত্ৰা অংসকূটে নিসীদিত্ৰা উপ্পতিত্ৰা তস্স হত্থতলে তীণি ৰিসবিন্দূনি পাতেত্ৰা পুন তস্স জটন্তরমেৰ পাৰিসি.

সুদস্সনো ৰিসবিন্দুং দস্সেত্ৰা ‘‘ইদং বিন্দুং সচে পথৰিযং পাতেস্সতি, ওসধিতিণৰনপ্পতযো সব্বে নস্সিস্সন্তি. সচে আকাসে খিপিস্সতি, সত্তৰস্সানি দেৰো ন ৰস্সিস্সতি. সচে উদকে পাতেস্সতি, যাৰতা তত্থ উদকজাতা পাণা সব্বে মরেয্যু’’ন্তি ৰত্ৰা রাজানং সদ্দহাপেতুং তযো আৰাটে খণাপেত্ৰা একং নানাভেসজ্জানং পূরেসি, দুতিযং গোমযস্স, ততিযং দিব্বোসধানঞ্চেৰ পূরেত্ৰা মজ্ঝে আৰাটে ৰিসবিন্দুং পক্খিপি. তঙ্খণঞ্ঞেৰ ধূমাযিত্ৰা জালা উট্ঠহি. সা গন্ত্ৰা গোমযাৰাটং গণ্হি. ততোপি জালা উট্ঠায দিব্বোসধপুণ্ণং গহেত্ৰা দিব্বোসধানি ঝাপেত্ৰা নিব্বাযি. অলম্পাযনং তত্থ আৰাটস্স অৰিদূরে ঠিতং উসুমা ফরিত্ৰা সরীরচ্ছৰিং উপ্পাটেত্ৰা গতা. সেতকুট্ঠী অহোসি. সো ভযতজ্জিতো ‘‘নাগরাজানং ৰিস্সজ্জেমী’’তি তিক্খত্তুং ৰাচং নিচ্ছারেসি. তং সুত্ৰা বোধিসত্তো রতনপেল়ায নিক্খমিত্ৰা সব্বালঙ্কারপটিমণ্ডিতং অত্তভাৰং মাপেত্ৰা দেৰলীল়ায ঠিতো. সুদস্সনো চ অচ্চিমুখী চ তথেৰ অট্ঠংসু.

ততো সুদস্সনো অত্তনো ভাগিনেয্যভাৰং রঞ্ঞো আরোচেসি. তং সুত্ৰা রাজা তে আলিঙ্গিত্ৰা সীসে চুম্বিত্ৰা অন্তেপুরং নেত্ৰা মহন্তং সক্কারসম্মানং কত্ৰা ভূরিদত্তেন সদ্ধিং পটিসন্থারং করোন্তো ‘‘তাত, এৰং মহানুভাৰং তং অলম্পাযনো কথং গণ্হী’’তি পুচ্ছি. সো সব্বং ৰিত্থারেন কথেত্ৰা ‘‘মহারাজ, রঞ্ঞা নাম ইমিনা নিযামেন রজ্জং কারেতুং ৰট্টতী’’তি মাতুলস্স ধম্মং দেসেসি. অথ সুদস্সনো ‘‘মাতুল, মম মাতা ভূরিদত্তং অপস্সন্তী কিলমতি, ন সক্কা অম্হেহি ইধ পপঞ্চং কাতু’’ন্তি মাতুলং আপুচ্ছিত্ৰা ভূরিদত্তঅচ্চিমুখীহি সদ্ধিং নাগভৰনমেৰ গতো.

অথ তত্থ মহাপুরিসো গিলানসেয্যায নিপন্নো গিলানপুচ্ছনত্থং আগতায মহতিযা নাগপরিসায ৰেদে চ যঞ্ঞে চ ব্রাহ্মণে চ সম্ভাৰেত্ৰা কাণারিট্ঠে কথেন্তে তং ৰাদং ভিন্দিত্ৰা নানানযেহি ধম্মং দেসেত্ৰা সীলসম্পদায দিট্ঠিসম্পদায চ পতিট্ঠাপেত্ৰা যাৰজীৰং সীলানি রক্খিত্ৰা উপোসথকম্মং কত্ৰা আযুপরিযোসানে সগ্গপুরং পূরেসি.

তদা মাতাপিতরো মহারাজকুলানি অহেসুং. নেসাদব্রাহ্মণো দেৰদত্তো, সোমদত্তো আনন্দো, অচ্চিমুখী উপ্পলৰণ্ণা, সুদস্সনো সারিপুত্তো, সুভোগো মহামোগ্গল্লানো, কাণারিট্ঠো সুনক্খত্তো, ভূরিদত্তো লোকনাথো.

তস্স ইধাপি সেসপারমিযো হেট্ঠা ৰুত্তনযেনেৰ নিদ্ধারেতব্বা. ইধাপি যোজনসতিকে অত্তনো নাগভৰনট্ঠানে সোল়সহি নাগকঞ্ঞাসহস্সেহি চিত্তরূপং ৰিয পরিচারিযমানো দেৰলোকসম্পত্তিসদিসে নাগলোকিস্সরিযে ঠিতোপি ইস্সরিযমদং অকত্ৰা অন্ৰদ্ধমাসং মাতাপিতুউপট্ঠানং, কুলে জেট্ঠাপচাযনং, সকলায নাগপরিসায চাতুমহারাজিকপরিসায তাৰতিংসপরিসায চ সমুট্ঠিতপঞ্হানং তংতংপরিসমজ্ঝে কুমুদনালকলাপং ৰিয সুনিসিতসত্থেন অত্তনো পঞ্ঞাসত্থেন তাৰদেৰ পচ্ছিন্দিত্ৰা তেসং চিত্তানুকূলধম্মদেসনা, ৰুত্তপ্পকারং ভোগসম্পত্তিং পহায অত্তনো সরীরজীৰিতনিরপেক্খং চতুরঙ্গসমন্নাগতং উপোসথাধিট্ঠানং, তত্থ চ পটিঞ্ঞায ৰিসংৰাদনভযেন অহিতুণ্ডিকহত্থগমনং, তস্মিঞ্চ মুখে ৰিসমিস্সখেল়পাতনং নঙ্গুট্ঠে গহেত্ৰা আৰিঞ্ছনং কড্ঢনং ভূমিযং ঘংসনং মদ্দনং পোথনন্তি এৰমাদিং নানপ্পকারৰিপ্পকারং করোন্তেপি এৰরূপং মহাদুক্খং অনুভৰতোপি কুজ্ঝিত্ৰা ওলোকনমত্তেন তং ছারিকং কাতুং সমত্থস্সাপি সীলপারমিং আৰজ্জিত্ৰা সীলখণ্ডনভযেন ঈসকম্পি চিত্তস্স ৰিকারাভাৰো, ধনং লভাপেমীতি ৰা তস্স চিত্তানুৰত্তনং, সুভোগেন পুনানীতস্স অকতঞ্ঞুনো মিত্তদুব্ভিস্স নেসাদব্রাহ্মণস্স সীলং অনধিট্ঠহিত্ৰাপি অকুজ্ঝনং, কাণারিট্ঠেন কথিতং মিচ্ছাৰাদং ভিন্দিত্ৰা অনেকপরিযাযেন ধম্মং ভাসিত্ৰা নাগপরিসায সীলেসু সম্মাদিট্ঠিযঞ্চ পতিট্ঠাপনন্তি এৰমাদযো বোধিসত্তস্স গুণানুভাৰা ৰিভাৰেতব্বা. তেনেতং ৰুচ্চতি – ‘‘এৰং অচ্ছরিযা হেতে…পে… ধম্মস্স অনুধম্মতো’’তি.

ভূরিদত্তচরিযাৰণ্ণনা নিট্ঠিতা.

৩. চম্পেয্যনাগচরিযাৰণ্ণনা

২০. ততিযে চম্পেয্যকোতি অঙ্গমগধরট্ঠানং অন্তরে চম্পা নাম নদী, তস্সা হেট্ঠা নাগভৰনম্পি অৰিদূরভৰত্তা চম্পা নাম, তত্থ জাতো নাগরাজা চম্পেয্যকো. তদাপি ধম্মিকো আসিন্তি তস্মিং চম্পেয্যনাগরাজকালেপি অহং ধম্মচারী অহোসিং.

বোধিসত্তো হি তদা চম্পানাগভৰনে নিব্বত্তিত্ৰা চম্পেয্যো নাম নাগরাজা অহোসি, মহিদ্ধিকো মহানুভাৰো. সো তত্থ নাগরজ্জং কারেন্তো দেৰরাজভোগসম্পত্তিসদিসইস্সরিযসম্পত্তিং অনুভৰন্তো পারমিপূরণস্স অনোকাসভাৰতো ‘‘কিং মে ইমায তিরচ্ছানযোনিযা, উপোসথৰাসং ৰসিত্ৰা ইতো মুচ্চিত্ৰা সম্মদেৰ পারমিযো পূরেস্সামী’’তি ততো পট্ঠায অত্তনো পাসাদেযেৰ উপোসথকম্মং করোতি. অলঙ্কতনাগমাণৰিকা তস্স সন্তিকং আগচ্ছন্তি. সো ‘‘ইধ মে সীলস্স অন্তরাযো ভৰিস্সতী’’তি পাসাদতো নিক্খমিত্ৰা উয্যানে নিসীদতি. তত্রাপি তা আগচ্ছন্তি. সো চিন্তেসি – ‘‘ইধ মে সীলস্স সংকিলেসো ভৰিস্সতি, ইতো নাগভৰনতো নিক্খমিত্ৰা মনুস্সলোকং গন্ত্ৰা উপোসথৰাসং ৰসিস্সামী’’তি. সো ততো পট্ঠায উপোসথদিৰসেসু নাগভৰনা নিক্খমিত্ৰা একস্স পচ্চন্তগামস্স অৰিদূরে মগ্গসমীপে ৰম্মিকমত্থকে ‘‘মম চম্মাদীহি অত্থিকা চম্মাদীনি গণ্হন্তু, কীল়াসপ্পং ৰা কাতুকামা কীল়াসপ্পং করোন্তূ’’তি সরীরং দানমুখে ৰিস্সজ্জেত্ৰা ভোগে আভুজিত্ৰা নিপন্নো উপোসথৰাসং ৰসতি চাতুদ্দসিযং পঞ্চদসিযঞ্চ, পাটিপদে নাগভৰনং গচ্ছতি. তস্সেৰং উপোসথং করোন্তস্স দীঘো অদ্ধা ৰীতিৰত্তো.

অথ বোধিসত্তো সুমনায নাম অত্তনো অগ্গমহেসিযা ‘‘দেৰ, ত্ৰং মনুস্সলোকং গন্ত্ৰা উপোসথং উপৰসসি, সো চ সাসঙ্কো সপ্পটিভযো’’তি ৰুত্তো মঙ্গলপোক্খরণিতীরে ঠত্ৰা ‘‘সচে মং, ভদ্দে, কোচি পহরিত্ৰা কিলমেস্সতি, ইমিস্সা পোক্খরণিযা উদকং আৰিলং ভৰিস্সতি. সচে সুপণ্ণো গণ্হিস্সতি, উদকং পক্কুথিস্সতি. সচে অহিতুণ্ডিকো গণ্হিস্সতি, উদকং লোহিতৰণ্ণং ভৰিস্সতী’’তি তীণি নিমিত্তানি তস্সা আচিক্খিত্ৰা চাতুদ্দসীউপোসথং অধিট্ঠায নাগভৰনা নিক্খমিত্ৰা তত্থ গন্ত্ৰা ৰম্মিকমত্থকে নিপজ্জি সরীরসোভায ৰম্মিকং সোভযমানো. সরীরঞ্হিস্স রজতদামং ৰিয সেতং অহোসি, মত্থকো রত্তকম্বলগেণ্ডুকো ৰিয, সরীরং নঙ্গলসীসপ্পমাণং ভূরিদত্তকালে (জা. ২.২২.৭৮৪ আদযো) পন ঊরুপ্পমাণং, সঙ্খপালকালে (জা. ২.১৭.১৪৩ আদযো) একদোণিকনাৰপ্পমাণং.

তদা একো বারাণসিমাণৰো তক্কসিলং গন্ত্ৰা অলম্পাযনমন্তং উগ্গণ্হিত্ৰা তেন মগ্গেন অত্তনো গামং গচ্ছন্তো মহাসত্তং দিস্ৰা ‘‘কিং মে তুচ্ছহত্থেন গামং গন্তুং, ইমং নাগং গহেত্ৰা গামনিগমরাজধানীসু কীল়াপেন্তো ধনং উপ্পাদেত্ৰাৰ গমিস্সামী’’তি চিন্তেত্ৰা দিব্বোসধানি গহেত্ৰা দিব্বমন্তং পরিৰত্তেত্ৰা তস্স সন্তিকং অগমাসি. দিব্বমন্তং সুতকালতো পট্ঠায মহাসত্তস্স কণ্ণেসু তত্তসলাকাপৰেসনকালো ৰিয অহোসি, মত্থকে সিখরেন অভিমন্থিযমানো ৰিয. সো ‘‘কো নু খো এসো’’তি ভোগন্তরতো সীসং উক্খিপিত্ৰা ওলোকেন্তো অহিতুণ্ডিকং দিস্ৰা চিন্তেসি – ‘‘মম ৰিসং উগ্গতেজং, সচাহং কুজ্ঝিত্ৰা নাসাৰাতং ৰিস্সজ্জেস্সামি, এতস্স সরীরং ভুসমুট্ঠি ৰিয ৰিপ্পকিরিস্সতি, অথ মে সীলং খণ্ডং ভৰিস্সতি, ন নং ওলোকেস্সামী’’তি. সো অক্খীনি নিম্মীলেত্ৰা সীসং ভোগন্তরে ঠপেসি. অহিতুণ্ডিকব্রাহ্মণো ওসধং খাদিত্ৰা মন্তং পরিৰত্তেত্ৰা খেল়ং মহাসত্তস্স সরীরে ওসিঞ্চি. ওসধানঞ্চ মন্তস্স চ আনুভাৰেন খেল়েন ফুট্ঠফুট্ঠট্ঠানে ফোটানং উট্ঠানকালো ৰিয অহোসি.

অথ সো নঙ্গুট্ঠে গহেত্ৰা আকড্ঢিত্ৰা দীঘসো নিপজ্জাপেত্ৰা অজপদেন দণ্ডেন উপ্পীল়েত্ৰা দুব্বলং কত্ৰা সীসং দল়্হং গহেত্ৰা নিপ্পীল়েসি. মহাসত্তো মুখং ৰিৰরি. অথস্স মুখে খেল়ং ওসিঞ্চিত্ৰা ওসধমন্তবলেন দন্তে ভিন্দি. মুখং লোহিতস্স পূরি. মহাসত্তো অত্তনো সীলভেদভযেন এৰরূপং দুক্খং অধিৰাসেন্তো অক্খীনি উম্মীলেত্ৰা ওলোকনমত্তম্পি নাকাসি. সোপি ‘‘নাগরাজানং দুব্বলং করিস্সামী’’তি নঙ্গুট্ঠতো পট্ঠায অট্ঠীনি সংচুণ্ণযমানো ৰিয সকলসরীরং মদ্দিত্ৰা পট্টকৰেঠনং নাম ৰেঠেসি, তন্তমজ্জিতং নাম মজ্জি, নঙ্গুট্ঠে গহেত্ৰা দুস্সপোথনং নাম পোথেসি. মহাসত্তস্স সকলসরীরং লোহিতমক্খিতং অহোসি, সো মহাৰেদনং অধিৰাসেসি.

অথস্স দুব্বলভাৰং ঞত্ৰা ৰল্লীহি পেল়ং করিত্ৰা তত্থ নং পক্খিপিত্ৰা পচ্চন্তগামং নেত্ৰা মহাজনস্স মজ্ঝে কীল়াপেসি. নীলাদীসু ৰণ্ণেসু ৰট্টচতুরস্সাদীসু সণ্ঠানেসু অণুংথূলাদীসু পমাণেসু যং যং ব্রাহ্মণো ইচ্ছতি, মহাসত্তো তং তদেৰ কত্ৰা নচ্চতি, ফণসতম্পি ফণসহস্সম্পি করোতিযেৰ. মহাজনো পসীদিত্ৰা বহুধনমদাসি. একদিৰসমেৰ কহাপণসহস্সঞ্চেৰ সহস্সগ্ঘনিকে চ পরিক্খারে লভি. ব্রাহ্মণো আদিতোৰ ‘‘সহস্সং লভিত্ৰা ৰিস্সজ্জেস্সামী’’তি চিন্তেসি. তং পন ধনং লভিত্ৰা ‘‘পচ্চন্তগামেযেৰ তাৰ মে এত্তকং ধনং লদ্ধং, রাজরাজমহামত্তানং দস্সিতে কীৰ বহুং ধনং লভিস্সামী’’তি সকটঞ্চ সুখযানকঞ্চ গহেত্ৰা সকটে পরিক্খারে ঠপেত্ৰা সুখযানকে নিসিন্নো ‘‘মহন্তেন পরিৰারেন মহাসত্তং গামনিগমরাজধানীসু কীল়াপেন্তো বারাণসিযং উগ্গসেনরঞ্ঞো সন্তিকে কীল়াপেত্ৰা ৰিস্সজ্জেস্সামী’’তি অগমাসি. সো মণ্ডূকে মারেত্ৰা নাগরঞ্ঞো দেতি. নাগরাজা ‘‘পুনপ্পুনং মং নিস্সায মারেস্সতী’’তি ন খাদতি. অথস্স মধুলাজে অদাসি. তেপি ‘‘সচাহং গোচরং গণ্হিস্সামি, অন্তোপেল়াযমেৰ মরণং ভৰিস্সতী’’তি ন খাদতি.

২১. ব্রাহ্মণো মাসমত্তেন বারাণসিং পত্ৰা দ্ৰারগামকে তং কীল়াপেন্তো বহুধনং লভি. রাজাপি নং পক্কোসাপেত্ৰা ‘‘অম্হাকম্পি কীল়াপেহী’’তি আহ. ‘‘সাধু, দেৰ, স্ৰে পন্নরসে তুম্হাকং কীল়াপেস্সামী’’তি আহ. রাজা ‘‘স্ৰে নাগরাজা রাজঙ্গণে নচ্চিস্সতি, মহাজনো সন্নিপতিত্ৰা পস্সতূ’’তি ভেরিং চরাপেত্ৰা পুনদিৰসে রাজঙ্গণং অলঙ্কারাপেত্ৰা ব্রাহ্মণং পক্কোসাপেসি. সো রতনপেল়ায মহাসত্তং নেত্ৰা ৰিচিত্তত্থরে পেল়ং ঠপেত্ৰা নিসীদি. রাজাপি পাসাদা ওরুয্হ মহাজনপরিৰুতো রাজাসনে নিসীদি. ব্রাহ্মণো মহাসত্তং নীহরিত্ৰা নচ্চাপেসি. মহাসত্তো তেন চিন্তিতচিন্তিতাকারং দস্সেসি. মহাজনো সকভাৰেন সন্ধারেতুং ন সক্কোতি. চেলুক্খেপসহস্সানি পৰত্তন্তি. বোধিসত্তস্স উপরি রতনৰস্সং ৰস্সি. তেন ৰুত্তং ‘‘তদাপি মং ধম্মচারি’’ন্তিআদি.

তত্থ তদাপীতি যদাহং চম্পেয্যকো নাগরাজা হোমি, তদাপি. ধম্মচারিন্তি দসকুসলকম্মপথধম্মং এৰ চরতি, ন অণুমত্তম্পি অধম্মন্তি ধম্মচারী. উপৰুট্ঠউপোসথন্তি অট্ঠঙ্গসমন্নাগতস্স অরিযুপোসথসীলস্স রক্খণৰসেন উপৰসিতউপোসথং. রাজদ্ৰারম্হি কীল়তীতি বারাণসিযং উগ্গসেনরঞ্ঞো গেহদ্ৰারে কীল়াপেতি.

২২. যং যং সো ৰণ্ণং চিন্তযীতি সো অহিতুণ্ডিকব্রাহ্মণো ‘‘যং যং নীলাদিৰণ্ণং হোতূ’’তি চিন্তেসি. তেন ৰুত্তং ‘‘নীলং ৰ পীতলোহিত’’ন্তি. তত্থ নীলং ৰাতি ৰা-সদ্দো অনিযমত্থো, গাথাসুখত্থং রস্সং কত্ৰা ৰুত্তো, তেন ৰাসদ্দেন ৰুত্তাৰসিট্ঠং ওদাতাদিৰণ্ণৰিসেসঞ্চেৰ ৰট্টাদিসণ্ঠানৰিসেসঞ্চ অণুংথূলাদিপমাণৰিসেসঞ্চ সঙ্গণ্হাতি. তস্স চিত্তানুৰত্তন্তোতি তস্স অহিতুণ্ডিকস্স চিত্তং অনুৰত্তন্তো. চিন্তিতসন্নিভোতি তেন চিন্তিতচিন্তিতাকারেন পেক্খজনস্স উপট্ঠহামীতি দস্সেতি.

২৩. ন কেৰলঞ্চ তেন চিন্তিতাকারদস্সনং এৰ ময্হং আনুভাৰো. অপি চ থলং করেয্যমুদকং, উদকম্পি থলং করেতি থলং মহাপথৰিং গহেত্ৰা উদকং, উদকম্পি গহেত্ৰা পথৰিং কাতুং সক্কুণেয্যং এৰং মহানুভাৰো চ. যদিহং তস্স কুপ্পেয্যন্তি তস্স অহিতুণ্ডিকস্স অহং যদি কুজ্ঝেয্যং. খণেন ছারিকং করেতি কোধুপ্পাদক্খণে এৰ ভস্মং করেয্যং.

২৪. এৰং ভগৰা তদা অত্তনো উপ্পজ্জনকানত্থপটিবাহনে সমত্থতং দস্সেত্ৰা ইদানি যেন অধিপ্পাযেন তং পটিবাহনং ন কতং, তং দস্সেতুং ‘‘যদি চিত্তৰসী হেস্স’’ন্তিআদিমাহ.

তস্সত্থো – ‘‘অযং অহিতুণ্ডিকো মং অতিৰিয বাধতি, ন মে আনুভাৰং জানাতি, হন্দস্স মে আনুভাৰং দস্সেস্সামী’’তি কুজ্ঝিত্ৰা ওলোকনমত্তেনাপি যদি চিত্তৰসী অভৰিস্সং, অথ সো ভুসমুট্ঠি ৰিয ৰিপ্পকিরিস্সতি. অহং যথাসমাদিন্নতো পরিহাযিস্সামি সীলতো. তথা চ সতি সীলেন পরিহীনস্স খণ্ডিতসীলস্স য্ৰাযং মযা দীপঙ্করদসবলস্স পাদমূলতো পট্ঠায অভিপত্থিতো, উত্তমত্থো বুদ্ধভাৰো সো ন সিজ্ঝতি.

২৫. কামং ভিজ্জতুযং কাযোতি অযং চাতুমহাভূতিকো ওদনকুম্মাসূপচযো অনিচ্চুচ্ছাদনপরিমদ্দনভেদনৰিদ্ধংসনধম্মো কাযো কিঞ্চাপি ভিজ্জতু ৰিনস্সতু, ইধেৰ ইমস্মিং এৰ ঠানে মহাৰাতে খিত্তভুসমুট্ঠি ৰিয ৰিপ্পকিরীযতু, নেৰ সীলং পভিন্দেয্যং, ৰিকিরন্তে ভুসং ৰিযাতি সীলং পন উত্তমত্থসিদ্ধিযা হেতুভূতং ইমস্মিং কল়েৰরে ভুসমুট্ঠি ৰিয ৰিপ্পকিরন্তেপি নেৰ ভিন্দেয্যং, কাযজীৰিতেসু নিরপেক্খো হুত্ৰা সীলপারমিংযেৰ পূরেমীতি চিন্তেত্ৰা তং তাদিসং দুক্খং তদা অধিৰাসেসিন্তি দস্সেতি.

অথ মহাসত্তস্স পন অহিতুণ্ডিকহত্থগতস্স মাসো পরিপূরি, এত্তকং কালং নিরাহারোৰ অহোসি. সুমনা ‘‘অতিচিরাযতি মে সামিকো, কো নু খো পৰত্তী’’তি পোক্খরণিং ওলোকেন্তী লোহিতৰণ্ণং উদকং দিস্ৰা ‘‘অহিতুণ্ডিকেন গহিতো ভৰিস্সতী’’তি ঞত্ৰা নাগভৰনা নিক্খমিত্ৰা ৰম্মিকসন্তিকং গন্ত্ৰা মহাসত্তস্স গহিতট্ঠানং কিলমিতট্ঠানঞ্চ দিস্ৰা রোদিত্ৰা কন্দিত্ৰা পচ্চন্তগামং গন্ত্ৰা পুচ্ছিত্ৰা তং পৰত্তিং সুত্ৰা বারাণসিং গন্ত্ৰা রাজদ্ৰারে আকাসে রোদমানা অট্ঠাসি. মহাসত্তো নচ্চন্তোৰ আকাসং উল্লোকেন্তো তং দিস্ৰা লজ্জিতো পেল়ং পৰিসিত্ৰা নিপজ্জি.

রাজা তস্স পেল়ং পৰিট্ঠকালে ‘‘কিং নু খো কারণ’’ন্তি ইতো চিতো চ ওলোকেন্তো তং আকাসে ঠিতং দিস্ৰা ‘‘কা নু ত্ৰ’’ন্তি পুচ্ছিত্ৰা তস্সা নাগকঞ্ঞাভাৰং সুত্ৰা ‘‘নিস্সংসযং খো নাগরাজা ইমং দিস্ৰা লজ্জিতো পেল়ং পৰিট্ঠো, অযঞ্চ যথাদস্সিতো ইদ্ধানুভাৰো নাগরাজস্সেৰ, ন অহিতুণ্ডিকস্সা’’তি নিট্ঠং গন্ত্ৰা ‘‘এৰং মহানুভাৰো অযং নাগরাজা, কথং নাম ইমস্স হত্থং গতো’’তি পুচ্ছিত্ৰা ‘‘অযং ধম্মচারী সীলৰা নাগরাজা, চাতুদ্দসীপন্নরসীসু উপোসথং উপৰসন্তো অত্তনো সরীরং দানমুখে নিয্যাতেত্ৰা মহামগ্গসমীপে ৰম্মিকমত্থকে নিপজ্জতি, তত্থাযমেতেন গহিতো, ইমস্স দেৰচ্ছরাপটিভাগা অনেকসহস্সা ইত্থিযো, দেৰলোকসম্পত্তিসদিসা নাগভৰনসম্পত্তি, অযং মহিদ্ধিকো মহানুভাৰো সকলপথৰিং পরিৰত্তেতুং সমত্থো, কেৰলং ‘সীলং মে ভিজ্জিস্সতী’তি এৰরূপং ৰিপ্পকারং দুক্খঞ্চ অনুভোতী’’তি চ সুত্ৰা সংৰেগপ্পত্তো তাৰদেৰ তস্স অহিতুণ্ডিকস্স ব্রাহ্মণস্স বহুং ধনং মহন্তঞ্চ যসং ইস্সরিযঞ্চ দত্ৰা – ‘‘হন্দ, ভো, ইমং নাগরাজানং ৰিস্সজ্জেহী’’তি ৰিস্সজ্জাপেসি.

মহাসত্তো নাগৰণ্ণং অন্তরধাপেত্ৰা মাণৰকৰণ্ণেন দেৰকুমারো ৰিয অট্ঠাসি. সুমনাপি আকাসতো ওতরিত্ৰা তস্স সন্তিকে অট্ঠাসি. নাগরাজা রঞ্ঞো অঞ্জলিং কত্ৰা ‘‘এহি, মহারাজ, ময্হং নিৰেসনং পস্সিতুং আগচ্ছাহী’’তি যাচি. তেনাহ ভগৰা –

‘‘মুত্তো চম্পেয্যকো নাগো, রাজানং এতদব্রৰি;

‘নমো তে কাসিরাজত্থু, নমো তে কাসিৰড্ঢন;

অঞ্জলিং তে পগ্গণ্হামি, পস্সেয্যং মে নিৰেসন’’ন্তি.

অথ রাজা তস্স নাগভৰনগমনং অনুজানি. মহাসত্তো তং সপরিসং গহেত্ৰা নাগভৰনং নেত্ৰা অত্তনো ইস্সরিযসম্পত্তিং দস্সেত্ৰা কতিপাহং তত্থ ৰসাপেত্ৰা ভেরিং চরাপেসি – ‘‘সব্বা রাজপরিসা যাৰদিচ্ছকং হিরঞ্ঞসুৰণ্ণাদিকং ধনং গণ্হতূ’’তি. রঞ্ঞো চ অনেকেহি সকটসতেহি ধনং পেসেসি. ‘‘মহারাজ, রঞ্ঞা নাম দানং দাতব্বং, সীলং রক্খিতব্বং, ধম্মিকা রক্খাৰরণগুত্তি সব্বত্থ সংৰিদহিতব্বা’’তি দসহি রাজধম্মকথাহি ওৰদিত্ৰা ৰিস্সজ্জেসি. রাজা মহন্তেন যসেন নাগভৰনা নিক্খমিত্ৰা বারাণসিমেৰ গতো. ততো পট্ঠায কির জম্বুদীপতলে হিরঞ্ঞসুৰণ্ণং জাতং. মহাসত্তো সীলানি রক্খিত্ৰা অন্ৰদ্ধমাসং উপোসথকম্মং কত্ৰা সপরিসো সগ্গপুরং পূরেসি.

তদা অহিতুণ্ডিকো দেৰদত্তো অহোসি, সুমনা রাহুলমাতা, উগ্গসেনো সারিপুত্তত্থেরো, চম্পেয্যকো নাগরাজা লোকনাথো.

তস্স ইধাপি যথারহং সেসপারমিযো নিদ্ধারেতব্বা. ইধ বোধিসত্তস্স অচ্ছরিযানুভাৰা হেট্ঠা ৰুত্তনযা এৰাতি.

চম্পেয্যনাগচরিযাৰণ্ণনা নিট্ঠিতা.

৪. চূল়বোধিচরিযাৰণ্ণনা

২৬. চতুত্থে চূল়বোধীতি মহাবোধিপরিব্বাজকত্তভাৰং উপাদায ইধ ‘‘চূল়বোধী’’তি সমঞ্ঞা আরোপিতা, ন পন ইমস্মিং এৰ জাতকে (জা. ১.১০.৪৯ আদযো) অত্তনো জেট্ঠভাতিকাদিনো মহাবোধিস্স সম্ভৰতোতি দট্ঠব্বং. সুসীলৰাতি সুট্ঠু সীলৰা, সম্পন্নসীলোতি অত্থো. ভৰং দিস্ৰান ভযতোতি কামাদিভৰং ভাযিতব্বভাৰেন পস্সিত্ৰা. নেক্খম্মন্তি এত্থ চ-সদ্দস্স লোপো দট্ঠব্বো, তেন ‘‘দিস্ৰানা’’তি পদং আকড্ঢীযতি. ইদং ৰুত্তং হোতি – জাতিজরাব্যাধিমরণং অপাযদুক্খং অতীতে ৰট্টমূলকং দুক্খং, অনাগতে ৰট্টমূলকং দুক্খং, পচ্চুপ্পন্নে আহারপরিযেট্ঠিমূলকং দুক্খন্তি ইমেসং অট্ঠন্নং সংৰেগৰত্থূনং পচ্চৰেক্খণেন সব্বম্পি কামাদিভেদং ভৰং সংসারভযতো উপট্ঠহমানং দিস্ৰা নিব্বানং তস্স উপাযভূতা সমথৰিপস্সনা তদুপাযভূতা চ পব্বজ্জাতি ইদং তিৰিধম্পি নেক্খম্মং অনুস্সৰাদিসিদ্ধেন ঞাণচক্খুনা তপ্পটিপক্খতো দিস্ৰা তাপসপব্বজ্জূপগমনেন অনেকাদীনৰাকুলা গহট্ঠভাৰা অভিনিক্খমিত্ৰা গতোতি.

২৭. দুতিযিকাতি পোরাণদুতিযিকা, গিহিকালে পজাপতিভূতা. কনকসন্নিভাতি কঞ্চনসন্নিভত্তচা. ৰট্টে অনপেক্খাতি সংসারে নিরালযা. নেক্খম্মং অভিনিক্খমীতি নেক্খম্মত্থায গেহতো নিক্খমি, পব্বজীতি অত্থো.

২৮. আলযন্তি সত্তা এতেনাতি আলযো, তণ্হা, তদভাৰেন নিরালযা. ততো এৰ ঞাতীসু তণ্হাবন্ধনস্স ছিন্নত্তা ছিন্নবন্ধু. এৰং গিহিবন্ধনাভাৰং দস্সেত্ৰা ইদানি পব্বজিতানম্পি কেসঞ্চি যং হোতি বন্ধনং, তস্সাপি অভাৰং দস্সেতুং ‘‘অনপেক্খা কুলে গণে’’তি ৰুত্তং. তত্থ কুলেতি উপট্ঠাককুলে. গণেতি তাপসগণে, সেসা ব্রহ্মচারিনোতি ৰুচ্চন্তি. উপাগমুন্তি উভোপি মযং উপাগমিম্হা.

২৯. তত্থাতি বারাণসিসামন্তে. নিপকাতি পঞ্ঞৰন্তো. নিরাকুলেতি জনসঞ্চাররহিতত্তা জনেহি অনাকুলে, অপ্পসদ্দেতি মিগপক্খীনং উট্ঠাপনতো তেসং ৰস্সিতসদ্দেনাপি ৰিরহিতত্তা অপ্পসদ্দে. রাজুয্যানে ৰসামুভোতি বারাণসিরঞ্ঞো উয্যানে মযং উভো জনা তদা ৰসাম.

তত্রাযং অনুপুব্বিকথা – অতীতে ইমস্মিং এৰ ভদ্দকপ্পে বোধিসত্তো ব্রহ্মলোকতো চৰিত্ৰা অঞ্ঞতরস্মিং কাসিগামে একস্স মহাৰিভৰস্স ব্রাহ্মণস্স পুত্তো হুত্ৰা নিব্বত্তি. তস্স নামগ্গহণসমযে ‘‘বোধিকুমারো’’তি নামং করিংসু. ৰযপ্পত্তকালে পনস্স তক্কসিলং গন্ত্ৰা সব্বসিপ্পানি উগ্গণ্হিত্ৰা পচ্চাগতস্স অনিচ্ছমানকস্সেৰ মাতাপিতরো সমজাতিকং কুলকুমারিকং আনেসুং. সাপি ব্রহ্মলোকচুতাৰ উত্তমরূপধরা দেৰচ্ছরাপটিভাগা. তেসং অনিচ্ছমানানং এৰ অঞ্ঞমঞ্ঞং আৰাহৰিৰাহং করিংসু. উভিন্নম্পি পন নেসং কিলেসমুদাচারো ন ভূতপুব্বো, সারাগৰসেন অঞ্ঞমঞ্ঞং ওলোকনম্পি নাহোসি, কা পন কথা ইতরসংসগ্গে. এৰং পরিসুদ্ধসীলা অহেসুং.

অপরভাগে মহাসত্তো মাতাপিতূসু কালংকতেসু তেসং সরীরকিচ্চং কত্ৰা তং পক্কোসাপেত্ৰা ‘‘ভদ্দে, ত্ৰং ইমং অসীতিকোটিধনং গহেত্ৰা সুখেন জীৰাহী’’তি আহ. ‘‘ত্ৰং পন অয্যপুত্তা’’তি? ‘‘ময্হং ধনেন কিচ্চং নত্থি, পব্বজিস্সামী’’তি. ‘‘কিং পন পব্বজ্জা ইত্থীনম্পি ন ৰট্টতী’’তি? ‘‘ৰট্টতি, ভদ্দে’’তি. ‘‘তেন হি ময্হম্পি ধনেন কিচ্চং নত্থি, অহম্পি পব্বজিস্সামী’’তি. তে উভোপি সব্বং ৰিভৰং পরিচ্চজিত্ৰা মহাদানং দত্ৰা নিক্খমিত্ৰা অরঞ্ঞং পৰিসিত্ৰা পব্বজিত্ৰা উঞ্ছাচরিযায ফলাফলেহি যাপেন্তা পব্বজ্জাসুখেনেৰ দস সংৰচ্ছরানি ৰসিত্ৰা লোণম্বিলসেৰনত্থায জনপদচারিকং চরন্তা অনুপুব্বেন বারাণসিং পত্ৰা রাজুয্যানে ৰসিংসু. তেন ৰুত্তং ‘‘রাজুয্যানে ৰসামুভো’’তি.

৩০. অথেকদিৰসং রাজা উয্যানকীল়ং গতো. উয্যানস্স একপস্সে পব্বজ্জাসুখেন ৰীতিনামেন্তানং তেসং সমীপট্ঠানং গন্ত্ৰা পরমপাসাদিকং উত্তমরূপধরং পরিব্বাজিকং ওলোকেন্তো কিলেসৰসেন পটিবদ্ধচিত্তো হুত্ৰা বোধিসত্তং ‘‘অযং তে পরিব্বাজিকা কিং হোতী’’তি পুচ্ছি. তেন ‘‘ন চ কিঞ্চি হোতি, কেৰলং একপব্বজ্জায পব্বজিতা, অপি চ খো পন গিহিকালে পাদপরিচারিকা অহোসী’’তি ৰুত্তে রাজা ‘‘অযং কিরেতস্স ন কিঞ্চি হোতি, অপি চ খো পনস্স গিহিকালে পাদপরিচারিকা অহোসি, যংনূনাহং ইমং অন্তেপুরং পৰেসেয্যং, তেনেৰস্স ইমিস্সা পটিপত্তিং জানিস্সামী’’তি অন্ধবালো তত্থ অত্তনো পটিবদ্ধচিত্তং নিৰারেতুং অসক্কোন্তো অঞ্ঞতরং পুরিসং আণাপেসি ‘‘ইমং পরিব্বাজিকং রাজনিৰেসনং নেহী’’তি.

সো তস্স পটিস্সুণিত্ৰা ‘‘অধম্মো লোকে ৰত্ততী’’তিআদীনি ৰত্ৰা পরিদেৰমানং এৰ তং আদায পাযাসি. বোধিসত্তো তস্সা পরিদেৰনসদ্দং সুত্ৰা একৰারং ওলোকেত্ৰা পুন ন ওলোকেসি. ‘‘সচে পনাহং ৰারেস্সামি, তেসু চিত্তং পদোসেত্ৰা ময্হং সীলস্স অন্তরাযো ভৰিস্সতী’’তি সীলপারমিংযেৰ আৰজ্জেন্তো নিসীদি. তেন ৰুত্তং ‘‘উয্যানদস্সনং গন্ত্ৰা, রাজা অদ্দস ব্রাহ্মণি’’ন্তিআদি.

তত্থ তুয্হেসা কা কস্স ভরিযাতি তুয্হং তৰ এসা কা, কিং ভরিযা, উদাহু ভগিনী ৰা সমানা কস্স অঞ্ঞস্স ভরিযা.

৩১. ন ময্হং ভরিযা এসাতি কামঞ্চেসা ময্হং গিহিকালে ভরিযা অহোসি, পব্বজিতকালতো পট্ঠায ন ময্হং ভরিযা এসা, নাপি অহং এতিস্সা সামিকো, কেৰলং পন সহধম্মা একসাসনী, অহম্পি পরিব্বাজকো অযম্পি পরিব্বাজিকাতি সমানধম্মা পরিব্বাজকসাসনেন একসাসনী, সব্রহ্মচারিনীতি অত্থো.

৩২. তিস্সা সারত্তগধিতোতি কামরাগেন সারত্তো হুত্ৰা পটিবদ্ধো. গাহাপেত্ৰান চেটকেতি চেটকেহি গণ্হাপেত্ৰা চেটকে ৰা অত্তনো রাজপুরিসে আণাপেত্ৰা তং পরিব্বাজিকং গণ্হাপেত্ৰা. নিপ্পীল়যন্তো বলসাতি তং অনিচ্ছমানং এৰ আকড্ঢনপরিকড্ঢনাদিনা নিপ্পীল়যন্তো বাধেন্তো, তথাপি অগচ্ছন্তিং বলসা বলক্কারেন রাজপুরিসেহি গণ্হাপেত্ৰা অত্তনো অন্তেপুরং পৰেসেসি.

৩৩. ওদপত্তকিযাতি উদকপত্তং আমসিত্ৰা গহিতভরিযা ওদপত্তিকা নাম, ইদং ৰচনং পুরাণদুতিযিকাভাৰেন উপলক্খণমত্তং দট্ঠব্বং, সা পনস্স ব্রাহ্মণৰিৰাহৰসেন মাতাপিতূহি সম্পটিপাদিতা, ‘‘ওদপত্তকিযা’’তি চ ভাৰেনভাৰলক্খণে ভুম্মং. সহজাতি পব্বজ্জাজাতিৰসেন সহজাতা, তেনেৰাহ ‘‘একসাসনী’’তি. ‘‘একসাসনী’’তি চ ইদং ভুম্মত্থে পচ্চত্তং, একসাসনিযাতি অত্থো. নযন্তিযাতি নীযন্তিযা. কোপো মে উপপজ্জথাতি অযং তে গিহিকালে ভরিযা ব্রাহ্মণী সীলৰতী, পব্বজিতকালে চ সব্রহ্মচারিনীভাৰতো সহজাতা ভগিনী, সা তুয্হং পুরতো বলক্কারেন আকড্ঢিত্ৰা নীযতি. ‘‘বোধিব্রাহ্মণ, কিং তে পুরিসভাৰ’’ন্তি পুরিসমানেন উস্সাহিতো চিরকালসযিতো ৰম্মিকবিলতো কেনচি পুরিসেন ঘট্টিতো ‘‘সুসূ’’তি ফণং করোন্তো আসিৰিসো ৰিয মে চিত্ততো কোপো সহসা ৰুট্ঠাসি.

৩৪-৫. সহকোপে সমুপ্পন্নেতি কোপুপ্পত্তিযা সহ, তস্স উপ্পত্তিসমনন্তরমেৰাতি অত্থো. সীলব্বতমনুস্সরিন্তি অত্তনো সীলপারমিং আৰজ্জেসিং. তত্থেৰ কোপং নিগ্গণ্হিন্তি তস্মিং এৰ আসনে যথানিসিন্নোৰ তং কোপং নিৰারেসিং. নাদাসিং ৰড্ঢিতূপরীতি ততো একৰারুপ্পত্তিতো উপরি উদ্ধং ৰড্ঢিতুং ন অদাসিং. ইদং ৰুত্তং হোতি – কোপে উপ্পন্নমত্তে এৰ ‘‘ননু ত্ৰং, বোধিপরিব্বাজক, সব্বপারমিযো পূরেত্ৰা সব্বঞ্ঞুতঞ্ঞাণং পটিৰিজ্ঝিতুকামো, তস্স তে কিমিদং সীলমত্তেপি উপক্খলনং, তযিদং গুন্নং খুরমত্তোদকে ওসীদন্তস্স মহাসমুদ্দস্স পরতীরং গণ্হিতুকামতা ৰিয হোতী’’তি অত্তানং পরিভাসিত্ৰা পটিসঙ্খানবলেন তস্মিং এৰ খণে কোপং নিগ্গহেত্ৰা পুন উপ্পজ্জনৰসেনস্স ৰড্ঢিতুং ন অদাসিন্তি. তেনেৰাহ ‘‘যদি নং ব্রাহ্মণি’’ন্তিআদি.

তস্সত্থো – তং পরিব্বাজিকং ব্রাহ্মণিং সো রাজা ৰা অঞ্ঞো ৰা কোচি তিণ্হাযপি নিসিতায সত্তিযা কোট্টেয্য, খণ্ডাখণ্ডিকং যদি ছিন্দেয্য, এৰং সন্তেপি সীলং অত্তনো সীলপারমিং নেৰ ভিন্দেয্যং. কস্মা? বোধিযা এৰ কারণা, সব্বত্থ অখণ্ডিতসীলেনেৰ সক্কা সম্মাসম্বোধিং পাপুণিতুং, ন ইতরেনাতি.

৩৬. ন মে সা ব্রাহ্মণী দেস্সাতি সা ব্রাহ্মণী জাতিযা গোত্তেন কুলপ্পদেসেন আচারসম্পত্তিযা চিরপরিচযেন পব্বজ্জাদিগুণসম্পত্তিযা চাতি সব্বপ্পকারেন ন মে দেস্সা ন অপ্পিযা, এতিস্সা মম অপ্পিযভাৰো কোচি নত্থি. নপি মে বলং ন ৰিজ্জতীতি ময্হম্পি বলং ন ন ৰিজ্জতি, অত্থি এৰ. অহং নাগবলো থামসম্পন্নো, ইচ্ছমানো সহসা ৰুট্ঠহিত্ৰা তং আকড্ঢন্তে পুরিসে নিপ্পোথেত্ৰা তং গহেত্ৰা যথিচ্ছিতট্ঠানং গন্তুং সমত্থোতি দস্সেতি. সব্বঞ্ঞুতং পিযং ময্হন্তি ততো পরিব্বাজিকতো সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণমেৰ ময্হং পিযং. তস্মা সীলানুরক্খিস্সন্তি তেন কারণেন সীলমেৰ অনুরক্খিস্সং.

অথ সো রাজা উয্যানে পপঞ্চং অকত্ৰাৰ সীঘতরং গন্ত্ৰা তং পরিব্বাজিকং পক্কোসাপেত্ৰা মহন্তেন যসেন নিমন্তেসি. সা যসস্স অগুণং পব্বজ্জায গুণং অত্তনো বোধিসত্তস্স চ মহন্তং ভোগক্খন্ধং পহায সংৰেগেন পব্বজিতভাৰঞ্চ কথেসি. রাজা কেনচি পরিযাযেন তস্সা মনং অলভন্তো চিন্তেসি – ‘‘অযং পরিব্বাজিকা সীলৰতী কল্যাণধম্মা, সোপি পরিব্বাজকো ইমায আকড্ঢিত্ৰা নীযমানায ন কিঞ্চি ৰিপ্পকারং দস্সেসি, সব্বত্থ নিরপেক্খচিত্তো, ন খো পন মেতং পতিরূপং, যং এৰরূপেসু গুণৰন্তেসু ৰিপ্পকারো, যংনূনাহং ইমং পরিব্বাজিকং গহেত্ৰা উয্যানং গন্ত্ৰা ইমং, তঞ্চ পরিব্বাজকং খমাপেয্য’’ন্তি? এৰং পন চিন্তেত্ৰা ‘‘পরিব্বাজিকং উয্যানং আনেথা’’তি পুরিসে আণাপেত্ৰা সযং পঠমতরং গন্ত্ৰা বোধিসত্তং উপসঙ্কমিত্ৰা পুচ্ছি – ‘‘ভো পব্বজিত, কিং মযা তায পরিব্বাজিকায নীযমানায কোপো তে উপ্পজ্জিত্থা’’তি. মহাসত্তো আহ –

‘‘উপ্পজ্জি মে ন মুচ্চিত্থ, ন মে মুচ্চিত্থ জীৰতো;

রজংৰ ৰিপুলা ৰুট্ঠি, খিপ্পমেৰ নিৰারযি’’ন্তি. (জা. ১.১০.৫২);

তং সুত্ৰা রাজা ‘‘কিং নু খো এস কোপমেৰ সন্ধায ৰদতি, উদাহু অঞ্ঞং কিঞ্চি সিপ্পাদিক’’ন্তি চিন্তেত্ৰা পুন পুচ্ছি –

‘‘কিং তে উপ্পজ্জি নো মুচ্চি, কিং তে নো মুচ্চি জীৰতো;

রজংৰ ৰিপুলা ৰুট্ঠি, কতমং তং নিৰারযী’’তি. (জা. ১.১০.৫৩);

তত্থ উপ্পজ্জীতি একৰারং উপ্পজ্জি, ন পুন উপ্পজ্জি. ন মুচ্চিত্থাতি কাযৰচীৰিকারুপ্পাদনৰসেন পন ন মুচ্চিত্থ, ন নং বহি পৰত্তিতুং ৰিস্সজ্জেসিন্তি অত্থো. রজংৰ ৰিপুলা ৰুট্ঠীতি যথা নাম গিম্হানং পচ্ছিমে মাসে উপ্পন্নং রজং ৰিপুলা অকালৰুট্ঠিধারা ঠানসো নিৰারেতি, এৰং তং ৰূপসমেন্তো নিৰারযিং, নিৰারেসিন্তি অত্থো.

অথস্স মহাপুরিসো নানপ্পকারেন কোধে আদীনৰং পকাসেন্তো –

‘‘যম্হি জাতে ন পস্সতি, অজাতে সাধু পস্সতি;

সো মে উপ্পজ্জি নো মুচ্চি, কোধো দুম্মেধগোচরো.

‘‘যেন জাতেন নন্দন্তি, অমিত্তা দুক্খমেসিনো;

সো মে উপ্পজ্জি নো মুচ্চি, কোধো দুম্মেধগোচরো.

‘‘যস্মিঞ্চ জাযমানম্হি, সদত্থং নাৰবুজ্ঝতি;

সো মে উপ্পজ্জি নো মুচ্চি, কোধো দুম্মেধগোচরো.

‘‘যেনাভিভূতো কুসলং জহাতি, পরক্করে ৰিপুলঞ্চাপি অত্থং;

স ভীমসেনো বলৰা পমদ্দী, কোধো মহারাজা ন মে অমুচ্চথ.

‘‘কট্ঠস্মিং মন্থমানস্মিং, পাৰকো নাম জাযতি;

তমেৰ কট্ঠং ডহতি, যস্মা সো জাযতে গিনি.

‘‘এৰং মন্দস্স পোসস্স, বালস্স অৰিজানতো;

সারম্ভা জাযতে কোধো, সপি তেনেৰ ডয্হতি.

‘‘অগ্গীৰ তিণকট্ঠস্মিং, কোধো যস্স পৰড্ঢতি;

নিহীযতি তস্স যসো, কাল়পক্খেৰ চন্দিমা.

‘‘অনিন্ধো ধূমকেতূৰ, কোধো যস্সূপসম্মতি;

আপূরতি তস্স যসো, সুক্কপক্খেৰ চন্দিমা’’তি. (জা. ১.১০.৫৪-৬১) –

ইমাহি গাথাহি ধম্মং দেসেসি.

তত্থ ন পস্সতীতি অত্তত্থম্পি ন পস্সতি, পগেৰ পরত্থং. সাধু পস্সতীতি অত্তত্থং পরত্থং উভযত্থঞ্চ সম্মদেৰ পস্সতি. দুম্মেধগোচরোতি নিপ্পঞ্ঞানং ৰিসযভূতো, নিপ্পঞ্ঞো ৰা গোচরো আহারো ইন্ধনং এতস্সাতি দুম্মেধগোচরো. দুক্খমেসিনোতি দুক্খং ইচ্ছন্তা. সদত্থন্তি অত্তনো অত্থং ৰুড্ঢিং. পরক্করেতি অপনেয্য ৰিনাসেয্য. সভীমসেনোতি সো ভীমায ভযজননিযা মহতিযা কিলেসসেনায সমন্নাগতো. পমদ্দীতি বলৰভাৰেন সত্তে পমদ্দনসীলো. ন মে অমুচ্চথাতি মম সন্তিকা মোক্খং ন লভি, অব্ভন্তরে এৰ দমিতো, নিব্বিসেৰনো কতোতি অত্থো. খীরং ৰিয ৰা মুহুত্তং দধিভাৰেন চিত্তেন পতিট্ঠহিত্থাতিপি অত্থো.

মন্থমানস্মিন্তি অরণিসহিতে মথিযমানে. ‘‘মথমানস্মি’’ন্তিপি পাঠো. যস্মাতি যতো কট্ঠা. গিনীতি অগ্গি. বালস্স অৰিজানতোতি বালস্স অজানন্তস্স. সারম্ভা জাযতেতি করণুত্তরিযকরণলক্খণা সারম্ভা অরণিমন্থনতো ৰিয পাৰকো কোধো জাযতে. সপি তেনেৰাতি সোপি বালো তেনেৰ কোধেন কট্ঠং ৰিয অগ্গিনা ডয্হতি. অনিন্ধো ধূমকেতূৰাতি অনিন্ধনো অগ্গি ৰিয. তস্সাতি তস্স অধিৰাসনখন্তিযা সমন্নাগতস্স পুগ্গলস্স সুক্কপক্খে চন্দো ৰিয লদ্ধো, যসো অপরাপরং আপূরতীতি.

রাজা মহাসত্তস্স ধম্মকথং সুত্ৰা মহাপুরিসং পরিব্বাজিকম্পি রাজগেহতো আগতং খমাপেত্ৰা ‘‘তুম্হে পব্বজ্জাসুখং অনুভৰন্তা ইধেৰ উয্যানে ৰসথ, অহং ৰো ধম্মিকং রক্খাৰরণগুত্তিং করিস্সামী’’তি ৰত্ৰা ৰন্দিত্ৰা পক্কামি. তে উভোপি তত্থেৰ ৰসিংসু. অপরভাগে পরিব্বাজিকা কালমকাসি. বোধিসত্তো হিমৰন্তং পৰিসিত্ৰা ঝানাভিঞ্ঞাযো নিব্বত্তেত্ৰা আযুপরিযোসানে ব্রহ্মলোকপরাযনো অহোসি.

তদা পরিব্বাজিকা রাহুলমাতা অহোসি, রাজা আনন্দত্থেরো, বোধিপরিব্বাজকো লোকনাথো.

তস্স ইধাপি যথারহং সেসপারমিযো নিদ্ধারেতব্বা. তথা মহন্তং ভোগক্খন্ধং মহন্তঞ্চ ঞাতিপরিৰট্টং পহায মহাভিনিক্খমনসদিসং গেহতো নিক্খমনং, তথা নিক্খমিত্ৰা পব্বজিতস্স বহুজনসম্মতস্স সতো পরমপ্পিচ্ছতায কুলেসু চ গণেসু চ অলগ্গতা, অচ্চন্তমেৰ লাভসক্কারজিগুচ্ছায পৰিৰেকাভিরতি, অতিসযৰতী চ অভিসল্লেখৰুত্তি, তথারূপায সীলৰতিযা কল্যাণধম্মায পরিব্বাজিকায অননুঞ্ঞাতা অত্তনো পুরতো বলক্কারেন পরামসিযমানায সীলপারমিং আৰজ্জেত্ৰা ৰিকারানাপত্তি, কতাপরাধে চ তস্মিং রাজিনি উপগতে হিতচিত্ততং মেত্তচিত্ততং উপট্ঠপেত্ৰা দিট্ঠধম্মিকসম্পরাযিকেহি সমনুসাসনন্তি এৰমাদযো ইধ মহাপুরিসস্স গুণানুভাৰা ৰিভাৰেতব্বা. তেনেতং ৰুচ্চতি ‘‘এৰং অচ্ছরিযা হেতে…পে… ধম্মস্স অনুধম্মতো’’তি.

চূল়বোধিচরিযাৰণ্ণনা নিট্ঠিতা.

৫. মহিংসরাজচরিযাৰণ্ণনা

৩৭. পঞ্চমে মহিংসো পৰনচারকোতি মহাৰনচারী ৰনমহিংসো যদা হোমীতি যোজনা. পৰড্ঢকাযোতি ৰযসম্পত্তিযা অঙ্গপচ্চঙ্গানঞ্চ থূলভাৰেন অভিৰড্ঢকাযো. বলৰাতি মহাবলো থামসম্পন্নো. মহন্তোতি ৰিপুলসরীরো. হত্থিকলভপ্পমাণো কির তদা বোধিসত্তস্স কাযো হোতি. ভীমদস্সনোতি মহাসরীরতায ৰনমহিংসজাতিতায চ সীলং অজানন্তানং ভযং জননতো ভযানকদস্সনো.

৩৮. পব্ভারেতি ওলম্বকসিলাকুচ্ছিযং. দকাসযেতি জলাসযসমীপে. হোতেত্থ ঠানন্তি এত্থ মহাৰনে যো কোচি পদেসো ৰনমহিংসানং তিট্ঠনট্ঠানং হোতি. তহিং তহিন্তি তত্থ তত্থ.

৩৯. ৰিচরন্তোতি ৰিহারফাসুকং ৰীমংসিতুং ৰিচরন্তো. ঠানং অদ্দস ভদ্দকন্তি এৰং ৰিচরন্তো তস্মিং মহারঞ্ঞে ভদ্দকং ময্হং ফাসুকং রুক্খমূলট্ঠানং অদ্দক্খিং. দিস্ৰা চ তং ঠানং উপগন্ত্ৰান, তিট্ঠামি চ সযামি চ গোচরং গহেত্ৰা দিৰা তং রুক্খমূলট্ঠানং গন্ত্ৰা ঠানসযনেহি ৰীতিনামেমীতি দস্সেতি.

৪০. তদা কির বোধিসত্তো হিমৰন্তপ্পদেসে মহিংসযোনিযং নিব্বত্তিত্ৰা ৰযপ্পত্তো থামসম্পন্নো মহাসরীরো হত্থিকলভপ্পমাণো পব্বতপাদপব্ভারগিরিদুগ্গৰনঘটাদীসু ৰিচরন্তো একং ফাসুকং মহারুক্খমূলং দিস্ৰা গোচরং গহেত্ৰা দিৰা তত্থ ৰসতি. অথেকো লোলমক্কটো রুক্খা ওতরিত্ৰা মহাসত্তস্স পিট্ঠিং অভিরুহিত্ৰা উচ্চারপস্সাৰং কত্ৰা সিঙ্গেসু গণ্হিত্ৰা ওলম্বন্তো নঙ্গুট্ঠে গহেত্ৰা দোলাযন্তো কীল়ি. বোধিসত্তো খন্তিমেত্তানুদ্দযসম্পদায তং তস্স অনাচারং ন মনসাকাসি. মক্কটো পুনপ্পুনং তথেৰ করোতি. তেন ৰুত্তং ‘‘অথেত্থ কপি মাগন্ত্ৰা’’তিআদি.

তত্থ কপি মাগন্ত্ৰাতি কপি আগন্ত্ৰা, ম-কারো পদসন্ধিকরো. পাপোতি লামকো. অনরিযোতি অনযে ইরিযনেন অযে চ ন ইরিযনেন অনরিযো, নিহীনাচারোতি অত্থো. লহূতি লোলো. খন্ধেতি খন্ধপ্পদেসে. মুত্তেতীতি পস্সাৰং করোতি. ওহদেতীতি করীসং ওস্সজ্জতি. তন্তি তং মং, তদা মহিংসভূতং মং.

৪১. সকিম্পি দিৰসন্তি একদিৰসম্পি দূসেতি মং সব্বকালম্পি. তেনাহ ‘‘দূসেতি মং সব্বকাল’’ন্তি. ন কেৰলঞ্চ দুতিযততিযচতুত্থদিৰসমত্তং, অথ খো সব্বকালম্পি মং পস্সাৰাদীহি দূসেতি. যদা যদা মুত্তাদীনি কাতুকামো, তদা তদা ময্হমেৰ উপরি করোতীতি দস্সেতি. উপদ্দুতোতি বাধিতো, তেন সিঙ্গেসু ওলম্বনাদিনা মুত্তাদিঅসুচিমক্খণেন তস্স চ অপহরণত্থং অনেকৰারং সিঙ্গকোটীহি ৰালগ্গেন চ অনেকৰারং কদ্দমপংসুমিস্সকং উদকং সিঞ্চিত্ৰা ধোৰনেন চ নিপ্পীল়িতো হোমীতি অত্থো.

৪২. যক্খোতি তস্মিং রুক্খে অধিৰত্থা দেৰতা. মং ইদমব্রৰীতি রুক্খক্খন্ধে ঠত্ৰা ‘‘মহিংসরাজ, কস্মা ইমস্স দুট্ঠমক্কটস্স অৰমানং সহসী’’তি ইমমত্থং পকাসেন্তো নাসেহেতং ছৰং পাপং , সিঙ্গেহি চ খুরেহি চাতি ইদং ৰচনং মং অভাসি.

৪৩. এৰং ৰুত্তে তদা যক্খেতি তদা তস্মিং কালে তস্মিং যক্খে এৰং ৰুত্তে সতি. অহং তং ইদমব্রৰিন্তি অহং তং যক্খং ইদং ইদানি ৰক্খমানং অব্রৰিং অভাসিং. কুণপেনাতি কিলেসাসুচিপগ্ঘরণেন সুচিজাতিকানং সাধূনং পরমজিগুচ্ছনীযতায অতিদুগ্গন্ধৰাযনেন চ কুণপসদিসতায কুণপেন. পাপেনাতি পাণাতিপাতপাপেন. অনরিযেনাতি অনরিযানং অসাধূনং মাগৰিকনেসাদাদীনং হীনপুরিসানং ধম্মত্তা অনরিযেন, কিং কেন কারণেন, ত্ৰং দেৰতে মং মক্খেসি, অযুত্তং তযা ৰুত্তং মং পাপে নিযোজেন্তিযাতি দস্সেতি.

৪৪. ইদানি তস্মিং পাপধম্মে আদীনৰং পকাসেন্তো ‘‘যদিহ’’ন্তিআদিমাহ. তস্সত্থো – ভদ্দে দেৰতে, অহং তস্স যদি কুজ্ঝেয্যং, ততোপি লামকতরো ভৰেয্যং. যেন হি অধম্মচরণেন সো বালমক্কটো নিহীনো নাম জাতো, সচে পনাহং ততোপি বলৰতরং পাপধম্মং চরেয্যং, ননু তেন ততো পাপতরো ভৰেয্যং, অট্ঠানঞ্চেতং যদিহং ইধলোকপরলোকং তদুত্তরি চ জানিত্ৰা ঠিতো একন্তেনেৰ পরহিতায পটিপন্নো এৰরূপং পাপধম্মং চরেয্যন্তি. কিঞ্চ ভিয্যো – সীলঞ্চ মে পভিজ্জেয্যাতি অহঞ্চেৰ খো পন এৰরূপং পাপং করেয্যং, ময্হং সীলপারমী খণ্ডিতা সিযা. ৰিঞ্ঞূ চ গরহেয্যু মন্তি পণ্ডিতা চ দেৰমনুস্সা মং গরহেয্যুং ‘‘পস্সথ, ভো, অযং বোধিসত্তো বোধিপরিযেসনং চরমানো এৰরূপং পাপং অকাসী’’তি.

৪৫. হীল়িতা জীৰিতা ৰাপীতি ৰা-সদ্দো অৰধারণে. এৰং ৰিঞ্ঞূহি হীল়িতা গরহিতা জীৰিতাপি পরিসুদ্ধেন পরিসুদ্ধসীলেন হুত্ৰা মতং ৰা মরণমেৰ ৰরং উত্তমং সেয্যো. ক্যাহং জীৰিতহেতুপি, কাহামি পরহেঠনন্তি এৰং জানন্তো চ অহং ময্হং জীৰিতনিমিত্তম্পি পরসত্তৰিহিংসনং কিং কাহামি কিং করিস্সামি, এতস্স করণে কারণং নত্থীতি অত্থো.

অযং পন অঞ্ঞেপি মং ৰিয মঞ্ঞমানো এৰং অনাচারং করিস্সতি, ততো যেসং চণ্ডমহিংসানং এৰং করিস্সতি, তে এৰ এতং ৰধিস্সন্তি, সা এতস্স অঞ্ঞেহি মারণা ময্হং দুক্খতো চ পাণাতিপাততো চ মুত্তি ভৰিস্সতীতি আহ. তেন ৰুত্তং –

৪৬.

‘‘মমেৰাযং মঞ্ঞমানো, অঞ্ঞেপেৰং করিস্সতি;

তেৰ তস্স ৰধিস্সন্তি, সা মে মুত্তি ভৰিস্সতী’’তি.

তত্থ মমেৰাযন্তি মং ৰিয অযং. অঞ্ঞেপীতি অঞ্ঞেসম্পি. সেসং ৰুত্তত্থমেৰ.

৪৭. হীনমজ্ঝিমউক্কট্ঠেতি হীনে চ মজ্ঝিমে চ উক্কট্ঠে চ নিমিত্তভূতে. সহন্তো অৰমানিতন্তি ৰিভাগং অকত্ৰা তেহি পৰত্তিতং অৰমানং পরিভৰং সহন্তো খমন্তো. এৰং লভতি সপ্পঞ্ঞোতি এৰং হীনাদীসু ৰিভাগং অকত্ৰা খন্তিমেত্তানুদ্দযং উপট্ঠপেত্ৰা তদপরাধং সহন্তো সীলাদিপারমিযো ব্রূহেত্ৰা মনসা যথাপত্থিতং যথিচ্ছিতং সব্বঞ্ঞুতঞ্ঞাণং লভতি পটিৰিজ্ঝতি, তস্স তং ন দূরেতি.

এৰং মহাসত্তো অত্তনো অজ্ঝাসযং পকাসেন্তো দেৰতায ধম্মং দেসেসি. সো কতিপাহচ্চযেন অঞ্ঞত্থ গতো. অঞ্ঞো চণ্ডমহিংসো নিৰাসফাসুতায তং ঠানং গন্ত্ৰা অট্ঠাসি. দুট্ঠমক্কটো ‘‘সো এৰ অয’’ন্তি সঞ্ঞায তস্স পিট্ঠিং অভিরুহিত্ৰা তথেৰ অনাচারং অকাসি. অথ নং সো ৰিধুনন্তো ভূমিযং পাতেত্ৰা সিঙ্গেন হদযে ৰিজ্ঝিত্ৰা পাদেহি মদ্দিত্ৰা সঞ্চুণ্ণেসি.

তদা সীলৰা মহিংসরাজা লোকনাথো.

তস্স ইধাপি হেট্ঠা ৰুত্তনযেনেৰ যথারহং সেসপারমিযো নিদ্ধারেতব্বা. তথা হত্থিনাগ- (চরিযা. ২.১ আদযো) ভূরিদত্ত- (চরিযা. ২.১১ আদযো) চম্পেয্যনাগরাজ- (চরিযা. ২.২০ আদযো) চরিযাসু ৰিয ইধ মহাসত্তস্স গুণানুভাৰা ৰেদিতব্বা.

মহিংসরাজচরিযাৰণ্ণনা নিট্ঠিতা.

৬. রুরুমিগরাজচরিযাৰণ্ণনা

৪৮. ছট্ঠে সুতত্তকনকসন্নিভোতি যথা সুট্ঠু অপগতসব্বকাল়কো হোতি, এৰং অগ্গিম্হি পক্খিপিত্ৰা সুতত্তকনকসন্নিভো. মিগরাজা রুরু নামাতি জাতিসিদ্ধেন নামেন রুরু নাম মিগরাজা, জাতিতো রুরু, মিগানঞ্চ রাজাতি অত্থো. পরমসীলসমাহিতোতি উত্তমসীলসমাহিতো, ৰিসুদ্ধসীলো চেৰ সমাহিতচিত্তো চ, ৰিসুদ্ধসীলে ৰা সম্মা আহিতচিত্তোতি এৰমেত্থ অত্থো ৰেদিতব্বো.

তদা বোধিসত্তো রুরুমিগযোনিযং নিব্বত্তি. তস্স সরীরচ্ছৰি সুট্ঠু তাপেত্ৰা মজ্জিতকঞ্চনপট্টৰণ্ণো অহোসি, হত্থপাদা লাখারসপরিকম্মকতা ৰিয, নঙ্গুট্ঠং চমরীনঙ্গুট্ঠং ৰিয, সিঙ্গানি রজতদামৰণ্ণানি অক্খীনি সুমজ্জিতমণিগুল়িকা ৰিয, মুখং ওদহিত্ৰা ঠপিতরত্তকম্বলগেণ্ডুকা ৰিয. সো জনসংসগ্গং পহায ৰিৰেকৰাসং ৰসিতুকামো পরিৰারং ছড্ডেত্ৰা এককোৰ গঙ্গানিৰত্তনে রমণীযে সালমিস্সকে সুপুপ্ফিতপৰনে ৰসতি. তেন ৰুত্তং –

৪৯.

‘‘রম্মে পদেসে রমণীযে, ৰিৰিত্তে অমনুস্সকে;

তত্থ ৰাসং উপগঞ্ছিং, গঙ্গাকূলে মনোরমে’’তি.

তত্থ রম্মে পদেসেতি মুত্তাতলসদিসৰালুকাচুণ্ণপণ্ডরেহি ভূমিভাগেহি সিনিদ্ধহরিততিণসঞ্চরিতেহি ৰনত্থলেহি চিত্তত্থরণেহি ৰিয নানাৰণ্ণৰিচিত্তেহি সিলাতলেহি মণিক্খন্ধনিম্মলসলিলেহি জলাসযেহি চ সমন্নাগতত্তা যেভুয্যেন চ ইন্দগোপকৰণ্ণায রত্তায সুখসম্ফস্সায তিণজাতিযা সঞ্ছন্নত্তা রম্মে অরঞ্ঞপ্পদেসে. রম্মণীযেতি পুপ্ফফলপল্লৰালঙ্কতৰিপুলসাখাৰিনদ্ধেহি নানাৰিধদিজগণূপকূজিতেহি ৰিৰিধতরুলতাৰনৰিরাজিতেহি যেভুয্যেন অম্বসালৰনসণ্ডমণ্ডিতেহি ৰনগহনেহি উপসোভিতত্তা তত্থ পৰিট্ঠস্স জনস্স রতিজননট্ঠেন রমণীযে. ৰুত্তম্পি চেতং রুরুমিগরাজজাতকে –

‘‘এতস্মিং ৰনসণ্ডস্মিং, অম্বা সালা চ পুপ্ফিতা;

ইন্দগোপকসঞ্ছন্নো, এত্থেসো তিট্ঠতে মিগো’’তি. (জা. ১.১৩.১১৯);

ৰিৰিত্তেতি জনৰাসৰিরহেন সুঞ্ঞে. অমনুস্সকেতি সঞ্চরণমনুস্সানম্পি তত্থ অভাৰেন মনুস্সরহিতে. মনোরমেতি যথাৰুত্তগুণসম্পত্তিযা ৰিসেসতো পৰিৰেককামানং মনো রমেতীতি মনোরমে.

৫০. অথ উপরিগঙ্গাযাতি এত্থ অথাতি অধিকারে নিপাতো, তেন মযি তত্থ তথা ৰসন্তে ইদং অধিকারন্তরং উপ্পন্নন্তি দীপেতি. উপরিগঙ্গাযাতি গঙ্গায নদিযা উপরিসোতে. ধনিকেহি পরিপীল়িতোতি ইণং গহেত্ৰা তং দাতুং অসক্কোন্তো ইণাযিকেহি চোদিযমানো.

একো কির বারাণসিসেট্ঠি অত্তনো পুত্তং ‘‘অযং সিপ্পং উগ্গণ্হন্তো কিলমিস্সতী’’তি কিঞ্চি সিপ্পং ন উগ্গণ্হাপেসি. গীতৰাদিতনচ্চখাদনভোজনতো উদ্ধং ন কিঞ্চি অঞ্ঞাসি. তং ৰযপ্পত্তং পতিরূপেন দারেন সংযোজেত্ৰা ধনং নিয্যাতেত্ৰা মাতাপিতরো কালমকংসু. সো তেসং অচ্চযেন ইত্থিধুত্তসুরাধুত্তাদিপরিৰুতো নানাব্যসনমুখেহি সব্বং ধনং ৰিদ্ধংসেত্ৰা তত্থ তত্থ ইণং আদায তম্পি দাতুং অসক্কোন্তো ধনিকেহি চোদিযমানো ‘‘কিং ময্হং জীৰিতেন, তেনেৰম্হি অত্তভাৰেন অঞ্ঞো ৰিয জাতো, মরণং মে সেয্যো’’তি চিন্তেত্ৰা ইণাযিকে আহ – ‘‘তুম্হাকং ইণপণ্ণানি গহেত্ৰা আগচ্ছথ, গঙ্গাতীরে মে নিহিতং কুলসন্তকং ধনং অত্থি, তং ৰো দস্সামী’’তি. তে তেন সদ্ধিং অগমংসু. সো ‘‘ইধ ধনং, এত্থ ধন’’ন্তি নিধিট্ঠানং আচিক্খন্তো ৰিয ‘‘এৰং মে ইণমোক্খো ভৰিস্সতী’’তি পলাযিত্ৰা গঙ্গাযং পতি. সো চণ্ডসোতেন ৰুয্হন্তো কারুঞ্ঞরৰং রৰি. তেন ৰুত্তং ‘‘অথ উপরিগঙ্গাযা’’তিআদি.

তত্থ জীৰামি ৰা মরামি ৰাতি ইমস্মিং গঙ্গাসোতে পতিতো জীৰামি ৰা মরামি ৰা, জীৰিতং ৰা মে এত্থ হোতু মরণং ৰা, উভযথাপি ইণাযিকপীল়া ন হোতীতি অধিপ্পাযো.

৫১. মজ্ঝে গঙ্গায গচ্ছতীতি সো পুরিসো রত্তিন্দিৰং গঙ্গায ৰুয্হমানো জীৰিতপেমস্স ৰিজ্জমানত্তা মরণং অপ্পত্তো মরণভযতজ্জিতো হুত্ৰা করুণং রৰং রৰন্তো গঙ্গায মজ্ঝে মহোদকেন গচ্ছতি.

৫২. অথ মহাপুরিসো অড্ঢরত্তসমযে তস্স তং করুণং পরিদেৰন্তস্স পরিদেৰিতসদ্দং সুত্ৰা ‘‘মনুস্সসদ্দো সূযতি, মা মযি ইধ ধরন্তে মরতু, জীৰিতমস্স দস্সামী’’তি চিন্তেত্ৰা সযনগুম্বা ৰুট্ঠায নদীতীরং গন্ত্ৰা ‘‘অম্ভো পুরিস, মা ভাযি, জীৰিতং তে দস্সামী’’তি ৰত্ৰা অস্সাসেত্ৰা সোতং ছিন্দন্তো গন্ত্ৰা তং পিট্ঠিযং আরোপেত্ৰা তীরং পাপেত্ৰা অত্তনো ৰসনট্ঠানং নেত্ৰা পরিস্সমং ৰিনোদেত্ৰা ফলাফলানি দত্ৰা দ্ৰীহতীহচ্চযেন তং আহ – ‘‘অম্ভো পুরিস, অহং তং বারাণসিগামিমগ্গং পাপেস্সামি, ত্ৰং ‘অসুকট্ঠানে নাম কঞ্চনমিগো ৰসতী’তি মা কস্সচি আরোচেহী’’তি. সো ‘‘সাধু, সামী’’তি সম্পটিচ্ছি. মহাসত্তো তং অত্তনো পিট্ঠিং আরোপেত্ৰা বারাণসিমগ্গে ওতারেত্ৰা নিৰত্তি. তেন ৰুত্তং – ‘‘তস্সাহং সদ্দং সুত্ৰান, করুণং পরিদেৰতো’’তিআদি.

তত্থ কোসি ত্ৰং নরোতি ত্ৰং কো মনুস্সো অসি, কুতো ইধ ৰুয্হমানো আগতোসীতি অত্থো.

৫৩. অত্তনো করণন্তি অত্তনো কিরিযং. ধনিকেহি ভীতোতি ইণাযিকেহি উব্বিগ্গো. তসিতোতি উত্রস্তো.

৫৪. তস্স কত্ৰান কারুঞ্ঞং, চজিত্ৰা মম জীৰিতন্তি কারুঞ্ঞং কত্ৰা মহাকরুণায সমুস্সাহিতো মম জীৰিতং তস্স পুরিসস্স পরিচ্চজিত্ৰা. পৰিসিত্ৰা নীহরিং তস্সাতি নদিং পৰিসিত্ৰা সোতং ছিন্দন্তো উজুকমেৰ গন্ত্ৰা মম পিট্ঠিং আরোপেত্ৰা ততো তং নীহরিং. তস্সাতি উপযোগত্থে সামিৰচনং. ‘‘তত্থা’’তিপি পাল়ি, তত্থ নদিযন্তি অত্থো. অন্ধকারম্হি রত্তিযাতি রত্তিযা অন্ধকারসমযে, কাল়পক্খরত্তিযন্তি অত্থো.

৫৫. অস্সত্থকালমঞ্ঞাযাতি পরিস্সমং অপনেত্ৰা ফলাফলানি দত্ৰা দ্ৰীহতীহচ্চযেন কিলমথস্স ৰিগতকালং জানিত্ৰা. একং তং ৰরং যাচামীতি অহং তং একং ৰরং যাচামি, ময্হং একং ৰরং দেহীতি অত্থো. কিং তং ৰরন্তি চে? আহ – মা মং কস্সচি পাৰদাতি ‘‘অসুকট্ঠানে সুৰণ্ণমিগো ৰসতী’’তি কস্সচি রঞ্ঞো ৰা রাজমহামত্তস্স ৰা মং মা পাৰদ.

অথ তস্মিং পুরিসে বারাণসিং পৰিট্ঠদিৰসেযেৰ সো রাজা ‘‘অহং, দেৰ, সুৰণ্ণৰণ্ণং মিগং ময্হং ধম্মং দেসেন্তং সুপিনেন অদ্দসং, অহঞ্হি সচ্চসুপিনা, অদ্ধা সো ৰিজ্জতি, তস্মা কঞ্চনমিগস্স ধম্মং সোতুকামা লভিস্সামি চে জীৰিস্সামি, নো চে মে জীৰিতং নত্থী’’তি অগ্গমহেসিযা ৰুত্তো তং অস্সাসেত্ৰা ‘‘সচে মনুস্সলোকে অত্থি, লভিস্সসী’’তি ৰত্ৰা ব্রাহ্মণে পক্কোসাপেত্ৰা ‘‘সুৰণ্ণমিগা নাম হোন্তী’’তি পুচ্ছিত্ৰা ‘‘আম, দেৰ, হোন্তী’’তি সুত্ৰা সহস্সত্থৰিকং সুৰণ্ণচঙ্কোটকে ঠপেত্ৰা তং হত্থিক্খন্ধং আরোপেত্ৰা নগরে ভেরিং চরাপেসি – ‘‘যো সুৰণ্ণমিগং আচিক্খিস্সতি, তস্স হত্থিনা সদ্ধিং ইমং দস্সামী’’তি. ততো উত্তরিম্পি দাতুকামো হুত্ৰা –

‘‘তস্স গামৰরং দম্মি, নারিযো চ অলঙ্কতা;

যো মেতং মিগমক্খাতি, মিগানং মিগমুত্তম’’ন্তি. (জা. ১.১৩.১১৭) –

গাথং সুৰণ্ণপট্টে লিখাপেত্ৰা সকলনগরে ৰাচাপেসি. অথ সো সেট্ঠিপুত্তো তং গাথং সুত্ৰা রাজপুরিসানং সন্তিকং গন্ত্ৰা ‘‘রঞ্ঞো এৰরূপং মিগং আচিক্খিস্সামি, মং রাজানং দস্সেথা’’তি আহ. রাজপুরিসা তং রঞ্ঞো সন্তিকং নেত্ৰা তমত্থং আরোচেসুং. রাজা ‘‘সচ্চং, ভো, অদ্দসা’’তি পুচ্ছি. সো ‘‘সচ্চং, দেৰ, মযা সদ্ধিং আগচ্ছতু, অহং তং দস্সেস্সামী’’তি আহ. রাজা তমেৰ পুরিসং মগ্গদেসকং কত্ৰা মহন্তেন পরিৰারেন তং ঠানং গন্ত্ৰা তেন মিত্তদুব্ভিনা পুরিসেন দস্সিতং পদেসং আৰুধহত্থে পুরিসে সমন্ততোৰ পরিৰারেত্ৰা ‘‘উক্কুট্ঠিং করোথা’’তি ৰত্ৰা সযং কতিপযেহি জনেহি সদ্ধিং একমন্তে অট্ঠাসি. সোপি পুরিসো অৰিদূরে অট্ঠাসি. মহাসত্তো সদ্দং সুত্ৰা ‘‘মহতো বলকাযস্স সদ্দো, অদ্ধা তম্হা মে পুরিসা ভযেন উপ্পন্নেন ভৰিতব্ব’’ন্তি ঞত্ৰা উট্ঠায সকলপরিসং ওলোকেত্ৰা ‘‘রঞ্ঞো ঠিতট্ঠানেযেৰ মে সোত্থি ভৰিস্সতী’’তি রাজাভিমুখো পাযাসি. রাজা তং আগচ্ছন্তং দিস্ৰা ‘‘নাগবলো অৰত্থরন্তো আগচ্ছেয্যা’’তি সরং সন্নয্হিত্ৰা ‘‘ইমং মিগং সন্তাসেত্ৰা সচে পলাযতি, ৰিজ্ঝিত্ৰা দুব্বলং কত্ৰা গণ্হিস্সামী’’তি বোধিসত্তাভিমুখো অহোসি. মহাসত্তো –

‘‘আগমেহি মহারাজ, মা মং ৰিজ্ঝি রথেসভ;

কো নু তে ইদমক্খাসি, এত্থেসো তিট্ঠতে মিগো’’তি. (জা. ১.১৩.১২১) –

গাথং অভাসি. রাজা তস্স মধুরকথায বজ্ঝিত্ৰা সরং পটিসংহরিত্ৰা গারৰেন অট্ঠাসি. মহাসত্তোপি রাজানং উপসঙ্কমিত্ৰা মধুরপটিসন্থারং অকাসি. মহাজনোপি সব্বাৰুধানি অপনেত্ৰা আগন্ত্ৰা রাজানং পরিৰারেসি. তেন ৰুত্তং –

৫৬.

‘‘নগরং গন্ত্ৰান আচিক্খি, পুচ্ছিতো ধনহেতুকো;

রাজানং সো গহেত্ৰান, উপগঞ্ছি মমন্তিক’’ন্তি.

তস্সত্থো – যো মিত্তদুব্ভী পাপপুরিসো জীৰিতং পরিচ্চজিত্ৰা তথা মযা পাণসংসযতো মোচিতো বারাণসিনগরং গন্ত্ৰা অত্তনা লদ্ধব্বধননিমিত্তং রঞ্ঞো মং আচিক্খি, আচিক্খিত্ৰা সো রঞ্ঞো গাহাপেতুং মগ্গদেসকো হুত্ৰা রাজানং গহেত্ৰা মম সন্তিকমুপাগমীতি.

মহাসত্তো সুৰণ্ণকিঙ্কিণিকং চালেন্তো ৰিয মধুরস্সরেন রাজানং পুন পুচ্ছি – ‘‘কো নু তে ইদমক্খাসি, এত্থেসো তিট্ঠতে মিগো’’তি. তস্মিং খণে সো পাপপুরিসো থোকং পটিক্কমিত্ৰা সোতপথে অট্ঠাসি. রাজা ‘‘ইমিনা মে ত্ৰং দস্সিতো’’তি তং পুরিসং নিদ্দিসি. ততো বোধিসত্তো –

‘‘সচ্চং কিরেৰ মাহংসু, নরা একচ্চিযা ইধ;

কট্ঠং নিপ্লৰিতং সেয্যো, ন ত্ৰেৰেকচ্চিযো নরো’’তি. (জা. ১.১৩.১২৩) –

গাথমাহ. তং সুত্ৰা রাজা সংৰেগজাতো –

‘‘কিং নু রুরু গরহসি মিগানং, কিং পক্খীনং কিং পন মানুসানং;

ভযঞ্হি মং ৰিন্দতিনপ্পরূপং, সুত্ৰান তং মানুসিং ভাসমান’’ন্তি. (জা. ১.১৩.১২৪) –

গাথমাহ. ততো মহাপুরিসো ‘‘মহারাজ, ন মিগং ন পক্খিং গরহামি, মনুস্সং পন গরহামী’’তি দস্সেন্তো –

‘‘যমুদ্ধরিং ৰাহনে ৰুয্হমানং, মহোদকে সলিলে সীঘসোতে;

ততোনিদানং ভযমাগতং মম, দুক্খো হৰে রাজ অসব্ভি সঙ্গমো’’তি. (জা. ১.১৩.১২৫) –

আহ.

তত্থ নিপ্লৰিতন্তি উদ্ধরিতং, একচ্চিযোতি একচ্চো মিত্তদুব্ভী পাপপুরিসো উদকে পতন্তোপি উত্তারিতো নত্ৰেৰ সেয্যো. কট্ঠঞ্হি নানপ্পকারেন উপকারায সংৰত্ততি, মিত্তদুব্ভী পন ৰিনাসায, তস্মা ততো কট্ঠমেৰ ৰরতরন্তি. মিগানন্তি রুরুমিগরাজ, মিগানং কিং অঞ্ঞতরং গরহসি, উদাহু পক্খীনং মনুস্সানন্তি পুচ্ছতি. ভযঞ্হি মং ৰিন্দতিনপ্পরূপন্তি মহন্তং ভযং মং পটিলভতি, অত্তনো সন্তকং ৰিয করোতীতি অত্থো.

ৰাহনেতি পতিতপতিতে ৰহিতুং সমত্থে গঙ্গাৰহে. মহোদকে সলিলেতি মহোদকীভূতে সলিলে. উভযেনাপি গঙ্গাৰহস্স বহূদকতং দস্সেতি. ততো নিদানন্তি, মহারাজ, যো ময্হং তযা দস্সিতো পুরিসো, এসো মযা গঙ্গায ৰুয্হমানো অড্ঢরত্তসমযে করুণং পরিদেৰন্তো ততো উত্তারিতো, ততোনিদানং ইদং ময্হং ভযমাগতং, অসপ্পুরিসেহি সমাগমো নাম দুক্খোতি.

তং সুত্ৰা রাজা তস্স কুজ্ঝিত্ৰা ‘‘এৰং বহূপকারস্স নাম গুণং ন জানাতি, দুক্খং উপ্পাদেতি, ৰিজ্ঝিত্ৰা নং জীৰিতক্খযং পাপেস্সামী’’তি সরং সন্নয্হি. তেন ৰুত্তং –

৫৭.

‘‘যাৰতা করণং সব্বং, রঞ্ঞো আরোচিতং মযা;

রাজা সুত্ৰান ৰচনং, উসুং তস্স পকপ্পযি;

ইধেৰ ঘাতযিস্সামি, মিত্তদুব্ভিং অনরিয’’ন্তি.

তত্থ যাৰতা করণন্তি যং তস্স মযা কতং উপকারকরণং, তং সব্বং. পকপ্পযীতি সন্নয্হি. মিত্তদুব্ভিন্তি অত্তনো মিত্তেসু উপকারীসু দুব্ভনসীলং.

ততো মহাসত্তো ‘‘এস বালো মং নিস্সায মা নস্সী’’তি চিন্তেত্ৰা ‘‘মহারাজ, ৰধো নামেস বালস্স ৰা পণ্ডিতস্স ৰা ন সাধূহি পসংসিতো, অঞ্ঞদত্থু গরহিতো এৰ, তস্মা মা ইমং ঘাতেহি, অযং যথারুচি গচ্ছতু, যঞ্চেৰ তস্স ‘দস্সামী’তি তযা পটিঞ্ঞাতং, তম্পি অহাপেত্ৰাৰ দেহী’’তি আহ. ‘‘অহঞ্চ তে যং ইচ্ছিতং, তং করিস্সামি, অত্তানং তুয্হং দম্মী’’তি আহ. তেন ৰুত্তং –

৫৮.

‘‘তমহং অনুরক্খন্তো, নিম্মিনিং মম অত্তনা;

তিট্ঠতেসো মহারাজ, কামকারো ভৰামি তে’’তি.

তত্থ নিম্মিনিন্তি তং মিত্তদুব্ভিং পাপপুগ্গলং অনুরক্খন্তো মম অত্তনো অত্তভাৰেন তং পরিৰত্তেসিং, অত্তানং রঞ্ঞো নিয্যাতেত্ৰা রাজহত্থতো পত্তং তস্স মরণং নিৰারেসিন্তি অত্থো. তিট্ঠতেসোতিআদি ৰিনিমযাকারদস্সনং.

৫৯. ইদানি যদত্থং সো অত্তৰিনিমযো কতো, তং দস্সেতুং ওসানগাথমাহ. তস্সত্থো – তদা মং নিস্সায তং মিত্তদুব্ভিং পুরিসং তস্মিং রঞ্ঞে জীৰিতা ৰোরোপেতুকামে অহং অত্তানং রঞ্ঞো পরিচ্চজন্তো মম সীলমেৰ অনুরক্খিং, জীৰিতং পন নারক্খিং. যং পনাহমেৰ অত্তনো জীৰিতনিরপেক্খং সীলৰা আসিং, তং সম্মাসম্বোধিযা এৰ কারণাতি.

অথ রাজা বোধিসত্তেন অত্তনো জীৰিতং পরিচ্চজিত্ৰা তস্স পুরিসস্স মরণে নিৰারেন্তে তুট্ঠমানসো ‘‘গচ্ছ, ভো, মিগরাজস্স অনুগ্গহেন মম হত্থতো মরণা মুত্তো’’তি ৰত্ৰা যথাপটিঞ্ঞায তঞ্চস্স ধনং দাপেসি. মহাসত্তস্স যথারুচিযাৰ অনুজানিত্ৰা তং নগরং নেত্ৰা নগরঞ্চ বোধিসত্তঞ্চ অলঙ্কারাপেত্ৰা দেৰিযা ধম্মং দেসাপেসি. মহাসত্তো দেৰিং আদিং কত্ৰা রঞ্ঞো চ রাজপরিসায চ মধুরায মনুস্সভাসায ধম্মং দেসেত্ৰা রাজানং দসহি রাজধম্মেহি ওৰদিত্ৰা মহাজনং অনুসাসিত্ৰা অরঞ্ঞং পৰিসিত্ৰা মিগগণপরিৰুতো ৰাসং কপ্পেসি. রাজাপি মহাসত্তস্স ওৰাদে ঠত্ৰা সব্বসত্তানং অভযং দত্ৰা দানাদীনি পুঞ্ঞানি কত্ৰা সুগতিপরাযনো অহোসি.

তদা সেট্ঠিপুত্তো দেৰদত্তো অহোসি, রাজা আনন্দো, রুরুমিগরাজা লোকনাথো.

তস্স ইধাপি হেট্ঠা ৰুত্তনযেনেৰ যথারহং সেসপারমিযো নিদ্ধারেতব্বা. তথা ইধাপি পৰিৰেকারামতায জনসংসগ্গং অনিচ্ছতো যূথং পহায এককৰিহারো, অড্ঢরত্তসমযে নদিযা ৰুয্হমানস্স করুণং পরিদেৰন্তস্স পুরিসস্স অট্টস্সরং সুত্ৰা সযিতট্ঠানতো ৰুট্ঠায নদীতীরং গন্ত্ৰা মহাগঙ্গায মহতি উদকোঘে ৰত্তমানে অত্তনো জীৰিতং পরিচ্চজিত্ৰা ওতরিত্ৰা সোতং পচ্ছিন্দিত্ৰা তং পুরিসং অত্তনো পিট্ঠিযং আরোপেত্ৰা তীরং পাপেত্ৰা সমস্সাসেত্ৰা ফলাফলাদীনি দত্ৰা পরিস্সমৰিনোদনং, পুন তং অত্তনো পিট্ঠিং আরোপেত্ৰা অরঞ্ঞতো নীহরিত্ৰা মহামগ্গে ওতারণং, সরং সন্নয্হিত্ৰা ৰিজ্ঝিস্সামীতি অভিমুখে ঠিতস্স রঞ্ঞো নিব্ভযেন হুত্ৰা পটিমুখমেৰ গন্ত্ৰা পঠমতরং মনুস্সভাসায আলপিত্ৰা মধুরপটিসন্থারকরণং, মিত্তদুব্ভী পাপপুরিসং হন্তুকামং রাজানং ধম্মকথং কত্ৰা পুনপি অত্তনো জীৰিতং পরিচ্চজিত্ৰা মরণতো পমোচনং, তস্স চ রঞ্ঞো যথাপটিঞ্ঞং ধনদাপনং, রঞ্ঞা অত্তনো ৰরে দীযমানে তেন সব্বসত্তানং অভযদাপনং, রাজানঞ্চ দেৰিঞ্চ পমুখং কত্ৰা মহাজনস্স ধম্মং দেসেত্ৰা দানাদীসু পুঞ্ঞেসু তেসং পতিট্ঠাপনং, লদ্ধাভযানং মিগানং ওৰাদং দত্ৰা মনুস্সানং সস্সখাদনতো নিৰারণং, পণ্ণসঞ্ঞায চ তস্স যাৰজ্জকালা থাৰরকরণন্তি এৰমাদযো মহাসত্তস্স গুণানুভাৰা ৰিভাৰেতব্বাতি.

রুরুমিগরাজচরিযাৰণ্ণনা নিট্ঠিতা.

৭. মাতঙ্গচরিযাৰণ্ণনা

৬০. সত্তমে জটিলোতি জটাৰন্তো, জটাবন্ধকেসোতি অত্থো. উগ্গতাপনোতি মনচ্ছট্ঠানং ইন্দ্রিযানং তাপনতো নিগ্গণ্হনতো তপসঙ্খাতং উগ্গতাপনং এতস্সাতি উগ্গতাপনো, ঘোরতপো পরমধিতিন্দ্রিযোতি অত্থো. অথ ৰা নানপ্পকারে দিট্ঠধম্মিকাদিভেদে অনত্থে উগ্গিরণতো বহি ছড্ডাপনতো ঘোরভীমভযানকট্ঠেন ৰা ‘‘উগ্গা’’তি লদ্ধনামে কিলেসে ৰীরিযাতপেন সন্তাপনতো উগ্গে তাপেতীতি উগ্গতাপনো. মাতঙ্গো নাম নামেনাতি নামেন মাতঙ্গো নাম. মাতঙ্গকুলে নিব্বত্তিযা জাতিযা আগতং হিস্স এতং নামং. সীলৰাতি সীলসম্পন্নো সুপরিসুদ্ধসীলো. সুসমাহিতোতি উপচারপ্পনাসমাধীহি সুট্ঠু সমাহিতো, ঝানসমাপত্তিলাভীতি অত্থো.

তদা হি বোধিসত্তো চণ্ডালযোনিযং নিব্বত্তিত্ৰা রূপেন দুদ্দসিকো বহিনগরে চণ্ডালগামে ৰসতি. ‘‘মাতঙ্গপণ্ডিতো’’তি পকাসনামো. অথেকদিৰসং তস্মিং নগরে নক্খত্তে ঘোসিতে যেভুয্যেন নাগরা নক্খত্তং কীল়ন্তি. অঞ্ঞতরাপি ব্রাহ্মণমহাসালকঞ্ঞা সোল়সপন্নরসৰস্সুদ্দেসিকা দেৰকঞ্ঞা ৰিয রূপেন দস্সনীযা পাসাদিকা ‘‘অত্তনো ৰিভৰানুরূপং নক্খত্তং কীল়িস্সামী’’তি পহূতখজ্জভোজ্জাদীনি সকটেসু আরোপেত্ৰা সব্বসেতং ৰল়ৰারথমারুয্হ মহতা পরিৰারেন উয্যানভূমিং গচ্ছতি. দিট্ঠমঙ্গলিকা নামেসা, সা কির দুস্সণ্ঠিতং রূপং ‘‘অৰমঙ্গল’’ন্তি তং দট্ঠুং ন ইচ্ছতি, তেনস্সা ‘‘দিট্ঠমঙ্গলিকা’’ত্ৰেৰ সমঞ্ঞা উদপাদি.

তদা বোধিসত্তো কালস্সেৰ উট্ঠায পটপিলোতিকং নিৰাসেত্ৰা জজ্জরিতমুখভাগং ৰেণুদণ্ডং গহেত্ৰা ভাজনহত্থো নগরং পৰিসতি মনুস্সে দিস্ৰা দূরতোৰ তেসং দূরীকরণত্থং তেন ৰেণুদণ্ডেন সঞ্ঞং করোন্তো. অথ দিট্ঠমঙ্গলিকা ‘‘উস্সরথ উস্সরথা’’তি উস্সারণং করোন্তেহি অত্তনো পুরিসেহি নীযমানা নগরদ্ৰারমজ্ঝে মাতঙ্গং দিস্ৰা ‘‘কো এসো’’তি আহ. ‘‘অয্যে, মাতঙ্গচণ্ডালো’’তি চ ৰুত্তে ‘‘ঈদিসং দিস্ৰা গতানং কুতো ৰুড্ঢী’’তি যানং নিৰত্তাপেসি. মনুস্সা ‘‘যং মযং উয্যানং গন্ত্ৰা বহুং খজ্জভোজ্জাদিং লভেয্যাম, তস্স নো মাতঙ্গেন অন্তরাযো কতো’’তি কুপিতা ‘‘গণ্হথ, চণ্ডাল’’ন্তি লেড্ডূহি পহরিত্ৰা ৰিসঞ্ঞীভূতং পাতেত্ৰা অগমংসু.

সো ন চিরেনেৰ সতিং পটিলভিত্ৰা ৰুট্ঠায মনুস্সে পুচ্ছি – ‘‘কিং, অয্যা, দ্ৰারং নাম সব্বসাধারণং, উদাহু ব্রাহ্মণানং এৰ কত’’ন্তি? ‘‘সব্বেসং সাধারণ’’ন্তি. ‘‘এৰং সব্বসাধারণদ্ৰারে একমন্তং অপক্কমন্তং মং দিট্ঠমঙ্গলিকায মনুস্সা ইমং অনযব্যসনং পাপেসু’’ন্তি রথিকায মনুস্সানং আরোচেত্ৰা ‘‘হন্দাহং ইমিস্সা মানং ভিন্দিস্সামী’’তি তস্সা নিৰেসনদ্ৰারং গন্ত্ৰা ‘‘অহং দিট্ঠমঙ্গলিকং অলদ্ধা ন ৰুট্ঠহিস্সামী’’তি নিপজ্জি. দিট্ঠমঙ্গলিকায পিতা ‘‘ঘরদ্ৰারে মাতঙ্গো নিপন্নো’’তি সুত্ৰা ‘‘তস্স কাকণিকং দেথ, তেলেন সরীরং মক্খেত্ৰা গচ্ছতূ’’তি আহ. সো ‘‘দিট্ঠমঙ্গলিকং অলদ্ধা ন উট্ঠহিস্সামি’’চ্চেৰ আহ. ততো ব্রাহ্মণেন – ‘‘দ্ৰে কাকণিকে দেথ, মাসকং পাদং কহাপণং দ্ৰে তীণি যাৰ কহাপণসতং কহাপণসহস্সং দেথা’’তি ৰুত্তেপি ন সম্পটিচ্ছতি এৰ. এৰং তেসং মন্তেন্তানং এৰ সূরিযো অত্থঙ্গতো.

অথ দিট্ঠমঙ্গলিকায মাতা পাসাদা ওরুয্হ সাণিপাকারং পরিক্খিপাপেত্ৰা তস্স সন্তিকং গন্ত্ৰা ‘‘তাত, মাতঙ্গ, দিট্ঠমঙ্গলিকায অপরাধং খম, দ্ৰে সহস্সানি গণ্হাহি যাৰ সতসহস্সং গণ্হাহী’’তি ৰুত্তেপি ন সম্পটিচ্ছি, নিপজ্জি এৰ. তস্সেৰং ছ দিৰসে নিপজ্জিত্ৰা সত্তমে দিৰসে সম্পত্তে সমন্তা সামন্তঘরা পটিৰিসকঘরা চ মনুস্সা উট্ঠহিত্ৰা ‘‘তুম্হে মাতঙ্গং ৰা উট্ঠাপেথ, দারিকং ৰা দেথ, মা অম্হে নাসযিত্থা’’তি আহংসু. তদা কির অযং তস্মিং দেসে দেসধম্মো ‘‘যস্স ঘরদ্ৰারে এৰং নিপজ্জিত্ৰা চণ্ডালো মরতি, তেন ঘরেন সদ্ধিং সত্তসত্তঘরৰাসিনো চণ্ডালা হোন্তী’’তি.

ততো দিট্ঠমঙ্গলিকায মাতাপিতরো দিট্ঠমঙ্গলিকং পটপিলোতিকং নিৰাসাপেত্ৰা চণ্ডালানুচ্ছৰিকং পরিক্খারং দত্ৰা পরিদেৰমানং এৰ তস্স সন্তিকং নেত্ৰা ‘‘হন্দ, দানি দারিকং উট্ঠায গণ্হাহী’’তি অদংসু. সা পস্সে ঠত্ৰা ‘‘উট্ঠাহী’’তি আহ. সো ‘‘অহং অতিৰিয কিলন্তো, হত্থে গহেত্ৰা মং উট্ঠাপেহী’’তি আহ. সা তথা অকাসি. মাতঙ্গো ‘‘মযং অন্তোনগরে ৰসিতুং ন লভাম, এহি, বহিনগরে চণ্ডালগামং গমিস্সামা’’তি তং অপস্সায অত্তনো গেহং অগমাসি. ‘‘তস্সা পিট্ঠিং অভিরুহিত্ৰা’’তি জাতকভাণকা ৰদন্তি.

এৰং পন গেহং গন্ত্ৰা জাতিসম্ভেদৰীতিক্কমং অকত্ৰাৰ কতিপাহং গেহে ৰসিত্ৰা বলং গহেত্ৰা চিন্তেসি – ‘‘অহং ইমং ব্রাহ্মণমহাসালকঞ্ঞং ময্হং চণ্ডালগেহে ৰাসাপেসিং, হন্দ, দানি তং লাভগ্গযসগ্গপ্পত্তং করিস্সামী’’তি. সো অরঞ্ঞং পৰিসিত্ৰা পব্বজিত্ৰা সত্তাহব্ভন্তরেযেৰ অট্ঠ সমাপত্তিযো পঞ্চাভিঞ্ঞাযো নিব্বত্তেত্ৰা ইদ্ধিযা চণ্ডালগামদ্ৰারে ওতরিত্ৰা গেহদ্ৰারে ঠিতো দিট্ঠমঙ্গলিকং পক্কোসাপেত্ৰা ‘‘সামি, কিস্স মং অনাথং কত্ৰা পব্বজিতোসী’’তি পরিদেৰমানং ‘‘ত্ৰং, ভদ্দে, মা চিন্তযি, তৰ পোরাণকযসতো ইদানি মহন্ততরং যসং করিস্সামি, ত্ৰং পন ‘মহাব্রহ্মা মে সামিকো, ন মাতঙ্গো, সো ব্রহ্মলোকং গতো, ইতো সত্তমে দিৰসে পুণ্ণমায চন্দমণ্ডলং ভিন্দিত্ৰা আগমিস্সতী’তি পরিসাসু ৰদেয্যাসী’’তি ৰত্ৰা হিমৰন্তমেৰ গতো.

দিট্ঠমঙ্গলিকাপি বারাণসিযং মহাজনমজ্ঝে তেসু তেসু ঠানেসু তথা কথেসি. অথ পুণ্ণমদিৰসে বোধিসত্তো চন্দমণ্ডলস্স গগনমজ্ঝে ঠিতকালে ব্রহ্মত্তভাৰং মাপেত্ৰা চন্দমণ্ডলং ভিন্দিত্ৰা দ্ৰাদসযোজনিকং বারাণসিং সকলং কাসিরট্ঠঞ্চ একোভাসং কত্ৰা আকাসতো ওতরিত্ৰা বারাণসিযা উপরি তিক্খত্তুং পরিব্ভমিত্ৰা মহাজনেন গন্ধমালাদীহি পূজিযমানো চণ্ডালগামাভিমুখো অহোসি. ব্রহ্মভত্তা সন্নিপতিত্ৰা তং চণ্ডালগামকং গন্ত্ৰা দিট্ঠমঙ্গলিকায গেহং সুদ্ধৰত্থগন্ধমালাদীহি দেৰৰিমানং ৰিয অলঙ্করিংসু. দিট্ঠমঙ্গলিকা চ তদা উতুনী হোতি. মহাসত্তো তত্থ গন্ত্ৰা দিট্ঠমঙ্গলিকং অঙ্গুট্ঠেন নাভিযং পরামসিত্ৰা ‘‘ভদ্দে, গব্ভো তে পতিট্ঠিতো, ত্ৰং পুত্তং ৰিজাযিস্সসি, ত্ৰম্পি পুত্তোপি তে লাভগ্গযসগ্গপ্পত্তা ভৰিস্সথ, তৰ সীসধোৰনউদকং সকলজম্বুদীপে রাজূনং অভিসেকোদকং ভৰিস্সতি, ন্হানোদকং পন তে অমতোদকং ভৰিস্সতি, যে নং সীসে আসিঞ্চিস্সন্তি, তে সব্বরোগেহি মুচ্চিস্সন্তি, কাল়কণ্ণিযা চ পরিমুচ্চিস্সন্তি, তৰ পাদপিট্ঠে সীসং ঠপেত্ৰা ৰন্দন্তা সহস্সং দস্সন্তি, কথাসৰনট্ঠানে ঠত্ৰা ৰন্দন্তা সতং দস্সন্তি, চক্খুপথে ঠত্ৰা ৰন্দন্তা একেকং কহাপণং দত্ৰা ৰন্দিস্সন্তি, অপ্পমত্তা হোহী’’তি তং ওৰদিত্ৰা গেহা নিক্খম্ম মহাজনস্স পস্সন্তস্সেৰ চন্দমণ্ডলং পাৰিসি.

ব্রহ্মভত্তা সন্নিপতিত্ৰা দিট্ঠমঙ্গলিকং মহন্তেন সক্কারেন নগরং পৰেসেত্ৰা মহন্তেন সিরিসোভগ্গেন তত্থ ৰসাপেসুং. দেৰৰিমানসদিসঞ্চস্সা নিৰেসনং কারেসুং. তত্থ নেত্ৰা উল়ারং লাভসক্কারং উপনামেসুং. পুত্তলাভাদি সব্বো বোধিসত্তেন ৰুত্তসদিসোৰ অহোসি. সোল়সসহস্সা ব্রাহ্মণা দিট্ঠমঙ্গলিকায পুত্তেন সহ নিবদ্ধং ভুঞ্জন্তি, সহস্সমত্তা নং পরিৰারেন্তি, অনেকসহস্সানং দানং দীযতি. অথ মহাসত্তো ‘‘অযং অট্ঠানে অভিপ্পসন্নো, হন্দস্স দক্খিণেয্যে জানাপেস্সামী’’তি ভিক্খায চরন্তো তস্সা গেহং গন্ত্ৰা তেন সদ্ধিং সল্লপিত্ৰা অগমাসি. অথ কুমারো গাথমাহ –

‘‘কুতো নু আগচ্ছসি দুম্মৰাসী, ওতল্লকো পংসুপিসাচকোৰ;

সঙ্কারচোল়ং পটিমুঞ্চ কণ্ঠে, কো রে তুৰং হোসি অদক্খিণেয্যো’’তি. (জা. ১.১৫.১);

তেন ৰুত্তং অনাচারং অসহমানা দেৰতা তস্স তেসঞ্চ সোল়সসহস্সানং ব্রাহ্মণানং মুখং ৰিপরিৰত্তেসুং. তং দিস্ৰা দিট্ঠমঙ্গলিকা মহাসত্তং উপসঙ্কমিত্ৰা তমত্থং আরোচেসি. বোধিসত্তো ‘‘তস্স অনাচারং অসহন্তেহি যক্খেহি সো ৰিপ্পকারো কতো, অপি চ খো পন ইমং উচ্ছিট্ঠপিণ্ডকং তেসং মুখে আসিঞ্চিত্ৰা তং ৰিপ্পকারং ৰূপসমেহী’’তি আহ. সাপি তথা কত্ৰা তং ৰূপসমেসি. অথ দিট্ঠমঙ্গলিকা পুত্তং আহ – ‘‘তাত, ইমস্মিং লোকে দক্খিণেয্যা নাম মাতঙ্গপণ্ডিতসদিসা ভৰন্তি, ন ইমে ব্রাহ্মণা ৰিয জাতিমত্তেন, মন্তসজ্ঝাযনমত্তেন ৰা মানত্থদ্ধা’’তি ৰত্ৰা যে তদা সীলাদিগুণৰিসেসযুত্তা ঝানসমাপত্তিলাভিনো চেৰ পচ্চেকবুদ্ধা চ, তত্থেৰস্স পসাদং উপ্পাদেসীতি.

তদা ৰেত্তৰতীনগরে জাতিমন্তো নাম একো ব্রাহ্মণো পব্বজিত্ৰাপি জাতিং নিস্সায মহন্তং মানমকাসি. মহাসত্তো ‘‘তস্স মানং ভিন্দিস্সামী’’তি তং ঠানং গন্ত্ৰা তস্সাসন্নে উপরিসোতে ৰাসং কপ্পেসি. তেন ৰুত্তং –

৬১.

‘‘অহঞ্চ ব্রাহ্মণো একো, গঙ্গাকূলে ৰসামুভো;

অহং ৰসামি উপরি, হেট্ঠা ৰসতি ব্রাহ্মণো’’তি.

অথ মহাসত্তো একদিৰসং দন্তকট্ঠং খাদিত্ৰা ‘‘ইদং জাতিমন্তস্স জটাসু লগ্গতূ’’তি অধিট্ঠায নদিযং পাতেসি. তং তস্স উদকং আচমেন্তস্স জটাসু লগ্গি, সো তং দিস্ৰা ‘‘নস্স ৰসলা’’তি ৰত্ৰা ‘‘কুতোযং কাল়কণ্ণী আগতো, উপধারেস্সামি ন’’ন্তি উদ্ধংসোতং গচ্ছন্তো মহাসত্তং দিস্ৰা ‘‘কিংজাতিকোসী’’তি পুচ্ছি. ‘‘চণ্ডালোস্মী’’তি. ‘‘তযা নদিযং দন্তকট্ঠং পাতিত’’ন্তি? ‘‘আম, মযা’’তি. ‘‘নস্স, ৰসল, চণ্ডাল, কাল়কণ্ণি, মা ইধ ৰসি, হেট্ঠাসোতে ৰসা’’তি ৰত্ৰা হেট্ঠাসোতে ৰসন্তেনপি পাতিতে দন্তকট্ঠে পটিসোতং আগন্ত্ৰা জটাসু লগ্গন্তে ‘‘নস্স, ৰসল, সচে ইধ ৰসিস্সসি, সত্তমে দিৰসে সত্তধা তে মুদ্ধা ফলিস্সতী’’তি আহ. তেন ৰুত্তং –

৬২.

‘‘ৰিচরন্তো অনুকূলম্হি, উদ্ধং মে অস্সমদ্দস;

তত্থ মং পরিভাসেত্ৰা, অভিসপি মুদ্ধফালন’’ন্তি.

তত্থ ৰিচরন্তো অনুকূলম্হীতি উচ্ছিট্ঠদন্তকট্ঠে অত্তনো জটাসু লগ্গে তস্স আগমনগৰেসনৰসেন গঙ্গায তীরে অনুৰিচরন্তো. উদ্ধং মে অস্সমদ্দসাতি অত্তনো ৰসনট্ঠানতো উপরিসোতে মম অস্সমং পণ্ণসালং অদ্দক্খি. তত্থ মং পরিভাসেত্ৰাতি মম অস্সমং আগন্ত্ৰা জাতিং সুত্ৰা ততোৰ পটিক্কমিত্ৰা সৰনূপচারে ঠত্ৰা ‘‘নস্স, ৰসল চণ্ডাল, কাল়কণ্ণি মা ইধ ৰসী’’তিআদীনি ৰত্ৰা ভযেন সন্তজ্জেত্ৰা. অভিসপি মুদ্ধফালনন্তি ‘‘সচে জীৰিতুকামোসি, এত্তোৰ সীঘং পলাযস্সূ’’তি ৰত্ৰা ‘‘সচে ন পক্কমিস্সতি, ইতো তে সত্তমে দিৰসে সত্তধা মুদ্ধা ফলতূ’’তি মে অভিসপং অদাসি.

কিং পন তস্স অভিসপেন মুদ্ধা ফলতীতি? ন ফলতি, কুহকো পন সো, এৰমযং মরণভযতজ্জিতো সুদূরং পক্কমিস্সতীতি সঞ্ঞায সন্তাসনত্থং তথা আহ.

৬৩. যদিহং তস্স পকুপ্পেয্যন্তি তস্স মানত্থদ্ধস্স কূটজটিলস্স অহং যদি কুজ্ঝেয্যং. যদি সীলং ন গোপযেতি সীলং যদি ন রক্খেয্যং, ইদং সীলং নাম জীৰিতনিরপেক্খং সম্মদেৰ রক্খিতব্বন্তি যদি ন চিন্তেয্যন্তি অত্থো. ওলোকেত্ৰানহং তস্স, করেয্যং ছারিকং ৰিযাতি সচাহং তদা তস্স অপ্পতীতো অভৰিস্সং. মম চিত্তাচারং ঞত্ৰা মযি অভিপ্পসন্না দেৰতা খণেনেৰ তং ভস্মমুট্ঠিং ৰিয ৰিদ্ধংসেয্যুন্তি অধিপ্পাযো. সত্থা পন তদা অত্তনো অপ্পতীতভাৰে সতি দেৰতাহি সাধেতব্বং তস্স অনত্থং অত্তনা কত্তব্বং ৰিয কত্ৰা দেসেসি ‘‘করেয্যং ছারিকং ৰিযা’’তি.

ৰিতণ্ডৰাদী পনাহ – ‘‘বোধিসত্তোৰ তং জটিলং ইচ্ছমানো ইদ্ধিযা ছারিকং করেয্য, এৰঞ্হি সতি ইমিস্সা পাল়িযা অত্থো উজুকমেৰ নীতো হোতী’’তি. সো এৰমস্স ৰচনীযো – ‘‘ত্ৰং ইদ্ধিযা পরূপঘাতং ৰদসি, ইদ্ধি নামেসা অধিট্ঠানা ইদ্ধি, ৰিকুব্বনা ইদ্ধি, মনোমযা ইদ্ধি, ঞাণৰিপ্ফারা ইদ্ধি, সমাধিৰিপ্ফারা ইদ্ধি, অরিযা ইদ্ধি, কম্মৰিপাকজা ইদ্ধি, পুঞ্ঞৰতো ইদ্ধি, ৰিজ্জামযা ইদ্ধি, তত্থ তত্থ সম্মাপযোগপ্পচ্চযা ইজ্ঝনট্ঠেন ইদ্ধীতি দসৰিধা. তত্থ ‘‘কতরং ইদ্ধিং ৰদেসী’’তি? ‘‘ভাৰনাময’’ন্তি. ‘‘কিং পন ভাৰনামযায পরূপঘাতকম্মং হোতী’’তি? আম, একচ্চে আচরিযা ‘‘একৰারং হোতী’’তি ৰদন্তি, যথা হি পরং পহরিতুকামেন উদকভরিতে ঘটে খিত্তে পরোপি পহরীযতি, ঘটোপি ভিজ্জতি, এৰমেৰ ভাৰনামযায ইদ্ধিযা একৰারং পরূপঘাতকম্মং হোতি, ততো পট্ঠায পন সা নস্সতি.

অথ সো ‘‘ভাৰনামযায ইদ্ধিযা নেৰ একৰারং ন দ্ৰেৰারং পরূপঘাতকম্মং হোতী’’তি ৰত্ৰা পুচ্ছিতব্বো ‘‘কিং ভাৰনামযা ইদ্ধি কুসলা অকুসলা অব্যাকতা, সুখায ৰেদনায সম্পযুত্তা দুক্খায ৰেদনায সম্পযুত্তা অদুক্খমসুখায ৰেদনায সম্পযুত্তা, সৰিতক্কসৰিচারা অৰিতক্কৰিচারমত্তা অৰিতক্কঅৰিচারা, কামাৰচরা রূপাৰচরা অরূপাৰচরা’’তি? জানন্তো ‘‘ভাৰনামযা ইদ্ধি কুসলা অব্যাকতা ৰা অদুক্খমসুখৰেদনিযা অৰিতক্কঅৰিচারা রূপাৰচরা চা’’তি ৰক্খতি. সো ৰত্তব্বো ‘‘পাণাতিপাতচেতনা কুসলাদীসু কতরং কোট্ঠাসং ভজতী’’তি? জানন্তো ৰক্খতি ‘‘পাণাতিপাতচেতনা অকুসলাৰ দুক্খৰেদনাৰ সৰিতক্কসৰিচারাৰ কামাৰচরাৰা’’তি. এৰং সন্তে ‘‘তৰ পঞ্হো নেৰ কুসলত্তিকেন সমেতি, ন ৰেদনাত্তিকেন ন ৰিতক্কত্তিকেন ন ভূমন্তরেনা’’তি পাল়িযা ৰিরোধং দস্সেত্ৰা সঞ্ঞাপেতব্বো. যদি পন সো ‘‘পুন চপরং, ভিক্খৰে, ইধেকচ্চো সমণো ৰা ব্রাহ্মণো ৰা ইদ্ধিমা চেতোৰসিপ্পত্তো অঞ্ঞিস্সা কুচ্ছিগতং গব্ভং পাপকেন মনসানুপেক্খিতা হোতি ‘অহো ৰত যং তং কুচ্ছিগতং গব্ভং ন সোত্থিনা অভিনিক্খমেয্যা’তি. এৰম্পি, ভিক্খৰে, কুলুম্পস্স উপঘাতো হোতী’’তি সঙ্গীতিং অনারুল়্হং কুলুম্পসুত্তং উদাহরেয্য. তস্সাপি ‘‘ত্ৰং অত্থং ন জানাসি. ইদ্ধিমা চেতোৰসিপ্পত্তোতি হি এত্থ ন ভাৰনামযা ইদ্ধি অধিপ্পেতা, আথব্বনিকা ইদ্ধি অধিপ্পেতা. সা হি এত্থ লব্ভমানা লব্ভতীতি ভাৰনামযায ইদ্ধিযা পরূপঘাতো ন সম্ভৰতিযেৰা’’তি সঞ্ঞাপেতব্বো. নো চে সঞ্ঞত্তিং উপেতি, কম্মং কত্ৰা উয্যোজেতব্বো. তস্মা যথাৰুত্তনযেনেৰেত্থ গাথায অত্থো ৰেদিতব্বো.

তথা পন তেন অভিসপিতো মহাসত্তো ‘‘সচাহং এতস্স কুজ্ঝিস্সামি, সীলং মে অরক্খিতং ভৰিস্সতি, উপাযেনেৰস্স মানং ভিন্দিস্সামি, সা চস্স রক্খা ভৰিস্সতী’’তি সত্তমে দিৰসে সূরিযুগ্গমনং ৰারেসি. মনুস্সা সূরিযস্স অনুগ্গমনেন উব্বাল়্হা জাতিমন্ততাপসং উপসঙ্কমিত্ৰা ‘‘ভন্তে, তুম্হে সূরিযস্স উগ্গন্তুং ন দেথা’’তি পুচ্ছিংসু. সো ‘‘ন মেতং কম্মং, গঙ্গাতীরে পন একো চণ্ডালতাপসো ৰসতি, তস্সেতং কম্মং সিযা’’তি আহ. মনুস্সা মহাসত্তং উপসঙ্কমিত্ৰা ‘‘ভন্তে, তুম্হে সূরিযস্স উগ্গন্তুং ন দেথা’’তি পুচ্ছিংসু. ‘‘আমাৰুসো’’তি. ‘‘কিংকারণা’’তি? ‘‘তুম্হাকং কুলূপকতাপসো মং নিরপরাধং অভিসপি, তস্মিং আগন্ত্ৰা খমাপনত্থং মম পাদেসু পতিতে সূরিযং ৰিস্সজ্জেস্সামী’’তি. তে গন্ত্ৰা তং আকড্ঢন্তা আনেত্ৰা মহাসত্তস্স পাদমূলে নিপজ্জাপেত্ৰা খমাপেত্ৰা ‘‘সূরিযং ৰিস্সজ্জেথ, ভন্তে’’তি আহংসু. ‘‘ন সক্কা ৰিস্সজ্জেতুং, সচাহং ৰিস্সজ্জেস্সামি, ইমস্স সত্তধা মুদ্ধা ফলিস্সতী’’তি. ‘‘অথ, ভন্তে, কিং করোমা’’তি. মহাসত্তো ‘‘মত্তিকাপিণ্ডং আহরথা’’তি আহরাপেত্ৰা ‘‘ইমং তাপসস্স সীসে ঠপেত্ৰা তাপসং ওতারেত্ৰা উদকে ঠপেথ, যদা সূরিযো দিস্সতি, তদা তাপসো উদকে নিমুজ্জতূ’’তি ৰত্ৰা সূরিযং ৰিস্সজ্জেসি. সূরিযরস্মীহি ফুট্ঠমত্তেৰ মত্তিকাপিণ্ডো সত্তধা ভিজ্জি. তাপসো উদকে নিমুজ্জি. তেন ৰুত্তং –

৬৪.

‘‘যং সো তদা মং অভিসপি, কুপিতো দুট্ঠমানসো;

তস্সেৰ মত্থকে নিপতি, যোগেন তং পমোচযি’’ন্তি.

তত্থ যং সো তদা মং অভিসপীতি সো জাতিমন্তজটিলো যং মুদ্ধফালনং সন্ধায তদা মং অভিসপি, ময্হং সপং অদাসি. তস্সেৰ মত্থকে নিপতীতি তং ময্হং উপরি তেন ইচ্ছিতং তস্সেৰ পন উপরি নিপতি নিপতনভাৰেন অট্ঠাসি. এৰঞ্হেতং হোতি যথা তং অপ্পদুট্ঠস্স পদুস্সতো. ৰুত্তঞ্হেতং ভগৰতা – ‘‘যো অপ্পদুট্ঠস্স নরস্স দুস্সতি…পে… পটিৰাতংৰ খিত্তো’’তি (ধ. প. ১২৫; সু. নি. ৬৬৭; জা. ১.৫.৯৪). যোগেন তং পমোচযিন্তি তং তস্স ভাসিতং মত্থকফালনং উপাযেন ততো পমোচেসিং, তং ৰা জটিলং ততো পমোচেসিং, যেন উপাযেন তং ন হোতি, তথা অকাসিন্তি অত্থো.

যঞ্হি তেন পারমিতাপরিভাৰনসমিদ্ধাহি নানাসমাপত্তিৰিহারপরিপূরিতাহি সীলদিট্ঠিসম্পদাহি সুসঙ্খতসন্তানে মহাকরুণাধিৰাসে মহাসত্তে অরিযূপৰাদকম্মং অভিসপসঙ্খাতং ফরুসৰচনং পযুত্তং, তং মহাসত্তস্স খেত্তৰিসেসভাৰতো তস্স চ অজ্ঝাসযফরুসতায দিট্ঠধম্মৰেদনীযং হুত্ৰা সচে সো মহাসত্তং ন খমাপেসি, সত্তমে দিৰসে ৰিপচ্চনসভাৰং জাতং, খমাপিতে পন মহাসত্তে পযোগসম্পত্তিপটিবাহিতত্তা অৰিপাকধম্মতং আপজ্জি অহোসিকম্মভাৰতো. অযঞ্হি অরিযূপৰাদপাপস্স দিট্ঠধম্মৰেদনীযস্স চ ধম্মতা. তত্থ যং সত্তমে দিৰসে বোধিসত্তেন সূরিযুগ্গমননিৰারণং কতং, অযমেত্থ যোগোতি অধিপ্পেতো উপাযো. তেন হি উব্বাল়্হা মনুস্সা বোধিসত্তস্স সন্তিকে তাপসং আনেত্ৰা খমাপেসুং. সোপি চ মহাসত্তস্স গুণে জানিত্ৰা তস্মিং চিত্তং পসাদেসীতি ৰেদিতব্বং. যং পনস্স মত্থকে মত্তিকাপিণ্ডস্স ঠপনং, তস্স চ সত্তধা ফালনং কতং, তং মনুস্সানং চিত্তানুরক্খণত্থং, অঞ্ঞথা হি ইমে পব্বজিতাপি সমানা চিত্তস্স ৰসে ৰত্তন্তি, ন পন চিত্তং অত্তনো ৰসে ৰত্তাপেন্তীতি মহাসত্তম্পি তেন সদিসং কত্ৰা গণ্হেয্যুং. তদস্স নেসং দীঘরত্তং অহিতায দুক্খাযাতি.

৬৫. ইদানি যদত্থং তদা তস্মিং তাপসে চিত্তং অদূসেত্ৰা সুপরিসুদ্ধং সীলমেৰ রক্খিতং, তং দস্সেতুং ‘‘অনুরক্খিং মম সীল’’ন্তি ওসানগাথমাহ. তং হেট্ঠা ৰুত্তত্থমেৰ.

তদা মণ্ডব্যো উদেনো, মাতঙ্গো লোকনাথো.

ইধাপি সেসপারমিযো নিদ্ধারেতব্বা. তথা নিহীনজাতিকস্স সতো যথাধিপ্পাযং দিট্ঠমঙ্গলিকায মাননিগ্গহো, পব্বজিত্ৰা ‘‘দিট্ঠমঙ্গলিকায অৰস্সযো ভৰিস্সামী’’তি উপ্পন্নচিত্তো অরঞ্ঞং গন্ত্ৰা পব্বজিত্ৰা সত্তদিৰসব্ভন্তরেযেৰ যথাধিপ্পাযং ঝানাভিঞ্ঞানিব্বত্তনং, ততো আগন্ত্ৰা দিট্ঠমঙ্গলিকায লাভগ্গযসগ্গপ্পত্তিযা উপাযসম্পাদনং, মণ্ডব্যকুমারস্স মাননিগ্গহো, জাতিমন্ততাপসস্স মাননিগ্গহো, তস্স চ অজানন্তস্সেৰ ভাৰিনো জীৰিতন্তরাযস্স অপনযনং, মহাপরাধস্সাপি তস্স অকুজ্ঝিত্ৰা অত্তনো সীলানুরক্খণং, অচ্ছরিযব্ভুতপাটিহারিযকরণন্তি এৰমাদযো মহাসত্তস্স গুণানুভাৰা ৰিভাৰেতব্বা.

মাতঙ্গচরিযাৰণ্ণনা নিট্ঠিতা.

৮. ধম্মদেৰপুত্তচরিযাৰণ্ণনা

৬৬. অট্ঠমে মহাপক্খোতি মহাপরিৰারো. মহিদ্ধিকোতি মহতিযা দেৰিদ্ধিযা সমন্নাগতো. ধম্মো নাম মহাযক্খোতি নামেন ধম্মো নাম মহানুভাৰো দেৰপুত্তো. সব্বলোকানুকম্পকোতি ৰিভাগং অকত্ৰা মহাকরুণায সব্বলোকং অনুগ্গণ্হনকো.

মহাসত্তো হি তদা কামাৰচরদেৰলোকে ধম্মো নাম দেৰপুত্তো হুত্ৰা নিব্বত্তি. সো দিব্বালঙ্কারপটিমণ্ডিতো দিব্বরথমভিরুয্হ অচ্ছরাগণপরিৰুতো মনুস্সেসু সাযমাসং ভুঞ্জিত্ৰা অত্তনো অত্তনো ঘরদ্ৰারেসু সুখকথায নিসিন্নেসু পুণ্ণমুপোসথদিৰসে গামনিগমরাজধানীসু আকাসে ঠত্ৰা ‘‘পাণাতিপাতাদীহি দসহি অকুসলকম্মপথেহি ৰিরমিত্ৰা তিৰিধসুচরিতধম্মং পূরেথ, মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো ভৰথ, সগ্গপরাযনা হুত্ৰা মহন্তং যসং অনুভৰিস্সথা’’তি মনুস্সে দসকুসলকম্মপথে সমাদপেন্তো জম্বুদীপং পদক্খিণং করোতি. তেন ৰুত্তং –

৬৭.

‘‘দসকুসলকম্মপথে, সমাদপেন্তো মহাজনং;

চরামি গামনিগমং, সমিত্তো সপরিজ্জনো’’তি.

তত্থ সমিত্তোতি ধম্মিকেহি ধম্মৰাদীহি সহাযেহি সসহাযো.

তেন চ সমযেন অধম্মো নামেকো দেৰপুত্তো কামাৰচরদেৰলোকে নিব্বত্তি. ‘‘সো পাণং হনথ, অদিন্নং আদিযথা’’তিআদিনা নযেন সত্তে অকুসলকম্মপথে সমাদপেন্তো মহতিযা পরিসায পরিৰুতো জম্বুদীপং ৰামং করোতি. তেন ৰুত্তং –

৬৮.

‘‘পাপো কদরিযো যক্খো, দীপেন্তো দস পাপকে;

সোপেত্থ মহিযা চরতি, সমিত্তো সপরিজ্জনো’’তি.

তত্থ পাপোতি পাপধম্মেহি সমন্নাগতো. কদরিযোতি থদ্ধমচ্ছরী. যক্খোতি দেৰপুত্তো. দীপেন্তো দস পাপকেতি সব্বলোকে গোচরং নাম সত্তানং উপভোগপরিভোগায জাতং. তস্মা সত্তে ৰধিত্ৰা যংকিঞ্চি কত্ৰা চ অত্তা পীণেতব্বো, ইন্দ্রিযানি সন্তপ্পেতব্বানীতিআদিনা নযেন পাণাতিপাতাদিকে দস লামকধম্মে কত্তব্বে কত্ৰা পকাসেন্তো. সোপেত্থাতি সোপি অধম্মো দেৰপুত্তো ইমস্মিং জম্বুদীপে. মহিযাতি ভূমিযা আসন্নে, মনুস্সানং দস্সনসৰনূপচারেতি অত্থো.

৬৯. তত্থ যে সত্তা সাধুকম্মিকা ধম্মগরুনো, তে ধম্মং দেৰপুত্তং তথা আগচ্ছন্তমেৰ দিস্ৰা আসনা ৰুট্ঠায গন্ধমালাদীহি পূজেন্তা যাৰ চক্খুপথসমতিক্কমনা তাৰ অভিত্থৰন্তি, পঞ্জলিকা নমস্সমানা তিট্ঠন্তি, তস্স ৰচনং সুত্ৰা অপ্পমত্তা সক্কচ্চং পুঞ্ঞানি করোন্তি. যে পন সত্তা পাপসমাচারা কুরূরকম্মন্তা, তে অধম্মস্স ৰচনং সুত্ৰা অব্ভনুমোদন্তি, ভিয্যোসোমত্তায পাপানি সমাচরন্তি. এৰং তে তদা অঞ্ঞমঞ্ঞস্স উজুৰিপচ্চনীকৰাদা চেৰ উজুৰিপচ্চনীককিরিযা চ হুত্ৰা লোকে ৰিচরন্তি. তেনাহ ভগৰা ‘‘ধম্মৰাদী অধম্মো চ, উভো পচ্চনিকা ময’’ন্তি.

এৰং পন গচ্ছন্তে কালে অথেকদিৰসং তেসং রথা আকাসে সম্মুখা অহেসুং. অথ নেসং পরিসা ‘‘তুম্হে কস্স, তুম্হে কস্সা’’তি পুচ্ছিত্ৰা ‘‘মযং ধম্মস্স, মযং অধম্মস্সা’’তি ৰত্ৰা মগ্গা ওক্কমিত্ৰা দ্ৰিধা জাতা. ধম্মস্স পন অধম্মস্স চ রথা অভিমুখা হুত্ৰা ঈসায ঈসং আহচ্চ অট্ঠংসু. ‘‘তৰ রথং ওক্কমাপেত্ৰা ময্হং মগ্গং দেহি, তৰ রথং ওক্কমাপেত্ৰা ময্হং মগ্গং দেহী’’তি অঞ্ঞমঞ্ঞং মগ্গদাপনত্থং ৰিৰাদং অকংসু. পরিসা চ নেসং আৰুধানি অভিহরিত্ৰা যুদ্ধসজ্জা অহেসুং. যং সন্ধায ৰুত্তং –

‘‘ধুরে ধুরং ঘট্টযন্তা, সমিম্হা পটিপথে উভো’’.

৭০.

‘‘কলহো ৰত্ততী ভেস্মা, কল্যাণপাপকস্স চ;

মগ্গা ওক্কমনত্থায, মহাযুদ্ধো উপট্ঠিতো’’তি.

তত্থ ধুরে ধুরন্তি একস্স রথীসায ইতরস্স রথীসং ঘট্টযন্তা. সমিম্হাতি সমাগতা সম্মুখীভূতা. পুন উভোতি ৰচনং উভোপি মযং অঞ্ঞমঞ্ঞস্স পচ্চনীকা হুত্ৰা লোকে ৰিচরন্তা একদিৰসং পটিমুখং আগচ্ছন্তা দ্ৰীসু পরিসাসু উভোসু পস্সেসু মগ্গতো ওক্কন্তাসু সহ রথেন মযং উভো এৰ সমাগতাতি দস্সনত্থং ৰুত্তং. ভেস্মাতি ভযজনকো. কল্যাণপাপকস্স চাতি কল্যাণস্স চ পাপকস্স চ. মহাযুদ্ধো উপট্ঠিতোতি মহাসঙ্গামো পচ্চুপট্ঠিতো আসি.

অঞ্ঞমঞ্ঞস্স হি পরিসায চ যুজ্ঝিতুকামতা জাতা. তত্থ হি ধম্মো অধম্মং আহ – ‘‘সম্ম, ত্ৰং অধম্মো, অহং ধম্মো, মগ্গো ময্হং অনুচ্ছৰিকো, তৰ রথং ওক্কমাপেত্ৰা ময্হং মগ্গং দেহী’’তি. ইতরো ‘‘অহং দল়্হযানো বলৰা অসন্তাসী, তস্মা মগ্গং ন দেমি, যুদ্ধং পন করিস্সামি, যো যুদ্ধে জিনিস্সতি, তস্স মগ্গো হোতূ’’তি আহ. তেনেৰাহ –

‘‘যসোকরো পুঞ্ঞকরোহমস্মি, সদাত্থুতো সমণব্রাহ্মণানং;

মগ্গারহো দেৰমনুস্সপূজিতো, ধম্মো অহং দেহি অধম্ম মগ্গং.

‘‘অধম্মযানং দল়্হমারুহিত্ৰা, অসন্তসন্তো বলৰাহমস্মি;

স কিস্স হেতুম্হি তৰজ্জ দজ্জং, মগ্গং অহং ধম্ম অদিন্নপুব্বং.

‘‘ধম্মো হৰে পাতুরহোসি পুব্বে, পচ্ছা অধম্মো উদপাদি লোকে;

জেট্ঠো চ সেট্ঠো চ সনন্তনো চ, উয্যাহি জেট্ঠস্স কনিট্ঠ মগ্গা.

‘‘ন যাচনায নপি পাতিরূপা, ন অরহতা তেহং দদেয্য মগ্গং;

যুদ্ধঞ্চ নো হোতু উভিন্নমজ্জ, যুদ্ধম্হি যো জেস্সতি তস্স মগ্গো.

‘‘সব্বা দিসা অনুৰিসটোহমস্মি, মহব্বলো অমিতযসো অতুল্যো;

গুণেহি সব্বেহি উপেতরূপো, ধম্মো অধম্ম ত্ৰং কথং ৰিজেস্সসি.

‘‘লোহেন ৰে হঞ্ঞতি জাতরূপং, ন জাতরূপেন হনন্তি লোহং;

সচে অধম্মো হঞ্ছতি ধম্মমজ্জ, অযো সুৰণ্ণং ৰিয দস্সনেয্যং.

‘‘সচে তুৰং যুদ্ধবলো অধম্ম, ন তুয্হং ৰুড্ঢা চ গরূ চ অত্থি;

মগ্গঞ্চ তে দম্মি পিযাপ্পিযেন, ৰাচা দুরুত্তানিপি তে খমামী’’তি. (জা. ১.১১.২৬-৩২);

ইমা হি তেসং ৰচনপটিৰচনকথা.

তত্থ যসোকরোতি ধম্মে নিযোজনৰসেন দেৰমনুস্সানং যসদাযকো. দুতিযপদেপি এসেৰ নযো. সদাত্থুতোতি সদা থুতো নিচ্চপ্পসত্থো. স কিস্স হেতুম্হি তৰজ্জ দজ্জন্তি সোম্হি অহং অধম্মো অধম্মযানরথং অভিরুল়্হো অভীতো বলৰা, কিংকারণা অজ্জ, ভো ধম্ম, কস্সচি অদিন্নপুব্বং মগ্গং তুয্হং দম্মি. পাতুরহোসীতি পঠমকপ্পিককালে ইমস্মিং লোকে দসকুসলকম্মপথধম্মো পুব্বে পাতুরহোসি, পচ্ছা অধম্মো. জেট্ঠো চাতি পুরে নিব্বত্তভাৰেন অহং জেট্ঠো চ সেট্ঠো চ পোরাণকো চ, ত্ৰং পন কনিট্ঠো, তস্মা ‘‘মগ্গা উয্যাহী’’তি ৰদতি.

নপি পাতিরূপাতি অহঞ্হি ভোতো নেৰ যাচনায ন পটিরূপৰচনেন ন মগ্গারহতায মগ্গং দদেয্যং. অনুৰিসটোতি অহং চতস্সো দিসা চতস্সো অনুদিসাতি সব্বা দিসা অত্তনো গুণেন পত্থটো পঞ্ঞাতো. লোহেনাতি অযোমুট্ঠিকেন. হঞ্ছতীতি হনিস্সতি. যুদ্ধবলো অধম্মাতি সচে তুৰং যুদ্ধবলো অসি অধম্ম. ৰুড্ঢা চ গরূ চাতি যদি তুয্হং ইমে ৰুড্ঢা ইমে গরূ পণ্ডিতাতি এতং নত্থি. পিযাপ্পিযেনাতি পিযেন ৰিয অপ্পিযেন, অপ্পিযেনপি দদন্তো (জা. অট্ঠ. ৪.১১.৩২) পিযেন ৰিয তে মগ্গং দদামীতি অত্থো.

৭১. মহাসত্তো হি তদা চিন্তেসি – ‘‘সচাহং ইমং পাপপুগ্গলং সব্বলোকস্স অহিতায পটিপন্নং এৰং মযা ৰিলোমগ্গাহং গহেত্ৰা ঠিতং অচ্ছরং পহরিত্ৰা ‘অনাচার মা ইধ তিট্ঠ, সীঘং পটিক্কম ৰিনস্সা’তি ৰদেয্যং, সো তঙ্খণঞ্ঞেৰ মম ধম্মতেজেন ভুসমুট্ঠি ৰিয ৰিকিরেয্য, ন খো পন মেতং পতিরূপং, স্ৰাহং সব্বলোকং অনুকম্পন্তো ‘লোকত্থচরিযং মত্থকং পাপেস্সামী’তি পটিপজ্জামি, অযং খো পন পাপো আযতিং মহাদুক্খভাগী, স্ৰাযং মযা ৰিসেসতো অনুকম্পিতব্বো, তস্মাস্স মগ্গং দস্সামি, এৰং মে সীলং সুৰিসুদ্ধং অখণ্ডিতং ভৰিস্সতী’’তি. এৰং পন চিন্তেত্ৰা বোধিসত্তে ‘‘সচে তুৰং যুদ্ধবলো’’তি গাথং ৰত্ৰা থোকং মগ্গতো ওক্কন্তমত্তে এৰ অধম্মো রথে ঠাতুং অসক্কোন্তো অৰংসিরো পথৰিযং পতিত্ৰা পথৰিযা ৰিৰরে দিন্নে গন্ত্ৰা অৰীচিম্হি এৰ নিব্বত্তি. তেন ৰুত্তং ‘‘যদিহং তস্স কুপ্পেয্য’’ন্তিআদি.

তত্থ যদিহং তস্স কুপ্পেয্যন্তি তস্স অধম্মস্স যদি অহং কুজ্ঝেয্যং. যদি ভিন্দে তপোগুণন্তি তেনেৰস্স কুজ্ঝনেন ময্হং তপোগুণং সীলসংৰরং যদি ৰিনাসেয্যং. সহপরিজনং তস্সাতি সপরিজনং তং অধম্মং. রজভূতন্তি রজমিৰ ভূতং, রজভাৰং পত্তং অহং করেয্যং.

৭২. অপিচাহন্তি এত্থ অহন্তি নিপাতমত্তং. সীলরক্খাযাতি সীলরক্খণত্থং. নিব্বাপেত্ৰানাতি পটিকচ্চেৰ খন্তিমেত্তানুদ্দযস্স উপট্ঠাপিতত্তা তস্মিং অধম্মে উপ্পজ্জনককোধস্স অনুপ্পাদনেনেৰ দোসপরিল়াহৰূপসমনেন মানসং ৰূপসমেত্ৰা. সহ জনেনোক্কমিত্ৰাতি ময্হং পরিজনেন সদ্ধিং মগ্গা ওক্কমিত্ৰা তস্স পাপস্স অধম্মস্স অহং মগ্গং অদাসিং.

৭৩. সহ পথতো ওক্কন্তেতি ৰুত্তনযেন চিত্তস্স ৰূপসমং কত্ৰা ‘‘মগ্গং তে দম্মী’’তি চ ৰত্ৰা থোকং মগ্গতো সহ ওক্কমনেন. পাপযক্খস্সাতি অধম্মদেৰপুত্তস্স. তাৰদেতি তঙ্খণং এৰ মহাপথৰী ৰিৰরমদাসি. জাতকট্ঠকথাযং পন ‘‘মগ্গঞ্চ তে দম্মী’’তি গাথায কথিতক্খণেযেৰাতি ৰুত্তং.

এৰং তস্মিং ভূমিযং পতিতে চতুনহুতাধিকদ্ৰিযোজনসতসহস্সবহলা সকলং ৰরাৰরং ধারেন্তীপি মহাপথৰী ‘‘নাহমিমং পাপপুরিসং ধারেমী’’তি কথেন্তী ৰিয তেন ঠিতট্ঠানে দ্ৰিধা ভিজ্জি. মহাসত্তো পন তস্মিং নিপতিত্ৰা অৰীচিম্হি নিব্বত্তে রথধুরে যথাঠিতোৰ সপরিজনো মহতা দেৰানুভাৰেন গমনমগ্গেনেৰ গন্ত্ৰা অত্তনো ভৰনং পাৰিসি. তেনাহ ভগৰা –

‘‘খন্তীবলো যুদ্ধবলং ৰিজেত্ৰা, হন্ত্ৰা অধম্মং নিহনিত্ৰ ভূম্যা;

পাযাসি ৰিত্তো অভিরুয্হ সন্দনং, মগ্গেনেৰ অতিবলো সচ্চনিক্কমো’’তি. (জা. ১.১১.৩৪);

তদা অধম্মো দেৰদত্তো অহোসি, তস্স পরিসা দেৰদত্তপরিসা, ধম্মো লোকনাথো, তস্স পরিসা বুদ্ধপরিসা.

ইধাপি হেট্ঠা ৰুত্তনযেনেৰ সেসপারমিযো যথারহং নিদ্ধারেতব্বা. তথা ইধাপি দিব্বেহি আযুৰণ্ণযসসুখআধিপতেয্যেহি দিব্বেহেৰ উল়ারেহি কামগুণেহি সমপ্পিতস্স সমঙ্গীভূতস্স অনেকসহস্সসঙ্খাহি অচ্ছরাহি সব্বকালং পরিচারিযমানস্স মহতি পমাদট্ঠানে ঠিতস্স সতো ঈসকম্পি পমাদং অনাপজ্জিত্ৰা ‘‘লোকত্থচরিযং মত্থকং পাপেস্সামী’’তি মাসে মাসে পুণ্ণমিযং ধম্মং দীপেন্তো সপরিজনো মনুস্সপথে ৰিচরিত্ৰা মহাকরুণায সব্বসত্তে অধম্মতো ৰিৰেচেত্ৰা ধম্মে নিযোজনং, অধম্মেন সমাগতোপি তেন কতং অনাচারং অগণেত্ৰা তত্থ চিত্তং অকোপেত্ৰা খন্তিমেত্তানুদ্দযমেৰ পচ্চুপট্ঠপেত্ৰা অখণ্ডং সুৰিসুদ্ধঞ্চ কত্ৰা অত্তনো সীলস্স রক্খণন্তি এৰমাদযো মহাসত্তস্স গুণানুভাৰা ৰিভাৰেতব্বাতি.

ধম্মদেৰপুত্তচরিযাৰণ্ণনা নিট্ঠিতা.

৯. অলীনসত্তুচরিযাৰণ্ণনা

৭৪. নৰমে পঞ্চালরট্ঠেতি এৰংনামকে জনপদে. নগরৰরে, কপিলাযন্তি ‘‘কপিলা’’তি এৰংলদ্ধনামে উত্তমনগরে. ‘‘নগরৰরে’’তি ৰত্ৰা পুন ‘‘পুরুত্তমে’’তি ৰচনং তস্মিং কালে জম্বুদীপে সব্বনগরানং তস্স নগরস্স অগ্গনগরভাৰদস্সনত্থং. জযদ্দিসো নামাতি রঞ্ঞা অত্তনো পচ্চত্থিকে জিতে জাতো, অত্তনো ৰা পচ্চামিত্তভূতং যক্খিনীসঙ্খাতং জযদ্দিসং জিতোতি এৰংলদ্ধনামো. সীলগুণমুপাগতোতি আচারসীলঞ্চেৰ উস্সাহসম্পত্তিযাদিরাজগুণঞ্চ উপাগতো, তেন সমন্নাগতোতি অত্থো.

৭৫. তস্স রঞ্ঞোতি জযদ্দিসরাজস্স, অহং পুত্তো অহোসিন্তি ৰচনসেসো. সুতধম্মোতি যাৰতা রাজপুত্তেন সোতব্বধম্মো নাম, তস্স সব্বস্স সুতত্তা সুতধম্মো, বহুস্সুতোতি অত্থো. অথ ৰা সুতধম্মোতি ৰিস্সুতধম্মো, ধম্মচরিযায সমচরিযায পকাসো পঞ্ঞাতো, লোকে পত্থটকিত্তিধম্মোতি অত্থো. অলীনসত্তোতি এৰংনামো. গুণৰাতি উল়ারেহি মহাপুরিসগুণেহি সমন্নাগতো. অনুরক্খপরিজনো সদাতি সদ্ধাদিগুণৰিসেসযোগতো চতূহি সঙ্গহৰত্থূহি সম্মদেৰ সঙ্গহণতো চ সব্বকালং সম্ভত্তপরিৰারজনো.

৭৬. পিতা মে মিগৰং গন্ত্ৰা, পোরিসাদং উপাগমীতি ময্হং পিতা জযদ্দিসরাজা মিগৰং চরন্তো অরঞ্ঞমজ্ঝং গন্ত্ৰা পোরিসাদং মনুস্সখাদকং যক্খিনিপুত্তং উপগঞ্ছি, তেন সমাগমি.

জযদ্দিসরাজা কির একদিৰসং ‘‘মিগৰং গমিস্সামী’’তি তদনুরূপেন মহতা পরিৰারেন কপিলনগরতো নিক্খমি. তং নিক্খন্তমত্তমেৰ তক্কসিলাৰাসী নন্দো নাম ব্রাহ্মণো চতস্সো সতারহা গাথা নাম কথেতুং আদায উপসঙ্কমিত্ৰা অত্তনো আগমনকারণং রঞ্ঞো আরোচেসি. রাজা ‘‘নিৰত্তিত্ৰা সুণিস্সামী’’তি তস্স ৰসনগেহং পরিব্বযঞ্চ দাপেত্ৰা অরঞ্ঞং পৰিট্ঠো ‘‘যস্স পস্সেন মিগো পলাযতি, তস্সেৰ সো গীৰা’’তি ৰত্ৰা মিগে পরিযেসন্তো ৰিচরতি. অথেকো পসদমিগো মহাজনস্স পদসদ্দেন আসযতো নিক্খমিত্ৰা রঞ্ঞো অভিমুখো গন্ত্ৰা পলাযি. অমচ্চা পরিহাসং করিংসু. রাজা তং অনুবন্ধিত্ৰা তিযোজনমত্থকে তং পরিক্খীণজৰং ঠিতং ৰিজ্ঝিত্ৰা পাতেসি. পতিতং খগ্গেন দ্ৰিধা কত্ৰা অনত্থিকোপি ‘‘মংসেন মিগং গহেতুং নাসক্খী’’তি ৰচনমোচনত্থং কাজে কত্ৰা আগচ্ছন্তো একস্স নিগ্রোধস্স মূলে দব্বতিণেসু নিসীদিত্ৰা থোকং ৰিস্সমিত্ৰা গন্তুং আরভি.

তেন চ সমযেন তস্সেৰ রঞ্ঞো জেট্ঠভাতা জাতদিৰসে এৰ একায যক্খিনিযা খাদিতুং গহিতো আরক্খমনুস্সেহি অনুবদ্ধায তায নিদ্ধমনমগ্গেন গচ্ছন্তিযা উরে ঠপিতো মাতুসঞ্ঞায মুখেন থনগ্গহণেন পুত্তসিনেহং উপ্পাদেত্ৰা সংৰড্ঢিযমানো তদাহারোপযোগিতায মনুস্সমংসং খাদন্তো অনুক্কমেন ৰুদ্ধিপ্পত্তো অত্তানং অন্তরধাপনত্থং যক্খিনিযা দিন্নওসধমূলানুভাৰেন অন্তরহিতো হুত্ৰা মনুস্সমংসং খাদিত্ৰা জীৰন্তো তায যক্খিনিযা মতায তং ওসধমূলং অত্তনো পমাদেন নাসেত্ৰা দিস্সমানরূপোৰ মনুস্সমংসং খাদন্তো নগ্গো উব্বিগ্গৰিরূপদস্সনো রাজপুরিসেহি পস্সিত্ৰা অনুবদ্ধো পলাযিত্ৰা অরঞ্ঞং পৰিসিত্ৰা তস্স নিগ্রোধস্স মূলে ৰাসং কপ্পেন্তো রাজানং দিস্ৰা ‘‘ভক্খোসি মে’’তি হত্থে অগ্গহেসি. তেন ৰুত্তং ‘‘সো মে পিতুমগ্গহেসি, ভক্খোসি মম মা চলী’’তিআদি.

তত্থ সো মে পিতুমগ্গহেসীতি সো পোরিসাদো মম পিতরং জযদ্দিসরাজানং অত্তনো নিসিন্নরুক্খসমীপমাগতং ‘‘মম ভক্খো ত্ৰং আগতোসি, হত্থপরিপ্ফন্দনাদিৰসেন মা চলি, চলন্তম্পি অহং তং খাদিস্সামী’’তি হত্থে অগ্গহেসি.

৭৭. তস্সাতি তস্স যক্খিনিপুত্তস্স. তসিতৰেধিতোতি চিত্তুত্রাসেন তসিতো সরীরপরিকম্পেন ৰেধিতো. ঊরুক্খম্ভোতি উভিন্নং ঊরূনং থদ্ধভাৰো, যেন সো ততো পলাযিতুং নাসক্খি.

মিগৰং গহেত্ৰা মুঞ্চস্সূতি এত্থ মিগৰন্তি মিগৰৰসেন লদ্ধত্তা তং মিগমংসং ‘‘মিগৰ’’ন্তি আহ, ইমং মিগমংসং গহেত্ৰা মং মুঞ্চস্সূতি অত্থো. সো হি রাজা নং যক্খিনিপুত্তং দিস্ৰা ভীতো ঊরুক্খম্ভং পত্ৰা খাণুকো ৰিয অট্ঠাসি. সো ৰেগেন গন্ত্ৰা তং হত্থে গহেত্ৰা ‘‘ভক্খোসি মে আগতোসী’’তি আহ. অথ নং রাজা সতিং পচ্চুপট্ঠপেত্ৰা ‘‘সচে আহারত্থিকো, ইমং তে মংসং দদামি, তং গহেত্ৰা খাদ, মং মুঞ্চাহী’’তি আহ. তং সুত্ৰা পোরিসাদো ‘‘কিমিদং ময্হমেৰ সন্তকং দত্ৰা মযা ৰোহারং করোসি, ননু ইমং মংসঞ্চ ত্ৰঞ্চ মম হত্থগতকালতো পট্ঠায ময্হমেৰ সন্তকং, তস্মা তং পঠমং খাদিত্ৰা পচ্ছা মংসং খাদিস্সামী’’তি আহ.

অথ রাজা ‘‘মংসনিক্কযেনাযং ন মং মুঞ্চতি, মযা চ মিগৰং আগচ্ছন্তেন তস্স ব্রাহ্মণস্স ‘আগন্ত্ৰা তে ধনং দস্সামী’তি পটিঞ্ঞা কতা. সচাযং যক্খো অনুজানিস্সতি, সচ্চং অনুরক্খন্তো গেহং গন্ত্ৰা তং পটিঞ্ঞং মোচেত্ৰা পুন ইমস্স যক্খস্স ভত্তত্থং আগচ্ছেয্য’’ন্তি চিন্তেত্ৰা তস্স তমত্থং আরোচেসি. তং সুত্ৰা পোরিসাদো ‘‘সচে ত্ৰং সচ্চং অনুরক্খন্তো গন্তুকামোসি, গন্ত্ৰা তস্স ব্রাহ্মণস্স দাতব্বং ধনং দত্ৰা সচ্চং অনুরক্খন্তো সীঘং পুন আগচ্ছেয্যাসী’’তি ৰত্ৰা রাজানং ৰিস্সজ্জেসি. সো তেন ৰিস্সট্ঠো ‘‘ত্ৰং মা চিন্তযি, অহং পাতোৰ আগমিস্সামী’’তি ৰত্ৰা মগ্গনিমিত্তানি সল্লক্খেন্তো অত্তনো বলকাযং উপগন্ত্ৰা তেন পরিৰুতো নগরং পৰিসিত্ৰা নন্দব্রাহ্মণং পক্কোসাপেত্ৰা মহারহে আসনে নিসীদাপেত্ৰা তা গাথা সুত্ৰা চত্তারি সহস্সানি দত্ৰা যানং আরোপেত্ৰা ‘‘ইমং তক্কসিলমেৰ নেথা’’তি মনুস্সে দত্ৰা ব্রাহ্মণং উয্যোজেত্ৰা দুতিযদিৰসে পোরিসাদস্স সন্তিকং গন্তুকামো পুত্তং রজ্জে পতিট্ঠপেতুং অনুসাসনিঞ্চ দেন্তো তমত্থং আরোচেসি. তেন ৰুত্তং –

৭৮.

‘‘মিগৰং গহেত্ৰা মুঞ্চস্সু, কত্ৰা আগমনং পুন;

ব্রাহ্মণস্স ধনং দত্ৰা, পিতা আমন্তযী মমং.

৭৯.

‘‘রজ্জং পুত্ত পটিপজ্জ, মা পমজ্জি পুরং ইদং;

কতং মে পোরিসাদেন, মম আগমনং পুনা’’তি.

তত্থ আগমনং পুনাতি পুন আগমনং পটিঞ্ঞাতস্স পোরিসাদস্স সঙ্গরং কত্ৰা. ব্রাহ্মণস্স ধনং দত্ৰাতি তক্কসিলতো আগতস্স নন্দনামস্স ব্রাহ্মণস্স তা গাথা সুত্ৰা চতুসহস্সপরিমাণং ধনং দত্ৰা. পিতা আমন্তযী মমন্তি মম পিতা জযদ্দিসরাজা মং আমন্তেসি.

কথং আমন্তেসীতি চে? আহ ‘‘রজ্জ’’ন্তিআদি. তস্সত্থো – পুত্ত, ত্ৰং ইমং কুলসন্তকং রজ্জং পটিপজ্জ, যথাহং ধম্মেন সমেন রজ্জং কারেমি, এৰং ত্ৰম্পি ছত্তং উস্সাপেত্ৰা রজ্জং কারেহি. ত্ৰং ইদং পুরং রক্খন্তো রজ্জঞ্চ কারেন্তো মা পমাদমাপজ্জি, অসুকস্মিং ঠানে নিগ্রোধরুক্খমূলে পোরিসাদেন যক্খেন কতমেতং মযা সঙ্গরং মম পুন তস্স সন্তিকং আগমনং উদ্দিস্স, কেৰলং তস্স ব্রাহ্মণস্স ধনদানত্থং ইধাগতো সচ্চং অনুরক্খন্তো, তস্মা তত্থাহং গমিস্সামীতি.

তং সুত্ৰা মহাসত্তো ‘‘মা খো ত্ৰং, মহারাজ, তত্থ অগমাসি, অহং তত্থ গমিস্সামি. সচে পন ত্ৰং, তাত, গমিস্সসিযেৰ, অহম্পি তযা সদ্ধিং গমিস্সামিযেৰা’’তি. ‘‘এৰং সন্তে মযং উভোপি ন ভৰিস্সাম, তস্মা অহমেৰ তত্থ গমিস্সামী’’তি নানপ্পকারেন ৰারেন্তং রাজানং সঞ্ঞাপেত্ৰা মাতাপিতরো ৰন্দিত্ৰা পিতু অত্থায অত্তানং পরিচ্চজিত্ৰা সোত্থিভাৰায পিতরি সাসিতৰাদং পযুঞ্জমানে মাতুভগিনিভরিযাসু চ সচ্চকিরিযং করোন্তীসু আৰুধং গহেত্ৰা নগরতো নিক্খমিত্ৰা অস্সুপুণ্ণমুখং মহাজনং অনুবন্ধন্তং আপুচ্ছিত্ৰা পিতরা অক্খাতনযেন যক্খৰাসমগ্গং পটিপজ্জি. যক্খিনিপুত্তোপি ‘‘খত্তিযা নাম বহুমাযা, কো জানাতি কিং ভৰিস্সতী’’তি রুক্খং অভিরুহিত্ৰা রঞ্ঞো আগমনং ওলোকেন্তো নিসিন্নো কুমারং আগচ্ছন্তং দিস্ৰা ‘‘পিতরং নিৰত্তেত্ৰা পুত্তো আগতো ভৰিস্সতি, নত্থি মে ভয’’ন্তি ওতরিত্ৰা তস্স পিট্ঠিং দস্সেত্ৰাৰ নিসীদি. মহাসত্তো আগন্ত্ৰা তস্স পুরতো অট্ঠাসি. তেন ৰুত্তং –

৮০.

‘‘মাতাপিতূ চ ৰন্দিত্ৰা, নিম্মিনিত্ৰান অত্তনা;

নিক্খিপিত্ৰা ধনুং খগ্গং, পোরিসাদং উপাগমি’’ন্তি.

৮১. সসত্থহত্থূপগতন্তি সসত্থহত্থং উপগতং আৰুধপাণিং মং অত্তনো সন্তিকং উপগতং দিস্ৰা. কদাচি সো তসিস্সতীতি সো যক্খো অপি তসেয্য. তেন ভিজ্জিস্সতি সীলন্তি তেন তস্স তাসুপ্পাদনেন ময্হং সীলং ৰিনস্সতি সংকিলিস্সতি. পরিতাসং কতে মযীতি মযি তস্স পরিতাসং কতে সতি.

৮২. সীলখণ্ডভযা ময্হং, তস্স দেস্সং ন ব্যাহরিন্তি যথা চ সীলভেদভযেন নিহিতসত্থো তস্স সন্তিকং অগমাসি, এৰং ময্হং সীলখণ্ডভযা এৰ তস্স পোরিসাদস্স দেস্সং অনিট্ঠম্পি ন ব্যাহরিং, কেৰলং পন মেত্তচিত্তেন হিতৰাদী ইদং ইদানি ৰক্খমানং ৰচনং অভাসিং.

মহাসত্তো চ গন্ত্ৰা পুরতো ঠিতো. যক্খিনিপুত্তো তং ৰীমংসিতুকামো ‘‘কোসি ত্ৰং, কুতো আগতো, কিং মং ন জানাসি ‘লুদ্দো মনুস্সমংসখাদকো’তি, কস্মা চ ইধাগতোসী’’তি পুচ্ছি. কুমারো ‘‘অহং জযদ্দিসরঞ্ঞো পুত্তো, ত্ৰং পোরিসাদকোতি জানামি, পিতু জীৰিতং রক্খিতুং ইধাগতো, তস্মা তং মুঞ্চ, মং খাদা’’তি আহ. পুন যক্খিনিপুত্তো মুখাকারেনেৰ ‘‘তং তস্স পুত্তোতি অহং জানামি, দুক্করং পন তযা কতং এৰং আগচ্ছন্তেনা’’তি আহ. কুমারো ‘‘ন ইদং দুক্করং, যং পিতু অত্থে জীৰিতপরিচ্চজনং, মাতাপিতুহেতু হি এৰরূপং পুঞ্ঞং কত্ৰা একন্তেনেৰ সগ্গে পমোদতি, অহঞ্চ ‘অমরণধম্মো নাম কোচি সত্তো নত্থী’তি জানামি, অত্তনা চ কিঞ্চি কতং পাপং নাম ন সরামি, তস্মা মরণতোপি মে ভযং নত্থি, ইদং সরীরং মযা তে নিস্সট্ঠং, অগ্গিং জালেত্ৰা খাদা’’তি আহ. তেন ৰুত্তং –

৮৩.

‘‘উজ্জালেহি মহাঅগ্গিং, পপতিস্সামি রুক্খতো;

ত্ৰং পক্ককালমঞ্ঞায, ভক্খয মং পিতামহা’’তি.

তং সুত্ৰা যক্খিনিপুত্তো ‘‘ন সক্কা ইমস্স মংসং খাদিতুং, উপাযেন ইমং পলাপেস্সামী’’তি চিন্তেত্ৰা ‘‘তেন হি অরঞ্ঞং পৰিসিত্ৰা সারদারূনি আহরিত্ৰা নিদ্ধূমে অঙ্গারে করোহি, তত্থ তে মংসং পচিত্ৰা খাদিস্সামী’’তি আহ. মহাসত্তো তথা কত্ৰা তস্স আরোচেসি. সো তং ওলোকেন্তো ‘‘অযং পুরিসসীহো মরণতোপি ভযং নত্থি, এৰং নিব্ভযো নাম ন মযা দিট্ঠপুব্বো’’তি লোমহংসজাতো কুমারং ওলোকেসি. কুমারো কিস্স মং ওলোকেসি, ন যথাৰুত্তং করোসীতি. যক্খিনিপুত্তো মহাসত্তং ‘‘সত্তধা তস্স মুদ্ধা ফলেয্য, যো তং খাদেয্যা’’তি আহ. ‘‘সচে মং ন খাদিতুকামোসি, অথ কস্মা অগ্গিং কারেসী’’তি? ‘‘তৰ পরিগ্গণ্হনত্থ’’ন্তি. ‘‘ত্ৰং ইদানি মং কথং পরিগ্গণ্হিস্সসি, স্ৰাহং তিরচ্ছানযোনিযং নিব্বত্তোপি সক্কস্স দেৰরঞ্ঞো অত্তানং পরিগ্গণ্হিতুং ন অদাসি’’ন্তি ইমমত্থং দস্সেন্তো –

‘‘ইদঞ্হি সো ব্রাহ্মণং মঞ্ঞমানো, সসো অৰাসেসি সকে সরীরে;

তেনেৰ সো চন্দিমা দেৰপুত্তো, সসত্থুতো কামদুহজ্জ যক্খা’’তি.(জা. ১.১৬.৯৩) –

গাথমাহ.

তত্থ সসো অৰাসেসি সকে সরীরেতি অত্তনো সরীরহেতু ইমং সরীরং খাদিত্ৰা ইধ ৰসাতি এৰং সকে সরীরে অত্তনো সরীরং দেন্তো তং ব্রাহ্মণরূপং সক্কং তত্থ ৰাসেসি. সসত্থুতোতি ‘‘সসী’’তি এৰং সসসদ্দেন থুতো. কামদুহোতি কামৰড্ঢনো. যক্খাতি দেৰ.

এৰং মহাসত্তো চন্দে সসলক্খণং কপ্পট্ঠিযং পাটিহারিযং সক্খিং কত্ৰা অত্তনো সক্কেনপি পরিগ্গণ্হিতুং অসক্কুণেয্যতং অভাসি. তং সুত্ৰা পোরিসাদো অচ্ছরিযব্ভুতচিত্তজাতো –

‘‘চন্দো যথা রাহুমুখা পমুত্তো, ৰিরোচতে পন্নরসেৰ ভাণুমা;

এৰং তুৰং পোরিসাদা পমুত্তো, ৰিরোচ কপিলে মহানুভাৰ;

আমোদযং পিতরং মাতরঞ্চ, সব্বো চ তে নন্দতু ঞাতিপক্খো’’তি. (জা. ১.১৬.৯৪) –

গাথং ৰত্ৰা ‘‘গচ্ছ মহাৰীরা’’তি কুমারং ৰিস্সজ্জেসি. সোপি তং নিব্বিসেৰনং কত্ৰা পঞ্চ সীলানি দত্ৰা ‘‘যক্খো নু খো এস, নো’’তি ৰীমংসন্তো ‘‘যক্খানং অক্খীনি রত্তানি হোন্তি অনিমিসানি চ, ছাযা চ ন পঞ্ঞাযতি, অসম্ভীতো হোতি, ন ইমস্স তথা. তস্মা নাযং যক্খো মনুস্সো এসো, ময্হং কির পিতু তযো ভাতরো যক্খিনিযা গহিতা, তেসু তায দ্ৰে খাদিতা ভৰিস্সন্তি, একো পুত্তসিনেহেন পটিজগ্গিতো ভৰিস্সতি. ইমিনা তেন ভৰিতব্ব’’ন্তি নযগ্গাহেন অনুমানেন সব্বঞ্ঞুতঞ্ঞাণেন ৰিয অৰিপরীততো নিট্ঠং গন্ত্ৰা ‘‘ময্হং পিতু আচিক্খিত্ৰা রজ্জে পতিট্ঠাপেস্সামী’’তি চিন্তেত্ৰা ‘‘ন ত্ৰং যক্খো, পিতু মে জেট্ঠভাতিকোসি, এহি মযা সদ্ধিং গন্ত্ৰা কুলসন্তকং রজ্জং পটিপজ্জাহী’’তি আহ. তেন ৰুত্তং ‘‘ত্ৰং পিতামহা’’তি, ত্ৰং মম মহাপিতাতি অত্থো. ইতরেন ‘‘নাহং মনুস্সো’’তি ৰুত্তে তেন সদ্ধাতব্বস্স দিব্বচক্খুকতাপসস্স সন্তিকং নেসি. তাপসেন ‘‘কিং করোন্তা পিতা পুত্তা অরঞ্ঞে ৰিচরথা’’তি পিতুভাৰে কথিতে পোরিসাদো সদ্দহিত্ৰা ‘‘গচ্ছ, তাত, ত্ৰং, ন মে রজ্জেন অত্থো, পব্বজিস্সামহ’’ন্তি তাপসস্স সন্তিকে ইসিপব্বজ্জং পব্বজি. তেন ৰুত্তং –

৮৪.

‘‘ইতি সীলৰতং হেতু, নারক্খিং মম জীৰিতং;

পব্বাজেসিং চহং তস্স, সদা পাণাতিপাতিক’’ন্তি.

তত্থ সীলৰতং হেতূতি সীলৰন্তানং মম পিতূনং হেতু. অথ ৰা সীলৰতং হেতূতি সীলৰতহেতু, ময্হং সীলৰতসমাদাননিমিত্তং তস্স অভিজ্জনত্থং. তস্সাতি তং পোরিসাদং.

অথ মহাসত্তো অত্তনো মহাপিতরং পব্বজিতং ৰন্দিত্ৰা নগরস্স সমীপং গন্ত্ৰা ‘‘কুমারো কির আগতো’’তি সুত্ৰা হট্ঠতুট্ঠেন রঞ্ঞা নাগরেহি নেগমজানপদেহি চ পচ্চুগ্গতো রাজানং ৰন্দিত্ৰা সব্বং পৰত্তিং আরোচেসি. তং সুত্ৰা রাজা তঙ্খণঞ্ঞেৰ ভেরিং চরাপেত্ৰা মহন্তেন পরিৰারেন তস্স সন্তিকং গন্ত্ৰা ‘‘এহি, ভাতিক, রজ্জং পটিপজ্জাহী’’তি আহ. ‘‘অলং, মহারাজা’’তি. ‘‘তেন হি ময্হং উয্যানে ৰসা’’তি. ‘‘ন আগচ্ছামী’’তি. রাজা তস্স অস্সমস্স অৰিদূরে গামং নিৰেসেত্ৰা ভিক্খং পট্ঠপেসি. সো চূল়কম্মাসদম্মনিগমো নাম জাতো.

তদা মাতাপিতরো মহারাজকুলানি অহেসুং, তাপসো সারিপুত্তো, পোরিসাদো অঙ্গুলিমালো, কনিট্ঠা উপ্পলৰণ্ণা, অগ্গমহেসী রাহুলমাতা, অলীনসত্তুকুমারো লোকনাথো.

তস্স ইধাপি হেট্ঠা ৰুত্তনযেনেৰ যথারহং সেসপারমিযো নিদ্ধারেতব্বা. তথা পিতরা নিৰারিযমানো অত্তনো জীৰিতং পরিচ্চজিত্ৰা পিতু জীৰিতরক্খণত্থং ‘‘পোরিসাদস্স সন্তিকং গমিস্সামী’’তি নিচ্ছযো, তস্স চ সন্তাসপরিহরণত্থং নিহিতসত্থস্স গমনং, ‘‘অত্তনো সীলখণ্ডনং মা হোতূ’’তি তেন পিযৰাচায সমুদাচারো, তেন চ নানানযেহি পরিগ্গণ্হিযমানস্স মরণসন্তাসাভাৰো, পিতু অত্থে ময্হং সরীরং সফলং করিস্সামীতি হট্ঠতুট্ঠভাৰো, সক্কেনাপি পরিগ্গণ্হিতুং অসক্কুণেয্যস্স সসজাতিযম্পি পরিচ্চাগত্থং অত্তনো জীৰিতনিরপেক্খভাৰস্স জাননং, তেন সমাগমেপি ওস্সট্ঠেপি চিত্তস্স ৰিকারাভাৰো, তস্স চ মনুস্সভাৰমহাপিতুভাৰানং অৰিপরীততো জাননং, ঞাতমত্তে চ তং কুলসন্তকে রজ্জে পতিট্ঠাপেতুকামতা, ধম্মদেসনায সংৰেজেত্ৰা সীলেসু পতিট্ঠাপনন্তি. এৰমাদযো ইধ বোধিসত্তস্স গুণানুভাৰা ৰিভাৰেতব্বাতি.

অলীনসত্তুচরিযাৰণ্ণনা নিট্ঠিতা.

১০. সঙ্খপালচরিযাৰণ্ণনা

৮৫. দসমে সঙ্খপালোতিআদীসু অযং সঙ্খেপত্থো – দেৰভোগসম্পত্তিসদিসায মহতিযা নাগিদ্ধিযা সমন্নাগতত্তা মহিদ্ধিকো. হেট্ঠা দ্ৰে, উপরি দ্ৰেতি চতস্সো দাঠা আৰুধা এতস্সাতি দাঠাৰুধো. উগ্গতেজৰিসতায ঘোরৰিসো. নাগযোনিসিদ্ধাহি দ্ৰীহি জিৰ্হাহি সমন্নাগতোতি দ্ৰিজিৰ্হো. মহানুভাৰানম্পি উরেন গমনতো ‘‘উরগা’’তি লদ্ধনামানং নাগানং অধিপতিভাৰতো উরগাধিভূ.

৮৬. দ্ৰিন্নং মগ্গানং ৰিনিৰিজ্ঝিত্ৰা সন্ধিভাৰেন গতট্ঠানসঙ্খাতে চতুপ্পথে. অপরাপরং মহাজনসঞ্চরণট্ঠানভূতে মহামগ্গে. ততো এৰ মহাজনসমাকিণ্ণভাৰেন নানাজনসমাকুলে. ইদানি ৰক্খমানানং চতুন্নং অঙ্গানং ৰসেন চতুরো অঙ্গে. অধিট্ঠায অধিট্ঠহিত্ৰা, চিত্তে ঠপেত্ৰা. যদাহং সঙ্খপালো নাম যথাৰুত্তরূপো নাগরাজা হোমি, তদা হেট্ঠা ৰুত্তপ্পকারে ঠানে ৰাসং উপোসথৰাসৰসেন নিৰাসং অকপ্পযিং কপ্পেসিং.

মহাসত্তো হি দানসীলাদিপুঞ্ঞপসুতো হুত্ৰা বোধিপরিযেসনৰসেন অপরাপরং দেৰমনুস্সগতীসু সংসরন্তো কদাচি দেৰভোগসদিসসম্পত্তিকে নাগভৰনে নিব্বত্তিত্ৰা সঙ্খপালো নাম নাগরাজা অহোসি মহিদ্ধিকো মহানুভাৰো. সো গচ্ছন্তে কালে তায সম্পত্তিযা ৰিপ্পটিসারী হুত্ৰা মনুস্সযোনিং পত্থেন্তো উপোসথৰাসং ৰসি. অথস্স নাগভৰনে ৰসন্তস্স উপোসথৰাসো ন সম্পজ্জতি, সীলং সংকিলিস্সতি, তেন সো নাগভৰনা নিক্খমিত্ৰা কণ্হৰণ্ণায নদিযা অৰিদূরে মহামগ্গস্স চ একপদিকমগ্গস্স চ অন্তরে একং ৰম্মিকং পরিক্খিপিত্ৰা উপোসথং অধিট্ঠায চাতুদ্দসপন্নরসেসু সমাদিন্নসীলো ‘‘মম চম্মাদীনি অত্থিকা গণ্হন্তূ’’তি অত্তানং দানমুখে ৰিস্সজ্জেত্ৰা নিপজ্জতি, পাটিপদে নাগভৰনং গচ্ছতি. তেন ৰুত্তং ‘‘পুনাপরং যদা হোমি, সঙ্খপালো’’তিআদি. তস্সত্থো ৰুত্তো এৰ.

৮৭. যং পনেত্থ ছৰিযা চম্মেনাতিআদিকং ‘‘চতুরো অঙ্গে অধিট্ঠাযা’’তি ৰুত্তং চতুরঙ্গাধিট্ঠানদস্সনং. ছৰিচম্মানি হি ইধ একমঙ্গং. এৰং উপোসথৰাসং ৰসন্তস্স মহাসত্তস্স দীঘো অদ্ধা ৰীতিৰত্তো.

অথেকদিৰসং তস্মিং তথা সীলং সমাদিযিত্ৰা নিপন্নে সোল়স ভোজপুত্তা ‘‘মংসং আহরিস্সামা’’তি আৰুধহত্থা অরঞ্ঞে চরন্তা কিঞ্চি অলভিত্ৰা নিক্খমন্তা তং ৰম্মিকমত্থকে নিপন্নং দিস্ৰা ‘‘মযং অজ্জ গোধাপোতকম্পি ন লভিম্হা, ইমং নাগরাজানং ৰধিত্ৰা খাদিস্সামা’’তি চিন্তেত্ৰা ‘‘মহা খো পনেস গয্হমানো পলাযেয্যাতি যথানিপন্নকংযেৰ নং ভোগেসু সূলেহি ৰিজ্ঝিত্ৰা দুব্বলং কত্ৰা গণ্হিস্সামা’’তি সূলানি আদায উপসঙ্কমিংসু. বোধিসত্তস্সাপি সরীরং মহন্তং একদোণিকনাৰপ্পমাণং ৰট্টেত্ৰা ঠপিতসুমনপুপ্ফদামং ৰিয জিঞ্জুকফলসদিসেহি অক্খীহি জযসুমনপুপ্ফসদিসেন চ সীসেন সমন্নাগতং অতিৰিয সোভতি. সো তেসং সোল়সন্নং জনানং পদসদ্দেন ভোগন্তরতো সীসং নীহরিত্ৰা রত্তক্খীনি উম্মীলেত্ৰা তে সূলহত্থে আগচ্ছন্তে দিস্ৰা ‘‘অজ্জ ময্হং মনোরথো মত্থকং পাপুণিস্সতী’’তি অত্তানং দানমুখে নিয্যাতেত্ৰা ‘‘ইমে মম সরীরং সত্তীহি কোট্টেত্ৰা ছিদ্দাৰছিদ্দং করোন্তে ন ওলোকেস্সামী’’তি অত্তনো সীলখণ্ডভযেন দল়্হং অধিট্ঠানং অধিট্ঠহিত্ৰা সীসং ভোগন্তরে এৰ পৰেসেত্ৰা নিপজ্জি.

অথ নং তে উপগন্ত্ৰা নঙ্গুট্ঠে গহেত্ৰা আকড্ঢন্তা ভূমিযং পাতেত্ৰা তিখিণসূলেহি অট্ঠসু ঠানেসু ৰিজ্ঝিত্ৰা সকণ্টকা কাল়ৰেত্তযট্ঠিযো পহারমুখেহি পৰেসেত্ৰা অট্ঠসু ঠানেসু কাজেহি আদায মহামগ্গং পটিপজ্জিংসু. মহাসত্তো সূলেহি ৰিজ্ঝনতো পট্ঠায একট্ঠানেপি অক্খীনি উম্মীলেত্ৰা তে ন ওলোকেসি. তস্স অট্ঠহি কাজেহি আদায নীযমানস্স সীসং ওলম্বিত্ৰা ভূমিং পহরতি. অথ নং ‘‘সীসমস্স ওলম্বতী’’তি মহামগ্গে নিপজ্জাপেত্ৰা সুখুমেন সূলেন নাসাপুটে ৰিজ্ঝিত্ৰা রজ্জুকং পৰেসেত্ৰা সীসং উক্খিপিত্ৰা কাজকোটিযং লগ্গেত্ৰা পুনপি উক্খিপিত্ৰা মগ্গং পটিপজ্জিংসু. তেন ৰুত্তং –

৮৮.

‘‘অদ্দসংসু ভোজপুত্তা, খরা লুদ্দা অকারুণা;

উপগঞ্ছুং মমং তত্থ, দণ্ডমুগ্গরপাণিনো.

৮৯.

‘‘নাসায ৰিনিৰিজ্ঝিত্ৰা, নঙ্গুট্ঠে পিট্ঠিকণ্টকে;

কাজে আরোপযিত্ৰান, ভোজপুত্তা হরিংসু ম’’ন্তি.

তত্থ ভোজপুত্তাতি লুদ্দপুত্তা. খরাতি কক্খল়া, ফরুসকাযৰচীকম্মন্তা. লুদ্দাতি দারুণা, ঘোরমানসা. অকারুণাতি নিক্করুণা. দণ্ডমুগ্গরপাণিনোতি চতুরস্সদণ্ডহত্থা. নাসায ৰিনিৰিজ্ঝিত্ৰাতি রজ্জুকং পৰেসেতুং সুখুমেন সূলেন নাসাপুটে ৰিজ্ঝিত্ৰা. নঙ্গুট্ঠে পিট্ঠিকণ্টকেতি নঙ্গুট্ঠপ্পদেসে তত্থ তত্থ পিট্ঠিকণ্টকসমীপে চ ৰিনিৰিজ্ঝিত্ৰাতি সম্বন্ধো. কাজে আরোপযিত্ৰানাতি অট্ঠসু ঠানেসু ৰিনিৰিজ্ঝিত্ৰা বদ্ধেসু অট্ঠসু ৰেত্তলতামণ্ডলেসু একেকস্মিং ওৰিজ্ঝিতং একেকং কাজং দ্ৰে দ্ৰে ভোজপুত্তা অত্তনো অত্তনো খন্ধং আরোপেত্ৰা.

৯০. সসাগরন্তং পথৰিন্তি সমুদ্দপরিযন্তং মহাপথৰিং. সকাননং সপব্বতন্তি সদ্ধিং কাননেহি পব্বতেহি চাতি সকাননং সপব্বতঞ্চ. নাসাৰাতেন ঝাপযেতি সচাহং ইচ্ছমানো ইচ্ছন্তো কুজ্ঝিত্ৰা নাসাৰাতং ৰিস্সজ্জেয্যং, সমুদ্দপরিযন্তং সকাননং সপব্বতং ইমং মহাপথৰিং ঝাপেয্যং, সহ নাসাৰাতৰিস্সজ্জনেন ছারিকং করেয্যং, এতাদিসো তদা ময্হং আনুভাৰো.

৯১. এৰং সন্তেপি সূলেহি ৰিনিৰিজ্ঝন্তে, কোট্টযন্তেপি সত্তিভি. ভোজপুত্তে ন কুপ্পামীতি দুব্বলভাৰকরণত্থং ৰেত্তলতাপৰেসনত্থঞ্চ সারদারূহি তচ্ছেত্ৰা কতেহি তিখিণসূলেহি অট্ঠসু ঠানেসু ৰিজ্ঝন্তেপি দুব্বলভাৰকরণত্থং তিখিণাহি সত্তীহি তহিং তহিং কোট্টযন্তেপি ভোজপুত্তানং লুদ্দানং ন কুপ্পামি. এসা মে সীলপারমীতি এৰং মহানুভাৰস্স তথা অধিট্ঠহন্তস্স যা মে ময্হং সীলখণ্ডভযেন তেসং অকুজ্ঝনা, এসা একন্তেনেৰ জীৰিতনিরপেক্খভাৰেন পৰত্তা ময্হং সীলপারমী, সীলৰসেন পরমত্থপারমীতি অত্থো.

তথা পন বোধিসত্তে তেহি নীযমানে মিথিলনগরৰাসী আল়ারো নাম কুটুম্বিকো পঞ্চসকটসতানি আদায সুখযানকে নিসীদিত্ৰা গচ্ছন্তো তে ভোজপুত্তে মহাসত্তং হরন্তে দিস্ৰা কারুঞ্ঞং উপ্পাদেত্ৰা তে লুদ্দে পুচ্ছি – ‘‘কিস্সাযং নাগো নীযতি, নেত্ৰা চিমং কিং করিস্সথা’’তি? তে ‘‘ইমস্স নাগস্স মংসং সাদুঞ্চ মুদুঞ্চ থূলঞ্চ পচিত্ৰা খাদিস্সামা’’তি আহংসু. অথ সো তেসং সোল়সৰাহগোণে পসতং পসতং সুৰণ্ণমাসকে সব্বেসং নিৰাসনপারুপনানি ভরিযানম্পি তেসং ৰত্থাভরণানি দত্ৰা ‘‘সম্মা, অযং মহানুভাৰো নাগরাজা, অত্তনো সীলগুণেন তুম্হাকং ন দুব্ভি, ইমং কিলমন্তেহি বহুং তুম্হেহি অপুঞ্ঞং পসুতং, ৰিস্সজ্জেথা’’তি আহ. তে ‘‘অযং অম্হাকং মনাপো ভক্খো, বহূ চ নো উরগা ভুত্তপুব্বা, তথাপি তৰ ৰচনং অম্হেহি পূজেতব্বং, তস্মা ইমং নাগং ৰিস্সজ্জেস্সামা’’তি ৰিস্সজ্জেত্ৰা মহাসত্তং ভূমিযং নিপজ্জাপেত্ৰা অত্তনো কক্খল়তায তা কণ্টকাচিতা আৰুতা কাল়ৰেত্তলতা কোটিযং গহেত্ৰা আকড্ঢিতুং আরভিংসু.

অথ সো নাগরাজানং কিলমন্তং দিস্ৰা অকিলমেন্তোৰ অসিনা লতা ছিন্দিত্ৰা দারকানং কণ্ণৰেধতো পটিহরণনিযামেন অদুক্খাপেন্তো সণিকং নীহরি. তস্মিং কালে তে ভোজপুত্তা যং বন্ধনং তস্স নত্থুতো পৰেসেত্ৰা পটিমুক্কং, তং বন্ধনং সণিকং মোচযিংসু. মহাসত্তো মুহুত্তং পাচীনাভিমুখো গন্ত্ৰা অস্সুপুণ্ণেহি নেত্তেহি আল়ারং ওলোকেসি. লুদ্দা থোকং গন্ত্ৰা ‘‘উরগো দুব্বলো, মতকালে গহেত্ৰাৰ নং গমিস্সামা’’তি নিলীযিংসু. আল়ারো মহাসত্তস্স অঞ্জলিং পগ্গয্হ ‘‘গচ্ছেৰ খো ত্ৰং, মহানাগ, মা তং লুদ্দা পুন গহেসু’’ন্তি ৰদন্তো থোকং তং নাগং অনুগন্ত্ৰা নিৰত্তি.

বোধিসত্তো নাগভৰনং গন্ত্ৰা তত্থ পপঞ্চং অকত্ৰা মহন্তেন পরিৰারেন নিক্খমিত্ৰা আল়ারং উপসঙ্কমিত্ৰা নাগভৰনস্স ৰণ্ণং কথেত্ৰা তং তত্থ নেত্ৰা তীহি কঞ্ঞাসতেহি সদ্ধিং মহন্তমস্স যসং দত্ৰা দিব্বেহি কামেহি সন্তপ্পেসি. আল়ারো নাগভৰনে একৰস্সং ৰসিত্ৰা দিব্বে কামে পরিভুঞ্জিত্ৰা ‘‘ইচ্ছামহং, সম্ম, পব্বজিতু’’ন্তি নাগরাজস্স কথেত্ৰা পব্বজিতপরিক্খারে গহেত্ৰা ততো নিক্খমিত্ৰা হিমৰন্তপ্পদেসং গন্ত্ৰা পব্বজিত্ৰা তত্থ চিরং ৰসিত্ৰা অপরভাগে চারিকং চরন্তো বারাণসিং পত্ৰা বারাণসিরঞ্ঞা সমাগতো তেন আচারসম্পত্তিং নিস্সায পসন্নেন ‘‘ত্ৰং উল়ারভোগা মঞ্ঞে কুলা পব্বজিতো, কেন নু খো কারণেন পব্বজিতোসী’’তি পুট্ঠো অত্তনো পব্বজ্জাকারণং কথেন্তো লুদ্দানং হত্থতো বোধিসত্তস্স ৰিস্সজ্জাপনং আদিং কত্ৰা সব্বং পৰত্তিং রঞ্ঞো আচিক্খিত্ৰা –

‘‘দিট্ঠা মযা মানুসকাপি কামা, অসস্সতা ৰিপরিণামধম্মা;

আদীনৰং কামগুণেসু দিস্ৰা, সদ্ধাযহং পব্বজিতোম্হি, রাজ.

‘‘দুমপ্ফলানীৰ পতন্তি মাণৰা, দহরা চ ৰুদ্ধা চ সরীরভেদা;

এতম্পি দিস্ৰা পব্বজিতোম্হি রাজ, অপণ্ণকং সামঞ্ঞমেৰ সেয্যো’’তি. (জা. ২.১৭.১৯১-১৯২) –

ইমাহি গাথাহি ধম্মং দেসেসি.

তং সুত্ৰা রাজা –

‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৰান তৰঞ্চল়ার, কাহামি পুঞ্ঞানি অনপ্পকানী’’তি. (জা. ২.১৭.১৯৩) –

আহ.

অথস্স তাপসো –

‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৰান মমঞ্চ রাজ, করোহি পুঞ্ঞানি অনপ্পকানী’’তি. (জা. ২.১৭.১৯৪) –

এৰং ধম্মং দেসেত্ৰা তত্থেৰ চত্তারো ৰস্সানমাসে ৰসিত্ৰা পুন হিমৰন্তং গন্ত্ৰা যাৰজীৰং চত্তারো ব্রহ্মৰিহারে ভাৰেত্ৰা ব্রহ্মলোকূপগো অহোসি. বোধিসত্তোপি যাৰজীৰং উপোসথৰাসং ৰসিত্ৰা সগ্গপুরং পূরেসি. সোপি রাজা দানাদীনি পুঞ্ঞানি কত্ৰা যথাকম্মং গতো.

তদা আল়ারো সারিপুত্তত্থেরো অহোসি, বারাণসিরাজা আনন্দত্থেরো, সঙ্খপালনাগরাজা লোকনাথো.

তস্স সরীরপরিচ্চাগো দানপারমী, তথারূপেনপি ৰিসতেজেন সমন্নাগতস্স তথারূপাযপি পীল়ায সতি সীলস্স অভিন্নতা সীলপারমী, দেৰভোগসম্পত্তিসদিসং ভোগং পহায নাগভৰনতো নিক্খমিত্ৰা সমণধম্মকরণং নেক্খম্মপারমী, ‘‘দানাদিঅত্থং ইদঞ্চিদঞ্চ কাতুং ৰট্টতী’’তি সংৰিদহনং পঞ্ঞাপারমী, কামৰিতক্কৰিনোদনং অধিৰাসনৰীরিযঞ্চ ৰীরিযপারমী, অধিৰাসনখন্তি খন্তিপারমী, সচ্চসমাদানং সচ্চপারমী, অচলসমাদানাধিট্ঠানং অধিট্ঠানপারমী, ভোজপুত্তে উপাদায সব্বসত্তেসু মেত্তানুদ্দযভাৰো মেত্তাপারমী, ৰেদনায সত্তসঙ্খারকতৰিপ্পকারেসু চ মজ্ঝত্তভাৰো উপেক্খাপারমীতি এৰং দস পারমিযো লব্ভন্তি. সীলপারমী পন অতিসযৰতীতি কত্ৰা সা এৰ দেসনং আরুল়্হা. তথা ইধ বোধিসত্তস্স গুণানুভাৰা ‘‘যোজনসতিকে নাগভৰনট্ঠানে’’তিআদিনা ভূরিদত্তচরিযাযং (চরিযা. ২.১১ আদযো) ৰুত্তনযেনেৰ যথারহং ৰিভাৰেতব্বাতি.

সঙ্খপালচরিযাৰণ্ণনা নিট্ঠিতা.

এতেতি যে হত্থিনাগচরিযাদযো ইমস্মিং ৰগ্গে নিদ্দিট্ঠা অনন্তরগাথায চ ‘‘হত্থিনাগো ভূরিদত্তো’’তিআদিনা উদ্দানৰসেন সঙ্গহেত্ৰা দস্সিতা নৰ চরিযা, তে সব্বে ৰিসেসতো সীলপারমিপূরণৰসেন পৰত্তিযা সীলং বলং এতেসন্তি সীলবলা. সীলস্স পরমত্থপারমিভূতস্স পরিক্খরণতো সন্তানস্স চ পরিভাৰনাৰসেন অভিসঙ্খরণতো পরিক্খারা. উক্কংসগতায সীলপরমত্থপারমিযা অসম্পুণ্ণত্তা পদেসো এতেসং অত্থি, ন নিপ্পদেসোতি পদেসিকা সপ্পদেসা. কস্মাতি চে? আহ ‘‘জীৰিতং পরিরক্খিত্ৰা, সীলানি অনুরক্খিস’’ন্তি, যস্মা এতেসু হত্থিনাগচরিযাদীসু (চরিযা. ২.১ আদযো) অহং অত্তনো জীৰিতং একদেসেন পরিরক্খিত্ৰাৰ সীলানি অনুরক্খিং, জীৰিতং ন সব্বথা পরিচ্চজিং, একন্তেনেৰ পন সঙ্খপালস্স মে সতো সব্বকালম্পি জীৰিতং যস্স কস্সচি নিয্যত্তং, সঙ্খপালনাগরাজস্স পন মে মহানুভাৰস্স উগ্গৰিসতেজস্স সতো সমানস্স সব্বকালম্পি তেহি লুদ্দেহি সমাগমে ততো পুব্বেপি পচ্ছাপি সতো এৰং পুগ্গলৰিভাগং অকত্ৰা যস্স কস্সচি সীলানুরক্খণত্থমেৰ জীৰিতং একংসেনেৰ নিয্যত্তং নীযাতিতং দানমুখে নিস্সট্ঠং, তস্মা সা সীলপারমীতি যস্মা চেতদেৰং, তস্মা তেন কারণেন সা পরমত্থপারমিভাৰং পত্তা ময্হং সীলপারমীতি দস্সেতীতি.

পরমত্থদীপনিযা চরিযাপিটকসংৰণ্ণনায

দসৰিধচরিযাসঙ্গহস্স ৰিসেসতো

সীলপারমিৰিভাৰনস্স

দুতিযৰগ্গস্স অত্থৰণ্ণনা নিট্ঠিতা.

৩. যুধঞ্জযৰগ্গো

১. যুধঞ্জযচরিযাৰণ্ণনা

১. ততিযৰগ্গস্স পঠমে অমিতযসোতি অপরিমিতপরিৰারৰিভৰো. রাজপুত্তো যুধঞ্জযোতি রম্মনগরে সব্বদত্তস্স নাম রঞ্ঞো পুত্তো নামেন যুধঞ্জযো নাম.

অযঞ্হি বারাণসী উদযজাতকে (জা. ১.১১.৩৭ আদযো) সুরুন্ধননগরং নাম জাতা. চূল়সুতসোমজাতকে (জা. ২.১৭.১৯৫ আদযো) সুদস্সনং নাম, সোণনন্দজাতকে (জা. ২.২০.৯২ আদযো) ব্রহ্মৰড্ঢনং নাম, খণ্ডহালজাতকে(জা. ২.২২.৯৮২ আদযো) পুপ্ফৰতী নাম, ইমস্মিং পন যুধঞ্জযজাতকে (জা. ১.১১.৭৩ আদযো) রম্মনগরং নাম অহোসি, এৰমস্স কদাচি নামং পরিৰত্ততি. তেন ৰুত্তং – ‘‘রাজপুত্তোতি রম্মনগরে সব্বদত্তস্স নাম রঞ্ঞো পুত্তো’’তি. তস্স পন রঞ্ঞো পুত্তসহস্সং অহোসি. বোধিসত্তো জেট্ঠপুত্তো, তস্স রাজা উপরজ্জং অদাসি. সো হেট্ঠা ৰুত্তনযেনেৰ দিৰসে দিৰসে মহাদানং পৰত্তেসি. এৰং গচ্ছন্তে কালে বোধিসত্তো একদিৰসং পাতোৰ রথৰরং অভিরুহিত্ৰা মহন্তেন সিরিৰিভৰেন উয্যানকীল়ং গচ্ছন্তো রুক্খগ্গতিণগ্গসাখগ্গমক্কটকসুত্তজালাদীসু মুত্তাজালাকারেন লগ্গে উস্সাৰবিন্দূ দিস্ৰা ‘‘সম্ম সারথি, কিং নামেত’’ন্তি পুচ্ছিত্ৰা ‘‘এতে, দেৰ, হিমসমযে পতনকউস্সাৰবিন্দূ নামা’’তি সুত্ৰা দিৰসভাগং উয্যানে কীল়িত্ৰা সাযন্হকালে পচ্চাগচ্ছন্তো তে অদিস্ৰা ‘‘সম্ম সারথি, কহং তে উস্সাৰবিন্দূ, ন তে ইদানি পস্সামী’’তি পুচ্ছিত্ৰা ‘‘দেৰ, সূরিযে উগ্গচ্ছন্তে সব্বে ভিজ্জিত্ৰা ৰিলযং গচ্ছন্তী’’তি সুত্ৰা ‘‘যথা ইমে উপ্পজ্জিত্ৰা ভিজ্জন্তি, এৰং ইমেসং সত্তানং জীৰিতসঙ্খারাপি তিণগ্গে উস্সাৰবিন্দুসদিসাৰ, তস্মা মযা ব্যাধিজরামরণেহি অপীল়িতেনেৰ মাতাপিতরো আপুচ্ছিত্ৰা পব্বজিতুং ৰট্টতী’’তি উস্সাৰবিন্দুমেৰ আরম্মণং কত্ৰা আদিত্তে ৰিয তযো ভৰে পস্সন্তো অত্তনো গেহং আগন্ত্ৰা অলঙ্কতপটিযত্তায ৰিনিচ্ছযসালায নিসিন্নস্স পিতু সন্তিকমেৰ গন্ত্ৰা পিতরং ৰন্দিত্ৰা একমন্তং ঠিতো পব্বজ্জং যাচি. তেন ৰুত্তং –

‘‘উস্সাৰবিন্দুং সূরিযাতপে, পতিতং দিস্ৰান সংৰিজিং.

২.

‘‘তঞ্ঞেৰাধিপতিং কত্ৰা, সংৰেগমনুব্রূহযিং;

মাতাপিতূ চ ৰন্দিত্ৰা, পব্বজ্জমনুযাচহ’’ন্তি.

তত্থ সূরিযাতপেতি সূরিযাতপহেতু, সূরিযরস্মিসম্ফস্সনিমিত্তং. ‘‘সূরিযাতপেনা’’তিপি পাঠো. পতিতং দিস্ৰানাতি ৰিনট্ঠং পস্সিত্ৰা, পুব্বে রুক্খগ্গাদীসু মুত্তাজালাদিআকারেন লগ্গং হুত্ৰা দিস্সমানং সূরিযরস্মিসম্ফস্সেন ৰিনট্ঠং পঞ্ঞাচক্খুনা ওলোকেত্ৰা. সংৰিজিন্তি যথা এতানি, এৰং সত্তানং জীৰিতানিপি লহুং লহুং ভিজ্জমানসভাৰানীতি অনিচ্চতামনসিকারৰসেন সংৰেগমাপজ্জিং.

তঞ্ঞেৰাধিপতিং কত্ৰা, সংৰেগমনুব্রূহযিন্তি তঞ্ঞেৰ উস্সাৰবিন্দূনং অনিচ্চতং অধিপতিং মুখং পুব্বঙ্গমং পুরেচারিকং কত্ৰা তথেৰ সব্বসঙ্খারানং ইত্তরট্ঠিতিকতং পরিত্তকালতং মনসিকরোন্তো একৰারং উপ্পন্নং সংৰেগং পুনপ্পুনং উপ্পাদনেন অনুৰড্ঢেসিং. পব্বজ্জমনুযাচহন্তি ‘‘তিণগ্গে উস্সাৰবিন্দূ ৰিয ন চিরট্ঠিতিকে সত্তানং জীৰিতে মযা ব্যাধিজরামরণেহি অনভিভূতেনেৰ পব্বজিত্ৰা যত্থ এতানি ন সন্তি, তং অমতং মহানিব্বানং গৰেসিতব্ব’’ন্তি চিন্তেত্ৰা মাতাপিতরো উপসঙ্কমিত্ৰা ৰন্দিত্ৰা ‘‘পব্বজ্জং মে অনুজানাথা’’তি তে অহং পব্বজ্জং যাচিং. এৰং মহাসত্তেন পব্বজ্জায যাচিতায সকলনগরে মহন্তং কোলাহলমহোসি – ‘‘উপরাজা কির যুধঞ্জযো পব্বজিতুকামো’’তি.

তেন চ সমযেন কাসিরট্ঠৰাসিনো রাজানং দট্ঠুং আগন্ত্ৰা রম্মকে পটিৰসন্তি. তে সব্বেপি সন্নিপতিংসু. ইতি সপরিসো রাজা নেগমা চেৰ জানপদা চ বোধিসত্তস্স মাতা দেৰী চ সব্বে চ ওরোধা মহাসত্তং ‘‘মা খো ত্ৰং, তাত কুমার, পব্বজী’’তি নিৰারেসুং. তত্থ রাজা ‘‘সচে তে কামেহি ঊনং, অহং তে পরিপূরযামি, অজ্জেৰ রজ্জং পটিপজ্জাহী’’তি আহ. তস্স মহাসত্তো –

‘‘মা মং দেৰ নিৰারেহি, পব্বজন্তং রথেসভ;

মাহং কামেহি সম্মত্তো, জরায ৰসমন্ৰগূ’’তি. (জা. ১.১১.৭৭) –

অত্তনো পব্বজ্জাছন্দমেৰ ৰত্ৰা তং সুত্ৰা সদ্ধিং ওরোধেহি মাতুযা করুণং পরিদেৰন্তিযা –

‘‘উস্সাৰোৰ তিণগ্গম্হি, সূরিযুগ্গমনং পতি;

এৰমাযু মনুস্সানং, মা মং অম্ম নিৰারযা’’তি. (জা. ১.১১.৭৯) –

অত্তনো পব্বজ্জাকারণং কথেত্ৰা নানপ্পকারং তেহি যাচিযমানোপি অভিসংৰড্ঢমানসংৰেগত্তা অনোসক্কিতমানসো পিযতরে মহতি ঞাতিপরিৰট্টে উল়ারে রাজিস্সরিযে চ নিরপেক্খচিত্তো পব্বজি. তেন ৰুত্তং –

৩.

‘‘যাচন্তি মং পঞ্জলিকা, সনেগমা সরট্ঠকা;

অজ্জেৰ পুত্ত পটিপজ্জ, ইদ্ধং ফীতং মহামহিং.

৪.

‘‘সরাজকে সহোরোধে, সনেগমে সরট্ঠকে;

করুণং পরিদেৰন্তে, অনপেক্খো পরিচ্চজি’’ন্তি.

তত্থ পঞ্জলিকাতি পগ্গহিতঅঞ্জলিকা. সনেগমা সরট্ঠকাতি নেগমেহি চেৰ রট্ঠৰাসীহি চ সদ্ধিং সব্বে রাজপুরিসা ‘‘মা খো, ত্ৰং দেৰ, পব্বজী’’তি মং যাচন্তি. মাতাপিতরো পন অজ্জেৰ পুত্ত পটিপজ্জ, গামনিগমরাজধানিঅভিৰুদ্ধিযা ৰেপুল্লপ্পত্তিযা চ, ইদ্ধং ৰিভৰসারসম্পত্তিযা সস্সাদিনিপ্ফত্তিযা চ, ফীতং ইমং মহামহিং অনুসাস, ছত্তং উস্সাপেত্ৰা রজ্জং কারেহীতি যাচন্তি. এৰং পন সহ রঞ্ঞাতি সরাজকে, তথা সহোরোধে সনেগমে সরট্ঠকে মহাজনে যথা সুণন্তানম্পি পগেৰ পস্সন্তানং মহন্তং কারুঞ্ঞং হোতি, এৰং করুণং পরিদেৰন্তে তত্থ তত্থ অনপেক্খো অলগ্গচিত্তো ‘‘অহং তদা পব্বজি’’ন্তি দস্সেতি.

৫-৬. ইদানি যদত্থং চক্কৰত্তিসিরিসদিসং রজ্জসিরিং পিযতরে ঞাতিবন্ধৰে পহায সিনিদ্ধং পরিগ্গহপরিজনং লোকাভিমতং মহন্তং যসঞ্চ নিরপেক্খো পরিচ্চজিন্তি দস্সেতুং দ্ৰে গাথা অভাসি.

তত্থ কেৰলন্তি অনৰসেসং ইত্থাগারং সমুদ্দপরিযন্তঞ্চ পথৰিং পব্বজ্জাধিপ্পাযেন চজমানো এৰং মে সম্মাসম্বোধি সক্কা অধিগন্তুন্তি বোধিযাযেৰ কারণা ন কিঞ্চি চিন্তেসিং, ন তত্থ ঈসকং লগ্গং জনেসিন্তি অত্থো. তস্মাতি যস্মা মাতাপিতরো তঞ্চ মহাযসং রজ্জঞ্চ মে ন দেস্সং, পিযমেৰ, ততো পন সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণমেৰ ময্হং পিযতরং, তস্মা মাতাদীহি সদ্ধিং রজ্জং অহং তদা পরিচ্চজিন্তি.

তদেতং সব্বং পরিচ্চজিত্ৰা পব্বজ্জায মহাসত্তে নিক্খমন্তে তস্স কনিট্ঠভাতা যুধিট্ঠিলকুমারো নাম পিতরং ৰন্দিত্ৰা পব্বজ্জং অনুজানাপেত্ৰা বোধিসত্তং অনুবন্ধি. তে উভোপি নগরা নিক্খম্ম মহাজনং নিৰত্তেত্ৰা হিমৰন্তং পৰিসিত্ৰা মনোরমে ঠানে অস্সমপদং কত্ৰা ইসিপব্বজ্জং পব্বজিত্ৰা ঝানাভিঞ্ঞাযো নিব্বত্তেত্ৰা ৰনমূলফলাদীহি যাৰজীৰং যাপেত্ৰা ব্রহ্মলোকপরাযনা অহেসুং. তেনাহ ভগৰা –

‘‘উভো কুমারা পব্বজিতা, যুধঞ্জযো যুধিট্ঠিলো;

পহায মাতাপিতরো, সঙ্গং ছেত্ৰান মচ্চুনো’’তি. (জা. ১.১১.৮৩);

তত্থ সঙ্গং ছেত্ৰান মচ্চুনোতি মচ্চুমারস্স সহকারিকারণভূতত্তা সন্তকং রাগদোসমোহসঙ্গং ৰিক্খম্ভনৰসেন ছিন্দিত্ৰা উভোপি পব্বজিতাতি.

তদা মাতাপিতরো মহারাজকুলানি অহেসুং, যুধিট্ঠিলকুমারো আনন্দত্থেরো, যুধঞ্জযো লোকনাথো.

তস্স পব্বজ্জতো পুব্বে পৰত্তিতমহাদানানি চেৰ রজ্জাদিপরিচ্চাগো চ দানপারমী, কাযৰচীসংৰরো সীলপারমী, পব্বজ্জা চ ঝানাধিগমো চ নেক্খম্মপারমী, অনিচ্চতো মনসিকারং আদিং কত্ৰা অভিঞ্ঞাধিগমপরিযোসানা পঞ্ঞা দানাদীনং উপকারানুপকারধম্মপরিগ্গণ্হনপঞ্ঞা চ পঞ্ঞাপারমী, সব্বত্থ তদত্থসাধনং ৰীরিযং ৰীরিযপারমী, ঞাণখন্তি অধিৰাসনখন্তি চ খন্তিপারমী, পটিঞ্ঞায অৰিসংৰাদনং সচ্চপারমী, সব্বত্থ অচলসমাদানাধিট্ঠানং অধিট্ঠানপারমী, সব্বসত্তেসু হিতচিত্ততায মেত্তাব্রহ্মৰিহারৰসেন চ মেত্তাপারমী, সত্তসঙ্খারকতৰিপ্পকারউপেক্খনৰসেন উপেক্খাব্রহ্মৰিহারৰসেন চ উপেক্খাপারমীতি দস পারমিযো লব্ভন্তি. ৰিসেসতো পন নেক্খম্মপারমীতি ৰেদিতব্বা. তথা অকিত্তিচরিযাযং ৰিয ইধাপি মহাপুরিসস্স অচ্ছরিযগুণা যথারহং নিদ্ধারেতব্বা. তেন ৰুচ্চতি ‘‘এৰং অচ্ছরিযা হেতে, অব্ভুতা চ মহেসিনো…পে… ধম্মস্স অনুধম্মতো’’তি.

যুধঞ্জযচরিযাৰণ্ণনা নিট্ঠিতা.

২. সোমনস্সচরিযাৰণ্ণনা

৭. দুতিযে ইন্দপত্থে পুরুত্তমেতি এৰংনামকে নগরৰরে. কামিতোতি মাতাপিতুআদীহি ‘‘অহো ৰত একো পুত্তো উপ্পজ্জেয্যা’’তি এৰং চিরকালে পত্থিতো. দযিতোতি পিযাযিতো. সোমনস্সোতি ৰিস্সুতোতি ‘‘সোমনস্সো’’তি এৰং পকাসনামো.

৮. সীলৰাতি দসকুসলকম্মপথসীলেন চেৰ আচারসীলেন চ সমন্নাগতো. গুণসম্পন্নোতি সদ্ধাবাহুসচ্চাদিগুণেহি উপেতো, পরিপুণ্ণো ৰা. কল্যাণপটিভানৰাতি তংতংইতিকত্তব্বসাধনেন উপাযকোসল্লসঙ্খাতেন চ সুন্দরেন পটিভানেন সমন্নাগতো. ৰুড্ঢাপচাযীতি মাতাপিতরো কুলে জেট্ঠাতি এৰং যে জাতিৰুড্ঢা, যে চ সীলাদিগুণেহি ৰুড্ঢা, তেসং অপচাযনসীলো. হিরীমাতি পাপজিগুচ্ছনলক্খণায হিরিযা সমন্নাগতো. সঙ্গহেসু চ কোৰিদোতি দানপিযৰচনঅত্থচরিযাসমানত্ততাসঙ্খাতেহি চতূহি সঙ্গহৰত্থূহি যথারহং সত্তানং সঙ্গণ্হনেসু কুসলো. এৰরূপো রেণুস্স নাম কুরুরাজস্স পুত্তো সোমনস্সোতি ৰিস্সুতো যদা হোমীতি সম্বন্ধো.

৯. তস্স রঞ্ঞো পতিকরোতি তেন কুরুরাজেন পতি অভিক্খণং উপকত্তব্বভাৰেন পতিকরো ৰল্লভো. কুহকতাপসোতি অসন্তগুণসম্ভাৰনলক্খণেন কোহঞ্ঞেন জীৰিতকপ্পনকো একো তাপসো, তস্স রঞ্ঞো সক্কাতব্বো অহোসি. আরামন্তি ফলারামং, যত্থ এল়ালুকলাবুকুম্ভণ্ডতিপুসাদিৰল্লিফলানি চেৰ তণ্ডুলেয্যকাদিসাকঞ্চ রোপীযতি. মালাৰচ্ছন্তি জাতিঅতিমুত্তকাদিপুপ্ফগচ্ছং, তেন পুপ্ফারামং দস্সেতি. এত্থ চ আরামং কত্ৰা তত্থ মালাৰচ্ছঞ্চ যথাৰুত্তফলৰচ্ছঞ্চ রোপেত্ৰা ততো লদ্ধধনং সংহরিত্ৰা ঠপেন্তো জীৰতীতি অত্থো ৰেদিতব্বো.

তত্রাযং অনুপুব্বিকথা – তদা মহারক্খিতো নাম তাপসো পঞ্চসততাপসপরিৰারো হিমৰন্তে ৰসিত্ৰা লোণম্বিলসেৰনত্থায জনপদচারিকং চরন্তো ইন্দপত্থনগরং পত্ৰা রাজুয্যানে ৰসিত্ৰা সপরিসো পিণ্ডায চরন্তো রাজদ্ৰারং পাপুণি. রাজা ইসিগণং দিস্ৰা ইরিযাপথে পসন্নো অলঙ্কতমহাতলে নিসীদাপেত্ৰা পণীতেনাহারেন পরিৰিসিত্ৰা ‘‘ভন্তে, ইমং ৰস্সারত্তং মম উয্যানেযেৰ ৰসথা’’তি ৰত্ৰা তেহি সদ্ধিং উয্যানং গন্ত্ৰা ৰসনট্ঠানানি কারেত্ৰা পব্বজিতপরিক্খারে দত্ৰা নিক্খমি. ততো পট্ঠায সব্বেপি তে রাজনিৰেসনে ভুঞ্জন্তি.

রাজা পন অপুত্তকো পুত্তে পত্থেতি, পুত্তা নুপ্পজ্জন্তি. ৰস্সারত্তচ্চযেন মহারক্খিতো ‘‘হিমৰন্তং গমিস্সামা’’তি রাজানং আপুচ্ছিত্ৰা রঞ্ঞা কতসক্কারসম্মানো নিক্খমিত্ৰা অন্তরামগ্গে মজ্ঝন্হিকসমযে মগ্গা ওক্কম্ম একস্স সন্দচ্ছাযস্স রুক্খস্স হেট্ঠা সপরিসো নিসীদি. তাপসা কথং সমুট্ঠাপেসুং – ‘‘রাজা অপুত্তকো, সাধু ৰতস্স সচে রাজপুত্তং লভেয্যা’’তি. মহারক্খিতো তং কথং সুত্ৰা ‘‘ভৰিস্সতি নু খো রঞ্ঞো পুত্তো, উদাহু নো’’তি উপধারেন্তো ‘‘ভৰিস্সতী’’তি ঞত্ৰা ‘‘মা তুম্হে চিন্তযিত্থ, অজ্জ পচ্চূসকালে একো দেৰপুত্তো চৰিত্ৰা রঞ্ঞো অগ্গমহেসিযা কুচ্ছিম্হি নিব্বত্তিস্সতী’’তি আহ.

তং সুত্ৰা একো কূটজটিলো ‘‘ইদানি রাজকুলূপকো ভৰিস্সামী’’তি চিন্তেত্ৰা তাপসানং গমনকালে গিলানালযং কত্ৰা নিপজ্জিত্ৰা ‘‘এহি গচ্ছামা’’তি ৰুত্তে ‘‘ন সক্কোমী’’তি আহ. মহারক্খিতো তস্স নিপন্নকারণং ঞত্ৰা ‘‘যদা সক্কোসি, তদা আগচ্ছেয্যাসী’’তি ইসিগণং আদায হিমৰন্তমেৰ গতো. কুহকো নিৰত্তিত্ৰা ৰেগেন গন্ত্ৰা রাজদ্ৰারে ঠত্ৰা ‘‘মহারক্খিতস্স উপট্ঠাকতাপসো আগতো’’তি রঞ্ঞো আরোচাপেত্ৰা রঞ্ঞা ৰেগেন পক্কোসাপিতো পাসাদং অভিরুয্হ পঞ্ঞত্তে আসনে নিসীদি. রাজা তং ৰন্দিত্ৰা একমন্তং নিসিন্নো ইসীনং আরোগ্যং পুচ্ছিত্ৰা ‘‘ভন্তে, অতিখিপ্পং নিৰত্তিত্থ, কেনত্থেন আগতত্থা’’তি আহ.

মহারাজ, ইসিগণো সুখনিসিন্নো ‘‘সাধু ৰতস্স সচে রঞ্ঞো ৰংসানুরক্খকো পুত্তো উপ্পজ্জেয্যা’’তি কথং সমুট্ঠাপেসি. অহং তং কথং সুত্ৰা ‘‘ভৰিস্সতি নু খো রঞ্ঞো পুত্তো, উদাহু নো’’তি দিব্বচক্খুনা ওলোকেন্তো ‘‘মহিদ্ধিকো দেৰপুত্তো চৰিত্ৰা অগ্গমহেসিযা সুধম্মায কুচ্ছিম্হি নিব্বত্তিস্সতী’’তি দিস্ৰা ‘‘অজানন্তা গব্ভং নাসেয্যুং, আচিক্খিস্সামি তাৰ ন’’ন্তি তুম্হাকং কথনত্থায আগতো, কথিতং ৰো মযা, গচ্ছামহ’’ন্তি. রাজা ‘‘ভন্তে, ন সক্কা গন্তু’’ন্তি হট্ঠতুট্ঠো পসন্নচিত্তো কুহকতাপসং উয্যানং নেত্ৰা ৰসনট্ঠানং সংৰিদহিত্ৰা অদাসি. সো ততো পট্ঠায রাজকুলে ভুঞ্জন্তো ৰসতি, ‘‘দিব্বচক্খুকো’’ত্ৰেৰস্স নামং অহোসি.

তদা বোধিসত্তো তাৰতিংসভৰনতো চৰিত্ৰা তত্থ পটিসন্ধিং গণ্হি, জাতস্স চ নামগ্গহণদিৰসে ‘‘সোমনস্সো’’তি নামং করিংসু. সো কুমারপরিহারেন ৰড্ঢতি. কুহকতাপসোপি উয্যানস্স একপস্সে নানপ্পকারং সূপেয্যসাকঞ্চ ফলৰল্লিআদযো চ রোপেত্ৰা পণ্ণিকানং হত্থে ৰিক্কিণন্তো ধনং সংহরতি. অথ বোধিসত্তস্স সত্তৰস্সিককালে রঞ্ঞো পচ্চন্তো কুপিতো. সো ‘‘তাত, দিব্বচক্খুতাপসে মা পমজ্জা’’তি কুমারং পটিচ্ছাপেত্ৰা পচ্চন্তং ৰূপসমেতুং গতো.

১০-১৩. অথেকদিৰসং কুমারো ‘‘জটিলং পস্সিস্সামী’’তি উয্যানং গন্ত্ৰা কূটজটিলং একং গন্ধিককাসাৰং নিৰাসেত্ৰা একং পারুপিত্ৰা উভোহি হত্থেহি দ্ৰে ঘটে গহেত্ৰা সাকৰত্থুস্মিং উদকং সিঞ্চন্তং দিস্ৰা ‘‘অযং কূটজটিলো অত্তনো সমণধম্মং অকত্ৰা পণ্ণিককম্মং করোতী’’তি ঞত্ৰা ‘‘কিং করোসি পণ্ণিকগহপতিকা’’তি তং লজ্জাপেত্ৰা অৰন্দিত্ৰা এৰ নিক্খমি.

কূটজটিলো ‘‘অযং ইদানেৰ এৰরূপো, পচ্ছা ‘কো জানাতি কিং করিস্সতী’তি ইদানেৰ নং নাসেতুং ৰট্টতী’’তি চিন্তেত্ৰা রঞ্ঞো আগমনকালে পাসাণফলকং একমন্তং খিপিত্ৰা পানীযঘটং ভিন্দিত্ৰা পণ্ণসালায তিণানি ৰিকিরিত্ৰা সরীরং তেলেন মক্খেত্ৰা পণ্ণসালং পৰিসিত্ৰা সসীসং পারুপিত্ৰা মহাদুক্খপ্পত্তো ৰিয মঞ্চে নিপজ্জি. রাজা আগন্ত্ৰা নগরং পদক্খিণং কত্ৰা নিৰেসনং অপৰিসিত্ৰাৰ ‘‘মম সামিকং দিব্বচক্খুকং পস্সিস্সামী’’তি পণ্ণসালদ্ৰারং গন্ত্ৰা তং ৰিপ্পকারং দিস্ৰা ‘‘কিং নু খো এত’’ন্তি অন্তো পৰিসিত্ৰা তং নিপন্নকং দিস্ৰা পাদে পরিমজ্জন্তো পুচ্ছি – ‘‘কেন, ত্ৰং ভন্তে, এৰং ৰিহেঠিতো, কমজ্জ যমলোকং নেমি, তং মে সীঘং আচিক্খা’’তি.

তং সুত্ৰা কূটজটিলো নিত্থুনন্তো উট্ঠায দিট্ঠো, মহারাজ, ত্ৰং মে, পস্সিত্ৰা তযি ৰিস্সাসেন অহং ইমং ৰিপ্পকারং পত্তো, তৰ পুত্তেনম্হি এৰং ৰিহেঠিতোতি. তং সুত্ৰা রাজা চোরঘাতকে আণাপেসি – ‘‘গচ্ছথ কুমারস্স সীসং ছিন্দিত্ৰা সরীরঞ্চস্স খণ্ডাখণ্ডিকং ছিন্দিত্ৰা রথিযা রথিযং ৰিকিরথা’’তি. তে মাতরা অলঙ্করিত্ৰা অত্তনো অঙ্কে নিসীদাপিতং কুমারং আকড্ঢিংসু – ‘‘রঞ্ঞা তে ৰধো আণত্তো’’তি. কুমারো মরণভযতজ্জিতো মাতু অঙ্কতো ৰুট্ঠায – ‘‘রঞ্ঞো মং দস্সেথ, সন্তি রাজকিচ্চানী’’তি আহ. তে কুমারস্স ৰচনং সুত্ৰা মারেতুং অৰিসহন্তা গোণং ৰিয রজ্জুযা পরিকড্ঢন্তা নেত্ৰা রঞ্ঞো দস্সেসুং. তেন ৰুত্তং ‘‘তমহং দিস্ৰান কুহক’’ন্তিআদি.

তত্থ থুসরাসিংৰ অতণ্ডুলন্তি তণ্ডুলকণেহি ৰিরহিতং থুসরাসিং ৰিয, দুমংৰ রুক্খং ৰিয, অন্তো মহাসুসিরং. কদলিংৰ অসারকং সীলাদিসাররহিতং তাপসং অহং দিস্ৰা নত্থি ইমস্স সতং সাধূনং ঝানাদিধম্মো. কস্মা? সামঞ্ঞা সমণভাৰা সীলমত্ততোপি অপগতো পরিহীনো অযং, তথা হি অযং হিরীসুক্কধম্মজহিতো পজহিতহিরিসঙ্খাতসুক্কধম্মো. জীৰিতৰুত্তিকারণাতি ‘‘কেৰলং জীৰিতস্সেৰ হেতু অযং তাপসলিঙ্গেন চরতী’’তি চিন্তেসিন্তি দস্সেতি. পরন্তিহীতি পরন্তো পচ্চন্তো নিৰাসভূতো এতেসং অত্থীতি পরন্তিনো, সীমন্তরিকৰাসিনো. তেহি পরন্তীহি অটৰিকেহি পচ্চন্তদেসো খোভিতো অহোসি. তং পচ্চন্তকোপং নিসেধেতুং ৰূপসমেতুং গচ্ছন্তো মম পিতা কুরুরাজা ‘‘তাত সোমনস্সকুমার, ময্হং সামিকং উগ্গতাপনং ঘোরতপং পরমসন্তিন্দ্রিযং জটিলং মা পমজ্জি. সো হি অম্হাকং সব্বকামদদো, তস্মা যদিচ্ছকং চিত্তরুচিযং তস্স চিত্তানুকূলং পৰত্তেহি অনুৰত্তেহী’’তি তদা মং অনুসাসীতি দস্সেতি.

১৪. তমহং গন্ত্ৰানুপট্ঠানন্তি পিতু ৰচনং অনতিক্কন্তো তং কূটতাপসং উপট্ঠানত্থং গন্ত্ৰা তং সাকৰত্থুস্মিং উদকং আসিঞ্চন্তং দিস্ৰা ‘‘পণ্ণিকো অয’’ন্তি চ ঞত্ৰা কচ্চি তে, গহপতি, কুসলন্তি, গহপতি, তে সরীরস্স কচ্চি কুসলং কুসলমেৰ, তথা হি সাকৰত্থুস্মিং উদকং আসিঞ্চসি. কিং ৰা তৰ হিরঞ্ঞং ৰা সুৰণ্ণং ৰা আহরীযতু, তথা হি পণ্ণিকৰুত্তিং অনুতিট্ঠসীতি ইদং ৰচনং অভাসিং.

১৫. তেন সো কুপিতো আসীতি তেন মযা ৰুত্তগহপতিৰাদেন সো মাননিস্সিতো মানং অল্লীনো কুহকো ময্হং কুপিতো কুদ্ধো অহোসি. কুদ্ধো চ সমানো ‘‘ঘাতাপেমি তুৰং অজ্জ, রট্ঠা পব্বাজযামি ৰা’’তি আহ.

তত্থ তুৰং অজ্জাতি, ত্ৰং অজ্জ, ইদানিযেৰ রঞ্ঞো আগতকালেতি অত্থো.

১৬. নিসেধযিত্ৰা পচ্চন্তন্তি পচ্চন্তং ৰূপসমেত্ৰা নগরং অপৰিট্ঠো তঙ্খণঞ্ঞেৰ উয্যানং গন্ত্ৰা কুহকং কুহকতাপসং কচ্চি তে, ভন্তে, খমনীযং, সম্মানো তে পৰত্তিতোতি কুমারেন তে সম্মানো পৰত্তিতো অহোসি.

১৭. কুমারো যথা নাসিযোতি যথা কুমারো নাসিযো নাসেতব্বো ঘাতাপেতব্বো, তথা সো পাপো তস্স রঞ্ঞো আচিক্খি. আণাপেসীতি ময্হং সামিকে ইমস্মিং দিব্বচক্খুতাপসে সতি কিং মম ন নিপ্ফজ্জতি, তস্মা পুত্তেন মে অত্থো নত্থি, ততোপি অযমেৰ সেয্যোতি চিন্তেত্ৰা আণাপেসি.

১৮. কিন্তি? সীসং তত্থেৰ ছিন্দিত্ৰাতি যস্মিং ঠানে তং কুমারং পস্সথ, তত্থেৰ তস্স সীসং ছিন্দিত্ৰা সরীরঞ্চস্স কত্ৰান চতুখণ্ডিকং চতুরো খণ্ডে কত্ৰা রথিযা রথিযং নীযন্তা ৰীথিতো ৰীথিং ৰিক্খিপন্তা দস্সেথ. কস্মা? সা গতি জটিলহীল়িতাতি যেহি অযং জটিলো হীল়িতো, তেসং জটিলহীল়িতানং সা গতি সা নিপ্ফত্তি সো ৰিপাকোতি. জটিলহীল়িতাতি ৰা জটিলহীল়নহেতু সা তস্স নিপ্ফত্তীতি এৰঞ্চেত্থ অত্থো দট্ঠব্বো.

১৯. তত্থাতি তস্স রঞ্ঞো আণাযং, তস্মিং ৰা তাপসস্স পরিভৰে. কারণিকাতি ঘাতকা, চোরঘাতকাতি অত্থো. চণ্ডাতি কুরূরা. লুদ্দাতি সুদারুণা. অকারুণাতি তস্সেৰ ৰেৰচনং কতং. ‘‘অকরুণা’’তিপি পাল়ি, নিক্করুণাতি অত্থো. মাতু অঙ্কে নিসিন্নস্সাতি মম মাতু সুধম্মায দেৰিযা উচ্ছঙ্গে নিসিন্নস্স. ‘‘নিসিন্নস্সা’’তি অনাদরে সামিৰচনং. আকড্ঢিত্ৰা নযন্তি মন্তি মাতরা অলঙ্করিত্ৰা অত্তনো অঙ্কে নিসীদাপিতং মং রাজাণায তে চোরঘাতকা গোণং ৰিয রজ্জুযা আকড্ঢিত্ৰা আঘাতনং নযন্তি. কুমারে পন নীযমানে দাসিগণপরিৰুতা সদ্ধিং ওরোধেহি সুধম্মা দেৰী নাগরাপি ‘‘মযং নিরপরাধং কুমারং মারেতুং ন দস্সামা’’তি তেন সদ্ধিংযেৰ অগমংসু.

২০. বন্ধতং গাল়্হবন্ধনন্তি গাল়্হবন্ধনং বন্ধন্তানং তেসং কারণিকপুরিসানং. রাজকিরিযানি অত্থি মেতি মযা রঞ্ঞো ৰত্তব্বানি রাজকিচ্চানি অত্থি. তস্মা রঞ্ঞো দস্সেথ মং খিপ্পন্তি তেসং অহং এৰং ৰচনং অৰচং.

২১. রঞ্ঞো দস্সযিংসু, পাপস্স পাপসেৰিনোতি অত্তনা পাপসীলস্স লামকাচারস্স কূটতাপসস্স সেৰনতো পাপসেৰিনো রঞ্ঞো মং দস্সযিংসু. দিস্ৰান তং সঞ্ঞাপেসিন্তি তং মম পিতরং কুরুরাজানং পস্সিত্ৰা ‘‘কস্মা মং, দেৰ, মারাপেসী’’তি ৰত্ৰা তেন ‘‘কস্মা চ পন ত্ৰং ময্হং সামিকং দিব্বচক্খুতাপসং গহপতিৰাদেন সমুদাচরি. ইদঞ্চিদঞ্চ ৰিপ্পকারং করী’’তি ৰুত্তে ‘‘দেৰ, গহপতিঞ্ঞেৰ ‘গহপতী’তি ৰদন্তস্স কো ময্হং দোসো’’তি ৰত্ৰা তস্স নানাৰিধানি মালাৰচ্ছানি রোপেত্ৰা পুপ্ফপণ্ণফলাফলাদীনং ৰিক্কিণনং হত্থতো চস্স তানি দেৰসিকং ৰিক্কিণন্তেহি মালাকারপণ্ণিকেহি সদ্দহাপেত্ৰা ‘‘মালাৰত্থুপণ্ণৰত্থূনি উপধারেথা’’তি ৰত্ৰা পণ্ণসালঞ্চস্স পৰিসিত্ৰা পুপ্ফাদিৰিক্কিযলদ্ধং কহাপণকভণ্ডিকং অত্তনো পুরিসেহি নীহরাপেত্ৰা রাজানং সঞ্ঞাপেসিং তস্স কূটতাপসভাৰং জানাপেসিং. মমঞ্চ ৰসমানযিন্তি তেন সঞ্ঞাপনেন ‘‘সচ্চং খো পন কুমারো ৰদতি, অযং কূটতাপসো পুব্বে অপ্পিচ্ছো ৰিয হুত্ৰা ইদানি মহাপরিগ্গহো জাতো’’তি যথা তস্মিং নিব্বিন্নো মম ৰসে ৰত্ততি, এৰং রাজানং মম ৰসমানেসিং.

ততো মহাসত্তো ‘‘এৰরূপস্স বালস্স রঞ্ঞো সন্তিকে ৰসনতো হিমৰন্তং পৰিসিত্ৰা পব্বজিতুং যুত্ত’’ন্তি চিন্তেত্ৰা রাজানং আপুচ্ছি – ‘‘ন মে, মহারাজ, ইধ ৰাসেন অত্থো, অনুজানাথ মং পব্বজিস্সামী’’তি. রাজা ‘‘তাত, মযা অনুপধারেত্ৰাৰ তে ৰধো আণত্তো, খম ময্হং অপরাধ’’ন্তি মহাসত্তং খমাপেত্ৰা ‘‘অজ্জেৰ ইমং রজ্জং পটিপজ্জাহী’’তি আহ. কুমারো ‘‘দেৰ, কিমত্থি মানুসকেসু ভোগেসু, অহং পুব্বে দীঘরত্তং দিব্বভোগসম্পত্তিযো অনুভৰিং, ন তত্থাপি মে সঙ্গো, পব্বজিস্সামেৰাহং, ন তাদিসস্স বালস্স পরনেয্যবুদ্ধিনো সন্তিকে ৰসামী’’তি ৰত্ৰা তং ওৰদন্তো –

‘‘অনিসম্ম কতং কম্মং, অনৰত্থায চিন্তিতং;

ভেসজ্জস্সেৰ ৰেভঙ্গো, ৰিপাকো হোতি পাপকো.

‘‘নিসম্ম চ কতং কম্মং, সম্মাৰত্থায চিন্তিতং;

ভেসজ্জস্সেৰ সম্পত্তি, ৰিপাকো হোতি ভদ্রকো.

‘‘অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধু.

‘‘নিসম্ম খত্তিযো কযিরা, নানিসম্ম দিসম্পতি;

নিসম্মকারিনো রাজ, যসো কিত্তি চ ৰড্ঢতি.

‘‘নিসম্ম দণ্ডং পণযেয্য ইস্সরো, ৰেগা কতং তপ্পতি ভূমিপাল;

সম্মাপণীধী চ নরস্স অত্থা, অনানুতপ্পা তে ভৰন্তি পচ্ছা.

‘‘অনানুতপ্পানি হি যে করোন্তি, ৰিভজ্জ কম্মাযতনানি লোকে;

ৰিঞ্ঞুপ্পসত্থানি সুখুদ্রযানি, ভৰন্তি বুদ্ধানুমতানি তানি.

‘‘আগচ্ছুং দোৰারিকা খগ্গবন্ধা, কাসাৰিযা হন্তু মমং জনিন্দ;

মাতুঞ্চ অঙ্কস্মিমহং নিসিন্নো, আকড্ঢিতো সহসা তেহি দেৰ.

‘‘কটুকঞ্হি সম্বাধং সুকিচ্ছং পত্তো, মধুরম্পিযং জীৰিতং লদ্ধ রাজ;

কিচ্ছেনহং অজ্জ ৰধা পমুত্তো, পব্বজ্জমেৰাভিমনোহমস্মী’’তি. (জা. ১.১৫.২২৭-২৩৪) –

ইমাহি গাথাহি ধম্মং দেসেসি.

তত্থ অনিসম্মাতি অনুপধারেত্ৰা. অনৰত্থাযাতি অৰৰত্থপেত্ৰা. ৰেভঙ্গোতি ৰিপত্তি. ৰিপাকোতি নিপ্ফত্তি. অসঞ্ঞতোতি অসংৰুতো দুস্সীলো. পণযেয্যাতি পট্ঠপেয্য. ৰেগাতি ৰেগেন সহসা. সম্মাপণীধী চাতি সম্মাপণিধিনা, যোনিসো ঠপিতেন চিত্তেন কতা নরস্স অত্থা পচ্ছা অনানুতপ্পা ভৰন্তীতি অত্থো. ৰিভজ্জাতি ইমানি কাতুং যুত্তানি, ইমানি অযুত্তানীতি এৰং পঞ্ঞায ৰিভজিত্ৰা. কম্মাযতনানীতি কম্মানি. বুদ্ধানুমতানীতি পণ্ডিতেহি অনুমতানি অনৰজ্জানি হোন্তি. কটুকন্তি দুক্খং অসাতং, সম্বাধং সুকিচ্ছং মরণভযং পত্তোম্হি. লদ্ধাতি অত্তনো ঞাণবলেন জীৰিতং লভিত্ৰা. পব্বজ্জমেৰাভিমনোতি পব্বজ্জাভিমুখচিত্তো এৰাহমস্মি.

এৰং মহাসত্তেন ধম্মে দেসিতে রাজা দেৰিং আমন্তেসি – ‘‘দেৰি, ত্ৰং পুত্তং নিৰত্তেহী’’তি. দেৰীপি কুমারস্স পব্বজ্জমেৰ রোচেসি. মহাসত্তো মাতাপিতরো ৰন্দিত্ৰা ‘‘সচে ময্হং দোসো অত্থি, তং খমথা’’তি খমাপেত্ৰা মহাজনং আপুচ্ছিত্ৰা হিমৰন্তাভিমুখো অগমাসি. গতে চ পন মহাসত্তে মহাজনো কূটজটিলং পোথেত্ৰা জীৰিতক্খযং পাপেসি. বোধিসত্তোপি সনাগরেহি অমচ্চপারিসজ্জাদীহি রাজপুরিসেহি অস্সুমুখেহি অনুবন্ধিযমানো তে নিৰত্তেসি. মনুস্সেসু নিৰত্তেসু মনুস্সৰণ্ণেনাগন্ত্ৰা দেৰতাহি নীতো সত্ত পব্বতরাজিযো অতিক্কমিত্ৰা হিমৰন্তে ৰিস্সকম্মুনা নিম্মিতায পণ্ণসালায ইসিপব্বজ্জং পব্বজি. তেন ৰুত্তং –

২২.

‘‘সো মং তত্থ খমাপেসি, মহারজ্জং অদাসি মে;

সোহং তমং দালযিত্ৰা, পব্বজিং অনগারিয’’ন্তি.

তত্থ তমং দালযিত্ৰাতি কামাদীনৰদস্সনস্স পটিপক্খভূতং সম্মোহতমং ৰিধমিত্ৰা. পব্বজিন্তি উপাগচ্ছিং. অনগারিযন্তি পব্বজ্জং.

২৩. ইদানি যদত্থং তদা তং রাজিস্সরিযং পরিচ্চত্তং, তং দস্সেতুং ‘‘ন মে দেস্স’’ন্তি ওসানগাথমাহ. তস্সত্থো ৰুত্তনযোৰ.

এৰং পন মহাসত্তে পব্বজিতে যাৰ সোল়সৰস্সকালা রাজকুলে পরিচারিকৰেসেন দেৰতাযেৰ নং উপট্ঠহিংসু. সো তত্থ ঝানাভিঞ্ঞাযো নিব্বত্তেত্ৰা ব্রহ্মলোকূপগো অহোসি.

তদা কুহকো দেৰদত্তো অহোসি, মাতা মহামাযা, মহারক্খিততাপসো সারিপুত্তত্থেরো, সোমনস্সকুমারো লোকনাথো.

তস্স যুধঞ্জযচরিযাযং (চরিযা. ৩.১ আদযো) ৰুত্তনযেনেৰ দস পারমিযো নিদ্ধারেতব্বা. ইধাপি নেক্খম্মপারমী অতিসযৰতীতি সা এৰ দেসনং আরুল়্হা. তথা সত্তৰস্সিককালে এৰ রাজকিচ্চেসু সমত্থতা, তস্স তাপসস্স কূটজটিলভাৰপরিগ্গণ্হনং, তেন পযুত্তেন রঞ্ঞা ৰধে আণত্তে সন্তাসাভাৰো, রঞ্ঞো সন্তিকং গন্ত্ৰা নানানযেহি তস্স সদোসতং অত্তনো চ নিরপরাধতং মহাজনস্স মজ্ঝে পকাসেত্ৰা রঞ্ঞো চ পরনেয্যবুদ্ধিতং বালভাৰঞ্চ পট্ঠপেত্ৰা তেন খমাপিতেপি তস্স সন্তিকে ৰাসতো রজ্জিস্সরিযতো চ সংৰেগমাপজ্জিত্ৰা নানপ্পকারং যাচিযমানেনপি হত্থগতং রজ্জসিরিং খেল়পিণ্ডং ৰিয ছড্ডেত্ৰা কত্থচি অলগ্গচিত্তেন হুত্ৰা পব্বজনং, পব্বজিত্ৰা পৰিৰেকারামেন হুত্ৰা নচিরস্সেৰ অপ্পকসিরেন ঝানাভিঞ্ঞানিব্বত্তনন্তি এৰমাদযো মহাসত্তস্স গুণানুভাৰা ৰিভাৰেতব্বাতি.

সোমনস্সচরিযাৰণ্ণনা নিট্ঠিতা.

৩. অযোঘরচরিযাৰণ্ণনা

২৪. ততিযে অযোঘরম্হি সংৰড্ঢোতি অমনুস্সউপদ্দৰপরিৰজ্জনত্থং চতুরস্সসালৰসেন কতে মহতি সব্বঅযোমযে গেহে সংৰড্ঢো. নামেনাসি অযোঘরোতি অযোঘরে জাতসংৰড্ঢভাৰেনেৰ ‘‘অযোঘরকুমারো’’তি নামেন পাকটো অহোসি.

২৫-৬. তদা হি কাসিরঞ্ঞো অগ্গমহেসিযা পুরিমত্তভাৰে সপত্তি ‘‘তৰ জাতং জাতং পজং খাদেয্য’’ন্তি পত্থনং পট্ঠপেত্ৰা যক্খিনিযোনিযং নিব্বত্তা ওকাসং লভিত্ৰা তস্সা ৰিজাতকালে দ্ৰে ৰারে পুত্তে খাদি. ততিযৰারে পন বোধিসত্তো তস্সা কুচ্ছিযং পটিসন্ধিং গণ্হি. রাজা ‘‘দেৰিযা জাতং জাতং পজং একা যক্খিনী খাদতি, কিং নু খো কাতব্ব’’ন্তি মনুস্সেহি সম্মন্তেত্ৰা ‘‘অমনুস্সা নাম অযোঘরস্স ভাযন্তি, অযোঘরং কাতুং ৰট্টতী’’তি ৰুত্তে কম্মারে আণাপেত্ৰা থম্ভে আদিং কত্ৰা অযোমযেহেৰ সব্বগেহসম্ভারেহি চতুরস্সসালং মহন্তং অযোঘরং নিট্ঠাপেত্ৰা পরিপক্কগব্ভং দেৰিং তত্থ ৰাসেসি. সা তত্থ ধঞ্ঞপুঞ্ঞলক্খণং পুত্তং ৰিজাযি. ‘‘অযোঘরকুমারো’’ত্ৰেৰস্স নামং করিংসু. তং ধাতীনং দত্ৰা মহন্তং আরক্খং সংৰিদহিত্ৰা রাজা দেৰিং অন্তেপুরং আনেসি. যক্খিনীপি উদকৰারং গন্ত্ৰা ৰেস্সৰণস্স উদকং ৰহন্তী জীৰিতক্খযং পত্তা.

মহাসত্তো অযোঘরেযেৰ ৰড্ঢিত্ৰা ৰিঞ্ঞুতং পত্তো, তত্থেৰ সব্বসিপ্পানি উগ্গণ্হি. রাজা পুত্তং সোল়সৰস্সুদ্দেসিকং ৰিদিত্ৰা ‘‘রজ্জমস্স দস্সামী’’তি অমচ্চে আণাপেসি – ‘‘পুত্তং মে আনেথা’’তি. তে ‘‘সাধু, দেৰা’’তি নগরং অলঙ্কারাপেত্ৰা সব্বালঙ্কারৰিভূসিতং মঙ্গলৰারণং আদায তত্থ গন্ত্ৰা কুমারং অলঙ্করিত্ৰা হত্থিক্খন্ধে নিসীদাপেত্ৰা নগরং পদক্খিণং কারেত্ৰা রঞ্ঞো দস্সেসুং. মহাসত্তো রাজানং ৰন্দিত্ৰা অট্ঠাসি. রাজা তস্স সরীরসোভং ওলোকেত্ৰা বলৰসিনেহেন তং আলিঙ্গিত্ৰা ‘‘অজ্জেৰ মে পুত্তং অভিসিঞ্চথা’’তি অমচ্চে আণাপেসি. মহাসত্তো পিতরং ৰন্দিত্ৰা ‘‘ন ময্হং রজ্জেন অত্থো, অহং পব্বজিস্সামি, পব্বজ্জং মে অনুজানাথা’’তি আহ. তেন ৰুত্তং ‘‘দুক্খেন জীৰিতো লদ্ধো’’তিআদি.

তত্থ দুক্খেনাতি, তাত, তৰ ভাতিকা দ্ৰে একায যক্খিনিযা খাদিতা, তুয্হং পন ততো অমনুস্সভযতো নিৰারণত্থং কতেন দুক্খেন মহতা আযাসেন জীৰিতো লদ্ধো. সংপীল়ে পতিপোসিতোতি নানাৰিধায অমনুস্সরক্খায সম্বাধে অযোঘরে ৰিজাযনকালতো পট্ঠায যাৰ সোল়সৰস্সুপ্পত্তিযা সম্বাধে সংৰড্ঢিতোতি অত্থো. অজ্জেৰ, পুত্ত, পটিপজ্জ, কেৰলং ৰসুধং ইমন্তি কঞ্চনমালালঙ্কতস্স সেতচ্ছত্তস্স হেট্ঠা রতনরাসিম্হি ঠপেত্ৰা তীহি সঙ্খেহি অভিসিঞ্চিযমানো ইমং কুলসন্তকং কেৰলং সকলং সমুদ্দপরিযন্তং ততোযেৰ সহ রট্ঠেহীতি সরট্ঠকং সহ নিগমেহি মহাগামেহীতি সনিগমং অপরিমিতেন পরিৰারজনেন সদ্ধিং সজনং ইমং ৰসুধং মহাপথৰিং অজ্জেৰ, পুত্ত, পটিপজ্জ, রজ্জং কারেহীতি অত্থো. ৰন্দিত্ৰা খত্তিযং. অঞ্জলিং পগ্গহেত্ৰান, ইদং ৰচনমব্রৰিন্তি খত্তিযং কাসিরাজানং মম পিতরং ৰন্দিত্ৰা তস্স অঞ্জলিং পণামেত্ৰা ইদং ৰচনং অভাসিং.

২৭. যে কেচি মহিযা সত্তাতি ইমিস্সা মহাপথৰিযা যে কেচি সত্তা নাম. হীনমুক্কট্ঠমজ্ঝিমাতি লামকা চেৰ উত্তমা চ, উভিন্নং ৰেমজ্ঝে ভৰত্তা মজ্ঝিমা চ. সকে গেহেতি সব্বে তে সকে গেহে. সকঞাতিভীতি সকেহি ঞাতীহি সম্মোদমানা ৰিস্সট্ঠা অনুক্কণ্ঠিতা যথাৰিভৰং ৰড্ঢন্তি.

২৮. ইদং লোকে উত্তরিযন্তি ইদং পন ইমস্মিং লোকে অসদিসং, ময্হং এৰ আৰেণিকং. কিং পন তং সংপীল়ে মম পোসনন্তি সম্বাধে মম সংৰড্ঢনং. তথা হি অযোঘরম্হি সংৰড্ঢো, অপ্পভে চন্দসূরিযেতি চন্দসূরিযানং পভারহিতে অযোঘরে সংৰড্ঢোম্হীতি সংৰড্ঢো অম্হি.

২৯. পূতিকুণপসম্পুণ্ণাতি পূতিগন্ধনানপ্পকারকুণপসম্পুণ্ণা গূথনিরযসদিসা. মাতু কুচ্ছিতো জীৰিতসংসযে ৰত্তমানে কথং মুচ্চিত্ৰা নিক্খমিত্ৰা. ততো ঘোরতরেতি ততোপি গব্ভৰাসতো দারুণতরে, অৰিস্সট্ঠৰাসেন দুক্খে. পক্খিত্তযোঘরেতি পক্খিত্তো অযোঘরে, বন্ধনাগারে ঠপিতো ৰিয অহোসিন্তি দস্সেতি.

৩০. যদিহন্তি এত্থ যদীতি নিপাতমত্তং. তাদিসন্তি যাদিসং পুব্বে ৰুত্তং, তাদিসং পরমদারুণং দুক্খং পত্ৰা অহং রজ্জেসু যদি রজ্জামি যদি রমিস্সামি, এৰং সন্তে পাপানং লামকানং নিহীনপুরিসানং উত্তমো নিহীনতমো সিযং.

৩১. উক্কণ্ঠিতোম্হি কাযেনাতি অপরিমুত্তগব্ভৰাসাদিনা পূতিকাযেন উক্কণ্ঠিতো নিব্বিন্নো অম্হি. রজ্জেনম্হি অনত্থিকোতি রজ্জেনপি অনত্থিকো অম্হি. যক্খিনিযা হত্থতো মুত্তোপি হি নাহং অজরামরো, কিং মে রজ্জেন, রজ্জঞ্হি নাম সব্বেসং অনত্থানং সন্নিপাতট্ঠানং, তত্থ ঠিতকালতো পট্ঠায দুন্নিক্খমং হোতি, তস্মা তং অনুপগন্ত্ৰা নিব্বুতিং পরিযেসিস্সং, যত্থ মং মচ্চু ন মদ্দিযেতি যত্থ ঠিতং মং মহাসেনো মচ্চুরাজা ন মদ্দিযে ন ওত্থরেয্য ন অভিভৰেয্য, তং নিব্বুতিং অমতমহানিব্বানং পরিযেসিস্সামীতি.

৩২. এৰাহং চিন্তযিত্ৰানাতি এৰং ইমিনা ৰুত্তপ্পকারেন নানপ্পকারং সংসারে আদীনৰং পচ্চৰেক্খণেন নিব্বানে আনিসংসদস্সনেন চ যোনিসো চিন্তেত্ৰা. ৰিরৰন্তে মহাজনেতি মযা ৰিপ্পযোগদুক্খাসহনেন ৰিরৰন্তে পরিদেৰন্তে মাতাপিতুপ্পমুখে মহন্তে জনে. নাগোৰ বন্ধনং ছেত্ৰাতি যথা নাম মহাবলো হত্থিনাগো দুব্বলতরং রজ্জুবন্ধনং সুখেনেৰ ছিন্দতি, এৰমেৰ ঞাতিসঙ্গাদিভেদস্স তস্মিং জনে তণ্হাবন্ধনস্স ছিন্দনেন বন্ধনং ছেত্ৰা কাননসঙ্খাতং মহাৰনং পব্বজ্জূপগমনৰসেন পাৰিসিং. ওসানগাথা ৰুত্তত্থা এৰ.

তত্থ চ মহাসত্তো অত্তনো পব্বজ্জাধিপ্পাযং জানিত্ৰা ‘‘তাত, কিংকারণা পব্বজসী’’তি রঞ্ঞা ৰুত্তো ‘‘দেৰ, অহং মাতুকুচ্ছিম্হি দস মাসে গূথনিরযে ৰিয ৰসিত্ৰা মাতু কুচ্ছিতো নিক্খন্তো যক্খিনিযা ভযেন সোল়সৰস্সানি বন্ধনাগারে ৰসন্তো বহি ওলোকেতুম্পি ন লভিং, উস্সদনিরযে পক্খিত্তো ৰিয অহোসিং, যক্খিনিতো মুত্তোপি অজরামরো ন হোমি, মচ্চু নামেস ন সক্কা কেনচি জিনিতুং, ভৰে উক্কণ্ঠিতোম্হি, যাৰ মে ব্যাধিজরামরণানি নাগচ্ছন্তি, তাৰদেৰ পব্বজিত্ৰা ধম্মং চরিস্সামি, অলং মে রজ্জেন, অনুজানাহি মং, দেৰ, পব্বজিতু’’ন্তি ৰত্ৰা –

‘‘যমেকরত্তিং পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততী’’তি. (জা. ১.১৫.৩৬৩) –

আদিনা চতুৰীসতিযা গাথাহি পিতু ধম্মং দেসেত্ৰা ‘‘মহারাজ, তুম্হাকং রজ্জং তুম্হাকমেৰ হোতু, ন ময্হং ইমিনা অত্থো, তুম্হেহি সদ্ধিং কথেন্তেযেৰ ব্যাধিজরামরণানি আগচ্ছেয্যুং, তিট্ঠথ তুম্হে’’তি ৰত্ৰা অযদামং ছিন্দিত্ৰা মত্তহত্থী ৰিয, কঞ্চনপঞ্জরং ভিন্দিত্ৰা সীহপোতকো ৰিয, কামে পহায মাতাপিতরো ৰন্দিত্ৰা নিক্খমি. অথস্স পিতা ‘‘অযং নাম কুমারো পব্বজিতুকামো, কিমঙ্গং পনাহং, মমাপি রজ্জেন অত্থো নত্থী’’তি রজ্জং পহায তেন সদ্ধিং এৰ নিক্খমি. তস্মিং নিক্খমন্তে দেৰীপি অমচ্চাপি ব্রাহ্মণগহপতিকাদযোপীতি সকলনগরৰাসিনো ভোগে ছড্ডেত্ৰা নিক্খমিংসু. সমাগমো মহা অহোসি, পরিসা দ্ৰাদসযোজনিকা জাতা, তে আদায মহাসত্তো হিমৰন্তং পাৰিসি.

সক্কো দেৰরাজা তস্স নিক্খন্তভাৰং ঞত্ৰা ৰিস্সকম্মং পেসেত্ৰা দ্ৰাদসযোজনাযামং সত্তযোজনৰিত্থারং অস্সমপদং কারেসি, সব্বে চ পব্বজিতপরিক্খারে পটিযাদাপেসি. ইধ মহাসত্তস্স পব্বজ্জা চ ওৰাদদানঞ্চ ব্রহ্মলোকপরাযনতা চ পরিসায সম্মা পটিপত্তি চ সব্বা মহাগোৰিন্দচরিযাযং (চরিযা. ১.৩৭ আদযো) ৰুত্তনযেনেৰ ৰেদিতব্বা.

তদা মাতাপিতরো মহারাজকুলানি অহেসুং, পরিসা বুদ্ধপরিসা, অযোঘরপণ্ডিতো লোকনাথো.

তস্স সেসপারমিনিদ্ধারণা আনুভাৰৰিভাৰনা চ হেট্ঠা ৰুত্তনযেনেৰ ৰেদিতব্বাতি.

অযোঘরচরিযাৰণ্ণনা নিট্ঠিতা.

৪. ভিসচরিযাৰণ্ণনা

৩৪.

চতুত্থে যদা হোমি, কাসীনং পুরৰরুত্তমেতি ‘‘কাসী’’তি বহুৰচনৰসেন লদ্ধৰোহারস্স রট্ঠস্স নগরৰরে বারাণসিযং যস্মিং কালে জাতসংৰড্ঢো হুত্ৰা ৰসামীতি অত্থো. ভগিনী চ ভাতরো সত্ত, নিব্বত্তা সোত্তিযে কুলেতি উপকঞ্চনাদযো ছ অহঞ্চাতি ভাতরো সত্ত সব্বকনিট্ঠা কঞ্চনদেৰী নাম ভগিনী চাতি সব্বে মযং অট্ঠ জনা মন্তজ্ঝেননিরততায সোত্তিযে উদিতোদিতে মহতি ব্রাহ্মণকুলে তদা নিব্বত্তা জাতাতি অত্থো.

৩৫.

বোধিসত্তো হি তদা বারাণসিযং অসীতিকোটিৰিভৰস্স ব্রাহ্মণমহাসালস্স পুত্তো হুত্ৰা নিব্বত্তি. তস্স ‘‘কঞ্চনকুমারো’’তি নামং করিংসু. অথস্স পদসা ৰিচরণকালে অপরো পুত্তো ৰিজাযি. ‘‘উপকঞ্চনকুমারো’’তিস্স নামং করিংসু. ততো পট্ঠায মহাসত্তং ‘‘মহাকঞ্চনকুমারো’’তি সমুদাচরন্তি. এৰং পটিপাটিযা সত্ত পুত্তা অহেসুং. সব্বকনিট্ঠা পন একা ধীতা. তস্সা ‘‘কঞ্চনদেৰী’’তি নামং করিংসু. মহাসত্তো ৰযপ্পত্তো তক্কসিলং গন্ত্ৰা সব্বসিপ্পানি উগ্গহেত্ৰা পচ্চাগঞ্ছি.

অথ নং মাতাপিতরো ঘরাৰাসেন বন্ধিতুকামা ‘‘অত্তনো সমানজাতিকুলতো তে দারিকং আনেস্সামা’’তি ৰদিংসু. সো ‘‘অম্ম, তাত, ন ময্হং ঘরাৰাসেন অত্থো. ময্হঞ্হি সব্বো লোকসন্নিৰাসো আদিত্তো ৰিয সপ্পটিভযো, বন্ধনাগারং ৰিয পলিবুদ্ধনং, উক্কারভূমি ৰিয জিগুচ্ছো হুত্ৰা উপট্ঠাতি, ন মে চিত্তং কামেসু রজ্জতি, অঞ্ঞে ৰো পুত্তা অত্থি, তে ঘরাৰাসেন নিমন্তেথা’’তি ৰত্ৰা পুনপ্পুনং যাচিতোপি সহাযেহি যাচাপিতোপি ন ইচ্ছি, অথ নং সহাযা ‘‘সম্ম, কিং পন ত্ৰং পত্থযন্তো কামে পরিভুঞ্জিতুং ন ইচ্ছসী’’তি পুচ্ছিংসু. সো তেসং অত্তনো নেক্খম্মজ্ঝাসযং আরোচেসি. তেন ৰুত্তং ‘‘এতেসং পুব্বজো আসি’’ন্তিআদি.

তত্থ এতেসং পুব্বজো আসিন্তি এতেসং উপকঞ্চনকাদীনং সত্তন্নং জেট্ঠভাতিকো অহং তদা অহোসিং. হিরীসুক্কমুপাগতোতি সুক্কৰিপাকত্তা সন্তানস্স ৰিসোধনতো চ সুক্কং পাপজিগুচ্ছনলক্খণং হিরিং ভুসং আগতো, অতিৰিয পাপং জিগুচ্ছন্তো আসিন্তি অত্থো. ভৰং দিস্ৰান ভযতো, নেক্খম্মাভিরতো অহন্তি কামভৰাদীনং ৰসেন সব্বং ভৰং পক্খন্দিতুং আগচ্ছন্তং চণ্ডহত্থিং ৰিয, হিংসিতুং আগচ্ছন্তং উক্খিত্তাসিকং ৰধকং ৰিয, সীহং ৰিয, যক্খং ৰিয, রক্খসং ৰিয, ঘোরৰিসং ৰিয, আসিৰিসং ৰিয, আদিত্তং অঙ্গারং ৰিয, সপ্পটিভযং ভযানকভাৰতো পস্সিত্ৰা ততো মুচ্চনত্থঞ্চ পব্বজ্জাভিরতো পব্বজিত্ৰা ‘‘কথং নু খো ধম্মচরিযং সম্মাপটিপত্তিং পূরেয্যং, ঝানসমাপত্তিযো চ নিব্বত্তেয্য’’ন্তি পব্বজ্জাকুসলধম্মপঠমজ্ঝানাদিঅভিরতো তদা অহং আসিন্তি অত্থো.

৩৬. পহিতাতি মাতাপিতূহি পেসিতা. একমানসাতি সমানজ্ঝাসযা পুব্বে মযা একচ্ছন্দা মনাপচারিনো মাতাপিতূহি পহিতত্তা পন মম পটিক্কূলং অমনাপং ৰদন্তা. কামেহি মং নিমন্তেন্তীতি মহাপিতূহি ৰা একমানসা কামেহি মং নিমন্তেন্তি. কুলৰংসং ধারেহীতি ঘরাৰাসং সণ্ঠপেন্তো অত্তনো কুলৰংসং ধারেহি পতিট্ঠপেহীতি কামেহি মং নিমন্তেসুন্তি অত্থো.

৩৭. যং তেসং ৰচনং ৰুত্তন্তি তেসং মম পিযসহাযানং যং ৰচনং ৰুত্তং. গিহিধম্মে সুখাৰহন্তি গিহিভাৰে সতি গহট্ঠভাৰে ঠিতস্স পুরিসস্স ঞাযানুগতত্তা দিট্ঠধম্মিকস্স সম্পরাযিকস্স চ সুখস্স আৰহনতো সুখাৰহং. তং মে অহোসি কঠিনন্তি তং তেসং ময্হং সহাযানং মাতাপিতূনঞ্চ ৰচনং একন্তেনেৰ নেক্খম্মাভিরতত্তা অমনাপভাৰেন মে কঠিনং ফরুসং দিৰসং সন্তত্তফালসদিসং উভোপি কণ্ণে ঝাপেন্তং ৰিয অহোসি.

৩৮. তে মং তদা উক্খিপন্তন্তি তে ময্হং সহাযা মাতাপিতূহি অত্তনো চ উপনিমন্তনৰসেন অনেকৰারং উপনীযমানে কামে উদ্ধমুদ্ধং খিপন্তং ছড্ডেন্তং পটিক্খিপন্তং মং পুচ্ছিংসু. পত্থিতং মমাতি ইতো ৰিসুদ্ধতরং কিং নু খো ইমিনা পত্থিতন্তি মযা অভিপত্থিতং মম তং পত্থনং পুচ্ছিংসু – ‘‘কিং ত্ৰং পত্থযসে, সম্ম, যদি কামে ন ভুঞ্জসী’’তি.

৩৯. অত্থকামোতি অত্তনো অত্থকামো, পাপভীরূতি অত্থো. ‘‘অত্তকামো’’তিপি পাল়ি. হিতেসিনন্তি ময্হং হিতেসীনং পিযসহাযানং. কেচি ‘‘অত্থকামহিতেসিন’’ন্তি পঠন্তি, তং ন সুন্দরং.

৪০. পিতু মাতু চ সাৰযুন্তি তে ময্হং সহাযা অনিৰত্তনীযং মম পব্বজ্জাছন্দং ৰিদিত্ৰা পব্বজিতুকামতাদীপকং ময্হং ৰচনং পিতু মাতু চ সাৰেসুং. ‘‘যগ্ঘে, অম্মতাতা, জানাথ, একন্তেনেৰ মহাকঞ্চনকুমারো পব্বজিস্সতি, ন সো সক্কা কেনচি উপাযেন কামেসু উপনেতু’’ন্তি অৰোচুং. মাতাপিতা এৰমাহূতি তদা ময্হং মাতাপিতরো মম সহাযেহি ৰুত্তং মম ৰচনং সুত্ৰা এৰমাহংসু – ‘‘সব্বেৰ পব্বজাম, ভো’’তি, যদি মহাকঞ্চনকুমারস্স নেক্খম্মং অভিরুচিতং, যং তস্স অভিরুচিতং, তদম্হাকম্পি অভিরুচিতমেৰ, তস্মা সব্বেৰ পব্বজাম, ভোতি. ‘‘ভো’’তি তেসং ব্রাহ্মণানং আলপনং. ‘‘পব্বজাম খো’’তিপি পাঠো, পব্বজাম এৰাতি অত্থো. মহাসত্তস্স হি পব্বজ্জাছন্দং ৰিদিত্ৰা উপকঞ্চনাদযো ছ ভাতরো ভগিনী চ কঞ্চনদেৰী পব্বজিতুকামাৰ অহেসুং, তেন তেপি মাতাপিতূহি ঘরাৰাসেন নিমন্তিযমানা ন ইচ্ছিংসুযেৰ. তস্মা এৰমাহংসু ‘‘সব্বেৰ পব্বজাম, ভো’’তি.

এৰঞ্চ পন ৰত্ৰা মহাসত্তং মাতাপিতরো পক্কোসিত্ৰা অত্তনোপি অধিপ্পাযং তস্স আচিক্খিত্ৰা ‘‘তাত, যদি পব্বজিতুকামোসি, অসীতিকোটিধনং তৰ সন্তকং যথাসুখং ৰিস্সজ্জেহী’’তি আহংসু. অথ নং মহাপুরিসো কপণদ্ধিকাদীনং ৰিস্সজ্জেত্ৰা মহাভিনিক্খমনং নিক্খমিত্ৰা হিমৰন্তং পাৰিসি. তেন সদ্ধিং মাতাপিতরো ছ ভাতরো চ ভগিনী চ একো দাসো একা দাসী একো চ সহাযো ঘরাৰাসং পহায অগমংসু. তেন ৰুত্তং –

৪১.

‘‘উভো মাতা পিতা ময্হং, ভগিনী চ সত্ত ভাতরো;

অমিতধনং ছড্ডযিত্ৰা, পৰিসিম্হা মহাৰন’’ন্তি.

জাতকট্ঠকথাযং (জা. অট্ঠ. ৪.১৪.৭৭ ভিসজাতকৰণ্ণনা) পন ‘‘মাতাপিতূসু কালংকতেসু তেসং কত্তব্বকিচ্চং কত্ৰা মহাসত্তো মহাভিনিক্খমনং নিক্খমী’’তি ৰুত্তং.

এৰং হিমৰন্তং পৰিসিত্ৰা চ তে বোধিসত্তপ্পমুখা একং পদুমসরং নিস্সায রমণীযে ভূমিভাগে অস্সমং কত্ৰা পব্বজিত্ৰা ৰনমূলফলাহারা যাপযিংসু. তেসু উপকঞ্চনাদযো অট্ঠ জনা ৰারেন ফলাফলং আহরিত্ৰা একস্মিং পাসাণফলকে অত্তনো ইতরেসঞ্চ কোট্ঠাসে কত্ৰা ঘণ্টিসঞ্ঞং দত্ৰা অত্তনো কোট্ঠাসং আদায ৰসনট্ঠানং পৰিসন্তি. সেসাপি ঘণ্টিসঞ্ঞায পণ্ণসালতো নিক্খমিত্ৰা অত্তনো অত্তনো পাপুণনকোট্ঠাসং আদায ৰসনট্ঠানং গন্ত্ৰা পরিভুঞ্জিত্ৰা সমণধম্মং করোন্তি.

অপরভাগে ভিসানি আহরিত্ৰা তথেৰ খাদন্তি. তত্থ তে ঘোরতপা পরমধিতিন্দ্রিযা কসিণপরিকম্মং করোন্তা ৰিহরিংসু. অথ নেসং সীলতেজেন সক্কস্স ভৰনং কম্পি. সক্কো তং কারণং ঞত্ৰা ‘‘ইমে ইসযো ৰীমংসিস্সামী’’তি অত্তনো আনুভাৰেন মহাসত্তস্স কোট্ঠাসে তযো দিৰসে অন্তরধাপেসি. মহাসত্তো পঠমদিৰসে কোট্ঠাসং অদিস্ৰা ‘‘মম কোট্ঠাসো পমুট্ঠো ভৰিস্সতী’’তি চিন্তেসি. দুতিযদিৰসে ‘‘মম দোসেন ভৰিতব্বং, পণামনৰসেন মম কোট্ঠাসং ন ঠপিতং মঞ্ঞে’’তি চিন্তেসি. ততিযদিৰসে ‘‘তং কারণং সুত্ৰা খমাপেস্সামী’’তি সাযন্হসমযে ঘণ্টিসঞ্ঞং দত্ৰা তায সঞ্ঞায সব্বেসু সন্নিপতিতেসু তমত্থং আরোচেত্ৰা তীসুপি দিৰসেসু তেহি জেট্ঠকোট্ঠাসস্স ঠপিতভাৰং সুত্ৰা ‘‘তুম্হেহি ময্হং কোট্ঠাসো ঠপিতো, মযা পন ন লদ্ধো, কিং নু খো কারণ’’ন্তি আহ. তং সুত্ৰা সব্বেৰ সংৰেগপ্পত্তা অহেসুং.

তস্মিং অস্সমে রুক্খদেৰতাপি অত্তনো ভৰনতো ওতরিত্ৰা তেসং সন্তিকে নিসীদি. মনুস্সানং হত্থতো পলাযিত্ৰা অরঞ্ঞং পৰিট্ঠো একো ৰারণো অহিতুণ্ডিকহত্থতো পলাযিত্ৰা মুত্তো সপ্পকীল়াপনকো একো ৰানরো চ তেহি ইসীহি কতপরিচযা তদা তেসং সন্তিকং গন্ত্ৰা একমন্তং অট্ঠংসু. সক্কোপি ‘‘ইসিগণং পরিগ্গণ্হিস্সামী’’তি অদিস্সমানকাযো তত্থেৰ অট্ঠাসি. তস্মিঞ্চ খণে বোধিসত্তস্স কনিট্ঠো উপকঞ্চনতাপসো উট্ঠায বোধিসত্তং ৰন্দিত্ৰা সেসানং অপচিতিং দস্সেত্ৰা ‘‘অহং সঞ্ঞং পট্ঠপেত্ৰা অত্তানঞ্ঞেৰ সোধেতুং লভামী’’তি পুচ্ছিত্ৰা ‘‘আম, লভসী’’তি ৰুত্তে ইসিগণমজ্ঝে ঠত্ৰা সপথং করোন্তো –

‘‘অস্সং গৰং রজতং জাতরূপং, ভরিযঞ্চ সো ইধ লভতং মনাপং;

পুত্তেহি দারেহি সমঙ্গি হোতু, ভিসানি তে ব্রাহ্মণ যো অহাসী’’তি. (জা. ১.১৪.৭৮) –

ইমং গাথং অভাসি. ইমঞ্হি সো ‘‘যত্তকানি পিযৰত্থূনি হোন্তি, তেহি ৰিপ্পযোগে তত্তকানি দুক্খানি উপ্পজ্জন্তী’’তি ৰত্থুকামে গরহন্তো আহ.

তং সুত্ৰা ইসিগণো ‘‘মারিস, মা কথয, অতিভারিযো তে সপথো’’তি কণ্ণে পিদহি. বোধিসত্তোপি ‘‘অতিভারিযো তে সপথো, ন, ত্ৰং তাত, গণ্হসি, তৰ পত্তাসনে নিসীদা’’তি আহ. সেসাপি সপথং করোন্তা যথাক্কমং –

‘‘মালঞ্চ সো কাসিকচন্দনঞ্চ, ধারেতু পুত্তস্স বহূ ভৰন্তু;

কামেসু তিব্বং কুরুতং অপেক্খং, ভিসানি তে ব্রাহ্মণ যো অহাসি.

‘‘পহূতধঞ্ঞো কসিমা যসস্সী, পুত্তে গিহী ধনিমা সব্বকামে;

ৰযং অপস্সং ঘরমাৰসাতু, ভিসানি তে ব্রাহ্মণ যো অহাসি.

‘‘সো খত্তিযো হোতু পসয্হকারী, রাজাভিরাজা বলৰা যসস্সী;

সচাতুরন্তং মহিমাৰসাতু, ভিসানি তে ব্রাহ্মণ যো অহাসি.

‘‘সো ব্রাহ্মণো হোতু অৰীতরাগো, মুহুত্তনক্খত্তপথেসু যুত্তো;

পূজেতু নং রট্ঠপতী যসস্সী, ভিসানি তে ব্রাহ্মণ যো অহাসি.

‘‘অজ্ঝাযকং সব্বসমন্তৰেদং, তপস্সিনং মঞ্ঞতু সব্বলোকো;

পূজেন্তু নং জানপদা সমেচ্চ, ভিসানি তে ব্রাহ্মণ যো অহাসি.

‘‘চতুস্সদং গামৰরং সমিদ্ধং, দিন্নঞ্হি সো ভুঞ্জতু ৰাসৰেন;

অৰীতরাগো মরণং উপেতু, ভিসানি তে ব্রাহ্মণ যো অহাসি.

‘‘সো গামণী হোতু সহাযমজ্ঝে, নচ্চেহি গীতেহি পমোদমানো;

সো রাজতো ব্যসনমালত্থ কিঞ্চি, ভিসানি তে ব্রাহ্মণ যো অহাসি.

‘‘তং একরাজা পথৰিং ৰিজেত্ৰা, ইত্থীসহস্সস্স ঠপেতু অগ্গে;

সীমন্তিনীনং পৰরা ভৰাতু, ভিসানি তে ব্রাহ্মণ যা অহাসি.

‘‘ইসীনঞ্হি সা সব্বসমাগতানং, ভুঞ্জেয্য সাদুং অৰিকম্পমানা;

চরাতু লাভেন ৰিকত্থমানা, ভিসানি তে ব্রাহণ যা অহাসি.

‘‘আৰাসিকো হোতু মহাৰিহারে, নৰকম্মিকো হোতু গজঙ্গলাযং;

আলোকসন্ধিং দিৰসং করোতু, ভিসানি তে ব্রাহ্মণ যো অহাসি.

‘‘সো বজ্ঝতং পাসসতেহি ছম্হি, রম্মা ৰনা নীযতু রাজধানিং;

তুত্তেহি সো হঞ্ঞতু পাচনেহি, ভিসানি তে ব্রাহ্মণ যো অহাসি.

‘‘অলক্কমালী তিপুকণ্ণপিট্ঠো, লট্ঠীহতো সপ্পমুখং উপেতু;

সকচ্ছবন্ধো ৰিসিখং চরাতু, ভিসানি তে ব্রাহ্মণ যো অহাসী’’তি. (জা. ১.১৪.৭৯-৯০) –

ইমা গাথাযো অৰোচুং.

তত্থ তিব্বন্তি ৰত্থুকামকিলেসকামেসু বহলং অপেক্খং করোতু. কসিমাতি সম্পন্নকসিকম্মো. পুত্তে গিহী ধনিমা সব্বকামেতি পুত্তে লভতু, গিহী হোতু, সত্তৰিধেন ধনেন ধনিমা হোতু, রূপাদিভেদে সব্বকামে লভতু. ৰযং অপস্সন্তি মহল্লককালেপি অপব্বজিত্ৰা অত্তনো ৰযং অপস্সন্তো পঞ্চকামগুণসমিদ্ধং ঘরমেৰ আৰসতু. রাজাভিরাজাতি রাজূনং অন্তরে অতিরাজা. অৰীতরাগোতি পুরোহিতট্ঠানতণ্হায সতণ্হো. তপস্সিনন্তি তপসীলং, সীলসম্পন্নোতি নং মঞ্ঞতু. চতুস্সদন্তি আকিণ্ণমনুস্সতায মনুস্সেহি পহূতধঞ্ঞতায ধঞ্ঞেন সুলভদারুতায দারূহি সম্পন্নোদকতায উদকেনাতি চতূহি উস্সন্নং. ৰাসৰেনাতি ৰাসৰেন দিন্নং ৰিয অচলং, ৰাসৰতো লদ্ধৰরানুভাৰেনেৰ রাজানং আরাধেত্ৰা তেন দিন্নন্তিপি অত্থো. অৰীতরাগোতি অৰিগতরাগো কদ্দমে সূকরো ৰিয কামপঙ্কে নিমুগ্গোৰ হোতু.

গামণীতি গামজেট্ঠকো. তন্তি তং ইত্থিং. একরাজাতি অগ্গরাজা. ইত্থীসহস্সস্সাতি ৰচনমট্ঠতায ৰুত্তং. সোল়সন্নং ইত্থিসহস্সানং অগ্গট্ঠানে ঠপেতূতি অত্থো. সীমন্তিনীনন্তি সীমন্তধরানং, ইত্থীনন্তি অত্থো. সব্বসমাগতানন্তি সব্বেসং সন্নিপতিতানং মজ্ঝে নিসীদিত্ৰা. অৰিকম্পমানাতি অনোসক্কমানা সাদুরসং ভুঞ্জতূতি অত্থো. চরাতু লাভেন ৰিকত্থমানাতি লাভহেতু সিঙ্গারৰেসং গহেত্ৰা লাভং উপ্পাদেতুং চরতু. আৰাসিকোতি আৰাসজগ্গনকো. গজঙ্গলাযন্তি এৰংনামকে নগরে. তত্থ কির দব্বসম্ভারা সুলভা. আলোকসন্ধিং দিৰসন্তি একদিৰসেন একমেৰ ৰাতপানং করোতু. সো কির দেৰপুত্তো কস্সপবুদ্ধকালে গজঙ্গলনগরং নিস্সায যোজনিকে মহাৰিহারে আৰাসিকো সঙ্ঘত্থেরো হুত্ৰা জিণ্ণে ৰিহারে নৰকম্মানি করোন্তোৰ মহাদুক্খং অনুভৰি, তং সন্ধাযাহ.

পাসসতেহীতি বহূহি পাসেহি. ছম্হীতি চতূসু পাদেসু গীৰায কটিভাগে চাতি ছসু ঠানেসু. তুত্তেহীতি দ্ৰিকণ্টকাহি দীঘলট্ঠীহি. পাচনেহীতি রস্সপাচনেহি, অঙ্কুসকেহি ৰা. অলক্কমালীতি অহিতুণ্ডিকেন কণ্ঠে পরিক্খিপিত্ৰা ঠপিতায অলক্কমালায সমন্নাগতো. তিপুকণ্ণপিট্ঠোতি তিপুপিল়ন্ধনেন পিল়ন্ধিতপিট্ঠিকণ্ণো কণ্ণপিট্ঠো. লট্ঠিহতোতি সপ্পকীল়াপনং সিক্খাপযমানো লট্ঠিযা হতো হুত্ৰা. সব্বং তে কামভোগং ঘরাৰাসং অত্তনা অত্তনা অনুভূতদুক্খঞ্চ জিগুচ্ছন্তা তথা তথা সপথং করোন্তা এৰমাহংসু.

অথ বোধিসত্তো ‘‘সব্বেহি ইমেহি সপথো কতো, মযাপি কাতুং ৰট্টতী’’তি সপথং করোন্তো –

‘‘যো ৰে অনট্ঠংৰ নট্ঠন্তি চাহ, কামেৰ সো লভতং ভুঞ্জতঞ্চ;

অগারমজ্ঝে মরণং উপেতু, যো ৰা ভোন্তো সঙ্কতি কঞ্চি দেৰা’’তি. (জা. ১.১৪.৯১) –

ইমং গাথমাহ.

তত্থ ভোন্তোতি ভৰন্তো. সঙ্কতীতি আসঙ্কতি. কঞ্চীতি অঞ্ঞতরং.

অথ সক্কো ‘‘সব্বেপিমে কামেসু নিরপেক্খা’’তি জানিত্ৰা সংৰিগ্গমানসো ন ইমেসু কেনচিপি ভিসানি নীতানি, নাপি তযা অনট্ঠং নট্ঠন্তি ৰুত্তং, অপিচ অহং তুম্হে ৰীমংসিতুকামো অন্তরধাপেসিন্তি দস্সেন্তো –

‘‘ৰীমংসমানো ইসিনো ভিসানি, তীরে গহেত্ৰান থলে নিধেসিং;

সুদ্ধা অপাপা ইসযো ৰসন্তি, এতানি তে ব্রহ্মচারী ভিসানী’’তি. (জা. ১.১৪.৯৫) –

ওসানগাথমাহ.

তং সুত্ৰা বোধিসত্তো –

‘‘ন তে নটা নো পন কীল়নেয্যা, ন বন্ধৰা নো পন তে সহাযা;

কিস্মিং ৰুপত্থম্ভ সহস্সনেত্ত, ইসীহি ত্ৰং কীল়সি দেৰরাজা’’তি. (জা. ১.১৪.৯৬) –

সক্কং তজ্জেসি.

অথ নং সক্কো –

‘‘আচরিযো মেসি পিতা চ ময্হং, এসা পতিট্ঠা খলিতস্স ব্রহ্মে;

একাপরাধং খম ভূরিপঞ্ঞ, ন পণ্ডিতা কোধবলা ভৰন্তী’’তি. (জা. ১.১৪.৯৭) –

খমাপেসি.

মহাসত্তো সক্কস্স দেৰরঞ্ঞো খমিত্ৰা সযং ইসিগণং খমাপেন্তো –

‘‘সুৰাসিতং ইসিনং একরত্তং, যং ৰাসৰং ভূতপতিদ্দসাম;

সব্বেৰ ভোন্তো সুমনা ভৰন্তু, যং ব্রাহ্মণো পচ্চুপাদী ভিসানী’’তি. (জা. ১.১৪.৯৮) –

আহ.

তত্থ ন তে নটাতি, দেৰরাজ, মযং তৰ নটা ৰা কীল়িতব্বযুত্তকা ৰা ন হোম. নাপি তৰ ঞাতকা, সহাযা হস্সং কাতব্বা. অথ ত্ৰং কিস্মিং ৰুপত্থম্ভাতি কিং উপত্থম্ভকং কত্ৰা, কিং নিস্সায ইসীহি সদ্ধিং কীল়সীতি অত্থো. এসা পতিট্ঠাতি এসা তৰ পাদচ্ছাযা অজ্জ মম খলিতস্স অপরাধস্স পতিট্ঠা হোতু. সুৰাসিতন্তি আযস্মন্তানং ইসীনং একরত্তিম্পি ইমস্মিং অরঞ্ঞে ৰসিতং সুৰসিতমেৰ. কিংকারণা? যং ৰাসৰং ভূতপতিং অদ্দসাম. সচে হি মযং নগরে অৰসিম্হা, ন ইমং অদ্দসাম. ভোন্তোতি ভৰন্তো. সব্বেপি সুমনা ভৰন্তু তুস্সন্তু, সক্কস্স দেৰরঞ্ঞো খমন্তু, কিংকারণা? যং ব্রাহ্মণো পচ্চুপাদী ভিসানি যস্মা তুম্হাকং আচরিযো ভিসানি অলভীতি. সক্কো ইসিগণং ৰন্দিত্ৰা দেৰলোকং গতো. ইসিগণোপি ঝানাভিঞ্ঞাযো নিব্বত্তেত্ৰা ব্রহ্মলোকূপগো অহোসি.

তদা উপকঞ্চনাদযো ছ ভাতরো সারিপুত্তমোগ্গল্লানমহাকস্সপঅনুরুদ্ধপুণ্ণআনন্দত্থেরা, ভগিনী উপ্পলৰণ্ণা, দাসী খুজ্জুত্তরা, দাসো চিত্তো গহপতি, রুক্খদেৰতা সাতাগিরো, ৰারণো পালিলেয্যনাগো, ৰানরো মধুৰাসিট্ঠো, সক্কো কাল়ুদাযী, মহাকঞ্চনতাপসো লোকনাথো.

তস্স ইধাপি হেট্ঠা ৰুত্তনযেনেৰ দস পারমিযো নিদ্ধারেতব্বা. তথা অচ্চন্তমেৰ কামেসু অনপেক্খতাদযো গুণানুভাৰা ৰিভাৰেতব্বাতি.

ভিসচরিযাৰণ্ণনা নিট্ঠিতা.

৫. সোণপণ্ডিতচরিযাৰণ্ণনা

৪২. পঞ্চমে নগরে ব্রহ্মৰড্ঢনেতি ব্রহ্মৰড্ঢননামকে নগরে. কুলৰরেতি অগ্গকুলে. সেট্ঠেতি পাসংসতমে. মহাসালেতি মহাসারে. অজাযহন্তি অজাযিং অহং. ইদং ৰুত্তং হোতি – তস্মিং কালে ‘‘ব্রহ্মৰড্ঢন’’ন্তি লদ্ধনামে বারাণসিনগরে যদা হোমি ভৰামি পটিৰসামি, তদা অভিজাতসম্পত্তিযা উদিতোদিতভাৰেন অগ্গে ৰিজ্জাৰতসম্পত্তিযা সেট্ঠে অসীতিকোটিৰিভৰতায মহাসালে ব্রাহ্মণকুলে অহং উপ্পজ্জিন্তি.

তদা হি মহাসত্তো ব্রহ্মলোকতো চৰিত্ৰা ব্রহ্মৰড্ঢননগরে অসীতিকোটিৰিভৰস্স অঞ্ঞতরস্স ব্রাহ্মণমহাসালস্স পুত্তো হুত্ৰা নিব্বত্তি. তস্স নামগ্গহণদিৰসে ‘‘সোণকুমারো’’তি নামং করিংসু. তস্স পদসা গমনকালে অঞ্ঞোপি সত্তো ব্রহ্মলোকা চৰিত্ৰা বোধিসত্তস্স মাতুযা কুচ্ছিম্হি পটিসন্ধিং গণ্হি. তস্স জাতস্স ‘‘নন্দকুমারো’’তি নামং করিংসু. তেসং উগ্গহিতৰেদানং সব্বসিপ্পনিপ্ফত্তিপ্পত্তানং ৰযপ্পত্তানং রূপসম্পদং দিস্ৰা তুট্ঠহট্ঠা মাতাপিতরো ‘‘ঘরবন্ধনেন বন্ধিস্সামা’’তি পঠমং সোণকুমারং আহংসু – ‘‘তাত, তে পতিরূপকুলতো দারিকং আনেস্সাম, ত্ৰং কুটুম্বং পটিপজ্জাহী’’তি.

মহাসত্তো ‘‘অলং ময্হং ঘরাৰাসেন, অহং যাৰজীৰং তুম্হে পটিজগ্গিত্ৰা তুম্হাকং অচ্চযেন পব্বজিস্সামী’’তি আহ. মহাসত্তস্স হি তদা তযোপি ভৰা আদিত্তং অগারং ৰিয অঙ্গারকাসু ৰিয চ উপট্ঠহিংসু. ৰিসেসতো পনেস নেক্খম্মজ্ঝাসযো নেক্খম্মাধিমুত্তো অহোসি. তস্স অধিপ্পাযং অজানন্তা তে পুনপ্পুনং কথেন্তাপি তস্স চিত্তং অলভিত্ৰা নন্দকুমারং আমন্তেত্ৰা ‘‘তাত, তেন হি ত্ৰং কুটুম্বং পটিপজ্জাহী’’তি ৰত্ৰা তেনাপি ‘‘নাহং মম ভাতরা ছড্ডিতখেল়ং সীসেন উক্খিপামি, অহম্পি তুম্হাকং অচ্চযেন ভাতরা সদ্ধিং পব্বজিস্সামী’’তি ৰুত্তে ‘‘ইমে এৰং তরুণা কামে জহন্তি, কিমঙ্গং পন মযন্তি সব্বেৰ পব্বজিস্সামা’’তি চিন্তেত্ৰা ‘‘তাত, কিং ৰো অম্হাকং অচ্চযেন পব্বজ্জায, সব্বে সহেৰ পব্বজামা’’তি ৰত্ৰা ঞাতীনং দাতব্বযুত্তকং দত্ৰা দাসজনং ভুজিস্সং কত্ৰা রঞ্ঞো আরোচেত্ৰা সব্বং ধনং ৰিস্সজ্জেত্ৰা মহাদানং পৰত্তেত্ৰা চত্তারোপি জনা ব্রহ্মৰড্ঢননগরা নিক্খমিত্ৰা হিমৰন্তপ্পদেসে পদুমপুণ্ডরীকমণ্ডিতং মহাসরং নিস্সায রমণীযে ৰনসণ্ডে অস্সমং মাপেত্ৰা পব্বজিত্ৰা তত্থ ৰসিংসু. তেন ৰুত্তং –

৪৩.

‘‘তদাপি লোকং দিস্ৰান, অন্ধীভূতং তমোত্থটং;

চিত্তং ভৰতো পতিকুটতি, তুত্তৰেগহতং ৰিয.

৪৪.

‘‘দিস্ৰান ৰিৰিধং পাপং, এৰং চিন্তেসহং তদা;

কদাহং গেহা নিক্খম্ম, পৰিসিস্সামি কাননং.

৪৫.

‘‘তদাপি মং নিমন্তিংসু, কামভোগেহি ঞাতযো;

তেসম্পি ছন্দমাচিক্খিং, মা নিমন্তেথ তেহি মং.

৪৬.

‘‘যো মে কনিট্ঠকো ভাতা, নন্দো নামাসি পণ্ডিতো;

সোপি মং অনুসিক্খন্তো, পব্বজ্জং সমরোচযি.

৪৭.

‘‘অহং সোণো চ নন্দো চ, উভো মাতাপিতা মম;

তদাপি ভোগে ছড্ডেত্ৰা, পাৰিসিম্হা মহাৰন’’ন্তি.

তত্থ তদাপীতি যদা অহং ব্রহ্মৰড্ঢননগরে সোণো নাম ব্রাহ্মণকুমারো অহোসিং, তদাপি. লোকং দিস্ৰানাতি সকলম্পি সত্তলোকং পঞ্ঞাচক্খুনা পস্সিত্ৰা. অন্ধীভূতন্তি পঞ্ঞাচক্খুৰিরহেন অন্ধজাতং অন্ধভাৰং পত্তং. তমোত্থটন্তি অৰিজ্জন্ধকারেন অভিভূতং. চিত্তং ভৰতো পতিকুটতীতি জাতিআদিসংৰেগৰত্থুপচ্চৰেক্খণেন কামাদিভৰতো মম চিত্তং সঙ্কুটতি সন্নিলীযতি ন ৰিসরতি. তুত্তৰেগহতং ৰিযাতি তুত্তং ৰুচ্চতি অযোকণ্টকসীসো দীঘদণ্ডো, যো পতোদোতি ৰুচ্চতি. তেন ৰেগসা অভিহতো যথা হত্থাজানীযো সংৰেগপ্পত্তো হোতি, এৰং মম চিত্তং তদা কামাদীনৰপচ্চৰেক্খণেন সংৰেগপ্পত্তন্তি দস্সেতি.

দিস্ৰান ৰিৰিধং পাপন্তি গেহং আৰসন্তেহি ঘরাৰাসনিমিত্তং ছন্দদোসাদিৰসেন করীযমানং নানাৰিধং পাণাতিপাতাদিপাপকম্মঞ্চেৰ তন্নিমিত্তঞ্চ নেসং লামকভাৰং পস্সিত্ৰা. এৰং চিন্তেসহং তদাতি ‘‘কদা নু খো অহং মহাহত্থী ৰিয অযবন্ধনং ঘরবন্ধনং ছিন্দিত্ৰা গেহতো নিক্খমনৰসেন ৰনং পৰিসিস্সামী’’তি এৰং তদা সোণকুমারকালে চিন্তেসিং অহং. তদাপি মং নিমন্তিংসূতি ন কেৰলং অযোঘরপণ্ডিতাদিকালেযেৰ, অথ খো তদাপি তস্মিং সোণকুমারকালেপি মং মাতাপিতুআদযো ঞাতযো কামভোগিনো কামজ্ঝাসযা ‘‘এহি, তাত, ইমং অসীতিকোটিধনং ৰিভৰং পটিপজ্জ, কুলৰংসং পতিট্ঠাপেহী’’তি উল়ারেহি ভোগেহি নিমন্তযিংসু. তেসম্পি ছন্দমাচিক্খিন্তি তেসম্পি মম ঞাতীনং তেহি কামভোগেহি মা মং নিমন্তযিত্থাতি অত্তনো ছন্দম্পি আচিক্খিং, পব্বজ্জায নিন্নজ্ঝাসযম্পি কথেসিং, যথাজ্ঝাসযং পটিপজ্জথাতি অধিপ্পাযো.

সোপি মং অনু সিক্খন্তোতি ‘‘ইমে কামা নাম অপ্পস্সাদা বহুদুক্খা বহূপাযাসা’’তিআদিনা (ম. নি. ১.২৩৪; ২.৪৩-৪৫; পাচি.৪১৭) নযেন নানপ্পকারং কামেসু আদীনৰং পচ্চৰেক্খিত্ৰা যথাহং সীলাদীনি সিক্খন্তো পব্বজ্জং রোচেসিং. সোপি নন্দপণ্ডিতো তথেৰ তস্স নেক্খম্মেন মং অনুসিক্খন্তো পব্বজ্জং সমরোচযীতি. অহং সোণো চ নন্দো চাতি তস্মিং কালে সোণনামকো অহং ময্হং কনিট্ঠভাতা নন্দো চাতি. উভো মাতাপিতা মমাতি ‘‘ইমে নাম পুত্তকা এৰং তরুণকালেপি কামে জহন্তি, কিমঙ্গং পন ময’’ন্তি উপ্পন্নসংৰেগা মাতাপিতরো চ. ভোগে ছড্ডেত্ৰাতি অসীতিকোটিৰিভৰসমিদ্ধে মহা ভোগে অনপেক্খচিত্তা খেল়পিণ্ডং ৰিয পরিচ্চজিত্ৰা মযং চত্তারোপি জনা হিমৰন্তপ্পদেসে মহাৰনং নেক্খম্মজ্ঝাসযেন পৰিসিম্হাতি অত্থো.

পৰিসিত্ৰা চ তে তত্থ রমণীযে ভূমিভাগে অস্সমং মাপেত্ৰা তাপসপব্বজ্জায পব্বজিত্ৰা তত্থ ৰসিংসু. তে উভোপি ভাতরো মাতাপিতরো পটিজগ্গিংসু. তেসু নন্দপণ্ডিতো ‘‘মযা আভতফলাফলানেৰ মাতাপিতরো খাদাপেস্সামী’’তি হিয্যো চ পুরিমগোচরগহিতট্ঠানতো চ যানি তানি অৰসেসানি ফলাফলানি পাতোৰ আনেত্ৰা মাতাপিতরো খাদাপেতি. তে তানি খাদিত্ৰা মুখং ৰিক্খালেত্ৰা উপোসথিকা হোন্তি. সোণপণ্ডিতো পন দূরং গন্ত্ৰা মধুরমধুরানি সুপক্কানি আহরিত্ৰা উপনামেতি. অথ নং তে ‘‘তাত, কনিট্ঠেন আভতানি মযং খাদিত্ৰা উপোসথিকা জাতা, ইদানি নো অত্থো নত্থী’’তি ৰদন্তি. ইতি তস্স ফলাফলানি পরিভোগং ন লভন্তি ৰিনস্সন্তি, পুনদিৰসাদীসুপি তথেৰাতি, এৰং সো পঞ্চাভিঞ্ঞতায দূরম্পি গন্ত্ৰা আহরতি, তে পন ন খাদন্তি.

অথ মহাসত্তো চিন্তেসি – ‘‘মাতাপিতরো সুখুমালা, নন্দো চ যানি তানি অপক্কানি দুপ্পক্কানি ফলাফলানি আহরিত্ৰা খাদাপেতি, এৰং সন্তে ইমে ন চিরং পৰত্তিস্সন্তি, ৰারেস্সামি ন’’ন্তি. অথ নং আমন্তেত্ৰা ‘‘নন্দ, ইতো পট্ঠায ফলাফলং আহরিত্ৰা মমাগমনং পতিমানেহি, উভো একতোৰ খাদাপেস্সামা’’তি আহ. এৰং ৰুত্তেপি অত্তনো পুঞ্ঞং পচ্চাসীসন্তো ন তস্স ৰচনমকাসি. মহাসত্তো তং উপট্ঠানং আগতং ‘‘ন ত্ৰং পণ্ডিতানং ৰচনং করোসি, অহং জেট্ঠো, মাতাপিতরো চ মমেৰ ভারো, অহমেৰ নে পটিজগ্গিস্সামি, ত্ৰং ইতো অঞ্ঞত্থ যাহী’’তি তস্স অচ্ছরং পহরি.

সো তেন পণামিতো তত্থ ঠাতুং অসক্কোন্তো তং ৰন্দিত্ৰা মাতাপিতূনং তমত্থং আরোচেত্ৰা অত্তনো পণ্ণসালং পৰিসিত্ৰা কসিণং ওলোকেত্ৰা তংদিৰসমেৰ অট্ঠ চ সমাপত্তিযো পঞ্চ চ অভিঞ্ঞাযো নিব্বত্তেত্ৰা চিন্তেসি – ‘‘কিং নু খো অহং সিনেরুপাদতো রতনৰালুকং আহরিত্ৰা মম ভাতু পণ্ণসালাপরিৰেণং আকিরিত্ৰা খমাপেস্সামি, উদাহু অনোতত্ততো উদকং আহরিত্ৰা খমাপেস্সামি? অথ ৰা মে ভাতা দেৰতাৰসেন খমেয্য, চত্তারো মহারাজানো সক্কঞ্চ দেৰরাজানং আনেত্ৰা খমাপেস্সামি, এৰং পন ন সোভিস্সতি, অযং খো মনোজো ব্রহ্মৰড্ঢনরাজা সকলজম্বুদীপে অগ্গরাজা, তং আদিং কত্ৰা সব্বে রাজানো আনেত্ৰা খমাপেস্সামি, এৰং সন্তে মম ভাতু গুণো সকলজম্বুদীপং অৰত্থরিত্ৰা গমিস্সতি, চন্দো ৰিয সূরিযো ৰিয চ পঞ্ঞাযিস্সতী’’তি.

সো তাৰদেৰ ইদ্ধিযা গন্ত্ৰা ব্রহ্মৰড্ঢননগরে তস্স রঞ্ঞো নিৰেসনদ্ৰারে ওতরিত্ৰা ‘‘একো তাপসো তুম্হে দট্ঠুকামো’’তি রঞ্ঞো আরোচাপেত্ৰা তেন কতোকাসো তস্স সন্তিকং গন্ত্ৰা ‘‘অহং অত্তনো বলেন সকলজম্বুদীপে রজ্জং গহেত্ৰা তৰ দস্সামী’’তি. ‘‘কথং পন তুম্হে, ভন্তে, সকলজম্বুদীপে রজ্জং গহেত্ৰা দস্সথা’’তি? ‘‘মহারাজ, কস্সচি ৰধচ্ছেদং অকত্ৰা অত্তনো ইদ্ধিযাৰ গহেত্ৰা দস্সামী’’তি মহতিযা সেনায সদ্ধিং তং আদায কোসলরট্ঠং গন্ত্ৰা নগরস্স অৰিদূরে খন্ধাৰারং নিৰেসেত্ৰা ‘‘যুদ্ধং ৰা নো দেতু, ৰসে ৰা ৰত্ততূ’’তি কোসলরঞ্ঞো দূতং পাহেসি. তেন কুজ্ঝিত্ৰা যুদ্ধসজ্জেন হুত্ৰা নিক্খন্তেন সদ্ধিং যুদ্ধে আরদ্ধে অত্তনো ইদ্ধানুভাৰেন যথা দ্ৰিন্নং সেনানং পীল়নং ন হোতি, এৰং কত্ৰা যথা চ কোসলরাজা তস্স ৰসে ৰত্ততি, এৰং ৰচনপটিৰচনহরণেহি সংৰিদহি. এতেনুপাযেন সকলজম্বুদীপে রাজানো তস্স ৰসে ৰত্তাপেসি.

সো তেন পরিতুট্ঠো নন্দপণ্ডিতং আহ – ‘‘ভন্তে, তুম্হেহি যথা ময্হং পটিঞ্ঞাতং, তথা কতং, বহূপকারা মে তুম্হে, কিমহং তুম্হাকং করিস্সামি, অহঞ্হি তে সকলজম্বুদীপে উপড্ঢরজ্জম্পি দাতুং ইচ্ছামি, কিমঙ্গং পন হত্থিঅস্সরথমণিমুত্তাপৰাল়রজতসুৰণ্ণদাসিদাসপরিজনপরিচ্ছেদ’’ন্তি? তং সুত্ৰা নন্দপণ্ডিতো ‘‘ন মে তে, মহারাজ, রজ্জেন অত্থো, নাপি হত্থিযানাদীহি, অপি চ খো তে রট্ঠে অসুকস্মিং নাম অস্সমে মম মাতাপিতরো পব্বজিত্ৰা ৰসন্তি. ত্যাহং উপট্ঠহন্তো একস্মিং অপরাধে মম জেট্ঠভাতিকেন সোণপণ্ডিতেন নাম মহেসিনা পণামিতো, স্ৰাহং তং আদায তস্স সন্তিকং গন্ত্ৰা খমাপেস্সামি, তস্স মে ত্ৰং খমাপনে সহাযো হোহী’’তি. রাজা ‘‘সাধূ’’তি সম্পটিচ্ছিত্ৰা চতুৰীসতিঅক্খোভনী পরিমাণায সেনায পরিৰুতো একসতরাজূহি সদ্ধিং নন্দপণ্ডিতং পুরক্খত্ৰা তং অস্সমপদং পত্ৰা চতুরঙ্গুলপ্পদেসং মুঞ্চিত্ৰা আকাসে ঠিতেন কাজেন অনোতত্ততো উদকং আহরিত্ৰা পানীযং পটিসামেত্ৰা পরিৰেণং সম্মজ্জিত্ৰা মাতাপিতূনং আসন্নপ্পদেসে নিসিন্নং ঝানরতিসমপ্পিতং মহাসত্তং উপসঙ্কমিত্ৰা নন্দপণ্ডিতো নং খমাপেসি. মহাসত্তো নন্দপণ্ডিতং মাতরং পটিচ্ছাপেত্ৰা অত্তনা যাৰজীৰং পিতরং পটিজগ্গি. তেসং পন রাজূনং –

‘‘আনন্দো চ পমোদো চ, সদা হসিতকীল়িতং;

মাতরং পরিচরিত্ৰান, লব্ভমেতং ৰিজানতা.

‘‘আনন্দো চ পমোদো চ, সদা হসিতকীল়িতং;

পিতরং পরিচরিত্ৰান, লব্ভমেতং ৰিজানতো.

‘‘দানঞ্চ পেয্যৰজ্জঞ্চ, অত্থচরিযা চ যা ইধ;

সমানত্ততা চ ধম্মেসু, তত্থ তত্থ যথারহং;

এতে খো সঙ্গহা লোকে, রথস্সাণীৰ যাযতো.

‘‘এতে চ সঙ্গহা নাস্সু, ন মাতা পুত্তকারণা;

লভেথ মানং পূজং ৰা, পিতা ৰা পুত্তকারণা.

‘‘যস্মা চ সঙ্গহা এতে, সম্মপেক্খন্তি পণ্ডিতা;

তস্মা মহত্তং পপ্পোন্তি, পাসংসা চ ভৰন্তি তে.

‘‘ব্রহ্মাতি মাতাপিতরো, পুব্বাচরিযাতি ৰুচ্চরে;

আহুনেয্যা চ পুত্তানং, পজায অনুকম্পকা.

‘‘তস্মা হি নে নমস্সেয্য, সক্করেয্য চ পণ্ডিতো;

অন্নেন অথ পানেন, ৰত্থেন সযনেন চ;

উচ্ছাদনেন ন্হাপনেন, পাদানং ধোৰনেন চ.

‘‘তায নং পারিচরিযায, মাতাপিতূসু পণ্ডিতা;

ইধেৰ নং পসংসন্তি, পেচ্চ সগ্গে পমোদতী’’তি. (জা. ২.২০.১৭৬-১৮৩) –

বুদ্ধলীল়ায ধম্মং দেসেসি, তং সুত্ৰা সব্বেপি তে রাজানো সবলকাযা পসীদিংসু. অথ নে পঞ্চসু সীলেসু পতিট্ঠাপেত্ৰা ‘‘দানাদীসু অপ্পমত্তা হোথা’’তি ওৰদিত্ৰা ৰিস্সজ্জেসি. তে সব্বেপি ধম্মেন রজ্জং কারেত্ৰা আযুপরিযোসানে দেৰনগরং পূরযিংসু. বোধিসত্তো ‘‘ইতো পট্ঠায মাতরং পটিজগ্গাহী’’তি মাতরং নন্দপণ্ডিতং পটিচ্ছাপেত্ৰা অত্তনা যাৰজীৰং পিতরং পটিজগ্গি. তে উভোপি আযুপরিযোসানে ব্রহ্মলোকপরাযনা অহেসুং.

তদা মাতাপিতরো মহারাজকুলানি, নন্দপণ্ডিতো আনন্দত্থেরো, মনোজো রাজা সারিপুত্তত্থেরো, একসতরাজানো অসীতিমহাথেরা চেৰ অঞ্ঞতরথেরা চ, চতুৰীসতিঅক্খোভনীপরিসা বুদ্ধপরিসা, সোণপণ্ডিতো লোকনাথো.

তস্স কিঞ্চাপি সাতিসযা নেক্খম্মপারমী, তথাপি হেট্ঠা ৰুত্তনযেনেৰ সেসপারমিযো চ নিদ্ধারেতব্বা. তথা অচ্চন্তমেৰ কামেসু অনপেক্খতা, মাতাপিতূসু তিব্বো সগারৰসপ্পতিস্সভাৰো, মাতাপিতুউপট্ঠানেন অতিত্তি, সতিপি নেসং উপট্ঠানে সব্বকালং সমাপত্তিৰিহারেহি ৰীতিনামনন্তি এৰমাদযো মহাসত্তস্স গুণানুভাৰা ৰিভাৰেতব্বাতি.

সোণপণ্ডিতচরিযাৰণ্ণনা নিট্ঠিতা.

নেক্খম্মপারমী নিট্ঠিতা.

৬. তেমিযচরিযাৰণ্ণনা

৪৮. ছট্ঠে কাসিরাজস্স অত্রজোতি কাসিরঞ্ঞো অত্রজো পুত্তো যদা হোমি, তদা মূগপক্খোতি নামেন, তেমিযোতি ৰদন্তি মন্তি তেমিযোতি নামেন মূগপক্খৰতাধিট্ঠানেন ‘‘মূগপক্খো’’তি মাতাপিতরো আদিং কত্ৰা সব্বেৰ মং ৰদন্তীতি সম্বন্ধো. মহাসত্তস্স হি জাতদিৰসে সকলকাসিরট্ঠে দেৰো ৰস্সি, যস্মা চ সো রঞ্ঞো চেৰ অমচ্চাদীনঞ্চ হদযং উল়ারেন পীতিসিনেহেন তেমযমানো উপ্পন্নো, তস্মা ‘‘তেমিযকুমারো’’তি নামং অহোসি.

৪৯. সোল়সিত্থিসহস্সানন্তি সোল়সন্নং কাসিরঞ্ঞো ইত্থাগারসহস্সানং. ন ৰিজ্জতি পুমোতি পুত্তো ন লব্ভতি. ন কেৰলঞ্চ পুত্তো এৰ, ধীতাপিস্স নত্থি এৰ. অহোরত্তানং অচ্চযেন, নিব্বত্তো অহমেককোতি অপুত্তকস্সেৰ তস্স রঞ্ঞো বহূনং সংৰচ্ছরানং অতীতত্তা অনেকেসং অহোরত্তানং অপগমনেন সক্কদত্তিযো অহমেককোৰ বোধিপরিযেসনং চরমানো, তদা তস্স পুত্তো হুত্ৰা উপ্পন্নোতি সত্থা ৰদতি.

তত্রাযং অনুপুব্বিকথা – অতীতে বারাণসিযং কাসিরাজা রজ্জং কারেসি. তস্স সোল়সসহস্সা ইত্থিযো অহেসুং. তাসু একাপি পুত্তং ৰা ধীতরং ৰা ন লভতি. নাগরা ‘‘অম্হাকং রঞ্ঞো ৰংসানুরক্খকো একোপি পুত্তো নত্থী’’তি ৰিপ্পটিসারী জাতা সন্নিপতিত্ৰা রাজানং ‘‘পুত্তং পত্থেহী’’তি আহংসু. রাজা সোল়সসহস্সা ইত্থিযো ‘‘পুত্তং পত্থেথা’’তি আণাপেসি. তা চন্দাদীনং উপট্ঠানাদীনি কত্ৰা পত্থেন্তিযোপি ন লভিংসু. অগ্গমহেসী পনস্স মদ্দরাজধীতা চন্দাদেৰী নাম সীলসম্পন্না অহোসি. রাজা ‘‘ত্ৰম্পি পুত্তং পত্থেহী’’তি আহ. সা পুণ্ণমদিৰসে উপোসথিকা হুত্ৰা অত্তনো সীলং আৰজ্জেত্ৰা ‘‘সচাহং অখণ্ডসীলা, ইমিনা মে সচ্চেন পুত্তো উপ্পজ্জতূ’’তি সচ্চকিরিযমকাসি. তস্সা সীলতেজেন সক্কস্স আসনং উণ্হাকারং দস্সেসি. সক্কো আৰজ্জেন্তো তং কারণং ঞত্ৰা ‘‘চন্দাদেৰিযা পুত্তপটিলাভস্স উপাযং করিস্সামী’’তি তস্সা অনুচ্ছৰিকং পুত্তং উপধারেন্তো বোধিসত্তং তাৰতিংসভৰনে নিব্বত্তিত্ৰা তত্থ যাৰতাযুকং ঠত্ৰা ততো চৰিত্ৰা উপরিদেৰলোকে উপ্পজ্জিতুকামং দিস্ৰা তস্স সন্তিকং গন্ত্ৰা ‘‘সম্ম, তযি মনুস্সলোকে উপ্পন্নে পারমিযো চ তে পূরেস্সন্তি, মহাজনস্স চ ৰুড্ঢি ভৰিস্সতি, অযং কাসিরঞ্ঞো চন্দা নাম অগ্গমহেসী পুত্তং পত্থেতি, তস্সা কুচ্ছিযং উপ্পজ্জাহী’’তি আহ.

সো ‘‘সাধূ’’তি পটিস্সুণিত্ৰা তস্সা কুচ্ছিযং পটিসন্ধিং গণ্হি. তস্স সহাযা পঞ্চসতা দেৰপুত্তা খীণাযুকা দেৰলোকা চৰিত্ৰা তস্সেৰ রঞ্ঞো অমচ্চভরিযানং কুচ্ছীসু পটিসন্ধিং গণ্হিংসু. দেৰী গব্ভস্স পতিট্ঠিতভাৰং ঞত্ৰা রঞ্ঞো আরোচেসি. রাজা গব্ভপরিহারং দাপেসি. সা পরিপুণ্ণগব্ভা ধঞ্ঞপুঞ্ঞলক্খণসম্পন্নং পুত্তং ৰিজাযি. তংদিৰসমেৰ অমচ্চগেহেসু পঞ্চকুমারসতানি ৰিজাযিংসু. উভযম্পি সুত্ৰা রাজা ‘‘মম পুত্তস্স পরিৰারা এতে’’তি পঞ্চন্নং দারকসতানং পঞ্চধাতিসতানি পেসেত্ৰা কুমারপসাধনানি চ পেসেসি. মহাসত্তস্স পন অতিদীঘাদিদোসৰিৰজ্জিতা অলম্বত্থনা মধুরথঞ্ঞা চতুসট্ঠিধাতিযো দত্ৰা মহন্তং সক্কারং কত্ৰা চন্দাদেৰিযাপি ৰরং অদাসি. সা গহিতকং কত্ৰা ঠপেসি. দারকো মহতা পরিৰারেন ৰড্ঢতি. অথ নং একমাসিকং অলঙ্করিত্ৰা রঞ্ঞো সন্তিকং আনযিংসু. রাজা পিযপুত্তং ওলোকেত্ৰা আলিঙ্গিত্ৰা অঙ্কে নিসীদাপেত্ৰা রমযমানো নিসীদি.

৫০. তস্মিং খণে চত্তারো চোরা আনীতা. রাজা তেসু একস্স সকণ্টকাহি কসাহি পহারসহস্সং আণাপেসি, একস্স সঙ্খলিকায বন্ধিত্ৰা বন্ধনাগারপ্পৰেসনং, একস্স সরীরে সত্তিপ্পহারদানং, একস্স সূলারোপনং. মহাসত্তো পিতু কথং সুত্ৰা সংৰেগপ্পত্তো হুত্ৰা ‘‘অহো মম পিতা রজ্জং নিস্সায ভারিযং নিরযগামিকম্মং করোতী’’তি চিন্তেসি. পুনদিৰসে নং সেতচ্ছত্তস্স হেট্ঠা অলঙ্কতসিরিসযনে নিপজ্জাপেসুং.

সো থোকং নিদ্দাযিত্ৰা পটিবুদ্ধো অক্খীনি উম্মীলেত্ৰা সেতচ্ছত্তং ওলোকেন্তো মহন্তং সিরিৰিভৰং পস্সি. অথস্স পকতিযাপি সংৰেগপ্পত্তস্স অতিরেকতরং ভযং উপ্পজ্জি. সো ‘‘কুতো নু খো অহং ইমং রাজগেহং আগতো’’তি উপধারেন্তো জাতিস্সরঞাণেন দেৰলোকতো আগতভাৰং ঞত্ৰা ততো পরং ওলোকেন্তো উস্সদনিরযে পক্কভাৰং পস্সি. ততো পরং ওলোকেন্তো তস্মিংযেৰ নগরে রাজভাৰং পস্সি. অথ সো ‘‘অহং ৰীসতিৰস্সানি রজ্জং কারেত্ৰা অসীতিৰস্সসহস্সানি উস্সদনিরযে পচ্চিং, ইদানি পুনপি ইমস্মিং চোরগেহে নিব্বত্তোস্মি, পিতাপি মে হিয্যো চতূসু চোরেসু আনীতেসু তথারূপং ফরুসং নিরযসংৰত্তনিকং কথং কথেসি. ন মে ইমিনা অৰিদিতৰিপুলানত্থাৰহেন রজ্জেন অত্থো, কথং নু খো ইমম্হা চোরগেহা মুচ্চেয্য’’ন্তি চিন্তেন্তো নিপজ্জি. অথ নং একা দেৰধীতা ‘‘তাত তেমিযকুমার, মা ভাযি, তীণি অঙ্গানি অধিট্ঠহিত্ৰা তৰ সোত্থি ভৰিস্সতী’’তি সমস্সাসেসি. তং সুত্ৰা মহাসত্তো রজ্জসঙ্খাতা অনত্থতো মুচ্চিতুকামো সোল়সসংৰচ্ছরানি তীণি অঙ্গানি অচলাধিট্ঠানৰসেন অধিট্ঠহি. তেন ৰুত্তং ‘‘কিচ্ছালদ্ধং পিযং পুত্ত’’ন্তিআদি.

তত্থ কিচ্ছালদ্ধন্তি কিচ্ছেন কসিরেন চিরকালপত্থনায লদ্ধং. অভিজাতন্তি জাতিসম্পন্নং. কাযজুতিযা চেৰ ঞাণজুতিযা চ সমন্নাগতত্তা জুতিন্ধরং. সেতচ্ছত্তং ধারযিত্ৰান, সযনে পোসেতি মং পিতাতি পিতা মে কাসিরাজা ‘‘মা নং কুমারং রজো ৰা উস্সাৰো ৰা’’তি জাতকালতো পট্ঠায সেতচ্ছত্তস্স হেট্ঠা সিরিসযনে সযাপেত্ৰা মহন্তেন পরিৰারেন মং পোসেতি.

৫১. নিদ্দাযমানো সযনৰরে পবুজ্ঝিত্ৰা অহং ওলোকেন্তো পণ্ডরং সেতচ্ছত্তং অদ্দসং. যেনাহং নিরযং গতোতি যেন সেতচ্ছত্তেন ততো ততিযে অত্তভাৰে অহং নিরযং গতো, সেতচ্ছত্তসীসেন রজ্জং ৰদতি.

৫২. সহ দিট্ঠস্স মে ছত্তন্তি তং সেতচ্ছত্তং দিট্ঠস্স দিট্ঠৰতো মে সহ তেন দস্সনেন, দস্সনসমকালমেৰাতি অত্থো. তাসো উপ্পজ্জি ভেরৰোতি সুপরিৰিদিতাদীনৰত্তা ভযানকো চিত্তুত্রাসো উদপাদি. ৰিনিচ্ছযং সমাপন্নো, কথাহং ইমং মুঞ্চিস্সন্তি কথং নু খো অহং ইমং রজ্জং কাল়কণ্ণিং মুঞ্চেয্যন্তি এৰং ৰিচারণং আপজ্জিং.

৫৩. পুব্বসালোহিতা ময্হন্তি পুব্বে একস্মিং অত্তভাৰে মম মাতুভূতপুব্বা তস্মিং ছত্তে অধিৰত্থা দেৰতা ময্হং অত্থকামিনী হিতেসিনী. সা মং দিস্ৰান দুক্খিতং, তীসু ঠানেসু যোজযীতি সা দেৰতা মং তথা চেতোদুক্খেন দুক্খিতং দিস্ৰা মূগপক্খবধিরভাৰসঙ্খাতেসু তীসু রজ্জদুক্খতো নিক্খমনকারণেসু যোজেসি.

৫৪. পণ্ডিচ্চযন্তি পণ্ডিচ্চং, অযমেৰ ৰা পাঠো. মা ৰিভাৰযাতি মা পকাসেহি. বালমতোতি বালোতি ঞাতো. সব্বোতি সকলো অন্তোজনো চেৰ বহিজনো চ. ওচিনাযতূতি নীহরথেতং কাল়কণ্ণিন্তি অৰজানাতু. এৰং তৰ অত্থো ভৰিস্সতীতি এৰং যথাৰুত্তনযেন অৰজানিতব্বভাৰে সতি তুয্হং গেহতো নিক্খমনেন হিতং পারমিপরিপূরণং ভৰিস্সতি.

৫৫. তেতং ৰচনন্তি তে এতং তীণি অঙ্গানি অধিট্ঠাহীতি ৰচনং. অত্থকামাসি মে অম্মাতি অম্ম দেৰতে, মম অত্থকামা অসি. হিতকামাতি তস্সেৰ পরিযাযৰচনং. অত্থোতি ৰা এত্থ সুখং ৰেদিতব্বং. হিতন্তি তস্স কারণভূতং পুঞ্ঞং.

৫৬. সাগরেৰ থলং লভিন্তি চোরগেহে ৰতাহং জাতো, অহু মে মহাৰতানত্থোতি সোকসাগরে ওসীদন্তো তস্সা দেৰতায অহং ৰচনং সুত্ৰা সাগরে ওসীদন্তো ৰিয থলং পতিট্ঠং অলভিং, রজ্জকুলতো নিক্খমনোপাযং অলভিন্তি অত্থো. তযো অঙ্গে অধিট্ঠহিন্তি যাৰ গেহতো নিক্খমিং, তাৰ তীণি অঙ্গানি কারণানি অধিট্ঠহিং.

৫৭. ইদানি তানি সরূপতো দস্সেতুং ‘‘মূগো অহোসি’’ন্তি গাথমাহ. তত্থ পক্খোতি পীঠসপ্পি. সেসং সুৰিঞ্ঞেয্যমেৰ.

এৰং পন মহাসত্তে দেৰতায দিন্ননযে ঠত্ৰা জাতৰস্সতো পট্ঠায মূগাদিভাৰেন অত্তানং দস্সেন্তে মাতাপিতরো ধাতিআদযো চ ‘‘মূগানং হনুপরিযোসানং নাম এৰরূপং ন হোতি, বধিরানং কণ্ণসোতং নাম এৰরূপং ন হোতি, পীঠসপ্পীনং হত্থপাদা নাম এৰরূপা ন হোন্তি, ভৰিতব্বমেত্থ কারণেন, ৰীমংসিস্সাম ন’’ন্তি চিন্তেত্ৰা ‘‘খীরেন তাৰ ৰীমংসিস্সামা’’তি সকলদিৰসং খীরং ন দেন্তি. সো সুস্সন্তোপি খীরত্থায সদ্দং ন করোতি.

অথস্স মাতা ‘‘পুত্তো মে ছাতো, খীরমস্স দেথা’’তি খীরং দাপেসি. এৰং অন্তরন্তরা খীরং অদত্ৰা একসংৰচ্ছরং ৰীমংসন্তাপি অন্তরং ন পস্সিংসু. ততো ‘‘কুমারকা নাম পূৰখজ্জকং পিযাযন্তি, ফলাফলং পিযাযন্তি, কীল়নভণ্ডকং পিযাযন্তি, ভোজনং পিযাযন্তী’’তি তানি তানি পলোভনীযানি উপনেত্ৰা ৰীমংসনৰসেন পলোভেন্তা যাৰ পঞ্চৰস্সকালা অন্তরং ন পস্সিংসু. অথ নং ‘‘দারকা নাম অগ্গিতো ভাযন্তি, মত্তহত্থিতো ভাযন্তি, সপ্পতো ভাযন্তি, উক্খিত্তাসিকপুরিসতো ভাযন্তি, তেহি ৰীমংসিস্সামা’’তি যথা তেহিস্স অনত্থো ন জাযতি, তথা পুরিমমেৰ সংৰিদহিত্ৰা অতিভযানকাকারেন উপগচ্ছন্তে কারেসুং.

মহাসত্তো নিরযভযং আৰজ্জেত্ৰা ‘‘ইতো সতগুণেন সহস্সগুণেন সতসহস্সগুণেন নিরযো ভাযিতব্বো’’তি নিচ্চলোৰ হোতি. এৰম্পি ৰীমংসিত্ৰা অন্তরং ন পস্সন্তা পুন ‘‘দারকা নাম সমজ্জত্থিকা হোন্তী’’তি সমজ্জং কারেত্ৰাপি মহাসত্তং সাণিযা পরিক্খিপিত্ৰা অজানন্তস্সেৰ চতূসু পস্সেসু সঙ্খসদ্দেহি ভেরিসদ্দেহি চ সহসা একনিন্নাদং কারেত্ৰাপি অন্ধকারে ঘটেহি দীপং উপনেত্ৰা সহসা আলোকং দস্সেত্ৰাপি সকলসরীরং ফাণিতেন মক্খেত্ৰা বহুমক্খিকে ঠানে নিপজ্জাপেত্ৰাপি ন্হাপনাদীনি অকত্ৰা উচ্চারপস্সাৰমত্থকে নিপন্নং অজ্ঝুপেক্খিত্ৰাপি তত্থ চ পলিপন্নং সযমানং পরিহাসেহি অক্কোসনেহি চ ঘট্টেত্ৰাপি হেট্ঠামঞ্চে অগ্গিকপল্লং কত্ৰা উণ্হসন্তাপেন পীল়েত্ৰাপীতি এৰং নানাৰিধেহি উপাযেহি ৰীমংসন্তাপিস্স অন্তরং ন পস্সিংসু.

মহাসত্তো হি সব্বত্থ নিরযভযমেৰ আৰজ্জেত্ৰা অধিট্ঠানং অৰিকোপেন্তো নিচ্চলোৰ অহোসি. এৰং পন্নরসৰস্সানি ৰীমংসিত্ৰা অথ সোল়সৰস্সকালে ‘‘পীঠসপ্পিনো ৰা হোন্তু মূগবধিরা ৰা রজনীযেসু অরজ্জন্তা দুস্সনীযেসু অদুস্সন্তা নাম নত্থীতি নাটকানিস্স পচ্চুপট্ঠপেত্ৰা ৰীমংসিস্সামা’’তি কুমারং গন্ধোদকেন ন্হাপেত্ৰা দেৰপুত্তং ৰিয অলঙ্করিত্ৰা দেৰৰিমানকপ্পং পুপ্ফগন্ধদামাদীহি একামোদপমোদং পাসাদং আরোপেত্ৰা উত্তমরূপধরা ভাৰৰিলাসসম্পন্না দেৰচ্ছরাপটিভাগা ইত্থিযো উপট্ঠপেসুং – ‘‘গচ্ছথ নচ্চাদীহি কুমারং অভিরমাপেথা’’তি. তা উপগন্ত্ৰা তথা কাতুং ৰাযমিংসু. সো বুদ্ধিসম্পন্নতায ‘‘ইমা মে সরীরসম্ফস্সং মা ৰিন্দিংসূ’’তি অস্সাসপস্সাসে নিরুন্ধি. তা তস্স সরীরসম্ফস্সং অৰিন্দন্তিযো ‘‘থদ্ধসরীরো এস, নাযং মনুস্সো, যক্খো ভৰিস্সতী’’তি পক্কমিংসু.

এৰং সোল়স ৰস্সানি সোল়সহি মহাৰীমংসাহি অনেকাহি চ খুদ্দকৰীমংসাহি পরিগ্গণ্হিতুং অসক্কুণিত্ৰা মাতাপিতরো ‘‘তাত, তেমিযকুমার, মযং তৰ অমূগাদিভাৰং জানাম, ন হি তেসং এৰরূপানি মুখকণ্ণসোতপাদানি হোন্তি, ত্ৰং অম্হেহি পত্থেত্ৰা লদ্ধপুত্তকো, মা নো নাসেহি, সকলজম্বুদীপে রাজূনং সন্তিকা গরহতো মোচেহী’’তি সহ ৰিসুং ৰিসুঞ্চ অনেকৰারং যাচিংসু. সো তেহি এৰং যাচিযমানোপি অসুণন্তো ৰিয হুত্ৰা নিপজ্জি.

৫৮. অথ রাজা মহাসত্তস্স উভো পাদে কণ্ণসোতে জিৰ্হং উভো চ হত্থে কুসলেহি পুরিসেহি ৰীমংসাপেত্ৰা ‘‘যদিপি অপীঠসপ্পিআদীনং ৰিযস্স পাদাদযো, তথাপি অযং পীঠসপ্পি মূগবধিরো মঞ্ঞে, ঈদিসে কাল়কণ্ণিপুরিসে ইমস্মিং গেহে ৰসন্তে তযো অন্তরাযা পঞ্ঞাযন্তি জীৰিতস্স ৰা ছত্তস্স ৰা মহেসিযা ৰা’’তি লক্খণপাঠকেহি ইদানি কথিতং. জাতদিৰসে পন ‘‘তুম্হাকং দোমনস্সপরিহরণত্থং ‘ধঞ্ঞপুঞ্ঞলক্খণো’তি ৰুত্ত’’ন্তি অমচ্চেহি আরোচিতং সুত্ৰা অন্তরাযভযেন ভীতো ‘‘গচ্ছথ নং অৰমঙ্গলরথে নিপজ্জাপেত্ৰা পচ্ছিমদ্ৰারেন নীহরাপেত্ৰা আমকসুসানে নিখণথা’’তি আণাপেসি. তং সুত্ৰা মহাসত্তো হট্ঠো উদগ্গো অহোসি – ‘‘চিরস্সং ৰত মে মনোরথো মত্থকং পাপুণিস্সতী’’তি. তেন ৰুত্তং ‘‘ততো মে হত্থপাদে চা’’তিআদি.

তত্থ মদ্দিযাতি মদ্দনৰসেন ৰীমংসিত্ৰা. অনূনতন্তি হত্থাদীহি অৰিকলতং. নিন্দিসুন্তি ‘‘এৰং অনূনাৰযৰোপি সমানো মূগাদি ৰিয দিস্সমানো ‘‘রজ্জং কারেতুং অভব্বো, কাল়কণ্ণিপুরিসো অয’’ন্তি গরহিংসু. ‘‘নিদ্দিসু’’ন্তিপি পাঠো, ৰদিংসূতি অত্থো.

৫৯. ছড্ডনং অনুমোদিসুন্তি রাজদস্সনত্থং আগতা সব্বেপি জনপদৰাসিনো সেনাপতিপুরোহিতপ্পমুখা রাজপুরিসা তে সব্বেপি একমনা সমানচিত্তা হুত্ৰা অন্তরাযপরিহরণত্থং রঞ্ঞা আণত্তা ভূমিযং নিখণনৰসেন মম ছড্ডনং মুখসঙ্কোচং অকত্ৰা অভিমুখভাৰেন সাধু সুট্ঠু ইদং কত্তব্বমেৰাতি অনুমোদিংসু.

৬০. সো মে অত্থো সমিজ্ঝথাতি যস্সত্থায যদত্থং ততো মূগাদিভাৰাধিট্ঠানৰসেন দুক্করচরণং চিণ্ণং চরিতং, সো অত্থো মম সমিজ্ঝতি. তেসং মম মাতাপিতুআদীনং মতিং অধিপ্পাযং সুত্ৰা সো অহং মম অধিপ্পাযসমিজ্ঝনেন হট্ঠো অনুপধারেত্ৰা ভূমিযং নিখণনানুজাননেন সংৰিগ্গমানসোৰ অহোসিন্তি ৰচনসেসেন সম্বন্ধো ৰেদিতব্বো.

৬১. এৰং কুমারস্স ভূমিযং নিখণনে রঞ্ঞা আণত্তে চন্দাদেৰী তং পৰত্তিং সুত্ৰা রাজানং উপসঙ্কমিত্ৰা, ‘‘দেৰ, তুম্হেহি ময্হং ৰরো দিন্নো, মযা চ গহিতকং কত্ৰা ঠপিতো, তং মে ইদানি দেথা’’তি. ‘‘গণ্হ, দেৰী’’তি. ‘‘পুত্তস্স মে রজ্জং দেথা’’তি. ‘‘পুত্তো তে কাল়কণ্ণী, ন সক্কা দাতু’’ন্তি. ‘‘তেন হি, দেৰ, যাৰজীৰং অদেন্তো সত্ত ৰস্সানি দেথা’’তি. ‘‘তম্পি ন সক্কা’’তি. ‘‘ছ ৰস্সানি, পঞ্চচত্তারিতীণিদ্ৰেএকং ৰস্সং, সত্ত মাসে, ছপঞ্চচত্তারোতযোদ্ৰেএকং মাসংঅদ্ধমাসংসত্তাহং দেথা’’তি. সাধু গণ্হাতি.

সা পুত্তং অলঙ্কারাপেত্ৰা ‘‘তেমিযকুমারস্স ইদং রজ্জ’’ন্তি নগরে ভেরিং চরাপেত্ৰা নগরং অলঙ্কারাপেত্ৰা পুত্তং হত্থিক্খন্ধং আরোপেত্ৰা সেতচ্ছত্তং মত্থকে কারাপেত্ৰা নগরং পদক্খিণং কত্ৰা আগতং অলঙ্কতসিরিসযনে নিপজ্জাপেত্ৰা সব্বরত্তিং যাচি – ‘‘তাত তেমিয, তং নিস্সায সোল়স ৰস্সানি নিদ্দং অলভিত্ৰা রোদমানায মে অক্খীনি উপ্পক্কানি, সোকেন হদযং ভিজ্জতি ৰিয, তৰ অপীঠসপ্পিআদিভাৰং জানামি, মা মং অনাথং করী’’তি. ইমিনা নিযামেন ছ দিৰসে যাচি. ছট্ঠে দিৰসে রাজা সুনন্দং নাম সারথিং পক্কোসাপেত্ৰা ‘‘স্ৰে পাতোৰ অৰমঙ্গলরথেন কুমারং নীহরিত্ৰা আমকসুসানে ভূমিযং নিখণিত্ৰা পথৰিৰড্ঢনককম্মং কত্ৰা এহী’’তি আহ. তং সুত্ৰা দেৰী ‘‘তাত, কাসিরাজা তং স্ৰে আমকসুসানে নিখণিতুং আণাপেসি. স্ৰে মরণং পাপুণিস্সতী’’তি আহ.

মহাসত্তো তং সুত্ৰা ‘‘তেমিয, সোল়স ৰস্সানি তযা কতো ৰাযামো মত্থকং পত্তো’’তি হট্ঠো উদগ্গো অহোসি. মাতুযা পনস্স হদযং ভিজ্জনাকারং ৰিয অহোসি. অথ তস্সা রত্তিযা অচ্চযেন পাতোৰ সারথি রথং আদায দ্ৰারে ঠপেত্ৰা সিরিগব্ভং পৰিসিত্ৰা ‘‘দেৰি, মা ময্হং কুজ্ঝি, রঞ্ঞো আণা’’তি পুত্তং আলিঙ্গিত্ৰা নিপন্নং দেৰিং পিট্ঠিহত্থেন অপনেত্ৰা কুমারং উক্খিপিত্ৰা পাসাদা ওতরি. দেৰী উরং পহরিত্ৰা মহাসদ্দেন পরিদেৰিত্ৰা মহাতলে ওহীযি.

অথ নং মহাসত্তো ওলোকেত্ৰা ‘‘মযি অকথেন্তে মাতু সোকো বলৰা ভৰিস্সতী’’তি কথেতুকামো হুত্ৰাপি ‘‘সচে কথেস্সামি সোল়স ৰস্সানি কতো ৰাযামো মোঘো ভৰিস্সতি, অকথেন্তো পনাহং অত্তনো চ মাতাপিতূনঞ্চ পচ্চযো ভৰিস্সামী’’তি অধিৰাসেসি. সারথি ‘‘মহাসত্তং রথং আরোপেত্ৰা পচ্ছিমদ্ৰারাভিমুখং রথং পেসেস্সামী’’তি পাচীনদ্ৰারাভিমুখং পেসেসি. রথো নগরা নিক্খমিত্ৰা দেৰতানুভাৰেন তিযোজনট্ঠানং গতো. মহাসত্তো সুট্ঠুতরং তুট্ঠচিত্তো অহোসি. তত্থ ৰনঘটং সারথিস্স আমকসুসানং ৰিয উপট্ঠাসি. সো ‘‘ইদং ঠানং সুন্দর’’ন্তি রথং ওক্কমাপেত্ৰা মগ্গপস্সে ঠপেত্ৰা রথা ওরুয্হ মহাসত্তস্স আভরণভণ্ডং ওমুঞ্চিত্ৰা ভণ্ডিকং কত্ৰা ঠপেত্ৰা কুদালং আদায অৰিদূরে আৰাটং খণিতুং আরভি. তেন ৰুত্তং ‘‘ন্হাপেত্ৰা অনুলিম্পিত্ৰা’’তিআদি.

তত্থ ন্হাপেত্ৰাতি সোল়সহি গন্ধোদকঘটেহি ন্হাপেত্ৰা. অনুলিম্পিত্ৰাতি সুরভিৰিলেপনেন ৰিলিম্পেত্ৰা. ৰেঠেত্ৰা রাজৰেঠনন্তি কাসিরাজূনং পৰেণিযাগতং রাজমকুটং সীসে পটিমুঞ্চিত্ৰা. অভিসিঞ্চিত্ৰাতি তস্মিং রাজকুলে রাজাভিসেকনিযামেন অভিসিঞ্চিত্ৰা. ছত্তেন কারেসুং পুরং পদক্খিণন্তি সেতচ্ছত্তেন ধারিযমানেন মং নগরং পদক্খিণং কারেসুং.

৬২. সত্তাহং ধারযিত্ৰানাতি ময্হং মাতু চন্দাদেৰিযা ৰরলাভনৰসেন লদ্ধং সত্তাহং মম সেতচ্ছত্তং ধারযিত্ৰা. উগ্গতে রৰিমণ্ডলেতি ততো পুনদিৰসে সূরিযমণ্ডলে উগ্গতমত্তে অৰমঙ্গলরথেন মং নগরতো নীহরিত্ৰা ভূমিযং নিখণনত্থং সারথি সুনন্দো ৰনমুপগচ্ছি.

৬৩. সজ্জস্সন্তি সন্নদ্ধো অস্সং, যুগে যোজিতস্সং মে রথং মগ্গতো উক্কমাপনৰসেন একোকাসে কত্ৰা. হত্থমুচ্চিতোতি মুচ্চিতহত্থো, রথপাচনতো মুত্তহত্থোতি অত্থো. অথ ৰা হত্থমুচ্চিতোতি হত্থমুত্তো মম হত্থতো মুচ্চিত্ৰাতি অত্থো. কাসুন্তি আৰাটং. নিখাতুন্তি নিখণিতুং.

৬৪-৫. ইদানি যদত্থং মযা সোল়স ৰস্সানি মূগৰতাদিঅধিট্ঠানেন দুক্করচরিযা অধিট্ঠিতা, তং দস্সেতুং ‘‘অধিট্ঠিতমধিট্ঠান’’ন্তি গাথাদ্ৰযমাহ.

তত্থ তজ্জেন্তো ৰিৰিধকারণাতি দ্ৰিমাসিককালতো পট্ঠায যাৰ সোল়সসংৰচ্ছরা থঞ্ঞপটিসেধনাদীহি ৰিৰিধেহি নানপ্পকারেহি কারণেহি তজ্জযন্তো ভযৰিদ্ধংসনৰসেন ৰিহেঠিযমানো. সেসং সুৰিঞ্ঞেয্যমেৰ.

অথ মহাসত্তো সুনন্দে কাসুং খণন্তে ‘‘অযং মে ৰাযামকালো’’তি উট্ঠায অত্তনো হত্থপাদে সম্বাহিত্ৰা রথা ওতরিতুং মে বলং অত্থীতি ঞত্ৰা চিত্তং উপ্পাদেসি. তাৰদেৰস্স পাদপতিট্ঠানট্ঠানং ৰাতপুণ্ণভস্তচম্মং ৰিয উগ্গন্ত্ৰা রথস্স পচ্ছিমন্তং আহচ্চ অট্ঠাসি. সো ওতরিত্ৰা কতিপযে ৰারে অপরাপরং চঙ্কমিত্ৰা ‘‘যোজনসতম্পি গন্তুং মে বলং অত্থী’’তি ঞত্ৰা রথং পচ্ছিমন্তে গহেত্ৰা কুমারকানং কীল়নযানকং ৰিয উক্খিপিত্ৰা ‘‘সচে সারথি মযা সদ্ধিং পটিৰিরুজ্ঝেয্য, অত্থি মে পটিৰিরুজ্ঝিতুং বল’’ন্তি সল্লক্খেত্ৰা পসাধনত্থায চিত্তং উপ্পাদেসি. তঙ্খণঞ্ঞেৰ সক্কস্স ভৰনং উণ্হাকারং দস্সেসি. সক্কো তং কারণং ঞত্ৰা ৰিস্সকম্মং আণাপেসি – ‘‘গচ্ছ কাসিরাজপুত্তং অলঙ্করোহী’’তি. সো ‘‘সাধূ’’তি ৰত্ৰা দিব্বেহি চ মানুসেহি চ অলঙ্কারেহি সক্কং ৰিয তং অলঙ্করি. সো দেৰরাজলীল়ায সারথিস্স খণনোকাসং গন্ত্ৰা আৰাটতীরে ঠত্ৰা –

‘‘কিন্নু সন্তরমানোৰ, কাসুং খণসি সারথি;

পুট্ঠো মে সম্ম অক্খাহি, কিং কাসুযা করিস্সসী’’তি. (জা. ২.২২.৩) –

আহ.

তেন উদ্ধং অনোলোকেত্ৰাৰ –

‘‘রঞ্ঞো মূগো চ পক্খো চ, পুত্তো জাতো অচেতসো;

সোম্হি রঞ্ঞা সমজ্ঝিট্ঠো, পুত্তং মে নিখণং ৰনে’’তি. (জা. ২.২২.৪) –

ৰুত্তে মহাসত্তো –

‘‘ন বধিরো ন মূগোস্মি, ন পক্খো ন চ ৰীকলো;

অধম্মং সারথি কযিরা, মং চে ত্ৰং নিখণং ৰনে.

‘‘ঊরূ বাহুঞ্চ মে পস্স, ভাসিতঞ্চ সুণোহি মে;

অধম্মং সারথি কযিরা, মং চে ত্ৰং নিখণং ৰনে’’তি. (জা. ২.২২.৫-৬) –

ৰত্ৰা পুন তেন আৰাটখণনং পহায উদ্ধং ওলোকেত্ৰা তস্স রূপসম্পত্তিং দিস্ৰা ‘‘মনুস্সো ৰা দেৰো ৰা’’তি অজানন্তেন –

‘‘দেৰতা নুসি গন্ধব্বো, অদু সক্কো পুরিন্দদো;

কো ৰা ত্ৰং কস্স ৰা পুত্তো, কথং জানেমু তং ময’’ন্তি. (জা. ২.২২.৭) –

ৰুত্তে –

‘‘নম্হি দেৰো ন গন্ধব্বো, নাপি সক্কো পুরিন্দদো;

কাসিরঞ্ঞো অহং পুত্তো, যং কাসুযা নিখঞ্ঞসি.

‘‘তস্স রঞ্ঞো অহং পুত্তো, যং ত্ৰং সম্মূপজীৰসি;

অধম্মং সারথি কযিরা, মং চে ত্ৰং নিখণং ৰনে.

‘‘যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো.

‘‘যথা রুক্খো তথা রাজা, যথা সাখা তথা অহং;

যথা ছাযূপগো পোসো, এৰং ত্ৰমসি সারথি;

অধম্মং সারথি কযিরা, মং চে ত্ৰং নিখণং ৰনে’’তি. (জা. ২.২২.৮-১১) –

আদিনা নযেন ধম্মং দেসেত্ৰা তেন নিৰত্তনত্থং যাচিতো অনিৰত্তনকারণং পব্বজ্জাছন্দং তস্স চ হেতু নিরযভযাদিকং অতীতভৰে অত্তনো পৰত্তিং ৰিত্থারেন কথেত্ৰা তায ধম্মকথায তায চ পটিপত্তিযা তস্মিম্পি পব্বজিতুকামে জাতে রঞ্ঞো ইমং –

‘‘রথং নিয্যাতযিত্ৰান, অনণো এহি সারথি;

অনণস্স হি পব্বজ্জা, এতং ইসীহি ৰণ্ণিত’’ন্তি. (জা. ২.২২.৪৪) –

ৰত্ৰা তং ৰিস্সজ্জেসি.

সো রথং আভরণানি চ গহেত্ৰা রঞ্ঞো সন্তিকং গন্ত্ৰা তমত্থং আরোচেসি. রাজা তাৰদেৰ ‘‘মহাসত্তস্স সন্তিকং গমিস্সামী’’তি নগরতো নিগ্গচ্ছি সদ্ধিং চতুরঙ্গিনিযা সেনায ইত্থাগারেহি নাগরজানপদেহি চ. মহাসত্তোপি খো সারথিং উয্যোজেত্ৰা পব্বজিতুকামো জাতো. তস্স চিত্তং ঞত্ৰা সক্কো ৰিস্সকম্মং পেসেসি – ‘‘তেমিযপণ্ডিতো পব্বজিতুকামো, তস্স অস্সমপদং পব্বজিতপরিক্খারে চ মাপেহী’’তি. সো গন্ত্ৰা তিযোজনিকে ৰনসণ্ডে অস্সমং মাপেত্ৰা রত্তিট্ঠানদিৰাট্ঠানচঙ্কমনপোক্খরণীফলরুক্খসম্পন্নং কত্ৰা সব্বে চ পব্বজিতপরিক্খারে মাপেত্ৰা সকট্ঠানমেৰ গতো. বোধিসত্তো তং দিস্ৰা সক্কদত্তিযভাৰং ঞত্ৰা পণ্ণসালং পৰিসিত্ৰা ৰত্থানি অপনেত্ৰা তাপসৰেসং গহেত্ৰা কট্ঠত্থরে নিসিন্নো অট্ঠ সমাপত্তিযো, পঞ্চ চ অভিঞ্ঞাযো নিব্বত্তেত্ৰা পব্বজ্জাসুখেন অস্সমে নিসীদি.

কাসিরাজাপি সারথিনা দস্সিতমগ্গেন গন্ত্ৰা অস্সমং পৰিসিত্ৰা মহাসত্তেন সহ সমাগন্ত্ৰা কতপটিসন্থারো রজ্জেন নিমন্তেসি. তেমিযপণ্ডিতো তং পটিক্খিপিত্ৰা অনেকাকারৰোকারং অনিচ্চতাদিপটিসংযুত্তায চ কামাদীনৰপটিসংযুত্তায চ ধম্মিযা কথায রাজানং সংৰেজেসি. সো সংৰিগ্গমানসো ঘরাৰাসে উক্কণ্ঠিতো পব্বজিতুকামো হুত্ৰা অমচ্চে ইত্থাগারে চ পুচ্ছি. তেপি পব্বজিতুকামা অহেসুং. অথ রাজা চন্দাদেৰিং আদিং কত্ৰা সোল়স সহস্সে ওরোধে চ অমচ্চাদিকে চ পব্বজিতুকামে ঞত্ৰা নগরে ভেরিং চরাপেসি – ‘‘যে মম পুত্তস্স সন্তিকে পব্বজিতুকামা, তে পব্বজন্তূ’’তি. সুৰণ্ণকোট্ঠাগারাদীনি চ ৰিৰরাপেত্ৰা ৰিস্সজ্জাপেসি. নাগরা চ যথাপসারিতেযেৰ আপণে ৰিৰটদ্ৰারানেৰ গেহানি চ পহায রঞ্ঞো সন্তিকং অগমংসু. রাজা মহাজনেন সদ্ধিং মহাসত্তস্স সন্তিকে পব্বজি. সক্কদত্তিযং তিযোজনিকং অস্সমপদং পরিপূরি.

সামন্তরাজানো ‘‘কাসিরাজা পব্বজিতো’’তি সুত্ৰা ‘‘বারাণসিরজ্জং গহেস্সামা’’তি নগরং পৰিসিত্ৰা দেৰনগরসদিসং নগরং সত্তরতনভরিতং দেৰৰিমানকপ্পং রাজনিৰেসনঞ্চ দিস্ৰা ‘‘ইমং ধনং নিস্সায ভযেন ভৰিতব্ব’’ন্তি তাৰদেৰ নিক্খমিত্ৰা পাযাসুং. তেসং আগমনং সুত্ৰা মহাসত্তো ৰনন্তং গন্ত্ৰা আকাসে নিসীদিত্ৰা ধম্মং দেসেসি. তে সব্বে সদ্ধিং পরিসায তস্স সন্তিকে পব্বজিংসু. এৰং অপরেপি অপরেপীতি মহাসমাগমো অহোসি. সব্বে ফলাফলানি পরিভুঞ্জিত্ৰা সমণধম্মং করোন্তি. যো কামাদিৰিতক্কং ৰিতক্কেতি, তস্স চিত্তং ঞত্ৰা মহাসত্তো তত্থ গন্ত্ৰা আকাসে নিসীদিত্ৰা ধম্মং দেসেতি.

সো ধম্মস্সৰনসপ্পাযং লভিত্ৰা সমাপত্তিযো অভিঞ্ঞাযো চ নিব্বত্তেতি. এৰং অপরোপি অপরোপীতি সব্বেপি জীৰিতপরিযোসানে ব্রহ্মলোকপরাযনা অহেসুং. তিরচ্ছানগতাপি মহাসত্তে ইসিগণেপি চিত্তং পসাদেত্ৰা ছসু কামসগ্গেসু নিব্বত্তিংসু. মহাসত্তস্স ব্রহ্মচরিযং চিরং দীঘমদ্ধানং পৰত্তিত্থ. তদা ছত্তে অধিৰত্থা দেৰতা উপ্পলৰণ্ণা অহোসি, সারথি সারিপুত্তত্থেরো, মাতাপিতরো মহারাজকুলানি, পরিসা বুদ্ধপরিসা, তেমিযপণ্ডিতো লোকনাথো.

তস্স অধিট্ঠানপারমী ইধ মত্থকং পত্তা, সেসপারমিযোপি যথারহং নিদ্ধারেতব্বা. তথা মাসজাতকালতো পট্ঠায নিরযভযং পাপভীরুতা রজ্জজিগুচ্ছা নেক্খম্মনিমিত্তং মূগাদিভাৰাধিট্ঠানং তত্থ চ ৰিরোধিপ্পচ্চযসমোধানেপি নিচ্চলভাৰোতি এৰমাদযো গুণানুভাৰা ৰিভাৰেতব্বাতি.

তেমিযচরিযাৰণ্ণনা নিট্ঠিতা.

অধিট্ঠানপারমী নিট্ঠিতা.

৭. কপিরাজচরিযাৰণ্ণনা

৬৭. সত্তমে যদা অহং কপি আসিন্তি যস্মিং কালে অহং কপিযোনিযং নিব্বত্তিত্ৰা ৰুদ্ধিমন্ৰায নাগবলো থামসম্পন্নো অস্সপোতকপ্পমাণো মহাসরীরো কপি হোমি. নদীকূলে দরীসযেতি একিস্সা নদিযা তীরে একস্মিং দরীভাগে যদা ৰাসং কপ্পেমীতি অত্থো.

তদা কির বোধিসত্তো যূথপরিহরণং অকত্ৰা একচরো হুত্ৰা ৰিহাসি. তস্সা পন নদিযা ৰেমজ্ঝে একো দীপকো নানপ্পকারেহি অম্বপনসাদীহি ফলরুক্খেহি সম্পন্নো. বোধিসত্তো থামজৰসম্পন্নতায নদিযা ওরিমতীরতো উপ্পতিত্ৰা দীপকস্স পন নদিযা চ মজ্ঝে একো পিট্ঠিপাসাণো অত্থি, তস্মিং পততি. ততো উপ্পতিত্ৰা তস্মিং দীপকে পততি. সো তত্থ নানপ্পকারানি ফলাফলানি খাদিত্ৰা সাযং তেনেৰ উপাযেন পচ্চাগন্ত্ৰা অত্তনো ৰসনট্ঠানে ৰসিত্ৰা পুনদিৰসেপি তথেৰ করোতি. ইমিনা নিযামেন ৰাসং কপ্পেসি.

তস্মিং পন কালে একো কুম্ভীলো সপজাপতিকো তস্সং নদিযং ৰসতি. তস্স ভরিযা বোধিসত্তং অপরাপরং গচ্ছন্তং দিস্ৰা তস্স হদযমংসে দোহল়ং উপ্পাদেত্ৰা কুম্ভীলং আহ – ‘‘ময্হং খো, অয্যপুত্ত, ইমস্স ৰানরস্স হদযমংসে দোহল়ো উপ্পন্নো’’তি. সো ‘‘সাধু, ভদ্দে, লচ্ছসী’’তি ৰত্ৰা ‘‘অজ্জ তং সাযং দীপকতো আগচ্ছন্তমেৰ গণ্হিস্সামী’’তি গন্ত্ৰা পিট্ঠিপাসাণে নিপজ্জি. বোধিসত্তো তং দিৰসং গোচরং চরিত্ৰা সাযন্হসমযে দীপকে ঠিতোৰ পাসাণং ওলোকেত্ৰা ‘‘অযং পাসাণো ইদানি উচ্চতরো খাযতি, কিং নু খো কারণ’’ন্তি চিন্তেসি. মহাসত্তস্স হি উদকপ্পমাণঞ্চ পাসাণপ্পমাণঞ্চ সুৰৰত্থাপিতমেৰ হোতি. তেনস্স এতদহোসি – ‘‘অজ্জ ইমিস্সা নদিযা উদকং নেৰ হাযতি, অথ চ পনাযং পাসাণো মহা হুত্ৰা পঞ্ঞাযতি, কচ্চি নু খো এত্থ ময্হং গহণত্থায কুম্ভীলো নিপন্নো’’তি?

সো ‘‘ৰীমংসিস্সামি তাৰ ন’’ন্তি তত্থেৰ ঠত্ৰা পাসাণেন সদ্ধিং কথেন্তো ৰিয ‘‘ভো, পাসাণা’’তি ৰত্ৰা পটিৰচনং অলভন্তো যাৰততিযং ‘‘ভো, পাসাণা’’তি আহ. পাসাণো পটিৰচনং ন দেতি. পুনপি বোধিসত্তো ‘‘কিং, ভো পাসাণ, অজ্জ ময্হং পটিৰচনং ন দেসী’’তি আহ. কুম্ভীলো ‘‘অদ্ধা অযং পাসাণো অঞ্ঞেসু দিৰসেসু ৰানরিন্দস্স পটিৰচনং দেতি মঞ্ঞে, অজ্জ পন মযা ওত্থরিতত্তা ন দেতি, হন্দাহং দস্সামিস্স পটিৰচন’’ন্তি চিন্তেত্ৰা ‘‘কিং ৰানরিন্দা’’তি আহ. ‘‘কোসি ত্ৰ’’ন্তি? ‘‘অহং কুম্ভীলো’’তি. ‘‘কিমত্থং এত্থ নিপন্নোসী’’তি? ‘‘তৰ হদযং পত্থযমানো’’তি. বোধিসত্তো চিন্তেসি – ‘‘অঞ্ঞো মে গমনমগ্গো নত্থি, পটিরুদ্ধং ৰত মে গমন’’ন্তি. তেন ৰুত্তং –

‘‘পীল়িতো সুসুমারেন, গমনং ন লভামহং’’.

৬৮.

‘‘যম্হোকাসে অহং ঠত্ৰা, ওরা পারং পতামহং;

তত্থচ্ছি সত্তুৰধকো, কুম্ভীলো লুদ্দদস্সনো’’তি.

তত্থ ‘‘পীল়িতো সুসুমারেনা’’তি অদ্ধগাথায ৰুত্তমেৰত্থং. ‘‘যম্হোকাসে’’তি গাথায পাকটং করোতি. তত্থ যম্হোকাসেতি যস্মিং নদীমজ্ঝে ঠিতপিট্ঠিপাসাণসঙ্খাতে পদেসে ঠত্ৰা. ওরাতি দীপকসঙ্খাতা ওরতীরা. পারন্তি তদা মম ৰসনট্ঠানভূতং নদিযা পরতীরং. পতামহন্তি উপ্পতিত্ৰা পতামি অহং. তত্থচ্ছীতি তস্মিং পিট্ঠিপাসাণপ্পদেসে সত্তুভূতো ৰধকো একন্তেনেৰ ঘাতকো পচ্চত্থিকো লুদ্দদস্সনো ঘোররূপো ভযানকদস্সনো নিসীদি.

অথ মহাসত্তো চিন্তেসি – ‘‘অঞ্ঞো মে গমনমগ্গো নত্থি, অজ্জ মযা কুম্ভীলো ৰঞ্চেতব্বো, এৰঞ্হি অযঞ্চ মহতা পাপতো মযা পরিমোচিতো সিযা, ময্হঞ্চ জীৰিতং লদ্ধ’’ন্তি. সো কুম্ভীলং আহ – ‘‘সম্ম, কুম্ভীল, অহং তুয্হং উপরি পতিস্সামী’’তি. কুম্ভীলো ‘‘ৰানরিন্দ, পপঞ্চং অকত্ৰা ইতো আগচ্ছাহী’’তি আহ. মহাসত্তো ‘‘অহং আগচ্ছামি, ত্ৰং পন অত্তনো মুখং ৰিৰরিত্ৰা মং তৰ সন্তিকং আগতকালে গণ্হাহী’’তি অৰোচ. কুম্ভীলানঞ্চ মুখে ৰিৰটে অক্খীনি নিম্মীলন্তি. সো তং কারণং অসল্লক্খেন্তো মুখং ৰিৰরি. অথস্স অক্খীনি নিম্মীলিংসু. সো মুখং ৰিৰরিত্ৰা সব্বসো নিম্মীলিতক্খী হুত্ৰা নিপজ্জি. মহাসত্তো তস্স তথাভাৰং ঞত্ৰা দীপকতো উপ্পতিতো গন্ত্ৰা কুম্ভীলস্স মত্থকং অক্কমিত্ৰা ততো উপ্পতন্তো ৰিজ্জুলতা ৰিয ৰিজ্জোতমানো পরতীরে অট্ঠাসি. তেন ৰুত্তং –

৬৯.

‘‘সো মং অসংসি এহীতি, অহম্পেমীতি তং ৰদিং;

তস্স মত্থকমক্কম্ম, পরকূলে পতিট্ঠহি’’ন্তি.

তত্থ অসংসীতি অভাসি. অহম্পেমীতি অহম্পি আগচ্ছামীতি তং কথেসিং.

যস্মা পন তং দীপকং অম্বজম্বুপনসাদিফলরুক্খসণ্ডমণ্ডিতং রমণীযং নিৰাসযোগ্গঞ্চ, ‘‘আগচ্ছামী’’তি পন পটিঞ্ঞায দিন্নত্তা সচ্চং অনুরক্খন্তো মহাসত্তোপি ‘‘আগমিস্সামেৰা’’তি তথা অকাসি. তেন ৰুত্তং –

৭০.

‘‘ন তস্স অলিকং ভণিতং, যথা ৰাচং অকাসহ’’ন্তি.

যস্মা চেতং সচ্চানুরক্খণং অত্তনো জীৰিতং পরিচ্চজিত্ৰা কতং, তস্মা আহ –

‘‘সচ্চেন মে সমো নত্থি, এসা মে সচ্চপারমী’’তি.

কুম্ভীলো পন তং অচ্ছরিযং দিস্ৰা ‘‘ইমিনা ৰানরিন্দেন অতিঅচ্ছেরকং কত’’ন্তি চিন্তেত্ৰা ‘‘ভো ৰানরিন্দ, ইমস্মিং লোকে চতূহি ধম্মেহি সমন্নাগতো পুগ্গলো অমিত্তে অভিভৰতি, তে সব্বেপি তুয্হং অব্ভন্তরে অত্থি মঞ্ঞে’’তি আহ –

‘‘যস্সেতে চতুরো ধম্মা, ৰানরিন্দ, যথা তৰ;

সচ্চং ধম্মো ধিতি চাগো, দিট্ঠং সো অতিৰত্ততী’’তি. (জা. ১.২.১৪৭);

তত্থ যস্সাতি যস্স কস্সচি পুগ্গলস্স. এতেতি ইদানি ৰত্তব্বে পচ্চক্খতো দস্সেতি. চতুরো ধম্মাতি চত্তারো গুণা. সচ্চন্তি ৰচীসচ্চং, ‘‘মম সন্তিকং আগমিস্সামী’’তি ৰত্ৰা মুসাৰাদং অকত্ৰা আগতো এৰাতি এতং তে ৰচীসচ্চং. ধম্মোতি ৰিচারণপঞ্ঞা, ‘‘এৰং কতে ইদং নাম ভৰিস্সতী’’তি পৰত্তা তে এসা ৰিচারণপঞ্ঞা. ধিতীতি অব্বোচ্ছিন্নং ৰীরিযং ৰুচ্চতি, এতম্পি তে অত্থি. চাগোতি অত্তপরিচ্চাগো, ত্ৰং অত্তানং পরিচ্চজিত্ৰা মম সন্তিকং আগতো, যং পনাহং গণ্হিতুং নাসক্খিং, ময্হমেৰেস দোসো. দিট্ঠন্তি পচ্চামিত্তং. সো অতিৰত্ততীতি যস্স পুগ্গলস্স যথা তৰ এৰং এতে চত্তারো ধম্মা অত্থি, সো যথা মং ত্ৰং অজ্জ অতিক্কন্তো, তথেৰ অত্তনো পচ্চামিত্তং অতিক্কমতি অভিভৰতীতি.

এৰং কুম্ভীলো বোধিসত্তং পসংসিত্ৰা অত্তনো ৰসনট্ঠানং গতো. তদা কুম্ভীলো দেৰদত্তো অহোসি, তস্স ভরিযা চিঞ্চমাণৰিকা, কপিরাজা পন লোকনাথো.

তস্স ইধাপি হেট্ঠা ৰুত্তনযেনেৰ সেসপারমিযো নিদ্ধারেতব্বা. তথা উদকস্স পাসাণস্স চ পমাণৰৰত্থানেন ইদানি পাসাণো উচ্চতরো খাযতীতি পরিগ্গণ্হনৰসেন পাসাণস্স উপরি সুসুমারস্স নিপন্নভাৰজাননং, পাসাণেন কথনাপদেসেন তস্সত্থস্স নিচ্ছযগমনং, সুসুমারস্স উপরি অক্কমিত্ৰা সহসা পরতীরে পতিট্ঠানৰসেন সীঘকারিতায তস্স মহতা পাপতো পরিমোচনং, অত্তনো জীৰিতরক্খণং, সচ্চৰাচানুরক্খণঞ্চাতি এৰমাদযো গুণানুভাৰা ৰিভাৰেতব্বাতি.

কপিরাজচরিযাৰণ্ণনা নিট্ঠিতা.

৮. সচ্চতাপসচরিযাৰণ্ণনা

অট্ঠমে তাপসো সচ্চসৰ্হযোতি সচ্চসদ্দেন অৰ্হাতব্বো সচ্চনামকো তাপসো যদা যস্মিং কালে হোমি, তদা. সচ্চেন লোকং পালেসিন্তি অত্তনো অৰিসংৰাদিভাৰেন সত্তলোকং জম্বুদীপে তত্থ তত্থ সত্তনিকাযং পাপতো নানাৰিধা অনত্থতো চ রক্খিং. সমগ্গং জনমকাসহন্তি তত্থ তত্থ কলহৰিগ্গহৰিৰাদাপন্নং মহাজনং কলহে আদীনৰং দস্সেত্ৰা সামগ্গিযং আনিসংসকথনেন সমগ্গং অৰিৰদমানং সম্মোদমানং অহমকাসিং.

তদা হি বোধিসত্তো বারাণসিযং অঞ্ঞতরস্মিং ব্রাহ্মণমহাসালকুলে নিব্বত্তি. তস্স ‘‘সচ্চো’’তি নামং করিংসু. সো ৰযপ্পত্তো তক্কসিলং গন্ত্ৰা দিসাপামোক্খস্স আচরিযস্স সন্তিকে সিপ্পং উগ্গণ্হিত্ৰা নচিরস্সেৰ সব্বসিপ্পানং নিপ্ফত্তিং পত্তো. আচরিযেন অনুঞ্ঞাতো বারাণসিং পচ্চাগন্ত্ৰা মাতাপিতরো ৰন্দিত্ৰা তেহি অভিনন্দিযমানো তেসং চিত্তানুরক্খণত্থং কতিপাহং তেসং সন্তিকে ৰসি. অথ নং মাতাপিতরো পতিরূপেন দারেন সংযোজেতুকামা সব্বং ৰিভৰজাতং আচিক্খিত্ৰা ঘরাৰাসেন নিমন্তেসুং.

মহাসত্তো নেক্খম্মজ্ঝাসযো অত্তনো নেক্খম্মপারমিং পরিব্রূহেতুকামো ঘরাৰাসে আদীনৰং পব্বজ্জায আনিসংসঞ্চ নানপ্পকারতো কথেত্ৰা মাতাপিতূনং অস্সুমুখানং রোদমানানং অপরিমাণং ভোগক্খন্ধং অনন্তং যসং মহন্তঞ্চ ঞাতিপরিৰট্টং পহায মহানাগোৰ অযসঙ্খলিকং ঘরবন্ধনং ছিন্দন্তো নিক্খমিত্ৰা হিমৰন্তপ্পদেসং পৰিসিত্ৰা ইসিপব্বজ্জং পব্বজিত্ৰা ৰনমূলফলাফলেহি যাপেন্তো নচিরস্সেৰ অট্ঠ সমাপত্তিযো পঞ্চ চ অভিঞ্ঞাযো নিব্বত্তেত্ৰা ঝানকীল়ং কীল়যমানো সমাপত্তিৰিহারেন ৰিহরতি.

সো একদিৰসং দিব্বচক্খুনা লোকং ওলোকেন্তো অদ্দস সকলজম্বুদীপে মনুস্সে যেভুয্যেন পাণাতিপাতাদিদসঅকুসলকম্মপথপসুতে কামনিদানং কামাধিকরণং অঞ্ঞমঞ্ঞং ৰিৰাদাপন্নে. দিস্ৰা এৰং চিন্তেসি – ‘‘ন খো পন মেতং পতিরূপং, যদিদং ইমে সত্তে এৰং পাপপসুতে ৰিৰাদাপন্নে চ দিস্ৰা অজ্ঝুপেক্খণং. অহঞ্হি ‘সত্তে সংসারপঙ্কতো উদ্ধরিত্ৰা নিব্বানথলে পতিট্ঠপেস্সামী’তি মহাসম্বোধিযানং পটিপন্নো, তস্মা তং পটিঞ্ঞং অৰিসংৰাদেন্তো যংনূনাহং মনুস্সপথং গন্ত্ৰা তে তে সত্তে পাপতো ওরমাপেয্যং, ৰিৰাদঞ্চ নেসং ৰূপসমেয্য’’ন্তি.

এৰং পন চিন্তেত্ৰা মহাসত্তো মহাকরুণায সমুস্সাহিতো সন্তং সমাপত্তিসুখং পহায ইদ্ধিযা তত্থ তত্থ গন্ত্ৰা তেসং চিত্তানুকূলং ধম্মং দেসেন্তো কলহৰিগ্গহৰিৰাদাপন্নে সত্তে দিট্ঠধম্মিকঞ্চ সম্পরাযিকঞ্চ ৰিরোধে আদীনৰং দস্সেত্ৰা অঞ্ঞমঞ্ঞং সমগ্গে সহিতে অকাসি. অনেকাকারৰোকারঞ্চ পাপে আদীনৰং ৰিভাৰেন্তো ততো সত্তে ৰিৰেচেত্ৰা একচ্চে দসসু কুসলকম্মপথধম্মেসু পতিট্ঠাপেসি. একচ্চে পব্বাজেত্ৰা সীলসংৰরে ইন্দ্রিযগুত্তিযং সতিসম্পজঞ্ঞে পৰিৰেকৰাসে ঝানাভিঞ্ঞাসু চ যথারহং পতিট্ঠাপেসি. তেন ৰুত্তং –

৭১.

‘‘পুনাপরং যদা হোমি, তাপসো সচ্চসৰ্হযো;

সচ্চেন লোকং পালেসিং, সমগ্গং জনমকাসহ’’ন্তি.

ইধাপি মহাপুরিসস্স হেট্ঠা ৰুত্তনযেনেৰ সেসপারমিযো নিদ্ধারেতব্বা. তথা গুণানুভাৰা চ ৰিভাৰেতব্বাতি.

সচ্চতাপসচরিযাৰণ্ণনা নিট্ঠিতা.

৯. ৰট্টপোতকচরিযাৰণ্ণনা

৭২. নৰমে মগধে ৰট্টপোতকোতিআদীসু অযং সঙ্খেপত্থো – মগধরট্ঠে অঞ্ঞতরস্মিং অরঞ্ঞপ্পদেসে ৰট্টকযোনিযং নিব্বত্তিত্ৰা অণ্ডকোসং পদালেত্ৰা অচিরনিক্খন্ততায তরুণো মংসপেসিভূতো, ততো এৰ অজাতপক্খো ৰট্টকচ্ছাপকো যদা অহং কুলাৰকেযেৰ হোমি.

৭৩. মুখতুণ্ডকেনাহরিত্ৰাতি ময্হং মাতা অত্তনো মুখতুণ্ডকেন কালেন কালং গোচরং আহরিত্ৰা মং পোসেতি. তস্সা ফস্সেন জীৰামীতি পরিসেদনত্থঞ্চেৰ পরিভাৰনত্থঞ্চ সম্মদেৰ কালেন কালং মমং অধিসযনৰসেন ফুসন্তিযা তস্সা মম মাতুযা সরীরসম্ফস্সেন জীৰামি ৰিহরামি অত্তভাৰং পৰত্তেমি. নত্থি মে কাযিকং বলন্তি ময্হং পন অতিতরুণতায কাযসন্নিস্সিতং বলং নত্থি.

৭৪. সংৰচ্ছরেতি সংৰচ্ছরে সংৰচ্ছরে. গিম্হসমযেতি গিম্হকালে. সুক্খরুক্খসাখানং অঞ্ঞমঞ্ঞং সঙ্ঘট্টনসমুপ্পন্নেন অগ্গিনা তস্মিং পদেসে দৰডাহো পদিপ্পতি পজ্জলতি, সো তথা পদীপিতো. উপগচ্ছতি অম্হাকন্তি ময্হং মাতাপিতূনঞ্চাতি অম্হাকং ৰসনট্ঠানপ্পদেসং অত্তনো পতিট্ঠানস্স অসুদ্ধস্সাপি সুদ্ধভাৰকরণেন পাৰনতো পাৰকোতি চ গতমগ্গে ইন্ধনস্স ভস্মভাৰাৰহনতো কণ্হৰত্তনীতি চ লদ্ধনামো অগ্গি ৰনরুক্খগচ্ছে দহন্তো কালেন কালং উপগচ্ছতি.

৭৫. এৰং উপগমনতো তদাপি সদ্দাযন্তোতি ‘‘ধমধম’’ইতি এৰং সদ্দং করোন্তো, অনুরৰদস্সনঞ্হেতং দাৰগ্গিনো. মহাসিখীতি পব্বতকূটসদিসানং ইন্ধনানং ৰসেন মহতিযো সিখা এতস্সাতি মহাসিখী. অনুপুব্বেন অনুক্কমেন তং অরঞ্ঞপ্পদেসং ঝাপেন্তো দহন্তো অগ্গি মম সমীপট্ঠানং উপাগমি.

৭৬. অগ্গিৰেগভযাতি ৰেগেন আগচ্ছতো অগ্গিনো ভযেন ভীতা. তসিতাতি চিত্তুত্রাসসমুট্ঠিতেন কাযস্স ছম্ভিতত্তেন চ উত্রাসা. মাতাপিতাতি মাতাপিতরো. অত্তানং পরিমোচযুন্তি অগ্গিনা অনুপদ্দুতট্ঠানগমনেন অত্তনো সোত্থিভাৰমকংসু. মহাসত্তো হি তদা মহাগেণ্ডুকপ্পমাণো মহাসরীরো অহোসি. তং মাতাপিতরো কেনচি উপাযেন গহেত্ৰা গন্তুং অসক্কুণন্তা অত্তসিনেহেন চ অভিভুয্যমানা পুত্তসিনেহং ছড্ডেত্ৰা পলাযিংসু.

৭৭. পাদে পক্খে পজহামীতি অত্তনো উভো পাদে উভো পক্খে চ ভূমিযং আকাসে চ গমনসজ্জে করোন্তো পসারেমি ইরিযামি ৰাযমামি. ‘‘পটীহামী’’তিপি পাঠো, ৰেহাসগমনযোগ্গে কাতুং ঈহামীতি অত্থো. ‘‘পতীহামী’’তিপি পঠন্তি. তস্সত্থো – পাদে পক্খে চ পতি ৰিসুং ঈহামি, গমনত্থং ৰাযমামি, তং পন ৰাযামকরণত্থমেৰ. কস্মা? যস্মা নত্থি মে কাযিকং বলং. সোহং অগতিকো তত্থাতি সো অহং এৰংভূতো পাদপক্খৰেকল্লেন গমনৰিরহিতো মাতাপিতূনং অপগমনেন ৰা অপ্পটিসরণো, তত্থ দাৰগ্গিউপদ্দুতে ৰনে, তস্মিং ৰা কুলাৰকে ঠিতোৰ এৰং ইদানি ৰত্তব্বাকারেন তদা চিন্তেসিং. দুতিযঞ্চেত্থ অহন্তি নিপাতমত্তং দট্ঠব্বং.

৭৮.

ইদানি তদা অত্তনো চিন্তিতাকারং দস্সেতুং ‘‘যেসাহ’’ন্তিআদিমাহ;

তত্থ যেসাহং উপধাৰেয্যং, ভীতো তসিতৰেধিতোতি মরণভযেন ভীতো ততো এৰ চিত্তুত্রাসেন তসিতো সরীরকম্পনেন ৰেধিতো যেসমহং পক্খন্তরং এতরহি দাৰগ্গিউপদ্দুতো জলদুগ্গং ৰিয মঞ্ঞমানো পৰিসিতুং উপধাৰেয্যং তে মম মাতাপিতরো মং এককং এৰ ওহায জহিত্ৰা পক্কন্তা. কথং মে অজ্জ কাতৰেতি কথং নু খো মযা অজ্জ কাতব্বং, পটিপজ্জিতব্বন্তি অত্থো.

এৰং মহাসত্তো ইতিকত্তব্বতাসম্মূল়্হো হুত্ৰা ঠিতো পুন চিন্তেসি – ‘‘ইমস্মিং লোকে সীলগুণো নাম অত্থি, সচ্চগুণো নাম অত্থি, অতীতে পারমিযো পূরেত্ৰা বোধিতলে নিসীদিত্ৰা অভিসম্বুদ্ধা সীলসমাধিপঞ্ঞাৰিমুত্তিৰিমুত্তিঞাণদস্সনসম্পন্না সচ্চানুদযকারুঞ্ঞখন্তিসমন্নাগতা সব্বসত্তেসু সমপ্পৰত্তমেত্তাভাৰনা সব্বঞ্ঞুবুদ্ধা নাম অত্থি, তেহি চ পটিৰিদ্ধো একন্তনিয্যানগুণো ধম্মো অত্থি, মযি চাপি একং সচ্চং অত্থি. সংৰিজ্জমানো একো সভাৰধম্মো পঞ্ঞাযতি, তস্মা অতীতবুদ্ধে চেৰ তেহি পটিৰিদ্ধগুণে চ আৰজ্জেত্ৰা মযি ৰিজ্জমানং সচ্চং সভাৰধম্মং গহেত্ৰা সচ্চকিরিযং কত্ৰা অগ্গিং পটিক্কমাপেত্ৰা অজ্জ মযা অত্তনো চেৰ ইধ ৰাসীনং সেসপাণীনঞ্চ সোত্থিভাৰং কাতুং ৰট্টতী’’তি. এৰং পন চিন্তেত্ৰা মহাসত্তো অত্তনো আনুভাৰে ঠত্ৰা যথাচিন্তিতং পটিপজ্জি. তেন ৰুত্তং –

৭৯.

‘‘অত্থি লোকে সীলগুণো, সচ্চং সোচেয্যনুদ্দযা;

তেন সচ্চেন কাহামি, সচ্চকিরিযমুত্তমং.

৮০.

‘‘আৰজ্জেত্ৰা ধম্মবলং, সরিত্ৰা পুব্বকে জিনে;

সচ্চবলমৰস্সায, সচ্চকিরিযমকাসহ’’ন্তি.

৮১. তত্থ মহাসত্তো অতীতে পরিনিব্বুতানং বুদ্ধানং গুণে আৰজ্জেত্ৰা অত্তনি ৰিজ্জমানং সচ্চসভাৰং আরব্ভ যং গাথং ৰত্ৰা তদা সচ্চকিরিযমকাসি, তং দস্সেতুং ‘‘সন্তি পক্খা’’তিআদি ৰুত্তং.

তত্থ সন্তি পক্খা অপতনাতি ময্হং পক্খা নাম অত্থি উপলব্ভন্তি, নো চ খো সক্কা এতেহি উপ্পতিতুং আকাসেন গন্তুন্তি অপতনা. সন্তি পাদা অৰঞ্চনাতি পাদাপি মে অত্থি, তেহি পন ৰঞ্চিতুং পদৰারগমনেন গন্তুং ন সক্কাতি অৰঞ্চনা. মাতাপিতা চ নিক্খন্তাতি যে মং অঞ্ঞত্থ নেয্যুং, তেপি মরণভযেন মম মাতাপিতরো নিক্খন্তা. জাতৰেদাতি অগ্গিং আলপতি. সো হি জাতোৰ ৰেদিযতি, ধূমজালুট্ঠানেন পঞ্ঞাযতি, তস্মা ‘‘জাতৰেদো’’তি ৰুচ্চতি. পটিক্কমাতি পটিগচ্ছ নিৰত্তাতি জাতৰেদং আণাপেতি.

ইতি মহাসত্তো ‘‘সচে ময্হং পক্খানং অত্থিভাৰো, তে চ পসারেত্ৰা আকাসে অপতনভাৰো, পাদানং অত্থিভাৰো, তে চ উক্খিপিত্ৰা অৰঞ্চনভাৰো, মাতাপিতূনং মং কুলাৰকেযেৰ ছড্ডেত্ৰা পলাতভাৰো চ সচ্চসভাৰভূতো এৰ, জাতৰেদ, এতেন সচ্চেন ত্ৰং ইতো পটিক্কমা’’তি কুলাৰকে নিপন্নোৰ সচ্চকিরিযং অকাসি. তস্স সহ সচ্চকিরিযায সোল়সকরীসমত্তে ঠানে জাতৰেদো পটিক্কমি. পটিক্কমন্তো চ ন ঝাযমানোৰ অরঞ্ঞং গতো, উদকে পন ওপিলাপিতউক্কা ৰিয তত্থেৰ নিব্বাযি. তেন ৰুত্তং –

৮২.

‘‘সহ সচ্চে কতে ময্হং, মহাপজ্জলিতো সিখী;

ৰজ্জেসি সোল়সকরীসানি, উদকং পত্ৰা যথা সিখী’’তি.

সা পনেসা বোধিসত্তস্স ৰট্টকযোনিযং তস্মিং সমযে বুদ্ধগুণানং আৰজ্জনপুব্বিকা সচ্চকিরিযা অনঞ্ঞসাধারণাতি আহ ‘‘সচ্চেন মে সমো নত্থি, এসা মে সচ্চপারমী’’তি. তেনেৰ হি তস্স ঠানস্স সকলেপি ইমস্মিং কপ্পে অগ্গিনা অনভিভৰনীযত্তা তং কপ্পট্ঠিযপাটিহারিযং নাম জাতং.

এৰং মহাসত্তো সচ্চকিরিযৰসেন অত্তনো তত্থ ৰাসীনং সত্তানঞ্চ সোত্থিং কত্ৰা জীৰিতপরিযোসানে যথাকম্মং গতো.

তদা মাতাপিতরো এতরহি মাতাপিতরো অহেসুং, ৰট্টকরাজা পন লোকনাথো.

তস্স হেট্ঠা ৰুত্তনযেনেৰ সেসপারমিযোপি যথারহং নিদ্ধারেতব্বা. তথা দাৰগ্গিম্হি তথা ভেরৰাকারেন অৰত্থরিত্ৰা আগচ্ছন্তে তস্মিং ৰযে এককো হুত্ৰাপি সারদং অনাপজ্জিত্ৰা সচ্চাদিধম্মগুণে বুদ্ধগুণে চ অনুস্সরিত্ৰা অত্তনো এৰ আনুভাৰং নিস্সায সচ্চকিরিযায তত্থ ৰাসীনম্পি সত্তানং সোত্থিভাৰাপাদনাদযো আনুভাৰা ৰিভাৰেতব্বা.

ৰট্টপোতকচরিযাৰণ্ণনা নিট্ঠিতা.

১০. মচ্ছরাজচরিযাৰণ্ণনা

৮৩. দসমে যদা হোমি, মচ্ছরাজা মহাসরেতি অতীতে মচ্ছযোনিযং নিব্বত্তিত্ৰা কোসলরট্ঠে সাৰত্থিযং জেতৰনে পোক্খরণিট্ঠানে ৰল্লিগহনপরিক্খিত্তে একস্মিং মহাসরে মচ্ছানং চতূহি সঙ্গহৰত্থূহি রঞ্জনতো যদা অহং রাজা হোমি, মচ্ছগণপরিৰুতো তত্থ পটিৰসামি তদা. উণ্হেতি উণ্হকালে গিম্হসমযে. সূরিযসন্তাপেতি আদিচ্চসন্তাপেন. সরে উদক খীযথাতি তস্মিং সরে উদকং খীযিত্থ ছিজ্জিত্থ. তস্মিঞ্হি রট্ঠে তদা দেৰো ন ৰস্সি, সস্সানি মিলাযিংসু, ৰাপিআদীসু উদকং পরিক্খযং পরিযাদানং অগমাসি, মচ্ছকচ্ছপা কললগহনং পৰিসিংসু. তস্মিম্পি সরে মচ্ছা কদ্দমগহনং পৰিসিত্ৰা তস্মিং তস্মিং ঠানে নিলীযিংসু.

৮৪. ততোতি ততো উদকপরিক্খযতো অপরভাগে. কুললসেনকাতি কুললাচেৰ সেনা চ. ভক্খযন্তি দিৰারত্তিং, মচ্ছে উপনিসীদিযাতি তত্থ তত্থ কললপিট্ঠে উপনিসীদিত্ৰা কললগহনং পৰিসিত্ৰা নিপন্নে মচ্ছে কাকা ৰা ইতরে ৰা দিৰা চেৰ রত্তিঞ্চ কণযগ্গসদিসেহি তুণ্ডেহি কোট্টেত্ৰা কোট্টেত্ৰা নীহরিত্ৰা ৰিপ্ফন্দমানে ভক্খযন্তি.

৮৫. অথ মহাসত্তো মচ্ছানং তং ব্যসনং দিস্ৰা মহাকরুণায সমুস্সাহিতহদযো ‘‘ঠপেত্ৰা মং ইমে মম ঞাতকে ইমস্মা দুক্খা মোচেতুং সমত্থো নাম অঞ্ঞো নত্থি, কেন নু খো অহং উপাযেন তে ইতো দুক্খতো মোচেয্য’’ন্তি চিন্তেন্তো ‘‘যংনূনাহং পুব্বকেহি মহেসীহি আচিণ্ণসমাচিণ্ণং মযি চ সংৰিজ্জমানং সচ্চধম্মং নিস্সায সচ্চকিরিযং কত্ৰা দেৰং ৰস্সাপেত্ৰা মম ঞাতিসঙ্ঘস্স জীৰিতদানং দদেয্যং, তেন চ সকলস্সাপি আহারূপজীৰিনো সত্তলোকস্স মহাউপকারো সম্পাদিতো মযা’’তি নিচ্ছযং কত্ৰা দেৰং ৰস্সাপেতুং সচ্চকিরিযং অকাসি. তেন ৰুত্তং ‘‘এৰং চিন্তেসহ’’ন্তিআদি.

তত্থ সহ ঞাতীহি পীল়িতোতি ময্হং ঞাতীহি সদ্ধিং তেন উদকপরিক্খযেন পীল়িতো. সহাতি ৰা নিপাতমত্তং. মহাকারুণিকতায তেন ব্যসনেন দুক্খিতেহি ঞাতীহি কারণভূতেহি পীল়িতো, ঞাতিসঙ্ঘদুক্খদুক্খিতোতি অত্থো.

৮৬. ধম্মত্থন্তি ধম্মভূতং অত্থং, ধম্মতো ৰা অনপেতং অত্থং. কিং তং? সচ্চং. অদ্দসপস্সযন্তি ময্হং ঞাতীনঞ্চ অপস্সযং অদ্দসং. অতিক্খযন্তি মহাৰিনাসং.

৮৭. সদ্ধম্মন্তি সতং সাধূনং বুদ্ধাদীনং একস্সাপি পাণিনো অহিংসনসঙ্খাতং ধম্মং. অনুস্সরিত্ৰা. পরমত্থং ৰিচিন্তযন্তি তং খো পন পরমত্থং সচ্চং অৰিপরীতসভাৰং কত্ৰা চিন্তযন্তো. যং লোকে ধুৰসস্সতন্তি যদেতং বুদ্ধপচ্চেকবুদ্ধসাৰকানং একস্সাপি পাণিনো অহিংসনং, তং সব্বকালং তথভাৰেন ধুৰং সস্সতং ৰিচিন্তযং সচ্চকিরিযং অকাসিন্তি সম্বন্ধো.

৮৮. ইদানি তং ধম্মং মহাসত্তো অত্তনি ৰিজ্জমানং গহেত্ৰা সচ্চৰচনং পযোজেতুকামো কালৰণ্ণং কদ্দমং দ্ৰিধা ৰিযূহিত্ৰা অঞ্জনরুক্খসারঘটিকৰণ্ণমহাসরীরো সুধোতলোহিতকমণিসদিসানি অক্খীনি উম্মীলেত্ৰা আকাসং উল্লোকেন্তো ‘‘যতো সরামি অত্তান’’ন্তি গাথমাহ.

তত্থ যতো সরামি অত্তানন্তি যতো পট্ঠায অহং অত্তভাৰসঙ্খাতং অত্তানং সরামি অনুস্সরামি. যতো পত্তোস্মি ৰিঞ্ঞুতন্তি যতো পট্ঠায তাসু তাসু ইতিকত্তব্বতাসু ৰিঞ্ঞুতং ৰিজাননভাৰং পত্তোস্মি, উদ্ধং আরোহনৰসেন ইতো যাৰ ময্হং কাযৰচীকম্মানং অনুস্সরণসমত্থতা ৰিঞ্ঞুতপ্পত্তি এৰ, এত্থন্তরে সমানজাতিকানং খাদনট্ঠানে নিব্বত্তোপি তণ্ডুলকণপ্পমাণম্পি মচ্ছং মযা ন খাদিতপুব্বং, অঞ্ঞম্পি কঞ্চি পাণং সঞ্চিচ্চ হিংসিতং বাধিতং নাভিজানামি, পগেৰ জীৰিতা ৰোরোপিতং.

৮৯. এতেন সচ্চৰজ্জেনাতি ‘‘যদেতং মযা কস্সচি পাণস্স অহিংসনং ৰুত্তং, সচে এতং সচ্চং তথং অৰিপরীতং, এতেন সচ্চৰচনেন পজ্জুন্নো মেঘো অভিৰস্সতু, ঞাতিসঙ্ঘং মে দুক্খা পমোচেতূ’’তি ৰত্ৰা পুন অত্তনো পরিচারিকচেটকং আণাপেন্তো ৰিয পজ্জুন্নং দেৰরাজানং আলপন্তো ‘‘অভিত্থনযা’’তি গাথমাহ.

তত্থ অভিত্থনয পজ্জুন্নাতি পজ্জুন্নো ৰুচ্চতি মেঘো, অযং পন মেঘৰসেন লদ্ধনামং ৰস্সৰলাহকদেৰরাজানং আলপতি. অযং হিস্স অধিপ্পাযো – দেৰো নাম অনভিত্থনযন্তো ৰিজ্জুলতা অনিচ্ছারেন্তো পৰস্সন্তোপি ন সোভতি, তস্মা ত্ৰং অভিত্থনযন্তো ৰিজ্জুলতা নিচ্ছারেন্তো ৰস্সাপেহীতি. নিধিং কাকস্স নাসযাতি কাকা কললং পৰিসিত্ৰা ঠিতে মচ্ছে তুণ্ডেন কোট্টেত্ৰা নীহরিত্ৰা খাদন্তি, তস্মা তেসং অন্তোকললে মচ্ছা ‘‘নিধী’’তি ৰুচ্চন্তি. তং কাকসঙ্ঘস্স নিধিং দেৰং ৰস্সাপেন্তো উদকেন পটিচ্ছাদেত্ৰা নাসেহি. কাকং সোকায রন্ধেহীতি কাকসঙ্ঘো ইমস্মিং মহাসরে উদকেন পুণ্ণে মচ্ছে অলভমানো সোচিস্সতি, তং কাকগণং ত্ৰং ইমং কদ্দমং পূরেন্তো সোকায রন্ধেহি, সোকস্সত্থায পন ৰস্সাপযথ, যথা অন্তোনিজ্ঝানলক্খণং সোকং পাপুণাতি, এৰং করোহীতি অত্থো. মচ্ছে সোকা পমোচযাতি মম ঞাতকে সব্বেৰ মচ্ছে ইমম্হা মরণসোকা পমোচেহি. ‘‘মঞ্চ সোকা পমোচযা’’তি (জা. ১.১.৭৫) জাতকে পঠন্তি. তত্থ চ-কারো সম্পিণ্ডনত্থো, মঞ্চ মম ঞাতকে চাতি সব্বেৰ মরণসোকা পমোচেহি (জা. অট্ঠ. ১.১.৭৫). মচ্ছানঞ্হি অনুদকভাৰেন পচ্চত্থিকানং ঘাসভাৰং গচ্ছামাতি মহামরণসোকো, মহাসত্তস্স পন তেসং অনযব্যসনং পটিচ্চ করুণাযতো করুণাপতিরূপমুখেন সোকসম্ভৰো ৰেদিতব্বো.

এৰং বোধিসত্তো অত্তনো পরিচারিকচেটকং আণাপেন্তো ৰিয পজ্জুন্নং আলপিত্ৰা সকলে কোসলরট্ঠে মহাৰস্সং ৰস্সাপেসি. মহাসত্তস্স হি সীলতেজেন সচ্চকিরিযায সমকালমেৰ সক্কস্স পণ্ডুকম্বলসিলাসনং উণ্হাকারং দস্সেসি. সো ‘‘কিং নু খো’’তি আৰজ্জেন্তো তং কারণং ঞত্ৰা ৰস্সৰলাহকদেৰরাজানং পক্কোসাপেত্ৰা ‘‘তাত, মহাপুরিসো মচ্ছরাজা ঞাতীনং মরণসোকেন ৰস্সাপনং ইচ্ছতি, সকলং কোসলরট্ঠং একমেঘং কত্ৰা ৰস্সাপেহী’’তি আহ.

সো ‘‘সাধূ’’তি সম্পটিচ্ছিত্ৰা একং ৰলাহকং নিৰাসেত্ৰা একং পারুপিত্ৰা মেঘগীতং গাযন্তো পাচীনলোকধাতুঅভিমুখো পক্খন্দি. পাচীনদিসাভাগে খলমণ্ডলমত্তং একং মেঘমণ্ডলং উট্ঠায সতপটলং সহস্সপটলং হুত্ৰা অভিত্থনযন্তং ৰিজ্জুলতা নিচ্ছারেন্তং অধোমুখঠপিতউদককুম্ভাকারেন ৰিস্সন্দমানং সকলং কোসলরট্ঠং মহোঘেন অজ্ঝোত্থরি. দেৰো অচ্ছিন্নধারং ৰস্সন্তো মুহুত্তেনেৰ তং মহাসরং পূরেসি. মচ্ছা মরণভযতো মুচ্চিংসু. কাকাদযো অপতিট্ঠা অহেসুং. ন কেৰলং মচ্ছা এৰ, মনুস্সাপি ৰিৰিধসস্সানি সম্পাদেন্তা চতুপ্পদাদযোপীতি সব্বেপি ৰস্সূপজীৰিনো কাযিকচেতসিকদুক্খতো মুচ্চিংসু. তেন ৰুত্তং –

৯০.

‘‘সহ কতে সচ্চৰরে, পজ্জুন্নো অভিগজ্জিয;

থলং নিন্নঞ্চ পূরেন্তো, খণেন অভিৰস্সথা’’তি.

তত্থ খণেন অভিৰস্সথাতি অদন্ধাযিত্ৰা সচ্চকিরিযখণেনেৰ অভিৰস্সি.

৯১. কত্ৰা ৰীরিযমুত্তমন্তি দেৰে অৰস্সন্তে কিং কাতব্বন্তি কোসজ্জং অনাপজ্জিত্ৰা ঞাতত্থচরিযাসম্পাদনমুখেন মহতো সত্তনিকাযস্স হিতসুখনিপ্ফাদনং উত্তমং ৰীরিযং কত্ৰা. সচ্চতেজবলস্সিতো মম সচ্চানুভাৰবলসন্নিস্সিতো হুত্ৰা তদা মহামেঘং ৰস্সাপেসিং. যস্মা চেতদেৰং, তস্মা ‘‘সচ্চেন মে সমো নত্থি, এসা মে সচ্চপারমী’’তি মহামচ্ছরাজকালে অত্তনো সচ্চপারমিযা অনঞ্ঞসাধারণভাৰং দস্সেসি ধম্মরাজা.

এৰং মহাসত্তো মহাকরুণায সমুস্সাহিতহদযো সকলরট্ঠে মহাৰস্সং ৰস্সাপনৰসেন মহাজনং মরণদুক্খতো মোচেত্ৰা জীৰিতপরিযোসানে যথাকম্মং গতো.

তদা পজ্জুন্নো আনন্দত্থেরো অহোসি, মচ্ছগণা বুদ্ধপরিসা, মচ্ছরাজা লোকনাথো.

তস্স হেট্ঠা ৰুত্তনযেনেৰ সেসপারমিযোপি নিদ্ধারেতব্বা. তথা অত্তনো সমানজাতিকানং খাদনট্ঠানে মচ্ছযোনিযং নিব্বত্তিত্ৰা তণ্ডুলকণমত্তম্পি মচ্ছং আদিং কত্ৰা কস্সচিপি পাণিনো অখাদনং, তিট্ঠতু খাদনং একসত্তস্সপি অৰিহেঠনং, তথা সচ্চকরণেন দেৰস্স ৰস্সাপনং, উদকে পরিক্খীণে কললগহনে নিমুজ্জনৰসেন অত্তনা অনুভৰমানং দুক্খং ৰীরভাৰেন অগণেত্ৰা ঞাতিসঙ্ঘস্সেৰ তং দুক্খং অত্তনো হদযে কত্ৰা অসহন্তস্স সব্বভাৰেন করুণাযনা, তথা চ পটিপত্তীতি এৰমাদযো গুণানুভাৰা ৰিভাৰেতব্বাতি.

মচ্ছরাজচরিযাৰণ্ণনা নিট্ঠিতা.

১১. কণ্হদীপাযনচরিযাৰণ্ণনা

৯২. একাদসমে কণ্হদীপাযনো ইসীতি এৰংনামকো তাপসো. বোধিসত্তো হি তদা দীপাযনো নাম অত্তনো সহাযং মণ্ডব্যতাপসং সূলে উত্তাসিতং উপসঙ্কমিত্ৰা তস্স সীলগুণেন তং অৰিজহন্তো তিযামরত্তিং সূলং নিস্সায ঠিতো তস্স সরীরতো পগ্ঘরিত্ৰা পতিতপতিতেহি লোহিতবিন্দূহি সুক্খেহি কাল়ৰণ্ণসরীরতায ‘‘কণ্হদীপাযনো’’তি পাকটো অহোসি. পরোপঞ্ঞাসৰস্সানীতি সাধিকানি পঞ্ঞাসৰস্সানি, অচ্চন্তসংযোগে উপযোগৰচনং. অনভিরতো চরিং অহন্তি পন্তসেনাসনেসু চেৰ অধিকুসলধম্মেসু চ অনভিরতিৰাসং ৰসন্তো অহং ব্রহ্মচরিযং অচরিং. পব্বজিত্ৰা সত্তাহমেৰ হি তদা মহাসত্তো অভিরতো ব্রহ্মচরিযং চরি. ততো পরং অনভিরতিৰাসং ৰসি.

কস্মা পন মহাপুরিসো অনেকসতসহস্সেসু অত্তভাৰেসু নেক্খম্মজ্ঝাসযো ব্রহ্মচরিযৰাসং অভিরমিত্ৰা ইধ তং নাভিরমি? পুথুজ্জনভাৰস্স চঞ্চলভাৰতো. কস্মা চ পুন ন অগারং অজ্ঝাৰসীতি? পঠমং নেক্খম্মজ্ঝাসযেন কামেসু দোসং দিস্ৰা পব্বজি. অথস্স অযোনিসোমনসিকারেন অনভিরতি উপ্পজ্জি. সো তং ৰিনোদেতুমসক্কোন্তোপি কম্মঞ্চ ফলঞ্চ সদ্দহিত্ৰা তাৰ মহন্তং ৰিভৰং পহায অগারস্মা নিক্খমন্তো যং পজহি, পুন তদত্থমেৰ নিৰত্তো, ‘‘এল়মূগো চপলো ৰতাযং কণ্হদীপাযনো’’তি ইমং অপৰাদং জিগুচ্ছন্তো অত্তনো হিরোত্তপ্পভেদভযেন. অপি চ পব্বজ্জাপুঞ্ঞং নামেতং ৰিঞ্ঞূহি বুদ্ধাদীহি পসত্থং, তেহি চ অনুট্ঠিতং, তস্মাপি সহাপি দুক্খেন সহাপি দোমনস্সেন অস্সুমুখো রোদমানোপি ব্রহ্মচরিযৰাসং ৰসি, ন তং ৰিস্সজ্জেসি. ৰুত্তঞ্চেতং –

‘‘সদ্ধায নিক্খম্ম পুন নিৰত্তো, সো এল়মূগো চপলো ৰতাযং;

এতস্স ৰাদস্স জিগুচ্ছমানো, অকামকো চরামি ব্রহ্মচরিযং;

ৰিঞ্ঞুপ্পসত্থঞ্চ সতঞ্চ ঠানং, এৰম্পহং পুঞ্ঞকরো ভৰামী’’তি. (জা. ১.১০.৬৬);

৯৩. ন কোচি এতং জানাতীতি এতং মম অনভিরতিমনং ব্রহ্মচরিযৰাসে অভিরতিৰিরহিতচিত্তং কোচি মনুস্সভূতো ন জানাতি. কস্মা? অহঞ্হি কস্সচি নাচিক্খিং মম মানসে চিত্তে অরতি চরতি পৰত্ততীতি কস্সচিপি ন কথেসিং, তস্মা ন কোচি মনুস্সভূতো এতং জানাতীতি.

৯৪.

‘‘সব্রহ্মচারী মণ্ডব্যো, সহাযো মে মহাইসি;

পুব্বকম্মসমাযুত্তো, সূলমারোপনং লভি.

.

সব্রহ্মচারীতি তাপসপব্বজ্জায সমানসিক্খতায সব্রহ্মচারী. মণ্ডব্যোতি এৰংনামকো. সহাযোতি গিহিকালে পব্বজিতকালে চ দল়্হমিত্ততায পিযসহাযো. মহাইসীতি মহানুভাৰো ইসি. পুব্বকম্মসমাযুত্তো, সূলমারোপনং লভীতি কতোকাসেন অত্তনো পুব্বকম্মেন যুত্তো সূলারোপনং লভি, সূলং উত্তাসিতোতি.

তত্রাযং অনুপুব্বিকথা – অতীতে ৰংসরট্ঠে কোসম্বিযং কোসম্বিকো নাম রাজা রজ্জং কারেসি. তদা বোধিসত্তো অঞ্ঞতরস্মিং নিগমে অসীতিকোটিৰিভৰস্স ব্রাহ্মণমহাসালস্স পুত্তো হুত্ৰা নিব্বত্তি, নামেন দীপাযনো নাম. তাদিসস্সেৰ ব্রাহ্মণমহাসালস্স পুত্তো ব্রাহ্মণকুমারো তস্স পিযসহাযো অহোসি, নামেন মণ্ডব্যো নাম. তে উভোপি অপরভাগে মাতাপিতূনং অচ্চযেন কামেসু দোসং দিস্ৰা মহাদানং পৰত্তেত্ৰা কামে পহায ঞাতিমিত্তপরিজনস্স রোদন্তস্স পরিদেৰন্তস্স নিক্খমিত্ৰা হিমৰন্তপ্পদেসে অস্সমং কত্ৰা পব্বজিত্ৰা উঞ্ছাচরিযায ৰনমূলফলাহারেন যাপেন্তো পরোপণ্ণাসৰস্সানি ৰসিংসু, কামচ্ছন্দং ৰিক্খম্ভেতুং নাসক্খিংসু, তে ঝানমত্তম্পি ন নিব্বত্তেসুং.

তে লোণম্বিলসেৰনত্থায জনপদচারিকং চরন্তা কাসিরট্ঠং সম্পাপুণিংসু. তত্রেকস্মিং নিগমে দীপাযনস্স গিহিসহাযো মণ্ডব্যো নাম পটিৰসতি. তে উভোপি তস্স সন্তিকং উপসঙ্কমিংসু. সো তে দিস্ৰা অত্তমনো পণ্ণসালং কারেত্ৰা চতূহি পচ্চযেহি উপট্ঠহি. তে তত্থ তীণি চত্তারি ৰস্সানি ৰসিত্ৰা তং আপুচ্ছিত্ৰা চারিকং চরন্তা বারাণসিসমীপে অতিমুত্তকসুসানে ৰসিংসু. তত্থ দীপাযনো যথাভিরন্তং ৰিহরিত্ৰা পুন তস্মিং নিগমে মণ্ডব্যস্স অত্তনো সহাযস্স সন্তিকং গতো. মণ্ডব্যতাপসো তত্থেৰ ৰসি.

অথেকদিৰসং একো চোরো অন্তোনগরে চোরিকং কত্ৰা ধনসারং আদায নিক্খন্তো পটিবুদ্ধেহি গেহসামিকেহি নগরারক্খকমনুস্সেহি চ অনুবদ্ধো নিদ্ধমনেন নিক্খমিত্ৰা ৰেগেন সুসানং পৰিসিত্ৰা তাপসস্স পণ্ণসালদ্ৰারে ভণ্ডিকং ছড্ডেত্ৰা পলাযি. মনুস্সা ভণ্ডিকং দিস্ৰা ‘‘অরে দুট্ঠজটিল, রত্তিং, চোরিকং কত্ৰা দিৰা তাপসৰেসেন চরসী’’তি তজ্জেত্ৰা পোথেত্ৰা তং আদায রঞ্ঞো দস্সযিংসু. রাজা অনুপপরিক্খিত্ৰাৰ ‘‘সূলে উত্তাসেথা’’তি আহ. তং সুসানং নেত্ৰা খদিরসূলে আরোপযিংসু. তাপসস্স সরীরে সূলং ন পৰিসতি. ততো নিম্বসূলং আহরিংসু, তম্পি ন পৰিসতি. ততো অযসূলং আহরিংসু, তম্পি ন পৰিসতি. তাপসো ‘‘কিং নু খো মে পুব্বকম্ম’’ন্তি চিন্তেসি. তস্স জাতিস্সরঞাণং উপ্পজ্জি. তেন পুব্বকম্মং অদ্দস – সো কির পুরিমত্তভাৰে ৰড্ঢকীপুত্তো হুত্ৰা পিতু রুক্খতচ্ছনট্ঠানং গন্ত্ৰা একং মক্খিকং গহেত্ৰা কোৰিল়ারসকলিকায সূলেন ৰিয ৰিজ্ঝি. তস্স তং পাপং ইমস্মিং ঠানে ওকাসং লভি. সো ‘‘ন সক্কা ইতো পাপতো মুচ্চিতু’’ন্তি ঞত্ৰা রাজপুরিসে আহ – ‘‘সচে মং সূলে উত্তাসেতুকামত্থ, কোৰিল়ারসূলং আহরথা’’তি. তে তথা কত্ৰা তং সূলে উত্তাসেত্ৰা আরক্খং দত্ৰা পক্কমিংসু.

তদা কণ্হদীপাযনো ‘‘চিরদিট্ঠো মে সহাযো’’তি মণ্ডব্যস্স সন্তিকং আগচ্ছন্তো তং পৰত্তিং সুত্ৰা তং ঠানং গন্ত্ৰা একমন্তং ঠিতো ‘‘কিং, সম্ম, কারকোসী’’তি পুচ্ছিত্ৰা ‘‘অকারকোম্হী’’তি ৰুত্তে ‘‘অত্তনো মনোপদোসং রক্খিতুং সক্খি ন সক্খী’’তি পুচ্ছি. ‘‘সম্ম, যেহি অহং গহিতো, নেৰ তেসং ন রঞ্ঞো উপরি ময্হং মনোপদোসো অত্থী’’তি. ‘‘এৰং সন্তে তাদিসস্স সীলৰতো ছাযা ময্হং সুখা’’তি ৰত্ৰা কণ্হদীপাযনো সূলং নিস্সায নিসীদি. আরক্খকপুরিসা তং পৰত্তিং রঞ্ঞো আরোচেসুং. রাজা ‘‘অনিসামেত্ৰা মে কত’’ন্তি ৰেগেন তত্থ গন্ত্ৰা ‘‘কস্মা, ভন্তে, ত্ৰং সূলং নিস্সায নিসিন্নোসী’’তি দীপাযনং পুচ্ছি. ‘‘মহারাজ, ইমং তাপসং রক্খন্তো নিসিন্নোস্মী’’তি. ‘‘কিং পন ত্ৰং ইমস্স কারকভাৰং ঞত্ৰা এৰং করোসী’’তি. সো কম্মস্স অৰিসোধিতভাৰং আচিক্খি. অথস্স দীপাযনো ‘‘রঞ্ঞা নাম নিসম্মকারিনা ভৰিতব্বং.

‘‘অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধূ’’তি. (জা. ১.৪.১২৭; ১.৫.৪; ১.১০.১৫৩; ১.১৫.২২৯) –

আদীনি ৰত্ৰা ধম্মং দেসেসি.

রাজা মণ্ডব্যতাপসস্স নিদ্দোসভাৰং ঞত্ৰা ‘‘সূলং হরথা’’তি আণাপেসি. সূলং হরন্তা হরিতুং নাসক্খিংসু. মণ্ডব্যো আহ – ‘‘মহারাজ, অহং পুব্বে কতকম্মদোসেন এৰরূপং অযসং পত্তো, মম সরীরতো সূলং হরিতুং ন সক্কা, সচেপি ময্হং জীৰিতং দাতুকামো, ককচেন ইমং সূলং চম্মসমং কত্ৰা ছিন্দাপেহী’’তি. রাজা তথা কারেসি. সূলং অন্তোযেৰ অহোসি, ন কঞ্চি পীল়ং জনেসি. তদা কির সুখুমং সকলিকহীরং গহেত্ৰা মক্খিকায ৰচ্চমগ্গং পৰেসেসি, তং তস্স অন্তো এৰ অহোসি. সো তেন কারণেন অমরিত্ৰা, অত্তনো আযুক্খযেনেৰ মরি, তস্মা অযম্পি ন মতোতি. রাজা তাপসে ৰন্দিত্ৰা খমাপেত্ৰা উভোপি উয্যানেযেৰ ৰসাপেন্তো পটিজগ্গি. ততো পট্ঠায সো আণিমণ্ডব্যো নাম জাতো. সো রাজানং উপনিস্সায তত্থেৰ ৰসি. দীপাযনো পন তস্স ৰণং ফাসুকং করিত্ৰা অত্তনো গিহিসহাযমণ্ডব্যেন কারিতং পণ্ণসালমেৰ গতো. তেন ৰুত্তং –

৯৫.

‘‘তমহং উপট্ঠহিত্ৰান, আরোগ্যমনুপাপযিং;

আপুচ্ছিত্ৰান আগঞ্ছিং, যং ময্হং সকমস্সম’’ন্তি.

তত্থ আপুচ্ছিত্ৰানাতি ময্হং সহাযং মণ্ডব্যতাপসং আপুচ্ছিত্ৰা. যং ময্হং সকমস্সমন্তি যং তং ময্হং গিহিসহাযেন মণ্ডব্যব্রাহ্মণেন কারিতং সকং মম সন্তকং অস্সমপদং পণ্ণসালা, তং উপাগঞ্ছিং.

৯৬. তং পন পণ্ণসালং পৰিসন্তং দিস্ৰা সহাযস্স আরোচেসুং. সো সুত্ৰাৰ তুট্ঠচিত্তো সপুত্তদারো বহুগন্ধমালফাণিতাদীনি আদায পণ্ণসালং গন্ত্ৰা দীপাযনং ৰন্দিত্ৰা পাদে ধোৰিত্ৰা পানকং পাযেত্ৰা আণিমণ্ডব্যস্স পৰত্তিং সুণন্তো নিসীদি. অথস্স পুত্তো যঞ্ঞদত্তকুমারো নাম চঙ্কমনকোটিযং গেণ্ডুকেন কীল়ি. তত্থ চেকস্মিং ৰম্মিকে আসিৰিসো ৰসতি. কুমারেন ভূমিযং পহতগেণ্ডুকো গন্ত্ৰা ৰম্মিকবিলে আসিৰিসস্স মত্থকে পতি. কুমারো অজানন্তো বিলে হত্থং পৰেসেসি.

অথ নং কুদ্ধো আসিৰিসো হত্থে ডংসি. সো ৰিসৰেগেন মুচ্ছিতো তত্থেৰ পতি. অথস্স মাতাপিতরো সপ্পেন দট্ঠভাৰং ঞত্ৰা কুমারং উক্খিপিত্ৰা তাপসস্স পাদমূলে নিপজ্জাপেত্ৰা ‘‘ভন্তে, ওসধেন ৰা মন্তেন ৰা পুত্তকং নো নীরোগং করোথা’’তি আহংসু. সো ‘‘অহং ওসধং ন জানামি, নাহং ৰেজ্জকম্মং করিস্সামি, পব্বজিতোম্হী’’তি. ‘‘তেন হি, ভন্তে, ইমস্মিং কুমারকে মেত্তং কত্ৰা সচ্চকিরিযং করোথা’’তি. তাপসো ‘‘সাধু সচ্চকিরিযং করিস্সামী’’তি ৰত্ৰা যঞ্ঞদত্তস্স সীসে হত্থং ঠপেত্ৰা সচ্চকিরিযং অকাসি. তেন ৰুত্তং ‘‘সহাযো ব্রাহ্মণো ময্হ’’ন্তিআদি.

তত্থ আগঞ্ছুং পাহুনাগতন্তি অতিথিঅভিগমনং অভিগমিংসু.

৯৭. ৰট্টমনুক্খিপন্তি খিপনৰট্টসণ্ঠানতায ‘‘ৰট্ট’’ন্তি লদ্ধনামং গেণ্ডুকং অনুক্খিপন্তো, গেণ্ডুককীল়ং কীল়ন্তোতি অত্থো. আসিৰিসমকোপযীতি ভূমিযং পটিহতো হুত্ৰা ৰম্মিকবিলগতেন গেণ্ডুকেন তত্থ ঠিতং কণ্হসপ্পং সীসে পহরিত্ৰা রোসেসি.

৯৮. ৰট্টগতং মগ্গং, অন্ৰেসন্তোতি তেন ৰট্টেন গতং মগ্গং গৰেসন্তো. আসিৰিসস্স হত্থেন, উত্তমঙ্গং পরামসীতি ৰম্মিকবিলং পৰেসিতেন অত্তনো হত্থেন আসীৰিসস্স সীসং ফুসি.

৯৯. ৰিসবলস্সিতোতি ৰিসবলনিস্সিতো অত্তনো ৰিসৰেগং নিস্সায উপ্পজ্জনকসপ্পো. অডংসি দারকং খণেতি তস্মিং পরামসিতক্খণে এৰ তং ব্রাহ্মণকুমারং ডংসি.

১০০. সহদট্ঠোতি ডংসেন সহেৰ, দট্ঠসমকালমেৰ. আসিৰিসেনাতি ঘোরৰিসেন. তেনাতি তেন দারকস্স ৰিসৰেগেন মুচ্ছিতস্স ভূমিযং পতনেন অহং দুক্খিতো অহোসিং. মম ৰাহসি তং দুক্খন্তি তং দারকস্স মাতাপিতূনঞ্চ দুক্খং মম ৰাহসি, ময্হং সরীরে ৰিয মম করুণায ৰাহেসি.

১০১. ত্যাহন্তি তে তস্স দারকস্স মাতাপিতরো অহং ‘‘মা সোচথ, মা পরিদেৰথা’’তিআদিনা নযেন সমস্সাসেত্ৰা. সোকসল্লিতেতি সোকসল্লৰন্তে. অগ্গন্তি সেট্ঠং ততো এৰ ৰরং উত্তমং সচ্চকিরিযং অকাসিং.

১০২. ইদানি তং সচ্চকিরিযং সরূপেন দস্সেতুং ‘‘সত্তাহমেৰা’’তি গাথমাহ.

তত্থ সত্তাহমেৰাতি পব্বজিতদিৰসতো পট্ঠায সত্ত অহানি এৰ. পসন্নচিত্তোতি কম্মফলসদ্ধায পসন্নমানসো. পুঞ্ঞত্থিকোতি পুঞ্ঞেন অত্থিকো, ধম্মচ্ছন্দযুত্তো. অথাপরং যং চরিতন্তি অথ তস্মা সত্তাহা উত্তরি যং মম ব্রহ্মচরিযচরণং.

১০৩. অকামকোৰাহীতি পব্বজ্জং অনিচ্ছন্তো এৰ. এতেন সচ্চেন সুৰত্থি হোতূতি সচে অতিরেকপঞ্ঞাসৰস্সানি অনভিরতিৰাসং ৰসন্তেন মযা কস্সচি অজানাপিতভাৰো সচ্চো, এতেন সচ্চেন যঞ্ঞদত্তকুমারস্স সোত্থি হোতু, জীৰিতং পটিলভতূতি.

এৰং পন মহাসত্তেন সচ্চকিরিযায কতায যঞ্ঞদত্তস্স সরীরতো ৰিসং ভস্সিত্ৰা পথৰিং পাৰিসি. কুমারো অক্খীনি উম্মীলেত্ৰা মাতাপিতরো ওলোকেত্ৰা ‘‘অম্ম, তাতা’’তি ৰত্ৰা ৰুট্ঠাসি. তেন ৰুত্তং –

১০৪.

‘‘সহ সচ্চে কতে ময্হং, ৰিসৰেগেন ৰেধিতো;

অবুজ্ঝিত্ৰান ৰুট্ঠাসি, অরোগো চাসি মাণৰো’’তি.

তস্সত্থো – মম সচ্চকরণেন সহ সমানকালমেৰ ততো পুব্বে ৰিসৰেগেন ৰেধিতো কম্পিতো ৰিসঞ্ঞিভাৰেন অবুজ্ঝিত্ৰা ঠিতো ৰিগতৰিসত্তা পটিলদ্ধসঞ্ঞো সহসা ৰুট্ঠাসি. সো মাণৰো কুমারো ৰিসৰেগাভাৰেন অরোগো চ অহোসীতি.

ইদানি সত্থা তস্সা অত্তনো সচ্চকিরিযায পরমত্থপারমিভাৰং দস্সেন্তো ‘‘সচ্চেন মে সমো নত্থি, এসা মে সচ্চপারমী’’তি আহ. তং উত্তানত্থমেৰ. জাতকট্ঠকথাযং (জা. অট্ঠ. ৪.১০.৬২) পন ‘‘মহাসত্তস্স সচ্চকিরিযায কুমারস্স থনপ্পদেসতো উদ্ধং ৰিসং ভস্সিত্ৰা ৰিগতং. দারকস্স পিতু সচ্চকিরিযায কটিতো উদ্ধং, মাতু সচ্চকিরিযায অৰসিট্ঠসরীরতো ৰিসং ভস্সিত্ৰা ৰিগত’’ন্তি আগতং. তথা হি ৰুত্তং –

‘‘যস্মা দানং নাভিনন্দিং কদাচি, দিস্ৰানহং অতিথিং ৰাসকালে;

ন চাপি মে অপ্পিযতং অৰেদুং, বহুস্সুতা সমণব্রাহ্মণা চ;

অকামকো ৰাপি অহং দদামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো.

‘‘আসীৰিসো তাত পহূততেজো, যো তং অদংসী পতরা উদিচ্চ;

তস্মিঞ্চ মে অপ্পিযতায অজ্জ, পিতরি চ তে নত্থি কোচি ৰিসেসো;

এতেন সচ্চেন সুৰত্থি হোতু, হতং ৰিসং জীৰতু যঞ্ঞদত্তো’’তি.

তত্থ ৰাসকালেতি ৰসনত্থায গেহং আগতকালে. ন চাপি মে অপ্পিযতং অৰেদুন্তি বহুস্সুতাপি সমণব্রাহ্মণা অযং নেৰ দানং অভিনন্দতি, ন অম্হেতি ইমং মম অপ্পিযভাৰং নেৰ জানিংসু. অহঞ্হি তে পিযচক্খূহিযেৰ ওলোকেমীতি দীপেতি. এতেন সচ্চেনাতি সচে অহং দদমানোপি ৰিপাকং অসদ্দহিত্ৰা অত্তনো অনিচ্ছায দেমি, অনিচ্ছভাৰঞ্চ মে পরে ন জানন্তি, এতেন সচ্চেন সুৰত্থি হোতূতি অত্থো. ইতরগাথায, তাতাতি পুত্তং আলপতি. পহূততেজোতি বলৰৰিসো. পতরাতি পদরা, অযমেৰ ৰা পাঠো. উদিচ্চাতি উদ্ধং গন্ত্ৰা, ৰম্মিকবিলতো উট্ঠহিত্ৰাতি অত্থো. ইদং ৰুত্তং হোতি – তাত যঞ্ঞদত্ত, তস্মিঞ্চ আসিৰিসে তৰ চ পিতরি অপ্পিযভাৰেন ময্হং কোচি ৰিসেসো নত্থি, তঞ্চ পন অপ্পিযভাৰং ঠপেত্ৰা অজ্জ মযা ন কোচি জানাপিতপুব্বো, সচে এতং সচ্চং, এতেন সচ্চেন সুৰত্থি হোতূতি.

এৰং বোধিসত্তো কুমারে অরোগে জাতে তস্স পিতরং ‘‘দানং দদন্তেন নাম কম্মঞ্চ ফলঞ্চ সদ্দহিত্ৰা দাতব্ব’’ন্তি কম্মফলসদ্ধায নিৰেসেত্ৰা সযং অনভিরতিং ৰিনোদেত্ৰা ঝানাভিঞ্ঞাযো উপ্পাদেত্ৰা আযুপরিযোসানে ব্রহ্মলোকপরাযনো অহোসি.

তদা মণ্ডব্যো আনন্দত্থেরো অহোসি, তস্স ভরিযা ৰিসাখা, পুত্তো রাহুলত্থেরো, আণিমণ্ডব্যো সারিপুত্তত্থেরো, কণ্হদীপাযনো লোকনাথো.

তস্স ইধ পাল়িযা আরুল়্হা সচ্চপারমী, সেসা চ পারমিযো হেট্ঠা ৰুত্তনযেনেৰ নিদ্ধারেতব্বা. তথা অনৰসেসমহাভোগপরিচ্চাগাদযো গুণানুভাৰা ৰিভাৰেতব্বাতি.

কণ্হদীপাযনচরিযাৰণ্ণনা নিট্ঠিতা.

১২. মহাসুতসোমচরিযাৰণ্ণনা

১০৫. দ্ৰাদসমে সুতসোমো মহীপতীতি এৰংনামো খত্তিযো. মহাসত্তো হি তদা কুরুরট্ঠে ইন্দপত্থনগরে কোরব্যস্স রঞ্ঞো অগ্গমহেসিযা কুচ্ছিম্হি নিব্বত্তি. তং সুতৰিত্ততায চন্দসমানসোম্মৰরৰণ্ণতায চ ‘‘সুতসোমো’’তি সঞ্জানিংসু. তং ৰযপ্পত্তং সব্বসিপ্পনিপ্ফত্তিপ্পত্তং মাতাপিতরো রজ্জে অভিসিঞ্চিংসু. গহিতো পোরিসাদেনাতি পুরিসানং মনুস্সানং অদনতো খাদনতো ‘‘পোরিসাদো’’তি লদ্ধনামেন বারাণসিরঞ্ঞা দেৰতাবলিকম্মত্থং গহিতো.

বারাণসিরাজা হি তদা মংসং ৰিনা অভুঞ্জন্তো অঞ্ঞং মংসং অলভন্তেন ভত্তকারকেন মনুস্সমংসং খাদাপিতো রসতণ্হায বদ্ধো হুত্ৰা মনুস্সে ঘাতেত্ৰা মনুস্সমংসং খাদন্তো ‘‘পোরিসাদো’’তি লদ্ধনামো অমচ্চপারিসজ্জপ্পমুখেহি নাগরেহি নেগমজানপদেহি চ উস্সাহিতেন কাল়হত্থিনা নাম অত্তনো সেনাপতিনা ‘‘দেৰ, যদি রজ্জেন অত্থিকো মনুস্সমংসখাদনতো ৰিরমাহী’’তি ৰুত্তো ‘‘রজ্জং পজহন্তোপি মনুস্সমংসখাদনতো ন ওরমিস্সামী’’তি ৰত্ৰা তেহি রট্ঠা পব্বাজিতো অরঞ্ঞং পৰিসিত্ৰা একস্মিং নিগ্রোধরুক্খমূলে ৰসন্তো খাণুপ্পহারেন পাদে জাতস্স ৰণস্স ফাসুভাৰায ‘‘সকলজম্বুদীপে একসতখত্তিযানং গললোহিতেন বলিকম্মং করিস্সামী’’তি দেৰতায আযাচনং কত্ৰা সত্তাহং অনাহারতায ৰণে ফাসুকে জাতে ‘‘দেৰতানুভাৰেন মে সোত্থি অহোসী’’তি সঞ্ঞায ‘‘দেৰতায বলিকম্মত্থং রাজানো আনেস্সামী’’তি গচ্ছন্তো অতীতভৰে সহাযভূতেন যক্খেন সমাগন্ত্ৰা তেন দিন্নমন্তবলেন অধিকতরথামজৰপরক্কমসসম্পন্নো হুত্ৰা সত্তাহব্ভন্তরেযেৰ সতরাজানো আনেত্ৰা অত্তনো ৰসননিগ্রোধরুক্খে ওলম্বেত্ৰা বলিকম্মকরণসজ্জো অহোসি.

অথ তস্মিং রুক্খে অধিৰত্থা দেৰতা তং বলিকম্মং অনিচ্ছন্তী ‘‘উপাযেন নং নিসেধেস্সামী’’তি পব্বজিতরূপেন তস্স অত্তানং দস্সেত্ৰা তেন অনুবদ্ধো তিযোজনং গন্ত্ৰা পুন অত্তনো দিব্বরূপমেৰ দস্সেত্ৰা ‘‘ত্ৰং মুসাৰাদী তযা ‘সকলজম্বুদীপে রাজানো আনেত্ৰা বলিকম্মং করিস্সামী’তি পটিস্সুতং. ইদানি যে ৰা তে ৰা দুব্বলরাজানো আনেসি. জম্বুদীপে জেট্ঠকং সুতসোমরাজানং সচে নানেস্সসি, ন মে তে বলিকম্মেন অত্থো’’তি আহ.

সো ‘‘দিট্ঠা মে অত্তনো দেৰতা’’তি তুসিত্ৰা ‘‘সামি, মা চিন্তযি, অহং অজ্জেৰ সুতসোমং আনেস্সামী’’তি ৰত্ৰা ৰেগেন মিগাজিনউয্যানং গন্ত্ৰা অসংৰিহিতায আরক্খায পোক্খরণিং ওতরিত্ৰা পদুমিনিপত্তেন সীসং পটিচ্ছাদেত্ৰা অট্ঠাসি. তস্মিং অন্তোউয্যানগতেযেৰ বলৰপচ্চূসে সমন্তা তিযোজনং আরক্খং গণ্হিংসু. মহাসত্তো পাতোৰ অলঙ্কতহত্থিক্খন্ধৰরগতো চতুরঙ্গিনিযা সেনায নগরতো নিক্খমি. তদা তক্কসিলতো নন্দো নাম ব্রাহ্মণো চতস্সো সতারহগাথাযো গহেত্ৰা ৰীসযোজনসতং মগ্গং অতিক্কম্ম তং নগরং পত্তো রাজানং পাচীনদ্ৰারেন নিক্খমন্তং দিস্ৰা হত্থং উক্খিপিত্ৰা ‘‘জযতু ভৰং, মহারাজা’’তি ৰত্ৰা জযাপেসি.

রাজা হত্থিনা তং উপসঙ্কমিত্ৰা ‘‘কুতো নু, ত্ৰং ব্রাহ্মণ, আগচ্ছসি, কিমিচ্ছসি, কিং তে দজ্জ’’ন্তি আহ. ব্রাহ্মণো ‘‘তুম্হে ‘সুতৰিত্তকা’তি সুত্ৰা চতস্সো সতারহগাথাযো আদায তুম্হাকং দেসেতুং আগতোম্হী’’তি আহ. মহাসত্তো তুট্ঠমানসো হুত্ৰা ‘‘অহং উয্যানং গন্ত্ৰা ন্হাযিত্ৰা আগন্ত্ৰা সোস্সামি, ত্ৰং মা উক্কণ্ঠী’’তি ৰত্ৰা ‘‘গচ্ছথ ব্রাহ্মণস্স অসুকগেহে নিৰাসং ঘাসচ্ছাদনঞ্চ সংৰিদহথা’’তি আণাপেত্ৰা উয্যানং পৰিসিত্ৰা মহন্তং আরক্খং সংৰিধায ওল়ারিকানি আভরণানি ওমুঞ্চিত্ৰা মস্সুকম্মং কারেত্ৰা উব্বট্টিতসরীরো পোক্খরণিযা রাজৰিভৰেন ন্হাযিত্ৰা পচ্চুত্তরিত্ৰা উদকগ্গহণসাটকে নিৰাসেত্ৰা অট্ঠাসি.

অথস্স গন্ধমালালঙ্কারে উপহরিংসু. পোরিসাদো ‘‘অলঙ্কতকালে রাজা ভারিকো ভৰিস্সতি, সল্লহুককালেযেৰ নং গণ্হিস্সামী’’তি নদন্তো খগ্গং পরিৰত্তেন্তো ‘‘অহমস্মি পোরিসাদো’’তি নামং সাৰেত্ৰা উদকা নিক্খমি. তস্স সদ্দং সুত্ৰা হত্থারোহাদযো হত্থিআদিতো ভস্সিংসু. বলকাযো দূরে ঠিতো ততোৰ পলাযি. ইতরো অত্তনো আৰুধানি ছড্ডেত্ৰা উরেন নিপজ্জি. পোরিসাদো রাজানং উক্খিপিত্ৰা খন্ধে নিসীদাপেত্ৰা সম্মুখট্ঠানেযেৰ অট্ঠারসহত্থং পাকারং লঙ্ঘিত্ৰা পুরতো পগলিতমদমত্তৰরৰারণে কুম্ভে অক্কমিত্ৰা পব্বতকূটানি ৰিয পাতেন্তো ৰাতজৰানিপি অস্সরতনানি পিট্ঠিযং অক্কমিত্ৰা পাতেন্তো রথসীসে অক্কমিত্ৰা পাতেন্তো ভমরিকং ভমন্তো ৰিয নীলকানি নিগ্রোধপত্তানি মদ্দন্তো ৰিয একৰেগেনেৰ তিযোজনমগ্গং গন্ত্ৰা কঞ্চি অনুবন্ধন্তং অদিস্ৰা সণিকং গচ্ছন্তো সুতসোমস্স কেসেহি উদকবিন্দূনি অত্তনো উপরি পতন্তানি ‘‘অস্সুবিন্দূনী’’তি সঞ্ঞায ‘‘কিমিদং সুতসোমোপি মরণং অনুসোচন্তো রোদতী’’তি আহ.

মহাসত্তো ‘‘নাহং মরণতো অনুসোচামি, কুতো রোদনা, অপি চ খো সঙ্গরং কত্ৰা সচ্চাপনং নাম পণ্ডিতানং আচিণ্ণং, তং ন নিপ্ফজ্জতী’’তি অনুসোচামি. কস্সপদসবলেন দেসিতা চতস্সো সতারহগাথাযো আদায তক্কসিলতো আগতস্স ব্রাহ্মণস্স আগন্তুকৰত্তং কারেত্ৰা ‘‘ন্হাযিত্ৰা আগন্ত্ৰা সুণিস্সামি, যাৰ মমাগমনা আগমেহী’’তি সঙ্গরং কত্ৰা উয্যানং গতো, ত্ৰঞ্চ তা গাথাযো সোতুং অদত্ৰা মং গণ্হীতি. তেন ৰুত্তং –

‘‘গহিতো পোরিসাদেন, ব্রাহ্মণে সঙ্গরং সরি’’ন্তি.

তত্থ ব্রাহ্মণে সঙ্গরং সরিন্তি নন্দব্রাহ্মণে অত্তনা কতং পটিঞ্ঞং অনুস্সরিং.

১০৬. আৰুণিত্ৰা করত্তলেতি তত্থ তত্থ উয্যানাদীসু গন্ত্ৰা অত্তনো বলেন আনীতানং একসতখত্তিযানং হত্থতলে ছিদ্দং কত্ৰা রুক্খে লম্বনত্থং রজ্জুং পটিমুঞ্চিত্ৰা. এতেসং পমিলাপেত্ৰাতি এতে একসতখত্তিযে জীৰগ্গাহং গহেত্ৰা উদ্ধংপাদে অধোসিরে কত্ৰা পণ্হিযা সীসং পহরন্তো ভমণৰসেন হত্থতলে আৰুণিত্ৰা রুক্খে আলম্বনৰসেন সব্বসো আহারূপচ্ছেদেন চ সব্বথা পমিলাপেত্ৰা ৰিসোসেত্ৰা খেদাপেত্ৰাতি অত্থো. যঞ্ঞত্থেতি বলিকম্মত্থে সাধেতব্বে. উপনযী মমন্তি মং উপনেসি.

১০৭. তথা উপনীযমানো পন মহাসত্তো পোরিসাদেন ‘‘কিং ত্ৰং মরণতো ভাযসী’’তি ৰুত্তে ‘‘নাহং মরণতো ভাযামি, তস্স পন ব্রাহ্মণস্স মযা কতো সঙ্গরো ন পরিমোচিতো’’তি অনুসোচামি. ‘‘সচে মং ৰিস্সজ্জেস্সসি, তং ধম্মং সুত্ৰা তস্স চ সক্কারসম্মানং কত্ৰা পুন আগমিস্সামী’’তি. ‘‘নাহমিদং সদ্দহামি, যং ত্ৰং মযা ৰিস্সজ্জিতো গন্ত্ৰা পুন মম হত্থং আগমিস্সাসী’’তি. ‘‘সম্ম পোরিসাদ, মযা সদ্ধিং একাচরিযকুলে সিক্খিতো সহাযো হুত্ৰা ‘অহং জীৰিতহেতুপি ন মুসা কথেমী’তি কিং ন সদ্দহসী’’তি? কিঞ্চাপি মে এতেন ৰাচামত্তকেন –

‘‘অসিঞ্চ সত্তিঞ্চ পরামসামি, সপথম্পি তে সম্ম অহং করোমি;

তযা পমুত্তো অনণো ভৰিত্ৰা, সচ্চানুরক্খী পুনরাৰজিস্স’’ন্তি. (জা. ২.২১.৪০৭) –

মহাসত্তেন ইমায গাথায ৰুত্তায পোরিসাদো ‘‘অযং সুতসোমো ‘খত্তিযেহি অকত্তব্বং সপথং করোমী’তি ৰদতি, গন্ত্ৰা অনাগচ্ছন্তোপি মম হত্থতো ন মুচ্চিস্সতী’’তি চিন্তেত্ৰা –

‘‘যো তে কতো সঙ্গরো ব্রাহ্মণেন, রট্ঠে সকে ইস্সরিযে ঠিতেন;

তং সঙ্গরং ব্রাহ্মণ সপ্পদায, সচ্চানুরক্খী পুনরাৰজস্সূ’’তি. (জা. ২.২১.৪০৮) –

ৰিস্সজ্জেসি.

মহাসত্তো রাহুমুখা মুত্তো চন্দো ৰিয নাগবলো থামসম্পন্নো খিপ্পমেৰ তং নগরং সম্পাপুণি. সেনাপিস্স ‘‘সুতসোমরাজা পণ্ডিতো, পোরিসাদং দমেত্ৰা সীহমুখা পমুত্তমত্তৰরৰারণো ৰিয আগমিস্সতী’’তি চ ‘‘রাজানং পোরিসাদস্স দত্ৰা আগতা’’তি গরহভযেন চ বহিনগরেযেৰ নিৰিট্ঠা তং দূরতোৰ আগচ্ছন্তং দিস্ৰা পচ্চুগ্গন্ত্ৰা ৰন্দিত্ৰা ‘‘কচ্চিত্থ, মহারাজ, পোরিসাদেন ন কিলমিতো’’তি পটিসন্থারং কত্ৰা ‘‘পোরিসাদেন ময্হং মাতাপিতূহিপি দুক্করং কতং, তথারূপো নাম চণ্ডো সাহসিকো মমং সদ্দহিত্ৰা মং ৰিস্সজ্জেসী’’তি ৰুত্তে রাজানং অলঙ্করিত্ৰা হত্থিক্খন্ধং আরোপেত্ৰা পরিৰারেত্ৰা নগরং পাৰিসি. তং দিস্ৰা সব্বে নাগরা তুসিংসু.

সোপি ধম্মসোণ্ডতায মাতাপিতরোপি অনুপসঙ্কমিত্ৰা নিৰেসনং গন্ত্ৰা ব্রাহ্মণং পক্কোসাপেত্ৰা তস্স মহন্তং সক্কারসম্মানং কত্ৰা ধম্মগরুতায সযং নীচাসনে নিসীদিত্ৰা ‘‘তুম্হেহি ময্হং আভতা সতারহগাথা সুণোমি আচরিযা’’তি আহ. ব্রাহ্মণো মহাসত্তেন যাচিতকালে গন্ধেহি হত্থে উব্বট্টেত্ৰা পসিব্বকতো মনোরমং পোত্থকং নীহরিত্ৰা উভোহি হত্থেহি গহেত্ৰা ‘‘তেন হি, মহারাজ, সুণোহী’’তি পোত্থকং ৰাচেন্তো গাথা অভাসি –

‘‘সকিদেৰ সুতসোম, সব্ভি হোতি সমাগমো;

সা নং সঙ্গতি পালেতি, নাসব্ভি বহুসঙ্গমো.

‘‘সব্ভিরেৰ সমাসেথ, সব্ভি কুব্বেথ সন্থৰং;

সতং সদ্ধম্মমঞ্ঞায, সেয্যো হোতি ন পাপিযো.

‘‘জীরন্তি ৰে রাজরথা সুচিত্তা, অথো সরীরম্পি জরং উপেতি;

সতঞ্চ ধম্মো ন জরং উপেতি, সন্তো হৰে সব্ভি পৰেদযন্তি.

‘‘নভঞ্চ দূরে পথৰী চ দূরে, পারং সমুদ্দস্স তদাহু দূরে;

ততো হৰে দূরতরং ৰদন্তি, সতঞ্চ ধম্মো অসতঞ্চ রাজা’’তি. (জা. ২.২১.৪১১-৪১৪, ৪৪৫-৪৪৮);

তা সুত্ৰা মহাসত্তো ‘‘সফলং মে আগমন’’ন্তি তুট্ঠচিত্তো ‘‘ইমা গাথা নেৰ সাৰকভাসিতা, ন ইসিভাসিতা, ন কৰিভাসিতা, ন দেৰভাসিতা, সব্বঞ্ঞুনাৰ ভাসিতা. কিং নু খো অগ্ঘ’’ন্তি চিন্তেন্তো ‘‘ইমং সকলম্পি চক্কৰাল়ং যাৰ ব্রহ্মলোকা সত্তরতনপুণ্ণং কত্ৰা দিন্নেপি নেৰ অনুচ্ছৰিকং কতং নাম হোতি, অহং খো পনস্স তিযোজনসতিকে কুরুরট্ঠে সত্তযোজনিকে ইন্দপত্থনগরে রজ্জং দাতুং পহোমি. রজ্জং কাতুং পনস্স ভাগ্যং নত্থি, তথা হিস্স অঙ্গলক্খণানুসারেন অপ্পানুভাৰতা দিস্সতি, তস্মা দিন্নম্পি রজ্জং ন ইমস্মিং তিট্ঠতী’’তি চিন্তেত্ৰা ‘‘আচরিয, তুম্হে অঞ্ঞেসং খত্তিযানং ইমা গাথাযো দেসেত্ৰা কিং লভথা’’তি পুচ্ছি. ‘‘একেকায সতং সতং, মহারাজ, তেনেৰ সতারহগাথা নাম জাতা’’তি. অথস্স মহাসত্তো ‘‘ত্ৰং আচরিয, অত্তনা গহেত্ৰা ৰিচরণভণ্ডস্স অগ্ঘং ন জানাসী’’তি.

‘‘সহস্সিযা ইমা গাথা, নযিমা গাথা সতারহা;

চত্তারি ত্ৰং সহস্সানি, খিপ্পং গণ্হাহি ব্রাহ্মণা’’তি. (জা. ২.২১.৪১৫);

চত্তারি সহস্সানি দাপেত্ৰা একঞ্চ সুখযানকং দত্ৰা মহতা সক্কারসম্মানেনেৰ তং উয্যোজেত্ৰা মাতাপিতরো ৰন্দিত্ৰা ‘‘অহং ব্রাহ্মণেন আভতং সদ্ধম্মরতনং পূজেত্ৰা তস্স চ সক্কারসম্মানং কত্ৰা আগমিস্সামীতি পোরিসাদস্স পটিঞ্ঞং দত্ৰা আগতো. তত্থ যং ব্রাহ্মণস্স কত্তব্বং পটিপজ্জিতব্বং তং কতং, ইদানি পোরিসাদস্স সন্তিকং গমিস্সামী’’তি ৰুত্ৰা ‘‘তেন হি, তাত সুতসোম, কিং নামেতং কথেসি, চতুরঙ্গিনিযা সেনায চোরং গণ্হিস্সাম, মা গচ্ছ চোরস্স সন্তিক’’ন্তি যাচিংসু. সোল়সসহস্সা নাটকিত্থিযো সেসপরিজনাপি ‘‘অম্হে অনাথে কত্ৰা কুহিং গচ্ছসি দেৰা’’তি পরিদেৰিংসু. ‘‘পুনপি কির রাজা চোরস্স সন্তিকং গমিস্সতী’’তি এককোলাহলং অহোসি.

মহাসত্তো ‘‘পটিঞ্ঞায সচ্চাপনং নাম সাধূনং সপ্পুরিসানং আচিণ্ণং, সোপি মমং সদ্দহিত্ৰা ৰিস্সজ্জেসি, তস্মা গমিস্সামিযেৰা’’তি মাতাপিতরো ৰন্দিত্ৰা সেসজনং অনুসাসেত্ৰা অস্সুমুখেন নানপ্পকারং পরিদেৰন্তেন ইত্থাগারাদিনা জনেন অনুগতো নগরা নিক্খম্ম তং জনং নিৰত্তেতুং মগ্গে দণ্ডকেন তিরিযং লেখং কত্ৰা ‘‘ইমং মম লেখং মা অতিক্কমিংসূ’’তি ৰত্ৰা অগমাসি. মহাজনো তেজৰতো মহাসত্তস্স আণং অতিক্কমিতুং অসক্কোন্তো মহাসদ্দেন কন্দিত্ৰা রোদিত্ৰা নিৰত্তি. বোধিসত্তো আগতমগ্গেনেৰ তস্স সন্তিকং অগমাসি. তেন ৰুত্তং ‘‘অপুচ্ছি মং পোরিসাদো’’তিআদি.

তত্থ কিং ত্ৰং ইচ্ছসি নিসজ্জন্তি ত্ৰং অত্তনো নগরং গন্তুং মম হত্থতো নিস্সজ্জনং কিং ইচ্ছসি, ত্ৰং ‘‘মযা তক্কসিলাদীসু চিরপরিচিতো সচ্চৰাদী চা’’তি ৰদসি, তস্মা যথা মতি তে কাহামি, যথারুচি তে করিস্সামি. যদি মে ত্ৰং পুনেহিসীতি সচে পুন ত্ৰং একংসেনেৰ মম সন্তিকং আগমিস্সসি.

১০৮. পণ্হে আগমনং মমাতি পগেৰ মম আগমনং তস্স পোরিসাদস্স পটিস্সুণিত্ৰা পাতোৰ আগমিস্সামীতি পটিস্সৰং কত্ৰা. রজ্জং নিয্যাতযিং তদাতি তদা পোরিসাদস্স সন্তিকং গন্তুকামো ‘‘ইদং ৰো রজ্জং পটিপজ্জথা’’তি মাতাপিতূনং তিযোজনসতিকং রজ্জং নিয্যাতেসিং.

১০৯. কস্মা পন রজ্জং নিয্যাতযিন্তি? অনুস্সরিত্ৰা সতং ধম্মন্তি যস্মা পন পটিঞ্ঞায সচ্চাপনং নাম সতং সাধূনং মহাবোধিসত্তানং পৰেণী কুলৰংসো, তস্মা তং সচ্চপারমিতাধম্মং পুব্বকং পোরাণং জিনেহি বুদ্ধাদীহি সেৰিতং অনুস্সরিত্ৰা সচ্চং অনুরক্খন্তো তস্স ব্রাহ্মণস্স ধনং দত্ৰা অত্তনো জীৰিতং পরিচ্চজিত্ৰা পোরিসাদং উপাগমিং.

১১০. নত্থি মে সংসযো তত্থাতি তস্মিং পোরিসাদস্স সন্তিকং গমনে ‘‘অযং মং কিং নু খো ঘাতেস্সতি, উদাহু নো’’তি ময্হং সংসযো নত্থি. ‘‘চণ্ডো সাহসিকো মযা সদ্ধিং একসতখত্তিযে দেৰতায বলিকম্মকরণসজ্জো একন্তেনেৰ ঘাতেস্সতী’’তি জানন্তো এৰ কেৰলং সচ্চৰাচং অনুরক্খন্তো অত্তনো জীৰিতং পরিচ্চজিত্ৰা তং উপাগমিং. যস্মা চেতদেৰং, তস্মা সচ্চেন মে সমো নত্থি, এসা মে পরমত্থভাৰপ্পত্তা সচ্চপারমীতি.

উপাগতে পন মহাসত্তে ৰিকসিতপুণ্ডরীকপদুমসস্সিরিকমস্স মুখং দিস্ৰা ‘‘অযং ৰিগতমরণভযো হুত্ৰা আগতো, কিস্স নু খো এস আনুভাৰো’’তি চিন্তেন্তো ‘‘তস্স মঞ্ঞে ধম্মস্স সুতত্তা অযং এৰং তেজৰা নিব্ভযো চ জাতো, অহম্পি তং সুত্ৰা তেজৰা নিব্ভযো চ ভৰিস্সামী’’তি সন্নিট্ঠানং কত্ৰা পোরিসাদো মহাসত্তং আহ – ‘‘সুণোম সতারহগাথাযো যাসং সৰনত্থং ত্ৰং অত্তনো নগরং গতো’’তি.

তং সুত্ৰা বোধিসত্তো ‘‘অযং পোরিসাদো পাপধম্মো, ইমং থোকং নিগ্গহেত্ৰা লজ্জাপেত্ৰা কথেস্সামী’’তি –

‘‘অধম্মিকস্স লুদ্দস্স, নিচ্চং লোহিতপাণিনো;

নত্থি সচ্চং কুতো ধম্মো, কিং সুতেন করিস্সসী’’তি. (জা. ২.২১.৪২৭) –

ৰত্ৰা পুন তেন সুট্ঠুতরং সঞ্জাতসৰনাদরেন –

‘‘সুত্ৰা ধম্মং ৰিজানন্তি, নরা কল্যাণপাপকং;

অপি গাথা সুণিত্ৰান, ধম্মে মে রমতে মনো’’তি. (জা. ২.২১.৪৪৪) –

ৰুত্তে ‘‘অযং অতিৰিয সঞ্জাতাদরো সোতুকামো, হন্দস্স কথেস্সামী’’তি চিন্তেত্ৰা ‘‘তেন হি সম্ম, সাধুকং সুণোহি মনসিকরোহী’’তি ৰত্ৰা নন্দব্রাহ্মণেন কথিতনিযামেনেৰ গাথানং সক্কচ্চং থুতিং কত্ৰা ছকামাৰচরদেৰলোকে এককোলাহলং কত্ৰা দেৰতাসু সাধুকারং দদমানাসু মহাসত্তো পোরিসাদস্স –

‘‘সকিদেৰ মহারাজ, সব্ভি হোতি সমাগমো;

সা নং সঙ্গতি পালেতি, নাসব্ভি বহুসঙ্গমো.

‘‘সব্ভিরেৰ সমাসেথ, সব্ভি কুব্বেথ সন্থৰং;

সতং সদ্ধম্মমঞ্ঞায, সেয্যো হোতি ন পাপিযো.

‘‘জীরন্তি ৰে রাজরথা সুচিত্তা, অত্থো সরীরম্পি জরং উপেতি;

সতঞ্চ ধম্মো ন জরং উপেতি, সন্তো হৰে সব্ভি পৰেদযন্তি.

‘‘নভঞ্চ দূরে পথৰী চ দূরে, পারং সমুদ্দস্স তদাহু দূরে;

ততো হৰে দূরতরং ৰদন্তি, সতঞ্চ ধম্মো অসতঞ্চ রাজা’’তি. (জা. ২.২১.৪১১-৪১৪) –

ধম্মং কথেসি. তস্স তেন সুকথিতত্তা চেৰ অত্তনো চ পুঞ্ঞানুভাৰেন গাথা সুণন্তস্সেৰ সকলসরীরং পঞ্চৰণ্ণায পীতিযা পরিপূরি. সো বোধিসত্তে মুদুচিত্তো হুত্ৰা ‘‘সম্ম সুতসোম, দাতব্বযুত্তকং হিরঞ্ঞাদিং ন পস্সামি, একেকায গাথায একেকং ৰরং দস্সামী’’তি আহ. অথ নং মহাসত্তো ‘‘ত্ৰং অত্তনোপি হিতানি অজানন্তো পরস্স কিং নাম ৰরং দস্সসী’’তি অপসাদেত্ৰা পুন তেন ‘‘ৰরং গণ্হথা’’তি যাচিতো সব্বপঠমং ‘‘অহং চিরকালং তং অরোগং পস্সেয্য’’ন্তি ৰরং যাচি. সো ‘‘অযং ইদানি মে ৰধিত্ৰা মংসং খাদিতুকামস্স মহানত্থকরস্স ময্হমেৰ জীৰিতমিচ্ছতী’’তি তুট্ঠমানসো ৰঞ্চেত্ৰা ৰরস্স গহিতভাৰং অজানন্তো অদাসি. মহাসত্তো হি উপাযকুসলতায তস্স চিরং জীৰিতুকামতাপদেসেন অত্তনো জীৰিতং যাচি. অথ ‘‘পরোসতং খত্তিযানং জীৰিতং দেহী’’তি দুতিযং ৰরং, তেসং সকে রট্ঠে পটিপাদনং ততিযং ৰরং, মনুস্সমংসখাদনতো ৰিরমণং চতুত্থং ৰরং যাচি. সো তীণি ৰরানি দত্ৰা চতুত্থং ৰরং অদাতুকামো ‘‘অঞ্ঞং ৰরং গণ্হাহী’’তি ৰত্ৰাপি মহাসত্তেন নিপ্পীল়িযমানো তম্পি অদাসিযেৰ.

অথ বোধিসত্তো পোরিসাদং নিব্বিসেৰনং কত্ৰা তেনেৰ রাজানো মোচাপেত্ৰা ভূমিযং নিপজ্জাপেত্ৰা দারকানং কণ্ণতো সুত্তৰট্টি ৰিয সণিকং রজ্জুযো নীহরিত্ৰা পোরিসাদেন একং তচং আহরাপেত্ৰা পাসাণেন ঘংসিত্ৰা সচ্চকিরিযং কত্ৰা তেসং হত্থতলানি মক্খেসি. তঙ্খণং এৰ ফাসুকং অহোসি. দ্ৰীহতীহং তত্থেৰ ৰসিত্ৰা তে অরোগে কারেত্ৰা তেহি সদ্ধিং অভিজ্জনকসভাৰং মিত্তসন্থৰং কারেত্ৰা তেহি সদ্ধিং তং বারাণসিং নেত্ৰা রজ্জে পতিট্ঠাপেত্ৰা ‘‘অপ্পমত্তা হোথা’’তি তে রাজানো অত্তনো অত্তনো নগরং পেসেত্ৰা ইন্দপত্থনগরতো আগতায অত্তনো চতুরঙ্গিনিযা সেনায পরিৰুতো অত্তনো নগরং গতো তুট্ঠপমুদিতেন নাগরজনেন সম্পরিৰারিযমানো অন্তেপুরং পৰিসিত্ৰা মাতাপিতরো ৰন্দিত্ৰা মহাতলং অভিরুহি.

অথ মহাসত্তো ছ দানসালাযো কারেত্ৰা দেৰসিকং মহাদানানি পৰত্তেন্তো সীলানি পরিপূরেন্তো উপোসথং উপৰসন্তো পারমিযো অনুব্রূহেসি. তেপি রাজানো মহাসত্তস্স ওৰাদে ঠত্ৰা দানাদীনি পুঞ্ঞানি কত্ৰা আযুপরিযোসানে সগ্গপুরং পূরযিংসু.

তদা পোরিসাদো অঙ্গুলিমালত্থেরো অহোসি, কাল়হত্থিঅমচ্চো সারিপুত্তত্থেরো, নন্দব্রাহ্মণো আনন্দত্থেরো, রুক্খদেৰতা মহাকস্সপত্থেরো, রাজানো বুদ্ধপরিসা, মাতাপিতরো মহারাজকুলানি, সুতসোমমহারাজা লোকনাথো.

তস্স হেট্ঠা ৰুত্তনযেনেৰ সেসপারমিযোপি নিদ্ধারেতব্বা. তথা অলীনসত্তুচরিযাৰণ্ণনায (চরিযা অট্ঠ. ২.৭৪ আদযো) ৰিয মহাসত্তস্স গুণানুভাৰা ৰিভাৰেতব্বাতি.

মহাসুতসোমচরিযাৰণ্ণনা নিট্ঠিতা.

সচ্চপারমী নিট্ঠিতা.

১৩. সুৰণ্ণসামচরিযাৰণ্ণনা

১১১. তেরসমে সামো যদা ৰনে আসিন্তি হিমৰন্তস্মিং মিগসম্মতায নাম নদিযা তীরে মহতি অরঞ্ঞে সামো নাম তাপসকুমারো যদা অহোসি. সক্কেন অভিনিম্মিতোতি সক্কস্স দেৰানমিন্দস্স উপদেসসম্পত্তিযা জাতত্তা সক্কেন নিব্বত্তিতো জনিতো. তত্রাযং অনুপুব্বিকথা – অতীতে বারাণসিতো অৰিদূরে নদিযা তীরে একো নেসাদগামো অহোসি. তত্থ জেট্ঠনেসাদস্স পুত্তো জাতো. তস্স ‘‘দুকূলো’’তি নামমকংসু. তস্সা এৰ নদিযা পরতীরেপি একো নেসাদগামো অহোসি. তত্থ জেট্ঠনেসাদস্স ধীতা জাতা. তস্সা ‘‘পারিকা’’তি নামমকংসু. তে উভোপি ব্রহ্মলোকতো আগতা সুদ্ধসত্তা. তেসং ৰযপ্পত্তানং অনিচ্ছমানানংযেৰ আৰাহৰিৰাহং করিংসু. তে উভোপি কিলেসসমুদ্দং অনোতরিত্ৰা ব্রহ্মানো ৰিয একতো ৰসিংসু. ন চ কিঞ্চি নেসাদকম্মং করোন্তি.

অথ দুকূলং মাতাপিতরো ‘‘তাত, ত্ৰং নেসাদকম্মং ন করোসি, নেৰ ঘরাৰাসং ইচ্ছসি, কিং নাম করিস্সসী’’তি আহংসু. সো ‘‘তুম্হেসু অনুজানন্তেসু পব্বজিস্সামী’’তি আহ. ‘‘তেন হি পব্বজাহী’’তি. দ্ৰেপি জনা হিমৰন্তং পৰিসিত্ৰা যস্মিং ঠানে মিগসম্মতা নাম নদী হিমৰন্ততো ওতরিত্ৰা গঙ্গং পত্তা, তং ঠানং গন্ত্ৰা গঙ্গং পহায মিগসম্মতাভিমুখা অভিরুহিংসু. তদা সক্কস্স ভৰনং উণ্হাকারং দস্সেসি. সক্কো তং কারণং ঞত্ৰা ৰিস্সকম্মুনা তস্মিং ঠানে অস্সমং মাপেসি. তে তত্থ গন্ত্ৰা পব্বজিত্ৰা সক্কদত্তিযে অস্সমে কামাৰচরমেত্তং ভাৰেত্ৰা পটিৰসিংসু. সক্কোপি তেসং উপট্ঠানং আগচ্ছতি.

সো একদিৰসং ‘‘তেসং চক্খূ পরিহাযিস্সন্তী’’তি ঞত্ৰা উপসঙ্কমিত্ৰা ‘‘ভন্তে, ৰো চক্খূনং অন্তরাযো পঞ্ঞাযতি, পটিজগ্গনকং পুত্তং লদ্ধুং ৰট্টতি, জানামি তুম্হাকং সুদ্ধচিত্ততং, তস্মা পারিকায উতুনিকালে নাভিং হত্থেন পরামসেয্যাথ, এৰং ৰো পুত্তো জাযিস্সতি, সো ৰো উপট্ঠহিস্সতী’’তি ৰত্ৰা পক্কামি. দুকূলপণ্ডিতো তং কারণং পারিকায আচিক্খিত্ৰা তস্সা উতুনিকালে নাভিং পরামসি. তদা বোধিসত্তো দেৰলোকা চৰিত্ৰা তস্সা কুচ্ছিম্হি পটিসন্ধিং গণ্হি, সা দসমাসচ্চযেন সুৰণ্ণৰণ্ণং পুত্তং ৰিজাযি. তেনেৰস্স ‘‘সুৰণ্ণসামো’’তি নামং করিংসু. তং অপরভাগে ৰড্ঢিত্ৰা সোল়সৰস্সুদ্দেসিকম্পি মাতাপিতরো রক্খন্তা অস্সমে নিসীদাপেত্ৰা সযমেৰ ৰনমূলফলাফলত্থায গচ্ছন্তি.

অথেকদিৰসং ৰনে ফলাফলং আদায নিৰত্তিত্ৰা অস্সমপদতো অৰিদূরে মেঘে উট্ঠিতে রুক্খমূলং পৰিসিত্ৰা ৰম্মিকমত্থকে ঠিতানং সরীরতো সেদগন্ধমিস্সকে উদকে তস্মিং ৰম্মিকবিলে ঠিতস্স আসিৰিসস্স নাসাপুটং পৰিট্ঠে আসিৰিসো কুজ্ঝিত্ৰা নাসাৰাতেন পহরি. দ্ৰে অন্ধা হুত্ৰা পরিদেৰমানা ৰিরৰিংসু. অথ মহাসত্তো ‘‘মম মাতাপিতরো অতিচিরাযন্তি, কা নু খো তেসং পৰত্তী’’তি পটিমগ্গং গন্ত্ৰা সদ্দমকাসি. তে তস্স সদ্দং সঞ্জানিত্ৰা পটিসদ্দং কত্ৰা পুত্তসিনেহেন ‘‘তাত সাম, ইধ পরিপন্থো অত্থি, মা আগমী’’তি ৰত্ৰা সদ্দানুসারেন সযমেৰ সমাগমিংসু. সো ‘‘কেন ৰো কারণেন চক্খূনি ৰিনট্ঠানী’’তি পুচ্ছিত্ৰা ‘‘তাত, মযং ন জানাম, দেৰে ৰস্সন্তে রুক্খমূলে ৰম্মিকমত্থকে ঠিতা, অথ ন পস্সামা’’তি ৰুত্তমত্তে এৰ অঞ্ঞাসি ‘‘তত্থ আসিৰিসেন ভৰিতব্বং, তেন কুদ্ধেন নাসাৰাতো ৰিস্সট্ঠো ভৰিস্সতী’’তি.

অথ ‘‘মা চিন্তযিত্থ, অহং ৰো পটিজগ্গিস্সামী’’তি মাতাপিতরো অস্সমং নেত্ৰা তেসং রত্তিট্ঠানদিৰাট্ঠানাদিসঞ্চরণট্ঠানে রজ্জুকে বন্ধি. ততো পট্ঠায তে অস্সমে ঠপেত্ৰা ৰনমূলফলাফলানি আহরতি, পাতোৰ ৰসনট্ঠানং সম্মজ্জতি, পানীযং আহরতি, পরিভোজনীযং উপট্ঠাপেতি, দন্তকট্ঠমুখোদকানি দত্ৰা মধুরফলাফলং দেতি. তেহি মুখে ৰিক্খালিতে সযং পরিভুঞ্জিত্ৰা মাতাপিতরো ৰন্দিত্ৰা তেসং অৰিদূরেযেৰ অচ্ছতি – ‘‘কিং নু খো ইমে আণাপেন্তী’’তি. ৰিসেসেন চ মেত্তং বহুলমকাসি, তেনস্স সত্তা অপ্পটিক্কূলা অহেসুং. যথা চস্স সত্তা, এৰং সত্তানং সো বোধিসত্তো অপ্পটিক্কূলো. এৰং সো দিৰসে দিৰসে ফলাফলত্থায অরঞ্ঞং গচ্ছন্তোপি আগচ্ছন্তোপি মিগগণপরিৰুতো এৰ অহোসি. সীহব্যগ্ঘাদিৰিপক্খসত্তাপি তেন সদ্ধিং অতিৰিয ৰিস্সত্থা, মেত্তানুভাৰেন পনস্স ৰসনট্ঠানে অঞ্ঞমঞ্ঞং তিরচ্ছানগতা মুদুচিত্ততং পটিলভিংসু. ইতি সো সব্বত্থ মেত্তানুভাৰেন অভীরূ অনুত্রাসী ব্রহ্মা ৰিয অৰেরো ৰিহাসি. তেন ৰুত্তং ‘‘পৰনে সীহব্যগ্ঘে চ, মেত্তাযমুপনামযি’’ন্তিআদি.

তত্থ মেত্তাযমুপনামযিন্তি ম-কারো পদসন্ধিকরো, মেত্তাভাৰনায কুরূরকম্মন্তে সীহব্যগ্ঘেপি ফরি, পগেৰ সেসসত্তেতি অধিপ্পাযো. অথ ৰা মেত্তা অযতি পৰত্ততি এতেনাতি মেত্তাযো, মেত্তাভাৰনা. তং মেত্তাযং উপনামযিং সত্তেসু অনোধিসো উপনেসিং. ‘‘সীহব্যগ্ঘেহী’’তিপি পাঠো. তস্সত্থো – ন কেৰলমহমেৰ, অথ খো পৰনে সীহব্যগ্ঘেহি, যস্মিং মহাৰনে তদা অহং ৰিহরামি, তত্থ সীহব্যগ্ঘেহি সদ্ধিং অহং সত্তেসু মেত্তং উপনামেসিং. সীহব্যগ্ঘাপি হি তদা মমানুভাৰেন সত্তেসু মেত্তচিত্ততং পটিলভিংসু, পগেৰ ইতরে সত্তাতি দস্সেতি.

১১২. পসদমিগৰরাহেহীতি পসদমিগেহি চেৰ ৰনসূকরেহি চ. পরিৰারেত্ৰাতি এতেহি অত্তানং পরিৰারিতং কত্ৰা তস্মিং অরঞ্ঞে ৰসিং.

১১৩. ইদানি তদা অত্তনো মেত্তাভাৰনায লদ্ধং আনিসংসং মত্থকপ্পত্তিঞ্চস্স দস্সেতুং ‘‘ন মং কোচি উত্তসতী’’তি ওসানগাথমাহ. তস্সত্থো – সসবিল়ারাদিকো ভীরুকজাতিকোপি কোচি সত্তো মং ন উত্তসতি ন উব্বিজ্জেতি. অহম্পি কস্সচি সীহব্যগ্ঘাদিতিরচ্ছানতো যক্খাদিঅমনুস্সতো লুদ্দলোহিতপাণিমনুস্সতোতি কুতোচিপি ন ভাযামি. কস্মা? যস্মা মেত্তাবলেনুপত্থদ্ধো চিরকালং ভাৰিতায মেত্তাপারমিতাযানুভাৰেন উপত্থম্ভিতো তস্মিং পৰনে মহাঅরঞ্ঞে তদা রমামি অভিরমামীতি. সেসং সুৰিঞ্ঞেয্যমেৰ.

এৰং পন মহাসত্তো সব্বসত্তে মেত্তাযন্তো মাতাপিতরো চ সাধুকং পটিজগ্গন্তো একদিৰসং অরঞ্ঞতো মধুরফলাফলং আহরিত্ৰা অস্সমে ঠপেত্ৰা মাতাপিতরো ৰন্দিত্ৰা ‘‘পানীযং আদায আগমিস্সামী’’তি মিগগণপরিৰুতো দ্ৰে মিগে একতো কত্ৰা তেসং পিট্ঠিযং পানীযঘটং ঠপেত্ৰা হত্থেন গহেত্ৰা নদীতিত্থং অগমাসি. তস্মিং সমযে বারাণসিযং পীল়িযক্খো নাম রাজা রজ্জং কারেসি. সো মিগমংসলোভেন মাতরং রজ্জং পটিচ্ছাপেত্ৰা সন্নদ্ধপঞ্চাৰুধো হিমৰন্তং পৰিসিত্ৰা মিগে ৰধিত্ৰা মংসং খাদিত্ৰা চরন্তো মিগসম্মতং নদিং পত্ৰা অনুপুব্বেন সামস্স পানীযগহণতিত্থং পত্তো. মিগপদৰলঞ্জং দিস্ৰা গচ্ছন্তো তং তথা গচ্ছন্তং দিস্ৰা ‘‘মযা এত্তকং কালং এৰং ৰিচরন্তো মনুস্সো ন দিট্ঠপুব্বো, দেৰো নু খো এস নাগো নু খো, সচাহং উপসঙ্কমিত্ৰা পুচ্ছিস্সামি, সহসা পক্কমেয্যাতি. যংনূনাহং এতং ৰিজ্ঝিত্ৰা দুব্বলং কত্ৰা পুচ্ছেয্য’’ন্তি চিন্তেত্ৰা মহাসত্তং ন্হত্ৰা ৰাকচীরং নিৰাসেত্ৰা অজিনচম্মং একংসং করিত্ৰা পানীযঘটং পূরেত্ৰা উক্খিপিত্ৰা ৰামংসকূটে ঠপনকালে ‘‘ইদানি তং ৰিজ্ঝিতুং সমযো’’তি ৰিসপীতেন সরেন দক্খিণপস্সে ৰিজ্ঝি. সরো ৰামপস্সেন নিক্খমি. তস্স ৰিদ্ধভাৰং ঞত্ৰা মিগগণো ভীতো পলাযি.

সামপণ্ডিতো পন ৰিদ্ধোপি পানীযঘটং যথা ৰা তথা ৰা অনৰসুম্ভেত্ৰা সতিং পচ্চুপট্ঠাপেত্ৰা সণিকং ওতারেত্ৰা ৰালুকং ব্যূহিত্ৰা ঠপেত্ৰা দিসং ৰৰত্থপেত্ৰা মাতাপিতূনং ৰসনট্ঠানদিসাভাগেন সীসং কত্ৰা নিপজ্জিত্ৰা মুখেন লোহিতং ছড্ডেত্ৰা ‘‘মম কোচি ৰেরী নাম নত্থি, মমপি কত্থচি ৰেরং নাম নত্থী’’তি ৰত্ৰা ইমং গাথমাহ –

‘‘কো নু মং উসুনা ৰিজ্ঝি, পমত্তং উদহারকং;

খত্তিযো ব্রাহ্মণো ৰেস্সো, কো মং ৰিদ্ধা নিলীযতী’’তি. (জা. ২.২২.২৯৬);

তং সুত্ৰা রাজা ‘‘অযং মযা ৰিজ্ঝিত্ৰা পথৰিযং পাতিতোপি নেৰ মং অক্কোসতি ন পরিভাসতি, মম হদযমংসং সম্বাহন্তো ৰিয পিযৰচনেন সমুদাচরতি, গমিস্সামিস্স সন্তিক’’ন্তি চিন্তেত্ৰা উপসঙ্কমিত্ৰা অত্তানং অত্তনা চ ৰিদ্ধভাৰং আৰিকত্ৰা ‘‘কো ৰা ত্ৰং কস্স ৰা পুত্তো’’তি মহাসত্তং পুচ্ছি.

সো ‘‘সামো নামাহং দুকূলপণ্ডিতস্স নাম নেসাদইসিনো পুত্তো, কিস্স পন মং ৰিজ্ঝী’’তি আহ. সো পঠমং ‘‘মিগসঞ্ঞাযা’’তি মুসাৰাদং ৰত্ৰা ‘‘অহং ইমং নিরপরাধং অকারণেন ৰিজ্ঝি’’ন্তি অনুসোচিত্ৰা যথাভূতং আৰিকত্ৰা তস্স মাতাপিতূনং ৰসনট্ঠানং পুচ্ছিত্ৰা তত্থ গন্ত্ৰা তেসং অত্তানং আৰিকত্ৰা তেহি কতপটিসন্থারো ‘‘সামো মযা ৰিদ্ধো’’তি ৰত্ৰা তে পরিদেৰন্তে সোকসমাপন্নে ‘‘যং সামেন কত্তব্বং পরিচারিককম্মং, তং কত্ৰা অহং ৰো উপট্ঠহিস্সামী’’তি সমস্সাসেত্ৰা সামস্স সন্তিকং আনেসি. তে তত্থ গন্ত্ৰা নানপ্পকারং পরিদেৰিত্ৰা তস্স উরে হত্থং ঠপেত্ৰা ‘‘পুত্তস্স মে সরীরে উসুমা ৰত্ততেৰ, ৰিসৰেগেন ৰিসঞ্ঞিতং আপন্নো ভৰিস্সতীতি নিব্বিসভাৰত্থায সচ্চকিরিযং করিস্সামা’’তি চিন্তেত্ৰা –

‘‘যং কিঞ্চিত্থি কতং পুঞ্ঞং, ময্হঞ্চেৰ পিতুচ্চ তে;

সব্বেন তেন কুসলেন, ৰিসং সামস্স হঞ্ঞতূ’’তি. (জা. ২.২২.৩৮৮) –

মাতরা,

‘‘যং কিঞ্চিত্থি কতং পুঞ্ঞং, ময্হঞ্চেৰ মাতুচ্চ তে;

সব্বেন তেন কুসলেন, ৰিসং সামস্স হঞ্ঞতূ’’তি. (জা. ২.২২.৩৯৬) –

পিতরা,

‘‘পব্বত্যাহং গন্ধমাদনে, চিররত্তনিৰাসিনী;

ন মে পিযতরো কোচি, অঞ্ঞো সামেন ৰিজ্জতি;

এতেন সচ্চৰজ্জেন, ৰিসং সামস্স হঞ্ঞতূ’’তি. (জা. ২.২২.৩৯৮) –

দেৰতায চ সচ্চকিরিযায কতায মহাসত্তো খিপ্পং ৰুট্ঠাসি. পদুমপত্তপলাসে উদকবিন্দু ৰিয ৰিনিৰট্টেত্ৰা আবাধো ৰিগতো. ৰিদ্ধট্ঠানং অরোগং পাকতিকমেৰ অহোসি. মাতাপিতূনং চক্খূনি উপ্পজ্জিংসু. ইতি মহাসত্তস্স অরোগতা, মাতাপিতূনঞ্চ চক্খুপটিলাভো, অরুণুগ্গমনং, তেসং চতুন্নম্পি অস্সমেযেৰ অৰট্ঠানন্তি সব্বং একক্খণেযেৰ অহোসি.

অথ মহাসত্তো রঞ্ঞা সদ্ধিং পটিসন্থারং কত্ৰা ‘‘ধম্মং চর, মহারাজা’’তিআদিনা (জা. ২.২২.৪১১-৪১২) ধম্মং দেসেত্ৰা উত্তরিম্পি ওৰদিত্ৰা পঞ্চ সীলানি অদাসি. সো তস্স ওৰাদং সিরসা পটিগ্গহেত্ৰা ৰন্দিত্ৰা বারাণসিং গন্ত্ৰা দানাদীনি পুঞ্ঞানি কত্ৰা সগ্গপরাযনো অহোসি. বোধিসত্তোপি সদ্ধিং মাতাপিতূহি অভিঞ্ঞাসমাপত্তিযো নিব্বত্তেত্ৰা আযুপরিযোসানে ব্রহ্মলোকূপগো অহোসি.

তদা রাজা আনন্দত্থেরো অহোসি, দেৰধীতা উপ্পলৰণ্ণা, সক্কো অনুরুদ্ধো, পিতা মহাকস্সপত্থেরো, মাতা ভদ্দকাপিলানী, সামপণ্ডিতো লোকনাথো.

তস্স হেট্ঠা ৰুত্তনযেনেৰ সেসপারমিযো নিদ্ধারেতব্বা. তথা ৰিসপীতেন সল্লেন দক্খিণপস্সেন পৰিসিত্ৰা ৰামপস্সতো ৰিনিৰিজ্ঝনৰসেন ৰিদ্ধোপি কিঞ্চি কাযৰিকারং অকত্ৰা উদকঘটস্স ভূমিযং নিক্খিপনং, ৰধকে অঞ্ঞাতেপি ঞাতে ৰিয চিত্তৰিকারাভাৰো, পিযৰচনেন সমুদাচারো, মাতাপিতুউপট্ঠানপুঞ্ঞতো ময্হং পরিহানীতি অনুসোচনমত্তং, অরোগে জাতে রঞ্ঞো কারুঞ্ঞং মেত্তঞ্চ উপট্ঠাপেত্ৰা ধম্মদেসনা, ওৰাদদানন্তি এৰমাদযো গুণানুভাৰা ৰিভাৰেতব্বাতি.

সুৰণ্ণসামচরিযাৰণ্ণনা নিট্ঠিতা.

১৪. একরাজচরিযাৰণ্ণনা

১১৪. চুদ্দসমে একরাজাতি ৰিস্সুতোতি একরাজাতি ইমিনা অন্ৰত্থনামেন জম্বুদীপতলে পাকটো.

মহাসত্তো হি তদা বারাণসিরঞ্ঞো পুত্তো হুত্ৰা নিব্বত্তি. ৰযপ্পত্তো সব্বসিপ্পনিপ্ফত্তিং পত্তো হুত্ৰা পিতু অচ্চযেন রজ্জং কারেন্তো কুসলসীলাচারসদ্ধাসুতাদিঅনঞ্ঞসাধারণগুণৰিসেসযোগেন পারমিপরিভাৰনেন চ জম্বুদীপতলে অদুতিযত্তা পধানভাৰেন চ ‘‘একরাজা’’তি পকাসনামো অহোসি. পরমং সীলং অধিট্ঠাযাতি সুপরিসুদ্ধকাযিকৰাচসিকসংৰরসঙ্খাতঞ্চেৰ সুপরিসুদ্ধমনোসমাচারসঙ্খাতঞ্চ পরমং উত্তমং দসকুসলকম্মপথসীলং সমাদানৰসেন চ অৰীতিক্কমনৰসেন চ অধিট্ঠহিত্ৰা অনুট্ঠহিত্ৰা. পসাসামি মহামহিন্তি তিযোজনসতিকে কাসিরট্ঠে মহতিং মহিং অনুসাসামি রজ্জং কারেমি.

১১৫. দসকুসলকম্মপথেতি পাণাতিপাতাৰেরমণি যাৰ সম্মাদিট্ঠীতি এতস্মিং দসৰিধে কুসলকম্মপথে, এতে ৰা অনৰসেসতো সমাদায ৰত্তামি. চতূহি সঙ্গহৰত্থূহীতি দানং পিযৰচনং অত্থচরিযা সমানত্ততাতি ইমেহি চতূহি সঙ্গহৰত্থূহি সঙ্গণ্হনকারণেহি যদা একরাজাতি ৰিস্সুতো হোমি, তদা যথারহং মহাজনং সঙ্গণ্হামীতি সম্বন্ধো.

১১৬. এৰন্তি দসকুসলকম্মপথসীলপরিপূরণং চতূহি সঙ্গহৰত্থূহি মহাজনসঙ্গণ্হনন্তি যথাৰুত্তেন ইমিনা আকারেন অপ্পমত্তস্স. ইধলোকে পরত্থ চাতি ইমস্মিং লোকে যং অপ্পমজ্জনং, তত্থ দিট্ঠধম্মিকে অত্থে, পরলোকে যং অপ্পমজ্জনং তত্থ সম্পরাযিকে অত্থে অপ্পমত্তস্স মে সতোতি অত্থো. দব্বসেনোতি এৰংনামকো কোসলরাজা. উপগন্ত্ৰাতি চতুরঙ্গিনিং সেনং সন্নয্হিত্ৰা অব্ভুয্যানৰসেন মম রজ্জং উপগন্ত্ৰা. অচ্ছিন্দন্তো পুরং মমাতি মম বারাণসিনগরং বলক্কারেন গণ্হন্তো.

তত্রাযং অনুপুব্বিকথা – মহাসত্তো হি তদা নগরস্স চতূসু দ্ৰারেসু চতস্সো মজ্ঝে একং নিৰেসনদ্ৰারে একন্তি ছ দানসালাযো কারেত্ৰা কপণদ্ধিকাদীনং দানং দেতি, সীলং রক্খতি, উপোসথকম্মং করোতি, খন্তিমেত্তানুদ্দযসম্পন্নো অঙ্কে নিসিন্নং পুত্তং পরিতোসযমানো ৰিয সব্বসত্তে পরিতোসযমানো ধম্মেন রজ্জং কারেতি. তস্সেকো অমচ্চো অন্তেপুরং পদুস্সিত্ৰা অপরভাগে পাকটোৰ জাতো. অমচ্চা রঞ্ঞো আরোচেসুং. রাজা পরিগ্গণ্হন্তো তং অত্তনা পচ্চক্খতো ঞত্ৰা তং অমচ্চং পক্কোসাপেত্ৰা ‘‘অন্ধবাল, অযুত্তং তে কতং, ন ত্ৰং মম ৰিজিতে ৰসিতুং অরহসি, অত্তনো ধনঞ্চ পুত্তদারঞ্চ গহেত্ৰা অঞ্ঞত্থ যাহী’’তি রট্ঠা পব্বাজেসি.

সো কোসলজনপদং গন্ত্ৰা দব্বসেনং নাম কোসলরাজানং উপট্ঠহন্তো অনুক্কমেন তস্স ৰিস্সাসিকো হুত্ৰা একদিৰসং তং রাজানং আহ – ‘‘দেৰ, বারাণসিরজ্জং নিম্মক্খিকমধুপটলসদিসং, অতিমুদুকো রাজা, সুখেনেৰ তং রজ্জং গণ্হিতুং সক্কোসী’’তি. দব্বসেনো বারাণসিরঞ্ঞো মহানুভাৰতায তস্স ৰচনং অসদ্দহন্তো মনুস্সে পেসেত্ৰা কাসিরট্ঠে গামঘাতাদীনি কারেত্ৰা তেসং চোরানং বোধিসত্তেন ধনং দত্ৰা ৰিস্সজ্জিতভাৰং সুত্ৰা ‘‘অতিৰিয ধম্মিকো রাজা’’তি ঞত্ৰা ‘‘বারাণসিরজ্জং গণ্হিস্সামী’’তি বলৰাহনং আদায নিয্যাসি. অথ বারাণসিরঞ্ঞো মহাযোধা ‘‘কোসলরাজা আগচ্ছতী’’তি সুত্ৰা ‘‘অম্হাকং রজ্জসীমং অনোক্কমন্তমেৰ নং পোথেত্ৰা গণ্হামা’’তি অত্তনো রঞ্ঞো ৰদিংসু.

বোধিসত্তো ‘‘তাতা, মং নিস্সায অঞ্ঞেসং কিলমনকিচ্চং নত্থি, রজ্জত্থিকা রজ্জং গণ্হন্তু, মা গমিত্থা’’তি নিৰারেসি. কোসলরাজা জনপদমজ্ঝং পাৰিসি. মহাযোধা পুনপি রঞ্ঞো তথেৰ ৰদিংসু. রাজা পুরিমনযেনেৰ নিৰারেসি. দব্বসেনো বহিনগরে ঠত্ৰা ‘‘রজ্জং ৰা দেতু যুদ্ধং ৰা’’তি একরাজস্স সাসনং পেসেসি. একরাজা ‘‘নত্থি মযা যুদ্ধং, রজ্জং গণ্হাতূ’’তি পটিসাসনং পেসেসি. পুনপি মহাযোধা ‘‘দেৰ, ন মযং কোসলরঞ্ঞো নগরং পৰিসিতুং দেম, বহিনগরেযেৰ নং পোথেত্ৰা গণ্হামা’’তি আহংসু. রাজা পুরিমনযেনেৰ নিৰারেত্ৰা নগরদ্ৰারানি অৰাপুরাপেত্ৰা মহাতলে পল্লঙ্কমজ্ঝে নিসীদি. দব্বসেনো মহন্তেন বলৰাহনেন নগরং পৰিসিত্ৰা একম্পি পটিসত্তুং অপস্সন্তো সব্বরজ্জং হত্থগতং কত্ৰা রাজনিৰেসনং গন্ত্ৰা মহাতলং আরুয্হ নিরপরাধং বোধিসত্তং গণ্হাপেত্ৰা আৰাটে নিখণাপেসি. তেন ৰুত্তং –

‘‘দব্বসেনো উপগন্ত্ৰা, অচ্ছিন্দন্তো পুরং মম.

১১৭.

‘‘রাজূপজীৰে নিগমে, সবলট্ঠে সরট্ঠকে;

সব্বং হত্থগতং কত্ৰা, কাসুযা নিখণী মম’’ন্তি.

তত্থ রাজূপজীৰেতি অমচ্চপারিসজ্জব্রাহ্মণগহপতিআদিকে রাজানং উপনিস্সায জীৰন্তে. নিগমেতি নেগমে. সবলট্ঠেতি সেনাপরিযাপন্নতায বলে তিট্ঠন্তীতি বলট্ঠা, হত্থারোহাদযো, বলট্ঠেহি সহাতি সবলট্ঠে. সরট্ঠকেতি সজনপদে, রাজূপজীৰে নিগমে চ অঞ্ঞঞ্চ সব্বং হত্থগতং কত্ৰা. কাসুযা নিখণী মমন্তি সবলৰাহনং সকলং মম রজ্জং গহেত্ৰা মম্পি গলপ্পমাণে আৰাটে নিখণাপেসি. জাতকেপি –

‘‘অনুত্তরে কামগুণে সমিদ্ধে, ভুত্ৰান পুব্বে ৰসি একরাজা;

সো দানি দুগ্গে নরকম্হি খিত্তো, নপ্পজ্জহে ৰণ্ণবলং পুরাণ’’ন্তি. (জা. ১.৪.৯) –

আৰাটে খিত্তভাৰো আগতো. জাতকট্ঠকথাযং (জা. অট্ঠ. ৩.৪.৯) পন ‘‘সিক্কায পক্খিপাপেত্ৰা উত্তরুম্মারে হেট্ঠাসীসকং ওলম্বেসী’’তি ৰুত্তং.

মহাসত্তো চোররাজানং আরব্ভ মেত্তং ভাৰেত্ৰা কসিণপরিকম্মং কত্ৰা ঝানাভিঞ্ঞাযো নিব্বত্তেত্ৰা কাসুতো উগ্গন্ত্ৰা আকাসে পল্লঙ্কেন নিসীদি. তেন ৰুত্তং –

১১৮.

‘‘অমচ্চমণ্ডলং রজ্জং, ফীতং অন্তেপুরং মম;

অচ্ছিন্দিত্ৰান গহিতং, পিযপুত্তংৰ পস্সহ’’ন্তি.

তত্থ অমচ্চমণ্ডলন্তি তস্মিং তস্মিং রাজকিচ্চে রঞ্ঞা অমা সহ ৰত্তন্তীতি অমচ্চা, সদ্ধিং ৰা তেসং মণ্ডলং সমূহং. ফীতন্তি বলৰাহনেন নগরজনপদাদীহি সমিদ্ধং রজ্জং. ইত্থাগারদাসিদাসপরিজনেহি চেৰ ৰত্থাভরণাদিউপভোগূপকরণেহি চ সমিদ্ধং মম অন্তেপুরঞ্চ অচ্ছিন্দিত্ৰা গহিতকং গণ্হন্তং অমিত্তরাজানং যায অত্তনো পিযপুত্তংৰ পস্সিং অহং, তায এৰংভূতায মেত্তায মে সমো সকললোকে নত্থি, তস্মা এৰংভূতা এসা মে মেত্তাপারমী পরমত্থপারমিভাৰং পত্তাতি অধিপ্পাযো.

এৰং পন মহাসত্তে তং চোররাজানং আরব্ভ মেত্তং ফরিত্ৰা আকাসে পল্লঙ্কেন নিসিন্নে তস্স সরীরে দাহো উপ্পজ্জি. সো ‘‘ডয্হামি ডয্হামী’’তি ভূমিযং অপরাপরং পরিৰত্ততি. ‘‘কিমেত’’ন্তি ৰুত্তে, মহারাজ, তুম্হে নিরপরাধং ধম্মিকরাজানং আৰাটে নিখণাপযিত্থাতি. ‘‘তেন হি ৰেগেন গন্ত্ৰা তং উদ্ধরথা’’তি আহ. পুরিসা গন্ত্ৰা তং রাজানং আকাসে পল্লঙ্কেন নিসিন্নং দিস্ৰা আগন্ত্ৰা দব্বসেনস্স আরোচেসুং. সো ৰেগেন গন্ত্ৰা ৰন্দিত্ৰা খমাপেত্ৰা ‘‘তুম্হাকং রজ্জং তুম্হেৰ কারেথ, অহং ৰো চোরে পটিবাহেস্সামী’’তি ৰত্ৰা তস্স দুট্ঠামচ্চস্স রাজাণং কারেত্ৰা পক্কামি. বোধিসত্তোপি রজ্জং অমচ্চানং নিয্যাতেত্ৰা ইসিপব্বজ্জং পব্বজিত্ৰা মহাজনং সীলাদিগুণেসু পতিট্ঠাপেত্ৰা আযুপরিযোসানে ব্রহ্মলোকপরাযনো অহোসি.

তদা দব্বসেনো আনন্দত্থেরো অহোসি, একরাজা লোকনাথো.

তস্স দিৰসে দিৰসে ছসু দানসালাসু ছসতসহস্সৰিস্সজ্জনেন পচ্চত্থিকরঞ্ঞো সকলরজ্জপরিচ্চাগেন চ দানপারমী, নিচ্চসীলউপোসথকম্মৰসেন পব্বজিতস্স অনৰসেসসীলসংৰরৰসেন চ সীলপারমী, পব্বজ্জাৰসেন ঝানাধিগমৰসেন চ নেক্খম্মপারমী, সত্তানং হিতাহিতৰিচারণৰসেন দানসীলাদিসংৰিদহনৰসেন চ পঞ্ঞাপারমী, দানাদিপুঞ্ঞসম্ভারস্স অব্ভুস্সহনৰসেন কামৰিতক্কাদিৰিনোদনৰসেন চ ৰীরিযপারমী, দুট্ঠামচ্চস্স দব্বসেনরঞ্ঞো চ অপরাধসহনৰসেন খন্তিপারমী, যথাপটিঞ্ঞং দানাদিনা অৰিসংৰাদনৰসেন চ সচ্চপারমী, দানাদীনং অচলসমাদানাধিট্ঠানৰসেন অধিট্ঠানপারমী, পচ্চত্থিকেপি একন্তেন হিতূপসংহারৰসেন মেত্তাঝাননিব্বত্তনেন চ মেত্তাপারমী, দুট্ঠামচ্চেন দব্বসেনেন চ কতাপরাধে হিতেসীহি অত্তনো অমচ্চাদীহি নিব্বত্তিতে উপকারে চ অজ্ঝুপেক্খণেন রজ্জসুখপ্পত্তকালে পচ্চত্থিকরঞ্ঞা নরকে খিত্তকালে সমানচিত্ততায চ উপেক্খাপারমী ৰেদিতব্বা. ৰুত্তঞ্হেতং –

‘‘পনুজ্জ দুক্খেন সুখং জনিন্দ, সুখেন ৰা দুক্খমসয্হসাহি;

উভযত্থ সন্তো অভিনিব্বুতত্তা, সুখে চ দুক্খে চ ভৰন্তি তুল্যা’’তি. (জা. ১.৪.১২);

যস্মা পনেত্থ মেত্তাপারমী অতিসযৰতী, তস্মা তদত্থদীপনত্থং সা এৰ পাল়ি আরুল়্হা. তথা ইধ মহাসত্তস্স সব্বসত্তেসু ওরসপুত্তে ৰিয সমানুকম্পতাদযো গুণৰিসেসা নিদ্ধারেতব্বাতি.

একরাজচরিযাৰণ্ণনা নিট্ঠিতা.

মেত্তাপারমী নিট্ঠিতা.

১৫. মহালোমহংসচরিযাৰণ্ণনা

১১৯. পন্নরসমে ‘‘সুসানে সেয্যং কপ্পেমী’’তি এত্থাযং অনুপুব্বিকথা –

মহাসত্তো হি তদা মহতি উল়ারভোগে কুলে নিব্বত্তিত্ৰা ৰুদ্ধিমন্ৰায দিসাপামোক্খস্স আচরিযস্স সন্তিকে গরুৰাসং ৰসন্তো সব্বসিপ্পানং নিপ্ফত্তিং পত্ৰা কুলঘরং আগন্ত্ৰা মাতাপিতূনং অচ্চযেন ঞাতকেহি ‘‘কুটুম্বং সণ্ঠপেহী’’তি যাচিযমানোপি অনিচ্চতামনসিকারমুখেন সব্বভৰেসু অভিৰড্ঢমানসংৰেগো কাযে চ অসুভসঞ্ঞং পটিলভিত্ৰা ঘরাৰাসপলিবোধাধিভূতং কিলেসগহনং অনোগাহেত্ৰাৰ চিরকালসম্পরিচিতং নেক্খম্মজ্ঝাসযং উপব্রূহযমানো মহন্তং ভোগক্খন্ধং পহায পব্বজিতুকামো হুত্ৰা পুন চিন্তেসি – ‘‘সচাহং পব্বজিস্সামি, গুণসম্ভাৰনাপাকটো ভৰিস্সামী’’তি.

সো লাভসক্কারং জিগুচ্ছন্তো পব্বজ্জং অনুপগন্ত্ৰা ‘‘পহোমি চাহং লাভালাভাদীসু নিব্বিকারো হোতু’’ন্তি অত্তানং তক্কেন্তো ‘‘ৰিসেসতো পরপরিভৰসহনাদিপটিপদং পূরেন্তো উপেক্খাপারমিং মত্থকং পাপেস্সামী’’তি নিৰত্থৰত্থেনেৰ গেহতো নিক্খমিত্ৰা পরমসল্লেখৰুত্তিকোপি অবলবলো অমন্দমন্দো ৰিয পরেসং অচিত্তকরূপেন হীল়িতপরিভূতো হুত্ৰা গামনিগমরাজধানীসু একরত্তিৰাসেনেৰ ৰিচরতি. যত্থ পন মহন্তং পরিভৰং পটিলভতি, তত্থ চিরম্পি ৰসতি. সো নিৰত্থৰত্থে জিণ্ণে পিলোতিকখণ্ডেন তস্মিম্পি জিণ্ণে কেনচি দিন্নং অগ্গণ্হন্তো হিরিকোপীনপটিচ্ছাদনমত্তেনেৰ চরতি. এৰং গচ্ছন্তে কালে একং নিগমগামং অগমাসি.

তত্থ গামদারকা ধুত্তজাতিকা ৰেধৰেরা কেচি রাজৰল্লভানং পুত্তনত্তুদাসাদযো চ উদ্ধতা উন্নল়া চপলা মুখরা ৰিকিণ্ণৰাচা কালেন কালং কীল়াবহুলা ৰিচরন্তি. দুগ্গতে মহল্লকে পুরিসে চ ইত্থিযো চ গচ্ছন্তে দিস্ৰা ভস্মপুটেন পিট্ঠিযং আকিরন্তি, কেতকীপণ্ণং কচ্ছন্তরে ওলম্বেন্তি, তেন ৰিপ্পকারেন পরিৰত্তেত্ৰা ওলোকেন্তে যথাৰজ্জকীল়িতং দস্সেত্ৰা উপহসন্তি. মহাপুরিসো তস্মিং নিগমে তে এৰং ৰিচরন্তে ধুত্তদারকে দিস্ৰা ‘‘লদ্ধো ৰত দানি মে উপেক্খাপারমিযা পরিপূরণূপাযো’’তি চিন্তেত্ৰা তত্থ ৰিহাসি. তং তে ধুত্তদারকা পস্সিত্ৰা ৰিপ্পকারং কাতুং আরভন্তি.

মহাসত্তো তং অসহন্তো ৰিয চ তেহি ভাযন্তো ৰিয চ উট্ঠহিত্ৰা গচ্ছতি. তে তং অনুবন্ধন্তি. সো তেহি অনুবন্ধিযমানো ‘‘এত্থ নত্থি কোচি পটিৰত্তা’’তি সুসানং গন্ত্ৰা অট্ঠিকং সীসূপধানং কত্ৰা সযতি. ধুত্তদারকাপি তত্থ গন্ত্ৰা ওট্ঠুভনাদিকং নানপ্পকারং ৰিপ্পকারং কত্ৰা পক্কমন্তি. এৰং তে দিৰসে দিৰসে করোন্তি এৰ. যে পন ৰিঞ্ঞূ পুরিসা, তে এৰং করোন্তে পস্সন্তি. তে তে পটিবাহিত্ৰা ‘‘অযং মহানুভাৰো তপস্সী মহাযোগী’’তি চ ঞত্ৰা উল়ারং সক্কারসম্মানং করোন্তি. মহাসত্তো পন সব্বত্থ একসদিসোৰ হোতি মজ্ঝত্তভূতো. তেন ৰুত্তং ‘‘সুসানে সেয্যং কপ্পেমী’’তিআদি.

তত্থ সুসানে সেয্যং কপ্পেমি, ছৰট্ঠিকং উপনিধাযাতি আমকসুসানে ছড্ডিতকল়েৰরতো সোণসিঙ্গালাদীহি তহিং তহিং ৰিক্খিত্তেসু অট্ঠিকেসু একং অট্ঠিকং সীসূপধানং কত্ৰা সুচিম্হি চ অসুচিম্হি চ সমানচিত্ততায তস্মিং সুসানে সেয্যং কপ্পেমি, সযামীতি অত্থো. গামণ্ডলাতি গামদারকা. রূপং দস্সেন্তিনপ্পকন্তি যথাৰজ্জকীল়িতায ওট্ঠুভনউপহসনউম্মিহনাদীহি কণ্ণসোতে সলাকপ্পৰেসনাদীহি চ অতিকক্খল়ং অনপ্পকং নানপ্পকারং রূপং ৰিকারং করোন্তি.

১২০. অপরেতি তেসু এৰ গামদারকেসু একচ্চে. উপাযনানূপনেন্তীতি ‘‘অযং ইমেসু পরিভৰৰসেন এৰরূপং ৰিপ্পকারং করোন্তেসু ন কিঞ্চি ৰিকারং দস্সেতি, সম্মাননে নু খো কীদিসো’’তি পরিগ্গণ্হন্তা ৰিৰিধং বহুং গন্ধমালং ভোজনং অঞ্ঞানি চ উপাযনানি পণ্ণাকারানি উপনেন্তি উপহরন্তি. অপরেহি ৰা তেহি অনাচারগামদারকেহি অঞ্ঞে ৰিঞ্ঞূ মনুস্সা ‘‘অযং ইমেসং এৰং ৰিৰিধম্পি ৰিপ্পকারং করোন্তানং ন কুপ্পতি, অঞ্ঞদত্থু খন্তিমেত্তানুদ্দযংযেৰ তেসু উপট্ঠপেতি, অহো অচ্ছরিযপুরিসো’’তি হট্ঠা ‘‘বহু ৰতিমেহি এতস্মিং ৰিপ্পটিপজ্জন্তেহি অপুঞ্ঞং পসুত’’ন্তি সংৰিগ্গমানসাৰ হুত্ৰা বহুং গন্ধমালং ৰিৰিধং ভোজনং অঞ্ঞানি চ উপাযনানি উপনেন্তি উপহরন্তি.

১২১. যে মে দুক্খং উপহরন্তীতি যে গামদারকা ময্হং সরীরদুক্খং উপহরন্তি উপনেন্তি. ‘‘উপদহন্তী’’তিপি পাঠো, উপ্পাদেন্তীতি অত্থো. যে চ দেন্তি সুখং মমাতি যে চ ৰিঞ্ঞূ মনুস্সা মম ময্হং সুখং দেন্তি, মালাগন্ধভোজনাদিসুখূপকরণেহি মম সুখং উপহরন্তি. সব্বেসং সমকো হোমীতি কত্থচিপি ৰিকারানুপ্পত্তিযা সমানচিত্ততায ৰিৰিধানম্পি তেসং জনানং সমকো একসদিসো হোমি ভৰামি. দযা কোপো ন ৰিজ্জতীতি যস্মা ময্হং উপকারকে মেত্তচিত্ততাসঙ্খাতা দযা, অপকারকে মনোপদোসসঙ্খাতো কোপোপি ন ৰিজ্জতি, তস্মা সব্বেসং সমকো হোমীতি দস্সেতি.

১২২. ইদানি ভগৰা তদা উপকারীসু অপকারীসু চ সত্তেসু সমুপচিতঞাণসম্ভারস্স অত্তনো সমানচিত্ততা ৰিকারাভাৰো যা চ লোকধম্মেসু অনুপলিত্ততা অহোসি, তং দস্সেতুং ‘‘সুখদুক্খে তুলাভূতো’’তি ওসানগাথমাহ.

তত্থ সুখদুক্খেতি সুখে চ দুক্খে চ. তুলাভূতোতি সমকং গহিততুলা ৰিয ওনতিউন্নতিঅপনতিং ৰজ্জেত্ৰা মজ্ঝত্তভূতো, সুখদুক্খগ্গহণেনেৰ চেত্থ তংনিমিত্তভাৰতো লাভালাভাপি গহিতাতি ৰেদিতব্বং. যসেসূতি কিত্তীসু. অযসেসূতি নিন্দাসু. সব্বত্থাতি সব্বেসু সুখাদীসু লোকধম্মেসু. ইতি ভগৰা তদা সব্বসত্তেসু সব্বলোকধম্মেসু চ অনঞ্ঞসাধারণং অত্তনো মজ্ঝত্তভাৰং কিত্তেত্ৰা তেন তস্মিং অত্তভাৰে অত্তনো উপেক্খাপারমিযা সিখাপ্পত্তভাৰং ৰিভাৰেন্তো ‘‘এসা মে উপেক্খাপারমী’’তি দেসনং নিট্ঠাপেসি.

ইধাপি মহাসত্তস্স পঠমং দানপারমী নাম ৰিসেসতো সব্বৰিভৰপরিচ্চাগো ‘‘যে কেচি ইমং সরীরং গহেত্ৰা যংকিঞ্চি অত্তনো ইচ্ছিতং করোন্তূ’’তি অনপেক্খভাৰেন অত্তনো অত্তভাৰপরিচ্চাগো চ দানপারমী, হীনাদিকস্স সব্বস্স অকত্তব্বস্স অকরণং সীলপারমী, কামস্সাদৰিমুখস্স গেহতো নিক্খন্তস্স সতো কাযে অসুভসঞ্ঞানুব্রূহনা নেক্খম্মপারমী, সম্বোধিসম্ভারানং উপকারধম্মপরিগ্গহণে তপ্পটিপক্খপ্পহানে চ কোসল্লং অৰিপরীততো ধম্মসভাৰচিন্তনা চ পঞ্ঞাপারমী, কামৰিতক্কাদিৰিনোদনং দুক্খাধিৰাসনৰীরিযঞ্চ ৰীরিযপারমী, সব্বাপি অধিৰাসনখন্তি খন্তিপারমী, ৰচীসচ্চং সমাদানাৰিসংৰাদনেন ৰিরতিসচ্চঞ্চ সচ্চপারমী, অনৰজ্জধম্মে অচলসমাদানাধিট্ঠানং অধিট্ঠানপারমী, অনোধিসো সব্বসত্তেসু মেত্তানুদ্দযভাৰো মেত্তাপারমী, উপেক্খাপারমী পনস্স যথাৰুত্তৰসেনেৰ ৰেদিতব্বাতি দস পারমিযো লব্ভন্তি. উপেক্খাপারমী চেত্থ অতিসযৰতীতি কত্ৰা সাযেৰ দেসনং আরুল়্হা. তথা ইধ মহাসত্তস্স মহন্তং ভোগক্খন্ধং মহন্তঞ্চ ঞাতিপরিৰট্টং পহায মহাভিনিক্খমনসদিসং গেহতো নিক্খমনং, তথা নিক্খমিত্ৰা লাভসক্কারং জিগুচ্ছতো পরেসং সম্ভাৰনং পরিহরিতুকামস্স পব্বজ্জালিঙ্গং অগ্গহেত্ৰা চিত্তেনেৰ অনৰসেসং পব্বজ্জাগুণে অধিট্ঠহিত্ৰা পরমসুখৰিহারো, পরমপ্পিচ্ছতা, পৰিৰেকাভিরতি, উপেক্খণাধিপ্পাযেন অত্তনো কাযজীৰিতনিরপেক্খা, পরেহি অত্তনো উপরি কতৰিপ্পকারাধিৰাসনং, উক্কংসগতসল্লেখৰুত্তি, বোধিসম্ভারপটিপক্খানং কিলেসানং তনুভাৰেন খীণাসৰানং ৰিয পরেসং উপকারাপকারেসু নিব্বিকারভাৰহেতুভূতেন সব্বত্থ মজ্ঝত্তভাৰেন সমুট্ঠাপিতো লোকধম্মেহি অনুপলেপো, সব্বপারমীনং মুদ্ধভূতায উপেক্খাপারমিযা সিখাপ্পত্তীতি এৰমাদযো গুণানুভাৰা ৰিভাৰেতব্বাতি.

মহালোমহংসচরিযাৰণ্ণনা নিট্ঠিতা.

উপেক্খাপারমী নিট্ঠিতা.

ততিযৰগ্গস্স অত্থৰণ্ণনা নিট্ঠিতা.

উদ্দানগাথাৰণ্ণনা

‘‘যুধঞ্জযো’’তিআদিকা উদ্দানগাথা. তত্থ ভিসেনাতি ভিসাপদেসেন মহাকঞ্চনচরিযং (চরিযা. ৩.৩৪ আদযো) দস্সেতি. সোণনন্দোতি ইমিনা সোণপণ্ডিতচরিযং (চরিযা. ৩.৪২ আদযো ) দস্সেতি. তথা মূগপক্খোতি মূগপক্খাপদেসেন তেমিযপণ্ডিতচরিযং (চরিযা. ৩.৪৮ আদযো) দস্সেতি. উপেক্খাপারমিসীসেন মহালোমহংসচরিযং (চরিযা. ৩.১১৯ আদযো) দস্সেতি. আসি ইতি ৰুট্ঠং মহেসিনাতি যথা, সারিপুত্ত, তুয্হং এতরহি দেসিতং, ইতি এৰং ইমিনা ৰিধানেন মহন্তানং দানপারমিআদীনং বোধিসম্ভারানং এসনতো মহেসিনা তদা বোধিসত্তভূতেন মযা ৰুট্ঠং চিণ্ণং চরিতং পটিপন্নং আসি অহোসীতি অত্থো. ইদানি পারমিপরিপূরণৰসেন চিরকালপ্পৰত্তিতং ইধ ৰুত্তং অৰুত্তঞ্চ অত্তনো দুক্করকিরিযং একজ্ঝং কত্ৰা যদত্থং সা পৰত্তিতা, তঞ্চ সঙ্খেপেনেৰ দস্সেতুং ‘‘এৰং বহুব্বিধ’’ন্তি গাথমাহ.

তত্থ এৰন্তি ইমিনা ৰুত্তনযেন. বহুব্বিধং দুক্খন্তি অকিত্তিপণ্ডিতাদিকালে কারপণ্ণাদিআহারতায তঞ্চ যাচকস্স দত্ৰা আহারূপচ্ছেদাদিনা চ বহুৰিধং নানপ্পকারং দুক্খং. তথা কুরুরাজাদিকালে সক্কসম্পত্তিসদিসা সম্পত্তী চ বহুব্বিধা. ভৰাভৰেতি খুদ্দকে চেৰ মহন্তে চ ভৰে. ভৰাভৰে ৰা ৰুদ্ধিহানিযো অনুভৰিত্ৰা বহুৰিধেহি দুক্খেহি অৰিহঞ্ঞমানো বহুৰিধাহি চ সম্পত্তীহি অনাকড্ঢিযমানো পারমিপরিপূরণপসুতো এৰ হুত্ৰা তদনুরূপং পটিপত্তিং পটিপন্নো উত্তমং অনুত্তরং সম্মাসম্বোধিং সব্বঞ্ঞুতং পত্তো, অধিগতোস্মীতি অত্থো.

ইদানি যাসং পারমীনং পরিপূরণত্থং এসা দুক্করচরিযা চিরং পৰত্তিতা, তাসং অনৰসেসতো পরিপুণ্ণভাৰং তেন চ পত্তব্বফলস্স অত্তনা অধিগতভাৰং দস্সেতুং ‘‘দত্ৰা দাতব্বকং দানং, সীলং পূরেত্ৰা অসেসতো’’তিআদি ৰুত্তং.

তত্থ দত্ৰা দাতব্বকং দানন্তি তদা অনুত্তরং সম্মাসম্বোধিং অভিসম্বুজ্ঝিতুং অগ্গযানপটিপদং পটিপন্নেন মহাবোধিসত্তেন দাতব্বং দেয্যধম্মং বাহিরং রজ্জাদিং অব্ভন্তরং অত্তপরিচ্চাগোতি পঞ্চ মহাপরিচ্চাগপরিযোসানং দানপারমিদানউপপারমিদানপরমত্থপারমিপ্পভেদং দানং অনৰসেসতো সম্পাদেত্ৰাতি অত্থো. তত্থ অকিত্তিব্রাহ্মণকালে (চরিযা. ১.১ আদযো; জা. ১.১৩.৮৩ আদযো) সঙ্খব্রাহ্মণকালেতি (চরিযা. ১.১১ আদযো; জা. ১.১০.৩৯ আদযো) এৰমাদীসু ইধ আগতেসু অনাগতেসু চ ৰিসয্হসেট্ঠিকালে (জা. ১.৪.১৫৭ আদযো) ৰেলামকালেতি (অ. নি. ৯.২০) এৰমাদীসুপি দানপারমিযা মহাপুরিসস্স পূরিতত্তভাৰানং পরিমাণং নাম নত্থি. একন্তেন পনস্স সসপণ্ডিতকালে –

‘‘ভিক্খায উপগতং দিস্ৰা, সকত্তানং পরিচ্চজিং;

দানেন মে সমো নত্থি, এসা মে দানপারমী’’তি. (চরিযা. ১. তস্সুদ্দান) –

এৰং অত্তপরিচ্চাগং করোন্তস্স দানপারমী পরমত্থপারমী নাম জাতা. ইতরেসু পন যথারহং পারমিউপপারমিযো ৰেদিতব্বা.

সীলং পূরেত্ৰা অসেসতোতি তথা অনৰসেসতো কাযিকো সংৰরো, ৰাচসিকো সংৰরো, কাযিকৰাচসিকো সংৰরো, ইন্দ্রিযসংৰরো, ভোজনে মত্তঞ্ঞুতা, সুৰিসুদ্ধাজীৰতাতি এৰমাদিকং বোধিসত্তসীলং সম্পাদেন্তেন সীলপারমিসীলউপপারমিসীলপরমত্থপারমিপ্পভেদং পূরেতব্বং সব্বং সীলং পূরেত্ৰা সম্মদেৰ সম্পাদেত্ৰা. ইধাপি সীলৰনাগরাজকালে (চরিযা. ২.১ আদযো; জা. ১.১.৭২) চম্পেয্যনাগরাজকালেতি (চরিযা. ২.২০ আদযো; জা. ১.১৫.২৪০ আদযো) এৰমাদীসু ইধ আগতেসু, অনাগতেসু চ মহাকপিকালে (চরিযা. ৩.৬৭ আদযো; জা. ১.৭.৮৩ আদযো; ১.১৬.১৭৮ আদযো) ছদ্দন্তকালেতি (জা. ১.১৬.৯৭ আদযো) এৰমাদীসু মহাসত্তস্স সীলপারমিযা পূরিতত্তভাৰানং পরিমাণং নাম নত্থি. একন্তেন পনস্স সঙ্খপালকালে –

‘‘সূলেহি ৰিনিৰিজ্ঝন্তে, কোট্টযন্তেপি সত্তিভি;

ভোজপুত্তে ন কুপ্পামি, এসা মে সীলপারমী’’তি. (চরিযা. ২.৯১) –

এৰং অত্তপরিচ্চাগং করোন্তস্স সীলপারমী পরমত্থপারমী নাম জাতা. ইতরেসু পন যথারহং পারমিউপপারমিযো ৰেদিতব্বা.

নেক্খম্মে পারমিং গন্ত্ৰাতি তথা তিৰিধেপি মহাভিনিক্খমনে পারমিং পরমুক্কংসং গন্ত্ৰা. তত্থ যুধঞ্জযকালে (চরিযা. ৩.১ আদযো; জা. ১.১১.৭৩ আদযো) সোমনস্সকুমারকালেতি (চরিযা. ৩.৭ আদযো; জা. ১.১৫.২১১ আদযো) এৰমাদীসু ইধ আগতেসু, অনাগতেসু চ হত্থিপালকুমারকালে (জা. ১.১৫.৩৩৭ আদযো) মঘদেৰকালেতি (ম. নি. ২.৩০৮ আদযো; জা. ১.১.৯) এৰমাদীসু মহারজ্জং পহায নেক্খম্মপারমিযা পূরিতত্তভাৰানং পরিমাণং নাম নত্থি. একন্তেন পনস্স চূল়সুতসোমকালে –

‘‘মহারজ্জং হত্থগতং, খেল়পিণ্ডংৰ ছড্ডযিং;

চজতো ন হোতি লগ্গনং, এসা মে নেক্খম্মপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা);

এৰং নিস্সঙ্গতায রজ্জং ছড্ডেত্ৰা নিক্খমন্তস্স নেক্খম্মপারমী পরমত্থপারমী নাম জাতা. ইতরেসু পন যথারহং পারমিউপপারমিযো ৰেদিতব্বা.

পণ্ডিতে পরিপুচ্ছিত্ৰাতি কিং কুসলং কিং অকুসলং কিং সাৰজ্জং কিং অনৰজ্জন্তিআদিনা কুসলাদিধম্মৰিভাগং কম্মকম্মফলৰিভাগং সত্তানং উপকারাৰহং অনৰজ্জকম্মাযতনসিপ্পাযতনৰিজ্জাট্ঠানাদিং পণ্ডিতে সপ্পঞ্ঞে পরিপুচ্ছিত্ৰা. এতেন পঞ্ঞাপারমিং দস্সেতি. তত্থ ৰিধুরপণ্ডিতকালে (জা. ২.২২.১৩৪৬ আদযো) মহাগোৰিন্দপণ্ডিতকালে (দী. নি. ২.২৯৩ আদযো; চরিযা ১.৩৭ আদযো) কুদালপণ্ডিতকালে (জা. ১.১.৭০) অরকপণ্ডিতকালে (জা. ১.২.৩৭ আদযো) বোধিপরিব্বাজককালে মহোসধপণ্ডিতকালেতি (জা. ২.২২.৫৯০ আদযো) এৰমাদীসু পঞ্ঞাপারমিযা পূরিতত্তভাৰানং পরিমাণং নাম নত্থি. একন্তেন পনস্স সেনকপণ্ডিতকালে –

‘‘পঞ্ঞায ৰিচিনন্তোহং, ব্রাহ্মণং মোচযিং দুখা;

পঞ্ঞায মে সমো নত্থি, এসা মে পঞ্ঞাপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানক্কথা) –

অন্তোভস্তগতং সপ্পং দস্সেন্তস্স পঞ্ঞাপারমী পরমত্থপারমী নাম জাতা. ৰীরিযং কত্ৰান উত্তমন্তি সম্মাসম্বোধিং পাপেতুং সমত্থতায উত্তমং পধানং ৰীরিযন্তি ৰিৰিধম্পি ৰীরিযপারমিং কত্ৰা উপ্পাদেত্ৰা. তত্থ মহাসীলৰরাজকালে (জা. ১.১.৫১) পঞ্চাৰুধকুমারকালে (জা. ১.১.৫৫) মহাৰানরিন্দকালেতি (জা. ১.১.৫৭) এৰমাদীসু ৰীরিযপারমিযা পূরিতত্তভাৰানং পরিমাণং নাম নত্থি. একন্তেন পনস্স মহাজনককালে –

‘‘অতীরদস্সী জলমজ্ঝে, হতা সব্বেৰ মানুসা;

চিত্তস্স অঞ্ঞথা নত্থি, এসা মে ৰীরিযপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং মহাসমুদ্দং তরন্তস্স ৰীরিযপারমী পরমত্থপারমী নাম জাতা.

খন্তিযা পারমিং গন্ত্ৰাতি অধিৰাসনখন্তিআদি খন্তিপরমুক্কংসভাৰং পাপেন্তো খন্তিযা পারমিং পরমকোটিং গন্ত্ৰা, খন্তিপারমিং সম্পাদেত্ৰাতি অত্থো. তত্থ মহাকপিকালে (চরিযা. ৩.৬৭ আদযো; জা. ১.৭.৮৩ আদযো) মহিংসরাজকালে (জা. ১.৩.৮২ আদযো) রুরুমিগরাজকালে (জা. ১.১৩.১১৭ আদযো) ধম্মদেৰপুত্তকালেতি (জা. ১.১১.২৬ আদযো) এৰমাদীসু খন্তিপারমিযা পূরিতত্তভাৰানং পরিমাণং নাম নত্থি. একন্তেন পনস্স খন্তিৰাদিকালে –

‘‘অচেতনং ৰ কোট্টেন্তে, তিণ্হেন ফরসুনা মমং;

কাসিরাজে ন কুপ্পামি, এসা মে খন্তিপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং অচেতনভাৰেন ৰিয মহাদুক্খং অনুভৰন্তস্স খন্তিপারমী পরমত্থপারমী নাম জাতা.

কত্ৰা দল়্হমধিট্ঠানন্তি কুসলসমাদানাধিট্ঠানং তস্স তস্স পারমিসমাদানস্স তদুপকারকসমাদানস্স চ অধিট্ঠানং দল়্হতরং অসিথিলং কত্ৰা, তং তং ৰতসমাদানং অনিৰত্তিভাৰেন অধিট্ঠহিত্ৰাতি অত্থো. তত্থ জোতিপালকালে (ম. নি. ২.২৮২ আদযো) সরভঙ্গকালে (জা. ২.১৭.৫০ আদযো) নেমিকালেতি (চরিযা. ১.৪০ আদযো; জা.২.২২.৪২১ আদযো) এৰমাদীসু অধিট্ঠানপারমিযা পূরিতত্তভাৰানং পরিমাণং নাম নত্থি. একন্তেন পনস্স তেমিযকুমারকালে –

‘‘মাতাপিতা ন মে দেস্সা, অত্তা মে ন চ দেস্সিযো;

সব্বঞ্ঞুতং পিযং ময্হং, তস্মা ৰতমধিট্ঠহি’’ন্তি. (চরিযা. ৩.৬৫) –

এৰং জীৰিতং পরিচ্চজিত্ৰা ৰতং অধিট্ঠহন্তস্স অধিট্ঠানপারমী পরমত্থপারমী নাম জাতা.

সচ্চৰাচানুরক্খিযাতি সচ্চৰাচং অনুরক্খিত্ৰা জীৰিতন্তরাযেপি অনরিযৰোহারং গূথং ৰিয জিগুচ্ছন্তো পরিহরিত্ৰা সব্বসো অৰিসংৰাদিভাৰং রক্খিত্ৰা. তত্থ কপিরাজকালে (চরিযা. ৩.৬৭ আদযো) সচ্চতাপসকালে মচ্ছরাজকালেতি এৰমাদীসু সচ্চপারমিযা পূরিতত্তভাৰানং পরিমাণং নাম নত্থি. একন্তেন পনস্স মহাসুতসোমকালে –

‘‘সচ্চৰাচং অনুরক্খন্তো, চজিত্ৰা মম জীৰিতং;

মোচেসিং একসতং খত্তিযে, এসা মে সচ্চপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং জীৰিতং চজিত্ৰা সচ্চং অনুরক্খন্তস্স সচ্চপারমী পরমত্থপারমী নাম জাতা.

মেত্তায পারমিং গন্ত্ৰাতি সব্বসত্তেসু অনোধিসো হিতূপসংহারলক্খণায মেত্তায পারমিং পরমুক্কংসতং পত্ৰা. তত্থ চূল়ধম্মপালকালে (জা. ১.৫.৪৪ আদযো) মহাসীলৰরাজকালে (জা. ১.১.৫১) সামপণ্ডিতকালেতি (চরিযা. ৩.১১১ আদযো; জা. ২.২২.২৯৬ আদযো) এৰমাদীসু মেত্তাপারমিযা পূরিতত্তভাৰানং পরিমাণং নাম নত্থি. একন্তেন পনস্স সুৰণ্ণসামকালে –

‘‘ন মং কোচি উত্তসতি, নপিহং ভাযামি কস্সচি;

মেত্তাবলেনুপত্থদ্ধো, রমামি পৰনে তদা’’তি. (চরিযা. ৩.১১৩) –

এৰং জীৰিতম্পি অনোলোকেত্ৰা মেত্তাযন্তস্স মেত্তাপারমী পরমত্থপারমী নাম জাতা.

সম্মাননাৰমাননেতি সক্কচ্চং পূজাসক্কারাদিনা সম্মাননে ওট্ঠুভনাদিনা অৰমাননে চ সব্বত্থ লোকধম্মে সমকো সমচিত্তো নিব্বিকারো হুত্ৰা উত্তমং অনুত্তরং লব্বঞ্ঞুতং অধিগতোস্মীতি অত্থো. তত্থ মহাৰানরিন্দকালে (জা. ১.১.৫৭) কাসিরাজকালে খেমব্রাহ্মণকালে অট্ঠিসেনপরিব্বাজককালেতি (জা. ১.৭.৫৪ আদযো) এৰমাদীসু উপেক্খাপারমিযা পূরিতত্তভাৰানং পরিমাণং নাম নত্থি. একন্তেন পনস্স মহালোমহংসকালে –

‘‘সুসানে সেয্যং কপ্পেমি, ছৰট্ঠিকং উপনিধাযহং;

গামণ্ডলা উপাগন্ত্ৰা, রূপং দস্সেন্তিনপ্পক’’ন্তি. (চরিযা. ৩.১১৯) –

এৰং গামদারকেসু ওট্ঠুভনাদীহি চেৰ মালাগন্ধূপহারাদীহি চ সুখদুক্খং উপ্পাদেন্তেসুপি উপেক্খং অনতিৰত্তন্তস্স উপেক্খাপারমী পরমত্থপারমী নাম জাতা. ইতি ভগৰা –

‘‘এৰং বহুব্বিধং দুক্খং, সম্পত্তী চ বহুব্বিধা;

ভৰাভৰে অনুভৰিত্ৰা, পত্তো সম্বোধিমুত্তম’’ন্তি. –

সম্মাসম্বোধিং অধিগন্তুং ইমস্মিং ভদ্দকপ্পে অত্তনা কতং দুক্করচরিযং সঙ্খেপেনেৰ ৰত্ৰা পুন –

‘‘দত্ৰা দাতব্বকং দানং, সীলং পূরেত্ৰা অসেসতো;

নেক্খম্মে পারমিং গন্ত্ৰা, পত্তো সম্বোধিমুত্তমং.

‘‘পণ্ডিতে পরিপুচ্ছিত্ৰা, ৰীরিযং কত্ৰান মুত্তমং;

খন্তিযা পারমিং গন্ত্ৰা, পত্তো সম্বোধিমুত্তমং.

‘‘কত্ৰা দল়্হমধিট্ঠানং, সচ্চৰাচানুরক্খিয;

মেত্তায পারমিং গন্ত্ৰা, পত্তো সম্বোধিমুত্তমং.

‘‘লাভালাভে যসাযসে, সম্মাননাৰমাননে;

সব্বত্থ সমকো হুত্ৰা, পত্তো সম্বোধিমুত্তম’’ন্তি. –

অত্তনা সম্মদেৰ পরিপূরিতা দস পারমিযো দস্সেতি.

পকিণ্ণককথা

ইমস্মিং পন ঠানে ঠত্ৰা মহাবোধিযানপটিপত্তিযং উস্সাহজাতানং কুলপুত্তানং বোধিসম্ভারেসু নানপ্পকারকোসল্লত্থং সব্বপারমীসু পকিণ্ণককথা কথেতব্বা.

তত্রিদং পঞ্হকম্মং – কা পনেতা পারমিযো? কেনট্ঠেন পারমিযো? কতিৰিধা চেতা? কো তাসং কমো? কানি লক্খণরসপচ্চুপট্ঠানপদট্ঠানানি? কো পচ্চযো? কো সংকিলেসো? কিং ৰোদানং? কো পটিপক্খো? কা পটিপত্তি? কো ৰিভাগো? কো সঙ্গহো? কো সম্পাদনূপাযো? কিত্তকেন কালেন সম্পাদনং? কো আনিসংসো? কিং চেতাসং ফলন্তি?

তত্রিদং ৰিস্সজ্জনং – কা পনেতা পারমিযোতি? তণ্হামানদিট্ঠীহি অনুপহতা করুণূপাযকোসল্লপরিগ্গহিতা দানাদযো গুণা পারমিযো.

কেনট্ঠেন পারমিযোতি? দানসীলাদিগুণৰিসেসযোগেন সত্তুত্তমতায পরমা মহাসত্তা বোধিসত্তা, তেসং ভাৰো কম্মং ৰা পারমী, দানাদিকিরিযা. অথ ৰা পরতীতি পরমো, দানাদিগুণানং পূরকো পালকো চাতি বোধিসত্তো, পরমস্স অযং, পরমস্স ৰা ভাৰো, কম্মং ৰা পারমী, দানাদিকিরিযাৰ. অথ ৰা পরং সত্তং অত্তনি মৰতি বন্ধতি গুণৰিসেসযোগেন, পরং ৰা অধিকতরং মজ্জতি সুজ্ঝতি সংকিলেসমলতো, পরং ৰা সেট্ঠং নিব্বানং ৰিসেসেন মযতি গচ্ছতি, পরং ৰা লোকং পমাণভূতেন ঞাণৰিসেসেন ইধলোকং ৰিয মুনাতি পরিচ্ছিন্দতি, পরং ৰা অতিৰিয সীলাদিগুণগণং অত্তনো সন্তানে মিনোতি পক্খিপতি, পরং ৰা অত্তভূততো ধম্মকাযতো অঞ্ঞং পটিপক্খং ৰা তদনত্থকরং কিলেসচোরগণং মিনাতি হিংসতীতি পরমো, মহাসত্তো. পরমস্স অযন্তিআদি ৰুত্তনযেন যোজেতব্বং. পারে ৰা নিব্বানে মজ্জতি সুজ্ঝতি সত্তে চ সোধেতি, তত্থ ৰা সত্তে মৰতি বন্ধতি যোজেতি, তং ৰা মযতি গচ্ছতি গমেতি চ, মুনাতি ৰা তং যাথাৰতো, তত্থ ৰা সত্তে মিনোতি পক্খিপতি, কিলেসারযো ৰা সত্তানং তত্থ মিনাতি হিংসতীতি পারমী, মহাপুরিসো. তস্স ভাৰো কম্মং ৰা পারমিতা, দানাদিকিরিযাৰ. ইমিনা নযেন পারমীসদ্দত্থো ৰেদিতব্বো.

কতিৰিধাতি? সঙ্খেপতো দসৰিধা. তা পন পাল়িযং সরূপতো আগতাযেৰ. যথাহ –

‘‘ৰিচিনন্তো তদা দক্খিং, পঠমং দানপারমিং;

পুব্বকেহি মহেসীহি, অনুচিণ্ণং মহাপথ’’ন্তি. (বু. ৰং. ২.১১৬) –

আদি. যথা চাহ – ‘‘কতি নু খো, ভন্তে, বুদ্ধকারকা ধম্মা? দস খো, সারিপুত্ত, বুদ্ধকারকা ধম্মা. কতমে দস? দানং খো, সারিপুত্ত, বুদ্ধকারকো ধম্মো, সীলং, নেক্খম্মং, পঞ্ঞা, ৰীরিযং, খন্তি, সচ্চং, অধিট্ঠানং, মেত্তা, উপেক্খা বুদ্ধকারকো ধম্মো. ইমে খো, সারিপুত্ত, দস বুদ্ধকারকা ধম্মা’’তি. ইদমৰোচ ভগৰা, ইদং ৰত্ৰা সুগতো অথাপরং এতদৰোচ সত্থা –

‘‘দানং সীলঞ্চ নেক্খম্মং, পঞ্ঞা ৰীরিযেন পঞ্চমং;

খন্তি সচ্চমধিট্ঠানং, মেত্তুপেক্খাতি তে দসা’’তি. (বু. ৰং. ১.৭৬ থোকং ৰিসদিসং);

কেচি পন ‘‘ছব্বিধা’’তি ৰদন্তি. তং এতাসং সঙ্গহৰসেন ৰুত্তং. সো পন সঙ্গহো পরতো আৰি ভৰিস্সতি.

কো তাসং কমোতি? এত্থ কমোতি দেসনাক্কমো, সো চ পঠমসমাদানহেতুকো, সমাদানং পৰিচযহেতুকং, ইতি যথা আদিম্হি পৰিচিতা সমাদিন্না চ, তথা দেসিতা. তত্থ দানং সীলস্স বহূপকারং সুকরঞ্চাতি তং আদিম্হি ৰুত্তং. দানং সীলপরিগ্গহিতং মহপ্ফলং হোতি মহানিসংসন্তি দানানন্তরং সীলং ৰুত্তং. সীলং নেক্খম্মপরিগ্গহিতং, নেক্খম্মং পঞ্ঞাপরিগ্গহিতং, পঞ্ঞা ৰীরিযপরিগ্গহিতা, ৰীরিযং খন্তিপরিগ্গহিতং, খন্তি সচ্চপরিগ্গহিতা, সচ্চং অধিট্ঠানপরিগ্গহিতং, অধিট্ঠানং মেত্তাপরিগ্গহিতং, মেত্তা উপেক্খাপরিগ্গহিতা মহপ্ফলা হোতি মহানিসংসাতি মেত্তানন্তরমুপেক্খা ৰুত্তা. উপেক্খা পন করুণাপরিগ্গহিতা করুণা চ উপেক্খাপরিগ্গহিতাতি ৰেদিতব্বা. ‘‘কথং পন মহাকারুণিকা বোধিসত্তা সত্তেসু উপেক্খকা হোন্তী’’তি? ‘‘উপেক্খিতব্বযুত্তেসু কঞ্চি কালং উপেক্খকা হোন্তি, ন পন সব্বত্থ সব্বদা চা’’তি কেচি. অপরে পন – ‘‘ন সত্তেসু উপেক্খকা, সত্তকতেসু পন ৰিপ্পকারেসু উপেক্খকা হোন্তী’’তি.

অপরো নযো – পচুরজনেসুপি পৰত্তিযা সব্বসত্তসাধারণত্তা অপ্পফলত্তা সুকরত্তা চ আদিম্হি দানং ৰুত্তং. সীলেন দাযকপটিগ্গাহকসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো কিরিযধম্মং ৰত্ৰা অকিরিযধম্মৰচনতো ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানস্স অনন্তরং সীলং ৰুত্তং. নেক্খম্মেন সীলসম্পত্তিসিদ্ধিতো কাযৰচীসুচরিতং ৰত্ৰা মনোসুচরিতৰচনতো ৰিসুদ্ধসীলস্স সুখেনেৰ ঝানসমিজ্ঝনতো কম্মাপরাধপ্পহানেন পযোগসুদ্ধিং ৰত্ৰা কিলেসাপরাধপ্পহানেন আসযসুদ্ধিৰচনতো ৰীতিক্কমপ্পহানেন চিত্তস্স পরিযুট্ঠানপ্পহানৰচনতো চ সীলস্স অনন্তরং নেক্খম্মং ৰুত্তং. পঞ্ঞায নেক্খম্মস্স সিদ্ধিপরিসুদ্ধিতো ঝানাভাৰেন পঞ্ঞাভাৰৰচনতো ‘‘সমাধিপদট্ঠানা হি পঞ্ঞা, পঞ্ঞাপচ্চুপট্ঠানো চ সমাধি’’. সমথনিমিত্তং ৰত্ৰা উপেক্খানিমিত্তৰচনতো পরহিতজ্ঝানেন পরহিতকরণূপাযকোসল্লৰচনতো চ নেক্খম্মস্স অনন্তরং পঞ্ঞা ৰুত্তা. ৰীরিযারম্ভেন পঞ্ঞাকিচ্চসিদ্ধিতো সত্তসুঞ্ঞতাধম্মনিজ্ঝানক্খন্তিং ৰত্ৰা সত্তহিতায আরম্ভস্স অচ্ছরিযতাৰচনতো উপেক্খানিমিত্তং ৰত্ৰা পগ্গহনিমিত্তৰচনতো নিসম্মকারিতং ৰত্ৰা উট্ঠানৰচনতো চ ‘‘নিসম্মকারিনো হি উট্ঠানং ফলৰিসেসমাৰহতী’’তি পঞ্ঞায অনন্তরং ৰীরিযং ৰুত্তং.

ৰীরিযেন তিতিক্খাসিদ্ধিতো ‘‘ৰীরিযৰা হি আরদ্ধৰীরিযত্তা সত্তসঙ্খারেহি উপনীতং দুক্খং অভিভুয্য ৰিহরতি’’. ৰীরিযস্স তিতিক্খালঙ্কারভাৰতো ‘‘ৰীরিযৰতো হি তিতিক্খা সোভতি’’. পগ্গহনিমিত্তং ৰত্ৰা সমথনিমিত্তৰচনতো অচ্চারম্ভেন উদ্ধচ্চদোসপ্পহানৰচনতো ‘‘ধম্মনিজ্ঝানক্খন্তিযা হি উদ্ধচ্চদোসো পহীযতি’’. ৰীরিযৰতো সাতচ্চকরণৰচনতো ‘‘খন্তিবহুলো হি অনুদ্ধতো সাতচ্চকারী হোতি’’. অপ্পমাদৰতো পরহিতকিরিযারম্ভে পচ্চুপকারতণ্হাভাৰৰচনতো ‘‘যাথাৰতো ধম্মনিজ্ঝানে হি সতি তণ্হা ন হোতি’’. পরহিতারম্ভে পরমেপি পরকতদুক্খসহনতাৰচনতো চ ৰীরিযস্স অনন্তরং খন্তি ৰুত্তা. সচ্চেন খন্তিযা চিরাধিট্ঠানতো অপকারিনো অপকারখন্তিং ৰত্ৰা তদুপকারকরণে অৰিসংৰাদৰচনতো খন্তিযা অপৰাদৰাচাৰিকম্পনেন ভূতৰাদিতায অৰিজহনৰচনতো সত্তসুঞ্ঞতাধম্মনিজ্ঝানক্খন্তিং ৰত্ৰা তদুপব্রূহিতঞাণসচ্চৰচনতো চ খন্তিযা অনন্তরং সচ্চং ৰুত্তং.

অধিট্ঠানেন সচ্চসিদ্ধিতো ‘‘অচলাধিট্ঠানস্স হি ৰিরতি সিজ্ঝতি’’. অৰিসংৰাদিতং ৰত্ৰা তত্থ অচলভাৰৰচনতো ‘‘সচ্চসন্ধো হি দানাদীসু পটিঞ্ঞানুরূপং নিচ্চলোৰ পৰত্ততি’’. ঞাণসচ্চং ৰত্ৰা সম্ভারেসু পৰত্তিনিট্ঠাপনৰচনতো ‘‘যথাভূতঞাণৰা হি বোধিসম্ভারে অধিট্ঠাতি, তে চ নিট্ঠাপেতি পটিপক্খেহি অকম্পিযভাৰতো’’তি সচ্চস্স অনন্তরং অধিট্ঠানং ৰুত্তং. মেত্তায পরহিতকরণসমাদানাধিট্ঠানসিদ্ধিতো অধিট্ঠানং ৰত্ৰা হিতূপসংহারৰচনতো ‘‘বোধিসম্ভারে হি অধিতিট্ঠমানো মেত্তাৰিহারী হোতি’’. অচলাধিট্ঠানস্স সমাদানাৰিকোপনেন সমাদানসম্ভৰতো চ অধিট্ঠানস্স অনন্তরং মেত্তা ৰুত্তা. উপেক্খায মেত্তাৰিসুদ্ধিতো সত্তেসু হিতূপসংহারং ৰত্ৰা তদপরাধেসু উদাসীনতাৰচনতো মেত্তাভাৰনং ৰত্ৰা তন্নিস্সন্দভাৰনাৰচনতো হিতকামসত্তেপি উপেক্খকোতি অচ্ছরিযগুণতাৰচনতো চ মেত্তায অনন্তরং উপেক্খা ৰুত্তাতি এৰমেতাসং কমো ৰেদিতব্বো.

কানি লক্খণরসপচ্চুপট্ঠানপদট্ঠানানীতি এত্থ অৰিসেসেন তাৰ সব্বাপি পারমিযো পরানুগ্গহলক্খণা, পরেসং উপকারকরণরসা, অৰিকম্পনরসা ৰা, হিতেসিতাপচ্চুপট্ঠানা, বুদ্ধত্তপচ্চুপট্ঠানা ৰা, মহাকরুণাপদট্ঠানা, করুণূপাযকোসল্লপদট্ঠানা ৰা.

ৰিসেসেন পন যস্মা করুণূপাযকোসল্লপরিগ্গহিতা অত্তূপকরণপরিচ্চাগচেতনা দানপারমিতা, করুণূপাযকোসল্লপরিগ্গহিতং কাযৰচীসুচরিতং অত্থতো অকত্তব্বৰিরতিকত্তব্বকরণচেতনাদযো চ সীলপারমিতা. করুণূপাযকোসল্লপরিগ্গহিতো আদীনৰদস্সনপুব্বঙ্গমো কামভৰেহি নিক্খমনচিত্তুপ্পাদো নেক্খম্মপারমিতা, করুণূপাযকোসল্লপরিগ্গহিতো ধম্মানং সামঞ্ঞৰিসেসলক্খণাৰবোধো পঞ্ঞাপারমিতা. করুণূপাযকোসল্লপরিগ্গহিতো কাযচিত্তেহি পরহিতারম্ভো ৰীরিযপারমিতা, করুণূপাযকোসল্লপরিগ্গহিতং সত্তসঙ্খারাপরাধসহনং অদোসপ্পধানো তদাকারপ্পৰত্তচিত্তুপ্পাদো খন্তিপারমিতা, করুণূপাযকোসল্লপরিগ্গহিতং ৰিরতিচেতনাদিভেদং অৰিসংৰাদনং সচ্চপারমিতা, করুণূপাযকোসল্লপরিগ্গহিতং অচলসমাদানাধিট্ঠানং তদাকারপ্পৰত্তো চিত্তুপ্পাদো অধিট্ঠানপারমিতা, করুণূপাযকোসল্লপরিগ্গহিতো লোকস্স হিতসুখূপসংহারো অত্থতো অব্যাপাদো মেত্তাপারমিতা, করুণূপাযকোসল্লপরিগ্গহিতা অনুনযপটিঘৰিদ্ধংসনী ইট্ঠানিট্ঠেসু সত্তসঙ্খারেসু সমপ্পৰত্তি উপেক্খাপারমিতা.

তস্মা পরিচ্চাগলক্খণা দানপারমী, দেয্যধম্মে লোভৰিদ্ধংসনরসা, অনাসত্তিপচ্চুপট্ঠানা, ভৰৰিভৰসম্পত্তিপচ্চুপট্ঠানা ৰা, পরিচ্চজিতব্বৰত্থুপদট্ঠানা. সীলনলক্খণা সীলপারমী, সমাধানলক্খণা পতিট্ঠানলক্খণা চাতি ৰুত্তং হোতি. দুস্সীল্যৰিদ্ধংসনরসা, অনৰজ্জরসা ৰা, সোচেয্যপচ্চুপট্ঠানা, হিরোত্তপ্পপদট্ঠানা. কামতো চ ভৰতো চ নিক্খমনলক্খণা নেক্খম্মপারমী, তদাদীনৰৰিভাৰনরসা, ততো এৰ ৰিমুখভাৰপচ্চুপট্ঠানা, সংৰেগপদট্ঠানা. যথাসভাৰপটিৰেধলক্খণা পঞ্ঞাপারমী, অক্খলিতপটিৰেধলক্খণা ৰা কুসলিস্সাসখিত্তউসুপটিৰেধো ৰিয, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসিকো ৰিয, সমাধিপদট্ঠানা, চতুসচ্চপদট্ঠানা ৰা. উস্সাহলক্খণা ৰীরিযপারমী, উপত্থম্ভনরসা, অসংসীদনপচ্চুপট্ঠানা, ৰীরিযারম্ভৰত্থুপদট্ঠানা, সংৰেগপদট্ঠানা ৰা. খমনলক্খণা খন্তিপারমী, ইট্ঠানিট্ঠসহনরসা, অধিৰাসনপচ্চুপট্ঠানা, অৰিরোধপচ্চুপট্ঠানা ৰা, যথাভূতদস্সনপদট্ঠানা. অৰিসংৰাদনলক্খণা সচ্চপারমী, যথাসভাৰৰিভাৰনরসা, সাধুতাপচ্চুপট্ঠানা, সোরচ্চপদট্ঠানা. বোধিসম্ভারেসু অধিট্ঠানলক্খণা অধিট্ঠানপারমী, তেসং পটিপক্খাভিভৰনরসা, তত্থ অচলতাপচ্চুপট্ঠানা, বোধিসম্ভারপদট্ঠানা. হিতাকারপ্পৰত্তিলক্খণা মেত্তাপারমী, হিতূপসংহাররসা, আঘাতৰিনযনরসা ৰা, সোম্মভাৰপচ্চুপট্ঠানা, সত্তানং মনাপভাৰদস্সনপদট্ঠানা. মজ্ঝত্তাকারপ্পৰত্তিলক্খণা উপেক্খাপারমী, সমভাৰদস্সনরসা, পটিঘানুনযৰূপসমপচ্চুপট্ঠানা, কম্মস্সকতাপচ্চৰেক্খণপদট্ঠানা.

এত্থ চ করুণূপাযকোসল্লপরিগ্গহিততা দানাদীনং পরিচ্চাগাদিলক্খণস্স ৰিসেসনভাৰেন ৰত্তব্বা. করুণূপাযকোসল্লপরিগ্গহিতানি হি দানাদীনি বোধিসত্তসন্তানে পৰত্তানি দানাদিপারমিযো নাম হোন্তি.

কো পচ্চযোতি? অভিনীহারো তাৰ পারমীনং পচ্চযো. যো হি অযং –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা;

অট্ঠধম্মসমোধানা, অভিনীহারো সমিজ্ঝতী’’তি. (বু. ৰং. ২.৫৯) –

এৰং ৰুত্তো অট্ঠধম্মসমোধানসম্পাদিতো ‘‘তিণ্ণো তারেয্যং মুত্তো মোচেয্যং দন্তো দমেয্যং সন্তো সমেয্যং অস্সত্থো অস্সাসেয্যং পরিনিব্বুতো পরিনিব্বাপেয্যং সুদ্ধো সোধেয্যং বুদ্ধো বোধেয্য’’ন্তিআদিনযপ্পৰত্তো অভিনীহারো. সো অৰিসেসেন সব্বপারমীনং পচ্চযো. তপ্পৰত্তিযা হি উদ্ধং পারমীনং পৰিচযুপট্ঠানসমাদানাধিট্ঠাননিপ্ফত্তিযো মহাপুরিসানং সম্ভৰন্তি.

তত্থ মনুস্সত্তন্তি মনুস্সত্তভাৰো. মনুস্সত্তভাৰেযেৰ হি ঠত্ৰা বুদ্ধত্তং পত্থেন্তস্স পত্থনা সমিজ্ঝতি, ন নাগসুপণ্ণাদিজাতীসু ঠিতস্স. কস্মাতি চে? বুদ্ধভাৰস্স অননুচ্ছৰিকভাৰতো.

লিঙ্গসম্পত্তীতি মনুস্সত্তভাৰে ঠিতস্সাপি পুরিসস্সেৰ পত্থনা সমিজ্ঝতি, ন ইত্থিযা ন পণ্ডকনপুংসকউভতোব্যঞ্জনকানং ৰা সমিজ্ঝতি. কস্মাতি চে? যথাৰুত্তকারণতো লক্খণপারিপূরিযা অভাৰতো চ. ৰুত্তঞ্চেতং – ‘‘অট্ঠানমেতং, ভিক্খৰে, অনৰকাসো, যং ইত্থী অরহং অস্স সম্মাসম্বুদ্ধো’’তি (অ. নি. ১.২৭৯; ৰিভ. ৮০৯) ৰিত্থারো. তস্মা মনুস্সজাতিকস্সাপি ইত্থিলিঙ্গে ঠিতস্স পণ্ডকাদীনং ৰা পত্থনা ন সমিজ্ঝতি.

হেতূতি উপনিস্সযসম্পত্তি. মনুস্সপুরিসস্সাপি হি উপনিস্সযসম্পন্নস্সেৰ হেতুসম্পত্তিযা পত্থনা সমিজ্ঝতি, ন ইতরস্স.

সত্থারদস্সনন্তি সত্থুসম্মুখীভাৰো. ধরমানকবুদ্ধস্সেৰ হি সন্তিকে পত্থেন্তস্স পত্থনা সমিজ্ঝতি, পরিনিব্বুতে পন ভগৰতি চেতিযস্স সন্তিকে ৰা বোধিমূলে ৰা পটিমায ৰা পচ্চেকবুদ্ধবুদ্ধসাৰকানং ৰা সন্তিকে পত্থনা ন সমিজ্ঝতি. কস্মা? অধিকারস্স বলৰভাৰাভাৰতো. বুদ্ধানং এৰ পন সন্তিকে পত্থনা সমিজ্ঝতি, অজ্ঝাসযস্স উল়ারভাৰেন তদধিকারস্স বলৰভাৰাপত্তিতো.

পব্বজ্জাতি বুদ্ধস্স ভগৰতো সন্তিকে পত্থেন্তস্সাপি কম্মকিরিযৰাদীসু তাপসেসু ৰা ভিক্খূসু ৰা পব্বজিতস্সেৰ পত্থনা সমিজ্ঝতি, নো গিহিলিঙ্গে ঠিতস্স. কস্মা? বুদ্ধভাৰস্স অননুচ্ছৰিকভাৰতো. পব্বজিতা এৰ হি মহাবোধিসত্তা সম্মাসম্বোধিং অধিগচ্ছন্তি, ন গহট্ঠভূতা, তস্মা পণিধানকালে চ পব্বজ্জালিঙ্গং এৰ হি যুত্তরূপং কিঞ্চ গুণসম্পত্তিঅধিট্ঠানভাৰতো.

গুণসম্পত্তীতি অভিঞ্ঞাদিগুণসম্পদা. পব্বজিতস্সাপি হি অট্ঠসমাপত্তিলাভিনো পঞ্চাভিঞ্ঞস্সেৰ পত্থনা সমিজ্ঝতি, ন যথাৰুত্তগুণসম্পত্তিযা ৰিরহিতস্স. কস্মা? পারমিপৰিচযস্স অসমত্থভাৰতো, উপনিস্সযসম্পত্তিযা অভিঞ্ঞাসম্পত্তিযা চ সমন্নাগতত্তা মহাপুরিসা কতাভিনীহারা সযমেৰ পারমী পৰিচেতুং সমত্থা হোন্তি.

অধিকারোতি অধিকো উপকারো. যথাৰুত্তগুণসম্পন্নোপি হি যো অত্তনো জীৰিতম্পি বুদ্ধানং পরিচ্চজিত্ৰা তস্মিং কালে অধিকং উপকারং করোতি, তস্সেৰ অভিনীহারো সমিজ্ঝতি, ন ইতরস্স.

ছন্দতাতি কত্তুকামতাকুসলচ্ছন্দো. যস্স হি যথাৰুত্তধম্মসমন্নাগতস্স বুদ্ধকারকধম্মানং অত্থায মহন্তো ছন্দো মহতী পত্থনা মহতী কত্তুকামতা অত্থি, তস্সেৰ সমিজ্ঝতি, ন ইতরস্স.

তত্রিদং ছন্দমহন্ততায ওপম্মং – যো সকলচক্কৰাল়গব্ভং একোদকীভূতং অত্তনো বাহুবলেনেৰ উত্তরিত্ৰা পারং গন্তুং সমত্থো, সো বুদ্ধত্তং পাপুণাতীতি সুত্ৰা তং দুক্করতো অদহন্তো ‘‘অহং তং উত্তরিত্ৰা পারং গমিস্সামী’’তি ছন্দজাতো হোতি, ন তত্থ সঙ্কোচং আপজ্জতি. তথা যো সকলচক্কৰাল়ং ৰীতচ্চিকানং ৰিগতধূমানং অঙ্গারানং পূরং পাদেহি অক্কমন্তো অতিক্কমিত্ৰা পরভাগং পাপুণিতুং সমত্থো…পে… ন তত্থ সঙ্কোচং আপজ্জতি. তথা যো সকলচক্কৰাল়ং সত্তিসূলেহি সুনিসিতফলেহি নিরন্তরং আকিণ্ণং পাদেহি অক্কমন্তো অতিক্কমিত্ৰা…পে… ন তত্থ সঙ্কোচং আপজ্জতি. তথা যো সকলচক্কৰাল়ং নিরন্তরং ঘনৰেল়ুগুম্বসঞ্ছন্নং কণ্টকলতাৰনগহনং ৰিনিৰিজ্ঝিত্ৰা পরভাগং গন্তুং সমত্থো…পে… ন তত্থ সঙ্কোচং আপজ্জতি. তথা যো ‘‘চত্তারি অসঙ্খ্যেয্যানি সতসহস্সঞ্চ কপ্পে নিরযে পচ্চিত্ৰা বুদ্ধত্তং পত্তব্ব’’ন্তি সুত্ৰা তং দুক্করতো অদহন্তো ‘‘অহং তত্থ পচ্চিত্ৰা বুদ্ধত্তং পাপুণিস্সামী’’তি ছন্দজাতো হোতি, ন তত্থ সঙ্কোচং আপজ্জতীতি এৰমাদিনা নযেন এত্থ ছন্দস্স মহন্তভাৰো ৰেদিতব্বো.

এৰং অট্ঠঙ্গসমন্নাগতো পনাযং অভিনীহারো অত্থতো তেসং অট্ঠন্নং অঙ্গানং সমোধানেন তথাপৰত্তো চিত্তুপ্পাদোতি ৰেদিতব্বো. সো সম্মদেৰ সম্মাসম্বোধিযা পণিধানলক্খণো. ‘‘অহো ৰতাহং অনুত্তরং সম্মাসম্বোধিং অভিসম্বুজ্ঝেয্যং, সব্বসত্তানং হিতসুখং নিপ্ফাদেয্য’’ন্তি এৰমাদিপত্থনারসো, বোধিসম্ভারহেতুভাৰপচ্চুপট্ঠানো, মহাকরুণাপদট্ঠানো, উপনিস্সযসম্পত্তিপদট্ঠানো ৰা. অচিন্তেয্যং বুদ্ধভূমিং অপরিমাণং সত্তলোকহিতঞ্চ আরব্ভ পৰত্তিযা সব্ববুদ্ধকারকধম্মমূলভূতো পরমভদ্দকো পরমকল্যাণো অপরিমেয্যপ্পভাৰো পুঞ্ঞৰিসেসোতি দট্ঠব্বো.

যস্স চ উপ্পত্তিযা সহেৰ মহাপুরিসো মহাবোধিযানপটিপত্তিং ওতিণ্ণো নাম হোতি নিযতভাৰসমধিগমনতো ততো অনিৰত্তনসভাৰত্তা বোধিসত্তোতি সমঞ্ঞং পটিলভতি, সব্বভাৰেন সম্মাসম্বোধিযং সমাসত্তমানসতা বোধিসম্ভারসিক্খাসমত্থতা চস্স সন্তিট্ঠতি. যথাৰুত্তাভিনীহারসমিজ্ঝনেন হি মহাপুরিসা সব্বঞ্ঞুতঞ্ঞাণাধিগমনপুব্বলিঙ্গেন সযম্ভুঞাণেন সম্মদেৰ সব্বপারমিযো পৰিচিনিত্ৰা সমাদায অনুক্কমেন পরিপূরেন্তি. তথা কতমহাভিনীহারো হি সুমেধপণ্ডিতো পটিপজ্জি. যথাহ –

‘‘হন্দ বুদ্ধকরে ধম্মে, ৰিচিনামি ইতো চিতো;

উদ্ধং অধো দস দিসা, যাৰতা ধম্মধাতুযা;

ৰিচিনন্তো তদা দক্খিং, পঠমং দানপারমি’’ন্তি. (বু. ৰং. ২.১১৫-১১৬) –

ৰিত্থারো. তস্স চ অভিনীহারস্স চত্তারো পচ্চযা চত্তারো হেতূ চত্তারি চ বলানি ৰেদিতব্বানি.

তত্থ কতমে চত্তারো পচ্চযা? ইধ মহাপুরিসো পস্সতি তথাগতং মহতা বুদ্ধানুভাৰেন অচ্ছরিযব্ভুতং পাটিহারিযং করোন্তং. তস্স তং নিস্সায তং আরম্মণং কত্ৰা মহাবোধিযং চিত্তং সন্তিট্ঠতি – ‘‘মহানুভাৰা ৰতাযং ধম্মধাতু, যস্সা সুপ্পটিৰিদ্ধত্তা ভগৰা এৰং অচ্ছরিযব্ভুতধম্মো অচিন্তেয্যানুভাৰো চা’’তি. সো তমেৰ মহানুভাৰদস্সনং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি. অযং পঠমো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, অপি চ খো সুণাতি ‘‘এদিসো চ এদিসো চ ভগৰা’’তি. সো তং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি. অযং দুতিযো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, নপি তং পরতো সুণাতি, অপি চ খো তথাগতস্স ধম্মং দেসেন্তস্স ‘‘দসবলসমন্নাগতো, ভিক্খৰে, তথাগতো’’তিআদিনা (সং. নি. ২.২১-২২) বুদ্ধানুভাৰপটিসংযুত্তং ধম্মং সুণাতি. সো তং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি. অযং ততিযো পচ্চযো মহাভিনীহারায.

ন হেৰ খো পস্সতি তথাগতস্স যথাৰুত্তং মহানুভাৰতং, নপি তং পরতো সুণাতি, নপি তথাগতস্স ধম্মং সুণাতি, অপি চ খো উল়ারজ্ঝাসযো কল্যাণাধিমুত্তিকো ‘‘অহমেতং বুদ্ধৰংসং বুদ্ধতন্তিং বুদ্ধপৰেণিং বুদ্ধধম্মতং পরিপালেস্সামী’’তি যাৰদেৰ ধম্মং এৰ সক্করোন্তো গরুকরোন্তো মানেন্তো পূজেন্তো ধম্মং অপচাযমানো তং নিস্সায তং পচ্চযং কত্ৰা সম্বোধিযং অধিমুচ্চন্তো তত্থ চিত্তং ঠপেতি. অযং চতুত্থো পচ্চযো মহাভিনীহারায.

তত্থ কতমে চত্তারো হেতূ মহাভিনীহারায? ইধ মহাপুরিসো পকতিযা উপনিস্সযসম্পন্নোৰ হোতি পুরিমকেসু বুদ্ধেসু কতাধিকারো. অযং পঠমো হেতু মহাভিনীহারায. পুন চপরং মহাপুরিসো পকতিযা করুণাজ্ঝাসযো হোতি করুণাধিমুত্তো সত্তানং দুক্খং অপনেতুকামো অপি চ অত্তনো কাযজীৰিতং পরিচ্চজিত্ৰা. অযং দুতিযো হেতু মহাভিনীহারায. পুন চপরং মহাপুরিসো সকলতোপি ৰট্টদুক্খতো সত্তহিতায চ দুক্করচরিযতো সুচিরম্পি কালং ঘটেন্তো ৰাযমন্তো অনিব্বিন্নো হোতি অনুত্রাসী যাৰ ইচ্ছিতত্থনিপ্ফত্তি. অযং ততিযো হেতু মহাভিনীহারায. পুন চপরং মহাপুরিসো কল্যাণমিত্তসন্নিস্সিতো হোতি, যো অহিততো নিৰারেতি, হিতে পতিট্ঠপেতি. অযং চতুত্থো হেতু মহাভিনীহারায.

তত্রাযং মহাপুরিসস্স উপনিস্সযসম্পদা – একন্তেনেৰস্স যথা অজ্ঝাসযো সম্বোধিনিন্নো হোতি সম্বোধিপোণো সম্বোধিপব্ভারো, তথা সত্তানং হিতচরিযা. যতো চানেন পুরিমবুদ্ধানং সন্তিকে সম্বোধিযা পণিধানং কতং হোতি মনসা ৰাচায চ ‘‘অহম্পি এদিসো সম্মাসম্বুদ্ধো হুত্ৰা সম্মদেৰ সত্তানং হিতসুখং নিপ্ফাদেয্য’’ন্তি. এৰং সম্পন্নূপনিস্সযস্স পনস্স ইমানি উপনিস্সযসম্পত্তিযা লিঙ্গানি ভৰন্তি যেহি সমন্নাগতস্স সাৰকবোধিসত্তেহি চ পচ্চেকবোধিসত্তেহি চ মহাৰিসেসো মহন্তং নানাকরণং পঞ্ঞাযতি ইন্দ্রিযতো পটিপত্তিতো কোসল্লতো চ. ইধ উপনিস্সযসম্পন্নো মহাপুরিসো যথা ৰিসদিন্দ্রিযো হোতি ৰিসদঞাণো, ন তথা ইতরে. পরহিতায পটিপন্নো হোতি, ন অত্তহিতায. তথা হি সো যথা বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং পটিপজ্জতি, ন তথা ইতরে. তত্থ চ কোসল্লং আৰহতি ঠানুপ্পত্তিকপটিভানেন ঠানাঠানকুসলতায চ.

তথা মহাপুরিসো পকতিযা দানজ্ঝাসযো হোতি দানাভিরতো, সতি দেয্যধম্মে দেতি এৰ, ন দানতো সঙ্কোচং আপজ্জতি, সততং সমিতং সংৰিভাগসীলো হোতি, পমুদিতোৰ দেতি আদরজাতো, ন উদাসীনচিত্তো, মহন্তম্পি দানং দত্ৰা ন চ দানেন সন্তুট্ঠো হোতি, পগেৰ অপ্পং, পরেসঞ্চ উস্সাহং জনেন্তো দানে ৰণ্ণং ভাসতি, দানপটিসংযুত্তং ধম্মকথং করোতি, অঞ্ঞে চ পরেসং দেন্তে দিস্ৰা অত্তমনো হোতি, ভযট্ঠানেসু চ পরেসং অভযং দেতীতি এৰমাদীনি দানজ্ঝাসযস্স মহাপুরিসস্স দানপারমিযা লিঙ্গানি.

তথা পাণাতিপাতাদীহি পাপধম্মেহি হিরীযতি ওত্তপ্পতি, সত্তানং অৰিহেঠনজাতিকো হোতি সোরতো সুখসীলো অসঠো অমাযাৰী উজুজাতিকো সুৰচো সোৰচস্সকরণীযেহি ধম্মেহি সমন্নাগতো মুদুজাতিকো অত্থদ্ধো অনতিমানী, পরসন্তকং নাদিযতি অন্তমসো তিণসলাকং উপাদায, অত্তনো হত্থে নিক্খিত্তং ইণং ৰা গহেত্ৰা পরং ন ৰিসংৰাদেতি, পরস্মিং ৰা অত্তনো সন্তকে ব্যামূল়্হে ৰিস্সরিতে ৰা তং সঞ্ঞাপেত্ৰা পটিপাদেতি যথা তং ন পরহত্থগতং হোতি, অলোলুপ্পো হোতি, পরপরিগ্গহেসু পাপকং চিত্তম্পি ন উপ্পাদেতি, ইত্থিব্যসনাদীনি দূরতো পরিৰজ্জেতি, সচ্চৰাদী সচ্চসন্ধো ভিন্নানং সন্ধাতা সহিতানং অনুপ্পদাতা, পিযৰাদী মিহিতপুব্বঙ্গমো পুব্বভাসী অত্থৰাদী ধম্মৰাদী অনভিজ্ঝালু অব্যাপন্নচিত্তো অৰিপরীতদস্সনো, কম্মস্সকতঞাণেন সচ্চানুলোমিকঞাণেন কতঞ্ঞূ কতৰেদী ৰুদ্ধাপচাযী সুৰিসুদ্ধাজীৰো ধম্মকামো পরেপি ধম্মে সমাদপেতা সব্বেন সব্বং অকিচ্চতো সত্তে নিৰারেতা কিচ্চেসু পতিট্ঠপেতা অত্তনা চ তত্থ কিচ্চে যোগং আপজ্জিতা, কত্ৰা ৰা পন সযং অকত্তব্বং সীঘঞ্ঞেৰ ততো পটিৰিরতো হোতীতি এৰমাদীনি সীলজ্ঝাসযস্স মহাপুরিসস্স সীলপারমিযা লিঙ্গানি.

তথা মন্দকিলেসো হোতি মন্দনীৰরণো, পৰিৰেকজ্ঝাসযো অৰিক্খেপবহুলো, ন তস্স পাপকা ৰিতক্কা চিত্তং অন্ৰাস্সৰন্তি, ৰিৰেকগতস্স চস্স অপ্পকসিরেনেৰ চিত্তং সমাধিযতি, অমিত্তপক্খেপি তুৰটং মেত্তচিত্ততা সন্তিট্ঠতি, পগেৰ ইতরস্মিং, সতিমা চ হোতি চিরকতম্পি চিরভাসিতম্পি সরিতা অনুস্সরিতা, মেধাৰী চ হোতি ধম্মোজপঞ্ঞায সমন্নাগতো, নিপকো চ হোতি তাসু তাসু ইতিকত্তব্বতাসু, আরদ্ধৰীরিযো চ হোতি সত্তানং হিতকিরিযাসু, খন্তিবলসমন্নাগতো চ হোতি সব্বসহো, অচলাধিট্ঠানো চ হোতি দল়্হসমাদানো, অজ্ঝুপেক্খকো চ হোতি উপেক্খাঠানীযেসু ধম্মেসূতি এৰমাদীনি মহাপুরিসস্স নেক্খম্মজ্ঝাসযাদীনং ৰসেন নেক্খম্মপারমিআদীনং লিঙ্গানি ৰেদিতব্বানি.

এৰমেতেহি বোধিসম্ভারলিঙ্গেহি সমন্নাগতস্স মহাপুরিসস্স যং ৰুত্তং ‘‘মহাভিনীহারায কল্যাণমিত্তসন্নিস্সযো হেতূ’’তি. তত্রিদং সঙ্খেপতো কল্যাণমিত্তলক্খণং – ইধ কল্যাণমিত্তো সদ্ধাসম্পন্নো হোতি সীলসম্পন্নো সুতসম্পন্নো চাগসম্পন্নো ৰীরিযসম্পন্নো সতিসম্পন্নো সমাধিসম্পন্নো পঞ্ঞাসম্পন্নো. তত্থ সদ্ধাসম্পত্তিযা সদ্দহতি তথাগতস্স বোধিং কম্মফলঞ্চ, তেন সম্মাসম্বোধিযা হেতুভূতং সত্তেসু হিতেসিতং ন পরিচ্চজতি, সীলসম্পত্তিযা সত্তানং পিযো হোতি মনাপো গরু ভাৰনীযো চোদকো পাপগরহী ৰত্তা ৰচনক্খমো, সুতসম্পত্তিযা সত্তানং হিতসুখাৰহং গম্ভীরং ধম্মকথং কত্তা হোতি, চাগসম্পত্তিযা অপ্পিচ্ছো হোতি সন্তুট্ঠো পৰিৰিত্তো অসংসট্ঠো, ৰীরিযসম্পত্তিযা আরদ্ধৰীরিযো হোতি সত্তানং হিতপটিপত্তিযং, সতিসম্পত্তিযা উপট্ঠিতসতি হোতি অনৰজ্জধম্মেসু, সমাধিসম্পত্তিযা অৰিক্খিত্তো হোতি সমাহিতচিত্তো, পঞ্ঞাসম্পত্তিযা অৰিপরীতং পজানাতি, সো সতিযা কুসলাকুসলানং ধম্মানং গতিযো সমন্ৰেসমানো পঞ্ঞায সত্তানং হিতাহিতং যথাভূতং জানিত্ৰা সমাধিনা তত্থ একগ্গচিত্তো হুত্ৰা ৰীরিযেন অহিতা সত্তে নিসেধেত্ৰা হিতে নিযোজেতি. তেনাহ –

‘‘পিযো গরু ভাৰনীযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজকো’’তি. (অ. নি. ৭.৩৭; নেত্তি. ১১৩) –

এৰং গুণসমন্নাগতঞ্চ কল্যাণমিত্তং উপনিস্সায মহাপুরিসো অত্তনো উপনিস্সযসম্পত্তিং সম্মদেৰ পরিযোদপেতি. সুৰিসুদ্ধাসযপযোগো চ হুত্ৰা চতূহি বলেহি সমন্নাগতো ন চিরেনেৰ অট্ঠঙ্গে সমোধানেত্ৰা মহাভিনীহারং করোন্তো বোধিসত্তভাৰে পতিট্ঠহতি অনিৰত্তিধম্মো নিযতো সম্বোধিপরাযনো.

তস্সিমানি চত্তারি বলানি. অজ্ঝত্তিকবলং যা সম্মাসম্বোধিযং অত্তসন্নিস্সযা ধম্মগারৰেন অভিরুচি একন্তনিন্নজ্ঝাসযতা, যায মহাপুরিসো অত্তাধিপতি লজ্জাপস্সযো অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. বাহিরবলং যা সম্মাসম্বোধিযং পরসন্নিস্সযা অভিরুচি একন্তনিন্নজ্ঝাসযতা, যায মহাপুরিসো লোকাধিপতি মানাপস্সযো অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. উপনিস্সযবলং যা সম্মাসম্বোধিযং উপনিস্সযসম্পত্তিযা অভিরুচি একন্তনিন্নজ্ঝাসযতা, যায মহাপুরিসো তিক্খিন্দ্রিযো ৰিসদধাতুকো সতিসন্নিস্সযো অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি. পযোগবলং যা সম্মাসম্বোধিযং তজ্জা পযোগসম্পদা সক্কচ্চকারিতা সাতচ্চকারিতা, যায মহাপুরিসো ৰিসুদ্ধপযোগো নিরন্তরকারী অভিনীহারসম্পন্নো চ হুত্ৰা পারমিযো পূরেত্ৰা সম্মাসম্বোধিং পাপুণাতি.

এৰমযং চতূহি পচ্চযেহি চতূহি হেতূহি চতূহি চ বলেহি সম্পন্নসমুদাগমো অট্ঠঙ্গসমোধানসম্পাদিতো অভিনীহারো পারমীনং পচ্চযো মূলকারণভাৰতো. যস্স চ পৰত্তিযা মহাপুরিসে চত্তারো অচ্ছরিযা অব্ভুতা ধম্মা পতিট্ঠহন্তি, সব্বসত্তনিকাযং অত্তনো ওরসপুত্তং ৰিয পিযচিত্তেন পরিগ্গণ্হাতি. ন চস্স চিত্তং পুত্তসংকিলেসৰসেন সংকিলিস্সতি. সত্তানং হিতসুখাৰহো চস্স অজ্ঝাসযো পযোগো চ হোতি. অত্তনো চ বুদ্ধকারকধম্মা উপরূপরি ৰড্ঢন্তি পরিপচ্চন্তি চ. যতো চ মহাপুরিসো উল়ারতমেন পুঞ্ঞাভিসন্দেন কুসলাভিসন্দেন পৰত্তিযা পচ্চযেন সুখস্সাহারেন সমন্নাগতো সত্তানং দক্খিণেয্যো উত্তমগারৰট্ঠানং অসদিসং পুঞ্ঞক্খেত্তঞ্চ হোতি. এৰমনেকগুণো অনেকানিসংসো মহাভিনীহারো পারমীনং পচ্চযোতি ৰেদিতব্বো.

যথা চ অভিনীহারো, এৰং মহাকরুণা উপাযকোসল্লঞ্চ. তত্থ উপাযকোসল্লং নাম দানাদীনং বোধিসম্ভারভাৰস্স নিমিত্তভূতা পঞ্ঞা, যাহি মহাকরুণূপাযকোসল্লতাহি মহাপুরিসানং অত্তসুখনিরপেক্খতা নিরন্তরং পরহিতকরণপসুততা সুদুক্করেহিপি মহাবোধিসত্তচরিতেহি ৰিসাদাভাৰো পসাদসম্বুদ্ধিদস্সনসৰনানুস্সরণকালেসুপি সত্তানং হিতসুখপ্পটিলাভহেতুভাৰো চ সম্পজ্জতি. তথা হিস্স পঞ্ঞায বুদ্ধভাৰসিদ্ধি, করুণায বুদ্ধকম্মসিদ্ধি, পঞ্ঞায সযং তরতি, করুণায পরে তারেতি, পঞ্ঞায পরদুক্খং পরিজানাতি, করুণায পরদুক্খপতিকারং আরভতি, পঞ্ঞায চ দুক্খে নিব্বিন্দতি, করুণায দুক্খং সম্পটিচ্ছতি, তথা পঞ্ঞায নিব্বানাভিমুখো হোতি, করুণায ৰট্টং পাপুণাতি, তথা করুণায সংসারাভিমুখো হোতি, পঞ্ঞায তত্র নাভিরমতি, পঞ্ঞায চ সব্বত্থ ৰিরজ্জতি, করুণানুগতত্তা ন চ ন সব্বেসং অনুগ্গহায পৰত্তো, করুণায সব্বেপি অনুকম্পতি, পঞ্ঞানুগতত্তা ন চ ন সব্বত্থ ৰিরত্তচিত্তো, পঞ্ঞায চ অহংকারমমংকারাভাৰো, করুণায আলসিযদীনতাভাৰো, তথা পঞ্ঞাকরুণাহি যথাক্কমং অত্তপরনাথতা ধীরৰীরভাৰো, অনত্তন্তপঅপরন্তপতা, অত্তহিতপরহিতনিপ্ফত্তি, নিব্ভযাভিংসনকভাৰো, ধম্মাধিপতিলোকাধিপতিতা, কতঞ্ঞুপুব্বকারিভাৰো, মোহতণ্হাৰিগমো, ৰিজ্জাচরণসিদ্ধি, বলৰেসারজ্জনিপ্ফত্তীতি সব্বস্সাপি পারমিতাফলস্স ৰিসেসেন উপাযভাৰতো পঞ্ঞাকরুণা পারমীনং পচ্চযো. ইদঞ্চ দ্ৰযং পারমীনং ৰিয পণিধানস্সাপি পচ্চযো.

তথা উস্সাহউম্মঙ্গঅৰত্থানহিতচরিযা চ পারমীনং পচ্চযাতি ৰেদিতব্বা, যা বুদ্ধভাৰস্স উপ্পত্তিট্ঠানতায বুদ্ধভূমিযোতি ৰুচ্চন্তি. তত্থ উস্সাহো নাম বোধিসম্ভারানং অব্ভুস্সহনৰীরিযং. উম্মঙ্গো নাম বোধিসম্ভারেসু উপাযকোসল্লভূতা পঞ্ঞা. অৰত্থানং নাম অধিট্ঠানং অচলাধিট্ঠানতা. হিতচরিযা নাম মেত্তাভাৰনা করুণাভাৰনা চ.

তথা নেক্খম্মপৰিৰেকঅলোভাদোসামোহনিস্সরণপ্পভেদা ছ অজ্ঝাসযা. নেক্খম্মজ্ঝাসযা হি বোধিসত্তা হোন্তি কামেসু ঘরাৰাসে চ দোসদস্সাৰিনো, তথা পৰিৰেকজ্ঝাসযা সঙ্গণিকায দোসদস্সাৰিনো, অলোভজ্ঝাসযা লোভে দোসদস্সাৰিনো, অদোসজ্ঝাসযা দোসে দোসদস্সাৰিনো, অমোহজ্ঝাসযা মোহে দোসদস্সাৰিনো, নিস্সরণজ্ঝাসযা সব্বভৰেসু দোসদস্সাৰিনোতি. তস্মা এতে বোধিসত্তানং ছ অজ্ঝাসযা দানাদীনং পারমীনং পচ্চযাতি ৰেদিতব্বা. ন হি লোভাদীসু আদীনৰদস্সনেন অলোভাদীনং অধিকভাৰেন চ ৰিনা দানাদিপারমিযো সম্ভৰন্তি, অলোভাদীনঞ্হি অধিকভাৰেন পরিচ্চাগাদিনিন্নচিত্ততা অলোভজ্ঝাসযাদিতাতি ৰেদিতব্বা.

যথা চেতে এৰং দানজ্ঝাসযতাদযোপি বোধিযা চরন্তানং বোধিসত্তানং দানাদিপারমীনং পচ্চযো. দানজ্ঝাসযতায হি বোধিসত্তা তপ্পটিপক্খে মচ্ছেরে দোসদস্সাৰিনো হুত্ৰা সম্মদেৰ দানপারমিং পরিপূরেন্তি. সীলজ্ঝাসযতায দুস্সীল্যে দোসদস্সাৰিনো হুত্ৰা সম্মদেৰ সীলপারমিং পরিপূরেন্তি. নেক্খম্মজ্ঝাসযতায কামেসু ঘরাৰাসে চ, যথাভূতঞাণজ্ঝাসযতায অঞ্ঞাণে ৰিচিকিচ্ছায চ, ৰীরিযজ্ঝাসযতায কোসজ্জে, খন্তিযজ্ঝাসযতায অক্খন্তিযং, সচ্চজ্ঝাসযতায ৰিসংৰাদে, অধিট্ঠানজ্ঝাসযতায অনধিট্ঠানে, মেত্তাজ্ঝাসযতায ব্যাপাদে, উপেক্খাজ্ঝাসযতায লোকধম্মেসু আদীনৰদস্সাৰিনো হুত্ৰা সম্মদেৰ নেক্খম্মাদিপারমিযো পরিপূরেন্তি. দানজ্ঝাসযতাদযো দানাদিপারমীনং নিপ্ফত্তিকারণত্তা পচ্চযো.

তথা অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযো. তত্থাযং পচ্চৰেক্খণাৰিধিখেত্তৰত্থুহিরঞ্ঞসুৰণ্ণগোমহিংসদাসিদাসপুত্তদারাদিপরিগ্গহব্যাসত্তচিত্তানং সত্তানং খেত্তাদীনং ৰত্থুকামভাৰেন বহুপত্থনীযভাৰতো রাজচোরাদিসাধারণভাৰতো ৰিৰাদাধিট্ঠানতো সপত্তকরণতো নিস্সারতো পটিলাভপরিপালনেসু পরৰিহেঠনহেতুতো ৰিনাসনিমিত্তঞ্চ সোকাদিঅনেকৰিহিতব্যসনাৰহতো তদাসত্তিনিদানঞ্চ মচ্ছেরমলপরিযুট্ঠিতচিত্তানং অপাযূপপত্তিহেতুভাৰতোতি এৰং ৰিৰিধৰিপুলানত্থাৰহানি পরিগ্গহৰত্থূনি নাম. তেসং পরিচ্চাগোযেৰ একো সোত্থিভাৰোতি পরিচ্চাগে অপ্পমাদো করণীযো.

অপি চ যাচকো যাচমানো অত্তনো গুয্হস্স আচিক্খনতো ‘‘ময্হং ৰিস্সাসিকো’’তি চ, ‘‘পহায গমনীযমত্তনো সন্তকং গহেত্ৰা পরলোকং যাহীতি ময্হং উপদেসকো’’তি চ, ‘‘আদিত্তে ৰিয অগারে মরণগ্গিনা আদিত্তে লোকে ততো ময্হং সন্তকস্স অপৰাহকসহাযো’’তি চ, ‘‘অপৰাহিতস্স চস্স অঝাপননিক্খেপট্ঠানভূতো’’তি চ দানসঙ্খাতে কল্যাণকম্মস্মিং সহাযভাৰতো সব্বসম্পত্তীনং অগ্গভূতায পরমদুল্লভায বুদ্ধভূমিযা সম্পত্তিহেতুভাৰতো চ ‘‘পরমো কল্যাণমিত্তো’’তি চ পচ্চৰেক্খিতব্বং.

তথা ‘‘উল়ারে কম্মনি অনেনাহং সম্ভাৰিতো, তস্মা সা সম্ভাৰনা অৰিতথা কাতব্বা’’তি চ, ‘‘একন্তভেদিতায জীৰিতস্স অযাচিতেনাপি মযা দাতব্বং, পগেৰ যাচিতেনা’’তি চ, ‘‘উল়ারজ্ঝাসযেহি গৰেসিত্ৰাপি দাতব্বতো সযমেৰাগতো মম পুঞ্ঞেনা’’তি চ ‘‘যাচকস্স দানাপদেসেন ময্হমেৰাযমনুগ্গহো’’তি চ, ‘‘অহং ৰিয অযং সব্বোপি লোকো মযা অনুগ্গহেতব্বো’’তি চ, ‘‘অসতি যাচকে কথং ময্হং দানপারমী পূরেয্যা’’তি চ, ‘‘যাচকানমেৰ চত্থায মযা সব্বো পরিগ্গহেতব্বো’’তি চ, ‘‘মং অযাচিত্ৰাৰ মম সন্তকং যাচকা কদা সযমেৰ গণ্হেয্যু’’ন্তি চ, ‘‘কথমহং যাচকানং পিযো চস্সং মনাপো’’তি চ, ‘‘কথং ৰা তে ময্হং পিযা চস্সু মনাপা’’তি চ, ‘‘কথং ৰাহং দদমানো দত্ৰাপি চ অত্তমনো চস্সং পমুদিতো পীতিসোমনস্সজাতো’’তি চ, ‘‘কথং ৰা মে যাচকা ভৰেয্যুং উল়ারো চ দানজ্ঝাসযো’’তি চ, ‘‘কথং ৰাহমযাচিতো এৰ যাচকানং হদযমঞ্ঞায দদেয্য’’ন্তি চ, ‘‘সতি ধনে যাচকে চ অপরিচ্চাগো মহতী ময্হং ৰঞ্চনা’’তি চ, ‘‘কথং ৰাহং অত্তনো অঙ্গানি জীৰিতং ৰাপি যাচকানং পরিচ্চজেয্য’’ন্তি চ পরিচ্চাগনিন্নতা উপট্ঠপেতব্বা. অপি চ ‘‘অত্থো নামাযং নিরপেক্খং দাযকমনুগচ্ছতি, যথা তং নিরপেক্খং খেপকং কিটকো’’তি চ অত্থে নিরপেক্খতায চিত্তং উপ্পাদেতব্বং.

যাচমানো পন যদি পিযপুগ্গলো হোতি, ‘‘পিযো মং যাচতী’’তি সোমনস্সং উপ্পাদেতব্বং. অথ উদাসীনপুগ্গলো হোতি, ‘‘অযং মং যাচমানো অদ্ধা ইমিনা পরিচ্চাগেন মিত্তো হোতী’’তি সোমনস্সং উপ্পাদেতব্বং. দদন্তোপি হি যাচকানং পিযো হোতীতি. অথ পন ৰেরী পুগ্গলো যাচতি, ‘‘পচ্চত্থিকো মং যাচতি, অযং মং যাচমানো অদ্ধা ইমিনা পরিচ্চাগেন ৰেরী পিযো মিত্তো হোতী’’তি ৰিসেসেন সোমনস্সং উপ্পাদেতব্বং. এৰং পিযপুগ্গলে ৰিয মজ্ঝত্তৰেরিপুগ্গলেসুপি মেত্তাপুব্বঙ্গমং করুণং উপট্ঠপেত্ৰাৰ দাতব্বং.

সচে পনস্স চিরকালপরিভাৰিতত্তা লোভস্স দেয্যধম্মৰিসযা লোভধম্মা উপ্পজ্জেয্যুং, তেন বোধিসত্তপটিঞ্ঞেন ইতি পটিসঞ্চিক্খিতব্বং ‘‘ননু তযা সপ্পুরিসসম্বোধায অভিনীহারং করোন্তেন সব্বসত্তানং উপকারত্থায অযং কাযো নিস্সট্ঠো তপ্পরিচ্চাগমযঞ্চ পুঞ্ঞং, তত্থ নাম তে বাহিরেপি ৰত্থুস্মিং অভিসঙ্গপ্পৰত্তি হত্থিসিনানসদিসী হোতি, তস্মা তযা ন কত্থচি সঙ্গো উপ্পাদেতব্বো. সেয্যথাপি নাম মহতো ভেসজ্জরুক্খস্স তিট্ঠতো মূলং মূলত্থিকা হরন্তি, পপটিকং তচং খন্ধং ৰিটপং সারং সাখং পলাসং পুপ্ফং ফলং ফলত্থিকা হরন্তি, ন তস্স রুক্খস্স ‘ময্হং সন্তকং এতে হরন্তী’তি ৰিতক্কসমুদাচারো হোতি, এৰমেৰ সব্বলোকহিতায উস্সুক্কমাপজ্জন্তেন মযা মহাদুক্খে অকতঞ্ঞুকে নিচ্চাসুচিম্হি কাযে পরেসং উপকারায ৰিনিযুজ্জমানে অণুমত্তোপি মিচ্ছাৰিতক্কো ন উপ্পাদেতব্বো. কো ৰা এত্থ ৰিসেসো অজ্ঝত্তিকবাহিরেসু মহাভূতেসু একন্তভেদনৰিকিরণৰিদ্ধংসনধম্মেসু, কেৰলং পন সম্মোহৰিজম্ভিতমেতং, যদিদং এতং মম এসোহমস্মি এসো মে অত্তাতি অভিনিৰেসো. তস্মা বাহিরেসু ৰিয অজ্ঝত্তিকেসুপি করচরণনযনাদীসু মংসাদীসু চ অনপেক্খেন হুত্ৰা ‘তং তদত্থিকা হরন্তূ’তি নিস্সট্ঠচিত্তেন ভৰিতব্ব’’ন্তি.

এৰং পটিসঞ্চিক্খতো চস্স সম্বোধায পহিতত্তস্স কাযজীৰিতেসু নিরপেক্খস্স অপ্পকসিরেনেৰ কাযৰচীমনোকম্মানি সুৰিসুদ্ধানি হোন্তি. সো সুৰিসুদ্ধকাযৰচীমনোকম্মন্তো ৰিসুদ্ধাজীৰো ঞাযপটিপত্তিযং ঠিতো অপাযুপাযকোসল্লসমন্নাগমেন ভিয্যোসোমত্তায দেয্যধম্মপরিচ্চাগেন অভযদানসদ্ধম্মদানেহি চ সব্বসত্তে অনুগ্গণ্হিতুং সমত্থো হোতীতি অযং তাৰ দানপারমিযং পচ্চৰেক্খণানযো.

সীলপারমিযং পন এৰং পচ্চৰেক্খিতব্বং – ইদঞ্হি সীলং নাম গঙ্গোদকাদীহি ৰিসোধেতুং অসক্কুণেয্যস্স দোসমলস্স ৰিক্খালনজলং, হরিচন্দনাদীহি ৰিনেতুং অসক্কুণেয্যস্স রাগাদিপরিল়াহস্স ৰিনযনং, হারমকুটকুণ্ডলাদীহি পচুরজনালঙ্কারেহি অসাধারণো সাধূনং অলঙ্কারৰিসেসো, সব্বদিসাৰাযনতো অকিত্তিমো সব্বকালানুরূপো চ সুরভিগন্ধো, খত্তিযমহাসালাদীহি দেৰতাহি চ ৰন্দনীযাদিভাৰাৰহনতো পরমো ৰসীকরণমন্তো, চাতুমহারাজিকাদিদেৰলোকারোহণসোপানপন্তি, ঝানাভিঞ্ঞানং অধিগমূপাযো, নিব্বানমহানগরস্স সম্পাপকমগ্গো, সাৰকবোধিপচ্চেকবোধিসম্মাসম্বোধীনং পতিট্ঠানভূমি, যং যং ৰা পনিচ্ছিতং পত্থিতং, তস্স তস্স সমিজ্ঝনূপাযভাৰতো চিন্তামণিকপ্পরুক্খাদিকে চ অতিসেতি.

ৰুত্তঞ্চেতং ভগৰতা – ‘‘ইজ্ঝতি, ভিক্খৰে, সীলৰতো চেতোপণিধিৰিসুদ্ধত্তা’’তি (দী. নি. ৩.৩৩৭; অ. নি. ৮.৩৫). অপরম্পি ৰুত্তং – ‘‘আকঙ্খেয্য চে, ভিক্খৰে, ভিক্খু ‘সব্রহ্মচারীনং পিযো চ অস্সং মনাপো চ গরু চ ভাৰনীযো চা’তি, সীলেস্ৰেৰস্স পরিপূরকারী’’তিআদি (ম. নি. ১.৬৫). তথা ‘‘অৰিপ্পটিসারত্থানি খো, আনন্দ, কুসলানি সীলানী’’তি (অ. নি. ১১.১). ‘‘পঞ্চিমে, গহপতযো, আনিসংসা সীলৰতো সীলসম্পদাযা’’তিআদিসুত্তানঞ্চ (দী. নি. ২.১৫০; ৩.৩১৬; অ. নি. ৫.২১৩; মহাৰ. ২৮৫) ৰসেন সীলস্স গুণা পচ্চৰেক্খিতব্বা. তথা অগ্গিক্খন্ধোপমসুত্তাদীনং (অ. নি. ৭.৭২) ৰসেন সীলৰিরহে আদীনৰা. পীতিসোমনস্সনিমিত্ততো অত্তানুৰাদপরাপৰাদদণ্ডদুগ্গতিভযাভাৰতো ৰিঞ্ঞূহি পাসংসভাৰতো অৰিপ্পটিসারহেতুতো সোত্থিট্ঠানতো অতিজনসাপতেয্যাধিপতেয্যাযুরূপট্ঠানবন্ধুমিত্তসম্পত্তীনং অতিসযনতো চ সীলং পচ্চৰেক্খিতব্বং. সীলৰতো হি অত্তনো সীলসম্পদাহেতু মহন্তং পীতিসোমনস্সং উপ্পজ্জতি – ‘‘কতং ৰত মযা কুসলং, কতং কল্যাণং, কতং ভীরুত্তাণ’’ন্তি.

তথা সীলৰতো অত্তা ন উপৰদতি, ন পরে ৰিঞ্ঞূ, দণ্ডদুগ্গতিভযানং সম্ভৰো এৰ নত্থি. ‘‘সীলৰা পুরিসপুগ্গলো কল্যাণধম্মো’’তি ৰিঞ্ঞূনং পাসংসো হোতি. তথা সীলৰতো য্ৰাযং ‘‘কতং ৰত মযা পাপং, কতং লুদ্দকং, কতং কিব্বিস’’ন্তি দুস্সীলস্স ৰিপ্পটিসারো উপ্পজ্জতি, সো ন হোতি. সীলঞ্চ নামেতং অপ্পমাদাধিট্ঠানতো ভোগব্যসনাদিপরিহারমুখেন মহতো অত্থস্স সাধনতো মঙ্গলভাৰতো চ পরমং সোত্থিট্ঠানং, নিহীনজচ্চোপি সীলৰা খত্তিযমহাসালাদীনং পূজনীযো হোতীতি কুলসম্পত্তিং অতিসেতি সীলসম্পদা, ‘‘তং কিং মঞ্ঞসি, মহারাজ? ইধ তে অস্স দাসো কম্মকরো’’তিআদিৰচনঞ্চেত্থ (দী. নি. ১.১৮৬) সাধকং. চোরাদীহি অসাধারণতো পরলোকানুগমনতো মহপ্ফলভাৰতো সমথাদিগুণাধিট্ঠানতো চ বাহিরধনং অতিসেতি সীলং. পরমস্স চিত্তিস্সরিযস্স অধিট্ঠানভাৰতো খত্তিযাদীনং ইস্সরিযং অতিসেতি সীলং. সীলনিমিত্তঞ্হি তংতংসত্তনিকাযেসু সত্তানং ইস্সরিযং, ৰস্সসতদীঘপ্পমাণতো জীৰিততো একাহম্পি সীলৰতো জীৰিতস্স ৰিসিট্ঠতাৰচনতো সতি চ জীৰিতে সিক্খানিক্খিপনস্স মরণতাৰচনতো সীলং জীৰিততো ৰিসিট্ঠতরং. ৰেরীনম্পি মনুঞ্ঞভাৰাৰহনতো জরারোগৰিপত্তীহি অনভিভৰনীযতো চ রূপসম্পত্তিং অতিসেতি সীলং. পাসাদহম্মিযাদিট্ঠানৰিসেসে রাজযুৰরাজসেনাপতিআদিট্ঠানৰিসেসে চ অতিসেতি সীলং সুখৰিসেসাধিট্ঠানভাৰতো. সভাৰসিনিদ্ধে সন্তিকাৰচরেপি বন্ধুজনে মিত্তজনে চ অতিসেতি একন্তহিতসম্পাদনতো পরলোকানুগমনতো চ ‘‘ন তং মাতাপিতা কযিরা’’তিআদিৰচনঞ্চেত্থ (ধ. প. ৪৩) সাধকং. তথা হত্থিঅস্সরথপত্তিবলকাযেহি মন্তাগদসোত্থানপ্পযোগেহি চ দুরারক্খং অত্তানং আরক্খাভাৰেন সীলমেৰ ৰিসিট্ঠতরং অত্তাধীনতো অপরাধীনতো মহাৰিসযতো চ. তেনেৰাহ – ‘‘ধম্মো হৰে রক্খতি ধম্মচারি’’ন্তিআদি (জা. ১.১০.১০২). এৰমনেকগুণসমন্নাগতং সীলন্তি পচ্চৰেক্খন্তস্স অপরিপুণ্ণা চেৰ সীলসম্পদা পারিপূরিং গচ্ছতি অপরিসুদ্ধা চ পারিসুদ্ধিং.

সচে পনস্স দীঘরত্তং পরিচযেন সীলপটিপক্খা ধম্মা দোসাদযো অন্তরন্তরা উপ্পজ্জেয্যুং, তেন বোধিসত্তপটিঞ্ঞেন এৰং পটিসঞ্চিক্খিতব্বং – ননু তযা সম্বোধায পণিধানং কতং, সীলৰিকলেন চ ন সক্কা লোকিযাপি সম্পত্তিযো পাপুণিতুং, পগেৰ লোকুত্তরা, সব্বসম্পত্তীনং পন অগ্গভূতায সম্মাসম্বোধিযা অধিট্ঠানভূতেন সীলেন পরমুক্কংসগতেন ভৰিতব্বং, তস্মা ‘‘কিকীৰ অণ্ড’’ন্তিআদিনা (ৰিসুদ্ধি. ১.১৯; দী. নি. অট্ঠ. ১.৭) ৰুত্তনযেন সম্মা সীলং রক্খন্তেন সুট্ঠুতরং তযা পেসলেন ভৰিতব্বং.

অপি চ তযা ধম্মদেসনায যানত্তযে সত্তানং অৰতারণপরিপাচনানি কাতব্বানি, সীলৰিকলস্স চ ৰচনং ন পচ্চেতব্বং হোতি, অসপ্পাযাহারৰিচারস্স ৰিয ৰেজ্জস্স তিকিচ্ছনং, তস্মা কথাহং সদ্ধেয্যো হুত্ৰা সত্তানং অৰতারণপরিপাচনানি করেয্যন্তি সভাৰপরিসুদ্ধসীলেন ভৰিতব্বং. কিঞ্চ ঝানাদিগুণৰিসেসযোগেন মে সত্তানং উপকারকরণসমত্থতা পঞ্ঞাপারমিআদিপরিপূরণঞ্চ, ঝানাদযো চ গুণা সীলপারিসুদ্ধিং ৰিনা ন সম্ভৰন্তীতি সম্মদেৰ সীলং পরিসোধেতব্বং.

তথা ‘‘সম্বাধো ঘরাৰাসো রজোপথো’’তিআদিনা (দী. নি. ১.১৯১; সং. নি. ২.১৫৪; ম. নি. ১.২৯১; ২.১০) ঘরাৰাসে, ‘‘অট্ঠিকঙ্কলূপমা কামা’’তিআদিনা (ম. নি. ১.২৩৪; পাচি. ১৭৫) ‘‘মাতাপি পুত্তেন ৰিৰদতী’’তিআদিনা (ম. নি. ১.১৭৮) চ কামেসু, ‘‘সেয্যথাপি পুরিসো ইণং আদায কম্মন্তে পযোজেয্যা’’তিআদিনা (দী. নি. ১.২১৮) কামচ্ছন্দাদীসু আদীনৰদস্সনপুব্বঙ্গমা ৰুত্তৰিপরিযাযেন ‘‘অব্ভোকাসো পব্বজ্জা’’তিআদিনা (দী. নি. ১.১৯১; সং. নি. ২.১৫৪) পব্বজ্জাদীসু আনিসংসপটিসঙ্খাৰসেন নেক্খম্মপারমিযং পচ্চৰেক্খণা ৰেদিতব্বা. অযমেত্থ সঙ্খেপো, ৰিত্থারো পন দুক্খক্খন্ধ- (ম. নি. ১.১৬৩ আদযো) আসিৰিসোপমসুত্তা- (সং. নি. ৪.২৩৮) দিৰসেন ৰেদিতব্বো.

তথা ‘‘পঞ্ঞায ৰিনা দানাদযো ধম্মা ন ৰিসুজ্ঝন্তি, যথাসকং ব্যাপারসমত্থা চ ন হোন্তী’’তি পঞ্ঞাগুণা মনসিকাতব্বা. যথেৰ হি জীৰিতেন ৰিনা সরীরযন্তং ন সোভতি, ন চ অত্তনো কিরিযাসু পটিপত্তিসমত্থং হোতি, যথা চ চক্খাদীনি ইন্দ্রিযানি ৰিঞ্ঞাণেন ৰিনা যথাসকং ৰিসযেসু কিচ্চং কাতুং নপ্পহোন্তি, এৰং সদ্ধাদীনি ইন্দ্রিযানি পঞ্ঞায ৰিনা সকিচ্চপটিপত্তিযং অসমত্থানীতি পরিচ্চাগাদিপটিপত্তিযং পঞ্ঞা পধানকারণং. উম্মীলিতপঞ্ঞাচক্খুকা হি মহাবোধিসত্তা অত্তনো অঙ্গপচ্চঙ্গানিপি দত্ৰা অনত্তুক্কংসকা অপরৰম্ভকা চ হোন্তি, ভেসজ্জরুক্খা ৰিয ৰিকপ্পরহিতা কালত্তযেপি সোমনস্সজাতা. পঞ্ঞাৰসেন হি উপাযকোসল্লযোগতো পরিচ্চাগো পরহিতপ্পৰত্তিযা দানপারমিভাৰং উপেতি. অত্তত্থঞ্হি দানং ৰড্ঢিসদিসং হোতি.

তথা পঞ্ঞায অভাৰেন তণ্হাদিসংকিলেসাৰিযোগতো সীলস্স ৰিসুদ্ধি এৰ ন সম্ভৰতি, কুতো সব্বঞ্ঞুগুণাধিট্ঠানভাৰো. পঞ্ঞৰা এৰ চ ঘরাৰাসে কামগুণেসু সংসারে চ আদীনৰং পব্বজ্জায ঝানসমাপত্তিযং নিব্বানে চ আনিসংসং সুট্ঠু সল্লক্খেন্তো পব্বজিত্ৰা ঝানসমাপত্তিযো নিব্বত্তেত্ৰা নিব্বানাভিমুখো পরে চ তত্থ পতিট্ঠাপেতি. ৰীরিযঞ্চ পঞ্ঞাৰিরহিতং যথিচ্ছিতমত্থং ন সাধেতি দুরারম্ভভাৰতো. ৰরমেৰ হি অনারম্ভো দুরারম্ভতো, পঞ্ঞাসহিতেন পন ৰীরিযেন ন কিঞ্চি দুরধিগমং উপাযপটিপত্তিতো. তথা পঞ্ঞৰা এৰ পরাপকারাদীনং অধিৰাসকজাতিকো হোতি, ন দুপ্পঞ্ঞো. পঞ্ঞাৰিরহিতস্স চ পরেহি উপনীতা অপকারা খন্তিযা পটিপক্খমেৰ অনুব্রূহেন্তি, পঞ্ঞৰতো পন তে খন্তিসম্পত্তিযা পরিব্রূহনৰসেন অস্সা থিরভাৰায সংৰত্তন্তি. পঞ্ঞৰা এৰ তীণিপি সচ্চানি নেসং কারণানি পটিপক্খে চ যথাভূতং জানিত্ৰা পরেসং অৰিসংৰাদকো হোতি.

তথা পঞ্ঞাবলেন অত্তানং উপত্থম্ভেত্ৰা ধিতিসম্পদায সব্বপারমীসু অচলসমাদানাধিট্ঠানো হোতি. পঞ্ঞৰা এৰ চ পিযমজ্ঝত্তৰেরিৰিভাগং অকত্ৰা সব্বত্থ হিতূপসংহারকুসলো হোতি. তথা পঞ্ঞাৰসেন লাভালাভাদিলোকধম্মসন্নিপাতে নিব্বিকারতায মজ্ঝত্তো হোতি. এৰং সব্বাসং পারমীনং পঞ্ঞাৰ পারিসুদ্ধিহেতূতি পঞ্ঞাগুণা পচ্চৰেক্খিতব্বা. অপি চ পঞ্ঞায ৰিনা ন দস্সনসম্পত্তি, অন্তরেন চ দিট্ঠিসম্পদং ন সীলসম্পদা, সীলদিট্ঠিসম্পদাৰিরহিতস্স ন সমাধিসম্পদা, অসমাহিতেন চ ন সক্কা অত্তহিতমত্তম্পি সাধেতুং, পগেৰ উক্কংসগতং পরহিতন্তি পরহিতায পটিপন্নেন ‘‘ননু তযা সক্কচ্চং পঞ্ঞায পরিৰুদ্ধিযং আযোগো করণীযো’’তি বোধিসত্তেন অত্তা ওৰদিতব্বো. পঞ্ঞানুভাৰেন হি মহাসত্তো চতুরধিট্ঠানাধিট্ঠিতো চতূহি সঙ্গহৰত্থূহি লোকং অনুগ্গণ্হন্তো সত্তে নিয্যানমগ্গে অৰতারেতি, ইন্দ্রিযানি চ নেসং পরিপাচেতি.

তথা পঞ্ঞাবলেন খন্ধাযতনাদীসু পৰিচযবহুলোপৰত্তিনিৰত্তিযো যাথাৰতো পরিজানন্তো দানাদযো গুণে ৰিসেসনিব্বেধভাগিযভাৰং নযন্তো বোধিসত্তসিক্খায পরিপূরকারী হোতীতি এৰমাদিনা অনেকাকারৰোকারে পঞ্ঞাগুণে ৰৰত্থপেত্ৰা পঞ্ঞাপারমী অনুব্রূহেতব্বা.

তথা দিস্সমানানিপি লোকিযানি কম্মানি নিহীনৰীরিযেন পাপুণিতুং অসক্কুণেয্যানি, অগণিতখেদেন পন আরদ্ধৰীরিযেন দুরধিগমং নাম নত্থি. নিহীনৰীরিযো হি ‘‘সংসারমহোঘতো সব্বসত্তে সন্তারেস্সামী’’তি আরভিতুমেৰ ন সক্কুণাতি. মজ্ঝিমো আরভিত্ৰা অন্তরা ৰোসানমাপজ্জতি. উক্কট্ঠৰীরিযো পন অত্তসুখনিরপেক্খো আরম্ভপারমিমধিগচ্ছতীতি ৰীরিযসম্পত্তি পচ্চৰেক্খিতব্বা. অপি চ ‘‘যস্স অত্তনো এৰ সংসারপঙ্কতো সমুদ্ধরণত্থমারম্ভো, তস্সাপি ন ৰীরিযস্স সিথিলভাৰে মনোরথানং মত্থকপ্পত্তি সক্কা সম্ভাৰেতুং, পগেৰ সদেৰকস্স লোকস্স সমুদ্ধরণত্থং কতাভিনীহারেনা’’তি চ ‘‘রাগাদীনং দোসগণানং মত্তমহাগজানং ৰিয দুন্নিৰারভাৰতো তন্নিদানানঞ্চ কম্মসমাদানানং উক্খিত্তাসিকৰধকসদিসভাৰতো তন্নিমিত্তানঞ্চ দুগ্গতীনং সব্বদা ৰিৰটমুখভাৰতো, তত্থ নিযোজকানঞ্চ পাপমিত্তানং সদা সন্নিহিতভাৰতো তদোৰাদকারিতায চ বালস্স পুথুজ্জনভাৰস্স সতিসম্ভৰে যুত্তং সযমেৰ সংসারদুক্খতো নিস্সরিতুন্তি মিচ্ছাৰিতক্কা ৰীরিযানুভাৰেন দূরীভৰন্তী’’তি চ ‘‘যদি পন সম্বোধি অত্তাধীনেন ৰীরিযেন সক্কা সমধিগন্তুং, কিমেত্থ দুক্কর’’ন্তি চ এৰমাদিনা নযেন ৰীরিযগুণা পচ্চৰেক্খিতব্বা.

তথা খন্তি নামাযং নিরৰসেসগুণপটিপক্খস্স কোধস্স ৰিধমনতো গুণসম্পাদনে সাধূনমপ্পটিহতমাযুধং, পরাভিভৰসমত্থানং অলঙ্কারো, সমণব্রাহ্মণানং বলসম্পদা, কোধগ্গিৰিনযনউদকধারা, কল্যাণস্স কিত্তিসদ্দস্স সঞ্জাতিদেসো, পাপপুগ্গলানং ৰচীৰিসৰূপসমকরো মন্তাগদো, সংৰরে ঠিতানং পরমা ধীরপকতি, গম্ভীরাসযতায সাগরো, দোসমহাসাগরস্স ৰেলা, অপাযদ্ৰারস্স পিদহনকৰাটং, দেৰব্রহ্মলোকানং আরোহণসোপানং, সব্বগুণানং অধিৰাসনভূমি, উত্তমা কাযৰচীমনোৰিসুদ্ধীতি মনসিকাতব্বং.

অপি চ ‘‘এতে সত্তা খন্তিসম্পত্তিযা অভাৰতো ইধলোকে তপ্পন্তি, পরলোকে চ তপনীযধম্মানুযোগতো’’তি চ ‘‘যদিপি পরাপকারনিমিত্তং দুক্খং উপ্পজ্জতি, তস্স পন দুক্খস্স খেত্তভূতো অত্তভাৰো বীজভূতঞ্চ কম্মং মযাৰ অভিসঙ্খত’’ন্তি চ ‘‘তস্স চ দুক্খস্স আণণ্যকারণমেত’’ন্তি চ ‘‘অপকারকে অসতি কথং ময্হং খন্তিসম্পদা সম্ভৰতী’’তি চ ‘‘যদিপাযং এতরহি অপকারকো, অযং নাম পুব্বে অনেন ময্হং উপকারো কতো’’তি চ ‘‘অপকারো এৰ ৰা খন্তিনিমিত্ততায উপকারো’’তি চ ‘‘সব্বেপিমে সত্তা ময্হং পুত্তসদিসা, পুত্তকতাপরাধেসু চ কো কুজ্ঝিস্সতী’’তি চ ‘‘যেন কোধপিসাচাৰেসেন অযং ময্হং অপরজ্ঝতি, স্ৰাযং কোধভূতাৰেসো মযা ৰিনেতব্বো’’তি চ, ‘‘যেন অপকারেন ইদং ময্হং দুক্খং উপ্পন্নং, তস্স অহম্পি নিমিত্ত’’ন্তি চ, ‘‘যেহি ধম্মেহি অপকারো কতো, যত্থ চ কতো, সব্বেপি তে তস্মিং এৰ খণে নিরুদ্ধা কস্সিদানি কেন কোপো কাতব্বো’’তি চ, ‘‘অনত্ততায সব্বধম্মানং কো কস্স অপরজ্ঝতী’’তি চ পচ্চৰেক্খন্তেন খন্তিসম্পদা অনুব্রূহেতব্বা.

যদি পনস্স দীঘরত্তং পরিচযেন পরাপকারনিমিত্তকো কোধো চিত্তং পরিযাদায তিট্ঠেয্য, তেন ইতি পটিসঞ্চিক্খিতব্বং – ‘‘খন্তি নামেসা পরাপকারস্স পটিপক্খপটিপত্তীনং পচ্চুপকারকারণ’’ন্তি চ ‘‘অপকারো চ ময্হং দুক্খূপনিসা সদ্ধাতি দুক্খুপ্পাদনেন সদ্ধায সব্বলোকে অনভিরতিসঞ্ঞায চ পচ্চযো’’তি চ, ‘‘ইন্দ্রিযপকতি হেসা যদিদং ইট্ঠানিট্ঠৰিসযসমাযোগো. তত্থ অনিট্ঠৰিসযসমাযোগো ময্হং ন সিযাতি তং কুতেত্থ লব্ভা’’তি চ ‘‘কোধৰসিকো সত্তো কোধেন উম্মত্তো ৰিক্খিত্তচিত্তো, তত্থ কিং পচ্চপকারেনা’’তি চ ‘‘সব্বেপিমে সত্তা সম্মাসম্বুদ্ধেন ওরসপুত্তা ৰিয পরিপালিতা, তস্মা ন তত্থ মযা চিত্তকোপো কাতব্বো’’তি চ, ‘‘অপরাধকে চ সতি গুণে গুণৰতি মযা কোপো ন কাতব্বো’’তি চ, ‘‘অসতি গুণে ৰিসেসেন করুণাযিতব্বো’’তি চ ‘‘কোপেন চ ময্হং গুণযসা নিহীযন্তী’’তি চ, ‘‘কুজ্ঝনেন ময্হং দুব্বণ্ণদুক্খসেয্যাদযো সপত্তকন্তা আগচ্ছন্তী’’তি চ, ‘‘কোধো চ নামাযং সব্বাহিতকারকো সব্বহিতৰিনাসকো বলৰা পচ্চত্থিকো’’তি চ, ‘‘সতি চ খন্তিযা ন কোচি পচ্চত্থিকো’’তি চ, ‘‘অপরাধকেন অপরাধনিমিত্তং যং আযতিং লদ্ধব্বং দুক্খং সতি চ খন্তিযা ময্হং তদভাৰো’’তি চ, ‘‘চিন্তনেন কুজ্ঝন্তেন চ মযা পচ্চত্থিকোযেৰ অনুৰত্তিতো হোতী’’তি চ, ‘‘কোধে চ মযা খন্তিযা অভিভূতে তস্স দাসভূতো পচ্চত্থিকো সম্মদেৰ অভিভূতো হোতী’’তি চ, ‘‘কোধনিমিত্তং খন্তিগুণপরিচ্চাগো ময্হং ন যুত্তো’’তি চ, ‘‘সতি চ কোধে গুণৰিরোধপচ্চনীকধম্মে কথং মে সীলাদিধম্মা পারিপূরিং গচ্ছেয্যুং, অসতি চ তেসু কথাহং সত্তানং উপকারবহুলো পটিঞ্ঞানুরূপং উত্তমং সম্পত্তিং পাপুণিস্সামী’’তি চ, ‘‘খন্তিযা চ সতি বহিদ্ধা ৰিক্খেপাভাৰতো সমাহিতস্স সব্বে সঙ্খারা অনিচ্চতো দুক্খতো সব্বে ধম্মা অনত্ততো নিব্বানঞ্চ অসঙ্খতামতসন্তপণীততাদিভাৰতো নিজ্ঝানং খমন্তি বুদ্ধধম্মা চ অচিন্তেয্যাপরিমেয্যপ্পভাৰা’’তি.

ততো চ অনুলোমিযং খন্তিযং ঠিতো কেৰলা ইমে অত্তত্তনিযভাৰরহিতা ধম্মমত্তা যথাসকং পচ্চযেহি উপ্পজ্জন্তি ৰযন্তি, ন কুতোচি আগচ্ছন্তি, ন কুহিঞ্চি গচ্ছন্তি, ন চ কত্থচি পতিট্ঠিতা, ন চেত্থ কোচি কস্সচি ব্যাপারোতি অহংকারমমংকারানধিট্ঠানতা নিজ্ঝানং খমতি, যেন বোধিসত্তো বোধিযা নিযতো অনাৰত্তিধম্মো হোতীতি এৰমাদিনা খন্তিপারমিযা পচ্চৰেক্খণা ৰেদিতব্বা.

তথা সচ্চেন ৰিনা সীলাদীনং অসম্ভৰতো পটিঞ্ঞানুরূপং পটিপত্তিযা অভাৰতো চ, সচ্চধম্মাতিক্কমে চ সব্বপাপধম্মানং সমোসরণতো অসচ্চসন্ধস্স অপচ্চযিকভাৰতো আযতিঞ্চ অনাদেয্যৰচনতাৰহনতো সম্পন্নসচ্চস্স চ, সব্বগুণাধিট্ঠানভাৰতো সচ্চাধিট্ঠানেন সব্ববোধিসম্ভারানং পারিসুদ্ধিপারিপূরিসামত্থিযতো সভাৰধম্মাৰিসংৰাদনেন সব্ববোধিসম্ভারকিচ্চকরণতো বোধিসত্তপটিপত্তিযা চ, পরিনিপ্ফত্তিতোতিআদিনা সচ্চপারমিযা সম্পত্তিযো পচ্চৰেক্খিতব্বা.

তথা দানাদীসু দল়্হসমাদানং তংপটিপক্খসন্নিপাতে চ নেসং অচলাধিট্ঠানং তত্থ চ ধীরৰীরভাৰং ৰিনা ন দানাদিসম্ভারা সম্বোধিনিমিত্তা সম্ভৰন্তীতিআদিনা অধিট্ঠানে গুণা পচ্চৰেক্খিতব্বা.

তথা ‘‘অত্তহিতমত্তে অৰতিট্ঠন্তেনাপি সত্তেসু হিতচিত্ততং ৰিনা ন সক্কা ইধলোকপরলোকসম্পত্তিযো পাপুণিতুং, পগেৰ সব্বসত্তে নিব্বানসম্পত্তিযং পতিট্ঠাপেতুকামেনা’’তি চ, ‘‘পচ্ছা সব্বসত্তানং লোকুত্তরসম্পত্তিং আকঙ্খন্তেন ইদানি লোকিযসম্পত্তিআকঙ্খা যুত্তরূপা’’তি চ, ‘‘ইদানি আসযমত্তেন পরেসং হিতসুখূপসংহারং কাতুং অসক্কোন্তো কদা পযোগেন তং সাধেস্সামী’’তি চ, ‘‘ইদানি মযা হিতসুখূপসংহারেন সংৰড্ঢিতা পচ্ছা ধম্মসংৰিভাগসহাযা ময্হং ভৰিস্সন্তী’’তি চ, ‘‘এতেহি ৰিনা ন ময্হং বোধিসম্ভারা সম্ভৰন্তি, তস্মা সব্ববুদ্ধগুণৰিভূতিনিপ্ফত্তিকারণত্তা ময্হং এতে পরমং পুঞ্ঞক্খেত্তং অনুত্তরং কুসলাযতনং উত্তমং গারৰট্ঠান’’ন্তি চ, সৰিসেসং সত্তেসু সব্বেসু হিতজ্ঝাসযতা পচ্চুপট্ঠপেতব্বা, কিঞ্চ করুণাধিট্ঠানতোপি সব্বসত্তেসু মেত্তা অনুব্রূহেতব্বা. ৰিমরিযাদীকতেন হি চেতসা সত্তেসু হিতসুখূপসংহারনিরতস্স তেসং অহিতদুক্খাপনযনকামতা বলৰতী উপ্পজ্জতি দল়্হমূলা. করুণা চ সব্বেসং বুদ্ধকারকধম্মানং আদি চরণং পতিট্ঠা মূলং মুখং পমুখন্তি এৰমাদিনা মেত্তায গুণা পচ্চৰেক্খিতব্বা.

তথা ‘‘উপেক্খায অভাৰে সত্তেহি কতা ৰিপ্পকারা চিত্তস্স ৰিকারং উপ্পাদেয্যুং, সতি চ চিত্তৰিকারে দানাদীনং সম্ভারানং সম্ভৰো এৰ নত্থী’’তি চ, ‘‘মেত্তাসিনেহেন সিনেহিতে চিত্তে উপেক্খায ৰিনা সম্ভারানং পারিসুদ্ধি ন হোতী’’তি চ, ‘‘অনুপেক্খকো সম্ভারেসু পুঞ্ঞসম্ভারং তব্বিপাকঞ্চ সত্তহিতত্থং পরিণামেতুং ন সক্কোতী’’তি চ, ‘‘উপেক্খায অভাৰে দেয্যধম্মপটিগ্গাহকানং ৰিভাগং অকত্ৰা পরিচ্চজিতুং ন সক্কোতী’’তি চ, ‘‘উপেক্খারহিতেন জীৰিতপরিক্খারানং জীৰিতস্স চ অন্তরাযং অমনসিকরিত্ৰা সীলৰিসোধনং কাতুং ন সক্কোতী’’তি চ, তথা উপেক্খাৰসেন অরতিরতিসহস্সেৰ নেক্খম্মবলসিদ্ধিতো উপপত্তিতো ইক্খণৰসেন সব্বসম্ভারকিচ্চনিপ্ফত্তিতো অচ্চারদ্ধস্স ৰীরিযস্স অনুপেক্খণে পধানকিচ্চাকরণতো উপেক্খতো এৰ তিতিক্খানিজ্ঝানসম্ভৰতো উপেক্খাৰসেন সত্তসঙ্খারানং অৰিসংৰাদনতো লোকধম্মানং অজ্ঝুপেক্খণেন সমাদিন্নধম্মেসু অচলাধিট্ঠানসিদ্ধিতো পরাপকারাদীসু অনাভোগৰসেনেৰ মেত্তাৰিহারনিপ্ফত্তিতোতি সব্ববোধিসম্ভারানং সমাদানাধিট্ঠানপারিপূরিনিপ্ফত্তিযো উপেক্খানুভাৰেন সম্পজ্জন্তীতি এৰমাদিনা নযেন উপেক্খাপারমী পচ্চৰেক্খিতব্বা. এৰং অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযোতি দট্ঠব্বং.

তথা সপরিক্খারা পঞ্চদস চরণধম্মা পঞ্চ চ অভিঞ্ঞাযো. তত্থ চরণধম্মা নাম সীলসংৰরো, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, জাগরিযানুযোগো, সত্ত সদ্ধম্মা, চত্তারি ঝানানি চ. তেসু সীলাদীনং চতুন্নং তেরসাপি ধুতধম্মা অপ্পিচ্ছতাদযো চ পরিক্খারা. সদ্ধম্মেসু সদ্ধায বুদ্ধধম্মসঙ্ঘসীলচাগদেৰতূপসমানুস্সতিলূখপুগ্গলপরিৰজ্জন- সিনিদ্ধপুগ্গলসেৰনপসাদনীযধম্মপচ্চৰেক্খণতদধিমুত্ততা পরিক্খারো. হিরোত্তপ্পানং অকুসলাদীনৰপচ্চৰেক্খণঅপাযাদীনৰপচ্চৰেক্খণকুসলধম্মূপত্থম্ভন- ভাৰপচ্চৰেক্খণহিরোত্তপ্পরহিতপুগ্গলপরিৰজ্জনহিরোত্তপ্পসম্পন্নপুগ্গলসেনতদধিমুত্ততা. বাহুসচ্চস্স পুব্বযোগপরিপুচ্ছক- ভাৰসদ্ধম্মাভিযোগঅনৰজ্জৰিজ্জাট্ঠানাদিপরিচযপরিপক্কিন্দ্রিযতাকিলেসদূরীভাৰঅপ্পস্সুত- পরিৰজ্জনবহুস্সুতসেৰনতদধিমুত্ততা. ৰীরিযস্স অপাযভযপচ্চৰেক্খণ- গমনৰীথিপচ্চৰেক্খণধম্মমহত্তপচ্চৰেক্খণথিনমিদ্ধৰিনোদনকুসীতপুগ্গলপরিৰজ্জন- আরদ্ধৰীরিযপুগ্গলসেৰনসম্মপ্পধানপচ্চৰেক্খণতদধিমুত্ততা. সতিযা সতিসম্পজঞ্ঞমুট্ঠস্সতিপুগ্গলপরিৰজ্জনউপট্ঠিতস্সতিপুগ্গলসেৰনতদধিমুত্ততা. পঞ্ঞায পরিপুচ্ছকভারৰত্থুৰিসদকিরিযাইন্দ্রিযসমত্তপটিপাদনদুপ্পঞ্ঞপুগ্গল- পরিৰজ্জনপঞ্ঞৰন্তপুগ্গলসেৰনগম্ভীরঞাণচরিযপচ্চৰেক্খণতদধিমুত্ততা. চতুন্নং ঝানানং সীলাদিচতুক্কং অট্ঠতিংসায আরম্মণেসু পুব্বভাগভাৰনা আৰজ্জনাদিৰসীভাৰকরণঞ্চ পরিক্খারো. তত্থ সীলাদীহি পযোগসুদ্ধিযা সত্তানং অভযদানে আসযসুদ্ধিযা আমিসদানে উভযসুদ্ধিযা ধম্মদানে সমত্থো হোতীতিআদিনা চরণাদীনং দানাদিসম্ভারানং পচ্চযভাৰো যথারহং নিদ্ধারেতব্বো. অতিৰিত্থারভযেন ন নিদ্ধারযিম্হাতি. এৰং সম্পত্তিচক্কাদযোপি দানাদীনং পচ্চযোতি ৰেদিতব্বা.

কো সংকিলেসোতি? অৰিসেসেন তণ্হাদীহি পরামট্ঠভাৰো পারমীনং সংকিলেসো, ৰিসেসেন পন দেয্যধম্মপটিগ্গাহকৰিকপ্পা দানপারমিযা সংকিলেসো. সত্তকালৰিকপ্পা সীলপারমিযা, কামভৰতদুপসমেসু অভিরতিঅনভিরতিৰিকপ্পা নেক্খম্মপারমিযা, অহং মমাতি ৰিকপ্পা পঞ্ঞাপারমিযা, লীনুদ্ধচ্চৰিকপ্পা ৰীরিযপারমিযা, অত্তপরৰিকপ্পা খন্তিপারমিযা, অদিট্ঠাদীসু দিট্ঠাদিৰিকপ্পা সচ্চপারমিযা, বোধিসম্ভারতব্বিপক্খেসু দোসগুণৰিকপ্পা অধিট্ঠানপারমিযা, হিতাহিতৰিকপ্পা মেত্তাপারমিযা, ইট্ঠানিট্ঠৰিকপ্পা উপেক্খাপারমিযা সংকিলেসোতি দট্ঠব্বং.

কিং ৰোদানন্তি? তণ্হাদীহি অনুপঘাতো যথাৰুত্তৰিকপ্পৰিরহো চ এতাসং ৰোদানন্তি ৰেদিতব্বং. অনুপহতা হি তণ্হামানদিট্ঠিকোধূপনাহমক্খপল়াসইস্সামচ্ছরিয- মাযাসাঠেয্যথম্ভসারম্ভমদপ্পমাদাদীহি কিলেসেহি দেয্যধম্মপটিগ্গাহকৰিকপ্পাদিরহিতা চ দানাদিপারমিযো পরিসুদ্ধা পভস্সরা ভৰন্তীতি.

কো পটিপক্খোতি? অৰিসেসেন সব্বেপি সংকিলেসা সব্বেপি অকুসলা ধম্মা এতাসং পটিপক্খো, ৰিসেসেন পন পুব্বে ৰুত্তা মচ্ছেরাদযোতি ৰেদিতব্বা. অপি চ দেয্যধম্মপটিগ্গাহকদানফলেসু অলোভাদোসামোহগুণযোগতো লোভদোসমোহপটিপক্খং দানং, কাযাদিদোসৰঙ্কাপগমতো লোভাদিপটিপক্খং সীলং, কামসুখপরূপঘাতঅত্তকিলমথপরিৰজ্জনতো দোসত্তযপটিপক্খং নেক্খম্মং, লোভাদীনং অন্ধীকরণতো ঞাণস্স চ অনন্ধীকরণতো লোভাদিপটিপক্খা পঞ্ঞা, অলীনানুদ্ধতঞাযারম্ভৰসেন লোভাদিপটিপক্খং ৰীরিযং, ইট্ঠানিট্ঠসুঞ্ঞতানং খমনতো লোভাদিপটিপক্খা খন্তি, সতিপি পরেসং উপকারে অপকারে চ যথাভূতপ্পৰত্তিযা লোভাদিপটিপক্খং সচ্চং, লোকধম্মে অভিভুয্য যথাসমাদিন্নেসু সম্ভারেসু অচলনতো লোভাদিপটিপক্খং অধিট্ঠানং, নীৰরণৰিৰেকতো লোভাদিপটিপক্খা মেত্তা, ইট্ঠানিট্ঠেসু অনুনযপটিঘৰিদ্ধংসনতো সমপ্পৰত্তিতো চ লোভাদিপটিপক্খা উপেক্খাতি দট্ঠব্বং.

কা পটিপত্তীতি? দানপারমিযা তাৰ সুখূপকরণসরীরজীৰিতপরিচ্চাগেন ভযাপনুদনেন ধম্মোপদেসেন চ বহুধা সত্তানং অনুগ্গহকরণং পটিপত্তি. তত্থ আমিসদানং অভযদানং ধম্মদানন্তি দাতব্বৰত্থুৰসেন তিৰিধং দানং. তেসু বোধিসত্তস্স দাতব্বৰত্থু অজ্ঝত্তিকং বাহিরন্তি দুৰিধং. তত্থ বাহিরং অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যন্তি দসৰিধং. অন্নাদীনং খাদনীযভোজনীযাদিৰিভাগেন অনেকৰিধং. তথা রূপারম্মণং যাৰ ধম্মারম্মণন্তি আরম্মণতো ছব্বিধং. রূপারম্মণাদীনঞ্চ নীলাদিৰিভাগেন অনেকৰিধং. তথা মণিকনকরজতমুত্তাপৰাল়াদি, খেত্তৰত্থুআরামাদি, দাসিদাসগোমহিংসাদি নানাৰিধৰিত্তূপকরণৰসেন অনেকৰিধং.

তত্থ মহাপুরিসো বাহিরং ৰত্থুং দেন্তো ‘‘যো যেন অত্থিকো, তং তস্স দেতি, দেন্তো চ তস্স অত্থিকো’’তি সযমেৰ জানন্তো অযাচিতোপি দেতি পগেৰ যাচিতো. মুত্তচাগো দেতি, নো অমুত্তচাগো, পরিযত্তং দেতি, নো অপরিযত্তং সতি দেয্যধম্মে. ন পচ্চুপকারসন্নিস্সিতো দেতি. অসতি দেয্যধম্মে হি পরিযত্তে সংৰিভাগারহং সংৰিভজতি. ন চ দেতি পরূপঘাতাৰহং সত্থৰিসমজ্জাদিকং, নাপি কীল়নকং যং অনত্থূপসংহিতং পমাদাৰহঞ্চ. ন চ গিলানস্স যাচকস্স পানভোজনাদিঅসপ্পাযং পমাণরহিতং ৰা দেতি, পমাণযুত্তং পন সপ্পাযমেৰ দেতি.

তথা যাচিতো গহট্ঠানং গহট্ঠানুচ্ছৰিকং দেতি, পব্বজিতানং পব্বজিতানুচ্ছৰিকং দেতি, মাতাপিতরো ঞাতিসালোহিতা মিত্তামচ্চা পুত্তদারদাসকম্মকরাতি এতেসু কস্সচি পীল়ং অজনেন্তো দেতি, ন চ উল়ারং দেয্যধম্মং পটিজানিত্ৰা লূখং দেতি, ন চ লাভসক্কারসিলোকসন্নিস্সিতো দেতি, ন চ পচ্চুপকারসন্নিস্সিতো দেতি, ন চ ফলপাটিকঙ্খী দেতি অঞ্ঞত্র সম্মাসম্বোধিযা, ন চ যাচকে দেয্যধম্মং ৰা জিগুচ্ছন্তো দেতি, ন চ অসঞ্ঞতানং যাচকানং অক্কোসকরোসকানম্পি অপৰিদ্ধং দানং দেতি, অঞ্ঞদত্থু পসন্নচিত্তো অনুকম্পন্তো সক্কচ্চমেৰ দেতি, ন চ কোতূহলমঙ্গলিকো হুত্ৰা দেতি, কম্মফলমেৰ পন সদ্দহন্তো দেতি, নপি যাচকে পযিরুপাসনাদীহি পরিকিলেসেত্ৰা দেতি, অপরিকিলেসন্তো এৰ পন দেতি, ন চ পরেসং ৰঞ্চনাধিপ্পাযো ভেদনাধিপ্পাযো ৰা দানং দেতি, অসংকিলিট্ঠচিত্তো এৰ দেতি, নপি ফরুসৰাচো ভাকুটিমুখো দানং দেতি, পিযৰাদী পন পুব্বভাসী মিতৰচনো হুত্ৰা দেতি, যস্মিঞ্চ দেয্যধম্মে উল়ারমনুঞ্ঞতায ৰা চিরপরিচযেন ৰা গেধসভাৰতায ৰা লোভধম্মো অধিমত্তো হোতি, জানন্তো বোধিসত্তো তং খিপ্পমেৰ পটিৰিনোদেত্ৰা যাচকে পরিযেসিত্ৰাপি দেতি, যঞ্চ দেয্যৰত্থু পরিত্তং যাচকোপি পচ্চুপট্ঠিতো, তং অচিন্তেত্ৰাপি অত্তানং বাধেত্ৰা দেন্তো যাচকং সম্মানেতি যথা তং অকিত্তিপণ্ডিতো. ন চ মহাপুরিসো অত্তনো পুত্তদারদাসকম্মকরপোরিসে যাচিতো তে অসঞ্ঞাপিতে দোমনস্সপ্পত্তে যাচকানং দেতি, সম্মদেৰ পন সঞ্ঞাপিতে সোমনস্সপ্পত্তে দেতি. দেন্তো চ যক্খরক্খসপিসাচাদীনং ৰা মনুস্সানং কুরূরকম্মন্তানং ৰা জানন্তো ন দেতি, তথা রজ্জম্পি তাদিসানং ন দেতি. যে লোকস্স অহিতায দুক্খায অনত্থায পটিপজ্জন্তি, যে পন ধম্মিকা ধম্মেন লোকং পালেন্তি, তেসং দেতি. এৰং তাৰ বাহিরদানে পটিপত্তি ৰেদিতব্বা.

অজ্ঝত্তিকদানং পন দ্ৰীহি আকারেহি ৰেদিতব্বং. কথং? যথা নাম কোচি পুরিসো ঘাসচ্ছাদনহেতু অত্তানং পরস্স নিস্সজ্জতি, ৰিধেয্যভাৰং উপগচ্ছতি দাসব্যং, এৰমেৰ মহাপুরিসো সম্বোধিহেতু নিরামিসচিত্তো সত্তানং অনুত্তরং হিতসুখং ইচ্ছন্তো অত্তনো দানপারমিং পরিপূরেতুকামো অত্তানং পরস্স নিস্সজ্জতি, ৰিধেয্যভাৰং উপগচ্ছতি যথাকামকরণীযতং. করচরণনযনাদিঅঙ্গপচ্চঙ্গং তেন তেন অত্থিকানং অকম্পিতো অনোলীনো অনুপ্পদেতি, ন তত্থ সজ্জতি ন সঙ্কোচং আপজ্জতি যথা তং বাহিরৰত্থুস্মিং, তথা হি মহাপুরিসো দ্ৰীহি আকারেহি বাহিরৰত্থুং পরিচ্চজতি যথাসুখং পরিভোগায ৰা যাচকানং তেসং মনোরথং পরিপূরেন্তো, অত্তনো ৰসীভাৰায ৰা, তত্থ সব্বেন সব্বং মুত্তচাগো, এৰমহং নিস্সঙ্গভাৰনায সম্বোধিং পাপুণিস্সামীতি. এৰং অজ্ঝত্তিকৰত্থুস্মিন্তি ৰেদিতব্বং.

তত্থ যং অজ্ঝত্তিকৰত্থু দীযমানং যাচকস্স একন্তেনেৰ হিতায সংৰত্ততি, তং দেতি, ন ইতরং. ন চ মহাপুরিসো মারস্স মারকাযিকানং দেৰতানং ৰা ৰিহিংসাধিপ্পাযানং অত্তনো অত্তভাৰং অঙ্গপচ্চঙ্গানি ৰা জানমানো দেতি ‘‘মা তেসং অনত্থো অহোসী’’তি. যথা চ মারকাযিকানং, এৰং তেহি অন্ৰাৰিট্ঠানম্পি ন দেতি, নপি উম্মত্তকানং. ইতরেসং পন যাচিযমানো সমনন্তরমেৰ দেতি, তাদিসায যাচনায দুল্লভভাৰতো তাদিসস্স চ দানস্স দুক্করভাৰতো.

অভযদানং পন রাজতো চোরতো অগ্গিতো উদকতো ৰেরিপুগ্গলতো সীহব্যগ্ঘাদিৰাল়মিগতো নাগযক্খরক্খসপিসাচাদিতো সত্তানং ভযে পচ্চুপট্ঠিতে ততো পরিত্তাণভাৰেন ৰেদিতব্বং.

ধম্মদানং পন অসংকিলিট্ঠচিত্তস্স অৰিপরীতা ধম্মদেসনা, ওপাযিকো হিতস্স উপদেসো দিট্ঠধম্মিকসম্পরাযিকপরমত্থৰসেন যেন সাসনে অনোতিণ্ণানং অৰতারণং ওতিণ্ণানং পরিপাচনং. তত্থাযং নযো – সঙ্খেপতো তাৰ দানকথা সীলকথা সগ্গকথা কামানং আদীনৰো সংকিলেসো চ নেক্খম্মে আনিসংসো. ৰিত্থারতো পন সাৰকবোধিযং অধিমুত্তচিত্তানং সরণগমনং সীলসংৰরো ইন্দ্রিযেসু গুত্তদ্ৰারতা ভোজনে মত্তঞ্ঞুতা জাগরিযানুযোগো সত্ত সদ্ধম্মা অট্ঠতিংসায আরম্মণেসু কম্মকরণৰসেন সমথানুযোগো রূপকাযাদীসু ৰিপস্সনাভিনিৰেসেসু যথারহং অভিনিৰেসমুখেন ৰিপস্সনানুযোগো, তথা ৰিসুদ্ধিপটিপদা সম্মত্তগহণং তিস্সো ৰিজ্জা ছ অভিঞ্ঞা চতস্সো পটিসম্ভিদা সাৰকবোধীতি এতেসং গুণসংকিত্তনৰসেন যথারহং তত্থ তত্থ পতিট্ঠাপনা পরিযোদপনা চ. তথা পচ্চেকবোধিযং সম্মাসম্বোধিযঞ্চ অধিমুত্তানং সত্তানং যথারহং দানাদিপারমীনং সভাৰরসলক্খণাদিসংকিত্তনমুখেন তীসুপি অৰত্থাসু তেসং বুদ্ধানং মহানুভাৰতাৰিভাৰনেন যানদ্ৰযে পতিট্ঠাপনা পরিযোদপনা চ. এৰং মহাপুরিসো সত্তানং ধম্মদানং দেতি.

তথা মহাপুরিসো সত্তানং আমিসদানং দেন্তো ‘‘ইমিনাহং দানেন সত্তানং আযুৰণ্ণসুখবলপটিভানাদিসম্পত্তিঞ্চ রমণীযং অগ্গফলসম্পত্তিঞ্চ নিপ্ফাদেয্য’’ন্তি অন্নদানং দেতি, তথা সত্তানং কামকিলেসপিপাসাৰূপসমায পানং দেতি, তথা সুৰণ্ণৰণ্ণতায হিরোত্তপ্পালঙ্কারস্স চ নিপ্ফত্তিযা ৰত্থানি দেতি, তথা ইদ্ধিৰিধস্স চেৰ নিব্বানসুখস্স চ নিপ্ফত্তিযা যানং দেতি, তথা সীলগন্ধনিপ্ফত্তিযা গন্ধং দেতি, তথা বুদ্ধগুণসোভানিপ্ফত্তিযা মালাৰিলেপনং দেতি, বোধিমণ্ডাসননিপ্ফত্তিযা আসনং দেতি, তথাগতসেয্যানিপ্ফত্তিযা সেয্যং দেতি, সরণভাৰনিপ্ফত্তিযা আৰসথং দেতি, পঞ্চচক্খুপটিলাভায পদীপেয্যং দেতি, ব্যামপ্পভানিপ্ফত্তিযা রূপদানং দেতি, ব্রহ্মস্সরনিপ্ফত্তিযা সদ্দদানং দেতি, সব্বলোকস্স পিযভাৰায রসদানং দেতি, বুদ্ধসুখুমালভাৰায ফোট্ঠব্বদানং দেতি, অজরামরভাৰায ভেসজ্জদানং দেতি, কিলেসদাসব্যৰিমোচনত্থং দাসানং ভুজিস্সতাদানং দেতি, সদ্ধম্মাভিরতিযা অনৰজ্জখিড্ডারতিহেতুদানং দেতি, সব্বেপি সত্তে অরিযায জাতিযা অত্তনো পুত্তভাৰূপনযনায পুত্তদানং দেতি, সকলস্সপি লোকস্স পতিভাৰূপগমনায দারদানং দেতি, সুভলক্খণসম্পত্তিযা সুৰণ্ণমণিমুত্তাপৰাল়াদিদানং, অনুব্যঞ্জনসম্পত্তিযা নানাৰিধৰিভূসনদানং, সদ্ধম্মকোসাধিগমায ৰিত্তকোসদানং, ধম্মরাজভাৰায রজ্জদানং, ঝানাদিসম্পত্তিযা আরামুয্যানতল়াকৰনদানং, চক্কঙ্কিতেহি পাদেহি বোধিমণ্ডূপসঙ্কমনায চরণদানং, চতুরোঘনিত্থরণায সত্তানং সদ্ধম্মহত্থদানত্থং হত্থদানং, সদ্ধিন্দ্রিযাদিপটিলাভায কণ্ণনাসাদিদানং, সমন্তচক্খুপটিলাভায চক্খুদানং, ‘‘দস্সনসৰনানুস্সরণপারিচরিযাদীসু সব্বকালং সব্বসত্তানং হিতসুখাৰহো, সব্বলোকেন চ উপজীৰিতব্বো মে কাযো ভৰেয্যা’’তি মংসলোহিতাদিদানং, ‘‘সব্বলোকুত্তমো ভৰেয্য’’ন্তি উত্তমঙ্গদানং দেতি.

এৰং দদন্তো চ ন অনেসনায দেতি, ন চ পরোপঘাতেন, ন ভযেন, ন লজ্জায, ন দক্খিণেয্যরোসনেন, ন পণীতে সতি লূখং, ন অত্তুক্কংসনেন, ন পরৰম্ভনেন, ন ফলাভিসঙ্খায, ন যাচকজিগুচ্ছায, ন অচিত্তীকারেন দেতি, অথ খো সক্কচ্চং দেতি, সহত্থেন দেতি, কালেন দেতি, চিত্তীকত্ৰা দেতি, অৰিভাগেন দেতি. তীসু কালেসু সোমনস্সিতো দেতি, ততো এৰ চ দত্ৰা ন পচ্ছানুতাপী হোতি. ন পটিগ্গাহকৰসেন মানাৰমানং করোতি, পটিগ্গাহকানং পিযসমুদাচারো হোতি ৰদঞ্ঞূ যাচযোগো সপরিৰারদাযকো. অন্নদানঞ্হি দেন্তো ‘‘তং সপরিৰারং কত্ৰা দস্সামী’’তি ৰত্থাদীহি সদ্ধিং দেতি. তথা ৰত্থদানং দেন্তো ‘‘তং সপরিৰারং কত্ৰা দস্সামী’’তি অন্নাদীহি সদ্ধিং দেতি. যানদানাদীসুপি এসেৰ নযো.

তথা রূপদানং দেন্তো ইতরারম্মণানিপি তস্স পরিৰারং কত্ৰা দেতি, এৰং সেসেসুপি. তত্থ রূপদানং নাম নীলপীতলোহিতওদাতাদিৰণ্ণাসু পুপ্ফৰত্থধাতূসু অঞ্ঞতরং লভিত্ৰা রূপৰসেন আভুজিত্ৰা ‘‘রূপদানং দস্সামি, রূপদানং ময্হ’’ন্তি চিন্তেত্ৰা তাদিসে দক্খিণেয্যে দানং পতিট্ঠাপেতি সৰত্থুকং কত্ৰা. এতং রূপদানং নাম.

সদ্দদানং পন ভেরিসদ্দাদিৰসেন ৰেদিতব্বং. তত্থ সদ্দং কন্দমূলানি ৰিয উপ্পাটেত্ৰা নীলুপ্পলহত্থকং ৰিয চ হত্থে ঠপেত্ৰা দাতুং ন সক্কা, সৰত্থুকং পন কত্ৰা দেন্তো সদ্দদানং দেতি নাম. তস্মা যদা ‘‘সদ্দদানং দস্সামী’’তি ভেরিমুদিঙ্গাদীসু অঞ্ঞতরেন তূরিযেন তিণ্ণং রতনানং উপহারং করোতি কারেতি চ, ‘‘সদ্দদানং মে’’তি ভেরিআদীনি ঠপেতি ঠপাপেতি চ. ধম্মকথিকানং পন সরভেসজ্জং তেলফাণিতাদিং দেতি, ধম্মস্সৰনং ঘোসেতি, সরভঞ্ঞং ভণতি, ধম্মকথং কথেতি, উপনিসিন্নককথং অনুমোদনকথঞ্চ করোতি কারেতি চ, তদা সদ্দদানং নাম হোতি.

তথা গন্ধদানং মূলগন্ধাদীসু অঞ্ঞতরং রজনীযং গন্ধৰত্থুং পিংসিতমেৰ ৰা গন্ধং যংকিঞ্চি লভিত্ৰা গন্ধৰসেন আভুজিত্ৰা ‘‘গন্ধদানং দস্সামি, গন্ধদানং ময্হ’’ন্তি বুদ্ধরতনাদীনং পূজং করোতি কারেতি চ, গন্ধপূজনত্থায অগরুচন্দনাদিকে গন্ধৰত্থুকে পরিচ্চজতি. ইদং গন্ধদানং.

তথা মূলরসাদীসু যংকিঞ্চি রজনীযং রসৰত্থুং লভিত্ৰা রসৰসেন আভুজিত্ৰা ‘‘রসদানং দস্সামি, রসদানং ময্হ’’ন্তি দক্খিণেয্যানং দেতি, রসৰত্থুমেৰ ৰা ধঞ্ঞগৰাদিকং পরিচ্চজতি. ইদং রসদানং.

তথা ফোট্ঠব্বদানং মঞ্চপীঠাদিৰসেন অত্থরণপাৰুরণাদিৰসেন চ ৰেদিতব্বং. যদা হি মঞ্চপীঠভিসিবিম্বোহনাদিকং নিৰাসনপারুপনাদিকং ৰা সুখসম্ফস্সং রজনীযং অনৰজ্জং ফোট্ঠব্বৰত্থুং লভিত্ৰা ফোট্ঠব্বৰসেন আভুজিত্ৰা ‘‘ফোট্ঠব্বদানং দস্সামি, ফোট্ঠব্বদানং ময্হ’’ন্তি দক্খিণেয্যানং দেতি. যথাৰুত্তং ফোট্ঠব্বৰত্থুং লভিত্ৰা পরিচ্চজতি, ইদং ফোট্ঠব্বদানং.

ধম্মদানং পন ধম্মারম্মণস্স অধিপ্পেতত্তা ওজপানজীৰিতৰসেন ৰেদিতব্বং. ওজাদীসু হি অঞ্ঞতরং রজনীযং ৰত্থুং লভিত্ৰা ধম্মারম্মণৰসেন আভুজিত্ৰা ‘‘ধম্মদানং দস্সামি, ধম্মদানং ময্হ’’ন্তি সপ্পিনৰনীতাদিওজদানং দেতি. অম্বপানাদিঅট্ঠৰিধপানদানং দেতি, জীৰিতদানন্তি আভুজিত্ৰা সলাকভত্তপক্খিকভত্তাদীনি দেতি, অফাসুকভাৰেন অভিভূতানং ব্যাধিতানং ৰেজ্জে পচ্চুপট্ঠাপেতি, জালং ফালাপেতি, কুমিনং ৰিদ্ধংসাপেতি, সকুণপঞ্জরং ৰিদ্ধংসাপেতি, বন্ধনেন বদ্ধানং সত্তানং বন্ধনমোক্খং কারেতি, মাঘাতভেরিং চরাপেতি, অঞ্ঞানি চ সত্তানং জীৰিতপরিত্তাণত্থং এৰরূপানি কম্মানি করোতি কারাপেতি চ. ইদং ধম্মদানং নাম.

সব্বমেতং যথাৰুত্তং দানসম্পদং সকললোকহিতসুখায পরিণামেতি. অত্তনো চ সম্মাসম্বোধিযা অকুপ্পায ৰিমুত্তিযা অপরিক্খযস্স ছন্দস্স অপরিক্খযস্স ৰীরিযস্স অপরিক্খযস্স সমাধিস্স অপরিক্খযস্স পটিভানস্স অপরিক্খযস্স ঞাণস্স অপরিক্খযায ৰিমুত্তিযা পরিণামেতি. ইমঞ্চ দানপারমিং পটিপজ্জন্তেন মহাসত্তেন জীৰিতে অনিচ্চসঞ্ঞা পচ্চুপট্ঠাপেতব্বা তথা ভোগেসু, বহুসাধারণতা চ নেসং মনসিকাতব্বা, সত্তেসু চ মহাকরুণা সততং সমিতং পচ্চুপট্ঠাপেতব্বা. এৰঞ্হি ভোগে গহেতব্বসারং গণ্হন্তো আদিত্ততো ৰিয অগারতো সব্বং সাপতেয্যং অত্তানঞ্চ বহি নীহরন্তো ন কিঞ্চি সেসেতি, ন কত্থচি ৰিভাগং করোতি, অঞ্ঞদত্থু নিরপেক্খো নিস্সজ্জতি এৰ. অযং তাৰ দানপারমিযা পটিপত্তিক্কমো.

সীলপারমিযা পন অযং পটিপত্তিক্কমো – যস্মা সব্বঞ্ঞুসীলালঙ্কারেহি সত্তে অলঙ্করিতুকামেন মহাপুরিসেন আদিতো অত্তনো এৰ তাৰ সীলং ৰিসোধেতব্বং. তত্থ চ চতূহি আকারেহি সীলং ৰিসুজ্ঝতি – অজ্ঝাসযৰিসুদ্ধিতো, সমাদানতো, অৰীতিক্কমনতো, সতি চ ৰীতিক্কমে পুন পটিপাকতিককরণতো. ৰিসুদ্ধাসযতায হি একচ্চো অত্তাধিপতি হুত্ৰা পাপজিগুচ্ছনসভাৰো অজ্ঝত্তং হিরিধম্মং পচ্চুপট্ঠাপেত্ৰা সুপরিসুদ্ধসমাচারো হোতি. তথা পরতো সমাদানে সতি একচ্চো লোকাধিপতি হুত্ৰা পাপতো উত্তসন্তো ওত্তপ্পধম্মং পচ্চুপট্ঠাপেত্ৰা সুপরিসুদ্ধসমাচারো হোতি. ইতি উভযথাপি এতে অৰীতিক্কমনতো সীলে পতিট্ঠহন্তি. অথ পন কদাচি সতিসম্মোসেন সীলস্স খণ্ডাদিভাৰো সিযা. তাযযেৰ যথাৰুত্তায হিরোত্তপ্পসম্পত্তিযা খিপ্পমেৰ নং ৰুট্ঠানাদিনা পটিপাকতিকং করোতি.

তযিদং সীলং ৰারিত্তং, চারিত্তন্তি দুৰিধং. তত্থাযং বোধিসত্তস্স ৰারিত্তসীলে পটিপত্তিক্কমো – সব্বসত্তেসু তথা দযাপন্নচিত্তেন ভৰিতব্বং, যথা সুপিনন্তেনপি ন আঘাতো উপ্পজ্জেয্য. পরূপকারনিরততায পরসন্তকো অলগদ্দো ৰিয ন পরামসিতব্বো. সচে পব্বজিতো হোতি, অব্রহ্মচরিযতোপি আরাচারী হোতি সত্তৰিধমেথুনসংযোগৰিরহিতো, পগেৰ পরদারগমনতো. সচে পন অপব্বজিতো গহট্ঠো সমানো পরেসং দারেসু সদা পাপকং চিত্তম্পি ন উপ্পাদেতি. কথেন্তো চ সচ্চং হিতং পিযং ৰচনং পরিমিতমেৰ চ কালেন ধম্মিং কথং ভাসিতা হোতি, সব্বত্থ অনভিজ্ঝালু অব্যাপন্নচিত্তো অৰিপরীতদস্সনো কম্মস্সকতঞাণেন চ সমন্নাগতো সম্মগ্গতেসু সম্মাপটিপন্নেসু নিৰিট্ঠসদ্ধো হোতি নিৰিট্ঠপেমো.

ইতি চতুরাপাযৰট্টদুক্খানং পথভূতেহি অকুসলকম্মপথেহি অকুসলধম্মেহি চ ওরমিত্ৰা সগ্গমোক্খানং পথভূতেসু কুসলকম্মপথেসু পতিট্ঠিতস্স মহাপুরিসস্স পরিসুদ্ধাসযপযোগতায যথাভিপত্থিতা সত্তানং হিতসুখূপসংহিতা মনোরথা সীঘং সীঘং অভিনিপ্ফজ্জন্তি, পারমিযো পরিপূরেন্তি. এৰংভূতো হি অযং. তত্থ হিংসানিৰত্তিযা সব্বসত্তানং অভযদানং দেতি, অপ্পকসিরেনেৰ মেত্তাভাৰনং সম্পাদেতি, একাদস মেত্তানিসংসে অধিগচ্ছতি, অপ্পাবাধো হোতি অপ্পাতঙ্কো, দীঘাযুকো সুখবহুলো লক্খণৰিসেসে পাপুণাতি, দোসৰাসনঞ্চ সমুচ্ছিন্দতি.

তথা অদিন্নাদাননিৰত্তিযা চোরাদীহি অসাধারণে ভোগে অধিগচ্ছতি. পরেহি অনাসঙ্কনীযো পিযো মনাপো ৰিস্সসনীযো ৰিভৰসম্পত্তীসু অলগ্গচিত্তো পরিচ্চাগসীলো লোভৰাসনঞ্চ সমুচ্ছিন্দতি.

অব্রহ্মচরিযনিৰত্তিযা অলোলো হোতি সন্তকাযচিত্তো, সত্তানং পিযো হোতি মনাপো অপরিসঙ্কনীযো, কল্যাণো চস্স কিত্তিসদ্দো অব্ভুগ্গচ্ছতি, অলগ্গচিত্তো হোতি মাতুগামেসু অলুদ্ধাসযো, নেক্খম্মবহুলো লক্খণৰিসেসে অধিগচ্ছতি, লোভৰাসনঞ্চ সমুচ্ছিন্দতি.

মুসাৰাদনিৰত্তিযা সত্তানং পমাণভূতো হোতি পচ্চযিকো থেতো আদেয্যৰচনো, দেৰতানং পিযো মনাপো, সুরভিগন্ধমুখো আরক্খিতকাযৰচীসমাচারো, লক্খণৰিসেসে চ অধিগচ্ছতি, কিলেসৰাসনঞ্চ সমুচ্ছিন্দতি.

পেসুঞ্ঞনিৰত্তিযা পরূপক্কমেহিপি অভেজ্জকাযো হোতি অভেজ্জপরিৰারো, সদ্ধম্মেসু চ অভেজ্জনকসদ্ধো, দল়্হমিত্তো ভৰন্তরপরিচিতানং ৰিয সত্তানং একন্তপিযো অসংকিলেসবহুলো.

ফরুসৰাচানিৰত্তিযা সত্তানং পিযো হোতি মনাপো সুখসীলো মধুরৰচনো সম্ভাৰনীযো, অট্ঠঙ্গসমন্নাগতো চস্স সরো নিব্বত্ততি.

সম্ফপ্পলাপনিৰত্তিযা সত্তানং পিযো হোতি মনাপো গরু ভাৰনীযো চ আদেয্যৰচনো পরিমিতালাপো. মহেসক্খো চ হোতি মহানুভাৰো, ঠানুপ্পত্তিকেন পটিভানেন পঞ্হানং ব্যাকরণকুসলো, বুদ্ধভূমিযঞ্চ একায এৰ ৰাচায অনেকভাসানং সত্তানং অনেকেসং পঞ্হানং ব্যাকরণসমত্থো হোতি.

অনভিজ্ঝালুতায ইচ্ছিতলাভী হোতি, উল়ারেসু চ ভোগেসু রুচিং পটিলভতি, খত্তিযমহাসালাদীনং সম্মতো হোতি, পচ্চত্থিকেহি অনভিভৰনীযো, ইন্দ্রিযৰেকল্লং ন পাপুণাতি, অপ্পটিপুগ্গলো চ হোতি.

অব্যাপাদেন পিযদস্সনো হোতি, সত্তানং সম্ভাৰনীযো পরহিতাভিনন্দিতায চ সত্তে অপ্পকসিরেনেৰ পসাদেতি, অলূখসভাৰো চ হোতি মেত্তাৰিহারী, মহেসক্খো চ হোতি মহানুভাৰো.

মিচ্ছাদস্সনাভাৰেন কল্যাণে সহাযে পটিলভতি, সীসচ্ছেদম্পি পাপুণন্তো পাপকম্মং ন করোতি, কম্মস্সকতাদস্সনতো অকোতূহলমঙ্গলিকো চ হোতি, সদ্ধম্মে চস্স সদ্ধা পতিট্ঠিতা হোতি মূলজাতা, সদ্দহতি চ তথাগতানং বোধিং, সমযন্তরেসু নাভিরমতি উক্কারট্ঠানে ৰিয রাজহংসো, লক্খণত্তযপরিজাননকুসলো হোতি, অন্তে চ অনাৰরণঞাণলাভী, যাৰ বোধিং ন পাপুণাতি, তাৰ তস্মিং তস্মিং সত্তনিকাযে উক্কট্ঠুক্কট্ঠো চ হোতি, উল়ারুল়ারা সম্পত্তিযো পাপুণাতি. ইতি হিদং সীলং নাম সব্বসম্পত্তীনং অধিট্ঠানং, সব্ববুদ্ধগুণানং পভৰভূমি, সব্ববুদ্ধকারকধম্মানং আদি চরণং মুখং পমুখন্তি বহুমাননং উপ্পাদেত্ৰা কাযৰচীসংযমে ইন্দ্রিযদমনে আজীৰৰিসুদ্ধিযং পচ্চযপরিভোগেসু চ সতিসম্পজঞ্ঞবলেন অপ্পমত্তেন লাভসক্কারসিলোকং মিত্তমুখপচ্চত্থিকং ৰিয সল্লক্খেত্ৰা ‘‘কিকীৰ অণ্ড’’ন্তিআদিনা (ৰিসুদ্ধি. ১.১৯; দী. নি. অট্ঠ. ১.৭) ৰুত্তনযেন সক্কচ্চং সীলং সম্পাদেতব্বং. অযং তাৰ ৰারিত্তসীলে পটিপত্তিক্কমো.

চারিত্তসীলে পন পটিপত্তি এৰং ৰেদিতব্বা – ইধ বোধিসত্তো কল্যাণমিত্তানং গরুট্ঠানিযানং অভিৰাদনং পচ্চুট্ঠানং অঞ্জলিকম্মং সামীচিকম্মং কালেন কালং কত্তা হোতি, তথা তেসং কালেন কালং উপট্ঠানং কত্তা হোতি, গিলানানং কাযৰেয্যাৰটিকং. সুভাসিতপদানি সুত্ৰা সাধুকারং কত্তা হোতি, গুণৰন্তানং গুণে ৰণ্ণেতা পরেসং অপকারে খন্তা, উপকারে অনুস্সরিতা, পুঞ্ঞানি অনুমোদিতা, অত্তনো পুঞ্ঞানি সম্মাসম্বোধিযা পরিণামেতা, সব্বকালং অপ্পমাদৰিহারী কুসলেসু ধম্মেসু, সতি চ অচ্চযে অচ্চযতো দিস্ৰা তাদিসানং সহধম্মিকানং যথাভূতং আৰিকত্তা, উত্তরি চ সম্মাপটিপত্তিং সম্মদেৰ পরিপূরেতা.

তথা অত্তনো অনুরূপাসু অত্থূপসংহিতাসু সত্তানং ইতিকত্তব্বতাসু দক্খো অনলসো সহাযভাৰং উপগচ্ছতি. উপ্পন্নেসু চ সত্তানং ব্যাধিআদিদুক্খেসু যথারহং পতিকারৰিধাযকো. ঞাতিভোগাদিব্যসনপতিতেসু সোকাপনোদনো উল্লুম্পনসভাৰাৰট্ঠিতো হুত্ৰা নিগ্গহারহানং ধম্মেনেৰ নিগ্গণ্হনকো যাৰদেৰ অকুসলা ৰুট্ঠাপেত্ৰা কুসলে পতিট্ঠাপনায. পগ্গহারহানং ধম্মেনেৰ পগ্গণ্হনকো. যানি পুরিমকানং মহাবোধিসত্তানং উল়ারতমানি পরমদুক্করানি অচিন্তেয্যানুভাৰানি সত্তানং একন্তহিতসুখাৰহানি চরিতানি, যেহি নেসং বোধিসম্ভারা সম্মদেৰ পরিপাকং অগমংসু, তানি সুত্ৰা অনুব্বিগ্গো অনুত্রাসো তেপি মহাপুরিসা মনুস্সা এৰ, কমেন পন সিক্খাপারিপূরিযা ভাৰিতত্তভাৰা তাদিসায উল়ারতমায আনুভাৰসম্পত্তিযা বোধিসম্ভারেসু উক্কংসপারমিপ্পত্তা অহেসুং, তস্মা মযাপি সীলাদিসিক্খাসু সম্মদেৰ তথা পটিপজ্জিতব্বং, যায পটিপত্তিযা অহম্পি অনুক্কমেন সিক্খং পরিপূরেত্ৰা একন্ততো তং পদং অনুপাপুণিস্সামীতি সদ্ধাপুরেচারিকং ৰীরিযং অৰিস্সজ্জেন্তো সম্মদেৰ সীলেসু পরিপূরকারী হোতি.

তথা পটিচ্ছন্নকল্যাণো হোতি ৰিৰটাপরাধো, অপ্পিচ্ছো সন্তুট্ঠো পৰিৰিত্তো অসংসট্ঠো দুক্খসহো অপরিতস্সনজাতিকো অনুদ্ধতো অনুন্নল়ো অচপলো অমুখরো অৰিকিণ্ণৰাচো সন্তিন্দ্রিযো সন্তমানসো কুহনাদিমিচ্ছাজীৰরহিতো আচারগোচরসম্পন্নো অণুমত্তেসু ৰজ্জেসু ভযদস্সাৰী সমাদায সিক্খতি সিক্খাপদেসু আরদ্ধৰীরিযো পহিতত্তো কাযে চ জীৰিতে চ নিরপেক্খো, অপ্পমত্তকম্পি কাযে জীৰিতে ৰা অপেক্খং নাধিৰাসেতি পজহতি ৰিনোদেতি, পগেৰ অধিমত্তং. সব্বেপি দুস্সীল্যহেতুভূতে কোধূপনাহাদিকে উপক্কিলেসে পজহতি ৰিনোদেতি. অপ্পমত্তকেন চ ৰিসেসাধিগমেন অপরিতুট্ঠো হোতি, ন সঙ্কোচং আপজ্জতি, উপরূপরি ৰিসেসাধিগমায ৰাযমতি.

যেন যথালদ্ধা সম্পত্তি হানভাগিযা ৰা ঠিতিভাগিযা ৰা ন হোতি, তথা মহাপুরিসো অন্ধানং পরিণাযকো হোতি, মগ্গং আচিক্খতি, বধিরানং হত্থমুদ্দায সঞ্ঞং দেতি, অত্থমনুগ্গাহেতি, তথা মূগানং. পীঠসপ্পিকানং পীঠং দেতি যানং দেতি ৰাহেতি ৰা. অস্সদ্ধানং সদ্ধাপটিলাভায ৰাযমতি, কুসীতানং উস্সাহজননায, মুট্ঠস্সতীনং সতিসমাযোগায, ৰিব্ভন্তচিত্তানং সমাধিসম্পদায, দুপ্পঞ্ঞানং পঞ্ঞাধিগমায ৰাযমতি. কামচ্ছন্দপরিযুট্ঠিতানং কামচ্ছন্দপটিৰিনোদনায ৰাযমতি. ব্যাপাদথিনমিদ্ধউদ্ধচ্চকুক্কুচ্চৰিচিকিচ্ছাপরিযুট্ঠিতানং ৰিচিকিচ্ছাৰিনোদনায ৰাযমতি. কামৰিতক্কাদিঅপকতানং কামৰিতক্কাদিমিচ্ছাৰিতক্কৰিনোদনায ৰাযমতি. পুব্বকারীনং সত্তানং কতঞ্ঞুতং নিস্সায পুব্বভাসী পিযৰাদী সঙ্গাহকো সদিসেন অধিকেন ৰা পচ্চুপকারেন সম্মানেতা হোতি.

আপদাসু সহাযকিচ্চং অনুতিট্ঠতি. তেসং তেসঞ্চ সত্তানং পকতিসভাৰঞ্চ পরিজানিত্ৰা যেহি যথা সংৰসিতব্বং হোতি, তেহি তথা সংৰসতি. যেসু চ যথা পটিপজ্জিতব্বং হোতি, তেসু তথা পটিপজ্জতি. তঞ্চ খো অকুসলতো ৰুট্ঠাপেত্ৰা কুসলে পতিট্ঠাপনৰসেন, ন অঞ্ঞথা. পরচিত্তানুরক্খণা হি বোধিসত্তানং যাৰদেৰ কুসলাভিৰড্ঢিযা. তথা হিতজ্ঝাসযেনাপি পরো ন হিংসিতব্বো, ন ভণ্ডিতব্বো, ন মঙ্কুভাৰমাপাদেতব্বো, ন পরস্স কুক্কুচ্চং উপ্পাদেতব্বং, ন নিগ্গহট্ঠানে ন চোদেতব্বো, ন নীচতরং পটিপন্নস্স অত্তা উচ্চতরে ঠপেতব্বো, ন চ পরেসু সব্বেন সব্বং অসেৰিনা ভৰিতব্বং, ন অতিসেৰিনা ভৰিতব্বং, ন অকালসেৰিনা.

সেৰিতব্বযুত্তে পন সত্তে দেসকালানুরূপং সেৰতি. ন চ পরেসং পুরতো পিযে ৰিগরহতি, অপ্পিযে ৰা পসংসতি. ন অৰিস্সট্ঠৰিস্সাসী হোতি. ন ধম্মিকং উপনিমন্তনং পটিক্খিপতি. ন সঞ্ঞত্তিং উপগচ্ছতি, নাধিকং পটিগ্গণ্হাতি. সদ্ধাসম্পন্নে সদ্ধানিসংসকথায সম্পহংসতি. সীলসুতচাগপঞ্ঞাসম্পন্নে পঞ্ঞাসম্পন্নকথায সম্পহংসতি. সচে পন বোধিসত্তো অভিঞ্ঞাবলপ্পত্তো হোতি, পমাদাপন্নে সত্তে অভিঞ্ঞাবলেন যথারহং নিরযাদিকে দস্সেন্তো সংৰেজেত্ৰা অস্সদ্ধাদিকে সদ্ধাদীসু পতিট্ঠাপেতি. সাসনে ওতারেতি. সদ্ধাদিগুণসম্পন্নে পরিপাচেতি. এৰমযং মহাপুরিসস্স চারিত্তভূতো অপরিমাণো পুঞ্ঞাভিসন্দো কুসলাভিসন্দো উপরূপরি অভিৰড্ঢতীতি ৰেদিতব্বং.

অপি চ যা সা ‘‘কিং সীলং কেনট্ঠেন সীল’’ন্তিআদিনা পুচ্ছং কত্ৰা ‘‘পাণাতিপাতাদীহি ৰিরমন্তস্স ৰত্তপটিপত্তিং ৰা পূরেন্তস্স চেতনাদযো ধম্মা সীল’’ন্তিআদিনা নযেন নানপ্পকারতো সীলস্স ৰিত্থারকথা ৰিসুদ্ধিমগ্গে (ৰিসুদ্ধি. ১.৬ আদযো) ৰুত্তা, সা সব্বাপি ইধ আহরিত্ৰা ৰত্তব্বা. কেৰলঞ্হি তত্থ সাৰকবোধিসত্তৰসেন সীলকথা আগতা, ইধ মহাবোধিসত্তৰসেন করুণূপাযকোসল্লপুব্বঙ্গমং কত্ৰা ৰত্তব্বাতি অযমেৰ ৰিসেসো. যতো ইদং সীলং মহাপুরিসো যথা ন অত্তনো দুগ্গতিযং পরিক্কিলেসৰিমুত্তিযা সুগতিযম্পি, ন রজ্জসম্পত্তিযা, ন চক্কৰত্তি, ন দেৰ, ন সক্ক, ন মার, ন ব্রহ্মসম্পত্তিযা পরিণামেতি, তথা ন অত্তনো তেৰিজ্জতায, ন ছল়ভিঞ্ঞতায, ন চতুপ্পটিসম্ভিদাধিগমায, ন সাৰকবোধিযা, ন পচ্চেকবোধিযা, পরিণামেতি, অথ খো সব্বঞ্ঞুভাৰেন সব্বসত্তানং অনুত্তরসীলালঙ্কারসম্পাদনত্থমেৰ পরিণামেতীতি. অযং সীলপারমিযা পটিপত্তিক্কমো.

তথা যস্মা করুণূপাযকোসল্লপরিগ্গহিতা আদীনৰদস্সনপুব্বঙ্গমা কামেহি চ ভৰেহি চ নিক্খমনৰসেন পৰত্তা কুসলচিত্তুপ্পত্তি নেক্খম্মপারমী, তস্মা সকলসংকিলেসনিৰাসনট্ঠানতায পুত্তদারাদীহি মহাসম্বাধতায কসিৰাণিজ্জাদিনানাৰিধকম্মন্তাধিট্ঠানব্যাকুলতায চ ঘরাৰাসস্স নেক্খম্মসুখাদীনং অনোকাসতং, কামানঞ্চ সত্থধারালগ্গমধুবিন্দু ৰিয চ অৰলিয্হমানা পরিত্তস্সাদা ৰিপুলানত্থানুবন্ধাতি চ, ৰিজ্জুলতোভাসেন গহেতব্বনচ্চং ৰিয পরিত্তকালূপলব্ভা, উম্মত্তকালঙ্কারো ৰিয ৰিপরীতসঞ্ঞায অনুভৰিতব্বা, করীসাৰচ্ছাদনা ৰিয পতিকারভূতা, উদকতেমিতঙ্গুলিযা তনূদকপানং ৰিয অতিত্তিকরা, ছাতজ্ঝত্তভোজনং ৰিয সাবাধা, বল়িসামিসং ৰিয ব্যসনসন্নিপাতকারণং, অগ্গিসন্তাপো ৰিয কালত্তযেপি দুক্খুপ্পত্তিহেতুভূতা, মক্কটলেপো ৰিয বন্ধনিমিত্তং, ঘাতকাৰচ্ছাদনা ৰিয অনত্থচ্ছাদনা, সপত্তগামৰাসো ৰিয ভযট্ঠানভূতা, পচ্চত্থিকপোসকো ৰিয কিলেসমারাদীনং আমিসভূতা, ছণসম্পত্তিযো ৰিয ৰিপরিণামদুক্খা, কোটরগ্গি ৰিয অন্তোদাহকা, পুরাণকূপাৰলম্বীবীরণমধুপিণ্ডং ৰিয অনেকাদীনৰা, লোণূদকপানং ৰিয পিপাসাহেতুভূতা, সুরামেরযং ৰিয নীচজনসেৰিতা, অপ্পস্সাদতায অট্ঠিকঙ্কলূপমাতিআদিনা (ম. নি. ১.২৩৪; ২.৪২; পাচি. ৪১৭; মহানি. ৩; চূল়নি. খগ্গৰিসাণসুত্তনিদ্দেস ১৪৭) চ নযেন আদীনৰং সল্লক্খেত্ৰা তব্বিপরিযাযেন নেক্খম্মে আনিসংসং পস্সন্তেন নেক্খম্মপৰিৰেকউপসমসুখাদীসু নিন্নপোণপব্ভারচিত্তেন নেক্খম্মপারমিযং পটিপজ্জিতব্বং. যস্মা পন নেক্খম্মং পব্বজ্জামূলকং, তস্মা পব্বজ্জা তাৰ অনুট্ঠাতব্বা. পব্বজ্জমনুতিট্ঠন্তেন চ মহাসত্তেন অসতি বুদ্ধুপ্পাদে কম্মৰাদীনং কিরিযৰাদীনং তাপসপরিব্বাজকানং পব্বজ্জা অনুট্ঠাতব্বা.

উপ্পন্নেসু পন সম্মাসম্বুদ্ধেসু তেসং সাসনে এৰ পব্বজিতব্বং. পব্বজিত্ৰা চ যথাৰুত্তে সীলে পতিট্ঠিতেন তস্সা এৰ হি সীলপারমিযা ৰোদাপনত্থং ধুতগুণা সমাদাতব্বা. সমাদিন্নধুতধম্মা হি মহাপুরিসা সম্মদেৰ তে পরিহরন্তা অপ্পিচ্ছাসন্তুট্ঠাসল্লেখপৰিৰেকঅসংসগ্গৰীরিযারম্ভসুভরতাদি- গুণসলিলৰিক্খালিতকিলেসমলতায অনৰজ্জসীলৰতগুণপরিসুদ্ধসব্বসমাচারা পোরাণে অরিযৰংসত্তযে পতিট্ঠিতা চতুত্থং ভাৰনারামতাসঙ্খাতং অরিযৰংসং অধিগন্তুং চত্তারীসায আরম্মণেসু যথারহং উপচারপ্পনাভেদং ঝানং উপসম্পজ্জ ৰিহরন্তি. এৰং হিস্স সম্মদেৰ নেক্খম্মপারমী পরিপূরিতা হোতি.

ইমস্মিং পন ঠানে তেরসহি ধুতধম্মেহি সদ্ধিং দস কসিণানি, দস অসুভানি, দসানুস্সতিযো, চত্তারো ব্রহ্মৰিহারা, চত্তারো আরুপ্পা, একা সঞ্ঞা, একং ৰৰত্থানন্তি চত্তারীসায সমাধিভাৰনায কম্মট্ঠানানি ভাৰনাৰিধানঞ্চ ৰিত্থারতো ৰত্তব্বানি. তং পনেতং সব্বং যস্মা ৰিসুদ্ধিমগ্গে (ৰিসুদ্ধি. ১.২২ আদযো, ৪৭, ৫৫) সব্বাকারতো ৰিত্থারেত্ৰা ৰুত্তং, তস্মা তত্থ ৰুত্তনযেনেৰ ৰেদিতব্বং. কেৰলঞ্হি তত্থ সাৰকবোধিসত্তস্স ৰসেন ৰুত্তং, ইধ মহাবোধিসত্তস্স ৰসেন করুণূপাযকোসল্লপুব্বঙ্গমং কত্ৰা ৰত্তব্বন্তি অযমেৰ ৰিসেসোতি. এৰমেত্থ নেক্খম্মপারমিযা পটিপত্তিক্কমো ৰেদিতব্বো.

তথা পঞ্ঞাপারমিং সম্পাদেতুকামেন যস্মা পঞ্ঞা আলোকো ৰিয অন্ধকারেন মোহেন সহ ন ৰত্ততি, তস্মা মোহকারণানি তাৰ বোধিসত্তেন পরিৰজ্জেতব্বানি. তত্থিমানি মোহকারণানি – অরতি তন্দি ৰিজম্ভিতা আলসিযং গণসঙ্গণিকারামতা নিদ্দাসীলতা অনিচ্ছযসীলতা ঞাণস্মিং অকুতূহলতা মিচ্ছাধিমানো অপরিপুচ্ছকতা কাযস্স ন সম্মাপরিহারো অসমাহিতচিত্ততা দুপ্পঞ্ঞানং পুগ্গলানং সেৰনা পঞ্ঞৰন্তানং অপযিরুপাসনা অত্তপরিভৰো মিচ্ছাৰিকপ্পো ৰিপরীতাভিনিৰেসো কাযদল়্হিবহুলতা অসংৰেগসীলতা পঞ্চ নীৰরণানি. সঙ্খেপতো যে ৰা পন ধম্মে আসেৰতো অনুপ্পন্না পঞ্ঞা নুপ্পজ্জতি, উপ্পন্না পরিহাযতি. ইতি ইমানি সম্মোহকারণানি পরিৰজ্জেন্তেন বাহুসচ্চে ঝানাদীসু চ যোগো করণীযো.

তত্থাযং বাহুসচ্চস্স ৰিসযৰিভাগো – পঞ্চক্খন্ধা দ্ৰাদসাযতনানি অট্ঠারস ধাতুযো চত্তারি সচ্চানি বাৰীসতিন্দ্রিযানি দ্ৰাদসপদিকো পটিচ্চসমুপ্পাদো তথা সতিপট্ঠানাদযো কুসলাদিধম্মপ্পকারভেদা চ, যানি চ লোকে অনৰজ্জানি ৰিজ্জাট্ঠানানি, যে চ সত্তানং হিতসুখৰিধানযোগ্গা ব্যাকরণৰিসেসা, ইতি এৰং পকারং সকলমেৰ সুতৰিসযং উপাযকোসল্লপুব্বঙ্গমায পঞ্ঞায সতিযা ৰীরিযেন চ সাধুকং উগ্গহণসৰনধারণপরিচযপরিপুচ্ছাহি ওগাহেত্ৰা তত্থ চ পরেসং পতিট্ঠাপনেন সুতমযা পঞ্ঞা নিব্বত্তেতব্বা.

তথা সত্তানং ইতিকত্তব্বতাসু ঠানুপ্পত্তিকপটিভানভূতা আযাপাযউপাযকোসল্লভূতা চ পঞ্ঞা হিতেসিতং নিস্সায তত্থ তত্থ যথারহং পৰত্তেতব্বা. তথা খন্ধাদীনং সভাৰধম্মানং আকারপরিৰিতক্কনমুখেন তে নিজ্ঝানং খমাপেন্তেন চিন্তামযা পঞ্ঞা নিব্বত্তেতব্বা. খন্ধাদীনংযেৰ পন সলক্খণসামঞ্ঞলক্খণপরিগ্গহণৰসেন লোকিযপরিঞ্ঞা নিব্বত্তেন্তেন পুব্বভাগভাৰনাপঞ্ঞা সম্পাদেতব্বা. এৰঞ্হি নামরূপমত্তমিদং যথারহং পচ্চযেহি উপ্পজ্জতি চেৰ নিরুজ্ঝতি চ, ন এত্থ কোচি কত্তা ৰা কারেতা ৰা, হুত্ৰা অভাৰট্ঠেন অনিচ্চং, উদযব্বযপটিপীল়নট্ঠেন দুক্খং, অৰসৰত্তনট্ঠেন অনত্তাতি অজ্ঝত্তিকধম্মে বাহিরকধম্মে চ নিব্বিসেসং পরিজানন্তো তত্থ আসঙ্গং পজহন্তো পরে চ তত্থ তং জহাপেন্তো কেৰলং করুণাৰসেনেৰ যাৰ ন বুদ্ধগুণা হত্থতলং আগচ্ছন্তি, তাৰ যানত্তযে সত্তে অৰতারণপরিপাচনেহি পতিট্ঠপেন্তো ঝানৰিমোক্খসমাধিসমাপত্তিযো অভিঞ্ঞাযো চ লোকিযা ৰসীভাৰং পাপেন্তো পঞ্ঞায মত্থকং পাপুণাতি.

তত্থ যা ইমা ইদ্ধিৰিধঞাণং দিব্বসোতধাতুঞাণং চেতোপরিযঞাণং পুব্বেনিৰাসানুস্সতিঞাণং দিব্বচক্খুঞাণং যথাকম্মুপগঞাণং অনাগতংসঞাণন্তি সপরিভণ্ডা পঞ্চলোকিযঅভিঞ্ঞাসঙ্খাতা ভাৰনাপঞ্ঞা, যা চ খন্ধাযতনধাতুইন্দ্রিযসচ্চপটিচ্চসমুপ্পাদাদিভেদেসু ভূমিভূতেসু ধম্মেসু উগ্গহপরিপুচ্ছাৰসেন ঞাণপরিচযং কত্ৰা সীলৰিসুদ্ধিচিত্তৰিসুদ্ধীতি মূলভূতাসু ইমাসু দ্ৰীসু ৰিসুদ্ধীসু পতিট্ঠায দিট্ঠিৰিসুদ্ধিকঙ্খাৰিতরণৰিসুদ্ধিমগ্গামগ্গঞাণদস্সনৰিসুদ্ধি- পটিপদাঞাণদস্সনৰিসুদ্ধিঞাণদস্সনৰিসুদ্ধীতি সরীরভূতা ইমা পঞ্চ ৰিসুদ্ধিযো সম্পাদেন্তেন ভাৰেতব্বা লোকিযলোকুত্তরভেদা ভাৰনাপঞ্ঞা, তাসং সম্পাদনৰিধানং যস্মা ‘‘তত্থ একোপি হুত্ৰা বহুধা হোতীতিআদিকং ইদ্ধিৰিকুব্বনং কাতুকামেন আদিকম্মিকেন যোগিনা’’তিআদিনা ‘‘খন্ধাতি রূপক্খন্ধো ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধো’’তিআদিনা চ ৰিসযৰিভাগেন সদ্ধিং ৰিসুদ্ধিমগ্গে (ৰিসুদ্ধি. ২.৪৩০ আদযো) সব্বাকারতো ৰিত্থারেত্ৰা ৰুত্তং, তস্মা তত্থ ৰুত্তনযেনেৰ ৰেদিতব্বং. কেৰলঞ্হি তত্থ সাৰকবোধিসত্তস্স ৰসেন পঞ্ঞা আগতা, ইধ মহাবোধিসত্তস্স ৰসেন করুণূপাযকোসল্লপুব্বঙ্গমং কত্ৰা ৰত্তব্বা, ঞাণদস্সনৰিসুদ্ধিং অপাপেত্ৰা পটিপদাঞাণদস্সনৰিসুদ্ধিযংযেৰ ৰিপস্সনা ঠপেতব্বাতি অযমেৰ ৰিসেসো. এৰমেত্থ পঞ্ঞাপারমিযা পটিপত্তিক্কমো ৰেদিতব্বো.

তথা যস্মা সম্মাসম্বোধিযা কতাভিনীহারেন মহাসত্তেন পারমিপরিপূরণত্থং সব্বকালং যুত্তপ্পযুত্তেন ভৰিতব্বং আবদ্ধপরিকরণেন, তস্মা কালেন কালং ‘‘কো নু খো অজ্জ মযা পুঞ্ঞসম্ভারো ঞাণসম্ভারো ৰা উপচিতো, কিং ৰা মযা পরহিতং কত’’ন্তি দিৰসে দিৰসে পচ্চৰেক্খন্তেন সত্তহিতত্থং উস্সাহো করণীযো. সব্বেসম্পি সত্তানং উপকারায অত্তনো পরিগ্গহভূতং ৰত্থু কাযে জীৰিতে চ নিরপেক্খচিত্তেন ওস্সজিতব্বং. যং কিঞ্চি কম্মং করোতি কাযেন ৰাচায ৰা, তং সব্বং সম্বোধিযং নিন্নচিত্তেনেৰ কাতব্বং, বোধিযা পরিণামেতব্বং. উল়ারেহি ইত্তরেহি চ কামেহি ৰিনিৰত্তচিত্তেনেৰ ভৰিতব্বং. সব্বাসুপি ইতিকত্তব্বতাসু উপাযকোসল্লং পচ্চুপট্ঠাপেত্ৰাৰ পটিপজ্জিতব্বং.

তস্মিং তস্মিং সত্তহিতে আরদ্ধৰীরিযেন ভৰিতব্বং ইট্ঠানিট্ঠাদিসব্বসহেন অৰিসংৰাদিনা. সব্বেপি সত্তা অনোধিসো মেত্তায করুণায চ ফরিতব্বা. যা কাচি সত্তানং দুক্খুপ্পত্তি, সব্বা সা অত্তনি পাটিকঙ্খিতব্বা. সব্বেসঞ্চ সত্তানং পুঞ্ঞং অব্ভনুমোদিতব্বং. বুদ্ধানং মহন্ততা মহানুভাৰতা অভিণ্হং পচ্চৰেক্খিতব্বা. যঞ্চ কিঞ্চি কম্মং করোতি কাযেন ৰাচায ৰা, তং সব্বং বোধিনিন্নচিত্তপুব্বঙ্গমং কাতব্বং. ইমিনা হি উপাযেন দানাদীসু যুত্তপ্পযুত্তস্স থামৰতো দল়্হপরক্কমস্স মহাসত্তস্স বোধিসত্তস্স অপরিমেয্যো পুঞ্ঞসম্ভারো ঞাণসম্ভারো চ দিৰসে দিৰসে উপচীযতি.

অপি চ সত্তানং পরিভোগত্থং পরিপালনত্থঞ্চ অত্তনো সরীরং জীৰিতঞ্চ পরিচ্চজিত্ৰা খুপ্পিপাসাসীতুণ্হৰাতাতপাদিদুক্খপতিকারো পরিযেসিতব্বো উপনেতব্বো চ. যঞ্চ যথাৰুত্তদুক্খপতিকারজং সুখং অত্তনা পটিলভতি, তথা রমণীযেসু আরামুয্যানপাসাদতল়াকাদীসু অরঞ্ঞাযতনেসু চ কাযচিত্তসন্তাপাভাৰেন অভিনিব্বুতত্তা অত্তনা সুখং পটিলভতি, যঞ্চ সুণাতি বুদ্ধানুবুদ্ধপচ্চেকবুদ্ধা মহাবোধিসত্তা চ নেক্খম্মপটিপত্তিযং ঠিতা দিট্ঠধম্মসুখৰিহারভূতং ঈদিসং নাম ঝানসমাপত্তিসুখং অনুভৰন্তীতি, তং সব্বং সব্বসত্তেসু অনোধিসো উপসংহরতীতি. অযং তাৰ নযো অসমাহিতভূমিযং পতিট্ঠিতস্স.

সমাহিতভূমিযং পন পতিট্ঠিতো অত্তনা যথানুভূতং ৰিসেসাধিগমনিব্বত্তং পীতিং পস্সদ্ধিং সুখং সমাধিং যথাভূতঞাণঞ্চ সত্তেসু অধিমুচ্চন্তো উপসংহরতি পরিণামেতি. তথা মহতি সংসারদুক্খে তস্স চ নিমিত্তভূতে কিলেসাভিসঙ্খারদুক্খে নিমুগ্গং সত্তনিকাযং দিস্ৰা তত্রাপি ছেদনভেদনফালনপিংসনগ্গিসন্তাপাদিজনিতা দুক্খা তিব্বা খরা কটুকা ৰেদনা নিরন্তরং চিরকালং ৰেদিযন্তে নারকে, অঞ্ঞমঞ্ঞং কুজ্ঝনসন্তাপনৰিহেঠনহিংসনপরাধীনতাদীহি মহাদুক্খং অনুভৰন্তে তিরচ্ছানগতে, জোতিমালাকুলসরীরে খুপ্পিপাসাৰাতাতপাদীহি ডয্হমানে চ ৰিসুস্সমানে চ ৰন্তখেল়াদিআহারে উদ্ধবাহুং ৰিরৰন্তে নিজ্ঝামতণ্হিকাদিকে মহাদুক্খং ৰেদিযমানে পেতে চ, পরিযেট্ঠিমূলকং মহন্তং অনযব্যসনং পাপুণন্তে হত্থচ্ছেদাদিকারণাযোগেন দুব্বণ্ণদুদ্দসিকদলিদ্দাদিভাৰেন খুপ্পিপাসাদিআবাধযোগেন বলৰন্তেহি অভিভৰনীযতো পরেসং ৰহনতো পরাধীনতো চ, নারকে পেতে তিরচ্ছানগতে চ, অতিসযন্তে অপাযদুক্খনিব্বিসেসং দুক্খমনুভৰন্তে মনুস্সে চ, তথা ৰিসযৰিসপরিভোগৰিক্খিত্তচিত্ততায রাগাদিপরিল়াহেন ডয্হমানে ৰাতৰেগসমুট্ঠিতজালাসমিদ্ধসুক্খকট্ঠসন্নিপাতে অগ্গিক্খন্ধে ৰিয অনুপসন্তপরিল়াহৰুত্তিকে অনুপসন্তনিহতপরাধীনে কামাৰচরদেৰে চ, মহতা ৰাযামেন ৰিদূরমাকাসং ৰিগাহিতসকুন্তা ৰিয বলৰতা দূরে পাণিনা খিত্তসরা ৰিয চ, সতিপি চিরপ্পৰত্তিযং অনিচ্চন্তিকতায পাতপরিযোসানা অনতিক্কন্তজাতিজরামরণা এৰাতি রূপারূপাৰচরদেৰে চ পস্সন্তেন মহন্তং সংৰেগং পচ্চুপট্ঠপেত্ৰা মেত্তায করুণায চ অনোধিসো সত্তা ফরিতব্বা. এৰং কাযেন ৰাচায মনসা চ বোধিসম্ভারে নিরন্তরং উপচিনন্তেন যথা পারমিযো পারিপূরিং গচ্ছন্তি, এৰং সক্কচ্চকারিনা সাতচ্চকারিনা অনোলীনৰুত্তিনা উস্সাহো পৰত্তেতব্বো, ৰীরিযপারমী পরিপূরেতব্বা.

অপি চ অচিন্তেয্যাপরিমেয্যৰিপুলোল়ারৰিমলনিরুপমনিরূপক্কিলেসগুণনিচযনিধানভূতস্স বুদ্ধভাৰস্স উস্সক্কিত্ৰা সম্পহংসনযোগ্গং ৰীরিযং নাম অচিন্তেয্যানুভাৰমেৰ, যং ন পচুরজনা সোতুম্পি সক্কুণন্তি, পগেৰ পটিপজ্জিতুং. তথা হি তিৰিধা অভিনীহারচিত্তুপ্পত্তি, চতস্সো বুদ্ধভূমিযো, চত্তারি সঙ্গহৰত্থূনি, করুণেকরসতা, বুদ্ধধম্মেসু সচ্ছিকরণেন ৰিসেসপ্পচ্চযো নিজ্ঝানখন্তি, সব্বধম্মেসু নিরুপলেপো, সব্বসত্তেসু পিযপুত্তসঞ্ঞা, সংসারদুক্খেহি অপরিখেদো, সব্বদেয্যধম্মপরিচ্চাগো, তেন চ নিরতিমানতা, অধিসীলাদিঅধিট্ঠানং, তত্থ চ অচঞ্চলতা, কুসলকিরিযাসু পীতিপামোজ্জং, ৰিৰেকনিন্নচিত্ততা, ঝানানুযোগো, অনৰজ্জধম্মেন অতিত্তি, যথাসুতস্স ধম্মস্স পরেসং হিতজ্ঝাসযেন দেসনা, সত্তানং ঞাযে নিৰেসনা, আরম্ভদল়্হতা, ধীরৰীরভাৰো, পরাপৰাদপরাপকারেসু ৰিকারাভাৰো, সচ্চাধিট্ঠানং, সমাপত্তীসু ৰসীভাৰো, অভিঞ্ঞাসু বলপ্পত্তি, লক্খণত্তযাৰবোধো, সতিপট্ঠানাদীসু যোগকম্মাভিযোগেন লোকুত্তরমগ্গসম্ভারসম্ভরণং, নৰলোকুত্তরাৰক্কন্তীতি এৰমাদিকা সব্বাপি বোধিসম্ভারপটিপত্তি ৰীরিযানুভাৰেনেৰ সমিজ্ঝতীতি অভিনীহারতো যাৰ মহাবোধি অনোস্সজ্জন্তেন সক্কচ্চং নিরন্তরং ৰীরিযং যথা উপরূপরি ৰিসেসাৰহং হোতি, এৰং সম্পাদেতব্বং. সম্পজ্জমানে চ যথাৰুত্তে ৰীরিযে খন্তিসচ্চাধিট্ঠানাদযো চ দানসীলাদযো চ সব্বেপি বোধিসম্ভারা তদধীনৰুত্তিতায সম্পন্না এৰ হোন্তীতি খন্তিআদীসুপি ইমিনাৰ নযেন পটিপত্তি ৰেদিতব্বা.

ইতি সত্তানং সুখূপকরণপরিচ্চাগেন বহুধা অনুগ্গহকরণং দানেন পটিপত্তি, সীলেন তেসং জীৰিতসাপতেয্যদাররক্খাঅভেদপিযহিতৰচনাৰিহিংসাদিকারণানি, নেক্খম্মেন তেসং আমিসপটিগ্গহণধম্মদানাদিনা অনেকৰিধা হিতচরিযা, পঞ্ঞায তেসং হিতকরণূপাযকোসল্লং, ৰীরিযেন তত্থ উস্সাহারম্ভঅসংহীরানি, খন্তিযা তদপরাধসহনং, সচ্চেন নেসং অৰঞ্চনতদুপকারকিরিযাসমাদানাৰিসংৰাদনাদি, অধিট্ঠানেন তদুপকারকরণে অনত্থসম্পাতেপি অচলনং, মেত্তায নেসং হিতসুখানুচিন্তনং, উপেক্খায নেসং উপকারাপকারেসু ৰিকারানাপত্তীতি এৰং অপরিমাণে সত্তে আরব্ভ অনুকম্পিতসব্বসত্তস্স মহাবোধিসত্তস্স পুথুজ্জনেহি অসাধারণো অপরিমেয্যো পুঞ্ঞঞাণসম্ভারূপচযো এত্থ পটিপত্তীতি ৰেদিতব্বং. যো চেতাসং পচ্চযো ৰুত্তো, তস্স চ সক্কচ্চং সম্পাদনং.

কো ৰিভাগোতি? দস পারমিযো, দস উপপারমিযো, দস পরমত্থপারমিযোতি সমত্তিংসপারমিযো. তত্থ কতাভিনীহারস্স বোধিসত্তস্স পরহিতকরণাভিনিন্নাসযপযোগস্স কণ্হধম্মৰোকিণ্ণা সুক্কধম্মা পারমিযো এৰ, তেহি অৰোকিণ্ণা সুক্কধম্মা উপপারমিযো, অকণ্হঅসুক্কা পরমত্থপারমিযোতি কেচি. সমুদাগমনকালেসু ৰা পূরিযমানা পারমিযো, বোধিসত্তভূমিযং পুণ্ণা উপপারমিযো, বুদ্ধভূমিযং সব্বাকারপরিপুণ্ণা পরমত্থপারমিযো. বোধিসত্তভূমিযং ৰা পরহিতকরণতো পারমিযো, অত্তহিতকরণতো উপপারমিযো, বুদ্ধভূমিযং বলৰেসারজ্জসমধিগমেন উভযহিতপরিপূরণতো পরমত্থপারমিযো.

এৰং আদিমজ্ঝপরিযোসানেসু পণিধানারম্ভপরিনিট্ঠানেসু তেসং ৰিভাগোতি অপরে. দোসূপসমকরুণাপকতিকানং ভৰসুখৰিমুত্তিসুখপরমসুখপ্পত্তানং পুঞ্ঞূপচযভেদতো তব্বিভাগোতি অঞ্ঞে. লজ্জাসতিমানাপস্সযানং লোকুত্তরধম্মাধিপতীনং সীলসমাধিপঞ্ঞাগরুকানং তারিততরিততারযিতূনং অনুবুদ্ধপচ্চেকবুদ্ধসম্মাসম্বুদ্ধানং পারমী, উপপারমী, পরমত্থপারমীতি বোধিসত্তস্সুপ্পত্তিতো যথাৰুত্তৰিভাগোতি কেচি. চিত্তপণিধিতো যাৰ ৰচীপণিধি, তাৰ পৰত্তা সম্ভারা পারমিযো, ৰচীপণিধিতো যাৰ কাযপণিধি, তাৰ পৰত্তা উপপারমিযো, কাযপণিধিতো পভুতি পরমত্থপারমিযোতি অপরে. অঞ্ঞে পন ‘‘পরপুঞ্ঞানুমোদনৰসেন পৰত্তা সম্ভারা পারমিযো, পরেসং কারাপনৰসেন পৰত্তা উপপারমিযো, সযংকরণৰসেন পৰত্তা পরমত্থপারমিযো’’তি ৰদন্তি.

তথা ভৰসুখাৰহো পুঞ্ঞঞাণসম্ভারো পারমী, অত্তনো নিব্বানসুখাৰহো উপপারমী, পরেসং তদুভযসুখাৰহো পরমত্থপারমীতি একে. পুত্তদারধনাদিউপকরণপরিচ্চাগো পন দানপারমী, অঙ্গপরিচ্চাগো দানউপপারমী, অত্তনো জীৰিতপরিচ্চাগো দানপরমত্থপারমীতি. তথা পুত্তদারাদিকস্স তিৰিধস্সাপি হেতু অৰীতিক্কমনৰসেন তিস্সো সীলপারমিযো, তেসু এৰ তিৰিধেসু ৰত্থূসু আলযং উপচ্ছিন্দিত্ৰা নিক্খমনৰসেন তিস্সো নেক্খম্মপারমিযো, উপকরণঙ্গজীৰিততণ্হং সমূহনিত্ৰা সত্তানং হিতাহিতৰিনিচ্ছযকরণৰসেন তিস্সো পঞ্ঞাপারমিযো. যথাৰুত্তভেদানং পরিচ্চাগাদীনং ৰাযমনৰসেন তিস্সো ৰীরিযপারমিযো, উপকরণঙ্গজীৰিতন্তরাযকরানং খমনৰসেন তিস্সো খন্তিপারমিযো, উপকরণঙ্গজীৰিতহেতু সচ্চাপরিচ্চাগৰসেন তিস্সো সচ্চপারমিযো, দানাদিপারমিযো অকুপ্পাধিট্ঠানৰসেনেৰ সমিজ্ঝন্তীতি, উপকরণাদিৰিনাসেপি অচলাধিট্ঠানৰসেন তিস্সো অধিট্ঠানপারমিযো, উপকরণাদিউপঘাতকেসুপি সত্তেসু মেত্তায অৰিজহনৰসেন তিস্সো মেত্তাপারমিযো, যথাৰুত্তৰত্থুত্তযস্স উপকারাপকারেসু সত্তসঙ্খারেসু মজ্ঝত্ততাপটিলাভৰসেন তিস্সো উপেক্খাপারমিযোতি এৰমাদিনা এতাসং ৰিভাগো ৰেদিতব্বাতি.

কো সঙ্গহোতি? এত্থ পন যথা এতা ৰিভাগতো তিংসৰিধাপি দানপারমিআদিভাৰতো দসৰিধা, এৰং দানসীলখন্তিৰীরিযঝানপঞ্ঞাসভাৰেন ছব্বিধা. এতাসু হি নেক্খম্মপারমী সীলপারমিযা সঙ্গহিতা, তস্সা পব্বজ্জাভাৰে, নীৰরণৰিৰেকভাৰে পন ঝানপারমিযা কুসলধম্মভাৰে ছহিপি সঙ্গহিতা. সচ্চপারমী সীলপারমিযা একদেসো এৰ ৰচীৰিরতিসচ্চপক্খে, ঞাণসচ্চপক্খে পন পঞ্ঞাপারমিযা সঙ্গহিতা. মেত্তাপারমি ঝানপারমিযা এৰ. উপেক্খাপারমী ঝানপঞ্ঞাপারমীহি. অধিট্ঠানপারমী সব্বাহিপি সঙ্গহিতাতি.

এতেসঞ্চ দানাদীনং ছন্নং গুণানং অঞ্ঞমঞ্ঞসম্বন্ধানং পঞ্চদসযুগলাদীনি পঞ্চদসযুগলাদিসাধকানি হোন্তি. সেয্যথিদং – দানসীলযুগলেন পরহিতাহিতানং করণাকরণযুগলসিদ্ধি, দানখন্তিযুগলেন অলোভাদোসযুগলসিদ্ধি, দানৰীরিযযুগলেন চাগসুতযুগলসিদ্ধি, দানঝানযুগলেন কামদোসপ্পহানযুগলসিদ্ধি. দানপঞ্ঞাযুগলেন অরিযযানধুরযুগলসিদ্ধি, সীলখন্তিদ্ৰযেন পযোগাসযসুদ্ধিদ্ৰযসিদ্ধি, সীলৰীরিযদ্ৰযেন ভাৰনাদ্ৰযসিদ্ধি, সীলঝানদ্ৰযেন দুস্সীল্যপরিযুট্ঠানপ্পহানদ্ৰযসিদ্ধি, সীলপঞ্ঞাদ্ৰযেন দানদ্ৰযসিদ্ধি, খন্তিৰীরিযযুগলেন খমাতেজদ্ৰযসিদ্ধি, খন্তিঝানযুগলেন ৰিরোধানুরোধপ্পহানযুগলসিদ্ধি, খন্তিপঞ্ঞাযুগলেন সুঞ্ঞতাখন্তিপটিৰেধদুকসিদ্ধি, ৰীরিযঝানদুকেন পগ্গহাৰিক্খেপদুকসিদ্ধি, ৰীরিযপঞ্ঞাদুকেন সরণদুকসিদ্ধি, ঝানপঞ্ঞাদুকেন যানদুকসিদ্ধি, দানসীলখন্তিত্তিকেন লোভদোসমোহপ্পহানত্তিকসিদ্ধি, দানসীলৰীরিযত্তিকেন ভোগজীৰিতকাযসারাদানত্তিকসিদ্ধি, দানসীলঝানত্তিকেন পুঞ্ঞকিরিযৰত্থুত্তিকসিদ্ধি, দানসীলপঞ্ঞাতিকেন আমিসাভযধম্মদানত্তিকসিদ্ধীতি. এৰং ইতরেহিপি তিকেহি চতুক্কাদীহি চ যথাসম্ভৰং তিকানি চ চতুক্কাদীনি চ যোজেতব্বানি.

এৰং ছব্বিধানম্পি পন ইমাসং পারমীনং চতূহি অধিট্ঠানেহি সঙ্গহো ৰেদিতব্বো. সব্বপারমীনং সমূহসঙ্গহতো হি চত্তারি অধিট্ঠানানি, সেয্যথিদং – সচ্চাধিট্ঠানং, চাগাধিট্ঠানং, উপসমাধিট্ঠানং, পঞ্ঞাধিট্ঠানন্তি. তত্থ অধিতিট্ঠতি এতেন, এত্থ ৰা অধিতিট্ঠতি, অধিট্ঠানমত্তমেৰ ৰা তন্তি অধিট্ঠানং, সচ্চঞ্চ তং অধিট্ঠানঞ্চ, সচ্চস্স ৰা অধিট্ঠানং, সচ্চং অধিট্ঠানমেতস্সাতি ৰা সচ্চাধিট্ঠানং. এৰং সেসেসুপি. তত্থ অৰিসেসতো তাৰ লোকুত্তরগুণে কতাভিনীহারস্স অনুকম্পিতসব্বসত্তস্স মহাসত্তস্স পটিঞ্ঞানুরূপং সব্বপারমিপরিগ্গহতো সচ্চাধিট্ঠানং. তাসং পটিপক্খপরিচ্চাগতো চাগাধিট্ঠানং. সব্বপারমিতাগুণেহি উপসমতো উপসমাধিট্ঠানং. তেহি এৰ পরহিতোপাযকোসল্লতো পঞ্ঞাধিট্ঠানং.

ৰিসেসতো পন যাচকজনং অৰিসংৰাদেত্ৰা দস্সামীতি পটিজাননতো পটিঞ্ঞং অৰিসংৰাদেত্ৰা দানতো দানং অৰিসংৰাদেত্ৰা অনুমোদনতো মচ্ছরিযাদিপটিপক্খপরিচ্চাগতো দেয্যধম্মপটিগ্গাহকদানদেয্যধম্মক্খযেসু লোভদোসমোহভযৰূপসমতো যথারহং যথাকালং যথাৰিধানঞ্চ দানতো পঞ্ঞুত্তরতো চ কুসলধম্মানং চতুরধিট্ঠানপদট্ঠানং দানং. তথা সংৰরসমাদানস্স অৰীতিক্কমনতো দুস্সীল্যপরিচ্চাগতো দুচ্চরিতৰূপসমনতো পঞ্ঞুত্তরতো চ চতুরধিট্ঠানপদট্ঠানং সীলং. যথাপটিঞ্ঞং খমনতো, পরাপরাধৰিকপ্পপরিচ্চাগতো, কোধপরিযুট্ঠানৰূপসমনতো, পঞ্ঞুত্তরতো, চ চতুরধিট্ঠানপদট্ঠানা খন্তি. পটিঞ্ঞানুরূপং পরহিতকরণতো, ৰিসদপরিচ্চাগতো, অকুসলৰূপসমনতো, পঞ্ঞুত্তরতো চ চতুরধিট্ঠানপদট্ঠানং ৰীরিযং. পটিঞ্ঞানুরূপং লোকহিতানুচিন্তনতো, নীৰরণপরিচ্চাগতো, চিত্তৰূপসমনতো, পঞ্ঞুত্তরতো চ চতুরধিট্ঠানপদট্ঠানং ঝানং. যথাপটিঞ্ঞং পরহিতূপাযকোসল্লতো, অনুপাযকিরিযাপরিচ্চাগতো, মোহজপরিল়াহৰূপসমনতো, সব্বঞ্ঞুতাপটিলাভতো চ চতুরধিট্ঠানপদট্ঠানা পঞ্ঞা.

তত্থ ঞেয্যপটিঞ্ঞানুৰিধানেহি সচ্চাধিট্ঠানং. ৰত্থুকামকিলেসকামপরিচ্চাগেহি চাগাধিট্ঠানং. দোসদুক্খৰূপসমেহি উপসমাধিট্ঠানং. অনুবোধপটিৰেধেহি পঞ্ঞাধিট্ঠানং. তিৰিধসচ্চপরিগ্গহিতং দোসত্তযৰিরোধি সচ্চাধিট্ঠানং. তিৰিধচাগপরিগ্গহিতং দোসত্তযৰিরোধি চাগাধিট্ঠানং. তিৰিধৰূপসমপরিগ্গহিতং দোসত্তযৰিরোধি উপসমাধিট্ঠানং. তিৰিধঞাণপরিগ্গহিতং দোসত্তযৰিরোধি পঞ্ঞাধিট্ঠানং. সচ্চাধিট্ঠানপরিগ্গহিতানি চাগূপসমপঞ্ঞাধিট্ঠানানি অৰিসংৰাদনতো পটিঞ্ঞানুৰিধানতো চ, চাগাধিট্ঠানপরিগ্গহিতানি সচ্চূপসমপঞ্ঞাধিট্ঠানানি পটিপক্খপরিচ্চাগতো সব্বপরিচ্চাগফলত্তা চ, উপসমাধিট্ঠানপরিগ্গহিতানি সচ্চচাগপঞ্ঞাধিট্ঠানানি কিলেসপরিল়াহৰূপসমনতো কামূপসমনতো কামপরিল়াহৰূপসমনতো চ, পঞ্ঞাধিট্ঠানপরিগ্গহিতানি সচ্চচাগূপসমাধিট্ঠানানি ঞাণপুব্বঙ্গমতো ঞাণানুপরিৰত্তনতো চাতি এৰং সব্বাপি পারমিযো সচ্চপ্পভাৰিতা চাগপরিব্যঞ্জিতা উপসমোপব্রূহিতা পঞ্ঞাপরিসুদ্ধা. সচ্চঞ্হি এতাসং জনকহেতু. চাগো পরিগ্গাহকহেতু, উপসমো পরিৰুদ্ধিহেতু, পঞ্ঞা পারিসুদ্ধিহেতু. তথা আদিম্হি সচ্চাধিট্ঠানং সচ্চপটিঞ্ঞত্তা, মজ্ঝে চাগাধিট্ঠানং কতপণিধানস্স পরহিতায অত্তপরিচ্চাগতো. অন্তে উপসমাধিট্ঠানং সব্বূপসমপরিযোসানত্তা. আদিমজ্ঝপরিযোসানেসু পঞ্ঞাধিট্ঠানং তস্মিং সতি সম্ভৰতো অসতি অভাৰতো যথাপটিঞ্ঞঞ্চ ভাৰতো.

তত্থ মহাপুরিসা সততমত্তহিতপরহিতকরেহি গরুপিযভাৰকরেহি সচ্চচাগাধিট্ঠানেহি গিহিভূতা আমিসদানেন পরে অনুগ্গণ্হন্তি. তথা অত্তহিতপরহিতকরেহি গরুপিযভাৰকরেহি উপসমপঞ্ঞাধিট্ঠানেহি চ পব্বজিতভূতা ধম্মদানেন পরে অনুগ্গণ্হন্তি.

তত্থ অন্তিমভৰে বোধিসত্তস্স চতুরধিট্ঠানপরিপূরণং. পরিপুণ্ণচতুরধিট্ঠানস্স হি চরিমকভৰূপপত্তীতি একে. তত্র হি গব্ভোক্কন্তিঠিতিঅভিনিক্খমনেসু পঞ্ঞাধিট্ঠানসমুদাগমেন সতো সম্পজানো সচ্চাধিট্ঠানপারিপূরিযা সম্পতিজাতো উত্তরাভিমুখো সত্তপদৰীতিহারেন গন্ত্ৰা সব্বা দিসা ওলোকেত্ৰা সচ্চানুপরিৰত্তিনা ৰচসা – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্সা’’তি (দী. নি. ২.৩১; ম. নি. ৩.২০৭) তিক্খত্তুং সীহনাদং নদি.

উপসমাধিট্ঠানসমুদাগমেন জিণ্ণাতুরমতপব্বজিতদস্সাৰিনো চতুধম্মপদেসকোৰিদস্স যোব্বনারোগ্যজীৰিতসম্পত্তিমদানং উপসমো. চাগাধিট্ঠানসমুদাগমেন মহতো ঞাতিপরিৰট্টস্স হত্থগতস্স চ চক্কৰত্তিরজ্জস্স অনপেক্খপরিচ্চাগোতি.

দুতিযে ঠানে অভিসম্বোধিযং চতুরধিট্ঠানং পরিপুণ্ণন্তি কেচি. তত্থ হি যথাপটিঞ্ঞং সচ্চাধিট্ঠানসমুদাগমেন চতুন্নং অরিযসচ্চানং অভিসমযো, ততো হি সচ্চাধিট্ঠানং পরিপুণ্ণং. চাগাধিট্ঠানসমুদাগমেন সব্বকিলেসূপক্কিলেসপরিচ্চাগো, ততো হি চাগাধিট্ঠানং পরিপুণ্ণং. উপসমাধিট্ঠানসমুদাগমেন পরমূপসমপ্পত্তি, ততো হি উপসমাধিট্ঠানং পরিপুণ্ণং. পঞ্ঞাধিট্ঠানসমুদাগমেন অনাৰরণঞাণপটিলাভো, ততো হি পঞ্ঞাধিট্ঠানং পরিপুণ্ণন্তি. তং অসিদ্ধং, অভিসম্বোধিযাপি পরমত্থভাৰতো.

ততিযে ঠানে ধম্মচক্কপ্পৰত্তনে চতুরধিট্ঠানং পরিপুণ্ণন্তি অঞ্ঞে. তত্থ হি সচ্চাধিট্ঠানসমুদাগতস্স দ্ৰাদসহি আকারেহি অরিযসচ্চদেসনায সচ্চাধিট্ঠানং পরিপুণ্ণং. চাগাধিট্ঠানসমুদাগতস্স সদ্ধম্মমহাযাগকরণেন চাগাধিট্ঠানং পরিপুণ্ণং. উপসমাধিট্ঠানসমুদাগতস্স সযং উপসন্তস্স পরেসং উপসমনেন উপসমাধিট্ঠানং পরিপুণ্ণং. পঞ্ঞাধিট্ঠানসমুদাগতস্স ৰেনেয্যানং আসযাদিপরিজাননেন পঞ্ঞাধিট্ঠানং পরিপুণ্ণন্তি. তদপি অসিদ্ধং, অপরিযোসিতত্তা বুদ্ধকিচ্চস্স.

চতুত্থে ঠানে পরিনিব্বানে চতুরধিট্ঠানং পরিপুণ্ণন্তি অপরে. তত্র হি পরিনিব্বুতত্তা পরমত্থসচ্চসম্পত্তিযা সচ্চাধিট্ঠানং পরিপুণ্ণং. সব্বূপধিপটিনিস্সগ্গেন চাগাধিট্ঠানং পরিপুণ্ণং. সব্বসঙ্খারূপসমেন উপসমাধিট্ঠানং পরিপুণ্ণং. পঞ্ঞাপযোজনপরিনিট্ঠানেন পঞ্ঞাধিট্ঠানং পরিপুণ্ণন্তি. তত্র মহাপুরিসস্স ৰিসেসেন মেত্তাখেত্তে অভিজাতিযং সচ্চাধিট্ঠানসমুদাগতস্স সচ্চাধিট্ঠানপরিপূরণমভিব্যত্তং, ৰিসেসেন করুণাখেত্তে অভিসম্বোধিযং পঞ্ঞাধিট্ঠানসমুদাগতস্স পঞ্ঞাধিট্ঠানপরিপূরণমভিব্যত্তং, ৰিসেসেন মুদিতাখেত্তে ধম্মচক্কপ্পৰত্তনে চাগাধিট্ঠানসমুদাগতস্স চাগাধিট্ঠানপরিপূরণমভিব্যত্তং, ৰিসেসেন উপেক্খাখেত্তে পরিনিব্বানে উপসমাধিট্ঠানসমুদাগতস্স উপসমাধিট্ঠানপরিপূরণমভিব্যত্তন্তি দট্ঠব্বং.

তত্র সচ্চাধিট্ঠানসমুদাগতস্স সংৰাসেন সীলং ৰেদিতব্বং. চাগাধিট্ঠানসমুদাগতস্স সংৰোহারেন সোচেয্যং ৰেদিতব্বং. উপসমাধিট্ঠানসমুদাগতস্স আপদাসু থামো ৰেদিতব্বো. পঞ্ঞাধিট্ঠানসমুদাগতস্স সাকচ্ছায পঞ্ঞা ৰেদিতব্বা. এৰং সীলাজীৰচিত্তদিট্ঠিৰিসুদ্ধিযো ৰেদিতব্বা. তথা সচ্চাধিট্ঠানসমুদাগমেন দোসাগতিং ন গচ্ছতি অৰিসংৰাদনতো. চাগাধিট্ঠানসমুদাগমেন লোভাগতিং ন গচ্ছতি অনভিসঙ্গতো. উপসমাধিট্ঠানসমুদাগমেন ভযাগতিং ন গচ্ছতি অনপরাধতো. পঞ্ঞাধিট্ঠানসমুদাগমেন মোহাগতিং ন গচ্ছতি যথা ভূতাৰবোধতো.

তথা পঠমেন অদুট্ঠো অধিৰাসেতি, দুতিযেন অলুদ্ধো পটিসেৰতি, ততিযেন অভীতো পরিৰজ্জেতি, চতুত্থেন অসম্মূল়্হো ৰিনোদেতি. পঠমেন নেক্খম্মসুখপ্পত্তি, ইতরেহি পৰিৰেকউপসমসম্বোধিসুখপ্পত্তিযো হোন্তীতি দট্ঠব্বা. তথা ৰিৰেকজপীতিসুখসমাধিজপীতিসুখঅপীতিজকাযসুখসতিপারিসুদ্ধিজ- উপেক্খাসুখপ্পত্তিযো এতেহি চতূহি যথাক্কমং হোন্তি. এৰমনেকগুণানুবন্ধেহি চতূহি অধিট্ঠানেহি সব্বপারমিসমূহসঙ্গহো ৰেদিতব্বো. যথা চ চতূহি অধিট্ঠানেহি সব্বপারমিসঙ্গহো, এৰং করুণাপঞ্ঞাহিপীতি দট্ঠব্বং. সব্বোপি হি বোধিসম্ভারো করুণাপঞ্ঞাহি সঙ্গহিতো. করুণাপঞ্ঞাপরিগ্গহিতা হি দানাদিগুণা মহাবোধিসম্ভারা ভৰন্তি বুদ্ধত্তসিদ্ধিপরিযোসানাতি. এৰমেতাসং সঙ্গহো ৰেদিতব্বো.

কো সম্পাদনূপাযোতি? সকলস্সাপি পুঞ্ঞাদিসম্ভারস্স সম্মাসম্বোধিং উদ্দিস্স অনৰসেসসম্ভরণং অৰেকল্লকারিতাযোগেন, তত্থ চ সক্কচ্চকারিতা আদরবহুমানযোগেন, সাতচ্চকারিতা নিরন্তরযোগেন, চিরকালাদিযোগো চ অন্তরা অৰোসানাপজ্জনেনাতি. তং পনস্স কালপরিমাণং পরতো আৰি ভৰিস্সতি. ইতি চতুরঙ্গযোগো এতাসং পারমীনং সম্পাদনূপাযো. তথা মহাসত্তেন বোধায পটিপজ্জন্তেন সম্মাসম্বোধায বুদ্ধানং পুরেতরমেৰ অত্তা নিয্যাতেতব্বো – ‘‘ইমাহং অত্তভাৰং বুদ্ধানং নিয্যাতেমী’’তি. তংতংপরিগ্গহৰত্থুঞ্চ পটিলাভতো পুরেতরমেৰ দানমুখে নিস্সজ্জিতব্বং. ‘‘যং কিঞ্চি ময্হং উপ্পজ্জনকং জীৰিতপরিক্খারজাতং, সব্বং তং সতি যাচকে দস্সামি, তেসং পন দিন্নাৰসেসং এৰ মযা পরিভুঞ্জিতব্ব’’ন্তি.

এৰং হিস্স সম্মদেৰ পরিচ্চাগায কতে চিত্তাভিসঙ্খারে যং উপ্পজ্জতি পরিগ্গহৰত্থু অৰিঞ্ঞাণকং সৰিঞ্ঞাণকং ৰা, তত্থ যে ইমে পুব্বে দানে অকতপরিচযো, পরিগ্গহৰত্থুস্স পরিত্তভাৰো, উল়ারমনুঞ্ঞতা, পরিক্খযচিন্তাতি চত্তারো দানৰিনিবন্ধা, তেসু যদা মহাবোধিসত্তস্স সংৰিজ্জমানেসু দেয্যধম্মেসু পচ্চুপট্ঠিতে চ যাচকজনে দানে চিত্তং ন পক্খন্দতি ন কমতি. তেন নিট্ঠমেত্থ গন্তব্বং ‘‘অদ্ধাহং দানে পুব্বে অকতপরিচযো, তেন মে এতরহি দাতুকম্যতা চিত্তে ন সণ্ঠাতী’’তি. সো এৰং মে ইতো পরং দানাভিরতং চিত্তং ভৰিস্সতি, হন্দাহং ইতো পট্ঠায দানং দস্সামি, ননু মযা পটিকচ্চেৰ পরিগ্গহৰত্থু যাচকানং পরিচ্চত্তন্তি দানং দেতি মুত্তচাগো পযতপাণী ৰোসগ্গরতো যাচযোগো দানসংৰিভাগরতো. এৰং মহাসত্তস্স পঠমো দানৰিনিবন্ধো হতো হোতি ৰিহতো সমুচ্ছিন্নো.

তথা মহাসত্তো দেয্যধম্মস্স পরিত্তভাৰে সতি ৰেকল্লে চ ইতি পটিসঞ্চিক্খতি – ‘‘অহং খো পুব্বে অদানসীলতায এতরহি এৰং পচ্চযৰিকলো জাতো, তস্মা ইদানি মযা পরিত্তেন ৰা হীনেন ৰা যথালদ্ধেন দেয্যধম্মেন অত্তানং পীল়েত্ৰাপি দানমেৰ দাতব্বং, যেনাহং আযতিম্পি দানপারমিং মত্থকং পাপেস্সামী’’তি. সো ইতরীতরেন তং দানং দেতি মুত্তচাগো পযতপাণী ৰোসগ্গরতো যাচযোগো দানসংৰিভাগরতো. এৰং মহাসত্তস্স দুতিযো দানৰিনিবন্ধো হতো হোতি ৰিহতো সমুচ্ছিন্নো.

তথা মহাসত্তো দেয্যধম্মস্স উল়ারমনুঞ্ঞতায অদাতুকম্যতাচিত্তে উপ্পজ্জমানে ইতি পটিসঞ্চিক্খতি – ‘‘ননু তযা সপ্পুরিস উল়ারতমা সব্বসেট্ঠা সম্মাসম্বোধি অভিপত্থিতা, তস্মা তদত্থং তযা উল়ারমনুঞ্ঞে এৰ দেয্যধম্মে দাতুং যুত্তরূপ’’ন্তি. সো উল়ারং মনুঞ্ঞঞ্চ দেতি মুত্তচাগো পযতপাণী ৰোস্সগ্গরতো যাচযোগো দানসংৰিভাগরতো. এৰং মহাপুরিসস্স ততিযো দানৰিনিবন্ধো হতো হোতি ৰিহতো সমুচ্ছিন্নো.

তথা মহাসত্তো দানং দেন্তো যদা দেয্যধম্মস্স পরিক্খযং পস্সতি, সো ইতি পটিসঞ্চিক্খতি – ‘‘অযং খো ভোগানং সভাৰো, যদিদং খযধম্মতা ৰযধম্মতা চ. অপি চ মে পুব্বে তাদিসস্স দানস্স অকতত্তা এৰং ভোগানং পরিক্খযো দিস্সতি, হন্দাহং যথালদ্ধেন দেয্যধম্মেন পরিত্তেন ৰা ৰিপুলেন ৰা দানমেৰ দদেয্যং, যেনাহং আযতিং দানপারমিযা মত্থকং পাপুণিস্সামী’’তি. সো যথালদ্ধেন দানং দেতি মুত্তচাগো পযতপাণী ৰোসগ্গরতো যাচযোগো দানসংৰিভাগরতো. এৰং মহাসত্তস্স চতুত্থো দানৰিনিবন্ধো হতো হোতি ৰিহতো সমুচ্ছিন্নো. এৰং যে যে দানপারমিযা ৰিনিবন্ধভূতা অনত্থা, তেসং তেসং যথারহং পচ্চৰেক্খিত্ৰা পটিৰিনোদনং উপাযো. যথা চ দানপারমিযা, এৰং সীলপারমিআদীসুপি দট্ঠব্বং.

অপি চ যং মহাসত্তস্স বুদ্ধানং অত্তসন্নিয্যাতনং, তং সম্মদেৰ সব্বপারমীনং সম্পাদনূপাযো. বুদ্ধানঞ্হি অত্তানং নিয্যাতেত্ৰা ঠিতো মহাপুরিসো তত্থ তত্থ বোধিসম্ভারপারিপূরিযা ঘটেন্তো ৰাযমন্তো সরীরস্স সুখূপকরণানঞ্চ উপচ্ছেদকেসু দুস্সহেসুপি কিচ্ছেসু দুরভিসম্ভৰেসুপি সত্তসঙ্খারসমুপনীতেসু অনত্থেসু তিব্বেসু পাণহরেসু ‘‘অযং মযা অত্তভাৰো বুদ্ধানং পরিচ্চত্তো, যং ৰা তং ৰা এত্থ হোতূ’’তি তংনিমিত্তং ন কম্পতি ন ৰেধতি, ঈসকম্পি অঞ্ঞথত্তং ন গচ্ছতি, কুসলারম্ভে অঞ্ঞদত্থু অচলাধিট্ঠানোৰ হোতি, এৰং অত্তসন্নিয্যাতনম্পি এতাসং সম্পাদনূপাযো.

অপি চ সমাসতো কতাভিনীহারস্স অত্তনি সিনেহস্স পরিসোসনং পরেসু চ সিনেহস্স পরিৰড্ঢনং এতাসং সম্পাদনূপাযো. সম্মাসম্বোধিসমধিগমায হি কতমহাপণিধানস্স মহাসত্তস্স যাথাৰতো পরিজাননেন সব্বেসু ধম্মেসু অনুপলিত্তস্স অত্তনি সিনেহো পরিক্খযং পরিযাদানং গচ্ছতি, মহাকরুণাসমাসেৰনেন পন পিযপুত্তে ৰিয সব্বসত্তে সম্পস্সমানস্স তেসু মেত্তাকরুণাসিনেহো পরিৰড্ঢতি, ততো চ তংতদৰত্থানুরূপং অত্তপরসন্তানেসু লোভদোসমোহৰিগমেন ৰিদূরীকতমচ্ছরিযাদিবোধিসম্ভারপটিপক্খো মহাপুরিসো দানপিযৰচনঅত্থচরিযাসমানত্ততাসঙ্খাতেহি চতূহি সঙ্গহৰত্থূহি চতুরধিট্ঠানানুগতেহি অচ্চন্তং জনস্স সঙ্গহকরণেন উপরি যানত্তযে অৰতারণং পরিপাচনঞ্চ করোতি.

মহাসত্তানঞ্হি মহাকরুণা মহাপঞ্ঞা চ দানেন অলঙ্কতা, দানং পিযৰচনেন, পিযৰচনং অত্থচরিযায, অত্থচরিযা সমানত্ততায অলঙ্কতা সঙ্গহিতা চ. তেসং সব্বেপি সত্তে অত্তনা নিব্বিসেসে কত্ৰা বোধিসম্ভারেসু পটিপজ্জন্তানং সব্বত্থ সমানসুখদুক্খতায সমানত্ততায সিদ্ধি. বুদ্ধভূতানম্পি চ তেহেৰ চতূহি সঙ্গহৰত্থূহি চতুরধিট্ঠানপরিপূরিতাভিৰুদ্ধেহি জনস্স অচ্চন্তিকসঙ্গহকরণেন অভিৰিনযনং সিজ্ঝতি. দানঞ্হি সম্মাসম্বুদ্ধানং চাগাধিট্ঠানেন পরিপূরিতাভিৰুদ্ধং, পিযৰচনং সচ্চাধিট্ঠানেন, অত্থচরিযা পঞ্ঞাধিট্ঠানেন, সমানত্ততা উপসমাধিট্ঠানেন পরিপূরিতাভিৰুদ্ধা. তথাগতানঞ্হি সব্বসাৰকপচ্চেকবুদ্ধেহি সমানত্ততা পরিনিব্বানে. তত্র হি নেসং অৰিসেসতো একীভাৰো. তেনেৰাহ ‘‘নত্থি ৰিমুত্তিযা নানত্ত’’ন্তি. হোন্তি চেত্থ –

‘‘সচ্চো চাগী উপসন্তো, পঞ্ঞৰা অনুকম্পকো;

সম্ভতসব্বসম্ভারো, কং নামত্থং ন সাধযে.

‘‘মহাকারুণিকো সত্থা, হিতেসী চ উপেক্খকো;

নিরপেক্খো চ সব্বত্থ, অহো অচ্ছরিযো জিনো.

‘‘ৰিরত্তো সব্বধম্মেসু, সত্তেসু চ উপেক্খকো;

সদা সত্তহিতে যুত্তো, অহো অচ্ছরিযো জিনো.

‘‘সব্বদা সব্বসত্তানং, হিতায চ সুখায চ;

উয্যুত্তো অকিলাসূ চ, অহো অচ্ছরিযো জিনো’’তি.

কিত্তকেন কালেন সম্পাদনন্তি? হেট্ঠিমেন তাৰ পরিচ্ছেদেন চত্তারি অসঙ্খ্যেয্যানি মহাকপ্পানং সতসহস্সঞ্চ, মজ্ঝিমেন অট্ঠ অসঙ্খ্যেয্যানি মহাকপ্পানং সতসহস্সঞ্চ, উপরিমেন পন সোল়স অসঙ্খ্যেয্যানি মহাকপ্পানং সতসহস্সঞ্চ. এতে চ ভেদা যথাক্কমং পঞ্ঞাধিকসদ্ধাধিকৰীরিযাধিকৰসেন ঞাতব্বা. পঞ্ঞাধিকানঞ্হি সদ্ধা মন্দা হোতি পঞ্ঞা তিক্খা, সদ্ধাধিকানং পঞ্ঞা মজ্ঝিমা হোতি, ৰীরিযাধিকানং পঞ্ঞা মন্দা, পঞ্ঞানুভাৰেন চ সম্মাসম্বোধি অধিগন্তব্বাতি অট্ঠকথাযং ৰুত্তং.

অপরে পন ‘‘ৰীরিযস্স তিক্খমজ্ঝিমমুদুভাৰেন বোধিসত্তানং অযং কালৰিভাগো’’তি ৰদন্তি. অৰিসেসেন পন ৰিমুত্তিপরিপাচনীযানং ধম্মানং তিক্খমজ্ঝিমমুদুভাৰেন যথাৰুত্তকালভেদেন বোধিসম্ভারা তেসং পারিপূরিং গচ্ছন্তীতি তযোপেতে কালভেদা যুত্তাতিপি ৰদন্তি. এৰং তিৰিধা হি বোধিসত্তা অভিনীহারক্খণে ভৰন্তি উগ্ঘহটিতঞ্ঞূৰিপঞ্চিতঞ্ঞূনেয্যভেদেন. তেসু যো উগ্ঘটিতঞ্ঞূ, সো সম্মাসম্বুদ্ধস্স সম্মুখা চতুপ্পদিকং গাথং সুণন্তো গাথায ততিযপদে অপরিযোসিতে এৰ ছহি অভিঞ্ঞাহি সহ পটিসম্ভিদাহি অরহত্তং অধিগন্তুং সমত্থূপনিস্সযো হোতি, সচে সাৰকবোধিযং অধিমুত্তো সিযা.

দুতিযো ভগৰতো সম্মুখা চতুপ্পদিকং গাথং সুণন্তো অপরিযোসিতে এৰ গাথায চতুত্থপদে ছহি অভিঞ্ঞাহি অরহত্তং অধিগন্তুং সমত্থূপনিস্সযো হোতি, যদি সাৰকবোধিযং অধিমুত্তো সিযা.

ইতরো পন ভগৰতো সম্মুখা চতুপ্পদিকং গাথং সুত্ৰা পরিযোসিতায গাথায ছহি অভিঞ্ঞাহি অরহত্তং পত্তুং সমত্থূপনিস্সযো হোতি.

তযোপেতে ৰিনা কালভেদেন কতাভিনীহারো বুদ্ধানং সন্তিকে লদ্ধব্যাকরণা চ অনুক্কমেন পারমিযো পরিপূরেন্তা যথাক্কমং যথাৰুত্তভেদেন কালেন সম্মাসম্বোধিং পাপুণন্তি. তেসু তেসু পন কালভেদেসু অপরিপুণ্ণেসু তে তে মহাসত্তা দিৰসে দিৰসে ৰেস্সন্তরদানসদিসং মহাদানং দেন্তাপি তদনুরূপে সীলাদিসব্বপারমিধম্মে আচিনন্তাপি পঞ্চ মহাপরিচ্চাগে পরিচ্চজন্তাপি ঞাতত্থচরিযা লোকত্থচরিযা বুদ্ধত্থচরিযা পরমকোটিং পাপেন্তাপি অন্তরা চ সম্মাসম্বুদ্ধা ভৰিস্সন্তীতি নেতং ঠানং ৰিজ্জতি. কস্মা? ঞাণস্স অপরিপচ্চনতো বুদ্ধকারকধম্মানং অপরিনিট্ঠানতো. পরিচ্ছিন্নকালনিপ্ফাদিতং ৰিয হি সস্সং যথাৰুত্তকালপরিচ্ছেদেন পরিনিপ্ফাদিতা সম্মাসম্বোধি তদনন্তরা সব্বুস্সাহেন ৰাযমন্তেনাপি ন সক্কা অধিগন্তুন্তি পারমিপারিপূরি যথাৰুত্তকালৰিসেসেন সম্পজ্জতীতি ৰেদিতব্বং.

কো আনিসংসোতি? যে তে কতাভিনীহারানং বোধিসত্তানং –

‘‘এৰং সব্বঙ্গসম্পন্না, বোধিযা নিযতা নরা;

সংসরং দীঘমদ্ধানং, কপ্পকোটিসতেহিপি.

‘‘অৰীচিম্হি নুপ্পজ্জন্তি, তথা লোকন্তরেসু চ;

নিজ্ঝামতণ্হা খুপ্পিপাসা, ন হোন্তি কালকঞ্জিকা.

‘‘ন হোন্তি খুদ্দকা পাণা, উপপজ্জন্তাপি দুগ্গতিং;

জাযমানা মনুস্সেসু, জচ্চন্ধা ন ভৰন্তি তে.

‘‘সোতৰেকল্লতা নত্থি, ন ভৰন্তি মূগপক্খিকা;

ইত্থিভাৰং ন গচ্ছন্তি, উভতোব্যঞ্জনপণ্ডকা.

‘‘ন ভৰন্তি পরিযাপন্না, বোধিযা নিযতা নরা;

মুত্তা আনন্তরিকেহি, সব্বত্থ সুদ্ধগোচরা.

‘‘মিচ্ছাদিট্ঠিং ন সেৰন্তি, কম্মকিরিযদস্সনা;

ৰসমানাপি সগ্গেসু, অসঞ্ঞং নূপপজ্জরে.

‘‘সুদ্ধাৰাসেসু দেৰেসু, হেতু নাম ন ৰিজ্জতি;

নেক্খম্মনিন্না সপ্পুরিসা, ৰিসংযুত্তা ভৰাভৰে;

চরন্তি লোকত্থচরিযাযো, পূরেন্তি সব্বপারমী’’তি. (ধ. স. অট্ঠ. নিদানকথা; জা. অট্ঠ. ১.দূরেনিদানকথা; অপ. অট্ঠ. ১.দূরেনিদানকথা) –

এৰং সংৰণ্ণিতা আনিসংসা. যে চ ‘‘সতো সম্পজানো, আনন্দ, বোধিসত্তো তুসিতা কাযা চৰিত্ৰা মাতুকুচ্ছিং ওক্কমতী’’তিআদিনা (ম. নি. ৩.২০০; দী. নি. ২.১৭) সোল়স অচ্ছরিযব্ভুতধম্মপ্পকারা, যে চ ‘‘সীতং ব্যপগতং হোতি, উণ্হঞ্চ উপসম্মতী’’তিআদিনা (বু. ৰং. ২.৮৩) ‘‘জাযমানে খো, সারিপুত্ত, বোধিসত্তে অযং দসসহস্সী লোকধাতু সঙ্কম্পতি সম্পকম্পতি সম্পৰেধতী’’তিআদিনা (ম. নি. ৩.২০১; দী. নি. ২.৩২) চ দ্ৰত্তিংস পুব্বনিমিত্তপ্পকারা, যে ৰা পনঞ্ঞেপি বোধিসত্তানং অধিপ্পাযসমিজ্ঝনং কম্মাদীসু ৰসীভাৰোতি এৰমাদযো তত্থ তত্থ জাতকবুদ্ধৰংসাদীসু দস্সিতাকারা আনিসংসা, তে সব্বেপি এতাসং আনিসংসা. তথা যথানিদস্সিতভেদা অলোভাদোসাদিগুণযুগলাদযো চাতি ৰেদিতব্বা.

অপি চ যস্মা বোধিসত্তো অভিনীহারতো পট্ঠায সব্বসত্তানং পিতুসমো হোতি হিতেসিতায, দক্খিণেয্যকো গরু ভাৰনীযো পরমঞ্চ পুঞ্ঞক্খেত্তং হোতি গুণৰিসেসযোগেন. যেভুয্যেন চ মনুস্সানং পিযো হোতি, অমনুস্সানং পিযো হোতি, দেৰতাহি অনুপালীযতি, মেত্তাকরুণাপরিভাৰিতসন্তানতায ৰাল়মিগাদীহি চ অনভিভৰনীযো হোতি, যস্মিং যস্মিঞ্চ সত্তনিকাযে পচ্চাজাযতি, তস্মিং তস্মিং উল়ারেন ৰণ্ণেন উল়ারেন যসেন উল়ারেন সুখেন উল়ারেন বলেন উল়ারেন আধিপতেয্যেন অঞ্ঞে সত্তে অভিভৰতি পুঞ্ঞৰিসেসযোগতো.

অপ্পাবাধো হোতি অপ্পাতঙ্কো, সুৰিসুদ্ধা চস্স সদ্ধা হোতি সুৰিসদা, সুৰিসুদ্ধং ৰীরিযং, সতিসমাধিপঞ্ঞা সুৰিসদা, মন্দকিলেসো হোতি মন্দদরথো মন্দপরিল়াহো, কিলেসানং মন্দভাৰেনেৰ সুৰচো হোতি পদক্খিণগ্গাহী, খমো হোতি সোরতো, সখিলো হোতি পটিসন্থারকুসলো, অক্কোধনো হোতি অনুপনাহী, অমক্খী হোতি অপল়াসী, অনিস্সুকী হোতি অমচ্ছরী, অসঠো হোতি অমাযাৰী, অথদ্ধো হোতি অনতিমানী, অসারদ্ধো হোতি অপ্পমত্তো, পরতো উপতাপসহো হোতি পরেসং অনুপতাপী, যস্মিঞ্চ গামখেত্তে পটিৰসতি, তত্থ সত্তানং ভযাদযো উপদ্দৰা যেভুয্যেন অনুপ্পন্না নুপ্পজ্জন্তি, উপ্পন্না চ ৰূপসম্মন্তি, যেসু চ অপাযেসু উপ্পজ্জতি, ন তত্থ পচুরজনো ৰিয দুক্খেন অধিমত্তং পীল়ীযতি, ভিয্যোসোমত্তায সংৰেগমাপজ্জতি. তস্মা মহাপুরিসস্স যথারহং তস্মিং তস্মিং ভৰে লব্ভমানা এতে সত্তানং পিতুসমতাদক্খিণেয্যতাদযো গুণৰিসেসা আনিসংসাতি ৰেদিতব্বা.

তথা আযুসম্পদা রূপসম্পদা কুলসম্পদা ইস্সরিযসম্পদা আদেয্যৰচনতা মহানুভাৰতাতি এতেপি মহাপুরিসস্স পারমীনং আনিসংসাতি ৰেদিতব্বা. তত্থ আযুসম্পদা নাম তস্সং তস্সং উপপত্তিযং দীঘাযুকতা চিরট্ঠিতিকতা, তায যথারদ্ধানি কুসলসমাদানানি পরিযোসাপেতি, বহুঞ্চ কুসলং উপচিনোতি. রূপসম্পদা নাম অভিরূপতা দস্সনীযতা পাসাদিকতা, তায রূপপ্পমাণানং সত্তানং পসাদাৰহো হোতি সম্ভাৰনীযো. কুলসম্পদা নাম উল়ারেসু কুলেসু অভিনিব্বত্তি, তায জাতিমদাদিমদমত্তানম্পি উপসঙ্কমনীযো হোতি পযিরুপাসনীযো, তেন তে নিব্বিসেৰনে করোতি. ইস্সরিযসম্পদা নাম মহাৰিভৰতা মহেসক্খতা মহাপরিৰারতা চ, তাহি সঙ্গণ্হিতব্বে চতূহি সঙ্গহৰত্থূহি সঙ্গণ্হিতুং, নিগ্গহেতব্বে ধম্মেন নিগ্গহেতুঞ্চ সমত্থো হোতি.

আদেয্যৰচনতা নাম সদ্ধেয্যতা পচ্চযিকতা, তায সত্তানং পমাণভূতো হোতি, অলঙ্ঘনীযা চস্স আণা হোতি. মহানুভাৰতা নাম আনুভাৰমহন্ততা, তায পরেহি ন অভিভূযতি, সযমেৰ পন পরে অঞ্ঞদত্থু অভিভৰতি ধম্মেন সমেন যথাভূতগুণেহি চ, এৰমেতে আযুসম্পদাদযো মহাপুরিসস্স পারমীনং আনিসংসা, সযঞ্চ অপরিমাণস্স পুঞ্ঞসম্ভারস্স পরিৰুড্ঢিহেতুভূতা যানত্তযে সত্তানং অৰতারণস্স পরিপাচনস্স চ কারণভূতাতি ৰেদিতব্বা.

কিং ফলন্তি? সমাসতো তাৰ সম্মাসম্বুদ্ধভাৰো এতাসং ফলং, ৰিত্থারতো পন দ্ৰত্তিংসমহাপুরিসলক্খণঅসীতিঅনুব্যঞ্জনব্যামপ্পভাদিঅনেকগুণগণসমুজ্জলরূপকাযসম্পত্তি- অধিট্ঠানসবলচতুৰেসারজ্জছঅসাধারণঞাণঅট্ঠারসাৰেণিক- বুদ্ধধম্মপ্পভুতিঅনন্তাপরিমাণ গুণসমুদযোপসোভিনী ধম্মকাযসিরী. যাৰতা পন বুদ্ধগুণা যে অনেকেহিপি কপ্পেহি সম্মাসম্বুদ্ধেনাপি ৰাচায পরিযোসাপেতুং ন সক্কা, ইদমেতাসং ফলং. ৰুত্তঞ্চেতং –

‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩; চরিযা. অট্ঠ. নিদানকথা);

এৰমেত্থ পারমীসু পকিণ্ণককথা ৰেদিতব্বা.

যং পন পাল়িযং ‘‘দত্ৰা দাতব্বকং দান’’ন্তিআদিনা সব্বাপি পারমী একজ্ঝং দস্সেত্ৰা পরতো ‘‘কোসজ্জং ভযতো দিস্ৰা’’তিআদিনা পরিযোসানগাথাদ্ৰযং ৰুত্তং, তং যেহি ৰীরিযারম্ভমেত্তাভাৰনা অপ্পমাদৰিহারেহি যথাৰুত্তা বুদ্ধকারকধম্মা ৰিসদভাৰং গতা সম্মাসম্বোধিসঙ্খাতা চ অত্তনো ৰিমুত্তি পরিপাচিতা, তেহি ৰেনেয্যানম্পি ৰিমুত্তিপরিপাচনায ওৰাদদানত্থং ৰুত্থং.

তত্থ কোসজ্জং ভযতো দিস্ৰা, ৰীরিযারম্ভঞ্চ খেমতোতি ইমিনা পটিপক্খে আদীনৰদস্সনমুখেন ৰীরিযারম্ভে আনিসংসং দস্সেতি. আরদ্ধৰীরিযা হোথাতি ইমিনা ৰীরিযারম্ভে নিযোজেতি. যস্মা চ –

‘‘সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধান সাসন’’ন্তি. (ধ. প. ১৮৩; দী. নি. ২.৯০; নেত্তি. ৩০, ৫০) –

সঙ্খেপতো. ৰিত্থারতো পন সকলেন বুদ্ধৰচনেন পকাসিতা সব্বাপি সম্পত্তিযো একন্তেনেৰ সম্মপ্পধানাধীনা, তস্মা ভগৰা ৰীরিযারম্ভে নিযোজেত্ৰা ‘‘এসা বুদ্ধানুসাসনী’’তি আহ.

তত্রাযং সঙ্খেপত্থো – য্ৰাযং সব্বসংকিলেসমূলভাৰতো সব্বানত্থৰিধাযকন্তি কোসজ্জং ভযতো তপ্পটিপক্খতো চতূহি যোগেহি অনুপদ্দৰভাৰসাধনতো ৰীরিযারম্ভঞ্চ খেমতো দিস্ৰা অধিসীলসিক্খাদিসম্পাদনৰসেন ৰীরিযস্স আরম্ভো সম্মপ্পধানানুযোগো, তত্থ যং সম্মদেৰ নিযোজন, ‘‘আরদ্ধৰীরিযা হোথা’’তি, এসা বুদ্ধানং ভগৰন্তানং অনুসাসনী অনুসিট্ঠি ওৰাদোতি. সেসগাথাসুপি ইমিনাৰ নযেন অত্থো ৰেদিতব্বো.

অযং পন ৰিসেসো – ৰিৰাদন্তি ৰিরুদ্ধৰাদং, ছৰিৰাদৰত্থুৰসেন ৰিৰদনন্তি অত্থো. অৰিৰাদন্তি ৰিৰাদপটিপক্খং মেত্তাৰচীকম্মং, মেত্তাভাৰনং ৰা. অথ ৰা অৰিৰাদন্তি অৰিৰাদহেতুভূতং ছব্বিধং সারণীযধম্মং. সমগ্গাতি অৰগ্গা, কাযেন চেৰ চিত্তেন চ সহিতা অৰিরমিতা অৰিযুত্তাতি অত্থো. সখিলাতি সক্কীলা মুদুসীলা, অঞ্ঞমঞ্ঞম্হি মুদুহদযাতি অত্থো. এসা বুদ্ধানুসাসনীতি এত্থ সব্বেন সব্বং ৰিৰাদমনুপগম্ম যদিদং ছসারণীযধম্মপরিপূরণৰসেন সমগ্গৰাসে নিযোজনং, এসা বুদ্ধানং অনুসিট্ঠীতি যোজেতব্বং. সমগ্গৰাসঞ্হি ৰসমানা সীলদিট্ঠিসামঞ্ঞগতা অৰিৰদমানা সুখেনেৰ তিস্সো সিক্খা পরিপূরেস্সন্তীতি সত্থা সমগ্গৰাসে নিযোজনং অত্তনো সাসনন্তি দস্সেসি.

পমাদন্তি পমজ্জনং, কুসলানং ধম্মানং পমুস্সনং অকুসলেসু চ ধম্মেসু চিত্তৰোস্সগ্গং. ৰুত্তঞ্হেতং – ‘‘তত্থ কতমো পমাদো, কাযদুচ্চরিতে ৰা ৰচীদুচ্চরিতে ৰা মনোদুচ্চরিতে ৰা পঞ্চসু ৰা কামগুণেসু চিত্তস্স ৰোসগ্গো ৰোসগ্গানুপ্পদানং কুসলানং ৰা ধম্মানং ভাৰনায অসক্কচ্চকিরিযতা, অসাতচ্চকিরিযতা, অনট্ঠিতকিরিযতা, ওলীনৰুত্তিতা, নিক্খিত্তছন্দতা, নিক্খিত্তধুরতা অনাসেৰনা অভাৰনা অবহুলীকম্মং…পে… যো এৰরূপো পমাদো পমজ্জনা পমজ্জিতত্তং, অযং ৰুচ্চতি পমাদো’’তি (ৰিভ. ৮৪৬).

অপ্পমাদন্তি অপ্পমজ্জনং. তং পমাদস্স পটিপক্খতো ৰেদিতব্বং. অত্থতো হি অপ্পমাদো নাম সতিযা অৰিপ্পৰাসো, ‘‘সতিযা অৰিপ্পৰাসো’’তি চ নিচ্চং উপট্ঠিতায সতিযা এৰেতং নামং. অপরে পন ‘‘সতিসম্পজঞ্ঞপ্পধানা তথা পৰত্তা চত্তারো অরূপিনো খন্ধা অপ্পমাদো’’তি ৰদন্তি. যস্মা পন অপ্পমাদভাৰনা নাম ৰিসুং একা ভাৰনা নত্থি. যা হি কাচি পুঞ্ঞকিরিযা কুসলকিরিযা, সব্বা সা অপ্পমাদভাৰনাত্ৰেৰ ৰেদিতব্বা.

ৰিসেসতো পন ৰিৰট্টূপনিস্সযং সরণগমনং কাযিকৰাচসিকসংৰরঞ্চ উপাদায সব্বা সীলভাৰনা, সব্বা সমাধিভাৰনা, সব্বা পঞ্ঞাভাৰনা, সব্বা কুসলভাৰনা, অনৰজ্জভাৰনা, অপ্পমাদভাৰনা. ‘‘অপ্পমাদো’’তি হি ইদং পদং মহন্তং অত্থং দীপেতি, মহন্তং অত্থং পরিগ্গহেত্ৰা তিট্ঠতি, সকলম্পি তেপিটকং বুদ্ধৰচনং আহরিত্ৰা অপ্পমাদপদস্স অত্থং কত্ৰা কথেন্তো ধম্মকথিকো ‘‘অতিত্থেন পক্খন্দো’’তি ন ৰত্তব্বো. কস্মা? অপ্পমাদপদস্স মহন্তভাৰতো. তথা হি সম্মাসম্বুদ্ধো কুসিনারাযং যমকসালানমন্তরে পরিনিব্বানসমযে নিপন্নো অভিসম্বোধিতো পট্ঠায পঞ্চচত্তালীসায ৰস্সেসু অত্তনা ভাসিতং ধম্মং একেনেৰ পদেন সঙ্গহেত্ৰা দস্সেন্তো ‘‘অপ্পমাদেন সম্পাদেথা’’তি (দী. নি. ২.২১৮) ভিক্খূনং ওৰাদমদাসি. তথা চাহ – ‘‘সেয্যথাপি, ভিক্খৰে, যানি কানিচি জঙ্গমানং পাণানং পদজাতানি, সব্বানি তানি হত্থিপদে সমোধানং গচ্ছন্তি, হত্থিপদং তেসং অগ্গমক্খাযতি যদিদং মহন্তত্তেন, এৰমেৰ খো, ভিক্খৰে, যে কেচি কুসলা ধম্মা, সব্বে তে অপ্পমাদমূলকা অপ্পমাদসমোসরণা, অপ্পমাদো তেসং অগ্গমক্খাযতী’’তি (ম. নি. ১.৩০০ থোকং ৰিসদিসং). তত্থ অপ্পমাদভাৰনং সিখাপ্পত্তং দস্সেন্তো সত্থা ‘‘ভাৰেথট্ঠঙ্গিকং মগ্গ’’ন্তি আহ.

তস্সত্থো – যো এস সীলাদিখন্ধত্তযসঙ্গহো সম্মাদিট্ঠিপুব্বঙ্গমো সম্মাদিট্ঠিআদীনংযেৰ অট্ঠন্নং অঙ্গানং ৰসেন অট্ঠঙ্গিকো অরিযমগ্গো, তং ভাৰেথ অত্তনো সন্তানে উপ্পাদেথ. দস্সনমগ্গমত্তে অঠত্ৰা উপরি তিণ্ণং মগ্গানং উপ্পাদনৰসেন ৰড্ঢেথ, এৰং ৰো অপ্পমাদভাৰনা সিখাপ্পত্তা ভৰিস্সতীতি. এসা বুদ্ধানুসাসনীতি যদিদং কুসলেসু ধম্মেসু অপ্পমজ্জনং, তঞ্চ উস্সুক্কাপেত্ৰা অরিযমগ্গস্স ভাৰনা এসা বুদ্ধানং ভগৰন্তানং অনুসিট্ঠি ওৰাদোতি.

ইতি ভগৰা অরহত্তনিকূটেনেৰ চরিযাপিটকদেসনং নিট্ঠাপেসি. ইত্থং সুদন্তিআদীসু ইত্থন্তি কপ্পে চ সতসহস্সেতিআদিনা (চরিযা. ১.১) পকারেন. সুদন্তি নিপাতমত্তং. ভগৰাতি ভাগ্যৰন্ততাদীহি কারণেহি ভগৰা. অত্তনো পুব্বচরিযন্তি পুরিমাসু অকিত্তিপণ্ডিতাদিজাতীসু অত্তনো পটিপত্তিদুক্করকিরিযং. সম্ভাৰযমানোতি হত্থতলে আমলকং ৰিয সম্মদেৰ পকাসেন্তো. বুদ্ধাপদানিযং নামাতি বুদ্ধানং পুরাতনকম্মং পোরাণং দুক্করকিরিযং অধিকিচ্চ পৰত্তত্তা দেসিতত্তা বুদ্ধাপদানিযন্তি এৰংনামকং. ধম্মপরিযাযন্তি ধম্মদেসনং ধম্মভূতং ৰা কারণং. অভাসিত্থাতি অৰোচ. যং পনেত্থ ন ৰুত্তং, তং হেট্ঠা ৰুত্তনযত্তা উত্তানত্থত্তা চ ন ৰুত্তন্তি ৰেদিতব্বং.

নিগমনকথা

এত্তাৰতা চ –

ৰিসুদ্ধচরিতো সত্থা, বুদ্ধিচরিযায পারগূ;

সব্বচরিযাসু কুসলো, লোকাচরিযো অনুত্তরো.

যং অচ্ছরিযধম্মানং, সব্বমচ্ছরিযাতিগো;

অত্তনো পুব্বচরিযানং, আনুভাৰৰিভাৰনং.

দেসেসি নাথো চরিযা-পিটকং যঞ্চ তাদিনো;

ধম্মসঙ্গাহকা থেরা, সঙ্গাযিংসু তথেৰ চ.

তস্স অত্থং পকাসেতুং, পোরাণট্ঠকথানযং;

নিস্সায যা সমারদ্ধা, অত্থসংৰণ্ণনা মযা.

যা তত্থ পরমত্থানং, নিদ্ধারেত্ৰা যথারহং;

পকাসনা পরমত্থ-দীপনী নাম নামতো.

সম্পত্তা পরিনিট্ঠানং, অনাকুলৰিনিচ্ছযা;

সাধিকাযট্ঠৰীসায, পাল়িযা ভাণৰারতো.

ইতি তং সঙ্খরোন্তেন, যং তং অধিগতং মযা;

পুঞ্ঞং তস্সানুভাৰেন, লোকনাথস্স সাসনং.

ওগাহেত্ৰা ৰিসুদ্ধায, সীলাদিপটিপত্তিযা;

সব্বেপি দেহিনো হোন্তু, ৰিমুত্তিরসভাগিনো.

চিরং তিট্ঠতু লোকস্মিং, সম্মাসম্বুদ্ধসাসনং;

তস্মিং সগারৰা নিচ্চং, হোন্তু সব্বেপি পাণিনো.

সম্মা ৰস্সতু কালেন, দেৰোপি জগতীপতি;

সদ্ধম্মনিরতো লোকং, ধম্মেনেৰ পসাসতূতি.

ইতি বদরতিত্থৰিহারৰাসিনা আচরিযধম্মপালেন

কতা

চরিযাপিটকৰণ্ণনা নিট্ঠিতা.