মূল > সুত্তপিটক > খুদ্দকনিকায

THA Vol 2
MMR Vol 2
VRI Vol 2
PTS Vol 0

Misc. Paragraph

খুদ্দকনিকাযে

চরিযাপিটকপাল়ি

নমো তস্স ভগৰতো অরহতো সম্মাসম্বুদ্ধস্স

‘‘কপ্পে ¶ ¶ ¶ ¶ চ সতসহস্সে, চতুরো চ অসঙ্খিযে;

এত্থন্তরে যং চরিতং, সব্বং তং বোধিপাচনং.

‘‘অতীতকপ্পে চরিতং, ঠপযিত্ৰা ভৰাভৰে;

ইমম্হি কপ্পে চরিতং, পৰক্খিস্সং সুণোহি মে.

‘‘যদা অহং ব্রহারঞ্ঞে, সুঞ্ঞে ৰিপিনকাননে;

অজ্ঝোগাহেত্ৰা [অজ্ঝোগহেত্ৰা (সী. স্যা.)] ৰিহরামি, অকিত্তি নাম তাপসো.

‘‘তদা ¶ মং তপতেজেন, সন্তত্তো তিদিৰাভিভূ;

ধারেন্তো ব্রাহ্মণৰণ্ণং, ভিক্খায মং উপাগমি.

‘‘পৰনা আভতং পণ্ণং, অতেলঞ্চ অলোণিকং;

মম দ্ৰারে ঠিতং দিস্ৰা, সকটাহেন আকিরিং.

‘‘তস্স দত্ৰানহং পণ্ণং, নিক্কুজ্জিত্ৰান ভাজনং;

পুনেসনং জহিত্ৰান, পাৰিসিং পণ্ণসালকং.

‘‘দুতিযম্পি ¶ ততিযম্পি, উপগঞ্ছি মমন্তিকং;

অকম্পিতো অনোলগ্গো, এৰমেৰমদাসহং.

‘‘ন ¶ মে তপ্পচ্চযা অত্থি, সরীরস্মিং ৰিৰণ্ণিযং;

পীতিসুখেন রতিযা, ৰীতিনামেমি তং দিৰং.

‘‘যদি মাসম্পি দ্ৰেমাসং, দক্খিণেয্যং ৰরং লভে;

অকম্পিতো অনোলীনো, দদেয্যং দানমুত্তমং.

‘‘ন তস্স দানং দদমানো, যসং লাভঞ্চ পত্থযিং;

সব্বঞ্ঞুতং পত্থযানো, তানি কম্মানি আচরি’’ন্তি.

‘‘পুনাপরং ¶ যদা হোমি, ব্রাহ্মণো সঙ্খসৰ্হযো;

মহাসমুদ্দং তরিতুকামো, উপগচ্ছামি পট্টনং.

‘‘তত্থদ্দসং পটিপথে, সযম্ভুং অপরাজিতং;

কন্তারদ্ধানং পটিপন্নং [কন্তারদ্ধানপটিপন্নং (সী. স্যা.)], তত্তায কঠিনভূমিযা.

‘‘তমহং পটিপথে দিস্ৰা, ইমমত্থং ৰিচিন্তযিং;

‘ইদং খেত্তং অনুপ্পত্তং, পুঞ্ঞকামস্স জন্তুনো.

‘‘‘যথা কস্সকো পুরিসো, খেত্তং দিস্ৰা মহাগমং;

তত্থ বীজং ন রোপেতি, ন সো ধঞ্ঞেন অত্থিকো.

‘‘‘এৰমেৰাহং ¶ ¶ পুঞ্ঞকামো, দিস্ৰা খেত্তৰরুত্তমং;

যদি তত্থ কারং ন করোমি, নাহং পুঞ্ঞেন অত্থিকো.

‘‘‘যথা অমচ্চো মুদ্দিকামো, রঞ্ঞো অন্তেপুরে জনে;

ন দেতি তেসং ধনধঞ্ঞং, মুদ্দিতো পরিহাযতি.

‘‘‘এৰমেৰাহং পুঞ্ঞকামো, ৰিপুলং দিস্ৰান দক্খিণং;

যদি তস্স দানং ন দদামি, পরিহাযিস্সামি পুঞ্ঞতো’.

‘‘এৰাহং চিন্তযিত্ৰান, ওরোহিত্ৰা উপাহনা;

তস্স পাদানি ৰন্দিত্ৰা, অদাসিং ছত্তুপাহনং.

‘‘তেনেৰাহং ¶ সতগুণতো, সুখুমালো সুখেধিতো;

অপি চ দানং পরিপূরেন্তো, এৰং তস্স অদাসহ’’ন্তি.

‘‘পুনাপরং যদা হোমি, ইন্দপত্থে [ইন্দপত্তে (সী. ক.)] পুরুত্তমে;

রাজা ধনঞ্চযো নাম, কুসলে দসহুপাগতো.

‘‘কলিঙ্গরট্ঠৰিসযা, ব্রাহ্মণা উপগঞ্ছু মং;

আযাচুং মং হত্থিনাগং, ধঞ্ঞং মঙ্গলসম্মতং.

‘‘‘অৰুট্ঠিকো জনপদো, দুব্ভিক্খো ছাতকো মহা;

দদাহি পৰরং নাগং, নীলং অঞ্জনসৰ্হযং.

‘‘‘ন ¶ ¶ মে যাচকমনুপ্পত্তে, পটিক্খেপো অনুচ্ছৰো;

মা মে ভিজ্জি সমাদানং, দস্সামি ৰিপুলং গজং’.

‘‘নাগং গহেত্ৰা সোণ্ডায, ভিঙ্গারে [ভিঙ্কারে (সী.)] রতনামযে;

জলং হত্থে আকিরিত্ৰা, ব্রাহ্মণানং অদং গজং.

‘‘তস্স নাগে পদিন্নম্হি, অমচ্চা এতদব্রৰুং;

‘কিং নু তুয্হং ৰরং নাগং, যাচকানং পদস্সসি.

‘‘‘ধঞ্ঞং ¶ মঙ্গলসম্পন্নং, সঙ্গামৰিজযুত্তমং;

তস্মিং নাগে পদিন্নম্হি, কিং তে রজ্জং করিস্সতি.

‘‘‘রজ্জম্পি মে দদে সব্বং, সরীরং দজ্জমত্তনো;

সব্বঞ্ঞুতং পিযং ময্হং, তস্মা নাগং অদাসহ’’’ন্তি.

‘‘কুসাৰতিম্হি নগরে, যদা আসিং মহীপতি;

মহাসুদস্সনো নাম, চক্কৰত্তী মহব্বলো.

‘‘তত্থাহং ¶ দিৰসে তিক্খত্তুং, ঘোসাপেমি তহিং তহিং;

‘কো কিং ইচ্ছতি পত্থেতি, কস্স কিং দীযতূ ধনং.

‘‘‘কো ছাতকো কো তসিতো, কো মালং কো ৰিলেপনং;

নানারত্তানি ৰত্থানি, কো নগ্গো পরিদহিস্সতি.

‘‘‘কো পথে ছত্তমাদেতি, কোপাহনা মুদূ সুভা’;

ইতি ¶ সাযঞ্চ পাতো চ, ঘোসাপেমি তহিং তহিং.

‘‘ন তং দসসু ঠানেসু, নপি ঠানসতেসু ৰা;

অনেকসতঠানেসু, পটিযত্তং যাচকে ধনং.

‘‘দিৰা ৰা যদি ৰা রত্তিং, যদি এতি ৰনিব্বকো;

লদ্ধা যদিচ্ছকং ভোগং, পূরহত্থোৰ গচ্ছতি.

‘‘এৰরূপং মহাদানং, অদাসিং যাৰজীৰিকং;

নপাহং দেস্সং ধনং দম্মি, নপি নত্থি নিচযো মযি.

‘‘যথাপি আতুরো নাম, রোগতো পরিমুত্তিযা;

ধনেন ৰেজ্জং তপ্পেত্ৰা, রোগতো পরিমুচ্চতি.

‘‘তথেৰাহং জানমানো, পরিপূরেতুমসেসতো;

ঊনমনং পূরযিতুং, দেমি দানং ৰনিব্বকে;

নিরালযো অপচ্চাসো, সম্বোধিমনুপত্তিযা’’তি.

‘‘পুনাপরং ¶ ¶ যদা হোমি, সত্তরাজপুরোহিতো;

পূজিতো নরদেৰেহি, মহাগোৰিন্দব্রাহ্মণো.

‘‘তদাহং সত্তরজ্জেসু, যং মে আসি উপাযনং;

তেন দেমি মহাদানং, অক্খোব্ভং [অক্খোভং (স্যা. কং.)] সাগরূপমং.

‘‘ন ¶ ¶ মে দেস্সং ধনং ধঞ্ঞং, নপি নত্থি নিচযো মযি;

সব্বঞ্ঞুতং পিযং ময্হং, তস্মা দেমি ৰরং ধন’’ন্তি.

‘‘পুনাপরং যদা হোমি, মিথিলাযং পুরুত্তমে;

নিমি নাম মহারাজা, পণ্ডিতো কুসলত্থিকো.

‘‘তদাহং মাপযিত্ৰান, চতুস্সালং চতুম্মুখং;

তত্থ দানং পৰত্তেসিং, মিগপক্খিনরাদিনং.

‘‘অচ্ছাদনঞ্চ সযনং, অন্নং পানঞ্চ ভোজনং;

অব্বোচ্ছিন্নং করিত্ৰান, মহাদানং পৰত্তযিং.

‘‘যথাপি সেৰকো সামিং, ধনহেতুমুপাগতো;

কাযেন ৰাচা মনসা, আরাধনীযমেসতি.

‘‘তথেৰাহং সব্বভৰে, পরিযেসিস্সামি বোধিজং;

দানেন সত্তে তপ্পেত্ৰা, ইচ্ছামি বোধিমুত্তম’’ন্তি.

‘‘পুনাপরং ¶ ¶ যদা হোমি, একরাজস্স অত্রজো;

নগরে পুপ্ফৰতিযা, কুমারো চন্দসৰ্হযো.

‘‘তদাহং ¶ যজনা মুত্তো, নিক্খন্তো যঞ্ঞৰাটতো;

সংৰেগং জনযিত্ৰান, মহাদানং পৰত্তযিং.

‘‘নাহং পিৰামি খাদামি, নপি ভুঞ্জামি ভোজনং;

দক্খিণেয্যে অদত্ৰান, অপি ছপ্পঞ্চরত্তিযো.

‘‘যথাপি ¶ ৰাণিজো নাম, কত্ৰান ভণ্ডসঞ্চযং;

যত্থ লাভো মহা হোতি, তত্থ তং [তত্থ নং (সী.), তত্থ (ক.)] হরতি ভণ্ডকং.

‘‘তথেৰ সকভুত্তাপি, পরে দিন্নং মহপ্ফলং;

তস্মা পরস্স দাতব্বং, সতভাগো ভৰিস্সতি.

‘‘এতমত্থৰসং ঞত্ৰা, দেমি দানং ভৰাভৰে;

ন পটিক্কমামি দানতো, সম্বোধিমনুপত্তিযা’’তি.

‘‘অরিট্ঠসৰ্হযে নগরে, সিৰিনামাসি খত্তিযো;

নিসজ্জ পাসাদৰরে, এৰং চিন্তেসহং তদা.

‘‘‘যং কিঞ্চি মানুসং দানং, অদিন্নং মে ন ৰিজ্জতি;

যোপি যাচেয্য মং চক্খুং, দদেয্যং অৰিকম্পিতো’.

‘‘মম সঙ্কপ্পমঞ্ঞায, সক্কো দেৰানমিস্সরো;

নিসিন্নো দেৰপরিসায, ইদং ৰচনমব্রৰি.

‘‘‘নিসজ্জ ¶ পাসাদৰরে, সিৰিরাজা মহিদ্ধিকো;

চিন্তেন্তো ৰিৰিধং দানং, অদেয্যং সো ন পস্সতি.

‘‘‘তথং ¶ নু ৰিতথং নেতং, হন্দ ৰীমংসযামি তং;

মুহুত্তং আগমেয্যাথ, যাৰ জানামি তং মনং’.

‘‘পৰেধমানো পলিতসিরো, ৰলিগত্তো [ৰলিতগত্তো (সী.)] জরাতুরো;

অন্ধৰণ্ণোৰ হুত্ৰান, রাজানং উপসঙ্কমি.

‘‘সো ¶ তদা পগ্গহেত্ৰান, ৰামং দক্খিণবাহু চ;

সিরস্মিং অঞ্জলিং কত্ৰা, ইদং ৰচনমব্রৰি.

‘‘‘যাচামি তং মহারাজ, ধম্মিক রট্ঠৰড্ঢন;

তৰ দানরতা কিত্তি, উগ্গতা দেৰমানুসে.

‘‘‘উভোপি ¶ নেত্তা নযনা, অন্ধা উপহতা মম;

একং মে নযনং দেহি, ত্ৰম্পি একেন যাপয’.

‘‘তস্সাহং ৰচনং সুত্ৰা, হট্ঠো সংৰিগ্গমানসো;

কতঞ্জলী ৰেদজাতো, ইদং ৰচনমব্রৰিং.

‘‘‘ইদানাহং চিন্তযিত্ৰান, পাসাদতো ইধাগতো;

ত্ৰং মম চিত্তমঞ্ঞায, নেত্তং যাচিতুমাগতো.

‘‘‘অহো মে মানসং সিদ্ধং, সঙ্কপ্পো পরিপূরিতো;

অদিন্নপুব্বং দানৰরং, অজ্জ দস্সামি যাচকে.

‘‘‘এহি সিৰক উট্ঠেহি, মা দন্ধযি মা পৰেধযি;

উভোপি নযনং দেহি, উপ্পাটেত্ৰা ৰণিব্বকে’.

‘‘ততো ¶ সো চোদিতো ময্হং, সিৰকো ৰচনং করো;

উদ্ধরিত্ৰান পাদাসি, তালমিঞ্জংৰ যাচকে.

‘‘দদমানস্স দেন্তস্স, দিন্নদানস্স মে সতো;

চিত্তস্স অঞ্ঞথা নত্থি, বোধিযাযেৰ কারণা.

‘‘ন মে দেস্সা উভো চক্খূ, অত্তা ন মে ন দেস্সিযো;

সব্বঞ্ঞুতং পিযং ময্হং, তস্মা চক্খুং অদাসহ’’ন্তি.

‘‘যা ¶ মে অহোসি জনিকা, ফুস্সতী [ফুসতী (সী.)] নাম খত্তিযা;

সা অতীতাসু জাতীসু, সক্কস্স মহেসী পিযা.

‘‘তস্সা আযুক্খযং ঞত্ৰা, দেৰিন্দো এতদব্রৰি;

‘দদামি তে দস ৰরে, ৰরভদ্দে যদিচ্ছসি’.

‘‘এৰং ৰুত্তা চ সা দেৰী, সক্কং পুনিদমব্রৰি;

‘কিং নু মে অপরাধত্থি, কিং নু দেস্সা অহং তৰ;

রম্মা চাৰেসি মং ঠানা, ৰাতোৰ ধরণীরুহং’.

‘‘এৰং ¶ ৰুত্তো চ সো সক্কো, পুন তস্সিদমব্রৰি;

‘ন চেৰ তে কতং পাপং, ন চ মে ত্ৰংসি অপ্পিযা.

‘‘‘এত্তকংযেৰ ¶ তে আযু, চৰনকালো ভৰিস্সতি;

পটিগ্গণ্হ মযা দিন্নে, ৰরে দস ৰরুত্তমে’.

‘‘সক্কেন ¶ সা দিন্নৰরা, তুট্ঠহট্ঠা পমোদিতা;

মমং অব্ভন্তরং কত্ৰা, ফুস্সতী দস ৰরে ৰরী.

‘‘ততো চুতা সা ফুস্সতী, খত্তিযে উপপজ্জথ;

জেতুত্তরম্হি নগরে, সঞ্জযেন সমাগমি.

‘‘যদাহং ফুস্সতিযা কুচ্ছিং, ওক্কন্তো পিযমাতুযা;

মম তেজেন মে মাতা, সদা দানরতা অহু.

‘‘অধনে আতুরে জিণ্ণে, যাচকে অদ্ধিকে [পথিকে (ক.)] জনে;

সমণে ব্রাহ্মণে খীণে, দেতি দানং অকিঞ্চনে.

‘‘দস মাসে ধারযিত্ৰান, করোন্তে পুরং পদক্খিণং;

ৰেস্সানং ৰীথিযা মজ্ঝে, জনেসি ফুস্সতী মমং.

‘‘ন ময্হং মত্তিকং নামং, নপি পেত্তিকসম্ভৰং;

জাতেত্থ ৰেস্সৰীথিযা, তস্মা ৰেস্সন্তরো অহু.

‘‘যদাহং দারকো হোমি, জাতিযা অট্ঠৰস্সিকো;

তদা নিসজ্জ পাসাদে, দানং দাতুং ৰিচিন্তযিং.

‘‘‘হদযং ¶ দদেয্যং চক্খুং, মংসম্পি রুধিরম্পি চ;

দদেয্যং কাযং সাৰেত্ৰা, যদি কোচি যাচযে মমং’.

‘‘সভাৰং চিন্তযন্তস্স, অকম্পিতমসণ্ঠিতং;

অকম্পি তত্থ পথৰী, সিনেরুৰনৰটংসকা.

‘‘অন্ৰদ্ধমাসে পন্নরসে, পুণ্ণমাসে উপোসথে;

পচ্চযং নাগমারুয্হ, দানং দাতুং উপাগমিং.

‘‘কলিঙ্গরট্ঠৰিসযা ¶ , ব্রাহ্মণা উপগঞ্ছু মং;

অযাচুং মং হত্থিনাগং, ধঞ্ঞং মঙ্গলসম্মতং.

‘‘অৰুট্ঠিকো ¶ জনপদো, দুব্ভিক্খো ছাতকো মহা;

দদাহি পৰরং নাগং, সব্বসেতং গজুত্তমং.

‘‘দদামি ন ৰিকম্পামি, যং মং যাচন্তি ব্রাহ্মণা;

সন্তং নপ্পতিগূহামি [নপ্পতিগুয্হামি (সী. ক.)], দানে মে রমতে মনো.

‘‘ন মে যাচকমনুপ্পত্তে, পটিক্খেপো অনুচ্ছৰো;

‘মা মে ভিজ্জি সমাদানং, দস্সামি ৰিপুলং গজং’.

‘‘নাগং গহেত্ৰা সোণ্ডায, ভিঙ্গারে রতনামযে;

জলং হত্থে আকিরিত্ৰা, ব্রাহ্মণানং অদং গজং.

‘‘পুনাপরং দদন্তস্স, সব্বসেতং গজুত্তমং;

তদাপি পথৰী কম্পি, সিনেরুৰনৰটংসকা.

‘‘তস্স নাগস্স দানেন, সিৰযো কুদ্ধা সমাগতা;

পব্বাজেসুং সকা রট্ঠা, ‘ৰঙ্কং গচ্ছতু পব্বতং’.

‘‘তেসং নিচ্ছুভমানানং, অকম্পিত্থমসণ্ঠিতং;

মহাদানং পৰত্তেতুং, একং ৰরমযাচিসং.

‘‘যাচিতা ¶ সিৰযো সব্বে, একং ৰরমদংসু মে;

সাৰযিত্ৰা কণ্ণভেরিং, মহাদানং দদামহং.

‘‘অথেত্থ ৰত্ততী সদ্দো, তুমুলো ভেরৰো মহা;

দানেনিমং নীহরন্তি, পুন দানং দদাতযং.

‘‘হত্থিং ¶ অস্সে রথে দত্ৰা, দাসিং দাসং গৰং ধনং;

মহাদানং দদিত্ৰান, নগরা নিক্খমিং তদা.

‘‘নিক্খমিত্ৰান ¶ নগরা, নিৰত্তিত্ৰা ৰিলোকিতে;

তদাপি পথৰী কম্পি, সিনেরুৰনৰটংসকা.

‘‘চতুৰাহিং রথং দত্ৰা, ঠত্ৰা চাতুম্মহাপথে;

একাকিযো অদুতিযো, মদ্দিদেৰিং ইদমব্রৰিং.

‘‘‘ত্ৰং মদ্দি কণ্হং গণ্হাহি, লহুকা এসা কনিট্ঠিকা;

অহং জালিং গহেস্সামি, গরুকো ভাতিকো হি সো’.

‘‘পদুমং ¶ পুণ্ডরীকংৰ, মদ্দী কণ্হাজিনগ্গহী;

অহং সুৰণ্ণবিম্বংৰ, জালিং খত্তিযমগ্গহিং.

‘‘অভিজাতা সুখুমালা, খত্তিযা চতুরো জনা;

ৰিসমং সমং অক্কমন্তা, ৰঙ্কং গচ্ছাম পব্বতং.

‘‘যে কেচি মনুজা এন্তি, অনুমগ্গে পটিপ্পথে;

মগ্গন্তে পটিপুচ্ছাম, ‘কুহিং ৰঙ্কন্ত [ৰঙ্কত (সী.)] পব্বতো’.

‘‘তে তত্থ অম্হে পস্সিত্ৰা, করুণং গিরমুদীরযুং;

দুক্খং তে পটিৰেদেন্তি, দূরে ৰঙ্কন্তপব্বতো.

‘‘যদি পস্সন্তি পৰনে, দারকা ফলিনে দুমে;

তেসং ফলানং হেতুম্হি, উপরোদন্তি দারকা.

‘‘রোদন্তে দারকে দিস্ৰা, উব্বিদ্ধা [উব্বিগ্গা (স্যা. কং.)] ৰিপুলা দুমা;

সযমেৰোণমিত্ৰান, উপগচ্ছন্তি দারকে.

‘‘ইদং ¶ অচ্ছরিযং দিস্ৰা, অব্ভুতং লোমহংসনং;

সাহুকারং [সাধুকারং (সব্বত্থ)] পৰত্তেসি, মদ্দী সব্বঙ্গসোভনা.

‘‘অচ্ছেরং ৰত লোকস্মিং, অব্ভুতং লোমহংসনং;

ৰেস্সন্তরস্স তেজেন, সযমেৰোণতা দুমা.

‘‘সঙ্খিপিংসু পথং যক্খা, অনুকম্পায দারকে;

নিক্খন্তদিৰসেনেৰ [নিক্খন্তদিৰসেযেৰ (সী.)], চেতরট্ঠমুপাগমুং.

‘‘সট্ঠিরাজসহস্সানি, তদা ৰসন্তি মাতুলে;

সব্বে পঞ্জলিকা হুত্ৰা, রোদমানা উপাগমুং.

‘‘তত্থ ৰত্তেত্ৰা সল্লাপং, চেতেহি চেতপুত্তেহি;

তে ততো নিক্খমিত্ৰান, ৰঙ্কং অগমু পব্বতং.

‘‘আমন্তযিত্ৰা ¶ দেৰিন্দো, ৰিস্সকম্মং [ৰিসুকম্মং (ক.)] মহিদ্ধিকং;

অস্সমং সুকতং রম্মং, পণ্ণসালং সুমাপয.

‘‘সক্কস্স ৰচনং সুত্ৰা, ৰিস্সকম্মো মহিদ্ধিকো;

অস্সমং ¶ সুকতং রম্মং, পণ্ণসালং সুমাপযি.

‘‘অজ্ঝোগাহেত্ৰা ¶ পৰনং, অপ্পসদ্দং নিরাকুলং;

চতুরো জনা মযং তত্থ, ৰসাম পব্বতন্তরে.

‘‘অহঞ্চ মদ্দিদেৰী চ, জালী কণ্হাজিনা চুভো;

অঞ্ঞমঞ্ঞং সোকনুদা, ৰসাম অস্সমে তদা.

‘‘দারকে অনুরক্খন্তো, অসুঞ্ঞো হোমি অস্সমে;

মদ্দী ফলং আহরিত্ৰা, পোসেতি সা তযো জনে.

‘‘পৰনে ¶ ৰসমানস্স, অদ্ধিকো মং উপাগমি;

আযাচি পুত্তকে ময্হং, জালিং কণ্হাজিনং চুভো.

‘‘যাচকং উপগতং দিস্ৰা, হাসো মে উপপজ্জথ;

উভো পুত্তে গহেত্ৰান, অদাসিং ব্রাহ্মণে তদা.

‘‘সকে পুত্তে চজন্তস্স, জূজকে ব্রাহ্মণে যদা;

তদাপি পথৰী কম্পি, সিনেরুৰনৰটংসকা.

‘‘পুনদেৰ সক্কো ওরুয্হ, হুত্ৰা ব্রাহ্মণসন্নিভো;

আযাচি মং মদ্দিদেৰিং, সীলৰন্তিং পতিব্বতং.

‘‘মদ্দিং হত্থে গহেত্ৰান, উদকঞ্জলি পূরিয;

পসন্নমনসঙ্কপ্পো, তস্স মদ্দিং অদাসহং.

‘‘মদ্দিযা দীযমানায, গগনে দেৰা পমোদিতা;

তদাপি পথৰী কম্পি, সিনেরুৰনৰটংসকা.

‘‘জালিং কণ্হাজিনং ধীতং, মদ্দিদেৰিং পতিব্বতং;

চজমানো ন চিন্তেসিং, বোধিযাযেৰ কারণা.

‘‘ন মে দেস্সা উভো পুত্তা, মদ্দিদেৰী ন দেস্সিযা;

সব্বঞ্ঞুতং পিযং ময্হং, তস্মা পিযে অদাসহং.

‘‘পুনাপরং ব্রহারঞ্ঞে, মাতাপিতুসমাগমে;

করুণং পরিদেৰন্তে, সল্লপন্তে সুখং দুখং.

‘‘হিরোত্তপ্পেন ¶ গরুনা [গরুনং (স্যা. ক.)], উভিন্নং উপসঙ্কমি;

তদাপি পথৰী কম্পি, সিনেরুৰনৰটংসকা.

‘‘পুনাপরং ¶ ¶ ব্রহারঞ্ঞা, নিক্খমিত্ৰা সঞাতিভি;

পৰিসামি পুরং রম্মং, জেতুত্তরং পুরুত্তমং.

‘‘রতনানি সত্ত ৰস্সিংসু, মহামেঘো পৰস্সথ;

তদাপি পথৰী কম্পি, সিনেরুৰনৰটংসকা.

‘‘অচেতনাযং পথৰী, অৰিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি.

‘‘পুনাপরং ¶ যদা হোমি, সসকো পৰনচারকো;

তিণপণ্ণসাকফলভক্খো, পরহেঠনৰিৰজ্জিতো.

‘‘মক্কটো চ সিঙ্গালো চ, সুত্তপোতো চহং তদা;

ৰসাম একসামন্তা, সাযং পাতো চ দিস্সরে [সাযং পাতো পদিস্সরে (ক.)].

‘‘অহং তে অনুসাসামি, কিরিযে কল্যাণপাপকে;

‘পাপানি পরিৰজ্জেথ, কল্যাণে অভিনিৰিস্সথ’.

‘‘উপোসথম্হি দিৰসে, চন্দং দিস্ৰান পূরিতং;

এতেসং তত্থ আচিক্খিং, দিৰসো অজ্জুপোসথো.

‘‘দানানি পটিযাদেথ, দক্খিণেয্যস্স দাতৰে;

দত্ৰা দানং দক্খিণেয্যে, উপৰস্সথুপোসথং.

‘‘তে ¶ মে সাধূতি ৰত্ৰান, যথাসত্তি যথাবলং;

দানানি পটিযাদেত্ৰা, দক্খিণেয্যং গৰেসিসুং [গৰেসয্যুং (ক.)].

‘‘অহং নিসজ্জ চিন্তেসিং, দানং দক্খিণনুচ্ছৰং;

‘যদিহং লভে দক্খিণেয্যং, কিং মে দানং ভৰিস্সতি.

‘‘‘ন ¶ মে অত্থি তিলা মুগ্গা, মাসা ৰা তণ্ডুলা ঘতং;

অহং তিণেন যাপেমি, ন সক্কা তিণ দাতৰে.

‘‘‘যদি ¶ কোচি এতি দক্খিণেয্যো, ভিক্খায মম সন্তিকে;

দজ্জাহং সকমত্তানং, ন সো তুচ্ছো গমিস্সতি’.

‘‘মম সঙ্কপ্পমঞ্ঞায, সক্কো ব্রাহ্মণৰণ্ণিনা;

আসযং মে উপাগচ্ছি, দানৰীমংসনায মে.

‘‘তমহং দিস্ৰান সন্তুট্ঠো, ইদং ৰচনমব্রৰিং;

‘সাধু খোসি অনুপ্পত্তো, ঘাসহেতু মমন্তিকে.

‘‘‘অদিন্নপুব্বং দানৰরং, অজ্জ দস্সামি তে অহং;

তুৰং সীলগুণূপেতো, অযুত্তং তে পরহেঠনং.

‘‘‘এহি অগ্গিং পদীপেহি, নানাকট্ঠে সমানয;

অহং পচিস্সমত্তানং, পক্কং ত্ৰং ভক্খযিস্সসি’.

‘‘‘সাধূ’তি সো হট্ঠমনো, নানাকট্ঠে সমানযি;

মহন্তং অকাসি চিতকং, কত্ৰা অঙ্গারগব্ভকং.

‘‘অগ্গিং তত্থ পদীপেসি, যথা সো খিপ্পং মহা ভৰে;

ফোটেত্ৰা রজগতে গত্তে, একমন্তং উপাৰিসিং.

‘‘যদা ¶ মহাকট্ঠপুঞ্জো, আদিত্তো ধমধমাযতি [ধুমধুমাযতি (সী.), ধমমাযতি (ক.)];

তদুপ্পতিত্ৰা পপতিং, মজ্ঝে জালসিখন্তরে.

‘‘যথা ¶ সীতোদকং নাম, পৰিট্ঠং যস্স কস্সচি;

সমেতি দরথপরিল়াহং, অস্সাদং দেতি পীতি চ.

‘‘তথেৰ জলিতং অগ্গিং, পৰিট্ঠস্স মমং তদা;

সব্বং সমেতি দরথং, যথা সীতোদকং ৰিয.

‘‘ছৰিং চম্মং মংসং ন্হারুং, অট্ঠিং হদযবন্ধনং;

কেৰলং সকলং কাযং, ব্রাহ্মণস্স অদাসহ’’ন্তি.

অকিত্তিব্রাহ্মণো ¶ সঙ্খো, কুরুরাজা ধনঞ্চযো;

মহাসুদস্সনো রাজা, মহাগোৰিন্দব্রাহ্মণো.

নিমি চন্দকুমারো চ, সিৰি ৰেস্সন্তরো সসো;

অহমেৰ তদা আসিং, যো তে দানৰরে অদা.

এতে দানপরিক্খারা, এতে দানস্স পারমী;

জীৰিতং যাচকে দত্ৰা, ইমং পারমি পূরযিং.

ভিক্খায উপগতং দিস্ৰা, সকত্তানং পরিচ্চজিং;

দানেন মে সমো নত্থি, এসা মে দানপারমীতি.

‘‘যদা ¶ ¶ ¶ ¶ অহোসিং পৰনে, কুঞ্জরো মাতুপোসকো;

ন তদা অত্থি মহিযা, গুণেন মম সাদিসো.

‘‘পৰনে দিস্ৰা ৰনচরো, রঞ্ঞো মং পটিৰেদযি;

‘তৰানুচ্ছৰো মহারাজ, গজো ৰসতি কাননে.

‘‘‘ন তস্স পরিক্খাযত্থো, নপি আল়ককাসুযা;

সহ গহিতে [সমং গহিতে (সী.)] সোণ্ডায, সযমেৰ ইধেহি’তি.

‘‘তস্স তং ৰচনং সুত্ৰা, রাজাপি তুট্ঠমানসো;

পেসেসি হত্থিদমকং, ছেকাচরিযং সুসিক্খিতং.

‘‘গন্ত্ৰা সো হত্থিদমকো, অদ্দস পদুমস্সরে;

ভিসমুল়ালং [ভিসমূলং (ক.)] উদ্ধরন্তং, যাপনত্থায মাতুযা.

‘‘ৰিঞ্ঞায মে সীলগুণং, লক্খণং উপধারযি;

‘এহি পুত্তা’তি পত্ৰান, মম সোণ্ডায অগ্গহি.

‘‘যং মে তদা পাকতিকং, সরীরানুগতং বলং;

অজ্জ নাগসহস্সানং, বলেন সমসাদিসং.

‘‘যদিহং তেসং পকুপ্পেয্যং, উপেতানং গহণায মং;

পটিবলো ভৰে তেসং, যাৰ রজ্জম্পি মানুসং.

‘‘অপি ¶ চাহং সীলরক্খায, সীলপারমিপূরিযা;

ন করোমি চিত্তে অঞ্ঞথত্তং, পক্খিপন্তং মমাল়কে.

‘‘যদি তে মং তত্থ কোট্টেয্যুং, ফরসূহি তোমরেহি চ;

নেৰ তেসং পকুপ্পেয্যং, সীলখণ্ডভযা মমা’’তি.

‘‘পুনাপরং ¶ ¶ ¶ যদা হোমি, ভূরিদত্তো মহিদ্ধিকো;

ৰিরূপক্খেন মহারঞ্ঞা, দেৰলোকমগঞ্ছহং.

‘‘তত্থ পস্সিত্ৰাহং দেৰে, একন্তং সুখসমপ্পিতে;

তং সগ্গগমনত্থায, সীলব্বতং সমাদিযিং.

‘‘সরীরকিচ্চং কত্ৰান, ভুত্ৰা যাপনমত্তকং;

চতুরো অঙ্গে অধিট্ঠায, সেমি ৰম্মিকমুদ্ধনি.

‘‘ছৰিযা চম্মেন মংসেন, নহারুঅট্ঠিকেহি ৰা;

যস্স এতেন করণীযং, দিন্নংযেৰ হরাতু সো.

‘‘সংসিতো অকতঞ্ঞুনা, আলম্পাযনো [আলম্বণো (সী.)] মমগ্গহি;

পেল়ায পক্খিপিত্ৰান, কীল়েতি মং তহিং তহিং.

‘‘পেল়ায পক্খিপন্তেপি, সম্মদ্দন্তেপি পাণিনা;

আলম্পাযনে [আলম্বণে (সী.)] ন কুপ্পামি, সীলখণ্ডভযা মম.

‘‘সকজীৰিতপরিচ্চাগো ¶ , তিণতো লহুকো মম;

সীলৰীতিক্কমো ময্হং, পথৰীউপ্পতনং ৰিয.

‘‘নিরন্তরং জাতিসতং, চজেয্যং মম জীৰিতং;

নেৰ সীলং পভিন্দেয্যং, চতুদ্দীপান হেতুপি.

‘‘অপি চাহং সীলরক্খায, সীলপারমিপূরিযা;

ন করোমি চিত্তে অঞ্ঞথত্তং, পক্খিপন্তম্পি পেল়কে’’তি.

‘‘পুনাপরং যদা হোমি, চম্পেয্যকো মহিদ্ধিকো;

তদাপি ধম্মিকো আসিং, সীলব্বতসমপ্পিতো.

‘‘তদাপি ¶ মং ধম্মচারিং, উপৰুত্থং উপোসথং;

অহিতুণ্ডিকো গহেত্ৰান, রাজদ্ৰারম্হি কীল়তি.

‘‘যং ¶ যং সো ৰণ্ণং চিন্তযি, নীলংৰ পীতলোহিতং;

তস্স চিত্তানুৰত্তন্তো, হোমি চিন্তিতসন্নিভো.

‘‘থলং ¶ করেয্যমুদকং, উদকম্পি থলং করে;

যদিহং তস্স পকুপ্পেয্যং, খণেন ছারিকং করে.

‘‘যদি চিত্তৰসী হেস্সং, পরিহাযিস্সামি সীলতো;

সীলেন পরিহীনস্স, উত্তমত্থো ন সিজ্ঝতি.

‘‘কামং ¶ ভিজ্জতুযং কাযো, ইধেৰ ৰিকিরীযতু;

নেৰ সীলং পভিন্দেয্যং, ৰিকিরন্তে ভুসং ৰিযা’’তি.

‘‘পুনাপরং যদা হোমি, চূল়বোধি সুসীলৰা;

ভৰং দিস্ৰান ভযতো, নেক্খম্মং অভিনিক্খমিং.

‘‘যা মে দুতিযিকা আসি, ব্রাহ্মণী কনকসন্নিভা;

সাপি ৰট্টে অনপেক্খা, নেক্খম্মং অভিনিক্খমি.

‘‘নিরালযা ছিন্নবন্ধূ, অনপেক্খা কুলে গণে;

চরন্তা গামনিগমং, বারাণসিমুপাগমুং.

‘‘তত্থ ৰসাম নিপকা, অসংসট্ঠা কুলে গণে;

নিরাকুলে অপ্পসদ্দে, রাজুয্যানে ৰসামুভো.

‘‘উয্যানদস্সনং গন্ত্ৰা, রাজা অদ্দস ব্রাহ্মণিং;

উপগম্ম মমং পুচ্ছি, ‘তুয্হেসা কা কস্স ভরিযা’.

‘‘এৰং ৰুত্তে অহং তস্স, ইদং ৰচনমব্রৰিং;

‘ন ময্হং ভরিযা এসা, সহধম্মা একসাসনী’.

‘‘তিস্সা ¶ [তস্সা (সী.)] সারত্তগধিতো, গাহাপেত্ৰান চেটকে;

নিপ্পীল়যন্তো বলসা, অন্তেপুরং পৰেসযি.

‘‘ওদপত্তকিযা ¶ ময্হং, সহজা একসাসনী;

আকড্ঢিত্ৰা নযন্তিযা, কোপো মে উপপজ্জথ.

‘‘সহ ¶ কোপে সমুপ্পন্নে, সীলব্বতমনুস্সরিং;

তত্থেৰ কোপং নিগ্গণ্হিং, নাদাসিং ৰড্ঢিতূপরি.

‘‘যদি নং ব্রাহ্মণিং কোচি, কোট্টেয্য তিণ্হসত্তিযা;

নেৰ সীলং পভিন্দেয্যং, বোধিযাযেৰ কারণা.

‘‘ন মেসা ব্রাহ্মণী দেস্সা, নপি মে বলং ন ৰিজ্জতি;

সব্বঞ্ঞুতং পিযং ময্হং, তস্মা সীলানুরক্খিস’’ন্তি.

‘‘পুনাপরং ¶ যদা হোমি, মহিংসো পৰনচারকো;

পৰড্ঢকাযো বলৰা, মহন্তো ভীমদস্সনো.

‘‘পব্ভারে গিরিদুগ্গে [ৰনদুগ্গে (সী.)] চ, রুক্খমূলে দকাসযে;

হোতেত্থ ঠানং মহিংসানং, কোচি কোচি তহিং তহিং.

‘‘ৰিচরন্তো ব্রহারঞ্ঞে, ঠানং অদ্দস ভদ্দকং;

তং ঠানং উপগন্ত্ৰান, তিট্ঠামি চ সযামি চ.

‘‘অথেত্থ কপিমাগন্ত্ৰা, পাপো অনরিযো লহু;

খন্ধে নলাটে ভমুকে, মুত্তেতি ওহনেতিতং.

‘‘সকিম্পি দিৰসং দুতিযং, ততিযং চতুত্থম্পি চ;

দূসেতি মং সব্বকালং, তেন হোমি উপদ্দুতো.

‘‘মমং ¶ উপদ্দুতং দিস্ৰা, যক্খো মং ইদমব্রৰি;

‘নাসেহেতং ছৰং পাপং, সিঙ্গেহি চ খুরেহি চ’.

‘‘এৰং ¶ ৰুত্তে তদা যক্খে, অহং তং ইদমব্রৰিং;

‘কিং ত্ৰং মক্খেসি কুণপেন, পাপেন অনরিযেন মং.

‘‘‘যদিহং ¶ তস্স পকুপ্পেয্যং, ততো হীনতরো ভৰে;

সীলঞ্চ মে পভিজ্জেয্য, ৰিঞ্ঞূ চ গরহেয্যু মং.

‘‘‘হীল়িতা জীৰিতা ৰাপি, পরিসুদ্ধেন মতং ৰরং;

ক্যাহং জীৰিতহেতূপি, কাহামিং পরহেঠনং’.

‘‘মমেৰাযং মঞ্ঞমানো, অঞ্ঞেপেৰং করিস্সতি;

তেৰ তস্স ৰধিস্সন্তি, সা মে মুত্তি ভৰিস্সতি.

‘‘হীনমজ্ঝিমউক্কট্ঠে, সহন্তো অৰমানিতং;

এৰং লভতি সপ্পঞ্ঞো, মনসা যথা পত্থিত’’ন্তি.

‘‘পুনাপরং যদা হোমি, সুতত্তকনকসন্নিভো;

মিগরাজা রুরুনাম, পরমসীলসমাহিতো.

‘‘রম্মে পদেসে রমণীযে, ৰিৰিত্তে অমনুস্সকে;

তত্থ ৰাসং উপগঞ্ছিং, গঙ্গাকূলে মনোরমে.

‘‘অথ ¶ উপরি গঙ্গায, ধনিকেহি পরিপীল়িতো;

পুরিসো গঙ্গায পপতি, ‘জীৰামি ৰা মরামি ৰা’.

‘‘রত্তিন্দিৰং ¶ সো গঙ্গায, ৰুয্হমানো মহোদকে;

রৰন্তো করুণং রৰং, মজ্ঝে গঙ্গায গচ্ছতি.

‘‘তস্সাহং সদ্দং সুত্ৰান, করুণং পরিদেৰতো;

গঙ্গায তীরে ঠত্ৰান, অপুচ্ছিং ‘কোসি ত্ৰং নরো’.

‘‘সো মে পুট্ঠো চ ব্যাকাসি, অত্তনো করণং তদা;

‘ধনিকেহি ভীতো তসিতো, পক্খন্দোহং মহানদিং’.

‘‘তস্স ¶ কত্ৰান কারুঞ্ঞং, চজিত্ৰা মম জীৰিতং;

পৰিসিত্ৰা নীহরিং তস্স, অন্ধকারম্হি রত্তিযা.

‘‘অস্সত্থকালমঞ্ঞায, তস্সাহং ইদমব্রৰিং;

‘একং তং ৰরং যাচামি, মা মং কস্সচি পাৰদ’.

‘‘নগরং ¶ গন্ত্ৰান আচিক্খি, পুচ্ছিতো ধনহেতুকো;

রাজানং সো গহেত্ৰান, উপগঞ্ছি মমন্তিকং.

‘‘যাৰতা করণং সব্বং, রঞ্ঞো আরোচিতং মযা;

রাজা সুত্ৰান ৰচনং, উসুং তস্স পকপ্পযি;

‘ইধেৰ ঘাতযিস্সামি, মিত্তদুব্ভিং [মিত্তদূভিং (সী.)] অনারিযং’.

‘‘তমহং অনুরক্খন্তো, নিম্মিনিং মম অত্তনা;

‘তিট্ঠতেসো মহারাজ, কামকারো ভৰামি তে’.

‘‘অনুরক্খিং মম সীলং, নারক্খিং মম জীৰিতং;

সীলৰা হি তদা আসিং, বোধিযাযেৰ কারণা’’তি.

‘‘পুনাপরং ¶ যদা হোমি, জটিলো উগ্গতাপনো;

মাতঙ্গো নাম নামেন, সীলৰা সুসমাহিতো.

‘‘অহঞ্চ ব্রাহ্মণো একো, গঙ্গাকূলে ৰসামুভো;

অহং ৰসামি উপরি, হেট্ঠা ৰসতি ব্রাহ্মণো.

‘‘ৰিচরন্তো অনুকূলম্হি, উদ্ধং মে অস্সমদ্দস;

তত্থ মং পরিভাসেত্ৰা, অভিসপি মুদ্ধফালনং.

‘‘যদিহং তস্স পকুপ্পেয্যং, যদি সীলং ন গোপযে;

ওলোকেত্ৰানহং তস্স, করেয্যং ছারিকং ৰিয.

‘‘যং ¶ সো তদা মং অভিসপি, কুপিতো দুট্ঠমানসো;

তস্সেৰ মত্থকে নিপতি, যোগেন তং পমোচযিং.

‘‘অনুরক্খিং ¶ মম সীলং, নারক্খিং মম জীৰিতং;

সীলৰা হি তদা আসিং, বোধিযাযেৰ কারণা’’তি.

‘‘পুনাপরং ¶ যদা হোমি, মহাপক্খো মহিদ্ধিকো;

ধম্মো নাম মহাযক্খো, সব্বলোকানুকম্পকো.

‘‘দসকুসলকম্মপথে ¶ , সমাদপেন্তো মহাজনং;

চরামি গামনিগমং, সমিত্তো সপরিজ্জনো.

‘‘পাপো কদরিযো যক্খো, দীপেন্তো দস পাপকে;

সোপেত্থ মহিযা চরতি, সমিত্তো সপরিজ্জনো.

‘‘ধম্মৰাদী অধম্মো চ, উভো পচ্চনিকা মযং;

ধুরে ধুরং ঘট্টযন্তা, সমিম্হা পটিপথে উভো.

‘‘কলহো ৰত্ততী ভেস্মা, কল্যাণপাপকস্স চ;

মগ্গা ওক্কমনত্থায, মহাযুদ্ধো উপট্ঠিতো.

‘‘যদিহং তস্স কুপ্পেয্যং, যদি ভিন্দে তপোগুণং;

সহপরিজনং তস্স, রজভূতং করেয্যহং.

‘‘অপিচাহং সীলরক্খায, নিব্বাপেত্ৰান মানসং;

সহ জনেনোক্কমিত্ৰা, পথং পাপস্স দাসহং.

‘‘সহ পথতো ওক্কন্তে, কত্ৰা চিত্তস্স নিব্বুতিং;

ৰিৰরং অদাসি পথৰী, পাপযক্খস্স তাৰদে’’তি.

‘‘পঞ্চালরট্ঠে ¶ ¶ নগরৰরে, কপিলাযং [কম্পিলাযং (সী.), কপ্পিলাযং (স্যা.)] পুরুত্তমে;

রাজা জযদ্দিসো নাম, সীলগুণমুপাগতো.

‘‘তস্স ¶ রঞ্ঞো অহং পুত্তো, সুতধম্মো সুসীলৰা;

অলীনসত্তো গুণৰা, অনুরক্খপরিজনো সদা.

‘‘পিতা মে মিগৰং গন্ত্ৰা, পোরিসাদং উপাগমি;

সো মে পিতুমগ্গহেসি, ‘ভক্খোসি মম মা চলি’.

‘‘তস্স ¶ তং ৰচনং সুত্ৰা, ভীতো তসিতৰেধিতো;

ঊরুক্খম্ভো অহু তস্স, দিস্ৰান পোরিসাদকং.

‘‘মিগৰং গহেত্ৰা মুঞ্চস্সু, কত্ৰা আগমনং পুন;

ব্রাহ্মণস্স ধনং দত্ৰা, পিতা আমন্তযী মমং.

‘‘‘রজ্জং পুত্ত পটিপজ্জ, মা পমজ্জি পুরং ইদং;

কতং মে পোরিসাদেন, মম আগমনং পুন’.

‘‘মাতাপিতূ চ ৰন্দিত্ৰা, নিম্মিনিত্ৰান অত্তনা;

নিক্খিপিত্ৰা ধনুং খগ্গং, পোরিসাদং উপাগমিং.

‘‘সসত্থহত্থূপগতং, কদাচি সো তসিস্সতি;

তেন ভিজ্জিস্সতি সীলং, পরিত্তাসং [পরিতাসং (সী.)] কতে মযি.

‘‘সীলখণ্ডভযা ময্হং, তস্স দেস্সং ন ব্যাহরিং;

মেত্তচিত্তো হিতৰাদী, ইদং ৰচনমব্রৰিং.

‘‘‘উজ্জালেহি মহাঅগ্গিং, পপতিস্সামি রুক্খতো;

ত্ৰং পক্ককালমঞ্ঞায [সুপক্ককালমঞ্ঞায (পী.)], ভক্খয মং পিতামহ’.

‘‘ইতি সীলৰতং হেতু, নারক্খিং মম জীৰিতং;

পব্বাজেসিং চহং তস্স, সদা পাণাতিপাতিক’’ন্তি.

‘‘পুনাপরং ¶ ¶ ¶ যদা হোমি, সঙ্খপালো মহিদ্ধিকো;

দাঠাৰুধো ঘোরৰিসো, দ্ৰিজিৰ্হো উরগাধিভূ.

‘‘চতুপ্পথে মহামগ্গে, নানাজনসমাকুলে;

চতুরো অঙ্গে অধিট্ঠায, তত্থ ৰাসমকপ্পযিং.

‘‘ছৰিযা চম্মেন মংসেন, নহারুঅট্ঠিকেহি ৰা;

যস্স এতেন করণীযং, দিন্নংযেৰ হরাতু সো.

‘‘অদ্দসংসু ¶ ভোজপুত্তা, খরা লুদ্দা অকারুণা;

উপগঞ্ছুং মমং তত্থ, দণ্ডমুগ্গরপাণিনো.

‘‘নাসায ৰিনিৰিজ্ঝিত্ৰা, নঙ্গুট্ঠে পিট্ঠিকণ্টকে;

কাজে আরোপযিত্ৰান, ভোজপুত্তা হরিংসু মং.

‘‘সসাগরন্তং পথৰিং, সকাননং সপব্বতং;

ইচ্ছমানো চহং তত্থ, নাসাৰাতেন ঝাপযে.

‘‘সূলেহি ৰিনিৰিজ্ঝন্তে, কোট্টযন্তেপি সত্তিভি;

ভোজপুত্তে ন কুপ্পামি, এসা মে সীলপারমী’’তি.

হত্থিনাগো ¶ ভূরিদত্তো, চম্পেয্যো বোধি মহিংসো;

রুরু মাতঙ্গো ধম্মো চ, অত্রজো চ জযদ্দিসো.

এতে নৰ সীলবলা, পরিক্খারা পদেসিকা;

জীৰিতং পরিরক্খিত্ৰা, সীলানি অনুরক্খিসং.

সঙ্খপালস্স মে সতো, সব্বকালম্পি জীৰিতং;

যস্স কস্সচি নিয্যত্তং, তস্মা সা সীলপারমীতি.

‘‘যদাহং ¶ ¶ ¶ অমিতযসো, রাজপুত্তো যুধঞ্জযো;

উস্সাৰবিন্দুং সূরিযাতপে, পতিতং দিস্ৰান সংৰিজিং.

‘‘তঞ্ঞেৰাধিপতিং কত্ৰা, সংৰেগমনুব্রূহযিং;

মাতাপিতূ চ ৰন্দিত্ৰা, পব্বজ্জমনুযাচহং.

‘‘যাচন্তি মং পঞ্জলিকা, সনেগমা সরট্ঠকা;

‘অজ্জেৰ পুত্ত পটিপজ্জ, ইদ্ধং ফীতং মহামহিং’.

‘‘সরাজকে সহোরোধে, সনেগমে সরট্ঠকে;

করুণং পরিদেৰন্তে, অনপেক্খোৰ পরিচ্চজিং.

‘‘কেৰলং পথৰিং রজ্জং, ঞাতিপরিজনং যসং;

চজমানো ন চিন্তেসিং, বোধিযাযেৰ কারণা.

‘‘মাতাপিতা ন মে দেস্সা, নপি মে দেস্সং মহাযসং;

সব্বঞ্ঞুতং পিযং ময্হং, তস্মা রজ্জং পরিচ্চজি’’ন্তি.

‘‘পুনাপরং ¶ যদা হোমি, ইন্দপত্থে পুরুত্তমে;

কামিতো দযিতো পুত্তো, সোমনস্সোতি ৰিস্সুতো.

‘‘সীলৰা গুণসম্পন্নো, কল্যাণপটিভানৰা;

ৰুড্ঢাপচাযী হিরীমা, সঙ্গহেসু চ কোৰিদো.

‘‘তস্স ¶ রঞ্ঞো পতিকরো, অহোসি কুহকতাপসো;

আরামং মালাৰচ্ছঞ্চ, রোপযিত্ৰান জীৰতি.

‘‘তমহং ¶ দিস্ৰান কুহকং, থুসরাসিংৰ অতণ্ডুলং;

দুমংৰ অন্তো সুসিরং, কদলিংৰ অসারকং.

‘‘নত্থিমস্স ¶ সতং ধম্মো, সামঞ্ঞাপগতো অযং;

হিরীসুক্কধম্মজহিতো, জীৰিতৰুত্তিকারণা.

‘‘কুপিতো অহু [অহোসি (সী.), আসি (স্যা.)] পচ্চন্তো, অটৰীহি পরন্তিহি;

তং নিসেধেতুং গচ্ছন্তো, অনুসাসি পিতা মমং.

‘‘‘মা পমজ্জি তুৰং তাত, জটিলং উগ্গতাপনং;

যদিচ্ছকং পৰত্তেহি, সব্বকামদদো হি সো’.

‘‘তমহং গন্ত্ৰানুপট্ঠানং, ইদং ৰচনমব্রৰিং;

‘কচ্চি তে গহপতি কুসলং, কিং ৰা তে আহরীযতু’.

‘‘তেন সো কুপিতো আসি, কুহকো মাননিস্সিতো;

‘ঘাতাপেমি তুৰং অজ্জ, রট্ঠা পব্বাজযামি ৰা’.

‘‘নিসেধযিত্ৰা ¶ পচ্চন্তং, রাজা কুহকমব্রৰি;

‘কচ্চি তে ভন্তে খমনীযং, সম্মানো তে পৰত্তিতো’.

‘‘তস্স আচিক্খতী পাপো, কুমারো যথা নাসিযো;

তস্স তং ৰচনং সুত্ৰা, আণাপেসি মহীপতি.

‘‘‘সীসং তত্থেৰ ছিন্দিত্ৰা, কত্ৰান চতুখণ্ডিকং;

রথিযা রথিযং দস্সেথ, সা গতি জটিলহীল়িতা’.

‘‘তত্থ কারণিকা গন্ত্ৰা, চণ্ডা লুদ্দা অকারুণা;

মাতুঅঙ্কে নিসিন্নস্স, আকড্ঢিত্ৰা নযন্তি মং.

‘‘তেসাহং এৰমৰচং, বন্ধতং গাল়্হবন্ধনং;

‘রঞ্ঞো দস্সেথ মং খিপ্পং, রাজকিরিযানি অত্থি মে’.

‘‘তে মং রঞ্ঞো দস্সযিংসু, পাপস্স পাপসেৰিনো;

দিস্ৰান তং সঞ্ঞাপেসিং, মমঞ্চ ৰসমানযিং.

‘‘সো মং তত্থ খমাপেসি, মহারজ্জমদাসি মে;

সোহং তমং দালযিত্ৰা, পব্বজিং অনগারিযং.

‘‘ন ¶ মে দেস্সং মহারজ্জং, কামভোগো ন দেস্সিযো;

সব্বঞ্ঞুতং পিযং ময্হং, তস্মা রজ্জং পরিচ্চজি’’ন্তি.

‘‘পুনাপরং ¶ ¶ ¶ যদা হোমি, কাসিরাজস্স অত্রজো;

অযোঘরম্হি সংৰড্ঢো, নামেনাসি অযোঘরো.

‘‘দুক্খেন জীৰিতো লদ্ধো, সংপীল়ে পতিপোসিতো;

অজ্জেৰ পুত্ত পটিপজ্জ, কেৰলং ৰসুধং ইমং.

‘‘সরট্ঠকং সনিগমং, সজনং ৰন্দিত্ৰ খত্তিযং;

অঞ্জলিং পগ্গহেত্ৰান, ইদং ৰচনমব্রৰিং.

‘‘‘যে কেচি মহিযা সত্তা, হীনমুক্কট্ঠমজ্ঝিমা;

নিরারক্খা সকে গেহে, ৰড্ঢন্তি সকঞাতিভি.

‘‘‘ইদং লোকে উত্তরিযং, সংপীল়ে মম পোসনং;

অযোঘরম্হি সংৰড্ঢো, অপ্পভে চন্দসূরিযে.

‘‘‘পূতিকুণপসম্পুণ্ণা, মুচ্চিত্ৰা মাতু কুচ্ছিতো;

ততো ঘোরতরে দুক্খে, পুন পক্খিত্তযোঘরে.

‘‘‘যদিহং তাদিসং পত্ৰা, দুক্খং পরমদারুণং;

রজ্জেসু যদি রজ্জামি [রঞ্জামি (সী.)], পাপানং উত্তমো সিযং.

‘‘‘উক্কণ্ঠিতোম্হি কাযেন, রজ্জেনম্হি অনত্থিকো;

নিব্বুতিং পরিযেসিস্সং, যত্থ মং মচ্চু ন মদ্দিযে’.

‘‘এৰাহং চিন্তযিত্ৰান, ৰিরৰন্তে মহাজনে;

নাগোৰ বন্ধনং ছেত্ৰা, পাৰিসিং কাননং ৰনং.

‘‘মাতাপিতা ¶ ¶ ন মে দেস্সা, নপি মে দেস্সং মহাযসং;

সব্বঞ্ঞুতং পিযং ময্হং, তস্মা রজ্জং পরিচ্চজি’’ন্তি.

‘‘পুনাপরং যদা হোমি, কাসীনং পুরৰরুত্তমে;

ভগিনী চ ভাতরো সত্ত, নিব্বত্তা সোত্থিযে কুলে.

‘‘এতেসং ¶ পুব্বজো আসিং, হিরীসুক্কমুপাগতো;

ভৰং দিস্ৰান ভযতো, নেক্খম্মাভিরতো অহং.

‘‘মাতাপিতূহি ¶ পহিতা, সহাযা একমানসা;

কামেহি মং নিমন্তেন্তি, ‘কুলৰংসং ধরেহি’তি.

‘‘যং তেসং ৰচনং ৰুত্তং, গিহীধম্মে সুখাৰহং;

তং মে অহোসি কঠিনং, তত্ত [সন্তত্ত (ক.)] ফালসমং ৰিয.

‘‘তে মং তদা উক্খিপন্তং, পুচ্ছিংসু পত্থিতং মম;

‘কিং ত্ৰং পত্থযসে সম্ম, যদি কামে ন ভুঞ্জসি’.

‘‘তেসাহং এৰমৰচং, অত্থকামো হিতেসিনং;

‘নাহং পত্থেমি গিহীভাৰং, নেক্খম্মাভিরতো অহং’.

‘‘তে ময্হং ৰচনং সুত্ৰা, পিতুমাতু চ সাৰযুং;

মাতাপিতা এৰমাহু, ‘সব্বেৰ পব্বজাম ভো’.

‘‘উভো ¶ মাতাপিতা ময্হং, ভগিনী চ সত্ত ভাতরো;

অমিতধনং ছড্ডযিত্ৰা, পাৰিসিম্হা মহাৰন’’ন্তি.

‘‘পুনাপরং ¶ যদা হোমি, নগরে ব্রহ্মৰড্ঢনে;

তত্থ কুলৰরে সেট্ঠে, মহাসালে অজাযহং.

‘‘তদাপি লোকং দিস্ৰান, অন্ধীভূতং তমোত্থটং;

চিত্তং ভৰতো পতিকুটতি, তুত্তৰেগহতং ৰিয.

‘‘দিস্ৰান ৰিৰিধং পাপং, এৰং চিন্তেসহং তদা;

‘কদাহং গেহা নিক্খম্ম, পৰিসিস্সামি কাননং’.

‘‘তদাপি মং নিমন্তেসুং, কামভোগেহি ঞাতযো;

তেসম্পি ছন্দমাচিক্খিং, ‘মা নিমন্তেথ তেহি মং’.

‘‘যো ¶ মে কনিট্ঠকো ভাতা, নন্দো নামাসি পণ্ডিতো;

সোপি মং অনুসিক্খন্তো, পব্বজ্জং সমরোচযি.

‘‘অহং সোণো চ নন্দো চ, উভো মাতাপিতা মম;

তদাপি ভোগে ছড্ডেত্ৰা, পাৰিসিম্হা মহাৰন’’ন্তি.

‘‘পুনাপরং ¶ ¶ যদা হোমি, কাসিরাজস্স অত্রজো;

মূগপক্খোতি নামেন, তেমিযোতি ৰদন্তি মং.

‘‘সোল়সিত্থিসহস্সানং, ন ৰিজ্জতি পুমো তদা [সদা (সী.)];

অহোরত্তানং অচ্চযেন, নিব্বত্তো অহমেককো.

‘‘কিচ্ছা লদ্ধং পিযং পুত্তং, অভিজাতং জুতিন্ধরং;

সেতচ্ছত্তং ধারযিত্ৰান, সযনে পোসেতি মং পিতা.

‘‘নিদ্দাযমানো সযনৰরে, পবুজ্ঝিত্ৰানহং তদা;

অদ্দসং পণ্ডরং ছত্তং, যেনাহং নিরযং গতো.

‘‘সহ ¶ দিট্ঠস্স মে ছত্তং, তাসো উপ্পজ্জি ভেরৰো;

ৰিনিচ্ছযং সমাপন্নো, ‘কথাহং ইমং মুঞ্চিস্সং’.

‘‘পুব্বসালোহিতা ময্হং, দেৰতা অত্থকামিনী;

সা মং দিস্ৰান দুক্খিতং, তীসু ঠানেসু যোজযি.

‘‘‘মা পণ্ডিচ্চযং ৰিভাৰয, বালমতো ভৰ সব্বপাণিনং;

সব্বো তং জনো ওচিনাযতু, এৰং তৰ অত্থো ভৰিস্সতি’.

‘‘এৰং ৰুত্তাযহং তস্সা, ইদং ৰচনমব্রৰিং;

‘করোমি তে তং ৰচনং, যং ত্ৰং ভণসি দেৰতে;

অত্থকামাসি মে অম্ম, হিতকামাসি দেৰতে’.

‘‘তস্সাহং ৰচনং সুত্ৰা, সাগরেৰ থলং লভিং;

হট্ঠো ¶ সংৰিগ্গমানসো, তযো অঙ্গে অধিট্ঠহিং.

‘‘মূগো ¶ অহোসিং বধিরো, পক্খো গতিৰিৰজ্জিতো;

এতে অঙ্গে অধিট্ঠায, ৰস্সানি সোল়সং ৰসিং.

‘‘ততো মে হত্থপাদে চ, জিৰ্হং সোতঞ্চ মদ্দিয;

অনূনতং মে পস্সিত্ৰা, ‘কাল়কণ্ণী’তি নিন্দিসুং.

‘‘ততো জানপদা সব্বে, সেনাপতিপুরোহিতা;

সব্বে একমনা হুত্ৰা, ছড্ডনং অনুমোদিসুং.

‘‘সোহং তেসং মতিং সুত্ৰা, হট্ঠো সংৰিগ্গমানসো;

যস্সত্থায তপোচিণ্ণো, সো মে অত্থো সমিজ্ঝথ.

‘‘ন্হাপেত্ৰা অনুলিম্পিত্ৰা, ৰেঠেত্ৰা রাজৰেঠনং;

ছত্তেন অভিসিঞ্চিত্ৰা, কারেসুং পুরং পদক্খিণং.

‘‘সত্তাহং ধারযিত্ৰান, উগ্গতে রৰিমণ্ডলে;

রথেন মং নীহরিত্ৰা, সারথী ৰনমুপাগমি.

‘‘একোকাসে ¶ রথং কত্ৰা, সজ্জস্সং হত্থমুচ্চিতো [হত্থমুঞ্চিতো (সী. স্যা.)];

সারথী খণতী কাসুং, নিখাতুং পথৰিযা মমং.

‘‘অধিট্ঠিতমধিট্ঠানং, তজ্জেন্তো ৰিৰিধকারণা;

ন ভিন্দিং তমধিট্ঠানং, বোধিযাযেৰ কারণা.

‘‘মাতাপিতা ন মে দেস্সা, অত্তা মে ন চ দেস্সিযো;

সব্বঞ্ঞুতং পিযং ময্হং, তস্মা ৰতমধিট্ঠহিং.

‘‘এতে ¶ ¶ অঙ্গে অধিট্ঠায, ৰস্সানি সোল়সং ৰসিং;

অধিট্ঠানেন মে সমো নত্থি, এসা মে অধিট্ঠানপারমী’’তি.

‘‘যদা অহং কপি আসিং, নদীকূলে দরীসযে;

পীল়িতো সুসুমারেন, গমনং ন লভামহং.

‘‘যম্হোকাসে ¶ অহং ঠত্ৰা, ওরা পারং পতামহং;

তত্থচ্ছি সত্তু ৰধকো, কুম্ভীলো লুদ্দদস্সনো.

‘‘সো মং অসংসি ‘এহী’তি, ‘অহংপেমী’তি তং ৰতিং;

তস্স মত্থকমক্কম্ম, পরকূলে পতিট্ঠহিং.

‘‘ন তস্স অলিকং ভণিতং, যথা ৰাচং অকাসহং;

সচ্চেন মে সমো নত্থি, এসা মে সচ্চপারমী’’তি.

‘‘পুনাপরং যদা হোমি, তাপসো সচ্চসৰ্হযো;

সচ্চেন লোকং পালেসিং, সমগ্গং জনমকাসহ’’ন্তি.

‘‘পুনাপরং ¶ ¶ ¶ যদা হোমি, মগধে ৰট্টপোতকো;

অজাতপক্খো তরুণো, মংসপেসি কুলাৰকে.

‘‘মুখতুণ্ডকেনাহরিত্ৰা [মুখতুণ্ডেনাহরিত্ৰা (সী.)], মাতা পোসযতী মমং;

তস্সা ফস্সেন জীৰামি, নত্থি মে কাযিকং বলং.

‘‘সংৰচ্ছরে গিম্হসমযে, দৰডাহো [ৰনদাহো (ক.)] পদিপ্পতি;

উপগচ্ছতি অম্হাকং, পাৰকো কণ্হৰত্তনী.

‘‘ধমধমা ইতিএৰং, সদ্দাযন্তো মহাসিখী;

অনুপুব্বেন ঝাপেন্তো, অগ্গি মমমুপাগমি.

‘‘অগ্গিৰেগভযাতীতা, তসিতা মাতাপিতা মম;

কুলাৰকে মং ছড্ডেত্ৰা, অত্তানং পরিমোচযুং.

‘‘পাদে ¶ পক্খে পজহামি, নত্থি মে কাযিকং বলং;

সোহং অগতিকো তত্থ, এৰং চিন্তেসহং তদা.

‘‘‘যেসাহং উপধাৰেয্যং, ভীতো তসিতৰেধিতো;

তে মং ওহায পক্কন্তা, কথং মে অজ্জ কাতৰে.

‘‘‘অত্থি লোকে সীলগুণো, সচ্চং সোচেয্যনুদ্দযা;

তেন সচ্চেন কাহামি, সচ্চকিরিযমুত্তমং.

‘‘‘আৰেজ্জেত্ৰা ধম্মবলং, সরিত্ৰা পুব্বকে জিনে;

সচ্চবলমৰস্সায, সচ্চকিরিযমকাসহং.

‘‘‘সন্তি ¶ পক্খা অপতনা, সন্তি পাদা অৰঞ্চনা;

মাতাপিতা চ নিক্খন্তা, জাতৰেদ পটিক্কম’.

‘‘সহসচ্চে কতে ময্হং, মহাপজ্জলিতো সিখী;

ৰজ্জেসি সোল়সকরীসানি, উদকং পত্ৰা যথা সিখী;

সচ্চেন মে সমো নত্থি, এসা মে সচ্চপারমী’’তি.

‘‘পুনাপরং ¶ ¶ যদা হোমি, মচ্ছরাজা মহাসরে;

উণ্হে সূরিযসন্তাপে, সরে উদক খীযথ.

‘‘ততো কাকা চ গিজ্ঝা চ, কঙ্কা [বকা (সী.)] কুললসেনকা;

ভক্খযন্তি দিৰারত্তিং, মচ্ছে উপনিসীদিয.

‘‘এৰং চিন্তেসহং তত্থ, সহ ঞাতীহি পীল়িতো;

‘কেন নু খো উপাযেন, ঞাতী দুক্খা পমোচযে’.

‘‘ৰিচিন্তযিত্ৰা ধম্মত্থং, সচ্চং অদ্দস পস্সযং;

সচ্চে ঠত্ৰা পমোচেসিং, ঞাতীনং তং অতিক্খযং.

‘‘অনুস্সরিত্ৰা সতং ধম্মং, পরমত্থং ৰিচিন্তযং;

অকাসি সচ্চকিরিযং, যং লোকে ধুৰসস্সতং.

‘‘‘যতো ¶ সরামি অত্তানং, যতো পত্তোস্মি ৰিঞ্ঞুতং;

নাভিজানামি সঞ্চিচ্চ, একপাণম্পি হিংসিতং.

‘‘‘এতেন ¶ সচ্চৰজ্জেন, পজ্জুন্নো অভিৰস্সতু;

অভিত্থনয পজ্জুন্ন, নিধিং কাকস্স নাসয;

কাকং সোকায রন্ধেহি, মচ্ছে সোকা পমোচয’.

‘‘সহকতে সচ্চৰরে, পজ্জুন্নো অভিগজ্জিয;

থলং নিন্নঞ্চ পূরেন্তো, খণেন অভিৰস্সথ.

‘‘এৰরূপং সচ্চৰরং, কত্ৰা ৰীরিযমুত্তমং;

ৰস্সাপেসিং মহামেঘং, সচ্চতেজবলস্সিতো;

সচ্চেন মে সমো নত্থি, এসা মে সচ্চপারমী’’তি.

‘‘পুনাপরং ¶ যদা হোমি, কণ্হদীপাযনো ইসি;

পরোপঞ্ঞাসৰস্সানি, অনভিরতোচরিং অহং.

‘‘ন কোচি এতং জানাতি, অনভিরতিমনং মম;

অহঞ্হি কস্সচি নাচিক্খিং, অরতি মে চরতি মানসে.

‘‘সব্রহ্মচারী ¶ মণ্ডব্যো, সহাযো মে মহাইসি;

পুব্বকম্মসমাযুত্তো, সূলমারোপনং লভি.

‘‘তমহং উপট্ঠহিত্ৰান, আরোগ্যমনুপাপযিং;

আপুচ্ছিত্ৰান আগঞ্ছিং, যং ময্হং সকমস্সমং.

‘‘সহাযো ¶ ব্রাহ্মণো ময্হং, ভরিযং আদায পুত্তকং;

তযো জনা সমাগন্ত্ৰা, আগঞ্ছুং পাহুনাগতং.

‘‘সম্মোদমানো তেহি সহ, নিসিন্নো সকমস্সমে;

দারকো ৰট্টমনুক্খিপং, আসীৰিসমকোপযি.

‘‘ততো সো ৰট্টগতং মগ্গং, অন্ৰেসন্তো কুমারকো;

আসীৰিসস্স হত্থেন, উত্তমঙ্গং পরামসি.

‘‘তস্স ¶ আমসনে কুদ্ধো, সপ্পো ৰিসবলস্সিতো;

কুপিতো পরমকোপেন, অডংসি দারকং খণে.

‘‘সহদট্ঠো আসীৰিসেন [অতিৰিসেন (পী. ক.)], দারকো পপতি [পততি (ক.)] ভূমিযং;

তেনাহং দুক্খিতো আসিং, মম ৰাহসি তং দুক্খং.

‘‘ত্যাহং অস্সাসযিত্ৰান, দুক্খিতে সোকসল্লিতে;

পঠমং অকাসিং কিরিযং, অগ্গং সচ্চং ৰরুত্তমং.

‘‘‘সত্তাহমেৰাহং পসন্নচিত্তো, পুঞ্ঞত্থিকো অচরিং ব্রহ্মচরিযং;

অথাপরং যং চরিতং মমেদং, ৰস্সানি পঞ্ঞাসসমাধিকানি.

‘‘‘অকামকো ৰাহি অহং চরামি, এতেন সচ্চেন সুৰত্থি হোতু;

‘‘সহ ¶ ¶ সচ্চে কতে ময্হং, ৰিসৰেগেন ৰেধিতো;

অবুজ্ঝিত্ৰান ৰুট্ঠাসি, অরোগো চাসি মাণৰো;

সচ্চেন মে সমো নত্থি, এসা মে সচ্চপারমী’’তি.

‘‘পুনাপরং যদা হোমি, সুতসোমো মহীপতি;

গহিতো পোরিসাদেন, ব্রাহ্মণে সঙ্গরং সরিং.

‘‘খত্তিযানং একসতং, আৰুণিত্ৰা করত্তলে;

এতেসং পমিলাপেত্ৰা, যঞ্ঞত্থে উপনযী মমং.

‘‘অপুচ্ছি ¶ মং পোরিসাদো, ‘কিং ত্ৰং ইচ্ছসি নিস্সজং;

যথামতি তে কাহামি, যদি মে ত্ৰং পুনেহিসি’.

‘‘তস্স ¶ পটিস্সুণিত্ৰান, পণ্হে আগমনং মম;

উপগন্ত্ৰা পুরং রম্মং, রজ্জং নিয্যাদযিং তদা.

‘‘অনুস্সরিত্ৰা সতং ধম্মং, পুব্বকং জিনসেৰিতং;

ব্রাহ্মণস্স ধনং দত্ৰা, পোরিসাদং উপাগমিং.

‘‘নত্থি মে সংসযো তত্থ, ঘাতযিস্সতি ৰা ন ৰা;

সচ্চৰাচানুরক্খন্তো, জীৰিতং চজিতুমুপাগমিং;

সচ্চেন মে সমো নত্থি, এসা মে সচ্চপারমী’’তি.

‘‘সামো ¶ ¶ যদা ৰনে আসিং, সক্কেন অভিনিম্মিতো;

পৰনে সীহব্যগ্ঘে চ, মেত্তাযমুপনামযিং.

‘‘সীহব্যগ্ঘেহি দীপীহি, অচ্ছেহি মহিসেহি চ;

পসদমিগৰরাহেহি, পরিৰারেত্ৰা ৰনে ৰসিং.

‘‘ন মং কোচি উত্তসতি, নপি ভাযামি কস্সচি;

মেত্তাবলেনুপত্থদ্ধো, রমামি পৰনে তদা’’তি.

‘‘পুনাপরং যদা হোমি, একরাজাতি ৰিস্সুতো;

পরমং সীলং অধিট্ঠায, পসাসামি মহামহিং.

‘‘দস কুসলকম্মপথে, ৰত্তামি অনৰসেসতো;

চতূহি সঙ্গহৰত্থূহি, সঙ্গণ্হামি [সঙ্গহামি (ক.)] মহাজনং.

‘‘এৰং মে অপ্পমত্তস্স, ইধ লোকে পরত্থ চ;

দব্বসেনো ¶ উপগন্ত্ৰা, অচ্ছিন্দন্তো পুরং মম.

‘‘রাজূপজীৰে ¶ নিগমে, সবলট্ঠে সরট্ঠকে;

সব্বং হত্থগতং কত্ৰা, কাসুযা নিখণী মমং.

‘‘অমচ্চমণ্ডলং রজ্জং, ফীতং অন্তেপুরং মম;

অচ্ছিন্দিত্ৰান গহিতং, পিযং পুত্তংৰ পস্সহং;

মেত্তায মে সমো নত্থি, এসা মে মেত্তাপারমী’’তি.

‘‘সুসানে ¶ ¶ সেয্যং কপ্পেমি, ছৰট্ঠিকং উপনিধাযহং;

গামণ্ডলা [গোমণ্ডলা (সী.), গামমণ্ডলা (স্যা.)] উপাগন্ত্ৰা, রূপং দস্সেন্তিনপ্পকং.

‘‘অপরে গন্ধমালঞ্চ, ভোজনং ৰিৰিধং বহুং;

উপাযনানূপনেন্তি, হট্ঠা সংৰিগ্গমানসা.

‘‘যে মে দুক্খং উপহরন্তি, যে চ দেন্তি সুখং মম;

সব্বেসং সমকো হোমি, দযা কোপো ন ৰিজ্জতি.

‘‘সুখদুক্খে তুলাভূতো, যসেসু অযসেসু চ;

সব্বত্থ সমকো হোমি, এসা মে উপেক্খাপারমী’’তি.

যুধঞ্জযো সোমনস্সো, অযোঘরভিসেন চ;

সোণনন্দো মূগপক্খো, কপিরাজা সচ্চসৰ্হযো.

ৰট্টকো মচ্ছরাজা চ, কণ্হদীপাযনো ইসি;

সুতসোমো পুন আসিং [আসি (স্যা.)], সামো চ একরাজহু;

উপেক্খাপারমী আসি, ইতি ৰুত্থং [ৰুত্তং (সব্বত্থ) অট্ঠকথা ওলোকেতব্বা] মহেসিনা.

এৰং ¶ বহুব্বিধং দুক্খং, সম্পত্তী চ বহুব্বিধা [সম্পত্তি চ বহুৰিধা (সী.), সম্পত্তিং চ বহুৰিধং (ক.)];

ভৰাভৰে অনুভৰিত্ৰা, পত্তো সম্বোধিমুত্তমং.

দত্ৰা দাতব্বকং দানং, সীলং পূরেত্ৰা অসেসতো;

নেক্খম্মে পারমিং গন্ত্ৰা, পত্তো সম্বোধিমুত্তমং.

পণ্ডিতে ¶ পরিপুচ্ছিত্ৰা, ৰীরিযং কত্ৰান মুত্তমং;

খন্তিযা পারমিং গন্ত্ৰা, পত্তো সম্বোধিমুত্তমং.

কত্ৰা দল়্হমধিট্ঠানং, সচ্চৰাচানুরক্খিয;

মেত্তায ¶ পারমিং গন্ত্ৰা, পত্তো সম্বোধিমুত্তমং.

লাভালাভে ¶ যসাযসে, সম্মাননাৰমাননে;

সব্বত্থ সমকো হুত্ৰা, পত্তো সম্বোধিমুত্তমং.

কোসজ্জং ভযতো দিস্ৰা, ৰীরিযারম্ভঞ্চ খেমতো;

আরদ্ধৰীরিযা হোথ, এসা বুদ্ধানুসাসনী.

ৰিৰাদং ভযতো দিস্ৰা, অৰিৰাদঞ্চ খেমতো;

সমগ্গা সখিলা হোথ, এসা বুদ্ধানুসাসনী.

পমাদং ভযতো দিস্ৰা, অপ্পমাদঞ্চ খেমতো;

ভাৰেথট্ঠঙ্গিকং মগ্গং, এসা বুদ্ধানুসাসনী.

ইত্থং সুদং ভগৰা অত্তনো পুব্বচরিযং সম্ভাৰযমানো বুদ্ধাপদানিযং নাম ধম্মপরিযাযং অভাসিত্থাতি.