📜

নমো তস্স ভগৰতো অরহতো সম্মাসম্বুদ্ধস্স

জাতক-অট্ঠকথা

(দুতিযো ভাগো)

২. দুকনিপাতো

১. দল়্হৰগ্গো

[১৫১] ১. রাজোৰাদজাতকৰণ্ণনা

দল়্হং ¶ ¶ ¶ দল়্হস্স খিপতীতি ইদং সত্থা জেতৰনে ৰিহরন্তো রাজোৰাদং আরব্ভ কথেসি. সো তেসকুণজাতকে (জা. ২.১৭.১ আদযো) আৰি ভৰিস্সতি. একস্মিং পন দিৰসে কোসলরাজা একং অগতিগতং দুব্বিনিচ্ছযং অড্ডং ৰিনিচ্ছিনিত্ৰা ভুত্তপাতরাসো অল্লহত্থোৰ অলঙ্কতরথং অভিরুয্হ সত্থু সন্তিকং গন্ত্ৰা ফুল্লপদুমসস্সিরিকেসু পাদেসু নিপতিত্ৰা সত্থারং ৰন্দিত্ৰা একমন্তং নিসীদি. অথ নং সত্থা এতদৰোচ – ‘‘হন্দ কুতো নু ত্ৰং, মহারাজ, আগচ্ছসি দিৰা দিৰস্সা’’তি. ‘‘ভন্তে, অজ্জ একং অগতিগতং দুব্বিনিচ্ছযং অড্ডং ৰিনিচ্ছিনন্তো ¶ ওকাসং অলভিত্ৰা ইদানি তং তীরেত্ৰা ভুঞ্জিত্ৰা অল্লহত্থোৰ তুম্হাকং উপট্ঠানং আগতোম্হী’’তি. সত্থা ‘‘মহারাজ, ধম্মেন সমেন অড্ডৰিনিচ্ছযং নাম কুসলং, সগ্গমগ্গো এস. অনচ্ছরিযং খো পনেতং, যং তুম্হে মাদিসস্স সব্বঞ্ঞুবুদ্ধস্স সন্তিকা ওৰাদং লভমানা ধম্মেন সমেন অড্ডং ৰিনিচ্ছিনেয্যাথ. এতদেৰ অচ্ছরিযং, যং পুব্বে রাজানো অসব্বঞ্ঞূনম্পি পণ্ডিতানং ৰচনং সুত্ৰা ধম্মেন সমেন ¶ অড্ডং ৰিনিচ্ছিনন্তা চত্তারি অগতিগমনানি ৰজ্জেত্ৰা দস রাজধম্মে অকোপেত্ৰা ধম্মেন রজ্জং কারেত্ৰা সগ্গপুরং পূরযমানা অগমিংসূ’’তি ৰত্ৰা তেন যাচিতো অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিস্মিং পটিসন্ধিং গহেত্ৰা লদ্ধগব্ভপরিহারো সোত্থিনা মাতুকুচ্ছিম্হা নিক্খমি. নামগ্গহণদিৰসে পনস্স ‘‘ব্রহ্মদত্তকুমারো’’ত্ৰেৰ নামং অকংসু. সো অনুপুব্বেন ৰযপ্পত্তো সোল়সৰস্সকালে তক্কসিলং গন্ত্ৰা সব্বসিপ্পেসু নিপ্ফত্তিং পত্ৰা পিতু অচ্চযেন রজ্জে পতিট্ঠায ধম্মেন সমেন রজ্জং কারেসি, ছন্দাদিৰসেন অগন্ত্ৰা ৰিনিচ্ছযং অনুসাসি. তস্মিং এৰং ধম্মেন রজ্জং কারেন্তে অমচ্চাপি ধম্মেনেৰ ৰোহারং ৰিনিচ্ছিনিংসু. ৰোহারেসু ধম্মেন ৰিনিচ্ছযমানেসু কূটড্ডকারকা নাম নাহেসুং, তেসং অভাৰা অড্ডত্থায রাজঙ্গণে উপরৰো পচ্ছিজ্জি. অমচ্চা দিৰসম্পি ৰিনিচ্ছযট্ঠানে নিসীদিত্ৰা কঞ্চি ৰিনিচ্ছযত্থায আগচ্ছন্তং অদিস্ৰা উট্ঠায পক্কমন্তি, ৰিনিচ্ছযট্ঠানং ছড্ডেতব্বভাৰং পাপুণি.

বোধিসত্তো চিন্তেসি – ‘‘মযি ধম্মেন রজ্জং কারেন্তে ৰিনিচ্ছযট্ঠানং আগচ্ছন্তা নাম নত্থি, উপরৰো পচ্ছিজ্জি, ৰিনিচ্ছযট্ঠানং ছড্ডেতব্বভাৰং পত্তং, ইদানি মযা অত্তনো অগুণং পরিযেসিতুং ৰট্টতি ‘অযং নাম মে অগুণো’তি সুত্ৰা তং পহায গুণেসুযেৰ ৰত্তিস্সামী’’তি. ততো পট্ঠায ‘‘অত্থি নু খো মে কোচি অগুণৰাদী’’তি পরিগ্গণ্হন্তো অন্তোৰল়ঞ্জকানং অন্তরে কঞ্চি অগুণৰাদিং অদিস্ৰা অত্তনো গুণকথমেৰ সুত্ৰা ‘‘এতে ময্হং ভযেনাপি অগুণং অৰত্ৰা গুণমেৰ ৰদেয্যু’’ন্তি বহিৰল়ঞ্জনকে পরিগ্গণ্হন্তো তত্থাপি অদিস্ৰা অন্তোনগরে পরিগ্গণ্হি. বহিনগরে চতূসু দ্ৰারেসু চতুগামকে পরিগ্গণ্হি. তত্থাপি কঞ্চি অগুণৰাদিং অদিস্ৰা অত্তনো গুণকথমেৰ সুত্ৰা ‘‘জনপদং পরিগ্গণ্হিস্সামী’’তি অমচ্চে রজ্জং পটিচ্ছাপেত্ৰা রথং আরুয্হ সারথিমেৰ গহেত্ৰা অঞ্ঞাতকৰেসেন নগরা নিক্খমিত্ৰা জনপদং পরিগ্গণ্হমানো যাৰ পচ্চন্তভূমিং গন্ত্ৰা কঞ্চি অগুণৰাদিং ¶ অদিস্ৰা অত্তনো গুণকথমেৰ সুত্ৰা পচ্চন্তসীমতো মহামগ্গেন নগরাভিমুখোযেৰ নিৰত্তি.

তস্মিং ¶ ¶ পন কালে বল্লিকো নাম কোসলরাজাপি ধম্মেন রজ্জং কারেন্তো অগুণকথং গৰেসন্তো হুত্ৰা অন্তোৰল়ঞ্জকাদীসু অগুণৰাদিং অদিস্ৰা অত্তনো গুণকথমেৰ সুত্ৰা জনপদং পরিগ্গণ্হন্তো তং পদেসং অগমাসি. তে উভোপি একস্মিং নিন্নট্ঠানে সকটমগ্গে অভিমুখা অহেসুং, রথস্স উক্কমনট্ঠানং নত্থি. অথ বল্লিকরঞ্ঞো সারথি বারাণসিরঞ্ঞো সারথিং ‘‘তৰ রথং উক্কমাপেহী’’তি আহ. সোপি ‘‘অম্ভো সারথি, তৰ রথং উক্কমাপেহি, ইমস্মিং রথে বারাণসিরজ্জসামিকো ব্রহ্মদত্তমহারাজা নিসিন্নো’’তি আহ. ইতরোপি নং ‘‘অম্ভো সারথি, ইমস্মিং রথে কোসলরজ্জসামিকো বল্লিকমহারাজা নিসিন্নো, তৰ রথং উক্কমাপেত্ৰা অম্হাকং রঞ্ঞো রথস্স ওকাসং দেহী’’তি আহ. বারাণসিরঞ্ঞো সারথি ‘‘অযম্পি কির রাজাযেৰ, কিং নু খো কাতব্ব’’ন্তি চিন্তেন্তো ‘‘অত্থেসো উপাযো’’তি ৰযং পুচ্ছিত্ৰা ‘‘দহরস্স রথং উক্কমাপেত্ৰা মহল্লকস্স ওকাসং দাপেস্সামী’’তি সন্নিট্ঠানং কত্ৰা তং সারথিং কোসলরঞ্ঞো ৰযং পুচ্ছিত্ৰা পরিগ্গণ্হন্তো উভিন্নম্পি সমানৰযভাৰং ঞত্ৰা রজ্জপরিমাণং বলং ধনং যসং জাতিং গোত্তং কুলপদেসন্তি সব্বং পুচ্ছিত্ৰা ‘‘উভোপি তিযোজনসতিকস্স রজ্জস্স সামিনো সমানবলধনযসজাতিগোত্তকুলপদেসা’’তি ঞত্ৰা ‘‘সীলৰন্তস্স ওকাসং দস্সামী’’তি চিন্তেত্ৰা ‘‘ভো সারথি, তুম্হাকং রঞ্ঞো সীলাচারো কীদিসো’’তি পুচ্ছি. সো ‘‘অযঞ্চ অযঞ্চ অম্হাকং রঞ্ঞো সীলাচারো’’তি অত্তনো রঞ্ঞো অগুণমেৰ গুণতো পকাসেন্তো পঠমং গাথমাহ –

১.

‘‘দল়্হং দল়্হস্স খিপতি, বল্লিকো মুদুনা মুদুং;

সাধুম্পি সাধুনা জেতি, অসাধুম্পি অসাধুনা;

এতাদিসো অযং রাজা, মগ্গা উয্যাহি সারথী’’তি.

তত্থ ¶ দল়্হং দল়্হস্স খিপতীতি যো দল়্হো হোতি বলৰদল়্হেন পহারেন ৰা ৰচনেন ৰা জিনিতব্বো, তস্স দল়্হমেৰ পহারং ৰা ৰচনং ৰা খিপতি. এৰং দল়্হোৰ হুত্ৰা তং জিনাতীতি দস্সেতি. বল্লিকোতি তস্স রঞ্ঞো নামং. মুদুনা মুদুন্তি মুদুপুগ্গলং সযম্পি মুদু হুত্ৰা মুদুনাৰ উপাযেন জিনাতি. সাধুম্পি সাধুনা জেতীতি যে সাধূ সপ্পুরিসা, তে সযম্পি সাধু হুত্ৰা সাধুনাৰ ¶ উপাযেন জিনাতি. অসাধুম্পি অসাধুনাতি যে পন অসাধূ, তে সযম্পি অসাধু হুত্ৰা অসাধুনাৰ উপাযেন জিনাতীতি দস্সেতি. এতাদিসো অযং রাজাতি অযং অম্হাকং কোসলরাজা সীলাচারেন এৰরূপো. মগ্গা উয্যাহি সারথীতি অত্তনো রথং মগ্গা উক্কমাপেত্ৰা উয্যাহি, উপ্পথেন যাহি, অম্হাকং রঞ্ঞো মগ্গং দেহীতি ৰদতি.

অথ ¶ নং বারাণসিরঞ্ঞো সারথি ‘‘অম্ভো, কিং পন তযা অত্তনো রঞ্ঞো গুণকথা কথিতা’’তি ৰত্ৰা ‘‘আমা’’তি ৰুত্তে ‘‘যদি পন এতে গুণাতি ৰদসি, অগুণা পন কীদিসী’’তি ৰত্ৰা ‘‘এতে তাৰ অগুণা হোন্তু, তুম্হাকং পন রঞ্ঞো কীদিসো গুণো’’তি ৰুত্তে ‘‘তেন হি সুণাহী’’তি দুতিযং গাথমাহ –

২.

‘‘অক্কোধেন জিনে কোধং, অসাধুং সাধুনা জিনে;

জিনে কদরিযং দানেন, সচ্চেনালিকৰাদিনং;

এতাদিসো অযং রাজা, মগ্গা উয্যাহি সারথী’’তি.

তত্থ এতাদিসোতি এতেহি ‘‘অক্কোধেন জিনে কোধ’’ন্তিআদিৰসেন ৰুত্তেহি গুণেহি সমন্নাগতো. অযঞ্হি কুদ্ধং পুগ্গলং সযং অক্কোধো হুত্ৰা অক্কোধেন জিনাতি, অসাধুং পন সযং সাধু হুত্ৰা সাধুনাৰ উপাযেন জিনাতি, কদরিযং থদ্ধমচ্ছরিং সযং দাযকো হুত্ৰা দানেন জিনাতি. সচ্চেনালিকৰাদিনন্তি মুসাৰাদিং সযং সচ্চৰাদী হুত্ৰা সচ্চেন জিনাতি. মগ্গা উয্যাহি সারথীতি, সম্ম সারথি, মগ্গতো অপগচ্ছ. এৰংৰিধসীলাচারগুণযুত্তস্স অম্হাকং রঞ্ঞো মগ্গং দেহি, অম্হাকং রাজা মগ্গস্স অনুচ্ছৰিকোতি.

এৰং ৰুত্তে বল্লিকরাজা চ সারথি চ উভোপি রথা ওতরিত্ৰা অস্সে মোচেত্ৰা রথং অপনেত্ৰা বারাণসিরঞ্ঞো মগ্গং অদংসু. বারাণসিরাজা বল্লিকরঞ্ঞো ‘‘রঞ্ঞা নাম ইদঞ্চিদঞ্চ কাতুং ¶ ৰট্টতী’’তি ওৰাদং দত্ৰা বারাণসিং গন্ত্ৰা দানাদীনি পুঞ্ঞানি কত্ৰা জীৰিতপরিযোসানে সগ্গপুরং পূরেসি. বল্লিকরাজাপি তস্স ওৰাদং গহেত্ৰা জনপদং পরিগ্গহেত্ৰা অত্তনো অগুণৰাদিং অদিস্ৰাৰ সকনগরং গন্ত্ৰা দানাদীনি পুঞ্ঞানি কত্ৰা জীৰিতপরিযোসানে সগ্গপুরমেৰ পূরেসি.

সত্থা ¶ কোসলরাজস্স ওৰাদত্থায ইমং ধম্মদেসনং আহরিত্ৰা জাতকং সমোধানেসি – ‘‘তদা বল্লিকরঞ্ঞো সারথি মোগ্গল্লানো অহোসি, বল্লিকরাজা আনন্দো, বারাণসিরঞ্ঞো সারথি সারিপুত্তো, বারাণসিরাজা পন অহমেৰ অহোসি’’ন্তি.

রাজোৰাদজাতকৰণ্ণনা পঠমা.

[১৫২] ২. সিঙ্গালজাতকৰণ্ণনা

অসমেক্খিতকম্মন্তন্তি ¶ ইদং সত্থা কূটাগারসালাযং ৰিহরন্তো ৰেসালিৰাসিকং একং ন্হাপিতপুত্তং আরব্ভ কথেসি. তস্স কির পিতা রাজূনং রাজোরোধানং রাজকুমারানং রাজকুমারিকানঞ্চ মস্সুকরণকেসসণ্ঠপনঅট্ঠপদট্ঠপনাদীনি সব্বকিচ্চানি করোতি সদ্ধো পসন্নো তিসরণগতো সমাদিন্নপঞ্চসীলো, অন্তরন্তরে সত্থু ধম্মং সুণন্তো কালং ৰীতিনামেতি. সো একস্মিং দিৰসে রাজনিৰেসনে কম্মং কাতুং গচ্ছন্তো অত্তনো পুত্তং গহেত্ৰা গতো. সো তত্থ একং দেৰচ্ছরাপটিভাগং অলঙ্কতপটিযত্তং লিচ্ছৰিকুমারিকং দিস্ৰা কিলেসৰসেন পটিবদ্ধচিত্তো হুত্ৰা পিতরা সদ্ধিং রাজনিৰেসনা নিক্খমিত্ৰা ‘‘এতং কুমারিকং লভমানো জীৰিস্সামি, অলভমানস্স মে এত্থেৰ মরণ’’ন্তি আহারুপচ্ছেদং কত্ৰা মঞ্চকং পরিস্সজিত্ৰা নিপজ্জি.

অথ নং পিতা উপসঙ্কমিত্ৰা ‘‘তাত, অৰত্থুম্হি ছন্দরাগং মা করি, হীনজচ্চো ত্ৰং ন্হাপিতপুত্তো, লিচ্ছৰিকুমারিকা খত্তিযধীতা জাতিসম্পন্না, ন সা তুয্হং অনুচ্ছৰিকা, অঞ্ঞং তে জাতিগোত্তেহি সদিসং কুমারিকং আনেস্সামী’’তি আহ. সো পিতু কথং ন গণ্হি. অথ নং মাতা ভাতা ভগিনী চূল়পিতা চূল়মাতাতি সব্বেপি ঞাতকা চেৰ মিত্তসুহজ্জা চ সন্নিপতিত্ৰা সঞ্ঞাপেন্তাপি সঞ্ঞাপেতুং নাসক্খিংসু. সো তত্থেৰ সুস্সিত্ৰা পরিসুস্সিত্ৰা জীৰিতক্খযং পাপুণি. অথস্স পিতা সরীরকিচ্চপেতকিচ্চানি কত্ৰা তনুসোকো ¶ ‘‘সত্থারং ৰন্দিস্সামী’’তি বহুং গন্ধমালাৰিলেপনং গহেত্ৰা মহাৰনং গন্ত্ৰা সত্থারং পূজেত্ৰা ৰন্দিত্ৰা একমন্তং নিসিন্নো ‘‘কিং নু খো, উপাসক, বহূনি দিৰসানি ন দিস্সসী’’তি ৰুত্তে তমত্থং আরোচেসি. সত্থা ‘‘ন খো, উপাসক, ইদানেৰ তৰ পুত্তো অৰত্থুস্মিং ¶ ছন্দরাগং উপ্পাদেত্ৰা ৰিনাসং পাপুণি, পুব্বেপি পত্তোযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে সীহযোনিযং নিব্বত্তি. তস্স ছ কনিট্ঠভাতরো একা চ ভগিনী অহোসি, সব্বেপি কঞ্চনগুহাযং ৰসন্তি. তস্সা পন গুহায অৰিদূরে রজতপব্বতে একা ফলিকগুহা অত্থি, তত্থেকো সিঙ্গালো ৰসতি. অপরভাগে সীহানং মাতাপিতরো কালমকংসু. তে ভগিনিং সীহপোতিকং কঞ্চনগুহাযং ঠপেত্ৰা গোচরায পক্কমিত্ৰা মংসং আহরিত্ৰা তস্সা দেন্তি. সো সিঙ্গালো তং সীহপোতিকং দিস্ৰা পটিবদ্ধচিত্তো অহোসি. তস্সা পন মাতাপিতূনং ধরমানকালে ওকাসং নালত্থ, সো সত্তন্নম্পি তেসং গোচরায পক্কন্তকালে ফলিকগুহায ওতরিত্ৰা কঞ্চনগুহায দ্ৰারং গন্ত্ৰা সীহপোতিকায ¶ পুরতো লোকামিসপটিসংযুত্তং এৰরূপং রহস্সকথং কথেসি – ‘‘সীহপোতিকে, অহম্পি চতুপ্পদো, ত্ৰম্পি চতুপ্পদা, ত্ৰং মে পজাপতী হোহি, অহং তে পতি ভৰিস্সামি, তে মযং সমগ্গা সম্মোদমানা ৰসিস্সাম, ত্ৰং ইতো পট্ঠায মং কিলেসৰসেন সঙ্গণ্হাহী’’তি. সা তস্স ৰচনং সুত্ৰা চিন্তেসি – ‘‘অযং সিঙ্গালো চতুপ্পদানং অন্তরে হীনো পটিকুট্ঠো চণ্ডালসদিসো, মযং উত্তমরাজকুলসম্মতা, এস খো মযা সদ্ধিং অসব্ভিং অননুচ্ছৰিকং কথং কথেতি, অহং এৰরূপং কথং সুত্ৰা জীৰিতেন কিং করিস্সামি, নাসাৰাতং সন্নিরুজ্ঝিত্ৰা মরিস্সামী’’তি. অথস্সা এতদহোসি – ‘‘ময্হং এৰমেৰ মরণং অযুত্তং, ভাতিকা তাৰ মে আগচ্ছন্তু, তেসং কথেত্ৰা ¶ মরিস্সামী’’তি. সিঙ্গালোপি তস্সা সন্তিকা পটিৰচনং অলভিত্ৰা ‘‘ইদানি এসা ময্হং কুজ্ঝতী’’তি দোমনস্সপ্পত্তো ফলিকগুহাযং পৰিসিত্ৰা নিপজ্জি.

অথেকো সীহপোতকো মহিংসৰারণাদীসু অঞ্ঞতরং ৰধিত্ৰা মংসং খাদিত্ৰা ভগিনিযা ভাগং আহরিত্ৰা ‘‘অম্ম, মংসং খাদস্সূ’’তি আহ. ‘‘ভাতিক, নাহং মংসং খাদামি, মরিস্সামী’’তি. ‘‘কিং কারণা’’তি? সা তং পৰত্তিং আচিক্খি. ‘‘ইদানি কহং সো সিঙ্গালো’’তি চ ৰুত্তে ফলিকগুহাযং নিপন্নং সিঙ্গালং ‘‘আকাসে নিপন্নো’’তি মঞ্ঞমানা ‘‘ভাতিক, কিং ন পস্সসি, এসো রজতপব্বতে আকাসে নিপন্নো’’তি. সীহপোতকো তস্স ফলিকগুহাযং নিপন্নভাৰং অজানন্তো ‘‘আকাসে নিপন্নো’’তি সঞ্ঞী ¶ হুত্ৰা ‘‘মারেস্সামি ন’’ন্তি সীহৰেগেন পক্খন্দিত্ৰা ফলিকগুহং হদযেনেৰ পহরি. সো হদযেন ফলিতেন তত্থেৰ জীৰিতক্খযং পত্ৰা পব্বতপাদে পতি. অথাপরো আগচ্ছি, সা তস্সপি তথেৰ কথেসি. সোপি তথেৰ কত্ৰা জীৰিতক্খযং পত্ৰা পব্বতপাদে পতি.

এৰং ছসুপি ভাতিকেসু মতেসু সব্বপচ্ছা বোধিসত্তো আগচ্ছি. সা তস্সপি তং কারণং আরোচেত্ৰা ‘‘ইদানি সো কুহি’’ন্তি ৰুত্তে ‘‘এসো রজতপব্বতমত্থকে আকাসে নিপন্নো’’তি আহ. বোধিসত্তো চিন্তেসি – ‘‘সিঙ্গালানং আকাসে পতিট্ঠা নাম নত্থি, ফলিকগুহাযং নিপন্নকো ভৰিস্সতী’’তি. সো পব্বতপাদং ওতরিত্ৰা ছ ভাতিকে মতে দিস্ৰা ‘‘ইমে অত্তনো বালতায পরিগ্গণ্হনপঞ্ঞায অভাৰেন ফলিকগুহভাৰং অজানিত্ৰা হদযেন পহরিত্ৰা মতা ভৰিস্সন্তি, অসমেক্খিত্ৰা অতিতুরিতং করোন্তানং কম্মং নাম এৰরূপং হোতী’’তি ৰত্ৰা পঠমং গাথমাহ –

৩.

‘‘অসমেক্খিতকম্মন্তং, তুরিতাভিনিপাতিনং;

সানি কম্মানি তপ্পেন্তি, উণ্হংৰজ্ঝোহিতং মুখে’’তি.

তত্থ ¶ ¶ অসমেক্খিতকম্মন্তং, তুরিতাভিনিপাতিনন্তি যো পুগ্গলো যং কম্মং কত্তুকামো হোতি, তত্থ দোসং অসমেক্খিত্ৰা অনুপধারেত্ৰা তুরিতো হুত্ৰা ৰেগেনেৰ তং কম্মং কাতুং অভিনিপততি পক্খন্দতি পটিপজ্জতি, তং অসমেক্খিতকম্মন্তং তুরিতাভিনিপাতিনং এৰং সানি কম্মানি তপ্পেন্তি, সোচেন্তি কিলমেন্তি. যথা কিং? উণ্হংৰজ্ঝোহিতং মুখেতি, যথা ভুঞ্জন্তেন ‘‘ইদং সীতলং ইদং উণ্হ’’ন্তি অনুপধারেত্ৰা উণ্হং অজ্ঝোহরণীযং মুখে অজ্ঝোহরিতং ঠপিতং মুখম্পি কণ্ঠম্পি কুচ্ছিম্পি দহতি সোচেতি কিলমেতি, এৰং তথারূপং পুগ্গলং সানি কম্মানি তপ্পেন্তি.

ইতি সো সীহো ইমং গাথং ৰত্ৰা ‘‘মম ভাতিকা অনুপাযকুসলতায ‘সিঙ্গালং মারেস্সামা’তি অতিৰেগেন পক্খন্দিত্ৰা সযং মতা, অহং পন এৰরূপং অকত্ৰা সিঙ্গালস্স ফলিকগুহাযং নিপন্নস্সেৰ হদযং ফালেস্সামী’’তি সিঙ্গালস্স আরোহনওরোহনমগ্গং সল্লক্খেত্ৰা তদভিমুখো হুত্ৰা তিক্খত্তুং সীহনাদং নদি, পথৰিযা সদ্ধিং আকাসং একনিন্নাদং অহোসি. সিঙ্গালস্স ফলিকগুহাযং নিপন্নস্সেৰ সীততসিতস্স হদযং ফলি, সো তত্থেৰ জীৰিতক্খযং পাপুণি.

সত্থা ¶ ‘‘এৰং সো সিঙ্গালো সীহনাদং সুত্ৰা জীৰিতক্খযং পত্তো’’তি ৰত্ৰা অভিসম্বুদ্ধো হুত্ৰা দুতিযং গাথমাহ –

৪.

‘‘সীহো চ সীহনাদেন, দদ্দরং অভিনাদযি;

সুত্ৰা সীহস্স নিগ্ঘোসং, সিঙ্গালো দদ্দরে ৰসং;

ভীতো সন্তাসমাপাদি, হদযঞ্চস্স অপ্ফলী’’তি.

তত্থ সীহোতি চত্তারো সীহা – তিণসীহো, পণ্ডুসীহো, কাল়সীহো, সুরত্তহত্থপাদো কেসরসীহোতি. তেসু কেসরসীহো ইধ অধিপ্পেতো. দদ্দরং অভিনাদযীতি তেন অসনিপাতসদ্দসদিসেন ভেরৰতরেন সীহনাদেন তং রজতপব্বতং অভিনাদযি একনিন্নাদং অকাসি. দদ্দরে ৰসন্তি ফলিকমিস্সকে রজতপব্বতে ৰসন্তো. ভীতো সন্তাসমাপাদীতি মরণভযেন ভীতো চিত্তুত্রাসং আপাদি. হদযঞ্চস্স অপ্ফলীতি তেন চস্স ভযেন হদযং ফলীতি.

এৰং ¶ ¶ সীহো সিঙ্গালং জীৰিতক্খযং পাপেত্ৰা ভাতরো একস্মিং ঠানে পটিচ্ছাদেত্ৰা তেসং মতভাৰং ভগিনিযা আচিক্খিত্ৰা তং সমস্সাসেত্ৰা যাৰজীৰং কঞ্চনগুহাযং ৰসিত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উপাসকো সোতাপত্তিফলে পতিট্ঠহি. ‘‘তদা সিঙ্গালো ন্হাপিতপুত্তো অহোসি, সীহপোতিকা লিচ্ছৰিকুমারিকা, ছ কনিট্ঠভাতরো অঞ্ঞতরথেরা অহেসুং, জেট্ঠভাতিকসীহো পন অহমেৰ অহোসি’’ন্তি.

সিঙ্গালজাতকৰণ্ণনা দুতিযা.

[১৫৩] ৩. সূকরজাতকৰণ্ণনা

চতুপ্পদো অহং, সম্মাতি ইদং সত্থা জেতৰনে ৰিহরন্তো অঞ্ঞতরং মহল্লকত্থেরং আরব্ভ কথেসি. একস্মিঞ্হি দিৰসে রত্তিং ধম্মস্সৰনে ৰত্তমানে সত্থরি গন্ধকুটিদ্ৰারে রমণীযে সোপানফলকে ঠত্ৰা ভিক্খুসঙ্ঘস্স সুগতোৰাদং দত্ৰা গন্ধকুটিং পৰিট্ঠে ধম্মসেনাপতি সত্থারং ৰন্দিত্ৰা অত্তনো পরিৰেণং অগমাসি. মহামোগ্গল্লানোপি পরিৰেণমেৰ গন্ত্ৰা ¶ মুহুত্তং ৰিস্সমিত্ৰা থেরস্স সন্তিকং আগন্ত্ৰা পঞ্হং পুচ্ছি, পুচ্ছিতপুচ্ছিতং ধম্মসেনাপতি গগনতলে পুণ্ণচন্দং উট্ঠাপেন্তো ৰিয ৰিস্সজ্জেত্ৰা পাকটমকাসি. চতস্সোপি পরিসা ধম্মং সুণমানা নিসীদিংসু. তত্থেকো মহল্লকত্থেরো চিন্তেসি – ‘‘সচাহং ইমিস্সা পরিসায মজ্ঝে সারিপুত্তং আলুল়েন্তো পঞ্হং পুচ্ছিস্সামি, অযং মে পরিসা ‘বহুস্সুতো অয’ন্তি ঞত্ৰা সক্কারসম্মানং করিস্সতী’’তি পরিসন্তরা উট্ঠায থেরং উপসঙ্কমিত্ৰা একমন্তং ঠত্ৰা ‘‘আৰুসো সারিপুত্ত, মযম্পি তং একং পঞ্হং পুচ্ছাম, অম্হাকম্পি ওকাসং করোহি, দেহি মে ৰিনিচ্ছযং আৰেধিকায ৰা নিৰেধিকায ৰা নিগ্গহে ৰা পগ্গহে ৰা ৰিসেসে ৰা পটিৰিসেসে ৰা’’তি আহ. থেরো তং ওলোকেত্ৰা ‘‘অযং মহল্লকো ইচ্ছাচারে ঠিতো তুচ্ছো ন কিঞ্চি জানাতী’’তি তেন সদ্ধিং অকথেত্ৰাৰ লজ্জমানো বীজনিং ঠপেত্ৰা আসনা ওতরিত্ৰা পরিৰেণং ¶ পাৰিসি, মোগ্গল্লানত্থেরোপি অত্তনো পরিৰেণমেৰ অগমাসি.

মনুস্সা উট্ঠায ‘‘গণ্হথেতং তুচ্ছমহল্লকং, মধুরধম্মস্সৰনং নো সোতুং ন অদাসী’’তি অনুবন্ধিংসু. সো পলাযন্তো ৰিহারপচ্চন্তে ভিন্নপদরায ৰচ্চকুটিযা পতিত্ৰা গূথমক্খিতো অট্ঠাসি. মনুস্সা তং দিস্ৰা ৰিপ্পটিসারিনো হুত্ৰা সত্থু সন্তিকং অগমংসু. সত্থা তে দিস্ৰা ‘‘কিং ¶ উপাসকা অৰেলায আগতত্থা’’তি পুচ্ছি, মনুস্সা তমত্থং আরোচেসুং. সত্থা ‘‘ন খো উপাসকা ইদানেৰেস মহল্লকো উপ্পিলাৰিতো হুত্ৰা অত্তনো বলং অজানিত্ৰা মহাবলেহি সদ্ধিং পযোজেত্ৰা গূথমক্খিতো জাতো, পুব্বেপেস উপ্পিলাৰিতো হুত্ৰা অত্তনো বলং অজানিত্ৰা মহাবলেহি সদ্ধিং পযোজেত্ৰা গূথমক্খিতো অহোসী’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সীহো হুত্ৰা হিমৰন্তপদেসে পব্বতগুহায ৰাসং কপ্পেসি. তস্সা অৰিদূরে একং সরং নিস্সায বহূ সূকরা নিৰাসং কপ্পেসুং. তমেৰ সরং নিস্সায তাপসাপি পণ্ণসালাসু ৰাসং কপ্পেসুং. অথেকদিৰসং সীহো মহিংসৰারণাদীসু অঞ্ঞতরং ৰধিত্ৰা যাৰদত্থং মংসং খাদিত্ৰা তং সরং ওতরিত্ৰা পানীযং পিৰিত্ৰা উত্তরি. তস্মিং খণে একো থূলসূকরো তং সরং নিস্সায গোচরং গণ্হাতি. সীহো তং দিস্ৰা ‘‘অঞ্ঞং একদিৰসং ¶ ইমং খাদিস্সামি, মং খো পন দিস্ৰা পুন ন আগচ্ছেয্যা’’তি তস্স অনাগমনভযেন সরতো উত্তরিত্ৰা একেন পস্সেন গন্তুং আরভি. সূকরো ওলোকেত্ৰা ‘‘এস মং দিস্ৰা মম ভযেন উপগন্তুং অসক্কোন্তো ভযেন পলাযতি, অজ্জ মযা ইমিনা সীহেন সদ্ধিং পযোজেতুং ৰট্টতী’’তি সীসং উক্খিপিত্ৰা তং যুদ্ধত্থায অৰ্হযন্তো পঠমং গাথমাহ –

৫.

‘‘চতুপ্পদো অহং সম্ম, ত্ৰম্পি সম্ম চতুপ্পদো;

এহি সম্ম নিৰত্তস্সু, কিং নু ভীতো পলাযসী’’তি.

সীহো ¶ তস্স কথং সুত্ৰা ‘‘সম্ম সূকর, অজ্জ অম্হাকং তযা সদ্ধিং সঙ্গামো নত্থি, ইতো পন সত্তমে দিৰসে ইমস্মিংযেৰ ঠানে সঙ্গামো হোতূ’’তি ৰত্ৰা পক্কামি. সূকরো ‘‘সীহেন সদ্ধিং সঙ্গামেস্সামী’’তি হট্ঠপহট্ঠো তং পৰত্তিং ঞাতকানং আরোচেসি. তে তস্স কথং সুত্ৰা ভীততসিতা ‘‘ইদানি ত্ৰং সব্বেপি অম্হে নাসেস্সসি, অত্তনো বলং অজানিত্ৰা সীহেন সদ্ধিং সঙ্গামং কত্তুকামোতি, সীহো আগন্ত্ৰা সব্বেপি অম্হে জীৰিতক্খযং পাপেস্সতি, সাহসিককম্মং মা করী’’তি আহংসু. সোপি ভীততসিতো ‘‘ইদানি কিং করোমী’’তি পুচ্ছি. সূকরা ‘‘সম্ম, ত্ৰং এতেসং তাপসানং উচ্চারভূমিং গন্ত্ৰা পূতিগূথে সত্ত দিৰসানি সরীরং পরিৰট্টেত্ৰা সুক্খাপেত্ৰা সত্তমে দিৰসে সরীরং উস্সাৰবিন্দূহি তেমেত্ৰা সীহস্স আগমনতো পুরিমতরং গন্ত্ৰা ৰাতযোগং ঞত্ৰা উপরিৰাতে তিট্ঠ, সুচিজাতিকো সীহো তৰ সরীরগন্ধং ঘাযিত্ৰা তুয্হং জযং দত্ৰা গমিস্সতী’’তি আহংসু. সো তথা কত্ৰা সত্তমে দিৰসে তত্থ অট্ঠাসি. সীহো তস্স সরীরগন্ধং ঘাযিত্ৰা গূথমক্খিতভাৰং ঞত্ৰা ‘‘সম্ম সূকর, সুন্দরো তে লেসো ¶ চিন্তিতো, সচে ত্ৰং গূথমক্খিতো নাভৰিস্স, ইধেৰ তং জীৰিতক্খযং অপাপেস্সং, ইদানি পন তে সরীরং নেৰ মুখেন ডংসিতুং, ন পাদেন পহরিতুং সক্কা, জযং তে দম্মী’’তি ৰত্ৰা দুতিযং গাথমাহ –

৬.

‘‘অসুচি পূতিলোমোসি, দুগ্গন্ধো ৰাসি সূকর;

সচে যুজ্জিতুকামোসি, জযং সম্ম দদামি তে’’তি.

তত্থ ¶ পূতিলোমোতি মীল়্হমক্খিতত্তা দুগ্গন্ধলোমো. দুগ্গন্ধো ৰাসীতি অনিট্ঠজেগুচ্ছপটিকূলগন্ধো হুত্ৰা ৰাযসি. জযং, সম্ম, দদামি তেতি ‘‘তুয্হং জযং দেমি, অহং পরাজিতো, গচ্ছ ত্ৰ’’ন্তি ৰত্ৰা সীহো ততোৰ নিৰত্তিত্ৰা গোচরং গহেত্ৰা সরে পানীযং পিৰিত্ৰা পব্বতগুহমেৰ গতো. সূকরোপি ‘‘সীহো মে জিতো’’তি ঞাতকানং আরোচেসি ¶ . তে ভীততসিতা ‘‘পুন একদিৰসং আগচ্ছন্তো সীহো সব্বেৰ অম্হে জীৰিতক্খযং পাপেস্সতী’’তি পলাযিত্ৰা অঞ্ঞত্থ অগমংসু.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সূকরো মহল্লকো অহোসি, সীহো পন অহমেৰ অহোসি’’ন্তি.

সূকরজাতকৰণ্ণনা ততিযা.

[১৫৪] ৪. উরগজাতকৰণ্ণনা

ইধূরগানং পৰরো পৰিট্ঠোতি ইদং সত্থা জেতৰনে ৰিহরন্তো সেণিভণ্ডনং আরব্ভ কথেসি. কোসলরঞ্ঞো কির সেৰকা সেণিপমুখা দ্ৰে মহামত্তা অঞ্ঞমঞ্ঞং দিট্ঠট্ঠানে কলহং করোন্তি, তেসং ৰেরিভাৰো সকলনগরে পাকটো জাতো. তে নেৰ রাজা, ন ঞাতিমিত্তা সমগ্গে কাতুং সক্খিংসু. অথেকদিৰসং সত্থা পচ্চূসসমযে বোধনেয্যবন্ধৰে ওলোকেন্তো তেসং উভিন্নম্পি সোতাপত্তিমগ্গস্স উপনিস্সযং দিস্ৰা পুনদিৰসে এককোৰ সাৰত্থিযং পিণ্ডায পৰিসিত্ৰা তেসু একস্স গেহদ্ৰারে অট্ঠাসি. সো নিক্খমিত্ৰা পত্তং গহেত্ৰা সত্থারং অন্তোনিৰেসনং পৰেসেত্ৰা আসনং পঞ্ঞপেত্ৰা নিসীদাপেসি. সত্থা নিসীদিত্ৰা তস্স মেত্তাভাৰনায আনিসংসং কথেত্ৰা কল্লচিত্ততং ঞত্ৰা সচ্চানি পকাসেসি, সো সচ্চপরিযোসানে সোতাপত্তিফলে পতিট্ঠহি.

সত্থা ¶ তস্স সোতাপন্নভাৰং ঞত্ৰা তমেৰ পত্তং গাহাপেত্ৰা উট্ঠায ইতরস্স গেহদ্ৰারং অগমাসি. সোপি নিক্খমিত্ৰা সত্থারং ৰন্দিত্ৰা ‘‘পৰিসথ, ভন্তে’’তি ঘরং পৰেসেত্ৰা নিসীদাপেসি. ইতরোপি পত্তং গহেত্ৰা সত্থারা সদ্ধিংযেৰ পাৰিসি. সত্থা তস্স একাদস মেত্তানিসংসে ৰণ্ণেত্ৰা কল্লচিত্ততং ঞত্ৰা সচ্চানি পকাসেসি, সচ্চপরিযোসানে সোপি সোতাপত্তিফলে পতিট্ঠহি. ইতি তে উভোপি সোতাপন্না ¶ হুত্ৰা অঞ্ঞমঞ্ঞং অচ্চযং দস্সেত্ৰা খমাপেত্ৰা সমগ্গা সম্মোদমানা একজ্ঝাসযা অহেসুং. তং দিৰসঞ্ঞেৰ চ ভগৰতো সম্মুখাৰ একতো ভুঞ্জিংসু. সত্থা ভত্তকিচ্চং নিট্ঠাপেত্ৰা ৰিহারং অগমাসি. তে বহূনি মালাগন্ধৰিলেপনানি চেৰ সপ্পিমধুফাণিতাদীনি চ আদায সত্থারা সদ্ধিংযেৰ নিক্খমিংসু. সত্থা ভিক্খুসঙ্ঘেন ৰত্তে ¶ দস্সিতে সুগতোৰাদং দত্ৰা গন্ধকুটিং পাৰিসি.

ভিক্খূ সাযন্হসমযে ধম্মসভাযং সত্থু গুণকথং সমুট্ঠাপেসুং ‘‘আৰুসো, সত্থা অদন্তদমকো, যে নাম দ্ৰে মহামত্তে চিরং ৰাযমমানোপি নেৰ রাজা সমগ্গে কাতুং সক্খি, ন ঞাতিমিত্তাদযো সক্খিংসু, তে একদিৰসেনেৰ তথাগতেন দমিতা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰাহং ইমে দ্ৰে জনে সমগ্গে অকাসিং, পুব্বেপেতে মযা সমগ্গা কতাযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বারাণসিযং উস্সৰে ঘোসিতে মহাসমজ্জং অহোসি. বহূ মনুস্সা চেৰ দেৰনাগসুপণ্ণাদযো চ সমজ্জদস্সনত্থং সন্নিপতিংসু. তত্রেকস্মিং ঠানে একো নাগো চ সুপণ্ণো চ সমজ্জং পস্সমানা একতো অট্ঠংসু. নাগো সুপণ্ণস্স সুপণ্ণভাৰং অজানন্তো অংসে হত্থং ঠপেসি. সুপণ্ণো ‘‘কেন মে অংসে হত্থো ঠপিতো’’তি নিৰত্তিত্ৰা ওলোকেন্তো নাগং সঞ্জানি. নাগোপি ওলোকেন্তো সুপণ্ণং সঞ্জানিত্ৰা মরণভযতজ্জিতো নগরা নিক্খমিত্ৰা নদীপিট্ঠেন পলাযি. সুপণ্ণোপি ‘‘তং গহেস্সামী’’তি অনুবন্ধি. তস্মিং সমযে বোধিসত্তো তাপসো হুত্ৰা তস্সা নদিযা তীরে পণ্ণসালায ৰসমানো দিৰা দরথপটিপ্পস্সম্ভনত্থং উদকসাটিকং নিৰাসেত্ৰা ৰক্কলং বহি ঠপেত্ৰা নদিং ওতরিত্ৰা ন্হাযতি. নাগো ‘‘ইমং পব্বজিতং নিস্সায জীৰিতং লভিস্সামী’’তি পকতিৰণ্ণং ৰিজহিত্ৰা মণিক্খন্ধৰণ্ণং মাপেত্ৰা ৰক্কলন্তরং পাৰিসি. সুপণ্ণো অনুবন্ধমানো তং তত্থ পৰিট্ঠং দিস্ৰা ৰক্কলে গরুভাৰেন অগ্গহেত্ৰা বোধিসত্তং আমন্তেত্ৰা ‘‘ভন্তে, অহং ছাতো, তুম্হাকং ৰক্কলং গণ্হথ, ইমং নাগং খাদিস্সামী’’তি ইমমত্থং পকাসেতুং পঠমং গাথমাহ –

৭.

‘‘ইধূরগানং ¶ ¶ ¶ পৰরো পৰিট্ঠো, সেলস্স ৰণ্ণেন পমোক্খমিচ্ছং;

ব্রহ্মঞ্চ ৰণ্ণং অপচাযমানো, বুভুক্খিতো নো ৰিতরামি ভোত্তু’’ন্তি.

তত্থ ইধূরগানং পৰরো পৰিট্ঠোতি ইমস্মিং ৰক্কলে উরগানং পৰরো নাগরাজা পৰিট্ঠো. সেলস্স ৰণ্ণেনাতি মণিৰণ্ণেন, মণিক্খন্ধো হুত্ৰা পৰিট্ঠোতি অত্থো. পমোক্খমিচ্ছন্তি মম সন্তিকা মোক্খং ইচ্ছমানো. ব্রহ্মঞ্চ ৰণ্ণং অপচাযমানোতি অহং পন তুম্হাকং ব্রহ্মৰণ্ণং সেট্ঠৰণ্ণং পূজেন্তো গরুং করোন্তো. বুভুক্খিতো নো ৰিতরামি ভোত্তুন্তি এতং নাগং ৰক্কলন্তরং পৰিট্ঠং ছাতোপি সমানো ভক্খিতুং ন সক্কোমীতি.

বোধিসত্তো উদকে ঠিতোযেৰ সুপণ্ণরাজস্স থুতিং কত্ৰা দুতিযং গাথমাহ –

৮.

‘‘সো ব্রহ্মগুত্তো চিরমেৰ জীৰ, দিব্যা চ তে পাতুভৰন্তু ভক্খা;

যো ব্রহ্মৰণ্ণং অপচাযমানো, বুভুক্খিতো নো ৰিতরাসি ভোত্তু’’ন্তি.

তত্থ সো ব্রহ্মগুত্তোতি সো ত্ৰং ব্রহ্মগোপিতো ব্রহ্মরক্খিতো হুত্ৰা. দিব্যা চ তে পাতুভৰন্তু ভক্খাতি দেৰতানং পরিভোগারহা ভক্খা চ তৰ পাতুভৰন্তু, মা পাণাতিপাতং কত্ৰা নাগমংসখাদকো অহোসি.

ইতি বোধিসত্তো উদকে ঠিতোৰ অনুমোদনং কত্ৰা উত্তরিত্ৰা ৰক্কলং নিৰাসেত্ৰা তে উভোপি গহেত্ৰা অস্সমপদং গন্ত্ৰা মেত্তাভাৰনায ৰণ্ণং কথেত্ৰা দ্ৰেপি জনে সমগ্গে অকাসি. তে ততো পট্ঠায সমগ্গা সম্মোদমানা সুখং ৰসিংসু.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা নাগো চ সুপণ্ণো চ ইমে দ্ৰে মহামত্তা অহেসুং, তাপসো পন অহমেৰ অহোসি’’ন্তি.

উরগজাতকৰণ্ণনা চতুত্থা.

[১৫৫] ৫. ভগ্গজাতকৰণ্ণনা

জীৰ ¶ ¶ ¶ ৰস্সসতং ভগ্গাতি ইদং সত্থা জেতৰনসমীপে পসেনদিকোসলেন রঞ্ঞা কারিতে রাজকারামে ৰিহরন্তো অত্তনো খিপিতকং আরব্ভ কথেসি. একস্মিঞ্হি দিৰসে সত্থা রাজকারামে চতুপরিসমজ্ঝে নিসীদিত্ৰা ধম্মং দেসেন্তো খিপি. ভিক্খূ ‘‘জীৰতু, ভন্তে ভগৰা, জীৰতু, সুগতো’’তি উচ্চাসদ্দং মহাসদ্দং অকংসু, তেন সদ্দেন ধম্মকথায অন্তরাযো অহোসি. অথ খো ভগৰা ভিক্খূ আমন্তেসি – ‘‘অপি নু খো, ভিক্খৰে, খিপিতে ‘জীৰা’তি ৰুত্তো তপ্পচ্চযা জীৰেয্য ৰা মরেয্য ৰা’’তি? ‘‘নো হেতং ভন্তে’’তি. ‘‘ন, ভিক্খৰে, খিপিতে ‘জীৰা’তি ৰত্তব্বো, যো ৰদেয্য আপত্তি দুক্কটস্সা’’তি (চূল়ৰ. ২৮৮). তেন খো পন সমযেন মনুস্সা ভিক্খূনং খিপিতে ‘‘জীৰথ, ভন্তে’’তি ৰদন্তি, ভিক্খূ কুক্কুচ্চাযন্তা নালপন্তি. মনুস্সা উজ্ঝাযন্তি – ‘‘কথঞ্হি নাম সমণা সক্যপুত্তিযা ‘জীৰথ, ভন্তে’তি ৰুচ্চমানা নালপিস্সন্তী’’তি. ভগৰতো এতমত্থং আরোচেসুং. গিহী, ভিক্খৰে, মঙ্গলিকা, অনুজানামি, ভিক্খৰে, গিহীনং ‘‘জীৰথ, ভন্তে’’তি ৰুচ্চমানেন ‘‘চিরং জীৰা’’তি ৰত্তুন্তি. ভিক্খূ ভগৰন্তং পুচ্ছিংসু – ‘‘ভন্তে, জীৰপটিজীৰং নাম কদা উপ্পন্ন’’ন্তি? সত্থা ‘‘ভিক্খৰে, জীৰপটিজীৰং নাম পোরাণকালে উপ্পন্ন’’ন্তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে একস্মিং ব্রাহ্মণকুলে নিব্বত্তি. তস্স পিতা ৰোহারং কত্ৰা জীৰিকং কপ্পেতি, সো সোল়সৰস্সুদ্দেসিকং বোধিসত্তং মণিকভণ্ডং উক্খিপাপেত্ৰা গামনিগমাদীসু চরন্তো বারাণসিং পত্ৰা দোৰারিকস্স ঘরে ভত্তং পচাপেত্ৰা ভুঞ্জিত্ৰা নিৰাসট্ঠানং অলভন্তো ‘‘অৰেলায আগতা আগন্তুকা কত্থ ৰসন্তী’’তি পুচ্ছি. অথ নং মনুস্সা ‘‘বহিনগরে একা সালা অত্থি, সা পন অমনুস্সপরিগ্গহিতা. সচে ইচ্ছথ, তত্থ ৰসথা’’তি আহংসু. বোধিসত্তো ‘‘এথ, তাত, গচ্ছাম, মা যক্খস্স ভাযিত্থ, অহং তং দমেত্ৰা তুম্হাকং পাদেসু পাতেস্সামী’’তি ¶ পিতরং গহেত্ৰা তত্থ গতো. অথস্স পিতা ফলকে নিপজ্জি, সযং পিতু পাদে সম্বাহন্তো নিসীদি. তত্থ অধিৰত্থো যক্খো দ্ৰাদস ৰস্সানি ৰেস্সৰণং উপট্ঠহিত্ৰা তং সালং লভন্তো ‘‘ইমং সালং পৰিট্ঠমনুস্সেসু যো খিপিতে ‘জীৰা’তি ৰদতি, যো চ ‘জীৰা’তি ৰুত্তে ‘পটিজীৰা’তি ৰদতি, তে জীৰপটিজীৰভাণিনো ¶ ঠপেত্ৰা অৰসেসে খাদেয্যাসী’’তি লভি. সো পিট্ঠিৰংসথূণায ৰসতি. সো ‘‘বোধিসত্তস্স পিতরং খিপাপেস্সামী’’তি অত্তনো আনুভাৰেন সুখুমচুণ্ণং ৰিস্সজ্জেসি, চুণ্ণো আগন্ত্ৰা তস্স নাসপুটে পাৰিসি. সো ফলকে নিপন্নকোৰ খিপি, বোধিসত্তো ন ‘‘জীৰা’’তি ¶ আহ. যক্খো তং খাদিতুং থূণায ওতরতি. বোধিসত্তো তং ওতরন্তং দিস্ৰা ‘‘ইমিনা মে পিতা খিপাপিতো ভৰিস্সতি, অযং সো খিপিতে ‘জীৰা’তি অৰদন্তং খাদকযক্খো ভৰিস্সতী’’তি পিতরং আরব্ভ পঠমং গাথমাহ –

৯.

‘‘জীৰ ৰস্সসতং ভগ্গ, অপরানি চ ৰীসতিং;

মা মং পিসাচা খাদন্তু, জীৰ ত্ৰং সরদোসত’’ন্তি.

তত্থ ভগ্গাতি পিতরং নামেনালপতি. অপরানি চ ৰীসতিন্তি অপরানি চ ৰীসতি ৰস্সানি জীৰ. মা মং পিসাচা খাদন্তূতি মং পিসাচা মা খাদন্তু. জীৰ ত্ৰং সরদোসতন্তি ত্ৰং পন ৰীসুত্তরং ৰস্সসতং জীৰাতি. সরদোসতঞ্হি গণিযমানং ৰস্সসতমেৰ হোতি, তং পুরিমেহি ৰীসায সদ্ধিং ৰীসুত্তরং ইধ অধিপ্পেতং.

যক্খো বোধিসত্তস্স ৰচনং সুত্ৰা ‘‘ইমং তাৰ মাণৰং ‘জীৰা’তি ৰুত্তত্তা খাদিতুং ন সক্কা, পিতরং পনস্স খাদিস্সামী’’তি পিতু সন্তিকং অগমাসি. সো তং আগচ্ছন্তং দিস্ৰা চিন্তেসি – ‘‘অযং সো ‘পটিজীৰা’তি অভণন্তানং খাদকযক্খো ভৰিস্সতি, পটিজীৰং করিস্সামী’’তি. সো পুত্তং আরব্ভ দুতিযং গাথমাহ –

১০.

‘‘ত্ৰম্পি ৰস্সসতং জীৰং, অপরানি চ ৰীসতিং;

ৰিসং পিসাচা খাদন্তু, জীৰ ত্ৰং সরদোসত’’ন্তি.

তত্থ ¶ ৰিসং পিসাচা খাদন্তূতি পিসাচা হলাহলৰিসং খাদন্তু.

যক্খো তস্স ৰচনং সুত্ৰা ‘‘উভোপি মে ন সক্কা খাদিতু’’ন্তি পটিনিৰত্তি. অথ নং বোধিসত্তো পুচ্ছি – ‘‘ভো যক্খ, কস্মা ত্ৰং ইমং সালং পৰিট্ঠমনুস্সে খাদসী’’তি? ‘‘দ্ৰাদস ৰস্সানি ৰেস্সৰণং উপট্ঠহিত্ৰা লদ্ধত্তা’’তি. ‘‘কিং পন সব্বেৰ খাদিতুং লভসী’’তি? ‘‘জীৰপটিজীৰভাণিনো ঠপেত্ৰা অৰসেসে খাদামী’’তি. ‘‘যক্খ, ত্ৰং পুব্বেপি অকুসলং কত্ৰা কক্খল়ো ¶ ফরুসো পরৰিহিংসকো হুত্ৰা নিব্বত্তো, ইদানিপি তাদিসং কম্মং কত্ৰা তমো তমপরাযণো ভৰিস্সতি, তস্মা ইতো পট্ঠায পাণাতিপাতাদীহি ৰিরমস্সূ’’তি তং যক্খং দমেত্ৰা নিরযভযেন তজ্জেত্ৰা পঞ্চসু সীলেসু পতিট্ঠাপেত্ৰা যক্খং পেসনকারকং ৰিয অকাসি.

পুনদিৰসে ¶ সঞ্চরন্তা মনুস্সা যক্খং দিস্ৰা বোধিসত্তেন চস্স দমিতভাৰং ঞত্ৰা রঞ্ঞো আরোচেসুং – ‘‘দেৰ, একো মাণৰো তং যক্খং দমেত্ৰা পেসনকারকং ৰিয কত্ৰা ঠিতো’’তি. রাজা বোধিসত্তং পক্কোসাপেত্ৰা সেনাপতিট্ঠানে ঠপেসি, পিতু চস্স মহন্তং যসং অদাসি. সো যক্খং বলিপটিগ্গাহকং কত্ৰা বোধিসত্তস্স ওৰাদে ঠত্ৰা দানাদীনি পুঞ্ঞানি কত্ৰা সগ্গপুরং পূরেসি.

সত্থা ইমং ধম্মদেসনং আহরিত্ৰা ‘‘জীৰপটিজীৰং নাম তস্মিং কালে উপ্পন্ন’’ন্তি ৰত্ৰা জাতকং সমোধানেসি – ‘‘তদা যক্খো অঙ্গুলিমালো অহোসি, রাজা আনন্দো, পিতা কস্সপো, পুত্তো পন অহমেৰ অহোসি’’ন্তি.

ভগ্গজাতকৰণ্ণনা পঞ্চমা.

[১৫৬] ৬. অলীনচিত্তজাতকৰণ্ণনা

অলীনচিত্তং নিস্সাযাতি ইদং সত্থা জেতৰনে ৰিহরন্তো একং ওস্সট্ঠৰীরিযং ভিক্খুং আরব্ভ কথেসি. ৰত্থু একাদসনিপাতে সংৰরজাতকে (জা. ১.১১.৯৭ আদযো) আৰিভৰিস্সতি. সো পন ভিক্খু সত্থারা ‘‘সচ্চং কির ত্ৰং, ভিক্খু, ৰীরিযং ওস্সজী’’তি ৰুত্তে ‘‘সচ্চং, ভগৰা’’তি ¶ আহ. অথ নং সত্থা ‘‘ননু ত্ৰং, ভিক্খু, পুব্বে ৰীরিযং অৰিস্সজ্জেত্ৰা মংসপেসিসদিসস্স দহরকুমারস্স দ্ৰাদসযোজনিকে বারাণসিনগরে রজ্জং গহেত্ৰা অদাসি, ইদানি কস্মা এৰরূপে সাসনে পব্বজিত্ৰা ৰীরিযং ওস্সজসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বারাণসিতো অৰিদূরে ৰড্ঢকীগামো অহোসি, তত্থ পঞ্চসতা ৰড্ঢকী ৰসন্তি. তে নাৰায ¶ উপরিসোতং গন্ত্ৰা অরঞ্ঞে গেহসম্ভারদারূনি কোট্টেত্ৰা তত্থেৰ একভূমিকদ্ৰিভূমিকাদিভেদে গেহসম্ভারে সজ্জেত্ৰা থম্ভতো পট্ঠায সব্বদারূসু সঞ্ঞং কত্ৰা নদীতীরং নেত্ৰা নাৰং আরোপেত্ৰা অনুসোতেন নগরং আগন্ত্ৰা যে যাদিসানি গেহানি আকঙ্খন্তি, তেসং তাদিসানি কত্ৰা কহাপণে গহেত্ৰা পুন তত্থেৰ গন্ত্ৰা গেহসম্ভারে আহরন্তি. এৰং তেসং জীৰিকং কপ্পেন্তানং একস্মিং কালে খন্ধাৰারং বন্ধিত্ৰা দারূনি কোট্টেন্তানং অৰিদূরে একো হত্থী খদিরখাণুকং অক্কমি. তস্স সো খাণুকো পাদং ৰিজ্ঝি, বলৰৰেদনা ৰত্তন্তি, পাদো উদ্ধুমাযিত্ৰা পুব্বং গণ্হি. সো ৰেদনাপ্পত্তো ¶ তেসং দারুকোট্টনসদ্দং সুত্ৰা ‘‘ইমে ৰড্ঢকী নিস্সায ময্হং সোত্থি ভৰিস্সতী’’তি মঞ্ঞমানো তীহি পাদেহি তেসং সন্তিকং গন্ত্ৰা অৰিদূরে নিপজ্জি, ৰড্ঢকী তং উদ্ধুমাতপাদং দিস্ৰা উপসঙ্কমিত্ৰা পাদে খাণুকং দিস্ৰা তিখিণৰাসিযা খাণুকস্স সমন্ততো ওধিং দত্ৰা রজ্জুযা বন্ধিত্ৰা আকড্ঢন্তা খাণুং নীহরিত্ৰা পুব্বং মোচেত্ৰা উণ্হোদকেন ধোৰিত্ৰা তদনুরূপেহি ভেসজ্জেহি মক্খেত্ৰা নচিরস্সেৰ ৰণং ফাসুকং করিংসু.

হত্থী অরোগো হুত্ৰা চিন্তেসি – ‘‘মযা ইমে ৰড্ঢকী নিস্সায জীৰিতং লদ্ধং, ইদানি তেসং মযা উপকারং কাতুং ৰট্টতী’’তি. সো ততো পট্ঠায ৰড্ঢকীহি সদ্ধিং ¶ রুক্খে নীহরতি, তচ্ছেন্তানং পরিৰত্তেত্ৰা দেতি, ৰাসিআদীনি উপসংহরতি, সোণ্ডায ৰেঠেত্ৰা কাল়সুত্তকোটিযং গণ্হাতি. ৰড্ঢকীপিস্স ভোজনৰেলায একেকং পিণ্ডং দেন্তা পঞ্চ পিণ্ডসতানি দেন্তি. তস্স পন হত্থিস্স পুত্তো সব্বসেতো হত্থাজানীযপোতকো অত্থি, তেনস্স এতদহোসি – ‘‘অহং এতরহি মহল্লকো. ইদানি মযা ইমেসং ৰড্ঢকীনং কম্মকরণত্তায পুত্তং দত্ৰা গন্তুং ৰট্টতী’’তি. সো ৰড্ঢকীনং অনাচিক্খিত্ৰাৰ অরঞ্ঞং পৰিসিত্ৰা পুত্তং আনেত্ৰা ‘‘অযং হত্থিপোতকো মম পুত্তো, তুম্হেহি ময্হং জীৰিতং দিন্নং, অহং ৰো ৰেজ্জৰেতনত্থায ইমং দম্মি, অযং তুম্হাকং ইতো পট্ঠায কম্মানি করিস্সতী’’তি ৰত্ৰা ‘‘ইতো পট্ঠায, পুত্তক, যং মযা কত্তব্বং কম্মং, তং ত্ৰং করোহী’’তি পুত্তং ওৰদিত্ৰা ৰড্ঢকীনং দত্ৰা সযং অরঞ্ঞং পাৰিসি.

ততো পট্ঠায হত্থিপোতকো ৰড্ঢকীনং ৰচনকরো ওৰাদক্খমো হুত্ৰা সব্বকিচ্চানি করোতি. তেপি তং পঞ্চহি পিণ্ডসতেহি পোসেন্তি, সো ¶ কম্মং কত্ৰা নদিং ওতরিত্ৰা ন্হত্ৰা কীল়িত্ৰা আগচ্ছতি, ৰড্ঢকীদারকাপি তং সোণ্ডাদীসু গহেত্ৰা উদকেপি থলেপি তেন সদ্ধিং কীল়ন্তি. আজানীযা পন হত্থিনোপি অস্সাপি পুরিসাপি উদকে উচ্চারং ৰা পস্সাৰং ৰা ন করোন্তি, তস্মা সোপি উদকে উচ্চারপস্সাৰং অকত্ৰা বহিনদীতীরেযেৰ করোতি. অথেকস্মিং দিৰসে উপরিনদিযা দেৰো ৰস্সি, অথ সুক্খং হত্থিলণ্ডং উদকেন নদিং ওতরিত্ৰা গচ্ছন্তং বারাণসীনগরতিত্থে একস্মিং গুম্বে লগ্গেত্ৰা অট্ঠাসি. অথ রঞ্ঞো হত্থিগোপকা ‘‘হত্থী ন্হাপেস্সামা’’তি পঞ্চ হত্থিসতানি নযিংসু. আজানীযলণ্ডস্স গন্ধং ঘাযিত্ৰা একোপি হত্থী নদিং ওতরিতুং ন উস্সহি. সব্বেপি নঙ্গুট্ঠং উক্খিপিত্ৰা পলাযিতুং আরভিংসু, হত্থিগোপকা হত্থাচরিযানং আরোচেসুং. তে ‘‘উদকে পরিপন্থেন ভৰিতব্ব’’ন্তি উদকং সোধাপেত্ৰা তস্মিং ¶ গুম্বে তং আজানীযলণ্ডং দিস্ৰা ‘‘ইদমেত্থ কারণ’’ন্তি ঞত্ৰা চাটিং আহরাপেত্ৰা উদকস্স পূরেত্ৰা তং তত্থ মদ্দিত্ৰা হত্থীনং সরীরে সিঞ্চাপেসুং, সরীরানি সুগন্ধানি অহেসুং. তস্মিং কালে তে নদিং ওতরিত্ৰা ন্হাযিংসু.

হত্থাচরিযা ¶ রঞ্ঞো তং পৰত্তিং আরোচেত্ৰা ‘‘তং হত্থাজানীযং পরিযেসিত্ৰা আনেতুং ৰট্টতি, দেৰা’’তি আহংসু. রাজা নাৰাসঙ্ঘাটেহি নদিং পক্খন্দিত্ৰা উদ্ধংগামীহি নাৰাসঙ্ঘাটেহি ৰড্ঢকীনং ৰসনট্ঠানং সম্পাপুণি. হত্থিপোতকো নদিযং কীল়ন্তো ভেরিসদ্দং সুত্ৰা গন্ত্ৰা ৰড্ঢকীনং সন্তিকে অট্ঠাসি. ৰড্ঢকী রঞ্ঞো পচ্চুগ্গমনং কত্ৰা ‘‘দেৰ, সচে দারূহি অত্থো, কিং কারণা আগতত্থ, কিং পেসেত্ৰা আহরাপেতুং ন ৰট্টতী’’তি আহংসু. ‘‘নাহং, ভণে, দারূনং অত্থায আগতো, ইমস্স পন হত্থিস্স অত্থায আগতোম্হী’’তি. ‘‘গাহাপেত্ৰা গচ্ছথ, দেৰা’’তি. হত্থিপোতকো গন্তুং ন ইচ্ছি. ‘‘কিং কারাপেতি, ভণে, হত্থী’’তি? ‘‘ৰড্ঢকীনং পোসাৰনিকং আহরাপেতি, দেৰা’’তি. ‘‘সাধু, ভণে’’তি রাজা হত্থিস্স চতুন্নং পাদানং সোণ্ডায নঙ্গুট্ঠস্স চ সন্তিকে সতসহস্সসতসহস্সকহাপণে ঠপাপেসি. হত্থী এত্তকেনাপি অগন্ত্ৰা সব্বৰড্ঢকীনং দুস্সযুগেসু ৰড্ঢকীভরিযানং নিৰাসনসাটকেসু দিন্নেসু সদ্ধিংকীল়িতানং দারকানঞ্চ দারকপরিহারে কতে নিৰত্তিত্ৰা ৰড্ঢকী চ ইত্থিযো চ দারকে চ ওলোকেত্ৰা রঞ্ঞা সদ্ধিং অগমাসি.

রাজা ¶ তং আদায নগরং গন্ত্ৰা নগরঞ্চ হত্থিসালঞ্চ অলঙ্কারাপেত্ৰা হত্থিং নগরং পদক্খিণং কারেত্ৰা হত্থিসালং পৰেসেত্ৰা সব্বালঙ্কারেহি অলঙ্করিত্ৰা অভিসেকং দত্ৰা ওপৰয্হং কত্ৰা অত্তনো সহাযট্ঠানে ঠপেত্ৰা উপড্ঢরজ্জং হত্থিস্স ¶ দত্ৰা অত্তনা সমানপরিহারং অকাসি. হত্থিস্স আগতকালতো পট্ঠায রঞ্ঞো সকলজম্বুদীপে রজ্জং হত্থগতমেৰ অহোসি. এৰং কালে গচ্ছন্তে বোধিসত্তো তস্স রঞ্ঞো অগ্গমহেসিযা কুচ্ছিম্হি পটিসন্ধিং গণ্হি. তস্সা গব্ভপরিপাককালে রাজা কালমকাসি. হত্থী পন সচে রঞ্ঞো কালকতভাৰং জানেয্য, তত্থেৰস্স হদযং ফলেয্য, তস্মা হত্থিং রঞ্ঞো কালকতভাৰং অজানাপেত্ৰাৰ উপট্ঠহিংসু. রঞ্ঞো পন কালকতভাৰং সুত্ৰা ‘‘তুচ্ছং কির রজ্জ’’ন্তি অনন্তরসামন্তকোসলরাজা মহতিযা সেনায আগন্ত্ৰা নগরং পরিৰারেসি. নগরৰাসিনো দ্ৰারানি পিদহিত্ৰা কোসলরঞ্ঞো সাসনং পহিণিংসু – ‘‘অম্হাকং রঞ্ঞো অগ্গমহেসী পরিপুণ্ণগব্ভা ‘ইতো কির সত্তমে দিৰসে পুত্তং ৰিজাযিস্সতী’তি অঙ্গৰিজ্জাপাঠকা আহংসু. সচে সা পুত্তং ৰিজাযিস্সতি, মযং সত্তমে দিৰসে যুদ্ধং দস্সাম, ন রজ্জং, এত্তকং কালং আগমেথা’’তি. রাজা ‘‘সাধূ’’তি সম্পটিচ্ছি.

দেৰী সত্তমে দিৰসে পুত্তং ৰিজাযি. তস্স নামগ্গহণদিৰসে পন মহাজনস্স অলীনচিত্তং পগ্গণ্হন্তো জাতোতি ‘‘অলীনচিত্তকুমারো’’ত্ৰেৰস্স নামং অকংসু. জাতদিৰসতোযেৰ পনস্স পট্ঠায নাগরা কোসলরঞ্ঞা সদ্ধিং যুজ্ঝিংসু. নিন্নাযকত্তা সঙ্গামস্স মহন্তম্পি বলং যুজ্ঝমানং থোকং থোকং ওসক্কতি. অমচ্চা দেৰিযা তমত্থং আরোচেত্ৰা ‘‘মযং ¶ এৰং ওসক্কমানে বলে পরাজযভাৰস্স ভাযাম, অম্হাকং পন রঞ্ঞো কালকতভাৰং, পুত্তস্স জাতভাৰং, কোসলরঞ্ঞো আগন্ত্ৰা যুজ্ঝানভাৰঞ্চ রঞ্ঞো সহাযকো মঙ্গলহত্থী ন জানাতি, জানাপেম ন’’ন্তি পুচ্ছিংসু. সা ‘‘সাধূ’’তি সম্পটিচ্ছিত্ৰা পুত্তং অলঙ্করিত্ৰা দুকূলচুম্বটকে নিপজ্জাপেত্ৰা পাসাদা ওরুয্হ অমচ্চগণপরিৰুতা হত্থিসালং গন্ত্ৰা বোধিসত্তং হত্থিস্স পাদমূলে ¶ নিপজ্জাপেত্ৰা ‘‘সামি, সহাযো তে কালকতো, মযং তুয্হং হদযফালনভযেন নারোচযিম্হ, অযং তে সহাযস্স পুত্তো, কোসলরাজা আগন্ত্ৰা নগরং ¶ পরিৰারেত্ৰা তৰ পুত্তেন সদ্ধিং যুজ্ঝতি, বলং ওসক্কতি, তৰ পুত্তং ত্ৰঞ্ঞেৰ ৰা মারেহি, রজ্জং ৰাস্স গণ্হিত্ৰা দেহী’’তি আহ.

তস্মিং কালে হত্থী বোধিসত্তং সোণ্ডায পরামসিত্ৰা উক্খিপিত্ৰা কুম্ভে ঠপেত্ৰা রোদিত্ৰা বোধিসত্তং ওতারেত্ৰা দেৰিযা হত্থে নিপজ্জাপেত্ৰা ‘‘কোসলরাজং গণ্হিস্সামী’’তি হত্থিসালতো নিক্খমি. অথস্স অমচ্চা ৰম্মং পটিমুঞ্চিত্ৰা অলঙ্করিত্ৰা নগরদ্ৰারং অৰাপুরিত্ৰা তং পরিৰারেত্ৰা নিক্খমিংসু. হত্থী নগরা নিক্খমিত্ৰা কোঞ্চনাদং কত্ৰা মহাজনং সন্তাসেত্ৰা পলাপেত্ৰা বলকোট্ঠকং ভিন্দিত্ৰা কোসলরাজানং চূল়ায গহেত্ৰা আনেত্ৰা বোধিসত্তস্স পাদমূলে নিপজ্জাপেত্ৰা মারণত্থাযস্স উট্ঠিতে ৰারেত্ৰা ‘‘ইতো পট্ঠায অপ্পমত্তো হোহি, ‘কুমারো দহরো’তি সঞ্ঞং মা করী’’তি ওৰদিত্ৰা উয্যোজেসি. ততো পট্ঠায সকলজম্বুদীপে রজ্জং বোধিসত্তস্স হত্থগতমেৰ জাতং, অঞ্ঞো পটিসত্তু নাম উট্ঠহিতুং সমত্থো নাহোসি. বোধিসত্তো সত্তৰস্সিককালে অভিসেকং কত্ৰা অলীনচিত্তরাজা নাম হুত্ৰা ধম্মেন রজ্জং কারেত্ৰা জীৰিতপরিযোসানে সগ্গপুরং পূরেসি.

সত্থা ইমং অতীতং আহরিত্ৰা অভিসম্বুদ্ধো হুত্ৰা ইমং গাথাদ্ৰযমাহ –

১১.

‘‘অলীনচিত্তং নিস্সায, পহট্ঠা মহতী চমূ;

কোসলং সেনাসন্তুট্ঠং, জীৰগ্গাহং অগাহযি.

১২.

‘‘এৰং নিস্সযসম্পন্নো, ভিক্খু আরদ্ধৰীরিযো;

ভাৰযং কুসলং ধম্মং, যোগক্খেমস্স পত্তিযা;

পাপুণে অনুপুব্বেন, সব্বসংযোজনক্খয’’ন্তি.

তত্থ ¶ অলীনচিত্তং নিস্সাযাতি অলীনচিত্তং রাজকুমারং নিস্সায. পহট্ঠা মহতী চমূতি ‘‘পৰেণীরজ্জং নো দিট্ঠ’’ন্তি হট্ঠতুট্ঠা হুত্ৰা মহতী সেনা. কোসলং সেনাসন্তুট্ঠন্তি কোসলরাজানং ¶ সেন রজ্জেন অসন্তুট্ঠং পররজ্জলোভেন আগতং. জীৰগ্গাহং অগাহযীতি অমারেত্ৰাৰ সা চমূ তং রাজানং হত্থিনা জীৰগ্গাহং গণ্হাপেসি. এৰং নিস্সযসম্পন্নোতি যথা সা চমূ, এৰং অঞ্ঞোপি কুলপুত্তো নিস্সযসম্পন্নো কল্যাণমিত্তং ¶ বুদ্ধং ৰা বুদ্ধসাৰকং ৰা নিস্সযং লভিত্ৰা. ভিক্খূতি পরিসুদ্ধাধিৰচনমেতং. আরদ্ধৰীরিযোতি পগ্গহিতৰীরিযো চতুদোসাপগতেন ৰীরিযেন সমন্নাগতো. ভাৰযং কুসলং ধম্মন্তি কুসলং নিরৰজ্জং সত্ততিংসবোধিপক্খিযসঙ্খাতং ধম্মং ভাৰেন্তো. যোগক্খেমস্স পত্তিযাতি চতূহি যোগেহি খেমস্স নিব্বানস্স পাপুণনত্থায তং ধম্মং ভাৰেন্তো. পাপুণে অনুপুব্বেন, সব্বসংযোজনক্খযন্তি এৰং ৰিপস্সনতো পট্ঠায ইমং কুসলং ধম্মং ভাৰেন্তো সো কল্যাণমিত্তুপনিস্সযসম্পন্নো ভিক্খু অনুপুব্বেন ৰিপস্সনাঞাণানি চ হেট্ঠিমমগ্গফলানি চ পাপুণন্তো পরিযোসানে দসন্নম্পি সংযোজনানং খযন্তে উপ্পন্নত্তা সব্বসংযোজনক্খযসঙ্খাতং অরহত্তং পাপুণাতি. যস্মা ৰা নিব্বানং আগম্ম সব্বসংযোজনানি খীযন্তি, তস্মা তম্পি সব্বসংযোজনক্খযমেৰ, এৰং অনুপুব্বেন নিব্বানসঙ্খাতং সব্বসংযোজনক্খযং পাপুণাতীতি অত্থো.

ইতি ভগৰা অমতমহানিব্বানেন ধম্মদেসনায কূটং গহেত্ৰা উত্তরিপি সচ্চানি পকাসেত্ৰা জাতকং সমোধানেসি, সচ্চপরিযোসানে ওস্সট্ঠৰীরিযো ভিক্খু অরহত্তে পতিট্ঠহি. ‘‘তদা মাতা মহামাযা, পিতা সুদ্ধোদনমহারাজা অহোসি, রজ্জং গহেত্ৰা দিন্নহত্থী অযং ওস্সট্ঠৰীরিযো ভিক্খু, হত্থিস্স পিতা সারিপুত্তো, সামন্তকোসলরাজা মোগ্গল্লানো, অলীনচিত্তকুমারো পন অহমেৰ অহোসি’’ন্তি.

অলীনচিত্তজাতকৰণ্ণনা ছট্ঠা.

[১৫৭] ৭. গুণজাতকৰণ্ণনা

যেন কামং পণামেতীতি ইদং সত্থা জেতৰনে ৰিহরন্তো আনন্দত্থেরস্স সাটকসহস্সলাভং আরব্ভ কথেসি. থেরস্স কোসলরঞ্ঞো অন্তেপুরে ধম্মৰাচনৰত্থু হেট্ঠা মহাসারজাতকে (জা. ১.১.৯২) আগতমেৰ. ইতি থেরে রঞ্ঞো অন্তেপুরে ধম্মং ৰাচেন্তে রঞ্ঞো ¶ সহস্সগ্ঘনিকানং সাটকানং সহস্সং আহরিযিত্থ. রাজা ততো পঞ্চ সাটকসতানি পঞ্চন্নং দেৰীসতানং অদাসি. তা সব্বাপি তে সাটকে ঠপেত্ৰা পুনদিৰসে আনন্দত্থেরস্স দত্ৰা সযং পুরাণসাটকেযেৰ পারুপিত্ৰা রঞ্ঞো পাতরাসট্ঠানং অগমংসু.

রাজা ¶ ¶ ‘‘মযা তুম্হাকং সহস্সগ্ঘনিকা সাটকা দাপিতা, কস্মা তুম্হে তে অপারুপিত্ৰাৰ আগতা’’তি পুচ্ছি. ‘‘দেৰ, অম্হেহি তে আনন্দত্থেরস্স দিন্না’’তি. ‘‘আনন্দত্থেরেন সব্বে গহিতা’’তি? ‘‘আম, দেৰা’’তি. ‘‘সম্মাসম্বুদ্ধেন তিচীৰরং অনুঞ্ঞাতং, আনন্দত্থেরো দুস্সৰণিজ্জং মঞ্ঞে করিস্সতি, অতিবহূ তেন সাটকা গহিতা’’তি থেরস্স কুজ্ঝিত্ৰা ভুত্তপাতরাসো ৰিহারং গন্ত্ৰা থেরস্স পরিৰেণং পৰিসিত্ৰা থেরং ৰন্দিত্ৰা নিসিন্নো পুচ্ছি – ‘‘অপি, ভন্তে, অম্হাকং ঘরে ইত্থিযো তুম্হাকং সন্তিকে ধম্মং উগ্গণ্হন্তি ৰা সুণন্তি ৰা’’তি? ‘‘আম, মহারাজ, গহেতব্বযুত্তকং গণ্হন্তি, সোতব্বযুত্তকং সুণন্তী’’তি. ‘‘কিং তা সুণন্তিযেৰ, উদাহু তুম্হাকং নিৰাসনং ৰা পারুপনং ৰা দদন্তী’’তি? ‘‘তা অজ্জ, মহারাজ, সহস্সগ্ঘনিকানি পঞ্চ সাটকসতানি অদংসূ’’তি. ‘‘তুম্হেহি গহিতানি তানি, ভন্তে’’তি? ‘‘আম, মহারাজা’’তি. ‘‘ননু, ভন্তে, সত্থারা তিচীৰরমেৰ অনুঞ্ঞাত’’ন্তি? ‘‘আম, মহারাজ, ভগৰতা একস্স ভিক্খুনো তিচীৰরমেৰ পরিভোগসীসেন অনুঞ্ঞাতং, পটিগ্গহণং পন অৰারিতং, তস্মা মযাপি অঞ্ঞেসং জিণ্ণচীৰরিকানং দাতুং তে সাটকা পটিগ্গহিতা’’তি. ‘‘তে পন ভিক্খূ তুম্হাকং সন্তিকা সাটকে লভিত্ৰা পোরাণচীৰরানি কিং করিস্সন্তী’’তি? ‘‘পোরাণসঙ্ঘাটিং উত্তরাসঙ্গং করিস্সন্তী’’তি? ‘‘পোরাণউত্তরাসঙ্গং কিং করিস্সন্তী’’তি? ‘‘অন্তরৰাসকং করিস্সন্তী’’তি. ‘‘পোরাণঅন্তরৰাসকং কিং করিস্সন্তী’’তি? ‘‘পচ্চত্থরণং করিস্সন্তী’’তি. ‘‘পোরাণপচ্চত্থরণং কিং করিস্সন্তী’’তি? ‘‘ভুম্মত্থরণং করিস্সন্তী’’তি. ‘‘পোরাণভুম্মত্থরণং ¶ কিং করিস্সন্তী’’তি? ‘‘পাদপুঞ্ছনং করিস্সন্তী’’তি. ‘‘পোরাণপাদপুঞ্ছনং কিং করিস্সন্তী’’তি? ‘‘মহারাজ, সদ্ধাদেয্যং নাম ৰিনিপাতেতুং ন লব্ভতি, তস্মা পোরাণপাদপুঞ্ছনং ৰাসিযা কোট্টেত্ৰা মত্তিকায মক্খেত্ৰা সেনাসনেসু মত্তিকালেপনং করিস্সন্তী’’তি. ‘‘ভন্তে, তুম্হাকং দিন্নং যাৰ পাদপুঞ্ছনাপি নস্সিতুং ন লব্ভতী’’তি? ‘‘আম, মহারাজ, অম্হাকং দিন্নং নস্সিতুং ন লব্ভতি, পরিভোগমেৰ হোতী’’তি.

রাজা তুট্ঠো সোমনস্সপ্পত্তো হুত্ৰা ইতরানিপি গেহে ঠপিতানি পঞ্চ সাটকসতানি আহরাপেত্ৰা থেরস্স দত্ৰা অনুমোদনং সুত্ৰা থেরং ৰন্দিত্ৰা পদক্খিণং কত্ৰা পক্কামি. থেরো পঠমলদ্ধানি পঞ্চ সাটকসতানি জিণ্ণচীৰরিকানং ভিক্খূনং অদাসি. থেরস্স পন পঞ্চমত্তানি সদ্ধিৰিহারিকসতানি ¶ , তেসু একো দহরভিক্খু থেরস্স বহূপকারো পরিৰেণং সম্মজ্জতি, পানীযপরিভোজনীযং উপট্ঠপেতি, দন্তকট্ঠং মুখোদকং ন্হানোদকং দেতি, ৰচ্চকুটিজন্তাঘরসেনাসনানি পটিজগ্গতি, হত্থপরিকম্মপাদপরিকম্মপিট্ঠিপরিকম্মাদীনি করোতি. থেরো পচ্ছা লদ্ধানি পঞ্চ সাটকসতানি ‘‘অযং মে বহূপকারো’’তি যুত্তৰসেন সব্বানি তস্সেৰ অদাসি. সোপি সব্বে তে সাটকে ভাজেত্ৰা অত্তনো সমানুপজ্ঝাযানং অদাসি.

এৰং ¶ সব্বেপি তে লদ্ধসাটকা ভিক্খূ সাটকে ছিন্দিত্ৰা রজিত্ৰা কণিকারপুপ্ফৰণ্ণানি কাসাযানি নিৰাসেত্ৰা চ পারুপিত্ৰা চ সত্থারং উপসঙ্কমিত্ৰা ৰন্দিত্ৰা একমন্তং নিসীদিত্ৰা এৰমাহংসু – ‘‘ভন্তে, সোতাপন্নস্স অরিযসাৰকস্স মুখোলোকনদানং নাম অত্থী’’তি. ‘‘ন, ভিক্খৰে, অরিযসাৰকানং মুখোলোকনদানং নাম অত্থী’’তি. ‘‘ভন্তে, অম্হাকং উপজ্ঝাযেন ধম্মভণ্ডাগারিকত্থেরেন সহস্সগ্ঘনিকানং সাটকানং পঞ্চ সতানি একস্সেৰ দহরভিক্খুনো দিন্নানি, সো পন অত্তনা লদ্ধে ভাজেত্ৰা অম্হাকং অদাসী’’তি. ‘‘ন, ভিক্খৰে, আনন্দো মুখোলোকনভিক্খং দেতি ¶ , সো পনস্স ভিক্খু বহূপকারো, তস্মা অত্তনো উপকারস্স উপকারৰসেন গুণৰসেন যুত্তৰসেন ‘উপকারস্স নাম পচ্চুপকারো কাতুং ৰট্টতী’তি কতঞ্ঞুকতৰেদিভাৰেন অদাসি. পোরাণকপণ্ডিতাপি হি অত্তনো উপকারানঞ্ঞেৰ পচ্চুপকারং করিংসূ’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সীহো হুত্ৰা পব্বতগুহাযং ৰসতি. সো একদিৰসং গুহায নিক্খমিত্ৰা পব্বতপাদং ওলোকেসি, তং পন পব্বতপাদং পরিক্খিপিত্ৰা মহাসরো অহোসি. তস্স একস্মিং উন্নতট্ঠানে উপরিথদ্ধকদ্দমপিট্ঠে মুদূনি হরিততিণানি জাযিংসু. সসকা চেৰ হরিণাদযো চ সল্লহুকমিগা কদ্দমমত্থকে ৰিচরন্তা তানি খাদন্তি. তং দিৰসম্পি একো মিগো তানি খাদন্তো ৰিচরতি. সীহো ‘‘তং মিগং গণ্হিস্সামী’’তি পব্বতমত্থকা উপ্পতিত্ৰা সীহৰেগেন পক্খন্দি, মিগো মরণভযতজ্জিতো ৰিরৰন্তো পলাযি. সীহো ৰেগং সন্ধারেতুং অসক্কোন্তো কললপিট্ঠে নিপতিত্ৰা ¶ ওসীদিত্ৰা উগ্গন্তুং অসক্কোন্তো চত্তারো পাদা থম্ভা ৰিয ওসীদিত্ৰা সত্তাহং নিরাহারো অট্ঠাসি.

অথ নং একো সিঙ্গালো গোচরপ্পসুতো তং দিস্ৰা ভযেন পলাযি. সীহো তং পক্কোসিত্ৰা ‘‘ভো সিঙ্গাল, মা পলাযি, অহং কললে লগ্গো, জীৰিতং মে দেহী’’তি আহ. সিঙ্গালো তস্স সন্তিকং গন্ত্ৰা ‘‘অহং তং উদ্ধরেয্যং, উদ্ধটো পন মং খাদেয্যাসীতি ভাযামী’’তি আহ. ‘‘মা ভাযি, নাহং তং খাদিস্সামি, মহন্তং পন তে গুণং করিস্সামি, একেনুপাযেন মং উদ্ধরাহী’’তি. সিঙ্গালো তস্স পটিঞ্ঞং গহেত্ৰা চতুন্নং পাদানং সমন্তা কললে অপনেত্ৰা চতুন্নম্পি পাদানং চতস্সো মাতিকা খণিত্ৰা ¶ উদকাভিমুখং অকাসি, উদকং পৰিসিত্ৰা কললং মুদুং অকাসি. তস্মিং খণে সিঙ্গালো সীহস্স উদরন্তরং অত্তনো সীসং পৰেসেত্ৰা ‘‘ৰাযামং করোহি, সামী’’তি উচ্চাসদ্দং করোন্তো সীসেন উদরং পহরি. সীহো ৰেগং জনেত্ৰা কললা উগ্গন্ত্ৰা পক্খন্দিত্ৰা থলে অট্ঠাসি. সো মুহুত্তং ৰিস্সমিত্ৰা সরং ওরুয্হ কদ্দমং ধোৰিত্ৰা ন্হাযিত্ৰা দরথং পটিপ্পস্সম্ভেত্ৰা একং মহিংসং ৰধিত্ৰা দাঠাহি ওৰিজ্ঝিত্ৰা মংসং ¶ উব্বত্তেত্ৰা ‘‘খাদ, সম্মা’’তি সিঙ্গালস্স পুরতো ঠপেত্ৰা তেন খাদিতে পচ্ছা অত্তনা খাদি. পুন সিঙ্গালো একং মংসপেসিং ডংসিত্ৰা গণ্হি. ‘‘ইদং কিমত্থায, সম্মা’’তি চ ৰুত্তে ‘‘তুম্হাকং দাসী অত্থি, তস্সা ভাগো ভৰিস্সতী’’তি আহ. সীহো ‘‘গণ্হাহী’’তি ৰত্ৰা সযম্পি সীহিযা অত্থায মংসং গণ্হিত্ৰা ‘‘এহি, সম্ম, অম্হাকং পব্বতমুদ্ধনি ঠত্ৰা সখিযা ৰসনট্ঠানং গমিস্সামা’’তি ৰত্ৰা তত্থ গন্ত্ৰা মংসং খাদাপেত্ৰা সিঙ্গালঞ্চ সিঙ্গালিঞ্চ অস্সাসেত্ৰা ‘‘ইতো পট্ঠায ইদানি অহং তুম্হে পটিজগ্গিস্সামী’’তি অত্তনো ৰসনট্ঠানং নেত্ৰা গুহায দ্ৰারে অঞ্ঞিস্সা গুহায ৰসাপেসি. তে ততো পট্ঠায গোচরায গচ্ছন্তা সীহিঞ্চ সিঙ্গালিঞ্চ ঠপেত্ৰা সিঙ্গালেন সদ্ধিং গন্ত্ৰা নানামিগে ৰধিত্ৰা উভোপি তত্থেৰ মংসং খাদিত্ৰা ইতরাসম্পি দ্ৰিন্নং আহরিত্ৰা দেন্তি.

এৰং কালে গচ্ছন্তে সীহী দ্ৰে পুত্তে ৰিজাযি, সিঙ্গালীপি দ্ৰে পুত্তে ৰিজাযি. তে সব্বেপি সমগ্গৰাসং ৰসিংসু. অথেকদিৰসং সীহিযা এতদহোসি – ‘‘অযং সীহো সিঙ্গালঞ্চ সিঙ্গালিঞ্চ সিঙ্গালপোতকে চ অতিৰিয পিযাযতি, নূনমস্স সিঙ্গালিযা সদ্ধিং সন্থৰো অত্থি, তস্মা এৰং সিনেহং করোতি, যংনূনাহং ইমং পীল়েত্ৰা তজ্জেত্ৰা ইতো পলাপেয্য’’ন্তি ¶ . সা সীহস্স সিঙ্গালং গহেত্ৰা গোচরায গতকালে সিঙ্গালিং পীল়েসি তজ্জেসি ‘‘কিংকারণা ইমস্মিং ঠানে ৰসতি ¶ , ন পলাযসী’’তি? পুত্তাপিস্সা সিঙ্গালিপুত্তে তথেৰ তজ্জযিংসু. সিঙ্গালী তমত্থং সিঙ্গালস্স কথেত্ৰা ‘‘সীহস্স ৰচনেন এতায এৰং কতভাৰম্পি ন জানাম, চিরং ৰসিম্হা, নাসাপেয্যাপি নো, অম্হাকং ৰসনট্ঠানমেৰ গচ্ছামা’’তি আহ. সিঙ্গালো তস্সা ৰচনং সুত্ৰা সীহং উপসঙ্কমিত্ৰা আহ – ‘‘সামি, চিরং অম্হেহি তুম্হাকং সন্তিকে নিৰুত্থং, অতিচিরং ৰসন্তা নাম অপ্পিযা হোন্তি, অম্হাকং গোচরায পক্কন্তকালে সীহী সিঙ্গালিং ৰিহেঠেতি ‘ইমস্মিং ঠানে কস্মা ৰসথ, পলাযথা’তি তজ্জেতি, সীহপোতকাপি সিঙ্গালপোতকে তজ্জেন্তি. যো নাম যস্স অত্তনো সন্তিকে ৰাসং ন রোচেতি, তেন সো ‘যাহী’তি নীহরিতব্বোৰ, ৰিহেঠনং নাম কিমত্থিয’’ন্তি ৰত্ৰা পঠমং গাথমাহ –

১৩.

‘‘যেন কামং পণামেতি, ধম্মো বলৰতং মিগী;

উন্নদন্তী ৰিজানাহি, জাতং সরণতো ভয’’ন্তি.

তত্থ যেন কামং পণামেতি, ধম্মো বলৰতন্তি বলৰা নাম ইস্সরো অত্তনো সেৰকং যেন দিসাভাগেন ইচ্ছতি, তেন দিসাভাগেন সো পণামেতি নীহরতি. এস ধম্মো বলৰতং অযং ইস্সরানং সভাৰো পৰেণিধম্মোৰ, তস্মা সচে অম্হাকং ৰাসং ন রোচেথ, উজুকমেৰ নো নীহরথ ¶ , ৰিহেঠনেন কো অত্থোতি দীপেন্তো এৰমাহ. মিগীতি সীহং আলপতি. সো হি মিগরাজতায মিগা অস্স অত্থীতি মিগী. উন্নদন্তীতিপি তমেৰ আলপতি. সো হি উন্নতানং দন্তানং অত্থিতায উন্নতা দন্তা অস্স অত্থীতি উন্নদন্তী. ‘‘উন্নতদন্তী’’তিপি পাঠোযেৰ. ৰিজানাহীতি ‘‘এস ইস্সরানং ধম্মো’’তি এৰং জানাহি. জাতং সরণতো ভযন্তি অম্হাকং তুম্হে পতিট্ঠানট্ঠেন সরণং, তুম্হাকঞ্ঞেৰ সন্তিকা ভযং জাতং, তস্মা অত্তনো ৰসনট্ঠানমেৰ গমিস্সামাতি দীপেতি.

অপরো নযো – তৰ মিগী সীহী উন্নদন্তীমম পুত্তদারং তজ্জেন্তী যেন কামং পণামেতি, যেন যেনাকারেন ইচ্ছতি, তেন পণামেতি পৰত্ততি, ৰিহেঠেতিপি ¶ পলাপেতিপি, এৰং ত্ৰং ৰিজানাহি, তত্থ কিং সক্কা অম্হেহি কাতুং. ধম্মো বলৰতং এস বলৰন্তানং সভাৰো, ইদানি মযং গমিস্সাম. কস্মা? জাতং সরণতো ভযন্তি.

তস্স ¶ ৰচনং সুত্ৰা সীহো সীহিং আহ – ‘‘ভদ্দে, অসুকস্মিং নাম কালে মম গোচরত্থায গন্ত্ৰা সত্তমে দিৰসে ইমিনা সিঙ্গালেন ইমায চ সিঙ্গালিযা সদ্ধিং আগতভাৰং সরসী’’তি. ‘‘আম, সরামী’’তি. ‘‘জানাসি পন ময্হং সত্তাহং অনাগমনস্স কারণ’’ন্তি? ‘‘ন জানামি, সামী’’তি. ‘‘ভদ্দে, অহং ‘একং মিগং গণ্হিস্সামী’তি ৰিরজ্ঝিত্ৰা কললে লগ্গো, ততো নিক্খমিতুং অসক্কোন্তো সত্তাহং নিরাহারো অট্ঠাসিং, স্ৰাহং ইমং সিঙ্গালং নিস্সায জীৰিতং লভিং, অযং মে জীৰিতদাযকো সহাযো. মিত্তধম্মে ঠাতুং সমত্থো হি মিত্তো দুব্বলো নাম নত্থি, ইতো পট্ঠায ময্হং সহাযস্স চ সহাযিকায চ পুত্তকানঞ্চ এৰরূপং অৰমানং মা অকাসী’’তি ৰত্ৰা সীহো দুতিযং গাথমাহ –

১৪.

‘‘অপি চেপি দুব্বলো মিত্তো, মিত্তধম্মেসু তিট্ঠতি;

সো ঞাতকো চ বন্ধু চ, সো মিত্তো সো চ মে সখা;

দাঠিনি মাতিমঞ্ঞিত্থো, সিঙ্গালো মম পাণদো’’তি.

তত্থ অপি চেপীতি একো অপিসদ্দো অনুগ্গহত্থো, একো সম্ভাৰনত্থো. তত্রাযং যোজনা – দুব্বলোপি চে মিত্তো মিত্তধম্মেসু অপি তিট্ঠতি, সচে ঠাতুং সক্কোতি, সো ঞাতকো চ বন্ধু চ, সো মেত্তচিত্ততায মিত্তো, সো চ মে সহাযট্ঠেন সখা. দাঠিনি মাতিমঞ্ঞিত্থোতি, ভদ্দে, দাঠাসম্পন্নে সীহি মা ময্হং সহাযং ৰা সহাযিং ৰা অতিমঞ্ঞি, অযঞ্হি সিঙ্গালো মম পাণদোতি.

সা ¶ তস্স ৰচনং সুত্ৰা সিঙ্গালিং খমাপেত্ৰা ততো পট্ঠায সপুত্তায তায সদ্ধিং সমগ্গৰাসং ৰসি. সীহপোতকাপি সিঙ্গালপোতকেহি সদ্ধিং কীল়মানা সম্মোদমানা মাতাপিতূনং অতিক্কন্তকালেপি ¶ মিত্তভাৰং অভিন্দিত্ৰা সম্মোদমানা ৰসিংসু. তেসং কির সত্তকুলপরিৰট্টে অভিজ্জমানা মেত্তি অগমাসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে কেচি সোতাপন্না, কেচি সকদাগামিনো, কেচি অনাগামিনো, কেচি অরহন্তো অহেসুং. ‘‘তদা সিঙ্গালো আনন্দো অহোসি, সীহো পন অহমেৰ অহোসি’’ন্তি.

গুণজাতকৰণ্ণনা সত্তমা.

[১৫৮] ৮. সুহনুজাতকৰণ্ণনা

নযিদং ¶ ৰিসমসীলেনাতি ইদং সত্থা জেতৰনে ৰিহরন্তো দ্ৰে চণ্ডভিক্খূ আরব্ভ কথেসি. তস্মিঞ্হি সমযে জেতৰনেপি একো ভিক্খু চণ্ডো অহোসি ফরুসো সাহসিকো জনপদেপি. অথেকদিৰসং জানপদো ভিক্খু কেনচিদেৰ করণীযেন জেতৰনং অগমাসি, সামণেরা চেৰ দহরভিক্খূ চ তস্স চণ্ডভাৰং জানন্তি. ‘‘তেসং দ্ৰিন্নং চণ্ডানং কলহং পস্সিস্সামা’’তি কুতূহলেন তং ভিক্খুং জেতৰনৰাসিকস্স পরিৰেণং পহিণিংসু. তে উভোপি চণ্ডা অঞ্ঞমঞ্ঞং দিস্ৰাৰ পিযসংৰাসং সংসন্দিংসু সমিংসু, হত্থপাদপিট্ঠিসম্বাহনাদীনি অকংসু. ধম্মসভাযং ভিক্খূ কথং সমুট্ঠাপেসুং – ‘‘আৰুসো, চণ্ডা ভিক্খূ অঞ্ঞেসং উপরি চণ্ডা ফরুসা সাহসিকা, অঞ্ঞমঞ্ঞং পন উভোপি সমগ্গা সম্মোদমানা পিযসংৰাসা জাতা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপেতে অঞ্ঞেসং চণ্ডা ফরুসা সাহসিকা, অঞ্ঞমঞ্ঞং পন সমগ্গা সম্মোদমানা পিযসংৰাসা চ অহেসু’’ন্তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স সব্বত্থসাধকো অত্থধম্মানুসাসকো অমচ্চো অহোসি. সো পন রাজা থোকং ধনলোভপকতিকো, তস্স ¶ মহাসোণো নাম কূটঅস্সো অত্থি. অথ উত্তরাপথকা অস্সৰাণিজা পঞ্চ অস্সসতানি আনেসুং, অস্সানং আগতভাৰং রঞ্ঞো আরোচেসুং. ততো পুব্বে পন বোধিসত্তো অস্সে অগ্ঘাপেত্ৰা ¶ মূলং অপরিহাপেত্ৰা দাপেসি. রাজা তং পরিহাযমানো অঞ্ঞং অমচ্চং পক্কোসাপেত্ৰা ‘‘তাত, অস্সে অগ্ঘাপেহি, অগ্ঘাপেন্তো চ পঠমং মহাসোণং যথা তেসং অস্সানং অন্তরং পৰিসতি, তথা ৰিস্সজ্জেত্ৰা অস্সে ডংসাপেত্ৰা ৰণিতে কারাপেত্ৰা দুব্বলকালে মূলং হাপেত্ৰা অস্সে অগ্ঘাপেয্যাসী’’তি আহ. সো ‘‘সাধূ’’তি সম্পটিচ্ছিত্ৰা তথা অকাসি.

অস্সৰাণিজা অনত্তমনা হুত্ৰা তেন কতকিরিযং বোধিসত্তস্স আরোচেসুং. বোধিসত্তো ‘‘কিং পন তুম্হাকং নগরে কূটঅস্সো নত্থী’’তি পুচ্ছি. ‘‘অত্থি সামি, সুহনু নাম কূটঅস্সো চণ্ডো ফরুসো’’তি. ‘‘তেন ¶ হি পুন আগচ্ছন্তা তং অস্সং আনেয্যাথা’’তি. তে ‘‘সাধূ’’তি পটিস্সুণিত্ৰা পুন আগচ্ছন্তা তং কূটস্সং গাহাপেত্ৰা আগচ্ছিংসু. রাজা ‘‘অস্সৰাণিজা আগতা’’তি সুত্ৰা সীহপঞ্জরং উগ্ঘাটেত্ৰা অস্সে ওলোকেত্ৰা মহাসোণং ৰিস্সজ্জাপেসি. অস্সৰাণিজাপি মহাসোণং আগচ্ছন্তং দিস্ৰা সুহনুং ৰিস্সজ্জাপেসুং. তে অঞ্ঞমঞ্ঞং পত্ৰা সরীরানি লেহন্তা সম্মোদমানা অট্ঠংসু. রাজা বোধিসত্তং পুচ্ছি – ‘‘পস্সসি ইমে দ্ৰে কূটস্সা অঞ্ঞেসং চণ্ডা ফরুসা সাহসিকা, অঞ্ঞে অস্সে ডংসিত্ৰা গেলঞ্ঞং পাপেন্তি, ইদানি অঞ্ঞমঞ্ঞং পন সরীরং লেহন্তা সম্মোদমানা অট্ঠংসু, কিং নামেত’’ন্তি? বোধিসত্তো ‘‘নযিমে, মহারাজ, ৰিসমসীলা, সমসীলা সমধাতুকা চ এতে’’তি ৰত্ৰা ইমং গাথাদ্ৰযমাহ –

১৫.

‘‘নযিদং ৰিসমসীলেন, সোণেন সুহনূ সহ;

সুহনূপি তাদিসোযেৰ, যো সোণস্স সগোচরো.

১৬.

‘‘পক্খন্দিনা ¶ পগব্ভেন, নিচ্চং সন্দানখাদিনা;

সমেতি পাপং পাপেন, সমেতি অসতা অস’’ন্তি.

তত্থ নযিদং ৰিসমসীলেন, সোণেন সুহনূ সহাতি যং ইদং সুহনু কূটস্সো সোণেন সদ্ধিং পেমং করোতি, ইদং ন অত্তনো ৰিসমসীলেন, অথ খো অত্তনো সমসীলেনেৰ সদ্ধিং করোতি. উভোপি হেতে অত্তনো অনাচারতায দুস্সীলতায সমসীলা সমধাতুকা. সুহনূপি তাদিসোযেৰ, যো সোণস্স সগোচরোতি যাদিসো সোণো, সুহনুপি তাদিসোযেৰ, যো সোণস্স সগোচরো যংগোচরো সোণো, সোপি তংগোচরোযেৰ. যথেৰ হি সোণো অস্সগোচরো অস্সে ডংসেন্তোৰ চরতি, তথা সুহনুপি. ইমিনা নেসং সমানগোচরতং দস্সেতি.

তে ¶ পন আচারগোচরে একতো কত্ৰা দস্সেতুং ‘‘পক্খন্দিনা’’তিআদি ৰুত্তং. তত্থ পক্খন্দিনাতি অস্সানং উপরি পক্খন্দনসীলেন পক্খন্দনগোচরেন. পগব্ভেনাতি কাযপাগব্ভিযাদিসমন্নাগতেন দুস্সীলেন. নিচ্চং সন্দানখাদিনাতি সদা অত্তনো বন্ধনযোত্তং খাদনসীলেন খাদনগোচরেন চ. সমেতি পাপং পাপেনাতি এতেসু অঞ্ঞতরেন পাপেন সদ্ধিং অঞ্ঞতরস্স ¶ পাপং দুস্সীল্যং সমেতি. অসতা অসন্তি এতেসু অঞ্ঞতরেন অসতা অনাচারগোচরসম্পন্নেন সহ ইতরস্স অসং অসাধুকম্মং সমেতি, গূথাদীনি ৰিয গূথাদীহি একতো সংসন্দতি সদিসং নিব্বিসেসমেৰ হোতীতি.

এৰং ৰত্ৰা চ পন বোধিসত্তো ‘‘মহারাজ, রঞ্ঞা নাম অতিলুদ্ধেন ন ভৰিতব্বং, পরস্স সন্তকং নাম নাসেতুং ন ৰট্টতী’’তি রাজানং ওৰদিত্ৰা অস্সে অগ্ঘাপেত্ৰা ভূতমেৰ মূলং দাপেসি. অস্সৰাণিজা যথাসভাৰমেৰ মূলং লভিত্ৰা হট্ঠতুট্ঠা অগমংসু. রাজাপি বোধিসত্তস্স ওৰাদে ঠত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা দ্ৰে অস্সা ইমে দ্ৰে দুট্ঠভিক্খূ অহেসুং, রাজা আনন্দো, পণ্ডিতামচ্চো পন অহমেৰ অহোসি’’ন্তি.

সুহনুজাতকৰণ্ণনা অট্ঠমা.

[১৫৯] ৯. মোরজাতকৰণ্ণনা

উদেতযং ¶ চক্খুমা একরাজাতি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. সো হি ভিক্খু ভিক্খূহি সত্থু সন্তিকং নীতো ‘‘সচ্চং কির, ত্ৰং ভিক্খু, উক্কণ্ঠিতো’’তি ৰুত্তে ‘‘সচ্চং, ভন্তে’’তি ৰত্ৰা ‘‘কিং দিস্ৰা’’তি ৰুত্তে ‘‘একং অলঙ্কতপটিযত্তসরীরং মাতুগামং ওলোকেত্ৰা’’তি আহ. অথ নং সত্থা ‘‘ভিক্খু মাতুগামো নাম কস্মা তুম্হাদিসানং চিত্তং নালুল়েস্সতি, পোরাণকপণ্ডিতানম্পি হি মাতুগামস্স সদ্দং সুত্ৰা সত্ত ৰস্সসতানি অসমুদাচিণ্ণকিলেসা ওকাসং লভিত্ৰা খণেনেৰ সমুদাচরিংসু. ৰিসুদ্ধাপি সত্তা সংকিলিস্সন্তি, উত্তমযসসমঙ্গিনোপি আযসক্যং পাপুণন্তি, পগেৰ অপরিসুদ্ধা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো মোরযোনিযং পটিসন্ধিং গহেত্ৰা অণ্ডকালেপি ¶ কণিকারমকুল়ৰণ্ণঅণ্ডকোসো হুত্ৰা অণ্ডং ভিন্দিত্ৰা নিক্খন্তো সুৰণ্ণৰণ্ণো অহোসি দস্সনীযো পাসাদিকো পক্খানং অন্তরে সুরত্তরাজিৰিরাজিতো, সো অত্তনো ¶ জীৰিতং রক্খন্তো তিস্সো পব্বতরাজিযো অতিক্কম্ম চতুত্থায পব্বতরাজিযা একস্মিং দণ্ডকহিরঞ্ঞপব্বততলে ৰাসং কপ্পেসি. সো পভাতায রত্তিযা পব্বতমত্থকে নিসিন্নো সূরিযং উগ্গচ্ছন্তং ওলোকেত্ৰা অত্তনো গোচরভূমিযং রক্খাৰরণত্থায ব্রহ্মমন্তং বন্ধন্তো ‘‘উদেতয’’ন্তিআদিমাহ.

১৭.

‘‘উদেতযং চক্খুমা একরাজা,

হরিস্সৰণ্ণো পথৰিপ্পভাসো;

তং তং নমস্সামি হরিস্সৰণ্ণং পথৰিপ্পভাসং,

তযাজ্জ গুত্তা ৰিহরেমু দিৰস’’ন্তি.

তত্থ ¶ উদেতীতি পাচীনলোকধাতুতো উগ্গচ্ছতি. চক্খুমাতি সকলচক্কৰাল়ৰাসীনং অন্ধকারং ৰিধমিত্ৰা চক্খুপটিলাভকরণেন যং তেন তেসং দিন্নং চক্খু, তেন চক্খুনা চক্খুমা. একরাজাতি সকলচক্কৰাল়ে আলোককরানং অন্তরে সেট্ঠৰিসিট্ঠট্ঠেন একরাজা. হরিস্সৰণ্ণোতি হরিসমানৰণ্ণো, সুৰণ্ণৰণ্ণোতি অত্থো. পথৰিপ্পভাসোতি পথৰিযা পভাসো. তং তং নমস্সামীতি তস্মা তং এৰরূপং ভৰন্তং নমস্সামি ৰন্দামি. তযাজ্জ গুত্তা ৰিহরেমু দিৰসন্তি তযা অজ্জ রক্খিতা গোপিতা হুত্ৰা ইমং দিৰসং চতুইরিযাপথৰিহারেন সুখং ৰিহরেয্যাম.

এৰং বোধিসত্তো ইমায গাথায সূরিযং নমস্সিত্ৰা দুতিযগাথায অতীতে পরিনিব্বুতে বুদ্ধে চেৰ বুদ্ধগুণে চ নমস্সতি.

‘‘যে ব্রাহ্মণা ৰেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং নমত্থু বোধিযা, নমো ৰিমুত্তানং নমো ৰিমুত্তিযা;

ইমং সো পরিত্তং কত্ৰা, মোরো চরতি এসনা’’তি.

তত্থ যে ব্রাহ্মণাতি যে বাহিতপাপা ৰিসুদ্ধিব্রাহ্মণা. ৰেদগূতি ৰেদানং পারং গতাতিপি ৰেদগূ, ৰেদেহি পারং গতাতিপি ৰেদগূ. ইধ পন সব্বে সঙ্খতাসঙ্খতধম্মে ৰিদিতে পাকটে কত্ৰা গতাতি ৰেদগূ. তেনেৰাহ ¶ ‘‘সব্বধম্মে’’তি. সব্বে খন্ধাযতনধাতুধম্মে সলক্খণসামঞ্ঞলক্খণৰসেন ¶ অত্তনো ঞাণস্স ৰিদিতে পাকটে কত্ৰা গতা, তিণ্ণং মারানং মত্থকং মদ্দিত্ৰা দসসহস্সিলোকধাতুং উন্নাদেত্ৰা বোধিতলে সম্মাসম্বোধিং পত্ৰা সংসারং ৰা অতিক্কন্তাতি অত্থো. তে মে নমোতি তে মম ইমং নমক্কারং পটিচ্ছন্তু. তে চ মং পালযন্তূতি এৰং মযা নমস্সিতা চ তে ভগৰন্তো মং পালেন্তু রক্খন্তু গোপেন্তু. নমত্থু বুদ্ধানং নমত্থু বোধিযা, নমো ৰিমুত্তানং নমো ৰিমুত্তিযাতি অযং মম নমক্কারো ¶ অতীতানং পরিনিব্বুতানং বুদ্ধানং অত্থু, তেসঞ্ঞেৰ চতূসু চ মগ্গেসু চতূসু ফলেসু ঞাণসঙ্খাতায বোধিযা অত্থু, তথা তেসঞ্ঞেৰ অরহত্তফলৰিমুত্তিযা ৰিমুত্তানং অত্থু, যা চ নেসং তদঙ্গৰিমুত্তি ৰিক্খম্ভনৰিমুত্তি সমুচ্ছেদৰিমুত্তি পটিপ্পস্সদ্ধিৰিমুত্তি নিস্সরণৰিমুত্তীতি পঞ্চৰিধা ৰিমুত্তি, তস্সা নেসং ৰিমুত্তিযাপি অযং ময্হং নমক্কারো অত্থূতি. ‘‘ইমং সো পরিত্তং কত্ৰা, মোরো চরতি এসনা’’তি ইদং পন পদদ্ৰযং সত্থা অভিসম্বুদ্ধো হুত্ৰা আহ. তস্সত্থো – ভিক্খৰে, সো মোরো ইমং পরিত্তং ইমং রক্খং কত্ৰা অত্তনো গোচরভূমিযং পুপ্ফফলাদীনং অত্থায নানপ্পকারায এসনায চরতি.

এৰং দিৰসং চরিত্ৰা সাযং পব্বতমত্থকে নিসীদিত্ৰা অত্থঙ্গতং সূরিযং ওলোকেন্তো বুদ্ধগুণে আৰজ্জেত্ৰা নিৰাসট্ঠানে রক্খাৰরণত্থায পুন ব্রহ্মমন্তং বন্ধন্তো ‘‘অপেতয’’ন্তিআদিমাহ.

১৮.

‘‘অপেতযং চক্খুমা একরাজা, হরিস্সৰণ্ণো পথৰিপ্পভাসো;

তং তং নমস্সামি হরিস্সৰণ্ণং পথৰিপ্পভাসং, তযাজ্জ গুত্তা ৰিহরেমু রত্তিং.

‘‘যে ব্রাহ্মণা ৰেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং নমত্থু বোধিযা, নমো ৰিমুত্তানং নমো ৰিমুত্তিযা;

ইমং সো পরিত্তং কত্ৰা, মোরো ৰাসমকপ্পযী’’তি.

তত্থ অপেতীতি অপযাতি অত্থং গচ্ছতি. ইমং সো পরিত্তং কত্ৰা, মোরো ৰাসমকপ্পযীতি ইদম্পি অভিসম্বুদ্ধো হুত্ৰা আহ. তস্সত্থো – ভিক্খৰে ¶ , সো মোরো ইমং পরিত্তং ইমং রক্খং কত্ৰা অত্তনো নিৰাসট্ঠানে ৰাসং কপ্পযিত্থ, তস্স রত্তিং ৰা দিৰা ৰা ইমস্স পরিত্তস্সানুভাৰেন নেৰ ভযং, ন লোমহংসো অহোসি.

অথেকো ¶ বারাণসিযা অৰিদূরে নেসাদগামৰাসী নেসাদো হিমৰন্তপদেসে ৰিচরন্তো তস্মিং ¶ দণ্ডকহিরঞ্ঞপব্বতমত্থকে নিসিন্নং বোধিসত্তং দিস্ৰা আগন্ত্ৰা পুত্তস্স আরোচেসি. অথেকদিৰসং খেমা নাম বারাণসিরঞ্ঞো দেৰী সুপিনেন সুৰণ্ণৰণ্ণং মোরং ধম্মং দেসেন্তং দিস্ৰা পবুদ্ধকালে রঞ্ঞো আরোচেসি – ‘‘অহং, দেৰ, সুৰণ্ণৰণ্ণস্স মোরস্স ধম্মং সোতুকামা’’তি. রাজা অমচ্চে পুচ্ছি. অমচ্চা ‘‘ব্রাহ্মণা জানিস্সন্তী’’তি আহংসু. ব্রাহ্মণা তং সুত্ৰা ‘‘সুৰণ্ণৰণ্ণা মোরা নাম হোন্তী’’তি ৰত্ৰা ‘‘কত্থ হোন্তী’’তি ৰুত্তে ‘‘নেসাদা জানিস্সন্তী’’তি আহংসু. রাজা নেসাদে সন্নিপাতেত্ৰা পুচ্ছি. অথ সো নেসাদপুত্তো ‘‘আম, মহারাজ, দণ্ডকহিরঞ্ঞপব্বতো নাম অত্থি, তত্থ সুৰণ্ণৰণ্ণো মোরো ৰসতী’’তি আহ. ‘‘তেন হি তং মোরং অমারেত্ৰা বন্ধিত্ৰাৰ আনেহী’’তি. নেসাদো গন্ত্ৰা তস্স গোচরভূমিযং পাসে ওড্ডেসি. মোরেন অক্কন্তট্ঠানেপি পাসো ন সঞ্চরতি. নেসাদো গণ্হিতুং অসক্কোন্তো সত্ত ৰস্সানি ৰিচরিত্ৰা তত্থেৰ কালমকাসি. খেমাপি দেৰী পত্থিতং অলভমানা কালমকাসি.

রাজা ‘‘মোরং মে নিস্সায দেৰী কালকতা’’তি কুজ্ঝিত্ৰা ‘‘হিমৰন্তপদেসে দণ্ডকহিরঞ্ঞপব্বতো নাম অত্থি, তত্থ সুৰণ্ণৰণ্ণো মোরো ৰসতি, যে তস্স মংসং খাদন্তি, তে অজরা অমরা হোন্তী’’তি অক্খরং সুৰণ্ণপট্টে লিখাপেত্ৰা সুৰণ্ণপট্টং মঞ্জূসায নিক্খিপাপেসি. তস্মিং কালকতে অঞ্ঞো রাজা রজ্জং পত্ৰা সুৰণ্ণপট্টং ৰাচেত্ৰা ‘‘অজরো অমরো ভৰিস্সামী’’তি অঞ্ঞং নেসাদং পেসেসি. সোপি গন্ত্ৰা বোধিসত্তং গহেতুং অসক্কোন্তো তত্থেৰ কালমকাসি. এতেনেৰ নিযামেন ছ রাজপরিৰট্টা গতা. অথ সত্তমো রাজা রজ্জং পত্ৰা একং নেসাদং পহিণি. সো গন্ত্ৰা বোধিসত্তেন অক্কন্তট্ঠানেপি পাসস্স অসঞ্চরণভাৰং, অত্তনো ¶ পরিত্তং কত্ৰা গোচরভূমিগমনভাৰঞ্চস্স ঞত্ৰা পচ্চন্তং ওতরিত্ৰা একং মোরিং গহেত্ৰা যথা হত্থতাল়সদ্দেন নচ্চতি, অচ্ছরাসদ্দেন চ ৰস্সতি, এৰং সিক্খাপেত্ৰা তং আদায গন্ত্ৰা মোরেন পরিত্তে ¶ অকতে পাতোযেৰ পাসযট্ঠিযো রোপেত্ৰা পাসে ওড্ডেত্ৰা মোরিং ৰস্সাপেসি. মোরো ৰিসভাগং মাতুগামসদ্দং সুত্ৰা কিলেসাতুরো হুত্ৰা পরিত্তং কাতুং অসক্কুণিত্ৰা গন্ত্ৰা পাসে বজ্ঝি. অথ নং নেসাদো গহেত্ৰা গন্ত্ৰা বারাণসিরঞ্ঞো অদাসি.

রাজা তস্স রূপসম্পত্তিং দিস্ৰা তুট্ঠমানসো আসনং দাপেসি. বোধিসত্তো পঞ্ঞত্তাসনে নিসীদিত্ৰা ‘‘মহারাজ, কস্মা মং গণ্হাপেসী’’তি পুচ্ছি. ‘‘যে কির তৰ মংসং খাদন্তি, তে অজরা অমরা হোন্তি, স্ৰাহং তৰ মংসং খাদিত্ৰা অজরো অমরো হোতুকামো তং গণ্হাপেসি’’ন্তি. ‘‘মহারাজ, মম তাৰ মংসং খাদন্তা অজরা অমরা হোন্তু, অহং পন মরিস্সামী’’তি ¶ ? ‘‘আম, মরিস্সসী’’তি. ‘‘মযি মরন্তে পন মম মংসমেৰ খাদিত্ৰা কিন্তি কত্ৰা ন মরিস্সন্তী’’তি? ‘‘ত্ৰং সুৰণ্ণৰণ্ণো, তস্মা কির তৰ মংসং খাদকা অজরা অমরা ভৰিস্সন্তী’’তি. ‘‘মহারাজ, অহং পন ন অকারণা সুৰণ্ণৰণ্ণো জাতো, পুব্বে পনাহং ইমস্মিংযেৰ নগরে চক্কৰত্তী রাজা হুত্ৰা সযম্পি পঞ্চ সীলানি রক্খিং, সকলচক্কৰাল়ৰাসিনোপি রক্খাপেসিং, স্ৰাহং কালং করিত্ৰা তাৰতিংসভৰনে নিব্বত্তো, তত্থ যাৰতাযুকং ঠত্ৰা ততো চুতো অঞ্ঞস্স অকুসলস্স নিস্সন্দেন মোরযোনিযং নিব্বত্তিত্ৰাপি পোরাণসীলানুভাৰেন সুৰণ্ণৰণ্ণো জাতো’’তি. ‘‘‘ত্ৰং চক্কৰত্তী রাজা হুত্ৰা সীলং রক্খিত্ৰা সীলফলেন সুৰণ্ণৰণ্ণো জাতো’তি কথমিদং অম্হেহি সদ্ধাতব্বং. অত্থি নো কোচি সক্খী’’তি ¶ ? ‘‘অত্থি, মহারাজা’’তি. ‘‘কো নামা’’তি? ‘‘মহারাজ, অহং চক্কৰত্তিকালে রতনমযে রথে নিসীদিত্ৰা আকাসে ৰিচরিং, সো মে রথো মঙ্গলপোক্খরণিযা অন্তোভূমিযং নিদহাপিতো, তং মঙ্গলপোক্খরণিতো উক্খিপাপেহি, সো মে সক্খি ভৰিস্সতী’’তি.

রাজা ‘‘সাধূ’’তি পটিস্সুণিত্ৰা পোক্খরণিতো উদকং হরাপেত্ৰা রথং নীহরাপেত্ৰা বোধিসত্তস্স সদ্দহি. বোধিসত্তো ‘‘মহারাজ, ঠপেত্ৰা অমতমহানিব্বানং অৰসেসা সব্বে সঙ্খতধম্মা হুত্ৰা অভাৰিনো অনিচ্চা খযৰযধম্মাযেৰা’’তি রঞ্ঞো ধম্মং দেসেত্ৰা রাজানং পঞ্চসু সীলেসু পতিট্ঠাপেসি. রাজা পসন্নো বোধিসত্তং রজ্জেন পূজেত্ৰা মহন্তং সক্কারং অকাসি. সো রজ্জং তস্সেৰ পটিনিয্যাদেত্ৰা কতিপাহং ৰসিত্ৰা ‘‘অপ্পমত্তো হোহি, মহারাজা’’তি ওৰদিত্ৰা আকাসে ¶ উপ্পতিত্ৰা দণ্ডকহিরঞ্ঞপব্বতমেৰ অগমাসি. রাজাপি বোধিসত্তস্স ওৰাদে ঠত্ৰা দানাদীনি পুঞ্ঞানি কত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু অরহত্তে পতিট্ঠহি. ‘‘তদা রাজা আনন্দো অহোসি, সুৰণ্ণমোরো পন অহমেৰ অহোসি’’ন্তি.

মোরজাতকৰণ্ণনা নৰমা.

[১৬০] ১০. ৰিনীলজাতকৰণ্ণনা

এৰমেৰ নূন রাজানন্তি ইদং সত্থা ৰেল়ুৰনে ৰিহরন্তো দেৰদত্তস্স সুগতালযং আরব্ভ কথেসি. দেৰদত্তে হি গযাসীসগতানং দ্ৰিন্নং অগ্গসাৰকানং সুগতালযং দস্সেত্ৰা নিপন্নে উভোপি থেরা ¶ ধম্মং দেসেত্ৰা অত্তনো নিস্সিতকে আদায ৰেল়ুৰনং অগমিংসু. তে সত্থারা ‘‘সারিপুত্ত, দেৰদত্তো তুম্হে দিস্ৰা কিং ¶ অকাসী’’তি পুট্ঠা ‘‘ভন্তে, সুগতালযং দস্সেত্ৰা মহাৰিনাসং পাপুণী’’তি আরোচেসুং. সত্থা ‘‘ন খো, সারিপুত্ত, দেৰদত্তো ইদানেৰ মম অনুকিরিযং করোন্তো ৰিনাসং পত্তো, পুব্বেপি পাপুণিযেৰা’’তি ৰত্ৰা থেরেহি যাচিতো অতীতং আহরি.

অতীতে ৰিদেহরট্ঠে মিথিলাযং ৰিদেহরাজে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি নিব্বত্তি. সো ৰযপ্পত্তো তক্কসিলাযং সব্বসিপ্পানি উগ্গণ্হিত্ৰা পিতু অচ্চযেন রজ্জে পতিট্ঠাসি. তদা একস্স সুৰণ্ণহংসরাজস্স গোচরভূমিযং কাকিযা সদ্ধিং সংৰাসো অহোসি. সা পুত্তং ৰিজাযি. সো নেৰ মাতুপতিরূপকো অহোসি, ন পিতু. অথস্স ৰিনীলকধাতুকত্তা ‘‘ৰিনীলকো’’ত্ৰেৰ নামং অকংসু. হংসরাজা অভিণ্হং গন্ত্ৰা পুত্তং পস্সতি. অপরে পনস্স দ্ৰে হংসপোতকা পুত্তা অহেসুং. তে পিতরং অভিণ্হং মনুস্সপথং গচ্ছন্তং দিস্ৰা পুচ্ছিংসু – ‘‘তাত, তুম্হে কস্মা অভিণ্হং মনুস্সপথং গচ্ছথা’’তি? ‘‘তাতা, একায মে কাকিযা সদ্ধিং সংৰাসমন্ৰায একো পুত্তো জাতো, ‘ৰিনীলকো’তিস্স নামং, তমহং দট্ঠুং গচ্ছামী’’তি. ‘‘কহং পনেতে ¶ ৰসন্তী’’তি? ‘‘ৰিদেহরট্ঠে মিথিলায অৰিদূরে অসুকস্মিং নাম ঠানে একস্মিং তালগ্গে ৰসন্তী’’তি. ‘‘তাত, মনুস্সপথো নাম সাসঙ্কো সপ্পটিভযো, তুম্হে মা গচ্ছথ, মযং গন্ত্ৰা তং আনেস্সামা’’তি দ্ৰে হংসপোতকা পিতরা আচিক্খিতসঞ্ঞায তত্থ গন্ত্ৰা তং ৰিনীলকং একস্মিং দণ্ডকে নিসীদাপেত্ৰা মুখতুণ্ডকেন দণ্ডকোটিযং ডংসিত্ৰা মিথিলানগরমত্থকেন পাযিংসু. তস্মিং খণে ৰিদেহরাজা সব্বসেতচতুসিন্ধৰযুত্তরথৰরে নিসীদিত্ৰা নগরং পদক্খিণং করোতি. ৰিনীলকো তং দিস্ৰা চিন্তেসি – ‘‘ময্হং ৰিদেহরঞ্ঞা কিং নানাকারণং, এস চতুসিন্ধৰযুত্তরথে নিসীদিত্ৰা নগরং অনুসঞ্চরতি, অহং পন হংসযুত্তরথে নিসীদিত্ৰা গচ্ছামী’’তি. সো আকাসেন গচ্ছন্তো পঠমং গাথমাহ –

১৯.

‘‘এৰমেৰ ¶ নূন রাজানং, ৰেদেহং মিথিলগ্গহং;

অস্সা ৰহন্তি আজঞ্ঞা, যথা হংসা ৰিনীলক’’ন্তি.

তত্থ এৰমেৰাতি এৰং এৰ, নূনাতি পরিৰিতক্কে নিপাতো. একংসেপি ৰট্টতিযেৰ. ৰেদেহন্তি ৰিদেহরট্ঠসামিকং. মিথিলগ্গহন্তি মিথিলগেহং, মিথিলাযং ঘরং পরিগ্গহেত্ৰা ৰসমানন্তি অত্থো. আজঞ্ঞাতি কারণাকারণাজাননকা. যথা হংসা ৰিনীলকন্তি যথা ইমে হংসা মং ৰিনীলকং ৰহন্তি, এৰমেৰ ৰহন্তীতি.

হংসপোতকা ¶ তস্স ৰচনং সুত্ৰা কুজ্ঝিত্ৰা ‘‘ইধেৰ নং পাতেত্ৰা গমিস্সামা’’তি চিত্তং উপ্পাদেত্ৰাপি ‘‘এৰং কতে পিতা নো কিং ৰক্খতী’’তি গরহভযেন পিতু সন্তিকং নেত্ৰা তেন কতকিরিযং পিতু আচিক্খিংসু. অথ নং পিতা কুজ্ঝিত্ৰা ‘‘কিং ত্ৰং মম পুত্তেহি অধিকতরোসি, যো মম পুত্তে অভিভৰিত্ৰা রথে যুত্তসিন্ধৰে ৰিয করোসি, অত্তনো পমাণং ন জানাসি. ইমং ঠানং তৰ অগোচরো, অত্তনো মাতু ৰসনট্ঠানমেৰ গচ্ছাহী’’তি তজ্জেত্ৰা দুতিযং গাথমাহ –

২০.

‘‘ৰিনীল দুগ্গং ভজসি, অভূমিং তাত সেৰসি;

গামন্তকানি সেৰস্সু, এতং মাতালযং তৰা’’তি.

তত্থ ৰিনীলাতি তং নামেনালপতি. দুগ্গং ভজসীতি ইমেসং ৰসেন গিরিদুগ্গং ভজসি. অভূমিং, তাত, সেৰসীতি, তাত, গিরিৰিসমং নাম তৰ অভূমি ¶ , তং সেৰসি উপগচ্ছসি. এতং মাতালযং তৰাতি এতং গামন্তং উক্কারট্ঠানং আমকসুসানট্ঠানঞ্চ তৰ মাতু আলযং গেহং ৰসনট্ঠানং, তত্থ গচ্ছাহীতি. এৰং তং তজ্জেত্ৰা ‘‘গচ্ছথ, নং মিথিলনগরস্স উক্কারভূমিযঞ্ঞেৰ ওতারেত্ৰা এথা’’তি পুত্তে আণাপেসি, তে তথা অকংসু.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা ৰিনীলকো দেৰদত্তো অহোসি, দ্ৰে হংসপোতকা দ্ৰে অগ্গসাৰকা অহেসুং, পিতা আনন্দো অহোসি, ৰিদেহরাজা পন অহমেৰ অহোসি’’ন্তি.

ৰিনীলজাতকৰণ্ণনা দসমা.

দল়্হৰগ্গো পঠমো.

তস্সুদ্দানং –

রাজোৰাদঞ্চ সিঙ্গালং, সূকরং উরগং ভগ্গং;

অলীনচিত্তগুণঞ্চ, সুহনু মোরৰিনীলং.

২. সন্থৰৰগ্গো

[১৬১] ১. ইন্দসমানগোত্তজাতকৰণ্ণনা

ন ¶ ¶ সন্থৰং কাপুরিসেন কযিরাতি ইদং সত্থা জেতৰনে ৰিহরন্তো একং দুব্বচজাতিকং আরব্ভ কথেসি. তস্স ৰত্থু নৰকনিপাতে গিজ্ঝজাতকে (জা. ১.৯.১ আদযো) আৰিভৰিস্সতি. সত্থা পন তং ভিক্খুং ‘‘পুব্বেপি ত্ৰং, ভিক্খু, দুব্বচতায পণ্ডিতানং ৰচনং অকত্ৰা মত্তহত্থিপাদেহি সঞ্চুণ্ণিতো’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো ব্রাহ্মণকুলে নিব্বত্তিত্ৰা ৰুড্ঢিপ্পত্তো ঘরাৰাসং পহায ইসিপব্বজ্জং পব্বজিত্ৰা পঞ্চন্নং ইসিসতানং গণসত্থা হুত্ৰা হিমৰন্তপদেসে ৰাসং কপ্পেসি. তদা তেসু তাপসেসু ইন্দসমানগোত্তো নামেকো তাপসো ¶ অহোসি দুব্বচো অনোৰাদকো. সো একং হত্থিপোতকং পোসেসি. বোধিসত্তো সুত্ৰা তং পক্কোসিত্ৰা ‘‘সচ্চং কির ত্ৰং হত্থিপোতকং পোসেসী’’তি পুচ্ছি. ‘‘সচ্চং, আচরিয, মতমাতিকং একং হত্থিপোতকং পোসেমী’’তি. ‘‘হত্থিনো নাম ৰুড্ঢিপ্পত্তা পোসকেযেৰ মারেন্তি, মা তং পোসেহী’’তি. ‘‘তেন ৰিনা ৰত্তিতুং ন সক্কোমি আচরিযা’’তি. ‘‘তেন হি পঞ্ঞাযিস্সসী’’তি. সো তেন পোসিযমানো অপরভাগে মহাসরীরো অহোসি.

অথেকস্মিং কালে তে ইসযো ৰনমূলফলাফলত্থায দূরং গন্ত্ৰা তত্থেৰ কতিপাহং ৰসিংসু. হত্থীপি অগ্গদক্খিণৰাতে পভিন্নমদো হুত্ৰা তস্স পণ্ণসালং ৰিদ্ধংসেত্ৰা পানীযঘটং ভিন্দিত্ৰা পাসাণফলকং খিপিত্ৰা আলম্বনফলকং লুঞ্চিত্ৰা ‘‘তং তাপসং মারেত্ৰাৰ গমিস্সামী’’তি একং গহনট্ঠানং পৰিসিত্ৰা তস্স আগমনমগ্গং ওলোকেন্তো অট্ঠাসি. ইন্দসমানগোত্তো তস্স গোচরং ¶ গহেত্ৰা সব্বেসং পুরতোৰ আগচ্ছন্তো তং দিস্ৰা পকতিসঞ্ঞাযেৰস্স সন্তিকং অগমাসি. অথ নং সো হত্থী গহনট্ঠানা নিক্খমিত্ৰা সোণ্ডায পরামসিত্ৰা ভূমিযং পাতেত্ৰা সীসং পাদেন অক্কমিত্ৰা জীৰিতক্খযং পাপেত্ৰা মদ্দিত্ৰা কোঞ্চনাদং কত্ৰা অরঞ্ঞং পাৰিসি. সেসতাপসা তং পৰত্তিং বোধিসত্তস্স আরোচেসুং ¶ . বোধিসত্তো ‘‘কাপুরিসেহি নাম সদ্ধিং সংসগ্গো ন কাতব্বো’’তি ৰত্ৰা ইমা গাথা আহ –

২১.

‘‘ন সন্থৰং কাপুরিসেন কযিরা, অরিযো অনরিযেন পজানমত্থং;

চিরানুৰুত্থোপি করোতি পাপং, গজো যথা ইন্দসমানগোত্তং.

২২.

‘‘যং ত্ৰেৰ জঞ্ঞা সদিসো মমন্তি, সীলেন পঞ্ঞায সুতেন চাপি;

তেনেৰ মেত্তিং কযিরাথ সদ্ধিং, সুখো হৰে সপ্পুরিসেন সঙ্গমো’’তি.

তত্থ ন সন্থৰং কাপুরিসেন কযিরাতি কুচ্ছিতেন কোধপুরিসেন সদ্ধিং তণ্হাসন্থৰং ৰা মিত্তসন্থৰং ৰা ন কযিরাথ. অরিযো অনরিযেন পজানমত্থন্তি ¶ অরিযোতি চত্তারো অরিযা আচারঅরিযো লিঙ্গঅরিযো দস্সনঅরিযো পটিৰেধঅরিযোতি. তেসু আচারঅরিযো ইধ অধিপ্পেতো. সো পজানমত্থং অত্থং পজানন্তো অত্থানত্থকুসলো আচারে ঠিতো অরিযপুগ্গলো অনরিযেন নিল্লজ্জেন দুস্সীলেন সদ্ধিং সন্থৰং ন করেয্যাতি অত্থো. কিং কারণা? চিরানুৰুত্থোপি করোতি পাপন্তি, যস্মা অনরিযো চিরং একতো অনুৰুত্থোপি তং একতো নিৰাসং অগণেত্ৰা করোতি পাপং লামককম্মং করোতিযেৰ. যথা কিং? গজো যথা ইন্দসমানগোত্তন্তি, যথা সো গজো ইন্দসমানগোত্তং মারেন্তো পাপং অকাসীতি অত্থো. যং ত্ৰেৰ জঞ্ঞা সদিসো মমন্তিআদীসু যং ত্ৰেৰ পুগ্গলং ‘‘অযং মম সীলাদীহি সদিসো’’তি জানেয্য, তেনেৰ সদ্ধিং মেত্তিং কযিরাথ, সপ্পুরিসেন সদ্ধিং সমাগমো সুখাৰহোতি.

এৰং ¶ বোধিসত্তো ‘‘অনোৰাদকেন নাম ন ভৰিতব্বং, সুসিক্খিতেন ভৰিতুং ৰট্টতী’’তি ইসিগণং ওৰদিত্ৰা ইন্দসমানগোত্তস্স সরীরকিচ্চং কারেত্ৰা ব্রহ্মৰিহারে ভাৰেত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা ইন্দসমানগোত্তো অযং দুব্বচো অহোসি, গণসত্থা পন অহমেৰ অহোসি’’ন্তি.

ইন্দসমানগোত্তজাতকৰণ্ণনা পঠমা.

[১৬২] ২. সন্থৰজাতকৰণ্ণনা

ন ¶ সন্থৰস্মা পরমত্থি পাপিযোতি ইদং সত্থা জেতৰনে ৰিহরন্তো অগ্গিজুহনং আরব্ভ কথেসি. ৰত্থু হেট্ঠা নঙ্গুট্ঠজাতকে (জা. ১.১.১৪৪ আদযো) কথিতসদিসমেৰ. ভিক্খূ তে অগ্গিং জুহন্তে দিস্ৰা ‘‘ভন্তে, জটিলা নানপ্পকারং মিচ্ছাতপং করোন্তি, অত্থি নু খো এত্থ ৰুড্ঢী’’তি ভগৰন্তং পুচ্ছিংসু. ‘‘ন, ভিক্খৰে, এত্থকাচি ৰুড্ঢি নাম অত্থি, পোরাণকপণ্ডিতাপি অগ্গিজুহনে ৰুড্ঢি অত্থীতি সঞ্ঞায চিরং অগ্গিং জুহিত্ৰা তস্মিং কম্মে অৰুড্ঢিমেৰ দিস্ৰা ¶ অগ্গিং উদকেন নিব্বাপেত্ৰা সাখাদীহি পোথেত্ৰা পুন নিৰত্তিত্ৰাপি ন ওলোকেসু’’ন্তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো ব্রাহ্মণকুলে নিব্বত্তি. মাতাপিতরো তস্স জাতগ্গিং গহেত্ৰা তং সোল়সৰস্সুদ্দেসে ঠিতং আহংসু – ‘‘কিং, তাত, জাতগ্গিং গহেত্ৰা অরঞ্ঞে অগ্গিং পরিচরিস্সসি, উদাহু তযো ৰেদে উগ্গণ্হিত্ৰা কুটুম্বং সণ্ঠপেত্ৰা ঘরাৰাসং ৰসিস্সসী’’তি. সো ‘‘ন মে ঘরাৰাসেন অত্থো, অরঞ্ঞে অগ্গিং পরিচরিত্ৰা ব্রহ্মলোকপরাযণো ভৰিস্সামী’’তি জাতগ্গিং গহেত্ৰা মাতাপিতরো ৰন্দিত্ৰা অরঞ্ঞং পৰিসিত্ৰা পণ্ণসালায ৰাসং কপ্পেত্ৰা অগ্গিং পরিচরি. সো একদিৰসং নিমন্তিতট্ঠানং গন্ত্ৰা সপ্পিনা পাযাসং লভিত্ৰা ‘‘ইমং পাযাসং মহাব্রহ্মুনো যজিস্সামী’’তি তং পাযাসং ¶ আহরিত্ৰা অগ্গিং জালেত্ৰা ‘‘অগ্গিং তাৰ ভৰন্তং সপ্পিযুত্তং পাযাসং পাযেমী’’তি পাযাসং অগ্গিম্হি পক্খিপি. বহুসিনেহে পাযাসে অগ্গিম্হি পক্খিত্তমত্তেযেৰ অগ্গি জলিত্ৰা পচ্চুগ্গতাহি অচ্চীহি পণ্ণসালং ঝাপেসি. ব্রাহ্মণো ভীততসিতো পলাযিত্ৰা বহি ঠত্ৰা ‘‘কাপুরিসেহি নাম সন্থৰো ন কাতব্বো, ইদানি মে ইমিনা অগ্গিনা কিচ্ছেন কতা পণ্ণসালা ঝাপিতা’’তি ৰত্ৰা পঠমং গাথমাহ –

২৩.

‘‘ন সন্থৰস্মা পরমত্থি পাপিযো, যো সন্থৰো কাপুরিসেন হোতি;

সন্তপ্পিতো সপ্পিনা পাযসেন, কিচ্ছাকতং পণ্ণকুটিং অদয্হী’’তি.

তত্থ ন সন্থৰস্মাতি তণ্হাসন্থৰাপি চ মিত্তসন্থৰাপি চাতি দুৰিধাপি এতস্মা সন্থৰা পরং উত্তরি অঞ্ঞং পাপতরং নত্থি, লামকতরং নাম নত্থীতি অত্থো. যো সন্থৰো কাপুরিসেনাতি যো পাপকেন কাপুরিসেন সদ্ধিং দুৰিধোপি সন্থৰো, ততো পাপতরং অঞ্ঞং নত্থি. কস্মা? সন্তপ্পিতো ¶ …পে…অদয্হীতি, যস্মা সপ্পিনা চ পাযাসেন চ সন্তপ্পিতোপি অযং অগ্গি মযা কিচ্ছেন কতং পণ্ণসালং ঝাপেসীতি অত্থো.

সো এৰং ৰত্ৰা ‘‘ন মে তযা মিত্তদুব্ভিনা অত্থো’’তি তং অগ্গিং উদকেন নিব্বাপেত্ৰা সাখাহি পোথেত্ৰা অন্তোহিমৰন্তং পৰিসিত্ৰা একং সামমিগিং সীহস্স চ ব্যগ্ঘস্স চ দীপিনো চ মুখং লেহন্তিং দিস্ৰা ¶ ‘‘সপ্পুরিসেহি সদ্ধিং সন্থৰা পরং সেয্যো নাম নত্থী’’তি চিন্তেত্ৰা দুতিযং গাথমাহ –

২৪.

‘‘ন সন্থৰস্মা পরমত্থি সেয্যো, যো সন্থৰো সপ্পুরিসেন হোতি;

সীহস্স ¶ ব্যগ্ঘস্স চ দীপিনো চ, সামা মুখং লেহতি সন্থৰেনা’’তি.

তত্থ সামা মুখং লেহতি সন্থৰেনাতি সামা নাম মিগী ইমেসং তিণ্ণং জনানং সন্থৰেন সিনেহেন মুখং লেহতীতি.

এৰং ৰত্ৰা বোধিসত্তো অন্তোহিমৰন্তং পৰিসিত্ৰা ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা জীৰিতপরিযোসানে ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তেন সমযেন তাপসো অহমেৰ অহোসি’’ন্তি.

সন্থৰজাতকৰণ্ণনা দুতিযা.

[১৬৩] ৩. সুসীমজাতকৰণ্ণনা

কাল়া মিগা সেতদন্তা তৰীমেতি ইদং সত্থা জেতৰনে ৰিহরন্তো ছন্দকদানং আরব্ভ কথেসি. সাৰত্থিযঞ্হি কদাচি একমেৰ কুলং বুদ্ধপ্পমুখস্স ভিক্খুসঙ্ঘস্স দানং দেতি, কদাচি অঞ্ঞতিত্থিযানং দেতি, কদাচি গণবন্ধনেন বহূ একতো হুত্ৰা দেন্তি, কদাচি ৰীথিসভাগেন, কদাচি সকলনগরৰাসিনো ছন্দকং সংহরিত্ৰা দানং দেন্তি. ইমস্মিং পন কালে সকলনগরৰাসিনো ছন্দকং সংহরিত্ৰা সব্বপরিক্খারদানং সজ্জেত্ৰা দ্ৰে কোট্ঠাসা হুত্ৰা একচ্চে ‘‘ইমং সব্বপরিক্খারদানং অঞ্ঞতিত্থিযানং দস্সামা’’তি আহংসু, একচ্চে ‘‘বুদ্ধপ্পমুখস্স ভিক্খুসঙ্ঘস্সা’’তি. এৰং পুনপ্পুনং কথায ৰত্তমানায অঞ্ঞতিত্থিযসাৰকেহি অঞ্ঞতিত্থিযানঞ্ঞেৰ ¶ , বুদ্ধসাৰকেহি ‘‘‘বুদ্ধপ্পমুখস্স ভিক্খুসঙ্ঘস্সেৰা’তি ৰুত্তে সম্বহুলং করিসামা’’তি সম্বহুলায কথায ‘‘বুদ্ধপ্পমুখস্স ভিক্খুসঙ্ঘস্স দস্সামা’’তি ৰদন্তাযেৰ বহুকা জাতা, তেসঞ্ঞেৰ কথা পতিট্ঠাসি ¶ . অঞ্ঞতিত্থিযসাৰকা বুদ্ধানং দাতব্বদানস্স অন্তরাযং কাতুং নাসক্খিংসু. নাগরা বুদ্ধপ্পমুখং ভিক্খুসঙ্ঘং নিমন্তেত্ৰা সত্তাহং মহাদানং পৰত্তেত্ৰা সত্তমে দিৰসে সব্বপরিক্খারে অদংসু. সত্থা অনুমোদনং কত্ৰা মহাজনং মগ্গফলেহি ¶ পবোধেত্ৰা জেতৰনৰিহারমেৰ গন্ত্ৰা ভিক্খুসঙ্ঘেন ৰত্তে দস্সিতে গন্ধকুটিপ্পমুখে ঠত্ৰা সুগতোৰাদং দত্ৰা গন্ধকুটিং পাৰিসি.

সাযন্হসমযে ভিক্খূ ধম্মসভাযং সন্নিপতিত্ৰা কথং সমুট্ঠাপেসুং – ‘‘আৰুসো, অঞ্ঞতিত্থিযসাৰকা বুদ্ধানং দাতব্বদানস্স অন্তরাযকরণত্থায ৰাযমন্তাপি অন্তরাযং কাতুং নাসক্খিংসু, তং সব্বপরিক্খারদানং বুদ্ধানংযেৰ পাদমূলং আগতং, অহো বুদ্ধবলং নাম মহন্ত’’ন্তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, এতে অঞ্ঞতিত্থিযসাৰকা ইদানেৰ ময্হং দাতব্বদানস্স অন্তরাযকরণত্থায ৰাযমন্তি, পুব্বেপি ৰাযমিংসু, সো পন পরিক্খারো সব্বকালেপি মমেৰ পাদমূলং আগচ্ছতী’’তি ৰত্ৰা অতীতং আহরি.

অতীতে বারাণসিযং সুসীমো নাম রাজা অহোসি. তদা বোধিসত্তো তস্স পুরোহিতস্স ব্রাহ্মণিযা কুচ্ছিম্হি পটিসন্ধিং গণ্হি, তস্স সোল়সৰস্সিককালে পিতা কালমকাসি. সো পন ধরমানকালে রঞ্ঞো হত্থিমঙ্গলকারকো অহোসি. হত্থীনং মঙ্গলকরণট্ঠানে আভতউপকরণভণ্ডঞ্চ হত্থালঙ্কারঞ্চ সব্বং সোযেৰ অলত্থ. এৰমস্স একেকস্মিং মঙ্গলে কোটিমত্তং ধনং উপ্পজ্জতি. অথ তস্মিং কালে হত্থিমঙ্গলছণো সম্পাপুণি. সেসা ব্রাহ্মণা রাজানং উপসঙ্কমিত্ৰা ‘‘মহারাজ, হত্থিমঙ্গলছণো সম্পত্তো, মঙ্গলং কাতুং ৰট্টতি. পুরোহিতব্রাহ্মণস্স পন পুত্তো অতিদহরো, নেৰ তযো ৰেদে জানাতি, ন হত্থিসুত্তং, মযং হত্থিমঙ্গলং করিস্সামা’’তি আহংসু. রাজা ‘‘সাধূ’’তি সম্পটিচ্ছি. ব্রাহ্মণা পুরোহিতপুত্তস্স হত্থিমঙ্গলং কাতুং অদত্ৰা ‘‘হত্থিমঙ্গলং কত্ৰা মযং ধনং গণ্হিস্সামা’’তি হট্ঠতুট্ঠা ৰিচরন্তি. অথ ‘‘চতুত্থে দিৰসে হত্থিমঙ্গলং ভৰিস্সতী’’তি বোধিসত্তস্স মাতা ¶ তং পৰত্তিং সুত্ৰা ‘‘হত্থিমঙ্গলকরণং নাম যাৰ সত্তমা কুলপরিৰট্টা অম্হাকং ৰংসো, ৰংসো চ নো ওসক্কিস্সতি, ধনা চ পরিহাযিস্সামা’’তি অনুসোচমানা পরোদি.

বোধিসত্তো ¶ ¶ ‘‘কস্মা, অম্ম, রোদসী’’তি ৰত্ৰা তং কারণং সুত্ৰা ‘‘ননু, অম্ম, অহং মঙ্গলং করিস্সামী’’তি আহ. ‘‘তাত, ত্ৰং নেৰ তযো ৰেদে জানাসি, ন হত্থিসুত্তং, কথং মঙ্গলং করিস্সসী’’তি. ‘‘অম্ম, কদা পন হত্থিমঙ্গলং করিস্সতী’’তি? ‘‘ইতো চতুত্থে দিৰসে, তাতা’’তি. ‘‘অম্ম, তযো পন ৰেদে পগুণে কত্ৰা হত্থিসুত্তং জাননকআচরিযো কহং ৰসতী’’তি? ‘‘তাত, এৰরূপো দিসাপামোক্খো আচরিযো ইতো ৰীসযোজনসতমত্থকে গন্ধাররট্ঠে তক্কসিলাযং ৰসতী’’তি. ‘‘অম্ম, অম্হাকং ৰংসং ন নাসেস্সামি, অহং স্ৰে একদিৰসেনেৰ তক্কসিলং গন্ত্ৰা একরত্তেনেৰ তযো ৰেদে চ হত্থিসুত্তঞ্চ উগ্গণ্হিত্ৰা পুনদিৰসে আগন্ত্ৰা চতুত্থে দিৰসে হত্থিমঙ্গলং করিস্সামি, মা রোদী’’তি মাতরং সমস্সাসেত্ৰা পুনদিৰসে বোধিসত্তো পাতোৰ ভুঞ্জিত্ৰা এককোৰ নিক্খমিত্ৰা একদিৰসেনেৰ তক্কসিলং গন্ত্ৰা আচরিযং ৰন্দিত্ৰা একমন্তং নিসীদি.

অথ নং আচরিযো ‘‘কুতো আগতোসি, তাতা’’তি পুচ্ছি. ‘‘বারাণসিতো, আচরিযা’’তি. ‘‘কেনত্থেনা’’তি? ‘‘তুম্হাকং সন্তিকে তযো ৰেদে চ হত্থিসুত্তঞ্চ উগ্গণ্হনত্থাযা’’তি. ‘‘সাধু, তাত, উগ্গণ্হা’’তি. বোধিসত্তো ‘‘আচরিয, ময্হং কম্মং অচ্চাযিক’’ন্তি সব্বং পৰত্তিং আরোচেত্ৰা ‘‘অহং একদিৰসেনেৰ ৰীসযোজনসতং আগতো, অজ্জেৰেকরত্তিং ময্হমেৰ ওকাসং করোথ, ইতো ততিযদিৰসে হত্থিমঙ্গলং ভৰিস্সতি, অহং একেনেৰ উদ্দেসমগ্গেন সব্বং উগ্গণ্হিস্সামী’’তি ৰত্ৰা আচরিযং ওকাসং কারেত্ৰা আচরিযস্স ভুত্তকালে সযং ভুঞ্জিত্ৰা আচরিযস্স পাদে ধোৰিত্ৰা সহস্সত্থৰিকং পুরতো ঠপেত্ৰা ¶ ৰন্দিত্ৰা একমন্তং নিসিন্নো পরিযত্তিং পট্ঠপেত্ৰা অরুণে উগ্গচ্ছন্তে তযো ৰেদে চ হত্থিসুত্তঞ্চ নিট্ঠপেত্ৰা ‘‘অঞ্ঞোপি অত্থি, আচরিযা’’তি পুচ্ছিত্ৰা ‘‘নত্থি তাত, সব্বং নিট্ঠিত’’ন্তি ৰুত্তে ‘‘আচরিয, ইমস্মিং গন্থে এত্তকং পদপচ্চাভট্ঠং, এত্তকং সজ্ঝাযসম্মোহট্ঠানং, ইতো পট্ঠায তুম্হে অন্তেৰাসিকে এৰং ৰাচেয্যাথা’’তি আচরিযস্স সিপ্পং সোধেত্ৰা পাতোৰ ভুঞ্জিত্ৰা আচরিযং ৰন্দিত্ৰা একদিৰসেনেৰ বারাণসিং পচ্চাগন্ত্ৰা মাতরং ৰন্দিত্ৰা ‘‘উগ্গহিতং তে, তাত, সিপ্প’’ন্তি ৰুত্তে ‘‘আম, অম্মা’’তি ৰত্ৰা মাতরং পরিতোসেসি.

পুনদিৰসে ¶ হত্থিমঙ্গলছণো পটিযাদিযিত্থ. সতমত্তে হত্থিসোণ্ডালঙ্কারে চ সুৰণ্ণদ্ধজে হেমজালসঞ্ছন্নে কত্ৰা ঠপেসুং, রাজঙ্গণং অলঙ্করিংসু. ব্রাহ্মণা ‘‘মযং হত্থিমঙ্গলং করিস্সাম, মযং করিস্সামা’’তি মণ্ডিতপসাধিতা অট্ঠংসু. সুসীমোপি রাজা সব্বালঙ্কারপটিমণ্ডিতো উপকরণভণ্ডং গাহাপেত্ৰা মঙ্গলট্ঠানং অগমাসি. বোধিসত্তোপি কুমারপরিহারেন অলঙ্কতো অত্তনো পরিসায পুরক্খতপরিৰারিতো রঞ্ঞো সন্তিকং গন্ত্ৰা ‘‘সচ্চং কির, মহারাজ, তুম্হে অম্হাকং ¶ ৰংসঞ্চ অত্তনো ৰংসঞ্চ নাসেত্ৰা ‘অঞ্ঞেহি ব্রাহ্মণেহি হত্থিমঙ্গলং কারেত্ৰা হত্থালঙ্কারঞ্চ উপকরণানি চ তেসং দস্সামা’তি অৰচুত্থা’’তি ৰত্ৰা পঠমং গাথমাহ –

২৫.

‘‘কাল়া মিগা সেতদন্তা তৰীমে, পরোসতং হেমজালাভিছন্না;

তে তে দদামীতি সুসীম ব্রূসি, অনুস্সরং পেত্তিপিতামহান’’ন্তি.

তত্থ তে তে দদামীতি সুসীম ব্রূসীতি তে এতে তৰ সন্তকে ‘‘কাল়া মিগা সেতদন্তা’’তি এৰং গতে পরোসতং সব্বালঙ্কারপটিমণ্ডিতে ¶ হত্থী অঞ্ঞেসং ব্রাহ্মণানং দদামীতি সচ্চং কির, ভো সুসীম, এৰং ব্রূসীতি অত্থো. অনুস্সরং পেত্তিপিতামহানন্তি অম্হাকঞ্চ অত্তনো চ ৰংসে পিতুপিতামহানং আচিণ্ণং সরন্তোযেৰ. ইদং ৰুত্তং হোতি – মহারাজ, যাৰ সত্তমকুলপরিৰট্টা তুম্হাকং পেত্তিপিতামহানং অম্হাকং পেত্তিপিতামহা চ হত্থিমঙ্গলং করোন্তি, সো ত্ৰং এৰং অনুস্সরন্তোপি অম্হাকঞ্চ অত্তনো চ ৰংসং নাসেত্ৰা সচ্চং কির এৰং ব্রূসীতি.

সুসীমো রাজা বোধিসত্তস্স ৰচনং সুত্ৰা দুতিযং গাথমাহ –

২৬.

‘‘কাল়া মিগা সেতদন্তা মমীমে, পরোসতং হেমজালাভিছন্না;

তে তে দদামীতি ৰদামি মাণৰ, অনুস্সরং পেত্তিপিতামহান’’ন্তি.

তত্থ ¶ তে তে দদামীতি তে এতে হত্থী অঞ্ঞেসং ব্রাহ্মণানং দদামীতি সচ্চমেৰ মাণৰ ৰদামি, নেৰ হত্থী ব্রাহ্মণানং দদামীতি অত্থো. অনুস্সরন্তি পেত্তিপিতামহানং কিরিযং অনুস্সরামিযেৰ, নো নানুস্সরামি, অম্হাকং পেত্তিপিতামহানং হত্থিমঙ্গলং তুম্হাকং পেত্তিপিতামহা করোন্তীতি পন অনুস্সরন্তোপি এৰং ৰদামিযেৰাতি অধিপ্পাযেনেৰমাহ.

অথ নং বোধিসত্তো এতদৰোচ – ‘‘মহারাজ, অম্হাকঞ্চ অত্তনো চ ৰংসং অনুস্সরন্তোযেৰ কস্মা মং ঠপেত্ৰা অঞ্ঞেহি হত্থিমঙ্গলং কারাপেথা’’তি. ‘‘ত্ৰং কির, তাত, তযো ৰেদে হত্থিসুত্তঞ্চ ন জানাসী’’তি ময্হং আরোচেসুং, তেনাহং অঞ্ঞেহি ব্রাহ্মণেহি কারাপেমীতি. ‘‘তেন হি, মহারাজ, এত্তকেসু ব্রাহ্মণেসু একব্রাহ্মণোপি তীসু ৰেদেসু ৰা হত্থিসুত্তেসু ৰা একদেসম্পি যদি মযা সদ্ধিং কথেতুং সমত্তো অত্থি, উট্ঠহতু, তযোপি ৰেদে হত্থিসুত্তঞ্চ সদ্ধিং হত্থিমঙ্গলকরণেন মং ঠপেত্ৰা অঞ্ঞো সকলজম্বুদীপেপি জানন্তো নাম ¶ নত্থী’’তি ¶ সীহনাদং নদি. একব্রাহ্মণোপি তস্স পটিসত্তু হুত্ৰা উট্ঠাতুং নাসক্খি. বোধিসত্তো অত্তনো কুলৰংসং পতিট্ঠাপেত্ৰা মঙ্গলং কত্ৰা বহুং ধনং আদায অত্তনো নিৰেসনং অগমাসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে কেচি সোতাপন্না অহেসুং, কেচি সকদাগামিনো, কেচি অনাগামিনো, কেচি অরহত্তং পাপুণিংসু. ‘‘তদা মাতা মহামাযা অহোসি, পিতা সুদ্ধোদনমহারাজা, সুসীমো রাজা আনন্দো, দিসাপামোক্খো আচরিযো সারিপুত্তো, মাণৰো পন অহমেৰ অহোসি’’ন্তি.

সুসীমজাতকৰণ্ণনা ততিযা.

[১৬৪] ৪. গিজ্ঝজাতকৰণ্ণনা

যং ¶ নু গিজ্ঝো যোজনসতন্তি ইদং সত্থা জেতৰনে ৰিহরন্তো একং মাতুপোসকভিক্খুং আরব্ভ কথেসি. ৰত্থু সামজাতকে (জা. ২.২২.২৯৬ আদযো) আৰিভৰিস্সতি. সত্থা পন তং ভিক্খুং ‘‘সচ্চং কির ত্ৰং, ভিক্খু, গিহী পোসেসী’’তি পুচ্ছিত্ৰা ‘‘সচ্চ’’ন্তি ৰুত্তে ‘‘কিং পন তে হোন্তী’’তি পুচ্ছিত্ৰা ‘‘মাতাপিতরো মে, ভন্তে’’তি ৰুত্তে ‘‘সাধু সাধূ’’তি তস্স সাধুকারং দত্ৰা ‘‘মা, ভিক্খৰে, ইমং ভিক্খুং উজ্ঝাযিত্থ, পোরাণকপণ্ডিতাপি গুণৰসেন অঞ্ঞাতকানম্পি উপকারং অকংসু, ইমস্স পন মাতাপিতূনং উপকারকরণং ভারোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো গিজ্ঝকূটপব্বতে গিজ্ঝযোনিযং নিব্বত্তিত্ৰা মাতাপিতরো পোসেতি. অথেকস্মিং কালে মহতী ৰাতৰুট্ঠি অহোসি. গিজ্ঝা ৰাতৰুট্ঠিং সহিতুং অসক্কোন্তা সীতভযেন বারাণসিং গন্ত্ৰা পাকারসমীপে চ পরিখাসমীপে চ সীতেন কম্পমানা নিসীদিংসু. তদা বারাণসিসেট্ঠি নগরা নিক্খমিত্ৰা ন্হাযিতুং গচ্ছন্তো তে গিজ্ঝে কিলমন্তে দিস্ৰা একস্মিং অনোৰস্সকট্ঠানে সন্নিপাতেত্ৰা অগ্গিং কারাপেত্ৰা গোসুসানং পেসেত্ৰা গোমংসং আহরাপেত্ৰা তেসং দাপেত্ৰা আরক্খং ঠপেসি. গিজ্ঝা ৰূপসন্তায ৰাতৰুট্ঠিযা ¶ কল্লসরীরা হুত্ৰা পব্বতমেৰ অগমংসু. তে তত্থেৰ সন্নিপতিত্ৰা এৰং মন্তযিংসু – ‘‘বারাণসিসেট্ঠিনা অম্হাকং উপকারো কতো, কতূপকারস্স চ নাম পচ্চুপকারং কাতুং ¶ ৰট্টতি, তস্মা ইতো পট্ঠায তুম্হেসু যো যং ৰত্থং ৰা আভরণং ৰা লভতি, তেন তং বারাণসিসেট্ঠিস্স গেহে আকাসঙ্গণে পাতেতব্ব’’ন্তি.

ততো পট্ঠায গিজ্ঝা মনুস্সানং ৰত্থাভরণানি আতপে সুক্খাপেন্তানং পমাদং ওলোকেত্ৰা সেনা ৰিয মংসপেসিং সহসা গহেত্ৰা বারাণসিসেট্ঠিস্স গেহে আকাসঙ্গণে পাতেন্তি. সো গিজ্ঝানং আহরণভাৰং ঞত্ৰা সব্বানি তানি ৰিসুংযেৰ ঠপেসি. ‘‘গিজ্ঝা নগরং ৰিলুম্পন্তী’’তি রঞ্ঞো আরোচেসুং. রাজা ‘‘একং গিজ্ঝম্পি তাৰ গণ্হথ, সব্বং আহরাপেস্সামী’’তি তত্থ তত্থ পাসে চেৰ জালানি চ ওড্ডাপেসি. মাতুপোসকগিজ্ঝো ¶ পাসে বজ্ঝি, তং গহেত্ৰা ‘‘রঞ্ঞো দস্সেস্সামা’’তি নেন্তি. বারাণসিসেট্ঠি রাজুপট্ঠানং গচ্ছন্তো তে মনুস্সে গিজ্ঝং গহেত্ৰা গচ্ছন্তে দিস্ৰা ‘‘মা ইমং গিজ্ঝং বাধযিংসূ’’তি সদ্ধিঞ্ঞেৰ অগমাসি. গিজ্ঝং রঞ্ঞো দস্সেসুং. অথ নং রাজা পুচ্ছি – ‘‘তুম্হে নগরং ৰিলুম্পিত্ৰা ৰত্থাদীনি গণ্হথা’’তি. ‘‘আম, মহারাজা’’তি. ‘‘কস্স তানি দিন্নানী’’তি? ‘‘বারাণসিসেট্ঠিস্সা’’তি. ‘‘কিংকারণা’’তি? ‘‘অম্হাকং তেন জীৰিতং দ্ৰিন্নং, উপকারস্স নাম পচ্চুপকারং কাতুং ৰট্টতি, তস্মা অদম্হা’’তি. অথ নং রাজা ‘‘গিজ্ঝা কির যোজনসতমত্থকে ঠত্ৰা কুণপং পস্সন্তি, কস্মা ত্ৰং অত্তনো ওড্ডিতং পাসং ন পস্সসী’’তি ৰত্ৰা পঠমং গাথমাহ –

২৭.

‘‘যং নু গিজ্ঝো যোজনসতং, কুণপানি অৰেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসী’’তি.

তত্থ ¶ যন্তি নিপাতমত্তং, নূতি নামত্থে নিপাতো. গিজ্ঝো নাম যোজনসতং অতিক্কমিত্ৰা ঠিতানি কুণপানি অৰেক্খতি, পস্সতীতি অত্থো. আসজ্জাপীতি আসাদেত্ৰাপি, সম্পাপুণিত্ৰাপীতি অত্থো. ‘‘ত্ৰং অত্তনো অত্থায ওড্ডিতং জালঞ্চ পাসঞ্চ পত্ৰাপি কস্মা ন বুজ্ঝসী’’তি পুচ্ছি.

গিজ্ঝো তস্স ৰচনং সুত্ৰা দুতিযং গাথমাহ –

২৮.

‘‘যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতী’’তি.

তত্থ ¶ পরাভৰোতি ৰিনাসো. পোসোতি সত্তো.

গিজ্ঝস্স ৰচনং সুত্ৰা রাজা সেট্ঠিং পুচ্ছি – ‘‘সচ্চং কির, মহাসেট্ঠি, গিজ্ঝেহি তুম্হাকং গেহে ৰত্থাদীনি আভতানী’’তি. ‘‘সচ্চং, দেৰা’’তি. ‘‘কহং তানী’’তি? ‘‘দেৰ, মযা তানি সব্বানি ৰিসুং ঠপিতানি, যং যেসং সন্তকং, তং তেসং দস্সামি, ইমং গিজ্ঝং ৰিস্সজ্জেথা’’তি গিজ্ঝং ৰিস্সজ্জাপেত্ৰা মহাসেট্ঠিং সব্বেসং সন্তকানি দাপেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে মাতুপোসকভিক্খু সোতাপত্তিফলে পতিট্ঠহি ¶ . ‘‘তদা রাজা আনন্দো অহোসি, বারাণসিসেট্ঠি সারিপুত্তো, মাতুপোসকগিজ্ঝো পন অহমেৰ অহোসি’’ন্তি.

গিজ্ঝজাতকৰণ্ণনা চতুত্থা.

[১৬৫] ৫. নকুলজাতকৰণ্ণনা

সদ্ধিং কত্ৰা অমিত্তেনাতি ইদং সত্থা জেতৰনে ৰিহরন্তো সেণিভণ্ডনং আরব্ভ কথেসি. ৰত্থু হেট্ঠা উরগজাতকে (জা. ১.২.৭-৮) কথিতসদিসমেৰ. ইধাপি সত্থা ‘‘ন, ভিক্খৰে, ইমে দ্ৰে মহামত্তা ইদানেৰ মযা সমগ্গা কতা, পুব্বেপাহং ইমে সমগ্গে অকাসিংযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং গামকে ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং ¶ সব্বসিপ্পানি উগ্গহেত্ৰা ঘরাৰাসং পহায ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা উঞ্ছাচরিযায ৰনমূলফলাহারো হিমৰন্তপদেসে ৰাসং কপ্পেসি. তস্স চঙ্কমনকোটিযং একস্মিং ৰম্মিকে নকুলো, তস্সেৰ সন্তিকে একস্মিং রুক্খবিলে সপ্পো চ ৰাসং কপ্পেসি. তে উভোপি অহিনকুলা নিচ্চকালং কলহং করোন্তি. বোধিসত্তো তেসং কলহে আদীনৰঞ্চ মেত্তাভাৰনায চ আনিসংসং কথেত্ৰা ‘‘কলহং নাম অকত্ৰা সমগ্গৰাসং ৰসিতুং ৰট্টতী’’তি ওৰদিত্ৰা উভোপি তে সমগ্গে অকাসি. অথ সপ্পস্স বহিনিক্খন্তকালে নকুলো চঙ্কমনকোটিযং ৰম্মিকস্স বিলদ্ৰারে সীসং নীহরিত্ৰা মুখং ৰিৰরিত্ৰা নিপন্নো অস্সসন্তো পস্সসন্তো নিদ্দং উপগঞ্ছি. বোধিসত্তো তং তথা ¶ নিদ্দাযমানং দিস্ৰা ‘‘কিং নু খো তে নিস্সায ভযং উপ্পন্ন’’ন্তি পুচ্ছন্তো পঠমং গাথমাহ –

২৯.

‘‘সন্ধিং কত্ৰা অমিত্তেন, অণ্ডজেন জলাবুজ;

ৰিৰরিয দাঠং সেসি, কুতো তে ভযমাগত’’ন্তি.

তত্থ ¶ সন্ধিং কত্ৰাতি মিত্তভাৰং করিত্ৰা. অণ্ডজেনাতি অণ্ডকোসে নিব্বত্তেন নাগেন. জলাবুজাতি নকুলং আলপতি. সো হি জলাবুম্হি জাতত্তা ‘‘জলাবুজো’’তি ৰুচ্চতি. ৰিৰরিযাতি ৰিৰরিত্ৰা.

এৰং বোধিসত্তেন ৰুত্তো নকুলো ‘‘অয্য, পচ্চামিত্তো নাম ন অৰজানিতব্বো আসঙ্কিতব্বোযেৰা’’তি ৰত্ৰা দুতিযং গাথমাহ –

৩০.

‘‘সঙ্কেথেৰ অমিত্তস্মিং, মিত্তস্মিম্পি ন ৰিস্সসে;

অভযা ভযমুপ্পন্নং, অপি মূলানি কন্ততী’’তি.

তত্থ অভযা ভযমুপ্পন্নন্তি ন ইতো তে ভযমুপ্পন্নন্তি অভযো, কো সো? মিত্তো. যঞ্হি মিত্তস্মিম্পি ৰিস্সাসে সতি ততো ভযং উপ্পজ্জতি, তং মূলানিপি কন্ততি, মিত্তস্স সব্বরন্ধানং ৰিদিতত্তা মূলঘচ্চায সংৰত্ততীতি অত্থো.

অথ ¶ নং বোধিসত্তো ‘‘মা ভাযি, যথা সপ্পো তযি ন দুব্ভতি, এৰমহং করিস্সামি, ত্ৰং ইতো পট্ঠায তস্মিং আসঙ্কং মা করী’’তি ওৰদিত্ৰা চত্তারো ব্রহ্মৰিহারে ভাৰেত্ৰা ব্রহ্মলোকপরাযণো অহোসি. তেপি যথাকম্মং গতা.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সপ্পো চ নকুলো চ ইমে দ্ৰে মহামত্তা অহেসুং, তাপসো পন অহমেৰ অহোসি’’ন্তি.

নকুলজাতকৰণ্ণনা পঞ্চমা.

[১৬৬] ৬. উপসাল়কজাতকৰণ্ণনা

উপসাল়কনামানীতি ¶ ইদং সত্থা ৰেল়ুৰনে ৰিহরন্তো একং উপসাল়কং নাম সুসানসুদ্ধিকং ব্রাহ্মণং আরব্ভ কথেসি. সো কির অড্ঢো অহোসি মহদ্ধনো, দিট্ঠিগতিকত্তা পন ধুরৰিহারে ৰসন্তানম্পি বুদ্ধানং সঙ্গহং নাম ন অকাসি. পুত্তো পনস্স পণ্ডিতো অহোসি ঞাণসম্পন্নো. সো মহল্লককালে পুত্তং আহ – ‘‘মা খো মং, তাত, অঞ্ঞস্স ৰসলস্স ঝাপিতসুসানে ঝাপেহি, একস্মিং পন অনুচ্ছিট্ঠসুসানেযেৰ মং ¶ ঝাপেয্যাসী’’তি. ‘‘তাত, অহং তুম্হাকং ঝাপেতব্বযুত্তকং ঠানং ন জানামি, সাধু ৰত মং আদায গন্ত্ৰা ‘ইমস্মিং ঠানে মং ঝাপেয্যাসী’তি তুম্হেৰ আচিক্খথা’’তি. ব্রাহ্মণো ‘‘সাধু, তাতা’’তি তং আদায নগরা নিক্খমিত্ৰা গিজ্ঝকূটমত্থকং অভিরুহিত্ৰা ‘‘তাত, ইদং অঞ্ঞস্স ৰসলস্স অঝাপিতট্ঠানং, এত্থ মং ঝাপেয্যাসী’’তি ৰত্ৰা পুত্তেন সদ্ধিং পব্বতা ওতরিতুং আরভি.

সত্থা পন তং দিৰসং পচ্চূসকালে বোধনেয্যবন্ধৰে ওলোকেন্তো তেসং পিতাপুত্তানং সোতাপত্তিমগ্গস্স উপনিস্সযং অদ্দস. তস্মা মগ্গং গহেত্ৰা ঠিতলুদ্দকো ৰিয পব্বতপাদং গন্ত্ৰা তেসং পব্বতমত্থকা ওতরন্তানং আগমযমানো নিসীদি, তে ওতরন্তা সত্থারং অদ্দসংসু. সত্থা পটিসন্থারং করোন্তো ‘‘কহং গমিস্সথ ব্রাহ্মণা’’তি পুচ্ছি. মাণৰো তমত্থং আরোচেসি. সত্থা ‘‘তেন হি এহি, তৰ পিতরা আচিক্খিতট্ঠানং গচ্ছামা’’তি উভো পিতাপুত্তে গহেত্ৰা পব্বতমত্থকং আরুয্হ ‘‘কতরং ঠান’’ন্তি পুচ্ছি. মাণৰো ‘‘ইমেসং তিণ্ণং পব্বতানং অন্তরং আচিক্খি, ভন্তে’’তি ¶ আহ. সত্থা ‘‘ন খো, মাণৰ, তৰ পিতা ইদানেৰ সুসানসুদ্ধিকো, পুব্বেপি সুসানসুদ্ধিকোৰ, ন চেস ইদানেৰ ‘ইমস্মিং ঠানে মং ঝাপেয্যাসী’তি তৰ আচিক্খতি, পুব্বেপি ইমস্মিংযেৰ ঠানে অত্তনো ঝাপিতভাৰং আচিক্খী’’তি ৰত্ৰা তেন যাচিতো অতীতং আহরি.

অতীতে ইমস্মিঞ্ঞেৰ রাজগহে অযমেৰ উপসাল়কো ব্রাহ্মণো অযমেৰস্স পুত্তো অহোসি. তদা বোধিসত্তো মগধরট্ঠে ব্রাহ্মণকুলে নিব্বত্তিত্ৰা পরিপুণ্ণসিপ্পো ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা ঝানকীল়ং কীল়ন্তো হিমৰন্তপদেসে চিরং ৰসিত্ৰা লোণম্বিলসেৰনত্থায গিজ্ঝকূটে পণ্ণসালাযং ৰিহাসি. তদা সো ব্রাহ্মণো ইমিনাৰ নিযামেন পুত্তং ৰত্ৰা পুত্তেন ‘‘তুম্হেযেৰ মে তথারূপং ঠানং আচিক্খথা’’তি ৰুত্তে ‘‘ইদমেৰ ঠান’’ন্তি আচিক্খিত্ৰা পুত্তেন সদ্ধিং ওতরন্তো বোধিসত্তং দিস্ৰা তস্স সন্তিকং উপসঙ্কমি. বোধিসত্তো ইমিনাৰ নিযামেন পুচ্ছিত্ৰা মাণৰস্স ৰচনং সুত্ৰা ‘‘এহি, তৰ পিতরা আচিক্খিতট্ঠানস্স ¶ উচ্ছিট্ঠভাৰং ৰা অনুচ্ছিট্ঠভাৰং ৰা জানিস্সামা’’তি তেহি সদ্ধিং পব্বতমত্থকং আরুয্হ ‘‘ইদং তিণ্ণং পব্বতানং অন্তরং ¶ অনুচ্ছিট্ঠট্ঠান’’ন্তি মাণৰেন ৰুত্তে ‘‘মাণৰ, ইমস্মিংযেৰ ঠানে ঝাপিতকানং পমাণং নত্থি, তৰেৰ পিতা ইমস্মিংযেৰ রাজগহে ব্রাহ্মণকুলেযেৰ নিব্বত্তিত্ৰা উপসাল়কোযেৰ নাম হুত্ৰা ইমস্মিংযেৰ পব্বতন্তরে চুদ্দস জাতিসহস্সানি ঝাপিতো. পথৰিযঞ্হি অঝাপিতট্ঠানং ৰা অসুসানট্ঠানং ৰা সীসানং অনিৰেসিতট্ঠানং ৰা লদ্ধুং ন সক্কা’’তি পুব্বেনিৰাসঞাণেন পরিচ্ছিন্দিত্ৰা ইমং গাথাদ্ৰযমাহ –

৩১.

‘‘উপসাল়কনামানি ¶ , সহস্সানি চতুদ্দস;

অস্মিং পদেসে দড্ঢানি, নত্থি লোকে অনামতং.

৩২.

‘‘যম্হি সচ্চঞ্চ ধম্মো চ, অহিংসা সংযমো দমো;

এতং অরিযা সেৰন্তি, এতং লোকে অনামত’’ন্তি.

তত্থ অনামতন্তি মতট্ঠানং. তঞ্হি উপচারৰসেন ‘‘অমত’’ন্তি ৰুচ্চতি, তং পটিসেধেন্তো ‘‘অনামত’’ন্তি আহ. ‘‘অনমত’’ন্তিপি পাঠো, লোকস্মিঞ্হি অনমতট্ঠানং অসুসানং নাম নত্থীতি অত্থো. যম্হি সচ্চঞ্চ ধম্মো চাতি যস্মিং পুগ্গলে চতুসচ্চৰত্থুকং পুব্বভাগসচ্চঞাণঞ্চ লোকুত্তরধম্মো চ অত্থি. অহিংসাতি পরেসং অৰিহেসা অৰিহেঠনা. সংযমোতি সীলসংযমো. দমোতি ইন্দ্রিযদমনং. ইদঞ্চ গুণজাতং যম্হি পুগ্গলে অত্থি, এতং অরিযা সেৰন্তীতি, অরিযা বুদ্ধা চ পচ্চেকবুদ্ধা চ বুদ্ধসাৰকা চ এতং ঠানং সেৰন্তি, এৰরূপং পুগ্গলং উপসঙ্কমন্তি ভজন্তীতি অত্থো. এতং লোকে অনামতন্তি এতং গুণজাতং লোকে অমতভাৰসাধনতো অনামতং নাম.

এৰং বোধিসত্তো পিতাপুত্তানং ধম্মং দেসেত্ৰা চত্তারো ব্রহ্মৰিহারে ভাৰেত্ৰা ব্রহ্মলোকপরাযণো অহোসি.

সত্থা ইমং ধম্মং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উভো পিতাপুত্তা সোতাপত্তিফলে পতিট্ঠহিংসু. ‘‘তদা পিতাপুত্তাৰ এতরহি পিতাপুত্তা অহেসুং, তাপসো পন অহমেৰ অহোসি’’ন্তি.

উপসাল়কজাতকৰণ্ণনা ছট্ঠা.

[১৬৭] ৭. সমিদ্ধিজাতকৰণ্ণনা

অভুত্ৰা ¶ ¶ ভিক্খসি ভিক্খূতি ইদং সত্থা রাজগহং উপনিস্সায তপোদারামে ৰিহরন্তো সমিদ্ধিথেরং আরব্ভ কথেসি. একদিৰসঞ্হি আযস্মা সমিদ্ধি সব্বরত্তিং পধানং পদহিত্ৰা অরুণুগ্গমনৰেলায ন্হত্ৰা সুৰণ্ণৰণ্ণং অত্তভাৰং সুক্খাপযমানো অন্তরৰাসকং নিৰাসেত্ৰা উত্তরাসঙ্গং হত্থেন গহেত্ৰা অট্ঠাসি সুপরিকম্মকতা ৰিয সুৰণ্ণপটিমা. অত্তভাৰসমিদ্ধিযাযেৰ হিস্স ¶ ‘‘সমিদ্ধী’’তি নামং অহোসি. অথস্স সরীরসোভগ্গং দিস্ৰা একা দেৰধীতা পটিবদ্ধচিত্তা থেরং এৰমাহ – ‘‘ত্ৰং খোসি, ভিক্খু, দহরো যুৰা সুসু কাল়কেসো ভদ্রেন যোব্বনেন সমন্নাগতো অভিরূপো দস্সনীযো পাসাদিকো, এৰরূপস্স তৰ কামে অপরিভুঞ্জিত্ৰা কো অত্থো পব্বজ্জায, কামে তাৰ পরিভুঞ্জস্সু, পচ্ছা পব্বজিত্ৰা সমণধম্মং করিস্সসী’’তি. অথ নং থেরো আহ – ‘‘দেৰধীতে, ‘অসুকস্মিং নাম ৰযে ঠিতো মরিস্সামী’তি মম মরণকালং ন জানামি, এস মে কালো পটিচ্ছন্নো, তস্মা তরুণকালেযেৰ সমণধম্মং কত্ৰা দুক্খস্সন্তং করিস্সামী’’তি. সা থেরস্স সন্তিকা পটিসন্থারং অলভিত্ৰা তত্থেৰ অন্তরধাযি. থেরো সত্থারং উপসঙ্কমিত্ৰা এতমত্থং আরোচেসি. সত্থা ‘‘ন খো, সমিদ্ধি, ত্ৰঞ্ঞেৰ এতরহি দেৰধীতায পলোভিতো, পুব্বেপি দেৰধীতরো পব্বজিতে পলোভিংসুযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং কাসিগামকে ব্রাহ্মণকুলে নিব্বত্তিত্ৰা ৰযপ্পত্তো সব্বসিপ্পেসু নিপ্ফত্তিং পত্ৰা ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা হিমৰন্তপদেসে একং জাতস্সরং নিস্সায ৰাসং কপ্পেসি. সো সব্বরত্তিং পধানং পদহিত্ৰা অরুণুগ্গমনৰেলায ন্হত্ৰা একং ৰক্কলং নিৰাসেত্ৰা একং হত্থেন গহেত্ৰা সরীরং ৰোদকং করোন্তো অট্ঠাসি. অথস্স রূপসোভগ্গপ্পত্তং অত্তভাৰং ওলোকেত্ৰা পটিবদ্ধচিত্তা একা দেৰধীতা বোধিসত্তং পলোভযমানা পঠমং গাথমাহ –

৩৩.

‘‘অভুত্ৰা ভিক্খসি ভিক্খু, ন হি ভুত্ৰান ভিক্খসি;

ভুত্ৰান ভিক্খু ভিক্খস্সু, মা তং কালো উপচ্চগা’’তি.

তত্থ ¶ অভুত্ৰা ভিক্খসি ভিক্খূতি ভিক্খু ত্ৰং দহরকালে কিলেসকামৰসেন ৰত্থুকামে অভুত্ৰাৰ ভিক্খায চরসি. ন হি ভুত্ৰান ভিক্খসীতি ননু নাম পঞ্চ কামগুণে ভুত্ৰা ভিক্খায চরিতব্বং, কামে অভুত্ৰাৰ ভিক্খাচরিযং উপগতোসি. ভুত্ৰান ভিক্খু ভিক্খস্সূতি ভিক্খু ¶ দহরকালে তাৰ কামে ভুঞ্জিত্ৰা পচ্ছা মহল্লককালে ভিক্খস্সু. মা তং কালো উপচ্চগাতি অযং কামে ভুঞ্জনকালো দহরকালো, তং মা অতিক্কমতূতি.

বোধিসত্তো ¶ দেৰতায ৰচনং সুত্ৰা অত্তনো অজ্ঝাসযং পকাসেন্তো দুতিযং গাথমাহ –

৩৪.

‘‘কালং ৰোহং ন জানামি, ছন্নো কালো ন দিস্সতি;

তস্মা অভুত্ৰা ভিক্খামি, মা মং কালো উপচ্চগা’’তি.

তত্থ কালং ৰোহং ন জানামীতি ৰোতি নিপাতমত্তং. অহং পন ‘‘পঠমৰযে ৰা মযা মরিতব্বং মজ্ঝিমৰযে ৰা পচ্ছিমৰযে ৰা’’তি এৰং অত্তনো মরণকালং ন জানামি. পণ্ডিতেন হি পুগ্গলেন –

‘‘জীৰিতং ব্যাধি কালো চ, দেহনিক্খেপনং গতি;

পঞ্চেতে জীৰলোকস্মিং, অনিমিত্তা ন নাযরে’’তি.

ছন্নো কালো ন দিস্সতীতি যস্মা ‘‘অসুকস্মিং নাম ৰযকালে হেমন্তাদিউতুকালে ৰা মযা মরিতব্ব’’ন্তি ময্হম্পেস ছন্নো হুত্ৰা কালো ন দিস্সতি, সুপ্পটিচ্ছন্নো হুত্ৰা ঠিতো ন পঞ্ঞাযতি. তস্মা অভুত্ৰা ভিক্খামীতি তেন কারণেন পঞ্চ কামগুণে অভুত্ৰা ভিক্খামি. মা মং কালো উপচ্চগাতি মং সমণধম্মকরণকালো মা অতিক্কমতূতি অত্থো. ইমিনা কারণেন দহরোৰ সমানো পব্বজিত্ৰা সমণধম্মং করোমীতি. দেৰধীতা বোধিসত্তস্স ৰচনং সুত্ৰা তত্থেৰ অন্তরধাযি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা দেৰধীতা অযং দেৰধীতা অহোসি, অহমেৰ তেন সমযেন তাপসো অহোসি’’ন্তি.

সমিদ্ধিজাতকৰণ্ণনা সত্তমা.

[১৬৮] ৮. সকুণগ্ঘিজাতকৰণ্ণনা

সেনো ¶ ¶ বলসা পতমানোতি ইদং সত্থা জেতৰনে ৰিহরন্তো অত্তজ্ঝাসযং সকুণোৰাদসুত্তং (সং. নি. ৫.৩৭২) আরব্ভ কথেসি. একদিৰসঞ্হি সত্থা ভিক্খূ আমন্তেত্ৰা ‘‘গোচরে, ভিক্খৰে, চরথ সকে পেত্তিকে ৰিসযে’’তি (সং. নি. ৫.৩৭২) ইমং সংযুত্তমহাৰগ্গে সুত্তন্তং কথেন্তো ¶ ‘‘তুম্হে তাৰ তিট্ঠথ, পুব্বে তিরচ্ছানগতাপি সকং পেত্তিকৰিসযং পহায অগোচরে চরন্তা পচ্চামিত্তানং হত্থপথং গন্ত্ৰাপি অত্তনো পঞ্ঞাসম্পত্তিযা উপাযকোসল্লেন পচ্চামিত্তানং হত্থা মুচ্চিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো লাপসকুণযোনিযং নিব্বত্তিত্ৰা নঙ্গলকট্ঠকরণে লেড্ডুট্ঠানে ৰাসং কপ্পেসি. সো একদিৰসং ‘‘সকৰিসযে গোচরগহণং পহায পরৰিসযে গোচরং গণ্হিস্সামী’’তি অটৰিপরিযন্তং অগমাসি. অথ নং তত্থ গোচরং গণ্হন্তং দিস্ৰা সকুণগ্ঘি সহসা অজ্ঝপ্পত্তা অগ্গহেসি. সো সকুণগ্ঘিযা হরিযমানো এৰং পরিদেৰসি – ‘‘মযমেৰম্হ অলক্খিকা, মযং অপ্পপুঞ্ঞা, যে মযং অগোচরে চরিম্হ পরৰিসযে, সচেজ্জ মযং গোচরে চরেয্যাম সকে পেত্তিকে ৰিসযে, ন ম্যাযং সকুণগ্ঘি অলং অভৰিস্স যদিদং যুদ্ধাযা’’তি. ‘‘কো পন, তে লাপ, গোচরো সকো পেত্তিকো ৰিসযো’’তি? ‘‘যদিদং নঙ্গলকট্ঠকরণং লেড্ডুট্ঠান’’ন্তি. অথ নং সকুণগ্ঘি সকে বলে অপত্থদ্ধা অমুঞ্চি – ‘‘গচ্ছ খো, ত্ৰং লাপ, তত্রপি মে গন্ত্ৰা ন মোক্খসী’’তি. সো তত্থ গন্ত্ৰা মহন্তং লেড্ডুং অভিরুহিত্ৰা ‘‘এহি খো দানি সকুণগ্ঘী’’তি সেনং অৰ্হযন্তো অট্ঠাসি. সকুণগ্ঘি সকে বলে অপত্থদ্ধা উভো পক্খে সন্নয্হ লাপসকুণং সহসা অজ্ঝপ্পত্তা. যদা পন তং লাপো ‘‘বহুআগতা খো ম্যাযং সকুণগ্ঘী’’তি অঞ্ঞাসি, অথ পরিৰত্তিত্ৰা তস্সেৰ লেড্ডুস্স অন্তরং পচ্চাপাদি. সকুণগ্ঘি ৰেগং সন্ধারেতুং অসক্কোন্তী তত্থেৰ উরং পচ্চতাল়েসি. এৰং সা ভিন্নেন হদযেন নিক্খন্তেহি অক্খীহি জীৰিতক্খযং পাপুণি.

সত্থা ¶ ইমং অতীতং দস্সেত্ৰা ‘‘এৰং, ভিক্খৰে, তিরচ্ছানগতাপি অগোচরে চরন্তা সপত্তহত্থং গচ্ছন্তি, গোচরে পন সকে পেত্তিকে ৰিসযে চরন্তা সপত্তে নিগ্গণ্হন্তি, তস্মা তুম্হেপি মা অগোচরে চরথ পরৰিসযে. অগোচরে ¶ , ভিক্খৰে, চরতং পরৰিসযে লচ্ছতি মারো ওতারং, লচ্ছতি মারো আরম্মণং. কো চ, ভিক্খৰে, ভিক্খুনো অগোচরো পরৰিসযো? যদিদং পঞ্চ কামগুণা. কতমে পঞ্চ? চক্খুৰিঞ্ঞেয্যা রূপা…পে… অযং, ভিক্খৰে, ভিক্খুনো অগোচরো পরৰিসযো’’তি ৰত্ৰা অভিসম্বুদ্ধো হুত্ৰা পঠমং গাথমাহ –

৩৫.

‘‘সেনো ¶ বলসা পতমানো, লাপং গোচরঠাযিনং;

সহসা অজ্ঝপ্পত্তোৰ, মরণং তেনুপাগমী’’তি.

তত্থ বলসা পতমানোতি ‘‘লাপং গণ্হিস্সামী’’তি বলেন থামেন পতমানো. গোচরঠাযিনন্তি সকৰিসযা নিক্খমিত্ৰা গোচরত্থায অটৰিপরিযন্তে ঠিতং. অজ্ঝপ্পত্তোতি সম্পত্তো. মরণং তেনুপাগমীতি তেন কারণেন মরণং পত্তো.

তস্মিং পন মরণং পত্তে লাপো নিক্খমিত্ৰা ‘‘দিট্ঠা ৰত মে পচ্চামিত্তস্স পিট্ঠী’’তি তস্স হদযে ঠত্ৰা উদানং উদানেন্তো দুতিযং গাথমাহ –

৩৬.

‘‘সোহং নযেন সম্পন্নো, পেত্তিকে গোচরে রতো;

অপেতসত্তু মোদামি, সম্পস্সং অত্থমত্তনো’’তি.

তত্থ নযেনাতি উপাযেন. অত্থমত্তনোতি অত্তনো অরোগভাৰসঙ্খাতং ৰুড্ঢিং.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে বহূ ভিক্খূ সোতাপত্তিফলাদীনি পাপুণিংসু. ‘‘তদা সেনো দেৰদত্তো অহোসি, লাপো পন অহমেৰ অহোসি’’ন্তি.

সকুণগ্ঘিজাতকৰণ্ণনা অট্ঠমা.

[১৬৯] ৯. অরকজাতকৰণ্ণনা

যো ¶ ৰে মেত্তেন চিত্তেনাতি ইদং সত্থা জেতৰনে ৰিহরন্তো মেত্তসুত্তং আরব্ভ কথেসি. একস্মিঞ্হি সমযে সত্থা ভিক্খূ আমন্তেসি – ‘‘মেত্তায, ভিক্খৰে, চেতোৰিমুত্তিযা আসেৰিতায ভাৰিতায ¶ বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায একাদসানিসংসা পাটিকঙ্খা. কতমে একাদস? সুখং সুপতি, সুখং পটিবুজ্ঝতি, ন পাপকং সুপিনং পস্সতি, মনুস্সানং পিযো হোতি, অমনুস্সানং পিযো হোতি, দেৰতা রক্খন্তি, নাস্স অগ্গি ৰা ৰিসং ৰা সত্থং ৰা কমতি, তুৰটং চিত্তং সমাধিযতি, মুখৰণ্ণো ৰিপ্পসীদতি, অসম্মূল়্হো কালং করোতি, উত্তরি অপ্পটিৰিজ্ঝন্তো ব্রহ্মলোকূপগো হোতি. মেত্তায, ভিক্খৰে, চেতোৰিমুত্তিযা আসেৰিতায…পে… সুসমারদ্ধায ইমে একাদসানিসংসা ¶ পাটিকঙ্খা’’তি (অ. নি. ১১.১৫). ইমে একাদসানিসংসে গহেত্ৰা ঠিতং মেত্তাভাৰনং ৰণ্ণেত্ৰা ‘‘ভিক্খৰে, ভিক্খুনা নাম সব্বসত্তেসু ওদিস্সকানোদিস্সকৰসেন মেত্তা ভাৰেতব্বা, হিতোপি হিতেন ফরিতব্বো, অহিতোপি হিতেন ফরিতব্বো, মজ্ঝত্তোপি হিতেন ফরিতব্বো. এৰং সব্বসত্তেসু ওদিস্সকানোদিস্সকৰসেন মেত্তা ভাৰেতব্বা, করুণা মুদিতা উপেক্খা ভাৰেতব্বা, চতূসু ব্রহ্মৰিহারেসু কম্মং কাতব্বমেৰ. এৰং করোন্তো হি মগ্গং ৰা ফলং ৰা অলভন্তোপি ব্রহ্মলোকপরাযণো অহোসি, পোরাণকপণ্ডিতাপি সত্ত ৰস্সানি মেত্তং ভাৰেত্ৰা সত্ত সংৰট্টৰিৰট্টকপ্পে ব্রহ্মলোকস্মিংযেৰ ৰসিংসূ’’তি ৰত্ৰা অতীতং আহরি.

অতীতে একস্মিং কপ্পে বোধিসত্তো ব্রাহ্মণকুলে নিব্বত্তিত্ৰা ৰযপ্পত্তো কামে পহায ইসিপব্বজ্জং পব্বজিত্ৰা চতুন্নং ব্রহ্মৰিহারানং লাভী অরকো নাম সত্থা হুত্ৰা হিমৰন্তপদেসে ৰাসং কপ্পেসি, তস্স মহা পরিৰারো অহোসি. সো ইসিগণং ওৰদন্তো ‘‘পব্বজিতেন নাম মেত্তা ভাৰেতব্বা, করুণা মুদিতা উপেক্খা ভাৰেতব্বা. মেত্তচিত্তঞ্হি নামেতং অপ্পনাপ্পত্তং ব্রহ্মলোকপরাযণতং সাধেতী’’তি মেত্তায আনিসংসং পকাসেন্তো ইমা গাথা আহ –

৩৭.

‘‘যো ¶ ৰে মেত্তেন চিত্তেন, সব্বলোকানুকম্পতি;

উদ্ধং অধো চ তিরিযং, অপ্পমাণেন সব্বসো.

৩৮.

‘‘অপ্পমাণং হিতং চিত্তং, পরিপুণ্ণং সুভাৰিতং;

যং পমাণকতং কম্মং, ন তং তত্রাৰসিস্সতী’’তি.

তত্থ ¶ যো ৰে মেত্তেন চিত্তেন, সব্বলোকানুকম্পতীতি খত্তিযাদীসু ৰা সমণব্রাহ্মণেসু ৰা যো কোচি অপ্পমাণেন মেত্তেন চিত্তেন সকলং সত্তলোকং অনুকম্পতি. উদ্ধন্তি পথৰিতো যাৰ নেৰসঞ্ঞানাসঞ্ঞাযতনব্রহ্মলোকা. অধোতি পথৰিযা হেট্ঠা উস্সদে মহানিরযে. তিরিযন্তি মনুস্সলোকে, যত্তকানি চক্কৰাল়ানি চ তেসু সব্বেসু এত্তকে ঠানে নিব্বত্তা সব্বে সত্তা অৰেরা হোন্তু, অব্যাপজ্ঝা অনীঘা, সুখী অত্তানং পরিহরন্তূতি এৰং ভাৰিতেন মেত্তেন চিত্তেনাতি অত্থো. অপ্পমাণেনাতি অপ্পমাণসত্তানং অপ্পমাণারম্মণত্তা অপ্পমাণেন. সব্বসোতি সব্বাকারেন, উদ্ধং অধো তিরিযন্তি এৰং সব্বসুগতিদুগ্গতিৰসেনাতি অত্থো.

অপ্পমাণং হিতং চিত্তন্তি অপ্পমাণং কত্ৰা ভাৰিতং সব্বসত্তেসু হিতচিত্তং. পরিপুণ্ণন্তি অৰিকলং. সুভাৰিতন্তি সুৰড্ঢিতং, অপ্পনাচিত্তস্সেতং নামং. যং পমাণকতং কম্মন্তি যং ‘‘অপ্পমাণং ¶ অপ্পমাণারম্মণ’’ন্তি এৰং আরম্মণত্তিকৰসেন চ ৰসীভাৰপ্পত্তিৰসেন চ অৰড্ঢিত্ৰা কতং পরিত্তং কামাৰচরকম্মং. ন তং তত্রাৰসিস্সতীতি তং পরিত্তং কম্মং যং তং ‘‘অপ্পমাণং হিতং চিত্ত’’ন্তি সঙ্খগতং রূপাৰচরকম্মং, তত্র ন অৰসিস্সতি. যথা নাম মহোঘেন অজ্ঝোত্থটং পরিত্তোদকং ওঘস্স অব্ভন্তরে তেন অসংহীরমানং নাৰসিস্সতি ন তিট্ঠতি, অথ খো মহোঘোৰ তং অজ্ঝোত্থরিত্ৰা তিট্ঠতি, এৰমেৰ তং পরিত্তকম্মং তস্স মহগ্গতকম্মস্স অব্ভন্তরে তেন মহগ্গতকম্মেন অচ্ছিন্দিত্ৰা অগ্গহিতৰিপাকোকাসং হুত্ৰা ন অৰসিস্সতি ন তিট্ঠতি, ন সক্কোতি অত্তনো ৰিপাকং দাতুং, অথ খো মহগ্গতকম্মমেৰ তং অজ্ঝোত্থরিত্ৰা তিট্ঠতি ৰিপাকং দেতীতি.

এৰং বোধিসত্তো অন্তেৰাসিকানং মেত্তাভাৰনায আনিসংসং কথেত্ৰা অপরিহীনজ্ঝানো ব্রহ্মলোকে নিব্বত্তিত্ৰা সত্ত সংৰট্টৰিৰট্টকপ্পে ন ইমং লোকং পুন অগমাসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা ইসিগণো বুদ্ধপরিসা অহোসি, অরকো পন সত্থা অহমেৰ অহোসি’’ন্তি.

অরকজাতকৰণ্ণনা নৰমা.

[১৭০] ১০. ককণ্টকজাতকৰণ্ণনা

নাযং ¶ পুরে উণ্ণমতীতি ইদং ককণ্টকজাতকং মহাউমঙ্গজাতকে (জা. ২.২২.৫৯০ আদযো) আৰিভৰিস্সতি.

ককণ্টকজাতকৰণ্ণনা দসমা.

সন্থৰৰগ্গো দুতিযো.

তস্সুদ্দানং –

ইন্দসমানগোত্তঞ্চ, সন্থৰং সুসীমং গিজ্ঝং;

নকুলং উপসাল়কং, সমিদ্ধি চ সকুণগ্ঘি;

অরকঞ্চ ককণ্টকং.

৩. কল্যাণৰগ্গো

[১৭১] ১. কল্যাণধম্মজাতকৰণ্ণনা

কল্যাণধম্মোতি ¶ ইদং সত্থা জেতৰনে ৰিহরন্তো একং বধিরসস্সুং আরব্ভ কথেসি. সাৰত্থিযঞ্হি একো কুটুম্বিকো সদ্ধো পসন্নো তিসরণগতো পঞ্চসীলেন সমন্নাগতো. সো একদিৰসং বহূনি সপ্পিআদীনি ভেসজ্জানি চেৰ পুপ্ফগন্ধৰত্থাদীনি চ গহেত্ৰা ‘‘জেতৰনে সত্থু সন্তিকে ধম্মং সোস্সামী’’তি অগমাসি. তস্স তত্থ গতকালে সস্সু খাদনীযভোজনীযং গহেত্ৰা ধীতরং দট্ঠুকামা তং গেহং অগমাসি, সা চ থোকং বধিরধাতুকা হোতি. সা ধীতরা সদ্ধিং ভুত্তভোজনা ¶ ভত্তসম্মদং ৰিনোদযমানা ধীতরং পুচ্ছি – ‘‘কিং, অম্ম, ভত্তা তে সম্মোদমানো অৰিৰদমানো পিযসংৰাসং ৰসতী’’তি. ‘‘কিং, অম্ম, কথেথ যাদিসো তুম্হাকং জামাতা সীলেন চেৰ আচারসম্পদায চ, তাদিসো পব্বজিতোপি দুল্লভো’’তি. উপাসিকা ধীতু ৰচনং সাধুকং অসল্লক্খেত্ৰা ‘‘পব্বজিতো’’তি পদমেৰ গহেত্ৰা ‘‘অম্ম, কস্মা তে ভত্তা পব্বজিতো’’তি মহাসদ্দং অকাসি. তং সুত্ৰা সকলগেহৰাসিনো ‘‘অম্হাকং কির কুটুম্বিকো পব্বজিতো’’তি ৰিরৰিংসু. তেসং সদ্দং সুত্ৰা দ্ৰারেন সঞ্চরন্তা ‘‘কিং নাম কিরেত’’ন্তি পুচ্ছিংসু. ‘‘ইমস্মিং কির গেহে কুটুম্বিকো পব্বজিতো’’তি. সোপি খো কুটুম্বিকো দসবলস্স ধম্মং সুত্ৰা ৰিহারা নিক্খম্ম নগরং পাৰিসি.

অথ নং অন্তরামগ্গেযেৰ একো পুরিসো দিস্ৰা ‘‘সম্ম, ত্ৰং কির পব্বজিতোতি তৰ গেহে পুত্তদারপরিজনো পরিদেৰতী’’তি আহ. অথস্স ¶ এতদহোসি – ‘‘অযং অপব্বজিতমেৰ কির মং ‘পব্বজিতো’তি ৰদতি, উপ্পন্নো খো পন মে কল্যাণসদ্দো ন অন্তরধাপেতব্বো, অজ্জেৰ মযা পব্বজিতুং ৰট্টতী’’তি ততোৰ নিৰত্তিত্ৰা সত্থু সন্তিকং গন্ত্ৰা ‘‘কিং নু খো, উপাসক, ইদানেৰ বুদ্ধুপট্ঠানং কত্ৰা গন্ত্ৰা ইদানেৰ পচ্চাগতোসী’’তি ৰুত্তে তমত্থং আরোচেত্ৰা ‘‘ভন্তে, কল্যাণসদ্দো নাম উপ্পন্নো ন অন্তরধাপেতুং ৰট্টতি, তস্মা পব্বজিতুকামো হুত্ৰা আগতোম্হী’’তি আহ. সো পব্বজ্জঞ্চ উপসম্পদঞ্চ লভিত্ৰা সম্মা পটিপন্নো নচিরস্সেৰ অরহত্তং পাপুণি. ইদং কির কারণং ভিক্খুসঙ্ঘে পাকটং জাতং. অথেকদিৰসং ধম্মসভাযং ভিক্খূ কথং সমুট্ঠাপেসুং – ‘‘আৰুসো, অসুকো নাম কুটুম্বিকো ‘উপ্পন্নো কল্যাণসদ্দো ¶ ন অন্তরধাপেতব্বো’তি পব্বজিত্ৰা ইদানি অরহত্তং পত্তো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ভিক্খৰে, পোরাণকপণ্ডিতাপি ‘উপ্পন্নো কল্যাণসদ্দো ৰিরাধেতুং ন ৰট্টতী’তি পব্বজিংসুযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সেট্ঠিকুলে নিব্বত্তিত্ৰা ৰযপ্পত্তো পিতু অচ্চযেন সেট্ঠিট্ঠানং পাপুণি. সো একদিৰসং নিৰেসনা নিক্খমিত্ৰা রাজুপট্ঠানং অগমাসি. অথস্স সস্সু ‘‘ধীতরং পস্সিস্সামী’’তি তং গেহং অগমাসি, সা থোকং বধিরধাতুকাতি সব্বং ¶ পচ্চুপ্পন্নৰত্থুসদিসমেৰ. তং পন রাজুপট্ঠানং গন্ত্ৰা অত্তনো ঘরং আগচ্ছন্তং দিস্ৰা একো পুরিসো ‘‘তুম্হে কির পব্বজিতাতি তুম্হাকং গেহে মহাপরিদেৰো পৰত্ততী’’তি আহ. বোধিসত্তো ‘‘উপ্পন্নো কল্যাণসদ্দো নাম ন অন্তরধাপেতুং ৰট্টতী’’তি ততোৰ নিৰত্তিত্ৰা রঞ্ঞো সন্তিকং গন্ত্ৰা ‘‘কিং, মহাসেট্ঠি, ইদানেৰ গন্ত্ৰা পুন আগতোসী’’তি ৰুত্তে ‘‘দেৰ, গেহজনো কির মং অপব্বজিতমেৰ ‘পব্বজিতো’তি ৰত্ৰা পরিদেৰতি, উপ্পন্নো খো পন কল্যাণসদ্দো ন অন্তরধাপেতব্বো, পব্বজিস্সামহং, পব্বজ্জং মে অনুজানাহী’’তি এতমত্থং পকাসেতুং ইমা গাথা আহ –

৪১.

‘‘কল্যাণধম্মোতি ¶ যদা জনিন্দ, লোকে সমঞ্ঞং অনুপাপুণাতি;

তস্মা ন হিয্যেথ নরো সপঞ্ঞো, হিরিযাপি সন্তো ঘুরমাদিযন্তি.

৪২.

‘‘সাযং সমঞ্ঞা ইধ মজ্জ পত্তা, কল্যাণধম্মোতি জনিন্দ লোকে;

তাহং সমেক্খং ইধ পব্বজিস্সং, ন হি মত্থি ছন্দো ইধ কামভোগে’’তি.

তত্থ কল্যাণধম্মোতি সুন্দরধম্মো. সমঞ্ঞং অনুপাপুণাতীতি যদা সীলৰা কল্যাণধম্মো পব্বজিতোতি ইদং পঞ্ঞত্তিৰোহারং পাপুণাতি. তস্মা ন হিয্যেথাতি ততো সামঞ্ঞতো ন পরিহাযেথ. হিরিযাপি সন্তো ধুরমাদিযন্তীতি, মহারাজ, সপ্পুরিসা নাম অজ্ঝত্তসমুট্ঠিতায হিরিযা বহিদ্ধসমুট্ঠিতেন ওত্তপ্পেনপি এতং পব্বজিতধুরং গণ্হন্তি. ইধ মজ্জ পত্তাতি ইধ মযা অজ্জ পত্তা. তাহং সমেক্খন্তি তং অহং গুণৰসেন লদ্ধসমঞ্ঞং সমেক্খন্তো পস্সন্তো. ন হি মত্থি ছন্দোতি ন হি মে অত্থি ছন্দো. ইধ কামভোগেতি ইমস্মিং লোকে কিলেসকামৰত্থুকামপরিভোগেহি.

বোধিসত্তো ¶ এৰং ৰত্ৰা রাজানং পব্বজ্জং অনুজানাপেত্ৰা হিমৰন্তপদেসং গন্ত্ৰা ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা ব্রহ্মলোকপরাযণো অহোসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, বারাণসিসেট্ঠি পন অহমেৰ অহোসি’’ন্তি.

কল্যাণধম্মজাতকৰণ্ণনা পঠমা.

[১৭২] ২. দদ্দরজাতকৰণ্ণনা

কো নু সদ্দেন মহতাতি ইদং সত্থা জেতৰনে ৰিহরন্তো কোকালিকং আরব্ভ কথেসি. তস্মিঞ্হি কালে বহূ বহুস্সুতা ভিক্খূ মনোসিলাতলে নদমানা তরুণসীহা ৰিয আকাসগঙ্গং ওতারেন্তা ¶ ৰিয সঙ্ঘমজ্ঝে সরভাণং ভণন্তি. কোকালিকো তেসু সরভাণং ভণন্তেসু অত্তনো তুচ্ছভাৰং অজানিত্ৰাৰ ‘‘অহম্পি সরভাণং ভণিস্সামী’’তি ভিক্খূনং অন্তরং পৰিসিত্ৰা ‘‘অম্হাকং সরভাণং ন পাপেন্তি. সচে অম্হাকম্পি পাপেয্যুং, মযম্পি ভণেয্যামা’’তি ভিক্খুসঙ্ঘস্স নামং অগ্গহেত্ৰাৰ তত্থ তত্থ কথেন্তো আহিণ্ডতি. তস্স সা কথা ভিক্খুসঙ্ঘে পাকটা জাতা. ভিক্খূ ‘‘ৰীমংসিস্সাম তাৰ ন’’ন্তি সঞ্ঞায এৰমাহংসু – ‘‘আৰুসো কোকালিক, অজ্জ সঙ্ঘস্স সরভাণং ভণাহী’’তি. সো অত্তনো বলং অজানিত্ৰাৰ ‘‘সাধূ’’তি সম্পটিচ্ছিত্ৰা ‘‘অজ্জ সরভাণং ভণিস্সামী’’তি অত্তনো সপ্পাযং যাগুং পিৰি, খজ্জকং খাদি, সপ্পাযেনেৰ সূপেন ভুঞ্জি.

সূরিযে অত্থঙ্গতে ধম্মস্সৰনকালে ঘোসিতে ভিক্খুসঙ্ঘো সন্নিপতি. সো কণ্টকুরণ্ডকৰণ্ণং কাসাৰং নিৰাসেত্ৰা কণিকারপুপ্ফৰণ্ণং চীৰরং পারুপিত্ৰা সঙ্ঘমজ্ঝং পৰিসিত্ৰা থেরে ৰন্দিত্ৰা অলঙ্কতরতনমণ্ডপে পঞ্ঞত্তৰরধম্মাসনং অভিরুহিত্ৰা চিত্রবীজনিং গহেত্ৰা ‘‘সরভাণং ভণিস্সামী’’তি নিসীদি, তাৰদেৰস্স সরীরা সেদা মুচ্চিংসু, সারজ্জং ওক্কমি, পুব্বগাথায পঠমং পদং উদাহরিত্ৰা অনন্তরং ন পস্সি. সো কম্পমানো আসনা ওরুয্হ লজ্জিতো সঙ্ঘমজ্ঝতো অপক্কম্ম অত্তনো পরিৰেণং অগমাসি. অঞ্ঞো বহুস্সুতো ভিক্খু সরভাণং ভণি. ততো পট্ঠায ভিক্খূ তস্স তুচ্ছভাৰং জানিংসু. অথেকদিৰসং ¶ ধম্মসভাযং ভিক্খূ কথং সমুট্ঠাপেসুং – ‘‘আৰুসো, পঠমং কোকালিকস্স তুচ্ছভাৰো দুজ্জানো, ইদানি ¶ পনেস সযং নদিত্ৰা পাকটো জাতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, কোকালিকো ইদানেৰ নদিত্ৰা পাকটো জাতো, পুব্বেপি নদিত্ৰা পাকটো অহোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে সীহযোনিযং নিব্বত্তিত্ৰা বহূনং ¶ সীহানং রাজা অহোসি. সো অনেকসীহপরিৰারো রজতগুহাযং ৰাসং কপ্পেসি. তস্স অৰিদূরে একিস্সায গুহায একো সিঙ্গালোপি ৰসতি. অথেকদিৰসং দেৰে ৰস্সিত্ৰা ৰিগতে সব্বে সীহা সীহরাজস্সেৰ গুহদ্ৰারে সন্নিপতিত্ৰা সীহনাদং নদন্তা সীহকীল়ং কীল়িংসু. তেসং এৰং নদিত্ৰা কীল়নকালে সোপি সিঙ্গালো নদতি. সীহা তস্স সদ্দং সুত্ৰা ‘‘অযং সিঙ্গালো অম্হেহি সদ্ধিং নদতী’’তি লজ্জিতা তুণ্হী অহেসুং. তেসং তুণ্হীভূতকালে বোধিসত্তস্স পুত্তো সীহপোতকো ‘‘তাত, ইমে সীহা নদিত্ৰা সীহকীল়ং কীল়ন্তা এতস্স সদ্দং সুত্ৰা লজ্জায তুণ্হী জাতা, কো নামেস অত্তনো সদ্দেন অত্তানং জানাপেতী’’তি পিতরং পুচ্ছন্তো পঠমং গাথমাহ –

৪৩.

‘‘কো নু সদ্দেন মহতা, অভিনাদেতি দদ্দরং;

তং সীহা নপ্পটিনদন্তি, কো নামেসো মিগাধিভূ’’তি.

তত্থ অভিনাদেতি দদ্দরন্তি দদ্দরং রজতপব্বতং একনাদং করোতি. মিগাধিভূতি পিতরং আলপতি. অযঞ্হেত্থ অত্থো – মিগাধিভূ মিগজেট্ঠক সীহরাজ পুচ্ছামি তং ‘‘কো নামেসো’’তি.

অথস্স ৰচনং সুত্ৰা পিতা দুতিযং গাথমাহ –

৪৪.

‘‘অধমো মিগজাতানং, সিঙ্গালো তাত ৰস্সতি;

জাতিমস্স জিগুচ্ছন্তা, তুণ্হী সীহা সমচ্চরে’’তি.

তত্থ সমচ্চরেতি সন্তি উপসগ্গমত্তং, অচ্চন্তীতি অত্থো, তুণ্হী হুত্ৰা নিসীদন্তীতি ৰুত্তং হোতি. পোত্থকেসু পন ‘‘সমচ্ছরে’’তি লিখন্তি.

সত্থা ¶ ¶ ‘‘ন, ভিক্খৰে, কোকালিকো ইদানেৰ অত্তনো নাদেন অত্তানং পাকটং করোতি, পুব্বেপি অকাসিযেৰা’’তি ৰত্ৰা ইমং ধম্মদেসনং আহরিত্ৰা জাতকং সমোধানেসি – ‘‘তদা সিঙ্গালো কোকালিকো অহোসি, সীহপোতকো রাহুলো, সীহরাজা পন অহমেৰ অহোসি’’ন্তি.

দদ্দরজাতকৰণ্ণনা দুতিযা.

[১৭৩] ৩. মক্কটজাতকৰণ্ণনা

তাতমাণৰকো ¶ এসোতি ইদং সত্থা জেতৰনে ৰিহরন্তো একং কুহকভিক্খুং আরব্ভ কথেসি. ৰত্থু পকিণ্ণকনিপাতে উদ্দালকজাতকে (জা. ১.১৪.৬২ আদযো) আৰিভৰিস্সতি. তদা পন সত্থা ‘‘ভিক্খৰে, নাযং ভিক্খু ইদানেৰ কুহকো, পুব্বেপি মক্কটো হুত্ৰা অগ্গিস্স কারণা কোহঞ্ঞং অকাসিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং কাসিগামকে ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং সিপ্পং উগ্গণ্হিত্ৰা ঘরাৰাসং সণ্ঠপেসি. অথস্স ব্রাহ্মণী একং পুত্তং ৰিজাযিত্ৰা পুত্তস্স আধাৰিত্ৰা পরিধাৰিত্ৰা ৰিচরণকালে কালমকাসি. বোধিসত্তো তস্সা পেতকিচ্চং কত্ৰা ‘‘কিং মে দানি ঘরাৰাসেন, পুত্তং গহেত্ৰা পব্বজিস্সামী’’তি অস্সুমুখং ঞাতিমিত্তৰগ্গং পহায পুত্তং আদায হিমৰন্তং পৰিসিত্ৰা ইসিপব্বজ্জং পব্বজিত্ৰা তত্থ ৰনমূলফলাহারো ৰাসং কপ্পেসি. সো একদিৰসং ৰস্সানকালে দেৰে ৰস্সন্তে সারদারূনি অগ্গিং জালেত্ৰা ৰিসিব্বন্তো ফলকত্থরে নিপজ্জি, পুত্তোপিস্স তাপসকুমারকো পিতু পাদে সম্বাহন্তোৰ নিসীদি.

অথেকো ৰনমক্কটো সীতেন পীল়িযমানো তস্স পণ্ণসালায তং অগ্গিং দিস্ৰা ‘‘সচাহং এত্থ পৰিসিস্সামি, ‘মক্কটো মক্কটো’তি মং পোথেত্ৰা নীহরিস্সন্তি, অগ্গিং ৰিসিব্বেতুং ন লভিস্সামি, অত্থি দানি মে উপাযো, তাপসৰেসং গহেত্ৰা কোহঞ্ঞং কত্ৰা পৰিসিস্সামী’’তি চিন্তেত্ৰা একস্স মততাপসস্স ৰক্কলানি নিৰাসেত্ৰা পচ্ছিঞ্চ অঙ্কুসযট্ঠিঞ্চ ¶ গহেত্ৰা পণ্ণসালদ্ৰারে একং তালরুক্খং নিস্সায সংকুটিতো অট্ঠাসি. তাপসকুমারকো তং দিস্ৰা মক্কটভাৰং অজানন্তো ‘‘একো মহল্লকতাপসো সীতেন পীল়িতো অগ্গিং ৰিসিব্বেতুং আগতো ¶ ভৰিস্সতী’’তি পিতু তাপসস্স কথেত্ৰা ‘‘এতং পণ্ণসালং পৰেসেত্ৰা ৰিসিব্বাপেস্সামী’’তি চিন্তেত্ৰা পিতরং আলপন্তো পঠমং গাথমাহ –

৪৫.

‘‘তাত ¶ মাণৰকো এসো, তালমূলং অপস্সিতো;

অগারকঞ্চিদং অত্থি, হন্দ দেমস্সগারক’’ন্তি.

তত্থ মাণৰকোতি সত্তাধিৰচনং. তেন ‘‘তাত, এসো একো মাণৰকো সত্তো একো তাপসো’’তি দীপেতি. তালমূলং অপস্সিতোতি তালক্খন্ধং নিস্সায ঠিতো. অগারকঞ্চিদং অত্থীতি ইদঞ্চ অম্হাকং পব্বজিতাগারং অত্থি, পণ্ণসালং সন্ধায ৰদতি. হন্দাতি ৰৰস্সগ্গত্থে নিপাতো. দেমস্সগারকন্তি এতস্স একমন্তে ৰসনত্থায অগারকং দেম.

বোধিসত্তো পুত্তস্স ৰচনং সুত্ৰা উট্ঠায পণ্ণসালদ্ৰারে ঠত্ৰা ওলোকেন্তো তস্স মক্কটভাৰং ঞত্ৰা ‘‘তাত, মনুস্সানং নাম ন এৰরূপং মুখং হোতি, মক্কটো এস, নযিধ পক্কোসিতব্বো’’তি ৰত্ৰা দুতিযং গাথমাহ –

৪৬.

‘‘মা খো ত্ৰং তাত পক্কোসি, দূসেয্য নো অগারকং;

নেতাদিসং মুখং হোতি, ব্রাহ্মণস্স সুসীলিনো’’তি.

তত্থ দূসেয্য নো অগারকন্তি অযঞ্হি ইধ পৰিট্ঠো সমানো ইমং কিচ্ছেন কতং পণ্ণসালং অগ্গিনা ৰা ঝাপেন্তো উচ্চারাদীনি ৰা করোন্তো দূসেয্য. নেতাদিসন্তি ‘‘এতাদিসং ব্রাহ্মণস্স সুসীলিনো মুখং ন হোতি, মক্কটো এসো’’তি ৰত্ৰা বোধিসত্তো একং উম্মুকং গহেত্ৰা ‘‘কিং এত্থ তিট্ঠসী’’তি খিপিত্ৰা তং পলাপেসি. মক্কটো ৰক্কলানি ছড্ডেত্ৰা রুক্খং অভিরুহিত্ৰা ৰনসণ্ডং পাৰিসি. বোধিসত্তো চত্তারো ব্রহ্মৰিহারে ভাৰেত্ৰা ব্রহ্মলোকূপগো অহোসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা মক্কটো অযং কুহকভিক্খু অহোসি, তাপসকুমারো রাহুলো, তাপসো পন অহমেৰ অহোসি’’ন্তি.

মক্কটজাতকৰণ্ণনা ততিযা.

[১৭৪] ৪. দুব্ভিযমক্কটজাতকণ্ণনা

অদম্হ ¶ ¶ তে ৰারি পহূতরূপন্তি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. একদিৰসঞ্হি ধম্মসভাযং ভিক্খূ দেৰদত্তস্স অকতঞ্ঞুমিত্তদুব্ভিভাৰং কথেন্তা নিসীদিংসু. সত্থা আগন্ত্ৰা ‘‘ন, ভিক্খৰে, দেৰদত্তো ইদানেৰ অকতঞ্ঞূ মিত্তদুব্ভী, পুব্বেপি এৰরূপো অহোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং কাসিগামকে ব্রাহ্মণকুলে নিব্বত্তিত্ৰা ৰযপ্পত্তো ঘরাৰাসং সণ্ঠপেসি. তস্মিং পন সমযে কাসিরট্ঠে ৰত্তনিমহামগ্গে একো গম্ভীরো উদপানো হোতি অনোতরণীযো তিরচ্ছানানং, মগ্গপ্পটিপন্না পুঞ্ঞত্থিকা মনুস্সা দীঘরজ্জুকেন ৰারকেন উদকং উস্সিঞ্চিত্ৰা একিস্সা দোণিযা পূরেত্ৰা তিরচ্ছানানং পানীযং দেন্তি. তস্স সামন্ততো মহন্তং অরঞ্ঞং, তত্থ বহূ মক্কটা ৰসন্তি. অথ তস্মিং মগ্গে দ্ৰে তীণি দিৰসানি মনুস্সসঞ্চারো পচ্ছিজ্জি, তিরচ্ছানা পানীযং ন লভিংসু. একো মক্কটো পিপাসাতুরো হুত্ৰা পানীযং পরিযেসন্তো উদপানস্স সন্তিকে ৰিচরতি. বোধিসত্তো কেনচিদেৰ করণীযেন তং মগ্গং পটিপজ্জিত্ৰা তত্থ গচ্ছন্তো পানীযং উত্তারেত্ৰা পিৰিত্ৰা হত্থপাদে ধোৰিত্ৰা ঠিতো তং মক্কটং অদ্দস. অথস্স পিপাসিতভাৰং ঞত্ৰা পানীযং উস্সিঞ্চিত্ৰা দোণিযং আকিরিত্ৰা অদাসি, দত্ৰা চ পন ‘‘ৰিস্সমিস্সামী’’তি একস্মিং রুক্খমূলে নিপজ্জি. মক্কটো পানীযং পিৰিত্ৰা অৰিদূরে নিসীদিত্ৰা মুখমক্কটিকং করোন্তো বোধিসত্তং ভিংসাপেসি. বোধিসত্তো তস্স তং কিরিযং দিস্ৰা ‘‘অরে দুট্ঠমক্কট, অহং তৰ পিপাসিতস্স কিলন্তস্স বহুং ¶ পানীযং অদাসিং, ইদানি ত্ৰং ময্হং মুখমক্কটিকং করোসি, অহো পাপজনস্স নাম কতো উপকারো নিরত্থকো’’তি ৰত্ৰা পঠমং গাথমাহ –

৪৭.

‘‘অদম্হ ¶ তে ৰারি পহূতরূপং, ঘম্মাভিতত্তস্স পিপাসিতস্স;

সো দানি পিত্ৰান কিরিঙ্করোসি, অসঙ্গমো পাপজনেন সেয্যো’’তি.

তত্থ সো দানি পিত্ৰান কিরিঙ্করোসীতি সো ইদানি ত্ৰং মযা দিন্নপানীযং পিৰিত্ৰা মুখমক্কটিকং করোন্তো ‘‘কিরি কিরী’’তি সদ্দং করোসি. অসঙ্গমো পাপজনেন সেয্যোতি পাপজনেন সদ্ধিং সঙ্গমো ন সেয্যো, অসঙ্গমোৰ সেয্যোতি.

তং ¶ সুত্ৰা সো মিত্তদুব্ভী মক্কটো ‘‘ত্ৰং ‘এত্তকেনৰেতং নিট্ঠিত’ন্তি সঞ্ঞং করোসি, ইদানি তে সীসে ৰচ্চং পাতেত্ৰা গমিস্সামী’’তি ৰত্ৰা দুতিযং গাথমাহ –

৪৮.

‘‘কো তে সুতো ৰা দিট্ঠো ৰা, সীলৰা নাম মক্কটো;

ইদানি খো তং ওহচ্ছং, এসা অস্মাক ধম্মতা’’তি.

তত্রাযং সঙ্খেপত্থো – ভো ব্রাহ্মণ, ‘‘মক্কটো কতগুণজাননকো আচারসম্পন্নো সীলৰা নাম অত্থী’’তি কহং তযা সুতো ৰা দিট্ঠো ৰা, ইদানি খো অহং তং ওহচ্ছং ৰচ্চং তে সীসে কত্ৰা পক্কমিস্সামি, অস্মাকঞ্হি মক্কটানং নাম এসা ধম্মতা অযং জাতিসভাৰো, যদিদং উপকারকস্স সীসে ৰচ্চং কাতব্বন্তি.

তং সুত্ৰা বোধিসত্তো উট্ঠায গন্তুং আরভি. মক্কটো তঙ্খণঞ্ঞেৰ উপ্পতিত্ৰা সাখাযং নিসীদিত্ৰা ওলম্বকং ওতরন্তো ৰিয তস্স সীসে ৰচ্চং পাতেত্ৰা ৰিরৰন্তো ৰনসণ্ডং পাৰিসি. বোধিসত্তো ন্হত্ৰা অগমাসি.

সত্থা ¶ ‘‘ন, ভিক্খৰে, ইদানেৰ দেৰদত্তো, পুব্বেপি মযা কতগুণং ন জানাসিযেৰা’’তি ৰত্ৰা ইমং ধম্মদেসনং আহরিত্ৰা জাতকং সমোধানেসি – ‘‘তদা মক্কটো দেৰদত্তো অহোসি, ব্রাহ্মণো পন অহমেৰ অহোসি’’ন্তি.

দুব্ভিযমক্কটজাতকৰণ্ণনা চতুত্থা.

[১৭৫] ৫. আদিচ্চুপট্ঠানজাতকৰণ্ণনা

সব্বেসু ¶ কির ভূতেসূতি ইদং সত্থা জেতৰনে ৰিহরন্তো একং কুহকভিক্খুং আরব্ভ কথেসি. ৰত্থু হেট্ঠা কথিতসদিসমেৰ.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং সব্বসিপ্পানি উগ্গণ্হিত্ৰা ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা মহাপরিৰারো গণসত্থা হুত্ৰা হিমৰন্তে ৰাসং কপ্পেসি. সো তত্থ চিরং ৰসিত্ৰা লোণম্বিলসেৰনত্থায পব্বতা ওরুয্হ পচ্চন্তে একং গামং নিস্সায ¶ পণ্ণসালাযং ৰাসং উপগঞ্ছি. অথেকো লোলমক্কটো ইসিগণে ভিক্খাচারং গতে অস্সমপদং আগন্ত্ৰা পণ্ণসালা উত্তিণ্ণা করোতি, পানীযঘটেসু উদকং ছড্ডেতি, কুণ্ডিকং ভিন্দতি, অগ্গিসালাযং ৰচ্চং করোতি. তাপসা ৰস্সং ৰসিত্ৰা ‘‘ইদানি হিমৰন্তো পুপ্ফফলসমিদ্ধো রমণীযো, তত্থেৰ গমিস্সামা’’তি পচ্চন্তগামৰাসিকে আপুচ্ছিংসু. মনুস্সা ‘‘স্ৰে, ভন্তে, মযং ভিক্খং গহেত্ৰা অস্সমপদং আগমিস্সাম, তং পরিভুঞ্জিত্ৰাৰ গমিস্সথা’’তি ৰত্ৰা দুতিযদিৰসে পহূতং খাদনীযভোজনীযং গহেত্ৰা তত্থ অগমংসু. তং দিস্ৰা সো মক্কটো চিন্তেসি – ‘‘কোহঞ্ঞং কত্ৰা মনুস্সে আরাধেত্ৰা ময্হম্পি খাদনীযভোজনীযং আহরাপেস্সামী’’তি. সো তাপসচরণং চরন্তো ৰিয সীলৰা ৰিয চ হুত্ৰা তাপসানং ¶ অৰিদূরে সূরিযং নমস্সমানো অট্ঠাসি. মনুস্সা তং দিস্ৰা ‘‘সীলৰন্তানং সন্তিকে ৰসন্তা সীলৰন্তা হোন্তী’’তি ৰত্ৰা পঠমং গাথমাহ –

৪৯.

‘‘সব্বেসু কির ভূতেসু, সন্তি সীলসমাহিতা;

পস্স সাখমিগং জম্মং, আদিচ্চমুপতিট্ঠতী’’তি.

তত্থ সন্তি সীলসমাহিতাতি সীলেন সমন্নাগতা সংৰিজ্জন্তি, সীলৰন্তা চ সমাহিতা চ একগ্গচিত্তা সংৰিজ্জন্তীতিপি অত্থো. জম্মন্তি লামকং. আদিচ্চমুপতিট্ঠতীতি সূরিযং নমস্সমানো তিট্ঠতি.

এৰং তে মনুস্সে তস্স গুণং কথেন্তে দিস্ৰা বোধিসত্তো ‘‘তুম্হে ইমস্স লোলমক্কটস্স সীলাচারং অজানিত্ৰা অৰত্থুস্মিংযেৰ পসন্না’’তি ৰত্ৰা দুতিযং গাথমাহ –

৫০.

‘‘নাস্স ¶ সীলং ৰিজানাথ, অনঞ্ঞায পসংসথ;

অগ্গিহুত্তঞ্চ উহন্নং, দ্ৰে চ ভিন্না কমণ্ডলূ’’তি.

তত্থ অনঞ্ঞাযাতি অজানিত্ৰা. উহন্নন্তি ইমিনা পাপমক্কটেন ঊহদং. কমণ্ডলূতি কুণ্ডিকা. ‘‘দ্ৰে চ কুণ্ডিকা তেন ভিন্না’’তি এৰমস্স অগুণং কথেসি.

মনুস্সা মক্কটস্স কুহকভাৰং ঞত্ৰা লেড্ডুঞ্চ যট্ঠিঞ্চ গহেত্ৰা পোথেত্ৰা পলাপেত্ৰা ইসিগণস্স ভিক্খং অদংসু. ইসযোপি হিমৰন্তমেৰ গন্ত্ৰা অপরিহীনজ্ঝানা ব্রহ্মলোকপরাযণা অহেসুং.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা মক্কটো অযং কুহকো ভিক্খু অহোসি, ইসিগণো বুদ্ধপরিসা, গণসত্থা পন অহমেৰ অহোসি’’ন্তি.

আদিচ্চুপট্ঠানজাতকৰণ্ণনা পঞ্চমা.

[১৭৬] ৬. কল়াযমুট্ঠিজাতকৰণ্ণনা

বালো ¶ ৰতাযং দুমসাখগোচরোতি ইদং সত্থা জেতৰনে ৰিহরন্তো কোসলরাজানং আরব্ভ কথেসি. একস্মিঞ্হি সমযে ৰস্সকালে কোসলরঞ্ঞো পচ্চন্তো কুপি. তত্থ ঠিতা যোধা দ্ৰে তীণি যুদ্ধানি কত্ৰা পচ্চত্থিকে অভিভৰিতুং অসক্কোন্তা রঞ্ঞো সাসনং পেসেসুং. রাজা অকালে ৰস্সানেযেৰ নিক্খমিত্ৰা জেতৰনসমীপে খন্ধাৰারং বন্ধিত্ৰা চিন্তেসি – ‘‘অহং অকালে নিক্খন্তো, কন্দরপদরাদযো উদকপূরা, দুগ্গমো মগ্গো, সত্থারং উপসঙ্কমিস্সামি, সো মং ‘কহং গচ্ছসি, মহারাজা’তি পুচ্ছিস্সতি, অথাহং এতমত্থং আরোচেস্সামি, ন খো পন মং সত্থা সম্পরাযিকেনেৰত্থেন অনুগ্গণ্হাতি, দিট্ঠধম্মিকেনাপি অনুগ্গণ্হাতিযেৰ, তস্মিং সচে মে গমনেন অৰুড্ঢি ভৰিস্সতি, ‘অকালো, মহারাজা’তি ৰক্খতি. সচে পন ৰুড্ডি ভৰিস্সতি, তুণ্হী ভৰিস্সতী’’তি. সো জেতৰনং পৰিসিত্ৰা সত্থারং ৰন্দিত্ৰা একমন্তং নিসীদি. সত্থা ‘‘হন্দ কুতো নু ত্ৰং, মহারাজ, আগচ্ছসি দিৰা দিৰস্সা’’তি পুচ্ছি. ‘‘ভন্তে, অহং পচ্চন্তং ৰূপসমেতুং নিক্খন্তো ‘তুম্হে ৰন্দিত্ৰা গমিস্সামী’তি আগতোম্হী’’তি ¶ . সত্থা ‘‘পুব্বেপি, মহারাজ, রাজানো সেনায অব্ভুগ্গচ্ছমানায পণ্ডিতানং কথং সুত্ৰা অকালে অব্ভুগ্গমনং নাম ন গমিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অত্থধম্মানুসাসকো সব্বত্থকঅমচ্চো অহোসি. অথ রঞ্ঞো পচ্চন্তে কুপিতে পচ্চন্তযোধা পণ্ণং পেসেসুং. রাজা ৰস্সকালে নিক্খমিত্ৰা উয্যানে খন্ধাৰারং বন্ধি, বোধিসত্তো রঞ্ঞো সন্তিকে অট্ঠাসি. তস্মিং খণে অস্সানং কল়াযে সেদেত্ৰা আহরিত্ৰা দোণিযং পক্খিপিংসু. উয্যানে মক্কটেসু একো মক্কটো রুক্খা ওতরিত্ৰা ততো কল়াযে গহেত্ৰা মুখং পূরেত্ৰা হত্থেহিপি গহেত্ৰা উপ্পতিত্ৰা রুক্খে নিসীদিত্ৰা খাদিতুং আরভি, অথস্স খাদমানস্স হত্থকো একো কল়াযো ভূমিযং পতি. সো মুখেন চ হত্থেহি চ গহিতে সব্বে ¶ কল়াযে ছড্ডেত্ৰা রুক্খা ওরুয্হ তমেৰ কল়াযং ওলোকেন্তো তং কল়াযং অদিস্ৰাৰ পুন রুক্খং অভিরুহিত্ৰা অড্ডে সহস্সপরাজিতো ৰিয সোচমানো দুম্মুখো রুক্খসাখাযং নিসীদি. রাজা মক্কটস্স কিরিযং দিস্ৰা বোধিসত্তং আমন্তেত্ৰা ¶ ‘‘পস্সথ, কিং নামেতং মক্কটেন কত’’ন্তি পুচ্ছি. বোধিসত্তো ‘‘মহারাজ, বহুং অনৰলোকেত্ৰা অপ্পং ওলোকেত্ৰা দুব্বুদ্ধিনো বালা এৰরূপং করোন্তিযেৰা’’তি ৰত্ৰা পঠমং গাথমাহ –

৫১.

‘‘বালো ৰতাযং দুমসাখগোচরো, পঞ্ঞা জনিন্দ নযিমস্স ৰিজ্জতি;

কল়াযমুট্ঠিং অৰকিরিয কেৰলং, একং কল়াযং পতিতং গৰেসতী’’তি.

তত্থ দুমসাখগোচরোতি মক্কটো. সো হি দুমসাখাসু গোচরং গণ্হাতি, সাৰ অস্স গোচরো সঞ্চরণভূমিভূতা, তস্মা ‘‘দুমসাখগোচরো’’তি ৰুচ্চতি. জনিন্দাতি রাজানং আলপতি. রাজা হি পরমিস্সরভাৰেন জনস্স ইন্দোতি জনিন্দো. কল়াযমুট্ঠিন্তি চণকমুট্ঠিং. ‘‘কাল়রাজমাসমুট্ঠি’’ন্তিপি ৰদন্তিযেৰ. অৰকিরিযাতি অৰকিরিত্ৰা. কেৰলন্তি সব্বং. গৰেসতীতি ভূমিযং পতিতং একমেৰ পরিযেসতি.

এৰং ¶ ৰত্ৰা পুন বোধিসত্তো তং উপসঙ্কমিত্ৰা রাজানং আমন্তেত্ৰা দুতিযং গাথমাহ –

৫২.

‘‘এৰমেৰ মযং রাজ, যে চঞ্ঞে অতিলোভিনো;

অপ্পেন বহুং জিয্যাম, কল়াযেনেৰ ৰানরো’’তি.

তত্রাযং সঙ্খেপত্থো – মহারাজ, এৰমেৰ মযঞ্চ যে চঞ্ঞে লোভাভিভূতা জনা সব্বেপি অপ্পেন বহুং জিয্যাম. মযঞ্হি এতরহি অকালে ৰস্সানসমযে মগ্গং গচ্ছন্তা অপ্পকস্স অত্থস্স কারণা বহুকা অত্থা পরিহাযাম. কল়াযেনেৰ ৰানরোতি যথা অযং ৰানরো একং কল়াযং পরিযেসমানো তেনেকেন কল়াযেন সব্বকল়াযেহি পরিহীনো, এৰং মযম্পি ¶ অকালেন কন্দরপদরাদীসু পূরেসু গচ্ছমানা অপ্পমত্তকং অত্থং পরিযেসমানা বহূহি হত্থিৰাহনঅস্সৰাহনাদীহি চেৰ বলকাযেন চ পরিহাযিস্সাম. তস্মা অকালে গন্তুং ন ৰট্টতীতি রঞ্ঞো ওৰাদং অদাসি.

রাজা তস্স কথং সুত্ৰা ততো নিৰত্তিত্ৰা বারাণসিমেৰ পাৰিসি. চোরাপি ‘‘রাজা কির চোরমদ্দনং করিস্সামীতি নগরা নিক্খন্তো’’তি সুত্ৰা পচ্চন্ততো পলাযিংসু. পচ্চুপ্পন্নেপি চোরা ‘‘কোসলরাজা কির নিক্খন্তো’’তি সুত্ৰা পলাযিংসু. রাজা সত্থু ধম্মদেসনং সুত্ৰা উট্ঠাযাসনা ৰন্দিত্ৰা পদক্খিণং কত্ৰা সাৰত্থিমেৰ পাৰিসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, পণ্ডিতামচ্চো পন অহমেৰ অহোসি’’ন্তি.

কল়াযমুট্ঠিজাতকৰণ্ণনা ছট্ঠা.

[১৭৭] ৭. তিন্দুকজাতকৰণ্ণনা

ধনুহত্থকলাপেহীতি ইদং সত্থা জেতৰনে ৰিহরন্তো পঞ্ঞাপারমিং আরব্ভ কথেসি. সত্থা হি মহাবোধিজাতকে (জা. ২.১৮.১২৪ আদযো) ৰিয উমঙ্গজাতকে (জা. ২.২২.৫৯০ আদযো) ৰিয চ অত্তনো পঞ্ঞায ৰণ্ণং ৰণ্ণিতং সুত্ৰা ‘‘ন, ভিক্খৰে, ইদানেৰ তথাগতো পঞ্ঞৰা, পুব্বেপি পঞ্ঞৰা উপাযকুসলোযেৰা’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো ৰানরযোনিযং নিব্বত্তিত্ৰা অসীতিসহস্সৰানরগণপরিৰারো হিমৰন্তপদেসে ৰাসং কপ্পেসি. তস্সাসন্নে একো পচ্চন্তগামকো কদাচি ৰসতি, কদাচি উব্বসতি. তস্স পন গামস্স মজ্ঝে সাখাৰিটপসম্পন্নো মধুরফলো একো তিন্দুকরুক্খো অত্থি, ৰানরগণো উব্বসিতকালে আগন্ত্ৰা তস্স ফলানি খাদতি. অথাপরস্মিং ফলৰারে সো গামো পুন আৰাসো অহোসি দল়্হপরিক্খিত্তো দ্ৰারযুত্তো, সোপি রুক্খো ফলভারনমিতসাখো ¶ অট্ঠাসি. ৰানরগণো চিন্তেসি – ‘‘মযং পুব্বে অসুকগামে তিন্দুকফলানি খাদাম, ফলিতো নু খো সো এতরহি রুক্খো, উদাহু নো, আৰসিতো সো গামো, উদাহু নো’’তি. এৰঞ্চ পন চিন্তেত্ৰা ‘‘গচ্ছ ইমং পৰত্তিং জানাহী’’তি একং ৰানরং পেসেসি. সো গন্ত্ৰা রুক্খস্স চ ফলিতভাৰং গামস্স চ গাল়্হৰাসভাৰং ঞত্ৰা আগন্ত্ৰা ৰানরানং আরোচেসি.

ৰানরা তস্স ফলিতভাৰং সুত্ৰা ‘‘মধুরানি তিন্দুকফলানি খাদিস্সামা’’তি উস্সাহজাতা ৰানরিন্দস্স তমত্থং আরোচেসুং. ৰানরিন্দো ‘‘গামো আৰাসো অনাৰাসো’’তি পুচ্ছি. ‘‘আৰাসো, দেৰা’’তি. ‘‘তেন হি ন গন্তব্বং. মনুস্সা হি বহুমাযা হোন্তী’’তি. ‘‘দেৰ, মনুস্সানং পটিসল্লানৰেলায অড্ঢরত্তসমযে খাদিস্সামা’’তি বহূ গন্ত্ৰা ৰানরিন্দং সম্পটিচ্ছাপেত্ৰা হিমৰন্তা ওতরিত্ৰা তস্স গামস্স অৰিদূরে মনুস্সানং পটিসল্লানকালং আগমযমানা মহাপাসাণপিট্ঠে সযিত্ৰা মজ্ঝিমযামে মনুস্সেসু নিদ্দং ওক্কমন্তেসু রুক্খং আরুয্হ ফলানি খাদিংসু. অথেকো পুরিসো সরীরকিচ্চেন গেহা নিক্খমিত্ৰা গামমজ্ঝগতো ৰানরে ¶ দিস্ৰা মনুস্সানং আচিক্খি. বহূ মনুস্সা ধনুকলাপং সন্নয্হিত্ৰা নানাৰুধহত্থা লেড্ডুদণ্ডাদীনি আদায ‘‘পভাতায রত্তিযা ৰানরে গণ্হিস্সামা’’তি রুক্খং পরিৰারেত্ৰা অট্ঠংসু. অসীতিসহস্সৰানরা মনুস্সে দিস্ৰা মরণভযতজ্জিতা ‘‘নত্থি নো অঞ্ঞং পটিস্সরণং অঞ্ঞত্র ৰানরিন্দেনা’’তি তস্স সন্তিকং গন্ত্ৰা পঠমং গাথমাহংসু –

৫৩.

‘‘ধনুহত্থকলাপেহি, নেত্তিংসৰরধারিভি;

সমন্তা পরিকিণ্ণম্হ, কথং মোক্খো ভৰিস্সতী’’তি.

তত্থ ¶ ধনুহত্থকলাপেহীতি ধনুকলাপহত্থেহি, ধনূনি চেৰ সরকলাপে চ গহেত্ৰা ঠিতেহীতি অত্থো. নেত্তিংসৰরধারিভীতি নেত্তিংসা ৰুচ্চন্তি খগ্গা, উত্তমখগ্গধারীহীতি অত্থো. পরিকিণ্ণম্হাতি পরিৰারিতম্হ. কথন্তি কেন নু খো উপাযেন অম্হাকং মোক্খো ভৰিস্সতীতি.

তেসং ¶ কথং সুত্ৰা ৰানরিন্দো ‘‘মা ভাযিত্থ, মনুস্সা নাম বহুকিচ্চা, অজ্জপি মজ্ঝিমযামো ৰত্ততি, অপি নাম তেসং ‘অম্হে মারেস্সামা’তি পরিৰারিতানং ইমস্স কিচ্চস্স অন্তরাযকরং অঞ্ঞং কিচ্চং উপ্পজ্জেয্যা’’তি ৰানরে সমস্সাসেত্ৰা দুতিযং গাথমাহ –

৫৪.

‘‘অপ্পেৰ বহুকিচ্চানং, অত্থো জাযেথ কোচি নং;

অত্থি রুক্খস্স অচ্ছিন্নং, খজ্জথঞ্ঞেৰ তিন্দুক’’ন্তি.

তত্থ নন্তি নিপাতমত্তং, অপ্পেৰ বহুকিচ্চানং মনুস্সানং অঞ্ঞো কোচি অত্থো উপ্পজ্জেয্যাতি অযমেৰেত্থ অত্থো. অত্থি রুক্খস্স অচ্ছিন্নন্তি ইমস্স রুক্খস্স ফলানং আকড্ঢনপরিকড্ঢনৰসেন অচ্ছিন্নং বহু ঠানং অত্থি. খজ্জথঞ্ঞেৰ তিন্দুকন্তি তিন্দুকফলং খজ্জথঞ্ঞেৰ. তুম্হে হি যাৰতকেন ৰো অত্থো অত্থি, তত্তকং খাদথ, অম্হাকং পহরণকালং জানিস্সামাতি.

এৰং মহাসত্তো কপিগণং সমস্সাসেসি. এত্তকঞ্হি অস্সাসং অলভমানা সব্বেপি তে ফলিতেন হদযেন জীৰিতক্খযং পাপুণেয্যুং. মহাসত্তো পন এৰং ৰানরগণং অস্সাসেত্ৰা ‘‘সব্বে ৰানরে সমানেথা’’তি আহ. সমানেন্তা তস্স ভাগিনেয্যং সেনকং নাম ৰানরং অদিস্ৰা ‘‘সেনকো নাগতো’’তি আরোচেসুং. ‘‘সচে সেনকো নাগতো, তুম্হে মা ভাযিত্থ, ইদানি ৰো সো ¶ সোত্থিং করিস্সতী’’তি. সেনকোপি খো ৰানরগণস্স গমনকালে নিদ্দাযিত্ৰা পচ্ছা পবুদ্ধো কঞ্চি অদিস্ৰা পদানুপদিকো হুত্ৰা আগচ্ছন্তো মনুস্সে দিস্ৰা ‘‘ৰানরগণস্স ভযং উপ্পন্ন’’ন্তি ঞত্ৰা একস্মিং পরিযন্তে গেহে অগ্গিং জালেত্ৰা সুত্তং কন্তন্তিযা মহল্লকিত্থিযা সন্তিকং গন্ত্ৰা খেত্তং গচ্ছন্তো গামদারকো ৰিয একং উম্মুকং গহেত্ৰা ¶ উপরিৰাতে ঠত্ৰা গামং পদীপেসি. মনুস্সা মক্কটে ছড্ডেত্ৰা অগ্গিং নিব্বাপেতুং অগমংসু. ৰানরা পলাযন্তা সেনকস্সত্থায একেকং ফলং গহেত্ৰা পলাযিংসু.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা ভাগিনেয্যো সেনকো মহানামো সক্কো অহোসি, ৰানরগণো বুদ্ধপরিসা, ৰানরিন্দো পন অহমেৰ অহোসি’’ন্তি.

তিন্দুকজাতকৰণ্ণনা সত্তমা.

[১৭৮] ৮. কচ্ছপজাতকৰণ্ণনা

জনিত্তং মে ভৰিত্তং মেতি ইদং সত্থা জেতৰনে ৰিহরন্তো একং অহিৰাতকরোগমুত্তং আরব্ভ কথেসি. সাৰত্থিযং কির একস্মিং কুলে অহিৰাতকরোগো উপ্পজ্জি. মাতাপিতরো পুত্তং আহংসু – ‘‘তাত, মা ইমস্মিং গেহে ৰস, ভিত্তিং ভিন্দিত্ৰা পলাযিত্ৰা যত্থ কত্থচি গন্ত্ৰা জীৰিতং রক্খ, পচ্ছা আগন্ত্ৰা ইমস্মিং নাম ঠানে মহানিধানং অত্থি, তং উদ্ধরিত্ৰা কুটুম্বং সণ্ঠপেত্ৰা সুখেন জীৰেয্যাসী’’তি. পুত্তো তেসং ৰচনং সম্পটিচ্ছিত্ৰা ভিত্তিং ভিন্দিত্ৰা পলাযিত্ৰা অত্তনো রোগে ৰূপসন্তে আগন্ত্ৰা মহানিধানং উদ্ধরিত্ৰা কুটুম্বং সণ্ঠপেত্ৰা ঘরাৰাসং ৰসি. সো একদিৰসং সপ্পিতেলাদীনি চেৰ ৰত্থচ্ছাদনাদীনি চ গাহাপেত্ৰা জেতৰনং গন্ত্ৰা সত্থারং ৰন্দিত্ৰা নিসীদি. সত্থা তেন সদ্ধিং পটিসন্থারং কত্ৰা ‘‘তুম্হাকং গেহে অহিৰাতকরোগো উপ্পন্নোতি অস্সুম্হ, কিন্তি কত্ৰা মুত্তোসী’’তি পুচ্ছি, সো তং পৰত্তিং আচিক্খি. সত্থা ‘‘পুব্বেপি খো, উপাসক, ভযে উপ্পন্নে অত্তনো ৰসনট্ঠানে আলযং কত্ৰা অঞ্ঞত্থ অগতা জীৰিতক্খযং পাপুণিংসু, অনালযং পন কত্ৰা অঞ্ঞত্থ গতা জীৰিতং লভিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিগামকে কুম্ভকারকুলে নিব্বত্তিত্ৰা কুম্ভকারকম্মং কত্ৰা পুত্তদারং পোসেসি. তদা পন বারাণসিযং মহানদিযা সদ্ধিং একাবদ্ধো মহাজাতস্সরো অহোসি. সো বহুউদককালে নদিযা সদ্ধিং একোদকো হোতি, উদকে মন্দীভূতে ¶ ৰিসুং হোতি. মচ্ছকচ্ছপা ¶ পন ‘‘ইমস্মিং সংৰচ্ছরে সুৰুট্ঠিকা ভৰিস্সতি, ইমস্মিং সংৰচ্ছরে দুব্বুট্ঠিকা’’তি জানন্তি. অথ তস্মিং সরে নিব্বত্তমচ্ছকচ্ছপা ‘‘ইমস্মিং সংৰচ্ছরে দুব্বুট্ঠিকা ভৰিস্সতী’’তি ঞত্ৰা উদকস্স একাবদ্ধকালেযেৰ তম্হা সরা নিক্খমিত্ৰা ¶ নদিং অগমিংসু. একো পন কচ্ছপো ‘‘ইদং মে জাতট্ঠানং ৰড্ঢিতট্ঠানং, মাতাপিতূহি ৰসিতট্ঠানং, ন সক্কোমি ইমং জহিতু’’ন্তি নদিং ন অগমাসি. অথ নিদাঘসমযে তত্থ উদকং ছিজ্জি, সো কচ্ছপো বোধিসত্তস্স মত্তিকগহণট্ঠানে ভূমিং খণিত্ৰা পাৰিসি. বোধিসত্তো ‘‘মত্তিকং গহেস্সামী’’তি তত্থ গন্ত্ৰা মহাকুদ্দালেন ভূমিং খণন্তো কচ্ছপস্স পিট্ঠিং ভিন্দিত্ৰা মত্তিকপিণ্ডং ৰিয কুদ্দালেনেৰ নং উদ্ধরিত্ৰা থলে পাতেসি. সো ৰেদনাপ্পত্তো হুত্ৰা ‘‘ৰসনট্ঠানে আলযং জহিতুং অসক্কোন্তো এৰং ৰিনাসং পাপুণি’’ন্তি ৰত্ৰা পরিদেৰমানো ইমা গাথা অৰোচ –

৫৫.

‘‘জনিত্তং মে ভৰিত্তং মে, ইতি পঙ্কে অৰস্সযিং;

তং মং পঙ্কো অজ্ঝভৰি, যথা দুব্বলকং তথা;

তং তং ৰদামি ভগ্গৰ, সুণোহি ৰচনং মম.

৫৬.

‘‘গামে ৰা যদি ৰারঞ্ঞে, সুখং যত্রাধিগচ্ছতি;

তং জনিত্তং ভৰিত্তঞ্চ, পুরিসস্স পজানতো;

যম্হি জীৰে তম্হি গচ্ছে, ন নিকেতহতো সিযা’’তি.

তত্থ জনিত্তং মে ভৰিত্তং মেতি ইদং মম জাতট্ঠানং, ইদং মম ৰড্ঢিতট্ঠানং. ইতি পঙ্কে অৰস্সযিন্তি ইমিনা কারণেনাহং ইমস্মিং কদ্দমে অৰস্সযিং নিপজ্জিং, ৰাসং কপ্পেসিন্তি অত্থো. অজ্ঝভৰীতি অধিঅভৰি ৰিনাসং পাপেসি. ভগ্গৰাতি কুম্ভকারং আলপতি. কুম্ভকারানঞ্হি নামগোত্তপঞ্ঞত্তি এসা, যদিদং ভগ্গৰাতি. সুখন্তি কাযিকচেতসিকস্সাদং. তং ¶ জনিত্তং ভৰিত্তঞ্চাতি তং জাতট্ঠানঞ্চ ৰড্ঢিতট্ঠানঞ্চ. ‘‘জানিত্তং ভাৰিত্ত’’ন্তি দীঘৰসেনপি পাঠো, সোযেৰত্থো. পজানতোতি অত্থানত্থং কারণাকারণং জানন্তস্স. ন নিকেতহতো সিযাতি নিকেতে আলযং কত্ৰা অঞ্ঞত্থ অগন্ত্ৰা নিকেতেন হতো, এৰরূপং মরণদুক্খং পাপিতো ন ভৰেয্যাতি.

এৰং সো বোধিসত্তেন সদ্ধিং কথেন্তো কালমকাসি. বোধিসত্তো তং গহেত্ৰা সকলগামৰাসিনো সন্নিপাতাপেত্ৰা তে মনুস্সে ওৰদন্তো এৰমাহ – ‘‘পস্সথ ইমং কচ্ছপং, অযং ¶ অঞ্ঞেসং মচ্ছকচ্ছপানং মহানদিং গমনকালে অত্তনো ৰসনট্ঠানে আলযং ছিন্দিতুং অসক্কোন্তো ¶ তেহি সদ্ধিং অগন্ত্ৰা মম মত্তিকগহণট্ঠানং পৰিসিত্ৰা নিপজ্জি. অথস্সাহং মত্তিকং গণ্হন্তো মহাকুদ্দালেন পিট্ঠিং ভিন্দিত্ৰা মত্তিকপিণ্ডং ৰিয নং থলে পাতেসিং, অযং অত্তনা কতকম্মং সরিত্ৰা দ্ৰীহি গাথাহি পরিদেৰিত্ৰা কালমকাসি. এৰমেস অত্তনো ৰসনট্ঠানে আলযং কত্ৰা মরণং পত্তো, তুম্হেপি মা ইমিনা কচ্ছপেন সদিসা অহুৰত্থ, ইতো পট্ঠায ‘ময্হং রূপং ময্হং সদ্দো ময্হং গন্ধো ময্হং রসো ময্হং ফোট্ঠব্বো ময্হং পুত্তো ময্হং ধীতা ময্হং দাসদাসিপরিচ্ছেদো ময্হং হিরঞ্ঞসুৰণ্ণ’ন্তি তণ্হাৰসেন উপভোগৰসেন মা গণ্হিত্থ, এককোৰেস সত্তো তীসু ভৰেসু পরিৰত্ততী’’তি. এৰং বুদ্ধলীলায মহাজনস্স ওৰাদমদাসি, সো ওৰাদো সকলজম্বুদীপং পত্থরিত্ৰা সট্ঠিমত্তানি ৰস্সসহস্সানি অট্ঠাসি. মহাজনো বোধিসত্তস্স ওৰাদে ঠত্ৰা দানাদীনি পুঞ্ঞানি কত্ৰা আযুপরিযোসানে সগ্গপুরং পূরেসি, বোধিসত্তোপি তথেৰ পুঞ্ঞানি কত্ৰা সগ্গপুরং পূরেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো কুলপুত্তো সোতাপত্তিফলে পতিট্ঠাসি. ‘‘তদা কচ্ছপো আনন্দো অহোসি, কুম্ভকারো পন অহমেৰ অহোসি’’ন্তি.

কচ্ছপজাতকৰণ্ণনা অট্ঠমা.

[১৭৯] ৯. সতধম্মজাতকৰণ্ণনা

তঞ্চ ¶ অপ্পন্তি ইদং সত্থা জেতৰনে ৰিহরন্তো একৰীসতিৰিধং অনেসনং আরব্ভ কথেসি. একস্মিঞ্হি কালে বহূ ভিক্খূ ৰেজ্জকম্মেন দূতকম্মেন পহিণকম্মেন জঙ্ঘপেসনিকেন পিণ্ডপটিপিণ্ডেনাতি এৰরূপায একৰীসতিৰিধায অনেসনায জীৰিকং কপ্পেসুং. সা সাকেতজাতকে (জা. ১.২.১৭৩-১৭৪) আৰিভৰিস্সতি. সত্থা তেসং তথা জীৰিককপ্পনভাৰং ঞত্ৰা ‘‘এতরহি খো বহূ ভিক্খূ অনেসনায জীৰিকং কপ্পেন্তি, তে পন এৰং জীৰিকং কপ্পেত্ৰা যক্খত্তভাৰা পেতত্তভাৰা ন মুচ্চিস্সন্তি, ধুরগোণা হুত্ৰাৰ নিব্বত্তিস্সন্তি, নিরযে পটিসন্ধিং গণ্হিস্সন্তি, এতেসং হিতত্থায সুখত্থায ¶ অত্তজ্ঝাসযং সকপটিভানং একং ধম্মদেসনং কথেতুং ৰট্টতী’’তি ভিক্খুসঙ্ঘং সন্নিপাতাপেত্ৰা ‘‘ন, ভিক্খৰে, একৰীসতিৰিধায অনেসনায পচ্চযা উপ্পাদেতব্বা. অনেসনায হি উপ্পন্নো পিণ্ডপাতো আদিত্তলোহগুল়সদিসো হলাহলৰিসূপমো. অনেসনা হি নামেসা বুদ্ধপচ্চেকবুদ্ধসাৰকেহি গরহিতব্বা পটিকুট্ঠা. অনেসনায ¶ উপ্পন্নং পিণ্ডপাতং ভুঞ্জন্তস্স হি হাসো ৰা সোমনস্সং ৰা নত্থি. এৰং উপ্পন্নো হি পিণ্ডপাতো মম সাসনে চণ্ডালস্স উচ্ছিট্ঠভোজনসদিসো, তস্স পরিভোগো সতধম্মমাণৰস্স চণ্ডালুচ্ছিট্ঠভত্তপরিভোগো ৰিয হোতী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো চণ্ডালযোনিযং নিব্বত্তিত্ৰা ৰযপ্পত্তো কেনচিদেৰ করণীযেন পাথেয্যতণ্ডুলে চ ভত্তপুটঞ্চ গহেত্ৰা মগ্গং পটিপজ্জি. তস্মিঞ্হি কালে বারাণসিযং একো মাণৰো অত্থি সতধম্মো নাম উদিচ্চব্রাহ্মণমহাসালকুলে নিব্বত্তো. সোপি কেনচিদেৰ করণীযেন তণ্ডুলে চ ভত্তপুটঞ্চ অগহেত্ৰাৰ মগ্গং পটিপজ্জি, তে উভোপি মহামগ্গে সমাগচ্ছিংসু. মাণৰো বোধিসত্তং ‘‘কিংজাতিকোসী’’তি পুচ্ছি. সো ‘‘অহং চণ্ডালো’’তি ৰত্ৰা ‘‘ত্ৰং কিংজাতিকোসী’’তি মাণৰং পুচ্ছি ¶ . ‘‘উদিচ্চব্রাহ্মণো অহ’’ন্তি. ‘‘সাধু গচ্ছামা’’তি তে উভোপি মগ্গং অগমংসু. বোধিসত্তো পাতরাসৰেলায উদকফাসুকট্ঠানে নিসীদিত্ৰা হত্থে ধোৰিত্ৰা ভত্তপুটং মোচেত্ৰা ‘‘মাণৰ, ভত্তং ভুঞ্জাহী’’তি আহ. ‘‘নত্থি, অরে চণ্ডাল, মম ভত্তেন অত্থো’’তি. বোধিসত্তো ‘‘সাধূ’’তি পুটকভত্তং উচ্ছিট্ঠং অকত্ৰাৰ অত্তনো যাপনমত্তং অঞ্ঞস্মিং পণ্ণে পক্খিপিত্ৰা পুটকভত্তং বন্ধিত্ৰা একমন্তে ঠপেত্ৰা ভুঞ্জিত্ৰা পানীযং পিৰিত্ৰা ধোতহত্থপাদো তণ্ডুলে চ সেসভত্তঞ্চ আদায ‘‘গচ্ছাম, মাণৰা’’তি মগ্গং পটিপজ্জি.

তে সকলদিৰসং গন্ত্ৰা সাযং উভোপি একস্মিং উদকফাসুকট্ঠানে ন্হত্ৰা পচ্চুত্তরিংসু. বোধিসত্তো ফাসুকট্ঠানে নিসীদিত্ৰা ভত্তপুটং মোচেত্ৰা মাণৰং অনাপুচ্ছিত্ৰা ভুঞ্জিতুং আরভি. মাণৰো সকলদিৰসং মগ্গগমনেন কিলন্তো ছাতজ্ঝত্তো ‘‘সচে মে ভত্তং দস্সতি, ভুঞ্জিস্সামী’’তি ওলোকেন্তো অট্ঠাসি. ইতরো কিঞ্চি অৰত্ৰা ভুঞ্জতেৰ. মাণৰো চিন্তেসি – ‘‘অযং চণ্ডালো ময্হং অৰত্ৰাৰ সব্বং ভুঞ্জতি ¶ নিপ্পীল়েত্ৰাপি তং গহেত্ৰা উপরি উচ্ছিট্ঠভত্তং ছড্ডেত্ৰা সেসং ভুঞ্জিতুং ৰট্টতী’’তি. সো তথা কত্ৰা উচ্ছিট্ঠভত্তং ভুঞ্জি. অথস্স ভুত্তমত্তস্সেৰ ‘‘মযা অত্তনো জাতিগোত্তকুলপদেসানং অননুচ্ছৰিকং কতং, চণ্ডালস্স নাম মে উচ্ছিট্ঠভত্তং ভুত্ত’’ন্তি বলৰৰিপ্পটিসারো উপ্পজ্জি, তাৰদেৰস্স সলোহিতং ভত্তং মুখতো উগ্গচ্ছি. সো ‘‘অপ্পমত্তকস্স ৰত মে কারণা অননুচ্ছৰিকং কম্মং কত’’ন্তি উপ্পন্নবলৰসোকতায পরিদেৰমানো পঠমং গাথমাহ –

৫৭.

‘‘তঞ্চ ¶ অপ্পঞ্চ উচ্ছিট্ঠং, তঞ্চ কিচ্ছেন নো অদা;

সোহং ব্রাহ্মণজাতিকো, যং ভুত্তং তম্পি উগ্গত’’ন্তি.

তত্রাযং ¶ সঙ্খেপত্থো – যং মযা ভুত্তং, তং অপ্পঞ্চ উচ্ছিট্ঠঞ্চ, তঞ্চ সো চণ্ডালো ন অত্তনো রুচিযা মং অদাসি, অথ খো নিপ্পীল়িযমানো কিচ্ছেন কসিরেন অদাসি, সোহং পরিসুদ্ধব্রাহ্মণজাতিকো, তেনেৰ মে যং ভুত্তং, তম্পি সদ্ধিং লোহিতেন উগ্গতন্তি.

এৰং মাণৰো পরিদেৰিত্ৰা ‘‘কিং দানি মে এৰরূপং অননুচ্ছৰিকং কম্মং কত্ৰা জীৰিতেনা’’তি অরঞ্ঞং পৰিসিত্ৰা কস্সচি অত্তানং অদস্সেত্ৰাৰ অনাথমরণং পত্তো.

সত্থা ইমং অতীতং দস্সেত্ৰা ‘‘সেয্যথাপি, ভিক্খৰে, সতধম্মমাণৰস্স তং চণ্ডালুচ্ছিট্ঠকং ভুঞ্জিত্ৰা অত্তনো অযুত্তভোজনস্স ভুত্তত্তা নেৰ হাসো, ন সোমনস্সং উপ্পজ্জি, এৰমেৰ যো ইমস্মিং সাসনে পব্বজিতো অনেসনায জীৰিকং কপ্পেন্তো তথালদ্ধপচ্চযং পরিভুঞ্জতি, তস্স বুদ্ধপটিকুট্ঠগরহিতজীৰিতভাৰতো নেৰ হাসো, ন সোমনস্সং উপ্পজ্জতী’’তি ৰত্ৰা অভিসম্বুদ্ধো হুত্ৰা দুতিযং গাথমাহ –

৫৮.

‘‘এৰং ধম্মং নিরংকত্ৰা, যো অধম্মেন জীৰতি;

সতধম্মোৰ লাভেন, লদ্ধেনপি ন নন্দতী’’তি.

তত্থ ধম্মন্তি আজীৰপারিসুদ্ধিসীলধম্মং. নিরংকত্ৰাতি নীহরিত্ৰা ছড্ডেত্ৰা. অধম্মেনাতি একৰীসতিযা অনেসনসঙ্খাতেন মিচ্ছাজীৰেন. সতধম্মোতি তস্স নামং, ‘‘সন্তধম্মো’’তিপি পাঠো. ন নন্দতীতি যথা সতধম্মো মাণৰো ‘‘চণ্ডালুচ্ছিট্ঠকং মে লদ্ধ’’ন্তি তেন লাভেন ন ¶ নন্দতি, এৰং ইমস্মিম্পি সাসনে পব্বজিতো কুলপুত্তো অনেসনায লদ্ধলাভং পরিভুঞ্জন্তো ন নন্দতি ন তুস্সতি, ‘‘বুদ্ধগরহিতজীৰিকায জীৰামী’’তি দোমনস্সপ্পত্তো হোতি. তস্মা অনেসনায জীৰিকং কপ্পেন্তস্স সতধম্মমাণৰস্সেৰ অরঞ্ঞং পৰিসিত্ৰা অনাথমরণং মরিতুং ৰরন্তি.

এৰং ¶ সত্থা ইমং ধম্মদেসনং দেসেত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে বহূ ভিক্খূ সোতাপত্তিফলাদীনি পাপুণিংসু. ‘‘তদা মাণৰো আনন্দো অহোসি, অহমেৰ চণ্ডালপুত্তো অহোসি’’ন্তি.

সতধম্মজাতকৰণ্ণনা নৰমা.

[১৮০] ১০. দুদ্দদজাতকৰণ্ণনা

দুদ্দদং ¶ দদমানানন্তি ইদং সত্থা জেতৰনে ৰিহরন্তো গণদানং আরব্ভ কথেসি. সাৰত্থিযং কির দ্ৰে সহাযকা কুটুম্বিযপুত্তা ছন্দকং সংহরিত্ৰা সব্বপরিক্খারদানং সজ্জেত্ৰা বুদ্ধপ্পমুখং ভিক্খুসঙ্ঘং নিমন্তেত্ৰা সত্তাহং মহাদানং পৰত্তেত্ৰা সত্তমে দিৰসে সব্বপরিক্খারে অদংসু. তেসু গণজেট্ঠকো সত্থারং ৰন্দিত্ৰা একমন্তং নিসীদিত্ৰা ‘‘ভন্তে, ইমস্মিং দানে বহুদাযকাপি অত্থি অপ্পদাযকাপি, তেসং সব্বেসম্পি ‘ইদং দানং মহপ্ফলং হোতূ’’’তি দানং নিয্যাদেসি. সত্থা ‘‘তুম্হেহি খো উপাসকা বুদ্ধপ্পমুখস্স ভিক্খুসঙ্ঘস্স দানং দত্ৰা এৰং নিয্যাদেন্তেহি মহাকম্মং কতং, পোরাণকপণ্ডিতাপি দানং দত্ৰা এৰমেৰ নিয্যাদিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং সব্বসিপ্পানি উগ্গণ্হিত্ৰা ঘরাৰাসং পহায ইসিপব্বজ্জং পব্বজিত্ৰা গণসত্থা হুত্ৰা হিমৰন্তপদেসে চিরং ৰসিত্ৰা লোণম্বিলসেৰনত্থায জনপদচারিকং চরমানো বারাণসিং পত্ৰা রাজুয্যানে ৰসিত্ৰা পুনদিৰসে দ্ৰারগামে সপরিৰারো ভিক্খায চরি. মনুস্সা ভিক্খং অদংসু. পুনদিৰসে বারাণসিযং চরি, মনুস্সা সম্পিযাযমানা ভিক্খং দত্ৰা গণবন্ধনেন ছন্দকং ¶ সংহরিত্ৰা দানং সজ্জেত্ৰা ইসিগণস্স মহাদানং পৰত্তযিংসু. দানপরিযোসানে গণজেট্ঠকো এৰমেৰ ৰত্ৰা ইমিনাৰ নিযামেন দানং নিয্যাদেসি. বোধিসত্তো ‘‘আৰুসো, চিত্তপ্পসাদে সতি অপ্পকং নাম দানং নত্থী’’তি ৰত্ৰা অনুমোদনং করোন্তো ইমা গাথা অৰোচ –

৫৯.

‘‘দুদ্দদং ¶ দদমানানং, দুক্করং কম্ম কুব্বতং;

অসন্তো নানুকুব্বন্তি, সতং ধম্মো দুরন্নযো.

৬০.

‘‘তস্মা সতঞ্চ অসতং, নানা হোতি ইতো গতি;

অসন্তো নিরযং যন্তি, সন্তো সগ্গপরাযণা’’তি.

তত্থ দুদ্দদন্তি দানং নাম লোভদোসৰসিকেহি অপণ্ডিতেহি দাতুং ন সক্কা, তস্মা ‘‘দুদ্দদ’’ন্তি ৰুচ্চতি. তং দদমানানং. দুক্করং কম্ম কুব্বতন্তি তদেৰ দানকম্মং সব্বেহি কাতুং ন সক্কাতি দুক্করং. তং কুরুমানানং. অসন্তোতি অপণ্ডিতা বালা. নানুকুব্বন্তীতি তং ¶ কম্মং নানুকরোন্তি. সতং ধম্মোতি পণ্ডিতানং সভাৰো. দানং সন্ধাযেতং ৰুত্তং. দুরন্নযোতি ফলসম্বন্ধৰসেন দুজ্জানো, এৰরূপস্স দানস্স এৰরূপো ফলৰিপাকো হোতীতি দুরনুবোধো. অপিচ দুরন্নযোতি দুরধিগমো, অপণ্ডিতেহি দানং দত্ৰা দানফলং নাম লদ্ধুং ন সক্কাতিপি অত্থো. নানা হোতি ইতো গতীতি ইতো চৰিত্ৰা পরলোকং গচ্ছন্তানং পটিসন্ধিগ্গহণং নানা হোতি. অসন্তো নিরযং যন্তীতি অপণ্ডিতা দুস্সীলা দানং অদত্ৰা সীলং অরক্খিত্ৰা নিরযং গচ্ছন্তি. সন্তো সগ্গপরাযণাতি পণ্ডিতা পন দানং দত্ৰা সীলং রক্খিত্ৰা উপোসথকম্মং করিত্ৰা তীণি সুচরিতানি পূরেত্ৰা সগ্গপরাযণা হোন্তি, মহন্তং সগ্গসুখসম্পত্তিং অনুভৰন্তীতি.

এৰং বোধিসত্তো অনুমোদনং কত্ৰা চত্তারো ৰস্সিকে মাসে তত্থেৰ ৰসিত্ৰা ৰস্সাতিক্কমে হিমৰন্তং গন্ত্ৰা ঝানং নিব্বত্তেত্ৰা অপরিহীনজ্ঝানো ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা ইসিগণো বুদ্ধপরিসা অহোসি, গণসত্থা পন অহমেৰ অহোসি’’ন্তি.

দুদ্দদজাতকৰণ্ণনা দসমা.

কল্যাণৰগ্গো ততিযো.

তস্সুদ্দানং –

কল্যাণধম্মং ¶ দদ্দরং, মক্কটি দুব্ভিমক্কটং;

আদিচ্চুপট্ঠানঞ্চেৰ, কল়াযমুট্ঠি তিন্দুকং;

কচ্ছপং সতধম্মঞ্চ, দুদ্দদন্তি চ তে দস.

৪. অসদিসৰগ্গো

[১৮১] ১. অসদিসজাতকৰণ্ণনা

ধনুগ্গহো ¶ অসদিসোতি ইদং সত্থা জেতৰনে ৰিহরন্তো মহাভিনিক্খমনং আরব্ভ কথেসি. একদিৰসঞ্হি ভিক্খূ ধম্মসভাযং সন্নিসিন্না ভগৰতো মহানিক্খমপারমিং ৰণ্ণেন্তা নিসীদিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, তথাগতো ইদানেৰ মহাভিনিক্খমনং নিক্খন্তো, পুব্বেপি সেতচ্ছত্তং পহায নিক্খন্তোযেৰা’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি পটিসন্ধিং গণ্হি, তস্স সোত্থিনা জাতস্স নামগ্গহণদিৰসে ‘‘অসদিসকুমারো’’তি নামং অকংসু. অথস্স আধাৰিত্ৰা পরিধাৰিত্ৰা ৰিচরণকালে অঞ্ঞো পুঞ্ঞৰা সত্তো দেৰিযা কুচ্ছিম্হি পটিসন্ধিং গণ্হি, তস্স সোত্থিনা জাতস্স নামগ্গহণদিৰসে ‘‘ব্রহ্মদত্তকুমারো’’তি নামং অকংসু. তেসু বোধিসত্তো সোল়সৰস্সকালে তক্কসিলং গন্ত্ৰা দিসাপামোক্খস্স আচরিযস্স সন্তিকে তযো ৰেদে অট্ঠারস চ সিপ্পানি উগ্গণ্হিত্ৰা তেসু ইস্সাসসিপ্পে অসদিসো হুত্ৰা বারাণসিং পচ্চাগমি. রাজা কালং করোন্তো ‘‘অসদিসকুমারস্স রজ্জং দত্ৰা ব্রহ্মদত্তস্স ওপরজ্জং দেথা’’তি ৰত্ৰা কালমকাসি. তস্মিং কালকতে বোধিসত্তো অত্তনো রজ্জে দীযমানে ‘‘ন ময্হং রজ্জেনত্থো’’তি পটিক্খিপি, ব্রহ্মদত্তং রজ্জে অভিসিঞ্চিংসু. বোধিসত্তো ‘‘ময্হং রজ্জেন অত্থো নত্থী’’তি কিঞ্চিপি ন ইচ্ছি, কনিট্ঠে রজ্জং কারেন্তে পকতিযা ৰসনাকারেনেৰ ৰসি. রাজপাদমূলিকা ‘‘অসদিসকুমারো ¶ রজ্জং পত্থেতী’’তি ৰত্ৰা রঞ্ঞো সন্তিকে বোধিসত্তং পরিভিন্দিংসু. সোপি তেসং ৰচনং গহেত্ৰা পরিভিন্নচিত্তো ‘‘ভাতরং মে গণ্হথা’’তি মনুস্সে পযোজেসি.

অথেকো বোধিসত্তস্স অত্থচরকো তং কারণং বোধিসত্তস্স আরোচেসি. বোধিসত্তো কনিট্ঠভাতিকস্স কুজ্ঝিত্ৰা নগরা নিক্খমিত্ৰা অঞ্ঞং রট্ঠং গন্ত্ৰা ‘‘একো ধনুগ্গহো আগন্ত্ৰা রাজদ্ৰারে ঠিতো’’তি রঞ্ঞো আরোচাপেসি. রাজা ‘‘কিত্তকং ভোগং ইচ্ছসী’’তি পুচ্ছি ¶ . ‘‘একসংৰচ্ছরেন সতসহস্স’’ন্তি. ‘‘সাধু আগচ্ছতূ’’তি. অথ নং আগন্ত্ৰা সমীপে ঠিতং পুচ্ছি – ‘‘ত্ৰং ধনগ্গহোসী’’তি? ‘‘আম, দেৰা’’তি. ‘‘সাধু মং উপট্ঠহস্সূ’’তি. সো ততো পট্ঠায রাজানং উপট্ঠহি. তস্স পরিব্বযং দীযমানং ¶ দিস্ৰা ‘‘অতিবহুং লভতী’’তি পোরাণকধনুগ্গহা উজ্ঝাযিংসু. অথেকদিৰসং রাজা উয্যানং গন্ত্ৰা মঙ্গলসিলাপট্টসমীপে সাণিপাকারং পরিক্খিপাপেত্ৰা অম্বরুক্খমূলে মহাসযনে নিপন্নো উদ্ধং ওলোকেন্তো রুক্খগ্গে একং অম্বপিণ্ডিং দিস্ৰা ‘‘ইমং ন সক্কা অভিরুহিত্ৰা গণ্হিতু’’ন্তি ধনুগ্গহে পক্কোসাপেত্ৰা ‘‘ইমং অম্বপিণ্ডিং সরেন ছিন্দিত্ৰা পাতেতুং সক্খিস্সথা’’তি আহ. ন তং, দেৰ, অম্হাকং গরু, দেৰেন পন নো বহুৰারে কম্মং দিট্ঠপুব্বং, অধুনাগতো ধনুগ্গহো অম্হেহি বহুতরং লভতি, তং পাতাপেথাতি.

রাজা বোধিসত্তং পক্কোসাপেত্ৰা ‘‘সক্খিস্সসি, তাত, এতং পাতেতু’’ন্তি পুচ্ছি. ‘‘আম, মহারাজ, একং ওকাসং লভমানো সক্খিস্সামী’’তি. ‘‘কতরোকাস’’ন্তি? ‘‘তুম্হাকং সযনস্স অন্তোকাস’’ন্তি. রাজা সযনং হরাপেত্ৰা ওকাসং কারেসি. বোধিসত্তস্স হত্থে ধনু নত্থি, নিৰাসনন্তরে ধনুং সন্নয্হিত্ৰা ৰিচরতি, তস্মা ‘‘সাণিং লদ্ধুং ৰট্টতী’’তি আহ. রাজা ‘‘সাধূ’’তি সাণিং আহরাপেত্ৰা পরিক্খিপাপেসি. বোধিসত্তো অন্তোসাণিং পৰিসিত্ৰা উপরিনিৰত্থং সেতৰত্থং হরিত্ৰা একং রত্তপটং নিৰাসেত্ৰা কচ্ছং বন্ধিত্ৰা একং রত্তপটং উদরে বন্ধিত্ৰা পসিব্বকতো সন্ধিযুত্তং খগ্গং নীহরিত্ৰা ৰামপস্সে সন্নয্হিত্ৰা সুৰণ্ণকঞ্চুকং পটিমুঞ্চিত্ৰা চাপনাল়িং পিট্ঠিযং সন্নয্হিত্ৰা সন্ধিযুত্তমেণ্ডকমহাধনুং আদায পৰাল়ৰণ্ণং জিযং আরোপেত্ৰা উণ্হীসং সীসে পটিমুঞ্চিত্ৰা তিখিণখুরপ্পং নখেহি পরিৰত্তযমানো সাণিং দ্ৰিধা কত্ৰা পথৰিং ফালেত্ৰা অলঙ্কতনাগকুমারো ৰিয নিক্খমিত্ৰা সরখিপনট্ঠানং গন্ত্ৰা খুরপ্পং সন্নয্হিত্ৰা রাজানং আহ – ‘‘কিং, মহারাজ, এতং অম্বপিণ্ডিং উদ্ধং আরোহনকণ্ডেন পাতেমি, উদাহু ¶ অধো ওরোহনকণ্ডেনা’’তি ¶ . ‘‘তাত, বহূ মযা আরোহনকণ্ডেন পাতেন্তা দিট্ঠপুব্বা, ওরোহনকণ্ডেন পন পাতেন্তা মযা ন দিট্ঠপুব্বা, ওরোহনকণ্ডেন পাতেহী’’তি. ‘‘মহারাজ, ইদং কণ্ডং দূরং আরোহিস্সতি, যাৰ চাতুমহারাজিকভৰনং, তাৰ গন্ত্ৰা সযং ওরোহিস্সতি, যাৰস্স ওরোহনং, তাৰ তুম্হেহি অধিৰাসেতুং ৰট্টতী’’তি. রাজা ‘‘সাধূ’’তি সম্পটিচ্ছি.

অথ নং পুন আহ – ‘‘মহারাজ, ইদং কণ্ডং পন আরোহমানং অম্বপিণ্ডিৰণ্টং যাৰমজ্ঝং কন্তমানং আরোহিস্সতি, ওরোহমানং কেসগ্গমত্তম্পি ইতো ৰা এত্তো ৰা অগন্ত্ৰা উজুঞ্ঞেৰ পতিত্ৰা অম্বপিণ্ডিং গহেত্ৰা ওতরিস্সতি, পস্স, মহারাজা’’তি ৰেগং জনেত্ৰা কণ্ডং ¶ খিপি. তং কণ্ডং অম্বপিণ্ডিৰণ্টং যাৰমজ্ঝং কন্তমানং অভিরুহি. বোধিসত্তো ‘‘ইদানি তং কণ্ডং যাৰ চাতুমহারাজিকভৰনং গতং ভৰিস্সতী’’তি ঞত্ৰা পঠমং খিত্তকণ্ডতো অধিকতরং ৰেগং জনেত্ৰা অঞ্ঞং কণ্ডং খিপি, তং গন্ত্ৰা পুরিমকণ্ডপুঙ্খে পহরিত্ৰা নিৰত্তিত্ৰা সযং তাৰতিংসভৰনং অভিরুহি. তত্থ নং দেৰতা অগ্গহেসুং, নিৰত্তনকণ্ডস্স ৰাতছিন্নসদ্দো অসনিসদ্দো ৰিয অহোসি. মহাজনেন ‘‘কিং এসো সদ্দো’’তি ৰুত্তে বোধিসত্তো ‘‘নিৰত্তনকণ্ডস্স সদ্দো’’তি ৰত্ৰা অত্তনো অত্তনো সরীরে কণ্ডস্স পতনভাৰং ঞত্ৰা ভীততসিতং মহাজনং ‘‘মা ভাযিত্থা’’তি সমস্সাসেত্ৰা ‘‘কণ্ডস্স ভূমিযং পতিতুং ন দস্সামী’’তি আহ. কণ্ডং ওতরমানং কেসগ্গমত্তম্পি ইতো ৰা এত্তো ৰা অগন্ত্ৰা উজুঞ্ঞেৰ পতিত্ৰা অম্বপিণ্ডিং ছিন্দি. বোধিসত্তো অম্বপিণ্ডিযা চ কণ্ডস্স চ ভূমিযং পতিতুং অদত্ৰা আকাসেযেৰ সম্পটিচ্ছন্তো একেন হত্থেন অম্বপিণ্ডিং, একেন হত্থেন কণ্ডং অগ্গহেসি. মহাজনো তং অচ্ছরিযং দিস্ৰা ‘‘ন নো এৰরূপং দিট্ঠপুব্ব’’ন্তি মহাপুরিসং পসংসতি ¶ উন্নদতি অপ্ফোটেতি অঙ্গুলিযো ৰিধূনতি, চেলুক্খেপসহস্সানি পৰত্তেতি. রাজপরিসায তুট্ঠপহট্ঠায বোধিসত্তস্স দিন্নধনং কোটিমত্তং অহোসি. রাজাপিস্স ধনৰস্সং ৰস্সেন্তো ৰিয বহুং ধনং মহন্তঞ্চ যসং অদাসি.

এৰং বোধিসত্তে তেন রঞ্ঞা সক্কতে গরুকতে তত্থ ৰসন্তে ‘‘অসদিসকুমারো কির বারাণসিযং নত্থী’’তি সত্ত রাজানো আগন্ত্ৰা বারাণসিনগরং ¶ পরিৰারেত্ৰা ‘‘রজ্জং ৰা দেতু যুদ্ধং ৰা’’তি রঞ্ঞো পণ্ণং পেসেসুং. রাজা মরণভযভীতো ‘‘কুহিং মে ভাতা ৰসতী’’তি পুচ্ছিত্ৰা ‘‘একং সামন্তরাজানং উপট্ঠহতী’’তি সুত্ৰা ‘‘মম ভাতিকে অনাগচ্ছন্তে ময্হং জীৰিতং নত্থি, গচ্ছথ তস্স মম ৰচনেন পাদে ৰন্দিত্ৰা খমাপেত্ৰা গণ্হিত্ৰা আগচ্ছথা’’তি দূতে পাহেসি. তে গন্ত্ৰা বোধিসত্তস্স তং পৰত্তিং আরোচেসুং. বোধিসত্তো তং রাজানং আপুচ্ছিত্ৰা বারাণসিং পচ্চাগন্ত্ৰা রাজানং ‘‘মা ভাযী’’তি সমস্সাসেত্ৰা কণ্ডে অক্খরানি ছিন্দিত্ৰা ‘‘অহং অসদিসকুমারো আগতো, অঞ্ঞং এককণ্ডং খিপন্তো সব্বেসং ৰো জীৰিতং হরিস্সামি, জীৰিতেন অত্থিকা পলাযন্তূ’’তি অট্টালকে ঠত্ৰা সত্তন্নং রাজূনং ভুঞ্জন্তানং কঞ্চনপাতিমকুলেযেৰ কণ্ডং পাতেসি. তে অক্খরানি দিস্ৰা মরণভযভীতা সব্বেৰ পলাযিংসু. এৰং মহাসত্তো খুদ্দকমক্খিকায পিৰনমত্তম্পি লোহিতং অনুপ্পাদেত্ৰা সত্ত রাজানো পলাপেত্ৰা কনিট্ঠভাতরং অপলোকেত্ৰা কামে পহায ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা জীৰিতপরিযোসানে ব্রহ্মলোকূপগো অহোসি.

সত্থা ¶ ¶ ‘‘এৰং, ভিক্খৰে, অসদিসকুমারো সত্ত রাজানো পলাপেত্ৰা ৰিজিতসঙ্গামো ইসিপব্বজ্জং পব্বজিতো’’তি অভিসম্বুদ্ধো হুত্ৰা ইমা গাথা অৰোচ –

৬১.

‘‘ধনুগ্গহো অসদিসো, রাজপুত্তো মহব্বলো;

দূরেপাতী অক্খণৰেধী, মহাকাযপ্পদালনো.

৬২.

‘‘সব্বামিত্তে রণং কত্ৰা, ন চ কঞ্চি ৰিহেঠযি;

ভাতরং সোত্থিং কত্ৰান, সংযমং অজ্ঝুপাগমী’’তি.

তত্থ অসদিসোতি ন কেৰলং নামেনেৰ, বলৰীরিযপঞ্ঞাহিপি অসদিসোৰ. মহব্বলোতি কাযবলেনপি পঞ্ঞাবলেনপি মহব্বলো. দূরেপাতীতি যাৰ চাতুমহারাজিকভৰনা তাৰতিংসভৰনা চ কণ্ডং পেসেতুং সমত্থতায দূরেপাতী. অক্খণৰেধীতি অৰিরাধিতৰেধী. অথ ৰা অক্খণা ৰুচ্চতি ৰিজ্জু, যাৰ একা ৰিজ্জু নিচ্ছরতি, তাৰ তেনোভাসেন সত্তট্ঠ ¶ ৰারে কণ্ডানি গহেত্ৰা ৰিজ্ঝতীতি অক্খণৰেধী. মহাকাযপ্পদালনোতি মহন্তে কাযে পদালেতি. চম্মকাযো, দারুকাযো, লোহকাযো, অযোকাযো, ৰালিককাযো, উদককাযো, ফলককাযোতি ইমে সত্ত মহাকাযা নাম. তত্থ অঞ্ঞো চম্মকাযপদালনো মহিংসচম্মং ৰিনিৰিজ্ঝতি, সো পন সতম্পি মহিংসচম্মানং ৰিনিৰিজ্ঝতিযেৰ. অঞ্ঞো অট্ঠঙ্গুলবহলং উদুম্বরপদরং, চতুরঙ্গুলবহলং অসনপদরং ৰিনিৰিজ্ঝতি, সো পন ফলকসতম্পি একতো বদ্ধং ৰিনিৰিজ্ঝতি, তথা দ্ৰঙ্গুলবহলং তম্বলোহপট্টং, অঙ্গুলবহলং অযপট্টং. ৰালিকসকটস্স বদরসকটস্স পলালসকটস্স ৰা পচ্ছাভাগেন কণ্ডং পৰেসেত্ৰা পুরেভাগেন অতিপাতেতি, পকতিযা উদকে চতুউসভট্ঠানং কণ্ডং পেসেতি, থলে অট্ঠউসভন্তি এৰং ইমেসং সত্তন্নং মহাকাযানং পদালনতো মহাকাযপ্পদালনো. সব্বামিত্তেতি সব্বে অমিত্তে. রণং কত্ৰাতি যুদ্ধং কত্ৰা পলাপেসীতি অত্থো. ন চ কঞ্চি ৰিহেঠযীতি একম্পি ন ৰিহেঠেসি. অৰিহেঠযন্তোযেৰ পন তেহি সদ্ধিং কণ্ডপেসনেনেৰ রণং কত্ৰা. সংযমং অজ্ঝুপাগমীতি সীলসংযমং পব্বজ্জং উপগতো.

এৰং ¶ সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা কনিট্ঠভাতা আনন্দো অহোসি, অসদিসকুমারো পন অহমেৰ অহোসি’’ন্তি.

অসদিসজাতকৰণ্ণনা পঠমা.

[১৮২] ২. সঙ্গামাৰচরজাতকৰণ্ণনা

সঙ্গামাৰচরো ¶ সূরোতি ইদং সত্থা জেতৰনে ৰিহরন্তো নন্দত্থেরং আরব্ভ কথেসি. সত্থরি হি পঠমগমনেন কপিলপুরং গন্ত্ৰা কনিট্ঠভাতিকং নন্দরাজকুমারং পব্বাজেত্ৰা কপিলপুরা নিক্খম্ম অনুপুব্বেন সাৰত্থিং গন্ত্ৰা ৰিহরন্তে আযস্মা নন্দো ভগৰতো পত্তং আদায তথাগতেন সদ্ধিং গেহা নিক্খমনকালে ‘‘নন্দকুমারো কির সত্থারা সদ্ধিং গচ্ছতী’’তি সুত্ৰা অড্ঢুল্লিখিতেহি কেসেহি ৰাতপানন্তরেন ওলোকেত্ৰা ‘‘তুৰটং খো, অয্যপুত্ত, আগচ্ছেয্যাসী’’তি ইদং জনপদকল্যাণিযা ৰুত্তৰচনং অনুস্সরন্তো উক্কণ্ঠিতো অনভিরতো উপ্পণ্ডুপ্পণ্ডুকজাতো ধমনিসন্থতগত্তো ¶ অহোসি. সত্থা তস্স তং পৰত্তিং ঞত্ৰা ‘‘যংনূনাহং নন্দং অরহত্তে পতিট্ঠাপেয্য’’ন্তি চিন্তেত্ৰা তস্স ৰসনপরিৰেণং গন্ত্ৰা পঞ্ঞত্তাসনে নিসিন্নো ‘‘কচ্চি, নন্দ, ইমস্মিং সাসনে অভিরমসী’’তি পুচ্ছি. ‘‘ভন্তে, জনপদকল্যাণিযা পটিবদ্ধচিত্তো হুত্ৰা নাভিরমামী’’তি. ‘‘হিমৰন্তচারিকং গতপুব্বোসি নন্দা’’তি? ‘‘ন গতপুব্বো, ভন্তে’’তি. ‘‘তেন হি গচ্ছামা’’তি. ‘‘নত্থি মে, ভন্তে, ইদ্ধি, কতাহং গমিস্সামী’’তি. সত্থা ‘‘অহং তং, নন্দ, মম ইদ্ধিবলেন নেস্সামী’’তি থেরং হত্থে গহেত্ৰা আকাসং পক্খন্দন্তো অন্তরামগ্গে একস্মিং ঝামখেত্তে ঝামখাণুকে নিসিন্নং ছিন্নকণ্ণনাসনঙ্গুট্ঠং ঝামলোমং ছিন্নছৰিং চম্মমত্তং লোহিতপলিগুণ্ঠিতং একং পলুট্ঠমক্কটিং দস্সেসি – ‘‘পস্সসি, নন্দ, এতং মক্কটি’’ন্তি. ‘‘আম, ভন্তে’’তি. ‘‘সুট্ঠু পচ্চক্খং করোহী’’তি.

অথ নং গহেত্ৰা সট্ঠিযোজনিকং মনোসিলাতলং, অনোতত্তদহাদযো সত্ত মহাসরে, পঞ্চ মহানদিযো, সুৰণ্ণপব্বতরজতপব্বতমণিপব্বতপটিমণ্ডিতং অনেকসতরামণেয্যকং হিমৰন্তপব্বতঞ্চ দস্সেত্ৰা ‘‘তাৰতিংসভৰনং তে, নন্দ, দিট্ঠপুব্ব’’ন্তি পুচ্ছিত্ৰা ‘‘ন ¶ , দিট্ঠপুব্বং, ভন্তে’’তি ৰুত্তে ‘‘এহি, নন্দ, তাৰতিংসভৰনং তে দস্সযিস্সামী’’তি তত্থ নেত্ৰা পণ্ডুকম্বলসিলাসনে নিসীদি. সক্কো দেৰরাজা দ্ৰীসু দেৰলোকেসু দেৰসঙ্ঘেন সদ্ধিং আগন্ত্ৰা ৰন্দিত্ৰা একমন্তং নিসীদি. অড্ঢতিযকোটিসঙ্খা তস্স পরিচারিকা পঞ্চসতা ককুটপাদা দেৰচ্ছরাযোপি আগন্ত্ৰা ৰন্দিত্ৰা একমন্তং নিসীদিংসু. সত্থা আযস্মন্তং নন্দং তা পঞ্চসতা অচ্ছরা কিলেসৰসেন পুনপ্পুনং ওলোকাপেসি. ‘‘পস্সসি, নন্দ, ইমা ককুটপাদিনিযো অচ্ছরাযো’’তি? ‘‘আম, ভন্তে’’তি. ‘‘কিং নু খো এতা সোভন্তি, উদাহু জনপদকল্যাণী’’তি. ‘‘সেয্যথাপি, ভন্তে, জনপদকল্যাণিং উপনিধায সা পলুট্ঠমক্কটী, এৰমেৰ ইমা উপনিধায জনপদকল্যাণী’’তি. ‘‘ইদানি কিং করিস্সসি নন্দা’’তি? ‘‘কিং কম্মং কত্ৰা, ভন্তে, ইমা অচ্ছরা লভন্তী’’তি? ‘‘সমণধম্মং কত্ৰা’’তি. ‘‘সচে মে, ভন্তে, ইমাসং ¶ পটিলাভত্থায ভগৰা পাটিভোগো হোতি, অহং সমণধম্মং করিস্সামী’’তি. ‘‘করোহি, নন্দ, অহং তে পাটিভোগো’’তি. এৰং থেরো দেৰসঙ্ঘস্স মজ্ঝে তথাগতং পাটিভোগং গহেত্ৰা ‘‘মা, ভন্তে, অতিপপঞ্চং করোথ, এথ গচ্ছাম, অহং সমণধম্মং করিস্সামী’’তি আহ. সত্থা ¶ তং আদায জেতৰনমেৰ পচ্চাগমি. থেরো সমণধম্মং কাতুং আরভি.

সত্থা ধম্মসেনাপতিং আমন্তেত্ৰা ‘‘সারিপুত্ত, ময্হং কনিট্ঠভাতা নন্দো তাৰতিংসদেৰলোকে দেৰসঙ্ঘস্স মজ্ঝে দেৰচ্ছরানং কারণা মং পাটিভোগং অগ্গহেসী’’তি তস্স আচিক্খি. এতেনুপাযেন মহামোগ্গল্লানত্থেরস্স মহাকস্সপত্থেরস্স অনুরুদ্ধত্থেরস্স ধম্মভণ্ডাগারিকআনন্দত্থেরস্সাতি অসীতিযা মহাসাৰকানং যেভুয্যেন চ সেসভিক্খূনং আচিক্খি. ধম্মসেনাপতি সারিপুত্তত্থেরো নন্দত্থেরং উপসঙ্কমিত্ৰা ‘‘সচ্চং কির ত্ৰং, আৰুসো নন্দ, তাৰতিংসদেৰলোকে দেৰসঙ্ঘস্স মজ্ঝে ‘দেৰচ্ছরা লভন্তো সমণধম্মং করিস্সামী’তি দসবলং পাটিভোগং গণ্হী’’তি ৰত্ৰা ‘‘ননু এৰং সন্তে তৰ ব্রহ্মচরিযৰাসো মাতুগামসন্নিস্সিতো কিলেসসন্নিস্সিতো, তস্স তে ইত্থীনং অত্থায সমণধম্মং করোন্তস্স ভতিযা কম্মং করোন্তেন কম্মকারকেন সদ্ধিং ¶ কিং নানাকরণ’’ন্তি থেরং লজ্জাপেসি নিত্তেজং অকাসি. এতেনুপাযেন সব্বেপি অসীতিমহাসাৰকা অৰসেসভিক্খূ চ তং আযস্মন্তং নন্দং লজ্জাপযিংসু.

সো ‘‘অযুত্তং ৰত মে কত’’ন্তি হিরিযা চ ওত্তপ্পেন চ ৰীরিযং দল়্হং পগ্গণ্হিত্ৰা ৰিপস্সনং ৰড্ঢেত্ৰা অরহত্তং পত্ৰা সত্থারং উপসঙ্কমিত্ৰা ‘‘অহং, ভন্তে, ভগৰতো পটিস্সৰং মুঞ্চামী’’তি আহ. সত্থাপি ‘‘যদা ত্ৰং, নন্দ, অরহত্তং পত্তো, তদাযেৰাহং পটিস্সৰা মুত্তো’’তি আহ. এতমত্থং ৰিদিত্ৰা ধম্মসভাযং ভিক্খূ কথং সমুট্ঠাপেসুং – ‘‘যাৰ ওৰাদক্খমো চাযং, আৰুসো, নন্দত্থেরো একোৰাদেনেৰ হিরোত্তপ্পং পচ্চুপট্ঠপেত্ৰা সমণধম্মং কত্ৰা অরহত্তং পত্তো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি নন্দো ওৰাদক্খমোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হত্থাচরিযকুলে নিব্বত্তিত্ৰা ৰযপ্পত্তো হত্থাচরিযসিপ্পে নিপ্ফত্তিং পত্তো একং বারাণসিরঞ্ঞো সপত্তরাজানং উপট্ঠাসি. সো তস্স মঙ্গলহত্থিং সুসিক্খিতং কত্ৰা সিক্খাপেসি. সো রাজা ‘‘বারাণসিরজ্জং গণ্হিস্সামী’’তি বোধিসত্তং গহেত্ৰা মঙ্গলহত্থিং আরুয্হ মহতিযা সেনায বারাণসিং ¶ গন্ত্ৰা পরিৰারেত্ৰা ‘‘রজ্জং ৰা দেতু যুদ্ধং ৰা’’তি রঞ্ঞো পণ্ণং পেসেসি. ব্রহ্মদত্তো ‘‘যুদ্ধং দস্সামী’’তি ¶ পাকারদ্ৰারট্টালকগোপুরেসু বলকাযং আরোপেত্ৰা যুদ্ধং অদাসি. সপত্তরাজা মঙ্গলহত্থিং ৰম্মেন ছাদেত্ৰা সযম্পি ৰম্মং পটিমুঞ্চিত্ৰা হত্তিক্খন্ধৰরগতো তিখিণং অঙ্কুসং আদায ‘‘নগরং ভিন্দিত্ৰা পচ্চামিত্তং জীৰিতক্খযং পাপেত্ৰা রজ্জং হত্থগতং করিস্সামী’’তি হত্থিং নগরাভিমুখং পেসেসি. সো উণ্হকললানি চেৰ যন্তপাসাণে চ নানপ্পকারানি চ পহরণানি ৰিস্সজ্জেন্তে দিস্ৰা মরণভযভীতো উপসঙ্কমিতুং অসক্কোন্তো পটিক্কমি. অথ নং হত্থাচরিযো উপসঙ্কমিত্ৰা ‘‘তাত, ত্ৰং সূরো সঙ্গামাৰচরো, এৰরূপে ঠানে পটিক্কমনং ¶ নাম তুয্হং নানুচ্ছৰিক’’ন্তি ৰত্ৰা হত্থিং ওৰদন্তো ইমা গাথা অৰোচ –

৬৩.

‘‘সঙ্গামাৰচরো সূরো, বলৰা ইতি ৰিস্সুতো;

কিং নু তোরণমাসজ্জ, পটিক্কমসি কুঞ্জর.

৬৪.

‘‘ওমদ্দ খিপ্পং পলিঘং, এসিকানি চ অব্বহ;

তোরণানি চ মদ্দিত্ৰা, খিপ্পং পৰিস কুঞ্জরা’’তি.

তত্থ ইতি ৰিস্সুতোতি, তাত, ত্ৰং পৰত্তসম্পহারং সঙ্গামং মদ্দিত্ৰা অৰচরণতো সঙ্গামাৰচরো, থিরহদযতায সূরো, থামসম্পত্তিযা বলৰাতি এৰং ৰিস্সুতো পঞ্ঞাতো পাকটো. তোরণমাসজ্জাতি নগরদ্ৰারসঙ্খাতং তোরণং পত্ৰা. পটিক্কমসীতি কিং নু খো ওসক্কসি, কেন কারণেন নিৰত্তসীতি ৰদতি. ওমদ্দাতি অৰমদ্দ অধো পাতয. এসিকানি চ অব্বহাতি নগরদ্ৰারে সোল়সরতনং অট্ঠরতনং ভূমিযং পৰেসেত্ৰা নিচ্চলং কত্ৰা নিখাতা এসিকত্থম্ভা হোন্তি, তে খিপ্পং উদ্ধর লুঞ্চাহীতি আণাপেতি. তোরণানি চ মদ্দিত্ৰাতি নগরদ্ৰারস্স পিট্ঠসঙ্ঘাটে মদ্দিত্ৰা. খিপ্পং পৰিসাতি সীঘং নগরং পৰিস. কুঞ্জরাতি নাগং আলপতি.

তং সুত্ৰা নাগো বোধিসত্তস্স একোৰাদেনেৰ নিৰত্তিত্ৰা এসিকত্থম্ভে সোণ্ডায পলিৰেঠেত্ৰা অহিচ্ছত্তকানি ৰিয লুঞ্চিত্ৰা তোরণং মদ্দিত্ৰা পলিঘং ওতারেত্ৰা নগরদ্ৰারং ভিন্দিত্ৰা নগরং পৰিসিত্ৰা রজ্জং গহেত্ৰা অদাসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা হত্থী নন্দো অহোসি, রাজা আনন্দো, হত্থাচরিযো পন অহমেৰ অহোসি’’ন্তি.

সঙ্গামাৰচরজাতকৰণ্ণনা দুতিযা.

[১৮৩] ৩. ৰালোদকজাতকৰণ্ণনা

ৰালোদকং ¶ অপ্পরসং নিহীনন্তি ইদং সত্থা জেতৰনে ৰিহরন্তো পঞ্চসতে ৰিঘাসাদে আরব্ভ কথেসি. সাৰত্থিযং কির পঞ্চসতা উপাসকা ঘরাৰাসপলিবোধং পুত্তদারস্স নিয্যাদেত্ৰা সত্থু ¶ ধম্মদেসনং সুণন্তা একতোৰ ৰিচরন্তি. তেসু কেচি সোতাপন্না, কেচি সকদাগামিনো, কেচি অনাগামিনো, একোপি পুথুজ্জনো নাম নত্থি, সত্থারং নিমন্তেন্তাপি তে উপাসকে অন্তোকরিত্ৰাৰ নিমন্তেন্তি. তেসং পন দন্তকট্ঠমুখোদকৰত্থগন্ধমালদাযকা পঞ্চসতা চূল়ুপট্ঠাকা ৰিঘাসাদা হুত্ৰা ৰসন্তি. তে ভুত্তপাতরাসা নিদ্দাযিত্ৰা উট্ঠায অচিরৰতিং গন্ত্ৰা নদীতীরে উন্নদন্তা মল্লযুদ্ধং যুজ্ঝন্তি. তে পন পঞ্চসতা উপাসকা অপ্পসদ্দা অপ্পনিগ্ঘোসা পটিসল্লানমনুযুঞ্জন্তি. সত্থা তেসং ৰিঘাসাদানং উচ্চাসদ্দং সুত্ৰা ‘‘কিং এসো, আনন্দ, সদ্দো’’তি থেরং পুচ্ছিত্ৰা ‘‘ৰিঘাসাদসদ্দো, ভন্তে’’তি ৰুত্তে ‘‘ন খো, আনন্দ, ইমে ৰিঘাসাদা ইদানেৰ ৰিঘাসং খাদিত্ৰা উন্নদন্তি, পুব্বেপি উন্নদন্তিযেৰ, ইমেপি উপাসকা ন ইদানেৰ সন্নিসিন্না, পুব্বেপি সন্নিসিন্নাযেৰা’’তি ৰত্ৰা থেরেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অমচ্চকুলে নিব্বত্তিত্ৰা ৰযপ্পত্তো রঞ্ঞো অত্থধম্মানুসাসকো অহোসি. অথেকস্মিং কালে সো রাজা ‘‘পচ্চন্তো কুপিতো’’তি সুত্ৰা পঞ্চসতে সিন্ধৰে কপ্পাপেত্ৰা চতুরঙ্গিনিযা সেনায গন্ত্ৰা পচ্চন্তং ৰূপসমেত্ৰা বারাণসিমেৰ পচ্চাগন্ত্ৰা ‘‘সিন্ধৰা কিলন্তা অল্লরসমেৰ নেসং মুদ্দিকপানং দেথা’’তি আণাপেসি. সিন্ধৰা গন্ধপানং পিৰিত্ৰা অস্সসালং গন্ত্ৰা অত্তনো অত্তনো ঠানেসু অট্ঠংসু. তেসং পন ¶ দিন্নাৰসিট্ঠকং অপ্পরসং বহুকসটং অহোসি. মনুস্সা ‘‘ইদং কিং করোমা’’তি রাজানং পুচ্ছিংসু. রাজা উদকেন মদ্দিত্ৰা মকচিপিলোতিকাহি পরিস্সাৰেত্ৰা ‘‘যে গদ্রভা সিন্ধৰানং নিৰাপং পহিংসু, তেসং দাপেথা’’তি দাপেসি. গদ্রভা কসটউদকং পিৰিত্ৰা মত্তা হুত্ৰা ৰিরৰন্তা রাজঙ্গণে ৰিচরিংসু. রাজা মহাৰাতপানং ৰিৰরিত্ৰা রাজঙ্গণং ওলোকযমানো সমীপে ঠিতং বোধিসত্তং আমন্তেত্ৰা ‘‘পস্স, ইমে ¶ গদ্রভা কসটোদকং পিৰিত্ৰা মত্তা হুত্ৰা ৰিরৰন্তা উপ্পতন্তা ৰিচরন্তি, সিন্ধৰকুলে জাতসিন্ধৰা পন গন্ধপানং পিৰিত্ৰা নিস্সদ্দা সন্নিসিন্না ন উপ্পিলৰন্তি, কিং নু খো কারণ’’ন্তি পুচ্ছন্তো পঠমং গাথমাহ –

৬৫.

‘‘ৰালোদকং অপ্পরসং নিহীনং, পিত্ৰা মদো জাযতি গদ্রভানং;

ইমঞ্চ পিত্ৰান রসং পণীতং, মদো ন সঞ্জাযতি সিন্ধৰান’’ন্তি.

তত্থ ¶ ৰালোদকন্তি মকচিৰালেহি পরিস্সাৰিতউদকং. ‘‘ৰালুদক’’ন্তিপি পাঠো. নিহীনন্তি নিহীনরসভাৰেন নিহীনং. ন সঞ্জাযতীতি সিন্ধৰানং মদো ন জাযতি, কিং নু খো কারণন্তি পুচ্ছি.

অথস্স কারণং আচিক্খন্তো বোধিসত্তো দুতিযং গাথমাহ –

৬৬.

‘‘অপ্পং পিৰিত্ৰান নিহীনজচ্চো, সো মজ্জতী তেন জনিন্দ পুট্ঠো;

ধোরয্হসীলী চ কুলম্হি জাতো, ন মজ্জতী অগ্গরসং পিৰিত্ৰা’’তি.

তত্থ তেন জনিন্দ পুট্ঠোতি জনিন্দ উত্তমরাজ যো নিহীনজচ্চো, তেন নিহীনজচ্চভাৰেন পুট্ঠো মজ্জতি পমজ্জতি. ধোরয্হসীলীতি ধোরয্হসীলো ধুরৰহনকআচারেন সম্পন্নো জাতিসিন্ধৰো. অগ্গরসন্তি সব্বপঠমং গহিতং মুদ্দিকরসং পিৰিত্ৰাপি ন মজ্জতি.

রাজা বোধিসত্তস্স ৰচনং সুত্ৰা গদ্রভে রাজঙ্গণা নীহরাপেত্ৰা তস্সেৰ ওৰাদে ঠিতো দানাদীনি পুঞ্ঞানি কত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা পঞ্চসতা ¶ গদ্রভা ইমে ৰিঘাসাদা অহেসুং, পঞ্চসতা সিন্ধৰা ইমে উপাসকা, রাজা আনন্দো, পণ্ডিতামচ্চো পন অহমেৰ অহোসি’’ন্তি.

ৰালোদকজাতকৰণ্ণনা ততিযা.

[১৮৪] ৪. গিরিদত্তজাতকৰণ্ণনা

দূসিতো ¶ গিরিদত্তেনাতি ইদং সত্থা ৰেল়ুৰনে ৰিহরন্তো একং ৰিপক্খসেৰিং ভিক্খুং আরব্ভ কথেসি. ৰত্থু হেট্ঠা মহিল়ামুখজাতকে (জা. ১.১.২৬) কথিতমেৰ. সত্থা পন ‘‘ন, ভিক্খৰে, অযং ভিক্খু ইদানেৰ ৰিপক্খং সেৰতি, পুব্বেপেস ৰিপক্খসেৰকোযেৰা’’তি ৰত্ৰা অতীতং আহরি.

অতীতে ¶ বারাণসিযং সামরাজা রজ্জং কারেসি. তদা বোধিসত্তো অমচ্চকুলে নিব্বত্তিত্ৰা ৰযপ্পত্তো তস্স অত্থধম্মানুসাসকো অহোসি. রঞ্ঞো পন পণ্ডৰো নাম মঙ্গলস্সো, তস্স গিরিদত্তো নাম অস্সবন্ধো, সো খঞ্জো অহোসি. অস্সো মুখরজ্জুকে গহেত্ৰা তং পুরতো পুরতো গচ্ছন্তং দিস্ৰা ‘‘মং এস সিক্খাপেতী’’তি সঞ্ঞায তস্স অনুসিক্খন্তো খঞ্জো অহোসি. তস্স অস্সস্স খঞ্জভাৰং রঞ্ঞো আরোচেসুং, রাজা ৰেজ্জে পেসেসি. তে গন্ত্ৰা অস্সস্স সরীরে রোগং অপস্সন্তা ‘‘রোগমস্স ন পস্সামা’’তি রঞ্ঞো কথযিংসু. রাজা বোধিসত্তং পেসেসি – ‘‘গচ্ছ ৰযস্স, এত্থ কারণং জানাহী’’তি. সো গন্ত্ৰা খঞ্জঅস্সবন্ধসংসগ্গেন তস্স খঞ্জভূতভাৰং ঞত্ৰা রঞ্ঞো তমত্থং আরোচেত্ৰা ‘‘সংসগ্গদোসেন নাম এৰং হোতী’’তি দস্সেন্তো পঠমং গাথমাহ –-

৬৭.

‘‘দূসিতো গিরিদত্তেন, হযো সামস্স পণ্ডৰো;

পোরাণং পকতিং হিত্ৰা, তস্সেৰানুৰিধিয্যতী’’তি.

তত্থ হযো সামস্সাতি সামস্স রঞ্ঞো মঙ্গলস্সো. পোরাণং পকতিং হিত্ৰাতি অত্তনো পোরাণপকতিং সিঙ্গারভাৰং পহায. অনুৰিধিয্যতীতি অনুসিক্খতি.

অথ ¶ নং রাজা ‘‘ইদানি ৰযস্স কিং কত্তব্ব’’ন্তি পুচ্ছি. বোধিসত্তো ‘‘সুন্দরং অস্সবন্ধং লভিত্ৰা যথা পোরাণো ভৰিস্সতী’’তি ৰত্ৰা দুতিযং গাথমাহ –

৬৮.

‘‘সচে ¶ চ তনুজো পোসো, সিখরাকারকপ্পিতো;

আননে নং গহেত্ৰান, মণ্ডলে পরিৰত্তযে;

খিপ্পমেৰ পহন্ত্ৰান, তস্সেৰানুৰিধিয্যতী’’তি.

তত্থ তনুজোতি তস্স অনুজো. অনুরূপং জাতো হি অনুজো, তস্স অনুজো তনুজো. ইদং ৰুত্তং হোতি – সচে হি, মহারাজ, তস্স সিঙ্গারস্স আচারসম্পন্নস্স অস্সস্স অনুরূপং জাতো সিঙ্গারো আচারসম্পন্নো পোসো. সিখরাকারকপ্পিতোতি সিখরেন সুন্দরেন আকারেন কপ্পিতকেসমস্সু তং অস্সং আননে গহেত্ৰা অস্সমণ্ডলে পরিৰত্তেয্য, খিপ্পমেৰেস তং খঞ্জভাৰং পহায ‘‘অযং সিঙ্গারো আচারসম্পন্নো অস্সগোপকো মং সিক্খাপেতী’’তি সঞ্ঞায খিপ্পমেৰ তস্স অনুৰিধিয্যতি অনুসিক্খিস্সতি, পকতিভাৰেযেৰ ঠস্সতীতি অত্থো. রাজা তথা ¶ কারেসি, অস্সো পকতিভাৰে পতিট্ঠাসি. রাজা ‘‘তিরচ্ছানানম্পি নাম আসযং জানিস্সতী’’তি তুট্ঠচিত্তো বোধিসত্তস্স মহন্তং যসং অদাসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা গিরিদত্তো দেৰদত্তো অহোসি, অস্সো ৰিপক্খসেৰকো ভিক্খু, রাজা আনন্দো, অমচ্চপণ্ডিতো পন অহমেৰ অহোসি’’ন্তি.

গিরিদত্তজাতকৰণ্ণনা চতুত্থা.

[১৮৫] ৫. অনভিরতিজাতকৰণ্ণনা

যথোদকে আৰিলে অপ্পসন্নেতি ইদং সত্থা জেতৰনে ৰিহরন্তো অঞ্ঞতরং ব্রাহ্মণকুমারং আরব্ভ কথেসি. সাৰত্থিযং কির একো ব্রাহ্মণকুমারো তিণ্ণং ৰেদানং পারগূ বহূ খত্তিযকুমারে চ ব্রাহ্মণকুমারে চ মন্তে ৰাচেসি. সো অপরভাগে ঘরাৰাসং সণ্ঠপেত্ৰা ৰত্থালঙ্কারদাসদাসিখেত্তৰত্থুগোমহিংসপুত্তদারাদীনং ¶ অত্থায চিন্তযমানো রাগদোসমোহৰসিকো হুত্ৰা আৰিলচিত্তো অহোসি, মন্তে পটিপাটিযা পরিৰত্তেতুং নাসক্খি, ইতো চিতো চ মন্তা ন পটিভংসু. সো একদিৰসং বহুং গন্ধমালাদিং গহেত্ৰা জেতৰনং গন্ত্ৰা সত্থারং পূজেত্ৰা ৰন্দিত্ৰা একমন্তং নিসীদি ¶ . সত্থা তেন সদ্ধিং পটিসন্থারং কত্ৰা ‘‘কিং, মাণৰ, মন্তে ৰাচেসি, পগুণা তে মন্তা’’তি পুচ্ছি. ‘‘পুব্বে মে, ভন্তে, মন্তা পগুণা অহেসুং, ঘরাৰাসস্স পন গহিতকালতো পট্ঠায চিত্তং মে আৰিলং জাতং, তেন মে মন্তা ন পগুণা’’তি. অথ নং সত্থা ‘‘ন খো, মাণৰ, ইদানেৰ, পুব্বেপি তে চিত্তস্স অনাৰিলকালে তৰ মন্তা পগুণা অহেসুং, রাগাদীহি পন আৰিলকালে তৰ মন্তা ন পটিভংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো ব্রাহ্মণমহাসালকুলে নিব্বত্তিত্ৰা ৰযপ্পত্তো তক্কসিলাযং মন্তে উগ্গণ্হিত্ৰা দিসাপামোক্খো আচরিযো হুত্ৰা বারাণসিযং বহূ খত্তিযকুমারে চ ব্রাহ্মণকুমারে চ মন্তে ৰাচেসি. তস্স সন্তিকে একো ব্রাহ্মণমাণৰো তযো ৰেদে পগুণে অকাসি, একপদেপি নিক্কঙ্খো পিট্ঠিআচরিযো হুত্ৰা মন্তে ৰাচেসি. সো অপরেন সমযেন ঘরাৰাসং গহেত্ৰা ঘরাৰাসচিন্তায আৰিলচিত্তো মন্তে পরিৰত্তেতুং নাসক্খি. অথ নং আচরিযো অত্তনো সন্তিকং আগতং ‘‘কিং, মাণৰ, পগুণা তে মন্তা’’তি পুচ্ছিত্ৰা ‘‘ঘরাৰাসগহিতকালতো ¶ পট্ঠায মে চিত্তং আৰিলং জাতং, মন্তে পরিৰত্তেতুং ন সক্কোমী’’তি ৰুত্তে ‘‘তাত, আৰিলে চিত্তম্হি পগুণাপি মন্তা ন পটিভন্তি, অনাৰিলে পন চিত্তে অপ্পটিভাণং নাম নত্থী’’তি ৰত্ৰা ইমা গাথা আহ –

৬৯.

‘‘যথোদকে আৰিলে অপ্পসন্নে, ন পস্সতি সিপ্পিকসম্বুকঞ্চ;

সক্খরং ৰালুকং মচ্ছগুম্বং, এৰং আৰিলম্হি চিত্তে;

ন সো পস্সতি অত্তদত্থং পরত্থং.

৭০.

‘‘যথোদকে ¶ অচ্ছে ৰিপ্পসন্নে, সো পস্সতি সিপ্পিকসম্বুকঞ্চ;

সক্খরং ৰালুকং মচ্ছগুম্বং, এৰং ¶ অনাৰিলম্হি চিত্তে;

সো পস্সতি অত্থদত্থং পরত্থ’’ন্তি.

তত্থ আৰিলেতি কদ্দমালুল়িতে. অপ্পসন্নেতি তাযেৰ আৰিলতায অৰিপ্পসন্নে. সিপ্পিকসম্বুকঞ্চাতি সিপ্পিকঞ্চ সম্বুকঞ্চ. মচ্ছগুম্বন্তি মচ্ছঘটং. এৰং আৰিলম্হীতি এৰমেৰ রাগাদীহি আৰিলে চিত্তে. অত্তদত্থং পরত্থন্তি নেৰ অত্তদত্থং ন পরত্থং পস্সতীতি অত্থো. সো পস্সতীতি এৰমেৰ অনাৰিলে চিত্তে সো পুরিসো অত্তদত্থং পরত্থঞ্চ পস্সতীতি.

সত্থা ইমং অতীতং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে ব্রাহ্মণকুমারো সোতাপত্তিফলে পতিট্ঠহি. ‘‘তদা মাণৰো অযমেৰ মাণৰো অহোসি, আচরিযো পন অহমেৰ অহোসি’’ন্তি.

অনভিরতিজাতকৰণ্ণনা পঞ্চমা.

[১৮৬] ৬. দধিৰাহনজাতকৰণ্ণনা

ৰণ্ণগন্ধরসূপেতোতি ইদং সত্থা ৰেল়ুৰনে ৰিহরন্তো ৰিপক্খসেৰিং ভিক্খুং আরব্ভ কথেসি. ৰত্থু হেট্ঠা কথিতমেৰ. সত্থা পন ‘‘ভিক্খৰে, অসাধুসন্নিৰাসো নাম পাপো অনত্থকরো, তত্থ মনুস্সভূতানং তাৰ পাপসন্নিৰাসস্স অনত্থকরতায কিং ৰত্তব্বং, পুব্বে পন অসাতেন অমধুরেন নিম্বরুক্খেন সদ্ধিং সন্নিৰাসমাগম্ম মধুররসো দিব্বরসপটিভাগো অচেতনো অম্বরুক্খোপি অমধুরো তিত্তকো জাতো’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে কাসিরট্ঠে চত্তারো ভাতরো ব্রাহ্মণা ইসিপব্বজ্জং পব্বজিত্ৰা হিমৰন্তপদেসে পটিপাটিযা পণ্ণসালা কত্ৰা ৰাসং কপ্পেসুং. তেসং জেট্ঠকভাতা কালং কত্ৰা সক্কত্তং পাপুণি. সো তং কারণং ঞত্ৰা অন্তরন্তরা সত্তট্ঠদিৰসচ্চযেন তেসং ¶ উপট্ঠানং গচ্ছন্তো একদিৰসং জেট্ঠকতাপসং ৰন্দিত্ৰা একমন্তং নিসীদিত্ৰা ¶ – ‘‘ভন্তে, কেন তে অত্থো’’তি পুচ্ছি. পণ্ডুরোগো তাপসো ‘‘অগ্গিনা মে অত্থো’’তি আহ. সো তং সুত্ৰা তস্স ৰাসিফরসুকং অদাসি. ৰাসিফরসুকো নাম দণ্ডে পৰেসনৰসেন ৰাসিপি হোতি ফরসুপি. তাপসো ‘‘কো মে ইমং আদায দারূনি আহরিস্সতী’’তি আহ. অথ নং সক্কো এৰমাহ – ‘‘যদা তে, ভন্তে, দারূহি অত্থো, ইমং ফরসুং হত্থেন পহরিত্ৰা ‘দারূনি মে আহরিত্ৰা অগ্গিং করোহী’তি ৰদেয্যাসি, দারূনি আহরিত্ৰা অগ্গিং কত্ৰা দস্সতী’’তি. তস্স ৰাসিফরসুকং দত্ৰা দুতিযম্পি উপসঙ্কমিত্ৰা ‘‘ভন্তে, কেন তে অত্থো’’তি পুচ্ছি. তস্স পণ্ণসালায হত্থিমগ্গো হোতি, সো হত্থীহি উপদ্দুতো ‘‘হত্থীনং মে ৰসেন দুক্খং উপ্পজ্জতি, তে পলাপেহী’’তি আহ. সক্কো তস্স একং ভেরিং উপনামেত্ৰা ‘‘ভন্তে, ইমস্মিং তলে পহটে তুম্হাকং পচ্চামিত্তা পলাযিস্সন্তি, ইমস্মিং তলে পহটে মেত্তচিত্তা হুত্ৰা চতুরঙ্গিনিযা সেনায পরিৰারেস্সন্তী’’তি ৰত্ৰা তং ভেরিং দত্ৰা কনিট্ঠস্স সন্তিকং গন্ত্ৰা ‘‘ভন্তে, কেন তে অত্থো’’তি পুচ্ছি. সোপি পণ্ডুরোগধাতুকোৰ, তস্মা ‘‘দধিনা মে অত্থো’’তি আহ. সক্কো তস্স একং দধিঘটং দত্ৰা ‘‘সচে তুম্হে ইচ্ছমানা ইমং আসিঞ্চেয্যাথ, মহানদী হুত্ৰা মহোঘং পৰত্তেত্ৰা তুম্হাকং রজ্জং গহেত্ৰা দাতুং সমত্থোপি ভৰিস্সতী’’তি ৰত্ৰা পক্কামি. ততো পট্ঠায ৰাসিফরসুকো জেট্ঠভাতিকস্স অগ্গিং করোতি, ইতরেন ভেরিতলে পহটে হত্থী পলাযন্তি, কনিট্ঠো দধিং পরিভুঞ্জতি.

তস্মিং কালে একো সূকরো একস্মিং পুরাণগামট্ঠানে চরন্তো আনুভাৰসম্পন্নং একং মণিক্খন্ধং অদ্দস. সো তং মণিক্খন্ধং মুখেন ডংসিত্ৰা তস্সানুভাৰেন আকাসে উপ্পতিত্ৰা সমুদ্দস্স মজ্ঝে একং দীপকং গন্ত্ৰা ‘‘এত্থ দানি মযা ৰসিতুং ৰট্টতী’’তি ওতরিত্ৰা ফাসুকট্ঠানে একস্স উদুম্বররুক্খস্স হেট্ঠা ¶ ৰাসং কপ্পেসি. সো একদিৰসং তস্মিং রুক্খমূলে মণিক্খন্ধং পুরতো ঠপেত্ৰা নিদ্দং ওক্কমি. অথেকো কাসিরট্ঠৰাসী মনুস্সো ‘‘নিরুপকারো এস অম্হাক’’ন্তি মাতাপিতূহি গেহা নিক্কড্ঢিতো একং পট্টনগামং গন্ত্ৰা নাৰিকানং কম্মকারো হুত্ৰা নাৰং আরুয্হ ¶ সমুদ্দমজ্ঝে ভিন্নায নাৰায ফলকে নিপন্নো তং দীপকং পত্ৰা ফলাফলানি পরিযেসন্তো তং সূকরং নিদ্দাযন্তং দিস্ৰা সণিকং গন্ত্ৰা মণিক্খন্ধং গণ্হিত্ৰা তস্স আনুভাৰেন আকাসে উপ্পতিত্ৰা উদুম্বররুক্খে নিসীদিত্ৰা চিন্তেসি – ‘‘অযং সূকরো ¶ ইমস্স মণিক্খন্ধস্স আনুভাৰেন আকাসচারিকো হুত্ৰা ইধ ৰসতি মঞ্ঞে, মযা পঠমমেৰ ইমং সূকরং মারেত্ৰা মংসং খাদিত্ৰা পচ্ছা গন্তুং ৰট্টতী’’তি. সো একং দণ্ডকং ভঞ্জিত্ৰা তস্স সীসে পাতেতি. সূকরো পবুজ্ঝিত্ৰা মণিং অপস্সন্তো ইতো চিতো চ কম্পমানো ৰিধাৰতি, রুক্খে নিসিন্নপুরিসো হসি. সূকরো ওলোকেন্তো তং দিস্ৰা তং রুক্খং সীসেন পহরিত্ৰা তত্থেৰ মতো.

সো পুরিসো ওতরিত্ৰা অগ্গিং কত্ৰা তস্স মংসং পচিত্ৰা খাদিত্ৰা আকাসে উপ্পতিত্ৰা হিমৰন্তমত্থকেন গচ্ছন্তো অস্সমপদং দিস্ৰা জেট্ঠভাতিকস্স তাপসস্স অস্সমে ওতরিত্ৰা দ্ৰীহতীহং ৰসিত্ৰা তাপসস্স ৰত্তপটিৰত্তং অকাসি, ৰাসিফরসুকস্স আনুভাৰঞ্চ পস্সি. সো ‘‘ইমং মযা গহেতুং ৰট্টতী’’তি মণিক্খন্ধস্স আনুভাৰং তাপসস্স দস্সেত্ৰা ‘‘ভন্তে, ইমং মণিং গহেত্ৰা ৰাসিফরসুকং দেথা’’তি আহ. তাপসো আকাসেন চরিতুকামো তং গহেত্ৰা ৰাসিফরসুকং অদাসি. সো তং গহেত্ৰা থোকং গন্ত্ৰা ৰাসিফরসুকং পহরিত্ৰা ‘‘ৰাসিফরসুক তাপসস্স সীসং ছিন্দিত্ৰা মণিক্খন্ধং মে আহরা’’তি আহ. সো গন্ত্ৰা তাপসস্স সীসং ছিন্দিত্ৰা মণিক্খন্ধং আহরি. সো ৰাসিফরসুকং পটিচ্ছন্নট্ঠানে ঠপেত্ৰা মজ্ঝিমতাপসস্স সন্তিকং ¶ গন্ত্ৰা কতিপাহং ৰসিত্ৰা ভেরিযা আনুভাৰং দিস্ৰা মণিক্খন্ধং দত্ৰা ভেরিং গণ্হিত্ৰা পুরিমনযেনেৰ তস্সপি সীসং ছিন্দাপেত্ৰা কনিট্ঠং উপসঙ্কমিত্ৰা দধিঘটস্স আনুভাৰং দিস্ৰা মণিক্খন্ধং দত্ৰা দধিঘটং গহেত্ৰা পুরিমনযেনেৰ তস্স সীসং ছিন্দাপেত্ৰা মণিক্খন্ধঞ্চ ৰাসিফরসুকঞ্চ ভেরিঞ্চ দধিঘটঞ্চ গহেত্ৰা আকাসে উপ্পতিত্ৰা বারাণসিযা অৰিদূরে ঠত্ৰা বারাণসিরঞ্ঞো ‘‘যুদ্ধং ৰা মে দেতু রজ্জং ৰা’’তি একস্স পুরিসস্স হত্থে পণ্ণং পাহেসি.

রাজা সাসনং সুত্ৰাৰ ‘‘চোরং গণ্হিস্সামী’’তি নিক্খমি. সো একং ভেরিতলং পহরি, চতুরঙ্গিনী সেনা পরিৰারেসি. রঞ্ঞো অৰত্থরণভাৰং ঞত্ৰা দধিঘটং ৰিস্সজ্জেসি, মহানদী পৰত্তি. মহাজনো দধিম্হি ওসীদিত্ৰা নিক্খমিতুং নাসক্খি. ৰাসিফরসুকং পহরিত্ৰা ‘‘রঞ্ঞো সীসং আহরা’’তি ¶ আহ, ৰাসিফরসুকো গন্ত্ৰা রঞ্ঞো সীসং আহরিত্ৰা পাদমূলে নিক্খিপি. একোপি আৰুধং উক্খিপিতুং নাসক্খি. সো মহন্তেন বলেন পরিৰুতো নগরং পৰিসিত্ৰা অভিসেকং কারেত্ৰা দধিৰাহনো নাম রাজা হুত্ৰা ধম্মেন সমেন রজ্জং কারেসি.

তস্সেকদিৰসং মহানদিযং জালকরণ্ডকে কীল়ন্তস্স কণ্ণমুণ্ডদহতো দেৰপরিভোগং একং অম্বপক্কং আগন্ত্ৰা জালে লগ্গি, জালং উক্খিপন্তা তং দিস্ৰা রঞ্ঞো অদংসু. তং মহন্তং ঘটপ্পমাণং ¶ পরিমণ্ডলং সুৰণ্ণৰণ্ণং অহোসি. রাজা ‘‘কিস্স ফলং নামেত’’ন্তি ৰনচরকে পুচ্ছিত্ৰা ‘‘অম্বফল’’ন্তি সুত্ৰা পরিভুঞ্জিত্ৰা তস্স অট্ঠিং অত্তনো উয্যানে রোপাপেত্ৰা খীরোদকেন সিঞ্চাপেসি. রুক্খো নিব্বত্তিত্ৰা ততিযে সংৰচ্ছরে ফলং অদাসি. অম্বস্স সক্কারো মহা অহোসি, খীরোদকেন সিঞ্চন্তি, গন্ধপঞ্চঙ্গুলিকং দেন্তি, মালাদামানি পরিক্খিপন্তি, গন্ধতেলেন দীপং জালেন্তি, পরিক্খেপো পনস্স পটসাণিযা অহোসি. ফলানি মধুরানি সুৰণ্ণৰণ্ণানি অহেসুং. দধিৰাহনরাজা অঞ্ঞেসং রাজূনং অম্বফলং পেসেন্তো অট্ঠিতো রুক্খনিব্বত্তনভযেন ¶ অঙ্কুরনিব্বত্তনট্ঠানং মণ্ডূককণ্টকেন ৰিজ্ঝিত্ৰা পেসেসি. তেসং অম্বং খাদিত্ৰা অট্ঠি রোপিতং ন সম্পজ্জতি. তে ‘‘কিং নু খো এত্থ কারণ’’ন্তি পুচ্ছন্তা তং কারণং জানিংসু.

অথেকো রাজা উয্যানপালং পক্কোসিত্ৰা ‘‘দধিৰাহনস্স অম্বফলানং রসং নাসেত্ৰা তিত্তকভাৰং কাতুং সক্খিস্সসী’’তি পুচ্ছিত্ৰা ‘‘আম, দেৰা’’তি ৰুত্তে ‘‘তেন হি গচ্ছাহী’’তি সহস্সং দত্ৰা পেসেসি. সো বারাণসিং গন্ত্ৰা ‘‘একো উয্যানপালো আগতো’’তি রঞ্ঞো আরোচাপেত্ৰা তেন পক্কোসাপিতো পৰিসিত্ৰা রাজানং ৰন্দিত্ৰা ‘‘ত্ৰং উয্যানপালো’’তি পুট্ঠো ‘‘আম, দেৰা’’তি ৰত্ৰা অত্তনো আনুভাৰং ৰণ্ণেসি. রাজা ‘‘গচ্ছ অম্হাকং উয্যানপালস্স সন্তিকে হোহী’’তি আহ. তে ততো পট্ঠায দ্ৰে জনা উয্যানং পটিজগ্গন্তি. অধুনাগতো উয্যানপালো অকালপুপ্ফানি সুট্ঠু পুপ্ফাপেন্তো অকালফলানি গণ্হাপেন্তো উয্যানং রমণীযং অকাসি. রাজা তস্স পসীদিত্ৰা পোরাণকউয্যানপালং নীহরিত্ৰা তস্সেৰ উয্যানং অদাসি. সো উয্যানস্স অত্তনো হত্থগতভাৰং ঞত্ৰা অম্বরুক্খং পরিৰারেত্ৰা নিম্বে চ ফগ্গৰৰল্লিযো চ রোপেসি, অনুপুব্বেন নিম্বা ৰড্ঢিংসু, মূলেহি মূলানি, সাখাহি চ সাখা সংসট্ঠা ওনদ্ধৰিনদ্ধা অহেসুং. তেন অসাতঅমধুরসংসগ্গেন তাৰমধুরফলো ¶ অম্বো তিত্তকো জাতো নিম্বপণ্ণসদিসরসো, অম্বফলানং তিত্তকভাৰং ঞত্ৰা উয্যানপালো পলাযি.

দধিৰাহনো উয্যানং গন্ত্ৰা অম্বফলং খাদন্তো মুখে পৰিট্ঠং অম্বরসং নিম্বকসটং ৰিয অজ্ঝোহরিতুং অসক্কোন্তো কক্কারেত্ৰা নিট্ঠুভি. তদা বোধিসত্তো তস্স অত্থধম্মানুসাসকো অমচ্চো অহোসি. রাজা বোধিসত্তং আমন্তেত্ৰা ‘‘পণ্ডিত, ইমস্স রুক্খস্স পোরাণকপরিহারতো পরিহীনং নত্থি, এৰং সন্তেপিস্স ফলং তিত্তকং জাতং, কিং নু খো কারণ’’ন্তি পুচ্ছন্তো পঠমং গাথমাহ –

৭১.

‘‘ৰণ্ণগন্ধরসূপেতো ¶ ¶ , অম্বোযং অহুৰা পুরে;

তমেৰ পূজং লভমানো, কেনম্বো কটুকপ্ফলো’’তি.

অথস্স কারণং আচিক্খন্তো বোধিসত্তো দুতিযং গাথমাহ –

৭২.

‘‘পুচিমন্দপরিৰারো, অম্বো তে দধিৰাহন;

মূলং মূলেন সংসট্ঠং, সাখা সাখা নিসেৰরে;

অসাতসন্নিৰাসেন, তেনম্বো কটুকপ্ফলো’’তি.

তত্থ পুচিমন্দপরিৰারোতি নিম্বরুক্খপরিৰারো. সাখা সাখা নিসেৰরেতি পুচিমন্দস্স সাখাযো অম্বরুক্খস্স সাখাযো নিসেৰন্তি. অসাতসন্নিৰাসেনাতি অমধুরেহি পুচিমন্দেহি সদ্ধিং সন্নিৰাসেন. তেনাতি তেন কারণেন অযং অম্বো কটুকপ্ফলো অসাতফলো তিত্তকফলো জাতোতি.

রাজা তস্স ৰচনং সুত্ৰা সব্বেপি পুচিমন্দে চ ফগ্গৰৰল্লিযো চ ছিন্দাপেত্ৰা মূলানি উদ্ধরাপেত্ৰা সমন্তা অমধুরপংসুং হরাপেত্ৰা মধুরপংসুং পক্খিপাপেত্ৰা খীরোদকসক্খরোদকগন্ধোদকেহি অম্বং পটিজগ্গাপেসি. সো মধুরসংসগ্গেন পুন মধুরোৰ অহোসি. রাজা পকতিউয্যানপালস্সেৰ উয্যানং নিয্যাদেত্ৰা যাৰতাযুকং ঠত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা অহমেৰ পণ্ডিতামচ্চো অহোসি’’ন্তি.

দধিৰাহনজাতকৰণ্ণনা ছট্ঠা.

[১৮৭] ৭. চতুমট্ঠজাতকৰণ্ণনা

উচ্চে ¶ ৰিটভিমারুয্হাতি ইদং সত্থা জেতৰনে ৰিহরন্তো অঞ্ঞতরং মহল্লকভিক্খুং আরব্ভ কথেসি. একদিৰসং কির দ্ৰীসু অগ্গসাৰকেসু অঞ্ঞমঞ্ঞং পঞ্হপুচ্ছনৰিস্সজ্জনকথায নিসিন্নেসু একো মহল্লকো ভিক্খু তেসং সন্তিকং গন্ত্ৰা ততিযো হুত্ৰা নিসীদিত্ৰা ¶ ‘‘ভন্তে, মযম্পি তুম্হে পঞ্হং পুচ্ছিস্সাম, তুম্হেপি অত্তনো কঙ্খং অম্হে পুচ্ছথা’’তি ¶ আহ. থেরা তং জিগুচ্ছিত্ৰা উট্ঠায পক্কমিংসু. থেরানং ধম্মং সোতুং নিসিন্নপরিসা সমাগমস্স ভিন্নকালে সত্থু সন্তিকং গন্ত্ৰা ‘‘কিং অকালে আগতত্থা’’তি ৰুত্তে তং কারণং আরোচযিংসু. সত্থা ‘‘ন, ভিক্খৰে, ইদানেৰ সারিপুত্তমোগ্গল্লানা এতং জিগুচ্ছিত্ৰা অকথেত্ৰা পক্কমন্তি, পুব্বেপি পক্কমিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অরঞ্ঞাযতনে রুক্খদেৰতা অহোসি. অথ দ্ৰে হংসপোতকা চিত্তকূটপব্বতা নিক্খমিত্ৰা তস্মিং রুক্খে নিসীদিত্ৰা গোচরায গন্ত্ৰা নিৰত্তন্তাপি তস্মিংযেৰ ৰিস্সমিত্ৰা চিত্তকূটং গচ্ছন্তি. গচ্ছন্তে গচ্ছন্তে কালে তেসং বোধিসত্তেন সদ্ধিং ৰিস্সাসো অহোসি. গচ্ছন্তা চ আগচ্ছন্তা চ অঞ্ঞমঞ্ঞং সম্মোদিত্ৰা ধম্মকথং কথেত্ৰা পক্কমিংসু. অথেকদিৰসং তেসু রুক্খগ্গে নিসীদিত্ৰা বোধিসত্তেন সদ্ধিং কথেন্তেসু একো সিঙ্গালো তস্স রুক্খস্স হেট্ঠা ঠত্ৰা তেহি হংসপোতকেহি সদ্ধিং মন্তেন্তো পঠমং গাথমাহ –

৭৩.

‘‘উচ্চে ৰিটভিমারুয্হ, মন্তযৰ্হো রহোগতা;

নীচে ওরুয্হ মন্তৰ্হো, মিগরাজাপি সোস্সতী’’তি.

তত্থ উচ্চে ৰিটভিমারুয্হাতি পকতিযা চ উচ্চে ইমস্মিং রুক্খে উচ্চতরং একং ৰিটপং অভিরুহিত্ৰা. মন্তযৰ্হোতি মন্তেথ কথেথ. নীচে ওরুয্হাতি ওতরিত্ৰা নীচে ঠানে ঠত্ৰা মন্তেথ. মিগরাজাপি সোস্সতীতি অত্তানং মিগরাজানং কত্ৰা আহ. হংসপোতকা জিগুচ্ছিত্ৰা উট্ঠায চিত্তকূটমেৰ গতা.

তেসং গতকালে বোধিসত্তো সিঙ্গালস্স দুতিযং গাথমাহ –

৭৪.

‘‘যং সুৰণ্ণো সুৰণ্ণেন, দেৰো দেৰেন মন্তযে;

কিং তেত্থ চতুমট্ঠস্স, বিলং পৰিস জম্বুকা’’তি.

তত্থ ¶ সুৰণ্ণোতি সুন্দরৰণ্ণো. সুৰণ্ণেনাতি দুতিযেন হংসপোতকেন. দেৰো দেৰেনাতি তেযেৰ দ্ৰে দেৰে কত্ৰা কথেতি. চতুমট্ঠস্সাতি সরীরেন ¶ জাতিযা সরেন গুণেনাতি ইমেহি চতূহি মট্ঠস্স সুদ্ধস্সাতি অক্খরত্থো. অসুদ্ধংযেৰ পন তং পসংসাৰচনেন নিন্দন্তো এৰমাহ, চতূহি ¶ লামকস্স কিং তে এত্থ সিঙ্গালস্সাতি অযমেত্থ অধিপ্পাযো. ‘‘বিলং পৰিসা’’তি ইদং বোধিসত্তো ভেরৰারম্মণং দস্সেত্ৰা তং পলাপেন্তো আহ.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সিঙ্গালো মহল্লকো অহোসি, দ্ৰে হংসপোতকা সারিপুত্তমোগ্গল্লানা, রুক্খদেৰতা পন অহমেৰ অহোসি’’ন্তি.

চতুমট্ঠজাতকৰণ্ণনা সত্তমা.

[১৮৮] ৮. সীহকোত্থুজাতকৰণ্ণনা

সীহঙ্গুলী সীহনখোতি ইদং সত্থা জেতৰনে ৰিহরন্তো কোকালিকং আরব্ভ কথেসি. একদিৰসং কির কোকালিকো অঞ্ঞেসু বহুস্সুতেসু ধম্মং কথেন্তেসু সযম্পি কথেতুকামো অহোসীতি সব্বং হেট্ঠা ৰুত্তনযেনেৰ ৰিত্থারেতব্বং. তং পন পৰত্তিং সুত্ৰা সত্থা ‘‘ন, ভিক্খৰে, কোকালিকো ইদানেৰ অত্তনো সদ্দেন পাকটো জাতো, পুব্বেপি পাকটো অহোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে সীহো হুত্ৰা একায সিঙ্গালিযা সদ্ধিং সংৰাসমন্ৰায পুত্তং পটিলভি. সো অঙ্গুলীহি নখেহি কেসরেন ৰণ্ণেন সণ্ঠানেনাতি ইমেহি আকারেহি পিতুসদিসো অহোসি, সদ্দেন মাতুসদিসো. অথেকদিৰসং দেৰে ৰস্সিত্ৰা ৰিগতে সীহেসু নদিত্ৰা সীহকীল়ং কীল়ন্তেসু সোপি তেসং অন্তরে নদিতুকামো হুত্ৰা সিঙ্গালিকং নাদং নদি. অথস্স সদ্দং সুত্ৰা সীহা তুণ্হী অহেসুং. তস্স সদ্দং সুত্ৰা অপরো বোধিসত্তস্স সজাতিপুত্তো ‘‘তাত, অযং সীহো ৰণ্ণাদীহি অম্হেহি ¶ সমানো, সদ্দো পনস্স অঞ্ঞাদিসো, কো নামেসো’’তি পুচ্ছন্তো পঠমং গাথমাহ –

৭৫.

‘‘সীহঙ্গুলী সীহনখো, সীহপাদপতিট্ঠিতো;

সো সীহো সীহসঙ্ঘম্হি, একো নদতি অঞ্ঞথা’’তি.

তত্থ ¶ সীহপাদপতিট্ঠিতোতি সীহপাদেহেৰ পতিট্ঠিতো. একো নদতি অঞ্ঞথাতি একোৰ অৰসেসসীহেহি অসদিসেন সিঙ্গালসদ্দেন নদন্তো অঞ্ঞথা নদতি.

তং ¶ সুত্ৰা বোধিসত্তো ‘‘তাত, এস তৰ ভাতা সিঙ্গালিযা পুত্তো, রূপেন মযা সদিসো, সদ্দেন মাতরা সদিসো’’তি ৰত্ৰা সিঙ্গালিপুত্তং আমন্তেত্ৰা ‘‘তাত, ত্ৰং ইতো পট্ঠায ইধ ৰসন্তো অপ্পসদ্দো ৰস, সচে পুন নদিস্সসি, সিঙ্গালভাৰং তে জানিস্সন্তী’’তি ওৰদন্তো দুতিযং গাথমাহ –

৭৬.

‘‘মা ত্ৰং নদি রাজপুত্ত, অপ্পসদ্দো ৰনে ৰস;

সরেন খো তং জানেয্যুং, ন হি তে পেত্তিকো সরো’’তি.

তত্থ রাজপুত্তাতি সীহস্স মিগরঞ্ঞো পুত্ত. ইমঞ্চ পন ওৰাদং সুত্ৰা পুন সো নদিতুং নাম ন উস্সহি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সিঙ্গালো কোকালিকো অহোসি, সজাতিপুত্তো রাহুলো, মিগরাজা পন অহমেৰ অহোসি’’ন্তি.

সীহকোত্থুজাতকৰণ্ণনা অট্ঠমা.

[১৮৯] ৯. সীহচম্মজাতকৰণ্ণনা

নেতং সীহস্স নদিতন্তি ইদং সত্থা জেতৰনে ৰিহরন্তো কোকালিকঞ্ঞেৰ আরব্ভ কথেসি. সো ইমস্মিং কালে সরভঞ্ঞং ভণিতুকামো অহোসি. সত্থা তং পৰত্তিং সুত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো কস্সককুলে নিব্বত্তিত্ৰা ৰযপ্পত্তো কসিকম্মেন জীৰিকং কপ্পেসি. তস্মিং কালে একো ৰাণিজো গদ্রভভারকেন ৰোহারং করোন্তো ৰিচরতি. সো গতগতট্ঠানে গদ্রভস্স পিট্ঠিতো ভণ্ডিকং ওতারেত্ৰা গদ্রভং সীহচম্মেন পারুপিত্ৰা সালিযৰখেত্তেসু ¶ ৰিস্সজ্জেতি. খেত্তরক্খকা তং দিস্ৰা ‘‘সীহো’’তি সঞ্ঞায উপসঙ্কমিতুং ন সক্কোন্তি. অথেকদিৰসং সো ৰাণিজো একস্মিং গামদ্ৰারে নিৰাসং গহেত্ৰা পাতরাসং পচাপেন্তো ততো গদ্রভং সীহচম্মং পারুপিত্ৰা যৰখেত্তে ৰিস্সজ্জেসি. খেত্তরক্খকা ‘‘সীহো’’তি সঞ্ঞায তং উপসঙ্কমিতুং অসক্কোন্তা গেহং গন্ত্ৰা আরোচেসুং. সকলগামৰাসিনো আৰুধানি গহেত্ৰা সঙ্খে ধমেন্তা ভেরিযো ৰাদেন্তা খেত্তসমীপং গন্ত্ৰা উন্নদিংসু, গদ্রভো মরণভযভীতো গদ্রভরৰং রৰি. অথস্স গদ্রভভাৰং ঞত্ৰা বোধিসত্তো পঠমং গাথমাহ –

৭৭.

‘‘নেতং ¶ সীহস্স নদিতং, ন ব্যগ্ঘস্স ন দীপিনো;

পারুতো সীহচম্মেন, জম্মো নদতি গদ্রভো’’তি.

তত্থ জম্মোতি লামকো. গামৰাসিনোপি তস্স গদ্রভভাৰং ঞত্ৰা তং অট্ঠীনি ভঞ্জন্তা পোথেত্ৰা সীহচম্মং আদায অগমংসু.

অথ সো ৰাণিজো আগন্ত্ৰা তং ব্যসনভাৰপ্পত্তং গদ্রভং দিস্ৰা দুতিযং গাথমাহ –

৭৮.

‘‘চিরম্পি খো তং খাদেয্য, গদ্রভো হরিতং যৰং;

পারুতো সীহচম্মেন, রৰমানোৰ দূসযী’’তি.

তত্থ তন্তি নিপাতমত্তং, অযং গদ্রভো অত্তনো গদ্রভভাৰং অজানাপেত্ৰা সীহচম্মেন পারুতো চিরম্পি কালং হরিতং যৰং খাদেয্যাতি অত্থো. রৰমানোৰ দূসযীতি অত্তনো পন গদ্রভরৰং রৰমানোৰেস অত্তানং দূসযি, নত্থেত্থ সীহচম্মস্স দোসোতি. তস্মিং এৰং কথেন্তেযেৰ গদ্রভো তত্থেৰ নিপন্নো মরি, ৰাণিজোপি তং পহায পক্কামি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা ৰাণিজো দেৰদত্তো অহোসি, গদ্রভো কোকালিকো, পণ্ডিতকস্সকো পন অহমেৰ অহোসি’’ন্তি.

সীহচম্মজাতকৰণ্ণনা নৰমা.

[১৯০] ১০. সীলানিসংসজাতকৰণ্ণনা

পস্স ¶ ¶ সদ্ধায সীলস্সাতি ইদং সত্থা জেতৰনে ৰিহরন্তো একং সদ্ধং উপাসকং আরব্ভ কথেসি. সো কির সদ্ধো পসন্নো অরিযসাৰকো একদিৰসং জেতৰনং গচ্ছন্তো সাযং অচিরৰতিনদীতীরং গন্ত্ৰা নাৰিকে নাৰং তীরে ঠপেত্ৰা ধম্মস্সৰনত্থায গতে তিত্থে নাৰং অদিস্ৰা বুদ্ধারম্মণং পীতিং গহেত্ৰা নদিং ওতরি, পাদা উদকম্হি ন ওসীদিংসু. সো পথৰীতলে গচ্ছন্তো ৰিয ৰেমজ্ঝং গতকালে ৰীচিং পস্সি. অথস্স বুদ্ধারম্মণা পীতি মন্দা জাতা, পাদা ওসীদিতুং আরভিংসু, সো পুন বুদ্ধারম্মণং পীতিং দল়্হং কত্ৰা উদকপিট্ঠেনেৰ গন্ত্ৰা জেতৰনং পৰিসিত্ৰা সত্থারং ৰন্দিত্ৰা একমন্তং নিসীদি. সত্থা তেন সদ্ধিং পটিসন্থারং কত্ৰা ¶ ‘‘উপাসক, কচ্চি মগ্গং আগচ্ছন্তো অপ্পকিলমথেন আগতোসী’’তি পুচ্ছিত্ৰা ‘‘ভন্তে, বুদ্ধারম্মণং পীতিং গহেত্ৰা উদকপিট্ঠে পতিট্ঠং লভিত্ৰা পথৰিং মদ্দন্তো ৰিয আগতোম্হী’’তি ৰুত্তে ‘‘ন খো পন, উপাসক, ত্ৰঞ্ঞেৰ বুদ্ধগুণে অনুস্সরিত্ৰা পতিট্ঠং লদ্ধো, পুব্বেপি উপাসকা সমুদ্দমজ্ঝে নাৰায ভিন্নায বুদ্ধগুণে অনুস্সরন্তা পতিট্ঠং লভিংসূ’’তি ৰত্ৰা তেন যাচিতো অতীতং আহরি.

অতীতে কস্সপসম্মাসম্বুদ্ধকালে সোতাপন্নো অরিযসাৰকো একেন ন্হাপিতকুটুম্বিকেন সদ্ধিং নাৰং অভিরুহি, তস্স ন্হাপিতস্স ভরিযা ‘‘অয্য, ইমস্স সুখদুক্খং তৰ ভারো’’তি ন্হাপিতং তস্স উপাসকস্স হত্থে নিক্খিপি. অথ সা নাৰা সত্তমে দিৰসে সমুদ্দমজ্ঝে ভিন্না, তেপি দ্ৰে জনা একস্মিং ফলকে নিপন্না একং দীপকং পাপুণিংসু. তত্থ সো ন্হাপিতো সকুণে মারেত্ৰা পচিত্ৰা খাদন্তো উপাসকস্সপি দেতি. উপাসকো ‘‘অলং ময্হ’’ন্তি ন খাদতি. সো চিন্তেসি – ‘‘ইমস্মিং ঠানে অম্হাকং ঠপেত্ৰা তীণি সরণানি অঞ্ঞা পতিট্ঠা নত্থী’’তি. সো তিণ্ণং রতনানং গুণে অনুস্সরি. অথস্সানুসরন্তস্স তস্মিং দীপকে নিব্বত্তো নাগরাজা অত্তনো সরীরং মহানাৰং কত্ৰা মাপেসি, সমুদ্দদেৰতা ¶ নিযামকো অহোসি, নাৰা সত্তহি রতনেহি পূরযিত্থ, তযো কূপকা ইন্দনীলমণিমযা অহেসুং, সুৰণ্ণমযো লঙ্কারো, রজতমযানি যোত্তানি, সুৰণ্ণমযানি যট্ঠিফিযানি.

সমুদ্দদেৰতা ¶ নাৰায ঠত্ৰা ‘‘অত্থি জম্বুদীপগমিকা’’তি ঘোসেসি. উপাসকো ‘‘মযং গমিস্সামা’’তি আহ. তেন হি এহি, নাৰং অভিরুহাতি. সো নাৰং অভিরুহিত্ৰা ন্হাপিতং পক্কোসি, সমুদ্দদেৰতা – ‘‘তুয্হঞ্ঞেৰ লব্ভতি, ন এতস্সা’’তি আহ. ‘‘কিংকারণা’’তি? ‘‘এতস্স সীলগুণাচারো নত্থি, তং কারণং. অহঞ্হি তুয্হং নাৰং আহরিং, ন এতস্সা’’তি. ‘‘হোতু, অহং অত্তনা দিন্নদানেন রক্খিতসীলেন ভাৰিতভাৰনায এতস্স পত্তিং দম্মী’’তি. ন্হাপিতো ‘‘অনুমোদামি, সামী’’তি আহ. দেৰতা ‘‘ইদানি গণ্হিস্সামী’’তি তম্পি আরোপেত্ৰা উভোপি জনে সমুদ্দা নিক্খামেত্ৰা নদিযা বারাণসিং গন্ত্ৰা অত্তনো আনুভাৰেন দ্ৰিন্নম্পি তেসং গেহে ধনং পতিট্ঠপেত্ৰা ‘‘পণ্ডিতেহেৰ সদ্ধিং সংসগ্গো নাম কাতব্বো. সচে হি ইমস্স ন্হাপিতস্স ইমিনা উপাসকেন সদ্ধিং সংসগ্গো নাভৰিস্স, সমুদ্দমজ্ঝেযেৰ নস্সিস্সা’’তি পণ্ডিতসংসগ্গগুণং কথযমানা ইমা গাথা অৰোচ –

৭৯.

‘‘পস্স সদ্ধায সীলস্স, চাগস্স চ অযং ফলং;

নাগো নাৰায ৰণ্ণেন, সদ্ধং ৰহতুপাসকং.

৮০.

‘‘সব্ভিরেৰ ¶ সমাসেথ, সব্ভি কুব্বেথ সন্থৰং;

সতঞ্হি সন্নিৰাসেন, সোত্থিং গচ্ছতি ন্হাপিতো’’তি.

তত্থ পস্সাতি কঞ্চি অনিযমেত্ৰা পস্সথাতি আলপতি. সদ্ধাযাতি লোকিযলোকুত্তরায সদ্ধায. সীলেপি এসেৰ নযো. চাগস্সাতি দেয্যধম্মপরিচ্চাগস্স চেৰ কিলেসপরিচ্চাগস্স চ. অযং ফলন্তি ইদং ফলং, গুণং আনিসংসন্তি অত্থো. অথ ৰা চাগস্স চ ফলং পস্স, অযং নাগো নাৰায ৰণ্ণেনাতি এৰম্পেত্থ অত্থো দট্ঠব্বো. নাৰায ৰণ্ণেনাতি নাৰায সণ্ঠানেন. সদ্ধন্তি তীসু রতনেসু পতিট্ঠিতসদ্ধং. সব্ভিরেৰাতি পণ্ডিতেহিযেৰ ¶ . সমাসেথাতি একতো আৰসেয্য, উপৰসেয্যাতি অত্থো. কুব্বেথাতি করেয্য. সন্থৰন্তি মিত্তসন্থৰং. তণ্হাসন্থৰো পন কেনচিপি সদ্ধিং ন কাতব্বো. ন্হাপিতোতি ন্হাপিতকুটুম্বিকো. ‘‘নহাপিতো’’তিপি পাঠো.

এৰং সমুদ্দদেৰতা আকাসে ঠত্ৰা ধম্মং দেসেত্ৰা ওৰদিত্ৰা নাগরাজানং গণ্হিত্ৰা অত্তনো ৰিমানমেৰ অগমাসি.

সত্থা ¶ ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে উপাসকো সকদাগামিফলে পতিট্ঠহি. ‘‘তদা সোতাপন্নউপাসকো পরিনিব্বাযি, নাগরাজা সারিপুত্তো অহোসি, সমুদ্দদেৰতা পন অহমেৰ অহোসি’’ন্তি.

সীলানিসংসজাতকৰণ্ণনা দসমা.

অসদিসৰগ্গো চতুত্থো.

তস্সুদ্দানং –

অসদিসঞ্চ সঙ্গামং, ৰালোদকং গিরিদত্তং;

নভিরতি দধিৰাহং, চতুমট্ঠং সীহকোট্ঠং;

সীহচম্মং সীলানিসংসং.

৫. রুহকৰগ্গো

[১৯১] ১. রুহকজাতকৰণ্ণনা

অপি ¶ রুহক ছিন্নাপীতি ইদং সত্থা জেতৰনে ৰিহরন্তো পুরাণদুতিযিকাপলোভনং আরব্ভ কথেসি. ৰত্থু অট্ঠকনিপাতে ইন্দ্রিযজাতকে (জা. ১.৮.৬০ আদযো) আৰিভৰিস্সতি. সত্থা পন তং ভিক্খুং ‘‘অযং তে ভিক্খু ইত্থী অনত্থকারিকা, পুব্বেপি তে এসা সরাজিকায পরিসায মজ্ঝে লজ্জাপেত্ৰা গেহা নিক্খমনাকারং কারেসী’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি নিব্বত্তিত্ৰা ৰযপ্পত্তো পিতু অচ্চযেন রজ্জে পতিট্ঠায ধম্মেন রজ্জং কারেসি. তস্স রুহকো নাম পুরোহিতো অহোসি, তস্স পুরাণী নাম ব্রাহ্মণী ভরিযা. রাজা ব্রাহ্মণস্স অস্সভণ্ডকেন অলঙ্করিত্ৰা অস্সং অদাসি. সো তং অস্সং আরুয্হ রঞ্ঞো উপট্ঠানং গচ্ছতি. অথ নং অলঙ্কতঅস্সস্স পিট্ঠে নিসীদিত্ৰা গচ্ছন্তং আগচ্ছন্তঞ্চ দিস্ৰা তহিং তহিং ঠিতা মনুস্সা ‘‘অহো ¶ অস্সস্স রূপং, অহো অস্সো সোভতী’’তি অস্সমেৰ পসংসন্তি. সো গেহং আগন্ত্ৰা পাসাদং অভিরুয্হ ভরিযং আমন্তেসি – ‘‘ভদ্দে ¶ , অম্হাকং অস্সো অতিৰিয সোভতি, উভোসু পস্সেসু ঠিতা মনুস্সা অম্হাকং অস্সমেৰ ৰণ্ণেন্তী’’তি. সা পন ব্রাহ্মণী থোকং ছিন্নিকা ধুত্তিকধাতুকা, তেন নং এৰমাহ – ‘‘অয্য, ত্ৰং অস্সস্স সোভনকারণং ন জানাসি, অযং অস্সো অত্তনো অলঙ্কতং অস্সভণ্ডকং নিস্সায সোভতি, সচে ত্ৰম্পি অস্সো ৰিয সোভিতুকামো অস্সভণ্ডকং পিল়ন্ধিত্ৰা অন্তরৰীথিং ওরুয্হ অস্সো ৰিয পাদে কোট্টযমানো গন্ত্ৰা রাজানং পস্স, রাজাপি তং ৰণ্ণযিস্সতি, মনুস্সাপি তঞ্ঞেৰ ৰণ্ণযিস্সন্তী’’তি.

সো উম্মত্তকজাতিকো ব্রাহ্মণো তস্সা ৰচনং সুত্ৰা ‘‘ইমিনা নাম কারণেন সা মং ৰদতী’’তি অজানিত্ৰা তথাসঞ্ঞী হুত্ৰা তথা অকাসি. যে যে পস্সন্তি, তে তে পরিহাসং করোন্তা ‘‘সোভতি আচরিযো’’তি ৰদিংসু. রাজা পন নং ‘‘কিং, আচরিয, পিত্তং তে কুপিতং ¶ , উম্মত্তকোসি জাতো’’তিআদীনি ৰত্ৰা লজ্জাপেসি. তস্মিং কালে ব্রাহ্মণো ‘‘অযুত্তং মযা কত’’ন্তি লজ্জিতো ব্রাহ্মণিযা কুজ্ঝিত্ৰা ‘‘তাযম্হি সরাজিকায পরিসায অন্তরে লজ্জাপিতো, পোথেত্ৰা তং নিক্কড্ঢিস্সামী’’তি গেহং অগমাসি. ধুত্তিকব্রাহ্মণী তস্স কুজ্ঝিত্ৰা আগমনভাৰং ঞত্ৰা পুরেতরঞ্ঞেৰ চূল়দ্ৰারেন নিক্খমিত্ৰা রাজনিৰেসনং গন্ত্ৰা চতূহপঞ্চাহং তত্থেৰ অহোসি. রাজা তং কারণং ঞত্ৰা পুরোহিতং পক্কোসাপেত্ৰা ‘‘আচরিয, মাতুগামস্স নাম দোসো হোতিযেৰ, ব্রাহ্মণিযা খমিতুং ৰট্টতী’’তি খমাপনত্থায পঠমং গাথমাহ –

৮১.

‘‘অপি রুহক ছিন্নাপি, জিযা সন্ধীযতে পুন;

সন্ধীযস্সু পুরাণিযা, মা কোধস্স ৰসং গমী’’তি.

তত্রাযং সঙ্খেপত্থো – ভো রুহক, ননু ছিন্নাপি ধনুজিযা পুন সন্ধীযতি ঘটীযতি, এৰমেৰ ত্ৰম্পি পুরাণিযা সদ্ধিং সন্ধীযস্সু, কোধস্স ৰসং মা গমীতি.

তং ¶ ¶ সুত্ৰা রুহকো দুতিযং গাথমাহ –

৮২.

‘‘ৰিজ্জমানেসু ৰাকেসু, ৰিজ্জমানেসু কারিসু;

অঞ্ঞং জিযং করিস্সামি, অলঞ্ঞেৰ পুরাণিযা’’তি.

তস্সত্থো – মহারাজ, ধনুকারমুদুৰাকেসু চ জিযকারকেসু চ মনুস্সেসু ৰিজ্জমানেসু অঞ্ঞং জিযং করিস্সামি, ইমায ছিন্নায পুরাণিযা জিযায অলং, নত্থি মে কোচি অত্থোতি. এৰঞ্চ পন ৰত্ৰা তং নীহরিত্ৰা অঞ্ঞং ব্রাহ্মণিং আনেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. ‘‘তদা, ব্রাহ্মণী, পুরাণদুতিযিকা অহোসি, রুহকো উক্কণ্ঠিতভিক্খু, বারাণসিরাজা পন অহমেৰ অহোসি’’ন্তি.

রুহকজাতকৰণ্ণনা পঠমা.

[১৯২] ২. সিরিকাল়কণ্ণিজাতকৰণ্ণনা

ইত্থী ¶ সিযা রূপৰতীতি ইদং সিরিকাল়কণ্ণিজাতকং মহাউমঙ্গজাতকে আৰিভৰিস্সতি.

সিরিকাল়কণ্ণিজাতকৰণ্ণনা দুতিযা.

[১৯৩] ৩. চূল়পদুমজাতকৰণ্ণনা

অযমেৰ সা অহমপি সো অনঞ্ঞোতি ইদং সত্থা জেতৰনে ৰিহরন্তো উক্কণ্ঠিতভিক্খুং আরব্ভ কথেসি. ৰত্থু উম্মাদন্তীজাতকে (জা. ২.২০.৫৭ আদযো) আৰিভৰিস্সতি. সো পন ভিক্খু সত্থারা ‘‘সচ্চং কির ত্ৰং, ভিক্খু, উক্কণ্ঠিতো’’তি ৰুত্তে ‘‘সচ্চং, ভগৰা’’তি ৰত্ৰা ‘‘কেন পন ত্ৰং উক্কণ্ঠাপিতো’’তি ৰুত্তে ¶ ‘‘অহং, ভন্তে, একং অলঙ্কতপটিযত্তং মাতুগামং দিস্ৰা কিলেসানুৰত্তকো হুত্ৰা উক্কণ্ঠিতোম্হী’’তি আহ. অথ নং সত্থা ‘‘ভিক্খু, মাতুগামো নাম অকতঞ্ঞূ মিত্তদুব্ভী বহুমাযা, পোরাণকপণ্ডিতাপি অত্তনো দক্খিণজাণুলোহিতং পাযেত্ৰা যাৰজীৰিতদানম্পি দত্ৰা মাতুগামস্স চিত্তং ন লভিংসূ’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি নিব্বত্তি, নামগ্গহণদিৰসে চস্স ‘‘পদুমকুমারো’’তি নামং অকংসু. তস্স অপরেন ছ কনিট্ঠভাতিকা অহেসুং. তে সত্তপি জনা অনুপুব্বেন ৰুড্ঢিপ্পত্তা ঘরাৰাসং গহেত্ৰা রঞ্ঞো সহাযা ৰিয ৰিচরন্তি. অথেকদিৰসং রাজা রাজঙ্গণং ওলোকেন্তো ঠিতো তে মহাপরিৰারেন রাজুপট্ঠানং আগচ্ছন্তে দিস্ৰা ‘‘ইমে মং ৰধিত্ৰা রজ্জম্পি গণ্হেয্যু’’ন্তি আসঙ্কং উপ্পাদেত্ৰা তে পক্কোসাপেত্ৰা – ‘‘তাতা, তুম্হে ইমস্মিং নগরে ৰসিতুং ন লভথ, অঞ্ঞত্থ গন্ত্ৰা মম অচ্চযেন আগন্ত্ৰা কুলসন্তকং রজ্জং গণ্হথা’’তি আহ. তে পিতু ৰচনং সম্পটিচ্ছিত্ৰা রোদিত্ৰা কন্দিত্ৰা অত্তনো অত্তনো ঘরানি গন্ত্ৰা পজাপতিযো আদায ‘‘যত্থ ৰা তত্থ ৰা গন্ত্ৰা জীৰিস্সামা’’তি নগরা নিক্খমিত্ৰা মগ্গং গচ্ছন্তা একং কন্তারং পত্ৰা অন্নপানং অলভমানা খুদং অধিৰাসেতুং অসক্কোন্তা ‘‘মযং জীৰমানা ইত্থিযো লভিস্সামা’’তি কনিট্ঠস্স ভরিযং মারেত্ৰা তেরস কোট্ঠাসে কত্ৰা মংসং খাদিংসু. বোধিসত্তো অত্তনো চ ভরিযায চ লদ্ধকোট্ঠাসেসু একং ঠপেত্ৰা একং দ্ৰেপি খাদিংসু. এৰং ছ দিৰসে ছ ইত্থিযো মারেত্ৰা মংসং খাদিংসু.

বোধিসত্তো ¶ পন দিৰসে দিৰসে একেকং ঠপেত্ৰা ছ কোট্ঠাসে ঠপেসি. সত্তমে দিৰসে ‘‘বোধিসত্তস্স ভরিযং মারেস্সামা’’তি ৰুত্তে বোধিসত্তো তে ছ কোট্ঠাসে তেসং দত্ৰা ‘‘অজ্জ তাৰ ইমে ছ কোট্ঠাসে খাদথ, স্ৰে জানিস্সামা’’তি ৰত্ৰা তেসং মংসং খাদিত্ৰা নিদ্দাযনকালে ভরিযং গহেত্ৰা পলাযি. সা থোকং গন্ত্ৰা ‘‘গন্তুং ন সক্কোমি, সামী’’তি আহ. অথ নং বোধিসত্তো খন্ধেনাদায অরুণুগ্গমনৰেলায কন্তারা নিক্খমি. সা সূরিযে উগ্গতে ‘‘পিপাসিতাম্হি, সামী’’তি আহ. বোধিসত্তো ‘‘উদকং নত্থি, ভদ্দে’’তি ৰত্ৰা পুনপ্পুনং কথিতে খগ্গেন ¶ দক্খিণজাণুকং পহরিত্ৰা – ‘‘ভদ্দে, পানীযং নত্থি, ইদং পন মে দক্খিণজাণুলোহিতং পিৰমানা নিসীদাহী’’তি আহ. সা তথা অকাসি. তে অনুপুব্বেন মহাগঙ্গং পত্ৰা পিৰিত্ৰা চ ন্হত্ৰা চ ফলাফলং খাদিত্ৰা ফাসুকট্ঠানে ৰিস্সমিত্ৰা একস্মিং গঙ্গানিৰত্তনে অস্সমপদং মাপেত্ৰা ৰাসং কপ্পেসুং.

অথেকদিৰসং উপরিগঙ্গায রাজাপরাধিকং চোরং হত্থপাদে চ কণ্ণনাসঞ্চ ছিন্দিত্ৰা একস্মিং অম্বণকে নিপজ্জাপেত্ৰা মহাগঙ্গায পৰাহেসুং. সো মহন্তং অট্টস্সরং করোন্তো তং ঠানং পাপুণি. বোধিসত্তো তস্স করুণং পরিদেৰিতসদ্দং সুত্ৰা ‘‘দুক্খপ্পত্তো সত্তো মযি ঠিতে মা নস্সী’’তি গঙ্গাতীরং গন্ত্ৰা তং উত্তারেত্ৰা অস্সমপদং আনেত্ৰা কাসাৰধোৰনলেপনাদীহি ৰণপটিকম্মং অকাসি. ভরিযা পনস্স ‘‘এৰরূপং নাম দুস্সীলং কুণ্ঠং গঙ্গায আৰাহেত্ৰা পটিজগ্গন্তো ৰিচরতী’’তি ৰত্ৰা তং কুণ্ঠং জিগুচ্ছমানা নিট্ঠুভন্তী ৰিচরতি. বোধিসত্তো তস্স ৰণেসু সংৰিরুল়্হেসু ভরিযায সদ্ধিং তং অস্সমপদেযেৰ ঠপেত্ৰা অটৰিতো ফলাফলানি আহরিত্ৰা তঞ্চ ভরিযঞ্চ পোসেসি. তেসু এৰং ৰসন্তেসু সা ইত্থী এতস্মিং কুণ্ঠে পটিবদ্ধচিত্তা হুত্ৰা তেন সদ্ধিং অনাচারং চরিত্ৰা একেনুপাযেন বোধিসত্তং মারেতুকামা হুত্ৰা এৰমাহ – ‘‘সামি, অহং তুম্হাকং অংসে নিসীদিত্ৰা কন্তারা নিক্খমমানা একং পব্বতং ওলোকেত্ৰা অয্যে পব্বতম্হি নিব্বত্তদেৰতে ‘সচে অহং সামিকেন সদ্ধিং অরোগা জীৰিতং লভিস্সামি, বলিকম্মং তে করিস্সামী’তি আযাচিং, সা মং ইদানি উত্তাসেতি, করোমস্সা বলিকম্ম’’ন্তি. বোধিসত্তো তং মাযং অজানন্তো ‘‘সাধূ’’তি সম্পটিচ্ছিত্ৰা বলিকম্মং সজ্জেত্ৰা তায বলিভাজনং গাহাপেত্ৰা পব্বতমত্থকং অভিরুহি. অথ নং ¶ সা এৰমাহ – ‘‘সামি, দেৰতাযপি ত্ৰঞ্ঞেৰ উত্তমদেৰতা, পঠমং তাৰ তং ৰনপুপ্ফেহি পূজেত্ৰা পদক্খিণং কত্ৰা ৰন্দিত্ৰা পচ্ছা দেৰতায বলিকম্মং করিস্সামী’’তি. সা বোধিসত্তং পপাতাভিমুখং ঠপেত্ৰা ৰনপুপ্ফেহি পূজেত্ৰা পদক্খিণং কত্ৰা ৰন্দিতুকামা ৰিয হুত্ৰা পিট্ঠিপস্সে ঠত্ৰা পিট্ঠিযং পহরিত্ৰা পপাতে পাতেত্ৰা ‘‘দিট্ঠা মে পচ্চামিত্তস্স পিট্ঠী’’তি তুট্ঠমানসা পব্বতা ওরোহিত্ৰা কুণ্ঠস্স সন্তিকং অগমাসি.

বোধিসত্তোপি ¶ ¶ পপাতানুসারেন পব্বতা পতন্তো উদুম্বররুক্খমত্থকে একস্মিং অকণ্টকে পত্তসঞ্ছন্নে গুম্বে লগ্গি, হেট্ঠাপব্বতং পন ওরোহিতুং ন সক্কা. সো উদুম্বরফলানি খাদিত্ৰা সাখন্তরে নিসীদি. অথেকো মহাসরীরো গোধরাজা হেট্ঠাপব্বতপাদতো অভিরুহিত্ৰা তস্মিং উদুম্বরফলানি খাদতি. সো তং দিৰসং বোধিসত্তং দিস্ৰা পলাযি, পুনদিৰসে আগন্ত্ৰা একস্মিং পস্সে ফলানি খাদিত্ৰা পক্কামি. সো এৰং পুনপ্পুনং আগচ্ছন্তো বোধিসত্তেন সদ্ধিং ৰিস্সাসং আপজ্জিত্ৰা ‘‘ত্ৰং ইমং ঠানং কেন কারণেন আগতোসী’’তি পুচ্ছিত্ৰা ‘‘ইমিনা নাম কারণেনা’’তি ৰুত্তে ‘‘তেন হি মা ভাযী’’তি ৰত্ৰা বোধিসত্তং অত্তনো পিট্ঠিযং নিপজ্জাপেত্ৰা ওতারেত্ৰা অরঞ্ঞতো নিক্খমিত্ৰা মহামগ্গে ঠপেত্ৰা ‘‘ত্ৰং ইমিনা মগ্গেন গচ্ছাহী’’তি উয্যোজেত্ৰা অরঞ্ঞমেৰ পাৰিসি. বোধিসত্তো একং গামকং গন্ত্ৰা তত্থেৰ ৰসন্তো পিতু কালকতভাৰং সুত্ৰা বারাণসিং গন্ত্ৰা কুলসন্তকে রজ্জে পতিট্ঠায পদুমরাজা নাম হুত্ৰা দস রাজধম্মে অকোপেত্ৰা ধম্মেন রজ্জং কারেন্তো চতূসু নগরদ্ৰারেসু নগরমজ্ঝে নিৰেসনদ্ৰারেতি ছ দানসালাযো কারেত্ৰা দেৰসিকং ছ সতসহস্সানি ৰিস্সজ্জেত্ৰা দানং অদাসি.

সাপি খো ইত্থী তং কুণ্ঠং খন্ধে নিসীদাপেত্ৰা অরঞ্ঞা নিক্খমিত্ৰা মনুস্সপথে ভিক্খং চরমানা যাগুভত্তং সংহরিত্ৰা তং কুণ্ঠং পোসেসি. মনুস্সা ‘‘অযং তে কিং হোতী’’তি ¶ পুচ্ছিযমানা ‘‘অহং এতস্স মাতুলধীতা, পিতুচ্ছাপুত্তো মে এসো, এতস্সেৰ মং অদংসু, সাহং ৰজ্ঝপ্পত্তম্পি অত্তনো সামিকং উক্খিপিত্ৰা পরিহরন্তী ভিক্খং চরিত্ৰা পোসেমী’’তি. মনুস্সা ‘‘অযং পতিব্বতা’’তি ততো পট্ঠায বহুতরং যাগুভত্তং অদংসু. অপরে পন জনা এৰমাহংসু – ‘‘ত্ৰং মা এৰং ৰিচরি, পদুমরাজা বারাণসিযং রজ্জং কারেতি, সকলজম্বুদীপং সঙ্খোভেত্ৰা দানং দেতি, সো তং দিস্ৰা তুস্সিস্সতি, তুট্ঠো তে বহুং ধনং দস্সতি, তৰ সামিকং ইধেৰ নিসীদাপেত্ৰা গচ্ছা’’তি থিরং কত্ৰা ৰেত্তপচ্ছিং অদংসু. সা অনাচারা তং কুণ্ঠং ৰেত্তপচ্ছিযং নিসীদাপেত্ৰা পচ্ছিং উক্খিপিত্ৰা বারাণসিং গন্ত্ৰা দানসালাসু ভুঞ্জমানা ৰিচরতি. বোধিসত্তো অলঙ্কতহত্থিক্খন্ধৰরগতো দানগ্গং গন্ত্ৰা অট্ঠন্নং ৰা দসন্নং ৰা সহত্থা দানং দত্ৰা পুন গেহং গচ্ছতি ¶ . সা অনাচারা তং কুণ্ঠং পচ্ছিযং নিসীদাপেত্ৰা পচ্ছিং উক্খিপিত্ৰা তস্স গমনমগ্গে অট্ঠাসি.

রাজা দিস্ৰা ‘‘কিং এত’’ন্তি পুচ্ছি. ‘‘একা, দেৰ, পতিব্বতা’’তি. অথ নং পক্কোসাপেত্ৰা সঞ্জানিত্ৰা কুণ্ঠং পচ্ছিযা নীহরাপেত্ৰা ‘‘অযং তে কিং হোতী’’তি পুচ্ছি. সা ‘‘পিতুচ্ছাপুত্তো মে, দেৰ, কুলদত্তিকো সামিকো’’তি আহ. মনুস্সা তং অন্তরং অজানন্তা ¶ ‘‘অহো পতিব্বতা’’তিআদীনি ৰত্ৰা তং অনাচারিত্থিং ৰণ্ণযিংসু. পুন রাজা ‘‘অযং তে কুণ্ঠো কুলদত্তিকো সামিকো’’তি পুচ্ছি. সা রাজানং অসঞ্জানন্তী ‘‘আম, দেৰা’’তি সূরা হুত্ৰা কথেসি. অথ নং রাজা ‘‘কিং এস বারাণসিরঞ্ঞো পুত্তো, ননু ত্ৰং পদুমকুমারস্স ভরিযা অসুকরঞ্ঞো ধীতা, অসুকা নাম মম জাণুলোহিতং পিৰিত্ৰা ইমস্মিং কুণ্ঠে পটিবদ্ধচিত্তা মং পপাতে পাতেসি. সা ইদানি ত্ৰং নলাটেন মচ্চুং গহেত্ৰা মং ‘মতো’তি মঞ্ঞমানা ইমং ঠানং আগতা, ননু অহং জীৰামী’’তি ¶ ৰত্ৰা অমচ্চে আমন্তেত্ৰা ‘‘ভো, অমচ্চা ননু চাহং তুম্হেহি পুট্ঠো এৰং কথেসিং ‘মম কনিট্ঠভাতিকা ছ ইত্থিযো মারেত্ৰা মংসং খাদিংসু, অহং পন ময্হং ভরিযং অরোগং কত্ৰা গঙ্গাতীরং নেত্ৰা অস্সমপদে ৰসন্তো একং ৰজ্ঝপ্পত্তং কুণ্ঠং উত্তারেত্ৰা পটিজগ্গিং. সা ইত্থী এতস্মিং পটিবদ্ধচিত্তা মং পব্বতপাদে পাতেসি. অহং অত্তনো মেত্তচিত্ততায জীৰিতং লভি’ন্তি. যায অহং পব্বতা পাতিতো, ন সা অঞ্ঞা, এসা দুস্সীলা, সোপি ৰজ্ঝপ্পত্তো কুণ্ঠো ন অঞ্ঞো, অযমেৰা’’তি ৰত্ৰা ইমা গাথা অৰোচ –

৮৫.

‘‘অযমেৰ সা অহমপি সো অনঞ্ঞো, অযমেৰ সো হত্থচ্ছিন্নো অনঞ্ঞো;

যমাহ ‘কোমারপতী মম’ন্তি, ৰজ্ঝিত্থিযো নত্থি ইত্থীসু সচ্চং.

৮৬.

‘‘ইমঞ্চ জম্মং মুসলেন হন্ত্ৰা, লুদ্দং ছৰং পরদারূপসেৰিং;

ইমিস্সা চ নং পাপপতিব্বতায, জীৰন্তিযা ছিন্দথ কণ্ণনাস’’ন্তি.

তত্থ যমাহ কোমারপতী মমন্তি যং এসা ‘‘অযং মে, কোমারপতি, কুলদত্তিকো সামিকো’’তি আহ, অযমেৰ সো, ন অঞ্ঞো. ‘‘যমাহু ¶ , কোমারপতী’’তিপি পাঠো. অযমেৰ হি পোত্থকেসু লিখিতো, তস্সাপি অযমেৰত্থো, ৰচনৰিপল্লাসো পনেত্থ ৰেদিতব্বো. যঞ্হি রঞ্ঞা ৰুত্তং, তদেৰ ইধ আগতং. ৰজ্ঝিত্থিযোতি ইত্থিযো নাম ৰজ্ঝা ৰধিতব্বা এৰ. নত্থি ইত্থীসু সচ্চন্তি এতাসু সভাৰো নামেকো নত্থি. ‘‘ইমঞ্চ জম্ম’’ন্তিআদি দ্ৰিন্নম্পি তেসং দণ্ডাণাপনৰসেন ৰুত্তং. তত্থ জম্মন্তি লামকং. মুসলেন হন্ত্ৰাতি মুসলেন হনিত্ৰা পোথেত্ৰা অট্ঠীনি ভঞ্জিত্ৰা চুণ্ণৰিচুণ্ণং কত্ৰা. লুদ্দন্তি দারুণং. ছৰন্তি গুণাভাৰেন নিজ্জীৰং মতসদিসং. ইমিস্সা ¶ চ নন্তি এত্থ নন্তি নিপাতমত্তং, ইমিস্সা চ পাপপতিব্বতায অনাচারায দুস্সীলায জীৰন্তিযাৰ কণ্ণনাসং ছিন্দথাতি অত্থো.

বোধিসত্তো কোধং অধিৰাসেতুং অসক্কোন্তো এৰং তেসং দণ্ডং আণাপেত্ৰাপি ন তথা কারেসি ¶ . কোপং পন মন্দং কত্ৰা যথা সা পচ্ছিং সীসতো ওরোপেতুং ন সক্কোতি, এৰং গাল়্হতরং বন্ধাপেত্ৰা কুণ্ঠং তত্থ পক্খিপাপেত্ৰা অত্তনো ৰিজিতা নীহরাপেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. ‘‘তদা ছ ভাতরো অঞ্ঞতরা থেরা অহেসুং, ভরিযা চিঞ্চমাণৰিকা, কুণ্ঠো দেৰদত্তো, গোধরাজা আনন্দো, পদুমরাজা পন অহমেৰ অহোসি’’ন্তি.

চূল়পদুমজাতকৰণ্ণনা ততিযা.

[১৯৪] ৪. মণিচোরজাতকৰণ্ণনা

ন সন্তি দেৰা পৰসন্তি নূনাতি ইদং সত্থা ৰেল়ুৰনে ৰিহরন্তো ৰধায পরিসক্কন্তং দেৰদত্তং আরব্ভ কথেসি. তদা পন সত্থা ‘‘দেৰদত্তো ৰধায পরিসক্কতী’’তি সুত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো ময্হং ৰধায পরিসক্কতিযেৰ, পরিসক্কন্তোপি পন মং ৰধিতুং নাসক্খী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো বারাণসিতো অৰিদূরে গামকে গহপতিকুলে নিব্বত্তি. অথস্স ৰযপ্পত্তস্স ¶ বারাণসিতো কুলধীতরং আনেসুং, সা সুৰণ্ণৰণ্ণা অহোসি অভিরূপা দস্সনীযা দেৰচ্ছরা ৰিয পুপ্ফলতা ৰিয লল়মানা মত্তকিন্নরী ৰিয চ সুজাতাতি নামেন পতিব্বতা সীলাচারসম্পন্না ৰত্তসম্পন্না. নিচ্চকালম্পিস্সা পতিৰত্তং সস্সুৰত্তং সসুরৰত্তঞ্চ কতমেৰ হোতি, সা বোধিসত্তস্স পিযা অহোসি মনাপা. ইতি উভোপি ¶ তে সম্মোদমানা একচিত্তা সমগ্গৰাসং ৰসিংসু.

অথেকদিৰসং সুজাতা ‘‘মাতাপিতরো দট্ঠুকামাম্হী’’তি বোধিসত্তস্স আরোচেসি. ‘‘সাধু, ভদ্দে, মগ্গপাথেয্যং পহোনকং পটিযাদেহী’’তি খজ্জৰিকতিং পচাপেত্ৰা খজ্জকাদীনি যানকে ঠপেত্ৰা যানকং পাজেন্তো যানকস্স পুরতো অহোসি, ইতরা পচ্ছতো. তে নগরসমীপং গন্ত্ৰা যানকং মোচেত্ৰা ন্হত্ৰা ভুঞ্জিংসু. পুন বোধিসত্তো যানকং যোজেত্ৰা পুরতো নিসীদি, সুজাতা ৰত্থানি পরিৰত্তেত্ৰা অলঙ্করিত্ৰা পচ্ছতো নিসীদি. যানকস্স অন্তোনগরং পৰিট্ঠকালে বারাণসিরাজা হত্থিক্খন্ধৰরগতো নগরং পদক্খিণং করোন্তো তং পদেসং অগমাসি. সুজাতা ওতরিত্ৰা ¶ যানকস্স পচ্ছতো পদসা পাযাসি. রাজা তং দিস্ৰা তস্সা রূপসম্পত্তিযা আকড্ঢিযমানলোচনো পটিবদ্ধচিত্তো হুত্ৰা একং অমচ্চং আণাপেসি – ‘‘গচ্ছ ত্ৰং এতিস্সা সস্সামিকভাৰং ৰা অস্সামিকভাৰং ৰা জানাহী’’তি. সো গন্ত্ৰা তস্সা সস্সামিকভাৰং ঞত্ৰা ‘‘সস্সামিকা কির, দেৰ, যানকে নিসিন্নো পুরিসো এতিস্সা সামিকো’’তি আহ.

রাজা পটিবদ্ধচিত্তং ৰিনোদেতুং অসক্কোন্তো কিলেসাতুরো হুত্ৰা ‘‘একেন নং উপাযেন মারাপেত্ৰা ইত্থিং গণ্হিস্সামী’’তি চিন্তেত্ৰা একং পুরিসং আমন্তেত্ৰা ‘‘গচ্ছ, ভো, ইমং চূল়ামণিং ৰীথিং গচ্ছন্তো ৰিয হুত্ৰা এতস্স পুরিসস্স যানকে পক্খিপিত্ৰা এহী’’তি চূল়ামণিং দত্ৰা উয্যোজেসি. সো ‘‘সাধূ’’তি তং গহেত্ৰা গন্ত্ৰা যানকে ঠপেত্ৰা ‘‘ঠপিতো মে, দেৰা’’তি আগন্ত্ৰা আরোচেসি. রাজা ‘‘চূল়ামণি মে নট্ঠো’’তি আহ, মনুস্সা এককোলাহলং অকংসু. রাজা ‘‘সব্বদ্ৰারানি পিদহিত্ৰা সঞ্চারং ছিন্দিত্ৰা চোরং পরিযেসথা’’তি আহ, রাজপুরিসা তথা অকংসু, নগরং একসঙ্খোভং অহোসি. ইতরো পুরিসো মনুস্সে গহেত্ৰা বোধিসত্তস্স সন্তিকং গন্ত্ৰা ‘‘ভো, যানকং ঠপেহি, রঞ্ঞো চূল়ামণি ¶ ¶ নট্ঠো, যানকং সোধেস্সামী’’তি যানকং সোধেন্তো অত্তনা ঠপিতমণিং গহেত্ৰা বোধিসত্তং গহেত্ৰা ‘‘মণিচোরো’’তি হত্থেহি চ পাদেহি চ পোথেত্ৰা পচ্ছাবাহং বন্ধিত্ৰা নেত্ৰা ‘‘অযং মণিচোরো’’তি রঞ্ঞো দস্সেসি. রাজাপি ‘‘সীসমস্স ছিন্দথা’’তি আণাপেসি.

অথ নং রাজপুরিসা চতুক্কে চতুক্কে কসাহি তাল়েন্তা দক্খিণদ্ৰারেন নগরা নিক্খমাপেসুং. সুজাতাপি যানকং পহায বাহা পগ্গয্হ পরিদেৰমানা ‘‘সামি, মং নিস্সায ইমং দুক্খং পত্তোসী’’তি পরিদেৰমানা পচ্ছতো পচ্ছতো অগমাসি. রাজপুরিসা ‘‘সীসমস্স ছিন্দিস্সামা’’তি বোধিসত্তং উত্তানং নিপজ্জাপেসুং. তং দিস্ৰা সুজাতা অত্তনো সীলগুণং আৰজ্জেত্ৰা ‘‘নত্থি ৰত মঞ্ঞে ইমস্মিং লোকে সীলৰন্তানং ৰিহেঠকে পাপসাহসিকমনুস্সে নিসেধেতুং সমত্থা দেৰতা নামা’’তিআদীনি ৰত্ৰা পঠমং গাথমাহ –

৮৭.

‘‘ন সন্তি দেৰা পৰসন্তি নূন, ন হি নূন সন্তি ইধ লোকপালা;

সহসা করোন্তানমসঞ্ঞতানং, ন হি নূন সন্তি পটিসেধিতারো’’তি.

তত্থ ন সন্তি, দেৰাতি ইমস্মিং লোকে সীলৰন্তানং ওলোকনকা পাপানঞ্চ নিসেধকা ন সন্তি নূন দেৰা. পৰসন্তি নূনাতি এৰরূপেসু ৰা কিচ্চেসু উপ্পন্নেসু নূন পৰসন্তি পৰাসং গচ্ছন্তি. ইধ, লোকপালাতি ইমস্মিং লোকে লোকপালসম্মতা সমণব্রাহ্মণাপি সীলৰন্তানং ¶ অনুগ্গাহকা ন হি নূন সন্তি. সহসা করোন্তানমসঞ্ঞতানন্তি সহসা অৰীমংসিত্ৰা সাহসিকং দারুণং কম্মং করোন্তানং দুস্সীলানং. পটিসেধিতারোতি এৰরূপং কম্মং মা করিত্থ, ন লব্ভা এতং কাতুন্তি পটিসেধেন্তা নত্থীতি অত্থো.

এৰং তায সীলসম্পন্নায পরিদেৰমানায সক্কস্স দেৰরঞ্ঞো নিসিন্নাসনং উণ্হাকারং দস্সেসি, সক্কো ‘‘কো নু খো মং ¶ সক্কত্ততো চাৰেতুকামো’’তি আৰজ্জেন্তো ইমং কারণং ঞত্ৰা ‘‘বারাণসিরাজা অতিফরুসকম্মং করোতি, সীলসম্পন্নং সুজাতং কিলমেতি, গন্তুং দানি মে ৰট্টতী’’তি দেৰলোকা ওরুয্হ অত্তনো আনুভাৰেন হত্থিপিট্ঠে ¶ নিসিন্নং তং পাপরাজানং হত্থিক্খন্ধতো ওতারেত্ৰা ধম্মগণ্ডিকায উত্তানং নিপজ্জাপেত্ৰা বোধিসত্তং উক্খিপিত্ৰা সব্বালঙ্কারেহি অলঙ্করিত্ৰা রাজৰেসং গাহাপেত্ৰা হত্থিক্খন্ধে নিসীদাপেসি. রাজপুরিসা ফরসুং উক্খিপিত্ৰা সীসং ছিন্দন্তা রঞ্ঞো সীসং ছিন্দিংসু, ছিন্নকালেযেৰ চস্স রঞ্ঞো সীসভাৰং জানিংসু. সক্কো দেৰরাজা দিস্সমানকসরীরেনেৰ বোধিসত্তস্স সন্তিকং গন্ত্ৰা বোধিসত্তস্স রাজাভিসেকং কত্ৰা সুজাতায চ অগ্গমহেসিট্ঠানং দাপেসি. অমচ্চা চেৰ ব্রাহ্মণগহপতিকাদযো চ সক্কং দেৰরাজানং দিস্ৰা ‘‘অধম্মিকরাজা মারিতো, ইদানি অম্হেহি সক্কদত্তিকো ধম্মিকরাজা লদ্ধো’’তি সোমনস্সপ্পত্তা অহেসুং.

সক্কোপি আকাসে ঠত্ৰা ‘‘অযং ৰো সক্কদত্তিকো রাজা, ইতো পট্ঠায ধম্মেন রজ্জং কারেস্সতি. সচে হি রাজা অধম্মিকো হোতি, দেৰো অকালে ৰস্সতি, কালে ন ৰস্সতি, ছাতভযং রোগভযং সত্থভযন্তি ইমানি তীণি ভযানি উপগতানেৰ হোন্তী’’তি ওৰদন্তো দুতিযং গাথমাহ –

৮৮.

‘‘অকালে ৰস্সতী তস্স, কালে তস্স ন ৰস্সতি;

সগ্গা চ চৰতি ঠানা, ননু সো তাৰতা হতো’’তি.

তত্থ অকালেতি অধম্মিকরঞ্ঞো রজ্জে অযুত্তকালে সস্সানং পক্ককালে ৰা লাযনমদ্দনাদিকালে ৰা দেৰো ৰস্সতি. কালেতি যুত্তপযুত্তকালে ৰপনকালে তরুণসস্সকালে গব্ভগ্গহণকালে চ ন ৰস্সতি. সগ্গা চ চৰতি ঠানাতি সগ্গসঙ্খাতা ঠানা দেৰলোকা চৰতীতি অত্থো. অধম্মিকরাজা হি অপ্পটিলাভৰসেন দেৰলোকা চৰতি নাম, সগ্গেপি ৰা রজ্জং কারেন্তো অধম্মিকরাজা ততো চৰতীতিপি অত্থো. ননু সো তাৰতা হতোতি ননু সো অধম্মিকো রাজা এত্তকেন হতো হোতি. অথ ¶ ৰা একংসৰাচী এত্থ নু-কারো, নেসো একংসেন এত্তাৰতা ¶ হতো, অট্ঠসু পন মহানিরযেসু সোল়সসু চ উস্সদনিরযেসু দীঘরত্তং সো হঞ্ঞিস্সতীতি অযমেত্থ অত্থো.

এৰং ¶ সক্কো মহাজনস্স ওৰাদং দত্ৰা অত্তনো দেৰট্ঠানমেৰ অগমাসি. বোধিসত্তোপি ধম্মেন রজ্জং কারেত্ৰা সগ্গপুরং পূরেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – ‘‘তদা অধম্মিকরাজা দেৰদত্তো অহোসি, সক্কো অনুরুদ্ধো, সুজাতা রাহুলমাতা, সক্কদত্তিযরাজা পন অহমেৰ অহোসি’’ন্তি.

মণিচোরজাতকৰণ্ণনা চতুত্থা.

[১৯৫] ৫. পব্বতূপত্থরজাতকৰণ্ণনা

পব্বতূপত্থরে রম্মেতি ইদং সত্থা জেতৰনে ৰিহরন্তো কোসলরাজানং আরব্ভ কথেসি. কোসলরঞ্ঞো কির একো অমচ্চো অন্তেপুরে পদুস্সি. রাজাপি পরিৰীমংসমানো তং তথতো ঞত্ৰা ‘‘সত্থু আরোচেস্সামী’’তি জেতৰনং গন্ত্ৰা সত্থারং ৰন্দিত্ৰা ‘‘ভন্তে, অম্হাকং অন্তেপুরে একো অমচ্চো পদুস্সি, তস্স কিং কাতুং ৰট্টতী’’তি পুচ্ছি. অথ নং সত্থা ‘‘উপকারকো তে, মহারাজ, সো চ অমচ্চো সা চ ইত্থী পিযা’’তি পুচ্ছিত্ৰা ‘‘আম, ভন্তে, অতিৰিয উপকারকো সকলং রাজকুলং সন্ধারেতি, সাপি মে ইত্থী পিযা’’তি ৰুত্তে ‘‘মহারাজ, ‘অত্তনো উপকারকেসু সেৰকেসু পিযাসু চ ইত্থীসু দুব্ভিতুং ন সক্কা’তি পুব্বেপি রাজানো পণ্ডিতানং কথং সুত্ৰা মজ্ঝত্তাৰ অহেসু’’ন্তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অমচ্চকুলে নিব্বত্তিত্ৰা ৰযপ্পত্তো তস্স অত্থধম্মানুসাসকো অহোসি. অথস্স রঞ্ঞো একো অমচ্চো অন্তেপুরে পদুস্সি. রাজা নং তথতো ঞত্ৰা ‘‘অমচ্চোপি মে বহূপকারো, অযং ইত্থীপি মে পিযা, দ্ৰেপি ইমে নাসেতুং ন সক্কা ¶ , পণ্ডিতামচ্চং পঞ্হং পুচ্ছিত্ৰা সচে সহিতব্বং ভৰিস্সতি, সহিস্সামি, নো চে, ন সহিস্সামী’’তি বোধিসত্তং পক্কোসাপেত্ৰা আসনং দত্ৰা ‘‘পণ্ডিত, পঞ্হং পুচ্ছিস্সামী’’তি ৰত্ৰা ‘‘পুচ্ছথ, মহারাজ, ৰিস্সজ্জেস্সামী’’তি ৰুত্তে পঞ্হং পুচ্ছন্তো পঠমং গাথমাহ –

৮৯.

‘‘পব্বতূপত্থরে ¶ ¶ রম্মে, জাতা পোক্খরণী সিৰা;

তং সিঙ্গালো অপাপাযি, জানং সীহেন রক্খিত’’ন্তি.

তত্থ পব্বতূপত্থরে রম্মেতি হিমৰন্তপব্বতপাদে পত্থরিত্ৰা ঠিতে অঙ্গণট্ঠানেতি অত্থো. জাতা পোক্খরণী সিৰাতি সিৰা সীতলা মধুরোদকা পোক্খরণী নিব্বত্তা, অপিচ খো পোক্খরসঞ্ছন্না নদীপি পোক্খরণীযেৰ. অপাপাযীতি অপ-ইতি উপসগ্গো, অপাযীতি অত্থো. জানং সীহেন রক্খিতন্তি সা পোক্খরণী সীহপরিভোগা সীহেন রক্খিতা, সোপি নং সিঙ্গালো ‘‘সীহেন রক্খিতা অয’’ন্তি জানন্তোৰ অপাযি. তং কিং মঞ্ঞতি, বালো সিঙ্গালো সীহস্স অভাযিত্ৰা পিৰেয্য এৰরূপং পোক্খরণিন্তি অযমেত্থাধিপ্পাযো.

বোধিসত্তো ‘‘অদ্ধা এতস্স অন্তেপুরে একো অমচ্চো পদুট্ঠো ভৰিস্সতী’’তি ঞত্ৰা দুতিযং গাথমাহ –

৯০.

‘‘পিৰন্তি চে মহারাজ, সাপদানি মহানদিং;

ন তেন অনদী হোতি, খমস্সু যদি তে পিযা’’তি.

তত্থ সাপদানীতি ন কেৰলং সিঙ্গালোৰ, অৰসেসানি সুনখপসদবিল়ারমিগাদীনি সব্বসাপদানি তং পোক্খরসঞ্ছন্নত্তা ‘‘পোক্খরণী’’তি লদ্ধনামং নদিং পিৰন্তি চে. ন তেন অনদী হোতীতি নদিযঞ্হি দ্ৰিপদচতুপ্পদাপি অহিমচ্ছাপি সব্বে পিপাসিতা পানীযং পিৰন্তি, ন সা তেন কারণেন অনদী নাম হোতি, নাপি উচ্ছিট্ঠনদী. কস্মা? সব্বেসং সাধারণত্তা. যথা নদী যেন কেনচি পীতা ন দুস্সতি, এৰং ইত্থীপি কিলেসৰসেন সামিকং অতিক্কমিত্ৰা অঞ্ঞেন সদ্ধিং সংৰাসং গতা নেৰ অনিত্থী হোতি. কস্মা? সব্বেসং সাধারণভাৰেন. নাপি উচ্ছিট্ঠিত্থী. কস্মা? ওদকন্তিকতায সুদ্ধভাৰেন. খমস্সু যদি তে পিযাতি যদি পন তে সা ইত্থী পিযা, সো চ অমচ্চো বহূপকারো, তেসং উভিন্নম্পি খমস্সু মজ্ঝত্তভাৰেন তিট্ঠাহীতি.

এৰং ¶ মহাসত্তো রঞ্ঞো ওৰাদং অদাসি. রাজা তস্স ওৰাদে ঠত্ৰা ‘‘পুন এৰরূপং পাপকম্মং মা করিত্থা’’তি ৰত্ৰা উভিন্নম্পি খমি. ততো পট্ঠায ¶ তে ওরমিংসু. রাজাপি দানাদীনি পুঞ্ঞানি কত্ৰা জীৰিতপরিযোসানে সগ্গপুরং পূরেসি. কোসলরাজাপি ইমং ধম্মদেসনং সুত্ৰা তেসং উভিন্নম্পি খমিত্ৰা মজ্ঝত্তো অহোসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, পণ্ডিতামচ্চো পন অহমেৰ অহোসি’’ন্তি.

পব্বতূপত্থরজাতকৰণ্ণনা পঞ্চমা.

[১৯৬] ৬. ৰলাহকস্সজাতকৰণ্ণনা

যে ন কাহন্তি ওৰাদন্তি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. সো হি ভিক্খু সত্থারা ‘‘সচ্চং কির ত্ৰং, ভিক্খু, উক্কণ্ঠিতোসী’’তি পুট্ঠো ‘‘সচ্চ’’ন্তি ৰত্ৰা ‘‘কিং কারণা’’তি ৰুত্তে ‘‘একং অলঙ্কতং মাতুগামং দিস্ৰা কিলেসৰসেনা’’তি আহ. অথ নং সত্থা ‘‘ইত্থিযো নামেতা ভিক্খু অত্তনো রূপসদ্দগন্ধরসফোট্ঠব্বেহি চেৰ ইত্থিকুত্তৰিলাসেহি চ পুরিসে পলোভেত্ৰা অত্তনো ৰসে কত্ৰা ৰসং উপগতভাৰং ঞত্ৰা সীলৰিনাসঞ্চেৰ ধনৰিনাসঞ্চ পাপনট্ঠেন ‘যক্খিনিযো’তি ৰুচ্চন্তি. পুব্বেপি হি যক্খিনিযো ইত্থিকুত্তেন একং পুরিসসত্থং উপসঙ্কমিত্ৰা ৰাণিজে পলোভেত্ৰা অত্তনো ৰসে কত্ৰা পুন অঞ্ঞে পুরিসে দিস্ৰা তে সব্বেপি জীৰিতক্খযং পাপেত্ৰা উভোহি হনুকপস্সেহি লোহিতেন পগ্ঘরন্তেন মুখং পূরাপেত্ৰা খাদিংসূ’’তি ৰত্ৰা অতীতং আহরি.

অতীতে তম্বপণ্ণিদীপে সিরীসৰত্থু নাম যক্খনগরং অহোসি, তত্থ যক্খিনিযো ৰসিংসু. তা ভিন্ননাৰানং ৰাণিজানং আগতকালে অলঙ্কতপটিযত্তা খাদনীযভোজনীযং গাহাপেত্ৰা দাসিগণপরিৰুতা দারকে অঙ্কেনাদায ৰাণিজে উপসঙ্কমন্তি. তেসং ¶ ‘‘মনুস্সাৰাসং আগতম্হা’’তি সঞ্জাননত্থং তত্থ তত্থ কসিগোরক্খাদীনি করোন্তে মনুস্সে গোগণে সুনখেতি এৰমাদীনি দস্সেন্তি, ৰাণিজানং সন্তিকং গন্ত্ৰা ‘‘ইমং যাগুং পিৰথ, ভত্তং ভুঞ্জথ, খাদনীযং খাদথা’’তি ৰদন্তি. ৰাণিজা অজানন্তা তাহি দিন্নং পরিভুঞ্জন্তি. অথ তেসং খাদিত্ৰা ভুঞ্জিত্ৰা পিৰিত্ৰা ৰিস্সমিতকালে ¶ পটিসন্থারং করোন্তি, ‘‘তুম্হে কত্থ ৰাসিকা, কুতো আগতা, কহং গচ্ছিস্সথ, কেন কম্মেন ইধাগতত্থা’’তি পুচ্ছন্তি. ‘‘ভিন্ননাৰা হুত্ৰা ইধাগতম্হা’’তি ৰুত্তে ‘‘সাধু, অয্যা, অম্হাকম্পি সামিকানং নাৰং অভিরুহিত্ৰা গতানং তীণি সংৰচ্ছরানি অতিক্কন্তানি, তে মতা ভৰিস্সন্তি; তুম্হেপি ৰাণিজাযেৰ, মযং তুম্হাকং পাদপরিচারিকা ভৰিস্সামা’’তি ৰত্ৰা তে ৰাণিজে ইত্থিকুত্তহাৰভাৰৰিলাসেহি পলোভেত্ৰা যক্খনগরং নেত্ৰা সচে পঠমগহিতা মনুস্সা অত্থি, তে দেৰসঙ্খলিকায বন্ধিত্ৰা কারণঘরে পক্খিপন্তি ¶ , অত্তনো ৰসনট্ঠানে ভিন্ননাৰে মনুস্সে অলভন্তিযো পন পরতো কল্যাণিং ওরতো নাগদীপন্তি এৰং সমুদ্দতীরং অনুসঞ্চরন্তি. অযং তাসং ধম্মতা.

অথেকদিৰসং পঞ্চসতা ভিন্ননাৰা ৰাণিজা তাসং নগরসমীপে উত্তরিংসু. তা তেসং সন্তিকং গন্ত্ৰা পলোভেত্ৰা যক্খনগরং নেত্ৰা পঠমং গহিতে মনুস্সে দেৰসঙ্খলিকায বন্ধিত্ৰা কারণঘরে পক্খিপিত্ৰা জেট্ঠযক্খিনী জেট্ঠকৰাণিজং, সেসা সেসেতি তা পঞ্চসতা যক্খিনিযো তে পঞ্চসতে ৰাণিজে অত্তনো সামিকে অকংসু. অথ সা জেট্ঠযক্খিনী রত্তিভাগে ৰাণিজে নিদ্দং উপগতে উট্ঠায গন্ত্ৰা কারণঘরে মনুস্সে মারেত্ৰা মংসং খাদিত্ৰা আগচ্ছতি, সেসাপি তথেৰ করোন্তি. জেট্ঠযক্খিনিযা মনুস্সমংসং খাদিত্ৰা আগতকালে সরীরং সীতলং হোতি. জেট্ঠৰাণিজো পরিগ্গণ্হন্তো তস্সা যক্খিনিভাৰং ঞত্ৰা ‘‘ইমা পঞ্চসতা যক্খিনিযো ¶ ভৰিস্সন্তি, অম্হেহি পলাযিতুং ৰট্টতী’’তি পুনদিৰসে পাতোৰ মুখধোৰনত্থায গন্ত্ৰা সেসৰাণিজানং আরোচেসি – ‘‘ইমা যক্খিনিযো, ন মনুস্সিত্থিযো, অঞ্ঞেসং ভিন্ননাৰানং আগতকালে তে সামিকে কত্ৰা অম্হেপি খাদিস্সন্তি, এথ ইতো পলাযিস্সামা’’তি তেসু পঞ্চসতেসু অড্ঢতেয্যসতা ‘‘ন মযং এতা ৰিজহিতুং সক্খিস্সাম, তুম্হে গচ্ছথ, মযং ন পলাযিস্সামা’’তি আহংসু. জেট্ঠৰাণিজো অত্তনো ৰচনকারে অড্ঢতেয্যসতে গহেত্ৰা তাসং ভীতো পলাযি.

তস্মিং পন কালে বোধিসত্তো ৰলাহকস্সযোনিযং নিব্বত্তি, সব্বসেতো কাল়সীসো মুঞ্জকেসো ইদ্ধিমা ৰেহাসঙ্গমো অহোসি. সো ¶ হিমৰন্ততো আকাসে উপ্পতিত্ৰা তম্বপণ্ণিদীপং গন্ত্ৰা তত্থ তম্বপণ্ণিসরে পল্ললে সযংজাতসালিং খাদিত্ৰা গচ্ছতি. এৰং গচ্ছন্তো চ ‘‘জনপদং গন্তুকামা অত্থী’’তি তিক্খত্তুং করুণাপরিভাৰিতং মানুসিং ৰাচং ভাসতি. তে বোধিসত্তস্স ৰচনং সুত্ৰা উপসঙ্কমিত্ৰা অঞ্জলিং পগ্গয্হ ‘‘সামি, মযং জনপদং গমিস্সামা’’তি আহংসু. তেন হি ময্হং পিট্ঠিং অভিরুহথাতি. অপ্পেকচ্চে অভিরুহিংসু, তেসু একচ্চে ৰালধিং গণ্হিংসু, একচ্চে অঞ্জলিং পগ্গহেত্ৰা অট্ঠংসুযেৰ. বোধিসত্তো অন্তমসো অঞ্জলিং পগ্গহেত্ৰা ঠিতে সব্বেপি তে অড্ঢতেয্যসতে ৰাণিজে অত্তনো আনুভাৰেন জনপদং নেত্ৰা সকসকট্ঠানেসু পতিট্ঠপেত্ৰা অত্তনো ৰসনট্ঠানং আগমাসি. তাপি খো যক্খিনিযো অঞ্ঞেসং আগতকালে তত্থ ওহীনকে অড্ঢতেয্যসতে মনুস্সে ৰধিত্ৰা খাদিংসু.

সত্থা ভিক্খূ আমন্তেত্ৰা ‘‘ভিক্খৰে, যথা তে যক্খিনীনং ৰসং গতা ৰাণিজা জীৰিতক্খযং পত্তা, ৰলাহকস্সরাজস্স ৰচনকরা ৰাণিজা সকসকট্ঠানেসু পতিট্ঠিতা, এৰমেৰ বুদ্ধানং ওৰাদং অকরোন্তা ভিক্খূপি ভিক্খুনিযোপি উপাসকাপি উপাসিকাযোপি চতূসু অপাযেসু ¶ পঞ্চৰিধবন্ধনকম্মকরণট্ঠানাদীসু ¶ মহাদুক্খং পাপুণন্তি. ওৰাদকরা পন তিস্সো কুলসম্পত্তিযো চ ছ কামসগ্গে ৰীসতি ব্রহ্মলোকেতি ইমানি চ ঠানানি পত্ৰা অমতমহানিব্বানং সচ্ছিকত্ৰা মহন্তং সুখং অনুভৰন্তী’’তি ৰত্ৰা অভিসম্বুদ্ধো হুত্ৰা ইমা গাথা অৰোচ –

৯১.

‘‘যে ন কাহন্তি ওৰাদং, নরা বুদ্ধেন দেসিতং;

ব্যসনং তে গমিস্সন্তি, রক্খসীহিৰ ৰাণিজা.

৯২.

‘‘যে চ কাহন্তি ওৰাদং, নরা বুদ্ধেন দেসিতং;

সোত্থিং পারং গমিস্সন্তি, ৰলাহেনেৰ ৰাণিজা’’তি.

তত্থ যে ন কাহন্তীতি যে ন করিস্সন্তি. ব্যসনং তে গমিস্সন্তীতি তে মহাৰিনাসং পাপুণিস্সন্তি. রক্খসীহিৰ ৰাণিজাতি রক্খসীহি পলোভিতৰাণিজা ৰিয. সোত্থিং পারং গমিস্সন্তীতি অনন্তরাযেন নিব্বানং পাপুণিস্সন্তি. ৰলাহেনেৰ ৰাণিজাতি ৰলাহেনেৰ ‘‘আগচ্ছথা’’তি ¶ ৰুত্তা তস্স ৰচনকরা ৰাণিজা ৰিয. যথা হি তে সমুদ্দপারং গন্ত্ৰা সকসকট্ঠানং অগমংসু, এৰং বুদ্ধানং ওৰাদকরা সংসারপারং নিব্বানং গচ্ছন্তীতি অমতমহানিব্বানেন ধম্মদেসনায কূটং গণ্হি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি, অঞ্ঞেপি বহূ সোতাপত্তিফলসকদাগামিফলঅনাগামিফলঅরহত্তফলানি পাপুণিংসু. ‘‘তদা ৰলাহকস্সরাজস্স ৰচনকরা অড্ঢতেয্যসতা ৰাণিজা বুদ্ধপরিসা অহেসুং, ৰলাহকস্সরাজা পন অহমেৰ অহোসি’’ন্তি.

ৰলাহকস্সজাতকৰণ্ণনা ছট্ঠা.

[১৯৭] ৭. মিত্তামিত্তজাতকৰণ্ণনা

ন নং উম্হযতে দিস্ৰাতি ইদং সত্থা জেতৰনে ৰিহরন্তো অঞ্ঞতরং ভিক্খুং আরব্ভ কথেসি. অঞ্ঞতরো ভিক্খু ‘‘মযা গহিতে ময্হং উপজ্ঝাযো ন কুজ্ঝিস্সতী’’তি উপজ্ঝাযেন ঠপিতং ৰিস্সাসেন একং ৰত্থখণ্ডং গহেত্ৰা উপাহনত্থৰিকং কত্ৰা পচ্ছা উপজ্ঝাযং আপুচ্ছি. অথ তং উপজ্ঝাযো ¶ ‘‘কিংকারণা গণ্হী’’তি ¶ ৰত্ৰা ‘‘মযা গহিতে ন কুজ্ঝিস্সতীতি তুম্হাকং ৰিস্সাসেনা’’তি ৰুত্তে ‘‘কো মযা সদ্ধিং তুয্হং ৰিস্সাসো নামা’’তি ৰত্ৰা কুদ্ধো উট্ঠহিত্ৰা পহরি. তস্স সা কিরিযা ভিক্খূসু পাকটা জাতা. অথেকদিৰসং ভিক্খূ ধম্মসভাযং কথং সমুট্ঠাপেসুং – ‘‘আৰুসো, অসুকো কির দহরো উপজ্ঝাযস্স ৰিস্সাসেন ৰত্থখণ্ডং গহেত্ৰা উপাহনত্থৰিকং অকাসি. অথ নং উপজ্ঝাযো ‘কো মযা সদ্ধিং তুয্হং ৰিস্সাসো নামা’তি ৰত্ৰা কুদ্ধো উট্ঠহিত্ৰা পহরী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰেস ভিক্খু অত্তনো সদ্ধিৰিহারিকেন সদ্ধিং অৰিস্সাসিকো, পুব্বেপি অৰিস্সাসিকোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে ব্রাহ্মণকুলে নিব্বত্তিত্ৰা ৰযপ্পত্তো ইসিপব্বজ্জং পব্বজিত্ৰা অভিঞ্ঞা ¶ চ সমাপত্তিযো চ নিব্বত্তেত্ৰা গণসত্থা হুত্ৰা হিমৰন্তপদেসে ৰাসং কপ্পেসি. তস্মিং ইসিগণে একো তাপসো বোধিসত্তস্স ৰচনং অকত্ৰা একং মতমাতিকং হত্থিপোতকং পটিজগ্গি. অথ নং সো ৰুদ্ধিপ্পত্তো মারেত্ৰা অরঞ্ঞং পাৰিসি. তস্স সরীরকিচ্চং কত্ৰা ইসিগণো বোধিসত্তং পরিৰারেত্ৰা – ‘‘ভন্তে, কেন নু কো কারণেন মিত্তভাৰো ৰা অমিত্তভাৰো ৰা সক্কা জানিতু’’ন্তি পুচ্ছি. বোধিসত্তো ‘‘ইমিনা চ ইমিনা চ কারণেনা’’তি আচিক্খন্তো ইমা গাথা অৰোচ –

৯৩.

‘‘ন নং উম্হযতে দিস্ৰা, ন চ নং পটিনন্দতি;

চক্খূনি চস্স ন দদাতি, পটিলোমঞ্চ ৰত্ততি.

৯৪.

‘‘এতে ভৰন্তি আকারা, অমিত্তস্মিং পতিট্ঠিতা;

যেহি অমিত্তং জানেয্য, দিস্ৰা সুত্ৰা চ পণ্ডিতো’’তি.

তত্থ ন নং উম্হযতে দিস্ৰাতি যো হি যস্স অমিত্তো হোতি, সো তং পুগ্গলং দিস্ৰা ন উম্হযতে, হসিতং ন করোতি, পহট্ঠাকারং ন দস্সেতি. ন ¶ চ নং পটিনন্দতীতি তস্স ৰচনং সুত্ৰাপি তং পুগ্গলং ন পটিনন্দতি, সাধু সুভাসিতন্তি ন চানুমোদতি. চক্খূনি চস্স ন দদাতীতি চক্খুনা চক্খুং আহচ্চ পটিমুখো হুত্ৰা ন ওলোকেতি, অঞ্ঞতো চক্খূনি হরতি. পটিলোমঞ্চ ৰত্ততীতি তস্স কাযকম্মম্পি ৰচীকম্মম্পি ন রোচেতি, পটিলোমগাহং গণ্হাতি পচ্চনীকগাহং. আকারাতি কারণানি. যেহি অমিত্তন্তি যেহি কারণেহি ¶ তানি কারণানি দিস্ৰা সুত্ৰা চ পণ্ডিতো পুগ্গলো ‘‘অযং মে অমিত্তো’’তি জানেয্য, ততো ৰিপরীতেহি পন মিত্তভাৰো জানিতব্বোতি.

এৰং বোধিসত্তো মিত্তামিত্তভাৰকারণানি আচিক্খিত্ৰা ব্রহ্মৰিহারে ভাৰেত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা হত্থিপোসকতাপসো সদ্ধিৰিহারিকো অহোসি, হত্থী উপজ্ঝাযো, ইসিগণো বুদ্ধপরিসা, গণসত্থা পন অহমেৰ অহোসি’’ন্তি.

মিত্তামিত্তজাতকৰণ্ণনা সত্তমা.

[১৯৮] ৮. রাধজাতকৰণ্ণনা

পৰাসা ¶ আগতো তাতাতি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. সো কির সত্থারা ‘‘সচ্চং কির, ত্ৰং ভিক্খু, উক্কণ্ঠিতো’’তি পুট্ঠো ‘‘সচ্চং, ভন্তে’’তি ৰত্ৰা ‘‘কিংকারণা’’তি ৰুত্তে ‘‘একং অলঙ্কতইত্থিং দিস্ৰা কিলেসৰসেনা’’তি আহ. অথ নং সত্থা ‘‘মাতুগামো নাম ভিক্খু ন সক্কা রক্খিতুং, পুব্বেপি দোৰারিকে ঠপেত্ৰা রক্খন্তাপি রক্খিতুং ন সক্খিংসু, কিং তে ইত্থিযা, লদ্ধাপি সা রক্খিতুং ন সক্কা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সুৰযোনিযং নিব্বত্তি, ‘‘রাধো’’তিস্স নামং, কনিট্ঠভাতা পনস্স পোট্ঠপাদো নাম. তে উভোপি তরুণকালেযেৰ একো লুদ্দকো গহেত্ৰা বারাণসিযং অঞ্ঞতরস্স ব্রাহ্মণস্স অদাসি, ব্রাহ্মণো তে পুত্তট্ঠানে ঠপেত্ৰা পটিজগ্গি. ব্রাহ্মণস্স ¶ পন ব্রাহ্মণী অরক্খিতা দুস্সীলা. সো ৰোহারকরণত্থায গচ্ছন্তো তে সুৰপোতকে আমন্তেত্ৰা ‘‘তাতা, অহং ৰোহারকরণত্থায গচ্ছামি, কালে ৰা ৰিকালে ৰা তুম্হাকং মাতু করণকম্মং ওলোকেয্যাথ, অঞ্ঞস্স পুরিসস্স গমনভাৰং ৰা অগমনভাৰং ৰা জানেয্যাথা’’তি ব্রাহ্মণিং সুৰপোতকানং পটিচ্ছাপেত্ৰা অগমাসি. সা তস্স নিক্খন্তকালতো পট্ঠায অনাচারং চরি, রত্তিম্পি দিৰাপি আগচ্ছন্তানঞ্চ গচ্ছন্তানঞ্চ পমাণং নত্থি.

তং দিস্ৰা পোট্ঠপাদো রাধং পুচ্ছি – ‘‘ব্রাহ্মণো ইমং ব্রাহ্মণিং অম্হাকং নিয্যাদেত্ৰা গতো, অযঞ্চ ¶ পাপকম্মং করোতি, ৰদামি ন’’ন্তি. রাধো ‘‘মা ৰদাহী’’তি আহ. সো তস্স ৰচনং অগ্গহেত্ৰা ‘‘অম্ম, কিংকারণা পাপকম্মং করোসী’’তি আহ. সা তং মারেতুকামা হুত্ৰা ‘‘তাত, ত্ৰং নাম ময্হং পুত্তো, ইতো পট্ঠায ন করিস্সামি, এহি, তাত, তাৰা’’তি পিযাযমানা ৰিয পক্কোসিত্ৰা আগতং গহেত্ৰা ‘‘ত্ৰং মং ওৰদসি, অত্তনো পমাণং ন জানাসী’’তি গীৰং পরিৰত্তেত্ৰা মারেত্ৰা উদ্ধনন্তরেসু পক্খিপি. ব্রাহ্মণো আগন্ত্ৰা ৰিস্সমিত্ৰা বোধিসত্তং ‘‘কিং, তাত রাধ, মাতা তে অনাচারং করোতি, ন করোতী’’তি পুচ্ছন্তো পঠমং গাথমাহ –

৯৫.

‘‘পৰাসা ¶ আগতো তাত, ইদানি নচিরাগতো;

কচ্চিন্নু তাত তে মাতা, ন অঞ্ঞমুপসেৰতী’’তি.

তস্সত্থো – অহং, তাত রাধ, পৰাসা আগতো, সো চম্হি ইদানেৰ আগতো নচিরাগতো, তেন পৰত্তিং অজানন্তো তং পুচ্ছামি – ‘‘কচ্চি নু তে, তাত, মাতা অঞ্ঞং পুরিসং ন উপসেৰতী’’তি.

রাধো ‘‘তাত, পণ্ডিতা নাম ভূতং ৰা অভূতং ৰা অনিয্যানিকং নাম ন কথেসু’’ন্তি ঞাপেন্তো দুতিযং গাথমাহ –

৯৬.

‘‘ন ¶ খো পনেতং সুভণং, গিরং সচ্চুপসংহিতং;

সযেথ পোট্ঠপাদোৰ, মুম্মুরে উপকূথিতো’’তি.

তত্থ গিরন্তি ৰচনং. তঞ্হি যথা ইদানি গিরা, এৰং তদা ‘‘গির’’ন্তি ৰুচ্চতি, সো সুৰপোতকো লিঙ্গং অনাদিযিত্ৰা এৰমাহ. অযং পনেত্থ অত্থো – তাত, পণ্ডিতেন নাম সচ্চুপসংহিতং যথাভূতং অত্থযুত্তং সভাৰৰচনম্পি অনিয্যানিকং ন সুভণং. অনিয্যানিকঞ্চ সচ্চং ভণন্তো সযেথ পোট্ঠপাদোৰ, মুম্মুরে উপকূথিতো, যথা পোট্ঠপাদো কুক্কুল়ে ঝামো সযতি, এৰং সযেয্যাতি. ‘‘উপকূধিতো’’তিপি পাঠো, অযমেৰত্থো.

এৰং বোধিসত্তো ব্রাহ্মণস্স ধম্মং দেসেত্ৰা ‘‘মযাপি ইমস্মিং ঠানে ৰসিতুং ন সক্কা’’তি ব্রাহ্মণং আপুচ্ছিত্ৰা অরঞ্ঞমেৰ পাৰিসি.

সত্থা ¶ ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. ‘‘তদা পোট্ঠপাদো আনন্দো অহোসি, রাধো পন অহমেৰ অহোসি’’ন্তি.

রাধজাতকৰণ্ণনা অট্ঠমা.

[১৯৯] ৯. গহপতিজাতকৰণ্ণনা

উভযং ¶ মে ন খমতীতি ইদং সত্থা জেতৰনে ৰিহরন্তো উক্কণ্ঠিতমেৰ ভিক্খুং আরব্ভ কথেসি. কথেন্তো চ ‘‘মাতুগামো নাম অরক্খিতো, পাপকম্মং কত্ৰা যেন কেনচি উপাযেন সামিকং ৰঞ্চেতিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে গহপতিকুলে নিব্বত্তিত্ৰা ৰযপ্পত্তো ঘরাৰাসং গণ্হি. তস্স ভরিযা দুস্সীলা গামভোজকেন সদ্ধিং অনাচারং চরতি. বোধিসত্তো তং ঞত্ৰা পরিগ্গণ্হন্তো চরতি ¶ . তদা পন অন্তোৰস্সে বীজেসু নীহটেসু ছাতকং অহোসি, সস্সানং গব্ভগহণকালো জাতো. সকলগামৰাসিনো ‘‘ইতো মাসদ্ৰযেন সস্সানি উদ্ধরিত্ৰা ৰীহিং দস্সামা’’তি একতো হুত্ৰা গামভোজকস্স হত্থতো একং জরগোণং গহেত্ৰা মংসং খাদিংসু.

অথেকদিৰসং গামভাজকো খণং ওলোকেত্ৰা বোধিসত্তস্স বহিগতৰেলাযং গেহং পাৰিসি. তেসং সুখনিপন্নক্খণেযেৰ বোধিসত্তো গামদ্ৰারেন পৰিসিত্ৰা গেহাভিমুখো পাযাসি. সা ইত্থী গামদ্ৰারাভিমুখী তং দিস্ৰা ‘‘কো নু খো এসো’’তি উম্মারে ঠত্ৰা ওলোকেন্তী ‘‘সোযেৰা’’তি ঞত্ৰা গামভোজকস্স আচিক্খি, গামভোজকো ভীতো পকম্পি. অথ নং সা ‘‘মা ভাযি, অত্থেকো উপাযো, অম্হেহি তৰ হত্থতো গোণমংসং খাদিতং, ত্ৰং মংসমূলং সোধেন্তো ৰিয হোহি, অহং কোট্ঠং আরুয্হ কোট্ঠদ্ৰারে ঠত্ৰা ‘ৰীহি নত্থী’তি ৰক্খামি. ত্ৰং গেহমজ্ঝে ঠত্ৰা ‘অম্হাকং ঘরে দারকা ছাতা, মংসমূলং মে দেহী’তি পুনপ্পুনং চোদেয্যাসী’’তি ৰত্ৰা কোট্ঠং আরুয্হ কোট্ঠদ্ৰারে নিসীদি. ইতরো গেহমজ্ঝে ঠত্ৰা ‘‘মংসমূলং দেহী’’তি ৰদতি. সা কোট্ঠদ্ৰারে নিসিন্না ‘‘কোট্ঠে ৰীহি নত্থি, সস্সে উদ্ধরন্তে দস্সামি গচ্ছাহী’’তি আহ.

বোধিসত্তো গেহং পৰিসিত্ৰা তেসং কিরিযং দিস্ৰা ‘‘ইমায পাপায কতউপাযো এস ভৰিস্সতী’’তি ¶ ঞত্ৰা গামভোজকং আমন্তেত্ৰা ‘‘সো গামভোজক অম্হে তৰ জরগোণস্স মংসং খাদন্তা ‘ইতো মাসদ্ৰযেন ৰীহিং দস্সামা’তি খাদিম্হ, ত্ৰং অড্ঢমাসম্পি অনতিক্কমিত্ৰা ইদানেৰ ¶ কস্মা আহরাপেসি, ন ত্ৰং ইমিনা কারণেন আগতো, অঞ্ঞেন কারণেন আগতো ভৰিস্সসি, ময্হং তৰ কিরিযা ন রুচ্চতি, অযম্পি অনাচারা পাপধম্মা কোট্ঠে ৰীহীনং অভাৰং জানাতি, সা দানি কোট্ঠং আরুয্হ ‘ৰীহি নত্থী’তি ¶ ৰদতি, ত্ৰম্পি ‘দেহী’তি ৰদতি, উভিন্নম্পি ৰো করণং ময্হং ন রুচ্চতী’’তি এতমত্থং পকাসেন্তো ইমা গাথা অৰোচ –

৯৭.

‘‘উভযং মে ন খমতি, উভযং মে ন রুচ্চতি;

যাচাযং কোট্ঠমোতিণ্ণা, নদস্সং ইতি ভাসতি.

৯৮.

‘‘তং তং গামপতি ব্রূমি, কদরে অপ্পস্মি জীৰিতে;

দ্ৰে মাসে সঙ্গরং কত্ৰা, মংসং জরগ্গৰং কিসং;

অপ্পত্তকালে চোদেসি, তম্পি ময্হং ন রুচ্চতী’’তি.

তত্থ তং তং গামপতি ব্রূমীতি, অম্ভো গামজেট্ঠক, তেন কারণেন তং ৰদামি. কদরে অপ্পস্মি জীৰিতেতি অম্হাকং জীৰিতং নাম কদরঞ্চেৰ থদ্ধং লূখং কসিরং অপ্পঞ্চ মন্দং পরিত্তং, তস্মিং নো এৰরূপে জীৰিতে ৰত্তমানে. দ্ৰে মাসে সঙ্গরং কত্ৰা, মংসং জরগ্গৰং কিসন্তি অম্হাকং মংসং গণ্হন্তানং জরগ্গৰং কিসং দুব্বলং জরগোণং দদমানো ত্ৰং ‘‘দ্ৰীহি মাসেহি মূলং দাতব্ব’’ন্তি এৰং দ্ৰে মাসে সঙ্গরং পরিচ্ছেদং কত্ৰা. অপ্পত্তকালে চোদেসীতি তস্মিং কালে অসম্পত্তে অন্তরাৰ চোদেসি. তম্পি ময্হং ন রুচ্চতীতি যা চাযং পাপধম্মা দুস্সীলা অন্তোকোট্ঠে ৰীহীনং নত্থিভাৰং জানমানাৰ অজানন্তী ৰিয হুত্ৰা কোট্ঠমোতিণ্ণা কোট্ঠদ্ৰারে ঠত্ৰা ন দস্সং ইতি ভাসতি, যঞ্চ ত্ৰং অকালে চোদেসি, তম্পীতি ইদং উভযম্পি মম নেৰ খমতি ন রুচ্চতীতি.

এৰং সো কথেন্তোৰ গামভোজকং চূল়ায গহেত্ৰা কড্ঢিত্ৰা গেহমজ্ঝে পাতেত্ৰা ‘‘গামভোজকোম্হীতি পরস্স রক্খিতগোপিতভণ্ডে অপরজ্ঝসী’’তিআদীহি পরিভাসিত্ৰা পোথেত্ৰা দুব্বলং কত্ৰা গীৰায গহেত্ৰা গেহা নিক্কড্ঢিত্ৰা তম্পি দুট্ঠইত্থিং কেসেসু গহেত্ৰা কোট্ঠা ওতারেত্ৰা নিপ্পোথেত্ৰা ‘‘সচে পুন এৰরূপং করোসি, জানিস্সসী’’তি সন্তজ্জেসি. ততো পট্ঠায গামভোজকো তং গেহং ওলোকেতুম্পি ন ৰিসহি, সাপি পাপা পুন মনসাপি অতিচরিতুং নাসক্খি.

সত্থা ¶ ¶ ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে ¶ উক্কণ্ঠিতভিক্খু সোতাপত্তিফলে পতিট্ঠহি. ‘‘তদা গামভোজকো দেৰদত্তো, নিগ্গহকারকো গহপতি পন অহমেৰ অহোসি’’ন্তি.

গহপতিজাতকৰণ্ণনা নৰমা.

[২০০] ১০. সাধুসীলজাতকৰণ্ণনা

সরীরদব্যন্তি ইদং সত্থা জেতৰনে ৰিহরন্তো অঞ্ঞতরং ব্রাহ্মণং আরব্ভ কথেসি. তস্স কির চতস্সো ধীতরো অহেসুং. তা চত্তারো জনা পত্থেন্তি, তেসু একো অভিরূপো সরীরসম্পন্নো, একো ৰযপ্পত্তো মহল্লকো, একো জাতিসম্পন্নো, একো সীলৰা. ব্রাহ্মণো চিন্তেসি – ‘‘ধীতরো নিৰেসেন্তেন পতিট্ঠাপেন্তেন কস্স নু খো দাতব্বা, কিং রূপসম্পন্নস্স, উদাহু ৰযপ্পত্তস্স, জাতিসম্পন্নসীলৰন্তানং অঞ্ঞতরস্সা’’তি. সো চিন্তেন্তোপি অজানিত্ৰা ‘‘ইমং কারণং সম্মাসম্বুদ্ধো জানিস্সতি, তং পুচ্ছিত্ৰা এতেসং অন্তরে অনুচ্ছৰিকস্স দস্সামী’’তি গন্ধমালাদীনি গাহাপেত্ৰা ৰিহারং গন্ত্ৰা সত্থারং ৰন্দিত্ৰা একমন্তং নিসিন্নো আদিতো পট্ঠায তমত্থং আরোচেত্ৰা ‘‘ভন্তে, ইমেসু চতূসু জনেসু কস্স দাতুং ৰট্টতী’’তি পুচ্ছি. সত্থা ‘‘পুব্বেপি পণ্ডিতা এতং পঞ্হং কথযিংসু, ভৰসঙ্খেপগতত্তা পন সল্লক্খেতুং ন সক্কোসী’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং সিপ্পং উগ্গণ্হিত্ৰা আগন্ত্ৰা বারাণসিযং দিসাপামোক্খো আচরিযো অহোসি. অথেকস্স ব্রাহ্মণস্স চতস্সো ধীতরো অহেসুং, তা এৰমেৰ চত্তারো জনা পত্থযিংসু. ব্রাহ্মণো ‘‘কস্স নু খো দাতব্বা’’তি অজানন্তো ‘‘আচরিযং পুচ্ছিত্ৰা দাতব্বযুত্তকস্স দস্সামী’’তি তস্স সন্তিকং গন্ত্ৰা তমত্থং পুচ্ছন্তো পঠমং গাথমাহ –

৯৯.

‘‘সরীরদব্যং ¶ ৰুড্ঢব্যং, সোজচ্চং সাধুসীলিযং;

ব্রাহ্মণং তেৰ পুচ্ছাম, কন্নু তেসং ৰনিম্হসে’’তি.

তত্থ ¶ ‘‘সরীরদব্য’’ন্তিআদীহি তেসং চতুন্নং ৰিজ্জমানে গুণে পকাসেতি. অযঞ্হেত্থ অধিপ্পাযো – ধীতরো মে চত্তারো জনা পত্থেন্তি, তেসু একস্স সরীরদব্যমত্থি, সরীরসম্পদা অভিরূপভাৰো সংৰিজ্জতি. একস্স ৰুড্ঢব্যং ৰুড্ঢিভাৰো মহল্লকতা অত্থি. একস্স সোজচ্চং সুজাতিতা জাতিসম্পদা অত্থি. ‘‘সুজচ্চ’’ন্তিপি পাঠো. একস্স সাধুসীলিযং সুন্দরসীলভাৰো ¶ সীলসম্পদা অত্থি. ব্রাহ্মণং তেৰ পুচ্ছামাতি তেসু অসুকস্স নামেতা দাতব্বাতি অজানন্তা মযং ভৰন্তং ব্রাহ্মণঞ্ঞেৰ পুচ্ছাম. কন্নু তেসং ৰনিম্হসেতি তেসং চতুন্নং জনানং কং ৰনিম্হসে, কং ইচ্ছাম, কস্স তা কুমারিকা দদামাতি পুচ্ছতি.

তং সুত্ৰা আচরিযো ‘‘রূপসম্পদাদীসু ৰিজ্জমানাসুপি ৰিপন্নসীলো গারয্হো, তস্মা তং নপ্পমাণং, অম্হাকং সীলৰন্তভাৰো রুচ্চতী’’তি ইমমত্থং পকাসেন্তো দুতিযং গাথমাহ –

১০০.

‘‘অত্থো অত্থি সরীরস্মিং, ৰুড্ঢব্যস্স নমো করে;

অত্থো অত্থি সুজাতস্মিং, সীলং অস্মাক রুচ্চতী’’তি.

তত্থ অত্থো অত্থি সরীরস্মিন্তি রূপসম্পন্নে সরীরেপি অত্থো ৰিসেসো ৰুদ্ধি অত্থিযেৰ, ‘‘নত্থী’’তি ন ৰদামি. ৰুড্ঢব্যস্স নমো করেতি ৰুড্ঢভাৰস্স পন নমক্কারমেৰ করোমি. ৰুড্ঢভাৰো হি ৰন্দনমাননং লভতি. অত্থো অত্থি সুজাতস্মিন্তি সুজাতেপি পুরিসে ৰুড্ঢি অত্থি, জাতিসম্পত্তিপি ইচ্ছিতব্বাযেৰ. সীলং অস্মাক রুচ্চতীতি অম্হাকং পন সীলমেৰ রুচ্চতি. সীলৰা হি আচারসম্পন্নো সরীরদব্যৰিরহিতোপি পুজ্জো পাসংসোতি. ব্রাহ্মণো তস্স ৰচনং সুত্ৰা সীলৰন্তস্সেৰ ধীতরো অদাসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – সচ্চপরিযোসানে ব্রাহ্মণো সোতাপত্তিফলে পতিট্ঠহি. ‘‘তদা ব্রাহ্মণো অযমেৰ ব্রাহ্মণো অহোসি, দিসাপামোক্খো আচরিযো পন অহমেৰ অহোসি’’ন্তি.

সাধুসীলজাতকৰণ্ণনা দসমা.

রুহকৰগ্গো পঞ্চমো.

তস্সুদ্দানং –

রুহকং ¶ সিরিকাল়কং, পদুমং মণিচোরকং;

পব্বতূপত্থরৰলাহং, মিত্তামিত্তঞ্চ রাধঞ্চ;

গহপতি সাধুসীলং.

৬. নতংদল়্হৰগ্গো

[২০১] ১. বন্ধনাগারজাতকৰণ্ণনা

ন ¶ ¶ তং দল়্হং বন্ধনমাহু ধীরাতি ইদং সত্থা জেতৰনে ৰিহরন্তো বন্ধনাগারং আরব্ভ কথেসি. তস্মিং কির কালে বহূ সন্ধিচ্ছেদকপন্থঘাতকচোরে আনেত্ৰা কোসলরঞ্ঞো দস্সেসুং. তে রাজা অদ্দুবন্ধনরজ্জুবন্ধনসঙ্খলিকবন্ধনেহি বন্ধাপেসি. তিংসমত্তা জানপদা ভিক্খূ সত্থারং দট্ঠুকামা আগন্ত্ৰা দিস্ৰা ৰন্দিত্ৰা পুনদিৰসে পিণ্ডায চরন্তা বন্ধনাগারং গন্ত্ৰা তে চোরে দিস্ৰা পিণ্ডপাতপটিক্কন্তা সাযন্হসমযে তথাগতং উপসঙ্কমিত্ৰা ‘‘ভন্তে, অজ্জ অম্হেহি পিণ্ডায চরন্তেহি বন্ধনাগারে বহূ চোরা অদ্দুবন্ধনাদীহি বদ্ধা মহাদুক্খং অনুভৰন্তা দিট্ঠা, তে তানি বন্ধনানি ছিন্দিত্ৰা পলাযিতুং ন সক্কোন্তি, অত্থি নু খো তেহি বন্ধনেহি থিরতরং নাম অঞ্ঞং বন্ধন’’ন্তি পুচ্ছিংসু. সত্থা ‘‘ভিক্খৰে, কিং বন্ধনানি নামেতানি, যং পনেতং ধনধঞ্ঞপুত্তদারাদীসু তণ্হাসঙ্খাতং কিলেসবন্ধনং, এতং এতেহি বন্ধনেহি সতগুণেন সহস্সগুণেন থিরতরং, এৰং মহন্তম্পি পনেতং দুচ্ছিন্দনিযং বন্ধনং পোরাণকপণ্ডিতা ছিন্দিত্ৰা হিমৰন্তং পৰিসিত্ৰা পব্বজিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং দুগ্গতগহপতিকুলে নিব্বত্তি, তস্স ৰযপ্পত্তস্স পিতা কালমকাসি. সো ভতিং কত্ৰা মাতরং পোসেসি, অথস্স মাতা অনিচ্ছমানস্সেৰ একং কুলধীতরং গেহে কত্ৰা অপরভাগে কালমকাসি. ভরিযাযপিস্স কুচ্ছিযং গব্ভো পতিট্ঠাসি. সো গব্ভস্স পতিট্ঠিতভাৰং অজানন্তো ‘‘ভদ্দে, ত্ৰং ভতিং কত্ৰা জীৰাহি, অহং পব্বজিস্সামী’’তি আহ ¶ . সাপি ‘‘গব্ভো মে পতিট্ঠিতো, মযি ¶ ৰিজাতায দারকং দিস্ৰা পব্বজিস্সসী’’তি আহ. সো ‘‘সাধূ’’তি সম্পটিচ্ছিত্ৰা তস্সা ৰিজাতকালে ‘‘ভদ্দে, ত্ৰং সোত্থিনা ৰিজাতা, ইদানাহং পব্বজিস্সামী’’তি আপুচ্ছি. অথ নং সা ‘‘পুত্তকস্স তাৰ থনপানতো অপগমনকালং আগমেহী’’তি ৰত্ৰা পুন গব্ভং গণ্হি.

সো চিন্তেসি – ‘‘ইমং সম্পটিচ্ছাপেত্ৰা গন্তুং ন সক্কা, ইমিস্সা অনাচিক্খিত্ৰাৰ পলাযিত্ৰা পব্বজিস্সামী’’তি. সো তস্সা অনাচিক্খিত্ৰা রত্থিভাগে উট্ঠায পলাযি. অথ নং ¶ নগরগুত্তিকা অগ্গহেসুং. সো ‘‘অহং, সামি, মাতুপোসকো নাম, ৰিস্সজ্জেথ ম’’ন্তি তেহি অত্তানং ৰিস্সজ্জাপেত্ৰা একস্মিং ঠানে ৰসিত্ৰা অগ্গদ্ৰারেনেৰ নিক্খমিত্ৰা হিমৰন্তং পৰিসিত্ৰা ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা ঝানকীল়ং কীল়ন্তো ৰিহাসি. সো তত্থ ৰসন্তো ‘‘এৰরূপম্পি নাম মে দুচ্ছিন্দনিযং পুত্তদারবন্ধনং কিলেসবন্ধনং ছিন্দিত’’ন্তি উদানং উদানেন্তো ইমা গাথা অৰোচ –

১০১.

‘‘ন তং দল়্হং বন্ধনমাহু ধীরা, যদাযসং দারুজপব্বজঞ্চ;

সারত্তরত্তা মণিকুণ্ডলেসু, পুত্তেসু দারেসু চ যা অপেক্খা.

১০২.

‘‘এতং দল়্হং বন্ধনমাহু ধীরা, ওহারিনং সীথিলং দুপ্পমুঞ্চং;

এতম্পি ছেত্ৰান ৰজন্তি ধীরা, অনপেক্খিনো কামসুখং পহাযা’’তি.

তত্থ ধীরাতি ধিতিমন্তা, ধিক্কতপাপাতি ধীরা. অথ ৰা ধী ৰুচ্চতি পঞ্ঞা, তায পঞ্ঞায সমন্নাগতাতি ধীরা, বুদ্ধা পচ্চেকবুদ্ধা বুদ্ধসাৰকা ¶ বোধিসত্তা চ ইমে ধীরা নাম. যদাযসন্তিআদীসু যং সঙ্খলিকসঙ্খাতং অযসা নিব্বত্তং আযসং, যং অদ্দুবন্ধনসঙ্খাতং দারুজং, যঞ্চ পব্বজতিণেহি ৰা অঞ্ঞেহি ৰা ৰাকাদীহি রজ্জুং কত্ৰা কতরজ্জুবন্ধনং, তং আযসাদিং ছিন্দিতুং সক্কুণেয্যভাৰেন ধীরা দল়্হং থিরন্তি নাহু ন কথেন্তি. সারত্তরত্তাতি সারত্তা হুত্ৰা রত্তা, বলৰরাগরত্তাতি অত্থো. মণিকুণ্ডলেসূতি মণীসু চ কুণ্ডলেসু চ, মণিযুত্তেসু ৰা কুণ্ডলেসু.

এতং ¶ দল়্হন্তি যে মণিকুণ্ডলেসু সারত্তরত্তা, তেসং যো চ সারাগো, যা চ তেসং পুত্তদারেসু অপেক্খা তণ্হা, এতং কিলেসমযং বন্ধনং দল়্হং থিরন্তি ধীরা আহু. ওহারিনন্তি আকড্ঢিত্ৰা চতূসু অপাযেসু পাতনতো অৰহরতি হেট্ঠা হরতীতি ওহারিনং. সিথিলন্তি বন্ধনট্ঠানে ছৰিচম্মমংসানি ন ছিন্দতি, লোহিতং ন নীহরতি, বন্ধনভাৰম্পি ন জানাপেতি, থলপথজলপথাদীসু কম্মানি কাতুং দেতীতি সিথিলং. দুপ্পমুঞ্চন্তি তণ্হালোভৰসেন হি একৰারম্পি উপ্পন্নং কিলেসবন্ধনং দট্ঠট্ঠানতো কচ্ছপো ৰিয দুম্মোচযং হোতীতি দুপ্পমুঞ্চং. এতম্পি ছেত্ৰানাতি এতং এৰং দল়্হম্পি কিলেসবন্ধনং ঞাণখগ্গেন ছিন্দিত্ৰা অযদামানি ছিন্দিত্ৰা মত্তৰরৰারণা ৰিয পঞ্জরে ছিন্দিত্ৰা সীহপোতকা ৰিয চ ধীরা ৰত্থুকামকিলেসকামে উক্কারভূমিং ৰিয জিগুচ্ছমানা অনপেক্খিনো হুত্ৰা কামসুখং পহায ৰজন্তি পক্কমন্তি, পক্কমিত্ৰা চ পন হিমৰন্তং পৰিসিত্ৰা ইসিপব্বজ্জং পব্বজিত্ৰা ঝানসুখেন ৰীতিনামেন্তীতি.

এৰং ¶ বোধিসত্তো ইমং উদানং উদানেত্ৰা অপরিহীনজ্ঝানো ব্রহ্মলোকপরাযণো অহোসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে কেচি সোতাপন্না, কেচি সকদাগামিনো, কেচি অনাগামিনো, কেচি অরহন্তো অহেসুং. ‘‘তদা মাতা মহামাযা অহোসি, পিতা সুদ্ধোদনমহারাজা, ভরিযা রাহুলমাতা, পুত্তো রাহুলো, পুত্তদারং পহায নিক্খমিত্ৰা পব্বজিতো পুরিসো পন অহমেৰ অহোসি’’ন্তি.

বন্ধনাগারজাতকৰণ্ণনা পঠমা.

[২০২] ২. কেল়িসীলজাতকৰণ্ণনা

হংসা ¶ কোঞ্চা মযূরা চাতি ইদং সত্থা জেতৰনে ৰিহরন্তো আযস্মন্তং লকুণ্ডকভদ্দিযং আরব্ভ কথেসি. সো কিরাযস্মা বুদ্ধসাসনে পাকটো অহোসি পঞ্ঞাতো মধুরস্সরো মধুরধম্মকথিকো পটিসম্ভিদাপ্পত্তো মহাখীণাসৰো অসীতিযা মহাথেরানং অন্তরো ¶ পমাণেন ওমকো লকুণ্ডকো সামণেরো ৰিয, খুদ্দকো কীল়নত্থায কতো ৰিয. তস্মিং একদিৰসং তথাগতং ৰন্দিত্ৰা জেতৰনকোট্ঠকং গতে জনপদা তিংসমত্তা ভিক্খূ ‘‘দসবলং ৰন্দিস্সামা’’তি জেতৰনং পৰিসন্তা ৰিহারকোট্ঠকে থেরং দিস্ৰা ‘‘সামণেরো এসো’’তি সঞ্ঞায থেরং চীৰরকণ্ণে গণ্হন্তা হত্থে গণ্হন্তা সীসং গণ্হন্তা নাসায পরামসন্তা কণ্ণেসু গহেত্ৰা চালেত্ৰা হত্থকুক্কুচ্চং কত্ৰা পত্তচীৰরং পটিসামেত্ৰা সত্থারং উপসঙ্কমিত্ৰা ৰন্দিত্ৰা নিসীদিত্ৰা সত্থারা মধুরপটিসন্থারে কতে পুচ্ছিংসু – ‘‘ভন্তে, লকুণ্ডকভদ্দিযত্থেরো কির নামেকো তুম্হাকং সাৰকো মধুরধম্মকথিকো অত্থি, কহং সো ইদানী’’তি. ‘‘কিং পন, ভিক্খৰে, দট্ঠুকামত্থা’’তি? ‘‘আম, ভন্তে’’তি. ‘‘যং, ভিক্খৰে, তুম্হে দ্ৰারকোট্ঠকে দিস্ৰা চীৰরকণ্ণাদীসু গণ্হন্তা হত্থকুক্কুচ্চং কত্ৰা আগতা, এস সো’’তি. ‘‘ভন্তে, এৰরূপো পত্থিতপত্থনো অভিনীহারসম্পন্নো সাৰকো কিংকারণা অপ্পেসক্খো জাতো’’তি? সত্থা ‘‘অত্তনা কতপাপকম্মং নিস্সাযা’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সক্কো দেৰরাজা অহোসি. তদা ব্রহ্মদত্তস্স জিণ্ণং জরাপ্পত্তং হত্থিং ৰা অস্সং ৰা গোণং ৰা দস্সেতুং ন সক্কা, কেল়িসীলো হুত্ৰা তথারূপং দিস্ৰাৰ অনুবন্ধাপেতি, জিণ্ণসকটম্পি দিস্ৰা ভিন্দাপেতি, জিণ্ণমাতুগামে দিস্ৰা পক্কোসাপেত্ৰা উদরে পহরাপেত্ৰা পাতাপেত্ৰা পুন উট্ঠাপেত্ৰা ভাযাপেতি ¶ , জিণ্ণপুরিসে দিস্ৰা লঙ্ঘকে ৰিয ভূমিযং সংপরিৰত্তকাদিকীল়ং কীল়াপেতি, অপস্সন্তো ‘‘অসুকঘরে কির মহল্লকো অত্থী’’তি সুত্ৰাপি ¶ পক্কোসাপেত্ৰা কীল়তি. মনুস্সা লজ্জন্তা অত্তনো মাতাপিতরো তিরোরট্ঠানি পেসেন্তি, মাতুপট্ঠানধম্মো পিতুপট্ঠানধম্মো পচ্ছিজ্জি, রাজসেৰকাপি কেল়িসীলাৰ অহেসুং. মতমতা চত্তারো অপাযে পূরেন্তি, দেৰপরিসা পরিহাযতি.

সক্কো অভিনৰে দেৰপুত্তে অপস্সন্তো ‘‘কিং নু খো কারণ’’ন্তি আৰজ্জেন্তো তং কারণং ঞত্ৰা ‘‘দমেস্সামি ন’’ন্তি মহল্লকৰণ্ণং অভিনিম্মিনিত্ৰা জিণ্ণযানকে দ্ৰে তক্কচাটিযো আরোপেত্ৰা দ্ৰে জরগোণে ¶ যোজেত্ৰা একস্মিং ছণদিৰসে অলঙ্কতহত্থিং অভিরুহিত্ৰা ব্রহ্মদত্তে অলঙ্কতনগরং পদক্খিণং করোন্তে পিলোতিকনিৰত্থো তং যানকং পাজেন্তো রঞ্ঞো অভিমুখো অগমাসি. রাজা জিণ্ণযানকং দিস্ৰা ‘‘এতং যানকং অপনেথা’’তি ৰদতি. মনুস্সা ‘‘কহং, দেৰ, ন পস্সামা’’তি আহংসু. সক্কো অত্তনো আনুভাৰেন রঞ্ঞোযেৰ দস্সেসি. অথ নং বহুসম্পত্তে তস্মিং তস্স উপরিভাগেন পাজেন্তো রঞ্ঞো মত্থকে একং চাটিং ভিন্দিত্ৰা নিৰত্তাপেন্তো দুতিযং ভিন্দি. অথস্স সীসতো পট্ঠায ইতো চিতো চ তক্কং পগ্ঘরতি, সো তেন অট্টীযতি হরাযতি জিগুচ্ছতি. অথস্স তং উপদ্দুতভাৰং ঞত্ৰা সক্কো যানকং অন্তরধাপেত্ৰা সক্কত্তভাৰং মাপেত্ৰা ৰজিরহত্থো আকাসে ঠত্ৰা ‘‘পাপ অধম্মিকরাজ, কিং ত্ৰং মহল্লকো ন ভৰিস্সসি, তৰ সরীরং জরা ন পহরিস্সতি, কেল়িসীলো হুত্ৰা ৰুড্ঢে ৰিহেঠনকম্মং করোসি, এককং তং নিস্সায এতং কম্মং কত্ৰা মতমতা অপাযে পরিপূরেন্তি, মনুস্সা মাতাপিতরো পটিজগ্গিতুং ন লভন্তি. সচে ইমম্হা কম্মা ন ৰিরমিস্সসি, ৰজিরেন তে সীসং পদালেস্সামি, মা ইতো পট্ঠাযেতং কম্মং অকত্থা’’তি সন্তজ্জেত্ৰা মাতাপিতূনং গুণং কথেত্ৰা ৰুড্ঢাপচাযিককম্মস্স আনিসংসং পকাসেত্ৰা ওৰদিত্ৰা সকট্ঠানমেৰ অগমাসি. রাজা ততো পট্ঠায তথারূপং কম্মং কাতুং চিত্তম্পি ন উপ্পাদেসি.

সত্থা ¶ ইমং অতীতং আহরিত্ৰা অভিসম্বুদ্ধো হুত্ৰা ইমা গাথা অৰোচ –

১০৩.

‘‘হংসা কোঞ্চা মযূরা চ, হত্থযো পসদা মিগা;

সব্বে সীহস্স ভাযন্তি, নত্থি কাযস্মি তুল্যতা.

১০৪.

‘‘এৰমেৰ ¶ মনুস্সেসু, দহরো চেপি পঞ্ঞৰা;

সো হি তত্থ মহা হোতি, নেৰ বালো সরীরৰা’’তি.

তত্থ পসদা মিগাতি পসদসঙ্খাতা মিগা, পসদা মিগা চ অৰসেসা মিগা চাতিপি অত্থো. ‘‘পসদমিগা’’তিপি পাঠো, পসদা মিগাতি অত্থো. নত্থি কাযস্মি তুল্যতাতি সরীরে পমাণং নাম নত্থি. যদি ভৰেয্য, মহাসরীরা হত্থিনো চেৰ পসদমিগা চ সীহং মারেয্যুং, সীহো হংসাদযো ¶ খুদ্দকসরীরেযেৰ মারেয্য, খুদ্দকাযেৰ সীহস্স ভাযেয্যুং, ন মহন্তা. যস্মা পনেতং নত্থি, তস্মা সব্বেপি তে সীহস্স ভাযন্তি. সরীরৰাতি বালো মহাসরীরোপি মহা নাম ন হোতি, তস্মা লকুণ্ডকভদ্দিযো সরীরেন খুদ্দকোপি মা তং ঞাণেনপি খুদ্দকোতি মঞ্ঞিত্থাতি অত্থো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে তেসু ভিক্খূসু কেচি সোতাপন্না, কেচি সকদাগামিনো, কেচি অনাগামিনো, কেচি অরহন্তো অহেসুং. ‘‘তদা রাজা লকুণ্ডকভদ্দিযো অহোসি, সো তায কেল়িসীলতায পরেসং কেল়িনিস্সযো জাতো, সক্কো পন অহমেৰ অহোসি’’ন্তি.

কেল়িসীলজাতকৰণ্ণনা দুতিযা.

[২০৩] ৩. খন্ধজাতকৰণ্ণনা

ৰিরূপক্খেহি মে মেত্তন্তি ইদং সত্থা জেতৰনে ৰিহরন্তো অঞ্ঞতরং ভিক্খুং আরব্ভ কথেসি. তং কির জন্তাঘরদ্ৰারে কট্ঠানি ফালেন্তং পূতিরুক্খন্তরা নিক্খমিত্ৰা একো সপ্পো পাদঙ্গুলিযং ডংসি, সো তত্থেৰ মতো. তস্স মতভাৰো সকলৰিহারে পাকটো অহোসি. ধম্মসভাযং ভিক্খূ কথং সমুট্ঠাপেসুং – ‘‘আৰুসো, অসুকো কির ভিক্খু জন্তাঘরদ্ৰারে কট্ঠানি ফালেন্তো সপ্পেন দট্ঠো তত্থেৰ মতো’’তি. সত্থা আগন্ত্ৰা ‘‘কায ¶ নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘সচে সো, ভিক্খৰে, ভিক্খু চত্তারি অহিরাজকুলানি আরব্ভ মেত্তং অভাৰযিস্স, ন নং সপ্পো ডংসেয্য. পোরাণকতাপসাপি অনুপ্পন্নে বুদ্ধে চতূসু অহিরাজকুলেসু মেত্তং ভাৰেত্ৰা তানি অহিরাজকুলানি নিস্সায উপ্পজ্জনকভযতো মুচ্চিংসূ’’তি ৰত্ৰা অতীতং আহরি.

অতীতে ¶ ¶ বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে ব্রাহ্মণকুলে নিব্বত্তিত্ৰা ৰযপ্পত্তো কামে পহায ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা হিমৰন্তপদেসে একস্মিং গঙ্গানিৰত্তনে অস্সমপদং মাপেত্ৰা ঝানকীল়ং কীল়ন্তো ইসিগণপরিৰুতো ৰিহাসি. তদা গঙ্গাতীরে নানপ্পকারা দীঘজাতিকা ইসীনং পরিপন্থং করোন্তি, যেভুয্যেন ইসযো জীৰিতক্খযং পাপুণন্তি. তাপসা তমত্থং বোধিসত্তস্স আরোচেসুং. বোধিসত্তো সব্বে তাপসে সন্নিপাতাপেত্ৰা ‘‘সচে তুম্হে চতূসু অহিরাজকুলেসু মেত্তং ভাৰেয্যাথ, ন ৰো সপ্পা ডংসেয্যুং, তস্মা ইতো পট্ঠায চতূসু অহিরাজকুলেসু এৰং মেত্তং ভাৰেথা’’তি ৰত্ৰা ইমং গাথমাহ –

১০৫.

‘‘ৰিরূপক্খেহি মে মেত্তং, মেত্তং এরাপথেহি মে;

ছব্যাপুত্তেহি মে মেত্তং, মেত্তং কণ্হাগোতমকেহি চা’’তি.

তত্থ ৰিরূপক্খেহি মে মেত্তন্তি ৰিরূপক্খনাগরাজকুলেহি সদ্ধিং ময্হং মেত্তং. এরাপথাদীসুপি এসেৰ নযো. এতানিপি হি এরাপথনাগরাজকুলং ছব্যাপুত্তনাগরাজকুলং কণ্হাগোতমকনাগরাজকুলন্তি নাগরাজকুলানেৰ.

এৰং চত্তারি নাগরাজকুলানি দস্সেত্ৰা ‘‘সচে তুম্হে এতেসু মেত্তং ভাৰেতুং সক্খিস্সথ, দীঘজাতিকা ৰো ন ডংসিস্সন্তি ন ৰিহেঠেস্সন্তী’’তি ৰত্ৰা দুতিযং গাথমাহ –

‘‘অপাদকেহি ¶ মে মেত্তং, মেত্তং দ্ৰিপাদকেহি মে;

চতুপ্পদেহি মে মেত্তং, মেত্তং বহুপ্পদেহি মে’’তি.

তত্থ পঠমপদেন ওদিস্সকং কত্ৰা সব্বেসু অপাদকেসু দীঘজাতিকেসু চেৰ মচ্ছেসু চ মেত্তাভাৰনা দস্সিতা, দুতিযপদেন মনুস্সেসু চেৰ পক্খিজাতেসু চ, ততিযপদেন হত্থিঅস্সাদীসু সব্বচতুপ্পদেসু, চতুত্থপদেন ৰিচ্ছিকসতপদিউচ্চালিঙ্গপাণকমক্কটকাদীসু.

এৰং সরূপেন মেত্তাভাৰনং দস্সেত্ৰা ইদানি আযাচনৰসেন দস্সেন্তো ইমং গাথমাহ –

‘‘মা মং অপাদকো হিংসি, মা মং হিংসি দ্ৰিপাদকো;

মা মং চতুপ্পদো হিংসি, মা মং হিংসি বহুপ্পদো’’তি.

তত্থ ¶ ¶ মা মন্তি এতেসু অপাদকাদীসু কোচি একোপি মা মং হিংসতু, মা ৰিহেঠেতূতি এৰং আযাচন্তা মেত্তং ভাৰেথাতি অত্থো.

ইদানি অনোদিস্সকৰসেন মেত্তাভাৰনং দস্সেন্তো ইমং গাথমাহ –

‘‘সব্বে সত্তা সব্বে পাণা, সব্বে ভূতা চ কেৰলা;

সব্বে ভদ্রানি পস্সন্তু, মা কঞ্চি পাপমাগমা’’তি.

তত্থ তণ্হাদিট্ঠিৰসেন ৰট্টে পঞ্চসু খন্ধেসু আসত্তা ৰিসত্তা লগ্গা লগ্গিতাতি সত্তা, অস্সাসপস্সাসপৰত্তনসঙ্খাতেন পাণনৰসেন পাণা, ভূতভাৰিতনিব্বত্তনৰসেন ভূতাতি এৰং ৰচনমত্তৰিসেসো ৰেদিতব্বো. অৰিসেসেন পন সব্বানিপেতানি পদানি সব্বসত্তসঙ্গাহকানেৰ. কেৰলাতি সকলা. ইদং সব্বসদ্দস্সেৰ হি পরিযাযৰচনং. ভদ্রানি পস্সন্তূতি সব্বেপেতে সত্তা ভদ্রানি সাধূনি কল্যাণানেৰ পস্সন্তু. মা কঞ্চি পাপমাগমাতি এতেসু কঞ্চি একং সত্তম্পি পাপং লামকং দুক্খং মা আগমা, মা আগচ্ছতু মা পাপুণাতু, সব্বে অৰেরা অব্যাপজ্জা সুখী নিদ্দুক্খা হোন্তূতি.

এৰং ¶ ‘‘সব্বসত্তেসু অনোদিস্সকৰসেন মেত্তং ভাৰেথা’’তি ৰত্ৰা পুন তিণ্ণং রতনানং গুণে অনুস্সরাপেতুং –

১০৬.

‘‘অপ্পমাণো বুদ্ধো, অপ্পমাণো ধম্মো;

অপ্পমাণো সঙ্ঘো’’তি আহ.

তত্থ পমাণকরানং কিলেসানং অভাৰেন গুণানঞ্চ পমাণাভাৰেন বুদ্ধরতনং অপ্পমাণং. ধম্মোতি নৰৰিধো লোকুত্তরধম্মো. তস্সপি পমাণং কাতুং ন সক্কাতি অপ্পমাণো. তেন অপ্পমাণেন ধম্মেন সমন্নাগতত্তা সঙ্ঘোপি অপ্পমাণো.

ইতি বোধিসত্তো ‘‘ইমেসং তিণ্ণং রতনানং গুণে অনুস্সরথা’’তি ৰত্ৰা তিণ্ণং রতনানং অপ্পমাণগুণতং দস্সেত্ৰা সপ্পমাণে সত্তে দস্সেতুং –

‘‘পমাণৰন্তানি ¶ ¶ সরীসপানি, অহি ৰিচ্ছিক সতপদী;

উণ্ণনাভি সরবূ মূসিকা’’তি আহ.

তত্থ সরীসপানীতি সপ্পদীঘজাতিকানং নামং. তে হি সরন্তা গচ্ছন্তি, সিরেন ৰা সপন্তীতি সরীসপা. ‘‘অহী’’তিআদি তেসং সরূপতো নিদস্সনং. তত্থ উণ্ণনাভীতি মক্কটকো. তস্স হি নাভিতো উণ্ণাসদিসং সুত্তং নিক্খমতি, তস্মা ‘‘উণ্ণনাভী’’তি ৰুচ্চতি. সরবূতি ঘরগোল়িকা.

ইতি বোধিসত্তো ‘‘যস্মা এতেসং অন্তোরাগাদযো পমাণকরা ধম্মা অত্থি, তস্মা তানি সরীসপাদীনি পমাণৰন্তানী’’তি দস্সেত্ৰা ‘‘অপ্পমাণানং তিণ্ণং রতনানং আনুভাৰেন ইমে পমাণৰন্তা সত্তা রত্তিন্দিৰং পরিত্তকম্মং করোন্তূতি এৰং তিণ্ণং রতনানং গুণে অনুস্সরথা’’তি ৰত্ৰা ততো উত্তরি কত্তব্বং দস্সেতুং ইমং গাথমাহ –

‘‘কতা মে রক্খা কতা মে পরিত্তা, পটিক্কমন্তু ভূতানি;

সোহং নমো ভগৰতো, নমো সত্তন্নং সম্মাসম্বুদ্ধান’’ন্তি.

তত্থ ¶ কতা মে রক্খাতি মযা রতনত্তযগুণে অনুস্সরন্তেন অত্তনো রক্খা গুত্তি কতা. কতা মে পরিত্তাতি পরিত্তাণম্পি মে অত্তনো কতং. পটিক্কমন্তু ভূতানীতি মযি অহিতজ্ঝাসযানি ভূতানি পটিক্কমন্তু অপগচ্ছন্তু. সোহং নমো ভগৰতোতি সো অহং এৰং কতপরিত্তো অতীতস্স পরিনিব্বুতস্স সব্বস্সপি বুদ্ধস্স ভগৰতো নমো করোমি. নমো সত্তন্নং সম্মাসম্বুদ্ধানন্তি ৰিসেসেন পন অতীতে পটিপাটিযা পরিনিব্বুতানং সত্তন্নং সম্মাসম্বুদ্ধানং নমো করোমীতি.

এৰং ‘‘নমক্কারং করোন্তাপি সত্ত বুদ্ধে অনুস্সরথা’’তি বোধিসত্তো ইসিগণস্স ইমং পরিত্তং বন্ধিত্ৰা অদাসি. আদিতো পন পট্ঠায দ্ৰীহি গাথাহি চতূসু অহিরাজকুলেসু মেত্তায দীপিতত্তা ওদিস্সকানোদিস্সকৰসেন ৰা দ্ৰিন্নং মেত্তাভাৰনানং দীপিতত্তা ইদং পরিত্তং ইধ ৰুত্তন্তি ৰেদিতব্বং, অঞ্ঞং ৰা কারণং পরিযেসিতব্বং. ততো পট্ঠায ইসিগণো বোধিসত্তস্স ওৰাদে ঠত্ৰা মেত্তং ভাৰেসি, বুদ্ধগুণে অনুস্সরি. এৰমেতেসু ¶ বুদ্ধগুণে অনুস্সরন্তেসুযেৰ সব্বে দীঘজাতিকা পটিক্কমিংসু. বোধিসত্তোপি ব্রহ্মৰিহারে ভাৰেত্ৰা ব্রহ্মলোকপরাযণো অহোসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা ইসিগণো বুদ্ধপরিসা অহোসি, গণসত্থা পন অহমেৰ অহোসি’’ন্তি.

খন্ধজাতকৰণ্ণনা ততিযা.

[২০৪] ৪. ৰীরকজাতকৰণ্ণনা

অপি ৰীরক পস্সেসীতি ইদং সত্থা জেতৰনে ৰিহরন্তো সুগতালযং আরব্ভ কথেসি. দেৰদত্তস্স পরিসং গহেত্ৰা আগতেসু হি থেরেসু সত্থা ‘‘সারিপুত্ত, দেৰদত্তো তুম্হে দিস্ৰা কিং অকাসী’’তি পুচ্ছিত্ৰা ‘‘সুগতালযং, ভন্তে, দস্সেসী’’তি ৰুত্তে ‘‘ন খো, সারিপুত্ত, ইদানেৰ দেৰদত্তো মম অনুকিরিযং করোন্তো ৰিনাসং পত্তো, পুব্বেপি ৰিনাসং পাপুণী’’তি ৰত্ৰা থেরেন যাচিতো অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে উদককাকযোনিযং নিব্বত্তিত্ৰা একং সরং উপনিস্সায ৰসি, ‘‘ৰীরকো’’তিস্স নামং অহোসি. তদা কাসিরট্ঠে দুব্ভিক্খং অহোসি, মনুস্সা কাকভত্তং ৰা দাতুং যক্খনাগবলিকম্মং ৰা কাতুং নাসক্খিংসু. ছাতকরট্ঠতো কাকা যেভুয্যেন অরঞ্ঞং পৰিসিংসু. তত্থেকো বারাণসিৰাসী সৰিট্ঠকো নাম কাকো কাকিং আদায ৰীরকস্স ৰসনট্ঠানং গন্ত্ৰা তং সরং নিস্সায একমন্তে ৰাসং কপ্পেসি. সো একদিৰসং তস্মিং সরে গোচরং গণ্হন্তো ৰীরকং সরং ওতরিত্ৰা মচ্ছে খাদিত্ৰা পচ্চুত্তরিত্ৰা সরীরং সুক্খাপেন্তং দিস্ৰা ‘‘ইমং উদককাকং নিস্সায সক্কা বহূ মচ্ছে লদ্ধুং, ইমং উপট্ঠহিস্সামী’’তি তং উপসঙ্কমিত্ৰা ‘‘কিং, সম্মা’’তি ৰুত্তে ‘‘ইচ্ছামি তং সামি উপট্ঠহিতু’’ন্তি ৰত্ৰা ‘‘সাধূ’’তি তেন সম্পটিচ্ছিতো ততো পট্ঠায উপট্ঠাসি. ৰীরকোপি ততো পট্ঠায অত্তনো যাপনমত্তং খাদিত্ৰা মচ্ছে উদ্ধরিত্ৰা সৰিট্ঠকস্স দেতি. সোপি অত্তনো যাপনমত্তং খাদিত্ৰা সেসং কাকিযা দেতি.

তস্স ¶ অপরভাগে মানো উপ্পজ্জি – ‘‘অযম্পি উদককাকো কাল়কো, অহম্পি কাল়কো, অক্খিতুণ্ডপাদেহিপি এতস্স চ ময্হঞ্চ নানাকরণং নত্থি, ইতো পট্ঠায ইমিনা গহিতমচ্ছেহি ময্হং কম্মং নত্থি, অহমেৰ গণ্হিস্সামী’’তি. সো ৰীরকং উপসঙ্কমিত্ৰা ‘‘সম্ম, ইতো পট্ঠায অহমেৰ সরং ওতরিত্ৰা মচ্ছে গণ্হিস্সামী’’তি ৰত্ৰা ‘‘ন ত্ৰং, সম্ম, উদকং ওতরিত্ৰা মচ্ছে গণ্হনককুলে নিব্বত্তো, মা নস্সী’’তি তেন ৰারিযমানোপি ৰচনং অনাদিযিত্ৰা ¶ সরং ওরুয্হ উদকং পৰিসিত্ৰা উম্মুজ্জমানো সেৰালং ছিন্দিত্ৰা নিক্খমিতুং নাসক্খি, সেৰালন্তরে লগ্গি, অগ্গতুণ্ডমেৰ পঞ্ঞাযি. সো নিরস্সাসো অন্তোউদকেযেৰ ¶ জীৰিতক্খযং পাপুণি. অথস্স ভরিযা আগমনং অপস্সমানা তং পৰত্তিং জাননত্থং ৰীরকস্স সন্তিকং গন্ত্ৰা ‘‘সামি, সৰিট্ঠকো ন পঞ্ঞাযতি, কহং নু খো সো’’তি পুচ্ছমানা পঠমং গাথমাহ –

১০৭.

‘‘অপি ৰীরক পস্সেসি, সকুণং মঞ্জুভাণকং;

মযূরগীৰসঙ্কাসং, পতিং ময্হং সৰিট্ঠক’’ন্তি.

তত্থ অপি, ৰীরক, পস্সেসীতি, সামি ৰীরক, অপি পস্সসি. মঞ্জুভাণকন্তি মঞ্জুভাণিনং. সা হি রাগৰসেন ‘‘মধুরস্সরো মে পতী’’তি মঞ্ঞতি, তস্মা এৰমাহ. মযূরগীৰসঙ্কাসন্তি মোরগীৰসমানৰণ্ণং.

তং সুত্ৰা ৰীরকো ‘‘আম, জানামি তে সামিকস্স গতট্ঠান’’ন্তি ৰত্ৰা দুতিযং গাথমাহ –

১০৮.

‘‘উদকথলচরস্স পক্খিনো, নিচ্চং আমকমচ্ছভোজিনো;

তস্সানুকরং সৰিট্ঠকো, সেৰালে পলিগুণ্ঠিতো মতো’’তি.

তত্থ উদকথলচরস্সাতি উদকে চ থলে চ চরিতুং সমত্থস্স. পক্খিনোতি অত্তানং সন্ধায ৰদতি. তস্সানুকরন্তি তস্স অনুকরোন্তো. সেৰালে পলিগুণ্ঠিতো মতোতি উদকং পৰিসিত্ৰা সেৰালং ছিন্দিত্ৰা নিক্খমিতুং অসক্কোন্তো সেৰালপরিযোনদ্ধো অন্তোউদকেযেৰ মতো, পস্স, এতস্স তুণ্ডং দিস্সতীতি. তং সুত্ৰা কাকী পরিদেৰিত্ৰা বারাণসিমেৰ অগমাসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা সৰিট্ঠকো দেৰদত্তো অহোসি, ৰীরকো পন অহমেৰ অহোসি’’ন্তি.

ৰীরকজাতকৰণ্ণনা চতুত্থা.

[২০৫] ৫. গঙ্গেয্যজাতকৰণ্ণনা

সোভতি ¶ ¶ মচ্ছো গঙ্গেয্যোতি ইদং সত্থা জেতৰনে ৰিহরন্তো দ্ৰে দহরভিক্খূ আরব্ভ কথেসি. তে কির সাৰত্থিৰাসিনো কুলপুত্তা সাসনে পব্বজিত্ৰা অসুভভাৰনং অনুনুযুঞ্জিত্ৰা রূপপসংসকা হুত্ৰা রূপং উপলাল়েন্তা ৰিচরিংসু. তে একদিৰসং ‘‘ত্ৰং ন সোভসি, অহং সোভামী’’তি রূপং নিস্সায উপ্পন্নৰিৰাদা অৰিদূরে নিসিন্নং একং মহল্লকত্থেরং দিস্ৰা ‘‘এসো অম্হাকং সোভনভাৰং ৰা অসোভনভাৰং ৰা জানিস্সতী’’তি তং উপসঙ্কমিত্ৰা ‘‘ভন্তে, কো অম্হেসু সোভনো’’তি পুচ্ছিংসু. সো ‘‘আৰুসো, তুম্হেহি অহমেৰ সোভনতরো’’তি আহ. দহরা ‘‘অযং মহল্লকো অম্হেহি পুচ্ছিতং অকথেত্ৰা অপুচ্ছিতং কথেতী’’তি তং পরিভাসিত্ৰা পক্কমিংসু. সা তেসং কিরিযা ভিক্খুসঙ্ঘে পাকটা জাতা. অথেকদিৰসং ধম্মসভাযং কথং সমুট্ঠাপেসুং – ‘‘আৰুসো, অসুকো মহল্লকো থেরো কির তে রূপনিস্সিতকে দহরে লজ্জাপেসী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইমে দ্ৰে দহরা ইদানেৰ রূপপসংসকা, পুব্বেপেতে রূপমেৰ উপলাল়েন্তা ৰিচরিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো গঙ্গাতীরে রুক্খদেৰতা অহোসি. তদা গঙ্গাযমুনানং সমাগমট্ঠানে গঙ্গেয্যো চ যামুনেয্যো চ দ্ৰে মচ্ছা ‘‘অহং সোভামি, ত্ৰং ন সোভসী’’তি রূপং নিস্সায ৰিৰদমানা অৰিদূরে গঙ্গাতীরে কচ্ছপং নিপন্নং দিস্ৰা ‘‘এসো অম্হাকং সোভনভাৰং ৰা অসোভনভাৰং ৰা জানিস্সতী’’তি তং উপসঙ্কমিত্ৰা ‘‘কিং নু খো, সম্ম কচ্ছপ, গঙ্গেয্যো সোভতি, উদাহু যামুনেয্যো’’তি পুচ্ছিংসু. কচ্ছপো ‘‘গঙ্গেয্যোপি সোভতি ¶ , যামুনেয্যোপি সোভতি, তুম্হেহি পন দ্ৰীহি অহমেৰ অতিরেকতরং সোভামী’’তি ইমমত্থং পকাসেন্তো পঠমং গাথমাহ –

১০৯.

‘‘সোভতি ¶ মচ্ছো গঙ্গেয্যো, অথো সোভতি যামুনো;

চতুপ্পদোযং পুরিসো, নিগ্রোধপরিমণ্ডলো;

ঈসকাযতগীৰো চ, সব্বেৰ অতিরোচতী’’তি.

তত্থ চতুপ্পদোযন্তি চতুপ্পদো অযং. পুরিসোতি অত্তানং সন্ধায ৰদতি. নিগ্রোধপরিমণ্ডলোতি সুজাতো নিগ্রোধো ৰিয পরিমণ্ডলো. ঈসকাযতগীৰোতি রথীসা ৰিয আযতগীৰো ¶ . সব্বেৰ অতিরোচতীতি এৰং সণ্ঠানসম্পন্নো কচ্ছপো সব্বেৰ অতিরোচতি, অহমেৰ সব্বে তুম্হে অতিক্কমিত্ৰা সোভামীতি ৰদতি.

মচ্ছা তস্স কথং হুত্ৰা ‘‘অম্ভো! পাপকচ্ছপ অম্হেহি পুচ্ছিতং অকথেত্ৰা অঞ্ঞমেৰ কথেসী’’তি ৰত্ৰা দুতিযং গাথমাহ –

১১০.

‘‘যং পুচ্ছিতো ন তং অক্খাসি, অঞ্ঞং অক্খাসি পুচ্ছিতো;

অত্থপ্পসংসকো পোসো, নাযং অস্মাক রুচ্চতী’’তি.

তত্থ অত্তপ্পসংসকোতি অত্তানং পসংসনসীলো অত্তুক্কংসকো পোসো. নাযং অস্মাক রুচ্চতীতি অযং পাপকচ্ছপো অম্হাকং ন রুচ্চতি ন খমতীতি কচ্ছপস্স উপরি উদকং খিপিত্ৰা সকট্ঠানমেৰ গমিংসু.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা দ্ৰে মচ্ছা দ্ৰে দহরভিক্খূ অহেসুং, কচ্ছপো মহল্লকো, ইমস্স কারণস্স পচ্চক্খকারিকা গঙ্গাতীরে নিব্বত্তরুক্খদেৰতা পন অহমেৰ অহোসি’’ন্তি.

গঙ্গেয্যজাতকৰণ্ণনা পঞ্চমা.

[২০৬] ৬. কুরুঙ্গমিগজাতকৰণ্ণনা

ইঙ্ঘ ৰট্টমযং পাসন্তি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. তদা হি সত্থা ‘‘দেৰদত্তো ৰধায পরিসক্কতী’’তি সুত্ৰা ‘‘ন, ভিক্খৰে, দেৰদত্তো ইদানেৰ ময্হং ৰধায পরিসক্কতি, পুব্বেপি পরিসক্কিযেৰা’’তি ৰত্ৰা অতীতং আহরি.

অতীতে ¶ ¶ বারাণসিযং ব্রহ্মদত্তে রজ্জং কারেন্তে বোধিসত্তো কুরুঙ্গমিগো হুত্ৰা অরঞ্ঞে একস্স সরস্স অৰিদূরে একস্মিং গুম্বে ৰাসং কপ্পেসি. তস্সেৰ সরস্স অৰিদূরে একস্মিং রুক্খগ্গে সতপত্তো, সরস্মিং পন কচ্ছপো ৰাসং কপ্পেসি. এৰং তে তযোপি সহাযকা অঞ্ঞমঞ্ঞং পিযসংৰাসং ৰসিংসু. অথেকো মিগলুদ্দকো অরঞ্ঞে চরন্তো পানীযতিত্থে বোধিসত্তস্স পদৰলঞ্জং দিস্ৰা লোহনিগল়সদিসং ৰট্টমযং পাসং ওড্ডেত্ৰা অগমাসি. বোধিসত্তো পানীযং পাতুং ¶ আগতো পঠমযামেযেৰ পাসে বজ্ঝিত্ৰা বদ্ধরৰং রৰি. তস্স তেন সদ্দেন রুক্খগ্গতো সতপত্তো উদকতো চ কচ্ছপো আগন্ত্ৰা ‘‘কিং নু খো কাতব্ব’’ন্তি মন্তযিংসু. অথ সতপত্তো কচ্ছপং আমন্তেত্ৰা ‘‘সম্ম, তৰ দন্তা অত্থি, ত্ৰং ইমং পাসং ছিন্দ, অহং গন্ত্ৰা যথা সো নাগচ্ছতি, তথা করিস্সামি, এৰং অম্হেহি দ্ৰীহিপি কতপরক্কমেন সহাযো নো জীৰিতং লভিস্সতী’’তি ইমমত্থং পকাসেন্তো পঠমং গাথমাহ –

১১১.

‘‘ইঙ্ঘ ৰট্টমযং পাসং, ছিন্দ দন্তেহি কচ্ছপ;

অহং তথা করিস্সামি, যথা নেহিতি লুদ্দকো’’তি.

অথ কচ্ছপো চম্মৰরত্তং খাদিতুং আরভি, সতপত্তো লুদ্দকস্স ৰসনগামং গতো অৰিদূরে রুক্খে নিসীদি. লুদ্দকো পচ্চূসকালেযেৰ সত্তিং গহেত্ৰা নিক্খমি. সকুণো তস্স নিক্খমনভাৰং ঞত্ৰা ৰস্সিত্ৰা পক্খে পপ্ফোটেত্ৰা তং পুরিমদ্ৰারেন নিক্খমন্তং মুখে পহরি. লুদ্দো ‘‘কাল়কণ্ণিনা সকুণেনম্হি পহটো’’তি নিৰত্তিত্ৰা থোকং সযিত্ৰা পুন সত্তিং গহেত্ৰা উট্ঠাসি. সকুণো ‘‘অযং পঠমং পুরিমদ্ৰারেন নিক্খন্তো ইদানি পচ্ছিমদ্ৰারেন নিক্খমিস্সতী’’তি ঞত্ৰা গন্ত্ৰা পচ্ছিমগেহে নিসীদি. লুদ্দোপি ¶ ‘‘পুরিমদ্ৰারেন মে নিক্খন্তেন কাল়কণ্ণী সকুণো দিট্ঠো, ইদানি পচ্ছিমদ্ৰারেন নিক্খমিস্সামী’’তি পচ্ছিমদ্ৰারেন নিক্খমি, সকুণো পুন ৰস্সিত্ৰা গন্ত্ৰা মুখে পহরি. লুদ্দো ‘‘পুনপি কাল়কণ্ণীসকুণেন পহটো, ন দানি মে এস নিক্খমিতুং দেতী’’তি নিৰত্তিত্ৰা যাৰ অরুণুগ্গমনা সযিত্ৰা অরুণুগ্গমনৰেলায সত্তিং গহেত্ৰা নিক্খমি. সকুণো ৰেগেন গন্ত্ৰা ‘‘লুদ্দো আগচ্ছতী’’তি বোধিসত্তস্স কথেসি.

তস্মিং ¶ খণে কচ্ছপেন একমেৰ চম্মৰদ্ধং ঠপেত্ৰা সেসৰরত্তা খাদিতা হোন্তি. দন্তা পনস্স পতনাকারপ্পত্তা জাতা, মুখতো লোহিতং পগ্ঘরতি. বোধিসত্তো লুদ্দপুত্তং সত্তিং গহেত্ৰা অসনিৰেগেন আগচ্ছন্তং দিস্ৰা তং ৰদ্ধং ছিন্দিত্ৰা ৰনং পাৰিসি, সকুণো রুক্খগ্গে নিসীদি, কচ্ছপো পন দুব্বলত্তা তত্থেৰ নিপজ্জি. লুদ্দো কচ্ছপং গহেত্ৰা পসিব্বকে পক্খিপিত্ৰা একস্মিং খাণুকে লগ্গেসি. বোধিসত্তো নিৰত্তিত্ৰা ওলোকেন্তো কচ্ছপস্স গহিতভাৰং ঞত্ৰা ‘‘সহাযস্স জীৰিতদানং দস্সামী’’তি দুব্বলো ৰিয হুত্ৰা লুদ্দস্স অত্তানং দস্সেসি. সো ‘‘দুব্বলো এস ভৰিস্সতি, মারেস্সামি ন’’ন্তি সত্তিং আদায অনুবন্ধি. বোধিসত্তো নাতিদূরে নাচ্চাসন্নে গচ্ছন্তো তং আদায অরঞ্ঞং পাৰিসি, দূরং গতভাৰং ঞত্ৰা পদং ৰঞ্চেত্ৰা অঞ্ঞেন মগ্গেন ৰাতৰেগেন গন্ত্ৰা সিঙ্গেন পসিব্বকং উক্খিপিত্ৰা ভূমিযং পাতেত্ৰা ¶ ফালেত্ৰা কচ্ছপং নীহরি. সতপত্তোপি রুক্খা ওতরি. বোধিসত্তো দ্ৰিন্নম্পি ওৰাদং দদমানো ‘‘অহং তুম্হে নিস্সায জীৰিতং লভিং, তুম্হেহি সহাযকস্স কত্তব্বং ময্হং কতং, ইদানি লুদ্দো আগন্ত্ৰা তুম্হে গণ্হেয্য, তস্মা, সম্ম সতপত্ত, ত্ৰং অত্তনো পুত্তকে গহেত্ৰা অঞ্ঞত্থ যাহি, ত্ৰম্পি, সম্ম কচ্ছপ, উদকং পৰিসাহী’’তি আহ. তে তথা অকংসু.

সত্থা অভিসম্বুদ্ধো হুত্ৰা দুতিযং গাথমাহ –

১১২.

‘‘কচ্ছপো ¶ পাৰিসী ৰারিং, কুরুঙ্গো পাৰিসী ৰনং;

সতপত্তো দুমগ্গম্হা, দূরে পুত্তে অপানযী’’তি.

তত্থ অপানযীতি আনযি, গহেত্ৰা অগমাসীতি অত্থো;

লুদ্দোপি তং ঠানং আগন্ত্ৰা কঞ্চি অপস্সিত্ৰা ছিন্নপসিব্বকং গহেত্ৰা দোমনস্সপ্পত্তো অত্তনো গেহং অগমাসি. তে তযোপি সহাযা যাৰজীৰং ৰিস্সাসং অচ্ছিন্দিত্ৰা যথাকম্মং গতা.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা লুদ্দকো দেৰদত্তো অহোসি, সতপত্তো সারিপুত্তো, কচ্ছপো মোগ্গল্লানো, কুরুঙ্গমিগো পন অহমেৰ অহোসি’’ন্তি.

কুরুঙ্গমিগজাতকৰণ্ণনা ছট্ঠা.

[২০৭] ৭. অস্সকজাতকৰণ্ণনা

অযমস্সকরাজেনাতি ¶ ইদং সত্থা জেতৰনে ৰিহরন্তো পুরাণদুতিযিকাপলোভনং আরব্ভ কথেসি. সো হি ভিক্খু সত্থারা ‘‘সচ্চং কির, ত্ৰং ভিক্খু, উক্কণ্ঠিতোসী’’তি পুট্ঠো ‘‘সচ্চ’’ন্তি ৰত্ৰা ‘‘কেন উক্কণ্ঠাপিতোসী’’তি ৰুত্তে ‘‘পুরাণদুতিযিকাযা’’তি আহ. অথ নং সত্থা ‘‘ন ইদানেৰ তস্সা ভিক্খু ইত্থিযা তযি সিনেহো অত্থি, পুব্বেপি ত্ৰং তং নিস্সায মহাদুক্খং পত্তো’’তি ৰত্ৰা অতীতং আহরি.

অতীতে কাসিরট্ঠে পাটলিনগরে অস্সকো নাম রাজা রজ্জং কারেসি. তস্স উপরী নাম ¶ অগ্গমহেসী পিযা অহোসি মনাপা অভিরূপা দস্সনীযা পাসাদিকা অতিক্কন্তা মানুসৰণ্ণং, অপত্তা দিব্বৰণ্ণং. সা কালমকাসি, তস্সা কালকিরিযায রাজা সোকাভিভূতো অহোসি দুক্খী দুম্মনো. সো তস্সা সরীরং দোণিযং নিপজ্জাপেত্ৰা তেলকললং পক্খিপাপেত্ৰা হেট্ঠামঞ্চে ঠপাপেত্ৰা নিরাহারো রোদমানো পরিদেৰমানো নিপজ্জি. মাতাপিতরো ¶ অৰসেসঞাতকা মিত্তামচ্চব্রাহ্মণগহপতিকাদযোপি ‘‘মা সোচি, মহারাজ, অনিচ্চা সঙ্খারা’’তিআদীনি ৰদন্তা সঞ্ঞাপেতুং নাসক্খিংসু. তস্স ৰিলপন্তস্সেৰ সত্ত দিৰসা অতিক্কন্তা. তদা বোধিসত্তো পঞ্চাভিঞ্ঞঅট্ঠসমাপত্তিলাভী তাপসো হুত্ৰা হিমৰন্তপদেসে ৰিহরন্তো আলোকং ৰড্ঢেত্ৰা দিব্বেন চক্খুনা জম্বুদীপং ওলোকেন্তো তং রাজানং তথা পরিদেৰমানং দিস্ৰা ‘‘এতস্স মযা অৰস্সযেন ভৰিতব্ব’’ন্তি ইদ্ধানুভাৰেন আকাসে উপ্পতিত্ৰা রঞ্ঞো উয্যানে ওতরিত্ৰা মঙ্গলসিলাপট্টে কঞ্চনপটিমা ৰিয নিসীদি.

অথেকো পাটলিনগরৰাসী ব্রাহ্মণমাণৰো উয্যানং গতো বোধিসত্তং দিস্ৰা ৰন্দিত্ৰা নিসীদি. বোধিসত্তো তেন সদ্ধিং পটিসন্থারং কত্ৰা ‘‘কিং, মাণৰ, রাজা ধম্মিকো’’তি পুচ্ছি. ‘‘আম, ভন্তে, ধম্মিকো রাজা, ভরিযা পনস্স কালকতা, সো তস্সা সরীরং দোণিযং পক্খিপাপেত্ৰা ৰিলপমানো নিপন্নো, অজ্জ সত্তমো দিৰসো, কিস্স তুম্হে রাজানং এৰরূপা দুক্খা ন মোচেথ, যুত্তং নু খো তুম্হাদিসেসু সীলৰন্তেসু সংৰিজ্জমানেসু রঞ্ঞো এৰরূপং দুক্খং অনুভৰিতু’’ন্তি. ‘‘ন খো অহং ¶ , মাণৰ, রাজানং জানামি, সচে পন সো আগন্ত্ৰা মং পুচ্ছেয্য, অহমেৰস্স তস্সা নিব্বত্তট্ঠানং আচিক্খিত্ৰা রঞ্ঞো সন্তিকেযেৰ তং কথাপেয্য’’ন্তি. ‘‘তেন হি, ভন্তে, যাৰ রাজানং আনেমি, তাৰ ইমেৰ নিসীদথা’’তি মাণৰো বোধিসত্তস্স পটিঞ্ঞং গহেত্ৰা রঞ্ঞো সন্তিকং গন্ত্ৰা তমত্থং আরোচেত্ৰা ‘‘তস্স দিব্বচক্খুকস্স সন্তিকং গন্তুং ৰট্টতী’’তি আহ.

রাজা ‘‘উপরিং কির দট্ঠুং লভিস্সামী’’তি তুট্ঠমানসো রথং অভিরুহিত্ৰা তত্থ গন্ত্ৰা বোধিসত্তং ৰন্দিত্ৰা একমন্তং নিসিন্নো – ‘‘সচ্চং কির তুম্হে দেৰিযা নিব্বত্তট্ঠানং জানাথা’’তি পুচ্ছি. ‘‘আম, মহারাজা’’তি. ‘‘কত্থ নিব্বত্তা’’তি? ‘‘সা খো, মহারাজ, রূপস্মিংযেৰ মত্তা পমাদমাগম্ম কল্যাণকম্মং অকত্ৰা ইমস্মিংযেৰ উয্যানে গোমযপাণকযোনিযং নিব্বত্তা’’তি ¶ . ‘‘নাহং সদ্দহামী’’তি. ‘‘তেন হি তে দস্সেত্ৰা কথাপেমী’’তি. ‘‘সাধু কথাপেথা’’তি. বোধিসত্তো অত্তনো আনুভাৰেন ‘‘উভোপি গোমযপিণ্ডং ৰট্টযমানা রঞ্ঞো পুরতো আগচ্ছন্তূ’’তি তেসং আগমনং অকাসি. তে তথেৰ আগমিংসু. বোধিসত্তো তং দস্সেন্তো ‘‘অযং তে ¶ , মহারাজ, উপরিদেৰী, তং জহিত্ৰা গোমযপাণকস্স পচ্ছতো পচ্ছতো গচ্ছতি, পস্সথ ন’’ন্তি আহ. ভন্তে ‘‘‘উপরী নাম গোমযপাণকযোনিযং নিব্বত্তিস্সতী’তি ন সদ্দহামহ’’ন্তি. ‘‘কথাপেমি নং, মহারাজা’’তি. ‘‘কথাপেথ, ভন্তে’’তি.

বোধিসত্তো অত্তনো আনুভাৰেন তং কথাপেন্তো ‘‘উপরী’’তি আহ. সা মনুস্সভাসায ‘‘কিং, ভন্তে’’তি আহ. ‘‘ত্ৰং অতীতভৰে কা নাম অহোসী’’তি? ‘‘ভন্তে, অস্সকরঞ্ঞো অগ্গমহেসী উপরী নাম অহোসি’’ন্তি. ‘‘কিং পন তে ইদানি অস্সকরাজা পিযো, উদাহু গোমযপাণকো’’তি? ‘‘ভন্তে, সো ময্হং পুরিমজাতিযা সামিকো, তদা অহং ইমস্মিং উয্যানে তেন সদ্ধিং রূপসদ্দগন্ধরসফোট্ঠব্বে অনুভৰমানা ৰিচরিং. ইদানি পন মে ভৰসঙ্খেপগতকালতো পট্ঠায সো কিং হোতি, অহঞ্হি ইদানি অস্সকরাজানং মারেত্ৰা তস্স গললোহিতেন ময্হং সামিকস্স গোমযপাণকস্স পাদে মক্খেয্য’’ন্তি ৰত্ৰা পরিসমজ্ঝে মনুস্সভাসায ইমা গাথা অৰোচ –

১১৩.

‘‘অযমস্সকরাজেন ¶ , দেসো ৰিচরিতো মযা;

অনুকাময কামেন, পিযেন পতিনা সহ.

১১৪.

‘‘নৰেন সুখদুক্খেন, পোরাণং অপিধীযতি;

তস্মা অস্সকরঞ্ঞাৰ, কীটো পিযতরো মমা’’তি.

তত্থ অযমস্সকরাজেন, দেসো ৰিচরিতো মযাতি অযং রমণীযো উয্যানপদেসো পুব্বে মযা অস্সকরাজেন সদ্ধিং ৰিচরিতো. অনুকাময কামেনাতি অনূতি নিপাতমত্তং, মযা তং কামযমানায তেন মং কামযমানেন ¶ সহাতি অত্থো. পিযেনাতি তস্মিং অত্তভাৰে পিযেন. নৰেন সুখদুক্খেন, পোরাণং অপিধীযতীতি, ভন্তে, নৰেন হি সুখেন পোরাণং সুখং, নৰেন চ দুক্খেন পোরাণং দুক্খং পিধীযতি পটিচ্ছাদীযতি, এসা লোকস্স ধম্মতাতি দীপেতি. তস্মা অস্সকরঞ্ঞাৰ, কীটো পিযতরো মমাতি যস্মা নৰেন পোরাণং পিধীযতি, তস্মা মম অস্সকরাজতো সতগুণেন সহস্সগুণেন কীটোৰ পিযতরোতি.

তং সুত্ৰা অস্সকরাজা ৰিপ্পটিসারী হুত্ৰা তত্থ ঠিতোৰ কুণপং নীহরাপেত্ৰা সীসং ন্হত্ৰা বোধিসত্তং ৰন্দিত্ৰা নগরং পৰিসিত্ৰা অঞ্ঞং অগ্গমহেসিং কত্ৰা ধম্মেন রজ্জং কারেসি. বোধিসত্তোপি রাজানং ওৰদিত্ৰা নিস্সোকং কত্ৰা হিমৰন্তমেৰ অগমাসি.

সত্থা ¶ ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. ‘‘তদা উপরী পুরাণদুতিযিকা অহোসি, অস্সকরাজা উক্কণ্ঠিতো ভিক্খু, মাণৰো সারিপুত্তো, তাপসো পন অহমেৰ অহোসি’’ন্তি.

অস্সকজাতকৰণ্ণনা সত্তমা.

[২০৮] ৮. সুসুমারজাতকৰণ্ণনা

অলং ¶ মেতেহি অম্বেহীতি ইদং সত্থা জেতৰনে ৰিহরন্তো দেৰদত্তস্স ৰধায পরিসক্কনং আরব্ভ কথেসি. তদা হি সত্থা ‘‘দেৰদত্তো ৰধায পরিসক্কতী’’তি সুত্ৰা ‘‘ন, ভিক্খৰে, ইদানেৰ দেৰদত্তো ময্হং ৰধায পরিসক্কতি, পুব্বেপি পরিসক্কিযেৰ, সন্তাসমত্তম্পি পন কাতুং ন সক্খী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে হিমৰন্তপদেসে বোধিসত্তো কপিযোনিযং নিব্বত্তিত্ৰা নাগবলো থামসম্পন্নো মহাসরীরো সোভগ্গপ্পত্তো হুত্ৰা গঙ্গানিৰত্তনে অরঞ্ঞাযতনে ৰাসং কপ্পেসি. তদা গঙ্গায একো সুসুমারো ৰসি. অথস্স ভরিযা বোধিসত্তস্স সরীরং দিস্ৰা ¶ তস্স হদযমংসে দোহল়ং উপ্পাদেত্ৰা সুসুমারং আহ – ‘‘অহং সামি, এতস্স কপিরাজস্স হদযমংসং খাদিতুকামা’’তি. ‘‘ভদ্দে, মযং জলগোচরা, এসো থলগোচরো, কিন্তি নং গণ্হিতুং সক্খিস্সামা’’তি. ‘‘যেন কেনচি উপাযেন গণ্হ, সচে ন লভিস্সামি, মরিস্সামী’’তি. ‘‘তেন হি মা সোচি, অত্থেকো উপাযো, খাদাপেস্সামি তং তস্স হদযমংস’’ন্তি সুসুমারিং সমস্সাসেত্ৰা বোধিসত্তস্স গঙ্গায পানীযং পিৰিত্ৰা গঙ্গাতীরে নিসিন্নকালে সন্তিকং গন্ত্ৰা এৰমাহ – ‘‘ৰানরিন্দ, ইমস্মিং পদেসে কসাযফলানি খাদন্তো কিং ত্ৰং নিৰিট্ঠট্ঠানেযেৰ চরসি, পারগঙ্গায অম্বলবুজাদীনং মধুরফলানং অন্তো নত্থি, কিং তে তত্থ গন্ত্ৰা ফলাফলং খাদিতুং ন ৰট্টতী’’তি? ‘‘কুম্ভীলরাজ, গঙ্গা মহোদকা ৰিত্থিণ্ণা, কথং তত্থ গমিস্সামী’’তি? ‘‘সচে ইচ্ছসি, অহং তং মম পিট্ঠিং আরোপেত্ৰা নেস্সামী’’তি. সো সদ্দহিত্ৰা ‘‘সাধূ’’তি সম্পটিচ্ছি. ‘‘তেন হি এহি পিট্ঠিং মে অভিরূহা’’তি চ ৰুত্তে তং অভিরুহি. সুসুমারো থোকং নেত্ৰা উদকে ওসীদাপেসি.

বোধিসত্তো ‘‘সম্ম, উদকে মং ওসীদাপেসি, কিং নু খো এত’’ন্তি আহ. ‘‘নাহং তং ধম্মসুধম্মতায গহেত্ৰা গচ্ছামি, ভরিযায পন মে তৰ হদযমংসে দোহল়ো উপ্পন্নো, তমহং তৰ ¶ হদযং খাদাপেতুকামো’’তি. ‘‘সম্ম, কথেন্তেন তে সুন্দরং কতং. সচে হি অম্হাকং উদরে হদযং ভৰেয্য, সাখগ্গেসু চরন্তানং চুণ্ণৰিচুণ্ণং ভৰেয্যা’’তি. ‘‘কহং পন তুম্হে ঠপেথা’’তি? বোধিসত্তো ¶ অৰিদূরে একং উদুম্বরং পক্কফলপিণ্ডিসঞ্ছন্নং দস্সেন্তো ‘‘পস্সেতানি অম্হাকং হদযানি এতস্মিং উদুম্বরে ওলম্বন্তী’’তি আহ. ‘‘সচে মে হদযং ¶ দস্সসি, অহং তং ন মারেস্সামী’’তি. ‘‘তেন হি মং এত্থ নেহি, অহং তে রুক্খে ওলম্বন্তং দস্সামী’’তি. সো তং আদায তত্থ অগমাসি. বোধিসত্তো তস্স পিট্ঠিতো উপ্পতিত্ৰা উদুম্বররুক্খে নিসীদিত্ৰা ‘‘সম্ম, বাল সুসুমার, ‘ইমেসং সত্তানং হদযং নাম রুক্খগ্গে হোতী’তি সঞ্ঞী অহোসি, বালোসি, অহং তং ৰঞ্চেসিং, তৰ ফলাফলং তৰেৰ হোতু, সরীরমেৰ পন তে মহন্তং পঞ্ঞা পন নত্থী’’তি ৰত্ৰা ইমমত্থং পকাসেন্তো ইমা গাথা অৰোচ –

১১৫.

‘‘অলং মেতেহি অম্বেহি, জম্বূহি পনসেহি চ;

যানি পারং সমুদ্দস্স, ৰরং ময্হং উদুম্বরো.

১১৬.

‘‘মহতী ৰত তে বোন্দি, ন চ পঞ্ঞা তদূপিকা;

সুসুমার ৰঞ্চিতো মেসি, গচ্ছ দানি যথাসুখ’’ন্তি.

তত্থ অলং মেতেহীতি যানি তযা দীপকে নিদ্দিট্ঠানি, এতেহি ময্হং অলং. ৰরং ময্হং উদুম্বরোতি ময্হং অযমেৰ উদুম্বররুক্খো ৰরং. বোন্দীতি সরীরং. তদূপিকাতি পঞ্ঞা পন তে তদূপিকা তস্স সরীরস্স অনুচ্ছৰিকা নত্থি. গচ্ছ দানি যথাসুখন্তি ইদানি যথাসুখং গচ্ছ, নত্থি তে হদযমংসগহণূপাযোতি অত্থো. সুসুমারো সহস্সং পরাজিতো ৰিয দুক্খী দুম্মনো পজ্ঝাযন্তোৰ অত্তনো নিৰাসট্ঠানমেৰ গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সুসুমারো দেৰদত্তো অহোসি, সুসুমারী চিঞ্চমাণৰিকা, কপিরাজা পন অহমেৰ অহোসি’’ন্তি.

সুসুমারজাতকৰণ্ণনা অট্ঠমা.

[২০৯] ৯. কুক্কুটজাতকৰণ্ণনা

দিট্ঠা ¶ ¶ মযা ৰনে রুক্খাতি ইদং সত্থা জেতৰনে ৰিহরন্তো ধম্মসেনাপতিসারিপুত্তত্থেরস্স সদ্ধিৰিহারিকং দহরভিক্খুং আরব্ভ কথেসি. সো কির অত্তনো সরীরস্স গুত্তিকম্মে ছেকো ¶ অহোসি. ‘‘সরীরস্স মে ন সুখং ভৰেয্যা’’তি ভযেন অতিসীতং অচ্চুণ্হং পরিভোগং ন করোতি, ‘‘সীতুণ্হেহি সরীরং কিলমেয্যা’’তি ভযেন বহি ন নিক্খমতি, অতিকিলিন্নউত্তণ্ডুলাদীনি ন ভুঞ্জতি. তস্স সা সরীরগুত্তিকুসলতা সঙ্ঘমজ্ঝে পাকটা জাতা. ভিক্খূ ধম্মসভাযং কথং সমুট্ঠাপেসুং – ‘‘আৰুসো, অসুকো দহরো কির ভিক্খু সরীরগুত্তিকম্মে ছেকো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, অযং দহরো ইদানেৰ সরীরগুত্তিকম্মে ছেকো, পুব্বেপি ছেকোৰ অহোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অরঞ্ঞাযতনে রুক্খদেৰতা অহোসি. অথেকো সকুণলুদ্দকো একং দীপককুক্কুটমাদায ৰালরজ্জুঞ্চ যট্ঠিঞ্চ গহেত্ৰা অরঞ্ঞে কুক্কুটে বন্ধন্তো একং পলাযিত্ৰা অরঞ্ঞং পৰিট্ঠং পোরাণকুক্কুটং বন্ধিতুং আরভি. সো ৰালপাসে কুসলতায অত্তানং বন্ধিতুং ন দেতি, উট্ঠাযুট্ঠায নিলীযতি. লুদ্দকো অত্তানং সাখাপল্লৰেহি পটিচ্ছাদেত্ৰা পুনপ্পুনং যট্ঠিঞ্চ পাসঞ্চ ওড্ডেতি. কুক্কুটো তং লজ্জাপেতুকামো মানুসিং ৰাচং নিচ্ছারেত্ৰা পঠমং গাথমাহ –

১১৭.

‘‘দিট্ঠা মযা ৰনে রুক্খা, অস্সকণ্ণা ৰিভীটকা;

ন তানি এৰং সক্কন্তি, যথা ত্ৰং রুক্খ সক্কসী’’তি.

তস্সত্থো – সম্ম লুদ্দক, মযা ইমস্মিং ৰনে জাতা বহূ অস্সকণ্ণা চ ৰিভীটকা চ রুক্খা দিট্ঠপুব্বা, তানি পন রুক্খানি যথা ত্ৰং সক্কসি সঙ্কমসি ইতো চিতো চ ৰিচরসি, এৰং ন সক্কন্তি ন সঙ্কমন্তি ন ৰিচরন্তীতি.

এৰং ৰত্ৰা চ পন সো কুক্কুটো পলাযিত্ৰা অঞ্ঞত্থ অগমাসি. তস্স পলাযিত্ৰা গতকালে লুদ্দকো দুতিযং গাথমাহ –

১১৮.

‘‘পোরাণকুক্কুটো ¶ ¶ ¶ অযং, ভেত্ৰা পঞ্জরমাগতো;

কুসলো ৰালপাসানং, অপক্কমতি ভাসতী’’তি.

তত্থ কুসলো ৰালপাসানন্তি ৰালমযেসু পাসেসু কুসলো অত্তানং বন্ধিতুং অদত্ৰা অপক্কমতি চেৰ ভাসতি চ, ভাসিত্ৰা চ পন পলাতোতি এৰং ৰত্ৰা লুদ্দকো অরঞ্ঞে চরিত্ৰা যথালদ্ধমাদায গেহমেৰ গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা লুদ্দকো দেৰদত্তো অহোসি, কুক্কুটো কাযগুত্তিকুসলো দহরভিক্খু, তস্স পন কারণস্স পচ্চক্খকারিকা রুক্খদেৰতা পন অহমেৰ অহোসি’’ন্তি.

কুক্কুটজাতকৰণ্ণনা নৰমা.

[২১০] ১০. কন্দগলকজাতকৰণ্ণনা

অম্ভো কো নামযং রুক্খোতি ইদং সত্থা ৰেল়ুৰনে ৰিহরন্তো সুগতালযং আরব্ভ কথেসি. তদা হি সত্থা ‘‘দেৰদত্তো সুগতালযং অকাসী’’তি সুত্ৰা ‘‘ন, ভিক্খৰে, ইদানেৰ দেৰদত্তো ময্হং অনুকিরিযং করোন্তো ৰিনাসং পত্তো, পুব্বেপি পাপুণিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে রুক্খকোট্টকসকুণযোনিযং নিব্বত্তি, ‘‘খদিরৰনিযো’’তিস্স নামং অহোসি. সো খদিরৰনেযেৰ গোচরং গণ্হি, তস্সেকো কন্দগলকো নাম সহাযো অহোসি, সো সিম্বলিপালিভদ্দকৰনে গোচরং গণ্হাতি. সো একদিৰসং খদিরৰনিযস্স সন্তিকং অগমাসি. খদিরৰনিযো ‘‘সহাযো মে আগতো’’তি কন্দগলকং গহেত্ৰা খদিরৰনং পৰিসিত্ৰা খদিরখন্ধং তুণ্ডেন পহরিত্ৰা রুক্খতো পাণকে নীহরিত্ৰা অদাসি. কন্দগলকো দিন্নে দিন্নে মধুরপূৰে ৰিয ছিন্দিত্ৰা ছিন্দিত্ৰা খাদি. তস্স খাদন্তস্সেৰ মানো উপ্পজ্জি – ‘‘অযম্পি ¶ রুক্খকোট্টকযোনিযং নিব্বত্তো, অহম্পি, কিং মে এতেন দিন্নগোচরেন, সযমেৰ খদিরৰনে গোচরং ¶ গণ্হিস্সামী’’তি. সো খদিরৰনিযং আহ – ‘‘সম্ম, মা ত্ৰং দুক্খং অনুভৰি, অহমেৰ খদিরৰনে গোচরং গণ্হিস্সামী’’তি.

অথ ¶ নং সো ‘‘হন্দ ত্ৰং সম্ম, সিম্বলিপালিভদ্দকাদিৰনে নিস্সারে গোচরগ্গহণকুলে জাতো, খদিরা নাম জাতসারা থদ্ধা, মা তে এতং রুচ্চী’’তি আহ. কন্দগলকো ‘‘কিং দানাহং ন রুক্খকোট্টকযোনিযং নিব্বত্তো’’তি তস্স ৰচনং অনাদিযিত্ৰা ৰেগেন গন্ত্ৰা খদিররুক্খং তুণ্ডেন পহরি. তাৰদেৰস্স তুণ্ডং ভিজ্জি, অক্খীনি নিক্খমনাকারপ্পত্তানি জাতানি, সীসং ফলিতং. সো খন্ধে পতিট্ঠাতুং অসক্কোন্তো ভূমিযং পতিত্ৰা পঠমং গাথমাহ –

১১৯.

‘‘অম্ভো কো নামযং রুক্খো, সিন্নপত্তো সকণ্টকো;

যত্থ একপ্পহারেন, উত্তমঙ্গং ৰিভিজ্জিত’’ন্তি.

তত্থ অম্ভো কো নামযং রুক্খোতি, ভো খদিরৰনিয, কো নাম অযং রুক্খো. ‘‘কো নাম সো’’তিপি পাঠো. সিন্নপত্তোতি সুখুমপত্তো. যত্থ একপ্পহারেনাতি যস্মিং রুক্খে একেনেৰ পহারেন. উত্তমঙ্গং ৰিভিজ্জিতন্তি সীসং ভিন্নং, ন কেৰলঞ্চ সীসং, তুণ্ডম্পি ভিন্নং. সো ৰেদনাপ্পত্ততায খদিররুক্খং ‘‘কিং রুক্খো নামেসো’’তি জানিতুং অসক্কোন্তো ৰেদনাপ্পত্তো হুত্ৰা ইমায গাথায ৰিপ্পলপি.

তং ৰচনং সুত্ৰা খদিরৰনিযো দুতিযং গাথমাহ –

১২০.

‘‘অচারি ৰতাযং ৰিতুদং ৰনানি, কট্ঠঙ্গরুক্খেসু অসারকেসু;

অথাসদা খদিরং জাতসারং, যত্থব্ভিদা গরুল়ো উত্তমঙ্গ’’ন্তি.

তত্থ ¶ অচারি ৰতাযন্তি অচরি ৰত অযং. ৰিতুদং ৰনানীতি নিস্সারসিম্বলিপালিভদ্দকৰনানি ৰিতুদন্তো ৰিজ্ঝন্তো. কট্ঠঙ্গরুক্খেসূতি ৰনকট্ঠকোট্ঠাসেসু রুক্খেসু. অসারকেসূতি নিস্সারেসু পালিভদ্দকসিম্বলিআদীসু. অথাসদা খদিরং জাতসারন্তি অথ পোতককালতো পট্ঠায জাতসারং খদিরং সম্পাপুণি. যত্থব্ভিদা গরুল়ো উত্তমঙ্গন্তি যত্থব্ভিদাতি যস্মিং খদিরে অভিন্দি পদালযি. গরুল়োতি সকুণো. সব্বসকুণানঞ্হেতং সগারৰসপ্পতিস্স ৰচনং.

ইতি ¶ নং খদিরৰনিযো ৰত্ৰা ‘‘ভো কন্দগলক, যত্থ ত্ৰং উত্তমঙ্গং অভিন্দি, খদিরো নামেসো সাররুক্খো’’তি আহ. সো তত্থেৰ জীৰিতক্খযং পাপুণি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা কন্দগলকো দেৰদত্তো অহোসি, খদিরৰনিযো পন অহমেৰ অহোসি’’ন্তি.

কন্দগলকজাতকৰণ্ণনা দসমা.

নতংদল়্হৰগ্গো ছট্ঠো.

তস্সুদ্দানং –

বন্ধনাগারং কেল়িসীলং, খণ্ডং ৰীরকগঙ্গেয্যং;

কুরুঙ্গমস্সকঞ্চেৰ, সুসুমারঞ্চ কুক্কুটং;

কন্দগলকন্তি তে দস.

৭. বীরণথম্ভৰগ্গো

[২১১] ১. সোমদত্তজাতকৰণ্ণনা

অকাসি ¶ যোগ্গন্তি ইদং সত্থা জেতৰনে ৰিহরন্তো লাল়ুদাযিত্থেরং আরব্ভ কথেসি. সো হি দ্ৰিন্নং তিণ্ণং জনানং অন্তরে একৰচনম্পি সম্পাদেত্ৰা কথেসুং ন সক্কোতি, সারজ্জবহুলো ‘‘অঞ্ঞং কথেস্সামী’’তি অঞ্ঞমেৰ কথেসি. তস্স তং পৰত্তিং ভিক্খূ ধম্মসভাযং কথেন্তা নিসীদিংসু. সত্থা আগন্ত্ৰা ‘‘কায নুত্থ ¶ , ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, লাল়ুদাযী ইদানেৰ সারজ্জবহুলো, পুব্বেপি সারজ্জবহুলোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে অঞ্ঞতরস্মিং ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং সিপ্পং উগ্গণ্হিত্ৰা পুন গেহং আগন্ত্ৰা মাতাপিতূনং দুগ্গতভাৰং ঞত্ৰা ‘‘পরিহীনকুলতো সেট্ঠিকুলং পতিট্ঠপেস্সামী’’তি মাতাপিতরো আপুচ্ছিত্ৰা ¶ বারাণসিং গন্ত্ৰা রাজানং উপট্ঠাসি. সো রঞ্ঞা পিযো অহোসি মনাপো. অথস্স পিতুনো ‘‘দ্ৰীহিযেৰ গোণেহি কসিং কত্ৰা জীৰিকং কপ্পেন্তস্স একো গোণো মতো. সো বোধিসত্তং উপসঙ্কমিত্ৰা ‘‘তাত, একো গোণো মতো, কসিকম্মং ন পৰত্ততি, রাজানং একং গোণং যাচাহী’’তি আহ. ‘‘তাত, নচিরস্সেৰ মে রাজা দিট্ঠো, ইদানেৰ গোণং যাচিতুং ন যুত্তং, তুম্হে যাচথা’’তি. ‘‘তাত, ত্ৰং ময্হং সারজ্জবহুলভাৰং ন জানাসি, অহঞ্হি দ্ৰিন্নং তিণ্ণং সম্মুখে কথং সম্পাদেতুং ন সক্কোমি. সচে অহং রঞ্ঞো সন্তিকং গোণং যাচিতুং গমিস্সামি, ইমম্পি দত্ৰা আগমিস্সামী’’তি. ‘‘তাত, যং হোতি, তং হোতু, ন সক্কা মযা রাজানং যাচিতুং, অপিচ খো পনাহং তুম্হে যোগ্গং কারেস্সামী’’তি. ‘‘তেন হি সাধু মং যোগ্গং কারেহী’’তি.

বোধিসত্তো পিতরং আদায বীরণত্থম্ভকসুসানং গন্ত্ৰা তত্থ তত্থ তিণকলাপে বন্ধিত্ৰা ‘‘অযং রাজা, অযং উপরাজা, অযং সেনাপতী’’তি নামানি কত্ৰা পটিপাটিযা পিতু দস্সেত্ৰা ‘‘তাত, ত্ৰং রঞ্ঞো সন্তিকং গন্ত্ৰা ‘জযতু, মহারাজা’তি এৰং ইমং গাথং ৰত্ৰা গোণং যাচেয্যাসী’’তি গাথং উগ্গণ্হাপেসি –

‘‘দ্ৰে ¶ মে গোণা মহারাজ, যেহি খেত্তং কসামসে;

তেসু একো মতো দেৰ, দুতিযং দেহি খত্তিযা’’তি.

ব্রাহ্মণো ¶ একেন সংৰচ্ছরেন ইমং গাথং পগুণং কত্ৰা বোধিসত্তং আহ – ‘‘তাত, সোমদত্ত, গাথা মে পগুণা জাতা, ইদানি অহং যস্স কস্সচি সন্তিকে ৰত্তুং সক্কোমি, মং রঞ্ঞো সন্তিকং নেহী’’তি. সো ‘‘সাধু, তাতা’’তি তথারূপং পণ্ণাকারং গাহাপেত্ৰা পিতরং রঞ্ঞো সন্তিকং নেসি. ব্রাহ্মণো ‘‘জযতু, মহারাজা’’তি ৰত্ৰা পণ্ণাকারং অদাসি. রাজা ‘‘অযং তে সোমদত্ত ব্রাহ্মণো কিং হোতী’’তি আহ. ‘‘পিতা মে, মহারাজা’’তি. ‘‘কেনট্ঠেনাগতো’’তি? তস্মিং খণে ব্রাহ্মণো গোণযাচনত্থায গাথং ৰদন্তো –

‘‘দ্ৰে মে গোণা মহারাজ, যেহি খেত্তং কসামসে;

তেসু একো মতো দেৰ, দুতিযং গণ্হ খত্তিযা’’তি. – আহ;

রাজা ব্রাহ্মণেন ৰিরজ্ঝিত্ৰা কথিতভাৰং ঞত্ৰা সিতং কত্ৰা ‘‘সোমদত্ত, তুম্হাকং গেহে বহূ মঞ্ঞে গোণা’’তি আহ. ‘‘তুম্হেহি দিন্না ¶ ভৰিস্সন্তি, মহারাজা’’তি. রাজা বোধিসত্তস্স তুস্সিত্ৰা ব্রাহ্মণস্স সোল়স গোণে অলঙ্কারভণ্ডকে নিৰাসনগামঞ্চস্স ব্রহ্মদেয্যং দত্ৰা মহন্তেন যসেন ব্রাহ্মণং উয্যোজেসি. ব্রাহ্মণো সব্বসেতসিন্ধৰযুত্তং রথং অভিরুয্হ মহন্তেন পরিৰারেন গামং অগমাসি. বোধিসত্তো পিতরা সদ্ধিং রথে নিসীদিত্ৰা গচ্ছন্তো ‘‘তাত, অহং তুম্হে সকলসংৰচ্ছরং যোগ্গং কারেসিং, সন্নিট্ঠানকালে পন তুম্হাকং গোণং রঞ্ঞো অদত্থা’’তি ৰত্ৰা পঠমং গাথমাহ –

১২১.

‘‘অকাসি যোগ্গং ধুৰমপ্পমত্তো, সংৰচ্ছরং বীরণথম্ভকস্মিং;

ব্যাকাসি সঞ্ঞং পরিসং ৰিগয্হ, ন নিয্যমো তাযতি অপ্পপঞ্ঞ’’ন্তি.

তত্থ অকাসি যোগ্গং ধুৰমপ্পমত্তো, সংৰচ্ছরং বীরণথম্ভকস্মিন্তি, তাত, ত্ৰং নিচ্চং অপ্পমত্তো বীরণত্থম্ভমযে সুসানে যোগ্গং অকাসি ¶ . ব্যাকাসি সঞ্ঞং পরিসং ৰিগয্হাতি অথ চ পন পরিসং ৰিগাহিত্ৰা তং সঞ্ঞং ৰিঅকাসি ৰিকারং আপাদেসি, পরিৰত্তেসীতি অত্থো. ন নিয্যমো তাযতি অপ্পপঞ্ঞন্তি অপ্পহঞ্ঞং নাম পুগ্গলং নিয্যমো যোগ্গাচিণ্ণং চরণং ন তাযতি ন রক্খতীতি.

অথস্স ¶ ৰচনং সুত্ৰা ব্রাহ্মণো দুতিযং গাথমাহ –

১২২.

‘‘দ্ৰযং যাচনকো তাত, সোমদত্ত নিগচ্ছতি;

অলাভং ধনলাভং ৰা, এৰংধম্মা হি যাচনা’’তি.

তত্থ এৰংধম্মা হি যাচনাতি যাচনা হি এৰংসভাৰাতি.

সত্থা ‘‘ন, ভিক্খৰে, লাল়ুদাযী ইদানেৰ সারজ্জবহুলো, পুব্বেপি সারজ্জবহুলোযেৰা’’তি ৰত্ৰা ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো, সোমদত্তস্স পিতা লাল়ুদাযী অহোসি, সোমদত্তো পন অহমেৰ অহোসি’’ন্তি.

সোমদত্তজাতকৰণ্ণনা পঠমা.

[২১২] ২. উচ্ছিট্ঠভত্তজাতকৰণ্ণনা

অঞ্ঞো ¶ উপরিমো ৰণ্ণোতি ইদং সত্থা জেতৰনে ৰিহরন্তো পুরাণদুতিযিকাপলোভনং আরব্ভ কথেসি. সো হি ভিক্খু সত্থারা ‘‘সচ্চং কির, ত্ৰং ভিক্খু, উক্কণ্ঠিতোসী’’তি পুট্ঠো ‘‘সচ্চ’’ন্তি ৰত্ৰা ‘‘কো তং উক্কণ্ঠাপেসী’’তি ৰুত্তে ‘‘পুরাণদুতিযিকা’’তি আহ. অথ নং সত্থা ‘‘ভিক্খু অযং তে ইত্থী অনত্থকারিকা, পুব্বেপি অত্তনো জারস্স উচ্ছিট্ঠকং ভোজেসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং ঠানে ভিক্খং চরিত্ৰা জীৰিককপ্পকে কপণে নটককুলে নিব্বত্তিত্ৰা ৰযপ্পত্তো দুগ্গতো দুরূপকো হুত্ৰা ভিক্খং চরিত্ৰা জীৰিকং কপ্পেসি. তদা কাসিরট্ঠে একস্মিং গামকে একস্স ব্রাহ্মণস্স ব্রাহ্মণী দুস্সীলা পাপধম্মা অতিচারং চরতি. অথেকদিৰসং ব্রাহ্মণে কেনচিদেৰ করণীযেন ¶ বহি গতে তস্সা জারো তং খণং ওলোকেত্ৰা তং গেহং পাৰিসি. সা তেন সদ্ধিং অতিচরিত্ৰা ‘‘মুহুত্তং অচ্ছ, ভুঞ্জিত্ৰাৰ গমিস্সসী’’তি ভত্তং সম্পাদেত্ৰা সূপব্যঞ্জনসম্পন্নং উণ্হভত্তং ৰড্ঢেত্ৰা ‘‘ত্ৰং ভুঞ্জা’’তি তস্স দত্ৰা সযং ব্রাহ্মণস্স আগমনং ওলোকযমানা দ্ৰারে অট্ঠাসি. বোধিসত্তো ব্রাহ্মণিযা জারস্স ভুঞ্জনট্ঠানে পিণ্ডং পচ্চাসীসন্তো অট্ঠাসি.

তস্মিং ¶ খণে ব্রাহ্মণো গেহাভিমুখো আগচ্ছতি. ব্রাহ্মণী তং আগচ্ছন্তং দিস্ৰা ৰেগেন পৰিসিত্ৰা ‘‘উট্ঠেহি, ব্রাহ্মণো আগচ্ছতী’’তি জারং কোট্ঠে ওতারেত্ৰা ব্রাহ্মণস্স পৰিসিত্ৰা নিসিন্নকালে ফলকং উপনেত্ৰা হত্থধোৰনং দত্ৰা ইতরেন ভুত্তাৰসিট্ঠস্স সীতভত্তস্স উপরি উণ্হভত্তং ৰড্ঢেত্ৰা ব্রাহ্মণস্স অদাসি. সো ভত্তে হত্থং ওতারেত্ৰা উপরি উণ্হং হেট্ঠা চ ভত্তং সীতলং দিস্ৰা চিন্তেসি – ‘‘ইমিনা অঞ্ঞস্স ভুত্তাধিকেন উচ্ছিট্ঠভত্তেন ভৰিতব্ব’’ন্তি. সো ব্রাহ্মণিং পুচ্ছন্তো পঠমং গাথমাহ –

১২৩.

‘‘অঞ্ঞো উপরিমো ৰণ্ণো, অঞ্ঞো ৰণ্ণো চ হেট্ঠিমো;

ব্রাহ্মণী ত্ৰেৰ পুচ্ছামি, কিং হেট্ঠা কিঞ্চ উপ্পরী’’তি.

তত্থ ৰণ্ণোতি আকারো. অযঞ্হি উপরিমস্স উণ্হভাৰং হেট্ঠিমস্স চ সীতভাৰং পুচ্ছন্তো এৰমাহ. কিং হেট্ঠা কিঞ্চ উপ্পরীতি ৰুড্ঢিতভত্তেন ¶ নাম উপরি সীতলেন, হেট্ঠা উণ্হেন ভৰিতব্বং, ইদঞ্চ পন ন তাদিসং, তেন তং পুচ্ছামি – ‘‘কেন কারণেন উপরি ভত্তং উণ্হং, হেট্ঠিমং সীতল’’ন্তি.

ব্রাহ্মণী অত্তনা কতকম্মস্স উত্তানভাৰভযেন ব্রাহ্মণে পুনপ্পুনং কথেন্তেপি তুণ্হীযেৰ অহোসি. তস্মিং খণে নটপুত্তস্স এতদহোসি – ‘‘কোট্ঠে নিসীদাপিতপাপপুরিসেন জারেন ভৰিতব্বং, ইমিনা গেহস্সামিকেন, ব্রাহ্মণী পন অত্তনা কতকম্মস্স পাকটভাৰভযেন কিঞ্চি ন কথেতি, হন্দাহং ইমিস্সা কতকম্মং পকাসেত্ৰা জারস্স কোট্ঠকে নিসীদাপিতভাৰং ব্রাহ্মণস্স কথেমী’’তি. সো ব্রাহ্মণস্স গেহা নিক্খন্তকালতো ¶ পট্ঠায ইতরস্স গেহপৰেসনং অতিচরণং অগ্গভত্তভুঞ্জনং ব্রাহ্মণিযা দ্ৰারে ঠত্ৰা মগ্গং ওলোকনং ইতরস্স কোট্ঠে ওতারিতভাৰন্তি সব্বং তং পৰত্তিং আচিক্খিত্ৰা দুতিযং গাথমাহ –

১২৪.

‘‘অহং নটোস্মি ভদ্দন্তে, ভিক্খকোস্মি ইধাগতো;

অযঞ্হি কোট্ঠমোতিণ্ণো, অযং সো যং গৰেসসী’’তি.

তত্থ অহং নটোস্মি, ভদ্দন্তেতি, সামি, অহং নটজাতিকো. ভিক্খকোস্মি ইধাগতোতি স্ৰাহং ইমং ঠানং ভিক্খকো ভিক্খং পরিযেসমানো আগতোস্মি. অযঞ্হি কোট্ঠমোতিণ্ণোতি অযং পন এতিস্সা জারো ইমং ভত্তং ভুঞ্জন্তো তৰ ভযেন কোট্ঠং ওতিণ্ণো. অযং সো যং গৰেসসীতি যং ত্ৰং কস্স নু খো ইমিনা উচ্ছিট্ঠকেন ভৰিতব্বন্তি গৰেসসি, অযং সো. চূল়ায ¶ নং গহেত্ৰা কোট্ঠা নীহরিত্ৰা যথা ন পুনেৰরূপং পাপং করোতি, তথা অস্স সতিং জনেহীতি ৰত্ৰা পক্কামি. ব্রাহ্মণো উভোপি তে যথা নং ন পুনেৰরূপং পাপং করোন্তি, তজ্জনপোথনেহি তথা সিক্খাপেত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতো ভিক্খু সোতাপত্তিফলে পতিট্ঠহি. ‘‘তদা ব্রাহ্মণী পুরাণদুতিযিকা অহোসি, ব্রাহ্মণো উক্কণ্ঠিতো ভিক্খু, নটপুত্তো পন অহমেৰ অহোসি’’ন্তি.

উচ্ছিট্ঠভত্তজাতকৰণ্ণনা দুতিযা.

[২১৩] ৩. ভরুজাতকৰণ্ণনা

ইসীনমন্তরং ¶ কত্ৰাতি ইদং সত্থা জেতৰনে ৰিহরন্তো কোসলরাজানং আরব্ভ কথেসি. ভগৰতো হি ভিক্খুসঙ্ঘস্স চ লাভসক্কারো মহা অহোসি. যথাহ –

‘‘তেন খো পন সমযেন ভগৰা সক্কতো হোতি গরুকতো মানিতো পূজিতো অপচিতো লাভী চীৰরপিণ্ডপাতসেনাসনগিলানপচ্চযভেসজ্জপরিক্খারানং. ভিক্খুসঙ্ঘোপি খো সক্কতো হোতি…পে… পরিক্খারানং. অঞ্ঞতিত্থিযা পন পরিব্বাজকা অসক্কতা হোন্তি…পে… পরিক্খারান’’ন্তি (উদা. ১৪).

তে এৰং পরিহীনলাভসক্কারা অহোরত্তং গুল়্হসন্নিপাতং কত্ৰা মন্তযন্তি ‘‘সমণস্স গোতমস্স উপ্পন্নকালতো পট্ঠায মযং হতলাভসক্কারা জাতা ¶ , সমণো গোতমো লাভগ্গযসগ্গপ্পত্তো জাতো, কেন নু খো কারণেনস্স এসা সম্পত্তী’’তি. তত্রেকে এৰমাহংসু – ‘‘সমণো গোতমো সকলজম্বুদীপস্স উত্তমট্ঠানে ভূমিসীসে ৰসতি. তেনস্স লাভসক্কারো উপ্পজ্জতী’’তি, সেসা ‘‘অত্থেতং কারণং, মযম্পি জেতৰনপিট্ঠে তিত্থিযারামং কারেমু, এৰং লাভিনো ভৰিস্সামা’’তি আহংসু. তে সব্বেপি ‘‘এৰমেত’’ন্তি সন্নিট্ঠানং কত্ৰা ‘‘সচেপি মযং রঞ্ঞো অনারোচেত্ৰা আরামং কারেস্সাম, ভিক্খূ ৰারেস্সন্তি, লঞ্জং লভিত্ৰা অভিজ্জনকো নাম নত্থি, তস্মা রঞ্ঞো লঞ্জং দত্ৰা আরামট্ঠানং গণ্হিস্সামা’’তি সম্মন্তেত্ৰা উপট্ঠাকে যাচিত্ৰা রঞ্ঞো সতসহস্সং দত্ৰা ‘‘মহারাজ, মযং জেতৰনপিট্ঠিযং তিত্থিযারামং করিস্সাম, সচে ¶ ভিক্খূ ‘কাতুং ন দস্সামা’তি তুম্হাকং আরোচেন্তি, নেসং পটিৰচনং ন দাতব্ব’’ন্তি আহংসু. রাজা লঞ্জলোভেন ‘‘সাধূ’’তি সম্পটিচ্ছি.

তিত্থিযা রাজানং সঙ্গণ্হিত্ৰা ৰড্ঢকিং পক্কোসাপেত্ৰা কম্মং পট্ঠপেসুং, মহাসদ্দো অহোসি. সত্থা ‘‘কে পনেতে, আনন্দ, উচ্চাসদ্দমহাসদ্দা’’তি পুচ্ছি. ‘‘অঞ্ঞতিত্থিযা, ভন্তে, জেতৰনপিট্ঠিযং তিত্থিযারামং কারেন্তি, তত্থেসো সদ্দো’’তি. ‘‘আনন্দ, নেতং ঠানং তিত্থিযারামস্স অনুচ্ছৰিকং, তিত্থিযা উচ্চাসদ্দকামা, ন সক্কা তেহি সদ্ধিং ¶ ৰসিতু’’ন্তি ৰত্ৰা ভিক্খুসঙ্ঘং সন্নিপাতেত্ৰা ‘‘গচ্ছথ, ভিক্খৰে, রঞ্ঞো আচিক্খিত্ৰা তিত্থিযারামকরণং নিৰারেথা’’তি আহ. ভিক্খুসঙ্ঘো গন্ত্ৰা রঞ্ঞো নিৰেসনদ্ৰারে অট্ঠাসি. রাজা সঙ্ঘস্স আগতভাৰং সুত্ৰাপি ‘‘তিত্থিযারামং নিস্সায আগতা ভৰিস্সন্তী’’তি লঞ্জস্স গহিতত্তা ‘‘রাজা গেহে নত্থী’’তি ৰদাপেসি. ভিক্খূ গন্ত্ৰা সত্থু আরোচেসুং. সত্থা ‘‘লঞ্জং নিস্সায এৰং করোতী’’তি দ্ৰে অগ্গসাৰকে পেসেসি. রাজা তেসম্পি আগতভাৰং সুত্ৰা তথেৰ ৰদাপেসি. তেপি আগন্ত্ৰা সত্থু আরাচেসুং. সত্থা ‘‘ন ইদানি, সারিপুত্ত, রাজা গেহে নিসীদিতুং লভিস্সতি, বহি নিক্খমিস্সতী’’তি পুনদিৰসে পুব্বণ্হসমযং নিৰাসেত্ৰা পত্তচীৰরমাদায পঞ্চহি ভিক্খুসতেহি সদ্ধিং রঞ্ঞো নিৰেসনদ্ৰারং অগমাসি. রাজা সুত্ৰা পাসাদা ওতরিত্ৰা পত্তং গহেত্ৰা সত্থারং পৰেসেত্ৰা বুদ্ধপ্পমুখস্স সঙ্ঘস্স যাগুখজ্জকং দত্ৰা সত্থারং ৰন্দিত্ৰা একমন্তং নিসীদি. সত্থা রঞ্ঞো একং পরিযাযধম্মদেসনং আরভন্তো ‘‘মহারাজ, পোরাণকরাজানো লঞ্জং গহেত্ৰা সীলৰন্তে অঞ্ঞমঞ্ঞং কলহং কারেত্ৰা অত্তনো রট্ঠস্স অস্সামিনো হুত্ৰা মহাৰিনাসং পাপুণিংসূ’’তি ৰত্ৰা তেন যাচিতো অতীতং আহরি.

অতীতে ¶ ভরুরট্ঠে ভরুরাজা নাম রজ্জং কারেসি. তদা বোধিসত্তো পঞ্চাভিঞ্ঞো অট্ঠসমাপত্তিলাভী গণসত্থা তাপসো হুত্ৰা হিমৰন্তপদেসে চিরং ৰসিত্ৰা লোণম্বিলসেৰনত্থায পঞ্চসততাপসপরিৰুতো হিমৰন্তা ওতরিত্ৰা অনুপুব্বেন ভরুনগরং পত্ৰা তত্থ পিণ্ডায চরিত্ৰা নগরা নিক্খমিত্ৰা উত্তরদ্ৰারে সাখাৰিটপসম্পন্নস্স ৰটরুক্খস্স মূলে নিসীদিত্ৰা ভত্তকিচ্চং কত্ৰা তত্থেৰ রুক্খমূলে ৰাসং কপ্পেসি. এৰং তস্মিং ইসিগণে তত্থ ৰসন্তে অড্ঢমাসচ্চযেন অঞ্ঞো গণসত্থা পঞ্চসতপরিৰারো আগন্ত্ৰা নগরে ভিক্খায চরিত্ৰা নগরা নিক্খমিত্ৰা দক্খিণদ্ৰারে তাদিসস্সেৰ ৰটরুক্খস্স মূলে নিসীদিত্ৰা ভত্তকিচ্চং কত্ৰা তত্থ রুক্খমূলে ৰাসং কপ্পেসি. ইতি তে দ্ৰেপি ইসিগণা তত্থ যথাভিরন্তং ৰিহরিত্ৰা হিমৰন্তমেৰ অগমংসু.

তেসং ¶ গতকালে দক্খিণদ্ৰারে ৰটরুক্খো সুক্খো. পুনৰারে তেসু আগচ্ছন্তেসু দক্খিণদ্ৰারে ৰটরুক্খৰাসিনো পঠমতরং আগন্ত্ৰা অত্তনো ৰটরুক্খস্স ¶ সুক্খভাৰং ঞত্ৰা ভিক্খায চরিত্ৰা নগরা নিক্খমিত্ৰা উত্তরদ্ৰারে ৰটরুক্খমূলং গন্ত্ৰা ভত্তকিচ্চং কত্ৰা তত্থ ৰাসং কপ্পেসুং. ইতরে পন ইসযো পচ্ছা আগন্ত্ৰা নগরে ভিক্খায চরিত্ৰা অত্তনো রুক্খমূলমেৰ গন্ত্ৰা ভত্তকিচ্চং কত্ৰা ৰাসং কপ্পেসুং. তে ‘‘ন সো তুম্হাকং রুক্খো, অম্হাকং রুক্খো’’তি রুক্খং নিস্সায অঞ্ঞমঞ্ঞং কলহং করিংসু, কলহো মহা অহোসি. একে ‘‘অম্হাকং পঠমং ৰসিতট্ঠানং তুম্হে ন লভিস্সথা’’তি ৰদন্তি. একে ‘‘মযং ইমস্মিং ৰারে পঠমতরং ইধাগতা, তুম্হে ন লভিস্সথা’’তি ৰদন্তি. ইতি তে ‘‘মযং সামিনো, মযং সামিনো’’তি কলহং করোন্তা রুক্খমূলস্সত্থায রাজকুলং অগমংসু. রাজা পঠমং ৰুত্থইসিগণঞ্ঞেৰ সামিকং অকাসি ¶ . ইতরে ‘‘ন দানি মযং ইমেহি পরাজিতাতি অত্তানং ৰদাপেস্সামা’’তি দিব্বচক্খুনা ওলোকেত্ৰা একং চক্কৰত্তিপরিভোগং রথপঞ্জরং দিস্ৰা আহরিত্ৰা রঞ্ঞো লঞ্জং দত্ৰা ‘‘মহারাজ, অম্হেপি সামিকে করোহী’’তি আহংসু.

রাজা লঞ্জং গহেত্ৰা ‘‘দ্ৰেপি গণা ৰসন্তূ’’তি দ্ৰেপি সামিকে অকাসি. ইতরে ইসযো তস্স রথপঞ্জরস্স রথচক্কানি নীহরিত্ৰা লঞ্জং দত্ৰা ‘‘মহারাজ, অম্হেযেৰ সামিকে করোহী’’তি আহংসু. রাজা তথা অকাসি. ইসিগণা ‘‘অম্হেহি ৰত্থুকামে চ কিলেসকামে চ পহায পব্বজিতেহি রুক্খমূলস্স কারণা কলহং করোন্তেহি লঞ্জং দদন্তেহি অযুত্তং কত’’ন্তি ৰিপ্পটিসারিনো হুত্ৰা ৰেগেন পলাযিত্ৰা হিমৰন্তমেৰ অগমংসু. সকলভরুরট্ঠৰাসিনো দেৰতা একতো হুত্ৰা ‘‘সীলৰন্তে কলহং করোন্তেন রঞ্ঞা অযুত্তং কত’’ন্তি ভরুরঞ্ঞো কুজ্ঝিত্ৰা তিযোজনসতিকং ভরুরট্ঠং সমুদ্দং উব্বত্তেত্ৰা অরট্ঠমকংসু. ইতি একং ভরুরাজানং নিস্সায সকলরট্ঠৰাসিনোপি ৰিনাসং পত্তাতি.

সত্থা ইমং অতীতং আহরিত্ৰা অভিসম্বুদ্ধো হুত্ৰা ইমা গাথা অৰোচ –

১২৫.

‘‘ইসীনমন্তরং কত্ৰা, ভরুরাজাতি মে সুতং;

উচ্ছিন্নো সহ রট্ঠেহি, স রাজা ৰিভৰঙ্গতো.

১২৬.

‘‘তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিরং সচ্চুপসংহিত’’ন্তি.

তত্থ ¶ ¶ অন্তরং কত্ৰাতি ছন্দাগতিৰসেন ৰিৰরং কত্ৰা. ভরুরাজাতি ভরুরট্ঠে রাজা. ইতি মে সুতন্তি ইতি মযা পুব্বে এতং সুতং. তস্মা হি ছন্দাগমনন্তি যস্মা হি ছন্দাগমনং গন্ত্ৰা ভরুরাজা সহ রট্ঠেন উচ্ছিন্নো, তস্মা ছন্দাগমনং পণ্ডিতা নপ্পসংসন্তি. অদুট্ঠচিত্তোতি কিলেসেহি অদূসিতচিত্তো হুত্ৰা. ভাসেয্য গিরং সচ্চুপসংহিতন্তি সভাৰনিস্সিতং ¶ অত্থনিস্সিতং কারণনিস্সিতমেৰ গিরং ভাসেয্য. যে হি তত্থ ভরুরঞ্ঞো লঞ্জং গণ্হন্তস্স অযুত্তং এতন্তি পটিক্কোসন্তা সচ্চুপসংহিতং গিরং ভাসিংসু, তেসং ঠিতট্ঠানং নাল়িকেরদীপে অজ্জাপি দীপকসহস্সং পঞ্ঞাযতীতি.

সত্থা ইমং ধম্মদেসনং আহরিত্ৰা ‘‘মহারাজ, ছন্দৰসিকেন নাম ন ভৰিতব্বং, দ্ৰে পব্বজিতগণে কলহং কারেতুং ন ৰট্টতী’’তি ৰত্ৰা জাতকং সমোধানেসি – ‘‘অহং তেন সমযেন জেট্ঠকইসি অহোসি’’ন্তি, রাজা তথাগতস্স ভত্তকিচ্চং কত্ৰা গতকালে মনুস্সে পেসেত্ৰা তিত্থিযারামং ৰিদ্ধংসাপেসি, তিত্থিযা অপ্পতিট্ঠা অহেসুং.

ভরুজাতকৰণ্ণনা ততিযা.

[২১৪] ৪. পুণ্ণনদীজাতকৰণ্ণনা

পুণ্ণং নদিন্তি ইদং সত্থা জেতৰনে ৰিহরন্তো পঞ্ঞাপারমিং আরব্ভ কথেসি. একস্মিঞ্হি দিৰসে ধম্মসভাযং ভিক্খূ তথাগতস্স পঞ্ঞং আরব্ভ কথং সমুট্ঠাপেসুং – ‘‘আৰুসো, সম্মাসম্বুদ্ধো মহাপঞ্ঞো পুথুপঞ্ঞো হাসপঞ্ঞো জৰনপঞ্ঞো তিক্খপঞ্ঞো গম্ভীরপঞ্ঞো নিব্বেধিকপঞ্ঞো উপাযপঞ্ঞায সমন্নাগতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি তথাগতো পঞ্ঞৰা উপাযকুসলোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো পুরোহিতকুলে নিব্বত্তিত্ৰা ৰযপ্পত্তো তক্কসিলাযং সব্বসিপ্পানি উগ্গণ্হিত্ৰা পিতু অচ্চযেন পুরোহিতট্ঠানং লভিত্ৰা বারাণসিরঞ্ঞো অত্থধম্মানুসাসকো ¶ অহোসি. অপরভাগে রাজা পরিভেদকানং কথং গহেত্ৰা বোধিসত্তস্স কুদ্ধো ‘‘মা মম সন্তিকে ৰসী’’তি বোধিসত্তং বারাণসিতো পব্বাজেসি. বোধিসত্তো পুত্তদারং গহেত্ৰা একস্মিং কাসিকগামকে ৰাসং কপ্পেসি. অপরভাগে রাজা তস্স গুণং সরিত্ৰা ‘‘ময্হং কঞ্চি পেসেত্ৰা আচরিযং পক্কোসিতুং ন যুত্তং, একং পন গাথং বন্ধিত্ৰা পণ্ণং ¶ ¶ লিখিত্ৰা কাকমংসং পচাপেত্ৰা পণ্ণঞ্চ মংসঞ্চ সেতৰত্থেন পলিৰেঠেত্ৰা রাজমুদ্দিকায লঞ্ছেত্ৰা পেসেস্সামি. যদি পণ্ডিতো ভৰিস্সতি, পণ্ণং ৰাচেত্ৰা কাকমংসভাৰং ঞত্ৰা আগমিস্সতি, নো চে, নাগমিস্সতী’’তি ‘‘পুণ্ণং নদি’’ন্তি ইমং গাথং পণ্ণে লিখি –

১২৭.

‘‘পুণ্ণং নদিং যেন চ পেয্যমাহু, জাতং যৰং যেন চ গুয্হমাহু;

দূরং গতং যেন চ অৰ্হযন্তি, সো ত্যাগতো হন্দ চ ভুঞ্জ ব্রাহ্মণা’’তি.

তত্থ পুণ্ণং নদিং যেন চ পেয্যমাহূতি কাকপেয্যা নদীহি ৰদন্তা যেন পুণ্ণং নদিং কাকপেয্যমাহু, ন হি অপুণ্ণা নদী ‘‘কাকপেয্যা’’তি ৰুচ্চতি. যদাপি নদীতীরে ঠত্ৰা গীৰং পসারেত্ৰা কাকেন পাতুং সক্কা হোতি, তদা নং ‘‘কাকপেয্যা’’তি ৰদন্তি. জাতং যৰং যেন চ গুয্হমাহূতি যৰন্তি দেসনাসীসমত্তং, ইধ পন সব্বম্পি জাতং উগ্গতং সম্পন্নতরুণসস্সং অধিপ্পেতং. তঞ্হি যদা অন্তো পৰিট্ঠকাকং পটিচ্ছাদেতুং সক্কোতি, তদা গুয্হতীতি গুয্হং. কিং গুয্হতি? কাকং. ইতি কাকস্স গুয্হং কাকগুয্হন্তি তং ৰদমানা কাকেন গুয্হৰচনস্স কারণভূতেন ‘‘গুয্হ’’ন্তি ৰদন্তি. তেন ৰুত্তং ‘‘যেন চ গুয্হমাহূ’’তি. দূরং গতং যেন চ অৰ্হযন্তীতি দূরং গতং ৰিপ্পৰুত্থং পিযপুগ্গলং যং আগন্ত্ৰা নিসিন্নং দিস্ৰা সচে ইত্থন্নামো আগচ্ছতি, ৰস্স কাকাতি ৰা ৰস্সন্তঞ্ঞেৰ ৰা সুত্ৰা ‘‘যথা কাকো ৰস্সতি, ইত্থন্নামো আগমিস্সতী’’তি এৰং ৰদন্তা যেন চ অৰ্হযন্তি কথেন্তি মন্তেন্তি, উদাহরন্তীতি অত্থো. সো ত্যাগতোতি সো তে আনীতো. হন্দ চ ভুঞ্জ, ব্রাহ্মণাতি গণ্হ, ব্রাহ্মণ, ভুঞ্জস্সু নং, খাদ ইদং কাকমংসন্তি অত্থো.

ইতি ¶ রাজা ইমং গাথং পণ্ণে লিখিত্ৰা বোধিসত্তস্স পেসেসি. সো পণ্ণং ৰাচেত্ৰা ‘‘রাজা মং দট্ঠুকামো’’তি ঞত্ৰা দুতিযং গাথমাহ –

১২৮.

‘‘যতো ¶ মং সরতী রাজা, ৰাযসম্পি পহেতৰে;

হংসা কোঞ্চা মযূরা চ, অসতীযেৰ পাপিযা’’তি.

তত্থ যতো মং সরতী রাজা, ৰাযসম্পি পহেতৰেতি যদা রাজা ৰাযসমংসং লভিত্ৰা তম্পি পহেতুং মং সরতি. হংসা কোঞ্চা মযূরা চাতি যদা পনস্স এতে হংসাদযো উপনীতা ভৰিস্সন্তি, একানি হংসমংসাদীনি লচ্ছতি, তদা মং কস্মা ন সরিস্সতীতি অত্থো? অট্ঠকথাযং ¶ পন ‘‘হংসকোঞ্চমযূরান’’ন্তি পাঠো. সো সুন্দরতরা, ইমেসং হংসাদীনং মংসং লভিত্ৰা কস্মা মং ন সরিস্সতি, সরিস্সতিযেৰাতি অত্থো. অসতীযেৰ পাপিযাতি যং ৰা তং ৰা লভিত্ৰা সরণং নাম সুন্দরং, লোকস্মিং পন অসতিযেৰ পাপিযা, অসতিকরণংযেৰ হীনং লামকং, তঞ্চ অম্হাকং রঞ্ঞো নত্থি. সরতি মং রাজা, আগমনং মে পচ্চাসীসতি, তস্মা গমিস্সামীতি যানং যোজাপেত্ৰা গন্ত্ৰা রাজানং পস্সি, রাজা তুস্সিত্ৰা পুরোহিতট্ঠানেযেৰ পতিট্ঠাপেসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, পুরোহিতো পন অহমেৰ অহোসি’’ন্তি.

পুণ্ণনদীজাতকৰণ্ণনা চতুত্থা.

[২১৫] ৫. কচ্ছপজাতকৰণ্ণনা

অৰধী ৰত অত্তানন্তি ইদং সত্থা জেতৰনে ৰিহরন্তো কোকালিকং আরব্ভ কথেসি. ৰত্থু মহাতক্কারিজাতকে (জা. ১.১৩.১০৪ আদযো) আৰি-ভৰিস্সতি. তদা পন সত্থা ‘‘ন, ভিক্খৰে, কোকালিকো ইদানেৰ ৰাচায হতো, পুব্বেপি ৰাচায হতোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অমচ্চকুলে নিব্বত্তিত্ৰা ৰযপ্পত্তো তস্স অত্থধম্মানুসাসকো অহোসি. সো পন রাজা বহুভাণী অহোসি, তস্মিং কথেন্তে অঞ্ঞেসং ¶ ৰচনস্স ওকাসো নাম নত্থি. বোধিসত্তো ¶ তস্স তং বহুভাণিতং ৰারেতুকামো একং উপাযং উপধারেন্তো ৰিচরতি. তস্মিঞ্চ কালে হিমৰন্তপদেসে একস্মিং সরে কচ্ছপো ৰসতি, দ্ৰে হংসপোতকা গোচরায চরন্তা তেন সদ্ধিং ৰিস্সাসং অকংসু. তে দল়্হৰিস্সাসিকা হুত্ৰা একদিৰসং কচ্ছপং আহংসু – ‘‘সম্ম কচ্ছপ, অম্হাকং হিমৰন্তে চিত্তকূটপব্বততলে কঞ্চনগুহাযং ৰসনট্ঠানং রমণীযো পদেসো, গচ্ছসি অম্হাকং সদ্ধি’’ন্তি. ‘‘অহং কিন্তি কত্ৰা গমিস্সামী’’তি? ‘‘মযং তং গহেত্ৰা গমিস্সাম, সচে ত্ৰং মুখং রক্খিতুং সক্খিস্সসি, কস্সচি কিঞ্চি ন কথেস্সসী’’তি. ‘‘রক্খিস্সামি, সামি, গহেত্ৰা মং গচ্ছথা’’তি. তে ‘‘সাধূ’’তি ৰত্ৰা একং দণ্ডকং কচ্ছপেন ডংসাপেত্ৰা সযং ¶ তস্স উভো কোটিযো ডংসিত্ৰা আকাসং পক্খন্দিংসু. তং তথা হংসেহি নীযমানং গামদারকা দিস্ৰা ‘‘দ্ৰে হংসা কচ্ছপং দণ্ডকেন হরন্তী’’তি আহংসু.

কচ্ছপো ‘‘যদি মং সহাযকা নেন্তি, তুম্হাকং এত্থ কিং দুট্ঠচেটকা’’তি ৰত্তুকামো হংসানং সীঘৰেগতায বারাণসিনগরে রাজনিৰেসনস্স উপরিভাগং সম্পত্তকালে দট্ঠট্ঠানতো দণ্ডকং ৰিস্সজ্জেত্ৰা আকাসঙ্গণে পতিত্ৰা দ্ৰেভাগো অহোসি, ‘‘কচ্ছপো আকাসতো পতিত্ৰা দ্ৰেধা ভিন্নো’’তি এককোলাহলং অহোসি. রাজা বোধিসত্তং আদায অমচ্চগণপরিৰুতো তং ঠানং গন্ত্ৰা কচ্ছপং দিস্ৰা বোধিসত্তং পুচ্ছি – ‘‘পণ্ডিত, কিন্তি কত্ৰা এস পতিতো’’তি? বোধিসত্তো ‘‘চিরপটিকঙ্খোহং রাজানং ওৰদিতুকামো উপাযং উপধারেন্তো চরামি, ইমিনা কচ্ছপেন হংসেহি সদ্ধিং ৰিস্সাসো কতো ভৰিস্সতি, তেহি ইমং ‘হিমৰন্তং নেস্সামা'তি দণ্ডকং ডংসাপেত্ৰা আকাসং পক্খন্তেহি ভৰিতব্বং, অথ ইমিনা কস্সচি ৰচনং সুত্ৰা অরক্খিতমুখতায কিঞ্চি ৰত্তুকামেন দণ্ডকা ৰিস্সট্ঠো ভৰিস্সতি, এৰং ¶ আকাসতো পতিত্ৰা জীৰিতক্খযং পত্তেনেৰ ভৰিতব্ব’’ন্তি চিন্তেত্ৰা ‘‘আম মহারাজ, অতিমুখরা নাম অপরিযন্তৰচনা এৰরূপং দুক্খং পাপুণন্তিযেৰা’’তি ৰত্ৰা ইমা গাথা অৰোচ –

১২৯.

‘‘অৰধী ৰত অত্তানং, কচ্ছপো ব্যাহরং গিরং;

সুগ্গহীতস্মিং কট্ঠস্মিং, ৰাচায সকিযাৰধি.

১৩০.

‘‘এতম্পি ¶ দিস্ৰা নরৰীরিযসেট্ঠ, ৰাচং পমুঞ্চে কুসলং নাতিৰেলং;

পস্সসি বহুভাণেন, কচ্ছপং ব্যসনং গত’’ন্তি.

তত্থ অৰধী ৰতাতি ঘাতেসি ৰত. ব্যাহরন্তি ব্যাহরন্তো. সুগ্গহীতস্মিং কট্ঠস্মিন্তি মুখেন সুট্ঠু ডংসিত্ৰা গহিতে দণ্ডকে. ৰাচায সকিযাৰধীতি অতিমুখরতায অকালে ৰাচং নিচ্ছারেন্তো দট্ঠট্ঠানং ৰিস্সজ্জেত্ৰা তায সকায ৰাচায অত্তানং অৰধি ঘাতেসি. এৰমেস জীৰিতক্খযং পত্তো, ন অঞ্ঞথাতি. এতম্পি দিস্ৰাতি এতম্পি কারণং দিস্ৰা. নরৰীরিযসেট্ঠাতি নরেসু ৰীরিযেন সেট্ঠ উত্তমৰীরিয রাজৰর. ৰাচং পমুঞ্চে কুসলং নাতিৰেলন্তি সচ্চাদিপটিসংযুত্তং কুসলমেৰ পণ্ডিতো পুরিসো মুঞ্চেয্য নিচ্ছারেয্য, তম্পি হিতং কালযুত্তং, ন অতিৰেলং, অতিক্কন্তকালং অপরিযন্তৰাচং ন ভাসেয্য. পস্সসীতি ননু পচ্চক্খতো পস্সসি. বহুভাণেনাতি বহুভণনেন. কচ্ছপং ব্যসনং গতন্তি এতং কচ্ছপং জীৰিতক্খযং পত্তন্তি.

রাজা ¶ ‘‘মং সন্ধায ভাসতী’’তি ঞত্ৰা ‘‘অম্হে সন্ধায কথেসি, পণ্ডিতা’’তি আহ. বোধিসত্তো ‘‘মহারাজ, ত্ৰং ৰা হোহি অঞ্ঞো ৰা, যো কোচি পমাণাতিক্কন্তং ভাসন্তো এৰরূপং ব্যসনং পাপুণাতী’’তি পাকটং কত্ৰা কথেসি. রাজা ততো পট্ঠায ৰিরমিত্ৰা মন্দভাণী অহোসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা কচ্ছপো কোকালিকো অহোসি, দ্ৰে হংসপোতকা দ্ৰে মহাথেরা, রাজা আনন্দো, অমচ্চপণ্ডিতো পন অহমেৰ অহোসি’’ন্তি.

কচ্ছপজাতকৰণ্ণনা পঞ্চমা.

[২১৬] ৬. মচ্ছজাতকৰণ্ণনা

ন মাযমগ্গি তপতীতি ইদং সত্থা জেতৰনে ৰিহরন্তো পুরাণদুতিযিকাপলোভনং আরব্ভ কথেসি. তঞ্হি ভিক্খুং সত্থা ‘‘সচ্চং কির ত্ৰং, ভিক্খু, উক্কণ্ঠিতোসী’’তি পুচ্ছি. ‘‘সচ্চং, ভন্তে’’তি ৰুত্তে ‘‘কেন উক্কণ্ঠাপিতোসী’’তি পুট্ঠো ‘‘পুরাণদুতিযিকাযা’’তি আহ. অথ নং সত্থা ‘‘অযং তে ভিক্খু ইত্থী অনত্থকারিকা, পুব্বেপি ত্ৰং এতং নিস্সায সূলেন ৰিজ্ঝিত্ৰা ¶ অঙ্গারেসু পচিত্ৰা খাদিতব্বতং পত্তো পণ্ডিতে নিস্সায জীৰিতং অলত্থা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স পুরোহিতো অহোসি. অথেকদিৰসং কেৰট্টা জালে লগ্গং মচ্ছং উদ্ধরিত্ৰা উণ্হৰালুকাপিট্ঠে ঠপেত্ৰা ‘‘অঙ্গারেসু নং পচিত্ৰা খাদিস্সামা’’তি সূলং তচ্ছিংসু. মচ্ছো মচ্ছিং আরব্ভ পরিদেৰমানো ইমা গাথা অৰোচ –

১৩১.

‘‘ন মাযমগ্গি তপতি, ন সূলো সাধুতচ্ছিতো;

যঞ্চ মং মঞ্ঞতে মচ্ছী, অঞ্ঞং সো রতিযা গতো.

১৩২.

‘‘সো মং দহতি রাগগ্গি, চিত্তং চূপতপেতি মং;

জালিনো মুঞ্চথাযিরা মং, ন কামে হঞ্ঞতে ক্ৰচী’’তি.

তত্থ ¶ ন মাযমগ্গি তপতীতি ন মং অযং অগ্গি তপতি, ন তাপং জনেতি, ন সোচযতীতি অত্থো. ন সূলোতি অযং সূলোপি সাধুতচ্ছিতো মং ন তপতি, ন মে সোকং উপ্পাদেতি. যঞ্চ মং মঞ্ঞতেতি যং পন মং মচ্ছী এৰং মঞ্ঞতি ‘‘অঞ্ঞং মচ্ছিং সো পঞ্চকামগুণরতিযা গতো’’তি, তদেৰ ¶ মং তপতি সোচযতি. সো মং দহতীতি যো পনেস রাগগ্গি, সো মং দহতি ঝাপেতি. চিত্তং চূপতপেতি মন্তি রাগসম্পযুত্তকং মম চিত্তমেৰ চ মং উপতাপেতি কিলমেতি ৰিহেঠেতি. জালিনোতি কেৰট্টে আলপতি. তে হি জালস্স অত্থিতায ‘‘জালিনো’’তি ৰুচ্চন্তি. মুঞ্চথাযিরা মন্তি মুঞ্চথ মং সামিনোতি যাচতি. ন কামে হঞ্ঞতে ক্ৰচীতি কামে পতিট্ঠিতো কামেন নীযমানো সত্তো ন ক্ৰচি হঞ্ঞতি. ন হি তং তুম্হাদিসা হনিতুং অনুচ্ছৰিকাতি পরিদেৰতি. অথ ৰা কামেতি হেতুৰচনে ভুম্মং, কামহেতু মচ্ছিং অনুবন্ধমানো নাম ন ক্ৰচি তুম্হাদিসেহি হঞ্ঞতীতি পরিদেৰতি. তস্মিং খণে বোধিসত্তো নদীতীরং গতো তস্স মচ্ছস্স পরিদেৰিতসদ্দং সুত্ৰা কেৰট্টে উপসঙ্কমিত্ৰা তং মচ্ছং মোচেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি ¶ . ‘‘তদা মচ্ছী পুরাণদুতিযিকা অহোসি, মচ্ছো উক্কণ্ঠিতভিক্খু, পুরোহিতো পন অহমেৰ অহোসি’’ন্তি.

মচ্ছজাতকৰণ্ণনা ছট্ঠা.

[২১৭] ৭. সেগ্গুজাতকৰণ্ণনা

সব্বো লোকোতি ইদং সত্থা জেতৰনে ৰিহরন্তো একং পণ্ণিকউপাসকং আরব্ভ কথেসি. ৰত্থু এককনিপাতে ৰিত্থারিতমেৰ. ইধাপি সত্থা তং ‘‘কিং, উপাসক, চিরস্সং আগতোসী’’তি পুচ্ছি. পণ্ণিকউপাসকো ‘‘ধীতা মে, ভন্তে, নিচ্চং পহংসিতমুখী, তমহং ৰীমংসিত্ৰা একস্স কুলদারকস্স অদাসিং, তত্থ ইতিকত্তব্বতায তুম্হাকং দস্সনায আগন্তুং ওকাসং ন লভি’’ন্তি আহ. অথ নং সত্থা ‘‘ন খো, উপাসক, ইদানেৰেসা সীলৰতী, পুব্বেপি সীলৰতী, ত্ৰঞ্চ ন ইদানেৰেতং ৰীমংসসি, পুব্বেপি ৰীমংসিযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো রুক্খদেৰতা অহোসি. তদা অযমেৰ ¶ পণ্ণিকউপাসকো ‘‘ধীতরং ৰীমংসিস্সামী’’তি অরঞ্ঞং নেত্ৰা কিলেসৰসেন ইচ্ছন্তো ¶ ৰিয হত্থে গণ্হি. অথ নং পরিদেৰমানং পঠমগাথায অজ্ঝভাসি –

১৩৩.

‘‘সব্বো লোকো অত্তমনো অহোসি, অকোৰিদা গামধম্মস্স সেগ্গু;

কোমারি কো নাম তৰজ্জ ধম্মো, যং ত্ৰং গহিতা পৰনে পরোদসী’’তি.

তত্থ সব্বো লোকো অত্তমনো অহোসীতি, অম্ম, সকলোপি সত্তলোকো এতিস্সা কামসেৰনায অত্তমনো জাতো. অকোৰিদা গামধম্মস্স সেগ্গূতি সেগ্গূতি তস্সা নামং. তেন ত্ৰং পন, অম্ম, সেগ্গু অকোৰিদা গামধম্মস্স, ইমস্মিং গামধম্মে ৰসলধম্মে অকুসলাসীতি ৰুত্তং হোতি. কোমারি কো নাম তৰজ্জ ধম্মোতি, অম্ম, কুমারি কো নামেস তৰ অজ্জ সভাৰো. যং ত্ৰং গহিতা পৰনে পরোদসীতি ত্ৰং মযা ইমস্মিং পৰনে সন্থৰৰসেন হত্থে গহিতা পরোদসি ¶ ন সম্পটিচ্ছসি, কো এস তৰ সভাৰো, কিং কুমারিকাযেৰ ত্ৰন্তি পুচ্ছতি.

তং সুত্ৰা কুমারিকা ‘‘আম, তাত, কুমারিকাযেৰাহং, নাহং মেথুনধম্মং নাম জানামী’’তি ৰত্ৰা পরিদেৰমানা দুতিযং গাথমাহ –

১৩৪.

‘‘যো দুক্খফুট্ঠায ভৰেয্য তাণং, সো মে পিতা দুব্ভি ৰনে করোতি;

সা কস্স কন্দামি ৰনস্স মজ্ঝে, যো তাযিতা সো সহসং করোতী’’তি.

সা হেট্ঠা কথিতাযেৰ. ইতি সো পণ্ণিকো তদা ধীতরং ৰীমংসিত্ৰা গেহং নেত্ৰা কুলদারকস্স দত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে পণ্ণিকউপাসকো সোতাপত্তিফলে পতিট্ঠহি. ‘‘তদা ধীতা ধীতাযেৰ, পিতা পিতাযেৰ অহোসি, তস্স কারণস্স পচ্চক্খকারিকা রুক্খদেৰতা পন অহমেৰ অহোসি’’ন্তি.

সেগ্গুজাতকৰণ্ণনা সত্তমা.

[২১৮] ৮. কূটৰাণিজজাতকৰণ্ণনা

সঠস্স ¶ ¶ সাঠেয্যমিদন্তি ইদং সত্থা জেতৰনে ৰিহরন্তো একং কূটৰাণিজং আরব্ভ কথেসি. সাৰত্থিৰাসিনো হি কূটৰাণিজো চ পণ্ডিতৰাণিজো চ দ্ৰে ৰাণিজা মিত্তিকা হুত্ৰা পঞ্চ সকটসতানি ভণ্ডস্স পূরাপেত্ৰা পুব্বন্ততো অপরন্তং ৰিচরমানা ৰোহারং কত্ৰা বহুং লাভং লভিত্ৰা সাৰত্থিং পচ্চাগমিংসু. পণ্ডিতৰাণিজো কূটৰাণিজং আহ – ‘‘সম্ম, ভণ্ডং ভাজেমা’’তি. কূটৰাণিজো ‘‘অযং দীঘরত্তং দুক্খসেয্যায দুব্ভোজনেন কিলন্তো অত্তনো ঘরে নানগ্গরসং ভত্তং ভুঞ্জিত্ৰা অজীরকেন মরিস্সতি, অথ সব্বম্পেতং ভণ্ডং ময্হমেৰ ভৰিস্সতী’’তি চিন্তেত্ৰা ‘‘নক্খত্তং ন মনাপং, দিৰসো ন মনাপো, স্ৰে জানিস্সামি ¶ , পুনদিৰসে জানিস্সামী’’তি কালং খেপেতি. অথ নং পণ্ডিতৰাণিজো নিপ্পীল়েত্ৰা ভাজাপেত্ৰা গন্ধমালং আদায সত্থু সন্তিকং গন্ত্ৰা সত্থারং পূজেত্ৰা ৰন্দিত্ৰা একমন্তং নিসীদি. সত্থা ‘‘কদা আগতোসী’’তি পুচ্ছিত্ৰা ‘‘অড্ঢমাসমত্তো মে, ভন্তে, আগতস্সা’’তি ৰত্ৰা ‘‘অথ কস্মা এৰং পপঞ্চং কত্ৰা বুদ্ধুপট্ঠানং আগতোসী’’তি পুট্ঠো তং পৰত্তিং আরোচেসি. সত্থা ‘‘ন খো, উপাসক, ইদানেৰ, পুব্বেপেস কূটৰাণিজোযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অমচ্চকুলে নিব্বত্তিত্ৰা ৰযপ্পত্তো তস্স ৰিনিচ্ছযামচ্চো অহোসি. তদা গামৰাসী চ নগরৰাসী চ দ্ৰে ৰাণিজা মিত্তা অহেসুং. গামৰাসী নগরৰাসিস্স সন্তিকে পঞ্চ ফালসতানি ঠপেসি. সো তে ফালে ৰিক্কিণিত্ৰা মূলং গহেত্ৰা ফালানং ঠপিতট্ঠানে মূসিকৰচ্চং আকিরিত্ৰা ঠপেসি. অপরভাগে গামৰাসী আগন্ত্ৰা ‘‘ফালে মে দেহী’’তি আহ. কূটৰাণিজো ‘‘ফালা তে মূসিকাহি খাদিতা’’তি মূসিকৰচ্চং দস্সেসি. ইতরো ‘‘খাদিতাৰ হোন্তু, মূসিকাহি খাদিতে কিং সক্কা কাতু’’ন্তি ন্হানত্থায তস্স পুত্তং আদায গচ্ছন্তো একস্স সহাযকস্স গেহে ‘‘ইমস্স কত্থচি গন্তুং মা অদত্থা’’তি ৰত্ৰা অন্তোগব্ভে ¶ নিসীদাপেত্ৰা সযং ন্হাযিত্ৰা কূটৰাণিজস্স গেহং অগমাসি. সো ‘‘পুত্তো মে কহ’’ন্তি আহ. ‘‘সম্ম, তৰ পুত্তং তীরে ঠপেত্ৰা মম উদকে নিমুগ্গকালে একো কুললো আগন্ত্ৰা তৰ পুত্তং নখপঞ্জরেন গহেত্ৰা আকাসং পক্খন্তো, অহং পাণিং পহরিত্ৰা ৰিরৰিত্ৰা ৰাযমন্তোপি মোচেতুং নাসক্খি’’ন্তি. ‘‘ত্ৰং মুসা ভণসি, কুললা দারকে গহেত্ৰা গন্তুং সমত্থা নাম নত্থী’’তি. ‘‘সম্ম, হোতু, অযুত্তেপি হোন্তে অহং কিং করোমি, কুললেনেৰ তে পুত্তো নীতো’’তি. সো তং সন্তজ্জেত্ৰা ‘‘অরে দুট্ঠচোর মনুস্সমারক ¶ , ইদানি তং ৰিনিচ্ছযং গন্ত্ৰা কড্ঢাপেস্সামী’’তি নিক্খমি. সো ‘‘মম রুচ্চনকমেৰ করোসী’’তি তেনেৰ সদ্ধিং ৰিনিচ্ছযট্ঠানং অগমাসি.

কূটৰাণিজো বোধিসত্তং আহ – ‘‘অযং, সামি, মম পুত্তং গহেত্ৰা ন্হাযিতুং গতো, ‘কহং মে পুত্তো’তি ৰুত্তে ‘কুললেন হটো’তি আহ, ৰিনিচ্ছিনথ ¶ মে অড্ড’’ন্তি. বোধিসত্তো ‘‘সচ্চং ভণে’’তি ইতরং পুচ্ছি. সো আহ – ‘‘আম, সামি, অহং তং আদায গতো, সেনেন পহটভাৰো সচ্চমেৰ, সামী’’তি. ‘‘কিং পন লোকে কুললা নাম দারকে হরন্তী’’তি? ‘‘সামি, অহম্পি তুম্হে পুচ্ছামি – ‘‘কুললা দারকে গহেত্ৰা আকাসে গন্তুং ন সক্কোন্তি, মূসিকা পন অযফালে খাদন্তী’’তি. ‘‘ইদং কিং নামা’’তি? ‘‘সামি, মযা এতস্স ঘরে পঞ্চ ফালসতানি ঠপিতানি, স্ৰাযং ‘ফালা তে মূসিকাহি খাদিতা’তি ৰত্ৰা ‘ইদং তে ফালে খাদিতমূসিকানং ৰচ্চ’ন্তি ৰচ্চং দস্সেতি, সামি, মূসিকা চে ফালে খাদন্তি, কুললাপি দারকে হরিস্সন্তি. সচে ন খাদন্তি, সেনাপি তং ন হরিস্সন্তি. এসো পন ‘ফালা তে মূসিকাহি খাদিতা’তি ৰদতি, তেসং খাদিতভাৰং ৰা অখাদিতভাৰং ৰা জানাথ, অড্ডং ¶ মে ৰিনিচ্ছিনথা’’তি. বোধিসত্তো ‘‘সঠস্স পটিসাঠেয্যং কত্ৰা জিনিস্সামীতি ইমিনা চিন্তিতং ভৰিস্সতী’’তি ঞত্ৰা ‘‘সুট্ঠু তে চিন্তিত’’ন্তি ৰত্ৰা ইমা গাথা অৰোচ –

১৩৫.

‘‘সঠস্স সাঠেয্যমিংদ সুচিন্তিতং, পচ্চোড্ডিতং পটিকূটস্স কূটং;

ফালং চে খাদেয্যুং মূসিকা, কস্মা কুমারং কুললা ন হরেয্যুং.

১৩৬.

‘‘কূটস্স হি সন্তি কূটকূটা, ভৰতি চাপি নিকতিনো নিকত্যা;

দেহি পুত্তনট্ঠ ফালনট্ঠস্স ফালং, মা তে পুত্তমহাসি ফালনট্ঠো’’তি.

তত্থ সঠস্সাতি সঠভাৰেন কেরাটিকেন ‘‘একং উপাযং কত্ৰা পরসন্তকং খাদিতুং ৰট্টতী’’তি সঠস্স. সাঠেয্যমিদং সুচিন্তিতন্তি ইদং পটিসাঠেয্যং চিন্তেন্তেন তযা সুট্ঠু চিন্তিতং. পচ্চোড্ডিতং পটিকূটস্স কূটন্তি কূটস্স পুগ্গলস্স তযা পটিকূটং সুট্ঠু পচ্চোড্ডিতং, পটিভাগং কত্ৰা ওড্ডিতসদিসমেৰ কতন্তি অত্থো. ফালং চে খাদেয্যুং মূসিকাতি যদি মূসিকা ফালং খাদেয্যুং. কস্মা কুমারং কুললা ন হরেয্যুন্তি মূসিকাসু ফালে খাদন্তীসু কুললা কিং কারণা কুমারং নো হরেয্যুং.

কূটস্স ¶ ¶ হি সন্তি কূটকূটাতি ত্ৰং ‘‘অহমেৰ মূসিকাহি ফালে খাদাপিতপুরিসো কূটো’’তি মঞ্ঞসি, তাদিসস্স পন কূটস্স ইমস্মিং লোকে বহূ কূটা সন্তি, কূটস্স কূটাতি কূটপটিকূটানং এতং নামং, কূটস্স পটিকূটা নাম সন্তীতি ৰুত্তং হোতি. ভৰতি চাপি নিকতিনো নিকত্যাতি নিকতিনো নেকতিকস্স ৰঞ্চনকপুগ্গলস্স নিকত্যা অপরো নিকতিকারকো ৰঞ্চনকপুরিসো ভৰতিযেৰ. দেহি পুত্তনট্ঠ ফালনট্ঠস্স ফালন্তি অম্ভো নট্ঠপুত্ত পুরিস, এতস্স নট্ঠফালস্স ফালং দেহি. মা তে পুত্তমহাসি ফালনট্ঠোতি সচে হিস্স ফালং ন দস্সসি, পুত্তং তে হরিস্সতি, তং তে এস মা হরতু, ফালমস্স দেহীতি. ‘‘দেমি, সামি, সচে মে পুত্তং দেতী’’তি. ‘‘দেমি, সামি, সচে মে ফালে দেতী’’তি. এৰং ¶ নট্ঠপুত্তো পুত্তং, নট্ঠফালো চ ফালং পটিলভিত্ৰা উভোপি যথাকম্মং গতা.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা কূটৰাণিজো ইদানি কূটৰাণিজোৰ, পণ্ডিতৰাণিজো পণ্ডিতৰাণিজোযেৰ, ৰিনিচ্ছযামচ্চো পন অহমেৰ অহোসি’’ন্তি.

কূটৰাণিজজাতকৰণ্ণনা অট্ঠমা.

[২১৯] ৯. গরহিতজাতকৰণ্ণনা

হিরঞ্ঞং মে সুৰণ্ণং মেতি ইদং সত্থা জেতৰনে ৰিহরন্তো একং অনভিরতিযা উক্কণ্ঠিতভিক্খুং আরব্ভ কথেসি. এতস্স হি পচ্চেকং গহিতং আরম্মণং নাম নত্থি, অনভিরতিৰাসং ৰসন্তং পন তং সত্থু সন্তিকং আনেসুং. সো সত্থারা ‘‘সচ্চং কির ত্ৰং, ভিক্খু, উক্কণ্ঠিতোসী’’তি পুট্ঠো ‘‘সচ্চ’’ন্তি ৰত্ৰা ‘‘কিংকারণা’’তি ৰুত্তে ‘‘কিলেসৰসেনা’’তি আহ. অথ নং সত্থা ‘‘অযং, ভিক্খু, কিলেসো নাম পুব্বে তিরচ্ছানেহিপি গরহিতো, ত্ৰং এৰরূপে সাসনে পব্বজিতো কস্মা তিরচ্ছানেহিপি গরহিতকিলেসৰসেন উক্কণ্ঠিতো’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে ৰানরযোনিযং নিব্বত্তি. তমেনং একো ৰনচরকো গহেত্ৰা ¶ আনেত্ৰা রঞ্ঞো অদাসি. সো চিরং রাজগেহে ৰসমানো ৰত্তসম্পন্নো অহোসি, মনুস্সলোকে ৰত্তমানং কিরিযং যেভুয্যেন অঞ্ঞাসি. রাজা তস্স ৰত্তে পসীদিত্ৰা ৰনচরকং পক্কোসাপেত্ৰা ‘‘ইমং ৰানরং গহিতট্ঠানেযেৰ ৰিস্সজ্জেহী’’তি আণাপেসি ¶ , সো তথা অকাসি. ৰানরগণো বোধিসত্তস্স আগতভাৰং ঞত্ৰা তস্স দস্সনত্থায মহন্তে পাসাণপিট্ঠে সন্নিপতিত্ৰা বোধিসত্তেন সদ্ধিং সম্মোদনীযং কথং কত্ৰা ‘‘সম্ম, কহং এত্তকং কালং ৰুত্থোসী’’তি আহ. ‘‘বারাণসিযং রাজনিৰেসনে’’তি. ‘‘অথ কথং মুত্তোসী’’তি? ‘‘রাজা মং কেল়িমক্কটং কত্ৰা মম ৰত্তে পসন্নো মং ৰিস্সজ্জেসী’’তি.

অথ নং তে ৰানরা ‘‘মনুস্সলোকে ৰত্তমানকিরিযং নাম তুম্হে জানিস্সথ ¶ , অম্হাকম্পি তাৰ কথেথ, সোতুকামম্হা’’তি আহংসু. ‘‘মা মং মনুস্সানং কিরিযং পুচ্ছথা’’তি. ‘‘কথেথ সোতুকামম্হা’’তি. বোধিসত্তোপি ‘‘মনুস্সা নাম খত্তিযাপি ব্রাহ্মণাপি ‘ময্হং ময্হ’ন্তি ৰদন্তি, হুত্ৰা অভাৰট্ঠেন অনিচ্চতং ন জানন্তি, সুণাথ দানি তেসং অন্ধবালানং কারণ’’ন্তি ৰত্ৰা ইমা গাথা অৰোচ –

১৩৭.

‘‘হিরঞ্ঞং মে সুৰণ্ণং মে, এসা রত্তিং দিৰা কথা;

দুম্মেধানং মনুস্সানং, অরিযধম্মং অপস্সতং.

১৩৮.

‘‘দ্ৰে দ্ৰে গহপতযো গেহে, একো তত্থ অমস্সুকো;

লম্বত্থনো ৰেণিকতো, অথো অঙ্কিতকণ্ণকো;

কীতো ধনেন বহুনা, সো তং ৰিতুদতে জন’’ন্তি.

তত্থ হিরঞ্ঞং মে সুৰণ্ণং মেতি দেসনাসীসমত্তমেতং, ইমিনা পন পদদ্ৰযেন দসৰিধম্পি রতনং সব্বং, পুব্বণ্ণাপরণ্ণং খেত্তৰত্থুং দ্ৰিপদচতুপ্পদঞ্চ সব্বং দস্সেন্তো ‘‘ইদং মে ইদং মে’’তি আহ. এসা রত্তিং দিৰা কথাতি এসা মনুস্সানং রত্তিঞ্চ দিৰা চ নিচ্চকালং কথা. অঞ্ঞং পন তে ‘‘পঞ্চক্খন্ধা অনিচ্চা’’তি ৰা ‘‘হুত্ৰা ন ভৰন্তী’’তি ৰা ন জানন্তি, এৰমেৰ পরিদেৰন্তা ৰিচরন্তি. দুম্মেধানন্তি অপ্পপঞ্ঞানং. অরিযধম্মং অপস্সতন্তি অরিযানং বুদ্ধাদীনং ধম্মং, অরিযং ৰা নিদ্দোসং নৰৰিধং লোকুত্তরধম্মং অপস্সন্তানং এসাৰ কথা. অঞ্ঞা পন ‘‘অনিচ্চং ৰা দুক্খং ৰা’’তি তেসং কথা নাম নত্থি.

গহপতযোতি ¶ গেহে অধিপতিভূতা. একো তত্থাতি তেসু দ্ৰীসু ঘরসামিকেসু ‘‘একো’’তি মাতুগামং সন্ধায ৰদতি. তত্থ ৰেণিকতোতি কতৰেণী, নানপ্পকারেন সণ্ঠাপিতকেসকলাপোতি অত্থো. অথো অঙ্কিতকণ্ণকোতি অথ স্ৰেৰ ৰিদ্ধকণ্ণো ছিদ্দকণ্ণোতি লম্বকণ্ণতং সন্ধাযাহ. কীতো ধনেন বহুনাতি সো পনেস অমস্সুকো লম্বত্থনো ৰেণিকতো অঙ্কিতকণ্ণো মাতাপিতূনং বহুং ¶ ধনং দত্ৰা কীতো, মণ্ডেত্ৰা পসাধেত্ৰা যানং আরোপেত্ৰা মহন্তেন পরিৰারেন ঘরং আনীতো. সো তং ৰিতুদতে জনন্তি সো গহপতি আগতকালতো পট্ঠায ¶ তস্মিং গেহে দাসকম্মকরাদিভেদং জনং ‘‘অরে দুট্ঠদাস দুট্ঠদাসি, ইমং ন করোসী’’তি মুখসত্তীহি ৰিতুদতি, সামিকো ৰিয হুত্ৰা মহাজনং ৰিচারেতি. এৰং তাৰ ‘‘মনুস্সলোকে অতিৰিয অযুত্ত’’ন্তি মনুস্সলোকং গরহি.

তং সুত্ৰা সব্বে ৰানরা ‘‘মা কথেথ, মা কথেথ, অসোতব্বযুত্তকং অস্সুম্হা’’তি উভোহি হত্থেহি কণ্ণে দল়্হং পিদহিংসু. ‘‘ইমস্মিং ঠানে অম্হেহি ইদং অযুত্তং সুত’’ন্তি তং ঠানম্পি গরহিত্ৰা অঞ্ঞত্থ অগমংসু. সো পিট্ঠিপাসাণো গরহিতপিট্ঠিপাসাণোযেৰ কির নাম জাতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো ভিক্খু সোতাপত্তিফলে পতিট্ঠহি. ‘‘তদা ৰানরগণো বুদ্ধপরিসা অহোসি, ৰানরিন্দো পন অহমেৰ অহোসি’’ন্তি.

গরহিতজাতকৰণ্ণনা নৰমা.

[২২০] ১০. ধম্মধজজাতকৰণ্ণনা

সুখং জীৰিতরূপোসীতি ইদং সত্থা ৰেল়ুৰনে ৰিহরন্তো দেৰদত্তস্স ৰধায পরিসক্কনং আরব্ভ কথেসি. তদা হি সত্থা ‘‘ন, ভিক্খৰে, ইদানেৰ, পুব্বেপি দেৰদত্তো ময্হং ৰধায পরিসক্কিযেৰ, সন্তাসমত্তম্পি পন কাতুং নাসক্খী’’তি ৰত্ৰা অতীতং আহরি.

অতীতে ¶ বারাণসিযং যসপাণি নাম রাজা রজ্জং কারেসি, কাল়কো নামস্স সেনাপতি অহোসি. তদা বোধিসত্তো তস্সেৰ পুরোহিতো অহোসি নামেন ধম্মধজো নাম, রঞ্ঞো পন সীসপ্পসাধনকপ্পকো ছত্তপাণি নাম. রাজা ধম্মেন রজ্জং কারেতি, সেনাপতি পনস্স ৰিনিচ্ছযং করোন্তো লঞ্জং খাদতি পরপিট্ঠিমংসিকো, লঞ্জং গহেত্ৰা অস্সামিকে সামিকে করোতি. অথেকদিৰসং ৰিনিচ্ছযে পরাজিতো মনুস্সো বাহা পগ্গয্হ কন্দন্তো ৰিনিচ্ছযা নিক্খন্তো রাজুপট্ঠানং গচ্ছন্তং ¶ বোধিসত্তং দিস্ৰা তস্স পাদেসু পতিত্ৰা ‘‘তুম্হাদিসেসু নাম, সামি, রঞ্ঞো অত্থঞ্চ ধম্মঞ্চ অনুসাসন্তেসু কাল়কসেনাপতি লঞ্জং গহেত্ৰা অস্সামিকে সামিকে করোতী’’তি অত্তনো পরাজিতভাৰং বোধিসত্তস্স কথেসি. বোধিসত্তো কারুঞ্ঞং উপ্পাদেত্ৰা ¶ ‘‘এহি ভণে, অড্ডং তে ৰিনিচ্ছিনিস্সামী’’তি তং গহেত্ৰা ৰিনিচ্ছযট্ঠানং অগমাসি. মহাজনো সন্নিপতি, বোধিসত্তো তং অড্ডং পটিৰিনিচ্ছিনিত্ৰা সামিকঞ্ঞেৰ সামিকং অকাসি.

মহাজনো সাধুকারং অদাসি, সো সদ্দো মহা অহোসি. রাজা তং সুত্ৰা ‘‘কিং সদ্দো নামেসো’’তি পুচ্ছি. ‘‘দেৰ, ধম্মধজপণ্ডিতেন দুব্বিনিচ্ছিতো অড্ডো সুৰিনিচ্ছিতো, তত্রেস সাধুকারসদ্দো’’তি. রাজা তুট্ঠো বোধিসত্তং পক্কোসাপেত্ৰা ‘‘অড্ডো কির তে আচরিয ৰিনিচ্ছিতো’’তি পুচ্ছি. ‘‘আম, মহারাজ, কাল়কেন দুব্বিনিচ্ছিতং অড্ডং ৰিনিচ্ছিনি’’ন্তি ৰুত্তে ‘‘ইতো দানি পট্ঠায তুম্হেৰ অড্ডং ৰিনিচ্ছিনথ, ময্হঞ্চ কণ্ণসুখং ভৰিস্সতি লোকস্স চ ৰুড্ঢী’’তি ৰত্ৰা অনিচ্ছন্তম্পি তং ‘‘সত্তানুদ্দযায ৰিনিচ্ছযে নিসীদথা’’তি যাচিত্ৰা সম্পটিচ্ছাপেসি. ততো পট্ঠায বোধিসত্তো ৰিনিচ্ছযে নিসীদতি, সামিকেযেৰ সামিকে করোতি.

কাল়কো ততো পট্ঠায লঞ্জং অলভন্তো লাভতো পরিহাযিত্ৰা বোধিসত্তস্স আঘাতং বন্ধিত্ৰা ‘‘মহারাজ, ধম্মধজপণ্ডিতো তৰ রজ্জং পত্থেতী’’তি বোধিসত্তং রঞ্ঞো অন্তরে পরিভিন্দি. রাজা অসদ্দহন্তো ‘‘মা এৰং অৰচা’’তি পটিক্খিপিত্ৰা পুন তেন ‘‘সচে মে ন সদ্দহথ, তস্সাগমনকালে ৰাতপানেন ওলোকেথ. অথানেন সকলনগরস্স অত্তনো হত্থে কতভাৰং পস্সিস্সথা’’তি ৰুত্তে রাজা তস্স অড্ডকারকপরিসং দিস্ৰা ‘‘এতস্সেৰ পরিসা’’তি সঞ্ঞায ভিজ্জিত্ৰা ‘‘কিং করোম ¶ সেনাপতী’’তি পুচ্ছি. ‘‘দেৰ, এতং মারেতুং ৰট্টতী’’তি ¶ . ‘‘ওল়ারিকদোসং অপস্সন্তা কথং মারেস্সামা’’তি? ‘‘অত্থেকো উপাযো’’তি. ‘‘কতরূপাযো’’তি. ‘‘অসয্হমস্স কম্মং আরোপেত্ৰা তং কাতুং অসক্কোন্তং তং তেন দোসেন মারেস্সামা’’তি. ‘‘কিং পন অসয্হকম্ম’’ন্তি? ‘‘মহারাজ, উয্যানং নাম সারভূমিযং রোপিতং পটিজগ্গিযমানং তীহি চতূহি সংৰচ্ছরেহি ফলং দেতি. তুম্হে তং পক্কোসাপেত্ৰা ‘স্ৰে উয্যানং কীল়িস্সাম, উয্যানং মে মাপেহী’তি ৰদথ, সো মাপেতুং ন সক্খিস্সতি. অথ নং তস্মিং দোসে মারেস্সামা’’তি.

রাজা বোধিসত্তং আমন্তেত্ৰা ‘‘পণ্ডিত, ময্হং পুরাণউয্যানে চিরং কীল়িম্হ, ইদানি নৰউয্যানে কীল়িতুকামম্হ, স্ৰে কীল়িস্সাম, উয্যানং নো মাপেহি, সচে মাপেতুং ন সক্খিস্সসি, জীৰিতং তে নত্থী’’তি. বোধিসত্তো ‘‘কাল়কেন লঞ্জং অলভমানেন রাজা অন্তরে পরিভিন্নো ভৰিস্সতী’’তি ঞত্ৰা ‘‘সক্কোন্তো জানিস্সামি, মহারাজা’’তি ৰত্ৰা গেহং গন্ত্ৰা সুভোজনং ভুঞ্জিত্ৰা চিন্তযমানো সযনে নিপজ্জি, সক্কস্স ভৰনং উণ্হাকারং দস্সেসি. সক্কো ¶ আৰজ্জেন্তো বোধিসত্তস্স চিত্তং ঞত্ৰা ৰেগেনাগন্ত্ৰা সিরিগব্ভং পৰিসিত্ৰা আকাসে ঠত্ৰা ‘‘কিং চিন্তেসি পণ্ডিতা’’তি পুচ্ছি. ‘‘কোসি ত্ৰ’’ন্তি? ‘‘সক্কোহমস্মী’’তি. ‘‘রাজা মং ‘উয্যানং মাপেহী’তি আহ, তং চিন্তেমী’’তি. ‘‘পণ্ডিত, মা চিন্তযি, অহং তে নন্দনৰনচিত্তলতাৰনসদিসং উয্যানং মাপেস্সামি, কতরস্মিং ঠানে মাপেমী’’তি? ‘‘অসুকট্ঠানে মাপেহী’’তি. সক্কো মাপেত্ৰা দেৰপুরমেৰ গতো.

পুনদিৰসে বোধিসত্তো উয্যানং পচ্চক্খতো দিস্ৰা গন্ত্ৰা রঞ্ঞো আরোচেসি – ‘‘নিট্ঠিতং তে, মহারাজ, উয্যানং, কীল়স্সূ’’তি. রাজা গন্ত্ৰা অট্ঠারসহত্থেন মনোসিলাৰণ্ণেন পাকারেন পরিক্খিত্তং দ্ৰারট্টালকসম্পন্নং পুপ্ফফলভারভরিতনানারুক্খপটিমণ্ডিতং ¶ উয্যানং দিস্ৰা কাল়কং পুচ্ছি – ‘‘পণ্ডিতেন অম্হাকং ৰচনং কতং, ইদানি কিং করোমা’’তি. ‘‘মহারাজ, একরত্তেন উয্যানং মাপেতুং সক্কোন্তো রজ্জং গহেতুং কিং ন সক্কোতী’’তি? ‘‘ইদানি কিং করোমা’’তি? ‘‘অপরম্পি নং অসয্হকম্মং কারেমা’’তি. ‘‘কিং কম্মং নামা’’তি? ‘‘সত্তরতনমযং পোক্খরণিং মাপেমা’’তি. রাজা ‘‘সাধূ’’তি বোধিসত্তং আমন্তেত্ৰা ‘‘আচরিয, উয্যানং তাৰ তে মাপিতং ¶ , এতস্স পন অনুচ্ছৰিকং সত্তরতনমযং পোক্খরণিং মাপেহি. সচে মাপেতুং ন সক্খিস্সসি, জীৰিতং তে নত্থী’’তি আহ. বোধিসত্তো ‘‘সাধু, মহারাজ, সক্কোন্তো মাপেস্সামী’’তি আহ. অথস্স সক্কো পোক্খরণিং মাপেসি সোভগ্গপ্পত্তং সততিত্থং সহস্সৰঙ্কং পঞ্চৰণ্ণপদুমসঞ্ছন্নং নন্দনপোক্খরণিসদিসং.

পুনদিৰসে বোধিসত্তো তম্পি পচ্চক্খং কত্ৰা রঞ্ঞো আরোচেসি – ‘‘মাপিতা, দেৰ, পোক্খরণী’’তি. রাজা তম্পি দিস্ৰা ‘‘ইদানি কিং করোমা’’তি কাল়কং পুচ্ছি. ‘‘উয্যানস্স অনুচ্ছৰিকং গেহং মাপেতুং আণাপেহি, দেৰা’’তি. রাজা বোধিসত্তং আমন্তেত্ৰা ‘‘ইদানি, আচরিয, ইমস্স উয্যানস্স চেৰ পোক্খরণিযা চ অনুচ্ছৰিকং সব্বদন্তমযং গেহং মাপেহি, নো চে মাপেস্সসি, জীৰিতং তে নত্থী’’তি আহ. অথস্স সক্কো গেহম্পি মাপেসি. বোধিসত্তো পুনদিৰসে তম্পি পচ্চক্খং কত্ৰা রঞ্ঞো আরোচেসি. রাজা তম্পি দিস্ৰা ‘‘ইদানি কিং করোমা’’তি কাল়কং পুচ্ছি. ‘‘গেহস্স অনুচ্ছৰিকং মণিং মাপেতুং আণাপেহি, মহারাজা’’তি আহ. রাজা বোধিসত্তং আমন্তেত্ৰা ‘‘পণ্ডিত, ইমস্স দন্তমযগেহস্স অনুচ্ছৰিকং মণিং মাপেহি, মণিআলোকেন ৰিচরিস্সাম. সচে মাপেতুং ন সক্কোসি, জীৰিতং তে নত্থী’’তি আহ. অথস্স সক্কো মণিম্পি মাপেসি.

বোধিসত্তো ¶ পুনদিৰসে তং পচ্চক্খং কত্ৰা রঞ্ঞো আরোচেসি ¶ . রাজা তম্পি দিস্ৰা ‘‘ইদানি কিং করিস্সামা’’তি কাল়কং পুচ্ছি. ‘‘মহারাজ, ধম্মধজব্রাহ্মণস্স ইচ্ছিতিচ্ছিতদাযিকা দেৰতা অত্থি মঞ্ঞে, ইদানি যং দেৰতাপি মাপেতুং ন সক্কোতি, তং আণাপেহি. চতুরঙ্গসমন্নাগতং নাম মনুস্সং দেৰতাপি মাপেতুং ন সক্কোতি, তস্মা ‘চতুরঙ্গসমন্নাগতং মে উয্যানপালং মাপেহী’তি তং ৰদাহী’’তি. রাজা বোধিসত্তং আমন্তেত্ৰা ‘‘আচরিয, তযা অম্হাকং উয্যানং, পোক্খরণী, দন্তমযপাসাদো, তস্স আলোককরণত্থায মণিরতনঞ্চ মাপিতং, ইদানি মে উয্যানরক্খকং চতুরঙ্গসমন্নাগতং উয্যানপালং মাপেহি, নো চে মাপেস্সসি, জীৰিতং তে নত্থী’’তি আহ. বোধিসত্তো ‘‘হোতু, লভমানো জানিস্সামী’’তি গেহং গন্ত্ৰা সুভোজনং ভুঞ্জিত্ৰা নিপন্নো পচ্চূসকালে পবুজ্ঝিত্ৰা সযনপীঠে নিসিন্নো চিন্তেসি – ‘‘সক্কো দেৰরাজা যং অত্তনা সক্কা মাপেতুং, তং মাপেসি, চতুরঙ্গসমন্নাগতং পন উয্যানপালং ন সক্কা মাপেতুং, এৰং সন্তে ¶ পরেসং হত্থে মরণতো অরঞ্ঞে অনাথমরণমেৰ ৰরতর’’ন্তি. সো কস্সচি অনারোচেত্ৰা পাসাদা ওতরিত্ৰা অগ্গদ্ৰারেনেৰ নগরা নিক্খমিত্ৰা অরঞ্ঞং পৰিসিত্ৰা অঞ্ঞতরস্মিং রুক্খমূলে সতং ধম্মং আৰজ্জমানো নিসীদি.

সক্কো তং কারণং ঞত্ৰা ৰনচরকো ৰিয হুত্ৰা বোধিসত্তং উপসঙ্কমিত্ৰা ‘‘ব্রাহ্মণ, ত্ৰং সুখুমালো, অদিট্ঠপুব্বদুক্খরূপো ৰিয ইমং অরঞ্ঞং পৰিসিত্ৰা কিং করোন্তো নিসিন্নোসী’’তি ইমমত্থং পুচ্ছন্তো পঠমং গাথমাহ –

১৩৬.

‘‘সুখং জীৰিতরূপোসি, রট্ঠা ৰিৰনমাগতো;

সো এককো রুক্খমূলে, কপণো ৰিয ঝাযসী’’তি.

তত্থ সুখং জীৰিতরূপোসীতি ত্ৰং সুখেন জীৰিতসদিসো সুখেধিতো সুখপরিহতো ৰিয. রট্ঠাতি আকিণ্ণমনুস্সট্ঠানা. ৰিৰনমাগতোতি নিরুদকট্ঠানং অরঞ্ঞং পৰিট্ঠো. রুক্খমূলেতি রুক্খসমীপে. কপণো ৰিয ¶ ঝাযসীতি কপণো ৰিয এককো নিসিন্নো ঝাযসি পজ্ঝাযসি, কিং নামেতং চিন্তেসীতি পুচ্ছি.

তং সুত্ৰা বোধিসত্তো দুতিযং গাথমাহ –

১৪০.

‘‘সুখং ¶ জীৰিতরূপোস্মি, রট্ঠা ৰিৰনমাগতো;

সো এককো রুক্খমূলে, কপণো ৰিয ঝাযামি;

সতং ধম্মং অনুস্সর’’ন্তি.

তত্থ সতং ধম্মং অনুস্সরন্তি, সম্ম, সচ্চমেতং, অহং সুখং জীৰিতরূপো রট্ঠা চ ৰিৰনমাগতো, সোহং এককোৰ ইমস্মিং রুক্খমূলে নিসীদিত্ৰা কপণো ৰিয ঝাযামি. যং পন ৰদেসি ‘‘কিং নামেতং চিন্তেসী’’তি, তং তে পৰেদেমি ‘‘সতং ধম্ম’’ন্তি. অহঞ্হি সতং ধম্মং অনুস্সরন্তো ইধ নিসিন্নো. সতং ধম্মন্তি বুদ্ধপচ্চেকবুদ্ধবুদ্ধসাৰকানং সতং সপ্পুরিসানং পণ্ডিতানং ধম্মং. লাভো অলাভো যসো অযসো নিন্দা পসংসা সুখং দুক্খন্তি অযঞ্হি অট্ঠৰিধো লোকধম্মো. ইমিনা পন অব্ভাহতা সন্তো ন কম্পন্তি ন পৰেধেন্তি, অযমেত্থ অকম্পনসঙ্খাতো সতং ধম্মো ইমং অনুস্সরন্তো নিসিন্নোম্হীতি দীপেতি.

অথ ¶ নং সক্কো ‘‘এৰং সন্তে, ব্রাহ্মণ, ইমস্মিং ঠানে কস্মা নিসিন্নোসী’’তি. ‘‘রাজা চতুরঙ্গসমন্নাগতং উয্যানপালং আহরাপেতি, তাদিসং ন সক্কোমি লদ্ধুং, সোহং ‘কিং মে পরস্স হত্থে মরণেন, অরঞ্ঞং পৰিসিত্ৰা অনাথমরণং মরিস্সামী’তি চিন্তেত্ৰা ইধাগন্ত্ৰা নিসিন্নো’’তি. ‘‘ব্রাহ্মণ, অহং সক্কো দেৰরাজা, মযা তে উয্যানাদীনি মাপিতানি, চতুরঙ্গসমন্নাগতং উয্যানপালং মাপেতুং ন সক্কা, তুম্হাকং রঞ্ঞো সীসপ্পসাধনকপ্পকো ছত্তপাণি নাম, সো চতুরঙ্গসমন্নাগতো, চতুরঙ্গসমন্নাগতেন উয্যানপালেন অত্থে সতি এতং কপ্পকং উয্যানপালং কাতুং ৰদেহী’’তি. ইতি সক্কো বোধিসত্তস্স ওৰাদং দত্ৰা ‘‘মা ভাযী’’তি সমস্সাসেত্ৰা অত্তনো দেৰপুরমেৰ গতো.

বোধিসত্তো গেহং ¶ গন্ত্ৰা ভুত্তপাতরাসো রাজদ্ৰারং গন্ত্ৰা ছত্তপাণিম্পি তত্থেৰ দিস্ৰা হত্থে গহেত্ৰা ‘‘ত্ৰং কির, সম্ম ছত্তপাণি, চতুরঙ্গসমন্নাগতোসী’’তি পুচ্ছিত্ৰা ‘‘কো তে ময্হং চতুরঙ্গসমন্নাগতভাৰং আচিক্খী’’তি ৰুত্তে ‘‘সক্কো, দেৰরাজা’’তি ৰত্ৰা ‘‘কিংকারণা আচিক্খী’’তি পুট্ঠো ‘‘ইমিনা নাম কারণেনা’’তি সব্বং আচিক্খি. সো ‘‘আম, অহং চতুরঙ্গসমন্নাগতো’’তি আহ. অথ নং বোধিসত্তো হত্থে গহেত্ৰাৰ রঞ্ঞো সন্তিকং গন্ত্ৰা ‘‘অযং, মহারাজ, ছত্তপাণি, চতুরঙ্গসমন্নাগতো, চতুরঙ্গসমন্নাগতেন উয্যানপালেন অত্থে সতি ইমং উয্যানপালং করোথা’’তি আহ. অথ নং রাজা ‘‘ত্ৰং কির চতুরঙ্গসমন্নাগতোসী’’তি পুচ্ছি. ‘‘আম, মহারাজা’’তি. ‘‘কতমেহি চতুরঙ্গেহি সমন্নাগতোসী’’তি?

‘‘অনুসূযকো ¶ অহং দেৰ, অমজ্জপাযকো অহং;

নিস্নেহকো অহং দেৰ, অক্কোধনং অধিট্ঠিতো’’তি.

‘‘ময্হঞ্হি, মহারাজ, উসূযা নাম নত্থি, মজ্জং মে ন পিৰিতপুব্বং, পরেসু মে স্নেহো ৰা কোধো ৰা ন ভূতপূব্বো. ইমেহি চতূহি অঙ্গেহি সমন্নাগতোম্হী’’তি.

অথ নং রাজা, ভো ছত্তপাণি, ‘‘অনুসূযকোস্মী’’তি ৰদসীতি. ‘‘আম, দেৰ, অনুসূযকোম্হী’’তি. ‘‘কিং আরম্মণং দিস্ৰা অনুসূযকো জাতোসী’’তি? ‘‘সুণাহি দেৰা’’তি অত্তনো অনুসূযককারণং কথেন্তো ইমং গাথমাহ –

‘‘ইত্থিযা ¶ কারণা রাজ, বন্ধাপেসিং পুরোহিতং;

সো মং অত্থে নিৰেদেসি, তস্মাহং অনুসূযকো’’তি.

তস্সত্থো – অহং, দেৰ, পুব্বে ইমস্মিংযেৰ বারাণসিনগরে তাদিসোৰ রাজা হুত্ৰা ইত্থিযা কারণা পুরোহিতং বন্ধাপেসিং.

‘‘অবদ্ধা তত্থ বজ্ঝন্তি, যত্থ বালা পভাসরে;

বদ্ধাপি তত্থ মুচ্চন্তি, যত্থ ধীরা পভাসরে’’তি. (জা. ১.১.১২০) –

ইমস্মিঞ্হি ¶ জাতকে আগতনযেনেৰ একস্মিং কালে অযং ছত্তপাণি রাজা হুত্ৰা চতুসট্ঠিযা পাদমূলিকেহি সদ্ধিং সম্পদুস্সিত্ৰা বোধিসত্তং অত্তনো মনোরথং অপূরেন্তং নাসেতুকামায দেৰিযা পরিভিন্নো বন্ধাপেসি. তদা নং বন্ধিত্ৰা আনীতো বোধিসত্তো যথাভূতং দেৰিযা দোসং আরোপেত্ৰা সযং মুত্তো রঞ্ঞা বন্ধাপিতে সব্বেপি তে পাদমূলিকে মোচেত্ৰা ‘‘এতেসঞ্চ দেৰিযা চ অপরাধং খমথ, মহারাজা’’তি ওৰদি. সব্বং হেট্ঠা ৰুত্তনযেনেৰ ৰিত্থারতো ৰেদিতব্বং. তং সন্ধাযাহ –

‘‘ইত্থিযা কারণা রাজ, বন্ধাপেসিং পুরোহিতং;

সো মং অত্থে নিৰেদেসি, তস্মাহং অনুসূযকো’’তি.

তদা পন সোহং চিন্তেসিং – ‘‘অহং সোল়স সহস্সইত্থিযো পহায এতং একমেৰ কিলেসৰসেন সঙ্গণ্হন্তোপি সন্তপ্পেতুং নাসক্খিং, এৰং দুপ্পূরণীযানং ইত্থীনং কুজ্ঝনং নাম নিৰত্থৰত্থে ¶ কিলিস্সন্তে ‘কস্মা কিলিস্সসী’তি কুজ্ঝনসদিসং হোতি, ভুত্তভত্তে গূথভাৰং আপজ্জন্তে ‘কস্মা এতং সভাৰং আপজ্জসী’তি কুজ্ঝনসদিসং হোতি. ‘ইতো দানি পট্ঠায যাৰ অরহত্তং ন পাপুণামি, তাৰ কিলেসং নিস্সায মযি উসূযা মা উপ্পজ্জতূ’’’তি অধিট্ঠহিং. ততো পট্ঠায অনুসূযকো জাতো. ইদং সন্ধায – ‘‘তস্মাহং অনুসূযকো’’তি আহ.

অথ নং রাজা ‘‘সম্ম ছত্তপাণি, কিং আরম্মণং দিস্ৰা অমজ্জপো জাতোসী’’তি পুচ্ছি. সো তং কারণং আচিক্খন্তো ইমং গাথমাহ –

‘‘মত্তো ¶ অহং মহারাজ, পুত্তমংসানি খাদযিং;

তস্স সোকেনহং ফুট্ঠো, মজ্জপানং ৰিৰজ্জযি’’ন্তি.

অহং, মহারাজ, পুব্বে তাদিসো বারাণসিরাজা হুত্ৰা মজ্জেন ৰিনা ৰত্তিতুং নাসক্খিং, অমংসকভত্তম্পি ভুঞ্জিতুং নাসক্খিং. নগরে উপোসথদিৰসেসু মাঘাতো হোতি, ভত্তকারকো পক্খস্স তেরসিযঞ্ঞেৰ মংসং গহেত্ৰা ঠপেসি, তং দুন্নিক্খিত্তং সুনখা খাদিংসু. ভত্তকারকো উপোসথদিৰসে মংসং অলভিত্ৰা রঞ্ঞো নানগ্গরসভোজনং পচিত্ৰা পাসাদং আরোপেত্ৰা উপনামেতুং অসক্কোন্তো দেৰিং উপসঙ্কমিত্ৰা ‘‘দেৰি, অজ্জ মে মংসং ন লদ্ধং, অমংসকভোজনং নাম উপনামেতুং ন সক্কোমি, কিন্তি করোমী’’তি আহ. ‘‘তাত, ময্হং পুত্তো রঞ্ঞা পিযো মনাপো, পুত্তং মে দিস্ৰা রাজা তমেৰ চুম্বন্তো পরিস্সজন্তো অত্তনো ¶ অত্থিভাৰম্পি ন জানাতি, অহং পুত্তং মণ্ডেত্ৰা রঞ্ঞো ঊরুম্হি নিসীদাপেয্যং, রঞ্ঞো পুত্তেন সদ্ধিং কীল়নকালে ত্ৰং ভত্তং উপনেয্যাসী’’তি. সা এৰং ৰত্ৰা অত্তনো পুত্তং অলঙ্কতাভরণং মণ্ডেত্ৰা রঞ্ঞো ঊরুম্হি নিসীদাপেসি. রঞ্ঞো পুত্তেন সদ্ধিং কীল়নকালে ভত্তকারকো ভত্তং উপনামেসি. রাজা সুরামদমত্তো পাতিযং মংসং অদিস্ৰা ‘‘মংসং কহ’’ন্তি পুচ্ছিত্ৰা ‘‘অজ্জ, দেৰ, উপোসথদিৰসং মাঘাততায মংসং ন লদ্ধ’’ন্তি ৰুত্তে ‘‘ময্হং মংসং নাম দুল্লভ’’ন্তি ৰত্ৰা ঊরুম্হি নিসিন্নস্স পিযপুত্তস্স গীৰং ৰট্টেত্ৰা জীৰিতক্খযং পাপেত্ৰা ভত্তকারকস্স পুরতো খিপিত্ৰা ‘‘ৰেগেন সম্পাদেত্ৰা আহরা’’তি আহ. ভত্তকারকো তথা অকাসি, রাজা পুত্তমংসেন ভত্তং ভুঞ্জি. রঞ্ঞো ভযেন একোপি কন্দিতুং ৰা রোদিতুং ৰা কথেতুং ৰা সমত্থো নাম নাহোসি.

রাজা ভুঞ্জিত্ৰা সযনপিট্ঠে নিদ্দং উপগন্ত্ৰা পচ্চূসকালে পবুজ্ঝিত্ৰা ৰিগতমদো ‘‘পুত্তং মে আনেথা’’তি আহ. তস্মিং কালে দেৰী কন্দমানা পাদমূলে পতি. ‘‘কিং, ভদ্দে’’তি চ ৰুত্তে ¶ , ‘‘দেৰ, হিয্যো তে পুত্তং মারেত্ৰা পুত্তমংসেন ভত্তং ভুত্ত’’ন্তি আহ. রাজা পুত্তসোকেন রোদিত্ৰা কন্দিত্ৰা ‘‘ইদং মে দুক্খং সুরাপানং নিস্সায উপ্পন্ন’’ন্তি সুরাপানে দোসং দিস্ৰা ‘‘ইতো পট্ঠায যাৰ অরহত্তং ন পাপুণামি, তাৰ এৰরূপং ৰিনাসকারকং ¶ সুরং নাম ন পিৰিস্সামী’’তি পংসুং গহেত্ৰা মুখং পুঞ্ছিত্ৰা অধিট্ঠাসি. ততো পট্ঠায মজ্জং নাম ন পিৰিং. ইমমত্থং সন্ধায – ‘‘মত্তো অহং, মহারাজা’’তি ইমং গাথমাহ.

অথ নং রাজা ‘‘কিং পন, সম্ম ছত্তপাণি, আরম্মণং দিস্ৰা নিস্নেহো জাতোসী’’তি পুচ্ছি. সো তং কারণং আচিক্খন্তো ইমং গাথমাহ –

‘‘কিতৰাসো নামহং রাজ, পুত্তো পচ্চেকবোধি মে;

পত্তং ভিন্দিত্ৰা চৰিতো, নিস্নেহো তস্স কারণা’’তি.

মহারাজ, পুব্বে অহং বারাণসিযংযেৰ কিতৰাসো নাম রাজা. তস্স মে পুত্তো ৰিজাযি. লক্খণপাঠকা তং দিস্ৰা ‘‘মহারাজ, অযং কুমারো পানীযং অলভিত্ৰা মরিস্সতী’’তি আহংসু. ‘‘দুট্ঠকুমারো’’তিস্স নামং অহোসি. সো ৰিঞ্ঞুতং পত্তো ওপরজ্জং কারেসি, রাজা কুমারং পুরতো ৰা পচ্ছতো ৰা কত্ৰা ৰিচরি, পানীযং অলভিত্ৰা মরণভযেন চস্স চতূসু দ্ৰারেসু অন্তোনগরেসু চ তত্থ তত্থ পোক্খরণিযো কারেসি, চতুক্কাদীসু মণ্ডপে কারেত্ৰা পানীযচাটিযো ঠপাপেসি. সো একদিৰসে অলঙ্কতপটিযত্তো পাতোৰ উয্যানং গচ্ছন্তো অন্তরামগ্গে পচ্চেকবুদ্ধং পস্সি. মহাজনোপি পচ্চেকবুদ্ধং দিস্ৰা তমেৰ ৰন্দতি ¶ পসংসতি, অঞ্জলিঞ্চস্স পগ্গণ্হাতি.

কুমারো চিন্তেসি – ‘‘মাদিসেন সদ্ধিং গচ্ছন্তা ইমং মুণ্ডকং ৰন্দন্তি পসংসন্তি, অঞ্জলিঞ্চস্স পগ্গণ্হন্তী’’তি. সো কুপিতো হত্থিক্খন্ধতো ওরুয্হ পচ্চেকবুদ্ধং উপসঙ্কমিত্ৰা ‘‘লদ্ধং তে, সমণ, ভত্ত’’ন্তি ৰত্ৰা ‘‘আম, কুমারা’’তি ৰুত্তে তস্স হত্থতো পত্তং গহেত্ৰা ভূমিযং পাতেত্ৰা সদ্ধিং ভত্তেন মদ্দিত্ৰা পাদপ্পহারেন চুণ্ণৰিচুণ্ণং অকাসি. পচ্চেকবুদ্ধো ‘‘নট্ঠো ৰতাযং সত্তো’’তি তস্স মুখং ওলোকেসি. কুমারো ‘‘অহং, সমণ, কিতৰাসরঞ্ঞো পুত্তো, নামেন দুট্ঠকুমারো নাম, ত্ৰং মে কুদ্ধো অক্খীনি উম্মীলেত্ৰা ওলোকেন্তো কিং করিস্সসী’’তি আহ.

পচ্চেকবুদ্ধো ¶ ছিন্নভত্তো হুত্ৰা ৰেহাসং অব্ভুগ্গন্ত্ৰা উত্তরহিমৰন্তে নন্দনমূলপব্ভারমেৰ গতো. কুমারস্সাপি তঙ্খণঞ্ঞেৰ পাপকম্মং পরিপচ্চি. সো ‘‘ডয্হামি ডয্হামী’’তি সমুগ্গতসরীরডাহো তত্থেৰ পতি. তত্থ তত্থেৰ যত্তকং পানীযং, তত্তকং পানীযং সব্বং ছিজ্জি, মাতিকা সুস্সিংসু, তত্থেৰ জীৰিতক্খযং ¶ পত্ৰা অৰীচিম্হি নিব্বত্তি. রাজা তং পৰত্তিং সুত্ৰা পুত্তসোকেন অভিভূতো চিন্তেসি – ‘‘অযং মে সোকো পিযৰত্থুতো উপ্পজ্জি, সচে মে স্নেহো নাভৰিস্স, সোকো ন উপ্পজ্জিস্স, ইতো দানি মে পট্ঠায সৰিঞ্ঞাণকে ৰা অৰিঞ্ঞাণকে ৰা কিস্মিঞ্চি ৰত্থুস্মিং স্নেহো নাম মা উপ্পজ্জতূ’’তি অধিট্ঠাসি, ততো পট্ঠায স্নেহো নাম নত্থি. তং সন্ধায ‘‘কিতৰাসো নামাহ’’ন্তি গাথমাহ.

তত্থ পুত্তো পচ্চেকবোধি মে. পত্তং ভিন্দিত্ৰা চৰিতোতি মম পুত্তো পচ্চেকবোধিপত্তং ভিন্দিত্ৰা চৰিতোতি অত্থো. নিস্নেহো তস্স কারণাতি তদা উপ্পন্নস্নেহৰত্থুস্স কারণা অহং নিস্নেহো জাতোতি অত্থো.

অথ নং রাজা ‘‘কিং পন, সম্ম, আরম্মণং দিস্ৰা নিক্কোধো জাতোসী’’তি পুচ্ছি. সো তং কারণং আচিক্খন্তো ইমং গাথমাহ –

‘‘অরকো হুত্ৰা মেত্তচিত্তং, সত্ত ৰস্সানি ভাৰযিং;

সত্ত কপ্পে ব্রহ্মলোকে, তস্মা অক্কোধনো অহ’’ন্তি.

তস্সত্থো – অহং, মহারাজ, অরকো নাম তাপসো হুত্ৰা সত্ত ৰস্সানি মেত্তচিত্তং ভাৰেত্ৰা সত্ত সংৰট্টৰিৰট্টকপ্পে ব্রহ্মলোকে ৰসিং, তস্মা অহং দীঘরত্তং মেত্তাভাৰনায আচিণ্ণপরিচিণ্ণত্তা অক্কোধনো জাতোতি.

এৰং ছত্তপাণিনা অত্তনো চতূসু অঙ্গেসু কথিতেসু রাজা পরিসায ইঙ্গিতসঞ্ঞং অদাসি. তঙ্খণঞ্ঞেৰ অমচ্চা চ ব্রাহ্মণগহপতিকাদযো ¶ চ উট্ঠহিত্ৰা ‘‘অরে লঞ্জখাদক দুট্ঠচোর, ত্ৰং লঞ্জং অলভিত্ৰা পণ্ডিতং উপৰদিত্ৰা মারেতুকামো জাতো’’তি কাল়কং সেনাপতিং হত্থপাদেসু গহেত্ৰা রাজনিৰেসনা ওতারেত্ৰা গহিতগহিতেহেৰ পাসাণমুগ্গরেহি সীসং ভিন্দিত্ৰা জীৰিতক্খযং পাপেত্ৰা পাদেসু গহেত্ৰা কড্ঢন্তা সঙ্কারট্ঠানে ছড্ডেসুং. ততো পট্ঠায রাজা ধম্মেন রজ্জং কারেন্তো যথাকম্মং গতো.

সত্থা ¶ ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা কাল়কসেনাপতি দেৰদত্তো অহোসি, ছত্তপাণিকপ্পকো সারিপুত্তো, সক্কো অনুরুদ্ধো, ধম্মধজো পন অহমেৰ অহোসি’’ন্তি.

ধম্মধজজাতকৰণ্ণনা দসমা.

বীরণথম্ভৰগ্গো সত্তমো.

তস্সুদ্দানং –

সোমদত্তঞ্চ উচ্ছিট্ঠং, কুরু পুণ্ণনদীপি চ;

কচ্ছপমচ্ছসেগ্গু চ, কূটৰাণিজগরহি;

ধম্মধজন্তি তে দস.

৮. কাসাৰৰগ্গো

[২২১] ১. কাসাৰজাতকৰণ্ণনা

অনিক্কসাৰো ¶ কাসাৰন্তি ইদং সত্থা জেতৰনে ৰিহরন্তো দেৰদত্তং আরব্ভ কথেসি. ৰত্থু পন রাজগহে সমুট্ঠিতং. একস্মিং সমযে ধম্মসেনাপতি পঞ্চহি ভিক্খুসতেহি সদ্ধিং ৰেল়ুৰনে ৰিহরতি. দেৰদত্তোপি অত্তনো অনুরূপায দুস্সীলপরিসায পরিৰুতো গযাসীসে ৰিহরতি. তস্মিং সমযে রাজগহৰাসিনো ছন্দকং সঙ্ঘরিত্ৰা দানং সজ্জযিংসু. অথেকো ৰোহারত্থায আগতৰাণিজো ইমং সাটকং ৰিস্সজ্জেত্ৰা ‘‘মম্পি পত্তিকং করোথা’’তি মহগ্ঘং গন্ধকাসাৰং অদাসি. নাগরা মহাদানং পৰত্তযিংসু, সব্বং ছন্দকেন সঙ্কড্ঢিতং কহাপণেহেৰ নিট্ঠাসি. সো সাটকো অতিরেকো অহোসি. মহাজনো সন্নিপতিত্ৰা ‘‘অযং গন্ধকাসাৰসাটকো অতিরেকো. কস্স নং দেম, কিং সারিপুত্তত্থেরস্স, উদাহু দেৰদত্তস্সা’’তি মন্তযিংসু.

তত্থেকে ‘‘সারিপুত্তত্থেরস্সা’’তি আহংসু. অপরে ‘‘সারিপুত্তত্থেরো কতিপাহং ৰসিত্ৰা যথারুচি পক্কমিস্সতি ¶ , দেৰদত্তত্থেরো পন নিবদ্ধং অম্হাকং নগরমেৰ উপনিস্সায ৰিহরতি, মঙ্গলামঙ্গলেসু অযমেৰ অম্হাকং ¶ অৰস্সযো, দেৰদত্তস্স দস্সামা’’তি আহংসু. সম্বহুলিকং করোন্তেসুপি ‘‘দেৰদত্তস্স দস্সামা’’তি ৰত্তারো বহুতরা অহেসুং, অথ নং দেৰদত্তস্স অদংসু. দেৰদত্তো তস্স দসা ছিন্দাপেত্ৰা ওৰট্টিকং সিব্বাপেত্ৰা রজাপেত্ৰা সুৰণ্ণপট্টৰণ্ণং কত্ৰা পারুপি. তস্মিং কালে তিংসমত্তা ভিক্খূ রাজগহা নিক্খমিত্ৰা সাৰত্থিং গন্ত্ৰা সত্থারং ৰন্দিত্ৰা কতপটিসন্থারা তং পৰত্তিং আরোচেত্ৰা ‘‘এৰং, ভন্তে, অত্তনো অননুচ্ছৰিকং অরহদ্ধজং পারুপী’’তি আরোচেসুং. সত্থা ‘‘ন, ভিক্খৰে, দেৰদত্তো ইদানেৰ অত্তনো অননুরূপং অরহদ্ধজং পরিদহতি, পুব্বেপি পরিদহিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে হত্থিকুলে নিব্বত্তিত্ৰা ৰযপ্পত্তো অসীতিসহস্সমত্তৰারণপরিৰারো যূথপতি হুত্ৰা অরঞ্ঞাযতনে ৰসতি. অথেকো দুগ্গতমনুস্সো বারাণসিযং ৰিহরন্তো দন্তকারৰীথিযং দন্তকারে দন্তৰলযাদীনি করোন্তে দিস্ৰা ¶ ‘‘হত্থিদন্তে লভিত্ৰা গণ্হিস্সথা’’তি পুচ্ছি. তে ‘‘আম গণ্হিস্সামা’’তি আহংসু. সো আৰুধং আদায কাসাৰৰত্থৰসনো পচ্চেকবুদ্ধৰেসং গণ্হিত্ৰা পটিসীসকং পটিমুঞ্চিত্ৰা হত্থিৰীথিযং ঠত্ৰা আৰুধেন হত্থিং মারেত্ৰা দন্তে আদায বারাণসিযং ৰিক্কিণন্তো জীৰিকং কপ্পেসি. সো অপরভাগে বোধিসত্তস্স পরিৰারহত্থীনং সব্বপচ্ছিমং হত্থিং মারেতুং আরভি. হত্থিনো দেৰসিকং হত্থীসু পরিহাযন্তেসু ‘‘কেন নু খো কারণেন হত্থিনো পরিহাযন্তী’’তি বোধিসত্তস্স আরোচেসুং.

বোধিসত্তো পরিগ্গণ্হন্তো ‘‘পচ্চেকবুদ্ধৰেসং গহেত্ৰা হত্থিৰীথিপরিযন্তে একো পুরিসো তিট্ঠতি, কচ্চি নু খো সো মারেতি, পরিগ্গণ্হিস্সামি ন’’ন্তি একদিৰসং হত্থী পুরতো কত্ৰা সযং ¶ পচ্ছতো অহোসি. সো বোধিসত্তং দিস্ৰা আৰুধং আদায পক্খন্দি. বোধিসত্তো নিৰত্তিত্ৰা ঠিতো ‘‘ভূমিযং পোথেত্ৰা মারেস্সামি ন’’ন্তি সোণ্ডং পসারেত্ৰা তেন পরিদহিতানি কাসাৰানি দিস্ৰা ‘‘ইমং অরহদ্ধজং মযা গরুং কাতুং ৰট্টতী’’তি সোণ্ডং পটিসংহরিত্ৰা ‘‘অম্ভো পুরিস, ননু এস অরহদ্ধজো অননুচ্ছৰিকো তুয্হং, কস্মা এতং পরিদহসী’’তি ইমা গাথা অৰোচ –

১৪১.

‘‘অনিক্কসাৰো কাসাৰং, যো ৰত্থং পরিদহিস্সতি;

অপেতো দমসচ্চেন, ন সো কাসাৰমরহতি.

১৪২.

‘‘যো ¶ চ ৰন্তকসাৰস্স, সীলেসু সুসমাহিতো;

উপেতো দমসচ্চেন, স ৰে কাসাৰমরহতী’’তি.

তত্থ অনিক্কসাৰোতি কসাৰো ৰুচ্চতি রাগো দোসো মোহো মক্খো পল়াসো ইস্সা মচ্ছরিযং মাযা সাঠেয্যং থম্ভো সারম্ভো মানো অতিমানো মদো পমাদো, সব্বে অকুসলা ধম্মা সব্বে দুচ্চরিতা সব্বং ভৰগামিকম্মং দিযড্ঢকিলেসসহস্সং, এসো কসাৰো নাম. সো যস্স পুগ্গলস্স অপ্পহীনো সন্তানতো অনিস্সট্ঠো অনিক্খন্তো, সো অনিক্কসাৰো নাম. কাসাৰন্তি কসাযরসপীতং অরহদ্ধজভূতং. যো ৰত্থং পরিদহিস্সতীতি যো এৰরূপো হুত্ৰা এৰরূপং ৰত্থং পরিদহিস্সতি নিৰাসেতি চেৰ পারুপতি চ. অপেতো দমসচ্চেনাতি ইন্দ্রিযদমসঙ্খাতেন দমেন চ নিব্বানসঙ্খাতেন চ পরমত্থসচ্চেন অপেতো পরিৰজ্জিতো. নিস্সক্কত্থে ৰা করণৰচনং, এতস্মা দমসচ্চা অপেতোতি অত্থো. ‘‘সচ্চ’’ন্তি চেত্থ ৰচীসচ্চং ¶ চতুসচ্চম্পি ৰট্টতিযেৰ. ন সো কাসাৰমরহতীতি সো পুগ্গলো অনিক্কসাৰত্তা অরহদ্ধজং কাসাৰং ন অরহতি অননুচ্ছৰিকো এতস্স.

যো চ ৰন্তকসাৰস্সাতি যো পন পুগ্গলো যথাৰুত্তস্সেৰ কসাৰস্স ৰন্তত্তা ৰন্তকসাৰো অস্স. সীলেসু সুসমাহিতোতি মগ্গসীলেসু চেৰ ফলসীলেসু চ সম্মা আহিতো, আনেত্ৰা ঠপিতো ৰিয তেসু পতিট্ঠিতো. তেহি সীলেহি সমঙ্গীভূতস্সেতং অধিৰচনং. উপেতোতি সমন্নাগতো. দমসচ্চেনাতি ৰুত্তপ্পকারেন দমেন চ সচ্চেন চ. স ৰে কাসাৰমরহতীতি সো এৰরূপো পুগ্গলো ইমং অরহদ্ধজং কাসাৰং অরহতি.

এৰং ¶ বোধিসত্তো তস্স পুরিসস্স ইমং কারণং কথেত্ৰা ‘‘ইতো পট্ঠায মা ইধ আগমি, আগচ্ছসি চে, জীৰিতং তে নত্থী’’’তি তজ্জেত্ৰা পলাপেসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা হত্থিমারকপুরিসো দেৰদত্তো অহোসি, যূথপতি পন অহমেৰ অহোসি’’ন্তি.

কাসাৰজাতকৰণ্ণনা পঠমা.

[২২২] ২. চূল়নন্দিযজাতকৰণ্ণনা

ইদং ¶ তদাচরিযৰচোতি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. একদিৰসঞ্হি ভিক্খূ ধম্মসভাযং কথং সমুট্ঠাপেসুং – ‘‘আৰুসো, দেৰদত্তো নাম কক্খল়ো ফরুসো সাহসিকো সম্মাসম্বুদ্ধে অভিমারে পযোজেসি, সিলং পৰিজ্ঝি, নাল়াগিরিং পযোজেসি, খন্তিমেত্তানুদ্দযমত্তম্পিস্স তথাগতে নত্থী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি দেৰদত্তো কক্খল়ো ফরুসো নিক্কারুণিকোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে মহানন্দিযো নাম ৰানরো অহোসি, কনিট্ঠভাতিকো পনস্স চূল়নন্দিযো নাম. তে উভোপি অসীতিসহস্সৰানরপরিৰারা হিমৰন্তপদেসে অন্ধমাতরং পটিজগ্গন্তা ৰাসং কপ্পেসুং. তে মাতরং সযনগুম্বে ঠপেত্ৰা অরঞ্ঞং পৰিসিত্ৰা মধুরানি ফলাফলানি মাতুযা পেসেন্তি. আহরণকৰানরা ¶ তস্সা ন দেন্তি, সা খুদাপীল়িতা অট্ঠিচম্মাৰসেসা কিসা অহোসি. অথ নং বোধিসত্তো আহ – ‘‘মযং, অম্ম, তুম্হাকং মধুরফলাফলানি পেসেম, তুম্হে কস্মা মিলাযথা’’তি. ‘‘তাত, নাহং লভামী’’তি. বোধিসত্তো চিন্তেসি ¶ – ‘‘মযি যূথং পরিহরন্তে মাতা মে নস্সিস্সতি, যূথং পহায মাতরংযেৰ পটিজগ্গিস্সামী’’তি. সো চূল়নন্দিযং পক্কোসিত্ৰা ‘‘তাত, ত্ৰং যূথং পরিহর, অহং মাতরং পটিজগ্গিস্সামী’’তি আহ. সোপি নং ‘‘ভাতিক, ময্হং যূথপরিহরণেন কম্মং নত্থি, অহম্পি মাতরমেৰ পটিজগ্গিস্সামী’’তি আহ. ইতি তে উভোপি একচ্ছন্দা হুত্ৰা যূথং পহায মাতরং গহেত্ৰা হিমৰন্তা ওরুয্হ পচ্চন্তে নিগ্রোধরুক্খে ৰাসং কপ্পেত্ৰা মাতরং পটিজগ্গিংসু.

অথেকো বারাণসিৰাসী ব্রাহ্মণমাণৰো তক্কসিলাযং দিসাপামোক্খস্স আচরিযস্স সন্তিকে সব্বসিপ্পানি উগ্গণ্হিত্ৰা ‘‘গমিস্সামী’’তি আচরিযং আপুচ্ছি. আচরিযো অঙ্গৰিজ্জানুভাৰেন তস্স কক্খল়ফরুসসাহসিকভাৰং ঞত্ৰা ‘‘তাত, ত্ৰং কক্খল়ো ফরুসো সাহসিকো, এৰরূপানং ন সব্বকালং একসদিসমেৰ ইজ্ঝতি, মহাৰিনাসং মহাদুক্খং পাপুণিস্সসি, মা ত্ৰং কক্খল়ো হোহি, পচ্ছানুতাপনকারণং কম্মং মা করী’’তি ¶ ওৰদিত্ৰা উয্যোজেসি. সো আচরিযং ৰন্দিত্ৰা বারাণসিং গন্ত্ৰা ঘরাৰাসং গহেত্ৰা অঞ্ঞেহি সিপ্পেহি জীৰিকং কপ্পেতুং অসক্কোন্তো ‘‘ধনুকোটিং নিস্সায জীৰিস্সামি, লুদ্দকম্মং কত্ৰা জীৰিকং কপ্পেস্সামী’’তি বারাণসিতো নিক্খমিত্ৰা পচ্চন্তগামকে ৰসন্তো ধনুকলাপসন্নদ্ধো অরঞ্ঞং পৰিসিত্ৰা নানামিগে মারেত্ৰা মংসৰিক্কযেন জীৰিকং কপ্পেসি. সো একদিৰসং অরঞ্ঞে কিঞ্চি অলভিত্ৰা আগচ্ছন্তো অঙ্গণপরিযন্তে ঠিতং নিগ্রোধরুক্খং দিস্ৰা ‘‘অপি নামেত্থ কিঞ্চি ভৰেয্যা’’তি নিগ্রোধরুক্খাভিমুখো পাযাসি.

তস্মিং খণে উভোপি তে ভাতরো মাতরং ফলানি খাদাপেত্ৰা পুরতো কত্ৰা ৰিটপব্ভন্তরে নিসিন্না তং আগচ্ছন্তং দিস্ৰা ‘‘কিং নো মাতরং করিস্সতী’’তি সাখন্তরে নিলীযিংসু. সোপি খো সাহসিকপুরিসো রুক্খমূলং আগন্ত্ৰা তং তেসং মাতরং জরাদুব্বলং অন্ধং দিস্ৰা চিন্তেসি – ‘‘কিং মে তুচ্ছহত্থগমনেন ইমং মক্কটিং ৰিজ্ঝিত্ৰা গহেত্ৰা গমিস্সামী’’তি. সো ¶ তস্সা ৰিজ্ঝনত্থায ধনুং গণ্হি. তং দিস্ৰা বোধিসত্তো ‘‘তাত চূল়নন্দিয, এসো মে পুরিসো মাতরং ৰিজ্ঝিতুকামো, অহমস্সা জীৰিতদানং দস্সামি, ত্ৰং মমচ্চযেন মাতরং পটিজগ্গেয্যাসী’’তি ৰত্ৰা সাখন্তরা নিক্খমিত্ৰা ‘‘ভো পুরিস, মা মে মাতরং ৰিজ্ঝি, এসা অন্ধা জরাদুব্বলা, অহমস্সা জীৰিতদানং দেমি, ত্ৰং এতং অমারেত্ৰা মং মারেহী’’তি তস্স পটিঞ্ঞং গহেত্ৰা সরস্স আসন্নট্ঠানে নিসীদি. সো নিক্করুণো বোধিসত্তং ৰিজ্ঝিত্ৰা পাতেত্ৰা মাতরম্পিস্স ৰিজ্ঝিতুং ¶ পুন ধনুং সন্নয্হি. তং দিস্ৰা চূল়নন্দিযো ‘‘অযং মে মাতরং ৰিজ্ঝিতুকামো, একদিৰসম্পি খো মে মাতা জীৰমানা লদ্ধজীৰিতাযেৰ নাম হোতি, জীৰিতদানমস্সা দস্সামী’’তি সাখন্তরা নিক্খমিত্ৰা ‘‘ভো পুরিস, মা মে মাতরং ৰিজ্ঝি, অহমস্সা জীৰিতদানং দম্মি, ত্ৰং মং ৰিজ্ঝিত্ৰা অম্হে দ্ৰে ভাতিকে গহেত্ৰা অম্হাকং মাতু জীৰিতদানং দেহী’’তি তস্স পটিঞ্ঞং গহেত্ৰা সরস্স আসন্নট্ঠানে নিসীদি. সো তম্পি ৰিজ্ঝিত্ৰা পাতেত্ৰা ‘‘অযং মক্কটী ঘরে দারকানং ভৰিস্সতী’’তি মাতরম্পি তেসং ৰিজ্ঝিত্ৰা পাতেত্ৰা তযোপি কাজেনাদায গেহাভিমুখো পাযাসি.

অথস্স পাপপুরিসস্স গেহে অসনি পতিত্ৰা ভরিযঞ্চ দ্ৰে দারকে চ গেহেনেৰ সদ্ধিং ঝাপেসি, পিট্ঠিৰংসথূণমত্তং অৰসিস্সি. অথস্স নং গামদ্ৰারেযেৰ একো পুরিসো দিস্ৰা তং পৰত্তিং আরোচেসি. সো পুত্তদারসোকেন ¶ অভিভূতো তস্মিংযেৰ ঠানে মংসকাজঞ্জ ধনুঞ্চ ছড্ডেত্ৰা ৰত্থং পহায নগ্গো বাহা পগ্গয্হ পরিদেৰমানো গন্ত্ৰা ঘরং পাৰিসি. অথস্স সা থূণা ভিজ্জিত্ৰা সীসে পতিত্ৰা সীসং ভিন্দি, পথৰী ৰিৰরং অদাসি, অৰীচিতো জালা উট্ঠহি. সো পথৰিযা গিলিযমানো আচরিযস্স ওৰাদং সরিত্ৰা ‘‘ইমং ৰত ¶ কারণং দিস্ৰা পারাসরিযব্রাহ্মণো ময্হং ওৰাদমদাসী’’তি পরিদেৰমানো ইমং গাথাদ্ৰযমাহ –

১৪৩.

‘‘ইদং তদাচরিযৰচো, পারাসরিযো যদব্রৰি;

মাসু ত্ৰং অকরি পাপং, যং ত্ৰং পচ্ছা কতং তপে.

১৪৪.

‘‘যানি করোতি পুরিসো, তানি অত্তনি পস্সতি;

কল্যাণকারী কল্যাণং, পাপকারী চ পাপকং;

যাদিসং ৰপতে বীজং, তাদিসং হরতে ফল’’ন্তি.

তস্সত্থো – যং পারাসরিযো ব্রাহ্মণো অব্রৰি – ‘‘মাসু ত্ৰং পাপং অকরী, যং কতং পচ্ছা ত্ৰঞ্ঞেৰ তপেয্যা’’তি, ইদং তং আচরিযস্স ৰচনং. যানি কাযৰচীমনোদ্ৰারেহি কম্মানি পুরিসো করোতি, তেসং ৰিপাকং পটিলভন্তো তানিযেৰ অত্তনি পস্সতি. কল্যাণকম্মকারী কল্যাণং ফলমনুভোতি, পাপকারী চ পাপকমেৰ হীনং লামকং অনিট্ঠফলং অনুভোতি. লোকস্মিম্পি হি যাদিসং ৰপতে বীজং, তাদিসং হরতে ফলং, বীজানুরূপং বীজানুচ্ছৰিকমেৰ ফলং হরতি গণ্হাতি অনুভৰতীতি. ইতি সো পরিদেৰন্তো পথৰিং পৰিসিত্ৰা অৰীচিমহানিরযে নিব্বত্তি.

সত্থা ¶ ‘‘ন, ভিক্খৰে, দেৰদত্তো ইদানেৰ, পুব্বেপি কক্খল়ো ফরুসো নিক্কারুণিকোযেৰা’’তি ৰত্ৰা ইমং ধম্মদেসনং আহরিত্ৰা জাতকং সমোধানেসি – ‘‘তদা লুদ্দকপুরিসো দেৰদত্তো অহোসি, দিসাপামোক্খো আচরিযো সারিপুত্তো, চূল়নন্দিযো আনন্দো, মাতা মহাপজাপতিগোতমী, মহানন্দিযো পন অহমেৰ অহোসি’’ন্তি.

চূল়নন্দিযজাতকৰণ্ণনা দুতিযা.

[২২৩] ৩. পুটভত্তজাতকৰণ্ণনা

নমে ¶ নমন্তস্স ভজে ভজন্তন্তি ইদং সত্থা জেতৰনে ৰিহরন্তো একং কুটুম্বিকং আরব্ভ কথেসি. সাৰত্থিনগরৰাসী কিরেকো কুটুম্বিকো একেন জনপদকুটুম্বিকেন সদ্ধিং ৰোহারং অকাসি. সো ¶ অত্তনো ভরিযং আদায তস্স ধারণকস্স সন্তিকং অগমাসি. ধারণকো ‘‘দাতুং ন সক্কোমী’’তি ন কিঞ্চি অদাসি, ইতরো কুজ্ঝিত্ৰা ভত্তং অভুঞ্জিত্ৰাৰ নিক্খমি. অথ নং অন্তরামগ্গে ছাতজ্ঝত্তং দিস্ৰা মগ্গপটিপন্না পুরিসা ‘‘ভরিযাযপি দত্ৰা ভুঞ্জাহী’’তি ভত্তপুটং অদংসু. সো তং গহেত্ৰা তস্সা অদাতুকামো হুত্ৰা ‘‘ভদ্দে, ইদং চোরানং তিট্ঠনট্ঠানং, ত্ৰং পুরতো যাহী’’তি উয্যোজেত্ৰা সব্বং ভত্তং ভুঞ্জিত্ৰা তুচ্ছপুটং দস্সেত্ৰা ‘‘ভদ্দে, অভত্তকং তুচ্ছপুটমেৰ অদংসূ’’তি আহ. সা তেন এককেনেৰ ভুত্তভাৰং ঞত্ৰা দোমনস্সপ্পত্তা অহোসি. তে উভোপি জেতৰনপিট্ঠিৰিহারেন গচ্ছন্তা ‘‘পানীযং পিৰিস্সামা’’তি জেতৰনং পৰিসিংসু.

সত্থাপি তেসঞ্ঞেৰ আগমনং ওলোকেন্তো মগ্গং গহেত্ৰা ঠিতলুদ্দকো ৰিয গন্ধকুটিছাযায নিসীদি, তে সত্থারং দিস্ৰা উপসঙ্কমিত্ৰা ৰন্দিত্ৰা নিসীদিংসু. সত্থা তেহি সদ্ধিং পটিসন্থারং কত্ৰা ‘‘কিং, উপাসিকে, অযং তে ভত্তা হিতকামো সস্নেহো’’তি পুচ্ছি. ‘‘ভন্তে, অহং এতস্স সস্নেহা, অযং পন ময্হং নিস্নেহো, তিট্ঠন্তু অঞ্ঞেপি দিৰসা, অজ্জেৰেস অন্তরামগ্গে পুটভত্তং লভিত্ৰা ময্হং অদত্ৰা অত্তনাৰ ভুঞ্জী’’তি. ‘‘উপাসিকে, নিচ্চকালম্পি ত্ৰং এতস্স হিতকামা সস্নেহা, অযং পন নিস্নেহোৰ. যদা পন পণ্ডিতে নিস্সায তৰ গুণে জানাতি, তদা তে সব্বিস্সরিযং নিয্যাদেতী’’তি ৰত্ৰা তায যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অমচ্চকুলে নিব্বত্তিত্ৰা ৰযপ্পত্তো ¶ তস্স অত্থধম্মানুসাসকো অহোসি. অথ রাজা ‘‘পদুব্ভেয্যাপি মে অয’’ন্তি অত্তনো পুত্তং আসঙ্কন্তো নীহরি. সো অত্তনো ভরিযং গহেত্ৰা নগরা নিক্খম্ম একস্মিং কাসিকগামকে ৰাসং কপ্পেসি. সো অপরভাগে পিতু কালকতভাৰং ¶ সুত্ৰা ‘‘কুলসন্তকং রজ্জং গণ্হিস্সামী’’তি বারাণসিং পচ্চাগচ্ছন্তো অন্তরামগ্গে ‘‘ভরিযাযপি দত্ৰা ভুঞ্জাহী’’তি ভত্তপুটং লভিত্ৰা তস্সা অদত্ৰা সযমেৰ তং ভুঞ্জি. সা ‘‘কক্খল়ো ¶ ৰতাযং পুরিসো’’তি দোমনস্সপ্পত্তা অহোসি. সো বারাণসিযং রজ্জং গহেত্ৰা তং অগ্গমহেসিট্ঠানে ঠপেত্ৰা ‘‘এত্তকমেৰ এতিস্সা অল’’ন্তি ন অঞ্ঞং সক্কারং ৰা সম্মানং ৰা করোতি, ‘‘কথং যাপেসী’’তিপি নং ন পুচ্ছতি.

বোধিসত্তো চিন্তেসি – ‘‘অযং দেৰী রঞ্ঞো বহূপকারা সস্নেহা, রাজা পনেতং কিস্মিঞ্চি ন মঞ্ঞতি, সক্কারসম্মানমস্সা কারেস্সামী’’তি তং উপসঙ্কমিত্ৰা উপচারং কত্ৰা একমন্তং ঠত্ৰা ‘‘কিং, তাতা’’তি ৰুত্তে ‘‘কথং সমুট্ঠাপেতুং মযং, দেৰি, তুম্হে উপট্ঠহাম, কিং নাম মহল্লকানং পিতূনং ৰত্থখণ্ডং ৰা ভত্তপিণ্ডং ৰা দাতুং ন ৰট্টতী’’তি আহ. ‘‘তাত, অহং অত্তনাৰ কিঞ্চি ন লভামি, তুম্হাকং কিং দস্সামি, ননু লভনকালে অদাসিং, ইদানি পন মে রাজা ন কিঞ্চি দেতি. তিট্ঠতু অঞ্ঞং দানং, রজ্জং গণ্হিতুং আগচ্ছন্তো অন্তরামগ্গে ভত্তপুটং লভিত্ৰা ভত্তমত্তম্পি মে অদত্ৰা অত্তনাৰ ভুঞ্জী’’তি. ‘‘কিং পন, অম্ম, রঞ্ঞো সন্তিকে এৰং কথেতুং সক্খিস্সথা’’তি? ‘‘সক্খিস্সামি, তাতা’’তি. ‘‘তেন হি অজ্জেৰ মম রঞ্ঞো সন্তিকে ঠিতকালে মযি পুচ্ছন্তে এৰং কথেথ অজ্জেৰ ৰো গুণং জানাপেস্সামী’’তি এৰং ৰত্ৰা বোধিসত্তো পুরিমতরং গন্ত্ৰা রঞ্ঞো সন্তিকে অট্ঠাসি. সাপি গন্ত্ৰা রঞ্ঞো সমীপে অট্ঠাসি.

অথ নং বোধিসত্তো ‘‘অম্ম, তুম্হে অতিৰিয কক্খল়া, কিং নাম পিতূনং ৰত্থখণ্ডং ৰা ভত্তপিণ্ডমত্তং ৰা দাতুং ন ৰট্টতী’’তি আহ. ‘‘তাত, অহমেৰ রঞ্ঞো সন্তিকা কিঞ্চি ন লভামি, তুম্হাকং কিং দস্সামী’’তি? ‘‘ননু অগ্গমহেসিট্ঠানং তে লদ্ধ’’ন্তি? ‘‘তাত, কিস্মিঞ্চি সম্মানে অসতি অগ্গমহেসিট্ঠানং কিং করিস্সতি, ইদানি মে তুম্হাকং রাজা কিং দস্সতি, সো অন্তরামগ্গে ভত্তপুটং লভিত্ৰা ততো কিঞ্চি অদত্ৰা ¶ সযমেৰ ভুঞ্জী’’তি. বোধিসত্তো ‘‘এৰং কির, মহারাজা’’তি পুচ্ছি. রাজা অধিৰাসেসি. বোধিসত্তো তস্স অধিৰাসনং ৰিদিত্ৰা ‘‘তেন হি, অম্ম, রঞ্ঞো অপ্পিযকালতো পট্ঠায কিং তুম্হাকং ইধ ৰাসেন. লোকস্মিঞ্হি অপ্পিযসম্পযোগো চ দুক্খো, তুম্হাকং ইধ ৰাসে সতি রঞ্ঞো অপ্পিযসম্পযোগোৰ ¶ দুক্খং ¶ ভৰিস্সতি, ইমে সত্তা নাম ভজন্তে ভজন্তি, অভজনভাৰং ঞত্ৰা অঞ্ঞত্থ গন্তব্বং, মহন্তো লোকসন্নিৰাসো’’তি ৰত্ৰা ইমা গাথা অৰোচ –

১৪৫.

‘‘নমে নমন্তস্স ভজে ভজন্তং, কিচ্চানুকুব্বস্স করেয্য কিচ্চং;

নানত্থকামস্স করেয্য অত্থং, অসম্ভজন্তম্পি ন সম্ভজেয্য.

১৪৬.

‘‘চজে চজন্তং ৰনথং ন কযিরা, অপেতচিত্তেন ন সম্ভজেয্য;

দিজো দুমং খীণফলন্তি ঞত্ৰা, অঞ্ঞং সমেক্খেয্য মহা হি লোকো’’তি.

তত্থ নমে নমন্তস্স ভজে ভজন্তন্তি যো অত্তনো নমতি, তস্সেৰ পটিনমেয্য. যো চ ভজতি, তমেৰ ভজেয্য. কিচ্চানুকুব্বস্স করেয্য কিচ্চন্তি অত্তনো উপ্পন্নকিচ্চং অনুকুব্বন্তস্সেৰ তস্সপি উপ্পন্নকিচ্চং পটিকরেয্য. চজে চজন্তং ৰনথং ন কযিরাতি অত্তানং জহন্তং জহেয্যেৰ, তস্মিং তণ্হাসঙ্খাতং ৰনথং ন করেয্য. অপেতচিত্তেনাতি ৰিগতচিত্তেন ৰিপল্লত্থচিত্তেন. ন সম্ভজেয্যাতি তথারূপেন সদ্ধিং ন সমাগচ্ছেয্য. দিজো দুমন্তি যথা সকুণো পুব্বে ফলিতম্পি রুক্খং ফলে খীণে ‘‘খীণফলো অয’’ন্তি ঞত্ৰা তং ছড্ডেত্ৰা অঞ্ঞং সমেক্খতি পরিযেসতি, এৰং অঞ্ঞং সমেক্খেয্য. মহা হি এস লোকো, অথ তুম্হে সস্নেহং একং পুরিসং লভিস্সথাতি.

তং সুত্ৰা বারাণসিরাজা দেৰিযা সব্বিস্সরিযং অদাসি. ততো পট্ঠায সমগ্গা সম্মোদমানা ৰসিংসু.

সত্থা ¶ ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে দ্ৰে জযম্পতিকা সোতাপত্তিফলে পতিট্ঠহিংসু. ‘‘তদা জযম্পতিকা ইমে দ্ৰে জযম্পতিকা অহেসুং, পণ্ডিতামচ্চো পন অহমেৰ অহোসি’’ন্তি.

পুটভত্তজাতকৰণ্ণনা ততিযা.

[২২৪] ৪. কুম্ভিলজাতকৰণ্ণনা

যস্সেতে ¶ ¶ চতুরো ধম্মাতি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি.

১৪৭.

‘‘যস্সেতে চতুরো ধম্মা, ৰানরিন্দ যথা তৰ;

সচ্চং ধম্মো ধিতি চাগো, দিট্ঠং সো অতিৰত্ততি.

১৪৮.

‘‘যস্স চেতে ন ৰিজ্জন্তি, গুণা পরমভদ্দকা;

সচ্চং ধম্মো ধিতি চাগো, দিট্ঠং সো নাতিৰত্ততী’’তি.

তত্থ গুণা পরমভদ্দকাতি যস্স এতে পরমভদ্দকা চত্তারো রাসট্ঠেন পিণ্ডট্ঠেন গুণা ন ৰিজ্জন্তি, সো পচ্চামিত্তং অতিক্কমিতুং ন সক্কোতীতি. সেসমেত্থ সব্বং হেট্ঠা কুম্ভিলজাতকে ৰুত্তনযমেৰ সদ্ধিং সমোধানেনাতি.

কুম্ভিলজাতকৰণ্ণনা চতুত্থা.

[২২৫] ৫. খন্তিৰণ্ণজাতকৰণ্ণনা

অত্থি মে পুরিসো, দেৰাতি ইদং সত্থা জেতৰনে ৰিহরন্তো কোসলরাজানং আরব্ভ কথেসি. তস্স কিরেকো বহূপকারো অমচ্চো অন্তেপুরে পদুস্সি. রাজা ‘‘উপকারকো মে’’তি ঞত্ৰাপি অধিৰাসেত্ৰা সত্থু আরোচেসি. সত্থা ‘‘পোরাণকরাজানোপি, মহারাজ, এৰং অধিৰাসেসুংযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একো অমচ্চো তস্স অন্তেপুরে পদুস্সি, অমচ্চস্সাপি সেৰকো তস্স গেহে পদুস্সি. সো তস্স অপরাধং অধিৰাসেতুং অসক্কোন্তো তং আদায রঞ্ঞো সন্তিকং গন্ত্ৰা ‘‘দেৰ, একো মে উপট্ঠাকো সব্বকিচ্চকারকো ¶ , সো ময্হং গেহে পদুস্সি, তস্স কিং কাতুং ৰট্টতী’’তি পুচ্ছন্তো পঠমং গাথমাহ –

১৪৯.

‘‘অত্থি মে পুরিসো দেৰ, সব্বকিচ্চেসু ব্যাৰটো;

তস্স চেকোপরাধত্থি, তত্থ ত্ৰং কিন্তি মঞ্ঞসী’’তি.

তত্থ ¶ ¶ তস্স চেকোপরাধত্থীতি তস্স চ পুরিসস্স একো অপরাধো অত্থি. তত্থ ত্ৰং কিন্তি মঞ্ঞসীতি তত্থ তস্স পুরিসস্স অপরাধে ত্ৰং ‘‘কিং কাতব্ব’’ন্তি মঞ্ঞসি, যথা তে চিত্তং উপ্পজ্জতি, তদনুরূপমস্স দণ্ডং পণেহীতি দীপেতি.

তং সুত্ৰা রাজা দুতিযং গাথমাহ –

১৫০.

‘‘অম্হাকম্পত্থি পুরিসো, এদিসো ইধ ৰিজ্জতি;

দুল্লভো অঙ্গসম্পন্নো, খন্তিরস্মাক রুচ্চতী’’তি.

তস্সত্থো – অম্হাকম্পি রাজূনং সতং এদিসো বহূপকারো অগারে দুস্সনকপুরিসো অত্থি, সো চ খো ইধ ৰিজ্জতি, ইদানিপি ইধেৰ সংৰিজ্জতি, মযং রাজানোপি সমানা তস্স বহূপকারতং সন্ধায অধিৰাসেম, তুয্হং পন অরঞ্ঞোপি সতো অধিৰাসনভারো জাতো. অঙ্গসম্পন্নো হি সব্বেহি গুণকোট্ঠাসেহি সমন্নাগতো পুরিসো নাম দুল্লভো, তেন কারণেন অস্মাকং এৰরূপেসু ঠানেসু অধিৰাসনখন্তিযেৰ রুচ্চতীতি.

অমচ্চো অত্তানং সন্ধায রঞ্ঞো ৰুত্তভাৰং ঞত্ৰা ততো পট্ঠায অন্তেপুরে পদুস্সিতুং ন ৰিসহি, সোপিস্স সেৰকো রঞ্ঞো আরোচিতভাৰং ঞত্ৰা ততো পট্ঠায তং কম্মং কাতুং ন ৰিসহি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা অহমেৰ বারাণসিরাজা অহোসি’’ন্তি. সোপি অমচ্চো রঞ্ঞো সত্থু কথিতভাৰং ঞত্ৰা ততো পট্ঠায তং কম্মং কাতুং নাসক্খীতি.

খন্তিৰণ্ণজাতকৰণ্ণনা পঞ্চমা.

[২২৬] ৬. কোসিযজাতকৰণ্ণনা

কালে ¶ নিক্খমনা সাধূতি ইদং সত্থা জেতৰনে ৰিহরন্তো কোসলরাজানং আরব্ভ কথেসি. কোসলরাজা পচ্চন্তৰূপসমনত্থায অকালে নিক্খমি. ৰত্থু হেট্ঠা ৰুত্তনযমেৰ.

সত্থা ¶ পন অতীতং আহরিত্ৰা আহ – ‘‘মহারাজ, অতীতে বারাণসিরাজা অকালে নিক্খমিত্ৰা উয্যানে খন্ধাৰারং নিৰেসযি. তস্মিং কালে ¶ একো উলূকসকুণো ৰেল়ুগুম্বং পৰিসিত্ৰা নিলীযি. কাকসেনা আগন্ত্ৰা ‘নিক্খন্তমেৰ তং গণ্হিস্সামা’’’তি পরিৰারেসি. সো সূরিযত্থঙ্গমনং অনোলোকেত্ৰা অকালেযেৰ নিক্খমিত্ৰা পলাযিতুং আরভি. অথ নং কাকা পরিৰারেত্ৰা তুণ্ডেহি কোট্টেন্তা পরিপাতেসুং. রাজা বোধিসত্তং আমন্তেত্ৰা ‘‘কিং নু খো, পণ্ডিত, ইমে কাকা কোসিযং পরিপাতেন্তী’’তি পুচ্ছি. বোধিসত্তো ‘‘অকালে, মহারাজ, অত্তনো ৰসনট্ঠানা নিক্খমন্তা এৰরূপং দুক্খং পটিলভন্তিযেৰ, তস্মা অকালে অত্তনো ৰসনট্ঠানা নিক্খমিতুং ন ৰট্টতী’’তি ইমমত্থং পকাসেন্তো ইমং গাথাদ্ৰযমাহ –

১৫১.

‘‘কালে নিক্খমনা সাধু, নাকালে সাধু নিক্খমো;

অকালেন হি নিক্খম্ম, এককম্পি বহুজ্জনো;

ন কিঞ্চি অত্থং জোতেতি, ধঙ্কসেনাৰ কোসিযং.

১৫২.

‘‘ধীরো চ ৰিধিৰিধানঞ্ঞূ, পরেসং ৰিৰরানুগূ;

সব্বামিত্তে ৰসীকত্ৰা, কোসিযোৰ সুখী সিযা’’তি.

তত্থ কালে নিক্খমনা সাধূতি, মহারাজ, নিক্খমনা নাম নিক্খমনং ৰা পরক্কমনং ৰা যুত্তপযুত্তকালে সাধু. নাকালে সাধু নিক্খমোতি অকালে পন অত্তনো ৰসনট্ঠানতো অঞ্ঞত্থ গন্তুং নিক্খমো নাম নিক্খমনং ৰা পরক্কমনং ৰা ন সাধু. ‘‘অকালেন হী’’তিআদীসু চতূসু পদেসু পঠমেন সদ্ধিং ততিযং, দুতিযেন চতুত্থং যোজেত্ৰা এৰং অত্থো ৰেদিতব্বো. অত্তনো ৰসনট্ঠানতো হি কোচি পুরিসো অকালেন নিক্খমিত্ৰা ৰা পরক্কমিত্ৰা ৰা ন কিঞ্চি ¶ অত্থং জোতেতি, অত্তনো অপ্পমত্তকম্পি ৰুড্ঢিং উপ্পাদেতুং ন সক্কোতি, অথ খো এককম্পি বহুজ্জনো বহুপি সো পচ্চত্থিকজনো এতং অকালে নিক্খমন্তং ৰা পরক্কমন্তং ৰা এককং পরিৰারেত্ৰা মহাৰিনাসং পাপেতি. তত্রাযং উপমা – ধঙ্কসেনাৰ কোসিযং, যথা অযং ধঙ্কসেনা ইমং অকালে নিক্খমন্তঞ্চ পরক্কমন্তঞ্চ কোসিযং তুণ্ডেহি ৰিতুদন্তি মহাৰিনাসং পাপেন্তি, তথা তস্মা তিরচ্ছানগতে আদিং কত্ৰা কেনচি অকালে অত্তনো ৰসনট্ঠানতো ন নিক্খমিতব্বং ন পরক্কমিতব্বন্তি.

দুতিযগাথায ¶ ধীরোতি পণ্ডিতো. ৰিধীতি পোরাণকপণ্ডিতেহি ঠপিতপৰেণী. ৰিধানন্তি কোট্ঠাসো ৰা সংৰিদহনং ৰা. ৰিৰরানুগূতি ৰিৰরং অনুগচ্ছন্তো জানন্তো. সব্বামিত্তেতি ¶ সব্বে অমিত্তে. ৰসীকত্ৰাতি অত্তনো ৰসে কত্ৰা. কোসিযোৰাতি ইমম্হা বালকোসিযা অঞ্ঞো পণ্ডিতকোসিযো ৰিয. ইদং ৰুত্তং হোতি – যো চ খো পণ্ডিতো ‘‘ইমস্মিং কালে নিক্খমিতব্বং পরক্কমিতব্বং, ইমস্মিং ন নিক্খমিতব্বং ন পরক্কমিতব্ব’’ন্তি পোরাণকপণ্ডিতেহি ঠপিতস্স পৰেণিসঙ্খাতস্স ৰিধিনো কোট্ঠাসসঙ্খাতং ৰিধানং ৰা তস্স ৰা ৰিধিনো ৰিধানং সংৰিদহনং অনুট্ঠানং জানাতি, সো ৰিধিৰিধানঞ্ঞূ পরেসং অত্তনো পচ্চামিত্তানং ৰিৰরং ঞত্ৰা যথা নাম পণ্ডিতো কোসিযো রত্তিসঙ্খাতে অত্তনো কালে নিক্খমিত্ৰা চ পরক্কমিত্ৰা চ তত্থ তত্থ সযিতানঞ্ঞেৰ কাকানং সীসানি ছিন্দমানো তে সব্বে অমিত্তে ৰসীকত্ৰা সুখী সিযা, এৰং ধীরোপি কালে নিক্খমিত্ৰা পরক্কমিত্ৰা অত্তনো পচ্চামিত্তে ৰসীকত্ৰা সুখী নিদ্দুক্খো ভৰেয্যাতি. রাজা বোধিসত্তস্স ৰচনং সুত্ৰা নিৰত্তি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, পণ্ডিতামচ্চো পন অহমেৰ অহোসি’’ন্তি.

কোসিযজাতকৰণ্ণনা ছট্ঠা.

[২২৭] ৭. গূথপাণজাতকৰণ্ণনা

সূরো সূরেন সঙ্গম্মাতি ইদং সত্থা জেতৰনে ৰিহরন্তো অঞ্ঞতরং ভিক্খুং আরব্ভ কথেসি. তস্মিং কির কালে জেতৰনতো তিগাৰুতড্ঢযোজনমত্তে একো নিগমগামো, তত্থ বহূনি সলাকভত্তপক্খিযভত্তানি অত্থি. তত্রেকো পঞ্হপুচ্ছকো কোণ্ডো ৰসতি. সো সলাকভত্তপক্খিযভত্তানং অত্থায আগতে দহরে চ ¶ সামণেরে চ ‘‘কে খাদন্তি, কে পিৰন্তি, কে ভুঞ্জন্তী’’তি পঞ্হং পুচ্ছিত্ৰা কথেতুং অসক্কোন্তে লজ্জাপেসি. তে তস্স ভযেন সলাকভত্তপক্খিযভত্তত্থায তং গামং ন গচ্ছন্তি. অথেকদিৰসং একো ভিক্খু সলাকগ্গং গন্ত্ৰা ‘‘ভন্তে, অসুকগামে সলাকভত্তং ৰা পক্খিযভত্তং ৰা অত্থী’’তি পুচ্ছিত্ৰা ¶ ‘‘অত্থাৰুসো, তত্থ পনেকো কোণ্ডো পঞ্হং পুচ্ছতি, তং কথেতুং অসক্কোন্তে অক্কোসতি পরিভাসতি, তস্স ভযেন কোচি গন্তুং ন সক্কোতী’’তি ৰুত্তে ‘‘ভন্তে, তত্থ ভত্তানি ময্হং পাপেথ, অহং তং দমেত্ৰা নিব্বিসেৰনং কত্ৰা ততো পট্ঠায তুম্হে দিস্ৰা পলাযনকং করিস্সামী’’তি আহ. ভিক্খূ ‘‘সাধূ’’তি সম্পটিচ্ছিত্ৰা তস্স তত্থ ভত্তানি পাপেসুং.

সো ¶ তত্থ গন্ত্ৰা গামদ্ৰারে চীৰরং পারুপি. তং দিস্ৰা কোণ্ডো চণ্ডমেণ্ডকো ৰিয ৰেগেন উপগন্ত্ৰা ‘‘পঞ্হং মে, সমণ, কথেহী’’তি আহ. ‘‘উপাসক, গামে চরিত্ৰা যাগুং আদায আসনসালং তাৰ মে আগন্তুং দেহী’’তি. সো যাগুং আদায আসনসালং আগতেপি তস্মিং তথেৰ আহ. সোপি নং ভিক্খু ‘‘যাগুং তাৰ মে পাতুং দেহি, আসনসালং তাৰ সম্মজ্জিতুং দেহি, সলাকভত্তং তাৰ মে আহরিতুং দেহী’’তি ৰত্ৰা সলাকভত্তং আহরিত্ৰা তমেৰ পত্তং গাহাপেত্ৰা ‘‘এহি, পঞ্হং তে কথেস্সামী’’তি বহিগামং নেত্ৰা চীৰরং সংহরিত্ৰা অংসে ঠপেত্ৰা তস্স হত্থতো পত্তং গহেত্ৰা অট্ঠাসি. তত্রাপি নং সো ‘‘সমণ, পঞ্হং মে কথেহী’’তি আহ. অথ নং ‘‘কথেমি তে পঞ্হ’’ন্তি একপ্পহারেনেৰ পাতেত্ৰা অট্ঠীনি সংচুণ্ণেন্তো ৰিয পোথেত্ৰা গূথং মুখে পক্খিপিত্ৰা ‘‘ইতো দানি পট্ঠায ইমং গামং আগতং কঞ্চি ভিক্খুং পঞ্হং পুচ্ছিতকালে জানিস্সামী’’তি সন্তজ্জেত্ৰা পক্কামি. সো ততো পট্ঠায ভিক্খূ দিস্ৰাৰ পলাযতি. অপরভাগে তস্স ভিক্খুনো সা কিরিযা ভিক্খুসঙ্ঘে পাকটা জাতা. অথেকদিৰসং ধম্মসভাযং ভিক্খূ কথং সমুট্ঠাপেসুং – ‘‘আৰুসো, অসুকভিক্খু কির কোণ্ডস্স মুখে গূথং পক্খিপিত্ৰা গতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, সো ভিক্খু ইদানেৰ তং মীল়্হেন আসাদেতি, পুব্বেপি আসাদেসিযেৰা’’তি ৰত্ৰা অতীতং আহরি.

অতীতে ¶ অঙ্গমগধৰাসিনো অঞ্ঞমঞ্ঞস্স রট্ঠং গচ্ছন্তা একদিৰসং দ্ৰিন্নং রট্ঠানং সীমন্তরে একং সরং নিস্সায ৰসিত্ৰা সুরং পিৰিত্ৰা মচ্ছমংসং খাদিত্ৰা পাতোৰ যানানি যোজেত্ৰা পক্কমিংসু. তেসং গতকালে একো গূথখাদকো পাণকো গূথগন্ধেন আগন্ত্ৰা তেসং পীতট্ঠানে ছড্ডিতং সুরং দিস্ৰা পিপাসায পিৰিত্ৰা মত্তো হুত্ৰা গূথপুঞ্জং অভিরুহি, অল্লগূথং ¶ তস্মিং আরুল়্হে থোকং ওনমি. সো ‘‘পথৰী মং ধারেতুং ন সক্কোতী’’তি ৰিরৰি. তস্মিঞ্ঞেৰ খণে একো মত্তৰরৰারণো তং পদেসং পত্ৰা গূথগন্ধং ঘাযিত্ৰা জিগুচ্ছন্তো পটিক্কমি. সো তং দিস্ৰা ‘‘এস মম ভযেন পলাযতী’’তি সঞ্ঞী হুত্ৰা ‘‘ইমিনা মে সদ্ধিং সঙ্গামং কাতুং ৰট্টতী’’তি তং অৰ্হযন্তো পঠমং গাথমাহ –

১৫৩.

‘‘সূরো সূরেন সঙ্গম্ম, ৰিক্কন্তেন পহারিনা;

এহি নাগ নিৰত্তস্সু, কিং নু ভীতো পলাযসি;

পস্সন্তু অঙ্গমগধা, মম তুয্হঞ্চ ৰিক্কম’’ন্তি.

তস্সত্থো ¶ – ত্ৰং সূরো মযা সূরেন সদ্ধিং সমাগন্ত্ৰা ৰীরিযৰিক্কমেন ৰিক্কন্তেন পহারদানসমত্থতায পহারিনা কিংকারণা অসঙ্গামেত্ৰাৰ গচ্ছসি, ননু নাম একসম্পহারোপি দাতব্বো সিযা, তস্মা এহি নাগ নিৰত্তস্সু, এত্তকেনেৰ মরণভযতজ্জিতো হুত্ৰা কিং নু ভীতো পলাযসি, ইমে ইমং সীমং অন্তরং কত্ৰা ৰসন্তা পস্সন্তু, অঙ্গমগধা মম তুয্হঞ্চ ৰিক্কমং উভিন্নম্পি অম্হাকং পরক্কমং পস্সন্তূতি.

সো হত্থী কণ্ণং দত্ৰা তস্স ৰচনং সুত্ৰা নিৰত্তিত্ৰা তস্স সন্তিকং গন্ত্ৰা তং অপসাদেন্তো দুতিযং গাথমাহ –

১৫৪.

‘‘ন তং পাদা ৰধিস্সামি, ন দন্তেহি ন সোণ্ডিযা;

মীল়্হেন তং ৰধিস্সামি, পূতি হঞ্ঞতু পূতিনা’’তি.

তস্সত্থো ¶ – ন তং পাদাদীহি ৰধিস্সামি, তুয্হং পন অনুচ্ছৰিকেন মীল়্হেন তং ৰধিস্সামীতি.

এৰঞ্চ পন ৰত্ৰা ‘‘পূতিগূথপাণকো পূতিনাৰ হঞ্ঞতূ’’তি তস্স মত্থকে মহন্তং লণ্ডং পাতেত্ৰা উদকং ৰিস্সজ্জেত্ৰা তত্থেৰ তং জীৰিতক্খযং পাপেত্ৰা কোঞ্চনাদং নদন্তো অরঞ্ঞমেৰ পাৰিসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা গূথপাণকো কোণ্ডো অহোসি, ৰারণো সো ভিক্খু, তং কারণং পচ্চক্খতো দিস্ৰা তস্মিং ৰনসণ্ডে নিৰুত্থদেৰতা পন অহমেৰ অহোসি’’ন্তি.

গূথপাণজাতকৰণ্ণনা সত্তমা.

[২২৮] ৮. কামনীতজাতকৰণ্ণনা

তযো ¶ গিরিন্তি ইদং সত্থা জেতৰনে ৰিহরন্তো কামনীতব্রাহ্মণং নাম আরব্ভ কথেসি. ৰত্থু পচ্চুপ্পন্নঞ্চ অতীতঞ্চ দ্ৰাদসকনিপাতে কামজাতকে (জা. ১.১২.৩৭ আদযো) আৰিভৰিস্সতি. তেসু পন দ্ৰীসু রাজপুত্তেসু জেট্ঠকো আগন্ত্ৰা বারাণসিযং রাজা অহোসি, কনিট্ঠো ¶ উপরাজা. তেসু রাজা ৰত্থুকামকিলেসকামেসু অতিত্তো ধনলোলো অহোসি. তদা বোধিসত্তো সক্কো দেৰরাজা হুত্ৰা জম্বুদীপং ওলোকেন্তো তস্স রঞ্ঞো দ্ৰীসুপি কামেসু অতিত্তভাৰং ঞত্ৰা ‘‘ইমং রাজানং নিগ্গণ্হিত্ৰা লজ্জাপেস্সামী’’তি ব্রাহ্মণমাণৰৰণ্ণেন আগন্ত্ৰা রাজানং পস্সি, রঞ্ঞা চ ‘‘কেনত্থেন আগতোসি মাণৰা’’তি ৰুত্তে ‘‘অহং, মহারাজ, তীণি নগরানি পস্সামি খেমানি সুভিক্খানি পহূতহত্থিঅস্সরথপত্তীনি হিরঞ্ঞসুৰণ্ণালঙ্কারভরিতানি, সক্কা চ পন তানি অপ্পকেনেৰ বলেন গণ্হিতুং, অহং তে তানি গহেত্ৰা দাতুং আগতো’’তি আহ. ‘‘কদা গচ্ছাম, মাণৰা’’তি ৰুত্তে ‘‘স্ৰে মহারাজা’’তি. ‘‘তেন হি গচ্ছ, পাতোৰ আগচ্ছেয্যাসী’’তি. ‘‘সাধু, মহারাজ, ৰেগেন বলং সজ্জেহী’’তি ৰত্ৰা সক্কো সকট্ঠানমেৰ ¶ গতো.

রাজা পুনদিৰসে ভেরিং চরাপেত্ৰা বলসজ্জং কারেত্ৰা অমচ্চে পক্কোসাপেত্ৰা হিয্যো একো ব্রাহ্মণমাণৰো ‘‘উত্তরপঞ্চালে ইন্দপত্তে কেককেতি ইমেসু তীসু নগরেসু রজ্জং গহেত্ৰা দস্সামী’’তি আহ, তং মাণৰং আদায তীসু নগরেসু রজ্জং গণ্হিস্সাম, ৰেগেন নং পক্কোসথাতি. ‘‘কত্থস্স, দেৰ, নিৰাসো দাপিতো’’তি? ‘‘ন মে তস্স নিৰাসগেহং দাপিত’’ন্তি. ‘‘নিৰাসপরিব্বযো পন দিন্নো’’তি? ‘‘সোপি ন দিন্নো’’তি. অথ ‘‘কহং নং পস্সিস্সামা’’তি? ‘‘নগরৰীথীসু ওলোকেথা’’তি. তে ওলোকেন্তা অদিস্ৰা ‘‘ন পস্সাম, মহারাজা’’তি আহংসু. রঞ্ঞো মাণৰং অপস্সন্তস্স ‘‘এৰং মহন্তা নাম ইস্সরিযা পরিহীনোম্হী’’তি মহাসোকো উদপাদি, হদযৰত্থু উণ্হং অহোসি, ৰত্থুলোহিতং কুপ্পি, লোহিতপক্খন্দিকা উদপাদি, ৰেজ্জা তিকিচ্ছিতুং নাসক্খিংসু.

ততো তীহচতূহচ্চযেন সক্কো আৰজ্জমানো তস্স তং আবাধং ঞত্ৰা ‘‘তিকিচ্ছিস্সামি ন’’ন্তি ব্রাহ্মণৰণ্ণেন আগন্ত্ৰা দ্ৰারে ঠত্ৰা ‘‘ৰেজ্জব্রাহ্মণো ¶ তুম্হাকং তিকিচ্ছনত্থায আগতো’’তি আরোচাপেসি. রাজা তং সুত্ৰা ‘‘মহন্তমহন্তা রাজৰেজ্জা মং তিকিচ্ছিতুং নাসক্খিংসু, পরিব্বযমস্স দাপেত্ৰা উয্যোজেথা’’তি আহ. সক্কো তং সুত্ৰা ‘‘ময্হং নেৰ নিৰাসপরিব্বযেন অত্থো, ৰেজ্জলাভম্পি ন গণ্হিস্সামি, তিকিচ্ছিস্সামি নং, পুন রাজা মং পস্সতূ’’তি আহ. রাজা তং সুত্ৰা ‘‘তেন হি আগচ্ছতূ’’তি আহ. সক্কো পৰিসিত্ৰা জযাপেত্ৰা একমন্তং অট্ঠাসি, রাজা ‘‘ত্ৰং মং তিকিচ্ছসী’’তি আহ. ‘‘আম, দেৰা’’তি. ‘‘তেন হি তিকিচ্ছস্সূ’’তি. ‘‘সাধু, মহারাজ, ব্যাধিনো মে লক্খণং কথেথ, কেন কারণেন উপ্পন্নো, কিং খাদিতং ৰা পীতং ৰা নিস্সায, উদাহু দিট্ঠং ৰা সুতং ৰা’’তি? ‘‘তাত, ময্হং ব্যাধি সুতং নিস্সায উপ্পন্নো’’তি. ‘‘কিং তে সুত’’ন্তি. ‘‘তাত একো মাণৰো ¶ ¶ আগন্ত্ৰা ময্হং ‘তীসু নগরেসু রজ্জং গণ্হিত্ৰা দস্সামী’তি আহ, অহং তস্স নিৰাসট্ঠানং ৰা নিৰাসপরিব্বযং ৰা ন দাপেসিং, সো ময্হং কুজ্ঝিত্ৰা অঞ্ঞস্স রঞ্ঞো সন্তিকং গতো ভৰিস্সতি. অথ মে ‘এৰং মহন্তা নাম ইস্সরিযা পরিহীনোম্হী’তি চিন্তেন্তস্স অযং ব্যাধি উপ্পন্নো. সচে সক্কোসি ত্ৰং মে কামচিত্তং নিস্সায উপ্পন্নং ব্যাধিং তিকিচ্ছিতুং, তিকিচ্ছাহী’’তি এতমত্থং পকাসেন্তো পঠমং গাথমাহ –

১৫৫.

‘‘তযো গিরিং অন্তরং কামযামি, পঞ্চালা কুরুযো কেককে চ;

ততুত্তরিং ব্রাহ্মণ কামযামি, তিকিচ্ছ মং ব্রাহ্মণ কামনীত’’ন্তি.

তত্থ তযো গিরিন্তি তযো গিরী, অযমেৰ ৰা পাঠো. যথা ‘‘সুদস্সনস্স গিরিনো, দ্ৰারঞ্হেতং পকাসতী’’তি এত্থ সুদস্সনং দেৰনগরং যুজ্ঝিত্ৰা দুগ্গণ্হতায দুচ্চলনতায ‘‘সুদস্সনগিরী’’তি ৰুত্তং, এৰমিধাপি তীণি নগরানি ‘‘তযো গিরি’’ন্তি অধিপ্পেতানি. তস্মা অযমেত্থ অত্থো – তীণি চ নগরানি তেসঞ্চ অন্তরং তিৰিধম্পি রট্ঠং কামযামি. ‘‘পঞ্চালা কুরুযো কেককে চা’’তি ইমানি তেসং রট্ঠানং নামানি. তেসু পঞ্চালাতি উত্তরপঞ্চালা, তত্থ কপিলং নাম নগরং. কুরুযোতি কুরুরট্ঠং, তত্থ ইন্দপত্তং নাম নগরং. কেককে চাতি পচ্চত্তে উপযোগৰচনং, তেন কেককরট্ঠং দস্সেতি. তত্থ কেককরাজধানীযেৰ নগরং. ততুত্তরিন্তি তং ¶ অহং ইতো পটিলদ্ধা বারাণসিরজ্জা ততুত্তরিং তিৰিধং রজ্জং কামযামি. তিকিচ্ছ মং, ব্রাহ্মণ, কামনীতন্তি ইমেহি ৰত্থুকামেহি চ কিলেসকামেহি চ নীতং হতং পহতং সচে সক্কোসি, তিকিচ্ছ মং ব্রাহ্মণাতি.

অথ নং সক্কো ‘‘মহারাজ, ত্ৰং মূলোসধাদীহি অতেকিচ্ছো. ঞাণোসধেনেৰ তিকিচ্ছিতব্বো’’তি ৰত্ৰা দুতিযং গাথমাহ –

১৫৬.

‘‘কণ্হাহিদট্ঠস্স ¶ করোন্তি হেকে, অমনুস্সপৰিট্ঠস্স করোন্তি পণ্ডিতা;

ন কামনীতস্স করোতি কোচি, ওক্কন্তসুক্কস্স হি কা তিকিচ্ছা’’তি.

তত্থ কণ্হাহিদট্ঠস্স করোন্তি হেকেতি একচ্চে হি তিকিচ্ছকা ঘোরৰিসেন কাল়সপ্পেন দট্ঠস্স মন্তেহি চেৰ ওসধেহি চ তিকিচ্ছং করোন্তি. অমনুস্সপৰিট্ঠস্স করোন্তি পণ্ডিতাতি অপরে পণ্ডিতা ভূতৰেজ্জা ভূতযক্খাদীহি অমনুস্সেহি পৰিট্ঠস্স অভিভূতস্স গহিতস্স বলিকম্মপরিত্তকরণওসধপরিভাৰিতাদীহি তিকিচ্ছং করোন্তি. ন কামনীতস্স করোতি কোচীতি ¶ কামেহি পন নীতস্স কামৰসিকস্স পুগ্গলস্স অঞ্ঞত্র পণ্ডিতেহি অঞ্ঞো কোচি তিকিচ্ছং ন করোতি, করোন্তোপি কাতুং সমত্থো নাম নত্থি. কিংকারণা? ওক্কন্তসুক্কস্স হি কা তিকিচ্ছাতি, ওক্কন্তসুক্কস্স অৰক্কন্তস্স কুসলধম্মমরিযাদং অতিক্কন্তস্স অকুসলধম্মে পতিট্ঠিতস্স পুগ্গলস্স মন্তোসধাদীহি কা নাম তিকিচ্ছা, ন সক্কা ওসধেহি তিকিচ্ছিতুন্তি.

ইতিস্স মহাসত্তো ইমং কারণং দস্সেত্ৰা উত্তরি এৰমাহ – ‘‘মহারাজ, সচে ত্ৰং তানি তীণি রজ্জানি লচ্ছসি, অপি নু খো ইমেসু চতূসু নগরেসু রজ্জং করোন্তো একপ্পহারেনেৰ চত্তারি সাটকযুগানি পরিদহেয্যাসি, চতূসু ৰা সুৰণ্ণপাতীসু ভুঞ্জেয্যাসি, চতূসু ৰা সযনেসু সযেয্যাসি, মহারাজ, তণ্হাৰসিকেন নাম ভৰিতুং ন ৰট্টতি, তণ্হা হি নামেসা ৰিপত্তিমূলা. সা ৰড্ঢমানা যো তং ৰড্ঢেতি, তং পুগ্গলং অট্ঠসু মহানিরযেসু সোল়সসু উস্সদনিরযেসু নানপ্পকারভেদেসু চ অৰসেসেসু অপাযেসু খিপতী’’তি. এৰং রাজানং নিরযাদিভযেন তজ্জেত্ৰা মহাসত্তো ধম্মং দেসেসি. রাজাপিস্স ধম্মং সুত্ৰা ৰিগতসোকো হুত্ৰা তাৰদেৰ নিব্যাধিতং পাপুণি ¶ . সক্কোপিস্স ওৰাদং দত্ৰা ¶ সীলেসু পতিট্ঠাপেত্ৰা দেৰলোকমেৰ গতো. সোপি ততো পট্ঠায দানাদীনি পুঞ্ঞানি কত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি – ‘‘তদা রাজা কামনীতব্রাহ্মণো অহোসি, সক্কো পন অহমেৰ অহোসি’’ন্তি.

কামনীতজাতকৰণ্ণনা অট্ঠমা.

[২২৯] ৯. পলাযিতজাতকৰণ্ণনা

গজগ্গমেঘেহীতি ইদং সত্থা জেতৰনে ৰিহরন্তো পলাযিতপরিব্বাজকং আরব্ভ কথেসি. সো কির ৰাদত্থায সকলজম্বুদীপং ৰিচরিত্ৰা কঞ্চি পটিৰাদিং অলভিত্ৰা অনুপুব্বেন সাৰত্থিং গন্ত্ৰা ‘‘অত্থি নু খো কোচি মযা সদ্ধিং ৰাদং কাতুং সমত্থো’’তি মনুস্সে পুচ্ছি. মনুস্সা ‘‘তাদিসানং সহস্সেনপি সদ্ধিং ৰাদং কাতুং সমত্থো সব্বঞ্ঞূ দ্ৰিপদানং অগ্গো মহাগোতমো ধম্মিস্সরো পরপ্পৰাদমদ্দনো, সকলেপি জম্বুদীপে উপ্পন্নো পরপ্পৰাদো তং ভগৰন্তং অতিক্কমিতুং সমত্থো নাম নত্থি. ৰেলন্তং পত্ৰা সমুদ্দঊমিযো ৰিয হি সব্বৰাদা তস্স পাদমূলং পত্ৰা চুণ্ণৰিচুণ্ণা হোন্তী’’তি বুদ্ধগুণে কথেসুং. পরিব্বাজকো ‘‘কহং ¶ পন সো এতরহী’’তি পুচ্ছিত্ৰা ‘‘জেতৰনে’’তি সুত্ৰা ‘‘ইদানিস্স ৰাদং আরোপেস্সামী’’তি মহাজনপরিৰুতো জেতৰনং গচ্ছন্তো জেতেন রাজকুমারেন নৰকোটিধনং ৰিস্সজ্জেত্ৰা কারিতং জেতৰনদ্ৰারকোট্ঠকং দিস্ৰা ‘‘অযং সমণস্স গোতমস্স ৰসনপাসাদো’’তি পুচ্ছিত্ৰা ‘‘দ্ৰারকোট্ঠকো অয’’ন্তি সুত্ৰা ‘‘দ্ৰারকোট্ঠকো তাৰ এৰরূপো, ৰসনগেহং কীদিসং ভৰিস্সতী’’তি ৰত্ৰা ‘‘গন্ধকুটি নাম অপ্পমেয্যা’’তি ৰুত্তে ‘‘এৰরূপেন সমণেন সদ্ধিং কো ৰাদং করিস্সতী’’তি ততোৰ পলাযি. মনুস্সা উন্নাদিনো হুত্ৰা জেতৰনং পৰিসিত্ৰা সত্থারা ‘‘কিং অকালে আগতত্থা’’তি ৰুত্তা তং পৰত্তিং কথযিংসু. সত্থা ‘‘ন খো উপাসকা ইদানেৰ, পুব্বেপেস মম ৰসনট্ঠানস্স দ্ৰারকোট্ঠকং দিস্ৰা পলাযতেৰা’’তি ৰত্ৰা তেহি যাচিতো অতীতং আহরি.

অতীতে ¶ ¶ গন্ধাররট্ঠে তক্কসিলাযং বোধিসত্তো রজ্জং কারেসি, বারাণসিযং ব্রহ্মদত্তো. সো ‘‘তক্কসিলং গণ্হিস্সামী’’তি মহন্তেন বলকাযেন গন্ত্ৰা নগরতো অৰিদূরে ঠত্ৰা ‘‘ইমিনা নিযামেন হত্থী পেসেথ, ইমিনা অস্সে, ইমিনা রথে, ইমিনা পত্তী, এৰং ধাৰিত্ৰা আৰুধেহি পহরথ, এৰং ঘনৰস্সৰলাহকা ৰিয সরৰস্সং ৰস্সথা’’তি তেনং ৰিচারেন্তো ইমং গাথাদ্ৰযমাহ –

১৫৭.

‘‘গজগ্গমেঘেহি হযগ্গমালিভি, রথূমিজাতেহি সরাভিৰস্সেভি;

থরুগ্গহাৰট্টদল়্হপ্পহারিভি, পরিৰারিতা তক্কসিলা সমন্ততো.

১৫৮.

‘‘অভিধাৰথ চূপধাৰথ চ, ৰিৰিধা ৰিনাদিতা ৰদন্তিভি;

ৰত্ততজ্জ তুমুলো ঘোসো যথা, ৰিজ্জুলতা জলধরস্স গজ্জতো’’তি.

তত্থ গজগ্গমেঘেহীতি অগ্গগজমেঘেহি, কোঞ্চনাদং গজ্জন্তেহি মত্তৰরৰারণৰলাহকেহীতি অত্থো. হযগ্গমালিভীতি অগ্গহযমালীহি, ৰরসিন্ধৰৰলাহককুলেহি অস্সানীকেহীতি অত্থো. রথূমিজাতেহীতি সঞ্জাতঊমিৰেগেহি সাগরসলিলেহি ৰিয সঞ্জাতরথূমীহি, রথানীকেহীতি অত্থো. সরাভিৰস্সেভীতি তেহিযেৰ রথানীকেহি ঘনৰস্সমেঘো ৰিয সরৰস্সং ৰস্সন্তেহি ¶ . থরুগ্গহাৰট্টদল়্হপ্পহারিভীতি থরুগ্গহেহি আৰট্টদল়্হপ্পহারীহি, ইতো চিতো চ আৰত্তিত্ৰা পরিৰত্তিত্ৰা দল়্হং পহরন্তেহি গহিতখগ্গরতনথরুদণ্ডেহি পত্তিযোধেহি চাতি অত্থো. পরিৰারিতা তক্কসিলা সমন্ততোতি যথা অযং তক্কসিলা পরিৰারিতা হোতি, সীঘং তথা করোথাতি অত্থো.

অভিধাৰথ ¶ চূপধাৰথ চাতি ৰেগেন ধাৰথ চেৰ উপধাৰথ চ. ৰিৰিধা ৰিনাদিতা ৰদন্তিভীতি ৰরৰারণেহি সদ্ধিং ৰিৰিধা ৰিনদিতা ভৰথ, সেলিতগজ্জিতৰাদিতেহি নানাৰিরৰা হোথাতি অত্থো. ৰত্ততজ্জ তুমুলো ঘোসোতি ৰত্ততু অজ্জ তুমুলো মহন্তো অসনিসদ্দসদিসো ঘোসো. যথা ৰিজ্জুলতা জলধরস্স গজ্জতোতি যথা গজ্জন্তস্স ¶ জলধরস্স মুখতো নিগ্গতা ৰিজ্জুলতা চরন্তি, এৰং ৰিচরন্তা নগরং পরিৰারেত্ৰা রজ্জং গণ্হথাতি ৰদতি.

ইতি সো রাজা গজ্জিত্ৰা সেনং ৰিচারেত্ৰা নগরদ্ৰারসমীপং গন্ত্ৰা দ্ৰারকোট্ঠকং দিস্ৰা ‘‘ইদং রঞ্ঞো ৰসনগেহ’’ন্তি পুচ্ছিত্ৰা ‘‘অযং নগরদ্ৰারকোট্ঠকো’’তি ৰুত্তে ‘‘নগরদ্ৰারকোট্ঠকো তাৰ এৰরূপো, রঞ্ঞো নিৰেসনং কীদিসং ভৰিস্সতী’’তি ৰত্ৰা ‘‘ৰেজযন্তপাসাদসদিস’’ন্তি সুত্ৰা ‘‘এৰং যসসম্পন্নেন রঞ্ঞা সদ্ধিং যুজ্ঝিতুং ন সক্খিস্সামা’’তি দ্ৰারকোট্ঠকং দিস্ৰাৰ নিৰত্তিত্ৰা পলাযিত্ৰা বারাণসিমেৰ অগমাসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা বারাণসিরাজা পলাযিতপরিব্বাজকো অহোসি, তক্কসিলরাজা পন অহমেৰ অহোসি’’ন্তি.

পলাযিতজাতকৰণ্ণনা নৰমা.

[২৩০] ১০. দুতিযপলাযিতজাতকৰণ্ণনা

ধজমপরিমিতন্তি ¶ ইদং সত্থা জেতৰনে ৰিহরন্তো একং পলাযিতপরিব্বাজকমেৰ আরব্ভ কথেসি. ইমস্মিং পন ৰত্থুস্মিং সো পরিব্বাজকো জেতৰনং পাৰিসি. তস্মিং খণে সত্থা মহাজনপরিৰুতো অলঙ্কতধম্মাসনে নিসিন্নো মনোসিলাতলে সীহনাদং নদন্তো সীহপোতকো ৰিয ধম্মং দেসেতি. পরিব্বাজকো দসবলস্স ব্রহ্মসরীরপটিভাগং রূপং পুণ্ণচন্দসস্সিরিকং মুখং সুৰণ্ণপট্টসদিসং নলাটঞ্চ দিস্ৰা ‘‘কো এৰরূপং পুরিসুত্তমং জিনিতুং সক্খিস্সতী’’তি নিৰত্তিত্ৰা পরিসন্তরং পৰিসিত্ৰা পলাযি. মহাজনো তং অনুবন্ধিত্ৰা নিৰত্তিত্ৰা সত্থুস্স তং পৰত্তিং আরোচেসি. সত্থা ‘‘ন সো পরিব্বাজকো ইদানেৰ, পুব্বেপি মম সুৰণ্ণৰণ্ণং মুখং দিস্ৰা পলাতোযেৰা’’তি ৰত্ৰা অতীতং আহরি.

অতীতে বোধিসত্তো বারাণসিযং রজ্জং কারেসি, তক্কসিলাযং একো গন্ধাররাজা. সো ‘‘বারাণসিং গহেস্সামী’’তি চতুরঙ্গিনিযা সেনায আগন্ত্ৰা নগরং পরিৰারেত্ৰা নগরদ্ৰারে ঠিতো অত্তনো ¶ বলৰাহনং ওলোকেত্ৰা ‘‘কো এত্তকং বলৰাহনং জিনিতুং সক্খিস্সতী’’তি অত্তনো সেনং সংৰণ্ণেত্ৰা পঠমং গাথমাহ –

১৫৯.

‘‘ধজমপরিমিতং ¶ অনন্তপারং, দুপ্পসহং ধঙ্কেহি সাগরংৰ;

গিরিমিৰ অনিলেন দুপ্পসয্হো, দুপ্পসহো অহমজ্জ তাদিসেনা’’তি.

তত্থ ধজমপরিমিতন্তি ইদং তাৰ মে রথেসু মোরছদে ঠপেত্ৰা উস্সাপিতধজমেৰ অপরিমিতং বহুং অনেকসতসঙ্খ্যং. অনন্তপারন্তি বলৰাহনম্পি মে ‘‘এত্তকা হত্থী এত্তকা অস্সা এত্তকা রথা এত্তকা পত্তী’’তি গণনপরিচ্ছেদরহিতং অনন্তপারং. দুপ্পসহন্তি ন সক্কা পটিসত্তূহি সহিতুং অভিভৰিতুং ¶ . যথা কিং? ধঙ্কেহি সাগরংৰ, যথা সাগরো বহূহি কাকেহি ৰেগৰিক্খম্ভনৰসেন ৰা অতিক্কমনৰসেন ৰা দুপ্পসহো, এৰং দুপ্পসহং. গিরিমিৰ অনিলেন দুপ্পসয্হোতি অপিচ মে অযং বলকাযো যথা পব্বতো ৰাতেন অকম্পনীযতো দুপ্পসহো, তথা অঞ্ঞেন বলকাযেন দুপ্পসহো. দুপ্পসহো অহমজ্জ তাদিসেনাতি স্ৰাহং ইমিনা বলেন সমন্নাগতো অজ্জ তাদিসেন দুপ্পসহোতি অট্টালকে ঠিতং বোধিসত্তং সন্ধায ৰদতি.

অথস্স সো পুণ্ণচন্দসস্সিরিকং অত্তনো মুখং দস্সেত্ৰা ‘‘বাল, মা ৰিপ্পলপসি, ইদানি তে বলৰাহনং মত্তৰারণো ৰিয নল়ৰনং ৰিদ্ধংসেস্সামী’’তি সন্তজ্জেত্ৰা দুতিযং গাথমাহ –

১৬০.

‘‘মা বালিযং ৰিলপি ন হিস্স তাদিসং, ৰিডয্হসে ন হি লভসে নিসেধকং;

আসজ্জসি গজমিৰ একচারিনং, যো তং পদা নল়মিৰ পোথযিস্সতী’’তি.

তত্থ মা বালিযং ৰিলপীতি মা অত্তনো বালভাৰং ৰিপ্পলপসি. ন হিস্স তাদিসন্তি ন হি অস্স তাদিসো, অযমেৰ ৰা পাঠো. তাদিসো ‘‘অনন্তপারং মে বলৰাহন’’ন্তি এৰরূপং তক্কেন্তো রজ্জঞ্চ গহেতুং সমত্থো নাম ন হি অস্স, ন হোতীতি অত্থো. ৰিডয্হসেতি ত্ৰং বাল, কেৰলং রাগদোসমোহমানপরিল়াহেন ৰিডয্হসিযেৰ. ন হি লভসে নিসেধকন্তি মাদিসং পন পসয্হ অভিভৰিত্ৰা নিসেধকং ন তাৰ লভসি, অজ্জ ¶ তং আগতমগ্গেনেৰ পলাপেস্সামি. আসজ্জসীতি উপগচ্ছসি. গজমিৰ একচারিনন্তি একচারিনং মত্তৰরৰারণং ৰিয. যো তং পদা নল়মিৰ পোথযিস্সতীতি যো তং যথা নাম মত্তৰরৰারণো পাদা নল়ং পোথেতি সংচুণ্ণেতি, এৰং পোথযিস্সতি, তং ত্ৰং আসজ্জসীতি অত্তানং সন্ধাযাহ.

এৰং ¶ তজ্জেন্তস্স পনস্স কথং সুত্ৰা গন্ধাররাজা উল্লোকেন্তো ¶ কঞ্চনপট্টসদিসং মহানলাটং দিস্ৰা অত্তনো গহণভীতো নিৰত্তিত্ৰা পলাযন্তো সকনগরমেৰ অগমাসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা গন্ধাররাজা পলাযিতপরিব্বাজকো অহোসি, বারাণসিরাজা পন অহমেৰ অহোসি’’ন্তি.

দুতিযপলাযিতজাতকৰণ্ণনা দসমা.

কাসাৰৰগ্গো অট্ঠমো.

তস্সুদ্দানং –

কাসাৰং চূল়নন্দিযং, পুটভত্তঞ্চ কুম্ভিলং;

খন্তিৰণ্ণং কোসিযঞ্চ, গূথপাণং কামনীতং;

পলাযিতদ্ৰযম্পি চ.

৯. উপাহনৰগ্গো

[২৩১] ১. উপাহনজাতকৰণ্ণনা

যথাপি ¶ কীতাতি ইদং সত্থা জেতৰনে ৰিহরন্তো দেৰদত্তং আরব্ভ কথেসি. ধম্মসভাযঞ্হি ভিক্খূ কথং সমুট্ঠাপেসুং – ‘‘আৰুসো, দেৰদত্তো আচরিযং পচ্চক্খায তথাগতস্স পটিপক্খো পটিসত্তু হুত্ৰা মহাৰিনাসং পাপুণী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, দেৰদত্তো ¶ ইদানেৰ আচরিযং পচ্চক্খায মম পটিপক্খো হুত্ৰা মহাৰিনাসং পত্তো, পুব্বেপি পত্তোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হত্থাচরিযকুলে নিব্বত্তিত্ৰা ৰযপ্পত্তো হত্থিসিপ্পে নিপ্ফত্তিং পাপুণি. অথেকো কাসিগামকো মাণৰকো আগন্ত্ৰা তস্স সন্তিকে সিপ্পং উগ্গণ্হি. বোধিসত্তা নাম সিপ্পং ৰাচেন্তা আচরিযমুট্ঠিং ন করোন্তি, অত্তনো জানননিযামেন নিরৰসেসং সিক্খাপেন্তি. তস্মা সো মাণৰো বোধিসত্তস্স জাননসিপ্পং নিরৰসেসমুগ্গণ্হিত্ৰা বোধিসত্তং আহ – ‘‘আচরিয ¶ , অহং রাজানং উপট্ঠহিস্সামী’’তি. বোধিসত্তো ‘‘সাধু, তাতা’’তি গন্ত্ৰা রঞ্ঞো আরোচেসি – ‘‘মহারাজ, মম অন্তেৰাসিকো তুম্হে উপট্ঠাতুং ইচ্ছতী’’তি. ‘‘সাধু, উপট্ঠাতূ’’তি. ‘‘তেন হিস্স পরিব্বযং জানাথা’’তি? ‘‘তুম্হাকং অন্তেৰাসিকো তুম্হেহি সমকং ন লচ্ছতি, তুম্হেসু সতং লভন্তেসু পণ্ণাসং লচ্ছতি, দ্ৰে লভন্তেসু একং লচ্ছতী’’তি. সো গেহং গন্ত্ৰা তং পৰত্তিং অন্তেৰাসিকস্স আরোচেসি. অন্তেৰাসিকো ‘‘অহং, আচরিয, তুম্হেহি সমং সিপ্পং জানামি. সচে সমকঞ্ঞেৰ পরিব্বযং লভিস্সামি, উপট্ঠহিস্সামি. নো চে, ন উপট্ঠহিস্সামী’’তি আহ. বোধিসত্তো তং পৰত্তিং রঞ্ঞো আরোচেসি. রাজা ‘‘সচে সো তুম্হেহি সমপ্পকারো, তুম্হেহি সমকঞ্ঞেৰ সিপ্পং দস্সেতুং সক্কোন্তো সমকং লভিস্সতী’’তি আহ. বোধিসত্তো তং পৰত্তিং তস্স আরোচেত্ৰা তেন ‘‘সাধু দস্সেস্সামী’’তি ৰুত্তে রঞ্ঞো আরোচেসি. রাজা ‘‘তেন হি স্ৰে সিপ্পং দস্সেথা’’তি. ‘‘সাধু, দস্সেস্সাম, নগরে ভেরিং চরাপেথা’’তি. রাজা ‘‘স্ৰে কির আচরিযো চ অন্তেৰাসিকো চ উভো হত্থিসিপ্পং দস্সেস্সন্তি, রাজঙ্গণে সন্নিপতিত্ৰা দট্ঠুকামা পস্সন্তূ’’তি ভেরিং চরাপেসি.

আচরিযো ¶ ‘‘ন মে অন্তেৰাসিকো উপাযকোসল্লং জানাতী’’তি একং হত্থিং গহেত্ৰা একরত্তেনেৰ ৰিলোমং সিক্খাপেসি. সো তং ‘‘গচ্ছা’’তি ৰুত্তে ওসক্কিতুং, ‘‘ওসক্কা’’তি ৰুত্তে গন্তুং, ‘‘তিট্ঠা’’তি ৰুত্তে নিপজ্জিতুং, ‘‘নিপজ্জা’’তি ৰুত্তে ঠাতুং, ‘‘গণ্হা’’তি ৰুত্তে ঠপেতুং, ‘‘ঠপেহী’’তি ৰুত্তে গণ্হিতুং সিক্খাপেত্ৰা পুনদিৰসে তং হত্থিং অভিরুহিত্ৰা রাজঙ্গণং অগমাসি. অন্তেৰাসিকোপি একং মনাপং হত্থিং অভিরুহি. মহাজনো সন্নিপতি. উভোপি সমকং সিপ্পং দস্সেসুং. পুন বোধিসত্তো অত্তনো হত্থিং ¶ ৰিলোমং কারেসি, সো ‘‘গচ্ছা’’তি ¶ ৰুত্তে ওসক্কি, ‘‘ওসক্কা’’তি ৰুত্তে পুরতো ধাৰি, ‘‘তিট্ঠা’’তি ৰুত্তে নিপজ্জি, ‘‘নিপজ্জা’’তি ৰুত্তে অট্ঠাসি, ‘‘গণ্হা’’তি ৰুত্তে নিক্খিপি, ‘‘নিক্খিপা’’তি ৰুত্তে গণ্হি. মহাজনো ‘‘অরে দুট্ঠঅন্তেৰাসিক, ত্ৰং আচরিযেন সদ্ধিং সারম্ভং করোসি, অত্তনো পমাণং ন জানাসি, ‘আচরিযেন সমকং জানামী’তি এৰংসঞ্ঞী হোসী’’তি লেড্ডুদণ্ডাদীহি পহরিত্ৰা তত্থেৰ জীৰিতক্খযং পাপেসি.

বোধিসত্তো হত্থিম্হা ওরুয্হ রাজানং উপসঙ্কমিত্ৰা ‘‘মহারাজ, সিপ্পং নাম অত্তনো সুখত্থায গণ্হন্তি, একচ্চস্স পন গহিতসিপ্পং দুক্কটউপাহনা ৰিয ৰিনাসমেৰ আৰহতী’’তি ৰত্ৰা ইদং গাথাদ্ৰযমাহ –

১৬১.

‘‘যথাপি কীতা পুরিসস্সুপাহনা, সুখস্স অত্থায দুখং উদব্বহে;

ঘম্মাভিতত্তা তলসা পপীল়িতা, তস্সেৰ পাদে পুরিসস্স খাদরে.

১৬২.

‘‘এৰমেৰ যো দুক্কুলীনো অনরিযো, তম্মাক ৰিজ্জঞ্চ সুতঞ্চ আদিয;

তমেৰ সো তত্থ সুতেন খাদতি, অনরিযো ৰুচ্চতি পানদূপমো’’তি.

তত্থ উদব্বহেতি উদব্বহেয্য. ঘম্মাভিতত্তা তলসা পপীল়িতাতি ঘম্মেন অভিতত্তা পাদতলেন চ পীল়িতা. তস্সেৰাতি যেন তা সুখত্থায কিণিত্ৰা পাদেসু পটিমুক্কা দুক্কটূপাহনা, তস্সেৰ. খাদরেতি ৰণং করোন্তা পাদে খাদন্তি.

দুক্কুলীনোতি দুজ্জাতিকো অকুলপুত্তো. অনরিযোতি হিরোত্তপ্পৰজ্জিতো অসপ্পুরিসো. তম্মাক ৰিজ্জঞ্চ সুতঞ্চ আদিযাতি এত্থ তং তং মনতীতি ‘‘তম্মো’’তি ৰত্তব্বে তম্মাকো, তং তং সিপ্পং আসেৰতি পরিৰত্তেতীতি অত্থো, আচরিযস্সেতং নামং. তস্মা তম্মাকা, গাথাবন্ধসুখত্থং ¶ পনস্স রস্সভাৰো কতো. ৰিজ্জন্তি অট্ঠারসসু ৰিজ্জাট্ঠানেসু ¶ যংকিঞ্চি. সুতন্তি যংকিঞ্চি সুতপরিযত্তি. আদিযাতিআদিযিত্ৰা. তমেৰ সো তত্থ সুতেন খাদতীতি তমেৰাতি ¶ অত্তানমেৰ. সোতি যো দুক্কুলীনো অনরিযো আচরিযম্হা ৰিজ্জঞ্চ সুতঞ্চ আদিযতি, সো. তত্থ সুতেন খাদতীতি তস্স সন্তিকে সুতেন সো অত্তানমেৰ খাদতীতি অত্থো. অট্ঠকথাযং পন ‘‘তেনেৰ সো তত্থ সুতেন খাদতী’’তিপি পাঠো. তস্সাপি সো তেন তত্থ সুতেন অত্তানমেৰ খাদতীতি অযমেৰ অত্থো. অনরিযো ৰুচ্চতি পানদূপমোতি ইতি অনরিযো দুপাহনূপমো দুক্কটূপাহনূপমো ৰুচ্চতি. যথা হি দুক্কটূপাহনা পুরিসং খাদন্তি, এৰমেস সুতেন খাদন্তো অত্তনাৰ অত্তানং খাদতি. অথ ৰা পানায দুতোতি পানদু, উপাহনূপতাপিতস্স উপাহনায খাদিতপাদস্সেতং নামং. তস্মা যো সো অত্তানং সুতেন খাদতি, সো তেন সুতেন খাদিতত্তা ‘‘অনরিযো’’তি ৰুচ্চতি পানদূপমো, উপাহনূপতাপিতপাদসদিসোতি ৰুচ্চতীতি অযমেত্থ অত্থো. রাজা তুট্ঠো বোধিসত্তস্স মহন্তং যসং অদাসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা অন্তেৰাসিকো দেৰদত্তো অহোসি, আচরিযো পন অহমেৰ অহোসি’’ন্তি.

উপাহনজাতকৰণ্ণনা পঠমা.

[২৩২] ২. ৰীণাথূণজাতকৰণ্ণনা

একচিন্তিতোযমত্থোতি ইদং সত্থা জেতৰনে ৰিহরন্তো অঞ্ঞতরং কুমারিকং আরব্ভ কথেসি. সা কিরেকা সাৰত্থিযং সেট্ঠিধীতা অত্তনো গেহে উসভরাজস্স সক্কারং কযিরমানং দিস্ৰা ধাতিং পুচ্ছি – ‘‘অম্ম, কো নামেস এৰং সক্কারং লভতী’’তি. ‘‘উসভরাজা নাম, অম্মা’’তি. পুন সা একদিৰসং পাসাদে ঠত্ৰা অন্তরৰীথিং ওলোকেন্তী একং খুজ্জং দিস্ৰা চিন্তেসি – ‘‘গুন্নং ¶ অন্তরে জেট্ঠকস্স পিট্ঠিযং ককুধং হোতি, মনুস্সজেট্ঠকস্সপি তেন ভৰিতব্বং, অযং মনুস্সেসু পুরিসূসভো ভৰিস্সতি, এতস্স মযা পাদপরিচারিকায ভৰিতুং ৰট্টতী’’তি. সা দাসিং পেসেত্ৰা ¶ ‘‘সেট্ঠিধীতা তযা সদ্ধিং গন্তুকামা, অসুকট্ঠানং কির গন্ত্ৰা তিট্ঠা’’তি তস্স আরোচেত্ৰা সারভণ্ডকং আদায অঞ্ঞাতকৰেসেন পাসাদা ওতরিত্ৰা তেন সদ্ধিং পলাযি. অপরভাগে তং কম্মং নগরে চ ভিক্খুসঙ্ঘে চ পাকটং জাতং. ধম্মসভাযং ভিক্খূ কথং সমুট্ঠাপেসুং – ‘‘আৰুসো, অসুকা কির সেট্ঠিধীতা খুজ্জেন সদ্ধিং পলাতা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে সত্থা ‘‘ন, ভিক্খৰে, ইদানেৰেসা খুজ্জং কামেতি, পুব্বেপি কামেসিযেৰা’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো একস্মিং নিগমগামে সেট্ঠিকুলে নিব্বত্তিত্ৰা ৰযপ্পত্তো ঘরাৰাসং ৰসন্তো পুত্তধীতাহি ৰড্ঢমানো অত্তনো পুত্তস্স বারাণসীসেট্ঠিস্স ধীতরং ৰারেত্ৰা দিৰসং ঠপেসি. সেট্ঠিধীতা অত্তনো গেহে উসভস্স সক্কারসম্মানং দিস্ৰা ‘‘কো নামেসো’’তি ধাতিং পুচ্ছিত্ৰা ‘‘উসভো’’তি সুত্ৰা অন্তরৰীথিযা গচ্ছন্তং একং খুজ্জং দিস্ৰা ‘‘অযং পুরিসূসভো ভৰিস্সতী’’তি সারভণ্ডকং গহেত্ৰা তেন সদ্ধিং পলাযি. বোধিসত্তোপি খো ‘‘সেট্ঠিধীতরং গেহং আনেস্সামী’’তি মহন্তেন পরিৰারেন বারাণসিং গচ্ছন্তো তমেৰ মগ্গং পটিপজ্জি. তে উভোপি সব্বরত্তিং মগ্গং অগমংসু. অথ খুজ্জস্স সব্বরত্তিং সীতাসিহতস্স অরুণোদযে সরীরে ৰাতো কুপ্পি, মহন্তা ৰেদনা ৰত্তন্তি. সো মগ্গা ওক্কম্ম ৰেদনাপ্পত্তো হুত্ৰা ৰীণাদণ্ডকো ৰিয সংকুটিতো নিপজ্জি, সেট্ঠিধীতাপিস্স পাদমূলে নিসীদি. বোধিসত্তো সেট্ঠিধীতরং খুজ্জস্স পাদমূলে নিসিন্নং দিস্ৰা সঞ্জানিত্ৰা উপসঙ্কমিত্ৰা সেট্ঠিধীতায সদ্ধিং সল্লপন্তো পঠমং গাথমাহ –

১৬৩.

‘‘একচিন্তিতোযমত্থো ¶ , বালো অপরিণাযকো;

ন হি খুজ্জেন ৰামেন, ভোতি সঙ্গন্তুমরহসী’’তি.

তত্থ একচিন্তিতোযমত্থোতি অম্ম, যং ত্ৰং অত্থং চিন্তেত্ৰা ইমিনা খুজ্জেন সদ্ধিং পলাতা, অযং তযা একিকায এৰ চিন্তিতো ভৰিস্সতি. বালো অপরিণাযকোতি অযং খুজ্জো বালো, দুপ্পঞ্ঞভাৰেন মহল্লকোপি বালোৰ, অঞ্ঞস্মিং গহেত্ৰা গচ্ছন্তে অসতি গন্তুং অসমত্থতায অপরিণাযকো. ন হি খুজ্জেন ৰামেন, ভোতি সঙ্গন্তুমরহসীতি ¶ ইমিনা হি খুজ্জেন ৰামনত্তা ৰামেন ভোতি ত্ৰং মহাকুলে জাতা অভিরূপা দস্সনীযা সঙ্গন্তুং সহ গন্তুং নারহসীতি.

অথস্স তং ৰচনং সুত্ৰা সেট্ঠিধীতা দুতিযং গাথমাহ –

১৬৪.

‘‘পুরিসূসভং মঞ্ঞমানা, অহং খুজ্জমকামযিং;

সোযং সংকুটিতো সেতি, ছিন্নতন্তি যথা থুণা’’তি.

তস্সত্থো – অহং, অয্য, একং উসভং দিস্ৰা ‘‘গুন্নং জেট্ঠকস্স পিট্ঠিযং ককুধং হোতি, ইমস্সপি তং অত্থি, ইমিনাপি পুরিসূসভেন ভৰিতব্ব’’ন্তি এৰমহং খুজ্জং পুরিসূসভং মঞ্ঞমানা অকামযিং. সোযং যথা নাম ছিন্নতন্তি সদোণিকো ৰীণাদণ্ডকো, এৰং সংকুটিতো সেতীতি.

বোধিসত্তো ¶ তস্সা অঞ্ঞাতকৰেসেন নিক্খন্তভাৰমেৰ ঞত্ৰা তং ন্হাপেত্ৰা অলঙ্করিত্ৰা রথং আরোপেত্ৰা গেহমেৰ অগমাসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা অযমেৰ সেট্ঠিধীতা অহোসি, বারাণসীসেট্ঠি পন অহমেৰ অহোসি’’ন্তি.

ৰীণাথূণজাতকৰণ্ণনা দুতিযা.

[২৩৩] ৩. ৰিকণ্ণকজাতকৰণ্ণনা

কামং ¶ যহিং ইচ্ছসি তেন গচ্ছাতি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. সো হি ধম্মসভং আনীতো ‘‘সচ্চং কির, ত্ৰং ভিক্খু, উক্কণ্ঠিতো’’তি সত্থারা পুট্ঠো ‘‘সচ্চ’’ন্তি ৰত্ৰা ‘‘কস্মা উক্কণ্ঠিতোসী’’তি ৰুত্তে ‘‘কামগুণকারণা’’তি আহ. অথ নং সত্থা ‘‘কামগুণা নামেতে ভিক্খু ৰিকণ্ণকসল্লসদিসা, সকিং হদযে পতিট্ঠং লভমানা ৰিকণ্ণকং ৰিয ৰিদ্ধং সুংসুমারং মরণমেৰ পাপেন্তী’’তি ৰত্ৰা অতীতং আহরি.

অতীতে বোধিসত্তো বারাণসিযং ধম্মেন রজ্জং কারেন্তো একদিৰসং উয্যানং গন্ত্ৰা পোক্খরণীতীরং সম্পাপুণি. নচ্চগীতাসু কুসলা নচ্চগীতানি ¶ পযোজেসুং, পোক্খরণিযং মচ্ছকচ্ছপা গীতসদ্দলোলতায সন্নিপতিত্ৰা রঞ্ঞাৰ সদ্ধিং গচ্ছন্তি. রাজা তালক্খন্ধপ্পমাণং মচ্ছঘটং দিস্ৰা ‘‘কিং নু খো ইমে মচ্ছা মযা সদ্ধিংযেৰ চরন্তী’’তি অমচ্চে পুচ্ছি. অমচ্চা ‘‘এতে, দেৰ, উপট্ঠহন্তী’’তি আহংসু. রাজা ‘‘এতে কির মং উপট্ঠহন্তী’’তি তুস্সিত্ৰা তেসং নিচ্চভত্তং পট্ঠপেসি. দেৰসিকং তণ্ডুলম্বণং পাচেসি. মচ্ছা ভত্তৰেলায একচ্চে আগচ্ছন্তি, একচ্চে নাগচ্ছন্তি, ভত্তং নস্সতি. রঞ্ঞো তমত্থং আরোচেসুং. রাজা ‘‘ইতো পট্ঠায সত্তৰেলায ভেরিং পহরিত্ৰা ভেরিসঞ্ঞায মচ্ছেসু সন্নিপতিতেসু ভত্তং দেথা’’তি আহ. ততো পট্ঠায ভত্তকম্মিকো ভেরিং পহরাপেত্ৰা সন্নিপতিতানং মচ্ছানং ভত্তং দেতি. তেপি ভেরিসঞ্ঞায সন্নিপতিত্ৰা ভুঞ্জন্তি.

তেসু এৰং সন্নিপতিত্ৰা ভুঞ্জন্তেসু একো সুংসুমারো আগন্ত্ৰা মচ্ছে খাদি. ভত্তকম্মিকো রঞ্ঞো আরোচেসি. রাজা তং সুত্ৰা ‘‘সুংসুমারং মচ্ছানং খাদনকালে ৰিকণ্ণকেন ¶ ৰিজ্ঝিত্ৰা গণ্হা’’তি আহ ¶ . সো ‘‘সাধূ’’তি গন্ত্ৰা নাৰায ঠত্ৰা মচ্ছে খাদিতুং আগতং সুংসুমারং ৰিকণ্ণকেন পহরি, তং তস্স অন্তোপিট্ঠিং পাৰিসি. সো ৰেদনাপ্পত্তো হুত্ৰা তং গহেত্ৰাৰ পলাযি. ভত্তকম্মিকো তস্স ৰিদ্ধভাৰং ঞত্ৰা তং আলপন্তো পঠমং গাথমাহ –

১৬৫.

‘‘কামং যহিং ইচ্ছসি তেন গচ্ছ, ৰিদ্ধোসি মম্মম্হি ৰিকণ্ণকেন;

হতোসি ভত্তেন সুৰাদিতেন, লোলো চ মচ্ছে অনুবন্ধমানো’’তি.

তত্থ কামন্তি একংসেন. যহিং ইচ্ছসি তেন গচ্ছাতি যস্মিং ইচ্ছসি, তস্মিং গচ্ছ. মম্মম্হীতি মম্মট্ঠানে. ৰিকণ্ণকেনাতি ৰিকণ্ণকসল্লেন. হতোসি ভত্তেন সুৰাদিতেন, লোলো চ মচ্ছে অনুবন্ধমানোতি ত্ৰং ভেরিৰাদিতসঞ্ঞায ভত্তে দীযমানে লোলো হুত্ৰা খাদনত্থায মচ্ছে অনুবন্ধমানো তেন সৰাদিতেন ভত্তেন হতো, গতট্ঠানেপি তে জীৰিতং নত্থীতি অত্থো. সো অত্তনো ৰসনট্ঠানং গন্ত্ৰা জীৰিতক্খযং পত্তো.

সত্থা ¶ ইমং কারণং দস্সেত্ৰা অভিসম্বুদ্ধো হুত্ৰা দুতিযং গাথমাহ –

১৬৬.

‘‘এৰম্পি লোকামিসং ওপতন্তো, ৰিহঞ্ঞতী চিত্তৰসানুৰত্তী;

সো হঞ্ঞতী ঞাতিসখান মজ্ঝে, মচ্ছানুগো সোরিৰ সুংসুমারো’’তি.

তত্থ লোকামিসন্তি পঞ্চ কামগুণা. তে হি লোকো ইট্ঠতো কন্ততো মনাপতো গণ্হাতি, তস্মা ‘‘লোকামিস’’ন্তি ৰুচ্চতি. ওপতন্তোতি তং লোকামিসং অনুপতন্তো কিলেসৰসেন চিত্তৰসানুৰত্তী পুগ্গলো ৰিহঞ্ঞতি কিলমতি, সো হঞ্ঞতীতি সো এৰরূপো পুগ্গলো ঞাতীনঞ্চ সখানঞ্চ মজ্ঝে সো ৰিকণ্ণকেন ৰিদ্ধো মচ্ছানুগো সুংসুমারো ৰিয পঞ্চ কামগুণে মনাপাতি গহেত্ৰা হঞ্ঞতি কিলমতি মহাৰিনাসং পাপুণাতিযেৰাতি.

এৰং ¶ সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. ‘‘তদা সুংসুমারো দেৰদত্তো, মচ্ছা বুদ্ধপরিসা, বারাণসিরাজা পন অহমেৰ অহোসি’’ন্তি.

ৰিকণ্ণকজাতকৰণ্ণনা ততিযা.

[২৩৪] ৪. অসিতাভূজাতকৰণ্ণনা

ত্ৰমেৰ ¶ দানিমকরাতি ইদং সত্থা জেতৰনে ৰিহরন্তো অঞ্ঞতরং কুমারিকং আরব্ভ কথেসি. সাৰত্থিযং কিরেকস্মিং দ্ৰিন্নং অগ্গসাৰকানং উপট্ঠাককুলে একা কুমারিকা অভিরূপা সোভগ্গপ্পত্তা, সা ৰযপ্পত্তা সমানজাতিকং কুলং অগমাসি. সামিকো তং কিস্মিঞ্চি অমঞ্ঞমানো অঞ্ঞত্থ চিত্তৰসেন চরতি. সা তস্স তং অত্তনি অনাদরতং অগণেত্ৰা দ্ৰে অগ্গসাৰকে নিমন্তেত্ৰা দানং দত্ৰা ধম্মং সুণন্তী সোতাপত্তিফলে পতিট্ঠহি. সা ততো পট্ঠায মগ্গফলসুখেন ৰীতিনামযমানা ‘‘সামিকোপি মং ন ইচ্ছতি, ঘরাৰাসেন মে কম্মং নত্থি, পব্বজিস্সামী’’তি চিন্তেত্ৰা ¶ মাতাপিতূনং আচিক্খিত্ৰা পব্বজিত্ৰা অরহত্তং পাপুণি. তস্সা সা কিরিযা ভিক্খূসু পাকটা জাতা. অথেকদিৰসং ভিক্খূ ধম্মসভাযং কথং সমুট্ঠাপেসুং – ‘‘আৰুসো, অসুককুলস্স ধীতা অত্থগৰেসিকা সামিকস্স অনিচ্ছভাৰং ঞত্ৰা অগ্গসাৰকানং ধম্মং সুত্ৰা সোতাপত্তিফলে পতিট্ঠায পুন মাতাপিতরো আপুচ্ছিত্ৰা পব্বজিত্ৰা অরহত্তং পত্তা, এৰং অত্থগৰেসিকা, আৰুসো সা কুমারিকা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰেসা কুলধীতা অত্থগৰেসিকা, পুব্বেপি অত্থগৰেসিকাযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো ইসিপব্বজ্জং পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা হিমৰন্তপদেসে ৰাসং কপ্পেসি. তদা বারাণসিরাজা অত্তনো পুত্তস্স ব্রহ্মদত্তকুমারস্স পরিৰারসম্পত্তিং দিস্ৰা উপ্পন্নাসঙ্কো পুত্তং রট্ঠা পব্বাজেসি. সো ¶ অসিতাভুং নাম অত্তনো দেৰিং আদায হিমৰন্তং পৰিসিত্ৰা মচ্ছমংসফলাফলানি খাদন্তো পণ্ণসালায নিৰাসং কপ্পেসি. সো একং কিন্নরিং দিস্ৰা পটিবদ্ধচিত্তো ‘‘ইমং পজাপতিং করিস্সামী’’তি অসিতাভুং অগণেত্ৰা তস্সা অনুপদং অগমাসি. সা তং কিন্নরিং অনুবন্ধমানং দিস্ৰা ‘‘অযং মং অগণেত্ৰা কিন্নরিং অনুবন্ধতি, কিং মে ইমিনা’’তি ৰিরত্তচিত্তা হুত্ৰা বোধিসত্তং উপসঙ্কমিত্ৰা ৰন্দিত্ৰা অত্তনো কসিণপরিকম্মং কথাপেত্ৰা কসিণং ওলোকেন্তী অভিঞ্ঞা চ সমাপত্তিযো চ নিব্বত্তেত্ৰা বোধিসত্তং ৰন্দিত্ৰা আগন্ত্ৰা অত্তনো পণ্ণসালায দ্ৰারে অট্ঠাসি. ব্রহ্মদত্তোপি কিন্নরিং অনুবন্ধন্তো ৰিচরিত্ৰা তস্সা গতমগ্গম্পি অদিস্ৰা ছিন্নাসো হুত্ৰা পণ্ণসালাভিমুখোৰ আগতো. অসিতাভূ তং আগচ্ছন্তং দিস্ৰা ৰেহাসং অব্ভুগ্গন্ত্ৰা মণিৰণ্ণে গগনতলে ঠিতা ‘‘অয্যপুত্ত, তং নিস্সায মযা ইদং ঝানসুখং লদ্ধ’’ন্তি ৰত্ৰা ইমং গাথমাহ –

১৬৭.

‘‘ত্ৰমেৰ ¶ দানিমকর, যং কামো ব্যগমা তযি;

সোযং অপ্পটিসন্ধিকো, খরছিন্নংৰ রেনুক’’ন্তি.

তত্থ ¶ ত্ৰমেৰ দানিমকরাতি, অয্যপুত্ত, মং পহায কিন্নরিং অনুবন্ধন্তো ত্ৰঞ্ঞেৰ ইদানি ইদং অকর. যং কামো ব্যগমা তযীতি যং মম তযি কামো ৰিগতো ৰিক্খম্ভনপ্পহানেন পহীনো, যস্স পহীনত্তা অহং ইমং ৰিসেসং পত্তাতি দীপেতি. সোযং অপ্পটিসন্ধিকোতি সো পন কামো ইদানি অপ্পটিসন্ধিকো জাতো, ন সক্কা পটিসন্ধিতুং. খরছিন্নংৰ রেনুকন্তি খরো ৰুচ্চতি ককচো, রেনুকং ৰুচ্চতি হত্থিদন্তো. যথা ককচেন ছিন্নো হত্থিদন্তো অপ্পটিসন্ধিকো হোতি, ন পুন পুরিমনযেন অল্লীযতি, এৰং পুন ময্হং তযা সদ্ধিং চিত্তস্স ঘটনং নাম নত্থীতি ৰত্ৰা তস্স পস্সন্তস্সেৰ উপ্পতিত্ৰা অঞ্ঞত্থ অগমাসি.

সো তস্সা গতকালে পরিদেৰমানো দুতিযং গাথমাহ –

১৬৮.

‘‘অত্রিচ্ছং অতিলোভেন ¶ , অতিলোভমদেন চ;

এৰং হাযতি অত্থম্হা, অহংৰ অসিতাভুযা’’তি.

তত্থ অত্রিচ্ছং অতিলোভেনাতি অত্রিচ্ছা ৰুচ্চতি অত্র অত্র ইচ্ছাসঙ্খাতা অপরিযন্ততণ্হা, অতিলোভো ৰুচ্চতি অতিক্কমিত্ৰা পৰত্তলোভো. অতিলোভমদেন চাতি পুরিসমদং উপ্পাদনতো অতিলোভমদো নাম জাযতি. ইদং ৰুত্তং হোতি – অত্রিচ্ছাৰসেন অত্রিচ্ছমানো পুগ্গলো অতিলোভেন চ অতিলোভমদেন চ যথা অহং অসিতাভুযা রাজধীতায পরিহীনো, এৰং অত্থা হাযতীতি.

ইতি সো ইমায গাথায পরিদেৰিত্ৰা অরঞ্ঞে এককোৰ ৰসিত্ৰা পিতু অচ্চযেন গন্ত্ৰা রজ্জং গণ্হি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা রাজপুত্তো চ রাজধীতা চ ইমে দ্ৰে জনা অহেসুং, তাপসো পন অহমেৰ অহোসি’’ন্তি.

অসিতাভূজাতকৰণ্ণনা চতুত্থা.

[২৩৫] ৫. ৰচ্ছনখজাতকৰণ্ণনা

সুখা ¶ ¶ ঘরা ৰচ্ছনখাতি ইদং সত্থা জেতৰনে ৰিহরন্তো রোজমল্লং আরব্ভ কথেসি. সো কিরাযস্মতো আনন্দস্স গিহিসহাযো. সো একদিৰসং আগমনত্থায থেরস্স সাসনং পাহেসি, থেরো সত্থারং আপুচ্ছিত্ৰা অগমাসি. সো থেরং নানগ্গরসভোজনং ভোজেত্ৰা একমন্তং নিসিন্নো থেরেন সদ্ধিং পটিসন্থারং কত্ৰা থেরং গিহিভোগেহি পঞ্চহি কামগুণেহি নিমন্তেন্তো ‘‘ভন্তে আনন্দ, মম গেহে পহূতং সৰিঞ্ঞাণকঅৰিঞ্ঞাণকরতনং, ইদং মজ্ঝে ভিন্দিত্ৰা তুয্হং দম্মি, এহি উভো অগারং অজ্ঝাৰসামা’’তি. থেরো তস্স কামগুণেসু আদীনৰং কথেত্ৰা উট্ঠাযাসনা ৰিহারং গন্ত্ৰা ‘‘দিট্ঠো তে, আনন্দ, রোজো’’তি সত্থারা পুচ্ছিতো ‘‘আম, ভন্তে’’তি ৰত্ৰা ‘‘কিমস্স কথেসী’’তি ৰুত্তে ‘‘ভন্তে, মং রোজো ঘরাৰাসেন নিমন্তেসি, অথস্সাহং ঘরাৰাসে চেৰ কামগুণেসু চ আদীনৰং কথেসি’’ন্তি. সত্থা ‘‘ন খো, আনন্দ, রোজো মল্লো ইদানেৰ পব্বজিতে ঘরাৰাসেন নিমন্তেসি, পুব্বেপি নিমন্তেসিযেৰা’’তি ৰত্ৰা তেন যাচিতো অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো অঞ্ঞতরস্মিং নিগমগামে ব্রাহ্মণকুলে নিব্বত্তিত্ৰা ৰযপ্পত্তো ইসিপব্বজ্জং পব্বজিত্ৰা হিমৰন্তপদেসে চিরং ৰসিত্ৰা লোণম্বিলসেৰনত্থায বারাণসিং পত্ৰা রাজুয্যানে ৰসিত্ৰা পুনদিৰসে বারাণসিং পাৰিসি. অথস্স বারাণসিসেট্ঠি আচারৰিহারে পসীদিত্ৰা গেহং নেত্ৰা ভোজেত্ৰা উয্যানে ৰসনত্থায পটিঞ্ঞং গহেত্ৰা তং পটিজগ্গন্তো উয্যানে ৰসাপেসি. তে অঞ্ঞমঞ্ঞং উপ্পন্নসিনেহা অহেসুং.

অথেকদিৰসং বারাণসিসেট্ঠি বোধিসত্তে পেমৰিস্সাসৰসেন এৰং চিন্তেসি – ‘‘পব্বজ্জা নাম দুক্খা, মম সহাযং ৰচ্ছনখপরিব্বাজকং উপ্পব্বাজেত্ৰা সব্বং ৰিভৰং মজ্ঝে ভিন্দিত্ৰা তস্স দত্ৰা দ্ৰেপি সমগ্গৰাসং ৰসিস্সামা’’তি. সো একদিৰসং ভত্তকিচ্চপরিযোসানে তেন সদ্ধিং মধুরপটিসন্থারং কত্ৰা ‘‘ভন্তে ৰচ্ছনখ, পব্বজ্জা নাম দুক্খা, সুখো ঘরাৰাসো, এহি উভো সমগ্গা কামে পরিভুঞ্জন্তা ৰসামা’’তি ৰত্ৰা পঠমং গাথমাহ –

১৬৯.

‘‘সুখা ¶ ঘরা ৰচ্ছনখ, সহিরঞ্ঞা সভোজনা;

যত্থ ভুত্ৰা পিৰিত্ৰা চ, সযেয্যাথ অনুস্সুকো’’তি.

তত্থ ¶ সহিরঞ্ঞাতি সত্তরতনসম্পন্না. সভোজনাতি বহুখাদনীযভোজনীযা. যত্থ ভুত্ৰা পিৰিত্ৰা চাতি যেসু সহিরঞ্ঞভোজনেসু ঘরেসু নানগ্গরসানি ভোজনানি পরিভুঞ্জিত্ৰা নানাপানানি চ পিৰিত্ৰা. সযেয্যাথ অনুস্সুকোতি যেসু অলঙ্কতসিরিসযনপিট্ঠে অনুস্সুকো হুত্ৰা সযেয্যাসি, তে ঘরা নাম অতিৰিয সুখাতি.

অথস্স তং সুত্ৰা বোধিসত্তো ‘‘মহাসেট্ঠি, ত্ৰং অঞ্ঞাণতায কামগিদ্ধো হুত্ৰা ঘরাৰাসস্স গুণং, পব্বজ্জায চ অগুণং কথেসি, ঘরাৰাসস্স তে অগুণং কথেস্সামি, সুণাহি দানী’’তি ৰত্ৰা দুতিযং গাথমাহ –

১৭০.

‘‘ঘরা ¶ নানীহমানস্স, ঘরা নাভণতো মুসা;

ঘরা নাদিন্নদণ্ডস্স, পরেসং অনিকুব্বতো;

এৰং ছিদ্দং দুরভিসম্ভৰং, কো ঘরং পটিপজ্জতী’’তি.

তত্থ ঘরা নানীহমানস্সাতি নিচ্চকালং কসিগোরক্খাদিকরণেন অনীহমানস্স অৰাযমন্তস্স ঘরা নাম নত্থি, ঘরাৰাসো ন পতিট্ঠাতীতি অত্থো. ঘরা নাভণতো মুসাতি খেত্তৰত্থুহিরঞ্ঞসুৰণ্ণাদীনং অত্থায অমুসাভণতোপি ঘরা নাম নত্থি. ঘরা নাদিন্নদণ্ডস্স, পরেসং অনিকুব্বতোতি নাদিন্নদণ্ডস্সাতি অগ্গহিতদণ্ডস্স, নিক্খিত্তদণ্ডস্স পরেসং অনিকুব্বতো ঘরা নাম নত্থি. যো পন আদিন্নদণ্ডো হুত্ৰা পরেসং দাসকম্মকরাদীনং তস্মিং তস্মিং অপরাধে অপরাধানুরূপং ৰধবন্ধনছেদনতাল়নাদিৰসেন করোতি, তস্সেৰ ঘরাৰাসো সণ্ঠহতীতি অত্থো. এৰং ছিদ্দং দুরভিসম্ভৰং, কো ঘরং পটিপজ্জতীতি তং দানি এৰং এতেসং ঈহনাদীনং অকরণে সতি তায তায পরিহানিযা ছিদ্দং করণেপি সতি নিচ্চমেৰ কাতব্বতো দুরভিসম্ভৰং দুরারাধনীযং, নিচ্চং করোন্তস্সপি ৰা দুরভিসম্ভৰমেৰ দুপ্পূরং ঘরাৰাসং ‘‘অহং নিপ্পরিতস্সো হুত্ৰা অজ্ঝাৰসিস্সামী’’তি কো পটিপজ্জতীতি.

এৰং মহাসত্তো ঘরাৰাসস্স দোসং কথেত্ৰা উয্যানমেৰ অগমাসি.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা বারাণসিসেট্ঠি রোজো মল্লো অহোসি, ৰচ্ছনখপরিব্বাজকো পন অহমেৰ অহোসি’’ন্তি.

ৰচ্ছনখজাতকৰণ্ণনা পঞ্চমা.

[২৩৬] ৬. বকজাতকৰণ্ণনা

ভদ্দকো ¶ ৰতযং পক্খীতি ইদং সত্থা জেতৰনে ৰিহরন্তো একং কুহকভিক্খুং আরব্ভ কথেসি. তঞ্হি সত্থা আনেত্ৰা দস্সিতং দিস্ৰা ‘‘ন, ভিক্খৰে, ইদানেৰ, পুব্বেপেস কুহকোযেৰা’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে একস্মিং সরে মচ্ছো হুত্ৰা মহাপরিৰারো ৰসি. অথেকো বকো ‘‘মচ্ছে খাদিস্সামী’’তি সরস্স আসন্নট্ঠানে সীসং পাতেত্ৰা পক্খে পসারেত্ৰা মন্দমন্দো মচ্ছে ওলোকেন্তো অট্ঠাসি তেসং পমাদং আগমযমানো. তস্মিং খণে বোধিসত্তো মচ্ছগণপরিৰুতো গোচরং গণ্হন্তো তং ঠানং পাপুণি. মচ্ছগণো তং বকং পস্সিত্ৰা পঠমং গাথমাহ –

১৭১.

‘‘ভদ্দকো ৰতযং পক্খী, দিজো কুমুদসন্নিভো;

ৰূপসন্তেহি পক্খেহি, মন্দমন্দোৰ ঝাযতী’’তি.

তত্থ মন্দমন্দোৰ ঝাযতীতি অবলবলো ৰিয হুত্ৰা কিঞ্চি অজানন্তো ৰিয এককোৰ ঝাযতীতি.

অথ নং বোধিসত্তো ওলোকেত্ৰা দুতিযং গাথমাহ –

১৭২.

‘‘নাস্স সীলং ৰিজানাথ, অনঞ্ঞায পসংসথ;

অম্হে দিজো ন পালেতি, তেন পক্খী ন ফন্দতী’’তি.

তত্থ অনঞ্ঞাযাতি অজানিত্ৰা. অম্হে দিজো ন পালেতীতি এস দিজো অম্হে ন রক্খতি ন গোপাযতি, ‘‘কতরং নু খো এতেসু কবল়ং করিস্সামী’’তি উপধারেতি. তেন পক্খী ন ফন্দতীতি তেনাযং সকুণো ন ফন্দতি ¶ ন চলতীতি. এৰং ৰুত্তে মচ্ছগণো উদকং খোভেত্ৰা বকং পলাপেসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা বকো কুহকো ভিক্খু অহোসি, মচ্ছরাজা পন অহমেৰ অহোসি’’ন্তি.

বকজাতকৰণ্ণনা ছট্ঠা.

[২৩৭] ৭. সাকেতজাতকৰণ্ণনা

কো ¶ নু খো ভগৰা হেতূতি ইদং সত্থা সাকেতং উপনিস্সায ৰিহরন্তো সাকেতং ব্রাহ্মণং আরব্ভ কথেসি. ৰত্থু পনেত্থ অতীতম্পি পচ্চুপ্পন্নম্পি হেট্ঠা এককনিপাতে (জা. অট্ঠ. ১.১.সাকেতজাতকৰণ্ণনা) কথিতমেৰ. তথাগতস্স ¶ পন ৰিহারং গতকালে ভিক্খূ ‘‘সিনেহো নামেস, ভন্তে, কথং পতিট্ঠাতী’’তি পুচ্ছন্তা পঠমং গাথমাহংসু –

১৭৩.

‘‘কো নু খো ভগৰা হেতু, একচ্চে ইধ পুগ্গলে;

অতীৰ হদযং নিব্বাতি, চিত্তঞ্চাপি পসীদতী’’তি.

তস্সত্থো – কো নু খো হেতু, যেন ইধেকচ্চে পুগ্গলে দিট্ঠমত্তেযেৰ হদযং অতিৰিয নিব্বাতি, সুৰাসিতস্স সীতস্স উদকস্স ঘটসহস্সেন পরিসিত্তং ৰিয সীতলং হোতি, একচ্চে ন নিব্বাতি. একচ্চে দিট্ঠমত্তেযেৰ চিত্তং পসীদতি, মুদু হোতি, পেমৰসেন অল্লীযতি, একচ্চে ন অল্লীযতীতি.

অথ নেসং সত্থা পেমকারণং দস্সেন্তো দুতিযং গাথমাহ –

১৭৪.

‘‘পুব্বেৰ সন্নিৰাসেন, পচ্চুপ্পন্নহিতেন ৰা;

এৰং তং জাযতে পেমং, উপ্পলংৰ যথোদকে’’তি.

তস্সত্থো – ভিক্খৰে, পেমং নামেতং দ্ৰীহি কারণেহি জাযতি, পুরিমভৰে মাতা ৰা পিতা ৰা পুত্তো ৰা ধীতা ৰা ভাতা ৰা ভগিনী ৰা পতি ৰা ভরিযা ৰা সহাযো ৰা মিত্তো ৰা হুত্ৰা যো যেন সদ্ধিং ¶ একট্ঠানে ৰুত্থপুব্বো, তস্স ইমিনা পুব্বেৰ সন্নিৰাসেন ভৰন্তরেপি অনুবন্ধন্তো সো সিনেহো ন ৰিজহতি. ইমস্মিং অত্তভাৰে কতেন পচ্চুপ্পন্নহিতেন ৰা এৰং তং জাযতে পেমং, ইমেহি দ্ৰীহি কারণেহি পেমং নাম জাযতি. যথা কিং? উপ্পলংৰ যথোদকেতি. ৰা-কারস্স রস্সত্তং কতং. সমুচ্চযত্থে চেস ৰুত্তো, তস্মা উপ্পলঞ্চ সেসং জলজপুপ্ফঞ্চ যথা উদকে জাযমানং দ্ৰে কারণানি নিস্সায জাযতি উদকঞ্চেৰ কললঞ্চ, তথা এতেহি দ্ৰীহি কারণেহি পেমং জাযতীতি এৰমেত্থ অত্থো দট্ঠব্বো.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা ব্রাহ্মণো চ ব্রাহ্মণী চ ইমে দ্ৰে জনা অহেসুং, পুত্তো পন অহমেৰ অহোসি’’ন্তি.

সাকেতজাতকৰণ্ণনা সত্তমা.

[২৩৮] ৮. একপদজাতকৰণ্ণনা

ইঙ্ঘ ¶ একপদং, তাতাতি ইদং সত্থা জেতৰনে ৰিহরন্তো একং কুটুম্বিকং আরব্ভ কথেসি. সাৰত্থিৰাসী কিরেস কুটুম্বিকো, অথস্স একদিৰসং অঙ্কে নিসিন্নো পুত্তো অত্থস্স দ্ৰারং নাম পঞ্হং পুচ্ছি. সো ‘‘বুদ্ধৰিসযো এস পঞ্হো, ন তং অঞ্ঞো কথেতুং সক্খিস্সতী’’তি পুত্তং গহেত্ৰা জেতৰনং গন্ত্ৰা সত্থারং ৰন্দিত্ৰা ‘‘ভন্তে, অযং মে দারকো ঊরুম্হি নিসিন্নো অত্থস্স দ্ৰারং নাম পঞ্হং পুচ্ছি, অহং তং অজানন্তো ইধাগতো, কথেথ, ভন্তে, ইমং পঞ্হ’’ন্তি. সত্থা ‘‘ন খো, উপাসক, অযং দারকো ইদানেৰ অত্থগৰেসকো, পুব্বেপি অত্থগৰেসকোৰ হুত্ৰা ইমং পঞ্হং পণ্ডিতে পুচ্ছি, পোরাণকপণ্ডিতাপিস্স কথেসুং, ভৰসঙ্খেপগতত্তা পন ন সল্লক্খেসী’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সেট্ঠিকুলে নিব্বত্তিত্ৰা ৰযপ্পত্তো পিতু অচ্চযেন সেট্ঠিট্ঠানং লভি. অথস্স পুত্তো দহরো কুমারো ঊরুম্হি নিসীদিত্ৰা ‘‘তাত, ময্হং একপদং অনেকত্থনিস্সিতং একং কারণং কথেথা’’তি পুচ্ছন্তো পঠমং গাথমাহ –

১৭৫.

‘‘ইঙ্ঘ ¶ একপদং তাত, অনেকত্থপদস্সিতং;

কিঞ্চি সঙ্গাহিকং ব্রূসি, যেনত্থে সাধযেমসে’’তি.

তত্থ ইঙ্ঘাতি যাচনত্থে চোদনত্থে ৰা নিপাতো. একপদন্তি একং কারণপদং, একং কারণূপসঞ্হিতং ৰা ব্যঞ্জনপদং. অনেকত্থপদস্সিতন্তি অনেকানি অত্থপদানি কারণপদানি নিস্সিতং. কিঞ্চি সঙ্গাহিকং ব্রূসীতি কিঞ্চি একপদং বহূনং পদানং সঙ্গাহিকং ব্রূহি, অযমেৰ ৰা পাঠো. যেনত্থে সাধযেমসেতি যেন একেন পদেন অনেকত্থনিস্সিতেন মযং অত্তনো ৰুড্ঢিং সাধেয্যাম, তং মে কথেহীতি পুচ্ছি.

অথস্স পিতা কথেন্তো দুতিযং গাথমাহ –

১৭৬.

‘‘দক্খেয্যেকপদং ¶ তাত, অনেকত্থপদস্সিতং;

তঞ্চ সীলেন সঞ্ঞুত্তং, খন্তিযা উপপাদিতং;

অলং মিত্তে সুখাপেতুং, অমিত্তানং দুখায চা’’তি.

তত্থ ¶ দক্খেয্যেকপদন্তি দক্খেয্যং একপদং. দক্খেয্যং নাম লাভুপ্পাদকস্স ছেকস্স কুসলস্স ঞাণসম্পযুত্তং ৰীরিযং. অনেকত্থপদস্সিতন্তি এৰং ৰুত্তপ্পকারং ৰীরিযং অনেকেহি অত্থপদেহি নিস্সিতং. কতরেহীতি? সীলাদীহি. তেনেৰ ‘‘তঞ্চ সীলেন সঞ্ঞুত্ত’’ন্তিআদিমাহ. তস্সত্থো – তঞ্চ পনেতং ৰীরিযং আচারসীলসম্পযুত্তং অধিৰাসনখন্তিযা উপেতং মিত্তে সুখাপেতুং অমিত্তানঞ্চ দুক্খায অলং সমত্থং. কো হি নাম লাভুপ্পাদকঞাণসম্পযুত্তকুসলৰীরিযসমন্নাগতো আচারখন্তিসম্পন্নো মিত্তে সুখাপেতুং, অমিত্তে ৰা দুক্খাপেতুং ন সক্কোতীতি.

এৰং বোধিসত্তো পুত্তস্স পঞ্হং কথেসি. সোপি পিতু কথিতনযেনেৰ অত্তনো অত্থং সাধেত্ৰা যথাকম্মং গতো.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে পিতাপুত্তা সোতাপত্তিফলে পতিট্ঠিতা. ‘‘তদা পুত্তো অযমেৰ পুত্তো অহোসি, বারাণসিসেট্ঠি পন অহমেৰ অহোসি’’ন্তি.

একপদজাতকৰণ্ণনা অট্ঠমা.

[২৩৯] ৯. হরিতমণ্ডূকজাতকৰণ্ণনা

আসীৰিসম্পি ¶ মং সন্তন্তি ইদং সত্থা ৰেল়ুৰনে ৰিহরন্তো অজাতসত্তুং আরব্ভ কথেসি. কোসলরাজস্স হি পিতা মহাকোসলো বিম্বিসাররঞ্ঞো ধীতরং দদমানো ধীতু ন্হানমূলং কাসিগামকং নাম অদাসি. সা অজাতসত্তুনা পিতুঘাতককম্মে কতে রঞ্ঞো সিনেহেন নচিরস্সেৰ কালমকাসি. অজাতসত্তু মাতরি কালকতাযপি তং গামং ভুঞ্জতেৰ. কোসলরাজা ‘‘পিতুঘাতকস্স চোরস্স মম কুলসন্তকং গামং ন দস্সামী’’তি তেন সদ্ধিং যুজ্ঝতি. কদাচি মাতুলস্স জযো হোতি, কদাচি ভাগিনেয্যস্স. যদা পন ¶ অজাতসত্তু জিনাতি, তদা সোমনস্সপ্পত্তো রথে ধজং উস্সাপেত্ৰা মহন্তেন যসেন নগরং পৰিসতি. যদা পন পরাজযতি, তদা দোমনস্সপ্পত্তো কঞ্চি অজানাপেত্ৰাৰ পৰিসতি. অথেকদিৰসং ধম্মসভাযং ভিক্খূ কথং সমুট্ঠাপেসুং ‘‘আৰুসো, অজাতসত্তু মাতুলং জিনিত্ৰা তুস্সতি, পরাজিতো দোমনস্সপ্পত্তো হোতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি ¶ কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপেস জিনিত্ৰা তুস্সতি, পরাজিতো দোমনস্সপ্পত্তো হোতী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো নীলমণ্ডূকযোনিযং নিব্বত্তি. তদা মনুস্সা নদীকন্দরাদীসু তত্থ তত্থ মচ্ছে গহণত্থায কুমীনানি ওড্ডেসুং. একস্মিং কুমীনে বহূ মচ্ছা পৰিসিংসু. অথেকো উদকাসীৰিসো মচ্ছে খাদন্তো তং কুমীনং পাৰিসি, বহূ মচ্ছা একতো হুত্ৰা তং খাদন্তা একলোহিতং অকংসু. সো পটিসরণং অপস্সন্তো মরণভযতজ্জিতো কুমীনমুখেন নিক্খমিত্ৰা ৰেদনাপ্পত্তো উদকপরিযন্তে নিপজ্জি. নীলমণ্ডূকোপি তস্মিং খণে উপ্পতিত্ৰা কুমীনসূলমত্থকে নিপন্নো হোতি. আসীৰিসো ৰিনিচ্ছযট্ঠানং অলভন্তো তত্থ নিপন্নং তং দিস্ৰা ‘‘সম্ম নীলমণ্ডূক, ইমেসং মচ্ছানং কিরিযা রুচ্চতি তুয্হ’’ন্তি পুচ্ছন্তো পঠমং গাথমাহ –

১৭৭.

‘‘আসীৰিসম্পি মং সন্তং, পৰিট্ঠং কুমিনামুখং;

রুচ্চতে হরিতামাতা, যং মং খাদন্তি মচ্ছকা’’তি.

তত্থ ¶ আসীৰিসম্পি মং সন্তন্তি মং আগতৰিসং সমানং. রুচ্চতে হরিতামাতা, যং মং খাদন্তি মচ্ছকাতি এতং তৰ রুচ্চতি হরিতমণ্ডূকপুত্তাতি ৰদতি.

অথ নং হরিতমণ্ডূকো ‘‘আম, সম্ম, রুচ্চতী’’তি. ‘‘কিংকারণা’’তি? ‘‘সচে ত্ৰম্পি তৰ পদেসং আগতে মচ্ছে খাদসি, মচ্ছাপি অত্তনো ¶ পদেসং আগতং তং খাদন্তি, অত্তনো ৰিসযে পদেসে গোচরভূমিযং অবলৰা নাম নত্থী’’তি ৰত্ৰা দুতিযং গাথমাহ –

১৭৮.

‘‘ৰিলুম্পতেৰ পুরিসো, যাৰস্স উপকপ্পতি;

যদা চঞ্ঞে ৰিলুম্পন্তি, সো ৰিলুত্তো ৰিলুম্পতী’’তি.

তত্থ ৰিলুম্পতেৰ পুরিসো, যাৰস্স উপকপ্পতীতি যাৰ অস্স পুরিসস্স ইস্সরিযং উপকপ্পতি ইজ্ঝতি পৰত্ততি, তাৰ সো অঞ্ঞং ৰিলুম্পতিযেৰ. ‘‘যাৰ সো উপকপ্পতী’’তিপি পাঠো ¶ , যত্তকং কালং সো পুরিসো সক্কোতি ৰিলুম্পিতুন্তি অত্থো. যদা চঞ্ঞে ৰিলুম্পন্তীতি যদা চ অঞ্ঞে ইস্সরা হুত্ৰা ৰিলুম্পন্তি. সো ৰিলুত্তো ৰিলুম্পতীতি অথ সো ৰিলুম্পকো অঞ্ঞেহি ৰিলুম্পতি. ‘‘ৰিলুম্পতে’’তিপি পাঠো, অযমেৰত্থো. ‘‘ৰিলুম্পন’’ন্তিপি পঠন্তি, তস্সত্থো ন সমেতি. এৰং ‘‘ৰিলুম্পকো পুন ৰিলুম্পং পাপুণাতী’’তি বোধিসত্তেন অড্ডে ৰিনিচ্ছিতে উদকাসীৰিসস্স দুব্বলভাৰং ঞত্ৰা ‘‘পচ্চামিত্তং গণ্হিস্সামা’’তি মচ্ছগণা কুমীনমুখা নিক্খমিত্ৰা তত্থেৰ নং জীৰিতক্খযং পাপেত্ৰা পক্কমুং.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা উদকাসীৰিসো অজাতসত্তু অহোসি, নীলমণ্ডূকো পন অহমেৰ অহোসি’’ন্তি.

হরিতমণ্ডূকজাতকৰণ্ণনা নৰমা.

[২৪০] ১০. মহাপিঙ্গলজাতকৰণ্ণনা

সব্বো জনোতি ইদং সত্থা জেতৰনে ৰিহরন্তো দেৰদত্তং আরব্ভ কথেসি. দেৰদত্তে সত্থরি আঘাতং বন্ধিত্ৰা নৰমাসচ্চযেন জেতৰনদ্ৰারকোট্ঠকে পথৰিযং নিমুগ্গে জেতৰনৰাসিনো চ সকলরট্ঠৰাসিনো চ ‘‘বুদ্ধপটিকণ্টকো দেৰদত্তো পথৰিযা গিলিতো, নিহতপচ্চামিত্তো দানি ¶ সম্মাসম্বুদ্ধো জাতো’’তি তুট্ঠহট্ঠা ¶ অহেসুং. তেসং কথং সুত্ৰা পরম্পরঘোসেন সকলজম্বুদীপৰাসিনো যক্খভূতদেৰগণা চ তুট্ঠহট্ঠা এৰ অহেসুং. অথেকদিৰসং ভিক্খূ ধম্মসভাযং কথং সমুট্ঠাপেসুং – ‘‘আৰুসো, দেৰদত্তে পথৰিযং নিমুগ্গে ‘বুদ্ধপটিকণ্টকো দেৰদত্তো পথৰিযা গিলিতো’তি মহাজনো অত্তমনো জাতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ দেৰদত্তে মতে মহাজনো তুস্সতি চেৰ হসতি চ, পুব্বেপি তুস্সি চেৰ হসি চা’’তি ৰত্ৰা অতীতং আহরি.

অতীতে বারাণসিযং মহাপিঙ্গলো নাম রাজা অধম্মেন ৰিসমেন রজ্জং কারেসি, ছন্দাদিৰসেন পাপকম্মানি করোন্তো দণ্ডবলিজঙ্ঘকহাপণাদিগ্গহণেন উচ্ছুযন্তে উচ্ছুং ৰিয মহাজনং পীল়েসি কক্খল়ো ফরুসো সাহসিকো, পরেসু অনুদ্দযামত্তম্পি নামস্স নত্থি, গেহে ইত্থীনম্পি পুত্তধীতানম্পি অমচ্চব্রাহ্মণগহপতিকাদীনম্পি অপ্পিযো অমনাপো, অক্খিম্হি পতিতরজং ৰিয, ভত্তপিণ্ডে সক্খরা ৰিয, পণ্হিং ৰিজ্ঝিত্ৰা পৰিট্ঠকণ্টকো ৰিয চ অহোসি ¶ . তদা বোধিসত্তো মহাপিঙ্গলস্স পুত্তো হুত্ৰা নিব্বত্তি. মহাপিঙ্গলো দীঘরত্তং রজ্জং কারেত্ৰা কালমকাসি. তস্মিং কালকতে সকলবারাণসিৰাসিনো হট্ঠতুট্ঠা মহাহসিতং হসিত্ৰা দারূনং সকটসহস্সেন মহাপিঙ্গলং ঝাপেত্ৰা অনেকেহি ঘটসহস্সেহি আল়াহনং নিব্বাপেত্ৰা বোধিসত্তং রজ্জে অভিসিঞ্চিত্ৰা ‘‘ধম্মিকো নো রাজা লদ্ধো’’তি হট্ঠতুট্ঠা নগরে উস্সৰভেরিং চরাপেত্ৰা সমুস্সিতধজপটাকং নগরং অলঙ্করিত্ৰা দ্ৰারে দ্ৰারে মণ্ডপং কারেত্ৰা ৰিপ্পকিণ্ণলাজকুসুমমণ্ডিততলেসু অলঙ্কতমণ্ডপেসু নিসীদিত্ৰা খাদিংসু চেৰ পিৰিংসু চ.

বোধিসত্তোপি অলঙ্কতে মহাতলে সমুস্সিতসেতচ্ছত্তস্স পল্লঙ্কৰরস্স ¶ মজ্ঝে মহাযসং অনুভৰন্তো নিসীদি. অমচ্চা চ ব্রাহ্মণগহপতিরট্ঠিকদোৰারিকাদযো চ রাজানং পরিৰারেত্ৰা অট্ঠংসু. অথেকো দোৰারিকো নাতিদূরে ঠত্ৰা অস্সসন্তো পস্সসন্তো পরোদি. বোধিসত্তো তং দিস্ৰা ‘‘সম্ম দোৰারিক, মম পিতরি কালকতে সব্বে তুট্ঠপহট্ঠা উস্সৰং কীল়ন্তা ৰিচরন্তি, ত্ৰং পন রোদমানো ঠিতো ¶ , কিং নু খো মম পিতা তৰেৰ পিযো অহোসি মনাপো’’তি পুচ্ছন্তো পঠমং গাথমাহ –

১৭৯.

‘‘সব্বো জনো হিংসিতো পিঙ্গলেন, তস্মিং মতে পচ্চযা ৰেদযন্তি;

পিযো নু তে আসি অকণ্হনেত্তো, কস্মা নু ত্ৰং রোদসি দ্ৰারপালা’’তি.

তত্থ হিংসিতোতি নানপ্পকারেহি দণ্ডবলিআদীহি পীল়িতো. পিঙ্গলেনাতি পিঙ্গলক্খেন. তস্স কির দ্ৰেপি অক্খীনি নিব্বিদ্ধপিঙ্গলানি বিল়ারক্খিৰণ্ণানি অহেসুং, তেনেৰস্স ‘‘পিঙ্গলো’’তি নামং অকংসু. পচ্চযা ৰেদযন্তীতি পীতিযো পৰেদযন্তি. অকণ্হনেত্তোতি পিঙ্গলনেত্তো. কস্মা নু ত্ৰন্তি কেন নু কারণেন ত্ৰং রোদসি. অট্ঠকথাযং পন ‘‘কস্মা তুৰ’’ন্তি পাঠো.

সো তস্স ৰচনং সুত্ৰা ‘‘নাহং, মহারাজ, ‘মহাপিঙ্গলো মতো’তি সোকেন রোদামি, সীসস্স মে সুখং জাতং. পিঙ্গলরাজা হি পাসাদা ওতরন্তো চ আরোহন্তো চ কম্মারমুট্ঠিকায পহরন্তো ৰিয ময্হং সীসে অট্ঠট্ঠ খটকে দেতি, সো পরলোকং গন্ত্ৰাপি মম সীসে দদমানো ৰিয নিরযপালানম্পি যমস্সপি সীলে খটকে দস্সতি, অথ নং তে ‘অতিৰিয অযং অম্হে বাধতী’তি পুন ইধেৰ আনেত্ৰা ৰিস্সজ্জেয্যুং, অথ মে সো পুনপি সীসে খটকে দদেয্যাতি ভযেনাহং রোদামী’’তি ইমমত্থং পকাসেন্তো দুতিযং গাথমাহ –

১৮০.

‘‘ন ¶ ¶ মে পিযো আসি অকণ্হনেত্তো, ভাযামি পচ্চাগমনায তস্স;

ইতো গতো হিংসেয্য মচ্চুরাজং, সো হিংসিতো আনেয্য পুন ইধা’’তি.

অথ নং বোধিসত্তো ‘‘সো রাজা দারূনং ৰাহসহস্সেন দড্ঢো উদকঘটসতেহি সিত্তো, সাপিস্স আল়াহনভূমি সমন্ততো খতা, পকতিযাপি চ পরলোকং গতা নাম অঞ্ঞত্থ গতিৰসা পুন তেনেৰ সরীরেন নাগচ্ছন্তি, মা ত্ৰং ভাযী’’তি তং সমস্সাসেন্তো ইমং গাথমাহ –

১৮১.

‘‘দড্ঢো ¶ ৰাহসহস্সেহি, সিত্তো ঘটসতেহি সো;

পরিক্খতা চ সা ভূমি, মা ভাযি নাগমিস্সতী’’তি.

ততো পট্ঠায দোৰারিকো অস্সাসং পটিলভি. বোধিসত্তো ধম্মেন রজ্জং কারেত্ৰা দানাদীনি পুঞ্ঞানি কত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা মহাপিঙ্গলো দেৰদত্তো অহোসি, পুত্তো পন অহমেৰ অহোসি’’ন্তি.

মহাপিঙ্গলজাতকৰণ্ণনা দসমা.

উপাহনৰগ্গো নৰমো.

তস্সুদ্দানং –

উপাহনং ৰীণাথূণং, ৰিকণ্ণকং অসিতাভু;

ৰচ্ছনখং বকঞ্চেৰ, সাকেতঞ্চ একপদং;

হরিতমাতু পিঙ্গলং.

১০. সিঙ্গালৰগ্গো

[২৪১] ১. সব্বদাঠজাতকৰণ্ণনা

সিঙ্গালো ¶ মানত্থদ্ধোতি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. দেৰদত্তো অজাতসত্তুং পসাদেত্ৰা উপ্পাদিতং লাভসক্কারং চিরট্ঠিতিকং কাতুং নাসক্খি, নাল়াগিরিপযোজনে পাটিহারিযস্স দিট্ঠকালতো পট্ঠায তস্স সো লাভসক্কারো ¶ অন্তরধাযি. অথেকদিৰসং ভিক্খূ ধম্মসভাযং কথং সমুট্ঠাপেসুং – ‘‘আৰুসো, দেৰদত্তো লাভসক্কারং উপ্পাদেত্ৰা চিরট্ঠিতিকং কাতুং নাসক্খী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, দেৰদত্তো ইদানেৰ অত্তনো উপ্পন্নং লাভসক্কারং অন্তরধাপেতি, পুব্বেপি অন্তরধাপেসিযেৰা’’তি ৰত্ৰা অতীতং আহরি.

অতীতে ¶ বারাণসিযং ব্রহ্মদত্তে রজ্জং কারেন্তে বোধিসত্তো তস্স পুরোহিতো অহোসি তিণ্ণং ৰেদানং অট্ঠারসন্নঞ্চ সিপ্পানং পারং গতো. সো পথৰীজযমন্তং নাম জানাতি. পথৰীজযমন্তোতি আৰট্টনমন্তো ৰুচ্চতি. অথেকদিৰসং বোধিসত্তো ‘‘তং মন্তং সজ্ঝাযিস্সামী’’তি একস্মিং অঙ্গণট্ঠানে পিট্ঠিপাসাণে নিসীদিত্ৰা সজ্ঝাযমকাসি. তং কির মন্তং অঞ্ঞৰিহিতং ধিতিৰিরহিতং সাৰেতুং ন সক্কা, তস্মা নং সো তথারূপে ঠানে সজ্ঝাযতি. অথস্স সজ্ঝাযনকালে একো সিঙ্গালো একস্মিং বিলে নিপন্নো তং মন্তং সুত্ৰাৰ পগুণমকাসি. সো কির অনন্তরাতীতে অত্তভাৰে পগুণপথৰীজযমন্তো একো ব্রাহ্মণো অহোসি. বোধিসত্তো সজ্ঝাযং কত্ৰা উট্ঠায ‘‘পগুণো ৰত মে অযং মন্তো’’তি আহ. সিঙ্গালো বিলা নিক্খমিত্ৰা ‘‘অম্ভো ব্রাহ্মণ, অযং মন্তো তযাপি মমেৰ পগুণতরো’’তি ৰত্ৰা পলাযি. বোধিসত্তো ‘‘অযং সিঙ্গালো মহন্তং অকুসলং করিস্সতী’’তি ‘‘গণ্হথ গণ্হথা’’তি থোকং অনুবন্ধি. সিঙ্গালো পলাযিত্ৰা অরঞ্ঞং পাৰিসি.

সো গন্ত্ৰা একং সিঙ্গালিং থোকং সরীরে ডংসি, ‘‘কিং, সামী’’তি চ ৰুত্তে ‘‘ময্হং জানাসি ন জানাসী’’তি আহ. সা ‘‘আম, জানামী’’তি সম্পটিচ্ছি. সো পথৰীজযমন্তং পরিৰত্তেত্ৰা ¶ অনেকানি সিঙ্গালসতানি আণাপেত্ৰা সব্বেপি হত্থিঅস্সসীহব্যগ্ঘসূকরমিগাদযো চতুপ্পদে অত্তনো সন্তিকে ¶ অকাসি. কত্ৰা চ পন সব্বদাঠো নাম রাজা হুত্ৰা একং সিঙ্গালিং অগ্গমহেসিং অকাসি. দ্ৰিন্নং হত্থীনং পিট্ঠে সীহো তিট্ঠতি, সীহপিট্ঠে সব্বদাঠো সিঙ্গালো রাজা সিঙ্গালিযা অগ্গমহেসিযা সদ্ধিং নিসীদতি, মহন্তো যসো অহোসি. সো যসমহন্তেন পমজ্জিত্ৰা মানং উপ্পাদেত্ৰা ‘‘বারাণসিরজ্জং গণ্হিস্সামী’’তি সব্বচতুপ্পদপরিৰুতো বারাণসিযা অৰিদূরট্ঠানং সম্পাপুণি, পরিসা দ্ৰাদসযোজনা অহোসি. সো অৰিদূরে ঠিতোযেৰ ‘‘রজ্জং ৰা দেতু, যুদ্ধং ৰা’’তি রঞ্ঞো সাসনং পেসেসি. বারাণসিৰাসিনো ভীততসিতা নগরদ্ৰারানি পিদহিত্ৰা অট্ঠংসু.

বোধিসত্তো রাজানং উপসঙ্কমিত্ৰা ‘‘মা ভাযি, মহারাজ, সব্বদাঠসিঙ্গালেন সদ্ধিং যুদ্ধং মম ভারো, ঠপেত্ৰা মং অঞ্ঞো তেন সদ্ধিং যুজ্ঝিতুং ¶ সমত্থো নাম নত্থী’’তি রাজানঞ্চ নাগরে চ সমস্সাসেত্ৰা ‘‘কিন্তি কত্ৰা নু খো সব্বদাঠো রজ্জং গহেস্সতি, পুচ্ছিস্সামি তাৰ ন’’ন্তি দ্ৰারট্টালকং অভিরুহিত্ৰা ‘‘সম্ম সব্বদাঠ, কিন্তি কত্ৰা ইমং রজ্জং গণ্হিস্সসী’’তি পুচ্ছি. ‘‘সীহনাদং নদাপেত্ৰা মহাজনং সদ্দেন সন্তাসেত্ৰা গণ্হিস্সামী’’তি. বোধিসত্তো ‘‘অত্থেত’’ন্তি ঞত্ৰা অট্টালকা ওরুয্হ ‘‘সকলদ্ৰাদসযোজনিকবারাণসিনগরৰাসিনো কণ্ণচ্ছিদ্দানি মাসপিট্ঠেন লঞ্জন্তূ’’তি ভেরিং চরাপেসি. মহাজনো ভেরিযা আণং সুত্ৰা অন্তমসো বিল়ালে উপাদায সব্বচতুপ্পদানঞ্চেৰ অত্তনো চ কণ্ণচ্ছিদ্দানি যথা পরস্স সদ্দং সোতুং ন সক্কা, এৰং মাসপিট্ঠেন লঞ্জি.

অথ বোধিসত্তো পুন অট্টালকং অভিরুহিত্ৰা ‘‘সব্বদাঠা’’তি আহ. ‘‘কিং, ব্রাহ্মণা’’তি? ‘‘ইমং রজ্জং কিন্তি কত্ৰা গণ্হিস্সসী’’তি? ‘‘সীহনাদং নদাপেত্ৰা মনুস্সে তাসেত্ৰা জীৰিতক্খযং পাপেত্ৰা গণ্হিস্সামী’’তি. ‘‘সীহনাদং নদাপেতুং ন সক্খিস্সসি. জাতিসম্পন্না হি সুরত্তহত্থপাদা কেসরসীহরাজানো তাদিসস্স জরসিঙ্গালস্স আণং ন করিস্সন্তী’’তি. সিঙ্গালো মানত্থদ্ধো হুত্ৰা ¶ ‘‘অঞ্ঞে তাৰ সীহা তিট্ঠন্তু, যস্সাহং পিট্ঠে নিসিন্নো, তঞ্ঞেৰ নদাপেস্সামী’’তি আহ. ‘‘তেন হি নদাপেহি, যদি সক্কোসী’’তি. সো যস্মিং সীহে নিসিন্নো, তস্স ‘‘নদাহী’’তি পাদেন সঞ্ঞং অদাসি. সীহো হত্থিকুম্ভে মুখং উপ্পীল়েত্ৰা তিক্খত্তুং অপ্পটিৰত্তিযং সীহনাদং নদি. হত্থী সন্তাসপ্পত্তা হুত্ৰা সিঙ্গালং পাদমূলে পাতেত্ৰা পাদেনস্স সীসং অক্কমিত্ৰা চুণ্ণৰিচুণ্ণং অকংসু, সব্বদাঠো তত্থেৰ জীৰিতক্খযং পত্তো. তেপি হত্থী সীহনাদং সুত্ৰা মরণভযতজ্জিতা অঞ্ঞমঞ্ঞং ওৰিজ্ঝিত্ৰা তত্থেৰ জীৰিতক্খযং পাপুণিংসু, ঠপেত্ৰা সীহে সেসাপি মিগসূকরাদযো সসবিল়ারপরিযোসানা সব্বে ¶ চতুপ্পাদা তত্থেৰ জীৰিতক্খযং পাপুণিংসু. সীহা পলাযিত্ৰা অরঞ্ঞং পৰিসিংসু, দ্ৰাদসযোজনিকো মংসরাসি অহোসি. বোধিসত্তো অট্টালকা ওতরিত্ৰা নগরদ্ৰারানি ৰিৰরাপেত্ৰা ‘‘সব্বে অত্তনো কণ্ণেসু মাসপিট্ঠং অপনেত্ৰা মংসত্থিকা মংসং আহরন্তূ’’তি নগরে ভেরিং চরাপেসি. মনুস্সা অল্লমংসং খাদিত্ৰা সেসং সুক্খাপেত্ৰা ৰল্লূরমকংসু. তস্মিং কির কালে ৰল্লূরকরণং উদপাদীতি ৰদন্তি.

সত্থা ¶ ইমং ধম্মদেসনং আহরিত্ৰা ইমা অভিসম্বুদ্ধগাথা ৰত্ৰা জাতকং সমোধানেসি –

১৮২.

‘‘সিঙ্গালো মানত্থদ্ধো চ, পরিৰারেন অত্থিকো;

পাপুণি মহতিং ভূমিং, রাজাসি সব্বদাঠিনং.

১৮৩.

‘‘এৰমেৰ মনুস্সেসু, যো হোতি পরিৰারৰা;

সো হি তত্থ মহা হোতি, সিঙ্গালো ৰিয দাঠিন’’ন্তি.

তত্থ মানত্থদ্ধোতি পরিৰারং নিস্সায উপ্পন্নেন মানেন থদ্ধো. পরিৰারেন অত্থিকোতি উত্তরিম্পি পরিৰারেন অত্থিকো হুত্ৰা. মহতিং ভূমিন্তি মহন্তং সম্পত্তিং. রাজাসি সব্বদাঠিনন্তি সব্বেসং দাঠীনং ¶ রাজা আসি. সো হি তত্থ মহা হোতীতি সো পরিৰারসম্পন্নো পুরিসো তেসু পরিৰারেসু মহা নাম হোতি. সিঙ্গালো ৰিয দাঠিনন্তি যথা সিঙ্গালো দাঠীনং মহা অহোসি, এৰং মহা হোতি, অথ সো সিঙ্গালো ৰিয পমাদং আপজ্জিত্ৰা তং পরিৰারং নিস্সায ৰিনাসং পাপুণাতীতি.

‘‘তদা সিঙ্গালো দেৰদত্তো অহোসি, রাজা সারিপুত্তো, পুরোহিতো পন অহমেৰ অহোসি’’ন্তি.

সব্বদাঠজাতকৰণ্ণনা পঠমা.

[২৪২] ২. সুনখজাতকৰণ্ণনা

বালো ৰতাযং সুনখোতি ইদং সত্থা জেতৰনে ৰিহরন্তো অম্বণকোট্ঠকে আসনসালায ভত্তভুঞ্জনসুনখং আরব্ভ কথেসি. তং কির জাতকালতো পট্ঠায পানীযহারকা গহেত্ৰা তত্থ পোসেসুং. সো অপরভাগে তত্থ ভত্তং ভুঞ্জন্তো থূলসরীরো অহোসি. অথেকদিৰসং একো গামৰাসী ¶ পুরিসো তং ঠানং পত্তো সুনখং দিস্ৰা পানীযহারকানং উত্তরিসাটকঞ্চ কহাপণঞ্চ দত্ৰা গদ্দূলেন বন্ধিত্ৰা তং আদায পক্কামি. সো গহেত্ৰা নীযমানো ন ৰস্সি, দিন্নং দিন্নং খাদন্তো পচ্ছতো পচ্ছতো অগমাসি. অথ সো পুরিসো ‘‘অযং ইদানি মং পিযাযতী’’তি গদ্দূলং মোচেসি, সো ৰিস্সট্ঠমত্তো একৰেগেন ¶ আসনসালমেৰ গতো. ভিক্খূ তং দিস্ৰা তেন গতকারণং জানিত্ৰা সাযন্হসমযে ধম্মসভাযং কথং সমুট্ঠাপেসুং – ‘‘আৰুসো, আসনসালায সুনখো বন্ধনমোক্খকুসলো ৰিস্সট্ঠমত্তোৰ পুন আগতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, সো সুনখো ইদানেৰ বন্ধনমোক্খকুসলো, পুব্বেপি কুসলোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে একস্মিং মহাভোগকুলে নিব্বত্তিত্ৰা ৰযপ্পত্তো ঘরাৰাসং অগ্গহেসি. তদা বারাণসিযং একস্স মনুস্সস্স সুনখো অহোসি, সো পিণ্ডিভত্তং লভন্তো থূলসরীরো ¶ জাতো. অথেকো গামৰাসী বারাণসিং আগতো তং সুনখং দিস্ৰা তস্স মনুস্সস্স উত্তরিসাটকঞ্চ কহাপণঞ্চ দত্ৰা সুনখং গহেত্ৰা চম্মযোত্তেন বন্ধিত্ৰা যোত্তকোটিযং গহেত্ৰা গচ্ছন্তো অটৰিমুখে একং সালং পৰিসিত্ৰা সুনখং বন্ধিত্ৰা ফলকে নিপজ্জিত্ৰা নিদ্দং ওক্কমি. তস্মিং কালে বোধিসত্তো কেনচিদেৰ করণীযেন অটৰিং পটিপন্নো তং সুনখং যোত্তেন বন্ধিত্ৰা ঠপিতং দিস্ৰা পঠমং গাথমাহ –

১৮৪.

‘‘বালো ৰতাযং সুনখো, যো ৰরত্তং ন খাদতি;

বন্ধনা চ পমুঞ্চেয্য, অসিতো চ ঘরং ৰজে’’তি.

তত্থ পমুঞ্চেয্যাতি পমোচেয্য, অযমেৰ ৰা পাঠো. অসিতো চ ঘরং ৰজেতি অসিতো সুহিতো হুত্ৰা অত্তনো ৰসনট্ঠানং গচ্ছেয্য.

তং সুত্ৰা সুনখো দুতিযং গাথমাহ –

১৮৫.

‘‘অট্ঠিতং মে মনস্মিং মে, অথো মে হদযে কতং;

কালঞ্চ পটিকঙ্খামি, যাৰ পস্সুপতূ জনো’’তি.

তত্থ অট্ঠিতং মে মনস্মিং মেতি যং তুম্হে কথেথ, তং মযা অধিট্ঠিতমেৰ, মনস্মিংযেৰ মে এতং. অথো মে হদযে কতন্তি অথ চ পন মে তুম্হাকং ৰচনং হদযে কতমেৰ. কালঞ্চ পটিকঙ্খামীতি ¶ কালং পটিমানেমি. যাৰ পস্সুপতূ জনোতি যাৰাযং মহাজনো পসুপতু নিদ্দং ওক্কমতু, তাৰাহং কালং পটিমানেমি ¶ . ইতরথা হি ‘‘অযং সুনখো পলাযতী’’তি রৰো উপ্পজ্জেয্য, তস্মা রত্তিভাগে সব্বেসং সুত্তকালে চম্মযোত্তং খাদিত্ৰা পলাযিস্সামীতি. সো এৰং ৰত্ৰা মহাজনে নিদ্দং ওক্কন্তে যোত্তং খাদিত্ৰা সুহিতো হুত্ৰা পলাযিত্ৰা অত্তনো সামিকানং ঘরমেৰ গতো.

সত্থা ¶ ইমং ধম্মদেসনং আহরিত্ৰা জাতকং সমোধানেসি – ‘‘তদা সুনখোৰ এতরহি সুনখো, পণ্ডিতপুরিসো পন অহমেৰ অহোসি’’ন্তি.

সুনখজাতকৰণ্ণনা দুতিযা.

[২৪৩] ৩. গুত্তিলজাতকৰণ্ণনা

সত্ততন্তিং সুমধুরন্তি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. তস্মিঞ্হি কালে ভিক্খূ দেৰদত্তং আহংসু – ‘‘আৰুসো দেৰদত্ত, সম্মাসম্বুদ্ধো তুয্হং আচরিযো, ত্ৰং সম্মাসম্বুদ্ধং নিস্সায তীণি পিটকানি উগ্গণ্হি, চত্তারি ঝানানি উপ্পাদেসি, আচরিযস্স নাম পটিসত্তুনা ভৰিতুং ন যুত্ত’’ন্তি. দেৰদত্তো ‘‘কিং পন মে, আৰুসো, সমণো গোতমো আচরিযো, ননু মযা অত্তনো বলেনেৰ তীণি পিটকানি উগ্গহিতানি, চত্তারি ঝানানি উপ্পাদিতানী’’তি আচরিযং পচ্চক্খাসি. ভিক্খূ ধম্মসভাযং কথং সমুট্ঠাপেসুং ‘‘আৰুসো, দেৰদত্তো আচরিযং পচ্চক্খায সম্মাসম্বুদ্ধস্স পটিসত্তু হুত্ৰা মহাৰিনাসং পত্তো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, দেৰদত্তো ইদানেৰ আচরিযং পচ্চক্খায মম পটিসত্তু হুত্ৰা ৰিনাসং পাপুণাতি, পুব্বেপি পত্তোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো গন্ধব্বকুলে নিব্বত্তি, ‘‘গুত্তিলকুমারো’’তিস্স নামং অকংসু. সো ৰযপ্পত্তো গন্ধব্বসিপ্পে নিপ্ফত্তিং পত্ৰা গুত্তিলগন্ধব্বো নাম সকলজম্বুদীপে অগ্গগন্ধব্বো অহোসি. সো দারাভরণং অকত্ৰা অন্ধে মাতাপিতরো পোসেসি. তদা বারাণসিৰাসিনো ৰাণিজা ৰণিজ্জায উজ্জেনিনগরং গন্ত্ৰা ¶ উস্সৰে ঘুট্ঠে ছন্দকং সংহরিত্ৰা বহুং মালাগন্ধৰিলেপনঞ্চ খজ্জভোজ্জাদীনি চ আদায কীল়নট্ঠানে সন্নিপতিত্ৰা ‘‘ৰেতনং দত্ৰা একং গন্ধব্বং আনেথা’’তি আহংসু. তেন চ সমযেন ¶ উজ্জেনিযং মূসিলো নাম জেট্ঠগন্ধব্বো ¶ হোতি, তে তং পক্কোসাপেত্ৰা অত্তনো গন্ধব্বং কারেসুং.

মূসিলো ৰীণং ৰাদন্তো ৰীণং উত্তমমুচ্ছনায মুচ্ছিত্ৰা ৰাদেসি. তেসং গুত্তিলগন্ধব্বস্স গন্ধব্বে জাতপরিচযানং তস্স গন্ধব্বং কিলঞ্জকণ্ডূৰনং ৰিয হুত্ৰা উপট্ঠাসি, একোপি পহট্ঠাকারং ন দস্সেসি. মূসিলো তেসু তুট্ঠাকারং অদস্সেন্তেসু ‘‘অতিখরং কত্ৰা ৰাদেমি মঞ্ঞে’’তি মজ্ঝিমমুচ্ছনায মুচ্ছিত্ৰা মজ্ঝিমসরেন ৰাদেসি, তে তত্থপি মজ্ঝত্তাৰ অহেসুং. অথ সো ‘‘ইমে ন কিঞ্চি জানন্তি মঞ্ঞে’’তি সযম্পি অজাননকো ৰিয হুত্ৰা তন্তিযো সিথিলে ৰাদেসি, তে তত্থপি ন কিঞ্চি আহংসু. অথ নে মূসিলো ‘‘অম্ভো ৰাণিজা, কিং নু খো মযি ৰীণং ৰাদেন্তে তুম্হে ন তুস্সথা’’তি. ‘‘কিং পন ত্ৰং ৰীণং ৰাদেসি, মযঞ্হি ‘অযং ৰীণং মুচ্ছেতী’তি সঞ্ঞং অকরিম্হা’’তি. ‘‘কিং পন তুম্হে মযা উত্তরিতরং আচরিযং জানাথ, উদাহু অত্তনো অজাননভাৰেন ন তুস্সথা’’তি. ৰাণিজা ‘‘বারাণসি