📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

জাতক-অট্ঠকথা

চতুত্থো ভাগো

১০. দসকনিপাতো

[৪৩৯] ১. চতুদ্ৰারজাতকৰণ্ণনা

চতুদ্ৰারমিদং নগরন্তি ইদং সত্থা জেতৰনে ৰিহরন্তো একং দুব্বচভিক্খুং আরব্ভ কথেসি. পচ্চুপ্পন্নৰত্থু নৰকনিপাতস্স পঠমজাতকে ৰিত্থারিতমেৰ. ইধ পন সত্থা তং ভিক্খুং ‘‘সচ্চং কির ত্ৰং ভিক্খু দুব্বচো’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘পুব্বেপি ত্ৰং ভিক্খু দুব্বচতায পণ্ডিতানং ৰচনং অকত্ৰা খুরচক্কং আপাদেসী’’তি ৰত্ৰা অতীতং আহরি.

অতীতে কস্সপদসবলস্স কালে বারাণসিযং অসীতিকোটিৰিভৰস্স সেট্ঠিনো একো পুত্তো মিত্তৰিন্দকো নাম অহোসি. তস্স মাতাপিতরো সোতাপন্না অহেসুং, সো পন দুস্সীলো অস্সদ্ধো. অথ নং অপরভাগে পিতরি কালকতে মাতা কুটুম্বং ৰিচারেন্তী আহ – ‘‘তাত, তযা দুল্লভং মনুস্সত্তং লদ্ধং, দানং দেহি, সীলং রক্খাহি, উপোসথকম্মং করোহি, ধম্মং সুণাহী’’তি. অম্ম, ন ময্হং দানাদীহি অত্থো, মা মং কিঞ্চি অৰচুত্থ, অহং যথাকম্মং গমিস্সামীতি. এৰং ৰদন্তম্পি নং একদিৰসং পুণ্ণমুপোসথদিৰসে মাতা আহ – ‘‘তাত, অজ্জ অভিলক্খিতো মহাউপোসথদিৰসো, অজ্জ উপোসথং সমাদিযিত্ৰা ৰিহারং গন্ত্ৰা সব্বরত্তিং ধম্মং সুত্ৰা এহি, অহং তে সহস্সং দস্সামী’’তি. সো ‘‘সাধূ’’তি ধনলোভেন উপোসথং সমাদিযিত্ৰা ভুত্তপাতরাসো ৰিহারং গন্ত্ৰা দিৰসং ৰীতিনামেত্ৰা রত্তিং যথা একম্পি ধম্মপদং কণ্ণং ন পহরতি, তথা একস্মিং পদেসে নিপজ্জিত্ৰা নিদ্দং ওক্কমিত্ৰা পুনদিৰসে পাতোৰ মুখং ধোৰিত্ৰা গেহং গন্ত্ৰা নিসীদি.

মাতা পনস্স ‘‘অজ্জ মে পুত্তো ধম্মং সুত্ৰা পাতোৰ ধম্মকথিকত্থেরং আদায আগমিস্সতী’’তি যাগুং খাদনীযং ভোজনীযং পটিযাদেত্ৰা আসনং পঞ্ঞপেত্ৰা তস্সাগমনং পটিমানেন্তী তং এককং আগতং দিস্ৰা ‘‘তাত, ধম্মকথিকো কেন ন আনীতো’’তি ৰত্ৰা ‘‘ন ময্হং ধম্মকথিকেন অত্থো’’তি ৰুত্তে ‘‘তেন হি যাগুং পিৰা’’তি আহ. সো ‘‘তুম্হেহি ময্হং সহস্সং পটিস্সুতং, তং তাৰ মে দেথ, পচ্ছা পিৰিস্সামী’’তি আহ. ‘‘পিৰ, তাত, পচ্ছা দস্সামী’’তি. ‘‘গহেত্ৰাৰ পিৰিস্সামী’’তি. অথস্স মাতা সহস্সভণ্ডিকং পুরতো ঠপেসি. সো যাগুং পিৰিত্ৰা সহস্সভণ্ডিকং গহেত্ৰা ৰোহারং করোন্তো ন চিরস্সেৰ ৰীসসতসহস্সং উপ্পাদেসি. অথস্স এতদহোসি – ‘‘নাৰং উপট্ঠপেত্ৰা ৰোহারং করিস্সামী’’তি. সো নাৰং উপট্ঠপেত্ৰা ‘‘অম্ম, অহং নাৰায ৰোহারং করিস্সামী’’তি আহ. অথ নং মাতা ‘‘ত্ৰং তাত, একপুত্তকো, ইমস্মিং ঘরে ধনম্পি বহু, সমুদ্দো অনেকাদীনৰো, মা গমী’’তি নিৰারেসি. সো ‘‘অহং গমিস্সামেৰ, ন সক্কা মং নিৰারেতু’’ন্তি ৰত্ৰা ‘‘অহং তং, তাত, ৰারেস্সামী’’তি মাতরা হত্থে গহিতো হত্থং ৰিস্সজ্জাপেত্ৰা মাতরং পহরিত্ৰা পাতেত্ৰা অন্তরং কত্ৰা গন্ত্ৰা নাৰায সমুদ্দং পক্খন্দি.

নাৰা সত্তমে দিৰসে মিত্তৰিন্দকং নিস্সায সমুদ্দপিট্ঠে নিচ্চলা অট্ঠাসি. কাল়কণ্ণিসলাকা করিযমানা মিত্তৰিন্দকস্সেৰ হত্থে তিক্খত্তুং পতি. অথস্স উল়ুম্পং দত্ৰা ‘‘ইমং একং নিস্সায বহূ মা নস্সন্তূ’’তি তং সমুদ্দপিট্ঠে খিপিংসু. তাৰদেৰ নাৰা জৰেন মহাসমুদ্দং পক্খন্দি. সোপি উল়ুম্পে নিপজ্জিত্ৰা একং দীপকং পাপুণি. তত্থ ফলিকৰিমানে চতস্সো ৰেমানিকপেতিযো অদ্দস. তা সত্তাহং দুক্খং অনুভৰন্তি, সত্তাহং সুখং. সো তাহি সদ্ধিং সত্তাহং দিব্বসম্পত্তিং অনুভৰি. অথ নং তা দুক্খানুভৰনত্থায গচ্ছমানা ‘‘সামি, মযং সত্তমে দিৰসে আগমিস্সাম, যাৰ মযং আগচ্ছাম, তাৰ অনুক্কণ্ঠমানো ইধেৰ ৰসা’’তি ৰত্ৰা অগমংসু. সো তণ্হাৰসিকো হুত্ৰা তস্মিংযেৰ ফলকে নিপজ্জিত্ৰা পুন সমুদ্দপিট্ঠেন গচ্ছন্তো অপরং দীপকং পত্ৰা তত্থ রজতৰিমানে অট্ঠ ৰেমানিকপেতিযো দিস্ৰা এতেনেৰ উপাযেন অপরস্মিং দীপকে মণিৰিমানে সোল়স, অপরস্মিং দীপকে কনকৰিমানে দ্ৰত্তিংস ৰেমানিকপেতিযো দিস্ৰা তাহি সদ্ধিং দিব্বসম্পত্তিং অনুভৰিত্ৰা তাসম্পি দুক্খং অনুভৰিতুং গতকালে পুন সমুদ্দপিট্ঠেন গচ্ছন্তো একং পাকারপরিক্খিত্তং চতুদ্ৰারং নগরং অদ্দস. উস্সদনিরযো কিরেস, বহূনং নেরযিকসত্তানং কম্মকরণানুভৰনট্ঠানং মিত্তৰিন্দকস্স অলঙ্কতপটিযত্তনগরং ৰিয হুত্ৰা উপট্ঠাসি.

সো ‘‘ইমং নগরং পৰিসিত্ৰা রাজা ভৰিস্সামী’’তি চিন্তেত্ৰা খুরচক্কং উক্খিপিত্ৰা সীসে পচ্চমানং নেরযিকসত্তং অদ্দস. অথস্স তং তস্স সীসে খুরচক্কং পদুমং ৰিয হুত্ৰা উপট্ঠাসি. উরে পঞ্চঙ্গিকবন্ধনং উরচ্ছদপসাধনং হুত্ৰা সীসতো গলন্তং লোহিতং লোহিতচন্দনৰিলেপনং ৰিয হুত্ৰা পরিদেৰনসদ্দো মধুরসরো গীতসদ্দো ৰিয হুত্ৰা উপট্ঠাসি. সো তস্স সন্তিকং গন্ত্ৰা ‘‘ভো পুরিস, চিরং তযা পদুমং ধারিতং, দেহি মে এত’’ন্তি আহ. ‘‘সম্ম, নযিদং পদুমং, খুরচক্কং এত’’ন্তি. ‘‘ত্ৰং ময্হং অদাতুকামতায এৰং ৰদসী’’তি. নেরযিকসত্তো চিন্তেসি ‘‘ময্হং কম্মং খীণং ভৰিস্সতি, ইমিনাপি মযা ৰিয মাতরং পহরিত্ৰা আগতেন ভৰিতব্বং, দস্সামিস্স খুরচক্ক’’ন্তি. অথ নং ‘‘এহি ভো, গণ্হ ইম’’ন্তি ৰত্ৰা খুরচক্কং তস্স সীসে খিপি, তং তস্স মত্থকং পিসমানং ভস্সি. তস্মিং খণে মিত্তৰিন্দকো তস্স খুরচক্কভাৰং ঞত্ৰা ‘‘তৰ খুরচক্কং গণ্হ, তৰ খুরচক্কং গণ্হা’’তি ৰেদনাপ্পত্তো পরিদেৰি, ইতরো অন্তরধাযি. তদা বোধিসত্তো রুক্খদেৰতা হুত্ৰা মহন্তেন পরিৰারেন উস্সদচারিকং চরমানো তং ঠানং পাপুণি. মিত্তৰিন্দকো তং ওলোকেত্ৰা ‘‘সামি দেৰরাজ, ইদং মং চক্কং সণ্হকরণিযং ৰিয তিলানি পিসমানং ওতরতি, কিং নু খো মযা পাপং পকত’’ন্তি পুচ্ছন্তো দ্ৰে গাথা অভাসি –

১.

‘‘চতুদ্ৰারমিদং নগরং, আযসং দল়্হপাকারং;

ওরুদ্ধপটিরুদ্ধোস্মি, কিং পাপং পকতং মযা.

২.

‘‘সব্বে অপিহিতা দ্ৰারা, ওরুদ্ধোস্মি যথা দিজো;

কিমাধিকরণং যক্খ, চক্কাভিনিহতো অহ’’ন্তি.

তত্থ দল়্হপাকারন্তি থিরপাকারং. ‘‘দল়্হতোরণ’’ন্তিপি পাঠো, থিরদ্ৰারন্তি অত্থো. ওরুদ্ধপটিরুদ্ধোস্মীতি অন্তো কত্ৰা সমন্তা পাকারেন রুদ্ধো, পলাযনট্ঠানং ন পঞ্ঞাযতি. কিং পাপং পকতন্তি কিং নু খো মযা পাপকম্মং কতং. অপিহিতাতি থকিতা. যথা দিজোতি পঞ্জরে পক্খিত্তো সকুণো ৰিয. কিমাধিকরণন্তি কিং কারণং. চক্কাভিনিহতোতি চক্কেন অভিনিহতো.

অথস্স দেৰরাজা কারণং কথেতুং ছ গাথা অভাসি –

৩.

‘‘লদ্ধা সতসহস্সানি, অতিরেকানি ৰীসতি;

অনুকম্পকানং ঞাতীনং, ৰচনং সম্ম নাকরি.

৪.

‘‘লঙ্ঘিং সমুদ্দং পক্খন্দি, সাগরং অপ্পসিদ্ধিকং;

চতুব্ভি অট্ঠজ্ঝগমা, অট্ঠাহিপি চ সোল়স.

৫.

‘‘সোল়সাহি চ বাত্তিংস, অতিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে.

৬.

‘‘উপরিৰিসালা দুপ্পূরা, ইচ্ছা ৰিসটগামিনী;

যে চ তং অনুগিজ্ঝন্তি, তে হোন্তি চক্কধারিনো.

৭.

‘‘বহুভণ্ডং অৰহায, মগ্গং অপ্পটিৰেক্খিয;

যেসঞ্চেতং অসঙ্খাতং, তে হোন্তি চক্কধারিনো.

৮.

‘‘কম্মং সমেক্খে ৰিপুলঞ্চ ভোগং, ইচ্ছং ন সেৰেয্য অনত্থসংহিতং;

করেয্য ৰাক্যং অনুকম্পকানং, তং তাদিসং নাতিৰত্তেয্য চক্ক’’ন্তি.

তত্থ লদ্ধা সতসহস্সানি, অতিরেকানি ৰীসতীতি ত্ৰং উপোসথং কত্ৰা মাতু সন্তিকা সহস্সং গহেত্ৰা ৰোহারং করোন্তো সতসহস্সানি চ অতিরেকানি ৰীসতিসহস্সানি লভিত্ৰা. নাকরীতি তেন ধনেন অসন্তুট্ঠো নাৰায সমুদ্দং পৰিসন্তো সমুদ্দে আদীনৰঞ্চ কথেত্ৰা মাতুযা ৰারিযমানোপি অনুকম্পকানং ঞাতীনং ৰচনং ন করোসি, সোতাপন্নং মাতরং পহরিত্ৰা অন্তরং কত্ৰা নিক্খন্তোযেৰাসীতি দীপেতি.

লঙ্ঘিন্তি নাৰং উল্লঙ্ঘনসমত্থং. পক্খন্দীতি পক্খন্দোসি. অপ্পসিদ্ধিকন্তি মন্দসিদ্ধিং ৰিনাসবহুলং. চতুব্ভি অট্ঠাতি অথ নং নিস্সায ঠিতায নাৰায ফলকং দত্ৰা সমুদ্দে খিত্তোপি ত্ৰং মাতরং নিস্সায একদিৰসং কতস্স উপোসথকম্মস্স নিস্সন্দেন ফলিকৰিমানে চতস্সো ইত্থিযো লভিত্ৰা ততো রজতৰিমানে অট্ঠ, মণিৰিমানে সোল়স, কনকৰিমানে দ্ৰত্তিংস অধিগতোসীতি. অতিচ্ছং চক্কমাসদোতি অথ ত্ৰং যথালদ্ধেন অসন্তুট্ঠো ‘‘অত্র উত্তরিতরং লভিস্সামী’’তি এৰং লদ্ধং লদ্ধং অতিক্কমনলোভসঙ্খাতায অতিচ্ছায সমন্নাগতত্তা অতিচ্ছো পাপপুগ্গলো তস্স উপোসথকম্মস্স খীণত্তা দ্ৰত্তিংস ইত্থিযো অতিক্কমিত্ৰা ইমং পেতনগরং আগন্ত্ৰা তস্স মাতুপহারদানঅকুসলস্স নিস্সন্দেন ইদং খুরচক্কং সম্পত্তোসি. ‘‘অত্রিচ্ছ’’ন্তিপি পাঠো, অত্র অত্র ইচ্ছমানোতি অত্থো. ‘‘অত্রিচ্ছা’’তিপি পাঠো, অত্রিচ্ছাযাতি অত্থো. ভমতীতি তস্স তে ইচ্ছাহতস্স পোসস্স ইদং চক্কং মত্থকং পিসমানং ইদানি কুম্ভকারচক্কং ৰিয মত্থকে ভমতীতি অত্থো.

যে চ তং অনুগিজ্ঝন্তীতি তণ্হা নামেসা গচ্ছন্তী উপরূপরি ৰিসালা হোতি, সমুদ্দো ৰিয চ দুপ্পূরা, রূপাদীসু তস্স তস্স ইচ্ছনইচ্ছায ৰিসটগামিনী, তং এৰরূপং তণ্হং যে চ অনুগিজ্ঝন্তি গিদ্ধা গধিতা হুত্ৰা পুনপ্পুনং অল্লীযন্তি. তে হোন্তি চক্কধারিনোতি তে এৰং পচ্চন্তা খুরচক্কং ধারেন্তি. বহুভণ্ডন্তি মাতাপিতূনং সন্তকং বহুধনং ওহায. মগ্গন্তি গন্তব্বং অপ্পসিদ্ধিকং সমুদ্দমগ্গং অপচ্চৰেক্খিত্ৰা যথা ত্ৰং পটিপন্নো, এৰমেৰ অঞ্ঞেসম্পি যেসঞ্চেতং অসঙ্খাতং অৰীমংসিতং, তে যথা ত্ৰং তথেৰ তণ্হাৰসিকা হুত্ৰা ধনং পহায গমনমগ্গং অনপেক্খিত্ৰা পটিপন্না চক্কধারিনো হোন্তি. কম্মং সমেক্খেতি তস্মা পণ্ডিতো পুরিসো অত্তনা কত্তব্বকম্মং ‘‘সদোসং নু খো, নিদ্দোস’’ন্তি সমেক্খেয্য পচ্চৰেক্খেয্য. ৰিপুলঞ্চ ভোগন্তি অত্তনো ধম্মলদ্ধং ধনরাসিম্পি সমেক্খেয্য. নাতিৰত্তেয্যাতি তং তাদিসং পুগ্গলং ইদং চক্কং ন অতিৰত্তেয্য নাৰত্থরেয্য. ‘‘নাতিৰত্তেতী’’তিপি পাঠো, নাৰত্থরতীতি অত্থো.

তং সুত্ৰা মিত্তৰিন্দকো ‘‘ইমিনা দেৰপুত্তেন মযা কতকম্মং তথতো ঞাতং, অযং ময্হং পচ্চনপমাণম্পি জানিস্সতি, পুচ্ছামি ন’’ন্তি চিন্তেত্ৰা নৰমং গাথমাহ –

৯.

‘‘কীৰচিরং নু মে যক্খ, চক্কং সিরসি ঠস্সতি;

কতি ৰস্সসহস্সানি, তং মে অক্খাহি পুচ্ছিতো’’তি.

অথস্স কথেন্তো মহাসত্তো দসমং গাথমাহ –

১০.

‘‘অতিসরো পচ্চসরো, মিত্তৰিন্দ সুণোহি মে;

চক্কং তে সিরসি মাৰিদ্ধং, ন তং জীৰং পমোক্খসী’’তি.

তত্থ অতিসরোতি অতিসরীতিপি অতিসরো, অতিসরিস্সতীতিপি অতিসরো. পচ্চসরোতি তস্সেৰ ৰেৰচনং. ইদং ৰুত্তং হোতি – সম্ম মিত্তৰিন্দক, সুণোহি মে ৰচনং, ত্ৰঞ্হি অতিদারুণস্স কম্মস্স কতত্তা অতিসরো, তস্স পন ন সক্কা ৰস্সগণনায ৰিপাকো পঞ্ঞাপেতুন্তি অপরিমাণং অতিমহন্তং ৰিপাকদুক্খং সরিস্সসি পটিপজ্জিস্সসীতি অতিসরো. তেন তে ‘‘এত্তকানি ৰস্সসহস্সানী’’তি ৰত্তুং ন সক্কোমি. সিরসিমাৰিদ্ধন্তি যং পন তে ইদং চক্কং সিরস্মিং আৰিদ্ধং কুম্ভকারচক্কমিৰ ভমতি. ন তং জীৰং পমোক্খসীতি তং ত্ৰং যাৰ তে কম্মৰিপাকো ন খীযতি, তাৰ জীৰমানো ন পমোক্খসি, কম্মৰিপাকে পন খীণে ইদং চক্কং পহায যথাকম্মং গমিস্সসীতি.

ইদং ৰত্ৰা দেৰপুত্তো অত্তনো দেৰট্ঠানমেৰ গতো, ইতরোপি মহাদুক্খং পটিপজ্জি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা মিত্তৰিন্দকো অযং দুব্বচভিক্খু অহোসি, দেৰরাজা পন অহমেৰ অহোসি’’ন্তি.

চতুদ্ৰারজাতকৰণ্ণনা পঠমা.

[৪৪০] ২. কণ্হজাতকৰণ্ণনা

কণ্হো ৰতাযং পুরিসোতি ইদং সত্থা কপিলৰত্থুং উপনিস্সায নিগ্রোধারামে ৰিহরন্তো সিতপাতুকম্মং আরব্ভ কথেসি. তদা কির সত্থা সাযন্হসমযে নিগ্রোধারামে ভিক্খুসঙ্ঘপরিৰুতো জঙ্ঘৰিহারং অনুচঙ্কমমানো অঞ্ঞতরস্মিং পদেসে সিতং পাত্ৰাকাসি. আনন্দত্থেরো ‘‘কো নু খো হেতু, কো পচ্চযো ভগৰতো সিতস্স পাতুকম্মায, ন অহেতু তথাগতা সিতং পাতুকরোন্তি, পুচ্ছিস্সামি তাৰা’’তি অঞ্জলিং পগ্গয্হ সিতকারণং পুচ্ছি. অথস্স সত্থা ‘‘ভূতপুব্বং, আনন্দ, কণ্হো নাম ইসি অহোসি, সো ইমস্মিং ভূমিপ্পদেসে ৰিহাসি ঝাযী ঝানরতো, তস্স সীলতেজেন সক্কস্স ভৰনং কম্পী’’তি সিতকারণং ৰত্ৰা তস্স ৰত্থুনো অপাকটত্তা থেরেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বারাণসিযং একেন অসীতিকোটিৰিভৰেন অপুত্তকেন ব্রাহ্মণেন সীলং সমাদিযিত্ৰা পুত্তে পত্থিতে বোধিসত্তো তস্স ব্রাহ্মণিযা কুচ্ছিম্হি নিব্বত্তি. কাল়ৰণ্ণত্তা পনস্স নামগ্গহণদিৰসে ‘‘কণ্হকুমারো’’তি নামং অকংসু. সো সোল়সৰস্সকালে মণিপটিমা ৰিয সোভগ্গপ্পত্তো হুত্ৰা পিতরা সিপ্পুগ্গহণত্থায পেসিতো তক্কসিলাযং সব্বসিপ্পানি উগ্গহেত্ৰা পচ্চাগচ্ছি. অথ নং পিতা অনুরূপেন দারেন সংযোজেসি. সো অপরভাগে মাতাপিতূনং অচ্চযেন সব্বিস্সরিযং পটিপজ্জি. অথেকদিৰসং রতনকোট্ঠাগারানি ৰিলোকেত্ৰা ৰরপল্লঙ্কমজ্ঝগতো সুৰণ্ণপট্টং আহরাপেত্ৰা ‘‘এত্তকং ধনং অসুকেন উপ্পাদিতং, এত্তকং অসুকেনা’’তি পুব্বঞাতীহি সুৰণ্ণপট্টে লিখিতানি অক্খরানি দিস্ৰা চিন্তেসি ‘‘যেহি ইমং ধনং উপ্পাদিতং, তে ন পঞ্ঞাযন্তি, ধনমেৰ পঞ্ঞাযতি, একোপি ইদং ধনং গহেত্ৰা গতো নাম নত্থি, ন খো পন সক্কা ধনভণ্ডিকং বন্ধিত্ৰা পরলোকং গন্তুং. পঞ্চন্নং ৰেরানং সাধারণভাৰেন হি অসারস্স ধনস্স দানং সারো, বহুরোগসাধারণভাৰেন অসারস্স সরীরস্স সীলৰন্তেসু অভিৰাদনাদিকম্মং সারো, অনিচ্চাভিভূতভাৰেন অসারস্স জীৰিতস্স অনিচ্চাদিৰসেন ৰিপস্সনাযোগো সারো, তস্মা অসারেহি ভোগেহি সারগ্গহণত্থং দানং দস্সামী’’তি.

সো আসনা ৰুট্ঠায রঞ্ঞো সন্তিকং গন্ত্ৰা রাজানং আপুচ্ছিত্ৰা মহাদানং পৰত্তেসি. যাৰ সত্তমা দিৰসা ধনং অপরিক্খীযমানং দিস্ৰা ‘‘কিং মে ধনেন, যাৰ মং জরা নাভিভৰতি, তাৰদেৰ পব্বজিত্ৰা অভিঞ্ঞা চ সমাপত্তিযো চ নিব্বত্তেত্ৰা ব্রহ্মলোকপরাযণো ভৰিস্সামী’’তি চিন্তেত্ৰা গেহে সব্বদ্ৰারানি ৰিৰরাপেত্ৰা ‘‘দিন্নং মে, হরন্তূ’’তি অসুচিং ৰিয জিগুচ্ছন্তো ৰত্থুকামে পহায মহাজনস্স রোদন্তস্স পরিদেৰন্তস্স নগরা নিক্খমিত্ৰা হিমৰন্তপদেসং পৰিসিত্ৰা ইসিপব্বজ্জং পব্বজিত্ৰা অত্তনো ৰসনত্থায রমণীযং ভূমিভাগং ওলোকেন্তো ইমং ঠানং পত্ৰা ‘‘ইধ ৰসিস্সামী’’তি একং ইন্দৰারুণীরুক্খং গোচরগামং অধিট্ঠায তস্সেৰ রুক্খস্স মূলে ৰিহাসি. গামন্তসেনাসনং পহায আরঞ্ঞিকো অহোসি, পণ্ণসালং অকত্ৰা রুক্খমূলিকো অহোসি, অব্ভোকাসিকো নেসজ্জিকো. সচে নিপজ্জিতুকামো, ভূমিযংযেৰ নিপজ্জতি, দন্তমূসলিকো হুত্ৰা অনগ্গিপক্কমেৰ খাদতি, থুসপরিক্খিত্তং কিঞ্চি ন খাদতি, একদিৰসং একৰারমেৰ খাদতি, একাসনিকো অহোসি. খমায পথৰীআপতেজৰাযুসমো হুত্ৰা এতে এত্তকে ধুতঙ্গগুণে সমাদায ৰত্ততি, ইমস্মিং কির জাতকে বোধিসত্তো পরমপ্পিচ্ছো অহোসি. সো ন চিরস্সেৰ অভিঞ্ঞা চ সমাপত্তিযো চ নিব্বত্তেত্ৰা ঝানকীল়ং কীল়ন্তো তত্থেৰ ৰসতি, ফলাফলত্থম্পি অঞ্ঞত্থ ন গচ্ছতি, রুক্খস্স ফলিতকালে ফলং খাদতি, পুপ্ফিতকালে পুপ্ফং খাদতি, সপত্তকালে পত্তানি খাদতি, নিপ্পত্তকালে পপটিকং খাদতি. এৰং পরমসন্তুট্ঠো হুত্ৰা ইমস্মিং ঠানে চিরং ৰসতি.

সো একদিৰসং পুব্বণ্হসমযে তস্স রুক্খস্স পক্কানি ফলানি গণ্হি, গণ্হন্তো পন লোলুপ্পচারেন উট্ঠায অঞ্ঞস্মিং পদেসে ন গণ্হাতি, যথানিসিন্নোৰ হত্থং পসারেত্ৰা হত্থপ্পসারণট্ঠানে ঠিতানি ফলানি সংহরতি, তেসুপি মনাপামনাপং অৰিচিনিত্ৰা সম্পত্তসম্পত্তমেৰ গণ্হাতি. এৰং পরমসন্তুট্ঠস্স তস্স সীলতেজেন সক্কস্স পণ্ডুকম্বলসিলাসনং উণ্হাকারং দস্সেসি. তং কির সক্কস্স আযুক্খযেন ৰা উণ্হং হোতি পুঞ্ঞক্খযেন ৰা, অঞ্ঞস্মিং ৰা মহানুভাৰসত্তে তং ঠানং পত্থেন্তে, ধম্মিকানং ৰা মহিদ্ধিকসমণব্রাহ্মণানং সীলতেজেন উণ্হং হোতি. সক্কো ‘‘কো নু খো মং ঠানা চাৰেতুকামো’’তি আৰজ্জেত্ৰা ইমস্মিং পদেসে ৰসন্তং কণ্হং ইসিং রুক্খফলানি উচ্চিনন্তং দিস্ৰা চিন্তেসি ‘‘অযং ইসি ঘোরতপো পরমজিতিন্দ্রিযো, ইমং ধম্মকথায সীহনাদং নদাপেত্ৰা সুকারণং সুত্ৰা ৰরেন সন্তপ্পেত্ৰা ইমমস্স রুক্খং ধুৰফলং কত্ৰা আগমিস্সামী’’তি. সো মহন্তেনানুভাৰেন সীঘং ওতরিত্ৰা তস্মিং রুক্খমূলে তস্স পিট্ঠিপস্সে ঠত্ৰা ‘‘অত্তনো অৰণ্ণে কথিতে কুজ্ঝিস্সতি নু খো, নো’’তি ৰীমংসন্তো পঠমং গাথমাহ –

১১.

‘‘কণ্হো ৰতাযং পুরিসো, কণ্হং ভুঞ্জতি ভোজনং;

কণ্হে ভূমিপদেসস্মিং, ন ময্হং মনসো পিযো’’তি.

তত্থ কণ্হোতি কাল়ৰণ্ণো. ভোজনন্তি রুক্খফলভোজনং.

কণ্হো ইসি সক্কস্স ৰচনং সুত্ৰা ‘‘কো নু খো মযা সদ্ধিং কথেতী’’তি দিব্বচক্খুনা উপধারেন্তো ‘‘সক্কো’’তি ঞত্ৰা অনিৰত্তিত্ৰা অনোলোকেত্ৰাৰ দুতিযং গাথমাহ –

১২.

‘‘ন কণ্হো তচসা হোতি, অন্তোসারো হি ব্রাহ্মণো;

যস্মিং পাপানি কম্মানি, স ৰে কণ্হো সুজম্পতী’’তি.

তত্থ তচসাতি তচেন কণ্হো নাম ন হোতীতি অত্থো. অন্তোসারোতি অব্ভন্তরে সীলসমাধিপঞ্ঞাৰিমুত্তিৰিমুত্তিঞাণদস্সনসারেহি সমন্নাগতো. এৰরূপো হি বাহিতপাপত্তা ব্রাহ্মণো নাম হোতি. স ৰেতি যস্মিং পন পাপানি কম্মানি অত্থি, সো যত্থ কত্থচি কুলে জাতোপি যেন কেনচি সরীরৰণ্ণেন সমন্নাগতোপি কাল়কোৰ.

এৰঞ্চ পন ৰত্ৰা ইমেসং সত্তানং কণ্হভাৰকরানি পাপকম্মানি একৰিধাদিভেদেহি ৰিত্থারেত্ৰা সব্বানিপি তানি গরহিত্ৰা সীলাদযো গুণে পসংসিত্ৰা আকাসে চন্দং উট্ঠাপেন্তো ৰিয সক্কস্স ধম্মং দেসেসি. সক্কো তস্স ধম্মকথং সুত্ৰা পমুদিতো সোমনস্সজাতো মহাসত্তং ৰরেন নিমন্তেন্তো ততিযং গাথমাহ –

১৩.

‘‘এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসী’’তি.

তত্থ এতস্মিন্তি যং ইদং তযা সব্বঞ্ঞুবুদ্ধেন ৰিয সুলপিতং, তস্মিং সুলপিতে তুম্হাকমেৰ অনুচ্ছৰিকত্তা পতিরূপে সুভাসিতে যং কিঞ্চি মনসা ইচ্ছসি, সব্বং তে যং ৰরং ইচ্ছিতং পত্থিতং, তং দম্মীতি অত্থো.

তং সুত্ৰা মহাসত্তো চিন্তেসি ‘‘অযং কিং নু খো অত্তনো অৰণ্ণে কথিতে কুজ্ঝিস্সতি, নোতি মং ৰীমংসন্তো ময্হং ছৰিৰণ্ণঞ্চ ভোজনঞ্চ ৰসনট্ঠানঞ্চ গরহিত্ৰা ইদানি ময্হং অকুদ্ধভাৰং ঞত্ৰা পসন্নচিত্তো ৰরং দেতি, মং খো পনেস ‘সক্কিস্সরিযব্রহ্মিস্সরিযানং অত্থায ব্রহ্মচরিযং চরতী’তিপি মঞ্ঞেয্য, তত্রস্স নিক্কঙ্খভাৰত্থং ময্হং পরেসু কোধো ৰা দোসো ৰা মা উপ্পজ্জতু, পরসম্পত্তিযং লোভো ৰা পরেসু সিনেহো ৰা মা উপ্পজ্জতু, মজ্ঝত্তোৰ ভৰেয্যন্তি ইমে মযা চত্তারো ৰরে গহেতুং ৰট্টতী’’তি. সো তস্স নিক্কঙ্খভাৰত্থায চত্তারো ৰরে গণ্হন্তো চতুত্থং গাথমাহ –

১৪.

‘‘ৰরঞ্চে মে অদো সক্ক, সব্বভূতানমিস্সর;

সুনিক্কোধং সুনিদ্দোসং, নিল্লোভং ৰুত্তিমত্তনো;

নিস্নেহমভিকঙ্খামি, এতে মে চতুরো ৰরে’’তি.

তত্থ ৰরঞ্চে মে অদো সক্কাতি সচে ত্ৰং ময্হং ৰরং অদাসি. সুনিক্কোধন্তি অকুজ্ঝনৰসেন সুট্ঠু নিক্কোধং. সুনিদ্দোসন্তি অদুস্সনৰসেন সুট্ঠু নিদ্দোসং. নিল্লোভন্তি পরসম্পত্তীসু নিল্লোভং. ৰুত্তিমত্তনোতি এৰরূপং অত্তনো ৰুত্তিং. নিস্নেহন্তি পুত্তধীতাদীসু ৰা সৰিঞ্ঞাণকেসু ধনধঞ্ঞাদীসু ৰা অৰিঞ্ঞাণকেসু অত্তনো সন্তকেসুপি নিস্নেহং অপগতলোভং. অভিকঙ্খামীতি এৰরূপং ইমেহি চতূহঙ্গেহি সমন্নাগতং অত্তনো ৰুত্তিং অভিকঙ্খামি. এতে মে চতুরো ৰরেতি এতে নিক্কোধাদিকে চতুরো ময্হং ৰরে দেহীতি.

কিং পনেস ন জানাতি ‘‘যথা ন সক্কা সক্কস্স সন্তিকে ৰরং গহেত্ৰা ৰরেন কোধাদযো হনিতু’’ন্তি. নো ন জানাতি, সক্কে খো পন ৰরং দেন্তে ন গণ্হামীতি ৰচনং ন যুত্তন্তি তস্স চ নিক্কঙ্খভাৰত্থায গণ্হি. ততো সক্কো চিন্তেসি ‘‘কণ্হপণ্ডিতো ৰরং গণ্হন্তো অতিৰিয অনৰজ্জে ৰরে গণ্হি, এতেসু ৰরেসু গুণদোসং এতমেৰ পুচ্ছিস্সামী’’তি. অথ নং পুচ্ছন্তো পঞ্চমং গাথমাহ –

১৫.

‘‘কিংনু কোধে ৰা দোসে ৰা, লোভে স্নেহে চ ব্রাহ্মণ;

আদীনৰং ত্ৰং পস্সসি, তং মে অক্খাহি পুচ্ছিতো’’তি.

তস্সত্থো – ব্রাহ্মণ কিং নু খো ত্ৰং কোধে দোসে লোভে স্নেহে চ আদীনৰং পস্সসি, তং তাৰ মে পুচ্ছিতো অক্খাহি, ন হি মযং এত্থ আদীনৰং জানামাতি.

অথ নং মহাসত্তো ‘‘তেন হি সুণাহী’’তি ৰত্ৰা চতস্সো গাথা অভাসি –

১৬.

‘‘অপ্পো হুত্ৰা বহু হোতি, ৰড্ঢতে সো অখন্তিজো;

আসঙ্গী বহুপাযাসো, তস্মা কোধং ন রোচযে.

১৭.

‘‘দুট্ঠস্স ফরুসা ৰাচা, পরামাসো অনন্তরা;

ততো পাণি ততো দণ্ডো, সত্থস্স পরমা গতি;

দোসো কোধসমুট্ঠানো, তস্মা দোসং ন রোচযে.

১৮.

‘‘আলোপসাহসাকারা, নিকতী ৰঞ্চনানি চ;

দিস্সন্তি লোভধম্মেসু, তস্মা লোভং ন রোচযে.

১৯.

‘‘স্নেহসঙ্গথিতা গন্থা, সেন্তি মনোমযা পুথূ;

তে ভুসং উপতাপেন্তি, তস্মা স্নেহং ন রোচযে’’তি.

তত্থ অখন্তিজোতি সো অনধিৰাসকজাতিকস্স অখন্তিতো জাতো কোধো পঠমং পরিত্তো হুত্ৰা পচ্ছা বহু হোতি অপরাপরং ৰড্ঢতি. তস্স ৰড্ঢনভাৰো খন্তিৰাদীজাতকেন (জা. ১.৪.৪৯ আদযো) চেৰ চূল়ধম্মপালজাতকেন (জা. ১.৫.৪৪ আদযো) চ ৰণ্ণেতব্বো. অপিচ তিস্সামচ্চস্সপেত্থ ভরিযং আদিং কত্ৰা সব্বং সপরিজনং মারেত্ৰা পচ্ছা অত্তনো মারিতৰত্থু কথেতব্বং. আসঙ্গীতি আসঙ্গকরণো. যস্স উপ্পজ্জতি, তং আসত্তং লগ্গিতং করোতি, তং ৰত্থুং ৰিস্সজ্জেত্ৰা গন্তুং ন দেতি, নিৰত্তিত্ৰা অক্কোসনাদীনি কারেতি. বহুপাযাসোতি বহুনা কাযিকচেতসিকদুক্খসঙ্খাতেন উপাযাসেন কিলমথেন সমন্নাগতো. কোধং নিস্সায হি কোধৰসেন অরিযাদীসু কতৰীতিক্কমা দিট্ঠধম্মে চেৰ সম্পরাযে চ ৰধবন্ধৰিপ্পটিসারাদীনি চেৰ পঞ্চৰিধবন্ধনকম্মকরণাদীনি চ বহূনি দুক্খানি অনুভৰন্তীতি কোধো বহুপাযাসো নাম. তস্মাতি যস্মা এস এৰং অনেকাদীনৰো, তস্মা কোধং ন রোচেমি.

দুট্ঠস্সাতি কুজ্ঝনলক্খণেন কোধেন কুজ্ঝিত্ৰা অপরভাগে দুস্সনলক্খণেন দোসেন দুট্ঠস্স পঠমং তাৰ ‘‘অরে, দাস, পেস্সা’’তি ফরুসৰাচা নিচ্ছরতি, ৰাচায অনন্তরা আকড্ঢনৰিকড্ঢনৰসেন হত্থপরামাসো, ততো অনন্তরা উপক্কমনৰসেন পাণি পৰত্ততি, ততো দণ্ডো, দণ্ডপ্পহারে অতিক্কমিত্ৰা পন একতোধারউভতোধারস্স সত্থস্স পরমা গতি, সব্বপরিযন্তা সত্থনিপ্ফত্তি হোতি. যদা হি সত্থেন পরং জীৰিতা ৰোরোপেত্ৰা পচ্ছা তেনেৰ সত্থেন অত্তানং জীৰিতা ৰোরোপেতি, তদা দোসো মত্থকপ্পত্তো হোতি. দোসো কোধসমুট্ঠানোতি যথা অনম্বিলং তক্কং ৰা কঞ্জিকং ৰা পরিণামৰসেন পরিৰত্তিত্ৰা অম্বিলং হোতি, তং একজাতিকম্পি সমানং অম্বিলং অনম্বিলন্তি নানা ৰুচ্চতি, তথা পুব্বকালে কোধো পরিণমিত্ৰা অপরভাগে দোসো হোতি. সো অকুসলমূলত্তেন একজাতিকোপি সমানো কোধো দোসোতি নানা ৰুচ্চতি. যথা অনম্বিলতো অম্বিলং, এৰং সোপি কোধতো সমুট্ঠাতীতি কোধসমুট্ঠানো. তস্মাতি যস্মা এৰং অনেকাদীনৰো দোসো, তস্মা দোসম্পি ন রোচেমি.

আলোপসাহসাকারাতি দিৰা দিৰস্সেৰ গামং পহরিত্ৰা ৰিলুম্পনানি চ আৰুধং সরীরে ঠপেত্ৰা ‘‘ইদং নাম মে দেহী’’তি সাহসাকারা চ. নিকতী ৰঞ্চনানি চাতি পতিরূপকং দস্সেত্ৰা পরস্স হরণং নিকতি নাম, সা অসুৰণ্ণমেৰ ‘‘সুৰণ্ণ’’ন্তি কূটকহাপণং ‘‘কহাপণো’’তি দত্ৰা পরসন্তকগ্গহণে দট্ঠব্বা. পটিভানৰসেন পন উপাযকুসলতায পরসন্তকগ্গহণং ৰঞ্চনং নাম. তস্সেৰং পৰত্তি দট্ঠব্বা – একো কির উজুজাতিকো গামিকপুরিসো অরঞ্ঞতো সসকং আনেত্ৰা নদীতীরে ঠপেত্ৰা ন্হাযিতুং ওতরি. অথেকো ধুত্তো তং সসকং সীসে কত্ৰা ন্হাযিতুং ওতিণ্ণো. ইতরো উত্তরিত্ৰা সসকং অপস্সন্তো ইতো চিতো চ ৰিলোকেসি. তমেনং ধুত্তো ‘‘কিং ভো ৰিলোকেসী’’তি ৰত্ৰা ‘‘ইমস্মিং মে ঠানে সসকো ঠপিতো, তং ন পস্সামী’’তি ৰুত্তে ‘‘অন্ধবাল, ত্ৰং ন জানাসি, সসকা নাম নদীতীরে ঠপিতা পলাযন্তি, পস্স অহং অত্তনো সসকং সীসে ঠপেত্ৰাৰ ন্হাযামী’’তি আহ. সো অপ্পটিভানতায ‘‘এৰং ভৰিস্সতী’’তি পক্কামি. এককহাপণেন মিগপোতকং গহেত্ৰা পুন তং দত্ৰা দ্ৰিকহাপণগ্ঘনকস্স মিগস্স গহিতৰত্থুপেত্থ কথেতব্বং. দিস্সন্তি লোভধম্মেসূতি সক্ক, ইমে আলোপাদযো পাপধম্মা লোভসভাৰেসু লোভাভিভূতেসু সত্তেসু দিস্সন্তি. ন হি অলুদ্ধা এৰরূপানি কম্মানি করোন্তি. এৰং লোভো অনেকাদীনৰো, তস্মা লোভম্পি ন রোচেমি.

স্নেহসঙ্গথিতা গন্থাতি আরম্মণেসু অল্লীযনলক্খণেন স্নেহেন সঙ্গথিতা পুনপ্পুনং উপ্পাদৰসেন ঘটিতা সুত্তেন পুপ্ফানি ৰিয বদ্ধা নানপ্পকারেসু আরম্মণেসু পৰত্তমানা অভিজ্ঝাকাযগন্থা. সেন্তি মনোমযা পুথূতি তে পুথূসু আরম্মণেসু উপ্পন্না সুৰণ্ণাদীহি নিব্বত্তানি সুৰণ্ণাদিমযানি আভরণাদীনি ৰিয মনেন নিব্বত্তত্তা মনোমযা অভিজ্ঝাকাযগন্থা তেসু আরম্মণেসু সেন্তি অনুসেন্তি. তে ভুসং উপতাপেন্তীতি তে এৰং অনুসযিতা বলৰতাপং জনেন্তা ভুসং উপতাপেন্তি অতিকিলমেন্তি. তেসং পন ভুসং উপতাপনে ‘‘সল্লৰিদ্ধোৰ রুপ্পতী’’তি (সু. নি. ৭৭৩) গাথায ৰত্থু, ‘‘পিযজাতিকা হি গহপতি, সোকপরিদেৰদুক্খদোমনস্সুপাযাসা পিযপ্পভুতিকা’’ (ম. নি. ২.৩৫৩), ‘‘পিযতো জাযতী সোকো’’তিআদীনি (ধ. প. ২১২) সুত্তানি চ আহরিতব্বানি. অপিচ মঙ্গলবোধিসত্তস্স দারকে দত্ৰা বলৰসোকেন হদযং ফলি, ৰেস্সন্তরবোধিসত্তস্স মহন্তং দোমনস্সং উদপাদি. এৰং পূরিতপারমীনং মহাসত্তানং পেমং উপতাপং করোতিযেৰ. অযং স্নেহে আদীনৰো, তস্মা স্নেহম্পি ন রোচেমীতি.

সক্কো পঞ্হৰিস্সজ্জনং সুত্ৰা ‘‘কণ্হপণ্ডিত তযা ইমে পঞ্হা বুদ্ধলীল়ায সাধুকং কথিতা, অতিৰিয তুট্ঠোস্মি তে, অপরম্পি ৰরং গণ্হাহী’’তি ৰত্ৰা দসমং গাথমাহ –

২০.

‘‘এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসী’’তি.

ততো বোধিসত্তো অনন্তরগাথমাহ –

২১.

‘‘ৰরঞ্চে মে অদো সক্ক, সব্বভূতানমিস্সর;

অরঞ্ঞে মে ৰিহরতো, নিচ্চং একৰিহারিনো;

আবাধা মা উপ্পজ্জেয্যুং, অন্তরাযকরা ভুসা’’তি.

তত্থ অন্তরাযকরা ভুসাতি ইমস্স মে তপোকম্মস্স অন্তরাযকরা.

তং সুত্ৰা সক্কো ‘‘কণ্হপণ্ডিতো ৰরং গণ্হন্তো ন আমিসসন্নিস্সিতং গণ্হাতি, তপোকম্মনিস্সিতমেৰ গণ্হাতী’’তি চিন্তেত্ৰা ভিয্যোসোমত্তায পসন্নো অপরম্পি ৰরং দদমানো ইতরং গাথমাহ –

২২.

‘‘এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসী’’তি.

বোধিসত্তোপি ৰরগ্গহণাপদেসেন তস্স ধম্মং দেসেন্তো ওসানগাথমাহ –

২৩.

‘‘ৰরঞ্চে মে অদো সক্ক, সব্বভূতানমিস্সর;

ন মনো ৰা সরীরং ৰা, মং-কতে সক্ক কস্সচি;

কদাচি উপহঞ্ঞেথ, এতং সক্ক ৰরং ৰরে’’তি.

তত্থ মনো ৰাতি মনোদ্ৰারং ৰা. সরীরং ৰাতি কাযদ্ৰারং ৰা, ৰচীদ্ৰারম্পি এতেসং গহণেন গহিতমেৰাতি ৰেদিতব্বং. মং-কতেতি মম কারণা. উপহঞ্ঞেথাতি উপঘাতং আপজ্জেয্য অপরিসুদ্ধং অস্স. ইদং ৰুত্তং হোতি – সক্ক দেৰরাজ, মম কারণা মং নিস্সায মম অনত্থকামতায কস্সচি সত্তস্স কিস্মিঞ্চি কালে ইদং তিৰিধম্পি কম্মদ্ৰারং ন উপহঞ্ঞেথ, পাণাতিপাতাদীহি দসহি অকুসলকম্মপথেহি ৰিমুত্তং পরিসুদ্ধমেৰ ভৰেয্যাতি.

ইতি মহাসত্তো ছসুপি ঠানেসু ৰরং গণ্হন্তো নেক্খম্মনিস্সিতমেৰ গণ্হি, জানাতি চেস ‘‘সরীরং নাম ব্যাধিধম্মং, ন তং সক্কা সক্কেন অব্যাধিধম্মং কাতু’’ন্তি. সত্তানঞ্হি তীসু দ্ৰারেসু পরিসুদ্ধভাৰো অসক্কাযত্তোৰ, এৰং সন্তেপি তস্স ধম্মদেসনত্থং ইমে ৰরে গণ্হি. সক্কোপি তং রুক্খং ধুৰফলং কত্ৰা মহাসত্তং ৰন্দিত্ৰা সিরসি অঞ্জলিং পতিট্ঠপেত্ৰা ‘‘অরোগা ইধেৰ ৰসথা’’তি ৰত্ৰা সকট্ঠানমেৰ গতো. বোধিসত্তোপি অপরিহীনজ্ঝানো ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা ‘‘আনন্দ, পুব্বে মযা নিৰুত্থভূমিপ্পদেসো চেসো’’তি ৰত্ৰা জাতকং সমোধানেসি – ‘‘তদা সক্কো অনুরুদ্ধো অহোসি, কণ্হপণ্ডিতো পন অহমেৰ অহোসি’’ন্তি.

কণ্হজাতকৰণ্ণনা দুতিযা.

[৪৪১] ৩. চতুপোসথিকজাতকৰণ্ণনা

২৪-৩৮. যো কোপনেয্যোতি ইদং চতুপোসথিকজাতকং পুণ্ণকজাতকে আৰি ভৰিস্সতি.

চতুপোসথিকজাতকৰণ্ণনা ততিযা.

[৪৪২] ৪. সঙ্খজাতকৰণ্ণনা

বহুস্সুতোতি ইদং সত্থা জেতৰনে ৰিহরন্তো সব্বপরিক্খারদানং আরব্ভ কথেসি. সাৰত্থিযং কিরেকো উপাসকো তথাগতস্স ধম্মদেসনং সুত্ৰা পসন্নচিত্তো স্ৰাতনায নিমন্তেত্ৰা অত্তনো ঘরদ্ৰারে মণ্ডপং কারেত্ৰা অলঙ্করিত্ৰা পুনদিৰসে তথাগতস্স কালং আরোচাপেসি. সত্থা পঞ্চসতভিক্খুপরিৰারো তত্থ গন্ত্ৰা পঞ্ঞত্তে আসনে নিসীদি. উপাসকো সপুত্তদারো সপরিজনো বুদ্ধপ্পমুখস্স ভিক্খুসঙ্ঘস্স মহাদানং দত্ৰা পুন স্ৰাতনাযাতি এৰং সত্তাহং নিমন্তেত্ৰা মহাদানং পৰত্তেত্ৰা সত্তমে দিৰসে সব্বপরিক্খারং অদাসি. তং পন দদমানো উপাহনদানং উস্সন্নং কত্ৰা অদাসি. দসবলস্স দিন্নো উপাহনসঙ্ঘাটো সহস্সগ্ঘনকো অহোসি, দ্ৰিন্নং অগ্গসাৰকানং পঞ্চসতগ্ঘনকো, সেসানং পঞ্চন্নং ভিক্খুসতানং সতগ্ঘনকো. ইতি সো সব্বপরিক্খারদানং দত্ৰা অত্তনো পরিসায সদ্ধিং ভগৰতো সন্তিকে নিসীদি. অথস্স সত্থা মধুরেন সরেন অনুমোদনং করোন্তো ‘‘উপাসক, উল়ারং তে সব্বপরিক্খারদানং, অত্তমনো হোহি, পুব্বে অনুপ্পন্নে বুদ্ধে পচ্চেকবুদ্ধস্স একং উপাহনসঙ্ঘাটং দত্ৰা নাৰায ভিন্নায অপ্পতিট্ঠে মহাসমুদ্দেপি উপাহনদাননিস্সন্দেন পতিট্ঠং লভিংসু, ত্ৰং পন বুদ্ধপ্পমুখস্স ভিক্খুসঙ্ঘস্স সব্বপরিক্খারদানং অদাসি, তস্স তে উপাহনদানস্স ফলং কস্মা ন পতিট্ঠা ভৰিস্সতী’’তি ৰত্ৰা তেন যাচিতো অতীতং আহরি.

অতীতে অযং বারাণসী মোল়িনী নাম অহোসি. মোল়িনিনগরে ব্রহ্মদত্তে রজ্জং কারেন্তে সঙ্খো নাম ব্রাহ্মণো অড্ঢো মহদ্ধনো মহাভোগো পহূতৰিত্তুপকরণো পহূতধনধঞ্ঞসুৰণ্ণরজতো চতূসু নগরদ্ৰারেসু নগরমজ্ঝে নিৰেসনদ্ৰারে চাতি ছসু ঠানেসু ছ দানসালাযো কারেত্ৰা দেৰসিকং ছসতসহস্সানি ৰিস্সজ্জেন্তো কপণদ্ধিকানং মহাদানং পৰত্তেসি. সো একদিৰসং চিন্তেসি ‘‘অহং গেহে ধনে খীণে দাতুং ন সক্খিস্সামি, অপরিক্খীণেযেৰ ধনে নাৰায সুৰণ্ণভূমিং গন্ত্ৰা ধনং আহরিস্সামী’’তি. সো নাৰং বন্ধাপেত্ৰা ভণ্ডস্স পূরাপেত্ৰা পুত্তদারং আমন্তেত্ৰা ‘‘যাৰাহং আগচ্ছামি, তাৰ মে দানং অনুপচ্ছিন্দিত্ৰা পৰত্তেয্যাথা’’তি ৰত্ৰা দাসকম্মকরপরিৰুতো ছত্তং আদায উপাহনং আরুয্হ মজ্ঝন্হিকসমযে পট্টনগামাভিমুখো পাযাসি. তস্মিং খণে গন্ধমাদনে একো পচ্চেকবুদ্ধো আৰজ্জেত্ৰা তং ধনাহরণত্থায গচ্ছন্তং দিস্ৰা ‘‘মহাপুরিসো ধনং আহরিতুং গচ্ছতি, ভৰিস্সতি নু খো অস্স সমুদ্দে অন্তরাযো, নো’’তি আৰজ্জেত্ৰা ‘‘ভৰিস্সতী’’তি ঞত্ৰা ‘‘এস মং দিস্ৰা ছত্তঞ্চ উপাহনঞ্চ ময্হং দত্ৰা উপাহনদাননিস্সন্দেন সমুদ্দে ভিন্নায নাৰায পতিট্ঠং লভিস্সতি, করিস্সামিস্স অনুগ্গহ’’ন্তি আকাসেনাগন্ত্ৰা তস্সাৰিদূরে ওতরিত্ৰা চণ্ডৰাতাতপে অঙ্গারসন্থরসদিসং উণ্হৰালুকং মদ্দন্তো তস্স অভিমুখো আগচ্ছি.

সো তং দিস্ৰাৰ ‘‘পুঞ্ঞক্খেত্তং মে আগতং, অজ্জ মযা এত্থ দানবীজং রোপেতুং ৰট্টতী’’তি তুট্ঠচিত্তো ৰেগেন তং উপসঙ্কমিত্ৰা ৰন্দিত্ৰা ‘‘ভন্তে, ময্হং অনুগ্গহত্থায থোকং মগ্গা ওক্কম্ম ইমং রুক্খমূলং উপসঙ্কমথা’’তি ৰত্ৰা তস্মিং রুক্খমূলং উপসঙ্কমন্তে রুক্খমূলে ৰালুকং উস্সাপেত্ৰা উত্তরাসঙ্গং পঞ্ঞপেত্ৰা পচ্চেকবুদ্ধং নিসীদাপেত্ৰা ৰন্দিত্ৰা ৰাসিতপরিস্সাৰিতেন উদকেন পাদে ধোৰিত্ৰা গন্ধতেলেন মক্খেত্ৰা অত্তনো উপাহনা ওমুঞ্চিত্ৰা পপ্ফোটেত্ৰা গন্ধতেলেন মক্খেত্ৰা তস্স পাদেসু পটিমুঞ্চিত্ৰা ‘‘ভন্তে, ইমা উপাহনা আরুয্হ ছত্তং মত্থকে কত্ৰা গচ্ছথা’’তি ছত্তুপাহনং অদাসি. সো অস্স অনুগ্গহত্থায তং গহেত্ৰা পসাদসংৰড্ঢনত্থং পস্সন্তস্সেৰস্স উপ্পতিত্ৰা গন্ধমাদনমেৰ অগমাসি. বোধিসত্তোপি তং দিস্ৰা অতিৰিয পসন্নচিত্তো পট্টনং গন্ত্ৰা নাৰং অভিরুহি. অথস্স মহাসমুদ্দং পটিপন্নস্স সত্তমে দিৰসে নাৰা ৰিৰরং অদাসি, উদকং উস্সিঞ্চিতুং নাসক্খিংসু. মহাজনো মরণভযভীতো অত্তনো অত্তনো দেৰতা নমস্সিত্ৰা মহাৰিরৰং ৰিরৰি. মহাসত্তো একং উপট্ঠাকং গহেত্ৰা সকলসরীরং তেলেন মক্খেত্ৰা সপ্পিনা সদ্ধিং সক্খরচুণ্ণং যাৰদত্থং খাদিত্ৰা তম্পি খাদাপেত্ৰা তেন সদ্ধিং কূপকযট্ঠিমত্থকং আরুয্হ ‘‘ইমায দিসায অম্হাকং নগর’’ন্তি দিসং ৰৰত্থপেত্ৰা মচ্ছকচ্ছপপরিপন্থতো অত্তানং মোচেন্তো তেন সদ্ধিং উসভমত্তং অতিক্কমিত্ৰা পতি. মহাজনো ৰিনাসং পাপুণি. মহাসত্তো পন উপট্ঠাকেন সদ্ধিং সমুদ্দং তরিতুং আরভি. তস্স তরন্তস্সেৰ সত্তমো দিৰসো জাতো. সো তস্মিম্পি কালে লোণোদকেন মুখং ৰিক্খালেত্ৰা উপোসথিকো অহোসিযেৰ.

তদা পন চতূহি লোকপালেহি মণিমেখলা নাম দেৰধীতা ‘‘সচে সমুদ্দে নাৰায ভিন্নায তিসরণগতা ৰা সীলসম্পন্না ৰা মাতাপিতুপট্ঠাকা ৰা মনুস্সা দুক্খপ্পত্তা হোন্তি, তে রক্খেয্যাসী’’তি সমুদ্দে আরক্খণত্থায ঠপিতা হোতি. সা অত্তনো ইস্সরিযেন সত্তাহমনুভৰিত্ৰা পমজ্জিত্ৰা সত্তমে দিৰসে সমুদ্দং ওলোকেন্তী সীলাচারসংযুত্তং সঙ্খব্রাহ্মণং দিস্ৰা ‘‘ইমস্স সত্তমো দিৰসো সমুদ্দে পতিতস্স, সচে সো মরিস্সতি অতিৰিয গারয্হা মে ভৰিস্সতী’’তি সংৰিগ্গমানহদযা হুত্ৰা একং সুৰণ্ণপাতিং নানগ্গরসভোজনস্স পূরেত্ৰা ৰাতৰেগেন তত্থ গন্ত্ৰা তস্স পুরতো আকাসে ঠত্ৰা ‘‘ব্রাহ্মণ, ত্ৰং সত্তাহং নিরাহারো, ইদং দিব্বভোজনং ভুঞ্জা’’তি আহ. সো তং ওলোকেত্ৰা ‘‘অপনেহি তৰ ভত্তং, অহং উপোসথিকো’’তি আহ. অথস্স উপট্ঠাকো পচ্ছতো আগতো দেৰতং অদিস্ৰা সদ্দমেৰ সুত্ৰা ‘‘অযং ব্রাহ্মণো পকতিসুখুমালো সত্তাহং নিরাহারতায দুক্খিতো মরণভযেন ৰিলপতি মঞ্ঞে, অস্সাসেস্সামি ন’’ন্তি চিন্তেত্ৰা পঠমং গাথমাহ –

৩৯.

‘‘বহুস্সুতো সুতধম্মোসি সঙ্খ, দিট্ঠা তযা সমণব্রাহ্মণা চ;

অথক্খণে দস্সযসে ৰিলাপং, অঞ্ঞো নু কো তে পটিমন্তকো মযা’’তি.

তত্থ সুতধম্মোসীতি ধম্মোপি তযা ধম্মিকসমণব্রাহ্মণানং সন্তিকে সুতো অসি. দিট্ঠা তযাতি তেসং পচ্চযে দেন্তেন ৰেয্যাৰচ্চং করোন্তেন ধম্মিকসমণব্রাহ্মণা চ তযা দিট্ঠা. এৰং অকরোন্তো হি পস্সন্তোপি তে ন পস্সতিযেৰ. অথক্খণেতি অথ অক্খণে সল্লপন্তস্স কস্সচি অভাৰেন ৰচনস্স অনোকাসে. দস্সযসেতি ‘‘অহং উপোসথিকো’’তি ৰদন্তো ৰিলাপং দস্সেসি. পটিমন্তকোতি মযা অঞ্ঞো কো তৰ পটিমন্তকো পটিৰচনদাযকো, কিংকারণা এৰং ৰিপ্পলপসীতি?

সো তস্স ৰচনং সুত্ৰা ‘‘ইমস্স দেৰতা ন পঞ্ঞাযতি মঞ্ঞে’’তি চিন্তেত্ৰা ‘‘সম্ম, নাহং মরণস্স ভাযামি, অত্থি পন মে অঞ্ঞো পটিমন্তকো’’তি ৰত্ৰা দুতিযং গাথমাহ –

৪০.

‘‘সুব্ভূ সুভা সুপ্পটিমুক্ককম্বু, পগ্গয্হ সোৰণ্ণমযায পাতিযা;

‘ভুঞ্জস্সু ভত্তং’ ইতি মং ৰদেতি, সদ্ধাৰিত্তা, তমহং নোতি ব্রূমী’’তি.

তত্থ সুব্ভূতি সুভমুখা. সুভাতি পাসাদিকা উত্তমরূপধরা. সুপ্পটিমুক্ককম্বূতি পটিমুক্কসুৰণ্ণালঙ্কারা. পগ্গয্হাতি সুৰণ্ণপাতিযা ভত্তং গহেত্ৰা উক্খিপিত্ৰা. সদ্ধাৰিত্তাতি সদ্ধা চেৰ তুট্ঠচিত্তা চ. ‘‘সদ্ধং চিত্ত’’ন্তিপি পাঠো, তস্সত্থো সদ্ধন্তি সদ্দহন্তং, চিত্তন্তি তুট্ঠচিত্তং. তমহং নোতীতি তমহং দেৰতং উপোসথিকত্তা পটিক্খিপন্তো নোতি ব্রূমি, ন ৰিপ্পলপামি সম্মাতি.

অথস্স সো ততিযং গাথমাহ –

৪১.

‘‘এতাদিসং ব্রাহ্মণ দিস্ৰান যক্খং, পুচ্ছেয্য পোসো সুখমাসিসানো;

উট্ঠেহি নং পঞ্জলিকাভিপুচ্ছ, দেৰী নুসি ত্ৰং উদ মানুসী নূ’’তি.

তত্থ সুখমাসিসানোতি এতাদিসং যক্খং দিস্ৰা অত্তনো সুখং আসীসন্তো পণ্ডিতো পুরিসো ‘‘অম্হাকং সুখং ভৰিস্সতি, ন ভৰিস্সতী’’তি পুচ্ছেয্য. উট্ঠেহীতি উদকতো উট্ঠানাকারং দস্সেন্তো উট্ঠহ. পঞ্জলিকাভিপুচ্ছাতি অঞ্জলিকো হুত্ৰা অভিপুচ্ছ. উদ মানুসীতি উদাহু মহিদ্ধিকা মানুসী ত্ৰন্তি.

বোধিসত্তো ‘‘যুত্তং কথেসী’’তি তং পুচ্ছন্তো চতুত্থং গাথমাহ –

৪২.

‘‘যং ত্ৰং সুখেনাভিসমেক্খসে মং, ভুঞ্জস্সু ভত্তং ইতি মং ৰদেসি;

পুচ্ছামি তং নারি মহানুভাৰে, দেৰী নুসি ত্ৰং উদ মানুসী নূ’’তি.

তত্থ যং ত্ৰন্তি যস্মা ত্ৰং সুখেন মং অভিসমেক্খসে, পিযচক্খূহি ওলোকেসি. পুচ্ছামি তন্তি তেন কারণেন তং পুচ্ছামি.

ততো দেৰধীতা দ্ৰে গাথা অভাসি –

৪৩.

‘‘দেৰী অহং সঙ্খ মহানুভাৰা, ইধাগতা সাগরৰারিমজ্ঝে;

অনুকম্পিকা নো চ পদুট্ঠচিত্তা, তৰেৰ অত্থায ইধাগতাস্মি.

৪৪.

‘‘ইধন্নপানং সযনাসনঞ্চ, যানানি নানাৰিৰিধানি সঙ্খ;

সব্বস্স ত্যাহং পটিপাদযামি, যং কিঞ্চি তুয্হং মনসাভিপত্থিত’’ন্তি.

তত্থ ইধাতি ইমস্মিং মহাসমুদ্দে. নানাৰিৰিধানীতি বহূনি চ অনেকপ্পকারানি চ হত্থিযানঅস্সযানাদীনি অত্থি. সব্বস্স ত্যাহন্তি তস্স অন্নপানাদিনো সব্বস্স সামিকং কত্ৰা তং তে অন্নপানাদিং পটিপাদযামি দদামি. যং কিঞ্চীতি অঞ্ঞম্পি যং কিঞ্চি মনসা ইচ্ছিতং, তং সব্বং তে দম্মীতি.

তং সুত্ৰা মহাসত্তো ‘‘অযং দেৰধীতা সমুদ্দপিট্ঠে ময্হং ‘ইদঞ্চিদঞ্চ দম্মী’তি ৰদতি, কিং নু খো এসা মযা কতেন পুঞ্ঞকম্মেন দাতুকামা, উদাহু অত্তনো বলেন, পুচ্ছিস্সামি তাৰ ন’’ন্তি চিন্তেত্ৰা পুচ্ছন্তো সত্তমং গাথমাহ –

৪৫.

‘‘যং কিঞ্চি যিট্ঠঞ্চ হুতঞ্চ ময্হং, সব্বস্স নো ইস্সরা ত্ৰং সুগত্তে;

সুস্সোণি সুব্ভমু সুৰিলগ্গমজ্ঝে, কিস্স মে কম্মস্স অযং ৰিপাকো’’তি.

তত্থ যিট্ঠন্তি দানৰসেন যজিতং. হুতন্তি আহুনপাহুনৰসেন দিন্নং. সব্বস্স নো ইস্সরা ত্ৰন্তি তস্স অম্হাকং পুঞ্ঞকম্মস্স ত্ৰং ইস্সরা, ‘‘ইমস্স অযং ৰিপাকো, ইমস্স অয’’ন্তি ব্যাকরিতুং সমত্থাতি অত্থো. সুস্সোণীতি সুন্দরঊরুলক্খণে. সুব্ভমূতি সুন্দরভমুকে. সুৰিলগ্গমজ্ঝেতি সুট্ঠুৰিলগ্গিততনুমজ্ঝে. কিস্স মেতি মযা কতকম্মেসু কতরকম্মস্স অযং ৰিপাকো, যেনাহং অপ্পতিট্ঠে সমুদ্দে পতিট্ঠং লভামীতি.

তং সুত্ৰা দেৰধীতা ‘‘অযং ব্রাহ্মণো ‘যং তেন কুসলং কতং, তং কম্মং ন জানাতী’তি অঞ্ঞায পুচ্ছতি মঞ্ঞে, কথযিস্সামি দানিস্সা’’তি তং কথেন্তী অট্ঠমং গাথমাহ –

৪৬.

‘‘ঘম্মে পথে ব্রাহ্মণ একভিক্খুং, উগ্ঘট্টপাদং তসিতং কিলন্তং;

পটিপাদযী সঙ্খ উপাহনানি, সা দক্খিণা কামদুহা তৰজ্জা’’তি.

তত্থ একভিক্খুন্তি একং পচ্চেকবুদ্ধং সন্ধাযাহ. উগ্ঘট্টপাদন্তি উণ্হৰালুকায ঘট্টিতপাদং. তসিতন্তি পিপাসিতং. পটিপাদযীতি পটিপাদেসি, যোজেসীতি অত্থো. কামদুহাতি সব্বকামদাযিকা.

তং সুত্ৰা মহাসত্তো ‘‘এৰরূপেপি নাম অপ্পতিট্ঠে মহাসমুদ্দে মযা দিন্নউপাহনদানং মম সব্বকামদদং জাতং, অহো সুদিন্নং মে পচ্চেকবুদ্ধস্স দান’’ন্তি তুট্ঠচিত্তো নৰমং গাথমাহ –

৪৭.

‘‘সা হোতু নাৰা ফলকূপপন্না, অনৰস্সুতা এরকৰাতযুত্তা;

অঞ্ঞস্স যানস্স ন হেত্থ ভূমি, অজ্জেৰ মং মোল়িনিং পাপযস্সূ’’তি.

তস্সত্থো – দেৰতে, এৰং সন্তে ময্হং একং নাৰং মাপেহি, খুদ্দকং পন একদোণিকনাৰং মাপেহি, যং নাৰং মাপেস্সসি, সা হোতু নাৰা বহূহি সুসিব্বিতেহি ফলকেহি উপপন্না, উদকপৰেসনস্সাভাৰেন অনৰস্সুতা, এরকেন সম্মা গহেত্ৰা গচ্ছন্তেন ৰাতেন যুত্তা, ঠপেত্ৰা দিব্বনাৰং অঞ্ঞস্স যানস্স এত্থ ভূমি নত্থি, তায পন দিব্বনাৰায অজ্জেৰ মং মোল়িনিনগরং পাপযস্সূতি.

দেৰধীতা তস্স ৰচনং সুত্ৰা তুট্ঠচিত্তা সত্তরতনমযং নাৰং মাপেসি. সা দীঘতো অট্ঠউসভা অহোসি ৰিত্থারতো চতুউসভা, গম্ভীরতো ৰীসতিযট্ঠিকা. তস্সা ইন্দনীলমযা তযো কূপকা, সোৰণ্ণমযানি যোত্তানি রজতমযানি পত্তানি সোৰণ্ণমযানি চ ফিযারিত্তানি অহেসুং. দেৰতা তং নাৰং সত্তন্নং রতনানং পূরেত্ৰা ব্রাহ্মণং আলিঙ্গিত্ৰা অলঙ্কতনাৰায আরোপেসি, উপট্ঠাকং পনস্স ন ওলোকেসি. ব্রাহ্মণো অত্তনা কতকল্যাণতো তস্স পত্তিং অদাসি, সো অনুমোদি. তদা দেৰতা তম্পি আলিঙ্গিত্ৰা নাৰায পতিট্ঠাপেসি. অথ নং নাৰং মোল়িনিনগরং নেত্ৰা ব্রাহ্মণস্স ঘরে ধনং পতিট্ঠাপেত্ৰা অত্তনো ৰসনট্ঠানমেৰ অগমাসি. সত্থা অভিসম্বুদ্ধো হুত্ৰা –

৪৮.

‘‘সা তত্থ ৰিত্তা সুমনা পতীতা, নাৰং সুচিত্তং অভিনিম্মিনিত্ৰা;

আদায সঙ্খং পুরিসেন সদ্ধিং, উপানযী নগরং সাধুরম্ম’’ন্তি. –

ইমং ওসানগাথং অভাসি.

তত্থ সাতি ভিক্খৰে, সা দেৰতা তত্থ সমুদ্দমজ্ঝে তস্স ৰচনং সুত্ৰা ৰিত্তিসঙ্খাতায পীতিযা সমন্নাগতত্তা ৰিত্তা. সুমনাতি সুন্দরমনা পামোজ্জেন পতীতচিত্তা হুত্ৰা ৰিচিত্রনাৰং নিম্মিনিত্ৰা ব্রাহ্মণং পরিচারকেন সদ্ধিং আদায সাধুরম্মং অতিরমণীযং নগরং উপানযীতি.

ব্রাহ্মণোপি যাৰজীৰং অপরিমিতধনং গেহং অজ্ঝাৰসন্তো দানং দত্ৰা সীলং রক্খিত্ৰা জীৰিতপরিযোসানে সপরিসো দেৰনগরং পরিপূরেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উপাসকো সোতাপত্তিফলে পতিট্ঠহি.

তদা দেৰধীতা উপ্পলৰণ্ণা অহোসি, উপট্ঠাকপুরিসো আনন্দো, সঙ্খব্রাহ্মণো পন অহমেৰ অহোসিন্তি.

সঙ্খজাতকৰণ্ণনা চতুত্থা.

[৪৪৩] ৫. চূল়বোধিজাতকৰণ্ণনা

যো তে ইমং ৰিসালক্খিন্তি ইদং সত্থা জেতৰনে ৰিহরন্তো একং কোধনং ভিক্খুং আরব্ভ কথেসি. সো কির ভিক্খু নিয্যানিকে বুদ্ধসাসনে পব্বজিত্ৰাপি কোধং নিগ্গহেতুং নাসক্খি, কোধনো অহোসি উপাযাসবহুলো, অপ্পম্পি ৰুত্তো সমানো অভিসজ্জি কুপ্পি ব্যাপজ্জি পতিট্ঠযি. সত্থা তস্স কোধনভাৰং সুত্ৰা পক্কোসাপেত্ৰা ‘‘সচ্চং কির ত্ৰং কোধনো’’তি পুচ্ছিত্ৰা ‘‘সচ্চং ভন্তে’’তি ৰুত্তে ‘‘ভিক্খু কোধো নাম ৰারেতব্বো, এৰরূপো হি ইধলোকে চ পরলোকে চ অনত্থকারকো, ত্ৰং নিক্কোধস্স বুদ্ধস্স সাসনে পব্বজিত্ৰা কস্মা কুজ্ঝসি, পোরাণকপণ্ডিতা বাহিরসাসনে পব্বজিত্ৰাপি কোধং ন করিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে অঞ্ঞতরস্মিং কাসিনিগমে একো ব্রাহ্মণো অড্ঢো মহদ্ধনো মহাভোগো অপুত্তকো অহোসি, তস্স ব্রাহ্মণী পুত্তং পত্থেসি. তদা বোধিসত্তো ব্রহ্মলোকা চৰিত্ৰা তস্সা কুচ্ছিযং নিব্বত্তি, তস্স নামগ্গহণদিৰসে ‘‘বোধিকুমারো’’তি নামং করিংসু. তস্স ৰযপ্পত্তকালে তক্কসিলং গন্ত্ৰা সব্বসিপ্পানি উগ্গণ্হিত্ৰা পচ্চাগতস্স অনিচ্ছন্তস্সেৰ মাতাপিতরো সমানজাতিকা কুলা কুমারিকং আনেসুং. সাপি ব্রহ্মলোকা চুতাৰ উত্তমরূপধরা দেৰচ্ছরপটিভাগা. তেসং অনিচ্ছমানানঞ্ঞেৰ অঞ্ঞমঞ্ঞং আৰাহৰিৰাহং করিংসু. উভিন্নং পনেতেসং কিলেসসমুদাচারো নাম ন ভূতপুব্বো, সংরাগৰসেন অঞ্ঞমঞ্ঞস্স ওলোকনং নাম নাহোসি, সুপিনেপি মেথুনধম্মো নাম ন দিট্ঠপুব্বো, এৰং পরিসুদ্ধসীলা অহেসুং.

অথাপরভাগে মহাসত্তো মাতাপিতূসু কালকতেসু তেসং সরীরকিচ্চং কত্ৰা তং পক্কোসিত্ৰা ‘‘ভদ্দে, ত্ৰং ইমং অসীতিকোটিধনং গহেত্ৰা সুখেন জীৰাহী’’তি আহ. ‘‘কিং করিস্সথ তুম্হে পন, অয্যপুত্তা’’তি? ‘‘ময্হং ধনেন কিচ্চং নত্থি, হিমৰন্তপদেসং পৰিসিত্ৰা ইসিপব্বজ্জং পব্বজিত্ৰা অত্তনো পতিট্ঠং করিস্সামী’’তি. ‘‘কিং পন অয্যপুত্ত পব্বজ্জা নাম পুরিসানঞ্ঞেৰ ৰট্টতী’’তি? ‘‘ইত্থীনম্পি ৰট্টতি, ভদ্দে’’তি. ‘‘তেন হি অহং তুম্হেহি ছট্টিতখেল়ং ন গণ্হিস্সামি, ময্হম্পি ধনেন কিচ্চং নত্থি, অহম্পি পব্বজিস্সামী’’তি. ‘‘সাধু, ভদ্দে’’তি. তে উভোপি মহাদানং দত্ৰা নিক্খমিত্ৰা রমণীযে ভূমিভাগে অস্সমং কত্ৰা পব্বজিত্ৰা উঞ্ছাচরিযায ফলাফলেহি যাপেন্তা তত্থ দসমত্তানি সংৰচ্ছরানি ৰসিংসু, ঝানং পন নেসং ন তাৰ উপ্পজ্জতি. তে তত্থ পব্বজ্জাসুখেনেৰ দস সংৰচ্ছরে ৰসিত্ৰা লোণম্বিলসেৰনত্থায জনপদচারিকং চরন্তা অনুপুব্বেন বারাণসিং পত্ৰা রাজুয্যানে ৰসিংসু.

অথেকদিৰসং রাজা উয্যানপালং পণ্ণাকারং আদায আগতং দিস্ৰা ‘‘উয্যানকীল়িকং কীল়িস্সাম, উয্যানং সোধেহী’’তি ৰত্ৰা তেন সোধিতং সজ্জিতং উয্যানং মহন্তেন পরিৰারেন অগমাসি. তস্মিং খণে তে উভোপি জনা উয্যানস্স একপস্সে পব্বজ্জাসুখেন ৰীতিনামেত্ৰা নিসিন্না হোন্তি. অথ রাজা উয্যানে ৰিচরন্তো তে উভোপি নিসিন্নকে দিস্ৰা পরমপাসাদিকং উত্তমরূপধরং পরিব্বাজিকং ওলোকেন্তো পটিবদ্ধচিত্তো অহোসি. সো কিলেসৰসেন কম্পন্তো ‘‘পুচ্ছিস্সামি তাৰ, অযং পরিব্বাজিকা ইমস্স কিং হোতী’’তি বোধিসত্তং উপসঙ্কমিত্ৰা ‘‘পব্বজিত অযং তে পরিব্বাজিকা কিং হোতী’’তি পুচ্ছি. মহারাজ, কিঞ্চি ন হোতি, কেৰলং একপব্বজ্জায পব্বজিতা, অপিচ খো পন মে গিহিকালে পাদপরিচারিকা অহোসীতি. তং সুত্ৰা রাজা ‘‘অযং কিরেতস্স কিঞ্চি ন হোতি, অপিচ খো পন গিহিকালে পাদপরিচারিকা কিরস্স অহোসি, সচে পনাহং ইস্সরিযবলেন গহেত্ৰা গচ্ছেয্যং, কিং নু খো এস করিস্সতি, পরিগ্গণ্হিস্সামি তাৰ ন’’ন্তি চিন্তেত্ৰা উপসঙ্কমিত্ৰা পঠমং গাথমাহ –

৪৯.

‘‘যো তে ইমং ৰিসালক্খিং, পিযং সংম্হিতভাসিনিং;

আদায বলা গচ্ছেয্য, কিং নু কযিরাসি ব্রাহ্মণা’’তি.

তত্থ সংম্হিতভাসিনিন্তি মন্দহসিতভাসিনিং. বলা গচ্ছেয্যাতি বলক্কারেন আদায গচ্ছেয্য. কিং নু কযিরাসীতি তস্স ত্ৰং ব্রাহ্মণ কিং করেয্যাসীতি?

অথস্স কথং সুত্ৰা মহাসত্তো দুতিযং গাথমাহ –

৫০.

‘‘উপ্পজ্জে মে ন মুচ্চেয্য, ন মে মুচ্চেয্য জীৰতো;

রজংৰ ৰিপুলা ৰুট্ঠি, খিপ্পমেৰ নিৰারযে’’তি.

তস্সত্থো – মহারাজ, সচে ইমং গহেত্ৰা গচ্ছন্তে কিস্মিঞ্চি মম অব্ভন্তরে কোপো উপ্পজ্জেয্য, সো মে অন্তো উপ্পজ্জিত্ৰা ন মুচ্চেয্য, যাৰাহং জীৰামি, তাৰ মে ন মুচ্চেয্য. নাস্স অন্তো ঘনসন্নিৰাসেন পতিট্ঠাতুং দস্সামি, অথ খো যথা উপ্পন্নং রজং ৰিপুলা মেঘৰুট্ঠি খিপ্পং নিৰারেতি, তথা খিপ্পমেৰ নং মেত্তাভাৰনায নিগ্গহেত্ৰা ৰারেস্সামীতি.

এৰং মহাসত্তো সীহনাদং নদি. রাজা পনস্স কথং সুত্ৰাপি অন্ধবালতায পটিবদ্ধং অত্তনো চিত্তং নিৰারেতুং অসক্কোন্তো অঞ্ঞতরং অমচ্চং আণাপেসি ‘‘ইমং পরিব্বাজিকং রাজনিৰেসনং নেহী’’তি. সো ‘‘সাধূ’’তি পটিস্সুণিত্ৰা ‘‘অধম্মো লোকে ৰত্ততি, অযুত্ত’’ন্তিআদীনি ৰত্ৰা পরিদেৰমানংযেৰ নং আদায পাযাসি. বোধিসত্তো তস্সা পরিদেৰনসদ্দং সুত্ৰা একৰারং ওলোকেত্ৰা পুন ন ওলোকেসি. তং রোদন্তিং পরিদেৰন্তিং রাজনিৰেসনমেৰ নযিংসু. সোপি বারাণসিরাজা উয্যানে পপঞ্চং অকত্ৰাৰ সীঘতরং গন্ত্ৰা তং পরিব্বাজিকং পক্কোসাপেত্ৰা মহন্তেন যসেন নিমন্তেসি. সা যসস্স অগুণং পব্বজায এৰ গুণং কথেসি. রাজা কেনচি পরিযাযেন তস্সা মনং অলভন্তো তং একস্মিং গব্ভে কারেত্ৰা চিন্তেসি ‘‘অযং পরিব্বাজিকা এৰরূপং যসং ন ইচ্ছতি, সোপি তাপসো এৰরূপং মাতুগামং গহেত্ৰা গচ্ছন্তে কুজ্ঝিত্ৰা ওলোকিতমত্তম্পি ন অকাসি, পব্বজিতা খো পন বহুমাযা হোন্তি, কিঞ্চি পযোজেত্ৰা অনত্থম্পি মে করেয্য, গচ্ছামি তাৰ জানামি কিং করোন্তো নিসিন্নো’’তি সণ্ঠাতুং অসক্কোন্তো উয্যানং অগমাসি. বোধিসত্তোপি চীৰরং সিব্বন্তো নিসীদি. রাজা মন্দপরিৰারোৰ পদসদ্দং অকরোন্তো সণিকং উপসঙ্কমি. বোধিসত্তো রাজানং অনোলোকেত্ৰা চীৰরমেৰ সিব্বি. রাজা ‘‘অযং কুজ্ঝিত্ৰা মযা সদ্ধিং ন সল্লপতী’’তি মঞ্ঞমানো ‘‘অযং কূটতাপসো ‘কোধস্স উপ্পজ্জিতুং ন দস্সামি, উপ্পন্নম্পি নং খিপ্পমেৰ নিগ্গণ্হিস্সামী’তি পঠমমেৰ গজ্জিত্ৰা ইদানি কোধেন থদ্ধো হুত্ৰা মযা সদ্ধিং ন সল্লপতী’’তি সঞ্ঞায ততিযং গাথমাহ –

৫১.

‘‘যং নু পুব্বে ৰিকত্থিত্থো, বলম্হিৰ অপস্সিতো;

স্ৰজ্জ তুণ্হিকতো দানি, সঙ্ঘাটিং সিব্বমচ্ছসী’’তি.

তত্থ বলম্হিৰ অপস্সিতোতি বলনিস্সিতো ৰিয হুত্ৰা. তুণ্হিকতোতি কিঞ্চি অৰদন্তো. সিব্বমচ্ছসীতি সিব্বন্তো অচ্ছসি.

তং সুত্ৰা মহাসত্তো ‘‘অযং রাজা কোধৰসেন মং নালপতীতি মঞ্ঞতি, কথেস্সামি দানিস্স উপ্পন্নস্স কোধস্স ৰসং অগতভাৰ’’ন্তি চিন্তেত্ৰা চতুত্থং গাথমাহ –

৫২.

‘‘উপ্পজ্জি মে ন মুচ্চিত্থ, ন মে মুচ্চিত্থ জীৰতো;

রজংৰ ৰিপুলা ৰুট্ঠি, খিপ্পমেৰ নিৰারযি’’ন্তি.

তস্সত্থো – মহারাজ, উপ্পজ্জি মে, ন ন উপ্পজ্জি, ন পন মে মুচ্চিত্থ, নাস্স পৰিসিত্ৰা হদযে ঠাতুং অদাসিং, ইতি সো মম জীৰতো ন মুচ্চিত্থেৰ, রজং ৰিপুলা ৰুট্ঠি ৰিয খিপ্পমেৰ নং নিৰারেসিন্তি.

তং সুত্ৰা রাজা ‘‘কিং নু খো এস কোপমেৰ সন্ধায ৰদতি, উদাহু অঞ্ঞং কিঞ্চি সিপ্পং সন্ধায কথেসি, পুচ্ছিস্সামি তাৰ ন’’ন্তি চিন্তেত্ৰা পুচ্ছন্তো পঞ্চমং গাথমাহ –

৫৩.

‘‘কিং তে উপ্পজ্জি নো মুচ্চি, কিং তে ন মুচ্চি জীৰতো;

রজংৰ ৰিপুলা ৰুট্ঠি, কতমং তং নিৰারযী’’তি.

তত্থ কিং তে উপ্পজ্জি নো মুচ্চীতি কিং তৰ উপ্পজ্জি চেৰ ন মুচ্চি চ.

তং সুত্ৰা বোধিসত্তো ‘‘মহারাজ, এৰং কোধো বহুআদীনৰো মহাৰিনাসদাযকো, এসো মম উপ্পজ্জি, উপ্পন্নঞ্চ নং মেত্তাভাৰনায নিৰারেসি’’ন্তি কোধে আদীনৰং পকাসেন্তো –

৫৪.

‘‘যম্হি জাতে ন পস্সতি, অজাতে সাধু পস্সতি;

সো মে উপ্পজ্জি নো মুচ্চি, কোধো দুম্মেধগোচরো.

৫৫.

‘‘যেন জাতেন নন্দন্তি, অমিত্তা দুক্খমেসিনো;

সো মে উপ্পজ্জি নো মুচ্চি, কোধো দুম্মেধগোচরো.

৫৬.

‘‘যস্মিঞ্চ জাযমানম্হি, সদত্থং নাৰবুজ্ঝতি;

সো মে উপ্পজ্জি নো মুচ্চি, কোধো দুম্মেধগোচরো.

৫৭.

‘‘যেনাভিভূতো কুসলং জহাতি, পরক্করে ৰিপুলঞ্চাপি অত্থং;

স ভীমসেনো বলৰা পমদ্দী, কোধো মহারাজ ন মে অমুচ্চথ.

৫৮.

‘‘কট্ঠস্মিং মত্থমানস্মিং, পাৰকো নাম জাযতি;

তমেৰ কট্ঠং ডহতি, যস্মা সো জাযতে গিনি.

৫৯.

‘‘এৰং মন্দস্স পোসস্স, বালস্স অৰিজানতো;

সারম্ভা জাযতে কোধো, সোপি তেনেৰ ডয্হতি.

৬০.

‘‘অগ্গীৰ তিণকট্ঠস্মিং, কোধো যস্স পৰড্ঢতি;

নিহীযতি তস্স যসো, কাল়পক্খেৰ চন্দিমা.

৬১.

‘‘অনেধো ধূমকেতূৰ, কোধো যস্সূপসম্মতি;

আপূরতি তস্স যসো, সুক্কপক্খেৰ চন্দিমা’’তি. – ইমা গাথা আহ;

তত্থ ন পস্সতীতি অত্তত্থম্পি ন পস্সতি, পগেৰ পরত্থং. সাধু পস্সতীতি অত্তত্থং পরত্থং উভযত্থম্পি সাধু পস্সতি. দুম্মেধগোচরোতি নিপ্পঞ্ঞানং আধারভূতো গোচরো. দুক্খমেসিনোতি দুক্খং ইচ্ছন্তা. সদত্থন্তি অত্তনো অত্থভূতং অত্থতো চেৰ ধম্মতো চ ৰুদ্ধিং. পরক্করেতি ৰিপুলম্পি অত্থং উপ্পন্নং পরতো কারেতি, অপনেথ, ন মে ইমিনা অত্থোতি ৰদতি. স ভীমসেনোতি সো কোধো ভীমায ভযজননিযা মহতিযা কিলেসসেনায সমন্নাগতো. পমদ্দীতি অত্তনো বলৰভাৰেন উল়ারেপি সত্তে গহেত্ৰা অত্তনো ৰসে করণেন মদ্দনসমত্থো. ন মে অমুচ্চথাতি মম সন্তিকা মোক্খং ন লভতি, হদযে ৰা পন মে খীরং ৰিয মুহুত্তং দধিভাৰেন ন পতিট্ঠহিত্থাতিপি অত্থো.

কট্ঠস্মিং মত্থমানস্মিন্তি অরণীসহিতেন মত্থিযমানে, ‘‘মদ্দমানস্মি’’ন্তিপি পাঠো. যস্মাতি যতো কট্ঠা জাযতি, তমেৰ ডহতি. গিনীতি অগ্গি. বালস্স অৰিজানতোতি বালস্স অৰিজানন্তস্স. সারম্ভা জাযতেতি অহং ত্ৰন্তি আকড্ঢনৰিকড্ঢনং করোন্তস্স করণুত্তরিযলক্খণা সারম্ভা অরণীমত্থনা ৰিয পাৰকো কোধো জাযতি. সোপি তেনেৰাতি সোপি বালো তেনেৰ কোধেন কট্ঠং ৰিয অগ্গিনা ডয্হতি. অনেধো ধূমকেতূৰাতি অনিন্ধনো অগ্গি ৰিয. তস্সাতি তস্স অধিৰাসনখন্তিযা সমন্নাগতস্স পুগ্গলস্স সুক্কপক্খে চন্দো ৰিয লদ্ধো যসো অপরাপরং আপূরতীতি.

রাজা মহাসত্তস্স ধম্মকথং সুত্ৰা তুট্ঠো একং অমচ্চং আণাপেত্ৰা পরিব্বাজিকং আহরাপেত্ৰা ‘‘ভন্তে নিক্কোধতাপস, উভোপি তুম্হে পব্বজ্জাসুখেন ৰীতিনামেন্তা ইধেৰ উয্যানে ৰসথ, অহং ৰো ধম্মিকং রক্খাৰরণগুত্তিং করিস্সামী’’তি ৰত্ৰা খমাপেত্ৰা ৰন্দিত্ৰা পক্কামি. তে উভোপি তত্থেৰ ৰসিংসু. অপরভাগে পরিব্বাজিকা কালমকাসি. বোধিসত্তো তস্সা কালকতায হিমৰন্তং পৰিসিত্ৰা অভিঞ্ঞা চ সমাপত্তিযো চ নিব্বত্তেত্ৰা চত্তারো ব্রহ্মৰিহারে ভাৰেত্ৰা ব্রহ্মলোকপরাযণো অহোসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে কোধনো ভিক্খু অনাগামিফলে পতিট্ঠহি.

তদা পরিব্বাজিকা রাহুলমাতা অহোসি, রাজা আনন্দো, পরিব্বাজকো পন অহমেৰ অহোসিন্তি.

চূল়বোধিজাতকৰণ্ণনা পঞ্চমা.

[৪৪৪] ৬. কণ্হদীপাযনজাতকৰণ্ণনা

সত্তাহমেৰাহন্তি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. ৰত্থু কুসজাতকে (জা. ২.২০.১ আদযো) আৰি ভৰিস্সতি. সত্থা তং ভিক্খুং ‘‘সচ্চং কির ত্ৰং ভিক্খু উক্কণ্ঠিতোসী’’তি পুচ্ছিত্ৰা ‘‘সচ্চং ভন্তে’’তি ৰুত্তে ‘‘ভিক্খু পোরাণকপণ্ডিতা অনুপ্পন্নে বুদ্ধে বাহিরকপব্বজ্জং পব্বজিত্ৰা অতিরেকপঞ্ঞাসৰস্সানি অনভিরতা ব্রহ্মচরিযং চরন্তা হিরোত্তপ্পভেদভযেন অত্তনো উক্কণ্ঠিতভাৰং ন কস্সচি কথেসুং, ত্ৰং কস্মা এৰরূপে নিয্যানিকসাসনে পব্বজিত্ৰা মাদিসস্স গরুনো বুদ্ধস্স সম্মুখে ঠত্ৰা চতুপরিসমজ্ঝে উক্কণ্ঠিতভাৰং আৰি করোসি, কিমত্থং অত্তনো হিরোত্তপ্পং ন রক্খসী’’তি ৰত্ৰা অতীতং আহরি.

অতীতে ৰংসরট্ঠে কোসম্বিযং নাম নগরে কোসম্বকো নাম রাজা রজ্জং কারেসি. তদা অঞ্ঞতরস্মিং নিগমে দ্ৰে ব্রাহ্মণা অসীতিকোটিধনৰিভৰা অঞ্ঞমঞ্ঞং পিযসহাযকা কামেসু দোসং দিস্ৰা মহাদানং পৰত্তেত্ৰা উভোপি কামে পহায মহাজনস্স রোদন্তস্স পরিদেৰন্তস্স নিক্খমিত্ৰা হিমৰন্তপদেসে অস্সমপদং কত্ৰা পব্বজিত্ৰা উঞ্ছাচরিযায ৰনমূলফলাফলেন যাপেন্তা পণ্ণাস ৰস্সানি ৰসিংসু, ঝানং উপ্পাদেতুং নাসক্খিংসু. তে পণ্ণাসৰস্সচ্চযেন লোণম্বিলসেৰনত্থায জনপদং চরন্তা কাসিরট্ঠং সম্পাপুণিংসু. তত্র অঞ্ঞতরস্মিং নিগমগামে দীপাযনতাপসস্স গিহিসহাযো মণ্ডব্যো নাম অত্থি, তে উভোপি তস্স সন্তিকং অগমংসু. সো তে দিস্ৰাৰ অত্তমনো পণ্ণসালং কারেত্ৰা উভোপি তে চতূহি পচ্চযেহি উপট্ঠহি. তে তত্থ তীণি চত্তারি ৰস্সানি ৰসিত্ৰা তং আপুচ্ছিত্ৰা চারিকং চরন্তা বারাণসিং পত্ৰা অতিমুত্তকসুসানে ৰসিংসু. তত্থ দীপাযনো যথাভিরন্তং ৰিহরিত্ৰা পুন তস্সেৰ সহাযস্স সন্তিকং গতো. মণ্ডব্যতাপসো তত্থেৰ ৰসি.

অথেকদিৰসং একো চোরো অন্তোনগরে চোরিকং কত্ৰা ধনসারং আদায নিক্খন্তো ‘‘চোরো’’তি ঞত্ৰা পটিবুদ্ধেহি ঘরস্সামিকেহি চেৰ আরক্খমনুস্সেহি চ অনুবদ্ধো নিদ্ধমনেন নিক্খমিত্ৰা ৰেগেন সুসানং পৰিসিত্ৰা তাপসস্স পণ্ণসালদ্ৰারে ভণ্ডিকং ছট্টেত্ৰা পলাযি. মনুস্সা ভণ্ডিকং দিস্ৰা ‘‘অরে দুট্ঠজটিল, ত্ৰং রত্তিং চোরিকং কত্ৰা দিৰা তাপসরূপেন চরসী’’তি তজ্জেত্ৰা পোথেত্ৰা তং আদায নেত্ৰা রঞ্ঞো দস্সযিংসু. রাজা অনুপপরিক্খিত্ৰাৰ ‘‘গচ্ছথ, নং সূলে উত্তাসেথা’’তি আহ. তে তং সুসানং নেত্ৰা খদিরসূলং আরোপযিংসু, তাপসস্স সরীরে সূলং ন পৰিসতি. ততো নিম্বসূলং আহরিংসু, তম্পি ন পৰিসতি. অযসূলং আহরিংসু, তম্পি ন পৰিসতি. তাপসো ‘‘কিং নু খো মে পুব্বকম্ম’’ন্তি ওলোকেসি, অথস্স জাতিস্সরঞাণং উপ্পজ্জি, তেন পুব্বকম্মং ওলোকেত্ৰা অদ্দস. কিং পনস্স পুব্বকম্মন্তি? কোৰিল়ারসূলে মক্খিকাৰেধনং. সো কির পুরিমভৰে ৰড্ঢকিপুত্তো হুত্ৰা পিতু রুক্খতচ্ছনট্ঠানং গন্ত্ৰা একং মক্খিকং গহেত্ৰা কোৰিল়ারসলাকায সূলে ৰিয ৰিজ্ঝি. তমেনং পাপকম্মং ইমং ঠানং পত্ৰা গণ্হি. সো ‘‘ন সক্কা ইতো পাপা মযা মুচ্চিতু’’ন্তি ঞত্ৰা রাজপুরিসে আহ ‘‘সচে মং সূলে উত্তাসেতুকামত্থ, কোৰিল়ারসূলং আহরথা’’তি. তে তথা কত্ৰা তং সূলে উত্তাসেত্ৰা আরক্খং দত্ৰা পক্কমিংসু.

আরক্খকা পটিচ্ছন্না হুত্ৰা তস্স সন্তিকং আগচ্ছন্তে ওলোকেন্তি. তদা দীপাযনো ‘‘চিরদিট্ঠো মে সহাযো’’তি মণ্ডব্যস্স সন্তিকং আগচ্ছন্তো ‘‘সূলে উত্তাসিতো’’তি তং দিৰসঞ্ঞেৰ অন্তরামগ্গে সুত্ৰা তং ঠানং গন্ত্ৰা একমন্তং ঠিতো ‘‘কিং সম্ম কারকোসী’’তি পুচ্ছিত্ৰা ‘‘অকারকোম্হী’’তি ৰুত্তে ‘‘অত্তনো মনোপদোসং রক্খিতুং সক্খি, নাসক্খী’’তি পুচ্ছি. ‘‘সম্ম, যেহি অহং গহিতো, নেৰ তেসং, ন রঞ্ঞো উপরি ময্হং মনোপদোসো অত্থী’’তি. ‘‘এৰং সন্তে তাদিসস্স সীলৰতো ছাযা ময্হং সুখা’’তি ৰত্ৰা দীপাযনো সূলং নিস্সায নিসীদি. অথস্স সরীরে মণ্ডব্যস্স সরীরতো লোহিতবিন্দূনি পতিংসু. তানি সুৰণ্ণৰণ্ণসরীরে পতিতপতিতানি সুস্সিত্ৰা কাল়কানি উপ্পজ্জিংসু. ততো পট্ঠাযেৰ সো কণ্হদীপাযনো নাম অহোসি. সো সব্বরত্তিং তত্থেৰ নিসীদি.

পুনদিৰসে আরক্খপুরিসা আগন্ত্ৰা তং পৰত্তিং রঞ্ঞো আরোচেসুং. রাজা ‘‘অনিসামেত্ৰাৰ মে কত’’ন্তি ৰেগেন তত্থ গন্ত্ৰা ‘‘পব্বজিত, কস্মা সূলং নিস্সায নিসিন্নোসী’’তি দীপাযনং পুচ্ছি. মহারাজ, ইমং তাপসং রক্খন্তো নিসিন্নোম্হি. কিং পন ত্ৰং মহারাজ, ইমস্স কারকভাৰং ৰা অকারকভাৰং ৰা ঞত্ৰা এৰং কারেসীতি? সো কম্মস্স অসোধিতভাৰং আচিক্খি. অথস্স সো ‘‘মহারাজ, রঞ্ঞা নাম নিসম্মকারিনা ভৰিতব্বং, অলসো গিহী কামভোগী ন সাধূ’’তিআদীনি ৰত্ৰা ধম্মং দেসেসি. রাজা মণ্ডব্যস্স নিদ্দোসভাৰং ঞত্ৰা ‘‘সূলং হরথা’’তি আণাপেসি. সূলং হরন্তা হরিতুং ন সক্খিংসু. মণ্ডব্যো আহ – ‘‘মহারাজ, অহং পুব্বে কতকম্মদোসেন এৰরূপং ভযং সম্পত্তো, মম সরীরতো সূলং হরিতুং ন সক্কা, সচে ময্হং জীৰিতং দাতুকামো, ককচং আহরাপেত্ৰা ইমং সূলং চম্মসমং ছিন্দাপেহী’’তি. রাজা তথা কারেসি. অন্তোসরীরে সূলো অন্তোযেৰ অহোসি. তদা কির সো সুখুমং কোৰিল়ারসলাকং গহেত্ৰা মক্খিকায ৰচ্চমগ্গং পৰেসেসি, তং তস্স অন্তোসরীরেযেৰ অহোসি. সো তেন কারণেন অমরিত্ৰা অত্তনো আযুক্খযেনেৰ মরি, তস্মা অযম্পি ন মতো. রাজা তাপসে ৰন্দিত্ৰা খমাপেত্ৰা উভোপি উয্যানে ৰসাপেন্তো পটিজগ্গি, ততো পট্ঠায মণ্ডব্যো আণিমণ্ডব্যো নাম জাতো. সো রাজানং উপনিস্সায তত্থেৰ ৰসি, দীপাযনো পন তস্স ৰণং ফাসুকং কত্ৰা অত্তনো গিহিসহাযমণ্ডব্যস্স সন্তিকমেৰ গতো.

তং পণ্ণসালং পৰিসন্তং দিস্ৰা একো পুরিসো সহাযস্স আরোচেসি. সো সুত্ৰাৰ তুট্ঠচিত্তো সপুত্তদারো বহূ গন্ধমালতেলফাণিতাদীনি আদায তং পণ্ণসালং গন্ত্ৰা দীপাযনং ৰন্দিত্ৰা পাদে ধোৰিত্ৰা তেলেন মক্খেত্ৰা পানকং পাযেত্ৰা আণিমণ্ডব্যস্স পৰত্তিং সুণন্তো নিসীদি. অথস্স পুত্তো যঞ্ঞদত্তকুমারো নাম চঙ্কমনকোটিযং গেণ্ডুকেন কীল়ি, তত্র চেকস্মিং ৰম্মিকে আসীৰিসো ৰসতি. কুমারস্স ভূমিযং পহটগেণ্ডুকো গন্ত্ৰা ৰম্মিকবিলে আসীৰিসস্স মত্থকে পতি. সো অজানন্তো বিলে হত্থং পৰেসেসি. অথ নং কুদ্ধো আসীৰিসো হত্থে ডংসি. সো ৰিসৰেগেন মুচ্ছিতো তত্থেৰ পতি. অথস্স মাতাপিতরো সপ্পেন ডট্ঠভাৰং ঞত্ৰা কুমারকং উক্খিপিত্ৰা তাপসস্স সন্তিকং আনেত্ৰা পাদমূলে নিপজ্জাপেত্ৰা ‘‘ভন্তে, পব্বজিতা নাম ওসধং ৰা পরিত্তং ৰা জানন্তি, পুত্তকং নো আরোগং করোথা’’তি আহংসু. অহং ওসধং ন জানামি, নাহং ৰেজ্জকম্মং করিস্সামীতি. ‘‘তেন হি ভন্তে, ইমস্মিং কুমারকে মেত্তং কত্ৰা সচ্চকিরিযং করোথা’’তি ৰুত্তে তাপসো ‘‘সাধু, সচ্চকিরিযং করিস্সামী’’তি ৰত্ৰা যঞ্ঞদত্তস্স সীসে হত্থং ঠপেত্ৰা পঠমং গাথমাহ –

৬২.

‘‘সত্তাহমেৰাহং পসন্নচিত্তো, পুঞ্ঞত্থিকো আচরিং ব্রহ্মচরিযং;

অথাপরং যং চরিতং মমেদং, ৰস্সানি পঞ্ঞাস সমাধিকানি;

অকামকোৰাপি অহং চরামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো’’তি.

তত্থ অথাপরং যং চরিতন্তি তস্মা সত্তাহা উত্তরি যং মম ব্রহ্মচরিযং. অকামকোৰাপীতি পব্বজ্জং অনিচ্ছন্তোযেৰ. এতেন সচ্চেন সুৰত্থি হোতূতি সচে অতিরেকপণ্ণাসৰস্সানি অনভিরতিৰাসং ৰসন্তেন মযা কস্সচি অনারোচিতভাৰো সচ্চং, এতেন সচ্চেন যঞ্ঞদত্তকুমারস্স সোত্থিভাৰো হোতু, জীৰিতং পটিলভতূতি.

অথস্স সহ সচ্চকিরিযায যঞ্ঞদত্তস্স থনপ্পদেসতো উদ্ধং ৰিসং ভস্সিত্ৰা পথৰিং পাৰিসি. কুমারো অক্খীনি উম্মীলেত্ৰা মাতাপিতরো ওলোকেত্ৰা ‘‘অম্মতাতা’’তি ৰত্ৰা পরিৰত্তিত্ৰা নিপজ্জি. অথস্স পিতরং কণ্হদীপাযনো আহ – ‘‘মযা তাৰ মম বলং কতং, ত্ৰম্পি অত্তনো বলং করোহী’’তি. সো ‘‘অহম্পি সচ্চকিরিযং করিস্সামী’’তি পুত্তস্স উরে হত্থং ঠপেত্ৰা দুতিযং গাথমাহ –

৬৩.

‘‘যস্মা দানং নাভিনন্দিং কদাচি, দিস্ৰানহং অতিথিং ৰাসকালে;

ন চাপি মে অপ্পিযতং অৰেদুং, বহুস্সুতা সমণব্রাহ্মণা চ;

অকামকোৰাপি অহং দদামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো’’তি.

তত্থ ৰাসকালেতি ৰসনত্থায গেহং আগতকালে. ন চাপি মে অপ্পিযতং অৰেদুন্তি বহুস্সুতাপি সমণব্রাহ্মণা ‘‘অযং নেৰ দানং অভিনন্দতি ন অম্হে’’তি ইমং মম অপ্পিযভাৰং নেৰ জানিংসু. অহঞ্হি তে পিযচক্খূহিযেৰ ওলোকেমীতি দীপেতি. এতেন সচ্চেনাতি সচে অহং দানং দদমানো ৰিপাকং অসদ্দহিত্ৰা অত্তনো অনিচ্ছায দম্মি, অনিচ্ছনভাৰং মম পরে ন জানন্তি, এতেন সচ্চেন সুৰত্থি হোতূতি অত্থো.

এৰং তস্স সচ্চকিরিযায সহ কটিতো উদ্ধং ৰিসং ভস্সিত্ৰা পথৰিং পাৰিসি. কুমারো উট্ঠায নিসীদি, ঠাতুং পন ন সক্কোতি. অথস্স পিতা মাতরং আহ ‘‘ভদ্দে, মযা অত্তনো বলং কতং, ত্ৰং ইদানি সচ্চকিরিযং কত্ৰা পুত্তস্স উট্ঠায গমনভাৰং করোহী’’তি. ‘‘সামি, অত্থি ময্হং একং সচ্চং, তৰ পন সন্তিকে কথেতুং ন সক্কোমী’’তি. ‘‘ভদ্দে, যথা তথা মে পুত্তং অরোগং করোহী’’তি. সা ‘‘সাধূ’’তি সম্পটিচ্ছিত্ৰা সচ্চং করোন্তী ততিযং গাথমাহ –

৬৪.

‘‘আসীৰিসো তাত পহূততেজো, যো তং অডংসী বিলরা উদিচ্চ;

তস্মিঞ্চ মে অপ্পিযতায অজ্জ, পিতরঞ্চ তে নত্থি কোচি ৰিসেসো;

এতেন সচ্চেন সুৰত্থি হোতু, হতং ৰিসং জীৰতু যঞ্ঞদত্তো’’তি.

তত্থ তাতাতি পুত্তং আলপতি. পহূততেজোতি বলৰৰিসো. বিলরাতি ৰিৰরা, অযমেৰ ৰা পাঠো. উদিচ্চাতি উট্ঠহিত্ৰা, ৰম্মিকবিলতো উট্ঠাযাতি অত্থো. পিতরঞ্চ তেতি পিতরি চ তে. অট্ঠকথাযং পন অযমেৰ পাঠো. ইদং ৰুত্তং হোতি – ‘‘তাত, যঞ্ঞদত্ত তস্মিঞ্চ আসীৰিসে তৰ পিতরি চ অপ্পিযভাৰেন ময্হং কোচি ৰিসেসো নত্থি. তঞ্চ পন অপ্পিযভাৰং ঠপেত্ৰা অজ্জ মযা কোচি জানাপিতপুব্বো নাম নত্থি, সচে এতং সচ্চং, এতেন সচ্চেন তৰ সোত্থি হোতূ’’তি.

সহ চ সচ্চকিরিযায সব্বং ৰিসং ভস্সিত্ৰা পথৰিং পাৰিসি. যঞ্ঞদত্তো নিব্বিসেন সরীরেন উট্ঠায কীল়িতুং আরদ্ধো. এৰং পুত্তে উট্ঠিতে মণ্ডব্যো দীপাযনস্স অজ্ঝাসযং পুচ্ছন্তো চতুত্থং গাথমাহ –

৬৫.

‘‘সন্তা দন্তাযেৰ পরিব্বজন্তি, অঞ্ঞত্র কণ্হা নত্থাকামরূপা;

দীপাযন কিস্স জিগুচ্ছমানো, অকামকো চরসি ব্রহ্মচরিয’’ন্তি.

তস্সত্থো – যে কেচি খত্তিযাদযো কামে পহায ইধ লোকে পব্বজন্তি, তে অঞ্ঞত্র কণ্হা ভৰন্তং কণ্হং ঠপেত্ৰা অঞ্ঞে অকামরূপা নাম নত্থি, সব্বে ঝানভাৰনায কিলেসানং সমিতত্তা সন্তা, চক্খাদীনি দ্ৰারানি যথা নিব্বিসেৰনানি হোন্তি, তথা তেসং দমিতত্তা দন্তা হুত্ৰা অভিরতাৰ ব্রহ্মচরিযং চরন্তি, ত্ৰং পন ভন্তে দীপাযন, কিংকারণা তপং জিগুচ্ছমানো অকামকো হুত্ৰা ব্রহ্মচরিযং চরসি, কস্মা পুন ন অগারমেৰ অজ্ঝাৰসসীতি.

অথস্স সো কারণং কথেন্তো পঞ্চমং গাথমাহ –

৬৬.

‘‘সদ্ধায নিক্খম্ম পুনং নিৰত্তো, সো এল়মূগোৰ বালো ৰতাযং;

এতস্স ৰাদস্স জিগুচ্ছমানো, অকামকো চরামি ব্রহ্মচরিযং;

ৰিঞ্ঞুপ্পসত্থঞ্চ সতঞ্চ ঠানং, এৰম্পহং পুঞ্ঞকরো ভৰামী’’তি.

তস্সত্থো – কণ্হো কম্মঞ্চ ফলঞ্চ সদ্দহিত্ৰা তাৰ মহন্তং ৰিভৰং পহায অগারা নিক্খমিত্ৰা যং জহি, পুন তদত্থমেৰ নিৰত্তো. সো অযং এল়মূগো গামদারকো ৰিয বালো ৰতাতি ইমং ৰাদং জিগুচ্ছমানো অহং অত্তনো হিরোত্তপ্পভেদভযেন অনিচ্ছমানোপি ব্রহ্মচরিযং চরামি. কিঞ্চ ভিয্যো পব্বজ্জাপুঞ্ঞঞ্চ নামেতং ৰিঞ্ঞূহি বুদ্ধাদীহি পসত্থং, তেসংযেৰ চ সতং নিৰাসট্ঠানং. এৰং ইমিনাপি কারণেন অহং পুঞ্ঞকরো ভৰামি, অস্সুমুখোপি রুদমানো ব্রহ্মচরিযং চরামিযেৰাতি.

এৰং সো অত্তনো অজ্ঝাসযং কথেত্ৰা পুন মণ্ডব্যং পুচ্ছন্তো ছট্ঠং গাথমাহ –

৬৭.

‘‘সমণে তুৰং ব্রাহ্মণে অদ্ধিকে চ, সন্তপ্পযাসি অন্নপানেন ভিক্খং;

ওপানভূতংৰ ঘরং তৰ যিদং, অন্নেন পানেন উপেতরূপং;

অথ কিস্স ৰাদস্স জিগুচ্ছমানো, অকামকো দানমিমং দদাসী’’তি.

তত্থ ভিক্খন্তি ভিক্খায চরন্তানং ভিক্খঞ্চ সম্পাদেত্ৰা দদাসি. ওপানভূতংৰাতি চতুমহাপথে খতসাধারণপোক্খরণী ৰিয.

ততো মণ্ডব্যো অত্তনো অজ্ঝাসযং কথেন্তো সত্তমং গাথমাহ –

৬৮.

‘‘পিতরো চ মে আসুং পিতামহা চ, সদ্ধা অহুং দানপতী ৰদঞ্ঞূ;

তং কুল্লৰত্তং অনুৰত্তমানো, মাহং কুলে অন্তিমগন্ধনো অহুং;

এতস্স ৰাদস্স জিগুচ্ছমানো, অকামকো দানমিমং দদামী’’তি.

তত্থ ‘‘আসু’’ন্তি পদস্স ‘‘সদ্ধা’’তি ইমিনা সম্বন্ধো, সদ্ধা অহেসুন্তি অত্থো. অহুন্তি সদ্ধা হুত্ৰা ততো উত্তরি দানজেট্ঠকা চেৰ ‘‘দেথ করোথা’’তি ৰুত্তৰচনস্স অত্থজাননকা চ অহেসুং. তং কুল্লৰত্তন্তি তং কুলৰত্তং, অট্ঠকথাযং পন অযমেৰ পাঠো. মাহং কুলে অন্তিমগন্ধনো অহুন্তি ‘‘অহং অত্তনো কুলে সব্বপচ্ছিমকো চেৰ কুলপলাপো চ মা অহু’’ন্তি সল্লক্খেত্ৰা এতং ‘‘কুলঅন্তিমো কুলপলাপো’’তি ৰাদং জিগুচ্ছমানো দানং অনিচ্ছন্তোপি ইদং দানং দদামীতি দীপেতি.

এৰঞ্চ পন ৰত্ৰা মণ্ডব্যো অত্তনো ভরিযং পুচ্ছমানো অট্ঠমং গাথমাহ –

৬৯.

‘‘দহরিং কুমারিং অসমত্থপঞ্ঞং, যং তানযিং ঞাতিকুলা সুগত্তে;

ন চাপি মে অপ্পিযতং অৰেদি, অঞ্ঞত্র কামা পরিচারযন্তা;

অথ কেন ৰণ্ণেন মযা তে ভোতি, সংৰাসধম্মো অহু এৰরূপো’’তি.

তত্থ অসমত্থপঞ্ঞন্তি কুটুম্বং ৰিচারেতুং অপ্পটিবলপঞ্ঞং অতিতরুণিঞ্ঞেৰ সমানং. যং তানযিন্তি যং তং আনযিং, অহং দহরিমেৰ সমানং তং ঞাতিকুলতো আনেসিন্তি ৰুত্তং হোতি. অঞ্ঞত্র কামা পরিচারযন্তাতি এত্তকং কালং ৰিনা কামেন অনিচ্ছায মং পরিচারযন্তাপি অত্তনো অপ্পিযতং মং ন জানাপেসি, সম্পিযাযমানরূপাৰ পরিচরি. কেন ৰণ্ণেনাতি কেন কারণেন. ভোতীতি তং আলপতি. এৰরূপোতি আসীৰিসসমানপটিকূলভাৰেন মযা সদ্ধিং তৰ সংৰাসধম্মো এৰরূপো পিযসংৰাসো ৰিয কথং জাতোতি.

অথস্স সা কথেন্তী নৰমং গাথমাহ –

৭০.

‘‘আরা দূরে নযিধ কদাচি অত্থি, পরম্পরা নাম কুলে ইমস্মিং;

তং কুল্লৰত্তং অনুৰত্তমানা, মাহং কুলে অন্তিমগন্ধিনী অহুং;

এতস্স ৰাদস্স জিগুচ্ছমানা, অকামিকা পদ্ধচরাম্হি তুয্হ’’ন্তি.

তত্থ আরা দূরেতি অঞ্ঞমঞ্ঞৰেৰচনং. অতিদূরেতি ৰা দস্সেন্তী এৰমাহ. ইধাতি নিপাতমত্তং, ন কদাচীতি অত্থো. পরম্পরাতি পুরিসপরম্পরা. ইদং ৰুত্তং হোতি – সামি, ইমস্মিং অম্হাকং ঞাতিকুলে দূরতো পট্ঠায যাৰ সত্তমা কুলপরিৰট্টা পুরিসপরম্পরা নাম ন কদাচি অত্থি, একিত্থিযাপি সামিকং ছড্ডেত্ৰা অঞ্ঞো পুরিসো গহিতপুব্বো নাম নত্থীতি. তং কুল্লৰত্তন্তি অহম্পি তং কুলৰত্তং কুলপৰেণিং অনুৰত্তমানা অত্তনো কুলে পচ্ছিমিকা পলালভূতা মা অহুন্তি সল্লক্খেত্ৰা এতং কুলঅন্তিমা কুলগন্ধিনীতি ৰাদং জিগুচ্ছমানা অকামিকাপি তুয্হং পদ্ধচরাম্হি ৰেয্যাৰচ্চকারিকা পাদপরিচারিকা জাতাম্হীতি.

এৰঞ্চ পন ৰত্ৰা ‘‘মযা সামিকস্স সন্তিকে অভাসিতপুব্বং গুয্হং ভাসিতং, কুজ্ঝেয্যপি মে অযং, অম্হাকং কুলূপকতাপসস্স সম্মুখেযেৰ খমাপেস্সামী’’তি চিন্তেত্ৰা খমাপেন্তী দসমং গাথমাহ –

৭১.

‘‘মণ্ডব্য ভাসিং যমভাসনেয্যং, তং খম্যতং পুত্তকহেতু মজ্জ;

পুত্তপেমা ন ইধ পরত্থি কিঞ্চি, সো নো অযং জীৰতি যঞ্ঞদত্তো’’তি.

তত্থ তং খম্যতন্তি তং খমযতু. পুত্তকহেতু মজ্জাতি তং মম ভাসিতং অজ্জ ইমস্স পুত্তস্স হেতু খমযতু. সো নো অযন্তি যস্স পুত্তস্স কারণা মযা এতং ভাসিতং, সো নো পুত্তো জীৰতি, ইমস্স জীৰিতলাভভাৰেন মে খম সামি, অজ্জতো পট্ঠায তৰ ৰসৰত্তিনী ভৰিস্সামীতি.

অথ নং মণ্ডব্যো ‘‘উট্ঠেহি ভদ্দে, খমামি তে, ইতো পন পট্ঠায মা ফরুসচিত্তা অহোসি, অহম্পি তে অপ্পিযং ন করিস্সামী’’তি আহ. বোধিসত্তো মণ্ডব্যং আহ – ‘‘আৰুসো, তযা দুস্সঙ্ঘরং ধনং সঙ্ঘরিত্ৰা কম্মঞ্চ ফলঞ্চ অসদ্দহিত্ৰা দানং দদন্তেন অযুত্তং কতং, ইতো পট্ঠায দানং সদ্দহিত্ৰা দেহী’’তি. সো ‘‘সাধূ’’তি সম্পটিচ্ছিত্ৰা বোধিসত্তং আহ – ‘‘ভন্তে, তযা অম্হাকং দক্খিণেয্যভাৰে ঠত্ৰা অনভিরতেন ব্রহ্মচরিযং চরন্তেন অযুত্তং কতং, ইতো পট্ঠায ইদানি যথা তযি কতকারা মহপ্ফলা হোন্তি, এৰং চিত্তং পসাদেত্ৰা সুদ্ধচিত্তো অভিরতো হুত্ৰা ব্রহ্মচরিযং চরাহী’’তি. তে মহাসত্তং ৰন্দিত্ৰা উট্ঠায অগমংসু. ততো পট্ঠায ভরিযা সামিকে সস্নেহা অহোসি, মণ্ডব্যো পসন্নচিত্তো সদ্ধায দানং অদাসি. বোধিসত্তো অনভিরতিং ৰিনোদেত্ৰা ঝানাভিঞ্ঞং উপ্পাদেত্ৰা ব্রহ্মলোকপরাযণো অহোসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতো ভিক্খু সোতাপত্তিফলে পতিট্ঠহি. তদা মণ্ডব্যো আনন্দো অহোসি, ভরিযা ৰিসাখা, পুত্তো রাহুলো, আণিমণ্ডব্যো সারিপুত্তো, কণ্হদীপাযনো পন অহমেৰ অহোসিন্তি.

কণ্হদীপাযনজাতকৰণ্ণনা ছট্ঠা.

[৪৪৫] ৭. নিগ্রোধজাতকৰণ্ণনা

ন ৰাহমেতং জানামীতি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. একদিৰসঞ্হি ভিক্খূ তেন ‘‘আৰুসো দেৰদত্ত, সত্থা তৰ বহূপকারো, ত্ৰঞ্হি সত্থারং নিস্সায পব্বজ্জং লভি উপসম্পদং লভি, তেপিটকং বুদ্ধৰচনং উগ্গণ্হি, ঝানং উপ্পাদেসি, লাভসক্কারোপি তে দসবলস্সেৰ সন্তকো’’তি ভিক্খূহি ৰুত্তে তিণসলাকং উক্খিপিত্ৰা ‘‘এত্তকম্পি সমণেন গোতমেন ময্হং কতং গুণং ন পস্সামী’’তি ৰুত্তে ধম্মসভাযং কথং সমুট্ঠাপেসুং. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি দেৰদত্তো অকতঞ্ঞূ মিত্তদুব্ভী’’তি ৰত্ৰা তেহি যাচিতো অতীতং আহরি.

অতীতে রাজগহে মগধমহারাজা নাম রজ্জং কারেসি. তদা রাজগহসেট্ঠি অত্তনো পুত্তস্স জনপদসেট্ঠিনো ধীতরং আনেসি, সা ৰঞ্ঝা অহোসি. অথস্সা অপরভাগে সক্কারো পরিহাযি. ‘‘অম্হাকং পুত্তস্স গেহে ৰঞ্ঝিত্থিযা ৰসন্তিযা কথং কুলৰংসো ৰড্ঢিস্সতী’’তি যথা সা সুণাতি, এৰম্পি কথং সমুট্ঠাপেন্তি. সা তং সুত্ৰা ‘‘হোতু গব্ভিনিআলযং কত্ৰা এতে ৰঞ্চেস্সামী’’তি চিন্তেত্ৰা অত্তনো অত্থচারিকং ধাতিং আহ ‘‘অম্ম, গব্ভিনিযো নাম কিঞ্চ কিঞ্চ করোন্তী’’তি গব্ভিনিপরিহারং পুচ্ছিত্ৰা উতুনিকালে পটিচ্ছাদেত্ৰা অম্বিলাদিরুচিকা হুত্ৰা হত্থপাদানং উদ্ধুমাযনকালে হত্থপাদপিট্ঠিযো কোট্টাপেত্ৰা বহলং কারেসি, দিৰসে দিৰসেপি পিলোতিকাৰেঠনেন চ উদরৰড্ঢনং ৰড্ঢেসি, থনমুখানি কাল়ানি কারেসি, সরীরকিচ্চং করোন্তীপি অঞ্ঞত্র তস্সা ধাতিযা অঞ্ঞেসং সম্মুখট্ঠানে ন করোতি. সামিকোপিস্সা গব্ভপরিহারং অদাসি. এৰং নৰ মাসে ৰসিত্ৰা ‘‘ইদানি জনপদে পিতু ঘরং গন্ত্ৰা ৰিজাযিস্সামী’’তি সসুরে আপুচ্ছিত্ৰা রথমারুহিত্ৰা মহন্তেন পরিৰারেন রাজগহা নিক্খমিত্ৰা মগ্গং পটিপজ্জি. তস্সা পন পুরতো একো সত্থো গচ্ছতি. সত্থেন ৰসিত্ৰা গতট্ঠানং এসা পাতরাসকালে পাপুণাতি.

অথেকদিৰসং তস্মিং সত্থে একা দুগ্গতিত্থী রত্তিযা একস্মিং নিগ্রোধমূলে পুত্তং ৰিজাযিত্ৰা পাতোৰ সত্থে গচ্ছন্তে ‘‘অহং ৰিনা সত্থেন গন্তুং ন সক্খিস্সামি, সক্কা খো পন জীৰন্তিযা পুত্তং লভিতু’’ন্তি নিগ্রোধমূলজালে জলাবুঞ্চেৰ গব্ভমলঞ্চ অত্থরিত্ৰা পুত্তং ছট্টেত্ৰা অগমাসি. দারকস্সপি দেৰতা আরক্খং গণ্হিংসু. সো হি ন যো ৰা সো ৰা, বোধিসত্তোযেৰ. সো পন তদা তাদিসং পটিসন্ধিং গণ্হি. ইতরা পাতরাসকালে তং ঠানং পত্ৰা ‘‘সরীরকিচ্চং করিস্সামী’’তি তায ধাতিযা সদ্ধিং নিগ্রোধমূলং গতা সুৰণ্ণৰণ্ণং দারকং দিস্ৰা ‘‘অম্ম, নিপ্ফন্নং নো কিচ্চ’’ন্তি পিলোতিকাযো অপনেত্ৰা উচ্ছঙ্গপদেসং লোহিতেন চ গব্ভমলেন চ মক্খেত্ৰা অত্তনো গব্ভৰুট্ঠানং আরোচেসি. তাৰদেৰ নং সাণিযা পরিক্খিপিত্ৰা হট্ঠতুট্ঠো সপরিজনো রাজগহং পণ্ণং পেসেসি. অথস্সা সস্সুসসুরা ৰিজাতকালতো পট্ঠায ‘‘পিতু কুলে কিং করিস্সতি, ইধেৰ আগচ্ছতূ’’তি পেসযিংসু. সা পটিনিৰত্তিত্ৰা রাজগহমেৰ পাৰিসি. তত্থ তং সম্পটিচ্ছিত্ৰা দারকস্স নামং করোন্তা নিগ্রোধমূলে জাতত্তা ‘‘নিগ্রোধকুমারো’’তি নামং করিংসু. তং দিৰসঞ্ঞেৰ অনুসেট্ঠিসুণিসাপি ৰিজাযনত্থায কুলঘরং গচ্ছন্তী অন্তরামগ্গে একিস্সা রুক্খসাখায হেট্ঠা পুত্তং ৰিজাযি, তস্স ‘‘সাখকুমারো’’তি নামং করিংসু. তং দিৰসঞ্ঞেৰ সেট্ঠিং নিস্সায ৰসন্তস্স তুন্নকারস্স ভরিযাপি পিলোতিকন্তরে পুত্তং ৰিজাযি, তস্স ‘‘পোত্তিকো’’তি নামং করিংসু.

মহাসেট্ঠি উভোপি তে দারকে ‘‘নিগ্রোধকুমারস্স জাতদিৰসঞ্ঞেৰ জাতা’’তি আণাপেত্ৰা তেনেৰ সদ্ধিং সংৰড্ঢেসি. তে একতো ৰড্ঢিত্ৰা ৰযপ্পত্তা তক্কসিলং গন্ত্ৰা সিপ্পং উগ্গণ্হিংসু. উভোপি সেট্ঠিপুত্তা আচরিযস্স দ্ৰে সহস্সানি অদংসু. নিগ্রোধকুমারো পোত্তিকস্স অত্তনো সন্তিকে সিপ্পং পট্ঠপেসি. তে নিপ্ফন্নসিপ্পা আচরিযং আপুচ্ছিত্ৰা নিক্খন্তা ‘‘জনপদচারিকং চরিস্সামা’’তি অনুপুব্বেন বারাণসিং পত্ৰা একস্মিং রুক্খমূলে নিপজ্জিংসু. তদা বারাণসিরঞ্ঞো কালকতস্স সত্তমো দিৰসো, ‘‘স্ৰে ফুস্সরথং যোজেস্সামা’’তি নগরে ভেরিং চরাপেসুং. তেসুপি সহাযেসু রুক্খমূলে নিপজ্জিত্ৰা নিদ্দাযন্তেসু পোত্তিকো পচ্চূসকালে উট্ঠায নিগ্রোধকুমারস্স পাদে পরিমজ্জন্তো নিসীদি. তস্মিং রুক্খে ৰুত্থকুক্কুটেসু উপরিকুক্কুটো হেট্ঠাকুক্কুটস্স সরীরে ৰচ্চং পাতেসি. অথ নং সো ‘‘কেনেতং পাতিত’’ন্তি আহ. ‘‘সম্ম, মা কুজ্ঝি, মযা অজানন্তেন পাতিত’’ন্তি আহ. ‘‘অরে, ত্ৰং মম সরীরং অত্তনো ৰচ্চট্ঠানং মঞ্ঞসি, কিং মম পমাণং ন জানাসী’’তি. অথ নং ইতরো ‘‘অরে ত্ৰং ‘অজানন্তেন মে কত’ন্তি ৰুত্তেপি কুজ্ঝসিযেৰ, কিং পন তে পমাণ’’ন্তি আহ. ‘‘যো মং মারেত্ৰা মংসং খাদতি, সো পাতোৰ সহস্সং লভতি, তস্মা অহং মানং করোমী’’তি. অথ নং ইতরো ‘‘অরে এত্তকমত্তেন ত্ৰং মানং করোসি, মং পন মারেত্ৰা যো থূলমংসং খাদতি, সো পাতোৰ রাজা হোতি, যো মজ্ঝিমমংসং খাদতি, সো সেনাপতি, যো অট্ঠিনিস্সিতং খাদতি, সো ভণ্ডাগারিকো হোতী’’তি আহ.

পোত্তিকো তেসং কথং সুত্ৰা ‘‘কিং নো সহস্সেন, রজ্জমেৰ ৰর’’ন্তি সণিকং রুক্খং অভিরুহিত্ৰা উপরিসযিতকুক্কুটং গহেত্ৰা মারেত্ৰা অঙ্গারে পচিত্ৰা থূলমংসং নিগ্রোধস্স অদাসি, মজ্ঝিমমংসং সাখস্স অদাসি, অট্ঠিমংসং অত্তনা খাদি. খাদিত্ৰা পন ‘‘সম্ম নিগ্রোধ, ত্ৰং অজ্জ রাজা ভৰিস্সসি, সম্ম সাখ, ত্ৰং সেনাপতি ভৰিস্সসি, অহং পন ভণ্ডাগারিকো ভৰিস্সামী’’তি ৰত্ৰা ‘‘কথং জানাসী’’তি পুট্ঠো তং পৰত্তিং আরোচেসি. তে তযোপি জনা পাতরাসৰেলায বারাণসিং পৰিসিত্ৰা একস্স ব্রাহ্মণস্স গেহে সপ্পিসক্করযুত্তং পাযাসং ভুঞ্জিত্ৰা নগরা নিক্খমিত্ৰা উয্যানং পৰিসিংসু. নিগ্রোধকুমারো সিলাপট্টে নিপজ্জি, ইতরে দ্ৰে বহি নিপজ্জিংসু. তস্মিং সমযে পঞ্চ রাজককুধভণ্ডানি অন্তো ঠপেত্ৰা ফুস্সরথং ৰিস্সজ্জেসুং. তত্থ ৰিত্থারকথা মহাজনকজাতকে (জা. ২.২২.১২৩ আদযো) আৰি ভৰিস্সতি. ফুস্সরথো উয্যানং গন্ত্ৰা নিৰত্তিত্ৰা আরোহনসজ্জো হুত্ৰা অট্ঠাসি. পুরোহিতো ‘‘উয্যানে পুঞ্ঞৰতা সত্তেন ভৰিতব্ব’’ন্তি উয্যানং পৰিসিত্ৰা কুমারং দিস্ৰা পাদন্ততো সাটকং অপনেত্ৰা পাদেসু লক্খণানি উপধারেত্ৰা ‘‘তিট্ঠতু বারাণসিযং রজ্জং, সকলজম্বুদীপস্স অধিপতিরাজা ভৰিতুং যুত্তো’’তি সব্বতালাৰচরে পগ্গণ্হাপেসি. নিগ্রোধকুমারো পবুজ্ঝিত্ৰা মুখতো সাটকং অপনেত্ৰা মহাজনং ওলোকেত্ৰা পরিৰত্তিত্ৰা নিপন্নো থোকং ৰীতিনামেত্ৰা সিলাপট্টে পল্লঙ্কেন নিসীদি. অথ নং পুরোহিতো জণ্ণুনা পতিট্ঠায ‘‘রজ্জং তে দেৰ পাপুণাতী’’তি ৰত্ৰা ‘‘‘সাধূ’’তি ৰুত্তে তত্থেৰ রতনরাসিম্হি ঠপেত্ৰা অভিসিঞ্চি. সো রজ্জং পত্ৰা সাখস্স সেনাপতিট্ঠানং দত্ৰা মহন্তেন সক্কারেন নগরং পাৰিসি, পোত্তিকোপি তেহি সদ্ধিঞ্ঞেৰ অগমাসি. ততো পট্ঠায মহাসত্তো বারাণসিযং ধম্মেন রজ্জং কারেসি.

সো একদিৰসং মাতাপিতূনং সরিত্ৰা সাখং আহ – ‘‘সম্ম, ন সক্কা মাতাপিতূহি ৰিনা ৰত্তিতুং, মহন্তেন পরিৰারেন গন্ত্ৰা মাতাপিতরো নো আনেহী’’তি. সাখো ‘‘ন মে তত্থ গমনকম্মং অত্থী’’তি পটিক্খিপি. ততো পোত্তিকং আণাপেসি. সো ‘‘সাধূ’’তি তত্থ গন্ত্ৰা নিগ্রোধস্স মাতাপিতরো ‘‘পুত্তো ৰো রজ্জে পতিট্ঠিতো, এথ গচ্ছামা’’তি আহ. তে ‘‘অত্থি নো তাৰ ৰিভৰমত্তং, অলং তত্থ গমনেনা’’তি পটিক্খিপিংসু. সাখস্সপি মাতাপিতরো অৰোচ, তেপি ন ইচ্ছিংসু. অত্তনো মাতাপিতরো অৰোচ, ‘‘মযং তাত তুন্নকারকম্মেন জীৰিস্সাম অল’’ন্তি পটিক্খিপিংসু. সো তেসং মনং অলভিত্ৰা বারাণসিমেৰ পচ্চাগন্ত্ৰা ‘‘সেনাপতিস্স ঘরে মগ্গকিলমথং ৰিনোদেত্ৰা পচ্ছা নিগ্রোধসহাযং পস্সিস্সামী’’তি চিন্তেত্ৰা তস্স নিৰেসনদ্ৰারং গন্ত্ৰা ‘‘সহাযো কির তে পোত্তিকো নাম আগতোতি সেনাপতিস্স আরোচেহী’’তি দোৰারিকং আহ, সো তথা অকাসি. সাখো পন ‘‘অযং ময্হং রজ্জং অদত্ৰা সহাযনিগ্রোধস্স অদাসী’’তি তস্মিং ৰেরং বন্ধি. সো তং কথং সুত্ৰাৰ কুদ্ধো আগন্ত্ৰা ‘‘কো ইমস্স সহাযো উম্মত্তকো দাসিপুত্তো, গণ্হথ ন’’ন্তি ৰত্ৰা হত্থপাদজণ্ণুকপ্পরেহি কোট্টাপেত্ৰা গীৰাযং গাহাপেত্ৰা নীহরাপেসি.

সো চিন্তেসি ‘‘সাখো মম সন্তিকা সেনাপতিট্ঠানং লভিত্ৰা অকতঞ্ঞূ মিত্তদুব্ভী, মং কোট্টাপেত্ৰা নীহরাপেসি, নিগ্রোধো পন পণ্ডিতো কতঞ্ঞূ সপ্পুরিসো, তস্সেৰ সন্তিকং গমিস্সামী’’তি. সো রাজদ্ৰারং গন্ত্ৰা ‘‘দেৰ, পোত্তিকো কির নাম তে সহাযো দ্ৰারে ঠিতো’’তি রঞ্ঞো আরোচাপেসি. রাজা পক্কোসাপেত্ৰা তং আগচ্ছন্তং দিস্ৰা আসনা ৰুট্ঠায পচ্চুগ্গন্ত্ৰা পটিসন্থারং কত্ৰা মস্সুকম্মাদীনি কারাপেত্ৰা সব্বালঙ্কারপটিমণ্ডিতেন পরিভুত্তনানগ্গরসভোজনেন তেন সদ্ধিং সুখনিসিন্নো মাতাপিতূনং পৰত্তিং পুচ্ছিত্ৰা অনাগমনভাৰং সুণি. সাখোপি ‘‘পোত্তিকো মং রঞ্ঞো সন্তিকে পরিভিন্দেয্য, মযি পন গতে কিঞ্চি ৰত্তুং ন সক্খিস্সতী’’তি তত্থেৰ অগমাসি. পোত্তিকো তস্স সন্তিকেযেৰ রাজানং আমন্তেত্ৰা ‘‘দেৰ, অহং মগ্গকিলন্তো ‘সাখস্স গেহং গন্ত্ৰা ৰিস্সমিত্ৰা ইধাগমিস্সামী’তি অগমিং. অথ মং সাখো ‘নাহং তং জানামী’তি ৰত্ৰা কোট্টাপেত্ৰা গীৰাযং গাহাপেত্ৰা নীহরাপেসীতি সদ্দহেয্যাসি ত্ৰং এত’’ন্তি ৰত্ৰা তিস্সো গাথা অভাসি –

৭২.

‘‘ন ৰাহমেতং জানামি, কো ৰাযং কস্স ৰাতি ৰা;

যথা সাখো ৰদি এৰ, নিগ্রোধ কিন্তি মঞ্ঞসি.

৭৩.

‘‘ততো গলৰিনীতেন, পুরিসা নীহরিংসু মং;

দত্ৰা মুখপহারানি, সাখস্স ৰচনংকরা.

৭৪.

‘‘এতাদিসং দুম্মতিনা, অকতঞ্ঞুন দুব্ভিনা;

কতং অনরিযং সাখেন, সখিনা তে জনাধিপা’’তি.

তত্থ কিন্তি মঞ্ঞসীতি যথা মং সাখো অচরি, কিং ত্ৰম্পি এৰমেৰ মঞ্ঞসি, উদাহু অঞ্ঞথা মঞ্ঞসি, মং সাখো এৰং ৰদেয্যাতি সদ্দহসি, তং ন সদ্দহসীতি অধিপ্পাযো. গলৰিনীতেনাতি গলগ্গাহেন. দুব্ভিনাতি মিত্তদুব্ভিনা.

তং সুত্ৰা নিগ্রোধো চতস্সো গাথা অভাসি –

৭৫.

‘‘ন ৰাহমেতং জানামি, নপি মে কোচি সংসতি;

যং মে ত্ৰং সম্ম অক্খাসি, সাখেন কারণং কতং.

৭৬.

‘‘সখীনং সাজীৰকরো, মম সাখস্স চূভযং;

ত্ৰং নোসিস্সরিযং দাতা, মনুস্সেসু মহন্ততং;

তযামা লব্ভিতা ইদ্ধী, এত্থ মে নত্থি সংসযো.

৭৭.

‘‘যথাপি বীজমগ্গিম্হি, ডয্হতি ন ৰিরূহতি;

এৰং কতং অসপ্পুরিসে, নস্সতি ন ৰিরূহতি.

৭৮.

‘‘কতঞ্ঞুম্হি চ পোসম্হি, সীলৰন্তে অরিযৰুত্তিনে;

সুখেত্তে ৰিয বীজানি, কতং তম্হি ন নস্সতী’’তি.

তত্থ সংসতীতি আচিক্খতি. কারণং কতন্তি আকড্ঢনৰিকড্ঢনপোথনকোট্টনসঙ্খাতং কারণং কতন্তি অত্থো. সখীনং সাজীৰকরোতি সম্ম, পোত্তিক ত্ৰং সহাযকানং সুআজীৰকরো জীৰিকায উপ্পাদেতা. মম সাখস্স চূভযন্তি ময্হঞ্চ সাখস্স চ উভিন্নম্পি সখীনন্তি অত্থো. ত্ৰং নোসিস্সরিযন্তি ত্ৰং নো অসি ইস্সরিযং দাতা, তৰ সন্তিকা ইমা সম্পত্তী অম্হেহি লদ্ধা. মহন্ততন্তি মহন্তভাৰং.

এৰঞ্চ পন ৰত্ৰা এত্তকং কথেন্তে নিগ্রোধে সাখো তত্থেৰ অট্ঠাসি. অথ নং রাজা ‘‘সাখ ইমং পোত্তিকং সঞ্জানাসী’’তি পুচ্ছি. সো তুণ্হী অহোসি. অথস্স রাজা দণ্ডং আণাপেন্তো অট্ঠমং গাথমাহ –

৭৯.

‘‘ইমং জম্মং নেকতিকং, অসপ্পুরিসচিন্তকং;

হনন্তু সাখং সত্তীহি, নাস্স ইচ্ছামি জীৰিত’’ন্তি.

তত্থ জম্মন্তি লামকং. নেকতিকন্তি ৰঞ্চকং.

তং সুত্ৰা পোত্তিকো ‘‘মা এস বালো মং নিস্সায নস্সতূ’’তি চিন্তেত্ৰা নৰমং গাথমাহ –

৮০.

‘‘খমতস্স মহারাজ, পাণা ন পটিআনযা;

খম দেৰ অসপ্পুরিসস্স, নাস্স ইচ্ছামহং ৰধ’’ন্তি.

তত্থ খমতস্সাতি খমতং অস্স, এতস্স অসপ্পুরিসস্স খমথাতি অত্থো. ন পটিআনযাতি মতস্স নাম পাণা পটিআনেতুং ন সক্কা.

রাজা তস্স ৰচনং সুত্ৰা সাখস্স খমি, সেনাপতিট্ঠানম্পি পোত্তিকস্সেৰ দাতুকামো অহোসি, সো পন ন ইচ্ছি. অথস্স সব্বসেনানীনং ৰিচারণারহং ভণ্ডাগারিকট্ঠানং নাম অদাসি. পুব্বে কিরেতং ঠানন্তরং নাহোসি, ততো পট্ঠায জাতং. অপরভাগে পোত্তিকো ভণ্ডাগারিকো পুত্তধীতাহি ৰড্ঢমানো অত্তনো পুত্তধীতানং ওৰাদৰসেন ওসানগাথমাহ –

৮১.

‘‘নিগ্রোধমেৰ সেৰেয্য, ন সাখমুপসংৰসে;

নিগ্রোধস্মিং মতং সেয্যো, যঞ্চে সাখস্মি জীৰিত’’ন্তি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, দেৰদত্তো পুব্বেপি অকতঞ্ঞূযেৰা’’তি ৰত্ৰা জাতকং সমোধানেসি – ‘‘তদা সাখো দেৰদত্তো অহোসি, পোত্তিকো আনন্দো, নিগ্রোধো পন অহমেৰ অহোসি’’ন্তি.

নিগ্রোধজাতকৰণ্ণনা সত্তমা.

[৪৪৬] ৮. তক্কলজাতকৰণ্ণনা

ন তক্কলা সন্তি ন আলুৰানীতি ইদং সত্থা জেতৰনে ৰিহরন্তো একং পিতুপোসকং উপাসকং আরব্ভ কথেসি. সো কির দলিদ্দকুলে পচ্চাজাতো মাতরি কালকতায পাতোৰ উট্ঠায দন্তকট্ঠমুখোদকদানাদীনি করোন্তো ভতিং ৰা কসিং ৰা কত্ৰা লদ্ধৰিভৰানুরূপেন যাগুভত্তাদীনি সম্পাদেত্ৰা পিতরং পোসেসি. অথ নং পিতা আহ – ‘‘তাত, ত্ৰং এককোৰ অন্তো চ বহি চ কত্তব্বং করোসি, একং তে কুলদারিকং আনেস্সামি, সা তে গেহে কত্তব্বং করিস্সতী’’তি. ‘‘তাত, ইত্থিযো নাম ঘরং আগতা নেৰ ময্হং, ন তুম্হাকং চিত্তসুখং করিস্সন্তি, মা এৰরূপং চিন্তযিত্থ, অহং যাৰজীৰং তুম্হে পোসেত্ৰা তুম্হাকং অচ্চযেন জানিস্সামী’’তি. অথস্স পিতা অনিচ্ছমানস্সেৰ একং কুমারিকং আনেসি. সা সসুরস্স চ সামিকস্স চ উপকারিকা অহোসি নীচৰুত্তি. সামিকোপিস্সা ‘‘মম পিতু উপকারিকা’’তি তুস্সিত্ৰা লদ্ধং লদ্ধং মনাপং আহরিত্ৰা দেতি, সাপি তং সসুরস্সেৰ উপনামেসি. সা অপরভাগে চিন্তেসি ‘‘ময্হং সামিকো লদ্ধং লদ্ধং পিতু অদত্ৰা ময্হমেৰ দেতি, অদ্ধা পিতরি নিস্নেহো জাতো, ইমং মহল্লকং একেনুপাযেন মম সামিকস্স পটিক্কূলং কত্ৰা গেহা নিক্কড্ঢাপেস্সামী’’তি.

সা ততো পট্ঠায উদকং অতিসীতং ৰা অচ্চুণ্হং ৰা, আহারং অতিলোণং ৰা অলোণং ৰা, ভত্তং উত্তণ্ডুলং ৰা অতিকিলিন্নং ৰাতি এৰমাদীনি তস্স কোধুপ্পত্তিকারণানি কত্ৰা তস্মিং কুজ্ঝন্তে ‘‘কো ইমং মহল্লকং উপট্ঠাতুং সক্খিস্সতী’’তি ফরুসানি ৰত্ৰা কলহং ৰড্ঢেসি. তত্থ তত্থ খেল়পিণ্ডাদীনি ছড্ডেত্ৰাপি সামিকং উজ্ঝাপেসি ‘‘পস্স পিতু কম্মং, ‘ইদঞ্চিদঞ্চ মা করী’তি ৰুত্তে কুজ্ঝতি, ইমস্মিং গেহে পিতরং ৰা ৰসাপেহি মং ৰা’’তি. অথ নং সো ‘‘ভদ্দে, ত্ৰং দহরা যত্থ কত্থচি জীৰিতুং সক্খিস্সসি, ময্হং পিতা মহল্লকো, ত্ৰং তস্স অসহন্তী ইমম্হা গেহা নিক্খমা’’তি আহ. সা ভীতা ‘‘ইতো পট্ঠায এৰং ন করিস্সামী’’তি সসুরস্স পাদেসু পতিত্ৰা খমাপেত্ৰা পকতিনিযামেনেৰ পটিজগ্গিতুং আরভি. অথ সো উপাসকো পুরিমদিৰসেসু তায উব্বাল়্হো সত্থু সন্তিকং ধম্মস্সৰনায অগন্ত্ৰা তস্সা পকতিযা পতিট্ঠিতকালে অগমাসি. অথ নং সত্থা ‘‘কিং, উপাসক, সত্তট্ঠ দিৰসানি ধম্মস্সৰনায নাগতোসী’’তি পুচ্ছি. সো তং কারণং কথেসি. সত্থা ‘‘ইদানি তাৰ তস্সা কথং অগ্গহেত্ৰা পিতরং ন নীহরাপেসি, পুব্বে পন এতিস্সা কথং গহেত্ৰা পিতরং আমকসুসানং নেত্ৰা আৰাটং খণিত্ৰা তত্থ নং পক্খিপিত্ৰা মারণকালে অহং সত্তৰস্সিকো হুত্ৰা মাতাপিতূনং গুণং কথেত্ৰা পিতুঘাতককম্মা নিৰারেসিং, তদা ত্ৰং মম কথং সুত্ৰা তৰ পিতরং যাৰজীৰং পটিজগ্গিত্ৰা সগ্গপরাযণো জাতো, স্ৰাযং মযা দিন্নো ওৰাদো ভৰন্তরগতম্পি ন ৰিজহতি, ইমিনা কারণেন তস্সা কথং অগ্গহেত্ৰা ইদানি তযা পিতা ন নীহটো’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে অঞ্ঞতরস্মিং কাসিগামে একস্স কুলস্স ঘরে একপুত্তকো অহোসি নামেন সৰিট্ঠকো নাম. সো মাতাপিতরো পটিজগ্গন্তো অপরভাগে মাতরি কালকতায পিতরং পোসেসীতি সব্বং ৰত্থু পচ্চুপ্পন্নৰত্থুনিযামেনেৰ কথেতব্বং. অযং পনেত্থ ৰিসেসো. তদা সা ইত্থী ‘‘পস্স পিতু কম্মং, ‘ইদঞ্চিদঞ্চ মা করী’তি ৰুত্তে কুজ্ঝতী’’তি ৰত্ৰা ‘‘সামি, পিতা তে চণ্ডো ফরুসো নিচ্চং কলহং করোতি, জরাজিণ্ণো ব্যাধিপীল়িতো ন চিরস্সেৰ মরিস্সতি, অহঞ্চ এতেন সদ্ধিং একগেহে ৰসিতুং ন সক্কোমি, সযম্পেস কতিপাহেন মরিস্সতিযেৰ, ত্ৰং এতং আমকসুসানং নেত্ৰা আৰাটং খণিত্ৰা তত্থ নং পক্খিপিত্ৰা কুদ্দালেন সীসং ছিন্দিত্ৰা জীৰিতক্খযং পাপেত্ৰা উপরি পংসুনা ছাদেত্ৰা আগচ্ছাহী’’তি আহ. সো তায পুনপ্পুনং ৰুচ্চমানো ‘‘ভদ্দে, পুরিসমারণং নাম ভারিযং, কথং নং মারেস্সামী’’তি আহ. ‘‘অহং তে উপাযং আচিক্খিস্সামী’’তি. ‘‘আচিক্খ তাৰা’’তি. ‘‘সামি, ত্ৰং পচ্চূসকালে পিতু নিসিন্নট্ঠানং গন্ত্ৰা যথা সব্বে সুণন্তি, এৰং মহাসদ্দং কত্ৰা ‘তাত, অসুকগামে তুম্হাকং উদ্ধারণকো অত্থি, মযি গতে ন দেতি, তুম্হাকং অচ্চযেন ন দস্সতেৰ, স্ৰে যানকে নিসীদিত্ৰা পাতোৰ গচ্ছিস্সামা’তি ৰত্ৰা তেন ৰুত্তৰেলাযমেৰ উট্ঠায যানকং যোজেত্ৰা তত্থ নিসীদাপেত্ৰা আমকসুসানং নেত্ৰা আৰাটং খণিত্ৰা চোরেহি অচ্ছিন্নসদ্দং কত্ৰা মারেত্ৰা আৰাটে পক্খিপিত্ৰা সীসং ছিন্দিত্ৰা ন্হাযিত্ৰা আগচ্ছা’’তি.

সৰিট্ঠকো ‘‘অত্থেস উপাযো’’তি তস্সা ৰচনং সম্পটিচ্ছিত্ৰা যানকং গমনসজ্জং অকাসি. তস্স পনেকো সত্তৰস্সিকো পুত্তো অত্থি পণ্ডিতো ব্যত্তো. সো মাতু ৰচনং সুত্ৰা ‘‘ময্হং মাতা পাপধম্মা পিতরং মে পিতুঘাতকম্মং কারেতি, অহং ইমস্স পিতুঘাতকম্মং কাতুং ন দস্সামী’’তি সণিকং গন্ত্ৰা অয্যকেন সদ্ধিং নিপজ্জি. সৰিট্ঠকোপি ইতরায ৰুত্তৰেলায যানকং যোজেত্ৰা ‘‘এহি, তাত, উদ্ধারং সোধেস্সামা’’তি পিতরং যানকে নিসীদাপেসি. কুমারোপি পঠমতরং যানকং অভিরুহি. সৰিট্ঠকো তং নিৰারেতুং অসক্কোন্তো তেনেৰ সদ্ধিং আমকসুসানং গন্ত্ৰা পিতরঞ্চ কুমারকেন সদ্ধিং একমন্তে ঠপেত্ৰা সযং ওতরিত্ৰা কুদ্দালপিটকং আদায একস্মিং পটিচ্ছন্নট্ঠানে চতুরস্সাৰাটং খণিতুং আরভি. কুমারকো ওতরিত্ৰা তস্স সন্তিকং গন্ত্ৰা অজানন্তো ৰিয কথং সমুট্ঠাপেত্ৰা পঠমং গাথমাহ –

৮২.

‘‘ন তক্কলা সন্তি ন আলুৰানি, ন বিল়ালিযো ন কল়ম্বানি তাত;

একো অরঞ্ঞম্হি সুসানমজ্ঝে, কিমত্থিকো তাত খণাসি কাসু’’ন্তি.

তত্থ ন তক্কলা সন্তীতি পিণ্ডালুকন্দা ন সন্তি. আলুৰানীতি আলুৰকন্দা. বিল়ালিযোতি বিল়ারিৰল্লিকন্দা. কল়ম্বানীতি তালকন্দা.

অথস্স পিতা দুতিযং গাথমাহ –

৮৩.

‘‘পিতামহো তাত সুদুব্বলো তে, অনেকব্যাধীহি দুখেন ফুট্ঠো;

তমজ্জহং নিখণিস্সামি সোব্ভে, ন হিস্স তং জীৰিতং রোচযামী’’তি.

তত্থ অনেকব্যাধীহীতি অনেকেহি ব্যাধীহি উপ্পন্নেন দুক্খেন ফুট্ঠো. ন হিস্স তন্তি অহঞ্হি তস্স তৰ পিতামহস্স তং দুজ্জীৰিতং ন ইচ্ছামি, ‘‘এৰরূপা জীৰিতা মরণমেৰস্স ৰর’’ন্তি মঞ্ঞমানো তং সোব্ভে নিখণিস্সামীতি.

তং সুত্ৰা কুমারো উপড্ঢং গাথমাহ –

৮৪.

‘‘সঙ্কপ্পমেতং পটিলদ্ধ পাপকং, অচ্চাহিতং কম্ম করোসি লুদ্দ’’ন্তি.

তস্সত্থো – তাত, ত্ৰং ‘‘পীতরং দুক্খা পমোচেস্সামী’’তি মরণদুক্খেন যোজেন্তো এতং পাপকং সঙ্কপ্পং পটিলদ্ধা তস্স চ সঙ্কপ্পৰসেন হিতং অতিক্কম্ম ঠিতত্তা অচ্চাহিতং কম্মং করোসি লুদ্দন্তি.

এৰঞ্চ পন ৰত্ৰা কুমারো পিতু হত্থতো কুদ্দালং গহেত্ৰা অৰিদূরে অঞ্ঞতরং আৰাটং খণিতুং আরভি. অথ নং পিতা উপসঙ্কমিত্ৰা ‘‘কস্মা, তাত, আৰাটং খণসী’’তি পুচ্ছি. সো তস্স কথেন্তো ততিযং গাথমাহ –

‘‘মযাপি তাত পটিলচ্ছসে তুৰং, এতাদিসং কম্ম জরূপনীতো;

তং কুল্লৰত্তং অনুৰত্তমানো, অহম্পি তং নিখণিস্সামি সোব্ভে’’তি.

তস্সত্থো – তাত, অহম্পি এতস্মিং সোব্ভে তং মহল্লককালে নিখণিস্সামি, ইতি খো তাত, মযাপি কতে ইমস্মিং সোব্ভে তুৰং জরূপনীতো এতাদিসং কম্মং পটিলচ্ছসে, যং এতং তযা পৰত্তিতং কুলৰত্তং, তং অনুৰত্তমানো ৰযপ্পত্তো ভরিযায সদ্ধিং ৰসন্তো অহম্পি তং নিখণিস্সামি সোব্ভেতি.

অথস্স পিতা চতুত্থং গাথমাহ –

৮৫.

‘‘ফরুসাহি ৰাচাহি পকুব্বমানো, আসজ্জ মং ত্ৰং ৰদসে কুমার;

পুত্তো মমং ওরসকো সমানো, অহীতানুকম্পী মম ত্ৰংসি পুত্তা’’তি.

তত্থ পকুব্বমানোতি অভিভৰন্তো. আসজ্জাতি ঘট্টেত্ৰা.

এৰং ৰুত্তে পণ্ডিতকুমারকো একং পটিৰচনগাথং, দ্ৰে উদানগাথাতি তিস্সো গাথা অভাসি –

৮৬.

‘‘ন তাহং তাত অহিতানুকম্পী, হিতানুকম্পী তে অহম্পি তাত;

পাপঞ্চ তং কম্ম পকুব্বমানং, অরহামি নো ৰারযিতুং ততো.

৮৭.

‘‘যো মাতরং ৰা পিতরং সৰিট্ঠ, অদূসকে হিংসতি পাপধম্মো;

কাযস্স ভেদা অভিসম্পরাযং, অসংসযং সো নিরযং উপেতি.

৮৮.

‘‘যো মাতরং ৰা পিতরং সৰিট্ঠ, অন্নেন পানেন উপট্ঠহাতি;

কাযস্স ভেদা অভিসম্পরাযং, অসংসযং সো সুগতিং উপেতী’’তি. –

ইমং পন পুত্তস্স ধম্মকথং সুত্ৰা পিতা অট্ঠমং গাথমাহ –

৮৯.

‘‘ন মে ত্ৰং পুত্ত অহিতানুকম্পী, হিতানুকম্পী মে ত্ৰংসি পুত্ত;

অহঞ্চ তং মাতরা ৰুচ্চমানো, এতাদিসং কম্ম করোমি লুদ্দ’’ন্তি.

তত্থ অহঞ্চ তং মাতরাতি অহঞ্চ তে মাতরা, অযমেৰ ৰা পাঠো.

তং সুত্ৰা কুমারো ‘‘তাত, ইত্থিযো নাম উপ্পন্নে দোসে অনিগ্গয্হমানা পুনপ্পুনং পাপং করোন্তি, মম মাতা যথা পুন এৰরূপং ন করোতি, তথা নং পণামেতুং ৰট্টতী’’তি নৰমং গাথমাহ –

৯০.

‘‘যা তে সা ভরিযা অনরিযরূপা, মাতা মমেসা সকিযা জনেত্তি;

নিদ্ধাপযে তঞ্চ সকা অগারা, অঞ্ঞম্পি তে সা দুখমাৰহেয্যা’’তি.

সৰিট্ঠকো পণ্ডিতপুত্তস্স কথং সুত্ৰা সোমনস্সজাতো হুত্ৰা ‘‘গচ্ছাম, তাতা’’তি সদ্ধিং পুত্তেন চ পিতরা চ যানকে নিসীদিত্ৰা পাযাসি. সাপি খো অনাচারা ‘‘নিক্খন্তা নো গেহা কাল়কণ্ণী’’তি হট্ঠতুট্ঠা অল্লগোমযেন গেহং উপলিম্পেত্ৰা পাযাসং পচিত্ৰা আগমনমগ্গং ওলোকেন্তী তে আগচ্ছন্তে দিস্ৰা ‘‘নিক্খন্তং কাল়কণ্ণিং পুন গহেত্ৰা আগতো’’তি কুজ্ঝিত্ৰা ‘‘অরে নিকতিক, নিক্খন্তং কাল়কণ্ণিং পুন আদায আগতোসী’’তি পরিভাসি. সৰিট্ঠকো কিঞ্চি অৰত্ৰা যানকং মোচেত্ৰা ‘‘অনাচারে কিং ৰদেসী’’তি তং সুকোট্টিতং কোট্টেত্ৰা ‘‘ইতো পট্ঠায মা ইমং গেহং পাৰিসী’’তি পাদে গহেত্ৰা নিক্কড্ঢি. ততো পিতরঞ্চ পুত্তঞ্চ ন্হাপেত্ৰা সযম্পি ন্হাযিত্ৰা তযোপি পাযাসং পরিভুঞ্জিংসু. সাপি পাপধম্মা কতিপাহং অঞ্ঞস্মিং গেহে ৰসি. তস্মিং কালে পুত্তো পিতরং আহ – ‘‘তাত, মম মাতা এত্তকেন ন বুজ্ঝতি, তুম্হে মম মাতু মঙ্কুভাৰকরণত্থং ‘অসুকগামকে মম মাতুলধীতা অত্থি, সা ময্হং পিতরঞ্চ পুত্তঞ্চ মঞ্চ পটিজগ্গিস্সতি, তং আনেস্সামী’তি ৰত্ৰা মালাগন্ধাদীনি আদায যানকেন নিক্খমিত্ৰা খেত্তং অনুৰিচরিত্ৰা সাযং আগচ্ছথা’’তি. সো তথা অকাসি.

পটিৰিস্সককুলে ইত্থিযো ‘‘সামিকো কির তে অঞ্ঞং ভরিযং আনেতুং অসুকগামং নাম গতো’’তি তস্সা আচিক্খিংসু. সা ‘‘দানিম্হি নট্ঠা, নত্থি মে পুন ওকাসো’’তি ভীতা তসিতা হুত্ৰা ‘‘পুত্তমেৰ যাচিস্সামী’’তি পণ্ডিতপুত্তস্স সন্তিকং গন্ত্ৰা তস্স পাদেসু পতিত্ৰা ‘‘তাত, তং ঠপেত্ৰা অঞ্ঞো মম পটিসরণং নত্থি, ইতো পট্ঠায তৰ পিতরঞ্চ পিতামহঞ্চ অলঙ্কতচেতিযং ৰিয পটিজগ্গিস্সামি, পুন ময্হং ইমস্মিং ঘরে পৰেসনং করোহী’’তি আহ. সো ‘‘সাধু, অম্ম, সচে পুন এৰরূপং ন করিস্সথ, করিস্সামি, অপ্পমত্তা হোথা’’তি ৰত্ৰা পিতু আগতকালে দসমং গাথমাহ –

৯১.

‘‘যা তে সা ভরিযা অনরিযরূপা, মাতা মমেসা সকিযা জনেত্তি;

দন্তা করেণূৰ ৰসূপনীতা, সা পাপধম্মা পুনরাৰজাতূ’’তি.

তত্থ করেণূৰাতি তাত, ইদানি সা আনেঞ্জকারণং কারিকা হত্থিনী ৰিয দন্তা ৰসং উপনীতা নিব্বিসেৰনা জাতা. পুনরাগজাতূতি পুন ইমং গেহং আগচ্ছতূতি.

এৰং সো পিতু ধম্মং কথেত্ৰা গন্ত্ৰা মাতরং আনেসি. সা সামিকঞ্চ সসুরঞ্চ খমাপেত্ৰা ততো পট্ঠায দন্তা ধম্মেন সমন্নাগতা হুত্ৰা সামিকঞ্চ সসুরঞ্চ পুত্তঞ্চ পটিজগ্গি. উভোপি চ পুত্তস্স ওৰাদে ঠত্ৰা দানাদীনি পুঞ্ঞানি করিত্ৰা সগ্গপরাযণা অহেসুং.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে পিতুপোসকো সোতাপত্তিফলে পতিট্ঠহি. তদা পিতা চ পুত্তো চ সুণিসা চ তেযেৰ অহেসুং, পণ্ডিতকুমারো পন অহমেৰ অহোসিন্তি.

তক্কলজাতকৰণ্ণনা অট্ঠমা.

[৪৪৭] ৯. মহাধম্মপালজাতকৰণ্ণনা

কিং তে ৰতন্তি ইদং সত্থা পঠমগমনেন কপিলপুরং গন্ত্ৰা নিগ্রোধারামে ৰিহরন্তো পিতু নিৰেসনে রঞ্ঞো অসদ্দহনং আরব্ভ কথেসি. তদা হি সুদ্ধোদনমহারাজা ৰীসতিসহস্সভিক্খুপরিৰারস্স ভগৰতো অত্তনো নিৰেসনে যাগুখজ্জকং দত্ৰা অন্তরাভত্তে সম্মোদনীযং কথং কথেন্তো ‘‘ভন্তে, তুম্হাকং পধানকালে দেৰতা আগন্ত্ৰা আকাসে ঠত্ৰা ‘পুত্তো তে সিদ্ধত্থকুমারো অপ্পাহারতায মতো’তি ময্হং আরোচেসু’’ন্তি আহ. সত্থারা চ ‘‘সদ্দহি, মহারাজা’’তি ৰুত্তে ‘‘ন সদ্দহিং, ভন্তে, আকাসে ঠত্ৰা কথেন্তিযোপি দেৰতা, ‘মম পুত্তস্স বোধিতলে বুদ্ধত্তং অপ্পত্ৰা পরিনিব্বানং নাম নত্থী’তি পটিক্খিপি’’ন্তি আহ. ‘‘মহারাজ, পুব্বেপি ত্ৰং মহাধম্মপালকালেপি ‘পুত্তো তে মতো ইমানিস্স অট্ঠীনী’তি দস্সেত্ৰা ৰদন্তস্সপি দিসাপামোক্খাচরিযস্স ‘অম্হাকং কুলে তরুণকালে কালকিরিযা নাম নত্থী’তি ন সদ্দহি, ইদানি পন কস্মা সদ্দহিস্সসী’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে কাসিরট্ঠে ধম্মপালগামো নাম অহোসি. সো ধম্মপালকুলস্স ৰসনতায এতং নামং লভি. তত্থ দসন্নং কুসলকম্মপথানং পালনতো ‘‘ধম্মপালো’’ত্ৰেৰ পঞ্ঞাতো ব্রাহ্মণো পটিৰসতি, তস্স কুলে অন্তমসো দাসকম্মকরাপি দানং দেন্তি, সীলং রক্খন্তি, উপোসথকম্মং করোন্তি. তদা বোধিসত্তো তস্মিং কুলে নিব্বত্তি, ‘‘ধম্মপালকুমারো’’ত্ৰেৰস্স নামং করিংসু. অথ নং ৰযপ্পত্তং পিতা সহস্সং দত্ৰা সিপ্পুগ্গহণত্থায তক্কসিলং পেসেসি. সো তত্থ গন্ত্ৰা দিসাপামোক্খাচরিযস্স সন্তিকে সিপ্পং উগ্গণ্হি, পঞ্চন্নং মাণৰকসতানং জেট্ঠন্তেৰাসিকো অহোসি. তদা আচরিযস্স জেট্ঠপুত্তো কালমকাসি. আচরিযো মাণৰকপরিৰুতো ঞাতিগণেন সদ্ধিং রোদন্তো কন্দন্তো সুসানে তস্স সরীরকিচ্চং কারেতি. তত্থ আচরিযো চ ঞাতিৰগ্গো চস্স অন্তেৰাসিকা চ রোদন্তি পরিদেৰন্তি, ধম্মপালোযেৰেকো ন রোদতি ন পরিদেৰতি. অপিচ খো পন তেসু পঞ্চসতেসু মাণৰেসু সুসানা আগম্ম আচরিযস্স সন্তিকে নিসীদিত্ৰা ‘‘অহো এৰরূপো নাম আচারসম্পন্নো তরুণমাণৰো তরুণকালেযেৰ মাতাপিতূহি ৰিপ্পযুত্তো মরণপ্পত্তো’’তি ৰদন্তেসু ‘‘সম্মা, তুম্হে ‘তরুণো’তি ভণথ, অথ কস্মা তরুণকালেযেৰ মরতি, ননু অযুত্তং তরুণকালে মরিতু’’ন্তি আহ.

অথ নং তে আহংসু ‘‘কিং পন সম্ম, ত্ৰং ইমেসং সত্তানং মরণভাৰং ন জানাসী’’তি? জানামি, তরুণকালে পন ন মরন্তি, মহল্লককালেযেৰ মরন্তীতি. ননু অনিচ্চা সব্বে সঙ্খারা হুত্ৰা অভাৰিনোতি? ‘‘সচ্চং অনিচ্চা, দহরকালে পন সত্তা ন মরন্তি, মহল্লককালে মরন্তি, অনিচ্চতং পাপুণন্তী’’তি. ‘‘কিং সম্ম, ধম্মপাল, তুম্হাকং গেহে ন কেচি মরন্তী’’তি? ‘‘দহরকালে পন ন মরন্তি, মহল্লককালেযেৰ মরন্তী’’তি. ‘‘কিং পনেসা তুম্হাকং কুলপৰেণী’’তি? ‘‘আম কুলপৰেণী’’তি. মাণৰা তং তস্স কথং আচরিযস্স আরোচেসুং. অথ নং সো পক্কোসাপেত্ৰা পুচ্ছি ‘‘সচ্চং কির তাত ধম্মপাল, তুম্হাকং কুলে দহরকালে ন মীযন্তী’’তি? ‘‘সচ্চং আচরিযা’’তি. সো তস্স ৰচনং সুত্ৰা চিন্তেসি ‘‘অযং অতিৰিয অচ্ছরিযং ৰদতি, ইমস্স পিতু সন্তিকং গন্ত্ৰা পুচ্ছিত্ৰা সচে এতং সচ্চং, অহম্পি তমেৰ ধম্মং পূরেস্সামী’’তি. সো পুত্তস্স কত্তব্বকিচ্চং কত্ৰা সত্তট্ঠদিৰসচ্চযেন ধম্মপালং পক্কোসাপেত্ৰা ‘‘তাত, অহং খিপ্পং আগমিস্সামি, যাৰ মমাগমনা ইমে মাণৰে সিপ্পং ৰাচেহী’’তি ৰত্ৰা একস্স এল়কস্স অট্ঠীনি গহেত্ৰা ধোৰিত্ৰা পসিব্বকে কত্ৰা একং চূল়ুপট্ঠাকং আদায তক্কসিলতো নিক্খমিত্ৰা অনুপুব্বেন তং গামং পত্ৰা ‘‘কতরং মহাধম্মপালস্স গেহ’’ন্তি পুচ্ছিত্ৰা গন্ত্ৰা দ্ৰারে অট্ঠাসি. ব্রাহ্মণস্স দাসমনুস্সেসু যো যো পঠমং অদ্দস, সো সো আচরিযস্স হত্থতো ছত্তং গণ্হি, উপাহনং গণ্হি, উপট্ঠাকস্সপি হত্থতো পসিব্বকং গণ্হি. ‘‘পুত্তস্স ৰো ধম্মপালকুমারস্স আচরিযো দ্ৰারে ঠিতোতি কুমারস্স পিতু আরোচেথা’’তি চ ৰুত্তা ‘‘সাধূ’’তি গন্ত্ৰা আরোচযিংসু. সো ৰেগেন দ্ৰারমূলং গন্ত্ৰা ‘‘ইতো এথা’’তি তং ঘরং অভিনেত্ৰা পল্লঙ্কে নিসীদাপেত্ৰা সব্বং পাদধোৰনাদিকিচ্চং অকাসি.

আচরিযো ভুত্তভোজনো সুখকথায নিসিন্নকালে ‘‘ব্রাহ্মণ, পুত্তো তে ধম্মপালকুমারো পঞ্ঞৰা তিণ্ণং ৰেদানং অট্ঠারসন্নঞ্চ সিপ্পানং নিপ্ফত্তিং পত্তো, অপিচ খো পনেকেন অফাসুকেন জীৰিতক্খযং পত্তো, সব্বে সঙ্খারা অনিচ্চা, মা সোচিত্থা’’তি আহ. ব্রাহ্মণো পাণিং পহরিত্ৰা মহাহসিতং হসি. ‘‘কিং নু ব্রাহ্মণ, হসসী’’তি চ ৰুত্তে ‘‘ময্হং পুত্তো ন মরতি, অঞ্ঞো কোচি মতো ভৰিস্সতী’’তি আহ. ‘‘ব্রাহ্মণ, পুত্তোযেৰ তে মতো, পুত্তস্সেৰ তে অট্ঠীনি দিস্ৰা সদ্দহা’’তি অট্ঠীনি নীহরিত্ৰা ‘‘ইমানি তে পুত্তস্স অট্ঠীনী’’তি আহ. এতানি এল়কস্স ৰা সুনখস্স ৰা ভৰিস্সন্তি, ময্হং পন পুত্তো ন মরতি, অম্হাকাঞ্হি কুলে যাৰ সত্তমা কুলপরিৰট্টা তরুণকালে মতপুব্বা নাম নত্থি, ত্ৰং মুসা ভণসীতি. তস্মিং খণে সব্বেপি পাণিং পহরিত্ৰা মহাহসিতং হসিংসু. আচরিযো তং অচ্ছরিযং দিস্ৰা সোমনস্সপ্পত্তো হুত্ৰা ‘‘ব্রাহ্মণ, তুম্হাকং কুলপৰেণিযং দহরানং অমরণেন ন সক্কা অহেতুকেন ভৰিতুং, কেন ৰো কারণেন দহরা ন মীযন্তী’’তি পুচ্ছন্তো পঠমং গাথমাহ –

৯২.

‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;

অক্খাহি মে ব্রাহ্মণ এতমত্থং, কস্মা নু তুম্হং দহরা ন মীযরে’’তি.

তত্থ ৰতন্তি ৰতসমাদানং. ব্রহ্মচরিযন্তি সেট্ঠচরিযং. কিস্স সুচিণ্ণস্সাতি তুম্হাকং কুলে দহরানং অমরণং নাম কতরসুচরিতস্স ৰিপাকোতি.

তং সুত্ৰা ব্রাহ্মণো যেসং গুণানং আনুভাৰেন তস্মিং কুলে দহরা ন মীযন্তি, তে ৰণ্ণযন্তো –

৯৩.

‘‘ধম্মং চরাম ন মুসা ভণাম, পাপানি কম্মানি পরিৰজ্জযাম;

অনরিযং পরিৰজ্জেমু সব্বং, তস্মা হি অম্হং দহরা ন মীযরে.

৯৪.

‘‘সুণোম ধম্মং অসতং সতঞ্চ, ন চাপি ধম্মং অসতং রোচযাম;

হিত্ৰা অসন্তে ন জহাম সন্তে, তস্মা হি অম্হং দহরা ন মীযরে.

৯৫.

‘‘পুব্বেৰ দানা সুমনা ভৰাম, দদম্পি ৰে অত্তমনা ভৰাম;

দত্ৰাপি ৰে নানুতপ্পাম পচ্ছা, তস্মা হি অম্হং দহরা ন মীযরে.

৯৬.

‘‘সমণে মযং ব্রাহ্মণে অদ্ধিকে চ, ৰনিব্বকে যাচনকে দলিদ্দে;

অন্নেন পানেন অভিতপ্পযাম, তস্মা হি অম্হং দহরা ন মীযরে.

৯৭.

‘‘মযঞ্চ ভরিযং নাতিক্কমাম, অম্হে চ ভরিযা নাতিক্কমন্তি;

অঞ্ঞত্র তাহি ব্রহ্মচরিযং চরাম, তস্মা হি অম্হং দহরা ন মীযরে.

৯৮.

‘‘পাণাতিপাতা ৰিরমাম সব্বে, লোকে অদিন্নং পরিৰজ্জযাম;

অমজ্জপা নোপি মুসা ভণাম, তস্মা হি অম্হং দহরা ন মীযরে.

৯৯.

‘‘এতাসু ৰে জাযরে সুত্তমাসু, মেধাৰিনো হোন্তি পহূতপঞ্ঞা;

বহুস্সুতা ৰেদগুনো চ হোন্তি, তস্মা হি অম্হং দহরা ন মীযরে.

১০০.

‘‘মাতা পিতা চ ভগিনী ভাতরো চ, পুত্তা চ দারা চ মযঞ্চ সব্বে;

ধম্মং চরাম পরলোকহেতু, তস্মা হি অম্হং দহরা ন মীযরে.

১০১.

‘‘দাসা চ দাস্যো অনুজীৰিনো চ, পরিচারকা কম্মকরা চ সব্বে;

ধম্মং চরন্তি পরলোকহেতু, তস্মা হি অম্হং দহরা ন মীযরে’’তি. –

ইমা গাথা আহ.

তত্থ ধম্মং চরামাতি দসকুসলকম্মপথধম্মং চরাম, অত্তনো জীৰিতহেতু অন্তমসো কুন্থকিপিল্লিকম্পি জীৰিতা ন ৰোরোপেম, পরভণ্ডং লোভচিত্তেন ন ওলোকেমাতি সব্বং ৰিত্থারেতব্বং. মুসাৰাদো চেত্থ মুসাৰাদিস্স অকরণপাপং নাম নত্থীতি উস্সন্নৰসেন পুন ৰুত্তো. তে কির হসাধিপ্পাযেনপি মুসা ন ভণন্তি. পাপানীতি সব্বানি নিরযগামিকম্মানি. অনরিযন্তি অরিযগরহিতং সব্বং অসুন্দরং অপরিসুদ্ধং কম্মং পরিৰজ্জযাম. তস্মা হি অম্হন্তি এত্থ হি-কারো নিপাতমত্তো, তেন কারণেন অম্হাকং দহরা ন মীযন্তি, অন্তরা অকালমরণং নাম নো নত্থীতি অত্থো. ‘‘তস্মা অম্হ’’ন্তিপি পাঠো. সুণোমাতি মযং কিরিযৰাদানং সপ্পুরিসানং কুসলদীপনম্পি অসপ্পুরিসানং অকুসলদীপনম্পি ধম্মং সুণোম, সো পন নো সুতমত্তকোৰ হোতি, তং ন রোচযাম. তেহি পন নো সদ্ধিং ৰিগ্গহো ৰা ৰিৰাদো ৰা মা হোতূতি ধম্মং সুণাম, সুত্ৰাপি হিত্ৰা অসন্তে সন্তে ৰত্তাম, একম্পি খণং ন জহাম সন্তে, পাপমিত্তে পহায কল্যাণমিত্তসেৰিনোৰ হোমাতি.

সমণে মযং ব্রাহ্মণেতি মযং সমিতপাপে বাহিতপাপে পচ্চেকবুদ্ধসমণব্রাহ্মণেপি অৰসেসধম্মিকসমণব্রাহ্মণেপি অদ্ধিকযাচকে সেসজনেপি অন্নপানেন অভিতপ্পেমাতি অত্থো. পাল়িযং পন অযং গাথা ‘‘পুব্বেৰ দানা’’তি গাথায পচ্ছতো আগতা. নাতিক্কমামাতি অত্তনো ভরিযং অতিক্কমিত্ৰা বহি অঞ্ঞং মিচ্ছাচারং ন করোম. অঞ্ঞত্র তাহীতি তা অত্তনো ভরিযা ঠপেত্ৰা সেসইত্থীসু ব্রহ্মচরিযং চরাম, অম্হাকং ভরিযাপি সেসপুরিসেসু এৰমেৰ ৰত্তন্তি. জাযরেতি জাযন্তি. সুত্তমাসূতি সুসীলাসু উত্তমিত্থীসু. ইদং ৰুত্তং হোতি – যে এতাসু সম্পন্নসীলাসু উত্তমিত্থীসু অম্হাকং পুত্তা জাযন্তি, তে মেধাৰিনোতি এৰংপকারা হোন্তি, কুতো তেসং অন্তরা মরণং, তস্মাপি অম্হাকং কুলে দহরা ন মরন্তীতি. ধম্মং চরামাতি পরলোকত্থায তিৰিধসুচরিতধম্মং চরাম. দাস্যোতি দাসিযো.

অৰসানে –

১০২.

‘‘ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

১০৩.

‘‘ধম্মো হৰে রক্খতি ধম্মচারিং, ছত্তং মহন্তং ৰিয ৰস্সকালে;

ধম্মেন গুত্তো মম ধম্মপালো, অঞ্ঞস্স অট্ঠীনি সুখী কুমারো’’তি. –

ইমাহি দ্ৰীহি গাথাহি ধম্মচারীনং গুণং কথেসি.

তত্থ রক্খতীতি ধম্মো নামেসো রক্খিতো অত্তনো রক্খিতং পটিরক্খতি. সুখমাৰহতীতি দেৰমনুস্সসুখঞ্চেৰ নিব্বানসুখঞ্চ আৰহতি. ন দুগ্গতিন্তি নিরযাদিভেদং দুগ্গতিং ন গচ্ছতি. এৰং ব্রাহ্মণ, মযং ধম্মং রক্খাম, ধম্মোপি অম্হে রক্খতীতি দস্সেতি. ধম্মেন গুত্তোতি মহাছত্তসদিসেন অত্তনা গোপিতধম্মেন গুত্তো. অঞ্ঞস্স অট্ঠীনীতি তযা আনীতানি অট্ঠীনি অঞ্ঞস্স এল়কস্স ৰা সুনখস্স ৰা অট্ঠীনি ভৰিস্সন্তি, ছড্ডেথেতানি, মম পুত্তো সুখী কুমারোতি.

তং সুত্ৰা আচরিযো ‘‘ময্হং আগমনং সুআগমনং, সফলং, নো নিপ্ফল’’ন্তি সঞ্জাতসোমনস্সো ধম্মপালস্স পিতরং খমাপেত্ৰা ‘‘মযা আগচ্ছন্তেন তুম্হাকং ৰীমংসনত্থায ইমানি এল়কঅট্ঠীনি আভতানি, পুত্তো তে অরোগোযেৰ, তুম্হাকং রক্খিতধম্মং ময্হম্পি দেথা’’তি পণ্ণে লিখিত্ৰা কতিপাহং তত্থ ৰসিত্ৰা তক্কসিলং গন্ত্ৰা ধম্মপালং সব্বসিপ্পানি সিক্খাপেত্ৰা মহন্তেন পরিৰারেন পেসেসি.

সত্থা সুদ্ধোদনমহারাজস্স ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে রাজা অনাগামিফলে পতিট্ঠহি. তদা মাতাপিতরো মহারাজকুলানি অহেসুং, আচরিযো সারিপুত্তো, পরিসা বুদ্ধপরিসা, ধম্মপালকুমারো পন অহমেৰ অহোসিন্তি.

মহাধম্মপালজাতকৰণ্ণনা নৰমা.

[৪৪৮] ১০. কুক্কুটজাতকৰণ্ণনা

নাস্মসে কতপাপম্হীতি ইদং সত্থা ৰেল়ুৰনে ৰিহরন্তো দেৰদত্তস্স ৰধায পরিসক্কনং আরব্ভ কথেসি. ধম্মসভাযঞ্হি ভিক্খূ দেৰদত্তস্স অগুণকথং সমুট্ঠাপেসুং ‘‘আৰুসো, দেৰদত্তো ধনুগ্গহাদিপযোজনেন দসবলস্স ৰধত্থমেৰ উপাযং করোতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি এস ময্হং ৰধায পরিসক্কিযেৰা’’তি ৰত্ৰা অতীতং আহরি.

অতীতে কোসম্বিযং কোসম্বকো নাম রাজা রজ্জং কারেসি. তদা বোধিসত্তো একস্মিং ৰেল়ুৰনে কুক্কুটযোনিযং নিব্বত্তিত্ৰা অনেকসতকুক্কুটপরিৰারো অরঞ্ঞে ৰসতি, তস্সাৰিদূরে একো সেনো ৰসতি. সো উপাযেন একেকং কুক্কুটং গহেত্ৰা খাদন্তো ঠপেত্ৰা বোধিসত্তং সেসে খাদি, বোধিসত্তো এককোৰ অহোসি. সো অপ্পমত্তো ৰেলায গোচরং গহেত্ৰা ৰেল়ুৰনং পৰিসিত্ৰা ৰসতি. সো সেনো তং গণ্হিতুং অসক্কোন্তো ‘‘একেন নং উপাযেন উপলাপেত্ৰা গণ্হিস্সামী’’তি চিন্তেত্ৰা তস্সাৰিদূরে সাখায নিলীযিত্ৰা ‘‘সম্ম কুক্কুটরাজ, ত্ৰং ময্হং কস্মা ভাযসি, অহং তযা সদ্ধিং ৰিস্সাসং কত্তুকামো, অসুকস্মিং নাম পদেসে সম্পন্নগোচরো, তত্থ উভোপি গোচরং গহেত্ৰা অঞ্ঞমঞ্ঞং পিযসংৰাসং ৰসিস্সামা’’তি আহ. অথ নং বোধিসত্তো আহ ‘‘সম্ম, ময্হং তযা সদ্ধিং ৰিস্সাসো নাম নত্থি, গচ্ছ ত্ৰ’’ন্তি. ‘‘সম্ম, ত্ৰং মযা পুব্বে কতপাপতায ন সদ্দহসি, ইতো পট্ঠায এৰরূপং ন করিস্সামী’’তি. ‘‘ন ময্হং তাদিসেন সহাযেনত্থো, গচ্ছ ত্ৰ’’ন্তি. ইতি নং যাৰততিযং পটিক্খিপিত্ৰা ‘‘এতেহি অঙ্গেহি সমন্নাগতেন পুগ্গলেন সদ্ধিং ৰিস্সাসো নাম কাতুং ন ৰট্টতী’’তি ৰনঘটং উন্নাদেন্তো দেৰতাসু সাধুকারং দদমানাসু ধম্মকথং সমুট্ঠাপেন্তো –

১০৪.

‘‘নাস্মসে কতপাপম্হি, নাস্মসে অলিকৰাদিনে;

নাস্মসে অত্তত্থপঞ্ঞম্হি, অতিসন্তেপি নাস্মসে.

১০৫.

‘‘ভৰন্তি হেকে পুরিসা, গোপিপাসিকজাতিকা;

ঘসন্তি মঞ্ঞে মিত্তানি, ৰাচায ন চ কম্মুনা.

১০৬.

‘‘সুক্খঞ্জলিপগ্গহিতা, ৰাচায পলিগুণ্ঠিতা;

মনুস্সফেগ্গূ নাসীদে, যস্মিং নত্থি কতঞ্ঞুতা.

১০৭.

‘‘ন হি অঞ্ঞঞ্ঞচিত্তানং, ইত্থীনং পুরিসান ৰা;

নানাৰিকত্ৰা সংসগ্গং, তাদিসম্পি চ নাস্মসে.

১০৮.

‘‘অনরিযকম্মমোক্কন্তং, অথেতং সব্বঘাতিনং;

নিসিতংৰ পটিচ্ছন্নং, তাদিসম্পি চ নাস্মসে.

১০৯.

‘‘মিত্তরূপেনিধেকচ্চে, সাখল্যেন অচেতসা;

ৰিৰিধেহি উপাযন্তি, তাদিসম্পি চ নাস্মসে.

১১০.

‘‘আমিসং ৰা ধনং ৰাপি, যত্থ পস্সতি তাদিসো;

দুব্ভিং করোতি দুম্মেধো, তঞ্চ হন্ত্ৰান গচ্ছতী’’তি. – ইমা গাথা আহ;

তত্থ নাস্মসেতি নাস্সসে. অযমেৰ ৰা পাঠো, ন ৰিস্সসেতি ৰুত্তং হোতি. কতপাপম্হীতি পঠমং কতপাপে পুগ্গলে. অলিকৰাদিনেতি মুসাৰাদিম্হিপি ন ৰিস্সসে. তস্স হি অকত্তব্বং নাম পাপং নত্থি. নাস্মসে অত্তত্থপঞ্ঞম্হীতি অত্তনো অত্থায এৰ যস্স পঞ্ঞা স্নেহৰসেন ন ভজতি, ধনত্থিকোৰ ভজতি, তস্মিং অত্তত্থপঞ্ঞেপি ন ৰিস্সসে. অতিসন্তেতি অন্তো উপসমে অৰিজ্জমানেযেৰ চ বহি উপসমদস্সনেন অতিসন্তে ৰিয পটিচ্ছন্নকম্মন্তেপি বিলপটিচ্ছন্নআসীৰিসসদিসে কুহকপুগ্গলে. গোপিপাসিকজাতিকাতি গুন্নং পিপাসকজাতিকা ৰিয, পিপাসিতগোসদিসাতি ৰুত্তং হোতি. যথা পিপাসিতগাৰো তিত্থং ওতরিত্ৰা মুখপূরং উদকং পিৰন্তি, ন পন উদকস্স কত্তব্বযুত্তকং করোন্তি, এৰমেৰ একচ্চে ‘‘ইদঞ্চিদঞ্চ করিস্সামা’’তি মধুরৰচনেন মিত্তানি ঘসন্তি, পিযৰচনানুচ্ছৰিকং পন ন করোন্তি, তাদিসেসু ৰিস্সাসো মহতো অনত্থায হোতীতি দীপেতি.

সুক্খঞ্জলিপগ্গহিতাতি পগ্গহিততুচ্ছঅঞ্জলিনো. ৰাচায পলিগুণ্ঠিতাতি ‘‘ইদং দস্সাম, ইদং করিস্সামা’’তি ৰচনেন পটিচ্ছাদিকা. মনুস্সফেগ্গূতি এৰরূপা অসারকা মনুস্সা মনুস্সফেগ্গূ নাম. নাসীদেতি ন আসীদে এৰরূপে ন উপগচ্ছেয্য. যস্মিং নত্থীতি যস্মিঞ্চ পুগ্গলে কতঞ্ঞুতা নত্থি, তম্পি নাসীদেতি অত্থো. অঞ্ঞঞ্ঞচিত্তানন্তি অঞ্ঞেনঞ্ঞেন চিত্তেন সমন্নাগতানং, লহুচিত্তানন্তি অত্থো. এৰরূপানং ইত্থীনং ৰা পুরিসানং ৰা ন ৰিস্সসেতি দীপেতি. নানাৰিকত্ৰা সংসগ্গন্তি যোপি ন সক্কা অনুপগন্ত্ৰা এতস্স অন্তরাযং কাতুন্তি অন্তরাযকরণত্থং নানাকারণেহি সংসগ্গমাৰিকত্ৰা দল়্হং করিত্ৰা পচ্ছা অন্তরাযং করোতি, তাদিসম্পি পুগ্গলং নাস্মসে ন ৰিস্সসেয্যাতি দীপেতি.

অনরিযকম্মমোক্কন্ততি অনরিযানং দুস্সীলানং কম্মং ওতরিত্ৰা ঠিতং. অথেতন্তি অথিরং অপ্পতিট্ঠিতৰচনং. সব্বঘাতিনন্তি ওকাসং লভিত্ৰা সব্বেসং উপঘাতকরং. নিসিতংৰ পটিচ্ছন্নন্তি কোসিযা ৰা পিলোতিকায ৰা পটিচ্ছন্নং নিসিতখগ্গমিৰ. তাদিসম্পীতি এৰরূপম্পি অমিত্তং মিত্তপতিরূপকং ন ৰিস্সসেয্য. সাখল্যেনাতি মট্ঠৰচনেন. অচেতসাতি অচিত্তকেন. ৰচনমেৰ হি নেসং মট্ঠং, চিত্তং পন থদ্ধং ফরুসং. ৰিৰিধেহীতি ৰিৰিধেহি উপাযেহি ওতারাপেক্খা উপগচ্ছন্তি. তাদিসম্পীতি যো এতেহি অমিত্তেহি মিত্তপতিরূপকেহি সদিসো হোতি, তম্পি ন ৰিস্সসেতি অত্থো. আমিসন্তি খাদনীযভোজনীযং. ধনন্তি মঞ্চপটিপাদকং আদিং কত্ৰা অৰসেসং. যত্থ পস্সতীতি সহাযকগেহে যস্মিং ঠানে পস্সতি. দুব্ভিং করোতীতি দুব্ভিচিত্তং উপ্পাদেতি, তং ধনং হরতি. তঞ্চ হন্ত্ৰানাতি তঞ্চ সহাযকম্পি ছেত্ৰা গচ্ছতি. ইতি ইমা সত্ত গাথা কুক্কুটরাজা কথেসি.

১১১.

‘‘মিত্তরূপেন বহৰো, ছন্না সেৰন্তি সত্তৰো;

জহে কাপুরিসে হেতে, কুক্কুটো ৰিয সেনকং.

১১২.

‘‘যো চ উপ্পতিতং অত্থং, ন খিপ্পমনুবুজ্ঝতি;

অমিত্তৰসমন্ৰেতি, পচ্ছা চ মনুতপ্পতি.

১১৩.

‘‘যো চ উপ্পতিতং অত্থং, খিপ্পমেৰ নিবোধতি;

মুচ্চতে সত্তুসম্বাধা, কুক্কুটো ৰিয সেনকা.

১১৪.

‘‘তং তাদিসং কূটমিৰোড্ডিতং ৰনে, অধম্মিকং নিচ্চৰিধংসকারিনং;

আরা ৰিৰজ্জেয্য নরো ৰিচক্খণো, সেনং যথা কুক্কুটো ৰংসকাননে’’তি. –

ইমা চতস্সো ধম্মরাজেন ভাসিতা অভিসম্বুদ্ধগাথা.

তত্থ জহে কাপুরিসে হেতেতি ভিক্খৰে, এতে কাপুরিসে পণ্ডিতো জহেয্য. হ-কারো পনেত্থ নিপাতমত্তং. পচ্ছা চ মনুতপ্পতীতি পচ্ছা চ অনুতপ্পতি. কূটমিৰোড্ডিতন্তি ৰনে মিগানং বন্ধনত্থায কূটপাসং ৰিয ওড্ডিতং. নিচ্চৰিধংসকারিনন্তি নিচ্চং ৰিদ্ধংসনকরং. ৰংসকাননেতি যথা ৰংসৰনে কুক্কুটো সেনং ৰিৰজ্জেতি, এৰং ৰিচক্খণো পাপমিত্তে ৰিৰজ্জেয্য.

সোপি তা গাথা ৰত্ৰা সেনং আমন্তেত্ৰা ‘‘সচে ইমস্মিং ঠানে ৰসিস্সসি, জানিস্সামি তে কত্তব্ব’’ন্তি তজ্জেসি. সেনো ততো পলাযিত্ৰা অঞ্ঞত্র গতো.

সত্থা ইমং ধম্মদেসনং আহরিত্ৰা ‘‘এৰং ভিক্খৰে দেৰদত্তো পুব্বেপি ময্হং ৰধায পরিসক্কী’’তি ৰত্ৰা জাতকং সমোধানেসি – ‘‘তদা সেনো দেৰদত্তো অহোসি, কুক্কুটো পন অহমেৰ অহোসি’’ন্তি.

কুক্কুটজাতকৰণ্ণনা দসমা.

[৪৪৯] ১১. মট্ঠকুণ্ডলীজাতকৰণ্ণনা

অলঙ্কতো মট্ঠকুণ্ডলীতি ইদং সত্থা জেতৰনে ৰিহরন্তো একং মতপুত্তং কুটুম্বিকং আরব্ভ কথেসি. সাৰত্থিযং কিরেকস্স বুদ্ধুপট্ঠাকস্স কুটুম্বিকস্স পিযপুত্তো কালমকাসি. সো পুত্তসোকসমপ্পিতো ন ন্হাযতি ন ভুঞ্জতি ন কম্মন্তে ৰিচারেতি, ন বুদ্ধুপট্ঠানং গচ্ছতি, কেৰলং ‘‘পিযপুত্তক, মং ওহায পঠমতরং গতোসী’’তিআদীনি ৰত্ৰা ৰিপ্পলপতি. সত্থা পচ্চূসসমযে লোকং ওলোকেন্তো তস্স সোতাপত্তিফলূপনিস্সযং দিস্ৰা পুনদিৰসে ভিক্খুসঙ্ঘপরিৰুতো সাৰত্থিযং পিণ্ডায চরিত্ৰা কতভত্তকিচ্চো ভিক্খূ উয্যোজেত্ৰা আনন্দত্থেরেন পচ্ছাসমণেন তস্স ঘরদ্ৰারং অগমাসি. সত্থু আগতভাৰং কুটুম্বিকস্স আরোচেসুং. অথস্স গেহজনো আসনং পঞ্ঞপেত্ৰা সত্থারং নিসীদাপেত্ৰা কুটুম্বিকং পরিগ্গহেত্ৰা সত্থু সন্তিকং আনেসি. তং ৰন্দিত্ৰা একমন্তং নিসিন্নং সত্থা করুণাসীতলেন ৰচনেন আমন্তেত্ৰা ‘‘কিং, উপাসক, পুত্তকং অনুসোচসী’’তি পুচ্ছিত্ৰা ‘‘আম, ভন্তে’’তি ৰুত্তে ‘‘উপাসক, পোরাণকপণ্ডিতা পুত্তে কালকতে সোকসমপ্পিতা ৰিচরন্তাপি পণ্ডিতানং কথং সুত্ৰা ‘অলব্ভনীযট্ঠান’ন্তি তথতো ঞত্ৰা অপ্পমত্তকম্পি সোকং ন করিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একস্স মহাৰিভৰস্স ব্রাহ্মণস্স পুত্তো পঞ্চদসসোল়সৰস্সকালে একেন ব্যাধিনা ফুট্ঠো কালং কত্ৰা দেৰলোকে নিব্বত্তি. ব্রাহ্মণো তস্স কালকিরিযতো পট্ঠায সুসানং গন্ত্ৰা ছারিকপুঞ্জং আৰিজ্ঝন্তো পরিদেৰতি, সব্বকম্মন্তে পরিচ্চজিত্ৰা সোকসমপ্পিতো ৰিচরতি. তদা দেৰপুত্তো অনুৰিচরন্তো তং দিস্ৰা ‘‘একং উপমং কত্ৰা সোকং হরিস্সামী’’তি তস্স সুসানং গন্ত্ৰা পরিদেৰনকালে তস্সেৰ পুত্তৰণ্ণী হুত্ৰা সব্বাভরণপটিমণ্ডিতো একস্মিং পদেসে ঠত্ৰা উভো হত্থে সীসে ঠপেত্ৰা মহাসদ্দেন পরিদেৰি. ব্রাহ্মণো সদ্দং সুত্ৰা তং ওলোকেত্ৰা পুত্তপেমং পটিলভিত্ৰা তস্স সন্তিকে ঠত্ৰা ‘‘তাত মাণৰ, ইমস্মিং সুসানমজ্ঝে কস্মা পরিদেৰসী’’তি পুচ্ছন্তো পঠমং গাথমাহ –

১১৫.

‘‘অলঙ্কতো মট্ঠকুণ্ডলী, মালধারী হরিচন্দনুস্সদো;

বাহা পগ্গয্হ কন্দসি, ৰনমজ্ঝে কিং দুক্খিতো তুৰ’’ন্তি.

তত্থ অলঙ্কতোতি নানাভরণৰিভূসিতো. মট্ঠকুণ্ডলীতি করণপরিনিট্ঠিতেহি মট্ঠেহি কুণ্ডলেহি সমন্নাগতো. মালধারীতি ৰিচিত্রকুসুমমালধরো. হরিচন্দনুস্সদোতি সুৰণ্ণৰণ্ণেন চন্দনেন অনুলিত্তো. ৰনমজ্ঝেতি সুসানমজ্ঝে. কিং দুক্খিতো তুৰন্তি কিংকারণা দুক্খিতো ত্ৰং, আচিক্খ, অহং তে যং ইচ্ছসি, তং দস্সামীতি আহ.

অথস্স কথেন্তো মাণৰো দুতিযং গাথমাহ –

১১৬.

‘‘সোৰণ্ণমযো পভস্সরো, উপ্পন্নো রথপঞ্জরো মম;

তস্স চক্কযুগং ন ৰিন্দামি, তেন দুক্খেন জহামি জীৰিত’’ন্তি.

ব্রাহ্মণো সম্পটিচ্ছন্তো ততিযং গাথমাহ –

১১৭.

‘‘সোৰণ্ণমযং মণীমযং, লোহমযং অথ রূপিযামযং;

পাৰদ রথং করিস্সামি তে, চক্কযুগং পটিপাদযামি ত’’ন্তি.

তত্থ পাৰদাতি যাদিসেন তে অত্থো যাদিসং রোচেসি, তাদিসং ৰদ, অহং তে রথ করিস্সামি. পটিপাদযামি তন্তি তং পঞ্জরানুরূপং চক্কযুগং অধিগচ্ছাপেমি.

তং সুত্ৰা মাণৰেন কথিতায গাথায পঠমপাদং সত্থা অভিসম্বুদ্ধো হুত্ৰা কথেসি, সেসং মাণৰো.

১১৮.

‘‘সো মাণৰো তস্স পাৰদি, চন্দসূরিযা উভযেত্থ ভাতরো;

সোৰণ্ণমযো রথো মম, তেন চক্কযুগেন সোভতী’’তি.

ব্রাহ্মণো তদনন্তরং আহ –

১১৯.

‘‘বালো খো ত্ৰংসি মাণৰ, যো ত্ৰং পত্থযসি অপত্থিযং;

মঞ্ঞামি তুৰং মরিস্সসি, ন হি ত্ৰং লচ্ছসি চন্দসূরিযে’’তি. –

ব্রাহ্মণেন ৰুত্তগাথায অপত্থিযন্তি অপত্থেতব্বং.

ততো মাণৰো আহ –

১২০.

‘‘গমনাগমনম্পি দিস্সতি, ৰণ্ণধাতু উভযেত্থ ৰীথিযো;

পেতো পন নেৰ দিস্সতি, কো নু খো কন্দতং বাল্যতরো’’তি.

মাণৰেন ৰুত্তগাথায গমনাগমনন্তি উগ্গমনঞ্চ অত্থগমনঞ্চ. ৰণ্ণোযেৰ ৰণ্ণধাতু. উভযেত্থ ৰীথিযোতি এত্থ আকাসে ‘‘অযং চন্দস্স ৰীথি, অযং সূরিযস্স ৰীথী’’তি এৰং উভযগমনাগমনভূমিযোপি পঞ্ঞাযন্তি. পেতো পনাতি পরলোকং গতসত্তো পন ন দিস্সতেৰ. কো নু খোতি এৰং সন্তে অম্হাকং দ্ৰিন্নং কন্দন্তানং কো নু খো বাল্যতরোতি.

এৰং মাণৰে কথেন্তে ব্রাহ্মণো সল্লক্খেত্ৰা গাথমাহ –

১২১.

‘‘সচ্চং খো ৰদেসি মাণৰ, অহমেৰ কন্দতং বাল্যতরো;

চন্দং ৰিয দারকো রুদং, পেতং কালকতাভিপত্থযে’’তি.

তত্থ চন্দং ৰিয দারকোতি যথা দহরো গামদারকো ‘‘চন্দং দেথা’’তি চন্দস্সত্থায রোদেয্য, এৰং অহম্পি পেতং কালকতং অভিপত্থেমীতি.

ইতি ব্রাহ্মণো মাণৰস্স কথায নিস্সোকো হুত্ৰা তস্স থুতিং করোন্তো সেসগাথা অভাসি –

১২২.

‘‘আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

১২৩.

‘‘অব্বহী ৰত মে সল্লং, যমাসি হদযস্সিতং;

যো মে সোকপরেতস্স, পুত্তসোকং অপানুদি.

১২৪.

‘‘সোহং অব্বূল়্হসল্লোস্মি, ৰীতসোকো অনাৰিলো;

ন সোচামি ন রোদামি, তৰ সুত্ৰান মাণৰা’’তি.

অথ নং মাণৰো ‘‘ব্রাহ্মণ, যস্সত্থায ত্ৰং রোদসি, অহং তে পুত্তো, অহং দেৰলোকে নিব্বত্তো, ইতো পট্ঠায মা মং অনুসোচি, দানং দেহি, সীলং রক্খাহি, উপোসথং করোহী’’তি ওৰদিত্ৰা সকট্ঠানমেৰ গতো. ব্রাহ্মণোপি তস্সোৰাদে ঠত্ৰা দানাদীনি পুঞ্ঞানি কত্ৰা কালকতো দেৰলোকে নিব্বত্তি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেহি, সচ্চপরিযোসানে কুটুম্বিকো সোতাপত্তিফলে পতিট্ঠহি.তদা ধম্মদেসকদেৰপুত্তো অহমেৰ অহোসিন্তি.

মট্ঠকুণ্ডলীজাতকৰণ্ণনা একাদসমা.

[৪৫০] ১২. বিলারকোসিযজাতকৰণ্ণনা

অপচন্তাপীতি ইদং সত্থা জেতৰনে ৰিহরন্তো একং দানৰিত্তং ভিক্খুং আরব্ভ কথেসি. সো কির ভগৰতো ধম্মদেসনং সুত্ৰা সাসনে পব্বজিত্ৰা পব্বজিতকালতো পট্ঠায দানৰিত্তো অহোসি দানজ্ঝাসযো, পত্তপরিযাপন্নম্পি পিণ্ডপাতং অঞ্ঞস্স অদত্ৰা ন ভুঞ্জি, অন্তমসো পানীযম্পি লভিত্ৰা অঞ্ঞস্স অদত্ৰা ন পিৰি, এৰং দানাভিরতো অহোসি. অথস্স ধম্মসভাযং ভিক্খূ গুণকথং কথেসুং. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে তং ভিক্খুং পক্কোসাপেত্ৰা ‘‘সচ্চং কির ত্ৰং ভিক্খু দানৰিত্তো দানজ্ঝাসযো’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খৰে অযং পুব্বে অস্সদ্ধো অহোসি অপ্পসন্নো, তিণগ্গেন তেলবিন্দুম্পি উদ্ধরিত্ৰা কস্সচি ন অদাসি, অথ নং অহং দমেত্ৰা নিব্বিসেৰনং কত্ৰা দানফলং ঞাপেসিং, তমেৰ দাননিন্নং চিত্তং ভৰন্তরেপি ন পজহতী’’তি ৰত্ৰা ভিক্খূহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সেট্ঠিকুলে নিব্বত্তিত্ৰা ৰযপ্পত্তো কুটুম্বং সণ্ঠপেত্ৰা পিতু অচ্চযেন সেট্ঠিট্ঠানং পত্ৰা একদিৰসং ধনৰিলোকনং কত্ৰা ‘‘ধনং পঞ্ঞাযতি, এতস্স উপ্পাদকা ন পঞ্ঞাযন্তি, ইমং ধনং ৰিস্সজ্জেত্ৰা মহাদানং দাতুং ৰট্টতী’’তি দানসালং কারেত্ৰা যাৰজীৰং মহাদানং পৰত্তেত্ৰা আযুপরিযোসানে ‘‘ইদং দানৰত্তং মা উপচ্ছিন্দী’’তি পুত্তস্স ওৰাদং দত্ৰা তাৰতিংসভৰনে সক্কো হুত্ৰা নিব্বত্তি. পুত্তোপিস্স তথেৰ দানং দত্ৰা পুত্তং ওৰদিত্ৰা আযুপরিযোসানে চন্দো দেৰপুত্তো হুত্ৰা নিব্বত্তি, তস্স পুত্তো সূরিযো হুত্ৰা নিব্বত্তি, তস্সপি পুত্তো মাতলিসঙ্গাহকো হুত্ৰা নিব্বত্তি, তস্স পুত্তো পঞ্চসিখো গন্ধব্বদেৰপুত্তো হুত্ৰা নিব্বত্তি. ছট্ঠো পন অস্সদ্ধো অহোসি থদ্ধচিত্তো নিস্নেহো মচ্ছরী, দানসালং ৰিদ্ধংসেত্ৰা ঝাপেত্ৰা যাচকে পোথেত্ৰা নীহরাপেসি, কস্সচি তিণগ্গেন উদ্ধরিত্ৰা তেলবিন্দুম্পি ন দেতি. তদা সক্কো দেৰরাজা অত্তনো পুব্বকম্মং ওলোকেত্ৰা ‘‘পৰত্ততি নু খো মে দানৰংসো, উদাহু নো’’তি উপধারেন্তো ‘‘পুত্তো মে দানং পৰত্তেত্ৰা চন্দো হুত্ৰা নিব্বত্তি, তস্স পুত্তো সূরিযো, তস্স পুত্তো মাতলি, তস্স পুত্তো পঞ্চসিখো গন্ধব্বদেৰপুত্তো হুত্ৰা নিব্বত্তি, ছট্ঠো পন তং ৰংসং উপচ্ছিন্দী’’তি পস্সি.

অথস্স এতদহোসি ‘‘ইমং পাপধম্মং দমেত্ৰা দানফলং জানাপেত্ৰা আগমিস্সামী’’তি. সো চন্দসূরিযমাতলিপঞ্চসিখে পক্কোসাপেত্ৰা ‘‘সম্মা, অম্হাকং ৰংসে ছট্ঠো কুলৰংসং সমুচ্ছিন্দিত্ৰা দানসালং ঝাপেত্ৰা যাচকে নীহরাপেসি, ন কস্সচি কিঞ্চি দেতি, এথ নং দমেস্সামা’’তি তেহি সদ্ধিং বারাণসিং অগমাসি. তস্মিং খণে সেট্ঠি রাজুপট্ঠানং কত্ৰা আগন্ত্ৰা সত্তমে দ্ৰারকোট্ঠকে অন্তরৰীথিং ওলোকেন্তো চঙ্কমতি. সক্কো ‘‘তুম্হে মম পৰিট্ঠকালে পচ্ছতো পটিপাটিযা আগচ্ছথা’’তি ৰত্ৰা গন্ত্ৰা সেট্ঠিস্স সন্তিকে ঠত্ৰা ‘‘ভো মহাসেট্ঠি, ভোজনং মে দেহী’’তি আহ. ‘‘ব্রাহ্মণ নত্থি তৰ ইধ ভত্তং, অঞ্ঞত্থ গচ্ছা’’তি. ‘‘ভো মহাসেট্ঠি, ব্রাহ্মণেহি ভত্তে যাচিতে ন দাতুং ন লব্ভতী’’তি. ‘‘ব্রাহ্মণ, মম গেহে পক্কম্পি পচিতব্বম্পি ভত্তং নত্থি, অঞ্ঞত্থ গচ্ছা’’তি. ‘‘মহাসেট্ঠি, একং তে সিলোকং কথেস্সামি, তং সুণাহী’’তি. ‘‘নত্থি ময্হং তৰ সিলোকেনত্থো, মা ইধ তিট্ঠা’’তি. সক্কো তস্স কথং অসুণন্তো ৰিয দ্ৰে গাথা অভাসি –

১২৫.

‘‘অপচন্তাপি দিচ্ছন্তি, সন্তো লদ্ধান ভোজনং;

কিমেৰ ত্ৰং পচমানো, যং ন দজ্জা ন তং সমং.

১২৬.

‘‘মচ্ছেরা চ পমাদা চ, এৰং দানং ন দীযতি;

পুঞ্ঞং আকঙ্খমানেন, দেয্যং হোতি ৰিজানতা’’তি.

তাসং অত্থো – মহাসেট্ঠি অপচন্তাপি সন্তো সপ্পুরিসা ভিক্খাচরিযায লদ্ধম্পি ভোজনং দাতুং ইচ্ছন্তি, ন এককা পরিভুঞ্জন্তি. কিমেৰ ত্ৰং পচমানো যং ন দদেয্যাসি, ন তং সমং, তং তৰ অনুরূপং অনুচ্ছৰিকং ন হোতি. দানঞ্হি মচ্ছেরেন চ পমাদেন চাতি দ্ৰীহি দোসেহি ন দীযতি, পুঞ্ঞং আকঙ্খমানেন ৰিজানতা পণ্ডিতমনুস্সেন দাতব্বমেৰ হোতীতি.

সো তস্স ৰচনং সুত্ৰা ‘‘তেন হি গেহং পৰিসিত্ৰা নিসীদ, থোকং লচ্ছসী’’তি আহ. সক্কো পৰিসিত্ৰা তে সিলোকে সজ্ঝাযন্তো নিসীদি. অথ নং চন্দো আগন্ত্ৰা ভত্তং যাচি. ‘‘নত্থি তে ভত্তং, গচ্ছা’’তি চ ৰুত্তো ‘‘মহাসেট্ঠি অন্তো একো ব্রাহ্মণো নিসিন্নো, ব্রাহ্মণৰাচনকং মঞ্ঞে ভৰিস্সতি, অহম্পি ভৰিস্সামী’’তি ৰত্ৰা ‘‘নত্থি ব্রাহ্মণৰাচনকং, নিক্খমা’’তি ৰুচ্চমানোপি ‘‘মহাসেট্ঠি ইঙ্ঘ তাৰ সিলোকং সুণাহী’’তি দ্ৰে গাথা অভাসি –

১২৭.

‘‘যস্সেৰ ভীতো ন দদাতি মচ্ছরী, তদেৰাদদতো ভযং;

জিঘচ্ছা চ পিপাসা চ, যস্স ভাযতি মচ্ছরী;

তমেৰ বালং ফুসতি, অস্মিং লোকে পরম্হি চ.

১২৮.

‘‘তস্মা ৰিনেয্য মচ্ছেরং, দজ্জা দানং মলাভিভূ;

পুঞ্ঞানি পরলোকস্মিং, পতিট্ঠা হোন্তি পাণিন’’ন্তি.

তত্থ যস্স ভাযতীতি ‘‘অহং অঞ্ঞেসং দত্ৰা সযং জিঘচ্ছিতো চ পিপাসিতো চ ভৰিস্সামী’’তি যস্সা জিঘচ্ছায পিপাসায ভাযতি. তমেৰাতি তঞ্ঞেৰ জিঘচ্ছাপিপাসাসঙ্খাতং ভযং এতং বালং নিব্বত্তনিব্বত্তট্ঠানে ইধলোকে পরলোকে চ ফুসতি পীল়েতি, অচ্চন্তদালিদ্দিযং পাপুণাতি. মলাভিভূতি মচ্ছরিযমলং অভিভৰন্তো.

তস্সপি ৰচনং সুত্ৰা ‘‘তেন হি পৰিস, থোকং লভিস্সসী’’তি আহ. সোপি পৰিসিত্ৰা সক্কস্স সন্তিকে নিসীদি. ততো থোকং ৰীতিনামেত্ৰা সূরিযো আগন্ত্ৰা ভত্তং যাচন্তো দ্ৰে গাথা অভাসি –

১২৯.

‘‘দুদ্দদং দদমানানং, দুক্করং কম্ম কুব্বতং;

অসন্তো নানুকুব্বন্তি, সতং ধম্মো দুরন্নযো.

১৩০.

‘‘তস্মা সতঞ্চ অসতং, নানা হোতি ইতো গতি;

অসন্তো নিরযং যন্তি, সন্তো সগ্গপরাযণা’’তি.

তত্থ দুদ্দদন্তি দানং নাম দুদ্দদং মচ্ছেরং অভিভৰিত্ৰা দাতব্বতো, তং দদমানানং. দুক্করন্তি তদেৰ দানকম্মং দুক্করং যুদ্ধসদিসং, তং কুব্বতং. নানুকুব্বন্তীতি অসপ্পুরিসা দানফলং অজানন্তা তেসং গতমগ্গং নানুগচ্ছন্তি. সতং ধম্মোতি সপ্পুরিসানং বোধিসত্তানং ধম্মো অঞ্ঞেহি দুরনুগমো. অসন্তোতি মচ্ছরিযৰসেন দানং অদত্ৰা অসপ্পুরিসা নিরযং যন্তি.

সেট্ঠি গহেতব্বগহণং অপস্সন্তো ‘‘তেন হি পৰিসিত্ৰা ব্রাহ্মণানং সন্তিকে নিসীদ, থোকং লচ্ছসী’’তি আহ. ততো থোকং ৰীতিনামেত্ৰা মাতলি আগন্ত্ৰা ভত্তং যাচিত্ৰা ‘‘নত্থী’’তি ৰচনমত্তকালমেৰ সত্তমং গাথমাহ –

১৩১.

‘‘অপ্পস্মেকে পৰেচ্ছন্তি, বহুনেকে ন দিচ্ছরে;

অপ্পস্মা দক্খিণা দিন্না, সহস্সেন সমং মিতা’’তি.

তত্থ অপ্পস্মেকে পৰেচ্ছন্তীতি মহাসেট্ঠি একচ্চে পণ্ডিতপুরিসা অপ্পস্মিম্পি দেয্যধম্মে পৰেচ্ছন্তি, দদন্তিযেৰাতি অত্থো. বহুনাপি দেয্যধম্মেন সমন্নাগতা একে সত্তা ন দিচ্ছরে ন দদন্তি. দক্খিণাতি কম্মঞ্চ ফলঞ্চ সদ্দহিত্ৰা দিন্নদানং. সহস্সেন সমং মিতাতি এৰং দিন্না কটচ্ছুভত্তমত্তাপি দক্খিণা সহস্সদানেন সদ্ধিং মিতা, মহাফলত্তা সহস্সদানসদিসাৰ হোতীতি অত্থো.

তম্পি সো ‘‘তেন হি পৰিসিত্ৰা নিসীদা’’তি আহ. ততো থোকং ৰীতিনামেত্ৰা পঞ্চসিখো আগন্ত্ৰা ভত্তং যাচিত্ৰা ‘‘নত্থি গচ্ছা’’তি ৰুত্তে ‘‘অহং ন গতপুব্বো, ইমস্মিং গেহে ব্রাহ্মণৰাচনকং ভৰিস্সতি মঞ্ঞে’’তি তস্স ধম্মকথং আরভন্তো অট্ঠমং গাথমাহ –

১৩২.

‘‘ধম্মং চরে যোপি সমুঞ্ছকং চরে, দারঞ্চ পোসং দদমপ্পকস্মিং;

সতং সহস্সানং সহস্সযাগিনং, কলম্পি নাগ্ঘন্তি তথাৰিধস্স তে’’তি.

তত্থ ধম্মন্তি তিৰিধসুচরিতধম্মং. সমুঞ্ছকন্তি গামে ৰা আমকপক্কভিক্খাচরিযং অরঞ্ঞে ৰা ফলাফলহরণসঙ্খাতং উঞ্ছং যো চরেয্য, সোপি ধম্মমেৰ চরে. দারঞ্চ পোসন্তি অত্তনো চ পুত্তদারং পোসেন্তোযেৰ. দদমপ্পকস্মিন্তি পরিত্তে ৰা দেয্যধম্মে ধম্মিকসমণব্রাহ্মণানং দদমানো ধম্মং চরেতি অত্থো. সতং সহস্সানং সহস্সযাগিনন্তি পরং পোথেত্ৰা ৰিহেঠেত্ৰা সহস্সেন যাগং যজন্তানং সহস্সযাগীনং ইস্সরানং সতসহস্সম্পি. কলম্পি নাগ্ঘন্তি তথাৰিধস্স তেতি তেসং সতসহস্সসঙ্খাতানং সহস্সযাগীনং যাগা তথাৰিধস্স ধম্মেন সমেন দেয্যধম্মং উপ্পাদেত্ৰা দেন্তস্স দুগ্গতমনুস্সস্স সোল়সিং কলং ন অগ্ঘন্তীতি.

সেট্ঠি পঞ্চসিখস্স কথং সুত্ৰা সল্লক্খেসি. অথ নং অনগ্ঘকারণং পুচ্ছন্তো নৰমং গাথমাহ –

১৩৩.

‘‘কেনেস যঞ্ঞো ৰিপুলো মহগ্ঘতো, সমেন দিন্নস্স ন অগ্ঘমেতি;

কথং সতং সহস্সানং সহস্সযাগিনং, কলম্পি নাগ্ঘন্তি তথাৰিধস্স তে’’তি.

তত্থ যঞ্ঞোতি দানযাগো সতসহস্সপরিচ্চাগৰসেন ৰিপুলো, ৰিপুলত্তাৰ মহগ্ঘতো. সমেন দিন্নস্সাতি ধম্মেন দিন্নস্স কেন কারণেন অগ্ঘং ন উপেতি. কথং সতং সহস্সানন্তি ব্রাহ্মণ, কথং সহস্সযাগীনং পুরিসানং বহূনং সহস্সানং সতসহস্সসঙ্খাতা ইস্সরা তথাৰিধস্স ধম্মেন উপ্পাদেত্ৰা দাযকস্স একস্স দুগ্গতমনুস্সস্স কলং নাগ্ঘন্তীতি.

অথস্স কথেন্তো পঞ্চসিখো ওসানগাথমাহ –

১৩৪.

‘‘দদন্তি হেকে ৰিসমে নিৰিট্ঠা, ছেত্ৰা ৰধিত্ৰা অথ সোচযিত্ৰা;

সা দক্খিণা অস্সুমুখা সদণ্ডা, সমেন দিন্নস্স ন অগ্ঘমেতি;

এৰং সতং সহস্সানং সহস্সযাগিনং, কলম্পি নাগ্ঘন্তি তথাৰিধস্স তে’’তি.

তত্থ ৰিসমেতি ৰিসমে কাযকম্মাদিম্হি নিৰিট্ঠা. ছেত্ৰাতি কিলমেত্ৰা. ৰধিত্ৰাতি মারেত্ৰা. সোচযিত্ৰাতি সসোকে কত্ৰা.

সো পঞ্চসিখস্স ধম্মকথং সুত্ৰা ‘‘তেন হি গচ্ছ, গেহং পৰিসিত্ৰা নিসীদ, থোকং লচ্ছসী’’তি আহ. সোপি গন্ত্ৰা তেসং সন্তিকে নিসীদি. ততো বিলারকোসিযো সেট্ঠি একং দাসিং আমন্তেত্ৰা ‘‘এতেসং ব্রাহ্মণানং পলাপৰীহীনং নাল়িং নাল়িং দেহী’’তি আহ. সা ৰীহী গহেত্ৰা ব্রাহ্মণে উপসঙ্কমিত্ৰা ‘‘ইমে আদায যত্থ কত্থচি পচাপেত্ৰা ভুঞ্জথা’’তি আহ. ‘‘ন অম্হাকং ৰীহিনা অত্থো, ন মযং ৰীহিং আমসামা’’তি. ‘‘অয্য, ৰীহিং কিরেতে নামসন্তী’’তি? ‘‘তেন হি তেসং তণ্ডুলে দেহী’’তি. সা তণ্ডুলে আদায গন্ত্ৰা ‘‘ব্রাহ্মণা তণ্ডুলে গণ্হথা’’তি আহ. ‘‘মযং আমকং ন পটিগ্গণ্হামা’’তি. ‘‘অয্য, আমকং কির ন গণ্হন্তী’’তি. ‘‘তেন হি তেসং করোটিযং ৰড্ঢেত্ৰা গোভত্তং দেহী’’তি. সা তেসং করোটিযং ৰড্ঢেত্ৰা মহাগোণানং পক্কভত্তং আহরিত্ৰা অদাসি. পঞ্চপি জনা কবল়ে ৰড্ঢেত্ৰা মুখে পক্খিপিত্ৰা গলে লগ্গাপেত্ৰা অক্খীনি পরিৰত্তেত্ৰা ৰিস্সট্ঠসঞ্ঞা মতা ৰিয নিপজ্জিংসু. দাসী তে দিস্ৰা ‘‘মতা ভৰিস্সন্তী’’তি ভীতা গন্ত্ৰা সেট্ঠিনো আরোচেসি ‘‘অয্য, তে ব্রাহ্মণা গোভত্তং গিলিতুং অসক্কোন্তা মতা’’তি.

সো চিন্তেসি ‘‘ইদানি অযং পাপধম্মো সুখুমালব্রাহ্মণানং গোভত্তং দাপেসি, তে তং গিলিতুং অসক্কোন্তা মতাতি মং গরহিস্সন্তী’’তি. ততো দাসিং আহ – ‘‘খিপ্পং গন্ত্ৰা এতেসং করোটিকেসু ভত্তং হরিত্ৰা নানগ্গরসং সালিভত্তং ৰড্ঢেহী’’তি. সা তথা অকাসি. সেট্ঠি অন্তরপীথিং পটিপন্নমনুস্সে পক্কোসাপেত্ৰা ‘‘অহং মম ভুঞ্জননিযামেন এতেসং ব্রাহ্মণানং ভত্তং দাপেসিং, এতে লোভেন মহন্তে পিণ্ডে কত্ৰা ভুঞ্জমানা গলে লগ্গাপেত্ৰা মতা, মম নিদ্দোসভাৰং জানাথা’’তি ৰত্ৰা পরিসং সন্নিপাতেসি. মহাজনে সন্নিপতিতে ব্রাহ্মণা উট্ঠায মহাজনং ওলোকেত্ৰা ‘‘পস্সথিমস্স সেট্ঠিস্স মুসাৰাদিতং, ‘অম্হাকং অত্তনো ভুঞ্জনভত্তং দাপেসি’ন্তি ৰদতি, পঠমং গোভত্তং অম্হাকং দত্ৰা অম্হেসু মতেসু ৰিয নিপন্নেসু ইমং ভত্তং ৰড্ঢাপেসী’’তি ৰত্ৰা অত্তনো মুখেহি গহিতভত্তং ভূমিযং পাতেত্ৰা দস্সেসুং. মহাজনো সেট্ঠিং গরহি ‘‘অন্ধবাল, অত্তনো কুলৰংসং নাসেসি, দানসালং ঝাপেসি, যাচকে গীৰাযং গহেত্ৰা নীহরাপেসি, ইদানি ইমেসং সুখুমালব্রাহ্মণানং ভত্তং দেন্তো গোভত্তং দাপেসি, পরলোকং গচ্ছন্তো তৰ ঘরে ৰিভৰং গীৰাযং বন্ধিত্ৰা গমিস্সসি মঞ্ঞে’’তি.

তস্মিং খণে সক্কো মহাজনং পুচ্ছি ‘‘জানাথ, তুম্হে ইমস্মিং গেহে ধনং কস্স সন্তক’’ন্তি? ‘‘ন জানামা’’তি. ‘‘ইমস্মিং নগরে অসুককালে বারাণসিযং মহাসেট্ঠি নাম দানসালং কারেত্ৰা মহাদানং পৰত্তযী’’তি সুতপুব্বং তুম্হেহীতি. ‘‘আম সুণামা’’তি. ‘‘অহং সো সেট্ঠি, দানং দত্ৰা সক্কো দেৰরাজা হুত্ৰা পুত্তোপি মে তং ৰংসং অৰিনাসেত্ৰা দানং দত্ৰা চন্দো দেৰপুত্তো হুত্ৰা নিব্বত্তো, তস্স পুত্তো সূরিযো, তস্স পুত্তো মাতলি, তস্স পুত্তো পঞ্চসিখো গন্ধব্বদেৰপুত্তো হুত্ৰা নিব্বত্তো. তেসু অযং চন্দো, অযং সূরিযো, অযং মাতলিসঙ্গাহকো, অযং ইমস্স পাপধম্মস্স পিতা পঞ্চসিখো গন্ধব্বদেৰপুত্তো, এৰং বহুগুণং এতং দানং নাম, কত্তব্বমেৰ কুসলং পণ্ডিতেহী’’তি কথেন্তা মহাজনস্স কঙ্খচ্ছেদনত্থং আকাসে উপ্পতিত্ৰা মহন্তেনানুভাৰেন মহন্তেন পরিৰারেন জলমানসরীরা অট্ঠংসু, সকলনগরং পজ্জলন্তং ৰিয অহোসি. সক্কো মহাজনং আমন্তেত্ৰা ‘‘মযং অত্তনো দিব্বসম্পত্তিং পহায আগচ্ছন্তা ইমং কুলৰংসনাসকরং পাপধম্মবিলারকোসিযং নিস্সায আগতা, অযং পাপধম্মো অত্তনো কুলৰংসং নাসেত্ৰা দানসালং ঝাপেত্ৰা যাচকে গীৰাযং গহেত্ৰা নীহরাপেত্ৰা অম্হাকং ৰংসং সমুচ্ছিন্দি, ‘অযং অদানসীলো হুত্ৰা নিরযে নিব্বত্তেয্যা’তি ইমস্স অনুকম্পায আগতাম্হা’’তি ৰত্ৰা দানগুণং পকাসেন্তো মহাজনস্স ধম্মং দেসেসি. বিলারকোসিযো সিরস্মিং অঞ্জলিং পতিট্ঠপেত্ৰা ‘‘দেৰ, অহং ইতো পট্ঠায পোরাণকুলৰংসং অনাসাপেত্ৰা দানং পৰত্তেস্সামি, অজ্জ আদিং কত্ৰা অন্তমসো উদকদন্তপোনং উপাদায অত্তনো লদ্ধাহারং পরস্স অদত্ৰা ন খাদিস্সামী’’তি সক্কস্স পটিঞ্ঞং অদাসি. সক্কো তং দমেত্ৰা নিব্বিসেৰনং কত্ৰা পঞ্চসু সীলেসু পতিট্ঠপেত্ৰা চত্তারো দেৰপুত্তে আদায সকট্ঠানমেৰ গতো. সোপি সেট্ঠি যাৰজীৰং দানং দত্ৰা তাৰতিংসভৰনে নিব্বত্তি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, অযং ভিক্খু পুব্বে অস্সদ্ধো অহোসি কস্সচি কিঞ্চি অদাতা, অহং পন নং দমেত্ৰা দানফলং জানাপেসিং, তমেৰ চিত্তং ভৰন্তরগতম্পি ন জহাতী’’তি ৰত্ৰা জাতকং সমোধানেসি – ‘‘তদা সেট্ঠি অযং দানপতিকো ভিক্খু অহোসি, চন্দো সারিপুত্তো, সূরিযো মোগ্গল্লানো, মাতলি কস্সপো, পঞ্চসিখো আনন্দো, সক্কো পন অহমেৰ অহোসি’’ন্তি.

বিলারকোসিযজাতকৰণ্ণনা দ্ৰাদসমা.

[৪৫১] ১৩. চক্কৰাকজাতকৰণ্ণনা

ৰণ্ণৰা অভিরূপোসীতি ইদং সত্থা জেতৰনে ৰিহরন্তো একং লোলভিক্খুং আরব্ভ কথেসি. সো কির চীৰরাদীহি অতিত্তো ‘‘কহং সঙ্ঘভত্তং, কহং নিমন্তন’’ন্তি পরিযেসন্তো ৰিচরতি, আমিসকথাযমেৰ অভিরমতি. অথঞ্ঞে পেসলা ভিক্খূ তস্সানুগ্গহেন সত্থু আরোচেসুং. সত্থা তং পক্কোসাপেত্ৰা ‘‘সচ্চং কির ত্ৰং ভিক্খু লোলো’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খু কস্মা এৰরূপে নিয্যানিকসাসনে পব্বজিত্ৰা লোলো অহোসি, লোলভাৰো চ নাম পাপকো, পুব্বেপি ত্ৰং লোলভাৰং নিস্সায বারাণসিযং হত্থিকুণপাদীহি অতিত্তো মহাঅরঞ্ঞং পৰিট্ঠো’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একো লোলকাকো বারাণসিযং হত্থিকুণপাদীহি অতিত্তো ‘‘অরঞ্ঞং নু খো কীদিস’’ন্তি অরঞ্ঞং গন্ত্ৰা তত্থপি ফলাফলেহি অসন্তুট্ঠো গঙ্গায তীরং গন্ত্ৰা ৰিচরন্তো জযম্পতিকে চক্কৰাকে দিস্ৰা ‘‘ইমে সকুণা অতিৰিয সোভন্তি, ইমে ইমস্মিং গঙ্গাতীরে বহুং মচ্ছমংসং খাদন্তি মঞ্ঞে, ইমে পটিপুচ্ছিত্ৰা মযাপি ইমেসং ভোজনং গোচরং খাদিত্ৰা ৰণ্ণৰন্তেন ভৰিতুং ৰট্টতী’’তি তেসং অৰিদূরে নিসীদিত্ৰা চক্কৰাকং পুচ্ছন্তো দ্ৰে গাথা অভাসি –

১৩৫.

‘‘ৰণ্ণৰা অভিরূপোসি, ঘনো সঞ্জাতরোহিতো;

চক্কৰাক সুরূপোসি, ৰিপ্পসন্নমুখিন্দ্রিযো.

১৩৬.

‘‘পাঠীনং পাৰুসং মচ্ছং, বলজং মুঞ্জরোহিতং;

গঙ্গায তীরে নিসিন্নো, এৰং ভুঞ্জসি ভোজন’’ন্তি.

তত্থ ঘনোতি ঘনসরীরো. সঞ্জাতরোহিতোতি উত্তত্তসুৰণ্ণং ৰিয সুট্ঠুজাতরোহিতৰণ্ণো. পাঠীনন্তি পাঠীননামকং পাসাণমচ্ছং. পাৰুসন্তি মহামুখমচ্ছং, ‘‘পাহুস’’ন্তিপি পাঠো. বলজন্তি বলজমচ্ছং. মুঞ্জরোহিতন্তি মুঞ্জমচ্ছঞ্চ রোহিতমচ্ছঞ্চ. এৰং ভুঞ্জসীতি এৰরূপং ভোজনং মঞ্ঞে ভুঞ্জসীতি পুচ্ছতি.

চক্কৰাকো তস্স ৰচনং পটিক্খিপন্তো ততিযং গাথমাহ –

১৩৭.

‘‘ন ৰাহমেতং ভুঞ্জামি, জঙ্গলানোদকানি ৰা;

অঞ্ঞত্র সেৰালপণকা, এতং মে সম্ম ভোজন’’ন্তি.

তস্সত্থো – অহং সম্ম, অঞ্ঞত্র সেৰালা চ পণকা চ সেসানি জঙ্গলানি ৰা ওদকানি ৰা মংসানি আদায এতং ভোজনং ন ভুঞ্জামি, যং পনেতং সেৰালপণকং, এতং মে সম্ম, ভোজনন্তি.

ততো কাকো দ্ৰে গাথা অভাসি –

১৩৮.

‘‘ন ৰাহমেতং সদ্দহামি, চক্কৰাকস্স ভোজনং;

অহম্পি সম্ম ভুঞ্জামি, গামে লোণিযতেলিযং.

১৩৯.

‘‘মনুস্সেসু কতং ভত্তং, সুচিং মংসূপসেচনং;

ন চ মে তাদিসো ৰণ্ণো, চক্কৰাক যথা তুৰ’’ন্তি.

তত্থ যথা তুৰন্তি যথা তুৰং সোভগ্গপ্পত্তো সরীরৰণ্ণো, তাদিসো ময্হং ৰণ্ণো নত্থি, এতেন কারণেন অহং তৰ ‘‘সেৰালপণকং মম ভোজন’’ন্তি ৰদন্তস্স ৰচনং ন সদ্দহামীতি.

অথস্স চক্কৰাকো দুব্বণ্ণকারণং কথেত্ৰা ধম্মং দেসেন্তো সেসগাথা অভাসি –

১৪০.

‘‘সম্পস্সং অত্তনি ৰেরং, হিংসযং মানুসিং পজং;

উত্রস্তো ঘসসী ভীতো, তেন ৰণ্ণো তৰেদিসো.

১৪১.

‘‘সব্বলোকৰিরুদ্ধোসি, ধঙ্ক পাপেন কম্মুনা;

লদ্ধো পিণ্ডো ন পীণেতি, তেন ৰণ্ণো তৰেদিসো.

১৪২.

‘‘অহম্পি সম্ম ভুঞ্জামি, অহিংসং সব্বপাণিনং;

অপ্পোস্সুক্কো নিরাসঙ্কী, অসোকো অকুতোভযো.

১৪৩.

‘‘সো করস্সু আনুভাৰং, ৰীতিৰত্তস্সু সীলিযং;

অহিংসায চর লোকে, পিযো হোহিসি মংমিৰ.

১৪৪.

‘‘যো ন হন্তি ন ঘাতেতি, ন জিনাতি ন জাপযে;

মেত্তংসো সব্বভূতেসু, ৰেরং তস্স ন কেনচী’’তি.

তত্থ সম্পস্সন্তি সম্ম কাক ত্ৰং পরেসু উপ্পন্নং অত্তনি ৰেরচিত্তং সম্পস্সমানো মানুসিং পজং হিংসন্তো ৰিহেঠেন্তো. উত্রস্তোতি ভীতো. ঘসসীতি ভুঞ্জসি. তেন তে এদিসো বীভচ্ছৰণ্ণো জাতো. ধঙ্কাতি কাকং আলপতি. পিণ্ডোতি ভোজনং. অহিংসং সব্বপাণিনন্তি অহং পন সব্বসত্তে অহিংসন্তো ভুঞ্জামীতি ৰদতি. সো করস্সু আনুভাৰন্তি সো ত্ৰম্পি ৰীরিযং করোহি, অত্তনো সীলিযসঙ্খাতং দুস্সীলভাৰং ৰীতিৰত্তস্সু. অহিংসাযাতি অহিংসায সমন্নাগতো হুত্ৰা লোকে চর. পিযো হোহিসি মংমিৰাতি এৰং সন্তে মযা সদিসোৰ লোকস্স পিযো হোহিসি. ন জিনাতীতি ধনজানিং ন করোতি. ন জাপযেতি অঞ্ঞেপি ন কারেতি. মেত্তংসোতি মেত্তকোট্ঠাসো মেত্তচিত্তো. ন কেনচীতি কেনচি একসত্তেনপি সদ্ধিং তস্স ৰেরং নাম নত্থীতি.

তস্মা সচে লোকস্স পিযো ভৰিতুং ইচ্ছসি, সব্বৰেরেহি ৰিরমাহীতি এৰং চক্কৰাকো কাকস্স ধম্মং দেসেসি. কাকো ‘‘তুম্হে অত্তনো গোচরং ময্হং ন কথেথ, কা কা’’তি ৰস্সন্তো উপ্পতিত্ৰা বারাণসিযং উক্কারভূমিযঞ্ঞেৰ ওতরি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে লোলভিক্খু অনাগামিফলে পতিট্ঠহি. তদা কাকো লোলভিক্খু অহোসি, চক্কৰাকী রাহুলমাতা, চক্কৰাকো পন অহমেৰ অহোসিন্তি.

চক্কৰাকজাতকৰণ্ণনা তেরসমা.

[৪৫২] ১৪. ভূরিপঞ্ঞজাতকৰণ্ণনা

১৪৫-১৫৪. সচ্চং কিরাতি ইদং ভূরিপঞ্ঞজাতকং মহাউমঙ্গজাতকে (জা. ২.২২.৫৯০ আদযো) আৰি ভৰিস্সতি.

ভূরিপঞ্ঞজাতকৰণ্ণনা চুদ্দসমা.

[৪৫৩] ১৫. মহামঙ্গলজাতকৰণ্ণনা

কিংসু নরোতি ইদং সত্থা জেতৰনে ৰিহরন্তো মহামঙ্গলসুত্তং (খু. পা. ৫.১ আদযো) আরব্ভ কথেসি. রাজগহনগরস্মিঞ্হি কেনচিদেৰ করণীযেন সন্থাগারে সন্নিপতিতস্স মহাজনস্স মজ্ঝে একো পুরিসো ‘‘অজ্জ মে মঙ্গলকিরিযা অত্থী’’তি উট্ঠায অগমাসি. অপরো তস্স ৰচনং সুত্ৰা ‘‘অযং ‘মঙ্গল’ন্তি ৰত্ৰাৰ গতো, কিং এতং মঙ্গলং নামা’’তি আহ. তমঞ্ঞো ‘‘অভিমঙ্গলরূপদস্সনং মঙ্গলং নাম. একচ্চো হি কালস্সেৰ উট্ঠায সব্বসেতং উসভং ৰা পস্সতি, গব্ভিনিত্থিং ৰা রোহিতমচ্ছং ৰা পুণ্ণঘটং ৰা নৰনীতং ৰা গোসপ্পিং ৰা অহতৰত্থং ৰা পাযাসং ৰা পস্সতি, ইতো উত্তরি মঙ্গলং নাম নত্থী’’তি আহ. তেন কথিতং একচ্চে ‘‘সুকথিত’’ন্তি অভিনন্দিংসু. অপরো ‘‘নেতং মঙ্গলং, সুতং নাম মঙ্গলং. একচ্চো হি ‘পুণ্ণা’তি ৰদন্তানং সুণাতি, তথা ‘ৰড্ঢা’তি ‘ৰড্ঢমানা’তি সুণাতি, ‘ভুঞ্জা’তি ‘খাদা’তি ৰদন্তানং সুণাতি, ইতো উত্তরি মঙ্গলং নাম নত্থী’’তি আহ. তেন কথিতম্পি একচ্চে ‘‘সুকথিত’’ন্তি অভিনন্দিংসু. অপরো ‘‘ন এতং মঙ্গলং, মুতং নাম মঙ্গলং. একচ্চো হি কালস্সেৰ উট্ঠায পথৰিং আমসতি, হরিততিণং অল্লগোমযং পরিসুদ্ধসাটকং রোহিতমচ্ছং সুৰণ্ণরজতভাজনং আমসতি, ইতো উত্তরি মঙ্গলং নাম নত্থী’’তি আহ. তেন কথিতম্পি একচ্চে ‘‘সুকথিত’’ন্তি অভিনন্দিংসু. এৰং দিট্ঠমঙ্গলিকা সুতমঙ্গলিকা মুতমঙ্গলিকাতি তিস্সোপি পরিসা হুত্ৰা অঞ্ঞমঞ্ঞং সঞ্ঞাপেতুং নাসক্খিংসু, ভুম্মদেৰতা আদিং কত্ৰা যাৰ ব্রহ্মলোকা ‘‘ইদং মঙ্গল’’ন্তি তথতো ন জানিংসু.

সক্কো চিন্তেসি ‘‘ইমং মঙ্গলপঞ্হং সদেৰকে লোকে অঞ্ঞত্র ভগৰতা অঞ্ঞো কথেতুং সমত্থো নাম নত্থি, ভগৰন্তং উপসঙ্কমিত্ৰা ইমং পঞ্হং পুচ্ছিস্সামী’’তি. সো রত্তিভাগে সত্থারং উপসঙ্কমিত্ৰা ৰন্দিত্ৰা অঞ্জলিং পগ্গয্হ ‘‘বহূ দেৰা মনুস্সা চা’’তি পঞ্হং পুচ্ছি. অথস্স সত্থা দ্ৰাদসহি গাথাহি অট্ঠতিংস মহামঙ্গলানি কথেসি. মঙ্গলসুত্তে ৰিনিৰট্টন্তেযেৰ কোটিসতসহস্সমত্তা দেৰতা অরহত্তং পাপুণিংসু, সোতাপন্নাদীনং গণনপথো নত্থি. সক্কো মঙ্গলং সুত্ৰা সকট্ঠানমেৰ গতো. সত্থারা মঙ্গলে কথিতে সদেৰকো লোকো ‘‘সুকথিত’’ন্তি অভিনন্দি. তদা ধম্মসভাযং তথাগতস্স গুণকথং সমুট্ঠাপেসুং ‘‘আৰুসো, সত্থা অঞ্ঞেসং অৰিসযং মঙ্গলপঞ্হং সদেৰকস্স লোকস্স চিত্তং গহেত্ৰা কুক্কুচ্চং ছিন্দিত্ৰা গগনতলে চন্দং উট্ঠাপেন্তো ৰিয কথেসি, এৰং মহাপঞ্ঞো, আৰুসো, তথাগতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘অনচ্ছরিযং, ভিক্খৰে, ইদানেৰ সম্বোধিপ্পত্তস্স মম মঙ্গলপঞ্হকথনং, স্ৰাহং বোধিসত্তচরিযং চরন্তোপি দেৰমনুস্সানং কঙ্খং ছিন্দিত্ৰা মঙ্গলপঞ্হং কথেসি’’ন্তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং গামে ৰিভৰসম্পন্নস্স ব্রাহ্মণস্স কুলে নিব্বত্তি, ‘‘রক্খিতকুমারো’’তিস্স নামং অকংসু. সো ৰযপ্পত্তো তক্কসিলাযং উগ্গহিতসিপ্পো কতদারপরিগ্গহো মাতাপিতূনং অচ্চযেন রতনৰিলোকনং কত্ৰা সংৰিগ্গমানসো মহাদানং পৰত্তেত্ৰা কামে পহায হিমৰন্তপদেসে পব্বজিত্ৰা ঝানাভিঞ্ঞং নিব্বত্তেত্ৰা ৰনমূলফলাহারো একস্মিং পদেসে ৰাসং কপ্পেসি. অনুপুব্বেনস্স পরিৰারো মহা অহোসি, পঞ্চ অন্তেৰাসিকসতানি অহেসুং. অথেকদিৰসং তে তাপসা বোধিসত্তং উপসঙ্কমিত্ৰা ৰন্দিত্ৰা ‘‘আচরিয, ৰস্সারত্তসমযে হিমৰন্ততো ওতরিত্ৰা লোণম্বিলসেৰনত্থায জনপদচারিকং গচ্ছাম, এৰং নো সরীরঞ্চ থিরং ভৰিস্সতি, জঙ্ঘৰিহারো চ কতো ভৰিস্সতী’’তি আহংসু. তে ‘‘তেন হি তুম্হে গচ্ছথ, অহং ইধেৰ ৰসিস্সামী’’তি ৰুত্তে তং ৰন্দিত্ৰা হিমৰন্তা ওতরিত্ৰা চারিকং চরমানা বারাণসিং পত্ৰা রাজুয্যানে ৰসিংসু. তেসং মহাসক্কারসম্মানো অহোসি. অথেকদিৰসং বারাণসিযং সন্থাগারে সন্নিপতিতে মহাজনকাযে মঙ্গলপঞ্হো সমুট্ঠাতি. সব্বং পচ্চুপ্পন্নৰত্থুনযেনেৰ ৰেদিতব্বং.

তদা পন মনুস্সানং কঙ্খং ছিন্দিত্ৰা মঙ্গলপঞ্হং কথেতুং সমত্থং অপস্সন্তো মহাজনো উয্যানং গন্ত্ৰা ইসিগণং মঙ্গলপঞ্হং পুচ্ছি. ইসযো রাজানং আমন্তেত্ৰা ‘‘মহারাজ, মযং এতং কথেতুং ন সক্খিস্সাম, অপিচ খো অম্হাকং আচরিযো রক্খিততাপসো নাম মহাপঞ্ঞো হিমৰন্তে ৰসতি, সো সদেৰকস্স লোকস্স চিত্তং গহেত্ৰা এতং মঙ্গলপঞ্হং কথেস্সতী’’তি ৰদিংসু. রাজা ‘‘ভন্তে, হিমৰন্তো নাম দূরে দুগ্গমোৰ, ন সক্খিস্সাম মযং তত্থ গন্তুং, সাধু ৰত তুম্হেযেৰ আচরিযস্স সন্তিকং গন্ত্ৰা পুচ্ছিত্ৰা উগ্গণ্হিত্ৰা পুনাগন্ত্ৰা অম্হাকং কথেথা’’তি আহ. তে ‘‘সাধূ’’তি সম্পটিচ্ছিত্ৰা আচরিযস্স সন্তিকং গন্ত্ৰা ৰন্দিত্ৰা কতপটিসন্থারা আচরিযেন রঞ্ঞো ধম্মিকভাৰে জনপদচারিত্তে চ পুচ্ছিতে তং দিট্ঠমঙ্গলাদীনং উপ্পত্তিং আদিতো পট্ঠায কথেত্ৰা রঞ্ঞো যাচনায চ অত্তনো পঞ্হসৰনত্থং আগতভাৰং পকাসেত্ৰা ‘‘সাধু নো ভন্তে, মঙ্গলপঞ্হং পাকটং কত্ৰা কথেথা’’তি যাচিংসু. ততো জেট্ঠন্তেৰাসিকো আচরিযং পুচ্ছন্তো পঠমং গাথমাহ –

১৫৫.

‘‘কিংসু নরো জপ্পমধিচ্চ কালে, কং ৰা ৰিজ্জং কতমং ৰা সুতানং;

সো মচ্চো অস্মিঞ্চ পরম্হি লোকে, কথং করো সোত্থানেন গুত্তো’’তি.

তত্থ কালেতি মঙ্গলপত্থনকালে. ৰিজ্জন্তি ৰেদং. সুতানন্তি সিক্খিতব্বযুত্তকপরিযত্তীনং. অস্মিঞ্চাতি এত্থ চাতি নিপাতমত্তং. সোত্থানেনাতি সোত্থিভাৰাৰহেন মঙ্গলেন. ইদং ৰুত্তং হোতি – ‘‘আচরিয, পুরিসো মঙ্গলং ইচ্ছন্তো মঙ্গলকালে কিংসু নাম জপ্পন্তো তীসু ৰেদেসু কতরং ৰা ৰেদং কতরং ৰা সুতানং অন্তরে সুতপরিযত্তিং অধীযিত্ৰা সো মচ্চো ইমস্মিঞ্চ লোকে পরম্হি চ কথং করো এতেসু জপ্পাদীসু কিং কেন নিযামেন করোন্তো সোত্থানেন নিরপরাধমঙ্গলেন গুত্তো রক্খিতো হোতি, তং উভযলোকহিতং গহেত্ৰা ঠিতমঙ্গলং অম্হাকং কথেহী’’তি.

এৰং জেট্ঠন্তেৰাসিকেন মঙ্গলপঞ্হং পুট্ঠো মহাসত্তো দেৰমনুস্সানং কঙ্খং ছিন্দন্তো ‘‘ইদঞ্চিদঞ্চ মঙ্গল’’ন্তি বুদ্ধলীল়ায মঙ্গলং কথেন্তো আহ –

১৫৬.

‘‘যস্স দেৰা পিতরো চ সব্বে, সরীসপা সব্বভূতানি চাপি;

মেত্তায নিচ্চং অপচিতানি হোন্তি, ভূতেসু ৰে সোত্থানং তদাহূ’’তি.

তত্থ যস্সাতি যস্স পুগ্গলস্স. দেৰাতি ভুম্মদেৰে আদিং কত্ৰা সব্বেপি কামাৰচরদেৰা. পিতরো চাতি ততুত্তরি রূপাৰচরব্রহ্মানো. সরীসপাতি দীঘজাতিকা. সব্বভূতানি চাপীতি ৰুত্তাৰসেসানি চ সব্বানিপি ভূতানি. মেত্তায নিচ্চং অপচিতানি হোন্তীতি এতে সব্বে সত্তা দসদিসাফরণৰসেন পৰত্তায অপ্পনাপ্পত্তায মেত্তাভাৰনায অপচিতা হোন্তি. ভূতেসু ৰেতি তং তস্স পুগ্গলস্স সব্বসত্তেসু সোত্থানং নিরন্তরং পৰত্তং নিরপরাধমঙ্গলং আহু. মেত্তাৰিহারী হি পুগ্গলো সব্বেসং পিযো হোতি পরূপক্কমেন অৰিকোপিযো. ইতি সো ইমিনা মঙ্গলেন রক্খিতো গোপিতো হোতীতি.

ইতি মহাসত্তো পঠমং মঙ্গলং কথেত্ৰা দুতিযাদীনি কথেন্তো –

১৫৭.

‘‘যো সব্বলোকস্স নিৰাতৰুত্তি, ইত্থীপুমানং সহদারকানং;

খন্তা দুরুত্তানমপ্পটিকূলৰাদী, অধিৰাসনং সোত্থানং তদাহু.

১৫৮.

‘‘যো নাৰজানাতি সহাযমত্তে, সিপ্পেন কুল্যাহি ধনেন জচ্চা;

রুচিপঞ্ঞো অত্থকালে মতীমা, সহাযেসু ৰে সোত্থানং তদাহু.

১৫৯.

‘‘মিত্তানি ৰে যস্স ভৰন্তি সন্তো, সংৰিস্সত্থা অৰিসংৰাদকস্স;

ন মিত্তদুব্ভী সংৰিভাগী ধনেন, মিত্তেসু ৰে সোত্থানং তদাহু.

১৬০.

‘‘যস্স ভরিযা তুল্যৰযা সমগ্গা, অনুব্বতা ধম্মকামা পজাতা;

কোলিনিযা সীলৰতী পতিব্বতা, দারেসু ৰে সোত্থানং তদাহু.

১৬১.

‘‘যস্স রাজা ভূতপতি যসস্সী, জানাতি সোচেয্যং পরক্কমঞ্চ;

অদ্ৰেজ্ঝতা সুহদযং মমন্তি, রাজূসু ৰে সোত্থানং তদাহু.

১৬২.

‘‘অন্নঞ্চ পানঞ্চ দদাতি সদ্ধো, মালঞ্চ গন্ধঞ্চ ৰিলেপনঞ্চ;

পসন্নচিত্তো অনুমোদমানো, সগ্গেসু ৰে সোত্থানং তদাহু.

১৬৩.

‘‘যমরিযধম্মেন পুনন্তি ৰুদ্ধা, আরাধিতা সমচরিযায সন্তো;

বহুস্সুতা ইসযো সীলৰন্তো, অরহন্তমজ্ঝে সোত্থানং তদাহূ’’তি. –

ইমা গাথা অভাসি.

তত্থ নিৰাতৰুত্তীতি মুদুচিত্ততায সব্বলোকস্স নীচৰুত্তি হোতি. খন্তা দুরুত্তানন্তি পরেহি ৰুত্তানং দুট্ঠৰচনানং অধিৰাসকো হোতি. অপ্পটিকূলৰাদীতি ‘‘অক্কোচ্ছি মং, অৰধি ম’’ন্তি যুগগ্গাহং অকরোন্তো অনুকূলমেৰ ৰদতি. অধিৰাসনন্তি ইদং অধিৰাসনং তস্স সোত্থানং নিরপরাধমঙ্গলং পণ্ডিতা ৰদন্তি.

সহাযমত্তেতি সহাযে চ সহাযমত্তে চ. তত্থ সহপংসুকীল়িতা সহাযা নাম, দস দ্ৰাদস ৰস্সানি একতো ৰুত্থা সহাযমত্তা নাম, তে সব্বেপি ‘‘অহং সিপ্পৰা, ইমে নিসিপ্পা’’তি এৰং সিপ্পেন ৰা ‘‘অহং কুলীনো, ইমে ন কুলীনা’’তি এৰং কুলসম্পত্তিসঙ্খাতাহি কুল্যাহি ৰা, ‘‘অহং অড্ঢো, ইমে দুগ্গতা’’তি এৰং ধনেন ৰা, ‘‘অহং জাতিসম্পন্নো, ইমে দুজ্জাতা’’তি এৰং জচ্চা ৰা নাৰজানাতি. রুচিপঞ্ঞোতি সাধুপঞ্ঞো সুন্দরপঞ্ঞো. অত্থকালেতি কস্সচিদেৰ অত্থস্স কারণস্স উপ্পন্নকালে. মতীমাতি তং তং অত্থং পরিচ্ছিন্দিত্ৰা ৰিচারণসমত্থতায মতিমা হুত্ৰা তে সহাযে নাৰজানাতি. সহাযেসূতি তং তস্স অনৰজাননং সহাযেসু সোত্থানং নামাতি পোরাণকপণ্ডিতা আহু. তেন হি সো নিরপরাধমঙ্গলেন ইধলোকে চ পরলোকে চ গুত্তো হোতি. তত্থ পণ্ডিতে সহাযে নিস্সায সোত্থিভাৰো কুসনাল়িজাতকেন (জা. ১.১.১২১ আদযো) কথেতব্বো.

সন্তোতি পণ্ডিতা সপ্পুরিসা যস্স মিত্তানি ভৰন্তি. সংৰিস্সত্থাতি ঘরং পৰিসিত্ৰা ইচ্ছিতিচ্ছিতস্সেৰ গহণৰসেন ৰিস্সাসমাপন্না. অৰিসংৰাদকস্সাতি অৰিসংৰাদনসীলস্স. ন মিত্তদুব্ভীতি যো চ মিত্তদুব্ভী ন হোতি. সংৰিভাগী ধনেনাতি অত্তনো ধনেন মিত্তানং সংৰিভাগং করোতি. মিত্তেসূতি মিত্তে নিস্সায লদ্ধব্বং তস্স তং মিত্তেসু সোত্থানং নাম হোতি. সো হি এৰরূপেহি মিত্তেহি রক্খিতো সোত্থিং পাপুণাতি. তত্থ মিত্তে নিস্সায সোত্থিভাৰো মহাউক্কুসজাতকাদীহি (জা. ১.১৪.৪৪ আদযো) কথেতব্বো.

তুল্যৰযাতি সমানৰযা. সমগ্গাতি সমগ্গৰাসা. অনুব্বতাতি অনুৰত্তিতা. ধম্মকামাতি তিৰিধসুচরিতধম্মং রোচেতি. পজাতাতি ৰিজাযিনী, ন ৰঞ্ঝা. দারেসূতি এতেহি সীলগুণেহি সমন্নাগতে মাতুগামে গেহে ৰসন্তে সামিকস্স সোত্থি হোতীতি পণ্ডিতা কথেন্তি. তত্থ সীলৰন্তং মাতুগামং নিস্সায সোত্থিভাৰো মণিচোরজাতক- (জা. ১.২.৮৭ আদযো) সম্বূলজাতক- (জা. ১.১৬.২৯৭ আদযো) খণ্ডহালজাতকেহি (জা. ২.২২.৯৮২ আদযো) কথেতব্বো.

সোচেয্যন্তি সুচিভাৰং. অদ্ৰেজ্ঝতাতি অদ্ৰেজ্ঝতায ন এস মযা সদ্ধিং ভিজ্জিত্ৰা দ্ৰিধা ভৰিস্সতীতি এৰং অদ্ৰেজ্ঝভাৰেন যং জানাতি. সুহদযং মমন্তি সুহদো অযং মমন্তি চ যং জানাতি. রাজূসু ৰেতি এৰং রাজূসু সেৰকানং সোত্থানং নামাতি পণ্ডিতা কথেন্তি. দদাতি সদ্ধোতি কম্মঞ্চ ফলঞ্চ সদ্দহিত্ৰা দদাতি. সগ্গেসু ৰেতি এৰং সগ্গে দেৰলোকে সোত্থানং নিরপরাধমঙ্গলন্তি পণ্ডিতা কথেন্তি, তং পেতৰত্থুৰিমানৰত্থূহি ৰিত্থারেত্ৰা কথেতব্বং.

পুনন্তি ৰুদ্ধাতি যং পুগ্গলং ঞাণৰুদ্ধা অরিযধম্মেন পুনন্তি পরিসোধেন্তি. সমচরিযাযাতি সম্মাপটিপত্তিযা. বহুস্সুতাতি পটিৰেধবহুস্সুতা. ইসযোতি এসিতগুণা. সীলৰন্তোতি অরিযসীলেন সমন্নাগতা. অরহন্তমজ্ঝেতি অরহন্তানং মজ্ঝে পটিলভিতব্বং তং সোত্থানন্তি পণ্ডিতা কথেন্তি. অরহন্তো হি অত্তনা পটিৰিদ্ধমগ্গং আচিক্খিত্ৰা পটিপাদেন্তা আরাধকং পুগ্গলং অরিযমগ্গেন পুনন্তি, সোপি অরহাৰ হোতি.

এৰং মহাসত্তো অরহত্তেন দেসনায কূটং গণ্হন্তো অট্ঠহি গাথাহি অট্ঠ মহামঙ্গলানি কথেত্ৰা তেসঞ্ঞেৰ মঙ্গলানং থুতিং করোন্তো ওসানগাথমাহ –

১৬৪.

‘‘এতানি খো সোত্থানানি লোকে, ৰিঞ্ঞুপ্পসত্থানি সুখুদ্রযানি;

তানীধ সেৰেথ নরো সপঞ্ঞো, ন হি মঙ্গলে কিঞ্চনমত্থি সচ্চ’’ন্তি.

তত্থ ন হি মঙ্গলেতি তস্মিং পন দিট্ঠসুতমুতপ্পভেদে মঙ্গলে কিঞ্চনং একমঙ্গলম্পি সচ্চং নাম নত্থি, নিব্বানমেৰ পনেকং পরমত্থসচ্চন্তি.

ইসযো তানি মঙ্গলানি সুত্ৰা সত্তট্ঠদিৰসচ্চযেন আচরিযং আপুচ্ছিত্ৰা তত্থেৰ অগমংসু. রাজা তেসং সন্তিকং গন্ত্ৰা পুচ্ছি. তে তস্স আচরিযেন কথিতনিযামেন মঙ্গলপঞ্হং কথেত্ৰা হিমৰন্তমেৰ আগমংসু. ততো পট্ঠায লোকে মঙ্গলং পাকটং অহোসি. মঙ্গলেসু ৰত্তিত্ৰা মতমতা সগ্গপথং পূরেসুং. বোধিসত্তো চত্তারো ব্রহ্মৰিহারে ভাৰেত্ৰা ইসিগণং আদায ব্রহ্মলোকে নিব্বত্তি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপাহং মঙ্গলপঞ্হং কথেসি’’ন্তি ৰত্ৰা জাতকং সমোধানেসি – ‘‘তদা ইসিগণো বুদ্ধপরিসা অহোসি, মঙ্গলপঞ্হপুচ্ছকো জেট্ঠন্তেৰাসিকো সারিপুত্তো, আচরিযো পন অহমেৰ অহোসি’’ন্তি.

মহামঙ্গলজাতকৰণ্ণনা পন্নরসমা.

[৪৫৪] ১৬. ঘটপণ্ডিতজাতকৰণ্ণনা

উট্ঠেহি কণ্হাতি ইদং সত্থা জেতৰনে ৰিহরন্তো মতপুত্তং কুটুম্বিকং আরব্ভ কথেসি. ৰত্থু মট্ঠকুণ্ডলিসদিসমেৰ. ইধ পন সত্থা তং উপাসকং ‘‘কিং, উপাসক, সোচসী’’তি ৰত্ৰা ‘‘আম, ভন্তে’’ন্তি ৰুত্তে ‘‘উপাসক, পোরাণকপণ্ডিতা পণ্ডিতানং কথং সুত্ৰা মতপুত্তং নানুসোচিংসূ’’তি ৰত্ৰা তেন যাচিতো অতীতং আহরি.

অতীতে উত্তরপথে কংসভোগে অসিতঞ্জননগরে মহাকংসো নাম রাজা রজ্জং কারেসি. তস্স কংসো চ, উপকংসো চাতি দ্ৰে পুত্তা অহেসুং, দেৰগব্ভা নাম একা ধীতা. তস্সা জাতদিৰসে নেমিত্তকা ব্রাহ্মণা ‘‘এতিস্সা কুচ্ছিযং নিব্বত্তপুত্তা কংসগোত্তং কংসৰংসং নাসেস্সন্তী’’তি ব্যাকরিংসু. রাজা বলৰসিনেহেন ধীতরং ৰিনাসেতুং নাসক্খি, ‘‘ভাতরো জানিস্সন্তী’’তি যাৰতাযুকং ঠত্ৰা কালমকাসি. তস্মিং কালকতে কংসো রাজা অহোসি, উপকংসো উপরাজা. তে চিন্তযিংসু ‘‘সচে মযং ভগিনিং নাসেস্সাম, গারয্হা ভৰিস্সাম, এতং কস্সচি অদত্ৰা নিস্সামিকং কত্ৰা পটিজগ্গিস্সামা’’তি. তে একথূণকং পাসাদং কারেত্ৰা তং তত্থ ৰসাপেসুং. নন্দিগোপা নাম তস্সা পরিচারিকা অহোসি. অন্ধকৰেণ্ডো নাম দাসো তস্সা সামিকো আরক্খমকাসি.

তদা উত্তরমধুরায মহাসাগরো নাম রাজা রজ্জং কারেসি. তস্স সাগরো, উপসাগরো চাতি দ্ৰে পুত্তা অহেসুং. তেসু পিতু অচ্চযেন সাগরো রাজা অহোসি, উপসাগরো উপরাজা. সো উপকংসস্স সহাযকো একাচরিযকুলে একতো উগ্গহিতসিপ্পো. সো সাগরস্স ভাতু অন্তেপুরে দুব্ভিত্ৰা ভাযমানো পলাযিত্ৰা কংসভোগে উপকংসস্স সন্তিকং অগমাসি. উপকংসো তং রঞ্ঞো দস্সেসি, রাজা তস্স মহন্তং যসং অদাসি. সো রাজুপট্ঠানং গচ্ছন্তো দেৰগব্ভায নিৰাসং একথম্ভং পাসাদং দিস্ৰা ‘‘কস্সেসো নিৰাসো’’তি পুচ্ছিত্ৰা তং কারণং সুত্ৰা দেৰগব্ভায পটিবদ্ধচিত্তো অহোসি. দেৰগব্ভাপি একদিৰসং তং উপকংসেন সদ্ধিং রাজুপট্ঠানং আগচ্ছন্তং দিস্ৰা ‘‘কো এসো’’তি পুচ্ছিত্ৰা ‘‘মহাসাগরস্স পুত্তো উপসাগরো নামা’’তি নন্দিগোপায সন্তিকা সুত্ৰা তস্মিং পটিবদ্ধচিত্তা অহোসি. উপসাগরো নন্দিগোপায লঞ্জং দত্ৰা ‘‘ভগিনি, সক্খিস্সসি মে দেৰগব্ভং দস্সেতু’’ন্তি আহ. সা ‘‘ন এতং সামি, গরুক’’ন্তি ৰত্ৰা তং কারণং দেৰগব্ভায আরোচেসি. সা পকতিযাৰ তস্মিং পটিবদ্ধচিত্তা তং ৰচনং সুত্ৰা ‘‘সাধূ’’তি সম্পটিচ্ছিত্ৰা নন্দিগোপা উপসাগরস্স সঞ্ঞং দত্ৰা রত্তিভাগে তং পাসাদং আরোপেসি. সো দেৰগব্ভায সদ্ধিং সংৰাসং কপ্পেসি. অথ নেসং পুনপ্পুনং সংৰাসেন দেৰগব্ভা গব্ভং পটিলভি.

অপরভাগে তস্সা গব্ভপতিট্ঠানং পাকটং অহোসি. ভাতরো নন্দিগোপং পুচ্ছিংসু, সা অভযং যাচিত্ৰা তং অন্তরং কথেসি. তে সুত্ৰা ‘‘ভগিনিং নাসেতুং ন সক্কা, সচে ধীতরং ৰিজাযিস্সতি, তম্পি ন নাসেস্সাম, সচে পন পুত্তো ভৰিস্সতি, নাসেস্সামা’’তি চিন্তেত্ৰা দেৰগব্ভং উপসাগরস্সেৰ অদংসু. সা পরিপুণ্ণগব্ভা ধীতরং ৰিজাযি. ভাতরো সুত্ৰা হট্ঠতুট্ঠা তস্সা ‘‘অঞ্জনদেৰী’’তি নামং করিংসু. তেসং ভোগৰড্ঢমানং নাম ভোগগামং অদংসু. উপসাগরো দেৰগব্ভং গহেত্ৰা ভোগৰড্ঢমানগামে ৰসি. দেৰগব্ভায পুনপি গব্ভো পতিট্ঠাসি, নন্দিগোপাপি তং দিৰসমেৰ গব্ভং পটিলভি. তাসু পরিপুণ্ণগব্ভাসু একদিৰসমেৰ দেৰগব্ভা পুত্তং ৰিজাযি, নন্দিগোপা ধীতরং ৰিজাযি. দেৰগব্ভা পুত্তস্স ৰিনাসনভযেন পুত্তং নন্দিগোপায রহস্সেন পেসেত্ৰা তস্সা ধীতরং আহরাপেসি. তস্সা ৰিজাতভাৰং ভাতিকানং আরোচেসুং. তে ‘‘পুত্তং ৰিজাতা, ধীতর’’ন্তি পুচ্ছিত্ৰা ‘‘ধীতর’’ন্তি ৰুত্তে ‘‘তেন হি পোসেথা’’তি আহংসু. এতেনুপাযেন দেৰগব্ভা দস পুত্তে ৰিজাযি, দস ধীতরো নন্দিগোপা ৰিজাযি. দস পুত্তা নন্দিগোপায সন্তিকে ৰড্ঢন্তি, ধীতরো দেৰগব্ভায. তং অন্তরং কোচি ন জানাতি. দেৰগব্ভায জেট্ঠপুত্তো ৰাসুদেৰো নাম অহোসি, দুতিযো বলদেৰো, ততিযো চন্দদেৰো, চতুত্থো সূরিযদেৰো, পঞ্চমো অগ্গিদেৰো, ছট্ঠো ৰরুণদেৰো, সত্তমো অজ্জুনো, অট্ঠমো পজ্জুনো, নৰমো ঘটপণ্ডিতো, দসমো অঙ্কুরো নাম অহোসি. তে অন্ধকৰেণ্ডদাসপুত্তা দস ভাতিকা চেটকাতি পাকটা অহেসুং.

তে অপরভাগে ৰুদ্ধিমন্ৰায থামবলসম্পন্না কক্খল়া ফরুসা হুত্ৰা ৰিলোপং করোন্তা ৰিচরন্তি, রঞ্ঞো গচ্ছন্তে পণ্ণাকারেপি ৰিলুম্পন্তেৰ. মনুস্সা সন্নিপতিত্ৰা ‘‘অন্ধকৰেণ্ডদাসপুত্তা দস ভাতিকা রট্ঠং ৰিলুম্পন্তী’’তি রাজঙ্গণে উপক্কোসিংসু. রাজা অন্ধকৰেণ্ডং পক্কোসাপেত্ৰা ‘‘কস্মা পুত্তেহি ৰিলোপং কারাপেসী’’তি তজ্জেসি. এৰং দুতিযম্পি ততিযম্পি মনুস্সেহি উপক্কোসে কতে রাজা তং সন্তজ্জেসি. সো মরণভযভীতো রাজানং অভযং যাচিত্ৰা ‘‘দেৰ, এতে ন ময্হং পুত্তা, উপসাগরস্স পুত্তা’’তি তং অন্তরং আরোচেসি. রাজা ভীতো ‘‘কেন তে উপাযেন গণ্হামা’’তি অমচ্চে পুচ্ছিত্ৰা ‘‘এতে, দেৰ, মল্লযুদ্ধৰিত্তকা, নগরে যুদ্ধং কারেত্ৰা তত্থ নে যুদ্ধমণ্ডলং আগতে গাহাপেত্ৰা মারেস্সামা’’তি ৰুত্তে চারুরঞ্চ, মুট্ঠিকঞ্চাতি দ্ৰে মল্লে পোসেত্ৰা ‘‘ইতো সত্তমে দিৰসে যুদ্ধং ভৰিস্সতী’’তি নগরে ভেরিং চরাপেত্ৰা রাজঙ্গণে যুদ্ধমণ্ডলং সজ্জাপেত্ৰা অক্খৰাটং কারেত্ৰা যুদ্ধমণ্ডলং অলঙ্কারাপেত্ৰা ধজপটাকং বন্ধাপেসি. সকলনগরং সঙ্খুভি. চক্কাতিচক্কং মঞ্চাতিমঞ্চং বন্ধিত্ৰা চারুরমুট্ঠিকা যুদ্ধমণ্ডলং আগন্ত্ৰা ৰগ্গন্তা গজ্জন্তা অপ্ফোটেন্তা ৰিচরিংসু. দস ভাতিকাপি আগন্ত্ৰা রজকৰীথিং ৰিলুম্পিত্ৰা ৰণ্ণসাটকে নিৰাসেত্ৰা গন্ধাপণেসু গন্ধং, মালাকারাপণেসু মালং ৰিলুম্পিত্ৰা ৰিলিত্তগত্তা মালধারিনো কতকণ্ণপূরা ৰগ্গন্তা গজ্জন্তা অপ্ফোটেন্তা যুদ্ধমণ্ডলং পৰিসিংসু.

তস্মিং খণে চারুরো অপ্ফোটেন্তো ৰিচরতি. বলদেৰো তং দিস্ৰা ‘‘ন নং হত্থেন ছুপিস্সামী’’তি হত্থিসালতো মহন্তং হত্থিযোত্তং আহরিত্ৰা ৰগ্গিত্ৰা গজ্জিত্ৰা যোত্তং খিপিত্ৰা চারুরং উদরে ৰেঠেত্ৰা দ্ৰে যোত্তকোটিযো একতো কত্ৰা ৰত্তেত্ৰা উক্খিপিত্ৰা সীসমত্থকে ভমেত্ৰা ভূমিযং পোথেত্ৰা বহি অক্খৰাটে খিপি. চারুরে মতে রাজা মুট্ঠিকমল্লং আণাপেসি. সো উট্ঠায ৰগ্গিত্ৰা গজ্জিত্ৰা অপ্ফোটেসি. বলদেৰো তং পোথেত্ৰা অট্ঠীনি সঞ্চুণ্ণেত্ৰা ‘‘অমল্লোম্হি, অমল্লোম্হী’’তি ৰদন্তমেৰ ‘‘নাহং তৰ মল্লভাৰং ৰা অমল্লভাৰং ৰা জানামী’’তি হত্থে গহেত্ৰা ভূমিযং পোথেত্ৰা জীৰিতক্খযং পাপেত্ৰা বহি অক্খৰাটে খিপি. মুট্ঠিকো মরন্তো ‘‘যক্খো হুত্ৰা তং খাদিতুং লভিস্সামী’’তি পত্থনং পট্ঠপেসি. সো কালমত্তিকঅটৰিযং নাম যক্খো হুত্ৰা নিব্বত্তি. রাজা ‘‘গণ্হথ দস ভাতিকে চেটকে’’তি উট্ঠহি. তস্মিং খণে ৰাসুদেৰো চক্কং খিপি. তং দ্ৰিন্নম্পি ভাতিকানং সীসানি পাতেসি. মহাজনো ভীততসিতো ‘‘অৰস্সযা নো হোথা’’তি তেসং পাদেসু পতিত্ৰা নিপজ্জি. তে দ্ৰেপি মাতুলে মারেত্ৰা অসিতঞ্জননগরে রজ্জং গহেত্ৰা মাতাপিতরো তত্থ কত্ৰা ‘‘সকলজম্বুদীপে রজ্জং গণ্হিস্সামা’’তি নিক্খমিত্ৰা অনুপুব্বেন কালযোনকরঞ্ঞো নিৰাসং অযুজ্ঝনগরং গন্ত্ৰা তং পরিক্খিপিত্ৰা ঠিতং পরিখারুক্খগহনং ৰিদ্ধংসেত্ৰা পাকারং ভিন্দিত্ৰা রাজানং গহেত্ৰা তং রজ্জং অত্তনো হত্থগতং কত্ৰা দ্ৰারৰতিং পাপুণিংসু. তস্স পন নগরস্স একতো সমুদ্দো একতো পব্বতো, অমনুস্সপরিগ্গহিতং কির তং অহোসি.

তস্স আরক্খং গহেত্ৰা ঠিতযক্খো পচ্চামিত্তে দিস্ৰা গদ্রভৰেসেন গদ্রভরৰং রৰতি. তস্মিং খণে যক্খানুভাৰেন সকলনগরং উপ্পতিত্ৰা মহাসমুদ্দে একস্মিং দীপকে তিট্ঠতি. পচ্চামিত্তেসু গতেসু পুনাগন্ত্ৰা সকট্ঠানেযেৰ পতিট্ঠাতি. তদাপি সো গদ্রভো তেসং দসন্নং ভাতিকানং আগমনং ঞত্ৰা গদ্রভরৰং রৰি. নগরং উপ্পতিত্ৰা দীপকে পতিট্ঠায তেসু নগরং অদিস্ৰা নিৰত্তন্তেসু পুনাগন্ত্ৰা সকট্ঠানে পতিট্ঠাসি. তে পুন নিৰত্তিংসু, পুনপি গদ্রভো তথেৰ অকাসি. তে দ্ৰারৰতিনগরে রজ্জং গণ্হিতুং অসক্কোন্তা কণ্হদীপাযনস্স ইসিনো সন্তিকং গন্ত্ৰা ৰন্দিত্ৰা ‘‘ভন্তে, মযং দ্ৰারৰতিযং রজ্জং গহেতুং ন সক্কোম, একং নো উপাযং করোথা’’তি পুচ্ছিত্ৰা ‘‘পরিখাপিট্ঠে অসুকস্মিং নাম ঠানে একো গদ্রভো চরতি. সো হি অমিত্তে দিস্ৰা ৰিরৰতি, তস্মিং খণে নগরং উপ্পতিত্ৰা গচ্ছতি, তুম্হে তস্স পাদে গণ্হথ, অযং ৰো নিপ্ফজ্জনূপাযো’’তি ৰুত্তে তাপসং ৰন্দিত্ৰা গন্ত্ৰা গদ্রভস্স পাদেসু গহেত্ৰা নিপতিত্ৰা ‘‘সামি, ঠপেত্ৰা তুম্হে অঞ্ঞো অম্হাকং অৰস্সযো নত্থি, অম্হাকং নগরং গণ্হনকালে মা রৰিত্থা’’তি যাচিংসু. গদ্রভো ‘‘ন সক্কা ন ৰিরৰিতুং, তুম্হে পন পঠমতরং আগন্ত্ৰা চত্তারো জনা মহন্তানি অযনঙ্গলানি গহেত্ৰা চতূসু নগরদ্ৰারেসু মহন্তে অযখাণুকে ভূমিযং আকোটেত্ৰা নগরস্স উপ্পতনকালে নঙ্গলানি গহেত্ৰা নঙ্গলবদ্ধং অযসঙ্খলিকং অযখাণুকে বন্ধেয্যাথ, নগরং উপ্পতিতুং ন সক্খিস্সতী’’তি আহ.

তে ‘‘সাধূ’’তি ৰত্ৰা তস্মিং অৰিরৰন্তেযেৰ নঙ্গলানি আদায চতূসু নগরদ্ৰারেসু খাণুকে ভূমিযং আকোটেত্ৰা অট্ঠংসু. তস্মিং খণে গদ্রভো ৰিরৰি, নগরং উপ্পতিতুমারভি. চতূসু দ্ৰারেসু ঠিতা চতূহি অযনঙ্গলেহি গহেত্ৰা নঙ্গলবদ্ধা অযসঙ্খলিকা খাণুকেসু বন্ধিংসু, নগরং উপ্পতিতুং নাসক্খি. দস ভাতিকা ততো নগরং পৰিসিত্ৰা রাজানং মারেত্ৰা রজ্জং গণ্হিংসু. এৰং তে সকলজম্বুদীপে তেসট্ঠিযা নগরসহস্সেসু সব্বরাজানো চক্কেন জীৰিতক্খযং পাপেত্ৰা দ্ৰারৰতিযং ৰসমানা রজ্জং দস কোট্ঠাসে কত্ৰা ৰিভজিংসু, ভগিনিং পন অঞ্জনদেৰিং ন সরিংসু. ততো পুন ‘‘একাদস কোট্ঠাসে করোমা’’তি ৰুত্তে অঙ্কুরো ‘‘মম কোট্ঠাসং তস্সা দেথ, অহং ৰোহারং কত্ৰা জীৰিস্সামি, কেৰলং তুম্হে অত্তনো জনপদে ময্হং সুঙ্কং ৰিস্সজ্জেথা’’তি আহ. তে ‘‘সাধূ’’তি সম্পটিচ্ছিত্ৰা তস্স কোট্ঠাসং ভগিনিযা দত্ৰা সদ্ধিং তায নৰ রাজানো দ্ৰারৰতিযং ৰসিংসু. অঙ্কুরো পন ৰণিজ্জমকাসি. এৰং তেসু অপরাপরং পুত্তধীতাহি ৰড্ঢমানেসু অদ্ধানে গতে মাতাপিতরো কালমকংসু.

তদা কির মনুস্সানং ৰীসতিৰস্সসহস্সাযুককালো অহোসি. তদা ৰাসুদেৰমহারাজস্স একো পুত্তো কালমকাসি. রাজা সোকপরেতো সব্বকিচ্চানি পহায মঞ্চস্স অটনিং পরিগ্গহেত্ৰা ৰিলপন্তো নিপজ্জি. তস্মিং কালে ঘটপণ্ডিতো চিন্তেসি ‘‘ঠপেত্ৰা মং অঞ্ঞো কোচি মম ভাতু সোকং হরিতুং সমত্থো নাম নত্থি, উপাযেনস্স সোকং হরিস্সামী’’তি. সো উম্মত্তকৰেসং গহেত্ৰা ‘‘সসং মে দেথ, সসং মে দেথা’’তি আকাসং উল্লোকেন্তো সকলনগরং ৰিচরি. ‘‘ঘটপণ্ডিতো উম্মত্তকো জাতো’’তি সকলনগরং সঙ্খুভি. তস্মিং কালে রোহিণেয্যো নাম অমচ্চো ৰাসুদেৰরঞ্ঞো সন্তিকং গন্ত্ৰা তেন সদ্ধিং কথং সমুট্ঠাপেন্তো পঠমং গাথমাহ –

১৬৫.

‘‘উট্ঠেহি কণ্হ কিং সেসি, কো অত্থো সুপনেন তে;

যোপি তুয্হং সকো ভাতা, হদযং চক্খু চ দক্খিণং;

তস্স ৰাতা বলীযন্তি, ঘটো জপ্পতি কেসৰা’’তি.

তত্থ কণ্হাতি গোত্তেনালপতি, কণ্হাযনগোত্তো কিরেস. কো অত্থোতি কতরা নাম ৰড্ঢি. হদযং চক্খু চ দক্খিণন্তি হদযেন চেৰ দক্খিণচক্খুনা চ সমানোতি অত্থো. তস্স ৰাতা বলীযন্তীতি তস্স হদযং অপস্মারৰাতা অৰত্থরন্তীতি অত্থো. জপ্পতীতি ‘‘সসং মে দেথা’’তি ৰিপ্পলপতি. কেসৰাতি সো কির কেসসোভনতায ‘‘কেসৰা’’তি পঞ্ঞাযিত্থ, তেন তং নামেনালপতি.

এৰং অমচ্চেন ৰুত্তে তস্স উম্মত্তকভাৰং ঞত্ৰা সত্থা অভিসম্বুদ্ধো হুত্ৰা দুতিযং গাথমাহ –

১৬৬.

‘‘তস্স তং ৰচনং সুত্ৰা, রোহিণেয্যস্স কেসৰো;

তরমানরূপো ৰুট্ঠাসি, ভাতুসোকেন অট্টিতো’’তি.

রাজা উট্ঠায সীঘং পাসাদা ওতরিত্ৰা ঘটপণ্ডিতস্স সন্তিকং গন্ত্ৰা উভোসু হত্থেসু দল়্হং গহেত্ৰা তেন সদ্ধিং সল্লপন্তো ততিযং গাথমাহ –

১৬৭.

‘‘কিং নু উম্মত্তরূপোৰ, কেৰলং দ্ৰারকং ইমং;

সসো সসোতি লপসি, কো নু তে সসমাহরী’’তি.

তত্থ কেৰলং দ্ৰারকং ইমন্তি কস্মা উম্মত্তকো ৰিয হুত্ৰা সকলং ইমং দ্ৰারৰতিনগরং ৰিচরন্তো ‘‘সসো সসো’’তি লপসি. কো তৰ সসং হরি, কেন তে সসো গহিতোতি পুচ্ছতি.

সো রঞ্ঞা এৰং ৰুত্তেপি পুনপ্পুনং তদেৰ ৰচনং ৰদতি. রাজা পুন দ্ৰে গাথা অভাসি –

১৬৮.

‘‘সোৰণ্ণমযং মণীমযং, লোহমযং অথ রূপিযামযং;

সঙ্খসিলাপৰাল়মযং, কারযিস্সামি তে সসং.

১৬৯.

‘‘সন্তি অঞ্ঞেপি সসকা, অরঞ্ঞে ৰনগোচরা;

তেপি তে আনযিস্সামি, কীদিসং সসমিচ্ছসী’’তি.

তত্রাযং সঙ্খেপত্থো – তেসু সুৰণ্ণমযাদীসু যং ইচ্ছসি, তং ৰদ, অহং তে কারেত্ৰা দস্সামি, অথাপি তে ন রোচেসি, অঞ্ঞেপি অরঞ্ঞে ৰনগোচরা সসকা অত্থি, তেপি তে আনযিস্সামি, ৰদ ভদ্রমুখ, কীদিসং সসমিচ্ছসীতি.

রঞ্ঞো কথং সুত্ৰা ঘটপণ্ডিতো ছট্ঠং গাথমাহ –

১৭০.

‘‘ন চাহমেতে ইচ্ছামি, যে সসা পথৰিস্সিতা;

চন্দতো সসমিচ্ছামি, তং মে ওহর কেসৰা’’তি.

তত্থ ওহরাতি ওতারেহি.

রাজা তস্স কথং সুত্ৰা ‘‘নিস্সংসযং মে ভাতা উম্মত্তকোৰ জাতো’’তি দোমনস্সপ্পত্তো সত্তমং গাথমাহ –

১৭১.

‘‘সো নূন মধুরং ঞাতি, জীৰিতং ৰিজহিস্সসি;

অপত্থিযং যো পত্থযসি, চন্দতো সসমিচ্ছসী’’তি.

তত্থ ঞাতীতি কনিট্ঠং আলপন্তো আহ. ইদং ৰুত্তং হোতি – ‘‘তাত, ময্হং পিযঞাতি সো ত্ৰং নূন অতিমধুরং অত্তনো জীৰিতং ৰিজহিস্সসি, যো অপত্থেতব্বং পত্থযসী’’তি.

ঘটপণ্ডিতো রঞ্ঞো ৰচনং সুত্ৰা নিচ্চলো ঠত্ৰা ‘‘ভাতিক, ত্ৰং চন্দতো সসকং পত্থেন্তস্স তং অলভিত্ৰা জীৰিতক্খযভাৰং জানন্তো কিং কারণা মতপুত্তং অনুসোচসী’’তি ৰত্ৰা অট্ঠমং গাথমাহ –

১৭২.

‘‘এৰং চে কণ্হ জানাসি, যদঞ্ঞমনুসাসসি;

কস্মা পুরে মতং পুত্তং, অজ্জাপি মনুসোচসী’’তি.

তত্থ এৰন্তি ইদং অলব্ভনেয্যট্ঠানং নাম ন পত্থেতব্বন্তি যদি এৰং জানাসি. যদঞ্ঞমনুসাসসীতি এৰং জানন্তোৰ যদি অঞ্ঞং অনুসাসসীতি অত্থো. পুরেতি অথ কস্মা ইতো চতুমাসমত্থকে মতপুত্তং অজ্জাপি অনুসোচসীতি ৰদতি.

এৰং সো অন্তরৰীথিযং ঠিতকোৰ ‘‘ভাতিক, অহং তাৰ পঞ্ঞাযমানং পত্থেমি, ত্ৰং পন অপঞ্ঞাযমানস্স সোচসী’’তি ৰত্ৰা তস্স ধম্মং দেসেন্তো পুন দ্ৰে গাথা অভাসি –

১৭৩.

‘‘যং ন লব্ভা মনুস্সেন, অমনুস্সেন ৰা পুন;

জাতো মে মা মরী পুত্তো, কুতো লব্ভা অলব্ভিযং.

১৭৪.

‘‘ন মন্তা মূলভেসজ্জা, ওসধেহি ধনেন ৰা;

সক্কা আনযিতুং কণ্হ, যং পেতমনুসোচসী’’তি.

তত্থ যন্তি ভাতিক যং এৰং জাতো মে পুত্তো মা মরীতি মনুস্সেন ৰা দেৰেন ৰা পুন ন লব্ভা ন সক্কা লদ্ধুং, তং ত্ৰং পত্থেসি, তদেতং কুতো লব্ভা কেন কারণেন সক্কা লদ্ধুং, ন সক্কাতি দীপেতি. কস্মা? যস্মা অলব্ভিযং, অলব্ভনেয্যট্ঠানঞ্হি নামেতন্তি অত্থো. মন্তাতি মন্তপযোগেন. মূলভেসজ্জাতি মূলভেসজ্জেন. ওসধেহীতি নানাৰিধোসধেহি. ধনেন ৰাতি কোটিসতসঙ্খ্যেনপি ধনেন ৰা. ইদং ৰুত্তং হোতি – ‘‘যং ত্ৰং পেতমনুসোচসি, তং এতেহি মন্তপযোগাদীহি আনেতুং ন সক্কা’’তি.

রাজা তং সুত্ৰা ‘‘যুত্তং, তাত, সল্লক্খিতং মে, মম সোকহরণত্থায তযা ইদং কত’’ন্তি ঘটপণ্ডিতং ৰণ্ণেন্তো চতস্সো গাথা অভাসি –

১৭৫.

‘‘যস্স এতাদিসা অস্সু, অমচ্চা পুরিসপণ্ডিতা;

যথা নিজ্ঝাপযে অজ্জ, ঘটো পুরিসপণ্ডিতো.

১৭৬.

‘‘আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

১৭৭.

‘‘অব্বহী ৰত মে সল্লং, যমাসি হদযস্সিতং;

যো মে সোকপরেতস্স, পুত্তসোকং অপানুদি.

১৭৮.

‘‘সোহং অব্বূল়্হসল্লোস্মি, ৰীতসোকো অনাৰিলো;

ন সোচামি ন রোদামি, তৰ সুত্ৰান মাণৰা’’তি.

তত্থ পঠমগাথায সঙ্খেপত্থো – যথা যেন কারণেন অজ্জ মং পুত্তসোকপরেতং ঘটো পুরিসপণ্ডিতো সোকহরণত্থায নিজ্ঝাপযে নিজ্ঝাপেসি বোধেসি. যস্স অঞ্ঞস্সপি এতাদিসা পুরিসপণ্ডিতা অমচ্চা অস্সু, তস্স কুতো সোকোতি. সেসগাথা ৰুত্তত্থাযেৰ.

অৰসানে –

১৭৯.

‘‘এৰং করোন্তি সপ্পঞ্ঞা, যে হোন্তি অনুকম্পকা;

নিৰত্তযন্তি সোকম্হা, ঘটো জেট্ঠংৰ ভাতর’’ন্তি. –

অযং অভিসম্বুদ্ধগাথা উত্তানত্থাযেৰ.

এৰং ঘটকুমারেন ৰীতসোকে কতে ৰাসুদেৰে রজ্জং অনুসাসন্তে দীঘস্স অদ্ধুনো অচ্চযেন দসভাতিকপুত্তা কুমারা চিন্তযিংসু ‘‘কণ্হদীপাযনং ‘দিব্বচক্খুকো’তি ৰদন্তি, ৰীমংসিস্সাম তাৰ ন’’ন্তি. তে একং দহরকুমারং অলঙ্করিত্ৰা গব্ভিনিআকারেন দস্সেত্ৰা উদরে মসূরকং বন্ধিত্ৰা তস্স সন্তিকং নেত্ৰা ‘‘ভন্তে, অযং কুমারিকা কিং ৰিজাযিস্সতী’’তি পুচ্ছিংসু. তাপসো ‘‘দসভাতিকরাজূনং ৰিনাসকালো পত্তো, ময্হং নু খো আযুসঙ্খারো কীদিসো হোতী’’তি ওলোকেন্তো ‘‘অজ্জেৰ মরণং ভৰিস্সতী’’তি ঞত্ৰা ‘‘কুমারা ইমিনা তুম্হাকং কো অত্থো’’তি ৰত্ৰা ‘‘কথেথেৰ নো, ভন্তে’’তি নিবদ্ধো ‘‘অযং ইতো সত্তমে দিৰসে খদিরঘটিকং ৰিজাযিস্সতি, তায ৰাসুদেৰকুলং নস্সিস্সতি, অপিচ খো পন তুম্হে তং খদিরঘটিকং গহেত্ৰা ঝাপেত্ৰা ছারিকং নদিযং পক্খিপেয্যাথা’’তি আহ. অথ নং তে ‘‘কূটজটিল, পুরিসো ৰিজাযনকো নাম নত্থী’’তি ৰত্ৰা তন্তরজ্জুকং নাম কম্মকরণং কত্ৰা তত্থেৰ জীৰিতক্খযং পাপযিংসু. রাজানো কুমারে পক্কোসাপেত্ৰা ‘‘কিং কারণা তাপসং মারযিত্থা’’তি পুচ্ছিত্ৰা সব্বং সুত্ৰা ভীতা তস্স আরক্খং দত্ৰা সত্তমে দিৰসে তস্স কুচ্ছিতো নিক্খন্তং খদিরঘটিকং ঝাপেত্ৰা ছারিকং নদিযং খিপিংসু. সা নদিযা ৰুয্হমানা মুখদ্ৰারে একপস্সে লগ্গি, ততো এরকং নিব্বত্তি.

অথেকদিৰসং তে রাজানো ‘‘সমুদ্দকীল়ং কীল়িস্সামা’’তি মুখদ্ৰারং গন্ত্ৰা মহামণ্ডপং কারাপেত্ৰা অলঙ্কতমণ্ডপে খাদন্তা পিৰন্তা কীল়াৰসেনেৰ পৰত্তহত্থপাদপরামাসা দ্ৰিধা ভিজ্জিত্ৰা মহাকলহং করিংসু. অথেকো অঞ্ঞং মুগ্গরং অলভন্তো এরকৰনতো একং এরকপত্তং গণ্হি. তং গহিতমত্তমেৰ খদিরমুসলং অহোসি. সো তেন মহাজনং পোথেসি. অথঞ্ঞেহি সব্বেহি গহিতগহিতং খদিরমুসলমেৰ অহোসি. তে অঞ্ঞমঞ্ঞং পহরিত্ৰা মহাৰিনাসং পাপুণিংসু. তেসু মহাৰিনাসং ৰিনস্সন্তেসু ৰাসুদেৰো চ বলদেৰো চ ভগিনী অঞ্জনদেৰী চ পুরোহিতো চাতি চত্তারো জনা রথং অভিরুহিত্ৰা পলাযিংসু, সেসা সব্বেপি ৰিনট্ঠা. তেপি চত্তারো রথেন পলাযন্তা কাল়মত্তিকঅটৰিং পাপুণিংসু. সো হি মুট্ঠিকমল্লো পত্থনং কত্ৰা যক্খো হুত্ৰা তত্থ নিব্বত্তো বলদেৰস্স আগতভাৰং ঞত্ৰা তত্থ গামং মাপেত্ৰা মল্লৰেসং গহেত্ৰা ‘‘কো যুজ্ঝিতুকামো’’তি ৰগ্গন্তো গজ্জন্তো অপ্ফোটেন্তো ৰিচরি. বলদেৰো তং দিস্ৰাৰ ‘‘ভাতিক, অহং ইমিনা সদ্ধিং যুজ্ঝিস্সামী’’তি ৰত্ৰা ৰাসুদেৰে ৰারেন্তেযেৰ রথা ওরুয্হ তস্স সন্তিকং গন্ত্ৰা ৰগ্গন্তো গজ্জন্তো অপ্ফোটেসি. অথ নং সো পসারিতহত্থেযেৰ গহেত্ৰা মূলকন্দং ৰিয খাদি. ৰাসুদেৰো তস্স মতভাৰং ঞত্ৰা ভগিনিঞ্চ পুরোহিতঞ্চ আদায সব্বরত্তিং গন্ত্ৰা সূরিযোদযে একং পচ্চন্তগামং পত্ৰা ‘‘আহারং পচিত্ৰা আহরথা’’তি ভগিনিঞ্চ পুরোহিতঞ্চ গামং পহিণিত্ৰা সযং একস্মিং গচ্ছন্তরে পটিচ্ছন্নো নিপজ্জি.

অথ নং জরা নাম একো লুদ্দকো গচ্ছং চলন্তং দিস্ৰা ‘‘সূকরো এত্থ ভৰিস্সতী’’তি সঞ্ঞায সত্তিং খিপিত্ৰা পাদে ৰিজ্ঝিত্ৰা ‘‘কো মং ৰিজ্ঝী’’তি ৰুত্তে মনুস্সস্স ৰিদ্ধভাৰং ঞত্ৰা ভীতো পলাযিতুং আরভি. রাজা সতিং পচ্চুপট্ঠপেত্ৰা উট্ঠায ‘‘মাতুল, মা ভাযি, এহী’’তি পক্কোসিত্ৰা আগতং ‘‘কোসি নাম ত্ৰ’’ন্তি পুচ্ছিত্ৰা ‘‘অহং সামি, জরা নামা’’তি ৰুত্তে ‘‘জরায ৰিদ্ধো মরিস্সতীতি কির মং পোরাণা ব্যাকরিংসু, নিস্সংসযং অজ্জ মযা মরিতব্ব’’ন্তি ঞত্ৰা ‘‘মাতুল, মা ভাযি, এহি পহারং মে বন্ধা’’তি তেন পহারমুখং বন্ধাপেত্ৰা তং উয্যোজেসি. বলৰৰেদনা পৰত্তিংসু, ইতরেহি আভতং আহারং পরিভুঞ্জিতুং নাসক্খি. অথ তে আমন্তেত্ৰা ‘‘অজ্জ অহং মরিস্সামি, তুম্হে পন সুখুমালা অঞ্ঞং কম্মং কত্ৰা জীৰিতুং ন সক্খিস্সথ, ইমং ৰিজ্জং সিক্খথা’’তি একং ৰিজ্জং সিক্খাপেত্ৰা তে উয্যোজেত্ৰা তত্থেৰ জীৰিতক্খযং পাপুণি. এৰং অঞ্জনদেৰিং ঠপেত্ৰা সব্বেৰ ৰিনাসং পাপুণিংসূতি.

সত্থা ইমং ধম্মদেসনং আহরিত্ৰা ‘‘উপাসক, এৰং পোরাণকপণ্ডিতা পণ্ডিতানং কথং সুত্ৰা অত্তনো পুত্তসোকং হরিংসু, মা চিন্তযী’’তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উপাসকো সোতাপত্তিফলে পতিট্ঠহি. তদা রোহিণেয্যো আনন্দো অহোসি, ৰাসুদেৰো সারিপুত্তো, অৰসেসা বুদ্ধপরিসা, ঘটপণ্ডিতো পন অহমেৰ অহোসিন্তি.

ঘটপণ্ডিতজাতকৰণ্ণনা সোল়সমা.

ইতি সোল়সজাতকপটিমণ্ডিতস্স

দসকনিপাতজাতকস্স অত্থৰণ্ণনা নিট্ঠিতা.

জাতকুদ্দানং –

চতুদ্ৰারো কণ্হুপোসো, সঙ্খ বোধি দীপাযনো;

নিগ্রোধ তক্কল ধম্ম-পালো কুক্কুট কুণ্ডলী;

বিলার চক্ক ভূরি চ, মঙ্গল ঘট সোল়স.

দসকনিপাতৰণ্ণনা নিট্ঠিতা.

১১. একাদসকনিপাতো

[৪৫৫] ১. মাতুপোসকজাতকৰণ্ণনা

তস্স নাগস্স ৰিপ্পৰাসেনাতি ইদং সত্থা জেতৰনে ৰিহরন্তো মাতুপোসকভিক্খুং আরব্ভ কথেসি. পচ্চুপ্পন্নৰত্থু সামজাতকৰত্থুসদিসমেৰ. সত্থা পন ভিক্খূ আমন্তেত্ৰা ‘‘মা ভিক্খৰে, এতং ভিক্খুং উজ্ঝাযিত্থ, পোরাণকপণ্ডিতা তিরচ্ছানযোনিযং নিব্বত্তাপি মাতরা ৰিযুত্তা সত্তাহং নিরাহারতায সুস্সমানা রাজারহং ভোজনং লভিত্ৰাপি ‘মাতরা ৰিনা ন ভুঞ্জিস্সামা’তি মাতরং দিস্ৰাৰ গোচরং গণ্হিংসূ’’তি ৰত্ৰা তেহি যাচিতো অতীতমাহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে হত্থিযোনিযং নিব্বত্তিত্ৰা সব্বসেতো অহোসি অভিরূপো দস্সনীযো পাসাদিকো লক্খণসম্পন্নো অসীতিহত্থিসহস্সপরিৰারো. সো জরাজিণ্ণং মাতরং পোসেসি, মাতা পনস্স অন্ধা. সো মধুরমধুরানি ফলাফলানি হত্থীনং দত্ৰা মাতু সন্তিকং পেসেসি. হত্থী তস্সা অদত্ৰা অত্তনাৰ খাদন্তি. সো পরিগ্গণ্হন্তো তং পৰত্তিং ঞত্ৰা ‘‘যূথং ছড্ডেত্ৰা মাতরমেৰ পোসেস্সামী’’তি রত্তিভাগে অঞ্ঞেসং হত্থীনং অজানন্তানং মাতরং গহেত্ৰা চণ্ডোরণপব্বতপাদং গন্ত্ৰা একং নল়িনিং উপনিস্সায ঠিতায পব্বতগুহাযং মাতরং ঠপেত্ৰা পোসেসি. অথেকো বারাণসিৰাসী ৰনচরকো মগ্গমূল়্হো দিসং ৰৰত্থপেতুং অসক্কোন্তো মহন্তেন সদ্দেন পরিদেৰি. বোধিসত্তো তস্স সদ্দং সুত্ৰা ‘‘অযং পুরিসো অনাথো, ন খো পন মেতং পতিরূপং, যং এস মযি ঠিতে ইধ ৰিনস্সেয্যা’’তি তস্স সন্তিকং গন্ত্ৰা তং ভযেন পলাযন্তং দিস্ৰা ‘‘অম্ভো পুরিস, নত্থি তে মং নিস্সায ভযং, মা পলাযি, কস্মা ত্ৰং পরিদেৰন্তো ৰিচরসী’’তি পুচ্ছিত্ৰা ‘‘সামি, অহং মগ্গমূল়্হো, অজ্জ মে সত্তমো দিৰসো’’তি ৰুত্তে ‘‘ভো পুরিস, মা ভাযি, অহং তং মনুস্সপথে ঠপেস্সামী’’তি তং অত্তনো পিট্ঠিযং নিসীদাপেত্ৰা অরঞ্ঞা নীহরিত্ৰা নিৰত্তি. সোপি পাপো ‘‘নগরং গন্ত্ৰা রঞ্ঞো আরোচেস্সামী’’তি রুক্খসঞ্ঞং পব্বতসঞ্ঞং করোন্তোৰ নিক্খমিত্ৰা বারাণসিং অগমাসি.

তস্মিং কালে রঞ্ঞো মঙ্গলহত্থী কালমকাসি. রাজা ‘‘সচে কেনচি কত্থচি ওপৰয্হং কাতুং যুত্তরূপো হত্থী দিট্ঠো অত্থি, সো আচিক্খতূ’’তি ভেরিং চরাপেসি. সো পুরিসো রাজানং উপসঙ্কমিত্ৰা ‘‘মযা, দেৰ, তুম্হাকং ওপৰয্হো ভৰিতুং যুত্তরূপো সব্বসেতো সীলৰা হত্থিরাজা দিট্ঠো, অহং মগ্গং দস্সেস্সামি, মযা সদ্ধিং হত্থাচরিযে পেসেত্ৰা তং গণ্হাপেথা’’তি আহ. রাজা ‘‘সাধূ’’তি ‘‘ইমং মগ্গদেসকং কত্ৰা অরঞ্ঞং গন্ত্ৰা ইমিনা ৰুত্তং হত্থিনাগং আনেথা’’তি তেন সদ্ধিং মহন্তেন পরিৰারেন হত্থাচরিযং পেসেসি. সো তেন সদ্ধিং গন্ত্ৰা বোধিসত্তং নল়িনিং পৰিসিত্ৰা গোচরং গণ্হন্তং পস্সি. বোধিসত্তোপি হত্থাচরিযং দিস্ৰা ‘‘ইদং ভযং ন অঞ্ঞতো উপ্পন্নং, তস্স পুরিসস্স সন্তিকা উপ্পন্নং ভৰিস্সতি, অহং খো পন মহাবলো হত্থিসহস্সম্পি ৰিদ্ধংসেতুং সমত্থো হোমি, কুজ্ঝিত্ৰা সরট্ঠকং সেনাৰাহনং নাসেতুং, সচে পন কুজ্ঝিস্সামি, সীলং মে ভিজ্জিস্সতি, তস্মা অজ্জ সত্তীহি কোট্টিযমানোপি ন কুজ্ঝিস্সামী’’তি অধিট্ঠায সীসং নামেত্ৰা নিচ্চলোৰ অট্ঠাসি. হত্থাচরিযো পদুমসরং ওতরিত্ৰা তস্স লক্খণসম্পত্তিং দিস্ৰা ‘‘এহি পুত্তা’’তি রজতদামসদিসায সোণ্ডায গহেত্ৰা সত্তমে দিৰসে বারাণসিং পাপুণি. বোধিসত্তমাতা পন পুত্তে অনাগচ্ছন্তে ‘‘পুত্তো মে রাজরাজমহামত্তাদীহি নীতো ভৰিস্সতি, ইদানি তস্স ৰিপ্পৰাসেন অযং ৰনসণ্ডো ৰড্ঢিস্সতী’’তি পরিদেৰমানা দ্ৰে গাথা অভাসি –

১.

‘‘তস্স নাগস্স ৰিপ্পৰাসেন, ৰিরূল়্হো সল্লকী চ কুটজা চ;

কুরুৰিন্দকরৰীরা ভিসসামা চ, নিৰাতে পুপ্ফিতা চ কণিকারা.

২.

‘‘কোচিদেৰ সুৰণ্ণকাযুরা, নাগরাজং ভরন্তি পিণ্ডেন;

যত্থ রাজা রাজকুমারো ৰা, কৰচমভিহেস্সতি অছম্ভিতো’’তি.

তত্থ ৰিরূল়্হাতি ৰড্ঢিতা নাম, নত্থেত্থ সংসযোতি অসংসযৰসেনেৰমাহ. সল্লকী চ কুটজা চাতি ইন্দসালরুক্খা চ কুটজরুক্খা চ. কুরুৰিন্দকরৰীরা ভিসসামা চাতি কুরুৰিন্দরুক্খা চ করৰীরনামকানি মহাতিণানি চ ভিসানি চ সামাকানি চাতি অত্থো. এতে চ সব্বে ইদানি ৰড্ঢিস্সন্তীতি পরিদেৰতি. নিৰাতেতি পব্বতপাদে. পুপ্ফিতাতি মম পুত্তেন সাখং ভঞ্জিত্ৰা অখাদিযমানা কণিকারাপি পুপ্ফিতা ভৰিস্সন্তীতি ৰুত্তং হোতি. কোচিদেৰাতি কত্থচিদেৰ গামে ৰা নগরে ৰা. সুৰণ্ণকাযুরাতি সুৰণ্ণাভরণা রাজরাজমহামত্তা. ভরন্তি পিণ্ডেনাতি অজ্জ মাতুপোসকং নাগরাজং রাজারহস্স ভোজনস্স সুৰড্ঢিতেন পিণ্ডেন পোসেন্তি. যত্থাতি যস্মিং নাগরাজে রাজা নিসীদিত্ৰা. কৰচমভিহেস্সতীতি সঙ্গামং পৰিসিত্ৰা পচ্চামিত্তানং কৰচং অভিহনিস্সতি ভিন্দিস্সতি. ইদং ৰুত্তং হোতি – ‘‘যত্থ মম পুত্তে নিসিন্নো রাজা ৰা রাজকুমারো ৰা অছম্ভিতো হুত্ৰা সপত্তানং কৰচং হনিস্সতি, তং মে পুত্তং নাগরাজানং সুৰণ্ণাভরণা অজ্জ পিণ্ডেন ভরন্তী’’তি.

হত্থাচরিযোপি অন্তরামগ্গেৰ রঞ্ঞো সাসনং পেসেসি. তং সুত্ৰা রাজা নগরং অলঙ্কারাপেসি. হত্থাচরিযো বোধিসত্তং কতগন্ধপরিভণ্ডং অলঙ্কতপটিযত্তং হত্থিসালং নেত্ৰা ৰিচিত্রসাণিযা পরিক্খিপাপেত্ৰা রঞ্ঞো আরোচাপেসি. রাজা নানগ্গরসভোজনং আদায গন্ত্ৰা বোধিসত্তস্স দাপেসি. সো ‘‘মাতরং ৰিনা গোচরং ন গণ্হিস্সামী’’তি পিণ্ডং ন গণ্হি. অথ নং যাচন্তো রাজা ততিযং গাথমাহ –

৩.

‘‘গণ্হাহি নাগ কবল়ং, মা নাগ কিসকো ভৰ;

বহূনি রাজকিচ্চানি, তানি নাগ করিস্সসী’’তি.

তং সুত্ৰা বোধিসত্তো চতুত্থং গাথমাহ –

৪.

‘‘সা নূনসা কপণিকা, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি.

তত্থ সা নূনসাতি মহারাজ, নূন সা এসা. কপণিকাতি পুত্তৰিযোগেন কপণা. খাণুন্তি তত্থ তত্থ পতিতং রুক্খকলিঙ্গরং. ঘট্টেতীতি পরিদেৰমানা তত্থ তত্থ পাদেন পোথেন্তী নূন পাদেন হনতি. গিরিং চণ্ডোরণং পতীতি চণ্ডোরণপব্বতাভিমুখী, পব্বতপাদে পরিপ্ফন্দমানাতি অত্থো.

অথ নং পুচ্ছন্তো রাজা পঞ্চমং গাথমাহ –

৫.

‘‘কা নু তে সা মহানাগ, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি.

বোধিসত্তো ছট্ঠং গাথমাহ –

৬.

‘‘মাতা মে সা মহারাজ, অন্ধা অপরিণাযিকা;

খাণুং পাদেন ঘট্টেতি, গিরিং চণ্ডোরণং পতী’’তি.

রাজা ছট্ঠগাথায তমত্থং সুত্ৰা মুঞ্চাপেন্তো সত্তমং গাথমাহ –

৭.

‘‘মুঞ্চথেতং মহানাগং, যোযং ভরতি মাতরং;

সমেতু মাতরা নাগো, সহ সব্বেহি ঞাতিভী’’তি.

তত্থ যোযং ভরতীতি অযং নাগো ‘‘অহং, মহারাজ, অন্ধং মাতরং পোসেমি, মযা ৰিনা ময্হং মাতা জীৰিতক্খযং পাপুণিস্সতি, তায ৰিনা ময্হং ইস্সরিযেন অত্থো নত্থি, অজ্জ মে মাতু গোচরং অলভন্তিযা সত্তমো দিৰসো’’তি ৰদতি, তস্মা যো অযং মাতরং ভরতি, এতং মহানাগং খিপ্পং মুঞ্চথ. সব্বেহি ঞাতিভীতি সদ্ধিং এস মাতরা সমেতু সমাগচ্ছতূতি.

অট্ঠমনৰমা অভিসম্বুদ্ধগাথা হোন্তি –

৮.

‘‘মুত্তো চ বন্ধনা নাগো, মুত্তমাদায কুঞ্জরো;

মুহুত্তং অস্সাসযিত্ৰা, অগমা যেন পব্বতো.

৯.

‘‘ততো সো নল়িনিং গন্ত্ৰা, সীতং কুঞ্জরসেৰিতং;

সোণ্ডাযূদকমাহত্ৰা, মাতরং অভিসিঞ্চথা’’তি.

সো কির নাগো বন্ধনা মুত্তো থোকং ৰিস্সমিত্ৰা রঞ্ঞো দসরাজধম্মগাথায ধম্মং দেসেত্ৰা ‘‘অপ্পমত্তো হোহি, মহারাজা’’তি ওৰাদং দত্ৰা মহাজনেন গন্ধমালাদীহি পূজিযমানো নগরা নিক্খমিত্ৰা তদহেৰ তং পদুমসরং পত্ৰা ‘‘মম মাতরং গোচরং গাহাপেত্ৰাৰ সযং গণ্হিস্সামী’’তি বহুং ভিসমুল়ালং আদায সোণ্ডপূরং উদকং গহেত্ৰা গুহালেণতো নিক্খমিত্ৰা গুহাদ্ৰারে নিসিন্নায মাতুযা সন্তিকং গন্ত্ৰা সত্তাহং নিরাহারতায মাতু সরীরস্স ফস্সপটিলাভত্থং উপরি উদকং সিঞ্চি, তমত্থং আৰিকরোন্তো সত্থা দ্ৰে গাথা অভাসি. বোধিসত্তস্স মাতাপি ‘‘দেৰো ৰস্সতী’’তি সঞ্ঞায তং অক্কোসন্তী দসমং গাথমাহ –

১০.

‘‘কোযং অনরিযো দেৰো, অকালেনপি ৰস্সতি;

গতো মে অত্রজো পুত্তো, যো ময্হং পরিচারকো’’তি.

তত্থ অত্রজোতি অত্ততো জাতো.

অথ নং সমস্সাসেন্তো বোধিসত্তো একাদসমং গাথমাহ –

১১.

‘‘উট্ঠেহি অম্ম কিং সেসি, আগতো ত্যাহমত্রজো;

মুত্তোম্হি কাসিরাজেন, ৰেদেহেন যসস্সিনা’’তি.

তত্থ আগতো ত্যাহন্তি আগতো তে অহং. ৰেদেহেনাতি ঞাণসম্পন্নেন. যসস্সিনাতি মহাপরিৰারেন তেন রঞ্ঞা মঙ্গলহত্থিভাৰায গহিতোপি অহং মুত্তো, ইদানি তৰ সন্তিকং আগতো উট্ঠেহি গোচরং গণ্হাহীতি.

সা তুট্ঠমানসা রঞ্ঞো অনুমোদনং করোন্তী ওসানগাথমাহ –

১২.

‘‘চিরং জীৰতু সো রাজা, কাসীনং রট্ঠৰড্ঢনো;

যো মে পুত্তং পমোচেসি, সদা ৰুদ্ধাপচাযিক’’ন্তি.

তদা রাজা বোধিসত্তস্স গুণে পসীদিত্ৰা নল়িনিযা অৰিদূরে গামং মাপেত্ৰা বোধিসত্তস্স চ মাতু চস্স নিবদ্ধং ৰত্তং পট্ঠপেসি. অপরভাগে বোধিসত্তো মাতরি কালকতায তস্সা সরীরপরিহারং কত্ৰা কারণ্ডকঅস্সমপদং নাম গতো. তস্মিং পন ঠানে হিমৰন্ততো ওতরিত্ৰা পঞ্চসতা ইসযো ৰসিংসু, তং ৰত্তং তেসং অদাসি. রাজা বোধিসত্তস্স সমানরূপং সিলাপটিমং কারেত্ৰা মহাসক্কারং পৰত্তেসি. সকলজম্বুদীপৰাসিনো অনুসংৰচ্ছরং সন্নিপতিত্ৰা হত্থিমহং নাম করিংসু.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে মাতুপোসকভিক্খু সোতাপত্তিফলে পতিট্ঠহি. তদা রাজা আনন্দো অহোসি, পাপপুরিসো দেৰদত্তো, হত্থাচরিযো সারিপুত্তো, মাতা হত্থিনী মহামাযা, মাতুপোসকনাগো পন অহমেৰ অহোসিন্তি.

মাতুপোসকজাতকৰণ্ণনা পঠমা.

[৪৫৬] ২. জুণ্হজাতকৰণ্ণনা

সুণোহি ময্হং ৰচনং জনিন্দাতি ইদং সত্থা জেতৰনে ৰিহরন্তো আনন্দত্থেরেন লদ্ধৰরে আরব্ভ কথেসি. পঠমবোধিযঞ্হি ৰীসতি ৰস্সানি ভগৰতো অনিবদ্ধুপট্ঠাকা অহেসুং. একদা থেরো নাগসমালো, একদা নাগিতো, একদা উপৰাণো, একদা সুনক্খত্তো, একদা চুন্দো, একদা নন্দো, একদা সাগতো, একদা মেঘিযো ভগৰন্তং উপট্ঠহি. অথেকদিৰসং ভগৰা ভিক্খূ আমন্তেসি ‘‘ভিক্খৰে, ইদানিম্হি মহল্লকো, একচ্চে ভিক্খূ ‘ইমিনা মগ্গেন গচ্ছামা’তি ৰুত্তে অঞ্ঞেন গচ্ছন্তি, একচ্চে ময্হং পত্তচীৰরং ভূমিযং নিক্খিপন্তি, নিবদ্ধুপট্ঠাকং মে একং ভিক্খুং জানাথা’’তি. ‘‘ভন্তে, অহং উপট্ঠহিস্সামি, অহং উপট্ঠহিস্সামী’’তি সিরসি অঞ্জলিং কত্ৰা উট্ঠিতে সারিপুত্তত্থেরাদযো ‘‘তুম্হাকং পত্থনা মত্থকং পত্তা, অল’’ন্তি পটিক্খিপি. ততো ভিক্খূ আনন্দত্থেরং ‘‘ত্ৰং আৰুসো, উপট্ঠাকট্ঠানং যাচাহী’’তি আহংসু. থেরো ‘‘সচে মে ভন্তে, ভগৰা অত্তনা লদ্ধচীৰরং ন দস্সতি, পিণ্ডপাতং ন দস্সতি, একগন্ধকুটিযং ৰসিতুং ন দস্সতি, মং গহেত্ৰা নিমন্তনং ন গমিস্সতি, সচে পন ভগৰা মযা গহিতং নিমন্তনং গমিস্সতি, সচে অহং তিরোরট্ঠা তিরোজনপদা ভগৰন্তং দট্ঠুং আগতং পরিসং আগতক্খণেযেৰ দস্সেতুং লভিস্সামি, যদা মে কঙ্খা উপ্পজ্জতি, তস্মিং খণেযেৰ ভগৰন্তং উপসঙ্কমিতুং লভিস্সামি, সচে যং ভগৰা মম পরম্মুখা ধম্মং কথেতি, তং আগন্ত্ৰা ময্হং কথেস্সতি, এৰাহং ভগৰন্তং উপট্ঠহিস্সামী’’তি ইমে চত্তারো পটিক্খেপে চতস্সো চ আযাচনাতি অট্ঠ ৰরে যাচি, ভগৰাপিস্স অদাসি.

সো ততো পট্ঠায পঞ্চৰীসতি ৰস্সানি নিবদ্ধুপট্ঠাকো অহোসি. সো পঞ্চসু ঠানেসু এতদগ্গে ঠপনং পত্ৰা আগমসম্পদা, অধিগমসম্পদা, পুব্বহেতুসম্পদা, অত্তত্থপরিপুচ্ছাসম্পদা, তিত্থৰাসসম্পদা, যোনিসোমনসিকারসম্পদা, বুদ্ধূপনিস্সযসম্পদাতি ইমাহি সত্তহি সম্পদাহি সমন্নাগতো বুদ্ধস্স সন্তিকে অট্ঠৰরদাযজ্জং লভিত্ৰা বুদ্ধসাসনে পঞ্ঞাতো গগনমজ্ঝে চন্দো ৰিয পাকটো অহোসি. অথেকদিৰসং ভিক্খূ ধম্মসভাযং কথং সমুট্ঠাপেসুং ‘‘আৰুসো, তথাগতো আনন্দত্থেরং ৰরদানেন সন্তপ্পেসী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপাহং আনন্দং ৰরেন সন্তপ্পেসিং, পুব্বেপাহং যং যং এস যাচি, তং তং অদাসিংযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স পুত্তো জুণ্হকুমারো নাম হুত্ৰা তক্কসিলাযং সিপ্পং উগ্গহেত্ৰা আচরিযস্স অনুযোগং দত্ৰা রত্তিভাগে অন্ধকারে আচরিযস্স ঘরা নিক্খমিত্ৰা অত্তনো নিৰাসট্ঠানং ৰেগেন গচ্ছন্তো অঞ্ঞতরং ব্রাহ্মণং ভিক্খং চরিত্ৰা অত্তনো নিৰাসট্ঠানং গচ্ছন্তং অপস্সন্তো বাহুনা পহরিত্ৰা তস্স ভত্তপাতিং ভিন্দিং, ব্রাহ্মণো পতিত্ৰা ৰিরৰি. কুমারো কারুঞ্ঞেন নিৰত্তিত্ৰা তং হত্থে গহেত্ৰা উট্ঠাপেসি. ব্রাহ্মণো ‘‘তযা, তাত, মম ভিক্খাভাজনং ভিন্নং, ভত্তমূলং মে দেহী’’তি আহ. কুমারো ‘‘ব্রাহ্মণ, ন দানাহং তৰ ভত্তমূলং দাতুং সক্কোমি, অহং খো পন কাসিকরঞ্ঞো পুত্তো জুণ্হকুমারো নাম, মযি রজ্জে পতিট্ঠিতে আগন্ত্ৰা মং ধনং যাচেয্যাসী’’তি ৰত্ৰা নিট্ঠিতসিপ্পো আচরিযং ৰন্দিত্ৰা বারাণসিং গন্ত্ৰা পিতু সিপ্পং দস্সেসি. পিতা ‘‘জীৰন্তেন মে পুত্তো দিট্ঠো, রাজভূতম্পি নং পস্সিস্সামী’’তি রজ্জে অভিসিঞ্চি. সো জুণ্হরাজা নাম হুত্ৰা ধম্মেন রজ্জং কারেসি. ব্রাহ্মণো তং পৰত্তিং সুত্ৰা ‘‘ইদানি মম ভত্তমূলং আহরিস্সামী’’তি বারাণসিং গন্ত্ৰা রাজানং অলঙ্কতনগরং পদক্খিণং করোন্তমেৰ দিস্ৰা একস্মিং উন্নতপ্পদেসে ঠিতো হত্থং পসারেত্ৰা জযাপেসি. অথ নং রাজা অনোলোকেত্ৰাৰ অতিক্কমি. ব্রাহ্মণো তেন অদিট্ঠভাৰং ঞত্ৰা কথং সমুট্ঠাপেন্তো পঠমং গাথমাহ –

১৩.

‘‘সুণোহি ময্হং ৰচনং জনিন্দ, অত্থেন জুণ্হম্হি ইধানুপত্তো;

ন ব্রাহ্মণে অদ্ধিকে তিট্ঠমানে, গন্তব্বমাহু দ্ৰিপদিন্দ সেট্ঠা’’তি.

তত্থ জুণ্হম্হীতি মহারাজ, তযি জুণ্হম্হি অহং একেন অত্থেন ইধানুপ্পত্তো, ন নিক্কারণা ইধাগতোম্হীতি দীপেতি. অদ্ধিকেতি অদ্ধানং আগতে. গন্তব্বন্তি তং অদ্ধিকং অদ্ধানমাগতং যাচমানং ব্রাহ্মণং অনোলোকেত্ৰাৰ গন্তব্বন্তি পণ্ডিতা ন আহু ন কথেন্তীতি.

রাজা তস্স ৰচনং সুত্ৰা হত্থিং ৰজিরঙ্কুসেন নিগ্গহেত্ৰা দুতিযং গাথমাহ –

১৪.

‘‘সুণোমি তিট্ঠামি ৰদেহি ব্রহ্মে, যেনাসি অত্থেন ইধানুপত্তো;

কং ৰা ত্ৰমত্থং মযি পত্থযানো, ইধাগমো ব্রহ্মে তদিঙ্ঘ ব্রূহী’’তি.

তত্থ ইঙ্ঘাতি চোদনত্থে নিপাতো.

ততো পরং ব্রাহ্মণস্স চ রঞ্ঞো চ ৰচনপটিৰচনৰসেন সেসগাথা কথিতা –

১৫.

‘‘দদাহি মে গামৰরানি পঞ্চ, দাসীসতং সত্ত গৰংসতানি;

পরোসহস্সঞ্চ সুৰণ্ণনিক্খে, ভরিযা চ মে সাদিসী দ্ৰে দদাহি.

১৬.

‘‘তপো নু তে ব্রাহ্মণ ভিংসরূপো, মন্তা নু তে ব্রাহ্মণ চিত্তরূপা;

যক্খা নু তে অস্সৰা সন্তি কেচি, অত্থং ৰা মে অভিজানাসি কত্তং.

১৭.

‘‘ন মে তপো অত্থি ন চাপি মন্তা, যক্খাপি মে অস্সৰা নত্থি কেচি;

অত্থম্পি তে নাভিজানামি কত্তং, পুব্বে চ খো সঙ্গতিমত্তমাসি.

১৮.

‘‘পঠমং ইদং দস্সনং জানতো মে, ন তাভিজানামি ইতো পুরত্থা;

অক্খাহি মে পুচ্ছিতো এতমত্থং, কদা কুহিং ৰা অহু সঙ্গমো নো.

১৯.

‘‘গন্ধাররাজস্স পুরম্হি রম্মে, অৰসিম্হসে তক্কসীলাযং দেৰ;

তত্থন্ধকারম্হি তিমীসিকাযং, অংসেন অংসং সমঘট্টযিম্হ.

২০.

‘‘তে তত্থ ঠত্ৰান উভো জনিন্দ, সারাণিযং ৰীতিসারযিম্হ তত্থ;

সাযেৰ নো সঙ্গতিমত্তমাসি, ততো ন পচ্ছা ন পুরে অহোসি.

২১.

‘‘যদা কদাচি মনুজেসু ব্রহ্মে, সমাগমো সপ্পুরিসেন হোতি;

ন পণ্ডিতা সঙ্গতিসন্থৰানি, পুব্বে কতং ৰাপি ৰিনাসযন্তি.

২২.

‘‘বালাৰ খো সঙ্গতিসন্থৰানি, পুব্বে কতং ৰাপি ৰিনাসযন্তি;

বহুম্পি বালেসু কতং ৰিনস্সতি, তথা হি বালা অকতঞ্ঞুরূপা.

২৩.

‘‘ধীরা চ খো সঙ্গতিসন্থৰানি, পুব্বে কতং ৰাপি ন নাসযন্তি;

অপ্পম্পি ধীরেসু কতং ন নস্সতি, তথা হি ধীরা সুকতঞ্ঞুরূপা.

২৪.

‘‘দদামি তে গামৰরানি পঞ্চ, দাসীসতং সত্ত গৰংসতানি;

পরোসহস্সঞ্চ সুৰণ্ণনিক্খে, ভরিযা চ তে সাদিসী দ্ৰে দদামি.

২৫.

‘‘এৰং সতং হোতি সমেচ্চ রাজ, নক্খত্তরাজারিৰ তারকানং;

আপূরতী কাসিপতী তথাহং, তযাপি মে সঙ্গমো অজ্জ লদ্ধো’’তি.

তত্থ সাদিসীতি রূপৰণ্ণজাতিকুলপদেসেন মযা সাদিসী একসদিসা দ্ৰে মহাযসা ভরিযা চ মে দেহীতি অত্থো. ভিংসরূপোতি কিং নু তে ব্রাহ্মণ বলৰরূপসীলাচারগুণসঙ্খাতং তপোকম্মং অত্থীতি পুচ্ছতি. মন্তা নু তেতি উদাহু ৰিচিত্ররূপা সব্বত্থসাধকা মন্তা তে অত্থি. অস্সৰাতি ৰচনকারকা ইচ্ছিতিচ্ছিতদাযকা যক্খা ৰা তে কেচি সন্তি. কত্তন্তি কতং, উদাহু তযা কতং কিঞ্চি মম অত্থং অভিজানাসীতি পুচ্ছতি. সঙ্গতিমত্তন্তি সমাগমমত্তং তযা সদ্ধিং পুব্বে মম আসীতি ৰদতি. জানতো মেতি জানন্তস্স মম ইদং পঠমং তৰ দস্সনং. ন তাভিজানামীতি ন তং অভিজানামি. তিমীসিকাযন্তি বহলতিমিরাযং রত্তিযং. তে তত্থ ঠত্ৰানাতি তে মযং তস্মিং অংসেন অংসং ঘট্টিতট্ঠানে ঠত্ৰা ৰীতিসারযিম্হ তত্থাতি তস্মিংযেৰ ঠানে সরিতব্বযুত্তকং কথং ৰীতিসারযিম্হ, অহং ‘‘ভিক্খাভাজনং মে তযা ভিন্নং, ভত্তমূলং মে দেহী’’তি অৰচং, ত্ৰং ‘‘ইদানাহং তৰ ভত্তমূলং দাতুং ন সক্কোমি, অহং খো পন কাসিকরঞ্ঞো পুত্তো জুণ্হকুমারো নাম, মযি রজ্জে পতিট্ঠিতে আগন্ত্ৰা মং ধনং যাচেয্যাসী’’তি অৰচাতি ইমং সারণীযকথং করিম্হাতি আহ. সাযেৰ নো সঙ্গতিমত্তমাসীতি দেৰ, অম্হাকং সাযেৰ অঞ্ঞমঞ্ঞং সঙ্গতিমত্তমাসি, একমুহুত্তিকমহোসীতি দীপেতি. ততোতি ততো পন তংমুহুত্তিকমিত্তধম্মতো পচ্ছা ৰা পুরে ৰা কদাচি অম্হাকং সঙ্গতি নাম ন ভূতপুব্বা.

ন পণ্ডিতাতি ব্রাহ্মণ পণ্ডিতা নাম তংমুহুত্তিকং সঙ্গতিং ৰা চিরকালসন্থৰানি ৰা যং কিঞ্চি পুব্বে কতগুণং ৰা ন নাসেন্তি. বহুম্পীতি বহুকম্পি. অকতঞ্ঞুরূপাতি যস্মা বালা অকতঞ্ঞুসভাৰা, তস্মা তেসু বহুম্পি কতং নস্সতীতি অত্থো. সুকতঞ্ঞুরূপাতি সুট্ঠু কতঞ্ঞুসভাৰা. এত্থাপি তত্থাপি তথা হীতি হি-কারো কারণত্থো. দদামি তেতি ব্রাহ্মণেন যাচিতযাচিতং দদন্তো এৰমাহ. এৰং সতন্তি ব্রাহ্মণো রঞ্ঞো অনুমোদনং করোন্তো ৰদতি, সতং সপ্পুরিসানং একৰারম্পি সমেচ্চ সঙ্গতি নাম এৰং হোতি. নক্খত্তরাজারিৰাতি এত্থ র-কারো নিপাতমত্তং. তারকানন্তি তারকগণমজ্ঝে. কাসিপতীতি রাজানমালপতি. ইদং ৰুত্তং হোতি – ‘‘দেৰ, কাসিরট্ঠাধিপতি যথা চন্দো তারকানং মজ্ঝে ঠিতো তারকগণপরিৰুতো পাটিপদতো পট্ঠায যাৰ পুণ্ণমা আপূরতি, তথা অহম্পি অজ্জ তযা দিন্নেহি গামৰরাদীহি আপূরামী’’তি. তযাপি মেতি মযা পুব্বে তযা সদ্ধিং লদ্ধোপি সঙ্গমো অলদ্ধোৰ, অজ্জ পন মম মনোরথস্স নিপ্ফন্নত্তা মযা তযা সহ সঙ্গমো লদ্ধো নামাতি নিপ্ফন্নং মে তযা সদ্ধিং মিত্তফলন্তি ৰদতি. বোধিসত্তো তস্স মহন্তং যসং অদাসি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপাহং আনন্দং ৰরেন সন্তপ্পেসিং যেৰা’’তি ৰত্ৰা জাতকং সমোধানেসি – ‘‘তদা ব্রাহ্মণো আনন্দো অহোসি, রাজা পন অহমেৰ অহোসি’’ন্তি.

জুণ্হজাতকৰণ্ণনা দুতিযা.

[৪৫৭] ৩. ধম্মদেৰপুত্তজাতকৰণ্ণনা

যসোকরো পুঞ্ঞকরোহমস্মীতি ইদং সত্থা জেতৰনে ৰিহরন্তো দেৰদত্তস্স পথৰিপৰেসনং আরব্ভ কথেসি. তদা হি ভিক্খূ ধম্মসভাযং কথং সমুট্ঠাপেসুং ‘‘আৰুসো, দেৰদত্তো তথাগতেন সদ্ধিং পটিৰিরুজ্ঝিত্ৰা পথৰিং পৰিট্ঠো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন ইদানেৰেস, ভিক্খৰে, মম জিনচক্কে পহারং দত্ৰা পথৰিং পৰিট্ঠো, পুব্বেপি ধম্মচক্কে পহারং দত্ৰা পথৰিং পৰিসিত্ৰা অৰীচিপরাযণো জাতোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কামাৰচরদেৰলোকে ধম্মো নাম দেৰপুত্তো হুত্ৰা নিব্বত্তি, দেৰদত্তো অধম্মো নাম. তেসু ধম্মো দিব্বালঙ্কারপটিমণ্ডিতো দিব্বরথৰরমভিরুয্হ অচ্ছরাগণপরিৰুতো মনুস্সেসু সাযমাসং ভুঞ্জিত্ৰা অত্তনো অত্তনো ঘরদ্ৰারে সুখকথায নিসিন্নেসু পুণ্ণমুপোসথদিৰসে গামনিগমজনপদরাজধানীসু আকাসে ঠত্ৰা ‘‘পাণাতিপাতাদীহি দসহি অকুসলকম্মপথেহি ৰিরমিত্ৰা মাতুপট্ঠানধম্মং পিতুপট্ঠানধম্মং তিৰিধসুচরিতধম্মঞ্চ পূরেথ, এৰং সগ্গপরাযণা হুত্ৰা মহন্তং যসং অনুভৰিস্সথা’’তি মনুস্সে দস কুসলকম্মপথে সমাদপেন্তো জম্বুদীপং পদক্খিণং করোতি. অধম্মো পন দেৰপুত্তো ‘‘পাণং হনথা’’তিআদিনা নযেন দস অকুসলকম্মপথে সমাদপেন্তো জম্বুদীপং ৰামং করোতি. অথ তেসং আকাসে রথা সম্মুখা অহেসুং. অথ নেসং পরিসা ‘‘তুম্হে কস্স, তুম্হে কস্সা’’তি পুচ্ছিত্ৰা ‘‘মযং ধম্মস্স, মযং অধম্মস্সা’’তি ৰত্ৰা মগ্গা ওক্কমিত্ৰা দ্ৰিধা জাতা. ধম্মোপি অধম্মং আমন্তেত্ৰা ‘‘সম্ম, ত্ৰং অধম্মো, অহং ধম্মো, মগ্গো ময্হং অনুচ্ছৰিকো, তৰ রথং ওক্কামেত্ৰা ময্হং মগ্গং দেহী’’তি পঠমং গাথমাহ –

২৬.

‘‘যসোকরো পুঞ্ঞকরোহমস্মি, সদাত্থুতো সমণব্রাহ্মণানং;

মগ্গারহো দেৰমনুস্সপূজিতো, ধম্মো অহং দেহি অধম্ম মগ্গ’’ন্তি.

তত্থ যসোকরোতি অহং দেৰমনুস্সানং যসদাযকো. দুতিযপদেপি এসেৰ নযো. সদাত্থুতোতি সদা থুতো নিচ্চপসত্থো. ততো পরা –

২৭.

‘‘অধম্মযানং দল়্হমারুহিত্ৰা, অসন্তসন্তো বলৰাহমস্মি;

স কিস্স হেতুম্হি তৰজ্জ দজ্জং, মগ্গং অহং ধম্ম অদিন্নপুব্বং.

২৮.

‘‘ধম্মো হৰে পাতুরহোসি পুব্বে, পচ্ছা অধম্মো উদপাদি লোকে;

জেট্ঠো চ সেট্ঠো চ সনন্তনো চ, উয্যাহি জেট্ঠস্স কনিট্ঠ মগ্গা.

২৯.

‘‘ন যাচনায নপি পাতিরূপা, ন অরহতা তেহং দদেয্যং মগ্গং;

যুদ্ধঞ্চ নো হোতু উভিন্নমজ্জ, যুদ্ধম্হি যো জেস্সতি তস্স মগ্গো.

৩০.

‘‘সব্বা দিসা অনুৰিসটোহমস্মি, মহব্বলো অমিতযসো অতুল্যো;

গুণেহি সব্বেহি উপেতরূপো, ধম্মো অধম্ম ত্ৰং কথং ৰিজেস্সসি.

৩১.

‘‘লোহেন ৰে হঞ্ঞতি জাতরূপং, ন জাতরূপেন হনন্তি লোহং;

সচে অধম্মো হঞ্ছতি ধম্মমজ্জ, অযো সুৰণ্ণং ৰিয দস্সনেয্যং.

৩২.

‘‘সচে তুৰং যুদ্ধবলো অধম্ম, ন তুয্হ ৰুড্ঢা চ গরূ চ অত্থি;

মগ্গঞ্চ তে দম্মি পিযাপ্পিযেন, ৰাচাদুরুত্তানিপি তে খমামী’’তি. –

ইমা ছ গাথা তেসঞ্ঞেৰ ৰচনপটিৰচনৰসেন কথিতা.

তত্থ স কিস্স হেতুম্হি তৰজ্জ দজ্জন্তি সোম্হি অহং অধম্মো অধম্মযানং রথং আরুল়্হো অভীতো বলৰা. কিংকারণা অজ্জ ভো ধম্ম, কস্সচি অদিন্নপুব্বং মগ্গং তুয্হং দম্মীতি. পুব্বেতি পঠমকপ্পিককালে ইমস্মিং লোকে দসকুসলকম্মপথধম্মো চ পুব্বে পাতুরহোসি, পচ্ছা অধম্মো. জেট্ঠো চাতি পুরে নিব্বত্তভাৰেন অহং জেট্ঠো চ সেট্ঠো চ পোরাণকো চ, ত্ৰং পন কনিট্ঠো, তস্মা মগ্গা উয্যাহীতি ৰদতি. নপি পাতিরূপাতি অহঞ্হি তে নেৰ যাচনায ন পতিরূপৰচনেন মগ্গারহতায মগ্গং দদেয্যং. অনুৰিসটোতি অহং চতস্সো দিসা চতস্সো অনুদিসাতি সব্বা দিসা অত্তনো গুণেন পত্থটো পঞ্ঞাতো পাকটো. লোহেনাতি অযমুট্ঠিকেন. হঞ্ছতীতি হনিস্সতি. তুৰং যুদ্ধবলো অধম্মাতি সচে ত্ৰং যুদ্ধবলোসি অধম্ম. ৰুড্ঢা চ গরূ চাতি যদি তুয্হং ‘‘ইমে ৰুড্ঢা, ইমে গরূ পণ্ডিতা’’তি এৰং নত্থি. পিযাপ্পিযেনাতি পিযেনাপি অপ্পিযেনাপি দদন্তো পিযেন ৰিয তে মগ্গং দদামীতি অত্থো.

বোধিসত্তেন পন ইমায গাথায কথিতক্খণেযেৰ অধম্মো রথে ঠাতুং অসক্কোন্তো অৰংসিরো পথৰিযং পতিত্ৰা পথৰিযা ৰিৰরে দিন্নে গন্ত্ৰা অৰীচিম্হিযেৰ নিব্বত্তি. এতমত্থং ৰিদিত্ৰা ভগৰা অভিসম্বুদ্ধো হুত্ৰা সেসগাথা অভাসি –

৩৩.

‘‘ইদঞ্চ সুত্ৰা ৰচনং অধম্মো, অৰংসিরো পতিতো উদ্ধপাদো;

যুদ্ধত্থিকো চে ন লভামি যুদ্ধং, এত্তাৰতা হোতি হতো অধম্মো.

৩৪.

‘‘খন্তীবলো যুদ্ধবলং ৰিজেত্ৰা, হন্ত্ৰা অধম্মং নিহনিত্ৰ ভূম্যা;

পাযাসি ৰিত্তো অভিরুয্হ সন্দনং, মগ্গেনেৰ অতিবলো সচ্চনিক্কমো.

৩৫.

‘‘মাতা পিতা সমণব্রাহ্মণা চ, অসম্মানিতা যস্স সকে অগারে;

ইধেৰ নিক্খিপ্প সরীরদেহং, কাযস্স ভেদা নিরযং ৰজন্তি তে;

যথা অধম্মো পতিতো অৰংসিরো.

৩৬.

‘‘মাতা পিতা সমণব্রাহ্মণা চ, সুসম্মানিতা যস্স সকে অগারে;

ইধেৰ নিক্খিপ্প সরীরদেহং, কাযস্স ভেদা সুগতিং ৰজন্তি তে;

যথাপি ধম্মো অভিরুয্হ সন্দন’’ন্তি.

তত্থ যুদ্ধত্থিকো চেতি অযং তস্স ৰিলাপো, সো কিরেৰং ৰিলপন্তোযেৰ পতিত্ৰা পথৰিং পৰিট্ঠো. এত্তাৰতাতি ভিক্খৰে, যাৰতা পথৰিং পৰিট্ঠো, তাৰতা অধম্মো হতো নাম হোতি. খন্তীবলোতি ভিক্খৰে, এৰং অধম্মো পথৰিং পৰিট্ঠো অধিৰাসনখন্তীবলো তং যুদ্ধবলং ৰিজেত্ৰা ৰধিত্ৰা ভূমিযং নিহনিত্ৰা পাতেত্ৰা ৰিত্তজাততায ৰিত্তো অত্তনো রথং আরুয্হ মগ্গেনেৰ সচ্চনিক্কমো তথপরক্কমো ধম্মদেৰপুত্তো পাযাসি. অসম্মানিতাতি অসক্কতা. সরীরদেহন্তি ইমস্মিংযেৰ লোকে সরীরসঙ্খাতং দেহং নিক্খিপিত্ৰা. নিরযং ৰজন্তীতি যস্স পাপপুগ্গলস্স এতে সক্কারারহা গেহে অসক্কতা, তথারূপা যথা অধম্মো পতিতো অৰংসিরো, এৰং অৰংসিরা নিরযং ৰজন্তীতি অত্থো. সুগতিং ৰজন্তীতি যস্স পনেতে সক্কতা, তাদিসা পণ্ডিতা যথাপি ধম্মো সন্দনং অভিরুয্হ দেৰলোকং গতো, এৰং সুগতিং ৰজন্তীতি.

সত্থা এৰং ধম্মং দেসেত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো মযা সদ্ধিং পটিৰিরুজ্ঝিত্ৰা পথৰিং পৰিট্ঠো’’তি ৰত্ৰা জাতকং সমোধানেসি – ‘‘তদা অধম্মো দেৰপুত্তো দেৰদত্তো অহোসি, পরিসাপিস্স দেৰদত্তপরিসা, ধম্মো পন অহমেৰ, পরিসা বুদ্ধপরিসাযেৰা’’তি.

ধম্মদেৰপুত্তজাতকৰণ্ণনা ততিযা.

[৪৫৮] ৪. উদযজাতকৰণ্ণনা

একা নিসিন্নাতি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. ৰত্থু কুসজাতকে (জা. ২.২০.১ আদযো) আৰি ভৰিস্সতি. সত্থা পন তং ভিক্খুং ‘‘সচ্চং কির ত্ৰং উক্কণ্ঠিতোসী’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খু কস্মা কিলেসৰসেন এৰরূপে নিয্যানিকসাসনে পব্বজিত্ৰা উক্কণ্ঠিতোসি? পোরাণকপণ্ডিতা সমিদ্ধে দ্ৰাদসযোজনিকে সুরুন্ধননগরে রজ্জং কারেন্তা দেৰচ্ছরপটিভাগায ইত্থিযা সদ্ধিং সত্ত ৰস্সসতানি একগব্ভে ৰসন্তাপি ইন্দ্রিযানি ভিন্দিত্ৰা লোভৰসেন ন ওলোকেসু’’ন্তি ৰত্ৰা অতীতং আহরি.

অতীতে কাসিরট্ঠে সুরুন্ধননগরে কাসিরাজা রজ্জং কারেসি, তস্স নেৰ পুত্তো, ন ধীতা অহোসি. সো অত্তনো দেৰিযো ‘‘পুত্তে পত্থেথা’’তি আহ. অগ্গমহেসীপি রঞ্ঞো ৰচনং সম্পটিচ্ছিত্ৰা তথা অকাসি. তদা বোধিসত্তো ব্রহ্মলোকা চৰিত্ৰা তস্সেৰ রঞ্ঞো অগ্গমহেসিযা কুচ্ছিম্হি নিব্বত্তি. অথস্স মহাজনস্স হদযং ৰড্ঢেত্ৰা জাতভাৰেন ‘‘উদযভদ্দো’’তি নামং করিংসু. কুমারস্স পদসা চরণকালে অঞ্ঞোপি সত্তো ব্রহ্মলোকা চৰিত্ৰা তস্সেৰ রঞ্ঞো অঞ্ঞতরায দেৰিযা কুচ্ছিম্হি কুমারিকা হুত্ৰা নিব্বত্তি, তস্সাপি ‘‘উদযভদ্দা’’তি নামং করিংসু. কুমারো ৰযপ্পত্তো সব্বসিপ্পনিপ্ফত্তিং পাপুণি, জাতব্রহ্মচারী পন অহোসি, সুপিনন্তেনপি মেথুনধম্মং ন জানাতি, ন তস্স কিলেসেসু চিত্তং অল্লীযি. রাজা পুত্তং রজ্জে অভিসিঞ্চিতুকামো ‘‘কুমারস্স ইদানি রজ্জসুখসেৰনকালো, নাটকাপিস্স পচ্চুপট্ঠাপেস্সামী’’তি সাসনং পেসেসি. বোধিসত্তো ‘‘ন ময্হং রজ্জেনত্থো, কিলেসেসু মে চিত্তং ন অল্লীযতী’’তি পটিক্খিপিত্ৰা পুনপ্পুনং ৰুচ্চমানো রত্তজম্বুনদমযং ইত্থিরূপং কারেত্ৰা ‘‘এৰরূপং ইত্থিং লভমানো রজ্জং সম্পটিচ্ছিস্সামী’’তি মাতাপিতূনং পেসেসি. তে তং সুৰণ্ণরূপকং সকলজম্বুদীপং পরিহারাপেত্ৰা তথারূপং ইত্থিং অলভন্তা উদযভদ্দং অলঙ্কারেত্ৰা তস্স সন্তিকে ঠপেসুং. সা তং সুৰণ্ণরূপকং অভিভৰিত্ৰা অট্ঠাসি. অথ নেসং অনিচ্ছমানানঞ্ঞেৰ ৰেমাতিকং ভগিনিং উদযভদ্দকুমারিং অগ্গমহেসিং কত্ৰা বোধিসত্তং রজ্জে অভিসিঞ্চিংসু. তে পন দ্ৰেপি ব্রহ্মচরিযৰাসমেৰ ৰসিংসু.

অপরভাগে মাতাপিতূনং অচ্চযেন বোধিসত্তো রজ্জং কারেসি. উভো একগব্ভে ৰসমানাপি লোভৰসেন ইন্দ্রিযানি ভিন্দিত্ৰা অঞ্ঞমঞ্ঞং ন ওলোকেসুং, অপিচ খো পন ‘‘যো অম্হেসু পঠমতরং কালং করোতি, সো নিব্বত্তট্ঠানতো আগন্ত্ৰা ‘অসুকট্ঠানে নিব্বত্তোস্মী’তি আরোচেতূ’’তি সঙ্গরমকংসু. অথ খো বোধিসত্তো অভিসেকতো সত্তৰস্সসতচ্চযেন কালমকাসি. অঞ্ঞো রাজা নাহোসি, উদযভদ্দাযযেৰ আণা পৰত্তি. অমচ্চা রজ্জং অনুসাসিংসু. বোধিসত্তোপি চুতিক্খণে তাৰতিংসভৰনে সক্কত্তং পত্ৰা যসমহন্ততায সত্তাহং অনুস্সরিতুং নাসক্খি. ইতি সো মনুস্সগণনায সত্তৰস্সসতচ্চযেন আৰজ্জেত্ৰা ‘‘উদযভদ্দং রাজধীতরং ধনেন ৰীমংসিত্ৰা সীহনাদং নদাপেত্ৰা ধম্মং দেসেত্ৰা সঙ্গরং মোচেত্ৰা আগমিস্সামী’’তি চিন্তেসি. তদা কির মনুস্সানং দসৰস্সসহস্সাযুককালো হোতি. রাজধীতাপি তং দিৰসং রত্তিভাগে পিহিতেসু দ্ৰারেসু ঠপিতআরক্খে সত্তভূমিকপাসাদৰরতলে অলঙ্কতসিরিগব্ভে একিকাৰ নিচ্চলা অত্তনো সীলং আৰজ্জমানা নিসীদি. অথ সক্কো সুৰণ্ণমাসকপূরং একং সুৰণ্ণপাতিং আদায আগন্ত্ৰা সযনগব্ভেযেৰ পাতুভৰিত্ৰা একমন্তং ঠিতো তায সদ্ধিং সল্লপন্তো পঠমং গাথমাহ –

৩৭.

‘‘একা নিসিন্না সুচি সঞ্ঞতূরূ, পাসাদমারুয্হ অনিন্দিতঙ্গী;

যাচামি তং কিন্নরনেত্তচক্খু, ইমেকরত্তিং উভযো ৰসেমা’’তি.

তত্থ সুচীতি সুচিৰত্থনিৰত্থা. সঞ্ঞতূরূতি সুট্ঠু ঠপিতঊরূ, ইরিযাপথং সণ্ঠপেত্ৰা সুচিৰত্থা একিকাৰ নিসিন্নাসীতি ৰুত্তং হোতি. অনিন্দিতঙ্গীতি পাদন্ততো যাৰ কেসগ্গা অনিন্দিতসরীরা পরমসোভগ্গপ্পত্তসরীরা. কিন্নরনেত্তচক্খূতি তীহি মণ্ডলেহি পঞ্চহি চ পসাদেহি উপসোভিতত্তা কিন্নরানং নেত্তসদিসেহি চক্খূহি সমন্নাগতে. ইমেকরত্তিন্তি ইমং একরত্তং অজ্জ ইমস্মিং অলঙ্কতসযনগব্ভে একতো ৰসেয্যামাতি যাচতি.

ততো রাজধীতা দ্ৰে গাথা অভাসি –

৩৮.

‘‘ওকিণ্ণন্তরপরিখং, দল়্হমট্টালকোট্ঠকং;

রক্খিতং খগ্গহত্থেহি, দুপ্পৰেসমিদং পুরং.

৩৯.

‘‘দহরস্স যুৰিনো চাপি, আগমো চ ন ৰিজ্জতি;

অথ কেন নু ৰণ্ণেন, সঙ্গমং ইচ্ছসে মযা’’তি.

তত্থ ওকিণ্ণন্তরপরিখন্তি ইদং দ্ৰাদসযোজনিকং সুরুন্ধনপুরং অন্তরন্তরা উদকপরিখানং কদ্দমপরিখানং সুক্খপরিখানং ওকিণ্ণত্তা ওকিণ্ণন্তরপরিখং. দল়্হমট্টালকোট্ঠকন্তি থিরতরেহি অট্টালকেহি দ্ৰারকোট্ঠকেহি চ সমন্নাগতং. খগ্গহত্থেহীতি আৰুধহত্থেহি দসহি যোধসহস্সেহি রক্খিতং. দুপ্পৰেসমিদং পুরন্তি ইদং সকলপুরম্পি তস্স অন্তো মাপিতং ময্হং নিৰাসপুরম্পি উভযং কস্সচি পৰিসিতুং ন সক্কা. আগমো চাতি ইধ ইমায ৰেলায তরুণস্স ৰা যোব্বনপ্পত্তস্স ৰা থামসম্পন্নযোধস্স ৰা অঞ্ঞস্স ৰা মহন্তম্পি পণ্ণাকারং গহেত্ৰা আগচ্ছন্তস্স আগমো নাম নত্থি. সঙ্গমন্তি অথ ত্ৰং কেন কারণেন ইমায ৰেলায মযা সহ সমাগমং ইচ্ছসীতি.

অথ সক্কো চতুত্থং গাথমাহ –

৪০.

‘‘যক্খোহমস্মি কল্যাণি, আগতোস্মি তৰন্তিকে;

ত্ৰং মং নন্দয ভদ্দন্তে, পুণ্ণকংসং দদামি তে’’তি.

তস্সত্থো – কল্যাণি, সুন্দরদস্সনে অহমেকো দেৰপুত্তো দেৰতানুভাৰেন ইধাগতো, ত্ৰং অজ্জ মং নন্দয তোসেহি, অহং তে ইমং সুৰণ্ণমাসকপুণ্ণং সুৰণ্ণপাতিং দদামীতি.

তং সুত্ৰা রাজধীতা পঞ্চমং গাথমাহ –

৪১.

‘‘দেৰংৰ যক্খং অথ ৰা মনুস্সং, ন পত্থযে উদযমতিচ্চ অঞ্ঞং;

গচ্ছেৰ ত্ৰং যক্খ মহানুভাৰ, মা চস্সু গন্ত্ৰা পুনরাৰজিত্থা’’তি.

তস্সত্থো – অহং দেৰরাজ, দেৰং ৰা যক্খং ৰা উদযং অতিক্কমিত্ৰা অঞ্ঞং ন পত্থেমি, সো ত্ৰং গচ্ছেৰ, মা ইধ অট্ঠাসি, ন মে তযা আভতেন পণ্ণাকারেন অত্থো, গন্ত্ৰা চ মা ইমং ঠানং পুনরাৰজিত্থাতি.

সো তস্সা সীহনাদং সুত্ৰা অট্ঠত্ৰা গতসদিসো হুত্ৰা তত্থেৰ অন্তরহিতো অট্ঠাসি. সো পুনদিৰসে তায ৰেলাযমেৰ সুৰণ্ণমাসকপূরং রজতপাতিং আদায তায সদ্ধিং সল্লপন্তো ছট্ঠং গাথমাহ –

৪২.

‘‘যা সা রতি উত্তমা কামভোগিনং, যংহেতু সত্তা ৰিসমং চরন্তি;

মা তং রতিং জীযি তুৰং সুচিম্হিতে, দদামি তে রূপিযং কংসপূর’’ন্তি.

তস্সত্থো – ভদ্দে, রাজধীতে যা এসা কামভোগিসত্তানং রতীসু মেথুনকামরতি নাম উত্তমা রতি, যস্সা রতিযা কারণা সত্তা কাযদুচ্চরিতাদিৰিসমং চরন্তি, তং রতিং ত্ৰং ভদ্দে, সুচিম্হিতে মনাপহসিতে মা জীযি, অহম্পি আগচ্ছন্তো ন তুচ্ছহত্থো আগতো, হিয্যো সুৰণ্ণমাসকপূরং সুৰণ্ণপাতিং আহরিং, অজ্জ রূপিযপাতিং, ইমং তে অহং রূপিযপাতিং সুৰণ্ণপূরং দদামীতি.

রাজধীতা চিন্তেসি ‘‘অযং কথাসল্লাপং লভন্তো পুনপ্পুনং আগমিস্সতি, ন দানি তেন সদ্ধিং কথেস্সামী’’তি. সা কিঞ্চি ন কথেসি.

সক্কো তস্সা অকথিতভাৰং ঞত্ৰা তত্থেৰ অন্তরহিতো হুত্ৰা পুনদিৰসে তাযমেৰ ৰেলায লোহপাতিং কহাপণপূরং আদায ‘‘ভদ্দে, ত্ৰং মং কামরতিযা সন্তপ্পেহি, ইমং তে কহাপণপূরং লোহপাতিং দস্সামী’’তি আহ. তং দিস্ৰা রাজধীতা সত্তমং গাথমাহ –

৪৩.

‘‘নারিং নরো নিজ্ঝপযং ধনেন, উক্কংসতী যত্থ করোতি ছন্দং;

ৰিপচ্চনীকো তৰ দেৰধম্মো, পচ্চক্খতো থোকতরেন এসী’’তি.

তস্সত্থো – ভো পুরিস, ত্ৰং জল়ো. নরো হি নাম নারিং কিলেসরতিকারণা ধনেন নিজ্ঝাপেন্তো সঞ্ঞাপেন্তো যত্থ নারিযা ছন্দং করোতি, তং উক্কংসতি ৰণ্ণেত্ৰা থোমেত্ৰা বহুতরেন ধনেন পলোভেতি, তুয্হং পনেসো দেৰসভাৰো ৰিপচ্চনীকো, ত্ৰঞ্হি মযা পচ্চক্খতো থোকতরেন এসি, পঠমদিৰসে সুৰণ্ণপূরং সুৰণ্ণপাতিং আহরিত্ৰা, দুতিযদিৰসে সুৰণ্ণপূরং রূপিযপাতিং, ততিযদিৰসে কহাপণপূরং লোহপাতিং আহরসীতি.

তং সুত্ৰা সক্কো ‘‘ভদ্দে রাজকুমারি, অহং ছেকৰাণিজো ন নিরত্থকেন অত্থং নাসেমি, সচে ত্ৰং আযুনা ৰা ৰণ্ণেন ৰা ৰড্ঢেয্যাসি, অহং তে পণ্ণাকারং ৰড্ঢেত্ৰা আহরেয্যং, ত্ৰং পন পরিহাযসেৰ, তেনাহম্পি ধনং পরিহাপেমী’’তি ৰত্ৰা তিস্সো গাথা অভাসি –

৪৪.

‘‘আযু চ ৰণ্ণো চ মনুস্সলোকে, নিহীযতি মনুজানং সুগত্তে;

তেনেৰ ৰণ্ণেন ধনম্পি তুয্হং, নিহীযতি জিণ্ণতরাসি অজ্জ.

৪৫.

‘‘এৰং মে পেক্খমানস্স, রাজপুত্তি যসস্সিনি;

হাযতেৰ তৰ ৰণ্ণো, অহোরত্তানমচ্চযে.

৪৬.

‘‘ইমিনাৰ ত্ৰং ৰযসা, রাজপুত্তি সুমেধসে;

ব্রহ্মচরিযং চরেয্যাসি, ভিয্যো ৰণ্ণৰতী সিযা’’তি.

তত্থ নিহীযতীতি পরিস্সাৰনে আসিত্তউদকং ৰিয পরিহাযতি. মনুস্সলোকস্মিঞ্হি সত্তা জীৰিতেন ৰণ্ণেন চক্খুপসাদাদীহি চ দিনে দিনে পরিহাযন্তেৰ. জিণ্ণতরাসীতি মম পঠমং আগতদিৰসে পৰত্তঞ্হি তে আযু হিয্যো দিৰসং ন পাপুণি, কুঠারিযা ছিন্নং ৰিয তত্থেৰ নিরুজ্ঝি, হিয্যো পৰত্তম্পি অজ্জদিৰসং ন পাপুণি, হিয্যোৰ কুঠারিযা ছিন্নং ৰিয নিরুজ্ঝি, তস্মা অজ্জ জিণ্ণতরাসি জাতা. এৰং মেতি তিট্ঠতু হিয্যো চ পরহিয্যো চ, অজ্জেৰ পন ময্হং এৰং পেক্খমানস্সেৰ হাযতেৰ তৰ ৰণ্ণো. অহোরত্তানমচ্চযেতি ইতো পট্ঠায রত্তিন্দিৰেসু ৰীতিৰত্তেসু অহোরত্তানং অচ্চযেন অপণ্ণত্তিকভাৰমেৰ গমিস্সসীতি দস্সেতি. ইমিনাৰাতি তস্মা ভদ্দে, সচে ত্ৰং ইমিনা ৰযেনেৰ ইমস্মিং সুৰণ্ণৰণ্ণে সরীরে রজায অৰিলুত্তেযেৰ সেট্ঠচরিযং চরেয্যাসি, পব্বজিত্ৰা সমণধম্মং করেয্যাসি. ভিয্যো ৰণ্ণৰতী সিযাতি অতিরেকতরৰণ্ণা ভৰেয্যাসীতি.

ততো রাজধীতা ইতরং গাথমাহ –

৪৭.

‘‘দেৰা ন জীরন্তি যথা মনুস্সা, গত্তেসু তেসং ৰলিযো ন হোন্তি;

পুচ্ছামি তং যক্খ মহানুভাৰ, কথং নু দেৰান সরীরদেহো’’তি.

তত্থ সরীরদেহোতি সরীরসঙ্খাতো দেহো, দেৰানং সরীরং কথং ন জীরতি, ইদং অহং তং পুচ্ছামীতি ৰদতি.

অথস্সা কথেন্তো সক্কো ইতরং গাথমাহ –

৪৮.

‘‘দেৰা ন জীরন্তি যথা মনুস্সা, গত্তেসু তেসং ৰলিযো ন হোন্তি;

সুৰে সুৰে ভিয্যতরোৰ তেসং, দিব্বো চ ৰণ্ণো ৰিপুলা চ ভোগা’’তি.

তত্থ যথা মনুস্সাতি যথা মনুস্সা জীরন্তা রূপেন ৰণ্ণেন ভোগেন চক্খুপসাদাদীহি চ জীরন্তি, ন এৰং দেৰা. তেসঞ্হি গত্তেসু ৰলিযোপি ন সন্তি, মট্ঠকঞ্চনপট্টমিৰ সরীরং হোতি. সুৰে সুৰেতি দিৰসে দিৰসে. ভিয্যতরোৰাতি অতিরেকতরোৰ তেসং দিব্বো চ ৰণ্ণো ৰিপুলা চ ভোগা হোন্তি, মনুস্সেসু হি রূপপরিহানি চিরজাতভাৰস্স সক্খি, দেৰেসু অতিরেকরূপসম্পত্তি চ অতিরেকপরিৰারসম্পত্তি চ. এৰং অপরিহানধম্মো নামেস দেৰলোকো. তস্মা ত্ৰং জরং অপ্পত্ৰাৰ নিক্খমিত্ৰা পব্বজ, এৰং পরিহানিযসভাৰা মনুস্সলোকা চৰিত্ৰা অপরিহানিযসভাৰং এৰরূপং দেৰলোকং গমিস্সসীতি.

সা দেৰলোকস্স ৰণ্ণং সুত্ৰা তস্স গমনমগ্গং পুচ্ছন্তী ইতরং গাথমাহ –

৪৯.

‘‘কিংসূধ ভীতা জনতা অনেকা, মগ্গো চ নেকাযতনং পৰুত্তো;

পুচ্ছামি তং যক্খ মহানুভাৰ, কত্থট্ঠিতো পরলোকং ন ভাযে’’তি.

তত্থ কিংসূধ ভীতাতি দেৰরাজ, অযং খত্তিযাদিভেদা অনেকা জনতা কিংভীতা কস্স ভযেন পরিহানিযসভাৰা মনুস্সলোকা দেৰলোকং ন গচ্ছতীতি পুচ্ছতি. মগ্গোতি দেৰলোকগামিমগ্গো. ইধ পন ‘‘কি’’ন্তি আহরিত্ৰা ‘‘কো’’তি পুচ্ছা কাতব্বা. অযঞ্হেত্থ অত্থো ‘‘অনেকতিত্থাযতনৰসেন পণ্ডিতেহি পৰুত্তো দেৰলোকমগ্গো কো কতরো’’তি ৰুত্তো. কত্থট্ঠিতোতি পরলোকং গচ্ছন্তো কতরস্মিং মগ্গে ঠিতো ন ভাযতীতি.

অথস্সা কথেন্তো সক্কো ইতরং গাথমাহ –

৫০.

‘‘ৰাচং মনঞ্চ পণিধায সম্মা, কাযেন পাপানি অকুব্বমানো;

বহুন্নপানং ঘরমাৰসন্তো, সদ্ধো মুদূ সংৰিভাগী ৰদঞ্ঞূ;

সঙ্গাহকো সখিলো সণ্হৰাচো, এত্থট্ঠিতো পরলোকং ন ভাযে’’তি.

তস্সত্থো – ভদ্দে, উদযে ৰাচং মনঞ্চ সম্মা ঠপেত্ৰা কাযেন পাপানি অকরোন্তো ইমে দস কুসলকম্মপথে সমাদায ৰত্তন্তো বহুঅন্নপানে পহূতদেয্যধম্মে ঘরে ৰসন্তো ‘‘দানস্স ৰিপাকো অত্থী’’তি সদ্ধায সমন্নাগতো মুদুচিত্তো দানসংৰিভাগতায সংৰিভাগী পব্বজিতা ভিক্খায চরমানা ৰদন্তি নাম, তেসং পচ্চযদানেন তস্স ৰাদস্স জাননতো ৰদঞ্ঞূ চতূহি সঙ্গহৰত্থূহি সঙ্গহতায সঙ্গাহকো পিযৰাদিতায সখিলো মট্ঠৰচনতায সণ্হৰাচো এত্থ এত্তকে গুণরাসিম্হি ঠিতো পরলোকং গচ্ছন্তো ন ভাযতীতি.

ততো রাজধীতা তং তস্স ৰচনং সুত্ৰা থুতিং করোন্তী ইতরং গাথমাহ –

৫১.

‘‘অনুসাসসি মং যক্খ, যথা মাতা যথা পিতা;

উল়ারৰণ্ণ পুচ্ছামি, কো নু ত্ৰমসি সুব্রহা’’তি.

তস্সত্থো – যথা মাতাপিতরো পুত্তকে অনুসাসন্তি, তথা মং অনুসাসসি. উল়ারৰণ্ণ সোভগ্গপ্পত্তরূপদারক কো নু অসি ত্ৰং এৰং অচ্চুগ্গতসরীরোতি.

ততো বোধিসত্তো ইতরং গাথমাহ –

৫২.

‘‘উদযোহমস্মি কল্যাণি, সঙ্গরত্তা ইধাগতো;

আমন্ত খো তং গচ্ছামি, মুত্তোস্মি তৰ সঙ্গরা’’তি.

তস্সত্থো – কল্যাণদস্সনে অহং পুরিমভৰে তৰ সামিকো উদযো নাম তাৰতিংসভৰনে সক্কো হুত্ৰা নিব্বত্তো, ইধাগচ্ছন্তো ন কিলেসৰসেনাগতো, তং ৰীমংসিত্ৰা পন সঙ্গরং মোচেস্সামীতি সঙ্গরত্তা পুব্বে সঙ্গরস্স কতত্তা আগতোস্মি, ইদানি তং আমন্তেত্ৰা গচ্ছামি, মুত্তোস্মি তৰ সঙ্গরাতি.

রাজধীতা অস্সসিত্ৰা ‘‘সামি, ত্ৰং উদযভদ্দরাজা’’তি অস্সুধারা পৰত্তযমানা ‘‘অহং তুম্হেহি ৰিনা ৰসিতুং ন সক্কোমি, যথা তুম্হাকং সন্তিকে ৰসামি, তথা মং অনুসাসথা’’তি ৰত্ৰা ইতরং গাথং অভাসি –

৫৩.

‘‘সচে খো ত্ৰং উদযোসি, সঙ্গরত্তা ইধাগতো;

অনুসাস মং রাজপুত্ত, যথাস্স পুন সঙ্গমো’’তি.

অথ নং অনুসাসন্তো মহাসত্তো চতস্সো গাথা অভাসি –

৫৪.

‘‘অতিপততি ৰযো খণো তথেৰ, ঠানং নত্থি ধুৰং চৰন্তি সত্তা;

পরিজীযতি অদ্ধুৰং সরীরং, উদযে মা পমাদ চরস্সু ধম্মং.

৫৫.

‘‘কসিণা পথৰী ধনস্স পূরা, একস্সেৰ সিযা অনঞ্ঞধেয্যা;

তং চাপি জহতি অৰীতরাগো, উদযে মা পমাদ চরস্সু ধম্মং.

৫৬.

‘‘মাতা চ পিতা চ ভাতরো চ, ভরিযা যাপি ধনেন হোতি কীতা;

তে চাপি জহন্তি অঞ্ঞমঞ্ঞং, উদযে মা পমাদ চরস্সু ধম্মং.

৫৭.

‘‘কাযো পরভোজনন্তি ঞত্ৰা, সংসারে সুগতিঞ্চ দুগ্গতিঞ্চ;

ইত্তরৰাসোতি জানিযান, উদযে মা পমাদ চরস্সু ধম্ম’’ন্তি.

তত্থ অতিপততীতি অতিৰিয পততি, সীঘং অতিক্কমতি. ৰযোতি পঠমৰযাদিতিৰিধোপি ৰযো. খণো তথেৰাতি উপ্পাদট্ঠিতিভঙ্গক্খণোপি তথেৰ অতিপততি. উভযেনপি ভিন্নো ইমেসং সত্তানং আযুসঙ্খারো নাম সীঘসোতা নদী ৰিয অনিৰত্তন্তো সীঘং অতিক্কমতীতি দস্সেতি. ঠানং নত্থীতি ‘‘উপ্পন্না সঙ্খারা অভিজ্জিত্ৰা তিট্ঠন্তূ’’তি পত্থনাযপি তেসং ঠানং নাম নত্থি, ধুৰং একংসেনেৰ বুদ্ধং ভগৰন্তং আদিং কত্ৰা সব্বেপি সত্তা চৰন্তি, ‘‘ধুৰং মরণং, অদ্ধুৰং জীৰিত’’ন্তি এৰং মরণস্সতিং ভাৰেহীতি দীপেতি. পরিজীযতীতি ইদং সুৰণ্ণৰণ্ণম্পি সরীরং জীরতেৰ, এৰং জানাহি. মা পমাদন্তি তস্মা ত্ৰং উদযভদ্দে মা পমাদং আপজ্জি, অপ্পমত্তা হুত্ৰা দসকুসলকম্মপথধম্মং চরাহীতি.

কসিণাতি সকলা. একস্সেৰাতি যদি একস্সেৰ রঞ্ঞো, তস্মিং একস্মিংযেৰ অনঞ্ঞাধীনা অস্স. তং চাপি জহতি অৰীতরাগোতি তণ্হাৰসিকো পুগ্গলো এত্তকেনপি যসেন অতিত্তো মরণকালে অৰীতরাগোৰ তং ৰিজহতি. এৰং তণ্হায অপূরণীযভাৰং জানাহীতি দীপেতি. তে চাপীতি মাতা পুত্তং, পুত্তো মাতরং, পিতা পুত্তং, পুত্তো পিতরং, ভাতা ভগিনিং, ভগিনী ভাতরং, ভরিযা সামিকং, সামিকো ভরিযন্তি এতে অঞ্ঞমঞ্ঞং জহন্তি, নানা হোন্তি. এৰং সত্তানং নানাভাৰৰিনাভাৰং জানাহীতি দীপেতি.

পরভোজনন্তি ৰিৰিধানং কাকাদীনং পরসত্তানং ভোজনং. ইত্তরৰাসোতি যা এসা ইমস্মিং সংসারে মনুস্সভূতা সুগ্গতি চ তিরচ্ছানভূতা দুগ্গতি চ, এতং উভযম্পি ‘‘ইত্তরৰাসো’’তি জানিত্ৰা মা পমাদং, চরস্সু ধম্মং. ইমেসং সত্তানং নানাঠানতো আগন্ত্ৰা একস্মিং ঠানে সমাগমো পরিত্তো, ইমে সত্তা অপ্পকস্মিংযেৰ কালে একতো ৰসন্তি, তস্মা অপ্পমত্তা হোহীতি.

এৰং মহাসত্তো তস্সা ওৰাদমদাসি. সাপি তস্স ধম্মকথায পসীদিত্ৰা থুতিং করোন্তী ওসানগাথমাহ –

৫৮.

‘‘সাধু ভাসতিযং যক্খো, অপ্পং মচ্চান জীৰিতং;

কসিরঞ্চ পরিত্তঞ্চ, তঞ্চ দুক্খেন সংযুতং;

সাহং একা পব্বজিস্সামি, হিত্ৰা কাসিং সুরুন্ধন’’ন্তি.

তত্থ সাধূতি ‘‘অপ্পং মচ্চান জীৰিত’’ন্তি ভাসমানো অযং দেৰরাজা সাধু ভাসতি. কিংকারণা? ইদঞ্হি কসিরঞ্চ দুক্খং অস্সাদরহিতং, পরিত্তঞ্চ ন বহুকং ইত্তরকালং. সচে হি কসিরম্পি সমানং দীঘকালং পৰত্তেয্য, পরিত্তকম্পি সমানং সুখং ভৰেয্য, ইদং পন কসিরঞ্চেৰ পরিত্তঞ্চ সকলেন ৰট্টদুক্খেন সংযুতং সন্নিহিতং. সাহন্তি সা অহং. সুরুন্ধনন্তি সুরুন্ধননগরঞ্চ কাসিরট্ঠঞ্চ ছড্ডেত্ৰা একিকাৰ পব্বজিস্সামীতি আহ.

বোধিসত্তো তস্সা ওৰাদং দত্ৰা সকট্ঠানমেৰ গতো. সাপি পুনদিৰসে অমচ্চে রজ্জং পটিচ্ছাপেত্ৰা অন্তোনগরেযেৰ রমণীযে উয্যানে ইসিপব্বজ্জং পব্বজিত্ৰা ধম্মং চরিত্ৰা আযুপরিযোসানে তাৰতিংসভৰনে বোধিসত্তস্স পাদপরিচারিকা হুত্ৰা নিব্বত্তি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. তদা রাজধীতা রাহুলমাতা অহোসি, সক্কো পন অহমেৰ অহোসিন্তি.

উদযজাতকৰণ্ণনা চতুত্থা.

[৪৫৯] ৫. পানীযজাতকৰণ্ণনা

মিত্তো মিত্তস্সাতি ইদং সত্থা জেতৰনে ৰিহরন্তো কিলেসনিগ্গহং আরব্ভ কথেসি. একস্মিঞ্হি সমযে সাৰত্থিৰাসিনো পঞ্চসতা গিহিসহাযকা তথাগতস্স ধম্মদেসনং সুত্ৰা পব্বজিত্ৰা উপসম্পন্না অন্তোকোটিসন্থারে ৰসন্তা অড্ঢরত্তসমযে কামৰিতক্কং ৰিতক্কেসুং. সব্বং হেট্ঠা ৰুত্তনযেনেৰ ৰেদিতব্বং. ভগৰতো আণত্তিযা পনাযস্মতা আনন্দেন ভিক্খুসঙ্ঘে সন্নিপাতিতে সত্থা পঞ্ঞত্তাসনে নিসীদিত্ৰা অনোদিস্সকং কত্ৰা ‘‘কামৰিতক্কং ৰিতক্কযিত্থা’’তি অৰত্ৰা সব্বসঙ্গাহিকৰসেনেৰ ‘‘ভিক্খৰে, কিলেসো খুদ্দকো নাম নত্থি, ভিক্খুনা নাম উপ্পন্নুপ্পন্না কিলেসা নিগ্গহেতব্বা, পোরাণকপণ্ডিতা অনুপ্পন্নেপি বুদ্ধে কিলেসে নিগ্গহেত্ৰা পচ্চেকবোধিঞাণং পত্তা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে কাসিরট্ঠে একস্মিং গামকে দ্ৰে সহাযকা পানীযতুম্বানি আদায খেত্তং গন্ত্ৰা একমন্তং ঠপেত্ৰা খেত্তং কোট্টেত্ৰা পিপাসিতকালে আগন্ত্ৰা পানীযং পিৰন্তি. তেসু একো পানীযত্থায আগন্ত্ৰা অত্তনো পানীযং রক্খন্তো ইতরস্স তুম্বতো পিৰিত্ৰা সাযং অরঞ্ঞা নিক্খমিত্ৰা ন্হাযিত্ৰা ঠিতো ‘‘অত্থি নু খো মে কাযদ্ৰারাদীহি অজ্জ কিঞ্চি পাপং কত’’ন্তি উপধারেন্তো থেনেত্ৰা পানীযস্স পিৰিতভাৰং দিস্ৰা সংৰেগপ্পত্তো হুত্ৰা ‘‘অযং তণ্হা ৰড্ঢমানা মং অপাযেসু খিপিস্সতি, ইমং কিলেসং নিগ্গণ্হিস্সামী’’তি পানীযস্স থেনেত্ৰা পিৰিতভাৰং আরম্মণং কত্ৰা ৰিপস্সনং ৰড্ঢেত্ৰা পচ্চেকবোধিঞাণং নিব্বত্তেত্ৰা পটিলদ্ধগুণং আৰজ্জেন্তো অট্ঠাসি. অথ নং ইতরো ন্হাযিত্ৰা উট্ঠিতো ‘‘এহি, সম্ম, ঘরং গচ্ছামা’’তি আহ. ‘‘গচ্ছ ত্ৰং, মম ঘরেন কিচ্চং নত্থি, পচ্চেকবুদ্ধা নাম ময’’ন্তি. ‘‘পচ্চেকবুদ্ধা নাম তুম্হাদিসা ন হোন্তী’’তি. ‘‘অথ কীদিসা পচ্চেকবুদ্ধা হোন্তী’’তি? ‘‘দ্ৰঙ্গুলকেসা কাসাযৰত্থৰসনা উত্তরহিমৰন্তে নন্দমূলকপব্ভারে ৰসন্তী’’তি. সো সীসং পরামসি, তং খণঞ্ঞেৰস্স গিহিলিঙ্গং অন্তরধাযি, সুরত্তদুপট্টং নিৰত্থমেৰ, ৰিজ্জুলতাসদিসং কাযবন্ধনং বদ্ধমেৰ, অলত্তকপাটলৰণ্ণং উত্তরাসঙ্গচীৰরং একংসং কতমেৰ, মেঘৰণ্ণং পংসুকূলচীৰরং দক্খিণঅংসকূটে ঠপিতমেৰ, ভমরৰণ্ণো মত্তিকাপত্তো ৰামঅংসকূটে লগ্গিতোৰ অহোসি. সো আকাসে ঠত্ৰা ধম্মং দেসেত্ৰা উপ্পতিত্ৰা নন্দমূলকপব্ভারেযেৰ ওতরি.

অপরোপি কাসিগামেযেৰ কুটুম্বিকো আপণে নিসিন্নো একং পুরিসং অত্তনো ভরিযং আদায গচ্ছন্তং দিস্ৰা তং উত্তমরূপধরং ইত্থিং ইন্দ্রিযানি ভিন্দিত্ৰা ওলোকেত্ৰা পুন চিন্তেসি ‘‘অযং লোভো ৰড্ঢমানো মং অপাযেসু খিপিস্সতী’’তি সংৰিগ্গমানসো ৰিপস্সনং ৰড্ঢেত্ৰা পচ্চেকবোধিঞাণং নিব্বত্তেত্ৰা আকাসে ঠিতো ধম্মং দেসেত্ৰা নন্দমূলকপব্ভারমেৰ গতো.

অপরেপি কাসিগামৰাসিনোযেৰ দ্ৰে পিতাপুত্তা একতো মগ্গং পটিপজ্জিংসু. অটৰীমুখে পন চোরা উট্ঠিতা হোন্তি. তে পিতাপুত্তে লভিত্ৰা পুত্তং গহেত্ৰা ‘‘ধনং আহরিত্ৰা তৰ পুত্তং গণ্হা’’তি পিতরং ৰিস্সজ্জেন্তি, দ্ৰে ভাতরো লভিত্ৰা কনিট্ঠং গহেত্ৰা জেট্ঠং ৰিস্সজ্জেন্তি, আচরিযন্তেৰাসিকে লভিত্ৰা আচরিযং গহেত্ৰা অন্তেৰাসিকং ৰিস্সজ্জেন্তি, অন্তেৰাসিকো সিপ্পলোভেন ধনং আহরিত্ৰা আচরিযং গণ্হিত্ৰা গচ্ছতি. অথ তে পিতাপুত্তাপি তত্থ চোরানং উট্ঠিতভাৰং ঞত্ৰা ‘‘ত্ৰং মং ‘পিতা’তি মা ৰদ, অহম্পি তং ‘পুত্তো’তি ন ৰক্খামী’’তি কতিকং কত্ৰা চোরেহি গহিতকালে ‘‘তুম্হে অঞ্ঞমঞ্ঞং কিং হোথা’’তি পুট্ঠা ‘‘ন কিঞ্চি হোমা’’তি সম্পজানমুসাৰাদং করিংসু. তেসু অটৰিতো নিক্খমিত্ৰা সাযং ন্হাযিত্ৰা ঠিতেসু পুত্তো অত্তনো সীলং সোধেন্তো তং মুসাৰাদং দিস্ৰা ‘‘ইদং পাপং ৰড্ঢমানং মং অপাযেসু খিপিস্সতি, ইমং কিলেসং নিগ্গণ্হিস্সামী’’তি ৰিপস্সনং ৰড্ঢেত্ৰা পচ্চেকবোধিঞাণং নিব্বত্তেত্ৰা আকাসে ঠিতো পিতু ধম্মং দেসেত্ৰা নন্দমূলকপব্ভারমেৰ গতো.

অপরোপি কাসিগামেযেৰ পন একো গামভোজকো মাঘাতং কারাপেসি. অথ নং বলিকম্মকালে মহাজনো সন্নিপতিত্ৰা আহ ‘‘সামি, মযং মিগসূকরাদযো মারেত্ৰা যক্খানং বলিকম্মং করিস্সাম, বলিকম্মকালো এসো’’তি. তুম্হাকং পুব্বে করণনিযামেনেৰ করোথাতি মনুস্সা বহুং পাণাতিপাতমকংসু. সো বহুং মচ্ছমংসং দিস্ৰা ‘‘ইমে মনুস্সা এত্তকে পাণে মারেন্তা মমেৰেকস্স ৰচনেন মারযিংসূ’’তি কুক্কুচ্চং কত্ৰা ৰাতপানং নিস্সায ঠিতকোৰ ৰিপস্সনং ৰড্ঢেত্ৰা পচ্চেকবোধিঞাণং নিব্বত্তেত্ৰা আকাসে ঠিতো মহাজনস্স ধম্মং দেসেত্ৰা নন্দমূলকপব্ভারমেৰ গতো.

অপরোপি কাসিরট্ঠেযেৰ গামভোজকো মজ্জৰিক্কযং ৰারেত্ৰা ‘‘সামি, পুব্বে ইমস্মিং কালে সুরাছণো নাম হোতি, কিং করোমা’’তি মহাজনেন ৰুত্তো ‘‘তুম্হাকং পোরাণকনিযামেনেৰ করোথা’’তি আহ. মনুস্সা ছণং কত্ৰা সুরং পিৰিত্ৰা কলহং করোন্তা হত্থপাদে ভঞ্জিত্ৰা সীসং ভিন্দিত্ৰা কণ্ণে ছিন্দিত্ৰা বহুদণ্ডেন বজ্ঝিংসু. গামভোজকো তে দিস্ৰা চিন্তেসি ‘‘মযি অননুজানন্তে ইমে ইমং দুক্খং ন ৰিন্দেয্যু’’ন্তি. সো এত্তকেন কুক্কুচ্চং কত্ৰা ৰাতপানং নিস্সায ঠিতকোৰ ৰিপস্সনং ৰড্ঢেত্ৰা পচ্চেকবোধিঞাণং নিব্বত্তেত্ৰা ‘‘অপ্পমত্তা হোথা’’তি আকাসে ঠত্ৰা ধম্মং দেসেত্ৰা নন্দমূলকপব্ভারমেৰ গতো.

অপরভাগে তে পঞ্চ পচ্চেকবুদ্ধা ভিক্খাচারত্থায বারাণসিদ্ৰারে ওতরিত্ৰা সুনিৰত্থা সুপারুতা পাসাদিকেহি অভিক্কমাদীহি পিণ্ডায চরন্তা রাজদ্ৰারং সম্পাপুণিংসু. রাজা তে দিস্ৰা পসন্নচিত্তো রাজনিৰেসনং পৰেসেত্ৰা পাদে ধোৰিত্ৰা গন্ধতেলেন মক্খেত্ৰা পণীতেন খাদনীযেন ভোজনীযেন পরিৰিসিত্ৰা একমন্তং নিসীদিত্ৰা ‘‘ভন্তে, তুম্হাকং পঠমৰযে পব্বজ্জা সোভতি, ইমস্মিং ৰযে পব্বজন্তা কথং কামেসু আদীনৰং পস্সিত্থ, কিং ৰো আরম্মণং অহোসী’’তি পুচ্ছি. তে তস্স কথেন্তা –

৫৯.

‘‘মিত্তো মিত্তস্স পানীযং, অদিন্নং পরিভুঞ্জিসং;

তেন পচ্ছা ৰিজিগুচ্ছিং, তং পাপং পকতং মযা;

মা পুন অকরং পাপং, তস্মা পব্বজিতো অহং.

৬০.

‘‘পরদারঞ্চ দিস্ৰান, ছন্দো মে উদপজ্জথ;

তেন পচ্ছা ৰিজিগুচ্ছিং, তং পাপং পকতং মযা;

মা পুন অকরং পাপং, তস্মা পব্বজিতো অহং.

৬১.

‘‘পিতরং মে মহারাজ, চোরা অগণ্হু কাননে;

তেসাহং পুচ্ছিতো জানং, অঞ্ঞথা নং ৰিযাকরিং.

৬২.

‘‘তেন পচ্ছা ৰিজিগুচ্ছিং, তং পাপং পকতং মযা;

মা পুন অকরং পাপং, তস্মা পব্বজিতো অহং.

৬৩.

‘‘পাণাতিপাতমকরুং, সোমযাগে উপট্ঠিতে;

তেসাহং সমনুঞ্ঞাসিং.

৬৪.

‘‘তেন পচ্ছা ৰিজিগুচ্ছিং, তং পাপং পকতং মযা;

মা পুন অকরং পাপং, তস্মা পব্বজিতো অহং.

৬৫.

‘‘সুরামেরযমাধুকা, যে জনা পঠমাসু নো;

বহূনং তে অনত্থায, মজ্জপানমকপ্পযুং;

তেসাহং সমনুঞ্ঞাসিং.

৬৬.

‘‘তেন পচ্ছা ৰিজিগুচ্ছিং, তং পাপং পকতং মযা;

মা পুন অকরং পাপং, তস্মা পব্বজিতো অহ’’ন্তি. –

ইমা পটিপাটিযা পঞ্চ গাথা অভাসিংসু. রাজাপি একমেকস্স ব্যাকরণং সুত্ৰা ‘‘ভন্তে, অযং পব্বজ্জা তুম্হাকং যেৰানুচ্ছৰিকা’’তি থুতিমকাসি.

তত্থ মিত্তো মিত্তস্সাতি মহারাজ, অহং একস্স মিত্তো হুত্ৰা তস্স মিত্তস্স সন্তকং পানীযং ইমিনা নিযামেনেৰ পরিভুঞ্জিং. তস্মাতি যস্মা পুথুজ্জনা নাম পাপকম্মং করোন্তি, তস্মা অহং মা পুন অকরং পাপং, তং পাপং আরম্মণং কত্ৰা পব্বজিতোম্হি. ছন্দোতি মহারাজ, ইমিনাৰ নিযামেন মম পরদারং দিস্ৰা কামে ছন্দো উপ্পজ্জি. অগণ্হূতি অগণ্হিংসু. জানন্তি তেসং চোরানং ‘‘অযং কিং তে হোতী’’তি পুচ্ছিতো জানন্তোযেৰ ‘‘ন কিঞ্চি হোতী’’তি অঞ্ঞথা ব্যাকাসিং. সোমযাগেতি নৰচন্দে উট্ঠিতে সোমযাগং নাম যক্খবলিং করিংসু, তস্মিং উপট্ঠিতে. সমনুঞ্ঞাসিন্তি সমনুঞ্ঞো আসিং. সুরামেরযমাধুকাতি পিট্ঠসুরাদিসুরঞ্চ পুপ্ফাসৰাদিমেরযঞ্চ পক্কমধু ৰিয মধুরং মঞ্ঞমানা. যে জনা পঠমাসু নোতি যে নো গামে জনা পঠমং এৰরূপা আসুং অহেসুং. বহূনং তেতি তে একদিৰসং একস্মিং ছণে পত্তে বহূনং অনত্থায মজ্জপানং অকপ্পযিংসু.

রাজা তেসং ধম্মং সুত্ৰা পসন্নচিত্তো চীৰরসাটকে চ ভেসজ্জানি চ দত্ৰা পচ্চেকবুদ্ধে উয্যোজেসি. তেপি তস্স অনুমোদনং কত্ৰা তত্থেৰ অগমংসু. ততো পট্ঠায রাজা ৰত্থুকামেসু ৰিরত্তো অনপেক্খো হুত্ৰা নানগ্গরসভোজনং ভুঞ্জিত্ৰা ইত্থিযো অনালপিত্ৰা অনোলোকেত্ৰা ৰিরত্তচিত্তো উট্ঠায সিরিগব্ভং পৰিসিত্ৰা নিসিন্নো সেতভিত্তিযং কসিণপরিকম্মং কত্ৰা ঝানং নিব্বত্তেসি. সো ঝানপ্পত্তো কামে গরহন্তো –

৬৭.

‘‘ধিরত্থু সুবহূ কামে, দুগ্গন্ধে বহুকণ্টকে;

যে অহং পটিসেৰন্তো, নালভিং তাদিসং সুখ’’ন্তি. – গাথমাহ;

তত্থ বহুকণ্টকেতি বহূ পচ্চামিত্তে. যে অহন্তি যো অহং, অযমেৰ ৰা পাঠো. তাদিসন্তি এতাদিসং কিলেসরহিতং ঝানসুখং.

অথস্স অগ্গমহেসী ‘‘অযং রাজা পচ্চেকবুদ্ধানং ধম্মকথং সুত্ৰা উক্কণ্ঠিতরূপো অহোসি, অম্হেহি সদ্ধিং অকথেত্ৰাৰ সিরিগব্ভং পৰিট্ঠো, পরিগ্গণ্হিস্সামি তাৰ ন’’ন্তি চিন্তেত্ৰা সিরিগব্ভদ্ৰারে ঠিতা রঞ্ঞো কামেসু গরহন্তস্স উদানং সুত্ৰা ‘‘মহারাজ, ত্ৰং কামে গরহসি, কামসুখসদিসং নাম সুখং নত্থী’’তি কামে ৰণ্ণেন্তী ইতরং গাথমাহ –

৬৮.

‘‘মহস্সাদা সুখা কামা, নত্থি কামা পরং সুখং;

যে কামে পটিসেৰন্তি, সগ্গং তে উপপজ্জরে’’তি.

তত্থ মহস্সাদাতি মহারাজ, এতে কামা নাম মহাঅস্সাদা, ইতো উত্তরিং অঞ্ঞং সুখং নত্থি. কামসেৰিনো হি অপাযে অনুপগম্ম সগ্গে নিব্বত্তন্তীতি অত্থো.

তং সুত্ৰা বোধিসত্তো তস্সা ‘‘নস্স ৰসলি, কিং কথেসি, কামেসু সুখং নাম কুতো অত্থি, ৰিপরিণামদুক্খা এতে’’তি গরহন্তো সেসগাথা অভাসি –

৬৯.

‘‘অপ্পস্সাদা দুখা কামা, নত্থি কামা পরং দুখং;

যে কামে পটিসেৰন্তি, নিরযং তে উপপজ্জরে.

৭০.

‘‘অসী যথা সুনিসিতো, নেত্তিংসোৰ সুপাযিকো;

সত্তীৰ উরসি খিত্তা, কামা দুক্খতরা ততো.

৭১.

‘‘অঙ্গারানংৰ জলিতং, কাসুং সাধিকপোরিসং;

ফালংৰ দিৰসংতত্তং, কামা দুক্খতরা ততো.

৭২.

‘‘ৰিসং যথা হলাহলং, তেলং পক্কুথিতং যথা;

তম্বলোহৰিলীনংৰ, কামা দুক্খতরা ততো’’তি.

তত্থ নেত্তিংসোতি নিক্করুণো, ইদম্পি একস্স খগ্গস্স নামং. দুক্খতরাতি এৰং জলিতঙ্গারকাসুং ৰা দিৰসং তত্তং ফালং ৰা পটিচ্চ যং দুক্খং উপ্পজ্জতি, ততোপি কামাযেৰ দুক্খতরাতি অত্থো. অনন্তরগাথায যথা এতানি ৰিসাদীনি দুক্খাৰহনতো দুক্খানি, এৰং কামাপি দুক্খা, তং পন কামদুক্খং ইতরেহি দুক্খেহি দুক্খতরন্তি অত্থো.

এৰং মহাসত্তো দেৰিযা ধম্মং দেসেত্ৰা অমচ্চে সন্নিপাতেত্ৰা ‘‘ভোন্তো অমচ্চা, তুম্হে রজ্জং পটিপজ্জথ, অহং পব্বজিস্সামী’’তি ৰত্ৰা মহাজনস্স রোদন্তস্স পরিদেৰন্তস্স উট্ঠায আকাসে ঠত্ৰা ওৰাদং দত্ৰা অনিলপথেনেৰ উত্তরহিমৰন্তং গন্ত্ৰা রমণীযে পদেসে অস্সমং মাপেত্ৰা ইসিপব্বজ্জং পব্বজিত্ৰা আযুপরিযোসানে ব্রহ্মলোকপরাযণো অহোসি.

সত্থা ইমং ধম্মদেসনং আহরিত্ৰা ‘‘ভিক্খৰে, কিলেসো খুদ্দকো নাম নত্থি, অপ্পমত্তকোপি পণ্ডিতেহি নিগ্গহিতব্বোযেৰা’’তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে পঞ্চসতা ভিক্খূ অরহত্তে পতিট্ঠহিংসু. তদা পচ্চেকবুদ্ধা পরিনিব্বাযিংসু, দেৰী রাহুলমাতা অহোসি, রাজা পন অহমেৰ অহোসিন্তি.

পানীযজাতকৰণ্ণনা পঞ্চমা.

[৪৬০] ৬. যুধঞ্চযজাতকৰণ্ণনা

মিত্তামচ্চপরিব্যূল়্হন্তি ইদং সত্থা জেতৰনে ৰিহরন্তো মহাভিনিক্খমনং আরব্ভ কথেসি. একদিৰসঞ্হি ধম্মসভাযং সন্নিপতিতা ভিক্খূ ‘‘আৰুসো, সচে দসবলো অগারং অজ্ঝাৰসিস্স, সকলচক্কৰাল়গব্ভে চক্কৰত্তিরাজা অভৰিস্স সত্তরতনসমন্নাগতো চতুরিদ্ধীহি সমিদ্ধো পরোসহস্সপুত্তপরিৰারো, সো এৰরূপং সিরিৰিভৰং পহায কামেসু দোসং দিস্ৰা অড্ঢরত্তসমযে ছন্নসহাযোৰ কণ্টকমারুয্হ নিক্খমিত্ৰা অনোমনদীতীরে পব্বজিত্ৰা ছব্বস্সানি দুক্করকারিকং কত্ৰা সম্মাসম্বোধিং পত্তো’’তি সত্থু গুণকথং কথযিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, তথাগতো ইদানেৰ মহাভিনিক্খমনং নিক্খন্তো, পুব্বেপি দ্ৰাদসযোজনিকে বারাণসিনগরে রজ্জং পহায নিক্খন্তোযেৰা’’তি ৰত্ৰা অতীতং আহরি.

অতীতে রম্মনগরে সব্বদত্তো নাম রাজা অহোসি. অযঞ্হি বারাণসী উদযজাতকে (জা. ১.১১.৩৭ আদযো) সুরুন্ধননগরং নাম জাতা, চূল়সুতসোমজাতকে (জা. ২.১৭.১৯৫ আদযো) সুদস্সনং নাম, সোণনন্দজাতকে (জা. ২.২০.৯২ আদযো) ব্রহ্মৰড্ঢনং নাম, খণ্ডহালজাতকে (জা. ২.২২.৯৮২ আদযো) পুপ্ফৰতী নাম, সঙ্খব্রাহ্মণজাতকে (জা. ১.১০.৩৯ আদযো) মোল়িনী নাম, ইমস্মিং পন যুধঞ্চযজাতকে রম্মনগরং নাম অহোসি. এৰমস্সা কদাচি নামং পরিৰত্ততি. তত্থ সব্বদত্তরঞ্ঞো পুত্তসহস্সং অহোসি. যুধঞ্চযস্স নাম জেট্ঠপুত্তস্স উপরজ্জং অদাসি. সো দিৰসে দিৰসে মহাদানং পৰত্তেসি. এৰং গচ্ছন্তে কালে বোধিসত্তো একদিৰসং পাতোৰ রথৰরমারুয্হ মহন্তেন সিরিৰিভৰেন উয্যানকীল়ং গচ্ছন্তো রুক্খগ্গতিণগ্গসাখগ্গমক্কটকসুত্তজালাদীসু মুত্তাজালাকারেন লগ্গিতউস্সৰবিন্দূনি দিস্ৰা ‘‘সম্ম সারথি, কিং নামেত’’ন্তি পুচ্ছিত্ৰা ‘‘এতে দেৰ, হিমসমযে পতনকউস্সৰবিন্দূনি নামা’’তি সুত্ৰা দিৰসভাগং উয্যানে কীল়িত্ৰা সাযন্হকালে পচ্চাগচ্ছন্তো তে অদিস্ৰাৰ ‘‘সম্ম সারথি, কহং নু খো এতে উস্সৰবিন্দূ, ন তে ইদানি পস্সামী’’তি পুচ্ছি. ‘‘দেৰ, তে সূরিযে উগ্গচ্ছন্তে সব্বেৰ ভিজ্জিত্ৰা পথৰিযং পতন্তী’’তি সুত্ৰা সংৰেগপ্পত্তো হুত্ৰা ‘‘ইমেসং সত্তানং জীৰিতসঙ্খারাপি তিণগ্গে উস্সৰবিন্দুসদিসাৰ, মযা ব্যাধিজরামরণেহি অপীল়িতেযেৰ মাতাপিতরো আপুচ্ছিত্ৰা পব্বজিতুং ৰট্টতী’’তি উস্সৰবিন্দুমেৰ আরম্মণং কত্ৰা আদিত্তে ৰিয তযো ভৰে পস্সন্তো অত্তনো গেহং অগন্ত্ৰা অলঙ্কতপটিযত্তায ৰিনিচ্ছযসালায নিসিন্নস্স পিতু সন্তিকংযেৰ গন্ত্ৰা পিতরং ৰন্দিত্ৰা একমন্তং ঠিতো পব্বজ্জং যাচন্তো পঠমং গাথমাহ –

৭৩.

‘‘মিত্তামচ্চপরিব্যূল়্হং, অহং ৰন্দে রথেসভং;

পব্বজিস্সামহং রাজ, তং দেৰো অনুমঞ্ঞতূ’’তি.

তত্থ পরিব্যূল়্হন্তি পরিৰারিতং. তং দেৰোতি তং মম পব্বজ্জং দেৰো অনুজানাতূতি অত্থো.

অথ নং রাজা নিৰারেন্তো দুতিযং গাথমাহ –

৭৪.

‘‘সচে তে ঊনং কামেহি, অহং পরিপূরযামি তে;

যো তং হিং সতি ৰারেমি, মা পব্বজ যুধঞ্চযা’’তি.

তং সুত্ৰা কুমারো ততিযং গাথমাহ –

৭৫.

‘‘ন মত্থি ঊনং কামেহি, হিংসিতা মে ন ৰিজ্জতি;

দীপঞ্চ কাতুমিচ্ছামি, যং জরা নাভিকীরতী’’তি.

তত্থ দীপঞ্চাতি তাত নেৰ ময্হং কামেহি ঊনং অত্থি, ন মং হিংসন্তো কোচি ৰিজ্জতি, অহং পন পরলোকগমনায অত্তনো পতিট্ঠং কাতুমিচ্ছামি. কীদিসং? যং জরা নাভিকীরতি ন ৰিদ্ধংসেতি, তমহং কাতুমিচ্ছামি, অমতমহানিব্বানং গৰেসিস্সামি, ন মে কামেহি অত্থো, অনুজানাথ মং, মহারাজাতি ৰদতি.

ইতি পুনপ্পুনং কুমারো পব্বজ্জং যাচি, রাজা ‘‘মা পব্বজা’’তি ৰারেতি. তমত্থমাৰিকরোন্তো সত্থা উপড্ঢং গাথমাহ –

৭৬.

‘‘পুত্তো ৰা পিতরং যাচে, পিতা ৰা পুত্তমোরস’’ন্তি.

তত্থ ৰা-কারো সম্পিণ্ডনত্থো. ইদং ৰুত্তং হোতি – ‘‘এৰং, ভিক্খৰে, পুত্তো চ পিতরং যাচতি, পিতা চ ওরসং পুত্তং যাচতী’’তি.

সেসং উপড্ঢগাথং রাজা আহ –

‘‘নেগমো তং যাচে তাত, মা পব্বজ যুধঞ্চযা’’তি.

তস্সত্থো – অযং তে তাত নিগমৰাসিমহাজনো যাচতি, নগরজনোপি মা ত্ৰং পব্বজাতি.

কুমারো পুনপি পঞ্চমং গাথমাহ –

৭৭.

‘‘মা মং দেৰ নিৰারেহি, পব্বজন্তং রথেসভ;

মাহং কামেহি সম্মত্তো, জরায ৰসমন্ৰগূ’’তি.

তত্থ ৰসমন্ৰগূতি মা অহং কামেহি সম্মত্তো পমত্তো জরায ৰসগামী নাম হোমি, ৰট্টদুক্খং পন খেপেত্ৰা যথা চ সব্বঞ্ঞুতঞ্ঞাণপ্পটিৰিজ্ঝনকো হোমি,. তথা মং ওলোকেহীতি অধিপ্পাযো.

এৰং ৰুত্তে রাজা অপ্পটিভাণো অহোসি. মাতা পনস্স ‘‘পুত্তো তে, দেৰি, পিতরং পব্বজ্জং অনুজানাপেতী’’তি সুত্ৰা ‘‘কিং তুম্হে কথেথা’’তি নিরস্সাসেন মুখেন সুৰণ্ণসিৰিকায নিসীদিত্ৰা সীঘং ৰিনিচ্ছযট্ঠানং গন্ত্ৰা যাচমানা ছট্ঠং গাথমাহ –

৭৮.

‘‘অহং তং তাত যাচামি, অহং পুত্ত নিৰারযে;

চিরং তং দট্ঠুমিচ্ছামি, মা পব্বজ যুধঞ্চযা’’তি.

তং সুত্ৰা কুমারো সত্তমং গাথমাহ –

৭৯.

‘‘উস্সাৰোৰ তিণগ্গম্হি, সূরিযুগ্গমনং পতি;

এৰমাযু মনুস্সানং, মা মং অম্ম নিৰারযা’’তি.

তস্সত্থো – অম্ম, যথা তিণগ্গে উস্সৰবিন্দু সূরিযস্স উগ্গমনং পতিট্ঠাতুং ন সক্কোতি, পথৰিযং পততি, এৰং ইমেসং সত্তানং জীৰিতং পরিত্তং তাৰকালিকং অচিরট্ঠিতিকং, এৰরূপে লোকসন্নিৰাসে কথং ত্ৰং চিরং মং পস্সসি, মা মং নিৰারেহীতি.

এৰং ৰুত্তেপি সা পুনপ্পুনং যাচিযেৰ. ততো মহাসত্তো পিতরং আমন্তেত্ৰা অট্ঠমং গাথমাহ –

৮০.

‘‘তরমানো ইমং যানং, আরোপেতু রথেসভ;

মা মে মাতা তরন্তস্স, অন্তরাযকরা অহূ’’তি.

তস্সত্থো – তাত রথেসভ, ইমং মম মাতরং তরমানো পুরিসো সুৰণ্ণসিৰিকাযানং আরোপেতু, মা মে জাতিজরাব্যাধিমরণকন্তারং তরন্তস্স অতিক্কমন্তস্স মাতা অন্তরাযকরা অহূতি.

রাজা পুত্তস্স ৰচনং সুত্ৰা ‘‘গচ্ছ, ভদ্দে, তৰ সিৰিকায নিসীদিত্ৰা রতিৰড্ঢনপাসাদং অভিরুহা’’তি আহ. সা তস্স ৰচনং সুত্ৰা ঠাতুং অসক্কোন্তী নারীগণপরিৰুতা গন্ত্ৰা পাসাদং অভিরুহিত্ৰা ‘‘কা নু খো পুত্তস্স পৰত্তী’’তি ৰিনিচ্ছযট্ঠানং ওলোকেন্তী অট্ঠাসি. বোধিসত্তো মাতু গতকালে পুন পিতরং যাচি. রাজা পটিবাহিতুং অসক্কোন্তো ‘‘তেন হি তাত, তৰ মনং মত্থকং পাপেহি, পব্বজাহী’’তি অনুজানি. রঞ্ঞো অনুঞ্ঞাতকালে বোধিসত্তস্স কনিট্ঠো যুধিট্ঠিলকুমারো নাম পিতরং ৰন্দিত্ৰা ‘‘তাত, ময্হং পব্বজ্জং অনুজানাথা’’তি অনুজানাপেসি. উভোপি ভাতরো পিতরং ৰন্দিত্ৰা কামে পহায মহাজনপরিৰুতা ৰিনিচ্ছযতো নিক্খমিংসু. দেৰীপি মহাসত্তং ওলোকেত্ৰা ‘‘মম পুত্তে পব্বজিতে রম্মনগরং তুচ্ছং ভৰিস্সতী’’তি পরিদেৰমানা গাথাদ্ৰযমাহ –

৮১.

‘‘অভিধাৰথ ভদ্দন্তে, সুঞ্ঞং হেস্সতি রম্মকং;

যুধঞ্চযো অনুঞ্ঞাতো, সব্বদত্তেন রাজিনা.

৮২.

‘‘যোহু সেট্ঠো সহস্সস্স, যুৰা কঞ্চনসন্নিভো;

সোযং কুমারো পব্বজিতো, কাসাযৰসনো বলী’’তি.

তত্থ অভিধাৰথাতি পরিৰারেত্ৰা ঠিতা নারিযো সব্বা ৰেগেন ধাৰথাতি আণাপেতি. ভদ্দন্তেতি এৰং গন্ত্ৰা ‘‘ভদ্দং তৰ হোতূ’’তি ৰদথ. রম্মকন্তি রম্মনগরং সন্ধাযাহ. যোহু সেট্ঠোতি যো রঞ্ঞো পুত্তো সহস্সস্স সেট্ঠো অহোসি, সো পব্বজিতোতি পব্বজ্জায গচ্ছন্তং সন্ধাযেৰমাহ.

বোধিসত্তোপি ন তাৰ পব্বজতি. সো হি মাতাপিতরো ৰন্দিত্ৰা কনিট্ঠং যুধিট্ঠিলকুমারং গহেত্ৰা নগরা নিক্খম্ম মহাজনং নিৰত্তেত্ৰা উভোপি ভাতরো হিমৰন্তং পৰিসিত্ৰা মনোরমে ঠানে অস্সমপদং করিত্ৰা ইসিপব্বজ্জং পব্বজিত্ৰা ঝানাভিঞ্ঞং নিব্বত্তেত্ৰা ৰনমূলফলাদীহি যাৰজীৰং যাপেত্ৰা ব্রহ্মলোকপরাযণা অহেসুং. তমত্থং ওসানে অভিসম্বুদ্ধগাথায দীপেতি –

৮৩.

‘‘উভো কুমারা পব্বজিতা, যুধঞ্চযো যুধিট্ঠিলো;

পহায মাতাপিতরো, সঙ্গং ছেত্ৰান মচ্চুনো’’তি.

তত্থ মচ্চুনোতি মারস্স. ইদং ৰুত্তং হোতি – ভিক্খৰে, যুধঞ্চযো চ যুধিট্ঠিলো চ তে উভোপি কুমারা মাতাপিতরো পহায মারস্স সন্তকং রাগদোসমোহসঙ্গং ছিন্দিত্ৰা পব্বজিতাতি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা ‘‘ন ভিক্খৰে, ইদানেৰ, পুব্বেপি তথাগতো রজ্জং ছড্ডেত্ৰা পব্বজিতোযেৰা’’তি ৰত্ৰা জাতকং সমোধানেসি – ‘‘তদা মাতাপিতরো মহারাজকুলানি অহেসুং, যুধিট্ঠিলকুমারো আনন্দো, যুধঞ্চযো পন অহমেৰ অহোসি’’ন্তি.

যুধঞ্চযজাতকৰণ্ণনা ছট্ঠা.

[৪৬১] ৭. দসরথজাতকৰণ্ণনা

এথ লক্খণ সীতা চাতি ইদং সত্থা জেতৰনে ৰিহরন্তো একং মতপিতিকং কুটুম্বিকং আরব্ভ কথেসি. সো হি পিতরি কালকতে সোকাভিভূতো সব্বকিচ্চানি পহায সোকানুৰত্তকোৰ অহোসি. সত্থা পচ্চূসসমযে লোকং ওলোকেন্তো তস্স সোতাপত্তিফলূপনিস্সযং দিস্ৰা পুনদিৰসে সাৰত্থিযং পিণ্ডায চরিত্ৰা কতভত্তকিচ্চো ভিক্খূ উয্যোজেত্ৰা একং পচ্ছাসমণং গহেত্ৰা তস্স গেহং গন্ত্ৰা ৰন্দিত্ৰা নিসিন্নং মধুরৰচনেন আলপন্তো ‘‘কিং সোচসি উপাসকা’’তি ৰত্ৰা ‘‘আম, ভন্তে, পিতুসোকো মং বাধতী’’তি ৰুত্তে ‘‘উপাসক, পোরাণকপণ্ডিতা অট্ঠৰিধে লোকধম্মে তথতো জানন্তা পিতরি কালকতে অপ্পমত্তকম্পি সোকং ন করিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং দসরথমহারাজা নাম অগতিগমনং পহায ধম্মেন রজ্জং কারেসি. তস্স সোল়সন্নং ইত্থিসহস্সানং জেট্ঠিকা অগ্গমহেসী দ্ৰে পুত্তে একঞ্চ ধীতরং ৰিজাযি. জেট্ঠপুত্তো রামপণ্ডিতো নাম অহোসি, দুতিযো লক্খণকুমারো নাম, ধীতা সীতা দেৰী নাম. অপরভাগে মহেসী কালমকাসি. রাজা তস্সা কালকতায চিরতরং সোকৰসং গন্ত্ৰা অমচ্চেহি সঞ্ঞাপিতো তস্সা কত্তব্বপরিহারং কত্ৰা অঞ্ঞং অগ্গমহেসিট্ঠানে ঠপেসি. সা রঞ্ঞো পিযা অহোসি মনাপা. সাপি অপরভাগে গব্ভং গণ্হিত্ৰা লদ্ধগব্ভপরিহারা পুত্তং ৰিজাযি, ‘‘ভরতকুমারো’’তিস্স নামং অকংসু. রাজা পুত্তসিনেহেন ‘‘ভদ্দে, ৰরং তে দম্মি, গণ্হাহী’’তি আহ. সা গহিতকং কত্ৰা ঠপেত্ৰা কুমারস্স সত্তট্ঠৰস্সকালে রাজানং উপসঙ্কমিত্ৰা ‘‘দেৰ, তুম্হেহি ময্হং পুত্তস্স ৰরো দিন্নো, ইদানিস্স ৰরং দেথা’’তি আহ. গণ্হ, ভদ্দেতি. ‘‘দেৰ, পুত্তস্স মে রজ্জং দেথা’’তি ৰুত্তে রাজা অচ্ছরং পহরিত্ৰা ‘‘নস্স, ৰসলি, ময্হং দ্ৰে পুত্তা অগ্গিক্খন্ধা ৰিয জলন্তি, তে মারাপেত্ৰা তৰ পুত্তস্স রজ্জং যাচসী’’তি তজ্জেসি. সা ভীতা সিরিগব্ভং পৰিসিত্ৰা অঞ্ঞেসুপি দিৰসেসু রাজানং পুনপ্পুনং রজ্জমেৰ যাচি.

রাজা তস্সা তং ৰরং অদত্ৰাৰ চিন্তেসি ‘‘মাতুগামো নাম অকতঞ্ঞূ মিত্তদুব্ভী, অযং মে কূটপণ্ণং ৰা কূটলঞ্জং ৰা কত্ৰা পুত্তে ঘাতাপেয্যা’’তি. সো পুত্তে পক্কোসাপেত্ৰা তমত্থং আরোচেত্ৰা ‘‘তাতা, তুম্হাকং ইধ ৰসন্তানং অন্তরাযোপি ভৰেয্য, তুম্হে সামন্তরজ্জং ৰা অরঞ্ঞং ৰা গন্ত্ৰা মম মরণকালে আগন্ত্ৰা কুলসন্তকং রজ্জং গণ্হেয্যাথা’’তি ৰত্ৰা পুন নেমিত্তকে ব্রাহ্মণে পক্কোসাপেত্ৰা অত্তনো আযুপরিচ্ছেদং পুচ্ছিত্ৰা ‘‘অঞ্ঞানি দ্ৰাদস ৰস্সানি পৰত্তিস্সতী’’তি সুত্ৰা ‘‘তাতা, ইতো দ্ৰাদসৰস্সচ্চযেন আগন্ত্ৰা ছত্তং উস্সাপেয্যাথা’’তি আহ. তে ‘‘সাধূ’’তি ৰত্ৰা পিতরং ৰন্দিত্ৰা রোদন্তা পাসাদা ওতরিংসু. সীতা দেৰী ‘‘অহম্পি ভাতিকেহি সদ্ধিং গমিস্সামী’’তি পিতরং ৰন্দিত্ৰা রোদন্তী নিক্খমি. তযোপি জনা মহাপরিৰারা নিক্খমিত্ৰা মহাজনং নিৰত্তেত্ৰা অনুপুব্বেন হিমৰন্তং পৰিসিত্ৰা সম্পন্নোদকে সুলভফলাফলে পদেসে অস্সমং মাপেত্ৰা ফলাফলেন যাপেন্তা ৰসিংসু.

লক্খণপণ্ডিতো চ সীতা চ রামপণ্ডিতং যাচিত্ৰা ‘‘তুম্হে অম্হাকং পিতুট্ঠানে ঠিতা, তস্মা অস্সমেযেৰ হোথ, মযং ফলাফলং আহরিত্ৰা তুম্হে পোসেস্সামা’’তি পটিঞ্ঞং গণ্হিংসু. ততো পট্ঠায রামপণ্ডিতো তত্থেৰ হোতি. ইতরে দ্ৰে ফলাফলং আহরিত্ৰা তং পটিজগ্গিংসু. এৰং তেসং ফলাফলেন যাপেত্ৰা ৰসন্তানং দসরথমহারাজা পুত্তসোকেন নৰমে সংৰচ্ছরে কালমকাসি. তস্স সরীরকিচ্চং কারেত্ৰা দেৰী ‘‘অত্তনো পুত্তস্স ভরতকুমারস্স ছত্তং উস্সাপেথা’’তি আহ. অমচ্চা পন ‘‘ছত্তস্সামিকা অরঞ্ঞে ৰসন্তী’’তি ন অদংসু. ভরতকুমারো ‘‘মম ভাতরং রামপণ্ডিতং অরঞ্ঞতো আনেত্ৰা ছত্তং উস্সাপেস্সামী’’তি পঞ্চরাজককুধভণ্ডানি গহেত্ৰা চতুরঙ্গিনিযা সেনায তস্স ৰসনট্ঠানং পত্ৰা অৰিদূরে খন্ধাৰারং কত্ৰা তত্থ নিৰাসেত্ৰা কতিপযেহি অমচ্চেহি সদ্ধিং লক্খণপণ্ডিতস্স চ সীতায চ অরঞ্ঞং গতকালে অস্সমপদং পৰিসিত্ৰা অস্সমপদদ্ৰারে ঠপিতকঞ্চনরূপকং ৰিয রামপণ্ডিতং নিরাসঙ্কং সুখনিসিন্নং উপসঙ্কমিত্ৰা ৰন্দিত্ৰা একমন্তং ঠিতো রঞ্ঞো পৰত্তিং আরোচেত্ৰা সদ্ধিং অমচ্চেহি পাদেসু পতিত্ৰা রোদতি. রামপণ্ডিতো পন নেৰ সোচি, ন পরিদেৰি, ইন্দ্রিযৰিকারমত্তম্পিস্স নাহোসি. ভরতস্স পন রোদিত্ৰা নিসিন্নকালে সাযন্হসমযে ইতরে দ্ৰে ফলাফলং আদায আগমিংসু. রামপণ্ডিতো চিন্তেসি ‘‘ইমে দহরা ময্হং ৰিয পরিগ্গণ্হনপঞ্ঞা এতেসং নত্থি, সহসা ‘পিতা ৰো মতো’তি ৰুত্তে সোকং সন্ধারেতুং অসক্কোন্তানং হদযম্পি তেসং ফলেয্য, উপাযেন তে উদকং ওতারেত্ৰা এতং পৰত্তিং আরোচেস্সামী’’তি. অথ নেসং পুরতো একং উদকট্ঠানং দস্সেত্ৰা ‘‘তুম্হে অতিচিরেন আগতা, ইদং ৰো দণ্ডকম্মং হোতু, ইমং উদকং ওতরিত্ৰা তিট্ঠথা’’তি উপড্ঢগাথং তাৰ আহ –

৮৪.

‘‘এথ লক্খণ সীতা চ, উভো ওতরথোদক’’ন্তি.

তস্সত্থো – এথ লক্খণ সীতা চ আগচ্ছথ, উভোপি ওতরথ উদকন্তি;

তে একৰচনেনেৰ ওতরিত্ৰা অট্ঠংসু. অথ নেসং পিতু পৰত্তিং আরোচেন্তো সেসং উপড্ঢগাথমাহ –

‘‘এৰাযং ভরতো আহ, রাজা দসরথো মতো’’তি.

তে পিতু মতসাসনং সুত্ৰাৰ ৰিসঞ্ঞা অহেসুং. পুনপি নেসং কথেসি, পুনপি তে ৰিসঞ্ঞা অহেসুন্তি এৰং যাৰততিযং ৰিসঞ্ঞিতং পত্তে তে অমচ্চা উক্খিপিত্ৰা উদকা নীহরিত্ৰা থলে নিসীদাপেত্ৰা লদ্ধস্সাসেসু তেসু সব্বে অঞ্ঞমঞ্ঞং রোদিত্ৰা পরিদেৰিত্ৰা নিসীদিংসু. তদা ভরতকুমারো চিন্তেসি – ‘‘ময্হং ভাতা লক্খণকুমারো চ ভগিনী চ সীতা দেৰী পিতু মতসাসনং সুত্ৰাৰ সোকং সন্ধারেতুং ন সক্কোন্তি, রামপণ্ডিতো পন নেৰ সোচতি, ন পরিদেৰতি, কিং নু খো তস্স অসোচনকারণং, পুচ্ছিস্সামি ন’’ন্তি. সো তং পুচ্ছন্তো দুতিযং গাথমাহ –

৮৫.

‘‘কেন রামপ্পভাৰেন, সোচিতব্বং ন সোচসি;

পিতরং কালকতং সুত্ৰা, ন তং পসহতে দুখ’’ন্তি.

তত্থ পভাৰেনাতি আনুভাৰেন. ন তং পসহতে দুখন্তি এৰরূপং দুক্খং কেন কারণেন তং ন পীল়েতি, কিং তে অসোচনকারণং, কথেহি তাৰ নন্তি.

অথস্স রামপণ্ডিতো অত্তনো অসোচনকারণং কথেন্তো –

৮৬.

‘‘যং ন সক্কা নিপালেতুং, পোসেন লপতং বহুং;

স কিস্স ৰিঞ্ঞূ মেধাৰী, অত্তানমুপতাপযে.

৮৭.

‘‘দহরা চ হি ৰুদ্ধা চ, যে বালা যে চ পণ্ডিতা;

অড্ঢা চেৰ দলিদ্দা চ, সব্বে মচ্চুপরাযণা.

৮৮.

‘‘ফলানমিৰ পক্কানং, নিচ্চং পতনতো ভযং;

এৰং জাতান মচ্চানং, নিচ্চং মরণতো ভযং.

৮৯.

‘‘সাযমেকে ন দিস্সন্তি, পাতো দিট্ঠা বহুজ্জনা;

পাতো একে ন দিস্সন্তি, সাযং দিট্ঠা বহুজ্জনা.

৯০.

‘‘পরিদেৰযমানো চে, কিঞ্চিদত্থং উদব্বহে;

সম্মূল়্হো হিংসমত্তানং, কযিরা তং ৰিচক্খণো.

৯১.

‘‘কিসো ৰিৰণ্ণো ভৰতি, হিংসমত্তানমত্তনো;

ন তেন পেতা পালেন্তি, নিরত্থা পরিদেৰনা.

৯২.

‘‘যথা সরণমাদিত্তং, ৰারিনা পরিনিব্বযে;

এৰম্পি ধীরো সুতৰা, মেধাৰী পণ্ডিতো নরো;

খিপ্পমুপ্পতিতং সোকং, ৰাতো তূলংৰ ধংসযে.

৯৩.

‘‘মচ্চো একোৰ অচ্চেতি, একোৰ জাযতে কুলে;

সংযোগপরমাত্ৰেৰ, সম্ভোগা সব্বপাণিনং.

৯৪.

‘‘তস্মা হি ধীরস্স বহুস্সুতস্স, সম্পস্সতো লোকমিমং পরঞ্চ;

অঞ্ঞায ধম্মং হদযং মনঞ্চ, সোকা মহন্তাপি ন তাপযন্তি.

৯৫.

‘‘সোহং দস্সঞ্চ ভোক্খঞ্চ, ভরিস্সামি চ ঞাতকে;

সেসঞ্চ পালযিস্সামি, কিচ্চমেতং ৰিজানতো’’তি. –

ইমাহি দসহি গাথাহি অনিচ্চতং পকাসেতি.

তত্থ নিপালেতুন্তি রক্খিতুং. লপতন্তি লপন্তানং. ইদং ৰুত্তং হোতি – ‘‘তাত ভরত, যং সত্তানং জীৰিতং বহুম্পি ৰিলপন্তানং পুরিসানং একেনাপি মা উচ্ছিজ্জীতি ন সক্কা রক্খিতুং, সো দানি মাদিসো অট্ঠ লোকধম্মে তথতো জানন্তো ৰিঞ্ঞূ মেধাৰী পণ্ডিতো মরণপরিযোসানজীৰিতেসু সত্তেসু কিস্স অত্তানমুপতাপযে, কিংকারণা অনুপকারেন সোকদুক্খেন অত্তানং সন্তাপেয্যা’’তি.

দহরা চাতি গাথা ‘‘মচ্চু নামেস তাত ভরত, নেৰ সুৰণ্ণরূপকসদিসানং দহরানং খত্তিযকুমারকাদীনং, ন ৰুদ্ধিপ্পত্তানং মহাযোধানং, ন বালানং পুথুজ্জনসত্তানং, ন বুদ্ধাদীনং পণ্ডিতানং, ন চক্কৰত্তিআদীনং ইস্সরানং, ন নিদ্ধনানং দলিদ্দাদীনং লজ্জতি, সব্বেপিমে সত্তা মচ্চুপরাযণা মরণমুখে সংভগ্গৰিভগ্গা ভৰন্তিযেৰা’’তি দস্সনত্থং ৰুত্তা.

নিচ্চং পতনতোতি ইদং ৰুত্তং হোতি – যথা হি তাত ভরত, পক্কানং ফলানং পক্ককালতো পট্ঠায ‘‘ইদানি ৰণ্টা ছিজ্জিত্ৰা পতিস্সন্তি, ইদানি পতিস্সন্তী’’তি পতনতো ভযং নিচ্চং ধুৰং একংসিকমেৰ ভৰতি, এৰং আসঙ্কনীযতো এৰং জাতানং মচ্চানম্পি একংসিকংযেৰ মরণতো ভযং, নত্থি সো খণো ৰা লযো ৰা যত্থ তেসং মরণং ন আসঙ্কিতব্বং ভৰেয্যাতি.

সাযন্তি ৰিকালে. ইমিনা রত্তিভাগে চ দিট্ঠানং দিৰসভাগে অদস্সনং, দিৰসভাগে চ দিট্ঠানং রত্তিভাগে অদস্সনং দীপেতি. কিঞ্চিদত্থন্তি ‘‘পিতা মে, পুত্তো মে’’তিআদীহি পরিদেৰমানোৰ পোসো সম্মূল়্হো অত্তানং হিংসন্তো কিলমেন্তো অপ্পমত্তকম্পি অত্থং আহরেয্য. কযিরা তং ৰিচক্খণোতি অথ পণ্ডিতো পুরিসো এৰং পরিদেৰং করেয্য, যস্মা পন পরিদেৰন্তো মতং ৰা আনেতুং অঞ্ঞং ৰা তস্স ৰড্ঢিং কাতুং ন সক্কোতি, তস্মা নিরত্থকত্তা পরিদেৰিতস্স পণ্ডিতা ন পরিদেৰন্তি.

অত্তানমত্তনোতি অত্তনো অত্তভাৰং সোকপরিদেৰদুক্খেন হিংসন্তো. ন তেনাতি তেন পরিদেৰেন পরলোকং গতা সত্তা ন পালেন্তি ন যাপেন্তি. নিরত্থাতি তস্মা তেসং মতসত্তানং অযং পরিদেৰনা নিরত্থকা. সরণন্তি নিৰাসগেহং. ইদং ৰুত্তং হোতি – যথা পণ্ডিতো পুরিসো অত্তনো ৰসনাগারে আদিত্তে মুহুত্তম্পি ৰোসানং অনাপজ্জিত্ৰা ঘটসতেন ঘটসহস্সেন ৰারিনা নিব্বাপযতেৰ, এৰং ধীরো উপ্পতিতং সোকং খিপ্পমেৰ নিব্বাপযে. তূলং ৰিয চ ৰাতো যথা সণ্ঠাতুং ন সক্কোতি, এৰং ধংসযে ৰিদ্ধংসেয্যাতি অত্থো.

মচ্চো একোৰ অচ্চেতীতি এত্থ তাত ভরত, ইমে সত্তা কম্মস্সকা নাম, তথা হি ইতো পরলোকং গচ্ছন্তো সত্তো একোৰ অচ্চেতি অতিক্কমতি, খত্তিযাদিকুলে জাযমানোপি একোৰ গন্ত্ৰা জাযতি. তত্থ তত্থ পন ঞাতিমিত্তসংযোগেন ‘‘অযং মে পিতা, অযং মে মাতা, অযং মে মিত্তো’’তি সংযোগপরমাত্ৰেৰ সম্ভোগা সব্বপাণীনং, পরমত্থেন পন তীসুপি ভৰেসু কম্মস্সকাৰেতে সত্তাতি অত্থো.

তস্মাতি যস্মা এতেসং সত্তানং ঞাতিমিত্তসংযোগং ঞাতিমিত্তপরিভোগমত্তং ঠপেত্ৰা ইতো পরং অঞ্ঞং নত্থি, তস্মা. সম্পস্সতোতি ইমঞ্চ পরঞ্চ লোকং নানাভাৰৰিনাভাৰমেৰ সম্মা পস্সতো. অঞ্ঞায ধম্মন্তি অট্ঠৰিধলোকধম্মং জানিত্ৰা. হদযং মনঞ্চাতি ইদং উভযম্পি চিত্তস্সেৰ নামং. ইদং ৰুত্তং হোতি –

‘‘লাভো অলাভো যসো অযসো চ, নিন্দা পসংসা চ সুখঞ্চ দুক্খং;

এতে অনিচ্চা মনুজেসু ধম্মা, মা সোচ কিং সোচসি পোট্ঠপাদা’’তি. (জা. ১.৪.১১৪) –

ইমেসং অট্ঠন্নং লোকধম্মানং যেন কেনচি চিত্তং পরিযাদীযতি, তস্স চ অনিচ্চতং ঞত্ৰা ঠিতস্স ধীরস্স পিতুপুত্তমরণাদিৰত্থুকা মহন্তাপি সোকা হদযং ন তাপযন্তীতি. এতং ৰা অট্ঠৰিধং লোকধম্মং ঞত্ৰা ঠিতস্স হদযৰত্থুঞ্চ মনঞ্চ মহন্তাপি সোকা ন তাপযন্তীতি এৰম্পেত্থ অত্থো দট্ঠব্বো.

সোহং দস্সঞ্চ ভোক্খঞ্চাতি গাথায – তাত ভরত, অন্ধবালানং সত্তানং ৰিয মম রোদনপরিদেৰনং নাম ন অনুচ্ছৰিকং, অহং পন পিতু অচ্চযেন তস্স ঠানে ঠত্ৰা কপণাদীনং দানারহানং দানং, ঠানন্তরারহানং ঠানন্তরং, যসারহানং যসং দস্সামি, পিতরা মে পরিভুত্তনযেন ইস্সরিযং পরিভুঞ্জিস্সামি, ঞাতকে চ পোসেস্সামি, অৰসেসঞ্চ অন্তোপরিজনাদিকং জনং পালেস্সামি, ধম্মিকসমণব্রাহ্মণানং ধম্মিকং রক্খাৰরণগুত্তিং করিস্সামীতি এৰঞ্হি জানতো পণ্ডিতপুরিসস্স অনুরূপং কিচ্চন্তি অত্থো.

পরিসা ইমং রামপণ্ডিতস্স অনিচ্চতাপকাসনং ধম্মদেসনং সুত্ৰা নিস্সোকা অহেসুং. ততো ভরতকুমারো রামপণ্ডিতং ৰন্দিত্ৰা ‘‘বারাণসিরজ্জং সম্পটিচ্ছথা’’তি আহ. তাত লক্খণঞ্চ, সীতাদেৰিঞ্চ গহেত্ৰা গন্ত্ৰা রজ্জং অনুসাসথাতি. তুম্হে পন, দেৰাতি. তাত, মম পিতা ‘‘দ্ৰাদসৰস্সচ্চযেন আগন্ত্ৰা রজ্জং কারেয্যাসী’’তি মং অৰোচ, অহং ইদানেৰ গচ্ছন্তো তস্স ৰচনকরো নাম ন হোমি, অঞ্ঞানিপি তীণি ৰস্সানি অতিক্কমিত্ৰা আগমিস্সামীতি. ‘‘এত্তকং কালং কো রজ্জং কারেস্সতী’’তি? ‘‘তুম্হে কারেথা’’তি. ‘‘ন মযং কারেস্সামা’’তি. ‘‘তেন হি যাৰ মমাগমনা ইমা পাদুকা কারেস্সন্তী’’তি অত্তনো তিণপাদুকা ওমুঞ্চিত্ৰা অদাসি. তে তযোপি জনা পাদুকা গহেত্ৰা রামপণ্ডিতং ৰন্দিত্ৰা মহাজনপরিৰুতা বারাণসিং অগমংসু. তীণি সংৰচ্ছরানি পাদুকা রজ্জং কারেসুং. অমচ্চা তিণপাদুকা রাজপল্লঙ্কে ঠপেত্ৰা অড্ডং ৰিনিচ্ছিনন্তি. সচে দুব্বিনিচ্ছিতো হোতি, পাদুকা অঞ্ঞমঞ্ঞং পটিহঞ্ঞন্তি. তায সঞ্ঞায পুন ৰিনিচ্ছিনন্তি. সম্মা ৰিনিচ্ছিতকালে পাদুকা নিস্সদ্দা সন্নিসীদন্তি. রামপণ্ডিতো তিণ্ণং সংৰচ্ছরানং অচ্চযেন অরঞ্ঞা নিক্খমিত্ৰা বারাণসিনগরং পত্ৰা উয্যানং পাৰিসি. তস্স আগমনভাৰং ঞত্ৰা কুমারা অমচ্চগণপরিৰুতা উয্যানং গন্ত্ৰা সীতং অগ্গমহেসিং কত্ৰা উভিন্নম্পি অভিসেকং অকংসু. এৰং অভিসেকপ্পত্তো মহাসত্তো অলঙ্কতরথে ঠত্ৰা মহন্তেন পরিৰারেন নগরং পৰিসিত্ৰা পদক্খিণং কত্ৰা চন্দকপাসাদৰরস্স মহাতলং অভিরুহি. ততো পট্ঠায সোল়স ৰস্সসহস্সানি ধম্মেন রজ্জং কারেত্ৰা আযুপরিযোসানে সগ্গপুরং পূরেসি.

৯৬.

‘‘দস ৰস্সসহস্সানি, সট্ঠি ৰস্সসতানি চ;

কম্বুগীৰো মহাবাহু, রামো রজ্জমকারযী’’তি. –

অযং অভিসম্বুদ্ধগাথা তমত্থং দীপেতি.

তত্থ কম্বুগীৰোতি সুৰণ্ণাল়িঙ্গসদিসগীৰো. সুৰণ্ণঞ্হি কম্বূতি ৰুচ্চতি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে কুটুম্বিকো সোতাপত্তিফলে পতিট্ঠহি. তদা দসরথমহারাজা সুদ্ধোদনমহারাজা অহোসি, মাতা মহামাযাদেৰী, সীতা রাহুলমাতা, ভরতো আনন্দো, লক্খণো সারিপুত্তো, পরিসা বুদ্ধপরিসা, রামপণ্ডিতো পন অহমেৰ অহোসিন্তি.

দসরথজাতকৰণ্ণনা সত্তমা.

[৪৬২] ৮. সংৰরজাতকৰণ্ণনা

জানন্তো নো মহারাজাতি ইদং সত্থা জেতৰনে ৰিহরন্তো একং ওস্সট্ঠৰীরিযং ভিক্খুং আরব্ভ কথেসি. সো কির সাৰত্থিৰাসী কুলপুত্তো সত্থু ধম্মদেসনং সুত্ৰা পব্বজিত্ৰা লদ্ধূপসম্পদো আচরিযুপজ্ঝাযৰত্তং পূরেন্তো উভযানি পাতিমোক্খানি পগুণানি কত্ৰা পরিপুণ্ণপঞ্চৰস্সো কম্মট্ঠানং গহেত্ৰা ‘‘অরঞ্ঞে ৰসিস্সামী’’তি আচরিযুপজ্ঝাযে আপুচ্ছিত্ৰা কোসলরট্ঠে একং পচ্চন্তগামং গন্ত্ৰা তত্থ ইরিযাপথে পসন্নমনুস্সেহি পণ্ণসালং কত্ৰা উপট্ঠিযমানো ৰস্সং উপগন্ত্ৰা যুঞ্জন্তো ঘটেন্তো ৰাযমন্তো অচ্চারদ্ধেন ৰীরিযেন তেমাসং কম্মট্ঠানং ভাৰেত্ৰা ওভাসমত্তম্পি উপ্পাদেতুং অসক্কোন্তো চিন্তেসি ‘‘অদ্ধা অহং সত্থারা দেসিতেসু চতূসু পুগ্গলেসু পদপরমো, কিং মে অরঞ্ঞৰাসেন, জেতৰনং গন্ত্ৰা তথাগতস্স রূপসিরিং পস্সন্তো মধুরধম্মদেসনং সুণন্তো ৰীতিনামেস্সামী’’তি. সো ৰীরিযং ওস্সজিত্ৰা ততো নিক্খন্তো অনুপুব্বেন জেতৰনং গন্ত্ৰা আচরিযুপজ্ঝাযেহি চেৰ সন্দিট্ঠসম্ভত্তেহি চ আগমনকারণং পুট্ঠো তমত্থং কথেত্ৰা তেহি ‘‘কস্মা এৰমকাসী’’তি গরহিত্ৰা সত্থু সন্তিকং নেত্ৰা ‘‘কিং, ভিক্খৰে, অনিচ্ছমানং ভিক্খুং আনযিত্থা’’তি ৰুত্তে ‘‘অযং, ভন্তে, ৰীরিযং ওস্সজিত্ৰা আগতো’’তি আরোচিতে সত্থা ‘‘সচ্চং কিরা’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘কস্মা ভিক্খু ৰীরিযং ওস্সজি, ইমস্মিঞ্হি সাসনে নিব্বীরিযস্স কুসীতপুগ্গলস্স অগ্গফলং অরহত্তং নাম নত্থি, আরদ্ধৰীরিযা ইমং ধম্মং আরাধেন্তি, ত্ৰং খো পন পুব্বে ৰীরিযৰা ওৰাদক্খমো, তেনেৰ কারণেন বারাণসিরঞ্ঞো পুত্তসতস্স সব্বকনিট্ঠো হুত্ৰাপি পণ্ডিতানং ওৰাদে ঠত্ৰা সেতচ্ছত্তং পত্তোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে সংৰরকুমারো নাম পুত্তসতস্স সব্বকনিট্ঠো অহোসি. রাজা একেকং পুত্তং ‘‘সিক্খিতব্বযুত্তকং সিক্খাপেথা’’তি একেকস্স অমচ্চস্স অদাসি. সংৰরকুমারস্স আচরিযো অমচ্চো বোধিসত্তো অহোসি পণ্ডিতো ব্যত্তো রাজপুত্তস্স পিতুট্ঠানে ঠিতো. অমচ্চা সিক্খিতসিপ্পে রাজপুত্তে রঞ্ঞো দস্সেসুং. রাজা তেসং জনপদং দত্ৰা উয্যোজেসি. সংৰরকুমারো সব্বসিপ্পস্স নিপ্ফত্তিং পত্ৰা বোধিসত্তং পুচ্ছি ‘‘তাত, সচে মং পিতা জনপদং পেসেতি, কিং করোমী’’তি? ‘‘তাত, ত্ৰং জনপদে দীযমানে তং অগ্গহেত্ৰা ‘দেৰ অহং সব্বকনিট্ঠো, মযিপি গতে তুম্হাকং পাদমূলং তুচ্ছং ভৰিস্সতি, অহং তুম্হাকং পাদমূলেযেৰ ৰসিস্সামী’তি ৰদেয্যাসী’’তি. অথেকদিৰসং রাজা সংৰরকুমারং ৰন্দিত্ৰা একমন্তং নিসিন্নং পুচ্ছি ‘‘কিং তাত, সিপ্পং তে নিট্ঠিত’’ন্তি? ‘‘আম, দেৰা’’তি. ‘‘তুয্হম্পি জনপদং দেমী’’তি. ‘‘দেৰ তুম্হাকং পাদমূলং তুচ্ছং ভৰিস্সতি, পাদমূলেযেৰ ৰসিস্সামী’’তি. রাজা তুস্সিত্ৰা ‘‘সাধূ’’তি সম্পটিচ্ছি. সো ততো পট্ঠায রঞ্ঞো পাদমূলেযেৰ হুত্ৰা পুনপি বোধিসত্তং পুচ্ছি ‘‘তাত অঞ্ঞং কিং করোমী’’তি? ‘‘তাত রাজানং একং পুরাণুয্যানং যাচাহী’’তি. সো ‘‘সাধূ’’তি উয্যানং যাচিত্ৰা তত্থ জাতকেহি পুপ্ফফলেহি নগরে ইস্সরজনং সঙ্গণ্হিত্ৰা পুন ‘‘কিং করোমী’’তি পুচ্ছি. ‘‘তাত, রাজানং আপুচ্ছিত্ৰা অন্তোনগরে ভত্তৰেতনং ত্ৰমেৰ দেহী’’তি. সো তথা কত্ৰা অন্তোনগরে কস্সচি কিঞ্চি অহাপেত্ৰা ভত্তৰেতনং দত্ৰা পুন বোধিসত্তং পুচ্ছিত্ৰা রাজানং ৰিঞ্ঞাপেত্ৰা অন্তোনিৰেসনে দাসপোরিসানম্পি হত্থীনম্পি অস্সানম্পি বলকাযস্সপি ৰত্তং অপরিহাপেত্ৰা অদাসি, তিরোজনপদেহি আগতানং দূতাদীনং নিৰাসট্ঠানাদীনি ৰাণিজানং সুঙ্কন্তি সব্বকরণীযানি অত্তনাৰ অকাসি. এৰং সো মহাসত্তস্স ওৰাদে ঠত্ৰা সব্বং অন্তোজনঞ্চ বহিজনঞ্চ নাগরে চ রট্ঠৰাসিনো চ আগন্তুকে চ আযৰত্তনে চ তেন তেন সঙ্গহৰত্থুনা আবন্ধিত্ৰা সঙ্গণ্হি, সব্বেসং পিযো অহোসি মনাপো.

অপরভাগে রাজানং মরণমঞ্চে নিপন্নং অমচ্চা পুচ্ছিংসু ‘‘দেৰ, তুম্হাকং অচ্চযেন সেতচ্ছত্তং কস্স দেমা’’তি? ‘‘তাত, মম পুত্তা সব্বেপি সেতচ্ছত্তস্স সামিনোৰ. যো পন তুম্হাকং মনং গণ্হাতি, তস্সেৰ সেতচ্ছত্থং দদেয্যাথা’’তি. তে তস্মিং কালকতে তস্স সরীরপরিহারং কত্ৰা সত্তমে দিৰসে সন্নিপতিত্ৰা ‘‘রঞ্ঞা ‘যো তুম্হাকং মনং গণ্হাতি, তস্স সেতচ্ছত্তং উস্সাপেয্যাথা’তি ৰুত্তং, অম্হাকঞ্চ অযং সংৰরকুমারো মনং গণ্হাতী’’তি ঞাতকেহি পরিৰারিতা তস্স কঞ্চনমালং সেতচ্ছত্তং উস্সাপযিংসু. সংৰরমহারাজা বোধিসত্তস্স ওৰাদে ঠত্ৰা ধম্মেন রজ্জং কারেসি. ইতরে একূনসতকুমারা ‘‘পিতা কির নো কালকতো, সংৰরকুমারস্স কির সেতচ্ছত্তং উস্সাপেসুং, সো সব্বকনিট্ঠো, তস্স ছত্তং ন পাপুণাতি, সব্বজেট্ঠকস্স ছত্তং উস্সাপেস্সামা’’তি একতো আগন্ত্ৰা ‘‘ছত্তং ৰা নো দেতু, যুদ্ধং ৰা’’তি সংৰরমহারাজস্স পণ্ণং পেসেত্ৰা নগরং উপরুন্ধিংসু. রাজা বোধিসত্তস্স তং পৰত্তিং আরোচেত্ৰা ‘‘ইদানি কিং করোমা’’তি পুচ্ছি. মহারাজ, তৰ ভাতিকেহি সদ্ধিং যুজ্ঝনকিচ্চং নত্থি, ত্ৰং পিতু সন্তকং ধনং সতকোট্ঠাসে কারেত্ৰা একূনসতং ভাতিকানং পেসেত্ৰা ‘‘ইমং তুম্হাকং কোট্ঠাসং পিতু সন্তকং গণ্হথ, নাহং তুম্হেহি সদ্ধিং যুজ্ঝামী’’তি সাসনং পহিণাহীতি. সো তথা অকাসি. অথস্স সব্বজেট্ঠভাতিকো উপোসথকুমারো নাম সেসে আমন্তেত্ৰা ‘‘তাতা, রাজানং নাম অভিভৰিতুং সমত্থা নাম নত্থি, অযঞ্চ নো কনিট্ঠভাতিকো পটিসত্তুপি হুত্ৰা ন তিট্ঠতি, অম্হাকং পিতু সন্তকং ধনং পেসেত্ৰা ‘নাহং তুম্হেহি সদ্ধিং যুজ্ঝামী’তি পেসেসি, ন খো পন মযং সব্বেপি একক্খণে ছত্তং উস্সাপেস্সাম, একস্সেৰ ছত্তং উস্সাপেস্সাম, অযমেৰ রাজা হোতু, এথ তং পস্সিত্ৰা রাজকুটুম্বং পটিচ্ছাদেত্ৰা অম্হাকং জনপদমেৰ গচ্ছামা’’তি আহ. অথ তে সব্বেপি কুমারা নগরদ্ৰারং ৰিৰরাপেত্ৰা পটিসত্তুনো অহুত্ৰা নগরং পৰিসিংসু.

রাজাপি তেসং অমচ্চেহি পণ্ণাকারং গাহাপেত্ৰা পটিমগ্গং পেসেতি. কুমারা নাতিমহন্তেন পরিৰারেন পত্তিকাৰ আগন্ত্ৰা রাজনিৰেসনং অভিরুহিত্ৰা সংৰরমহারাজস্স নিপচ্চকারং দস্সেত্ৰা নীচাসনে নিসীদিংসু. সংৰরমহারাজা সেতচ্ছত্তস্স হেট্ঠা সীহাসনে নিসীদি, মহন্তো যসো মহন্তং সিরিসোভগ্গং অহোসি, ওলোকিতোলোকিতট্ঠানং কম্পি. উপোসথকুমারো সংৰরমহারাজস্স সিরিৰিভৰং ওলোকেত্ৰা ‘‘অম্হাকং পিতা অত্তনো অচ্চযেন সংৰরকুমারস্স রাজভাৰং ঞত্ৰা মঞ্ঞে অম্হাকং জনপদে দত্ৰা ইমস্স ন অদাসী’’তি চিন্তেত্ৰা তেন সদ্ধিং সল্লপন্তো তিস্সো গাথা অভাসি –

৯৭.

‘‘জানন্তো নো মহারাজ, তৰ সীলং জনাধিপো;

ইমে কুমারে পূজেন্তো, ন তং কেনচি মঞ্ঞথ.

৯৮.

‘‘তিট্ঠন্তে নো মহারাজে, অদু দেৰে দিৰঙ্গতে;

ঞাতী তং সমনুঞ্ঞিংসু, সম্পস্সং অত্থমত্তনো.

৯৯.

‘‘কেন সংৰর ৰত্তেন, সঞ্জাতে অভিতিট্ঠসি;

কেন তং নাতিৰত্তন্তি, ঞাতিসঙ্ঘা সমাগতা’’তি.

তত্থ জানন্তো নোতি জানন্তো নু. জনাধিপোতি অম্হাকং পিতা নরিন্দো. ইমেতি ইমে একূনসতে কুমারে. পাল়িপোত্থকেসু পন ‘‘অঞ্ঞে কুমারে’’তি লিখিতং. পূজেন্তোতি তেন তেন জনপদেন মানেন্তো. ন তং কেনচীতি খুদ্দকেনাপি কেনচি জনপদেন তং পূজেতব্বং ন মঞ্ঞিত্থ, ‘‘অযং মম অচ্চযেন রাজা ভৰিস্সতী’’তি ঞত্ৰা মঞ্ঞে অত্তনো পাদমূলেযেৰ ৰাসেসীতি. তিট্ঠন্তে নোতি তিট্ঠন্তে নু, ধরমানেযেৰ নূতি পুচ্ছতি, অদু দেৰেতি উদাহু অম্হাকং পিতরি দিৰঙ্গতে অত্তনো অত্থং ৰুড্ঢিং পস্সন্তা সদ্ধিং রাজকারকেহি নেগমজানপদেহি ঞাতযো তং ‘‘রাজা হোহী’’তি সমনুঞ্ঞিংসু. ৰত্তেনাতি সীলাচারেন. সঞ্জাতে অভিতিট্ঠসীতি সমানজাতিকে একূনসতভাতরো অভিভৰিত্ৰা তিট্ঠসি. নাতিৰত্তন্তীতি ন অভিভৰন্তি.

তং সুত্ৰা সংৰরমহারাজা অত্তনো গুণং কথেন্তো ছ গাথা অভাসি –

১০০.

‘‘ন রাজপুত্ত উসূযামি, সমণানং মহেসিনং;

সক্কচ্চং তে নমস্সামি, পাদে ৰন্দামি তাদিনং.

১০১.

‘‘তে মং ধম্মগুণে যুত্তং, সুস্সূসমনুসূযকং;

সমণা মনুসাসন্তি, ইসী ধম্মগুণে রতা.

১০২.

‘‘তেসাহং ৰচনং সুত্ৰা, সমণানং মহেসিনং;

ন কিঞ্চি অতিমঞ্ঞামি, ধম্মে মে নিরতো মনো.

১০৩.

‘‘হত্থারোহা অনীকট্ঠা, রথিকা পত্তিকারকা;

তেসং নপ্পটিবন্ধামি, নিৰিট্ঠং ভত্তৰেতনং.

১০৪.

‘‘মহামত্তা চ মে অত্থি, মন্তিনো পরিচারকা;

বারাণসিং ৰোহরন্তি, বহুমংসসুরোদনং.

১০৫.

‘‘অথোপি ৰাণিজা ফীতা, নানারট্ঠেহি আগতা;

তেসু মে ৰিহিতা রক্খা, এৰং জানাহুপোসথা’’তি.

তত্থ ন রাজপুত্তাতি অহং রাজপুত্ত, কঞ্চি সত্তং ‘‘অযং সম্পত্তি ইমস্স মা হোতূ’’তি ন উসূযামি. তাদিনন্তি তাদিলক্খণযুত্তানং সমিতপাপতায সমণানং মহন্তানং সীলক্খন্ধাদীনং গুণানং এসিততায মহেসীনং ধম্মিকসমণব্রাহ্মণানং পঞ্চপতিট্ঠিতেন পাদে ৰন্দামি, দানং দদন্তো ধম্মিকঞ্চ নেসং রক্খাৰরণগুত্তিং পচ্চুপট্ঠপেন্তো সক্কচ্চং তে নমস্সামি, মনেন সম্পিযাযন্তো চ পূজেমীতি অত্থো. তে মন্তি তে সমণা মং ‘‘অযং ধম্মকোট্ঠাসে যুত্তপযুত্তো সুস্সূসং অনুসূযকো’’তি তথতো ঞত্ৰা মং ধম্মগুণে যুত্তং সুস্সূসং অনুসূযকং অনুসাসন্তি, ‘‘ইদং কর, ইদং মা করী’’তি ওৰদন্তীতি অত্থো. তেসাহন্তি তেসং অহং. হত্থারোহাতি হত্থিং আরুয্হ যুজ্ঝনকা যোধা. অনীকট্ঠাতি হত্থানীকাদীসু ঠিতা. রথিকাতি রথযোধা. পত্তিকারকাতি পত্তিনোৰ. নিৰিট্ঠন্তি যং তেহি সজ্জিতং ভত্তঞ্চ ৰেতনঞ্চ, অহং তং নপ্পটিবন্ধামি, অপরিহাপেত্ৰা দদামীতি অত্থো.

মহামত্তাতি ভাতিক, ময্হং মহাপঞ্ঞা মন্তেসু কুসলা মহাঅমচ্চা চেৰ অৰসেসমন্তিনো চ পরিচারকা অত্থি. ইমিনা ইমং দস্সেতি ‘‘তুম্হে মন্তসম্পন্নে পণ্ডিতে আচরিযে ন লভিত্থ, অম্হাকং পন আচরিযা পণ্ডিতা উপাযকুসলা, তে নো সেতচ্ছত্তেন যোজেসু’’ন্তি. বারাণসিন্তি ভাতিক, মম ছত্তং উস্সাপিতকালতো পট্ঠায ‘‘অম্হাকং রাজা ধম্মিকো অন্ৰদ্ধমাসং দেৰো ৰস্সতি, তেন সস্সানি সম্পজ্জন্তি, বারাণসিযং বহুং খাদিতব্বযুত্তকং মচ্ছমংসং পাযিতব্বযুত্তকং সুরোদকঞ্চ জাত’’ন্তি এৰং রট্ঠৰাসিনো বহুমংসসুরোদকং কত্ৰা বারাণসিং ৰোহরন্তি. ফীতাতি হত্থিরতনঅস্সরতনমুত্তরতনাদীনি আহরিত্ৰা নিরুপদ্দৰা ৰোহারং করোন্তা ফীতা সমিদ্ধা. এৰং জানাহীতি ভাতিক উপোসথ অহং ইমেহি এত্তকেহি কারণেহি সব্বকনিট্ঠোপি হুত্ৰা মম ভাতিকে অভিভৰিত্ৰা সেতচ্ছত্তং পত্তো, এৰং জানাহীতি.

অথস্স গুণং সুত্ৰা উপোসথকুমারো দ্ৰে গাথা অভাসি –

১০৬.

‘‘ধম্মেন কির ঞাতীনং, রজ্জং কারেহি সংৰর;

মেধাৰী পণ্ডিতো চাসি, অথোপি ঞাতিনং হিতো.

১০৭.

‘‘তং তং ঞাতিপরিব্যূল়্হং, নানারতনমোচিতং;

অমিত্তা নপ্পসহন্তি, ইন্দংৰ অসুরাধিপো’’তি.

তত্থ ধম্মেন কির ঞাতীনন্তি তাত সংৰর মহারাজ, ধম্মেন কির ত্ৰং একূনসতানং ঞাতীনং অত্তনো জেট্ঠভাতিকানং আনুভাৰং অভিভৰসি, ইতো পট্ঠায ত্ৰমেৰ রজ্জং কারেহি, ত্ৰমেৰ মেধাৰী চেৰ পণ্ডিতো চ ঞাতীনঞ্চ হিতোতি অত্থো. তং তন্তি এৰং ৰিৰিধগুণসম্পন্নং তং. ঞাতিপরিব্যূল়্হন্তি অম্হেহি একূনসতেহি ঞাতকেহি পরিৰারিতং. নানারতনমোচিতন্তি নানারতনেহি ওচিতং সঞ্চিতং বহুরতনসঞ্চযং. অসুরাধিপোতি যথা তাৰতিংসেহি পরিৰারিতং ইন্দং অসুররাজা নপ্পসহতি, এৰং অম্হেহি আরক্খং করোন্তেহি পরিৰারিতং তং তিযোজনসতিকে কাসিরট্ঠে দ্ৰাদসযোজনিকায বারাণসিযা রজ্জং কারেন্তং অমিত্তা নপ্পসহন্তীতি দীপেতি.

সংৰরমহারাজা সব্বেসম্পি ভাতিকানং মহন্তং যসং অদাসি. তে তস্স সন্তিকে মাসড্ঢমাসং ৰসিত্ৰা ‘‘মহারাজ জনপদেসু চোরেসু উট্ঠহন্তেসু মযং জানিস্সাম, ত্ৰং রজ্জসুখং অনুভৰা’’তি ৰত্ৰা অত্তনো অত্তনো জনপদং গতা. রাজাপি বোধিসত্তস্স ওৰাদে ঠত্ৰা আযুপরিযোসানে দেৰনগরং পূরেন্তো অগমাসি.

সত্থা ইমং ধম্মদেসনং আহরিত্ৰা ‘‘ভিক্খু এৰং ত্ৰং পুব্বে ওৰাদক্খমো, ইদানি কস্মা ৰীরিযং ন অকাসী’’তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো ভিক্খু সোতাপত্তিফলে পতিট্ঠহি.

তদা সংৰরমহারাজা অযং ভিক্খু অহোসি, উপোসথকুমারো সারিপুত্তো, সেসভাতিকা থেরানুথেরা, পরিসা বুদ্ধপরিসা, ওৰাদদাযকো অমচ্চো পন অহমেৰ অহোসিন্তি.

সংৰরজাতকৰণ্ণনা অট্ঠমা.

[৪৬৩] ৯. সুপ্পারকজাতকৰণ্ণনা

উম্মুজ্জন্তি নিমুজ্জন্তীতি ইদং সত্থা জেতৰনে ৰিহরন্তো পঞ্ঞাপারমিং আরব্ভ কথেসি. একদিৰসঞ্হি সাযন্হসমযে তথাগতস্স ধম্মং দেসেতুং নিক্খমনং আগমযমানা ভিক্খূ ধম্মসভাযং নিসীদিত্ৰা ‘‘আৰুসো, অহো সত্থা মহাপঞ্ঞো পুথুপঞ্ঞো হাসপঞ্ঞো জৰনপঞ্ঞো তিক্খপঞ্ঞো নিব্বেধিকপঞ্ঞো তত্র তত্র উপাযপঞ্ঞায সমন্নাগতো ৰিপুলায পথৰীসমায, মহাসমুদ্দো ৰিয গম্ভীরায, আকাসো ৰিয ৰিত্থিণ্ণায, সকলজম্বুদীপস্মিঞ্হি উট্ঠিতপঞ্হো দসবলং অতিক্কমিত্ৰা গন্তুং সমত্থো নাম নত্থি. যথা মহাসমুদ্দে উট্ঠিতঊমিযো ৰেলং নাতিক্কমন্তি, ৰেলং পত্ৰাৰ ভিজ্জন্তি, এৰং ন কোচি পঞ্হো দসবলং অতিক্কমতি, সত্থু পাদমূলং পত্ৰা ভিজ্জতেৰা’’তি দসবলস্স মহাপঞ্ঞাপারমিং ৰণ্ণেসুং. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, তথাগতো ইদানেৰ পঞ্ঞৰা, পুব্বেপি অপরিপক্কে ঞাণে পঞ্ঞৰাৰ, অন্ধো হুত্ৰাপি মহাসমুদ্দে উদকসঞ্ঞায ‘ইমস্মিং ইমস্মিং সমুদ্দে ইদং নাম ইদং নাম রতন’ন্তি অঞ্ঞাসী’’তি ৰত্ৰা অতীতং আহরি.

অতীতে কুরুরট্ঠে কুরুরাজা নাম রজ্জং কারেসি, কুরুকচ্ছং নাম পট্টনগামো অহোসি. তদা বোধিসত্তো কুরুকচ্ছে নিযামকজেট্ঠকস্স পুত্তো হুত্ৰা নিব্বত্তি পাসাদিকো সুৰণ্ণৰণ্ণো, ‘‘সুপ্পারককুমারো’’তিস্স নামং করিংসু. সো মহন্তেন পরিৰারেন ৰড্ঢন্তো সোল়সৰস্সকালেযেৰ নিযামকসিপ্পে নিপ্ফত্তিং পত্ৰা অপরভাগে পিতু অচ্চযেন নিযামকজেট্ঠকো হুত্ৰা নিযামককম্মং অকাসি, পণ্ডিতো ঞাণসম্পন্নো অহোসি. তেন আরুল়্হনাৰায ব্যাপত্তি নাম নত্থি. তস্স অপরভাগে লোণজলপহটানি দ্ৰেপি চক্খূনি নস্সিংসু. সো ততো পট্ঠায নিযামকজেট্ঠকো হুত্ৰাপি নিযামককম্মং অকত্ৰা ‘‘রাজানং নিস্সায জীৰিস্সামী’’তি রাজানং উপসঙ্কমি. অথ নং রাজা অগ্ঘাপনিযকম্মে ঠপেসি. সো ততো পট্ঠায রঞ্ঞো হত্থিরতনঅস্সরতনমুত্তসারমণিসারাদীনি অগ্ঘাপেসি.

অথেকদিৰসং ‘‘রঞ্ঞো মঙ্গলহত্থী ভৰিস্সতী’’তি কাল়পাসাণকূটৰণ্ণং একং ৰারণং আনেসুং. তং দিস্ৰা রাজা ‘‘পণ্ডিতস্স দস্সেথা’’তি আহ. অথ নং তস্স সন্তিকং নযিংসু. সো হত্থেন তস্স সরীরং পরিমজ্জিত্ৰা ‘‘নাযং মঙ্গলহত্থী ভৰিতুং অনুচ্ছৰিকো, পাদেহি ৰামনধাতুকো এস, এতঞ্হি মাতা ৰিজাযমানা অঙ্কেন সম্পটিচ্ছিতুং নাসক্খি, তস্মা ভূমিযং পতিত্ৰা পচ্ছিমপাদেহি ৰামনধাতুকো হোতী’’তি আহ. হত্থিং গহেত্ৰা আগতে পুচ্ছিংসু. তে ‘‘সচ্চং পণ্ডিতো কথেতী’’তি ৰদিংসু. তং কারণং রাজা সুত্ৰা তুট্ঠো তস্স অট্ঠ কহাপণে দাপেসি.

পুনেকদিৰসং ‘‘রঞ্ঞো মঙ্গলঅস্সো ভৰিস্সতী’’তি একং অস্সং আনযিংসু. তম্পি রাজা পণ্ডিতস্স সন্তিকং পেসেসি. সো তম্পি হত্থেন পরামসিত্ৰা ‘‘অযং মঙ্গলঅস্সো ভৰিতুং ন যুত্তো, এতস্স হি জাতদিৰসেযেৰ মাতা মরি, তস্মা মাতু খীরং অলভন্তো ন সম্মা ৰড্ঢিতো’’তি আহ. সাপিস্স কথা সচ্চাৰ অহোসি. তম্পি সুত্ৰা রাজা তুস্সিত্ৰা অট্ঠ কহাপণে দাপেসি. অথেকদিৰসং ‘‘রঞ্ঞো মঙ্গলরথো ভৰিস্সতী’’তি রথং আহরিংসু. তম্পি রাজা তস্স সন্তিকং পেসেসি. সো তম্পি হত্থেন পরামসিত্ৰা ‘‘অযং রথো সুসিররুক্খেন কতো, তস্মা রঞ্ঞো নানুচ্ছৰিকো’’তি আহ. সাপিস্স কথা সচ্চাৰ অহোসি. রাজা তম্পি সুত্ৰা অট্ঠেৰ কহাপণে দাপেসি. অথস্স মহগ্ঘং কম্বলরতনং আহরিংসু. তম্পি তস্সেৰ পেসেসি. সো তম্পি হত্থেন পরামসিত্ৰা ‘‘ইমস্স মূসিকচ্ছিন্নং একট্ঠানং অত্থী’’তি আহ. সোধেন্তা তং দিস্ৰা রঞ্ঞো আরোচেসুং. রাজা সুত্ৰা তুস্সিত্ৰা অট্ঠেৰ কহাপণে দাপেসি.

সো চিন্তেসি ‘‘অযং রাজা এৰরূপানিপি অচ্ছরিযানি দিস্ৰা অট্ঠেৰ কহাপণে দাপেসি, ইমস্স দাযো ন্হাপিতদাযো, ন্হাপিতজাতিকো ভৰিস্সতি, কিং মে এৰরূপেন রাজুপট্ঠানেন, অত্তনো ৰসনট্ঠানমেৰ গমিস্সামী’’তি. সো কুরুকচ্ছপট্টনমেৰ পচ্চাগমি. তস্মিং তত্থ ৰসন্তে ৰাণিজা নাৰং সজ্জেত্ৰা ‘‘কং নিযামকং করিস্সামা’’তি মন্তেসুং. ‘‘সুপ্পারকপণ্ডিতেন আরুল়্হনাৰা ন ব্যাপজ্জতি, এস পণ্ডিতো উপাযকুসলো, অন্ধো সমানোপি সুপ্পারকপণ্ডিতোৰ উত্তমো’’তি তং উপসঙ্কমিত্ৰা ‘‘নিযামকো নো হোহী’’তি ৰত্ৰা ‘‘তাতা, অহং অন্ধো, কথং নিযামককম্মং করিস্সামী’’তি ৰুত্তে ‘‘সামি, অন্ধাপি তুম্হেযেৰ অম্হাকং উত্তমা’’তি পুনপ্পুনং যাচিযমানো ‘‘সাধু তাতা, তুম্হেহি আরোচিতসঞ্ঞায নিযামকো ভৰিস্সামী’’তি তেসং নাৰং অভিরুহি. তে নাৰায মহাসমুদ্দং পক্খন্দিংসু. নাৰা সত্ত দিৰসানি নিরুপদ্দৰা অগমাসি, ততো অকালৰাতং উপ্পাতিতং উপ্পজ্জি, নাৰা চত্তারো মাসে পকতিসমুদ্দপিট্ঠে ৰিচরিত্ৰা খুরমালীসমুদ্দং নাম পত্তা. তত্থ মচ্ছা মনুস্সসমানসরীরা খুরনাসা উদকে উম্মুজ্জনিমুজ্জং করোন্তি. ৰাণিজা তে দিস্ৰা মহাসত্তং তস্স সমুদ্দস্স নামং পুচ্ছন্তা পঠমং গাথমাহংসু –

১০৮.

‘‘উম্মুজ্জন্তি নিমুজ্জন্তি, মনুস্সা খুরনাসিকা;

সুপ্পারকং তং পুচ্ছাম, সমুদ্দো কতমো অয’’ন্তি.

এৰং তেহি পুট্ঠো মহাসত্তো অত্তনো নিযামকসুত্তেন সংসন্দিত্ৰা দুতিযং গাথমাহ –

১০৯.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, খুরমালীতি ৰুচ্চতী’’তি.

তত্থ পযাতানন্তি কুরুকচ্ছপট্টনা নিক্খমিত্ৰা গচ্ছন্তানং. ধনেসিনন্তি তুম্হাকং ৰাণিজানং ধনং পরিযেসন্তানং. নাৰায ৰিপ্পনট্ঠাযাতি তাত তুম্হাকং ইমায ৰিদেসং পক্খন্দনাৰায কম্মকারকং পকতিসমুদ্দং অতিক্কমিত্ৰা সম্পত্তো অযং সমুদ্দো ‘‘খুরমালী’’তি ৰুচ্চতি, এৰমেতং পণ্ডিতা কথেন্তীতি.

তস্মিং পন সমুদ্দে ৰজিরং উস্সন্নং হোতি. মহাসত্তো ‘‘সচাহং ‘অযং ৰজিরসমুদ্দো’তি এৰং এতেসং কথেস্সামি, লোভেন বহুং ৰজিরং গণ্হিত্ৰা নাৰং ওসীদাপেস্সন্তী’’তি তেসং অনাচিক্খিত্ৰাৰ নাৰং লগ্গাপেত্ৰা উপাযেনেকং যোত্তং গহেত্ৰা মচ্ছগহণনিযামেন জালং খিপাপেত্ৰা ৰজিরসারং উদ্ধরিত্ৰা নাৰাযং পক্খিপিত্ৰা অঞ্ঞং অপ্পগ্ঘভণ্ডং ছড্ডাপেসি. নাৰা তং সমুদ্দং অতিক্কমিত্ৰা পুরতো অগ্গিমালিং নাম গতা. সো পজ্জলিতঅগ্গিক্খন্ধো ৰিয মজ্ঝন্হিকসূরিযো ৰিয চ ওভাসং মুঞ্চন্তো অট্ঠাসি. ৰাণিজা –

১১০.

‘‘যথা অগ্গীৰ সূরিযোৰ, সমুদ্দো পটিদিস্সতি;

সুপ্পারকং তং পুচ্ছাম, সমুদ্দো কতমো অয’’ন্তি. – গাথায তং পুচ্ছিংসু;

মহাসত্তোপি তেসং অনন্তরগাথায কথেসি –

১১১.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, অগ্গিমালীতি ৰুচ্চতী’’তি.

তস্মিং পন সমুদ্দে সুৰণ্ণং উস্সন্নং অহোসি. মহাসত্তো পুরিমনযেনেৰ ততোপি সুৰণ্ণং গাহাপেত্ৰা নাৰাযং পক্খিপাপেসি. নাৰা তম্পি সমুদ্দং অতিক্কমিত্ৰা খীরং ৰিয দধিং ৰিয চ ওভাসন্তং দধিমালিং নাম সমুদ্দং পাপুণি. ৰাণিজা –

১১২.

‘‘যথা দধীৰ খীরংৰ, সমুদ্দো পটিদিস্সতি;

সুপ্পারকং তং পুচ্ছাম, সমুদ্দো কতমো অয’’ন্তি. –

গাথায তস্সপি নামং পুচ্ছিংসু.

মহাসত্তো অনন্তরগাথায আচিক্খি –

১১৩.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, দধিমালীতি ৰুচ্চতী’’তি.

তস্মিং পন সমুদ্দে রজতং উস্সন্নং অহোসি. সো তম্পি উপাযেন গাহাপেত্ৰা নাৰাযং পক্খিপাপেসি. নাৰা তম্পি সমুদ্দং অতিক্কমিত্ৰা নীলকুসতিণং ৰিয সম্পন্নসস্সং ৰিয চ ওভাসমানং নীলৰণ্ণং কুসমালিং নাম সমুদ্দং পাপুণি. ৰাণিজা –

১১৪.

‘‘যথা কুসোৰ সস্সোৰ, সমুদ্দো পটিদিস্সতি;

সুপ্পারকং তং পুচ্ছাম, সমুদ্দো কতমো অয’’ন্তি. –

গাথায তস্সপি নামং পুচ্ছিংসু.

সো অনন্তরগাথায আচিক্খি –

১১৫.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, কুসমালীতি ৰুচ্চতী’’তি.

তস্মিং পন সমুদ্দে নীলমণিরতনং উস্সন্নং অহোসি. সো তম্পি উপাযেনেৰ গাহাপেত্ৰা নাৰাযং পক্খিপাপেসি. নাৰা তম্পি সমুদ্দং অতিক্কমিত্ৰা নল়ৰনং ৰিয ৰেল়ুৰনং ৰিয চ খাযমানং নল়মালিং নাম সমুদ্দং পাপুণি. ৰাণিজা –

১১৬.

‘‘যথা নল়োৰ ৰেল়ূৰ, সমুদ্দো পটিদিস্সতি;

সুপ্পারকং তং পুচ্ছাম, সমুদ্দো কতমো অয’’ন্তি. –

গাথায তস্সপি নামং পুচ্ছিংসু.

মহাসত্তো অনন্তরগাথায কথেসি –

১১৭.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, নল়মালীতি ৰুচ্চতী’’তি.

তস্মিং পন সমুদ্দে মসারগল্লং ৰেল়ুরিযং উস্সন্নং অহোসি. সো তম্পি উপাযেন গাহাপেত্ৰা নাৰাযং পক্খিপাপেসি. অপরো নযো – নল়োতি ৰিচ্ছিকনল়োপি কক্কটকনল়োপি, সো রত্তৰণ্ণো হোতি. ৰেল়ূতি পন পৰাল়স্সেতং নামং, সো চ সমুদ্দো পৰাল়ুস্সন্নো রত্তোভাসো অহোসি, তস্মা ‘‘যথা নল়োৰ ৰেল়ুৰা’’তি পুচ্ছিংসু. মহাসত্তো ততো পৰাল়ং গাহাপেসীতি.

ৰাণিজা নল়মালিং অতিক্কন্তা বলৰামুখসমুদ্দং নাম পস্সিংসু. তত্থ উদকং কড্ঢিত্ৰা কড্ঢিত্ৰা সব্বতো ভাগেন উগ্গচ্ছতি. তস্মিং সব্বতো ভাগেন উগ্গতে উদকং সব্বতো ভাগেন ছিন্নপপাতমহাসোব্ভো ৰিয পঞ্ঞাযতি, ঊমিযা উগ্গতায একতো পপাতসদিসং হোতি, ভযজননো সদ্দো উপ্পজ্জতি সোতানি ভিন্দন্তো ৰিয হদযং ফালেন্তো ৰিয চ. তং দিস্ৰা ৰাণিজা ভীততসিতা –

১১৮.

‘‘মহব্ভযো ভিংসনকো, সদ্দো সুয্যতিমানুসো;

যথা সোব্ভো পপাতোৰ, সমুদ্দো পটিদিস্সতি;

সুপ্পারকং তং পুচ্ছাম, সমুদ্দো কতমো অয’’ন্তি. –

গাথায তস্সপি নামং পুচ্ছিংসু.

তত্থ সুয্যতিমানুসোতি সুয্যতি অমানুসো সদ্দো.

১১৯.

‘‘কুরুকচ্ছা পযাতানং, ৰাণিজানং ধনেসিনং;

নাৰায ৰিপ্পনট্ঠায, বলৰামুখীতি ৰুচ্চতী’’তি. –

বোধিসত্তো অনন্তরগাথায তস্স নামং আচিক্খিত্ৰা ‘‘তাতা, ইমং বলৰামুখসমুদ্দং পত্ৰা নিৰত্তিতুং সমত্থা নাৰা নাম নত্থি, অযং সম্পত্তনাৰং নিমুজ্জাপেত্ৰা ৰিনাসং পাপেতী’’তি আহ. তঞ্চ নাৰং সত্ত মনুস্সসতানি অভিরুহিংসু. তে সব্বে মরণভযভীতা একপ্পহারেনেৰ অৰীচিম্হি পচ্চমানসত্তা ৰিয অতিকারুঞ্ঞং রৰং মুঞ্চিংসু. মহাসত্তো ‘‘ঠপেত্ৰা মং অঞ্ঞো এতেসং সোত্থিভাৰং কাতুং সমত্থো নাম নত্থি, সচ্চকিরিযায তেসং সোত্থিং করিস্সামী’’তি চিন্তেত্ৰা তে আমন্তেত্ৰা আহ – ‘‘তাতা, খিপ্পং মং গন্ধোদকেন ন্হাপেত্ৰা অহতৰত্থানি নিৰাসাপেত্ৰা পুণ্ণপাতিং সজ্জেত্ৰা নাৰায ধুরে ঠপেথা’’তি. তে ৰেগেন তথা করিংসু. মহাসত্তো উভোহি হত্থেহি পুণ্ণপাতিং গহেত্ৰা নাৰায ধুরে ঠিতো সচ্চকিরিযং করোন্তো ওসানগাথমাহ –

১২০.

‘‘যতো সরামি অত্তানং, যতো পত্তোস্মি ৰিঞ্ঞুতং;

নাভিজানামি সঞ্চিচ্চ, একপাণম্পি হিংসিতং;

এতেন সচ্চৰজ্জেন, সোত্থিং নাৰা নিৰত্ততূ’’তি.

তত্থ যতোতি যতো পট্ঠায অহং অত্তানং সরামি, যতো পট্ঠায চম্হি ৰিঞ্ঞুতং পত্তোতি অত্থো. একপাণম্পি হিংসিতন্তি এত্থন্তরে সঞ্চিচ্চ একং কুন্থকিপিল্লিকপাণম্পি হিংসিতং নাভিজানামি. দেসনামত্তমেৰেতং, বোধিসত্তো পন তিণসলাকম্পি উপাদায মযা পরসন্তকং ন গহিতপুব্বং, লোভৰসেন পরদারং ন ওলোকিতপুব্বং, মুসা ন ভাসিতপুব্বা, তিণগ্গেনাপি মজ্জং ন পিৰিতপুব্বন্তি এৰং পঞ্চসীলৰসেন পন সচ্চকিরিযং অকাসি, কত্ৰা চ পন পুণ্ণপাতিযা উদকং নাৰায ধুরে অভিসিঞ্চি.

চত্তারো মাসে ৰিদেসং পক্খন্দনাৰা নিৰত্তিত্ৰা ইদ্ধিমা ৰিয সচ্চানুভাৰেন একদিৰসেনেৰ কুরুকচ্ছপট্টনং অগমাসি. গন্ত্ৰা চ পন থলেপি অট্ঠুসভমত্তং ঠানং পক্খন্দিত্ৰা নাৰিকস্স ঘরদ্ৰারেযেৰ অট্ঠাসি. মহাসত্তো তেসং ৰাণিজানং সুৰণ্ণরজতমণিপৰাল়মুত্তৰজিরানি ভাজেত্ৰা অদাসি. ‘‘এত্তকেহি ৰো রতনেহি অলং, মা পুন সমুদ্দং পৰিসথা’’তি তেসং ওৰাদং দত্ৰা যাৰজীৰং দানাদীনি পুঞ্ঞানি কত্ৰা দেৰপুরং পূরেসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি তথাগতো মহাপঞ্ঞোযেৰা’’তি ৰত্ৰা জাতকং সমোধানেসি – ‘‘তদা পরিসা বুদ্ধপরিসা অহেসুং, সুপ্পারকপণ্ডিতো পন অহমেৰ অহোসি’’ন্তি.

সুপ্পারকজাতকৰণ্ণনা নৰমা.

জাতকুদ্দানং –

মাতুপোসক জুণ্হো চ, ধম্ম উদয পানীযো;

যুধঞ্চযো দসরথো, সংৰরো চ সুপ্পারকো;

একাদসনিপাতম্হি, সঙ্গীতা নৰ জাতকা.

একাদসকনিপাতৰণ্ণনা নিট্ঠিতা.

১২. দ্ৰাদসকনিপাতো

[৪৬৪] ১. চূল়কুণালজাতকৰণ্ণনা

১-১২.

লুদ্ধানং লহুচিত্তানন্তি ইদং জাতকং কুণালজাতকে (জা. ২.২১.কুণালজাতক) আৰি ভৰিস্সতি;

চূল়কুণালজাতকৰণ্ণনা পঠমা.

[৪৬৫] ২. ভদ্দসালজাতকৰণ্ণনা

কা ত্ৰং সুদ্ধেহি ৰত্থেহীতি ইদং সত্থা জেতৰনে ৰিহরন্তো ঞাতত্থচরিযং আরব্ভ কথেসি. সাৰত্থিযঞ্হি অনাথপিণ্ডিকস্স নিৰেসনে পঞ্চন্নং ভিক্খুসতানং নিবদ্ধভোজনং পৰত্ততি, তথা ৰিসাখায চ কোসলরঞ্ঞো চ. তত্থ পন কিঞ্চাপি নানগ্গরসভোজনং দীযতি, ভিক্খূনং পনেত্থ কোচি ৰিস্সাসিকো নত্থি, তস্মা ভিক্খূ রাজনিৰেসনে ন ভুঞ্জন্তি, ভত্তং গহেত্ৰা অনাথপিণ্ডিকস্স ৰা ৰিসাখায ৰা অঞ্ঞেসং ৰা ৰিস্সাসিকানং ঘরং গন্ত্ৰা ভুঞ্জন্তি. রাজা একদিৰসং পণ্ণাকারং আহটং ‘‘ভিক্খূনং দেথা’’তি ভত্তগ্গং পেসেত্ৰা ‘‘ভত্তগ্গে ভিক্খূ নত্থী’’তি ৰুত্তে ‘‘কহং গতা’’তি পুচ্ছিত্ৰা ‘‘অত্তনো ৰিস্সাসিকগেহেসু নিসীদিত্ৰা ভুঞ্জন্তী’’তি সুত্ৰা ভুত্তপাতরাসো সত্থু সন্তিকং গন্ত্ৰা ‘‘ভন্তে, ভোজনং নাম কিং পরম’’ন্তি পুচ্ছি. ৰিস্সাসপরমং মহারাজ, কঞ্জিকমত্তকম্পি ৰিস্সাসিকেন দিন্নং মধুরং হোতীতি. ভন্তে, কেন পন সদ্ধিং ভিক্খূনং ৰিস্সাসো হোতীতি? ‘‘ঞাতীহি ৰা সেক্খকুলেহি ৰা, মহারাজা’’তি. ততো রাজা চিন্তেসি ‘‘একং সক্যধীতরং আনেত্ৰা অগ্গমহেসিং করিস্সামি, এৰং মযা সদ্ধিং ভিক্খূনং ঞাতকে ৰিয ৰিস্সাসো ভৰিস্সতী’’তি. সো উট্ঠাযাসনা অত্তনো নিৰেসনং গন্ত্ৰা কপিলৰত্থুং দূতং পেসেসি ‘‘ধীতরং মে দেথ, অহং তুম্হেহি সদ্ধিং ঞাতিভাৰং ইচ্ছামী’’তি.

সাকিযা দূতৰচনং সুত্ৰা সন্নিপতিত্ৰা মন্তযিংসু ‘‘মযং কোসলরঞ্ঞো আণাপৰত্তিট্ঠানে ৰসাম, সচে দারিকং ন দস্সাম, মহন্তং ৰেরং ভৰিস্সতি, সচে দস্সাম, কুলৰংসো নো ভিজ্জিস্সতি, কিং নু খো কাতব্ব’’ন্তি. অথ নে মহানামো আহ – ‘‘মা চিন্তযিত্থ, মম ধীতা ৰাসভখত্তিযা নাম নাগমুণ্ডায নাম দাসিযা কুচ্ছিস্মিং নিব্বত্তি. সা সোল়সৰস্সুদ্দেসিকা উত্তমরূপধরা সোভগ্গপ্পত্তা পিতু ৰংসেন খত্তিযজাতিকা, তমস্স ‘খত্তিযকঞ্ঞা’তি পেসেস্সামা’’তি. সাকিযা ‘‘সাধূ’’তি সম্পটিচ্ছিত্ৰা দূতে পক্কোসাপেত্ৰা ‘‘সাধু, দারিকং দস্সাম, ইদানেৰ নং গহেত্ৰা গচ্ছথা’’তি আহংসু. দূতা চিন্তেসুং ‘‘ইমে সাকিযা নাম জাতিং নিস্সায অতিমানিনো, ‘সদিসী নো’তি ৰত্ৰা অসদিসিম্পি দদেয্যুং, এতেহি সদ্ধিং একতো ভুঞ্জমানমেৰ গণ্হিস্সামা’’তি. তে এৰমাহংসু ‘‘মযং গহেত্ৰা গচ্ছন্তা যা তুম্হেহি সদ্ধিং একতো ভুঞ্জতি, তং গহেত্ৰা গমিস্সামা’’তি. সাকিযা তেসং নিৰাসট্ঠানং দাপেত্ৰা ‘‘কিং করিস্সামা’’তি চিন্তযিংসু. মহানামো আহ – ‘‘তুম্হে মা চিন্তযিত্থ, অহং উপাযং করিস্সামি, তুম্হে মম ভোজনকালে ৰাসভখত্তিযং অলঙ্করিত্ৰা আনেত্ৰা মযা একস্মিং কবল়ে গহিতমত্তে ‘দেৰ, অসুকরাজা পণ্ণং পহিণি, ইমং তাৰ সাসনং সুণাথা’তি পণ্ণং দস্সেয্যাথা’’তি. তে ‘‘সাধূ’’তি সম্পটিচ্ছিত্ৰা তস্মিং ভুঞ্জমানে কুমারিকং অলঙ্করিংসু.

মহানামো ‘‘ধীতরং মে আনেথ, মযা সদ্ধিং ভুঞ্জতূ’’তি আহ. অথ নং অলঙ্করিত্ৰা তাৰদেৰ থোকং পপঞ্চং কত্ৰা আনযিংসু. সা ‘‘পিতরা সদ্ধিং ভুঞ্জিস্সামী’’তি একপাতিযং হত্থং ওতারেসি. মহানামোপি তায সদ্ধিং একপিণ্ডং গহেত্ৰা মুখে ঠপেসি. দুতিযপিণ্ডায হত্থে পসারিতে ‘‘দেৰ, অসুকরঞ্ঞা পণ্ণং পহিতং, ইমং তাৰ সাসনং সুণাথা’’তি পণ্ণং উপনামেসুং. মহানামো ‘‘অম্ম, ত্ৰং ভুঞ্জাহী’’তি দক্খিণহত্থং পাতিযাযেৰ কত্ৰা ৰামহত্থেন গহেত্ৰা পণ্ণং ওলোকেসি. তস্স তং সাসনং উপধারেন্তস্সেৰ ইতরা ভুঞ্জি. সো তস্সা ভুত্তকালে হত্থং ধোৰিত্ৰা মুখং ৰিক্খালেসি. তং দিস্ৰা দূতা ‘‘নিচ্ছযেনেসা এতস্স ধীতা’’তি নিট্ঠমকংসু, ন তং অন্তরং জানিতুং সক্খিংসু. মহানামো মহন্তেন পরিৰারেন ধীতরং পেসেসি. দূতাপি নং সাৰত্থিং নেত্ৰা ‘‘অযং কুমারিকা জাতিসম্পন্না মহানামস্স ধীতা’’তি ৰদিংসু. রাজা তুস্সিত্ৰা সকলনগরং অলঙ্কারাপেত্ৰা তং রতনরাসিম্হি ঠপেত্ৰা অগ্গমহেসিট্ঠানে অভিসিঞ্চাপেসি. সা রঞ্ঞো পিযা অহোসি মনাপা.

অথস্সা ন চিরস্সেৰ গব্ভো পতিট্ঠহি. রাজা গব্ভপরিহারমদাসি. সা দসমাসচ্চযেন সুৰণ্ণৰণ্ণং পুত্তং ৰিজাযি. অথস্স নামগ্গহণদিৰসে রাজা অত্তনো অয্যকস্স সন্তিকং পেসেসি ‘‘সক্যরাজধীতা ৰাসভখত্তিযা পুত্তং ৰিজাযি, কিমস্স নামং করোমা’’তি. তং পন সাসনং গহেত্ৰা গতো অমচ্চো থোকং বধিরধাতুকো, সো গন্ত্ৰা রঞ্ঞো অয্যকস্সারোচেসি. সো তং সুত্ৰা ‘‘ৰাসভখত্তিযা পুত্তং অৰিজাযিত্ৰাপি সব্বং জনং অভিভৰতি, ইদানি পন অতিৰিয রঞ্ঞো ৰল্লভা ভৰিস্সতী’’তি আহ. সো বধিরঅমচ্চো ‘‘ৰল্লভা’’তি ৰচনং দুস্সুতং সুত্ৰা ‘‘ৰিটটূভো’’তি সল্লক্খেত্ৰা রাজানং উপগন্ত্ৰা ‘‘দেৰ, কুমারস্স কির ‘ৰিটটূভো’তি নামং করোথা’’তি আহ. রাজা ‘‘পোরাণকং নো কুলদত্তিকং নামং ভৰিস্সতী’’তি চিন্তেত্ৰা ‘‘ৰিটটূভো’’তি নামং অকাসি. ততো পট্ঠায কুমারো কুমারপরিহারেন ৰড্ঢন্তো সত্তৰস্সিককালে অঞ্ঞেসং কুমারানং মাতামহকুলতো হত্থিরূপকঅস্সরূপকাদীনি আহরিযমানানি দিস্ৰা মাতরং পুচ্ছি ‘‘অম্ম, অঞ্ঞেসং মাতামহকুলতো পণ্ণাকারো আহরিযতি, ময্হং কোচি কিঞ্চি ন পেসেসি, কিং ত্ৰং নিম্মাতা নিপ্পিতাসী’’তি? অথ নং সা ‘‘তাত, সক্যরাজানো মাতামহা দূরে পন ৰসন্তি, তেন তে কিঞ্চি ন পেসেন্তী’’তি ৰত্ৰা ৰঞ্চেসি.

পুন সোল়সৰস্সিককালে ‘‘অম্ম, মাতামহকুলং পস্সিতুকামোম্হী’’তি ৰত্ৰা ‘‘অলং তাত, কিং তত্থ গন্ত্ৰা করিস্সসী’’তি ৰারিযমানোপি পুনপ্পুনং যাচি. অথস্স মাতা ‘‘তেন হি গচ্ছাহী’’তি সম্পটিচ্ছি. সো পিতু আরোচেত্ৰা মহন্তেন পরিৰারেন নিক্খমি. ৰাসভখত্তিযা পুরেতরং পণ্ণং পেসেসি ‘‘অহং ইধ সুখং ৰসামি, সামিনো কিঞ্চি অন্তরং মা দস্সযিংসূ’’তি. সাকিযা ৰিটটূভস্স আগমনং ঞত্ৰা ‘‘ৰন্দিতুং ন সক্কা’’তি তস্স দহরদহরে কুমারকে জনপদং পহিণিংসু. কুমারে কপিলৰত্থুং সম্পত্তে সাকিযা সন্থাগারে সন্নিপতিংসু. কুমারো সন্থাগারং গন্ত্ৰা অট্ঠাসি. অথ নং ‘‘অযং তে, তাত, মাতামহো, অযং মাতুলো’’তি ৰদিংসু সো সব্বে ৰন্দমানো ৰিচরি. সো যাৰপিট্ঠিযা রুজনপ্পমাণা ৰন্দিত্ৰা একম্পি অত্তানং ৰন্দমানং অদিস্ৰা ‘‘কিং নু খো মং ৰন্দন্তা নত্থী’’তি পুচ্ছি. সাকিযা ‘‘তাত, তৰ কনিট্ঠকুমারা জনপদং গতা’’তি ৰত্ৰা তস্স মহন্তং সক্কারং করিংসু. সো কতিপাহং ৰসিত্ৰা মহন্তেন পরিৰারেন নিক্খমি. অথেকা দাসী সন্থাগারে তেন নিসিন্নফলকং ‘‘ইদং ৰাসভখত্তিযায দাসিযা পুত্তস্স নিসিন্নফলক’’ন্তি অক্কোসিত্ৰা পরিভাসিত্ৰা খীরোদকেন ধোৰি. একো পুরিসো অত্তনো আৰুধং পমুস্সিত্ৰা নিৰত্তো তং গণ্হন্তো ৰিটটূভকুমারস্স অক্কোসনসদ্দং সুত্ৰা তং অন্তরং পুচ্ছিত্ৰা ‘‘ৰাসভখত্তিযা দাসিযা কুচ্ছিস্মিং মহানামসক্কস্স জাতা’’তি ঞত্ৰা গন্ত্ৰা বলকাযস্স কথেসি. ‘‘ৰাসভখত্তিযা কির দাসিযা ধীতা’’তি মহাকোলাহলং অহোসি.

কুমারো তং সুত্ৰা ‘‘এতে তাৰ মম নিসিন্নফলকং খীরোদকেন ধোৰন্তু, অহং পন রজ্জে পতিট্ঠিতকালে এতেসং গললোহিতং গহেত্ৰা মম নিসিন্নফলকং ধোৰিস্সামী’’তি চিত্তং পট্ঠপেসি. তস্মিং সাৰত্থিং গতে অমচ্চা সব্বং পৰত্তিং রঞ্ঞো আরোচেসুং. রাজা ‘‘সব্বে ময্হং দাসিধীতরং অদংসূ’’তি সাকিযানং কুজ্ঝিত্ৰা ৰাসভখত্তিযায চ পুত্তস্স চ দিন্নপরিহারং অচ্ছিন্দিত্ৰা দাসদাসীহি লদ্ধব্বপরিহারমত্তমেৰ দাপেসি. ততো কতিপাহচ্চযেন সত্থা রাজনিৰেসনং আগন্ত্ৰা নিসীদি. রাজা সত্থারং ৰন্দিত্ৰা ‘‘ভন্তে, তুম্হাকং কির ঞাতকেহি দাসিধীতা ময্হং দিন্না, তেনস্সা অহং সপুত্তায পরিহারং অচ্ছিন্দিত্ৰা দাসদাসীহি লদ্ধব্বপরিহারমত্তমেৰ দাপেসি’’ন্তি আহ. সত্থা ‘‘অযুত্তং, মহারাজ, সাকিযেহি কতং, দদন্তেহি নাম সমানজাতিকা দাতব্বা অস্স. তং পন মহারাজ, ৰদামি ৰাসভখত্তিযা খত্তিযরাজধীতা খত্তিযস্স রঞ্ঞো গেহে অভিসেকং লভি, ৰিটটূভোপি খত্তিযরাজানমেৰ পটিচ্চ জাতো, মাতুগোত্তং নাম কিং করিস্সতি, পিতুগোত্তমেৰ পমাণন্তি পোরাণকপণ্ডিতা দলিদ্দিত্থিযা কট্ঠহারিকাযপি অগ্গমহেসিট্ঠানং অদংসু, তস্সা চ কুচ্ছিম্হি জাতকুমারো দ্ৰাদসযোজনিকায বারাণসিযা রজ্জং কত্ৰা কট্ঠৰাহনরাজা নাম জাতো’’তি কট্ঠৰাহনজাতকং (জা. ১.১.৭) কথেসি. রাজা সত্থু ধম্মকথং সুত্ৰা ‘‘পিতুগোত্তমেৰ কির পমাণ’’ন্তি সুত্ৰা তুস্সিত্ৰা মাতাপুত্তানং পকতিপরিহারমেৰ দাপেসি.

রঞ্ঞো পন বন্ধুলো নাম সেনাপতি মল্লিকং নাম অত্তনো ভরিযং ৰঞ্ঝং ‘‘তৰ কুলঘরমেৰ গচ্ছাহী’’তি কুসিনারমেৰ পেসেসি. সা ‘‘সত্থারং দিস্ৰাৰ গমিস্সামী’’তি জেতৰনং পৰিসিত্ৰা তথাগতং ৰন্দিত্ৰা একমন্তং ঠিতা ‘‘কহং গচ্ছসী’’তি চ পুট্ঠা ‘‘সামিকো মে, ভন্তে, কুলঘরং পেসেসী’’তি ৰত্ৰা ‘‘কস্মা’’তি ৰুত্তা ‘‘ৰঞ্ঝা অপুত্তিকা, ভন্তে’’তি ৰত্ৰা সত্থারা ‘‘যদি এৰং গমনকিচ্চং নত্থি, নিৰত্তাহী’’তি ৰুত্তা তুট্ঠা সত্থারং ৰন্দিত্ৰা নিৰেসনমেৰ পুন অগমাসি. ‘‘কস্মা নিৰত্তসী’’তি পুট্ঠা ‘‘দসবলেন নিৰত্তিতাম্হী’’তি আহ. সেনাপতি ‘‘দিট্ঠং ভৰিস্সতি তথাগতেন কারণ’’ন্তি আহ. সা ন চিরস্সেৰ গব্ভং পটিলভিত্ৰা উপ্পন্নদোহল়া ‘‘দোহল়ো মে উপ্পন্নো’’তি আরোচেসি. ‘‘কিং দোহল়ো’’তি? ‘‘ৰেসালিযা নগরে লিচ্ছৰিরাজানং অভিসেকমঙ্গলপোক্খরণিং ওতরিত্ৰা ন্হত্ৰা পানীযং পিৰিতুকামাম্হি, সামী’’তি. সেনাপতি ‘‘সাধূ’’তি ৰত্ৰা সহস্সথামধনুং গহেত্ৰা তং রথং আরোপেত্ৰা সাৰত্থিতো নিক্খমিত্ৰা রথং পাজেন্তো ৰেসালিং পাৰিসি.

তস্মিঞ্চ কালে কোসলরঞ্ঞো বন্ধুলসেনাপতিনা সদ্ধিং একাচরিযকুলে উগ্গহিতসিপ্পো মহালি নাম লিচ্ছৰী অন্ধো লিচ্ছৰীনং অত্থঞ্চ ধম্মঞ্চ অনুসাসন্তো দ্ৰারসমীপে ৰসতি. সো রথস্স উম্মারে পটিঘট্টনসদ্দং সুত্ৰা ‘‘বন্ধুলমল্লস্স রথপতনসদ্দো এসো, অজ্জ লিচ্ছৰীনং ভযং উপ্পজ্জিস্সতী’’তি আহ. পোক্খরণিযা অন্তো চ বহি চ আরক্খা বলৰা, উপরি লোহজালং পত্থটং, সকুণানম্পি ওকাসো নত্থি. সেনাপতি পন রথা ওতরিত্ৰা আরক্খকে খগ্গেন পহরন্তো পলাপেত্ৰা লোহজালং ছিন্দিত্ৰা অন্তোপোক্খরণিযং ভরিযং ওতারেত্ৰা ন্হাপেত্ৰা পাযেত্ৰা সযম্পি ন্হত্ৰা মল্লিকং রথং আরোপেত্ৰা নগরা নিক্খমিত্ৰা আগতমগ্গেনেৰ পাযাসি. আরক্খকা গন্ত্ৰা লিচ্ছৰীনং আরোচেসুং. লিচ্ছৰিরাজানো কুজ্ঝিত্ৰা পঞ্চ রথসতানি আরুয্হ ‘‘বন্ধুলমল্লং গণ্হিস্সামা’’তি নিক্খমিংসু. তং পৰত্তিং মহালিস্স আরোচেসুং. মহালি ‘‘মা গমিত্থ, সো হি ৰো সব্বে ঘাতযিস্সতী’’তি আহ. তেপি ‘‘মযং গমিস্সামযেৰা’’তি ৰদিংসু. তেন হি চক্কস্স যাৰ নাভিতো পথৰিং পৰিট্ঠট্ঠানং দিস্ৰা নিৰত্তেয্যাথ, ততো অনিৰত্তন্তা পুরতো অসনিসদ্দং ৰিয সুণিস্সথ, তম্হা ঠানা নিৰত্তেয্যাথ, ততো অনিৰত্তন্তা তুম্হাকং রথধুরেসু ছিদ্দং পস্সিস্সথ, তম্হা ঠানা নিৰত্তেয্যাথ, পুরতো মাগমিত্থাতি. তে তস্স ৰচনেন অনিৰত্তিত্ৰা তং অনুবন্ধিংসুযেৰ.

মল্লিকা দিস্ৰা ‘‘রথা, সামি, পঞ্ঞাযন্তী’’তি আহ. তেন হি একস্স রথস্স ৰিয পঞ্ঞাযনকালে মম আরোচেয্যাসীতি. সা যদা সব্বে একো ৰিয হুত্ৰা পঞ্ঞাযিংসু, তদা ‘‘একমেৰ সামি রথসীসং পঞ্ঞাযতী’’তি আহ. বন্ধুলো ‘‘তেন হি ইমা রস্মিযো গণ্হাহী’’তি তস্সা রস্মিযো দত্ৰা রথে ঠিতোৰ ধনুং আরোপেতি, রথচক্কং যাৰ নাভিতো পথৰিং পাৰিসি, লিচ্ছৰিনো তং ঠানং দিস্ৰাপি ন নিৰত্তিংসু. ইতরো থোকং গন্ত্ৰা জিযং পোথেসি, অসনিসদ্দো ৰিয অহোসি. তে ততোপি ন নিৰত্তিংসু, অনুবন্ধন্তা গচ্ছন্তেৰ. বন্ধুলো রথে ঠিতকোৰ একং সরং খিপি. সো পঞ্চন্নং রথসতানং রথসীসং ছিদ্দং কত্ৰা পঞ্চ রাজসতানি পরিকরবন্ধনট্ঠানে ৰিজ্ঝিত্ৰা পথৰিং পাৰিসি. তে অত্তনো ৰিদ্ধভাৰং অজানিত্ৰা ‘‘তিট্ঠ রে, তিট্ঠ রে’’তি ৰদন্তা অনুবন্ধিংসুযেৰ. বন্ধুলো রথং ঠপেত্ৰা ‘‘তুম্হে মতকা, মতকেহি সদ্ধিং ময্হং যুদ্ধং নাম নত্থী’’তি আহ. তে ‘‘মতকা নাম অম্হাদিসা নেৰ হোন্তী’’তি ৰদিংসু. ‘‘তেন হি সব্বপচ্ছিমস্স পরিকরং মোচেথা’’তি. তে মোচযিংসু. সো মুত্তমত্তেযেৰ মরিত্ৰা পতিতো. অথ নে ‘‘সব্বেপি তুম্হে এৰরূপা, অত্তনো ঘরানি গন্ত্ৰা সংৰিধাতব্বং সংৰিদহিত্ৰা পুত্তদারে অনুসাসিত্ৰা সন্নাহং মোচেথা’’তি আহ. তে তথা কত্ৰা সব্বে জীৰিতক্খযং পত্তা.

বন্ধুলোপি মল্লিকং সাৰত্থিং আনেসি. সা সোল়সক্খত্তুং যমকে পুত্তে ৰিজাযি, সব্বেপি সূরা থামসম্পন্না অহেসুং, সব্বসিপ্পে নিপ্ফত্তিং পাপুণিংসু. একেকস্সপি পুরিসসহস্সপরিৰারো অহোসি. পিতরা সদ্ধিং রাজনিৰেসনং গচ্ছন্তেহি তেহেৰ রাজঙ্গণং পরিপূরি. অথেকদিৰসং ৰিনিচ্ছযে কূটড্ডপরাজিতা মনুস্সা বন্ধুলং আগচ্ছন্তং দিস্ৰা মহারৰং ৰিরৰন্তা ৰিনিচ্ছযঅমচ্চানং কূটড্ডকারণং তস্স আরোচেসুং. সোপি ৰিনিচ্ছযং গন্ত্ৰা তং অড্ডং তীরেত্ৰা সামিকমেৰ সামিকং, অস্সামিকমেৰ অস্সামিকং অকাসি. মহাজনো মহাসদ্দেন সাধুকারং পৰত্তেসি. রাজা ‘‘কিমিদ’’ন্তি পুচ্ছিত্ৰা তমত্থং সুত্ৰা তুস্সিত্ৰা সব্বেপি তে অমচ্চে হারেত্ৰা বন্ধুলস্সেৰ ৰিনিচ্ছযং নিয্যাদেসি. সো ততো পট্ঠায সম্মা ৰিনিচ্ছিনি. ততো পোরাণকৰিনিচ্ছযিকা লঞ্জং অলভন্তা অপ্পলাভা হুত্ৰা ‘‘বন্ধুলো রজ্জং পত্থেতী’’তি রাজকুলে পরিভিন্দিংসু. রাজা তং কথং গহেত্ৰা চিত্তং নিগ্গহেতুং নাসক্খি, ‘‘ইমস্মিং ইধেৰ ঘাতিযমানে গরহা মে উপ্পজ্জিস্সতী’’তি পুন চিন্তেত্ৰা ‘‘পযুত্তপুরিসেহি পচ্চন্তং পহরাপেত্ৰা তে পলাপেত্ৰা নিৰত্তকালে অন্তরামগ্গে পুত্তেহি সদ্ধিং মারেতুং ৰট্টতী’’তি বন্ধুলং পক্কোসাপেত্ৰা ‘‘পচ্চন্তো কির কুপিতো, তৰ পুত্তেহি সদ্ধিং গন্ত্ৰা চোরে গণ্হাহী’’তি পহিণিত্ৰা ‘‘এত্থেৰস্স দ্ৰত্তিংসায পুত্তেহি সদ্ধিং সীসং ছিন্দিত্ৰা আহরথা’’তি তেহি সদ্ধিং অঞ্ঞেপি সমত্থে মহাযোধে পেসেসি. তস্মিং পচ্চন্তং গচ্ছন্তেযেৰ ‘‘সেনাপতি কির আগচ্ছতী’’তি সুত্ৰাৰ পযুত্তকচোরা পলাযিংসু. সো তং পদেসং আৰাসাপেত্ৰা জনপদং সণ্ঠপেত্ৰা নিৰত্তি.

অথস্স নগরতো অৰিদূরে ঠানে তে যোধা পুত্তেহি সদ্ধিং সীসং ছিন্দিংসু. তং দিৰসং মল্লিকায পঞ্চহি ভিক্খুসতেহি সদ্ধিং দ্ৰে অগ্গসাৰকা নিমন্তিতা হোন্তি. অথস্সা পুব্বণ্হসমযে ‘‘সামিকস্স তে সদ্ধিং পুত্তেহি সীসং ছিন্দিংসূ’’তি পণ্ণং আহরিত্ৰা অদংসু. সা তং পৰত্তিং ঞত্ৰা কস্সচি কিঞ্চি অৰত্ৰা পণ্ণং উচ্ছঙ্গে কত্ৰা ভিক্খুসঙ্ঘমেৰ পরিৰিসি. অথস্সা পরিচারিকা ভিক্খূনং ভত্তং দত্ৰা সপ্পিচাটিং আহরন্তিযো থেরানং পুরতো চাটিং ভিন্দিংসু. ধম্মসেনাপতি ‘‘উপাসিকে, ভেদনধম্মং ভিন্নং, ন চিন্তেতব্ব’’ন্তি আহ. সা উচ্ছঙ্গতো পণ্ণং নীহরিত্ৰা ‘‘দ্ৰত্তিংসপুত্তেহি সদ্ধিং পিতু সীসং ছিন্নন্তি মে ইমং পণ্ণং আহরিংসু, অহং ইদং সুত্ৰাপি ন চিন্তেমি, সপ্পিচাটিযা ভিন্নায কিং চিন্তেমি, ভন্তে’’তি আহ. ধম্মসেনাপতি ‘‘অনিমিত্তমনঞ্ঞাত’’ন্তিআদীনি (সু. নি. ৫৭৯) ৰত্ৰা ধম্মং দেসেত্ৰা উট্ঠাযাসনা ৰিহারং অগমাসি. সাপি দ্ৰত্তিংস সুণিসাযো পক্কোসাপেত্ৰা ‘‘তুম্হাকং সামিকা অত্তনো পুরিমকম্মফলং লভিংসু, তুম্হে মা সোচিত্থ মা পরিদেৰিত্থ, রঞ্ঞো উপরি মনোপদোসং মা করিত্থা’’তি ওৰদি.

রঞ্ঞো চরপুরিসা তং কথং সুত্ৰা তেসং নিদ্দোসভাৰং রঞ্ঞো কথযিংসু. রাজা সংৰেগপ্পত্তো তস্সা নিৰেসনং গন্ত্ৰা মল্লিকঞ্চ সুণিসাযো চস্সা খমাপেত্ৰা মল্লিকায ৰরং অদাসি. সা ‘‘গহিতো মে হোতূ’’তি ৰত্ৰা তস্মিং গতে মতকভত্তং দত্ৰা ন্হত্ৰা রাজানং উপসঙ্কমিত্ৰা ৰন্দিত্ৰা ‘‘দেৰ, তুম্হেহি মে ৰরো দিন্নো, ময্হঞ্চ অঞ্ঞেন অত্থো নত্থি, দ্ৰত্তিংসায মে সুণিসানং মম চ কুলঘরগমনং অনুজানাথা’’তি আহ. রাজা সম্পটিচ্ছি. সা দ্ৰত্তিংসায সুণিসানং সককুলং পেসেত্ৰা সযং কুসিনারনগরে অত্তনো কুলঘরং অগমাসি. রাজা বন্ধুলসেনাপতিনো ভাগিনেয্যস্স দীঘকারাযনস্স নাম সেনাপতিট্ঠানং অদাসি. সো পন ‘‘মাতুলো মে ইমিনা মারিতো’’তি রঞ্ঞো ওতারং গৰেসন্তো ৰিচরতি. রাজাপি নিপ্পরাধস্স বন্ধুলস্স মারিতকালতো পট্ঠায ৰিপ্পটিসারী চিত্তস্সাদং ন লভতি, রজ্জসুখং নানুভোতি.

তদা সত্থা সাকিযানং ৰেল়ুং নাম নিগমং উপনিস্সায ৰিহরতি. রাজা তত্থ গন্ত্ৰা আরামতো অৰিদূরে খন্ধাৰারং নিৰাসেত্ৰা ‘‘মহন্তেন পরিৰারেন সত্থারং ৰন্দিস্সামা’’তি ৰিহারং গন্ত্ৰা পঞ্চ রাজককুধভণ্ডানি দীঘকারাযনস্স দত্ৰা এককোৰ গন্ধকুটিং পাৰিসি. সব্বং ধম্মচেতিযসুত্তনিযামেনেৰ (ম. নি. ২.৩৬৪ আদযো) ৰেদিতব্বং. তস্মিং গন্ধকুটিং পৰিট্ঠে দীঘকারাযনো তানি পঞ্চ রাজককুধভণ্ডানি গহেত্ৰা ৰিটটূভং রাজানং কত্ৰা রঞ্ঞো একং অস্সং একঞ্চ উপট্ঠানকারিকং মাতুগামং নিৰত্তেত্ৰা সাৰত্থিং অগমাসি. রাজা সত্থারা সদ্ধিং পিযকথং কথেত্ৰা নিক্খন্তো সেনং অদিস্ৰা তং মাতুগামং পুচ্ছিত্ৰা তং পৰত্তিং সুত্ৰা ‘‘অহং ভাগিনেয্যং অজাতসত্তুং আদায আগন্ত্ৰা ৰিটটূভং গহেস্সামী’’তি রাজগহনগরং গচ্ছন্তো ৰিকালে দ্ৰারেসু পিহিতেসু নগরং পৰিসিতুমসক্কোন্তো একিস্সায সালায নিপজ্জিত্ৰা ৰাতাতপেন কিলন্তো রত্তিভাগে তত্থেৰ কালমকাসি. ৰিভাতায রত্তিযা ‘‘দেৰ কোসলনরিন্দ, ইদানি অনাথোসি জাতো’’তি ৰিলপন্তিযা তস্সা ইত্থিযা সদ্দং সুত্ৰা রঞ্ঞো আরোচেসুং. সো মাতুলস্স মহন্তেন সক্কারেন সরীরকিচ্চং কারেসি.

ৰিটটূভোপি রজ্জং লভিত্ৰা তং ৰেরং সরিত্ৰা ‘‘সব্বেপি সাকিযে মারেস্সামী’’তি মহতিযা সেনায নিক্খমি. তং দিৰসং সত্থা পচ্চূসসমযে লোকং ৰোলোকেন্তো ঞাতিসঙ্ঘস্স ৰিনাসং দিস্ৰা ‘‘ঞাতিসঙ্গহং কাতুং ৰট্টতী’’তি চিন্তেত্ৰা পুব্বণ্হসমযে পিণ্ডায চরিত্ৰা পিণ্ডপাতপটিক্কন্তো গন্ধকুটিযং সীহসেয্যং কপ্পেত্ৰা সাযন্হসমযে আকাসেন গন্ত্ৰা কপিলৰত্থুসামন্তে একস্মিং কবরচ্ছাযে রুক্খমূলে নিসীদি. ততো অৰিদূরে ৰিটটূভস্স রজ্জসীমায অন্তো সন্দচ্ছাযো নিগ্রোধরুক্খো অত্থি, ৰিটটূভো সত্থারং দিস্ৰা উপসঙ্কমিত্ৰা ৰন্দিত্ৰা ‘‘ভন্তে, কিংকারণা এৰরূপায উণ্হৰেলায ইমস্মিং কবরচ্ছাযে রুক্খমূলে নিসীদথ, এতস্মিং সন্দচ্ছাযে নিগ্রোধরুক্খমূলে নিসীদথ, ভন্তে’’তি ৰত্ৰা ‘‘হোতু, মহারাজ, ঞাতকানং ছাযা নাম সীতলা’’তি ৰুত্তে ‘‘ঞাতকানং রক্খণত্থায সত্থা আগতো ভৰিস্সতী’’তি চিন্তেত্ৰা সত্থারং ৰন্দিত্ৰা সাৰত্থিমেৰ পচ্চাগমি. সত্থাপি উপ্পতিত্ৰা জেতৰনমেৰ গতো.

রাজা সাকিযানং দোসং সরিত্ৰা দুতিযং নিক্খমিত্ৰা তথেৰ সত্থারং পস্সিত্ৰা পুন নিৰত্তিত্ৰা ততিযৰারে নিক্খমিত্ৰা তত্থেৰ সত্থারং পস্সিত্ৰা নিৰত্তি. চতুত্থৰারে পন তস্মিং নিক্খন্তে সত্থা সাকিযানং পুব্বকম্মং ওলোকেত্ৰা তেসং নদিযং ৰিসপক্খিপনপাপকম্মস্স অপ্পটিবাহিরভাৰং ঞত্ৰা চতুত্থৰারে ন অগমাসি. ৰিটটূভরাজা খীরপাযকে দারকে আদিং কত্ৰা সব্বে সাকিযে ঘাতেত্ৰা গললোহিতেন নিসিন্নফলকং ধোৰিত্ৰা পচ্চাগমি. সত্থরি ততিযৰারে গমনতো পচ্চাগন্ত্ৰা পুনদিৰসে পিণ্ডায চরিত্ৰা নিট্ঠাপিতভত্তকিচ্চে গন্ধকুটিযং পৰিসন্তে দিসাহি সন্নিপতিতা ভিক্খূ ধম্মসভাযং নিসীদিত্ৰা ‘‘আৰুসো, সত্থা অত্তানং দস্সেত্ৰা রাজানং নিৰত্তাপেত্ৰা ঞাতকে মরণভযা মোচেসি, এৰং ঞাতকানং অত্থচরো সত্থা’’তি ভগৰতো গুণকথং কথযিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ তথাগতো ঞাতকানং অত্থং চরতি, পুব্বেপি চরিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তো নাম রাজা দস রাজধম্মে অকোপেত্ৰা ধম্মেন রজ্জং কারেন্তো একদিৰসং চিন্তেসি ‘‘জম্বুদীপতলে রাজানো বহুথম্ভেসু পাসাদেসু ৰসন্তি, তস্মা বহূহি থম্ভেহি পাসাদকরণং নাম অনচ্ছরিযং, যংনূনাহং একথম্ভকং পাসাদং কারেয্যং, এৰং সব্বরাজূনং অগ্গরাজা ভৰিস্সামী’’তি. সো ৰড্ঢকী পক্কোসাপেত্ৰা ‘‘ময্হং সোভগ্গপ্পত্তং একথম্ভকং পাসাদং করোথা’’তি আহ. তে ‘‘সাধূ’’তি সম্পটিচ্ছিত্ৰা অরঞ্ঞং পৰিসিত্ৰা উজূ মহন্তে একথম্ভকপাসাদারহে বহূ রুক্খে দিস্ৰা ‘‘ইমে রুক্খা সন্তি, মগ্গো পন ৰিসমো, ন সক্কা ওতারেতুং, রঞ্ঞো আচিক্খিস্সামা’’তি চিন্তেত্ৰা তথা অকংসু. রাজা ‘‘কেনচি উপাযেন সণিকং ওতারেথা’’তি ৰত্ৰা ‘‘দেৰ, যেন কেনচি উপাযেন ন সক্কা’’তি ৰুত্তে ‘‘তেন হি মম উয্যানে একং রুক্খং উপধারেথা’’তি আহ. ৰড্ঢকী উয্যানং গন্ত্ৰা একং সুজাতং উজুকং গামনিগমপূজিতং রাজকুলতোপি লদ্ধবলিকম্মং মঙ্গলসালরুক্খং দিস্ৰা রঞ্ঞো সন্তিকং গন্ত্ৰা তমত্থং আরোচেসুং. রাজা ‘‘উয্যানে রুক্খো নাম মম পটিবদ্ধো, গচ্ছথ ভো তং ছিন্দথা’’তি আহ. তে ‘‘সাধূ’’তি সম্পটিচ্ছিত্ৰা গন্ধমালাদিহত্থা উয্যানং গন্ত্ৰা রুক্খে গন্ধপঞ্চঙ্গুলিকং দত্ৰা সুত্তেন পরিক্খিপিত্ৰা পুপ্ফকণ্ণিকং বন্ধিত্ৰা দীপং জালেত্ৰা বলিকম্মং কত্ৰা ‘‘ইতো সত্তমে দিৰসে আগন্ত্ৰা রুক্খং ছিন্দিস্সাম, রাজা ছিন্দাপেতি, ইমস্মিং রুক্খে নিব্বত্তদেৰতা অঞ্ঞত্থ গচ্ছতু, অম্হাকং দোসো নত্থী’’তি সাৰেসুং.

অথ তস্মিং নিব্বত্তো দেৰপুত্তো তং ৰচনং সুত্ৰা ‘‘নিস্সংসযং ইমে ৰড্ঢকী ইমং রুক্খং ছিন্দিস্সন্তি, ৰিমানং মে নস্সিস্সতি, ৰিমানপরিযন্তিকমেৰ খো পন ময্হং জীৰিতং, ইমঞ্চ রক্খং পরিৰারেত্ৰা ঠিতেসু তরুণসালরুক্খেসু নিব্বত্তানং মম ঞাতিদেৰতানম্পি বহূনি ৰিমানানি নস্সিস্সন্তি. ৰিমানপরিযন্তিকমেৰ মম ঞাতীনং দেৰতানম্পি জীৰিতং, ন খো পন মং তথা অত্তনো ৰিনাসো বাধতি, যথা ঞাতীনং, তস্মা নেসং মযা জীৰিতং দাতুং ৰট্টতী’’তি চিন্তেত্ৰা অড্ঢরত্তসমযে দিব্বালঙ্কারপটিমণ্ডিতো রঞ্ঞো সিরিগব্ভং পৰিসিত্ৰা সকলগব্ভং একোভাসং কত্ৰা উস্সিসকপস্সে রোদমানো অট্ঠাসি. রাজা তং দিস্ৰা ভীততসিতো তেন সদ্ধিং সল্লপন্তো পঠমং গাথমাহ –

১৩.

‘‘কা ত্ৰং সুদ্ধেহি ৰত্থেহি, অঘে ৰেহাযসং ঠিতা;

কেন ত্যাস্সূনি ৰত্তন্তি, কুতো তং ভযমাগত’’ন্তি.

তত্থ কা ত্ৰন্তি নাগযক্খসুপণ্ণসক্কাদীসু কা নাম ত্ৰন্তি পুচ্ছতি. ৰত্থেহীতি ৰচনমত্তমেৰেতং, সব্বেপি পন দিব্বালঙ্কারে সন্ধাযেৰমাহ. অঘেতি অপ্পটিঘে আকাসে. ৰেহাযসন্তি তস্সেৰ ৰেৰচনং. কেন ত্যাস্সূনি ৰত্তন্তীতি কেন কারণেন তৰ অস্সূনি ৰত্তন্তি. কুতোতি ঞাতিৰিযোগধনৰিনাসাদীনং কিং নিস্সায তং ভযমাগতন্তি পুচ্ছতি.

ততো দেৰরাজা দ্ৰে গাথা অভাসি –

১৪.

‘‘তৰেৰ দেৰ ৰিজিতে, ভদ্দসালোতি মং ৰিদূ;

সট্ঠি ৰস্সসহস্সানি, তিট্ঠতো পূজিতস্স মে.

১৫.

‘‘কারযন্তা নগরানি, অগারে চ দিসম্পতি;

ৰিৰিধে চাপি পাসাদে, ন মং তে অচ্চমঞ্ঞিসুং;

যথেৰ মং তে পূজেসুং, তথেৰ ত্ৰম্পি পূজযা’’তি.

তত্থ তিট্ঠতোতি সকলবারাণসিনগরেহি চেৰ গামনিগমেহি চ তযা চ পূজিতস্স নিচ্চং বলিকম্মঞ্চ সক্কারঞ্চ লভন্তস্স ময্হং ইমস্মিং উয্যানে তিট্ঠন্তস্স এত্তকো কালো গতোতি দস্সেতি. নগরানীতি নগরপটিসঙ্খরণকম্মানি. অগারেচাতি ভূমিগেহানি. দিসম্পতীতি দিসানং পতি, মহারাজ. ন মং তেতি তে নগরপটিসঙ্খরণাদীনি করোন্তা ইমস্মিং নগরে পোরাণকরাজানো মং নাতিমঞ্ঞিসুং নাতিক্কমিংসু ন ৰিহেঠযিংসু, মম নিৰাসরুক্খং ছিন্দিত্ৰা অত্তনো কম্মং ন করিংসু, ময্হং পন সক্কারমেৰ করিংসূতি অৰচ. যথেৰাতি তস্মা যথেৰ তে পোরাণকরাজানো মং পূজযিংসু, একোপি ইমং রুক্খং ন ছিন্দাপেসি, ত্ৰঞ্চাপি মং তথেৰ পূজয, মা মে রুক্খং ছেদযীতি.

ততো রাজা দ্ৰে গাথা অভাসি –

১৬.

‘‘তং ইৰাহং ন পস্সামি, থূলং কাযেন তে দুমং;

আরোহপরিণাহেন, অভিরূপোসি জাতিযা.

১৭.

‘‘পাসাদং কারযিস্সামি, একত্থম্ভং মনোরমং;

তত্থ তং উপনেস্সামি, চিরং তে যক্খ জীৰিত’’ন্তি.

তত্থ কাযেনাতি পমাণেন. ইদং ৰুত্তং হোতি – তৰ পমাণেন তং ৰিয থূলং মহন্তং অঞ্ঞং দুমং ন পস্সামি, ত্ৰঞ্ঞেৰ পন আরোহপরিণাহেন সুজাতসঙ্খাতায সমসণ্ঠানউজুভাৰপ্পকারায জাতিযা চ অভিরূপো সোভগ্গপ্পত্তো একথম্ভপাসাদারহোতি. পাসাদন্তি তস্মা তং ছেদাপেত্ৰা অহং পাসাদং কারাপেস্সামেৰ. তত্থ তন্তি তং পনাহং সম্ম দেৰরাজ, তত্থ পাসাদে উপনেস্সামি, সো ত্ৰং মযা সদ্ধিং একতো ৰসন্তো অগ্গগন্ধমালাদীনি লভন্তো সক্কারপ্পত্তো সুখং জীৰিস্সসি, নিৰাসট্ঠানাভাৰেন মে ৰিনাসো ভৰিস্সতীতি মা চিন্তযি, চিরং তে যক্খ জীৰিতং ভৰিস্সতীতি.

তং সুত্ৰা দেৰরাজা দ্ৰে গাথা অভাসি –

১৮.

‘‘এৰং চিত্তং উদপাদি, সরীরেন ৰিনাভাৰো;

পুথুসো মং ৰিকন্তিত্ৰা, খণ্ডসো অৰকন্তথ.

১৯.

‘‘অগ্গে চ ছেত্ৰা মজ্ঝে চ, পচ্ছা মূলম্হি ছিন্দথ;

এৰং মে ছিজ্জমানস্স, ন দুক্খং মরণং সিযা’’তি.

তত্থ এৰং চিত্তং উদপাদীতি যদি এৰং চিত্তং তৰ উপ্পন্নং. সরীরেন ৰিনাভাৰোতি যদি তে মম সরীরেন ভদ্দসালরুক্খেন সদ্ধিং মম ৰিনাভাৰো পত্থিতো. পুথুসোতি বহুধা. ৰিকন্তিত্ৰাতি ছিন্দিত্ৰা. খণ্ডসোতি খণ্ডাখণ্ডং কত্ৰা অৰকন্তথ. অগ্গে চাতি অৰকন্তন্তা পন পঠমং অগ্গে, ততো মজ্ঝে ছেত্ৰা সব্বপচ্ছা মূলে ছিন্দথ. এৰঞ্হি মে ছিজ্জমানস্স ন দুক্খং মরণং সিযা, সুখং নু খণ্ডসো ভৰেয্যাতি যাচতি.

ততো রাজা দ্ৰে গাথা অভাসি –

২০.

‘‘হত্থপাদং যথা ছিন্দে, কণ্ণনাসঞ্চ জীৰতো;

ততো পচ্ছা সিরো ছিন্দে, তং দুক্খং মরণং সিযা.

২১.

‘‘সুখং নু খণ্ডসো ছিন্নং, ভদ্দসাল ৰনপ্পতি;

কিংহেতু কিং উপাদায, খণ্ডসো ছিন্নমিচ্ছসী’’তি.

তত্থ হত্থপাদন্তি হত্থে চ পাদে চ. তং দুক্খন্তি এৰং পটিপাটিযা ছিজ্জন্তস্স চোরস্স তং মরণং দুক্খং সিযা. সুখং নূতি সম্ম ভদ্দসাল, ৰজ্ঝপ্পত্তা চোরা সুখেন মরিতুকামা সীসচ্ছেদং যাচন্তি, ন খণ্ডসো ছেদনং, ত্ৰং পন এৰং যাচসি, তেন তং পুচ্ছামি ‘‘সুখং নু খণ্ডসো ছিন্ন’’ন্তি. কিংহেতূতি খণ্ডসো ছিন্নং নাম ন সুখং, কারণেন পনেত্থ ভৰিতব্বন্তি তং পুচ্ছন্তো এৰমাহ.

অথস্স আচিক্খন্তো ভদ্দসালো দ্ৰে গাথা অভাসি –

২২.

‘‘যঞ্চ হেতুমুপাদায, হেতুং ধম্মূপসংহিতং;

খণ্ডসো ছিন্নমিচ্ছামি, মহারাজ সুণোহি মে.

২৩.

‘‘ঞাতী মে সুখসংৰদ্ধা, মম পস্সে নিৰাতজা;

তেপিহং উপহিংসেয্য, পরেসং অসুখোচিত’’ন্তি.

তত্থ হেতুং ধম্মূপসংহিতন্তি মহারাজ, যং হেতুসভাৰযুত্তমেৰ, ন হেতুপতিরূপকং, হেতুং উপাদায আরব্ভ সন্ধাযাহং খণ্ডসো ছিন্নমিচ্ছামি, তং ওহিতসোতো সুণোহীতি অত্থো. ঞাতী মেতি মম ভদ্দসালরুক্খস্স ছাযায সুখসংৰদ্ধা মম পস্সে তরুণসালরুক্খেসু নিব্বত্তা মযা কতৰাতপরিত্তাণত্তা নিৰাতজা মম ঞাতকা দেৰসঙ্ঘা অত্থি, তে অহং ৰিসালসাখৰিটপো মূলে ছিন্দিত্ৰা পতন্তো উপহিংসেয্যং, সংভগ্গৰিমানে করোন্তো ৰিনাসেয্যন্তি অত্থো. পরেসং অসুখোচিতন্তি এৰং সন্তে মযা তেসং পরেসং ঞাতিদেৰসঙ্ঘানং অসুখং দুক্খং ওচিতং ৰড্ঢিতং, ন চাহং তেসং দুক্খকামো, তস্মা ভদ্দসালং খণ্ডসো খণ্ডসো ছিন্দাপেমীতি অযমেত্থাধিপ্পাযো.

তং সুত্ৰা রাজা ‘‘ধম্মিকো ৰতাযং, দেৰপুত্তো, অত্তনো ৰিমানৰিনাসতোপি ঞাতীনং ৰিমানৰিনাসং ন ইচ্ছতি, ঞাতীনং অত্থচরিযং চরতি, অভযমস্স দস্সামী’’তি তুস্সিত্ৰা ওসানগাথমাহ –

২৪.

‘‘চেতেয্যরূপং চেতেসি, ভদ্দসাল ৰনপ্পতি;

হিতকামোসি ঞাতীনং, অভযং সম্ম দম্মি তে’’তি.

তত্থ চেতেয্যরূপং চেতেসীতি ঞাতীসু মুদুচিত্ততায চিন্তেন্তো চিন্তেতব্বযুত্তকমেৰ চিন্তেসি. ছেদেয্যরূপং ছেদেসীতিপি পাঠো. তস্সত্থো – খণ্ডসো ছিন্নমিচ্ছন্তো ছেদেতব্বযুত্তকমেৰ ছেদেসীতি. অভযন্তি এতস্মিং তে সম্ম, গুণে পসীদিত্ৰা অভযং দদামি, ন মে পাসাদেনত্থো, নাহং তং ছেদাপেস্সামি, গচ্ছ ঞাতিসঙ্ঘপরিৰুতো সক্কতগরুকতো সুখং জীৰাতি আহ.

দেৰরাজা রঞ্ঞো ধম্মং দেসেত্ৰা অগমাসি. রাজা তস্সোৰাদে ঠত্ৰা দানাদীনি পুঞ্ঞানি কত্ৰা সগ্গপুরং পূরেসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি তথাগতো ঞাতত্থচরিযং অচরিযেৰা’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, তরুণসালেসু নিব্বত্তদেৰতা বুদ্ধপরিসা, ভদ্দসালদেৰরাজা পন অহমেৰ অহোসি’’ন্তি.

ভদ্দসালজাতকৰণ্ণনা দুতিযা.

[৪৬৬] ৩. সমুদ্দৰাণিজজাতকৰণ্ণনা

কসন্তি ৰপন্তি তে জনাতি ইদং সত্থা জেতৰনে ৰিহরন্তো দেৰদত্তস্স পঞ্চ কুলসতানি গহেত্ৰা নিরযে পতিতভাৰং আরব্ভ কথেসি. সো হি অগ্গসাৰকেসু পরিসং গহেত্ৰা পক্কন্তেসু সোকং সন্ধারেতুং অসক্কোন্তো উণ্হলোহিতে মুখতো নিক্খন্তে বলৰৰেদনাপীল়িতো তথাগতস্স গুণং অনুস্সরিত্ৰা ‘‘অহমেৰ নৰ মাসে তথাগতস্স অনত্থং চিন্তেসিং, সত্থু পন মযি পাপচিত্তং নাম নত্থি, অসীতিমহাথেরানম্পি মযি আঘাতো নাম নত্থি, মযা কতকম্মেন অহমেৰ ইদানি অনাথো জাতো, সত্থারাপিম্হি ৰিস্সট্ঠো মহাথেরেহিপি ঞাতিসেট্ঠেন রাহুলত্থেরেনপি সক্যরাজকুলেহিপি, গন্ত্ৰা সত্থারং খমাপেস্সামী’’তি পরিসায সঞ্ঞং দত্ৰা অত্তানং পঞ্চকেন গাহাপেত্ৰা রত্তিং রত্তিং গচ্ছন্তো কোসলরট্ঠং সম্পাপুণি. আনন্দত্থেরো সত্থু আরোচেসি ‘‘দেৰদত্তো কির, ভন্তে, তুম্হাকং খমাপেতুং আগচ্ছতী’’তি. ‘‘আনন্দ, দেৰদত্তো মম দস্সনং ন লভিস্সতী’’তি.

অথ তস্মিং সাৰত্থিনগরদ্ৰারং সম্পত্তে পুন থেরো আরোচেসি, ভগৰাপি তথেৰ অৰচ. তস্স জেতৰনে পোক্খরণিযা সমীপং আগতস্স পাপং মত্থকং পাপুণি, সরীরে ডাহো উপ্পজ্জি, ন্হত্ৰা পানীযং পিৰিতুকামো হুত্ৰা ‘‘মঞ্চকতো মং আৰুসো ওতারেথ, পানীযং পিৰিস্সামী’’তি আহ. তস্স ওতারেত্ৰা ভূমিযং ঠপিতমত্তস্স চিত্তস্সাদে অলদ্ধেযেৰ মহাপথৰী ৰিৰরমদাসি. তাৰদেৰ তং অৰীচিতো অগ্গিজালা উট্ঠায পরিক্খিপিত্ৰা গণ্হি. সো ‘‘পাপকম্মং মে মত্থকং পত্ত’’ন্তি তথাগতস্স গুণে অনুস্সরিত্ৰা –

‘‘ইমেহি অট্ঠীহি তমগ্গপুগ্গলং, দেৰাতিদেৰং নরদম্মসারথিং;

সমন্তচক্খুং সতপুঞ্ঞলক্খণং, পাণেহি বুদ্ধং সরণং উপেমী’’তি. (মি. প. ৪.১.৩) –

ইমায গাথায সরণে পতিট্ঠহন্তো অৰীচিপরাযণো অহোসি. তস্স পন পঞ্চ উপট্ঠাককুলসতানি অহেসুং. তানিপি তপ্পক্খিকানি হুত্ৰা দসবলং অক্কোসিত্ৰা অৰীচিম্হিযেৰ নিব্বত্তিংসু. এৰং সো তানি পঞ্চ কুলসতানি গণ্হিত্ৰা অৰীচিম্হি পতিট্ঠিতো.

অথেকদিৰসং ভিক্খূ ধম্মসভাযং কথং সমুট্ঠাপেসুং ‘‘আৰুসো, দেৰদত্তো পাপো লাভসক্কারগিদ্ধতায সম্মাসম্বুদ্ধে অট্ঠানে কোপং বন্ধিত্ৰা অনাগতভযমনোলোকেত্ৰা পঞ্চহি কুলসতেহি সদ্ধিং অৰীচিপরাযণো জাতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন ভিক্খৰে, ইদানেৰ দেৰদত্তো লাভসক্কারগিদ্ধো হুত্ৰা অনাগতভযং ন ওলোকেসি, পুব্বেপি অনাগতভযং অনোলোকেত্ৰা পচ্চুপ্পন্নসুখগিদ্ধেন সদ্ধিং পরিসায মহাৰিনাসং পত্তো’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বারাণসিতো অৰিদূরে কুলসহস্সনিৰাসো মহাৰড্ঢকীগামো অহোসি. তত্থ ৰড্ঢকী ‘‘তুম্হাকং মঞ্চং করিস্সাম, পীঠং করিস্সাম, গেহং করিস্সামা’’তি ৰত্ৰা মনুস্সানং হত্থতো বহুং ইণং গহেত্ৰা কিঞ্চি কাতুং ন সক্খিংসু. মনুস্সা দিট্ঠদিট্ঠে ৰড্ঢকী চোদেন্তি পলিবুদ্ধন্তি. তে ইণাযিকেহি উপদ্দুতা সুখং ৰসিতুং অসক্কোন্তা ‘‘ৰিদেসং গন্ত্ৰা যত্থ কত্থচি ৰসিস্সামা’’তি অরঞ্ঞং পৰিসিত্ৰা রুক্খে ছিন্দিত্ৰা মহতিং নাৰং বন্ধিত্ৰা নদিং ওতারেত্ৰা আহরিত্ৰা গামতো গাৰুতড্ঢযোজনমত্তে ঠানে ঠপেত্ৰা অড্ঢরত্তসমযে গামং আগন্ত্ৰা পুত্তদারমাদায নাৰট্ঠানং গন্ত্ৰা নাৰং আরুয্হ অনুক্কমেন মহাসমুদ্দং পৰিসিত্ৰা ৰাতৰেগেন ৰিচরন্তা সমুদ্দমজ্ঝে একং দীপকং পাপুণিংসু. তস্মিং পন দীপকে সযংজাতসালিউচ্ছুকদলিঅম্বজম্বুপনসতালনাল়িকেরাদীনি ৰিৰিধফলানি অত্থি, অঞ্ঞতরো পভিন্ননাৰো পুরিসো পঠমতরং তং দীপকং পত্ৰা সালিভত্তং ভুঞ্জমানো উচ্ছুআদীনি খাদমানো থূলসরীরো নগ্গো পরূল়্হকেসমস্সু তস্মিং দীপকে পটিৰসতি.

ৰড্ঢকী চিন্তযিংসু ‘‘সচে অযং দীপকো রক্খসপরিগ্গহিতো ভৰিস্সতি, সব্বেপি অম্হে ৰিনাসং পাপুণিস্সাম, পরিগ্গণ্হিস্সাম তাৰ ন’’ন্তি. অথ সত্তট্ঠ পুরিসা সূরা বলৰন্তো সন্নদ্ধপঞ্চাৰুধা হুত্ৰা ওতরিত্ৰা দীপকং পরিগ্গণ্হিংসু. তস্মিং খণে সো পুরিসো ভুত্তপাতরাসো উচ্ছুরসং পিৰিত্ৰা সুখপ্পত্তো রমণীযে পদেসে রজতপট্টসদিসে ৰালুকতলে সীতচ্ছাযায উত্তানকো নিপজ্জিত্ৰা ‘‘জম্বুদীপৰাসিনো কসন্তা ৰপন্তা এৰরূপং সুখং ন লভন্তি, জম্বুদীপতো ময্হং অযমেৰ দীপকো ৰর’’ন্তি গাযমানো উদানং উদানেসি. অথ সত্থা ভিক্খূ আমন্তেত্ৰা ‘‘সো ভিক্খৰে পুরিসো ইমং উদানং উদানেসী’’তি দস্সেন্তো পঠমং গাথমাহ –

২৫.

‘‘কসন্তি ৰপন্তি তে জনা, মনুজা কম্মফলূপজীৰিনো;

নযিমস্স দীপকস্স ভাগিনো, জম্বুদীপা ইদমেৰ নো ৰর’’ন্তি.

তত্থ তে জনাতি তে জম্বুদীপৰাসিনো জনা. কম্মফলূপজীৰিনোতি নানাকম্মানং ফলূপজীৰিনো সত্তা.

অথ তে দীপকং পরিগ্গণ্হন্তা পুরিসা তস্স গীতসদ্দং সুত্ৰা ‘‘মনুস্সসদ্দো ৰিয সুয্যতি, জানিস্সাম ন’’ন্তি সদ্দানুসারেন গন্ত্ৰা তং পুরিসং দিস্ৰা ‘‘যক্খো ভৰিস্সতী’’তি ভীততসিতা সরে সন্নহিংসু. সোপি তে দিস্ৰা অত্তনো ৰধভযেন ‘‘নাহং, সামি, যক্খো, পুরিসোম্হি, জীৰিতং মে দেথা’’তি যাচন্তো ‘‘পুরিসা নাম তুম্হাদিসা নগ্গা ন হোন্তী’’তি ৰুত্তে পুনপ্পুনং যাচিত্ৰা মনুস্সভাৰং ৰিঞ্ঞাপেসি. তে তং পুরিসং উপসঙ্কমিত্ৰা সম্মোদনীযং কথং সুত্ৰা তস্স তত্থ আগতনিযামং পুচ্ছিংসু. সোপি সব্বং তেসং কথেত্ৰা ‘‘তুম্হে অত্তনো পুঞ্ঞসম্পত্তিযা ইধাগতা, অযং উত্তমদীপো, ন এত্থ সহত্থেন কম্মং কত্ৰা জীৰন্তি, সযংজাতসালীনঞ্চেৰ উচ্ছুআদীনঞ্চেত্থ অন্তো নত্থীতি অনুক্কণ্ঠন্তা ৰসথা’’তি আহ. ইধ পন ৰসন্তানং অম্হাকং অঞ্ঞো পরিপন্থো নত্থি, অঞ্ঞং ভযং এত্থ নত্থি, অযং পন অমনুস্সপরিগ্গহিতো, অমনুস্সা তুম্হাকং উচ্চারপস্সাৰং দিস্ৰা কুজ্ঝেয্যুং, তস্মা তং করোন্তা ৰালুকং ৰিযূহিত্ৰা ৰালুকায পটিচ্ছাদেয্যাথ, এত্তকং ইধ ভযং, অঞ্ঞং নত্থি, নিচ্চং অপ্পমত্তা ভৰেয্যাথাতি. তে তত্থ ৰাসং উপগচ্ছিংসু. তস্মিং পন কুলসহস্সে পঞ্চন্নং পঞ্চন্নং কুলসতানং জেট্ঠকা দ্ৰে ৰড্ঢকী অহেসুং. তেসু একো বালো অহোসি রসগিদ্ধো, একো পণ্ডিতো রসেসু অনল্লীনো.

অপরভাগে সব্বেপি তে তত্থ সুখং ৰসন্তা থূলসরীরা হুত্ৰা চিন্তযিংসু ‘‘চিরং পীতা নো সুরা, উচ্ছুরসেন মেরযং কত্ৰা পিৰিস্সামা’’তি. তে মেরযং কারেত্ৰা পিৰিত্ৰা মদৰসেন গাযন্তা নচ্চন্তা কীল়ন্তা পমত্তা তত্থ তত্থ উচ্চারপস্সাৰং কত্ৰা অপ্পটিচ্ছাদেত্ৰা দীপকং জেগুচ্ছং পটিকূলং করিংসু. দেৰতা ‘‘ইমে অম্হাকং কীল়ামণ্ডলং পটিকূলং করোন্তী’’তি কুজ্ঝিত্ৰা ‘‘মহাসমুদ্দং উত্তরাপেত্ৰা দীপকধোৰনং করিস্সামা’’তি মন্তেত্ৰা ‘‘অযং কাল়পক্খো, অজ্জ অম্হাকং সমাগমো চ ভিন্নো, ইতো দানি পন্নরসমে দিৰসে পুণ্ণমীউপোসথদিৰসে চন্দস্সুগ্গমনৰেলায সমুদ্দং উব্বত্তেত্ৰা সব্বেপিমে ঘাতেস্সামা’’তি দিৰসং ঠপযিংসু. অথ নেসং অন্তরে একো ধম্মিকো দেৰপুত্তো ‘‘মা ইমে মম পস্সন্তস্স নস্সিংসূ’’তি অনুকম্পায তেসু সাযমাসং ভুঞ্জিত্ৰা ঘরদ্ৰারে সুখকথায নিসিন্নেসু সব্বালঙ্কারপটিমণ্ডিতো সকলদীপং একোভাসং কত্ৰা উত্তরায দিসায আকাসে ঠত্ৰা ‘‘অম্ভো ৰড্ঢকী, দেৰতা তুম্হাকং কুদ্ধা. ইমস্মিং ঠানে মা ৰসিত্থ, ইতো অড্ঢমাসচ্চযেন হি দেৰতা সমুদ্দং উব্বত্তেত্ৰা সব্বেৰ তুম্হে ঘাতেস্সন্তি, ইতো নিক্খমিত্ৰা পলাযথা’’তি ৰত্ৰা দুতিযং গাথমাহ –

২৬.

‘‘তিপঞ্চরত্তূপগতম্হি চন্দে, ৰেগো মহা হেহিতি সাগরস্স;

উপ্লৰিস্সং দীপমিমং উল়ারং, মা ৰো ৰধী গচ্ছথ লেণমঞ্ঞ’’ন্তি.

তত্থ উপ্লৰিস্সন্তি ইমং দীপকং উপ্লৰন্তো অজ্ঝোত্থরন্তো অভিভৰিস্সতি. মা ৰো ৰধীতি সো সাগরৰেগো তুম্হে মা ৰধি.

ইতি সো তেসং ওৰাদং দত্ৰা অত্তনো ঠানমেৰ গতো. তস্মিং গতে অপরো সাহসিকো কক্খল়ো দেৰপুত্তো ‘‘ইমে ইমস্স ৰচনং গহেত্ৰা পলাযেয্যুং, অহং নেসং গমনং নিৰারেত্ৰা সব্বেপিমে মহাৰিনাসং পাপেস্সামী’’তি চিন্তেত্ৰা দিব্বালঙ্কারপটিমণ্ডিতো সকলদীপং একোভাসং করোন্তো আগন্ত্ৰা দক্খিণায দিসায আকাসে ঠত্ৰা ‘‘একো দেৰপুত্তো ইধাগতো, নো’’তি পুচ্ছিত্ৰা ‘‘আগতো’’তি ৰুত্তে ‘‘সো ৰো কিং কথেসী’’তি ৰত্ৰা ‘‘ইমং নাম, সামী’’তি ৰুত্তে ‘‘সো তুম্হাকং ইধ নিৰাসং ন ইচ্ছতি, দোসেন কথেতি, তুম্হে অঞ্ঞত্থ অগন্ত্ৰা ইধেৰ ৰসথা’’তি ৰত্ৰা দ্ৰে গাথা অভাসি –

২৭.

‘‘ন জাতুযং সাগরৰারিৰেগো, উপ্লৰিস্সং দীপমিমং উল়ারং;

তং মে নিমিত্তেহি বহূহি দিট্ঠং, মা ভেথ কিং সোচথ মোদথৰ্হো.

২৮.

‘‘পহূতভক্খং বহুঅন্নপানং, পত্তত্থ আৰাসমিমং উল়ারং;

ন ৰো ভযং পটিপস্সামি কিঞ্চি, আপুত্তপুত্তেহি পমোদথৰ্হো’’তি.

তত্থ ন জাতুযন্তি ন জাতু অযং. মা ভেথাতি মা ভাযিত্থ. মোদথৰ্হোতি পমোদিতা পীতিসোমনস্সজাতা হোথ. আপুত্তপুত্তেহীতি যাৰ পুত্তানম্পি পুত্তেহি পমোদথ, নত্থি ৰো ইমস্মিং ঠানে ভযন্তি.

এৰং সো ইমাহি দ্ৰীহি গাথাহি তে অস্সাসেত্ৰা পক্কামি. তস্স পক্কন্তকালে ধম্মিকদেৰপুত্তস্স ৰচনং অনাদিযন্তো বালৰড্ঢকী ‘‘সুণন্তু মে, ভোন্তো, ৰচন’’ন্তি সেসৰড্ঢকী আমন্তেত্ৰা পঞ্চমং গাথমাহ –

২৯.

‘‘যো দেৰোযং দক্খিণাযং দিসাযং, খেমন্তি পক্কোসতি তস্স সচ্চং;

ন উত্তরো ৰেদি ভযাভযস্স, মা ভেথ কিং সোচথ মোদথৰ্হো’’তি.

তত্থ দক্খিণাযন্তি দক্খিণায, অযমেৰ ৰা পাঠো.

তং সুত্ৰা রসগিদ্ধা পঞ্চসতা ৰড্ঢকী তস্স বালস্স ৰচনং আদিযিংসু. ইতরো পন পণ্ডিতৰড্ঢকী তস্স ৰচনং অনাদিযন্তো তে ৰড্ঢকী আমন্তেত্ৰা চতস্সো গাথা অভাসি –

৩০.

‘‘যথা ইমে ৰিপ্পৰদন্তি যক্খা, একো ভযং সংসতি খেমমেকো;

তদিঙ্ঘ ময্হং ৰচনং সুণাথ, খিপ্পং লহুং মা ৰিনস্সিম্হ সব্বে.

৩১.

‘‘সব্বে সমাগম্ম করোম নাৰং, দোণিং দল়্হং সব্বযন্তূপপন্নং;

সচে অযং দক্খিণো সচ্চমাহ, মোঘং পটিক্কোসতি উত্তরোযং;

সা চেৰ নো হেহিতি আপদত্থা, ইমঞ্চ দীপং ন পরিচ্চজেম.

৩২.

‘‘সচে চ খো উত্তরো সচ্চমাহ, মোঘং পটিক্কোসতি দক্খিণোযং;

তমেৰ নাৰং অভিরুয্হ সব্বে, এৰং মযং সোত্থি তরেমু পারং.

৩৩.

‘‘ন ৰে সুগণ্হং পঠমেন সেট্ঠং, কনিট্ঠমাপাথগতং গহেত্ৰা;

যো চীধ তচ্ছং পৰিচেয্য গণ্হতি, স ৰে নরো সেট্ঠমুপেতি ঠান’’ন্তি.

তত্থ ৰিপ্পৰদন্তীতি অঞ্ঞমঞ্ঞং ৰিরুদ্ধং ৰদন্তি. লহুন্তি পুরিমস্স অত্থদীপনং. দোণিন্তি গম্ভীরং মহানাৰং. সব্বযন্তূপপন্নন্তি সব্বেহি ফিযারিত্তাদীহি যন্তেহি উপপন্নং. সা চেৰ নো হেহিতি আপদত্থাতি সা চ নো নাৰা পচ্ছাপি উপ্পন্নায আপদায অত্থা ভৰিস্সতি, ইমঞ্চ দীপং ন পরিচ্চজিস্সাম. তরেমূতি তরিস্সাম. ন ৰে সুগণ্হন্তি ন ৰে সুখেন গণ্হিতব্বং. সেট্ঠন্তি উত্তমং তথং সচ্চং. কনিট্ঠন্তি পঠমৰচনং উপাদায পচ্ছিমৰচনং কনিট্ঠং নাম. ইধাপি ‘‘ন ৰে সুগণ্হ’’ন্তি অনুৰত্ততেৰ. ইদং ৰুত্তং হোতি – অম্ভো ৰড্ঢকী, যেন কেনচি পঠমেন ৰুত্তৰচনং ‘‘ইদমেৰ সেট্ঠং তথং সচ্চ’’ন্তি সুখং ন গণ্হিতব্বমেৰ, যথা চ তং, এৰং কনিট্ঠং গচ্ছা ৰুত্তৰচনম্পি ‘‘ইদমেৰ তথং সচ্চ’’ন্তি ন গণ্হিতব্বং. যং পন সোতৰিসযং আপাথগতং হোতি, তং আপাথগতং গহেত্ৰা যো ইধ পণ্ডিতপুরিসো পুরিমৰচনঞ্চ পচ্ছিমৰচনঞ্চ পৰিচেয্য ৰিচিনিত্ৰা তীরেত্ৰা উপপরিক্খিত্ৰা তচ্ছং গণ্হাতি, যং তথং সচ্চং সভাৰভূতং, তদেৰ পচ্চক্খং কত্ৰা গণ্হাতি. স ৰে নরো সেট্ঠমুপেতি ঠানন্তি সো উত্তমং ঠানং উপেতি অধিগচ্ছতি ৰিন্দতি লভতীতি.

সো এৰঞ্চ পন ৰত্ৰা আহ – ‘‘অম্ভো, মযং দ্ৰিন্নম্পি দেৰতানং ৰচনং করিস্সাম, নাৰং তাৰ সজ্জেয্যাম. সচে পঠমস্স ৰচনং সচ্চং ভৰিস্সতি, তং নাৰং অভিরুহিত্ৰা পলাযিস্সাম, অথ ইতরস্স ৰচনং সচ্চং ভৰিস্সতি, নাৰং একমন্তে ঠপেত্ৰা ইধেৰ ৰসিস্সামা’’তি. এৰং ৰুত্তে বালৰড্ঢকী ‘‘অম্ভো, ত্ৰং উদকপাতিযং সুসুমারং পস্সসি, অতীৰ দীঘং পস্সসি, পঠমদেৰপুত্তো অম্হেসু দোসৰসেন কথেসি, পচ্ছিমো সিনেহেনেৰ, ইমং এৰরূপং ৰরদীপং পহায কুহিং গমিস্সাম, সচে পন ত্ৰং গন্তুকামো, তৰ পরিসং গণ্হিত্ৰা নাৰং করোহি, অম্হাকং নাৰায কিচ্চং নত্থী’’তি আহ. পণ্ডিতো অত্তনো পরিসং গহেত্ৰা নাৰং সজ্জেত্ৰা নাৰায সব্বূপকরণানি আরোপেত্ৰা সপরিসো নাৰায অট্ঠাসি.

ততো পুণ্ণমদিৰসে চন্দস্স উগ্গমনৰেলায সমুদ্দতো ঊমি উত্তরিত্ৰা জাণুকপমাণা হুত্ৰা দীপকং ধোৰিত্ৰা গতা. পণ্ডিতো সমুদ্দস্স উত্তরণভাৰং ঞত্ৰা নাৰং ৰিস্সজ্জেসি. বালৰড্ঢকিপক্খিকানি পঞ্চ কুলসতানি ‘‘সমুদ্দতো ঊমি দীপধোৰনত্থায আগতা, এত্তকমেৰ এত’’ন্তি কথেন্তা নিসীদিংসু. ততো পটিপাটিযা কটিপ্পমাণা পুরিসপ্পমাণা তালপ্পমাণা সত্ততালপ্পমাণা সাগরঊমি দীপকম্পি ৰুয্হমানা আগঞ্ছি. পণ্ডিতো উপাযকুসলতায রসে অলগ্গো সোত্থিনা গতো, বালৰড্ঢকী রসগিদ্ধেন অনাগতভযং অনোলোকেন্তো পঞ্চহি কুলসতেহি সদ্ধিং ৰিনাসং পত্তো.

ইতো পরা সানুসাসনী তমত্থং দীপযমানা তিস্সো অভিসম্বুদ্ধগাথা হোন্তি –

৩৪.

‘‘যথাপি তে সাগরৰারিমজ্ঝে, সকম্মুনা সোত্থি ৰহিংসু ৰাণিজা;

অনাগতত্থং পটিৰিজ্ঝিযান, অপ্পম্পি নাচ্চেতি স ভূরিপঞ্ঞো.

৩৫.

‘‘বালা চ মোহেন রসানুগিদ্ধা, অনাগতং অপ্পটিৰিজ্ঝিযত্থং;

পচ্চুপ্পন্নে সীদন্তি অত্থজাতে, সমুদ্দমজ্ঝে যথা তে মনুস্সা.

৩৬.

‘‘অনাগতং পটিকযিরাথ কিচ্চং, ‘মা মং কিচ্চং কিচ্চকালে ব্যধেসি’;

তং তাদিসং পটিকতকিচ্চকারিং, ন তং কিচ্চং কিচ্চকালে ব্যধেতী’’তি.

তত্থ সকম্মুনাতি অনাগতভযং দিস্ৰা পুরেতরং কতেন অত্তনো কম্মেন. সোত্থি ৰহিংসূতি খেমেন গমিংসু. ৰাণিজাতি সমুদ্দে ৰিচরণভাৰেন ৰড্ঢকী ৰুত্তা. পটিৰিজ্ঝিযানাতি এৰং, ভিক্খৰে, পঠমতরং কত্তব্বং অনাগতং অত্থং পটিৰিজ্ঝিত্ৰা ইধলোকে ভূরিপঞ্ঞো কুলপুত্তো অপ্পমত্তকম্পি অত্তনো অত্থং ন অচ্চেতি নাতিৰত্ততি, ন হাপেতীতি অত্থো. অপ্পটিৰিজ্ঝিযত্থন্তি অপ্পটিৰিজ্ঝিত্ৰা অত্থং, পঠমমেৰ কত্তব্বং অকত্ৰাতি অত্থো. পচ্চুপ্পন্নেতি যদা তং অনাগতং অত্থজাতং উপ্পজ্জতি, তদা তস্মিং পচ্চুপ্পন্নে সীদন্তি, অত্থে জাতে অত্তনো পতিট্ঠং ন লভন্তি, সমুদ্দে তে বালৰড্ঢকী মনুস্সা ৰিয ৰিনাসং পাপুণন্তি.

অনাগতন্তি ভিক্খৰে, পণ্ডিতপুরিসো অনাগতং পঠমতরং কত্তব্বকিচ্চং সম্পরাযিকং ৰা দিট্ঠধম্মিকং ৰা পটিকযিরাথ, পুরেতরমেৰ করেয্য. কিংকারণা? মা মং কিচ্চং কিচ্চকালে ব্যধেসি, পুরে কত্তব্বঞ্হি পুরে অকযিরমানং পচ্ছা পচ্চুপ্পন্নভাৰপ্পত্তং অত্তনো কিচ্চকালে কাযচিত্তাবাধেন ব্যধেতি, তং মং মা ব্যধেসীতি পঠমমেৰ নং পণ্ডিতো করেয্য. তং তাদিসন্তি যথা পণ্ডিতং পুরিসং. পটিকতকিচ্চকারিন্তি পটিকচ্চেৰ কত্তব্বকিচ্চকারিনং. তং কিচ্চং কিচ্চকালেতি অনাগতং কিচ্চং কযিরমানং পচ্ছা পচ্চুপ্পন্নভাৰপ্পত্তং অত্তনো কিচ্চকালে কাযচিত্তাবাধকালে তাদিসং পুরিমং ন ব্যধেতি ন বাধতি. কস্মা? পুরেযেৰ কতত্তাতি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো পচ্চুপ্পন্নসুখে লগ্গো অনাগতভযং অনোলোকেত্ৰা সপরিসো ৰিনাসং পত্তো’’তি ৰত্ৰা জাতকং সমোধানেসি – ‘‘তদা বালৰড্ঢকী দেৰদত্তো অহোসি, দক্খিণদিসায ঠিতো অধম্মিকদেৰপুত্তো কোকালিকো, উত্তরদিসায ঠিতো ধম্মিকদেৰপুত্তো সারিপুত্তো, পণ্ডিতৰড্ঢকী পন অহমেৰ অহোসি’’ন্তি.

সমুদ্দৰাণিজজাতকৰণ্ণনা ততিযা.

[৪৬৭] ৪. কামজাতকৰণ্ণনা

কামং কামযমানস্সাতি ইদং সত্থা জেতৰনে ৰিহরন্তো অঞ্ঞতরং ব্রাহ্মণং আরব্ভ কথেসি. একো কির সাৰত্থিৰাসী ব্রাহ্মণো অচিরৰতীতীরে খেত্তকরণত্থায অরঞ্ঞং কোটেসি. সত্থা তস্স উপনিস্সযং দিস্ৰা সাৰত্থিং পিণ্ডায পৰিসন্তো মগ্গা ওক্কম্ম তেন সদ্ধিং পটিসন্থারং কত্ৰা ‘‘কিং করোসি ব্রাহ্মণা’’তি ৰত্ৰা ‘‘খেত্তট্ঠানং কোটাপেমি ভো, গোতমা’’তি ৰুত্তে ‘‘সাধু, ব্রাহ্মণ, কম্মং করোহী’’তি ৰত্ৰা অগমাসি. এতেনেৰ উপাযেন ছিন্নরুক্খে হারেত্ৰা খেত্তস্স সোধনকালে কসনকালে কেদারবন্ধনকালে ৰপনকালেতি পুনপ্পুনং গন্ত্ৰা তেন সদ্ধিং পটিসন্থারমকাসি. ৰপনদিৰসে পন সো ব্রাহ্মণো ‘‘অজ্জ, ভো গোতম, ময্হং ৰপ্পমঙ্গলং, অহং ইমস্মিং সস্সে নিপ্ফন্নে বুদ্ধপ্পমুখস্স ভিক্খুসঙ্ঘস্স মহাদানং দস্সামী’’তি আহ. সত্থা তুণ্হীভাৰেন অধিৰাসেত্ৰা পক্কামি. পুনেকদিৰসং ব্রাহ্মণো সস্সং ওলোকেন্তো অট্ঠাসি. সত্থাপি তত্থ গন্ত্ৰা ‘‘কিং করোসি ব্রাহ্মণা’’তি পুচ্ছিত্ৰা ‘‘সস্সং ওলোকেমি ভো গোতমা’’তি ৰুত্তে ‘‘সাধু ব্রাহ্মণা’’তি ৰত্ৰা পক্কামি. তদা ব্রাহ্মণো চিন্তেসি ‘‘সমণো গোতমো অভিণ্হং আগচ্ছতি, নিস্সংসযং ভত্তেন অত্থিকো, দস্সামহং তস্স ভত্ত’’ন্তি. তস্সেৰং চিন্তেত্ৰা গেহং গতদিৰসে সত্থাপি তত্থ অগমাসি. অথ ব্রাহ্মণস্স অতিৰিয ৰিস্সাসো অহোসি. অপরভাগে পরিণতে সস্সে ‘‘স্ৰে খেত্তং লাযিস্সামী’’তি সন্নিট্ঠানং কত্ৰা নিপন্নে ব্রাহ্মণে অচিরৰতিযা উপরি সব্বরত্তিং করকৰস্সং ৰস্সি. মহোঘো আগন্ত্ৰা একনাল়িমত্তম্পি অনৰসেসং কত্ৰা সব্বং সস্সং সমুদ্দং পৰেসেসি. ব্রাহ্মণো ওঘম্হি পতিতে সস্সৰিনাসং ওলোকেত্ৰা সকভাৰেন সণ্ঠাতুং নাহোসি, বলৰসোকাভিভূতো হত্থেন উরং পহরিত্ৰা পরিদেৰমানো রোদন্তো নিপজ্জি.

সত্থা পচ্চূসসমযে সোকাভিভূতং ব্রাহ্মণং দিস্ৰা ‘‘ব্রাহ্মণস্সাৰস্সযো ভৰিস্সামী’’তি পুনদিৰসে সাৰত্থিযং পিণ্ডায চরিত্ৰা পিণ্ডপাতপটিক্কন্তো ভিক্খূ ৰিহারং পেসেত্ৰা পচ্ছাসমণেন সদ্ধিং তস্স গেহদ্ৰারং অগমাসি. ব্রাহ্মণো সত্থু আগতভাৰং সুত্ৰা ‘‘পটিসন্থারত্থায মে সহাযো আগতো ভৰিস্সতী’’তি পটিলদ্ধস্সাসো আসনং পঞ্ঞপেসি. সত্থা পৰিসিত্ৰা পঞ্ঞত্তাসনে নিসীদিত্ৰা ‘‘ব্রাহ্মণ, কস্মা ত্ৰং দুম্মনোসি, কিং তে অফাসুক’’ন্তি পুচ্ছি. ভো গোতম, অচিরৰতীতীরে মযা রুক্খচ্ছেদনতো পট্ঠায কতং কম্মং তুম্হে জানাথ, অহং ‘‘ইমস্মিং সস্সে নিপ্ফন্নে তুম্হাকং দানং দস্সামী’’তি ৰিচরামি, ইদানি মে সব্বং তং সস্সং মহোঘো সমুদ্দমেৰ পৰেসেসি, কিঞ্চি অৰসিট্ঠং নত্থি, সকটসতমত্তং ধঞ্ঞং ৰিনট্ঠং, তেন মে মহাসোকো উপ্পন্নোতি. ‘‘কিং পন, ব্রাহ্মণ, সোচন্তস্স নট্ঠং পুনাগচ্ছতী’’তি. ‘‘নো হেতং ভো গোতমা’’তি. ‘‘এৰং সন্তে কস্মা সোচসি, ইমেসং সত্তানং ধনধঞ্ঞং নাম উপ্পজ্জনকালে উপ্পজ্জতি, নস্সনকালে নস্সতি, কিঞ্চি সঙ্খারগতং অনস্সনধম্মং নাম নত্থি, মা চিন্তযী’’তি. ইতি নং সত্থা সমস্সাসেত্ৰা তস্স সপ্পাযধম্মং দেসেন্তো কামসুত্তং (সু. নি. ৭৭২ আদযো) কথেসি. সুত্তপরিযোসানে সোচন্তো ব্রাহ্মণো সোতাপত্তিফলে পতিট্ঠহি. সত্থা তং নিস্সোকং কত্ৰা উট্ঠাযাসনা ৰিহারং অগমাসি. ‘‘সত্থা অসুকং নাম ব্রাহ্মণং সোকসল্লসমপ্পিতং নিস্সোকং কত্ৰা সোতাপত্তিফলে পতিট্ঠাপেসী’’তি সকলনগরং অঞ্ঞাসি. ভিক্খূ ধম্মসভাযং কথং সমুট্ঠাপেসুং ‘‘আৰুসো, দসবলো ব্রাহ্মণেন সদ্ধিং মিত্তং কত্ৰা ৰিস্সাসিকো হুত্ৰা উপাযেনেৰ তস্স সোকসল্লসমপ্পিতস্স ধম্মং দেসেত্ৰা তং নিস্সোকং কত্ৰা সোতাপত্তিফলে পতিট্ঠাপেসী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপাহং এতং নিস্সোকমকাসি’’ন্তি ৰত্ৰা অতীতং আহরি.

অতীতে বারাণসিযং ব্রহ্মদত্তস্স রঞ্ঞো দ্ৰে পুত্তা অহেসুং. সো জেট্ঠকস্স উপরজ্জং অদাসি, কনিট্ঠস্স সেনাপতিট্ঠানং. অপরভাগে ব্রহ্মদত্তে কালকতে অমচ্চা জেট্ঠকস্স অভিসেকং পট্ঠপেসুং. সো ‘‘ন ময্হং রজ্জেনত্থো, কনিট্ঠস্স মে দেথা’’তি ৰত্ৰা পুনপ্পুনং যাচিযমানোপি পটিক্খিপিত্ৰা কনিট্ঠস্স অভিসেকে কতে ‘‘ন মে ইস্সরিযেনত্থো’’তি উপরজ্জাদীনিপি ন ইচ্ছি. ‘‘তেন হি সাদূনি ভোজনানি ভুঞ্জন্তো ইধেৰ ৰসাহী’’তি ৰুত্তেপি ‘‘ন মে ইমস্মিং নগরে কিচ্চং অত্থী’’তি বারাণসিতো নিক্খমিত্ৰা পচ্চন্তং গন্ত্ৰা একং সেট্ঠিকুলং নিস্সায সহত্থেন কম্মং করোন্তো ৰসি. তে অপরভাগে তস্স রাজকুমারভাৰং ঞত্ৰা কম্মং কাতুং নাদংসু, কুমারপরিহারেনেৰ তং পরিহরিংসু. অপরভাগে রাজকম্মিকা খেত্তপ্পমাণগ্গহণত্থায তং গামং অগমংসু. সেট্ঠি রাজকুমারং উপসঙ্কমিত্ৰা ‘‘সামি, মযং তুম্হে পোসেম, কনিট্ঠভাতিকস্স পণ্ণং পেসেত্ৰা অম্হাকং বলিং হারেথা’’তি আহ. সো ‘‘সাধূ’’তি সম্পটিচ্ছিত্ৰা ‘‘অহং অসুকসেট্ঠিকুলং নাম উপনিস্সায ৰসামি, মং নিস্সায এতেসং বলিং ৰিস্সজ্জেহী’’তি পণ্ণং পেসেসি. রাজা ‘‘সাধূ’’তি ৰত্ৰা তথা কারেসি.

অথ নং সকলগামৰাসিনোপি জনপদৰাসিনোপি উপসঙ্কমিত্ৰা ‘‘মযং তুম্হাকঞ্ঞেৰ বলিং দস্সাম, অম্হাকম্পি সুঙ্কং ৰিস্সজ্জাপেহী’’তি আহংসু. সো তেসম্পি অত্থায পণ্ণং পেসেত্ৰা ৰিস্সজ্জাপেসি. ততো পট্ঠায তে তস্সেৰ বলিং অদংসু. অথস্স মহালাভসক্কারো অহোসি, তেন সদ্ধিঞ্ঞেৰস্স তণ্হাপি মহতী জাতা. সো অপরভাগেপি সব্বং জনপদং যাচি, উপড্ঢরজ্জং যাচি, কনিট্ঠোপি তস্স অদাসিযেৰ. সো তণ্হায ৰড্ঢমানায উপড্ঢরজ্জেনপি অসন্তুট্ঠো ‘‘রজ্জং গণ্হিস্সামী’’তি জনপদপরিৰুতো তং নগরং গন্ত্ৰা বহিনগরে ঠত্ৰা ‘‘রজ্জং ৰা মে দেতু যুদ্ধং ৰা’’তি কনিট্ঠস্স পণ্ণং পহিণি. কনিট্ঠো চিন্তেসি ‘‘অযং বালো পুব্বে রজ্জম্পি উপরজ্জাদীনিপি পটিক্খিপিত্ৰা ইদানি ‘যুদ্ধেন গণ্হামী’তি ৰদতি, সচে খো পনাহং ইমং যুদ্ধেন মারেস্সামি, গরহা মে ভৰিস্সতি, কিং মে রজ্জেনা’’তি. অথস্স ‘‘অলং যুদ্ধেন, রজ্জং গণ্হতূ’’তি পেসেসি. সো রজ্জং গণ্হিত্ৰা কনিট্ঠস্স উপরজ্জং দত্ৰা ততো পট্ঠায রজ্জং কারেন্তো তণ্হাৰসিকো হুত্ৰা একেন রজ্জেন অসন্তুট্ঠো দ্ৰে তীণি রজ্জানি পত্থেত্ৰা তণ্হায কোটিং নাদ্দস.

তদা সক্কো দেৰরাজা ‘‘কে নু খো লোকে মাতাপিতরো উপট্ঠহন্তি, কে দানাদীনি পুঞ্ঞানি করোন্তি, কে তণ্হাৰসিকা’’তি ওলোকেন্তো তস্স তণ্হাৰসিকভাৰং ঞত্ৰা ‘‘অযং বালো বারাণসিরজ্জেনপি ন তুস্সতি, অহং সিক্খাপেস্সামি ন’’ন্তি মাণৰকৰেসেন রাজদ্ৰারে ঠত্ৰা ‘‘একো উপাযকুসলো মাণৰো দ্ৰারে ঠিতো’’তি আরোচাপেত্ৰা ‘‘পৰিসতূ’’তি ৰুত্তে পৰিসিত্ৰা রাজানং জযাপেত্ৰা ‘‘কিংকারণা আগতোসী’’তি ৰুত্তে ‘‘মহারাজ তুম্হাকং কিঞ্চি ৰত্তব্বং অত্থি, রহো পচ্চাসীসামী’’তি আহ. সক্কানুভাৰেন তাৰদেৰ মনুস্সা পটিক্কমিংসু. অথ নং মাণৰো ‘‘অহং, মহারাজ, ফীতানি আকিণ্ণমনুস্সানি সম্পন্নবলৰাহনানি তীণি নগরানি পস্সামি, অহং তে অত্তনো আনুভাৰেন তেসু রজ্জং গহেত্ৰা দস্সামি, পপঞ্চং অকত্ৰা সীঘং গন্তুং ৰট্টতী’’তি আহ. সো তণ্হাৰসিকো রাজা ‘‘সাধূ’’তি সম্পটিচ্ছিত্ৰা সক্কানুভাৰেন ‘‘কো ৰা ত্ৰং, কুতো ৰা আগতো, কিং ৰা তে লদ্ধুং ৰট্টতী’’তি ন পুচ্ছি. সোপি এত্তকং ৰত্ৰা তাৰতিংসভৰনমেৰ অগমাসি.

রাজা অমচ্চে পক্কোসাপেত্ৰা ‘‘একো মাণৰো ‘অম্হাকং তীণি রজ্জানি গহেত্ৰা দস্সামী’তি আহ, তং পক্কোসথ, নগরে ভেরিং চরাপেত্ৰা বলকাযং সন্নিপাতাপেথ, পপঞ্চং অকত্ৰা তীণি রজ্জানি গণ্হিস্সামী’’তি ৰত্ৰা ‘‘কিং পন তে, মহারাজ, তস্স মাণৰস্স সক্কারো ৰা কতো, নিৰাসট্ঠানং ৰা পুচ্ছিত’’ন্তি ৰুত্তে ‘‘নেৰ সক্কারং অকাসিং, ন নিৰাসট্ঠানং পুচ্ছিং, গচ্ছথ নং উপধারেথা’’তি আহ. উপধারেন্তা নং অদিস্ৰা ‘‘মহারাজ, সকলনগরে মাণৰং ন পস্সামা’’তি আরোচেসুং. তং সুত্ৰা রাজা দোমনস্সজাতো ‘‘তীসু নগরেসু রজ্জং নট্ঠং, মহন্তেনম্হি যসেন পরিহীনো, ‘নেৰ মে পরিব্বযং অদাসি, ন চ পুচ্ছি নিৰাসট্ঠান’ন্তি ময্হং কুজ্ঝিত্ৰা মাণৰো অনাগতো ভৰিস্সতী’’তি পুনপ্পুনং চিন্তেসি. অথস্স তণ্হাৰসিকস্স সরীরে ডাহো উপ্পজ্জি, সরীরে পরিডয্হন্তে উদরং খোভেত্ৰা লোহিতপক্খন্দিকা উদপাদি. একং ভাজনং পৰিসতি, একং নিক্খমতি, ৰেজ্জা তিকিচ্ছিতুং ন সক্কোন্তি, রাজা কিলমতি. অথস্স ব্যাধিতভাৰো সকলনগরে পাকটো অহোসি.

তদা বোধিসত্তো তক্কসিলতো সব্বসিপ্পানি উগ্গণ্হিত্ৰা বারাণসিনগরে মাতাপিতূনং সন্তিকং আগতো তং রঞ্ঞো পৰত্তিং সুত্ৰা ‘‘অহং তিকিচ্ছিস্সামী’’তি রাজদ্ৰারং গন্ত্ৰা ‘‘একো কির তরুণমাণৰো তুম্হে তিকিচ্ছিতুং আগতো’’তি আরোচাপেসি. রাজা ‘‘মহন্তমহন্তা দিসাপামোক্খৰেজ্জাপি মং তিকিচ্ছিতুং ন সক্কোন্তি, কিং তরুণমাণৰো সক্খিস্সতি, পরিব্বযং দত্ৰা ৰিস্সজ্জেথ ন’’ন্তি আহ. তং সুত্ৰা মাণৰো ‘‘ময্হং ৰেজ্জকম্মেন ৰেতনং নত্থি, অহং তিকিচ্ছামি, কেৰলং ভেসজ্জমূলমত্তং দেতূ’’তি আহ. তং সুত্ৰা রাজা ‘‘সাধূ’’তি পক্কোসাপেসি. মাণৰো রাজানং ৰন্দিত্ৰা ‘‘মা ভাযি, মহারাজ, অহং তে তিকিচ্ছামি, অপিচ খো পন মে রোগস্স সমুট্ঠানং আচিক্খাহী’’তি আহ. রাজা হরাযমানো ‘‘কিং তে সমুট্ঠানেন, ভেসজ্জং এৰ করোহী’’তি আহ. মহারাজ, ৰেজ্জা নাম ‘‘অযং ব্যাধি ইমং নিস্সায সমুট্ঠিতো’’তি ঞত্ৰা অনুচ্ছৰিকং ভেসজ্জং করোন্তীতি. রাজা ‘‘সাধু তাতা’’তি সমুট্ঠানং কথেন্তো ‘‘একেন মাণৰেন আগন্ত্ৰা তীসু নগরেসু রজ্জং গহেত্ৰা দস্সামী’’তিআদিং কত্ৰা সব্বং কথেত্ৰা ‘‘ইতি মে তাত, তণ্হং নিস্সায ব্যাধি উপ্পন্নো, সচে তিকিচ্ছিতুং সক্কোসি, তিকিচ্ছাহী’’তি আহ. কিং পন মহারাজ, সোচনায তানি নগরানি সক্কা লদ্ধুন্তি? ‘‘ন সক্কা তাতা’’তি. ‘‘এৰং সন্তে কস্মা সোচসি, মহারাজ, সব্বমেৰ হি সৰিঞ্ঞাণকাৰিঞ্ঞাণকৰত্থুং অত্তনো কাযং আদিং কত্ৰা পহায গমনীযং, চতূসু নগরেসু রজ্জং গহেত্ৰাপি ত্ৰং একপ্পহারেনেৰ ন চতস্সো ভত্তপাতিযো ভুঞ্জিস্সসি, ন চতূসু সযনেসু সযিস্সসি, ন চত্তারি ৰত্থযুগানি অচ্ছাদেস্সসি, তণ্হাৰসিকেন নাম ভৰিতুং ন ৰট্টতি, অযঞ্হি তণ্হা নাম ৰড্ঢমানা চতূহি অপাযেহি মুচ্চিতুং ন দেতীতি.

ইতি নং মহাসত্তো ওৰদিত্ৰা অথস্স ধম্মং দেসেন্তো ইমা গাথা অভাসি –

৩৭.

‘‘কামং কামযমানস্স, তস্স চে তং সমিজ্ঝতি;

অদ্ধা পীতিমনো হোতি, লদ্ধা মচ্চো যদিচ্ছতি.

৩৮.

‘‘কামং কামযমানস্স, তস্স চে তং সমিজ্ঝতি;

ততো নং অপরং কামে, ঘম্মে তণ্হংৰ ৰিন্দতি.

৩৯.

‘‘গৰংৰ সিঙ্গিনো সিঙ্গং, ৰড্ঢমানস্স ৰড্ঢতি;

এৰং মন্দস্স পোসস্স, বালস্স অৰিজানতো;

ভিয্যো তণ্হা পিপাসা চ, ৰড্ঢমানস্স ৰড্ঢতি.

৪০.

‘‘পথব্যা সালিযৰকং, গৰাস্সং দাসপোরিসং;

দত্ৰা চ নালমেকস্স, ইতি ৰিদ্ৰা সমং চরে.

৪১.

‘‘রাজা পসয্হ পথৰিং ৰিজিত্ৰা, সসাগরন্তং মহিমাৰসন্তো;

ওরং সমুদ্দস্স অতিত্তরূপো, পারং সমুদ্দস্সপি পত্থযেথ.

৪২.

‘‘যাৰ অনুস্সরং কামে, মনসা তিত্তি নাজ্ঝগা;

ততো নিৰত্তা পটিক্কম্ম দিস্ৰা, তে ৰে সুতিত্তা যে পঞ্ঞায তিত্তা.

৪৩.

‘‘পঞ্ঞায তিত্তিনং সেট্ঠং, ন সো কামেহি তপ্পতি;

পঞ্ঞায তিত্তং পুরিসং, তণ্হা ন কুরুতে ৰসং.

৪৪.

‘‘অপচিনেথেৰ কামানং, অপ্পিচ্ছস্স অলোলুপো;

সমুদ্দমত্তো পুরিসো, ন সো কামেহি তপ্পতি.

৪৫.

‘‘রথকারোৰ চম্মস্স, পরিকন্তং উপাহনং;

যং যং চজতি কামানং, তং তং সম্পজ্জতে সুখং;

সব্বঞ্চে সুখমিচ্ছেয্য, সব্বে কামে পরিচ্চজে’’তি.

তত্থ কামন্তি ৰত্থুকামম্পি কিলেসকামম্পি. কামযমানস্সাতি পত্থযমানস্স. তস্স চে তং সমিজ্ঝতীতি তস্স পুগ্গলস্স তং কামিতৰত্থু সমিজ্ঝতি চে, নিপ্ফজ্জতি চেতি অত্থো. ততো নং অপরং কামেতি এত্থ নন্তি নিপাতমত্তং. অপরন্তি পরভাগদীপনং. কামেতি উপযোগবহুৰচনং. ইদং ৰুত্তং হোতি – সচে কামং কামযমানস্স তং কামিতৰত্থু সমিজ্ঝতি, তস্মিং সমিদ্ধে ততো পরং সো পুগ্গলো কামযমানো যথা নাম ঘম্মে গিম্হকালে ৰাতাতপেন কিলন্তো তণ্হং ৰিন্দতি, পানীযপিপাসং পটিলভতি, এৰং ভিয্যো কামতণ্হাসঙ্খাতে কামে ৰিন্দতি পটিলভতি, রূপতণ্হাদিকা তণ্হা চস্স ৰড্ঢতিযেৰাতি. গৰংৰাতি গোরূপস্স ৰিয. সিঙ্গিনোতি মত্থকং পদালেত্ৰা উট্ঠিতসিঙ্গস্স. মন্দস্সাতি মন্দপঞ্ঞস্স. বালস্সাতি বালধম্মে যুত্তস্স. ইদং ৰুত্তং হোতি – যথা ৰচ্ছকস্স ৰড্ঢন্তস্স সরীরেনেৰ সদ্ধিং সিঙ্গং ৰড্ঢতি, এৰং অন্ধবালস্সপি অপ্পত্তকামতণ্হা চ পত্তকামপিপাসা চ অপরাপরং ৰড্ঢতীতি.

সালিযৰকন্তি সালিখেত্তযৰখেত্তং. এতেন সালিযৰাদিকং সব্বং ধঞ্ঞং দস্সেতি, দুতিযপদেন সব্বং দ্ৰিপদচতুপ্পদং দস্সেতি. পঠমপদেন ৰা সব্বং অৰিঞ্ঞাণকং, ইতরেন সৰিঞ্ঞাণকং. দত্ৰা চাতি দত্ৰাপি. ইদং ৰুত্তং হোতি – তিট্ঠন্তু তীণি রজ্জানি, সচে সো মাণৰো অঞ্ঞং ৰা সকলম্পি পথৰিং সৰিঞ্ঞাণকাৰিঞ্ঞাণকরতনপূরং কস্সচি দত্ৰা গচ্ছেয্য, ইদম্পি এত্তকং ৰত্থু একস্সেৰ অপরিযন্তং, এৰং দুপ্পূরা এসা তণ্হা নাম. ইতি ৰিদ্ৰা সমং চরেতি এৰং জানন্তো পুরিসো তণ্হাৰসিকো অহুত্ৰা কাযসমাচারাদীনি পূরেন্তো চরেয্য.

ওরন্তি ওরিমকোট্ঠাসং পত্ৰা তেন অতিত্তরূপো পুন সমুদ্দপারম্পি পত্থযেথ. এৰং তণ্হাৰসিকসত্তা নাম দুপ্পূরাতি দস্সেতি. যাৰাতি অনিযামিতপরিচ্ছেদো. অনুস্সরন্তি অনুস্সরন্তো. নাজ্ঝগাতি ন ৰিন্দতি. ইদং ৰুত্তং হোতি – মহারাজ, পুরিসো অপরিযন্তেপি কামে মনসা অনুস্সরন্তো তিত্তিং ন ৰিন্দতি, পত্তুকামোৰ হোতি, এৰং কামেসু সত্তানং তণ্হা ৰড্ঢতেৰ. ততো নিৰত্তাতি ততো পন ৰত্থুকামকিলেসকামতো চিত্তেন নিৰত্তিত্ৰা কাযেন পটিক্কম্ম ঞাণেন আদীনৰং দিস্ৰা যে পঞ্ঞায তিত্তা পরিপুণ্ণা, তে তিত্তা নাম.

পঞ্ঞায তিত্তিনং সেট্ঠন্তি পঞ্ঞায তিত্তীনং অযং পরিপুণ্ণসেট্ঠো, অযমেৰ ৰা পাঠো. ন সো কামেহি তপ্পতীতি ‘‘ন হী’’তিপি পাঠো. যস্মা পঞ্ঞায তিত্তো পুরিসো কামেহি ন পরিডয্হতীতি অত্থো. ন কুরুতে ৰসন্তি তাদিসঞ্হি পুরিসং তণ্হা ৰসে ৰত্তেতুং ন সক্কোতি, স্ৰেৰ পন তণ্হায আদীনৰং দিস্ৰা সরভঙ্গমাণৰো ৰিয চ অড্ঢমাসকরাজা ৰিয চ তণ্হাৰসে ন পৰত্ততীতি অত্থো. অপচিনেথেৰাতি ৰিদ্ধংসেথেৰ. সমুদ্দমত্তোতি মহতিযা পঞ্ঞায সমন্নাগতত্তা সমুদ্দপ্পমাণো. সো মহন্তেন অগ্গিনাপি সমুদ্দো ৰিয কিলেসকামেহি ন তপ্পতি ন ডয্হতি.

রথকারোতি চম্মকারো. পরিকন্তন্তি পরিকন্তন্তো. ইদং ৰুত্তং হোতি – যথা চম্মকারো উপাহনং পরিকন্তন্তো যং যং চম্মস্স অগয্হূপগট্ঠানং হোতি, তং তং চজিত্ৰা উপাহনং কত্ৰা উপাহনমূলং লভিত্ৰা সুখিতো হোতি, এৰমেৰ পণ্ডিতো চম্মকারসত্থসদিসায পঞ্ঞায কন্তন্তো যং যং ওধিং কামানং চজতি, তেন তেনস্স কামোধিনা রহিতং তং তং কাযকম্মং ৰচীকম্মং মনোকম্মঞ্চ সুখং সম্পজ্জতি ৰিগতদরথং, সচে পন সব্বম্পি কাযকম্মাদিসুখং ৰিগতপরিল়াহমেৰ ইচ্ছেয্য, কসিণং ভাৰেত্ৰা ঝানং নিব্বত্তেত্ৰা সব্বে কামে পরিচ্চজেতি.

বোধিসত্তস্স পন ইমং গাথং কথেন্তস্স রঞ্ঞো সেতচ্ছত্তং আরম্মণং কত্ৰা ওদাতকসিণজ্ঝানং উদপাদি, রাজাপি অরোগো অহোসি. সো তুট্ঠো সযনা ৰুট্ঠহিত্ৰা ‘‘এত্তকা ৰেজ্জা মং তিকিচ্ছিতুং নাসক্খিংসু, পণ্ডিতমাণৰো পন অত্তনো ঞাণোসধেন মং নিরোগং অকাসী’’তি তেন সদ্ধিং সল্লপন্তো দসমং গাথমাহ –

৪৬.

‘‘অট্ঠ তে ভাসিতা গাথা, সব্বা হোন্তি সহস্সিযা;

পটিগণ্হ মহাব্রহ্মে, সাধেতং তৰ ভাসিত’’ন্তি.

তত্থ অট্ঠাতি দুতিযগাথং আদিং কত্ৰা কামাদীনৰসংযুত্তা অট্ঠ. সহস্সিযাতি সহস্সারহা. পটিগণ্হাতি অট্ঠ সহস্সানি গণ্হ. সাধেতং তৰ ভাসিতন্তি সাধু এতং তৰ ৰচনং.

তং সুত্ৰা মহাসত্তো একাদসমং গাথমাহ –

৪৭.

‘‘ন মে অত্থো সহস্সেহি, সতেহি নহুতেহি ৰা;

পচ্ছিমং ভাসতো গাথং, কামে মে ন রতো মনো’’তি.

তত্থ পচ্ছিমন্তি ‘‘রথকারোৰ চম্মস্সা’’তি গাথং. কামে মে ন রতো মনোতি ইমং গাথং ভাসমানস্সেৰ মম ৰত্থুকামেপি কিলেসকামেপি মনো নাভিরমামি. অহঞ্হি ইমং গাথং ভাসমানো অত্তনোৰ ধম্মদেসনায ঝানং নিব্বত্তেসিং, মহারাজাতি.

রাজা ভিয্যোসোমত্তায তুস্সিত্ৰা মহাসত্তং ৰণ্ণেন্তো ওসানগাথমাহ –

৪৮.

‘‘ভদ্রকো ৰতাযং মাণৰকো, সব্বলোকৰিদূ মুনি;

যো ইমং তণ্হং দুক্খজননিং, পরিজানাতি পণ্ডিতো’’তি.

তত্থ দুক্খজননিন্তি সকলৰট্টদুক্খজননিং. পরিজানাতীতি পরিজানি পরিচ্ছিন্দি, লুঞ্চিত্ৰা নীহরীতি বোধিসত্তং ৰণ্ণেন্তো এৰমাহ.

বোধিসত্তোপি ‘‘মহারাজ, অপ্পমত্তো হুত্ৰা ধম্মং চরা’’তি রাজানং ওৰদিত্ৰা আকাসেন হিমৰন্তং গন্ত্ৰা ইসিপব্বজ্জং পব্বজিত্ৰা যাৰতাযুকং ঠত্ৰা ব্রহ্মৰিহারে ভাৰেত্ৰা অপরিহীনজ্ঝানো হুত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপাহং এতং ব্রাহ্মণং নিস্সোকমকাসি’’ন্তি ৰত্ৰা জাতকং সমোধানেসি – ‘‘তদা রাজা এস ব্রাহ্মণো অহোসি, পণ্ডিতমাণৰো পন অহমেৰ অহোসি’’ন্তি.

কামজাতকৰণ্ণনা চতুত্থা.

[৪৬৮] ৫. জনসন্ধজাতকৰণ্ণনা

দস খলূতি ইদং সত্থা জেতৰনে ৰিহরন্তো কোসলরঞ্ঞো ওৰাদত্থায কথেসি. একস্মিঞ্হি কালে রাজা ইস্সরিযমদমত্তো কিলেসসুখনিস্সিতো ৰিনিচ্ছযম্পি ন পট্ঠপেসি, বুদ্ধুপট্ঠানম্পি পমজ্জি. সো একদিৰসে দসবলং অনুস্সরিত্ৰা ‘‘সত্থারং ৰন্দিস্সামী’’তি ভুত্তপাতরাসো রথৰরমারুয্হ ৰিহারং গন্ত্ৰা সত্থারং ৰন্দিত্ৰা নিসীদি. অথ নং সত্থা ‘‘কিং মহারাজ চিরং ন পঞ্ঞাযসী’’তি ৰত্ৰা ‘‘বহুকিচ্চতায নো ভন্তে বুদ্ধুপট্ঠানস্স ওকাসো ন জাতো’’তি ৰুত্তে ‘‘মহারাজ, মাদিসে নাম ওৰাদদাযকে সব্বঞ্ঞুবুদ্ধে ধুরৰিহারে ৰিহরন্তে অযুত্তং তৰ পমজ্জিতুং, রঞ্ঞা নাম রাজকিচ্চেসু অপ্পমত্তেন ভৰিতব্বং, রট্ঠৰাসীনং মাতাপিতুসমেন অগতিগমনং পহায দস রাজধম্মে অকোপেন্তেন রজ্জং কারেতুং ৰট্টতি, রঞ্ঞো হি ধম্মিকভাৰে সতি পরিসাপিস্স ধম্মিকা হোন্তি, অনচ্ছরিযং খো পনেতং, যং মযি অনুসাসন্তে ত্ৰং ধম্মেন রজ্জং কারেয্যাসি, পোরাণকপণ্ডিতা অনুসাসকআচরিযে অৰিজ্জমানেপি অত্তনো মতিযাৰ তিৰিধসুচরিতধম্মে পতিট্ঠায মহাজনস্স ধম্মং দেসেত্ৰা সগ্গপথং পূরযমানা অগমংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি নিব্বত্তি, ‘‘জনসন্ধকুমারো’’তিস্স নামং করিংসু. অথস্স ৰযপ্পত্তস্স তক্কসিলতো সব্বসিপ্পানি উগ্গণ্হিত্ৰা আগতকালে রাজা সব্বানি বন্ধনাগারানি সোধাপেত্ৰা উপরজ্জং অদাসি. সো অপরভাগে পিতু অচ্চযেন রজ্জে পতিট্ঠায চতূসু নগরদ্ৰারেসু নগরমজ্ঝে রাজদ্ৰারে চাতি ছ দানসালাযো কারাপেত্ৰা দিৰসে দিৰসে ছ সতসহস্সানি পরিচ্চজিত্ৰা সকলজম্বুদীপং সঙ্খোভেত্ৰা মহাদানং পৰত্তেন্তো বন্ধনাগারানি নিচ্চং ৰিৰটানি কারাপেত্ৰা ধম্মভণ্ডিকং সোধাপেত্ৰা চতূহি সঙ্গহৰত্থূহি লোকং সঙ্গণ্হন্তো পঞ্চ সীলানি রক্খন্তো উপোসথৰাসং ৰসন্তো ধম্মেন রজ্জং কারেসি. অন্তরন্তরা চ রট্ঠৰাসিনো সন্নিপাতাপেত্ৰা ‘‘দানং দেথ, সীলং সমাদিযথ, ভাৰনং ভাৰেথ, ধম্মেন কম্মন্তে চ ৰোহারে চ পযোজেথ, দহরকালেযেৰ সিপ্পানি উগ্গণ্হথ, ধনং উপ্পাদেথ, গামকূটকম্মং ৰা পিসুণৰাচাকম্মং ৰা মা করিত্থ, চণ্ডা ফরুসা মা অহুৰত্থ, মাতুপট্ঠানং পিতুপট্ঠানং পূরেথ, কুলে জেট্ঠাপচাযিনো ভৰথা’’তি ধম্মং দেসেত্ৰা মহাজনে সুচরিতধম্মে পতিট্ঠাপেসি. সো একদিৰসং পন্নরসীউপোসথে সমাদিন্নুপোসথো ‘‘মহাজনস্স ভিয্যো হিতসুখত্থায অপ্পমাদৰিহারত্থায ধম্মং দেসেস্সামী’’তি চিন্তেত্ৰা নগরে ভেরিং চরাপেত্ৰা অত্তনো ওরোধে আদিং কত্ৰা সব্বনগরজনং সন্নিপাতাপেত্ৰা রাজঙ্গণে অলঙ্করিত্ৰা অলঙ্কতরতনমণ্ডপমজ্ঝে সুপঞ্ঞত্তৰরপল্লঙ্কে নিসীদিত্ৰা ‘‘অম্ভো, নগরৰাসিনো তুম্হাকং তপনীযে চ অতপনীযে চ ধম্মে দেসেস্সামি, অপ্পমত্তা হুত্ৰা ওহিতসোতা সক্কচ্চং সুণাথা’’তি ৰত্ৰা ধম্মং দেসেসি.

সত্থা সচ্চপরিভাৰিতং মুখরতনং ৰিৰরিত্ৰা তং ধম্মদেসনং মধুরেন সরেন কোসলরঞ্ঞো আৰি করোন্তো –

৪৯.

‘‘দস খলু ইমানি ঠানানি, যানি পুব্বে অকরিত্ৰা;

স পচ্ছা মনুতপ্পতি, ইচ্চেৰাহ জনসন্ধো.

৫০.

‘‘অলদ্ধা ৰিত্তং তপ্পতি, পুব্বে অসমুদানিতং;

ন পুব্বে ধনমেসিস্সং, ইতি পচ্ছানুতপ্পতি.

৫১.

‘‘সক্যরূপং পুরে সন্তং, মযা সিপ্পং ন সিক্খিতং;

কিচ্ছা ৰুত্তি অসিপ্পস্স, ইতি পচ্ছানুতপ্পতি.

৫২.

‘‘কূটৰেদী পুরে আসিং, পিসুণো পিট্ঠিমংসিকো;

চণ্ডো চ ফরুসো চাপি, ইতি পচ্ছানুতপ্পতি.

৫৩.

‘‘পাণাতিপাতী পুরে আসিং, লুদ্দো চাপি অনারিযো;

ভূতানং নাপচাযিস্সং, ইতি পচ্ছানুতপ্পতি.

৫৪.

‘‘বহূসু ৰত সন্তীসু, অনাপাদাসু ইত্থিসু;

পরদারং অসেৰিস্সং, ইতি পচ্ছানুতপ্পতি.

৫৫.

‘‘বহুম্হি ৰত সন্তম্হি, অন্নপানে উপট্ঠিতে;

ন পুব্বে অদদং দানং, ইতি পচ্ছানুতপ্পতি.

৫৬.

‘‘মাতরং পিতরং চাপি, জিণ্ণকং গতযোব্বনং;

পহু সন্তো ন পোসিস্সং, ইতি পচ্ছানুতপ্পতি.

৫৭.

‘‘আচরিযমনুসত্থারং, সব্বকামরসাহরং;

পিতরং অতিমঞ্ঞিস্সং, ইতি পচ্ছানুতপ্পতি.

৫৮.

‘‘সমণে ব্রাহ্মণে চাপি, সীলৰন্তে বহুস্সুতে;

ন পুব্বে পযিরুপাসিস্সং, ইতি পচ্ছানুতপ্পতি.

৫৯.

‘‘সাধু হোতি তপো চিণ্ণো, সন্তো চ পযিরুপাসিতো;

ন চ পুব্বে তপো চিণ্ণো, ইতি পচ্ছানুতপ্পতি.

৬০.

‘‘যো চ এতানি ঠানানি, যোনিসো পটিপজ্জতি;

করং পুরিসকিচ্চানি, স পচ্ছা নানুতপ্পতী’’তি. – ইমা গাথা আহ;

তত্থ ঠানানীতি কারণানি. পুব্বেতি পঠমমেৰ অকরিত্ৰা. স পচ্ছা মনুতপ্পতীতি সো পঠমং কত্তব্বানং অকারকো পুগ্গলো পচ্ছা ইধলোকেপি পরলোকেপি তপ্পতি কিলমতি. ‘‘পচ্ছা ৰা অনুতপ্পতী’’তিপি পাঠো. ইচ্চেৰাহাতি ইতি এৰং আহাতি পদচ্ছেদো, ইতি এৰং রাজা জনসন্ধো অৰোচ. ইচ্চস্সুহাতিপি পাঠো. তত্থ অস্সু-কারো নিপাতমত্তং ইতি অস্সু আহাতি পদচ্ছেদো. ইদানি তানি দস তপনীযকারণানি পকাসেতুং বোধিসত্তস্স ধম্মকথা হোতি. তত্থ পুব্বেতি পঠমমেৰ তরুণকালে পরক্কমং কত্ৰা অসমুদানিতং অসম্ভতং ধনং মহল্লককালে অলভিত্ৰা তপ্পতি সোচতি, পরে চ সুখিতে দিস্ৰা সযং দুক্খং জীৰন্তো ‘‘পুব্বে ধনং ন পরিযেসিস্স’’ন্তি এৰং পচ্ছা অনুতপ্পতি, তস্মা মহল্লককালে সুখং জীৰিতুকামা দহরকালেযেৰ ধম্মিকানি কসিকম্মাদীনি কত্ৰা ধনং পরিযেসথাতি দস্সেতি.

পুরে সন্তন্তি পুরে দহরকালে আচরিযে পযিরুপাসিত্ৰা মযা কাতুং সক্যরূপং সমানং হত্থিসিপ্পাদিকং কিঞ্চি সিপ্পং ন সিক্খিতং. কিচ্ছাতি মহল্লককালে অসিপ্পস্স দুক্খা জীৰিতৰুত্তি, নেৰ সক্কা তদা সিপ্পং সিক্খিতুং, তস্মা মহল্লককালে সুখং জীৰিতুকামা তরুণকালেযেৰ সিপ্পং সিক্খথাতি দস্সেতি. কুটৰেদীতি কূটজাননকো গামকূটকো ৰা লোকস্স অনত্থকারকো ৰা তুলাকূটাদিকারকো ৰা কূটট্টকারকো ৰাতি অত্থো. আসিন্তি এৰরূপো অহং পুব্বে অহোসিং. পিসুণোতি পেসুঞ্ঞকারণো. পিট্ঠিমংসিকোতি লঞ্জং গহেত্ৰা অসামিকে সামিকে করোন্তো পরেসং পিট্ঠিমংসখাদকো. ইতি পচ্ছাতি এৰং মরণমঞ্চে নিপন্নো অনুতপ্পতি, তস্মা সচে নিরযে ন ৰসিতুকামাত্থ, মা এৰরূপং পাপকম্মং করিত্থাতি ওৰদতি.

লুদ্দোতি দারুণো. অনারিযোতি ন অরিযো নীচসমাচারো. নাপচাযিস্সন্তি খন্তিমেত্তানুদ্দযৰসেন নীচৰুত্তিকো নাহোসিং. সেসং পুরিমনযেনেৰ যোজেতব্বং. অনাপাদাসূতি আপাদানং আপাদো, পরিগ্গহোতি অত্থো. নত্থি আপাদো যাসং তা অনাপাদা, অঞ্ঞেহি অকতপরিগ্গহাসূতি অত্থো. উপট্ঠিতেতি পচ্চুপট্ঠিতে. ন পুব্বেতি ইতো পুব্বে দানং ন অদদং. পহু সন্তোতি ধনবলেনাপি কাযবলেনাপি পোসিতুং সমত্থো পটিবলো সমানো. আচরিযন্তি আচারে সিক্খাপনতো ইধ পিতা ‘‘আচরিযো’’তি অধিপ্পেতো. অনুসত্থারন্তি অনুসাসকং. সব্বকামরসাহরন্তি সব্বে ৰত্থুকামরসে আহরিত্ৰা পোসিতারং. অতিমঞ্ঞিস্সন্তি তস্স ওৰাদং অগণ্হন্তো অতিক্কমিত্ৰা মঞ্ঞিস্সং.

ন পুব্বেতি ইতো পুব্বে ধম্মিকসমণব্রাহ্মণেপি গিলানাগিলানেপি চীৰরাদীনি দত্ৰা অপ্পটিজগ্গনেন ন পযিরুপাসিস্সং. তপোতি সুচরিততপো. সন্তোতি তীহি দ্ৰারেহি উপসন্তো সীলৰা. ইদং ৰুত্তং হোতি – তিৰিধসুচরিতসঙ্খাতো তপো চিণ্ণো এৰরূপো চ উপসন্তো পযিরুপাসিতো নাম সাধু সুন্দরো. ন পুব্বেতি মযা দহরকালে এৰরূপো তপো ন চিণ্ণো, ইতি পচ্ছা জরাজিণ্ণো মরণভযতজ্জিতো অনুতপ্পতি সোচতি. সচে তুম্হে এৰং ন সোচিতুকামা, তপোকম্মং করোথাতি ৰদতি. যো চ এতানীতি যো পন এতানি দস কারণানি পঠমমেৰ উপাযেন পটিপজ্জতি সমাদায ৰত্ততি, পুরিসেহি কত্তব্বানি ধম্মিককিচ্চানি করোন্তো সো অপ্পমাদৰিহারী পুরিসো পচ্ছা নানুতপ্পতি, সোমনস্সপ্পত্তোৰ হোতীতি.

ইতি মহাসত্তো অন্ৰদ্ধমাসং ইমিনা নিযামেন মহাজনস্স ধম্মং দেসেসি. মহাজনোপিস্স ওৰাদে ঠত্ৰা তানি দস ঠানানি পূরেত্ৰা সগ্গপরাযণোৰ অহোসি.

সত্থা ইমং ধম্মদেসনং আহরিত্ৰা ‘‘এৰং, মহারাজ, পোরাণকপণ্ডিতা অনাচরিযকাপি অত্তনো মতিযাৰ ধম্মং দেসেত্ৰা মহাজনং সগ্গপথে পতিট্ঠাপেসু’’ন্তি ৰত্ৰা জাতকং সমোধানেসি – ‘‘তদা পরিসা বুদ্ধপরিসা অহেসুং, জনসন্ধরাজা পন অহমেৰ অহোসি’’ন্তি.

জনসন্ধজাতকৰণ্ণনা পঞ্চমা.

[৪৬৯] ৬. মহাকণ্হজাতকৰণ্ণনা

কণ্হো কণ্হো চাতি ইদং সত্থা জেতৰনে ৰিহরন্তো লোকত্থচরিযং আরব্ভ কথেসি. একদিৰসঞ্হি ভিক্খূ ধম্মসভাযং নিসীদিত্ৰা ‘‘যাৰঞ্চিদং, আৰুসো, সত্থা বহুজনহিতায পটিপন্নো অত্তনো ফাসুৰিহারং পহায লোকস্সেৰ অত্থং চরতি, পরমাভিসম্বোধিং পত্ৰা সযং পত্তচীৰরমাদায অট্ঠারসযোজনমগ্গং গন্ত্ৰা পঞ্চৰগ্গিযত্থেরানং ধম্মচক্কং (সং. নি. ৫.১০৮১; মহাৰ. ১৩ আদযো; পটি. ম. ২.৩০) পৰত্তেত্ৰা পঞ্চমিযা পক্খস্স অনত্তলক্খণসুত্তং (সং. নি. ৩.৫৯; মহাৰ. ২০ আদযো) কথেত্ৰা সব্বেসং অরহত্তং অদাসি. উরুৰেলং গন্ত্ৰা তেভাতিকজটিলানং অড্ঢুড্ঢানি পাটিহারিযসহস্সানি দস্সেত্ৰা পব্বাজেত্ৰা গযাসীসে আদিত্তপরিযাযং (সং. নি. ৪.২৩৫; মহাৰ. ৫৪) কথেত্ৰা জটিলসহস্সানং অরহত্তং অদাসি, মহাকস্সপস্স তীণি গাৰুতানি পচ্চুগ্গমনং গন্ত্ৰা তীহি ওৰাদেহি উপসম্পদং অদাসি. একো পচ্ছাভত্তং পঞ্চচত্তালীসযোজনমগ্গং গন্ত্ৰা পুক্কুসাতিকুলপুত্তং অনাগামিফলে পতিট্ঠাপেসি, মহাকপ্পিনস্স ৰীসযোজনসতং পচ্চুগ্গমনং কত্ৰা অরহত্তং অদাসি, একো পচ্ছাভত্তং তিংসযোজনমগ্গং গন্ত্ৰা তাৰ কক্খল়ং ফরুসং অঙ্গুলিমালং অরহত্তে পতিট্ঠাপেসি, তিংসযোজনমগ্গং গন্ত্ৰা আল়ৰকং যক্খং সোতাপত্তিফলে পতিট্ঠাপেত্ৰা কুমারস্স সোত্থিং অকাসি. তাৰতিংসভৰনে তেমাসং ৰসন্তো অসীতিযা দেৰতাকোটীনং ধম্মাভিসমযং সম্পাদেসি, ব্রহ্মলোকং গন্ত্ৰা বকব্রহ্মুনো দিট্ঠিং ভিন্দিত্ৰা দসন্নং ব্রহ্মসহস্সানং অরহত্তং অদাসি, অনুসংৰচ্ছরং তীসু মণ্ডলেসু চারিকং চরমানো উপনিস্সযসম্পন্নানং মনুস্সানং সরণানি চেৰ সীলানিচ মগ্গফলানি চ দেতি, নাগসুপণ্ণাদীনম্পি নানপ্পকারং অত্থং চরতী’’তি দসবলস্স লোকত্থচরিযগুণং কথযিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘অনচ্ছরিযং, ভিক্খৰে, সোহং ইদানি অভিসম্বোধিং পত্ৰা লোকস্স অত্থং চরেয্যং, পুব্বে সরাগকালেপি লোকস্স অত্থং অচরি’’ন্তি ৰত্ৰা অতীতং আহরি.

অতীতে কস্সপসম্মাসম্বুদ্ধকালে বারাণসিযং উসীনকো নাম রাজা রজ্জং কারেসি. কস্সপসম্মাসম্বুদ্ধে চতুসচ্চদেসনায মহাজনং কিলেসবন্ধনা মোচেত্ৰা নিব্বাননগরং পূরেত্ৰা পরিনিব্বুতে দীঘস্স অদ্ধুনো অচ্চযেন সাসনং ওসক্কি. ভিক্খূ একৰীসতিযা অনেসনাহি জীৰিকং কপ্পেন্তি, ভিক্খূ গিহিসংসগ্গং করোন্তি, পুত্তধীতাদীহি ৰড্ঢন্তি. ভিক্খুনিযোপি গিহিসংসগ্গং করোন্তি, পুত্তধীতাদীহি ৰড্ঢন্তি. ভিক্খূ ভিক্খুধম্মং, ভিক্খুনিযো ভিক্খুনিধম্মং, উপোসকা উপাসকধম্মং, উপাসিকা উপাসিকধম্মং, ব্রাহ্মণা ব্রাহ্মণধম্মং ৰিস্সজ্জেসুং. যেভুয্যেন মনুস্সা দস অকুসলকম্মপথে সমাদায ৰত্তিংসু, মতমতা অপাযেসু পরিপূরেসুং. তদা সক্কো দেৰরাজা নৰে নৰে দেৰে অপস্সন্তো মনুস্সলোকং ওলোকেত্ৰা মনুস্সানং অপাযেসু নিব্বত্তিতভাৰং ঞত্ৰা সত্থু সাসনং ওসক্কিতং দিস্ৰা ‘‘কিং নু করিস্সামী’’তি চিন্তেত্ৰা ‘‘অত্থেকো উপাযো, মহাজনং তাসেত্ৰা ভীতভাৰং ঞত্ৰা পচ্ছা অস্সাসেত্ৰা ধম্মং দেসেত্ৰা ওসক্কিতং সাসনং পগ্গয্হ অপরম্পি ৰস্সসহস্সং পৰত্তনকারণং করিস্সামী’’তি সন্নিট্ঠানং কত্ৰা মাতলিদেৰপুত্তং মোচপ্পমাণদাঠং চতূহি দাঠাহি ৰিনিগ্গতরস্মিযা ভযানকং কত্ৰা গব্ভিনীনং দস্সনেনেৰ গব্ভপাতনসমত্থং ঘোররূপং আজানেয্যপ্পমাণং কাল়ৰণ্ণং মহাকণ্হসুনখং মাপেত্ৰা পঞ্চবন্ধনেন বন্ধিত্ৰা রত্তমালং কণ্ঠে পিল়ন্ধিত্ৰা রজ্জুকোটিকং আদায সযং দ্ৰে কাসাযানি নিৰাসেত্ৰা পচ্ছামুখে পঞ্চধা কেসে বন্ধিত্ৰা রত্তমালং পিল়ন্ধিত্ৰা আরোপিতপৰাল়ৰণ্ণজিযং মহাধনুং গহেত্ৰা ৰজিরগ্গনারাচং নখেন পরিৰট্টেন্তো ৰনচরকৰেসং গহেত্ৰা নগরতো যোজনমত্তে ঠানে ওতরিত্ৰা ‘‘নস্সতি লোকো, নস্সতি লোকো’’তি তিক্খত্তুং সদ্দং অনুসাৰেত্ৰা মনুস্সে উত্তাসেত্ৰা নগরূপচারং পত্ৰা পুন সদ্দমকাসি.

মনুস্সা সুনখং দিস্ৰা উত্রস্তা নগরং পৰিসিত্ৰা তং পৰত্তিং রঞ্ঞো আরোচেসুং. রাজা সীঘং নগরদ্ৰারানি পিদহাপেসি. সক্কোপি অট্ঠারসহত্থং পাকারং উল্লঙ্ঘিত্ৰা সুনখেন সদ্ধিং অন্তোনগরে পতিট্ঠহি. মনুস্সা ভীততসিতা পলাযিত্ৰা গেহানি পৰিসিত্ৰা নিলীযিংসু. মহাকণ্হোপি দিট্ঠদিট্ঠে মনুস্সে উপধাৰিত্ৰা সন্তাসেন্তো রাজনিৰেসনং অগমাসি. রাজঙ্গণে মনুস্সা ভযেন পলাযিত্ৰা রাজনিৰেসনং পৰিসিত্ৰা দ্ৰারং পিদহিংসু. উসীনকরাজাপি ওরোধে গহেত্ৰা পাসাদং অভিরুহি. মহাকণ্হো সুনখো পুরিমপাদে উক্খিপিত্ৰা ৰাতপানে ঠত্ৰা মহাভুস্সিতং ভুস্সি. তস্স সদ্দো হেট্ঠা অৰীচিং, উপরি ভৰগ্গং পত্ৰা সকলচক্কৰাল়ং একনিন্নাদং অহোসি. ৰিধুরজাতকে (জা. ২.২২.১৩৪৬ আদযো) হি পুণ্ণকযক্খরঞ্ঞো, কুসজাতকে (জা. ২.২০.১ আদযো) কুসরঞ্ঞো, ভূরিদত্তজাতকে (জা. ২.২২.৭৮৪ আদযো) সুদস্সননাগরঞ্ঞো, ইমস্মিং মহাকণ্হজাতকে অযং সদ্দোতি ইমে চত্তারো সদ্দা জম্বুদিপে মহাসদ্দা নাম অহেসুং.

নগরৰাসিনো ভীততসিতা হুত্ৰা একপুরিসোপি সক্কেন সদ্ধিং কথেতুং নাসক্খি, রাজাযেৰ সতিং উপট্ঠাপেত্ৰা ৰাতপানং নিস্সায সক্কং আমন্তেত্ৰা ‘‘অম্ভো লুদ্দক, কস্মা তে সুনখো ভুস্সতী’’তি আহ. ‘‘ছাতভাৰেন, মহারাজা’’তি. ‘‘তেন হি তস্স ভত্তং দাপেস্সামী’’তি অন্তোজনস্স চ অত্তনো চ পক্কভত্তং সব্বং দাপেসি. তং সব্বং সুনখো এককবল়ং ৰিয কত্ৰা পুন সদ্দমকাসি. পুন রাজা পুচ্ছিত্ৰা ‘‘ইদানিপি মে সুনখো ছাতোযেৰা’’তি সুত্ৰা হত্থিঅস্সাদীনং পক্কভত্তং সব্বং আহরাপেত্ৰা দাপেসি. তস্মিং একপ্পহারেনেৰ নিট্ঠাপিতে সকলনগরস্স পক্কভত্তং দাপেসি. তম্পি সো তথেৰ ভুঞ্জিত্ৰা পুন সদ্দমকাসি. রাজা ‘‘ন এস সুনখো, নিস্সংসযং এস যক্খো ভৰিস্সতি, আগমনকারণং পুচ্ছিস্সামী’’তি ভীততসিতো হুত্ৰা পুচ্ছন্তো পঠমং গাথমাহ –

৬১.

‘‘কণ্হো কণ্হো চ ঘোরো চ, সুক্কদাঠো পভাসৰা;

বদ্ধো পঞ্চহি রজ্জূহি, কিং রৰি সুনখো তৰা’’তি.

তত্থ কণ্হো কণ্হোতি ভযৰসেন দল়্হীৰসেন ৰা আমেডিতং. ঘোরোতি পস্সন্তানং ভযজনকো. পভাসৰাতি দাঠা নিক্খন্তরংসিপভাসেন পভাসৰা. কিং রৰীতি কিং ৰিরৰি. তৰেস এৰরূপো কক্খল়ো সুনখো কিং করোতি, কিং মিগে গণ্হাতি, উদাহু তে অমিত্তে, কিং তে ইমিনা, ৰিস্সজ্জেহি নন্তি অধিপ্পাযেনেৰমাহ.

তং সুত্ৰা সক্কো দুতিযং গাথমাহ –

৬২.

‘‘নাযং মিগানমত্থায, উসীনক ভৰিস্সতি;

মনুস্সানং অনযো হুত্ৰা, তদা কণ্হো পমোক্খতী’’তি.

তস্সত্থো – অযঞ্হি ‘‘মিগমংসং খাদিস্সামী’’তি ইধ নাগতো, তস্মা মিগানং অত্থো ন ভৰিস্সতি, মনুস্সমংসং পন খাদিতুং আগতো, তস্মা তেসং অনযো মহাৰিনাসকারকো হুত্ৰা যদা অনেন মনুস্সা ৰিনাসং পাপিতা ভৰিস্সন্তি, তদা অযং কণ্হো পমোক্খতি, মম হত্থতো মুচ্চিস্সতীতি.

অথ নং রাজা ‘‘কিং পন তে ভো লুদ্দক-সুনখো সব্বেসংযেৰ মনুস্সানং মংসং খাদিস্সতি, উদাহু তৰ অমিত্তানঞ্ঞেৰা’’তি পুচ্ছিত্ৰা ‘‘অমিত্তানঞ্ঞেৰ মে, মহারাজা’’তি ৰুত্তে ‘‘কে পন ইধ তে অমিত্তা’’তি পুচ্ছিত্ৰা ‘‘অধম্মাভিরতা ৰিসমচারিনো, মহারাজা’’তি ৰুত্তে ‘‘কথেহি তাৰ নে অম্হাক’’ন্তি পুচ্ছি. অথস্স কথেন্তো দেৰরাজা দস গাথা অভাসি –

৬৩.

‘‘পত্তহত্থা সমণকা, মুণ্ডা সঙ্ঘাটিপারুতা;

নঙ্গলেহি কসিস্সন্তি, তদা কণ্হো পমোক্খতি.

৬৪.

‘‘তপস্সিনিযো পব্বজিতা, মুণ্ডা সঙ্ঘাটিপারুতা;

যদা লোকে গমিস্সন্তি, তদা কণ্হো পমোক্খতি.

৬৫.

‘‘দীঘোত্তরোট্ঠা জটিলা, পঙ্কদন্তা রজস্সিরা;

ইণং চোদায গচ্ছন্তি, তদা কণ্হো পমোক্খতি.

৬৬.

‘‘অধিচ্চ ৰেদে সাৰিত্তিং, যঞ্ঞতন্তঞ্চ ব্রাহ্মণা;

ভতিকায যজিস্সন্তি, তদা কণ্হো পমোক্খতি.

৬৭.

‘‘মাতরং পিতরং চাপি, জিণ্ণকং গতযোব্বনং;

পহূ সন্তো ন ভরন্তি, তদা কণ্হো পমোক্খতি.

৬৮.

‘‘মাতরং পিতরং চাপি, জিণ্ণকং গতযোব্বনং;

বালা তুম্হেতি ৰক্খন্তি, তদা কণ্হো পমোক্খতি.

৬৯.

‘‘আচরিযভরিযং সখিং, মাতুলানিং পিতুচ্ছকিং;

যদা লোকে গমিস্সন্তি, তদা কণ্হো পমোক্খতি.

৭০.

‘‘অসিচম্মং গহেত্ৰান, খগ্গং পগ্গয্হ ব্রাহ্মণা;

পন্থঘাতং করিস্সন্তি, তদা কণ্হো পমোক্খতি.

৭১.

‘‘সুক্কচ্ছৰী ৰেধৰেরা, থূলবাহূ অপাতুভা;

মিত্তভেদং করিস্সন্তি, তদা কণ্হো পমোক্খতি.

৭২.

‘‘মাযাৰিনো নেকতিকা, অসপ্পুরিসচিন্তকা;

যদা লোকে ভৰিস্সন্তি, তদা কণ্হো পমোক্খতী’’তি.

তত্থ সমণকাতি ‘‘মযং সমণাম্হা’’তি পটিঞ্ঞামত্তকেন হীল়িতৰোহারেনেৰমাহ. কসিস্সন্তীতি তে তদাপি কসন্তিযেৰ. অযং পন অজানন্তো ৰিয এৰমাহ. অযঞ্হিস্স অধিপ্পাযো – এতে এৰরূপা দুস্সীলা মম অমিত্তা, যদা মম সুনখেন এতে মারেত্ৰা মংসং খাদিতং ভৰিস্সতি, তদা এস কণ্হো ইতো পঞ্চরজ্জুবন্ধনা পমোক্খতীতি. ইমিনা উপাযেন সব্বগাথাসু অধিপ্পাযযোজনা ৰেদিতব্বা.

পব্বজিতাতি বুদ্ধসাসনে পব্বজিতা. গমিস্সন্তীতি অগারমজ্ঝে পঞ্চ কামগুণে পরিভুঞ্জন্তিযো ৰিচরিস্সন্তি. দীঘোত্তরোট্ঠাতি দাঠিকানং ৰড্ঢিতত্তা দীঘুত্তরোট্ঠা. পঙ্কদন্তাতি পঙ্কেন মলেন সমন্নাগতদন্তা. ইণং চোদাযাতি ভিক্খাচরিযায ধনং সংহরিত্ৰা ৰড্ঢিযা ইণং পযোজেত্ৰা তং চোদেত্ৰা ততো লদ্ধেন জীৰিকং কপ্পেন্তা যদা গচ্ছন্তীতি অত্থো.

সাৰিত্তিন্তি সাৰিত্তিঞ্চ অধিযিত্ৰা. যঞ্ঞতন্তঞ্চাতি যঞ্ঞৰিধাযকতন্তং, যঞ্ঞং অধিযিত্ৰাতি অত্থো. ভতিকাযাতি তে তে রাজরাজমহামত্তে উপসঙ্কমিত্ৰা ‘‘তুম্হাকং যঞ্ঞং যজিস্সাম, ধনং দেথা’’তি এৰং ভতিঅত্থায যদা যঞ্ঞং যজিস্সন্তি. পহূ সন্তোতি ভরিতুং পোসেতুং সমত্থা সমানা. বালা তুম্হেতি তুম্হে বালা ন কিঞ্চি জানাথাতি যদা ৰক্খন্তি. গমিস্সন্তীতি লোকধম্মসেৰনৰসেন গমিস্সন্তি. পন্থঘাতন্তি পন্থে ঠত্ৰা মনুস্সে মারেত্ৰা তেসং ভণ্ডগ্গহণং.

সুক্কচ্ছৰীতি কসাৰচুণ্ণাদিঘংসনেন সমুট্ঠাপিতসুক্কচ্ছৰিৰণ্ণা. ৰেধৰেরাতি ৰিধৰা অপতিকা, তাহি ৰিধৰাহি ৰেরং চরন্তীতি ৰেধৰেরা. থূলবাহূতি পাদপরিমদ্দনাদীহি সমুট্ঠাপিতমংসতায মহাবাহূ. অপাতুভাতি অপাতুভাৰা, ধনুপ্পাদরহিতাতি অত্থো. মিত্তভেদন্তি মিথুভেদং, অযমেৰ ৰা পাঠো. ইদং ৰুত্তং হোতি – যদা এৰরূপা ইত্থিধুত্তা ‘‘ইমা অম্হে ন জহিস্সন্তী’’তি সহিরঞ্ঞা ৰিধৰা উপগন্ত্ৰা সংৰাসং কপ্পেত্ৰা তাসং সন্তকং খাদিত্ৰা তাহি সদ্ধিং মিত্তভেদং করিস্সন্তি, ৰিস্সাসং ভিন্দিত্ৰা অঞ্ঞং সহিরঞ্ঞং গমিস্সন্তি, তদা এস তে চোরে সব্বেৰ খাদিত্ৰা মুচ্চিস্সতি. অসপ্পুরিসচিন্তকাতি অসপ্পুরিসচিত্তেহি পরদুক্খচিন্তনসীলা. তদাতি তদা সব্বেপিমে ঘাতেত্ৰা খাদিতমংসো কণ্হো পমোক্খতীতি.

এৰঞ্চ পন ৰত্ৰা ‘‘ইমে ময্হং, মহারাজ, অমিত্তা’’তি তে তে অধম্মকারকে পক্খন্দিত্ৰা খাদিতুকামতং ৰিয কত্ৰা দস্সেতি. সো ততো মহাজনস্স উত্রস্তকালে সুনখং রজ্জুযা আকড্ঢিত্ৰা ঠপিতং ৰিয কত্ৰা লুদ্দকৰেসং ৰিজহিত্ৰা অত্তনো আনুভাৰেন আকাসে জলমানো ঠত্ৰা ‘‘মহারাজ, অহং সক্কো দেৰরাজা, ‘অযং লোকো ৰিনস্সতী’তি আগতো, পমত্তা হি মহাজনা, অধম্মং ৰত্তিত্ৰা মতমতা সম্পতি অপাযে পূরেন্তি, দেৰলোকো তুচ্ছো ৰিয ৰিতো, ইতো পট্ঠায অধম্মিকেসু কত্তব্বং অহং জানিস্সামি, ত্ৰং অপ্পমত্তো হোহি, মহারাজা’’তি চতূহি সতারহগাথাহি ধম্মং দেসেত্ৰা মনুস্সানং দানসীলেসু পতিট্ঠাপেত্ৰা ওসক্কিতসাসনং অঞ্ঞং ৰস্সসহস্সং পৰত্তনসমত্থং কত্ৰা মাতলিং আদায সকট্ঠানমেৰ গতো. মহাজনা দানসীলাদীনি পুঞ্ঞানি কত্ৰা দেৰলোকে নিব্বত্তিংসু.

সত্থা ইমং ধম্মদেসনং আহরিত্ৰা ‘‘এৰং ভিক্খৰে পুব্বেপাহং লোকস্স অত্থমেৰ চরামী’’তি ৰত্ৰা জাতকং সমোধানেসি – ‘‘তদা মাতলি আনন্দো অহোসি, সক্কো পন অহমেৰ অহোসি’’ন্তি.

মহাকণ্হজাতকৰণ্ণনা ছট্ঠা.

[৪৭০] ৭. কোসিযজাতকৰণ্ণনা

৭৩-৯৩. কোসিযজাতকং সুধাভোজনজাতকে (জা. ২.২১.১৯২ আদযো) আৰি ভৰিস্সতি.

কোসিযজাতকৰণ্ণনা সত্তমা.

[৪৭১] ৮. মেণ্ডকপঞ্হজাতকৰণ্ণনা

৯৪-১০৫. মেণ্ডকপঞ্হজাতকং উমঙ্গজাতকে (জা. ২.২২.৫৯০ আদযো) আৰি ভৰিস্সতি.

মেণ্ডকপঞ্হজাতকৰণ্ণনা অট্ঠমা.

[৪৭২] ৯. মহাপদুমজাতকৰণ্ণনা

নাদট্ঠা পরতো দোসন্তি ইদং সত্থা জেতৰনে ৰিহরন্তো চিঞ্চমাণৰিকং আরব্ভ কথেসি. পঠমবোধিযঞ্হি দসবলস্স পুথুভূতেসু সাৰকেসু অপরিমাণেসু দেৰমনুস্সেসু অরিযভূমিং ওক্কন্তেসু পত্থটেসু গুণসমুদযেসু মহালাভসক্কারো উদপাদি. তিত্থিযা সূরিযুগ্গমনে খজ্জোপনকসদিসা অহেসুং হতলাভসক্কারা. তে অন্তরৰীথিযং ঠত্ৰা ‘‘কিং সমণো গোতমোৰ বুদ্ধো, মযম্পি বুদ্ধা, কিং তস্সেৰ দিন্নং মহপ্ফলং, অম্হাকম্পি দিন্নং মহপ্ফলমেৰ, অম্হাকম্পি দেথ করোথা’’তি এৰং মনুস্সে ৰিঞ্ঞাপেন্তাপি লাভসক্কারং অলভন্তা রহো সন্নিপতিত্ৰা ‘‘কেন নু খো উপাযেন সমণস্স গোতমস্স মনুস্সানং অন্তরে অৰণ্ণং উপ্পাদেত্ৰা লাভসক্কারং নাসেয্যামা’’তি মন্তযিংসু. তদা সাৰত্থিযং চিঞ্চমাণৰিকা নামেকা পরিব্বাজিকা উত্তমরূপধরা সোভগ্গপ্পত্তা দেৰচ্ছরা ৰিয. তস্সা সরীরতো রস্মিযো নিচ্ছরন্তি. অথেকো খরমন্তী এৰমাহ – ‘‘চিঞ্চমাণৰিকং পটিচ্চ সমণস্স গোতমস্স অৰণ্ণং উপ্পাদেত্ৰা লাভসক্কারং নাসেস্সামা’’তি. তে ‘‘অত্থেসো উপাযো’’তি সম্পটিচ্ছিংসু. অথ সা তিত্থিযারামং গন্ত্ৰা ৰন্দিত্ৰা অট্ঠাসি, তিত্থিযা তায সদ্ধিং ন কথেসুং. সা ‘‘কো নু খো মে দোসো’’তি যাৰততিযং ‘‘ৰন্দামি অয্যা’’তি ৰত্ৰা ‘‘অয্যা, কো নু খো মে দোসো, কিং মযা সদ্ধিং ন কথেথা’’তি আহ. ‘‘ভগিনি, সমণং গোতমং অম্হে ৰিহেঠেন্তং হতলাভসক্কারে কত্ৰা ৰিচরন্তং ন জানাসী’’তি. ‘‘নাহং জানামি অয্যা, মযা কিং পনেত্থ কত্তব্বন্তি. সচে ত্ৰং ভগিনি, অম্হাকং সুখমিচ্ছসি, অত্তানং পটিচ্চ সমণস্স গোতমস্স অৰণ্ণং উপ্পাদেত্ৰা লাভসক্কারং নাসেহী’’তি.

সা ‘‘সাধু অয্যা, ময্হমেৰেসো ভারো, মা চিন্তযিত্থা’’তি ৰত্ৰা পক্কমিত্ৰা ইত্থিমাযাসু কুসলতায ততো পট্ঠায সাৰত্থিৰাসীনং ধম্মকথং সুত্ৰা জেতৰনা নিক্খমনসমযে ইন্দগোপকৰণ্ণং পটং পারুপিত্ৰা গন্ধমালাদিহত্থা জেতৰনাভিমুখী গচ্ছন্তী ‘‘ইমায ৰেলায কুহিং গচ্ছসী’’তি ৰুত্তে ‘‘কিং তুম্হাকং মম গমনট্ঠানেনা’’তি ৰত্ৰা জেতৰনসমীপে তিত্থিযারামে ৰসিত্ৰা পাতোৰ ‘‘অগ্গৰন্দনং ৰন্দিস্সামা’’তি নগরা নিক্খমন্তে উপাসকজনে জেতৰনে ৰুত্থা ৰিয হুত্ৰা নগরং পৰিসতি. ‘‘কুহিং ৰুত্থাসী’’তি ৰুত্তে ‘‘কিং তুম্হাকং মম ৰুত্থট্ঠানেনা’’তি ৰত্ৰা মাসড্ঢমাসচ্চযেন পুচ্ছিযমানা ‘‘জেতৰনে সমণেন গোতমেন সদ্ধিং একগন্ধকুটিযা ৰুত্থাম্হী’’তি আহ. পুথুজ্জনানং ‘‘সচ্চং নু খো এতং, নো’’তি কঙ্খং উপ্পাদেত্ৰা তেমাসচতুমাসচ্চযেন পিলোতিকাহি উদরং ৰেঠেত্ৰা গব্ভিনিৰণ্ণং দস্সেত্ৰা উপরি রত্তপটং পারুপিত্ৰা ‘‘সমণং গোতমং পটিচ্চ গব্ভো মে লদ্ধো’’তি অন্ধবালে গাহাপেত্ৰা অট্ঠনৰমাসচ্চযেন উদরে দারুমণ্ডলিকং বন্ধিত্ৰা উপরি রত্তপটং পারুপিত্ৰা হত্থপাদপিট্ঠিযো গোহনুকেন কোট্টাপেত্ৰা উস্সদে দস্সেত্ৰা কিলন্তিন্দ্রিযা হুত্ৰা সাযন্হসমযে তথাগতে অলঙ্কতধম্মাসনে নিসীদিত্ৰা ধম্মং দেসেন্তে ধম্মসভং গন্ত্ৰা তথাগতস্স পুরতো ঠত্ৰা ‘‘মহাসমণ, মহাজনস্স তাৰ ধম্মং দেসেসি, মধুরো তে সদ্দো, সুফুসিতং দন্তাৰরণং, অহং পন তং পটিচ্চ গব্ভং লভিত্ৰা পরিপুণ্ণগব্ভা জাতা, নেৰ মে সূতিঘরং জানাসি, ন সপ্পিতেলাদীনি, সযং অকরোন্তো উপট্ঠাকানম্পি অঞ্ঞতরং কোসলরাজানং ৰা অনাথপিণ্ডিকং ৰা ৰিসাখং উপাসিকং ৰা ‘‘ইমিস্সা চিঞ্চমাণৰিকায কত্তব্বযুত্তং করোহী’তি ন ৰদসি, অভিরমিতুংযেৰ জানাসি, গব্ভপরিহারং ন জানাসী’’তি গূথপিণ্ডং গহেত্ৰা চন্দমণ্ডলং দূসেতুং ৰাযমন্তী ৰিয পরিসমজ্ঝে তথাগতং অক্কোসি. তথাগতো ধম্মকথং ঠপেত্ৰা সীহো ৰিয অভিনদন্তো ‘‘ভগিনি, তযা কথিতস্স তথভাৰং ৰা অতথভাৰং ৰা অহঞ্চেৰ ত্ৰঞ্চ জানামা’’তি আহ. আম, সমণ, তযা চ মযা চ ঞাতভাৰেনেতং জাতন্তি.

তস্মিং খণে সক্কস্স ভৰনং উণ্হাকারং দস্সেসি. সো আৰজ্জমানো ‘‘চিঞ্চমাণৰিকা তথাগতং অভূতেন অক্কোসতী’’তি ঞত্ৰা ‘‘ইমং ৰত্থুং সোধেস্সামী’’তি চতূহি দেৰপুত্তেহি সদ্ধিং আগমি. দেৰপুত্তা মূসিকপোতকা হুত্ৰা দারুমণ্ডলিকস্স বন্ধনরজ্জুকে একপ্পহারেনেৰ ছিন্দিংসু, পারুতপটং ৰাতো উক্খিপি, দারুমণ্ডলিকং পতমানং তস্সা পাদপিট্ঠিযং পতি, উভো অগ্গপাদা ছিজ্জিংসু. মনুস্সা উট্ঠায ‘‘কাল়কণ্ণি, সম্মাসম্বুদ্ধং অক্কোসসী’’তি সীসে খেল়ং পাতেত্ৰা লেড্ডুদণ্ডাদিহত্থা জেতৰনা নীহরিংসু. অথস্সা তথাগতস্স চক্খুপথং অতিক্কন্তকালে মহাপথৰী ভিজ্জিত্ৰা ৰিৰরমদাসি, অৰীচিতো অগ্গিজালা উট্ঠহি. সা কুলদত্তিযং কম্বলং পারুপমানা ৰিয গন্ত্ৰা অৰীচিম্হি নিব্বত্তি. অঞ্ঞতিত্থিযানং লাভসক্কারো পরিহাযি, দসবলস্স ভিয্যোসোমত্তায ৰড্ঢি. পুনদিৰসে ধম্মসভাযং কথং সমুট্ঠাপেসুং ‘‘আৰুসো, চিঞ্চমাণৰিকা এৰং উল়ারগুণং অগ্গদক্খিণেয্যং সম্মাসম্বুদ্ধং অভূতেন অক্কোসিত্ৰা মহাৰিনাসং পত্তা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি এসা মং অভূতেন অক্কোসিত্ৰা মহাৰিনাসং পত্তা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অগ্গমহেসিযা কুচ্ছিম্হি নিব্বত্তি, ফুল্লপদুমসস্সিরিকমুখত্তা পনস্স ‘‘পদুমকুমারো’’ত্ৰেৰ নামং করিংসু. সো ৰযপ্পত্তো তক্কসিলাযং গন্ত্ৰা সব্বসিপ্পানি উগ্গণ্হিত্ৰা আগমি. অথস্স মাতা কালমকাসি. রাজা অঞ্ঞং অগ্গমহেসিং কত্ৰা পুত্তস্স উপরজ্জং অদাসি. অপরভাগে রাজা পচ্চন্তং কুপিতং ৰূপসমেতুং অগ্গমহেসিং আহ ‘‘ভদ্দে, ইধেৰ ৰস, অহং পচ্চন্তং কুপিতং ৰূপসমেতুং গচ্ছামী’’তি ৰত্ৰা ‘‘নাহং ইধেৰ ৰসিস্সামি, অহম্পি গমিস্সামী’’তি ৰুত্তে যুদ্ধভূমিযা আদীনৰং দস্সেত্ৰা ‘‘যাৰ মমাগমনা অনুক্কণ্ঠমানা ৰস, অহং পদুমকুমারং যথা তৰ কত্তব্বকিচ্চেসু অপ্পমত্তো হোতি, এৰং আণাপেত্ৰা গমিস্সামী’’তি ৰত্ৰা তথা কত্ৰা গন্ত্ৰা পচ্চামিত্তে পলাপেত্ৰা জনপদং সন্তপ্পেত্ৰা পচ্চাগন্ত্ৰা বহিনগরে খন্ধাৰারং নিৰাসেসি. বোধিসত্তো পিতু আগতভাৰং ঞত্ৰা নগরং অলঙ্কারাপেত্ৰা রাজগেহং পটিজগ্গাপেত্ৰা এককোৰ তস্সা সন্তিকং অগমাসি.

সা তস্স রূপসম্পত্তিং দিস্ৰা পটিবদ্ধচিত্তা অহোসি. বোধিসত্তো তং ৰন্দিত্ৰা ‘‘অম্ম, কিং অম্হাকং কত্তব্ব’’ন্তি পুচ্ছি. অথ নং ‘‘অম্মাতি মং ৰদসী’’তি উট্ঠায হত্থে গহেত্ৰা ‘‘সযনং অভিরুহা’’তি আহ. ‘‘কিংকারণা’’তি? ‘‘যাৰ রাজা ন আগচ্ছতি, তাৰ উভোপি কিলেসরতিযা রমিস্সামা’’তি. ‘‘অম্ম, ত্ৰং মম মাতা চ সসামিকা চ, মযা সপরিগ্গহো মাতুগামো নাম কিলেসৰসেন ইন্দ্রিযানি ভিন্দিত্ৰা ন ওলোকিতপুব্বো, কথং তযা সদ্ধিং এৰরূপং কিলিট্ঠকম্মং করিস্সামী’’তি. সা দ্ৰে তযো ৰারে কথেত্ৰা তস্মিং অনিচ্ছমানে ‘‘মম ৰচনং ন করোসী’’তি আহ. ‘‘আম, ন করোমী’’তি. ‘‘তেন হি রঞ্ঞো কথেত্ৰা সীসং তে ছিন্দাপেস্সামী’’তি. মহাসত্তো ‘‘তৰ রুচিং করোহী’’তি ৰত্ৰা তং লজ্জাপেত্ৰা পক্কামি.

সা ভীততসিতা চিন্তেসি ‘‘সচে অযং পঠমং পিতু আরোচেস্সতি, জীৰিতং মে নত্থি, অহমেৰ পুরেতরং কথেস্সামী’’তি ভত্তং অভুঞ্জিত্ৰা কিলিট্ঠলোমৰত্থং নিৰাসেত্ৰা সরীরে নখরাজিযো দস্সেত্ৰা ‘‘কুহিং দেৰীতি রঞ্ঞো পুচ্ছনকালে ‘‘গিলানা’তি কথেয্যাথা’’তি পরিচারিকানং সঞ্ঞং দত্ৰা গিলানালযং কত্ৰা নিপজ্জি. রাজাপি নগরং পদক্খিণং কত্ৰা নিৰেসনং আরুয্হ তং অপস্সন্তো ‘‘কুহিং দেৰী’’তি পুচ্ছিত্ৰা ‘‘গিলানা’’তি সুত্ৰা সিরিগব্ভং পৰিসিত্ৰা ‘‘কিং তে দেৰি, অফাসুক’’ন্তি পুচ্ছি. সা তস্স ৰচনং অসুণন্তী ৰিয হুত্ৰা দ্ৰে তযো ৰারে পুচ্ছিতা ‘‘মহারাজ, কস্মা কথেসি, তুণ্হী হোহি, সসামিকইত্থিযো নাম মাদিসা ন হোন্তী’’তি ৰত্ৰা ‘‘কেন ত্ৰং ৰিহেঠিতাসি, সীঘং মে কথেহি, সীসমস্স ছিন্দিস্সামী’’তি ৰুত্তে ‘‘কংসি ত্ৰং, মহারাজ, নগরে ঠপেত্ৰা গতো’’তি ৰত্ৰা ‘‘পদুমকুমার’’ন্তি ৰুত্তে ‘‘সো ময্হং ৰসনট্ঠানং আগন্ত্ৰা ‘তাত, মা এৰং করোহি, অহং তৰ মাতা’তি ৰুচ্চমানোপি ‘ঠপেত্ৰা মং অঞ্ঞো রাজা নত্থি, অহং তং গেহে করিত্ৰা কিলেসরতিযা রমিস্সামী’তি মং কেসেসু গহেত্ৰা অপরাপরং লুঞ্চিত্ৰা অত্তনো ৰচনং অকরোন্তিং মং পাতেত্ৰা কোট্টেত্ৰা গতো’’তি আহ.

রাজা অনুপপরিক্খিত্ৰাৰ আসীৰিসো ৰিয কুদ্ধো পুরিসে আণাপেসি ‘‘গচ্ছথ, ভণে, পদুমকুমারং বন্ধিত্ৰা আনেথা’’তি. তে নগরং অৰত্থরন্তা ৰিয তস্স গেহং গন্ত্ৰা তং বন্ধিত্ৰা পহরিত্ৰা পচ্ছাবাহং গাল়্হবন্ধনং বন্ধিত্ৰা রত্তকণৰেরমালং গীৰাযং পটিমুঞ্চিত্ৰা ৰজ্ঝং কত্ৰা আনযিংসু. সো ‘‘দেৰিযা ইদং কম্ম’’ন্তি ঞত্ৰা ‘‘ভো পুরিসা, নাহং রঞ্ঞো দোসকারকো, নিপ্পরাধোহমস্মী’’তি ৰিলপন্তো আগচ্ছতি. সকলনগরং সংখুব্ভিত্ৰা ‘‘রাজা কির মাতুগামস্স ৰচনং গহেত্ৰা মহাপদুমকুমারং ঘাতাপেসী’’তি সন্নিপতিত্ৰা রাজকুমারস্স পাদমূলে নিপতিত্ৰা ‘‘ইদং তে সামি, অননুচ্ছৰিক’’ন্তি মহাসদ্দেন পরিদেৰি. অথ নং নেত্ৰা রঞ্ঞো দস্সেসুং. রাজা দিস্ৰাৰ চিত্তং নিগ্গণ্হিতুং অসক্কোন্তো ‘‘অযং অরাজাৰ রাজলীল়ং করোতি, মম পুত্তো হুত্ৰা অগ্গমহেসিযা অপরজ্ঝতি, গচ্ছথ নং চোরপপাতে পাতেত্ৰা ৰিনাসং পাপেথা’’তি আহ. মহাসত্তো ‘‘ন ময্হং, তাত, এৰরূপো অপরাধো অত্থি, মাতুগামস্স ৰচনং গহেত্ৰা মা মং নাসেহী’’তি পিতরং যাচি. সো তস্স কথং ন গণ্হি.

ততো সোল়সসহস্সা অন্তেপুরিকা ‘‘তাত মহাপদুমকুমার, অত্তনো অননুচ্ছৰিকং ইদং লদ্ধ’’ন্তি মহাৰিরৰং ৰিরৰিংসু. সব্বে খত্তিযমহাসালাদযোপি অমচ্চপরিজনাপি ‘‘দেৰ, কুমারো সীলাচারগুণসম্পন্নো ৰংসানুরক্খিতো রজ্জদাযাদো, মা নং মাতুগামস্স ৰচনং গহেত্ৰা অনুপপরিক্খিত্ৰাৰ ৰিনাসেহি, রঞ্ঞা নাম নিসম্মকারিনা ভৰিতব্ব’’ন্তি ৰত্ৰা সত্ত গাথা অভাসিংসু –

১০৬.

‘‘নাদট্ঠা পরতো দোসং, অণুং থূলানি সব্বসো;

ইস্সরো পণযে দণ্ডং, সামং অপ্পটিৰেক্খিয.

১০৭.

‘‘যো চ অপ্পটিৰেক্খিত্ৰা, দণ্ডং কুব্বতি খত্তিযো;

সকণ্টকং সো গিলতি, জচ্চন্ধোৰ সমক্খিকং.

১০৮.

‘‘অদণ্ডিযং দণ্ডযতি, দণ্ডিযঞ্চ অদণ্ডিযং;

অন্ধোৰ ৰিসমং মগ্গং, ন জানাতি সমাসমং.

১০৯.

‘‘যো চ এতানি ঠানানি, অণুং থূলানি সব্বসো;

সুদিট্ঠমনুসাসেয্য, স ৰে ৰোহরিতু মরহতি.

১১০.

‘‘নেকন্তমুদুনা সক্কা, একন্ততিখিণেন ৰা;

অত্তং মহন্তে ঠপেতুং, তস্মা উভযমাচরে.

১১১.

‘‘পরিভূতো মুদু হোতি, অতিতিক্খো চ ৰেরৰা;

এতঞ্চ উভযং ঞত্ৰা, অনুমজ্ঝং সমাচরে.

১১২.

‘‘বহুম্পি রত্তো ভাসেয্য, দুট্ঠোপি বহু ভাসতি;

ন ইত্থিকারণা রাজ, পুত্তং ঘাতেতুমরহসী’’তি.

তত্থ নাদট্ঠাতি ন অদিস্ৰা. পরতোতি পরস্স. সব্বসোতি সব্বানি. অণুংথূলানীতি খুদ্দকমহন্তানি ৰজ্জানি. সামং অপ্পটিৰেক্খিযাতি পরস্স ৰচনং গহেত্ৰা অত্তনো পচ্চক্খং অকত্ৰা পথৰিস্সরো রাজা দণ্ডং ন পণযে ন পট্ঠপেয্য. মহাসম্মতরাজকালস্মিঞ্হি সততো উত্তরি দণ্ডো নাম নত্থি, তাল়নগরহণপব্বাজনতো উদ্ধং হত্থপাদচ্ছেদনঘাতনং নাম নত্থি, পচ্ছা কক্খল়রাজূনংযেৰ কালে এতং উপ্পন্নং, তং সন্ধায তে অমচ্চা ‘‘একন্তেনেৰ পরস্স দোসং সামং অদিস্ৰা কাতুং ন যুত্ত’’ন্তি কথেন্তা এৰমাহংসু.

যো চ অপ্পটিৰেক্খিত্ৰাতি মহারাজ, এৰং অপ্পটিৰেক্খিত্ৰা দোসানুচ্ছৰিকে দণ্ডে পণেতব্বে যো রাজা অগতিগমনে ঠিতো তং দোসং অপ্পটিৰেক্খিত্ৰা হত্থচ্ছেদাদিদণ্ডং করোতি, সো অত্তনো দুক্খকারণং করোন্তো সকণ্টকং ভোজনং গিলতি নাম, জচ্চন্ধো ৰিয চ সমক্খিকং ভুঞ্জতি নাম. অদণ্ডিযন্তি যো অদণ্ডিযং অদণ্ডপণেতব্বঞ্চ দণ্ডেত্ৰা দণ্ডিযঞ্চ দণ্ডপণেতব্বং অদণ্ডেত্ৰা অত্তনো রুচিমেৰ করোতি, সো অন্ধো ৰিয ৰিসমং মগ্গং পটিপন্নো, ন জানাতি সমাসমং, ততো পাসাণাদীসু পক্খলন্তো অন্ধো ৰিয চতূসু অপাযেসু মহাদুক্খং পাপুণাতীতি অত্থো. এতানি ঠানানীতি এতানি দণ্ডিযাদণ্ডিযকারণানি চেৰ দণ্ডিযকারণেসুপি অণুংথূলানি চ সব্বানি সুদিট্ঠং দিস্ৰা অনুসাসেয্য, স ৰে ৰোহরিতুং রজ্জমনুসাসিতুং অরহতীতি অত্থো.

অত্তং মহন্তে ঠপেতুন্তি এৰরূপো অনুপ্পন্নে ভোগে উপ্পাদেত্ৰা উপ্পন্নে থাৰরে কত্ৰা অত্তানং মহন্তে উল়ারে ইস্সরিযে ঠপেতুং ন সক্কোতীতি অত্থো. মুদূতি মুদুরাজা রট্ঠৰাসীনং পরিভূতো হোতি অৰঞ্ঞাতো, সো রজ্জং নিচ্চোরং কাতুং ন সক্কোতি. ৰেরৰাতি অতিতিক্খস্স পন সব্বেপি রট্ঠৰাসিনো ৰেরিনো হোন্তীতি সো ৰেরৰা নাম হোতি. অনুমজ্ঝন্তি অনুভূতং মুদুতিখিণভাৰানং মজ্ঝং সমাচরে, অমুদু অতিক্খো হুত্ৰা রজ্জং কারেয্যাতি অত্থো. ন ইত্থিকারণাতি পাপং লামকং মাতুগামং নিস্সায ৰংসানুরক্খকং ছত্তদাযাদং পুত্তং ঘাতেতুং নারহসি, মহারাজাতি.

এৰং নানাকারণেহি কথেন্তাপি অমচ্চা অত্তনো কথং গাহাপেতুং নাসক্খিংসু. বোধিসত্তোপি যাচন্তো অত্তনো কথং গাহাপেতুং নাসক্খি. অন্ধবালো পন রাজা ‘‘গচ্ছথ নং চোরপপাতে খিপথা’’তি আণাপেন্তো অট্ঠমং গাথমাহ –

১১৩.

‘‘সব্বোৰ লোকো একতো, ইত্থী চ অযমেকিকা;

তেনাহং পটিপজ্জিস্সং, গচ্ছথ পক্খিপথেৰ ত’’ন্তি.

তত্থ তেনাহন্তি যেন কারণেন সব্বো লোকো একতো কুমারস্সেৰ পক্খো হুত্ৰা ঠিতো, অযঞ্চ ইত্থী একিকাৰ, তেন কারণেন অহং ইমিস্সা ৰচনং পটিপজ্জিস্সং, গচ্ছথ তং পব্বতং আরোপেত্ৰা পপাতে খিপথেৰাতি.

এৰং ৰুত্তে সোল়সসহস্সাসু রাজইত্থীসু একাপি সকভাৰেন সণ্ঠাতুং নাসক্খি, সকলনগরৰাসিনো বাহা পগ্গয্হ কন্দিত্ৰা কেসে ৰিকিরযমানা ৰিলপিংসু. রাজা ‘‘ইমে ইমস্স পপাতে খিপনং পটিবাহেয্যু’’ন্তি সপরিৰারো গন্ত্ৰা মহাজনস্স পরিদেৰন্তস্সেৰ নং উদ্ধংপাদং অৰংসিরং কত্ৰা গাহাপেত্ৰা পপাতে খিপাপেসি. অথস্স মেত্তানুভাৰেন পব্বতে অধিৰত্থা দেৰতা ‘‘মা ভাযি মহাপদুমা’’তি তং সমস্সাসেত্ৰা উভোহি হত্থেহি গহেত্ৰা হদযে ঠপেত্ৰা দিব্বসম্ফস্সং ফরাপেত্ৰা ওতরিত্ৰা পব্বতপাদে পতিট্ঠিতনাগরাজস্স ফণগব্ভে ঠপেসি. নাগরাজা বোধিসত্তং নাগভৰনং নেত্ৰা অত্তনো যসং মজ্ঝে ভিন্দিত্ৰা অদাসি. সো তত্থ একসংৰচ্ছরং ৰসিত্ৰা ‘‘মনুস্সপথং গমিস্সামী’’তি ৰত্ৰা ‘‘কতরং ঠান’’ন্তি ৰুত্তে ‘‘হিমৰন্তং গন্ত্ৰা পব্বজিস্সামী’’তি আহ. নাগরাজা ‘‘সাধূ’’তি তং গহেত্ৰা মনুস্সপথে পতিট্ঠাপেত্ৰা পব্বজিতপরিক্খারে দত্ৰা সকট্ঠানমেৰ গতো. সোপি হিমৰন্তং পৰিসিত্ৰা ইসিপব্বজ্জং পব্বজিত্ৰা ঝানাভিঞ্ঞং নিব্বত্তেত্ৰা ৰনমূলফলাহারো তত্থ পটিৰসতি.

অথেকো বারাণসিৰাসী ৰনচরকো তং ঠানং পত্তো মহাসত্তং সঞ্জানিত্ৰা ‘‘ননু ত্ৰং দেৰ, মহাপদুমকুমারো’’তি ৰত্ৰা ‘‘আম, সম্মা’’তি ৰুত্তে তং ৰন্দিত্ৰা কতিপাহং তত্থ ৰসিত্ৰা বারাণসিং গন্ত্ৰা রঞ্ঞো আরোচেসি ‘‘দেৰ, পুত্তো তে হিমৰন্তপদেসে ইসিপব্বজ্জং পব্বজিত্ৰা পণ্ণসালাযং ৰসতি, অহং তস্স সন্তিকে ৰসিত্ৰা আগতো’’তি. ‘‘পচ্চক্খতো তে দিট্ঠো’’তি? ‘‘আম দেৰা’’তি. রাজা মহাবলকাযপরিৰুতো তত্থ গন্ত্ৰা ৰনপরিযন্তে খন্ধাৰারং বন্ধিত্ৰা অমচ্চগণপরিৰুতো পণ্ণসালং গন্ত্ৰা কঞ্চনরূপসদিসং পণ্ণসালদ্ৰারে নিসিন্নং মহাসত্তং দিস্ৰা ৰন্দিত্ৰা একমন্তং নিসীদি. অমচ্চাপি ৰন্দিত্ৰা পটিসন্থারং কত্ৰা নিসীদিংসু. বোধিসত্তোপি রাজানং পটিপুচ্ছিত্ৰা পটিসন্থারমকাসি. অথ নং রাজা ‘‘তাত, মযা ত্ৰং গম্ভীরে পপাতে খিপাপিতো, কথং সজীৰিতোসী’’তি পুচ্ছন্তো নৰমং গাথমাহ –

১১৪.

‘‘অনেকতালে নরকে, গম্ভীরে চ সুদুত্তরে;

পাতিতো গিরিদুগ্গস্মিং, কেন ত্ৰং তত্থ নামরী’’তি.

তত্থ অনেকতালেতি অনেকতালপ্পমাণে. নামরীতি ন অমরি.

ততোপরং –

১১৫.

‘‘নাগো জাতফণো তত্থ, থামৰা গিরিসানুজো;

পচ্চগ্গহি মং ভোগেহি, তেনাহং তত্থ নামরিং.

১১৬.

‘‘এহি তং পটিনেস্সামি, রাজপুত্ত সকং ঘরং;

রজ্জং কারেহি ভদ্দন্তে, কিং অরঞ্ঞে করিস্সসি.

১১৭.

‘‘যথা গিলিত্ৰা বল়িসং, উদ্ধরেয্য সলোহিতং;

উদ্ধরিত্ৰা সুখী অস্স, এৰং পস্সামি অত্তনং.

১১৮.

‘‘কিং নু ত্ৰং বল়িসং ব্রূসি, কিং ত্ৰং ব্রূসি সলোহিতং;

কিং নু ত্ৰং উব্ভতং ব্রূসি, তং মে অক্খাহি পুচ্ছিতো.

১১৯.

‘‘কামাহং বল়িসং ব্রূমি, হত্থিঅস্সং সলোহিতং;

চত্তাহং উব্ভতং ব্রূমি, এৰং জানাহি খত্তিযা’’তি. –

ইমাসু পঞ্চসু একন্তরিকা তিস্সো গাথা বোধিসত্তস্স, দ্ৰে রঞ্ঞো.

তত্থ পচ্চগ্গহি মন্তি পব্বতপতনকালে দেৰতায পরিগ্গহেত্ৰা দিব্বসম্ফস্সেন সমস্সাসেত্ৰা উপনীতং মং পটিগ্গণ্হি, গহেত্ৰা চ পন নাগভৰনং আনেত্ৰা মহন্তং যসং দত্ৰা ‘‘মনুস্সপথং মং নেহী’’তি ৰুত্তো মং মনুস্সপথং আনেসি. অহং ইধাগন্ত্ৰা পব্বজিতো, ইতি তেন দেৰতায চ নাগরাজস্স চ আনুভাৰেন অহং তত্থ নামরিন্তি সব্বং আরোচেসি.

এহীতি রাজা তস্স ৰচনং সুত্ৰা সোমনস্সপ্পত্তো হুত্ৰা ‘‘তাত, অহং বালভাৰেন ইত্থিযা ৰচনং গহেত্ৰা এৰং সীলাচারসম্পন্নে তযি অপরজ্ঝিং, খমাহি মে দোস’’ন্তি পাদেসু নিপতিত্ৰা ‘‘উট্ঠেহি, মহারাজ, খমাম তে দোসং, ইতো পরং পুন মা এৰং অনিসম্মকারী ভৰেয্যাসী’’তি ৰুত্তে ‘‘তাত, ত্ৰং অত্তনো কুলসন্তকং সেতচ্ছত্তং উস্সাপেত্ৰা রজ্জং অনুসাসন্তো ময্হং খমসি নামা’’তি এৰমাহ.

উদ্ধরিত্ৰাতি হদযৰক্কাদীনি অসম্পত্তমেৰ তং উদ্ধরিত্ৰা সুখী অস্স. এৰং পস্সামি অত্তনন্তি অত্তানং মহারাজ, এৰং অহম্পি পুন সোত্থিভাৰপ্পত্তং গিলিতবল়িসং পুরিসমিৰ অত্তানং পস্সামীতি. ‘‘কিং নু ত্ৰ’’ন্তি ইদং রাজা তমত্থং ৰিত্থারতো সোতুং পুচ্ছতি. কামাহন্তি পঞ্চ কামগুণে অহং. হত্থিঅস্সং সলোহিতন্তি এৰং হত্থিঅস্সরথৰাহনং সত্তরতনাদিৰিভৰং ‘‘সলোহিত’’ন্তি ব্রূমি. চত্তাহন্তি চত্তং অহং, যদা তং সব্বম্পি চত্তং হোতি পরিচ্চত্তং, তং দানাহং ‘‘উব্ভত’’ন্তি ব্রূমি.

‘‘ইতি খো, মহারাজ, ময্হং রজ্জেন কিচ্চং নত্থি, ত্ৰং পন দস রাজধম্মে অকোপেত্ৰা অগতিগমনং পহায ধম্মেন রজ্জং কারেহী’’তি মহাসত্তো পিতু ওৰাদং অদাসি. সো রাজা রোদিত্ৰা পরিদেৰিত্ৰা নগরং গচ্ছন্তো অন্তরামগ্গে অমচ্চে পুচ্ছি. ‘‘অহং কং নিস্সায এৰরূপেন আচারগুণসম্পন্নেন পুত্তেন ৰিযোগং পত্তো’’তি? ‘‘অগ্গমহেসিং, দেৰা’’তি. রাজা তং উদ্ধংপাদং গাহাপেত্ৰা চোরপপাতে খিপাপেত্ৰা নগরং পৰিসিত্ৰা ধম্মেন রজ্জং কারেসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপেসা মং অক্কোসিত্ৰা মহাৰিনাসং পত্তা’’তি ৰত্ৰা –

১২০.

‘‘চিঞ্চমাণৰিকা মাতা, দেৰদত্তো চ মে পিতা;

আনন্দো পণ্ডিতো নাগো, সারিপুত্তো চ দেৰতা;

রাজপুত্তো অহং আসিং, এৰং ধারেথ জাতক’’ন্তি. –

ওসানগাথায জাতকং সমোধানেসি.

মহাপদুমজাতকৰণ্ণনা নৰমা.

[৪৭৩] ১০. মিত্তামিত্তজাতকৰণ্ণনা

কানি কম্মানীতি ইদং সত্থা জেতৰনে ৰিহরন্তো কোসলরঞ্ঞো অত্থচরকং অমচ্চং আরব্ভ কথেসি. সো কির রঞ্ঞো বহূপকারো অহোসি. অথস্স রাজা অতিরেকসম্মানং কারেসি. অৰসেসা নং অসহমানা ‘‘দেৰ, অসুকো নাম অমচ্চো তুম্হাকং অনত্থকারকো’’তি পরিভিন্দিংসু. রাজা তং পরিগ্গণ্হন্তো কিঞ্চি দোসং অদিস্ৰা ‘‘অহং ইমস্স কিঞ্চি দোসং ন পস্সামি, কথং নু খো সক্কা মযা ইমস্স মিত্তভাৰং ৰা অমিত্তভাৰং ৰা জানিতু’’ন্তি চিন্তেত্ৰা ‘‘ইমং পঞ্হং ঠপেত্ৰা তথাগতং অঞ্ঞো জানিতুং ন সক্খিস্সতি, গন্ত্ৰা পুচ্ছিস্সামী’’তি ভুত্তপাতরাসো সত্থারং উপসঙ্কমিত্ৰা ‘‘ভন্তে, কথং নু খো সক্কা পুরিসেন অত্তনো মিত্তভাৰং ৰা অমিত্তভাৰং ৰা জানিতু’’ন্তি পুচ্ছি. অথ নং সত্থা ‘‘পুব্বেপি মহারাজ, পণ্ডিতা ইমং পঞ্হং চিন্তেত্ৰা পণ্ডিতে পুচ্ছিত্ৰা তেহি কথিতৰসেন ঞত্ৰা অমিত্তে ৰজ্জেত্ৰা মিত্তে সেৰিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অত্থধম্মানুসাসকো অমচ্চো অহোসি. তদা বারাণসিরঞ্ঞো একং অত্থচরকং অমচ্চং সেসা পরিভিন্দিংসু. রাজা তস্স দোসং অপস্সন্তো ‘‘কথং নু খো সক্কা মিত্তং ৰা অমিত্তং ৰা ঞাতু’’ন্তি মহাসত্তং পুচ্ছন্তো পঠমং গাথমাহ –

১২১.

‘‘কানি কম্মানি কুব্বানং, কথং ৰিঞ্ঞূ পরক্কমে;

অমিত্তং জানেয্য মেধাৰী, দিস্ৰা সুত্ৰা চ পণ্ডিতো’’তি.

তস্সত্থো – কানি কম্মানি করোন্তং মেধাৰী পণ্ডিতো পুরিসো চক্খুনা দিস্ৰা ৰা সোতেন সুত্ৰা ৰা ‘‘অযং ময্হং অমিত্তো’’তি জানেয্য, তস্স জাননত্থায কথং ৰিঞ্ঞূ পরক্কমেয্যাতি.

অথস্স অমিত্তলক্খণং কথেন্তো আহ –

১২২.

‘‘ন নং উম্হযতে দিস্ৰা, ন চ নং পটিনন্দতি;

চক্খূনি চস্স ন দদাতি, পটিলোমঞ্চ ৰত্ততি.

১২৩.

‘‘অমিত্তে তস্স ভজতি, মিত্তে তস্স ন সেৰতি;

ৰণ্ণকামে নিৰারেতি, অক্কোসন্তে পসংসতি.

১২৪.

‘‘গুয্হঞ্চ তস্স নক্খাতি, তস্স গুয্হং ন গূহতি;

কম্মং তস্স ন ৰণ্ণেতি, পঞ্ঞস্স নপ্পসংসতি.

১২৫.

‘‘অভৰে নন্দতি তস্স, ভৰে তস্স ন নন্দতি;

অচ্ছেরং ভোজনং লদ্ধা, তস্স নুপ্পজ্জতে সতি;

ততো নং নানুকম্পতি, অহো সোপি লভেয্যিতো.

১২৬.

‘‘ইচ্চেতে সোল়সাকারা, অমিত্তস্মিং পতিট্ঠিতা;

যেহি অমিত্তং জানেয্য, দিস্ৰা সুত্ৰা চ পণ্ডিতো’’তি.

মহাসত্তো ইমা পঞ্চ গাথা ৰত্ৰান পুন –

১২৭.

‘‘কানি কম্মানি কুব্বানং, কথং ৰিঞ্ঞূ পরক্কমে;

মিত্তং জানেয্য মেধাৰী, দিস্ৰা সুত্ৰা চ পণ্ডিতো’’তি. –

ইমায গাথায মিত্তলক্খণং পুট্ঠো সেসগাথা অভাসি –

১২৮.

‘‘পৰুত্থং তস্স সরতি, আগতং অভিনন্দতি;

ততো কেলাযিতো হোতি, ৰাচায পটিনন্দতি.

১২৯.

‘‘মিত্তে তস্সেৰ ভজতি, অমিত্তে তস্স ন সেৰতি;

অক্কোসন্তে নিৰারেতি, ৰণ্ণকামে পসংসতি.

১৩০.

‘‘গুয্হঞ্চ তস্স অক্খাতি, তস্স গুয্হঞ্চ গূহতি;

কম্মঞ্চ তস্স ৰণ্ণেতি, পঞ্ঞং তস্স পসংসতি.

১৩১.

‘‘ভৰে চ নন্দতি তস্স, অভৰে তস্স ন নন্দতি;

অচ্ছেরং ভোজনং লদ্ধা, তস্স উপ্পজ্জতে সতি;

ততো নং অনুকম্পতি, অহো সোপি লভেয্যিতো.

১৩২.

‘‘ইচ্চেতে সোল়সাকারা, মিত্তস্মিং সুপ্পতিট্ঠিতা;

যেহি মিত্তঞ্চ জানেয্য, দিস্ৰা সুত্ৰা চ পণ্ডিতো’’তি.

তত্থ ন নং উম্হযতে দিস্ৰাতি তং মিত্তং মিত্তপতিরূপকো দিস্ৰা সিতং ন করোতি, পহট্ঠাকারং ন দস্সেতি. ন চ নং পটিনন্দতীতি তস্স কথং পগ্গণ্হন্তো ন পটিনন্দতি ন তুস্সতি. চক্খূনি চস্স ন দদাতীতি ওলোকেন্তং ন ওলোকেতি. পটিলোমঞ্চাতি তস্স কথং পটিপ্ফরতি পটিসত্তু হোতি. ৰণ্ণকামেতি তস্স ৰণ্ণং ভণন্তে. নক্খাতীতি অত্তনো গুয্হং তস্স ন আচিক্খতি. কম্মং তস্সাতি তেন কতকম্মং ন ৰণ্ণযতি. পঞ্ঞস্সাতি অস্স পঞ্ঞং নপ্পসংসতি, ঞাণসম্পদং ন পসংসতি. অভৰেতি অৰড্ঢিযং. তস্স নুপ্পজ্জতে সতীতি তস্স মিত্তপতিরূপকস্স ‘‘মম মিত্তস্সপি ইতো দস্সামী’’তি সতি ন উপ্পজ্জতি. নানুকম্পতীতি মুদুচিত্তেন ন চিন্তেতি. লভেয্যিতোতি লভেয্য ইতো. আকারাতি কারণানি. পৰুত্থন্তি ৰিদেসগতং. কেলাযিতোতি কেলাযতি মমাযতি পত্থেতি পিহেতি ইচ্ছতীতি অত্থো. ৰাচাযাতি মধুরৰচনেন তং সমুদাচরন্তো পটিনন্দতি তুস্সতি. সেসং ৰুত্তপটিপক্খনযেন ৰেদিতব্বং. রাজা মহাসত্তস্স কথায অত্তমনো হুত্ৰা তস্স মহন্তং যসং অদাসি.

সত্থা ইমং ধম্মদেসনং আহরিত্ৰা ‘‘এৰং, মহারাজ, পুব্বেপেস পঞ্হো সমুট্ঠহি, পণ্ডিতাৰ নং কথযিংসু, ইমেহি দ্ৰত্তিংসায আকারেহি মিত্তামিত্তো জানিতব্বো’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, পণ্ডিতামচ্চো পন অহমেৰ অহোসি’’ন্তি.

মিত্তামিত্তজাতকৰণ্ণনা দসমা.

জাতকুদ্দানং –

কুণালং ভদ্দসালঞ্চ, সমুদ্দৰাণিজ পণ্ডিতং;

জনসন্ধং মহাকণ্হং, কোসিযং সিরিমন্তকং.

পদুমং মিত্তামিত্তঞ্চ, ইচ্চেতে দস জাতকে;

সঙ্গাযিংসু মহাথেরা, দ্ৰাদসম্হি নিপাতকে.

দ্ৰাদসকনিপাতৰণ্ণনা নিট্ঠিতা.

১৩. তেরসকনিপাতো

[৪৭৪] ১. অম্বজাতকৰণ্ণনা

অহাসি মে অম্বফলানি পুব্বেতি ইদং সত্থা জেতৰনে ৰিহরন্তো দেৰদত্তং আরব্ভ কথেসি. দেৰদত্তো হি ‘‘অহং বুদ্ধো ভৰিস্সামি, ময্হং সমণো গোতমো নেৰ আচরিযো ন উপজ্ঝাযো’’তি আচরিযং পচ্চক্খায ঝানপরিহীনো সঙ্ঘং ভিন্দিত্ৰা অনুপুব্বেন সাৰত্থিং আগচ্ছন্তো বহিজেতৰনে পথৰিযা ৰিৰরে দিন্নে অৰীচিং পাৰিসি. তদা ভিক্খূ ধম্মসভাযং কথং সমুট্ঠাপেসুং ‘‘আৰুসো, দেৰদত্তো আচরিযং পচ্চক্খায মহাৰিনাসং পত্তো, অৰীচিমহানিরযে নিব্বত্তো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি দেৰদত্তো আচরিযং পচ্চক্খায মহাৰিনাসং পত্তোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে তস্স পুরোহিতকুলং অহিৰাতরোগেন ৰিনস্সি. একোৰ পুত্তো ভিত্তিং ভিন্দিত্ৰা পলাতো. সো তক্কসিলং গন্ত্ৰা দিসাপামোক্খস্সাচরিযস্স সন্তিকে তযো ৰেদে চ অৰসেসসিপ্পানি চ উগ্গহেত্ৰা আচরিযং ৰন্দিত্ৰা নিক্খন্তো ‘‘দেসচারিত্তং জানিস্সামী’’তি চরন্তো একং পচ্চন্তনগরং পাপুণি. তং নিস্সায মহাচণ্ডালগামকো অহোসি. তদা বোধিসত্তো তস্মিং গামে পটিৰসতি, পণ্ডিতো ব্যত্তো অকালে ফলং গণ্হাপনমন্তং জানাতি. সো পাতোৰ ৰুট্ঠায কাজং আদায ততো গামা নিক্খিমিত্ৰা অরঞ্ঞে একং অম্বরুক্খং উপসঙ্কমিত্ৰা সত্তপদমত্থকে ঠিতো তং মন্তং পরিৰত্তেত্ৰা অম্বরুক্খং একেন উদকপসতেন পহরতি. রুক্খতো তঙ্খণঞ্ঞেৰ পুরাণপণ্ণানি পতন্তি, নৰানি উট্ঠহন্তি, পুপ্ফানি পুপ্ফিত্ৰা পতন্তি, অম্বফলানি উট্ঠায মুহুত্তেনেৰ পচ্চিত্ৰা মধুরানি ওজৰন্তানি দিব্বরসসদিসানি হুত্ৰা রুক্খতো পতন্তি. মহাসত্তো তানি উচ্চিনিত্ৰা যাৰদত্থং খাদিত্ৰা কাজং পূরাপেত্ৰা গেহং গন্ত্ৰা তানি ৰিক্কিণিত্ৰা পুত্তদারং পোসেসি.

সো ব্রাহ্মণকুমারো মহাসত্তং অকালে অম্বপক্কানি আহরিত্ৰা ৰিক্কিণন্তং দিস্ৰা ‘‘নিস্সংসযেন তেহি মন্তবলেন উপ্পন্নেহি ভৰিতব্বং, ইমং পুরিসং নিস্সায ইদং অনগ্ঘমন্তং লভিস্সামী’’তি চিন্তেত্ৰা মহাসত্তস্স অম্বানি আহরণনিযামং পরিগ্গণ্হন্তো তথতো ঞত্ৰা তস্মিং অরঞ্ঞতো অনাগতেযেৰ তস্স গেহং গন্ত্ৰা অজানন্তো ৰিয হুত্ৰা তস্স ভরিযং ‘‘কুহিং অয্যো, আচরিযো’’তি পুচ্ছিত্ৰা ‘‘অরঞ্ঞং গতো’’তি ৰুত্তে তং আগতং আগমযমানোৰ ঠত্ৰা আগচ্ছন্তং দিস্ৰা হত্থতো পচ্ছিং গহেত্ৰা আহরিত্ৰা গেহে ঠপেসি. মহাসত্তো তং ওলোকেত্ৰা ভরিযং আহ – ‘‘ভদ্দে, অযং মাণৰো মন্তত্থায আগতো, তস্স হত্থে মন্তো নস্সতি, অসপ্পুরিসো এসো’’তি. মাণৰোপি ‘‘অহং ইমং মন্তং আচরিযস্স উপকারকো হুত্ৰা লভিস্সামী’’তি চিন্তেত্ৰা ততো পট্ঠায তস্স গেহে সব্বকিচ্চানি করোতি. দারূনি আহরতি, ৰীহিং কোট্টেতি, ভত্তং পচতি, দন্তকট্ঠমুখধোৰনাদীনি দেতি, পাদং ধোৰতি.

একদিৰসং মহাসত্তেন ‘‘তাত মাণৰ, মঞ্চপাদানং মে উপধানং দেহী’’তি ৰুত্তে অঞ্ঞং অপস্সিত্ৰা সব্বরত্তিং ঊরুম্হি ঠপেত্ৰা নিসীদি. অপরভাগে মহাসত্তস্স ভরিযা পুত্তং ৰিজাযি. তস্সা পসূতিকালে পরিকম্মং সব্বমকাসি. সা একদিৰসং মহাসত্তং আহ ‘‘সামি, অযং মাণৰো জাতিসম্পন্নো হুত্ৰা মন্তত্থায অম্হাকং ৰেয্যাৰচ্চং করোতি, এতস্স হত্থে মন্তো তিট্ঠতু ৰা মা ৰা, দেথ তস্স মন্ত’’ন্তি. সো ‘‘সাধূ’’তি সম্পটিচ্ছিত্ৰা তস্স মন্তং দত্ৰা এৰমাহ – ‘‘তাত, অনগ্ঘোযং মন্তো, তৰ ইমং নিস্সায মহালাভসক্কারো ভৰিস্সতি, রঞ্ঞা ৰা রাজমহামত্তেন ৰা ‘কো তে আচরিযো’তি পুট্ঠকালে মা মং নিগূহিত্থো, সচে হি ‘চণ্ডালস্স মে সন্তিকা মন্তো গহিতো’তি লজ্জন্তো ‘ব্রাহ্মণমহাসালো মে আচরিযো’তি কথেস্সসি, ইমস্স মন্তস্স ফলং ন লভিস্সসী’’তি. সো ‘‘কিং কারণা তং নিগূহিস্সামি, কেনচি পুট্ঠকালে তুম্হেযেৰ কথেস্সামী’’তি ৰত্ৰা তং ৰন্দিত্ৰা চণ্ডালগামতো নিক্খমিত্ৰা মন্তং ৰীমংসিত্ৰা অনুপুব্বেন বারাণসিং পত্ৰা অম্বানি ৰিক্কিণিত্ৰা বহুং ধনং লভি.

অথেকদিৰসং উয্যানপালো তস্স হত্থতো অম্বং কিণিত্ৰা রঞ্ঞো অদাসি. রাজা তং পরিভুঞ্জিত্ৰা ‘‘কুতো সম্ম, তযা এৰরূপং অম্বং লদ্ধ’’ন্তি পুচ্ছি. দেৰ, একো মাণৰো অকালঅম্বফলানি আনেত্ৰা ৰিক্কিণাতি, ততো মে গহিতন্তি. তেন হি ‘‘ইতো পট্ঠায ইধেৰ অম্বানি আহরতূ’’তি নং ৰদেহীতি. সো তথা অকাসি. মাণৰোপি ততো পট্ঠায অম্বানি রাজকুলং হরতি. অথ রঞ্ঞা ‘‘উপট্ঠহ ম’’ন্তি ৰুত্তে রাজানং উপট্ঠহন্তো বহুং ধনং লভিত্ৰা অনুক্কমেন ৰিস্সাসিকো জাতো. অথ নং একদিৰসং রাজা পুচ্ছি ‘‘মাণৰ, কুতো অকালে এৰং ৰণ্ণগন্ধরসসম্পন্নানি অম্বানি লভসি, কিং তে নাগো ৰা সুপণ্ণো ৰা দেৰো ৰা কোচি দেতি, উদাহু মন্তবলং এত’’ন্তি? ‘‘ন মে মহারাজ, কোচি দেতি, অনগ্ঘো পন মে মন্তো অত্থি, তস্সেৰ বল’’ন্তি. ‘‘তেন হি মযম্পি তে একদিৰসং মন্তবলং দট্ঠুকামা’’তি. ‘‘সাধু, দেৰ, দস্সেস্সামী’’তি. রাজা পুনদিৰসে তেন সদ্ধিং উয্যানং গন্ত্ৰা ‘‘দস্সেহী’’তি আহ. সো ‘‘সাধূ’’তি অম্বরুক্খং উপগন্ত্ৰা সত্তপদমত্থকে ঠিতো মন্তং পরিৰত্তেত্ৰা রুক্খং উদকেন পহরি. তঙ্খণঞ্ঞেৰ অম্বরুক্খো হেট্ঠা ৰুত্তনিযামেনেৰ ফলং গহেত্ৰা মহামেঘো ৰিয অম্বৰস্সং ৰস্সি. মহাজনো সাধুকারং অদাসি, চেলুক্খেপা পৰত্তিংসু.

রাজা অম্বফলানি খাদিত্ৰা তস্স বহুং ধনং দত্ৰা ‘‘মাণৰক, এৰরূপো তে অচ্ছরিযমন্তো কস্স সন্তিকে গহিতো’’তি পুচ্ছি. মাণৰো ‘‘সচাহং ‘চণ্ডালস্স সন্তিকে’তি ৰক্খামি, লজ্জিতব্বকং ভৰিস্সতি, মঞ্চ গরহিস্সন্তি, মন্তো খো পন মে পগুণো, ইদানি ন নস্সিস্সতি, দিসাপামোক্খং আচরিযং অপদিসামী’’তি চিন্তেত্ৰা মুসাৰাদং কত্ৰা ‘‘তক্কসিলাযং দিসাপামোক্খাচরিযস্স সন্তিকে গহিতো মে’’তি ৰদন্তো আচরিযং পচ্চক্খাসি. তঙ্খণঞ্ঞেৰ মন্তো অন্তরধাযি. রাজা সোমনস্সজাতো তং আদায নগরং পৰিসিত্ৰা পুনদিৰসে ‘‘অম্বানি খাদিস্সামী’’তি উয্যানং গন্ত্ৰা মঙ্গলসিলাপট্টে নিসীদিত্ৰা মাণৰ, অম্বানি আহরাতি আহ. সো ‘‘সাধূ’’তি অম্বং উপগন্ত্ৰা সত্তপদমত্থকে ঠিতো ‘‘মন্তং পরিৰত্তেস্সামী’’তি মন্তে অনুপট্ঠহন্তে অন্তরহিতভাৰং ঞত্ৰা লজ্জিতো অট্ঠাসি. রাজা ‘‘অযং পুব্বে পরিসমজ্ঝেযেৰ অম্বানি আহরিত্ৰা অম্হাকং দেতি, ঘনমেঘৰস্সং ৰিয অম্বৰস্সং ৰস্সাপেতি, ইদানি থদ্ধো ৰিয ঠিতো, কিং নু খো কারণ’’ন্তি চিন্তেত্ৰা তং পুচ্ছন্তো পঠমং গাথমাহ –

১.

‘‘অহাসি মে অম্বফলানি পুব্বে, অণূনি থূলানি চ ব্রহ্মচারি;

তেহেৰ মন্তেহি ন দানি তুয্হং, দুমপ্ফলা পাতুভৰন্তি ব্রহ্মে’’তি.

তত্থ অহাসীতি আহরি. দুমপ্ফলাতি রুক্খফলানি.

তং সুত্ৰা মাণৰো ‘‘সচে ‘অজ্জ অম্বফলং ন গণ্হামী’তি ৰক্খামি, রাজা মে কুজ্ঝিস্সতি, মুসাৰাদেন নং ৰঞ্চেস্সামী’’তি দুতিযং গাথমাহ –

২.

‘‘নক্খত্তযোগং পটিমানযামি, খণং মুহুত্তঞ্চ মন্তে ন পস্সং;

নক্খত্তযোগঞ্চ খণঞ্চ লদ্ধা, অদ্ধা হরিস্সম্বফলং পহূত’’ন্তি.

তত্থ অদ্ধাহরিস্সম্বফলন্তি অদ্ধা অম্বফলং আহরিস্সামি.

রাজা ‘‘অযং অঞ্ঞদা নক্খত্তযোগং ন ৰদতি, কিং নু খো এত’’ন্তি পুচ্ছন্তো দ্ৰে গাথা অভাসি –

৩.

‘‘নক্খত্তযোগং ন পুরে অভাণি, খণং মুহুত্তং ন পুরে অসংসি;

সযং হরী অম্বফলং পহূতং, ৰণ্ণেন গন্ধেন রসেনুপেতং.

৪.

‘‘মন্তাভিজপ্পেন পুরে হি তুয্হং, দুমপ্ফলা পাতুভৰন্তি ব্রহ্মে;

স্ৰাজ্জ ন পারেসি জপ্পম্পি মন্তং, অযং সো কো নাম তৰজ্জ ধম্মো’’তি.

তত্থ ন পারেসীতি ন সক্কোসি. জপ্পম্পীতি জপ্পন্তোপি পরিৰত্তেন্তোপি. অযং সোতি অযমেৰ সো তৰ সভাৰো অজ্জ কো নাম জাতোতি.

তং সুত্ৰা মাণৰো ‘‘ন সক্কা রাজানং মুসাৰাদেন ৰঞ্চেতুং, সচেপি মে সভাৰে কথিতে আণং করেয্য, করোতু, সভাৰমেৰ কথেস্সামী’’তি চিন্তেত্ৰা দ্ৰে গাথা অভাসি –

৫.

‘‘চণ্ডালপুত্তো মম সম্পদাসি, ধম্মেন মন্তে পকতিঞ্চ সংসি;

মা চস্সু মে পুচ্ছিতো নামগোত্তং, গুয্হিত্থো অত্থং ৰিজহেয্য মন্তো.

৬.

‘‘সোহং জনিন্দেন জনম্হি পুট্ঠো, মক্খাভিভূতো অলিকং অভাণিং;

‘মন্তা ইমে ব্রাহ্মণস্সা’তি মিচ্ছা, পহীনমন্তো কপণো রুদামী’’তি.

তত্থ ধম্মেনাতি সমেন কারণেন অপ্পটিচ্ছাদেত্ৰাৰ অদাসি. পকতিঞ্চ সংসীতি ‘‘মা মে পুচ্ছিতো নামগোত্তং গুয্হিত্থো, সচে গূহসি, মন্তা তে নস্সিস্সন্তী’’তি তেসং নস্সনপকতিঞ্চ ময্হং সংসি. ব্রাহ্মণস্সাতি মিচ্ছাতি ‘‘ব্রাহ্মণস্স সন্তিকে মযা ইমে মন্তা গহিতা’’তি মিচ্ছায অভণিং, তেন মে তে মন্তা নট্ঠা, স্ৰাহং পহীনমন্তো ইদানি কপণো রুদামীতি.

তং সুত্ৰা রাজা ‘‘অযং পাপধম্মো এৰরূপং রতনমন্তং ন ওলোকেসি, এৰরূপস্মিঞ্হি উত্তমরতনমন্তে লদ্ধে জাতি কিং করিস্সতী’’তি কুজ্ঝিত্ৰা তস্স গরহন্তো –

৭.

‘‘এরণ্ডা পুচিমন্দা ৰা, অথ ৰা পালিভদ্দকা;

মধুং মধুত্থিকো ৰিন্দে, সো হি তস্স দুমুত্তমো.

৮.

‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

যম্হা ধম্মং ৰিজানেয্য, সো হি তস্স নরুত্তমো.

৯.

‘‘ইমস্স দণ্ডঞ্চ ৰধঞ্চ দত্ৰা, গলে গহেত্ৰা খলযাথ জম্মং;

যো উত্তমত্থং কসিরেন লদ্ধং, মানাতিমানেন ৰিনাসযিত্থা’’তি. –

ইমা গাথা আহ.

তত্থ মধুত্থিকোতি মধুঅত্থিকো পুরিসো অরঞ্ঞে মধুং ওলোকেন্তো এতেসং রুক্খানং যতো মধুং লভতি, সোৰ দুমো তস্স দুমুত্তমো নাম. তথেৰ খত্তিযাদীসু যম্হা পুরিসা ধম্মং কারণং যুত্তং অত্থং ৰিজানেয্য, সোৰ তস্স উত্তমো নরো নাম. ইমস্স দণ্ডঞ্চাতি ইমস্স পাপধম্মস্স সব্বস্সহরণদণ্ডঞ্চ ৰেল়ুপেসিকাদীহি পিট্ঠিচম্মং উপ্পাটেত্ৰা ৰধঞ্চ দত্ৰা ইমং জম্মং গলে গহেত্ৰা খলযাথ, খলিকারত্তং পাপেত্ৰা নিদ্ধমথ নিক্কড্ঢথ, কিং ইমিনা ইধ ৰসন্তেনাতি.

রাজপুরিসা তথা কত্ৰা ‘‘তৰাচরিযস্স সন্তিকং গন্ত্ৰা তং আরাধেত্ৰাৰ সচে পুন মন্তে লভিস্সসি, ইধ আগচ্ছেয্যাসি, নো চে, ইমং দিসং মা ওলোকেয্যাসী’’তি তং নিব্বিসযমকংসু. সো অনাথো হুত্ৰা ‘‘ঠপেত্ৰা আচরিযং ন মে অঞ্ঞং পটিসরণং অত্থি, তস্সেৰ সন্তিকং গন্ত্ৰা তং আরাধেত্ৰা পুন মন্তং যাচিস্সামী’’তি রোদন্তো তং গামং অগমাসি. অথ নং আগচ্ছন্তং দিস্ৰা মহাসত্তো ভরিযং আমন্তেত্ৰা ‘‘ভদ্দে, পস্স তং পাপধম্মং পরিহীনমন্তং পুন আগচ্ছন্ত’’ন্তি আহ. সো মহাসত্তং উপসঙ্কমিত্ৰা ৰন্দিত্ৰা একমন্তং নিসিন্নো ‘‘কিংকারণা আগতোসী’’তি পুট্ঠো ‘‘আচরিয, মুসাৰাদং কত্ৰা আচরিযং পচ্চক্খিত্ৰা মহাৰিনাসং পত্তোম্হী’’তি ৰত্ৰা অচ্চযং দস্সেত্ৰা পুন মন্তে যাচন্তো –

১০.

‘‘যথা সমং মঞ্ঞমানো পতেয্য, সোব্ভং গুহং নরকং পূতিপাদং;

রজ্জূতি ৰা অক্কমে কণ্হসপ্পং, অন্ধো যথা জোতিমধিট্ঠহেয্য;

এৰম্পি মং তং খলিতং সপঞ্ঞ, পহীনমন্তস্স পুনপ্পদাহী’’তি. – গাথমাহ;

তত্থ যথা সমন্তি যথা পুরিসো ইদং সমং ঠানন্তি মঞ্ঞমানো সোব্ভং ৰা গুহং ৰা ভূমিযা ফলিতট্ঠানসঙ্খাতং নরকং ৰা পূতিপাদং ৰা পতেয্য. পূতিপাদোতি হিমৰন্তপদেসে মহারুক্খে সুস্সিত্ৰা মতে তস্স মূলেসু পূতিকেসু জাতেসু তস্মিং ঠানে মহাআৰাটো হোতি, তস্স নামং. জোতিমধিট্ঠহেয্যাতি অগ্গিং অক্কমেয্য. এৰম্পীতি এৰং অহম্পি পঞ্ঞাচক্খুনো অভাৰা অন্ধো তুম্হাকং ৰিসেসং অজানন্তো তুম্হেসু খলিতো, তং মং খলিতং ৰিদিত্ৰা সপঞ্ঞ ঞাণসম্পন্ন পহীনমন্তস্স মম পুনপি দেথাতি.

অথ নং আচরিযো ‘‘তাত, কিং কথেসি, অন্ধো হি সঞ্ঞায দিন্নায সোব্ভাদীনি পরিহরতি, মযা পঠমমেৰ তৰ কথিতং, ইদানি কিমত্থং মম সন্তিকং আগতোসী’’তি ৰত্ৰা –

১১.

‘‘ধম্মেন মন্তং তৰ সম্পদাসিং, তুৰম্পি ধম্মেন পটিগ্গহেসি;

পকতিম্পি তে অত্তমনো অসংসিং, ধম্মে ঠিতং তং ন জহেয্য মন্তো.

১২.

‘‘যো বাল-মন্তং কসিরেন লদ্ধং, যং দুল্লভং অজ্জ মনুস্সলোকে;

কিঞ্চাপি লদ্ধা জীৰিতুং অপ্পপঞ্ঞো, ৰিনাসযী অলিকং ভাসমানো.

১৩.

‘‘বালস্স মূল়্হস্স অকতঞ্ঞুনো চ, মুসা ভণন্তস্স অসঞ্ঞতস্স;

মন্তে মযং তাদিসকে ন দেম, কুতো মন্তা গচ্ছ ন ময্হং রুচ্চসী’’তি. –

ইমা গাথা আহ.

তত্থ ধম্মেনাতি অহম্পি তৰ আচরিযভাগং হিরঞ্ঞং ৰা সুৰণ্ণং ৰা অগ্গহেত্ৰা ধম্মেনেৰ মন্তং সম্পদাসিং, ত্ৰম্পি কিঞ্চি অদত্ৰা ধম্মেন সমেনেৰ পটিগ্গহেসি. ধম্মে ঠিতন্তি আচরিযপূজকধম্মে ঠিতং. তাদিসকেতি তথারূপে অকালফলগণ্হাপকে মন্তে ন দেম, গচ্ছ ন মে রুচ্চসীতি.

সো এৰং আচরিযেন উয্যোজিতো ‘‘কিং ময্হং জীৰিতেনা’’তি অরঞ্ঞং পৰিসিত্ৰা অনাথমরণং মরি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো আচরিযং পচ্চক্খায মহাৰিনাসং পত্তো’’তি ৰত্ৰা জাতকং সমোধানেসি – ‘‘তদা অকতঞ্ঞূ মাণৰো দেৰদত্তো অহোসি, রাজা আনন্দো, চণ্ডালপুত্তো পন অহমেৰ অহোসি’’ন্তি.

অম্বজাতকৰণ্ণনা পঠমা.

[৪৭৫] ২. ফন্দনজাতকৰণ্ণনা

কুঠারিহত্থো পুরিসোতি ইদং সত্থা রোহিণীনদীতীরে ৰিহরন্তো ঞাতকানং কলহং আরব্ভ কথেসি. ৰত্থু পন কুণালজাতকে (জা. ২.২১.কুণালজাতক) আৰি ভৰিস্সতি. তদা পন সত্থা ঞাতকে আমন্তেত্ৰা – মহারাজা, অতীতে বারাণসিযং ব্রহ্মদত্তে রজ্জং কারেন্তে বহিনগরে ৰড্ঢকিগামো অহোসি. তত্রেকো ব্রাহ্মণৰড্ঢকী অরঞ্ঞতো দারূনি আহরিত্ৰা রথং কত্ৰা জীৰিকং কপ্পেসি. তদা হিমৰন্তপদেসে মহাফন্দনরুক্খো অহোসি. একো কাল়সীহো গোচরং পরিযেসিত্ৰা আগন্ত্ৰা তস্স মূলে নিপজ্জি. অথস্স একদিৰসং ৰাতে পহরন্তে একো সুক্খদণ্ডকো পতিত্ৰা খন্ধে অৰত্থাসি. সো থোকং খন্ধেন রুজন্তেন ভীততসিতো উট্ঠায পক্খন্দিত্ৰা পুন নিৰত্তো আগতমগ্গং ওলোকেন্তো কিঞ্চি অদিস্ৰা ‘‘অঞ্ঞো মং সীহো ৰা ব্যগ্ঘো ৰা অনুবন্ধন্তো নত্থি, ইমস্মিং পন রুক্খে নিব্বত্তদেৰতা মং এত্থ নিপজ্জন্তং ন সহতি মঞ্ঞে, হোতু জানিস্সামী’’তি অট্ঠানে কোপং বন্ধিত্ৰা রুক্খং পহরিত্ৰা ‘‘নেৰ তৰ রুক্খস্স পত্তং খাদামি, ন সাখং ভঞ্জামি, ইধ অঞ্ঞে মিগে ৰসন্তে সহসি, মং ন সহসি, কো ময্হং দোসো অত্থি, কতিপাহং আগমেহি, সমূলং তে রুক্খং উপ্পাটেত্ৰা খণ্ডাখণ্ডিকং ছেদাপেস্সামী’’তি রুক্খদেৰতং তজ্জেত্ৰা একং পুরিসং উপধারেন্তো ৰিচরি. তদা সো ব্রাহ্মণৰড্ঢকী দ্ৰে তযো মনুস্সে আদায রথদারূনং অত্থায যানকেন তং পদেসং গন্ত্ৰা একস্মিং ঠানে যানকং ঠপেত্ৰা ৰাসিফরসুহত্থো রুক্খে উপধারেন্তো ফন্দনসমীপং অগমাসি. কাল়সীহো তং দিস্ৰা ‘‘অজ্জ, মযা পচ্চামিত্তস্স পিট্ঠিং দট্ঠুং ৰট্টতী’’তি গন্ত্ৰা রুক্খমূলে অট্ঠাসি. ৰড্ঢকী চ ইতো চিতো ওলোকেত্ৰা ফন্দনসমীপেন পাযাসি. সো ‘‘যাৰ এসো নাতিক্কমতি, তাৰদেৰস্স কথেস্সামী’’তি চিন্তেত্ৰা পঠমং গাথমাহ –

১৪.

‘‘কুঠারিহত্থো পুরিসো, ৰনমোগয্হ তিট্ঠসি;

পুট্ঠো মে সম্ম অক্খাহি, কিং দারুং ছেতুমিচ্ছসী’’তি.

তত্থ পুরিসোতি ত্ৰং কুঠারিহত্থো একো পুরিসো ইমং ৰনং ওগয্হ তিট্ঠসীতি.

সো তস্স ৰচনং সুত্ৰা ‘‘অচ্ছরিযং ৰত ভো, ন ৰত মে ইতো পুব্বে মিগো মনুস্সৰাচং ভাসন্তো দিট্ঠপুব্বো, এস রথানুচ্ছৰিকং দারুং জানিস্সতি, পুচ্ছিস্সামি ন’’ন্তি চিন্তেত্ৰা দুতিযং গাথমাহ –

১৫.

‘‘ইস্সো ৰনানি চরসি, সমানি ৰিসমানি চ;

পুট্ঠো মে সম্ম অক্খাহি, কিং দারুং নেমিযা দল়্হ’’ন্তি.

তত্থ ইস্সোতি ত্ৰম্পি একো কাল়সীহো ৰনানি চরসি, ত্ৰং রথানুচ্ছৰিকং দারুং জানিস্সসীতি.

তং সুত্ৰা কাল়সীহো ‘‘ইদানি মে মনোরথো মত্থকং পাপুণিস্সতী’’তি চিন্তেত্ৰা ততিযং গাথমাহ –

১৬.

‘‘নেৰ সালো ন খদিরো, নাস্সকণ্ণো কুতো ধৰো;

রুক্খো চ ফন্দনো নাম, তং দারুং নেমিযা দল়্হ’’ন্তি.

সো তং সুত্ৰা সোমনস্সজাতো ‘‘সুদিৰসেন ৰতম্হি অজ্জ অরঞ্ঞং পৰিট্ঠো, তিরচ্ছানগতো মে রথানুচ্ছৰিকং দারুং আচিক্খতি, অহো সাধূ’’তি পুচ্ছন্তো চতুত্থং গাথমাহ –

১৭.

‘‘কীদিসানিস্স পত্তানি, খন্ধো ৰা পন কীদিসো;

পুট্ঠো মে সম্ম অক্খাহি, যথা জানেমু ফন্দন’’ন্তি.

অথস্স সো আচিক্খন্তো দ্ৰে গাথা অভাসি –

১৮.

‘‘যস্স সাখা পলম্বন্তি, নমন্তি ন চ ভঞ্জরে;

সো রুক্খো ফন্দনো নাম, যস্স মূলে অহং ঠিতো.

১৯.

‘‘অরানং চক্কনাভীনং, ঈসানেমিরথস্স চ;

সব্বস্স তে কম্মনিযো, অযং হেস্সতি ফন্দনো’’তি.

তত্থ ‘‘অরান’’ন্তি ইদং সো ‘‘কদাচেস ইমং রুক্খং ন গণ্হেয্য, গুণম্পিস্স কথেস্সামী’’তি চিন্তেত্ৰা এৰমাহ. তত্থ ঈসানেমিরথস্স চাতি ঈসায চ নেমিযা চ সেসস্স চ রথস্স সব্বস্স তে এস কম্মনিযো কম্মক্খমো ভৰিস্সতীতি.

সো এৰং আচিক্খিত্ৰা তুট্ঠমানসো একমন্তে ৰিচরি, ৰড্ঢকীপি রুক্খং ছিন্দিতুং আরভি. রুক্খদেৰতা চিন্তেসি ‘‘মযা এতস্স উপরি ন কিঞ্চি পাতিতং, অযং অট্ঠানে আঘাতং বন্ধিত্ৰা মম ৰিমানং নাসেতি, অহঞ্চ ৰিনস্সিস্সামি, একেনুপাযেন ইমঞ্চ ইস্সং ৰিনাসেস্সামী’’তি. সা ৰনকম্মিকপুরিসো ৰিয হুত্ৰা তস্স সন্তিকং আগন্ত্ৰা পুচ্ছি ‘‘ভো পুরিস মনাপো তে রুক্খো লদ্ধো, ইমং ছিন্দিত্ৰা কিং করিস্সসী’’তি? ‘‘রথনেমিং করিস্সামী’’তি. ‘‘ইমিনা রুক্খেন রথো ভৰিস্সতী’’তি কেন তে অক্খাতন্তি. ‘‘একেন কাল়সীহেনা’’তি. ‘‘সাধু সুট্ঠু তেন অক্খাতং, ইমিনা রুক্খেন রথো সুন্দরো ভৰিস্সতি, কাল়সীহস্স গলচম্মং উপ্পাটেত্ৰা চতুরঙ্গুলমত্তে ঠানে অযপট্টেন ৰিয নেমিমণ্ডলে পরিক্খিত্তে নেমি চ থিরা ভৰিস্সতি, বহুঞ্চ ধনং লভিস্সসী’’তি. ‘‘কাল়সীহচম্মং কুতো লচ্ছামী’’তি? ‘‘ত্ৰং বালকোসি, অযং তৰ রুক্খো ৰনে ঠিতো ন পলাযতি, ত্ৰং যেন তে রুক্খো অক্খাতো, তস্স সন্তিকং গন্ত্ৰা ‘সামি তযা দস্সিতরুক্খং কতরট্ঠানে ছিন্দামী’তি ৰঞ্চেত্ৰা আনেহি, অথ নং নিরাসঙ্কং ‘ইধ চ এত্থ চ ছিন্দা’তি মুখতুণ্ডং পসারেত্ৰা আচিক্খন্তং তিখিণেন মহাফরসুনা কোট্টেত্ৰা জীৰিতক্খযং পাপেত্ৰা চম্মং আদায ৰরমংসং খাদিত্ৰা রুক্খং ছিন্দা’’তি ৰেরং অপ্পেসি. তমত্থং পকাসেন্তো সত্থা ইমা গাথা আহ –

২০.

‘‘ইতি ফন্দনরুক্খোপি, তাৰদে অজ্ঝভাসথ;

ময্হম্পি ৰচনং অত্থি, ভারদ্ৰাজ সুণোহি মে.

২১.

‘‘ইস্সস্স উপক্খন্ধম্হা, উক্কচ্চ চতুরঙ্গুলং;

তেন নেমিং পসারেসি, এৰং দল়্হতরং সিযা.

২২.

‘‘ইতি ফন্দনরুক্খোপি, ৰেরং অপ্পেসি তাৰদে;

জাতানঞ্চ অজাতানং, ইস্সানং দুক্খমাৰহী’’তি.

তত্থ ভারদ্ৰাজাতি তং গোত্তেন আলপতি. উপক্খন্ধম্হাতি খন্ধতো. উক্কচ্চাতি উক্কন্তিত্ৰা.

ৰড্ঢকী রুক্খদেৰতায ৰচনং সুত্ৰা ‘‘অহো অজ্জ ময্হং মঙ্গলদিৰসো’’তি কাল়সীহং ঘাতেত্ৰা রুক্খং ছেত্ৰা পক্কামি. তমত্থং পকাসেন্তো সত্থা আহ –

২৩.

‘‘ইচ্চেৰং ফন্দনো ইস্সং, ইস্সো চ পন ফন্দনং;

অঞ্ঞমঞ্ঞং ৰিৰাদেন, অঞ্ঞমঞ্ঞমঘাতযুং.

২৪.

‘‘এৰমেৰ মনুস্সানং, ৰিৰাদো যত্থ জাযতি;

মযূরনচ্চং নচ্চন্তি, যথা তে ইস্সফন্দনা.

২৫.

‘‘তং ৰো ৰদামি ভদ্দং ৰো, যাৰন্তেত্থ সমাগতা;

সম্মোদথ মা ৰিৰদথ, মা হোথ ইস্সফন্দনা.

২৬.

‘‘সামগ্গিমেৰ সিক্খেথ, বুদ্ধেহেতং পসংসিতং;

সামগ্গিরতো ধম্মট্ঠো, যোগক্খেমা ন ধংসতী’’তি.

তত্থ অঘাতযুন্তি ঘাতাপেসুং. মযূরনচ্চং নচ্চন্তীতি মহারাজা যত্থ হি মনুস্সানং ৰিৰাদো হোতি, তত্থ যথা নাম মযূরা নচ্চন্তা পটিচ্ছাদেতব্বং রহস্সঙ্গং পাকটং করোন্তি, এৰং মনুস্সা অঞ্ঞমঞ্ঞস্স রন্ধং পকাসেন্তা মযূরনচ্চং নচ্চন্তি নাম. যথা তে ইস্সফন্দনা অঞ্ঞমঞ্ঞস্স রন্ধং পকাসেন্তা নচ্চিংসু নাম. তং ৰোতি তেন কারণেন তুম্হে ৰদামি. ভদ্দং ৰোতি ভদ্দং তুম্হাকং হোতু. যাৰন্তেত্থাতি যাৰন্তো এত্থ ইস্সফন্দনসদিসা মা অহুৰত্থ. সামগ্গিমেৰ সিক্খেথাতি সমগ্গভাৰমেৰ তুম্হে সিক্খথ, ইদং পঞ্ঞাৰুদ্ধেহি পণ্ডিতেহি পসংসিতং. ধম্মট্ঠোতি সুচরিতধম্মে ঠিতো. যোগক্খেমা ন ধংসতীতি যোগেহি খেমা নিব্বানা ন পরিহাযতীতি নিব্বানেন দেসনাকূটং গণ্হি. সক্যরাজানো ধম্মকথং সুত্ৰা সমগ্গা জাতা.

সত্থা ইমং ধম্মদেসনং আহরিত্ৰা জাতকং সমোধানেসি ‘‘তদা তং কারণং ৰিদিত্ৰা তস্মিং ৰনসণ্ডে নিৰুত্থদেৰতা অহমেৰ অহোসি’’ন্তি.

ফন্দনজাতকৰণ্ণনা দুতিযা.

[৪৭৬] ৩. জৰনহংসজাতকৰণ্ণনা

ইধেৰ হংস নিপতাতি ইদং সত্থা জেতৰনে ৰিহরন্তো দল়্হধম্মধনুগ্গহসুত্তন্তদেসনং (সং. নি. ২.২২৮) আরব্ভ কথেসি. ভগৰতা হি –

‘‘সেয্যথাপি, ভিক্খৰে, চত্তারো দল়্হধম্মা ধনুগ্গহা সুসিক্খিতা কতহত্থা কতূপাসনা চতুদ্দিসা ঠিতা অস্সু, অথ পুরিসো আগচ্ছেয্য ‘অহং ইমেসং চতুন্নং দল়্হধম্মানং ধনুগ্গহানং সুসিক্খিতানং কতহত্থানং কতূপাসনানং চতুদ্দিসা কণ্ডে খিত্তে অপতিট্ঠিতে পথৰিযং গহেত্ৰা আহরিস্সামী’তি. ‘‘তং কিং মঞ্ঞথ, ভিক্খৰে, ‘জৰনো পুরিসো পরমেন জৰেন সমন্নাগতো’তি অলং ৰচনাযা’’তি? ‘‘এৰং ভন্তে’’তি. যথা চ, ভিক্খৰে, তস্স পুরিসস্স জৰো, যথা চ চন্দিমসূরিযানং জৰো, ততো সীঘতরো. যথা চ, ভিক্খৰে, তস্স পুরিসস্স জৰো, যথা চ চন্দিমসূরিযানং জৰো, যথা চ যা দেৰতা চন্দিমসূরিযানং পুরতো ধাৰন্তি, তাসং দেৰতানং জৰো, ততো সীঘতরং আযুসঙ্খারা খীযন্তি, তস্মাতিহ, ভিক্খৰে, এৰং সিক্খিতব্বং ‘অপ্পমত্তা ৰিহরিস্সামা’তি. এৰঞ্হি ৰো, ভিক্খৰে, সিক্খিতব্ব’’ন্তি –

ইমস্স সুত্তস্স কথিতদিৰসতো দুতিযদিৰসে ভিক্খূ ধম্মসভাযং কথং সমুট্ঠাপেসুং ‘‘আৰুসো, সত্থা অত্তনো বুদ্ধৰিসযে ঠত্ৰা ইমেসং সত্তানং আযুসঙ্খারে ইত্তরে দুব্বলে কত্ৰা পরিদীপেন্তো পুথুজ্জনভিক্খূ অতিৰিয সন্তাসং পাপেসি, অহো বুদ্ধবলং নামা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘অনচ্ছরিযং, ভিক্খৰে, স্ৰাহং ইদানি সব্বঞ্ঞুতং পত্তো আযুসঙ্খারানং ইত্তরভাৰং দস্সেত্ৰা ভিক্খূ সংৰেজেত্ৰা ধম্মং দেসেমি, মযা হি পুব্বে অহেতুকহংসযোনিযং নিব্বত্তেনপি আযুসঙ্খারানং ইত্তরভাৰং দস্সেত্ৰা বারাণসিরাজানং আদিং কত্ৰা সকলরাজপরিসং সংৰেজেত্ৰা ধম্মো দেসিতো’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো জৰনহংসযোনিযং নিব্বত্তিত্ৰা নৰুতিহংসসহস্সপরিৰুতো চিত্তকূটে পটিৰসতি. সো একদিৰসং জম্বুদীপতলে একস্মিং সরে সপরিৰারো সযংজাতসালিং খাদিত্ৰা আকাসে সুৰণ্ণকিলঞ্জং পত্থরন্তো ৰিয মহন্তেন পরিৰারেন বারাণসিনগরস্স মত্থকেন মন্দমন্দায ৰিলাসগতিযা চিত্তকূটং গচ্ছতি. অথ নং বারাণসিরাজা দিস্ৰা ‘‘ইমিনাপি মাদিসেন রঞ্ঞা ভৰিতব্ব’’ন্তি অমচ্চানং ৰত্ৰা তস্মিং সিনেহং উপ্পাদেত্ৰা মালাগন্ধৰিলেপনং গহেত্ৰা মহাসত্তং ওলোকেত্ৰা সব্বতূরিযানি পগ্গণ্হাপেসি. মহাসত্তো অত্তনো সক্কারং করোন্তং দিস্ৰা হংসে পুচ্ছি ‘‘রাজা, মম এৰরূপং সক্কারং করোন্তো কিং পচ্চাসীসতী’’তি? ‘‘তুম্হেহি সদ্ধিং মিত্তভাৰং দেৰা’’তি. ‘‘তেন হি রঞ্ঞো অম্হেহি সদ্ধিং মিত্তভাৰো হোতূ’’তি রঞ্ঞা সদ্ধিং মিত্তভাৰং কত্ৰা পক্কামি. অথেকদিৰসং রঞ্ঞো উয্যানং গতকালে অনোতত্তদহং গন্ত্ৰা একেন পক্খেন উদকং, একেন চন্দনচুণ্ণং আদায আগন্ত্ৰা রাজানং তেন উদকেন ন্হাপেত্ৰা চন্দনচুণ্ণেন ওকিরিত্ৰা মহাজনস্স পস্সন্তস্সেৰ সপরিৰারো চিত্তকূটং অগমাসি. ততো পট্ঠায রাজা মহাসত্তং দট্ঠুকামো হুত্ৰা ‘‘সহাযো মে অজ্জ আগমিস্সতি, সহাযো মে অজ্জ আগমিস্সতী’’তি আগমনমগ্গং ওলোকেন্তো অচ্ছতি.

তদা মহাসত্তস্স কনিট্ঠা দ্ৰে হংসপোতকা ‘‘সূরিযেন সদ্ধিং জৰিস্সামা’’তি মন্তেত্ৰা মহাসত্তস্স আরোচেসুং ‘‘মযং সূরিযেন সদ্ধিং জৰিস্সামা’’তি. ‘‘তাতা, সূরিযজৰো নাম সীঘো, সূরিযেন সদ্ধিং জৰিতুং ন সক্খিস্সথ, অন্তরাৰ ৰিনস্সিস্সথ, মা গমিত্থা’’তি. তে দুতিযম্পি ততিযম্পি যাচিংসু, বোধিসত্তোপি তে যাৰততিযং ৰারেসিযেৰ. তে মানথদ্ধা অত্তনো বলং অজানন্তা মহাসত্তস্স অনাচিক্খিত্ৰাৰ ‘‘সূরিযেন সদ্ধিং জৰিস্সামা’’তি সূরিযে অনুগ্গতেযেৰ গন্ত্ৰা যুগন্ধরমত্থকে নিসীদিংসু. মহাসত্তো তে অদিস্ৰা ‘‘কহং নু খো গতা’’তি পুচ্ছিত্ৰা তং পৰত্তিং সুত্ৰা চিন্তেসি ‘‘তে সূরিযেন সদ্ধিং জৰিতুং ন সক্খিস্সন্তি, অন্তরাৰ ৰিনস্সিস্সন্তি, জীৰিতং তেসং দস্সামী’’তি. সোপি গন্ত্ৰা যুগন্ধরমত্থকেযেৰ নিসীদি. অথ উগ্গতে সূরিযমণ্ডলে হংসপোতকা উপ্পতিত্ৰা সূরিযেন সদ্ধিং পক্খন্দিংসু, মহাসত্তোপি তেহি সদ্ধিং পক্খন্দি. কনিট্ঠভাতিকো যাৰ পুব্বণ্হসমযা জৰিত্ৰা কিলমি, পক্খসন্ধীসু অগ্গিউট্ঠানকালো ৰিয অহোসি. সো বোধিসত্তস্স সঞ্ঞং অদাসি ‘‘ভাতিক, ন সক্কোমী’’তি. অথ নং মহাসত্তো ‘‘মা ভাযি, জীৰিতং তে দস্সামী’’তি পক্খপঞ্জরেন পরিক্খিপিত্ৰা অস্সাসেত্ৰা চিত্তকূটপব্বতং নেত্ৰা হংসানং মজ্ঝে ঠপেত্ৰা পুন পক্খন্দিত্ৰা সূরিযং পত্ৰা ইতরেন সদ্ধিং পাযাসি. সোপি যাৰ উপকট্ঠমজ্ঝন্হিকা সূরিযেন সদ্ধিং জৰিত্ৰা কিলমি, পক্খসন্ধীসু অগ্গিউট্ঠানকালো ৰিয অহোসি. তদা বোধিসত্তস্স সঞ্ঞং অদাসি ‘‘ভাতিক, ন সক্কোমী’’তি. তম্পি মহাসত্তো তথেৰ সমস্সাসেত্ৰা পক্খপঞ্জরেনাদায চিত্তকূটমেৰ অগমাসি. তস্মিং খণে সূরিযো নভমজ্ঝং পাপুণি.

অথ মহাসত্তো ‘‘মম অজ্জ সরীরবলং ৰীমংসিস্সামী’’তি চিন্তেত্ৰা একৰেগেন পক্খন্দিত্ৰা যুগন্ধরমত্থকে নিসীদিত্ৰা ততো উপ্পতিত্ৰা একৰেগেন সূরিযং পাপুণিত্ৰা কালেন পুরতো, কালেন পচ্ছতো জৰিত্ৰা চিন্তেসি ‘‘ময্হং সূরিযেন সদ্ধিং জৰনং নাম নিরত্থকং অযোনিসোমনসিকারসম্ভূতং, কিং মে ইমিনা, বারাণসিং গন্ত্ৰা মম সহাযকস্স রঞ্ঞো অত্থযুত্তং ধম্মযুত্তং কথং কথেস্সামী’’তি. সো নিৰত্তিত্ৰা সূরিযে নভমজ্ঝং অনতিক্কন্তেযেৰ সকলচক্কৰাল়গব্ভং অন্তন্তেন অনুসংযাযিত্ৰা ৰেগং পরিহাপেন্তো সকলজম্বুদীপং অন্তন্তেন অনুসংযাযিত্ৰা বারাণসিং পাপুণি. দ্ৰাদসযোজনিকং সকলনগরং হংসচ্ছন্নং ৰিয অহোসি, ছিদ্দং নাম ন পঞ্ঞাযি, অনুক্কমেন ৰেগে পরিহাযন্তে আকাসে ছিদ্দানি পঞ্ঞাযিংসু. মহাসত্তো ৰেগং পরিহাপেত্ৰা আকাসতো ওতরিত্ৰা সীহপঞ্জরস্স অভিমুখট্ঠানে অট্ঠাসি. রাজা ‘‘আগতো মে সহাযো’’তি সোমনস্সপ্পত্তো তস্স নিসীদনত্থায কঞ্চনপীঠং পঞ্ঞপেত্ৰা ‘‘সম্ম, পৰিস, ইধ নিসীদা’’তি ৰত্ৰা পঠমং গাথমাহ –

২৭.

‘‘ইধেৰ হংস নিপত, পিযং মে তৰ দস্সনং;

ইস্সরোসি অনুপ্পত্তো, যমিধত্থি পৰেদযা’’তি.

তত্থ ‘‘ইধা’’তি কঞ্চনপীঠং সন্ধাযাহ. নিপতাতি নিসীদ. ইস্সরোসীতি ত্ৰং ইমস্স ঠানস্স ইস্সরো সামি হুত্ৰা আগতোসীতি ৰদতি. যমিধত্থি পৰেদযাতি যং ইমস্মিং নিৰেসনে অত্থি, তং অপরিসঙ্কন্তো অম্হাকং কথেহীতি.

মহাসত্তো কঞ্চনপীঠে নিসীদি. রাজা সতপাকসহস্সপাকেহি তেলেহি তস্স পক্খন্তরানি মক্খেত্ৰা কঞ্চনতট্টকে মধুলাজে চ মধুরোদকঞ্চ সক্খরোদকঞ্চ দাপেত্ৰা মধুরপটিসন্থারং কত্ৰা ‘‘সম্ম, ত্ৰং এককোৰ আগতোসি, কুহিং অগমিত্থা’’তি পুচ্ছি. সো তং পৰত্তিং ৰিত্থারেন কথেসি. অথ নং রাজা আহ ‘‘সম্ম, মমপি সূরিযেন সদ্ধিং জৰিতৰেগং দস্সেহী’’তি. মহারাজ, ন সক্কা সো ৰেগো দস্সেতুন্তি. তেন হি মে সরিক্খকমত্তং দস্সেহীতি. সাধু, মহারাজ, সরিক্খকমত্তং দস্সেস্সামি, অক্খণৰেধী ধনুগ্গহে সন্নিপাতেহীতি. রাজা সন্নিপাতেসি. মহাসত্তো চত্তারো ধনুগ্গহে গহেত্ৰা নিৰেসনা ওরুয্হ রাজঙ্গণে সিলাথম্ভং নিখণাপেত্ৰা অত্তনো গীৰাযং ঘণ্টং বন্ধাপেত্ৰা সিলাথম্ভমত্থকে নিসীদিত্ৰা চত্তারো ধনুগ্গহে থম্ভং নিস্সায চতুদ্দিসাভিমুখে ঠপেত্ৰা ‘‘মহারাজ, ইমে চত্তারো জনা একপ্পহারেনেৰ চতুদ্দিসাভিমুখা চত্তারি কণ্ডানি খিপন্তু, তানি অহং পথৰিং অপ্পত্তানেৰ আহরিত্ৰা এতেসং পাদমূলে পাতেস্সামি. মম কণ্ডগহণত্থায গতভাৰং ঘণ্টসদ্দসঞ্ঞায জানেয্যাসি, মং পন ন পস্সিস্সসী’’তি ৰত্ৰা তেহি একপ্পহারেনেৰ খিত্তকণ্ডানি আহরিত্ৰা তেসং পাদমূলে পাতেত্ৰা সিলাথম্ভমত্থকে নিসিন্নমেৰ অত্তানং দস্সেত্ৰা ‘‘দিট্ঠো তে, মহারাজ, ময্হং ৰেগো’’তি ৰত্ৰা ‘‘মহারাজ, অযং ৰেগো ময্হং নেৰ উত্তমো, মজ্ঝিমো, পরিত্তো লামকৰেগো এস, এৰং সীঘো, মহারাজ, অম্হাকং ৰেগো’’তি আহ.

অথ নং রাজা পুচ্ছি ‘‘সম্ম, অত্থি পন তুম্হাকং ৰেগতো অঞ্ঞো সীঘতরো ৰেগো’’তি? ‘‘আম, মহারাজ, অম্হাকং উত্তমৰেগতোপি সতগুণেন সহস্সগুণেন সতসহস্সগুণেন ইমেসং সত্তানং আযুসঙ্খারা সীঘতরং খীযন্তি ভিজ্জন্তি, খযং গচ্ছন্তী’’তি খণিকনিরোধৰসেন রূপধম্মানং নিরোধং দস্সেতি, ততো নামধম্মানং. রাজা মহাসত্তস্স কথং সুত্ৰা মরণভযভীতো সতিং পচ্চুপট্ঠাপেতুং অসক্কোন্তো ভূমিযং পতি, মহাজনো উত্রাসং পত্তো অহোসি. রঞ্ঞো মুখং উদকেন সিঞ্চিত্ৰা সতিং লভাপেসি. অথ নং মহাসত্তো ‘‘মহারাজ, মা ভাযি, মরণস্সতিং ভাৰেহি, ধম্মং চরাহি, দানাদীনি পুঞ্ঞানি করোহি, অপ্পমত্তো হোহি, দেৰা’’তি ওৰদি. অথ রাজা ‘‘সামি, মযং তুম্হাদিসেন ঞাণবলসম্পন্নেন আচরিযেন ৰিনা ৰসিতুং ন সক্খিস্সাম, চিত্তকূটং অগন্ত্ৰা ময্হং ধম্মং দেসেন্তো ময্হং ওৰাদাচরিযো হুত্ৰা ইধেৰ ৰসাহী’’তি যাচন্তো দ্ৰে গাথা অভাসি –

২৮.

‘‘সৰনেন একস্স পিযা ভৰন্তি, দিস্ৰা পনেকস্স ৰিযেতি ছন্দো;

দিস্ৰা চ সুত্ৰা চ পিযা ভৰন্তি, কচ্চিন্নু মে পীযসি দস্সনেন.

২৯.

‘‘সৰনেন পিযো মেসি, ভিয্যো চাগম্ম দস্সনং;

এৰং পিযদস্সনো মে, ৰস হংস মমন্তিকে’’তি.

তাসং অত্থো – সম্ম হংসরাজ সৰনেন একস্স একচ্চে পিযা হোন্তি, ‘‘এৰং গুণো নামা’’তি সুত্ৰা সৰনেন পিযাযতি, একস্স পন একচ্চে দিস্ৰাৰ ছন্দো ৰিগচ্ছতি, পেমং অন্তরধাযতি, খাদিতুং আগতা যক্খা ৰিয উপট্ঠহন্তি, একস্স একচ্চে দিস্ৰা চ সুত্ৰা চাতি উভযথাপি পিযা হোন্তি, তেন তং পুচ্ছামি. কচ্চিন্নু মে পীযসি দস্সনেনাতি কচ্চি নু ত্ৰং মং পিযাযসি, ময্হং পন ত্ৰং সৰনেন পিযোৰ, দস্সনং পনাগম্ম অতিপিযোৰ. এৰং মম পিযদস্সনো সমানো চিত্তকূটং অগন্ত্ৰা ইধ মম সন্তিকে ৰসাতি.

বোধিসত্তো আহ –

৩০.

‘‘ৰসেয্যাম তৰাগারে, নিচ্চং সক্কতপূজিতা;

মত্তো চ একদা ৰজ্জে, হংসরাজং পচন্তু মে’’তি.

তত্থ মত্তো চ একদাতি মহারাজ, মযং তৰ ঘরে নিচ্চং পূজিতা ৰসেয্যাম, ত্ৰং পন কদাচি সুরামদমত্তো মংসখাদনত্থং ‘‘হংসরাজং পচন্তু মে’’তি ৰদেয্যাসি, অথ এৰং তৰ অনুজীৰিনো মং মারেত্ৰা পচেয্যুং, তদাহং কিং করিস্সামীতি.

অথস্স রাজা ‘‘তেন হি মজ্জমেৰ ন পিৰিস্সামী’’তি পটিঞ্ঞং দাতুং ইমং গাথমাহ –

৩১.

‘‘ধিরত্থু তং মজ্জপানং, যং মে পিযতরং তযা;

ন চাপি মজ্জং পিস্সামি, যাৰ মে ৰচ্ছসী ঘরে’’তি.

ততো পরং বোধিসত্তো ছ গাথা আহ –

৩২.

‘‘সুৰিজানং সিঙ্গালানং, সকুণানঞ্চ ৰস্সিতং;

মনুস্সৰস্সিতং রাজ, দুব্বিজানতরং ততো.

৩৩.

‘‘অপি চে মঞ্ঞতী পোসো, ঞাতি মিত্তো সখাতি ৰা;

যো পুব্বে সুমনো হুত্ৰা, পচ্ছা সম্পজ্জতে দিসো.

৩৪.

‘‘যস্মিং মনো নিৰিসতি, অৰিদূরে সহাপি সো;

সন্তিকেপি হি সো দূরে, যস্মিং নাৰিসতে মনো.

৩৫.

‘‘অন্তোপি সো হোতি পসন্নচিত্তো, পারং সমুদ্দস্স পসন্নচিত্তো;

অন্তোপি সো হোতি পদুট্ঠচিত্তো, পারং সমুদ্দস্স পদুট্ঠচিত্তো.

৩৬.

‘‘সংৰসন্তা ৰিৰসন্তি, যে দিসা তে রথেসভ;

আরা সন্তো সংৰসন্তি, মনসা রট্ঠৰড্ঢন.

৩৭.

‘‘অতিচিরং নিৰাসেন, পিযো ভৰতি অপ্পিযো;

আমন্ত খো তং গচ্ছাম, পুরা তে হোম অপ্পিযা’’তি.

তত্থ ৰস্সিতন্তি মহারাজ, তিরচ্ছানগতা উজুহদযা, তেন তেসং ৰস্সিতং সুৰিজানং, মনুস্সা পন কক্খল়া, তস্মা তেসং ৰচনং দুব্বিজানতরন্তি অত্থো. যো পুব্বেতি যো পুগ্গলো পঠমমেৰ অত্তমনো হুত্ৰা ‘‘ত্ৰং ময্হং ঞাতকো মিত্তো পাণসমো সখা’’তি অপি এৰং মঞ্ঞতি, স্ৰেৰ পচ্ছা দিসো ৰেরী সম্পজ্জতি, এৰং দুব্বিজানং নাম মনুস্সহদযন্তি. নিৰিসতীতি মহারাজ, যস্মিং পুগ্গলে পেমৰসেন মনো নিৰিসতি, সো দূরে ৰসন্তোপি অৰিদূরে সহাপি ৰসতিযেৰ নাম. যস্মিং পন পুগ্গলে মনো ন নিৰিসতি অপেতি, সো সন্তিকে ৰসন্তোপি দূরেযেৰ.

অন্তোপি সো হোতীতি মহারাজ, যো সহাযো পসন্নচিত্তো, সো চিত্তেন অল্লীনত্তা পারং সমুদ্দস্স ৰসন্তোপি অন্তোযেৰ হোতি. যো পন পদুট্ঠচিত্তো, সো চিত্তেন অনল্লীনত্তা অন্তো ৰসন্তোপি পারং সমুদ্দস্স নাম. যে দিসা তেতি যে ৰেরিনো পচ্চত্থিকা, তে একতো ৰসন্তাপি দূরে ৰসন্তিযেৰ নাম. সন্তো পন পণ্ডিতা আরা ঠিতাপি মেত্তাভাৰিতেন মনসা আৰজ্জেন্তা সংৰসন্তিযেৰ. পুরা তে হোমাতি যাৰ তৰ অপ্পিযা ন হোম, তাৰদেৰ তং আমন্তেত্ৰা গচ্ছামাতি ৰদতি.

অথ নং রাজা আহ –

৩৮.

‘‘এৰং চে যাচমানানং, অঞ্জলিং নাৰবুজ্ঝসি;

পরিচারকানং সতং, ৰচনং ন করোসি নো;

এৰং তং অভিযাচাম, পুন কযিরাসি পরিযায’’ন্তি.

তত্থ এৰং চেতি সচে হংসরাজ, এৰং অঞ্জলিং পগ্গয্হ যাচমানানং অম্হাকং ইমং অঞ্জলিং নাৰবুজ্ঝসি, তৰ পরিচারকানং সমানানং ৰচনং ন করোসি, অথ নং এৰং যাচাম. পুন কযিরাসি পরিযাযন্তি কালেন কালং ইধ আগমনায ৰারং করেয্যাসীতি অত্থো.

ততো বোধিসত্তো আহ –

৩৯.

‘‘এৰং চে নো ৰিহরতং, অন্তরাযো ন হেস্সতি;

তুয্হং চাপি মহারাজ, ময্হঞ্চ রট্ঠৰড্ঢন;

অপ্পেৰ নাম পস্সেমু, অহোরত্তানমচ্চযে’’তি.

তত্থ এৰং চে নোতি মহারাজ, মা চিন্তযিত্থ, সচে অম্হাকম্পি এৰং ৰিহরন্তানং জীৰিতন্তরাযো ন ভৰিস্সতি, অপ্পেৰ নাম উভো অঞ্ঞমঞ্ঞং পস্সিস্সাম, অপিচ ত্ৰং মযা দিন্নং ওৰাদমেৰ মম ঠানে ঠপেত্ৰা এৰং ইত্তরজীৰিতে লোকসন্নিৰাসে অপ্পমত্তো হুত্ৰা দানাদীনি পুঞ্ঞানি করোন্তো দস রাজধম্মে অকোপেত্ৰা ধম্মেন রজ্জং কারেহি, এৰঞ্হি মে ওৰাদং করোন্তো মং পস্সিস্সতিযেৰাতি. এৰং মহাসত্তো রাজানং ওৰদিত্ৰা চিত্তকূটপব্বতমেৰ গতো.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বে তিরচ্ছানযোনিযং নিব্বত্তেনপি মযা আযুসঙ্খারানং দুব্বলভাৰং দস্সেত্ৰা ধম্মো দেসিতো’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, কনিট্ঠো মোগ্গল্লানো, মজ্ঝিমো সারিপুত্তো, সেসহংসগণা বুদ্ধপরিসা, জৰনহংসো পন অহমেৰ অহোসি’’ন্তি.

জৰনহংসজাতকৰণ্ণনা ততিযা.

[৪৭৭] ৪. চূল়নারদজাতকৰণ্ণনা

ন তে কট্ঠানি ভিন্নানীতি ইদং সত্থা জেতৰনে ৰিহরন্তো থুল্লকুমারিকাপলোভনং আরব্ভ কথেসি. সাৰত্থিৰাসিনো কিরেকস্স কুলস্স পন্নরসসোল়সৰস্সুদ্দেসিকা ধীতা অহোসি সোভগ্গপ্পত্তা, ন চ নং কোচি ৰারেসি. অথস্সা মাতা চিন্তেসি ‘‘মম ধীতা ৰযপ্পত্তা, ন চ নং কোচি ৰারেতি, আমিসেন মচ্ছং ৰিয এতায একং সাকিযভিক্খুং পলোভেত্ৰা উপ্পব্বাজেত্ৰা তং নিস্সায জীৰিস্সামী’’তি. তদা চ সাৰত্থিৰাসী একো কুলপুত্তো সাসনে উরং দত্ৰা পব্বজিত্ৰা উপসম্পন্নকালতো পট্ঠায সিক্খাকামতং পহায আলসিযো সরীরমণ্ডনমনুযুত্তো ৰিহাসি. মহাউপাসিকা গেহে যাগুখাদনীযভোজনীযানি সম্পাদেত্ৰা দ্ৰারে ঠত্ৰা অন্তরৰীথিযা গচ্ছন্তেসু ভিক্খূসু একং ভিক্খুং রসতণ্হায বন্ধিত্ৰা গহেতুং সক্কুণেয্যরূপং উপধারেন্তী তেপিটকআভিধম্মিকৰিনযধরানং মহন্তেন পরিৰারেন গচ্ছন্তানং অন্তরে কঞ্চি গয্হুপগং অদিস্ৰা তেসং পচ্ছতো গচ্ছন্তানং মধুরধম্মকথিকানং অচ্ছিন্নৰলাহকসদিসানং পিণ্ডপাতিকানম্পি অন্তরে কঞ্চি অদিস্ৰাৰ একং যাৰ বহি অপঙ্গা অক্খীনি অঞ্জেত্ৰা কেসে ওসণ্হেত্ৰা দুকূলন্তরৰাসকং নিৰাসেত্ৰা ঘটিতমট্ঠং চীৰরং পারুপিত্ৰা মণিৰণ্ণপত্তং আদায মনোরমং ছত্তং ধারযমানং ৰিস্সট্ঠিন্দ্রিযং কাযদল়্হিবহুলং আগচ্ছন্তং দিস্ৰা ‘‘ইমং সক্কা গণ্হিতু’’ন্তি গন্ত্ৰা ৰন্দিত্ৰা পত্তং গহেত্ৰা ‘‘এথ, ভন্তে’’তি ঘরং আনেত্ৰা নিসীদাপেত্ৰা যাগুআদীহি পরিৰিসিত্ৰা কতভত্তকিচ্চং তং ভিক্খুং ‘‘ভন্তে, ইতো পট্ঠায ইধেৰাগচ্ছেয্যাথা’’তি আহ. সোপি ততো পট্ঠায তত্থেৰ গন্ত্ৰা অপরভাগে ৰিস্সাসিকো অহোসি.

অথেকদিৰসং মহাউপাসিকা তস্স সৰনপথে ঠত্ৰা ‘‘ইমস্মিং গেহে উপভোগপরিভোগমত্তা অত্থি, তথারূপো পন মে পুত্তো ৰা জামাতা ৰা গেহং ৰিচারিতুং সমত্থো নত্থী’’তি আহ. সো তস্সা ৰচনং সুত্ৰা ‘‘কিমত্থং নু খো কথেতী’’তি থোকং হদযে ৰিদ্ধো ৰিয অহোসি. সা ধীতরং আহ ‘‘ইমং পলোভেত্ৰা তৰ ৰসে ৰত্তাপেহী’’তি. সা ততো পট্ঠায মণ্ডিতপসাধিতা ইত্থিকুত্তৰিলাসেহি তং পলোভেসি. থুল্লকুমারিকাতি ন চ থূলসরীরা দট্ঠব্বা, থূলা ৰা হোতু কিসা ৰা, পঞ্চকামগুণিকরাগেন পন থূলতায ‘‘থুল্লকুমারিকা’’তি ৰুচ্চতি. সো দহরো কিলেসৰসিকো হুত্ৰা ‘‘ন দানাহং বুদ্ধসাসনে পতিট্ঠাতুং সক্খিস্সামী’’তি চিন্তেত্ৰা ‘‘ৰিহারং গন্ত্ৰা পত্তচীৰরং নিয্যাদেত্ৰা অসুকট্ঠানং নাম গমিস্সামি, তত্র মে ৰত্থানি পেসেথা’’তি ৰত্ৰা ৰিহারং গন্ত্ৰা পত্তচীৰরং নিয্যাদেত্ৰা ‘‘উক্কণ্ঠিতোস্মী’’তি আচরিযুপজ্ঝাযে আহ. তে তং আদায সত্থু সন্তিকং নেত্ৰা ‘‘অযং ভিক্খু উক্কণ্ঠিতো’’তি আরোচেসুং. সত্থা ‘‘সচ্চং কির ত্ৰং ভিক্খু উক্কণ্ঠিতোসী’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘কেন উক্কণ্ঠাপিতোসী’’তি ৰত্ৰা ‘‘থুল্লকুমারিকায, ভন্তে’’তি ৰুত্তে ‘‘ভিক্খু পুব্বেপেসা তৰ অরঞ্ঞে ৰসন্তস্স ব্রহ্মচরিযন্তরাযং কত্ৰা মহন্তং অনত্থমকাসি, পুন ত্ৰং এতমেৰ নিস্সায কস্মা উক্কণ্ঠিতোসী’’তি ৰত্ৰা ভিক্খূহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো কাসিরট্ঠে মহাভোগে ব্রাহ্মণকুলে নিব্বত্তিত্ৰা উগ্গহিতসিপ্পো কুটুম্বং সণ্ঠপেসি, অথস্স ভরিযা একং পুত্তং ৰিজাযিত্ৰা কালমকাসি. সো ‘‘যথেৰ মে পিযভরিযায, এৰং মযিপি মরণং আগমিস্সতি, কিং মে ঘরাৰাসেন, পব্বজিস্সামী’’তি চিন্তেত্ৰা কামে পহায পুত্তং আদায হিমৰন্তং পৰিসিত্ৰা তেন সদ্ধিং ইসিপব্বজ্জং পব্বজিত্ৰা ঝানাভিঞ্ঞা নিব্বত্তেত্ৰা ৰনমূলফলাহারো অরঞ্ঞে ৰিহাসি. তদা পচ্চন্তৰাসিনো চোরা জনপদং পৰিসিত্ৰা গামং পহরিত্ৰা করমরে গহেত্ৰা ভণ্ডিকং উক্খিপাপেত্ৰা পুন পচ্চন্তং পাপযিংসু. তেসং অন্তরে একা অভিরূপা কুমারিকা কেরাটিকপঞ্ঞায সমন্নাগতা চিন্তেসি ‘‘ইমে অম্হে গহেত্ৰা দাসিভোগেন পরিভুঞ্জিস্সন্তি, একেন উপাযেন পলাযিতুং ৰট্টতী’’তি. সা ‘‘সামি, সরীরকিচ্চং কাতুকামাম্হি, থোকং পটিক্কমিত্ৰা তিট্ঠথা’’তি ৰত্ৰা চোরে ৰঞ্চেত্ৰা পলাযিত্ৰা অরঞ্ঞং পৰিসন্তী বোধিসত্তস্স পুত্তং অস্সমে ঠপেত্ৰা ফলাফলত্থায গতকালে পুব্বণ্হসমযে তং অস্সমং পাপুণিত্ৰা তং তাপসকুমারং কামরতিযা পলোভেত্ৰা সীলমস্স ভিন্দিত্ৰা অত্তনো ৰসে ৰত্তেত্ৰা ‘‘কিং তে অরঞ্ঞৰাসেন, এহি গামং গন্ত্ৰা ৰসিস্সাম, তত্র হি রূপাদযো কামগুণা সুলভা’’তি আহ. সোপি ‘‘সাধূ’’তি সম্পটিচ্ছিত্ৰা ‘‘পিতা তাৰ মে অরঞ্ঞতো ফলাফলং আহরিতুং গতো, তং দিস্ৰা উভোপি একতোৰ গমিস্সামা’’তি আহ.

সা চিন্তেসি – ‘‘অযং তরুণদারকো ন কিঞ্চি জানাতি, পিতরা পনস্স মহল্লককালে পব্বজিতেন ভৰিতব্বং, সো আগন্ত্ৰা ‘ইধ কিং করোসী’তি মং পোথেত্ৰা পাদে গহেত্ৰা কড্ঢেত্ৰা অরঞ্ঞে খিপিস্সতি, তস্মিং অনাগতেযেৰ পলাযিস্সামী’’তি. অথ নং ‘‘অহং পুরতো গচ্ছামি, ত্ৰং পচ্ছা আগচ্ছেয্যাসী’’তি ৰত্ৰা মগ্গসঞ্ঞং আচিক্খিত্ৰা পক্কামি. সো তস্সা গতকালতো পট্ঠায উপ্পন্নদোমনস্সো যথা পুরে কিঞ্চি ৰত্তং অকত্ৰা সসীসং পারুপিত্ৰা অন্তোপণ্ণসালায পজ্ঝাযন্তো নিপজ্জি. মহাসত্তো ফলাফলং আদায আগন্ত্ৰা তস্সা পদৰলঞ্জং দিস্ৰা ‘‘অযং মাতুগামস্স পদৰলঞ্জো, ‘‘পুত্তস্স মম সীলং ভিন্নং ভৰিস্সতী’’তি চিন্তেন্তো পণ্ণসালং পৰিসিত্ৰা ফলাফলং ওতারেত্ৰা পুত্তং পুচ্ছন্তো পঠমং গাথমাহ –

৪০.

‘‘ন তে কট্ঠানি ভিন্নানি, ন তে উদকমাভতং;

অগ্গীপি তে ন হাপিতো, কিং নু মন্দোৰ ঝাযসী’’তি.

তত্থ অগ্গীপি তে ন হাপিতোতি অগ্গিপি তে ন জালিতো. মন্দোৰাতি নিপ্পঞ্ঞো অন্ধবালো ৰিয.

সো পিতু কথং সুত্ৰা উট্ঠায পিতরং ৰন্দিত্ৰা গারৰেনেৰ অরঞ্ঞৰাসে অনুস্সাহং পৰেদেন্তো গাথাদ্ৰযমাহ –

৪১.

‘‘ন উস্সহে ৰনে ৰত্থুং, কস্সপামন্তযামি তং;

দুক্খো ৰাসো অরঞ্ঞম্হি, রট্ঠং ইচ্ছামি গন্তৰে.

৪২.

‘‘যথা অহং ইতো গন্ত্ৰা, যস্মিং জনপদে ৰসং;

আচারং ব্রহ্মে সিক্খেয্যং, তং ধম্মং অনুসাস ম’’ন্তি.

তত্থ কস্সপামন্তযামি তন্তি কস্সপ আমন্তযামি তং. গন্তৰেতি গন্তুং. আচারন্তি যস্মিং জনপদে ৰসামি, তত্থ ৰসন্তো যথা আচারং জনপদচারিত্তং সিক্খেয্যং জানেয্যং, তং ধম্মং অনুসাস ওৰদাহীতি ৰদতি.

মহাসত্তো ‘‘সাধু, তাত, দেসচারিত্তং তে কথেস্সামী’’তি ৰত্ৰা গাথাদ্ৰযমাহ –

৪৩.

‘‘সচে অরঞ্ঞং হিত্ৰান, ৰনমূলফলানি চ;

রট্ঠে রোচযসে ৰাসং, তং ধম্মং নিসামেহি মে.

৪৪.

‘‘ৰিসং মা পটিসেৰিত্থো, পপাতং পরিৰজ্জয;

পঙ্কে চ মা ৰিসীদিত্থো, যত্তো চাসীৰিসে চরে’’তি.

তত্থ ধম্মন্তি সচে রট্ঠৰাসং রোচেসি, তেন হি ত্ৰং জনপদচারিত্তং ধম্মং নিসামেহি. যত্তো চাসীৰিসেতি আসীৰিসস্স সন্তিকে যত্তো পটিযত্তো চরেয্যাসি, সক্কোন্তো আসীৰিসং পরিৰজ্জেয্যাসীতি অত্থো.

তাপসকুমারো সংখিত্তেন ভাসিতস্স অত্থং অজানন্তো পুচ্ছি –

৪৫.

‘‘কিং নু ৰিসং পপাতো ৰা, পঙ্কো ৰা ব্রহ্মচারিনং;

কং ত্ৰং আসীৰিসং ব্রূসি, তং মে অক্খাহি পুচ্ছিতো’’তি.

ইতরোপিস্স ব্যাকাসি –

৪৬.

‘‘আসৰো তাত লোকস্মিং, সুরা নাম পৰুচ্চতি;

মনুঞ্ঞো সুরভী ৰগ্গু, সাদু খুদ্দরসূপমো;

ৰিসং তদাহু অরিযা সে, ব্রহ্মচরিযস্স নারদ.

৪৭.

‘‘ইত্থিযো তাত লোকস্মিং, পমত্তং পমথেন্তি তা;

হরন্তি যুৰিনো চিত্তং, তূলং ভট্ঠংৰ মালুতো;

পপাতো এসো অক্খাতো, ব্রহ্মচরিযস্স নারদ.

৪৮.

‘‘লাভো সিলোকো সক্কারো, পূজা পরকুলেসু চ;

পঙ্কো এসো চ অক্খাতো, ব্রহ্মচরিযস্স নারদ.

৪৯.

‘‘সসত্থা তাত রাজানো, আৰসন্তি মহিং ইমং;

তে তাদিসে মনুস্সিন্দে, মহন্তে তাত নারদ.

৫০.

‘‘ইস্সরানং অধিপতীনং, ন তেসং পাদতো চরে;

আসীৰিসোতি অক্খাতো, ব্রহ্মচরিযস্স নারদ.

৫১.

‘‘ভত্তত্থো ভত্তকালে চ, যং গেহমুপসঙ্কমে;

যদেত্থ কুসলং জঞ্ঞা, তত্থ ঘাসেসনং চরে.

৫২.

‘‘পৰিসিত্ৰা পরকুলং, পানত্থং ভোজনায ৰা;

মিতং খাদে মিতং ভুঞ্জে, ন চ রূপে মনং করে.

৫৩.

‘‘গোট্ঠং মজ্জং কিরাটঞ্চ, সভা নিকিরণানি চ;

আরকা পরিৰজ্জেহি, যানীৰ ৰিসমং পথ’’ন্তি.

তত্থ আসৰোতি পুপ্ফাসৰাদি. ৰিসং তদাহূতি তং আসৰসঙ্খাতং সুরং অরিযা ‘‘ব্রহ্মচরিযস্স ৰিস’’ন্তি ৰদন্তি. পমত্তন্তি মুট্ঠস্সতিং. তূলং ভট্ঠংৰাতি রুক্খা ভস্সিত্ৰা পতিততূলং ৰিয. অক্খাতোতি বুদ্ধাদীহি কথিতো. সিলোকোতি কিত্তিৰণ্ণো. সক্কারোতি অঞ্জলিকম্মাদি. পূজাতি গন্ধমালাদীহি পূজা. পঙ্কোতি এস ওসীদাপনট্ঠেন ‘‘পঙ্কো’’তি অক্খাতো. মহন্তেতি মহন্তভাৰপ্পত্তে. ন তেসং পাদতো চরেতি তেসং সন্তিকে ন চরে, রাজকুলূপকো ন ভৰেয্যাসীতি অত্থো. রাজানো হি আসীৰিসা ৰিয মুহুত্তেনেৰ কুজ্ঝিত্ৰা অনযব্যসনং পাপেন্তি. অপিচ অন্তেপুরপ্পৰেসনে ৰুত্তাদীনৰৰসেনপেত্থ অত্থো ৰেদিতব্বো.

ভত্তত্থোতি ভত্তেন অত্থিকো হুত্ৰা. যদেত্থ কুসলন্তি যং তেসু উপসঙ্কমিতব্বেসু গেহেসু কুসলং অনৰজ্জং পঞ্চঅগোচররহিতং জানেয্যাসি, তত্থ ঘাসেসনং চরেয্যাসীতি অত্থো. ন চ রূপে মনং করেতি পরকুলে মত্তঞ্ঞূ হুত্ৰা ভোজনং ভুঞ্জন্তোপি তত্থ ইত্থিরূপে মনং মা করেয্যাসি, মা চক্খুং উম্মীলেত্ৰা ইত্থিরূপে নিমিত্তং গণ্হেয্যাসীতি ৰদতি. গোট্ঠং মজ্জং কিরাটন্তি অযং পোত্থকেসু পাঠো, অট্ঠকথাযং পন ‘‘গোট্ঠং মজ্জং কিরাসঞ্চা’’তি ৰত্ৰা ‘‘গোট্ঠন্তি গুন্নং ঠিতট্ঠানং. মজ্জন্তি পানাগারং. কিরাসন্তি ধুত্তকেরাটিকজন’’ন্তি ৰুত্তং. সভা নিকিরণানি চাতি সভাযো চ হিরঞ্ঞসুৰণ্ণানং নিকিরণট্ঠানানি চ. আরকাতি এতানি সব্বানি দূরতো পরিৰজ্জেয্যাসি. যানীৰাতি সপ্পিতেলযানেন গচ্ছন্তো ৰিসমং মগ্গং ৰিয.

মাণৰো পিতু কথেন্তস্সেৰ সতিং পটিলভিত্ৰা ‘‘তাত, অলং মে মনুস্সপথেনা’’তি আহ. অথস্স পিতা মেত্তাদিভাৰনং আচিক্খি. সো তস্সোৰাদে ঠত্ৰা ন চিরস্সেৰ ঝানাভিঞ্ঞা নিব্বত্তেসি. উভোপি পিতাপুত্তা অপরিহীনজ্ঝানা কালং কত্ৰা ব্রহ্মলোকে নিব্বত্তিংসু.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সা কুমারিকা অযং কুমারিকা অহোসি, তাপসকুমারো উক্কণ্ঠিতভিক্খু, পিতা পন অহমেৰ অহোসি’’ন্তি.

চূল়নারদজাতকৰণ্ণনা চতুত্থা.

[৪৭৮] ৫. দূতজাতকৰণ্ণনা

দূতে তে ব্রহ্মে পাহেসিন্তি ইদং সত্থা জেতৰনে ৰিহরন্তো অত্তনো পঞ্ঞাপসংসনং আরব্ভ কথেসি. ধম্মসভাযং ভিক্খূ কথং সমুট্ঠাপেসুং ‘‘পস্সথ, আৰুসো, দসবলস্স উপাযকোসল্লং, নন্দস্স সক্যপুত্তস্স অচ্ছরাগণং দস্সেত্ৰা অরহত্তং অদাসি, চূল়পন্থকস্স পিলোতিকং দত্ৰা সহ পটিসম্ভিদাহি অরহত্তং অদাসি, কম্মারপুত্তস্স পদুমং দস্সেত্ৰা অরহত্তং অদাসি, এৰং নানাউপাযেহি সত্তে ৰিনেতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, তথাগতো ইদানেৰ ‘ইমিনা ইদং হোতী’তি উপাযকুসলো, পুব্বেপি উপাযকুসলোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে জনপদো অহিরঞ্ঞো অহোসি. সো হি জনপদং পীল়েত্ৰা ধনমেৰ সংকড্ঢি. তদা বোধিসত্তো কাসিগামে ব্রাহ্মণকুলে নিব্বত্তিত্ৰা ৰযপ্পত্তো তক্কসিলং গন্ত্ৰা ‘‘পচ্ছা ধম্মেন ভিক্খং চরিত্ৰা আচরিযধনং আহরিস্সামী’’তি ৰত্ৰা সিপ্পং পট্ঠপেত্ৰা নিট্ঠিতসিপ্পো অনুযোগং দত্ৰা ‘‘আচরিয, তুম্হাকং ধনং আহরিস্সামী’’তি আপুচ্ছিত্ৰা নিক্খম্ম জনপদে চরন্তো ধম্মেন সমেন পরিযেসিত্ৰা সত্ত নিক্খে লভিত্ৰা ‘‘আচরিযস্স দস্সামী’’তি গচ্ছন্তো অন্তরামগ্গে গঙ্গং ওতরিতুং নাৰং অভিরুহি. তস্স তত্থ নাৰায ৰিপরিৰত্তমানায তং সুৰণ্ণং উদকে পতি. সো চিন্তেসি ‘‘দুল্লভং হিরঞ্ঞং, জনপদে পুন আচরিযধনে পরিযেসিযমানে পপঞ্চো ভৰিস্সতি, যংনূনাহং গঙ্গাতীরেযেৰ নিরাহারো নিসীদেয্যং, তস্স মে নিসিন্নভাৰং অনুপুব্বেন রাজা জানিস্সতি, ততো অমচ্চে পেসেস্সতি, অহং তেহি সদ্ধিং ন মন্তেস্সামি, ততো রাজা সযং আগমিস্সতি, ইমিনা উপাযেন তস্স সন্তিকে আচরিযধনং লভিস্সামী’’তি. সো গঙ্গাতীরে উত্তরিসাটকং পারুপিত্ৰা যঞ্ঞসুত্তং বহি ঠপেত্ৰা রজতপট্টৰণ্ণে ৰালুকতলে সুৰণ্ণপটিমা ৰিয নিসীদি. তং নিরাহারং নিসিন্নং দিস্ৰা মহাজনো ‘‘কস্মা নিসিন্নোসী’’তি পুচ্ছি, কস্সচি ন কথেসি. পুনদিৰসে দ্ৰারগামৰাসিনো তস্স তত্থ নিসিন্নভাৰং সুত্ৰা আগন্ত্ৰা পুচ্ছিংসু, তেসম্পি ন কথেসি. তে তস্স কিলমথং দিস্ৰা পরিদেৰন্তা পক্কমিংসু. ততিযদিৰসে নগরৰাসিনো আগমিংসু, চতুত্থদিৰসে নগরতো ইস্সরজনা, পঞ্চমদিৰসে রাজপুরিসা. ছট্ঠদিৰসে রাজা অমচ্চে পেসেসি, তেহিপি সদ্ধিং ন কথেসি. সত্তমদিৰসে রাজা ভযট্টিতো হুত্ৰা তস্স সন্তিকং গন্ত্ৰা পুচ্ছন্তো পঠমং গাথমাহ –

৫৪.

‘‘দূতে তে ব্রহ্মে পাহেসিং, গঙ্গাতীরস্মি ঝাযতো;

তেসং পুট্ঠো ন ব্যাকাসি, দুক্খং গুয্হমতং নু তে’’তি.

তত্থ দুক্খং গুয্হমতং নু তেতি কিং নু খো, ব্রাহ্মণ, যং তৰ দুক্খং উপ্পন্নং, তং তে গুয্হমেৰ মতং, ন অঞ্ঞস্স আচিক্খিতব্বন্তি.

তং সুত্ৰা মহাসত্তো ‘‘মহারাজ, দুক্খং নাম হরিতুং সমত্থস্সেৰ আচিক্খিতব্বং, ন অঞ্ঞস্সা’’তি ৰত্ৰা সত্ত গাথা অভাসি –

৫৫.

‘‘সচে তে দুক্খমুপ্পজ্জে, কাসীনং রট্ঠৰড্ঢন;

মা খো নং তস্স অক্খাহি, যো তং দুক্খা ন মোচযে.

৫৬.

‘‘যো তস্স দুক্খজাতস্স, একঙ্গমপি ভাগসো;

ৰিপ্পমোচেয্য ধম্মেন, কামং তস্স পৰেদয.

৫৭.

‘‘সুৰিজানং সিঙ্গালানং, সকুণানঞ্চ ৰস্সিতং;

মনুস্সৰস্সিতং রাজ, দুব্বিজানতরং ততো.

৫৮.

‘‘অপি চে মঞ্ঞতী পোসো, ঞাতি মিত্তো সখাতি ৰা;

যো পুব্বে সুমনো হুত্ৰা, পচ্ছা সম্পজ্জতে দিসো.

৫৯.

‘‘যো অত্তনো দুক্খমনানুপুট্ঠো, পৰেদযে জন্তু অকালরূপে;

আনন্দিনো তস্স ভৰন্তি মিত্তা, হিতেসিনো তস্স দুখী ভৰন্তি.

৬০.

‘‘কালঞ্চ ঞত্ৰান তথাৰিধস্স, মেধাৰিনং একমনং ৰিদিত্ৰা;

অক্খেয্য তিব্বানি পরস্স ধীরো, সণ্হং গিরং অত্থৰতিং পমুঞ্চে.

৬১.

‘‘সচে চ জঞ্ঞা অৰিসয্হমত্তনো, ন তে হি ময্হং সুখাগমায;

একোৰ তিব্বানি সহেয্য ধীরো, সচ্চং হিরোত্তপ্পমপেক্খমানো’’তি.

তত্থ উপ্পজ্জেতি সচে তৰ উপ্পজ্জেয্য. মা অক্খাহীতি মা কথেহি. দুব্বিজানতরং ততোতি ততো তিরচ্ছানগতৰস্সিততোপি দুব্বিজানতরং, তস্মা তথতো অজানিত্ৰা হরিতুং অসমত্থস্স অত্তনো দুক্খং ন কথেতব্বমেৰাতি. অপি চেতি গাথা ৰুত্তত্থাৰ. অনানুপুট্ঠোতি পুনপ্পুনং পুট্ঠো. পৰেদযেতি কথেতি. অকালরূপেতি অকালে. কালন্তি অত্তনো গুয্হস্স কথনকালং. তথাৰিধস্সাতি পণ্ডিতপুরিসং অত্তনা সদ্ধিং একমনং ৰিদিত্ৰা তথাৰিধস্স আচিক্খেয্য. তিব্বানীতি দুক্খানি.

সচেতি যদি অত্তনো দুক্খং অৰিসয্হং অত্তনো ৰা পরেসং ৰা পুরিসকারেন অতেকিচ্ছং জানেয্য. তে হীতি তে এৰ লোকপৰেণিকা, অট্ঠলোকধম্মাতি অত্থো. ইদং ৰুত্তং হোতি – অথ অযং লোকপৰেণী ন ময্হং এৰ সুখাগমায উপ্পন্না, অট্ঠহি লোকধম্মেহি পরিমুত্তো নাম নত্থি, এৰং সন্তে সুখমেৰ পত্থেন্তেন পরস্স দুক্খারোপনং নাম ন যুত্তং, নেতং হিরোত্তপ্পসম্পন্নেন কত্তব্বং, অত্থি চ মে হিরী ওত্তপ্পন্তি সচ্চং সংৰিজ্জমানং অত্তনি হিরোত্তপ্পং অপেক্খমানোৰ অঞ্ঞস্স অনারোচেত্ৰা একোৰ তিব্বানি সহেয্য ধীরোতি.

এৰং মহাসত্তো সত্তহি গাথাহি রঞ্ঞো ধম্মং দেসেত্ৰা অত্তনো আচরিযধনস্স পরিযেসিতভাৰং দস্সেন্তো চতস্সো গাথা অভাসি –

৬২.

‘‘অহং রট্ঠে ৰিচরন্তো, নিগমে রাজধানিযো;

ভিক্খমানো মহারাজ, আচরিযস্স ধনত্থিকো.

৬৩.

‘‘গহপতী রাজপুরিসে, মহাসালে চ ব্রাহ্মণে;

অলত্থং সত্ত নিক্খানি, সুৰণ্ণস্স জনাধিপ;

তে মে নট্ঠা মহারাজ, তস্মা সোচামহং ভুসং.

৬৪.

‘‘পুরিসা তে মহারাজ, মনসানুৰিচিন্তিতা;

নালং দুক্খা পমোচেতুং, তস্মা তেসং ন ব্যাহরিং.

৬৫.

‘‘ত্ৰঞ্চ খো মে মহারাজ, মনসানুৰিচিন্তিতো;

অলং দুক্খা পমোচেতুং, তস্মা তুয্হং পৰেদযি’’ন্তি.

তত্থ ভিক্খমানোতি এতে গহপতিআদযো যাচমানো. তে মেতি তে সত্ত নিক্খা মম গঙ্গং তরন্তস্স নট্ঠা, গঙ্গাযং পতিতা. পুরিসা তেতি মহারাজ, তৰ দূতপুরিসা. অনুৰিচিন্তিতাতি ‘‘নালং ইমে মং দুক্খা মোচেতু’’ন্তি মযা ঞাতা. তস্মাতি তেন কারণেন তেসং অত্তনো দুক্খং নাচিক্খিং. পৰেদযিন্তি কথেসিং.

রাজা তস্স ধম্মকথং সুত্ৰা ‘‘মা চিন্তযি, ব্রাহ্মণ, অহং তে আচরিযধনং দস্সামী’’তি দ্ৰিগুণধনমদাসি. তমত্থং পকাসেন্তো সত্থা ওসানগাথমাহ –

৬৬.

‘‘তস্সাদাসি পসন্নত্তো, কাসীনং রট্ঠৰড্ঢনো;

জাতরূপমযে নিক্খে, সুৰণ্ণস্স চতুদ্দসা’’তি.

তত্থ জাতরূপমযেতি তে সুৰণ্ণস্স চতুদ্দস নিক্খে জাতরূপমযেযেৰ অদাসি, ন যস্স ৰা তস্স ৰা সুৰণ্ণস্সাতি অত্থো.

মহাসত্তো রঞ্ঞো ওৰাদং দত্ৰা আচরিযস্স ধনং দত্ৰা দানাদীনি পুঞ্ঞানি কত্ৰা রাজাপি তস্সোৰাদে ঠিতো ধম্মেন রজ্জং কারেত্ৰা উভোপি যথাকম্মং গতা.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি তথাগতো উপাযকুসলোযেৰা’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, আচরিযো সারিপুত্তো, ব্রাহ্মণমাণৰো পন অহমেৰ অহোসি’’ন্তি.

দূতজাতকৰণ্ণনা পঞ্চমা.

[৪৭৯] ৬. কালিঙ্গবোধিজাতকৰণ্ণনা

রাজা কালিঙ্গো চক্কৰত্তীতি ইদং সত্থা জেতৰনে ৰিহরন্তো আনন্দত্থেরেন কতং মহাবোধিপূজং আরব্ভ কথেসি. ৰেনেয্যসঙ্গহত্থায হি তথাগতে জনপদচারিকং পক্কন্তে সাৰত্থিৰাসিনো গন্ধমালাদিহত্থা জেতৰনং গন্ত্ৰা অঞ্ঞং পূজনীযট্ঠানং অলভিত্ৰা গন্ধকুটিদ্ৰারে পাতেত্ৰা গচ্ছন্তি, তে উল়ারপামোজ্জা ন হোন্তি. তং কারণং ঞত্ৰা অনাথপিণ্ডিকো তথাগতস্স জেতৰনং আগতকালে আনন্দত্থেরস্স সন্তিকং গন্ত্ৰা ‘‘ভন্তে, অযং ৰিহারো তথাগতে চারিকং পক্কন্তে নিপচ্চযো হোতি, মনুস্সানং গন্ধমালাদীহি পূজনীযট্ঠানং ন হোতি, সাধু, ভন্তে, তথাগতস্স ইমমত্থং আরোচেত্ৰা একস্স পূজনীযট্ঠানস্স সক্কুণেয্যভাৰং জানাথা’’তি আহ. সো ‘‘সাধূ’’তি সম্পটিচ্ছিত্ৰা তথাগতং পুচ্ছি ‘‘কতি নু খো, ভন্তে, চেতিযানী’’তি? ‘‘তীণি আনন্দা’’তি. ‘‘কতমানি, ভন্তে, তীণী’’তি? ‘‘সারীরিকং পারিভোগিকং উদ্দিস্সক’’ন্তি. ‘‘সক্কা পন, ভন্তে, তুম্হেসু ধরন্তেসুযেৰ চেতিযং কাতু’’ন্তি. ‘‘আনন্দ, সারীরিকং ন সক্কা কাতুং. তঞ্হি বুদ্ধানং পরিনিব্বানকালে হোতি, উদ্দিস্সকং অৰত্থুকং মমাযনমত্তমেৰ হোতি, বুদ্ধেহি পরিভুত্তো মহাবোধিরুক্খো বুদ্ধেসু ধরন্তেসুপি চেতিযমেৰা’’তি. ‘‘ভন্তে, তুম্হেসু পক্কন্তেসু জেতৰনৰিহারো অপ্পটিসরণো হোতি, মহাজনো পূজনীযট্ঠানং ন লভতি, মহাবোধিতো বীজং আহরিত্ৰা জেতৰনদ্ৰারে রোপেস্সামি, ভন্তে’’তি. ‘‘সাধু, আনন্দ, রোপেহি, এৰং সন্তে জেতৰনে মম নিবদ্ধৰাসো ৰিয ভৰিস্সতী’’তি.

থেরো কোসলনরিন্দস্স অনাথপিণ্ডিকস্স ৰিসাখাদীনঞ্চ আরোচেত্ৰা জেতৰনদ্ৰারে বোধিরোপনট্ঠানে আৰাটং খণাপেত্ৰা মহামোগ্গল্লানত্থেরং আহ – ‘‘ভন্তে, অহং জেতৰনদ্ৰারে বোধিং রোপেস্সামি, মহাবোধিতো মে বোধিপক্কং আহরথা’’তি. থেরো ‘‘সাধূ’’তি সম্পটিচ্ছিত্ৰা আকাসেন বোধিমণ্ডং গন্ত্ৰা ৰণ্টা পরিগলন্তং পক্কং ভূমিং অসম্পত্তমেৰ চীৰরেন সম্পটিচ্ছিত্ৰা গহেত্ৰা আনন্দত্থেরস্স অদাসি. আনন্দত্থেরো ‘‘অজ্জ বোধিং রোপেস্সামী’’তি কোসলরাজাদীনং আরোচেসি. রাজা সাযন্হসমযে মহন্তেন পরিৰারেন সব্বূপকরণানি গাহাপেত্ৰা আগমি, তথা অনাথপিণ্ডিকো ৰিসাখা চ অঞ্ঞো চ সদ্ধো জনো. থেরো মহাবোধিরোপনট্ঠানে মহন্তং সুৰণ্ণকটাহং ঠপেত্ৰা হেট্ঠা ছিদ্দং কারেত্ৰা গন্ধকললস্স পূরেত্ৰা ‘‘ইদং বোধিপক্কং রোপেহি, মহারাজা’’তি রঞ্ঞো অদাসি. সো চিন্তেসি ‘‘রজ্জং নাম ন সব্বকালং অম্হাকং হত্থে তিট্ঠতি, ইদং মযা অনাথপিণ্ডিকেন রোপাপেতুং ৰট্টতী’’তি. সো তং বোধিপক্কং মহাসেট্ঠিস্স হত্থে ঠপেসি. অনাথপিণ্ডিকো গন্ধকললং ৰিযূহিত্ৰা তত্থ পাতেসি. তস্মিং তস্স হত্থতো মুত্তমত্তেযেৰ সব্বেসং পস্সন্তানঞ্ঞেৰ নঙ্গলসীসপ্পমাণো বোধিখন্ধো পণ্ণাসহত্থুব্বেধো উট্ঠহি, চতূসু দিসাসু উদ্ধঞ্চাতি পঞ্চ মহাসাখা পণ্ণাসহত্থাৰ নিক্খমিংসু. ইতি সো তঙ্খণঞ্ঞেৰ ৰনপ্পতিজেট্ঠকো হুত্ৰা অট্ঠাসি. রাজা অট্ঠারসমত্তে সুৰণ্ণরজতঘটে গন্ধোদকেন পূরেত্ৰা নীলুপ্পলহত্থকাদিপটিমণ্ডিতে মহাবোধিং পরিক্খিপিত্ৰা পুণ্ণঘটে পটিপাটিযা ঠপেসি, সত্তরতনমযং ৰেদিকং কারেসি, সুৰণ্ণমিস্সকং ৰালুকং ওকিরি, পাকারপরিক্খেপং কারেসি, সত্তরতনমযং দ্ৰারকোট্ঠকং কারেসি, সক্কারো মহা অহোসি.

থেরো তথাগতং উপসঙ্কমিত্ৰা ‘‘ভন্তে, তুম্হেহি মহাবোধিমূলে সমাপন্নসমাপত্তিং মযা রোপিতবোধিমূলে নিসীদিত্ৰা মহাজনস্স হিতত্থায সমাপজ্জথা’’তি আহ. ‘‘আনন্দ, কিং কথেসি, মযি মহাবোধিমূলে সমাপন্নসমাপত্তিং সমাপজ্জিত্ৰা নিসিন্নে অঞ্ঞো পদেসো ধারেতুং ন সক্কোতী’’তি. ‘‘ভন্তে, মহাজনস্স হিতত্থায ইমস্স ভূমিপ্পদেসস্স ধুৰনিযামেন সমাপত্তিসুখেন তং বোধিমূলং পরিভুঞ্জথা’’তি. সত্থা একরত্তিং সমাপত্তিসুখেন পরিভুঞ্জি. থেরো কোসলরাজাদীনং কথেত্ৰা বোধিমহং নাম কারেসি. সোপি খো বোধিরুক্খো আনন্দত্থেরেন রোপিতত্তা আনন্দবোধিযেৰাতি পঞ্ঞাযিত্থ. তদা ভিক্খূ ধম্মসভাযং কথং সমুট্ঠাপেসুং ‘‘আৰুসো আযস্মা আনন্দো ধরন্তেযেৰ তথাগতে বোধিং রোপেত্ৰা মহাপূজং কারেসি, অহো মহাগুণো থেরো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি আনন্দো সপরিৰারেসু চতূসু মহাদীপেসু মনুস্সে গহেত্ৰা বহুগন্ধমালাদীনি আহরিত্ৰা মহাবোধিমণ্ডে বোধিমহং কারেসিযেৰা’’তি ৰত্ৰা অতীতং আহরি.

অতীতে কলিঙ্গরট্ঠে দন্তপুরনগরে কালিঙ্গো নাম রাজা রজ্জং কারেসি. তস্স মহাকালিঙ্গো, চূল়কালিঙ্গোতি দ্ৰে পুত্তা অহেসুং. নেমিত্তকা ‘‘জেট্ঠপুত্তো পিতু অচ্চযেন রজ্জং কারেস্সতি, কনিট্ঠো পন ইসিপব্বজ্জং পব্বজিত্ৰা ভিক্খায চরিস্সতি, পুত্তো পনস্স চক্কৰত্তী ভৰিস্সতী’’তি ব্যাকরিংসু. অপরভাগে জেট্ঠপুত্তো পিতু অচ্চযেন রাজা অহোসি, কনিট্ঠো পন উপরাজা. সো ‘‘পুত্তো কির মে চক্কৰত্তী ভৰিস্সতী’’তি পুত্তং নিস্সায মানং অকাসি. রাজা অসহন্তো ‘‘চূল়কালিঙ্গং গণ্হা’’তি একং অত্থচরকং আণাপেসি. সো গন্ত্ৰা ‘‘কুমার, রাজা তং গণ্হাপেতুকামো, তৰ জীৰিতং রক্খাহী’’তি আহ. সো অত্তনো লঞ্জনমুদ্দিকঞ্চ সুখুমকম্বলঞ্চ খগ্গঞ্চাতি ইমানি তীণি অত্থচরকামচ্চস্স দস্সেত্ৰা ‘‘ইমায সঞ্ঞায মম পুত্তস্স রজ্জং দদেয্যাথা’’তি ৰত্ৰা অরঞ্ঞং পৰিসিত্ৰা রমণীযে ভূমিভাগে অস্সমং কত্ৰা ইসিপব্বজ্জং পব্বজিত্ৰা নদীতীরে ৰাসং কপ্পেসি.

মদ্দরট্ঠেপি সাগলনগরে মদ্দরঞ্ঞো অগ্গমহেসী ধীতরং ৰিজাযি. তং নেমিত্তকা ‘‘অযং ভিক্খং চরিত্ৰা জীৰিকং কপ্পেস্সতি, পুত্তো পনস্সা চক্কৰত্তী ভৰিস্সতী’’তি ব্যাকরিংসু. সকলজম্বুদীপে রাজানো তং পৰত্তিং সুত্ৰা একপ্পহারেনেৰ আগন্ত্ৰা সাগলনগরং রুন্ধিংসু. মদ্দরাজা চিন্তেসি ‘‘সচাহং ইমং একস্স দস্সামি, সেসরাজানো কুজ্ঝিস্সন্তি, মম ধীতরং রক্খিস্সামী’’তি ধীতরঞ্চ ভরিযঞ্চ গহেত্ৰা অঞ্ঞাতকৰেসেন পলাযিত্ৰা অরঞ্ঞং পৰিসিত্ৰা চূল়কালিঙ্গকুমারস্স অস্সমপদতো উপরিভাগে অস্সমং কত্ৰা পব্বজিত্ৰা উঞ্ছাচরিযায জীৰিকং কপ্পেন্তো তত্থ পটিৰসতি. মাতাপিতরো ‘‘ধীতরং রক্খিস্সামা’’তি তং অস্সমপদে কত্ৰা ফলাফলত্থায গচ্ছন্তি. সা তেসং গতকালে নানাপুপ্ফানি গহেত্ৰা পুপ্ফচুম্বটকং কত্ৰা গঙ্গাতীরে ঠপিতসোপানপন্তি ৰিয জাতো একো সুপুপ্ফিতো অম্বরুক্খো অত্থি, তং অভিরুহিত্ৰা কীল়িত্ৰা পুপ্ফচুম্বটকং উদকে খিপি. তং একদিৰসং গঙ্গাযং ন্হাযন্তস্স চূল়কালিঙ্গকুমারস্স সীসে লগ্গি. সো তং ওলোকেত্ৰা ‘‘ইদং একায ইত্থিযা কতং, নো চ খো মহল্লিকায, তরুণকুমারিকায কতকম্মং, ৰীমংসিস্সামি তাৰ ন’’ন্তি কিলেসৰসেন উপরিগঙ্গং গন্ত্ৰা তস্সা অম্বরুক্খে নিসীদিত্ৰা মধুরেন সরেন গাযন্তিযা সদ্দং সুত্ৰা রুক্খমূলং গন্ত্ৰা তং দিস্ৰা ‘‘ভদ্দে, কা নাম ত্ৰ’’ন্তি আহ. ‘‘মনুস্সিত্থীহমস্মি সামী’’তি. ‘‘তেন হি ওতরাহী’’তি. ‘‘ন সক্কা সামি, অহং খত্তিযা’’তি. ‘‘ভদ্দে, অহম্পি খত্তিযোযেৰ, ওতরাহী’’তি. সামি, ন ৰচনমত্তেনেৰ খত্তিযো হোতি, যদিসি খত্তিযো, খত্তিযমাযং কথেহী’’তি. তে উভোপি অঞ্ঞমঞ্ঞং খত্তিযমাযং কথযিংসু. রাজধীতা ওতরি.

তে অঞ্ঞমঞ্ঞং অজ্ঝাচারং চরিংসু. সা মাতাপিতূসু আগতেসু তস্স কালিঙ্গরাজপুত্তভাৰঞ্চেৰ অরঞ্ঞং পৰিট্ঠকারণঞ্চ ৰিত্থারেন তেসং কথেসি. তে ‘‘সাধূ’’তি সম্পটিচ্ছিত্ৰা তং তস্স অদংসু. তেসং পিযসংৰাসেন ৰসন্তানং রাজধীতা গব্ভং লভিত্ৰা দসমাসচ্চযেন ধঞ্ঞপুঞ্ঞলক্খণসম্পন্নং পুত্তং ৰিজাযি, ‘‘কালিঙ্গো’’তিস্স নামং অকংসু. সো ৰযপ্পত্তো পিতু চেৰ অয্যকস্স চ সন্তিকে সব্বসিপ্পানং নিপ্ফত্তিং পাপুণি. অথস্স পিতা নক্খত্তযোগৰসেন ভাতু মতভাৰং ঞত্ৰা ‘‘তাত, মা ত্ৰং অরঞ্ঞে ৰস, পেত্তেয্যো তে মহাকালিঙ্গো কালকতো, ত্ৰং দন্তপুরনগরং গন্ত্ৰা কুলসন্তকং সকলরজ্জং গণ্হাহী’’তি ৰত্ৰা অত্তনা আনীতং মুদ্দিকঞ্চ কম্বলঞ্চ খগ্গঞ্চ দত্ৰা ‘‘তাত, দন্তপুরনগরে অসুকৰীথিযং অম্হাকং অত্থচরকো অমচ্চো অত্থি, তস্স গেহে সযনমজ্ঝে ওতরিত্ৰা ইমানি তীণি রতনানি তস্স দস্সেত্ৰা মম পুত্তভাৰং আচিক্খ, সো তং রজ্জে পতিট্ঠাপেস্সতী’’তি উয্যোজেসি. সো মাতাপিতরো চ অয্যকায্যিকে চ ৰন্দিত্ৰা পুঞ্ঞমহিদ্ধিযা আকাসেন গন্ত্ৰা অমচ্চস্স সযনপিট্ঠেযেৰ ওতরিত্ৰা ‘‘কোসি ত্ৰ’’ন্তি পুট্ঠো ‘‘চূল়কালিঙ্গস্স পুত্তোম্হী’’তি আচিক্খিত্ৰা তানি রতনানি দস্সেসি. অমচ্চো রাজপরিসায আরোচেসি. অমচ্চা নগরং অলঙ্কারাপেত্ৰা তস্স সেতচ্ছত্তং উস্সাপযিংসু.

অথস্স কালিঙ্গভারদ্ৰাজো নাম পুরোহিতো তস্স দস চক্কৰত্তিৰত্তানি আচিক্খি. সো তং ৰত্তং পূরেসি. অথস্স পন্নরসউপোসথদিৰসে চক্কদহতো চক্করতনং, উপোসথকুলতো হত্থিরতনং, ৰলাহককুলতো অস্সরতনং, ৰেপুল্লপব্বততো মণিরতনং আগমি, ইত্থিরতনগহপতিরতনপরিণাযকরতনানি পাতুভৰন্তি. সো সকলচক্কৰাল়গব্ভে রজ্জং গণ্হিত্ৰা একদিৰসঞ্চ ছত্তিংসযোজনায পরিসায পরিৰুতো সব্বসেতং কেলাসকূটপটিভাগং হত্থিং আরুয্হ মহন্তেন সিরিৰিলাসেন মাতাপিতূনং সন্তিকং পাযাসি. অথস্স সব্ববুদ্ধানং জযপল্লঙ্কস্স পথৰীনাভিভূতস্স মহাবোধিমণ্ডস্স উপরিভাগে নাগো গন্তুং নাসক্খি. রাজা পুনপ্পুনং চোদেসি, সো নাসক্খিযেৰ. তমত্থং পকাসেন্তো সত্থা পঠমং গাথমাহ –

৬৭.

‘‘রাজা কালিঙ্গো চক্কৰত্তি, ধম্মেন পথৰিমনুসাসং;

অগমা বোধিসমীপং, নাগেন মহানুভাৰেনা’’তি.

অথ রঞ্ঞো পুরোহিতো রঞ্ঞা সদ্ধিং গচ্ছন্তো ‘‘আকাসে আৰরণং নাম নত্থি, কিং নু খো রাজা হত্থিং পেসেতুং ন সক্কোতি, ৰীমংসিস্সামী’’তি আকাসতো ওরুয্হ সব্ববুদ্ধানংযেৰ জযপল্লঙ্কং পথৰীনাভিমণ্ডলভূতং ভূমিভাগং পস্সি. তদা কির তত্থ অট্ঠরাজকরীসমত্তে ঠানে কেসমস্সুমত্তম্পি তিণং নাম নত্থি, রজতপট্টৰণ্ণৰালুকা ৰিপ্পকিণ্ণা হোন্তি, সমন্তা তিণলতাৰনপ্পতিযো বোধিমণ্ডং পদক্খিণং কত্ৰা আৰট্টেত্ৰা বোধিমণ্ডাভিমুখাৰ অট্ঠংসু. ব্রাহ্মণো তং ভূমিভাগং ওলোকেত্ৰা ‘‘ইদঞ্হি সব্ববুদ্ধানং সব্বকিলেসৰিদ্ধংসনট্ঠানং, ইমস্স উপরিভাগে সক্কাদীহিপি ন সক্কা গন্তু’’ন্তি চিন্তেত্ৰা কালিঙ্গরঞ্ঞো সন্তিকং গন্ত্ৰা বোধিমণ্ডস্স ৰণ্ণং কথেত্ৰা রাজানং ‘‘ওতরা’’তি আহ. তমত্থং পকাসেন্তো সত্থা ইমা গাথা আহ –

৬৮.

‘‘কালিঙ্গো ভারদ্ৰাজো চ, রাজানং কালিঙ্গং সমণকোলঞ্ঞং;

চক্কং ৰত্তযতো পরিগ্গহেত্ৰা, পঞ্জলী ইদমৰোচ.

৬৯.

‘‘পচ্চোরোহ মহারাজ, ভূমিভাগো যথা সমণুগ্গতো;

ইধ অনধিৰরা বুদ্ধা, অভিসম্বুদ্ধা ৰিরোচন্তি.

৭০.

‘‘পদক্খিণতো আৰট্টা, তিণলতা অস্মিং ভূমিভাগস্মিং;

পথৰিযা নাভিযং মণ্ডো, ইতি নো সুতং মন্তে মহারাজ.

৭১.

‘‘সাগরপরিযন্তায, মেদিনিযা সব্বভূতধরণিযা;

পথৰিযা অযং মণ্ডো, ওরোহিত্ৰা নমো করোহি.

৭২.

‘‘যে তে ভৰন্তি নাগা চ, অভিজাতা চ কুঞ্জরা;

এত্তাৰতা পদেসং তে, নাগা নেৰ মুপযন্তি.

৭৩.

‘‘অভিজাতো নাগো কামং, পেসেহি কুঞ্জরং দন্তিং;

এত্তাৰতা পদেসো, সক্কা নাগেন মুপগন্তুং.

৭৪.

‘‘তং সুত্ৰা রাজা কালিঙ্গো, ৰেয্যঞ্জনিকৰচো নিসামেত্ৰা;

সম্পেসেসি নাগং ঞস্সাম, মযং যথিমস্সিদং ৰচনং.

৭৫.

‘‘সম্পেসিতো চ রঞ্ঞা, নাগো কোঞ্চোৰ অভিনদিত্ৰান;

পটিসক্কিত্ৰা নিসীদি, গরুংৰ ভারং অসহমানো’’তি.

তত্থ সমণকোলঞ্ঞন্তি তাপসানং পুত্তং. চক্কং ৰত্তযতোতি চক্কং ৰত্তযমানং, চক্কৰত্তিন্তি অত্থো. পরিগ্গহেত্ৰাতি ভূমিভাগং ৰীমংসিত্ৰা. সমণুগ্গতোতি সব্ববুদ্ধেহি ৰণ্ণিতো. অনধিৰরাতি অতুল্যা অপ্পমেয্যা. ৰিরোচন্তীতি ৰিহতসব্বকিলেসন্ধকারা তরুণসূরিযা ৰিয ইধ নিসিন্না ৰিরোচন্তি. তিণলতাতি তিণানি চ লতাযো চ. মণ্ডোতি চতুনহুতাধিকদ্ৰিযোজনসতসহস্সবহলায পথৰিযা মণ্ডো সারো নাভিভূতো অচলট্ঠানং, কপ্পে সণ্ঠহন্তে পঠমং সণ্ঠহতি, ৰিনস্সন্তে পচ্ছা ৰিনস্সতি. ইতি নো সুতন্তি এৰং অম্হেহি লক্খণমন্তৰসেন সুতং. ওরোহিত্ৰাতি আকাসতো ওতরিত্ৰা ইমস্স সব্ববুদ্ধানং কিলেসৰিদ্ধংসনট্ঠানস্স নমো করোহি, পূজাসক্কারং করোহি.

যে তেতি যে চক্কৰত্তিরঞ্ঞো হত্থিরতনসঙ্খাতা উপোসথকুলে নিব্বত্তনাগা. এত্তাৰতাতি সব্বেপি তে এত্তকং পদেসং নেৰ উপযন্তি, কোট্টিযমানাপি ন উপগচ্ছন্তিযেৰ. অভিজাতোতি গোচরিযাদীনি অট্ঠ হত্থিকুলানি অভিভৰিত্ৰা অতিক্কমিত্ৰা উপোসথকুলে জাতো. কুঞ্জরন্তি উত্তমং. এত্তাৰতাতি এত্তকো পদেসো সক্কা এতেন নাগেন উপগন্তুং, ইতো উত্তরি ন সক্কা, অভিকঙ্খন্তো ৰজিরঙ্কুসেন সঞ্ঞং দত্ৰা পেসেহীতি. ৰেয্যঞ্জনিকৰচো নিসামেত্ৰাতি ভিক্খৰে, সো রাজা তস্স লক্খণপাঠকস্স ৰেয্যঞ্জনিকস্স কালিঙ্গভারদ্ৰাজস্স ৰচো নিসামেত্ৰা উপধারেত্ৰা ‘‘ঞস্সাম মযং যথা ইমস্স ৰচনং যদি ৰা সচ্চং যদি ৰা অলিক’’ন্তি ৰীমংসন্তো নাগং পেসেসীতি অত্থো. কোঞ্চোৰ অভিনদিত্ৰানাতি ভিক্খৰে, সো নাগো তেন রঞ্ঞা ৰজিরঙ্কুসেন চোদেত্ৰা পেসিতো কোঞ্চসকুণো ৰিয নদিত্ৰা পটিসক্কিত্ৰা সোণ্ডং উক্খিপিত্ৰা গীৰং উন্নামেত্ৰা গরুং ভারং ৰহিতুং অসক্কোন্তো ৰিয আকাসেযেৰ নিসীদি.

সো তেন পুনপ্পুনং ৰিজ্ঝিযমানো ৰেদনং সহিতুং অসক্কোন্তো কালমকাসি. রাজা পনস্স মতভাৰং অজানন্তো পিট্ঠে নিসিন্নোৰ অহোসি. কালিঙ্গভারদ্ৰাজো ‘‘মহারাজ, তৰ নাগো নিরুদ্ধো, অঞ্ঞং হত্থিং সঙ্কমা’’তি আহ. তমত্থং পকাসেন্তো সত্থা দসমং গাথমাহ –

৭৬.

‘‘কালিঙ্গভারদ্ৰাজো, নাগং খীণাযুকং ৰিদিত্ৰান;

রাজানং কালিঙ্গং, তরমানো অজ্ঝভাসিত্থ;

অঞ্ঞং সঙ্কম নাগং, নাগো খীণাযুকো মহারাজা’’তি.

তত্থ নাগো খীণাযুকোতি নাগো তে জীৰিতক্খযং পত্তো, যং কিঞ্চি করোন্তেন ন সক্কা পিট্ঠে নিসিন্নেন বোধিমণ্ডমত্থকেন গন্তুং. অঞ্ঞং নাগং সঙ্কমাতি রঞ্ঞো পুঞ্ঞিদ্ধিবলেন অঞ্ঞো নাগো উপোসথকুলতো আগন্ত্ৰা পিট্ঠিং উপনামেসি.

রাজা তস্স পিট্ঠিযং নিসীদি. তস্মিং খণে মতহত্থী ভূমিযং পতি. তমত্থং পকাসেন্তো সত্থা ইতরং গাথমাহ –

৭৭.

‘‘তং সুত্ৰা কালিঙ্গো, তরমানো সঙ্কমী নাগং;

সঙ্কন্তেৰ রঞ্ঞে নাগো, তত্থেৰ পতি ভুম্যা;

ৰেয্যঞ্জনিকৰচো, যথা তথা অহু নাগো’’তি.

অথ রাজা আকাসতো ওরুয্হ বোধিমণ্ডং ওলোকেত্ৰা পাটিহারিযং দিস্ৰা ভারদ্ৰাজস্স থুতিং করোন্তো আহ –

৭৮.

‘‘কালিঙ্গো রাজা কালিঙ্গং, ব্রাহ্মণং এতদৰোচ;

ত্ৰমেৰ অসি সম্বুদ্ধো, সব্বঞ্ঞূ সব্বদস্সাৰী’’তি.

ব্রাহ্মণো তং অনধিৰাসেন্তো অত্তানং নীচট্ঠানে ঠপেত্ৰা বুদ্ধেযেৰ উক্খিপিত্ৰা ৰণ্ণেসি. তমত্থং পকাসেন্তো সত্থা ইমা গাথা অভাসি –

৭৯.

‘‘তং অনধিৰাসেন্তো কালিঙ্গ, ব্রাহ্মণো ইদমৰোচ;

ৰেয্যঞ্জনিকা হি মযং, বুদ্ধা সব্বঞ্ঞুনো মহারাজ.

৮০.

‘‘সব্বঞ্ঞূ সব্বৰিদূ চ, বুদ্ধা ন লক্খণেন জানন্তি;

আগমবলসা হি মযং, বুদ্ধা সব্বং পজানন্তী’’তি.

তত্থ ৰেয্যঞ্জনিকাতি মহারাজ, মযং ব্যঞ্জনং দিস্ৰা ব্যাকরণসমত্থা সুতবুদ্ধা নাম, বুদ্ধা পন সব্বঞ্ঞূ সব্বৰিদূ. বুদ্ধা হি অতীতাদিভেদং সব্বং জানন্তি চেৰ পস্সন্তি চ, সব্বঞ্ঞুতঞ্ঞাণেন তে সব্বং জানন্তি, ন লক্খণেন. মযং পন আগমবলসা অত্তনো সিপ্পবলেনেৰ জানাম, তঞ্চ একদেসমেৰ, বুদ্ধা পন সব্বং পজানন্তীতি.

রাজা বুদ্ধগুণে সুত্ৰা সোমনস্সপ্পত্তো হুত্ৰা সকলচক্কৰাল়ৰাসিকেহি বহুগন্ধমালং আহরাপেত্ৰা মহাবোধিমণ্ডে সত্তাহং ৰসিত্ৰা মহাবোধিপূজং কারেসি. তমত্থং পকাসেন্তো সত্থা ইমং গাথাদ্ৰযমাহ –

৮১.

‘‘মহযিত্ৰা সম্বোধিং, নানাতুরিযেহি ৰজ্জমানেহি;

মালাৰিলেপনং অভিহরিত্ৰা, অথ রাজা মনুপাযাসি.

৮২.

‘‘সট্ঠি ৰাহসহস্সানি, পুপ্ফানং সন্নিপাতযি;

পূজেসি রাজা কালিঙ্গো, বোধিমণ্ডমনুত্তর’’ন্তি.

তত্থ মনুপাযাসীতি মাতাপিতূনং সন্তিকং অগমাসি. সো মহাবোধিমণ্ডে অট্ঠারসহত্থং সুৰণ্ণত্থম্ভং উস্সাপেসি. তস্স সত্তরতনমযা ৰেদিকা কারেসি, রতনমিস্সকং ৰালুকং ওকিরাপেত্ৰা পাকারপরিক্খিত্তং কারেসি, সত্তরতনমযং দ্ৰারকোট্ঠকং কারেসি, দেৰসিকং পুপ্ফানং সট্ঠিৰাহসহস্সানি সন্নিপাতযি, এৰং বোধিমণ্ডং পূজেসি. পাল়িযং পন ‘‘সট্ঠি ৰাহসহস্সানি পুপ্ফান’’ন্তি এত্তকমেৰ আগতং.

এৰং মহাবোধিপূজং কত্ৰা মাতাপিতরো অয্যকায্যিকে চ আদায দন্তপুরমেৰ আনেত্ৰা দানাদীনি পুঞ্ঞানি কত্ৰা তাৰতিংসভৰনে নিব্বত্তি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি আনন্দো বোধিপূজং কারেসিযেৰা’’তি ৰত্ৰা জাতকং সমোধানেসি – ‘‘তদা মাণৰককালিঙ্গো আনন্দো অহোসি, কালিঙ্গভারদ্ৰাজো পন অহমেৰ অহোসি’’ন্তি.

কালিঙ্গবোধিজাতকৰণ্ণনা ছট্ঠা.

[৪৮০] ৭. অকিত্তিজাতকৰণ্ণনা

অকিত্তিং দিস্ৰা সম্মন্তন্তি ইদং সত্থা জেতৰনে ৰিহরন্তো একং সাৰত্থিৰাসিং দানপতিং উপাসকং আরব্ভ কথেসি. সো কির সত্থারং নিমন্তেত্ৰা সত্তাহং বুদ্ধপ্পমুখস্স ভিক্খুসঙ্ঘস্স মহাদানং দত্ৰা পরিযোসানদিৰসে অরিযসঙ্ঘস্স সব্বপরিক্খারে অদাসি. অথস্স সত্থা পরিসমজ্ঝেযেৰ অনুমোদনং করোন্তো ‘‘উপাসক, মহা তে পরিচ্চাগো, অহো দুক্করং তযা কতং, অযঞ্হি দানৰংসো নাম পোরাণকপণ্ডিতানং ৰংসো, দানং নাম গিহিনাপি পব্বজিতেনাপি দাতব্বমেৰ. পোরাণকপণ্ডিতা পন পব্বজিত্ৰা অরঞ্ঞে ৰসন্তাপি অলোণকং ৰিধূপনং উদকমত্তসিত্তং কারপণ্ণং খাদমানাপি সম্পত্তযাচকানং যাৰদত্থং দত্ৰা সযং পীতিসুখেন যাপযিংসূ’’তি ৰত্ৰা ‘‘ভন্তে, ইদং তাৰ সব্বপরিক্খারদানং মহাজনস্স পাকটং, তুম্হেহি ৰুত্তং অপাকটং, তং নো কথেথা’’তি তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অসীতিকোটিৰিভৰস্স ব্রাহ্মণমহাসালস্স কুলে নিব্বত্তি, ‘‘অকিত্তী’’তিস্স নামং করিংসু. তস্স পদসা গমনকালে ভগিনীপি জাযি, ‘‘যসৰতী’’তিস্সা নামং করিংসু. মহাসত্তো সোল়সৰস্সকালে তক্কসিলং গন্ত্ৰা সব্বসিপ্পানি উগ্গণ্হিত্ৰা পচ্চাগমি. অথস্স মাতাপিতরো কালমকংসু. সো তেসং পেতকিচ্চানি কারেত্ৰা ধনৰিলোকনং করোন্তো ‘‘অসুকো নাম এত্তকং ধনং সণ্ঠপেত্ৰা অতীতো, অসুকো এত্তক’’ন্তি ৰচনং সুত্ৰা সংৰিগ্গমানসো হুত্ৰা ‘‘ইদং ধনমেৰ পঞ্ঞাযতি, ন ধনস্স সংহারকা, সব্বে ইমং ধনং পহাযেৰ গতা, অহং পন তং আদায গমিস্সামী’’তি ভগিনিং পক্কোসাপেত্ৰা ‘‘ত্ৰং ইমং ধনং পটিপজ্জাহী’’তি আহ. ‘‘তুম্হাকং পন কো অজ্ঝাসযো’’তি? ‘‘পব্বজিতুকামোম্হী’’তি. ‘‘ভাতিক, অহং তুম্হেহি ছড্ডিতং খেল়ং ন সিরসা সম্পটিচ্ছামি, ন মে ইমিনা অত্থো, অহম্পি পব্বজিস্সামী’’তি. সো রাজানং আপুচ্ছিত্ৰা ভেরিং চরাপেসি ‘‘ধনেন অত্থিকা অকিত্তিপণ্ডিতস্স গেহং আগচ্ছন্তূ’’তি.

সো সত্তাহং মহাদানং পৰত্তেত্ৰা ধনে অখীযমানে চিন্তেসি ‘‘ইমে সঙ্খারা খীযন্তি, কিং মে ধনকীল়ায, অত্থিকা তং গণ্হিস্সন্তী’’তি নিৰেসনদ্ৰারং ৰিৰরিত্ৰা ‘‘দিন্নঞ্ঞেৰ হরন্তূ’’তি সহিরঞ্ঞসুৰণ্ণং গেহং পহায ঞাতিমণ্ডলস্স পরিদেৰন্তস্স ভগিনিং গহেত্ৰা বারাণসিতো নিক্খমি. যেন দ্ৰারেন নিক্খমি, তং অকিত্তিদ্ৰারং নাম জাতং, যেন তিত্থেন নদিং ওতিণ্ণো, তম্পি অকিত্তিতিত্থং নাম জাতং. সো দ্ৰে তীণি যোজনানি গন্ত্ৰা রমণীযে ঠানে পণ্ণসালং কত্ৰা ভগিনিযা সদ্ধিং পব্বজি. তস্স পব্বজিতকালতো পট্ঠায বহুগামনিগমরাজধানিৰাসিনো পব্বজিংসু. মহাপরিৰারো অহোসি, মহালাভসক্কারো নিব্বত্তি, বুদ্ধুপ্পাদকালো ৰিয পৰত্তি. অথ মহাসত্তো ‘‘অযং লাভসক্কারো মহা, পরিৰারোপি মহন্তো, মযা এককেনেৰ ৰিহরিতুং ৰট্টতী’’তি চিন্তেত্ৰা অৰেলায অন্তমসো ভগিনিম্পি অজানাপেত্ৰা এককোৰ নিক্খমিত্ৰা অনুপুব্বেন দমিল়রট্ঠং পত্ৰা কাৰীরপট্টনসমীপে উয্যানে ৰিহরন্তো ঝানাভিঞ্ঞাযো নিব্বত্তেসি. তত্রাপিস্স মহালাভসক্কারো উপ্পজ্জি. সো তং জিগুচ্ছিত্ৰা ছড্ডেত্ৰা আকাসেন গন্ত্ৰা নাগদীপসমীপে কারদীপে ওতরি. তদা কারদীপো অহিদীপো নাম অহোসি. সো তত্থ মহন্তং কাররুক্খং উপনিস্সায পণ্ণসালং মাপেত্ৰা ৰাসং কপ্পেসি. তত্থ তস্স ৰসনভাৰং ন কোচি জানাতি. অথস্স ভগিনী ভাতরং গৰেসমানা অনুপুব্বেন দমিল়রট্ঠং পত্ৰা তং অদিস্ৰা তেন ৰসিতট্ঠানেযেৰ ৰসি, ঝানং পন নিব্বত্তেতুং নাসক্খি.

মহাসত্তো অপ্পিচ্ছতায কত্থচি অগন্ত্ৰা তস্স রুক্খস্স ফলকালে ফলানি খাদতি, পত্তকালে পত্তানি উদকসিত্তানি খাদতি. তস্স সীলতেজেন সক্কস্স পণ্ডুকম্বলসিলাসনং উণ্হাকারং দস্সেসি. সক্কো ‘‘কো নু খো মং ঠানা চাৰেতুকামো’’তি আৰজ্জেন্তো অকিত্তিপণ্ডিতং দিস্ৰা ‘‘কিমত্থং এস তাপসো সীলানি রক্খতি, সক্কত্তং নু খো পত্থেতি, উদাহু অঞ্ঞং, ৰীমিংসিস্সামি নং. অযঞ্হি দুক্খেন জীৰিকং কপ্পেসি, উদকসিত্তানি কারপণ্ণানি খাদতি, সচে সক্কত্তং পত্থেতি, অত্তনো সিত্তপত্তানি ময্হং দস্সতি, নো চে, ন দস্সতী’’তি ব্রাহ্মণৰণ্ণেন তস্স সন্তিকং অগমাসি. বোধিসত্তো কারপণ্ণানি সেদেত্ৰা ওতারেত্ৰা ‘‘সীতলভূতানি খাদিস্সামী’’তি পণ্ণসালদ্ৰারে নিসীদি. অথস্স পুরতো সক্কো ভিক্খায অট্ঠাসি. মহাসত্তো তং দিস্ৰা সোমনস্সপ্পত্তো হুত্ৰা ‘‘লাভা ৰত মে, যোহং যাচকং পস্সামি, অজ্জ মে মনোরথং মত্থকং পাপেত্ৰা দানং দস্সামী’’তি পক্কভাজনেনেৰ আদায গন্ত্ৰা ‘‘ইদং মে দানং সব্বঞ্ঞুতঞ্ঞাণস্স পচ্চযো হোতূ’’তি অত্তনো অসেসেত্ৰাৰ তস্স ভাজনে পক্খিপি. ব্রাহ্মণো তং গহেত্ৰা থোকং গন্ত্ৰা অন্তরধাযি. মহাসত্তোপি তস্স দত্ৰা পুন অপচিত্ৰা পীতিসুখেনেৰ ৰীতিনামেত্ৰা পুনদিৰসে পচিত্ৰা তত্থেৰ পণ্ণসালদ্ৰারে নিসীদি.

সক্কো পুন ব্রাহ্মণৰেসেন অগমাসি. পুনপিস্স দত্ৰা মহাসত্তো তথেৰ ৰীতিনামেসি. ততিযদিৰসেপি তথেৰ দত্ৰা ‘‘অহো মে লাভা ৰত, কারপণ্ণানি নিস্সায মহন্তং পুঞ্ঞং পসুত’’ন্তি সোমনস্সপ্পত্তো তযো দিৰসে অনাহারতায দুব্বলোপি সমানো মজ্ঝন্হিকসমযে পণ্ণসালতো নিক্খমিত্ৰা দানং আৰজ্জেন্তো পণ্ণসালদ্ৰারে নিসীদি. সক্কোপি চিন্তেসি ‘‘অযং ব্রাহ্মণো তযো দিৰসে নিরাহারো হুত্ৰা এৰং দুব্বলোপি দানং দেন্তো তুট্ঠচিত্তোৰ দেতি, চিত্তস্স অঞ্ঞথত্তম্পি নত্থি, অহং ইমং ‘ইদং নাম পত্থেত্ৰা দেতী’তি ন জানামি, পুচ্ছিত্ৰা অজ্ঝাসযমস্স সুত্ৰা দানকারণং জানিস্সামী’’তি. সো মজ্ঝন্হিকে ৰীতিৰত্তে মহন্তেন সিরিসোভগ্গেন গগনতলে তরুণসূরিযো ৰিয জলমানো আগন্ত্ৰা মহাসত্তস্স পুরতোৰ ঠত্ৰা ‘‘অম্ভো তাপস, এৰং উণ্হৰাতে পহরন্তে এৰরূপে লোণজলপরিক্খিত্তে অরঞ্ঞে কিমত্থং তপোকম্মং করোসী’’তি পুচ্ছি. তমত্থং পকাসেন্তো সত্থা পঠমং গাথমাহ –

৮৩.

‘‘অকিত্তিং দিস্ৰা সম্মন্তং, সক্কো ভূতপতী ব্রৰি;

কিং পত্থযং মহাব্রহ্মে, একো সম্মসি ঘম্মনী’’তি.

তত্থ কিং পত্থযন্তি কিং মনুস্সসম্পত্তিং পত্থেন্তো, উদাহু সক্কসম্পত্তিআদীনং অঞ্ঞতরন্তি.

মহাসত্তো তং সুত্ৰা সক্কভাৰঞ্চস্স ঞত্ৰা ‘‘নাহং এতা সম্পত্তিযো পত্থেমি, সব্বঞ্ঞুতং পন পত্থেন্তো তপোকম্মং করোমী’’তি পকাসেতুং দুতিযং গাথমাহ –

৮৪.

‘‘দুক্খো পুনব্ভৰো সক্ক, সরীরস্স চ ভেদনং;

সম্মোহমরণং দুক্খং, তস্মা সম্মামি ৰাসৰা’’তি.

তত্থ তস্মাতি যস্মা পুনপ্পুনং জাতি খন্ধানং ভেদনং সম্মোহমরণঞ্চ দুক্খং, তস্মা যত্থেতানি নত্থি, তং নিব্বানং পত্থেন্তো ইধ সম্মামীতি এৰং অত্তনো নিব্বানজ্ঝাসযতং দীপেতি.

তং সুত্ৰা সক্কো তুট্ঠমানসো ‘‘সব্বভৰেসু কিরাযং উক্কণ্ঠিতো নিব্বানত্থায অরঞ্ঞে ৰিহরতি, ৰরমস্স দস্সামী’’তি ৰরেন নিমন্তেন্তো ততিযং গাথমাহ –

৮৫.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসী’’তি.

তত্থ যং কিঞ্চি মনসিচ্ছসীতি যং মনসা ইচ্ছসি, তং দম্মি, ৰরং গণ্হাহীতি.

মহাসত্তো ৰরং গণ্হন্তো চতুত্থং গাথমাহ –

৮৬.

‘‘ৰরঞ্চে মে অদো সক্ক, সব্বভূতানমিস্সর;

যেন পুত্তে চ দারে চ, ধনধঞ্ঞং পিযানি চ;

লদ্ধা নরা ন তপ্পন্তি, সো লোভো ন মযী ৰসে’’তি.

তত্থ ৰরঞ্চে মে অদোতি সচে ৰরং ময্হং দেসি. পিযানি চাতি অঞ্ঞানি চ যানি পিযভণ্ডানি. ন তপ্পন্তীতি পুনপ্পুনং পুত্তাদযো পত্থেন্তিযেৰ, ন তিত্তিং উপগচ্ছন্তি. ন মযী ৰসেতি মযি মা ৰসতু মা উপ্পজ্জতু.

অথস্স সক্কো তুস্সিত্ৰা উত্তরিম্পি ৰরং দেন্তো মহাসত্তো চ ৰরং গণ্হন্তো ইমা গাথা অভাসিংসু –

৮৭.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৮৮.

‘‘ৰরঞ্চে মে অদো সক্ক, সব্বভূতানমিস্সর;

খেত্তং ৰত্থুং হিরঞ্ঞঞ্চ, গৰাস্সং দাসপোরিসং;

যেন জাতেন জীযন্তি, সো দোসো ন মযী ৰসে.

৮৯.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯০.

‘‘ৰরঞ্চে মে অদো সক্ক, সব্বভূতানমিস্সর;

বালং ন পস্সে ন সুণে, ন চ বালেন সংৰসে;

বালেনল্লাপসল্লাপং, ন করে ন চ রোচযে.

৯১.

‘‘কিং নু তে অকরং বালো, ৰদ কস্সপ কারণং;

কেন কস্সপ বালস্স, দস্সনং নাভিকঙ্খসি.

৯২.

‘‘অনযং নযতি দুম্মেধো, অধুরাযং নিযুঞ্জতি;

দুন্নযো সেয্যসো হোতি, সম্মা ৰুত্তো পকুপ্পতি;

ৰিনযং সো ন জানাতি, সাধু তস্স অদস্সনং.

৯৩.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯৪.

‘‘ৰরঞ্চে মে অদো সক্ক, সব্বভূতানমিস্সর;

ধীরং পস্সে সুণে ধীরং, ধীরেন সহ সংৰসে;

ধীরেনল্লাপসল্লাপং, তং করে তঞ্চ রোচযে.

৯৫.

‘‘কিং নু তে অকরং ধীরো, ৰদ কস্সপ কারণং;

কেন কস্সপ ধীরস্স, দস্সনং অভিকঙ্খসি.

৯৬.

‘‘নযং নযতি মেধাৰী, অধুরাযং ন যুঞ্জতি;

সুনযো সেয্যসো হোতি, সম্মা ৰুত্তো ন কুপ্পতি;

ৰিনযং সো পজানাতি, সাধু তেন সমাগমো.

৯৭.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

৯৮.

‘‘ৰরঞ্চে মে অদো সক্ক, সব্বভূতানমিস্সর;

ততো রত্যা ৰিৰসানে, সূরিযুগ্গমনং পতি;

দিব্বা ভক্খা পাতুভৰেয্যুং, সীলৰন্তো চ যাচকা.

৯৯.

‘‘দদতো মে ন খীযেথ, দত্ৰা নানুতপেয্যহং;

দদং চিত্তং পসাদেয্যং, এতং সক্ক ৰরং ৰরে.

১০০.

‘‘এতস্মিং তে সুলপিতে, পতিরূপে সুভাসিতে;

ৰরং কস্সপ তে দম্মি, যং কিঞ্চি মনসিচ্ছসি.

১০১.

‘‘ৰরঞ্চে মে অদো সক্ক, সব্বভূতানমিস্সর;

ন মং পুন উপেয্যাসি, এতং সক্ক ৰরং ৰরে.

১০২.

‘‘বহূহি ৰতচরিযাহি, নরা চ অথ নারিযো;

দস্সনং অভিকঙ্খন্তি, কিং নু মে দস্সনে ভযং.

১০৩.

‘‘তং তাদিসং দেৰৰণ্ণং, সব্বকামসমিদ্ধিনং;

দিস্ৰা তপো পমজ্জেয্যং, এতং তে দস্সনে ভয’’ন্তি.

তত্থ যেন জাতেনাতি যেন চিত্তেন জাতেন কুদ্ধা সত্তা পাণৰধাদীনং কতত্তা রাজদণ্ডৰসেন ৰিসখাদনাদীহি ৰা অত্তনো মরণৰসেন এতানি খেত্তাদীনি জীযন্তি, সো দোসো মযি ন ৰসেয্যাতি যাচতি. ন সুণেতি অসুকট্ঠানে নাম ৰসতীতিপি ইমেহি কারণেহি ন সুণেয্যং. কিং নু তে অকরন্তি কিং নু তৰ বালেন মাতা মারিতা, উদাহু তৰ পিতা, অঞ্ঞং ৰা পন তে কিং নাম অনত্থং বালো অকরং.

অনযং নযতীতি অকারণং ‘‘কারণ’’ন্তি গণ্হাতি, পাণাতিপাতাদীনি কত্ৰা জীৰিকং কপ্পেস্সামীতি এৰরূপানি অনত্থকম্মানি চিন্তেতি. অধুরাযন্তি সদ্ধাধুরসীলধুরপঞ্ঞাধুরেসু অযোজেত্ৰা অযোগে নিযুঞ্জতি. দুন্নযো সেয্যসো হোতীতি দুন্নযোৰ তস্স সেয্যো হোতি. পঞ্চ দুস্সীলকম্মানি সমাদায ৰত্তনমেৰ সেয্যোতি গণ্হাতি, হিতপটিপত্তিযা ৰা দুন্নযো হোতি নেতুং অসক্কুণেয্যো. সম্মা ৰুত্তোতি হেতুনা কারণেন ৰুত্তো কুপ্পতি. ৰিনযন্তি ‘‘এৰং অভিক্কমিতব্ব’’ন্তিআদিকং আচারৰিনযং ন জানাতি, ওৰাদঞ্চ ন সম্পটিচ্ছতি. সাধু তস্সাতি এতেহি কারণেহি তস্স অদস্সনমেৰ সাধু.

সূরিযুগ্গমনং পতীতি সূরিযুগ্গমনৰেলায. দিব্বা ভক্খাতি দিব্বভোজনং যাচকাতি তস্স দিব্বভোজনস্স পটিগ্গাহকা. ৰতচরিযাহীতি দানসীলউপোসথকম্মেহি. দস্সনং অভিকঙ্খন্তীতি দস্সনং মম অভিকঙ্খন্তি. তং তাদিসন্তি এৰরূপং দিব্বালঙ্কারৰিভূসিতং. পমজ্জেয্যন্তি পমাদং আপজ্জেয্যং. তৰ সিরিসম্পত্তিং পত্থেয্যং, এৰং নিব্বানত্থায পৰত্তিতে তপোকম্মে সক্কট্ঠানং পত্থেন্তো পমত্তো নাম ভৰেয্যং, এতং তৰ দস্সনে ময্হং ভযন্তি.

সক্কো ‘‘সাধু, ভন্তে, ইতো পট্ঠায ন তে সন্তিকং আগমিস্সামা’’তি তং ৰন্দিত্ৰা খমাপেত্ৰা পক্কামি. মহাসত্তো যাৰজীৰং তত্থেৰ ৰসন্তো ব্রহ্মৰিহারে ভাৰেত্ৰা ব্রহ্মলোকে নিব্বত্তি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সক্কো অনুরুদ্ধো অহোসি, অকিত্তিপণ্ডিতো পন অহমেৰ অহোসি’’ন্তি.

অকিত্তিজাতকৰণ্ণনা সত্তমা.

[৪৮১] ৮. তক্কারিযজাতকৰণ্ণনা

অহমেৰ দুব্ভাসিতং ভাসি বালোতি ইদং সত্থা জেতৰনে ৰিহরন্তো কোকালিকং আরব্ভ কথেসি. একস্মিঞ্হি অন্তোৰস্সে দ্ৰে অগ্গসাৰকা গণং পহায ৰিৰিত্তাৰাসং ৰসিতুকামা সত্থারং আপুচ্ছিত্ৰা কোকালিকরট্ঠে কোকালিকস্স ৰসনট্ঠানং গন্ত্ৰা তং এৰমাহংসু ‘‘আৰুসো কোকালিক, তং নিস্সায অম্হাকং, অম্হে চ নিস্সায তৰ ফাসুৰিহারো ভৰিস্সতি, ইমং তেমাসং ইধ ৰসেয্যামা’’তি. ‘‘কো পনাৰুসো, মং নিস্সায তুম্হাকং ফাসুৰিহারো’’তি. সচে ত্ৰং আৰুসো ‘‘দ্ৰে অগ্গসাৰকা ইধ ৰিহরন্তী’’তি কস্সচি নারোচেয্যাসি, মযং সুখং ৰিহরেয্যাম, অযং তং নিস্সায অম্হাকং ফাসুৰিহারোতি. ‘‘অথ তুম্হে নিস্সায ময্হং কো ফাসুৰিহারো’’তি? ‘‘মযং তুয্হং অন্তোতেমাসং ধম্মং ৰাচেস্সাম, ধম্মকথং কথেস্সাম, এস তুয্হং অম্হে নিস্সায ফাসুৰিহারো’’তি. ‘‘ৰসথাৰুসো, যথাজ্ঝাসযেনা’’তি. সো তেসং পতিরূপং সেনাসনং অদাসি. তে ফলসমাপত্তিসুখেন সুখং ৰসিংসু. কোচি নেসং তত্থ ৰসনভাৰং ন জানাতি.

তে ৰুত্থৰস্সা পৰারেত্ৰা ‘‘আৰুসো, তং নিস্সায সুখং ৰুত্থাম্হ, সত্থারং ৰন্দিতুং গচ্ছামা’’তি তং আপুচ্ছিংসু. সো ‘‘সাধূ’’তি সম্পটিচ্ছিত্ৰা তে আদায ধুরগামে পিণ্ডায চরি. থেরা কতভত্তকিচ্চা গামতো নিক্খমিংসু. কোকালিকো তে উয্যোজেত্ৰা নিৰত্তিত্ৰা মনুস্সানং আরোচেসি ‘‘উপাসকা, তুম্হে তিরচ্ছানসদিসা, দ্ৰে অগ্গসাৰকে তেমাসং ধুরৰিহারে ৰসন্তে ন জানিত্থ, ইদানি তে গতা’’তি. মনুস্সা ‘‘কস্মা পন, ভন্তে, অম্হাকং নারোচিত্থা’’তি ৰত্ৰা বহুং সপ্পিতেলাদিভেসজ্জঞ্চেৰ ৰত্থচ্ছাদনঞ্চ গহেত্ৰা থেরে উপসঙ্কমিত্ৰা ৰন্দিত্ৰা ‘‘খমথ নো, ভন্তে, মযং তুম্হাকং অগ্গসাৰকভাৰং ন জানাম, অজ্জ নো কোকালিকভদন্তস্স ৰচনেন ঞাতা, অম্হাকং অনুকম্পায ইমানি ভেসজ্জৰত্থচ্ছাদনানি গণ্হথা’’তি আহংসু.

কোকালিকো ‘‘থেরা অপ্পিচ্ছা সন্তুট্ঠা, ইমানি ৰত্থানি অত্তনা অগ্গহেত্ৰা ময্হং দস্সন্তী’’তি চিন্তেত্ৰা উপাসকেহি সদ্ধিংযেৰ থেরানং সন্তিকং গতো. থেরা ভিক্খুপরিপাচিতত্তা ততো কিঞ্চি নেৰ অত্তনা গণ্হিংসু, ন কোকালিকস্স দাপেসুং. উপাসকা ‘‘ভন্তে, ইদানি অগণ্হন্তা পুন অম্হাকং অনুকম্পায ইধ আগচ্ছেয্যাথা’’তি যাচিংসু. থেরা অনধিৰাসেত্ৰা সত্থু সন্তিকং অগমিংসু. কোকালিকো ‘‘ইমে থেরা অত্তনা অগণ্হন্তা ময্হং ন দাপেসু’’ন্তি আঘাতং বন্ধি. থেরাপি সত্থু সন্তিকে থোকং ৰসিত্ৰা অত্তনো পরিৰারে পঞ্চভিক্খুসতে চ আদায ভিক্খুসহস্সেন সদ্ধিং চারিকং চরমানা কোকালিকরট্ঠং পত্তা. তে উপাসকা পচ্চুগ্গমনং কত্ৰা থেরে আদায তমেৰ ৰিহারং নেত্ৰা দেৰসিকং মহাসক্কারং করিংসু. পহুতং ভেসজ্জৰত্থচ্ছাদনং উপ্পজ্জি, থেরেহি সদ্ধিং আগতভিক্খূ চীৰরানি ৰিচারেন্তা সদ্ধিং আগতানং ভিক্খূনঞ্ঞেৰ দেন্তি, কোকালিকস্স ন দেন্তি, থেরাপি তস্স ন দাপেন্তি. কোকালিকো চীৰরং অলভিত্ৰা ‘‘পাপিচ্ছা সারিপুত্তমোগ্গল্লানা, পুব্বে দীযমানং লাভং অগ্গহেত্ৰা ইদানি গণ্হন্তি, পূরেতুং ন সক্কা, অঞ্ঞে ন ওলোকেন্তী’’তি থেরে অক্কোসতি পরিভাসতি. থেরা ‘‘অযং অম্হে নিস্সায অকুসলং পসৰতী’’তি সপরিৰারা নিক্খমিত্ৰা ‘‘অঞ্ঞং, ভন্তে, কতিপাহং ৰসথা’’তি মনুস্সেহি যাচিযমানাপি নিৰত্তিতুং ন ইচ্ছিংসু.

অথেকো দহরো ভিক্খু আহ – ‘‘উপাসকা, কথং থেরা ৰসিস্সন্তি, তুম্হাকং কুলূপকো থেরো ইধ ইমেসং ৰাসং ন সহতী’’তি. তে তস্স সন্তিকং গন্ত্ৰা ‘‘ভন্তে, তুম্হে কির থেরানং ইধ ৰাসং ন সহথ, গচ্ছথ নে খমাপেত্ৰা নিৰত্তেথ, সচে ন নিৰত্তেথ, পলাযিত্ৰা অঞ্ঞত্থ ৰসথা’’তি আহংসু. সো উপাসকানং ভযেন গন্ত্ৰা থেরে যাচি. থেরা ‘‘গচ্ছাৰুসো, ন মযং নিৰত্তামা’’তি পক্কমিংসু. সো থেরে নিৰত্তেতুং অসক্কোন্তো ৰিহারমেৰ পচ্চাগতো. অথ নং উপাসকা পুচ্ছিংসু ‘‘নিৰত্তিতা তে, ভন্তে, থেরা’’তি. ‘‘নিৰত্তেতুং নাসক্খিং আৰুসো’’তি. অথ নং ‘‘ইমস্মিং পাপধম্মে ৰসন্তে ইধ পেসলা ভিক্খূ ন ৰসিস্সন্তি, নিক্কড্ঢাম ন’’ন্তি চিন্তেত্ৰা ‘‘ভন্তে, মা ত্ৰং ইধ ৰসি, অম্হে নিস্সায তুয্হং কিঞ্চি নত্থী’’তি আহংসু. সো তেহি নিক্কড্ঢিতো পত্তচীৰরমাদায জেতৰনং গন্ত্ৰা সত্থারং উপসঙ্কমিত্ৰা ‘‘পাপিচ্ছা, ভন্তে, সারিপুত্তমোগ্গল্লানা, পাপিকানং ইচ্ছানং ৰসং গতা’’তি আহ. অথ নং সত্থা ‘‘মা হেৰং কোকালিক, অৰচ, মা হেৰং কোকালিক অৰচ, পসাদেহি কোকালিক, সারিপুত্তমোগ্গল্লানেসু চিত্তং, তে পেসলা ভিক্খূ’’তি ৰারেতি. ৰারিতোপি কোকালিকো ‘‘তুম্হে, ভন্তে, তুম্হাকং অগ্গসাৰকানং সদ্দহথ, অহং পচ্চক্খতো অদ্দসং, পাপিচ্ছা এতে পটিচ্ছন্নকম্মন্তা দুস্সীলা’’তি ৰত্ৰা যাৰততিযং সত্থারা ৰারিতোপি তথেৰ ৰত্ৰা উট্ঠাযাসনা পক্কামি. তস্স পক্কন্তমত্তস্সেৰ সকলসরীরে সাসপমত্তা পিল়কা উট্ঠহিত্ৰা অনুপুব্বেন ৰড্ঢিত্ৰা বেল়ুৰপক্কমত্তা হুত্ৰা ভিজ্জিত্ৰা পুব্বলোহিতানি পগ্ঘরিংসু. সো নিত্থুনন্তো ৰেদনাপ্পত্তো জেতৰনদ্ৰারকোট্ঠকে নিপজ্জি. ‘‘কোকালিকেন দ্ৰে অগ্গসাৰকা অক্কুট্ঠা’’তি যাৰ ব্রহ্মলোকা এককোলাহলং অহোসি.

অথস্স উপজ্ঝাযো তুরূ নাম ব্রহ্মা তং কারণং ঞত্ৰা ‘‘থেরে খমাপেস্সামী’’তি আগন্ত্ৰা আকাসে ঠত্ৰা ‘‘কোকালিক, ফরুসং তে কম্মং কতং, অগ্গসাৰকে পসাদেহী’’তি আহ. ‘‘কো পন ত্ৰং আৰুসো’’তি? ‘‘তুরূ ব্রহ্মা নামাহ’’ন্তি. ‘‘ননু ত্ৰং, আৰুসো, ভগৰতা অনাগামীতি ব্যাকতো, অনাগামী চ অনাৰত্তিধম্মো অস্মা লোকাতি ৰুত্তং, ত্ৰং সঙ্কারট্ঠানে যক্খো ভৰিস্সসী’’তি মহাব্রহ্মং অপসাদেসি. সো তং অত্তনো ৰচনং গাহাপেতুং অসক্কোন্তো ‘‘তৰ ৰাচায ত্ৰঞ্ঞেৰ পঞ্ঞাযিস্সসী’’তি ৰত্ৰা সুদ্ধাৰাসমেৰ গতো. কোকালিকোপি কালং কত্ৰা পদুমনিরযে উপ্পজ্জি. তস্স তত্থ নিব্বত্তভাৰং ঞত্ৰা সহম্পতিব্রহ্মা তথাগতস্স আরোচেসি, সত্থা ভিক্খূনং আরোচেসি. ভিক্খূ তস্স অগুণং কথেন্তা ধম্মসভাযং কথং সমুট্ঠাপেসুং ‘‘আৰুসো, কোকালিকো কির সারিপুত্তমোগ্গল্লানে অক্কোসিত্ৰা অত্তনো মুখং নিস্সায পদুমনিরযে উপ্পন্নো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ কোকালিকো ৰচনেন হতো অত্তনো মুখং নিস্সায দুক্খং অনুভোতি, পুব্বেপি এস অত্তনো মুখং নিস্সায দুক্খং অনুভোসিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে তস্স পুরোহিতো পিঙ্গলো নিক্খন্তদাঠো অহোসি. তস্স ব্রাহ্মণী অঞ্ঞেন ব্রাহ্মণেন সদ্ধিং অতিচরি, সোপি তাদিসোৰ. পুরোহিতো ব্রাহ্মণিং পুনপ্পুনং ৰারেন্তোপি ৰারেতুং অসক্কোন্তো চিন্তেসি ‘‘ইমং মম ৰেরিং সহত্থা মারেতুং ন সক্কা, উপাযেন নং মারেস্সামী’’তি. সো রাজানং উপসঙ্কমিত্ৰা আহ ‘‘মহারাজ, তৰ নগরং সকলজম্বুদীপে অগ্গনগরং, ত্ৰং অগ্গরাজা, এৰং অগ্গরঞ্ঞো নাম তৰ দক্খিণদ্ৰারং দুযুত্তং অৰমঙ্গল’’ন্তি. ‘‘আচরিয, ইদানি কিং কাতব্ব’’ন্তি? ‘‘মঙ্গলং কত্ৰা যোজেতব্ব’’ন্তি. ‘‘কিং লদ্ধুং ৰট্টতী’’তি. ‘‘পুরাণদ্ৰারং হারেত্ৰা মঙ্গলযুত্তানি দারূনি গহেত্ৰা নগরপরিগ্গাহকানং ভূতানং বলিং দত্ৰা মঙ্গলনক্খত্তেন পতিট্ঠাপেতুং ৰট্টতী’’তি. ‘‘তেন হি এৰং করোথা’’তি. তদা বোধিসত্তো তক্কারিযো নাম মাণৰো হুত্ৰা তস্স সন্তিকে সিপ্পং উগ্গণ্হাতি. পুরোহিতো পুরাণদ্ৰারং হারেত্ৰা নৰং নিট্ঠাপেত্ৰা রাজানং আহ – ‘‘নিট্ঠিতং, দেৰ, দ্ৰারং, স্ৰে ভদ্দকং নক্খত্তং, তং অনতিক্কমিত্ৰা বলিং কত্ৰা দ্ৰারং পতিট্ঠাপেতুং ৰট্টতী’’তি. ‘‘আচরিয, বলিকম্মত্থায কিং লদ্ধুং ৰট্টতী’’তি? ‘‘দেৰ, মহেসক্খং দ্ৰারং মহেসক্খাহি দেৰতাহি পরিগ্গহিতং, একং পিঙ্গলং নিক্খন্তদাঠং উভতোৰিসুদ্ধং ব্রাহ্মণং মারেত্ৰা তস্স মংসলোহিতেন বলিং কত্ৰা সরীরং হেট্ঠা খিপিত্ৰা দ্ৰারং পতিট্ঠাপেতব্বং, এৰং তুম্হাকঞ্চ নগরস্স চ ৰুড্ঢি ভৰিস্সতী’’তি. ‘‘সাধু আচরিয, এৰরূপং ব্রাহ্মণং মারেত্ৰা দ্ৰারং পতিট্ঠাপেহী’’তি.

সো তুট্ঠমানসো ‘‘স্ৰে পচ্চামিত্তস্স পিট্ঠিং পস্সিস্সামী’’তি উস্সাহজাতো অত্তনো গেহং গন্ত্ৰা মুখং রক্খিতুং অসক্কোন্তো তুরিততুরিতো ভরিযং আহ – ‘‘পাপে চণ্ডালি ইতো পট্ঠায কেন সদ্ধিং অভিরমিস্সসি, স্ৰে তে জারং মারেত্ৰা বলিকম্মং করিস্সামী’’তি. ‘‘নিরপরাধং কিংকারণা মারেস্সসী’’তি? রাজা ‘‘কল়ারপিঙ্গলস্স ব্রাহ্মণস্স মংসলোহিতেন বলিকম্মং কত্ৰা নগরদ্ৰারং পতিট্ঠাপেহী’’তি আহ, ‘‘জারো চ তে কল়ারপিঙ্গলো, তং মারেত্ৰা বলিকম্মং করিস্সামী’’তি. সা জারস্স সন্তিকং সাসনং পাহেসি ‘‘রাজা কির কল়ারপিঙ্গলং ব্রাহ্মণং মারেত্ৰা বলিং কাতুকামো, সচে জীৰিতুকামো, অঞ্ঞেপি তযা সদিসে ব্রাহ্মণে গহেত্ৰা কালস্সেৰ পলাযস্সূ’’তি. সো তথা অকাসি. তং নগরে পাকটং অহোসি, সকলনগরতো সব্বে কল়ারপিঙ্গলা পলাযিংসু.

পুরোহিতো পচ্চামিত্তস্স পলাতভাৰং অজানিত্ৰা পাতোৰ রাজানং উপসঙ্কমিত্ৰা ‘‘দেৰ, অসুকট্ঠানে কল়ারপিঙ্গলো ব্রাহ্মণো অত্থি, তং গণ্হাপেথা’’তি আহ. রাজা অমচ্চে পেসেসি. তে তং অপস্সন্তা আগন্ত্ৰা ‘‘পলাতো কিরা’’তি আরোচেসুং. ‘‘অঞ্ঞত্থ উপধারেথা’’তি সকলনগরং উপধারেন্তাপি ন পস্সিংসু. ততো ‘‘অঞ্ঞং উপধারেথা’’তি ৰুত্তে ‘‘দেৰ, ঠপেত্ৰা পুরোহিতং অঞ্ঞো এৰরূপো নত্থী’’তি ৰদিংসু. পুরোহিতং ন সক্কা মারেতুন্তি. ‘‘দেৰ, কিং কথেথ, পুরোহিতস্স কারণা অজ্জ দ্ৰারে অপ্পতিট্ঠাপিতে নগরং অগুত্তং ভৰিস্সতি, আচরিযো কথেন্তো ‘‘অজ্জ নক্খত্তং অতিক্কমিত্ৰা ইতো সংৰচ্ছরচ্চযেন নক্খত্তং লভিস্সতী’’তি কথেসি, সংৰচ্ছরং নগরে অদ্ৰারকে পচ্চত্থিকানং ওকাসো ভৰিস্সতি, ইমং মারেত্ৰা অঞ্ঞেন ব্যত্তেন ব্রাহ্মণেন বলিকম্মং কারেত্ৰা দ্ৰারং পতিট্ঠাপেস্সামা’’তি. ‘‘অত্থি পন অঞ্ঞো আচরিযসদিসো পণ্ডিতো ব্রাহ্মণো’’তি? ‘‘অত্থি দেৰ, তস্স অন্তেৰাসী তক্কারিযমাণৰো নাম, তস্স পুরোহিতট্ঠানং দত্ৰা মঙ্গলং করোথা’’তি.

রাজা তং পক্কোসাপেত্ৰা সম্মানং কারেত্ৰা পুরোহিতট্ঠানং দত্ৰা তথা কাতুং আণাপেসি. সো মহন্তেন পরিৰারেন নগরদ্ৰারং অগমাসি. পুরোহিতং রাজানুভাৰেন বন্ধিত্ৰা আনযিংসু. মহাসত্তো দ্ৰারট্ঠপনট্ঠানে আৰাটং খণাপেত্ৰা সাণিং পরিক্খিপাপেত্ৰা আচরিযেন সদ্ধিং অন্তোসাণিযং অট্ঠাসি. আচরিযো আৰাটং ওলোকেত্ৰা অত্তনো পতিট্ঠং অলভন্তো ‘‘অত্থো তাৰ মে নিপ্ফাদিতো অহোসি, বালত্তা পন মুখং রক্খিতুং অসক্কোন্তো ৰেগেন পাপিত্থিযা কথেসিং, অত্তনাৰ অত্তনো ৰধো আভতো’’তি মহাসত্তং আলপন্তো পঠমং গাথমাহ –

১০৪.

‘‘অহমেৰ দুব্ভাসিতং ভাসি বালো, ভেকোৰরঞ্ঞে অহিমৰ্হাযমানো;

তক্কারিযে সোব্ভমিমং পতামি, ন কিরেৰ সাধু অতিৰেলভাণী’’তি.

তত্থ দুব্ভাসিতং ভাসীতি দুব্ভাসিতং ভাসিং. ভেকোৰাতি যথা অরঞ্ঞে মণ্ডূকো ৰস্সন্তো অত্তনো খাদকং অহিং অৰ্হাযমানো দুব্ভাসিতং ভাসতি নাম, এৰং অহমেৰ দুব্ভাসিতং ভাসিং. তক্কারিযেতি তস্স নামং, তক্কারিযাতি ইত্থিলিঙ্গং নামং, তেনেৰ তং আলপন্তো এৰমাহ.

তং সুত্ৰা মহাসত্তো দুতিযং গাথমাহ –

১০৫.

‘‘পপ্পোতি মচ্চো অতিৰেলভাণী, বন্ধং ৰধং সোকপরিদ্দৰঞ্চ;

অত্তানমেৰ গরহাসি এত্থ, আচের যং তং নিখণন্তি সোব্ভে’’তি.

তত্থ অতিৰেলভাণীতি ৰেলাতিক্কন্তং পমাণাতিক্কন্তং কত্ৰা কথনং নাম ন সাধু, অতিৰেলভাণী পুরিসো ন সাধূতি অত্থো. সোকপরিদ্দৰঞ্চাতি আচরিয, এৰমেৰ অতিৰেলভাণী পুরিসো ৰধং বন্ধঞ্চ সোকঞ্চ মহন্তেন সদ্দেন পরিদেৰঞ্চ পপ্পোতি. গরহাসীতি পরং অগরহিত্ৰা অত্তানংযেৰ গরহেয্যাসি. এত্থাতি এতস্মিং কারণে. আচের যং তন্তি আচরিয, যেন কারণেন তং নিখণন্তি সোব্ভে, তং তযাৰ কতং, তস্মা অত্তানমেৰ গরহেয্যাসীতি ৰদতি.

এৰঞ্চ পন ৰত্ৰা ‘‘আচরিয, ৰাচং অরক্খিত্ৰা ন কেৰলং ত্ৰমেৰ দুক্খপ্পত্তো, অঞ্ঞোপি দুক্খপ্পত্তোযেৰা’’তি ৰত্ৰা অতীতং আহরিত্ৰা দস্সেসি.

পুব্বে কির বারাণসিযং কাল়ী নাম গণিকা অহোসি, তস্সা তুণ্ডিলো নাম ভাতা. কাল়ী একদিৰসং সহস্সং গণ্হাতি. তুণ্ডিলো পন ইত্থিধুত্তো সুরাধুত্তো অক্খধুত্তো অহোসি. সা তস্স ধনং দেতি, সো লদ্ধং লদ্ধং ৰিনাসেতি. সা তং ৰারেন্তীপি ৰারেতুং নাসক্খি. সো একদিৰসং জূতপরাজিতো নিৰত্থৰত্থানি দত্ৰা কটসারকখণ্ডং নিৰাসেত্ৰা তস্সা গেহং আগমি. তায চ দাসিযো আণত্তা হোন্তি ‘‘তুণ্ডিলস্স আগতকালে কিঞ্চি অদত্ৰা গীৰাযং নং গহেত্ৰা নীহরেয্যাথা’’তি. তা তথা করিংসু. সো দ্ৰারমূলে রোদন্তো অট্ঠাসি.

অথেকো সেট্ঠিপুত্তো নিচ্চকালং কাল়িযা সহস্সং আহরাপেন্তো দিস্ৰা ‘‘কস্মা তুণ্ডিল রোদসী’’তি পুচ্ছি. ‘‘সামি, জূতপরাজিতো মম ভগিনিযা সন্তিকং আগতোম্হি, তং মং দাসিযো গীৰাযং গহেত্ৰা নীহরিংসূ’’তি. ‘‘তেন হি তিট্ঠ, ভগিনিযা তে কথেস্সামী’’তি সো গন্ত্ৰা ‘‘ভাতা তে কটসারকখণ্ডং নিৰাসেত্ৰা দ্ৰারমূলে ঠিতো, ৰত্থানিস্স কিমত্থং ন দেসী’’তি আহ. ‘‘অহং তাৰ ন দেমি, সচে পন তে সিনেহো অত্থি, ত্ৰং দেহী’’তি. তস্মিং পন গণিকায ঘরে ইদংচারিত্তং – আভতসহস্সতো পঞ্চসতানি গণিকায হোন্তি, পঞ্চসতানি ৰত্থগন্ধমালমূলানি হোন্তি. আগতপুরিসা তস্মিং ঘরে লদ্ধৰত্থানি নিৰাসেত্ৰা রত্তিং ৰসিত্ৰা পুনদিৰসে গচ্ছন্তা আভতৰত্থানেৰ নিৰাসেত্ৰা গচ্ছন্তি. তস্মা সো সেট্ঠিপুত্তো তায দিন্নৰত্থানি নিৰাসেত্ৰা অত্তনো সাটকে তুণ্ডিলস্স দাপেসি. সো নিৰাসেত্ৰা নদন্তো গজ্জন্তো গন্ত্ৰা সুরাগেহং পাৰিসি. কাল়ীপি দাসিযো আণাপেসি ‘‘স্ৰে এতস্স গমনকালে ৰত্থানি অচ্ছিন্দেয্যাথা’’তি. তা তস্স নিক্খমনকালে ইতো চিতো চ উপধাৰিত্ৰা ৰিলুম্পমানা সাটকে গহেত্ৰা ‘‘ইদানি যাহি কুমারা’’তি নগ্গং কত্ৰা ৰিস্সজ্জেসুং. সো নগ্গোৰ নিক্খমি. জনো পরিহাসং করোতি. সো লজ্জিত্ৰা ‘‘মযাৰেতং কতং, অহমেৰ অত্তনো মুখং রক্খিতুং নাসক্খি’’ন্তি পরিদেৰি. ইদং তাৰ দস্সেতুং ততিযং গাথমাহ –

১০৬.

‘‘কিমেৰহং তুণ্ডিলমনুপুচ্ছিং, করেয্য সং ভাতরং কাল়িকাযং;

নগ্গোৰহং ৰত্থযুগঞ্চ জীনো, অযম্পি অত্থো বহুতাদিসোৰা’’তি.

তত্থ বহুতাদিসোৰাতি সেট্ঠিপুত্তো হি অত্তনা কতেন দুক্খং পত্তো, ত্ৰম্পি তস্মা অযম্পি তুয্হং দুক্খপ্পত্তি অত্থো. বহূহি কারণেহি তাদিসোৰ.

অপরোপি বারাণসিযং অজপালানং পমাদেন গোচরভূমিযং দ্ৰীসু মেণ্ডেসু যুজ্ঝন্তেসু একো কুলিঙ্গসকুণো ‘‘ইমে দানি ভিন্নেহি সীসেহি মরিস্সন্তি, ৰারেস্সামি তেতি মাতুলা মা যুজ্ঝথা’’তি ৰারেত্ৰা তেসং কথং অগ্গহেত্ৰা যুজ্ঝন্তানঞ্ঞেৰ পিট্ঠিযম্পি সীসেপি নিসীদিত্ৰা যাচিত্ৰা ৰারেতুং অসক্কোন্তো ‘‘তেন হি মং মারেত্ৰা যুজ্ঝথা’’তি উভিন্নম্পি সীসন্তরং পাৰিসি. তে অঞ্ঞমঞ্ঞং যুজ্ঝিংসুযেৰ. সো সণ্হকরণিযং পিসিতো ৰিয অত্তনা কতেনেৰ ৰিনাসং পত্তো. ইদম্পি অপরং কারণং দস্সেতুং চতুত্থং গাথমাহ –

১০৭.

‘‘যো যুজ্ঝমানানমযুজ্ঝমানো, মেণ্ডন্তরং অচ্চুপতী কুলিঙ্গো;

সো পিংসিতো মেণ্ডসিরেহি তত্থ, অযম্পি অত্থো বহুতাদিসোৰা’’তি.

তত্থ মেণ্ডন্তরন্তি মেণ্ডানং অন্তরং. অচ্চুপতীতি অতিগন্ত্ৰা উপ্পতি, আকাসে সীসানং ৰেমজ্ঝে অট্ঠাসীতি অত্থো. পিংসিতোতি পীল়িতো.

অপরেপি বারাণসিৰাসিনো গোপালকা ফলিতং তালরুক্খং দিস্ৰা একং তালফলত্থায রুক্খং আরোপেসুং. তস্মিং ফলানি পাতেন্তে একো কণ্হসপ্পো ৰম্মিকা নিক্খমিত্ৰা তালরুক্খং আরুহি. হেট্ঠা পতিট্ঠিতা দণ্ডেহি পহরন্তা নিৰারেতুং নাসক্খিংসু. তে ‘‘সপ্পো তালং অভিরুহতী’’তি ইতরস্স আচিক্খিংসু. সো ভীতো মহাৰিরৰং ৰিরৰি. হেট্ঠা ঠিতা একং থিরসাটকং চতূসু কণ্ণেসু গহেত্ৰা ‘‘ইমস্মিং সাটকে পতা’’তি আহংসু. সো পতন্তো চতুন্নম্পি অন্তরে সাটকমজ্ঝে পতি. তস্স পন পাতনৰেগেন তে সন্ধারেতুং অসক্কোন্তা অঞ্ঞমঞ্ঞং সীসেহি পহরিত্ৰা ভিন্নেহি সীসেহি জীৰিতক্খযং পত্তা. ইদম্পি কারণং দস্সেন্তো পঞ্চমং গাথমাহ –

১০৮.

‘‘চতুরো জনা পোত্থকমগ্গহেসুং, একঞ্চ পোসং অনুরক্খমানা;

সব্বেৰ তে ভিন্নসিরা সযিংসু, অযম্পি অত্থো বহুতাদিসোৰা’’তি.

তত্থ পোত্থকন্তি সাণসাটকং. সব্বেৰ তেতি তেপি চত্তারো জনা অত্তনা কতেনেৰ ভিন্নসীসা সযিংসু.

অপরেপি বারাণসিৰাসিনো এল়কচোরা রত্তিং একং অজং থেনেত্ৰা ‘‘দিৰা অরঞ্ঞে খাদিস্সামা’’তি তস্সা অৰস্সনত্থায মুখং বন্ধিত্ৰা ৰেল়ুগুম্বে ঠপেসুং. পুনদিৰসে তং খাদিতুং গচ্ছন্তা আৰুধং পমুস্সিত্ৰা অগমংসু. তে ‘‘অজং মারেত্ৰা মংসং পচিত্ৰা খাদিস্সাম, আহরথাৰুধ’’ন্তি একস্সপি হত্থে আৰুধং অদিস্ৰা ‘‘ৰিনা আৰুধেন এতং মারেত্ৰাপি মংসং গহেতুং ন সক্কা, ৰিস্সজ্জেথ নং, পুঞ্ঞমস্স অত্থী’’তি ৰিস্সজ্জেসুং. তদা একো নল়কারো ৰেল়ুং গহেত্ৰা ‘‘পুনপি আগন্ত্ৰা গহেস্সামী’’তি নল়কারসত্থং ৰেল়ুগুম্বন্তরে ঠপেত্ৰা পক্কামি. অজা ‘‘মুত্তাম্হী’’তি তুস্সিত্ৰা ৰেল়ুমূলে কীল়মানা পচ্ছিমপাদেহি পহরিত্ৰা তং সত্থং পাতেসি. চোরা সত্থসদ্দং সুত্ৰা উপধারেন্তা তং দিস্ৰা তুট্ঠমানসা অজং মারেত্ৰা মংসং খাদিংসু. ইতি ‘‘সাপি অজা অত্তনা কতেনেৰ মতা’’তি দস্সেতুং ছট্ঠং গাথমাহ –

১০৯.

‘‘অজা যথা ৰেল়ুগুম্বস্মিং বদ্ধা, অৰক্খিপন্তী অসিমজ্ঝগচ্ছি;

তেনেৰ তস্সা গলকাৰকন্তং, অযম্পি অত্থো বহুতাদিসোৰা’’তি.

তত্থ অৰক্খিপন্তীতি কীল়মানা পচ্ছিমপাদে খিপন্তী.

এৰঞ্চ পন ৰত্ৰা ‘‘অত্তনো ৰচনং রক্খিত্ৰা মিতভাণিনো নাম মরণদুক্খা মুচ্চন্তী’’তি দস্সেত্ৰা কিন্নরৰত্থুং আহরি.

বারাণসিৰাসী কিরেকো লুদ্দকো হিমৰন্তং গন্ত্ৰা একেনুপাযেন জযম্পতিকে দ্ৰে কিন্নরে গহেত্ৰা আনেত্ৰা রঞ্ঞো অদাসি. রাজা অদিট্ঠপুব্বে কিন্নরে দিস্ৰা তুস্সিত্ৰা ‘‘লুদ্দ, ইমেসং কো গুণো’’তি পুচ্ছি. ‘‘দেৰ, এতে মধুরেন সদ্দেন গাযন্তি, মনুঞ্ঞং নচ্চন্তি, মনুস্সা এৰং গাযিতুঞ্চ নচ্চিতুঞ্চ ন জানন্তী’’তি. রাজা লুদ্দস্স বহুং ধনং দত্ৰা কিন্নরে ‘‘গাযথ নচ্চথা’’তি আহ. কিন্নরা ‘‘সচে মযং গাযন্তা ব্যঞ্জনং পরিপুণ্ণং কাতুং ন সক্খিস্সাম, দুগ্গীতং হোতি, অম্হে গরহিস্সন্তি ৰধিস্সন্তি, বহুং কথেন্তানঞ্চ পন মুসাৰাদোপি হোতী’’তি মুসাৰাদভযেন রঞ্ঞা পুনপ্পুনং ৰুত্তাপি ন গাযিংসু ন নচ্চিংসু. রাজা কুজ্ঝিত্ৰা ‘‘ইমে মারেত্ৰা মংসং পচিত্ৰা আহরথা’’তি আণাপেন্তো সত্তমং গাথমাহ –

১১০.

‘‘ইমে ন দেৰা ন গন্ধব্বপুত্তা, মিগা ইমে অত্থৰসং গতা মে;

একঞ্চ নং সাযমাসে পচন্তু, একং পুনপ্পাতরাসে পচন্তূ’’তি.

তত্থ মিগা ইমেতি ইমে সচে দেৰা গন্ধব্বা ৰা ভৰেয্যুং, নচ্চেয্যুঞ্চেৰ গাযেয্যুঞ্চ, ইমে পন মিগা তিরচ্ছানগতা. অত্থৰসং গতা মেতি অত্থং পচ্চাসীসন্তেন লুদ্দেন আনীতত্তা অত্থৰসেন মম হত্থং গতা. এতেসু একং সাযমাসে, একং পাতরাসে পচন্তূতি.

কিন্নরী চিন্তেসি ‘‘রাজা কুদ্ধো নিস্সংসযং মারেস্সতি, ইদানি কথেতুং কালো’’তি অট্ঠমং গাথমাহ –

১১১.

‘‘সতং সহস্সানি দুভাসিতানি, কলম্পি নাগ্ঘন্তি সুভাসিতস্স;

দুব্ভাসিতং সঙ্কমানো কিলেসো, তস্মা তুণ্হী কিম্পুরিসা ন বাল্যা’’তি.

তত্থ সঙ্কমানো কিলেসোতি কদাচি অহং ভাসমানো দুব্ভাসিতং ভাসেয্যং, এৰং দুব্ভাসিতং সঙ্কমানো কিলিস্সতি কিলমতি. তস্মাতি তেন কারণেন তুম্হাকং ন গাযিং, ন বালভাৰেনাতি.

রাজা কিন্নরিযা তুস্সিত্ৰা অনন্তরং গাথমাহ –

১১২.

‘‘যা মেসা ব্যাহাসি পমুঞ্চথেতং, গিরিঞ্চ নং হিমৰন্তং নযন্তু;

ইমঞ্চ খো দেন্তু মহানসায, পাতোৰ নং পাতরাসে পচন্তূ’’তি.

তত্থ যা মেসাতি যা মে এসা. দেন্তূতি মহানসত্থায দেন্তু.

কিন্নরো রঞ্ঞো ৰচনং সুত্ৰা ‘‘অযং মং অকথেন্তং অৰস্সং মারেস্সতি, ইদানি কথেতুং ৰট্টতী’’তি ইতরং গাথমাহ –

১১৩.

‘‘পজ্জুন্ননাথা পসৰো, পসুনাথা অযং পজা;

ত্ৰং নাথোসি মহারাজ, নাথোহং ভরিযায মে;

দ্ৰিন্নমঞ্ঞতরং ঞত্ৰা, মুত্তো গচ্ছেয্য পব্বত’’ন্তি.

তত্থ পজ্জুন্ননাথা পসৰোতি তিণভক্খা পসৰো মেঘনাথা নাম. পসুনাথা অযং পজাতি অযং পন মনুস্সপজা পঞ্চগোরসেন উপজীৰন্তী পসুনাথা পসুপতিট্ঠা. ত্ৰং নাথোসীতি ত্ৰং মম পতিট্ঠা অসি. নাথোহন্তি মম ভরিযায অহং নাথো, অহমস্সা পতিট্ঠা. দ্ৰিন্নমঞ্ঞতরং ঞত্ৰা, মুত্তো গচ্ছেয্য পব্বতন্তি অম্হাকং দ্ৰিন্নং অন্তরে একো একং মতং ঞত্ৰা সযং মরণতো মুত্তো হিমৰন্তং গচ্ছেয্য, জীৰমানা পন মযং অঞ্ঞমঞ্ঞং ন জহাম, তস্মা সচেপি ইমং হিমৰন্তং পেসেতুকামো, মং পঠমং মারেত্ৰা পচ্ছা পেসেহীতি.

এৰঞ্চ পন ৰত্ৰা ‘‘মহারাজ, ন মযং তৰ ৰচনং অকাতুকামতায তুণ্হী অহুম্হ, মযং কথায পন দোসং দিস্ৰা ন কথযিম্হা’’তি দীপেন্তো ইমং গাথাদ্ৰযমাহ –

১১৪.

‘‘ন ৰে নিন্দা সুপরিৰজ্জযেথ, নানা জনা সেৰিতব্বা জনিন্দ;

যেনেৰ একো লভতে পসংসং, তেনেৰ অঞ্ঞো লভতে নিন্দিতারং.

১১৫.

‘‘সব্বো লোকো পরিচিত্তো অতিচিত্তো, সব্বো লোকো চিত্তৰা সম্হি চিত্তে;

পচ্চেকচিত্তা পুথু সব্বসত্তা, কস্সীধ চিত্তস্স ৰসেন ৰত্তে’’তি.

তত্থ সুপরিৰজ্জযেথাতি মহারাজ, নিন্দা নাম সুখেন পরিৰজ্জেতুং ন সক্কা. নানা জনাতি নানাছন্দা জনা. যেনেৰাতি যেন সীলাদিগুণেন একো পসংসং লভতি, তেনেৰ অঞ্ঞো নিন্দিতারং লভতি. অম্হাকঞ্হি কিন্নরানং অন্তরে কথনেন পসংসং লভতি, মনুস্সানং অন্তরে নিন্দং, ইতি নিন্দা নাম দুপ্পরিৰজ্জিযা, স্ৰাহং কথং তৰ সন্তিকা পসংসং লভিস্সামীতি.

সব্বো লোকো পরিচিত্তোতি মহারাজ, অসপ্পুরিসো নাম পাণাতিপাতাদিচিত্তেন, সপ্পুরিসো পাণাতিপাতা ৰেরমণি আদিচিত্তেন অতিচিত্তোতি, এৰং সব্বো লোকো পরিচিত্তো অতিচিত্তোতি অত্থো. চিত্তৰা সম্হি চিত্তেতি সব্বো পন লোকো অত্তনো হীনেন ৰা পণীতেন ৰা চিত্তেন চিত্তৰা নাম. পচ্চেকচিত্তাতি পাটিযেক্কচিত্তা পুথুপ্পভেদা সব্বে সত্তা. তেসু কস্সেকস্স তৰ ৰা অঞ্ঞস্স ৰা চিত্তেন কিন্নরী ৰা মাদিসো ৰা অঞ্ঞো ৰা ৰত্তেয্য, তস্মা ‘‘অযং মম চিত্তৰসেন ন ৰত্ততী’’তি, মা ময্হং কুজ্ঝি. সব্বসত্তা হি অত্তনো চিত্তৰসেন গচ্ছন্তি, দেৰাতি. কিম্পুরিসো রঞ্ঞো ধম্মং দেসেসি.

রাজা ‘‘সভাৰমেৰ কথেতি পণ্ডিতো কিন্নরো’’তি সোমনস্সপ্পত্তো হুত্ৰা ওসানগাথমাহ –

১১৬.

‘‘তুণ্হী অহূ কিম্পুরিসো সভরিযো, যো দানি ব্যাহাসি ভযস্স ভীতো;

সো দানি মুত্তো সুখিতো অরোগো, ৰাচাকিরেৰত্থৰতী নরান’’ন্তি.

তত্থ ৰাচাকিরেৰত্থৰতী নরানন্তি ৰাচাগিরা এৰ ইমেসং সত্তানং অত্থৰতী হিতাৰহা হোতীতি অত্থো.

রাজা কিন্নরে সুৰণ্ণপঞ্জরে নিসীদাপেত্ৰা তমেৰ লুদ্দং পক্কোসাপেত্ৰা ‘‘গচ্ছ ভণে, গহিতট্ঠানেযেৰ ৰিস্সজ্জেহী’’তি ৰিস্সজ্জাপেসি. মহাসত্তোপি ‘‘আচরিয, এৰং কিন্নরা ৰাচং রক্খিত্ৰা পত্তকালে কথিতেন সুভাসিতেনেৰ মুত্তা, ত্ৰং পন দুক্কথিতেন মহাদুক্খং পত্তো’’তি ইদং উদাহরণং দস্সেত্ৰা ‘‘আচরিয, মা ভাযি, জীৰিতং তে অহং দস্সামী’’তি অস্সাসেসি, ‘‘অপিচ খো পন তুম্হে মং রক্খেয্যাথা’’তিৰুত্তে ‘‘ন তাৰ নক্খত্তযোগো লব্ভতী’’তি দিৰসং ৰীতিনামেত্ৰা মজ্ঝিমযামসমনন্তরে মতং এল়কং আহরাপেত্ৰা ‘‘ব্রাহ্মণ, যত্থ কত্থচি গন্ত্ৰা জীৰাহী’’তি কঞ্চি অজানাপেত্ৰা উয্যোজেত্ৰা এল়কমংসেন বলিং কত্ৰা দ্ৰারং পতিট্ঠাপেসি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি কোকালিকো ৰাচায হতোযেৰা’’তি ৰত্ৰা জাতকং সমোধানেসি – ‘‘তদা কল়ারপিঙ্গলো কোকালিকো অহোসি, তক্কারিযপণ্ডিতো পন অহমেৰ অহোসি’’ন্তি.

তক্কারিযজাতকৰণ্ণনা অট্ঠমা.

[৪৮২] ৯. রুরুমিগরাজজাতকৰণ্ণনা

তস্স গামৰরং দম্মীতি ইদং সত্থা ৰেল়ুৰনে ৰিহরন্তো দেৰদত্তং আরব্ভ কথেসি. সো কির ভিক্খূহি ‘‘বহূপকারো তে আৰুসো, দেৰদত্তসত্থা, ত্ৰং তথাগতং নিস্সায পব্বজ্জং লভি, তীণি পিটকানি উগ্গণ্হি, লাভসক্কারং পাপুণী’’তি ৰুত্তো ‘‘আৰুসো, সত্থারা মম তিণগ্গমত্তোপি উপকারো ন কতো, অহং সযমেৰ পব্বজিং, সযং তীণি পিটকানি উগ্গণ্হিং, সযং লাভসক্কারং পাপুণি’’ন্তি কথেসি. ভিক্খূ ধম্মসভাযং কথং সমুট্ঠাপেসুং ‘‘অকতঞ্ঞূ আৰুসো, দেৰদত্তো অকতৰেদী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, দেৰদত্তো ইদানেৰ অকতঞ্ঞূ, পুব্বেপি অকতঞ্ঞূযেৰ, পুব্বেপেস মযা জীৰিতে দিন্নেপি মম গুণমত্তং ন জানাতী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একো অসীতিকোটিৰিভৰো সেট্ঠি পুত্তং লভিত্ৰা ‘‘মহাধনকো’’তিস্স, নামং কত্ৰা ‘‘সিপ্পং উগ্গণ্হন্তো মম পুত্তো কিলমিস্সতী’’তি ন কিঞ্চি সিপ্পং উগ্গণ্হাপেসি. সো গীতনচ্চৰাদিতখাদনভোজনতো উদ্ধং ন কিঞ্চি অঞ্ঞাসি. তং ৰযপ্পত্তং পতিরূপেন দারেন সংযোজেত্ৰা মাতাপিতরো কালমকংসু. সো তেসং অচ্চযেন ইত্থিধুত্তসুরাধুত্তাদীহি পরিৰুতো নানাব্যসনমুখেহি ইণং আদায তং দাতুং অসক্কোন্তো ইণাযিকেহি চোদিযমানো চিন্তেসি ‘‘কিং ময্হং জীৰিতেন, একেনম্হি অত্তভাৰেন অঞ্ঞো ৰিয জাতো, মতং মে সেয্যো’’তি. সো ইণাযিকে আহ – ‘‘তুম্হাকং ইণপণ্ণানি গহেত্ৰা আগচ্ছথ, গঙ্গাতীরে মে নিদহিতং কুলসন্তকং ধনং অত্থি, তং ৰো দস্সামী’’তি. তে তেন সদ্ধিং অগমংসু. সো ‘‘ইধ ধন’’ন্তি নিধিট্ঠানং আচিক্খন্তো ৰিয ‘‘গঙ্গাযং পতিত্ৰা মরিস্সামী’’তি পলাযিত্ৰা গঙ্গাযং পতি. সো চণ্ডসোতেন ৰুয্হন্তো কারুঞ্ঞরৰং ৰিরৰি.

তদা মহাসত্তো রুরুমিগযোনিযং নিব্বত্তিত্ৰা পরিৰারং ছড্ডেত্ৰা এককোৰ গঙ্গানিৰত্তনে রমণীযে সালমিস্সকে সুপুপ্ফিতঅম্বৰনে ৰসতি উপোসথং উপৰুত্থায. তস্স সরীরচ্ছৰি সুমজ্জিতকঞ্চনপট্টৰণ্ণা অহোসি, হত্থপাদা লাখারসপরিকম্মকতা ৰিয, নঙ্গুট্ঠং চামরীনঙ্গুট্ঠং ৰিয, সিঙ্গানি রজতদামসদিসানি, অক্খীনি সুমজ্জিতমণিগুল়িকা ৰিয, মুখং ওদহিত্ৰা ঠপিতরত্তকম্বলগেণ্ডুকং ৰিয. এৰরূপং তস্স রূপং অহোসি. সো অড্ঢরত্তসমযে তস্স কারুঞ্ঞসদ্দং সুত্ৰা ‘‘মনুস্সসদ্দো সূযতি, মা মযি ধরন্তে মরতু, জীৰিতমস্স দস্সামী’’তি চিন্তেত্ৰা সযনগুম্বা উট্ঠায নদীতীরং গন্ত্ৰা ‘‘অম্ভো পুরিস, মা ভাযি, জীৰিতং তে দস্সামী’’তি অস্সাসেত্ৰা সোতং ছিন্দন্তো গন্ত্ৰা তং পিট্ঠিযং আরোপেত্ৰা তীরং পাপেত্ৰা অত্তনো ৰসনট্ঠানং নেত্ৰা ফলাফলানি দত্ৰা দ্ৰীহতীহচ্চযেন ‘‘ভো পুরিস, অহং তং ইতো অরঞ্ঞতো নীহরিত্ৰা বারাণসিমগ্গে ঠপেস্সামি, ত্ৰং সোত্থিনা গমিস্সসি, অপিচ খো পন ত্ৰং ‘অসুকট্ঠানে নাম কঞ্চনমিগো ৰসতী’তি ধনকারণা মং রঞ্ঞো চেৰ রাজমহামত্তস্স চ মা আচিক্খাহী’’তি আহ. সো ‘‘সাধু সামী’’তি সম্পটিচ্ছি.

মহাসত্তো তস্স পটিঞ্ঞং গহেত্ৰা তং অত্তনো পিট্ঠিযং আরোপেত্ৰা বারাণসিমগ্গে ওতারেত্ৰা নিৰত্তি. তস্স বারাণসিপৰিসনদিৰসেযেৰ খেমা নাম রঞ্ঞো অগ্গমহেসী পচ্চূসকালে সুপিনন্তে সুৰণ্ণৰণ্ণং মিগং অত্তনো ধম্মং দেসেন্তং দিস্ৰা চিন্তেসি ‘‘সচে এৰরূপো মিগো ন ভৰেয্য, নাহং সুপিনে পস্সেয্যং, অদ্ধা ভৰিস্সতি, রঞ্ঞো আরোচেস্সামী’’তি. সা রাজানং উপসঙ্কমিত্ৰা ‘‘মহারাজ, অহং সুৰণ্ণৰণ্ণং মিগং পস্সিতুং ইচ্ছামি, সুৰণ্ণৰণ্ণমিগস্স ধম্মং সোতুকামাম্হি, লভিস্সামি চে, জীৰেয্যং, নো চে, নত্থি মে জীৰিত’’ন্তি আহ. রাজা তং অস্সাসেত্ৰা ‘‘সচে মনুস্সলোকে অত্থি, লভিস্সসী’’তি ৰত্ৰা ব্রাহ্মণে পক্কোসাপেত্ৰা ‘‘সুৰণ্ণৰণ্ণা মিগা নাম হোন্তী’’তি পুচ্ছিত্ৰা ‘‘আম, দেৰ, হোন্তী’’তি সুত্ৰা অলঙ্কতহত্থিক্খন্ধে সুৰণ্ণচঙ্কোটকে সহস্সথৰিকং ঠপেত্ৰা যো সুৰণ্ণৰণ্ণং মিগং আচিক্খিস্সতি, তস্স সদ্ধিং সহস্সথৰিকসুৰণ্ণচঙ্কোটকেন তঞ্চ হত্থিং ততো চ উত্তরি দাতুকামো হুত্ৰা সুৰণ্ণপট্টে গাথং লিখাপেত্ৰা একং অমচ্চং পক্কোসাপেত্ৰা ‘‘এহি তাত, মম ৰচনেন ইমং গাথং নগরৰাসীনং কথেহী’’তি ইমস্মিং জাতকে পঠমং গাথমাহ –

১১৭.

‘‘তস্স গামৰরং দম্মি, নারিযো চ অলঙ্কতা;

যো মে তং মিগমক্খাতি, মিগানং মিগমুত্তম’’ন্তি.

অমচ্চো সুৰণ্ণপট্টং গহেত্ৰা সকলনগরে ৰাচাপেসি. অথ সো সেট্ঠিপুত্তো বারাণসিং পৰিসন্তোৰ তং কথং সুত্ৰা অমচ্চস্স সন্তিকং গন্ত্ৰা ‘‘অহং রঞ্ঞো এৰরূপং মিগং আচিক্খিস্সামি, মং রঞ্ঞো দস্সেহী’’তি আহ. অমচ্চো হত্থিক্খন্ধতো ওতরিত্ৰা তং রঞ্ঞো সন্তিকং নেত্ৰা ‘‘অযং কির, দেৰ, তং মিগং আচিক্খিস্সতী’’তি দস্সেসি. রাজা ‘‘সচ্চং অম্ভো পুরিসা’’তি পুচ্ছি. সো ‘‘সচ্চং মহারাজ, ত্ৰং এতং যসং ময্হং দেহী’’তি ৰদন্তো দুতিযং গাথমাহ –

১১৮.

‘‘ময্হং গামৰরং দেহি, নারিযো চ অলঙ্কতা;

অহং তে মিগমক্খিস্সং, মিগানং মিগমুত্তম’’ন্তি.

তং সুত্ৰা রাজা তস্স মিত্তদুব্ভিস্স তুস্সিত্ৰা ‘‘অব্ভো কুহিং সো মিগো ৰসতী’’তি পুচ্ছিত্ৰা ‘‘অসুকট্ঠানে নাম দেৰা’’তি ৰুত্তে তমেৰ মগ্গদেসকং কত্ৰা মহন্তেন পরিৰারেন তং ঠানং অগমাসি. অথ নং সো মিত্তদুব্ভী ‘‘সেনং, দেৰ, সন্নিসীদাপেহী’’তি ৰত্ৰা সন্নিসিন্নায সেনায এসো, দেৰ, সুৰণ্ণমিগো এতস্মিং ৰনে ৰসতী’’তি হত্থং পসারেত্ৰা আচিক্খন্তো ততিযং গাথমাহ –

১১৯.

‘‘এতস্মিং ৰনসণ্ডস্মিং, অম্বা সালা চ পুপ্ফিতা;

ইন্দগোপকসঞ্ছন্না, এত্থেসো তিট্ঠতে মিগো’’তি.

তত্থ ইন্দগোপকসঞ্ছন্নাতি এতস্স ৰনসণ্ডস্স ভূমি ইন্দগোপকৰণ্ণায রত্তায সুখসম্ফস্সায তিণজাতিযা সঞ্ছন্না, সসকুচ্ছি ৰিয মুদুকা, এত্থ এতস্মিং রমণীযে ৰনসণ্ডে এসো তিট্ঠতীতি দস্সেতি.

রাজা তস্স ৰচনং সুত্ৰা অমচ্চে আণাপেসি ‘‘তস্স মিগস্স পলাযিতুং অদত্ৰা খিপ্পং আৰুধহত্থেহি পুরিসেহি সদ্ধিং ৰনসণ্ডং পরিৰারেথা’’তি. তে তথা কত্ৰা উন্নদিংসু. রাজা কতিপযেহি জনেহি সদ্ধিং একমন্তং অট্ঠাসি, সোপিস্স অৰিদূরে অট্ঠাসি. মহাসত্তো তং সদ্দং সুত্ৰা চিন্তেসি ‘‘মহন্তো বলকাযসদ্দো, তম্হা মে পুরিসা ভযেন উপ্পন্নেন ভৰিতব্ব’’ন্তি. সো উট্ঠায সকলপরিসং ওলোকেত্ৰা রঞ্ঞো ঠিতট্ঠানং দিস্ৰা ‘‘রঞ্ঞো ঠিতট্ঠানেযেৰ মে সোত্থি ভৰিস্সতি, এত্থেৰ মযা গন্তুং ৰট্টতী’’তি চিন্তেত্ৰা রাজাভিমুখো পাযাসি. রাজা তং আগচ্ছন্তং দিস্ৰা ‘‘নাগবলো মিগো অৰত্থরন্তো ৰিয আগচ্ছেয্য, সরং সন্নয্হিত্ৰা ইমং মিগং সন্তাসেত্ৰা সচে পলাযতি, ৰিজ্ঝিত্ৰা দুব্বলং কত্ৰা গণ্হিস্সামী’’তি ধনুং আরোপেত্ৰা বোধিসত্তাভিমুখো অহোসি. তমত্থং পকাসেন্তো সত্থা ইমং গাথাদ্ৰযমাহ –

১২০.

‘‘ধনুং অদ্ৰেজ্ঝং কত্ৰান, উসুং সন্নয্হুপাগমি;

মিগো চ দিস্ৰা রাজানং, দূরতো অজ্ঝভাসথ.

১২১.

‘‘আগমেহি মহারাজ, মা মং ৰিজ্ঝি রথেসভ;

কো নু তে ইদমক্খাসি, এত্থেসো তিট্ঠতে মিগো’’তি.

তত্থ অদ্ৰেজ্ঝং কত্ৰানাতি জিযায চ সরেন চ সদ্ধিং একমেৰ কত্ৰা. সন্নয্হাতি সন্নয্হিত্ৰা. আগমেহীতি ‘‘তিট্ঠ, মহারাজ, মা মং ৰিজ্ঝি, জীৰগ্গাহমেৰ গণ্হাহী’’তি মধুরায মনুস্সৰাচায অভাসি.

রাজা তস্স মধুরকথায বন্ধিত্ৰা ধনুং ওতারেত্ৰা গারৰেন অট্ঠাসি. মহাসত্তোপি রাজানং উপসঙ্কমিত্ৰা মধুরপটিসন্থারং কত্ৰা একমন্তং অট্ঠাসি. মহাজনোপি সব্বাৰুধানি ছড্ডেত্ৰা আগন্ত্ৰা রাজানং পরিৰারেসি. তস্মিং খণে মহাসত্তো সুৰণ্ণকিঙ্কিণিকং চালেন্তো ৰিয মধুরেন সরেন রাজানং পুচ্ছি ‘‘কো নু তে ইদমক্খাসি, এত্থেসো তিট্ঠতে মিগো’’তি? তস্মিং খণে পাপপুরিসো থোকং পটিক্কমিত্ৰা সোতপথেৰ অট্ঠাসি. রাজা ‘‘ইমিনা মে দস্সিতো’’তি কথেন্তো ছট্ঠং গাথমাহ –

১২২.

‘‘এস পাপচরো পোসো, সম্ম তিট্ঠতি আরকা;

সোযং মে ইদমক্খাসি, এত্থেসো তিট্ঠতে মিগো’’তি.

তত্থ পাপচরোতি ৰিস্সট্ঠাচারো.

তং সুত্ৰা মহাসত্তো তং মিত্তদুব্ভিং গরহিত্ৰা রঞ্ঞা সদ্ধিং সল্লপন্তো সত্তমং গাথমাহ –

১২৩.

‘‘সচ্চং কিরেৰ মাহংসু, নরা একচ্চিযা ইধ;

কট্ঠং নিপ্লৰিতং সেয্যো, ন ত্ৰেৰেকচ্চিযো নরো’’তি.

তত্থ নিপ্লৰিতন্তি উত্তারিতং. একচ্চিযোতি একচ্চো পন মিত্তদুব্ভী পাপপুগ্গলো উদকে পতন্তোপি উত্তারিতো ন ত্ৰেৰ সেয্যো. কট্ঠঞ্হি নানপ্পকারেন উপকারায সংৰত্ততি, মিত্তদুব্ভী পন পাপপুগ্গলো ৰিনাসায, তস্মা ততো কট্ঠমেৰ ৰরতরন্তি পোরাণকপণ্ডিতা কথযিংসু, মযা পন তেসং ৰচনং ন কতন্তি.

তং সুত্ৰা রাজা ইতরং গাথমাহ –

১২৪.

‘‘কিং নু রুরু গরহসি মিগানং, কিং পক্খীনং কিং পন মানুসানং;

ভযং হি মং ৰিন্দতিনপ্পরূপং, সুত্ৰান তং মানুসিং ভাসমান’’ন্তি.

তত্থ মিগানন্তি মিগানমঞ্ঞতরং গরহসি, উদাহু পক্খীনং, মানুসানন্তি পুচ্ছি. ভযঞ্হি মং ৰিন্দতীতি ভযং মং পটিলভতি, অহং অত্তনি অনিস্সরো ভযসন্তকো ৰিয হোমি. অনপ্পরূপন্তি মহন্তং.

ততো মহাসত্তো ‘‘মহারাজ, ন মিগং, ন পক্খিং গরহামি, মনুস্সং পন গরহামী’’তি দস্সেন্তো নৰমং গাথমাহ –

১২৫.

‘‘যমুদ্ধরিং ৰাহনে ৰুয্হমানং, মহোদকে সলিলে সীঘসোতে;

ততোনিদানং ভযমাগতং মম, দুক্খো হৰে রাজ অসব্ভি সঙ্গমো’’তি.

তত্থ ৰাহনেতি পতিতপতিতে ৰহিতুং সমত্থে গঙ্গাৰহে. মহোদকে সলিলেতি মহাউদকে মহাসলিলেতি অত্থো. উভযেনাপি গঙ্গাৰহস্সেৰ বহুউদকতং দস্সেতি. ততোনিদানন্তি মহারাজ, যো ময্হং তযা দস্সিতো পুরিসো, এসো মযা গঙ্গায ৰুয্হমানো অড্ঢরত্তসমযে কারুঞ্ঞরৰং ৰিরৰন্তো উদ্ধরিতো, ততোনিদানং মে ইদমজ্জ ভযং আগতং, অসপ্পুরিসেহি সমাগমো নাম দুক্খো, মহারাজাতি.

তং সুত্ৰা রাজা তস্স কুজ্ঝিত্ৰা ‘‘এৰং বহূপকারস্স নাম গুণং ন জানাতি, ৰিজ্ঝিত্ৰা নং জীৰিতক্খযং পাপেস্সামী’’তি দসমং গাথমাহ –

১২৬.

‘‘সোহং চতুপ্পত্তমিমং ৰিহঙ্গমং, তনুচ্ছিদং হদযে ওস্সজামি;

হনামি তং মিত্তদুব্ভিং অকিচ্চকারিং, যো তাদিসং কম্মকতং ন জানে’’তি.

তত্থ চতুপ্পত্তন্তি চতূহি ৰাজপত্তেহি সমন্নাগতং. ৰিহঙ্গমন্তি আকাসগামিং. তনুচ্ছিদন্তি সরীরছিন্দনং. ওস্সজামীতি এতস্স হদযে ৰিস্সজ্জেমি.

ততো মহাসত্তো ‘‘মা এস মং নিস্সায নস্সতূ’’তি চিন্তেত্ৰা একাদসমং গাথমাহ –

১২৭.

‘‘ধীরস্স বালস্স হৰে জনিন্দ, সন্তো ৰধং নপ্পসংসন্তি জাতু;

কামং ঘরং গচ্ছতু পাপধম্মো, যঞ্চস্স ভট্ঠং তদেতস্স দেহি;

অহঞ্চ তে কামকরো ভৰামী’’তি.

তত্থ কামন্তি কামেন যথারুচিযা অত্তনো ঘরং গচ্ছতু. যঞ্চস্স ভট্ঠং তদেতস্স দেহীতি যঞ্চ তস্স ‘‘ইদং নাম তে দস্সামী’’তি তযা কথিতং, তং তস্স দেহি. কামকরোতি ইচ্ছাকরো, যং ইচ্ছসি, তং করোহি, মংসং ৰা মে খাদ, কীল়ামিগং ৰা করোহি, সব্বত্থ তে অনুকূলৰত্তী ভৰিস্সামীতি অত্থো.

তং সুত্ৰা রাজা তুট্ঠমানসো মহাসত্তস্স থুতিং করোন্তো অনন্তরং গাথমাহ –

১২৮.

‘‘অদ্ধা রুরূ অঞ্ঞতরো সতং সো, যো দুব্ভতো মানুসস্স ন দুব্ভি;

কামং ঘরং গচ্ছতু পাপধম্মো, যঞ্চস্স ভট্ঠং তদেতস্স দম্মি;

অহঞ্চ তে কামচারং দদামী’’তি.

তত্থ সতং সোতি অদ্ধা ত্ৰং সতং পণ্ডিতানং অঞ্ঞতরো. কামচারন্তি অহং তৰ ধম্মকথায পসীদিত্ৰা তুয্হং কামচারং অভযং দদামি, ইতো পট্ঠায তুম্হে নিব্ভযা যথারুচিযা ৰিহরথাতি মহাসত্তস্স ৰরং অদাসি.

অথ নং মহাসত্তো ‘‘মহারাজ, মনুস্সা নাম অঞ্ঞং মুখেন ভাসন্তি, অঞ্ঞং কাযেন করোন্তী’’তি পরিগ্গণ্হন্তো দ্ৰে গাথা অভাসি –

১২৯.

‘‘সুৰিজানং সিঙ্গালানং, সকুণানঞ্চ ৰস্সিতং;

মনুস্সৰস্সিতং রাজ, দুব্বিজানতরং ততো.

১৩০.

‘‘অপি চে মঞ্ঞতী পোসো, ঞাতি মিত্তো সখাতি ৰা;

যো পুব্বে সুমনো হুত্ৰা, পচ্ছা সম্পজ্জতে দিসো’’তি.

তং সুত্ৰা রাজা ‘‘মিগরাজ, মা মং এৰং মঞ্ঞি, অহঞ্হি রজ্জং জহন্তোপি ন তুয্হং দিন্নৰরং জহিস্সং, সদ্দহথ, ময্হ’’ন্তি ৰরং অদাসি. মহাসত্তো তস্স সন্তিকে ৰরং গণ্হন্তো অত্তানং আদিং কত্ৰা সব্বসত্তানং অভযদানং ৰরং গণ্হি. রাজাপি তং ৰরং দত্ৰা বোধিসত্তং নগরং নেত্ৰা মহাসত্তঞ্চ নগরঞ্চ অলঙ্কারাপেত্ৰা দেৰিযা ধম্মং দেসাপেসি. মহাসত্তো দেৰিং আদিং কত্ৰা রঞ্ঞো চ রাজপরিসায চ মধুরায মনুস্সভাসায ধম্মং দেসেত্ৰা রাজানং দসহি রাজধম্মেহি ওৰদিত্ৰা মহাজনং অনুসাসিত্ৰা অরঞ্ঞং পৰিসিত্ৰা মিগগণপরিৰুতো ৰাসং কপ্পেসি. রাজা ‘‘সব্বেসং সত্তানং অভযং দম্মী’’তি নগরে ভেরিং চরাপেসি. ততো পট্ঠায মিগপক্খীনং কোচি হত্থং পসারেতুং সমত্থো নাম নাহোসি. মিগগণো মনুস্সানং সস্সানি খাদতি, কোচি ৰারেতুং ন সক্কোতি. মহাজনো রাজঙ্গণং গন্ত্ৰা উপক্কোসি. তমত্থং পকাসেন্তো সত্থা ইমং গাথমাহ –

১৩১.

‘‘সমাগতা জানপদা, নেগমা চ সমাগতা;

মিগা সস্সানি খাদন্তি, তং দেৰো পটিসেধতূ’’তি.

তত্থ তং দেৰোতি তং মিগগণং দেৰো পটিসেধতূতি.

তং সুত্ৰা রাজা গাথাদ্ৰযমাহ –

১৩২.

‘‘কামং জনপদো মাসি, রট্ঠঞ্চাপি ৰিনস্সতু;

ন ত্ৰেৰাহং রুরুং দুব্ভে, দত্ৰা অভযদক্খিণং.

১৩৩.

‘‘মা মে জনপদো আসি, রট্ঠঞ্চাপি ৰিনস্সতু;

ন ত্ৰেৰাহং মিগরাজস্স, ৰরং দত্ৰা মুসা ভণে’’তি.

তত্থ মাসীতি কামং ময্হং জনপদো মা হোতু. রুরুন্তি ন ত্ৰেৰ অহং সুৰণ্ণৰণ্ণস্স রুরুমিগরাজস্স অভযদক্খিণং দত্ৰা দুব্ভিস্সামীতি.

মহাজনো রঞ্ঞো ৰচনং সুত্ৰা কিঞ্চি ৰত্তুং অৰিসহন্তো পটিক্কমি. সা কথা ৰিত্থারিকা অহোসি. তং সুত্ৰা মহাসত্তো মিগগণং সন্নিপাতাপেত্ৰা ‘‘ইতো পট্ঠায মনুস্সানং সস্সানি মা খাদথা’’তি ওৰদিত্ৰা ‘‘অত্তনো খেত্তেসু পণ্ণসঞ্ঞং বন্ধন্তূ’’তি মনুস্সানং ঘোসাপেসি. তে তথা বন্ধিংসু, তায সঞ্ঞায মিগা যাৰজ্জতনা সস্সানি ন খাদন্তি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো অকতঞ্ঞূযেৰা’’তি ৰত্ৰা জাতকং সমোধানেসি ‘‘তদা সেট্ঠিপুত্তো দেৰদত্তো অহোসি, রাজা আনন্দো, রুরুমিগরাজা পন অহমেৰ অহোসি’’ন্তি.

রুরুমিগরাজজাতকৰণ্ণনা নৰমা.

[৪৮৩] ১০. সরভমিগজাতকৰণ্ণনা

আসীসেথেৰ পুরিসোতি ইদং সত্থা জেতৰনে ৰিহরন্তো অত্তনা সংখিত্তেন পুচ্ছিতপঞ্হস্স ধম্মসেনাপতিনো ৰিত্থারেন ব্যাকরণং আরব্ভ কথেসি. কদা পন সত্থা থেরং সংখিত্তেন পঞ্হং পুচ্ছীতি? দেৰোরোহনে. তত্রাযং সঙ্খেপতো অনুপুব্বিকথা. রাজগহসেট্ঠিনো হি সন্তকে চন্দনপত্তে আযস্মতা পিণ্ডোলভারদ্ৰাজেন ইদ্ধিযা গহিতে সত্থা ভিক্খূনং ইদ্ধিপাটিহারিযকরণং পটিক্খিপি. তদা তিত্থিযা ‘‘পটিক্খিত্তং সমণেন গোতমেন ইদ্ধিপাটিহারিযকরণং, ইদানি সযম্পি ন করিস্সতী’’তি চিন্তেত্ৰা মঙ্কুভূতেহি অত্তনো সাৰকেহি ‘‘কিং, ভন্তে, ইদ্ধিযা পত্তং ন গণ্হথা’’তি ৰুচ্চমানা ‘‘নেতং আৰুসো, অম্হাকং দুক্করং, ছৰস্স পন দারুপত্তস্সত্থায অত্তনো সণ্হসুখুমগুণং কো গিহীনং পকাসেস্সতীতি ন গণ্হিম্হ, সমণা পন সক্যপুত্তিযা লোলতায ইদ্ধিং দস্সেত্ৰা গণ্হিংসু. মা ‘অম্হাকং ইদ্ধিকরণং ভারো’তি চিন্তযিত্থ, মযঞ্হি তিট্ঠন্তু সমণস্স গোতমস্স সাৰকা, আকঙ্খমানা পন সমণেন গোতমেন সদ্ধিং ইদ্ধিং দস্সেস্সাম, সচে হি সমণো গোতমো একং পাটিহারিযং করিস্সতি, মযং দ্ৰিগুণং করিস্সামা’’তি কথযিংসু.

তং সুত্ৰা ভিক্খূ ভগৰতো আরোচেসুং ‘‘ভন্তে, তিত্থিযা কির পাটিহারিযং করিস্সন্তী’’তি. সত্থা ‘‘ভিক্খৰে, করোন্তু, অহম্পি করিস্সামী’’তি আহ. তং সুত্ৰা বিম্বিসারো আগন্ত্ৰা ভগৰন্তং পুচ্ছি ‘‘ভন্তে, পাটিহারিযং কির করিস্সথা’’তি? ‘‘আম, মহারাজা’’তি. ‘‘ননু, ভন্তে, সিক্খাপদং পঞ্ঞত্ত’’ন্তি. ‘‘মহারাজ, তং মযা সাৰকানং পঞ্ঞত্তং, বুদ্ধানং পন সিক্খাপদং নাম নত্থি. ‘‘যথা হি, মহারাজ, তৰ উয্যানে পুপ্ফফলং অঞ্ঞেসং ৰারিতং, ন তৰ, এৰংসম্পদমিদং দট্ঠব্ব’’ন্তি. ‘‘কত্থ পন, ভন্তে, পাটিহারিযং করিস্সথা’’তি? ‘‘সাৰত্থিনগরদ্ৰারে কণ্ডম্বরুক্খমূলে’’তি. ‘‘অম্হেহি তত্থ কিং কত্তব্ব’’ন্তি? ‘‘নত্থি কিঞ্চি মহারাজা’’তি. পুনদিৰসে সত্থা কতভত্তকিচ্চো চারিকং পক্কামি. মনুস্সা ‘‘কুহিং, ভন্তে, সত্থা গচ্ছতী’’তি পুচ্ছন্তি. ‘‘সাৰত্থিনগরদ্ৰারে কণ্ডম্বরুক্খমূলে তিত্থিযমদ্দনং যমকপাটিহারিযং কাতু’’ন্তি তেসং ভিক্খূ কথযন্তি. মহাজনো ‘‘অচ্ছরিযরূপং কির পাটিহারিযং ভৰিস্সতি, পস্সিস্সাম ন’’ন্তি ঘরদ্ৰারানি ছড্ডেত্ৰা সত্থারা সদ্ধিংযেৰ অগমাসি.

অঞ্ঞতিত্থিযা ‘‘মযম্পি সমণস্স গোতমস্স পাটিহারিযকরণট্ঠানে পাটিহারিযং করিস্সামা’’তি উপট্ঠাকেহি সদ্ধিং সত্থারমেৰ অনুবন্ধিংসু. সত্থা অনুপুব্বেন সাৰত্থিং গন্ত্ৰা রঞ্ঞা ‘‘পাটিহারিযং কির, ভন্তে, করিস্সথা’’তি পুচ্ছিতো ‘‘করিস্সামী’’তি ৰত্ৰা ‘‘কদা, ভন্তে’’তি ৰুত্তে ‘‘ইতো সত্তমে দিৰসে আসাল়্হিপুণ্ণমাসিয’’ন্তি আহ. ‘‘মণ্ডপং করোমি ভন্তে’’তি? ‘‘অলং মহারাজ, মম পাটিহারিযকরণট্ঠানে সক্কো দেৰরাজা দ্ৰাদসযোজনিকং রতনমণ্ডপং করিস্সতী’’তি. ‘‘এতং কারণং নগরে উগ্ঘোসাপেমি, ভন্তে’’তি? ‘‘উগ্ঘোসাপেহি মহারাজা’’তি. রাজা ধম্মঘোসকং অলঙ্কতহত্থিপিট্ঠিং আরোপেত্ৰা ‘‘ভগৰা কির সাৰত্থিনগরদ্ৰারে কণ্ডম্বরুক্খমূলে তিত্থিযমদ্দনং পাটিহারিযং করিস্সতি ইতো সত্তমে দিৰসে’’তি যাৰ ছট্ঠদিৰসা দেৰসিকং ঘোসনং কারেসি. তিত্থিযা ‘‘কণ্ডম্বরুক্খমূলে কির করিস্সতী’’তি সামিকানং ধনং দত্ৰা সাৰত্থিসামন্তে অম্বরুক্খে ছিন্দাপযিংসু. ধম্মঘোসকো পুণ্ণমীদিৰসে পাতোৰ ‘‘অজ্জ, ভগৰতো পাটিহারিযং ভৰিস্সতী’’তি উগ্ঘোসেসি. দেৰতানুভাৰেন সকলজম্বুদীপে দ্ৰারে ঠত্ৰা উগ্ঘোসিতং ৰিয অহোসি. যে যে গন্তুং চিত্তং উপ্পাদেন্তি, তে তে সাৰত্থিং পত্তমেৰ অত্তানং পস্সিংসু, দ্ৰাদসযোজনিকা পরিসা অহোসি.

সত্থা পাতোৰ সাৰত্থিং পিণ্ডায পৰিসিতুং নিক্খমি. কণ্ডো নাম উয্যানপালো পিণ্ডিপক্কমেৰ কুম্ভপমাণং মহন্তং অম্বপক্কং রঞ্ঞো হরন্তো সত্থারং নগরদ্ৰারে দিস্ৰা ‘‘ইদং তথাগতস্সেৰ অনুচ্ছৰিক’’ন্তি অদাসি. সত্থা পটিগ্গহেত্ৰা তত্থেৰ একমন্তং নিসিন্নো পরিভুঞ্জিত্ৰা ‘‘আনন্দ, ইমং অম্বট্ঠিং উয্যানপালকস্স ইমস্মিং ঠানে রোপনত্থায দেহি, এস কণ্ডম্বো নাম ভৰিস্সতী’’তি আহ. থেরো তথা অকাসি. উয্যানপালো পংসুং ৰিযূহিত্ৰা রোপেসি. তঙ্খণঞ্ঞেৰ অট্ঠিং ভিন্দিত্ৰা মূলানি ওতরিংসু, নঙ্গলসীসপমাণো রত্তঙ্কুরো উট্ঠহি, মহাজনস্স ওলোকেন্তস্সেৰ পণ্ণাসহত্থক্খন্ধো পণ্ণাসহত্থসাখো উব্বেধতো চ হত্থসতিকো অম্বরুক্খো সম্পজ্জি, তাৰদেৰস্স পুপ্ফানি চ ফলানি চ উট্ঠহিংসু. সো মধুকরপরিৰুতো সুৰণ্ণৰণ্ণফলভরিতো নভং পূরেত্ৰা অট্ঠাসি, ৰাতপ্পহরণকালে মধুরপক্কানি পতিংসু. পচ্ছা আগচ্ছন্তা ভিক্খূ পরিভুঞ্জিত্ৰাৰ আগমিংসু.

সাযন্হসমযে সক্কো দেৰরাজা আৰজ্জেন্তো ‘‘সত্থু রতনমণ্ডপকরণং অম্হাকং ভারো’’তি ঞত্ৰা ৰিস্সকম্মদেৰপুত্তং পেসেত্ৰা দ্ৰাদসযোজনিকং নীলুপ্পলসঞ্ছন্নং সত্তরতনমণ্ডপং কারেসি. এৰং দসসহস্সচক্কৰাল়দেৰতা সন্নিপতিংসু. সত্থা তিত্থিযমদ্দনং অসাধারণং সাৰকেহি যমকপাটিহারিযং কত্ৰা বহুজনস্স পসন্নভাৰং ঞত্ৰা ওরুয্হ বুদ্ধাসনে নিসিন্নো ধম্মং দেসেসি. ৰীসতি পাণকোটিযো অমতপানং পিৰিংসু. ততো ‘‘পুরিমবুদ্ধা পন পাটিহারিযং কত্ৰা কত্থ গচ্ছন্তী’’তি আৰজ্জেন্তো ‘‘তাৰতিংসভৰন’’ন্তি ঞত্ৰা বুদ্ধাসনা উট্ঠায দক্খিণপাদং যুগন্ধরমুদ্ধনি ঠপেত্ৰা ৰামপাদেন সিনেরুমত্থকং অক্কমিত্ৰা পারিচ্ছত্তকমূলে পণ্ডুকম্বলসিলাযং ৰস্সং উপগন্ত্ৰা অন্তোতেমাসং দেৰানং অভিধম্মপিটকং কথেসি. পরিসা সত্থু গতট্ঠানং অজানন্তী ‘‘দিস্ৰাৰ গমিস্সামা’’তি তত্থেৰ তেমাসং ৰসি. উপকট্ঠায পৰারণায মহামোগ্গল্লানত্থেরো গন্ত্ৰা ভগৰতো আরোচেসি. অথ নং সত্থা পুচ্ছি ‘‘কহং পন এতরহি সারিপুত্তো’’তি? ‘‘এসো, ভন্তে, পাটিহারিযে পসীদিত্ৰা পব্বজিতেহি পঞ্চহি ভিক্খুসতেহি সদ্ধিং সঙ্কস্সনগরদ্ৰারে ৰসী’’তি. ‘‘মোগ্গল্লান, অহং ইতো সত্তমে দিৰসে সঙ্কস্সনগরদ্ৰারে ওতরিস্সামি, তথাগতং দট্ঠুকামা সঙ্কস্সনগরে একতো সন্নিপতন্তূ’’তি. থেরো ‘‘সাধূ’’তি পটিস্সুণিত্ৰা আগন্ত্ৰা পরিসায আরোচেত্ৰা সকলপরিসং সাৰত্থিতো তিংসযোজনং সঙ্কস্সনগরং একমুহুত্তেনেৰ পাপেসি.

সত্থা ৰুত্থৰস্সো পৰারেত্ৰা ‘‘মহারাজ, মনুস্সলোকং গমিস্সামী’’তি সক্কস্স আরোচেসি. সক্কো ৰিস্সকম্মং আমন্তেত্ৰা ‘‘দসবলস্স মনুস্সলোকগমনত্থায তীণি সোপানানি করোহী’’তি আহ. সো সিনেরুমত্থকে সোপানসীসং সঙ্কস্সনগরদ্ৰারে ধুরসোপানং কত্ৰা মজ্ঝে মণিমযং, একস্মিং পস্সে রজতমযং, একস্মিং পস্সে সুৰণ্ণমযন্তি তীণি সোপানানি মাপেসি, সত্তরতনমযা ৰেদিকাপরিক্খেপা. সত্থা লোকৰিৰরণং পাটিহারিযং কত্ৰা মজ্ঝে মণিমযেন সোপানেন ওতরি. সক্কো পত্তচীৰরং অগ্গহেসি, সুযামো ৰালবীজনিং, সহম্পতি মহাব্রহ্মা ছত্তং ধারেসি, দসসহস্সচক্কৰাল়দেৰতা দিব্বগন্ধমালাদীহি পূজযিংসু. সত্থারং ধুরসোপানে পতিট্ঠিতং পঠমমেৰ সারিপুত্তত্থেরো ৰন্দি, পচ্ছা সেসপরিসা. তস্মিং সমাগমে সত্থা চিন্তেসি ‘‘মোগ্গল্লানো ‘‘ইদ্ধিমা’তি পাকটো, উপালি ‘ৰিনযধরো’তি. সারিপুত্তস্স পন মহাপঞ্ঞগুণো অপাকটো, ঠপেত্ৰা মং অঞ্ঞো এতেন সদিসো সমপঞ্ঞো নাম নত্থি, পঞ্ঞাগুণমস্স পাকটং করিস্সামী’’তি পঠমং তাৰ পুথুজ্জনানং ৰিসযে পঞ্হং পুচ্ছি, তং পুথুজ্জনাৰ কথযিংসু ততো সোতাপন্নানং ৰিসযে পঞ্হং পুচ্ছি, তম্পি সোতাপন্নাৰ কথযিংসু, পুথুজ্জনা ন জানিংসু. এৰং সকদাগামিৰিসযে অনাগামিৰিসযে খীণাসৰৰিসযে মহাসাৰকৰিসযে চ পঞ্হং পুচ্ছি, তম্পি হেট্ঠিমা হেট্ঠিমা ন জানিংসু, উপরিমা উপরিমাৰ কথযিংসু. অগ্গসাৰকৰিসযে পুট্ঠপঞ্হম্পি অগ্গসাৰকাৰ কথযিংসু, অঞ্ঞে ন জানিংসু. ততো সারিপুত্তত্থেরস্স ৰিসযে পঞ্হং পুচ্ছি, তং থেরোৰ কথেসি, অঞ্ঞে ন জানিংসু.

মনুস্সা ‘‘কো নাম এস থেরো সত্থারা সদ্ধিং কথেসী’’তি পুচ্ছিত্ৰা ‘‘ধম্মসেনাপতি সারিপুত্তত্থেরো নামা’’তি সুত্ৰা ‘‘অহো মহাপঞ্ঞো’’তি ৰদিংসু. ততো পট্ঠায দেৰমনুস্সানং অন্তরে থেরস্স মহাপঞ্ঞগুণো পাকটো জাতো. অথ নং সত্থা –

‘‘যে চ সঙ্খাতধম্মাসে, যে চ সেখা পুথূ ইধ;

তেসং মে নিপকো ইরিযং, পুট্ঠো পব্রূহি মারিসা’’তি. (সু. নি. ১০৪৪; চূল়নি. অজিতমাণৰপুচ্ছা ৬৩; নেত্তি. ১৪) –

বুদ্ধৰিসযে পঞ্হং পুচ্ছিত্ৰা ‘‘ইমস্স নু খো সারিপুত্ত, সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি আহ. থেরো পঞ্হং ওলোকেত্ৰা ‘‘সত্থা মং সেখাসেখানং ভিক্খূনং আগমনপটিপদং পুচ্ছতী’’তি পঞ্হে নিক্কঙ্খো হুত্ৰা ‘‘আগমনপটিপদা নাম খন্ধাদিৰসেন বহূহি মুখেহি সক্কা কথেতুং, কতং নু খো কথেন্তো সত্থু অজ্ঝাসযং গণ্হিতুং সক্খিস্সামী’’তি অজ্ঝাসযে কঙ্খি. সত্থা ‘‘সারিপুত্তো পঞ্হে নিক্কঙ্খো, অজ্ঝাসযে পন মে কঙ্খতি, মযা নযে অদিন্নে কথেতুং ন সক্খিস্সতি, নযমস্স দস্সামী’’তি নযং দদন্তো ‘‘ভূতমিদং সারিপুত্ত সমনুপস্সা’’তি আহ. এৰং কিরস্স অহোসি ‘‘সারিপুত্তো মম অজ্ঝাসযং গহেত্ৰা কথেন্তো খন্ধৰসেন কথেস্সতী’’তি. থেরস্স সহ নযদানেন সো পঞ্হো নযসতেন নযসহস্সেন উপট্ঠাসি. সো সত্থারা দিন্ননযে ঠত্ৰা বুদ্ধৰিসযে পঞ্হং কথেসি.

সত্থা দ্ৰাদসযোজনিকায পরিসায ধম্মং দেসেসি. তিংস পাণকোটিযো অমতপানং পিৰিংসু. সত্থা পরিসং উয্যোজেত্ৰা চারিকং চরন্তো অনুপুব্বেন সাৰত্থিং গন্ত্ৰা পুনদিৰসে সাৰত্থিযং পিণ্ডায চরিত্ৰা পিণ্ডপাতপটিক্কন্তো ভিক্খূহি ৰত্তে দস্সিতে গন্ধকুটিং পাৰিসি. সাযন্হসমযে ভিক্খূ থেরস্স গুণকথং কথেন্তা ধম্মসভাযং নিসীদিংসু ‘‘মহাপঞ্ঞো, আৰুসো, সারিপুত্তো পুথুপঞ্ঞো জৰনপঞ্ঞো তিক্খপঞ্ঞো নিব্বেধিকপঞ্ঞো দসবলেন সংখিত্তেন পুচ্ছিতপঞ্হং ৰিত্থারেন কথেসী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি এস সংখিত্তেন ভাসিতস্স ৰিত্থারেন অত্থং কথেসিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো সরভমিগযোনিযং নিব্বত্তিত্ৰা অরঞ্ঞে ৰসতি. রাজা মিগৰিত্তকো অহোসি থামসম্পন্নো, অঞ্ঞং মনুস্সং ‘‘মনুস্সো’’তিপি ন গণেতি. সো একদিৰসং মিগৰং গন্ত্ৰা অমচ্চে আহ – ‘‘যস্স পস্সেন মিগো পলাযতি, তেন সো দণ্ডো দাতব্বো’’তি. তে চিন্তযিংসু ‘‘কদাচি ৰেমজ্ঝে ঠিতমিগং ৰিজ্ঝন্তি, কদাচি উট্ঠিতং, কদাচি পলাযন্তম্পি, অজ্জ পন যেন কেনচি উপাযেন রঞ্ঞো ঠিতট্ঠানঞ্ঞেৰ আরোপেস্সামা’’তি. চিন্তেত্ৰা চ পন কতিকং কত্ৰা রঞ্ঞো ধুরমগ্গং অদংসু. তে মহন্তং গুম্বং পরিক্খিপিত্ৰা মুগ্গরাদীহি ভূমিং পোথযিংসু. পঠমমেৰ সরভমিগো উট্ঠায তিক্খত্তুং গুব্ভং অনুপরিগন্ত্ৰা পলাযনোকাসং ওলোকেন্তো সেসদিসাসু মনুস্সে বাহায বাহং ধনুনা ধনুং আহচ্চ নিরন্তরে ঠিতে দিস্ৰা রঞ্ঞো ঠিতট্ঠানেযেৰ ওকাসং অদ্দস. সো উম্মীলিতেসু অক্খীসু ৰালুকং খিপমানো ৰিয রাজানং অভিমুখো অগমাসি. রাজা তং লহুসম্পত্তং দিস্ৰা সরং উক্খিপিত্ৰা ৰিজ্ঝি. সরভমিগা নাম সরং ৰঞ্চেতুং ছেকা হোন্তি, সরে অভিমুখং আগচ্ছন্তে ৰেগং হাপেত্ৰা তিট্ঠন্তি, পচ্ছতো আগচ্ছন্তে ৰেগেন পুরতো জৰন্তি, উপরিভাগেনাগচ্ছন্তে পিট্ঠিং নামেন্তি, পস্সেনাগচ্ছন্তে থোকং অপগচ্ছন্তি, কুচ্ছিং সন্ধাযাগচ্ছন্তে পরিৰত্তিত্ৰা পতন্তি, সরে অতিক্কন্তে ৰাতচ্ছিন্নৰলাহকৰেগেন পলাযন্তি.

সোপি রাজা তস্মিং পরিৰত্তিত্ৰা পতিতে ‘‘সরভমিগো মে ৰিদ্ধো’’তি নাদং মুঞ্চি. সরভো উট্ঠায ৰাতৰেগেন পলাযি. বলমণ্ডলং ভিজ্জিত্ৰা উভোসু পস্সেসু ঠিতঅমচ্চা সরভং পলাযমানং দিস্ৰা একতো হুত্ৰা পুচ্ছিংসু ‘‘মিগো কস্স ঠিতট্ঠানং অভিরুহী’’তি? ‘‘রঞ্ঞো ঠিতট্ঠান’’ন্তি. ‘‘রাজা ‘ৰিদ্ধো মে’তি ৰদতি, কোনেন ৰিদ্ধো, নিব্বিরজ্ঝো ভো অম্হাকং রাজা, ভূমিনেন ৰিদ্ধা’’তি তে নানপ্পকারেন রঞ্ঞা সদ্ধিং কেল়িং করিংসু. রাজা চিন্তেসি ‘‘ইমে মং পরিহসন্তি, ন মম পমাণং জানন্তী’’তি গাল়্হং নিৰাসেত্ৰা পত্তিকোৰ খগ্গং আদায ‘‘সরভং গণ্হিস্সামী’’তি ৰেগেন পক্খন্দি. অথ নং দিস্ৰা তীণি যোজনানি অনুবন্ধি. সরভো অরঞ্ঞং পাৰিসি, রাজাপি পাৰিসি. তত্থ সরভমিগস্স গমনমগ্গে সট্ঠিহত্থমত্তো মহাপূতিপাদনরকাৰাটো অত্থি, সো তিংসহত্থমত্তং উদকেন পুণ্ণো তিণেহি চ পটিচ্ছন্নো. সরভো উদকগন্ধং ঘাযিত্ৰাৰ আৰাটভাৰং ঞত্ৰা থোকং ওসক্কিত্ৰা গতো. রাজা পন উজুকমেৰ গচ্ছন্তো তস্মিং পতি.

সরভো তস্স পদসদ্দং অসুণন্তো নিৰত্তিত্ৰা তং অপস্সন্তো ‘‘নরকাৰাটে পতিতো ভৰিস্সতী’’তি ঞত্ৰা আগন্ত্ৰা ওলোকেন্তো তং গম্ভীরউদকে অপতিট্ঠং কিলমন্তং দিস্ৰা তেন কতং অপরাধং হদযে অকত্ৰা সঞ্জাতকারুঞ্ঞো ‘‘মা মযি পস্সন্তেৰ রাজা নস্সতু, ইমম্হা দুক্খা নং মোচেস্সামী’’তি আৰাটতীরে ঠিতো ‘‘মা ভাযি, মহারাজ, মহন্তা দুক্খা তং মোচেস্সামী’’তি ৰত্ৰা অত্তনো পিযপুত্তং উদ্ধরিতুং উস্সাহং করোন্তো ৰিয তস্সুদ্ধরণত্থায সিলায যোগ্গং কত্ৰাৰ ‘‘ৰিজ্ঝিস্সামী’’তি আগতং রাজানং সট্ঠিহত্থা নরকা উদ্ধরিত্ৰা অস্সাসেত্ৰা পিট্ঠিং আরোপেত্ৰা অরঞ্ঞা নীহরিত্ৰা সেনায অৰিদূরে ওতারেত্ৰা ওৰাদমস্স দত্ৰা পঞ্চসু সীলেসু পতিট্ঠাপেসি. রাজা মহাসত্তং ৰিনা ৰসিতুং অসক্কোন্তো আহ ‘‘সামি সরভমিগরাজ, মযা সদ্ধিং বারাণসিং এহি, দ্ৰাদসযোজনিকায তে বারাণসিযং রজ্জং দম্মি, তং কারেহী’’তি. ‘‘মহারাজ, মযং তিরচ্ছানগতা, ন মে রজ্জেনত্থো, সচে তে মযি সিনেহো অত্থি, মযা দিন্নানি সীলানি রক্খন্তো রট্ঠৰাসিনোপি সীলং রক্খাপেহী’’তি তং ওৰদিত্ৰা অরঞ্ঞমেৰ পাৰিসি.

সো অস্সুপুণ্ণেহি নেত্তেহি তস্স গুণং সরন্তোৰ সেনং পাপুণিত্ৰা সেনঙ্গপরিৰুতো নগরং গন্ত্ৰা ‘‘ইতো পট্ঠায সকলনগরৰাসিনো পঞ্চ সীলানি রক্খন্তূ’’তি ধম্মভেরিং চরাপেসি. মহাসত্তেন পন অত্তনো কতগুণং কস্সচি অকথেত্ৰা সাযন্হে নানগ্গরসভোজনং ভুঞ্জিত্ৰা অলঙ্কতসযনে সযিত্ৰা পচ্চূসকালে মহাসত্তস্স গুণং সরিত্ৰা উট্ঠায সযনপিট্ঠে পল্লঙ্কেন নিসীদিত্ৰা পীতিপুণ্ণেন হদযেন ছহি গাথাহি উদানেসি –

১৩৪.

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

১৩৫.

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

১৩৬.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

১৩৭.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

১৩৮.

‘‘দুক্খূপনীতোপি নরো সপঞ্ঞো, আসং ন ছিন্দেয্য সুখাগমায;

বহূ হি ফস্সা অহিতা হিতা চ, অৰিতক্কিতা মচ্চুমুপব্বজন্তি.

১৩৯.

‘‘অচিন্তিতম্পি ভৰতি, চিন্তিতম্পি ৰিনস্সতি;

ন হি চিন্তামযা ভোগা, ইত্থিযা পুরিসস্স ৰা’’তি.

তত্থ আসীসেথেৰ পুরিসোতি আসচ্ছেদককম্মং অকত্ৰা অত্তনো কম্মেসু আসং করোথেৰ ন উক্কণ্ঠেয্য. যথা ইচ্ছিন্তি অহঞ্হি সট্ঠিহত্থা নরকা উট্ঠানং ইচ্ছিং, সোম্হি তথেৰ জাতো, ততো উট্ঠিতোযেৰাতি দীপেতি. অহিতা হিতা চাতি দুক্খফস্সা চ সুখফস্সা চ, ‘‘মরণফস্সা জীৰিতফস্সা চা’’তিপি অত্থো, সত্তানঞ্হি মরণফস্সো অহিতো জীৰিতফস্সো হিতো, তেসং অৰিতক্কিতো অচিন্তিতোপি মরণফস্সো আগচ্ছতীতি দস্সেতি. অচিন্তি তম্পীতি মযা ‘‘আৰাটে পতিস্সামী’’তি ন চিন্তিতং, ‘‘সরভং মারেস্সামী’’তি চিন্তিতং, ইদানি পন মে চিন্তিতং নট্ঠং, অচিন্তিতমেৰ জাতং. ভোগাতি যসপরিৰারা. এতে চিন্তামযা ন হোন্তি, তস্মা ঞাণৰতা ৰীরিযমেৰ কাতব্বং. ৰীরিযৰতো হি অচিন্তিতম্পি হোতিযেৰ.

তস্সেৰং উদানং উদানেন্তস্সেৰ অরুণং উট্ঠহি. পুরোহিতো চ পাতোৰ সুখসেয্যপুচ্ছনত্থং আগন্ত্ৰা রাজদ্ৰারে ঠিতো তস্স উদানগীতসদ্দং সুত্ৰা চিন্তেসি ‘‘রাজা হিয্যো মিগৰং অগমাসি, তত্থ সরভমিগং ৰিরদ্ধো ভৰিস্সতি, ততো অমচ্চেহি অৰহসিযমানো ‘মারেত্ৰা নং আহরিস্সামী’তি খত্তিযমানেন তং অনুবন্ধন্তো সট্ঠিহত্থে নরকে পতিতো ভৰিস্সতি, দযালুনা সরভরাজেন রঞ্ঞো দোসং অচিন্তেত্ৰা রাজা উদ্ধরিতো ভৰিস্সতি, তেন মঞ্ঞে উদানং উদানেতী’’তি. এৰং ব্রাহ্মণস্স রঞ্ঞো পরিপুণ্ণব্যঞ্জনং উদানং সুত্ৰা সুমজ্জিতে আদাসে মুখং ওলোকেন্তস্স ছাযা ৰিয রঞ্ঞা চ সরভেন চ কতকারণং পাকটং অহোসি. সো নখগ্গেন দ্ৰারং আকোটেসি. রাজা ‘‘কো এসো’’তি পুচ্ছি. ‘‘অহং দেৰ পুরোহিতো’’তি. অথস্স দ্ৰারং ৰিৰরিত্ৰা ‘‘ইতো এহাচরিযা’’তি আহ. সো পৰিসিত্ৰা রাজানং জযাপেত্ৰা একমন্তং ঠিতো ‘‘অহং, মহারাজ, তযা অরঞ্ঞে কতকারণং জানামি, ত্ৰং একং সরভমিগং অনুবন্ধন্তো নরকে পতিতো, অথ নং সো সরভো সিলায যোগ্গং কত্ৰা নরকতো উদ্ধরি, সো ত্ৰং তস্স গুণং অনুস্সরিত্ৰা উদানং উদানেসী’’তি ৰত্ৰা দ্ৰে গাথা অভাসি –

১৪০.

‘‘সরভং গিরিদুগ্গস্মিং, যং ত্ৰং অনুসরী পুরে;

অলীনচিত্তস্স তুৰং, ৰিক্কন্তমনুজীৰসি.

১৪১.

‘‘যো তং ৰিদুগ্গা নরকা সমুদ্ধরি, সিলায যোগ্গং সরভো করিত্ৰা;

দুক্খূপনীতং মচ্চুমুখা পমোচযি, অলীনচিত্তং ত মিগং ৰদেসী’’তি.

তত্থ অনুসরীতি অনুবন্ধি. ৰিক্কন্তন্তি উদ্ধরণত্থায কতপরক্কমং. অনুজীৰসীতি উপজীৰসি, তস্সানুভাৰেন তযা জীৰিতং লদ্ধন্তি অত্থো. সমুদ্ধরীতি উদ্ধরি. ত মিগং ৰদেসীতি তং সুৰণ্ণসরভমিগং ইধ সিরিসযনে নিসিন্নো ৰণ্ণেসি.

তং সুত্ৰা রাজা ‘‘অযং মযা সদ্ধিং ন মিগৰং গতো, সব্বং পৰত্তিং জানাতি, কথং নু খো জানাতি, পুচ্ছিস্সামি ন’’ন্তি চিন্তেত্ৰা নৰমং গাথমাহ –

১৪২.

‘‘কিং ত্ৰং নু তত্থেৰ তদা অহোসি, উদাহু তে কোচি নং এতদক্খা;

ৰিৰটচ্ছদ্দো নুসি সব্বদস্সী, ঞাণং নু তে ব্রাহ্মণ ভিংসরূপ’’ন্তি.

তত্থ ভিংসরূপন্তি কিং নু তে ঞাণং বলৰজাতিকং, তেনেতং জানাসীতি.

ব্রাহ্মণো ‘‘নাহং সব্বঞ্ঞুবুদ্ধো, ব্যঞ্জনং অমক্খেত্ৰা তযা কথিতগাথানং পন ময্হং অত্থো উপট্ঠাতী’’তি দীপেন্তো দসমং গাথমাহ –

১৪৩.

‘‘ন চেৰহং তত্থ তদা অহোসিং, ন চাপি মে কোচি নং এতদক্খা;

গাথাপদানঞ্চ সুভাসিতানং, অত্থং তদানেন্তি জনিন্দ ধীরা’’তি.

তত্থ সুভাসিতানন্তি ব্যঞ্জনং অমক্খেত্ৰা সুট্ঠু ভাসিতানং. অত্থং তদানেন্তীতি যো তেসং অত্থো, তং আনেন্তি উপধারেন্তীতি.

রাজা তস্স তুস্সিত্ৰা বহুং ধনং অদাসি. ততো পট্ঠায দানাদিপুঞ্ঞাভিরতো অহোসি, মনুস্সাপি পুঞ্ঞাভিরতা হুত্ৰা মতমতা সগ্গমেৰ পূরযিংসু. অথেকদিৰসং রাজা ‘‘লক্খং ৰিজ্ঝিস্সামী’’তি পুরোহিতমাদায উয্যানং গতো. তদা সক্কো দেৰরাজা বহূ নৰে দেৰে চ দেৰকঞ্ঞাযো চ দিস্ৰা ‘‘কিং নু খো কারণ’’ন্তি আৰজ্জেন্তো সরভমিগেন নরকা উদ্ধরিত্ৰা রঞ্ঞো সীলেসু পতিট্ঠাপিতভাৰং ঞত্ৰা ‘‘রঞ্ঞো আনুভাৰেন মহাজনো পুঞ্ঞানি করোতি, তেন দেৰলোকো পরিপূরতি, ইদানি খো পন রাজা লক্খং ৰিজ্ঝিতুং উয্যানং গতো, তং ৰীমংসিত্ৰা সীহনাদং নদাপেত্ৰা সরভমিগস্স গুণং কথাপেত্ৰা অত্তনো চ সক্কভাৰং জানাপেত্ৰা আকাসে ঠিতো ধম্মং দেসেত্ৰা মেত্তায চেৰ পঞ্চন্নং সীলানঞ্চ গুণং কথেত্ৰা আগমিস্সামী’’তি চিন্তেত্ৰা উয্যানং অগমাসি. রাজাপি ‘‘লক্খং ৰিজ্ঝিস্সামী’’তি ধনুং আরোপেত্ৰা সরং সন্নয্হি. তস্মিং খণে সক্কো রঞ্ঞো চ লক্খস্স চ অন্তরে অত্তনো আনুভাৰেন সরভং দস্সেসি. রাজা তং দিস্ৰা সরং ন মুঞ্চি. অথ নং সক্কো পুরোহিতস্স সরীরে অধিমুচ্চিত্ৰা গাথং অভাসি –

১৪৪.

‘‘আদায পত্তিং পরৰিরিযঘাতিং, চাপে সরং কিং ৰিচিকিচ্ছসে তুৰং;

নুন্নো সরো সরভং হন্তু খিপ্পং, অন্নঞ্হি এতং ৰরপঞ্ঞ রঞ্ঞো’’তি.

তত্থ পত্তিন্তি ৰাজপত্তেহি সমন্নাগতং. পরৰিরিযঘাতিন্তি পরেসং ৰীরিযঘাতকং. চাপে সরন্তি এতং পত্তসহিতং সরং চাপে আদায সন্নয্হিত্ৰা ইদানি ত্ৰং কিং ৰিচিকিচ্ছসি. হন্তূতি তযা ৰিস্সট্ঠো হুত্ৰা এস সরো খিপ্পং ইমং সরভং হনতু. অন্নঞ্হি এতন্তি ৰরপঞ্ঞ, মহারাজ, সরভো নাম রঞ্ঞো আহারো ভক্খোতি অত্থো.

ততো রাজা গাথমাহ –

১৪৫.

‘‘অদ্ধা পজানামি অহম্পি এতং, অন্নং মিগো ব্রাহ্মণ খত্তিযস্স;

পুব্বে কতঞ্চ অপচাযমানো, তস্মা মিগং সরভং নো হনামী’’তি.

তত্থ পুব্বে কতঞ্চাতি ব্রাহ্মণ, অহমেতং একংসেন জানামি যথা মিগো খত্তিযস্স অন্নং, পুব্বে পন ইমিনা ময্হং কতগুণং পূজেমি, তস্মা তং ন হনামীতি.

ততো সক্কো গাথাদ্ৰযমাহ –

১৪৬.

‘‘নেসো মিগো মহারাজ, অসুরেসো দিসম্পতি;

এতং হন্ত্ৰা মনুস্সিন্দ, ভৰস্সু অমরাধিপো.

১৪৭.

‘‘সচে চ রাজা ৰিচিকিচ্ছসে তুৰং, হন্তুং মিগং সরভং সহাযকং;

সপুত্তদারো নরৰীরসেট্ঠ, গন্তা তুৰং ৰেতরণিং যমস্সা’’তি.

তত্থ অসুরেসোতি অসুরো এসো, অসুরজেট্ঠকো সক্কো এসোতি অধিপ্পাযেন ৰদতি. অমরাধিপোতি ত্ৰং এতং সক্কং মারেত্ৰা সযং সক্কো দেৰরাজা হোহীতি ৰদতি. ৰেতরণিং যমস্সাতি ‘‘সচে এতং ‘সহাযো মে’তি চিন্তেত্ৰা ন মারেস্সসি, সপুত্তদারো যমস্স ৰেতরণিনিরযং গতো ভৰিস্সসী’’তি নং তাসেসি.

ততো রাজা দ্ৰে গাথা অভাসি –

১৪৮.

‘‘কামং অহং জানপদা চ সব্বে, পুত্তা চ দারা চ সহাযসঙ্ঘা;

গচ্ছেমু তং ৰেতরণিং যমস্স, ন ত্ৰেৰ হঞ্ঞো মম পাণদো যো.

১৪৯.

‘‘অযং মিগো কিচ্ছগতস্স ময্হং, একস্স কত্তা ৰিৰনস্মি ঘোরে;

তং তাদিসং পুব্বকিচ্চং সরন্তো, জানং মহাব্রহ্মে কথং হনেয্য’’ন্তি.

তত্থ মম পাণদো যোতি ব্রাহ্মণ, যো মম পাণদদো যেন মে পিযং জীৰিতং দিন্নং, নরকং পৰিসন্তেন মযা সো ন ত্ৰেৰ হঞ্ঞো ন হনিতব্বো, অৰজ্ঝো এসোতি ৰদতি. একস্স কত্তা ৰিৰনস্মি ঘোরেতি দারুণে অরঞ্ঞে পৰিট্ঠস্স সতো একস্স অসহাযকস্স মম কত্তা কারকো জীৰিতস্স দাযকো, স্ৰাহং তং ইমিনা কতং তাদিসং পুব্বকিচ্চং সরন্তোযেৰ তং গুণং জানন্তোযেৰ কথং হনেয্যং.

অথ সক্কো পুরোহিতস্স সরীরতো অপগন্ত্ৰা সক্কত্তভাৰং মাপেত্ৰা আকাসে ঠত্ৰা রঞ্ঞো গুণং পকাসেন্তো গাথাদ্ৰযমাহ –

১৫০.

‘‘মিত্তাভিরাধী চিরমেৰ জীৰ, রজ্জং ইমং ধম্মগুণে পসাস;

নারীগণেহি পরিচারিযন্তো, মোদস্সু রট্ঠে তিদিৰেৰ ৰাসৰো.

১৫১.

‘‘অক্কোধনো নিচ্চপসন্নচিত্তো, সব্বাতিথী যাচযোগো ভৰিত্ৰা;

দত্ৰা চ ভুত্ৰা চ যথানুভাৰং, অনিন্দিতো সগ্গমুপেহি ঠান’’ন্তি.

তত্থ মিত্তাভিরাধীতি মিত্তে আরাধেন্তো তোসেন্তো তেসু অদুব্ভমানো. সব্বাতিথীতি সব্বে ধম্মিকসমণব্রাহ্মণে অতিথী পাহুনকেযেৰ কত্ৰা পরিহরন্তো যাচিতব্বযুত্তকো হুত্ৰা. অনিন্দিতোতি দানাদীনি পুঞ্ঞানি করণেন পমুদিতো দেৰলোকেন অভিনন্দিতো হুত্ৰা সগ্গট্ঠানং উপেহীতি.

এৰং ৰত্ৰা সক্কো ‘‘অহং মহারাজং তং পরিগ্গণ্হিতুং আগতো, ত্ৰং অত্তানং পরিগ্গণ্হিতুং নাদাসি, অপ্পমত্তো হোহী’’তি তং ওৰদিত্ৰা সকট্ঠানমেৰ গতো.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি সারিপুত্তো সংখিত্তেন ভাসিতস্স ৰিত্থারেন অত্থং জানাতিযেৰা’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, পুরোহিতো সারিপুত্তো, সরভমিগো পন অহমেৰ অহোসি’’ন্তি.

সরভমিগজাতকৰণ্ণনা দসমা.

জাতকুদ্দানং –

অম্ব ফন্দন জৰন, নারদ দূত কলিঙ্গা;

অকিত্তি তক্কারিযং রুরু, সরভং দস তেরসে.

তেরসকনিপাতৰণ্ণনা নিট্ঠিতা.

১৪. পকিণ্ণকনিপাতো

[৪৮৪] ১. সালিকেদারজাতকৰণ্ণনা

সম্পন্নং সালিকেদারন্তি ইদং সত্থা জেতৰনে ৰিহরন্তো মাতুপোসকভিক্খুং আরব্ভ কথেসি. পচ্চুপ্পন্নৰত্থু সামজাতকে (জা. ২.২২.২৯৬ আদযো) আৰি ভৰিস্সতি. সত্থা পন তং ভিক্খুং পক্কোসাপেত্ৰা ‘‘সচ্চং কির ত্ৰং ভিক্খু গিহী পোসেসী’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘কিং তে হোন্তী’’তি ৰত্ৰা ‘‘মাতাপিতরো মে, ভন্তে’’তি ৰুত্তে ‘‘সাধু ভিক্খু, পোরাণকপণ্ডিতা তিরচ্ছানা হুত্ৰা সুৰযোনিযং নিব্বত্তিত্ৰাপি জিণ্ণে মাতাপিতরো কুলাৰকে নিপজ্জাপেত্ৰা মুখতুণ্ডকেন গোচরং আহরিত্ৰা পোসেসু’’ন্তি ৰত্ৰা অতীতং আহরি.

অতীতে রাজগহে মগধরাজা নাম রজ্জং কারেসি. তদা নগরতো পুব্বুত্তরদিসায সালিদ্দিযো নাম ব্রাহ্মণগামো অহোসি. তস্স পুব্বুত্তরদিসায মগধখেত্তং অত্থি, তত্থ কোসিযগোত্তো নাম সালিদ্দিযৰাসী ব্রাহ্মণো সহস্সকরীসমত্তং খেত্তং গহেত্ৰা সালিং ৰপাপেসি. উট্ঠিতে চ পন সস্সে ৰতিং থিরং কারেত্ৰা কস্সচি পণ্ণাসকরীসমত্তং, কস্সচি সট্ঠিকরীসমত্তন্তি এৰং পঞ্চসতকরীসমত্তং খেত্তং অত্তনো পুরিসানংযেৰ আরক্খণত্থায দত্ৰা সেসং পঞ্চসতকরীসমত্তং খেত্তং ভতিং কত্ৰা একস্স ভতকস্স অদাসি. সো তত্থ কুটিং কত্ৰা রত্তিন্দিৰং ৰসতি. খেত্তস্স পন পুব্বুত্তরদিসাভাগে একস্মিং সানুপব্বতে মহন্তং সিম্বলিৰনং অত্থি, তত্থ অনেকানি সুৰসতানি ৰসন্তি. তদা বোধিসত্তো তস্মিং সুৰসঙ্ঘে সুৰরঞ্ঞো পুত্তো হুত্ৰা নিব্বত্তি. সো ৰযপ্পত্তো অভিরূপো থামসম্পন্নো সকটনাভিপমাণসরীরো অহোসি. অথস্স পিতা মহল্লককালে ‘‘অহং ইদানি দূরং গন্তুং ন সক্কোমি, ত্ৰং ইমং গণং পরিহরা’’তি গণং নিয্যাদেসি. সো পুনদিৰসতো পট্ঠায মাতাপিতূনং গোচরত্থায গন্তুং নাদাসি, সুৰগণং পরিহরন্তো হিমৰন্তং গন্ত্ৰা সযংজাতসালিৰনে যাৰদত্থং সালিং খাদিত্ৰা আগমনকালে মাতাপিতূনং পহোনকং গোচরং আহরিত্ৰা মাতাপিতরো পোসেসি.

অথস্স একদিৰসং সুৰা আরোচেসুং ‘‘পুব্বে ইমস্মিং কালে মগধখেত্তে সালি পচ্চতি, ইদানি কিং নু খো জাত’’ন্তি? ‘‘তেন হি জানাথা’’তি দ্ৰে সুৰে পহিণিংসু. তে গন্ত্ৰা মগধখেত্তে ওতরন্তা তস্স ভতিযা রক্খণপুরিসস্স খেত্তে ওতরিত্ৰা সালিং খাদিত্ৰা একং সালিসীসং আদায সিম্বলিৰনং গন্ত্ৰা সালিসীসং মহাসত্তস্স পাদমূলে ঠপেত্ৰা ‘‘তত্থ এৰরূপো সালী’’তি ৰদিংসু. সো পুনদিৰসে সুৰগণপরিৰুতো তত্থ গন্ত্ৰা তস্মিং ভতকস্স খেত্তে ওতরি. সো পন পুরিসো সুৰে সালিং খাদন্তে দিস্ৰা ইতো চিতো চ ধাৰিত্ৰা ৰারেন্তোপি ৰারেতুং ন সক্কোতি. সেসা সুৰা যাৰদত্থং সালিং খাদিত্ৰা তুচ্ছমুখাৰ গচ্ছন্তি. সুৰরাজা পন বহূনি সালিসীসানি একতো কত্ৰা তেহি পরিৰুতো হুত্ৰা আহরিত্ৰা মাতাপিতূনং দেতি. সুৰা পুনদিৰসতো পট্ঠায তত্থেৰ সালিং খাদিংসু. অথ সো পুরিসো ‘‘সচে ইমে অঞ্ঞং কতিপাহং এৰং খাদিস্সন্তি, কিঞ্চি ন ভৰিস্সতি, ব্রাহ্মণো সালিং অগ্ঘাপেত্ৰা ময্হং ইণং করিস্সতি, গন্ত্ৰা তস্স আরোচেস্সামী’’তি সালিমুট্ঠিনা সদ্ধিং তথারূপং পণ্ণাকারং গহেত্ৰা সালিদ্দিযগামং গন্ত্ৰা ব্রাহ্মণং পস্সিত্ৰা ৰন্দিত্ৰা পণ্ণাকারং দত্ৰা একমন্তং ঠিতো ‘‘কিং, ভো পুরিস, সম্পন্নং সালিখেত্ত’’ন্তি পুট্ঠো ‘‘আম, ব্রাহ্মণ, সম্পন্ন’’ন্তি ৰত্ৰা দ্ৰে গাথা অভাসি –

১.

‘‘সম্পন্নং সালিকেদারং, সুৰা ভুঞ্জন্তি কোসিয;

পটিৰেদেমি তে ব্রহ্মে, ন নে ৰারেতুমুস্সহে.

২.

‘‘একো চ তত্থ সকুণো, যো নেসং সব্বসুন্দরো;

ভুত্ৰা সালিং যথাকামং, তুণ্ডেনাদায গচ্ছতী’’তি.

তত্থ সম্পন্নন্তি পরিপুণ্ণং অৰেকল্লং. সালিকেদারন্তি সালিখেত্তং. সব্বসুন্দরোতি সব্বেহি কোট্ঠাসেহি সুন্দরো রত্ততুণ্ডো জিঞ্জুকসন্নিভঅক্খি রত্তপাদো তীহি রত্তরাজীহি পরিক্খিত্তগীৰো মহামযূরপমাণো সো যাৰদত্থং সালিং খাদিত্ৰা অঞ্ঞং তুণ্ডেন গহেত্ৰা গচ্ছতীতি.

ব্রাহ্মণো তস্স কথং সুত্ৰা সুৰরাজে সিনেহং উপ্পাদেত্ৰা খেত্তপালং পুচ্ছি ‘‘অম্ভো পুরিস, পাসং ওড্ডেতুং জানাসী’’তি? ‘‘আম, জানামী’’তি. অথ নং গাথায অজ্ঝভাসি –

৩.

‘‘ওড্ডেন্তু ৰালপাসানি, যথা বজ্ঝেথ সো দিজো;

জীৰঞ্চ নং গহেত্ৰান, আনযেহি মমন্তিকে’’তি.

তত্থ ওড্ডেন্তূতি ওড্ডযন্তু. ৰালপাসানীতি অস্সৰালাদিরজ্জুমযপাসানি. জীৰঞ্চ নন্তি জীৰন্তং এৰ নং. আনযেহীতি আনেহি.

তং সুত্ৰা খেত্তপালো সালিং অগ্ঘাপেত্ৰা ইণস্স অকতভাৰেন তুট্ঠো গন্ত্ৰা অস্সৰালে ৰট্টেত্ৰা ‘‘অজ্জ ইমস্মিং ঠানে ওতরিস্সতী’’তি সুৰরঞ্ঞো ওতরণট্ঠানং সল্লক্খেত্ৰা পুনদিৰসে পাতোৰ চাটিপমাণং পঞ্জরং কত্ৰা পাসঞ্চ ওড্ডেত্ৰা সুৰানং আগমনং ওলোকেন্তো কুটিযং নিসীদি. সুৰরাজাপি সুৰগণপরিৰুতো আগন্ত্ৰা অলোলুপ্পচারতায হিয্যো খাদিতট্ঠানে ওড্ডিতপাসে পাদং পৰেসন্তোৰ ওতরি. সো অত্তনো বদ্ধভাৰং ঞত্ৰা চিন্তেসি ‘‘সচাহং ইদানেৰ বদ্ধরৰং রৰিস্সামি, ঞাতকামে ভযতজ্জিতা গোচরং অগ্গহেত্ৰাৰ পলাযিস্সন্তি, যাৰ এতেসং গোচরগ্গহণং, তাৰ অধিৰাসেস্সামী’’তি. সো তেসং সুহিতভাৰং ঞত্ৰা মরণভযতজ্জিতো হুত্ৰা তিক্খত্তুং বদ্ধরৰং রৰি. অথ সব্বে তে সুৰা পলাযিংসু. সুৰরাজা ‘‘এত্তকেসু মে ঞাতকেসু নিৰত্তিত্ৰা ওলোকেন্তো একোপি নত্থি, কিং নু খো মযা পাপং কত’’ন্তি ৰিলপন্তো গাথমাহ –

৪.

‘‘এতে ভুত্ৰা পিৰিত্ৰা চ, পক্কমন্তি ৰিহঙ্গমা;

একো বদ্ধোস্মি পাসেন, কিং পাপং পকতং মযা’’তি.

খেত্তপালো সুৰরাজস্স বদ্ধরৰং সুৰানঞ্চ আকাসে পক্খন্দনসদ্দং সুত্ৰা ‘‘কিং নু খো’’তি কুটিযা ওরুয্হ পাসাট্ঠানং গন্ত্ৰা সুৰরাজানং দিস্ৰা ‘‘যস্সেৰ মে পাসো ওড্ডিতো, স্ৰেৰ বদ্ধো’’তি তুট্ঠমানসো সুৰরাজানং পাসতো মোচেত্ৰা দ্ৰে পাদে একতো বন্ধিত্ৰা দল়্হং আদায সালিদ্দিযগামং গন্ত্ৰা সুৰরাজং ব্রাহ্মণস্স অদাসি. ব্রাহ্মণো বলৰসিনেহেন মহাসত্তং উভোহি হত্থেহি দল়্হং গহেত্ৰা অঙ্কে নিসীদাপেত্ৰা তেন সদ্ধিং সল্লপন্তো দ্ৰে গাথা অভাসি –

৫.

‘‘উদরং নূন অঞ্ঞেসং, সুৰ অচ্চোদরং তৰ;

ভুত্ৰা সালিং যথাকামং, তুণ্ডেনাদায গচ্ছসি.

৬.

‘‘কোট্ঠং নু তত্থ পূরেসি, সুৰ ৰেরং নু তে মযা;

পুট্ঠো মে সম্ম অক্খাহি, কুহিং সালিং নিদাহসী’’তি.

তত্থ উদরং নূনাতি অঞ্ঞেসং উদরং উদরমেৰ মঞ্ঞে, তৰ উদরং পন অতিউদরং. তত্থাতি তস্মিং সিম্বলিৰনে. পূরেসীতি ৰস্সারত্তত্থায পূরেসি. নিদাহসীতি নিধানং কত্ৰা ঠপেসি, ‘‘নিধীযসী’’তিপি পাঠো.

তং সুত্ৰা সুৰরাজা মধুরায মনুস্সভাসায সত্তমং গাথমাহ –

৭.

‘‘ন মে ৰেরং তযা সদ্ধিং, কোট্ঠো ময্হং ন ৰিজ্জতি;

ইণং মুঞ্চামিণং দম্মি, সম্পত্তো কোটসিম্বলিং;

নিধিম্পি তত্থ নিদহামি, এৰং জানাহি কোসিযা’’তি.

তত্থ ইণং মুঞ্চামিণং দম্মীতি তৰ সালিং হরিত্ৰা ইণং মুঞ্চামি চেৰ দম্মি চাতি ৰদতি. নিধিম্পীতি একং তত্থ সিম্বলিৰনে অনুগামিকনিধিম্পি নিদহামি.

অথ নং ব্রাহ্মণো পুচ্ছি –

৮.

‘‘কীদিসং তে ইণদানং, ইণমোক্খো চ কীদিসো;

নিধিনিধানমক্খাহি, অথ পাসা পমোক্খসী’’তি.

তত্থ ইণদানন্তি ইণস্স দানং. নিধিনিধানন্তি নিধিনো নিধানং.

এৰং ব্রাহ্মণেন পুট্ঠো সুৰরাজা তস্স ব্যাকরোন্তো চতস্সো গাথা অভাসি –

৯.

‘‘অজাতপক্খা তরুণা, পুত্তকা ময্হ কোসিয;

তে মং ভতা ভরিস্সন্তি, তস্মা তেসং ইণং দদে.

১০.

‘‘মাতা পিতা চ মে ৰুদ্ধা, জিণ্ণকা গতযোব্বনা;

তেসং তুণ্ডেন হাতূন, মুঞ্চে পুব্বকতং ইণং.

১১.

‘‘অঞ্ঞেপি তত্থ সকুণা, খীণপক্খা সুদুব্বলা;

তেসং পুঞ্ঞত্থিকো দম্মি, তং নিধিং আহু পণ্ডিতা.

১২.

‘‘ঈদিসং মে ইণদানং, ইণমোক্খো চ ঈদিসো;

নিধিনিধানমক্খামি, এৰং জানাহি কোসিযা’’তি.

তত্থ হাতূনাতি হরিত্ৰা. তং নিধিন্তি তং পুঞ্ঞকম্মং পণ্ডিতা অনুগামিকনিধিং নাম কথেন্তি. নিধিনিধানন্তি নিধিনো নিধানং, ‘‘নিধাননিধি’’ন্তিপি পাঠো, অযমেৰত্থো.

ব্রাহ্মণো মহাসত্তস্স ধম্মকথং সুত্ৰা পসন্নচিত্তো দ্ৰে গাথা অভাসি.

১৩.

‘‘ভদ্দকো ৰতযং পক্খী, দিজো পরমধম্মিকো;

একচ্চেসু মনুস্সেসু, অযং ধম্মো ন ৰিজ্জতি.

১৪.

‘‘ভুঞ্জ সালিং যথাকামং, সহ সব্বেহি ঞাতিভি;

পুনাপি সুৰ পস্সেমু, পিযং মে তৰ দস্সন’’ন্তি.

তত্থ ভুঞ্জ সালিন্তি ইতো পট্ঠায নিব্ভযো হুত্ৰা ভুঞ্জাতি করীসসহস্সম্পি তস্সেৰ নিয্যাদেন্তো এৰমাহ. পস্সেমূতি অত্তনো রুচিযা আগতং অঞ্ঞেসুপি দিৰসেসু তং পস্সেয্যামাতি.

এৰং ব্রাহ্মণো মহাসত্তং যাচিত্ৰা পিযপুত্তং ৰিয মুদুচিত্তেন ওলোকেন্তো পাদতো বন্ধনং মোচেত্ৰা সতপাকতেলেন পাদে মক্খেত্ৰা ভদ্দপীঠে নিসীদাপেত্ৰা কঞ্চনতট্টকে মধুলাজে খাদাপেত্ৰা সক্খরোদকং পাযেসি. অথস্স সুৰরাজা ‘‘অপ্পমত্তো হোহি, ব্রাহ্মণা’’তি ৰত্ৰা ওৰাদং দেন্তো আহ –

১৫.

‘‘ভুত্তঞ্চ পীতঞ্চ তৰস্সমম্হি, রতী চ নো কোসিয তে সকাসে;

নিক্খিত্তদণ্ডেসু দদাহি দানং, জিণ্ণে চ মাতাপিতরো ভরস্সূ’’তি.

তত্থ তৰস্সমম্হীতি তৰ নিৰেসনে. রতীতি অভিরতি.

তং সুত্ৰা ব্রাহ্মণো তুট্ঠমানসো উদানং উদানেন্তো গাথমাহ –

১৬.

‘‘লক্খী ৰত মে উদপাদি অজ্জ, যো অদ্দসাসিং পৰরং দিজানং;

সুৰস্স সুত্ৰান সুভাসিতানি, কাহামি পুঞ্ঞানি অনপ্পকানী’’তি.

তত্থ লক্খীতি সিরীপি পুঞ্ঞম্পি পঞ্ঞাপি.

মহাসত্তো ব্রাহ্মণেন অত্তনো দিন্নং করীসসহস্সমত্তং পটিক্খিপিত্ৰা অট্ঠকরীসমেৰ গণ্হি. ব্রাহ্মণো থম্ভে নিখনিত্ৰা তস্স খেত্তং নিয্যাদেত্ৰা গন্ধমালাদীহি পূজেত্ৰা খমাপেত্ৰা ‘‘গচ্ছ সামি, অস্সুমুখে রোদমানে মাতাপিতরো অস্সাসেহী’’তি ৰত্ৰা তং উয্যোজেসি. সো তুট্ঠমানসো সালিসীসং আদায গন্ত্ৰা মাতাপিতূনং পুরতো নিক্খিপিত্ৰা ‘‘অম্মতাতা, উট্ঠেথা’’তি আহ. তে অস্সুমুখা রোদমানা উট্ঠহিংসু, তাৰদেৰ সুৰগণা সন্নিপতিত্ৰা ‘‘কথং মুত্তোসি, দেৰা’’তি পুচ্ছিংসু. সো তেসং সব্বং ৰিত্থারতো কথেসি. কোসিযোপি সুৰরঞ্ঞো ওৰাদং সুত্ৰা ততো পট্ঠায ধম্মিকসমণব্রাহ্মণানং মহাদানং পট্ঠপেসি. তমত্থং পকাসেন্তো সত্থা ওসানগাথমাহ –

১৭.

‘‘সো কোসিযো অত্তমনো উদগ্গো, অন্নঞ্চ পানঞ্চভিসঙ্খরিত্ৰা;

অন্নেন পানেন পসন্নচিত্তো, সন্তপ্পযি সমণব্রাহ্মণে চা’’তি.

তত্থ সন্তপ্পযীতি গহিতগহিতানি ভাজনানি পূরেন্তো সন্তপ্পেসীতি.

সত্থা ইমং ধম্মদেসনং আহরিত্ৰা ‘‘এৰং ভিক্খু মাতাপিতূনং পোসনং নাম পণ্ডিতানং ৰংসো’’তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো ভিক্খু সোতাপত্তিফলে পতিট্ঠহি. তদা সুৰগণা বুদ্ধপরিসা অহেসুং, মাতাপিতরো মহারাজকুলানি, খেত্তপালো ছন্নো, ব্রাহ্মণো আনন্দো, সুৰরাজা পন অহমেৰ অহোসিন্তি.

সালিকেদারজাতকৰণ্ণনা পঠমা.

[৪৮৫] ২. চন্দকিন্নরীজাতকৰণ্ণনা

উপনীযতিদং মঞ্ঞেতি ইদং সত্থা কপিলৰত্থুপুরং উপনিস্সায নিগ্রোধারামে ৰিহরন্তো রাজনিৰেসনে রাহুলমাতরং আরব্ভ কথেসি. ইদং পন জাতকং দূরেনিদানতো পট্ঠায কথেতব্বং. সা পনেসা নিদানকথা যাৰ লট্ঠিৰনে উরুৰেলকস্সপসীহনাদা অপণ্ণকজাতকে কথিতা, ততো পরং যাৰ কপিলৰত্থুগমনা ৰেস্সন্তরজাতকে আৰি ভৰিস্সতি. সত্থা পন পিতু নিৰেসনে নিসীদিত্ৰা অন্তরভত্তসমযে মহাধম্মপালজাতকং (জা. ১.১০.৯২ আদযো) কথেত্ৰা কতভত্তকিচ্চো ‘‘রাহুলমাতু নিৰেসনে নিসীদিত্ৰা তস্সা গুণং ৰণ্ণেন্তো চন্দকিন্নরীজাতকং (জা. ১.১৪.১৮ আদযো) কথেস্সামী’’তি রাজানং পত্তং গাহাপেত্ৰা দ্ৰীহি অগ্গসাৰকেহি সদ্ধিং রাহুলমাতু নিৰেসনট্ঠানং পাযাসি. তদা তস্সা সম্মুখা চত্তালীসসহস্সনাটকিত্থিযো ৰসন্তি তাসু খত্তিযকঞ্ঞানংযেৰ নৰুতিঅধিকসহস্সং. সা তথাগতস্স আগমনং ঞত্ৰা ‘‘সব্বা কাসাৰানেৰ নিৰাসেন্তূ’’তি তাসং আরোচাপেসি. তা তথা করিংসু. সত্থা আগন্ত্ৰা পঞ্ঞত্তাসনে নিসীদি. অথ তা সব্বাপি একপ্পহারেনেৰ ৰিরৰিংসু, মহাপরিদেৰসদ্দো অহোসি. রাহুলমাতাপি পরিদেৰিত্ৰা সোকং ৰিনোদেত্ৰা সত্থারং ৰন্দিত্ৰা রাজগতেন বহুমানেন সগারৰেন নিসীদি. রাজা তস্সা গুণকথং আরভি, ‘‘ভন্তে, মম সুণ্হা ‘তুম্হেহি কাসাৰানি নিৰত্থানী’তি সুত্ৰা কাসাৰানেৰ নিৰাসেসি, ‘মালাদীনি পরিচ্চত্তানী’তি সুত্ৰা মালাদীনি পরিচ্চজি, ‘ভূমিযং সযতী’তি সুত্ৰা ভূমিসযনাৰ জাতা, তুম্হাকং পব্বজিতকালে ৰিধৰা হুত্ৰা অঞ্ঞেহি রাজূহি পেসিতং পণ্ণাকারং ন গণ্হি, এৰং তুম্হেসু অসংহীরচিত্তা এসা’’তি নানপ্পকারেহি তস্সা গুণকথং কথেসি. সত্থা ‘‘অনচ্ছরিযং, মহারাজ, যং এসা ইদানি মম পচ্ছিমে অত্তভাৰে মযি সসিনেহা অসংহীরচিত্তা অনঞ্ঞনেয্যা ভৰেয্য. এসা তিরচ্ছানযোনিযং নিব্বত্তাপি মযি অসংহীরচিত্তা অনঞ্ঞনেয্যা অহোসী’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে মহাসত্তো হিমৰন্তপদেসে কিন্নরযোনিযং নিব্বত্তি, চন্দা নামস্স ভরিযা. তে উভোপি চন্দনামকে রজতপব্বতে ৰসিংসু. তদা বারাণসিরাজা অমচ্চানং রজ্জং নিয্যাদেত্ৰা দ্ৰে কাসাযানি নিৰাসেত্ৰা সন্নদ্ধপঞ্চাৰুধো এককোৰ হিমৰন্তং পাৰিসি. সো মিগমংসং খাদন্তো একং খুদ্দকনদিং অনুসঞ্চরন্তো উদ্ধং অভিরুহি. চন্দপব্বতৰাসিনো কিন্নরা ৰস্সারত্তসমযে অনোতরিত্ৰা পব্বতেযেৰ ৰসন্তি, নিদাঘসমযে ওতরন্তি. তদা চ সো চন্দকিন্নরো অত্তনো ভরিযায সদ্ধিং ওতরিত্ৰা তেসু তেসু ঠানেসু গন্ধে ৰিলিম্পন্তো পুপ্ফরেণুং খাদন্তো পুপ্ফপটে নিৰাসেন্তো পারুপন্তো লতাদোলাহি কীল়ন্তো মধুরস্সরেন গাযন্তো তং খুদ্দকনদিং পত্ৰা একস্মিং নিৰত্তনট্ঠানে ওতরিত্ৰা উদকে পুপ্ফানি ৰিকিরিত্ৰা উদককীল়ং কীল়িত্ৰা পুপ্ফপটে নিৰাসেত্ৰা পারুপিত্ৰা রজতপট্টৰণ্ণায ৰালুকায পুপ্ফাসনং পঞ্ঞপেত্ৰা একং ৰেল়ু দণ্ডকং গহেত্ৰা সযনে নিসীদি. ততো চন্দকিন্নরো ৰেল়ুং ৰাদেন্তো মধুরসদ্দেন গাযি. চন্দকিন্নরী মুদুহত্থে নামেত্ৰা তস্স অৰিদূরে ঠিতা নচ্চি চেৰ গাযি চ. সো রাজা তেসং সদ্দং সুত্ৰা পদসদ্দং অসাৰেন্তো সণিকং গন্ত্ৰা পটিচ্ছন্নে ঠত্ৰা তে কিন্নরে দিস্ৰা কিন্নরিযা পটিবদ্ধচিত্তো হুত্ৰা ‘‘তং কিন্নরং ৰিজ্ঝিত্ৰা জীৰিতক্খযং পাপেত্ৰা ইমায সদ্ধিং সংৰাসং কপ্পেস্সামী’’তি ঠত্ৰা চন্দকিন্নরং ৰিজ্ঝি. সো ৰেদনাপ্পত্তো পরিদেৰমানো চতস্সো গাথা অভাসি –

১৮.

‘‘উপনীযতিদং মঞ্ঞে, চন্দে লোহিতমদ্দনে;

অজ্জ জহামি জীৰিতং, পাণা মে চন্দে নিরুজ্ঝন্তি.

১৯.

‘‘ওসীদি মে দুক্খং হদযং, মে ডয্হতে নিতম্মামি;

তৰ চন্দিযা সোচন্তিযা, ন নং অঞ্ঞেহি সোকেহি.

২০.

‘‘তিণমিৰ ৰনমিৰ মিলাযামি, নদী অপরিপুণ্ণাৰ সুস্সামি;

তৰ চন্দিযা সোচন্তিযা, ন নং অঞ্ঞেহি সোকেহি.

২১.

‘‘ৰস্সমিৰ সরে পাদে, ইমানি অস্সূনি ৰত্তরে ময্হং;

তৰ চন্দিযা সোচন্তিযা, ন নং অঞ্ঞেহি সোকেহী’’তি.

তত্থ উপনীযতীতি সন্ততিৰিচ্ছেদং উপনীযতি. ইদন্তি জীৰিতং. পাণা মেতি ভদ্দে, চন্দে মম জীৰিতপাণা নিরুজ্ঝন্তি. ওসীদি মেতি জীৰিতং মে ওসীদতি. নিতম্মামীতি অতিকিলমামি. তৰ চন্দিযাতি ইদং মম দুক্খং, ন নং অঞ্ঞেহি সোকেহি, অথ খো তৰ চন্দিযা সোচন্তিযা সোকহেতু যস্মা ত্ৰং মম ৰিযোগেন সোচিস্সসি, তস্মাতি অত্থো. তিণমিৰ ৰনমিৰ মিলাযামীতি তত্তপাসাণে খিত্ততিণমিৰ মূলছিন্নৰনমিৰ মিলাযামীতি ৰদতি. সরে পাদেতি যথা নাম পব্বতপাদে পতিতৰস্সং সরিত্ৰা অচ্ছিন্নধারং ৰত্ততি.

মহাসত্তো ইমাহি চতূহি গাথাহি পরিদেৰিত্ৰা পুপ্ফসযনে নিপন্নোৰ সতিং ৰিস্সজ্জেত্ৰা পরিৰত্তি. রাজা পতিট্ঠিতোৰ. ইতরা মহাসত্তে পরিদেৰন্তে অত্তনো রতিযা মত্তা হুত্ৰা তস্স ৰিদ্ধভাৰং ন জানাতি, ৰিসঞ্ঞং পন নং পরিৰত্তিত্ৰা নিপন্নং দিস্ৰা ‘‘কিং নু খো মে পিযসামিকস্স দুক্খ’’ন্তি উপধারেন্তী পহারমুখতো পগ্ঘরন্তং লোহিতং দিস্ৰা পিযসামিকে উপ্পন্নং বলৰসোকং সন্ধারেতুং অসক্কোন্তী মহাসদ্দেন পরিদেৰি. রাজা ‘‘কিন্নরো মতো ভৰিস্সতী’’তি নিক্খমিত্ৰা অত্তানং দস্সেসি. চন্দা তং দিস্ৰা ‘‘ইমিনা মে চোরেন পিযসামিকো ৰিদ্ধো ভৰিস্সতী’’তি কম্পমানা পলাযিত্ৰা পব্বতমত্থকে ঠত্ৰা রাজানং পরিভাসন্তী পঞ্চ গাথা অভাসি –

২২.

‘‘পাপো খোসি রাজপুত্ত, যো মে ইচ্ছিতং পতিং ৰরাকিযা;

ৰিজ্ঝসি ৰনমূলস্মিং, সোযং ৰিদ্ধো ছমা সেতি.

২৩.

‘‘ইমং ময্হং হদযসোকং, পটিমুঞ্চতু রাজপুত্ত তৰ মাতা;

যো ময্হং হদযসোকো, কিম্পুরিসং অৰেক্খমানায.

২৪.

‘‘ইমং ময্হং হদযসোকং, পটিমুঞ্চতু রাজপুত্ত তৰ জাযা;

যো ময্হং হদযসোকো, কিম্পুরিসং অৰেক্খমানায.

২৫.

‘‘মা চ পুত্তং মা চ পতিং, অদ্দক্খি রাজপুত্ত তৰ মাতা;

যো কিম্পুরিসং অৰধি, অদূসকং ময্হ কামা হি.

২৬.

‘‘মা চ পুত্তং মা চ পতিং, অদ্দক্খি রাজপুত্ত তৰ জাযা;

যো কিম্পুরিসং অৰধি, অদূসকং ময্হ কামা হী’’তি.

তত্থ ৰরাকিযাতি কপণায. পটিমুঞ্চতূতি পটিলভতু ফুসতু পাপুণাতু. ময্হ কামা হীতি ময্হং কামেন.

রাজা নং পঞ্চহি গাথাহি পরিভাসিত্ৰা পব্বতমত্থকে ঠিতংযেৰ অস্সাসেন্তো গাথমাহ –

২৭.

‘‘মা ত্ৰং চন্দে রোদি মা সোপি, ৰনতিমিরমত্তক্খি;

মম ত্ৰং হেহিসি ভরিযা, রাজকুলে পূজিতা নারীভী’’তি.

তত্থ চন্দেতি মহাসত্তস্স পরিদেৰনকালে নামস্স সুতত্তা এৰমাহ. ৰনতিমিরমত্তক্খীতি ৰনতিমিরপুপ্ফসমানঅক্খি. পূজিতা নারীভীতি সোল়সন্নং ইত্থিসহস্সানং জেট্ঠিকা অগ্গমহেসী হেস্সসি.

চন্দা তস্স ৰচনং সুত্ৰা ‘‘ত্ৰং কিং মং ৰদেসী’’তি সীহনাদং নদন্তী অনন্তরগাথমাহ –

২৮.

‘‘অপি নূনহং মরিস্সং, নাহং রাজপুত্ত তৰ হেস্সং;

যো কিম্পুরিসং অৰধি, অদূসকং ময্হ কামা হী’’তি.

তত্থ অপি নূনহন্তি অপি একংসেনেৰ অহং মরিস্সং.

সো তস্সা ৰচনং সুত্ৰা নিচ্ছন্দরাগো হুত্ৰা ইতরং গাথমাহ –

২৯.

‘‘অপি ভীরুকে অপি জীৰিতুকামিকে, কিম্পুরিসি গচ্ছ হিমৰন্তং;

তালীসতগরভোজনা, অঞ্ঞে তং মিগা রমিস্সন্তী’’তি.

তত্থ অপি ভীরুকেতি ভীরুজাতিকে. তালীসতগরভোজনাতি ত্ৰং তালীসপত্ততগরপত্তভোজনা মিগী, তস্মা অঞ্ঞে তং মিগা রমিস্সন্তি, ন ত্ৰং রাজকুলারহা, গচ্ছাতি নং অৰচ, ৰত্ৰা চ পন নিরপেক্খো হুত্ৰা পক্কামি.

সা তস্স গতভাৰং ঞত্ৰা ওরুয্হ মহাসত্তং আলিঙ্গিত্ৰা পব্বতমত্থকং আরোপেত্ৰা পব্বততলে নিপজ্জাপেত্ৰা সীসমস্স অত্তনো ঊরূসু কত্ৰা বলৰপরিদেৰং পরিদেৰমানা দ্ৰাদস গাথা অভাসি –

৩০.

‘‘তে পব্বতা তা চ কন্দরা, তা চ গিরিগুহাযো তথেৰ তিট্ঠন্তি;

তত্থেৰ তং অপস্সন্তী, কিম্পুরিস কথং অহং কস্সং.

৩১.

‘‘তে পণ্ণসন্থতা রমণীযা, ৰাল়মিগেহি অনুচিণ্ণা;

তত্থেৰ তং অপস্সন্তী, কিম্পুরিস কথং অহং কস্সং.

৩২.

‘‘তে পুপ্ফসন্থতা রমণীযা, ৰাল়মিগেহি অনুচিণ্ণা;

তত্থেৰ তং অপস্সন্তী, কিম্পুরিস কথং অহং কস্সং.

৩৩.

‘‘অচ্ছা সৰন্তি গিরিৰননদিযো, কুসুমাভিকিণ্ণসোতাযো;

তত্থেৰ তং অপস্সন্তী, কিম্পুরিস কথং অহং কস্সং.

৩৪.

‘‘নীলানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৩৫.

‘‘পীতানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৩৬.

‘‘তম্বানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৩৭.

‘‘তুঙ্গানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৩৮.

‘‘সেতানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৩৯.

‘‘চিত্রানি হিমৰতো পব্বতস্স, কূটানি দস্সনীযানি;

তত্থেৰ তং অপস্সন্তী, কিম্পুরিস কথং অহং কস্সং.

৪০.

‘‘যক্খগণসেৰিতে গন্ধমাদনে, ওসধেভি সঞ্ছন্নে;

তত্থেৰ তং অপস্সন্তী, কিম্পুরিস কথং অহং কস্সং.

৪১.

‘‘কিম্পুরিসসেৰিতে গন্ধমাদনে, ওসধেভি সঞ্ছন্নে;

তত্থেৰ তং অপস্সন্তী, কিম্পুরিস কথং অহং কস্স’’ন্তি.

তত্থ তে পব্বতাতি যেসু মযং একতোৰ অভিরমিম্হ, ইমে তে পব্বতা তা চ কন্দরা তা চ গিরিগুহাযো তথেৰ ঠিতা. তেসু অহং ইদানি তং অপস্সন্তী কথং কস্সং, কিং করিস্সামি, তেসু পুপ্ফফলপল্লৰাদিসোভং তং অপস্সন্তী কথং অধিৰাসেতুং সক্খিস্সামীতি পরিদেৰতি. পণ্ণসন্থতাতি তালীসপত্তাদিগন্ধপণ্ণসন্থরা. অচ্ছাতি ৰিপ্পসন্নোদকা. নীলানীতি নীলমণিমযানি. পীতানীতি সোৰণ্ণমযানি. তম্বানীতি মনোসিলমযানি. তুঙ্গানীতি উচ্চানি তিখিণগ্গানি. সেতানীতি রজতমযানি. চিত্রানীতি সত্তরতনমিস্সকানি. যক্খগণসেৰিতেতি ভুম্মদেৰতাহি সেৰিতে.

ইতি সা দ্ৰাদসহি গাথাহি পরিদেৰিত্ৰা মহাসত্তস্স উরে হত্থং ঠপেত্ৰা সন্তাপভাৰং ঞত্ৰা ‘‘চন্দো জীৰতিযেৰ, দেৰুজ্ঝানকম্মং কত্ৰা জীৰিতমস্স দস্সামী’’তি চিন্তেত্ৰা ‘‘কিং নু খো লোকপালা নাম নত্থি, উদাহু ৰিপ্পৰুত্থা, অদু মতা, তে মে পিযসামিকং ন রক্খন্তী’’তি দেৰুজ্ঝানকম্মং অকাসি. তস্সা সোকৰেগেন সক্কস্স আসনং উণ্হং অহোসি. সক্কো আৰজ্জেন্তো তং কারণং ঞত্ৰা ব্রাহ্মণৰণ্ণেন ৰেগেনেৰ আগন্ত্ৰা কুণ্ডিকতো উদকং গহেত্ৰা মহাসত্তং আসিঞ্চি. তাৰদেৰ ৰিসং অন্তরধাযি, ৰণো রুহি, ইমস্মিং ঠানে ৰিদ্ধোতিপি ন পঞ্ঞাযি. মহাসত্তো সুখিতো উট্ঠাসি. চন্দা পিযসামিকং অরোগং দিস্ৰা সোমনস্সপ্পত্তা সক্কস্স পাদে ৰন্দন্তী অনন্তরগাথমাহ –

৪২.

‘‘ৰন্দে তে অযিরব্রহ্মে, যো মে ইচ্ছিতং পতিং ৰরাকিযা;

অমতেন অভিসিঞ্চি, সমাগতাস্মি পিযতমেনা’’তি.

তত্থ অমতেনাতি উদকং ‘‘অমত’’ন্তি মঞ্ঞমানা এৰমাহ. পিযতমেনাতি পিযতরেন, অযমেৰ ৰা পাঠো.

সক্কো তেসং ওৰাদমদাসি ‘‘ইতো পট্ঠায চন্দপব্বততো ওরুয্হ মনুস্সপথং মা গমিত্থ, ইধেৰ ৰসথা’’তি. এৰঞ্চ পন ৰত্ৰা তে ওৰদিত্ৰা সকট্ঠানমেৰ গতো. চন্দাপি ‘‘কিং নো সামি ইমিনা পরিপন্থট্ঠানেন, এহি চন্দপব্বতমেৰ গচ্ছামা’’তি ৰত্ৰা ওসানগাথমাহ –

৪৩.

‘‘ৰিচরাম দানি গিরিৰননদিযো, কুসুমাভিকিণ্ণসোতাযো;

নানাদুমৰসনাযো, পিযংৰদা অঞ্ঞমঞ্ঞস্সা’’তি.

সত্থা ইমং ধম্মদেসনং আহরিত্ৰা ‘‘ন ইদানেৰ, পুব্বেপেসা মযি অসংহীরচিত্তা অনঞ্ঞনেয্যা এৰা’’তি ৰত্ৰা জাতকং সমোধানেসি – ‘‘তদা রাজা দেৰদত্তো অহোসি, সক্কো অনুরুদ্ধো, চন্দা রাহুলমাতা, চন্দকিন্নরো পন অহমেৰ অহোসি’’ন্তি.

চন্দকিন্নরীজাতকৰণ্ণনা দুতিযা.

[৪৮৬] ৩. মহাউক্কুসজাতকৰণ্ণনা

উক্কা চিলাচা বন্ধন্তীতি ইদং সত্থা জেতৰনে ৰিহরন্তো মিত্তবন্ধকউপাসকং আরব্ভ কথেসি. সো কির সাৰত্থিযং পরিজিণ্ণস্স কুলস্স পুত্তো সহাযং পেসেত্ৰা অঞ্ঞতরং কুলধীতরং ৰারাপেত্ৰা ‘‘অত্থি পনস্স উপ্পন্নকিচ্চং নিত্থরণসমত্থো মিত্তো ৰা সহাযো ৰা’’তি ৰুত্তে ‘‘নত্থী’’তি ৰত্ৰা ‘‘তেন হি মিত্তে তাৰ বন্ধতূ’’তি ৰুত্তে তস্মিং ওৰাদে ঠত্ৰা পঠমং তাৰ চতূহি দোৰারিকেহি সদ্ধিং মেত্তিং অকাসি, অথানুপুব্বেন নগরগুত্তিকগণকমহামত্তাদীহি সদ্ধিং মেত্তিং কত্ৰা সেনাপতিনাপি উপরাজেনাপি সদ্ধিং মেত্তিং অকাসি. তেহি পন সদ্ধিং একতো হুত্ৰা রঞ্ঞা সদ্ধিং মেত্তিং অকাসি. ততো অসীতিযা মহাথেরেহি সদ্ধিং আনন্দত্থেরেনপি সদ্ধিং একতো হুত্ৰা তথাগতেন সদ্ধিং মেত্তিং অকাসি. অথ নং সত্থা সরণেসু চ সীলেসু চ পতিট্ঠাপেসি, রাজাপিস্স ইস্সরিযমদাসি. সো মিত্তবন্ধকোযেৰাতি পাকটো জাতো. অথস্স রাজা মহন্তং গেহং দত্ৰা আৰাহমঙ্গলং কারেসি. রাজানং আদিং কত্ৰা মহাজনো পণ্ণাকারে পহিণি. অথস্স ভরিযা রঞ্ঞা পহিতং পণ্ণাকারং উপরাজস্স, উপরাজেন পহিতং পণ্ণাকারং সেনাপতিস্সাতি এতেন উপাযেন সকলনগরৰাসিনো আবন্ধিত্ৰা গণ্হি. সত্তমে দিৰসে মহাসক্কারং কত্ৰা দসবলং নিমন্তেত্ৰা পঞ্চসতস্স বুদ্ধপ্পমুখস্স ভিক্খুসঙ্ঘস্স মহাদানং দত্ৰা ভত্তকিচ্চাৰসানে সত্থারা কথিতং অনুমোদনং সুত্ৰা উভোপি জযম্পতিকা সোতাপত্তিফলে পতিট্ঠহিংসু.

ভিক্খূ ধম্মসভাযং কথং সমুট্ঠাপেসুং ‘‘আৰুসো, মিত্তবন্ধকউপাসকো অত্তনো ভরিযং নিস্সায তস্সা ৰচনং কত্ৰা সব্বেহি মেত্তিং কত্ৰা রঞ্ঞো সন্তিকা মহন্তং সক্কারং লভি, তথাগতেন পন সদ্ধিং মেত্তিং কত্ৰা উভোপি জযম্পতিকা সোতাপত্তিফলে পতিট্ঠিতা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ সো এতং মাতুগামং নিস্সায মহন্তং যসং সম্পত্তো, পুব্বে তিরচ্ছানযোনিযং নিব্বত্তোপি পনেস এতিস্সা ৰচনেন বহূহি সদ্ধিং মেত্তিং কত্ৰা পুত্তসোকতো মুত্তোযেৰা’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একচ্চে পচ্চন্তৰাসিনো যত্থ যত্থ বহুং মংসং লভন্তি, তত্থ তত্থ গামং নিৰাসেত্ৰা অরঞ্ঞে চরিত্ৰা মিগাদযো মারেত্ৰা মংসং আহরিত্ৰা পুত্তদারে পোসেন্তি. তেসং গামতো অৰিদূরে মহাজাতস্সরো অত্থি. তস্স দক্খিণপস্সে একো সেনসকুণো, পচ্ছিমপস্সে একা সেনসকুণী, উত্তরপস্সে সীহো মিগরাজা, পাচীনপস্সে উক্কুসসকুণরাজা ৰসতি. জাতস্সরমজ্ঝে পন উন্নতট্ঠানে কচ্ছপো ৰসতি. তদা সেনো সেনিং ‘‘ভরিযা মে হোহী’’তি ৰদতি. অথ নং সা আহ – ‘‘অত্থি পন তে কোচি মিত্তো’’তি? ‘‘নত্থি ভদ্দে’’তি. অম্হাকং উপ্পন্নং ভযং ৰা দুক্খং ৰা হরণসমত্থং মিত্তং ৰা সহাযং ৰা লদ্ধুং ৰট্টতি, মিত্তে তাৰ গণ্হাহীতি. ‘‘কেহি সদ্ধিং মেত্তিং করোমি ভদ্দে’’তি? পাচীনপস্সে ৰসন্তেন উক্কুসরাজেন, উত্তরপস্সে সীহেন, জাতস্সরমজ্ঝে কচ্ছপেন সদ্ধিং মেত্তিং করোহীতি. সো তস্সা ৰচনং সম্পটিচ্ছিত্ৰা তথা অকাসি. তদা তে উভোপি সংৰাসং কপ্পেত্ৰা তস্মিংযেৰ সরে একস্মিং দীপকে কদম্বরুক্খো অত্থি সমন্তা উদকেন পরিক্খিত্তো, তস্মিং কুলাৰকং কত্ৰা পটিৰসিংসু.

তেসং অপরভাগে দ্ৰে সকুণপোতকা জাযিংসু. তেসং পক্খেসু অসঞ্জাতেসুযেৰ একদিৰসং তে জানপদা দিৰসং অরঞ্ঞে চরিত্ৰা কিঞ্চি অলভিত্ৰা ‘‘ন সক্কা তুচ্ছহত্থেন ঘরং গন্তুং, মচ্ছে ৰা কচ্ছপে ৰা গণ্হিস্সামা’’তি সরং ওতরিত্ৰা তং দীপকং গন্ত্ৰা তস্স কদম্বস্স মূলে নিপজ্জিত্ৰা মকসাদীহি খজ্জমানা তেসং পলাপনত্থায অরণিং মন্থেত্ৰা অগ্গিং নিব্বত্তেত্ৰা ধূমং করিংসু. ধুমো উগ্গন্ত্ৰা সকুণে পহরি, সকুণপোতকা ৰিরৰিংসু. জানপদা তং সুত্ৰা ‘‘অম্ভো, সকুণপোতকানং সূযতি সদ্দো, উট্ঠেথ উক্কা বন্ধথ, ছাতা সযিতুং ন সক্কোম, সকুণমংসং খাদিত্ৰাৰ সযিস্সামা’’তি ৰত্ৰা অগ্গিং জালেত্ৰা উক্কা বন্ধিংসু. সকুণিকা তেসং সদ্দং সুত্ৰা ‘‘ইমে অম্হাকং পোতকে খাদিতুকামা, মযং এৰরূপস্স ভযস্স হরণত্থায মিত্তে গণ্হিম্হ, সামিকং উক্কুসরাজস্স সন্তিকং পেসেস্সামী’’তি চিন্তেত্ৰা ‘‘গচ্ছ, সামি, পুত্তানং নো উপ্পন্নভযং উক্কুসরাজস্স আরোচেহী’’তি ৰত্ৰা পঠমং গাথমাহ –

৪৪.

‘‘উক্কা চিলাচা বন্ধন্তি দীপে, পজা মমং খাদিতুং পত্থযন্তি;

মিত্তং সহাযঞ্চ ৰদেহি সেনক, আচিক্খ ঞাতিব্যসনং দিজান’’ন্তি.

তত্থ চিলাচাতি জানপদা. দীপেতি দীপকম্হি. পজা মমন্তি মম পুত্তকে. সেনকাতি সেনকসকুণং নামেনালপতি. ঞাতিব্যসনন্তি পুত্তানং ব্যসনং. দিজানন্তি অম্হাকং ঞাতীনং দিজানং ইদং ব্যসনং উক্কুসরাজস্স সন্তিকং গন্ত্ৰা আচিক্খাহীতি ৰদতি.

সো ৰেগেন তস্স ৰসনট্ঠানং গন্ত্ৰা ৰস্সিত্ৰা অত্তনো আগতভাৰং জানাপেত্ৰা কতোকাসো উপসঙ্কমিত্ৰা ৰন্দিত্ৰা ‘‘কিংকারণা আগতোসী’’তি পুট্ঠো আগতকারণং দস্সেন্তো দুতিযং গাথমাহ –

৪৫.

‘‘দিজো দিজানং পৰরোসি পক্খিম, উক্কুসরাজ সরণং তং উপেম;

পজা মমং খাদিতুং পত্থযন্তি, লুদ্দা চিলাচা ভৰ মে সুখাযা’’তি.

তত্থ দিজোতি ত্ৰং দিজো চেৰ দিজানং পৰরো চ.

উক্কুসরাজা ‘‘সেনক মা ভাযী’’তি তং অস্সাসেত্ৰা ততিযং গাথমাহ –

৪৬.

‘‘মিত্তং সহাযঞ্চ করোন্তি পণ্ডিতা, কালে অকালে সুখমেসমানা;

করোমি তে সেনক এতমত্থং, অরিযো হি অরিযস্স করোতি কিচ্চ’’ন্তি.

তত্থ কালে অকালেতি দিৰা চ রত্তিঞ্চ. অরিযোতি ইধ আচারঅরিযো অধিপ্পেতো. আচারসম্পন্নো হি আচারসম্পন্নস্স কিচ্চং করোতেৰ, কিমেত্থ করণীযন্তি ৰদতি.

অথ নং পুচ্ছি ‘‘কিং, সম্ম, রুক্খং অভিরুল়্হা চিলাচা’’তি? ন তাৰ অভিরুল়্হা, উক্কাযেৰ বন্ধন্তীতি. তেন হি ত্ৰং সীঘং গন্ত্ৰা মম সহাযিকং অস্সাসেত্ৰা মমাগমনভাৰং আচিক্খাহীতি. সো তথা অকাসি. উক্কুসরাজাপি গন্ত্ৰা কদম্বস্স অৰিদূরে চিলাচানং অভিরুহনং ওলোকেন্তো একস্মিং রুক্খগ্গে নিসীদিত্ৰা একস্স চিলাচস্স অভিরুহনকালে তস্মিং কুলাৰকস্স অৰিদূরং অভিরুল়্হে সরে নিমুজ্জিত্ৰা পক্খেহি চ মুখেন চ উদকং আহরিত্ৰা উক্কায উপরি আসিঞ্চি, সা নিব্বাযি. চিলাচা ‘‘ইমঞ্চ সেনকসকুণপোতকে চস্স খাদিস্সামী’’তি ওতরিত্ৰা পুন উক্কং জালাপেত্ৰা অভিরুহিংসু. পুন সো উক্কং ৰিজ্ঝাপেসি. এতেনুপাযেন বদ্ধং বদ্ধং ৰিজ্ঝাপেন্তস্সেৰস্স অড্ঢরত্তো জাতো. সো অতিৰিয কিলমি, হেট্ঠাউদরে কিলোমকং তনুতং গতং, অক্খীনি রত্তানি জাতানি. তং দিস্ৰা সকুণী সামিকং আহ – ‘‘সামি, অতিৰিয কিলন্তো উক্কুসরাজা, এতস্স থোকং ৰিস্সমনত্থায গন্ত্ৰা কচ্ছপরাজস্স কথেহী’’তি. সো তস্সা ৰচনং সুত্ৰা উক্কুসং উপসঙ্কমিত্ৰা গাথায অজ্ঝভাসি –

৪৭.

‘‘যং হোতি কিচ্চং অনুকম্পকেন, অরিযস্স অরিযেন কতং তযীদং;

অত্তানুরক্খী ভৰ মা অডয্হি, লচ্ছাম পুত্তে তযি জীৰমানে’’তি.

তত্থ তযীদন্তি তযা ইদং, অযমেৰ ৰা পাঠো.

সো তস্স ৰচনং সুত্ৰা সীহনাদং নদন্তো পঞ্চমং গাথমাহ –

৪৮.

‘‘তৰেৰ রক্খাৰরণং করোন্তো, সরীরভেদাপি ন সন্তসামি;

করোন্তি হেকে সখিনং সখারো, পাণং চজন্তা সতমেস ধম্মো’’তি.

ছট্ঠং পন সত্থা অভিসম্বুদ্ধো হুত্ৰা তস্স গুণং ৰণ্ণেন্তো আহ –

৪৯.

‘‘সুদুক্করং কম্মমকাসি, অণ্ডজাযং ৰিহঙ্গমো;

অত্থায কুররো পুত্তে, অড্ঢরত্তে অনাগতে’’তি.

তত্থ কুররোতি উক্কুসরাজা. পুত্তেতি সেনকস্স পুত্তে রক্খন্তো তেসং অত্থায অড্ঢরত্তে অনাগতে যাৰ দিযড্ঢযামা ৰাযামং করোন্তো দুক্করং অকাসি.

সেনোপি উক্কুসং ‘‘থোকং ৰিস্সমাহি, সম্মা’’তি ৰত্ৰা কচ্ছপস্স সন্তিকং গন্ত্ৰা তং উট্ঠাপেত্ৰা ‘‘কিং, সম্ম, আগতোসী’’তি ৰুত্তো ‘‘এৰরূপং নাম ভযং উপ্পন্নং, উক্কুসরাজা পঠমযামতো পট্ঠায ৰাযমন্তো কিলমি, তেনম্হি তৰ সন্তিকং আগতো’’তি ৰত্ৰা সত্তমং গাথমাহ –

৫০.

‘‘চুতাপি হেকে খলিতা সকম্মুনা, মিত্তানুকম্পায পতিট্ঠহন্তি;

পুত্তা মমট্টা গতিমাগতোস্মি, অত্থং চরেথো মম ৰারিচরা’’তি.

তস্সত্থো – সামি, একচ্চে হি যসতো ৰা ধনতো ৰা চুতাপি সকম্মুনা খলিতাপি মিত্তানং অনুকম্পায পতিট্ঠহন্তি, মম চ পুত্তা অট্টা আতুরা, তেনাহং তং গতিং পটিসরণং কত্ৰা আগতোস্মি, পুত্তানং জীৰিতদানং দদন্তো অত্থং মে চরাহি ৰারিচরাতি.

তং সুত্ৰা কচ্ছপো ইতরং গাথমাহ –

৫১.

‘‘ধনেন ধঞ্ঞেন চ অত্তনা চ, মিত্তং সহাযঞ্চ করোন্তি পণ্ডিতা;

করোমি তে সেনক এতমত্থং, অরিযো হি অরিযস্স করোতি কিচ্চ’’ন্তি.

অথস্স পুত্তো অৰিদূরে নিপন্নো পিতু ৰচনং সুত্ৰা ‘‘মা মে পিতা কিলমতু, অহং পিতু কিচ্চং করিস্সামী’’তি চিন্তেত্ৰা নৰমং গাথমাহ –

৫২.

‘‘অপ্পোস্সুক্কো তাত তুৰং নিসীদ, পুত্তো পিতু চরতি অত্থচরিযং;

অহং চরিস্সামি তৰেতমত্থং, সেনস্স পুত্তে পরিতাযমানো’’তি.

অথ নং পিতা গাথায অজ্ঝভাসি –

৫৩.

‘‘অদ্ধা হি তাত সতমেস ধম্মো, পুত্তো পিতু যং চরে অত্থচরিযং;

অপ্পেৰ মং দিস্ৰান পৰড্ঢকাযং, সেনস্স পুত্তা ন ৰিহেঠযেয্যু’’ন্তি.

তত্থ সতমেস ধম্মোতি পণ্ডিতানং এস ধম্মো. পুত্তাতি সেনস্স পুত্তে চিলাচা ন হেঠযেয্যুন্তি.

এৰং ৰত্ৰা মহাকচ্ছপো ‘‘সম্ম, মা ভাযি, ত্ৰং পুরতো গচ্ছ, ইদানাহং আগমিস্সামী’’তি তং উয্যোজেত্ৰা উদকে পতিত্ৰা কললঞ্চ সেৰালঞ্চ সংকড্ঢিত্ৰা আদায দীপকং গন্ত্ৰা অগ্গিং ৰিজ্ঝাপেত্ৰা নিপজ্জি. চিলাচা ‘‘কিং নো সেনপোতকেহি, ইমং কাল়কচ্ছপং পরিৰত্তেত্ৰা মারেস্সাম, অযং নো সব্বেসং পহোস্সতী’’তি ৰল্লিযো উদ্ধরিত্ৰা জিযা গহেত্ৰা নিৰত্থপিলোতিকাপি মোচেত্ৰা তেসু তেসু ঠানেসু বন্ধিত্ৰা কচ্ছপং পরিৰত্তেতুং ন সক্কোন্তি. কচ্ছপো তে আকড্ঢন্তো গন্ত্ৰা গম্ভীরট্ঠানে উদকে পতি. তেপি কচ্ছপলোভেন সদ্ধিংযেৰ পতিত্ৰা উদকপুণ্ণায কুচ্ছিযা কিলন্তা নিক্খমিত্ৰা ‘‘ভো একেন নো উক্কুসেন যাৰ অড্ঢরত্তা উক্কা ৰিজ্ঝাপিতা, ইদানি ইমিনা কচ্ছপেন উদকে পাতেত্ৰা উদকং পাযেত্ৰা মহোদরা কতম্হ, পুন অগ্গিং করিত্ৰা অরুণে উগ্গতেপি ইমে সেনকপোতকে খাদিস্সামা’’তি অগ্গিং কাতুং আরভিংসু. সকুণী তেসং কথং সুত্ৰা ‘‘সামি, ইমে যায কাযচি ৰেলায অম্হাকং পুত্তকে খাদিত্ৰা গমিস্সন্তি, সহাযস্স নো সীহস্স সন্তিকং গচ্ছাহী’’তি আহ. সো তঙ্খণঞ্ঞেৰ সীহস্স সন্তিকং গন্ত্ৰা ‘‘কিং অৰেলায আগতোসী’’তি ৰুত্তে আদিতো পট্ঠায তং পৰত্তিং আরোচেত্ৰা একাদসমং গাথমাহ –

৫৪.

‘‘পসূ মনুস্সা মিগৰীরসেট্ঠ, ভযট্টিতা সেট্ঠমুপব্বজন্তি;

পুত্তা মমট্টা গতিমাগতোস্মি, ত্ৰং নোসি রাজা ভৰ মে সুখাযা’’তি.

তত্থ পসূতি সব্বতিরচ্ছানে আহ. ইদং ৰুত্তং হোতি – ‘‘সামি, মিগেসু ৰীরিযেন সেট্ঠ, সব্বলোকস্মিঞ্হি সব্বে তিরচ্ছানাপি মনুস্সাপি ভযট্টিতা হুত্ৰা সেট্ঠং উপগচ্ছন্তি, মম চ পুত্তা অট্টা আতুরা. তস্মাহং তং গতিং কত্ৰা আগতোম্হি, ত্ৰং অম্হাকং রাজা সুখায মে ভৰাহী’’তি.

তং সুত্ৰা সীহো গাথমাহ –

৫৫.

‘‘করোমি তে সেনক এতমত্থং, আযামি তে তং দিসতং ৰধায;

কথঞ্হি ৰিঞ্ঞূ পহু সম্পজানো, ন ৰাযমে অত্তজনস্স গুত্তিযা’’তি.

তত্থ তং দিসতন্তি তং দিসসমূহং, তং তৰ পচ্চত্থিকগণন্তি অত্থো. পহূতি অমিত্তে হন্তুং সমত্থো. সম্পজানোতি মিত্তস্স ভযুপ্পত্তিং জানন্তো. অত্তজনস্সাতি অত্তসমস্স অঙ্গসমানস্স জনস্স, মিত্তস্সাতি অত্থো.

এৰঞ্চ পন ৰত্ৰা ‘‘গচ্ছ ত্ৰং পুত্তে সমস্সাসেহী’’তি তং উয্যোজেত্ৰা মণিৰণ্ণং উদকং মদ্দমানো পাযাসি. চিলাচা তং আগচ্ছন্তং দিস্ৰা ‘‘কুররেন তাৰ অম্হাকং উক্কা ৰিজ্ঝাপিতা, তথা কচ্ছপেন অম্হে নিৰত্থপিলোতিকানম্পি অস্সামিকা কতা, ইদানি পন নট্ঠম্হা, সীহো নো জীৰিতক্খযমেৰ পাপেস্সতী’’তি মরণভযতজ্জিতা যেন ৰা তেন ৰা পলাযিংসু. সীহো আগন্ত্ৰা রুক্খমূলে ন কিঞ্চি অদ্দস. অথ নং কুররো চ কচ্ছপো চ সেনো চ উপসঙ্কমিত্ৰা ৰন্দিংসু. সো তেসং মিত্তানিসংসং কথেত্ৰা ‘‘ইতো পট্ঠায মিত্তধম্মং অভিন্দিত্ৰা অপ্পমত্তা হোথা’’তি ওৰদিত্ৰা পক্কামি, তেপি সকঠানানি গতা. সেনসকুণী অত্তনো পুত্তে ওলোকেত্ৰা ‘‘মিত্তে নিস্সায অম্হেহি দারকা লদ্ধা’’তি সুখনিসিন্নসমযে সেনেন সদ্ধিং সল্লপন্তী মিত্তধম্মং পকাসমানা ছ গাথা অভাসি –

৫৬.

‘‘মিত্তঞ্চ কযিরাথ সুহদযঞ্চ, অযিরঞ্চ কযিরাথ সুখাগমায;

নিৰত্থকোচোৰ সরেভিহন্ত্ৰা, মোদাম পুত্তেহি সমঙ্গিভূতা.

৫৭.

‘‘সকমিত্তস্স কম্মেন, সহাযস্সাপলাযিনো;

কূজন্তমুপকূজন্তি, লোমসা হদযঙ্গমং.

৫৮.

‘‘মিত্তং সহাযং অধিগম্ম পণ্ডিতো, সো ভুঞ্জতী পুত্ত পসুং ধনং ৰা;

অহঞ্চ পুত্তা চ পতী চ ময্হং, মিত্তানুকম্পায সমঙ্গিভূতা.

৫৯.

‘‘রাজৰতা সূরৰতা চ অত্থো, সম্পন্নসখিস্স ভৰন্তি হেতে;

সো মিত্তৰা যসৰা উগ্গতত্তো, অস্মিংধলোকে মোদতি কামকামী.

৬০.

‘‘করণীযানি মিত্তানি, দলিদ্দেনাপি সেনক;

পস্স মিত্তানুকম্পায, সমগ্গম্হা সঞাতকে.

৬১.

‘‘সূরেন বলৰন্তেন, যো মিত্তে কুরুতে দিজো;

এৰং সো সুখিতো হোতি, যথাহং ত্ৰঞ্চ সেনকা’’তি.

তত্থ মিত্তঞ্চাতি যংকিঞ্চি অত্তনো মিত্তঞ্চ সুহদযঞ্চ সুহদযসহাযঞ্চ সামিকসঙ্খাতং অযিরঞ্চ করোথেৰ. নিৰত্থকোচোৰ সরেভিহন্ত্ৰাতি এত্থ কোচোতি কৰচো. যথা নাম পটিমুক্ককৰচো সরে অভিহনতি নিৰারেতি, এৰং মযম্পি মিত্তবলেন পচ্চত্থিকে অভিহন্ত্ৰা পুত্তেহি সদ্ধিং মোদামাতি ৰদতি. সকমিত্তস্স কম্মেনাতি সকস্স মিত্তস্স পরক্কমেন. সহাযস্সাপলাযিনোতি সহাযস্স অপলাযিনো মিগরাজস্স. লোমসাতি পক্খিনো অম্হাকং পুত্তকা মঞ্চ তঞ্চ কূজন্তং হদযঙ্গমং মধুরস্সরং নিচ্ছারেত্ৰা উপকূজন্তি. সমঙ্গিভূতাতি একট্ঠানে ঠিতা.

রাজৰতা সূরৰতা চ অত্থোতি যস্স সীহসদিসো রাজা উক্কুসকচ্ছপসদিসা চ সূরা মিত্তা হোন্তি, তেন রাজৰতা সূরৰতা চ অত্থো সক্কা পাপুণিতুং. ভৰন্তি হেতেতি যো চ সম্পন্নসখো পরিপুণ্ণমিত্তধম্মো, তস্স এতে সহাযা ভৰন্তি. উগ্গতত্তোতি সিরিসোভগ্গেন উগ্গতসভাৰো. অস্মিংধলোকেতি ইধলোকসঙ্খাতে অস্মিং লোকে মোদতি. কামকামীতি সামিকং আলপতি. সো হি কামে কামনতো কামকামী নাম. সমগ্গম্হাতি সমগ্গা জাতম্হা. সঞাতকেতি ঞাতকেহি পুত্তেহি সদ্ধিং.

এৰং সা ছহি গাথাহি মিত্তধম্মস্স গুণকথং কথেসি. তে সব্বেপি সহাযকা মিত্তধম্মং অভিন্দিত্ৰা যাৰতাযুকং ঠত্ৰা যথাকম্মং গতা.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ সো ভরিযং নিস্সায সুখপ্পত্তো, পুব্বেপি সুখপ্পত্তোযেৰা’’তি ৰত্ৰা জাতকং সমোধানেসি – ‘‘তদা সেনো চ সেনী চ জযম্পতিকা অহেসুং, পুত্তকচ্ছপো রাহুলো, পিতা মহামোগ্গল্লানো, উক্কুসো সারিপুত্তো, সীহো পন অহমেৰ অহোসি’’ন্তি.

মহাউক্কুসজাতকৰণ্ণনা ততিযা.

[৪৮৭] ৪. উদ্দালকজাতকৰণ্ণনা

খরাজিনা জটিলা পঙ্কদন্তাতি ইদং সত্থা জেতৰনে ৰিহরন্তো একং কুহকভিক্খুং আরব্ভ কথেসি. সো হি নিয্যানিকসাসনে পব্বজিত্ৰাপি চতুপচ্চযত্থায তিৰিধং কুহকৰত্থুং পূরেসি. অথস্স অগুণং পকাসেন্তা ভিক্খূ ধম্মসভাযং কথং সমুট্ঠাপেসুং ‘‘আৰুসো, অসুকো নাম ভিক্খু এৰরূপে নিয্যানিকসাসনে পব্বজিত্ৰা কুহনং নিস্সায জীৰিকং কপ্পেতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপেস কুহকোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স পুরোহিতো অহোসি পণ্ডিতো ব্যত্তো. সো একদিৰসং উয্যানকীল়ং গতো একং অভিরূপং গণিকং দিস্ৰা পটিবদ্ধচিত্তো তায সদ্ধিং সংৰাসং কপ্পেসি. সা তং পটিচ্চ গব্ভং পটিলভি. গব্ভস্স পতিট্ঠিতভাৰং ঞত্ৰা তং আহ – ‘‘সামি, গব্ভো মে পতিট্ঠিতো, জাতকালে নামং করোন্তী অস্স কিং নামং করোমী’’তি? সো ‘‘ৰণ্ণদাসিযা কুচ্ছিম্হি নিব্বত্তত্তা ন সক্কা কুলনামং কাতু’’ন্তি চিন্তেত্ৰা ‘‘ভদ্দে, অযং ৰাতঘাতরুক্খো উদ্দালো নাম, ইধ পটিলদ্ধত্তা ‘উদ্দালকো’তিস্স নামং করেয্যাসী’’তি ৰত্ৰা অঙ্গুলিমুদ্দিকং অদাসি. ‘‘সচে ধীতা হোতি, ইমায নং পোসেয্যাসি, সচে পুত্তো, অথ নং ৰযপ্পত্তং ময্হং দস্সেয্যাসী’’তি আহ. সা অপরভাগে পুত্তং ৰিজাযিত্ৰা ‘‘উদ্দালকো’’তিস্স নামং অকাসি.

সো ৰযপ্পত্তো মাতরং পুচ্ছি – ‘‘অম্ম, কো মে পিতা’’তি? ‘‘পুরোহিতো তাতা’’তি. ‘‘যদি এৰং ৰেদে উগ্গণ্হিস্সামী’’তি মাতু হত্থতো মুদ্দিকঞ্চ আচরিযভাগঞ্চ গহেত্ৰা তক্কসিলং গন্ত্ৰা দিসাপামোক্খাচরিযস্স সন্তিকে সিপ্পং উগ্গণ্হন্তো একং তাপসগণং দিস্ৰা ‘‘ইমেসং সন্তিকে ৰরসিপ্পং ভৰিস্সতি, তং উগ্গণ্হিস্সামী’’তি সিপ্পলোভেন পব্বজিত্ৰা তেসং ৰত্তপটিৰত্তং কত্ৰা ‘‘আচরিযা মং তুম্হাকং জাননসিপ্পং সিক্খাপেথা’’তি আহ. তে অত্তনো অত্তনো জানননিযামেনেৰ তং সিক্খাপেসুং. পঞ্চন্নং তাপসসতানং একোপি তেন অতিরেকপঞ্ঞো নাহোসি, স্ৰেৰ তেসং পঞ্ঞায অগ্গো. অথস্স তে সন্নিপতিত্ৰা আচরিযট্ঠানং অদংসু. অথ নে সো আহ – ‘‘মারিসা, তুম্হে নিচ্চং ৰনমূলফলাহারা অরঞ্ঞেৰ ৰসথ, মনুস্সপথং কস্মা ন গচ্ছথা’’তি? ‘‘মারিস, মনুস্সা নাম মহাদানং দত্ৰা অনুমোদনং কারাপেন্তি, ধম্মিং কথং ভণাপেন্তি, পঞ্হং পুচ্ছন্তি, মযং তেন ভযেন তত্থ ন গচ্ছামা’’তি. ‘‘মারিসা, সচেপি চক্কৰত্তিরাজা ভৰিস্সতি, মনং গহেত্ৰা কথনং নাম ময্হং ভারো, তুম্হে মা ভাযথা’’তি ৰত্ৰা তেহি সদ্ধিং চারিকং চরমানো অনুপুব্বেন বারাণসিং পত্ৰা রাজুয্যানে ৰসিত্ৰা পুনদিৰসে সব্বেহি সদ্ধিং দ্ৰারগামে ভিক্খায চরি, মনুস্সা মহাদানং অদংসু. তাপসা পুনদিৰসে নগরং পৰিসিংসু মনুস্সা মহাদানং অদংসু. উদ্দালকতাপসো দানানুমোদনং করোতি, মঙ্গলং ৰদতি, পঞ্হং ৰিস্সজ্জেতি, মনুস্সা পসীদিত্ৰা বহুপচ্চযে অদংসু. সকলনগরং ‘‘পণ্ডিতো গণসত্থা ধম্মিকতাপসো আগতো’’তি সঙ্খুভি, তং রঞ্ঞোপি কথযিংসু.

রাজা ‘‘কুহিং ৰসতী’’তি পুচ্ছিত্ৰা ‘‘উয্যানে’’তি সুত্ৰা ‘‘সাধু অজ্জ তেসং দস্সনায গমিস্সামী’’তি আহ. একো পুরিসো গন্ত্ৰা ‘‘রাজা কির ৰো পস্সিতুং আগচ্ছিস্সতী’’তি উদ্দালকস্স কথেসি. সোপি ইসিগণং আমন্তেত্ৰা ‘‘মারিসা, রাজা কির আগমিস্সতি, ইস্সরে নাম একদিৰসং আরাধেত্ৰা যাৰজীৰং অলং হোতী’’তি. ‘‘কিং পন কাতব্বং আচরিযা’’তি? সো এৰমাহ – ‘‘তুম্হেসু একচ্চে ৰগ্গুলিৰতং চরন্তু, একচ্চে উক্কুটিকপ্পধানমনুযুঞ্জন্তু, একচ্চে কণ্টকাপস্সযিকা ভৰন্তু, একচ্চে পঞ্চাতপং তপন্তু, একচ্চে উদকোরোহনকম্মং করোন্তু, একচ্চে তত্থ তত্থ মন্তে সজ্ঝাযন্তূ’’তি. তে তথা করিংসু. সযং পন অট্ঠ ৰা দস ৰা পণ্ডিতৰাদিনো গহেত্ৰা মনোরমে আধারকে রমণীযং পোত্থকং ঠপেত্ৰা অন্তেৰাসিকপরিৰুতো সুপঞ্ঞত্তে সাপস্সযে আসনে নিসীদি. তস্মিং খণে রাজা পুরোহিতং আদায মহন্তেন পরিৰারেন উয্যানং গন্ত্ৰা তে মিচ্ছাতপং চরন্তে দিস্ৰা ‘‘অপাযভযম্হা মুত্তা’’তি পসীদিত্ৰা উদ্দালকস্স সন্তিকং গন্ত্ৰা পটিসন্থারং কত্ৰা একমন্তং নিসিন্নো তুট্ঠমানসো পুরোহিতেন সদ্ধিং সল্লপন্তো পঠমং গাথমাহ –

৬২.

‘‘খরাজিনা জটিলা পঙ্কদন্তা, দুম্মক্খরূপা যে মন্তং জপ্পন্তি;

কচ্চিন্নু তে মানুসকে পযোগে, ইদং ৰিদূ পরিমুত্তা অপাযা’’তি.

তত্থ খরাজিনাতি সখুরেহি অজিনচম্মেহি সমন্নাগতা. পঙ্কদন্তাতি দন্তকট্ঠস্স অখাদনেন মলগ্গহিতদন্তা. দুম্মক্খরূপাতি অনঞ্জিতক্খা অমণ্ডিতরূপা লূখসঙ্ঘাটিধরা. মানুসকে পযোগেতি মনুস্সেহি কত্তব্বৰীরিযে. ইদং ৰিদূতি ইদং তপচরণঞ্চ মন্তসজ্ঝাযনঞ্চ জানন্তা. অপাযাতি কচ্চি আচরিয, ইমে চতূহি অপাযেহি মুত্তাতি পুচ্ছতি.

তং সুত্ৰা পুরোহিতো ‘‘অযং রাজা অট্ঠানে পসন্নো, তুণ্হী ভৰিতুং ন ৰট্টতী’’তি চিন্তেত্ৰা দুতিযং গাথমাহ –

৬৩.

‘‘পাপানি কম্মানি করেথ রাজ, বহুস্সুতো চে ন চরেয্য ধম্মং;

সহস্সৰেদোপি ন তং পটিচ্চ, দুক্খা পমুচ্চে চরণং অপত্ৰা’’তি.

তত্থ বহুস্সুতো চেতি সচে মহারাজ, ‘‘অহং বহুস্সুতোম্হী’’তি পগুণৰেদোপি দসকুসলকম্মপথধম্মং ন চরেয্য, তীহি দ্ৰারেহি পাপানেৰ করেয্য, তিট্ঠন্তু তযো ৰেদা, সহস্সৰেদোপি সমানো তং বাহুসচ্চং পটিচ্চ অট্ঠসমাপত্তিসঙ্খাতং চরণং অপ্পত্ৰা অপাযদুক্খতো ন মুচ্চেয্যাতি.

তস্স ৰচনং সুত্ৰা উদ্দালকো চিন্তেসি ‘‘রাজা যথা ৰা তথা ৰা ইসিগণস্স পসীদি, অযং পন ব্রাহ্মণো চরন্তং গোণং দণ্ডেন পহরন্তো ৰিয ৰড্ঢিতভত্তে কচৰরং খিপন্তো ৰিয কথেসি, তেন সদ্ধিং কথেস্সামী’’তি. সো তেন সদ্ধিং কথেন্তো ততিযং গাথমাহ –

৬৪.

‘‘সহস্সৰেদোপি ন তং পটিচ্চ, দুক্খা পমুচ্চে চরণং অপত্ৰা;

মঞ্ঞামি ৰেদা অফলা ভৰন্তি, সসংযমং চরণঞ্ঞেৰ সচ্চ’’ন্তি.

তত্থ অফলাতি তৰ ৰাদে ৰেদা চ সেসসিপ্পানি চ অফলানি আপজ্জন্তি, তানি কস্মা উগ্গণ্হন্তি, সীলসংযমেন সদ্ধিং চরণঞ্ঞেৰ একং সচ্চং আপজ্জতীতি.

ততো পুরোহিতো চতুত্থং গাথমাহ –

৬৫.

‘‘ন হেৰ ৰেদা অফলা ভৰন্তি, সসংযমং চরণঞ্ঞেৰ সচ্চং;

কিত্তিঞ্হি পপ্পোতি অধিচ্চ ৰেদে, সন্তিং পুণাতি চরণেন দন্তো’’তি.

তত্থ ন হেৰাতি নাহং ‘‘ৰেদা অফলা’’তি ৰদামি, অপিচ খো পন সসংযমং চরণং সচ্চমেৰ সভাৰভূতং উত্তমং. তেন হি সক্কা দুক্খা মুচ্চিতুং. সন্তিং পুণাতীতি সমাপত্তিসঙ্খাতেন চরণেন দন্তো ভযসন্তিকরং নিব্বানং পাপুণাতীতি.

তং সুত্ৰা উদ্দালকো ‘‘ন সক্কা ইমিনা সদ্ধিং পটিপক্খৰসেন ঠাতুং, ‘পুত্তো তৰাহ’ন্তি ৰুত্তে সিনেহং অকরোন্তো নাম নত্থি, পুত্তভাৰমস্স কথেস্সামী’’তি চিন্তেত্ৰা পঞ্চমং গাথমাহ –

৬৬.

‘‘ভচ্চা মাতা পিতা বন্ধূ, যেন জাতো সযেৰ সো;

উদ্দালকো অহং ভোতো, সোত্তিযাকুলৰংসকো’’তি.

তত্থ ভচ্চাতি মাতা চ পিতা চ সেসবন্ধূ চ ভরিতব্বা নাম. যেন পন জাতো, সোযেৰ সো হোতি. অত্তাযেৰ হি অত্তনো জাযতি, অহঞ্চ তযাৰ উদ্দালকরুক্খমূলে জনিতো, তযা ৰুত্তমেৰ নামং কতং, উদ্দালকো অহং ভোতি.

সো ‘‘একংসেন ত্ৰং উদ্দালকোসী’’তি ৰুত্তে ‘‘আমা’’তি ৰত্ৰা ‘‘মযা তে মাতু সঞ্ঞাণং দিন্নং, তং কুহি’’ন্তি ৰুত্তে ‘‘ইদং ব্রাহ্মণা’’তি মুদ্দিকং তস্স হত্থে ঠপেসি. ব্রাহ্মণো মুদ্দিকং সঞ্জানিত্ৰা নিচ্ছযেন ‘‘ত্ৰং ব্রাহ্মণধম্মং পজানাসী’’তি ৰত্ৰা ব্রাহ্মণধম্মং পুচ্ছন্তো ছট্ঠং গাথমাহ –

৬৭.

‘‘কথং ভো ব্রাহ্মণো হোতি, কথং ভৰতি কেৰলী;

কথঞ্চ পরিনিব্বানং, ধম্মট্ঠো কিন্তি ৰুচ্চতী’’তি.

উদ্দালকোপি তস্স আচিক্খন্তো সত্তমং গাথমাহ –

৬৮.

‘‘নিরংকত্ৰা অগ্গিমাদায ব্রাহ্মণো, আপো সিঞ্চং যজং উস্সেতি যূপং;

এৰংকরো ব্রাহ্মণো হোতি খেমী, ধম্মে ঠিতং তেন অমাপযিংসূ’’তি.

তত্থ নিরংকত্ৰা অগ্গিমাদাযাতি নিরন্তরং কত্ৰা অগ্গিং গহেত্ৰা পরিচরতি. আপো সিঞ্চং যজং উস্সেতি যূপন্তি অভিসেচনককম্মং করোন্তো সম্মাপাসং ৰা ৰাজপেয্যং ৰা নিরগ্গল়ং ৰা যজন্তো সুৰণ্ণযূপং উস্সাপেতি. খেমীতি খেমপ্পত্তো. অমাপযিংসূতি তেনেৰ চ কারণেন ধম্মে ঠিতং কথযিংসু.

তং সুত্ৰা পুরোহিতো তেন কথিতং ব্রাহ্মণধম্মং গরহন্তো অট্ঠমং গাথমাহ –

৬৯.

‘‘ন সুদ্ধি সেচনেনত্থি, নাপি কেৰলী ব্রাহ্মণো;

ন খন্তী নাপি সোরচ্চং, নাপি সো পরিনিব্বুতো’’তি.

তত্থ সেচনেনাতি তেন ৰুত্তেসু ব্রাহ্মণধম্মেসু একং দস্সেত্ৰা সব্বং পটিক্খিপতি. ইদং ৰুত্তং হোতি – ‘‘অগ্গিপরিচরণেন ৰা উদকসেচনেন ৰা পসুঘাতযঞ্ঞেন ৰা সুদ্ধি নাম নত্থি, নাপি এত্তকেন ব্রাহ্মণো কেৰলপরিপুণ্ণো হোতি, ন অধিৰাসনখন্তি, ন সীলসোরচ্চং, নাপি কিলেসপরিনিব্বানেন পরিনিব্বুতো নাম হোতী’’তি.

ততো নং উদ্দালকো ‘‘যদি এৰং ব্রাহ্মণো ন হোতি, অথ কথং হোতী’’তি পুচ্ছন্তো নৰমং গাথমাহ –

৭০.

‘‘কথং সো ব্রাহ্মণো হোতি, কথং ভৰতি কেৰলী;

কথঞ্চ পরিনিব্বানং, ধম্মট্ঠো কিন্তি ৰুচ্চতী’’তি.

পুরোহিতোপিস্স কথেন্তো ইতরং গাথমাহ –

৭১.

‘‘অখেত্তবন্ধূ অমমো নিরাসো, নিল্লোভপাপো ভৰলোভখীণো;

এৰংকরো ব্রাহ্মণো হোতি খেমী, ধম্মে ঠিতং তেন অমাপযিংসূ’’তি.

তত্থ অখেত্তবন্ধূতি অক্খেত্তো অবন্ধু, খেত্তৰত্থুগামনিগমপরিগ্গহেন চেৰ ঞাতিবন্ধৰগোত্তবন্ধৰমিত্তবন্ধৰসহাযবন্ধৰসিপ্পবন্ধৰপরিগ্গহেন চ রহিতো. অমমোতি সত্তসঙ্খারেসু তণ্হাদিট্ঠিমমাযনরহিতো. নিরাসোতি লাভধনপুত্তজীৰিতাসায রহিতো. নিল্লোভপাপোতি পাপলোভৰিসমলোভেন রহিতো. ভৰলোভখীণোতি খীণভৰরাগো.

ততো উদ্দালকো গাথমাহ –

৭২.

‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা;

সব্বেসং সীতিভূতানং, অত্থি সেয্যোথ পাপিযো’’তি.

তত্থ অত্থি সেয্যোথ পাপিযোতি এতে খত্তিযাদযো সব্বেপি সোরচ্চাদীহি সমন্নাগতা হোন্তি, এৰং ভূতানং পন তেসং অযং সেয্যো, অযং পাপিযোতি এৰং হীনুক্কট্ঠতা অত্থি, নত্থীতি পুচ্ছতি.

অথস্স ‘‘অরহত্তুপ্পত্তিতো পট্ঠায হীনুক্কট্ঠতা নাম নত্থী’’তি দস্সেতুং ব্রাহ্মণো গাথমাহ –

৭৩.

‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা;

সব্বেসং সীতিভূতানং, নত্থি সেয্যোথ পাপিযো’’তি.

অথ নং গরহন্তো উদ্দালকো গাথাদ্ৰযমাহ –

৭৪.

‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

সব্বেৰ সোরতা দন্তা, সব্বেৰ পরিনিব্বুতা.

৭৫.

‘‘সব্বেসং সীতিভূতানং, নত্থি সেয্যোথ পাপিযো;

পনট্ঠং চরসি ব্রহ্মঞ্ঞং, সোত্তিযাকুলৰংসত’’ন্তি.

তস্সত্থো – যদি এতেহি গুণেহি সমন্নাগতানং ৰিসেসো নত্থি, একো ৰণ্ণোৰ হোতি, এৰং সন্তে ত্ৰং উভতো সুজাতভাৰং নাসেন্তো পনট্ঠং চরসি ব্রহ্মঞ্ঞং, চণ্ডালসমো হোসি, সোত্তিযকুলৰংসতং নাসেসীতি.

অথ নং পুরোহিতো উপমায সঞ্ঞাপেন্তো গাথাদ্ৰযমাহ –

৭৬.

‘‘নানারত্তেহি ৰত্থেহি, ৰিমানং ভৰতি ছাদিতং;

ন তেসং ছাযা ৰত্থানং, সো রাগো অনুপজ্জথ.

৭৭.

‘‘এৰমেৰ মনুস্সেসু, যদা সুজ্ঝন্তি মাণৰা;

তে সজাতিং পমুঞ্চন্তি, ধম্মমঞ্ঞায সুব্বতা’’তি.

তত্থ ৰিমানন্তি গেহং ৰা মণ্ডপং ৰা. ছাযাতি তেসং ৰত্থানং ছাযা সো নানাৰিধো রাগো ন উপেতি, সব্বা ছাযা একৰণ্ণাৰ হোন্তি. এৰমেৰাতি মনুস্সেসুপি এৰমেৰ একচ্চে অঞ্ঞাণব্রাহ্মণা অকারণেনেৰ চাতুৰণ্ণে সুদ্ধিং পঞ্ঞাপেন্তি, এসা অত্থীতি মা গণ্হি. যদা অরিযমগ্গেন মাণৰা সুজ্ঝন্তি, তদা তেহি পটিৰিদ্ধং নিব্বানধম্মং জানিত্ৰা সুব্বতা সীলৰন্তা পণ্ডিতপুরিসা তে সজাতিং মুঞ্চন্তি. নিব্বানপ্পত্তিতো পট্ঠায হি জাতি নাম নিরত্থকাতি.

উদ্দালকো পন পচ্চাহরিতুং অসক্কোন্তো অপ্পটিভানোৰ নিসীদি. অথ ব্রাহ্মণো রাজানং আহ – ‘‘সব্বে এতে, মহারাজ, কুহকা সকলজম্বুদীপে কোহঞ্ঞেনেৰ নাসেন্তি, উদ্দালকং উপ্পব্বাজেত্ৰা উপপুরোহিতং করোথ, সেসে উপ্পব্বাজেত্ৰা ফলকাৰুধানি দত্ৰা সেৰকে করোথা’’তি. ‘‘সাধু, আচরিযা’’তি রাজা তথা কারেসি. তে রাজানং উপট্ঠহন্তাৰ যথাকম্মং গতা.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপেস কুহকোযেৰা’’তি ৰত্ৰা জাতকং সমোধানেসি – ‘‘তদা উদ্দালকো কুহকভিক্খু অহোসি, রাজা আনন্দো, পুরোহিতো পন অহমেৰ অহোসি’’ন্তি.

উদ্দালকজাতকৰণ্ণনা চতুত্থা.

[৪৮৮] ৫. ভিসজাতকৰণ্ণনা

অস্সং গৰং রজতং জাতরূপন্তি ইদং সত্থা জেতৰনে ৰিহরন্তো উক্কণ্ঠিতভিক্খুং আরব্ভ কথেসি. ৰত্থু পন কুসজাতকে (জা. ২.২০.১ আদযো) আৰি ভৰিস্সতি. তদা পন সত্থা ‘‘সচ্চং কির ত্ৰং ভিক্খু উক্কণ্ঠিতোসী’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘কিং পটিচ্চা’’তি ৰত্ৰা ‘‘কিলেসং, ভন্তে’’তি ৰুত্তে ‘‘ভিক্খু এৰরূপে নিয্যানিকসাসনে পব্বজিত্ৰা কস্মা কিলেসং পটিচ্চ উক্কণ্ঠিতোসি, পোরাণকপণ্ডিতা অনুপ্পন্নে বুদ্ধে বাহিরকপব্বজ্জং পব্বজিত্ৰা ৰত্থুকামকিলেসকামে আরব্ভ উপ্পজ্জনকসঞ্ঞং সপথং কত্ৰা ৰিহরিংসূ’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অসীতিকোটিৰিভৰস্স ব্রাহ্মণমহাসালকুলস্স পুত্তো হুত্ৰা নিব্বত্তি, ‘‘মহাকঞ্চনকুমারো’’তিস্স নামং করিংসু. অথস্স পদসা ৰিচরণকালে অপরোপি পুত্তো জাযি, ‘‘উপকঞ্চনকুমারো’’তিস্স নামং করিংসু. এৰং পটিপাটিযা সত্ত পুত্তা অহেসুং. সব্বকনিট্ঠা পনেকা ধীতা, তস্সা ‘‘কঞ্চনদেৰী’’তি নামং করিংসু. মহাকঞ্চনকুমারো ৰযপ্পত্তো তক্কসিলতো সব্বসিপ্পানি উগ্গণ্হিত্ৰা আগচ্ছি. অথ নং মাতাপিতরো ঘরাৰাসেন বন্ধিতুকামা ‘‘অত্তনা সমানজাতিযকুলতো তে দারিকং আনেস্সাম, ঘরাৰাসং সণ্ঠপেহী’’তি ৰদিংসু. ‘‘অম্মতাতা, ন ময্হং ঘরাৰাসেনত্থো, ময্হঞ্হি তযো ভৰা আদিত্তা ৰিয সপ্পটিভযা, বন্ধনাগারং ৰিয পলিবুদ্ধা, উক্কারভূমি ৰিয জেগুচ্ছা হুত্ৰা উপট্ঠহন্তি, মযা সুপিনেনপি মেথুনধম্মো ন দিট্ঠপুব্বো, অঞ্ঞে ৰো পুত্তা অত্থি, তে ঘরাৰাসেন নিমন্তেথা’’তি ৰত্ৰা পুনপ্পুনং যাচিতোপি সহাযে পেসেত্ৰা তেহি যাচিতোপি ন ইচ্ছি.

অথ নং সহাযা ‘‘সম্ম, কিং পন ত্ৰং পত্থেন্তো কামে পরিভুঞ্জিতুং ন ইচ্ছসী’’তি পুচ্ছিংসু. সো তেসং নেক্খম্মজ্ঝাসযতং আরোচেসি. তং সুত্ৰা মাতাপিতরো সেসপুত্তে নিমন্তেসুং, তেপি ন ইচ্ছিংসু. কঞ্চনদেৰীপি ন ইচ্ছিযেৰ. অপরভাগে মাতাপিতরো কালমকংসু. মহাকঞ্চনপণ্ডিতো মাতাপিতূনং কত্তব্বকিচ্চং কত্ৰা অসীতিকোটিধনেন কপণদ্ধিকানং মহাদানং দত্ৰা ছ ভাতরো ভগিনিং একং দাসং একং দাসিং একং সহাযকঞ্চ আদায মহাভিনিক্খমনং নিক্খমিত্ৰা হিমৰন্তং পাৰিসি. তে তত্থ একং পদুমসরং নিস্সায রমণীযে ভূমিভাগে অস্সমং কত্ৰা পব্বজিত্ৰা ৰনমূলফলাহারেহি যাপযিংসু. তে অরঞ্ঞং গচ্ছন্তা একতোৰ গন্ত্ৰা যত্থ একো ফলং ৰা পত্তং ৰা পস্সতি, তত্থ ইতরেপি পক্কোসিত্ৰা দিট্ঠসুতাদীনি কথেন্তা উচ্চিনন্তি, গামস্স কম্মন্তট্ঠানং ৰিয হোতি. অথ আচরিযো মহাকঞ্চনতাপসো চিন্তেসি ‘‘অম্হাকং অসীতিকোটিধনং ছড্ডেত্ৰা পব্বজিতানং এৰং লোলুপ্পচারৰসেন ফলাফলত্থায ৰিচরণং নাম অপ্পতিরূপং, ইতো পট্ঠায অহমেৰ ফলাফলং আহরিস্সামী’’তি. সো অস্সমং পত্ৰা সব্বেপি তে সাযন্হসমযে সন্নিপাতেত্ৰা তমত্থং আরোচেত্ৰা ‘‘তুম্হে ইধেৰ সমণধম্মং করোন্তা অচ্ছথ, অহং ফলাফলং আহরিস্সামী’’তি আহ. অথ নং উপকঞ্চনাদযো ‘‘মযং আচরিয, তুম্হে নিস্সায পব্বজিতা, তুম্হে ইধেৰ সমণধম্মং করোথ, ভগিনীপি নো ইধেৰ হোতু, দাসীপি তস্সা সন্তিকে অচ্ছতু, মযং অট্ঠ জনা ৰারেন ফলাফলং আহরিস্সাম, তুম্হে পন তযো ৰারমুত্তাৰ হোথা’’তি ৰত্ৰা পটিঞ্ঞং গণ্হিংসু.

ততো পট্ঠায অট্ঠসুপি জনেসু একেকো ৰারেনেৰ ফলাফলং আহরতি. সেসা অত্তনো অত্তনো পণ্ণসালাযমেৰ হোন্তি, অকারণেন একতো ভৰিতুং ন লভন্তি. ৰারপ্পত্তো ফলাফলং আহরিত্ৰা একো মাল়কো অত্থি, তত্থ পাসাণফলকে একাদস কোট্ঠাসে কত্ৰা ঘণ্ডিসঞ্ঞং কত্ৰা অত্তনো কোট্ঠাসং আদায ৰসনট্ঠানং পৰিসতি. সেসা ঘণ্ডিসঞ্ঞায নিক্খমিত্ৰা লোলুপ্পং অকত্ৰা গারৰপরিহারেন গন্ত্ৰা অত্তনো পাপুণনকোট্ঠাসং আদায ৰসনট্ঠানং গন্ত্ৰা পরিভুঞ্জিত্ৰা সমণধম্মং করোন্তি. তে অপরভাগে ভিসানি আহরিত্ৰা খাদন্তা তত্ততপা ঘোরতপা পরমাজিতিন্দ্রিযা কসিণপরিকম্মং করোন্তা ৰিহরিংসু. অথ তেসং সীলতেজেন সক্কস্স ভৰনং কম্পি. সক্কোপি আৰজ্জেন্তো তং কারণং ঞত্ৰা ‘‘কামাধিমুত্তা নু খো ইমে ইসযো, নো’’তি আসঙ্কং করোতিযেৰ. সো ‘‘ইমে তাৰ ইসযো পরিগ্গণ্হিস্সামী’’তি চিন্তেত্ৰা অত্তনো আনুভাৰেন মহাসত্তস্স কোট্ঠাসং তযো দিৰসে অন্তরধাপেসি. সো পঠমদিৰসে কোট্ঠাসং অদিস্ৰা ‘‘মম কোট্ঠাসং পমুট্ঠো ভৰিস্সতী’’তি চিন্তেসি, দুতিযদিৰসে ‘‘মম দোসেন ভৰিতব্বং, পণামনৰসেন মম কোট্ঠাসং ন ঠপেসি মঞ্ঞে’’তি চিন্তেসি, ততিযদিৰসে ‘‘কেন নু খো কারণেন ময্হং কোট্ঠাসং ন ঠপেন্তি, সচে মে দোসো অত্থি, খমাপেস্সামী’’তি সাযন্হসমযে ঘণ্ডিসঞ্ঞং অদাসি.

সব্বে সন্নিপতিত্ৰা ‘‘কেন ঘণ্ডিসঞ্ঞা দিন্না’’তি আহংসু. ‘‘মযা তাতা’’তি. ‘‘কিংকারণা আচরিযা’’তি? ‘‘তাতা ততিযদিৰসে কেন ফলাফলং আভত’’ন্তি? তেসু একো উট্ঠায ‘‘মযা আচরিযা’’তি ৰন্দিত্ৰা অট্ঠাসি. কোট্ঠাসে করোন্তেন তে ময্হং কোট্ঠাসো কতোতি. ‘‘আম, আচরিয, জেট্ঠককোট্ঠাসো মে কতো’’তি. ‘‘হিয্যো কেনাভত’’ন্তি? ‘‘মযা’’তি অপরো উট্ঠায ৰন্দিত্ৰা অট্ঠাসি. কোট্ঠাসং করোন্তো মং অনুস্সরীতি. ‘‘তুম্হাকং মে জেট্ঠককোট্ঠাসো ঠপিতো’’তি. ‘‘অজ্জ কেনাভত’’ন্তি. ‘‘মযা’’তি অপরো উট্ঠায ৰন্দিত্ৰা অট্ঠাসি. কোট্ঠাসং করোন্তো মং অনুস্সরীতি. ‘‘তুম্হাকং মে জেট্ঠককোট্ঠাসো কতো’’তি. ‘‘তাতা, অজ্জ ময্হং কোট্ঠাসং অলভন্তস্স ততিযো দিৰসো, পঠমদিৰসে কোট্ঠাসং অদিস্ৰা ‘কোট্ঠাসং করোন্তো মং পমুট্ঠো ভৰিস্সতী’তি চিন্তেসিং, দুতিযদিৰসে ‘‘মম কোচি দোসো ভৰিস্সতী’’তি চিন্তেসিং, অজ্জ পন ‘‘সচে মে দোসো অত্থি, খমাপেস্সামী’’তি চিন্তেত্ৰা ঘণ্ডিসঞ্ঞায তুম্হে সন্নিপাতেসিং. এতে ভিসকোট্ঠাসে তুম্হে ‘‘করিম্হা’’তি ৰদথ, অহং ন লভামি, এতেসং থেনেত্ৰা খাদকং ঞাতুং ৰট্টতি, কামে পহায পব্বজিতানং ভিসমত্তং থেননং নাম অপ্পতিরূপন্তি. তে তস্স কথং সুত্ৰা ‘‘অহো সাহসিককম্ম’’ন্তি সব্বেৰ উব্বেগপ্পত্তা অহেসুং.

তস্মিং অস্সমপদে ৰনজেট্ঠকরুক্খে নিব্বত্তদেৰতাপি ওতরিত্ৰা আগন্ত্ৰা তেসংযেৰ সন্তিকে নিসীদি. আনেঞ্জকরণং কারিযমানো দুক্খং অধিৰাসেতুং অসক্কোন্তো আল়ানং ভিন্দিত্ৰা পলাযিত্ৰা অরঞ্ঞং পৰিট্ঠো একো ৰারণো কালেন কালং ইসিগণং ৰন্দতি, সোপি আগন্ত্ৰা একমন্তং অট্ঠাসি. সপ্পকীল়াপনকো একো ৰানরো অহিতুণ্ডিকস্স হত্থতো মুচ্চিত্ৰা পলাযিত্ৰা অরঞ্ঞং পৰিসিত্ৰা তত্থেৰ অস্সমে ৰসতি. সোপি তং দিৰসং ইসিগণং ৰন্দিত্ৰা একমন্তং নিসীদি. সক্কো ‘‘ইসিগণং পরিগ্গণ্হিস্সামী’’তি তেসং সন্তিকে অদিস্সমানকাযো অট্ঠাসি. তস্মিং খণেৰ বোধিসত্তস্স কনিট্ঠো উপকঞ্চনতাপসো উট্ঠাযাসনা বোধিসত্তং ৰন্দিত্ৰা সেসানং অপচিতিং দস্সেত্ৰা ‘‘আচরিয, অহং অঞ্ঞে অপট্ঠপেত্ৰা অত্তানঞ্ঞেৰ সোধেতুং লভামী’’তি পুচ্ছি. ‘‘আম, লভসী’’তি. সো ইসিগণমজ্ঝে ঠত্ৰা ‘‘সচে তে মযা ভিসানি খাদিতানি, এৰরূপো নাম হোতূ’’তি সপথং করোন্তো পঠমং গাথমাহ –

৭৮.

‘‘অস্সং গৰং রজতং জাতরূপং, ভরিযঞ্চ সো ইধ লভতং মনাপং;

পুত্তেহি দারেহি সমঙ্গি হোতু, ভিসানি তে ব্রাহ্মণ যো অহাসী’’তি.

তত্থ ‘‘অস্সং গৰ’’ন্তি ইদং ‘‘সো ‘যত্তকানি পিযৰত্থূনি হোন্তি, তেহি ৰিপ্পযোগে তত্তকানি সোকদুক্খানি উপ্পজ্জন্তী’তি ৰত্থুকামে গরহন্তো অভাসী’’তি ৰেদিতব্বং.

তং সুত্ৰা ইসিগণো ‘‘মারিস, মা এৰং কথেথ, অতিভারিযো তে সপথো’’তি কণ্ণে পিদহি. বোধিসত্তোপি নং ‘‘তাত, অতিভারিযো তে সপথো, ন ত্ৰং খাদসি, তৰ পত্তাসনে নিসীদা’’তি আহ. তস্মিং পঠমং সপথং কত্ৰা নিসিন্নে দুতিযোপি ভাতা সহসা উট্ঠায মহাসত্তং ৰন্দিত্ৰা সপথেন অত্তানং সোধেন্তো দুতিযং গাথমাহ –

৭৯.

‘‘মালঞ্চ সো কাসিকচন্দনঞ্চ, ধারেতু পুত্তস্স বহূ ভৰন্তু;

কামেসু তিব্বং কুরুতং অপেক্খং, ভিসানি তে ব্রাহ্মণ যো অহাসী’’তি.

তত্থ তিব্বন্তি ৰত্থুকামকিলেসকামেসু বহলং অপেক্খং করোতূতি. ইদং সো ‘‘যস্সেতেসু তিব্বা অপেক্খা হোন্তি, সো তেহি ৰিপ্পযোগে মহন্তং দুক্খং পাপুণাতী’’তি দুক্খপটিক্খেপৰসেনেৰ আহ.

তস্মিং নিসিন্নে সেসাপি অত্তনো অত্তনো অজ্ঝাসযানুরূপেন তং তং গাথং অভাসিংসু –

৮০.

‘‘পহূতধঞ্ঞো কসিমা যসস্সী, পুত্তে গিহী ধনিমা সব্বকামে;

ৰযং অপস্সং ঘরমাৰসাতু, ভিসানি তে ব্রাহ্মণ যো অহাসি.

৮১.

‘‘সো খত্তিযো হোতু পসয্হকারী, রাজাভিরাজা বলৰা যসস্সী;

স চাতুরন্তং মহিমাৰসাতু, ভিসানি তে ব্রাহ্মণ যো অহাসি.

৮২.

‘‘সো ব্রাহ্মণো হোতু অৰীতরাগো, মুহুত্তনক্খত্তপথেসু যুত্তো;

পূজেতু নং রট্ঠপতী যসস্সী, ভিসানি তে ব্রাহ্মণ যো অহাসি.

৮৩.

‘‘অজ্ঝাযকং সব্বসমন্তৰেদং, তপস্সিনং মঞ্ঞতু সব্বলোকো;

পূজেন্তু নং জানপদা সমেচ্চ, ভিসানি তে ব্রাহ্মণ যো অহাসি.

৮৪.

‘‘চতুস্সদং গামৰরং সমিদ্ধং, দিন্নঞ্হি সো ভুঞ্জতু ৰাসৰেন;

অৰীতরাগো মরণং উপেতু, ভিসানি তে ব্রাহ্মণ যো অহাসি.

৮৫.

‘‘সো গামণী হোতু সহাযমজ্ঝে, নচ্চেহি গীতেহি পমোদমানো;

সো রাজতো ব্যসন মালত্থ কিঞ্চি, ভিসানি তে ব্রাহ্মণ যো অহাসি.

৮৬.

‘‘যং একরাজা পথৰিং ৰিজেত্ৰা, ইত্থীসহস্সান ঠপেতু অগ্গং;

সীমন্তিনীনং পৰরা ভৰাতু, ভিসানি তে ব্রাহ্মণ যা অহাসি.

৮৭.

‘‘ইসীনঞ্হি সা সব্বসমাগতানং, ভুঞ্জেয্য সাদুং অৰিকম্পমানা;

চরাতু লাভেন ৰিকত্থমানা, ভিসানি তে ব্রাহ্মণ যা অহাসি.

৮৮.

‘‘আৰাসিকো হোতু মহাৰিহারে, নৰকম্মিকো হোতু গজঙ্গলাযং;

আলোকসন্ধিং দিৰসং করোতু, ভিসানি তে ব্রাহ্মণ যো অহাসি.

৮৯.

‘‘সো বজ্ঝতূ পাসসতেহি ছব্ভি, রম্মা ৰনা নিয্যতু রাজধানিং;

তুত্তেহি সো হঞ্ঞতু পাচনেহি, ভিসানি তে ব্রাহ্মণ যো অহাসি.

৯০.

‘‘অলক্কমালী তিপুকণ্ণৰিদ্ধো, লট্ঠীহতো সপ্পমুখং উপেতু;

সকচ্ছবন্ধো ৰিসিখং চরাতু, ভিসানি তে ব্রাহ্মণ যো অহাসী’’তি.

তত্থ ততিযেন ৰুত্তগাথায কসিমাতি সম্পন্নকসিকম্মো. পুত্তে গিহী ধনিমা সব্বকামেতি পুত্তে লভতু, গিহী হোতু, সত্তৰিধেন রতনধনেন ধনিমা হোতু, রূপাদিভেদে সব্বকামে লভতু. ৰযং অপস্সন্তি মহল্লককালে পব্বজ্জানুরূপম্পি অত্তনো ৰযং অপস্সন্তো পঞ্চকামগুণসমিদ্ধং ঘরমেৰ আৰসতূতি. ইদং সো ‘‘পঞ্চকামগুণগিদ্ধো কামগুণৰিপ্পযোগেন মহাৰিনাসং পাপুণাতী’’তি দস্সেতুং কথেসি.

চতুত্থেন ৰুত্তগাথায রাজাভিরাজাতি রাজূনং অন্তরে অভিরাজাতি. ইদং সো ‘‘ইস্সরানং নাম ইস্সরিযে পরিগলিতে মহন্তং দুক্খং উপ্পজ্জতী’’তি রজ্জে দোসং দস্সেন্তো কথেসি. পঞ্চমেন ৰুত্তগাথায অৰীতরাগোতি পুরোহিতট্ঠানতণ্হায সতণ্হোতি. ইদং সো ‘‘পুরোহিতস্স পুরোহিতট্ঠানে পরিগলিতে মহন্তং দোমনস্সং উপ্পজ্জতী’’তি দস্সেতুং কথেসি. ছট্ঠেন ৰুত্তগাথায তপস্সিনন্তি তপসীলসম্পন্নোতি তং মঞ্ঞতু. ইদং সো ‘‘লাভসক্কারাপগমেন মহন্তং দোমনস্সং উপ্পজ্জতী’’তি লাভসক্কারগরহৰসেন কথেসি.

সহাযতাপসেন ৰুত্তগাথায চতুস্সদন্তি আকিণ্ণমনুস্সতায মনুস্সেহি, পহূতধঞ্ঞতায ধঞ্ঞেন, সুলভদারুতায দারূহি, সম্পন্নোদকতায উদকেনাতি চতূহি উস্সন্নং, চতুস্সদসমন্নাগতন্তি অত্থো. ৰাসৰেনাতি ৰাসৰেন দিন্নং ৰিয অচলং, ৰাসৰতো লদ্ধৰরানুভাৰেন একং রাজানং আরাধেত্ৰা তেন দিন্নন্তিপি অত্থো. অৰীতরাগোতি কদ্দমে সূকরো ৰিয কামপঙ্কে নিমুগ্গোৰ হুত্ৰা. ইতি সোপি কামানং আদীনৰং কথেন্তো এৰমাহ.

দাসেন ৰুত্তগাথায গামণীতি গামজেট্ঠকো. অযম্পি কামে গরহন্তোযেৰ এৰমাহ. কঞ্চনদেৰিযা ৰুত্তগাথায যন্তি যং ইত্থিন্তি অত্থো. একরাজাতি অগ্গরাজা. ইত্থিসহস্সানন্তি ৰচনমট্ঠতায ৰুত্তং, সোল়সন্নং ইত্থিসহস্সানং অগ্গট্ঠানে ঠপেতূতি অত্থো. সীমন্তিনীনন্তি সীমন্তধরানং ইত্থীনন্তি অত্থো. ইতি সা ইত্থিভাৰে ঠত্ৰাপি দুগ্গন্ধগূথরাসিং ৰিয কামে গরহন্তীযেৰ এৰমাহ. দাসিযা ৰুত্তগাথায সব্বসমাগতানন্তি সব্বেসং সন্নিপতিতানং মজ্ঝে নিসীদিত্ৰা অৰিকম্পমানা অনোসক্কমানা সাদুরসং ভুঞ্জতূতি অত্থো. দাসীনং কির সামিকস্স সন্তিকে নিসীদিত্ৰা ভুঞ্জনং নাম অপ্পিযং. ইতি সা অত্তনো অপ্পিযতায এৰমাহ. চরাতূতি চরতু. লাভেন ৰিকত্থমানাতি লাভহেতু কুহনকম্মং করোন্তী লাভসক্কারং উপ্পাদেন্তী চরতূতি অত্থো. ইমিনা সা দাসিভাৰে ঠিতাপি কিলেসকামৰত্থুকামে গরহতি.

দেৰতায ৰুত্তগাথায আৰাসিকোতি আৰাসজগ্গনকো. গজঙ্গলাযন্তি এৰংনামকে নগরে. তত্থ কির দব্বসম্ভারা সুলভা. আলোকসন্ধিং দিৰসন্তি একদিৰসেনেৰ ৰাতপানং করোতু. সো কির দেৰপুত্তো কস্সপবুদ্ধকালে গজঙ্গলনগরং নিস্সায যোজনিকে জিণ্ণমহাৰিহারে আৰাসিকসঙ্ঘত্থেরো হুত্ৰা জিণ্ণৰিহারে নৰকম্মং করোন্তোযেৰ মহাদুক্খং অনুভৰি. তস্মা তদেৰ দুক্খং আরব্ভ এৰমাহ. হত্থিনা ৰুত্তগাথায পাসসতেহীতি বহূহি পাসেহি. ছব্ভীতি চতূসু পাদেসু গীৰায কটিভাগে চাতি ছসু ঠানেসু. তুত্তেহীতি দ্ৰিকণ্ডকাহি দীঘলট্ঠীহি. পাচনেহীতি দসপাচনেহি অঙ্কুসেহি ৰা. সো কির অত্তনো অনুভূতদুক্খঞ্ঞেৰ আরব্ভ এৰমাহ.

ৰানরেন ৰুত্তগাথায অলক্কমালীতি অহিতুণ্ডিকেন কণ্ঠে পরিক্খিপিত্ৰা ঠপিতায অলক্কমালায সমন্নাগতো. তিপুকণ্ণৰিদ্ধোতি তিপুপিল়ন্ধনেন পিল়ন্ধকণ্ণো. লট্ঠীহতোতি সপ্পকীল়ং সিক্খাপযমানো লট্ঠিযা হতো হুত্ৰা. এসোপি অহিতুণ্ডিকস্স হত্থে অত্তনো অনুভূতদুক্খমেৰ সন্ধায এৰমাহ.

এৰং তেহি তেরসহি জনেহি সপথে কতে মহাসত্তো চিন্তেসি ‘‘কদাচি ইমে ‘অযং অনট্ঠমেৰ নট্ঠন্তি কথেতী’তি মযি আসঙ্কং করেয্যুং, অহম্পি সপথং করোমী’’তি. অথ নং করোন্তো চুদ্দসমং গাথমাহ –

৯১.

‘‘যো ৰে অনট্ঠংৰ নট্ঠন্তি চাহ, কামেৰ সো লভতং ভুঞ্জতঞ্চ;

অগারমজ্ঝে মরণং উপেতু, যো ৰা ভোন্তো সঙ্কতি কঞ্চিদেৰা’’তি.

তত্থ ভোন্তোতি আলপনং. ইদং ৰুত্তং হোতি – ভৰন্তো যো অনট্ঠে কোট্ঠাসে ‘‘নট্ঠং মে’’তি ৰদতি, যো ৰা তুম্হেসু কঞ্চি আসঙ্কতি, সো পঞ্চ কামগুণে লভতু চেৰ ভুঞ্জতু চ, রমণীযমেৰ পব্বজ্জং অলভিত্ৰা অগারমজ্ঝেযেৰ মরতূতি.

এৰং ইসীহি সপথে কতে সক্কো ভাযিত্ৰা ‘‘অহং ইমে ৰীমংসন্তো ভিসানি অন্তরধাপেসিং. ইমে চ ছড্ডিতখেল়পিণ্ডং ৰিয কামে গরহন্তা সপথং করোন্তি, কামে গরহকারণং তে পুচ্ছিস্সামী’’তি চিন্তেত্ৰা দিস্সমানরূপো বোধিসত্তং ৰন্দিত্ৰা পুচ্ছন্তো অনন্তরং গাথমাহ –

৯২.

‘‘যদেসমানা ৰিচরন্তি লোকে, ইট্ঠঞ্চ কন্তঞ্চ বহূনমেতং;

পিযং মনুঞ্ঞং চিধ জীৰলোকে, কস্মা ইসযো নপ্পসংসন্তি কামে’’তি.

তত্থ যদেসমানাতি যং ৰত্থুকামং কিলেসকামঞ্চ কসিগোরক্খাদীহি সমৰিসমকম্মেহি পরিযেসমানা সত্তা লোকে ৰিচরন্তি, এতং বহূনং দেৰমনুস্সানং ইট্ঠঞ্চ কন্তঞ্চ পিযঞ্চ মনুঞ্ঞঞ্চ, কস্মা ইসযো নপ্পসংসন্তি কামেতি অত্থো. ‘‘কামে’’তি ইমিনা তং ৰত্থুং সরূপতো দস্সেতি.

অথস্স পঞ্হং ৰিস্সজ্জেন্তো মহাসত্তো দ্ৰে গাথা অভাসি –

৯৩.

‘‘কামেসু ৰে হঞ্ঞরে বজ্ঝরে চ, কামেসু দুক্খঞ্চ ভযঞ্চ জাতং;

কামেসু ভূতাধিপতী পমত্তা, পাপানি কম্মানি করোন্তি মোহা.

৯৪.

‘‘তে পাপধম্মা পসৰেত্ৰ পাপং, কাযস্স ভেদা নিরযং ৰজন্তি;

আদীনৰং কামগুণেসু দিস্ৰা, তস্মা ইসযো নপ্পসংসন্তি কামে’’তি.

তত্থ কামেসূতি কামহেতু, কামে নিস্সায কাযদুচ্চরিতাদীনি করোন্তীতি অত্থো. হঞ্ঞরেতি দণ্ডাদীহি হঞ্ঞন্তি. বজ্ঝরেতি রজ্জুবন্ধনাদীহি বজ্ঝন্তি. দুক্খন্তি কাযিকচেতসিকং অসাতং দুক্খং. ভযন্তি অত্তানুৰাদাদিকং সব্বম্পি ভযং. ভূতাধিপতীতি সক্কং আলপতি. আদীনৰন্তি এৰরূপং দোসং. সো পনেস আদীনৰো দুক্খক্খন্ধাদীহি সুত্তেহি (ম. নি. ১.১৬৩-১৮০) দীপেতব্বো.

সক্কো মহাসত্তস্স কথং সুত্ৰা সংৰিগ্গমানসো অনন্তরং গাথমাহ –

৯৫.

‘‘ৰীমংসমানো ইসিনো ভিসানি, তীরে গহেত্ৰান থলে নিধেসিং;

সুদ্ধা অপাপা ইসযো ৰসন্তি, এতানি তে ব্রহ্মচারী ভিসানী’’তি.

তত্থ ৰিমংসমানোতি ভন্তে, অহং ‘‘ইমে ইসযো কামাধিমুত্তা ৰা, নো ৰা’’তি ৰীমংসন্তো. ইসিনোতি তৰ মহেসিনো সন্তকানি ভিসানি. তীরে গহেত্ৰানাতি তীরে নিক্খিত্তানি গহেত্ৰা থলে একমন্তে নিধেসিং. সুদ্ধাতি ইদানি মযা তুম্হাকং সপথকিরিযায ঞাতং ‘‘ইমে ইসযো সুদ্ধা অপাপা হুত্ৰা ৰসন্তী’’তি.

তং সুত্ৰা বোধিসত্তো গাথমাহ –

৯৬.

‘‘ন তে নটা নো পন কীল়নেয্যা, ন বন্ধৰা নো পন তে সহাযা;

কিস্মিং ৰুপত্থম্ভ সহস্সনেত্ত, ইসীহি ত্ৰং কীল়সি দেৰরাজা’’তি.

তত্থ ন তে নটা নোতি দেৰরাজ, মযং তৰ নটা ৰা কীল়িতব্বযুত্তকা ৰা কেচি ন হোম, নাপি তৰ ঞাতকা, ন সহাযা, অথ ত্ৰং কিং ৰা উপত্থম্ভং কত্ৰা কিং নিস্সায ইসীহি সদ্ধিং কীল়সীতি অত্থো.

অথ নং সক্কো খমাপেন্তো ৰীসতিমং গাথমাহ –

৯৭.

‘‘আচরিযো মেসি পিতা চ ময্হং, এসা পতিট্ঠা খলিতস্স ব্রহ্মে;

একাপরাধং খম ভূরিপঞ্ঞ, ন পণ্ডিতা কোধবলা ভৰন্তী’’তি.

তত্থ এসা পতিট্ঠাতি এসা তৰ পাদচ্ছাযা অজ্জ মম খলিতস্স অপরদ্ধস্স পতিট্ঠা হোতু. কোধবলাতি পণ্ডিতা নাম খন্তিবলা ভৰন্তি, ন কোধবলাতি.

অথ মহাসত্তো সক্কস্স দেৰরঞ্ঞো খমিত্ৰা সযং ইসিগণং খমাপেন্তো ইতরং গাথমাহ –

৯৮.

‘‘সুৰাসিতং ইসিনং একরত্তং, যং ৰাসৰং ভূতপতিদ্দসাম;

সব্বেৰ ভোন্তো সুমনা ভৰন্তু, যং ব্রাহ্মণো পচ্চুপাদী ভিসানী’’তি.

তত্থ সুৰাসিতং ইসিনং একরত্তন্তি আযস্মন্তানং ইসীনং একরত্তম্পি ইমস্মিং অরঞ্ঞে ৰসিতং সুৰসিতমেৰ. কিংকারণা? যং ৰাসৰং ভূতপতিং অদ্দসাম, সচে হি মযং নগরে অৰসিম্হ, ইমং ন অদ্দসাম. ভোন্তোতি ভৰন্তো সব্বেপি সুমনা ভৰন্তু, তুস্সন্তু, সক্কস্স দেৰরঞ্ঞো খমন্তু. কিংকারণা? যং ব্রাহ্মণো পচ্চুপাদী ভিসানি, যস্মা তুম্হাকং আচরিযো ভিসানি পটিলভীতি.

সক্কো ইসিগণং ৰন্দিত্ৰা দেৰলোকমেৰ গতো. ইসিগণোপি ঝানাভিঞ্ঞাযো নিব্বত্তেত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা ‘‘এৰং ভিক্খু পোরাণকপণ্ডিতা সপথং কত্ৰা কিলেসে পজহিংসূ’’তি ৰত্ৰা সচ্চানি পকাসেসি, সচ্চপরিযোসানে উক্কণ্ঠিতভিক্খু সোতাপত্তিফলে পতিট্ঠহি. জাতকং সমোধানেন্তো পুন সত্থা তিস্সো গাথা অভাসি –

৯৯.

‘‘অহঞ্চ সারিপুত্তো চ, মোগ্গল্লানো চ কস্সপো;

অনুরুদ্ধো পুণ্ণো আনন্দো, তদাসুং সত্ত ভাতরো.

১০০.

‘‘ভগিনী উপ্পলৰণ্ণা চ, দাসী খুজ্জুত্তরা তদা;

চিত্তো গহপতি দাসো, যক্খো সাতাগিরো তদা.

১০১.

‘‘পালিলেয্যো তদা নাগো, মধুদো সেট্ঠৰানরো;

কাল়ুদাযী তদা সক্কো, এৰং ধারেথ জাতক’’ন্তি.

ভিসজাতকৰণ্ণনা পঞ্চমা.

[৪৮৯] ৬. সুরুচিজাতকৰণ্ণনা

মহেসী সুরুচিনো ভরিযাতি ইদং সত্থা সাৰত্থিং উপনিস্সায মিগারমাতুপাসাদে ৰিহরন্তো ৰিসাখায মহাউপাসিকায লদ্ধে অট্ঠ ৰরে আরব্ভ কথেসি. সা হি একদিৰসং জেতৰনে ধম্মকথং সুত্ৰা ভগৰন্তং সদ্ধিং ভিক্খুসঙ্ঘেন স্ৰাতনায নিমন্তেত্ৰা পক্কামি. তস্সা পন রত্তিযা অচ্চযেন চাতুদ্দীপিকো মহামেঘো পাৰস্সি. ভগৰা ভিক্খূ আমন্তেত্ৰা ‘‘যথা, ভিক্খৰে, জেতৰনে ৰস্সতি, এৰং চতূসু দীপেসু ৰস্সতি, ওৰস্সাপেথ, ভিক্খৰে, কাযং, অযং পচ্ছিমকো চাতুদ্দীপিকো মহামেঘো’’তি ৰত্ৰা ওৰস্সাপিতকাযেহি ভিক্খূহি সদ্ধিং ইদ্ধিবলেন জেতৰনে অন্তরহিতো ৰিসাখায কোট্ঠকে পাতুরহোসি. উপাসিকা ‘‘অচ্ছরিযং ৰত ভো, অব্ভুতং ৰত ভো, তথাগতস্স মহিদ্ধিকতা মহানুভাৰতা, যত্র হি নাম জাণুকমত্তেসুপি ওঘেসু ৰত্তমানেসু কটিমত্তেসুপি ওঘেসু ৰত্তমানেসু ন হি নাম একভিক্খুস্সপি পাদা ৰা চীৰরানি ৰা অল্লানি ভৰিস্সন্তী’’তি হট্ঠা উদগ্গা বুদ্ধপ্পমুখং ভিক্খুসঙ্ঘং পরিৰিসিত্ৰা কতভত্তকিচ্চং ভগৰন্তং এতদৰোচ ‘‘অট্ঠাহং, ভন্তে, ভগৰন্তং ৰরানি যাচামী’’তি. ‘‘অতিক্কন্তৰরা খো, ৰিসাখে, তথাগতা’’তি. ‘‘যানি চ, ভন্তে, কপ্পিযানি যানি চ অনৰজ্জানী’’তি. ‘‘ৰদেহি ৰিসাখে’’তি. ‘‘ইচ্ছামহং, ভন্তে, ভিক্খুসঙ্ঘস্স যাৰজীৰং ৰস্সিকসাটিকং দাতুং, আগন্তুকভত্তং দাতুং, গমিকভত্তং দাতুং, গিলানভত্তং দাতুং, গিলানুপট্ঠাকভত্তং দাতুং, গিলানভেসজ্জং দাতুং, ধুৰযাগুং দাতুং, ভিক্খুনিসঙ্ঘস্স যাৰজীৰং উদকসাটিকং দাতু’’ন্তি.

সত্থা ‘‘কং পন ত্ৰং, ৰিসাখে, অত্থৰসং সম্পস্সমানা তথাগতং অট্ঠ ৰরানি যাচসী’’তি পুচ্ছিত্ৰা তায ৰরানিসংসে কথিতে ‘‘সাধু সাধু, ৰিসাখে, সাধু খো ত্ৰং, ৰিসাখে, ইমং আনিসংসং সম্পস্সমানা তথাগতং অট্ঠ ৰরানি যাচসী’’তি ৰত্ৰা ‘‘অনুজানামি তে, ৰিসাখে, অট্ঠ ৰরানী’’তি অট্ঠ ৰরে দত্ৰা অনুমোদনং কত্ৰা পক্কামি. অথেকদিৰসং সত্থরি পুব্বারামে ৰিহরন্তে ভিক্খূ ধম্মসভাযং কথং সমুট্ঠাপেসুং ‘‘আৰুসো, ৰিসাখা মহাউপাসিকা মাতুগামত্তভাৰে ঠত্ৰাপি দসবলস্স সন্তিকে অট্ঠ ৰরে লভি, অহো মহাগুণা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ৰিসাখা ইদানেৰ মম সন্তিকা ৰরে লভতি, পুব্বেপেসা লভিযেৰা’’তি ৰত্ৰা অতীতং আহরি.

অতীতে মিথিলাযং সুরুচি নাম রাজা রজ্জং কারেন্তো পুত্তং পটিলভিত্ৰা তস্স ‘‘সুরুচিকুমারো’’ত্ৰেৰ নামং অকাসি. সো ৰযপ্পত্তো ‘‘তক্কসিলাযং সিপ্পং উগ্গণ্হিস্সামী’’তি গন্ত্ৰা নগরদ্ৰারে সালাযং নিসীদি. বারাণসিরঞ্ঞোপি পুত্তো ব্রহ্মদত্তকুমারো নাম তথেৰ গন্ত্ৰা সুরুচিকুমারস্স নিসিন্নফলকেযেৰ নিসীদি. তে অঞ্ঞমঞ্ঞং পুচ্ছিত্ৰা ৰিস্সাসিকা হুত্ৰা একতোৰ আচরিযস্স সন্তিকং গন্ত্ৰা আচরিযভাগং দত্ৰা সিপ্পং পট্ঠপেত্ৰা ন চিরস্সেৰ নিট্ঠিতসিপ্পা আচরিযং আপুচ্ছিত্ৰা থোকং মগ্গং একতোৰ গন্ত্ৰা দ্ৰেধাপথে ঠিতা অঞ্ঞমঞ্ঞং আলিঙ্গিত্ৰা মিত্তধম্মানুরক্খণত্থং কতিকং করিংসু ‘‘সচে মম পুত্তো জাযতি, তৰ ধীতা, তৰ পুত্তো, মম ধীতা, তেসং আৰাহৰিৰাহং করিস্সামা’’তি. তেসু রজ্জং কারেন্তেসু সুরুচিমহারাজস্স পুত্তো জাযি, ‘‘সুরুচিকুমারো’’ত্ৰেৰস্স নামং করিংসু. ব্রহ্মদত্তস্স ধীতা জাযি, ‘‘সুমেধা’’তিস্সা নামং করিংসু.

সুরুচিকুমারো ৰযপ্পত্তো তক্কসিলাযং গন্ত্ৰা সিপ্পং উগ্গণ্হিত্ৰা আগচ্ছি. অথ নং পিতা রজ্জে অভিসিঞ্চিতুকামো হুত্ৰা ‘‘সহাযস্স কির মে বারাণসিরঞ্ঞো ধীতা অত্থি, তমেৰস্স অগ্গমহেসিং করিস্সামী’’তি তস্সা অত্থায বহুং পণ্ণাকারং দত্ৰা অমচ্চে পেসেসি. তেসং অনাগতকালেযেৰ বারাণসিরাজা দেৰিং পুচ্ছি ‘‘ভদ্দে, মাতুগামস্স নাম কিং অতিরেকদুক্খ’’ন্তি? ‘‘সপত্তিরোসদুক্খং দেৰা’’তি. ‘‘তেন হি, ভদ্দে, অম্হাকং একং ধীতরং সুমেধাদেৰিং তম্হা দুক্খা মোচেত্ৰা যো এতং একিকমেৰ গণ্হিস্সতি, তস্স দস্সামা’’তি আহ. সো তেহি অমচ্চেহি আগন্ত্ৰা তস্সা নামে গহিতে ‘‘তাতা, কামং মযা পুব্বে ময্হং সহাযস্স পটিঞ্ঞা কতা, ইমং পন মযং ইত্থিঘটায অন্তরে ন খিপিতুকামা, যো এতং একিকমেৰ গণ্হাতি, তস্স দাতুকামম্হা’’তি আহ. তে রঞ্ঞো সন্তিকং পহিণিংসু. রাজা পন ‘‘অম্হাকং রজ্জং মহন্তং, সত্তযোজনিকং মিথিলনগরং, তীণি যোজনসতানি রট্ঠপরিচ্ছেদো, হেট্ঠিমন্তেন সোল়স ইত্থিসহস্সানি লদ্ধুং ৰট্টতী’’তি ৰত্ৰা ন রোচেসি.

সুরুচিকুমারো পন সুমেধায রূপসম্পদং সুত্ৰা সৰনসংসগ্গেন বজ্ঝিত্ৰা ‘‘অহং তং একিকমেৰ গণ্হিস্সামি, ন ময্হং ইত্থিঘটায অত্থো, তমেৰ আনেন্তূ’’তি মাতাপিতূনং পেসেসি. তে তস্স মনং অভিন্দিত্ৰা বহুং ধনং পেসেত্ৰা মহন্তেন পরিৰারেন তং আনেত্ৰা কুমারস্স অগ্গমহেসিং কত্ৰা একতোৰ অভিসিঞ্চিংসু. সো সুরুচিমহারাজা নাম হুত্ৰা ধম্মেন রজ্জং কারেন্তো তায সদ্ধিং পিযসংৰাসং ৰসি. সা পন দস ৰস্সসহস্সানি তস্স গেহে ৰসন্তী নেৰ পুত্তং, ন ধীতরং লভি. অথ নাগরা সন্নিপতিত্ৰা রাজঙ্গণে উপক্কোসিত্ৰা ‘‘কিমেত’’ন্তি ৰুত্তে ‘‘রঞ্ঞো দোসো নত্থি, ৰংসানুপালকো পন ৰো পুত্তো ন ৰিজ্জতি, তুম্হাকং একাৰ দেৰী, রাজকুলে চ নাম হেট্ঠিমন্তেন সোল়সহি ইত্থিসহস্সেহি ভৰিতব্বং, ইত্থিঘটং গণ্হ, দেৰ, অদ্ধা তাসু পুঞ্ঞৰতী পুত্তং লভিস্সতী’’তি ৰত্ৰা ‘‘তাতা, কিং কথেথ, ‘অহং অঞ্ঞং ন গণ্হিস্সামী’তি পটিঞ্ঞং দত্ৰা মযা এসা আনীতা, ন সক্কা মুসাৰাদং কাতুং, ন ময্হং ইত্থিঘটায অত্থো’’তি রঞ্ঞা পটিক্খিত্তা পক্কমিংসু.

সুমেধা তং কথং সুত্ৰা ‘‘রাজা তাৰ সচ্চৰাদিতায অঞ্ঞা ইত্থিযো ন আনেসি, অহমেৰ পনস্স আনেস্সামী’’তি রঞ্ঞো মাতুসমভরিযট্ঠানে ঠত্ৰা অত্তনো রুচিযাৰ খত্তিযকঞ্ঞানং সহস্সং, অমচ্চকঞ্ঞানং সহস্সং, গহপতিকঞ্ঞানং সহস্সং, সব্বসমযনাটকিত্থীনং সহস্সন্তি চত্তারি ইত্থিসহস্সানি আনেসি. তাপি দস ৰস্সসহস্সানি রাজকুলে ৰসিত্ৰা নেৰ পুত্তং, ন ধীতরং লভিংসু. এতেনেৰুপাযেন অপরানিপি তিক্খত্তুং চত্তারি চত্তারি সহস্সানি আনেসি. তাপি নেৰ পুত্তং, ন ধীতরং লভিংসু. এত্তাৰতা সোল়স ইত্থিসহস্সানি অহেসুং. চত্তালীস ৰস্সসহস্সানি অতিক্কমিংসু, তানি তায একিকায ৰুত্থেহি দসহি সহস্সেহি সদ্ধিং পঞ্ঞাস ৰস্সসহস্সানি হোন্তি. অথ নাগরা সন্নিপতিত্ৰা পুন উপক্কোসিত্ৰা ‘‘কিমেত’’ন্তি ৰুত্তে ‘‘দেৰ, তুম্হাকং ইত্থিযো পুত্তং পত্থেতুং আণাপেথা’’তি ৰদিংসু. রাজা ‘‘সাধূ’’তি সম্পটিচ্ছিত্ৰা ‘‘তুম্হে পুত্তং পত্থেথা’’তি আহ. তা ততো পট্ঠায পুত্তং পত্থযমানা নানাদেৰতা নমস্সন্তি, নানাৰতানি চরন্তি, পুত্তো নুপ্পজ্জতেৰ. অথ রাজা সুমেধং আহ ‘‘ভদ্দে, ত্ৰম্পি পুত্তং পত্থেহী’’তি. সা ‘‘সাধূ’’তি পন্নরসউপোসথদিৰসে অট্ঠঙ্গসমন্নাগতং উপোসথং সমাদায সিরিগব্ভে সীলানি আৰজ্জমানা কপ্পিযমঞ্চকে নিসীদি. সেসা অজৰতগোৰতা হুত্ৰা পুত্তং অলভিত্ৰা উয্যানং অগমংসু.

সুমেধায সীলতেজেন সক্কস্স ভৰনং কম্পি. তদা সক্কো আৰজ্জেন্তো ‘‘সুমেধা পুত্তং পত্থেতি, পুত্তমস্সা দস্সামি, ন খো পন সক্কা যং ৰা তং ৰা দাতুং, অনুচ্ছৰিকমস্সা পুত্তং উপধারেস্সামী’’তি উপধারেন্তো নল়কারদেৰপুত্তং পস্সি. সো হি পুঞ্ঞসম্পন্নো সত্তো পুরিমত্তভাৰে বারাণসিযং ৰসন্তো ৰপ্পকালে খেত্তং গচ্ছন্তো একং পচ্চেকবুদ্ধং দিস্ৰা দাসকম্মকরে ‘‘ৰপথা’’তি পহিণি. সযং নিৰত্তিত্ৰা পচ্চেকবুদ্ধং গেহং নেত্ৰা ভোজেত্ৰা পুন গঙ্গাতীরং আনেত্ৰা পুত্তেন সদ্ধিং একতো হুত্ৰা উদুম্বরভিত্তিপাদং নল়ভিত্তিকং পণ্ণসালং কত্ৰা দ্ৰারং যোজেত্ৰা চঙ্কমং কত্ৰা পচ্চেকবুদ্ধং তত্থেৰ তেমাসং ৰসাপেত্ৰা ৰুত্থৰস্সং দ্ৰে পিতাপুত্তা তিচীৰরেন অচ্ছাদেত্ৰা উয্যোজেসুং. এতেনেৰ নিযামেন সত্তট্ঠ পচ্চেকবুদ্ধে তায পণ্ণসালায ৰসাপেত্ৰা তিচীৰরানি অদংসু. ‘‘দ্ৰে পিতাপুত্তা নল়কারা হুত্ৰা গঙ্গাতীরে ৰেল়ুং উপধারেন্তা পচ্চেকবুদ্ধং দিস্ৰা এৰমকংসূ’’তিপি ৰদন্তিযেৰ.

তে কালং কত্ৰা তাৰতিংসভৰনে নিব্বত্তিত্ৰা ছসু কামাৰচরসগ্গেসু অনুলোমপটিলোমেন মহন্তং দেৰিস্সরিযং অনুভৰন্তা ৰিচরন্তি. তে ততো চৰিত্ৰা উপরিদেৰলোকে নিব্বত্তিতুকামা হোন্তি. সক্কো তথা গতভাৰং ঞত্ৰা তেসু একস্স ৰিমানদ্ৰারং গন্ত্ৰা তং আগন্ত্ৰা ৰন্দিত্ৰা ঠিতং আহ – ‘‘মারিস, তযা মনুস্সলোকং গন্তুং ৰট্টতী’’তি. ‘‘মহারাজ, মনুস্সলোকো নাম জেগুচ্ছো পটিকূলো, তত্থ ঠিতা দানাদীনি পুঞ্ঞানি কত্ৰা দেৰলোকং পত্থেন্তি, তত্থ গন্ত্ৰা কিং করিস্সামী’’তি. ‘‘মারিস, দেৰলোকে পরিভুঞ্জিতব্বসম্পত্তিং মনুস্সলোকে পরিভুঞ্জিস্সসি, পঞ্চৰীসতিযোজনুব্বেধে নৰযোজনআযামে অট্ঠযোজনৰিত্থারে রতনপাসাদে ৰসিস্সসি, অধিৰাসেহী’’তি. সো অধিৰাসেসি. সক্কো তস্স পটিঞ্ঞং গহেত্ৰা ইসিৰেসেন রাজুয্যানং গন্ত্ৰা তাসং ইত্থীনং উপরি আকাসে চঙ্কমন্তো অত্তানং দস্সেত্ৰা ‘‘কস্সাহং পুত্তৰরং দম্মি, কা পুত্তৰরং গণ্হিস্সতী’’তি আহ. ‘‘ভন্তে, ময্হং দেহি, ময্হং দেহী’’তি সোল়স ইত্থিসহস্সানি হত্থে উক্খিপিংসু. ততো সক্কো আহ – ‘‘অহং সীলৰতীনং পুত্তং দম্মি, তুম্হাকং কিং সীলং, কো আচারো’’তি. তা উক্খিত্তহত্থে সমঞ্ছিত্ৰা ‘‘সচে সীলৰতিযা দাতুকামো, সুমেধায সন্তিকং গচ্ছাহী’’তি ৰদিংসু. সো আকাসেনেৰ গন্ত্ৰা তস্সা ৰাসাগারে সীহপঞ্জরে অট্ঠাসি.

অথস্সা তা ইত্থিযো আরোচেসুং ‘‘এথ, দেৰি, সক্কো দেৰরাজা ‘তুম্হাকং পুত্তৰরং দস্সামী’তি আকাসেনাগন্ত্ৰা সীহপঞ্জরে ঠিতো’’তি. সা গরুপরিহারেনাগন্ত্ৰা সীহপঞ্জরং উগ্ঘাটেত্ৰা ‘‘সচ্চং কির, ভন্তে, তুম্হে সীলৰতিযা পুত্তৰরং দেথা’’তি আহ. ‘‘আম দেৰী’’তি. ‘‘তেন হি ময্হং দেথা’’তি. ‘‘কিং পন তে সীলং, কথেহি, সচে মে রুচ্চতি, দস্সামি তে পুত্তৰর’’ন্তি. সা তস্স ৰচনং সুত্ৰা ‘‘তেন হি সুণাহী’’তি ৰত্ৰা অত্তনো সীলগুণং কথেন্তী পন্নরস গাথা অভাসি –

১০২.

‘‘মহেসী সুরুচিনো ভরিযা, আনীতা পঠমং অহং;

দস ৰস্সসহস্সানি, যং মং সুরুচিমানযি.

১০৩.

‘‘সাহং ব্রাহ্মণ রাজানং, ৰেদেহং মিথিলগ্গহং;

নাভিজানামি কাযেন, ৰাচায উদ চেতসা;

সুরুচিং অতিমঞ্ঞিত্থ, আৰি ৰা যদি ৰা রহো.

১০৪.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৫.

‘‘ভত্তু মম সস্সু মাতা, পিতা চাপি চ সস্সুরো;

তে মং ব্রহ্মে ৰিনেতারো, যাৰ অট্ঠংসু জীৰিতং.

১০৬.

‘‘সাহং অহিংসারতিনী, কামসা ধম্মচারিনী;

সক্কচ্চং তে উপট্ঠাসিং, রত্তিন্দিৰমতন্দিতা.

১০৭.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৮.

‘‘সোল়সিত্থিসহস্সানি, সহভরিযানি ব্রাহ্মণ;

তাসু ইস্সা ৰা কোধো ৰা, নাহু ময্হং কুদাচনং.

১০৯.

‘‘হিতেন তাসং নন্দামি, ন চ মে কাচি অপ্পিযা;

অত্তানংৰানুকম্পামি, সদা সব্বা সপত্তিযো.

১১০.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১১.

‘‘দাসে কম্মকরে পেস্সে, যে চঞ্ঞে অনুজীৰিনো;

পেসেমি সহধম্মেন, সদা পমুদিতিন্দ্রিযা.

১১২.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৩.

‘‘সমণে ব্রাহ্মণে চাপি, অঞ্ঞে চাপি ৰনিব্বকে;

তপ্পেমি অন্নপানেন, সদা পযতপাণিনী.

১১৪.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৫.

‘‘চাতুদ্দসিং পঞ্চদ্দসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং;

উপোসথং উপৰসামি, সদা সীলেসু সংৰুতা.

১১৬.

‘‘এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা’’তি.

তত্থ মহেসীতি অগ্গমহেসী. সুরুচিনোতি সুরুচিরঞ্ঞো. পঠমন্তি সোল়সন্নং ইত্থিসহস্সানং সব্বপঠমং. যং মন্তি যস্মিং কালে মং সুরুচি আনযি, ততো পট্ঠায অহং দস ৰস্সসহস্সানি একিকাৰ ইমস্মিং গেহে ৰসিং. অতিমঞ্ঞিত্থাতি মুহুত্তম্পি সম্মুখা ৰা পরম্মুখা ৰা অতিমঞ্ঞিন্তি ইদং অতিক্কমিত্ৰা মঞ্ঞনং ন জানামি ন সরামি. ইসেতি তং আলপতি.

তে মন্তি সসুরো চ সস্সু চাতি তে উভোপি মং ৰিনেতারো, তেহি ৰিনীতা অম্হি, তে মে যাৰ জীৰিংসু, তাৰ ওৰাদমদংসু. অহিংসারতিনীতি অহিংসাসঙ্খাতায রতিযা সমন্নাগতা. মযা হি কুন্থকিপিল্লিকোপি ন হিংসিতপুব্বো. কামসাতি একন্তেনেৰ. ধম্মচারিনীতি দসকুসলকম্মপথেসু পূরেমি. উপট্ঠাসিন্তি পাদপরিকম্মাদীনি কিচ্চানি করোন্তী উপট্ঠহিং.

সহভরিযানীতি মযা সহ একসামিকস্স ভরিযভূতানি. নাহূতি কিলেসং নিস্সায ইস্সাধম্মো ৰা কোধধম্মো ৰা ময্হং ন ভূতপুব্বো. হিতেনাতি যং তাসং হিতং, তেনেৰ নন্দামি, উরে ৰুত্থধীতরো ৰিয তা দিস্ৰা তুস্সামি. কাচীতি তাসু একাপি ময্হং অপ্পিযা নাম নত্থি, সব্বাপি পিযকাযেৰ. অনুকম্পামীতি মুদুচিত্তেন সব্বা সোল়সসহস্সাপি তা অত্তানং ৰিয অনুকম্পামি.

সহধম্মেনাতি নযেন কারণেন যো যং কাতুং সক্কোতি, তং তস্মিং কম্মে পযোজেমীতি অত্থো. পমুদিতিন্দ্রিযাতি পেসেন্তী চ নিচ্চং পমুদিতিন্দ্রিযাৰ হুত্ৰা পেসেমি, ‘‘অরে দুট্ঠ দাস ইদং নাম করোহী’তি এৰং কুজ্ঝিত্ৰা ন মে কোচি কত্থচি পেসিতপুব্বো. পযতপাণিনীতি ধোতহত্থা পসারিতহত্থাৰ হুত্ৰা. পাটিহারিযপক্খঞ্চাতি অট্ঠমীচাতুদ্দসীপন্নরসীনং পচ্চুগ্গমনানুগ্গমনৰসেন চত্তারো দিৰসা. সদাতি নিচ্চকালং পঞ্চসু সীলেসু সংৰুতা, তেহি পিহিতগোপিতত্তভাৰাৰ হোমীতি.

এৰং তস্সা গাথায সতেনপি সহস্সেনপি ৰণ্ণিযমানানং গুণানং পমাণং নাম নত্থি, তায পন্নরসহি গাথাহি অত্তনো গুণানং ৰণ্ণিতকালেযেৰ সক্কো অত্তনো বহুকরণীযতায তস্সা কথং অৰিচ্ছিন্দিত্ৰা ‘‘পহূতা অব্ভুতাযেৰ তে গুণা’’তি তং পসংসন্তো গাথাদ্ৰযমাহ –

১১৭.

‘‘সব্বেৰ তে ধম্মগুণা, রাজপুত্তি যসস্সিনি;

সংৰিজ্জন্তি তযি ভদ্দে, যে ত্ৰং কিত্তেসি অত্তনি.

১১৮.

‘‘খত্তিযো জাতিসম্পন্নো, অভিজাতো যসস্সিমা;

ধম্মরাজা ৰিদেহানং, পুত্তো উপ্পজ্জতে তৰা’’তি.

তত্থ ধম্মগুণাতি সভাৰগুণা ভূতগুণা. সংৰিজ্জন্তীতি যে তযা ৰুত্তা, তে সব্বেৰ তযি উপলব্ভন্তি. অভিজাতোতি অতিজাতো সুদ্ধজাতো. যসস্সিমাতি যসসম্পন্নেন পরিৰারসম্পন্নেন সমন্নাগতো. উপ্পজ্জতেতি এৰরূপো পুত্তো তৰ উপ্পজ্জিস্সতি, মা চিন্তযীতি.

সা তস্স ৰচনং সুত্ৰা সোমনস্সজাতা তং পুচ্ছন্তী দ্ৰে গাথা অভাসি –

১১৯.

‘‘দুম্মী রজোজল্লধরো, অঘে ৰেহাযসং ঠিতো;

মনুঞ্ঞং ভাসসে ৰাচং, যং ময্হং হদযঙ্গমং.

১২০.

‘‘দেৰতানুসি সগ্গম্হা, ইসি ৰাসি মহিদ্ধিকো;

কো ৰাসি ত্ৰং অনুপ্পত্তো, অত্তানং মে পৰেদযা’’তি.

তত্থ দুম্মীতি অনঞ্জিতামণ্ডিতো সক্কো আগচ্ছন্তো রমণীযেন তাপসৰেসেন আগতো, পব্বজিতৰেসেন আগতত্তা পন সা এৰমাহ. অঘেতি অপ্পটিঘে ঠানে. যং ময্হন্তি যং এতং মনুঞ্ঞং ৰাচং ময্হং ভাসসি, তং ভাসমানো ত্ৰং দেৰতানুসি সগ্গম্হা ইধাগতো. ইসি ৰাসি মহিদ্ধিকোতি যক্খাদীসু কো ৰা ত্ৰং অসি ইধানুপ্পত্তো, অত্তানং মে পৰেদয, যথাভূতং কথেহীতি ৰদতি.

সক্কো তস্সা কথেন্তো ছ গাথা অভাসি –

১২১.

‘‘যং দেৰসঙ্ঘা ৰন্দন্তি, সুধম্মাযং সমাগতা;

সোহং সক্কো সহস্সক্খো, আগতোস্মি তৰন্তিকে.

১২২.

‘‘ইত্থিযো জীৰলোকস্মিং, যা হোতি সমচারিনী;

মেধাৰিনী সীলৰতী, সস্সুদেৰা পতিব্বতা.

১২৩.

‘‘তাদিসায সুমেধায, সুচিকম্মায নারিযা;

দেৰা দস্সনমাযন্তি, মানুসিযা অমানুসা.

১২৪.

‘‘ত্ৰঞ্চ ভদ্দে সুচিণ্ণেন, পুব্বে সুচরিতেন চ;

ইধ রাজকুলে জাতা, সব্বকামসমিদ্ধিনী.

১২৫.

‘‘অযঞ্চ তে রাজপুত্তি, উভযত্থ কটগ্গহো;

দেৰলোকূপপত্তী চ, কিত্তী চ ইধ জীৰিতে.

১২৬.

‘‘চিরং সুমেধে সুখিনী, ধম্মমত্তনি পালয;

এসাহং তিদিৰং যামি, পিযং মে তৰ দস্সন’’ন্তি.

তত্থ সহস্সক্খোতি অত্থসহস্সস্স তংমুহুত্তং দস্সনৰসেন সহস্সক্খো. ইত্থিযোতি ইত্থী. সমচারিনীতি তীহি দ্ৰারেহি সমচরিযায সমন্নাগতা. তাদিসাযাতি তথারূপায. সুমেধাযাতি সুপঞ্ঞায. উভযত্থ কটগ্গহোতি অযং তৰ ইমস্মিঞ্চ অত্তভাৰে অনাগতে চ জযগ্গাহো. তেসু অনাগতে দেৰলোকুপ্পত্তি চ ইধ জীৰিতে পৰত্তমানে কিত্তি চাতি অযং উভযত্থ কটগ্গহো নাম. ধম্মন্তি এৰং সভাৰগুণং চিরং অত্তনি পালয. এসাহন্তি এসো অহং. পিযং মেতি ময্হং তৰ দস্সনং পিযং.

দেৰলোকে পন মে কিচ্চকরণীযং অত্থি, তস্মা গচ্ছামি, ত্ৰং অপ্পমত্তা হোহীতি তস্সা ওৰাদং দত্ৰা পক্কামি. নল়কারদেৰপুত্তো পন পচ্চূসকালে চৰিত্ৰা তস্সা কুচ্ছিযং পটিসন্ধিং গণ্হি. সা গব্ভস্স পতিট্ঠিতভাৰং ঞত্ৰা রঞ্ঞো আরোচেসি, রাজা গব্ভস্স পরিহারং অদাসি. সা দসমাসচ্চযেন পুত্তং ৰিজাযি, ‘‘মহাপনাদো’’তিস্স নামং করিংসু. উভযরট্ঠৰাসিনো ‘‘সামিপুত্তস্স নো খীরমূল’’ন্তি একেকং কহাপণং রাজঙ্গণে খিপিংসু, মহাধনরাসি অহোসি. রঞ্ঞা পটিক্খিত্তাপি ‘‘সামিপুত্তস্স নো ৰড্ঢিতকালে পরিব্বযো ভৰিস্সতী’’তি অগ্গহেত্ৰাৰ পক্কমিংসু. কুমারো পন মহাপরিৰারেন ৰড্ঢিত্ৰা ৰযপ্পত্তো সোল়সৰস্সকালেযেৰ সব্বসিপ্পেসু নিপ্ফত্তিং পাপুণি. রাজা পুত্তস্স ৰযং ওলোকেত্ৰা দেৰিং আহ – ‘‘ভদ্দে, পুত্তস্স মে রজ্জাভিসেককালো, রমণীযমস্স পাসাদং কারেত্ৰা অভিসেকং করিস্সামী’’তি. সা ‘‘সাধু দেৰা’’তি সম্পটিচ্ছি. রাজা ৰত্থুৰিজ্জাচরিযে পক্কোসাপেত্ৰা ‘‘তাতা, ৰড্ঢকিং গহেত্ৰা অম্হাকং নিৰেসনতো অৰিদূরে পুত্তস্স মে পাসাদং মাপেথ, রজ্জেন নং অভিসিঞ্চিস্সামা’’তি আহ. তে ‘‘সাধু, দেৰা’’তি ভূমিপ্পদেসং ৰীমংসন্তি.

তস্মিং খণে সক্কস্স ভৰনং উণ্হাকারং দস্সেসি. সো তং কারণং ঞত্ৰা ৰিস্সকম্মং আমন্তেত্ৰা ‘‘গচ্ছ, তাত, মহাপনাদকুমারস্স আযামেন নৰযোজনিকং, ৰিত্থারতো অট্ঠযোজনিকং, উব্বেধেন পঞ্চৰীসতিযোজনিকং, রতনপাসাদং মাপেহী’’তি পেসেসি. সো ৰড্ঢকীৰেসেন ৰড্ঢকীনং সন্তিকং গন্ত্ৰা ‘‘তুম্হে পাতরাসং ভুঞ্জিত্ৰা এথা’’তি তে পেসেত্ৰা দণ্ডকেন ভূমিং পহরি, তাৰদেৰ ৰুত্তপ্পকারো সত্তভূমিকো পাসাদো উট্ঠহি. মহাপনাদস্স পাসাদমঙ্গলং, ছত্তমঙ্গলং, আৰাহমঙ্গলন্তি তীণি মঙ্গলানি একতোৰ অহেসুং. মঙ্গলট্ঠানে উভযরট্ঠৰাসিনো সন্নিপতিত্ৰা মঙ্গলচ্ছণেন সত্ত ৰস্সানি ৰীতিনামেসুং. নেৰ নে রাজা উয্যোজেসি, তেসং ৰত্থালঙ্কারখাদনীযভোজনীযাদি সব্বং রাজকুলসন্তকমেৰ অহোসি. তে সত্তসংৰচ্ছরচ্চযেন উপক্কোসিত্ৰা সুরুচিমহারাজেন ‘‘কিমেত’’ন্তি পুট্ঠা ‘‘মহারাজ, অম্হাকং মঙ্গলং ভুঞ্জন্তানং সত্ত ৰস্সানি গতানি, কদা মঙ্গলস্স ওসানং ভৰিস্সতী’’তি আহংসু. ততো রাজা ‘‘তাতা, পুত্তেন মে এত্তকং কালং ন হসিতপুব্বং, যদা সো হসিস্সতি, তদা গমিস্সথা’’তি আহ. অথ মহাজনো ভেরিং চরাপেত্ৰা নটে সন্নিপাতেসি. ছ নটসহস্সানি সন্নিপতিত্ৰা সত্ত কোট্ঠাসা হুত্ৰা নচ্চন্তা রাজানং হসাপেতুং নাসক্খিংসু. তস্স কির দীঘরত্তং দিব্বনাটকানং দিট্ঠত্তা তেসং নচ্চং অমনুঞ্ঞং অহোসি.

তদা ভণ্ডুকণ্ডো চ পণ্ডুকণ্ডো চাতি দ্ৰে নাটকজেট্ঠকা ‘‘মযং রাজানং হসাপেস্সামা’’তি রাজঙ্গণং পৰিসিংসু. তেসু ভণ্ডুকণ্ডো তাৰ রাজদ্ৰারে মহন্তং অতুলং নাম অম্বং মাপেত্ৰা সুত্তগুল়ং খিপিত্ৰা তস্স সাখায লগ্গাপেত্ৰা সুত্তেন অতুলম্বং অভিরুহি. অতুলম্বোতি কির ৰেস্সৰণস্স অম্বো. অথ তম্পি ৰেস্সৰণস্স দাসা গহেত্ৰা অঙ্গপচ্চঙ্গানি ছিন্দিত্ৰা পাতেসুং, সেসনাটকা তানি সমোধানেত্ৰা উদকেন অভিসিঞ্চিংসু. সো পুপ্ফপটং নিৰাসেত্ৰা চ পারুপিত্ৰা চ নচ্চন্তোৰ উট্ঠহি. মহাপনাদো তম্পি দিস্ৰা নেৰ হসি. পণ্ডুকণ্ডো নটো রাজঙ্গণে দারুচিতকং কারেত্ৰা অত্তনো পরিসায সদ্ধিং অগ্গিং পাৰিসি. তস্মিং নিব্বুতে চিতকং উদকেন অভিসিঞ্চিংসু. সো সপরিসো পুপ্ফপটং নিৰাসেত্ৰা চ পারুপিত্ৰা চ নচ্চন্তোৰ উট্ঠহি. তম্পি দিস্ৰা রাজা নেৰ হসি. ইতি তং হসাপেতুং অসক্কোন্তা মনুস্সা উপদ্দুতা অহেসুং.

সক্কো তং কারণং ঞত্ৰা ‘‘গচ্ছ, তাত, মহাপনাদং হসাপেত্ৰা এহী’’তি দেৰনটং পেসেসি. সো আগন্ত্ৰা রাজঙ্গণে আকাসে ঠত্ৰা উপড্ঢঅঙ্গং নাম দস্সেসি, একোৰ হত্থো, একোৰ পাদো, একং অক্খি, একা দাঠা নচ্চতি চলতি ফন্দতি, সেসং নিচ্চলমহোসি. তং দিস্ৰা মহাপনাদো থোকং হসিতং অকাসি. মহাজনো পন হসন্তো হসন্তো হাসং সন্ধারেতুং সতিং পচ্চুপট্ঠাপেতুং অসক্কোন্তো অঙ্গানি ৰিস্সজ্জেত্ৰা রাজঙ্গণেযেৰ পতি, তস্মিং কালে মঙ্গলং নিট্ঠিতং. সেসমেত্থ ‘‘পনাদো নাম সো রাজা, যস্স যূপো সুৰণ্ণযো’’তি মহাপনাদজাতকেন ৰণ্ণেতব্বং. রাজা মহাপনাদো দানাদীনি পুঞ্ঞানি কত্ৰা আযুপরিযোসানে দেৰলোকমেৰ গতো.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, ৰিসাখা পুব্বেপি মম সন্তিকা ৰরং লভিযেৰা’’তি ৰত্ৰা জাতকং সমোধানেসি – ‘‘তদা মহাপনাদো ভদ্দজি অহোসি, সুমেধাদেৰী ৰিসাখা, ৰিস্সকম্মো আনন্দো, সক্কো পন অহমেৰ অহোসি’’ন্তি.

সুরুচিজাতকৰণ্ণনা ছট্ঠা.

[৪৯০] ৭. পঞ্চুপোসথজাতকৰণ্ণনা

অপ্পোস্সুক্কো দানি তুৰং কপোতাতি ইদং সত্থা জেতৰনে ৰিহরন্তো উপোসথিকে পঞ্চসতে উপাসকে আরব্ভ কথেসি. তদা হি সত্থা ধম্মসভাযং চতুপরিসমজ্ঝে অলঙ্কতবুদ্ধাসনে নিসীদিত্ৰা মুদুচিত্তেন পরিসং ওলোকেত্ৰা ‘‘অজ্জ উপাসকানং কথং পটিচ্চ দেসনা সমুট্ঠহিস্সতী’’তি ঞত্ৰা উপাসকে আমন্তেত্ৰা ‘‘উপোসথিকত্থ উপাসকা’’তি পুচ্ছিত্ৰা ‘‘আম, ভন্তে’’তি ৰুত্তে ‘‘সাধু ৰো কতং, উপোসথো নামেস পোরাণকপণ্ডিতানং ৰংসো, পোরাণকপণ্ডিতা হি রাগাদিকিলেসনিগ্গহত্থং উপোসথৰাসং ৰসিংসূ’’তি ৰত্ৰা তেহি যাচিতো অতীতং আহরি.

অতীতে মগধরট্ঠাদীনং তিণ্ণং রট্ঠানং অন্তরে অটৰী অহোসি. বোধিসত্তো মগধরট্ঠে ব্রাহ্মণমহাসালকুলে নিব্বত্তিত্ৰা ৰযপ্পত্তো কামে পহায নিক্খমিত্ৰা তং অটৰিং পৰিসিত্ৰা অস্সমং কত্ৰা ইসিপব্বজ্জং পব্বজিত্ৰা ৰাসং কপ্পেসি. তস্স পন অস্সমস্স অৰিদূরে একস্মিং ৰেল়ুগহনে অত্তনো ভরিযায সদ্ধিং কপোতসকুণো ৰসতি, একস্মিং ৰম্মিকে অহি, একস্মিং ৰনগুম্বে সিঙ্গালো, একস্মিং ৰনগুম্বে অচ্ছো. তে চত্তারোপি কালেন কালং ইসিং উপসঙ্কমিত্ৰা ধম্মং সুণন্তি.

অথেকদিৰসং কপোতো ভরিযায সদ্ধিং কুলাৰকা নিক্খমিত্ৰা গোচরায পক্কামি. তস্স পচ্ছতো গচ্ছন্তিং কপোতিং একো সেনো গহেত্ৰা পলাযি. তস্সা ৰিরৰসদ্দং সুত্ৰা কপোতো নিৰত্তিত্ৰা ওলোকেন্তো তং তেন হরিযমানং পস্সি. সেনোপি নং ৰিরৰন্তিংযেৰ মারেত্ৰা খাদি. কপোতো তায ৰিযোগেন রাগপরিল়াহেন পরিডয্হমানো চিন্তেসি ‘‘অযং রাগো মং অতিৰিয কিলমেতি, ন ইদানি ইমং অনিগ্গহেত্ৰা গোচরায পক্কমিস্সামী’’তি. সো গোচরপথং পচ্ছিন্দিত্ৰা তাপসস্স সন্তিকং গন্ত্ৰা রাগনিগ্গহায উপোসথং সমাদিযিত্ৰা একমন্তং নিপজ্জি.

সপ্পোপি ‘‘গোচরং পরিযেসিস্সামী’’তি ৰসনট্ঠানা নিক্খমিত্ৰা পচ্চন্তগামে গাৰীনং ৰিচরণট্ঠানে গোচরং পরিযেসতি. তদা গামভোজকস্স সব্বসেতো মঙ্গলউসভো গোচরং গহেত্ৰা একস্মিং ৰম্মিকপাদে জণ্ণুনা পতিট্ঠায সিঙ্গেহি মত্তিকং গণ্হন্তো কীল়তি, সপ্পো গাৰীনং পদসদ্দেন ভীতো তং ৰম্মিকং পৰিসিতুং পক্কন্তো. অথ নং উসভো পাদেন অক্কমি. সো তং কুজ্ঝিত্ৰা ডংসি, উসভো তত্থেৰ জীৰিতক্খযং পত্তো. গামৰাসিনো ‘‘উসভো কির মতো’’তি সুত্ৰা সব্বে একতো আগন্ত্ৰা রোদিত্ৰা কন্দিত্ৰা তং গন্ধমালাদীহি পূজেত্ৰা আৰাটে নিখণিত্ৰা পক্কমিংসু. সপ্পো তেসং গতকালে নিক্খমিত্ৰা ‘‘অহং কোধং নিস্সায ইমং জীৰিতা ৰোরোপেত্ৰা মহাজনস্স হদযে সোকং পৰেসেসিং, ন দানি ইমং কোধং অনিগ্গহেত্ৰা গোচরায পক্কমিস্সামী’’তি চিন্তেত্ৰা নিৰত্তিত্ৰা তং অস্সমং গন্ত্ৰা কোধনিগ্গহায উপোসথং সমাদিযিত্ৰা একমন্তং নিপজ্জি.

সিঙ্গালোপি গোচরং পরিযেসন্তো একং মতহত্থিং দিস্ৰা ‘‘মহা মে গোচরো লদ্ধো’’তি তুট্ঠো গন্ত্ৰা সোণ্ডাযং ডংসি, থম্ভে দট্ঠকালো ৰিয অহোসি. তত্থ অস্সাদং অলভিত্ৰা দন্তে ডংসি, পাসাণে দট্ঠকালো ৰিয অহোসি. কুচ্ছিযং ডংসি, কুসুলে দট্ঠকালো ৰিয অহোসি. নঙ্গুট্ঠে ডংসি, অযসলাকে দট্ঠকালো ৰিয অহোসি. ৰচ্চমগ্গে ডংসি, ঘতপূৰে দট্ঠকালো ৰিয অহোসি. সো লোভৰসেন খাদন্তো অন্তোকুচ্ছিযং পাৰিসি, তত্থ ছাতকালে মংসং খাদতি, পিপাসিতকালে লোহিতং পিৰতি, নিপজ্জনকালে অন্তানি চ পপ্ফাসঞ্চ অৰত্থরিত্ৰা নিপজ্জি. সো ‘‘ইধেৰ মে অন্নপানঞ্চ সযনঞ্চ নিপ্ফন্নং, অঞ্ঞত্থ কিং করিস্সামী’’তি চিন্তেত্ৰা তত্থেৰ অভিরতো বহি অনিক্খমিত্ৰা অন্তোকুচ্ছিযংযেৰ ৰসি. অপরভাগে ৰাতাতপেন হত্থিকুণপে সুক্খন্তে করীসমগ্গো পিহিতো, সিঙ্গালো অন্তোকুচ্ছিযং নিপজ্জমানো অপ্পমংসলোহিতো পণ্ডুসরীরো হুত্ৰা নিক্খমনমগ্গং ন পস্সি. অথেকদিৰসং অকালমেঘো ৰস্সি, করীসমগ্গো তেমিযমানো মুদু হুত্ৰা ৰিৰরং দস্সেসি. সিঙ্গালো ছিদ্দং দিস্ৰা ‘‘অতিচিরম্হি কিলন্তো, ইমিনা ছিদ্দেন পলাযিস্সামী’’তি করীসমগ্গং সীসেন পহরি. তস্স সম্বাধট্ঠানেন ৰেগেন নিক্খন্তস্স সিন্নসরীরস্স সব্বানি লোমানি করীসমগ্গে লগ্গানি, তালকন্দো ৰিয নিল্লোমসরীরো হুত্ৰা নিক্খমি. সো ‘‘লোভং নিস্সায মযা ইদং দুক্খং অনুভূতং, ন দানি ইমং অনিগ্গহেত্ৰা গোচরং গণ্হিস্সামী’’তি চিন্তেত্ৰা তং অস্সমং গন্ত্ৰা লোভনিগ্গহত্থায উপোসথং সমাদিযিত্ৰা একমন্তং নিপজ্জি.

অচ্ছোপি অরঞ্ঞা নিক্খমিত্ৰা অত্রিচ্ছাভিভূতো মল্লরট্ঠে পচ্চন্তগামং গতো. গামৰাসিনো ‘‘অচ্ছো কির আগতো’’তি ধনুদণ্ডাদিহত্থা নিক্খমিত্ৰা তেন পৰিট্ঠং গুম্বং পরিৰারেসুং. সো মহাজনেন পরিৰারিতভাৰং ঞত্ৰা নিক্খমিত্ৰা পলাযি, পলাযন্তমেৰ তং ধনূহি চেৰ দণ্ডাদীহি চ পোথেসুং. সো ভিন্নেন সীসেন লোহিতেন গলন্তেন অত্তনো ৰসনট্ঠানং গন্ত্ৰা ‘‘ইদং দুক্খং মম অত্রিচ্ছালোভৰসেন উপ্পন্নং, ন দানি ইমং অনিগ্গহেত্ৰা গোচরং গণ্হিস্সামী’’তি চিন্তেত্ৰা তং অস্সমং গন্ত্ৰা অত্রিচ্ছানিগ্গহায উপোসথং সমাদিযিত্ৰা একমন্তং নিপজ্জি.

তাপসোপি অত্তনো জাতিং নিস্সায মানৰসিকো হুত্ৰা ঝানং উপ্পাদেতুং ন সক্কোতি. অথেকো পচ্চেকবুদ্ধো তস্স মাননিস্সিতভাৰং ঞত্ৰা ‘‘অযং ন লামকসত্তো, বুদ্ধঙ্কুরো এস, ইমস্মিংযেৰ ভদ্দকপ্পে সব্বঞ্ঞুতং পাপুণিস্সতি, ইমস্স মাননিগ্গহং কত্ৰা সমাপত্তিনিব্বত্তনাকারং করিস্সামী’’তি তস্মিং পণ্ণসালায নিসিন্নেযেৰ উত্তরহিমৰন্ততো আগন্ত্ৰা তস্স পাসাণফলকে নিসীদি. সো নিক্খমিত্ৰা তং অত্তনো আসনে নিসিন্নং দিস্ৰা মাননিস্সিতভাৰেন অনত্তমনো হুত্ৰা তং উপসঙ্কমিত্ৰা অচ্ছরং পহরিত্ৰা ‘‘নস্স, ৰসল, কাল়কণ্ণি, মুণ্ডক, সমণক, কিমত্থং মম নিসিন্নফলকে নিসিন্নোসী’’তি আহ. অথ নং সো ‘‘সপ্পুরিস, কস্মা মাননিস্সিতোসি, অহং পটিৰিদ্ধপচ্চেকবোধিঞাণো, ত্ৰং ইমস্মিংযেৰ ভদ্দকপ্পে সব্বঞ্ঞুবুদ্ধো ভৰিস্সসি, বুদ্ধঙ্কুরোসি, পারমিযো পূরেত্ৰা আগতো অঞ্ঞং এত্তকং নাম কালং অতিক্কমিত্ৰা বুদ্ধো ভৰিস্সসি, বুদ্ধত্তভাৰে ঠিতো সিদ্ধত্থো নাম ভৰিস্সসী’’তি নামঞ্চ গোত্তঞ্চ কুলঞ্চ অগ্গসাৰকাদযো চ সব্বে আচিক্খিত্ৰা ‘‘কিমত্থং ত্ৰং মাননিস্সিতো হুত্ৰা ফরুসো হোসি, নযিদং তৰ অনুচ্ছৰিক’’ন্তি ওৰাদমদাসি. সো তেন এৰং ৰুত্তোপি নেৰ নং ৰন্দি, ন চ ‘‘কদাহং বুদ্ধো ভৰিস্সামী’’তিআদীনি পুচ্ছি. অথ নং পচ্চেকবুদ্ধো ‘‘তৰ জাতিযা মম গুণানং মহন্তভাৰং জান, সচে সক্কোসি, অহং ৰিয আকাসে ৰিচরাহী’’তি ৰত্ৰা আকাসে উপ্পতিত্ৰা অত্তনো পাদপংসুং তস্স জটামণ্ডলে ৰিকিরন্তো উত্তরহিমৰন্তমেৰ গতো.

তাপসো তস্স গতকালে সংৰেগপ্পত্তো হুত্ৰা ‘‘অযং সমণো এৰং গরুসরীরো ৰাতমুখে খিত্ততূলপিচু ৰিয আকাসে পক্খন্দো, অহং জাতিমানেন এৰরূপস্স পচ্চেকবুদ্ধস্স নেৰ পাদে ৰন্দিং, ন চ ‘‘কদাহং বুদ্ধো ভৰিস্সামী’তি পুচ্ছিং, জাতি নামেসা কিং করিস্সতি, ইমস্মিং লোকে সীলচরণমেৰ মহন্তং, অযং খো পন মে মানো ৰড্ঢন্তো নিরযং উপনেস্সতি, ন ইদানি ইমং মানং অনিগ্গহেত্ৰা ফলাফলত্থায গমিস্সামী’’তি পণ্ণসালং পৰিসিত্ৰা মাননিগ্গহায উপোসথং সমাদায কট্ঠত্থরিকায নিসিন্নো মহাঞাণো কুলপুত্তো মানং নিগ্গহেত্ৰা কসিণং ৰড্ঢেত্ৰা অভিঞ্ঞা চ সমাপত্তিযো চ নিব্বত্তেত্ৰা নিক্খমিত্ৰা চঙ্কমনকোটিযং পাসাণফলকে নিসীদি. অথ নং কপোতাদযো উপসঙ্কমিত্ৰা ৰন্দিত্ৰা একমন্তং নিসীদিংসু. মহাসত্তো কপোতং পুচ্ছি ‘‘ত্ৰং অঞ্ঞেসু দিৰসেসু ন ইমায ৰেলায আগচ্ছসি, গোচরং পরিযেসসি, কিং নু খো অজ্জ উপোসথিকো জাতোসী’’তি? ‘‘আম ভন্তে’’তি. অথ নং ‘‘কেন কারণেনা’’তি পুচ্ছন্তো পঠমং গাথমাহ –

১২৭.

‘‘অপ্পোস্সুক্কো দানি তুৰং কপোত, ৰিহঙ্গম ন তৰ ভোজনত্থো;

খুদং পিপাসং অধিৰাসযন্তো, কস্মা ভৰংপোসথিকো কপোতা’’তি.

তত্থ অপ্পোস্সুক্কোতি নিরালযো. ন তৰ ভোজনত্থোতি কিং অজ্জ তৰ ভোজনেন অত্থো নত্থি.

তং সুত্ৰা কপোতো দ্ৰে গাথা অভাসি –

১২৮.

‘‘অহং পুরে গিদ্ধিগতো কপোতিযা, অস্মিং পদেসস্মিমুভো রমাম;

অথগ্গহী সাকুণিকো কপোতিং, অকামকো তায ৰিনা অহোসিং.

১২৯.

‘‘নানাভৰা ৰিপ্পযোগেন তস্সা, মনোমযং ৰেদন ৰেদযামি;

তস্মা অহংপোসথং পালযামি, রাগো মমং মা পুনরাগমাসী’’তি.

তত্থ রমামাতি ইমস্মিং ভূমিভাগে কামরতিযা রমাম. সাকুণিকোতি সেনসকুণো.

কপোতেন অত্তনো উপোসথকম্মে ৰণ্ণিতে মহাসত্তো সপ্পাদীসু একেকং পুচ্ছি. তেপি যথাভূতং ব্যাকরিংসু –

১৩০.

‘‘অনুজ্জুগামী উরগা দুজিৰ্হ, দাঠাৰুধো ঘোরৰিসোসি সপ্প;

খুদং পিপাসং অধিৰাসযন্তো, কস্মা ভৰংপোসথিকো নু দীঘ.

১৩১.

‘‘উসভো অহূ বলৰা গামিকস্স, চলক্ককূ ৰণ্ণবলূপপন্নো;

সো মং অক্কমি তং কুপিতো অডংসিং, দুক্খাভিতুণ্ণো মরণং উপাগা.

১৩২.

‘‘ততো জনা নিক্খমিত্ৰান গামা, কন্দিত্ৰা রোদিত্ৰা অপক্কমিংসু;

তস্মা অহংপোসথং পালযামি, কোধো মমং মা পুনরাগমাসি.

১৩৩.

‘‘মতান মংসানি বহূ সুসানে, মনুঞ্ঞরূপং তৰ ভোজনে তং;

খুদং পিপাসং অধিৰাসযন্তো, কস্মা ভৰংপোসথিকো সিঙ্গাল.

১৩৪.

‘‘পৰিসি কুচ্ছিং মহতো গজস্স, কুণপে রতো হত্থিমংসেসু গিদ্ধো;

উণ্হো চ ৰাতো তিখিণা চ রস্মিযো, তে সোসযুং তস্স করীসমগ্গং.

১৩৫.

‘‘কিসো চ পণ্ডূ চ অহং ভদন্তে, ন মে অহূ নিক্খমনায মগ্গো;

মহা চ মেঘো সহসা পৰস্সি, সো তেমযী তস্স করীসমগ্গং.

১৩৬.

‘‘ততো অহং নিক্খমিসং ভদন্তে, চন্দো যথা রাহুমুখা পমুত্তো;

তস্মা অহংপোসথং পালযামি, লোভো মমং মা পুনরাগমাসি.

১৩৭.

‘‘ৰম্মীকথূপস্মিং কিপিল্লিকানি, নিপ্পোথযন্তো তুৰং পুরে চরাসি;

খুদং পিপাসং অধিৰাসযন্তো, কস্মা ভৰংপোসথিকো নু অচ্ছ.

১৩৮.

‘‘সকং নিকেতং অতিহীল়যানো, অত্রিচ্ছতা মল্লগামং অগচ্ছিং;

ততো জনা নিক্খমিত্ৰান গামা, কোদণ্ডকেন পরিপোথযিংসু মং.

১৩৯.

‘‘সো ভিন্নসীসো রুহিরমক্খিতঙ্গো, পচ্চাগমাসিং সকং নিকেতং;

তস্মা অহংপোসথং পালযামি, অত্রিচ্ছতা মা পুনরাগমাসী’’তি.

তত্থ অনুজ্জুগামীতিআদীহি তং আলপতি. চলক্ককূতি চলমানককুধো. দুক্খাভিতুণ্ণোতি সো উসভো দুক্খেন অভিতুণ্ণো আতুরো হুত্ৰা. বহূতি বহূনি. পৰিসীতি পাৰিসিং. রস্মিযোতি সূরিযরস্মিযো. নিক্খমিসন্তি নিক্খমিং. কিপিল্লিকানীতি উপচিকাযো. নিপ্পোথযন্তোতি খাদমানো. অতিহীল়যানোতি অতিমঞ্ঞন্তো নিন্দন্তো গরহন্তো. কোদণ্ডকেনাতি ধনুদণ্ডকেহি চেৰ মুগ্গরেহি চ.

এৰং তে চত্তারোপি অত্তনো উপোসথকম্মং ৰণ্ণেত্ৰা উট্ঠায মহাসত্তং ৰন্দিত্ৰা ‘‘ভন্তে, তুম্হে অঞ্ঞেসু দিৰসেসু ইমায ৰেলায ফলাফলত্থায গচ্ছথ, অজ্জ অগন্ত্ৰা কস্মা উপোসথিকত্থা’’তি পুচ্ছন্তা গাথমাহংসু –

১৪০.

‘‘যং নো অপুচ্ছিত্থ তুৰং ভদন্তে, সব্বেৰ ব্যাকরিম্হ যথাপজানং;

মযম্পি পুচ্ছাম তুৰং ভদন্তে, কস্মা ভৰংপোসথিকো নু ব্রহ্মে’’তি.

সোপি নেসং ব্যাকাসি –

১৪১.

‘‘অনূপলিত্তো মম অস্সমম্হি, পচ্চেকবুদ্ধো মুহুত্তং নিসীদি;

সো মং অৰেদী গতিমাগতিঞ্চ, নামঞ্চ গোত্তং চরণঞ্চ সব্বং.

১৪২.

‘‘এৰম্পহং ন ৰন্দি তস্স পাদে, ন চাপি নং মানগতেন পুচ্ছিং;

তস্মা অহংপোসথং পালযামি, মানো মমং মা পুনরাগমাসী’’তি.

তত্থ যং নোতি যং অত্থং ত্ৰং অম্হে অপুচ্ছি. যথাপজানন্তি অত্তনো পজানননিযামেন তং মযং ব্যাকরিম্হ. অনূপলিত্তোতি সব্বকিলেসেহি অলিত্তো. সো মং অৰেদীতি সো মম ইদানি গন্তব্বট্ঠানঞ্চ গতট্ঠানঞ্চ ‘‘অনাগতে ত্ৰং এৰংনামো বুদ্ধো ভৰিস্সসি এৰংগোত্তো, এৰরূপং তে সীলচরণং ভৰিস্সতী’’তি এৰং নামঞ্চ গোত্তঞ্চ চরণঞ্চ সব্বং মং অৰেদি জানাপেসি, কথেসীতি অত্থো. এৰম্পহং ন ৰন্দীতি এৰং কথেন্তস্সপি তস্স অহং অত্তনো মানং নিস্সায পাদে ন ৰন্দিন্তি.

এৰং মহাসত্তো অত্তনো উপোসথকারণং কথেত্ৰা তে ওৰদিত্ৰা উয্যোজেত্ৰা পণ্ণসালং পাৰিসি, ইতরেপি যথাট্ঠানানি অগমংসু. মহাসত্তো অপরিহীনজ্ঝানো ব্রহ্মলোকপরাযণো অহোসি, ইতরে চ তস্সোৰাদে ঠত্ৰা সগ্গপরাযণা অহেসুং.

সত্থা ইমং ধম্মদেসনং আহরিত্ৰা ‘‘এৰং উপাসকা, উপোসথো নামেস পোরাণকপণ্ডিতানং ৰংসো, উপৰসিতব্বো উপোসথৰাসো’’তি ৰত্ৰা জাতকং সমোধানেসি – ‘‘তদা কপোতো অনুরুদ্ধো অহোসি, অচ্ছো কস্সপো, সিঙ্গালো মোগ্গল্লানো, সপ্পো সারিপুত্তো, তাপসো পন অহমেৰ অহোসি’’ন্তি.

পঞ্চুপোসথজাতকৰণ্ণনা সত্তমা.

[৪৯১] ৮. মহামোরজাতকৰণ্ণনা

সচে হি ত্যাহং ধনহেতু গাহিতোতি ইদং সত্থা জেতৰনে ৰিহরন্তো একং উক্কণ্ঠিতভিক্খুং আরব্ভ কথেসি. তঞ্হি ভিক্খুং সত্থা ‘‘সচ্চং কির ত্ৰং উক্কণ্ঠিতোসী’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খু অযং নন্দীরাগো তাদিসং কিং নাম নালোলেস্সতি, ন হি সিনেরুউব্বাহনকৰাতো সামন্তে পুরাণপণ্ণস্স লজ্জতি, পুব্বে সত্ত ৰস্সসতানি অন্তোকিলেসসমুদাচারং ৰারেত্ৰা ৰিহরন্তে ৰিসুদ্ধসত্তেপেস আলোলেসিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো পচ্চন্তপদেসে মোরসকুণিযা কুচ্ছিম্হি পটিসন্ধিং অগ্গহেসি. গব্ভে পরিপাকগতে মাতা গোচরভূমিযং অণ্ডং পাতেত্ৰা পক্কামি. অণ্ডঞ্চ নাম মাতু অরোগভাৰে সতি অঞ্ঞস্মিং দীঘজাতিকাদিপরিপন্থে চ অৰিজ্জমানে ন নস্সতি. তস্মা তং অণ্ডং কণিকারমকুলং ৰিয সুৰণ্ণৰণ্ণং হুত্ৰা পরিণতকালে অত্তনো ধম্মতায ভিজ্জি, সুৰণ্ণৰণ্ণো মোরচ্ছাপো নিক্খমি. তস্স দ্ৰে অক্খীনি জিঞ্জুকাফলসদিসানি, তুণ্ডং পৰাল়ৰণ্ণং, তিস্সো রত্তরাজিযো গীৰং পরিক্খিপিত্ৰা পিট্ঠিমজ্ঝেন অগমংসু. সো ৰযপ্পত্তো ভণ্ডসকটমত্তসরীরো অভিরূপো অহোসি. তং সব্বে নীলমোরা সন্নিপতিত্ৰা রাজানং কত্ৰা পরিৰারযিংসু.

সো একদিৰসং উদকসোণ্ডিযং পানীযং পিৰন্তো অত্তনো রূপসম্পত্তিং দিস্ৰা চিন্তেসি ‘‘অহং সব্বমোরেহি অতিরেকরূপসোভো, সচাহং ইমেহি সদ্ধিং মনুস্সপথে ৰসিস্সামি, পরিপন্থো মে উপ্পজ্জিস্সতি, হিমৰন্তং গন্ত্ৰা এককোৰ ফাসুকট্ঠানে ৰসিস্সামী’’তি. সো রত্তিভাগে মোরেসু পটিসল্লীনেসু কঞ্চি অজানাপেত্ৰা উপ্পতিত্ৰা হিমৰন্তং পৰিসিত্ৰা তিস্সো পব্বতরাজিযো অতিক্কম্ম চতুত্থায পব্বতরাজিযা একস্মিং অরঞ্ঞে পদুমসঞ্ছন্নো জাতস্সরো অত্থি, তস্স অৰিদূরে একং পব্বতং নিস্সায ঠিতো মহানিগ্রোধরুক্খো অত্থি, তস্স সাখায নিলীযি. তস্স পন পব্বতস্স ৰেমজ্ঝে মনাপা গুহা অত্থি. সো তত্থ ৰসিতুকামো হুত্ৰা তস্সা পমুখে পব্বততলে নিলীযি. তং পন ঠানং নেৰ হেট্ঠাভাগেন অভিরুহিতুং, ন উপরিভাগেন ওতরিতুং সক্কা, বিল়ালদীঘজাতিকমনুস্সভযেহি ৰিমুত্তং. সো ‘‘ইদং মে ফাসুকট্ঠান’’ন্তি তং দিৰসং তত্থেৰ ৰসিত্ৰা পুনদিৰসে পব্বতগুহাতো উট্ঠায পব্বতমত্থকে পুরত্থাভিমুখো নিসিন্নো উদেন্তং সূরিযমণ্ডলং দিস্ৰা অত্তনো দিৰারক্খাৰরণত্থায ‘‘উদেতযং চক্খুমা একরাজা’’তি পরিত্তং কত্ৰা গোচরভূমিযং ওতরিত্ৰা গোচরং গহেত্ৰা সাযং আগন্ত্ৰা পব্বতমত্থকে পচ্ছাভিমুখো নিসিন্নো অত্থঙ্গতং সূরিযমণ্ডলং দিস্ৰা অত্তনো রত্তিরক্খাৰরণত্থায ‘‘অপেতযং চক্খুমা একরাজা’’তি পরিত্তং কত্ৰা এতেনুপাযেন ৰসতি.

অথ নং একদিৰসং একো লুদ্দপুত্তো অরঞ্ঞে ৰিচরন্তো পব্বতমত্থকে নিসিন্নং মোরং দিস্ৰা অত্তনো নিৰেসনং আগন্ত্ৰা মরণাসন্নকালে পুত্তং আহ – ‘‘তাত, চতুত্থায পব্বতরাজিযা অরঞ্ঞে সুৰণ্ণৰণ্ণো মোরো অত্থি, সচে রাজা পুচ্ছতি, আচিক্খেয্যাসী’’তি. অথেকস্মিং দিৰসে বারাণসিরঞ্ঞো খেমা নাম অগ্গমহেসী পচ্চূসকালে সুপিনং পস্সি. এৰরূপো সুপিনো অহোসি – ‘‘সুৰণ্ণৰণ্ণো মোরো ধম্মং দেসেতি, সা সাধুকারং দত্ৰা ধম্মং সুণাতি, মোরো ধম্মং দেসেত্ৰা উট্ঠায পক্কামি’’. সা ‘‘মোররাজা গচ্ছতি, গণ্হথ ন’’ন্তি ৰদন্তীযেৰ পবুজ্ঝি, পবুজ্ঝিত্ৰা চ পন সুপিনভাৰং ঞত্ৰা ‘‘সুপিনোতি ৰুত্তে রাজা ন আদরং করিস্সতি, ‘দোহল়ো মে’তি ৰুত্তে করিস্সতী’’তি চিন্তেত্ৰা দোহল়িনী ৰিয হুত্ৰা নিপজ্জি. অথ নং রাজা উপসঙ্কমিত্ৰা পুচ্ছি ‘‘ভদ্দে, কিং তে অফাসুক’’ন্তি. ‘‘দোহল়ো মে উপ্পন্নো’’তি. ‘‘কিং ইচ্ছসি ভদ্দে’’তি? ‘‘সুৰণ্ণৰণ্ণস্স মোরস্স ধম্মং সোতুং দেৰা’’তি. ‘‘ভদ্দে, কুতো এৰরূপং মোরং লচ্ছামী’’তি? ‘‘দেৰ, সচে ন লভামি, জীৰিতং মে নত্থী’’তি. ‘‘ভদ্দে, মা চিন্তযি, সচে কত্থচি অত্থি, লভিস্সসী’’তি রাজা নং অস্সাসেত্ৰা গন্ত্ৰা রাজাসনে নিসিন্নো অমচ্চে পুচ্ছি ‘‘অম্ভো, দেৰী সুৰণ্ণৰণ্ণস্স মোরস্স ধম্মং সোতুকামা, মোরা নাম সুৰণ্ণৰণ্ণা হোন্তী’’তি? ‘‘ব্রাহ্মণা জানিস্সন্তি দেৰা’’তি.

রাজা ব্রাহ্মণে পক্কোসাপেত্ৰা পুচ্ছি. ব্রাহ্মণা এৰমাহংসু ‘‘মহারাজ জলজেসু মচ্ছকচ্ছপকক্কটকা, থলজেসু মিগা হংসা মোরা তিত্তিরা এতে তিরচ্ছানগতা চ মনুস্সা চ সুৰণ্ণৰণ্ণা হোন্তীতি অম্হাকং লক্খণমন্তেসু আগত’’ন্তি. রাজা অত্তনো ৰিজিতে লুদ্দপুত্তে সন্নিপাতেত্ৰা ‘‘সুৰণ্ণৰণ্ণো মোরো ৰো দিট্ঠপুব্বো’’তি পুচ্ছি. সেসা ‘‘ন দিট্ঠপুব্বো’’তি আহংসু. যস্স পন পিতরা আচিক্খিতং, সো আহ – ‘‘মযাপি ন দিট্ঠপুব্বো, পিতা পন মে ‘অসুকট্ঠানে নাম সুৰণ্ণৰণ্ণো মোরো অত্থী’তি কথেসী’’তি. অথ নং রাজা ‘‘সম্ম, ময্হঞ্চ দেৰিযা চ জীৰিতং দিন্নং ভৰিস্সতি, গন্ত্ৰা তং বন্ধিত্ৰা আনেহী’’তি বহুং ধনং দত্ৰা উয্যোজেসি. সো পুত্তদারস্স ধনং দত্ৰা তত্থ গন্ত্ৰা মহাসত্তং দিস্ৰা পাসে ওড্ডেত্ৰা ‘‘অজ্জ বজ্ঝিস্সতি, অজ্জ বজ্ঝিস্সতী’’তি অবজ্ঝিত্ৰাৰ মতো, দেৰীপি পত্থনং অলভন্তী মতা. রাজা ‘‘তং মোরং নিস্সায পিযভরিযা মে মতা’’তি কুজ্ঝিত্ৰা কোধৰসিকো হুত্ৰা ‘‘হিমৰন্তে চতুত্থায পব্বতরাজিযা সুৰণ্ণৰণ্ণো মোরো চরতি, তস্স মংসং খাদিত্ৰা অজরা অমরা হোন্তী’’তি সুৰণ্ণপট্টে লিখাপেত্ৰা তং পট্টং সারমঞ্জূসাযং ঠপেত্ৰা কালমকাসি.

অথ অঞ্ঞো রাজা অহোসি. সো সুৰণ্ণপট্টে অক্খরানি দিস্ৰা ‘‘অজরো অমরো ভৰিস্সামী’’তি তস্স গহণত্থায একং লুদ্দপুত্তং পেসেসি. সোপি তত্থেৰ মতো. এৰং ছ রাজপরিৰট্টা গতা, ছ লুদ্দপুত্তা হিমৰন্তেযেৰ মতা. সত্তমেন পন রঞ্ঞা পেসিতো সত্তমো লুদ্দো ‘‘অজ্জ অজ্জেৰা’’তি সত্ত সংৰচ্ছরানি বজ্ঝিতুং অসক্কোন্তো চিন্তেসি ‘‘কিং নু খো ইমস্স মোররাজস্স পাদে পাসস্স অসঞ্চরণকারণ’’ন্তি? অথ নং পরিগ্গণ্হন্তো সাযংপাতং পরিত্তং করোন্তং দিস্ৰা ‘‘ইমস্মিং ঠানে অঞ্ঞো মোরো নত্থি, ইমিনা ব্রহ্মচারিনা ভৰিতব্বং, ব্রহ্মচরিযানুভাৰেন চেৰ পরিত্তানুভাৰেন চস্স পাদো পাসে ন বজ্ঝতী’’তি নযতো পরিগ্গহেত্ৰা পচ্চন্তজনপদং গন্ত্ৰা একং মোরিং বন্ধিত্ৰা যথা সা অচ্ছরায পহটায ৰস্সতি, পাণিম্হি পহটে নচ্চতি, এৰং সিক্খাপেত্ৰা আদায গন্ত্ৰা বোধিসত্তস্স পরিত্তকরণতো পুরেতরমেৰ পাসং ওড্ডেত্ৰা অচ্ছরং পহরিত্ৰা মোরিং ৰস্সাপেসি. মোরো তস্সা সদ্দং সুণি, তাৰদেৰস্স সত্ত ৰস্সসতানি সন্নিসিন্নকিলেসো ফণং করিত্ৰা দণ্ডেন পহটাসীৰিসো ৰিয উট্ঠহি. সো কিলেসাতুরো হুত্ৰা পরিত্তং কাতুং অসক্কুণিত্ৰাৰ ৰেগেন তস্সা সন্তিকং গন্ত্ৰা পাসে পাদং পৰেসেন্তোযেৰ আকাসা ওতরি. সত্ত ৰস্সসতানি অসঞ্চরণকপাসো তঙ্খণঞ্ঞেৰ সঞ্চরিত্ৰা পাদং বন্ধি.

অথ নং লুদ্দপুত্তো যট্ঠিঅগ্গে ওলম্বন্তং দিস্ৰা চিন্তেসি ‘‘ইমং মোররাজং ছ লুদ্দপুত্তা বন্ধিতুং নাসক্খিংসু, অহম্পি সত্ত ৰস্সানি নাসক্খিং, অজ্জ পনেস ইমং মোরিং নিস্সায কিলেসাতুরো হুত্ৰা পরিত্তং কাতুং অসক্কুণিত্ৰা আগম্ম পাসে বদ্ধো হেট্ঠাসীসকো ওলম্বতি, এৰরূপো মে সীলৰা কিলমিতো, এৰরূপং রঞ্ঞো পণ্ণাকারত্থায নেতুং অযুত্তং, কিং মে রঞ্ঞা দিন্নেন সক্কারেন, ৰিস্সজ্জেস্সামি ন’’ন্তি. পুন চিন্তেসি ‘‘অযং নাগবলো থামসম্পন্নো মযি উপসঙ্কমন্তে ‘এস মং মারেতুং আগচ্ছতী’তি মরণভযতজ্জিতো ফন্দমানো পাদং ৰা পক্খং ৰা ভিন্দেয্য, অনুপগন্ত্ৰা পন পটিচ্ছন্নে ঠত্ৰা খুরপ্পেনস্স পাসং ছিন্দিস্সামি, ততো সযমেৰ যথারুচিযা গমিস্সতী’’তি. সো পটিচ্ছন্নে ঠত্ৰা ধনুং আরোপেত্ৰা খুরপ্পং সন্নয্হিত্ৰা আকড্ঢি. মোরোপি ‘‘অযং লুদ্দকো মং কিলেসাতুরং কত্ৰা বদ্ধভাৰং ঞত্ৰা নিরাসঙ্কো আগচ্ছিস্সতি, কহং নু খো সো’’তি চিন্তেত্ৰা ইতো চিতো চ ৰিলোকেত্ৰা ধনুং আরোপেত্ৰা ঠিতং দিস্ৰা ‘‘মারেত্ৰা মং আদায গন্তুকামো ভৰিস্সতী’’তি মঞ্ঞমানো মরণভযতজ্জিতো হুত্ৰা জীৰিতং যাচন্তো পঠমং গাথমাহ –

১৪৩.

‘‘সচে হি ত্যাহং ধনহেতু গাহিতো, মা মং ৰধী জীৰগাহং গহেত্ৰা;

রঞ্ঞো চ মং সম্ম উপন্তিকং নেহি, মঞ্ঞে ধনং লচ্ছসিনপ্পরূপ’’ন্তি.

তত্থ সচে হি ত্যাহন্তি সচে হি তে অহং. উপন্তিকং নেহীতি উপসন্তিকং নেহি. লচ্ছসিনপ্পরূপন্তি লচ্ছসি অনপ্পকরূপং.

তং সুত্ৰা লুদ্দপুত্তো চিন্তেসি – ‘‘মোররাজা, ‘অযং মং ৰিজ্ঝিতুকামতায খুরপ্পং সন্নয্হী’তি মঞ্ঞতি, অস্সাসেস্সামি ন’’ন্তি. সো অস্সাসেন্তো দুতিযং গাথমাহ –

১৪৪.

‘‘ন মে অযং তুয্হ ৰধায অজ্জ, সমাহিতো চাপধুরে খুরপ্পো;

পাসঞ্চ ত্যাহং অধিপাতযিস্সং, যথাসুখং গচ্ছতু মোররাজা’’তি.

তত্থ অধিপাতযিস্সন্তি ছিন্দযিস্সং.

ততো মোররাজা দ্ৰে গাথা অভাসি –

১৪৫.

‘‘যং সত্ত ৰস্সানি মমানুবন্ধি, রত্তিন্দিৰং খুপ্পিপাসং সহন্তো;

অথ কিস্স মং পাসৰসূপনীতং, পমুত্তৰে ইচ্ছসি বন্ধনস্মা.

১৪৬.

‘‘পাণাতিপাতা ৰিরতো নুসজ্জ, অভযং নু তে সব্বভূতেসু দিন্নং;

যং মং তুৰং পাসৰসূপনীতং, পমুত্তৰে ইচ্ছসি বন্ধনস্মা’’তি.

তত্থ যন্তি যস্মা মং এত্তকং কালং ত্ৰং অনুবন্ধি, তস্মা তং পুচ্ছামি, অথ কিস্স মং পাসৰসং উপনীতং বন্ধনস্মা পমোচেতুং ইচ্ছসীতি অত্থো. ৰিরতো নুসজ্জাতি ৰিরতো নুসি অজ্জ. সব্বভূতেসূতি সব্বসত্তানং.

ইতো পরং –

১৪৭.

‘‘পাণাতিপাতা ৰিরতস্স ব্রূহি, অভযঞ্চ যো সব্বভূতেসু দেতি;

পুচ্ছামি তং মোররাজেতমত্থং, ইতো চুতো কিং লভতে সুখং সো.

১৪৮.

‘‘পাণাতিপাতা ৰিরতস্স ব্রূমি, অভযঞ্চ যো সব্বভূতেসু দেতি;

দিট্ঠেৰ ধম্মে লভতে পসংসং, সগ্গঞ্চ সো যাতি সরীরভেদা.

১৪৯.

‘‘ন সন্তি দেৰা ইতি আহু একে, ইধেৰ জীৰো ৰিভৰং উপেতি;

তথা ফলং সুকতদুক্কটানং, দত্তুপঞ্ঞত্তঞ্চ ৰদন্তি দানং;

তেসং ৰচো অরহতং সদ্দহানো, তস্মা অহং সকুণে বাধযামী’’তি. –

ইমা উত্তানসম্বন্ধগাথা পাল়িনযেন ৰেদিতব্বা.

তত্থ ইতি আহু একেতি একচ্চে সমণব্রাহ্মণা এৰং কথেন্তি. তেসং ৰচো অরহতং সদ্দহানোতি তস্স কির কুলূপকা উচ্ছেদৰাদিনো নগ্গসমণকা. তে তং পচ্চেকবোধিঞাণস্স উপনিস্সযসম্পন্নম্পি সত্তং উচ্ছেদৰাদং গণ্হাপেসুং. সো তেহি সংসগ্গেন ‘‘কুসলাকুসলং নত্থী’’তি গহেত্ৰা সকুণে মারেতি. এৰং মহাসাৰজ্জা এসা অসপ্পুরিসসেৰনা নাম. তেযেৰ অযং ‘‘অরহন্তো’’তি মঞ্ঞমানো এৰমাহ.

তং সুত্ৰা মহাসত্তো ‘‘তস্সেৰ পরলোকস্স অত্থিভাৰং কথেস্সামী’’তি পাসযট্ঠিযং অধোসিরো ওলম্বমানোৰ ইমং গাথমাহ –

১৫০.

‘‘চন্দো চ সুরিযো চ উভো সুদস্সনা, গচ্ছন্তি ওভাসযমন্তলিক্খে;

ইমস্স লোকস্স পরস্স ৰা তে, কথং নু তে আহু মনুস্সলোকে’’তি.

তত্থ ইমস্সাতি কিং নু তে ইমস্স লোকস্স সন্তি, উদাহু পরলোকস্সাতি. ভুম্মত্থে ৰা এতং সামিৰচনং. কথং নু তেতি এতেসু ৰিমানেসু চন্দিমসূরিযদেৰপুত্তে কথং নু কথেন্তি, কিং অত্থীতি কথেন্তি, উদাহু নত্থীতি, কিং ৰা দেৰা, উদাহু মনুস্সাতি?

লুদ্দপুত্তো গাথমাহ –

১৫১.

‘‘চন্দো চ সুরিযো চ উভো সুদস্সনা, গচ্ছন্তি ওভাসযমন্তলিক্খে;

পরস্স লোকস্স ন তে ইমস্স, দেৰাতি তে আহু মনুস্সলোকে’’তি.

অথ নং মহাসত্তো আহ –

১৫২.

‘‘এত্থেৰ তে নীহতা হীনৰাদা, অহেতুকা যে ন ৰদন্তি কম্মং;

তথা ফলং সুকতদুক্কটানং, দত্তুপঞ্ঞত্তং যে চ ৰদন্তি দান’’ন্তি.

তত্থ এত্থেৰ তে নিহতা হীনৰাদাতি সচে চন্দিমসূরিযা দেৰলোকে ঠিতা, ন মনুস্সলোকে, সচে চ তে দেৰা, ন মনুস্সা, এত্থেৰ এত্তকে ব্যাকরণে তে তৰ কুলূপকা হীনৰাদা নীহতা হোন্তি. অহেতুকা ‘‘ৰিসুদ্ধিযা ৰা সংকিলেসস্স ৰা হেতুভূতং কম্মং নত্থী’’তি এৰংৰাদা. দত্তুপঞ্ঞত্তন্তি যে চ দানং ‘‘বালকেহি পঞ্ঞত্ত’’ন্তি ৰদন্তি.

সো মহাসত্তে কথেন্তে সল্লক্খেত্ৰা গাথাদ্ৰযমাহ –

১৫৩.

‘‘অদ্ধা হি সচ্চং ৰচনং তৰেদং, কথঞ্হি দানং অফলং ভৰেয্য;

তথা ফলং সুকতদুক্কটানং, দত্তুপঞ্ঞত্তঞ্চ কথং ভৰেয্য.

১৫৪.

‘‘কথংকরো কিন্তিকরো কিমাচরং, কিং সেৰমানো কেন তপোগুণেন;

অক্খাহি মে মোররাজেতমত্থং, যথা অহং নো নিরযং পতেয্য’’ন্তি.

তত্থ দত্তুপঞ্ঞত্তঞ্চাতি দানঞ্চ দত্তুপঞ্ঞত্তং নাম কথং ভৰেয্যাতি অত্থো. কথংকরোতি কতরকম্মং করোন্তো. কিন্তিকরোতি কেন কারণেন করোন্তো অহং নিরযং ন গচ্ছেয্যং. ইতরানি তস্সেৰ ৰেৰচনানি.

তং সুত্ৰা মহাসত্তো ‘‘সচাহং ইমং পঞ্হং ন কথেস্সামি, মনুস্সলোকো তুচ্ছো ৰিয কতো ভৰিস্সতি, তথেৰস্স ধম্মিকানং সমণব্রাহ্মণানং অত্থিভাৰং কথেস্সামী’’তি চিন্তেত্ৰা দ্ৰে গাথা অভাসি –

১৫৫.

‘‘যে কেচি অত্থি সমণা পথব্যা, কাসাযৰত্থা অনগারিযা তে;

পাতোৰ পিণ্ডায চরন্তি কালে, ৰিকালচরিযা ৰিরতা হি সন্তো.

১৫৬.

‘‘তে তত্থ কালেনুপসঙ্কমিত্ৰা, পুচ্ছাহি যং তে মনসো পিযং সিযা;

তে তে পৰক্খন্তি যথাপজানং, ইমস্স লোকস্স পরস্স চত্থ’’ন্তি.

তত্থ সন্তোতি সন্তপাপা পণ্ডিতা পচ্চেকবুদ্ধা. যথাপজানন্তি তে তুয্হং অত্তনো পজানননিযামেন ৰক্খন্তি, কঙ্খং তে ছিন্দিত্ৰা কথেস্সন্তি. ইমস্স লোকস্স পরস্স চত্থন্তি ইমিনা নাম কম্মেন মনুস্সলোকে নিব্বত্তন্তি, ইমিনা দেৰলোকে, ইমিনা নিরযাদীসূতি এৰং ইমস্স চ পরস্স চ লোকস্স অত্থং আচিক্খিস্সন্তি, তে পুচ্ছাতি.

এৰঞ্চ পন ৰত্ৰা নিরযভযেন তজ্জেসি. সো পন পূরিতপারমী পচ্চেকবোধিসত্তো সূরিযরস্মিসম্ফস্সং ওলোকেত্ৰা ঠিতং পরিণতপদুমং ৰিয পরিপাকগতঞাণো ৰিচরতি. সো তস্স ধম্মকথং সুণন্তো ঠিতপদেনেৰ ঠিতো সঙ্খারে পরিগ্গণ্হিত্ৰা তিলক্খণং সম্মসন্তো পচ্চেকবোধিঞাণং পটিৰিজ্ঝি. তস্স পটিৰেধো চ মহাসত্তস্স পাসতো মোক্খো চ একক্খণেযেৰ অহোসি. পচ্চেকবুদ্ধো সব্বকিলেসে পদালেত্ৰা ভৰপরিযন্তে ঠিতোৰ উদানং উদানন্তো গাথমাহ –

১৫৭.

‘‘তচংৰ জিণ্ণং উরগো পুরাণং, পণ্ডূপলাসং হরিতো দুমোৰ;

এসপ্পহীনো মম লুদ্দভাৰো, জহামহং লুদ্দকভাৰমজ্জা’’তি.

তস্সত্থো – যথা জিণ্ণং পুরাণং তচং উরগো জহতি, যথা চ হরিতো সম্পজ্জমাননীলপত্তো দুমো কত্থচি ঠিতং পণ্ডুপলাসং জহতি, এৰং অহম্পি অজ্জ লুদ্দভাৰং দারুণভাৰং জহিত্ৰা ঠিতো, সো দানি এস পহীনো মম লুদ্দভাৰো, সাধু ৰত জহামহং লুদ্দকভাৰমজ্জাতি. জহামহন্তি পজহিং অহন্তি অত্থো.

সো ইমং উদানং উদানেত্ৰা ‘‘অহং তাৰ সব্বকিলেসবন্ধনেহি মুত্তো, নিৰেসনে পন মে বন্ধিত্ৰা ঠপিতা বহূ সকুণা অত্থি, তে কথং মোচেস্সামী’’তি চিন্তেত্ৰা মহাসত্তং পুচ্ছি – ‘‘মোররাজ, নিৰেসনে মে বহূ সকুণা বদ্ধা অত্থি, তে কথং মোচেস্সামী’’তি? পচ্চেকবুদ্ধতোপি সব্বঞ্ঞুবোধিসত্তানঞ্ঞেৰ উপাযপরিগ্গহঞাণং মহন্ততরং হোতি, তেন নং আহ ‘‘যং ৰো মগ্গেন কিলেসে খণ্ডেত্ৰা পচ্চেকবোধিঞাণং পটিৰিদ্ধং, তং আরব্ভ সচ্চকিরিযং করোথ, সকলজম্বুদীপে বন্ধনগতো সত্তো নাম ন ভৰিস্সতী’’তি. সো বোধিসত্তেন দিন্ননযদ্ৰারে ঠত্ৰা সচ্চকিরিযং করোন্তো গাথমাহ –

১৫৮.

‘‘যে চাপি মে সকুণা অত্থি বদ্ধা, সতানিনেকানি নিৰেসনস্মিং;

তেসম্পহং জীৰিতমজ্জ দম্মি, মোক্খঞ্চ তে পত্তা সকং নিকেত’’ন্তি.

তত্থ মোক্খঞ্চ তে পত্তাতি স্ৰাহং মোক্খং পত্তো পচ্চেকবোধিঞাণং পটিৰিজ্ঝিত্ৰা ঠিতো, তে সত্তে জীৰিতদানেন অনুকম্পামি, এতেন সচ্চেন. সকং নিকেতন্তি সব্বেপি তে সত্তা অত্তনো অত্তনো ৰসনট্ঠানং গচ্ছন্তূতি ৰদতি.

অথস্স সচ্চকিরিযাসমকালমেৰ সব্বে বন্ধনা মুচ্চিত্ৰা তুট্ঠিরৰং রৰন্তা সকট্ঠানমেৰ অগমিংসু. তস্মিং খণে তেসং তেসং গেহেসু বিল়ালে আদিং কত্ৰা সকলজম্বুদীপে বন্ধনগতো সত্তো নাম নাহোসি. পচ্চেকবুদ্ধো হত্থং উক্খিপিত্ৰা সীসং পরামসি. তাৰদেৰ গিহিলিঙ্গং অন্তরধাযি, পব্বজিতলিঙ্গং পাতুরহোসি. সো সট্ঠিৰস্সিকত্থেরো ৰিয আকপ্পসম্পন্নো অট্ঠপরিক্খারধরো হুত্ৰা ‘‘ত্ৰমেৰ মম পতিট্ঠা অহোসী’’তি মোররাজস্স অঞ্জলিং পগ্গয্হ পদক্খিণং কত্ৰা আকাসে উপ্পতিত্ৰা নন্দমূলকপব্ভারং অগমাসি. মোররাজাপি যট্ঠিঅগ্গতো উপ্পতিত্ৰা গোচরং গহেত্ৰা অত্তনো ৰসনট্ঠানং গতো. ইদানি লুদ্দস্স সত্ত ৰস্সানি পাসহত্থস্স চরিত্ৰাপি মোররাজানং নিস্সায দুক্খা মুত্তভাৰং পকাসেন্তো সত্থা ওসানগাথমাহ –

১৫৯.

‘‘লুদ্দো চরী পাসহত্থো অরঞ্ঞে, বাধেতু মোরাধিপতিং যসস্সিং;

বন্ধিত্ৰা মোরাধিপতিং যসস্সিং, দুক্খা স পমুচ্চি যথাহং পমুত্তো’’তি.

তত্থ বাধেতূতি মারেতুং, অযমেৰ ৰা পাঠো. বন্ধিত্ৰাতি বন্ধিত্ৰা ঠিতস্স ধম্মকথং সুত্ৰা পটিলদ্ধসংৰেগো হুত্ৰাতি অত্থো. যথাহন্তি যথা অহং সযম্ভুঞাণেন মুত্তো, এৰমেৰ সোপি মুত্তোতি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু অরহত্তং পাপুণি. তদা মোররাজা অহমেৰ অহোসিন্তি.

মহামোরজাতকৰণ্ণনা অট্ঠমা.

[৪৯২] ৯. তচ্ছসূকরজাতকৰণ্ণনা

যদেসমানা ৰিচরিম্হাতি ইদং সত্থা জেতৰনে ৰিহরন্তো দ্ৰে মহল্লকত্থেরে আরব্ভ কথেসি. মহাকোসলো কির রঞ্ঞো বিম্বিসারস্স ধীতরং দেন্তো ধীতু ন্হানীযমূলত্থায কাসিগামং অদাসি. পসেনদি রাজা অজাতসত্তুনা পিতরি মারিতে তং গামং অচ্ছিন্দি. তেসু তস্সত্থায যুজ্ঝন্তেসু পঠমং অজাতসত্তুস্স জযো অহোসি. কোসলরাজা পরাজযপ্পত্তো অমচ্চে পুচ্ছি ‘‘কেন নু খো উপাযেন অজাতসত্তুং গণ্হেয্যামা’’তি. মহারাজ, ভিক্খূ নাম মন্তকুসলা হোন্তি, চরপুরিসে পেসেত্ৰা ৰিহারে ভিক্খূনং কথং পরিগ্গণ্হিতুং ৰট্টতীতি. রাজা ‘‘সাধূ’’তি পটিস্সুণিত্ৰা ‘‘এথ, তুম্হে ৰিহারং গন্ত্ৰা পটিচ্ছন্না হুত্ৰা ভদন্তানং কথং পরিগ্গণ্হথা’’তি চরপুরিসে পযোজেসি. জেতৰনেপি বহূ রাজপুরিসা পব্বজিতা হোন্তি. তেসু দ্ৰে মহল্লকত্থেরা ৰিহারপচ্চন্তে পণ্ণসালাযং ৰসন্তি, একো ধনুগ্গহতিস্সত্থেরো নাম, একো মন্তিদত্তত্থেরো নাম. তে সব্বরত্তিং সুপিত্ৰা পচ্চূসকালে পবুজ্ঝিংসু.

তেসু ধনুগ্গহতিস্সত্থেরো অগ্গিং জালেত্ৰা আহ ‘‘ভন্তে, মন্তিদত্তত্থেরা’’তি. ‘‘কিং ভন্তে’’তি. ‘‘নিদ্দাযথ তুম্হে’’তি. ‘‘ন নিদ্দাযামি, কিং কাতব্ব’’ন্তি? ‘‘ভন্তে, লালকো ৰতাযং কোসলরাজা চাটিমত্তভোজনমেৰ ভুঞ্জিতুং জানাতী’’তি. ‘‘অথ কিং ভন্তে’’তি. ‘‘অত্তনো কুচ্ছিম্হি পাণকমত্তেন অজাতসত্তুনা পরাজিতো রাজা’’তি. ‘‘কিন্তি পন ভন্তে কাতুং ৰট্টতী’’তি? ‘‘ভন্তে, মন্তিদত্তত্থের যুদ্ধং নাম সকটব্যূহচক্কব্যূহপদুমব্যূহৰসেন তিৰিধং. তেসু ভাগিনেয্যং অজাতসত্তুং গণ্হন্তেন সকটব্যূহং কত্ৰা গণ্হিতুং ৰট্টতি, অসুকস্মিং নাম পব্বতকণ্ণে দ্ৰীসু পস্সেসু সূরপুরিসে ঠপেত্ৰা পুরতো বলং দস্সেত্ৰা অন্তো পৰিট্ঠভাৰং ঞত্ৰা নদিত্ৰা ৰগ্গিত্ৰা কুমিনে পৰিট্ঠমচ্ছং ৰিয অন্তোমুট্ঠিযং কত্ৰাৰ নং গহেতুং সক্কা’’তি.

পযোজিতপুরিসা তং কথং সুত্ৰা রঞ্ঞো আরোচেসুং. রাজা মহতিযা সেনায গন্ত্ৰা তথা কত্ৰা অজাতসত্তুং গহেত্ৰা সঙ্খলিকবন্ধনেন বন্ধিত্ৰা কতিপাহং নিম্মদং কত্ৰা ‘‘পুন এৰরূপং মা করী’’তি অস্সাসেত্ৰা মোচেত্ৰা ধীতরং ৰজিরকুমারিং নাম তস্স দত্ৰা মহন্তেন পরিৰারেন ৰিস্সজ্জেসি. ‘‘কোসলরঞ্ঞা ধনুগ্গহতিস্সত্থেরস্স সংৰিধানেন অজাতসত্তু গহিতো’’তি ভিক্খূনং অন্তরে কথা সমুট্ঠহি, ধম্মসভাযম্পি তমেৰ কথং সমুট্ঠাপেসুং. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি ধনুগ্গহতিস্সো যুদ্ধসংৰিধানে ছেকোযেৰা’’তি ৰত্ৰা অতীতং আহরি.

অতীতে বারাণসিনগরস্স দ্ৰারগামৰাসী একো ৰড্ঢকী দারুঅত্থায অরঞ্ঞং গন্ত্ৰা আৰাটে পতিতং একং সূকরপোতকং দিস্ৰা আনেত্ৰা ‘‘তচ্ছসূকরো’’তিস্স নামং কত্ৰা পোসেসি. সো তস্স উপকারকো অহোসি. তুণ্ডেন রুক্খে পরিৰত্তেত্ৰা দেতি, দাঠায ৰেঠেত্ৰা কাল়সুত্তং কড্ঢতি, মুখেন ডংসিত্ৰা ৰাসিনিখাদনমুগ্গরে আহরতি. সো ৰুড্ঢিপ্পত্তো মহাবলো মহাসরীরো অহোসি. অথ ৰড্ঢকী তস্মিং পুত্তপেমং পচ্চুপট্ঠাপেত্ৰা ‘‘ইমং ইধ ৰসন্তং কোচিদেৰ হিংসেয্যা’’তি অরঞ্ঞে ৰিস্সজ্জেসি. সো চিন্তেসি ‘‘অহং ইমস্মিং অরঞ্ঞে এককোৰ ৰসিতুং ন সক্খিস্সামি, ঞাতকে পরিযেসিত্ৰা তেহি পরিৰুতো ৰসিস্সামী’’তি. সো ৰনঘটায সূকরে পরিযেসন্তো বহূ সূকরে দিস্ৰা তুস্সিত্ৰা তিস্সো গাথা অভাসি –

১৬০.

‘‘যদেসমানা ৰিচরিম্হ, পব্বতানি ৰনানি চ;

অন্ৰেসং ৰিচরিং ঞাতী, তেমে অধিগতা মযা.

১৬১.

‘‘বহুঞ্চিদং মূলফলং, ভক্খো চাযং অনপ্পকো;

রম্মা চিমা গিরীনজ্জো, ফাসুৰাসো ভৰিস্সতি.

১৬২.

‘‘ইধেৰাহং ৰসিস্সামি, সহ সব্বেহি ঞাতিভি;

অপ্পোস্সুক্কো নিরাসঙ্কী, অসোকো অকুতোভযো’’তি.

তত্থ যদেসমানাতি যং ঞাতিগণং পরিযেসন্তা মযং ৰিচরিম্হ. অন্ৰেসন্তি চিরং ৰত অন্ৰেসন্তো ৰিচরিং. তেমেতি তে ইমে. ভক্খোতি স্ৰেৰ ৰনমূলফলসঙ্খাতো ভক্খো. অপ্পোস্সুক্কোতি অনুস্সুক্কো হুত্ৰা.

সূকরা তস্স ৰচনং সুত্ৰা চতুত্থং গাথমাহংসু –

১৬৩.

‘‘অঞ্ঞম্পি লেণং পরিযেস, সত্তু নো ইধ ৰিজ্জতি;

সো তচ্ছ সূকরে হন্তি, ইধাগন্ত্ৰা ৰরং ৰর’’ন্তি.

তত্থ তচ্ছাতি তং নামেনালপন্তি. ৰরং ৰরন্তি সূকরে হনন্তো থূলমংসং ৰরং ৰরঞ্ঞেৰ হনতি.

ইতো পরং উত্তানসম্বন্ধগাথা পাল়িনযেন ৰেদিতব্বা –

১৬৪.

‘‘কো নুম্হাকং ইধ সত্তু, কো ঞাতী সুসমাগতে;

দুপ্পধংসে পধংসেতি, তং মে অক্খাথ পুচ্ছিতা.

১৬৫.

‘‘উদ্ধগ্গরাজী মিগরাজা, বলী দাঠাৰুধো মিগো;

সো তচ্ছ সূকরে হন্তি, ইধাগন্ত্ৰা ৰরং ৰরং.

১৬৬.

‘‘ন নো দাঠা ন ৰিজ্জন্তি, বলং কাযে সমোহিতং;

সব্বে সমগ্গা হুত্ৰান, ৰসং কাহাম এককং.

১৬৭.

‘‘হদযঙ্গমং কণ্ণসুখং, ৰাচং ভাসসি তচ্ছক;

যোপি যুদ্ধে পলাযেয্য, তম্পি পচ্ছা হনামসে’’তি.

তত্থ কো নুম্হাকন্তি অহং তুম্হে দিস্ৰাৰ ‘‘ইমে সূকরা অপ্পমংসলোহিতা, ভযেন নেসং ভৰিতব্ব’’ন্তি চিন্তেসিং, তস্মা মে আচিক্খথ, কো নু অম্হাকং ইধ সত্তু. উদ্ধগ্গরাজীতি উদ্ধগ্গাহি সরীররাজীহি সমন্নাগতো. ব্যগ্ঘং সন্ধাযেৰমাহংসু. যোপীতি যো অম্হাকং অন্তরে একোপি পলাযিস্সতি, তম্পি মযং পচ্ছা হনিস্সামাতি.

তচ্ছসূকরো সব্বে সূকরে একচিত্তে কত্ৰা পুচ্ছি ‘‘কায ৰেলায ব্যগ্ঘো আগমিস্সতী’’তি. অজ্জ পাতোৰ একং গহেত্ৰা গতো, স্ৰে পাতোৰ আগমিস্সতীতি. সো যুদ্ধকুসলো ‘‘ইমস্মিং ঠানে ঠিতেন সক্কা জেতু’’ন্তি ভূমিসীসং পজানাতি, তস্মা একং পদেসং সল্লক্খেত্ৰা রত্তিমেৰ সূকরে গোচরং গাহাপেত্ৰা বলৰপচ্চূসতো পট্ঠায ‘‘যুদ্ধং নাম সকটব্যূহাদিৰসেন তিৰিধং হোতী’’তি ৰত্ৰা পদুমব্যূহং সংৰিদহতি. মজ্ঝে ঠানে খীরপিৰকে সূকরপোতকে ঠপেসি. তে পরিৰারেত্ৰা তেসং মাতরো, তা পরিৰারেত্ৰা ৰঞ্ঝা সূকরিযো, তাসং অনন্তরা সূকরপোতকে, তেসং অনন্তরা মকুলদাঠে তরুণসূকরে, তেসং অনন্তরা মহাদাঠে, তেসং অনন্তরা জিণ্ণসূকরে, ততো তত্থ তত্থ দসৰগ্গং ৰীসতিৰগ্গং তিংসৰগ্গঞ্চ কত্ৰা বলগুম্বং ঠপেসি. অত্তনো অত্থায একং আৰাটং, ব্যগ্ঘস্স পতনত্থায একং সুপ্পসণ্ঠানং পব্ভারং কত্ৰা খণাপেসি. দ্ৰিন্নং আৰাটানং অন্তরে অত্তনো ৰসনত্থায পীঠকং কারেসি. সো থামসম্পন্নে যোধসূকরে গহেত্ৰা তস্মিং তস্মিং ঠানে সূকরে অস্সাসেন্তো ৰিচরি. তস্সেৰং করোন্তস্সেৰ সূরিযো উগ্গচ্ছতি.

অথ ব্যগ্ঘরাজা কূটজটিলস্স অস্সমপদা নিক্খমিত্ৰা পব্বততলে অট্ঠাসি. তং দিস্ৰা সূকরা ‘‘আগতো নো ভন্তে ৰেরী’’তি ৰদিংসু. মা ভাযথ, যং যং এস করোতি, তং সব্বং সরিক্খা হুত্ৰা করোথাতি. ব্যগ্ঘো সরীরং ৰিধুনিত্ৰা ওসক্কন্তো ৰিয পস্সাৰমকাসি, সূকরাপি তথেৰ করিংসু. ব্যগ্ঘো সূকরে ওলোকেত্ৰা মহানদং নদি, তেপি তথেৰ করিংসু. সো তেসং কিরিযং দিস্ৰা চিন্তেসি ‘‘ন ইমে পুব্বসদিসা, অজ্জ ময্হং পটিসত্তুনো হুত্ৰা ৰগ্গৰগ্গা ঠিতা, সংৰিদহকো নেসং সেনানাযকোপি অত্থি, অজ্জ মযা এতেসং সন্তিকং গন্তুং ন ৰট্টতী’’তি মরণভযতজ্জিতো নিৰত্তিত্ৰা কূটজটিলস্স সন্তিকং গতো. অথ নং সো তুচ্ছহত্থং দিস্ৰা নৰমং গাথমাহ –

১৬৮.

‘‘পাণাতিপাতা ৰিরতো নু অজ্জ, অভযং নু তে সব্বভূতেসু দিন্নং;

দাঠা নু তে মিগৰধায ন সন্তি, যো সঙ্ঘপত্তো কপণোৰ ঝাযসী’’তি.

তত্থ সঙ্ঘপত্তোতি যো ত্ৰং সূকরসঙ্ঘপত্তো হুত্ৰা কিঞ্চি গোচরং অলভিত্ৰা কপণো ৰিয ঝাযসীতি.

অথ ব্যগ্ঘো তিস্সো গাথা অভাসি –

১৬৯.

‘‘ন মে দাঠা ন ৰিজ্জন্তি, বলং কাযে সমোহিতং;

ঞাতী চ দিস্ৰান সামগ্গী একতো, তস্মা চ ঝাযামি ৰনম্হি এককো.

১৭০.

‘‘ইমস্সুদং যন্তি দিসোদিসং পুরে, ভযট্টিতা লেণগৰেসিনো পুথু;

তে দানি সঙ্গম্ম ৰসন্তি একতো, যত্থট্ঠিতা দুপ্পসহজ্জ তে মযা.

১৭১.

‘‘পরিণাযকসম্পন্না, সহিতা একৰাদিনো;

তে মং সমগ্গা হিংসেয্যুং, তস্মা নেসং ন পত্থযে’’তি.

তত্থ সামগ্গী একতোতি সহিতা হুত্ৰা একতো ঠিতে. ইমস্সুদন্তি ইমে সুদং মযা অক্খীনি উম্মীলেত্ৰা ওলোকিতমত্তাৰ পুব্বে দিসোদিসং গচ্ছন্তি. পুথূতি ৰিসুং ৰিসুং. যত্থট্ঠিতাতি যস্মিং ভূমিভাগে ঠিতা. পরিণাযকসম্পন্নাতি সেনানাযকেন সম্পন্না. তস্মা নেসং ন পত্থযেতি তেন কারণেন এতেসং ন পত্থেমি.

তং সুত্ৰা কূটজটিলো তস্স উস্সাহং জনযন্তো গাথমাহ –

১৭২.

‘‘একোৰ ইন্দো অসুরে জিনাতি, একোৰ সেনো হন্তি দিজে পসয্হ;

একোৰ ব্যগ্ঘো মিগসঙ্ঘপত্তো, ৰরং ৰরং হন্তি বলঞ্হি তাদিস’’ন্তি.

তত্থ মিগসঙ্ঘপত্তোতি মিগগণপত্তো হুত্ৰা ৰরং ৰরং মিগং হন্তি. বলঞ্হি তাদিসন্তি তাদিসঞ্হি তস্স বলং.

অথ ব্যগ্ঘো গাথমাহ –

১৭৩.

‘‘ন হেৰ ইন্দো ন সেনো, নপি ব্যগ্ঘো মিগাধিপো;

সমগ্গে সহিতে ঞাতী, ন ব্যগ্ঘে কুরুতে ৰসে’’তি.

তত্থ ব্যগ্ঘেতি ব্যগ্ঘসদিসে হুত্ৰা সরীরৰিধূননাদীনি কত্ৰা ঠিতে ৰসে ন কুরুতে, অত্তনো ৰসে ৰত্তাপেতুং ন সক্কোতীতি অত্থো.

পুন জটিলো তং উস্সাহেন্তো দ্ৰে গাথা অভাসি –

১৭৪.

‘‘কুম্ভীলকা সকুণকা, সঙ্ঘিনো গণচারিনো;

সম্মোদমানা একজ্ঝং, উপ্পতন্তি ডযন্তি চ.

১৭৫.

‘‘তেসঞ্চ ডযমানানং, একেত্থ অপসক্কতি;

তঞ্চ সেনো নিতাল়েতি, ৰেয্যগ্ঘিযেৰ সা গতী’’তি.

তত্থ কুম্ভীলকাতি এৰংনামকা খুদ্দকসকুণা. উপ্পতন্তীতি গোচরং চরন্তা উপ্পতন্তি. ডযন্তি চাতি গোচরং গহেত্ৰা আকাসেন গচ্ছন্তি. একেত্থ অপসক্কতীতি একো এতেসু ওসক্কিত্ৰা ৰা একপস্সেন ৰা ৰিসুং গচ্ছতি. নিতাল়েতীতি পহরিত্ৰা গণ্হাতি. ৰেয্যগ্ঘিযেৰ সা গতীতি ব্যগ্ঘানং এসাতি ৰেয্যগ্ঘি, সমগ্গানং গচ্ছন্তানম্পি এসা এৰরূপা গতি ব্যগ্ঘানং গতিযেৰ নাম হোতি. ন হি সক্কা সব্বেহি একতোৰ গন্তুং, তস্মা যো এৰং তত্থ একো গচ্ছতি, তং গণ্হাতি.

এৰঞ্চ পন ৰত্ৰা ‘‘ব্যগ্ঘরাজ ত্ৰং অত্তনো বলং ন জানাসি, মা ভাযি, কেৰলং ত্ৰং নদিত্ৰা পক্খন্দ, দ্ৰে একতো গচ্ছন্তা নাম ন ভৰিস্সন্তী’’তি উস্সাহেসি. সো তথা অকাসি. তমত্থং পকাসেন্তো সত্থা আহ –

১৭৬.

‘‘উস্সাহিতো জটিলেন, লুদ্দেনামিসচক্খুনা;

দাঠী দাঠীসু পক্খন্তি, মঞ্ঞমানো যথা পুরে’’তি.

তত্থ দাঠীতি সযং দাঠাৰুধো ইতরেসু দাঠাৰুধেসু পক্খন্দি. যথা পুরেতি যথা পুব্বে মঞ্ঞতি, তথেৰ মঞ্ঞমানো.

সো কির গন্ত্ৰা পব্বততলে তাৰ অট্ঠাসি. সূকরা ‘‘পুনাগতো সামি, চোরো’’তি তচ্ছস্স আরোচেসুং. সো ‘‘মা ভাযথা’’তি তে অস্সাসেত্ৰা উট্ঠায দ্ৰিন্নং আৰাটানং অন্তরে পীঠকায অট্ঠাসি. ব্যগ্ঘো ৰেগং জনেত্ৰা তচ্ছসূকরং সন্ধায পক্খন্দি. তচ্ছসূকরো পরিৰত্তিত্ৰা পচ্ছামুখো পুরিমআৰাটে পতি. ব্যগ্ঘো চ ৰেগং সন্ধারেতুং অসক্কোন্তো গন্ত্ৰা সুপ্পপব্ভারে আৰাটে পতিত্ৰা পুঞ্জকিতোৰ অট্ঠাসি. তচ্ছসূকরো ৰেগেন উট্ঠায তস্স অন্তরসত্থিম্হি দাঠং ওতারেত্ৰা যাৰ হদযা ফালেত্ৰা মংসং খাদিত্ৰা মুখেন ডংসিত্ৰা বহিআৰাটে পাতেত্ৰা ‘‘গণ্হথিমং দাস’’ন্তি আহ. পঠমাগতা একৰারমেৰ তুণ্ডোতারণমত্তং লভিংসু, পচ্ছা আগতা অলভিত্ৰা ‘‘ব্যগ্ঘমংসং নাম কীদিস’’ন্তি ৰদিংসু. তচ্ছসূকরো আৰাটা উত্তরিত্ৰা সূকরে ওলোকেত্ৰা ‘‘কিং নু খো ন তুস্সথা’’তি আহ. ‘‘সামি, একো তাৰ ব্যগ্ঘো গহিতো, অঞ্ঞো পনেকো দসব্যগ্ঘগ্ঘনকো অত্থী’’তি? ‘‘কো নামেসো’’তি? ‘‘ব্যগ্ঘেন আভতাভতমংসং খাদকো কূটজটিলো’’তি. ‘‘তেন হি এথ, গণ্হিস্সাম ন’’ন্তি তেহি সদ্ধিং ৰেগেন পক্খন্দি.

জটিলো ‘‘ব্যগ্ঘো চিরাযতী’’তি তস্স আগমনমগ্গং ওলোকেন্তো বহূ সূকরে আগচ্ছন্তে দিস্ৰা ‘‘ইমে ব্যগ্ঘং মারেত্ৰা মম মারণত্থায আগচ্ছন্তি মঞ্ঞে’’তি পলাযিত্ৰা একং উদুম্বররুক্খং অভিরুহি. সূকরা ‘‘এস রুক্খং আরুল়্হো’’তি ৰদিংসু. ‘‘কিং রুক্খ’’ন্তি. ‘‘উদুম্বররুক্খ’’ন্তি. ‘‘তেন হি মা চিন্তযিত্থ, ইদানি নং গণ্হিস্সামা’’তি তরুণসূকরে পক্কোসিত্ৰা রুক্খমূলতা পংসুং অপব্যূহাপেসি, সূকরীহি মুখপূরং উদকং আহরাপেসি, মহাদাঠসূকরেহি সমন্তা মূলানি ছিন্দাপেসি. একং উজুকং ওতিণ্ণমূলমেৰ অট্ঠাসি. ততো সেসসূকরে ‘‘তুম্হে অপেথা’’তি উস্সারেত্ৰা জণ্ণুকেহি পতিট্ঠহিত্ৰা দাঠায মূলং পহরি, ফরসুনা পহটং ৰিয ছিজ্জিত্ৰা গতং. রুক্খো পরিৰত্তিত্ৰা পতি. তং কূটজটিলং পতন্তমেৰ সম্পটিচ্ছিত্ৰা মংসং ভক্খেসুং. তং অচ্ছরিযং দিস্ৰা রুক্খদেৰতা গাথমাহ –

১৭৭.

‘‘সাধু সম্বহুলা ঞাতী, অপি রুক্খা অরঞ্ঞজা;

সূকরেহি সমগ্গেহি, ব্যগ্ঘো একাযনে হতো’’তি.

তত্থ একাযনে হতোতি একগমনস্মিংযেৰ হতো.

উভিন্নং পন নেসং হতভাৰং পকাসেন্তো সত্থা ইতরং গাথমাহ –

১৭৮.

‘‘ব্রাহ্মণঞ্চেৰ ব্যগ্ঘঞ্চ, উভো হন্ত্ৰান সূকরা;

আনন্দিনো পমুদিতা, মহানাদং পনাদিসু’’ন্তি.

পুন তচ্ছসূকরো তে পুচ্ছি ‘‘অঞ্ঞেপি ৰো অমিত্তা অত্থী’’তি? সূকরা ‘‘নত্থি, সামী’’তি ৰত্ৰা ‘‘তং অভিসিঞ্চিত্ৰা রাজানং করিস্সামা’’তি উদকং পরিযেসন্তা জটিলস্স পানীযসঙ্খং দিস্ৰা তং দক্খিণাৰট্টং সঙ্খরতনং পূরেত্ৰা উদকং অভিহরিত্ৰা তচ্ছসূকরং উদুম্বররুক্খমূলেযেৰ অভিসিঞ্চিংসু. অভিসেকউদকং আসিত্তং, সূকরিমেৰস্স অগ্গমহেসিং করিংসু. ততো পট্ঠায উদুম্বরভদ্দপীঠে নিসীদাপেত্ৰা দক্খিণাৰট্টসঙ্খেন অভিসেককরণং পৰত্তং. তম্পি অত্থং পকাসেন্তো সত্থা ওসানগাথমাহ –

১৭৯.

‘‘তে সু উদুম্বরমূলস্মিং, সূকরা সুসমাগতা;

তচ্ছকং অভিসিঞ্চিংসু, ত্ৰং নো রাজাসি ইস্সরো’’তি.

তত্থ তে সূতি তে সূকরা, সু-কারো নিপাতমত্তং. উদুম্বরমূলস্মিন্তি উদুম্বরস্স মূলে.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি ধনুগ্গহতিস্সত্থেরো যুদ্ধসংৰিদহনে ছেকোযেৰা’’তি ৰত্ৰা জাতকং সমোধানেসি – ‘‘তদা কূটজটিলো দেৰদত্তো অহোসি, তচ্ছসূকরো ধনুগ্গহতিস্সো, রুক্খদেৰতা পন অহমেৰ অহোসি’’ন্তি.

তচ্ছসূকরজাতকৰণ্ণনা নৰমা.

[৪৯৩] ১০. মহাৰাণিজজাতকৰণ্ণনা

ৰাণিজা সমিতিং কত্ৰাতি ইদং সত্থা জেতৰনে ৰিহরন্তো সাৰত্থিৰাসিনো ৰাণিজে আরব্ভ কথেসি. তে কির ৰোহারত্থায গচ্ছন্তা সত্থু মহাদানং দত্ৰা সরণেসু চ সীলেসু চ পতিট্ঠায ‘‘ভন্তে, সচে অরোগা আগমিস্সাম, পুন তুম্হাকং পাদে ৰন্দিস্সামা’’তি ৰত্ৰা পঞ্চমত্তেহি সকটসতেহি নিক্খমিত্ৰা কন্তারং পত্ৰা মগ্গং অসল্লক্খেত্ৰা মগ্গমূল়্হা নিরুদকে নিরাহারে অরঞ্ঞে ৰিচরন্তা একং নাগপরিগ্গহিতং নিগ্রোধরুক্খং দিস্ৰা সকটানি মোচেত্ৰা রুক্খমূলে নিসীদিংসু. তে তস্স উদকতিন্তানি ৰিয নীলানি সিনিদ্ধানি পত্তানি উদকপুণ্ণা ৰিয চ সাখা দিস্ৰা চিন্তযিংসু ‘‘ইমস্মিং রুক্খে উদকং সঞ্চরন্তং ৰিয পঞ্ঞাযতি, ইমস্স পুরিমসাখং ছিন্দাম, পানীযং নো দস্সতী’’তি. অথেকো রুক্খং অভিরুহিত্ৰা সাখং ছিন্দি, ততো তালক্খন্ধপ্পমাণা উদকধারা পৰত্তি. তে তত্থ ন্হত্ৰা পিৰিত্ৰা চ দক্খিণসাখং ছিন্দিংসু, ততো নানগ্গরসভোজনং নিক্খমি. তং ভুঞ্জিত্ৰা পচ্ছিমসাখং ছিন্দিংসু, ততো অলঙ্কতইত্থিযো নিক্খমিংসু. তাহি সদ্ধিং অভিরমিত্ৰা উত্তরসাখং ছিন্দিংসু, ততো সত্ত রতনানি নিক্খমিংসু. তানি গহেত্ৰা পঞ্চ সকটসতানি পূরেত্ৰা সাৰত্থিং পচ্চাগন্ত্ৰা ধনং গোপেত্ৰা গন্ধমালাদিহত্থা জেতৰনং গন্ত্ৰা সত্থারং ৰন্দিত্ৰা পূজেত্ৰা একমন্তং নিসিন্না ধম্মকথং সুত্ৰা নিমন্তেত্ৰা পুনদিৰসে মহাদানং দত্ৰা ‘‘ভন্তে, ইমস্মিং দানে অম্হাকং ধনদাযিকায রুক্খদেৰতায পত্তিং দেমা’’তি পত্তিং অদংসু. সত্থা নিট্ঠিতভত্তকিচ্চো ‘‘কতররুক্খদেৰতায পত্তিং দেথা’’তি পুচ্ছি. ৰাণিজা নিগ্রোধরুক্খে ধনস্স লদ্ধাকারং তথাগতস্সারোচেসুং. সত্থা ‘‘তুম্হে তাৰ মত্তঞ্ঞুতায তণ্হাৰসিকা অহুত্ৰা ধনং লভিত্থ, পুব্বে পন অমত্তঞ্ঞুতায তণ্হাৰসিকা ধনঞ্চ জীৰিতঞ্চ ৰিজহিংসূ’’তি ৰত্ৰা তেহি যাচিতো অতীতং আহরি.

অতীতে বারাণসিনগরে তদেৰ পন কন্তারং স্ৰেৰ নিগ্রোধো. ৰাণিজা মগ্গমূল়্হা হুত্ৰা তমেৰ নিগ্রোধং পস্সিংসু. তমত্থং সত্থা অভিসম্বুদ্ধো হুত্ৰা কথেন্তো ইমা গাথা আহ –

১৮০.

‘‘ৰাণিজা সমিতিং কত্ৰা, নানারট্ঠতো আগতা;

ধনাহরা পক্কমিংসু, একং কত্ৰান গামণিং.

১৮১.

‘‘তে তং কন্তারমাগম্ম, অপ্পভক্খং অনোদকং;

মহানিগ্রোধমদ্দক্খুং, সীতচ্ছাযং মনোরমং.

১৮২.

‘‘তে চ তত্থ নিসীদিত্ৰা, তস্স রুক্খস্স ছাযযা;

ৰাণিজা সমচিন্তেসুং, বালা মোহেন পারুতা.

১৮৩.

‘‘অল্লাযতে অযং রুক্খো, অপি ৰারীৰ সন্দতি;

ইঙ্ঘস্স পুরিমং সাখং, মযং ছিন্দাম ৰাণিজা.

১৮৪.

‘‘সা চ ছিন্নাৰ পগ্ঘরি, অচ্ছং ৰারিং অনাৰিলং;

তে তত্থ ন্হত্ৰা পিৰিত্ৰা, যাৰতিচ্ছিংসু ৰাণিজা.

১৮৫.

‘‘দুতিযং সমচিন্তেসুং, বালা মোহেন পারুতা;

ইঙ্ঘস্স দক্খিণং সাখং, মযং ছিন্দাম ৰাণিজা.

১৮৬.

‘‘সা চ ছিন্নাৰ পগ্ঘরি, সালিমংসোদনং বহুং;

অপ্পোদৰণ্ণে কুম্মাসে, সিঙ্গিং ৰিদলসূপিযো.

১৮৭.

‘‘তে তত্থ ভুত্ৰা খাদিত্ৰা, যাৰতিচ্ছিংসু ৰাণিজা;

ততিযং সমচিন্তেসুং, বালা মোহেন পারুতা;

ইঙ্ঘস্স পচ্ছিমং সাখং, মযং ছিন্দাম ৰাণিজা.

১৮৮.

‘‘সা চ ছিন্নাৰ পগ্ঘরি, নারিযো সমলঙ্কতা;

ৰিচিত্রৰত্থাভরণা, আমুত্তমণিকুণ্ডলা.

১৮৯.

‘‘অপি সু ৰাণিজা একা, নারিযো পণ্ণৰীসতি;

সমন্তা পরিৰারিংসু, তস্স রুক্খস্স ছাযযা;

তে তাহি পরিচারেত্ৰা, যাৰতিচ্ছিংসু ৰাণিজা.

১৯০.

‘‘চতুত্থং সমচিন্তেসুং, বালা মোহেন পারুতা;

ইঙ্ঘস্স উত্তরং সাখং, মযং ছিন্দাম ৰাণিজা.

১৯১.

‘‘সা চ ছিন্নাৰ পগ্ঘরি, মুত্তা ৰেল়ুরিযা বহূ;

রজতং জাতরূপঞ্চ, কুত্তিযো পটিযানি চ.

১৯২.

‘‘কাসিকানি চ ৰত্থানি, উদ্দিযানি চ কম্বলা;

তে তত্থ ভারে বন্ধিত্ৰা, যাৰতিচ্ছিংসু ৰাণিজা.

১৯৩.

‘‘পঞ্চমং সমচিন্তেসুং, বালা মোহেন পারুতা;

ইঙ্ঘস্স মূলং ছিন্দাম, অপি ভিয্যো লভামসে.

১৯৪.

‘‘অথুট্ঠহি সত্থৰাহো, যাচমানো কতঞ্জলী;

নিগ্রোধো কিং পরজ্ঝতি, ৰাণিজা ভদ্দমত্থু তে.

১৯৫.

‘‘ৰারিদা পুরিমা সাখা, অন্নপানঞ্চ দক্খিণা;

নারিদা পচ্ছিমা সাখা, সব্বকামে চ উত্তরা;

নিগ্রোধো কিং পরজ্ঝতি, ৰাণিজা ভদ্দমত্থু তে.

১৯৬.

‘‘যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো.

১৯৭.

‘‘তে চ তস্সানাদিযিত্ৰা, একস্স ৰচনং বহূ;

নিসিতাহি কুঠারীহি, মূলতো নং উপক্কমু’’ন্তি.

তত্থ সমিতিং কত্ৰাতি বারাণসিযং সমাগমং কত্ৰা, বহূ একতো হুত্ৰাতি অত্থো. পক্কমিংসূতি পঞ্চহি সকটসতেহি বারাণসেয্যকং ভণ্ডং আদায পক্কমিংসু. গামণিন্তি একং পঞ্ঞৰন্ততরং সত্থৰাহং কত্ৰা. ছাযযাতি ছাযায. অল্লাযতেতি উদকভরিতো ৰিয অল্লো হুত্ৰা পঞ্ঞাযতি. ছিন্নাৰ পগ্ঘরীতি একো রুক্খারোহনকুসলো অভিরুহিত্ৰা তং ছিন্দি, সা ছিন্নমত্তাৰ পগ্ঘরীতি দস্সেতি. পরতোপি এসেৰ নযো.

অপ্পোদৰণ্ণে কুম্মাসেতি অপ্পোদকপাযাসসদিসে কুম্মাসে. সিঙ্গিন্তি সিঙ্গিৰেরাদিকং উত্তরিভঙ্গং. ৰিদলসূপিযোতি মুগ্গসূপাদযো. ৰাণিজা একাতি একেকস্স ৰাণিজস্স যত্তকা ৰাণিজা, তেসু একেকস্স একেকাৰ, সত্থৰাহস্স পন সন্তিকে পঞ্চৰীসতীতি অত্থো. পরিৰারিংসূতি পরিৰারেসুং. তাহি পন সদ্ধিংযেৰ নাগানুভাৰেন সাণিৰিতানসযনাদীনি পগ্ঘরিংসু.

কুত্তিযোতি হত্থত্থরাদযো. পটিযানিচাতি উণ্ণামযপচ্চত্থরণানি. ‘‘সেতকম্বলানী’’তিপি ৰদন্তিযেৰ. উদ্দিযানি চ কম্বলাতি উদ্দিযানি নাম কম্বলা অত্থি. তে তত্থ ভারে বন্ধিত্ৰাতি যাৰতকং ইচ্ছিংসু, তাৰতকং গহেত্ৰা পঞ্চ সকটসতানি পূরেত্ৰাতি অত্থো. ৰাণিজা ভদ্দমত্থু তেতি একেকং ৰাণিজং আলপন্তো ‘‘ভদ্দং তে অত্থূ’’তি আহ. অন্নপানঞ্চাতি অন্নঞ্চ পানঞ্চ অদাসি. সব্বকামে চাতি সব্বকামে চ অদাসি. মিত্তদুব্ভো হীতি মিত্তানং দুব্ভনপুরিসো হি পাপকো লামকো নাম. অনাদিযিত্ৰাতি তস্স ৰচনং অগ্গহেত্ৰা. উপক্কমুন্তি মোহাৰ ছিন্দিতুং আরভিংসু.

অথ নে ছিন্দনত্থায রুক্খং উপগতে দিস্ৰা নাগরাজা চিন্তেসি ‘‘অহং এতেসং পিপাসিতানং পানীযং দাপেসিং, ততো দিব্বভোজনং, ততো সযনাদীনি চেৰ পরিচারিকা চ নারিযো, ততো পঞ্চসতসকটপূরং রতনং, ইদানি পনিমে ‘‘রুক্খং মূলতো ছিন্দিস্সামা’তি ৰদন্তি, অতিৰিয লুদ্ধা ইমে, ঠপেত্ৰা সত্থৰাহং অৰসেসে মারেতুং ৰট্টতী’’তি. সো ‘‘এত্তকা সন্নদ্ধযোধা নিক্খমন্তু, এত্তকা ধনুগ্গহা, এত্তকা ৰম্মিনো’’তি সেনং ৰিচারেসি. তমত্থং পকাসেন্তো সত্থা গাথমাহ –

১৯৮.

‘‘ততো নাগা নিক্খমিংসু, সন্নদ্ধা পণ্ণৰীসতি;

ধনুগ্গহানং তিসতা, ছসহস্সা চ ৰম্মিনো’’তি.

তত্থ সন্নদ্ধাতি সুৰণ্ণরজতাদিৰম্মকৰচিকা. ধনুগ্গহানং তিসতাতি মেণ্ডৰিসাণধনুগ্গহানং তীণি সতানি. ৰম্মিনোতি খেটকফলকহত্থা ছসহস্সা.

১৯৯.

‘‘এতে হনথ বন্ধথ, মা ৰো মুঞ্চিত্থ জীৰিতং;

ঠপেত্ৰা সত্থৰাহংৰ, সব্বে ভস্মং করোথ নে’’তি. – অযং নাগরাজেন ৰুত্তগাথা;

তত্থ মা ৰো মুঞ্চিত্থ জীৰিতন্তি কস্সচি একস্সপি জীৰিতং মা মুঞ্চিত্থ.

নাগা তথা কত্ৰা অত্থরণাদীনি পঞ্চসু সকটসতেসু আরোপেত্ৰা সত্থৰাহং গহেত্ৰা সযং তানি সকটানি পাজেন্তা বারাণসিং গন্ত্ৰা সব্বং ধনং তস্স গেহে পটিসামেত্ৰা তং আপুচ্ছিত্ৰা অত্তনো নাগভৰনমেৰ গতা. তমত্থং ৰিদিত্ৰা সত্থা ওৰাদৰসেন গাথাদ্ৰযমাহ –

২০০.

‘‘তস্মা হি পণ্ডিতো পোসো, সম্পস্সং অত্থমত্তনো;

লোভস্স ন ৰসং গচ্ছে, হনেয্যারিসকং মনং.

২০১.

‘‘এৰমাদীনৰং ঞত্ৰা, তণ্হা দুক্খস্স সম্ভৰং;

ৰীততণ্হো অনাদানো, সতো ভিক্খু পরিব্বজে’’তি.

তত্থ তস্মাতি যস্মা লোভৰসিকা মহাৰিনাসং পত্তা, সত্থৰাহো উত্তমসম্পত্তিং, তস্মা. হনেয্যারিসকং মনন্তি অন্তো উপ্পজ্জমানানং নানাৰিধানং লোভসত্তূনং সন্তকং মনং, লোভসম্পযুত্তচিত্তং হনেয্যাতি অত্থো. এৰমাদীনৰন্তি এৰং লোভে আদীনৰং জানিত্ৰা. তণ্হা দুক্খস্স সম্ভৰন্তি জাতিআদিদুক্খস্স তণ্হা সম্ভৰো, ততো এতং দুক্খং নিব্বত্ততি, এৰং তণ্হাৰ দুক্খস্স সম্ভৰং ঞত্ৰা ৰীততণ্হো তণ্হাআদানেন অনাদানো মগ্গেন আগতায সতিযা সতো হুত্ৰা ভিক্খু পরিব্বজে ইরিযেথ ৰত্তেথাতি অরহত্তেন দেসনায কূটং গণ্হি.

ইমঞ্চ পন ধম্মদেসনং আহরিত্ৰা ‘‘এৰং উপাসকা পুব্বে লোভৰসিকা ৰাণিজা মহাৰিনাসং পত্তা, তস্মা লোভৰসিকেন ন ভৰিতব্ব’’ন্তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে তে ৰাণিজা সোতাপত্তিফলে পতিট্ঠিতা. তদা নাগরাজা সারিপুত্তো অহোসি, সত্থৰাহো পন অহমেৰ অহোসিন্তি.

মহাৰাণিজজাতকৰণ্ণনা দসমা.

[৪৯৪] ১১. সাধিনজাতকৰণ্ণনা

অব্ভুতো ৰত লোকস্মিন্তি ইদং সত্থা জেতৰনে ৰিহরন্তো উপোসথিকে উপাসকে আরব্ভ কথেসি. তদা হি সত্থা ‘‘উপাসকা পোরাণকপণ্ডিতা অত্তনো উপোসথকম্মং নিস্সায মনুস্সসরীরেনেৰ দেৰলোকং গন্ত্ৰা চিরং ৰসিংসূ’’তি ৰত্ৰা তেহি যাচিতো অতীতং আহরি.

অতীতে মিথিলাযং সাধিনো নাম রাজা ধম্মেন রজ্জং কারেসি. সো চতূসু নগরদ্ৰারেসু নগরমজ্ঝে নিৰেসনদ্ৰারে চাতি ছ দানসালাযো কারেত্ৰা সকলজম্বুদীপং উন্নঙ্গলং কত্ৰা মহাদানং পৰত্তেসি, দেৰসিকং ছ সতসহস্সানি ৰযকরণং গচ্ছন্তি, পঞ্চ সীলানি রক্খতি, উপোসথং উপৰসতি. রট্ঠৰাসিনোপি তস্স ওৰাদে ঠত্ৰা দানাদীনি পুঞ্ঞানি কত্ৰা মতমতা দেৰনগরেযেৰ নিব্বত্তিংসু. সুধম্মদেৰসভং পূরেত্ৰা নিসিন্না দেৰা রঞ্ঞো সীলাদিগুণমেৰ ৰণ্ণযন্তি. তং সুত্ৰা সেসদেৰাপি রাজানং দট্ঠুকামা অহেসুং. সক্কো দেৰরাজা তেসং মনং ৰিদিত্ৰা আহ – ‘‘সাধিনরাজানং দট্ঠুকামত্থা’’তি. ‘‘আম দেৰা’’তি. সো মাতলিং আণাপেসি ‘‘গচ্ছ ত্ৰং ৰেজযন্তরথং যোজেত্ৰা সাধিনরাজানং আনেহী’’তি. সো ‘‘সাধূ’’তি সম্পটিচ্ছিত্ৰা রথং যোজেত্ৰা ৰিদেহরট্ঠং অগমাসি, তদা পুণ্ণমদিৰসো হোতি. মাতলি মনুস্সানং সাযমাসং ভুঞ্জিত্ৰা ঘরদ্ৰারেসু সুখকথায নিসিন্নকালে চন্দমণ্ডলেন সদ্ধিং রথং পেসেসি. মনুস্সা ‘‘দ্ৰে চন্দা উট্ঠিতা’’তি ৰদন্তা পুন চন্দমণ্ডলং ওহায রথং আগচ্ছন্তং দিস্ৰা ‘‘নাযং চন্দো, রথো এসো, দেৰপুত্তো পঞ্ঞাযতি, কস্সেস এতং মনোমযসিন্ধৰযুত্তং দিব্বরথং আনেতি, ন অঞ্ঞস্স, অম্হাকং রঞ্ঞো ভৰিস্সতি, রাজা হি নো ধম্মিকো ধম্মরাজা’’তি সোমনস্সজাতা হুত্ৰা অঞ্জলিং পগ্গয্হ ঠিতা পঠমং গাথমাহংসু –

২০২.

‘‘অব্ভুতো ৰত লোকস্মিং, উপ্পজ্জি লোমহংসনো;

দিব্বো রথো পাতুরহু, ৰেদেহস্স যসস্সিনো’’তি.

তস্সত্থো – অব্ভুতো ৰতেস অম্হাকং রাজা, লোকস্মিং লোমহংসনো উপ্পজ্জি, যস্স দিব্বো রথো পাতুরহোসি ৰেদেহস্স যসস্সিনোতি.

মাতলিপি তং রথং আনেত্ৰা মনুস্সেসু গন্ধমালাদীহি পূজেন্তেসু তিক্খত্তুং নগরং পদক্খিণং কত্ৰা রঞ্ঞো নিৰেসনদ্ৰারং গন্ত্ৰা রথং নিৰত্তেত্ৰা পচ্ছাভাগেন সীহপঞ্জরউম্মারে ঠপেত্ৰা আরোহণসজ্জং কত্ৰা অট্ঠাসি. তং দিৰসং রাজাপি দানসালাযো ওলোকেত্ৰা ‘‘ইমিনা নিযামেন দানং দেথা’’তি আণাপেত্ৰা উপোসথং সমাদিযিত্ৰা দিৰসং ৰীতিনামেত্ৰা অমচ্চগণপরিৰুতো অলঙ্কতমহাতলে পাচীনসীহপঞ্জরাভিমুখো ধম্মযুত্তং কথেন্তো নিসিন্নো হোতি. অথ নং মাতলি রথাভিরুহনত্থং নিমন্তেত্ৰা আদায অগমাসি. তমত্থং পকাসেন্তো সত্থা ইমা গাথা অভাসি –

২০৩.

‘‘দেৰপুত্তো মহিদ্ধিকো, মাতলি দেৰসারথি;

নিমন্তযিত্থ রাজানং, ৰেদেহং মিথিলগ্গহং.

২০৪.

‘‘এহিমং রথমারুয্হ, রাজসেট্ঠ দিসম্পতি;

দেৰা দস্সনকামা তে, তাৰতিংসা সইন্দকা;

সরমানা হি তে দেৰা, সুধম্মাযং সমচ্ছরে.

২০৫.

‘‘ততো চ রাজা সাধিনো, ৰেদেহো মিথিলগ্গহো;

সহস্সযুত্তমারুয্হ, অগা দেৰান সন্তিকে;

তং দেৰা পটিনন্দিংসু, দিস্ৰা রাজানমাগতং.

২০৬.

‘‘স্ৰাগতং তে মহারাজ, অথো তে অদুরাগতং;

নিসীদ দানি রাজীসি, দেৰরাজস্স সন্তিকে.

২০৭.

‘‘সক্কোপি পটিনন্দিত্থ, ৰেদেহং মিথিলগ্গহং;

নিমন্তযিত্থ কামেহি, আসনেন চ ৰাসৰো.

২০৮.

‘‘সাধু খোসি অনুপ্পত্তো, আৰাসং ৰসৰত্তিনং;

ৰস দেৰেসু রাজীসি, সব্বকামসমিদ্ধিসু;

তাৰতিংসেসু দেৰেসু, ভুঞ্জ কামে অমানুসে’’তি.

তত্থ সমচ্ছরেতি অচ্ছন্তি. অগা দেৰান সন্তিকেতি দেৰানং সন্তিকং অগমাসি. তস্মিঞ্হি রথং অভিরুহিত্ৰা ঠিতে রথো আকাসং পক্খন্দি, সো মহাজনস্স ওলোকেন্তস্সেৰ অন্তরধাযি. মাতলি রাজানং দেৰলোকং নেসি. তং দিস্ৰা দেৰতা চ সক্কো চ হট্ঠতুট্ঠা পচ্চুগ্গমনং কত্ৰা পটিসন্থারং করিংসু. তমত্থং দস্সেতুং ‘‘তং দেৰা’’তিআদি ৰুত্তং. তত্থ পটিনন্দিংসূতি পুনপ্পুনং নন্দিংসু. আসনেন চাতি রাজানং আলিঙ্গিত্ৰা ‘‘ইধ নিসীদা’’তি অত্তনো পণ্ডুকম্বলসিলাসনেন চ কামেহি চ নিমন্তেসি, উপড্ঢরজ্জং দত্ৰা একাসনে নিসীদাপেসীতি অত্থো.

তত্থ সক্কেন দেৰরঞ্ঞা দসযোজনসহস্সং দেৰনগরং অড্ঢতিযা চ অচ্ছরাকোটিযো ৰেজযন্তপাসাদঞ্চ মজ্ঝে ভিন্দিত্ৰা দিন্নং সম্পত্তিং অনুভৰন্তস্স মনুস্সগণনায সত্ত ৰস্সসতানি অতিক্কন্তানি. তেনত্তভাৰেন দেৰলোকে ৰসনকং পুঞ্ঞং খীণং, অনভিরতি উপ্পন্না, তস্মা সক্কেন সদ্ধিং সল্লপন্তো গাথমাহ –

২০৯.

‘‘অহং পুরে সগ্গগতো রমামি, নচ্চেহি গীতেহি চ ৰাদিতেহি;

সো দানি অজ্জ ন রমামি সগ্গে, আযুং নু খীণো মরণং নু সন্তিকে;

উদাহু মূল়্হোস্মি জনিন্দসেট্ঠা’’তি.

তত্থ আযুং নু খীণোতি কিং নু মম সরসেন জীৰিতিন্দ্রিযং খীণং, উদাহু উপচ্ছেদককম্মৰসেন মরণং সন্তিকে জাতন্তি পুচ্ছতি. জনিন্দসেট্ঠাতি জনিন্দানং দেৰানং সেট্ঠ.

অথ নং সক্কো আহ –

২১০.

‘‘ন তাযু খীণং মরণঞ্চ দূরে, ন চাপি মূল়্হো নরৰীরসেট্ঠ;

তুয্হঞ্চ পুঞ্ঞানি পরিত্তকানি, যেসং ৰিপাকং ইধ ৰেদযিত্থো.

২১১.

‘‘ৰস দেৰানুভাৰেন, রাজসেট্ঠ দিসম্পতি;

তাৰতিংসেসু দেৰেসু, ভুঞ্জ কামে অমানুসে’’তি.

তত্থ ‘‘পরিত্তকানী’’তি ইদং তেন অত্তভাৰেন দেৰলোকে ৰিপাকদাযকানি পুঞ্ঞানি সন্ধায ৰুত্তং, ইতরানি পনস্স পুঞ্ঞানি পথৰিযং পংসু ৰিয অপ্পমাণানি. ৰস দেৰানুভাৰেনাতি অহং তে অত্তনো পুঞ্ঞানি মজ্ঝে ভিন্দিত্ৰা দস্সামি, মমানুভাৰেন ৰসাতি তং সমস্সাসেন্তো আহ.

অথ নং পটিক্খিপন্তো মহাসত্তো আহ –

২১২.

‘‘যথা যাচিতকং যানং, যথা যাচিতকং ধনং;

এৰংসম্পদমেৰেতং, যং পরতো দানপচ্চযা.

২১৩.

‘‘ন চাহমেতমিচ্ছামি, যং পরতো দানপচ্চযা;

সযংকতানি পুঞ্ঞানি, তং মে আৰেণিকং ধনং.

২১৪.

‘‘সোহং গন্ত্ৰা মনুস্সেসু, কাহামি কুসলং বহুং;

দানেন সমচরিযায, সংযমেন দমেন চ;

যং কত্ৰা সুখিতো হোতি, ন চ পচ্ছানুতপ্পতী’’তি.

তত্থ যং পরতো দানপচ্চযাতি যং পরেন দিন্নত্তা লব্ভতি, তং যাচিতকসদিসমেৰ হোতি. যাচিতকঞ্হি তুট্ঠকালে দেন্তি, অতুট্ঠকালে অচ্ছিন্দিত্ৰা গণ্হন্তীতি ৰদতি. সমচরিযাযাতি কাযাদীহি পাপস্স অকরণেন. সংযমেনাতি সীলসংযমেন. দমেনাতি ইন্দ্রিযদমনেন. যং কত্ৰাতি যং করিত্ৰা সুখিতো চেৰ হোতি ন চ পচ্ছানুতপ্পতি, তথারূপমেৰ কম্মং করিস্সামীতি.

অথস্স ৰচনং সুত্ৰা সক্কো মাতলিং আণাপেসি ‘‘গচ্ছ, তাত, সাধিনরাজানং মিথিলং নেত্ৰা উয্যানে ওতারেহী’’তি. সো তথা অকাসি. রাজা উয্যানে চঙ্কমতি. অথ নং উয্যানপালো দিস্ৰা পুচ্ছিত্ৰা গন্ত্ৰা নারদরঞ্ঞো আরোচেসি. সো রঞ্ঞো আগতভাৰং সুত্ৰা ‘‘ত্ৰং পুরতো গন্ত্ৰা উয্যানং সজ্জেত্ৰা তস্স চ ময্হঞ্চ দ্ৰে আসনানি পঞ্ঞাপেহী’’তি উয্যানপালং উয্যোজেসি. সো তথা অকাসি. অথ নং রাজা পুচ্ছি ‘‘কস্স দ্ৰে আসনানি পঞ্ঞাপেসী’’তি? ‘‘একং তুম্হাকং, একং অম্হাকং রঞ্ঞো’’তি. অথ নং রাজা ‘‘কো অঞ্ঞো সত্তো মম সন্তিকে আসনে নিসীদিস্সতী’’তি ৰত্ৰা একস্মিং নিসীদিত্ৰা একস্মিং পাদে ঠপেসি. নারদরাজা আগন্ত্ৰা তস্স পাদে ৰন্দিত্ৰা একমন্তং নিসীদি. সো কিরস্স সত্তমো পনত্তা. তদা কির ৰস্সসতাযুককালোৰ হোতি. মহাসত্তো পন অত্তনো পুঞ্ঞবলেন এত্তকং কালং ৰীতিনামেসি. সো নারদং হত্থে গহেত্ৰা উয্যানে ৰিচরন্তো তিস্সো গাথা অভাসি –

২১৫.

‘‘ইমানি তানি খেত্তানি, ইমং নিক্খং সুকুণ্ডলং;

ইমা তা হরিতানূপা, ইমা নজ্জো সৰন্তিযো.

২১৬.

‘‘ইমা তা পোক্খরণী রম্মা, চক্কৰাকপকূজিতা;

মন্দালকেহি সঞ্ছন্না, পদুমুপ্পলকেহি চ;

যস্সিমানি মমাযিংসু, কিং নু তে দিসতং গতা.

২১৭.

‘‘তানীধ খেত্তানি সো ভূমিভাগো, তেযেৰ আরামৰনূপচারা;

তমেৰ ময্হং জনতং অপস্সতো, সুঞ্ঞংৰ মে নারদ খাযতে দিসা’’তি.

তত্থ খেত্তানীতি ভূমিভাগে সন্ধাযাহ. ইমং নিক্খন্তি ইমং তাদিসমেৰ উদকনিদ্ধমনং. সুকুণ্ডলন্তি সোভনেন মুসলপৰেসনকুণ্ডলেন সমন্নাগতং. হরিতানূপাতি উদকনিদ্ধমনস্স উভোসু পস্সেসু হরিততিণসঞ্ছন্না অনূপভূমিযো. যস্সিমানি মমাযিংসূতি তাত নারদ, যে মম উপট্ঠাকা চ ওরোধা চ ইমস্মিং উয্যানে মহন্তেন যসেন মযা সদ্ধিং ৰিচরন্তা ইমানি ঠানানি মমাযিংসু পিযাযিংসু, কতরং নু তে দিসতং গতা, কত্থ তে পেসিতা. তানীধ খেত্তানীতি ইমস্মিং উয্যানে তানেৰ এতানি উপরোপনকৰিরুহনট্ঠানানি. তেযেৰ আরামৰনূপচারাতি ইমে তেযেৰ আরামৰনূপচারা, ৰিহারভূমিযোতি অত্থো.

অথ নং নারদো আহ – ‘‘দেৰ, তুম্হাকং দেৰলোকগতানং ইদানি সত্ত ৰস্সসতানি, অহং ৰো সত্তমো পনত্তা, তুম্হাকং উপট্ঠাকা চ ওরোধা চ মরণমুখং পত্তা, ইদং ৰো অত্তনো সন্তকং রজ্জং, অনুভৰথ ন’’ন্তি. রাজা ‘‘তাত নারদ, নাহং ইধাগচ্ছন্তো রজ্জত্থায আগতো, পুঞ্ঞকরণত্থাযম্হি আগতো, অহং পুঞ্ঞমেৰ করিস্সামী’’তি ৰত্ৰা গাথা আহ –

২১৮.

‘‘দিট্ঠা মযা ৰিমানানি, ওভাসেন্তা চতুদ্দিসা;

সম্মুখা দেৰরাজস্স, তিদসানঞ্চ সম্মুখা.

২১৯.

‘‘ৰুত্থং মে ভৰনং দিব্যং, ভুত্তা কামা অমানুসা;

তাৰতিংসেসু দেৰেসু, সব্বকামসমিদ্ধিসু.

২২০.

‘‘সোহং এতাদিসং হিত্ৰা, পুঞ্ঞাযম্হি ইধাগতো;

ধম্মমেৰ চরিস্সামি, নাহং রজ্জেন অত্থিকো.

২২১.

‘‘অদণ্ডাৰচরং মগ্গং, সম্মাসম্বুদ্ধদেসিতং;

তং মগ্গং পটিপজ্জিস্সং, যেন গচ্ছন্তি সুব্বতা’’তি.

তত্থ ৰুত্থং মে ভৰনং দিব্যন্তি ৰেজযন্তং সন্ধায আহ. সোহং এতাদিসন্তি তাত নারদ, সোহং বুদ্ধঞাণেন অপরিচ্ছিন্দনীযং এৰরূপং কামগুণসম্পত্তিং পহায পুঞ্ঞকরণত্থায ইধাগতো. অদণ্ডাৰচরন্তি অদণ্ডেহি নিক্খিত্তদণ্ডহত্থেহি অৰচরিতব্বং সম্মাদিট্ঠিপুরেক্খারং অট্ঠঙ্গিকং মগ্গং. সুব্বতাতি যেন মগ্গেন সুব্বতা সব্বঞ্ঞুবুদ্ধা গচ্ছন্তি, অহম্পি অগতপুব্বং দিসং গন্তুং বোধিতলে নিসীদিত্ৰা তমেৰ মগ্গং পটিপজ্জিস্সামীতি.

এৰং বোধিসত্তো ইমা গাথাযো সব্বঞ্ঞুতঞ্ঞাণেন সঙ্খিপিত্ৰা কথেসি. নারদো পুনপি আহ – ‘‘রজ্জং, দেৰ, অনুসাসা’’তি. ‘‘তাত, ন মে রজ্জেনত্থো, সত্ত ৰস্সসতানি ৰিগতং দানং সত্তাহেনেৰ দাতুকামম্হী’’তি. নারদো ‘‘সাধূ’’তি তস্স ৰচনং সম্পটিচ্ছিত্ৰা মহাদানং পটিযাদেসি. রাজা সত্তাহং দানং দত্ৰা সত্তমে দিৰসে কালং কত্ৰা তাৰতিংসভৰনেযেৰ নিব্বত্তি.

সত্থা ইমং ধম্মদেসনং আহরিত্ৰা ‘‘এৰং ৰসিতব্বযুত্তকং উপোসথকম্মং নামা’’তি দস্সেত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উপোসথিকেসু উপাসকেসু কেচি সোতাপত্তিফলে, কেচি সকদাগামিফলে, কেচি অনাগামিফলে পতিট্ঠহিংসু. তদা নারদরাজা সারিপুত্তো অহোসি, মাতলি আনন্দো, সক্কো অনুরুদ্ধো, সাধিনরাজা পন অহমেৰ অহোসিন্তি.

সাধিনজাতকৰণ্ণনা একাদসমা.

[৪৯৫] ১২. দসব্রাহ্মণজাতকৰণ্ণনা

রাজা অৰোচ ৰিধুরন্তি ইদং সত্থা জেতৰনে ৰিহরন্তো অসদিসদানং আরব্ভ কথেসি. তং অট্ঠকনিপাতে আদিত্তজাতকে (জা. ১.৮.৬৯ আদযো) ৰিত্থারিতমেৰ. রাজা কির তং দানং দদন্তো সত্থারং জেট্ঠকং কত্ৰা পঞ্চ ভিক্খুসতানি ৰিচিনিত্ৰা গণ্হিত্ৰা মহাখীণাসৰানংযেৰ অদাসি. অথস্স গুণকথং কথেন্তা ‘‘আৰুসো, রাজা অসদিসদানং দদন্তো ৰিচিনিত্ৰা মহপ্ফলট্ঠানে অদাসী’’তি ধম্মসভাযং কথং সমুট্ঠাপেসুং. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘অনচ্ছরিযং, ভিক্খৰে, যং কোসলরাজা মাদিসস্স বুদ্ধস্স উপট্ঠাকো হুত্ৰা ৰিচেয্যদানং দেতি, পোরাণকপণ্ডিতা অনুপ্পন্নে বুদ্ধেপি ৰিচেয্যদানং অদংসূ’’তি ৰত্ৰা অতীতং আহরি.

অতীতে কুরুরট্ঠে ইন্দপত্থনগরে যুধিট্ঠিলগোত্তো কোরব্যো নাম রাজা রজ্জং কারেসি. তস্স ৰিধুরো নাম অমচ্চো অত্থঞ্চ ধম্মঞ্চ অনুসাসতি. রাজা সকলজম্বুদীপং খোভেত্ৰা মহাদানং দেতি. তং গহেত্ৰা ভুঞ্জন্তেসু একোপি পঞ্চসীলমত্তং রক্খন্তো নাম নত্থি, সব্বে দুস্সীলাৰ, দানং রাজানং ন তোসেতি. রাজা ‘‘ৰিচেয্যদানং মহপ্ফল’’ন্তি সীলৰন্তানং দাতুকামো হুত্ৰা চিন্তেসি ‘‘ৰিধুরপণ্ডিতেন সদ্ধিং মন্তযিস্সামী’’তি. সো তং উপট্ঠানং আগতং আসনে নিসীদাপেত্ৰা পঞ্হং পুচ্ছি. তমত্থং পকাসেন্তো সত্থা উপড্ঢগাথমাহ –

২২২.

‘‘রাজা অৰোচ ৰিধুরং, ধম্মকামো যুধিট্ঠিলো’’তি;

পরতো রঞ্ঞো চ ৰিধুরস্স চ ৰচনপটিৰচনং হোতি –

‘‘ব্রাহ্মণে ৰিধুর পরিযেস, সীলৰন্তে বহুস্সুতে.

২২৩.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২২৪.

‘‘দুল্লভা ব্রাহ্মণা দেৰ, সীলৰন্তো বহুস্সুতা;

ৰিরতা মেথুনা ধম্মা, যে তে ভুঞ্জেয্যু ভোজনং.

২২৫.

‘‘দস খলু মহারাজ, যা তা ব্রাহ্মণজাতিযো;

তেসং ৰিভঙ্গং ৰিচযং, ৰিত্থারেন সুণোহি মে.

২২৬.

‘‘পসিব্বকে গহেত্ৰান, পুণ্ণে মূলস্স সংৰুতে;

ওসধিকাযো গন্থেন্তি, ন্হাপযন্তি জপন্তি চ.

২২৭.

‘‘তিকিচ্ছকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২২৮.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২২৯.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৩০.

‘‘কিঙ্কিণিকাযো গহেত্ৰা, ঘোসেন্তি পুরতোপি তে;

পেসনানিপি গচ্ছন্তি, রথচরিযাসু সিক্খরে.

২৩১.

‘‘পরিচারকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৩২.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৩৩.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৩৪.

‘‘কমণ্ডলুং গহেত্ৰান, ৰঙ্কদণ্ডঞ্চ ব্রাহ্মণা;

পচ্চুপেস্সন্তি রাজানো, গামেসু নিগমেসু চ;

নাদিন্নে ৰুট্ঠহিস্সাম, গামম্হি ৰা ৰনম্হি ৰা.

২৩৫.

‘‘নিগ্গাহকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৩৬.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৩৭.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৩৮.

‘‘পরূল়্হকচ্ছনখলোমা, পঙ্কদন্তা রজস্সিরা;

ওকিণ্ণা রজরেণূহি, যাচকা ৰিচরন্তি তে.

২৩৯.

‘‘খাণুঘাতসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৪০.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৪১.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৪২.

‘‘হরীতকং আমলকং, অম্বং জম্বুং ৰিভীতকং;

লবুজং দন্তপোণানি, বেলুৰা বদরানি চ.

২৪৩.

‘‘রাজাযতনং উচ্ছুপুটং, ধূমনেত্তং মধুঅঞ্জনং;

উচ্চাৰচানি পণিযানি, ৰিপণেন্তি জনাধিপ.

২৪৪.

‘‘ৰাণিজকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৪৫.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৪৬.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৪৭.

‘‘কসিৰাণিজ্জং কারেন্তি, পোসযন্তি অজেল়কে;

কুমারিযো পৰেচ্ছন্তি, ৰিৰাহন্তাৰহন্তি চ.

২৪৮.

‘‘সমা অম্বট্ঠৰেস্সেহি, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৪৯.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৫০.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৫১.

‘‘নিক্খিত্তভিক্খং ভুঞ্জন্তি, গামেস্ৰেকে পুরোহিতা;

বহূ তে পরিপুচ্ছন্তি, অণ্ডচ্ছেদা নিলঞ্ছকা.

২৫২.

‘‘পসূপি তত্থ হঞ্ঞন্তি, মহিংসা সূকরা অজা;

গোঘাতকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৫৩.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৫৪.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৫৫.

‘‘অসিচম্মং গহেত্ৰান, খগ্গং পগ্গয্হ ব্রাহ্মণা;

ৰেস্সপথেসু তিট্ঠন্তি, সত্থং অব্বাহযন্তিপি.

২৫৬.

‘‘সমা গোপনিসাদেহি, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৫৭.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৫৮.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৫৯.

‘‘অরঞ্ঞে কুটিকং কত্ৰা, কুটানি কারযন্তি তে;

সসবিল়ারে বাধেন্তি, আগোধা মচ্ছকচ্ছপং.

২৬০.

‘‘তে লুদ্দকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৬১.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৬২.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফলং.

২৬৩.

‘‘অঞ্ঞে ধনস্স কামা হি, হেট্ঠামঞ্চে পসক্কিতা;

রাজানো উপরি ন্হাযন্তি, সোমযাগে উপট্ঠিতে.

২৬৪.

‘‘মলমজ্জকসমা রাজ, তেপি ৰুচ্চন্তি ব্রাহ্মণা;

অক্খাতা তে মহারাজ, তাদিসে নিপতামসে.

২৬৫.

‘‘অপেতা তে চ ব্রহ্মঞ্ঞা, (ইতি রাজা কোরব্যো)

ন তে ৰুচ্চন্তি ব্রাহ্মণা;

অঞ্ঞে ৰিধুর পরিযেস, সীলৰন্তে বহুস্সুতে.

২৬৬.

‘‘ৰিরতে মেথুনা ধম্মা, যে মে ভুঞ্জেয্যু ভোজনং;

দক্খিণং সম্ম দস্সাম, যত্থ দিন্নং মহপ্ফল’’ন্তি.

তত্থ সীলৰন্তেতি মগ্গেনাগতসীলে. বহুস্সুতেতি পটিৰেধবহুস্সুতে. দক্খিণন্তি দানং. যে তেতি যে ধম্মিকা সমণব্রাহ্মণা তৰ দানং ভুঞ্জেয্যুং, তে দুল্লভা. ব্রাহ্মণজাতিযোতি ব্রাহ্মণকুলানি. তেসং ৰিভঙ্গং ৰিচযন্তি তেসং ব্রাহ্মণানং ৰিভঙ্গং মম পঞ্ঞায ৰিচিতভাৰং ৰিত্থারেন সুণোহি. সংৰুতেতি বদ্ধমুখে. ওসধিকাযো গন্থেন্তীতি ‘‘ইদং ইমস্স রোগস্স ভেসজ্জং, ইদং ইমস্স রোগস্স ভেসজ্জ’’ন্তি এৰং সিলোকে বন্ধিত্ৰা মনুস্সানং দেন্তি. ন্হাপযন্তীতি নহাপনং নাম করোন্তি. জপন্তি চাতি ভূতৰিজ্জং পরিৰত্তেন্তি. তিকিচ্ছকসমাতি ৰেজ্জসদিসা. তেপি ৰুচ্চন্তীতি তেপি ‘‘ব্রাহ্মণা ৰা মযং, অব্রাহ্মণা ৰা’’তি অজানিত্ৰা ৰেজ্জকম্মেন জীৰিকং কপ্পেন্তা ৰোহারেন ‘‘ব্রাহ্মণা’’তি ৰুচ্চন্তি. অক্খাতা তেতি ইমে তে মযা ৰেজ্জব্রাহ্মণা নাম অক্খাতা. নিপতামসেতি ৰদেহি দানি, কিং তাদিসে ব্রাহ্মণে নিপতাম, নিমন্তনত্থায উপসঙ্কমাম, অত্থি তে এতেহি অত্থোতি পুচ্ছতি. ব্রহ্মঞ্ঞাতি ব্রাহ্মণধম্মতো. ন তে ৰুচ্চন্তীতি তে বাহিতপাপতায ব্রাহ্মণা নাম ন ৰুচ্চন্তি.

কিঙ্কিণিকাযোতি মহারাজ, অপরেপি ব্রাহ্মণা অত্তনো ব্রাহ্মণধম্মং ছড্ডেত্ৰা জীৰিকত্থায রাজরাজমহামত্তানং পুরতো কংসতাল়ে গহেত্ৰা ৰাদেন্তা গাযন্তা গচ্ছন্তি. পেসনানিপীতি দাসকম্মকরা ৰিয পেসনানিপি গচ্ছন্তি. রথচরিযাসূতি রথসিপ্পং সিক্খন্তি. পরিচারকসমাতি দাসকম্মকরসদিসা. ৰঙ্কদণ্ডন্তি ৰঙ্কদণ্ডকট্ঠং. পচ্চুপেস্সন্তি রাজানোতি রাজরাজমহামত্তে পটিচ্চ আগম্ম সন্ধায উপসেৰন্তি. গামেসু নিগমেসু চাতি তেসং নিৰেসনদ্ৰারে নিসীদন্তি. নিগ্গাহকসমাতি নিগ্গহকারকেহি বলিসাধকরাজপুরিসেহি সমা. যথা তে পুরিসা ‘‘অগ্গহেত্ৰা ন গমিস্সামা’’তি নিগ্গহং কত্ৰা গণ্হন্তিযেৰ, তথা ‘‘গামে ৰা ৰনে ৰা অলদ্ধা মরন্তাপি ন ৰুট্ঠহিস্সামা’’তি উপৰসন্তি. তেপীতি তেপি বলিসাধকসদিসা পাপধম্মা.

রজরেণূহীতি রজেহি চ পংসূহি চ ওকিণ্ণা. যাচকাতি ধনযাচকা. খাণুঘাতসমাতি মলীনসরীরতায ঝামখেত্তে খাণুঘাতকেহি ভূমিং খণিত্ৰা ঝামখাণুকউদ্ধরণকমনুস্সেহি সমানা, ‘‘অগ্গহেত্ৰা ন গমিস্সামা’’তি নিচ্চলভাৰেন ঠিতত্তা নিখণিত্ৰা ঠপিতৰতিখাণুকা ৰিযাতিপি অত্থো. তেপীতি তেপি তথা লদ্ধং ধনং ৰড্ঢিযা পযোজেত্ৰা পুন তথেৰ ঠিতত্তা দুস্সীলা ব্রাহ্মণা.

উচ্ছুপুটন্তি উচ্ছুঞ্চেৰ ফাণিতপুটঞ্চ. মধুঅঞ্জনন্তি মধুঞ্চেৰ অঞ্জনঞ্চ. উচ্চাৰচানীতি মহগ্ঘঅপ্পগ্ঘানি. পণিযানীতি ভণ্ডানি. ৰিপণেন্তীতি ৰিক্কিণন্তি. তেপীতি তেপি ইমানি এত্তকানি ৰিক্কিণিত্ৰা জীৰিককপ্পকা ৰাণিজকব্রাহ্মণা. পোসযন্তীতি গোরসৰিক্কযেন জীৰিককপ্পনত্থং পোসেন্তি. পৰেচ্ছন্তীতি অত্তনো ধীতরো হিরঞ্ঞসুৰণ্ণং গহেত্ৰা পরেসং দেন্তি. তে এৰং পরেসং দদমানা ৰিৰাহন্তি নাম, অত্তনো পুত্তানং অত্থায গণ্হমানা আৰাহন্তি নাম. অম্বট্ঠৰেস্সেহীতি কুটুম্বিকেহি চেৰ গহপতীহি চ সমা, তেপি ৰোহারৰসেন ‘‘ব্রাহ্মণা’’তি ৰুচ্চন্তি.

নিক্খিত্তভিক্খন্তি গামপুরোহিতা হুত্ৰা অত্তনো অত্থায নিবদ্ধভিক্খং. বহূ তেতি বহূ জনা এতে গামপুরোহিতে নক্খত্তমুহুত্তমঙ্গলানি পুচ্ছন্তি. অণ্ডচ্ছেদা নিলঞ্ছকাতি ভতিং গহেত্ৰা বলিবদ্দানং অণ্ডচ্ছেদকা চেৰ তিসূলাদিঅঙ্ককরণেন লঞ্ছকা চ, লক্খণকারকাতি অত্থো. তত্থাতি তেসং গামপুরোহিতানং গেহেসু মংসৰিক্কিণনত্থং এতে পসুআদযোপি হঞ্ঞন্তি. তেপীতি তেপি গোঘাতকসমা ব্রাহ্মণাতি ৰুচ্চন্তি.

অসিচম্মন্তি অসিলট্ঠিঞ্চেৰ কণ্ডৰারণঞ্চ. ৰেস্সপথেসূতি ৰাণিজানং গমনমগ্গেসু. সত্থং অব্বাহযন্তীতি সত্থৰাহানং হত্থতো সতম্পি সহস্সম্পি গহেত্ৰা সত্থে চোরাটৰিং অতিবাহেন্তি. গোপনিসাদেহীতি গোপালকেহি চেৰ নিসাদেহি চ গামঘাতকচোরেহি সমাতি ৰুত্তং. তেপীতি তেপি এৰরূপা ব্রাহ্মণাতি ৰুচ্চন্তি. কুটানি কারযন্তি তেতি কূটপাসাদীনি রোপেন্তি. সসবিল়ারেতি সসে চেৰ বিল়ারে চ. এতেন থলচরে মিগে দস্সেতি. আগোধা মচ্ছকচ্ছপন্তি থলজেসু তাৰ আগোধতো মহন্তে চ খুদ্দকে চ পাণযো বাধেন্তি মারেন্তি, জলজেসু মচ্ছকচ্ছপে. তেপীতি তেপি লুদ্দকসমা ব্রাহ্মণাতি ৰুচ্চন্তি.

অঞ্ঞে ধনস্স কামা হীতি অপরে ব্রাহ্মণা ধনং পত্থেন্তা. হেট্ঠামঞ্চে পসক্কিতাতি ‘‘কলিপৰাহকম্মং কারেস্সামা’’তি রতনমযং মঞ্চং কারেত্ৰা তস্স হেট্ঠা নিপন্না অচ্ছন্তি. অথ নেসং সোমযাগে উপট্ঠিতে রাজানো উপরি নহাযন্তি, তে কির সোমযাগে নিট্ঠিতে আগন্ত্ৰা তস্মিং মঞ্চে নিসীদন্তি. অথ নে অঞ্ঞে ব্রাহ্মণা ‘‘কলিং পৰাহেস্সামা’’তি নহাপেন্তি. রতনমঞ্চো চেৰ রঞ্ঞো রাজালঙ্কারো চ সব্বো হেট্ঠামঞ্চে নিপন্নস্সেৰ হোতি. তেপীতি তেপি মলমজ্জকেহি নহাপিতেহি সদিসা ব্রাহ্মণাতি ৰুচ্চন্তি.

এৰঞ্চিমে ৰোহারমত্তব্রাহ্মণে দস্সেত্ৰা ইদানি পরমত্থব্রাহ্মণে দস্সেন্তো দ্ৰে গাথা অভাসি –

২৬৭.

‘‘অত্থি খো ব্রাহ্মণা দেৰ, সীলৰন্তো বহুস্সুতা;

ৰিরতা মেথুনা ধম্মা, যে তে ভুঞ্জেয্যু ভোজনং.

২৬৮.

‘‘একঞ্চ ভত্তং ভুঞ্জন্তি, ন চ মজ্জং পিৰন্তি তে;

অক্খাতা তে মহারাজ, তাদিসে নিপতামসে’’তি.

তত্থ সীলৰন্তোতি অরিযসীলেন সমন্নাগতা. বহুস্সুতাতি পটিৰেধবাহুসচ্চেন সমন্নাগতা. তাদিসেতি এৰরূপে বাহিতপাপে পচ্চেকবুদ্ধব্রাহ্মণে নিমন্তনত্থায উপসঙ্কমামাতি.

রাজা তস্স কথং সুত্ৰা পুচ্ছি ‘‘সম্ম ৰিধুর, এৰরূপা অগ্গদক্খিণেয্যা ব্রাহ্মণা কহং ৰসন্তী’’তি? উত্তরহিমৰন্তে নন্দমূলকপব্ভারে, মহারাজাতি. ‘‘তেন হি, পণ্ডিত, তৰ বলেন ময্হং তে ব্রাহ্মণে পরিযেসা’’তি তুট্ঠমানসো গাথমাহ –

২৬৯.

‘‘এতে খো ব্রাহ্মণা ৰিধুর, সীসৰন্তো বহুস্সুতা;

এতে ৰিধুর পরিযেস, খিপ্পঞ্চ নে নিমন্তযা’’তি.

মহাসত্তো ‘‘সাধূ’’তি তস্স ৰচনং সম্পটিচ্ছিত্ৰা ‘‘তেন হি, মহারাজ, নগরং অলঙ্কারাপেত্ৰা সব্বে নগরৰাসিনো দানং দত্ৰা উপোসথং অধিট্ঠায সমাদিন্নসীলা হোন্তূ’’তি ভেরিং চরাপেত্ৰা ‘‘তুম্হেপি সদ্ধিং পরিজনেন উপোসথং সমাদিযথা’’তি ৰত্ৰা সযং পাতোৰ ভুঞ্জিত্ৰা উপোসথং সমাদায সাযন্হসমযে জাতিপুপ্ফপুণ্ণং সুৰণ্ণসমুগ্গং আহরাপেত্ৰা রঞ্ঞা সদ্ধিং পঞ্চপতিট্ঠিতং পতিট্ঠহিত্ৰা পচ্চেকবুদ্ধানং গুণে অনুস্সরিত্ৰা ৰন্দিত্ৰা ‘‘উত্তরহিমৰন্তে নন্দমূলকপব্ভারৰাসিনো পঞ্চসতা পচ্চেকবুদ্ধা স্ৰে অম্হাকং ভিক্খং গণ্হন্তূ’’তি নিমন্তেত্ৰা আকাসে অট্ঠ পুপ্ফমুট্ঠিযো ৰিস্সজ্জেসি. তদা তত্থ পঞ্চসতা পচ্চেকবুদ্ধা ৰসন্তি, পুপ্ফানি গন্ত্ৰা তেসং উপরি পতিংসু. তে আৰজ্জেন্তা তং কারণং ঞত্ৰা ‘‘মারিসা, ৰিধুরপণ্ডিতেন নিমন্তিতম্হ, ন খো পনেস ইত্তরসত্তো, বুদ্ধঙ্কুরো এস, ইমস্মিংযেৰ কপ্পে বুদ্ধো ভৰিস্সতি, করিস্সামস্স সঙ্গহ’’ন্তি নিমন্তনং অধিৰাসযিংসু. মহাসত্তো পুপ্ফানং অনাগমনসঞ্ঞায অধিৰাসিতভাৰং ঞত্ৰা ‘‘মহারাজ, স্ৰে পচ্চেকবুদ্ধা আগমিস্সন্তি, সক্কারসম্মানং করোহী’’তি আহ. রাজা পুনদিৰসে মহাসক্কারং কত্ৰা মহাতলে মহারহানি আসনানি পঞ্ঞপেসি. পচ্চেকবুদ্ধা অনোতত্তদহে কতসরীরপটিজগ্গনা ৰেলং সল্লক্খেত্ৰা আকাসেনাগন্ত্ৰা রাজঙ্গণে ওতরিংসু. রাজা চ বোধিসত্তো চ পসন্নমানসা তেসং হত্থতো পত্তানি গহেত্ৰা পাসাদং আরোপেত্ৰা নিসীদাপেত্ৰা দক্খিণোদকং দত্ৰা পণীতেন খাদনীযেন ভোজনীযেন পরিৰিসিংসু. ভত্তকিচ্চপরিযোসানে চ পুনদিৰসত্থাযাতি এৰং সত্ত দিৰসে নিমন্তেত্ৰা মহাদানং দত্ৰা সত্তমে দিৰসে সব্বপরিক্খারে অদংসু. তে অনুমোদনং কত্ৰা আকাসেন তত্থেৰ গতা, পরিক্খারাপি তেহি সদ্ধিংযেৰ গতা.

সত্থা ইমং ধম্মদেসনং আহরিত্ৰা ‘‘অনচ্ছরিযং, ভিক্খৰে, কোসলরঞ্ঞো মম উপট্ঠাকস্স সতো ৰিচেয্যদানং দাতুং, পোরাণকপণ্ডিতা অনুপ্পন্নেপি বুদ্ধে দানং অদংসুযেৰা’’তি ৰত্ৰা জাতকং সমোধানেসি – ‘‘তদা রাজা আনন্দো অহোসি, ৰিধুরপণ্ডিতো পন অহমেৰ অহোসি’’ন্তি.

দসব্রাহ্মণজাতকৰণ্ণনা দ্ৰাদসমা.

[৪৯৬] ১৩. ভিক্খাপরম্পরজাতকৰণ্ণনা

সুখুমালরূপং দিস্ৰাতি ইদং সত্থা জেতৰনে ৰিহরন্তো অঞ্ঞতরং কুটুম্বিকং আরব্ভ কথেসি. সো কির সদ্ধো অহোসি পসন্নো, তথাগতস্স চেৰ সঙ্ঘস্স চ নিবদ্ধং মহাসক্কারং করোতি. অথেকদিৰসং চিন্তেসি ‘‘অহং বুদ্ধরতনস্স চেৰ সঙ্ঘরতনস্স চ পণীতানি খাদনীযভোজনীযানি চেৰ সুখুমৰত্থানি চ দেন্তো নিচ্চং মহাসক্কারং করোমি, ইদানি ধম্মরতনস্সপি করিস্সামি, কথং নু খো তস্স সক্কারং করোন্তেন কত্তব্ব’’ন্তি. সো বহূনি গন্ধমালাদীনি আদায জেতৰনং গন্ত্ৰা সত্থারং ৰন্দিত্ৰা পুচ্ছি ‘‘অহং, ভন্তে, ধম্মরতনস্স সক্কারং কত্তুকামোম্হি, কথং নু খো তস্স সক্কারং করোন্তেন কত্তব্ব’’ন্তি. অথ নং সত্থা আহ – ‘‘সচে ধম্মরতনস্স সক্কারং কত্তুকামো, ধম্মভণ্ডাগারিকস্স আনন্দস্স সক্কারং করোহী’’তি. সো ‘‘সাধূ’’তি পটিস্সুণিত্ৰা থেরং নিমন্তেত্ৰা পুনদিৰসে মহন্তেন সক্কারেন অত্তনো গেহং নেত্ৰা মহারহে আসনে নিসীদাপেত্ৰা গন্ধমালাদীহি পূজেত্ৰা নানগ্গরসভোজনং দত্ৰা মহগ্ঘে তিচীৰরপ্পহোনকে সাটকে অদাসি. থেরোপি ‘‘অযং সক্কারো ধম্মরতনস্স কতো, ন ময্হং অনুচ্ছৰিকো, অগ্গসাৰকস্স ধম্মসেনাপতিস্স অনুচ্ছৰিকো’’তি চিন্তেত্ৰা পিণ্ডপাতঞ্চ ৰত্থানি চ ৰিহারং হরিত্ৰা সারিপুত্তত্থেরস্স অদাসি. সোপি ‘‘অযং সক্কারো ধম্মরতনস্স কতো, একন্তেন ধম্মস্সামিনো সম্মাসম্বুদ্ধস্সেৰ অনুচ্ছৰিকো’’তি চিন্তেত্ৰা দসবলস্স অদাসি. সত্থা অত্তনো উত্তরিতরং অদিস্ৰা পিণ্ডপাতং পরিভুঞ্জি, চীৰরসাটকে অগ্গহেসি.

ভিক্খূ ধম্মসভাযং কথং সমুট্ঠাপেসুং ‘‘আৰুসো, অসুকো নাম কুটুম্বিকো ‘ধম্মরতনস্স সক্কারং করোমী’তি ধম্মভণ্ডাগারিকস্স আনন্দত্থেরস্স অদাসি. থেরো ‘নাযং ময্হং অনুচ্ছৰিকো’তি ধম্মসেনাপতিনো অদাসি, সোপি ‘নাযং ময্হং অনুচ্ছৰিকো’তি তথাগতস্স অদাসি. তথাগতো অঞ্ঞং উত্তরিতরং অপস্সন্তো অত্তনো ধম্মস্সামিতায ‘ময্হমেৰেসো অনুচ্ছৰিকো’তি তং পিণ্ডপাতং পরিভুঞ্জি, চীৰরসাটকেপি গণ্হি, এৰং সো পিণ্ডপাতো যথানুচ্ছৰিকতায ধম্মস্সামিনোৰ পাদমূলং গতো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ পিণ্ডপাতো পরম্পরা যথানুচ্ছৰিকং গচ্ছতি, পুব্বেপি অনুপ্পন্নে বুদ্ধে অগমাসিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তো অগতিগমনং পহায দস রাজধম্মে অকোপেন্তো ধম্মেন রজ্জং কারেসি. এৰং সন্তেপিস্স ৰিনিচ্ছযো সুঞ্ঞো ৰিয অহোসি. রাজা অত্তনো অগুণগৰেসকো হুত্ৰা অন্তোনিৰেসনাদীনি পরিগ্গণ্হন্তো অন্তেপুরে চ অন্তোনগরে চ দ্ৰারগামেসু চ অত্তনো অগুণং কথেন্তং অদিস্ৰা ‘‘জনপদে গৰেসিস্সামী’’তি অমচ্চানং রজ্জং নিয্যাদেত্ৰা পুরোহিতেন সদ্ধিং অঞ্ঞাতকৰেসেনেৰ কাসিরট্ঠে চরন্তো কঞ্চি অগুণং কথেন্তং অদিস্ৰা পচ্চন্তে একং নিগমং পত্ৰা বহিদ্ৰারসালাযং নিসীদি. তস্মিং খণে নিগমৰাসী অসীতিকোটিৰিভৰো কুটুম্বিকো মহন্তেন পরিৰারেন ন্হানতিত্থং গচ্ছন্তো সালাযং নিসিন্নং সুৰণ্ণৰণ্ণং সুখুমালসরীরং রাজানং দিস্ৰা উপ্পন্নসিনেহো সালং পৰিসিত্ৰা পটিসন্থারং কত্ৰা ‘‘ইধেৰ হোথা’’তি ৰত্ৰা গেহং গন্ত্ৰা নানগ্গরসভোজনং সম্পাদেত্ৰা মহন্তেন পরিৰারেন ভত্তভাজনানি গাহাপেত্ৰা অগমাসি. তস্মিং খণে হিমৰন্তৰাসী পঞ্চাভিঞ্ঞো তাপসো আগন্ত্ৰা তত্থেৰ নিসীদি. নন্দমূলকপব্ভারতো পচ্চেকবুদ্ধোপি আগন্ত্ৰা তত্থেৰ নিসীদি.

কুটুম্বিকো রঞ্ঞো হত্থধোৰনউদকং দত্ৰা নানগ্গরসেহি সূপব্যঞ্জনেহি ভত্তপাতিং সজ্জেত্ৰা রঞ্ঞো উপনেসি. রাজা নং গহেত্ৰা পুরোহিতস্স ব্রাহ্মণস্স অদাসি. ব্রাহ্মণো গহেত্ৰা তাপসস্স অদাসি. তাপসো পচ্চেকবুদ্ধস্স সন্তিকং গন্ত্ৰা ৰামহত্থেন ভত্তপাতিং, দক্খিণহত্থেন কমণ্ডলুং গহেত্ৰা দক্খিণোদকং দত্ৰা পত্তে ভত্তং পক্খিপি. সো কঞ্চি অনিমন্তেত্ৰা অনাপুচ্ছিত্ৰা পরিভুঞ্জি. তস্স ভত্তকিচ্চপরিযোসানে কুটুম্বিকো চিন্তেসি ‘‘মযা রঞ্ঞো ভত্তং দিন্নং, রঞ্ঞা ব্রাহ্মণস্স, ব্রাহ্মণেন তাপসস্স, তাপসেন পচ্চেকবুদ্ধস্স, পচ্চেকবুদ্ধো কঞ্চি অনাপুচ্ছিত্ৰা পরিভুঞ্জি, কিং নু খো ইমেসং এত্তকং দানকারণং, কিং ইমস্স কঞ্চি অনাপুচ্ছিত্ৰাৰ ভুঞ্জনকারণং, অনুপুব্বেন তে পুচ্ছিস্সামী’’তি. সো একেকং উপসঙ্কমিত্ৰা ৰন্দিত্ৰা পুচ্ছি. তেপিস্স কথেসুং –

২৭০.

‘‘সুখুমালরূপং দিস্ৰা, রট্ঠা ৰিৰনমাগতং;

কুটাগারৰরূপেতং, মহাসযনমুপাসিতং.

২৭১.

‘‘তস্স তে পেমকেনাহং, অদাসিং ৰড্ঢমোদনং;

সালীনং ৰিচিতং ভত্তং, সুচিং মংসূপসেচনং.

২৭২.

‘‘তং ত্ৰং ভত্তং পটিগ্গয্হ, ব্রাহ্মণস্স অদাসযি;

অত্তানং অনসিত্ৰান, কোযং ধম্মো নমত্থু তে.

২৭৩.

‘‘আচরিযো ব্রাহ্মণো ময্হং, কিচ্চাকিচ্চেসু ব্যাৰটো;

গরু চ আমন্তনীযো চ, দাতুমরহামি ভোজনং.

২৭৪.

‘‘ব্রাহ্মণং দানি পুচ্ছামি, গোতমং রাজপূজিতং;

রাজা তে ভত্তং পাদাসি, সুচিং মংসূপসেচনং.

২৭৫.

‘‘তং ত্ৰং ভত্তং পটিগ্গয্হ, ইসিস্স ভোজনং অদা;

অখেত্তঞ্ঞূসি দানস্স, কোযং ধম্মো নমত্থু তে.

২৭৬.

‘‘ভরামি পুত্তদারে চ, ঘরেসু গধিতো অহং;

ভুঞ্জে মানুসকে কামে, অনুসাসামি রাজিনো.

২৭৭.

‘‘আরঞ্ঞিকস্স ইসিনো, চিররত্তং তপস্সিনো;

ৰুড্ঢস্স ভাৰিতত্তস্স, দাতুমরহামি ভোজনং.

২৭৮.

‘‘ইসিঞ্চ দানি পুচ্ছামি, কিসং ধমনিসন্থতং;

পরূল়্হকচ্ছনখলোমং, পঙ্কদন্তং রজস্সিরং.

২৭৯.

‘‘একো অরঞ্ঞে ৰিহরসি, নাৰকঙ্খসি জীৰিতং;

ভিক্খু কেন তযা সেয্যো, যস্স ত্ৰং ভোজনং অদা.

২৮০.

‘‘খণন্তালুকলম্বানি, বিলালিতক্কলানি চ;

ধুনং সামাকনীৰারং, সঙ্ঘারিযং পসারিযং.

২৮১.

‘‘সাকং ভিসং মধুং মংসং, বদরামলকানি চ;

তানি আহরিত্ৰা ভুঞ্জামি, অত্থি মে সো পরিগ্গহো.

২৮২.

‘‘পচন্তো অপচন্তস্স, অমমস্স সকিঞ্চনো;

অনাদানস্স সাদানো, দাতুমরহামি ভোজনং.

২৮৩.

‘‘ভিক্খুঞ্চ দানি পুচ্ছামি, তুণ্হীমাসীন সুব্বতং;

ইসি তে ভত্তং পাদাসি, সুচিং মংসূপসেচনং.

২৮৪.

‘‘তং ত্ৰং ভত্তং পটিগ্গয্হ, তুণ্হী ভুঞ্জসি এককো;

নাঞ্ঞং কঞ্চি নিমন্তেসি, কোযং ধম্মো নমত্থু তে.

২৮৫.

‘‘ন পচামি ন পাচেমি, ন ছিন্দামি ন ছেদযে;

তং মং অকিঞ্চনং ঞত্ৰা, সব্বপাপেহি আরতং.

২৮৬.

‘‘ৰামেন ভিক্খমাদায, দক্খিণেন কমণ্ডলুং;

ইসি মে ভত্তং পাদাসি, সুচিং মংসূপসেচনং.

২৮৭.

‘‘এতে হি দাতুমরহন্তি, সমমা সপরিগ্গহা;

পচ্চনীকমহং মঞ্ঞে, যো দাতারং নিমন্তযে’’তি.

তত্থ ৰিৰনন্তি নিরুদকারঞ্ঞসদিসং ইমং পচ্চন্তং আগতং. কূটাগারৰরূপেতন্তি কূটাগারৰরেন উপগতং, একং ৰরকূটাগারৰাসিনন্তি অত্থো. মহাসযনমুপাসিতন্তি তত্থেৰ সুপঞ্ঞত্তং সিরিসযনং উপাসিতং. তস্স তেতি এৰরূপং তং দিস্ৰা অহং পেমমকাসিং, তস্স তে পেমকেন. ৰড্ঢমোদনন্তি উত্তমোদনং. ৰিচিতন্তি অপগতখণ্ডকাল়কেহি ৰিচিততণ্ডুলেহি কতং. অদাসযীতি অদাসি. অত্তানন্তি অত্তনা, অযমেৰ ৰা পাঠো. অনসিত্ৰানাতি অভুঞ্জিত্ৰা. কোযং ধম্মোতি মহারাজ, কো এস তুম্হাকং সভাৰো. নমত্থু তেতি নমো তৰ অত্থু, যো ত্ৰং অত্তনা অভুঞ্জিত্ৰা পরস্স অদাসি.

আচরিযোতি কুটুম্বিক এস ময্হং আচারসিক্খাপকো আচরিযো. ব্যাৰটোতি উস্সুকো. আমন্তনীযোতি আমন্তেতব্বযুত্তকো মযা দিন্নং ভত্তং গহেতুং অনুরূপো. দাতুমরহামীতি ‘‘অহং এৰরূপস্স আচরিযস্স ভোজনং দাতুং অরহামী’’তি রাজা ব্রাহ্মণস্স গুণং ৰণ্ণেসি. অখেত্তঞ্ঞূসীতি নাহং দানস্স খেত্তং, মযি দিন্নং মহপ্ফলং ন হোতীতি এৰং অত্তানং দানস্স অখেত্তং জানাসি মঞ্ঞেতি. অনুসাসামীতি অত্তনো অত্থং পহায রঞ্ঞো অত্থঞ্চ ধম্মঞ্চ অনুসাসামি.

এৰং অত্তনো অগুণং কথেত্ৰা আরঞ্ঞিকস্সাতি ইসিনো গুণং কথেসি. ইসিনোতি সীলাদিগুণপরিযেসকস্স. তপস্সিনোতি তপনিস্সিতস্স. ৰুড্ঢস্সাতি পণ্ডিতস্স গুণৰুড্ঢস্স. নাৰকঙ্খসীতি সযং দুল্লভভোজনো হুত্ৰা এৰরূপং ভোজনং অঞ্ঞস্স দেসি, কিং অত্তনো জীৰিতং ন কঙ্খসি. ভিক্খু কেনাতি অযং ভিক্খু কতরেন গুণেন তযা সেট্ঠতরো.

খণন্তালুকলম্বানীতি খণন্তো আলূনি চেৰ তালকন্দানি চ. বিলালিতক্কলানি চাতি বিলালিকন্দতক্কলকন্দানি চ. ধুনং সামাকনীৰারন্তি সামাকঞ্চ নীৰারঞ্চ ধুনিত্ৰা. সঙ্ঘারিযং পসারিযন্তি এতে সামাকনীৰারে ধুনন্তো সঙ্ঘারেত্ৰা পুন সুক্খাপিতে পসারেত্ৰা সুপ্পেন পপ্ফোটেত্ৰা কোট্টেত্ৰা তণ্ডুলে আদায পচিত্ৰা ভুঞ্জামীতি ৰদতি. সাকন্তি যং কিঞ্চি সূপেয্যপণ্ণং. মংসন্তি সীহব্যগ্ঘৰিঘাসাদিমংসং. তানি আহরিত্ৰাতি তানি সাকাদীনি আহরিত্ৰা. অমমস্সাতি তণ্হাদিট্ঠিমমত্তরহিতস্স. সকিঞ্চনোতি সপলিবোধো. অনাদানস্সাতি নিগ্গহণস্স. দাতুমরহামীতি এৰরূপস্স পচ্চেকবুদ্ধস্স অত্তনা লদ্ধভোজনং দাতুং অরহামি.

তুণ্হীমাসীনন্তি কিঞ্চি অৰত্ৰা নিসিন্নং. অকিঞ্চনন্তি রাগকিঞ্চনাদীহি রহিতং. আরতন্তি ৰিরতং সব্বপাপানি পহায ঠিতং. কমণ্ডলুন্তি কুণ্ডিকং. এতে হীতি এতে রাজাদযো তযো জনাতি হত্থং পসারেত্ৰা তে নিদ্দিসন্তো এৰমাহ. দাতুমরহন্তীতি মাদিসস্স দাতুং অরহন্তি. পচ্চনীকন্তি পচ্চনীকপটিপদং. দাযকস্স হি নিমন্তনং একৰীসতিযা অনেসনাসু অঞ্ঞতরায পিণ্ডপাতপরিযেসনায জীৰিককপ্পনসঙ্খাতা মিচ্ছাজীৰপটিপত্তি নাম হোতি.

তস্স ৰচনং সুত্ৰা কুটুম্বিকো অত্তমনো দ্ৰে ওসানগাথা অভাসি –

২৮৮.

‘‘অত্থায ৰত মে অজ্জ, ইধাগচ্ছি রথেসভো;

সোহং অজ্জ পজানামি, যত্থ দিন্নং মহপ্ফলং.

২৮৯.

‘‘রট্ঠেসু গিদ্ধা রাজানো, কিচ্চাকিচ্চেসু ব্রাহ্মণা;

ইসী মূলফলে গিদ্ধা, ৰিপ্পমুত্তা চ ভিক্খৰো’’তি.

তত্থ রথেসভোতি রাজানং সন্ধাযাহ. কিচ্চাকিচ্চেসূতি রঞ্ঞো কিচ্চকরণীযেসু. ভিক্খৰোতি পচ্চেকবুদ্ধা ভিক্খৰো পন সব্বভৰেহি ৰিপ্পমুত্তা.

পচ্চেকবুদ্ধো তস্স ধম্মং দেসেত্ৰা সকট্ঠানমেৰ গতো, তথা তাপসো. রাজা পন কতিপাহং তস্স সন্তিকে ৰসিত্ৰা বারাণসিমেৰ গতো.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ পিণ্ডপাতো যথানুচ্ছৰিকং গচ্ছতি, পুব্বেপি গতোযেৰা’’তি ৰত্ৰা জাতকং সমোধানেসি – ‘‘তদা কুটুম্বিকো ধম্মরতনস্স সক্কারকারকো কুটুম্বিকো অহোসি, রাজা আনন্দো, পুরোহিতো সারিপুত্তো, হিমৰন্ততাপসো পন অহমেৰ অহোসি’’ন্তি.

ভিক্খাপরম্পরজাতকৰণ্ণনা তেরসমা.

জাতকুদ্দানং –

কেদারং চন্দকিন্নরী, উক্কুসুদ্দালভিসকং;

সুরুচি পঞ্চুপোসথং, মহামোরঞ্চ তচ্ছকং.

মহাৰাণিজ সাধিনং, দসব্রাহ্মণজাতকং;

ভিক্খাপরম্পরাপি চ, তেরসানি পকিণ্ণকে.

পকিণ্ণকনিপাতৰণ্ণনা নিট্ঠিতা.

১৫. ৰীসতিনিপাতো

[৪৯৭] ১. মাতঙ্গজাতকৰণ্ণনা

কুতো নু আগচ্ছসি দুম্মৰাসীতি ইদং সত্থা জেতৰনে ৰিহরন্তো উদেনং নাম ৰংসরাজানং আরব্ভ কথেসি. তস্মিঞ্হি কালে আযস্মা পিণ্ডোলভারদ্ৰাজো জেতৰনতো আকাসেন গন্ত্ৰা যেভুয্যেন কোসম্বিযং উদেনস্স রঞ্ঞো উয্যানং দিৰাৰিহারায গচ্ছতি. থেরো কির পুরিমভৰে রজ্জং কারেন্তো দীঘমদ্ধানং তস্মিং উয্যানে মহাপরিৰারো সম্পত্তিং অনুভৰি. সো তেন পুব্বাচিণ্ণেন যেভুয্যেন তত্থেৰ দিৰাৰিহারং নিসীদিত্ৰা ফলসমাপত্তিসুখেন ৰীতিনামেতি. তস্মিং একদিৰসং তত্থ গন্ত্ৰা সুপুপ্ফিতসালমূলে নিসিন্নে উদেনো সত্তাহং মহাপানং পিৰিত্ৰা ‘‘উয্যানকীল়ং কীল়িস্সামী’’তি মহন্তেন পরিৰারেন উয্যানং গন্ত্ৰা মঙ্গলসিলাপট্টে অঞ্ঞতরায ইত্থিযা অঙ্কে নিপন্নো সুরামদমত্ততায নিদ্দং ওক্কমি. গাযন্তা নিসিন্নিত্থিযো তূরিযানি ছড্ডেত্ৰা উয্যানং পৰিসিত্ৰা পুপ্ফফলাদীনি ৰিচিনন্তিযো থেরং দিস্ৰা গন্ত্ৰা ৰন্দিত্ৰা নিসীদিংসু. থেরো তাসং ধম্মকথং কথেন্তো নিসীদি. ইতরাপি ইত্থী অঙ্কং চালেত্ৰা রাজানং পবোধেত্ৰা ‘‘কুহিং তা ৰসলিযো গতা’’তি ৰুত্তে ‘‘একং সমণং পরিৰারেত্ৰা নিসিন্না’’তি আহ. সো কুদ্ধো গন্ত্ৰা থেরং অক্কোসিত্ৰা পরিভাসিত্ৰা ‘‘হন্দাহং, তং সমণং তম্বকিপিল্লকেহি খাদাপেস্সামী’’তি কোধৰসেন থেরস্স সরীরে তম্বকিপিল্লকপুটং ভিন্দাপেসি. থেরো আকাসে ঠত্ৰা তস্সোৰাদং দত্ৰা জেতৰনে গন্ধকুটিদ্ৰারেযেৰ ওতরিত্ৰা তথাগতেন ‘‘কুতো আগতোসী’’তি পুট্ঠো থেরো তমত্থং আরোচেসি. সত্থা ‘‘ন খো, ভারদ্ৰাজ, উদেনো ইদানেৰ পব্বজিতে ৰিহেঠেতি, পুব্বেপি ৰিহেঠেসিযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে তদা মহাসত্তো বহিনগরে চণ্ডালযোনিযং নিব্বত্তি, ‘‘মাতঙ্গো’’তিস্স নামং করিংসু. অপরভাগে ৰিঞ্ঞুতং পত্তো ‘‘মাতঙ্গপণ্ডিতো’’তি পাকটো অহোসি. তদা বারাণসিসেট্ঠিনো ধীতা দিট্ঠমঙ্গলিকা নাম একমাসদ্ৰেমাসৰারেন মহাপরিৰারা উয্যানং কীল়িতুং গচ্ছতি. অথেকদিৰসং মহাসত্তো কেনচি কম্মেন নগরং পৰিসন্তো অন্তরদ্ৰারে দিট্ঠমঙ্গলিকং দিস্ৰা একমন্তং অপগন্ত্ৰা অল্লীযিত্ৰা অট্ঠাসি. দিট্ঠমঙ্গলিকা সাণিযা অন্তরেন ওলোকেন্তী তং দিস্ৰা ‘‘কো এসো’’তি পুচ্ছিত্ৰা ‘‘চণ্ডালো অয্যে’’তি ৰুত্তে ‘‘অদিট্ঠপুব্বযুত্তকং ৰত পস্সামী’’তি গন্ধোদকেন অক্খীনি ধোৰিত্ৰা ততো নিৰত্তি. তায সদ্ধিং নিক্খন্তজনো ‘‘অরে, দুট্ঠ চণ্ডাল, অজ্জ তং নিস্সায অম্হাকং অমূলকং সুরাভত্তং নট্ঠ’’ন্তি কোধাভিভূতো মাতঙ্গপণ্ডিতং হত্থেহি চ পাদেহি চ পোথেত্ৰা ৰিসঞ্ঞিং কত্ৰা পক্কামি. সো মুহুত্তং ৰীতিনামেত্ৰা পটিলদ্ধসঞ্ঞো চিন্তেসি ‘‘দিট্ঠমঙ্গলিকায পরিজনো মং নিদ্দোসং অকারণেন পোথেসি, দিট্ঠমঙ্গলিকং লভিত্ৰাৰ উট্ঠহিস্সামি, নো অলভিত্ৰা’’তি অধিট্ঠায গন্ত্ৰা তস্সা পিতু নিৰেসনদ্ৰারে নিপজ্জি. সো ‘‘কেন কারণেন নিপন্নোসী’’তি ৰুত্তে ‘‘অঞ্ঞং কারণং নত্থি, দিট্ঠমঙ্গলিকায মে অত্থো’’তি আহ. একো দিৰসো অতীতো, তথা দুতিযো, ততিযো, চতুত্থো, পঞ্চমো, ছট্ঠো চ. বোধিসত্তানং অধিট্ঠানং নাম সমিজ্ঝতি, তস্মা সত্তমে দিৰসে দিট্ঠমঙ্গলিকং নীহরিত্ৰা তস্স অদংসু.

অথ নং সা ‘‘উট্ঠেহি, সামি, তুম্হাকং গেহং গচ্ছামা’’তি আহ. ভদ্দে, তৰ পরিজনেনম্হি সুপোথিতো দুব্বলো, মং উক্খিপিত্ৰা পিট্ঠিং আরোপেত্ৰা আদায গচ্ছাহীতি. সা তথা কত্ৰা নগরৰাসীনং পস্সন্তানঞ্ঞেৰ নগরা নিক্খমিত্ৰা চণ্ডালগামকং গতা. অথ নং মহাসত্তো জাতিসম্ভেদৰীতিক্কমং অকত্ৰাৰ কতিপাহং গেহে ৰসাপেত্ৰা চিন্তেসি ‘‘অহমেতং লাভগ্গযসগ্গপ্পত্তং করোন্তো পব্বজিত্ৰাৰ কাতুং সক্খিস্সামি, ন ইতরথা’’তি. অথ নং আমন্তেত্ৰা ‘ভদ্দে, মযি অরঞ্ঞতো কিঞ্চি অনাহরন্তে অম্হাকং জীৰিকা নপ্পৰত্ততি, যাৰ মমাগমনা মা উক্কণ্ঠি, অহং অরঞ্ঞং গমিস্সামী’’তি ৰত্ৰা গেহৰাসিনোপি ‘‘ইমং মা পমজ্জিত্থা’’তি ওৰদিত্ৰা অরঞ্ঞং গন্ত্ৰা সমণপব্বজ্জং পব্বজিত্ৰা অপ্পমত্তো সত্তমে দিৰসে অট্ঠ সমাপত্তিযো চ পঞ্চ অভিঞ্ঞাযো চ উপ্পাদেত্ৰা ‘‘ইদানি দিট্ঠমঙ্গলিকায অৰস্সযো ভৰিতুং সক্খিস্সামী’’তি ইদ্ধিযা গন্ত্ৰা চণ্ডালগামদ্ৰারে ওতরিত্ৰা দিট্ঠমঙ্গলিকায গেহদ্ৰারং অগমাসি. সা তস্সাগমনং সুত্ৰা গেহতো নিক্খমিত্ৰা ‘‘সামি, কস্মা মং অনাথং কত্ৰা পব্বজিতোসী’’তি পরিদেৰি. অথ নং ‘‘ভদ্দে, মা চিন্তযি, তৰ পোরাণকযসতো ইদানি মহন্ততরং যসং করিস্সামি, অপিচ খো পন ‘ন ময্হং মাতঙ্গপণ্ডিতো সামিকো, মহাব্রহ্মা মে সামিকো’তি এত্তকং পরিসমজ্ঝে ৰত্তুং সক্খিস্সসী’তি আহ. ‘‘আম, সামি, সক্খিস্সামী’’তি. ‘‘তেন হি ‘‘ইদানি তে সামিকো কুহিন্তি পুট্ঠা ‘ব্রহ্মলোকং গতো’তি ৰত্ৰা ‘কদা আগমিস্সতী’তি ৰুত্তে ‘ইতো সত্তমে দিৰসে পুণ্ণমাযং চন্দং ভিন্দিত্ৰা আগমিস্সতী’তি ৰদেয্যাসী’’তি নং ৰত্ৰা মহাসত্তো হিমৰন্তমেৰ গতো.

দিট্ঠমঙ্গলিকাপি বারাণসিযং মহাজনস্স মজ্ঝে তেসু তেসু ঠানেসু তথা কথেসি. মহাজনো ‘‘অহো মহাব্রহ্মা সমানো দিট্ঠমঙ্গলিকং ন গচ্ছতি, এৰমেতং ভৰিস্সতী’’তি সদ্দহি. বোধিসত্তোপি পুণ্ণমদিৰসে চন্দস্স গগনমজ্ঝে ঠিতকালে ব্রহ্মত্তভাৰং মাপেত্ৰা সকলং কাসিরট্ঠং দ্ৰাদসযোজনিকং বারাণসিনগরঞ্চ একোভাসং কত্ৰা চন্দমণ্ডলং ভিন্দিত্ৰা ওতরিত্ৰা বারাণসিযা উপরূপরি তিক্খত্তুং পরিব্ভমিত্ৰা মহাজনেন গন্ধমালাদীহি পূজিযমানো চণ্ডালগামকাভিমুখো অহোসি. ব্রহ্মভত্তা সন্নিপতিত্ৰা চণ্ডালগামকং গন্ত্ৰা দিট্ঠমঙ্গলিকায গেহং সুদ্ধৰত্থেহি ছাদেত্ৰা ভূমিং চতুজ্জাতিযগন্ধেহি ওপুঞ্ছিত্ৰা পুপ্ফানি ৰিকিরিত্ৰা ধূমং দত্ৰা চেলৰিতানং পসারেত্ৰা মহাসযনং পঞ্ঞপেত্ৰা গন্ধতেলেহি দীপং জালেত্ৰা দ্ৰারে রজতপট্টৰণ্ণৰালুকং ওকিরিত্ৰা পুপ্ফানি ৰিকিরিত্ৰা ধজে বন্ধিংসু. এৰং অলঙ্কতে গেহে মহাসত্তো ওতরিত্ৰা অন্তো পৰিসিত্ৰা থোকং সযনপিট্ঠে নিসীদি.

তদা দিট্ঠমঙ্গলিকা উতুনী হোতি. অথস্সা অঙ্গুট্ঠকেন নাভিং পরামসি, কুচ্ছিযং গব্ভো পতিট্ঠাসি. অথ নং মহাসত্তো আমন্তেত্ৰা ‘‘ভদ্দে, গব্ভো তে পতিট্ঠিতো, ত্ৰং পুত্তং ৰিজাযিস্সসি, ত্ৰম্পি পুত্তোপি তে লাভগ্গযসগ্গপ্পত্তা ভৰিস্সথ, তৰ পাদধোৰনউদকং সকলজম্বুদীপে রাজূনং অভিসেকোদকং ভৰিস্সতি, নহানোদকং পন তে অমতোসধং ভৰিস্সতি, যে তং সীসে আসিঞ্চিস্সন্তি, তে সব্বরোগেহি মুচ্চিস্সন্তি, কাল়কণ্ণিং পরিৰজ্জেস্সন্তি, তৰ পাদপিট্ঠে সীসং ঠপেত্ৰা ৰন্দন্তা সহস্সং দস্সন্তি, সোতপথে ঠত্ৰা ৰন্দন্তা সতং দস্সন্তি, চক্খুপথে ঠত্ৰা ৰন্দন্তা একং কহাপণং দত্ৰা ৰন্দিস্সন্তি, অপ্পমত্তা হোহী’’তি নং ওৰদিত্ৰা গেহা নিক্খমিত্ৰা মহাজনস্স পস্সন্তস্সেৰ উপ্পতিত্ৰা চন্দমণ্ডলং পাৰিসি. ব্রহ্মভত্তা সন্নিপতিত্ৰা ঠিতকাৰ রত্তিং ৰীতিনামেত্ৰা পাতোৰ দিট্ঠমঙ্গলিকং সুৰণ্ণসিৰিকং আরোপেত্ৰা সীসেন উক্খিপিত্ৰা নগরং পৰিসিংসু. ‘‘মহাব্রহ্মভরিযা’’তি তং উপসঙ্কমিত্ৰা মহাজনো গন্ধমালাদীহি পূজেসি. পাদপিট্ঠে সীসং ঠপেত্ৰা ৰন্দিতুং লভন্তা সহস্সত্থৰিকং দেন্তি, সোতপথে ঠত্ৰা ৰন্দিতুং লভন্তা সতং দেন্তি, চক্খুপথে ঠত্ৰা ৰন্দিতুং লভন্তা একং কহাপণং দেন্তি. এৰং দ্ৰাদসযোজনিকং বারাণসিং তং গহেত্ৰা ৰিচরন্তা অট্ঠারসকোটিধনং লভিংসু.

অথ নং নগরং পরিহরিত্ৰা আনেত্ৰা নগরমজ্ঝে মহামণ্ডপং কারেত্ৰা সাণিং পরিক্খিপিত্ৰা মহাসযনং পঞ্ঞপেত্ৰা মহন্তেন সিরিসোভগ্গেন তত্থ ৰসাপেসুং. মণ্ডপসন্তিকেযেৰ সত্তদ্ৰারকোট্ঠং সত্তভূমিকং পাসাদং কাতুং আরভিংসু, মহন্তং নৰকম্মং অহোসি. দিট্ঠমঙ্গলিকা মণ্ডপেযেৰ পুত্তং ৰিজাযি. অথস্স নামগ্গহণদিৰসে ব্রাহ্মণা সন্নিপতিত্ৰা মণ্ডপে জাতত্তা ‘‘মণ্ডব্যকুমারো’’তি নামং করিংসু. পাসাদো পন দসহি মাসেহি নিট্ঠিতো. ততো পট্ঠায সা মহন্তেন যসেন তস্মিং ৰসতি, মণ্ডব্যকুমারোপি মহন্তেন পরিৰারেন ৰড্ঢতি. তস্স সত্তট্ঠৰস্সকালেযেৰ জম্বুদীপতলে উত্তমাচরিযা সন্নিপতিংসু. তে তং তযো ৰেদে উগ্গণ্হাপেসুং. সো সোল়সৰস্সকালতো পট্ঠায ব্রাহ্মণানং ভত্তং পট্ঠপেসি, নিবদ্ধং সোল়স ব্রাহ্মণসহস্সানি ভুঞ্জন্তি. চতুত্থে দ্ৰারকোট্ঠকে ব্রাহ্মণানং দানং দেতি.

অথেকস্মিং মহামহদিৰসে গেহে বহুং পাযাসং পটিযাদেসুং. সোল়স ব্রাহ্মণসহস্সানি চতুত্থে দ্ৰারকোট্ঠকে নিসীদিত্ৰা সুৰণ্ণরসৰণ্ণেন নৰসপ্পিনা পক্কমধুখণ্ডসক্খরাহি চ অভিসঙ্খতং পাযাসং পরিভুঞ্জন্তি. কুমারোপি সব্বালঙ্কারপটিমণ্ডিতো সুৰণ্ণপাদুকা আরুয্হ হত্থেন কঞ্চনদণ্ডং গহেত্ৰা ‘‘ইধ সপ্পিং দেথ, ইধ মধু’’ন্তি ৰিচারেন্তো চরতি. তস্মিং খণে মাতঙ্গপণ্ডিতো হিমৰন্তে অস্সমপদে নিসিন্নো ‘‘কা নু খো দিট্ঠমঙ্গলিকায পুত্তস্স পৰত্তী’’তি ওলোকেন্তো তস্স অতিত্থে পক্খন্দভাৰং দিস্ৰা ‘‘অজ্জেৰ গন্ত্ৰা মাণৰং দমেত্ৰা যত্থ দিন্নং মহপ্ফলং হোতি, তত্থ দানং দাপেত্ৰা আগমিস্সামী’’তি চিন্তেত্ৰা আকাসেন অনোতত্তদহং গন্ত্ৰা মুখধোৰনাদীনি কত্ৰা মনোসিলাতলে ঠিতো রত্তদুপট্টং নিৰাসেত্ৰা কাযবন্ধনং বন্ধিত্ৰা পংসুকূলসঙ্ঘাটিং পারুপিত্ৰা মত্তিকাপত্তং আদায আকাসেনাগন্ত্ৰা চতুত্থে দ্ৰারকোট্ঠকে দানগ্গেযেৰ ওতরিত্ৰা একমন্তং অট্ঠাসি. মণ্ডব্যো কুমারো ইতো চিতো চ ওলোকেন্তো তং দিস্ৰা ‘‘এৰংৰিরূপো সঙ্কারযক্খসদিসো অযং পব্বজিতো ইমং ঠানং আগচ্ছন্তো কুতো নু খো আগচ্ছতী’’তি তেন সদ্ধিং সল্লপন্তো পঠমং গাথমাহ –

১.

‘‘কুতো নু আগচ্ছসি দুম্মৰাসী, ওতল্লকো পংসুপিসাচকোৰ;

সঙ্কারচোল়ং পটিমুঞ্চ কণ্ঠে, কো রে তুৰং হোসি অদক্খিণেয্যো’’তি.

তত্থ দুম্মৰাসীতি অনঞ্জিতঅমণ্ডিতঘটিতসঙ্ঘাটিকপিলোতিকৰসনো. ওতল্লকোতি লামকো ওলম্বৰিলম্বনন্তকধরো ৰা. পংসুপিসাচকোৰাতি সঙ্কারট্ঠানে পিসাচকো ৰিয. সঙ্কারচোল়ন্তি সঙ্কারট্ঠানে লদ্ধপিলোতিকং. পটিমুঞ্চাতি পটিমুঞ্চিত্ৰা. অদক্খিণেয্যোতি ত্ৰং অদক্খিণেয্যো ইমেসং পরমদক্খিণেয্যানং নিসিন্নট্ঠানং একো হুত্ৰা কুতো আগতো.

তং সুত্ৰা মহাসত্তো মুদুচিত্তেনেৰ তেন সদ্ধিং সল্লপন্তো দুতিযং গাথমাহ –

২.

‘‘অন্নং তৰেদং পকতং যসস্সি, তং খজ্জরে ভুঞ্জরে পিয্যরে চ;

জানাসি মং ত্ৰং পরদত্তূপজীৰিং, উত্তিট্ঠপিণ্ডং লভতং সপাকো’’তি.

তত্থ পকতন্তি পটিযত্তং. যসস্সীতি পরিৰারসম্পন্ন. তং খজ্জরেতি তং খজ্জন্তি চ ভুঞ্জন্তি চ পিৰন্তি চ. কিংকারণা ময্হং কুজ্ঝসি? উত্তিট্ঠপিণ্ডন্তি উপতিট্ঠিত্ৰা লভিতব্বপিণ্ডং, উট্ঠায ঠিতেহি ৰা দীযমানং হেট্ঠা ঠত্ৰা লভিতব্বপিণ্ডং. লভতং সপাকোতি সপাকো চণ্ডালোপি লভতু. জাতিসম্পন্না হি যত্থ কত্থচি লভন্তি, সপাকচণ্ডালস্স পন কো দেতি, দুল্লভপিণ্ডো অহং, তস্মা মে জীৰিতপৰত্তনত্থং ভোজনং দাপেহি, কুমারাতি.

ততো মণ্ডব্যো গাথমাহ –

৩.

‘‘অন্নং মমেদং পকতং ব্রাহ্মণানং, অত্তত্থায সদ্দহতো মমেদং;

অপেহি এত্তো কিমিধট্ঠিতোসি, ন মাদিসা তুম্হং দদন্তি জম্মা’’তি.

তত্থ অত্তত্থাযাতি অত্তনো ৰড্ঢিঅত্থায. অপেহি এত্তোতি ইমম্হা ঠানা অপগচ্ছ. ন মাদিসাতি মাদিসা জাতিসম্পন্নানং উদিচ্চব্রাহ্মণানং দানং দেন্তি, ন তুয্হং চণ্ডালস্স, গচ্ছ, জম্মাতি.

ততো মহাসত্তো গাথমাহ –

৪.

‘‘থলে চ নিন্নে চ ৰপন্তি বীজং, অনূপখেত্তে ফলমাসমানা;

এতায সদ্ধায দদাহি দানং, অপ্পেৰ আরাধযে দক্খিণেয্যে’’তি.

তস্সত্থো – কুমার, সস্সফলং আসীসমানা তীসুপি খেত্তেসু বীজং ৰপন্তি. তত্থ অতিৰুট্ঠিকালে থলে সস্সং সম্পজ্জতি, নিন্নে পূতিকং হোতি, অনূপখেত্তে নদিঞ্চ তল়াকঞ্চ নিস্সায কতং ওঘেন ৰুয্হতি. মন্দৰুট্ঠিকালে থলে খেত্তে ৰিপজ্জতি, নিন্নে থোকং সম্পজ্জতি, অনূপখেত্তে সম্পজ্জতেৰ. সমৰুট্ঠিকালে থলে খেত্তে থোকং সম্পজ্জতি, ইতরেসু সম্পজ্জতেৰ. তস্মা যথা ফলমাসীসমানা তীসুপি খেত্তেসু ৰপন্তি, তথা ত্ৰম্পি এতায ফলসদ্ধায আগতাগতানং সব্বেসংযেৰ দানং দেহি, অপ্পেৰ নাম এৰং দদন্তো দক্খিণেয্যে আরাধেয্যাসি লভেয্যাসীতি.

ততো মণ্ডব্যো গাথমাহ –

৫.

‘‘খেত্তানি ময্হং ৰিদিতানি লোকে, যেসাহং বীজানি পতিট্ঠপেমি;

যে ব্রাহ্মণা জাতিমন্তূপপন্না, তানীধ খেত্তানি সুপেসলানী’’তি.

তত্থ যেসাহন্তি যেসু অহং. জাতিমন্তূপপন্নাতি জাতিযা চ মন্তেহি চ উপপন্না.

ততো মহাসত্তো দ্ৰে গাথা অভাসি –

৬.

‘‘জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু চ সন্তি সব্বে, তানীধ খেত্তানি অপেসলানি.

৭.

‘‘জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু ন সন্তি সব্বে, তানীধ খেত্তানি সুপেসলানী’’তি.

তত্থ জাতিমদোতি ‘‘অহমস্মি জাতিসম্পন্নো’’তি এৰং উপ্পন্নমানো. অতিমানিতা চাতি ‘‘অঞ্ঞো মযা সদ্ধিং জাতিআদীহি সদিসো নত্থী’’তি অতিক্কম্ম পৰত্তমানো. লোভাদযো লুব্ভনদুস্সনমজ্জনমুয্হনমত্তাৰ. অপেসলানীতি এৰরূপা পুগ্গলা আসীৰিসভরিতা ৰিয ৰম্মিকা অপ্পিযসীলা হোন্তি. এৰরূপানং দিন্নং ন মহপ্ফলং হোতি, তস্মা মা এতেসং সুপেসলখেত্তভাৰং মঞ্ঞিত্থ. ন হি জাতিমন্তা সগ্গদাযকা. যে পন জাতিমানাদিরহিতা অরিযা, তানি খেত্তানি সুপেসলানি, তেসু দিন্নং মহপ্ফলং, তে সগ্গদাযকা হোন্তীতি.

ইতি সো মহাসত্তে পুনপ্পুনং কথেন্তে কুজ্ঝিত্ৰা ‘‘অযং অতিৰিয বহুং ৰিপ্পলপতি, কুহিং গতা ইমে দোৰারিকা, নযিমং চণ্ডালং নীহরন্তী’’তি গাথমাহ –

৮.

‘‘ক্ৰেত্থ গতা উপজোতিযো চ, উপজ্ঝাযো অথ ৰা গণ্ডকুচ্ছি;

ইমস্স দণ্ডঞ্চ ৰধঞ্চ দত্ৰা, গলে গহেত্ৰা খলযাথ জম্ম’’ন্তি.

তত্থ ক্ৰেত্থ গতাতি ইমেসু তীসু দ্ৰারেসু ঠপিতা উপজোতিযো চ উপজ্ঝাযো চ গণ্ডকুচ্ছি চাতি তযো দোৰারিকা কুহিং গতাতি অত্থো.

তেপি তস্স ৰচনং সুত্ৰা ৰেগেনাগন্ত্ৰা ৰন্দিত্ৰা ‘‘কিং করোম দেৰা’’তি আহংসু. ‘‘অযং ৰো জম্মো চণ্ডালো দিট্ঠো’’তি? ‘‘ন পস্সাম দেৰ, কুতোচি আগতভাৰং ন জানামা’’তি. ‘‘কো চেস মাযাকারো ৰা ৰিজ্জাধরো ৰা ভৰিস্সতি, ইদানি কিং তিট্ঠথা’’তি. ‘‘কিং করোম দেৰা’’তি? ‘‘ইমস্স মুখমেৰ পোথেত্ৰা ভিন্দন্তা দণ্ডৰেল়ুপেসিকাহি পিট্ঠিচম্মং উপ্পাটেন্তা ৰধঞ্চ দত্ৰা গলে গহেত্ৰা এতং জম্মং খলযাথ, ইতো নীহরথা’’তি.

মহাসত্তো তেসু অত্তনো সন্তিকং অনাগতেস্ৰেৰ উপ্পতিত্ৰা আকাসে ঠিতো গাথমাহ –

৯.

‘‘গিরিং নখেন খণসি, অযো দন্তেহি খাদসি;

জাতৰেদং পদহসি, যো ইসিং পরিভাসসী’’তি.

তত্থ জাতৰেদং পদহসীতি অগ্গিং গিলিতুং ৰাযমসি.

ইমঞ্চ পন গাথং ৰত্ৰা মহাসত্তো পস্সন্তস্সেৰ মাণৰস্স চ ব্রাহ্মণানঞ্চ আকাসে পক্খন্দি. তমত্থং পকাসেন্তো সত্থা আহ –

১০.

‘‘ইদং ৰত্ৰান মাতঙ্গো, ইসি সচ্চপরক্কমো;

অন্তলিক্খস্মিং পক্কামি, ব্রাহ্মণানং উদিক্খত’’ন্তি.

তত্থ সচ্চপরক্কমোতি সভাৰপরক্কমো.

সো পাচীনদিসাভিমুখো গন্ত্ৰা একায ৰীথিযা ওতরিত্ৰা ‘‘পদৰল়ঞ্জং পঞ্ঞাযতূ’’তি অধিট্ঠায পাচীনদ্ৰারসমীপে পিণ্ডায চরন্তো মিস্সকভত্তং সংকড্ঢিত্ৰা একিস্সং সালাযং নিসীদিত্ৰা মিস্সকভত্তং পরিভুঞ্জি. নগরদেৰতা ‘‘অযং অম্হাকং অয্যং ৰিহেঠেত্ৰা কথেতী’’তি অসহমানা আগমিংসু. অথস্স জেট্ঠকযক্খো মণ্ডব্যস্স গীৰং গহেত্ৰা পরিৰত্তেসি, সেসদেৰতা সেসব্রাহ্মণানং গীৰং গণ্হিত্ৰা পরিৰত্তেসুং. বোধিসত্তে মুদুচিত্ততায পন ‘‘তস্স পুত্তো’’তি নং ন মারেন্তি, কেৰলং কিলমেন্তিযেৰ. মণ্ডব্যস্স সীসং পরিৰত্তিত্ৰা পিট্ঠিপস্সাভিমুখং জাতং, হত্থপাদা উজুকা থদ্ধাৰ অট্ঠংসু, অক্খীনি কালকতস্সেৰ পরিৰত্তিংসু. সো থদ্ধসরীরোৰ নিপজ্জি, সেসব্রাহ্মণা মুখেন খেল়ং ৰমন্তা অপরাপরং পরিৰত্তন্তি. মাণৰা ‘‘অয্যে, পুত্তস্স তে কিং জাত’’ন্তি দিট্ঠমঙ্গলিকায আরোচযিংসু. সা ৰেগেন গন্ত্ৰা পুত্তং দিস্ৰা ‘‘কিমেত’’ন্তি ৰত্ৰা গাথমাহ –

১১.

‘‘আৰেল্লিতং পিট্ঠিতো উত্তমঙ্গং, বাহুং পসারেতি অকম্মনেয্যং;

সেতানি অক্খীনি যথা মতস্স, কো মে ইমং পুত্তমকাসি এৰ’’ন্তি.

তত্থ আৰেল্লিতন্তি পরিৰত্তিতং.

অথস্সা তস্মিং ঠানে ঠিতজনো আরোচেতুং গাথমাহ –

১২.

‘‘ইধাগমা সমণো দুম্মৰাসী, ওতল্লকো পংসুপিসাচকোৰ;

সঙ্কারচোল়ং পটিমুঞ্চ কণ্ঠে, সো তে ইমং পুত্তমকাসি এৰ’’ন্তি.

সা তং সুত্ৰাৰ চিন্তেসি ‘‘অঞ্ঞস্সেতং বলং নত্থি, নিস্সংসযং মাতঙ্গপণ্ডিতো ভৰিস্সতি, সম্পন্নমেত্তাভাৰনো খো পন ধীরো ন এত্তকং জনং কিলমেত্ৰা গমিস্সতি, কতরং নু খো দিসং গতো ভৰিস্সতী’’তি. ততো পুচ্ছন্তী গাথমাহ –

১৩.

‘‘কতমং দিসং অগমা ভূরিপঞ্ঞো, অক্খাথ মে মাণৰা এতমত্থং;

গন্ত্ৰান তং পটিকরেমু অচ্চযং, অপ্পেৰ নং পুত্ত লভেমু জীৰিত’’ন্তি.

তত্থ গন্ত্ৰানাতি তস্স সন্তিকং গন্ত্ৰা. তং পটিকরেমু অচ্চযন্তি তং অচ্চযং পটিকরিস্সাম দেসেস্সাম, খমাপেস্সাম নন্তি. পুত্ত লভেমু জীৰিতন্তি অপ্পেৰ নাম পুত্তস্স জীৰিতং লভেয্যাম.

অথস্সা তত্থ ঠিতা মাণৰা কথেন্তা গাথমাহংসু –

১৪.

‘‘ৰেহাযসং অগমা ভূরিপঞ্ঞো, পথদ্ধুনো পন্নরসেৰ চন্দো;

অপি চাপি সো পুরিমদিসং অগচ্ছি, সচ্চপ্পটিঞ্ঞো ইসি সাধুরূপো’’তি.

তত্থ পথদ্ধুনোতি আকাসপথসঙ্খাতস্স অদ্ধুনো মজ্ঝে ঠিতো পন্নরসে চন্দো ৰিয. অপি চাপি সোতি অপিচ খো পন সো পুরত্থিমং দিসং গতো.

সা তেসং ৰচনং সুত্ৰা ‘‘মম সামিকং উপধারেস্সামী’’তি সুৰণ্ণকলসসুৰণ্ণসরকানি গাহাপেত্ৰা দাসিগণপরিৰুতা তেন পদৰল়ঞ্জস্স অধিট্ঠিতট্ঠানং পত্ৰা তেনানুসারেন গচ্ছন্তী তস্মিং পীঠিকায নিসীদিত্ৰা ভুঞ্জমানে তস্স সন্তিকং গন্ত্ৰা ৰন্দিত্ৰা অট্ঠাসি. সো তং দিস্ৰা থোকং ওদনং পত্তে ঠপেসি. দিট্ঠমঙ্গলিকা সুৰণ্ণকলসেন তস্স উদকং অদাসি. সো তত্থেৰ হত্থং ধোৰিত্ৰা মুখং ৰিক্খালেসি. অথ নং সা ‘‘কেন মে পুত্তস্স সো ৰিপ্পকারো কতো’’তি পুচ্ছন্তী গাথমাহ –

১৫.

‘‘আৰেল্লিতং পিট্ঠিতো উত্তমঙ্গং, বাহুং পসারেতি অকম্মনেয্যং;

সেতানি অক্খীনি যথা মতস্স, কো মে ইমং পুত্তমকাসি এৰ’’ন্তি.

ততো পরা তেসং ৰচনপটিৰচনগাথা হোন্তি –

১৬.

‘‘যক্খা হৰে সন্তি মহানুভাৰা, অন্ৰাগতা ইসযো সাধুরূপা;

তে দুট্ঠচিত্তং কুপিতং ৰিদিত্ৰা, যক্খা হি তে পুত্তমকংসু এৰং.

১৭.

‘‘যক্খা চ মে পুত্তমকংসু এৰং, ত্ৰঞ্ঞেৰ মে মা কুদ্ধো ব্রহ্মচারি;

তুম্হেৰ পাদে সরণং গতাস্মি, অন্ৰাগতা পুত্তসোকেন ভিক্খু.

১৮.

‘‘তদেৰ হি এতরহি চ ময্হং, মনোপদোসো ন মমত্থি কোচি;

পুত্তো চ তে ৰেদমদেন মত্তো, অত্থং ন জানাতি অধিচ্চ ৰেদে.

১৯.

‘‘অদ্ধা হৰে ভিক্খু মুহুত্তকেন, সম্মুয্হতেৰ পুরিসস্স সঞ্ঞা;

একাপরাধং খম ভূরিপঞ্ঞ, ন পণ্ডিতা কোধবলা ভৰন্তী’’তি.

তত্থ যক্খাতি নগরপরিগ্গাহকযক্খা. অন্ৰাগতাতি অনু আগতা, ইসযো সাধুরূপা গুণসম্পন্নাতি এৰং জানমানাতি অত্থো. তেতি তে ইসীনং গুণং ঞত্ৰা তৰ পুত্তং দুট্ঠচিত্তং কুপিতচিত্তং ৰিদিত্ৰা. ত্ৰঞ্ঞেৰ মেতি সচে যক্খা কুপিতা এৰমকংসু, করোন্তু, দেৰতা নাম পানীযউল়ুঙ্কমত্তেন সন্তপ্পেতুং সক্কা, তস্মাহং তেসং ন ভাযামি, কেৰলং ত্ৰঞ্ঞেৰ মে পুত্তস্স মা কুজ্ঝি. অন্ৰাগতাতি আগতাস্মি. ভিক্খূতি মহাসত্তং আলপন্তী পুত্তস্স জীৰিতদানং যাচতি. তদেৰ হীতি দিট্ঠমঙ্গলিকে তদা তৰ পুত্তস্স মং অক্কোসনকালে চ ময্হং মনোপদোসো নত্থি, এতরহি চ তযি যাচমানাযপি মম তস্মিং মনোপদোসো নত্থিযেৰ. ৰেদমদেনাতি ‘‘তযো ৰেদা মে উগ্গহিতা’’তি মদেন. অধিচ্চাতি ৰেদে উগ্গহেত্ৰাপি অত্থানত্থং ন জানাতি. মুহুত্তকেনাতি যং কিঞ্চি উগ্গহেত্ৰা মুহুত্তকেনেৰ.

এৰং তায খমাপিযমানো মহাসত্তো ‘‘তেন হি এতেসং যক্খানং পলাযনত্থায অমতোসধং দস্সামী’’তি ৰত্ৰা গাথমাহ –

২০.

‘‘ইদঞ্চ ময্হং উত্তিট্ঠপিণ্ডং, তৰ মণ্ডব্যো ভুঞ্জতু অপ্পপঞ্ঞো;

যক্খা চ তে নং ন ৰিহেঠযেয্যুং, পুত্তো চ তে হেস্সতি সো অরোগো’’তি.

তত্থ উত্তিট্ঠপিণ্ডন্তি উচ্ছিট্ঠকপিণ্ডং, ‘‘উচ্ছিট্ঠপিণ্ড’’ন্তিপি পাঠো.

সা মহাসত্তস্স ৰচনং সুত্ৰা ‘‘দেথ, সামি, অমতোসধ’’ন্তি সুৰণ্ণসরকং উপনামেসি. মহাসত্তো উচ্ছিট্ঠককঞ্জিকং তত্থ আসিঞ্চিত্ৰা ‘‘পঠমঞ্ঞেৰ ইতো উপড্ঢং তৰ পুত্তস্স মুখে ওসিঞ্চিত্ৰা সেসং চাটিযং উদকেন মিস্সেত্ৰা সেসব্রাহ্মণানং মুখে ওসিঞ্চেহি, সব্বেপি নিরোগা ভৰিস্সন্তী’’তি ৰত্ৰা উপ্পতিত্ৰা হিমৰন্তমেৰ গতো. সাপি তং সরকং সীসেনাদায ‘‘অমতোসধং মে লদ্ধ’’ন্তি ৰদন্তী নিৰেসনং গন্ত্ৰা পঠমং পুত্তস্স মুখে কঞ্জিকং ওসিঞ্চি, যক্খো পলাযি. ইতরো পংসুং পুঞ্ছন্তো উট্ঠায ‘‘অম্ম কিমেত’’ন্তি আহ. তযা কতং ত্ৰমেৰ জানিস্সসি. এহি, তাত, তৰ দক্খিণেয্যানং তেসং ৰিপ্পকারং পস্সাতি. সো তে দিস্ৰা ৰিপ্পটিসারী অহোসি. অথ নং মাতা ‘‘তাত মণ্ডব্য, ত্ৰং বালো দানস্স মহপ্ফলট্ঠানং ন জানাসি, দক্খিণেয্যা নাম এৰরূপা ন হোন্তি, মাতঙ্গপণ্ডিতসদিসাৰ হোন্তি, ইতো পট্ঠায মা এতেসং দুস্সীলানং দানমদাসি, সীলৰন্তানং দেহী’’তি ৰত্ৰা আহ –

২১.

‘‘মণ্ডব্য বালোসি পরিত্তপঞ্ঞো, যো পুঞ্ঞক্খেত্তানমকোৰিদোসি;

মহক্কসাৰেসু দদাসি দানং, কিলিট্ঠকম্মেসু অসঞ্ঞতেসু.

২২.

‘‘জটা চ কেসা অজিনা নিৰত্থা, জরূদপানংৰ মুখং পরূল়্হং;

পজং ইমং পস্সথ দুম্মরূপং, ন জটাজিনং তাযতি অপ্পপঞ্ঞং.

২৩.

‘‘যেসং রাগো চ দোসো চ, অৰিজ্জা চ ৰিরাজিতা;

খীণাসৰা অরহন্তো, তেসু দিন্নং মহপ্ফল’’ন্তি.

তত্থ মহক্কসাৰেসূতি মহাকসাৰেসু মহন্তেহি রাগকসাৰাদীহি সমন্নাগতেসু. জটা চ কেসাতি তাত মণ্ডব্য, তৰ দক্খিণেয্যেসু একচ্চানং কেসা জটা কত্ৰা বদ্ধা. অজিনা নিৰত্থাতি সখুরানি অজিনচম্মানি নিৰত্থা. জরূদপানং ৰাতি তিণগহনেন জিণ্ণকূপো ৰিয মুখং দীঘমস্সুতায পরূল়্হং. পজং ইমন্তি ইমং এৰরূপং অনঞ্জিতামণ্ডিতলূখৰেসং পজং পস্সথ. ন জটাজিনন্তি এতং জটাজিনং ইমং অপ্পপঞ্ঞং পজং তাযিতুং ন সক্কোতি, সীলপঞ্ঞাণতপোকম্মানেৰ ইমেসং সত্তানং পতিট্ঠা হোন্তি. যেসন্তি যস্মা যেসং এতে রজ্জনদুস্সনমুয্হনসভাৰা রাগাদযো অট্ঠৰত্থুকা চ অৰিজ্জা ৰিরাজিতা ৰিগতা, ৰিগতত্তাযেৰ চ এতেসং কিলেসানং যে খীণাসৰা অরহন্তো, তেসু দিন্নং মহপ্ফলং, তস্মা ত্ৰং, তাত, ইতো পট্ঠায এৰরূপানং দুস্সীলানং অদত্ৰা যে লোকে অট্ঠসমাপত্তিলাভিনো পঞ্চাভিঞ্ঞা ধম্মিকসমণব্রাহ্মণা চ পচ্চেকবুদ্ধা চ সন্তি, তেসং দানং দেহি. এহি, তাত, তৰ কুলূপকে অমতোসধং পাযেত্ৰা অরোগে করিস্সামাতি ৰত্ৰা উচ্ছিট্ঠকঞ্জিকং গাহাপেত্ৰা উদকচাটিযং পক্খিপিত্ৰা সোল়সন্নং ব্রাহ্মণসহস্সানং মুখেসু আসিঞ্চাপেসি.

একেকো পংসুং পুঞ্ছন্তোৰ উট্ঠহি. অথ নে ব্রাহ্মণা ‘‘ইমেহি চণ্ডালুচ্ছিট্ঠকং পীত’’ন্তি অব্রাহ্মণে করিংসু. তে লজ্জিতা বারাণসিতো নিক্খমিত্ৰা মজ্ঝরট্ঠং গন্ত্ৰা মজ্ঝরঞ্ঞো সন্তিকে ৰসিংসু, মণ্ডব্যো পন তত্থেৰ ৰসি. তদা ৰেত্তৰতীনগরং উপনিস্সায ৰেত্তৰতীনদীতীরে জাতিমন্তো নামেকো ব্রাহ্মণো পব্বজিতো জাতিং নিস্সায মহন্তং মানমকাসি. মহাসত্তো ‘‘এতস্স মানং ভিন্দিস্সামী’’তি তং ঠানং গন্ত্ৰা তস্স সন্তিকে উপরিসোতে ৰাসং কপ্পেসি. সো একদিৰসং দন্তকট্ঠং খাদিত্ৰা ‘‘ইমং দন্তকট্ঠং জাতিমন্তস্স জটাসু লগ্গতূ’’তি অধিট্ঠায নদিযং পাতেসি. তং তস্স উদকং আচমন্তস্স জটাসু লগ্গি. সো তং দিস্ৰাৰ ‘‘নস্স ৰসলা’’তি ৰত্ৰা ‘‘কুতো অযং কাল়কণ্ণী আগতো, উপধারেস্সামি ন’’ন্তি উদ্ধংসোতং গচ্ছন্তো মহাসত্তং দিস্ৰা ‘‘কিংজাতিকোসী’’তি পুচ্ছি. ‘‘চণ্ডালোস্মী’’তি. ‘‘তযা নদিযা দন্তকট্ঠং পাতিত’’ন্তি? ‘‘আম, মযা’’তি. ‘‘নস্স, ৰসল, চণ্ডাল কাল়কণ্ণি মা ইধ ৰসি, হেট্ঠাসোতে ৰসাহী’’তি ৰত্ৰা হেট্ঠাসোতে ৰসন্তেনপি তেন পাতিতে দন্তকট্ঠে পটিসোতং আগন্ত্ৰা জটাসু লগ্গন্তে সো ‘‘নস্স ৰসল, সচে ইধ ৰসিস্সসি, সত্তমে দিৰসে সত্তধা মুদ্ধা ফলিস্সতী’’তি আহ.

মহাসত্তো ‘‘সচাহং এতস্স কুজ্ঝিস্সামি, সীলং মে অরক্খিতং ভৰিস্সতি, উপাযেনেৰস্স মানং ভিন্দিস্সামী’’তি সত্তমে দিৰসে সূরিযুগ্গমনং নিৰারেসি. মনুস্সা উব্বাল়্হা জাতিমন্তং তাপসং উপসঙ্কমিত্ৰা ‘‘ভন্তে, তুম্হে সূরিযুগ্গমনং ন দেথা’’তি পুচ্ছিংসু. সো আহ – ‘‘ন মে তং কম্মং, নদীতীরে পনেকো চণ্ডালো ৰসতি, তস্সেতং কম্মং ভৰিস্সতী’’তি. মনুস্সা মহাসত্তং উপসঙ্কমিত্ৰা ‘‘তুম্হে, ভন্তে, সূরিযুগ্গমনং ন দেথা’’তি পুচ্ছিংসু. ‘‘আমাৰুসো’’তি. ‘‘কিংকারণা’’তি. ‘‘তুম্হাকং কুলূপকো তাপসো মং নিরপরাধং অভিসপি, তস্মিং আগন্ত্ৰা খমাপনত্থায মম পাদেসু পতিতে সূরিযং ৰিস্সজ্জেস্সামী’’তি. তে গন্ত্ৰা তং কড্ঢন্তা আনেত্ৰা মহাসত্তস্স পাদমূলে নিপজ্জাপেত্ৰা খমাপেত্ৰা আহংসু ‘‘সূরিযং ৰিস্সজ্জেথ ভন্তে’’তি. ‘‘ন সক্কা ৰিস্সজ্জেতুং, সচাহং ৰিস্সজ্জেস্সামি, ইমস্স সত্তধা মুদ্ধা ফলিস্সতী’’তি. ‘‘অথ, ভন্তে, কিং করোমা’’তি? সো ‘‘মত্তিকাপিণ্ডং আহরথা’’তি আহরাপেত্ৰা ‘‘ইমং তাপসস্স সীসে ঠপেত্ৰা তাপসং ওতারেত্ৰা উদকে ঠপেথা’’তি ঠপাপেত্ৰা সূরিযং ৰিস্সজ্জেসি. সূরিযরস্মীহি পহটমত্তে মত্তিকাপিণ্ডো সত্তধা ভিজ্জি, তাপসো উদকে নিমুজ্জি.

মহাসত্তো তং দমেত্ৰা ‘‘কহং নু খো দানি সোল়স ব্রাহ্মণসহস্সানি ৰসন্তী’’তি উপধারেন্তো ‘‘মজ্ঝরঞ্ঞো সন্তিকে’’তি ঞত্ৰা ‘‘তে দমেস্সামী’’তি ইদ্ধিযা গন্ত্ৰা নগরসামন্তে ওতরিত্ৰা পত্তং আদায নগরে পিণ্ডায চরি. ব্রাহ্মণা তং দিস্ৰা ‘‘অযং ইধ একং দ্ৰে দিৰসে ৰসন্তোপি অম্হে অপ্পতিট্ঠে করিস্সতী’’তি ৰেগেন গন্ত্ৰা ‘‘মহারাজ, মাযাকারো একো ৰিজ্জাধরো চোরো আগতো, গণ্হাপেথ ন’’ন্তি রঞ্ঞো আরোচেসুং. রাজা ‘‘সাধূ’’তি সম্পটিচ্ছি. মহাসত্তোপি মিস্সকভত্তং আদায অঞ্ঞতরং কুট্টং নিস্সায পীঠিকায নিসিন্নো ভুঞ্জতি. অথ নং অঞ্ঞৰিহিতকং আহারং পরিভুঞ্জমানমেৰ রঞ্ঞা পহিতপুরিসা অসিনা গীৰং পহরিত্ৰা জীৰিতক্খযং পাপেসুং. সো কালং কত্ৰা ব্রহ্মলোকে নিব্বত্তি. ইমস্মিং কির জাতকে বোধিসত্তো কোণ্ডদমকো অহোসি. সো তেনেৰ পরতন্তিযুত্তভাৰেন জীৰিতক্খযং পাপুণি. দেৰতা কুজ্ঝিত্ৰা সকলমেৰ মজ্ঝরট্ঠং উণ্হং কুক্কুল়ৰস্সং ৰস্সাপেত্ৰা রট্ঠং অরট্ঠমকংসু. তেন ৰুত্তং –

‘‘উপহচ্চ মনং মজ্ঝো, মাতঙ্গস্মিং যসস্সিনে;

সপারিসজ্জো উচ্ছিন্নো, মজ্ঝারঞ্ঞং তদা অহূ’’তি. (জা. ২.১৯.৯৬);

সত্থা ইমং ধম্মদেসনং আহরিত্ৰা ‘‘ন ইদানেৰ, পুব্বেপি উদেনো পব্বজিতে ৰিহেঠেসিযেৰা’’তি ৰত্ৰা জাতকং সমোধানেসি – ‘‘তদা মণ্ডব্যো উদেনো অহোসি, মাতঙ্গপণ্ডিতো পন অহমেৰ অহোসি’’ন্তি.

মাতঙ্গজাতকৰণ্ণনা পঠমা.

[৪৯৮] ২. চিত্তসম্ভূতজাতকৰণ্ণনা

সব্বং নরানং সফলং সুচিণ্ণন্তি ইদং সত্থা জেতৰনে ৰিহরন্তো আযস্মতো মহাকস্সপস্স পিযসংৰাসে দ্ৰে সদ্ধিৰিহারিকে ভিক্খূ আরব্ভ কথেসি. তে কির অঞ্ঞমঞ্ঞং অপ্পটিৰিভত্তভোগা পরমৰিস্সাসিকা অহেসুং, পিণ্ডায চরন্তাপি একতোৰ গচ্ছন্তি, একতোৰ আগচ্ছন্তি, ৰিনা ভৰিতুং ন সক্কোন্তি. ধম্মসভাযং ভিক্খূ তেসংযেৰ ৰিস্সাসং ৰণ্ণযমানা নিসীদিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘অনচ্ছরিযং, ভিক্খৰে, ইমেসং একস্মিং অত্তভাৰে ৰিস্সাসিকত্তং, পোরাণকপণ্ডিতা তীণি চত্তারি ভৰন্তরানি গচ্ছন্তাপি মিত্তভাৰং ন ৰিজহিংসুযেৰা’’তি ৰত্ৰা অতীতং আহরি.

অতীতে অৰন্তিরট্ঠে উজ্জেনিযং অৰন্তিমহারাজা নাম রজ্জং কারেসি. তদা উজ্জেনিযা বহি চণ্ডালগামকো অহোসি. মহাসত্তো তত্থ নিব্বত্তি, অপরোপি সত্তো তস্সেৰ মাতুচ্ছাপুত্তো হুত্ৰা নিব্বত্তি. তেসু একো চিত্তো নাম অহোসি, একো সম্ভূতো নাম. তে উভোপি ৰযপ্পত্তা চণ্ডালৰংসধোৰনং নাম সিপ্পং উগ্গণ্হিত্ৰা একদিৰসং ‘‘উজ্জেনীনগরদ্ৰারে সিপ্পং দস্সেস্সামা’’তি একো উত্তরদ্ৰারে সিপ্পং দস্সেসি, একো পাচীনদ্ৰারে. তস্মিঞ্চ নগরে দ্ৰে দিট্ঠমঙ্গলিকাযো অহেসুং, একা সেট্ঠিধীতা, একা পুরোহিতধীতা. তা বহুখাদনীযভোজনীযমালাগন্ধাদীনি গাহাপেত্ৰা ‘‘উয্যানকীল়ং কীল়িস্সামা’’তি একা উত্তরদ্ৰারেন নিক্খমি, একা পাচীনদ্ৰারেন. তা তে চণ্ডালপুত্তে সিপ্পং দস্সেন্তে দিস্ৰা ‘‘কে এতে’’তি পুচ্ছিত্ৰা ‘‘চণ্ডালপুত্তা’’তি সুত্ৰা ‘‘অপস্সিতব্বযুত্তকং ৰত পস্সিম্হা’’তি গন্ধোদকেন অক্খীনি ধোৰিত্ৰা নিৰত্তিংসু. মহাজনো ‘‘অরে দুট্ঠচণ্ডাল, তুম্হে নিস্সায মযং অমূলকানি সুরাভত্তাদীনি ন লভিম্হা’’তি তে উভোপি ভাতিকে পোথেত্ৰা অনযব্যসনং পাপেসি.

তে পটিলদ্ধসঞ্ঞা উট্ঠায অঞ্ঞমঞ্ঞস্স সন্তিকং গচ্ছন্তা একস্মিং ঠানে সমাগন্ত্ৰা অঞ্ঞমঞ্ঞস্স তং দুক্খুপ্পত্তিং আরোচেত্ৰা রোদিত্ৰা পরিদেৰিত্ৰা ‘‘কিন্তি করিস্সামা’’তি মন্তেত্ৰা ‘‘ইমং অম্হাকং জাতিং নিস্সায দুক্খং উপ্পন্নং, চণ্ডালকম্মং কাতুং ন সক্খিস্সাম, জাতিং পটিচ্ছাদেত্ৰা ব্রাহ্মণমাণৰৰণ্ণেন তক্কসিলং গন্ত্ৰা সিপ্পং উগ্গণ্হিস্সামা’’তি সন্নিট্ঠানং কত্ৰা তত্থ গন্ত্ৰা ধম্মন্তেৰাসিকা হুত্ৰা দিসাপামোক্খাচরিযস্স সন্তিকে সিপ্পং পট্ঠপেসুং. জম্বুদীপতলে ‘‘দ্ৰে কির চণ্ডালা জাতিং পটিচ্ছাদেত্ৰা সিপ্পং উগ্গণ্হন্তী’’তি সূযিত্থ. তেসু চিত্তপণ্ডিতস্স সিপ্পং নিট্ঠিতং, সম্ভূতস্স ন তাৰ নিট্ঠাতি.

অথেকদিৰসং একো গামৰাসী ‘‘ব্রাহ্মণৰাচনকং করিস্সামী’’তি আচরিযং নিমন্তেসি. তমেৰ রত্তিং দেৰো ৰস্সিত্ৰা মগ্গে কন্দরাদীনি পূরেসি. আচরিযো পাতোৰ চিত্তপণ্ডিতং পক্কোসাপেত্ৰা ‘‘তাত, অহং গন্তুং ন সক্খিস্সামি, ত্ৰং মাণৰেহি সদ্ধিং গন্তা মঙ্গলং ৰত্ৰা তুম্হেহি লদ্ধং ভুঞ্জিত্ৰা অম্হেহি লদ্ধং আহরা’’তি পেসেসি. সো ‘‘সাধূ’’তি মাণৰকে গহেত্ৰা গতো. যাৰ মাণৰা ন্হাযন্তি চেৰ মুখানি চ ধোৰন্তি, তাৰ মনুস্সা পাযাসং ৰড্ঢেত্ৰা নিব্বাতূতি ঠপেসুং. মাণৰা তস্মিং অনিব্বুতেযেৰ আগন্ত্ৰা নিসীদিংসু. মনুস্সা দক্খিণোদকং দত্ৰা তেসং পুরতো পাতিযো ঠপেসুং. সম্ভূতো লুদ্ধধাতুকো ৰিয হুত্ৰা ‘‘সীতলো’’তি সঞ্ঞায পাযাসপিণ্ডং উক্খিপিত্ৰা মুখে ঠপেসি, সো তস্স আদিত্তঅযোগুল়ো ৰিয মুখং দহি. সো কম্পমানো সতিং অনুপট্ঠাপেত্ৰা চিত্তপণ্ডিতং ওলোকেত্ৰা চণ্ডালভাসায এৰ ‘‘খল়ু খল়ূ’’তি আহ. সোপি তথেৰ সতিং অনুপট্ঠাপেত্ৰা চণ্ডালভাসায এৰ ‘‘নিগ্গল নিগ্গলা’’তি আহ. মাণৰা অঞ্ঞমঞ্ঞং ওলোকেত্ৰা ‘‘কিং ভাসা নামেসা’’তি ৰদিংসু. চিত্তপণ্ডিতো মঙ্গলং অভাসি. মাণৰা বহি নিক্খমিত্ৰা ৰগ্গৰগ্গা হুত্ৰা তত্থ তত্থ নিসীদিত্ৰা ভাসং সোধেন্তা ‘‘চণ্ডালভাসা’’তি ঞত্ৰা ‘‘অরে দুট্ঠচণ্ডালা, এত্তকং কালং ‘ব্রাহ্মণাম্হা’তি ৰত্ৰা ৰঞ্চযিত্থা’’তি উভোপি তে পোথযিংসু. অথেকো সপ্পুরিসো ‘‘অপেথা’’তি ৰারেত্ৰা ‘‘অযং তুম্হাকং জাতিযা দোসো, গচ্ছথ কত্থচি দেসেৰ পব্বজিত্ৰা জীৰথা’’তি তে উভো উয্যোজেসি. মাণৰা তেসং চণ্ডালভাৰং আচরিযস্স আরোচেসুং.

তেপি অরঞ্ঞং পৰিসিত্ৰা ইসিপব্বজ্জং পব্বজিত্ৰা ন চিরস্সেৰ ততো চৰিত্ৰা নেরঞ্জরায তীরে মিগিযা কুচ্ছিস্মিং নিব্বত্তিংসু. তে মাতুকুচ্ছিতো নিক্খন্তকালতো পট্ঠায একতোৰ ৰিচরন্তি, ৰিনা ভৰিতুং ন সক্কোন্তি. তে একদিৰসং গোচরং গহেত্ৰা একস্মিং রুক্খমূলে সীসেন সীসং, সিঙ্গেন সিঙ্গং, তুণ্ডেন তুণ্ডং অল্লীযাপেত্ৰা রোমন্থযমানে ঠিতে দিস্ৰা একো লুদ্দকো সত্তিং খিপিত্ৰা একপ্পহারেনেৰ জীৰিতা ৰোরোপেসি. ততো চৰিত্ৰা নম্মদানদীতীরে উক্কুসযোনিযং নিব্বত্তিংসু. তত্রাপি ৰুদ্ধিপ্পত্তে গোচরং গহেত্ৰা সীসেন সীসং, তুণ্ডেন তুণ্ডং অল্লীযাপেত্ৰা ঠিতে দিস্ৰা একো যট্ঠিলুদ্দকো একপ্পহারেনেৰ বন্ধিত্ৰা ৰধি. ততো পন চৰিত্ৰা চিত্তপণ্ডিতো কোসম্বিযং পুরোহিতস্স পুত্তো হুত্ৰা নিব্বত্তি. সম্ভূতপণ্ডিতো উত্তরপঞ্চালরঞ্ঞো পুত্তো হুত্ৰা নিব্বত্তি. তে নামগ্গহণদিৰসতো পট্ঠায অত্তনো জাতিং অনুস্সরিংসু. তেসু সম্ভূতপণ্ডিতো নিরন্তরং সরিতুং অসক্কোন্তো চতুত্থং চণ্ডালজাতিমেৰ অনুস্সরতি, চিত্তপণ্ডিতো পটিপাটিযা চতস্সোপি জাতিযো. সো সোল়সৰস্সকালে নিক্খমিত্ৰা হিমৰন্তং পৰিসিত্ৰা ইসিপব্বজ্জং পব্বজিত্ৰা ঝানাভিঞ্ঞং নিব্বত্তেত্ৰা ঝানসুখেন ৰীতিনামেন্তো ৰসি. সম্ভূতপণ্ডিতোপি পিতু অচ্চযেন ছত্তং উস্সাপেত্ৰা ছত্তমঙ্গলদিৰসেযেৰ মহাজনমজ্ঝে মঙ্গলগীতং কত্ৰা উদানৰসেন দ্ৰে গাথা অভাসি. তং সুত্ৰা ‘‘অম্হাকং রঞ্ঞো মঙ্গলগীত’’ন্তি ওরোধাপি গন্ধব্বাপি তমেৰ গীতং গাযন্তি. অনুক্কমেনেৰ ‘‘রঞ্ঞো পিযগীত’’ন্তি সব্বেপি নগরৰাসিনো মনুস্সা তমেৰ গাযন্তি.

চিত্তপণ্ডিতোপি হিমৰন্তপদেসে ৰসন্তোযেৰ ‘‘কিং নু খো মম ভাতিকেন সম্ভূতেন ছত্তং লদ্ধং, উদাহু ন ৰা’’তি উপধারেন্তো লদ্ধভাৰং ঞত্ৰা ‘‘নৰরজ্জং তাৰ ইদানি গন্ত্ৰাপি বোধেতুং ন সক্খিস্সামি, মহল্লককালে নং উপসঙ্কমিত্ৰা ধম্মং কথেত্ৰা পব্বাজেস্সামী’’তি চিন্তেত্ৰা পণ্ণাস ৰস্সানি অগন্ত্ৰা রঞ্ঞো পুত্তধীতাহি ৰড্ঢিতকালে ইদ্ধিযা গন্ত্ৰা উয্যানে ওতরিত্ৰা মঙ্গলসিলাপট্টে সুৰণ্ণপটিমা ৰিয নিসীদি. তস্মিং খণে একো দারকো তং গীতং গাযন্তো দারূনি উদ্ধরতি. চিত্তপণ্ডিতো তং পক্কোসি. সো আগন্ত্ৰা ৰন্দিত্ৰা অট্ঠাসি. অথ নং আহ – ‘‘ত্ৰং পাতোৰ পট্ঠায ইমমেৰ গীতং গাযসি, কিং অঞ্ঞং ন জানাসী’’তি. ‘‘ভন্তে, অঞ্ঞানিপি বহূনি জানামি, ইমানি পন দ্ৰে রঞ্ঞো পিযগীতানি, তস্মা ইমানেৰ গাযামী’’তি. ‘‘অত্থি পন রঞ্ঞো গীতস্স পটিগীতং গাযন্তো’’তি? ‘‘নত্থি ভন্তে’’তি. ‘‘সক্খিস্সসি পন ত্ৰং পটিগীতং গাযিতু’’ন্তি? ‘‘জানন্তো সক্খিস্সামী’’তি. ‘‘তেন হি ত্ৰং রঞ্ঞা দ্ৰীসু গীতেসু গাযিতেসু ইদং ততিযং কত্ৰা গাযস্সূ’’তি গীতংদত্ৰা ‘‘গন্ত্ৰা রঞ্ঞো সন্তিকে গাযিস্সসি, রাজা তে পসীদিত্ৰা মহন্তং ইস্সরিযং দস্সতী’’তি উয্যোজেসি.

সো সীঘং মাতু সন্তিকং গন্ত্ৰা অত্তানং অলঙ্কারাপেত্ৰা রাজদ্ৰারং গন্ত্ৰা ‘‘একো কির দারকো তুম্হেহি সদ্ধিং পটিগীতং গাযিস্সতী’’তি রঞ্ঞো আরোচাপেত্ৰা ‘‘আগচ্ছতূ’’তি ৰুত্তে গন্ত্ৰা ৰন্দিত্ৰা ‘‘ত্ৰং কির, তাত, পটিগীতং গাযিস্সসী’’তি পুট্ঠো ‘‘আম, দেৰ, সব্বং রাজপরিসং সন্নিপাতেথা’’তি সন্নিপতিতায পরিসায রাজানং আহ ‘‘তুম্হে তাৰ, দেৰ, তুম্হাকং গীতং গাযথ, অথাহং পটিগীতং গাযিস্সামী’’তি. রাজা গাথাদ্ৰযমাহ –

২৪.

‘‘সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

পস্সামি সম্ভূতং মহানুভাৰং, সকম্মুনা পুঞ্ঞফলূপপন্নং.

২৫.

‘‘সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

কচ্চিন্নু চিত্তস্সপি এৰমেৰং, ইদ্ধো মনো তস্স যথাপি ময্হ’’ন্তি.

তত্থ ন কম্মুনা কিঞ্চন মোঘমত্থীতি সুকতদুক্কটেসু কম্মেসু কিঞ্চন এককম্মম্পি মোঘং নাম নত্থি, নিপ্ফলং ন হোতি, ৰিপাকং দত্ৰাৰ নস্সতীতি অপরাপরিযৰেদনীযকম্মং সন্ধাযাহ. সম্ভূতন্তি অত্তানং ৰদতি, পস্সামহং আযস্মন্তং সম্ভূতং সকেন কম্মেন পুঞ্ঞফলূপপন্নং, সকম্মং নিস্সায পুঞ্ঞফলেন উপপন্নং তং পস্সামীতি অত্থো. কচ্চিন্নু চিত্তস্সপীতি মযঞ্হি দ্ৰেপি জনা একতো হুত্ৰা ন চিরং সীলং রক্খিম্হ, অহং তাৰ তস্স ফলেন মহন্তং যসং পত্তো, কচ্চি নু খো মে ভাতিকস্স চিত্তস্সপি এৰমেৰ মনো ইদ্ধো সমিদ্ধোতি.

তস্স গীতাৰসানে দারকো গাযন্তো ততিযং গাথমাহ –

২৬.

‘‘সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

চিত্তম্পি জানাহি তথেৰ দেৰ, ইদ্ধো মনো তস্স যথাপি তুয্হ’’ন্তি.

তং সুত্ৰা রাজা চতুত্থং গাথমাহ –

২৭.

‘‘ভৰং নু চিত্তো সুতমঞ্ঞতো তে, উদাহু তে কোচি নং এতদক্খা;

গাথা সুগীতা ন মমত্থি কঙ্খা, দদামি তে গামৰরং সতঞ্চা’’তি.

তত্থ সুতমঞ্ঞতো তেতি অহং সম্ভূতস্স ভাতা চিত্তো নামাতি ৰদন্তস্স চিত্তস্সেৰ নু তে সন্তিকা সুতন্তি অত্থো. কোচি নন্তি উদাহু মযা সম্ভূতস্স রঞ্ঞো ভাতা চিত্তো দিট্ঠোতি কোচি তে এতমত্থং আচিক্খি. সুগীতাতি সব্বথাপি অযং গাথা সুগীতা, নত্থেত্থ মম কঙ্খা. গামৰরং সতঞ্চাতি গামৰরানং তে সতং দদামীতি ৰদতি.

ততো দারকো পঞ্চমং গাথমাহ –

২৮.

‘‘ন চাহং চিত্তো সুতমঞ্ঞতো মে, ইসী চ মে এতমত্থং অসংসি;

গন্ত্ৰান রঞ্ঞো পটিগাহি গাথং, অপি তে ৰরং অত্তমনো দদেয্যা’’তি.

তত্থ এতমত্থন্তি তুম্হাকং উয্যানে নিসিন্নো একো ইসি ময্হং এতমত্থং আচিক্খি.

তং সুত্ৰা রাজা ‘‘সো মম ভাতা চিত্তো ভৰিস্সতি, ইদানেৰ নং গন্ত্ৰা পস্সিস্সামী’’তি পুরিসে আণাপেন্তো গাথাদ্ৰযমাহ –

২৯.

‘‘যোজেন্তু ৰে রাজরথে, সুকতে চিত্তসিব্বনে;

কচ্ছং নাগানং বন্ধথ, গীৰেয্যং পটিমুঞ্চথ.

৩০.

‘‘আহঞ্ঞন্তু ভেরিমুদিঙ্গসঙ্খে, সীঘানি যানানি চ যোজযন্তু;

অজ্জেৰহং অস্সমং তং গমিস্সং, যত্থেৰ দক্খিস্সমিসিং নিসিন্ন’’ন্তি.

তত্থ আহঞ্ঞন্তূতি আহনন্তু. অস্সমং তন্তি তং অস্সমং.

সো এৰং ৰত্ৰা রথং অভিরুয্হ সীঘং গন্ত্ৰা উয্যানদ্ৰারে রথং ঠপেত্ৰা চিত্তপণ্ডিতং উপসঙ্কমিত্ৰা ৰন্দিত্ৰা একমন্তং নিসিন্নো তুট্ঠমানসো অট্ঠমং গাথমাহ –

৩১.

‘‘সুলদ্ধলাভো ৰত মে অহোসি, গাথা সুগীতা পরিসায মজ্ঝে;

স্ৰাহং ইসিং সীলৰতূপপন্নং, দিস্ৰা পতীতো সুমনোহমস্মী’’তি.

তস্সত্থো – সুলদ্ধলাভো ৰত ময্হং ছত্তমঙ্গলদিৰসে পরিসায মজ্ঝে গীতগাথা সুগীতাৰ অহোসি, স্ৰাহং অজ্জ সীলৰতসম্পন্নং ইসিং দিস্ৰা পীতিসোমনস্সপ্পত্তো জাতোতি.

সো চিত্তপণ্ডিতস্স দিট্ঠকালতো পট্ঠায সোমনস্সপ্পত্তো ‘‘ভাতিকস্স মে পল্লঙ্কং অত্থরথা’’তিআদীনি আণাপেন্তো নৰমং গাথমাহ –

৩২.

‘‘আসনং উদকং পজ্জং, পটিগ্গণ্হাতু নো ভৰং;

অগ্ঘে ভৰন্তং পুচ্ছাম, অগ্ঘং কুরুতু নো ভৰ’’ন্তি.

তত্থ অগ্ঘেতি অতিথিনো দাতব্বযুত্তকস্মিং অগ্ঘে ভৰন্তং আপুচ্ছাম. কুরুতু নোতি ইমং নো অগ্ঘং ভৰং পটিগ্গণ্হাতু.

এৰং মধুরপটিসন্থারং কত্ৰা রজ্জং মজ্ঝে ভিন্দিত্ৰা দেন্তো ইতরং গাথমাহ –

৩৩.

‘‘রম্মঞ্চ তে আৰসথং করোন্তু, নারীগণেহি পরিচারযস্সু;

করোহি ওকাসমনুগ্গহায, উভোপিমং ইস্সরিযং করোমা’’তি.

তত্থ ইমং ইস্সরিযন্তি কপিলরট্ঠে উত্তরপঞ্চালনগরে রজ্জং মজ্ঝে ভিন্দিত্ৰা দ্ৰেপি জনা করোম অনুভৰাম.

তস্স তং ৰচনং সুত্ৰা চিত্তপণ্ডিতো ধম্মং দেসেন্তো ছ গাথা অভাসি –

৩৪.

‘‘দিস্ৰা ফলং দুচ্চরিতস্স রাজ, অত্থো সুচিণ্ণস্স মহাৰিপাকং;

অত্তানমেৰ পটিসংযমিস্সং, ন পত্থযে পুত্ত পসুং ধনং ৰা.

৩৫.

‘‘দসেৰিমা ৰস্সদসা, মচ্চানং ইধ জীৰিতং;

অপত্তঞ্ঞেৰ তং ওধিং, নল়ো ছিন্নোৰ সুস্সতি.

৩৬.

‘‘তত্থ কা নন্দি কা খিড্ডা, কা রতী কা ধনেসনা;

কিং মে পুত্তেহি দারেহি, রাজ মুত্তোস্মি বন্ধনা.

৩৭.

‘‘সোহং এৰং পজানামি, মচ্চু মে নপ্পমজ্জতি;

অন্তকেনাধিপন্নস্স, কা রতী কা ধনেসনা.

৩৮.

‘‘জাতি নরানং অধমা জনিন্দ, চণ্ডালযোনি দ্ৰিপদাকনিট্ঠা;

সকেহি কম্মেহি সুপাপকেহি, চণ্ডালগব্ভে অৰসিম্হ পুব্বে.

৩৯.

‘‘চণ্ডালাহুম্হ অৰন্তীসু, মিগা নেরঞ্জরং পতি;

উক্কুসা নম্মদাতীরে, ত্যজ্জ ব্রাহ্মণখত্তিযা’’তি.

তত্থ দুচ্চরিতস্সাতি মহারাজ, ত্ৰং সুচরিতস্সেৰ ফলং জানাসি, অহং পন দুচ্চরিতস্সপি ফলং পস্সামিযেৰ. মযঞ্হি উভো দুচ্চরিতস্স ফলেন ইতো চতুত্থে অত্তভাৰে চণ্ডালযোনিযং নিব্বত্তা. তত্থ ন চিরং সীলং রক্খিত্ৰা তস্স ফলেন ত্ৰং খত্তিযকুলে নিব্বত্তো, অহং ব্রাহ্মণকুলে, এৰাহং দুচ্চরিতস্স চ ফলং সুচিণ্ণস্স চ মহাৰিপাকং দিস্ৰা অত্তানমেৰ সীলসংযমেন পটিসংযমিস্সং, পুত্তং ৰা পসুং ৰা ধনং ৰা ন পত্থেমি.

দসেৰিমা ৰস্সদসাতি মহারাজ, মন্দদসকং খিড্ডাদসকং ৰণ্ণদসকং বলদসকং পঞ্ঞাদসকং হানিদসকং পব্ভারদসকং ৰঙ্কদসকং মোমূহদসকং সযনদসকন্তি ইমেসঞ্হি দসন্নং দসকানং ৰসেন দসেৰ ৰস্সদসা ইমেসং মচ্চানং ইধ মনুস্সলোকে জীৰিতং. তযিদং ন নিযমেন সব্বা এৰ এতা দসা পাপুণাতি, অথ খো অপ্পত্তঞ্ঞেৰ তং ওধিং নল়ো ছিন্নোৰ সুস্সতি. যেপি সকলং ৰস্সসতং জীৰন্তি, তেসম্পি মন্দদসকে পৰত্তা রূপারূপধম্মা ৰিচ্ছিন্দিত্ৰা আতপে খিত্তনল়ো ৰিয তত্থেৰ সুস্সন্তি অন্তরধাযন্তি, তং ওধিং অতিক্কমিত্ৰা খিড্ডাদসকং ন পাপুণন্তি, তথা খিট্টাদসকাদীসু পৰত্তা ৰণ্ণদসকাদীনি.

তত্থাতি তস্মিং এৰং সুস্সমানে জীৰিতে কা পঞ্চ কামগুণে নিস্সায অভিনন্দী, কা কাযকীল়াদিৰসেন খিড্ডা, কা সোমনস্সৰসেন রতি, কা ধনেসনা, কিং মে পুত্তেহি, কিং দারেহি, মুত্তোস্মি তম্হা পুত্তদারবন্ধনাতি অত্থো. অন্তকেনাধিপন্নস্সাতি জীৰিতন্তকরেন মচ্চুনা অভিভূতস্স. দ্ৰিপদাকনিট্ঠাতি দ্ৰিপদানং অন্তরে লামকা. অৰসিম্হাতি দ্ৰেপি মযং ৰসিম্হ.

চণ্ডালাহুম্হাতি মহারাজ, ইতো পুব্বে চতুত্থং জাতিং অৰন্তিরট্ঠে উজ্জেনিনগরে চণ্ডালা অহুম্হ, ততো চৰিত্ৰা নেরঞ্জরায নদিযা তীরে উভোপি মিগা অহুম্হ. তত্থ দ্ৰেপি অম্হে একস্মিং রুক্খমূলে অঞ্ঞমঞ্ঞং নিস্সায ঠিতে একো লুদ্দকো একেনেৰ সত্তিপহারেন জীৰিতা ৰোরোপেসি, ততো চৰিত্ৰা নম্মদানদীতীরে কুররা অহুম্হ. তত্রাপি নো নিস্সায ঠিতে একো নেসাদো একপ্পহারেনেৰ বন্ধিত্ৰা জীৰিতক্খযং পাপেসি, ততো চৰিত্ৰা তে মযং অজ্জ ব্রাহ্মণখত্তিযা জাতা. অহং কোসম্বিযং ব্রাহ্মণকুলে নিব্বত্তো, ত্ৰং ইধ রাজা জাতোতি.

এৰমস্স অতীতে লামকজাতিযো পকাসেত্ৰা ইদানি ইমিস্সাপি জাতিযা আযুসঙ্খারপরিত্ততং দস্সেত্ৰা পুঞ্ঞেসু উস্সাহং জনেন্তো চতস্সো গাথা অভাসি –

৪০.

‘‘উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি দুক্খুদ্রযানি.

৪১.

‘‘উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি দুক্খপ্ফলানি.

৪২.

‘‘উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি রজস্সিরানি.

৪৩.

‘‘উপনীযতি জীৰিতমপ্পমাযু, ৰণ্ণং জরা হন্তি নরস্স জিয্যতো;

করোহি পঞ্চাল মমেত ৰাক্যং, মাকাসি কম্মং নিরযূপপত্তিযা’’তি.

তত্থ উপনীযতীতি মহারাজ, ইদং জীৰিতং মরণং উপগচ্ছতি. ইদঞ্হি ইমেসং সত্তানং অপ্পমাযু সরসপরিত্ততাযপি ঠিতিপরিত্ততাযপি পরিত্তকং, সূরিযুগ্গমনে তিণগ্গে উস্সাৰবিন্দুসদিসং. ন সন্তি তাণাতি ন হি জরায মরণং উপনীতস্স পুত্তাদযো তাণা নাম হোন্তি. মমেত ৰাক্যন্তি মম এতং ৰচনং. মাকাসীতি মা রূপাদিকামগুণহেতু পমাদং আপজ্জিত্ৰা নিরযাদীসু দুক্খৰড্ঢনানি কম্মানি করি. দুক্খপ্ফলানীতি দুক্খৰিপাকানি. রজস্সিরানীতি কিলেসরজেন ওকিণ্ণসীসানি. ৰণ্ণন্তি জীরমানস্স নরস্স সরীরৰণ্ণং জরা হন্তি. নিরযূপপত্তিযাতি নিরস্সাদে নিরযে উপ্পজ্জনত্থায.

এৰং মহাসত্তে কথেন্তে রাজা তুস্সিত্ৰা তিস্সো গাথা অভাসি –

৪৪.

‘‘অদ্ধা হি সচ্চং ৰচনং তৰেতং, যথা ইসী ভাসসি এৰমেতং;

কামা চ মে সন্তি অনপ্পরূপা, তে দুচ্চজা মাদিসকেন ভিক্খু.

৪৫.

‘‘নাগো যথা পঙ্কমজ্ঝে ব্যসন্নো, পস্সং থলং নাভিসম্ভোতি গন্তুং;

এৰম্পহং কামপঙ্কে ব্যসন্নো, ন ভিক্খুনো মগ্গমনুব্বজামি.

৪৬.

‘‘যথাপি মাতা চ পিতা চ পুত্তং, অনুসাসরে কিন্তি সুখী ভৰেয্য;

এৰম্পি মং ত্ৰং অনুসাস ভন্তে, যথা চিরং পেচ্চ সুখী ভৰেয্য’’ন্তি.

তত্থ অনপ্পরূপাতি অপরিত্তজাতিকা বহূ অপরিমিতা. তে দুচ্চজা মাদিসকেনাতি ভাতিক, ত্ৰং কিলেসে পহায ঠিতো, অহং পন কামপঙ্কে নিমুগ্গো, তস্মা মাদিসকেন তে কামা দুচ্চজা. ‘‘নাগো যথা’’তি ইমিনা অত্তনো কামপঙ্কে নিমুগ্গভাৰস্স উপমং দস্সেতি. তত্থ ব্যসন্নোতি ৰিসন্নো অনুপৰিট্ঠো অযমেৰ ৰা পাঠো. মগ্গন্তি তুম্হাকং ওৰাদানুসাসনীমগ্গং নানুব্বজামি পব্বজিতুং ন সক্কোমি, ইধেৰ পন মে ঠিতস্স ওৰাদং দেথাতি. অনুসাসরেতি অনুসাসন্তি.

অথ নং মহাসত্তো আহ –

৪৭.

‘‘নো চে তুৰং উস্সহসে জনিন্দ, কামে ইমে মানুসকে পহাতুং;

ধম্মিং বলিং পট্ঠপযস্সু রাজ, অধম্মকারো তৰ মাহু রট্ঠে.

৪৮.

‘‘দূতা ৰিধাৰন্তু দিসা চতস্সো, নিমন্তকা সমণব্রাহ্মণানং;

তে অন্নপানেন উপট্ঠহস্সু, ৰত্থেন সেনাসনপচ্চযেন চ.

৪৯.

‘‘অন্নেন পানেন পসন্নচিত্তো, সন্তপ্পয সমণব্রাহ্মণে চ;

দত্ৰা চ ভুত্ৰা চ যথানুভাৰং, অনিন্দিতো সগ্গমুপেহি ঠানং.

৫০.

‘‘সচে চ তং রাজ মদো সহেয্য, নারীগণেহি পরিচারযন্তং;

ইমমেৰ গাথং মনসী করোহি, ভাসেসি চেনং পরিসায মজ্ঝে.

৫১.

‘‘অব্ভোকাসসযো জন্তু, ৰজন্ত্যা খীরপাযিতো;

পরিকিণ্ণো সুৰানেহি, স্ৰাজ্জ রাজাতি ৰুচ্চতী’’তি.

তত্থ উস্সহসেতি উস্সহসি. ধম্মিং বলিন্তি ধম্মেন সমেন অনতিরিত্তং বলিং গণ্হাতি অত্থো. অধম্মকারোতি পোরাণকরাজূহি ঠপিতং ৰিনিচ্ছযধম্মং ভিন্দিত্ৰা পৰত্তা অধম্মকিরিযা. নিমন্তকাতি ধম্মিকসমণব্রাহ্মণে নিমন্তেত্ৰা পক্কোসকা. যথানুভাৰন্তি যথাবলং যথাসত্তিং. ইমমেৰ গাথন্তি ইদানি ৰত্তব্বং সন্ধাযাহ. তত্রাযং অধিপ্পাযো – ‘‘মহারাজ, সচে তং মদো অভিভৰেয্য, সচে তে নারীগণপরিৰুতস্স রূপাদযো ৰা কামগুণে রজ্জসুখং ৰা আরব্ভ মানো উপ্পজ্জেয্য, অথেৰং চিন্তেয্যাসি ‘অহং পুরে চণ্ডালযোনিযং নিব্বত্তো ছন্নস্স তিণকুটিমত্তস্সপি অভাৰা অব্ভোকাসসযো অহোসিং, তদা হি মে মাতা চণ্ডালী অরঞ্ঞং দারুপণ্ণাদীনং অত্থায গচ্ছন্তী মং কুক্কুরগণস্স মজ্ঝে অব্ভোকাসে নিপজ্জাপেত্ৰা অত্তনো খীরং পাযেত্ৰা গচ্ছতি, সোহং কুক্কুরেহি পরিৰারিতো তেহিযেৰ সদ্ধিং সুনখিযা খীরং পিৰিত্ৰা ৰড্ঢিতো, এৰং নীচজচ্চো হুত্ৰা অজ্জ রাজা নাম জাতো’তি. ‘ইতি খো, ত্ৰং মহারাজ, ইমিনা অত্থেন অত্তানং ওৰদন্তো যো সো পুব্বে অব্ভোকাসসযো জন্তু অরঞ্ঞে ৰজন্তিযা চণ্ডালিযা ইতো চিতো চ অনুসঞ্চরন্তিযা সুনখিযা চ খীরং পাযিতো সুনখেহি পরিকিণ্ণো ৰড্ঢিতো, সো অজ্জ রাজাতি ৰুচ্চতী’তি ইমং গাথং ভাসেয্যাসী’’তি.

এৰং মহাসত্তো তস্স ওৰাদং দত্ৰা ‘‘দিন্নো তে মযা ওৰাদো, ইদানি ত্ৰং পব্বজ ৰা মা ৰা, অত্তনাৰ অত্তনো কম্মস্স ৰিপাকং পটিসেৰিস্সতী’’তি ৰত্ৰা আকাসে উপ্পতিত্ৰা তস্স মত্থকে পাদরজং পাতেন্তো হিমৰন্তমেৰ গতো. রাজাপি তং দিস্ৰা উপ্পন্নসংৰেগো জেট্ঠপুত্তস্স রজ্জং দত্ৰা বলকাযং নিৰত্তেত্ৰা হিমৰন্তাভিমুখো পাযাসি. মহাসত্তো তস্সাগমনং ঞত্ৰা ইসিগণপরিৰুতো আগন্ত্ৰা তং আদায গন্ত্ৰা পব্বাজেত্ৰা কসিণপরিকম্মং আচিক্খি. সো ঝানাভিঞ্ঞং নিব্বত্তেসি. ইতি তে উভোপি ব্রহ্মলোকূপগা অহেসুং.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পোরাণকপণ্ডিতা তীণি চত্তারি ভৰন্তরানি গচ্ছন্তাপি দল়্হৰিস্সাসাৰ অহেসু’’ন্তি ৰত্ৰা জাতকং সমোধানেসি – ‘‘তদা সম্ভূতপণ্ডিতো আনন্দো অহোসি, চিত্তপণ্ডিতো পন অহমেৰ অহোসি’’ন্তি.

চিত্তসম্ভূতজাতকৰণ্ণনা দুতিযা

[৪৯৯] ৩. সিৰিজাতকৰণ্ণনা

দূরে অপস্সং থেরোৰাতি ইদং সত্থা জেতৰনে ৰিহরন্তো অসদিসদানং আরব্ভ কথেসি. তং অট্ঠকনিপাতে সিৰিজাতকে ৰিত্থারিতমেৰ. তদা পন রাজা সত্তমে দিৰসে সব্বপরিক্খারে দত্ৰা অনুমোদনং যাচি, সত্থা অকত্ৰাৰ পক্কামি. রাজা ভুত্তপাতরাসো ৰিহারং গন্ত্ৰা ‘‘কস্মা, ভন্তে, অনুমোদনং ন করিত্থা’’তি আহ. সত্থা ‘‘অপরিসুদ্ধা, মহারাজ, পরিসা’’তি ৰত্ৰা ‘‘ন ৰে কদরিযা দেৰলোকং ৰজন্তী’’তি (ধ. প. ১৭৭) গাথায ধম্মং দেসেসি. রাজা পসীদিত্ৰা সতসহস্সগ্ঘনকেন সীৰেয্যকেন উত্তরাসঙ্গেন তথাগতং পূজেত্ৰা নগরং পাৰিসি. পুনদিৰসে ধম্মসভাযং কথং সমুট্ঠাপেসুং ‘‘আৰুসো, কোসলরাজা অসদিসদানং দত্ৰা তাদিসেনপি দানেন অতিত্তো দসবলেন ধম্মে দেসিতে পুন সতসহস্সগ্ঘনকং সীৰেয্যকৰত্থং অদাসি, যাৰ অতিত্তো ৰত আৰুসো দানেন রাজা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘ইমায নামা’’তি ৰুত্তে ‘‘ভিক্খৰে, বাহিরভণ্ডং নাম সুদিন্নং, পোরাণকপণ্ডিতা সকলজম্বুদীপং উন্নঙ্গলং কত্ৰা দেৰসিকং ছসতসহস্সপরিচ্চাগেন দানং দদমানাপি বাহিরদানেন অতিত্তা ‘পিযস্স দাতা পিযং লভতী’তি সম্পত্তযাচকানং অক্খীনি উপ্পাটেত্ৰা অদংসুযেৰা’’তি ৰত্ৰা অতীতং আহরি.

অতীতে সিৰিরট্ঠে অরিট্ঠপুরনগরে সিৰিমহারাজে রজ্জং কারেন্তে মহাসত্তো তস্স পুত্তো হুত্ৰা নিব্বত্তি, ‘‘সিৰিকুমারো’’তিস্স নামং করিংসু. সো ৰযপ্পত্তো তক্কসিলং গন্ত্ৰা উগ্গহিতসিপ্পো আগন্ত্ৰা পিতু সিপ্পং দস্সেত্ৰা উপরজ্জং লভিত্ৰা অপরভাগে পিতু অচ্চযেন রাজা হুত্ৰা অগতিগমনং পহায দস রাজধম্মে অকোপেত্ৰা ধম্মেন রজ্জং কারেত্ৰা চতূসু দ্ৰারেসু নগরমজ্ঝে নিৰেসনদ্ৰারে চাতি ছ দানসালাযো কারেত্ৰা দেৰসিকং ছসতসহস্সপরিচ্চাগেন মহাদানং পৰত্তেসি. অট্ঠমিযং চাতুদ্দসিযং পন্নরসিযঞ্চ নিচ্চং দানসালং গন্ত্ৰা দানং ওলোকেসি. সো একদা পুণ্ণমদিৰসে পাতোৰ সমুস্সিতসেতচ্ছত্তে রাজপল্লঙ্কে নিসিন্নো অত্তনা দিন্নদানং আৰজ্জেন্তো বাহিরৰত্থুং অত্তনা অদিন্নং নাম অদিস্ৰা ‘‘মযা বাহিরৰত্থু অদিন্নং নাম নত্থি, ন মং বাহিরদানং তোসেতি, অহং অজ্ঝত্তিকদানং দাতুকামো, অহো ৰত অজ্জ মম দানসালং গতকালে কোচিদেৰ যাচকো বাহিরৰত্থুং অযাচিত্ৰা অজ্ঝত্তিকস্স নামং গণ্হেয্য, সচে হি মে কোচি হদযমংসস্স নামং গণ্হেয্য, কণযেন উরং পহরিত্ৰা পসন্নউদকতো সনাল়ং পদুমং উদ্ধরন্তো ৰিয লোহিতবিন্দূনি পগ্ঘরন্তং হদযং নীহরিত্ৰা দস্সামি. সচে সরীরমংসস্স নামং গণ্হেয্য, অৰলেখনসত্থকেন তেলসিঙ্গং লিখন্তো ৰিয সরীরমংসং ওতারেত্ৰা দস্সামি. সচে লোহিতস্স নামং গণ্হেয্য, যন্তমুখে পক্খন্দিত্ৰা উপনীতং ভাজনং পূরেত্ৰা লোহিতং দস্সামি. সচে ৰা পন কোচি ‘গেহে মে কম্মং নপ্পৰত্ততি, গেহে মে দাসকম্মং করোহী’তি ৰদেয্য, রাজৰেসং অপনেত্ৰা বহি ঠত্ৰা অত্তানং সাৰেত্ৰা দাসকম্মং করিস্সামি. সচে মে কোচি অক্খিনো নামং গণ্হেয্য, তালমিঞ্জং নীহরন্তো ৰিয অক্খীনি উপ্পাটেত্ৰা দস্সামী’’তি চিন্তেসি.

ইতি সো –

‘‘যংকিঞ্চি মানুসং দানং, অদিন্নং মে ন ৰিজ্জতি;

যোপি যাচেয্য মং চক্খুং, দদেয্যং অৰিকম্পিতো’’তি. (চরিযা. ১.৫২) –

চিন্তেত্ৰা সোল়সহি গন্ধোদকঘটেহি ন্হাযিত্ৰা সব্বালঙ্কারপটিমণ্ডিতো নানগ্গরসভোজনং ভুঞ্জিত্ৰা অলঙ্কতহত্থিক্খন্ধৰরগতো দানগ্গং অগমাসি. সক্কো তস্স অজ্ঝাসযং ৰিদিত্ৰা ‘‘সিৰিরাজা ‘অজ্জ সম্পত্তযাচকানং চক্খূনি উপ্পাটেত্ৰা দস্সামী’তি চিন্তেসি, সক্খিস্সতি নু খো দাতুং, উদাহু নো’’তি তস্স ৰিমংসনত্থায জরাপত্তো অন্ধব্রাহ্মণো ৰিয হুত্ৰা রঞ্ঞো দানগ্গগমনকালে একস্মিং উন্নতপ্পদেসে হত্থং পসারেত্ৰা রাজানং জযাপেত্ৰা অট্ঠাসি. রাজা তদভিমুখং ৰারণং পেসেত্ৰা ‘‘ব্রাহ্মণ, কিং ৰদেসী’’তি পুচ্ছি. অথ নং সক্কো ‘‘মহারাজ, তৰ দানজ্ঝাসযং নিস্সায সমুগ্গতেন কিত্তিঘোসেন সকললোকসন্নিৰাসো নিরন্তরং ফুটো, অহং অন্ধো, ত্ৰং দ্ৰিচক্খুকো’’তি ৰত্ৰা চক্খুং যাচন্তো পঠমং গাথমাহ –

৫২.

‘‘দূরে অপস্সং থেরোৰ, চক্খুং যাচিতুমাগতো;

একনেত্তা ভৰিস্সাম, চক্খুং মে দেহি যাচিতো’’তি.

তত্থ দূরেতি ইতো দূরে ৰসন্তো. থেরোতি জরাজিণ্ণথেরো. একনেত্তাতি একং নেত্তং ময্হং দেহি, এৰং দ্ৰেপি একেকনেত্তা ভৰিস্সামাতি.

তং সুত্ৰা মহাসত্তো ‘‘ইদানেৰাহং পাসাদে নিসিন্নো চিন্তেত্ৰা আগতো, অহো মে লাভো, অজ্জেৰ মে মনোরথো মত্থকং পাপুণিস্সতি, অদিন্নপুব্বং দানং দস্সামী’’তি তুট্ঠমানসো দুতিযং গাথমাহ –

৫৩.

‘‘কেনানুসিট্ঠো ইধ মাগতোসি, ৰনিব্বক চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুরিসেন ‘দুচ্চজ’ন্তি.

তত্থ ৰনিব্বকাতি তং আলপতি. চক্খুপথানীতি চক্খূনমেতং নামং. যমাহূতি যং পণ্ডিতা ‘‘দুচ্চজ’’ন্তি কথেন্তি.

ইতো পরং উত্তানসম্বন্ধগাথা পাল়িনযেনেৰ ৰেদিতব্বা –

৫৪.

‘‘যমাহু দেৰেসু সুজম্পতীতি, মঘৰাতি নং আহু মনুস্সলোকে;

তেনানুসিট্ঠো ইধ মাগতোস্মি, ৰনিব্বকো চক্খুপথানি যাচিতুং.

৫৫.

‘‘ৰনিব্বতো ময্হ ৰনিং অনুত্তরং, দদাহি তে চক্খুপথানি যাচিতো;

দদাহি মে চক্খুপথং অনুত্তরং, যমাহু নেত্তং পুরিসেন দুচ্চজং.

৫৬.

‘‘যেন অত্থেন আগচ্ছি, যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্রাহ্মণ.

৫৭.

‘‘একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো, যদিচ্ছসে ত্ৰং তদতে সমিজ্ঝতূ’’তি.

তত্থ ৰনিব্বতোতি যাচন্তস্স. ৰনিন্তি যাচনং. তে তেতি তে তৰ তস্স অত্থস্স সঙ্কপ্পা. স চক্খুমাতি সো ত্ৰং মম চক্খূহি চক্খুমা হুত্ৰা. যদিচ্ছসে ত্ৰং তদতে সমিজ্ঝতূতি যং ত্ৰং মম সন্তিকা ইচ্ছসি, তং তে সমিজ্ঝতূতি.

রাজা এত্তকং কথেত্ৰা ‘‘ইধেৰ মযা অক্খীনি উপ্পাটেত্ৰা দাতুং অসারুপ্প’’ন্তি চিন্তেত্ৰা ব্রাহ্মণং আদায অন্তেপুরং গন্ত্ৰা রাজাসনে নিসীদিত্ৰা সীৰিকং নাম ৰেজ্জং পক্কোসাপেত্ৰা ‘‘অক্খিং মে সোধেহী’’তি আহ. ‘‘অম্হাকং কির রাজা অক্খীনি উপ্পাটেত্ৰা ব্রাহ্মণস্স দাতুকামো’’তি সকলনগরে এককোলাহলং অহোসি. অথ সেনাপতিআদযো রাজৰল্লভা চ নাগরা চ ওরোধা চ সব্বে সন্নিপতিত্ৰা রাজানং ৰারেন্তা তিস্সো গাথা অৰোচুং –

৫৮.

‘‘মা নো দেৰ অদা চক্খুং, মা নো সব্বে পরাকরি;

ধনং দেহি মহারাজ, মুত্তা ৰেল়ুরিযা বহূ.

৫৯.

‘‘যুত্তে দেৰ রথে দেহি, আজানীযে চলঙ্কতে;

নাগে দেহি মহারাজ, হেমকপ্পনৰাসসে.

৬০.

‘‘যথা তং সিৰযো সব্বে, সযোগ্গা সরথা সদা;

সমন্তা পরিকিরেয্যুং, এৰং দেহি রথেসভা’’তি.

তত্থ পরাকরীতি পরিচ্চজি. অক্খীসু হি দিন্নেসু রজ্জং ত্ৰং ন কারেস্সসি, অঞ্ঞো রাজা ভৰিস্সতি, এৰং তযা মযং পরিচ্চত্তা নাম ভৰিস্সামাতি অধিপ্পাযেনেৰমাহংসু. পরিকিরেয্যুন্তি পরিৰারেয্যুং. এৰং দেহীতি যথা তং অৰিকলচক্খুং সিৰযো পরিৰারেয্যুং, এৰং বাহিরধনমেৰস্স দেহি, মা অক্খীনি. অক্খীসু হি দিন্নেসু ন তং সিৰযো পরিৰারেস্সন্তীতি.

অথ রাজা তিস্সো গাথা অভাসি –

৬১.

‘‘যো ৰে দস্সন্তি ৰত্ৰান, অদানে কুরুতে মনো;

ভূম্যং সো পতিতং পাসং, গীৰাযং পটিমুঞ্চতি.

৬২.

‘‘যো ৰে দস্সন্তি ৰত্ৰানং, অদানে কুরুতে মনো;

পাপা পাপতরো হোতি, সম্পত্তো যমসাধনং.

৬৩.

‘‘যঞ্হি যাচে তঞ্হি দদে, যং ন যাচে ন তং দদে;

স্ৰাহং তমেৰ দস্সামি, যং মং যাচতি ব্রাহ্মণো’’তি.

তত্থ পটিমুঞ্চতীতি পৰেসেতি. পাপা পাপতরোতি লামকাপি লামকতরো নাম হোতি. সম্পত্তো যমসাধনন্তি যমস্স আণাপৰত্তিট্ঠানং উস্সদনিরযং এস পত্তোযেৰ নাম হোতি. যঞ্হি যাচেতি যং যাচকো যাচেয্য, দাযকোপি তমেৰ দদেয্য, ন অযাচিতং, অযঞ্চ ব্রাহ্মণো মং চক্খুং যাচতি, ন মুত্তাদিকং ধনং, তদেৰস্সাহং দস্সামীতি ৰদতি.

অথ নং অমচ্চা ‘‘কিং পত্থেত্ৰা চক্খূনি দেসী’’তি পুচ্ছন্তা গাথমাহংসু –

৬৪.

‘‘আযুং নু ৰণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি রাজা সিৰিনং অনুত্তরো, চক্খূনি দজ্জা পরলোকহেতূ’’তি.

তত্থ পরলোকহেতূতি মহারাজ, কথং নাম তুম্হাদিসো পণ্ডিতপুরিসো সন্দিট্ঠিকং ইস্সরিযং পহায পরলোকহেতু চক্খূনি দদেয্যাতি.

অথ নেসং কথেন্তো রাজা গাথমাহ –

৬৫.

‘‘ন ৰাহমেতং যসসা দদামি, ন পুত্তমিচ্ছে ন ধনং ন রট্ঠং;

সতঞ্চ ধম্মো চরিতো পুরাণো, ইচ্চেৰ দানে রমতে মনো মমা’’তি.

তত্থ ন ৰাহন্তি ন ৰে অহং. যসসাতি দিব্বস্স ৰা মানুসস্স ৰা যসস্স কারণা. ন পুত্তমিচ্ছেতি ইমস্স চক্খুদানস্স ফলেন নেৰাহং পুত্তং ইচ্ছামি, ন ধনং ন রট্ঠং, অপিচ সতং পণ্ডিতানং সব্বঞ্ঞুবোধিসত্তানং এস আচিণ্ণো সমাচিণ্ণো পোরাণকমগ্গো, যদিদং পারমীপূরণং নাম. ন হি পারমিযো অপূরেত্ৰা বোধিপল্লঙ্কে সব্বঞ্ঞুতং পাপুণিতুং সমত্থো নাম অত্থি, অহঞ্চ পারমিযো পূরেত্ৰা বুদ্ধো ভৰিতুকামো. ইচ্চেৰ দানে রমতে মনো মমাতি ইমিনা কারণেন মম মনো দানেযেৰ নিরতোতি ৰদতি.

সম্মাসম্বুদ্ধোপি ধম্মসেনাপতিসারিপুত্তত্থেরস্স চরিযাপিটকং দেসেন্তো ‘‘ময্হং দ্ৰীহি চক্খূহিপি সব্বঞ্ঞুতঞ্ঞাণমেৰ পিযতর’’ন্তি দীপেতুং আহ –

‘‘ন মে দেস্সা উভো চক্খূ, অত্তানং মে ন দেস্সিযং;

সব্বঞ্ঞুতং পিযং ময্হং, তস্মা চক্খুং অদাসহ’’ন্তি. (চরিযা. ১.৬৬);

মহাসত্তস্স পন কথং সুত্ৰা অমচ্চেসু অপ্পটিভাণেসু ঠিতেসু মহাসত্তো সীৰিকং ৰেজ্জং গাথায অজ্ঝভাসি –

৬৬.

‘‘সখা চ মিত্তো চ মমাসি সীৰিক, সুসিক্খিতো সাধু করোহি মে ৰচো;

উদ্ধরিত্ৰা চক্খূনি মমং জিগীসতো, হত্থেসু ঠপেহি ৰনিব্বকস্সা’’তি.

তস্সত্থো – সম্ম সীৰিক, ত্ৰং ময্হং সহাযো চ মিত্তো চ ৰেজ্জসিপ্পে চাসি সুসিক্খিতো, সাধু মে ৰচনং করোহি. মম জিগীসতো উপধারেন্তস্স ওলোকেন্তস্সেৰ তালমিঞ্জং ৰিয মে অক্খীনি উদ্ধরিত্ৰা ইমস্স যাচকস্স হত্থেসু ঠপেহীতি.

অথ নং সীৰিকো আহ ‘‘চক্খুদানং নাম ভারিযং, উপধারেহি, দেৰা’’তি. সীৰিক, উপধারিতং মযা, ত্ৰং মা পপঞ্চং করোহি, মা মযা সদ্ধিং বহুং কথেহীতি. সো চিন্তেসি ‘‘অযুত্তং মাদিসস্স সুসিক্খিতস্স ৰেজ্জস্স রঞ্ঞো অক্খীসু সত্থপাতন’’ন্তি. সো নানাভেসজ্জানি ঘংসিত্ৰা ভেসজ্জচুণ্ণেন নীলুপ্পলং পরিভাৰেত্ৰা দক্খিণক্খিং উপসিঙ্ঘাপেসি, অক্খি পরিৰত্তি, দুক্খৰেদনা উপ্পজ্জি. ‘‘সল্লক্খেহি, মহারাজ, পটিপাকতিককরণং ময্হং ভারো’’তি. ‘‘অলঞ্হি তাত মা পপঞ্চং করী’’তি. সো পরিভাৰেত্ৰা পুন উপসিঙ্ঘাপেসি, অক্খি অক্খিকূপতো মুচ্চি, বলৰতরা ৰেদনা উদপাদি. ‘‘সল্লক্খেহি মহারাজ, সক্কোমহং পটিপাকতিকং কাতু’’ন্তি. ‘‘মা পপঞ্চং করী’’তি. সো ততিযৰারে খরতরং পরিভাৰেত্ৰা উপনামেসি. অক্খি ওসধবলেন পরিব্ভমিত্ৰা অক্খিকূপতো নিক্খমিত্ৰা ন্হারুসুত্তকেন ওলম্বমানং অট্ঠাসি. সল্লক্খেহি নরিন্দ, পুন পাকতিককরণং ময্হং বলন্তি. মা পপঞ্চং করীতি. অধিমত্তা ৰেদনা উদপাদি, লোহিতং পগ্ঘরি, নিৰত্থসাটকা লোহিতেন তেমিংসু. ওরোধা চ অমচ্চা চ রঞ্ঞো পাদমূলে পতিত্ৰা ‘‘দেৰ অক্খীনি মা দেহী’’তি মহাপরিদেৰং পরিদেৰিংসু.

রাজা ৰেদনং অধিৰাসেত্ৰা ‘‘তাত, মা পপঞ্চং করী’’তি আহ. সো ‘‘সাধু, দেৰা’’তি ৰামহত্থেন অক্খিং ধারেত্ৰা দক্খিণহত্থেন সত্থকং আদায অক্খিসুত্তকং ছিন্দিত্ৰা অক্খিং গহেত্ৰা মহাসত্তস্স হত্থে ঠপেসি. সো ৰামক্খিনা দক্খিণক্খিং ওলোকেত্ৰা ৰেদনং অধিৰাসেত্ৰা ‘‘এহি ব্রাহ্মণা’’তি ব্রাহ্মণং পক্কোসিত্ৰা ‘‘মম ইতো অক্খিতো সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণক্খিমেৰ পিযতরং, তস্স মে ইদং পচ্চযো হোতূ’’তি ৰত্ৰা ব্রাহ্মণস্স অক্খিং অদাসি. সো তং উক্খিপিত্ৰা অত্তনো অক্খিম্হি ঠপেসি. তং তস্সানুভাৰেন ৰিকসিতনীলুপ্পলং ৰিয হুত্ৰা পতিট্ঠাসি. মহাসত্তো ৰামক্খিনা তস্স তং অক্খিং দিস্ৰা ‘‘অহো, সুদিন্নং মযা অক্খিদান’’ন্তি অন্তো সমুগ্গতায পীতিযা নিরন্তরং ফুটো হুত্ৰা ইতরম্পি অক্খিং অদাসি. সক্কো তম্পি অত্তনো অক্খিম্হি ঠপেত্ৰা রাজনিৰেসনা নিক্খমিত্ৰা মহাজনস্স ওলোকেন্তস্সেৰ নগরা নিক্খমিত্ৰা দেৰলোকমেৰ গতো. তমত্থং পকাসেন্তো সত্থা দিযড্ঢগাথমাহ –

৬৭.

‘‘চোদিতো সিৰিরাজেন, সীৰিকো ৰচনংকরো;

রঞ্ঞো চক্খূনুদ্ধরিত্ৰা, ব্রাহ্মণস্সূপনামযি;

সচক্খু ব্রাহ্মণো আসি, অন্ধো রাজা উপাৰিসী’’তি.

রঞ্ঞো ন চিরস্সেৰ অক্খীনি রুহিংসু, রুহমানানি চ আৰাটভাৰং অপ্পত্ৰা কম্বলগেণ্ডুকেন ৰিয উগ্গতেন মংসপিণ্ডেন পূরেত্ৰা চিত্তকম্মরূপস্স ৰিয অক্খীনি অহেসুং, ৰেদনা পচ্ছিজ্জি. অথ মহাসত্তো কতিপাহং পাসাদে ৰসিত্ৰা ‘‘কিং অন্ধস্স রজ্জেন, অমচ্চানং রজ্জং নিয্যাদেত্ৰা উয্যানং গন্ত্ৰা পব্বজিত্ৰা সমণধম্মং করিস্সামী’’তি চিন্তেত্ৰা অমচ্চে পক্কোসাপেত্ৰা তেসং তমত্থং আরোচেত্ৰা ‘‘একো মুখধোৰনাদিদাযকো কপ্পিযকারকোৰ ময্হং সন্তিকে ভৰিস্সতি, সরীরকিচ্চট্ঠানেসুপি মে রজ্জুকং বন্ধথা’’তি ৰত্ৰা সারথিং আমন্তেত্ৰা ‘‘রথং যোজেহী’’তি আহ. অমচ্চা পনস্স রথেন গন্তুং অদত্ৰা সুৰণ্ণসিৰিকায নং নেত্ৰা পোক্খরণীতীরে নিসীদাপেত্ৰা আরক্খং সংৰিধায পটিক্কমিংসু. রাজা পল্লঙ্কেন নিসিন্নো অত্তনো দানং আৰজ্জেসি. তস্মিং খণে সক্কস্স আসনং উণ্হং অহোসি. সো আৰজ্জেন্তো তং কারণং দিস্ৰা ‘‘মহারাজস্স ৰরং দত্ৰা চক্খুং পটিপাকতিকং করিস্সামী’’তি চিন্তেত্ৰা তত্থ গন্ত্ৰা মহাসত্তস্স অৰিদূরে অপরাপরং চঙ্কমি. তমত্থং পকাসেন্তো সত্থা ইমা গাথা আহ –

৬৮.

‘‘ততো সো কতিপাহস্স, উপরূল়্হেসু চক্খুসু;

সূতং আমন্তযী রাজা, সিৰীনং রট্ঠৰড্ঢনো.

৬৯.

‘‘যোজেহি সারথি যানং, যুত্তঞ্চ পটিৰেদয;

উয্যানভূমিং গচ্ছাম, পোক্খরঞ্ঞো ৰনানি চ.

৭০.

‘‘সো চ পোক্খরণীতীরে, পল্লঙ্কেন উপাৰিসি;

তস্স সক্কো পাতুরহু, দেৰরাজা সুজম্পতী’’তি.

সক্কোপি মহাসত্তেন পদসদ্দং সুত্ৰা ‘‘কো এসো’’তি পুট্ঠো গাথমাহ –

৭১.

‘‘সক্কোহমস্মি দেৰিন্দো, আগতোস্মি তৰন্তিকে;

ৰরং ৰরস্সু রাজীসি, যং কিঞ্চি মনসিচ্ছসী’’তি. –

এৰং ৰুত্তে রাজা গাথমাহ –

৭২.

‘‘পহূতং মে ধনং সক্ক, বলং কোসো চনপ্পকো;

অন্ধস্স মে সতো দানি, মরণঞ্ঞেৰ রুচ্চতী’’তি.

তত্থ মরণঞ্ঞেৰ রুচ্চতীতি দেৰরাজ, ইদানি ময্হং অন্ধভাৰেন মরণমেৰ রুচ্চতি, তং মে দেহীতি.

অথ নং সক্কো আহ ‘‘সিৰিরাজ, কিং পন ত্ৰং মরিতুকামো হুত্ৰা মরণং রোচেসি, উদাহু অন্ধভাৰেনা’’তি? ‘‘অন্ধভাৰেন দেৰা’’তি. ‘‘মহারাজ, দানং নাম ন কেৰলং সম্পরাযত্থমেৰ দীযতি, দিট্ঠধম্মত্থাযপি পচ্চযো হোতি, ত্ৰঞ্চ একং চক্খুং যাচিতো দ্ৰে অদাসি, তেন সচ্চকিরিযং করোহী’’তি কথং সমুট্ঠাপেত্ৰা আহ –

৭৩.

‘‘যানি সচ্চানি দ্ৰিপদিন্দ, তানি ভাসস্সু খত্তিয;

সচ্চং তে ভণমানস্স, পুন চক্খু ভৰিস্সতী’’তি.

তং সুত্ৰা মহাসত্তো ‘‘সক্ক, সচেসি মম চক্খুং দাতুকামো, অঞ্ঞং উপাযং মা করি, মম দাননিস্সন্দেনেৰ মে চক্খু উপ্পজ্জতূ’’তি ৰত্ৰা সক্কেন ‘‘মহারাজ, অহং সক্কো দেৰরাজাপি ন পরেসং চক্খুং দাতুং সক্কোমি, তযা দিন্নদানস্স ফলেনেৰ তে চক্খু উপ্পজ্জিস্সতী’’তি ৰুত্তে ‘‘তেন হি মযা দানং সুদিন্ন’’ন্তি ৰত্ৰা সচ্চকিরিযং করোন্তো গাথমাহ –

৭৪.

‘‘যে মং যাচিতুমাযন্তি, নানাগোত্তা ৰনিব্বকা;

যোপি মং যাচতে তত্থ, সোপি মে মনসো পিযো;

এতেন সচ্চৰজ্জেন, চক্খু মে উপপজ্জথা’’তি.

তত্থ যে মন্তি যে মং যাচিতুং আগচ্ছন্তি, তেসু যাচকেসু আগচ্ছন্তেসু যোপি মং যাচতে, সোপি মে মনসো পিযো. এতেনাতি সচে মম সব্বেপি যাচকা পিযা, সচ্চমেৰেতং মযা ৰুত্তং, এতেন মে সচ্চৰচনেন একং মে চক্খু উপপজ্জথ উপপজ্জতূতি আহ.

অথস্স ৰচনানন্তরমেৰ পঠমং চক্খু উদপাদি. ততো দুতিযস্স উপ্পজ্জনত্থায গাথাদ্ৰযমাহ –

৭৫.

‘‘যং মং সো যাচিতুং আগা, দেহি চক্খুন্তি ব্রাহ্মণো;

তস্স চক্খূনি পাদাসিং, ব্রাহ্মণস্স ৰনিব্বতো.

৭৬.

‘‘ভিয্যো মং আৰিসী পীতি, সোমনস্সঞ্চনপ্পকং;

এতেন সচ্চৰজ্জেন, দুতিযং মে উপপজ্জথা’’তি.

তত্থ যং মন্তি যো মং যাচতি. সোতি সো চক্খুৰিকলো ব্রাহ্মণো ‘‘দেহি মে চক্খু’’ন্তি যাচিতুং আগতো. ৰনিব্বতোতি যাচন্তস্স. ভিয্যো মং আৰিসীতি ব্রাহ্মণস্স চক্খূনি দত্ৰা অন্ধকালতো পট্ঠায তস্মিং অন্ধকালে তথারূপং ৰেদনং অগণেত্ৰা ‘‘অহো সুদিন্নং মে দান’’ন্তি পচ্চৰেক্খন্তং মং ভিয্যো অতিরেকতরা পীতি আৰিসি, মম হদযং পৰিট্ঠা, সোমনস্সঞ্চ মম অনন্তং অপরিমাণং উপ্পজ্জি. এতেনাতি সচে মম তদা অনপ্পকং পীতিসোমনস্সং উপ্পন্নং, সচ্চমেৰেতং মযা ৰুত্তং, এতেন মে সচ্চৰচনেন দুতিযম্পি চক্খু উপপজ্জতূতি আহ.

তঙ্খণঞ্ঞেৰ দুতিযম্পি চক্খু উদপাদি. তানি পনস্স চক্খূনি নেৰ পাকতিকানি, ন দিব্বানি. সক্কব্রাহ্মণস্স হি দিন্নং চক্খুং পুন পাকতিকং কাতুং ন সক্কা, উপহতৰত্থুনো চ দিব্বচক্খু নাম ন উপ্পজ্জতি, তানি পনস্স সচ্চপারমিতানুভাৰেন সম্ভূতানি চক্খূনীতি ৰুত্তানি. তেসং উপ্পত্তিসমকালমেৰ সক্কানুভাৰেন সব্বা রাজপরিসা সন্নিপতিতাৰ অহেসুং. অথস্স সক্কো মহাজনমজ্ঝেযেৰ থুতিং করোন্তো গাথাদ্ৰযমাহ –

৭৭.

‘‘ধম্মেন ভাসিতা গাথা, সিৰীনং রট্ঠৰড্ঢন;

এতানি তৰ নেত্তানি, দিব্বানি পটিদিস্সরে.

৭৮.

‘‘তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তু তে’’তি.

তত্থ ধম্মেন ভাসিতাতি মহারাজ, ইমা তে গাথা ধম্মেন সভাৰেনেৰ ভাসিতা. দিব্বানীতি দিব্বানুভাৰযুত্তানি. পটিদিস্সরেতি পটিদিস্সন্তি. তিরোকুট্টন্তি মহারাজ, ইমানি তে চক্খূনি দেৰতানং চক্খূনি ৰিয পরকুট্টং পরসেলং যংকিঞ্চি পব্বতম্পি সমতিগ্গয্হ অতিক্কমিত্ৰা সমন্তা দস দিসা যোজনসতং রূপদস্সনং অনুভোন্তু সাধেন্তূতি অত্থো.

ইতি সো আকাসে ঠত্ৰা মহাজনমজ্ঝে ইমা গাথা ভাসিত্ৰা ‘‘অপ্পমত্তো হোহী’’তি মহাসত্তং ওৰদিত্ৰা দেৰলোকমেৰ গতো. মহাসত্তোপি মহাজনপরিৰুতো মহন্তেন সক্কারেন নগরং পৰিসিত্ৰা সুচন্দকং পাসাদং অভিরুহি. তেন চক্খূনং পটিলদ্ধভাৰো সকলসিৰিরট্ঠে পাকটো জাতো. অথস্স দস্সনত্থং সকলরট্ঠৰাসিনো বহুং পণ্ণাকারং গহেত্ৰা আগমিংসু. মহাসত্তো ‘‘ইমস্মিং মহাজনসন্নিপাতে মম দানং ৰণ্ণযিস্সামী’’তি রাজদ্ৰারে মহামণ্ডপং কারেত্ৰা সমুস্সিতসেতচ্ছত্তে রাজপল্লঙ্কে নিসিন্নো নগরে ভেরিং চরাপেত্ৰা সব্বসেনিযো সন্নিপাতেত্ৰা ‘‘অম্ভো, সিৰিরট্ঠৰাসিনো ইমানি মে দিব্বচক্খূনি দিস্ৰা ইতো পট্ঠায দানং অদত্ৰা মা ভুঞ্জথা’’তি ধম্মং দেসেন্তো চতস্সো গাথা অভাসি –

৭৯.

‘‘কো নীধ ৰিত্তং ন দদেয্য যাচিতো, অপি ৰিসিট্ঠং সুপিযম্পি অত্তনো;

তদিঙ্ঘ সব্বে সিৰযো সমাগতা, দিব্বানি নেত্তানি মমজ্জ পস্সথ.

৮০.

‘‘তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তি মে.

৮১.

‘‘ন চাগমত্তা পরমত্থি কিঞ্চি, মচ্চানং ইধ জীৰিতে;

দত্ৰান মানুসং চক্খুং, লদ্ধং মে চক্খুং অমানুসং.

৮২.

‘‘এতম্পি দিস্ৰা সিৰযো, দেথ দানানি ভুঞ্জথ;

দত্ৰা চ ভুত্ৰা চ যথানুভাৰং, অনিন্দিতা সগ্গমুপেথ ঠান’’ন্তি.

তত্থ কোনীধাতি কো নু ইধ. অপি ৰিসিট্ঠন্তি উত্তমম্পি সমানং. চাগমত্তাতি চাগপমাণতো অঞ্ঞং ৰরং নাম নত্থি. ইধ জীৰিতেতি ইমস্মিং জীৰলোকে. ‘‘ইধ জীৰত’’ন্তিপি পাঠো, ইমস্মিং লোকে জীৰমানানন্তি অত্থো. অমানুসন্তি দিব্বচক্খু মযা লদ্ধং, ইমিনা কারণেন ৰেদিতব্বমেতং ‘‘চাগতো উত্তমং নাম নত্থী’’তি. এতম্পি দিস্ৰাতি এতং মযা লদ্ধং দিব্বচক্খুং দিস্ৰাপি.

ইতি ইমাহি চতূহি গাথাহি ধম্মং দেসেত্ৰা ততো পট্ঠায অন্ৰদ্ধমাসং পন্নরসুপোসথেসু মহাজনং সন্নিপাতাপেত্ৰা নিচ্চং ইমাহি গাথাহি ধম্মং দেসেসি. তং সুত্ৰা মহাজনো দানাদীনি পুঞ্ঞানি কত্ৰা দেৰলোকং পূরেন্তোৰ অগমাসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পোরাণকপণ্ডিতা বাহিরদানেন অসন্তুট্ঠা সম্পত্তযাচকানং অত্তনো চক্খূনি উপ্পাটেত্ৰা অদংসূ’’তি ৰত্ৰা সচ্চানি পকাসেত্ৰা জাতকং সমোধানেসি – ‘‘তদা সীৰিকৰেজ্জো আনন্দো অহোসি, সক্কো অনুরুদ্ধো অহোসি, সেসপরিসা বুদ্ধপরিসা, সিৰিরাজা পন অহমেৰ অহোসি’’ন্তি.

সিৰিজাতকৰণ্ণনা ততিযা.

[৫০০] ৪. সিরীমন্তজাতকৰণ্ণনা

৮৩-১০৩. পঞ্ঞাযুপেতং সিরিযা ৰিহীনন্তি অযং সিরীমন্তপঞ্হো মহাউমঙ্গে (জা. ২.২২.৫৯০ আদযো) আৰি ভৰিস্সতি.

সিরীমন্তজাতকৰণ্ণনা চতুত্থা.

[৫০১] ৫. রোহণমিগজাতকৰণ্ণনা

এতে যূথা পতিযন্তীতি ইদং সত্থা ৰেল়ুৰনে ৰিহরন্তো আযস্মতো আনন্দস্স জীৰিতপরিচ্চাগং আরব্ভ কথেসি. সো পনস্স জীৰিতপরিচ্চাগো অসীতিনিপাতে চূল়হংসজাতকে (জা. ২.২১.১ আদযো) ধনপালদমনে আৰি ভৰিস্সতি. এৰং তেনাযস্মতা সত্থু অত্থায জীৰিতে পরিচ্চত্তে ধম্মসভাযং কথং সমুট্ঠাপেসুং ‘‘আৰুসো, আযস্মা আনন্দো সেক্খপটিসম্ভিদপ্পত্তো হুত্ৰা দসবলস্সত্থায জীৰিতং পরিচ্চজী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপেস মমত্থায জীৰিতং পরিচ্চজিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে খেমা নামস্স অগ্গমহেসী অহোসি. তদা বোধিসত্তো হিমৰন্তপদেসে মিগযোনিযং নিব্বত্তিত্ৰা সুৰণ্ণৰণ্ণো অহোসি সোভগ্গপ্পত্তো. কনিট্ঠোপিস্স চিত্তমিগো নাম সুৰণ্ণৰণ্ণোৰ অহোসি, কনিট্ঠভগিনীপিস্স সুতনা নাম সুৰণ্ণৰণ্ণাৰ অহোসি. মহাসত্তো পন রোহণো নাম মিগরাজা অহোসি. সো হিমৰন্তে দ্ৰে পব্বতরাজিযো অতিক্কমিত্ৰা ততিযায অন্তরে রোহণং নাম সরং নিস্সায অসীতিমিগসহস্সপরিৰারো ৰাসং কপ্পেসি. সো অন্ধে জিণ্ণে মাতাপিতরো পোসেসি. অথেকো বারাণসিতো অৰিদূরে নেসাদগামৰাসী নেসাদপুত্তো হিমৰন্তং পৰিট্ঠো মহাসত্তং দিস্ৰা অত্তনো গামং আগন্ত্ৰা অপরভাগে কালং করোন্তো পুত্তস্সারোচেসি ‘‘তাত, অম্হাকং কম্মভূমিযং অসুকস্মিং নাম ঠানে সুৰণ্ণৰণ্ণো মিগো ৰসতি, সচে রাজা পুচ্ছেয্য, কথেয্যাসী’’তি.

অথেকদিৰসং খেমা দেৰী পচ্চূসকালে সুপিনং অদ্দস. এৰরূপো সুপিনো অহোসি – সুৰণ্ণৰণ্ণো মিগো আগন্ত্ৰা কঞ্চনপীঠে নিসীদিত্ৰা সুৰণ্ণকিঙ্কিণিকং আকোটেন্তো ৰিয মধুরস্সরেন দেৰিযা ধম্মং দেসেতি, সা সাধুকারং দত্ৰা ধম্মং সুণাতি. মিগো ধম্মকথায অনিট্ঠিতায এৰ উট্ঠায গচ্ছতি, সা ‘‘মিগং গণ্হথ গণ্হথা’’তি ৰদন্তীযেৰ পবুজ্ঝি. পরিচারিকাযো তস্সা সদ্দং সুত্ৰা ‘‘পিহিতদ্ৰারৰাতপানং গেহং ৰাতস্সপি ওকাসো নত্থি, অয্যা, ইমায ৰেলায মিগং গণ্হাপেতী’’তি অৰহসিংসু. সা তস্মিং খণে ‘‘সুপিনো অয’’ন্তি ঞত্ৰা চিন্তেসি ‘‘সুপিনোতি ৰুত্তে রাজা অনাদরো ভৰিস্সতি, ‘দোহল়ো উপ্পন্নো’তি ৰুত্তে পন আদরেন পরিযেসিস্সতি, সুৰণ্ণৰণ্ণস্স মিগস্স ধম্মকথং সুণিস্সামী’’তি. সা গিলানালযং কত্ৰা নিপজ্জি. রাজা আগন্ত্ৰা ‘‘ভদ্দে, কিং তে অফাসুক’’ন্তি পুচ্ছি. ‘‘দেৰ, অঞ্ঞং নত্থি, দোহল়ো পন মে উপ্পন্নো’’তি. ‘‘কিং ইচ্ছসি দেৰী’’তি? ‘‘সুৰণ্ণৰণ্ণস্স ধম্মিকমিগস্স ধম্মং সোতুকামা দেৰা’’তি. ‘‘ভদ্দে, যং নত্থি, তত্থ তে দোহল়ো উপ্পন্নো, সুৰণ্ণৰণ্ণো নাম মিগোযেৰ নত্থী’’তি. সো ‘‘সচে ন লভামি, ইধেৰ মে মরণ’’ন্তি রঞ্ঞো পিট্ঠিং দত্ৰা নিপজ্জি.

রাজা ‘‘সচে অত্থি, লভিস্সসী’’তি পরিসমজ্ঝে নিসীদিত্ৰা মোরজাতকে (জা. ১.২.১৭ আদযো) ৰুত্তনযেনেৰ অমচ্চে চ ব্রাহ্মণে চ পুচ্ছিত্ৰা ‘‘সুৰণ্ণৰণ্ণা মিগা নাম হোন্তী’’তি সুত্ৰা লুদ্দকে সন্নিপাতেত্ৰা ‘‘এৰরূপো মিগো কেন দিট্ঠো, কেন সুতো’’তি পুচ্ছিত্ৰা তেন নেসাদপুত্তেন পিতু সন্তিকা সুতনিযামেন কথিতে ‘‘সম্ম, তস্স তে মিগস্স আনীতকালে মহন্তং সক্কারং করিস্সামি, গচ্ছ আনেহি ন’’ন্তি ৰত্ৰা পরিব্বযং দত্ৰা তং পেসেসি. সোপি ‘‘সচাহং, দেৰ, তং আনেতুং ন সক্খিস্সামি, চম্মমস্স আনেস্সামি, তং আনেতুং অসক্কোন্তো লোমানিপিস্স আনেস্সামি, তুম্হে মা চিন্তযিত্থা’’তি ৰত্ৰা অত্তনো নিৰেসনং গন্ত্ৰা পুত্তদারস্স পরিব্বযং দত্ৰা তত্থ গন্ত্ৰা তং মিগরাজানং দিস্ৰা ‘‘কস্মিং নু খো ঠানে পাসং ওড্ডেত্ৰা ইমং মিগরাজানং গণ্হিতুং সক্খিস্সামী’’তি ৰীমংসন্তো পানীযতিত্থে ওকাসং পস্সি. সো দল়্হং চম্মযোত্তং ৰট্টেত্ৰা মহাসত্তস্স পানীযপিৰনট্ঠানে যট্ঠিপাসং ওড্ডেসি.

পুনদিৰসে মহাসত্তো অসীতিযা মিগসহস্সেহি সদ্ধিং গোচরং চরিত্ৰা ‘‘পকতিতিত্থেযেৰ পানীযং পিৰিস্সামী’’তি তত্থ গন্ত্ৰা ওতরন্তোযেৰ পাসে বজ্ঝি. সো ‘‘সচাহং ইদানেৰ বদ্ধরৰং রৰিস্সামি, ঞাতিগণা পানীযং অপিৰিত্ৰাৰ ভীতা পলাযিস্সন্তী’’তি চিন্তেত্ৰা যট্ঠিযং অল্লীযিত্ৰা অত্তনো ৰসে ৰত্তেত্ৰা পানীযং পিৰন্তো ৰিয অহোসি. অথ অসীতিযা মিগসহস্সানং পানীযং পিৰিত্ৰা উত্তরিত্ৰা ঠিতকালে ‘‘পাসং ছিন্দিস্সামী’’তি তিক্খত্তুং আকড্ঢি. পঠমৰারে চম্মং ছিজ্জি, দুতিযৰারে মংসং ছিজ্জি, ততিযৰারে ন্হারুং ছিন্দিত্ৰা পাসো অট্ঠিং আহচ্চ অট্ঠাসি. সো ছিন্দিতুং অসক্কোন্তো বদ্ধরৰং রৰি, মিগগণা ভাযিত্ৰা তীহি ঘটাহি পলাযিংসু. চিত্তমিগো তিণ্ণম্পি ঘটানং অন্তরে মহাসত্তং অদিস্ৰা ‘‘ইদং ভযং উপ্পজ্জমানং মম ভাতু উপ্পন্নং ভৰিস্সতী’’তি চিন্তেত্ৰা তস্স সন্তিকং গন্ত্ৰা বদ্ধং পস্সি. অথ নং মহাসত্তো দিস্ৰা ‘‘ভাতিক, মা ইধ তিট্ঠ, সাসঙ্কং ইদং ঠান’’ন্তি ৰত্ৰা উয্যোজেন্তো পঠমং গাথমাহ –

১০৪.

‘‘এতে যূথা পতিযন্তি, ভীতা মরণস্স চিত্তক;

গচ্ছ তুৰম্পি মাকঙ্খি, জীৰিস্সন্তি তযা সহা’’তি.

তত্থ এতেতি চক্খুপথং অতিক্কমিত্ৰা দূরগতে সন্ধাযাহ. পতিযন্তীতি পতিগচ্ছন্তি, পলাযন্তীতি অত্থো. চিত্তকাতি তং আলপতি. তযা সহাতি ত্ৰং এতেসং মম ঠানে ঠত্ৰা রাজা হোহি, এতে তযা সদ্ধিং জীৰিস্সন্তীতি.

ততো উভিন্নম্পি তিস্সো একন্তরিকগাথাযো হোন্তি –

১০৫.

‘‘নাহং রোহণ গচ্ছামি, হদযং মে অৰকস্সতি;

ন তং অহং জহিস্সামি, ইধ হিস্সামি জীৰিতং.

১০৬.

‘‘তে হি নূন মরিস্সন্তি, অন্ধা অপরিণাযকা;

গচ্ছ তুৰম্পি মাকঙ্খি, জীৰিস্সন্তি তযা সহ.

১০৭.

‘‘নাহং রোহণ গচ্ছামি, হদযং মে অৰকস্সতি;

ন তং বদ্ধং জহিস্সামি, ইধ হিস্সামি জীৰিত’’ন্তি.

তত্থ রোহণাতি মহাসত্তং নামেনালপতি. অৰকস্সতীতি কড্ঢযতি, সোকেন ৰা কড্ঢীযতি. তে হি নূনাতি তে অম্হাকং মাতাপিতরো একংসেনেৰ দ্ৰীসুপি অম্হেসু ইধ মতেসু অপরিণাযকা হুত্ৰা অপ্পটিজগ্গিযমানা সুস্সিত্ৰা মরিস্সন্তি, তস্মা ভাতিক চিত্তক, গচ্ছ তুৰং, তযা সহ তে জীৰিস্সন্তীতি অত্থো. ইধ হিস্সামীতি ইমস্মিংযেৰ ঠানে জীৰিতং জহিস্সামীতি.

ইতি ৰত্ৰা বোধিসত্তস্স দক্খিণপস্সং নিস্সায তং সন্ধারেত্ৰা অস্সাসেন্তো অট্ঠাসি. সুতনাপি মিগপোতিকা পলাযিত্ৰা মিগানং অন্তরে উভো ভাতিকে অপস্সন্তী ‘‘ইদং ভযং মম ভাতিকানং উপ্পন্নং ভৰিস্সতী’’তি নিৰত্তিত্ৰা তেসং সন্তিকং আগতা. নং আগচ্ছন্তিং দিস্ৰা মহাসত্তো পঞ্চমং গাথমাহ –

১০৮.

‘‘গচ্ছ ভীরু পলাযস্সু, কূটে বদ্ধোস্মি আযসে;

গচ্ছ তুৰম্পি মাকঙ্খি, জীৰিস্সন্তি তযা সহা’’তি.

তত্থ ভীরূতি মাতুগামো নাম অপ্পমত্তকেনপি ভাযতি, তেন নং এৰং আলপতি. কূটেতি পটিচ্ছন্নপাসে. আযসেতি সো হি অন্তোউদকে অযক্খন্ধং কোট্টেত্ৰা তত্থ সারদারুং যট্ঠিং বন্ধিত্ৰা ওড্ডিতো, তস্মা এৰমাহ. তযা সহাতি তে অসীতিসহস্সা মিগা তযা সদ্ধিং জীৰিস্সন্তীতি.

ততো পরং পুরিমনযেনেৰ তিস্সো গাথা হোন্তি –

১০৯.

‘‘নাহং রোহণ গচ্ছামি, হদযং মে অৰকস্সতি;

ন তং অহং জহিস্সামি, ইধ হিস্সামি জীৰিতং.

১১০.

‘‘তে হি নূন মরিস্সন্তি, অন্ধা অপরিণাযকা;

গচ্ছ তুৰম্পি মাকঙ্খি, জীৰিস্সন্তি তযা সহ.

১১১.

‘‘নাহং রোহণ গচ্ছামি, হদযং মে অৰকস্সতি;

ন তং বদ্ধং জহিস্সামি, ইধ হিস্সামি জীৰিত’’ন্তি.

তত্থ তে হি নূনাতি ইধাপি মাতাপিতরোযেৰ সন্ধাযাহ.

সাপি তথেৰ পটিক্খিপিত্ৰা মহাসত্তস্স ৰামপস্সং নিস্সায অস্সাসযমানা অট্ঠাসি. লুদ্দোপি তে মিগে পলাযন্তে দিস্ৰা বদ্ধরৰঞ্চ সুত্ৰা ‘‘বদ্ধো ভৰিস্সতি মিগরাজা’’তি দল়্হং কচ্ছং বন্ধিত্ৰা মিগমারণসত্তিং আদায ৰেগেনাগচ্ছি. মহাসত্তো তং আগচ্ছন্তং দিস্ৰা নৰমং গাথমাহ –

১১২.

‘‘অযং সো লুদ্দকো এতি, লুদ্দরূপো সহাৰুধো;

যো নো ৰধিস্সতি অজ্জ, উসুনা সত্তিযা অপী’’তি.

তত্থ লুদ্দরূপোতি দারুণজাতিকো. সত্তিযা অপীতি সত্তিযাপি নো পহরিত্ৰা ৰধিস্সতি, তস্মা যাৰ সো নাগচ্ছতি, তাৰ পলাযথাতি.

তং দিস্ৰাপি চিত্তমিগো ন পলাযি. সুতনা পন সকভাৰেন সণ্ঠাতুং অসক্কোন্তী মরণভযভীতা থোকং পলাযিত্ৰা – ‘‘অহং দ্ৰে ভাতিকে পহায কুহিং পলাযিস্সামী’’তি অত্তনো জীৰিতং জহিত্ৰা নলাটেন মচ্চুং আদায পুনাগন্ত্ৰা ভাতু ৰামপস্সে অট্ঠাসি. তমত্থং পকাসেন্তো সত্থা দসমং গাথমাহ –

১১৩.

‘‘সা মুহুত্তং পলাযিত্ৰা, ভযট্টা ভযতজ্জিতা;

সুদুক্করং অকরা ভীরু, মরণাযূপনিৰত্তথা’’তি.

তত্থ মরণাযূপনিৰত্তথাতি মরণত্থায উপনিৰত্তি.

লুদ্দোপি আগন্ত্ৰা তে তযো জনে একতো ঠিতে দিস্ৰা মেত্তচিত্তং উপ্পাদেত্ৰা এককুচ্ছিযং নিব্বত্তভাতরো ৰিয তে মঞ্ঞমানো চিন্তেসি ‘‘মিগরাজা, তাৰ পাসে বদ্ধো, ইমে পন দ্ৰে জনা হিরোত্তপ্পবন্ধনেন বদ্ধা, কিং নু খো ইমে এতস্স হোন্তী’’তি? অথ নং পুচ্ছন্তো গাথমাহ –

১১৪.

‘‘কিং নু তেমে মিগা হোন্তি, মুত্তা বদ্ধং উপাসরে;

ন তং চজিতুমিচ্ছন্তি, জীৰিতস্সপি কারণা’’তি.

তত্থ কিং নু তেমেতি কিং নু তে ইমে. উপাসরেতি উপাসন্তি.

অথস্স বোধিসত্তো আচিক্খি –

১১৫.

‘‘ভাতরো হোন্তি মে লুদ্দ, সোদরিযা একমাতুকা;

ন মং চজিতুমিচ্ছন্তি, জীৰিতস্সপি কারণা’’তি.

সো তস্স ৰচনং সুত্ৰা ভিয্যোসোমত্তায মুদুচিত্তো অহোসি. চিত্তমিগরাজা তস্স মুদুচিত্তভাৰং ঞত্ৰা ‘‘সম্ম লুদ্দক, মা ত্ৰং এতং মিগরাজানং ‘মিগমত্তোযেৰা’তি মঞ্ঞিত্থ, অযঞ্হি অসীতিযা মিগসহস্সানং রাজা সীলাচারসম্পন্নো সব্বসত্তেসু মুদুচিত্তো মহাপঞ্ঞো অন্ধে জিণ্ণে মাতাপিতরো পোসেতি. সচে ত্ৰং এৰরূপং ধম্মিকং মিগং মারেসি, এতং মারেন্তো মাতাপিতরো চ নো মঞ্চ ভগিনিঞ্চ মেতি অম্হে পঞ্চপি জনে মারেসিযেৰ. ময্হং পন ভাতু জীৰিতং দেন্তো পঞ্চন্নম্পি জনানং জীৰিতদাযকোসী’’তি ৰত্ৰা গাথমাহ –

১১৬.

‘‘তে হি নূন মরিস্সন্তি, অন্ধা অপরিণাযকা;

পঞ্চন্নং জীৰিতং দেহি, ভাতরং মুঞ্চ লুদ্দকা’’তি.

সো তস্স ধম্মকথং সুত্ৰা পসন্নচিত্তো ‘‘মা ভাযি সামী’’তি ৰত্ৰা অনন্তরং গাথমাহ –

১১৭.

‘‘সো ৰো অহং পমোক্খামি, মাতাপেত্তিভরং মিগং;

নন্দন্তু মাতাপিতরো, মুত্তং দিস্ৰা মহামিগ’’ন্তি.

তত্থ ৰোতি নিপাতমত্তং. মুত্তন্তি বন্ধনা মুত্তং পস্সিত্ৰা.

এৰঞ্চ পন ৰত্ৰা চিন্তেসি ‘‘রঞ্ঞা দিন্নযসো ময্হং কিং করিস্সতি, সচাহং ইমং মিগরাজানং ৰধিস্সামি, অযং ৰা মে পথৰী ভিজ্জিত্ৰা ৰিৰরং দস্সতি, অসনি ৰা মে মত্থকে পতিস্সতি, ৰিস্সজ্জেস্সামি ন’’ন্তি. সো মহাসত্তং উপসঙ্কমিত্ৰা যট্ঠিং পাতেত্ৰা চম্মযোত্তং ছিন্দিত্ৰা মিগরাজানং আলিঙ্গিত্ৰা উদকপরিযন্তে নিপজ্জাপেত্ৰা মুদুচিত্তেন সণিকং পাসা মোচেত্ৰা ন্হারূহি ন্হারুং, মংসেন মংসং, চম্মেন চম্মং সমোধানেত্ৰা উদকেন লোহিতং ধোৰিত্ৰা মেত্তচিত্তেন পুনপ্পুনং পরিমজ্জি. তস্স মেত্তানুভাৰেনেৰ মহাসত্তস্স পারমিতানুভাৰেন চ সব্বানি ন্হারুমংসচম্মানি সন্ধীযিংসু, পাদো সঞ্ছন্নছৰি সঞ্ছন্নলোমো অহোসি, অসুকট্ঠানে বদ্ধো অহোসীতিপি ন পঞ্ঞাযি. মহাসত্তো সুখপ্পত্তো হুত্ৰা অট্ঠাসি. তং দিস্ৰা চিত্তমিগো সোমনস্সজাতো লুদ্দস্স অনুমোদনং করোন্তো গাথমাহ –

১১৮.

‘‘এৰং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, মুত্তং দিস্ৰা মহামিগ’’ন্তি.

অথ মহাসত্তো ‘‘কিং নু খো এস লুদ্দো মং গণ্হন্তো অত্তনো কামেন গণ্হি, উদাহু অঞ্ঞস্স আণত্তিযা’’তি চিন্তেত্ৰা গহিতকারণং পুচ্ছি. লুদ্দপুত্তো আহ – ‘‘সামি, ন ময্হং তুম্হেহি কম্মং অত্থি, রঞ্ঞো পন অগ্গমহেসী খেমা নাম তুম্হাকং ধম্মকথং সোতুকামা, তদত্থায রঞ্ঞো আণত্তিযা ত্ৰং মযা গহিতো’’তি. সম্ম, এৰং সন্তে মং ৰিস্সজ্জেন্তো অতিদুক্করং করোসি, এহি মং নেত্ৰা রঞ্ঞো দস্সেহি, দেৰিযা ধম্মং কথেস্সামীতি. সামি, রাজানো নাম কক্খল়া, কো জানাতি, কিং ভৰিস্সতি, ময্হং রঞ্ঞা দিন্নযসেন কম্মং নত্থি, গচ্ছ ত্ৰং যথাসুখন্তি. পুন মহাসত্তো ‘‘ইমিনা মং ৰিস্সজ্জেন্তেন অতিদুক্করং কতং, যসপটিলাভস্স উপাযমস্স করিস্সামী’’তি চিন্তেত্ৰা ‘‘সম্ম, পিট্ঠিং তাৰ মে হত্থেন পরিমজ্জা’’তি আহ. ‘‘সো পরিমজ্জি, হত্থো সুৰণ্ণৰণ্ণেহি লোমেহি পূরি’’. ‘‘সামি, ইমেহি লোমেহি কিং কারোমী’’তি. ‘‘সম্ম, ইমানি হরিত্ৰা রঞ্ঞো চ দেৰিযা চ দস্সেত্ৰা ‘ইমানি তস্স সুৰণ্ণৰণ্ণমিগস্স লোমানী’তি ৰত্ৰা মম ঠানে ঠত্ৰা ইমাহি গাথাহি দেৰিযা ধম্মং দেসেহি, তং সুত্ৰাযেৰ চস্সা দোহল়ো পটিপ্পস্সম্ভিস্সতী’’তি. ‘‘ধম্মং চর মহারাজা’’তি দস ধম্মচরিযগাথা উগ্গণ্হাপেত্ৰা পঞ্চ সীলানি দত্ৰা অপ্পমাদেন ওৰদিত্ৰা উয্যোজেসি. লুদ্দপুত্তো মহাসত্তং আচরিযট্ঠানে ঠপেত্ৰা তিক্খত্তুং পদক্খিণং কত্ৰা চতূসু ঠানেসু ৰন্দিত্ৰা লোমানি পদুমিনিপত্তেন গহেত্ৰা পক্কামি. তেপি তযো জনা থোকং অনুগন্ত্ৰা মুখেন গোচরঞ্চ পানীযঞ্চ গহেত্ৰা মাতাপিতূনং সন্তিকং গমিংসু. মাতাপিতরো ‘‘তাত রোহণ, ত্ৰং কির পাসে বদ্ধো কথং মুত্তোসী’’তি পুচ্ছন্তা গাথমাহংসু –

১১৯.

‘‘কথং ত্ৰং পমোক্খো আসি, উপনীতস্মি জীৰিতে;

কথং পুত্ত অমোচেসি, কূটপাসম্হ লুদ্দকো’’তি.

তত্থ উপনীতস্মীতি তৰ জীৰিতে মরণসন্তিকং উপনীতে কথং পমোক্খো আসি.

তং সুত্ৰা বোধিসত্তো তিস্সো গাথা অভাসি –

১২০.

‘‘ভণং কণ্ণসুখং ৰাচং, হদযঙ্গং হদযস্সিতং;

সুভাসিতাহি ৰাচাহি, চিত্তকো মং অমোচযি.

১২১.

‘‘ভণং কণ্ণসুখং ৰাচং, হদযঙ্গং হদযস্সিতং;

সুভাসিতাহি ৰাচাহি, সুতনা মং অমোচযি.

১২২.

‘‘সুত্ৰা কণ্ণসুখং ৰাচং, হদযঙ্গং হদযস্সিতং;

সুভাসিতানি সুত্ৰান, লুদ্দকো মং অমোচযী’’তি.

তত্থ ভণন্তি ভণন্তো. হদযঙ্গন্তি হদযঙ্গমং. দুতিযগাথায ভণন্তি ভণমানা. সুত্ৰাতি সো ইমেসং উভিন্নং ৰাচং সুত্ৰা.

অথস্স মাতাপিতরো অনুমোদন্তা আহংসু –

১২৩.

‘‘এৰং আনন্দিতো হোতু, সহ দারেহি লুদ্দকো;

যথা মযজ্জ নন্দাম, দিস্ৰা রোহণমাগত’’ন্তি.

লুদ্দোপি অরঞ্ঞা নিক্খমিত্ৰা রাজকুলং গন্ত্ৰা রাজানং ৰন্দিত্ৰা একমন্তং অট্ঠাসি. তং দিস্ৰা রাজা গাথমাহ –

১২৪.

‘‘ননু ত্ৰং অৰচ লুদ্দ, ‘মিগচম্মানি আহরিং’;

অথ কেন নু ৰণ্ণেন, মিগচম্মানি নাহরী’’তি.

তত্থ মিগচম্মানীতি মিগং ৰা চম্মং ৰা. আহরিন্তি আহরিস্সামি. ইদং ৰুত্তং হোতি – অম্ভো লুদ্দ, ননু ত্ৰং এৰং অৰচ ‘‘মিগং আনেতুং অসক্কোন্তো চম্মং আহরিস্সামি, তং অসক্কোন্তো লোমানী’’তি, সো ত্ৰং কেন কারণেন নেৰ মিগং, ন মিগচম্মং আহরীতি?

তং সুত্ৰা লুদ্দো গাথমাহ –

১২৫.

‘‘আগমা চেৰ হত্থত্থং, কূটপাসঞ্চ সো মিগো;

অবজ্ঝি তং মিগরাজং, তঞ্চ মুত্তা উপাসরে.

১২৬.

‘‘তস্স মে অহু সংৰেগো, অব্ভুতো লোমহংসনো;

ইমঞ্চাহং মিগং হঞ্ঞে, অজ্জ হিস্সামি জীৰিত’’ন্তি.

তত্থ আগমাতি মহারাজ, সো মিগো মম হত্থত্থং হত্থপাসঞ্চেৰ মযা ওড্ডিতং কূটপাসঞ্চ আগতো, তস্মিঞ্চ কূটপাসে অবজ্ঝি. তঞ্চ মুত্তা উপাসরেতি তঞ্চ বদ্ধং অপরে মুত্তা অবদ্ধাৰ দ্ৰে মিগা অস্সাসেন্তা তং নিস্সায অট্ঠংসু. অব্ভুতোতি পুব্বে অভূতপুব্বো. ইমঞ্চাহন্তি অথ মে সংৰিগ্গস্স এতদহোসি ‘‘সচে অহং ইমং মিগং হনিস্সামি, অজ্জেৰ ইমস্মিংযেৰ ঠানে জীৰিতং জহিস্সামী’’তি.

তং সুত্ৰা রাজা আহ –

১২৭.

‘‘কীদিসা তে মিগা লুদ্দ, কীদিসা ধম্মিকা মিগা;

কথংৰণ্ণা কথংসীলা, বাল়্হং খো নে পসংসসী’’তি.

ইদং সো রাজা ৰিম্হযৰসেন পুনপ্পুনং পুচ্ছতি. তং সুত্ৰা লুদ্দো গাথমাহ –

১২৮.

‘‘ওদাতসিঙ্গা সুচিৰালা, জাতরূপতচূপমা;

পাদা লোহিতকা তেসং, অঞ্জিতক্খা মনোরমা’’তি.

তত্থ ওদাতসিঙ্গাতি রজতদামসদিসসিঙ্গা. সুচিৰালাতি চামরিৰালসদিসেন সুচিনা ৰালেন সমন্নাগতা. লোহিতকাতি রত্তনখা পৰাল়সদিসা. পাদাতি খুরপরিযন্তা. অঞ্জিতক্খাতি অঞ্জিতেহি ৰিয ৰিসুদ্ধপঞ্চপসাদেহি অক্খীহি সমন্নাগতা.

ইতি সো কথেন্তোৰ মহাসত্তস্স সুৰণ্ণৰণ্ণানি লোমানি রঞ্ঞো হত্থে ঠপেত্ৰা তেসং মিগানং সরীরৰণ্ণং পকাসেন্তো গাথমাহ –

১২৯.

‘‘এদিসা তে মিগা দেৰ, এদিসা ধম্মিকা মিগা;

মাতাপেত্তিভরা দেৰ, ন তে সো অভিহারিতু’’ন্তি.

তত্থ মাতাপেত্তিভরাতি জিণ্ণে অন্ধে মাতাপিতরো পোসেন্তি, এতাদিসা নেসং ধম্মিকতা. ন তে সো অভিহারিতুন্তি সো মিগরাজা ন সক্কা কেনচি তৰ পণ্ণাকারত্থায অভিহরিতুন্তি অত্থো. ‘‘অভিহারযি’’ন্তিপি পাঠো, সো অহং তং তে পণ্ণাকারত্থায নাভিহারযিং ন আহরিন্তি অত্থো.

ইতি সো মহাসত্তস্স চ চিত্তমিগস্স চ সুতনায মিগপোতিকায চ গুণং কথেত্ৰা ‘‘মহারাজ, অহং তেন মিগরঞ্ঞা ‘অত্তনো লোমানি দস্সেত্ৰা মম ঠানে ঠত্ৰা দসহি রাজধম্মচরিযগাথাহি দেৰিযা ধম্মং কথেয্যাসী’তি উগ্গণ্হাপিতো আণত্তো’’তি আহ. তং সুত্ৰা রাজা নং ন্হাপেত্ৰা অহতৰত্থানি নিৰাসেত্ৰা সত্তরতনখচিতে পল্লঙ্কে নিসীদাপেত্ৰা সযং দেৰিযা সদ্ধিং নীচাসনে একমন্তং নিসীদিত্ৰা তং অঞ্জলিং পগ্গয্হ যাচতি. সো ধম্মং দেসেন্তো আহ –

‘‘ধম্মং চর মহারাজ, মাতাপিতূসু খত্তিয;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, পুত্তদারেসু খত্তিয;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, মিত্তামচ্চেসু খত্তিয;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, ৰাহনেসু বলেসু চ;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, গামেসু নিগমেসু চ;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, রট্ঠেসু জনপদেসু চ;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, সমণব্রাহ্মণেসু চ;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, মিগপক্খীসু খত্তিয;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, ধম্মো চিণ্ণো সুখাৰহো;

ইধ ধম্মং চরিত্ৰান, রাজ সগ্গং গমিস্সসি.

‘‘ধম্মং চর মহারাজ, সইন্দা দেৰা সব্রহ্মকা;

সুচিণ্ণেন দিৰং পত্তা, মা ধম্মং রাজ পামদো’’তি. (জা. ২.১৮.১১৪-১২৩);

ইতি নেসাদপুত্তো মহাসত্তেন দেসিতনিযামেন আকাসগঙ্গং ওতারেন্তো ৰিয বুদ্ধলীলায ধম্মং দেসেসি. মহাজনো সাধুকারসহস্সানি পৰত্তেসি. ধম্মকথং সুত্ৰাযেৰ দেৰিযা দোহল়ো পটিপ্পস্সম্ভি. রাজা তুস্সিত্ৰা লুদ্দপুত্তং মহন্তেন যসেন সন্তপ্পেন্তো তিস্সো গাথা অভাসি –

১৩০.

‘‘দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ পল্লঙ্কং, উমাপুপ্ফসরিন্নিভং.

১৩১.

‘‘দ্ৰে চ সাদিসিযো ভরিযা, উসভঞ্চ গৰং সতং;

ধম্মেন রজ্জং কারেস্সং, বহুকারো মেসি লুদ্দক.

১৩২.

‘‘কসিৰাণিজ্জা ইণদানং, উচ্ছাচরিযা চ লুদ্দক;

এতেন দারং পোসেহি, মা পাপং অকরী পুনা’’তি.

তত্থ থূলন্তি মহগ্ঘং মণিকুণ্ডলপসাধনঞ্চ তে দম্মি. চতুস্সদন্তি চতুরুস্সদং, চতুউস্সীসকন্তি অত্থো. উমাপুপ্ফসরিন্নিভন্তি নীলপচ্চত্থরণত্তা উমাপুপ্ফসদিসায নিভায ওভাসেন সমন্নাগতং, কাল়ৰণ্ণদারুসারমযং ৰা. সাদিসিযোতি অঞ্ঞমঞ্ঞং রূপেন চ ভোগেন চ সদিসা. উসভঞ্চ গৰং সতন্তি উসভং জেট্ঠকং কত্ৰা গৰং সতঞ্চ তে দম্মি. কারেস্সন্তি দস রাজধম্মে অকোপেন্তো ধম্মেনেৰ রজ্জং কারেস্সামি. বহুকারো মেসীতি সুৰণ্ণৰণ্ণস্স মিগরঞ্ঞো ঠানে ঠত্ৰা ধম্মস্স দেসিতত্তা ত্ৰং মম বহুপকারো, মিগরাজেন ৰুত্তনিযামেনেৰ তে অহং পঞ্চসু সীলেসু পতিট্ঠাপিতো. কসিৰাণিজ্জাতি সম্ম লুদ্দক, অহম্পি মিগরাজানং অদিস্ৰা তস্স ৰচনমেৰ সুত্ৰা পঞ্চসু সীলেসু পতিট্ঠিতো, ত্ৰম্পি ইতো পট্ঠায সীলৰা হোহি, যানি তানি কসিৰাণিজ্জানি ইণদানং উঞ্ছাচরিযাতি আজীৰমুখানি, এতেনেৰ সম্মাআজীৰেন তৰ পুত্তদারং পোসেহি, মা পুন পাপং করীতি.

সো রঞ্ঞো কথং সুত্ৰা ‘‘ন মে ঘরাৰাসেনত্থো, পব্বজ্জং মে অনুজানাথ দেৰা’’তি অনুজানাপেত্ৰা রঞ্ঞা দিন্নধনং পুত্তদারস্স দত্ৰা হিমৰন্তং পৰিসিত্ৰা ইসিপব্বজ্জং পব্বজিত্ৰা অট্ঠ সমাপত্তিযো নিব্বত্তেত্ৰা ব্রহ্মলোকপরাযণো অহোসি. রাজাপি মহাসত্তস্স ওৰাদে ঠত্ৰা সগ্গপুরং পূরেসি, তস্স ওৰাদো ৰস্সসহস্সং পৰত্তি.

সত্থা ইমং ধম্মদেসনং আহরিত্ৰা ‘‘এৰং ভিক্খৰে পুব্বেপি মমত্থায আনন্দেন জীৰিতং পরিচ্চত্তমেৰা’’তি ৰত্ৰা জাতকং সমোধানেসি – ‘‘তদা লুদ্দো ছন্নো অহোসি, রাজা সারিপুত্তো, দেৰী খেমা ভিক্খুনী, মাতাপিতরো মহারাজকুলানি, সুতনা উপ্পলৰণ্ণা, চিত্তমিগো আনন্দো, অসীতি মিগসহস্সানি সাকিযগণো, রোহণো মিগরাজা পন অহমেৰ অহোসি’’ন্তি.

রোহণমিগজাতকৰণ্ণনা পঞ্চমা.

[৫০২] ৬. চূল়হংসজাতকৰণ্ণনা

এতে হংসা পক্কমন্তীতি ইদং সত্থা ৰেল়ুৰনে ৰিহরন্তো আনন্দথেরস্স জীৰিতপরিচ্চাগমেৰ আরব্ভ কথেসি. তদাপি হি ধম্মসভাযং থেরস্স গুণকথং কথেন্তেসু ভিক্খূসু সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি আনন্দেন মমত্থায জীৰিতং পরিচ্চত্তমেৰা’’তি ৰত্ৰা অতীতং আহরি.

অতীতে বারাণসিযং বহুপুত্তকো নাম রাজা রজ্জং কারেসি. খেমা নামস্স অগ্গমহেসী অহোসি. তদা মহাসত্তো সুৰণ্ণহংসযোনিযং নিব্বত্তিত্ৰা নৰুতিহংসসহস্সপরিৰুতো চিত্তকূটে ৰসি. তদাপি দেৰী ৰুত্তনযেনেৰ সুপিনং দিস্ৰা রঞ্ঞো সুৰণ্ণৰণ্ণহংসস্স ধম্মদেসনাসৰনদোহল়ং আরোচেসি. রাজাপি অমচ্চে পুচ্ছিত্ৰা ‘‘সুৰণ্ণৰণ্ণহংসা নাম চিত্তকূটপব্বতে ৰসন্তী’’তি চ সুত্ৰা খেমং নাম সরং কারেত্ৰা নানপ্পকারানি নিৰাপধঞ্ঞানি রোপাপেত্ৰা চতূসু কণ্ণেসু দেৰসিকং অভযঘোসনং ঘোসাপেসি, একঞ্চ লুদ্দপুত্তং হংসানং গহণত্থায পযোজেসি. তস্স পযোজিতাকারো চ, তেন তত্থ সকুণানং উপপরিক্খিতভাৰো চ, সুৰণ্ণহংসানং আগতকালে রঞ্ঞো আরোচেত্ৰা পাসানং ওড্ডিতনিযামো চ, মহাসত্তস্স পাসে বদ্ধনিযামো চ, সুমুখস্স হংসসেনাপতিনো তীসু হংসঘটাসু তং অদিস্ৰা নিৰত্তনঞ্চ সব্বং মহাহংসজাতকে (জা. ২.২১.৮৯ আদযো) আৰি ভৰিস্সতি. ইধাপি মহাসত্তো যট্ঠিপাসে বজ্ঝিত্ৰা পাসযট্ঠিযং ওলম্বন্তোযেৰ গীৰং পসারেত্ৰা হংসানং গতমগ্গং ওলোকেন্তো সুমুখং আগচ্ছন্তং দিস্ৰা ‘‘আগতকালে নং ৰীমংসিস্সামী’’তি চিন্তেত্ৰা তস্মিং আগতে তিস্সো গাথা অভাসি –

১৩৩.

‘‘এতে হংসা পক্কমন্তি, ৰক্কঙ্গা ভযমেরিতা;

হরিত্তচ হেমৰণ্ণ, কামং সুমুখ পক্কম.

১৩৪.

‘‘ওহায মং ঞাতিগণা, একং পাসৰসং গতং;

অনপেক্খমানা গচ্ছন্তি, কিং একো অৰহিয্যসি.

১৩৫.

‘‘পতেৰ পততং সেট্ঠ, নত্থি বদ্ধে সহাযতা;

মা অনীঘায হাপেসি, কামং সুমুখ পক্কমা’’তি.

তত্থ ভযমেরিতাতি ভযেরিতা ভযতজ্জিতা ভযচলিতা. হরিত্তচ হেমৰণ্ণাতি দ্ৰীহিপি ৰচনেহি তমেৰালপতি. কামন্তি সুৰণ্ণত্তচ, সুৰণ্ণৰণ্ণ, সুন্দরমুখ একংসেন পক্কমাহিযেৰ, কিং তে ইধাগমনেনাতি ৰদতি. ওহাযাতি মং জহিত্ৰা উপ্পতিতা. অনপেক্খমানাতি তে মম ঞাতকা মযি অনপেক্খাৰ গচ্ছন্তি. পতেৰাতি উপ্পতেৰ. মা অনীঘাযাতি ইতো গন্ত্ৰা পত্তব্বায নিদ্দুক্খভাৰায ৰীরিযং মা হাপেসি.

ততো সুমুখো পঙ্কপিট্ঠে নিসীদিত্ৰা গাথমাহ –

১৩৬.

‘‘নাহং দুক্খপরেতোতি, ধতরট্ঠ তুৰং জহে;

জীৰিতং মরণং ৰা মে, তযা সদ্ধিং ভৰিস্সতী’’তি.

তত্থ দুক্খপরেতোতি মহারাজ, ‘‘ত্ৰং মরণদুক্খপরেতো’’তি এত্তকেনেৰ নাহং তং জহামি.

এৰং সুমুখেন সীহনাদে কথিতে ধতরট্ঠো গাথমাহ –

১৩৭.

‘‘এতদরিযস্স কল্যাণং, যং ত্ৰং সুমুখ ভাসসি;

তঞ্চ ৰীমংসমানোহং, পততেতং অৰস্সজি’’ন্তি.

তত্থ এতদরিযস্সাতি যং ত্ৰং ‘‘নাহং তং জহে’’তি ভাসসি, এতং আচারসম্পন্নস্স অরিযস্স কল্যাণং উত্তমৰচনং. পততেতন্তি অহঞ্চ ন তং ৰিস্সজ্জেতুকামোৰ এৰং অৰচং, অথ খো তং ৰীমংসমানো ‘‘পততূ’’তি এতং ৰচনং অৰস্সজিং, গচ্ছাতি তং অৰোচন্তি অত্থো.

এৰং তেসং কথেন্তানঞ্ঞেৰ লুদ্দপুত্তো দণ্ডমাদায ৰেগেনাগতো. সুমুখো ধতরট্ঠং অস্সাসেত্ৰা তস্সাভিমুখো গন্ত্ৰা অপচিতিং দস্সেত্ৰা হংসরঞ্ঞো গুণে কথেসি. তাৰদেৰ লুদ্দো মুদুচিত্তো অহোসি. সো তস্স মুদুচিত্তকং ঞত্ৰা পুন গন্ত্ৰা হংসরাজমেৰ অস্সাসেন্তো অট্ঠাসি. লুদ্দোপি হংসরাজানং উপসঙ্কমিত্ৰা ছট্ঠং গাথমাহ –

১৩৮.

‘‘অপদেন পদং যাতি, অন্তলিক্খচরো দিজো;

আরা পাসং ন বুজ্ঝি ত্ৰং, হংসানং পৰরুত্তমা’’তি.

তত্থ অপদেন পদন্তি মহারাজ, তুম্হাদিসো অন্তলিক্খচরো দিজো অপদে আকাসে পদং কত্ৰা যাতি. ন বুজ্ঝি ত্ৰন্তি সো ত্ৰং এৰরূপো দূরতোৰ ইমং পাসং ন বুজ্ঝি ন জানীতি পুচ্ছতি.

মহাসত্তো আহ –

১৩৯.

‘‘যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতী’’তি.

তত্থ যদা পরাভৰোতি সম্ম লুদ্দপুত্ত, যদা পরাভৰো অৰুড্ঢি ৰিনাসো সম্পত্তো হোতি, অথ পোসো জীৰিতসঙ্খযে পত্তে জালঞ্চ পাসঞ্চ পত্ৰাপি ন জানাতীতি অত্থো.

লুদ্দো হংসরঞ্ঞো কথং অভিনন্দিত্ৰা সুমুখেন সদ্ধিং সল্লপন্তো তিস্সো গাথা অভাসি –

১৪০.

‘‘এতে হংসা পক্কমন্তি, ৰক্কঙ্গা ভযমেরিতা;

হরিত্তচ হেমৰণ্ণ, ত্ৰঞ্ঞেৰ অৰহিয্যসি.

১৪১.

‘‘এতে ভুত্ৰা চ পিৰিত্ৰা চ, পক্কমন্তি ৰিহঙ্গমা;

অনপেক্খমানা ৰক্কঙ্গা, ত্ৰঞ্ঞেৰেকো উপাসসি.

১৪২.

‘‘কিং নু ত্যাযং দিজো হোতি, মুত্তো বদ্ধং উপাসসি;

ওহায সকুণা যন্তি, কিং একো অৰহিয্যসী’’তি.

তত্থ ত্ৰঞ্ঞেৰাতি ত্ৰমেৰ ওহিয্যসীতি পুচ্ছতি. উপাসসীতি পযিরুপাসসি.

সুমুখো আহ –

১৪৩.

‘‘রাজা মে সো দিজো মিত্তো, সখা পাণসমো চ মে;

নেৰ নং ৰিজহিস্সামি, যাৰ কালস্স পরিযায’’ন্তি.

তত্থ যাৰ কালস্স পরিযাযন্তি লুদ্দপুত্ত, যাৰ জীৰিতকালস্স পরিযোসানং অহং এতং ন ৰিজহিস্সামিযেৰ.

তং সুত্ৰা লুদ্দো পসন্নচিত্তো হুত্ৰা ‘‘সচাহং এৰং সীলসম্পন্নেসু ইমেসু অপরজ্ঝিস্সামি, পথৰীপি মে ৰিৰরং দদেয্য, কিং মে রঞ্ঞো সন্তিকা লদ্ধেন ধনেন, ৰিস্সজ্জেস্সামি ন’’ন্তি চিন্তেত্ৰা গাথমাহ –

১৪৪.

‘‘যো চ ত্ৰং সখিনো হেতু, পাণং চজিতুমিচ্ছসি;

সো তে সহাযং মুঞ্চামি, হোতু রাজা তৰানুগো’’তি.

তত্থ যো চ ত্ৰন্তি যো নাম ত্ৰং. সোতি সো অহং. তৰানুগোতি এস হংসরাজা তৰ ৰসং অনুগতো হোতু, তযা সদ্ধিং একট্ঠানে ৰসতু.

এৰঞ্চ পন ৰত্ৰা ধতরট্ঠং যট্ঠিপাসতো ওতারেত্ৰা সরতীরং নেত্ৰা পাসং মুঞ্চিত্ৰা মুদুচিত্তেন লোহিতং ধোৰিত্ৰা ন্হারুআদীনি পটিপাদেসি. তস্স মুদুচিত্ততায মহাসত্তস্স পারমিতানুভাৰেন চ তাৰদেৰ পাদো সচ্ছৰি অহোসি, বদ্ধট্ঠানম্পি ন পঞ্ঞাযি. সুমুখো বোধিসত্তং ওলোকেত্ৰা তুট্ঠচিত্তো অনুমোদনং করোন্তো গাথমাহ –

১৪৫.

‘‘এৰং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, মুত্তং দিস্ৰা দিজাধিপ’’ন্তি.

তং সুত্ৰা লুদ্দো ‘‘গচ্ছথ, সামী’’তি আহ. অথ নং মহাসত্তো ‘‘কিং পন ত্ৰং সম্ম, মং অত্তনো অত্থায বন্ধি, উদাহু অঞ্ঞস্স আণত্তিযা’’তি পুচ্ছিত্ৰা তেন তস্মিং কারণে আরোচিতে ‘‘কিং নু খো মে ইতোৰ চিত্তকূটং গন্তুং সেয্যো, উদাহু নগর’’ন্তি ৰিমংসন্তো ‘‘মযি নগরং গতে লুদ্দপুত্তো ধনং লভিস্সতি, দেৰিযা দোহল়ো পটিপ্পস্সম্ভিস্সতি, সুমুখস্স মিত্তধম্মো পাকটো ভৰিস্সতি, তথা মম ঞাণবলং, খেমঞ্চ সরং অভযদক্খিণং কত্ৰা লভিস্সামি, তস্মা নগরমেৰ গন্তুং সেয্যো’’তি সন্নিট্ঠানং কত্ৰা ‘‘লুদ্দ, ত্ৰং অম্হে কাজেনাদায রঞ্ঞো সন্তিকং নেহি, সচে নো রাজা ৰিস্সজ্জেতুকামো ভৰিস্সতি, ৰিস্সজ্জেস্সতী’’তি আহ. রাজানো নাম সামি, কক্খল়া, গচ্ছথ তুম্হেতি. মযং তাদিসং লুদ্দম্পি মুদুকং করিম্হ, রঞ্ঞো আরাধনে অম্হাকং ভারো, নেহিযেৰ নো, সম্মাতি. সো তথা অকাসি. রাজা হংসে দিস্ৰাৰ সোমনস্সজাতো হুত্ৰা দ্ৰেপি হংসে কঞ্চনপীঠে নিসীদাপেত্ৰা মধুলাজে খাদাপেত্ৰা মধুরোদকং পাযেত্ৰা অঞ্জলিং পগ্গয্হ ধম্মকথং আযাচি. হংসরাজা তস্স সোতুকামতং ৰিদিত্ৰা পঠমং তাৰ পটিসন্থারমকাসি. তত্রিমা হংসস্স চ রঞ্ঞো চ ৰচনপটিৰচনগাথাযো হোন্তি –

১৪৬.

‘‘কচ্চিন্নু ভোতো কুসলং, কচ্চি ভোতো অনামযং;

কচ্চি রট্ঠমিদং ফীতং, ধম্মেন মনুসাসসি.

১৪৭.

‘‘কুসলং চেৰ মে হংস, অথো হংস অনামযং;

অথো রট্ঠমিদং ফীতং, ধম্মেন মনুসাসহং.

১৪৮.

‘‘কচ্চি ভোতো অমচ্চেসু, দোসো কোচি ন ৰিজ্জতি;

কচ্চি আরা অমিত্তা তে, ছাযা দক্খিণতোরিৰ.

১৪৯.

‘‘অথোপি মে অমচ্চেসু, দোসো কোচি ন ৰিজ্জতি;

অথো আরা অমিত্তা মে, ছাযা দক্খিণতোরিৰ.

১৫০.

‘‘কচ্চি তে সাদিসী ভরিযা, অস্সৰা পিযভাণিনী;

পুত্তরূপযসূপেতা, তৰ ছন্দৰসানুগা.

১৫১.

‘‘অথো মে সাদিসী ভরিযা, অস্সৰা পিযভাণিনী;

পুত্তরূপযসূপেতা, মম ছন্দৰসানুগা.

১৫২.

‘‘কচ্চি তে বহৰো পুত্তা, সুজাতা রট্ঠৰড্ঢন;

পঞ্ঞাজৰেন সম্পন্না, সম্মোদন্তি ততো ততো.

১৫৩.

‘‘সতমেকো চ মে পুত্তা, ধতরট্ঠ মযা সুতা;

তেসং ত্ৰং কিচ্চমক্খাহি, নাৰরুজ্ঝন্তি তে ৰচো’’তি.

তত্থ কুসলন্তি আরোগ্যং, ইতরং তস্সেৰ ৰেৰচনং. ফীতন্তি কচ্চি তে ইদং রট্ঠং ফীতং সুভিক্খং, ধম্মেন চ নং অনুসাসসীতি পুচ্ছতি. দোসোতি অপরাধো. ছাযা দক্খিণতোরিৰাতি যথা নাম দক্খিণদিসাভিমুখা ছাযা ন ৰড্ঢতি, এৰং তে কচ্চি অমিত্তা ন ৰড্ঢন্তীতি ৰদতি. সাদিসীতি জাতিগোত্তকুলপদেসেহি সমানা. এৰরূপা হি অতিচারিনী ন হোতি. অস্সৰাতি ৰচনপটিগ্গাহিকা. পুত্তরূপযসূপেতাতি পুত্তেহি চ রূপেন চ যসেন চ উপেতা. পঞ্ঞাজৰেনাতি পঞ্ঞাৰেগেন পঞ্ঞং জৰাপেত্ৰা তানি তানি কিচ্চানি পরিচ্ছিন্দিতুং সমত্থাতি পুচ্ছতি. সম্মোদন্তি ততো ততোতি যত্থ যত্থ নিযুত্তা হোন্তি, ততো ততো সম্মোদন্তেৰ, ন ৰিরুজ্ঝন্তীতি পুচ্ছতি. মযা সুতাতি মযা ৰিস্সুতা. মঞ্হি লোকো ‘‘বহুপুত্তরাজা’’তি ৰদতি, ইতি তে মং নিস্সায ৰিস্সুতা পাকটা জাতাতি মযা সুতা নাম হোন্তীতি ৰদতি. তেসং ত্ৰং কিচ্চমক্খাহীতি তেসং মম পুত্তানং ‘‘ইদং নাম করোন্তূ’’তি ত্ৰং কিচ্চমক্খাহি, ন তে ৰচনং অৰরুজ্ঝন্তি, ওৰাদং নেসং দেহীতি অধিপ্পাযেনেৰমাহ.

তং সুত্ৰা মহাসত্তো তস্স ওৰাদং দেন্তো পঞ্চ গাথা অভাসি –

১৫৪.

‘‘উপপন্নোপি চে হোতি, জাতিযা ৰিনযেন ৰা;

অথ পচ্ছা কুরুতে যোগং, কিচ্ছে আপাসু সীদতি.

১৫৫.

‘‘তস্স সংহীরপঞ্ঞস্স, ৰিৰরো জাযতে মহা;

রত্তিমন্ধোৰ রূপানি, থূলানি মনুপস্সতি.

১৫৬.

‘‘অসারে সারযোগঞ্ঞূ, মতিং ন ত্ৰেৰ ৰিন্দতি;

সরভোৰ গিরিদুগ্গস্মিং, অন্তরাযেৰ সীদতি.

১৫৭.

‘‘হীনজচ্চোপি চে হোতি, উট্ঠাতা ধিতিমা নরো;

আচারসীলসম্পন্নো, নিসে অগ্গীৰ ভাসতি.

১৫৮.

‘‘এতং মে উপমং কত্ৰা, পুত্তে ৰিজ্জাসু ৰাচয;

সংৰিরূল়্হেথ মেধাৰী, খেত্তে বীজংৰ ৰুট্ঠিযা’’তি.

তত্থ ৰিনযেনাতি আচারেন. পচ্ছা কুরুতে যোগন্তি যো চে সিক্খিতব্বসিক্খাসু দহরকালে যোগং ৰীরিযং অকত্ৰা পচ্ছা মহল্লককালে করোতি, এৰরূপো পচ্ছা তথারূপে দুক্খে ৰা আপদাসু ৰা উপ্পন্নাসু সীদতি, অত্তানং উদ্ধরিতুং ন সক্কোতি. তস্স সংহীরপঞ্ঞস্সাতি তস্স অসিক্খিতত্তা ততো ততো হরিতব্বপঞ্ঞস্স নিচ্চং চলবুদ্ধিনো. ৰিৰরোতি ভোগাদীনং ছিদ্দং, পরিহানীতি অত্থো. রত্তিমন্ধোতি রত্তন্ধো. ইদং ৰুত্তং হোতি – ‘‘যথা রত্তন্ধো রত্তিকাণো রত্তিং চন্দোভাসাদীহি থূলরূপানেৰ পস্সতি, সুখুমানি পস্সিতুং ন সক্কোতি, এৰং অসিক্খিতো সংহীরপঞ্ঞো কিস্মিঞ্চিদেৰ ভযে উপ্পন্নে সুখুমানি কিচ্চানি পস্সিতুং ন সক্কোতি, ওল়ারিকেযেৰ পস্সতি, তস্মা তৰ পুত্তে দহরকালেযেৰ সিক্খাপেতুং ৰট্টতী’’তি.

অসারেতি নিস্সারে লোকাযতৰেদসমযে. সারযোগঞ্ঞূতি সারযুত্তো এস সমযোতি মঞ্ঞমানো. মতিং ন ত্ৰেৰ ৰিন্দতীতি বহুং সিক্খিত্ৰাপি পঞ্ঞং ন লভতিযেৰ. গিরিদুগ্গস্মিন্তি সো এৰরূপো যথা নাম সরভো অত্তনো ৰসনট্ঠানং আগচ্ছন্তো অন্তরামগ্গে ৰিসমম্পি সমন্তি মঞ্ঞমানো গিরিদুগ্গে ৰেগেনাগচ্ছন্তো নরকপপাতং পতিত্ৰা অন্তরাযেৰ সীদতি, আৰাসং ন পাপুণাতি, এৰমেতং অসারং লোকাযতৰেদসমযং সারসঞ্ঞায উগ্গহেত্ৰা মহাৰিনাসং পাপুণাতি. তস্মা তৰ পুত্তে অত্থনিস্সিতেসু ৰড্ঢিআৰহেসু কিচ্চেসু যোজেত্ৰা সিক্খাপেহীতি. নিসে অগ্গীৰাতি মহারাজ, হীনজাতিকোপি উট্ঠানাদিগুণসম্পন্নো রত্তিং অগ্গিক্খন্ধো ৰিয ওভাসতি. এতং মেতি এতং মযা ৰুত্তং রত্তন্ধঞ্চ অগ্গিক্খন্ধঞ্চ উপমং কত্ৰা তৰ পুত্তে ৰিজ্জাসু ৰাচয, সিক্খিতব্বযুত্তাসু সিক্খাসু যোজেহি. এৰং যুত্তো হি যথা সুখেত্তে সুৰুট্ঠিযা বীজং সংৰিরূহতি, তথেৰ মেধাৰী সংৰিরূহতি, যসেন চ ভোগেহি চ ৰড্ঢতীতি.

এৰং মহাসত্তো সব্বরত্তিং রঞ্ঞো ধম্মং দেসেসি, দেৰিযা দোহল়ো পটিপ্পস্সম্ভি. মহাসত্তো অরুণুগ্গমনৰেলাযমেৰ রাজানং পঞ্চসু সীলেসু পতিট্ঠপেত্ৰা অপ্পমাদেন ওৰদিত্ৰা সদ্ধিং সুমুখেন উত্তরসীহপঞ্জরেন নিক্খমিত্ৰা চিত্তকূটমেৰ গতো.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি ইমিনা মমত্থায জীৰিতং পরিচ্চত্তমেৰা’’তি ৰত্ৰা জাতকং সমোধানেসি – ‘‘তদা লুদ্দো ছন্নো অহোসি, রাজা সারিপুত্তো, দেৰী খেমাভিক্খুনী, হংসপরিসা সাকিযগণো, সুমুখো আনন্দো, হংসরাজা পন অহমেৰ অহোসি’’ন্তি.

চূল়হংসজাতকৰণ্ণনা ছট্ঠা.

[৫০৩] ৭. সত্তিগুম্বজাতকৰণ্ণনা

মিগলুদ্দো মহারাজাতি ইদং সত্থা মদ্দকুচ্ছিস্মিং মিগদাযে ৰিহরন্তো দেৰদত্তং আরব্ভ কথেসি. দেৰদত্তেন হি সিলায পৰিদ্ধায ভগৰতো পাদে সকলিকায খতে বলৰৰেদনা উপ্পজ্জি. তথাগতস্স দস্সনত্থায বহূ ভিক্খূ সন্নিপতিংসু. অথ ভগৰা পরিসং সন্নিপতিতং দিস্ৰা ‘‘ভিক্খৰে, ইদং সেনাসনং অতিসম্বাধং, সন্নিপাতো মহা ভৰিস্সতি, মং মঞ্চসিৰিকায মদ্দকুচ্ছিং নেথা’’তি আহ. ভিক্খূ তথা করিংসু. জীৰকো তথাগতস্স পাদং ফাসুকং অকাসি. ভিক্খূ সত্থু সন্তিকে নিসিন্নাৰ কথং সমুট্ঠাপেসুং ‘‘আৰুসো, দেৰদত্তো সযম্পি পাপো, পরিসাপিস্স পাপা, ইতি সো পাপো পাপপরিৰারোৰ ৰিহরতী’’তি. সত্থা ‘‘কিং কথেথ, ভিক্খৰে’’তি পুচ্ছিত্ৰা ‘‘ইদং নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি দেৰদত্তো পাপো পাপপরিৰারোযেৰা’’তি ৰত্ৰা অতীতং আহরি.

অতীতে উত্তরপঞ্চালনগরে পঞ্চালো নাম রাজা রজ্জং কারেসি. মহাসত্তো অরঞ্ঞাযতনে একস্মিং সানুপব্বতে সিম্বলিৰনে একস্স সুৰরঞ্ঞো পুত্তো হুত্ৰা নিব্বত্তি, দ্ৰে ভাতরো অহেসুং. তস্স পন পব্বতস্স উপরিৰাতে চোরগামকো অহোসি পঞ্চন্নং চোরসতানং নিৰাসো, অধোৰাতে অস্সমো পঞ্চন্নং ইসিসতানং নিৰাসো. তেসং সুৰপোতকানং পক্খনিক্খমনকালে ৰাতমণ্ডলিকা উদপাদি. তায পহটো একো সুৰপোতকো চোরগামকে চোরানং আৰুধন্তরে পতিতো, তস্স তত্থ পতিতত্তা ‘‘সত্তিগুম্বো’’ত্ৰেৰ নামং করিংসু. একো অস্সমে ৰালুকতলে পুপ্ফন্তরে পতি, তস্স তত্থ পতিতত্তা ‘‘পুপ্ফকো’’ত্ৰেৰ নামং করিংসু. সত্তিগুম্বো চোরানং অন্তরে ৰড্ঢিতো, পুপ্ফকো ইসীনং.

অথেকদিৰসং রাজা সব্বালঙ্কারপটিমণ্ডিতো রথৰরং অভিরুহিত্ৰা মহন্তেন পরিৰারেন মিগৰধায নগরতো নাতিদূরে সুপুপ্ফিতফলিতং রমণীযং উপগুম্বৰনং গন্ত্ৰা ‘‘যস্স পস্সেন মিগো পলাযতি, তস্সেৰ গীৰা’’তি ৰত্ৰা রথা ওরুয্হ পটিচ্ছাদেত্ৰা দিন্নে কোট্ঠকে ধনুং আদায অট্ঠাসি. পুরিসেহি মিগানং উট্ঠাপনত্থায ৰনগুম্বেসু পোথিযমানেসু একো এণিমিগো উট্ঠায গমনমগ্গং ওলোকেন্তো রঞ্ঞো ঠিতট্ঠানস্সেৰ ৰিৰিত্ততং দিস্ৰা তদভিমুখো পক্খন্দিত্ৰা পলাযি. অমচ্চা ‘‘কস্স পস্সেন মিগো পলাযিতো’’তি পুচ্ছন্তা ‘‘রঞ্ঞো পস্সেনা’’তি ঞত্ৰা রঞ্ঞা সদ্ধিং কেল়িং করিংসু. রাজা অস্মিমানেন তেসং কেল়িং অসহন্তো ‘‘ইদানি তং মিগং গহেস্সামী’’তি রথং আরুয্হ ‘‘সীঘং পেসেহী’’তি সারথিং আণাপেত্ৰা মিগেন গতমগ্গং পটিপজ্জি. রথং ৰেগেন গচ্ছন্তং পরিসা অনুবন্ধিতুং নাসক্খি. রাজা সারথিদুতিযো যাৰ মজ্ঝন্হিকা গন্ত্ৰা তং মিগং অদিস্ৰা নিৰত্তন্তো তস্স চোরগামস্স সন্তিকে রমণীযং কন্দরং দিস্ৰা রথা ওরুয্হ ন্হত্ৰা চ পিৰিত্ৰা চ পচ্চুত্তরি. অথস্স সারথি রথস্স উত্তরত্থরণং ওতারেত্ৰা সযনং রুক্খচ্ছাযায পঞ্ঞপেসি, সো তত্থ নিপজ্জি. সারথিপি তস্স পাদে সম্বাহন্তো নিসীদি. রাজা অন্তরন্তরা নিদ্দাযতি চেৰ পবুজ্ঝতি চ.

চোরগামৰাসিনো চোরাপি রঞ্ঞো আরক্খণত্থায অরঞ্ঞমেৰ পৰিসিংসু. চোরগামকে সত্তিগুম্বো চেৰ ভত্তরন্ধকো পতিকোলম্বো নামেকো পুরিসো চাতি দ্ৰেৰ ওহীযিংসু. তস্মিং খণে সত্তিগুম্বো গামকা নিক্খমিত্ৰা রাজানং দিস্ৰা ‘‘ইমং নিদ্দাযমানমেৰ মারেত্ৰা আভরণানি গহেস্সামা’’তি চিন্তেত্ৰা পতিকোলম্বস্স সন্তিকং গন্ত্ৰা তং কারণং আরোচেসি. তমত্থং পকাসেন্তো সত্থা পঞ্চ গাথা অভাসি –

১৫৯.

‘‘মিগলুদ্দো মহারাজা, পঞ্চালানং রথেসভো;

নিক্খন্তো সহ সেনায, ওগণো ৰনমাগমা.

১৬০.

‘‘তত্থদ্দসা অরঞ্ঞস্মিং, তক্করানং কুটিং কতং;

তস্সা কুটিযা নিক্খম্ম, সুৰো লুদ্দানি ভাসতি.

১৬১.

‘‘সম্পন্নৰাহনো পোসো, যুৰা সম্মট্ঠকুণ্ডলো;

সোভতি লোহিতুণ্হীসো, দিৰা সূরিযোৰ ভাসতি.

১৬২.

‘‘মজ্ঝন্হিকে সম্পতিকে, সুত্তো রাজা সসারথি;

হন্দস্সাভরণং সব্বং, গণ্হাম সাহসা মযং.

১৬৩.

‘‘নিসীথেপি রহোদানি, সুত্তো রাজা সসারথি;

আদায ৰত্থং মণিকুণ্ডলঞ্চ, হন্ত্ৰান সাখাহি অৰত্থরামা’’তি.

তত্থ মিগলুদ্দোতি লুদ্দো ৰিয মিগানং গৰেসনতো ‘‘মিগলুদ্দো’’তি ৰুত্তো. ওগণোতি গণা ওহীনো পরিহীনো হুত্ৰা. তক্করানং কুটিং কতন্তি সো রাজা তত্থ অরঞ্ঞে চোরানং ৰসনত্থায কতং গামকং অদ্দস. তস্সাতি ততো চোরকুটিতো. লুদ্দানি ভাসতীতি পতিকোলম্বেন সদ্ধিং দারুণানি ৰচনানি কথেতি. সম্পন্নৰাহনোতি সম্পন্নঅস্সৰাহনো. লোহিতুণ্হীসোতি রত্তেন উণ্হীসপট্টেন সমন্নাগতো. সম্পতিকেতি সম্পতি ইদানি, এৰরূপে ঠিতমজ্ঝন্হিককালেতি অত্থো. সাহসাতি সাহসেন পসয্হাকারং কত্ৰা গণ্হামাতি ৰদতি. নিসীথেপি রহোদানীতি নিসীথেপি ইদানিপি রহো. ইদং ৰদতি – যথা নিসীথে অড্ঢরত্তসমযে মনুস্সা কিলন্তা সযন্তি, রহো নাম হোতি, ইদানি ঠিতমজ্ঝন্হিকেপি কালে তথেৰাতি. হন্ত্ৰানাতি রাজানং মারেত্ৰা ৰত্থাভরণানিস্স গহেত্ৰা অথ নং পাদে গহেত্ৰা কড্ঢিত্ৰা একমন্তে সাখাহি পটিচ্ছাদেমাতি.

ইতি সো ৰেগেন সকিং নিক্খমতি, সকিং পতিকোলম্বস্স সন্তিকং গচ্ছতি. সো তস্স ৰচনং সুত্ৰা নিক্খমিত্ৰা ওলোকেন্তো রাজভাৰং ঞত্ৰা ভীতো গাথমাহ –

১৬৪.

‘‘কিন্নু উম্মত্তরূপোৰ, সত্তিগুম্ব পভাসসি;

দুরাসদা হি রাজানো, অগ্গি পজ্জলিতো যথা’’তি.

অথ নং সুৰো গাথায অজ্ঝভাসি –

১৬৫.

‘‘অথ ত্ৰং পতিকোলম্ব, মত্তো থুল্লানি গজ্জসি;

মাতরি ময্হ নগ্গায, কিন্নু ত্ৰং ৰিজিগুচ্ছসে’’তি.

তত্থ অথ ত্ৰন্তি ননু ত্ৰং. মত্তোতি চোরানং উচ্ছিট্ঠসুরং লভিত্ৰা তায মত্তো হুত্ৰা পুব্বে মহাগজ্জিতানি গজ্জসি. মাতরীতি চোরজেট্ঠকস্স ভরিযং সন্ধাযাহ. সা কির তদা সাখাভঙ্গং নিৰাসেত্ৰা চরতি. ৰিজিগুচ্ছসেতি মম মাতরি নগ্গায কিন্নু ত্ৰং ইদানি চোরকম্মং জিগুচ্ছসি, কাতুং ন ইচ্ছসীতি.

রাজা পবুজ্ঝিত্ৰা তস্স তেন সদ্ধিং মনুস্সভাসায কথেন্তস্স ৰচনং সুত্ৰা ‘‘সপ্পটিভযং ইদং ঠান’’ন্তি সারথিং উট্ঠাপেন্তো গাথমাহ –

১৬৬.

‘‘উট্ঠেহি সম্ম তরমানো, রথং যোজেহি সারথি;

সকুণো মে ন রুচ্চতি, অঞ্ঞং গচ্ছাম অস্সম’’ন্তি.

সোপি সীঘং উট্ঠহিত্ৰা রথং যোজেত্ৰা গাথমাহ –

১৬৭.

‘‘যুত্তো রথো মহারাজ, যুত্তো চ বলৰাহনো;

অধিতিট্ঠ মহারাজ, অঞ্ঞং গচ্ছাম অস্সম’’ন্তি.

তত্থ বলৰাহনোতি বলৰৰাহনো, মহাথামঅস্সসম্পন্নোতি অত্থো. অধিতিট্ঠাতি অভিরুহ.

অভিরুল়্হমত্তেযেৰ চ তস্মিং সিন্ধৰা ৰাতৰেগেন পক্খন্দিংসু. সত্তিগুম্বো রথং গচ্ছন্তং দিস্ৰা সংৰেগপ্পত্তো দ্ৰে গাথা অভাসি –

১৬৮.

‘‘কো নুমেৰ গতা সব্বে, যে অস্মিং পরিচারকা;

এস গচ্ছতি পঞ্চালো, মুত্তো তেসং অদস্সনা.

১৬৯.

‘‘কোদণ্ডকানি গণ্হথ, সত্তিযো তোমরানি চ;

এস গচ্ছতি পঞ্চালো, মা ৰো মুঞ্চিত্থ জীৰত’’ন্তি.

তত্থ কো নুমেতি কুহিং নু ইমে. অস্মিন্তি ইমস্মিং অস্সমে. পরিচারকাতি চোরা. অদস্সনাতি এতেসং চোরানং অদস্সনেন মুত্তো এস গচ্ছতীতি, এতেসং হত্থতো মুত্তো হুত্ৰা এস অদস্সনং গচ্ছতীতিপি অত্থো. কোদণ্ডকানীতি ধনূনি. জীৰতন্তি তুম্হাকং জীৰন্তানং মা মুঞ্চিত্থ, আৰুধহত্থা ধাৰিত্ৰা গণ্হথ নন্তি.

এৰং তস্স ৰিরৰিত্ৰা অপরাপরং ধাৰন্তস্সেৰ রাজা ইসীনং অস্সমং পত্তো. তস্মিং খণে ইসযো ফলাফলত্থায গতা. একো পুপ্ফকসুৰোৰ অস্সমপদে ঠিতো হোতি. সো রাজানং দিস্ৰা পচ্চুগ্গমনং কত্ৰা পটিসন্থারমকাসি. তমত্থং পকাসেন্তো সত্থা চতস্সো গাথা অভাসি –

১৭০.

‘‘অথাপরো পটিনন্দিত্থ, সুৰো লোহিততুণ্ডকো;

স্ৰাগতং তে মহারাজ, অথো তে অদুরাগতং;

ইস্সরোসি অনুপ্পত্তো, যং ইধত্থি পৰেদয.

১৭১.

‘‘তিণ্ডুকানি পিযালানি, মধুকে কাসুমারিযো;

ফলানি খুদ্দকপ্পানি, ভুঞ্জ রাজ ৰরং ৰরং.

১৭২.

‘‘ইদম্পি পানীযং সীতং, আভতং গিরিগব্ভরা;

ততো পিৰ মহারাজ, সচে ত্ৰং অভিকঙ্খসি.

১৭৩.

‘‘অরঞ্ঞং উঞ্ছায গতা, যে অস্মিং পরিচারকা;

সযং উট্ঠায গণ্হৰ্হো, হত্থা মে নত্থি দাতৰে’’তি.

তত্থ পটিনন্দিত্থাতি রাজানং দিস্ৰাৰ তুস্সি. লোহিততুণ্ডকোতি রত্ততুণ্ডো সোভগ্গপ্পত্তো. মধুকেতি মধুকফলানি. কাসুমারিযোতি এৰংনামকানি ফলানি, কারফলানি ৰা. ততো পিৰাতি ততো পানীযমাল়তো গহেত্ৰা পানীযং পিৰ. যে অস্মিং পরিচারকাতি মহারাজ, যে ইমস্মিং অস্সমে ৰিচরণকা ইসযো, তে অরঞ্ঞং উঞ্ছায গতা. গণ্হৰ্হোতি ফলাফলানি গণ্হথ. দাতৰেতি দাতুং.

রাজা তস্স পটিসন্থারে পসীদিত্ৰা গাথাদ্ৰযমাহ –

১৭৪.

‘‘ভদ্দকো ৰতযং পক্খী, দিজো পরমধম্মিকো;

অথেসো ইতরো পক্খী, সুৰো লুদ্দানি ভাসতি.

১৭৫.

‘‘‘এতং হনথ বন্ধথ, মা ৰো মুঞ্চিত্থ জীৰতং’;

ইচ্চেৰং ৰিলপন্তস্স, সোত্থিং পত্তোস্মি অস্সম’’ন্তি.

তত্থ ইতরোতি চোরকুটিযং সুৰকো. ইচ্চেৰন্তি অহং পন তস্স এৰং ৰিলপন্তস্সেৰ ইমং অস্সমং সোত্থিনা পত্তো.

রঞ্ঞো কথং সুত্ৰা পুপ্ফকো দ্ৰে গাথা অভাসি –

১৭৬.

‘‘ভাতরোস্ম মহারাজ, সোদরিযা একমাতুকা;

একরুক্খস্মিং সংৰড্ঢা, নানাখেত্তগতা উভো.

১৭৭.

‘‘সত্তিগুম্বো চ চোরানং, অহঞ্চ ইসিনং ইধ;

অসতং সো, সতং অহং, তেন ধম্মেন নো ৰিনা’’তি.

তত্থ ভাতরোস্মাতি মহারাজ, সো চ অহঞ্চ উভো ভাতরো হোম. চোরানন্তি সো চোরানং সন্তিকে সংৰড্ঢো, অহং ইসীনং সন্তিকে. অসতং সো, সতং অহন্তি সো অসাধূনং দুস্সীলানং সন্তিকং উপগতো, অহং সাধূনং সীলৰন্তানং. তেন ধম্মেন নো ৰিনাতি মহারাজ, তং সত্তিগুম্বং চোরা চোরধম্মেন চোরকিরিযায ৰিনেসুং, মং ইসযো ইসিধম্মেন ইসিসীলাচারেন, তস্মা সোপি তেন চোরধম্মেন নো ৰিনা হোতি, অহম্পি ইসিধম্মেন নো ৰিনা হোমীতি.

ইদানি তং ধম্মং ৰিভজন্তো গাথাদ্ৰযমাহ –

১৭৮.

‘‘তত্থ ৰধো চ বন্ধো চ, নিকতী ৰঞ্চনানি চ;

আলোপা সাহসাকারা, তানি সো তত্থ সিক্খতি.

১৭৯.

‘‘ইধ সচ্চঞ্চ ধম্মো চ, অহিংসা সংযমো দমো;

আসনূদকদাযীনং, অঙ্কে ৰদ্ধোস্মি ভারধা’’তি.

তত্থ নিকতীতি পতিরূপকেন ৰঞ্চনা. ৰঞ্চনানীতি উজুকৰঞ্চনানেৰ. আলোপাতি দিৰা গামঘাতা. সাহসাকারাতি গেহং পৰিসিত্ৰা মরণেন তজ্জেত্ৰা সাহসিককম্মকরণানি. সচ্চন্তি সভাৰো. ধম্মোতি সুচরিতধম্মো. অহিংসাতি মেত্তাপুব্বভাগো. সংযমোতি সীলসংযমো. দমোতি ইন্দ্রিযদমনং. আসনূদকদাযীনন্তি অব্ভাগতানং আসনঞ্চ উদকঞ্চ দানসীলানং. ভারধাতি রাজানং আলপতি.

ইদানি রঞ্ঞো ধম্মং দেসেন্তো ইমা গাথা অভাসি –

১৮০.

‘‘যং যঞ্হি রাজ ভজতি, সন্তং ৰা যদি ৰা অসং;

সীলৰন্তং ৰিসীলং ৰা, ৰসং তস্সেৰ গচ্ছতি.

১৮১.

‘‘যাদিসং কুরুতে মিত্তং, যাদিসং চূপসেৰতি;

সোপি তাদিসকো হোতি, সহৰাসো হি তাদিসো.

১৮২.

‘‘সেৰমানো সেৰমানং, সম্ফুট্ঠো সম্ফুসং পরং;

সরো দিদ্ধো কলাপংৰ, অলিত্তমুপলিম্পতি;

উপলেপভযা ধীরো, নেৰ পাপসখা সিযা.

১৮৩.

‘‘পূতিমচ্ছং কুসগ্গেন, যো নরো উপনয্হতি;

কুসাপি পূতি ৰাযন্তি, এৰং বালূপসেৰনা.

১৮৪.

‘‘তগরঞ্চ পলাসেন, যো নরো উপনয্হতি;

পত্তাপি সুরভি ৰাযন্তি, এৰং ধীরূপসেৰনা.

১৮৫.

‘‘তস্মা পত্তপুটস্সেৰ, ঞত্ৰা সম্পাকমত্তনো;

অসন্তে নোপসেৰেয্য, সন্তে সেৰেয্য পণ্ডিতো;

অসন্তো নিরযং নেন্তি, সন্তো পাপেন্তি সুগ্গতি’’ন্তি.

তত্থ সন্তং ৰা যদি ৰা অসন্তি সপ্পুরিসং ৰা অসপ্পুরিসং ৰা. সেৰমানো সেৰমানন্তি সেৰিযমানো আচরিযো সেৰমানং অন্তেৰাসিকং. সম্ফুট্ঠোতি অন্তেৰাসিনা ৰা ফুট্ঠো আচরিযো. সম্ফুসং পরন্তি পরং আচরিযং সম্ফুসন্তো অন্তেৰাসী ৰা. অলিত্তন্তি তং অন্তেৰাসিকং পাপধম্মেন অলিত্তং সো আচরিযো ৰিসদিদ্ধো সরো সেসং সরকলাপং ৰিয লিম্পতি. এৰং বালূপসেৰনাতি বালূপসেৰী হি পূতিমচ্ছং উপনয্হনকুসগ্গং ৰিয হোতি, পাপকম্মং অকরোন্তোপি অৰণ্ণং অকিত্তিং লভতি. ধীরূপসেৰনাতি ধীরূপসেৰী পুগ্গলো তগরাদিগন্ধজাতিপলিৰেঠনপত্তং ৰিয হোতি, পণ্ডিতো ভৰিতুং অসক্কোন্তোপি কল্যাণমিত্তসেৰী গুণকিত্তিং লভতি. পত্তপুটস্সেৰাতি দুগ্গন্ধসুগন্ধপলিৰেঠনপণ্ণস্সেৰ. সম্পাকমত্তনোতি কল্যাণমিত্তসংসগ্গৰসেন অত্তনো পরিপাকং পরিভাৰনং ঞত্ৰাতি অত্থো. পাপেন্তি সুগ্গতিন্তি সন্তো সম্মাদিট্ঠিকা অত্তানং নিস্সিতে সত্তে সগ্গমেৰ পাপেন্তীতি দেসনং যথানুসন্ধিমেৰ পাপেসি.

রাজা তস্স ধম্মকথায পসীদি, ইসিগণোপি আগতো. রাজা ইসযো ৰন্দিত্ৰা ‘‘ভন্তে, মং অনুকম্পমানা মম ৰসনট্ঠানে ৰসথা’’তি ৰত্ৰা তেসং পটিঞ্ঞং গহেত্ৰা নগরং গন্ত্ৰা সুৰানং অভযং অদাসি. ইসযোপি তত্থ অগমংসু. রাজা ইসিগণং উয্যানে ৰসাপেন্তো যাৰজীৰং উপট্ঠহিত্ৰা সগ্গপুরং পূরেসি. অথস্স পুত্তোপি ছত্তং উস্সাপেন্তো ইসিগণং পটিজগ্গিযেৰাতি তস্মিং কুলপরিৰট্টে সত্ত রাজানো ইসিগণস্স দানং পৰত্তযিংসু. মহাসত্তো অরঞ্ঞে ৰসন্তোযেৰ যথাকম্মং গতো.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি দেৰদত্তো পাপো পাপপরিৰারোযেৰা’’তি ৰত্ৰা জাতকং সমোধানেসি – ‘‘তদা সত্তিগুম্বো দেৰদত্তো অহোসি, চোরা দেৰদত্তপরিসা, রাজা আনন্দো, ইসিগণা বুদ্ধপরিসা, পুপ্ফকসুৰো পন অহমেৰ অহোসি’’ন্তি.

সত্তিগুম্বজাতকৰণ্ণনা সত্তমা.

[৫০৪] ৮. ভল্লাতিযজাতকৰণ্ণনা

ভল্লাতিযো নাম অহোসি রাজাতি ইদং সত্থা জেতৰনে ৰিহরন্তো মল্লিকং দেৰিং আরব্ভ কথেসি. তস্সা কির একদিৰসং রঞ্ঞা সদ্ধিং সযনং নিস্সায কলহো অহোসি. রাজা কুজ্ঝিত্ৰা নং ন ওলোকেসি. সা চিন্তেসি ‘‘ননু তথাগতো রঞ্ঞো মযি কুদ্ধভাৰং ন জানাতী’’তি. সত্থা তং কারণং ঞত্ৰা পুনদিৰসে ভিক্খুসঙ্ঘপরিৰুতো সাৰত্থিং পিণ্ডায পৰিসিত্ৰা রঞ্ঞো গেহদ্ৰারং গতো. রাজা পচ্চুগ্গন্ত্ৰা পত্তং গহেত্ৰা সত্থারং পাসাদং আরোপেত্ৰা পটিপাটিযা ভিক্খুসঙ্ঘং নিসীদাপেত্ৰা দক্খিণোদকং দত্ৰা পণীতেনাহারেন পরিৰিসিত্ৰা ভত্তকিচ্চাৰসানে একমন্তং নিসীদি. সত্থা ‘‘কিং নু খো, মহারাজ, মল্লিকা ন পঞ্ঞাযতী’’তি পুচ্ছিত্ৰা ‘‘অত্তনো সুখমদমত্ততাযা’’তি ৰুত্তে ‘‘ননু, মহারাজ, ত্ৰং পুব্বে কিন্নরযোনিযং নিব্বত্তিত্ৰা একরত্তিং কিন্নরিযা ৰিনা হুত্ৰা সত্ত ৰস্সসতানি পরিদেৰমানো ৰিচরী’’তি ৰত্ৰা তেন যাচিতো অতীতং আহরি.

অতীতে বারাণসিযং ভল্লাতিযো নাম রাজা রজ্জং কারেন্তো ‘‘অঙ্গারপক্কমিগমংসং খাদিস্সামী’’তি রজ্জং অমচ্চানং নিয্যাদেত্ৰা সন্নদ্ধপঞ্চাৰুধো সুসিক্খিতকোলেয্যকসুণখগণপরিৰুতো নগরা নিক্খমিত্ৰা হিমৰন্তং পৰিসিত্ৰা অনুগঙ্গং গন্ত্ৰা উপরি অভিরুহিতুং অসক্কোন্তো একং গঙ্গং ওতিণ্ণনদিং দিস্ৰা তদনুসারেন গচ্ছন্তো মিগসূকরাদযো ৰধিত্ৰা অঙ্গারপক্কমংসং খাদন্তো উচ্চট্ঠানং অভিরুহি. তত্থ রমণীযা নদিকা পরিপুণ্ণকালে থনপমাণোদকা হুত্ৰা সন্দতি, অঞ্ঞদা জণ্ণুকপমাণোদকা হোতি. তত্থ নানপ্পকারকা মচ্ছকচ্ছপা ৰিচরন্তি. উদকপরিযন্তে রজতপট্টৰণ্ণৰালুকা উভোসু তীরেসু নানাপুপ্ফফলভরিতৰিনমিতা রুক্খা পুপ্ফফলরসমত্তেহি নানাৰিহঙ্গমভমরগণেহি সম্পরিকিণ্ণা ৰিৰিধমিগসঙ্ঘনিসেৰিতা সীতচ্ছাযা. এৰং রমণীযায হেমৰতনদিযা তীরে দ্ৰে কিন্নরা অঞ্ঞমঞ্ঞং আলিঙ্গিত্ৰা পরিচুম্বিত্ৰা নানপ্পকারেহি পরিদেৰন্তা রোদন্তি.

রাজা তস্সা নদিযা তীরেন গন্ধমাদনং অভিরুহন্তো তে কিন্নরে দিস্ৰা ‘‘কিং নু খো এতে এৰং পরিদেৰন্তি, পুচ্ছিস্সামি নে’’তি চিন্তেত্ৰা সুনখে ওলোকেত্ৰা অচ্ছরং পহরি. সুসিক্খিতকোলেয্যকসুনখা তায সঞ্ঞায গুম্বং পৰিসিত্ৰা উরেন নিপজ্জিংসু. সো তেসং পটিসল্লীনভাৰং ঞত্ৰা ধনুকলাপঞ্চেৰ সেসাৰুধানি চ রুক্খং নিস্সায ঠপেত্ৰা পদসদ্দং অকরোন্তো সণিকং তেসং সন্তিকং গন্ত্ৰা ‘‘কিংকারণা তুম্হে রোদথা’’তি কিন্নরে পুচ্ছি. তমত্থং পকাসেন্তো সত্থা তিস্সো গাথা অভাসি –

১৮৬.

‘‘ভল্লাতিযো নাম অহোসি রাজা, রট্ঠং পহায মিগৰং অচারি সো;

অগমা গিরিৰরং গন্ধমাদনং, সুপুপ্ফিতং কিম্পুরিসানুচিণ্ণং.

১৮৭.

‘‘সাল়ূরসঙ্ঘঞ্চ নিসেধযিত্ৰা, ধনুং কলাপঞ্চ সো নিক্খিপিত্ৰা;

উপাগমি ৰচনং ৰত্তুকামো, যত্থট্ঠিতা কিম্পুরিসা অহেসুং.

১৮৮.

‘‘হিমচ্চযে হেমৰতায তীরে, কিমিধট্ঠিতা মন্তযৰ্হো অভিণ্হং;

পুচ্ছামি ৰো মানুসদেহৰণ্ণে, কথং ৰো জানন্তি মনুস্সলোকে’’তি.

তত্থ সাল়ূরসঙ্ঘন্তি সুনখগণং. হিমচ্চযেতি চতুন্নং হেমন্তমাসানং অতিক্কমে. হেমৰতাযাতি ইমিস্সা হেমৰতায নদিযা তীরে.

রঞ্ঞো ৰচনং সুত্ৰা কিন্নরো তুণ্হী অহোসি, কিন্নরী পন রঞ্ঞা সদ্ধিং সল্লপি –

১৮৯.

‘‘মল্লং গিরিং পণ্ডরকং তিকূটং, সীতোদকা অনুৰিচরাম নজ্জো;

মিগা মনুস্সাৰ নিভাসৰণ্ণা, জানন্তি নো কিম্পুরিসাতি লুদ্দা’’তি.

তত্থ মল্লং গিরিন্তি সম্ম লুদ্দক, মযং ইমং মল্লগিরিঞ্চ পণ্ডরকঞ্চ তিকূটঞ্চ ইমা চ নজ্জো অনুৰিচরাম. ‘‘মালাগিরি’’ন্তিপি পাঠো. নিভাসৰণ্ণাতি নিভাসমানৰণ্ণা, দিস্সমানসরীরাতি অত্থো.

ততো রাজা তিস্সো গাথা অভাসি –

১৯০.

‘‘সুকিচ্ছরূপং পরিদেৰযৰ্হো, আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে রোদথ অপ্পতীতা.

১৯১.

‘‘সুকিচ্ছরূপং পরিদেৰযৰ্হো, আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে ৰিলপথ অপ্পতীতা.

১৯২.

‘‘সুকিচ্ছরূপং পরিদেৰযৰ্হো, আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে সোচথ অপ্পতীতা’’তি.

তত্থ সুকিচ্ছরূপন্তি সুট্ঠু দুক্খপ্পত্তা ৰিয হুত্ৰা. আলিঙ্গিতো চাসি পিযো পিযাযাতি তযা পিযায তৰ পিযো আলিঙ্গিতো চ আসি. ‘‘আলিঙ্গিযো চাসী’’তিপি পাঠো, অযমেৰত্থো. কিমিধ ৰনেতি কিংকারণা ইধ ৰনে অন্তরন্তরা আলিঙ্গিত্ৰা পরিচুম্বিত্ৰা পিযকথং কথেত্ৰা পুন অপ্পতীতা রোদথাতি.

ততো পরা উভিন্নম্পি আলাপসল্লাপগাথা হোন্তি –

১৯৩.

‘‘মযেকরত্তং ৰিপ্পৰসিম্হ লুদ্দ, অকামকা অঞ্ঞমঞ্ঞং সরন্তা;

তমেকরত্তং অনুতপ্পমানা, সোচাম ‘সা রত্তি পুনং ন হোস্সতি’.

১৯৪.

‘‘যমেকরত্তং অনুতপ্পথেতং, ধনংৰ নট্ঠং পিতরংৰ পেতং;

পুচ্ছামি ৰো মানুসদেহৰণ্ণে, কথং ৰিনা ৰাসমকপ্পযিত্থ.

১৯৫.

‘‘যমিমং নদিং পস্সসি সীঘসোতং, নানাদুমচ্ছাদনং সেলকূলং;

তং মে পিযো উত্তরি ৰস্সকালে, মমঞ্চ মঞ্ঞং অনুবন্ধতীতি.

১৯৬.

‘‘অহঞ্চ অঙ্কোলকমোচিনামি, অতিমুত্তকং সত্তলিযোথিকঞ্চ;

‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’.

১৯৭.

‘‘অহঞ্চিদং কুরৰকমোচিনামি, উদ্দালকা পাটলিসিন্ধুৰারকা;

‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’.

১৯৮.

‘‘অহঞ্চ সালস্স সুপুপ্ফিতস্স, ওচেয্য পুপ্ফানি করোমি মালং;

‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’.

১৯৯.

‘‘অহঞ্চ সালস্স সুপুপ্ফিতস্স, ওচেয্য পুপ্ফানি করোমি ভারং;

ইদঞ্চ নো হেহিতি সন্থরত্থং, যত্থজ্জিমং ৰিহরিস্সাম রত্তিং.

২০০.

‘‘অহঞ্চ খো অগল়ুং চন্দনঞ্চ, সিলায পিংসামি পমত্তরূপা;

‘পিযো চ মে হেহিতি রোসিতঙ্গো, অহঞ্চ নং রোসিতা অজ্ঝুপেস্সং’.

২০১.

‘‘অথাগমা সলিলং সীঘসোতং, নুদং সালে সলল়ে কণ্ণিকারে;

আপূরথ তেন মুহুত্তকেন, সাযং নদী আসি মযা সুদুত্তরা.

২০২.

‘‘উভোসু তীরেসু মযং তদা ঠিতা, সম্পস্সন্তা উভযো অঞ্ঞমঞ্ঞং;

সকিম্পি রোদাম সকিং হসাম, কিচ্ছেন নো আগমা সংৰরী সা.

২০৩.

‘‘পাতোৰ খো উগ্গতে সূরিযম্হি, চতুক্কং নদিং উত্তরিযান লুদ্দ;

আলিঙ্গিযা অঞ্ঞমঞ্ঞং মযং উভো, সকিম্পি রোদাম সকিং হসাম.

২০৪.

‘‘তীহূনকং সত্ত সতানি লুদ্দ, যমিধ মযং ৰিপ্পৰসিম্হ পুব্বে;

ৰস্সেকিমং জীৰিতং ভূমিপাল, কো নীধ কন্তায ৰিনা ৰসেয্য.

২০৫.

‘‘আযুঞ্চ ৰো কীৰতকো নু সম্ম, সচেপি জানাথ ৰদেথ আযুং;

অনুস্সৰা ৰুড্ঢতো আগমা ৰা, অক্খাথ মেতং অৰিকম্পমানা.

২০৬.

‘‘আযুঞ্চ নো ৰস্সসহস্সং লুদ্দ, ন চন্তরা পাপকো অত্থি রোগো;

অপ্পঞ্চ দুক্খং সুখমেৰ ভিয্যো, অৰীতরাগা ৰিজহাম জীৰিত’’ন্তি.

তত্থ মযেকরত্তন্তি মযং একরত্তং. ৰিপ্পৰসিম্হাতি ৰিপ্পযুত্তা হুত্ৰা ৰসিম্হ. অনুতপ্পমানাতি ‘‘অনিচ্ছমানানং নো একরত্তো অতীতো’’তি তং একরত্তং অনুচিন্তযমানা. পুনং ন হেস্সতীতি পুন ন ভৰিস্সতি নাগমিস্সতীতি সোচাম. ধনংৰ নট্ঠং পিতরংৰ পেতন্তি ধনং ৰা নট্ঠং পিতরং ৰা মাতরং ৰাপেতং কালকতং কিং নু খো তুম্হে চিন্তযমানা কেন কারণেন তং একরত্তং ৰিনা ৰাসং অকপ্পযিত্থ, ইদং মে আচিক্খথাতি পুচ্ছতি. যমিমন্তি যং ইমং. সেলকূলন্তি দ্ৰিন্নং সেলানং অন্তরে সন্দমানং. ৰস্সকালেতি একস্স মেঘস্স উট্ঠায ৰস্সনকালে. অম্হাকঞ্হি ইমস্মিং ৰনসণ্ডে রতিৰসেন চরন্তানং একো মেঘো উট্ঠহি. অথ মে পিযসামিকো কিন্নরোমং ‘‘পচ্ছতো আগচ্ছতী’’তি মঞ্ঞমানো এতং নদিং উত্তরীতি আহ.

অহঞ্চাতি অহং পনেতস্স পরতীরং গতভাৰং অজানন্তী সুপুপ্ফিতানি অঙ্কোলকাদীনি পুপ্ফানি ওচিনামি. তত্থ সত্তলিযোথিকঞ্চাতি কুন্দালপুপ্ফঞ্চ সুৰণ্ণযোথিকঞ্চ ওচিনন্তী পন ‘‘পিযো চ মে মালভারী ভৰিস্সতি, অহঞ্চ নং মালিনী হুত্ৰা অজ্ঝুপেস্স’’ন্তি ইমিনা কারণেন ওচিনামি. উদ্দালকা পাটলিসিন্ধুৰারকাতি তেপি মযা ওচিতাযেৰাতি ৰদতি. ওচেয্যাতি ওচিনিত্ৰা. অগল়ুং চন্দনঞ্চাতি কাল়াগল়ুঞ্চ রত্তচন্দনঞ্চ. রোসিতঙ্গোতি ৰিলিত্তসরীরো. রোসিতাতি ৰিলিত্তা হুত্ৰা. অজ্ঝুপেস্সন্তি সযনে উপগমিস্সামি. নুদং সালে সলল়ে কণ্ণিকারেতি এতানি মযা ওচিনিত্ৰা তীরে ঠপিতানি পুপ্ফানি নুদন্তং হরন্তং. সুদুত্তরাতি তস্সা হি ওরিমতীরে ঠিতকালেযেৰ নদিযা উদকং আগতং, তঙ্খণঞ্ঞেৰ সূরিযো অত্থঙ্গতো, ৰিজ্জুলতা নিচ্ছরন্তি, কিন্নরা নাম উদকভীরুকা হোন্তি, ইতি সা ওতরিতুং ন ৰিসহি. তেনাহ ‘‘সাযং নদী আসি মযা সুদুত্তরা’’তি.

সম্পস্সন্তাতি ৰিজ্জুলতানিচ্ছরণকালে পস্সন্তা. রোদামাতি অন্ধকারকালে অপস্সন্তা রোদাম, ৰিজ্জুলতানিচ্ছরণকালে পস্সন্তা হসাম. সংৰরীতি রত্তি. চতুক্কন্তি তুচ্ছং. উত্তরিযানাতি উত্তরিত্ৰা. তীহূনকন্তি তীহি ঊনানি সত্ত ৰস্সসতানি. যমিধ মযন্তি যং কালং ইধ মযং ৰিপ্পৰসিম্হ, সো ইতো তীহি ঊনকানি সত্ত ৰস্সসতানি হোন্তীতি ৰদতি. ৰস্সেকিমন্তি ৰস্সং একং ইমং, তুম্হাকং একমেৰ ৰস্সসতং ইমং জীৰিতন্তি ৰদতি. কো নীধাতি এৰং পরিত্তকে জীৰিতে কো নু ইধ কন্তায ৰিনা ভৰেয্য, অযুত্তং তৰ পিযভরিযায ৰিনা ভৰিতুন্তি দীপেতি.

কীৰতকো নূতি রাজা কিন্নরিযা ৰচনং সুত্ৰা ‘‘ইমেসং আযুপ্পমাণং পুচ্ছিস্সামী’’তি চিন্তেত্ৰা ‘‘তুম্হাকং কিত্তকো আযূ’’তি পুচ্ছতি. অনুস্সৰাতি সচে ৰো কস্সচি ৰদন্তস্স ৰা সুতং, মাতাপিতূনং ৰা ৰুড্ঢানং মহল্লকানং সন্তিকা আগমো অত্থি, অথ মে ততো অনুস্সৰা ৰুড্ঢতো আগমা ৰা এতং অৰিকম্পমানা অক্খাথ. ন চন্তরাতি অম্হাকং ৰস্সসহস্সং আযু, অন্তরা চ নো পাপকো জীৰিতন্তরাযকরো রোগোপি নত্থি. অৰীতরাগাতি অঞ্ঞমঞ্ঞং অৰিগতপেমাৰ হুত্ৰা.

তং সুত্ৰা রাজা ‘‘ইমে হি নাম তিরচ্ছানগতা হুত্ৰা একরত্তিং ৰিপ্পযোগেন সত্ত ৰস্সসতানি রোদন্তা ৰিচরন্তি, অহং পন তিযোজনসতিকে রজ্জে মহাসম্পত্তিং পহায অরঞ্ঞে ৰিচরামি, অহো অকিচ্চকারিম্হী’’তি ততোৰ নিৰত্তো বারাণসিং গন্ত্ৰা ‘‘কিং তে, মহারাজ, হিমৰন্তে অচ্ছরিযং দিট্ঠ’’ন্তি অমচ্চেহি পুট্ঠো সব্বং আরোচেত্ৰা ততো পট্ঠায দানানি দদন্তো ভোগে ভুঞ্জি. তমত্থং পকাসেন্তো সত্থা –

২০৭.

‘‘ইদঞ্চ সুত্ৰান অমানুসানং, ভল্লাতিযো ইত্তরং জীৰিতন্তি;

নিৰত্তথ ন মিগৰং অচরি, অদাসি দানানি অভুঞ্জি ভোগে’’তি. –

ইমং গাথং ৰত্ৰা পুন ওৰদন্তো দ্ৰে গাথা অভাসি –

২০৮.

‘‘ইদঞ্চ সুত্ৰান অমানুসানং, সম্মোদথ মা কলহং অকত্থ;

মা ৰো তপী অত্তকম্মাপরাধো, যথাপি তে কিম্পুরিসেকরত্তং.

২০৯.

‘‘ইদঞ্চ সুত্ৰান অমানুসানং, সম্মোদথ মা ৰিৰাদং অকত্থ;

মা ৰো তপী অত্তকম্মাপরাধো, যথাপি তে কিম্পুরিসেকরত্ত’’ন্তি.

তত্থ অমানুসানন্তি কিন্নরানং. অত্তকম্মাপরাধোতি অত্তনো কম্মদোসো. কিম্পুরিসেকরত্তন্তি যথা তে কিম্পুরিসে একরত্তিং কতো অত্তনো কম্মদোসো তপি, তথা তুম্হেপি মা তপীতি অত্থো.

মল্লিকা দেৰী তথাগতস্স ধম্মদেসনং সুত্ৰা উট্ঠাযাসনা অঞ্জলিং পগ্গয্হ দসবলস্স থুতিং করোন্তী ওসানগাথমাহ –

২১০.

‘‘ৰিৰিধং অধিমনা সুণোমহং, ৰচনপথং তৰ অত্থসংহিতং;

মুঞ্চং গিরং নুদসেৰ মে দরং, সমণ সুখাৰহ জীৰ মে চির’’ন্তি.

তত্থ ৰিৰিধং অধিমনা সুণোমহন্তি ভন্তে, তুম্হেহি ৰিৰিধেহি নানাকারণেহি অলঙ্করিত্ৰা দেসিতং ধম্মদেসনং অহং অধিমনা পসন্নচিত্তা হুত্ৰা সুণোমি. ৰচনপথন্তি তং তুম্হেহি ৰুত্তং ৰিৰিধৰচনং. মুঞ্চং গিরং নুদসেৰ মে দরন্তি কণ্ণসুখং মধুরং গিরং মুঞ্চন্তো মম হদযে সোকদরথং নুদসিযেৰ হরসিযেৰ. সমণ সুখাৰহ জীৰ মে চিরন্তি ভন্তে বুদ্ধসমণ, দিব্বমানুসলোকিযলোকুত্তরসুখাৰহ মম সামি ধম্মরাজ, চিরং জীৰাতি.

কোসলরাজা ততো পট্ঠায তায সদ্ধিং সমগ্গৰাসং ৰসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা কিন্নরো কোসলরাজা অহোসি, কিন্নরী মল্লিকা দেৰী, ভল্লাতিযরাজা অহমেৰ অহোসি’’ন্তি.

ভল্লাতিযজাতকৰণ্ণনা অট্ঠমা.

[৫০৫] ৯. সোমনস্সজাতকৰণ্ণনা

কো তং হিংসতি হেঠেতীতি ইদং সত্থা জেতৰনে ৰিহরন্তো দেৰদত্তস্স ৰধায পরিসক্কনং আরব্ভ কথেসি. তদা হি সত্থা ‘‘ন, ভিক্খৰে, ইদানেৰ, পুব্বেপেস মম ৰধায পরিসক্কিযেৰা’’তি ৰত্ৰা অতীতং আহরি.

অতীতে কুরুরট্ঠে উত্তরপঞ্চালনগরে রেণু নাম রাজা রজ্জং কারেসি. তদা মহারক্খিতো নাম তাপসো পঞ্চসততাপসপরিৰারো হিমৰন্তে চিরং ৰসিত্ৰা লোণম্বিলসেৰনত্থায চারিকং চরন্তো উত্তরপঞ্চালনগরং পত্ৰা রাজুয্যানে ৰসিত্ৰা সপরিসো পিণ্ডায চরন্তো রাজদ্ৰারং পাপুণি. রাজা ইসিগণং দিস্ৰা ইরিযাপথে পসন্নো অলঙ্কতমহাতলে নিসীদাপেত্ৰা পণীতেনাহারেন পরিৰিসিত্ৰা ‘‘ভন্তে, ইমং ৰস্সারত্তং মম উয্যানেযেৰ ৰসথা’’তি ৰত্ৰা তেহি সদ্ধিং উয্যানং গন্ত্ৰা ৰসনট্ঠানানি কারেত্ৰা পব্বজিতপরিক্খারে দত্ৰা ৰন্দিত্ৰা নিক্খমি. ততো পট্ঠায সব্বেপি তে রাজনিৰেসনে ভুঞ্জন্তি. রাজা পন অপুত্তকো পুত্তং পত্থেতি, পুত্তা নুপ্পজ্জন্তি. ৰস্সারত্তচ্চযেন মহারক্খিতো ‘‘ইদানি হিমৰন্তো রমণীযো, তত্থেৰ গমিস্সামা’’তি রাজানং আপুচ্ছিত্ৰা রঞ্ঞা কতসক্কারসম্মানো নিক্খমিত্ৰা অন্তরামগ্গে মজ্ঝন্হিকসমযে মগ্গা ওক্কম্ম একস্স সন্দচ্ছাযস্স রুক্খস্স হেট্ঠা তরুণতিণপিট্ঠে সপরিৰারো নিসীদি.

তাপসা কথং সমুট্ঠাপেসুং ‘‘রাজগেহে ৰংসানুরক্খিতো পুত্তো নত্থি, সাধু ৰতস্স সচে রাজা পুত্তং লভেয্য, পৰেণি ঘটীযেথা’’তি. মহারক্খিতো তেসং কথং সুত্ৰা ‘‘ভৰিস্সতি নু খো রঞ্ঞো পুত্তো, উদাহু নো’’তি উপধারেন্তো ‘‘ভৰিস্সতী’’তি ঞত্ৰা এৰমাহ ‘‘মা ভোন্তো চিন্তযিত্থ, অজ্জ পচ্চূসকালে একো দেৰপুত্তো চৰিত্ৰা রঞ্ঞো অগ্গমহেসিযা কুচ্ছিম্হি পটিসন্ধিং গণ্হিস্সতী’’তি. তং সুত্ৰা একো কুটজটিলো ‘‘ইদানি রাজকুলূপকো ভৰিস্সামী’’তি চিন্তেত্ৰা তাপসানং গমনকালে গিলানালযং কত্ৰা নিপজ্জিত্ৰা ‘‘এহি গচ্ছামা’’তি ৰুত্তো ‘‘ন সক্কোমী’’তি আহ. মহারক্খিতো তস্স নিপন্নকারণং ঞত্ৰা ‘‘যদা সক্কোসি, তদা আগচ্ছেয্যাসী’’তি ৰত্ৰা ইসিগণং আদায হিমৰন্তমেৰ গতো. কুহকোপি নিৰত্তিত্ৰা ৰেগেনাগন্ত্ৰা রাজদ্ৰারে ঠত্ৰা ‘‘মহারক্খিতস্স উপট্ঠাকতাপসো আগতো’’তি রঞ্ঞো আরোচাপেত্ৰা রঞ্ঞা ৰেগেন পক্কোসাপিতো পাসাদং অভিরুয্হ পঞ্ঞত্তাসনে নিসীদি. রাজা কুহকং তাপসং ৰন্দিত্ৰা একমন্তং নিসিন্নো ইসীনং আরোগ্যং পুচ্ছিত্ৰা ‘‘ভন্তে, অতিখিপ্পং নিৰত্তিত্থ, ৰেগেন কেনত্থেনাগতত্থা’’তি আহ. ‘‘আম, মহারাজ, ইসিগণো সুখনিসিন্নো ‘সাধু ৰতস্স, সচে রঞ্ঞো পৰেণিপালকো পুত্তো উপ্পজ্জেয্যা’তি কথং সমুট্ঠাপেসি. অহং কথং সুত্ৰা ‘‘ভৰিস্সতি নু খো রঞ্ঞো পুত্তো, উদাহু নো’’তি দিব্বচক্খুনা ওলোকেন্তো ‘‘মহিদ্ধিকো দেৰপুত্তো চৰিত্ৰা অগ্গমহেসিযা সুধম্মায কুচ্ছিম্হি নিব্বত্তিস্সতী’’তি দিস্ৰা ‘‘অজানন্তা গব্ভং নাসেয্যুং, আচিক্খিস্সামি নেস’’ন্তি তুম্হাকং কথনত্থায আগতো. কথিতং তে মযা, গচ্ছামহং, মহারাজাতি. রাজা ‘‘ভন্তে, ন সক্কা গন্তু’’ন্তি হট্ঠতুট্ঠো পসন্নচিত্তো কুহকতাপসং উয্যানং নেত্ৰা ৰসনট্ঠানং সংৰিদহিত্ৰা অদাসি. সো ততো পট্ঠায রাজকুলে ভুঞ্জন্তো ৰসতি, ‘‘দিব্বচক্খুকো’’ত্ৰেৰস্স নামং অহোসি.

তদা বোধিসত্তো তাৰতিংসভৰনা চৰিত্ৰা তত্থ পটিসন্ধিং গণ্হি. জাতস্স চস্স নামগ্গহণদিৰসে ‘‘সোমনস্সকুমারো’’ত্ৰেৰ নামং করিংসু. সো কুমারপরিহারেন ৰড্ঢতি. কুহকতাপসোপি উয্যানস্স একস্মিং পস্সে নানপ্পকারং সূপেয্যসাকঞ্চ ৰল্লিফলানি চ রোপেত্ৰা পণ্ণিকানং হত্থে ৰিক্কিণন্তো ধনং সণ্ঠপেসি. বোধিসত্তস্স সত্তৰস্সিককালে রঞ্ঞো পচ্চন্তো কুপ্পি. ‘‘দিব্বচক্খুতাপসং মা পমজ্জী’’তি কুমারং পটিচ্ছাপেত্ৰা ‘‘পচ্চন্তং ৰূপসমেস্সামী’’তি গতো. অথেকদিৰসং কুমারো ‘‘জটিলং পস্সিস্সামী’’তি উয্যানং গন্ত্ৰা কূটজটিলং একং গণ্ঠিককাসাৰং নিৰাসেত্ৰা একং পারুপিত্ৰা উভোহি হত্থেহি দ্ৰে উদকঘটে গহেত্ৰা সাকৰত্থুস্মিং উদকং আসিঞ্চন্তং দিস্ৰা ‘‘অযং কূটজটিলো অত্তনো সমণধম্মং অকত্ৰা পণ্ণিককম্মং করোতী’’তি ঞত্ৰা ‘‘কিং করোসি পণ্ণিকগহপতিকা’’তি তং লজ্জাপেত্ৰা অৰন্দিত্ৰাৰ নিক্খমি. কূটজটিলো ‘‘অযং ইদানেৰ এৰরূপো পচ্চামিত্তো, কো জানাতি কিং করিস্সতি, ইদানেৰ নং নাসেতুং ৰট্টতী’’তি চিন্তেত্ৰা রঞ্ঞো আগমনকালে পাসাণফলকং একমন্তং খিপিত্ৰা পানীযঘটং ভিন্দিত্ৰা পণ্ণসালায তিণানি ৰিকিরিত্ৰা সরীরং তেলেন মক্খেত্ৰা পণ্ণসালং পৰিসিত্ৰা সসীসং পারুপিত্ৰা মহাদুক্খপ্পত্তো ৰিয মঞ্চে নিপজ্জি. রাজা আগন্ত্ৰা নগরং পদক্খিণং কত্ৰা নিৰেসনং অপৰিসিত্ৰাৰ ‘‘মম সামিকং দিব্বচক্খুকং পস্সিস্সামী’’তি পণ্ণসালদ্ৰারং গন্ত্ৰা তং ৰিপ্পকারং দিস্ৰা ‘‘কিং নু খো এত’’ন্তি অন্তো পৰিসিত্ৰা তং নিপন্নকং দিস্ৰা পাদে পরিমজ্জন্তো পঠমং গাথমাহ –

২১১.

‘‘কো তং হিংসতি হেঠেতি, কিং দুম্মনো সোচসি অপ্পতীতো;

কস্সজ্জ মাতাপিতরো রুদন্তু, ক্ৰজ্জ সেতু নিহতো পথব্যা’’তি.

তত্থ হিংসতীতি পহরতি. হেঠেতীতি অক্কোসতি. ক্ৰজ্জ সেতূতি কো অজ্জ সযতু.

তং সুত্ৰা কূটজটিলো নিত্থুনন্তো উট্ঠায দুতিযং গাথমাহ –

২১২.

‘‘তুট্ঠোস্মি দেৰ তৰ দস্সনেন, চিরস্সং পস্সামি তং ভূমিপাল;

অহিংসকো রেণুমনুপ্পৰিস্স, পুত্তেন তে হেঠযিতোস্মি দেৰা’’তি.

ইতো পরা উত্তানসম্বন্ধগাথা পাল়িনযেনেৰ ৰেদিতব্বা –

২১৩.

‘‘আযন্তু দোৰারিকা খগ্গবন্ধা, কাসাৰিযা যন্তু অন্তেপুরন্তং;

হন্ত্ৰান তং সোমনস্সং কুমারং, ছেত্ৰান সীসং ৰরমাহরন্তু.

২১৪.

‘‘পেসিতা রাজিনো দূতা, কুমারং এতদব্রৰুং;

ইস্সরেন ৰিতিণ্ণোসি, ৰধং পত্তোসি খত্তিয.

২১৫.

‘‘স রাজপুত্তো পরিদেৰযন্তো, দসঙ্গুলিং অঞ্জলিং পগ্গহেত্ৰা;

অহম্পি ইচ্ছামি জনিন্দ দট্ঠুং, জীৰং মং নেত্ৰা পটিদস্সযেথ.

২১৬.

‘‘তস্স তং ৰচনং সুত্ৰা, রঞ্ঞো পুত্তং অদস্সযুং;

পুত্তো চ পিতরং দিস্ৰা, দূরতোৰজ্ঝভাসথ.

২১৭.

‘‘আগচ্ছুং দোৰারিকা খগ্গবন্ধা, কাসাৰিযা হন্তু মমং জনিন্দ;

অক্খাহি মে পুচ্ছিতো এতমত্থং, অপরাধো কো নিধ মমজ্জ অত্থী’’তি.

তত্থ অহিংসকোতি অহং কস্সচি অহিংসকো সীলাচারসম্পন্নো. রেণুমনুপ্পৰিস্সাতি মহারাজ রেণু, অহং তৰ পুত্তেন মহাপরিৰারেন অনুপৰিসিত্ৰা ‘‘অরে কূটতাপস, কস্মা ত্ৰং ইধ ৰসসী’’তি ৰত্ৰা পাসাণফলকং খিপিত্ৰা ঘটং ভিন্দিত্ৰা হত্থেহি চ পাদেহি চ কোট্টেন্তেন ৰিহেঠিতোস্মীতি এৰং সো অভূতমেৰ ভূতং ৰিয কত্ৰা রাজানং সদ্দহাপেসি. আযন্তূতি গচ্ছন্তু. ‘‘মম সামিম্হি ৰিপ্পটিপন্নকালতো পট্ঠায মযিপি সো ন লজ্জিস্সতী’’তি কুজ্ঝিত্ৰা তস্স ৰধং আণাপেন্তো এৰমাহ. কাসাৰিযাতি চোরঘাতকা. তেপি ফরসুহত্থা অত্তনো ৰিধানেন গচ্ছন্তূতি ৰদতি. ৰরন্তি ৰরং সীসং উত্তমসীসং ছিন্দিত্ৰা আহরন্তু.

রাজিনোতি ভিক্খৰে, রঞ্ঞো সন্তিকা দূতা রঞ্ঞা পেসিতা ৰেগেন গন্ত্ৰা মাতরা অলঙ্করিত্ৰা অত্তনো অঙ্কে নিসীদাপিতং কুমারং পরিৰারেত্ৰা এতদৰোচুং. ইস্সরেনাতি রঞ্ঞা. ৰিতিণ্ণোসীতি পরিচ্চত্তোসি. স রাজপুত্তোতি ভিক্খৰে, তেসং ৰচনং সুত্ৰা মরণভযতজ্জিতো মাতু অঙ্কতো উট্ঠায সো রাজপুত্তো. পটিদস্সযেথাতি দস্সেথ. তস্সাতি ভিক্খৰে, তে দূতা কুমারস্স তং ৰচনং সুত্ৰা মারেতুং অৰিসহন্তা গোণং ৰিয নং রজ্জুযা পরিকড্ঢন্তা নেত্ৰা রঞ্ঞো দস্সযুং. কুমারে পন নীযমানে দাসিগণপরিৰুতা সদ্ধিং ওরোধেহি সুধম্মাপি দেৰী নাগরাপি ‘‘মযং নিরপরাধং কুমারং মারেতুং ন দস্সামা’’তি তেন সদ্ধিংযেৰ অগমংসু. আগচ্ছুন্তি তুম্হাকং আণায মম সন্তিকং আগমিংসু. হন্তুং মমন্তি মং মারেতুং. কো নীধাতি কো নু ইধ মম অপরাধো, যেন মং ত্ৰং মারেসীতি পুচ্ছি.

রাজা ‘‘ভৰগ্গং অতিনীচং, তৰ দোসো অতিমহন্তো’’তি তস্স দোসং কথেন্তো গাথমাহ –

২১৮.

‘‘সাযঞ্চ পাতো উদকং সজাতি, অগ্গিং সদা পারিচরতপ্পমত্তো;

তং তাদিসং সংযতং ব্রহ্মচারিং, কস্মা তুৰং ব্রূসি গহপ্পতী’’তি.

তত্থ উদকং সজাতীতি উদকোরোহণকম্মং করোতি. তং তাদিসন্তি তং তথারূপং মম সামিং দিব্বচক্খুতাপসং কস্মা ত্ৰং গহপতিৰাদেন সমুদাচরসীতি ৰদতি.

ততো কুমারো ‘‘দেৰ, ময্হং গহপতিঞ্ঞেৰ ‘গহপতী’তি ৰদন্তস্স কো দোসো’’তি ৰত্ৰা গাথমাহ –

২১৯.

‘‘তালা চ মূলা চ ফলা চ দেৰ, পরিগ্গহা ৰিৰিধা সন্তিমস্স;

তে রক্খতি গোপযতপ্পমত্তো, তস্মা অহং ব্রূমি গহপ্পতী’’তি.

তত্থ মূলাতি মূলকাদিমূলানি. ফলাতি নানাৰিধানি ৰল্লিফলানি. তে রক্খতি গোপযতপ্পমত্তোতি তে এস তৰ কুলূপকতাপসো পণ্ণিককম্মং করোন্তো নিসীদিত্ৰা রক্খতি, ৰতিং কত্ৰা গোপযতি অপ্পমত্তো, তেন কারণেন সো তৰ ব্রাহ্মণো গহপতি নাম হোতি.

ইতি নং অহম্পি ‘‘গহপতী’’তি কথেসিং. সচে ন সদ্দহসি, চতূসু দ্ৰারেসু পণ্ণিকে পুচ্ছাপেহীতি. রাজা পুচ্ছাপেসি. তে ‘‘আম, মযং ইমস্স হত্থতো পণ্ণঞ্চ ফলাফলানি চ কিণামা’’তি আহংসু. পণ্ণৰত্থুম্পি উপধারাপেত্ৰা পচ্চক্খমকাসি. পণ্ণসালম্পিস্স পৰিসিত্ৰা কুমারস্স পুরিসা পণ্ণৰিক্কযলদ্ধং কহাপণমাসকভণ্ডিকং নীহরিত্ৰা রঞ্ঞো দস্সেসুং. রাজা মহাসত্তস্স নিদ্দোসভাৰং ঞত্ৰা গাথমাহ –

২২০.

‘‘সচ্চং খো এতং ৰদসি কুমার, পরিগ্গহা ৰিৰিধা সন্তিমস্স;

তে রক্খতি গোপযতপ্পমত্তো, স ব্রাহ্মণো গহপতি তেন হোতী’’তি.

ততো মহাসত্তো চিন্তেসি ‘‘এৰরূপস্স বালস্স রঞ্ঞো সন্তিকে ৰাসতো হিমৰন্তং পৰিসিত্ৰা পব্বজিতুং ৰরং, পরিসমজ্ঝেযেৰস্স দোসং আৰিকত্ৰা আপুচ্ছিত্ৰা অজ্জেৰ নিক্খমিত্ৰা পব্বজিস্সামী’’তি. সো পরিসায নমক্কারং কত্ৰা গাথমাহ –

২২১.

‘‘সুণন্তু ময্হং পরিসা সমাগতা, সনেগমা জানপদা চ সব্বে;

বালাযং বালস্স ৰচো নিসম্ম, অহেতুনা ঘাতযতে মং জনিন্দো’’তি.

তত্থ বালাযং বালস্সাতি অযং রাজা সযং বালো ইমস্স বালস্স কূটজটিলস্স ৰচনং সুত্ৰা অহেতুনাৰ মং ঘাতযতেতি.

এৰঞ্চ পন ৰত্ৰা পিতরং ৰন্দিত্ৰা অত্তানং পব্বজ্জায অনুজানাপেন্তো ইতরং গাথমাহ –

২২২.

‘‘দল়্হস্মি মূলে ৰিসটে ৰিরূল়্হে, দুন্নিক্কযো ৰেল়ু পসাখজাতো;

ৰন্দামি পাদানি তৰ জনিন্দ, অনুজান মং পব্বজিস্সামি দেৰা’’তি.

তত্থ ৰিসটেতি ৰিসালে মহন্তে জাতে. দুন্নিক্কযোতি দুন্নিক্কড্ঢিযো.

ততো পরা রঞ্ঞো চ পুত্তস্স চ ৰচনপটিৰচনগাথা হোন্তি –

২২৩.

‘‘ভুঞ্জস্সু ভোগে ৰিপুলে কুমার, সব্বঞ্চ তে ইস্সরিযং দদামি;

অজ্জেৰ ত্ৰং কুরূনং হোহি রাজা, মা পব্বজী পব্বজ্জা হি দুক্খা.

২২৪.

‘‘কিন্নূধ দেৰ তৰমত্থি ভোগা, পুব্বেৰহং দেৰলোকে রমিস্সং;

রূপেহি সদ্দেহি অথো রসেহি, গন্ধেহি ফস্সেহি মনোরমেহি.

২২৫.

‘‘ভুত্তা চ মে ভোগা তিদিৰস্মিং দেৰ, পরিৰারিতো অচ্ছরানং গণেন;

তুৰঞ্চ বালং পরনেয্যং ৰিদিত্ৰা, ন তাদিসে রাজকুলে ৰসেয্যং.

২২৬.

‘‘সচাহং বালো পরনেয্যো অস্মি, একাপরাধং খম পুত্ত ময্হং;

পুনপি চে এদিসকং ভৰেয্য, যথামতিং সোমনস্স করোহী’’তি.

তত্থ দুক্খাতি তাত, পব্বজ্জা নাম পরপটিবদ্ধজীৰিকত্তা দুক্খা, মা পব্বজি, রাজা হোহীতি তং যাচি. কিন্নূধ দেৰাতি দেৰ, যে তৰ ভোগা, তেসু কিং নাম ভুঞ্জিতব্বং অত্থি. পরিৰারিতোতি পরিচারিতো, অযমেৰ ৰা পাঠো. তস্স কির জাতিস্সরঞাণং উপ্পজ্জি, তস্মা এৰমাহ. পরনেয্যন্তি অন্ধং ৰিয যট্ঠিযা পরেন নেতব্বং. তাদিসেতি তাদিসস্স রঞ্ঞো সন্তিকে ন পণ্ডিতেন ৰসিতব্বং, মযা অত্তনো ঞাণবলেন অজ্জ জীৰিতং লদ্ধং, নাহং তৰ সন্তিকে ৰসিস্সামীতি ঞাপেতুং এৰমাহ. যথামতিন্তি সচে পুন ময্হং এৰরূপো দোসো হোতি, অথ ত্ৰং যথাঅজ্ঝাসযং করোহীতি পুত্তং খমাপেসি.

মহাসত্তো রাজানং ওৰদন্তো অট্ঠ গাথা অভাসি –

২২৭.

‘‘অনিসম্ম কতং কম্মং, অনৰত্থায চিন্তিতং;

ভেসজ্জস্সেৰ ৰেভঙ্গো, ৰিপাকো হোতি পাপকো.

২২৮.

‘‘নিসম্ম চ কতং কম্মং, সম্মাৰত্থায চিন্তিতং;

ভেসজ্জস্সেৰ সম্পত্তি, ৰিপাকো হোতি ভদ্রকো.

২২৯.

‘‘অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধু.

২৩০.

‘‘নিসম্ম খত্তিযো কযিরা, নানিসম্ম দিসম্পতি;

নিসম্মকারিনো রাজ, যসো কিত্তি চ ৰড্ঢতি.

২৩১.

‘‘নিসম্ম দণ্ডং পণযেয্য ইস্সরো, ৰেগা কতং তপ্পতি ভূমিপাল;

সম্মাপণীধী চ নরস্স অত্থা, অনানুতপ্পা তে ভৰন্তি পচ্ছা.

২৩২.

‘‘অনানুতপ্পানি হি যে করোন্তি, ৰিভজ্জ কম্মাযতনানি লোকে;

ৰিঞ্ঞুপ্পসত্থানি সুখুদ্রযানি, ভৰন্তি বুদ্ধানুমতানি তানি.

২৩৩.

‘‘আগচ্ছুং দোৰারিকা খগ্গবন্ধা, কাসাৰিযা হন্তু মমং জনিন্দ;

মাতুঞ্চ অঙ্কস্মিমহং নিসিন্নো, আকড্ঢিতো সহসা তেহি দেৰ.

২৩৪.

‘‘কটুকঞ্হি সম্বাধং সুকিচ্ছং পত্তো, মধুরম্পি যং জীৰিতং লদ্ধ রাজ;

কিচ্ছেনহং অজ্জ ৰধা পমুত্তো, পব্বজ্জমেৰাভিমনোহমস্মী’’তি.

তত্থ অনিসম্মাতি অনোলোকেত্ৰা অনুপধারেত্ৰা. অনৰত্থায চিন্তিতন্তি অনৰত্থপেত্ৰা অতুলেত্ৰা অতীরেত্ৰা চিন্তিতং. ৰিপাকো হোতি পাপকোতি তস্স হি যথা নাম ভেসজ্জস্স ৰেভঙ্গো ৰিপত্তি, এৰমেৰং ৰিপাকো হোতি পাপকো. অসঞ্ঞতোতি কাযাদীহি অসঞ্ঞতো দুস্সীলো. তং ন সাধূতি তং তস্স কোধনং ন সাধু. নানিসম্মাতি অনিসামেত্ৰা কিঞ্চি কম্মং ন করেয্য. পণযেয্যাতি পট্ঠপেয্য পৰত্তেয্য. ৰেগাতি ৰেগেন সহসা. সম্মাপণীধী চাতি যোনিসো ঠপিতেন চিত্তেন কতা নরস্স অত্থা পচ্ছা অনানুতপ্পা ভৰন্তীতি অত্থো. ৰিভজ্জাতি ‘‘ইমানি কাতুং যুত্তানি, ইমানি অযুত্তানী’’তি এৰং পঞ্ঞায ৰিভজিত্ৰা. কম্মাযতনানীতি কম্মানি. বুদ্ধানুমতানীতি পণ্ডিতেহি অনুমতানি অনৰজ্জানি হোন্তি. কটুকন্তি দেৰ, কটুকং সম্বাধং সুকিচ্ছং মরণভযং পত্তোম্হি. লদ্ধাতি অত্তনো ঞাণবলেন লভিত্ৰা. পব্বজ্জমেৰাভিমনোহমস্মীতি পব্বজ্জাভিমুখচিত্তোযেৰস্মি.

এৰং মহাসত্তেন ধম্মে দেসিতে রাজা দেৰিং আমন্তেত্ৰা গাথমাহ –

২৩৫.

‘‘পুত্তো তৰাযং তরুণো সুধম্মে, অনুকম্পকো সোমনস্সো কুমারো;

তং যাচমানো ন লভামি স্ৰজ্জ, অরহসি নং যাচিতৰে তুৰম্পী’’তি.

তত্থ যাচিতৰেতি যাচিতুং.

সা পব্বজ্জাযমেৰ উযোজেন্তী গাথমাহ –

২৩৬.

‘‘রমস্সু ভিক্খাচরিযায পুত্ত, নিসম্ম ধম্মেসু পরিব্বজস্সু;

সব্বেসু ভূতেসু নিধায দণ্ডং, অনিন্দিতো ব্রহ্মমুপেতি ঠান’’ন্তি.

তত্থ নিসম্মাতি পব্বজন্তো চ নিসামেত্ৰা মিচ্ছাদিট্ঠিকানং পব্বজ্জং পহায সম্মাদিট্ঠিযুত্তং নিয্যানিকপব্বজ্জং পব্বজ.

অথ রাজা গাথমাহ –

২৩৭.

‘‘অচ্ছেররূপং ৰত যাদিসঞ্চ, দুক্খিতং মং দুক্খাপযসে সুধম্মে;

যাচস্সু পুত্তং ইতি ৰুচ্চমানা, ভিয্যোৰ উস্সাহযসে কুমার’’ন্তি.

তত্থ যাদিসঞ্চাতি যাদিসং ইদং ত্ৰং ৰদেসি, তং অচ্ছরিযরূপং ৰত. দুক্খিতন্তি পকতিযাপি মং দুক্খিতং ভিয্যো দুক্খাপযসি.

পুন দেৰী গাথমাহ –

২৩৮.

‘‘যে ৰিপ্পমুত্তা অনৰজ্জভোগিনো, পরিনিব্বুতা লোকমিমং চরন্তি;

তমরিযমগ্গং পটিপজ্জমানং, ন উস্সহে ৰারযিতুং কুমার’’ন্তি.

তত্থ ৰিপ্পমুত্তাতি রাগাদীহি ৰিপ্পমুত্তা. পরিনিব্বুতাতি কিলেসপরিনিব্বানেন নিব্বুতা. তমরিযমগ্গন্তি তং তেসং বুদ্ধাদীনং অরিযানং সন্তকং মগ্গং পটিপজ্জমানং মম পুত্তং ৰারেতুং ন উস্সহামি দেৰাতি.

তস্সা ৰচনং সুত্ৰা রাজা ওসানগাথমাহ –

২৩৯.

‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

যেসাযং সুত্ৰান সুভাসিতানি, অপ্পোস্সুক্কা ৰীতসোকা সুধম্মা’’তি.

তত্থ বহুঠানচিন্তিনোতি বহুকারণচিন্তিনো. যেসাযন্তি যেসং অযং. সোমনস্সকুমারস্সেৰ হি সা সুভাসিতং সুত্ৰা অপ্পোস্সুক্কা জাতা, রাজাপি তদেৰ সন্ধাযাহ.

মহাসত্তো মাতাপিতরো ৰন্দিত্ৰা ‘‘সচে ময্হং দোসো অত্থি, খমথা’’তি মহাজনস্স অঞ্জলিং কত্ৰা হিমৰন্তাভিমুখো গন্ত্ৰা মনুস্সেসু নিৰত্তেসু মনুস্সৰণ্ণেনাগন্ত্ৰা দেৰতাহি সত্ত পব্বতরাজিযো অতিক্কমিত্ৰা হিমৰন্তং নীতো ৰিস্সকম্মুনা নিম্মিতায পণ্ণসালায ইসিপব্বজ্জং পব্বজি. তং তত্থ যাৰ সোল়সৰস্সকালা রাজকুলপরিচারিকৰেসেন দেৰতাযেৰ উপট্ঠহিংসু. কূটজটিলম্পি মহাজনো পোথেত্ৰা জীৰিতক্খযং পাপেসি. মহাসত্তো ঝানাভিঞ্ঞং নিব্বত্তেত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপেস ময্হং ৰধায পরিসক্কিযেৰা’’তি ৰত্ৰা জাতকং সমোধানেসি – ‘‘তদা কুহকো দেৰদত্তো অহোসি, মাতা মহামাযা, মহারক্খিতো সারিপুত্তো, সোমনস্সকুমারো পন অহমেৰ অহোসি’’ন্তি.

সোমনস্সজাতকৰণ্ণনা নৰমা.

[৫০৬] ১০. চম্পেয্যজাতকৰণ্ণনা

কা নু ৰিজ্জুরিৰাভাসীতি ইদং সত্থা জেতৰনে ৰিহরন্তো উপোসথকম্মং আরব্ভ কথেসি. তদা হি সত্থা ‘‘সাধু ৰো কতং উপাসকা উপোসথৰাসং ৰসন্তেহি, পোরাণকপণ্ডিতা নাগসম্পত্তিং পহায উপোসথৰাসং ৰসিংসুযেৰা’’তি ৰত্ৰা তেহি যাচিতো অতীতং আহরি.

অতীতে অঙ্গরট্ঠে অঙ্গে চ মগধরট্ঠে মগধে চ রজ্জং কারেন্তে অঙ্গমগধরট্ঠানং অন্তরে চম্পা নাম নদী, তত্থ নাগভৰনং অহোসি. চম্পেয্যো নাম নাগরাজা রজ্জং কারেসি. কদাচি মগধরাজা অঙ্গরট্ঠং গণ্হাতি, কদাচি অঙ্গরাজা মগধরট্ঠং. অথেকদিৰসং মগধরাজা অঙ্গেন সদ্ধিং যুজ্ঝিত্ৰা যুদ্ধপরাজিতো অস্সং আরুয্হ পলাযন্তো অঙ্গরঞ্ঞো যোধেহি অনুবদ্ধো পুণ্ণং চম্পানদিং পত্ৰা ‘‘পরহত্থে মরণতো নদিং পৰিসিত্ৰা মতং সেয্যো’’তি অস্সেনেৰ সদ্ধিং নদিং ওতরি. তদা চম্পেয্যো নাগরাজা অন্তোদকে রতনমণ্ডপং নিম্মিনিত্ৰা মহাপরিৰারো মহাপানং পিৰতি. অস্সো রঞ্ঞা সদ্ধিং উদকে নিমুজ্জিত্ৰা নাগরঞ্ঞো পুরতো ওতরি. নাগরাজা অলঙ্কতপটিযত্তং রাজানং দিস্ৰা সিনেহং উপ্পাদেত্ৰা আসনা উট্ঠায ‘‘মা ভাযি, মহারাজা’’তি রাজানং অত্তনো পল্লঙ্কে নিসীদাপেত্ৰা উদকে নিমুগ্গকারণং পুচ্ছি. রাজা যথাভূতং কথেসি. অথ নং ‘‘মা ভাযি, মহারাজ, অহং তং দ্ৰিন্নং রট্ঠানং সামিকং করিস্সামী’’তি অস্সাসেত্ৰা সত্তাহং মহন্তং যসং অনুভৰিত্ৰা সত্তমে দিৰসে মগধরাজেন সদ্ধিং নাগভৰনা নিক্খমি. মগধরাজা নাগরাজস্সানুভাৰেন অঙ্গরাজানং গহেত্ৰা জীৰিতা ৰোরোপেত্ৰা দ্ৰীসু রট্ঠেসু রজ্জং কারেসি. ততো পট্ঠায রঞ্ঞো চ নাগরাজস্স চ ৰিস্সাসো থিরো অহোসি. রাজা অনুসংৰচ্ছরং চম্পানদীতীরে রতনমণ্ডপং কারেত্ৰা মহন্তেন পরিচ্চাগেন নাগরঞ্ঞো বলিকম্মং করোতি. সোপি মহন্তেন পরিৰারেন নাগভৰনা নিক্খমিত্ৰা বলিকম্মং সম্পটিচ্ছতি. মহাজনো নাগরঞ্ঞো সম্পত্তিং ওলোকেতি.

তদা বোধিসত্তো দলিদ্দকুলে নিব্বত্তো রাজপরিসায সদ্ধিং নদীতীরং গন্ত্ৰা তং নাগরাজস্স সম্পত্তিং দিস্ৰা লোভং উপ্পাদেত্ৰা তং পত্থযমানো দানং দত্ৰা সীলং রক্খিত্ৰা চম্পেয্যনাগরাজস্স কালকিরিযতো সত্তমে দিৰসে চৰিত্ৰা তস্স ৰসনপাসাদে সিরিগব্ভে সিরিসযনপিট্ঠে নিব্বত্তি. সরীরং সুমনদামৰণ্ণং মহন্তং অহোসি. সো তং দিস্ৰা ৰিপ্পটিসারী হুত্ৰা ‘‘মযা কতকুসলনিস্সন্দেন ছসু কামসগ্গেসু ইস্সরিযং কোট্ঠে পটিসামিতং ধঞ্ঞং ৰিয অহোসি. স্ৰাহং ইমিস্সা তিরচ্ছানযোনিযা পটিসন্ধিং গণ্হিং, কিং মে জীৰিতেনা’’তি মরণায চিত্তং উপ্পাদেসি. অথ নং সুমনা নাম নাগমাণৰিকা দিস্ৰা ‘‘মহানুভাৰো সত্তো নিব্বত্তো ভৰিস্সতী’’তি সেসনাগমাণৰিকানং সঞ্ঞং অদাসি, সব্বা নানাতূরিযহত্থা আগন্ত্ৰা তস্স উপহারং করিংসু. তস্স তং নাগভৰনং সক্কভৰনং ৰিয অহোসি, মরণচিত্তং পটিপ্পস্সম্ভি, সপ্পসরীরং ৰিজহিত্ৰা সব্বালঙ্কারপটিমণ্ডিতো সযনপিট্ঠে নিসীদি. অথস্স ততো পট্ঠায যসো মহা অহোসি.

সো তত্থ নাগরজ্জং কারেন্তো অপরভাগে ৰিপ্পটিসারী হুত্ৰা ‘‘কিং মে ইমায তিরচ্ছানযোনিযা, উপোসথৰাসং ৰসিত্ৰা ইতো মুচ্চিত্ৰা মনুস্সপথং গন্ত্ৰা সচ্চানি পটিৰিজ্ঝিত্ৰা দুক্খস্সন্তং করিস্সামী’’তি চিন্তেত্ৰা ততো পট্ঠায তস্মিংযেৰ পাসাদে উপোসথকম্মং করোতি. অলঙ্কতনাগমাণৰিকা তস্স সন্তিকং গচ্ছন্তি, যেভুয্যেনস্স সীলং ভিজ্জতি. সো ততো পট্ঠায পাসাদা নিক্খমিত্ৰা উয্যানং গচ্ছতি. তা তত্রাপি গচ্ছন্তি, উপোসথো ভিজ্জতেৰ. সো চিন্তেসি ‘‘মযা ইতো নাগভৰনা নিক্খমিত্ৰা মনুস্সলোকং গন্ত্ৰা উপোসথৰাসং ৰসিতুং ৰট্টতী’’তি. সো ততো পট্ঠায উপোসথদিৰসেসু নাগভৰনা নিক্খমিত্ৰা একস্স পচ্চন্তগামস্স অৰিদূরে মহামগ্গসমীপে ৰম্মিকমত্থকে ‘‘মম চম্মাদীহি অত্থিকা গণ্হন্তু, মং কীল়াসপ্পং ৰা কাতুকামা করোন্তূ’’তি সরীরং দানমুখে ৰিস্সজ্জেত্ৰা ভোগে আভুজিত্ৰা নিপন্নো উপোসথৰাসং ৰসতি. মহামগ্গেন গচ্ছন্তা চ আগচ্ছন্তা চ তং দিস্ৰা গন্ধাদীহি পূজেত্ৰা পক্কমন্তি. পচ্চন্তগামৰাসিনো গন্ত্ৰা ‘‘মহানুভাৰো নাগরাজা’’তি তস্স উপরি মণ্ডপং করিত্ৰা সমন্তা ৰালুকং ওকিরিত্ৰা গন্ধাদীহি পূজযিংসু. ততো পট্ঠায মনুস্সা মহাসত্তে পসীদিত্ৰা পূজং কত্ৰা পুত্তং পত্থেন্তি, ধীতরং পত্থেন্তি.

মহাসত্তোপি উপোসথকম্মং করোন্তো চাতুদ্দসীপন্নরসীসু ৰম্মিকমত্থকে নিপজ্জিত্ৰা পাটিপদে নাগভৰনং গচ্ছতি. তস্সেৰং উপোসথং করোন্তস্স অদ্ধা ৰীতিৰত্তো. একদিৰসং সুমনা অগ্গমহেসী আহ ‘‘দেৰ, ত্ৰং মনুস্সলোকং গন্ত্ৰা উপোসথং উপৰসসি, মনুস্সলোকো চ সাসঙ্কো সপ্পটিভযো, সচে তে ভযং উপ্পজ্জেয্য, অথ মযং যেন নিমিত্তেন জানেয্যাম, তং নো আচিক্খাহী’’তি. অথ নং মহাসত্তো মঙ্গলপোক্খরণিযা তীরং নেত্ৰা ‘‘সচে মং ভদ্দে, কোচি পহরিত্ৰা কিলমেস্সতি, ইমিস্সা পোক্খরণিযা উদকং আৰিলং ভৰিস্সতি, সচে সুপণ্ণো গহেস্সতি, উদকং পক্কুথিস্সতি, সচে অহিতুণ্ডিকো গণ্হিস্সতি, উদকং লোহিতৰণ্ণং ভৰিস্সতী’’তি আহ. এৰং তস্সা তীণি নিমিত্তানি আচিক্খিত্ৰা চাতুদ্দসীউপোসথং অধিট্ঠায নাগভৰনা নিক্খমিত্ৰা তত্থ গন্ত্ৰা ৰম্মিকমত্থকে নিপজ্জি সরীরসোভায ৰম্মিকং সোভযমানো. সরীরঞ্হিস্স রজতদামং ৰিয সেতং অহোসি মত্থকো রত্তকম্বলগেণ্ডুকো ৰিয. ইমস্মিং পন জাতকে বোধিসত্তস্স সরীরং নঙ্গলসীসপমাণং অহোসি, ভূরিদত্তজাতকে (জা. ২.২২.৭৮৪ আদযো) ঊরুপ্পমাণং, সঙ্খপালজাতকে (জা. ২.১৭.১৪৩ আদযো) একদোণিকনাৰপমাণং.

তদা একো বারাণসিৰাসী মাণৰো তক্কসিলং গন্ত্ৰা দিসাপামোক্খস্স আচরিযস্স সন্তিকে অলম্পাযনমন্তং উগ্গণ্হিত্ৰা তেন মগ্গেন অত্তনো গেহং গচ্ছন্তো মহাসত্তং দিস্ৰা ‘‘ইমং সপ্পং গহেত্ৰা গামনিগমরাজধানীসু কীল়াপেন্তো ধনং উপ্পাদেস্সামী’’তি চিন্তেত্ৰা দিব্বোসধানি গহেত্ৰা দিব্বমন্তং পরিৰত্তেত্ৰা তস্স সন্তিকং অগমাসি. দিব্বমন্তসুতকালতো পট্ঠায মহাসত্তস্স কণ্ণেসু অযসলাকপৰেসনকালো ৰিয জাতো, মত্থকো সিখরেন অভিমত্থিযমানো ৰিয জাতো. সো ‘‘কো নু খো এসো’’তি ভোগন্তরতো সীসং উক্খিপিত্ৰা ওলোকেন্তো অহিতুণ্ডিকং দিস্ৰা চিন্তেসি ‘‘মম ৰিসং মহন্তং, সচাহং কুজ্ঝিত্ৰা নাসৰাতং ৰিস্সজ্জেস্সামি, এতস্স সরীরং ভস্মমুট্ঠি ৰিয ৰিপ্পকিরিস্সতি, অথ মে সীলং খণ্ডং ভৰিস্সতি, ন দানি তং ওলোকেস্সামী’’তি. সো অক্খীনি নিম্মীলেত্ৰা সীসং ভোগন্তরে ঠপেসি.

অহিতুণ্ডিকো ব্রাহ্মণো ওসধং খাদিত্ৰা মন্তং পরিৰত্তেত্ৰা খেল়ং মহাসত্তস্স সরীরে ওপি, ওসধানঞ্চ মন্তস্স চানুভাৰেন খেল়েন ফুট্ঠফুট্ঠট্ঠানে ফোটানং উট্ঠানকালো ৰিয জাতো. অথ নং সো নঙ্গুট্ঠে গহেত্ৰা কড্ঢিত্ৰা দীঘসো নিপজ্জাপেত্ৰা অজপদেন দণ্ডেন উপ্পীল়েন্তো দুব্বলং কত্ৰা সীসং দল়্হং গহেত্ৰা নিপ্পীল়ি, মহাসত্তস্স মুখং ৰিৰরি. অথস্স মুখে খেল়ং ওপিত্ৰা ওসধমন্তং কত্ৰা দন্তে ভিন্দি, মুখং লোহিতস্স পূরি. মহাসত্তো অত্তনো সীলভেদভযেন এৰরূপং দুক্খং অধিৰাসেন্তো অক্খীনি উম্মীলেত্ৰা ওলোকনমত্তম্পি নাকরি. সোপি ‘‘নাগরাজানং দুব্বলং করিস্সামী’’তি নঙ্গুট্ঠতো পট্ঠাযস্স অট্ঠীনি চুণ্ণযমানো ৰিয সকলসরীরং মদ্দিত্ৰা পট্টকৰেঠনং নাম ৰেঠেসি, তন্তমজ্জিতং নাম মজ্জি, নঙ্গুট্ঠং গহেত্ৰা দুস্সপোথিমং নাম পোথেসি. মহাসত্তস্স সকলসরীরং লোহিতমক্খিতং অহোসি. সো মহাৰেদনং অধিৰাসেসি.

অথস্স দুব্বলভাৰং ঞত্ৰা ৰল্লীহি পেল়ং করিত্ৰা তত্থ নং পক্খিপিত্ৰা পচ্চন্তগামং নেত্ৰা মহাজনমজ্ঝে কীল়াপেসি. নীলাদীসু ৰণ্ণেসু ৰট্টচতুরস্সাদীসু সণ্ঠানেসু অণুংথূলাদীসু পমাণেসু যং যং ব্রাহ্মণো ইচ্ছতি, মহাসত্তো তংতদেৰ কত্ৰা নচ্চতি, ফণসতং ফণসহস্সম্পি করোতিযেৰ. মহাজনো পসীদিত্ৰা বহুং ধনং অদাসি. একদিৰসমেৰ কহাপণসহস্সঞ্চেৰ সহস্সগ্ঘনকে চ পরিক্খারে লভি. ব্রাহ্মণো আদিতোৰ সহস্সং লভিত্ৰা ‘‘ৰিস্সজ্জেস্সামী’’তি চিন্তেসি, তং পন ধনং লভিত্ৰা ‘‘পচ্চন্তগামেযেৰ তাৰ মে এত্তকং ধনং লদ্ধং, রাজরাজমহামচ্চানং সন্তিকে বহুং ধনং লভিস্সামী’’তি সকটঞ্চ সুখযানকঞ্চ গহেত্ৰা সকটে পরিক্খারে ঠপেত্ৰা সুখযানকে নিসিন্নো মহন্তেন পরিৰারেন মহাসত্তং গামনিগমাদীসু কীল়াপেন্তো ‘‘বারাণসিযং উগ্গসেনরঞ্ঞো সন্তিকে কীল়াপেত্ৰা ৰিস্সজ্জেস্সামী’’তি অগমাসি. সো মণ্ডূকে মারেত্ৰা নাগরঞ্ঞো দেতি. নাগরাজা ‘‘পুনপ্পুনং এস মং নিস্সায মারেস্সতী’’তি ন খাদতি. অথস্স মধুলাজে অদাসি. মহাসত্তো ‘‘সচাহং ভোজনং গণ্হিস্সামি, অন্তোপেল়ায এৰ মরণং ভৰিস্সতী’’তি তেপি ন খাদতি. ব্রাহ্মণো মাসমত্তেন বারাণসিং পত্ৰা দ্ৰারগামেসু কীল়াপেন্তো বহুং ধনং লভি.

রাজাপি নং পক্কোসাপেত্ৰা ‘‘অম্হাকং কীল়াপেহী’’তি আহ. ‘‘সাধু, দেৰ, স্ৰে পন্নরসে তুম্হাকং কীল়াপেস্সামী’’তি. রাজা ‘‘স্ৰে নাগরাজা রাজঙ্গণে নচ্চিস্সতি, মহাজনো সন্নিপতিত্ৰা পস্সতূ’’তি ভেরিং চরাপেত্ৰা পুনদিৰসে রাজঙ্গণং অলঙ্কারাপেত্ৰা ব্রাহ্মণং পক্কোসাপেসি. সো রতনপেল়ায মহাসত্তং নেত্ৰা ৰিচিত্তত্থরে পেল়ং ঠপেত্ৰা নিসীদি. রাজাপি পাসাদা ওরুয্হ মহাজনপরিৰুতো রাজাসনে নিসীদি. ব্রাহ্মণো মহাসত্তং নীহরিত্ৰা নচ্চাপেসি. মহাজনো সকভাৰেন সণ্ঠাতুং অসক্কোন্তো চেলুক্খেপসহস্সং পৰত্তেতি. বোধিসত্তস্স উপরি সত্তরতনৰস্সং ৰস্সতি. তস্স গহিতস্স মাসো সম্পূরি. এত্তকং কালং নিরাহারোৰ অহোসি. সুমনা ‘‘অতিচিরাযতি মে পিযসামিকো, ইদানিস্স ইধ অনাগচ্ছন্তস্স মাসো সম্পুণ্ণো, কিং নু খো কারণ’’ন্তি গন্ত্ৰা পোক্খরণিং ওলোকেন্তী লোহিতৰণ্ণং উদকং দিস্ৰা ‘‘অহিতুণ্ডিকেন গহিতো ভৰিস্সতী’’তি ঞত্ৰা নাগভৰনা নিক্খমিত্ৰা ৰম্মিকসন্তিকং গন্ত্ৰা মহাসত্তস্স গহিতট্ঠানঞ্চ কিলমিতট্ঠানঞ্চ দিস্ৰা রোদিত্ৰা কন্দিত্ৰা পচ্চন্তগামং গন্ত্ৰা পুচ্ছিত্ৰা তং পৰত্তিং সুত্ৰা বারাণসিং গন্ত্ৰা রাজঙ্গণে পরিসমজ্ঝে আকাসে রোদমানা অট্ঠাসি. মহাসত্তো নচ্চন্তোৰ আকাসং ওলোকেত্ৰা তং দিস্ৰা লজ্জিতো পেল়ং পৰিসিত্ৰা নিপজ্জি. রাজা তস্স পেল়ং পৰিট্ঠকালে ‘‘কিং নু খো কারণ’’ন্তি ইতো চিতো চ ওলোকেন্তো তং আকাসে ঠিতং দিস্ৰা পঠমং গাথমাহ –

২৪০.

‘‘কা নু ৰিজ্জুরিৰাভাসি, ওসধী ৰিয তারকা;

দেৰতা নুসি গন্ধব্বী, ন তং মঞ্ঞামী মানুসি’’ন্তি.

তত্থ ন তং মঞ্ঞামি মানুসিন্তি অহং তং মানুসীতি ন মঞ্ঞামি, তযা একায দেৰতায গন্ধব্বিযা ৰা ভৰিতুং ৰট্টতীতি ৰদতি.

ইদানি তেসং ৰচনপটিৰচনগাথা হোন্তি –

২৪১.

‘‘নম্হি দেৰী ন গন্ধব্বী, ন মহারাজ মানুসী;

নাগকঞ্ঞাস্মি ভদ্দন্তে, অত্থেনম্হি ইধাগতা.

২৪২.

‘‘ৰিব্ভন্তচিত্তা কুপিতিন্দ্রিযাসি, নেত্তেহি তে ৰারিগণা সৰন্তি;

কিং তে নট্ঠং কিং পন পত্থযানা, ইধাগতা নারি তদিঙ্ঘ ব্রূহি.

২৪৩.

‘‘যমুগ্গতেজো উরগোতি চাহু, নাগোতি নং আহু জনা জনিন্দ;

তমগ্গহী পুরিসো জীৰিকত্থো, তং বন্ধনা মুঞ্চ পতী মমেসো.

২৪৪.

‘‘কথং ন্ৰযং বলৰিরিযূপপন্নো, হত্থত্তমাগচ্ছি ৰনিব্বকস্স;

অক্খাহি মে নাগকঞ্ঞে তমত্থং, কথং ৰিজানেমু গহীতনাগং.

২৪৫.

‘‘নগরম্পি নাগো ভস্মং করেয্য, তথা হি সো বলৰিরিযূপপন্নো;

ধম্মঞ্চ নাগো অপচাযমানো, তস্মা পরক্কম্ম তপো করোতী’’তি.

তত্থ অত্থেনম্হীতি অহং একং কারণং পটিচ্চ ইধাগতা. কুপিতিন্দ্রিযাতি কিলন্তিন্দ্রিযা. ৰারিগণাতি অস্সুবিন্দুঘটা. উরগোতি চাহূতি উরগোতি চাযং মহাজনো কথেসি. তমগ্গহী পুরিসোতি অযং পুরিসো তং নাগরাজানং জীৰিকত্থায অগ্গহেসি. ৰনিব্বকস্সাতি ইমস্স ৰনিব্বকস্স কথং নু এস মহানুভাৰো সমানো হত্থত্তং আগতোতি পুচ্ছতি. ধম্মঞ্চাতি পঞ্চসীলধম্মং উপোসথৰাসধম্মঞ্চ গরুং করোন্তো ৰিহরতি, তস্মা ইমিনা পুরিসেন গহিতোপি ‘‘সচাহং ইমস্স উপরি নাসৰাতং ৰিস্সজ্জেস্সামি, ভস্মমুট্ঠি ৰিয ৰিকিরিস্সতি, এৰং মে সীলং ভিজ্জিস্সতী’’তি সীলভেদভযা পরক্কম্ম তং দুক্খং অধিৰাসেত্ৰা তপো করোতি, ৰীরিযমেৰ করোতীতি আহ.

রাজা ‘‘কহং পনেসো ইমিনা গহিতো’’তি পুচ্ছি. অথস্স সা আচিক্খন্তী গাথমাহ –

২৪৬.

‘‘চাতুদ্দসিং পঞ্চদসিঞ্চ রাজ, চতুপ্পথে সম্মতি নাগরাজা;

তমগ্গহী পুরিসো জীৰিকত্থো, তং বন্ধনা মুঞ্চ পতী মমেসো’’তি.

তত্থ চতুপ্পথেতি চতুক্কমগ্গস্স আসন্নট্ঠানে একস্মিং ৰম্মিকে চতুরঙ্গসমন্নাগতং অধিট্ঠানং অধিট্ঠহিত্ৰা উপোসথৰাসং ৰসন্তো নিপজ্জতীতি অত্থো. তং বন্ধনাতি তং এৰং ধম্মিকং গুণৰন্তং নাগরাজানং এতস্স ধনং দত্ৰা পেল়বন্ধনা পমুঞ্চ.

এৰঞ্চ পন ৰত্ৰা পুনপি তং যাচন্তী দ্ৰে গাথা অভাসি –

২৪৭.

‘‘সোল়সিত্থিসহস্সানি, আমুত্তমণিকুণ্ডলা;

ৰারিগেহসযা নারী, তাপি তং সরণং গতা.

২৪৮.

‘‘ধম্মেন মোচেহি অসাহসেন, গামেন নিক্খেন গৰং সতেন;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা’’তি.

তত্থ সোল়সিত্থিসহস্সানীতি মা ত্ৰং এস যো ৰা সো ৰা দলিদ্দনাগোতি মঞ্ঞিত্থ. এতস্স হি এত্তকা সব্বালঙ্কারপটিমণ্ডিতা ইত্থিযোৰ, সেসা সম্পত্তি অপরিমাণাতি দস্সেতি. ৰারিগেহসযাতি উদকচ্ছদনং উদকগব্ভং কত্ৰা তত্থ সযনসীলা. ওস্সট্ঠকাযোতি নিস্সট্ঠকাযো হুত্ৰা. চরাতূতি চরতু.

অথ নং রাজা তিস্সো গাথা অভাসি –

২৪৯.

‘‘ধম্মেন মোচেমি অসাহসেন, গামেন নিক্খেন গৰং সতেন;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা.

২৫০.

‘‘দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ পল্লঙ্কং, উমাপুপ্ফসরিন্নিভং.

২৫১.

‘‘দ্ৰে চ সাদিসিযো ভরিযা, উসভঞ্চ গৰং সতং;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা’’তি.

তত্থ লুদ্দাতি রাজা উরগং মোচেতুং অহিতুণ্ডিকং আমন্তেত্ৰা তস্স দাতব্বং দেয্যধম্মং দস্সেন্তো এৰমাহ. গাথা পন হেট্ঠা ৰুত্তত্থাযেৰ.

অথ নং লুদ্দো আহ –

২৫২.

‘‘ৰিনাপি দানা তৰ ৰচনং জনিন্দ, মুঞ্চেমু নং উরগং বন্ধনস্মা;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা’’তি.

তত্থ তৰ ৰচনন্তি মহারাজ, ৰিনাপি দানেন তৰ ৰচনমেৰ অম্হাকং গরু. মুঞ্চেমু নন্তি মুঞ্চিস্সামি এতন্তি ৰদতি.

এৰঞ্চ পন ৰত্ৰা মহাসত্তং পেল়তো নীহরি. নাগরাজা নিক্খমিত্ৰা পুপ্ফন্তরং পৰিসিত্ৰা তং অত্তভাৰং ৰিজহিত্ৰা মাণৰকৰণ্ণেন অলঙ্কতসরীরো হুত্ৰা পথৰিং ভিন্দন্তো ৰিয নিক্খন্তো অট্ঠাসি. সুমনা আকাসতো ওতরিত্ৰা তস্স সন্তিকে ঠিতা. নাগরাজা অঞ্জলিং পগ্গয্হ রাজানং নমস্সমানো অট্ঠাসি. তমত্থং পকাসেন্তো সত্থা দ্ৰে গাথা অভাসি –

২৫৩.

‘‘মুত্তো চম্পেয্যকো নাগো, রাজানং এতদব্রৰি;

নমো তে কাসিরাজত্থু, নমো তে কাসিৰড্ঢন;

অঞ্জলিং তে পগ্গণ্হামি, পস্সেয্যং মে নিৰেসনং.

২৫৪.

‘‘অদ্ধা হি দুব্বিস্সসমেতমাহু, যং মানুসো ৰিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৰেসনানী’’তি.

তত্থ পস্সেয্যং মে নিৰেসনন্তি মম নিৰেসনং চম্পেয্যনাগভৰনং রমণীযং পস্সিতব্বযুত্তকং. তং তে অহং দস্সেতুকামো, তং সবলৰাহনো ত্ৰং আগন্ত্ৰা পস্স, নরিন্দাতি ৰদতি. দুব্বিস্সসন্তি দুৰিস্সাসনীযং. সচে চাতি সচে মং যাচসি, পস্সেয্যাম তে নিৰেসনানি, অপি চ খো পন তং ন সদ্দহামীতি ৰদতি.

অথ নং সদ্দহাপেতুং সপথং করোন্তো মহাসত্তো দ্ৰে গাথা অভাসি –

২৫৫.

‘‘সচেপি ৰাতো গিরিমাৰহেয্য, চন্দো চ সুরিযো চ ছমা পতেয্যুং;

সব্বা চ নজ্জো পটিসোতং ৰজেয্যুং, ন ত্ৰেৰহং রাজ মুসা ভণেয্যং.

২৫৬.

‘‘নভং ফলেয্য উদধীপি সুস্সে, সংৰট্টযে ভূতধরা ৰসুন্ধরা;

সিলুচ্চযো মেরু সমূলমুপ্পতে, ন ত্ৰেৰহং রাজ মুসা ভণেয্য’’ন্তি.

তত্থ সংৰট্টযে ভূতধরা ৰসুন্ধরাতি অযং ভূতধরাতি চ ৰসুন্ধরাতি চ সঙ্খং গতা মহাপথৰী কিলঞ্জং ৰিয সংৰট্টেয্য. সমূলমুপ্পতেতি এৰং মহাসিনেরুপব্বতো সমূলো উট্ঠায পুরাণপণ্ণং ৰিয আকাসে পক্খন্দেয্য.

সো মহাসত্তেন এৰং ৰুত্তেপি অসদ্দহন্তো –

২৫৭.

‘‘অদ্ধা হি দুব্বিস্সসমেতমাহু, যং মানুসো ৰিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৰেসনানী’’তি. –

পুনপি তমেৰ গাথং ৰত্ৰা ‘‘ত্ৰং মযা কতগুণং জানিতুং অরহসি, সদ্দহিতুং পন যুত্তভাৰং ৰা অযুত্তভাৰং ৰা অহং জানিস্সামী’’তি পকাসেন্তো ইতরং গাথমাহ –

২৫৮.

‘‘তুম্হে খোত্থ ঘোরৰিসা উল়ারা, মহাতেজা খিপ্পকোপী চ হোথ;

মংকারণা বন্ধনস্মা পমুত্তো, অরহসি নো জানিতুযে কতানী’’তি.

তত্থ উল়ারাতি উল়ারৰিসা. জানিতুযেতি জানিতুং.

অথ নং সদ্দহাপেতুং পুন সপথং করোন্তো মহাসত্তো গাথমাহ –

২৫৯.

‘‘সো পচ্চতং নিরযে ঘোররূপে, মা কাযিকং সাতমলত্থ কিঞ্চি;

পেল়ায বদ্ধো মরণং উপেতু, যো তাদিসং কম্মকতং ন জানে’’তি.

তত্থ পচ্চতন্তি পচ্চতু. কম্মকতন্তি কতকম্মং এৰং গুণকারকং তুম্হাদিসং যো ন জানাতি, সো এৰরূপো হোতূতি ৰদতি.

অথস্স রাজা সদ্দহিত্ৰা থুতিং করোন্তো গাথমাহ –

২৬০.

‘‘সচ্চপ্পটিঞ্ঞা তৰ মেস হোতু, অক্কোধনো হোহি অনুপনাহী;

সব্বঞ্চ তে নাগকুলং সুপণ্ণা, অগ্গিংৰ গিম্হেসু ৰিৰজ্জযন্তূ’’তি.

তত্থ তৰ মেস হোতূতি তৰ এসা পটিঞ্ঞা সচ্চা হোতু. অগ্গিংৰ গিম্হেসু ৰিৰজ্জযন্তূতি যথা মনুস্সা গিম্হকালে সন্তাপং অনিচ্ছন্তা জলমানং অগ্গিং ৰিৰজ্জেন্তি, এৰং ৰিৰজ্জেন্তু দূরতোৰ পরিহরন্তু.

মহাসত্তোপি রঞ্ঞো থুতিং করোন্তো ইতরং গাথমাহ –

২৬১.

‘‘অনুকম্পসী নাগকুলং জনিন্দ, মাতা যথা সুপ্পিযং একপুত্তং;

অহঞ্চ তে নাগকুলেন সদ্ধিং, কাহামি ৰেয্যাৰটিকং উল়ার’’ন্তি.

তং সুত্ৰা রাজা নাগভৰনং গন্তুকামো সেনং গমনসজ্জং কাতুং আণাপেন্তো গাথমাহ –

২৬২.

‘‘যোজেন্তু ৰে রাজরথে সুচিত্তে, কম্বোজকে অস্সতরে সুদন্তে;

নাগে চ যোজেন্তু সুৰণ্ণকপ্পনে, দক্খেমু নাগস্স নিৰেসনানী’’তি.

তত্থ কম্বোজকে অস্সতরে সুদন্তেতি সুসিক্খিতে কম্বোজরট্ঠসম্ভৰে অস্সতরে যোজেন্তু.

ইতরা অভিসম্বুদ্ধগাথা –

২৬৩.

‘‘ভেরী মুদিঙ্গা পণৰা চ সঙ্খা, অৰজ্জযিংসু উগ্গসেনস্স রঞ্ঞো;

পাযাসি রাজা বহু সোভমানো, পুরক্খতো নারিগণস্স মজ্ঝে’’তি.

তত্থ বহু সোভমানোতি ভিক্খৰে, বারাণসিরাজা সোল়সহি নারীসহস্সেহি পুরক্খতো পরিৰারিতো তস্স নারীগণস্স মজ্ঝে বারাণসিতো নাগভৰনং গচ্ছন্তো অতিৰিয সোভমানো পাযাসি.

তস্স নগরা নিক্খন্তকালেযেৰ মহাসত্তো অত্তনো আনুভাৰেন নাগভৰনং সব্বরতনমযং পাকারঞ্চ দ্ৰারট্টালকে চ দিস্সমানরূপে কত্ৰা নাগভৰনগামিং মগ্গং অলঙ্কতপটিযত্তং মাপেসি. রাজা সপরিসো তেন মগ্গেন নাগভৰনং পৰিসিত্ৰা রমণীযং ভূমিভাগঞ্চ পাসাদে চ অদ্দস. তমত্থং পকাসেন্তো সত্থা আহ –

২৬৪.

‘‘সুৰণ্ণচিতকং ভূমিং, অদ্দক্খি কাসিৰড্ঢনো;

সোৰণ্ণমযপাসাদে, ৰেল়ুরিযফলকত্থতে.

২৬৫.

‘‘স রাজা পাৰিসি ব্যম্হং, চম্পেয্যস্স নিৰেসনং;

আদিচ্চৰণ্ণসন্নিভং, কংসৰিজ্জুপভস্সরং.

২৬৬.

‘‘নানারুক্খেহি সঞ্ছন্নং, নানাগন্ধসমীরিতং;

সো পাৰেক্খি কাসিরাজা, চম্পেয্যস্স নিৰেসনং.

২৬৭.

‘‘পৰিট্ঠস্মিং কাসিরঞ্ঞে, চম্পেয্যস্স নিৰেসনং;

দিব্বা তূরিযা পৰজ্জিংসু, নাগকঞ্ঞা চ নচ্চিসুং.

২৬৮.

‘‘তং নাগকঞ্ঞা চরিতং গণেন, অন্ৰারুহী কাসিরাজা পসন্নো;

নিসীদি সোৰণ্ণমযম্হি পীঠে, সাপস্সযে চন্দনসারলিত্তে’’তি.

তত্থ সুৰণ্ণচিতকন্তি সুৰণ্ণৰালুকায সন্থতং. ব্যম্হন্তি অলঙ্কতনাগভৰনং. চম্পেয্যস্সাতি নাগভৰনং পৰিসিত্ৰা চম্পেয্যনাগরাজস্স নিৰেসনং পাৰিসি. কংসৰিজ্জুপভস্সরন্তি মেঘমুখে সঞ্চরণসুৰণ্ণৰিজ্জু ৰিয ওভাসমানং. নানাগন্ধসমীরিতন্তি নানাৰিধেহি দিব্বগন্ধেহি অনুসঞ্চরিতং. চরিতং গণেনাতি তং নিৰেসনং নাগকঞ্ঞাগণেন চরিতং অনুসঞ্চরিতং. চন্দনসারলিত্তেতি দিব্বসারচন্দনেন অনুলিত্তে.

তত্থ নিসিন্নমত্তস্সেৰস্স নানগ্গরসং দিব্বভোজনং উপনামেসুং, তথা সোল়সন্নং ইত্থিসহস্সানং সেসরাজপরিসায চ. সো সত্তাহমত্তং সপরিসো দিব্বন্নপানাদীনি পরিভুঞ্জিত্ৰা দিব্বেহি কামগুণেহি অভিরমিত্ৰা সুখসযনে নিসিন্নো মহাসত্তস্স যসং ৰণ্ণেত্ৰা ‘‘নাগরাজ, ত্ৰং এৰরূপং সম্পত্তিং পহায মনুস্সলোকে ৰম্মিকমত্থকে নিপজ্জিত্ৰা কস্মা উপোসথৰাসং ৰসী’’তি পুচ্ছি. সোপিস্স কথেসি. তমত্থং পকাসেন্তো সত্থা আহ –

২৬৯.

‘‘সো তত্থ ভুত্ৰা চ অথো রমিত্ৰা, চম্পেয্যকং কাসিরাজা অৰোচ;

ৰিমানসেট্ঠানি ইমানি তুয্হং, আদিচ্চৰণ্ণানি পভস্সরানি;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭০.

‘‘তা কম্বুকাযূরধরা সুৰত্থা, ৰট্টঙ্গুলী তম্বতলূপপন্না;

পগ্গয্হ পাযেন্তি অনোমৰণ্ণা, নেতাদিসং অত্থি মনুস্সলোকে;

কিং পত্থযং নাগ তপো করোসি.

২৭১.

‘‘নজ্জো চ তেমা পুথুলোমমচ্ছা, আটাসকুন্তাভিরুদা সুতিত্থা;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭২.

‘‘কোঞ্চা মযূরা দিৰিযা চ হংসা, ৰগ্গুস্সরা কোকিলা সম্পতন্তি;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৩.

‘‘অম্বা চ সালা তিলকা চ জম্বুযো, উদ্দালকা পাটলিযো চ ফুল্লা;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৪.

‘‘ইমা চ তে পোক্খরঞ্ঞো সমন্ততো, দিব্বা চ গন্ধা সততং পৰাযন্তি;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৫.

‘‘ন পুত্তহেতু ন ধনস্স হেতু, ন আযুনো চাপি জনিন্দ হেতু;

মনুস্সযোনিং অভিপত্থযানো, তস্মা পরক্কম্ম তপো করোমী’’তি.

তত্থ তাতি সোল়সসহস্সনাগকঞ্ঞাযো সন্ধাযাহ. কম্বুকাযূরধরাতি সুৰণ্ণাভরণধরা. ৰট্টঙ্গুলীতি পৰাল়ঙ্কুরসদিসৰট্টঙ্গুলী. তম্বতলূপপন্নাতি অভিরত্তেহি হত্থপাদতলেহি সমন্নাগতা. পাযেন্তীতি দিব্বপানং উক্খিপিত্ৰা তং পাযেন্তি. পুথুলোমমচ্ছাতি পুথুলপত্তেহি নানামচ্ছেহি সমন্নাগতা. আটাসকুন্তাভিরুদাতি আটাসঙ্খাতেহি সকুণেহি অভিরুদা. সুতিত্থাতি সুন্দরতিত্থা. দিৰিযা চ হংসাতি দিব্বহংসা চ. সম্পতন্তীতি মনুঞ্ঞরৰং রৰন্তা রুক্খতো রুক্খং সম্পতন্তি. দিব্বা চ গন্ধাতি তাসু পোক্খরণীসু সততং দিব্বগন্ধা ৰাযন্তি. অভিপত্থযানোতি পত্থযন্তো ৰিচরামি. তস্মাতি তেন কারণেন পরক্কম্ম ৰীরিযং পগ্গহেত্ৰা তপো করোমি, উপোসথং উপৰসামীতি.

এৰং ৰুত্তে রাজা আহ –

২৭৬.

‘‘ত্ৰং লোহিতক্খো ৰিহতন্তরংসো, অলঙ্কতো কপ্পিতকেসমস্সু;

সুরোসিতো লোহিতচন্দনেন, গন্ধব্বরাজাৰ দিসা পভাসসি.

২৭৭.

‘‘দেৰিদ্ধিপত্তোসি মহানুভাৰো, সব্বেহি কামেহি সমঙ্গিভূতো;

পুচ্ছামি তং নাগরাজেতমত্থং, সেয্যো ইতো কেন মনুস্সলোকো’’তি.

তত্থ সুরোসিতোতি সুৰিলিত্তো.

অথস্স আচিক্খন্তো নাগরাজা আহ –

২৭৮.

‘‘জনিন্দ নাঞ্ঞত্র মনুস্সলোকা, সুদ্ধীৰ সংৰিজ্জতি সংযমো ৰা;

অহঞ্চ লদ্ধান মনুস্সযোনিং, কাহামি জাতিমরণস্স অন্ত’’ন্তি.

তত্থ সুদ্ধী ৰাতি মহারাজ, অঞ্ঞত্র মনুস্সলোকা অমতমহানিব্বানসঙ্খাতা সুদ্ধি ৰা সীলসংযমো ৰা নত্থি. অন্তন্তি মনুস্সযোনিং লদ্ধা জাতিমরণস্স অন্তং করিস্সামীতি তপো করোমীতি.

তং সুত্ৰা রাজা আহ –

২৭৯.

‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নারিযো চ দিস্ৰান তুৰঞ্চ নাগ, কাহামি পুঞ্ঞানি অনপ্পকানী’’তি.

তত্থ নারিযো চাতি ইমা তৰ নাগকঞ্ঞাযো চ তুৰঞ্চ দিস্ৰা বহূনি পুঞ্ঞানি করিস্সামীতি ৰদতি.

অথ নং নাগরাজা আহ –

২৮০.

‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নারিযো চ দিস্ৰান মমঞ্চ রাজ, করোহি পুঞ্ঞানি অনপ্পকানী’’তি.

তত্থ করোহীতি করেয্যাসি, মহারাজাতি.

এৰং ৰুত্তে উগ্গসেনো গন্তুকামো হুত্ৰা ‘‘নাগরাজ, চিরং ৰসিম্হ, গমিস্সামা’’তি আপুচ্ছি. অথ নং মহাসত্তো ‘‘তেন হি মহারাজ, যাৰদিচ্ছকং ধনং গণ্হাহী’’তি ধনং দস্সেন্তো আহ –

২৮১.

‘‘ইদঞ্চ মে জাতরূপং পহূতং, রাসী সুৰণ্ণস্স চ তালমত্তা;

ইতো হরিত্ৰান সুৰণ্ণঘরানি, করস্সু রূপিযপাকারং করোন্তু.

২৮২.

‘‘মুত্তা চ ৰাহসহস্সানি পঞ্চ, ৰেল়ুরিযমিস্সানি ইতো হরিত্ৰা;

অন্তেপুরে ভূমিযং সন্থরন্তু, নিক্কদ্দমা হেহিতি নীরজা চ.

২৮৩.

‘‘এতাদিসং আৰস রাজসেট্ঠ, ৰিমানসেট্ঠং বহু সোভমানং;

বারাণসিং নগরং ইদ্ধং ফীতং, রজ্জঞ্চ কারেহি অনোমপঞ্ঞা’’তি.

তত্থ রাসীতি তেসু তেসু ঠানেসু তালপমাণা রাসিযো. সুৰণ্ণঘরানীতি সুৰণ্ণগেহানি. নিক্কদ্দমাতি এৰং তে অন্তেপুরে ভূমি নিক্কদ্দমা চ নিরজা চ ভৰিস্সতি. এতাদিসন্তি এৰরূপং সুৰণ্ণমযং রজতপাকারং মুত্তাৰেল়ুরিযসন্থতভূমিভাগং. ফীতন্তি ফীতং বারাণসিনগরঞ্চ আৰস. অনোমপঞ্ঞাতি অলামকপঞ্ঞা.

রাজা তস্স কথং সুত্ৰা অধিৰাসেসি. অথ মহাসত্তো নাগভৰনে ভেরিং চরাপেসি ‘‘সব্বা রাজপরিসা যাৰদিচ্ছকং হিরঞ্ঞসুৰণ্ণাদিকং ধনং গণ্হন্তূ’’তি. রঞ্ঞো চ অনেকেহি সকটসতেহি ধনং পেসেসি. রাজা মহন্তেন যসেন নাগভৰনা নিক্খমিত্ৰা বারাণসিমেৰ গতো. ততো পট্ঠায কির জম্বুদীপতলং সহিরঞ্ঞং জাতং.

সত্থা ইমং ধম্মদেসনং আহরিত্ৰা ‘‘এৰং পোরাণকপণ্ডিতা নাগসম্পত্তিং পহায উপোসথৰাসং ৰসিংসূ’’তি ৰত্ৰা জাতকং সমোধানেসি – ‘‘তদা অহিতুণ্ডিকো দেৰদত্তো অহোসি, সুমনা রাহুলমাতা, উগ্গসেনো সারিপুত্তো, চম্পেয্যনাগরাজা পন অহমেৰ অহোসি’’ন্তি.

চম্পেয্যজাতকৰণ্ণনা দসমা.

[৫০৭] ১১. মহাপলোভনজাতকৰণ্ণনা

ব্রহ্মলোকা চৰিত্ৰানাতি ইদং সত্থা জেতৰনে ৰিহরন্তো ৰিসুদ্ধসংকিলেসং আরব্ভ কথেসি. ৰত্থু হেট্ঠা ৰিত্থারিতমেৰ. ইধ পন সত্থা ‘‘ভিক্খু মাতুগামো নামেস ৰিসুদ্ধসত্তেপি সংকিলিট্ঠে করোতী’’তি ৰত্ৰা অতীতং আহরি.

অতীতে বারাণসিযন্তি চূল়পলোভনে (জা. ১.৩.৩৭ আদযো) ৰুত্তনযেনেৰ অতীতৰত্থু ৰিত্থারিতব্বং. তদা পন মহাসত্তো ব্রহ্মলোকা চৰিত্ৰা কাসিরঞ্ঞো পুত্তো হুত্ৰা নিব্বত্তি, অনিত্থিগন্ধকুমারো নাম অহোসি. ইত্থীনং হত্থে ন সণ্ঠাতি, পুরিসৰেসেন নং থঞ্ঞং পাযেন্তি, ঝানাগারে ৰসতি, ইত্থিযো ন পস্সতি. তমত্থং পকাসেন্তো সত্থা চতস্সো গাথা অভাসি –

২৮৪.

‘‘ব্রহ্মলোকা চৰিত্ৰান, দেৰপুত্তো মহিদ্ধিকো;

রঞ্ঞো পুত্তো উদপাদি, সব্বকামসমিদ্ধিসু.

২৮৫.

‘‘কামা ৰা কামসঞ্ঞা ৰা, ব্রহ্মলোকে ন ৰিজ্জতি;

স্ৰাস্সু তাযেৰ সঞ্ঞায, কামেহি ৰিজিগুচ্ছথ.

২৮৬.

‘‘তস্স চন্তেপুরে আসি, ঝানাগারং সুমাপিতং;

সো তত্থ পটিসল্লীনো, একো রহসি ঝাযথ.

২৮৭.

‘‘স রাজা পরিদেৰেসি, পুত্তসোকেন অট্টিতো;

একপুত্তো চযং ময্হং, ন চ কামানি ভুঞ্জতী’’তি.

তত্থ সব্বকামসমিদ্ধিসূতি সব্বকামানং সমিদ্ধীসু সম্পত্তীসু ঠিতস্স রঞ্ঞো পুত্তো হুত্ৰা একো দেৰপুত্তো নিব্বত্তি. স্ৰাস্সূতি সো কুমারো. তাযেৰাতি তায ব্রহ্মলোকে নিব্বত্তিতায ঝানসঞ্ঞায এৰ. সুমাপিতন্তি পিতরা সুট্ঠু মনাপং কত্ৰা মাপিতং. রহসি ঝাযথাতি মাতুগামং অপস্সন্তো ৰসি. পরিদেৰেসীতি ৰিলপি.

পঞ্চমা রঞ্ঞো পরিদেৰনগাথা –

২৮৮.

‘‘কো নু খ্ৰেত্থ উপাযো সো, কো ৰা জানাতি কিঞ্চনং;

যো মে পুত্তং পলোভেয্য, যথা কামানি পত্থযে’’তি.

তত্থ কো নু খ্ৰেত্থ উপাযোতি কো নু খো এত্থ এতস্স কামানং ভুঞ্জনউপাযো. ‘‘কো নু খো ইধুপাযো সো’’তিপি পাঠো, অট্ঠকথাযং পন ‘‘কো নু খো এতং উপৰসিত্ৰা উপলাপনকারণং জানাতী’’তি ৰুত্তং. কো ৰা জানাতি কিঞ্চনন্তি কো ৰা এতস্স পলিবোধকারণং জানাতীতি অত্থো.

ততো পরং দিযড্ঢগাথা অভিসম্বুদ্ধগাথা –

২৮৯.

‘‘অহু কুমারী তত্থেৰ, ৰণ্ণরূপসমাহিতা;

কুসলা নচ্চগীতস্স, ৰাদিতে চ পদক্খিণা.

২৯০.

‘‘সা তত্থ উপসঙ্কম্ম, রাজানং এতদব্রৰী’’তি;

তত্থ অহূতি ভিক্খৰে, তত্থেৰ অন্তেপুরে চূল়নাটকানং অন্তরে একা তরুণকুমারিকা অহোসি. পদক্খিণাতি সুসিক্খিতা.

‘‘অহং খো নং পলোভেয্যং, সচে ভত্তা ভৰিস্সতী’’তি. –

উপড্ঢগাথা কুমারিকায ৰুত্তা.

তত্থ সচে ভত্তাতি সচে এস ময্হং পতি ভৰিস্সতীতি.

২৯১.

‘‘তং তথাৰাদিনিং রাজা, কুমারিং এতদব্রৰি;

ত্ৰঞ্ঞেৰ নং পলোভেহি, তৰ ভত্তা ভৰিস্সতীতি.

তত্থ তৰ ভত্তাতি তৰেস পতি ভৰিস্সতি, ত্ৰঞ্ঞেৰ তস্স অগ্গমহেসী ভৰিস্সসি, গচ্ছ নং পলোভেহি, কামরসং জানাপেহীতি.

এৰং ৰত্ৰা রাজা ‘‘ইমিস্সা কির ওকাসং করোন্তূ’’তি কুমারস্স উপট্ঠাকানং পেসেসি. সা পচ্চূসকালে ৰীণং আদায গন্ত্ৰা কুমারস্স সযনগব্ভস্স বহি অৰিদূরে ঠত্ৰা অগ্গনখেহি ৰীণং ৰাদেন্তী মধুরসরেন গাযিত্ৰা তং পলোভেসি. তমত্থং পকাসেন্তো সত্থা আহ –

২৯২.

‘‘সা চ অন্তেপুরং গন্ত্ৰা, বহুং কামুপসংহিতং;

হদযঙ্গমা পেমনীযা, চিত্রা গাথা অভাসথ.

২৯৩.

‘‘তস্সা চ গাযমানায, সদ্দং সুত্ৰান নারিযা;

কামচ্ছন্দস্স উপ্পজ্জি, জনং সো পরিপুচ্ছথ.

২৯৪.

‘‘কস্সেসো সদ্দো কো ৰা সো, ভণতি উচ্চাৰচং বহুং;

হদযঙ্গমং পেমনীযং, অহো কণ্ণসুখং মম.

২৯৫.

‘‘এসা খো পমদা দেৰ, খিড্ডা এসা অনপ্পিকা;

সচে ত্ৰং কামে ভুঞ্জেয্য, ভিয্যো ভিয্যো ছাদেয্যু তং.

২৯৬.

‘‘ইঙ্ঘ আগচ্ছতোরেন, অৰিদূরম্হি গাযতু;

অস্সমস্স সমীপম্হি, সন্তিকে ময্হ গাযতু.

২৯৭.

‘‘তিরোকুট্টম্হি গাযিত্ৰা, ঝানাগারম্হি পাৰিসি;

বন্ধি নং অনুপুব্বেন, আরঞ্ঞমিৰ কুঞ্জরং.

২৯৮.

‘‘তস্স কামরসং ঞত্ৰা, ইস্সাধম্মো অজাযথ;

‘অহমেৰ কামে ভুঞ্জেয্যং, মা অঞ্ঞো পুরিসো অহু’.

২৯৯.

‘‘ততো অসিং গহেত্ৰান, পুরিসে হন্তুং উপক্কমি;

অহমেৰেকো ভুঞ্জিস্সং, মা অঞ্ঞো পুরিসো সিযা.

৩০০.

‘‘ততো জানপদা সব্বে, ৰিক্কন্দিংসু সমাগতা;

পুত্তো ত্যাযং মহারাজ, জনং হেঠেত্যদূসকং.

৩০১.

‘‘তঞ্চ রাজা ৰিৰাহেসি, সম্হা রট্ঠা চ খত্তিযো;

যাৰতা ৰিজিতং ময্হং, ন তে ৰত্থব্ব তাৰদে.

৩০২.

‘‘ততো সো ভরিযমাদায, সমুদ্দং উপসঙ্কমি;

পণ্ণসালং করিত্ৰান, ৰনমুঞ্ছায পাৰিসি.

৩০৩.

‘‘অথেত্থ ইসি মাগচ্ছি, সমুদ্দং উপরূপরি;

সো তস্স গেহং পাৰেক্খি, ভত্তকালে উপট্ঠিতে.

৩০৪.

‘‘তঞ্চ ভরিযা পলোভেসি, পস্স যাৰ সুদারুণং;

চুতো সো ব্রহ্মচরিযম্হা, ইদ্ধিযা পরিহাযথ.

৩০৫.

‘‘রাজপুত্তো চ উঞ্ছাতো, ৰনমূলফলং বহুং;

সাযং কাজেন আদায, অস্সমং উপসঙ্কমি.

৩০৬.

‘‘ইসী চ খত্তিযং দিস্ৰা, সমুদ্দং উপসঙ্কমি;

‘ৰেহাযসং গমিস্স’ন্তি, সীদতে সো মহণ্ণৰে.

৩০৭.

‘‘খত্তিযো চ ইসিং দিস্ৰা, সীদমানং মহণ্ণৰে;

তস্সেৰ অনুকম্পায, ইমা গাথা অভাসথ.

৩০৮.

‘‘অভিজ্জমানে ৰারিস্মিং, সযং আগম্ম ইদ্ধিযা;

মিস্সীভাৰিত্থিযা গন্ত্ৰা, সংসীদসি মহণ্ণৰে.

৩০৯.

‘‘আৰট্টনী মহামাযা, ব্রহ্মচরিযৰিকোপনা;

সীদন্তি নং ৰিদিত্ৰান, আরকা পরিৰজ্জযে.

৩১০.

‘‘অনলা মুদুসম্ভাসা, দুপ্পূরা তা নদীসমা;

সীদন্তি নং ৰিদিত্ৰান, আরকা পরিৰজ্জযে.

৩১১.

‘‘যং এতা উপসেৰন্তি, ছন্দসা ৰা ধনেন ৰা;

জাতৰেদোৰ সং ঠানং, খিপ্পং অনুদহন্তি তং.

৩১২.

‘‘খত্তিযস্স ৰচো সুত্ৰা, ইসিস্স নিব্বিদা অহু;

লদ্ধা পোরাণকং মগ্গং, গচ্ছতে সো ৰিহাযসং.

৩১৩.

‘‘খত্তিযো চ ইসিং দিস্ৰা, গচ্ছমানং ৰিহাযসং;

সংৰেগং অলভী ধীরো, পব্বজ্জং সমরোচযি.

৩১৪.

‘‘ততো সো পব্বজিত্ৰান, কামরাগং ৰিরাজযি;

কামরাগং ৰিরাজেত্ৰা, ব্রাহ্মলোকূপগো অহূ’’তি.

তত্থ অন্তেপুরন্তি কুমারস্স ৰসনট্ঠানং. বহুন্তি বহুং নানপ্পকারং. কামুপসংহিতন্তি কামনিস্সিতং গীতং পৰত্তযমানা. কামচ্ছন্দস্সাতি অস্স অনিত্থিগন্ধকুমারস্স কামচ্ছন্দো উপ্পজ্জি. জনন্তি অত্তনো সন্তিকাৰচরং পরিচারিকজনং. উচ্চাৰচন্তি উগ্গতঞ্চ অনুগ্গতঞ্চ. ভুঞ্জেয্যাতি সচে ভুঞ্জেয্যাসি. ছাদেয্যু তন্তি এতে কামা নাম তৰ রুচ্চেয্যুং. সো ‘‘পমদা’’তি ৰচনং সুত্ৰা তুণ্হী অহোসি. ইতরা পুনদিৰসেপি গাযি. এৰং কুমারো পটিবদ্ধচিত্তো হুত্ৰা তস্সা আগমনং রোচেন্তো পরিচারিকে আমন্তেত্ৰা ‘‘ইঙ্ঘা’’তি গাথমাহ.

তিরোকুট্টম্হীতি সযনগব্ভকুট্টস্স বহি. মা অঞ্ঞোতি অঞ্ঞো কামে পরিভুঞ্জন্তো পুরিসো নাম মা সিযা. হন্তুং উপক্কমীতি অন্তরৰীথিং ওতরিত্ৰা মারেতুং আরভি. ৰিকন্দিংসূতি কুমারেন কতিপযেসু পুরিসেসু পহতেসু পুরিসা পলাযিত্ৰা গেহানি পৰিসিংসু. সো পুরিসে অলভন্তো থোকং ৰিস্সমি. তস্মিং খণে রাজঙ্গণে সন্নিপতিত্ৰা উপক্কোসিংসু. জনং হেঠেত্যদূসকন্তি নিরপরাধং জনং হেঠেতি, তং গণ্হাপেথাতি ৰদিংসু. রাজা উপাযেন কুমারং গণ্হাপেত্ৰা ‘‘ইমস্স কিং কত্তব্ব’’ন্তি পুচ্ছি. ‘‘দেৰ, অঞ্ঞং নত্থি, ইমং পন কুমারং তায কুমারিকায সদ্ধিং রট্ঠা পব্বাজেতুং ৰট্টতী’’তি ৰুত্তে তথা অকাসি. তমত্থং পকাসেন্তো সত্থা ‘‘তঞ্চা’’তিআদিমাহ. তত্থ ৰিৰাহেসীতি পব্বাজেসি. ন তে ৰত্থব্ব তাৰদেতি যত্তকং ময্হং ৰিজিতং, তত্তকে তযা ন ৰত্থব্বং. উঞ্ছাযাতি ফলাফলত্থায.

তস্মিং পন ৰনং পৰিট্ঠে ইতরা যং তত্থ পচিতব্বযুত্তকং অত্থি, তং পচিত্ৰা তস্সাগমনং ওলোকেন্তী পণ্ণসালদ্ৰারে নিসীদতি. এৰং কালে গচ্ছন্তে একদিৰসং অন্তরদীপকৰাসী একো ইদ্ধিমন্ততাপসো অস্সমপদতো নিক্খমিত্ৰা মণিফলকং ৰিয উদকং মদ্দমানোৰ আকাসে উপ্পতিত্ৰা ভিক্খাচারং গচ্ছন্তো পণ্ণসালায উপরিভাগং পত্ৰা ধূমং দিস্ৰা ‘‘ইমস্মিং ঠানে মনুস্সা ৰসন্তি মঞ্ঞে’’তি পণ্ণসালদ্ৰারে ওতরি. সা তং দিস্ৰা নিসীদাপেত্ৰা পটিবদ্ধচিত্তা হুত্ৰা ইত্থিকুত্তং দস্সেত্ৰা তেন সদ্ধিং অনাচারং অচরি. তমত্থং পকাসেন্তো সত্থা ‘‘অথেত্থা’’তিআদিমাহ. তত্থ ইসি মাগচ্ছীতি ইসি আগচ্ছি. সমুদ্দং উপরূপরীতি সমুদ্দস্স মত্থকমত্থকেন. পস্স যাৰ সুদারুণন্তি পস্সথ, ভিক্খৰে, তায কুমারিকায যাৰ সুদারুণং কম্মং কতন্তি অত্থো.

সাযন্তি সাযন্হসমযে. দিস্ৰাতি তং ৰিজহিতুং অসক্কোন্তো সকলদিৰসং তত্থেৰ হুত্ৰা সাযন্হসমযে রাজপুত্তং আগতং দিস্ৰা পলাযিতুং ‘‘ৰেহাযসং গমিস্স’’ন্তি উপ্পতনাকারং করোন্তো পতিত্ৰা মহণ্ণৰে সীদতি. ইসিং দিস্ৰাতি অনুবন্ধমানো গন্ত্ৰা পস্সিত্ৰা. অনুকম্পাযাতি সচাযং ভূমিযা আগতো অভৰিস্স, পলাযিত্ৰা অরঞ্ঞং পৰিসেয্য, আকাসেন আগতো ভৰিস্সতি, তস্মা সমুদ্দে পতিতোপি উপ্পতনাকারমেৰ করোতীতি অনুকম্পং উপ্পাদেত্ৰা তস্সেৰ অনুকম্পায অভাসথ. তাসং পন গাথানং অত্থো তিকনিপাতে ৰুত্তোযেৰ. নিব্বিদা অহূতি কামেসু নিব্বেদো জাতো. পোরাণকং মগ্গন্তি পুব্বে অধিগতং ঝানৰিসেসং. পব্বজিত্ৰানাতি তং ইত্থিং মনুস্সাৰাসং নেত্ৰা নিৰত্তিত্ৰা অরঞ্ঞে ইসিপব্বজ্জং পব্বজিত্ৰা কামরাগং ৰিরাজযি, ৰিরাজেত্ৰা ব্রহ্মলোকূপগো অহোসীতি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, মাতুগামং পটিচ্চ ৰিসুদ্ধসত্তাপি সংকিলিস্সন্তী’’তি ৰত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উক্কণ্ঠিতভিক্খু অরহত্তং পত্তো. তদা অনিত্থিগন্ধকুমারো অহমেৰ অহোসিন্তি.

মহাপলোভনজাতকৰণ্ণনা একাদসমা.

[৫০৮] ১২. পঞ্চপণ্ডিতজাতকৰণ্ণনা

৩১৫-৩৩৬. পঞ্চপণ্ডিতজাতকং মহাউমঙ্গে আৰি ভৰিস্সতি.

পঞ্চপণ্ডিতজাতকৰণ্ণনা দ্ৰাদসমা.

[৫০৯] ১৩. হত্থিপালজাতকৰণ্ণনা

চিরস্সং ৰত পস্সামাতি ইদং সত্থা জেতৰনে ৰিহরন্তো মহাভিনিক্খমনং আরব্ভ কথেসি. তদা হি সত্থা ‘‘ন, ভিক্খৰে, ইদানেৰ, পুব্বেপি তথাগতো মহাভিনিক্খমনং নিক্খন্তোযেৰা’’তি ৰত্ৰা অতীতং আহরি.

অতীতে বারাণসিযং এসুকারী নাম রাজা অহোসি. তস্স পুরোহিতো দহরকালতো পট্ঠায পিযসহাযো. তে উভোপি অপুত্তকা অহেসুং. তে একদিৰসং সুখসযনে নিসিন্না মন্তযিংসু ‘‘অম্হাকং ইস্সরিযং মহন্তং, পুত্তো ৰা ধীতা ৰা নত্থি, কিং নু খো কত্তব্ব’’ন্তি. ততো রাজা পুরোহিতং আহ – ‘‘সম্ম, সচে তৰ গেহে পুত্তো জাযিস্সতি, মম রজ্জস্স সামিকো ভৰিস্সতি, সচে মম পুত্তো জাযিস্সতি, তৰ গেহে ভোগানং সামিকো ভৰিস্সতী’’তি. এৰং উভোপি অঞ্ঞমঞ্ঞং সঙ্করিংসু.

অথেকদিৰসং পুরোহিতো ভোগগামং গন্ত্ৰা আগমনকালে দক্খিণদ্ৰারেন নগরং পৰিসন্তো বহিনগরে একং বহুপুত্তিকং নাম দুগ্গতিত্থিং পস্সি. তস্সা সত্ত পুত্তা সব্বেৰ অরোগা, একো পচনভাজনকপল্লং গণ্হি, একো সযনকটসারকং, একো পুরতো গচ্ছতি, একো পচ্ছতো, একো অঙ্গুলিং গণ্হি, একো অঙ্কে নিসিন্নো, একো খন্ধে. অথ নং পুরোহিতো পুচ্ছি ‘‘ভদ্দে, ইমেসং দারকানং পিতা কুহি’’ন্তি? ‘‘সামি, ইমেসং পিতা নাম নিবদ্ধো নত্থী’’তি. ‘‘এৰরূপে সত্ত পুত্তে কিন্তি কত্ৰা অলত্থা’’তি? সা অঞ্ঞং গহণং অপস্সন্তী নগরদ্ৰারে ঠিতং নিগ্রোধরুক্খং দস্সেত্ৰা ‘‘সামি এতস্মিং নিগ্রোধে অধিৰত্থায দেৰতায সন্তিকে পত্থেত্ৰা লভিং, এতায মে পুত্তা দিন্না’’তি আহ. পুরোহিতো ‘‘তেন হি গচ্ছ ত্ৰ’’ন্তি রথা ওরুয্হ নিগ্রোধমূলং গন্ত্ৰা সাখায গহেত্ৰা চালেত্ৰা ‘‘অম্ভো দেৰতে, ত্ৰং রঞ্ঞো সন্তিকা কিং নাম ন লভসি, রাজা তে অনুসংৰচ্ছরং সহস্সং ৰিস্সজ্জেত্ৰা বলিকম্মং করোতি, তস্স পুত্তং ন দেসি, এতায দুগ্গতিত্থিযা তৰ কো উপকারো কতো, যেনস্সা সত্ত পুত্তে অদাসি. সচে অম্হাকং রঞ্ঞো পুত্তং ন দেসি, ইতো তং সত্তমে দিৰসে সমূলং ছিন্দাপেত্ৰা খণ্ডাখণ্ডিকং কারেস্সামী’’তি রুক্খদেৰতং তজ্জেত্ৰা পক্কামি. সো এতেন নিযামেনেৰ পুনদিৰসেপীতি পটিপাটিযা ছ দিৰসে কথেসি. ছট্ঠে পন দিৰসে সাখায গহেত্ৰা ‘‘রুক্খদেৰতে অজ্জেকরত্তিমত্তকমেৰ সেসং, সচে মে রঞ্ঞো পুত্তং ন দেসি, স্ৰে তং নিট্ঠাপেস্সামী’’তি আহ.

রুক্খদেৰতা আৰজ্জেত্ৰা তং কারণং তথতো ঞত্ৰা ‘‘অযং ব্রাহ্মণো পুত্তং অলভন্তো মম ৰিমানং নাসেস্সতি, কেন নু খো উপাযেন তস্স পুত্তং দাতুং ৰট্টতী’’তি চতুন্নং মহারাজানং সন্তিকং গন্ত্ৰা তমত্থং আরোচেসি. তে ‘‘মযং তস্স পুত্তং দাতুং ন সক্খিস্সামা’’তি ৰদিংসু. অট্ঠৰীসতিযক্খসেনাপতীনং সন্তিকং অগমাসি, তেপি তথেৰাহংসু. সক্কস্স দেৰরঞ্ঞো সন্তিকং গন্ত্ৰা কথেসি. সোপি ‘‘লভিস্সতি নু খো রাজা অনুচ্ছৰিকে পুত্তে, উদাহু নো’’তি উপধারেন্তো পুঞ্ঞৰন্তে চত্তারো দেৰপুত্তে পস্সি. তে কির পুরিমভৰে বারাণসিযং পেসকারা হুত্ৰা তেন কম্মেন লদ্ধকং পঞ্চকোট্ঠাসং কত্ৰা চত্তারো কোট্ঠাসে পরিভুঞ্জিংসু. পঞ্চমং গহেত্ৰা একতোৰ দানং অদংসু. তে ততো চুতা তাৰতিংসভৰনে নিব্বত্তিংসু, ততো যামভৰনেতি এৰং অনুলোমপটিলোমং ছসু দেৰলোকেসু সম্পত্তিং অনুভৰন্তা ৰিচরন্তি. তদা পন নেসং তাৰতিংসভৰনতো চৰিত্ৰা যামভৰনং গমনৰারো হোতি. সক্কো তেসং সন্তিকং গন্ত্ৰা পক্কোসিত্ৰা ‘‘মারিসা, তুম্হেহি মনুস্সলোকং গন্তুং ৰট্টতি, এসুকারীরঞ্ঞো অগ্গমহেসিযা কুচ্ছিম্হি নিব্বত্তথা’’তি আহ. তে তস্স ৰচনং সুত্ৰা ‘‘সাধু দেৰ, গমিস্সাম, ন পনম্হাকং রাজকুলেনত্থো, পুরোহিতস্স গেহে নিব্বত্তিত্ৰা দহরকালেযেৰ কামে পহায পব্বজিস্সামা’’তি ৰদিংসু. সক্কো ‘‘সাধূ’’তি তেসং পটিঞ্ঞং গহেত্ৰা আগন্ত্ৰা রুক্খদেৰতায তমত্থং আরোচেসি. সা তুট্ঠমানসা সক্কং ৰন্দিত্ৰা অত্তনো ৰিমানমেৰ গতা.

পুরোহিতোপি পুনদিৰসে বলৰপুরিসে সন্নিপাতাপেত্ৰা ৰাসিফরসুআদীনি গাহাপেত্ৰা রুক্খমূলং গন্ত্ৰা রুক্খসাখায গহেত্ৰা ‘‘অম্ভো দেৰতে, অজ্জ ময্হং তং যাচন্তস্স সত্তমো দিৰসো, ইদানি তে নিট্ঠানকালো’’তি আহ. ততো রুক্খদেৰতা মহন্তেনানুভাৰেন খন্ধৰিৰরতো নিক্খমিত্ৰা মধুরসরেন তং আমন্তেত্ৰা ‘ব্রাহ্মণ, তিট্ঠতু একো পুত্তো, চত্তারো তে পুত্তে দস্সামী’’তি আহ. ‘‘মম পুত্তেনত্থো নত্থি, অম্হাকং রঞ্ঞো পুত্তং দেহী’’তি. ‘‘তুয্হংযেৰ দেমী’’তি. ‘‘তেন হি মম দ্ৰে, রঞ্ঞো দ্ৰে দেহী’’তি. ‘‘রঞ্ঞো ন দেমি, চত্তারোপি তুয্হমেৰ দম্মি, তযা চ লদ্ধমত্তাৰ ভৰিস্সন্তি, অগারে পন অট্ঠত্ৰা দহরকালেযেৰ পব্বজিস্সন্তী’’তি. ‘‘ত্ৰং মে কেৰলং পুত্তে দেহি, অপব্বজনকারণং পন অম্হাকং ভারো’’তি. সা তস্স পুত্তৰরং দত্ৰা অত্তনো ভৰনং পাৰিসি. ততো পট্ঠায দেৰতায সক্কারো মহা অহোসি.

জেট্ঠকদেৰপুত্তো চৰিত্ৰা পুরোহিতস্স ব্রাহ্মণিযা কুচ্ছিম্হি নিব্বত্তি. তস্স নামগ্গহণদিৰসে ‘‘হত্থিপালো’’তি নামং কত্ৰা অপব্বজনত্থায হত্থিগোপকে পটিচ্ছাপেসুং. সো তেসং সন্তিকে ৰড্ঢতি. তস্স পদসা গমনকালে দুতিযো চৰিত্ৰা অস্সা কুচ্ছিম্হি নিব্বত্তি, তস্সপি জাতকালে ‘‘অস্সপালো’’তি নামং করিংসু. সো অস্সগোপকানং সন্তিকে ৰড্ঢতি. ততিযস্স জাতকালে ‘‘গোপালো’’তি নামং করিংসু. সো গোপালেহি সদ্ধিং ৰড্ঢতি. চতুত্থস্স জাতকালে ‘‘অজপালো’’তি নামং করিংসু. সো অজপালেহি সদ্ধিং ৰড্ঢতি. তে ৰুড্ঢিমন্ৰায সোভগ্গপ্পত্তা অহেসুং.

অথ নেসং পব্বজিতভযেন রঞ্ঞো ৰিজিতা পব্বজিতে নীহরিংসু. সকলকাসিরট্ঠে একপব্বজিতোপি নাহোসি. তে কুমারা অতিফরুসা অহেসুং, যায দিসায গচ্ছন্তি, তায আহরিযমানং পণ্ণাকারং ৰিলুম্পন্তি. হত্থিপালস্স সোল়সৰস্সকালে কাযসম্পত্তিং দিস্ৰা রাজা চ পুরোহিতো চ ‘‘কুমারা মহল্লকা জাতা, ছত্তুস্সাপনসমযো, তেসং কিং নু খো কাতব্ব’’ন্তি মন্তেত্ৰা ‘‘এতে অভিসিত্তকালতো পট্ঠায অতিস্সরা ভৰিস্সন্তি, ততো ততো পব্বজিতা আগমিস্সন্তি, তে দিস্ৰা পব্বজিস্সন্তি, এতেসং পব্বজিতকালে জনপদো উল্লোল়ো ভৰিস্সতি, ৰীমংসিস্সাম তাৰ নে, পচ্ছা অভিসিঞ্চিস্সামা’’তি চিন্তেত্ৰা উভোপি ইসিৰেসং গহেত্ৰা ভিক্খং চরন্তা হত্থিপালস্স কুমারস্স নিৰেসনদ্ৰারং অগমংসু. কুমারো তে দিস্ৰাৰ তুট্ঠো পসন্নো উপসঙ্কমিত্ৰা ৰন্দিত্ৰা তিস্সো গাথা অভাসি –

৩৩৭.

‘‘চিরস্সং ৰত পস্সাম, ব্রাহ্মণং দেৰৰণ্ণিনং;

মহাজটং খারিধরং, পঙ্কদন্তং রজস্সিরং.

৩৩৮.

‘‘চিরস্সং ৰত পস্সাম, ইসিং ধম্মগুণে রতং;

কাসাযৰত্থৰসনং, ৰাকচীরং পটিচ্ছদং.

৩৩৯.

‘‘আসনং উদকং পজ্জং, পটিগণ্হাতু নো ভৰং;

অগ্ঘে ভৰন্তং পুচ্ছাম, অগ্ঘং কুরুতু নো ভৰ’’ন্তি.

তত্থ ব্রাহ্মণন্তি বাহিতপাপব্রাহ্মণং. দেৰৰণ্ণিনন্তি সেট্ঠৰণ্ণিনং ঘোরতপং পরমতিক্খিন্দ্রিযং পব্বজিতভাৰং উপগতন্তি অত্থো. খারিধরন্তি খারিভারধরং. ইসিন্তি সীলক্খন্ধাদযো পরিযেসিত্ৰা ঠিতং. ধম্মগুণে রতন্তি সুচরিতকোট্ঠাসে অভিরতং. ‘‘আসন’’ন্তি ইদং তেসং নিসীদনত্থায আসনং পঞ্ঞপেত্ৰা গন্ধোদকঞ্চ পাদব্ভঞ্জনঞ্চ উপনেত্ৰা আহ. অগ্ঘেতি ইমে সব্বেপি আসনাদযো অগ্ঘে ভৰন্তং পুচ্ছাম. কুরুতু নোতি ইমে নো অগ্ঘে ভৰং পটিগ্গণ্হতূতি.

এৰং সো তেসু একেকং ৰারেনাহ. অথ নং পুরোহিতো আহ – ‘‘তাত হত্থিপাল ত্ৰং অম্হে ‘কে ইমে’তি মঞ্ঞমানো এৰং কথেসী’’তি. ‘‘হেমৰন্তকা ইসযো’’তি. ‘‘ন মযং, তাত, ইসযো, এস রাজা এসুকারী, অহং তে পিতা পরোহিতো’’তি. ‘‘অথ কস্মা ইসিৰেসং গণ্হিত্থা’’তি? ‘‘তৰ ৰীমংসনত্থাযা’’তি. ‘‘মম কিং ৰীমংসথা’’তি? ‘‘সচে অম্হে দিস্ৰা ন পব্বজিস্সসি, অথ তং রজ্জে অভিসিঞ্চিতুং আগতাম্হা’’তি. ‘‘তাত ন মে রজ্জেনত্থো, পব্বজিস্সামহন্তি. অথ নং পিতা ‘‘তাত হত্থিপাল, নাযং কালো পব্বজ্জাযা’’তি ৰত্ৰা যথাজ্ঝাসযং অনুসাসন্তো চতুত্থগাথমাহ –

৩৪০.

‘‘অধিচ্চ ৰেদে পরিযেস ৰিত্তং, পুত্তে গেহে তাত পতিট্ঠপেত্ৰা;

গন্ধে রসে পচ্চনুভুয্য সব্বং, অরঞ্ঞং সাধু মুনি সো পসত্থো’’তি.

তত্থ অধিচ্চাতি সজ্ঝাযিত্ৰা. পুত্তেতি ছত্তং উস্সাপেত্ৰা নাটকে ৰারেন উপট্ঠাপেত্ৰা পুত্তধীতাহি ৰড্ঢিত্ৰা তে পুত্তে গেহে পতিট্ঠাপেত্ৰাতি অত্থো. সব্বন্তি এতে চ গন্ধরসে সেসঞ্চ সব্বং ৰত্থুকামং অনুভৰিত্ৰা. অরঞ্ঞং সাধু মুনি সো পসত্থোতি পচ্ছা মহল্লককালে পব্বজিতস্স অরঞ্ঞং সাধু লদ্ধকং হোতি. যো এৰরূপে কালে পব্বজতি, সো মুনি বুদ্ধাদীহি অরিযেহি পসত্থোতি ৰদতি.

ততো হত্থিপালো গাথমাহ –

৩৪১.

‘‘ৰেদা ন সচ্চা ন চ ৰিত্তলাভো, ন পুত্তলাভেন জরং ৰিহন্তি;

গন্ধে রসে মুচ্চনমাহু সন্তো, সকম্মুনা হোতি ফলূপপত্তী’’তি.

তত্থ ন সচ্চাতি যং সগ্গঞ্চ মগ্গঞ্চ ৰদন্তি, ন তং সাধেন্তি, তুচ্ছা নিস্সারা নিপ্ফলা. ন চ ৰিত্তলাভোতি ধনলাভোপি পঞ্চসাধারণত্তা সব্বো একসভাৰো ন হোতি. জরন্তি তাত, জরং ৰা ব্যাধিমরণং ৰা ন কোচি পুত্তলাভেন পটিবাহিতুং সমত্থো নাম অত্থি. দুক্খমূলা হেতে উপধযো. গন্ধে রসেতি গন্ধে চ রসে চ সেসেসু আরম্মণেসু চ মুচ্চনং মুত্তিমেৰ বুদ্ধাদযো পণ্ডিতা কথেন্তি. সকম্মুনাতি অত্তনা কতকম্মেনেৰ সত্তানং ফলূপপত্তি ফলনিপ্ফত্তি হোতি. কম্মস্সকা হি, তাত, সত্তাতি.

কুমারস্স ৰচনং সুত্ৰা রাজা গাথমাহ –

৩৪২.

‘‘অদ্ধা হি সচ্চং ৰচনং তৰেতং, সকম্মুনা হোতি ফলূপপত্তি;

জিণ্ণা চ মাতাপিতরো তৰীমে, পস্সেয্যুং তং ৰস্সসতং অরোগ’’ন্তি.

তত্থ ৰস্সসতং অরোগন্তি এতে ৰস্সসতং অরোগং তং পস্সেয্যুং, ত্ৰম্পি ৰস্সসতং জীৰন্তো মাতাপিতরো পোসস্সূতি ৰদতি.

তং সুত্ৰা কুমারো ‘‘দেৰ, ত্ৰং কিং নামেতং ৰদসী’’তি ৰত্ৰা দ্ৰে গাথা অভাসি –

৩৪৩.

‘‘যস্সস্স সক্খী মরণেন রাজ, জরায মেত্তী নরৰীরসেট্ঠ;

যো চাপি জঞ্ঞা ন মরিস্সং কদাচি, পস্সেয্যুং তং ৰস্সসতং অরোগং.

৩৪৪.

‘‘যথাপি নাৰং পুরিসো দকম্হি, এরেতি চে নং উপনেতি তীরং;

এৰম্পি ব্যাধী সততং জরা চ, উপনেতি মচ্চং ৰসমন্তকস্সা’’তি.

তত্থ সক্খীতি মিত্তধম্মো. মরণেনাতি দত্তো মতো মিত্তো মতোতি সম্মুতিমরণেন. জরাযাতি পাকটজরায ৰা সদ্ধিং যস্স মেত্তী ভৰেয্য, যস্সেতং মরণঞ্চ জরা চ মিত্তভাৰেন নাগচ্ছেয্যাতি অত্থো. এরেতি চে নন্তি মহারাজ, যথা নাম পুরিসো নদীতিত্থে উদকম্হি নাৰং ঠপেত্ৰা পরতীরগামিং জনং আরোপেত্ৰা সচে অরিত্তেন উপ্পীল়েন্তো ফিযেন কড্ঢন্তো চালেতি ঘট্টেতি, অথ নং পরতীরং নেতি. এৰং ব্যাধি জরা চ নিচ্চং অন্তকস্স মচ্চুনো ৰসং উপনেতিযেৰাতি.

এৰং ইমেসং সত্তানং জীৰিতসঙ্খারস্স পরিত্তভাৰং দস্সেত্ৰা ‘‘মহারাজ, তুম্হে তিট্ঠথ, তুম্হেহি সদ্ধিং কথযন্তমেৰ মং ব্যাধিজরামরণানি উপগচ্ছন্তি, অপ্পমত্তা হোথা’’তি ওৰাদং দত্ৰা রাজানঞ্চ পিতরঞ্চ ৰন্দিত্ৰা অত্তনো পরিচারকে গহেত্ৰা বারাণসিযং রজ্জং পহায ‘‘পব্বজিস্সামী’’তি নগরতো নিক্খমি. ‘‘পব্বজ্জা নামেসা সোভনা ভৰিস্সতী’’তি হত্থিপালকুমারেন সদ্ধিং মহাজনো নিক্খমি. যোজনিকা পরিসা অহোসি. সো তায পরিসায সদ্ধিং গঙ্গায তীরং পত্ৰা গঙ্গায উদকং ওলোকেত্ৰা কসিণপরিকম্মং কত্ৰা ঝানানি নিব্বত্তেত্ৰা চিন্তেসি ‘‘অযং সমাগমো মহা ভৰিস্সতি, মম তযো কনিট্ঠভাতরো মাতাপিতরো রাজা দেৰীতি সব্বে সপরিসা পব্বজিস্সন্তি, বারাণসী সুঞ্ঞা ভৰিস্সতি, যাৰ এতেসং আগমনা ইধেৰ ভৰিস্সামী’’তি. সো তত্থেৰ মহাজনস্স ওৰাদং দেন্তো নিসীদি.

পুনদিৰসে রাজা চ পুরোহিতো চ চিন্তযিংসু ‘‘হত্থিপালকুমারো তাৰ ‘রজ্জং পহায মহাজনং আদায পব্বজিস্সামী’তি গন্ত্ৰা গঙ্গাতীরে নিসিন্নো, অস্সপালং ৰীমংসিত্ৰা অভিসিঞ্চিস্সামা’’তি. তে ইসিৰেসেনেৰ তস্সপি গেহদ্ৰারং অগমংসু. সোপি তে দিস্ৰা পসন্নমানসো উপসঙ্কমিত্ৰা ‘‘চিরস্সং ৰত পস্সামা’’তিআদীনি ৰদন্তো তথেৰ পটিপজ্জি. তেপি তং তথেৰ ৰত্ৰা অত্তনো আগতকারণং কথযিংসু. সো ‘‘মম ভাতিকে হত্থিপালকুমারে সন্তে কথং পঠমতরং ময্হমেৰ সেতচ্ছত্তং পাপুণাতী’’তি পুচ্ছিত্ৰা ‘‘তাত, ভাতা, তে ‘ন ময্হং রজ্জেনত্থো, পব্বজিস্সামী’তি ৰত্ৰা নিক্খন্তো’’তি ৰুত্তে ‘‘কহং পনেসো ইদানী’’তি ৰত্ৰা ‘‘গঙ্গাতীরে নিসিন্নো’’তি ৰুত্তে ‘‘তাত, মম ভাতরা ছড্ডিতখেল়েন কম্মং নত্থি, বালা হি পরিত্তকপঞ্ঞা সত্তা এতং কিলেসং জহিতুং ন সক্কোন্তি, অহং পন জহিস্সামী’’তি রঞ্ঞো চ পিতু চ ধম্মং দেসেন্তো দ্ৰে গাথা অভাসি –

৩৪৫.

‘‘পঙ্কো চ কামা পলিপো চ কামা, মনোহরা দুত্তরা মচ্চুধেয্যা;

এতস্মিং পঙ্কে পলিপে ব্যসন্না, হীনত্তরূপা ন তরন্তি পারং.

৩৪৬.

‘‘অযং পুরে লুদ্দমকাসি কম্মং, স্ৰাযং গহীতো ন হি মোক্খিতো মে;

ওরুন্ধিযা নং পরিরক্খিস্সামি, মাযং পুন লুদ্দমকাসি কম্ম’’ন্তি.

তত্থ পঙ্কোতি যো কোচি কদ্দমো. পলিপোতি সুখুমৰালুকমিস্সো সণ্হকদ্দমো. তত্থ কামা লগ্গাপনৰসেন পঙ্কো নাম, ওসীদাপনৰসেন পলিপো নামাতি ৰুত্তা. দুত্তরাতি দুরতিক্কমা. মচ্চুধেয্যাতি মচ্চুনো অধিট্ঠানা. এতেসু হি লগ্গা চেৰ অনুপৰিট্ঠা চ সত্তা উত্তরিতুং অসক্কোন্তা দুক্খক্খন্ধপরিযাযে ৰুত্তপ্পকারং দুক্খঞ্চেৰ মরণঞ্চ পাপুণন্তি. তেনাহ – ‘‘এতস্মিং পঙ্কে পলিপে ব্যসন্না হীনত্তরূপা ন তরন্তি পার’’ন্তি. তত্থ ব্যসন্নাতি সন্না. ‘‘ৰিসন্না’’তিপি পাঠো, অযমেৰত্থো. হীনত্তরূপাতি হীনচিত্তসভাৰা. ন তরন্তি পারন্তি নিব্বানপারং গন্তুং ন সক্কোন্তি.

অযন্তি মহারাজ, অযং মমত্তভাৰো পুব্বে অস্সগোপকেহি সদ্ধিং ৰড্ঢন্তো মহাজনস্স ৰিলুম্পনৰিহেঠনাদিৰসেন বহুং লুদ্দং সাহসিককম্মং অকাসি. স্ৰাযং গহীতোতি সো অযং তস্স কম্মস্স ৰিপাকো মযা গহিতো. ন হি মোক্খিতো মেতি সংসারৰট্টে সতি ন হি মোক্খো ইতো অকুসলফলতো মম অত্থি. ওরুন্ধিযা নং পরিরক্খিস্সামীতি ইদানি নং কাযৰচীমনোদ্ৰারানি পিদহন্তো ওরুন্ধিত্ৰা পরিরক্খিস্সামি. কিংকারণা? মাযং পুন লুদ্দমকাসি কম্মং. অহঞ্হি ইতো পট্ঠায পাপং অকত্ৰা কল্যাণমেৰ করিস্সামি.

এৰং অস্সপালকুমারো দ্ৰীহি গাথাহি ধম্মং দেসেত্ৰা ‘‘তিট্ঠথ তুম্হে, তুম্হেহি সদ্ধিং কথেন্তমেৰ মং ব্যাধিজরামরণানি উপগচ্ছন্তী’’তি ওৰাদং দত্ৰা যোজনিকং পরিসং গহেত্ৰা নিক্খমিত্ৰা হত্থিপালকুমারস্সেৰ সন্তিকং গতো. সো তস্স আকাসে নিসীদিত্ৰা ধম্মং দেসেত্ৰা ‘‘ভাতিক, অযং সমাগমো মহা ভৰিস্সতি, ইধেৰ তাৰ হোমা’’তি আহ. ইতরোপি ‘‘সাধূ’’তি সম্পটিচ্ছি. পুনদিৰসে রাজা চ পুরোহিতো চ তেনেৰুপাযেন গোপালকুমারস্স নিৰেসনং গন্ত্ৰা তেনপি তথেৰ পটিনন্দিত্ৰা অত্তনো আগমনকারণং আচিক্খিংসু. সোপি অস্সপালকুমারো ৰিয পটিক্খিপিত্ৰা ‘‘অহং চিরতো পট্ঠায পব্বজিতুকামো ৰনে নট্ঠগোণং ৰিয পব্বজ্জং উপধারেন্তো ৰিচরামি, তেন মে নট্ঠগোণস্স পদং ৰিয ভাতিকানং গতমগ্গো দিট্ঠো, স্ৰাহং তেনেৰ মগ্গেন গমিস্সামী’’তি ৰত্ৰা গাথমাহ –

৩৪৭.

‘‘গৰংৰ নট্ঠং পুরিসো যথা ৰনে, অন্ৰেসতী রাজ অপস্সমানো;

এৰং নট্ঠো এসুকারী মমত্থো, সোহং কথং ন গৰেসেয্যং রাজা’’তি.

তত্থ এসুকারীতি রাজানং আলপতি. মমত্থোতি ৰনে গোণো ৰিয মম পব্বজ্জাসঙ্খাতো অত্থো নট্ঠো. সোহন্তি সো অহং অজ্জ পব্বজিতানং মগ্গং দিস্ৰা কথং পব্বজ্জং ন গৰেসেয্যং, মম ভাতিকানং গতমগ্গমেৰ গমিস্সামি নরিন্দাতি.

অথ নং ‘‘তাত গোপাল, একাহং দ্ৰীহং আগমেহি, অম্হে সমস্সাসেত্ৰা পচ্ছা পব্বজিস্সসী’’তি ৰদিংসু. সো ‘‘মহারাজ, অজ্জ কত্তব্বকম্মং ‘স্ৰে করিস্সামী’তি ন ৰত্তব্বং, কল্যাণকম্মং নাম অজ্জেৰ কত্তব্ব’’ন্তি ৰত্ৰা ইতরং গাথমাহ –

৩৪৮.

‘‘হিয্যোতি হিয্যতি পোসো, পরেতি পরিহাযতি;

অনাগতং নেতমত্থীতি ঞত্ৰা, উপ্পন্নছন্দং কো পনুদেয্য ধীরো’’তি.

তত্থ হিয্যোতি স্ৰেতি অত্থো. পরেতি পুনদিৰসে. ইদং ৰুত্তং হোতি – ‘‘যো মহারাজ, অজ্জ কত্তব্বং কম্মং ‘স্ৰে’তি, স্ৰে কত্তব্বং কম্মং ‘পরে’তি ৰত্ৰা ন করোতি, সো ততো পরিহাযতি, ন তং কম্মং কাতুং সক্কোতী’’তি. এৰং গোপালো ভদ্দেকরত্তসুত্তং (ম. নি. ৩.২৭২ আদযো) নাম কথেসি. স্ৰাযমত্থো ভদ্দেকরত্তসুত্তেন কথেতব্বো. অনাগতং নেতমত্থীতি যং অনাগতং, তং ‘‘নেতং অত্থী’’তি ঞত্ৰা উপ্পন্নং কুসলচ্ছন্দং কো পণ্ডিতো পনুদেয্য হরেয্য.

এৰং গোপালকুমারো দ্ৰীহি গাথাহি ধম্মং দেসেত্ৰা ‘‘তিট্ঠথ তুম্হে, তুম্হেহি সদ্ধিং কথেন্তমেৰ মং ব্যাধিজরামরণানি উপগচ্ছন্তী’’তি যোজনিকং পরিসং গহেত্ৰা নিক্খমিত্ৰা দ্ৰিন্নং ভাতিকানং সন্তিকং গতো. হত্থিপালো তস্সপি ধম্মং দেসেসি. পুনদিৰসে রাজা চ পুরোহিতো চ তেনেৰুপাযেন অজপালকুমারস্স নিৰেসনং গন্ত্ৰা তেনপি তথেৰ পটিনন্দিত্ৰা অত্তনো আগমনকারণং আচিক্খিত্ৰা ‘‘ছত্তং তে উস্সাপেস্সামা’’তি ৰদিংসু. কুমারো আহ – ‘‘ময্হং ভাতিকা কুহি’’ন্তি? তে ‘‘অম্হাকং রজ্জেনত্থো নত্থী’’তি সেতচ্ছত্তং পহায তিযোজনিকং পরিসং গহেত্ৰা নিক্খমিত্ৰা গঙ্গাতীরে নিসিন্নাতি. নাহং মম ভাতিকেহি ছড্ডিতখেল়ং সীসেনাদায ৰিচরিস্সামি, অহম্পি পব্বজিস্সামীতি. তাত, ত্ৰং তাৰ দহরো, অম্হাকং হত্থভারো, ৰযপ্পত্তকালে পব্বজিস্সসীতি. অথ নে কুমারো ‘‘কিং তুম্হে কথেথ, ননু ইমে সত্তা দহরকালেপি মহল্লককালেপি মরন্তিযেৰ, ‘অযং দহরকালে মরিস্সতি, অযং মহল্লককালে’তি কস্সচি হত্থে ৰা পাদে ৰা নিমিত্তং নত্থি, অহং মম মরণকালং ন জানামি, তস্মা ইদানেৰ পব্বজিস্সামী’’তি ৰত্ৰা দ্ৰে গাথা অভাসি –

৩৪৯.

‘‘পস্সামি ৰোহং দহরং কুমারিং, মত্তূপমং কেতকপুপ্ফনেত্তং;

অভুত্তভোগে পঠমে ৰযস্মিং, আদায মচ্চু ৰজতে কুমারিং.

৩৫০.

‘‘যুৰা সুজাতো সুমুখো সুদস্সনো, সামো কুসুম্ভপরিকিণ্ণমস্সু;

হিত্ৰান কামে পটিকচ্চ গেহং, অনুজান মং পব্বজিস্সামি দেৰা’’তি.

তত্থ ৰোতি নিপাতমত্তং, পস্সামিচ্চেৰাতি অত্থো. মত্তূপমন্তি হাসভাসৰিলাসেহি মত্তং ৰিয চরন্তিং. কেতকপুপ্ফনেত্তন্তি কেতকপুপ্ফপত্তং ৰিয পুথুলাযতনেত্তং. অভুত্তভোগেতি এৰং উত্তমরূপধরং কুমারিং পঠমৰযে ৰত্তমানং অভুত্তভোগমেৰ মাতাপিতূনং উপরি মহন্তং সোকং পাতেত্ৰা মচ্চু গহেত্ৰাৰ গচ্ছতি. সুজাতোতি সুসণ্ঠিতো. সুমুখোতি কঞ্চনাদাসপুণ্ণচন্দসদিসমুখো. সুদস্সনোতি উত্তমরূপধারিতায সম্পন্নদস্সনো. সামোতি সুৰণ্ণসামো. কুসুম্ভপরিকিণ্ণমস্সূতি সন্নিসিন্নট্ঠেন সুখুমট্ঠেন চ তরুণকুসুম্ভকেসরসদিসপরিকিণ্ণমস্সু. ইমিনা এৰরূপোপি কুমারো মচ্চুৰসং গচ্ছতি. তথাৰিধম্পি হি সিনেরুং উপ্পাতেন্তো ৰিয নিক্করুণো মচ্চু আদায গচ্ছতীতি দস্সেতি. হিত্ৰান কামে পটিকচ্চ গেহং, অনুজান মং পব্বজিস্সামি দেৰাতি দেৰ, পুত্তদারবন্ধনস্মিঞ্হি উপ্পন্নে তং বন্ধনং দুচ্ছেদনীযং হোতি, তেনাহং পুরেতরঞ্ঞেৰ কামে চ গেহঞ্চ হিত্ৰা ইদানেৰ পব্বজিস্সামি, অনুজান, মন্তি.

এৰঞ্চ পন ৰত্ৰা ‘‘তিট্ঠথ তুম্হে, তুম্হেহি সদ্ধিং কথেন্তমেৰ মং ব্যাধিজরামরণানি উপগচ্ছন্তী’’তি তে উভোপি ৰন্দিত্ৰা যোজনিকং পরিসং গহেত্ৰা নিক্খমিত্ৰা গঙ্গাতীরমেৰ অগমাসি. হত্থিপালো তস্সপি আকাসে নিসীদিত্ৰা ধম্মং দেসেত্ৰা ‘‘সমাগমো মহা ভৰিস্সতী’’তি তত্থেৰ নিসীদি. পুনদিৰসে পুরোহিতো পল্লঙ্কৰরমজ্ঝগতো নিসীদিত্ৰা চিন্তেসি ‘‘মম পুত্তা পব্বজিতা, ইদানাহং এককোৰ মনুস্সখাণুকো জাতোম্হি, অহম্পি পব্বজিস্সামী’’তি. সো ব্রাহ্মণিযা সদ্ধিং মন্তেন্তো গাথমাহ –

৩৫১.

‘‘সাখাহি রুক্খো লভতে সমঞ্ঞং, পহীনসাখং পন খাণুমাহু;

পহীনপুত্তস্স মমজ্জ ভোতি, ৰাসেট্ঠি ভিক্খাচরিযায কালো’’তি.

তত্থ লভতে সমঞ্ঞন্তি রুক্খোতি ৰোহারং লভতি. ৰাসেট্ঠীতি ব্রাহ্মণিং আলপতি. ভিক্খাচরিযাযাতি ময্হম্পি পব্বজ্জায কালো, পুত্তানং সন্তিকমেৰ গমিস্সামীতি.

সো এৰং ৰত্ৰা ব্রাহ্মণে পক্কোসাপেসি, সট্ঠি ব্রাহ্মণসহস্সানি সন্নিপতিংসু. অথ নে আহ – ‘‘তুম্হে কিং করিস্সথা’’তি তুম্হে পন আচরিযাতি. ‘‘অহং মম পুত্তস্স সন্তিকে পব্বজিস্সামী’’তি. ‘‘ন তুম্হাকমেৰ নিরযো উণ্হো, মযম্পি পব্বজিস্সামা’’তি. সো অসীতিকোটিধনং ব্রাহ্মণিযা নিয্যাদেত্ৰা যোজনিকং ব্রাহ্মণপরিসং আদায নিক্খমিত্ৰা পুত্তানং সন্তিকঞ্ঞেৰ গতো. হত্থিপালো তাযপি পরিসায আকাসে ঠত্ৰা ধম্মং দেসেসি. পুনদিৰসে ব্রাহ্মণী চিন্তেসি ‘‘মম চত্তারো পুত্তা সেতচ্ছত্তং পহায ‘পব্বজিস্সামা’তি গতা, ব্রাহ্মণোপি পুরোহিতট্ঠানেন সদ্ধিং অসীতিকোটিধনং ছড্ডেত্ৰা পুত্তানঞ্ঞেৰ সন্তিকং গতো, অহমেৰ একা কিং করিস্সামি, পুত্তানং গতমগ্গেনেৰ গমিস্সামী’’তি. সা অতীতং উদাহরণং আহরন্তী উদানগাথমাহ –

৩৫২.

‘‘অঘস্মি কোঞ্চাৰ যথা হিমচ্চযে, কতানি জালানি পদালিয হংসা;

গচ্ছন্তি পুত্তা চ পতী চ ময্হং, সাহং কথং নানুৰজে পজান’’ন্তি.

তত্থ অঘস্মি কোঞ্চাৰ যথাতি যথেৰ আকাসে কোঞ্চসকুণা অসজ্জমানা গচ্ছন্তি. হিমচ্চযেতি ৰস্সানচ্চযে. কতানি জালানি পদালিয হংসাতি অতীতে কির ছন্নৰুতিসহস্সা সুৰণ্ণহংসাৰস্সারত্তপহোনকং সালিং কঞ্চনগুহাযং নিক্খিপিত্ৰা ৰস্সভযেন বহি অনিক্খমিত্ৰা চতুমাসং তত্থ ৰসন্তি. অথ নেসং উণ্ণনাভি নাম মক্কটকো গুহাদ্ৰারে জালং বন্ধতি. হংসা দ্ৰিন্নং তরুণহংসানং দ্ৰিগুণং ৰট্টং দেন্তি. তে থামসম্পন্নতায তং জালং ছিন্দিত্ৰা পুরতো গচ্ছন্তি, সেসা তেসং গতমগ্গেন গচ্ছন্তি. সা তমত্থং পকাসেন্তী এৰমাহ. ইদং ৰুত্তং হোতি – যথেৰ আকাসে কোঞ্চসকুণা অসজ্জমানা গচ্ছন্তি, তথা হিমচ্চযে ৰস্সানাতিক্কমে দ্ৰে তরুণহংসা কতানি জালানি পদালেত্ৰা গচ্ছন্তি, অথ নেসং গতমগ্গেন ইতরে হংসা. ইদানি পন মম পুত্তা তরুণহংসা জালং ৰিয কামজালং ছিন্দিত্ৰা গতা, মযাপি তেসং গতমগ্গেন গন্তব্বন্তি ইমিনাধিপ্পাযেন ‘‘গচ্ছন্তি পুত্তা চ পতী চ ময্হং, সাহং কথং নানুৰজে পজান’’ন্তি আহ.

ইতি সা ‘‘কথং অহং এৰং পজানন্তী ন পব্বজিস্সামি, পব্বজিস্সামি যেৰা’’তি সন্নিট্ঠানং কত্ৰা ব্রাহ্মণিযো পক্কোসাপেত্ৰা এৰমাহ ‘‘তুম্হে কিং করিস্সথা’’তি? ‘‘তুম্হে পন অয্যে’’তি. ‘‘অহং পব্বজিস্সামী’’তি. ‘‘মযম্পি পব্বজিস্সামা’’তি. সা তং ৰিভৰং ছড্ডেত্ৰা যোজনিকং পরিসং গহেত্ৰা পুত্তানং সন্তিকমেৰ গতা. হত্থিপালো তাযপি পরিসায আকাসে নিসীদিত্ৰা ধম্মং দেসেসি. পুনদিৰসে রাজা ‘‘কুহিং পুরোহিতো’’তি পুচ্ছি. ‘‘দেৰ, পুরোহিতো চ ব্রাহ্মণী চ সব্বং ধনং ছড্ডেত্ৰা দ্ৰিযোজনিকং পরিসং গহেত্ৰা পুত্তানং সন্তিকং গতা’’তি. রাজা ‘‘অসামিকং ধনং অম্হাকং পাপুণাতী’’তি তস্স গেহতো ধনং আহরাপেসি. অথস্স অগ্গমহেসী ‘‘রাজা কিং করোতী’’তি পুচ্ছিত্ৰা ‘‘পুরোহিতস্স গেহতো ধনং আহরাপেতী’’তি ৰুত্তে ‘‘পুরোহিতো কুহি’’ন্তি ৰত্ৰা ‘‘সপজাপতিকো পব্বজ্জত্থায নিক্খন্তো’’তি সুত্ৰা ‘‘অযং রাজা ব্রাহ্মণেন চ ব্রাহ্মণিযা চ চতূহি পুত্তেহি চ জহিতং উক্কারং মোহেন মূল়্হো অত্তনো ঘরং আহরাপেতি, উপমায নং বোধেস্সামী’’তি সূনতো মংসং আহরাপেত্ৰা রাজঙ্গণে রাসিং কারেত্ৰা উজুমগ্গং ৰিস্সজ্জেত্ৰা জালং পরিক্খিপাপেসি. গিজ্ঝা দূরতোৰ দিস্ৰা তস্সত্থায ওতরিংসু. তত্থ সপ্পঞ্ঞা জালং পসারিতং ঞত্ৰা অতিভারিকা হুত্ৰা ‘‘উজুকং উপ্পতিতুং ন সক্খিস্সামা’’তি অত্তনা খাদিতমংসং ছড্ডেত্ৰা ৰমিত্ৰা জালং অনল্লীযিত্ৰা উজুকমেৰ উপ্পতিত্ৰা গমিংসু. অন্ধবালা পন তেহি ছড্ডিতং ৰমিতং খাদিত্ৰা ভারিযা হুত্ৰা উজুকং উপ্পতিতুং অসক্কোন্তা আগন্ত্ৰা জালে বজ্ঝিংসু. অথেকং গিজ্ঝং আনেত্ৰা দেৰিযা দস্সযিংসু. সা তং আদায রঞ্ঞো সন্তিকং গন্ত্ৰা ‘‘এথ তাৰ, মহারাজ, রাজঙ্গণে একং কিরিযং পস্সিস্সামা’’তি সীহপঞ্জরং ৰিৰরিত্ৰা ‘‘ইমে গিজ্ঝে ওলোকেহি মহারাজা’’তি ৰত্ৰা দ্ৰে গাথা অভাসি –

৩৫৩.

‘‘এতে ভুত্ৰা ৰমিত্ৰা চ, পক্কমন্তি ৰিহঙ্গমা;

যে চ ভুত্ৰা ন ৰমিংসু, তে মে হত্থত্তমাগতা.

৩৫৪.

‘‘অৰমী ব্রাহ্মণো কামে, সো ত্ৰং পচ্চাৰমিস্সসি;

ৰন্তাদো পুরিসো রাজ, ন সো হোতি পসংসিযো’’তি.

তত্থ ভুত্ৰা ৰমিত্ৰা চাতি মংসং খাদিত্ৰা ৰমিত্ৰা চ. পচ্চাৰমিস্সসীতি পটিভুঞ্জিস্সসি. ৰন্তাদোতি পরস্স ৰমিতখাদকো. ন পসংসিযোতি সো তণ্হাৰসিকো বালো বুদ্ধাদীহি পণ্ডিতেহি পসংসিতব্বো ন হোতি.

তং সুত্ৰা রাজা ৰিপ্পটিসারী অহোসি, তযো ভৰা আদিত্তা ৰিয উপট্ঠহিংসু. সো ‘‘অজ্জেৰ রজ্জং পহায মম পব্বজিতুং ৰট্টতী’’তি উপ্পন্নসংৰেগো দেৰিযা থুতিং করোন্তো গাথমাহ –

৩৫৫.

‘‘পঙ্কে চ পোসং পলিপে ব্যসন্নং, বলী যথা দুব্বলমুদ্ধরেয্য;

এৰম্পি মং ত্ৰং উদতারি ভোতি, পঞ্চালি গাথাহি সুভাসিতাহী’’তি.

তত্থ ব্যসন্নন্তি নিমুগ্গং, ‘‘ৰিসন্ন’’ন্তিপি পাঠো. উদ্ধরেয্যাতি কেসেসু ৰা হত্থেসু ৰা গহেত্ৰা উক্খিপিত্ৰা থলে ঠপেয্য. উদতারীতি কামপঙ্কতো উত্তারযি. ‘‘উদতাসী’’তিপি পাঠো, অযমেৰত্থো. ‘‘উদ্ধটাসী’’তিপি পাঠো, উদ্ধরীতি অত্থো. পঞ্চালীতি পঞ্চালরাজধীতে.

এৰঞ্চ পন ৰত্ৰা তঙ্খণঞ্ঞেৰ পব্বজিতুকামো হুত্ৰা অমচ্চে পক্কোসাপেত্ৰা আহ – ‘‘তুম্হে কিং করিস্সথা’’তি তুম্হে পন, দেৰাতি? ‘‘অহং হত্থিপালস্স সন্তিকে পব্বজিস্সামী’’তি. ‘‘মযম্পি পব্বজিস্সাম, দেৰা’’তি. রাজা দ্ৰাদসযোজনিকে বারাণসিনগরে রজ্জং ছড্ডেত্ৰা ‘‘অত্থিকা সেতচ্ছত্তং উস্সাপেন্তূ’’তি অমচ্চপরিৰুতো তিযোজনিকং পরিসং গহেত্ৰা কুমারস্সেৰ সন্তিকং গতো. হত্থিপালো তস্সাপি পরিসায আকাসে নিসিন্নো ধম্মং দেসেসি. সত্থা রঞ্ঞো পব্বজিতভাৰং পকাসেন্তো গাথমাহ –

৩৫৬.

‘‘ইদং ৰত্ৰা মহারাজা, এসুকারী দিসম্পতি;

রট্ঠং হিত্ৰান পব্বজি, নাগো ছেত্ৰাৰ বন্ধন’’ন্তি.

পুনদিৰসে নগরে ওহীনজনো সন্নিপতিত্ৰা রাজদ্ৰারং গন্ত্ৰা দেৰিযা আরোচেত্ৰা নিৰেসনং পৰিসিত্ৰা দেৰিং ৰন্দিত্ৰা একমন্তং ঠিতো গাথমাহ.

৩৫৭.

‘‘রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

তুৰম্পি নো হোহি যথেৰ রাজা, অম্হেহি গুত্তা অনুসাস রজ্জ’’ন্তি.

তত্থ অনুসাসাতি অম্হেহি গুত্তা হুত্ৰা ধম্মেন রজ্জং কারেহি.

সা মহাজনস্স কথং সুত্ৰা সেসগাথা অভাসি –

৩৫৮.

‘‘রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

অহম্পি একা চরিস্সামি লোকে, হিত্ৰান কামানি মনোরমানি.

৩৫৯.

‘‘রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

অহম্পি একা চরিস্সামি লোকে, হিত্ৰান কামানি যথোধিকানি.

৩৬০.

‘‘অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, হিত্ৰান কামানি মনোরমানি.

৩৬১.

‘‘অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, হিত্ৰান কামানি যথোধিকানি.

৩৬২.

‘‘অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, সীতিভূতা সব্বমতিচ্চ সঙ্গ’’ন্তি.

তত্থ একাতি পুত্তধীতুকিলেসসম্বাধেহি মুচ্চিত্ৰা ইমস্মিং লোকে একিকাৰ চরিস্সামি. কামানীতি রূপাদযো কামগুণে. যতোধিকানীতি যেন যেন ওধিনা ঠিতানি, তেন তেন ঠিতানেৰ জহিস্সামি, ন কিঞ্চি আমসিস্সামীতি অত্থো. অচ্চেন্তি কালাতি পুব্বণ্হাদযো কালা অতিক্কমন্তি. তরযন্তীতি অতুচ্ছা হুত্ৰা আযুসঙ্খারং খেপযমানা খাদযমানা গচ্ছন্তি. ৰযোগুণাতি পঠমৰযাদযো তযো, মন্দদসকাদযো ৰা দস কোট্ঠাসা. অনুপুব্বং জহন্তীতি উপরূপরিকোট্ঠাসং অপ্পত্ৰা তত্থ তত্থেৰ নিরুজ্ঝন্তি. সীতিভূতাতি উণ্হকারকে উণ্হসভাৰে কিলেসে পহায সীতলা হুত্ৰা. সব্বমতিচ্চ সঙ্গন্তি রাগসঙ্গাদিকং সব্বসঙ্গং অতিক্কমিত্ৰা একা চরিস্সামি, হত্থিপালকুমারস্স সন্তিকং গন্ত্ৰা পব্বজিস্সামীতি.

ইতি সা ইমাহি গাথাহি মহাজনস্স ধম্মং দেসেত্ৰা অমচ্চভরিযাযো পক্কোসাপেত্ৰা আহ – ‘‘তুম্হে কিং করিস্সথা’’তি তুম্হে পন অয্যেতি? ‘‘অহং পব্বজিস্সামী’’তি. ‘‘মযম্পি পব্বজিস্সামা’’তি. সা ‘‘সাধূ’’তি রাজনিৰেসনে সুৰণ্ণকোট্ঠাগারাদীনি ৰিৰরাপেত্ৰা ‘‘অসুকট্ঠানে চ অসুকট্ঠানে চ মহানিধি নিদহিত’’ন্তি সুৰণ্ণপট্টে লিখাপেত্ৰা ‘‘দিন্নঞ্ঞেৰ, অত্থিকা হরন্তূ’’তি ৰত্ৰা সুৰণ্ণপট্টং মহাতলে থম্ভে বন্ধাপেত্ৰা নগরে ভেরিং চরাপেত্ৰা মহাসম্পত্তিং ছড্ডেত্ৰা নগরা নিক্খমি. তস্মিং খণে সকলনগরং সঙ্খুভি. ‘‘রাজা চ কির দেৰী চ রজ্জং পহায ‘পব্বজিস্সামা’তি নিক্খমন্তি, মযং ইধ কিং করিস্সামা’’তি ততো ততো মনুস্সা যথাপূরিতানেৰ গেহানি ছড্ডেত্ৰা পুত্তে হত্থেসু গহেত্ৰা নিক্খমিংসু. সব্বাপণা পসারিতনিযামেনেৰ ঠিতা, নিৰত্তিত্ৰা ওলোকেন্তো নাম নাহোসি. সকলনগরং তুচ্ছং অহোসি, দেৰীপি তিযোজনিকং পরিসং গহেত্ৰা তত্থেৰ গতা. হত্থিপালো তস্সাপি পরিসায আকাসে নিসিন্নো ধম্মং দেসেত্ৰা দ্ৰাদসযোজনিকং পরিসং গহেত্ৰা হিমৰন্তাভিমুখো পাযাসি. ‘‘হত্থিপালকুমারো কির দ্ৰাদসযোজনিকং বারাণসিং তুচ্ছং কত্ৰা ‘পব্বজিস্সামী’তি মহাজনং আদায হিমৰন্তং গচ্ছতি, কিমঙ্গং পন ময’’ন্তি সকলকাসিরট্ঠং সঙ্খুভি. অপরভাগে পরিসা তিংসযোজনিকা অহেসুং, সো তায পরিসায সদ্ধিং হিমৰন্তং পাৰিসি.

সক্কো আৰজ্জেন্তো তং পৰত্তিং ঞত্ৰা ‘‘হত্থিপালকুমারো মহাভিনিক্খমনং নিক্খন্তো, সমাগমো মহা ভৰিস্সতি, ৰসনট্ঠানং লদ্ধুং ৰট্টতী’’তি ৰিস্সকম্মং আণাপেসি ‘‘গচ্ছ, আযামতো ছত্তিংসযোজনং, ৰিত্থারতো পন্নরসযোজনং অস্সমং মাপেত্ৰা পব্বজিতপরিক্খারে সম্পাদেহী’’তি. সো ‘‘সাধূ’’তি পটিস্সুণিত্ৰা গঙ্গাতীরে রমণীযে ভূমিভাগে ৰুত্তপ্পমাণং অস্সমপদং মাপেত্ৰা পণ্ণসালাসু কট্ঠত্থরণপণ্ণত্থরণআসনাদীনি পঞ্ঞপেত্ৰা সব্বে পব্বজিতপরিক্খারে মাপেসি. একেকিস্সা পণ্ণসালায দ্ৰারে একেকো চঙ্কমো রত্তিট্ঠানদিৰাট্ঠানপরিচ্ছিন্নো কতসুধাপরিকম্মো আলম্বনফলকো, তেসু তেসু ঠানেসু নানাৰণ্ণসুরভিকুসুমসঞ্ছন্না পুপ্ফগচ্ছা, একেকস্স চঙ্কমস্স কোটিযং একেকো উদকভরিতো কূপো, তস্স সন্তিকে একেকো ফলরুক্খো, সো একোৰ সব্বফলানি ফলতি. ইদং সব্বং দেৰতানুভাৰেন অহোসি. ৰিস্সকম্মো অস্সমপদং মাপেত্ৰা পণ্ণসালাসু পব্বজিতপরিক্খারে ঠপেত্ৰা ‘‘যে কেচি পব্বজিতুকামা ইমে পরিক্খারে গণ্হন্তূ’’তি জাতিহিঙ্গুলকেন ভিত্তিযা অক্খরানি লিখিত্ৰা অত্তনো আনুভাৰেন ভেরৰসদ্দে মিগপক্খী দুদ্দসিকে অমনুস্সে চ পটিক্কমাপেত্ৰা সকট্ঠানমেৰ গতো.

হত্থিপালকুমারো একপদিকমগ্গেন সক্কদত্তিযং অস্সমং পৰিসিত্ৰা অক্খরানি দিস্ৰা ‘‘সক্কেন মম মহাভিনিক্খমনং নিক্খন্তভাৰো ঞাতো ভৰিস্সতী’’তি দ্ৰারং ৰিৰরিত্ৰা পণ্ণসালং পৰিসিত্ৰা ইসিপব্বজ্জলিঙ্গং গহেত্ৰা নিক্খমিত্ৰা চঙ্কমং ওতরিত্ৰা কতিপযে ৰারে অপরাপরং চঙ্কমিত্ৰা সেসজনকাযং পব্বাজেত্ৰা অস্সমপদং ৰিচারেন্তো তরুণপুত্তানং ইত্থীনং মজ্ঝট্ঠানে পণ্ণসালং অদাসি. ততো অনন্তরং মহল্লকিত্থীনং, ততো অনন্তরং মজ্ঝিমিত্থীনং, সমন্তা পরিক্খিপিত্ৰা পন পুরিসানং অদাসি. অথেকো রাজা ‘‘বারাণসিযং কির রাজা নত্থী’’তি আগন্ত্ৰা অলঙ্কতপটিযত্তং নগরং ওলোকেত্ৰা রাজনিৰেসনং আরুয্হ তত্থ তত্থ রতনরাসিং দিস্ৰা ‘‘এৰরূপং নগরং পহায পব্বজিতকালতো পট্ঠায পব্বজ্জা নামেসা উল়ারা ভৰিস্সতী’’তি সুরাসোণ্ডে মগ্গং পুচ্ছিত্ৰা হত্থিপালস্স সন্তিকং পাযাসি. হত্থিপালো তস্স ৰনন্তরং আগতভাৰং ঞত্ৰা পটিমগ্গং গন্ত্ৰা আকাসে নিসিন্নো পরিসায ধম্মং দেসেত্ৰা অস্সমপদং নেত্ৰা সব্বপরিসং পব্বাজেসি. এতেনুপাযেন অঞ্ঞেপি ছ রাজানো পব্বজিংসু. সত্ত রাজানো ভোগে ছড্ডযিংসু, ছত্তিংসযোজনিকো অস্সমো নিরন্তরো পরিপূরি. যো কামৰিতক্কাদীসু অঞ্ঞতরং ৰিতক্কেতি, মহাপুরিসো তস্স ধম্মং দেসেত্ৰা ব্রহ্মৰিহারভাৰনঞ্চেৰ কসিণভাৰনঞ্চ আচিক্খতি. তে যেভুয্যেন ঝানাভিঞ্ঞা নিব্বত্তেত্ৰা তীসু কোট্ঠাসেসু দ্ৰে কোট্ঠাসা ব্রহ্মলোকে নিব্বত্তিংসু. ততিযকোট্ঠাসং তিধা কত্ৰা একো কোট্ঠাসো ব্রহ্মলোকে নিব্বত্তি, একো ছসু কামসগ্গেসু, একো ইসীনং পারিচরিযং কত্ৰা মনুস্সলোকে তীসু কুলসম্পত্তীসু নিব্বত্তি. এৰং হত্থিপালস্স সাসনং অপগতনিরযতিরচ্ছানযোনিপেত্তিৰিসযাসুরকাযং অহোসি.

ইমস্মিং তম্বপণ্ণিদীপে পথৰিচালকধম্মগুত্তত্থেরো, কটকন্ধকারৰাসী ফুস্সদেৰত্থেরো, উপরিমণ্ডলৰাসী মহাসঙ্ঘরক্খিতত্থেরো, মলযমহাদেৰত্থেরো, অভযগিরিৰাসী মহাদেৰত্থেরো, গামন্তপব্ভারৰাসী মহাসিৰত্থেরো, কাল়ৰল্লিমণ্ডপৰাসী মহানাগত্থেরো কুদ্দালসমাগমে মূগপক্খসমাগমে চূল়সুতসোমসমাগমে অযোঘরপণ্ডিতসমাগমে হত্থিপালসমাগমে চ সব্বপচ্ছা নিক্খন্তপুরিসা অহেসুং. তেনেৰাহ ভগৰা –

‘‘অভিত্থরেথ কল্যাণে, পাপা চিত্তং নিৰারযে;

দন্ধঞ্হি করোতো পুঞ্ঞং, পাপস্মিং রমতে মনো’’তি. (ধ. প. ১১৬);

তস্মা কল্যাণং তুরিততুরিতেনেৰ কাতব্বন্তি.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি তথাগতো মহাভিনিক্খমনং নিক্খন্তোযেৰা’’তি ৰত্ৰা জাতকং সমোধানেসি – ‘‘তদা এসুকারী রাজা সুদ্ধোদনমহারাজা অহোসি, দেৰী মহামাযা, পুরোহিতো কস্সপো, ব্রাহ্মণী ভদ্দকাপিলানী, অজপালো অনুরুদ্ধো, গোপালো মোগ্গল্লানো, অস্সপালো সারিপুত্তো, সেসপরিসা বুদ্ধপরিসা, হত্থিপালো পন অহমেৰ অহোসি’’ন্তি.

হত্থিপালজাতকৰণ্ণনা তেরসমা.

[৫১০] ১৪. অযোঘরজাতকৰণ্ণনা

যমেকরত্তিং পঠমন্তি ইদং সত্থা জেতৰনে ৰিহরন্তো মহাভিনিক্খমনঞ্ঞেৰ আরব্ভ কথেসি. তদাপি হি সো ‘‘ন, ভিক্খৰে, ইদানেৰ, পুব্বেপি তথাগতো মহাভিনিক্খমনং নিক্খন্তোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে ব্রহ্মদত্তস্স রঞ্ঞো অগ্গমহেসী গব্ভং পটিলভিত্ৰা লদ্ধগব্ভপরিহারা পরিণতগব্ভা পচ্চূসসমনন্তরে পুত্তং ৰিজাযি. তস্সা পুরিমত্তভাৰে একা সপত্তিকা ‘‘তৰ জাতং জাতং পজং খাদিতুং লভিস্সামী’’তি পত্থনং পট্ঠপেসি. সা কির সযং ৰঞ্ঝা হুত্ৰা পুত্তমাতুকোধেন তং পত্থনং কত্ৰা যক্খযোনিযং নিব্বত্তি. ইতরা রঞ্ঞো অগ্গমহেসী হুত্ৰা ইমং পুত্তং ৰিজাযি. সা যক্খিনী তদা ওকাসং লভিত্ৰা দেৰিযা পস্সন্তিযাৰ বীভচ্ছরূপা হুত্ৰা আগন্ত্ৰা তং দারকং গহেত্ৰা পলাযি. দেৰী ‘‘যক্খিনী মে পুত্তং গহেত্ৰা পলাযী’’তি মহাসদ্দেন ৰিরৰি. ইতরাপি দারকং মূলকন্দং ৰিয মুরুং মুরুং করোন্তী খাদিত্ৰা দেৰিযা হত্থৰিকারাদীহি ভেরৰং পকাসেত্ৰা তজ্জেত্ৰা পক্কামি. রাজা তং ৰচনং সুত্ৰা ‘‘কিং সক্কা যক্খিনিযা কাতু’’ন্তি তুণ্হী অহোসি. পুন দেৰিযা ৰিজাযনকালে দল়্হং আরক্খমকাসি. দেৰী পুত্তং পুন ৰিজাযি. যক্খিনী আগন্ত্ৰা তম্পি খাদিত্ৰা গতা. ততিযৰারে তস্সা কুচ্ছিযং মহাসত্তো পটিসন্ধিং গণ্হি. রাজা মহাজনং সন্নিপাতেত্ৰা ‘‘দেৰিযা জাতং জাতং পজং একা যক্খিনী খাদতি, কিং নু খো কাতব্ব’’ন্তি পুচ্ছি. অথেকো ‘‘যক্খা নাম তালপণ্ণস্স ভাযন্তি, দেৰিযা হত্থপাদেসু তালপণ্ণং বন্ধিতুং ৰট্টতী’’তি আহ. অথেকো ‘‘অযোঘরস্স ভাযন্তি, অযোঘরং কাতুং ৰট্টতী’’তি আহ. রাজা ‘‘সাধূ’’তি অত্তনো ৰিজিতে কম্মারে সন্নিপাতেত্ৰা ‘‘অযোঘরং করোথা’’তি আণাপেত্ৰা আযুত্তকে অদাসি. অন্তোনগরেযেৰ রমণীযে ভূমিভাগে গেহং পট্ঠপেসুং, থম্ভে আদিং কত্ৰা সব্বগেহসম্ভারা অযোমযাৰ অহেসুং, নৰহি মাসেহি অযোমযং মহন্তং চতুরস্সসালং নিট্ঠানং অগমাসি. তং নিচ্চং পজ্জলিতপদীপমেৰ হোতি.

রাজা দেৰিযা গব্ভপরিপাকং ঞত্ৰা অযোঘরং অলঙ্কারাপেত্ৰা তং আদায অযোঘরং পাৰিসি. সা তত্থ ধঞ্ঞপুঞ্ঞলক্খণসম্পন্নং পুত্তং ৰিজাযি, ‘‘অযোঘরকুমারো’’ত্ৰেৰস্স নামং করিংসু. তং ধাতীনং দত্ৰা মহন্তং আরক্খং সংৰিদহিত্ৰা রাজা দেৰিং আদায নগরং পদক্খিণং কত্ৰা অলঙ্কতপাসাদতলমেৰ অভিরুহি. যক্খিনীপি উদকৰারং গন্ত্ৰা ৰেস্সৰণস্স উদকং ৰহন্তী জীৰিতক্খযং পত্তা. মহাসত্তো অযোঘরেযেৰ ৰড্ঢিত্ৰা ৰিঞ্ঞুতং পত্তো তত্থেৰ সব্বসিপ্পানি উগ্গণ্হি. রাজা ‘‘কো মে পুত্তস্স ৰযপ্পদেসো’’তি অমচ্চে পুচ্ছিত্ৰা ‘‘সোল়সৰস্সো, দেৰ, সূরো থামসম্পন্নো যক্খসহস্সম্পি পটিবাহিতুং সমত্থো’’তি সুত্ৰা ‘‘রজ্জমস্স দস্সামি, সকলনগরং অলঙ্করিত্ৰা অযোঘরতো তং নীহরিত্ৰা আনেথা’’তি আহ. অমচ্চা ‘‘সাধু, দেৰা’’তি দ্ৰাদসযোজনিকং বারাণসিং অলঙ্করিত্ৰা সব্বালঙ্কারৰিভূসিতং মঙ্গলৰারণং আদায তত্থ গন্ত্ৰা কুমারং অলঙ্কারাপেত্ৰা হত্থিক্খন্ধে নিসীদাপেত্ৰা ‘‘দেৰ, কুলসন্তকং অলঙ্কতনগরং পদক্খিণং কত্ৰা পিতরং কাসিরাজানং ৰন্দথ, অজ্জেৰ সেতচ্ছত্তং লভিস্সথা’’তি আহংসু.

মহাসত্তো নগরং পদক্খিণং করোন্তো আরামরামণেয্যকৰনপোক্খরণিভূমিরামণেয্যকপাসাদরামণেয্যকাদীনি দিস্ৰা চিন্তেসি ‘‘মম পিতা মং এত্তকং কালং বন্ধনাগারে ৰসাপেসি. এৰরূপং অলঙ্কতনগরং দট্ঠুং নাদাসি, কো নু খো ময্হং দোসো’’তি অমচ্চে পুচ্ছি. ‘‘দেৰ, নত্থি তুম্হাকং দোসো, তুম্হাকং পন দ্ৰেভাতিকে একা যক্খিনী খাদি, তেন ৰো পিতা অযোঘরে ৰসাপেসি, অযোঘরেন জীৰিতং তুম্হাকং লদ্ধ’’ন্তি. সো তেসং ৰচনং সুত্ৰা চিন্তেসি ‘‘অহং দস মাসে লোহকুম্ভিনিরযে ৰিয চ গূথনিরযে ৰিয চ মাতুকুচ্ছিম্হি ৰসিত্ৰা মাতুকুচ্ছিতো নিক্খন্তকালতো পট্ঠায সোল়স ৰস্সানি এতস্মিং বন্ধনাগারে ৰসিং, বহি ওলোকেতুম্পি ন লভিং, উস্সদনিরযে খিত্তো ৰিয অহোসিং, যক্খিনিযা হত্থতো মুত্তোপি পনাহং নেৰ অজরো, ন অমরো হোমি, কিং মে রজ্জেন, রজ্জে ঠিতকালতো পট্ঠায দুন্নিক্খমনং হোতি, অজ্জেৰ মম পিতরং পব্বজ্জং অনুজানাপেত্ৰা হিমৰন্তং পৰিসিত্ৰা পব্বজিস্সামী’’তি. সো নগরং পদক্খিণং কত্ৰা রাজকুলং পৰিসিত্ৰা রাজানং ৰন্দিত্ৰা অট্ঠাসি.

রাজা তস্স সরীরসোভং ওলোকেত্ৰা বলৰসিনেহেন অমচ্চে ওলোকেসি. তে ‘‘কিং করোম, দেৰা’’তি ৰদিংসু. পুত্তং মে রতনরাসিম্হি ঠপেত্ৰা তীহি সঙ্খেহি অভিসিঞ্চিত্ৰা কঞ্চনমালং সেতচ্ছত্তং উস্সাপেথাতি. মহাসত্তো পিতরং ৰন্দিত্ৰা ‘‘ন ময্হং রজ্জেনত্থো, অহং পব্বজিস্সামি, পব্বজ্জং মে অনুজানাথা’’তি আহ. তাত রজ্জং পটিক্খিপিত্ৰা কিংকারণা পব্বজিস্সসীতি. ‘‘দেৰ অহং মাতুকুচ্ছিম্হি দস মাসে গূথনিরযে ৰিয ৰসিত্ৰা মাতুকুচ্ছিতো নিক্খন্তো যক্খিনিভযেন সোল়স ৰস্সানি বন্ধনাগারে ৰসন্তো বহি ওলোকেতুম্পি ন অলভিং, উস্সদনিরযে খিত্তো ৰিয অহোসিং, যক্খিনিযা হত্থতো মুত্তোম্হীতিপি অজরো অমরো ন হোমি. মচ্চু নামেস ন সক্কা কেনচি জিনিতুং, ভৰে উক্কণ্ঠিতোম্হি, যাৰ মে ব্যাধিজরামরণানি নাগচ্ছন্তি, তাৰদেৰ পব্বজিত্ৰা ধম্মং চরিস্সামি, অলং মে রজ্জেন, অনুজানাথ মং, দেৰা’’তি ৰত্ৰা পিতু ধম্মং দেসেন্তো আহ –

৩৬৩.

‘‘যমেকরত্তিং পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততি.

৩৬৪.

‘‘ন যুজ্ঝমানা ন বলেনৰস্সিতা, নরা ন জীরন্তি ন চাপি মীযরে;

সব্বং হিদং জাতিজরাযুপদ্দুতং, তং মে মতী হোতি চরামি ধম্মং.

৩৬৫.

‘‘চতুরঙ্গিনিং সেনং সুভিংসরূপং, জযন্তি রট্ঠাধিপতী পসয্হ;

ন মচ্চুনো জযিতুমুস্সহন্তি, তং মে মতী হোতি চরামি ধম্মং.

৩৬৬.

‘‘হত্থীহি অস্সেহি রথেহি পত্তিভি, পরিৰারিতা মুচ্চরে একচ্চেয্যা;

ন মচ্চুনো মুচ্চিতুমুস্সহন্তি, তং মে মতী হোতি চরামি ধম্মং.

৩৬৭.

‘‘হত্থীহি অস্সেহি রথেহি পত্তিভি, সূরা পভঞ্জন্তি পধংসযন্তি;

ন মচ্চুনো ভঞ্জিতুমুস্সহন্তি, তং মে মতী হোতি চরামি ধম্মং.

৩৬৮.

‘‘মত্তা গজা ভিন্নগল়া পভিন্না, নগরানি মদ্দন্তি জনং হনন্তি;

ন মচ্চুনো মদ্দিতুমুস্সহন্তি, তং মে মতী হোতি চরামি ধম্মং.

৩৬৯.

‘‘ইস্সাসিনো কতহত্থাপি ৰীরা, দূরেপাতী অক্খণৰেধিনোপি;

ন মচ্চুনো ৰিজ্ঝিতুমুস্সহন্তি, তং মে মতী হোতি চরামি ধম্মং.

৩৭০.

‘‘সরানি খীযন্তি সসেলকাননা, সব্বং হিদং খীযতি দীঘমন্তরং;

সব্বং হিদং ভঞ্জরে কালপরিযাযং, তং মে মতী হোতি চরামি ধম্মং.

৩৭১.

‘‘সব্বেসমেৰঞ্হি নরান নারিনং, চলাচলং পাণভুনোধ জীৰিতং;

পটোৰ ধুত্তস্স, দুমোৰ কূলজো, তং মে মতী হোতি চরামি ধম্মং.

৩৭২.

‘‘দুমপ্ফলানেৰ পতন্তি মাণৰা, দহরা চ ৰুদ্ধা চ সরীরভেদা;

নারিযো নরা মজ্ঝিমপোরিসা চ, তং মে মতী হোতি চরামি ধম্মং.

৩৭৩.

‘‘নাযং ৰযো তারকরাজসন্নিভো, যদব্ভতীতং গতমেৰ দানি তং;

জিণ্ণস্স হী নত্থি রতী কুতো সুখং, তং মে মতী হোতি চরামি ধম্মং.

৩৭৪.

‘‘যক্খা পিসাচা অথৰাপি পেতা, কুপিতা তে অস্সসন্তি মনুস্সে;

ন মচ্চুনো অস্সসিতুস্সহন্তি, তং মে মতী হোতি চরামি ধম্মং.

৩৭৫.

‘‘যক্খে পিসাচে অথৰাপি পেতে, কুপিতেপি তে নিজ্ঝপনং করোন্তি;

ন মচ্চুনো নিজ্ঝপনং করোন্তি, তং মে মতী হোতি চরামি ধম্মং.

৩৭৬.

‘‘অপরাধকে দূসকে হেঠকে চ, রাজানো দণ্ডেন্তি ৰিদিত্ৰান দোসং;

ন মচ্চুনো দণ্ডযিতুস্সহন্তি, তং মে মতী হোতি চরামি ধম্মং.

৩৭৭.

‘‘অপরাধকা দূসকা হেঠকা চ, লভন্তি তে রাজিনো নিজ্ঝপেতুং;

ন মচ্চুনো নিজ্ঝপনং করোন্তি, তং মে মতী হোতি চরামি ধম্মং.

৩৭৮.

‘‘ন খত্তিযোতি ন চ ব্রাহ্মণোতি, ন অড্ঢকা বলৰা তেজৰাপি;

ন মচ্চুরাজস্স অপেক্খমত্থি, তং মে মতী হোতি চরামি ধম্মং.

৩৭৯.

‘‘সীহা চ ব্যগ্ঘা চ অথোপি দীপিযো, পসয্হ খাদন্তি ৰিপ্ফন্দমানং;

ন মচ্চুনো খাদিতুমুস্সহন্তি, তং মে মতী হোতি চরামি ধম্মং.

৩৮০.

‘‘মাযাকারা রঙ্গমজ্ঝে করোন্তা, মোহেন্তি চক্খূনি জনস্স তাৰদে;

ন মচ্চুনো মোহযিতুস্সহন্তি, তং মে মতী হোতি চরামি ধম্মং.

৩৮১.

‘‘আসীৰিসা কুপিতা উগ্গতেজা, ডংসন্তি মারেন্তিপি তে মনুস্সে;

ন মচ্চুনো ডংসিতুমুস্সহন্তি, তং মে মতী হোতি চরামি ধম্মং.

৩৮২.

‘‘আসীৰিসা কুপিতা যং ডংসন্তি, তিকিচ্ছকা তেস ৰিসং হনন্তি;

ন মচ্চুনো দট্ঠৰিসং হনন্তি, তং মে মতী হোতি চরামি ধম্মং.

৩৮৩.

‘‘ধম্মন্তরী ৰেত্তরণী চ ভোজো, ৰিসানি হন্ত্ৰান ভুজঙ্গমানং;

সুয্যন্তি তে কালকতা তথেৰ, তং মে মতী হোতি চরামি ধম্মং.

৩৮৪.

‘‘ৰিজ্জাধরা ঘোরমধীযমানা, অদস্সনং ওসধেহি ৰজন্তি;

ন মচ্চুরাজস্স ৰজন্তদস্সনং, তং মে মতী হোতি চরামি ধম্মং.

৩৮৫.

‘‘ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

৩৮৬.

‘‘ন হি ধম্মো অধম্মো চ, উভো সমৰিপাকিনো;

অধম্মো নিরযং নেতি, ধম্মো পাপেতি সুগ্গতি’’ন্তি.

তত্থ যমেকরত্তিন্তি যেভুয্যেন সত্তা মাতুকুচ্ছিম্হি পটিসন্ধিং গণ্হন্তা রত্তিযংযেৰ গণ্হন্তি, তস্মা এৰমাহ. অযং পনেত্থ অত্থো – যং একরত্তিং ৰা দিৰা ৰা পঠমমেৰ পটিসন্ধিং গণ্হিত্ৰা মাতুকুচ্ছিসঙ্খাতে গব্ভে ৰসতি. মাণৰোতি সত্তো কললভাৰেন পতিট্ঠাতি. অব্ভুট্ঠিতোৰ সো যাতীতি সো মাণৰো যথা নাম ৰলাহকসঙ্খাতো অব্ভো উট্ঠিতো নিব্বত্তো ৰাযুৰেগাহতো পটিগচ্ছতি, তথেৰ –

‘‘পঠমং কললং হোতি, কললা হোতি অব্বুদং;

অব্বুদা জাযতে পেসি, পেসি নিব্বত্ততী ঘনো;

ঘনা পসাখা জাযন্তি, কেসা লোমা নখাপি চ.

‘‘যঞ্চস্স ভুঞ্জতী মাতা, অন্নং পানঞ্চ ভোজনং;

তেন সো তত্থ যাপেতি, মাতুকুচ্ছিগতো নরোতি. (সং. নি. ১.২৩৫);

ইমং মাতুকুচ্ছিযং কললাদিভাৰং, মাতুকুচ্ছিতো চ নিক্খন্তো মন্দদসকাদিভাৰং আপজ্জমানো সততং সমিতং গচ্ছতি. স গচ্ছং ন নিৰত্ততীতি সচাযং এৰং গচ্ছন্তো পুন অব্বুদতো কললভাৰং, পেসিআদিতো ৰা অব্বুদাদিভাৰং, খিড্ডাদসকতো মন্দদসকভাৰং, ৰণ্ণদসকাদিতো ৰা খিড্ডাদসকাদিভাৰং পাপুণিতুং ন নিৰত্ততি. যথা পন সো ৰলাহকো ৰাতৰেগেন সংচুণ্ণিযমানো ‘‘অহং অসুকট্ঠানে নাম উট্ঠিতো পুন নিৰত্তিত্ৰা তত্থেৰ গন্ত্ৰা পকতিভাৰেন ঠস্সামী’’তি ন লভতি, যং দিসং গতং, তং গতমেৰ, যং অন্তরহিতং, তং অন্তরহিতমেৰ হোতি, তথা সোপি কললাদিভাৰেন গচ্ছমানো গচ্ছতেৰ, তস্মিং তস্মিং কোট্ঠাসে সঙ্খারা পুরিমানং পুরিমানং পচ্চযা হুত্ৰা পচ্ছতো অনিৰত্তিত্ৰা তত্থ তত্থেৰ ভিজ্জন্তি, জরাকালে সঙ্খারা ‘‘অম্হেহি এস পুব্বে যুৰা থামসম্পন্নো কতো, পুন নং নিৰত্তিত্ৰা তত্থেৰ করিস্সামা’’তি ন লভন্তি, তত্থ তত্থেৰ অন্তরধাযন্তীতি দস্সেতি.

ন যুজ্ঝমানাতি উভতো ব্যূল়্হে সঙ্গামে যুজ্ঝন্তা. ন বলেনৰস্সিতাতি ন কাযবলেন ৰা যোধবলেন ৰা উপগতা সমন্নাগতা. ন জীরন্তীতি পুরিম-ন-কারং আহরিত্ৰা এৰরূপাপি নরা ন জীরন্তি ন চাপি ন মীযরেতি অত্থো ৰেদিতব্বো. সব্বং হিদন্তি মহারাজ, সব্বমেৰ ইদং পাণমণ্ডলং মহাযন্তেন পীল়িযমানা উচ্ছুঘটিকা ৰিয জাতিযা চ জরায চ উপদ্দুতং নিচ্চং পীল়িতং. তং মে মতী হোতীতি তেন কারণেন মম ‘‘পব্বজিত্ৰা ধম্মং চরামী’’তি মতি হোতি চিত্তং উপ্পজ্জতি.

চতুরঙ্গিনিন্তি হত্থিআদীহি চতুরঙ্গেহি সমন্নাগতং. সেনং সুভিংসরূপন্তি সুট্ঠু ভিংসনকজাতিকং সেনং. জযন্তীতি কদাচি একচ্চে রাজানো অত্তনো সেনায জযন্তি. ন মচ্চুনোতি তেপি রাজানো মহাসেনস্স মচ্চুনো সেনং জযিতুং ন উস্সহন্তি, ন ব্যাধিজরামরণানি মদ্দিতুং সক্কোন্তি. মুচ্চরে একচ্চেয্যাতি এতেহি হত্থিআদীহি পরিৰারিতা একচ্চে পচ্চামিত্তানং হত্থতো মুচ্চন্তি, মচ্চুনো পন সন্তিকা মুচ্চিতুং ন সক্কোন্তি. পভঞ্জন্তীতি এতেহি হত্থিআদীহি পচ্চত্থিকরাজূনং নগরানি পভঞ্জন্তি. পধংসযন্তীতি মহাজনং ধংসেন্তা পধংসেন্তা জীৰিতক্খযং পাপেন্তি. ন মচ্চুনোতি তেপি মরণকালে পত্তে মচ্চুনো ভঞ্জিতুং ন সক্কোন্তি.

ভিন্নগল়া পভিন্নাতি তীসু ঠানেসু পভিন্না হুত্ৰা মদং গল়ন্তা, পগ্ঘরিতমদাতি অত্থো. ন মচ্চুনোতি তেপি মহামচ্চুং মদ্দিতুং ন সক্কোন্তি. ইস্সাসিনোতি ইস্সাসা ধনুগ্গহা. কতহত্থাতি সুসিক্খিতা. দূরেপাতীতি সরং দূরে পাতেতুং সমত্থা. অক্খণৰেধিনোতি অৰিরদ্ধৰেধিনো, ৰিজ্জুআলোকেন ৰিজ্ঝনসমত্থা ৰা. সরানীতি অনোতত্তাদীনি মহাসরানি খীযন্তিযেৰ. সসেলকাননাতি সপব্বতৰনসণ্ডা মহাপথৰীপি খীযতি. সব্বং হিদন্তি সব্বমিদং সঙ্খারগতং দীঘমন্তরং ঠত্ৰা খীযতেৰ. কপ্পুট্ঠানগ্গিং পত্ৰা মহাসিনেরুপি অগ্গিমুখে মধুসিত্থকং ৰিয ৰিলীযতেৰ, অণুমত্তোপি সঙ্খারো ঠাতুং ন সক্কোতি. কালপরিযাযন্তি কালপরিযাযং নস্সনকালৰারং পত্ৰা সব্বং ভঞ্জরে, সব্বং সঙ্খারগতং ভিজ্জতেৰ. তস্স পকাসনত্থং সত্তসূরিযসুত্তং (অ. নি. ৭.৬৬) আহরিতব্বং.

চলাচলন্তি চঞ্চলং সকভাৰেন ঠাতুং অসমত্থং নানাভাৰৰিনাভাৰসভাৰমেৰ. পাণভুনোধ জীৰিতন্তি ইধ লোকে ইমেসং পাণভূতানং জীৰিতং. পটোৰ ধুত্তস্স, দুমোৰ কূলজোতি সুরধুত্তো হি সুরং দিস্ৰাৰ উদরে বদ্ধং সাটকং দত্ৰা পিৰতেৰ, নদীকূলে জাতদুমোৰ কূলে লুজ্জমানে লুজ্জতি, যথা এস পটো চ দুমো চ চঞ্চলো, এৰং সত্তানং জীৰিতং, দেৰাতি. দুমপ্ফলানেৰাতি যথা পক্কানি ফলানি ৰাতাহতানি দুমগ্গতো ভূমিযং পতন্তি, তথেৰিমে মাণৰা জরাৰাতাহতা জীৰিতা গল়িত্ৰা মরণপথৰিযং পতন্তি. দহরাতি অন্তমসো কললভাৰে ঠিতাপি. মজ্ঝিমপোরিসাতি নারীনরানং মজ্ঝে ঠিতা উভতোব্যঞ্জনকনপুংসকা.

তারকরাজসন্নিভোতি যথা তারকরাজা কাল়পক্খে খীণো, পুন জুণ্হপক্খে পূরতি, ন এৰং সত্তানং ৰযো. সত্তানঞ্হি যং অব্ভতীতং, গতমেৰ দানি তং, ন তস্স পুনাগমনং অত্থি. কুতো সুখন্তি জরাজিণ্ণস্স কামগুণেসু রতিপি নত্থি, তে পটিচ্চ উপ্পজ্জনকসুখং কুতোযেৰ. যক্খাতি মহিদ্ধিকা যক্খা. পিসাচাতি পংসুপিসাচকা. পেতাতি পেত্তিৰিসযিকা. অস্সসন্তীতি অস্সাসৰাতেন উপহনন্তি, আৰিসন্তীতি ৰা অত্থো. ন মচ্চুনোতি মচ্চুং পন তেপি অস্সাসেন উপহনিতুং ৰা আৰিসিতুং ৰা ন সক্কোন্তি. নিজ্ঝপনং করোন্তীতি বলিকম্মৰসেন খমাপেন্তি পসাদেন্তি. অপরাধকেতি রাজাপরাধকারকে. দূসকেতি রজ্জদূসকে. হেঠকেতি সন্ধিচ্ছেদাদীহি লোকৰিহেঠকে. রাজানোতি রাজানো. ৰিদিত্ৰান দোসন্তি দোসং জানিত্ৰা যথানুরূপেন দণ্ডেন দণ্ডেন্তীতি অত্থো. ন মচ্চুনোতি তেপি মচ্চুং দণ্ডযিতুং ন সক্কোন্তি.

নিজ্ঝপেতুন্তি সক্খীহি অত্তনো নিরপরাধভাৰং পকাসেত্ৰা পসাদেতুং. ন অড্ঢকা বলৰা তেজৰাপীতি ‘‘ইমে অড্ঢা, অযং কাযবলঞাণবলাদীহি বলৰা, অযং তেজৰা’’তি এৰম্পি ন পচ্চুরাজস্স অপেক্খং অত্থি, একস্মিম্পি সত্তে অপেক্খং পেমং সিনেহো নত্থি, সব্বমেৰ অভিমদ্দতীতি দস্সেতি. পসয্হাতি বলক্কারেন অভিভৰিত্ৰা. ন মচ্চুনোতি তেপি মচ্চুং খাদিতুং ন সক্কোন্তি. করোন্তাতি মাযং করোন্তা. মোহেন্তীতি অভূতং ভূতং কত্ৰা দস্সেন্তা মোহেন্তি. উগ্গতেজাতি উগ্গতেন ৰিসতেজেন সমন্নাগতা. তিকিচ্ছকাতি ৰিসৰেজ্জা. ধম্মন্তরী ৰেত্তরণী চ ভোজোতি এতে এৰংনামকা ৰেজ্জা. ঘোরমধীযমানাতি ঘোরং নাম ৰিজ্জং অধীযন্তা. ওসধেহীতি ঘোরং ৰা গন্ধারিং ৰা ৰিজ্জং সাৰেত্ৰা ওসধং আদায তেহি ওসধেহি পচ্চত্থিকানং অদস্সনং ৰজন্তি.

ধম্মোতি সুচরিতধম্মো. রক্খতীতি যেন রক্খিতো, তং পটিরক্খতি. সুখন্তি ছসু কামসগ্গেসু সুখং আৰহতি. পাপেতীতি পটিসন্ধিৰসেন উপনেতি.

এৰং মহাসত্তো চতুৰীসতিযা গাথাহি পিতু ধম্মং দেসেত্ৰা ‘‘মহারাজ, তুম্হাকং রজ্জং তুম্হাকমেৰ হোতু, ন ময্হং ইমিনা অত্থো, তুম্হেহি পন সদ্ধিং কথেন্তমেৰ মং ব্যাধিজরামরণানি উপগচ্ছন্তি, তিট্ঠথ, তুম্হে’’তি ৰত্ৰা অযদামং ছিন্দিত্ৰা মত্তহত্থী ৰিয কঞ্চনপঞ্জরং ছিন্দিত্ৰা সীহপোতকো ৰিয কামে পহায মাতাপিতরো ৰন্দিত্ৰা নিক্খমি. অথস্স পিতা ‘‘মমপি রজ্জেনত্থো নত্থী’’তি রজ্জং পহায তেন সদ্ধিঞ্ঞেৰ নিক্খমি, তস্মিং নিক্খন্তে দেৰীপি অমচ্চাপি ব্রাহ্মণগহপতিকাদযোপীতি সকলনগরৰাসিনো গেহানি ছড্ডেত্ৰা নিক্খমিংসু. সমাগমো মহা অহোসি, পরিসা দ্ৰাদসযোজনিকা জাতা. তং আদায মহাসত্তো হিমৰন্তং পাৰিসি. সক্কো তস্স নিক্খন্তভাৰং ঞত্ৰা ৰিস্সকম্মং পেসেত্ৰা দ্ৰাদসযোজনাযামং সত্তযোজনৰিত্থারং অস্সমপদং কারেসি. সব্বে পব্বজিতপরিক্খারে পটিযাদাপেসি. ইতো পরং মহাসত্তস্স পব্বজ্জা চ ওৰাদদানঞ্চ ব্রহ্মলোকপরাযণতা চ পরিসায অনপাযগমনীযতা চ সব্বা হেট্ঠা ৰুত্তনযেনেৰ ৰেদিতব্বা.

সত্থা ইমং ধম্মদেসনং আহরিত্ৰা ‘‘এৰং, ভিক্খৰে, পুব্বেপি তথাগতো মহাভিনিক্খমনং নিক্খন্তোযেৰা’’তি ৰত্ৰা জাতকং সমোধানেসি – ‘‘তদা মাতাপিতরো মহারাজকুলানি অহেসুং, সেসপরিসা বুদ্ধপরিসা, অযোঘরপণ্ডিতো পন অহমেৰ অহোসি’’ন্তি.

অযোঘরজাতকৰণ্ণনা চুদ্দসমা.

জাতকুদ্দানং –

মাতঙ্গো চিত্তসম্ভূতো, সিৰি সিরী চ রোহণং;

হংসো সত্তিগুম্বো ভল্লা, সোমনস্সং চম্পেয্যকং.

পলোভং পঞ্চপণ্ডিতং, হত্থিপালং অযোঘরং;

ৰীসতিযম্হি জাতকা, চতুদ্দসেৰ সঙ্গিতা.

ৰীসতিনিপাতৰণ্ণনা নিট্ঠিতা.

(চতুত্থো ভাগো নিট্ঠিতো)

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

জাতক-অট্ঠকথা

(পঞ্চমো ভাগো)

১৬. তিংসনিপাতো

[৫১১] ১. কিংছন্দজাতকৰণ্ণনা

কিংছন্দো কিমধিপ্পাযোতি ইদং সত্থা জেতৰনে ৰিহরন্তো উপোসথকম্মং আরব্ভ কথেসি. একদিৰসঞ্হি সত্থা বহূ উপাসকে চ উপাসিকাযো চ উপোসথিকে ধম্মস্সৰনত্থায আগন্ত্ৰা ধম্মসভাযং নিসিন্নে ‘‘উপোসথিকাত্থ উপাসকা’’তি পুচ্ছিত্ৰা ‘‘আম, ভন্তে’’তি ৰুত্তে ‘‘সাধু ৰো কতং উপোসথং করোন্তেহি, পোরাণকা উপড্ঢূপোসথকম্মস্স নিস্সন্দেন মহন্তং যসং পটিলভিংসূ’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তো ধম্মেন রজ্জং কারেন্তো সদ্ধো অহোসি দানসীলউপোসথকম্মেসু অপ্পমত্তো. সো সেসেপি অমচ্চাদযো দানাদীসু সমাদপেসি. পুরোহিতো পনস্স পরপিট্ঠিমংসিকো লঞ্জখাদকো কূটৰিনিচ্ছযিকো অহোসি. রাজা উপোসথদিৰসে অমচ্চাদযো পক্কোসাপেত্ৰা ‘‘উপোসথিকা হোথা’’তি আহ. পুরোহিতো উপোসথং ন সমাদিযি. অথ নং দিৰা লঞ্জং গহেত্ৰা কূটড্ডং কত্ৰা উপট্ঠানং আগতং রাজা ‘‘তুম্হে উপোসথিকা’’তি অমচ্চে পুচ্ছন্তো ‘‘ত্ৰম্পি আচরিয উপোসথিকো’’তি পুচ্ছি. সো ‘‘আমা’’তি মুসাৰাদং কত্ৰা পাসাদা ওতরি. অথ নং একো অমচ্চো ‘‘ননু তুম্হে ন উপোসথিকা’’তি চোদেসি. সো আহ – ‘‘অহং ৰেলাযমেৰ ভুঞ্জিং, গেহং পন গন্ত্ৰা মুখং ৰিক্খালেত্ৰা উপোসথং অধিট্ঠায সাযং ন ভুঞ্জিস্সামি, রত্তিং সীলং রক্খিস্সামি, এৰং মে উপড্ঢূপোসথকম্মং ভৰিস্সতী’’তি? ‘‘সাধু, আচরিযা’’তি. সো গেহং গন্ত্ৰা তথা অকাসি. পুনেকদিৰসং তস্মিং ৰিনিচ্ছযে নিসিন্নে অঞ্ঞতরা সীলৰতী ইত্থী অড্ডং করোন্তী ঘরং গন্তুং অলভমানা ‘‘উপোসথকম্মং নাতিক্কমিস্সামী’’তি উপকট্ঠে কালে মুখং ৰিক্খালেতুং আরভি. তস্মিং খণে ব্রাহ্মণস্স সুপক্কানং অম্বফলানং অম্বপিণ্ডি আহরিযিত্থ. সো তস্সা উপোসথিকভাৰং ঞত্ৰা ‘‘ইমানি খাদিত্ৰা উপোসথিকা হোহী’’তি অদাসি. সা তথা অকাসি. এত্তকং ব্রাহ্মণস্স কম্মং.

সো অপরভাগে কালং কত্ৰা হিমৰন্তপদেসে কোসিকিগঙ্গায তীরে তিযোজনিকে অম্বৰনে রমণীযে ভূমিভাগে সোভগ্গপ্পত্তে কনকৰিমানে অলঙ্কতসিরিসযনে সুত্তপ্পবুদ্ধো ৰিয নিব্বত্তি অলঙ্কতপটিযত্তো উত্তমরূপধরো সোল়সসহস্সদেৰকঞ্ঞাপরিৰারো. সো রত্তিঞ্ঞেৰ তং সিরিসম্পত্তিং অনুভোতি. ৰেমানিকপেতভাৰেন হিস্স কম্মসরিক্খকো ৰিপাকো অহোসি, তস্মা অরুণে উগ্গচ্ছন্তে অম্বৰনং পৰিসতি, পৰিট্ঠক্খণেযেৰস্স দিব্বত্তভাৰো অন্তরধাযতি, অসীতিহত্থতালক্খন্ধপ্পমাণো অত্তভাৰো নিব্বত্ততি, সকলসরীরং ঝাযতি, সুপুপ্ফিতকিংসুকো ৰিয হোতি. দ্ৰীসু হত্থেসু একেকাৰ অঙ্গুলি, তত্থ মহাকুদ্দালপ্পমাণা নখা হোন্তি. তেহি নখেহি অত্তনো পিট্ঠিমংসং ফালেত্ৰা উপ্পাটেত্ৰা খাদন্তো ৰেদনাপ্পত্তো মহারৰং রৰন্তো দুক্খং অনুভোতি. সূরিযে অত্থঙ্গতে তং সরীরং অন্তরধাযতি, দিব্বসরীরং নিব্বত্ততি, অলঙ্কতপটিযত্তা দিব্বনাটকিত্থিযো নানাতূরিযানি গহেত্ৰা পরিৰারেন্তি. সো মহাসম্পত্তিং অনুভৰন্তো রমণীযে অম্বৰনে দিব্বপাসাদং অভিরুহতি. ইতি সো উপোসথিকায ইত্থিযা অম্বফলদানস্স নিস্সন্দেন তিযোজনিকং অম্বৰনং পটিলভতি, লঞ্জং গহেত্ৰা কূটড্ডকরণনিস্সন্দেন পন পিট্ঠিমংসং উপ্পাটেত্ৰা খাদতি, উপড্ঢূপোসথস্স নিস্সন্দেন রত্তিং সম্পত্তিং অনুভোতি, সোল়সসহস্সনাটকিত্থীহি পরিৰুতো পরিচারেসি.

তস্মিং কালে বারাণসিরাজা কামেসু দোসং দিস্ৰা ইসিপব্বজ্জং পব্বজিত্ৰা অধোগঙ্গায রমণীযে ভূমিপদেসে পণ্ণসালং কারেত্ৰা উঞ্ছাচরিযায যাপেন্তো ৰিহাসি. অথেকদিৰসং তম্হা অম্বৰনা মহাঘটপ্পমাণং অম্বপক্কং গঙ্গায পতিত্ৰা সোতেন ৰুয্হমানং তস্স তাপসস্স পরিভোগতিত্থাভিমুখং অগমাসি. সো মুখং ধোৰন্তো তং মজ্ঝে নদিযা আগচ্ছন্তং দিস্ৰা উদকং তরন্তো গন্ত্ৰা আদায অস্সমপদং আহরিত্ৰা অগ্যাগারে ঠপেত্ৰা সত্থকেন ফালেত্ৰা যাপনমত্তং খাদিত্ৰা সেসং কদলিপণ্ণেহি পটিচ্ছাদেত্ৰা পুনপ্পুনং দিৰসে দিৰসে যাৰ পরিক্খযা খাদি. তস্মিং পন খীণে অঞ্ঞং ফলাফলং খাদিতুং নাসক্খি, রসতণ্হায বজ্ঝিত্ৰা ‘‘তমেৰ অম্বপক্কং খাদিস্সামী’’তি নদীতীরং গন্ত্ৰা নদিং ওলোকেন্তো ‘‘অম্বং অলভিত্ৰা ন উট্ঠহিস্সামী’’তি সন্নিট্ঠানং কত্ৰা নিসীদি. সো তত্থ নিরাহারো একম্পি দিৰসং, দ্ৰেপি, তীণি, চতু, পঞ্চ, ছ দিৰসানি ৰাতাতপেন পরিসুস্সন্তো অম্বং ওলোকেন্তো নিসীদি. অথ সত্তমে দিৰসে নদীদেৰতা আৰজ্জমানা তং কারণং ঞত্ৰা ‘‘অযং তাপসো তণ্হাৰসিকো হুত্ৰা সত্তাহং নিরাহারো গঙ্গং ওলোকেন্তো নিসীদি, ইমস্স অম্বপক্কং অদাতুং ন যুত্তং, অলভন্তো মরিস্সতি, দস্সামি তস্সা’’তি আগন্ত্ৰা গঙ্গায উপরি আকাসে ঠত্ৰা তেন সদ্ধিং সল্লপন্তী পঠমং গাথমাহ –

১.

‘‘কিংছন্দো কিমধিপ্পাযো, একো সম্মসি ঘম্মনি;

কিংপত্থযানো কিং এসং, কেন অত্থেন ব্রাহ্মণা’’তি.

তত্থ ছন্দোতি অজ্ঝাসযো. অধিপ্পাযোতি চিত্তং. সম্মসীতি অচ্ছসি. ঘম্মনীতি গিম্হে. এসন্তি এসন্তো. ব্রাহ্মণাতি পব্বজিতত্তা তাপসং আলপতি. ইদং ৰুত্তং হোতি – ব্রাহ্মণ, ত্ৰং কিং অধিপ্পাযো কিং চিন্তেন্তো কিং পত্থেন্তো কিং গৰেসন্তো কেনত্থেন ইমস্মিং গঙ্গাতীরে গঙ্গং ওলোকেন্তো নিসিন্নোতি.

তং সুত্ৰা তাপসো নৰ গাথা অভাসি –

২.

‘‘যথা মহা ৰারিধরো, কুম্ভো সুপরিণাহৰা;

তথূপমং অম্বপক্কং, ৰণ্ণগন্ধরসুত্তমং.

৩.

‘‘তং ৰুয্হমানং সোতেন, দিস্ৰানামলমজ্ঝিমে;

পাণীভি নং গহেত্ৰান, অগ্যাযতনমাহরিং.

৪.

‘‘ততো কদলিপত্তেসু, নিক্খিপিত্ৰা সযং অহং;

সত্থেন নং ৰিকপ্পেত্ৰা, খুপ্পিপাসং অহাসি মে.

৫.

‘‘সোহং অপেতদরথো, ব্যন্তীভূতো দুখক্খমো;

অস্সাদং নাধিগচ্ছামি, ফলেস্ৰঞ্ঞেসু কেসুচি.

৬.

‘‘সোসেত্ৰা নূন মরণং, তং মমং আৰহিস্সতি;

অম্বং যস্স ফলং সাদু, মধুরগ্গং মনোরমং;

যমুদ্ধরিং ৰুয্হমানং, উদধিস্মা মহণ্ণৰে.

৭.

‘‘অক্খাতং তে মযা সব্বং, যস্মা উপৰসামহং;

রম্মং পতি নিসিন্নোস্মি, পুথুলোমাযুতা পুথু.

৮.

‘‘ত্ৰঞ্চ খো মেৰ অক্খাহি, অত্তানমপলাযিনি;

কা ৰা ত্ৰমসি কল্যাণি, কিস্স ৰা ত্ৰং সুমজ্ঝিমে.

৯.

‘‘রুপ্পপট্টপলিমট্ঠীৰ, ব্যগ্ঘীৰ গিরিসানুজা;

যা সন্তি নারিযো দেৰেসু, দেৰানং পরিচারিকা.

১০.

‘‘যা চ মনুস্সলোকস্মিং, রূপেনান্ৰাগতিত্থিযো;

রূপেন তে সদিসী নত্থি, দেৰেসু গন্ধব্বমনুস্সলোকে;

পুট্ঠাসি মে চারুপুব্বঙ্গি, ব্রূহি নামঞ্চ বন্ধৰে’’তি.

তত্থ ৰারিধরো কুম্ভোতি উদকঘটো. সুপরিণাহৰাতি সুসণ্ঠানো. ৰণ্ণগন্ধরসুত্তমন্তি ৰণ্ণগন্ধরসেহি উত্তমং. দিস্ৰানাতি দিস্ৰা. অমলমজ্ঝিমেতি নিম্মলমজ্ঝে. দেৰতং আলপন্তো এৰমাহ. পাণীভীতি হত্থেহি. অগ্যাযতনমাহরিন্তি অত্তনো অগ্গিহুতসালং আহরিং. ৰিকপ্পেত্ৰাতি ৰিচ্ছিন্দিত্ৰা. ‘‘ৰিকন্তেত্ৰা’’তিপি পাঠো. ‘‘খাদি’’ন্তি পাঠসেসো. অহাসি মেতি তং জিৰ্হগ্গে ঠপিতমত্তমেৰ সত্ত রসহরণিসহস্সানি ফরিত্ৰা মম খুদঞ্চ পিপাসঞ্চ হরি. অপেতদরথোতি ৰিগতকাযচিত্তদরথো. সুধাভোজনং ভুত্তস্স ৰিয হি তস্স সব্বদরথং অপহরি. ব্যন্তীভূতোতি তস্স অম্বপক্কস্স ৰিগতন্তো জাতো, পরিক্খীণঅম্বপক্কো হুত্ৰাতি অত্থো. দুখক্খমোতি দুক্খেন অসাতেন কাযক্খমেন চেৰ চিত্তক্খমেন চ সমন্নাগতো. অঞ্ঞেসু পন কদলিপনসাদীসু ফলেসু পরিত্তকম্পি অস্সাদং নাধিগচ্ছামি, সব্বানি মে জিৰ্হায ঠপিতমত্তানি তিত্তকানেৰ সম্পজ্জন্তীতি দীপেতি.

সোসেত্ৰাতি নিরাহারতায সোসেত্ৰা সুক্খাপেত্ৰা. তং মমন্তি তং মম. যস্সাতি যং অস্স, অহোসীতি অত্থো. ইদং ৰুত্তং হোতি – যং ফলং মম সাদু অহোসি, যমহং গম্ভীরে পুথুলউদকক্খন্ধসঙ্খাতে মহণ্ণৰে ৰুয্হমানং ততো উদধিস্মা উদ্ধরিং, তং অম্বং মম মরণং আৰহিস্সতীতি মঞ্ঞামি, ময্হং তং অলভন্তস্স জীৰিতং নপ্পৰত্তিস্সতীতি. উপৰসামীতি খুপ্পিপাসাহি উপগতো ৰসামি. রম্মং পতি নিসিন্নোস্মীতি রমণীযং নদিং পতি অহং নিসিন্নো. পুথুলোমাযুতা পুথূতি অযং নদী পুথুলোমেহি মচ্ছেহি আযুতা পুথু ৰিপুলা, অপি নাম মে ইতো সোত্থি ভৰেয্যাতি অধিপ্পাযো. অপলাযিনীতি অপলাযিত্ৰা মম সম্মুখে ঠিতেতি তং দেৰতং আলপতি. ‘‘অপলাসিনী’’তিপি পাঠো, পলাসরহিতে অনৰজ্জসরীরেতি অত্থো. কিস্স ৰাতি কিস্স ৰা কারণা ইধাগতাসীতি পুচ্ছতি.

রূপপট্টপলিমট্ঠীৰাতি সুট্ঠু পরিমজ্জিতকঞ্চনপট্টসদিসী. ব্যগ্ঘীৰাতি লীলাৰিলাসেন তরুণব্যগ্ঘপোতিকা ৰিয. দেৰানন্তি ছন্নং কামাৰচরদেৰানং. যা চ মনুস্সলোকস্মিন্তি যা চ মনুস্সলোকে. রূপেনান্ৰাগতিত্থিযোতি রূপেন অন্ৰাগতা ইত্থিযো নত্থীতি অত্তনো সম্ভাৰনায এৰমাহ. তৰ রূপসদিসায নাম ন ভৰিতব্বন্তি হিস্স অধিপ্পাযো. গন্ধব্বমনুস্সলোকেতি মূলগন্ধাদিনিস্সিতেসু গন্ধব্বেসু চ মনুস্সলোকে চ. চারুপুব্বঙ্গীতি চারুনা পুব্বঙ্গেন ঊরুলক্খণেন সমন্নাগতে. নামঞ্চ বন্ধৰেতি অত্তনো নামগোত্তঞ্চ বন্ধৰে চ ময্হং অক্খাহীতি ৰদতি.

ততো দেৰধীতা অট্ঠ গাথা অভাসি –

১১.

‘‘যং ত্ৰং পতি নিসিন্নোসি, রম্মং ব্রাহ্মণ কোসিকিং;

সাহং ভুসালযাৰুত্থা, ৰরৰারিৰহোঘসা.

১২.

‘‘নানাদুমগণাকিণ্ণা, বহুকা গিরিকন্দরা;

মমেৰ পমুখা হোন্তি, অভিসন্দন্তি পাৰুসে.

১৩.

‘‘অথো বহূ ৰনতোদা, নীলৰারিৰহিন্ধরা;

বহুকা নাগৰিত্তোদা, অভিসন্দন্তি ৰারিনা.

১৪.

‘‘তা অম্বজম্বুলবুজা, নীপা তালা চুদুম্বরা;

বহূনি ফলজাতানি, আৰহন্তি অভিণ্হসো.

১৫.

‘‘যং কিঞ্চি উভতো তীরে, ফলং পততি অম্বুনি;

অসংসযং তং সোতস্স, ফলং হোতি ৰসানুগং.

১৬.

‘‘এতদঞ্ঞায মেধাৰি, পুথুপঞ্ঞ সুণোহি মে;

মা রোচয মভিসঙ্গং, পটিসেধ জনাধিপ.

১৭.

‘‘ন ৰাহং ৰড্ঢৰং মঞ্ঞে, যং ত্ৰং রট্ঠাভিৰড্ঢন;

আচেয্যমানো রাজিসি, মরণং অভিকঙ্খসি.

১৮.

‘‘তস্স জানন্তি পিতরো, গন্ধব্বা চ সদেৰকা;

যে চাপি ইসযো লোকে, সঞ্ঞতত্তা তপস্সিনো;

অসংসযং তেপি জানন্তি, পট্ঠভূতা যসস্সিনো’’তি.

তত্থ কোসিকিন্তি যং ত্ৰং, ব্রাহ্মণ, রম্মং কোসিকিং গঙ্গং পতি নিসিন্নো. ভুসালযাৰুত্থাতি ভুসে চণ্ডসোতে আলযো যস্স ৰিমানস্স, তস্মিং অধিৰত্থা, গঙ্গট্ঠকৰিমানৰাসিনীতি অত্থো. ৰরৰারিৰহোঘসাতি ৰরৰারিৰহেন ওঘেন সমন্নাগতা. পমুখাতি তা ৰুত্তপ্পকারা গিরিকন্দরা মং পমুখং করোন্তি, অহং তাসং পামোক্খা হোমীতি দস্সেতি. অভিসন্দন্তীতি সন্দন্তি পৰত্তন্তি, ততো ততো আগন্ত্ৰা মং কোসিকিগঙ্গং পৰিসন্তীতি অত্থো. ৰনতোদাতি ন কেৰলং কন্দরাৰ, অথ খো বহূ ৰনতোদা তম্হা তম্হা ৰনম্হা উদকানিপি মং বহূনি পৰিসন্তি. নীলৰারিৰহিন্ধরাতি মণিৰণ্ণেন নীলৰারিনা যুত্তে উদকক্খন্ধসঙ্খাতে ৰহে ধারযন্তিযো. নাগৰিত্তোদাতি নাগানং ৰিত্তিকারেন ধনসঙ্খাতেন ৰা উদকেন সমন্নাগতা. ৰারিনাতি এৰরূপা হি বহূ নদিযো মং ৰারিনাৰ অভিসন্দন্তি পূরেন্তীতি দস্সেতি.

তাতি তা নদিযো. আৰহন্তীতি এতানি অম্বাদীনি আকড্ঢন্তি. সব্বানি হি এতানি উপযোগত্থে পচ্চত্তৰচনানি. অথ ৰা তাতি উপযোগবহুৰচনং. আৰহন্তীতি ইমানি অম্বাদীনি তা নদিযো আগচ্ছন্তি, উপগচ্ছন্তীতি অত্থো, এৰং উপগতানি পন মম সোতং পৰিসন্তীতি অধিপ্পাযো. সোতস্সাতি যং উভতো তীরে জাতরুক্খেহি ফলং মম অম্বুনি পততি, সব্বং তং মম সোতস্সেৰ ৰসানুগং হোতি. নত্থেত্থ সংসযোতি এৰং অম্বপক্কস্স নদীসোতেন আগমনকারণং কথেসি.

মেধাৰি পুথুপঞ্ঞাতি উভযং আলপনমেৰ. মা রোচযাতি এৰং তণ্হাভিসঙ্গং মা রোচয. পটিসেধাতি পটিসেধেহি নন্তি রাজানং ওৰদতি. ৰড্ঢৰন্তি পঞ্ঞাৰড্ঢভাৰং পণ্ডিতভাৰং. রট্ঠাভিৰড্ঢনাতি রট্ঠস্স অভিৰড্ঢন. আচেয্যমানোতি মংসলোহিতেহি আচিযন্তো ৰড্ঢন্তো, তরুণোৰ হুত্ৰাতি অত্থো. রাজিসীতি তং আলপতি. ইদং ৰুত্তং হোতি – যং ত্ৰং নিরাহারতায সুস্সমানো তরুণোৰ সমানো অম্বলোভেন মরণং অভিকঙ্খসি, ন ৰে অহং তৰ ইমং পণ্ডিতভাৰং মঞ্ঞামীতি.

তস্সাতি যো পুগ্গলো তণ্হাৰসিকো হোতি, তস্স তণ্হাৰসিকভাৰং ‘‘পিতরো’’তি সঙ্খং গতা ব্রহ্মানো চ সদ্ধিং কামাৰচরদেৰেহি গন্ধব্বা চ ৰুত্তপ্পকারা দিব্বচক্খুকা ইসযো চ অসংসযং জানন্তি. অনচ্ছরিযঞ্চেতং, যং তে ইদ্ধিমন্তো জানেয্যুং, ‘‘অসুকো হি নাম তণ্হাৰসিকো হোতী’’তি. পুন তেসং ভাসমানানং ৰচনং সুত্ৰা যেপি তেসং পট্ঠভূতা যসস্সিনো পরিচারকা, তেপি জানন্তি. পাপকম্মং করোন্তস্স হি রহো নাম নত্থীতি তাপসস্স সংৰেগং উপ্পাদেন্তী এৰমাহ.

ততো তাপসো চতস্সো গাথা অভাসি –

১৯.

‘‘এৰং ৰিদিত্ৰা ৰিদূ সব্বধম্মং, ৰিদ্ধংসনং চৰনং জীৰিতস্স;

ন চীযতী তস্স নরস্স পাপং, সচে ন চেতেতি ৰধায তস্স.

২০.

‘‘ইসিপূগসমঞ্ঞাতে, এৰং লোক্যা ৰিদিতা সতি;

অনরিযপরিসম্ভাসে, পাপকম্মং জিগীসসি.

২১.

‘‘সচে অহং মরিস্সামি, তীরে তে পুথুসুস্সোণি;

অসংসযং তং অসিলোকো, মযি পেতে আগমিস্সতি.

২২.

‘‘তস্মা হি পাপকং কম্মং, রক্খস্সেৰ সুমজ্ঝিমে;

মা তং সব্বো জনো পচ্ছা, পকুট্ঠাযি মযি মতে’’তি.

তত্থ এৰং ৰিদিত্ৰাতি যথা অহং সীলঞ্চ অনিচ্চতঞ্চ জানামি, এৰং জানিত্ৰা ঠিতস্স. ৰিদূতি ৰিদুনো. সব্বধম্মন্তি সব্বং সুচরিতধম্মং. তিৰিধঞ্হি সুচরিতং ইধ সব্বধম্মোতি অধিপ্পেতং. ৰিদ্ধংসনন্তি ভঙ্গং. চৰনন্তি চুতিং. জীৰিতস্সাতি আযুনো. ইদং ৰুত্তং হোতি – এৰং ৰিদিত্ৰা ঠিতস্স পণ্ডিতস্স সব্বং সুচরিতধম্মং জীৰিতস্স চ অনিচ্চতং জানন্তস্স এৰরূপস্স নরস্স পাপং ন চীযতি ন ৰড্ঢতি. সচে ন চেতেতি ৰধায তস্সাতি তস্স সঙ্খং গতস্স পরপুগ্গলস্স ৰধায ন চেতেতি ন পকপ্পেতি, নেৰ পরপুগ্গলং ৰধায চেতেতি, নাপি পরসন্তকং ৰিনাসেতি, অহঞ্চ কস্সচি ৰধায অচেতেত্ৰা কেৰলং অম্বপক্কে আসঙ্গং কত্ৰা গঙ্গং ওলোকেন্তো নিসিন্নো, ত্ৰং ময্হং কিং নাম অকুসলং পস্সসীতি.

ইসিপূগসমঞ্ঞাতেতি ইসিগণেন সুট্ঠু অঞ্ঞাতে ইসীনং সম্মতে. এৰং লোক্যাতি ত্ৰং নাম পাপপৰাহনেন লোকস্স হিতাতি এৰং ৰিদিতা. সতীতি সতি সোভনে উত্তমেতি আলপনমেতং. অনরিযপরিসম্ভাসেতি ‘‘তস্স জানন্তি পিতরো’’তিআদিকায অসুন্দরায পরিভাসায সমন্নাগতে. জিগীসসীতি মযি পাপে অসংৰিজ্জন্তেপি মং এৰং পরিভাসন্তী চ পরমরণং অজ্ঝুপেক্খন্তী চ অত্তনো পাপকম্মং গৰেসসি উপ্পাদেসি. তীরে তেতি তৰ গঙ্গাতীরে. পুথুসুস্সোণীতি পুথুলায সুন্দরায সোণিযা সমন্নাগতে. পেতেতি অম্বপক্কং অলভিত্ৰা পরলোকং গতে, মতেতি অত্থো. পকুট্ঠাযীতি অক্কোসি গরহি নিন্দি. ‘‘পক্ৰত্থাসী’’তিপি পাঠো.

তং সুত্ৰা দেৰধীতা পঞ্চ গাথা অভাসি –

২৩.

‘‘অঞ্ঞাতমেতং অৰিসয্হসাহি, অত্তানমম্বঞ্চ দদামি তে তং;

যো দুব্বজে কামগুণে পহায, সন্তিঞ্চ ধম্মঞ্চ অধিট্ঠিতোসি.

২৪.

‘‘যো হিত্ৰা পুব্বসঞ্ঞোগং, পচ্ছাসংযোজনে ঠিতো;

অধম্মঞ্চেৰ চরতি, পাপঞ্চস্স পৰড্ঢতি.

২৫.

‘‘এহি তং পাপযিস্সামি, কামং অপ্পোস্সুকো ভৰ;

উপনযামি সীতস্মিং, ৰিহরাহি অনুস্সুকো.

২৬.

‘‘তং পুপ্ফরসমত্তেভি, ৰক্কঙ্গেহি অরিন্দম;

কোঞ্চা মযূরা দিৰিযা, কোলট্ঠিমধুসাল়িকা;

কূজিতা হংসপূগেহি, কোকিলেত্থ পবোধরে.

২৭.

‘‘অম্বেত্থ ৰিপ্পসাখগ্গা, পলালখলসন্নিভা;

কোসম্বসলল়া নীপা, পক্কতালৰিলম্বিনো’’তি.

তত্থ অঞ্ঞাতমেতন্তি ‘‘গরহা তে ভৰিস্সতীতি ৰদন্তো অম্বপক্কত্থায ৰদসী’’তি এতং কারণং মযা অঞ্ঞাতং. অৰিসয্হসাহীতি রাজানো নাম দুস্সহং সহন্তি, তেন নং আলপন্তী এৰমাহ. অত্তানন্তি তং আলিঙ্গিত্ৰা অম্বৰনং নযন্তী অত্তানঞ্চ তে দদামি তঞ্চ অম্বং. কামগুণেতি কঞ্চনমালাসেতচ্ছত্তপটিমণ্ডিতে ৰত্থুকামে. সন্তিঞ্চ ধম্মঞ্চাতি দুস্সীল্যৰূপসমেন সন্তিসঙ্খাতং সীলঞ্চেৰ সুচরিতধম্মঞ্চ. অধিট্ঠিতোসীতি যো ত্ৰং ইমে গুণে উপগতো, এতেসু ৰা পতিট্ঠিতোতি অত্থো.

পুব্বসঞ্ঞোগন্তি পুরিমবন্ধনং. পচ্ছাসংযোজনেতি পচ্ছিমবন্ধনে. ইদং ৰুত্তং হোতি – অম্ভো তাপস যো মহন্তং রজ্জসিরিৰিভৰং পহায অম্বপক্কমত্তে রসতণ্হায বজ্ঝিত্ৰা ৰাতাতপং অগণেত্ৰা নদীতীরে সুস্সমানো নিসীদতি, সো মহাসমুদ্দং তরিত্ৰা ৰেলন্তে সংসীদনপুগ্গলসদিসো. যো পুগ্গলো রসতণ্হাৰসিকো অধম্মঞ্চেৰ চরতি, রসতণ্হাৰসেন করিযমানং পাপঞ্চস্স পৰড্ঢতীতি. ইতি সা তাপসং গরহন্তী এৰমাহ.

কামং অপ্পোস্সুকো ভৰাতি একংসেনেৰ অম্বপক্কে নিরালযো হোহি. সীতস্মিন্তি সীতলে অম্বৰনে. তন্তি এৰং ৰদমানাৰ দেৰতা তাপসং আলিঙ্গিত্ৰা উরে নিপজ্জাপেত্ৰা আকাসে পক্খন্তা তিযোজনিকং দিব্বঅম্বৰনং দিস্ৰা সকুণসদ্দঞ্চ সুত্ৰা তাপসস্স আচিক্খন্তী ‘‘ত’’ন্তি এৰমাহ. পুপ্ফরসমত্তেভীতি পুপ্ফরসেন মত্তেহি. ৰক্কঙ্গেহীতি ৰঙ্কগীৰেহি সকুণেহি অভিনাদিতন্তি অত্থো. ইদানি তে সকুণে আচিক্খন্তী ‘‘কোঞ্চা’’তিআদিমাহ. তত্থ দিৰিযাতি দিব্যা. কোলট্ঠিমধুসাল়িকাতি কোলট্ঠিসকুণা চ নাম সুৰণ্ণসাল়িকা সকুণা চ. এতে দিব্বসকুণা এত্থ ৰসন্তীতি দস্সেতি. কূজিতা হংসপূগেহীতি হংসগণেহি উপকূজিতা ৰিরৰসঙ্ঘট্টিতা. কোকিলেত্থ পবোধরেতি এত্থ অম্বৰনে কোকিলা ৰস্সন্তিযো অত্তানং পবোধেন্তি ঞাপেন্তি. অম্বেত্থাতি অম্বা এত্থ. ৰিপ্পসাখগ্গাতি ফলভারেন ওনমিতসাখগ্গা. পলালখলসন্নিভাতি পুপ্ফসন্নিচযেন সালিপলালখলসদিসা. পক্কতালৰিলম্বিনোতি পক্কতালফলৰিলম্বিনো. এৰরূপা রুক্খা চ এত্থ অত্থীতি অম্বৰনং ৰণ্ণেতি.

ৰণ্ণযিত্ৰা চ পন তাপসং তত্থ ওতারেত্ৰা ‘‘ইমস্মিং অম্বৰনে অম্বানি খাদন্তো অত্তনো তণ্হং পূরেহী’’তি ৰত্ৰা পক্কামি. তাপসো অম্বানি খাদিত্ৰা তণ্হং পূরেত্ৰা ৰিস্সমিত্ৰা অম্বৰনে ৰিচরন্তো তং পেতং দুক্খং অনুভৰন্তং দিস্ৰা কিঞ্চি ৰত্তুং নাসক্খি. সূরিযে পন অত্থঙ্গতে তং নাটকিত্থিপরিৰারিতং দিব্বসম্পত্তিং অনুভৰমানং দিস্ৰা তিস্সো গাথা অভাসি –

২৮.

‘‘মালী কিরিটী কাযূরী, অঙ্গদী চন্দনুস্সদো;

রত্তিং ত্ৰং পরিচারেসি, দিৰা ৰেদেসি ৰেদনং.

২৯.

‘‘সোল়সিত্থিসহস্সানি, যা তেমা পরিচারিকা;

এৰং মহানুভাৰোসি, অব্ভুতো লোমহংসনো.

৩০.

‘‘কিং কম্মমকরী পুব্বে, পাপং অত্তদুখাৰহং;

যং করিত্ৰা মনুস্সেসু, পিট্ঠিমংসানি খাদসী’’তি.

তত্থ মালীতি দিব্বমালাধরো. কিরিটীতি দিব্বৰেঠনধরো. কাযূরীতি দিব্বাভরণপটিমণ্ডিতো. অঙ্গদীতি দিব্বঙ্গদসমন্নাগতো. চন্দনুস্সদোতি দিব্বচন্দনৰিলিত্তো. পরিচারেসীতি ইন্দ্রিযানি দিব্বৰিসযেসু চারেসি. দিৰাতি দিৰা পন মহাদুক্খং অনুভোসি. যা তেমাতি যা তে ইমা. অব্ভুতোতি মনুস্সলোকে অভূতপুব্বো. লোমহংসনোতি যে তং পস্সন্তি, তেসং লোমানি হংসন্তি. পুব্বেতি পুরিমভৰে. অত্তদুখাৰহন্তি অত্তনো দুক্খাৰহং. মনুস্সেসূতি যং মনুস্সলোকে কত্ৰা ইদানি অত্তনো পিট্ঠিমংসানি খাদসীতি পুচ্ছতি.

পেতো তং সঞ্জানিত্ৰা ‘‘তুম্হে মং ন সঞ্জানাথ, অহং তুম্হাকং পুরোহিতো অহোসিং, ইদং মে রত্তিং সুখানুভৰনং তুম্হে নিস্সায কতস্স উপড্ঢূপোসথস্স নিস্সন্দেন লদ্ধং, দিৰা দুক্খানুভৰনং পন মযা পকতস্স পাপস্সেৰ নিস্সন্দেন. অহঞ্হি তুম্হেহি ৰিনিচ্ছযে ঠপিতো কূটড্ডং করিত্ৰা লঞ্জং গহেত্ৰা পরপিট্ঠিমংসিকো হুত্ৰা তস্স দিৰা কতস্স কম্মস্স নিস্সন্দেন ইদং দুক্খং অনুভৰামী’’তি ৰত্ৰা গাথাদ্ৰযমাহ –

৩১.

‘‘অজ্ঝেনানি পটিগ্গয্হ, কামেসু গধিতো অহং;

অচরিং দীঘমদ্ধানং, পরেসং অহিতাযহং.

৩২.

‘‘যো পিট্ঠিমংসিকো হোতি, এৰং উক্কচ্চ খাদতি;

যথাহং অজ্জ খাদামি, পিট্ঠিমংসানি অত্তনো’’তি.

তত্থ অজ্ঝেনানীতি ৰেদে. পটিগ্গয্হাতি পটিগ্গহেত্ৰা অধীযিত্ৰা. অচরিন্তি পটিপজ্জিং. অহিতাযহন্তি অহিতায অত্থনাসনায অহং. যো পিট্ঠিমংসিকোতি যো পুগ্গলো পরেসং পিট্ঠিমংসখাদকো পিসুণো হোতি. উক্কচ্চাতি উক্কন্তিত্ৰা.

ইদঞ্চ পন ৰত্ৰা তাপসং পুচ্ছি – ‘‘তুম্হে কথং ইধাগতা’’তি. তাপসো সব্বং ৰিত্থারেন কথেসি. ‘‘ইদানি পন, ভন্তে, ইধেৰ ৰসিস্সথ, গমিস্সথা’’তি. ‘‘ন ৰসিস্সামি, অস্সমপদংযেৰ গমিস্সামী’’তি. পেতো ‘‘সাধু, ভন্তে, অহং ৰো নিবদ্ধং অম্বপক্কেন উপট্ঠহিস্সামী’’তি ৰত্ৰা অত্তনো আনুভাৰেন অস্সমপদেযেৰ ওতারেত্ৰা ‘‘অনুক্কণ্ঠা ইধেৰ ৰসথা’’তি পটিঞ্ঞং গহেত্ৰা গতো. ততো পট্ঠায নিবদ্ধং অম্বপক্কেন উপট্ঠহি. তাপসো তং পরিভুঞ্জন্তো কসিণপরিকম্মং কত্ৰা ঝানাভিঞ্ঞা নিব্বত্তেত্ৰা ব্রহ্মলোকপরাযণো অহোসি.

সত্থা উপাসকানং ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে কেচি সোতাপন্না অহেসুং, কেচি সকদাগামিনো, কেচি অনাগামিনো. তদা দেৰধীতা উপ্পলৰণ্ণা অহোসি, তাপসো পন অহমেৰ অহোসিন্তি.

কিংছন্দজাতকৰণ্ণনা পঠমা.

[৫১২] ২. কুম্ভজাতকৰণ্ণনা

কো পাতুরাসীতি ইদং সত্থা জেতৰনে ৰিহরন্তো ৰিসাখায সহাযিকা সুরাপীতা পঞ্চসতা ইত্থিযো আরব্ভ কথেসি. সাৰত্থিযং কির সুরাছণে সঙ্ঘুট্ঠে তা পঞ্চসতা ইত্থিযো সামিকানং ছণে কীল়মানানং তিক্খসুরং পটিযাদেত্ৰা ‘‘ছণং কীল়িস্সামা’’তি সব্বাপি ৰিসাখায সন্তিকং গন্ত্ৰা ‘‘সহাযিকে ছণং কীল়িস্সামা’’তি ৰত্ৰা ‘‘অযং সুরাছণো, ন অহং সুরং পিৰিস্সামী’’তি ৰুত্তে – ‘‘তুম্হে সম্মাসম্বুদ্ধস্স দানং দেথ, মযং ছণং করিস্সামা’’তি আহংসু. সা ‘‘সাধূ’’তি সম্পটিচ্ছিত্ৰা তা উয্যোজেত্ৰা সত্থারং নিমন্তাপেত্ৰা মহাদানং পৰত্তেত্ৰা বহুং গন্ধমালং আদায সাযন্হসমযে ধম্মকথং সোতুং তাহি পরিৰুতা জেতৰনং অগমাসি. তা পনিত্থিযো সুরং পিৰমানাৰ তায সদ্ধিং গন্ত্ৰা দ্ৰারকোট্ঠকে ঠত্ৰা সুরং পিৰিত্ৰাৰ তায সদ্ধিং সত্থু সন্তিকং অগমংসু. ৰিসাখা সত্থারং ৰন্দিত্ৰা একমন্তং নিসীদি, ইতরাসু একচ্চা সত্থু সন্তিকেযেৰ নচ্চিংসু, একচ্চা গাযিংসু, একচ্চা হত্থকুক্কুচ্চপাদকুক্কুচ্চানি, একচ্চা কলহং অকংসু.

সত্থা তাসং সংৰেগজননত্থায ভমুকলোমতো রংসী ৰিস্সজ্জেসি, অন্ধকারতিমিসা অহোসি. তা ভীতা অহেসুং মরণভযতজ্জিতা, তেন তাসং সুরা জীরি. সত্থা নিসিন্নপল্লঙ্কে অন্তরহিতো সিনেরুমুদ্ধনি ঠত্ৰা উণ্ণলোমতো রংসী ৰিস্সজ্জেসি, চন্দসূরিযসহস্সুগ্গমনং ৰিয অহোসি. সত্থা তত্থ ঠিতোৰ তাসং সংৰেগজননত্থায –

‘‘কো নু হাসো কিমানন্দো, নিচ্চং পজ্জলিতে সতি;

অন্ধকারেন ওনদ্ধা, পদীপং ন গৰেসথা’’তি. (ধ. প. ১৪৬) –

ইমং গাথমাহ. গাথাপরিযোসানে তা পঞ্চসতাপি সোতাপত্তিফলে পতিট্ঠহিংসু. সত্থা আগন্ত্ৰা গন্ধকুটিছাযায বুদ্ধাসনে নিসীদি. অথ নং ৰিসাখা ৰন্দিত্ৰা, ‘‘ভন্তে, ইদং হিরোত্তপ্পভেদকং সুরাপানং নাম কদা উপ্পন্ন’’ন্তি পুচ্ছি. সো তস্সা আচিক্খন্তো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে একো কাসিরট্ঠৰাসী সুরো নাম ৰনচরকো ভণ্ডপরিযেসনত্থায হিমৰন্তং অগমাসি. তত্থেকো রুক্খো উগ্গন্ত্ৰা পোরিসমত্তে ঠানে তিধাকপ্পো অহোসি. তস্স তিণ্ণং কপ্পানং অন্তরে চাটিপ্পমাণো আৰাটো অহোসি. সো দেৰে ৰস্সন্তে উদকেন পূরিতো, তং পরিৰারেত্ৰা হরীতকী আমলকী মরিচগচ্ছো চ অহোসি, তেসং পক্কানি ফলানি ছিজ্জিত্ৰা তত্থ পতন্তি. তস্সাৰিদূরে সযংজাতসালি জাতো, ততো সুৰকা সালিসীসানি আহরিত্ৰা তস্মিং রুক্খে নিসীদিত্ৰা খাদন্তি. তেসং খাদমানানং সালীপি তণ্ডুলাপি তত্থ পতন্তি. ইতি তং উদকং সূরিযসন্তাপেন পচ্চমানং রসং লোহিতৰণ্ণং অহোসি. নিদাঘসমযে পিপাসিতা সকুণগণা আগন্ত্ৰা তং পিৰিত্ৰা মত্তা পরিৰত্তিত্ৰা রুক্খমূলে পতিংসু, তস্মিং থোকং নিদ্দাযিত্ৰা ৰিকূজমানা পক্কমন্তি. রুক্খসুনখমক্কটাদীসুপি এসেৰ নযো. ৰনচরকো তং দিস্ৰা ‘‘সচে ইদং ৰিসং ভৰেয্য, ইমে মরেয্যুং, ইমে পন থোকং নিদ্দাযিত্ৰা যথাসুখং গচ্ছন্তি, নযিদং ৰিস’’ন্তি সযং পিৰিত্ৰা মত্তো হুত্ৰা মংসং খাদিতুকামো অহোসি. ততো অগ্গিং কত্ৰা রুক্খমূলে পতিতে তিত্তিরকুক্কুটাদযো মারেত্ৰা মংসং অঙ্গারে পচিত্ৰা একেন হত্থেন নচ্চন্তো একেন মংসং খাদন্তো একাহদ্ৰীহং তত্থেৰ অহোসি.

ততো পন অৰিদূরে একো ৰরুণো নাম তাপসো ৰসতি. ৰনচরকো অঞ্ঞদাপি তস্স সন্তিকং গচ্ছতি. অথস্স এতদহোসি – ‘‘ইদং পানং তাপসেন সদ্ধিং পিৰিস্সামী’’তি. সো একং ৰেল়ুনাল়িকং পূরেত্ৰা পক্কমংসেন সদ্ধিং আহরিত্ৰা পণ্ণসালং গন্ত্ৰা, ‘‘ভন্তে, ইমং পিৰথা’’তি ৰত্ৰা উভোপি মংসং খাদন্তা পিৰিংসু. ইতি সুরেন চ ৰরুণেন চ দিট্ঠত্তা তস্স পানস্স ‘‘সুরা’’তি চ ‘‘ৰরুণা’’তি চ নামং জাতং. তে উভোপি ‘‘অত্থেসো উপাযো’’তি ৰেল়ুনাল়িযো পূরেত্ৰা কাজেনাদায পচ্চন্তনগরং গন্ত্ৰা ‘‘পানকারকা নাম আগতা’’তি রঞ্ঞো আরোচাপেসুং. রাজা নে পক্কোসাপেসি, তে তস্স পানং উপনেসুং. রাজা দ্ৰে তযো ৰারে পিৰিত্ৰা মজ্জি, তস্স তং একাহদ্ৰীহমত্তমেৰ অহোসি. অথ নে ‘‘অঞ্ঞম্পি অত্থী’’তি পুচ্ছি. ‘‘অত্থি, দেৰা’’তি. ‘‘কুহি’’ন্তি? ‘‘হিমৰন্তে দেৰা’’তি. ‘‘তেন হি আনেথা’’তি. তে গন্ত্ৰা একদ্ৰে ৰারে আনেত্ৰা ‘‘নিবদ্ধং গন্তুং ন সক্খিস্সামা’’তি সম্ভারে সল্লক্খেত্ৰা তস্স রুক্খস্স তচং আদিং কত্ৰা সব্বসম্ভারে পক্খিপিত্ৰা নগরে সুরং করিংসু. নাগরা সুরং পিৰিত্ৰা পমাদং আপন্না দুগ্গতা অহেসুং, নগরং সুঞ্ঞং ৰিয অহোসি, তেন পানকারকা ততো পলাযিত্ৰা বারাণসিং গন্ত্ৰা ‘‘পানকারকা আগতা’’তি রঞ্ঞো আরোচাপেসুং. রাজা নে পক্কোসাপেত্ৰা পরিব্বযং অদাসি. তে তত্থাপি সুরং অকংসু, তম্পি নগরং তথেৰ ৰিনস্সি, ততো পলাযিত্ৰা সাকেতং, সাকেততো সাৰত্থিং অগমংসু.

তদা সাৰত্থিযং সব্বমিত্তো নাম রাজা অহোসি. সো তেসং সঙ্গহং কত্ৰা ‘‘কেন ৰো অত্থো’’তি পুচ্ছিত্ৰা ‘‘সম্ভারমূলেন চেৰ সালিপিট্ঠেন চ পঞ্চহি চাটিসতেহি চা’’তি ৰুত্তে সব্বং দাপেসি. তে পঞ্চসু চাটিসতেসু সুরং সণ্ঠাপেত্ৰা মূসিকভযেন চাটিরক্খণত্থায একেকায চাটিযা সন্তিকে একেকং বিল়ারং বন্ধিংসু. তে পচ্চিত্ৰা উত্তরণকালে চাটিকুচ্ছীসু পগ্ঘরন্তং সুরং পিৰিত্ৰা মত্তা নিদ্দাযিংসু. মূসিকা আগন্ত্ৰা তেসং কণ্ণনাসিকদাঠিকনঙ্গুট্ঠে খাদিত্ৰা অগমংসু. ‘‘বিল়ারা সুরং পিৰিত্ৰা মতা’’তি আযুত্তকপুরিসা রঞ্ঞো আরোচেসুং. রাজা ‘‘ৰিসকারকা এতে ভৰিস্সন্তী’’তি তেসং দ্ৰিন্নম্পি জনানং সীসানি ছিন্দাপেসি. তে ‘‘সুরং দেৰ, মধুরং দেৰা’’তি ৰিরৰন্তাৰ মরিংসু. রাজা তে মারাপেত্ৰা ‘‘চাটিযো ভিন্দথা’’তি আণাপেসি. বিল়ারাপি সুরায জিণ্ণায উট্ঠহিত্ৰা কীল়ন্তা ৰিচরিংসু, তে দিস্ৰা রঞ্ঞো আরোচেসুং. রাজা ‘‘সচে ৰিসং অস্স, এতে মরেয্যুং, মধুরেনেৰ ভৰিতব্বং, পিৰিস্সামি ন’’ন্তি নগরং অলঙ্কারাপেত্ৰা রাজঙ্গণে মণ্ডপং কারাপেত্ৰা অলঙ্কতমণ্ডপে সমুস্সিতসেতচ্ছত্তে রাজপল্লঙ্কে নিসীদিত্ৰা অমচ্চগণপরিৰুতো সুরং পাতুং আরভি.

তদা সক্কো দেৰরাজা ‘‘কে নু খো মাতুপট্ঠানাদীসু অপ্পমত্তা তীণি সুচরিতানি পূরেন্তী’’তি লোকং ৰোলোকেন্তো তং রাজানং সুরং পাতুং নিসিন্নং দিস্ৰা ‘‘সচাযং সুরং পিৰিস্সতি, সকলজম্বুদীপো নস্সিস্সতি. যথা ন পিৰিস্সতি, তথা নং করিস্সামী’’তি একং সুরাপুণ্ণং কুম্ভং হত্থতলে ঠপেত্ৰা ব্রাহ্মণৰেসেনাগন্ত্ৰা রঞ্ঞো সম্মুখট্ঠানে আকাসে ঠত্ৰা ‘‘ইমং কুম্ভং কিণাথ, ইমং কুম্ভং কিণাথা’’তি আহ. সব্বমিত্তরাজা তং তথা ৰদন্তং আকাসে ঠিতং দিস্ৰা ‘‘কুতো নু খো ব্রাহ্মণো আগচ্ছতী’’তি তেন সদ্ধিং সল্লপন্তো তিস্সো গাথা অভাসি –

৩৩.

‘‘কো পাতুরাসী তিদিৰা নভম্হি, ওভাসযং সংৰরিং চন্দিমাৰ;

গত্তেহি তে রস্মিযো নিচ্ছরন্তি, সতেরতা ৰিজ্জুরিৰন্তলিক্খে.

৩৪.

‘‘সো ছিন্নৰাতং কমসী অঘম্হি, ৰেহাযসং গচ্ছসি তিট্ঠসী চ;

ইদ্ধী নু তে ৰত্থুকতা সুভাৰিতা, অনদ্ধগূনং অপি দেৰতানং.

৩৫.

‘‘ৰেহাযসং গম্মমাগম্ম তিট্ঠসি, কুম্ভং কিণাথাতি যমেতমত্থং;

কো ৰা তুৰং কিস্স ৰা তায কুম্ভো, অক্খাহি মে ব্রাহ্মণ এতমত্থ’’ন্তি.

তত্থ কো পাতুরাসীতি কুতো পাতুভূতোসি, কুতো আগতোসীতি অত্থো. তিদিৰা নভম্হীতি কিং তাৰতিংসভৰনা আগন্ত্ৰা ইধ নভম্হি আকাসে পাকটো জাতোসীতি পুচ্ছতি. সংৰরিন্তি রত্তিং. সতেরতাতি এৰংনামিকা. সোতি সো ত্ৰং. ছিন্নৰাতন্তি ৰলাহকোপি তাৰ ৰাতেন কমতি, তস্স পন সোপি ৰাতো নত্থি, তেনেৰমাহ. কমসীতি পৰত্তেসি. অঘম্হীতি অপ্পটিঘে আকাসে. ৰত্থুকতাতি ৰত্থু ৰিয পতিট্ঠা ৰিয কতা. অনদ্ধগূনং অপি দেৰতানন্তি যা পদসা অদ্ধানং অগমনেন অনদ্ধগূনং দেৰতানং ইদ্ধি, সা অপি তৰ সুভাৰিতাতি পুচ্ছতি. ৰেহাযসং গম্মমাগম্মাতি আকাসে পৰত্তং পদৰীতিহারং পটিচ্চ নিস্সায. ‘‘তিট্ঠসী’’তি ইমস্স ‘‘কো ৰা তুৰ’’ন্তি ইমিনা সম্বন্ধো, এৰং তিট্ঠমানো কো ৰা ত্ৰন্তি অত্থো. যমেতমত্থন্তি যং এতং ৰদসি. ইমস্স ‘‘কিস্স ৰা তায’’ন্তি ইমিনা সম্বন্ধো, যং এতং কুম্ভং কিণাথাতি ৰদসি, কিস্স ৰা তে অযং কুম্ভোতি অত্থো.

ততো সক্কো ‘‘তেন হি সুণাহী’’তি ৰত্ৰা সুরায দোসে দস্সেন্তো আহ –

৩৬.

‘‘ন সপ্পিকুম্ভো নপি তেলকুম্ভো, ন ফাণিতস্স ন মধুস্স কুম্ভো;

কুম্ভস্স ৰজ্জানি অনপ্পকানি, দোসে বহূ কুম্ভগতে সুণাথ.

৩৭.

‘‘গল়েয্য যং পিত্ৰা পতে পপাতং, সোব্ভং গুহং চন্দনিযোল়িগল্লং;

বহুম্পি ভুঞ্জেয্য অভোজনেয্যং, তস্সা পুণ্ণং কুম্ভমিমং কিণাথ.

৩৮.

‘‘যং পিত্ৰা চিত্তস্মিং অনেসমানো, আহিণ্ডতী গোরিৰ ভক্খসাদী;

অনাথমানো উপগাযতি নচ্চতি চ, তস্সা পুণ্ণং কুম্ভমিমং কিণাথ.

৩৯.

‘‘যং ৰে পিৰিত্ৰা অচেলোৰ নগ্গো, চরেয্য গামে ৰিসিখন্তরানি;

সম্মূল়্হচিত্তো অতিৰেলসাযী, তস্সা পুণ্ণং কুম্ভমিমং কিণাথ.

৪০.

‘‘যং পিত্ৰা উট্ঠায পৰেধমানো, সীসঞ্চ বাহুঞ্চ পচালযন্তো;

সো নচ্চতী দারুকটল্লকোৰ, তস্সা পুণ্ণং কুম্ভমিমং কিণাথ.

৪১.

‘‘যং ৰে পিৰিত্ৰা অগ্গিদড্ঢা সযন্তি, অথো সিগালেহিপি খাদিতাসে;

বন্ধং ৰধং ভোগজানিঞ্চুপেন্তি, তস্সা পুণ্ণং কুম্ভমিমং কিণাথ.

৪২.

‘‘যং পিত্ৰা ভাসেয্য অভাসনেয্যং, সভাযমাসীনো অপেতৰত্থো;

সম্মক্খিতো ৰন্তগতো ব্যসন্নো, তস্সা পুণ্ণং কুম্ভমিমং কিণাথ.

৪৩.

‘‘যং ৰে পিৰিত্ৰা উক্কট্ঠো আৰিলক্খো, মমেৰ সব্বপথৰীতি মঞ্ঞে;

ন মে সমো চাতুরন্তোপি রাজা, তস্সা পুণ্ণং কুম্ভমিমং কিণাথ.

৪৪.

‘‘মানাতিমানা কলহানি পেসুণী, দুব্বণ্ণিনী নগ্গযিনী পলাযিনী;

চোরান ধুত্তান গতী নিকেতো, তস্সা পুণ্ণং কুম্ভমিমং কিণাথ.

৪৫.

‘‘ইদ্ধানি ফীতানি কুলানি অস্সু, অনেকসাহস্সধনানি লোকে;

উচ্ছিন্নদাযজ্জকতানিমায, তস্সা পুণ্ণং কুম্ভমিমং কিণাথ.

৪৬.

‘‘ধঞ্ঞং ধনং রজতং জাতরূপং, খেত্তং গৰং যত্থ ৰিনাসযন্তি;

উচ্ছেদনী ৰিত্তগতং কুলানং, তস্সা পুণ্ণং কুম্ভমিমং কিণাথ.

৪৭.

‘‘যং ৰে পিত্ৰা দিত্তরূপোৰ পোসো, অক্কোসতি মাতরং পিতরঞ্চ;

সস্সুম্পি গণ্হেয্য অথোপি সুণ্হং, তস্সা পুণ্ণং কুম্ভমিমং কিণাথ.

৪৮.

‘‘যং ৰে পিত্ৰা দিত্তরূপাৰ নারী, অক্কোসতী সস্সুরং সামিকঞ্চ;

দাসম্পি গণ্হে পরিচারিকম্পি, তস্সা পুণ্ণং কুম্ভমিমং কিণাথ.

৪৯.

‘‘যং ৰে পিৰিত্ৰান হনেয্য পোসো, ধম্মে ঠিতং সমণং ব্রাহ্মণং ৰা;

গচ্ছে অপাযম্পি ততোনিদানং, তস্সা পুণ্ণং কুম্ভমিমং কিণাথ.

৫০.

‘‘যং ৰে পিৰিত্ৰা দুচ্চরিতং চরন্তি, কাযেন ৰাচায চ চেতসা চ;

নিরযং ৰজন্তি দুচ্চরিতং চরিত্ৰা, তস্সা পুণ্ণং কুম্ভমিমং কিণাথ.

৫১.

‘‘যং যাচমানা ন লভন্তি পুব্বে, বহুং হিরঞ্ঞম্পি পরিচ্চজন্তা;

সো তং পিৰিত্ৰা অলিকং ভণাতি, তস্সা পুণ্ণং কুম্ভমিমং কিণাথ.

৫২.

‘‘যং ৰে পিত্ৰা পেসনে পেসিযন্তো, অচ্চাযিকে করণীযম্হি জাতে;

অত্থম্পি সো নপ্পজানাতি ৰুত্তো, তস্সা পুণ্ণং কুম্ভমিমং কিণাথ.

৫৩.

‘‘হিরীমনাপি অহিরীকভাৰং, পাতুং করোন্তি মদনায মত্তা;

ধীরাপি সন্তা বহুকং ভণন্তি, তস্সা পুণ্ণং কুম্ভমিমং কিণাথ.

৫৪.

‘‘যং ৰে পিত্ৰা একথূপা সযন্তি, অনাসকা থণ্ডিলদুক্খসেয্যং;

দুব্বণ্ণিযং আযসক্যঞ্চুপেন্তি, তস্সা পুণ্ণং কুম্ভমিমং কিণাথ.

৫৫.

‘‘যং ৰে পিত্ৰা পত্তখন্ধা সযন্তি, গাৰো কূটহতাৰ ন হি ৰারুণিযা;

ৰেগো নরেন সুসহোরিৰ, তস্সা পুণ্ণং কুম্ভমিমং কিণাথ.

৫৬.

‘‘যং মনুস্সা ৰিৰজ্জন্তি, সপ্পং ঘোরৰিসমিৰ;

তং লোকে ৰিসসমানং, কো নরো পাতুমরহতি.

৫৭.

‘‘যং ৰে পিত্ৰা অন্ধকৰেণ্ডপুত্তা, সমুদ্দতীরে পরিচারযন্তা;

উপক্কমুং মুসলেভি অঞ্ঞমঞ্ঞং, তস্সা পুণ্ণং কুম্ভমিমং কিণাথ.

৫৮.

‘‘যং ৰে পিত্ৰা পুব্বদেৰা পমত্তা, তিদিৰা চুতা সস্সতিযা সমাযা;

তং তাদিসং মজ্জমিমং নিরত্থকং, জানং মহারাজ কথং পিৰেয্য.

৫৯.

‘‘নযিমস্মিং কুম্ভস্মিং দধি ৰা মধু ৰা, এৰং অভিঞ্ঞায কিণাহি রাজ;

এৰঞ্হিমং কুম্ভগতা মযা তে, অক্খাতরূপং তৰ সব্বমিত্তা’’তি.

তত্থ ৰজ্জানীতিআদীনৰা. গল়েয্যাতি গচ্ছন্তো পদে পদে পরিৰত্তেয্য. যং পিত্ৰা পতেতি যং পিৰিত্ৰা পতেয্য. সোব্ভন্তি আৰাটং. চন্দনিযোল়িগল্লন্তি চন্দনিকঞ্চ ওল়িগল্লঞ্চ. অভোজনেয্যন্তি ভুঞ্জিতুং অযুত্তং. অনেসমানোতি অনিস্সরো. গোরিৰাতি গোণো ৰিয. ভক্খসাদীতি পুরাণকসটখাদকো, যথা সো তত্থ তত্থ ভক্খসং পরিযেসন্তো আহিণ্ডতি, এৰং আহিণ্ডতীতি অত্থো. অনাথমানোতি নিরৰস্সযো অনাথো ৰিয. উপগাযতীতি অঞ্ঞং গাযন্তং দিস্ৰা উপগন্ত্ৰা গাযতি. অচেলোৰাতি অচেলকো ৰিয. ৰিসিখন্তরানীতি অন্তরৰীথিযো. অতিৰেলসাযীতি অতিচিরম্পি নিদ্দং ওক্কমেয্য. ‘‘অতিৰেলচারী’’তিপি পাঠো, অতিৰেলচারী হুত্ৰা চরেয্যাতি অত্থো.

দারুকটল্লকো ৰাতি দারুমযযন্তরূপকং ৰিয. ভোগজানিঞ্চুপেন্তীতি ভোগজানিঞ্চ উপেন্তি, পাণাতিপাতাদীনি কত্ৰা দণ্ডপীল়িতা ধনজানিঞ্চ অঞ্ঞঞ্চ ৰধবন্ধনাদিদুক্খং পাপুণন্তীতি অত্থো. ৰন্তগতোতি অত্তনো ৰন্তস্মিং গতো. ব্যসন্নোতি ব্যসনাপন্নো. ‘‘ৰিসন্নো’’তিপি পাঠো, তস্মিং ৰন্তে ওসন্নোতি অত্থো. উক্কট্ঠোতি অহং মহাযোধো, কো মযা সদিসো অত্থীতি এৰং উক্কংসগতো হুত্ৰা. আৰিলক্খোতি রত্তক্খো. সব্বপথৰীতি সব্বা পথৰী. ‘‘সব্বপুথুৰী’’তিপি পাঠো. চাতুরন্তোতি চতুসমুদ্দপরিযন্তায পথৰিযা ইস্সরো. মানাতিমানাতি মানকারিকা. সেসপদেসুপি এসেৰ নযো. গতীতি নিব্বত্তি. নিকেতোতি নিৰাসো. তস্সা পুণ্ণন্তি যা এৰরূপা, তস্সা পুণ্ণং. ইদ্ধানীতি সমিদ্ধানি. ফীতানীতি ৰত্থালঙ্কারকপ্পভণ্ডেহি পুপ্ফিতানি. উচ্ছিন্নদাযজ্জকতানীতি উচ্ছিন্নদাযাদানি নিদ্ধনানি কতানি. যত্থ ৰিনাসযন্তীতি যং নিস্সায যত্থ পতিট্ঠিতা, এৰং বহুম্পি ধনধঞ্ঞাদিসাপতেয্যং নাসযন্তি, কপণা হোন্তি.

দিত্তরূপোতি দপ্পিতরূপো. গণ্হেয্যাতি ভরিযসঞ্ঞায কিলেসৰসেন হত্থে গণ্হেয্য. দাসম্পি গণ্হেতি অত্তনো দাসম্পি কিলেসৰসেন ‘‘সামিকো মে’’তি গণ্হেয্য. পিৰিত্ৰানাতি পিৰিত্ৰা. দুচ্চরিতং চরিত্ৰাতি এৰং তীহি দ্ৰারেহি দসৰিধম্পি অকুসলং কত্ৰা. যং যাচমানাতি যং পুরিসং পুব্বে সুরং অপিৰন্তং বহুং হিরঞ্ঞং পরিচ্চজন্তা মুসাৰাদং করোহীতি যাচমানা ন লভন্তি. পিত্ৰাতি পিৰিত্ৰা ঠিতো. নপ্পজানাতি ৰুত্তোতি ‘‘কেনট্ঠেন আগতোসী’’তি ৰুত্তো সাসনস্স দুগ্গহিতত্তা তং অত্থং ন জানাতি. হিরীমনাপীতি হিরীযুত্তচিত্তাপি. একথূপাতি সূকরপোতকা ৰিয হীনজচ্চেহিপি সদ্ধিং একরাসী হুত্ৰা. অনাসকাতি নিরাহারা. থণ্ডিলদুক্খসেয্যন্তি ভূমিযং দুক্খসেয্যং সযন্তি. আযসক্যন্তি গরহং.

পত্তখন্ধাতি পতিতক্খন্ধা. কূটহতাৰাতি গীৰায বদ্ধেন কূটেন হতা গাৰো ৰিয, যথা তা তিণং অখাদন্তিযো পানীযং অপিৰন্তিযো সযন্তি, তথা সযন্তীতি অত্থো. ঘোরৰিসমিৰাতি ঘোরৰিসং ৰিয. ৰিসসমানন্তি ৰিসসদিসং. অন্ধকৰেণ্ডপুত্তাতি দস ভাতিকরাজানো. উপক্কমুন্তি পহরিংসু. পুব্বদেৰাতি অসুরা. তিদিৰাতি তাৰতিংসদেৰলোকা. সস্সতিযাতি সস্সতা, দীঘাযুকভাৰেন নিচ্চসম্মতা দেৰলোকাতি অত্থো. সমাযাতি সদ্ধিং অসুরমাযাহি. জানন্তি এৰং ‘‘নিরত্থকং এত’’ন্তি জানন্তো তুম্হাদিসো পণ্ডিতো পুরিসো কথং পিৰেয্য. কুম্ভগতা মযাতি কুম্ভগতং মযা, অযমেৰ ৰা পাঠো. অক্খাতরূপন্তি সভাৰতো অক্খাতং.

তং সুত্ৰা রাজা সুরায আদীনৰং ঞত্ৰা তুট্ঠো সক্কস্স থুতিং করোন্তো দ্ৰে গাথা অভাসি –

৬০.

‘‘ন মে পিতা ৰা অথৰাপি মাতা, এতাদিসা যাদিসকো তুৰংসি;

হিতানুকম্পী পরমত্থকামো, সোহং করিস্সং ৰচনং তৰজ্জ.

৬১.

‘‘দদামি তে গামৰরানি পঞ্চ, দাসীসতং সত্ত গৰংসতানি;

আজঞ্ঞযুত্তে চ রথে দস ইমে, আচরিযো হোসি মমত্থকামো’’তি.

তত্থ গামৰরানীতি, ব্রাহ্মণ, আচরিযস্স নাম আচরিযভাগো ইচ্ছিতব্বো, সংৰচ্ছরে সংৰচ্ছরে সতসহস্সুট্ঠানকে তুয্হং পঞ্চ গামে দদামীতি ৰদতি. দস ইমেতি ইমে দস পুরতো ঠিতে কঞ্চনৰিচিত্তে রথে দস্সেন্তো এৰমাহ.

তং সুত্ৰা সক্কো দেৰত্তভাৰং দস্সেত্ৰা অত্তানং জানাপেন্তো আকাসে ঠত্ৰা দ্ৰে গাথা অভাসি –

৬২.

‘‘তৰেৰ দাসীসতমত্থু রাজ, গামা চ গাৰো চ তৰেৰ হোন্তু;

আজঞ্ঞযুত্তা চ রথা তৰেৰ, সক্কোহমস্মী তিদসানমিন্দো.

৬৩.

‘‘মংসোদনং সপ্পিপাযাসং ভুঞ্জ, খাদস্সু চ ত্ৰং মধুমাসপূৰে;

এৰং তুৰং ধম্মরতো জনিন্দ, অনিন্দিতো সগ্গমুপেহি ঠান’’ন্তি.

তত্থ এৰং তুৰং ধম্মরতোতি এৰং ত্ৰং নানগ্গরসভোজনং ভুঞ্জন্তো সুরাপানা ৰিরতো তীণি দুচ্চরিতানি পহায তিৰিধসুচরিতধম্মরতো হুত্ৰা কেনচি অনিন্দিতো সগ্গট্ঠানং উপেহীতি.

ইতি সক্কো তস্স ওৰাদং দত্ৰা সকট্ঠানমেৰ গতো. সোপি সুরং অপিৰিত্ৰা সুরাভাজনানি ভিন্দাপেত্ৰা সীলং সমাদায দানং দত্ৰা সগ্গপরাযণো অহোসি. জম্বুদীপেপি অনুক্কমেন সুরাপানং ৰেপুল্লপ্পত্তং জাতং.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা রাজা আনন্দো অহোসি, সক্কো পন অহমেৰ অহোসি’’ন্তি.

কুম্ভজাতকৰণ্ণনা দুতিযা.

[৫১৩] ৩. জযদ্দিসজাতকৰণ্ণনা

চিরস্সং ৰত মেতি ইদং সত্থা জেতৰনে ৰিহরন্তো একং মাতুপোসকভিক্খুং আরব্ভ কথেসি. পচ্চুপ্পন্নৰত্থু সামজাতকসদিসং (জা. ২.২২.২৯৬ আদযো). তদা পন সত্থা ‘‘পোরাণকপণ্ডিতা কঞ্চনমালং সেতচ্ছত্তং পহায মাতাপিতরো পোসেসু’’ন্তি ৰত্ৰা অতীতং আহরি.

অতীতে কপিলরট্ঠে উত্তরপঞ্চালনগরে পঞ্চালো নাম রাজা অহোসি. তস্স অগ্গমহেসী গব্ভং পটিলভিত্ৰা পুত্তং ৰিজাযি. তস্সা পুরিমভৰে একা সপত্তিকা কুজ্ঝিত্ৰা ‘‘তুয্হং জাতং জাতং পজং খাদিতুং সমত্থা ভৰিস্সামী’’তি পত্থনং ঠপেত্ৰা যক্খিনী অহোসি. সা তদা ওকাসং লভিত্ৰা তস্সা পস্সন্তিযাৰ তং অল্লমংসপেসিৰণ্ণং কুমারকং গহেত্ৰা মুরুমুরাযন্তী খাদিত্ৰা পক্কামি. দুতিযৰারেপি তথেৰ অকাসি. ততিযৰারে পন তস্সা পসূতিঘরং পৰিট্ঠকালে গেহং পরিৰারেত্ৰা গাল়্হং আরক্খং অকংসু. ৰিজাতদিৰসে যক্খিনী আগন্ত্ৰা পুন দারকং অগ্গহেসি. দেৰী ‘‘যক্খিনী’’তি মহাসদ্দমকাসি. আৰুধহত্থা পুরিসা আগন্ত্ৰা দেৰিযা দিন্নসঞ্ঞায যক্খিনিং অনুবন্ধিংসু. সা খাদিতুং ওকাসং অলভন্তী ততো পলাযিত্ৰা উদকনিদ্ধমনং পাৰিসি. দারকো মাতুসঞ্ঞায তস্সা থনং মুখেন গণ্হি. সা পুত্তসিনেহং উপ্পাদেত্ৰা ততো পলাযিত্ৰা সুসানং গন্ত্ৰা দারকং পাসাণলেণে ঠপেত্ৰা পটিজগ্গি. অথস্স অনুক্কমেন ৰড্ঢমানস্স মনুস্সমংসং আহরিত্ৰা অদাসি. উভোপি মনুস্সমংসং খাদিত্ৰা তত্থ ৰসিংসু. দারকো অত্তনো মনুস্সভাৰং ন জানাতি ‘‘যক্খিনিপুত্তোস্মী’’তি সঞ্ঞায. সো অত্তভাৰং জহিত্ৰা অন্তরধাযিতুং ন সক্কোতি. অথস্স সা অন্তরধানত্থায একং মূলং অদাসি. সো মূলানুভাৰেন অন্তরধাযিত্ৰা মনুস্সমংসং খাদন্তো ৰিচরতি. যক্খিনী ৰেস্সৰণস্স মহারাজস্স ৰেয্যাৰচ্চত্থায গতা তত্থেৰ কালমকাসি. দেৰীপি চতুত্থৰারে অঞ্ঞং পুত্তং ৰিজাযি. সো যক্খিনিযা মুত্তত্তা অরোগো অহোসি. পচ্চামিত্তং যক্খিনিং জিনিত্ৰা জাতত্তা ‘‘জযদ্দিসকুমারো’’তিস্স নামং অকংসু. সো ৰযপ্পত্তো সব্বসিপ্পেসু নিপ্ফত্তিং পত্ৰা ছত্তং উস্সাপেত্ৰা রজ্জমনুসাসি.

তদা বোধিসত্তো তস্স অগ্গমহেসিযা কুচ্ছিম্হি নিব্বত্তি, ‘‘অলীনসত্তুকুমারো’’তিস্স নামং করিংসু. সো ৰযপ্পত্তো উগ্গহিতসব্বসিপ্পো উপরাজা অহোসি. সোপি যক্খিনিপুত্তো অপরভাগে পমাদেন তং মূলং নাসেত্ৰা অন্তরধাযিতুং অসক্কোন্তো দিস্সমানরূপোৰ সুসানে মনুস্সমংসং খাদি. মনুস্সা তং দিস্ৰা ভীতা আগন্ত্ৰা রঞ্ঞো উপক্কোসিংসু ‘‘দেৰ একো যক্খো দিস্সমানরূপো সুসানে মনুস্সমংসং খাদতি, সো অনুক্কমেন নগরং পৰিসিত্ৰা মনুস্সে মারেত্ৰা খাদিস্সতি, তং গাহাপেতুং ৰট্টতী’’তি. রাজা ‘‘সাধূ’’তি পটিস্সুণিত্ৰা ‘‘গণ্হথ ন’’ন্তি আণাপেসি. বলকাযো গন্ত্ৰা সুসানং পরিৰারেত্ৰা অট্ঠাসি. যক্খিনিপুত্তো নগ্গো উব্বিগ্গরূপো মরণভযভীতো ৰিরৰন্তো মনুস্সানং অন্তরং পক্খন্দি. মনুস্সা ‘‘যক্খো’’তি মরণভযভীতা দ্ৰিধা ভিজ্জিংসু. সোপি ততো পলাযিত্ৰা অরঞ্ঞং পাৰিসি, ন পুন মনুস্সপথং আগচ্ছি. সো একং মহাৰত্তনিঅটৰিং নিস্সায মগ্গপটিপন্নেসু মনুস্সেসু একেকং গহেত্ৰা অরঞ্ঞং পৰিসিত্ৰা মারেত্ৰা খাদন্তো একস্মিং নিগ্রোধমূলে ৰাসং কপ্পেসি.

অথেকো সত্থৰাহব্রাহ্মণো অটৰিপালানং সহস্সং দত্ৰা পঞ্চহি সকটসতেহি তং মগ্গং পটিপজ্জি. মনুস্সযক্খো ৰিরৰন্তো পক্খন্দি, ভীতা মনুস্সা উরেন নিপজ্জিংসু. সো ব্রাহ্মণং গহেত্ৰা পলাযন্তো খাণুনা পাদে ৰিদ্ধো অটৰিপালেসু অনুবন্ধন্তেসু ব্রাহ্মণং ছড্ডেত্ৰা অত্তনো ৰসনট্ঠানরুক্খমূলে নিপজ্জি. তস্স তত্থ নিপন্নস্স সত্তমে দিৰসে জযদ্দিসরাজা মিগৰধং আণাপেত্ৰা নগরা নিক্খমি. তং নগরা নিক্খন্তমত্তমেৰ তক্কসিলৰাসী নন্দো নাম মাতুপোসকব্রাহ্মণো চতস্সো সতারহগাথাযো আদায আগন্ত্ৰা রাজানং অদ্দস. রাজা ‘‘নিৰত্তিত্ৰা সুণিস্সামী’’তি তস্স নিৰাসগেহং দাপেত্ৰা মিগৰং গন্ত্ৰা ‘‘যস্স পস্সেন মিগো পলাযতি, তস্সেৰ গীৰা’’তি আহ. অথেকো পসদমিগো উট্ঠহিত্ৰা রঞ্ঞো অভিমুখো গন্ত্ৰা পলাযি. অমচ্চা পরিহাসং করিংসু. রাজা খগ্গং গহেত্ৰা তং অনুবন্ধিত্ৰা তিযোজনমত্থকে পত্ৰা খগ্গেন পহরিত্ৰা দ্ৰে খণ্ডানি করিত্ৰা কাজেনাদায আগচ্ছন্তো মনুস্সযক্খস্স নিপন্নট্ঠানং পত্ৰা দব্বতিণেসু নিসীদিত্ৰা থোকং ৰিস্সমিত্ৰা গন্তুং আরভি. অথ নং সো উট্ঠায ‘‘তিট্ঠ কুহিং গচ্ছসি, ভক্খোসি মে’’তি হত্থে গহেত্ৰা পঠমং গাথমাহ –

৬৪.

‘‘চিরস্সং ৰত মে উদপাদি অজ্জ, ভক্খো মহা সত্তমিভত্তকালে;

কুতোসি কোৰাসি তদিঙ্ঘ ব্রূহি, আচিক্খ জাতিং ৰিদিতো যথাসী’’তি.

তত্থ ভক্খো মহাতি মহাভক্খো. সত্তমিভত্তকালেতি পাটিপদতো পট্ঠায নিরাহারস্স সত্তমিযং ভত্তকালে. কুতোসীতি কুতো আগতোসীতি.

রাজা যক্খং দিস্ৰা ভীতো ঊরুত্থম্ভং পত্ৰা পলাযিতুং নাসক্খি, সতিং পন পচ্চুপট্ঠাপেত্ৰা দুতিযং গাথমাহ –

৬৫.

‘‘পঞ্চালরাজা মিগৰং পৰিট্ঠো, জযদ্দিসো নাম যদিস্সুতো তে;

চরামি কচ্ছানি ৰনানি চাহং, পসদং ইমং খাদ মমজ্জ মুঞ্চা’’তি.

তত্থ মিগৰং পৰিট্ঠোতি মিগৰধায রট্ঠা নিক্খন্তো. কচ্ছানীতি পব্বতপস্সানি. পসদন্তি পসদমিগং.

তং সুত্ৰা যক্খো ততিযং গাথমাহ –

৬৬.

‘‘সেনেৰ ত্ৰং পণসি সস্সমানো, মমেস ভক্খো পসদো যং ৰদেসি;

তং খাদিযান পসদং জিঘঞ্ঞং, খাদিস্সং পচ্ছা ন ৰিলাপকালো’’তি.

তত্থ সেনেৰাতি মম সন্তকেনেৰ. পণসীতি ৰোহরসি অত্তানং ৰিক্কিণাসি. সস্সমানোতি ৰিহিংসযমানো. তং খাদিযানাতি তং পঠমং খাদিত্ৰা. জিঘঞ্ঞন্তি ঘসিতুকামো. খাদিস্সন্তি এতং পচ্ছা খাদিস্সামি. ন ৰিলাপকালোতি মা ৰিলপি. নাযং ৰিলাপকালোতি ৰদতি.

তং সুত্ৰা রাজা নন্দব্রাহ্মণং সরিত্ৰা চতুত্থং গাথমাহ –

৬৭.

‘‘ন চত্থি মোক্খো মম নিক্কযেন, গন্ত্ৰান পচ্ছাগমনায পণ্হে;

তং সঙ্গরং ব্রাহ্মণস্সপ্পদায, সচ্চানুরক্খী পুনরাৰজিস্স’’ন্তি.

তত্থ ন চত্থীতি ন চে ময্হং নিক্কযেন ৰিমোক্খো অত্থি. গন্ত্ৰানাতি এৰং সন্তে অজ্জ ইমং মিগমংসং খাদিত্ৰা মম নগরং গন্ত্ৰা. পণ্হেতি পগেযেৰ, স্ৰেৰ পাতরাসকালে পচ্চাগমনত্থায পটিঞ্ঞং গণ্হাহীতি অধিপ্পাযো. তং সঙ্গরন্তি মযা ‘‘ধনং তে দস্সামী’’তি ব্রাহ্মণস্স সঙ্গরো কতো, তং তস্স দত্ৰা ইমং মযা ৰুত্তং সচ্চং অনুরক্খন্তো অহং পুন আগমিস্সামীতি অত্থো.

তং সুত্ৰা যক্খো পঞ্চমং গাথমাহ –

৬৮.

‘‘কিং কম্মজাতং অনুতপ্পতে ত্ৰং, পত্তং সমীপং মরণস্স রাজ;

আচিক্খ মে তং অপি সক্কুণেমু, অনুজানিতুং আগমনায পণ্হে’’তি.

তত্থ কম্মমেৰ কম্মজাতং. অনুতপ্পতেতি তং অনুতপ্পতি. পত্তন্তি উপগতং. অপি সক্কুণেমূতি অপি নাম তং তৰ সোককারণং সুত্ৰা পাতোৰ আগমনায তং অনুজানিতুং সক্কুণেয্যামাতি অত্থো.

রাজা তং কারণং কথেন্তো ছট্ঠং গাথমাহ –

৬৯.

‘‘কতা মযা ব্রাহ্মণস্স ধনাসা, তং সঙ্গরং পটিমুক্কং ন মুত্তং;

তং সঙ্গরং ব্রাহ্মণস্সপ্পদায, সচ্চানুরক্খী পুনরাৰজিস্স’’ন্তি.

তত্থ পটিমুক্কং ন মুত্তন্তি চতস্সো সতারহা গাথা সুত্ৰা ‘‘ধনং তে দস্সামী’’তি পটিঞ্ঞায মযা অত্তনি পটিমুঞ্চিত্ৰা ঠপিতং, ন পন তং মুত্তং ধনস্স অদিন্নত্তা.

তং সুত্ৰা যক্খো সত্তমং গাথমাহ –

৭০.

‘‘যা তে কতা ব্রাহ্মণস্স ধনাসা, তং সঙ্গরং পটিমুক্কং ন মুত্তং;

তং সঙ্গরং ব্রাহ্মণস্সপ্পদায, সচ্চানুরক্খী পুনরাৰজস্সূ’’তি.

তত্থ পুনরাৰজস্সূতি পুন আগচ্ছস্সু.

এৰঞ্চ পন ৰত্ৰা রাজানং ৰিস্সজ্জেসি. সো তেন ৰিস্সট্ঠো ‘‘ত্ৰং মা চিন্তযি, অহং পাতোৰ আগমিস্সামী’’তি ৰত্ৰা মগ্গনিমিত্তানি সল্লক্খেন্তো অত্তনো বলকাযং উপগন্ত্ৰা বলকাযপরিৰুতো নগরং পৰিসিত্ৰা নন্দব্রাহ্মণং পক্কোসাপেত্ৰা মহারহে আসনে নিসীদাপেত্ৰা তা গাথা সুত্ৰা চত্তারি সহস্সানি দত্ৰা যানং আরোপেত্ৰা ‘‘ইমং তক্কসিলমেৰ নেথা’’তি মনুস্সে দত্ৰা ব্রাহ্মণং উয্যোজেত্ৰা দুতিযদিৰসে পটিগন্তুকামো হুত্ৰা পুত্তং আমন্তেত্ৰা অনুসাসি. তমত্থং দীপেন্তো সত্থা দ্ৰে গাথা অভাসি –

৭১.

‘‘মুত্তোচ সো পোরিসাদস্স হত্থা, গন্ত্ৰা সকং মন্দিরং কামকামী;

তং সঙ্গরং ব্রাহ্মণস্সপ্পদায, আমন্তযী পুত্তমলীনসত্তুং.

৭২.

‘‘অজ্জেৰ রজ্জং অভিসিঞ্চযস্সু, ধম্মং চর সেসু পরেসু চাপি;

অধম্মকারো চ তে মাহু রট্ঠে, গচ্ছামহং পোরিসাদস্স ঞত্তে’’তি.

তত্থ অলীনসত্তুন্তি এৰংনামকং কুমারং. পাল়িযং পন ‘‘অরিনসত্তু’’ন্তি লিখিতং. অজ্জেৰ রজ্জন্তি পুত্ত রজ্জং তে দম্মি, ত্ৰং অজ্জেৰ মুদ্ধনি অভিসেকং অভিসিঞ্চযস্সু. ঞত্তেতি অভ্যাসে, সন্তিকেতি অত্থো.

তং সুত্ৰা কুমারো দসমং গাথমাহ –

৭৩.

‘‘কিং কম্ম ক্রুব্বং তৰ দেৰ পাৰ, নারাধযী তং তদিচ্ছামি সোতুং;

যমজ্জ রজ্জম্হি উদস্সযে তুৰং, রজ্জম্পি নিচ্ছেয্যং, তযা ৰিনাহ’’ন্তি.

তত্থ ক্রুব্বন্তি করোন্তো. যমজ্জাতি যেন অনারাধকম্মেন অজ্জ মং রজ্জম্হি ত্ৰং উদস্সযে উস্সাপেসি পতিট্ঠাপেসি, তং মে আচিক্খ, অহঞ্হি তযা ৰিনা রজ্জম্পি ন ইচ্ছামীতি অত্থো.

তং সুত্ৰা রাজা অনন্তরং গাথমাহ –

৭৪.

‘‘ন কম্মুনা ৰা ৰচসাৰ তাত, অপরাধিতোহং তুৰিযং সরামি;

সন্ধিঞ্চ কত্ৰা পুরিসাদকেন, সচ্চানুরক্খী পুনাহং গমিস্স’’ন্তি.

তত্থ অপরাধিতোতি অপরাধং ইতো. তুৰিযন্তি তৰ সন্তকং. ইদং ৰুত্তং হোতি – তাত, অহং ইতো তৰ কম্মতো ৰা তৰ ৰচনতো ৰা কিঞ্চি মম অপ্পিযং অপরাধং ন সরামীতি. সন্ধিঞ্চ কত্ৰাতি মং পন মিগৰং গতং একো যক্খো ‘‘খাদিস্সামী’’তি গণ্হি. অথাহং ব্রাহ্মণস্স ধম্মকথং সুত্ৰা তস্স সক্কারং কত্ৰা ‘‘স্ৰে তৰ পাতরাসকালে আগমিস্সামী’’তি তেন পুরিসাদকেন সন্ধিং সচ্চং কত্ৰা আগতো, তস্মা তং সচ্চং অনুরক্খন্তো পুন তত্থ গমিস্সামি, ত্ৰং রজ্জং কারেহীতি ৰদতি.

তং সুত্ৰা কুমারো গাথমাহ –

৭৫.

‘‘অহং গমিস্সামি ইধেৰ হোহি, নত্থি ততো জীৰতো ৰিপ্পমোক্খো;

সচে তুৰং গচ্ছসিযেৰ রাজ, অহম্পি গচ্ছামি উভো ন হোমা’’তি.

তত্থ ইধেৰাতি ত্ৰং ইধেৰ হোতি. ততোতি তস্স সন্তিকা জীৰন্তস্স মোক্খো নাম নত্থি. উভোতি এৰং সন্তে উভোপি ন ভৰিস্সাম.

তং সুত্ৰা রাজা গাথমাহ –

৭৬.

‘‘অদ্ধা হি তাত সতানেস ধম্মো, মরণা চ মে দুক্খতরং তদস্স;

কম্মাসপাদো তং যদা পচিত্ৰা, পসয্হ খাদে ভিদা রুক্খসূলে’’তি.

তস্সত্থো – অদ্ধা একংসেন এস, তাত, সতানং পণ্ডিতানং ধম্মো সভাৰো, যুত্তং ত্ৰং ৰদসি, অপি চ খো পন ময্হং মরণতোপেতং দুক্খতরং অস্স, যদা তং সো কম্মাসপাদো. ভিদা রুক্খসূলেতি তিখিণরুক্খসূলে ভিত্ৰা পচিত্ৰা পসয্হ বলক্কারেন খাদেয্যাতি.

তং সুত্ৰা কুমারো গাথমাহ –

৭৭.

‘‘পাণেন তে পাণমহং নিমিস্সং, মা ত্ৰং অগা পোরিসাদস্স ঞত্তে;

এৰঞ্চ তে পাণমহং নিমিস্সং, তস্মা মতং জীৰিতস্স ৰণ্ণেমী’’তি.

তত্থ নিমিস্সন্তি অহং ইধেৰ তৰ পাণেন মম পাণং পরিৰত্তেস্সং. তস্মাতি যস্মা এতং পাণং তৰ পাণেনাহং নিমিস্সং, তস্মা তৰ জীৰিতস্সত্থায মম মরণং ৰণ্ণেমি মরণমেৰ ৰরেমি, ইচ্ছামীতি অত্থো.

তং সুত্ৰা রাজা পুত্তস্স বলং জানন্তো ‘‘সাধু তাত, গচ্ছাহী’’তি সম্পটিচ্ছি. সো মাতাপিতরো ৰন্দিত্ৰা নগরম্হা নিক্খমি. তমত্থং পকাসেন্তো সত্থা উপড্ঢগাথমাহ –

৭৮.

‘‘ততো হৰে ধিতিমা রাজপুত্তো, ৰন্দিত্ৰা মাতু চ পিতু চ পাদে’’তি.

তত্থ পাদেতি পাদে ৰন্দিত্ৰা নিক্খন্তোতি অত্থো;

অথস্স মাতাপিতরোপি ভগিনীপি ভরিযাপি অমচ্চপরিজনেহি সদ্ধিংযেৰ নিক্খমিংসু. সো নগরা নিক্খমিত্ৰা পিতরং মগ্গং পুচ্ছিত্ৰা সুট্ঠু ৰৰত্থপেত্ৰা মাতাপিতরো ৰন্দিত্ৰা সেসানং ওৰাদং দত্ৰা অচ্ছম্ভিতো কেসরসীহো ৰিয মগ্গং আরুয্হ যক্খাৰাসং পাযাসি. তং গচ্ছন্তং দিস্ৰা মাতা সকভাৰেন সণ্ঠাতুং অসক্কোন্তী পথৰিযং পতি. পিতা বাহা পগ্গয্হ মহন্তেন সদ্দেন কন্দি. তম্পি অত্থং পকাসেন্তো সত্থা –

‘‘দুখিনিস্স মাতা নিপতা পথব্যা, পিতাস্স পগ্গয্হ ভুজানি কন্দতী’’তি. –

উপড্ঢগাথং ৰত্ৰা তস্স পিতরা পযুত্তং আসীসৰাদং অভিৰাদনৰাদং মাতরা ভগিনীভরিযাহি চ কতং সচ্চকিরিযং পকাসেন্তো অপরাপি চতস্সো গাথা অভাসি –

৭৯.

‘‘তং গচ্ছন্তং তাৰ পিতা ৰিদিত্ৰা, পরম্মুখো ৰন্দতি পঞ্জলীকো;

সোমো চ রাজা ৰরুণো চ রাজা, পজাপতী চন্দিমা সূরিযো চ;

এতেহি গুত্তো পুরিসাদকম্হা, অনুঞ্ঞাতো সোত্থি পচ্চেহি তাত.

৮০.

‘‘যং দণ্ডকিরঞ্ঞো গতস্স মাতা, রামস্সকাসি সোত্থানং সুগুত্তা;

তং তে অহং সোত্থানং করোমি, এতেন সচ্চেন সরন্তু দেৰা;

অনুঞ্ঞাতো সোত্থি পচ্চেহি পুত্ত.

৮১.

‘‘আৰী রহো ৰাপি মনোপদোসং, নাহং সরে জাতু মলীনসত্তে;

এতেন সচ্চেন সরন্তু দেৰা, অনুঞ্ঞাতো সোত্থি পচ্চেহি ভাতিক.

৮২.

‘‘যস্মা চ মে অনধিমনোসি সামি, ন চাপি মে মনসা অপ্পিযোসি;

এতেন সচ্চেন সরন্তু দেৰা, অনুঞ্ঞাতো সোত্থি পচ্চেহি সামী’’তি.

তত্থ পরম্মুখোতি অযং মে পুত্তো পরম্মুখো মাতাপিতরো ৰন্দিত্ৰা গচ্ছতি, ইতি এতং পরম্মুখং গচ্ছন্তং দিস্ৰা ৰিদিত্ৰা. পঞ্জলীকোতি তস্মিং কালে সিরসি অঞ্জলিং ঠপেত্ৰা ৰন্দতি দেৰতা নমস্সতি. পুরিসাদকম্হাতি পুরিসাদস্স সন্তিকা তেন অনুঞ্ঞাতো সোত্থিনা পচ্চেহি.

রামস্সকাসীতি রামস্স অকাসি. একো কির বারাণসিৰাসী রামো নাম মাতুপোসকো মাতাপিতরো পটিজগ্গন্তো ৰোহারত্থায গতো দণ্ডকিরঞ্ঞো ৰিজিতে কুম্ভৰতীনগরং গন্ত্ৰা নৰৰিধেন ৰস্সেন সকলরট্ঠে ৰিনাসিযমানে মাতাপিতূনং গুণং সরি. অথ নং মাতুপট্ঠানকম্মস্স ফলেন দেৰতা সোত্থিনা আনযিত্ৰা মাতু অদংসু. তং কারণং সুতৰসেনাহরিত্ৰা এৰমাহ. সোত্থানন্তি সোত্থিভাৰং. তং পন কিঞ্চাপি দেৰতা করিংসু, মাতুপট্ঠানং নিস্সায নিব্বত্তত্তা পন মাতা অকাসীতি ৰুত্তং. তং তে অহন্তি অহম্পি তে তমেৰ সোত্থানং করোমি, মং নিস্সায তথেৰ তৰ সোত্থিভাৰো হোতূতি অত্থো. অথ ৰা করোমীতি ইচ্ছামি. এতেন সচ্চেনাতি সচে দেৰতাহি তস্স সোত্থিনা আনীতভাৰো সচ্চো, এতেন সচ্চেন মমপি পুত্তং সরন্তু দেৰা, রামং ৰিয তম্পি আহরিত্ৰা মম দস্সন্তূতি অত্থো. অনুঞ্ঞাতোতি পোরিসাদেন ‘‘গচ্ছা’’তি অনুঞ্ঞাতো দেৰতানং আনুভাৰেন সোত্থি পটিআগচ্ছ পুত্তাতি ৰদতি.

জাতু মলীনসত্তেতি জাতু একংসেন অলীনসত্তে মম ভাতিকে অহং সম্মুখা ৰা পরম্মুখা ৰা মনোপদোসং ন সরামি, ন মযা তম্হি মনোপদোসো কতপুব্বোতি এৰমস্স কনিট্ঠা সচ্চমকাসি. যস্মা চ মে অনধিমনোসি, সামীতি মম, সামি অলীনসত্তু যস্মা ত্ৰং অনধিমনোসি, মং অভিভৰিত্ৰা অতিক্কমিত্ৰা অঞ্ঞং মনেন ন পত্থেসি. ন চাপি মে মনসা অপ্পিযোসীতি ময্হম্পি চ মনসা ত্ৰং অপ্পিযো ন হোসি, অঞ্ঞমঞ্ঞং পিযসংৰাসাৰ মযন্তি এৰমস্স অগ্গমহেসী সচ্চমকাসি.

কুমারোপি পিতরা অক্খাতনযেন রক্খাৰাসমগ্গং পটিপজ্জি. যক্খোপি ‘‘খত্তিযা নাম বহুমাযা হোন্তি, কো জানাতি, কিং ভৰিস্সতী’’তি রুক্খং অভিরুহিত্ৰা রঞ্ঞো আগমনং ওলোকেন্তো নিসীদি. সো কুমারং আগচ্ছন্তং দিস্ৰা ‘‘পিতরং নিৰত্তেত্ৰা পুত্তো আগতো ভৰিস্সতি, নত্থি মে ভয’’ন্তি ওতরিত্ৰা তস্স পিট্ঠিং দস্সেন্তো নিসীদি. সো আগন্ত্ৰা তস্স পুরতো অট্ঠাসি. অথ যক্খো গাথমাহ –

৮৩.

‘‘ব্রহা উজূ চারুমুখো কুতোসি, ন মং পজানাসি ৰনে ৰসন্তং;

লুদ্দং মং ঞত্ৰা ‘পুরিসাদকো’সি, কো সোত্থিমাজানমিধাৰজেয্যা’’তি.

তত্থ কো সোত্থিমাজানমিধাৰজেয্যাতি কুমার কো নাম পুরিসো অত্তনো সোত্থিভাৰং জানন্তো ইচ্ছন্তো ইধাগচ্ছেয্য, ত্ৰং অজানন্তো আগতো মঞ্ঞেতি.

তং সুত্ৰা কুমারো গাথমাহ –

৮৪.

‘‘জানামি লুদ্দ পুরিসাদকো ত্ৰং, ন তং ন জানামি ৰনে ৰসন্তং;

অহঞ্চ পুত্তোস্মি জযদ্দিসস্স, মমজ্জ খাদ পিতুনো পমোক্খা’’তি.

তত্থ পমোক্খাতি পমোক্খহেতু অহং পিতু জীৰিতং দত্ৰা ইধাগতো, তস্মা তং মুঞ্চ, মং খাদাহীতি অত্থো.

ততো যক্খো গাথমাহ –

৮৫.

‘‘জানামি পুত্তোতি জযদ্দিসস্স, তথা হি ৰো মুখৰণ্ণো উভিন্নং;

সুদুক্করঞ্ঞেৰ কতং তৰেদং, যো মত্তুমিচ্ছে পিতুনো পমোক্খা’’তি.

তত্থ তথা হি ৰোতি তাদিসো ৰো তুম্হাকং. উভিন্নম্পি সদিসোৰ মুখৰণ্ণো হোতীতি অত্থো. কতং তৰেদন্তি ইদং তৰ কম্মং সুদুক্করং.

ততো কুমারো গাথমাহ –

৮৬.

‘‘ন দুক্করং কিঞ্চি মহেত্থ মঞ্ঞে, যো মত্তুমিচ্ছে পিতুনো পমোক্খা;

মাতু চ হেতু পরলোক গন্ত্ৰা, সুখেন সগ্গেন চ সম্পযুত্তো’’তি.

তত্থ কিঞ্চি মহেত্থ মঞ্ঞেতি কিঞ্চি অহং এত্থ ন মঞ্ঞামি. ইদং ৰুত্তং হোতি – যক্খ যো পুগ্গলো পিতু ৰা পমোক্খত্থায মাতু ৰা হেতু পরলোকং গন্ত্ৰা সুখেন সগ্গে নিব্বত্তনকসুখেন সম্পযুত্তো ভৰিতুং মত্তুমিচ্ছে মরিতুং ইচ্ছতি, তস্মা অহং এত্থ মাতাপিতূনং অত্থায জীৰিতপরিচ্চাগে কিঞ্চি দুক্করং ন মঞ্ঞামীতি.

তং সুত্ৰা যক্খো ‘‘কুমার, মরণস্স অভযানকসত্তো নাম নত্থি, ত্ৰং কস্মা ন ভাযসী’’তি পুচ্ছি. সো তস্স কথেন্তো দ্ৰে গাথা অভাসি –

৮৭.

‘‘অহঞ্চ খো অত্তনো পাপকিরিযং, আৰী রহো ৰাপি সরে ন জাতু;

সঙ্খাতজাতীমরণোহমস্মি, যথেৰ মে ইধ তথা পরত্থ.

৮৮.

‘‘খাদজ্জ মং দানি মহানুভাৰ, করস্সু কিচ্চানি ইমং সরীরং;

রুক্খস্স ৰা তে পপতামি অগ্গা, ছাদযমানো ময্হং ত্ৰমদেসি মংস’’ন্তি.

তত্থ সরে ন জাতূতি একংসেনেৰ ন সরামি. সঙ্খাতজাতীমরণোহমস্মীতি অহং ঞাণেন সুপরিচ্ছিন্নজাতিমরণো, জাতসত্তো অমরণধম্মো নাম নত্থীতি জানামি. যথেৰ মে ইধাতি যথেৰ মম ইধ, তথা পরলোকে, যথা চ পরলোকে, তথা ইধাপি মরণতো মুত্তি নাম নত্থীতি ইদম্পি মম ঞাণেন সুপরিচ্ছিন্নং. করস্সু কিচ্চানীতি ইমিনা সরীরেন কত্তব্বকিচ্চানি কর, ইমং তে মযা নিস্সট্ঠং সরীরং. ছাদযমানো ময্হং ত্ৰমদেসি মংসন্তি মযি রুক্খগ্গা পতিত্ৰা মতে মম সরীরতো ত্ৰং ছাদযমানো রোচযমানো যং যং ইচ্ছসি, তং তং মংসং অদেসি, খাদেয্যাসীতি অত্থো.

যক্খো তস্স ৰচনং সুত্ৰা ভীতো হুত্ৰা ‘‘ন সক্কা ইমস্স মংসং খাদিতুং, উপাযেন নং পলাপেস্সামী’’তি চিন্তেত্ৰা ইমং গাথমাহ –

৮৯.

‘‘ইদঞ্চ তে রুচ্চতি রাজপুত্ত, চজেসি পাণং পিতুনো পমোক্খা;

তস্মা হি সো ত্ৰং তরমানরূপো, সম্ভঞ্জ কট্ঠানি জলেহি অগ্গি’’ন্তি.

তত্থ জলেহীতি অরঞ্ঞং পৰিসিত্ৰা সারদারূনি আহরিত্ৰা অগ্গিং জালেত্ৰা নিদ্ধূমে অঙ্গারে কর, তত্থ তে মংসং পচিত্ৰা খাদিস্সামীতি দীপেতি.

সো তথা কত্ৰা তস্স সন্তিকং অগমাসি. তং কারণং পকাসেন্তো সত্থা ইতরং গাথমাহ –

৯০.

‘‘ততো হৰে ধিতিমা রাজপুত্তো, দারুং সমাহরিত্ৰা মহন্তমগ্গিং;

সন্তীপযিত্ৰা পটিৰেদযিত্থ, আদীপিতো দানি মহাযমগ্গী’’তি.

যক্খো অগ্গিং কত্ৰা আগতং কুমারং ওলোকেত্ৰা ‘‘অযং পুরিসসীহো, মরণাপিস্স ভযং নত্থি, মযা এত্তকং কালং এৰং নিব্ভযো নাম ন দিট্ঠপুব্বো’’তি লোমহংসজাতো কুমারং পুনপ্পুনং ওলোকেন্তো নিসীদি. কুমারো তস্স কিরিযং দিস্ৰা গাথমাহ –

৯১.

‘‘খাদজ্জ মং দানি পসয্হকারি, কিং মং মুহুং পেক্খসি হট্ঠলোমো;

তথা তথা তুয্হমহং করোমি, যথা যথা মং ছাদযমানো অদেসী’’তি.

তত্থ মুহুন্তি পুনপ্পুনং. তথা তথা তুয্হমহন্তি অহং তুয্হং তথা তথা ৰচনং করোমি, ইদানি কিং করিস্সামি, যথা যথা মং ছাদযমানো রোচযমানো অদেসি খাদিস্সসি, তস্মা খাদজ্জ মন্তি.

অথস্স ৰচনং সুত্ৰা যক্খো গাথমাহ –

৯২.

‘‘কো তাদিসং অরহতি খাদিতাযে, ধম্মে ঠিতং সচ্চৰাদিং ৰদঞ্ঞুং;

মুদ্ধাপি তস্স ৰিফলেয্য সত্তধা, যো তাদিসং সচ্চৰাদিং অদেয্যা’’তি.

তং সুত্ৰা কুমারো ‘‘সচে মং ন খাদিতুকামোসি, অথ কস্মা দারূনি ভঞ্জাপেত্ৰা অগ্গিং কারেসী’’তি ৰত্ৰা ‘‘পলাযিস্সতি নু খো, নোতি তৰ পরিগ্গণ্হনত্থাযা’’তি ৰুত্তে ‘‘ত্ৰং ইদানি মং কথং পরিগ্গণ্হিস্সসি, যোহং তিরচ্ছানযোনিযং নিব্বত্তো সক্কস্স দেৰরঞ্ঞো অত্তানং পরিগ্গণ্হিতুং নাদাসি’’ন্তি ৰত্ৰা আহ –

৯৩.

‘‘ইদঞ্হি সো ব্রাহ্মণং মঞ্ঞমানো, সসো অৰাসেসি সকে সরীরে;

তেনেৰ সো চন্দিমা দেৰপুত্তো, সসত্থুতো কামদুহজ্জ যক্খা’’তি.

তস্সত্থো – ইদঞ্হি সো সসপণ্ডিতো ‘‘ব্রাহ্মণো এসো’’তি ব্রাহ্মণং মঞ্ঞমানো ‘‘অজ্জ ইমং সরীরং খাদিত্ৰা ইধেৰ ৰসা’’তি এৰং সকে সরীরে অত্তনো সরীরং দাতুং অৰাসেসি, ৰসাপেসীতি অত্থো. সরীরঞ্চস্স ভক্খত্থায অদাসি. সক্কো পব্বতরসং পীল়েত্ৰা আদায চন্দমণ্ডলে সসলক্খণং অকাসি. ততো পট্ঠায তেনেৰ সসলক্খণেন সো চন্দিমা দেৰপুত্তো ‘‘সসী সসী’’তি এৰং সসত্থুতো লোকস্স কামদুহো পেমৰড্ঢনো অজ্জ যক্খ ৰিরোচতি. কপ্পট্ঠিযঞ্হেতং পাটিহারিযন্তি.

তং সুত্ৰা যক্খো কুমারং ৰিস্সজ্জেন্তো গাথমাহ –

৯৪.

‘‘চন্দো যথা রাহুমুখা পমুত্তো, ৰিরোচতে পন্নরসেৰ ভাণুমা;

এৰং তুৰং পোরিসাদা পমুত্তো, ৰিরোচ কপ্পিলে মহানুভাৰ;

আমোদযং পিতরং মাতরঞ্চ, সব্বো চ তে নন্দতু ঞাতিপক্খো’’তি.

তত্থ ভাণুমাতি সূরিযো. ইদং ৰুত্তং হোতি – যথা পন্নরসে রাহুমুখা মুত্তো চন্দো ৰা ভাণুমা ৰা ৰিরোচতি, এৰং ত্ৰম্পি মম সন্তিকা মুত্তো কপিলরট্ঠে ৰিরোচ মহানুভাৰাতি. নন্দতূতি তুস্সতু.

গচ্ছ মহাৰীরাতি মহাসত্তং উয্যোজেসি. সোপি তং নিব্বিসেৰনং কত্ৰা পঞ্চ সীলানি দত্ৰা ‘‘যক্খো নু খো এস, নো’’তি পরিগ্গণ্হন্তো ‘‘যক্খানং অক্খীনি রত্তানি হোন্তি অনিম্মিসানি চ, ছাযা ন পঞ্ঞাযতি, অচ্ছম্ভিতা হোন্তি. নাযং যক্খো, মনুস্সো এসো. ময্হং পিতু কির তযো ভাতরো যক্খিনিযা গহিতা. তেসু এতায দ্ৰে খাদিতা ভৰিস্সন্তি, একো পুত্তসিনেহেন পটিজগ্গিতো ভৰিস্সতি, ইমিনা তেন ভৰিতব্বং, ইমং নেত্ৰা ময্হং পিতু আচিক্খিত্ৰা রজ্জে পতিট্ঠাপেস্সামী’’তি চিন্তেত্ৰা ‘‘এহি অম্ভো, ন ত্ৰং যক্খো, পিতু মে জেট্ঠভাতিকোসি, এহি মযা সদ্ধিং গন্ত্ৰা কুলসন্তকে রজ্জে ছত্তং উস্সাপেহী’’তি ৰত্ৰা ইতরেন ‘‘নাহং মনুস্সো’’তি ৰুত্তে ‘‘ন ত্ৰং ময্হং সদ্দহসি, অত্থি পন সো, যস্স সদ্দহসী’’তি পুচ্ছিত্ৰা ‘‘অত্থি অসুকট্ঠানে দিব্বচক্খুকতাপসো’’তি ৰুত্তে তং আদায তত্থ অগমাসি. তাপসো তে দিস্ৰাৰ ‘‘কিং করোন্তা পিতাপুত্তা অরঞ্ঞে চরথা’’তি ৰত্ৰা তেসং ঞাতিভাৰং কথেসি. পোরিসাদো তস্স সদ্দহিত্ৰা ‘‘তাত, ত্ৰং গচ্ছ, অহং একস্মিঞ্ঞেৰ অত্তভাৰে দ্ৰিধা জাতো, ন মে রজ্জেনত্থো, পব্বজিস্সামহ’’ন্তি তাপসস্স সন্তিকে ইসিপব্বজ্জং পব্বজি. অথ নং কুমারো ৰন্দিত্ৰা নগরং অগমাসি. তমত্থং পকাসেন্তো সত্থা –

৯৫.

‘‘ততো হৰে ধিতিমা রাজপুত্তো, কতঞ্জলী পরিযায পোরিসাদং;

অনুঞ্ঞাতো সোত্থি সুখী অরোগো, পচ্চাগমা কপিলমলীনসত্তা’’তি. –

গাথং ৰত্ৰা তস্স নগরং গতস্স নেগমাদীহি কতকিরিযং দস্সেন্তো ওসানগাথমাহ –

৯৬.

‘‘তং নেগমা জানপদা চ সব্বে, হত্থারোহা রথিকা পত্তিকা চ;

নমস্সমানা পঞ্জলিকা উপাগমুং, নমত্থু তে দুক্করকারকোসী’’তি.

রাজা ‘‘কুমারো কির আগতো’’তি সুত্ৰা পচ্চুগ্গমনং অকাসি. কুমারো মহাজনপরিৰারো গন্ত্ৰা রাজানং ৰন্দি. অথ নং সো পুচ্ছি – ‘‘তাত, কথং তাদিসা পোরিসাদা মুত্তোসী’’তি. ‘‘তাত, নাযং যক্খো, তুম্হাকং জেট্ঠভাতিকো, এস ময্হং পেত্তেয্যো’’তি সব্বং পৰত্তিং আরোচেত্ৰা ‘‘তুম্হেহি মম পেত্তেয্যং দট্ঠুং ৰট্টতী’’তি আহ. রাজা তঙ্খণঞ্ঞেৰ ভেরিং চরাপেত্ৰা মহন্তেন পরিৰারেন তাপসানং সন্তিকং অগমাসি. মহাতাপসো তস্স যক্খিনিযা আনেত্ৰা অখাদিত্ৰা পোসিতকারণঞ্চ যক্খাভাৰকারণঞ্চ তেসং ঞাতিভাৰঞ্চ সব্বং ৰিত্থারতো কথেসি. রাজা ‘‘এহি, ভাতিক, রজ্জং কারেহী’’তি আহ. ‘‘অলং মহারাজা’’তি. ‘‘তেন হি এথ উয্যানে ৰসিস্সথ, অহং ৰো চতূহি পচ্চযেহি উপট্ঠহিস্সামী’’তি? ‘‘ন আগচ্ছামি মহারাজা’’তি. রাজা তেসং অস্সমপদতো অৰিদূরে একং পব্বতন্তরং বন্ধিত্ৰা মহন্তং তল়াকং কারেত্ৰা কেদারে সম্পাদেত্ৰা মহড্ঢকুলসহস্সং আনেত্ৰা মহাগামং নিৰাসেত্ৰা তাপসানং ভিক্খাচারং পট্ঠপেসি. সো গামো চূল়কম্মাসদম্মনিগমো নাম জাতো. সুতসোমমহাসত্তেন পোরিসাদস্স দমিতপদেসো পন মহাকম্মাসদম্মনিগমোতি ৰেদিতব্বো.

সত্থা ইদং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে মাতুপোসকত্থেরো সোতাপত্তিফলে পতিট্ঠহি. তদা মাতাপিতরো মহারাজকুলানি অহেসুং, তাপসো সারিপুত্তো, পোরিসাদো অঙ্গুলিমালো, কনিট্ঠা উপ্পলৰণ্ণা, অগ্গমহেসী রাহুলমাতা, অলীনসত্তুকুমারো পন অহমেৰ অহোসিন্তি.

জযদ্দিসজাতকৰণ্ণনা ততিযা.

[৫১৪] ৪. ছদ্দন্তজাতকৰণ্ণনা

কিং নু সোচসীতি ইদং সত্থা জেতৰনে ৰিহরন্তো একং দহরভিক্খুনিং আরব্ভ কথেসি. সা কির সাৰত্থিযং কুলধীতা ঘরাৰাসে আদীনৰং দিস্ৰা সাসনে পব্বজিত্ৰা একদিৰসং ভিক্খুনীহি সদ্ধিং ধম্মসৰনায গন্ত্ৰা অলঙ্কতধম্মাসনে নিসীদিত্ৰা ধম্মং দেসেন্তস্স দসবলস্স অপরিমাণপুঞ্ঞপভাৰাভিনিব্বত্তং উত্তমরূপসম্পত্তিযুত্তং অত্তভাৰং ওলোকেত্ৰা ‘‘পরিচিণ্ণপুব্বা নু খো মে ভৰস্মিং ৰিচরন্তিযা ইমস্স মহাপুরিসস্স পাদপরিচারিকা’’তি চিন্তেসি. অথস্সা তঙ্খণঞ্ঞেৰ জাতিস্সরঞাণং উপ্পজ্জি – ‘‘ছদ্দন্তৰারণকালে অহং ইমস্স মহাপুরিসস্স পাদপরিচারিকা ভূতপুব্বা’’তি. অথস্সা সরন্তিযা মহন্তং পীতিপামোজ্জং উপ্পজ্জি. সা পীতিৰেগেন মহাহসিতং হসিত্ৰা পুন চিন্তেসি – ‘‘পাদপরিচারিকা নাম সামিকানং হিতজ্ঝাসযা অপ্পকা, অহিতজ্ঝাসযাৰ বহুতরা, হিতজ্ঝাসযা নু খো অহং ইমস্স মহাপুরিসস্স অহোসিং, অহিতজ্ঝাসযা’’তি. সা অনুস্সরমানা ‘‘অহং অপ্পমত্তকং দোসং হদযে ঠপেত্ৰা ৰীসরতনসতিকং ছদ্দন্তমহাগজিস্সরং সোনুত্তরং নাম নেসাদং পেসেত্ৰা ৰিসপীতসল্লেন ৰিজ্ঝাপেত্ৰা জীৰিতক্খযং পাপেসি’’ন্তি অদ্দস. অথস্সা সোকো উদপাদি, হদযং উণ্হং অহোসি, সোকং সন্ধারেতুং অসক্কোন্তী অস্সসিত্ৰা পস্সসিত্ৰা মহাসদ্দেন পরোদি. তং দিস্ৰা সত্থা সিতং পাতু করিত্ৰা ‘‘কো নু খো, ভন্তে, হেতু, কো পচ্চযো সিতস্স পাতুকম্মাযা’’তি ভিক্খুসঙ্ঘেন পুট্ঠো ‘‘ভিক্খৰে, অযং দহরভিক্খুনী পুব্বে মযি কতং অপরাধং সরিত্ৰা রোদতী’’তি ৰত্ৰা অতীতং আহরি.

অতীতে হিমৰন্তপদেসে ছদ্দন্তদহং উপনিস্সায অট্ঠসহস্সা হত্থিনাগা ৰসিংসু ইদ্ধিমন্তা ৰেহাসঙ্গমা. তদা বোধিসত্তো জেট্ঠকৰারণস্স পুত্তো হুত্ৰা নিব্বত্তি, সো সব্বসেতো অহোসি রত্তমুখপাদো. সো অপরভাগে ৰুদ্ধিপ্পত্তো অট্ঠাসীতিহত্থুব্বেধো অহোসি ৰীসরতনসতাযামো. অট্ঠপণ্ণাসহত্থায রজতদামসদিসায সোণ্ডায সমন্নাগতো. দন্তা পনস্স পরিক্খেপতো পন্নরসহত্থা অহেসুং দীঘতো তিংসহত্থা ছব্বণ্ণরংসীহি সমন্নাগতা. সো অট্ঠন্নং নাগসহস্সানং জেট্ঠকো অহোসি, পঞ্চসতে পচ্চেকবুদ্ধে পূজেসি. তস্স দ্ৰে অগ্গমহেসিযো অহেসুং – চূল়সুভদ্দা, মহাসুভদ্দা চাতি. নাগরাজা অট্ঠনাগসহস্সপরিৰারো কঞ্চনগুহাযং ৰসতি. সো পন ছদ্দন্তদহো আযামতো চ ৰিত্থারতো চ পণ্ণাসযোজনো হোতি. তস্স মজ্ঝে দ্ৰাদসযোজনপ্পমাণে ঠানে সেৰালো ৰা পণকং ৰা নত্থি, মণিক্খন্ধৰণ্ণউদকমেৰ সন্তিট্ঠতি, তদনন্তরং যোজনৰিত্থতং সুদ্ধং কল্লহারৰনং, তং উদকং পরিক্খিপিত্ৰা ঠিতং, তদনন্তরং যোজনৰিত্থতমেৰ সুদ্ধং নীলুপ্পলৰনং তং পরিক্খিপিত্ৰা ঠিতং, ততো যোজনযোজনৰিত্থতানেৰ রত্তুপ্পলসেতুপ্পলরত্তপদুমসেতপদুমকুমুদৰনানি পুরিমং পুরিমং পরিক্খিপিত্ৰা ঠিতানি. ইমেসং পন সত্তন্নং ৰনানং অনন্তরং সব্বেসম্পি তেসং কল্লহারাদিৰনানং ৰসেন ওমিস্সকৰনং যোজনৰিত্থতমেৰ তানি পরিক্খিপিত্ৰা ঠিতং. তদনন্তরং নাগানং কটিপ্পমাণে উদকে যোজনৰিত্থতমেৰ রত্তসালিৰনং, তদনন্তরং উদকপরিযন্তে যোজনৰিত্থতমেৰ নীলপীতলোহিতওদাতসুরভিসুখুমকুসুমসমাকিণ্ণং খুদ্দকগচ্ছৰনং, ইতি ইমানি দস ৰনানি যোজনৰিত্থতানেৰ. ততো খুদ্দকরাজমাসমহারাজমাসমুগ্গৰনং, তদনন্তরং তিপুসএলালুকলাবুকুম্ভণ্ডৰল্লিৰনানি, ততো পূগরুক্খপ্পমাণং উচ্ছুৰনং, ততো হত্থিদন্তপ্পমাণফলং কদলিৰনং, ততো সালৰনং, তদনন্তরং চাটিপ্পমাণফলং পনসৰনং, ততো মধুরফলং চিঞ্চৰনং, ততো অম্বৰনং, ততো কপিট্ঠৰনং, ততো ওমিস্সকো মহাৰনসণ্ডো, ততো ৰেল়ুৰনং, অযমস্স তস্মিং কালে সম্পত্তি. সংযুত্তট্ঠকথাযং পন ইদানি পৰত্তমানসম্পত্তিযেৰ কথিতা.

ৰেল়ুৰনং পন পরিক্খিপিত্ৰা সত্ত পব্বতা ঠিতা. তেসং বাহিরন্ততো পট্ঠায পঠমো চূল়কাল়পব্বতো নাম, দুতিযো মহাকাল়পব্বতো নাম, ততো উদকপব্বতো নাম, ততো চন্দিমপস্সপব্বতো নাম, ততো সূরিযপস্সপব্বতো নাম, ততো মণিপস্সপব্বতো নাম, সত্তমো সুৰণ্ণপস্সপব্বতো নাম. সো উব্বেধতো সত্তযোজনিকো ছদ্দন্তদহং পরিক্খিপিত্ৰা পত্তস্স মুখৰট্টি ৰিয ঠিতো. তস্স অব্ভন্তরিমং পস্সং সুৰণ্ণৰণ্ণং, ততো নিক্খন্তেন ওভাসেন ছদ্দন্তদহো সমুগ্গতবালসূরিযো ৰিয হোতি. বাহিরপব্বতেসু পন একো উব্বেধতো ছযোজনিকো, একো পঞ্চ, একো চত্তারি, একো তীণি, একো দ্ৰে, একো যোজনিকো, এৰং সত্তপব্বতপরিক্খিত্তস্স পন তস্স দহস্স পুব্বুত্তরকণ্ণে উদকৰাতপ্পহরণোকাসে মহানিগ্রোধরুক্খো অত্থি. তস্স খন্ধো পরিক্খেপতো পঞ্চযোজনিকো, উব্বেধতো সত্তযোজনিকো, চতূসু দিসাসু চতস্সো সাখা ছযোজনিকা, উদ্ধং উগ্গতসাখাপি ছযোজনিকাৰ, ইতি সো মূলতো পট্ঠায উব্বেধেন তেরসযোজনিকো, সাখানং ওরিমন্ততো যাৰ পারিমন্তা দ্ৰাদসযোজনিকো, অট্ঠহি পারোহসহস্সেহি পটিমণ্ডিতো মুণ্ডমণিপব্বতো ৰিয ৰিলাসমানো তিট্ঠতি. ছদ্দন্তদহস্স পন পচ্ছিমদিসাভাগে সুৰণ্ণপস্সপব্বতে দ্ৰাদসযোজনিকা কঞ্চনগুহা তিট্ঠতি. ছদ্দন্তো নাম নাগরাজা ৰস্সারত্তে হেমন্তে অট্ঠসহস্সনাগপরিৰুতো কঞ্চনগুহাযং ৰসতি. গিম্হকালে উদকৰাতং সম্পটিচ্ছমানো মহানিগ্রোধমূলে পারোহন্তরে তিট্ঠতী.

অথস্স একদিৰসং ‘‘মহাসালৰনং পুপ্ফিত’’ন্তি তরুণনাগা আগন্ত্ৰা আরোচযিংসু. সো সপরিৰারো ‘‘সালকীল়ং কীল়িস্সামী’’তি সালৰনং গন্ত্ৰা একং সুপুপ্ফিতং সালরুক্খং কুম্ভেন পহরি. তদা চূল়সুভদ্দা পটিৰাতপস্সে ঠিতা, তস্সা সরীরে সুক্খদণ্ডকমিস্সকানি পুরাণপণ্ণানি চেৰ তম্বকিপিল্লিকানি চ পতিংসু. মহাসুভদ্দা অধোৰাতপস্সে ঠিতা, তস্সা সরীরে পুপ্ফরেণুকিঞ্জক্খপত্তানি পতিংসু. চূল়সুভদ্দা ‘‘অযং নাগরাজা অত্তনো পিযভরিযায উপরি পুপ্ফরেণুকিঞ্জক্খপত্তানি পাতেসি, মম সরীরে সুক্খদণ্ডকমিস্সানি পুরাণপণ্ণানি চেৰ তম্বকিপিল্লিকানি চ পাতেসি, হোতু, কাতব্বং জানিস্সামী’’তি মহাসত্তে ৰেরং বন্ধি.

অপরম্পি দিৰসং নাগরাজা সপরিৰারো ন্হানত্থায ছদ্দন্তদহং ওতরি. অথ দ্ৰে তরুণনাগা সোণ্ডাহি উসিরকলাপে গহেত্ৰা কেলাসকূটং মজ্জন্তা ৰিয ন্হাপেসুং. তস্মিং ন্হত্ৰা উত্তিণ্ণে দ্ৰে করেণুযো ন্হাপেসুং. তাপি উত্তরিত্ৰা মহাসত্তস্স সন্তিকে অট্ঠংসু. ততো অট্ঠসহস্সনাগাসরং ওতরিত্ৰা উদককীল়ং কীল়িত্ৰা সরতো নানাপুপ্ফানি আহরিত্ৰা রজতথূপং অলঙ্করোন্তা ৰিয মহাসত্তং অলঙ্করিত্ৰা পচ্ছা দ্ৰে করেণুযো অলঙ্করিংসু. অথেকো হত্থী সরে ৰিচরন্তো সত্তুদ্দযং নাম মহাপদুমং লভিত্ৰা আহরিত্ৰা মহাসত্তস্স অদাসি. সো তং সোণ্ডায গহেত্ৰা রেণুং কুম্ভে ওকিরিত্ৰা জেট্ঠকায মহাসুভদ্দায অদাসি. তং দিস্ৰা ইতরা ‘‘ইদম্পি সত্তুদ্দযং মহাপদুমং অত্তনো পিযভরিযায এৰ অদাসি, ন ময্হ’’ন্তি পুনপি তস্মিং ৰেরং বন্ধি.

অথেকদিৰসং বোধিসত্তে মধুরফলানি চেৰ ভিসমুল়ালানি চ পোক্খরমধুনা যোজেত্ৰা পঞ্চসতে পচ্চেকবুদ্ধে ভোজেন্তে চূল়সুভদ্দা অত্তনা লদ্ধফলাফলং পচ্চেকবুদ্ধানং দত্ৰা ‘‘ভন্তে, ইতো চৰিত্ৰা মদ্দরাজকুলে নিব্বত্তিত্ৰা সুভদ্দা নাম রাজকঞ্ঞা হুত্ৰা ৰযপ্পত্তা বারাণসিরঞ্ঞো অগ্গমহেসিভাৰং পত্ৰা তস্স পিযা মনাপা তং অত্তনো রুচিং কারেতুং সমত্থা হুত্ৰা তস্স আচিক্খিত্ৰা একং লুদ্দকং পেসেত্ৰা ইমং হত্থিং ৰিসপীতেন সল্লেন ৰিজ্ঝাপেত্ৰা জীৰিতক্খযং পাপেত্ৰা ছব্বণ্ণরংসিং ৰিস্সজ্জেন্তে যমকদন্তে আহরাপেতুং সমত্থা হোমী’’তি পত্থনং ঠপেসি. সা ততো পট্ঠায গোচরং অগ্গহেত্ৰা সুস্সিত্ৰা নচিরস্সেৰ কালং কত্ৰা মদ্দরট্ঠে রাজঅগ্গমহেসিযা কুচ্ছিম্হি নিব্বত্তি, সুভদ্দাতিস্সা নামং করিংসু. অথ নং ৰযপ্পত্তং বারাণসিরঞ্ঞো অদংসু. সা তস্স পিযা অহোসি মনাপা, সোল়সন্নং ইত্থিসহস্সানং জেট্ঠিকা হুত্ৰা জাতিস্সরঞাণঞ্চ পটিলভি. সা চিন্তেসি – ‘‘সমিদ্ধা মে পত্থনা, ইদানি তস্স নাগস্স যমকদন্তে আহরাপেস্সামী’’তি. ততো সরীরং তেলেন মক্খেত্ৰা কিলিট্ঠৰত্থং নিৰাসেত্ৰা গিলানাকারং দস্সেত্ৰা সিরিগব্ভং পৰিসিত্ৰা মঞ্চকে নিপজ্জি. রাজা ‘‘কুহিং সুভদ্দা’’তি ৰত্ৰা ‘‘গিলানা’’তি সুত্ৰা সিরিগব্ভং পৰিসিত্ৰা মঞ্চকে নিসীদিত্ৰা তস্সা পিট্ঠিং পরিমজ্জন্তো পঠমং গাথমাহ –

৯৭.

‘‘কিং নু সোচসিনুচ্চঙ্গি, পণ্ডূসি ৰরৰণ্ণিনি;

মিলাযসি ৰিসালক্খি, মালাৰ পরিমদ্দিতা’’তি.

তত্থ অনুচ্চঙ্গীতি কঞ্চনসন্নিভসরীরে. মালাৰ পরিমদ্দিতাতি হত্থেহি পরিমদ্দিতা পদুমমালা ৰিয.

তং সুত্ৰা সা ইতরং গাথমাহ –

৯৮.

‘‘দোহল়ো মে মহারাজ, সুপিনন্তেনুপজ্ঝগা;

ন সো সুলভরূপোৰ, যাদিসো মম দোহল়ো’’তি.

তত্থ ন সোতি যাদিসো মম সুপিনন্তেনুপজ্ঝগা সুপিনে পস্সন্তিযা মযা দিট্ঠো দোহল়ো, সো সুলভরূপো ৰিয ন হোতি, দুল্লভো সো, ময্হং পন তং অলভন্তিযা জীৰিতং নত্থীতি অৰচ.

তং সুত্ৰা রাজা গাথমাহ –

৯৯.

‘‘যে কেচি মানুসা কামা, ইধ লোকম্হি নন্দনে;

সব্বে তে পচুরা ময্হং, অহং তে দম্মি দোহল়’’ন্তি.

তত্থ পচুরাতি বহূ সুলভা.

তং সুত্ৰা দেৰী, ‘‘মহারাজ, দুল্লভো মম দোহল়ো, ন তং ইদানি কথেমি, যাৰত্তকা পন তে ৰিজিতে লুদ্দা, তে সব্বে সন্নিপাতেথ, তেসং মজ্ঝে কথেস্সামী’’তি দীপেন্তী অনন্তরং গাথমাহ –

১০০.

‘‘লুদ্দা দেৰ সমাযন্তু, যে কেচি ৰিজিতে তৰ;

এতেসং অহমক্খিস্সং, যাদিসো মম দোহল়ো’’তি.

রাজা ‘‘সাধূ’’তি সিরিগব্ভা নিক্খমিত্ৰা ‘‘যাৰতিকা তিযোজনসতিকে কাসিকরট্ঠে লুদ্দা, তেসং সন্নিপাতত্থায ভেরিং চরাপেথা’’তি অমচ্চে আণাপেসি. তে তথা অকংসু. নচিরস্সেৰ কাসিরট্ঠৰাসিনো লুদ্দা যথাবলং পণ্ণাকারং গহেত্ৰা আগন্ত্ৰা আগতভাৰং রঞ্ঞো আরোচাপেসুং. তে সব্বেপি সট্ঠিসহস্সমত্তা অহেসুং. রাজা তেসং আগতভাৰং ঞত্ৰা ৰাতপানে ঠিতো হত্থং পসারেত্ৰা তেসং আগতভাৰং দেৰিযা কথেন্তো আহ –

১০১.

‘‘ইমে তে লুদ্দকা দেৰি, কতহত্থা ৰিসারদা;

ৰনঞ্ঞূ চ মিগঞ্ঞূ চ, মমত্থে চত্তজীৰিতা’’তি.

তত্থ ইমে তেতি যে ত্ৰং সন্নিপাতাপেসি, ইমে তে. কতহত্থাতি ৰিজ্ঝনছেদনেসু কতহত্থা কুসলা সুসিক্খিতা. ৰিসারদাতি নিব্ভযা. ৰনঞ্ঞূ চ মিগঞ্ঞূ চাতি ৰনানি চ মিগে চ জানন্তি. মমত্থেতি সব্বেপি চেতে মমত্থে চত্তজীৰিতা, যমহং ইচ্ছামি, তং করোন্তীতি.

তং সুত্ৰা দেৰী তে আমন্তেত্ৰা ইতরং গাথমাহ –

১০২.

‘‘লুদ্দপুত্তা নিসামেথ, যাৰন্তেত্থ সমাগতা;

ছব্বিসাণং গজং সেতং, অদ্দসং সুপিনে অহং;

তস্স দন্তেহি মে অত্থো, অলাভে নত্থি জীৰিত’’ন্তি.

তত্থ নিসামেথাতি সুণাথ. ছব্বিসাণন্তি ছব্বণ্ণৰিসাণং.

তং সুত্ৰা লুদ্দপুত্তা আহংসু –

১০৩.

‘‘ন নো পিতূনং ন পিতামহানং, দিট্ঠো সুতো কুঞ্জরো ছব্বিসাণো;

যমদ্দসা সুপিনে রাজপুত্তী, অক্খাহি নো যাদিসো হত্থিনাগো’’তি.

তত্থ পিতূনন্তি করণত্থে সামিৰচনং. ইদং ৰুত্তং হোতি – দেৰি নেৰ অম্হাকং পিতূহি, ন পিতামহেহি এৰরূপো কুঞ্জরো দিট্ঠপুব্বো, পগেৰ অম্হেহি, তস্মা অত্তনা দিট্ঠলক্খণৰসেন অক্খাহি নো, যাদিসো তযা দিট্ঠো হত্থিনাগোতি.

অনন্তরগাথাপি তেহেৰ ৰুত্তা –

১০৪.

‘‘দিসা চতস্সো ৰিদিসা চতস্সো, উদ্ধং অধো দস দিসা ইমাযো;

কতমং দিসং তিট্ঠতি নাগরাজা, যমদ্দসা সুপিনে ছব্বিসাণ’’ন্তি.

তত্থ দিসাতি দিসাসু. কতমন্তি এতাসু দিসাসু কতমায দিসাযাতি.

এৰং ৰুত্তে সুভদ্দা সব্বে লুদ্দে ওলোকেত্ৰা তেসং অন্তরে পত্থটপাদং ভত্তপুটসদিসজঙ্ঘং মহাজাণুকং মহাফাসুকং বহলমস্সুতম্বদাঠিকং নিব্বিদ্ধপিঙ্গলং দুস্সণ্ঠানং বীভচ্ছং সব্বেসং মত্থকমত্থকেন পঞ্ঞাযমানং মহাসত্তস্স পুব্বৰেরিং সোনুত্তরং নাম নেসাদং দিস্ৰা ‘‘এস মম ৰচনং কাতুং সক্খিস্সতী’’তি রাজানং অনুজানাপেত্ৰা তং আদায সত্তভূমিকপাসাদস্স উপরিমতলং আরুয্হ উত্তরসীহপঞ্জরং ৰিৰরিত্ৰা উত্তরহিমৰন্তাভিমুখং হত্থং পসারেত্ৰা চতস্সো গাথা অভাসি –

১০৫.

‘‘ইতো উজুং উত্তরিযং দিসাযং, অতিক্কম্ম সো সত্ত গিরী ব্রহ্মন্তে;

সুৰণ্ণপস্সো নাম গিরী উল়ারো, সুপুপ্ফিতো কিম্পুরিসানুচিণ্ণো.

১০৬.

‘‘আরুয্হ সেলং ভৰনং কিন্নরানং, ওলোকয পব্বতপাদমূলং;

অথ দক্খসী মেঘসমানৰণ্ণং, নিগ্রোধরাজং অট্ঠসহস্সপাদং.

১০৭.

‘‘তত্থচ্ছতী কুঞ্জরো ছব্বিসাণো, সব্বসেতো দুপ্পসহো পরেভি;

রক্খন্তি নং অট্ঠসহস্সনাগা, ঈসাদন্তা ৰাতজৰপ্পহারিনো.

১০৮.

‘‘তিট্ঠন্তি তে তুমূলং পস্সসন্তা, কুপ্পন্তি ৰাতস্সপি এরিতস্স;

মনুস্সভূতং পন তত্থ দিস্ৰা, ভস্মং করেয্যুং নাস্স রজোপি তস্সা’’তি.

তত্থ ইতোতি ইমম্হা ঠানা. উত্তরিযন্তি উত্তরায. উল়ারোতি মহা ইতরেহি ছহি পব্বতেহি উচ্চতরো. ওলোকযাতি আলোকেয্যাসি. তত্থচ্ছতীতি তস্মিং নিগ্রোধমূলে গিম্হসমযে উদকৰাতং সম্পটিচ্ছন্তো তিট্ঠতি. দুপ্পসহোতি অঞ্ঞে তং উপগন্ত্ৰা পসয্হকারং কাতুং সমত্থা নাম নত্থীতি দুপ্পসহো পরেভি. ঈসাদন্তাতি রথীসায সমানদন্তা. ৰাতজৰপ্পহারিনোতি ৰাতজৰেন গন্ত্ৰা পচ্চামিত্তে পহরণসীলা এৰরূপা অট্ঠসহস্সনাগা নাগরাজানং রক্খন্তি. তুমূলন্তি ভিংসনকং মহাসদ্দানুবন্ধং অস্সাসং মুঞ্চন্তা তিট্ঠন্তি. এরিতস্সাতি ৰাতপহরিতস্স যং সদ্দানুবন্ধং এরিতং চলনং কম্পনং, তস্সপি কুপ্পন্তি, এৰংফরুসা তে নাগা. নাস্সাতি তস্স নাসৰাতেন ৰিদ্ধংসেত্ৰা ভস্মং কতস্স তস্স রজোপি ন ভৰেয্যাতি.

তং সুত্ৰা সোনুত্তরো মরণভযভীতো আহ –

১০৯.

‘‘বহূ হিমে রাজকুলম্হি সন্তি, পিল়ন্ধনা জাতরূপস্স দেৰি;

মুত্তা মণী ৰেল়ুরিযামযা চ, কিং কাহসি দন্তপিল়ন্ধনেন;

মারেতুকামা কুঞ্জরং ছব্বিসাণং, উদাহু ঘাতেস্সসি লুদ্দপুত্তে’’তি.

তত্থ পিল়ন্ধনাতি আভরণানি. ৰেল়ুরিযামযাতি ৰেল়ুরিযমযানি. ঘাতেস্সসীতি উদাহু পিল়ন্ধনাপদেসেন লুদ্দপুত্তে ঘাতাপেতুকামাসীতি পুচ্ছতি.

ততো দেৰী গাথমাহ –

১১০.

‘‘সা ইস্সিতা দুক্খিতা চস্মি লুদ্দ, উদ্ধঞ্চ সুস্সামি অনুস্সরন্তী;

করোহি মে লুদ্দক এতমত্থং, দস্সামি তে গামৰরানি পঞ্চা’’তি.

তত্থ সাতি সা অহং. অনুস্সরন্তীতি তেন ৰারণেন পুরে মযি কতং ৰেরং অনুস্সরমানা. দস্সামি তেতি এতস্মিং তে অত্থে নিপ্ফাদিতে সংৰচ্ছরে সতসহস্সুট্ঠানকে পঞ্চ গামৰরে দদামীতি.

এৰঞ্চ পন ৰত্ৰা ‘‘সম্ম লুদ্দপুত্ত অহং ‘এতং ছদ্দন্তহত্থিং মারাপেত্ৰা যমকদন্তে আহরাপেতুং সমত্থা হোমী’তি পুব্বে পচ্চেকবুদ্ধানং দানং দত্ৰা পত্থনং পট্ঠপেসিং, মযা সুপিনন্তেন দিট্ঠং নাম নত্থি, সা পন মযা পত্থিতপত্থনা সমিজ্ঝিস্সতি, ত্ৰং গচ্ছন্তো মা ভাযী’’তি তং সমস্সাসেত্ৰা পেসেসি. সো ‘‘সাধু, অয্যে’’তি তস্সা ৰচনং সম্পটিচ্ছিত্ৰা ‘‘তেন হি মে পাকটং কত্ৰা তস্স ৰসনট্ঠানং কথেহী’’তি পুচ্ছন্তো ইমং গাথমাহ –

১১১.

‘‘কত্থচ্ছতী কত্থ মুপেতি ঠানং, ৰীথিস্স কা ন্হানগতস্স হোতি;

কথঞ্হি সো ন্হাযতি নাগরাজা, কথং ৰিজানেমু গতিং গজস্সা’’তি.

তত্থ কত্থচ্ছতীতি কত্থ ৰসতি. কত্থ মুপেতীতি কত্থ উপেতি, কত্থ তিট্ঠতীতি অত্থো. ৰীথিস্স কাতি তস্স ন্হানগতস্স কা ৰীথি হোতি, কতরমগ্গেন সো গচ্ছতি. কথং ৰিজানেমু গতিন্তি তযা অকথিতে মযং কথং তস্স নাগরাজস্স গতিং ৰিজানিস্সাম, তস্মা কথেহি নোতি অত্থো.

ততো সা জাতিস্সরঞাণেন পচ্চক্খতো দিট্ঠট্ঠানং তস্স আচিক্খন্তী দ্ৰে গাথা অভাসি –

১১২.

‘‘তত্থেৰ সা পোক্খরণী অদূরে, রম্মা সুতিত্থা চ মহোদিকা চ;

সম্পুপ্ফিতা ভমরগণানুচিণ্ণা, এত্থ হি সো ন্হাযতি নাগরাজা.

১১৩.

‘‘সীসং নহাতুপ্পলমালভারী, সব্বসেতো পুণ্ডরীকত্তচঙ্গী;

আমোদমানো গচ্ছতি সন্নিকেতং, পুরক্খত্ৰা মহেসিং সব্বভদ্দ’’ন্তি.

তত্থ তত্থেৰাতি তস্স ৰসনট্ঠানেযেৰ. পোক্খরণীতি ছদ্দন্তদহং সন্ধাযাহ. সম্পুপ্ফিতাতি দুৰিধেহি কুমুদেহি তিৰিধেহি উপ্পলেহি পঞ্চৰণ্ণেহি চ পদুমেহি সমন্ততো পুপ্ফিতা. এত্থ হি সোতি সো নাগরাজা এত্থ ছদ্দন্তদহে ন্হাযতি. উপ্পলমালভারীতি উপ্পলাদীনং জলজথলজানং পুপ্ফানং মালং ধারেন্তো. পুণ্ডরীকত্তচঙ্গীতি পুণ্ডরীকসদিসতচেন ওদাতেন অঙ্গেন সমন্নাগতো. আমোদমানোতি আমোদিতপমোদিতো. সন্নিকেতন্তি অত্তনো ৰসনট্ঠানং. পুরক্খত্ৰাতি সব্বভদ্দং নাম মহেসিং পুরতো কত্ৰা অট্ঠহি নাগসহস্সেহি পরিৰুতো অত্তনো ৰসনট্ঠানং গচ্ছতীতি.

তং সুত্ৰা সোনুত্তরো ‘‘সাধু অয্যে, অহং তং ৰারণং মারেত্ৰা তস্স দন্তে আহরিস্সামী’’তি সম্পটিচ্ছি. অথস্স সা তুট্ঠা সহস্সং দত্ৰা ‘‘গেহং তাৰ গচ্ছ, ইতো সত্তাহচ্চযেন তত্থ গমিস্সসী’’তি তং উয্যোজেত্ৰা কম্মারে পক্কোসাপেত্ৰা ‘‘তাতা অম্হাকং ৰাসিফরসু-কুদ্দাল-নিখাদন-মুট্ঠিকৰেল়ুগুম্বচ্ছেদন-সত্থ-তিণলাযন-অসিলোহদণ্ডককচখাণুক- অযসিঙ্ঘাটকেহি অত্থো, সব্বং সীঘং কত্ৰা আহরথা’’তি আণাপেত্ৰা চম্মকারে পক্কোসাপেত্ৰা ‘‘তাতা অম্হাকং কুম্ভভারগাহিতং চম্মভস্তং কাতুং ৰট্টতি, চম্মযোত্তৰরত্তহত্থিপাদউপাহনচম্মছত্তেহিপি নো অত্থো, সব্বং সীঘং কত্ৰা আহরথা’’তি আণাপেসি. তে উভোপি সব্বানি তানি সীঘং কত্ৰা আহরিত্ৰা অদংসু. সা তস্স পাথেয্যং সংৰিদহিত্ৰা অরণিসহিতং আদিং কত্ৰা সব্বং উপকরণঞ্চ বদ্ধসত্তুমাদিং কত্ৰা পাথেয্যঞ্চ চম্মভস্তাযং পক্খিপি, তং সব্বম্পি কুম্ভভারমত্তং অহোসি.

সোনুত্তরোপি অত্তনো পরিৰচ্ছং কত্ৰা সত্তমে দিৰসে আগন্ত্ৰা দেৰিং ৰন্দিত্ৰা অট্ঠাসি. অথ নং সা ‘‘নিট্ঠিতং তে সম্ম সব্বূপকরণং, ইমং তাৰ পসিব্বকং গণ্হা’’তি আহ. সো পন মহাথামো পঞ্চন্নং হত্থীনং বলং ধারেতি, তস্মা তম্বূলপসিব্বকং ৰিয উক্খিপিত্ৰা উপকচ্ছন্তরে ঠপেত্ৰা রিত্তহত্থো ৰিয অট্ঠাসি. সুভদ্দা লুদ্দস্স পুত্তদারানং পরিব্বযং দত্ৰা রঞ্ঞো আচিক্খিত্ৰা সোনুত্তরং উয্যোজেসি. সোপি রাজানঞ্চ দেৰিঞ্চ ৰন্দিত্ৰা রাজনিৰেসনা ওরুয্হ রথে ঠত্ৰা মহন্তেন পরিৰারেন নগরা নিক্খমিত্ৰা গামনিগমজনপদপরম্পরায পচ্চন্তং পত্ৰা জানপদে নিৰত্তেত্ৰা পচ্চন্তৰাসীহি সদ্ধিং অরঞ্ঞং পৰিসিত্ৰা মনুস্সপথং অতিক্কম্ম পচ্চন্তৰাসিনোপি নিৰত্তেত্ৰা এককোৰ গচ্ছন্তো তিংসযোজনং পত্ৰা পঠমং দব্বগহনং কাসগহনং তিণগহনং তুলসিগহনং সরগহনং তিরিৰচ্ছগহনন্তি ছ গহনানি, কণ্টকৰেল়ুগুম্বগহনানি ৰেত্তগহনং ওমিস্সকগহনং নল়গহনং সরগহনসদিসং উরগেনপি দুব্বিনিৰিজ্ঝং ঘনৰনগহনং রুক্খগহনং ৰেল়ুগহনং অপরম্পি ৰেল়ুগুম্বগহনং কললগহনং উদকগহনং পব্বতগহনন্তি অট্ঠারস গহনানি পটিপাটিযা পত্ৰা দব্বগহনাদীনি অসিতেন লাযিত্ৰা তুলসিগহনাদীনি ৰেল়ুগুম্বচ্ছেদনসত্থেন ছিন্দিত্ৰা রুক্খে ফরসুনা কোট্টেত্ৰা অতিমহন্তে রুক্খে নিখাদনেন ৰিজ্ঝিত্ৰা মগ্গং করোন্তো ৰেল়ুৰনে নিস্সেণিং কত্ৰা ৰেল়ুগুম্বং আরুয্হ ৰেল়ুং ছিন্দিত্ৰা অপরস্স ৰেল়ুগুম্বস্স উপরি পাতেত্ৰা ৰেল়ুগুম্বমত্থকেন গন্ত্ৰা কললগহনে সুক্খরুক্খপদরং অত্থরিত্ৰা তেন গন্ত্ৰা অপরং অত্থরিত্ৰা ইতরং উক্খিপিত্ৰা পুন পুরতো অত্থরন্তো তং অতিক্কমিত্ৰা উদকগহনে দোণিং কত্ৰা তায উদকগহনং তরিত্ৰা পব্বতপাদে ঠত্ৰা অযসিঙ্ঘাটকং যোত্তেন বন্ধিত্ৰা উদ্ধং খিপিত্ৰা পব্বতে লগ্গাপেত্ৰা যোত্তেনারুয্হ ৰজিরগ্গেন লোহদণ্ডেন পব্বতং ৰিজ্ঝিত্ৰা খাণুকং কোট্টেত্ৰা তত্থ ঠত্ৰা সিঙ্ঘাটকং আকড্ঢিত্ৰা পুন উপরি লগ্গাপেত্ৰা তত্থ ঠিতো চম্মযোত্তং ওলম্বেত্ৰা তং আদায ওতরিত্ৰা হেট্ঠিমখাণুকে বন্ধিত্ৰা ৰামহত্থেন যোত্তং গহেত্ৰা দক্খিণহত্থেন মুগ্গরং আদায যোত্তং পহরিত্ৰা খাণুকং নীহরিত্ৰা পুন অভিরুহতি. এতেনুপাযেন পব্বতমত্থকং অভিরুয্হ পরতো ওতরন্তো পুরিমনযেনেৰ পঠমং পব্বতমত্থকে খাণুকং কোট্টেত্ৰা চম্মপসিব্বকে যোত্তং বন্ধিত্ৰা খাণুকে ৰেঠেত্ৰা সযং অন্তোপসিব্বকে নিসীদিত্ৰা মক্কটকানং মক্কটসুত্তৰিস্সজ্জনাকারেন যোত্তং ৰিনিৰেঠেন্তো ওতরতি. চম্মছত্তেন ৰাতং গাহাপেত্ৰা সকুণো ৰিয ওতরতীতিপি ৰদন্তিযেৰ.

এৰং তস্স সুভদ্দায ৰচনং আদায নগরা নিক্খমিত্ৰা সত্তরস গহনানি অতিক্কমিত্ৰা পব্বতগহনং পত্ৰা তত্রাপি ছ পব্বতে অতিক্কমিত্ৰা সুৰণ্ণপস্সপব্বতমত্থকং আরুল়্হভাৰং আৰিকরোন্তো সত্থা আহ –

১১৪.

‘‘তত্থেৰ সো উগ্গহেত্ৰান ৰাক্যং, আদায তূণিঞ্চ ধনুঞ্চ লুদ্দো;

ৰিতুরিযতি সত্ত গিরী ব্রহন্তে, সুৰণ্ণপস্সং নাম গিরিং উল়ারং.

১১৫.

‘‘আরুয্হ সেলং ভৰনং কিন্নরানং, ওলোকযী পব্বতপাদমূলং;

তত্থদ্দসা মেঘসমানৰণ্ণং, নিগ্রোধরাজং অট্ঠসহস্সপাদং.

১১৬.

‘‘তত্থদ্দসা কুঞ্জরং ছব্বিসাণং, সব্বসেতং দুপ্পসহং পরেভি;

রক্খন্তি নং অট্ঠসহস্সনাগা, ঈসাদন্তা ৰাতজৰপ্পহারিনো.

১১৭.

‘‘তত্থদ্দসা পোক্খরণিং অদূরে, রম্মং সুতিত্থঞ্চ মহোদিকঞ্চ;

সম্পুপ্ফিতং ভমরগণানুচিণ্ণং, যত্থ হি সো ন্হাযতি নাগরাজা.

১১৮.

‘‘দিস্ৰান নাগস্স গতিং ঠিতিঞ্চ, ৰীথিস্সযা ন্হানগতস্স হোতি;

ওপাতমাগচ্ছি অনরিযরূপো, পযোজিতো চিত্তৰসানুগাযা’’তি.

তত্থ সোতি, ভিক্খৰে, সো লুদ্দো তত্থেৰ সত্তভূমিকপাসাদতলে ঠিতায তস্সা সুভদ্দায ৰচনং উগ্গহেত্ৰা সরতূণিঞ্চ মহাধনুঞ্চ আদায পব্বতগহনং পত্ৰা ‘‘কতরো নু খো সুৰণ্ণপস্সপব্বতো নামা’’তি সত্ত মহাপব্বতে ৰিতুরিযতি, তস্মিং কালে তুলেতি তীরেতি. সো এৰং তীরেন্তো সুৰণ্ণপস্সং নাম গিরিং উল়ারং দিস্ৰা ‘‘অযং সো ভৰিস্সতী’’তি চিন্তেসি. ওলোকযীতি তং কিন্নরানং ভৰনভূতং পব্বতং আরুয্হ সুভদ্দায দিন্নসঞ্ঞাৰসেন হেট্ঠা ওলোকেসি. তত্থাতি তস্মিং পব্বতপাদমূলে অৰিদূরেযেৰ তং নিগ্রোধং অদ্দস.

তত্থাতি তস্মিং নিগ্রোধরুক্খমূলে ঠিতং. তত্থাতি তত্থেৰ অন্তোপব্বতে তস্স নিগ্রোধস্সাৰিদূরে যত্থ সো ন্হাযতি, তং পোক্খরণিং অদ্দস. দিস্ৰানাতি সুৰণ্ণপস্সপব্বতা ওরুয্হ হত্থীনং গতকালে হত্থিপাদউপাহনং আরুয্হ তস্স নাগরঞ্ঞো গতট্ঠানং নিবদ্ধৰসনট্ঠানং উপধারেন্তো ‘‘ইমিনা মগ্গেন গচ্ছতি, ইধ ন্হাযতি, ন্হত্ৰা উত্তিণ্ণো, ইধ তিট্ঠতী’’তি সব্বং দিস্ৰা অহিরিকভাৰেন অনরিযরূপো তায চিত্তৰসানুগায পযোজিতো, তস্মা ওপাতং আগচ্ছি পটিপজ্জি, আৰাটং খণীতি অত্থো.

তত্রাযং অনুপুব্বিকথা – ‘‘সো কির মহাসত্তস্স ৰসনোকাসং সত্তমাসাধিকেহি সত্তহি সংৰচ্ছরেহি সত্তহি চ দিৰসেহি পত্ৰা ৰুত্তনযেনেৰ তস্স ৰসনোকাসং সল্লক্খেত্ৰা ‘‘ইধ আৰাটং খণিত্ৰা তস্মিং ঠিতো ৰারণাধিপতিং ৰিসপীতেন সল্লেন ৰিজ্ঝিত্ৰা জীৰিতক্খযং পাপেস্সামী’’তি ৰৰত্থপেত্ৰা অরঞ্ঞং পৰিসিত্ৰা থম্ভাদীনং অত্থায রুক্খে ছিন্দিত্ৰা দব্বসম্ভারে সজ্জেত্ৰা হত্থীসু ন্হানত্থায গতেসু তস্স ৰসনোকাসে মহাকুদ্দালেন চতুরস্সং আৰাটং খণিত্ৰা উদ্ধতপংসুং বীজং ৰপন্তো ৰিয উদকেন ৰিকিরিত্ৰা উদুক্খলপাসাণানং উপরি থম্ভে পতিট্ঠপেত্ৰা তুলা চ কাজে চ দত্ৰা পদরানি অত্থরিত্ৰা কণ্ডপ্পমাণং ছিদ্দং কত্ৰা উপরি পংসুঞ্চ কচৰরঞ্চ পক্খিপিত্ৰা একেন পস্সেন অত্তনো পৰিসনট্ঠানং কত্ৰা এৰং নিট্ঠিতে আৰাটে পচ্চূসকালেযেৰ পতিসীসকং পটিমুঞ্চিত্ৰা কাসাযানি পরিদহিত্ৰা সদ্ধিং ৰিসপীতেন সল্লেন ধনুং আদায আৰাটং ওতরিত্ৰা অট্ঠাসি. তমত্থং পকাসেন্তো সত্থা আহ –

১১৯.

‘‘খণিত্ৰান কাসুং ফলকেহি ছাদযি, অত্তানমোধায ধনুঞ্চ লুদ্দো;

পস্সাগতং পুথুসল্লেন নাগং, সমপ্পযী দুক্কটকম্মকারী.

১২০.

‘‘ৰিদ্ধো চ নাগো কোঞ্চমনাদি ঘোরং, সব্বে চ নাগা নিন্নদুং ঘোররূপং;

তিণঞ্চ কট্ঠঞ্চ রণং করোন্তা, ধাৰিংসু তে অট্ঠ দিসা সমন্ততো.

১২১.

‘‘ৰধিস্সমেতন্তি পরামসন্তো, কাসাৰমদ্দক্খি ধজং ইসীনং;

দুক্খেন ফুট্ঠস্সুদপাদি সঞ্ঞা, অরহদ্ধজো সব্ভি অৰজ্ঝরূপো’’তি.

তত্থ ওধাযাতি ওদহিত্ৰা পৰেসেত্ৰা. পস্সাগতন্তি অত্তনো আৰাটস্স পস্সং আগতং. সো কির দুতিযদিৰসে আগন্ত্ৰা ন্হত্ৰা উত্তিণ্ণো তস্মিং মহাৰিসালমালকে নাম পদেসে অট্ঠাসি. অথস্স সরীরতো উদকং নাভিপদেসেন ওগলিত্ৰা তেন ছিদ্দেন লুদ্দস্স সরীরে পতি. তায সঞ্ঞায সো মহাসত্তস্স আগন্ত্ৰা ঠিতভাৰং ঞত্ৰা তং পস্সাগতং পুথুনা সল্লেন সমপ্পযি ৰিজ্ঝি. দুক্কটকম্মকারীতি তস্স মহাসত্তস্স কাযিকচেতসিকস্স দুক্খস্স উপ্পাদনেন দুক্কটস্স কম্মস্স কারকো.

কোঞ্চমনাদীতি কোঞ্চনাদং অকরি. তস্স কির তং সল্লং নাভিযং পৰিসিত্ৰা পিহকাদীনি সঞ্চুণ্ণেত্ৰা অন্তানি ছিন্দিত্ৰা পিট্ঠিভাগং ফরসুনা পদালেন্তং ৰিয উগ্গন্ত্ৰা আকাসে পক্খন্দি. ভিন্নরজতকুম্ভতো রজনং ৰিয পহারমুখেন লোহিতং পগ্ঘরি, বলৰৰেদনা উপ্পজ্জি. সো ৰেদনং অধিৰাসেতুং অসক্কোন্তো ৰেদনাপ্পত্তো সকলপব্বতং একনিন্নাদং করোন্তো তিক্খত্তুং মহন্তং কোঞ্চনাদং নদি. সব্বে চাতি তেপি সব্বে অট্ঠসহস্সনাগা তং সদ্দং সুত্ৰা মরণভযভীতা ঘোররূপং নিন্নদুং অনুরৰং করিংসু. রণং করোন্তাতি তেন সদ্দেন গন্ত্ৰা ছদ্দন্তৰারণং ৰেদনাপ্পত্তং দিস্ৰা ‘‘পচ্চামিত্তং গণ্হিস্সামা’’তি তিণঞ্চ কট্ঠঞ্চ চুণ্ণৰিচুণ্ণং করোন্তা সমন্তা ধাৰিংসু.

ৰধিস্সমেতন্তি ‘‘ভিক্খৰে, সো ছদ্দন্তৰারণো দিসা পক্কন্তেসু নাগেসু সুভদ্দায করেণুযা পস্সে ঠত্ৰা সন্ধারেত্ৰা সমস্সাসযমানায ৰেদনং অধিৰাসেত্ৰা কণ্ডস্স আগতট্ঠানং সল্লক্খেন্তো ‘সচে ইদং পুরত্থিমদিসাদীহি আগতং অভৰিস্স, কুম্ভাদীহি পৰিসিত্ৰা পচ্ছিমকাযীদীহি নিক্খমিস্স, ইদং পন নাভিযা পৰিসিত্ৰা আকাসং পক্খন্দি, তস্মা পথৰিযং ঠিতেন ৰিস্সট্ঠং ভৰিস্সতী’তি উপধারেত্ৰা ঠিতট্ঠানং উপপরিক্খিতুকামো ‘‘কো জানাতি, কিং ভৰিস্সতি, সুভদ্দং অপনেতুং ৰট্টতী’’তি চিন্তেত্ৰা ‘‘ভদ্দে, অট্ঠসহস্সনাগা মম পচ্চামিত্তং পরিযেসন্তা দিসা পক্খন্দা, ত্ৰং ইধ কিং করোসী’’তি ৰত্ৰা, ‘‘দেৰ, অহং তুম্হে সন্ধারেত্ৰা সমস্সাসেন্তী ঠিতা, খমথ মে’’তি তিক্খত্তুং পদক্খিণং কত্ৰা চতূসু ঠানেসু ৰন্দিত্ৰা তায আকাসং পক্খন্দায নাগরাজা ভূমিং পাদনখেন পহরি, পদরং উপ্পতিত্ৰা গতং. সো ছিদ্দেন ওলোকেন্তো সোনুত্তরং দিস্ৰা ‘‘ৰধিস্সামি ন’’ন্তি চিত্তং উপ্পাদেত্ৰা রজতদামৰণ্ণসোণ্ডং পৰেসেত্ৰা পরামসন্তো বুদ্ধানং ইসীনং ধজং কাসাৰং অদ্দক্খি. লুদ্দো কাসাৰং মহাসত্তস্স হত্থে ঠপেসি. সো তং উক্খিপিত্ৰা পুরতো ঠপেসি. অথস্স তেন তথারূপেনপি দুক্খেন ফুট্ঠস্স ‘‘অরহদ্ধজো নাম সব্ভি পণ্ডিতেহি অৰজ্ঝরূপো, অঞ্ঞদত্থু সক্কাতব্বো গরুকাতব্বোযেৰা’’তি অযং সঞ্ঞা উদপাদি.

সো তেন সদ্ধিং সল্লপন্তো গাথাদ্ৰযমাহ –

১২২.

‘‘অনিক্কসাৰো কাসাৰং, যো ৰত্থং পরিদহিস্সতি;

অপেতো দমসচ্চেন, ন সো কাসাৰমরহতি.

১২৩.

‘‘যো চ ৰন্তকসাৰস্স, সীলেসু সুসমাহিতো;

উপেতো দমসচ্চেন, স ৰে কাসাৰমরহতী’’তি.

তস্সত্থো – সম্ম লুদ্দপুত্ত যো পুরিসো রাগাদীহি কসাৰেহি অনিক্কসাৰো ইন্দ্রিযদমেন চেৰ ৰচীসচ্চেন চ অপেতো অনুপগতো তেহি গুণেহি কসাৰরসপীতং কাসাৰৰত্থং পরিদহতি, সো তং কাসাৰং নারহতি, নানুচ্ছৰিকো সো তস্স ৰত্থস্স. যো পন তেসং কসাৰানং ৰন্তত্তা ৰন্তকসাৰো অস্স সীলেসু সুসমাহিতো সুপতিট্ঠিতো পরিপুণ্ণসীলাচারো, সো তং কাসাৰং অরহতি নামাতি.

এৰং ৰত্ৰা মহাসত্তো তস্মিং চিত্তং নিব্বাপেত্ৰা ‘‘সম্ম কিমত্থং ত্ৰং মং ৰিজ্ঝসি, কিং অত্তনো অত্থায, উদাহু অঞ্ঞেন পযোজিতোসী’’তি পুচ্ছি. তমত্থং আৰীকরোন্তো সত্থা আহ –

১২৪.

‘‘সমপ্পিতো পুথুসল্লেন নাগো, অদুট্ঠচিত্তো লুদ্দকমজ্ঝভাসি;

কিমত্থযং কিস্স ৰা সম্ম হেতু, মমং ৰধী কস্স ৰাযং পযোগো’’তি.

তত্থ কিমত্থযন্তি আযতিং কিং পত্থেন্তো. কিস্স ৰাতি কিস্স হেতু কেন কারণেন, কিং নাম তৰ মযা সদ্ধিং ৰেরন্তি অধিপ্পাযো. কস্স ৰাতি কস্স ৰা অঞ্ঞস্স অযং পযোগো, কেন পযোজিতো মং অৰধীতি অত্থো.

অথস্স আচিক্খন্তো লুদ্দো গাথমাহ –

১২৫.

‘‘কাসিস্স রঞ্ঞো মহেসী ভদন্তে, সা পূজিতা রাজকুলে সুভদ্দা;

তং অদ্দসা সা চ মমং অসংসি, দন্তেহি অত্থোতি চ মং অৰোচা’’তি.

তত্থ পূজিতাতি অগ্গমহেসিট্ঠানে ঠপেত্ৰা পূজিতা. অদ্দসাতি সা কির তং সুপিনন্তে অদ্দস. অসংসীতি সা চ মম সক্কারং কারেত্ৰা ‘‘হিমৰন্তপদেসে এৰরূপো নাম নাগো অসুকস্মিং নাম ঠানে ৰসতী’’তি মমং আচিক্খি. দন্তেহীতি তস্স নাগস্স ছব্বণ্ণরংসিসমুজ্জলা দন্তা, তেহি মম অত্থো, পিল়ন্ধনং কারেতুকামাম্হি, তে মে আহরাতি মং অৰোচাতি.

তং সুত্ৰা ‘‘ইদং চূল়সুভদ্দায কম্ম’’ন্তি ঞত্ৰা মহাসত্তো ৰেদনং অধিৰাসেত্ৰা ‘‘তস্সা মম দন্তেহি অত্থো নত্থি, মং মারেতুকামতায পন পহিণী’’তি দীপেন্তো গাথাদ্ৰযমাহ –

১২৬.

‘‘বহূ হিমে দন্তযুগা উল়ারা, যে মে পিতূনঞ্চ পিতামহানং;

জানাতি সা কোধনা রাজপুত্তী, ৰধত্থিকা ৰেরমকাসি বালা.

১২৭.

‘‘উট্ঠেহি ত্ৰং লুদ্দ খরং গহেত্ৰা, দন্তে ইমে ছিন্দ পুরা মরামি;

ৰজ্জাসি তং কোধনং রাজপুত্তিং, নাগো হতো হন্দ ইমস্স দন্তা’’তি.

তত্থ ইমেতি তস্স কির পিতু পিতামহানং দন্তা মা ৰিনস্সন্তূতি গুহাযং সন্নিচিতা, তে সন্ধায এৰমাহ. জানাতীতি বহূনং ৰারণানং ইধ সন্নিচিহে দন্তে জানাতি. ৰধত্থিকাতি কেৰলং পন সা মং মারেতুকামা অপ্পমত্তকং দোসং হদযে ঠপেত্ৰা অত্তনো ৰেরং অকাসি, এৰরূপেন ফরুসকম্মেন মত্থকং পাপেসি. খরন্তি ককচং. পুরা মরামীতি যাৰ ন মরামি. ৰজ্জসীতি ৰদেয্যাসি. হন্দ ইমস্স দন্তাতি হতো সো মযা নাগো, মনোরথো তে মত্থকপ্পত্তো, গণ্হ, ইমে তস্স দন্তাতি.

সো তস্স ৰচনং সুত্ৰা নিসীদনট্ঠানা ৰুট্ঠায ককচং আদায ‘‘দন্তে ছিন্দিস্সামী’’তি তস্স সন্তিকং উপগতো. সো পন উব্বেধতো অট্ঠাসীতিহত্থো রজতপব্বতো ৰিয ঠিতো, তেনস্স সো দন্তট্ঠানং ন পাপুণি. অথ মহাসত্তো কাযং উপনামেন্তো হেট্ঠাসীসকো নিপজ্জি. তদা নেসাদো মহাসত্তস্স রজতদামসদিসং সোণ্ডং মদ্দন্তো অভিরুহিত্ৰা কেলাসকূটে ৰিয কুম্ভে ঠত্ৰা মুখকোটিমংসং ধনুকেন পহরিত্ৰা অন্তো পক্খিপিত্ৰা কুম্ভতো ওরুয্হ ককচং অন্তোমুখে পৰেসেসি, উভোহি হত্থেহি দল়্হং অপরাপরং কড্ঢি. মহাসত্তস্স বলৰৰেদনা উপ্পজ্জি, মুখং লোহিতেন পূরি. নেসাদো ইতো চিতো চ সঞ্চারেন্তো ককচেন ছিন্দিতুং নাসক্খি. অথ নং মহাসত্তো মুখতো লোহিতং ছড্ডেত্ৰা ৰেদনং অধিৰাসেত্ৰা ‘‘কিং সম্ম ছিন্দিতুং ন সক্কোসী’’তি পুচ্ছি. ‘‘আম, সামী’’তি. মহাসত্তো সতিং পচ্চুপট্ঠপেত্ৰা ‘‘তেন হি সম্ম মম সোণ্ডং উক্খিপিত্ৰা ককচকোটিং গণ্হাপেহি, মম সযং সোণ্ডং উক্খিপিতুং বলং নত্থী’’তি আহ. নেসাদো তথা অকাসি.

মহাসত্তো সোণ্ডায ককচং গহেত্ৰা অপরাপরং চারেসি, দন্তা কল়ীরা ৰিয ছিজ্জিংসু. অথ নং তে আহরাপেত্ৰা গণ্হিত্ৰা ‘‘সম্ম লুদ্দপুত্ত অহং ইমে দন্তে তুয্হং দদমানো নেৰ ‘ময্হং অপ্পিযা’তি দম্মি, ন সক্কত্তমারত্তব্রহ্মত্তানি পত্থেন্তো, ইমেহি পন মে দন্তেহি সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণদন্তাৰ পিযতরা, সব্বঞ্ঞুতঞ্ঞাণপ্পটিৰেধায মে ইদং পুঞ্ঞং পচ্চযো হোতূ’’তি দন্তে দত্ৰা ‘‘সম্ম ইদং ঠানং কিত্তকেন কালেন আগতোসী’’তি পুচ্ছিত্ৰা ‘‘সত্তমাসসত্তদিৰসাধিকেহি সত্তহি সংৰচ্ছরেহী’’তি ৰুত্তে – ‘‘গচ্ছ ইমেসং দন্তানং আনুভাৰেন সত্তদিৰসব্ভন্তরেযেৰ বারাণসিং পাপুণিস্সসী’’তি ৰত্ৰা তস্স পরিত্তং কত্ৰা তং উয্যোজেসি. উয্যোজেত্ৰা চ পন অনাগতেসুযেৰ তেসু নাগেসু সুভদ্দায চ অনাগতায কালমকাসি. তমত্থং পকাসেন্তো সত্থা আহ –

১২৮.

‘‘উট্ঠায সো লুদ্দো খরং গহেত্ৰা, ছেত্ৰান দন্তানি গজুত্তমস্স;

ৰগ্গূ সুভে অপ্পটিমে পথব্যা, আদায পক্কামি ততো হি খিপ্প’’ন্তি.

তত্থ ৰগ্গূতি ৰিলাসৰন্তে. সুভেতি সুন্দরে. অপ্পটিমেতি ইমিস্সং পথৰিযং অঞ্ঞেহি দন্তেহি অসদিসেতি.

তস্মিং পক্কন্তে তে নাগা পচ্চামিত্তং অদিস্ৰা আগমিংসু. তমত্থং পকাসেন্তো সত্থা আহ –

১২৯.

‘‘ভযট্টিতা নাগৰধেন অট্টা, যে তে নাগা অট্ঠ দিসা ৰিধাৰুং;

অদিস্ৰান পোসং গজপচ্চমিত্তং, পচ্চাগমুং যেন সো নাগরাজা’’তি.

তত্থ ভযট্টিতাতি মরণভযেন উপদ্দুতা. অট্টাতি দুক্খিতা. গজপচ্চমিত্তন্তি গজস্স পচ্চামিত্তং. যেন সোতি যত্থ ৰিসালমালকে সো নাগরাজা কালং কত্ৰা কেলাসপব্বতো ৰিয পতিতো, তং ঠানং পচ্চাগমুন্তি অত্থো.

তেহি পন সদ্ধিং মহাসুভদ্দাপি আগতা. তে সব্বেপি অট্ঠসহস্সনাগা তত্থ রোদিত্ৰা কন্দিত্ৰা মহাসত্তস্স কুলুপকানং পচ্চেকবুদ্ধানং সন্তিকং গন্ত্ৰা, ‘‘ভন্তে, তুম্হাকং পচ্চযদাযকো ৰিসপীতেন সল্লেন ৰিদ্ধো কালকতো, সীৰথিকদস্সনমস্স আগচ্ছথা’’তি ৰদিংসু. পঞ্চসতা পচ্চেকবুদ্ধাপি আকাসেনাগন্ত্ৰা ৰিসালমালকে ওতরিংসু. তস্মিং খণে দ্ৰে তরুণনাগা নাগরঞ্ঞো সরীরং দন্তেহি উক্খিপিত্ৰা পচ্চেকবুদ্ধে ৰন্দাপেত্ৰা চিতকং আরোপেত্ৰা ঝাপযিংসু. পচ্চেকবুদ্ধা সব্বরত্তিং আল়াহনে ধম্মসজ্ঝাযমকংসু. অট্ঠসহস্সনাগা আল়াহনং নিব্বাপেত্ৰা ৰন্দিত্ৰা ন্হত্ৰা মহাসুভদ্দং পুরতো কত্ৰা অত্তনো ৰসনট্ঠানং অগমংসু. তমত্থং পকাসেন্তো সত্থা আহ –

১৩০.

‘‘তে তত্থ কন্দিত্ৰা রোদিত্ৰান নাগা, সীসে সকে পংসুকং ওকিরিত্ৰা;

অগমংসু তে সব্বে সকং নিকেতং, পুরক্খত্ৰা মহেসিং সব্বভদ্দ’’ন্তি.

তত্থ পংসুকন্তি আল়াহনপংসুকং.

সোনুত্তরোপি অপ্পত্তেযেৰ সত্তমে দিৰসে দন্তে আদায বারাণসিং সম্পাপুণি. তমত্থং পকাসেন্তো সত্থা আহ –

১৩১.

‘‘আদায দন্তানি গজুত্তমস্স, ৰগ্গূ সুভে অপ্পটিমে পথব্যা;

সুৰণ্ণরাজীহি সমন্তমোদরে, সো লুদ্দকো কাসিপুরং উপাগমি;

উপনেসি সো রাজকঞ্ঞায দন্তে, নাগো হতো হন্দ ইমস্স দন্তা’’তি.

তত্থ সুৰণ্ণরাজীহীতি সুৰণ্ণরাজিরংসীহি. সমন্তমোদরেতি সমন্ততো ওভাসন্তে সকলৰনসণ্ডং সুৰণ্ণৰণ্ণং ৰিয করোন্তে. উপনেসীতি অহং ছদ্দন্তৰারণস্স ছব্বণ্ণরংসিৰিস্সজ্জনে যমকদন্তে আদায আগচ্ছামি, নগরং অলঙ্কারাপেথাতি দেৰিযা সাসনং পেসেত্ৰা তায রঞ্ঞো আরোচাপেত্ৰা দেৰনগরং ৰিয নগরে অলঙ্কারাপিতে সোনুত্তরোপি নগরং পৰিসিত্ৰা পাসাদং আরুহিত্ৰা দন্তে উপনেসি, উপনেত্ৰা চ পন, ‘‘অয্যে, যস্স কির তুম্হে অপ্পমত্তকং দোসং হদযে করিত্থ, সো নাগো মযা হতো মতো, ‘মতভাৰং মে আরোচেয্যাসী’তি আহ, তস্স মতভাৰং তুম্হে জানাথ, গণ্হথ, ইমে তস্স দন্তা’’তি দন্তে অদাসি.

সা মহাসত্তস্স ছব্বণ্ণরংসিৰিচিত্তদন্তে মণিতালৰণ্টেন গহেত্ৰা ঊরূসু ঠপেত্ৰা পুরিমভৰে অত্তনো পিরসামিকস্স দন্তে ওলোকেন্তী ‘‘এৰরূপং সোভগ্গপ্পত্তং ৰারণং ৰিসপীতেন সল্লেন জীৰিতক্খযং পাপেত্ৰা ইমে দন্তে ছিন্দিত্ৰা সোনুত্তরো আগতো’’তি মহাসত্তং অনুস্সরন্তী সোকং উপ্পাদেত্ৰা অধিৰাসেতুং নাসক্খি. অথস্সা তত্থেৰ হদযং ফলি, তং দিৰসমেৰ কালমকাসি. তমত্থং পকাসেন্তো সত্থা আহ –

১৩২.

‘‘দিস্ৰান দন্তানি গজুত্তমস্স, ভত্তুপ্পিযস্স পুরিমায জাতিযা;

তত্থেৰ তস্সা হদযং অফালি, তেনেৰ সা কালমকাসি বালা’’তি.

১৩৩.

‘‘সম্বোধিপত্তো স মহানুভাৰো, সিতং অকাসী পরিসায মজ্ঝে;

পুচ্ছিংসু ভিক্খূ সুৰিমুত্তচিত্তা, নাকারণে পাতুকরোন্তি বুদ্ধা.

১৩৪.

‘‘যমদ্দসাথ দহরিং কুমারিং, কাসাযৰত্থং অনগারিযং চরন্তিং;

সা খো তদা রাজকঞ্ঞা অহোসি, অহং তদা নাগরাজা অহোসিং.

১৩৫.

‘‘আদায দন্তানি গজুত্তমস্স, ৰগ্গূ সুভে অপ্পটিমে পথব্যা;

যো লুদ্দকো কাসিপুরং উপাগমি, সো খো তদা দেৰদত্তো অহোসি.

১৩৬.

‘‘অনাৰসূরং চিররত্তসংসিতং, উচ্চাৰচং চরিতমিদং পুরাণং;

ৰীতদ্দরো ৰীতসোকো ৰিসল্লো, সযং অভিঞ্ঞায অভাসি বুদ্ধো.

১৩৭.

‘‘অহং ৰো তেন কালেন, অহোসিং তত্থ ভিক্খৰো;

নাগরাজা তদা হোমি, এৰং ধারেথ জাতক’’ন্তি. –

ইমা গাথা দসবলস্স গুণে ৰণ্ণেন্তেহি ধম্মসঙ্গাহকত্থেরেহি ঠপিতা.

তত্থ সিতং অকাসীতি সো সম্বোধিপ্পত্তো সত্থা মহানুভাৰো অলঙ্কতধম্মসভাযং অলঙ্কতধম্মাসনে পরিসমজ্ঝে নিসিন্নো একদিৰসং সিতং অকাসি. নাকারণেতি ‘‘ভন্তে, বুদ্ধা নাম অকারণে সিতং ন করোন্তি, তুম্হেহি চ সিতং কতং, কেন নু খো কারণেন সিতং কত’’ন্তি মহাখীণাসৰা ভিক্খূ পুচ্ছিংসু. যমদ্দসাথাতি এৰং পুট্ঠো, আৰুসো, সত্থা অত্তনো সিতকারণং আচিক্খন্তো একং দহরভিক্খুনিং দস্সেত্ৰা এৰমাহ – ‘‘ভিক্খৰে, যং একং দহরং যোব্বনপ্পত্তং কুমারিং কাসাযৰত্থং অনগারিযং উপেতং পব্বজিত্ৰা ইমস্মিং সাসনে চরন্তিং অদ্দসাথ পস্সথ, সা তদা ‘ৰিসপীতেন সল্লেন নাগরাজং ৰিজ্ঝিত্ৰা ৰধেহী’’’তি সোনুত্তরস্স পেসেতা রাজকঞ্ঞা অহোসি. তেন গন্ত্ৰা জীৰিতক্খযং পাপিতো অহং তদা সো নাগরাজা অহোসিন্তি অত্থো. দেৰদত্তোতি, ভিক্খৰে, ইদানি দেৰদত্তো তদা সো লুদ্দকো অহোসি.

অনাৰসূরন্তি ন অৰসূরং, অনত্থঙ্গতসূরিযন্তি অত্থো. চিররত্তসংসিতন্তি ইতো চিররত্তে অনেকৰস্সকোটিমত্থকে সংসিতং সংসরিতং অনুচিণ্ণং. ইদং ৰুত্তং হোতি – আৰুসো, ইতো অনেকৰস্সকোটিমত্থকে সংসরিতম্পি পুব্বণ্হে কতং তং দিৰসমেৰ সাযন্হে সরন্তো ৰিয অত্তনো চরিতৰসেন উচ্চত্তা তায রাজধীতায চ সোনুত্তরস্স চ চরিতৰসেন নীচত্তা উচ্চানীচং চরিতং ইদং পুরাণং রাগাদীনং দরানং ৰিগততায ৰীতদ্দরো, ঞাতিধনসোকাদীনং অভাৰেন ৰীতসোকো, রাগসল্লাদীনং ৰিগতত্তা ৰিসল্লো অত্তনাৰ জানিত্ৰা বুদ্ধো অভাসীতি. অহং ৰোতি এত্থ ৰোতি নিপাতমত্তং, ভিক্খৰে, অহং তেন কালেন তত্থ ছদ্দন্তদহে অহোসিন্তি অত্থো. নাগরাজাতি হোন্তো চ পন ন অঞ্ঞো কোচি তদা হোমি, অথ খো নাগরাজা হোমীতি অত্থো. এৰং চারেথাতি তুম্হে তং জাতকং এৰং ধারেথ উগ্গণ্হাথ পরিযাপুণাথাতি.

ইমঞ্চ পন ধম্মদেসনং সুত্ৰা বহূ সোতাপন্নাদযো অহেসুং. সা পন ভিক্খুনী পচ্ছা ৰিপস্সিত্ৰা অরহত্তং পত্তাতি.

ছদ্দন্তজাতকৰণ্ণনা চতুত্থা.

[৫১৫] ৫. সম্ভৰজাতকৰণ্ণনা

রজ্জঞ্চ পটিপন্নাস্মাতি ইদং সত্থা জেতৰনে ৰিহরন্তো পঞ্ঞাপারমিং আরব্ভ কথেসি. পচ্চুপ্পন্নৰত্থু মহাউমঙ্গজাতকে (জা. ২.২২.৫৯০ আদযো) আৰি ভৰিস্সতি.

অতীতে পন কুরুরট্ঠে ইন্দপত্থনগরে ধনঞ্চযকোরব্যো নাম রাজা রজ্জং কারেসি. তস্স সুচিরতো নাম ব্রাহ্মণো পুরোহিতো অত্থধম্মানুসাসকো অহোসি. রাজা দানাদীনি পুঞ্ঞানি করোন্তো ধম্মেন রজ্জমনুসাসি. সো একদিৰসং ধম্মযাগং নাম পঞ্হং অভিসঙ্খরিত্ৰা সুচিরতং নাম ব্রাহ্মণং পুরোহিতং আসনে নিসীদাপেত্ৰা সক্কারং কত্ৰা পঞ্হং পুচ্ছন্তো চতস্সো গাথাযো অভাসি –

১৩৮.

‘‘রজ্জঞ্চ পটিপন্নাস্ম, আধিপচ্চং সুচীরত;

মহত্তং পত্তুমিচ্ছামি, ৰিজেতুং পথৰিং ইমং.

১৩৯.

‘‘ধম্মেন নো অধম্মেন, অধম্মো মে ন রুচ্চতি;

কিচ্চোৰ ধম্মো চরিতো, রঞ্ঞো হোতি সুচীরত.

১৪০.

‘‘ইধ চেৰানিন্দিতা যেন, পেচ্চ যেন অনিন্দিতা;

যসং দেৰমনুস্সেসু, যেন পপ্পোমু ব্রাহ্মণ.

১৪১.

‘‘যোহং অত্থঞ্চ ধম্মঞ্চ, কত্তুমিচ্ছামি ব্রাহ্মণ;

তং ত্ৰং অত্থঞ্চ ধম্মঞ্চ, ব্রাহ্মণক্খাহি পুচ্ছিতো’’তি.

তত্থ রজ্জন্তি, আচরিয, মযং ইমস্মিং সত্তযোজনিকে ইন্দপত্থনগরে রজ্জঞ্চ, তিযোজনসতিকে কুরুরট্ঠে ইস্সরভাৰসঙ্খাতং আধিপচ্চঞ্চ. পটিপন্নাস্মাতি অধিগতা ভৰাম. মহত্তন্তি ইদানি মহন্তভাৰং. পত্তুমিচ্ছামি ৰিজেতুন্তি ইমং পথৰিং ধম্মেন অভিভৰিতুং অজ্ঝোত্থরিতুং ইচ্ছামি. কিচ্চোৰাতি অৰসেসজনেহি রঞ্ঞো চরিতো ধম্মো কিচ্চো করণীযতরো. রাজানুৰত্তকো হি লোকো, সো তস্মিং ধম্মিকে সব্বোপি ধম্মিকো হোতি. তস্মা এস ধম্মো নাম রঞ্ঞোৰ কিচ্চোতি.

ইধ চেৰানিন্দিতাতি যেন মযং ইধলোকে পরলোকে চ অনিন্দিতা. যেন পপ্পোমূতি যেন মযং নিরযাদীসু অনিব্বত্তিত্ৰা দেৰেসু চ মনুস্সেসু চ যসং ইস্সরিযং সোভগ্গং পাপুণেয্যাম, তং নো কারণং কথেহীতি. যোহন্তি, ব্রাহ্মণ, যো অহং ফলৰিপাকসঙ্খাতং অত্থঞ্চ তস্স অত্থস্স হেতুভূতং ধম্মঞ্চ কত্তুং সমাদায ৰত্তিতুং উপ্পাদেতুঞ্চ ইচ্ছামি. তং ত্ৰন্তি তস্স ময্হং ত্ৰং সুখেনেৰ নিব্বানগামিমগ্গং আরুয্হ অপটিসন্ধিকভাৰং পত্থেন্তস্স তং অত্থঞ্চ ধম্মঞ্চ পুচ্ছিতো অক্খাহি, পাকটং কত্ৰা কথেহীতি ব্রাহ্মণং ধম্মযাগপঞ্হং পুচ্ছি.

অযং পন পঞ্হো গম্ভীরো বুদ্ধৰিসযো, সব্বঞ্ঞুবুদ্ধমেৰ তং পুচ্ছিতুং যুত্তং, তস্মিং অসতি সব্বঞ্ঞুতঞ্ঞাণপরিযেসকং বোধিসত্তন্তি. সুচিরতো পন অত্তনো অবোধিসত্ততায পঞ্হং কথেতুং নাসক্খি, অসক্কোন্তো চ পণ্ডিতমানং অকত্ৰা অত্তনো অসমত্থভাৰং কথেন্তো গাথমাহ –

১৪২.

‘‘নাঞ্ঞত্র ৰিধুরা রাজ, এতদক্খাতুমরহতি;

যং ত্ৰং অত্থঞ্চ ধম্মঞ্চ, কত্তুমিচ্ছসি খত্তিযা’’তি.

তস্সত্থো – অৰিসযো এস, মহারাজ, পঞ্হো মাদিসানং. অহঞ্হি নেৰস্স আদিং, ন পরিযোসানং পস্সামি, অন্ধকারং পৰিট্ঠো ৰিয হোমি. বারাণসিরঞ্ঞো পন পুরোহিতো ৰিধুরো নাম ব্রাহ্মণো অত্থি, সো এতং আচিক্খেয্য, তং ঠপেত্ৰা যং ত্ৰং অত্থঞ্চ ধম্মঞ্চ কত্তুমিচ্ছসি, এতং অক্খাতুং ন অঞ্ঞো অরহতীতি.

রাজা তস্স ৰচনং সুত্ৰা ‘‘তেন হি, ব্রাহ্মণ, খিপ্পং তস্স সন্তিকং গচ্ছাহী’’তি পণ্ণাকারং দত্ৰা তং পেসেতুকামো হুত্ৰা গাথমাহ –

১৪৩.

‘‘এহি খো পহিতো গচ্ছ, ৰিধুরস্স উপন্তিকং;

নিক্খঞ্চিমং সুৰণ্ণস্স, হরং গচ্ছ সুচীরত;

অভিহারং ইমং দজ্জা, অত্থধম্মানুসিট্ঠিযা’’তি.

তত্থ উপন্তিকন্তি সন্তিকং. নিক্খন্তি পঞ্চসুৰণ্ণো একো নিক্খো. অযং পন রত্তসুৰণ্ণস্স নিক্খসহস্সং দত্ৰা এৰমাহ. ইমং দজ্জাতি তেন ইমস্মিং ধম্মযাগপঞ্হে কথিতে তস্স অত্থধম্মানুসিট্ঠিযা অভিহারপূজং করোন্তো ইমং নিক্খসহস্সং দদেয্যাসীতি.

এৰঞ্চ পন ৰত্ৰা পঞ্হৰিস্সজ্জনস্স লিখনত্থায সতসহস্সগ্ঘনকং সুৰণ্ণপট্টঞ্চ গমনত্থায যানং, পরিৰারত্থায বলকাযং, তঞ্চ পণ্ণাকারং দত্ৰা তঙ্খণঞ্ঞেৰ উয্যোজেসি. সো পন ইন্দপত্থনগরা নিক্খমিত্ৰা উজুকমেৰ বারাণসিং অগন্ত্ৰা যত্থ যত্থ পণ্ডিতা ৰসন্তি, সব্বানি তানি ঠানানি উপসঙ্কমিত্ৰা সকলজম্বুদীপে পঞ্হস্স ৰিস্সজ্জেতারং অলভিত্ৰা অনুপুব্বেন বারাণসিং পত্ৰা একস্মিং ঠানে নিৰাসং গহেত্ৰা কতিপযেহি জনেহি সদ্ধিং পাতরাসভুঞ্জনৰেলায ৰিধুরস্স নিৰেসনং গন্ত্ৰা আগতভাৰং আরোচাপেত্ৰা তেন পক্কোসাপিতো তং সকে ঘরে ভুঞ্জমানং অদ্দস. তমত্থং আৰিকরোন্তো সত্থা সত্তমং গাথমাহ –

১৪৪.

‘‘স্ৰাধিপ্পাগা ভারদ্ৰাজো, ৰিধুরস্স উপন্তিকং;

তমদ্দস মহাব্রহ্মা, অসমানং সকে ঘরে’’তি.

তত্থ স্ৰাধিপ্পাগাতি সো ভারদ্ৰাজগোত্তো সুচিরতো অধিপ্পাগা, গতোতি অত্থো. মহাব্রহ্মাতি মহাব্রাহ্মণো. অসমানন্তি ভুঞ্জমানং.

সো পন তস্স বালসহাযকো একাচরিযকুলে উগ্গহিতসিপ্পো, তস্মা তেন সদ্ধিং একতো ভুঞ্জিত্ৰা ভত্তকিচ্চপরিযোসানে সুখনিসিন্নো ‘‘সম্ম কিমত্থং আগতোসী’’তি পুট্ঠো আগমনকারণং আচিক্খন্তো অট্ঠমং গাথমাহ –

১৪৫.

‘‘রঞ্ঞোহং পহিতো দূতো, কোরব্যস্স যসস্সিনো;

‘অত্থং ধম্মঞ্চ পুচ্ছেসি’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, ৰিধুরক্খাহি পুচ্ছিতো’’তি.

তত্থ রঞ্ঞোহন্তি অহং রঞ্ঞো কোরব্যস্স যসস্সিনো দূতো. পহিতোতি তেন পেসিতো ইধাগমিং. পুচ্ছেসীতি সো যুধিট্ঠিলগোত্তো ধনঞ্চযরাজা মং ধম্মযাগপঞ্হং নাম পুচ্ছি, অহং কথেতুং অসক্কোন্তো ‘‘ত্ৰং সক্খিস্সসী’’তি ঞত্ৰা তস্স আরোচেসিং, সো চ পণ্ণাকারং দত্ৰা পঞ্হপুচ্ছনত্থায মং তৰ সন্তিকং পেসেন্তো ‘‘ৰিধুরস্স সন্তিকং গন্ত্ৰা ইমস্স পঞ্হস্স অত্থঞ্চ পাল়িধম্মঞ্চ পুচ্ছেয্যাসী’’তি অব্রৰি. ‘‘তং ত্ৰং ইদানি মযা পুচ্ছিতো অক্খাহী’’তি.

তদা পন সো ব্রাহ্মণো ‘‘মহাজনস্স চিত্তং গণ্হিস্সামী’’তি গঙ্গং পিদহন্তো ৰিয ৰিনিচ্ছযং ৰিচারেতি. তস্স পঞ্হৰিস্সজ্জনে ওকাসো নত্থি. সো তমত্থং আচিক্খন্তো নৰমং গাথমাহ –

১৪৬.

‘‘গঙ্গং মে পিদহিস্সন্তি, ন তং সক্কোমি ব্রাহ্মণ;

অপিধেতুং মহাসিন্ধুং, তং কথং সো ভৰিস্সতি;

ন তে সক্কোমি অক্খাতুং, অত্থং ধম্মঞ্চ পুচ্ছিতো’’তি.

তস্সত্থো – ব্রাহ্মণ, ময্হং ‘‘মহাজনস্স নানাচিত্তগতিসঙ্খাতং গঙ্গং পিদহিস্স’’ন্তি ব্যাপারো উপ্পন্নো, তমহং মহাসিন্ধুং অপিধেতুং ন সক্কোমি, তস্মা কথং সো ওকাসো ভৰিস্সতি, যস্মা তে অহং পঞ্হং ৰিস্সজ্জেয্যং. ইতি চিত্তেকগ্গতঞ্চেৰ ওকাসঞ্চ অলভন্তো ন তে সক্কোমি অক্খাতুং অত্থং ধম্মঞ্চ পুচ্ছিতোতি.

এৰঞ্চ পন ৰত্ৰা ‘‘পুত্তো মে পণ্ডিতো মযা ঞাণৰন্ততরো, সো তে ব্যাকরিস্সতি, তস্স সন্তিকং গচ্ছাহী’’তি ৰত্ৰা দসমং গাথমাহ –

১৪৭.

‘‘ভদ্রকারো চ মে পুত্তো, ওরসো মম অত্রজো;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণা’’তি.

তত্থ ওরসোতি উরে সংৰড্ঢো. অত্রজোতি অত্তনা জাতোতি.

তং সুত্ৰা সুচিরতো ৰিধুরস্স ঘরা নিক্খমিত্ৰা ভদ্রকারস্স ভুত্তপাতরাসস্স অত্তনো পরিসমজ্ঝে নিসিন্নকালে নিৰেসনং অগমাসি. তমত্থং পকাসেন্তো সত্থা একাদসমং গাথমাহ –

১৪৮.

‘‘স্ৰাধিপ্পাগা ভারদ্ৰাজো, ভদ্রকারস্সুপন্তিকং;

তমদ্দস মহাব্রহ্মা, নিসিন্নং সম্হি ৰেস্মনী’’তি.

তত্থ ৰেস্মনীতি ঘরে.

সো তত্থ গন্ত্ৰা ভদ্রকারমাণৰেন কতাসনাভিহারসক্কারো নিসীদিত্ৰা আগমনকারণং পুট্ঠো দ্ৰাদসমং গাথমাহ –

১৪৯.

‘‘রঞ্ঞোহং পহিতো দূতো, কোরব্যস্স যসস্সিনো;

‘অত্থং ধম্মঞ্চ পুচ্ছেসি’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, ভদ্রকার পব্রূহি মে’’তি.

অথ নং ভদ্রকারো, ‘‘তাত, অহং ইমেসু দিৰসেসু পরদারিককম্মে অভিনিৰিট্ঠো, চিত্তং মে ব্যাকুলং, তেন ত্যাহং ৰিস্সজ্জেতুং ন সক্খিস্সামি, ময্হং পন কনিট্ঠো সঞ্চযকুমারো নাম মযা অতিৰিয ঞাণৰন্ততরো, তং পুচ্ছ, সো তে পঞ্হং ৰিস্সজ্জেস্সতী’’তি তস্স সন্তিকং পেসেন্তো দ্ৰে গাথা অভাসি –

১৫০.

‘‘মংসকাজং অৰহায, গোধং অনুপতামহং;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫১.

‘‘সঞ্চযো নাম মে ভাতা, কনিট্ঠো মে সুচীরত;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণা’’তি.

তত্থ মংসকাজন্তি যথা নাম পুরিসো থূলমিগমংসং কাজেনাদায গচ্ছন্তো অন্তরামগ্গে গোধপোতকং দিস্ৰা মংসকাজং ছড্ডেত্ৰা তং অনুবন্ধেয্য, এৰমেৰ অত্তনো ঘরে ৰসৰত্তিনিং ভরিযং ছড্ডেত্ৰা পরস্স রক্খিতগোপিতং ইত্থিং অনুবন্ধন্তো হোমীতি দীপেন্তো এৰমাহাতি.

সো তস্মিং খণে সঞ্চযস্স নিৰেসনং গন্ত্ৰা তেন কতসক্কারো আগমনকারণং পুট্ঠো আচিক্খি. তমত্থং পকাসেন্তো সত্থা দ্ৰে গাথা অভাসি –

১৫২.

‘‘স্ৰাধিপ্পাগা ভারদ্ৰাজো, সঞ্চযস্স উপন্তিকং;

তমদ্দস মহাব্রহ্মা, নিসিন্নং সম্হি ৰেস্মনি.

১৫৩.

‘‘রঞ্ঞোহং পহিতো দূতো, কোরব্যস্স যসস্সিনো;

‘অত্থং ধম্মঞ্চ পুচ্ছেসি’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, সঞ্চযক্খাহি পুচ্ছিতো’’তি.

সঞ্চযকুমারো পন তদা পরদারমেৰ সেৰতি. অথস্স সো ‘‘অহং, তাত, পরদারং সেৰামি, সেৰন্তো চ পন গঙ্গং ওতরিত্ৰা পরতীরং গচ্ছামি, তং মং সাযঞ্চ পাতো চ নদিং তরন্তং মচ্চু গিলতি নাম, তেন চিত্তং মে ব্যাকুলং, ন ত্যাহং আচিক্খিতুং সক্খিস্সামি, কনিট্ঠো পন মে সম্ভৰকুমারো নাম অত্থি জাতিযা সত্তৰস্সিকো, মযা সতগুণেন সহস্সগুণেন সতসহস্সগুণেনাধিকঞাণতরো, সো তে আচিক্খিস্সতি, গচ্ছ তং পুচ্ছাহী’’তি আহ. ইমমত্থং পকাসেন্তো সত্থা দ্ৰে গাথা অভাসি –

১৫৪.

‘‘সদা মং গিলতে মচ্চু, সাযং পাতো সুচীরত;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫৫.

‘‘সম্ভৰো নাম মে ভাতা, কনিট্ঠো মে সুচীরত;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণা’’তি.

তং সুত্ৰা সুচিরতো ‘‘অযং পঞ্হো ইমস্মিং লোকে অব্ভুতো ভৰিস্সতি, ইমং পঞ্হং ৰিস্সজ্জেতুং সমত্থো নাম নত্থি মঞ্ঞে’’তি চিন্তেত্ৰা দ্ৰে গাথা অভাসি –

১৫৬.

‘‘অব্ভুতো ৰত ভো ধম্মো, নাযং অস্মাক রুচ্চতি;

তযো জনা পিতাপুত্তা, তে সু পঞ্ঞায নো ৰিদূ.

১৫৭.

‘‘ন তং সক্কোথ অক্খাতুং, অত্থং ধম্মঞ্চ পুচ্ছিতা;

কথং নু দহরো জঞ্ঞা, অত্থং ধম্মঞ্চ পুচ্ছিতো’’তি.

তত্থ নাযন্তি অযং পঞ্হধম্মো অব্ভুতো, ইমং কথেতুং সমত্থেন নাম ন ভৰিতব্বং, তস্মা যং ত্ৰং ‘‘কুমারো কথেস্সতী’’তি ৰদতি, নাযং অস্মাকং রুচ্চতি. তে সূতি এত্থ সু-কারো নিপাতমত্তং. পিতাতি ৰিধুরো পণ্ডিতো, পুত্তা ভদ্রকারো সঞ্চযো চাতি তেপি তযো পিতাপুত্তা পঞ্ঞায ইমং ধম্মং নো ৰিদূ, ন ৰিজানন্তি, অঞ্ঞো কো জানিস্সতীতি অত্থো. ন তন্তি তুম্হে তযো জনা পুচ্ছিতা এতং অক্খাতুং ন সক্কোথ, দহরো সত্তৰস্সিকো কুমারো পুচ্ছিতো কথং নু জঞ্ঞা, কেন কারণেন জানিতুং সক্খিস্সতীতি অত্থো.

তং সুত্ৰা সঞ্চযকুমারো, ‘‘তাত, সম্ভৰকুমারং ‘দহরো’তি মা উঞ্ঞাসি, সচেপি পঞ্হৰিস্সজ্জনেনাত্থিকো, গচ্ছ নং পুচ্ছা’’তি অত্থদীপনাহি উপমাহি কুমারস্স ৰণ্ণং পকাসেন্তো দ্ৰাদস গাথা অভাসি –

১৫৮.

‘‘মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৫৯.

‘‘যথাপি চন্দো ৰিমলো, গচ্ছং আকাসধাতুযা;

সব্বে তারাগণে লোকে, আভায অতিরোচতি.

১৬০.

‘‘এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬১.

‘‘যথাপি রম্মকো মাসো, গিম্হানং হোতি ব্রাহ্মণ;

অতেৰঞ্ঞেহি মাসেহি, দুমপুপ্ফেহি সোভতি.

১৬২.

‘‘এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৩.

‘‘যথাপি হিমৰা ব্রহ্মে, পব্বতো গন্ধমাদনো;

নানারুক্খেহি সঞ্ছন্নো, মহাভূতগণালযো;

ওসধেহি চ দিব্বেহি, দিসা ভাতি পৰাতি চ.

১৬৪.

‘‘এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৫.

‘‘যথাপি পাৰকো ব্রহ্মে, অচ্চিমালী যসস্সিমা;

জলমানো ৰনে গচ্ছে, অনলো কণ্হৰত্তনী.

১৬৬.

‘‘ঘতাসনো ধূমকেতু, উত্তমাহেৰনন্দহো;

নিসীথে পব্বতগ্গস্মিং, পহূতেধো ৰিরোচতি.

১৬৭.

‘‘এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৮.

‘‘জৰেন ভদ্রং জানন্তি, বলিবদ্দঞ্চ ৰাহিযে;

দোহেন ধেনুং জানন্তি, ভাসমানঞ্চ পণ্ডিতং.

১৬৯.

‘‘এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণা’’তি.

তত্থ জঞ্ঞাতি জানিস্সসি. চন্দোতি পুণ্ণচন্দো. ৰিমলোতি অব্ভাদিমলৰিরহিতো. এৰম্পি দহরূপেতোতি এৰং সম্ভৰকুমারো দহরভাৰেন উপেতোপি পঞ্ঞাযোগেন সকলজম্বুদীপতলে অৰসেসে পণ্ডিতে অতিক্কমিত্ৰা ৰিরোচতি. রম্মকোতি চিত্তমাসো. অতেৰঞ্ঞেহীতি অতিৰিয অঞ্ঞেহি একাদসহি মাসেহি. এৰন্তি এৰং সম্ভৰোপি পঞ্ঞাযোগেন সোভতি. হিমৰাতি হিমপাতসমযে হিমযুত্তোতি হিমৰা, গিম্হকালে হিমং ৰমতীতি হিমৰা. সম্পত্তং জনং গন্ধেন মদযতীতি গন্ধমাদনো. মহাভূতগণালযোতি দেৰগণানং নিৰাসো. দিসা ভাতীতি সব্বদিসা একোভাসা ৰিয করোতি. পৰাতীতি গন্ধেন সব্বদিসা ৰাযতি. এৰন্তি এৰং সম্ভৰোপি পঞ্ঞাযোগেন সব্বদিসা ভাতি চেৰ পৰাতি চ.

যসস্সিমাতি তেজসম্পত্তিযা যসস্সিমা. অচ্চিমালীতি অচ্চীহি যুত্তো. জলমানো ৰনে গচ্ছেতি গচ্ছসঙ্খাতে মহাৰনে জলন্তো চরতি. অনলোতি অতিত্তো. গতমগ্গস্স কণ্হভাৰেন কণ্হৰত্তনী. যঞ্ঞে আহুতিৰসেন আহুতং ঘতং অস্নাতীতি ঘতাসনো. ধূমো কেতুকিচ্চং অস্স সাধেতীতি ধূমকেতু. উত্তমাহেৰনন্দহোতি অহেৰনং ৰুচ্চতি ৰনসণ্ডো, উত্তমং ৰনসণ্ডং দহতীতি অত্থো. নিসীথেতি রত্তিভাগে. পব্বতগ্গস্মিন্তি পব্বতসিখরে. পহূতেধোতি পহূতইন্ধনো. ৰিরোচতীতি সব্বদিসাসু ওভাসতি. এৰন্তি এৰং মম কনিট্ঠো সম্ভৰকুমারো দহরোপি পঞ্ঞাযোগেন ৰিরোচতি. ভদ্রন্তি ভদ্রং অস্সাজানীযং জৰসম্পত্তিযা জানন্তি, ন সরীরেন. ৰাহিযেতি ৰহিতব্বভারে সতি ভারৰহতায ‘‘অহং উত্তমো’’তি বলিবদ্দং জানন্তি. দোহেনাতি দোহসম্পত্তিযা ধেনুং ‘‘সুখীরা’’তি জানন্তি. ভাসমানন্তি এত্থ ‘‘নাভাসমানং জানন্তি, মিস্সং বালেহি পণ্ডিত’’ন্তি সুত্তং (সং. নি. ২.২৪১) আহরিতব্বং.

সুচিরতো এৰং তস্মিং সম্ভৰং ৰণ্ণেন্তে ‘‘পঞ্হং পুচ্ছিত্ৰা জানিস্সামী’’তি ‘‘কহং পন তে কুমার কনিট্ঠো’’তি পুচ্ছি. অথস্স সো সীহপঞ্জরং ৰিৰরিত্ৰা হত্থং পসারেত্ৰা ‘‘যো এস পাসাদদ্ৰারে অন্তরৰীথিযা কুমারকেহি সদ্ধিং সুৰণ্ণৰণ্ণো কীল়তি, অযং মম কনিট্ঠো, উপসঙ্কমিত্ৰা তং পুচ্ছ, বুদ্ধলীল়ায তে পঞ্হং কথেস্সতী’’তি আহ. সুচিরতো তস্স ৰচনং সুত্ৰা পাসাদা ওরুয্হ কুমারস্স সন্তিকং অগমাসি. কায ৰেলাযাতি? কুমারস্স নিৰত্থসাটকং মোচেত্ৰা খন্ধে খিপিত্ৰা উভোহি হত্থেহি পংসুং গহেত্ৰা ঠিতৰেলায. তমত্থং আৰিকরোন্তো সত্থা গাথমাহ –

১৭০.

‘‘স্ৰাধিপ্পাগা ভারদ্ৰাজো, সম্ভৰস্স উপন্তিকং;

তমদ্দস মহাব্রহ্মা, কীল়মানং বহীপুরে’’তি.

তত্থ বহীপুরেতি বহিনিৰেসনে.

মহাসত্তোপি ব্রাহ্মণং আগন্ত্ৰা পুরতো ঠিতং দিস্ৰা ‘‘তাত, কেনত্থেনাগতোসী’’তি পুচ্ছিত্ৰা, ‘‘তাত, কুমার অহং জম্বুদীপতলে আহিণ্ডন্তো মযা পুচ্ছিতং পঞ্হং কথেতুং সমত্থং অলভিত্ৰা তৰ সন্তিকং আগতোম্হী’’তি ৰুত্তে ‘‘সকলজম্বুদীপে কির অৰিনিচ্ছিতো পঞ্হো মম সন্তিকং আগতো, অহং ঞাণেন মহল্লকো’’তি হিরোত্তপ্পং পটিলভিত্ৰা হত্থগতং পংসুং ছড্ডেত্ৰা খন্ধতো সাটকং আদায নিৰাসেত্ৰা ‘‘পুচ্ছ, ব্রাহ্মণ, বুদ্ধলীল়ায তে কথেস্সামী’’তি সব্বঞ্ঞুপৰারণং পৰারেসি. ততো ব্রাহ্মণো –

১৭১.

‘‘রঞ্ঞোহং পহিতো দূতো, কোরব্যস্স যসস্সিনো;

‘অত্থং ধম্মঞ্চ পুচ্ছেসি’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, সম্ভৰক্খাহি পুচ্ছিতো’’তি. –

গাথায পঞ্হং পুচ্ছি.

তস্স অত্থো সম্ভৰপণ্ডিতস্স গগনমজ্ঝে পুণ্ণচন্দো ৰিয পাকটো অহোসি.

অথ নং ‘‘তেন হি সুণোহী’’তি ৰত্ৰা ধম্মযাগপঞ্হং ৰিস্সজ্জেন্তো গাথমাহ –

১৭২.

‘‘তগ্ঘ তে অহমক্খিস্সং, যথাপি কুসলো তথা;

রাজা চ খো তং জানাতি, যদি কাহতি ৰা ন ৰা’’তি.

তস্স অন্তরৰীথিযং ঠত্ৰা মধুরস্সরেন ধম্মং দেসেন্তস্স সদ্দো দ্ৰাদসযোজনিকং সকলবারাণসিনগরং অৰত্থরি. অথ রাজা চ উপরাজাদযো চ সব্বে সন্নিপতিংসু. মহাসত্তো মহাজনস্স মজ্ঝে ধম্মদেসনং পট্ঠপেসি.

তত্থ তগ্ঘাতি একংসৰচনং. যথাপি কুসলোতি যথা অতিকুসলো সব্বঞ্ঞুবুদ্ধো আচিক্খতি, তথা তে একংসেনেৰ অহমক্খিস্সন্তি অত্থো. রাজা চ খো তন্তি অহং তং পঞ্হং যথা তুম্হাকং রাজা জানিতুং সক্কোতি, তথা কথেস্সামি. ততো উত্তরি রাজা এৰ তং জানাতি, যদি করিস্সতি ৰা ন ৰা করিস্সতি, করোন্তস্স ৰা অকরোন্তস্স ৰা তস্সেৰেতং ভৰিস্সতি, ময্হং পন দোসো নত্থীতি দীপেতি.

এৰং ইমায গাথায পঞ্হকথনং পটিজানিত্ৰা ইদানি ধম্মযাগপঞ্হং কথেন্তো আহ –

১৭৩.

‘‘অজ্জ সুৰেতি সংসেয্য, রঞ্ঞা পুট্ঠো সুচীরত;

মা কত্ৰা অৰসী রাজা, অত্থে জাতে যুধিট্ঠিলো.

১৭৪.

‘‘অজ্ঝত্তঞ্ঞেৰ সংসেয্য, রঞ্ঞা পুট্ঠো সুচীরত;

কুম্মগ্গং ন নিৰেসেয্য, যথা মূল়্হো অচেতসো.

১৭৫.

‘‘অত্তানং নাতিৰত্তেয্য, অধম্মং ন সমাচরে;

অতিত্থে নপ্পতারেয্য, অনত্থে ন যুতো সিযা.

১৭৬.

‘‘যো চ এতানি ঠানানি, কত্তুং জানাতি খত্তিযো;

সদা সো ৰড্ঢতে রাজা, সুক্কপক্খেৰ চন্দিমা.

১৭৭.

‘‘ঞাতীনঞ্চ পিযো হোতি, মিত্তেসু চ ৰিরোচতি;

কাযস্স ভেদা সপ্পঞ্ঞো, সগ্গং সো উপপজ্জতী’’তি.

তত্থ সংসেয্যাতি কথেয্য. ইদং ৰুত্তং হোতি – তাত, সুচিরত সচে তুম্হাকং রঞ্ঞা ‘‘অজ্জ দানং দেম, সীলং রক্খাম, উপোসথকম্মং করোমা’’তি কোচি পুট্ঠো, ‘‘মহারাজ, অজ্জ তাৰ পাণং হনাম, কামে পরিভুঞ্জাম, সুরং পিৰাম, কুসলং পন করিস্সাম সুৰে’’তি রঞ্ঞো কথেয্য, তস্স অতিমহন্তস্সপি অমচ্চস্স ৰচনং কত্ৰা তুম্হাকং রাজা যুধিট্ঠিলগোত্তো তথারূপে অত্থে জাতে তং দিৰসং পমাদেন ৰীতিনামেন্তো মা অৰসি, তস্স ৰচনং অকত্ৰা উপ্পন্নং কুসলচিত্তং অপরিহাপেত্ৰা কুসলপটিসংযুত্তং কম্মং করোতুযেৰ, ইদমস্স কথেয্যাসীতি. এৰং মহাসত্তো ইমায গাথায –

‘‘অজ্জেৰ কিচ্চমাতপ্পং, কো জঞ্ঞা মরণং সুৰে’’তি. (ম. নি. ৩.২৭২) –

ভদ্দেকরত্তসুত্তঞ্চেৰ,

‘‘অপ্পমাদো অমতপদং, পমাদো মচ্চুনো পদ’’ন্তি. (ধ. প. ২১) –

অপ্পমাদোৰাদঞ্চ কথেসি.

অজ্ঝত্তঞ্ঞেৰাতি, তাত, সুচিরত সম্ভৰপণ্ডিতো তযা ধম্মযাগপঞ্হে পুচ্ছিতে কিং কথেসীতি রঞ্ঞা পুট্ঠো সমানো তুম্হাকং রঞ্ঞো অজ্ঝত্তঞ্ঞেৰ সংসেয্য, নিযকজ্ঝত্তসঙ্খাতং খন্ধপঞ্চকং হুত্ৰা অভাৰতো অনিচ্চন্তি কথেয্যাসি. এত্তাৰতা মহাসত্তো –

‘‘সব্বে সঙ্খারা অনিচ্চাতি, যদা পঞ্ঞায পস্সতি’’. (ধ. প. ২৭৭) –

‘‘অনিচ্চা ৰত সঙ্খারা, উপ্পাদৰযধম্মিনো’’তি. (দী. নি. ২.২২১) –

এৰং ৰিভাৰিতং অনিচ্চতং কথেসীতি.

কুম্মগ্গন্তি, ব্রাহ্মণ, যথা মূল়্হো অচেতনো অন্ধবালপুথুজ্জনো দ্ৰাসট্ঠিদিট্ঠিগতসঙ্খাতং কুম্মগ্গং সেৰতি, এৰং তৰ রাজা তং কুম্মগ্গং ন সেৰেয্য, নিয্যানিকং দসকুসলকম্মপথমগ্গমেৰ সেৰতু, এৰমস্স ৰদেয্যাসীতি.

অত্তানন্তি ইমং সুগতিযং ঠিতং অত্তভাৰং নাতিৰত্তেয্য, যেন কম্মেন তিস্সো কুসলসম্পত্তিযো সব্বকামসগ্গে অতিক্কমিত্ৰা অপাযে নিব্বত্তন্তি, তং কম্মং ন করেয্যাতি অত্থো. অধম্মন্তি তিৰিধদুচ্চরিতসঙ্খাতং অধম্মং ন সমাচরেয্য. অতিত্থেতি দ্ৰাসট্ঠিদিট্ঠিসঙ্খাতে অতিত্থে নপ্পতারেয্য ন ওতারেয্য. ‘‘ন তারেয্যা’’তিপি পাঠো, অত্তনো দিট্ঠানুগতিমাপজ্জন্তং জনং ন ওতারেয্য. অনত্থেতি অকারণে. ন যুতোতি যুত্তপযুত্তো ন সিযা. ব্রাহ্মণ, যদি তে রাজা ধম্মযাগপঞ্হে ৰত্তিতুকামো, ‘‘ইমস্মিং ওৰাদে ৰত্ততূ’’তি তস্স কথেয্যাসীতি অযমেত্থ অধিপ্পাযো.

সদাতি সততং. ইদং ৰুত্তং হোতি – ‘‘যো খত্তিযো এতানি কারণানি কাতুং জানাতি, সো রাজা সুক্কপক্খে চন্দো ৰিয সদা ৰড্ঢতী’’তি. ৰিরোচতীতি মিত্তামচ্চানং মজ্ঝে অত্তনো সীলাচারঞাণাদীহি গুণেহি সোভতি ৰিরোচতীতি.

এৰং মহাসত্তো গগনতলে চন্দং উট্ঠাপেন্তো ৰিয বুদ্ধলীল়ায ব্রাহ্মণস্স পঞ্হং কথেসি. মহাজনো নদন্তো সেলেন্তো অপ্ফোটেন্তো সাধুকারসহস্সানি অদাসি, চেলুক্খেপে চ অঙ্গুলিফোটে চ পৰত্তেসি, হত্থপিল়ন্ধনাদীনি খিপি. এৰং খিত্তধনং কোটিমত্তং অহোসি. রাজাপিস্স তুট্ঠো মহন্তং যসং অদাসি. সুচিরতোপি নিক্খসহস্সেন পূজং কত্ৰা সুৰণ্ণপট্টে জাতিহিঙ্গুলকেন পঞ্হৰিস্সজ্জনং লিখিত্ৰা ইন্দপত্থনগরং গন্ত্ৰা রঞ্ঞো ধম্মযাগপঞ্হং কথেসি. রাজা তস্মিং ধম্মে ৰত্তিত্ৰা সগ্গপুরং পূরেসি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি তথাগতো মহাপঞ্ঞোযেৰা’’তি ৰত্ৰা জাতকং সমোধানেসি ‘‘তদা ধনঞ্চযরাজা আনন্দো অহোসি, সুচিরতো অনুরুদ্ধো, ৰিধুরো কস্সপো, ভদ্রকারো মোগ্গল্লানো, সঞ্চযমাণৰো সারিপুত্তো, সম্ভৰপণ্ডিতো পন অহমেৰ অহোসি’’ন্তি.

সম্ভৰজাতকৰণ্ণনা পঞ্চমা.

[৫১৬] ৬. মহাকপিজাতকৰণ্ণনা

বারাণস্যং অহূ রাজাতি ইদং সত্থা ৰেল়ুৰনে ৰিহরন্তো দেৰদত্তস্স সিলাপৰিজ্ঝনং আরব্ভ কথেসি. তেন হি ধনুগ্গহে পযোজেত্ৰা অপরভাগে সিলায পৰিদ্ধায ভিক্খূহি দেৰদত্তস্স অৰণ্ণে কথিতে সত্থা ‘‘ন, ভিক্খৰে, ইদানেৰ, পুব্বেপি দেৰদত্তো ময্হং সিলং পৰিজ্ঝিযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে কাসিকগামকে একো কস্সকব্রাহ্মণো খেত্তং কসিত্ৰা গোণে ৰিস্সজ্জেত্ৰা কুদ্দালকম্মং কাতুং আরভি. গোণা একস্মিং গচ্ছে পণ্ণানি খাদন্তা অনুক্কমেন অটৰিং পৰিসিত্ৰা পলাযিংসু. সো ৰেলং সল্লক্খেত্ৰা কুদ্দালং ঠপেত্ৰা গোণে ওলোকেন্তো অদিস্ৰা দোমনস্সপ্পত্তো তে পরিযেসন্তো অন্তোঅটৰিং পৰিসিত্ৰা আহিণ্ডন্তো হিমৰন্তং পাৰিসি. সো তত্থ দিসামূল়্হো হুত্ৰা সত্তাহং নিরাহারো ৰিচরন্তো একং তিন্দুকরুক্খং দিস্ৰা অভিরুয্হ ফলানি খাদন্তো তিন্দুকরুক্খতো পরিগল়িত্ৰা সট্ঠিহত্থে নরকপপাতে পতি. তত্রস্স দস দিৰসা ৰীতিৰত্তা. তদা বোধিসত্তো কপিযোনিযং নিব্বত্তিত্ৰা ফলাফলানি খাদন্তো তং পুরিসং দিস্ৰা সিলায যোগ্গং কত্ৰা তং পুরিসং উদ্ধরিত্ৰা সিলায মত্থকে নিসীদাপেত্ৰা এৰমাহ – ‘‘ভো ব্রাহ্মণ, অহং কিলমামি, মুহুত্তং নিদ্দাযিস্সামি, মং রক্খাহী’’তি. সো তস্স নিদ্দাযন্তস্স সিলায মত্থকং পদালেসি. মহাসত্তো তস্স তং কম্মং ঞত্ৰা উপ্পতিত্ৰা সাখায নিসীদিত্ৰা ‘‘ভো পুরিস, ত্ৰং ভূমিযা গচ্ছ, অহং সাখগ্গেন তুয্হং মগ্গং আচিক্খন্তো গমিস্সামী’’তি তং পুরিসং অরঞ্ঞতো নীহরিত্ৰা মগ্গে ঠপেত্ৰা পব্বতপাদমেৰ পাৰিসি. সো পুরিসো মহাসত্তে অপরজ্ঝিত্ৰা কুট্ঠী হুত্ৰা দিট্ঠধম্মেযেৰ মনুস্সপেতো অহোসি.

সো সত্ত ৰস্সানি দুক্খপীল়িতো ৰিচরন্তো বারাণসিযং মিগাজিনং নাম উয্যানং পৰিসিত্ৰা পাকারন্তরে কদলিপণ্ণং অত্থরিত্ৰা ৰেদনাপ্পত্তো নিপজ্জি. তদা বারাণসিরাজা উয্যানং গন্ত্ৰা তত্থ ৰিচরন্তো তং দিস্ৰা ‘‘কোসি ত্ৰং, কিং ৰা কত্ৰা ইমং দুক্খং পত্তো’’তি পুচ্ছি. সোপিস্স সব্বং ৰিত্থারতো আচিক্খি. তমত্থং পকাসেন্তো সত্থা আহ –

১৭৮.

‘‘বারাণস্যং অহূ রাজা, কাসীনং রট্ঠৰড্ঢনো;

মিত্তামচ্চপরিব্যূল়্হো, অগমাসি মিগাজিনং.

১৭৯.

‘‘তত্থ ব্রাহ্মণমদ্দক্খি, সেতং চিত্রং কিলাসিনং;

ৰিদ্ধস্তং কোৰিল়ারংৰ, কিসং ধমনিসন্থতং.

১৮০.

‘‘পরমকারুঞ্ঞতং পত্তং, দিস্ৰা কিচ্ছগতং নরং;

অৰচ ব্যম্হিতো রাজা, যক্খানং কতমো নুসি.

১৮১.

‘‘হত্থপাদা চ তে সেতা, ততো সেততরং সিরো;

গত্তং কম্মাসৰণ্ণং তে, কিলাসবহুলো চসি.

১৮২.

‘‘ৰট্টনাৰল়িসঙ্কাসা, পিট্ঠি তে নিন্নতুন্নতা;

কাল়পব্বাৰ তে অঙ্গা, নাঞ্ঞং পস্সামি এদিসং.

১৮৩.

‘‘উগ্ঘট্টপাদো তসিতো, কিসো ধমনিসন্থতো;

ছাতো আতত্তরূপোসি, কুতোসি কত্থ গচ্ছতি.

১৮৪.

‘‘দুদ্দসী অপ্পকারোসি, দুব্বণ্ণো ভীমদস্সনো;

জনেত্তি যাপি তে মাতা, ন তং ইচ্ছেয্য পস্সিতুং.

১৮৫.

‘‘কিং কম্মমকরং পুব্বে, কং অৰজ্ঝং অঘাতযি;

কিব্বিসং যং করিত্ৰান, ইদং দুক্খং উপাগমী’’তি.

তত্থ বারাণস্যন্তি বারাণসিযং. মিত্তামচ্চপরিব্যূল়্হোতি মিত্তেহি চ দল়্হভত্তীহি অমচ্চেহি চ পরিৰুতো. মিগাজিনন্তি এৰংনামকং উয্যানং. সেতন্তি সেতকুট্ঠেন সেতং কবরকুট্ঠেন ৰিচিত্রং পরিভিন্নেন কণ্ডূযনকিলাসকুট্ঠেন কিলাসিনং ৰেদনাপ্পত্তং কদলিপণ্ণে নিপন্নং অদ্দস. ৰিদ্ধস্তং কোৰিল়ারংৰাতি ৰণমুখেহি পগ্ঘরন্তেন মংসেন ৰিদ্ধস্তং পুপ্ফিতকোৰিল়ারসদিসং. কিসন্তি একচ্চেসু পদেসেসু অট্ঠিচম্মমত্তসরীরং সিরাজালসন্থতং. ব্যম্হিতোতি ভীতো ৰিম্হযমাপন্নো ৰা. যক্খানন্তি যক্খানং অন্তরে ত্ৰং কতরযক্খো নামাসি. ৰট্টনাৰল়িসঙ্কাসাতি পিট্ঠিকণ্টকট্ঠানে আৰুনিত্ৰা ঠপিতাৰট্টনাৰল়িসদিসা. অঙ্গাতি কাল়পব্বৰল্লিসদিসানি তে অঙ্গানি. নাঞ্ঞন্তি অঞ্ঞং পুরিসং এদিসং ন পস্সামি. উগ্ঘট্টপাদোতি রজোকিণ্ণপাদো. আতত্তরূপোতি সুক্খসরীরো. দুদ্দসীতি দুক্খেন পস্সিতব্বো. অপ্পকারোসীতি সরীরপ্পকাররহিতোসি, দুস্সণ্ঠানোসীতি অত্থো. কিং কম্মমকরন্তি ইতো পুব্বে কিং কম্মং অকরং, অকাসীতি অত্থো. কিব্বিসন্তি দারুণকম্মং.

ততো পরং ব্রাহ্মণো আহ –

১৮৬.

‘‘তগ্ঘ তে অহমক্খিস্সং, যথাপি কুসলো তথা;

সচ্চৰাদিঞ্হি লোকস্মিং, পসংসন্তীধ পণ্ডিতা.

১৮৭.

‘‘একো চরং গোগৰেসো, মূল়্হো অচ্চসরিং ৰনে;

অরঞ্ঞে ইরীণে ৰিৰনে, নানাকুঞ্জরসেৰিতে.

১৮৮.

‘‘ৰাল়মিগানুচরিতে, ৰিপ্পনট্ঠোস্মি কাননে;

অচরিং তত্থ সত্তাহং, খুপ্পিপাসসমপ্পিতো.

১৮৯.

‘‘তত্থ তিন্দুকমদ্দক্খিং, ৰিসমট্ঠং বুভুক্খিতো;

পপাতমভিলম্বন্তং, সম্পন্নফলধারিনং.

১৯০.

‘‘ৰাতস্সিতানি ভক্খেসিং, তানি রুচ্চিংসু মে ভুসং;

অতিত্তো রুক্খমারূহিং, তত্থ হেস্সামি আসিতো.

১৯১.

‘‘একং মে ভক্খিতং আসি, দুতিযং অভিপত্থিতং;

ততো সা ভঞ্জথ সাখা, ছিন্না ফরসুনা ৰিয.

১৯২.

‘‘সোহং সহাৰ সাখাহি, উদ্ধংপাদো অৰংসিরো;

অপ্পতিট্ঠে অনালম্বে, গিরিদুগ্গস্মি পাপতং.

১৯৩.

‘‘যস্মা চ ৰারি গম্ভীরং, তস্মা ন সমপজ্জিসং;

তত্থ সেসিং নিরানন্দো, অনূনা দস রত্তিযো.

১৯৪.

‘‘অথেত্থ কপি মাগঞ্ছি, গোনঙ্গুলো দরীচরো;

সাখাহি সাখং ৰিচরন্তো, খাদমানো দুমপ্ফলং.

১৯৫.

‘‘সো মং দিস্ৰা কিসং পণ্ডুং, কারুঞ্ঞমকরং মযি;

অম্ভো কো নাম সো এত্থ, এৰং দুক্খেন অট্টিতো.

১৯৬.

‘‘মনুস্সো অমনুস্সো ৰা, অত্তানং মে পৰেদয;

তস্সঞ্জলিং পণামেত্ৰা, ইদং ৰচনমব্রৰিং.

১৯৭.

‘‘মনুস্সোহং ব্যসম্পত্তো, সা মে নত্থি ইতো গতি;

তং ৰো ৰদামি ভদ্দং ৰো, ত্ৰঞ্চ মে সরণং ভৰ.

১৯৮.

‘‘গরুং সিলং গহেত্ৰান, ৰিচরী পব্বতে কপি;

সিলায যোগ্গং কত্ৰান, নিসভো এতদব্রৰি.

১৯৯.

‘‘এহি মে পিট্ঠিমারুয্হ, গীৰং গণ্হাহি বাহুভি;

অহং তং উদ্ধরিস্সামি, গিরিদুগ্গত ৰেগসা.

২০০.

‘‘তস্স তং ৰচনং সুত্ৰা, ৰানরিন্দস্স সিরীমতো;

পিট্ঠিমারুয্হ ধীরস্স, গীৰং বাহাহি অগ্গহিং.

২০১.

‘‘সো মং ততো সমুট্ঠাসি, তেজস্সী বলৰা কপি;

ৰিহঞ্ঞমানো কিচ্ছেন, গিরিদুগ্গত ৰেগসা.

২০২.

‘‘উদ্ধরিত্ৰান মং সন্তো, নিসভো এতদব্রৰি;

ইঙ্ঘ মং সম্ম রক্খস্সু, পসুপিস্সং মুহুত্তকং.

২০৩.

‘‘সীহা ব্যগ্ঘা চ দীপী চ, অচ্ছকোকতরচ্ছযো;

তে মং পমত্তং হিংসেয্যুং, তে ত্ৰং দিস্ৰা নিৰারয.

২০৪.

‘‘এৰং মে পরিত্তাতূন, পসুপী সো মুহুত্তকং;

তদাহং পাপিকং দিট্ঠিং, পটিলচ্ছিং অযোনিসো.

২০৫.

‘‘ভক্খো অযং মনুস্সানং, যথা চঞ্ঞে ৰনে মিগা;

যং নূনিমং ৰধিত্ৰান, ছাতো খাদেয্য ৰানরং.

২০৬.

‘‘অসিতো চ গমিস্সামি, মংসমাদায সম্বলং;

কন্তারং নিত্থরিস্সামি, পাথেয্যং মে ভৰিস্সতি.

২০৭.

‘‘ততো সিলং গহেত্ৰান, মত্থকং সন্নিতাল়যিং;

মম গত্তকিলন্তস্স, পহারো দুব্বলো অহু.

২০৮.

‘‘সো চ ৰেগেনুদপ্পত্তো, কপি রুহিরমক্খিতো;

অস্সুপুণ্ণেহি নেত্তেহি, রোদন্তো মং উদিক্খতি.

২০৯.

‘‘মায্যো মং করি ভদ্দন্তে, ত্ৰঞ্চ নামেদিসং করি;

ত্ৰঞ্চ খো নাম দীঘাৰু, অঞ্ঞে ৰারেতুমরহসি.

২১০.

‘‘অহো ৰত রে পুরিস, তাৰদুক্করকারক;

এদিসা ৰিসমা দুগ্গা, পপাতা উদ্ধতো মযা.

২১১.

‘‘আনীতো পরলোকাৰ, দুব্ভেয্যং মং অমঞ্ঞথ;

তং তেন পাপকম্মেন, পাপং পাপেন চিন্তিতং.

২১২.

‘‘মা হেৰ ত্ৰং অধম্মট্ঠ, ৰেদনং কটুকং ফুসি;

মা হেৰ পাপকম্মং তং, ফলং ৰেল়ুংৰ তং ৰধি.

২১৩.

‘‘তযি মে নত্থি ৰিস্সাসো, পাপধম্ম অসঞ্ঞত;

এহি মে পিট্ঠিতো গচ্ছ, দিস্সমানোৰ সন্তিকে.

২১৪.

‘‘মুত্তোসি হত্থা ৰাল়ানং, পত্তোসি মানুসিং পদং;

এস মগ্গো অধম্মট্ঠ, তেন গচ্ছ যথাসুখং.

২১৫.

‘‘ইদং ৰত্ৰা গিরিচরো, রহদে পক্খল্য মত্থকং;

অস্সূনি সম্পমজ্জিত্ৰা, ততো পব্বতমারুহি.

২১৬.

‘‘সোহং তেনাভিসত্তোস্মি, পরিল়াহেন অট্টিতো;

ডয্হমানেন গত্তেন, ৰারিং পাতুং উপাগমিং.

২১৭.

‘‘অগ্গিনা ৰিয সন্তত্তো, রহদো রুহিরমক্খিতো;

পুব্বলোহিতসঙ্কাসো, সব্বো মে সমপজ্জথ.

২১৮.

‘‘যাৰন্তো উদবিন্দূনি, কাযস্মিং নিপতিংসু মে;

তাৰন্তো গণ্ড জাযেথ, অদ্ধবেলুৰসাদিসা.

২১৯.

‘‘পভিন্না পগ্ঘরিংসু মে, কুণপা পুব্বলোহিতা;

যেন যেনেৰ গচ্ছামি, গামেসু নিগমেসু চ.

২২০.

‘‘দণ্ডহত্থা নিৰারেন্তি, ইত্থিযো পুরিসা চ মং;

ওক্কিতা পূতিগন্ধেন, মাস্সু ওরেন আগমা.

২২১.

‘‘এতাদিসং ইদং দুক্খং, সত্ত ৰস্সানি দানি মে;

অনুভোমি সকং কম্মং, পুব্বে দুক্কটমত্তনো.

২২২.

‘‘তং ৰো ৰদামি ভদ্দন্তে, যাৰন্তেত্থ সমাগতা;

মাস্সু মিত্তান দুব্ভিত্থো, মিত্তদুব্ভো হি পাপকো.

২২৩.

‘‘কুট্ঠী কিলাসী ভৰতি, যো মিত্তানিধ দুব্ভতি;

কাযস্স ভেদা মিত্তদ্দু, নিরযং সোপপজ্জতী’’তি.

তত্থ কুসলোতি যথা ছেকো কুসলো কথেতি, তথা ৰো কথেস্সামি. গোগৰেসোতি নট্ঠে গোণে গৰেসন্তো. অচ্চসরিন্তি মনুস্সপথং অতিক্কমিত্ৰা হিমৰন্তং পাৰিসিং. অরঞ্ঞেতি অরাজকে সুঞ্ঞে. ইরীণেতি সুক্খকন্তারে. ৰিৰনেতি ৰিৰিত্তে. ৰিপ্পনট্ঠোতি মগ্গমূল়্হো. বুভুক্খিতোতি সঞ্জাতবুভুক্খো ছাতজ্ঝত্তো. পপাতমভিলম্বন্তন্তি পপাতাভিমুখং ওলম্বন্তং. সম্পন্নফলধারিনন্তি মধুরফলধারিনং. ৰাতস্সিতানীতি পঠমং তাৰ ৰাতপতিতানি খাদিং. তত্থ হেস্সামীতি তস্মিং রুক্খে সুহিতো ভৰিস্সামীতি আরুল়্হোম্হি. ততো সা ভঞ্জথ সাখাতি তস্স অভিপত্থিতস্স অত্থায হত্থে পসারিতে সা মযা অভিরুল়্হা সাখা ফরসুনা ছিন্না ৰিয অভঞ্জথ. অনালম্বেতি আলম্বিতব্বট্ঠানরহিতে. গিরিদুগ্গস্মিন্তি গিরিৰিসমে. সেসিন্তি সযিতোম্হি.

কপি মাগঞ্ছীতি কপি আগঞ্ছি. গোনঙ্গুলোতি গুন্নং নঙ্গুট্ঠসদিসনঙ্গুট্ঠো. ‘‘গোনঙ্গুট্ঠো’’তিপি পাঠো. ‘‘গোনঙ্গুলী’’তিপি পঠন্তি. অকরং মযীতি অকরা মযি. অম্ভোতি, মহারাজ, সো কপিরাজা তস্মিং নরকপপাতে মম উদকপোথনসদ্দং সুত্ৰা মং ‘‘অম্ভো’’তি আলপিত্ৰা ‘‘কো নামেসো’’তি পুচ্ছি. ব্যসম্পত্তোতি ব্যসনং পত্তো, পপাতস্স ৰসং পত্তোতি ৰা অত্থো. ভদ্দং ৰোতি তস্মা তুম্হে ৰদামি – ‘‘ভদ্দং তুম্হাকং হোতূ’’তি. গরুং সিলন্তি, মহারাজ, সো কপিরাজা মযা এৰং ৰুত্তে ‘‘মা ভাযী’’তি মং অস্সাসেত্ৰা পঠমং তাৰ গরুং সিলং গহেত্ৰা যোগ্গং করোন্তো পব্বতে ৰিচরি. নিসভোতি পুরিসনিসভো উত্তমৰানরিন্দো পব্বতপপাতে ঠত্ৰা মং এতদব্রৰীতি.

বাহুভীতি দ্ৰীহি বাহাহি মম গীৰং সুগ্গহিতং গণ্হ. ৰেগসাতি ৰেগেন. সিরীমতোতি পুঞ্ঞৰন্তস্স. অগ্গহিন্তি সট্ঠিহত্থং নরকপপাতং ৰাতৰেগেন ওতরিত্ৰা উদকপিট্ঠে ঠিতস্স অহং ৰেগেন পিট্ঠিমভিরুহিত্ৰা উভোহি বাহাহি গীৰং অগ্গহেসিং. ৰিহঞ্ঞমানোতি কিলমন্তো. কিচ্ছেনাতি দুক্খেন. সন্তোতি পণ্ডিতো, অথ ৰা পরিসন্তো কিলন্তো. রক্খস্সূতি অহং তং উদ্ধরন্তো কিলন্তো মুহুত্তং ৰিস্সমন্তো পসুপিস্সং, তস্মা মং রক্খাহি. যথা চঞ্ঞে ৰনে মিগাতি সীহাদীহি অঞ্ঞেপি যে ইমস্মিং ৰনে ৰাল়মিগা. পাল়িযং পন ‘‘অচ্ছকোকতরচ্ছযো’’তি লিখন্তি. পরিত্তাতূনাতি, মহারাজ, এৰং সো কপিরাজা মং অত্তনো পরিত্তাণং কত্ৰা মুহুত্তং পসুপি. অযোনিসোতি অযোনিসোমনসিকারেন. ভক্খোতি খাদিতব্বযুত্তকো. অসিতো ধাতো সুহিতো. সম্বলন্তি পাথেয্যং. মত্থকং সন্নিতাল়যিন্তি তস্স ৰানরিন্দস্স মত্থকং পহরিং. ‘‘সন্নিতাল়য’’ন্তিপি পাঠো. দুব্বলো অহূতি ন বলৰা আসি, যথাধিপ্পাযং ন অগমাসীতি.

ৰেগেনাতি মযা পহটপাসাণৰেগেন. উদপ্পত্তোতি উট্ঠিতো. মায্যোতি তেন মিত্তদুব্ভিপুরিসেন সিলায পৰিদ্ধায মহাচম্মং ছিন্দিত্ৰা ওলম্বি, রুহিরং পগ্ঘরি. মহাসত্তো ৰেদনাপ্পত্তো চিন্তেসি – ‘‘ইমস্মিং ঠানে অঞ্ঞো নত্থি, ইদং ভযং ইমং পুরিসং নিস্সায উপ্পন্ন’’ন্তি. সো মরণভযভীতো ওলম্বন্তং চম্মবন্ধং হত্থেন গহেত্ৰা উপ্পতিত্ৰা সাখং অভিরুয্হ তেন পাপপুরিসেন সদ্ধিং সল্লপন্তো ‘‘মায্যো ম’’ন্তিআদিমাহ. তত্থ মায্যো মং করি ভদ্দন্তেতি মা অকরি অয্যো মং ভদ্দন্তেতি তং নিৰারেতি. ত্ৰঞ্চ খো নামাতি ত্ৰং নাম এৰং মযা পপাতা উদ্ধটো এদিসং ফরুসকম্মং মযি করি, অহো তে অযুত্তং কতন্তি. অহো ৰতাতি তং গরহন্তো এৰমাহ. তাৰদুক্করকারকাতি মযি অপরজ্ঝনেন অতিদুক্করকম্মকারক. পরলোকাৰাতি পরলোকতো ৰিয আনীতো. দুব্ভেয্যন্তি দুব্ভিতব্বং ৰধিতব্বং. ৰেদনং কটুকন্তি এৰং সন্তেপি ত্ৰং অধম্মট্ঠ যাদিসং ৰেদনং অহং ফুসামি, এদিসং ৰেদনং কটুকং মা ফুসি, তং পাপকম্মং ফলং ৰেল়ুংৰ তং মা ৰধি. ইতি মং, মহারাজ, সো পিযপুত্তকং ৰিয অনুকম্পি.

অথ নং অহং এতদৰোচং – ‘‘অয্য, মযা কতং দোসং হদযে মা করি, মা মং অসপ্পুরিসং এৰরূপে অরঞ্ঞে নাসয, অহং দিসামূল়্হো মগ্গং ন জানামি, অত্তনা কতং কম্মং মা নাসেথ, জীৰিতদানং মে দেথ, অরঞ্ঞা নীহরিত্ৰা মনুস্সপথে ঠপেথা’’তি. এৰং ৰুত্তে সো মযা সদ্ধিং সল্লপন্তো ‘‘তযি মে নত্থি ৰিস্সাসো’’তি আদিমাহ. তত্থ তযীতি ইতো পট্ঠায ময্হং তযি ৰিস্সাসো নত্থি. এহীতি, ভো পুরিস, অহং তযা সদ্ধিং মগ্গেন ন গমিস্সামি, ত্ৰং পন এহি মম পিট্ঠিতো অৰিদূরে দিস্সমানসরীরোৰ গচ্ছ, অহং রুক্খগ্গেহেৰ গমিস্সামীতি. মুত্তোসীতি অথ সো মং, মহারাজ, অরঞ্ঞা নীহরিত্ৰা, ভো পুরিস, ৰাল়মিগানং হত্থা মুত্তোসি. পত্তোসি মানুসিং পদন্তি মনুস্সূপচারং পত্তো আগতোসি, এস তে মগ্গো, এতেন গচ্ছাতি আহ.

গিরিচরোতি গিরিচারী ৰানরো. পক্খল্যাতি ধোৰিত্ৰা. তেনাভিসত্তোস্মীতি সো অহং, মহারাজ, তেন ৰানরেন অভিসত্তো, পাপকম্মে পরিণতে তেনাভিসত্তোস্মীতি মঞ্ঞমানো এৰমাহ. অট্টিতোতি উপদ্দুতো. উপাগমিন্তি একং রহদং উপগতোস্মি. সমপজ্জথাতি জাতো, এৰরূপো হুত্ৰা উপট্ঠাসি. যাৰন্তোতি যত্তকানি. গণ্ড জাযেথাতি গণ্ডা জাযিংসু. সো কির পিপাসং সন্ধারেতুং অসক্কোন্তো উদকঞ্জলিং উক্খিপিত্ৰা থোকং পিৰিত্ৰা সেসং সরীরে সিঞ্চি. অথস্স তাৰদেৰ উদকবিন্দুগণনায অড্ঢবেলুৰপক্কপ্পমাণা গণ্ডা উট্ঠহিংসু, তস্মা এৰমাহ. পভিন্নাতি তে গণ্ডা তং দিৰসমেৰ ভিজ্জিত্ৰা কুণপা পূতিগন্ধিকা হুত্ৰা পুব্বলোহিতানি পগ্ঘরিংসু. যেন যেনাতি যেন যেন মগ্গেন. ওক্কিতাতি পূতিগন্ধেন ওকিণ্ণা পরিক্খিত্তা পরিৰারিতা. মাস্সু ওরেন আগমাতি দুট্ঠসত্ত ওরেন মাস্সু আগমা, অম্হাকং সন্তিকং মা আগমীতি এৰং ৰদন্তা মং নিৰারেন্তীতি অত্থো. সত্ত ৰস্সানি দানি মেতি, মহারাজ, ততো পট্ঠায ইদানি সত্ত ৰস্সানি মম এত্তকং কালং সকং কম্মং অনুভোমি.

ইতি সো অত্তনো মিত্তদুব্ভিকম্মং ৰিত্থারেত্ৰা, ‘‘মহারাজ, মঞ্ঞেৰ ওলোকেত্ৰা এৰরূপং কম্মং ন কেনচি কত্তব্ব’’ন্তি ৰত্ৰা ‘‘তং ৰো’’তিআদিমাহ. তত্থ তন্তি তস্মা. যস্মা এৰরূপং কম্মং এৰং দুক্খৰিপাকং, তস্মাতি অত্থো.

২২৩.

‘‘কুট্ঠী কিলাসী ভৰতি, যো মিত্তানিধ দুব্ভতি;

কাযস্স ভেদা মিত্তদ্দু, নিরযং সোপপজ্জতী’’তি. –

অযং অভিসম্বুদ্ধগাথা. ভিক্খৰে, যো ইধ লোকে মিত্তানি দুব্ভতি হিংসতি, সো এৰরূপো হোতীতি অত্থো.

তস্সপি পুরিসস্স রঞ্ঞা সদ্ধিং কথেন্তস্সেৰ পথৰী ৰিৰরং অদাসি. তঙ্খণঞ্ঞেৰ চৰিত্ৰা অৰীচিম্হি নিব্বত্তো. রাজা তস্মিং পথৰিং পৰিট্ঠে উয্যানা নিক্খমিত্ৰা নগরং পৰিট্ঠো.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো ময্হং সিলং পটিৰিজ্ঝিযেৰা’’তি ৰত্ৰা জাতকং সমোধানেসি – ‘‘তদা মিত্তদুব্ভী পুরিসো দেৰদত্তো অহোসি, কপিরাজা পন অহমেৰ অহোসি’’ন্তি.

মহাকপিজাতকৰণ্ণনা ছট্ঠা.

[৫১৭] ৭. দকরক্খসজাতকৰণ্ণনা

২২৪-২৫৭. সচে ৰো ৰুয্হমানানন্তি দকরক্খসজাতকং. তং সব্বং মহাউমঙ্গজাতকে আৰি ভৰিস্সতীতি.

দকরক্খসজাতকৰণ্ণনা সত্তমা.

[৫১৮] ৮. পণ্ডরনাগরাজজাতকৰণ্ণনা

ৰিকিণ্ণৰাচন্তি ইদং সত্থা জেতৰনে ৰিহরন্তো মুসাৰাদং কত্ৰা দেৰদত্তস্স পথৰিপ্পৰেসনং আরব্ভ কথেসি. তদা হি সত্থা ভিক্খূহি তস্স অৰণ্ণে কথিতে ‘‘ন, ভিক্খৰে, ইদানেৰ, পুব্বেপি দেৰদত্তো মুসাৰাদং কত্ৰা পথৰিং পৰিট্ঠোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে পঞ্চসতৰাণিজা নাৰায সমুদ্দং পক্খন্দিত্ৰা সত্তমে দিৰসে অতীরদস্সনিযা নাৰায সমুদ্দপিট্ঠে ভিন্নায ঠপেত্ৰা একং অৰসেসা মচ্ছকচ্ছপভক্খা অহেসুং, একো পন ৰাতৰেগেন করম্পিযপট্টনং নাম পাপুণি. সো সমুদ্দতো উত্তরিত্ৰা নগ্গভোগো তস্মিং পট্টনেযেৰ ভিক্খায চরি. তমেনং মনুস্সা ‘‘অযং সমণো অপ্পিচ্ছো সন্তুট্ঠো’’তি সম্ভাৰেত্ৰা সক্কারং করিংসু. সো ‘‘লদ্ধো মে জীৰিকূপাযো’’তি তেসু নিৰাসনপারুপনং দেন্তেসুপি ন ইচ্ছি. তে ‘‘নত্থি ইতো উত্তরি অপ্পিচ্ছো সমণো’’তি ভিয্যো ভিয্যো পসীদিত্ৰা তস্স অস্সমপদং কত্ৰা তত্থ নং নিৰাসাপেসুং. সো ‘‘করম্পিযঅচেলো’’তি পঞ্ঞাযি. তস্স তত্থ ৰসন্তস্স মহালাভসক্কারো উদপাদি.

একো নাগরাজাপিস্স সুপণ্ণরাজা চ উপট্ঠানং আগচ্ছন্তি. তেসু নাগরাজা নামেন পণ্ডরো নাম. অথেকদিৰসং সুপণ্ণরাজা তস্স সন্তিকং গন্ত্ৰা ৰন্দিত্ৰা একমন্তং নিসিন্নো এৰমাহ – ‘‘ভন্তে, অম্হাকং ঞাতকা নাগে গণ্হন্তা বহূ ৰিনস্সন্তি, এতেসং নাগানং গহণনিযামং মযং ন জানাম, গুয্হকারণং কির তেসং অত্থি, সক্কুণেয্যাথ নু খো তুম্হে এতে পিযাযমানা ৰিয তং কারণং পুচ্ছিতু’’ন্তি. সো ‘‘সাধূ’’তি সম্পটিচ্ছিত্ৰা সুপণ্ণরাজে ৰন্দিত্ৰা পক্কন্তে নাগরাজস্স আগতকালে ৰন্দিত্ৰা নিসিন্নং নাগরাজানং পুচ্ছি – ‘‘নাগরাজ, সুপণ্ণা কির তুম্হে গণ্হন্তা বহূ ৰিনস্সন্তি, তুম্হে গণ্হন্তা কথং গণ্হিতুং ন সক্কোন্তী’’তি. ভন্তে, ইদং অম্হাকং গুয্হং রহস্সং, মযা ইমং কথেন্তেন ঞাতিসঙ্ঘস্স মরণং আহটং হোতীতি. কিং পন ত্ৰং, আৰুসো, ‘‘অযং অঞ্ঞস্স কথেস্সতী’’তি এৰংসঞ্ঞী হোসি, নাহং অঞ্ঞস্স কথেস্সামি, অত্তনা পন জানিতুকামতায পুচ্ছামি, ত্ৰং ময্হং সদ্দহিত্ৰা নিব্ভযো হুত্ৰা কথেহীতি. নাগরাজা ‘‘ন কথেস্সামি, ভন্তে’’তি ৰন্দিত্ৰা পক্কামি. পুনদিৰসেপি পুচ্ছি, তথাপিস্স ন কথেসি.

অথ নং ততিযদিৰসে আগন্ত্ৰা নিসিন্নং, ‘‘নাগরাজ, অজ্জ ততিযো দিৰসো, মম পুচ্ছন্তস্স কিমত্থং ন কথেসী’’তি আহ. ‘‘তুম্হে অঞ্ঞস্স আচিক্খিস্সথা’’তি ভযেন, ভন্তেতি. কস্সচি ন কথেস্সামি, নিব্ভযো কথেহীতি. ‘‘তেন হি, ভন্তে, অঞ্ঞস্স মা কথযিত্থা’’তি পটিঞ্ঞং গহেত্ৰা, ‘‘ভন্তে, মযং মহন্তে মহন্তে পাসাণে গিলিত্ৰা ভারিযা হুত্ৰা নিপজ্জিত্ৰা সুপণ্ণানং আগমনকালে মুখং নিব্বাহেত্ৰা দন্তে ৰিৰরিত্ৰা সুপণ্ণে ডংসিতুং অচ্ছাম, তে আগন্ত্ৰা অম্হাকং সীসং গণ্হন্তি, তেসং অম্হে গরুভারে হুত্ৰা নিপন্নে উদ্ধরিতুং ৰাযমন্তানঞ্ঞেৰ উদকং ওত্থরতি. তে সীদন্তা অন্তোউদকেযেৰ মরন্তি, ইমিনা কারণেন বহূ সুপণ্ণা ৰিনস্সন্তি, তেসং অম্হে গণ্হন্তানং কিং সীসেন গহিতেন, বালা নঙ্গুট্ঠে গহেত্ৰা অম্হে হেট্ঠাসীসকে কত্ৰা গহিতং গোচরং মুখেন ছড্ডাপেত্ৰা লহুকে কত্ৰা গন্তুং সক্কোন্তী’’তি সো অত্তনো রহস্সকারণং তস্স দুস্সীলস্স কথেসি.

অথ তস্মিং পক্কন্তে সুপণ্ণরাজা আগন্ত্ৰা করম্পিযঅচেলং ৰন্দিত্ৰা ‘‘কিং, ভন্তে, পুচ্ছিতং তে নাগরাজস্স গুয্হকারণ’’ন্তি আহ. সো ‘‘আমাৰুসো’’তি ৰত্ৰা সব্বং তেন কথিতনিযামেনেৰ কথেসি. তং সুত্ৰা সুপণ্ণো ‘‘নাগরাজেন অযুত্তং কতং, ঞাতীনং নাম নস্সননিযামো পরস্স ন কথেতব্বো, হোতু, অজ্জেৰ মযা সুপণ্ণৰাতং কত্ৰা পঠমং এতমেৰ গহেতুং ৰট্টতী’’তি সুপণ্ণৰাতং কত্ৰা পণ্ডরনাগরাজানং নঙ্গুট্ঠে গহেত্ৰা হেট্ঠাসীসং কত্ৰা গহিতগোচরং ছড্ডাপেত্ৰা উপ্পতিত্ৰা আকাসং পক্খন্দি. পণ্ডরো আকাসে হেট্ঠাসীসকং ওলম্বন্তো ‘‘মযাৰ মম দুক্খং আভত’’ন্তি পরিদেৰন্তো আহ –

২৫৮.

‘‘ৰিকিণ্ণৰাচং অনিগুয্হমন্তং, অসঞ্ঞতং অপরিচক্খিতারং;

ভযং তমন্ৰেতি সযং অবোধং, নাগং যথা পণ্ডরকং সুপণ্ণো.

২৫৯.

‘‘যো গুয্হমন্তং পরিরক্খণেয্যং, মোহা নরো সংসতি হাসমানো;

তং ভিন্নমন্তং ভযমন্ৰেতি খিপ্পং, নাগং যথা পণ্ডরকং সুপণ্ণো.

২৬০.

‘‘নানুমিত্তো গরুং অত্থং, গুয্হং ৰেদিতুমরহতি;

সুমিত্তো চ অসম্বুদ্ধং, সম্বুদ্ধং ৰা অনত্থৰা.

২৬১.

‘‘ৰিস্সাসমাপজ্জিমহং অচেলং, সমণো অযং সম্মতো ভাৰিতত্তো;

তস্সাহমক্খিং ৰিৰরিং গুয্হমত্থং, অতীতমত্থো কপণং রুদামি.

২৬২.

‘‘তস্সাহং পরমং ব্রহ্মে গুয্হং, ৰাচং হিমং নাসক্খিং সংযমেতুং;

তপ্পক্খতো হি ভযমাগতং মমং, অতীতমত্থো কপণং রুদামি.

২৬৩.

‘‘যো ৰে নরো সুহদং মঞ্ঞমানো, গুয্হমত্থং সংসতি দুক্কুলীনে;

দোসা ভযা অথৰা রাগরত্তা, পল্লত্থিতো বালো অসংসযং সো.

২৬৪.

‘‘তিরোক্খৰাচো অসতং পৰিট্ঠো, যো সঙ্গতীসু মুদীরেতি ৰাক্যং;

আসীৰিসো দুম্মুখোত্যাহু তং নরং, আরা আরা সংযমে তাদিসম্হা.

২৬৫.

‘‘অন্নং পানং কাসিকচন্দনঞ্চ, মনাপিত্থিযো মালমুচ্ছাদনঞ্চ;

ওহায গচ্ছামসে সব্বকামে, সুপণ্ণ পাণূপগতাৰ ত্যম্হা’’তি.

তত্থ ৰিকিণ্ণৰাচন্তি পত্থটৰচনং. অনিগুয্হমন্তন্তি অপ্পটিচ্ছন্নমন্তং. অসঞ্ঞতন্তি কাযদ্ৰারাদীনি রক্খিতুং অসক্কোন্তং. অপরিচক্খিতারন্তি ‘‘অযং মযা কথিতমন্তং রক্খিতুং সক্খিস্সতি, ন সক্খিস্সতী’’তি পুগ্গলং ওলোকেতুং উপপরিক্খিতুং অসক্কোন্তং. ভযং তমন্ৰেতীতি তং ইমেহি চতূহি অঙ্গেহি সমন্নাগতং অবোধং দুপ্পঞ্ঞং পুগ্গলং সযংকতমেৰ ভযং অন্ৰেতি, যথা মং পণ্ডরকনাগং সুপণ্ণো অন্ৰাগতোতি. সংসতি হাসমানোতি রক্খিতুং অসমত্থস্স পাপপুরিসস্স হাসমানো কথেতি. নানুমিত্তোতি অনুৰত্তনমত্তেন যো মিত্তো, ন হদযেন, সো গুয্হং অত্থং জানিতুং নারহতীতি পরিদেৰতি. অসম্বুদ্ধন্তি অসম্বুদ্ধন্তো অজানন্তো, অপ্পঞ্ঞোতি অত্থো. সম্বুদ্ধন্তি সম্বুদ্ধন্তো জানন্তো, সপ্পঞ্ঞোতি অত্থো. ইদং ৰুত্তং হোতি – ‘‘যোপি সুহদযো মিত্তো ৰা অমিত্তো ৰা অপ্পঞ্ঞো সপ্পঞ্ঞোপি ৰা যো অনত্থৰা অনত্থচরো, সোপি গুয্হং ৰেদিতুং নারহতে’’তি.

সমণো অযন্তি অযং সমণোতি চ লোকসম্মতোতি চ ভাৰিতত্তোতি চ মঞ্ঞমানো অহং এতস্মিং ৰিস্সাসমাপজ্জিং. অক্খিন্তি কথেসিং. অতীতমত্থোতি অতীতত্থো, অতিক্কন্তত্থো হুত্ৰা ইদানি কপণং রুদামীতি পরিদেৰতি. তস্সাতি তস্স অচেলকস্স. ব্রহ্মেতি সুপণ্ণং আলপতি. সংযমেতুন্তি ইমং গুয্হৰাচং রহস্সকারণং রক্খিতুং নাসক্খিং. তপ্পক্খতো হীতি ইদানি ইদং ভযং মম তস্স অচেলকস্স পক্খতো কোট্ঠাসতো সন্তিকা আগতং, ইতি অতীতত্থো কপণং রুদামীতি. সুহদন্তি ‘‘সুহদো মম অয’’ন্তি মঞ্ঞমানো. দুক্কুলীনেতি অকুলজে নীচে. দোসাতি এতেহি দোসাদীহি কারণেহি যো এৰরূপং গুয্হং সংসতি, সো বালো অসংসযং পল্লত্থিতো পরিৰত্তেত্ৰা পাপিতো, হতোযেৰ নামাতি অত্থো.

তিরোক্খৰাচোতি অত্তনো যং ৰাচং কথেতুকামো, তস্সা তিরোক্খকতত্তা পটিচ্ছন্নৰাচো. অসতং পৰিট্ঠোতি অসপ্পুরিসানং অন্তরং পৰিট্ঠো অসপ্পুরিসেসু পরিযাপন্নো. সঙ্গতীসু মুদীরেতীতি যো এৰরূপো পরেসং রহস্সং সুত্ৰাৰ পরিসমজ্ঝেসু ‘‘অসুকেন অসুকং নাম কতং ৰা ৰুত্তং ৰা’’তি ৰাক্যং উদীরেতি, তং নরং ‘‘আসীৰিসো দুম্মুখো পূতিমুখো’’তি আহু, তাদিসম্হা পুরিসা আরা আরা সংযমে, দূরতো দূরতোৰ ৰিরমেয্য, পরিৰজ্জেয্য নন্তি অত্থো. মালমুচ্ছাদনঞ্চাতি মালঞ্চ দিব্বং চতুজ্জাতিযগন্ধঞ্চ উচ্ছাদনঞ্চ. ওহাযাতি এতে দিব্বঅন্নাদযো সব্বকামে অজ্জ মযং ওহায ছড্ডেত্ৰা গমিস্সাম. সুপণ্ণ, পাণূপগতাৰ ত্যম্হাতি, ভো সুপণ্ণ, পাণেহি উপগতাৰ তে অম্হা, সরণং নো হোহীতি.

এৰং পণ্ডরকো আকাসে হেট্ঠাসীসকো ওলম্বন্তো অট্ঠহি গাথাহি পরিদেৰি. সুপণ্ণো তস্স পরিদেৰনসদ্দং সুত্ৰা, ‘‘নাগরাজ অত্তনো রহস্সং অচেলকস্স কথেত্ৰা ইদানি কিমত্থং পরিদেৰসী’’তি তং গরহিত্ৰা গাথমাহ –

২৬৬.

‘‘কো নীধ তিণ্ণং গরহং উপেতি, অস্মিংধ লোকে পাণভূ নাগরাজ;

সমণো সুপণ্ণো অথৰা ত্ৰমেৰ, কিংকারণা পণ্ডরকগ্গহীতো’’তি.

তত্থ কো নীধাতি ইধ অম্হেসু তীসু জনেসু কো নু. অস্মিংধাতি এত্থ ইধাতি নিপাতমত্তং, অস্মিং লোকেতি অত্থো. পাণভূতি পাণভূতো. অথৰা ত্ৰমেৰাতি উদাহু ত্ৰংযেৰ. তত্থ সমণং তাৰ মা গরহ, সো হি উপাযেন তং রহস্সং পুচ্ছি. সুপণ্ণম্পি মা গরহ, অহঞ্হি তৰ পচ্চত্থিকোৰ. পণ্ডরকগ্গহীতোতি, সম্ম পণ্ডরক, ‘‘অহং কিংকারণা সুপণ্ণেন গহিতো’’তি চিন্তেত্ৰা চ পন অত্তানমেৰ গরহ, তযা হি রহস্সং কথেন্তেন অত্তনাৰ অত্তনো অনত্থো কতোতি অযমেত্থ অধিপ্পাযো.

তং সুত্ৰা পণ্ডরকো ইতরং গাথমাহ –

২৬৭.

‘‘সমণোতি মে সম্মতত্তো অহোসি, পিযো চ মে মনসা ভাৰিতত্তো;

তস্সাহমক্খিং ৰিৰরিং গুয্হমত্থং, অতীতমত্থো কপণং রুদামী’’তি.

তত্থ সম্মতত্তোতি সো সমণো ময্হং ‘‘সপ্পুরিসো অয’’ন্তি সম্মতভাৰো অহোসি. ভাৰিতত্তোতি সম্ভাৰিতভাৰো চ মে অহোসীতি.

ততো সুপণ্ণো চতস্সো গাথা অভাসি –

২৬৮.

‘‘ন চত্থি সত্তো অমরো পথব্যা, পঞ্ঞাৰিধা নত্থি ন নিন্দিতব্বা;

সচ্চেন ধম্মেন ধিতিযা দমেন, অলব্ভমব্যাহরতী নরো ইধ.

২৬৯.

‘‘মাতা পিতা পরমা বন্ধৰানং, নাস্স ততিযো অনুকম্পকত্থি;

তেসম্পি গুয্হং পরমং ন সংসে, মন্তস্স ভেদং পরিসঙ্কমানো.

২৭০.

‘‘মাতা পিতা ভগিনী ভাতরো চ, সহাযা ৰা যস্স হোন্তি সপক্খা;

তেসম্পি গুয্হং পরমং ন সংসে, মন্তস্স ভেদং পরিসঙ্কমানো.

২৭১.

‘‘ভরিযা চে পুরিসং ৰজ্জা, কোমারী পিযভাণিনী;

পুত্তরূপযসূপেতা, ঞাতিসঙ্ঘপুরক্খতা;

তস্সাপি গুয্হং পরমং ন সংসে, মন্তস্স ভেদং পরিসঙ্কমানো’’তি.

তত্থ অমরোতি অমরণসভাৰো সত্তো নাম নত্থি. পঞ্ঞাৰিধা নত্থীতি ন-কারো পদসন্ধিকরো, পঞ্ঞাৰিধা অত্থীতি অত্থো. ইদং ৰুত্তং হোতি – নাগরাজ, লোকে অমরোপি নত্থি, পঞ্ঞাৰিধাপি অত্থি, সা অঞ্ঞেসং পঞ্ঞাকোট্ঠাসসঙ্খাতা পঞ্ঞাৰিধা অত্তনো জীৰিতহেতু ন নিন্দিতব্বাতি. অথ ৰা পঞ্ঞাৰিধাতি পঞ্ঞাসদিসা ন নিন্দিতব্বা নাম অঞ্ঞা ধম্মজাতি নত্থি, তং কস্মা নিন্দসীতি. যেসং পন ‘‘পঞ্ঞাৰিধানম্পি ন নিন্দিতব্ব’’ন্তিপি পাঠো, তেসং উজুকমেৰ. সচ্চেনাতিআদীসু ৰচীসচ্চেন চ সুচরিতধম্মেন চ পঞ্ঞাসঙ্খাতায ধিতিযা চ ইন্দ্রিযদমেন চ অলব্ভং দুল্লভং অট্ঠসমাপত্তিমগ্গফলনিব্বানসঙ্খাতম্পি ৰিসেসং অব্যাহরতি আৰহতি তং নিপ্ফাদেতি নরো ইধ, তস্মা নারহসি অচেলং নিন্দিতুং, অত্তানমেৰ গরহ. অচেলেন হি অত্তনো পঞ্ঞৰন্ততায উপাযকুসলতায চ ৰঞ্চেত্ৰা ত্ৰং রহস্সং গুয্হং মন্তং পুচ্ছিতোতি অত্থো.

পরমাতি এতে উভো বন্ধৰানং উত্তমবন্ধৰা নাম. নাস্স ততিযোতি অস্স পুগ্গলস্স মাতাপিতূহি অঞ্ঞো ততিযো সত্তো অনুকম্পকো নাম নত্থি, মন্তস্স ভেদং পরিসঙ্কমানো পণ্ডিতো তেসং মাতাপিতূনম্পি পরমং গুয্হং ন সংসেয্য, ত্ৰং পন মাতাপিতূনম্পি অকথেতব্বং অচেলকস্স কথেসীতি অত্থো. সহাযা ৰাতি সুহদযমিত্তা ৰা. সপক্খাতি পেত্তেয্যমাতুলপিতুচ্ছাদযো সমানপক্খা ঞাতযো. তেসম্পীতি এতেসম্পি ঞাতিমিত্তানং ন কথেয্য, ত্ৰং পন অচেলকস্স কথেসি, অত্তনোৰ কুজ্ঝস্সূতি দীপেতি. ভরিযা চেতি কোমারী পিযভাণিনী পুত্তেহি চ রূপেন চ যসেন চ উপেতা এৰরূপা ভরিযাপি চে ‘‘আচিক্খাহি মে তৰ গুয্হ’’ন্তি ৰদেয্য, তস্সাপি ন সংসেয্য.

ততো পরা –

২৭২.

‘‘ন গুয্হমত্থং ৰিৰরেয্য, রক্খেয্য নং যথা নিধিং;

ন হি পাতুকতো সাধু, গুয্হো অত্থো পজানতা.

২৭৩.

‘‘থিযা গুয্হং ন সংসেয্য, অমিত্তস্স চ পণ্ডিতো;

যো চামিসেন সংহীরো, হদযত্থেনো চ যো নরো.

২৭৪.

‘‘গুয্হমত্থং অসম্বুদ্ধং, সম্বোধযতি যো নরো;

মন্তভেদভযা তস্স, দাসভূতো তিতিক্খতি.

২৭৫.

‘‘যাৰন্তো পুরিসস্সত্থং, গুয্হং জানন্তি মন্তিনং;

তাৰন্তো তস্স উব্বেগা, তস্মা গুয্হং ন ৰিস্সজে;

২৭৬.

‘‘ৰিৰিচ্চ ভাসেয্য দিৰা রহস্সং, রত্তিং গিরং নাতিৰেলং পমুঞ্চে;

উপস্সুতিকা হি সুণন্তি মন্তং, তস্মা মন্তো খিপ্পমুপেতি ভেদ’’ন্তি. –

পঞ্চ গাথা উমঙ্গজাতকে পঞ্চপণ্ডিতপঞ্হে আৰি ভৰিস্সন্তি.

ততো পরাসু –

২৭৭.

‘‘যথাপি অস্স নগরং মহন্তং, অদ্ৰারকং আযসং ভদ্দসালং;

সমন্তখাতাপরিখাউপেতং, এৰম্পি মে তে ইধ গুয্হমন্তা.

২৭৮.

‘‘যে গুয্হমন্তা অৰিকিণ্ণৰাচা, দল়্হা সদত্থেসু নরা দুজিৰ্হ;

আরা অমিত্তা ব্যৰজন্তি তেহি, আসীৰিসা ৰা রিৰ সত্তুসঙ্ঘা’’তি. –

দ্ৰীসু গাথাসু ভদ্দসালন্তি আপণাদীহি সালাহি সম্পন্নং. সমন্তখাতাপরিখাউপেতন্তি সমন্তখাতাহি তীহি পরিখাহি উপগতং. এৰম্পি মেতি এৰম্পি ময্হং তে পুরিসা খাযন্তি. কতরে? যে ইধ গুয্হমন্তা. ইদং ৰুত্তং হোতি – যথা অদ্ৰারকস্স অযোমযনগরস্স মনুস্সানং উপভোগপরিভোগো অন্তোৰ হোতি, ন অব্ভন্তরিমা বহি নিক্খমন্তি, ন বাহিরা অন্তো পৰিসন্তি, অপরাপরং সঞ্চারো ছিজ্জতি, গুয্হমন্তা পুরিসা এৰরূপা হোন্তি, অত্তনো গুয্হং অত্তনো অন্তোযেৰ জীরাপেন্তি, ন অঞ্ঞস্স কথেন্তীতি. দল়্হা সদত্থেসূতি অত্তনো অত্থেসু থিরা. দুজিৰ্হাতি পণ্ডরকনাগং আলপতি. ব্যৰজন্তীতি পটিক্কমন্তি. আসীৰিসা ৰা রিৰ সত্তুসঙ্ঘাতি এত্থ ৰাতি নিপাতমত্তং, আসীৰিসা সত্তুসঙ্ঘা রিৰাতি অত্থো. যথা আসীৰিসতো সত্তুসঙ্ঘা জীৰিতুকামা মনুস্সা আরা পটিক্কমন্তি, এৰং তেহি গুয্হমন্তেহি নরেহি আরা অমিত্তা পটিক্কমন্তি, উপগন্তুং ওকাসং ন লভন্তীতি ৰুত্তং হোতি.

এৰং সুপণ্ণেন ধম্মে কথিতে পণ্ডরকো আহ –

২৭৯.

‘‘হিত্ৰা ঘরং পব্বজিতো অচেলো, নগ্গো মুণ্ডো চরতি ঘাসহেতু;

তম্হি নু খো ৰিৰরিং গুয্হমত্থং, অত্থা চ ধম্মা চ অপগ্গতাম্হা.

২৮০.

‘‘কথংকরো হোতি সুপণ্ণরাজ, কিংসীলো কেন ৰতেন ৰত্তং;

সমণো চরং হিত্ৰা মমাযিতানি, কথংকরো সগ্গমুপেতি ঠান’’ন্তি.

তত্থ ঘাসহেতূতি নিস্সিরিকো কুচ্ছিপূরণত্থায খাদনীযভোজনীযে পরিযেসন্তো চরতি. অপগ্গতাম্হাতি অপগতা পরিহীনাম্হা. কথংকরোতি ইদং নাগরাজা তস্স নগ্গস্স সমণভাৰং ঞত্ৰা সমণপটিপত্তিং পুচ্ছন্তো আহ. তত্থ কিংসীলোতি কতরেন আচারেন সমন্নাগতো. কেন ৰতেনাতি কতরেন ৰতসমাদানেন ৰত্তন্তো. সমণো চরন্তি পব্বজ্জায চরন্তো তণ্হামমাযিতানি হিত্ৰা কথং সমিতপাপসমণো নাম হোতি. সগ্গন্তি কথং করোন্তো চ সুট্ঠু অগ্গং দেৰনগরং সো সমণো উপেতীতি.

সুপণ্ণো আহ –

২৮১.

‘‘হিরিযা তিতিক্খায দমেনুপেতো, অক্কোধনো পেসুণিযং পহায;

সমণো চরং হিত্ৰা মমাযিতানি, এৰংকরো সগ্গমুপেতি ঠান’’ন্তি.

তত্থ হিরিযাতি, সম্ম নাগরাজ, অজ্ঝত্তবহিদ্ধাসমুট্ঠানেহি হিরোত্তপ্পেহি তিতিক্খাসঙ্খাতায অধিৰাসনখন্তিযা ইন্দ্রিযদমেন চ উপেতো অকুজ্ঝনসীলো পিসুণৰাচং পহায তণ্হামমাযিতানি চ হিত্ৰা পব্বজ্জায চরন্তো সমণো নাম হোতি, এৰংকরোযেৰ চ এতানি হিরীআদীনি কুসলানি করোন্তো সগ্গমুপেতি ঠানন্তি.

ইদং সুপণ্ণরাজস্স ধম্মকথং সুত্ৰা পণ্ডরকো জীৰিতং যাচন্তো গাথমাহ –

২৮২.

‘‘মাতাৰ পুত্তং তরুণং তনুজ্জং, সম্ফস্সতা সব্বগত্তং ফরেতি;

এৰম্পি মে ত্ৰং পাতুরহু দিজিন্দ, মাতাৰ পুত্তং অনুকম্পমানো’’তি.

তস্সত্থো – যথা মাতা তনুজং অত্তনো সরীরজাতং তরুণং পুত্তং সম্ফস্সতং দিস্ৰা তং উরে নিপজ্জাপেত্ৰা থঞ্ঞং পাযেন্তী পুত্তসম্ফস্সেন সব্বং অত্তনো গত্তং ফরেতি, নপি মাতা পুত্ততো ভাযতি নপি পুত্তো মাতিতো, এৰম্পি মে ত্ৰং পাতুরহু পাতুভূতো দিজিন্দ দিজরাজ, তস্মা মাতাৰ পুত্তং মুদুকেন হদযেন অনুকম্পমানো মং পস্স, জীৰিতং মে দেহীতি.

অথস্স সুপণ্ণো জীৰিতং দেন্তো ইতরং গাথমাহ –

২৮৩.

‘‘হন্দজ্জ ত্ৰং মুঞ্চ ৰধা দুজিৰ্হ, তযো হি পুত্তা ন হি অঞ্ঞো অত্থি;

অন্তেৰাসী দিন্নকো অত্রজো চ, রজ্জস্সু পুত্তঞ্ঞতরো মে অহোসী’’তি.

তত্থ মুঞ্চাতি মুচ্চ, অযমেৰ ৰা পাঠো. দুজিৰ্হাতি তং আলপতি. অঞ্ঞোতি অঞ্ঞো চতুত্থো পুত্তো নাম নত্থি. অন্তেৰাসীতি সিপ্পং ৰা উগ্গণ্হমানো পঞ্হং ৰা সুণন্তো সন্তিকে নিৰুত্থো. দিন্নকোতি ‘‘অযং তে পুত্তো হোতূ’’তি পরেহি দিন্নো. রজ্জস্সূতি অভিরমস্সু. অঞ্ঞতরোতি তীসু পুত্তেসু অঞ্ঞতরো অন্তেৰাসী পুত্তো মে ত্ৰং জাতোতি দীপেতি.

এৰঞ্চ পন ৰত্ৰা আকাসা ওতরিত্ৰা তং ভূমিযং পতিট্ঠাপেসি. তমত্থং পকাসেন্তো সত্থা দ্ৰে গাথা অভাসি –

২৮৪.

‘‘ইচ্চেৰ ৰাক্যং ৰিসজ্জী সুপণ্ণো, ভুম্যং পতিট্ঠায দিজো দুজিৰ্হং;

মুত্তজ্জ ত্ৰং সব্বভযাতিৰত্তো, থলূদকে হোহি মযাভিগুত্তো.

২৮৫.

‘‘আতঙ্কিনং যথা কুসলো ভিসক্কো, পিপাসিতানং রহদোৰ সীতো;

ৰেস্মং যথা হিমসীতট্টিতানং, এৰম্পি তে সরণমহং ভৰামী’’তি.

তত্থ ইচ্চেৰ ৰাক্যন্তি ইতি এৰং ৰচনং ৰত্ৰা তং নাগরাজং ৰিস্সজ্জি. ভুম্যন্তি সো সযম্পি ভূমিযং পতিট্ঠায দিজো তং দুজিৰ্হং সমস্সাসেন্তো মুত্তো অজ্জ ত্ৰং ইতো পট্ঠায সব্বভযানি অতিৰত্তো থলে চ উদকে চ মযা অভিগুত্তো রক্খিতো হোহীতি আহ. আতঙ্কিনন্তি গিলানানং. এৰম্পি তেতি এৰং অহং তৰ সরণং ভৰামি.

গচ্ছ ত্ৰন্তি উয্যোজেসি. সো নাগরাজা নাগভৰনং পাৰিসি. ইতরোপি সুপণ্ণভৰনং গন্ত্ৰা ‘‘মযা পণ্ডরকনাগো সপথং কত্ৰা সদ্দহাপেত্ৰা ৰিস্সজ্জিতো, কীদিসং নু খো মযি তস্স হদযং, ৰীমংসিস্সামি ন’’ন্তি নাগভৰনং গন্ত্ৰা সুপণ্ণৰাতং অকাসি. তং দিস্ৰা নাগো ‘‘সুপণ্ণরাজা মং গহেতুং আগতো ভৰিস্সতী’’তি মঞ্ঞমানো ব্যামসহস্সমত্তং অত্তভাৰং মাপেত্ৰা পাসাণে চ ৰালুকঞ্চ গিলিত্ৰা ভারিযো হুত্ৰা নঙ্গুট্ঠং হেট্ঠাকত্ৰা ভোগমত্থকে ফণং ধারযমানো নিপজ্জিত্ৰা সুপণ্ণরাজানং ডংসিতুকামো ৰিয অহোসি. তং দিস্ৰা সুপণ্ণো ইতরং গাথমাহ –

২৮৬.

‘‘সন্ধিং কত্ৰা অমিত্তেন, অণ্ডজেন জলাবুজ;

ৰিৰরিয দাঠং সেসি, কুতো তং ভযমাগত’’ন্তি.

তং সুত্ৰা নাগরাজা তিস্সো গাথা অভাসি –

২৮৭.

‘‘সঙ্কেথেৰ অমিত্তস্মিং, মিত্তস্মিম্পি ন ৰিস্সসে;

অভযা ভযমুপ্পন্নং, অপি মূলানি কন্ততি.

২৮৮.

‘‘কথং নু ৰিস্সসে ত্যম্হি, যেনাসি কলহো কতো;

নিচ্চযত্তেন ঠাতব্বং, সো দিসব্ভি ন রজ্জতি.

২৮৯.

‘‘ৰিস্সাসযে ন চ তং ৰিস্সযেয্য, অসঙ্কিতো সঙ্কিতো চ ভৰেয্য;

তথা তথা ৰিঞ্ঞূ পরক্কমেয্য, যথা যথা ভাৰং পরো ন জঞ্ঞা’’তি.

তত্থ অভযাতি অভযট্ঠানভূতা মিত্তম্হা ভযং উপ্পন্নং জীৰিতসঙ্খাতানি মূলানেৰ কন্ততি. ত্যম্হীতি তস্মিং. যেনাসীতি যেন সদ্ধিং কলহো কতো অহোসি. নিচ্চযত্তেনাতি নিচ্চপটিযত্তেন. সো দিসব্ভি ন রজ্জতীতি যো নিচ্চযত্তেন অভিতিট্ঠতি, সো অত্তনো সত্তূহি সদ্ধিং ৰিস্সাসৰসেন ন রজ্জতি, ততো তেসং যথাকামকরণীযো ন হোতীতি অত্থো. ৰিস্সাসযেতি পরং অত্তনি ৰিস্সাসযে, তং পন সযং ন ৰিস্সসেয্য. পরেন অসঙ্কিতো অত্তনা চ সো সঙ্কিতো ভৰেয্য. ভাৰং পরোতি যথা যথা পণ্ডিতো পরক্কমতি, তথা তথা তস্স পরো ভাৰং ন জানাতি, তস্মা পণ্ডিতেন ৰীরিযং কাতব্বমেৰাতি দীপেতি.

ইতি তে অঞ্ঞমঞ্ঞং সল্লপিত্ৰা সমগ্গা সম্মোদমানা উভোপি অচেলকস্স অস্সমং অগমিংসু. তমত্থং পকাসেন্তো সত্থা আহ –

২৯০.

‘‘তে দেৰৰণ্ণা সুখুমালরূপা, উভো সমা সুজযা পুঞ্ঞখন্ধা;

উপাগমুং করম্পিযং অচেলং, মিস্সীভূতা অস্সৰাহাৰ নাগা’’তি.

তত্থ সমাতি সমানরূপা সদিসসণ্ঠানা হুত্ৰা. সুজযাতি সুৰযা পরিসুদ্ধা, অযমেৰ ৰা পাঠো. পুঞ্ঞখন্ধাতি কতকুসলতায পুঞ্ঞক্খন্ধা ৰিয. মিস্সীভূতাতি হত্থেন হত্থং গহেত্ৰা কাযমিস্সীভাৰং উপগতা. অস্সৰাহাৰ নাগাতি ধুরে যুত্তকা রথৰাহা দ্ৰে অস্সা ৰিয পুরিসনাগা তস্স অস্সমং অগমিংসু.

গন্ত্ৰা চ পন সুপণ্ণরাজা চিন্তেসি – ‘‘অযং নাগরাজা অচেলকস্স জীৰিতং ন দস্সতি, এতং দুস্সীলং ন ৰন্দিস্সামী’’তি. সো বহি ঠত্ৰা নাগরাজানমেৰ তস্স সন্তিকং পেসেসি. তং সন্ধায সত্থা ইতরং গাথমাহ.

২৯১.

‘‘ততো হৰে পণ্ডরকো অচেলং, সযমেৰুপাগম্ম ইদং অৰোচ;

মুত্তজ্জহং সব্বভযাতিৰত্তো, ন হি নূন তুয্হং মনসো পিযম্হা’’তি.

তত্থ পিযম্হাতি দুস্সীলনগ্গভোগ্গমুসাৰাদি নূন মযং তৰ মনসো ন পিযা অহুম্হাতি পরিভাসি.

ততো অচেলো ইতরং গাথমাহ –

২৯২.

‘‘পিযো হি মে আসি সুপণ্ণরাজা, অসংসযং পণ্ডরকেন সচ্চং;

সো রাগরত্তোৰ অকাসিমেতং, পাপকম্মং সম্পজানো ন মোহা’’তি.

তত্থ পণ্ডরকেনাতি তযা পণ্ডরকেন সো মম পিযতরো অহোসি, সচ্চমেতং. সোতি সো অহং তস্মিং সুপণ্ণে রাগেন রত্তো হুত্ৰা এতং পাপকম্মং জানন্তোৰ অকাসিং, ন মোহেন অজানন্তোতি.

তং সুত্ৰা নাগরাজা দ্ৰে গাথা অভাসি –

২৯৩.

‘‘ন মে পিযং অপ্পিযং ৰাপি হোতি, সম্পস্সতো লোকমিমং পরঞ্চ;

সুসঞ্ঞতানঞ্হি ৰিযঞ্জনেন, অসঞ্ঞতো লোকমিমং চরাসি.

২৯৪.

‘‘অরিযাৰকাসোসি অনরিযোৰাসি, অসঞ্ঞতো সঞ্ঞতসন্নিকাসো;

কণ্হাভিজাতিকোসি অনরিযরূপো, পাপং বহুং দুচ্চরিতং অচারী’’তি.

তত্থ ন মেতি অম্ভো দুস্সীলনগ্গমুসাৰাদি পব্বজিতস্স হি ইমঞ্চ পরঞ্চ লোকং সম্পস্সতো পিযং ৰা মে অপ্পিযং ৰাপি মেতি ন হোতি, ত্ৰং পন সুসঞ্ঞতানং সীলৰন্তানং ব্যঞ্জনেন পব্বজিতলিঙ্গেন অসঞ্ঞতো হুত্ৰা ইমং লোকং ৰঞ্চেন্তো চরসি. অরিযাৰকাসোসীতি অরিযপটিরূপকোসি. অসঞ্ঞতোতি কাযাদীহি অসঞ্ঞতোসি. কণ্হাভিজাতিকোতি কাল়কসভাৰো. অনরিযরূপোতি অহিরিকসভাৰো. অচারীতি অকাসি.

ইতি তং গরহিত্ৰা ইদানি অভিসপন্তো ইমং গাথমাহ –

২৯৫.

‘‘অদুট্ঠস্স তুৰং দুব্ভি, দুব্ভী চ পিসুণো চসি;

এতেন সচ্চৰজ্জেন, মুদ্ধা তে ফলতু সত্তধা’’তি.

তস্সত্থো – অম্ভো দুব্ভি ত্ৰং অদুট্ঠস্স মিত্তস্স দুব্ভী চাসি, পিসুণো চাসি, এতেন সচ্চৰজ্জেন মুদ্ধা তে সত্তধা ফলতূতি.

ইতি নাগরাজস্স সপন্তস্সেৰ অচেলকস্স সীসং সত্তধা ফলি. নিসিন্নট্ঠানেযেৰস্স ভূমি ৰিৰরং অদাসি. সো পথৰিং পৰিসিত্ৰা অৰীচিম্হি নিব্বত্তি, নাগরাজসুপণ্ণরাজানোপি অত্তনো ভৰনমেৰ অগমিংসু. সত্থা তস্স পথৰিং পৰিট্ঠভাৰং পকাসেন্তো ওসানগাথমাহ –

২৯৬.

‘‘তস্মা হি মিত্তানং ন দুব্ভিতব্বং, মিত্তদুব্ভা পাপিযো নত্থি অঞ্ঞো;

আসিত্তসত্তো নিহতো পথব্যা, ইন্দস্স ৰাক্যেন হি সংৰরো হতো’’তি.

তত্থ তস্মাতি যস্মা মিত্তদুব্ভিকম্মস্স ফরুসো ৰিপাকো, তস্মা. আসিত্তসত্তোতি আসিত্তৰিসেন সত্তো. ইন্দস্সাতি নাগিন্দস্স ৰাক্যেন. সংৰরোতি ‘‘অহং সংৰরে ঠিতোস্মী’’তি পটিঞ্ঞায এৰং পঞ্ঞাতো আজীৰকো হতোতি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি দেৰদত্তো মুসাৰাদং কত্ৰা পথৰিং পৰিট্ঠোযেৰা’’তি ৰত্ৰা জাতকং সমোধানেসি – ‘‘তদা অচেলকো দেৰদত্তো অহোসি, নাগরাজা সারিপুত্তো, সুপণ্ণরাজা পন অহমেৰ অহোসি’’ন্তি.

পণ্ডরনাগরাজজাতকৰণ্ণনা অট্ঠমা.

[৫১৯] ৯. সম্বুলাজাতকৰণ্ণনা

কা ৰেধমানাতি ইদং সত্থা জেতৰনে ৰিহরন্তো মল্লিকং দেৰিং আরব্ভ কথেসি. ৰত্থু কুম্মাসপিণ্ডিজাতকে (জা. ১.৭.১৪২ আদযো) ৰিত্থারিতমেৰ. সা পন তথাগতস্স তিণ্ণং কুম্মাসপিণ্ডিকানং দানানুভাৰেন তং দিৰসঞ্ঞেৰ রঞ্ঞো অগ্গমহেসিভাৰং পত্ৰা পুব্বুট্ঠাযিতাদীহি পঞ্চহি কল্যাণধম্মেহি সমন্নাগতা ঞাণসম্পন্না বুদ্ধুপট্ঠাযিকা পতিদেৰতা অহোসি. তস্সা পতিদেৰতাভাৰো সকলনগরে পাকটো অহোসি. অথেকদিৰসং ধম্মসভাযং কথং সমুট্ঠাপেসুং – ‘‘আৰুসো, মল্লিকা দেৰী কির ৰত্তসম্পন্না ঞাণসম্পন্না পতিদেৰতা’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপেসা ৰত্তসম্পন্না পতিদেৰতাযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তস্স রঞ্ঞো সোত্থিসেনো নাম পুত্তো অহোসি. তং রাজা ৰযপ্পত্তং উপরজ্জে পতিট্ঠপেসি, সম্বুলা নামস্স অগ্গমহেসী অহোসি উত্তমরূপধরা সরীরপ্পভাসম্পন্না, নিৰাতে জলমানা দীপসিখা ৰিয খাযতি. অপরভাগে সোত্থিসেনস্স সরীরে কুট্ঠং উপ্পজ্জতি, ৰেজ্জা তিকিচ্ছিতুং নাসক্খিংসু. সো ভিজ্জমানে কুট্ঠে পটিকূলো হুত্ৰা ৰিপ্পটিসারং পত্ৰা ‘‘কো মে রজ্জেন অত্থো, অরঞ্ঞে অনাথমরণং মরিস্সামী’’তি রঞ্ঞো আরোচাপেত্ৰা ইত্থাগারং ছড্ডেত্ৰা নিক্খমি. সম্বুলা বহূহি উপাযেহি নিৰত্তিযমানাপি অনিৰত্তিত্ৰাৰ ‘‘অহং তং সামিকং অরঞ্ঞে পটিজগ্গিস্সামী’’তি ৰত্ৰা সদ্ধিঞ্ঞেৰ নিক্খমি. সো অরঞ্ঞং পৰিসিত্ৰা সুলভমূলফলাফলে ছাযূদকসম্পন্নে পদেসে পণ্ণসালং কত্ৰা ৰাসং কপ্পেসি. রাজধীতা তং পটিজগ্গি. কথং? সা হি পাতো ৰুট্ঠায অস্সমপদং সম্মজ্জিত্ৰা পানীযপরিভোজনীযং উপট্ঠপেত্ৰা দন্তকট্ঠঞ্চ মুখধোৰনঞ্চ উপনামেত্ৰা মুখে ধোতে নানাওসধানি পিসিত্ৰা তস্স ৰণে মক্খেত্ৰা মধুরমধুরানি ফলাফলানি খাদাপেত্ৰা মুখং ৰিক্খালেত্ৰা হত্থেসু ধোতেসু ‘‘অপ্পমত্তো হোহি দেৰা’’তি ৰত্ৰা ৰন্দিত্ৰা পচ্ছিখণিত্তিঅঙ্কুসকে আদায ফলাফলত্থায অরঞ্ঞং পৰিসিত্ৰা ফলাফলানি আহরিত্ৰা একমন্তে ঠপেত্ৰা ঘটেন উদকং আহরিত্ৰা নানাচুণ্ণেহি চ মত্তিকাহি চ সোত্থিসেনং ন্হাপেত্ৰা পুন মধুরফলাফলানি উপনামেতি. পরিভোগাৰসানে ৰাসিতপানীযং উপনেত্ৰা সযং ফলাফলানি পরিভুঞ্জিত্ৰা পদরসন্থরং সংৰিদহিত্ৰা তস্মিং তত্থ নিপন্নে তস্স পাদে ধোৰিত্ৰা সীসপরিকম্মপিট্ঠিপরিকম্মপাদপরিকম্মানি কত্ৰা সযনপস্সং উপগন্ত্ৰা নিপজ্জতি. এতেনুপাযেন সামিকং পটিজগ্গি.

সা একদিৰসং অরঞ্ঞে ফলাফলং আহরন্তী একং গিরিকন্দরং দিস্ৰা সীসতো পচ্ছিং ওতারেত্ৰা কন্দরতীরে ঠপেত্ৰা ‘‘ন্হাযিস্সামী’’তি ওতরিত্ৰা হলিদ্দায সরীরং উব্বট্টেত্ৰা ন্হত্ৰা সুধোতসরীরা উত্তরিত্ৰা ৰাকচীরং নিৰাসেত্ৰা কন্দরতীরে অট্ঠাসি. অথস্সা সরীরপ্পভায ৰনং একোভাসং অহোসি. তস্মিং খণে একো দানৰো গোচরত্থায চরন্তো তং দিস্ৰা পটিবদ্ধচিত্তো হুত্ৰা গাথাদ্ৰযং আহ –

২৯৭.

‘‘কা ৰেধমানা গিরিকন্দরাযং, একা তুৰং তিট্ঠসি সংহিতূরু;

পুট্ঠাসি মে পাণিপমেয্যমজ্ঝে, অক্খাহি মে নামঞ্চ বন্ধৰে চ.

২৯৮.

‘‘ওভাসযং ৰনং রম্মং, সীহব্যগ্ঘনিসেৰিতং;

কা ৰা ত্ৰমসি কল্যাণি, কস্স ৰা ত্ৰং সুমজ্ঝিমে;

অভিৰাদেমি তং ভদ্দে, দানৰাহং নমত্থু তে’’তি.

তত্থ কা ৰেধমানাতি ন্হানমত্ততায সীতভাৰেন কম্পমানা. সংহিতূরূতি সম্পিণ্ডিতূরু উত্তমঊরুলক্খণে. পাণিপমেয্যমজ্ঝেতি হত্থেন মিনিতব্বমজ্ঝে. কা ৰা ত্ৰন্তি কা নাম ৰা ত্ৰং ভৰসি. অভিৰাদেমীতি ৰন্দামি. দানৰাহন্তি অহং একো দানৰো, অযং নমক্কারো তৰ অত্থু, অঞ্জলিং তে পগ্গণ্হামীতি অৰচ.

সা তস্স ৰচনং সুত্ৰা তিস্সো গাথা অভাসি –

২৯৯.

‘‘যো পুত্তো কাসিরাজস্স, সোত্থিসেনোতি তং ৰিদূ;

তস্সাহং সম্বুলা ভরিযা, এৰং জানাহি দানৰ;

অভিৰাদেমি তং ভন্তে, সম্বুলাহং নমত্থু তে.

৩০০.

‘‘ৰেদেহপুত্তো ভদ্দন্তে, ৰনে ৰসতি আতুরো;

তমহং রোগসম্মত্তং, একা একং উপট্ঠহং.

৩০১.

‘‘অহঞ্চ ৰনমুঞ্ছায, মধুমংসং মিগাবিলং;

যদাহরামি তং ভক্খো, তস্স নূনজ্জ নাধতী’’তি.

তত্থ ৰেদেহপুত্তোতি ৰেদেহরাজধীতায পুত্তো. রোগসম্মত্তন্তি রোগপীল়িতং. উপট্ঠহন্তি উপট্ঠহামি পটিজগ্গামি. ‘‘উপট্ঠিতা’’তিপি পাঠো. ৰনমুঞ্ছাযাতি ৰনং উঞ্ছেত্ৰা উঞ্ছাচরিযং চরিত্ৰা. মধুমংসন্তি নিম্মক্খিকং মধুঞ্চ মিগাবিলমংসঞ্চ সীহব্যগ্ঘমিগেহি খাদিতমংসতো অতিরিত্তকোট্ঠাসং. তং ভক্খোতি যং অহং আহরামি, তং ভক্খোৰ সো মম সামিকো. তস্স নূনজ্জাতি তস্স মঞ্ঞে অজ্জ আহারং অলভমানস্স সরীরং আতপে পক্খিত্তপদুমং ৰিয নাধতি উপতপ্পতি মিলাযতি.

ততো পরং দানৰস্স চ তস্সা চ ৰচনপটিৰচনগাথাযো হোন্তি –

৩০২.

‘‘কিং ৰনে রাজপুত্তেন, আতুরেন করিস্সসি;

সম্বুলে পরিচিণ্ণেন, অহং ভত্তা ভৰামি তে.

৩০৩.

‘‘সোকট্টায দুরত্তায, কিং রূপং ৰিজ্জতে মম;

অঞ্ঞং পরিযেস ভদ্দন্তে, অভিরূপতরং মযা.

৩০৪.

‘‘এহিমং গিরিমারুয্হ, ভরিযা মে চতুস্সতা;

তাসং ত্ৰং পৰরা হোহি, সব্বকামসমিদ্ধিনী.

৩০৫.

‘‘নূন তারকৰণ্ণাভে, যং কিঞ্চি মনসিচ্ছসি;

সব্বং তং পচুরং ময্হং, রমস্স্ৰজ্জ মযা সহ.

৩০৬.

‘‘নো চে তুৰং মহেসেয্যং, সম্বুলে কারযিস্সসি;

অলং ত্ৰং পাতরাসায, পণ্হে ভক্খা ভৰিস্সসি.

৩০৭.

‘‘তঞ্চ সত্তজটো লুদ্দো, কল়ারো পুরিসাদকো;

ৰনে নাথং অপস্সন্তিং, সম্বুলং অগ্গহী ভুজে.

৩০৮.

‘‘অধিপন্না পিসাচেন, লুদ্দেনামিসচক্খুনা;

সা চ সত্তুৰসং পত্তা, পতিমেৰানুসোচতি.

৩০৯.

‘‘ন মে ইদং তথা দুক্খং, যং মং খাদেয্য রক্খসো;

যঞ্চ মে অয্যপুত্তস্স, মনো হেস্সতি অঞ্ঞথা.

৩১০.

‘‘ন সন্তি দেৰা পৰসন্তি নূন, ন হি নূন সন্তি ইধ লোকপালা;

সহসা করোন্তানমসঞ্ঞতানং, ন হি নূন সন্তি পটিসেধিতারো’’তি.

তত্থ পরিচিণ্ণেনাতি তেন আতুরেন পরিচিণ্ণেন কিং করিস্সসি. সোকট্টাযাতি সোকাতুরায. ‘‘সোকট্ঠাযা’’তিপি পাঠো, সোকে ঠিতাযাতি অত্থো. দুরত্তাযাতি দুগ্গতকপণভাৰপ্পত্তায অত্তভাৰায. এহিমন্তি মা ত্ৰং দুরত্তাম্হীতি চিন্তযি, এতং মম গিরিম্হি দিব্বৰিমানং, এহি ইমং গিরিং আরুহ. চতুস্সতাতি তস্মিং মে ৰিমানে অপরাপি চতুস্সতা ভরিযাযো অত্থি. সব্বং তন্তি যং কিঞ্চি উপভোগপরিভোগৰত্থাভরণাদিকং ইচ্ছসি, সব্বং তং নূন ময্হং পচুরং বহুং সুলভং, তস্মা মা কপণাম্হীতি চিন্তযি, এহি মযা সহ রমস্সূতি ৰদতি.

মহেসেয্যন্তি, ‘‘ভদ্দে, সম্বুলে নো চে মে ত্ৰং মহেসিভাৰং কারেস্সসি, পরিযত্তা ত্ৰং মম পাতরাসায, তেন তং বলক্কারেন ৰিমানং নেস্সামি, তত্র মং অসঙ্গণ্হন্তী মম স্ৰে পাতোৰ ভক্খা ভৰিস্সসী’’তি এৰং ৰত্ৰা সো সত্তহি জটাহি সমন্নাগতো লুদ্দকো দারুণো নিক্খন্তদন্তো তং তস্মিং ৰনে কিঞ্চি অত্তনো নাথং অপস্সন্তিং সম্বুলং ভুজে অগ্গহেসি. অধিপন্নাতি অজ্ঝোত্থটা. আমিসচক্খুনাতি কিলেসলোলেন. পতিমেৰাতি অত্তনো অচিন্তেত্ৰা পতিমেৰ অনুসোচতি. মনো হেস্সতীতি মং চিরাযন্তিং ৰিদিত্ৰা অঞ্ঞথা চিত্তং ভৰিস্সতি. ন সন্তি দেৰাতি ইদং সা দানৰেন ভুজে গহিতা দেৰতুজ্ঝাপনং করোন্তী আহ. লোকপালাতি এৰরূপানং সীলৰন্তীনং পতিদেৰতানং পালকা লোকপালা নূন ইধ লোকে ন সন্তীতি পরিদেৰতি.

অথস্সা সীলতেজেন সক্কস্স ভৰনং কম্পি, পণ্ডুকম্বলসিলাসনং উণ্হাকারং দস্সেসি. সক্কো আৰজ্জেন্তো তং কারণং ঞত্ৰা ৰজিরং আদায ৰেগেন গন্ত্ৰা দানৰস্স মত্থকে ঠত্ৰা ইতরং গাথমাহ –

৩১১.

‘‘ইত্থীনমেসা পৰরা যসস্সিনী, সন্তা সমা অগ্গিরিৰুগ্গতেজা;

তঞ্চে তুৰং রক্খসাদেসি কঞ্ঞং, মুদ্ধা চ হি সত্তধা তে ফলেয্য;

মা ত্ৰং দহী মুঞ্চ পতিব্বতাযা’’তি.

তত্থ সন্তাতি উপসন্তা, অথ ৰা পণ্ডিতা ঞাণসম্পন্না. সমাতি কাযৰিসমাদিৰিরহিতা. অদেসীতি খাদসি. ফলেয্যাতি ইমিনা মে ইন্দৰজিরেন পহরিত্ৰা মুদ্ধা ভিজ্জেথ. মা ত্ৰং দহীতি ত্ৰং ইমং পতিব্বতং মা তাপেয্যাসীতি.

তং সুত্ৰা দানৰো সম্বুলং ৰিস্সজ্জেসি. সক্কো ‘‘পুনপি এস এৰরূপং করেয্যা’’তি চিন্তেত্ৰা দানৰং দেৰসঙ্খলিকায বন্ধিত্ৰা পুন অনাগমনায ততিযে পব্বতন্তরে ৰিস্সজ্জেসি, রাজধীতরং অপ্পমাদেন ওৰদিত্ৰা সকট্ঠানমেৰ গতো. রাজধীতাপি অত্থঙ্গতে সূরিযে চন্দালোকেন অস্সমং পাপুণি. তমত্থং পকাসেন্তো সত্থা অট্ঠ গাথা অভাসি –

৩১২.

‘‘সা চ অস্সমমাগচ্ছি, পমুত্তা পুরিসাদকা;

নীল়ং পল়িনং সকুণীৰ, গতসিঙ্গংৰ আলযং.

৩১৩.

‘‘সা তত্থ পরিদেৰেসি, রাজপুত্তী যসস্সিনী;

সম্বুলা উতুমত্তক্খা, ৰনে নাথং অপস্সন্তী.

৩১৪.

‘‘সমণে ব্রাহ্মণে ৰন্দে, সম্পন্নচরণে ইসে;

রাজপুত্তং অপস্সন্তী, তুম্হংম্হি সরণং গতা.

৩১৫.

‘‘ৰন্দে সীহে চ ব্যগ্ঘে চ, যে চ অঞ্ঞে ৰনে মিগা;

রাজপুত্তং অপস্সন্তী, তুম্হংম্হি সরণং গতা.

৩১৬.

‘‘তিণা লতানি ওসঝো, পব্বতানি ৰনানি চ;

রাজপুত্তং অপস্সন্তী, তুম্হংম্হি সরণং গতা.

৩১৭.

‘‘ৰন্দে ইন্দীৰরীসামং, রত্তিং নক্খত্তমালিনিং;

রাজপুত্তং অপস্সন্তী, তুম্হংম্হি সরণং গতা.

৩১৮.

‘‘ৰন্দে ভাগীরথিং গঙ্গং, সৰন্তীনং পটিগ্গহং;

রাজপুত্তং অপস্সন্তী, তুম্হংম্হি সরণং গতা.

৩১৯.

‘‘ৰন্দে অহং পব্বতরাজসেট্ঠং, হিমৰন্তং সিলুচ্চযং;

রাজপুত্তং অপস্সন্তী, তুম্হংম্হি সরণং গতা’’তি.

তত্থ নীল়ং পল়িনং সকুণীৰাতি যথা সকুণিকা মুখতুণ্ডকেন গোচরং গহেত্ৰা কেনচি উপদ্দৰেন সকুণপোতকানং পল়িনত্তা পল়িনং সকুণিনীল়ং আগচ্ছেয্য, যথা ৰা গতসিঙ্গং নিক্খন্তৰচ্ছকং আলযং সুঞ্ঞং ৰচ্ছকসালং ৰচ্ছগিদ্ধিনী ধেনু আগচ্ছেয্য, এৰং সুঞ্ঞং অস্সমং আগচ্ছীতি অত্থো. তদা হি সোত্থিসেনো সম্বুলায চিরমানায ‘‘ইত্থিযো নাম লোলা, পচ্চামিত্তম্পি মে গহেত্ৰা আগচ্ছেয্যা’’তি পরিসঙ্কন্তো পণ্ণসালতো নিক্খমিত্ৰা গচ্ছন্তরং পৰিসিত্ৰা নিসীদি. তেনেতং ৰুত্তং. উতুমত্তক্খাতি সোকৰেগসঞ্জাতেন উণ্হেন উতুনা মন্দলোচনা. অপস্সন্তীতি তস্মিং ৰনে নাথং অত্তনো পতিং অপস্সন্তী ইতো চিতো চ সন্ধাৰমানা পরিদেৰেসি.

তত্থ সমণে ব্রাহ্মণেতি সমিতপাপবাহিতপাপে সমণে ব্রাহ্মণে. সম্পন্নচরণেতি সহ সীলেন অট্ঠন্নং সমাপত্তীনং ৰসেন চ সম্পন্নচরণে ইসে ৰন্দেতি এৰং ৰত্ৰা রাজপুত্তং অপস্সন্তী তুম্হাকং সরণং গতা অম্হি. সচে মে সামিকস্স নিসিন্নট্ঠানং জানাথ, আচিক্খথাতি পরিদেৰেসীতি অত্থো. সেসগাথাসুপি এসেৰ নযো. তিণা লতানি ওসঝোতি অন্তোফেগ্গুবহিসারতিণানি চ লতানি চ অন্তোসারওসধিযো চ. ইমং গাথং তিণাদীসু নিব্বত্তদেৰতা সন্ধাযাহ. ইন্দীৰরীসামন্তি ইন্দীৰরীপুপ্ফসমানৰণ্ণং. নক্খত্তমালিনিন্তি নক্খত্তপটিপাটিসমন্নাগতং. তুম্হংম্হীতি রত্তিং সন্ধায তম্পি অম্হীতি আহ. ভাগীরথিং গঙ্গন্তি এৰংপরিযাযনামিকং গঙ্গং. সৰন্তীনন্তি অঞ্ঞাসং বহূনং নদীনং পটিগ্গাহিকং. গঙ্গায নিব্বত্তদেৰতং সন্ধাযেৰমাহ. হিমৰন্তেপি এসেৰ নযো.

তং এৰং পরিদেৰমানং দিস্ৰা সোত্থিসেনো চিন্তেসি – ‘‘অযং অতিৰিয পরিদেৰতি, ন খো পনস্সা ভাৰং জানামি, সচে মযি সিনেহেন এৰং করোতি, হদযম্পিস্সা ফলেয্য, পরিগ্গণ্হিস্সামি তাৰ ন’’ন্তি গন্ত্ৰা পণ্ণসালদ্ৰারে নিসীদি. সাপি পরিদেৰমানাৰ পণ্ণসালদ্ৰারং গন্ত্ৰা তস্স পাদে ৰন্দিত্ৰা ‘‘কুহিং গতোসি, দেৰা’’তি আহ. অথ নং সো, ‘‘ভদ্দে, ত্ৰং অঞ্ঞেসু দিৰসেসু ন ইমায ৰেলায আগচ্ছসি, অজ্জ অতিসাযং আগতাসী’’তি পুচ্ছন্তো গাথমাহ –

৩২০.

‘‘অতিসাযং ৰতাগঞ্ছি, রাজপুত্তি যসস্সিনি;

কেন নুজ্জ সমাগচ্ছি, কো তে পিযতরো মযা’’তি.

অথ নং সা ‘‘অহং, অয্যপুত্ত, ফলাফলানি আদায আগচ্ছন্তী একং দানৰং পস্সিং, সো মযি পটিবদ্ধচিত্তো হুত্ৰা মং হত্থে গণ্হিত্ৰা ‘সচে মম ৰচনং ন করোসি, খাদিস্সামি ত’ন্তি আহ, অহং তায ৰেলায তঞ্ঞেৰ অনুসোচন্তী এৰং পরিদেৰি’’ন্তি ৰত্ৰা গাথমাহ –

৩২১.

‘‘ইদং খোহং তদাৰোচং, গহিতা তেন সত্তুনা;

ন মে ইদং তথা দুক্খং, যং মং খাদেয্য রক্খসো;

যঞ্চ মে অয্যপুত্তস্স, মনো হেস্সতি অঞ্ঞথা’’তি.

অথস্স সেসম্পি পৰত্তিং আরোচেন্তী ‘‘তেন পনাহং, দেৰ, দানৰেন গহিতা অত্তানং ৰিস্সজ্জাপেতুং অসক্কোন্তী দেৰতুজ্ঝাপনকম্মং অকাসিং, অথ সক্কো ৰজিরহত্থো আগন্ত্ৰা আকাসে ঠিতো দানৰং সন্তজ্জেত্ৰা মং ৰিস্সজ্জাপেত্ৰা তং দেৰসঙ্খলিকায বন্ধিত্ৰা ততিযে পব্বতন্তরে খিপিত্ৰা পক্কামি, এৰাহং সক্কং নিস্সায জীৰিতং লভি’’ন্তি আহ. তং সুত্ৰা সোত্থিসেনো, ‘‘ভদ্দে, হোতু, মাতুগামস্স অন্তরে সচ্চং নাম দুল্লভং, হিমৰন্তে হি বহূ ৰনচরকতাপসৰিজ্জাধরাদযো সন্তি, কো তুয্হং সদ্দহিস্সতী’’তি ৰত্ৰা গাথমাহ –

৩২২.

‘‘চোরীনং বহুবুদ্ধীনং, যাসু সচ্চং সুদুল্লভং;

থীনং ভাৰো দুরাজানো, মচ্ছস্সেৰোদকে গত’’ন্তি.

সা তস্স ৰচনং সুত্ৰা, ‘‘অয্যপুত্ত, অহং তং অসদ্দহন্তং মম সচ্চবলেনেৰ তিকিচ্ছিস্সামী’’তি উদকস্স কলসং পূরেত্ৰা সচ্চকিরিযং কত্ৰা তস্স সীসে উদকং আসিঞ্চন্তী গাথমাহ –

৩২৩.

‘‘তথা মং সচ্চং পালেতু, পালযিস্সতি চে মমং;

যথাহং নাভিজানামি, অঞ্ঞং পিযতরং তযা;

এতেন সচ্চৰজ্জেন, ব্যাধি তে ৰূপসম্মতূ’’তি.

তত্থ তথা-সদ্দো ‘‘চে মম’’ন্তি ইমিনা সদ্ধিং যোজেতব্বো. ইদং ৰুত্তং হোতি – যথাহং ৰদামি, তথা চে মম ৰচনং সচ্চং, অথ মং ইদানিপি পালেতু, আযতিম্পি পালেস্সতি, ইদানি মে ৰচনং সুণাথ ‘‘যথাহং নাভিজানামী’’তি. পোত্থকেসু পন ‘‘তথা মং সচ্চং পালেতী’’তি লিখিতং, তং অট্ঠকথাযং নত্থি.

এৰং তায সচ্চকিরিযং কত্ৰা উদকে আসিত্তমত্তেযেৰ সোত্থিসেনস্স কুট্ঠং অম্বিলেন ধোতং ৰিয তম্বমলং তাৰদেৰ অপগচ্ছি. তে কতিপাহং তত্থ ৰসিত্ৰা অরঞ্ঞা নিক্খম্ম বারাণসিং পত্ৰা উয্যানং পৰিসিংসু. রাজা তেসং আগতভাৰং ঞত্ৰা উয্যানং গন্ত্ৰা তত্থেৰ সোত্থিসেনস্স ছত্তং উস্সাপেত্ৰা সম্বুলং অগ্গমহেসিট্ঠানে অভিসিঞ্চাপেত্ৰা নগরং পৰেসেত্ৰা সযং ইসিপব্বজ্জং পব্বজিত্ৰা উয্যানে ৰাসং কপ্পেসি, রাজনিৰেসনেযেৰ চ নিবদ্ধং ভুঞ্জি. সোত্থিসেনোপি সম্বুলায অগ্গমহেসিট্ঠানমত্তমেৰ অদাসি, ন পুনস্সা কোচি সক্কারো অহোসি, অত্থিভাৰম্পিস্সা ন অঞ্ঞাসি, অঞ্ঞাহেৰ ইত্থীহি সদ্ধিং অভিরমি. সম্বুলা সপত্তিদোসৰসেন কিসা অহোসি উপণ্ডুপণ্ডুকজাতা ধমনীসন্থতগত্তা. সা একদিৰসং সোকৰিনোদনত্থং ভুঞ্জিতুং আগতস্স সসুরতাপসস্স সন্তিকং গন্ত্ৰা তং কতভত্তকিচ্চং ৰন্দিত্ৰা একমন্তং নিসীদি. সো তং মিলাতিন্দ্রিযং দিস্ৰা গাথমাহ –

৩২৪.

‘‘যে কুঞ্জরা সত্তসতা উল়ারা, রক্খন্তি রত্তিন্দিৰমুয্যুতাৰুধা;

ধনুগ্গহানঞ্চ সতানি সোল়স, কথংৰিধে পস্সসি ভদ্দে সত্তৰো’’তি.

তস্সত্থো – ভদ্দে, সম্বুলে যে অম্হাকং সত্তসতা কুঞ্জরা, তেসঞ্ঞেৰ খন্ধগতানং যোধানং ৰসেন উয্যুত্তাৰুধা, অপরানি চ সোল়সধনুগ্গহসতানি রত্তিন্দিৰং বারাণসিং রক্খন্তি. এৰং সুরক্খিতে নগরে কথংৰিধে ত্ৰং সত্তৰো পস্সসি. ভদ্দে, যস্সা তৰ সাসঙ্কা সপ্পটিভযা অরঞ্ঞা আগতকালেপি পভাসম্পন্নং সরীরং, ইদানি পন মিলাতা পণ্ডুপলাসৰণ্ণা অতিৰিয কিলন্তিন্দ্রিযাসি, কস্স নাম ত্ৰং ভাযসী’’তি পুচ্ছি.

সা তস্স ৰচনং সুত্ৰা ‘‘পুত্তো তে, দেৰ, মযি ন পুরিমসদিসো’’তি ৰত্ৰা পঞ্চ গাথা অভাসি –

৩২৫.

‘‘অলঙ্কতাযো পদুমুত্তরত্তচা, ৰিরাগিতা পস্সতি হংসগগ্গরা;

তাসং সুণিত্ৰা মিতগীতৰাদিতং, ন দানি মে তাত তথা যথা পুরে.

৩২৬.

‘‘সুৰণ্ণসংকচ্চধরা সুৰিগ্গহা, অলঙ্কতা মানুসিযচ্ছরূপমা;

সেনোপিযা তাত অনিন্দিতঙ্গিযো, খত্তিযকঞ্ঞা পটিলোভযন্তি নং.

৩২৭.

‘‘সচে অহং তাত তথা যথা পুরে, পতিং তমুঞ্ছায পুনা ৰনে ভরে;

সম্মানযে মং ন চ মং ৰিমানযে, ইতোপি মে তাত ততো ৰরং সিযা.

৩২৮.

‘‘যমন্নপানে ৰিপুলস্মি ওহিতে, নারী ৰিমট্ঠাভরণা অলঙ্কতা;

সব্বঙ্গুপেতা পতিনো চ অপ্পিযা, অবজ্ঝ তস্সা মরণং ততো ৰরং.

৩২৯.

‘‘অপি চে দলিদ্দা কপণা অনাল়্হিযা, কটাদুতীযা পতিনো চ সা পিযা;

সব্বঙ্গুপেতাযপি অপ্পিযায, অযমেৰ সেয্যা কপণাপি যা পিযা’’তি.

তত্থ পদুমুত্তরত্তচাতি পদুমগব্ভসদিসউত্তরত্তচা. সব্বাসং সরীরতো সুৰণ্ণপভা নিচ্ছরন্তীতি দীপেতি. ৰিরাগিতাতি ৰিলগ্গসরীরা, তনুমজ্ঝাতি অত্থো. হংসগগ্গরাতি এৰরূপা হংসা ৰিয মধুরস্সরা নারিযো পস্সতি. তাসন্তি সো তৰ পুত্তো তাসং নারীনং মিতগীতৰাদিতাদীনি সুণিত্ৰা ইদানি মে, তাত, যথা পুরে, তথা ন পৰত্ততীতি ৰদতি. সুৰণ্ণসংকচ্চধরাতি সুৰণ্ণমযসংকচ্চালঙ্কারধরা. অলঙ্কতাতি নানালঙ্কারপটিমণ্ডিতা. মানুসিযচ্ছরূপমাতি মানুসিযো অচ্ছরূপমা. সেনোপিযাতি সোত্থিসেনস্স পিযা. পটিলোভযন্তি নন্তি নং তৰ পুত্তং পটিলোভযন্তি.

সচে অহন্তি, তাত, যথা পুরে সচে অহং পুনপি তং পতিং তথেৰ কুট্ঠরোগেন ৰনং পৰিট্ঠং উঞ্ছায তস্মিং ৰনে ভরেয্যং, পুনপি মং সো সম্মানেয্য ন ৰিমানেয্য, ততো মে ইতোপি বারাণসিরজ্জতো তং অরঞ্ঞমেৰ ৰরং সিযা সপত্তিদোসেন সুস্সন্তিযাতি দীপেতি. যমন্নপানেতি যং অন্নপানে. ওহিতেতি ঠপিতে পটিযত্তে. ইমিনা বহুন্নপানঘরং দস্সেতি. অযং কিরস্সা অধিপ্পাযো – যা নারী ৰিপুলন্নপানে ঘরে একিকাৰ অসপত্তি সমানা ৰিমট্ঠাভরণা নানালঙ্কারেহি অলঙ্কতা সব্বেহি গুণঙ্গেহি উপেতা পতিনো চ অপ্পিযা হোতি, অবজ্ঝ গীৰায ৰল্লিযা ৰা রজ্জুযা ৰা বন্ধিত্ৰা তস্সা ততো ঘরাৰাসতো মরণমেৰ ৰরতরন্তি. অনাল়্হীযাতি অনাল়্হা. কটাদুতীযাতি নিপজ্জনকটসারকদুতিযা. সেয্যাতি কপণাপি সমানা যা পতিনো পিযা, অযমেৰ উত্তমাতি.

এৰং তায অত্তনো পরিসুস্সনকারণে তাপসস্স কথিতে তাপসো রাজানং পক্কোসাপেত্ৰা ‘‘তাত, সোত্থিসেন তযি কুট্ঠরোগাভিভূতে অরঞ্ঞং পৰিসন্তে তযা সদ্ধিং পৰিসিত্ৰা তং উপট্ঠহন্তী অত্তনো সচ্চবলেন তৰ রোগং ৰূপসমেত্ৰা যা তে রজ্জে পতিট্ঠানকারণমকাসি, তস্সা নাম ত্ৰং নেৰ ঠিতট্ঠানং, ন নিসিন্নট্ঠানং জানাসি, অযুত্তং তে কতং, মিত্তদুব্ভিকম্মং নামেতং পাপক’’ন্তি ৰত্ৰা পুত্তং ওৰদন্তো গাথমাহ –

৩৩০.

‘‘সুদুল্লভিত্থী পুরিসস্স যা হিতা, ভত্তিত্থিযা দুল্লভো যো হিতো চ;

হিতা চ তে সীলৰতী চ ভরিযা, জনিন্দ ধম্মং চর সম্বুলাযা’’তি.

তস্সত্থো – তাত, যা পুরিসস্স হিতা মুদুচিত্তা অনুকম্পিকা ইত্থী, যো চ ভত্তা ইত্থিযা হিতো কতগুণং জানাতি, উভোপেতে সুদুল্লভা. অযঞ্চ সম্বুলা তুয্হং হিতা চেৰ সীলসম্পন্না চ, তস্মা এতিস্সা ধম্মং চর, কতগুণং জানিত্ৰা মুদুচিত্তো হোহি, চিত্তমস্সা পরিতোসেহীতি.

এৰং সো পুত্তস্স ওৰাদং দত্ৰা উট্ঠাযাসনা পক্কামি. রাজা পিতরি গতে সম্বুলং পক্কোসাপেত্ৰা, ‘‘ভদ্দে, এত্তকং কালং মযা কতং দোসং খম, ইতো পট্ঠায সব্বিস্সরিযং তুয্হমেৰ দম্মী’’তি ৰত্ৰা ওসানগাথমাহ –

৩৩১.

‘‘সচে তুৰং ৰিপুলে লদ্ধভোগে, ইস্সাৰতিণ্ণা মরণং উপেসি;

অহঞ্চ তে ভদ্দে ইমা রাজকঞ্ঞা, সব্বে তে ৰচনকরা ভৰামা’’তি.

তস্সত্থো – ভদ্দে, সম্বুলে সচে ত্ৰং রতনরাসিম্হি ঠপেত্ৰা অভিসিত্তা অগ্গমহেসিট্ঠানৰসেন ৰিপুলে ভোগে লভিত্ৰাপি ইস্সায ওতিণ্ণা মরণং উপেসি, অহঞ্চ ইমা চ রাজকঞ্ঞা সব্বে তৰ ৰচনকরা ভৰাম, ত্ৰং যথাধিপ্পাযং ইমং রজ্জং ৰিচারেহীতি সব্বিস্সরিযং তস্সা অদাসি.

ততো পট্ঠায উভো সমগ্গৰাসং ৰসন্তা দানাদীনি পুঞ্ঞানি করিত্ৰা যথাকম্মং গমিংসু. তাপসো ঝানাভিঞ্ঞাযো নিব্বত্তেত্ৰা ব্রহ্মলোকূপগো অহোসি.

সত্থা ইমং ধম্মদেসনং আহরিত্ৰা ‘‘ন, ভিক্খৰে, ইদানেৰ, পুব্বেপি মল্লিকা পতিদেৰতাযেৰা’’তি ৰত্ৰা জাতকং সমোধানেসি ‘‘তদা সম্বুলা মল্লিকা অহোসি, সোত্থিসেনো কোসলরাজা, পিতা তাপসো পন অহমেৰ অহোসি’’ন্তি.

সম্বুলাজাতকৰণ্ণনা নৰমা.

[৫২০] ১০. গন্ধতিন্দুকজাতকৰণ্ণনা

অপ্পমাদোতি ইদং সত্থা জেতৰনে ৰিহরন্তো রাজোৰাদং আরব্ভ কথেসি. রাজোৰাদো হেট্ঠা ৰিত্থারিতোৰ. অতীতে পন কপিলরট্ঠে উত্তরপঞ্চালনগরে পঞ্চালো নাম রাজা অগতিগমনে ঠিতো অধম্মেন পমত্তো রজ্জং কারেসি. অথস্স অমচ্চাদযো সব্বেপি অধম্মিকাৰ জাতা. বলিপীল়িতা রট্ঠৰাসিনো পুত্তদারে আদায অরঞ্ঞে মিগা ৰিয চরিংসু, গামট্ঠানে গামো নাম নাহোসি. মনুস্সা রাজপুরিসানং ভযেন দিৰা গেহে ৰসিতুং অসক্কোন্তা গেহানি কণ্টকসাখাহি পরিক্খিপিত্ৰা গেহে রত্তিং ৰসিত্ৰা অরুণে উগ্গচ্ছন্তেযেৰ অরঞ্ঞং পৰিসন্তি. দিৰা রাজপুরিসা ৰিলুম্পন্তি, রত্তিং চোরা. তদা বোধিসত্তো বহিনগরে গন্ধতিন্দুকরুক্খে দেৰতা হুত্ৰা নিব্বত্তি, অনুসংৰচ্ছরং রঞ্ঞো সন্তিকা সহস্সগ্ঘনকং বলিকম্মং লভতি. সো চিন্তেসি – ‘‘অযং রাজা পমত্তো রজ্জং কারেতি, সকলরট্ঠং ৰিনস্সতি, ঠপেত্ৰা মং অঞ্ঞো রাজানং পতিরূপে নিৰেসেতুং সমত্থো নাম নত্থি, উপকারকো চাপি মে অনুসংৰচ্ছরং সহস্সগ্ঘনকবলিনা পূজেতি, ওৰদিস্সামি ন’’ন্তি.

সো রত্তিভাগে রঞ্ঞো সিরিগব্ভং পৰিসিত্ৰা উস্সীসকপস্সে ঠত্ৰা ওভাসং ৰিস্সজ্জেত্ৰা আকাসে অট্ঠাসি. রাজা তং বালসূরিযং ৰিয জলমানং দিস্ৰা ‘‘কোসি ত্ৰং, কেন ৰা কারণেন ইধাগতোসী’’তি পুচ্ছি. সো তস্স ৰচনং সুত্ৰা, ‘‘মহারাজ, অহং গন্ধতিন্দুকদেৰতা, ‘তুয্হং ওৰাদং দস্সামী’তি আগতোম্হী’’তি আহ. ‘‘কিং নাম ওৰাদং দস্সসী’’তি এৰং ৰুত্তে মহাসত্তো, ‘‘মহারাজ, ত্ৰং পমত্তো হুত্ৰা রজ্জং কারেসি, তেন তে সকলরট্ঠং হতৰিলুত্তং ৰিয ৰিনট্ঠং, রাজানো নাম পমাদেন রজ্জং কারেন্তা সকলরট্ঠস্স সামিনো ন হোন্তি, দিট্ঠেৰ ধম্মে ৰিনাসং পত্ৰা সম্পরাযে পুন মহানিরযে নিব্বত্তন্তি. তেসু চ পমাদং আপন্নেসু অন্তোজনা বহিজনাপিস্স পমত্তাৰ হোন্তি, তস্মা রঞ্ঞা অতিরেকেন অপ্পমত্তেন ভৰিতব্ব’’ন্তি ৰত্ৰা ধম্মদেসনং পট্ঠপেন্তো ইমা একাদস গাথা আহ –

৩৩২.

‘‘অপ্পমাদো অমতপদং, পমাদো মচ্চুনো পদং;

অপ্পমত্তা ন মীযন্তি, যে পমত্তা যথা মতা.

৩৩৩.

‘‘মদা পমাদো জাযেথ, পমাদা জাযতে খযো;

খযা পদোসা জাযন্তি, মা মদো ভরতূসভ.

৩৩৪.

‘‘বহূ হি খত্তিযা জীনা, অত্থং রট্ঠং পমাদিনো;

অথোপি গামিনো গামা, অনগারা অগারিনো.

৩৩৫.

‘‘খত্তিযস্স পমত্তস্স, রট্ঠস্মিং রট্ঠৰড্ঢন;

সব্বে ভোগা ৰিনস্সন্তি, রঞ্ঞো তং ৰুচ্চতে অঘং.

৩৩৬.

‘‘নেস ধম্মো মহারাজ, অতিৰেলং পমজ্জসি;

ইদ্ধং ফীতং জনপদং, চোরা ৰিদ্ধংসযন্তি নং.

৩৩৭.

‘‘ন তে পুত্তা ভৰিস্সন্তি, ন হিরঞ্ঞং ন ধানিযং;

রট্ঠে ৰিলুপ্পমানম্হি, সব্বভোগেহি জীযসি.

৩৩৮.

‘‘সব্বভোগা পরিজিণ্ণং, রাজানং ৰাপি খত্তিযং;

ঞাতিমিত্তা সুহজ্জা চ, ন তং মঞ্ঞন্তি মানিযং.

৩৩৯.

‘‘হত্থারোহা অনীকট্ঠা, রথিকা পত্তিকারকা;

তমেৰমুপজীৰন্তা, ন তং মঞ্ঞন্তি মানিযং.

৩৪০.

‘‘অসংৰিহিতকম্মন্তং, বালং দুম্মন্তিমন্তিনং;

সিরী জহতি দুম্মেধং, জিণ্ণংৰ উরগো তচং.

৩৪১.

‘‘সুসংৰিহিতকম্মন্তং, কালুট্ঠাযিং অতন্দিতং;

সব্বে ভোগাভিৰড্ঢন্তি, গাৰো সউসভামিৰ.

৩৪২.

‘‘উপস্সুতিং মহারাজ, রট্ঠে জনপদে চর;

তত্থ দিস্ৰা চ সুত্ৰা চ, ততো তং পটিপজ্জসী’’তি.

তত্থ অপ্পমাদোতি সতিযা অৰিপ্পৰাসো. অমতপদন্তি অমতস্স নিব্বানস্স পদং অধিগমকারণং. মচ্চুনো পদন্তি মরণস্স কারণং. পমত্তা হি ৰিপস্সনং অৰড্ঢেত্ৰা অপ্পটিসন্ধিকভাৰং পত্তুং অসক্কোন্তা পুনপ্পুনং সংসারে জাযন্তি চেৰ মীযন্তি চ, তস্মা পমাদো মচ্চুনো পদং নাম. ন মীযন্তীতি ৰিপস্সনং ৰড্ঢেত্ৰা অপ্পটিসন্ধিকভাৰং পত্তা পুন সংসারে অনিব্বত্তত্তা ন মীযন্তি নাম. যে পমত্তাতি, মহারাজ, যে পুগ্গলা পমত্তা, তে যথা মতা, তথেৰ দট্ঠব্বা. কস্মা? অকিচ্চসাধনতায. মতস্সপি হি ‘‘অহং দানং দস্সামি, সীলং রক্খিস্সামি, উপোসথকম্মং করিস্সামি, কল্যাণকম্মং পূরেস্সামী’’তি আভোগো ৰা পত্থনা ৰা পরিযুট্ঠানং ৰা নত্থি অপগতৰিঞ্ঞাণত্তা, পমত্তস্সপি অপ্পমাদাভাৰাতি তস্মা উভোপেতে একসদিসাৰ.

মদাতি, মহারাজ, আরোগ্যযোব্বনজীৰিতমদসঙ্খাতা তিৰিধা মদা পমাদো নাম জাযতি. সো মদপ্পত্তো পমাদাপন্নো পাণাতিপাতাদীনি পাপকম্মানি করোতি. অথ নং রাজানো ছিন্দাপেন্তি ৰা হনাপেন্তি ৰা, সব্বং ৰা ধনমস্স হরন্তি, এৰমস্স পমাদা ঞাতিধনজীৰিতক্খযো জাযতি. পুন সো ধনক্খযং ৰা যসক্খযং ৰা পত্তো জীৰিতুং অসক্কোন্তো জীৰিতৰুত্তত্থায কাযদুচ্চরিতাদীনি করোতি, ইচ্চস্স খযা পদোসা জাযন্তি, তেন তং ৰদামি মা মদো ভরতূসভাতি, রট্ঠভারকজেট্ঠক ভরতূসভ মা পমাদমাপজ্জীতি অত্থো. অত্থং রট্ঠন্তি জনপদৰাসীনং ৰুদ্ধিঞ্চেৰ সকলরট্ঠঞ্চ বহূ পমাদিনো জীনা. তেসং আৰিভাৰত্থায খন্তিৰাদিজাতক-মাতঙ্গজাতক-ভরুজাতক-সরভঙ্গজাতক-চেতিযজাতকানি কথেতব্বানি. গামিনোতি গামভোজকাপি তে গামাপি বহূ পমাদদোসেন জীনা পরিহীনা ৰিনট্ঠা. অনগারা অগারিনোতি পব্বজিতাপি পব্বজিতপটিপত্তিতো, গিহীপি ঘরাৰাসতো চেৰ ধনধঞ্ঞাদীহি চ বহূ জীনা পরিহীনাতি ৰদতি. তং ৰুচ্চতে অঘন্তি, মহারাজ, যসভোগপরিহানি নামেতং রঞ্ঞো দুক্খং ৰুচ্চতি. ভোগাভাৰেন হি নিদ্ধনস্স যসো হাযতি, হীনযসো মহন্তং কাযিকচেতসিকদুক্খং পাপুণাতি.

নেস ধম্মোতি, মহারাজ, এস পোরাণকরাজূনং ধম্মো ন হোতি. ইদ্ধং ফীতন্তি অন্নপানাদিনা সমিদ্ধং হিরঞ্ঞসুৰণ্ণাদিনা ফীতং পুপ্ফিতং. ন তে পুত্তাতি, মহারাজ, পৰেণিপালকা তে পুত্তা ন ভৰিস্সন্তি. রট্ঠৰাসিনো হি ‘‘অধম্মিকরঞ্ঞো এস পুত্তো, কিং অম্হাকং ৰুড্ঢিং করিস্সতি, নাস্স ছত্তং দস্সামা’’তি ছত্তং ন দেন্তি. এৰমেতেসং পৰেণিপালকা পুত্তা ন হোন্তি নাম. পরিজিণ্ণন্তি পরিহীনং. রাজানং ৰাপীতি সচেপি সো রাজা হোতি, অথ নং রাজানং সমানম্পি. মানিযন্তি ‘‘অযং রাজা’’তি গরুচিত্তেন সম্মানেতব্বং কত্ৰা ন মঞ্ঞন্তি. উপজীৰন্তাতি উপনিস্সায জীৰন্তাপি এতে এত্তকা জনা গরুচিত্তেন মঞ্ঞিতব্বং ন মঞ্ঞন্তি. কিংকারণা? অধম্মিকভাৰেন.

সিরীতি যসৰিভৰো. তচন্তি যথা উরগো জিণ্ণতচং জিগুচ্ছন্তো জহতি, ন পুন ওলোকেতি, এৰং তাদিসং রাজানং সিরী জহতি. সুসংৰিহিতকম্মন্তন্তি কাযদ্ৰারাদীহি পাপকম্মং অকরোন্তং. অভিৰড্ঢন্তীতি অভিমুখং গচ্ছন্তা ৰড্ঢন্তি. সউসভামিৰাতি সউসভা ইৰ. অপ্পমত্তস্স হি সউসভজেট্ঠকো গোগণো ৰিয ভোগা ৰড্ঢন্তি. উপস্সুতিন্তি জনপদচারিত্তসৰনায চারিকং অত্তনো সকলরট্ঠে চ জনপদে চ চর. তত্থাতি তস্মিং রট্ঠে চরন্তো দট্ঠব্বং দিস্ৰা সোতব্বং সুত্ৰা অত্তনো গুণাগুণং পচ্চক্খং কত্ৰা ততো অত্তনো হিতপটিপত্তিং পটিপজ্জিস্সসীতি.

ইতি মহাসত্তো একাদসহি গাথাহি রাজানং ওৰদিত্ৰা ‘‘গচ্ছ পপঞ্চং অকত্ৰা পরিগ্গণ্হ রট্ঠং, মা নাসযী’’তি ৰত্ৰা সকট্ঠানমেৰ গতো. রাজাপি তস্স ৰচনং সুত্ৰা সংৰেগপ্পত্তো পুনদিৰসে রজ্জং অমচ্চে পটিচ্ছাপেত্ৰা পুরোহিতেন সদ্ধিং কালস্সেৰ পাচীনদ্ৰারেন নগরা নিক্খমিত্ৰা যোজনমত্তং গতো. তত্থেকো গামৰাসী মহল্লকো অটৰিতো কণ্টকসাখং আহরিত্ৰা গেহদ্ৰারং পরিক্খিপিত্ৰা পিদহিত্ৰা পুত্তদারং আদায অরঞ্ঞং পৰিসিত্ৰা সাযং রাজপুরিসেসু পক্কন্তেসু অত্তনো ঘরং আগচ্ছন্তো গেহদ্ৰারে পাদে কণ্টকেন ৰিদ্ধো উক্কুটিকং নিসীদিত্ৰা কণ্টকং নীহরন্তো –

৩৪৩.

‘‘এৰং ৰেদেতু পঞ্চালো, সঙ্গামে সরমপ্পিতো;

যথাহমজ্জ ৰেদেমি, কণ্টকেন সমপ্পিতো’’তি. –

ইমায গাথায রাজানং অক্কোসি. তং পনস্স অক্কোসনং বোধিসত্তানুভাৰেন অহোসি. বোধিসত্তেন অধিগ্গহিতোৰ সো অক্কোসীতি ৰেদিতব্বো. তস্মিং পন সমযে রাজা চ পুরোহিতো চ অঞ্ঞাতকৰেসেন তস্স সন্তিকেৰ অট্ঠংসু. অথস্স ৰচনং সুত্ৰা পুরোহিতো ইতরং গাথমাহ –

৩৪৪.

‘‘জিণ্ণো দুব্বলচক্খূসি, ন রূপং সাধু পস্সসি;

কিং তত্থ ব্রহ্মদত্তস্স, যং তং মগ্গেয্য কণ্টকো’’তি.

তত্থ মগ্গেয্যাতি ৰিজ্ঝেয্য. ইদং ৰুত্তং হোতি – যদি ত্ৰং অত্তনো অব্যত্ততায কণ্টকেন ৰিদ্ধো, কো এত্থ রঞ্ঞো দোসো. যেন রাজানং অক্কোসি, কিং তে রঞ্ঞা কণ্টকো ওলোকেত্ৰাৰ আচিক্খিতব্বোতি.

তং সুত্ৰা মহল্লকো তিস্সো গাথা অভাসি –

৩৪৫.

‘‘বহ্ৰেত্থ ব্রহ্মদত্তস্স, সোহং মগ্গস্মি ব্রাহ্মণ;

অরক্খিতা জানপদা, অধম্মবলিনা হতা.

৩৪৬.

‘‘রত্তিঞ্হি চোরা খাদন্তি, দিৰা খাদন্তি তুণ্ডিযা;

রট্ঠস্মিং কূটরাজস্স, বহু অধম্মিকো জনো.

৩৪৭.

‘‘এতাদিসে ভযে জাতে, ভযট্টা তাত মাণৰা;

নিল্লেনকানি কুব্বন্তি, ৰনে আহত্ৰ কণ্টক’’ন্তি.

তত্থ বহ্ৰেত্থাতি, ব্রাহ্মণ, সোহং সকণ্টকে মগ্গে পতিতো সন্নিসিন্নো, বহু এত্থ ব্রহ্মদত্তস্স দোসো, ত্ৰং এত্তকং কালং রঞ্ঞো দোসেন মম সকণ্টকে মগ্গে ৰিচরণভাৰং ন জানাসি. তস্স হি অরক্খিতা জানপদা…পে… কণ্টকন্তি. তত্থ খাদন্তীতি ৰিলুম্পন্তি. তুণ্ডিযাতি ৰধবন্ধাদীহি পীল়েত্ৰা অধম্মেন বলিসাধকা. কূটরাজস্সাতি পাপরঞ্ঞো. অধম্মিকোতি পটিচ্ছন্নকম্মন্তো. তাতাতি পুরোহিতং আলপতি. মাণৰাতি মনুস্সা. নিল্লেনকানীতি নিলীযনট্ঠানানি. ৰনে আহত্ৰ কণ্টকন্তি কণ্টকং আহরিত্ৰা দ্ৰারানি পিদহিত্ৰা ঘরং ছড্ডেত্ৰা পুত্তদারং আদায ৰনং পৰিসিত্ৰা তস্মিং ৰনে অত্তনো নিলীযনট্ঠানানি করোন্তি. অথ ৰা ৰনে যো কণ্টকো, তং আহরিত্ৰা ঘরানি পরিক্খিপন্তি. ইতি রঞ্ঞো দোসেনেৰম্হি কণ্টকেন ৰিদ্ধো, মা এৰরূপস্স রঞ্ঞো উপত্থম্ভো হোহীতি.

তং সুত্ৰা রাজা পুরোহিতং আমন্তেত্ৰা, ‘‘আচরিয, মহল্লকো যুত্তং ভণতি, অম্হাকমেৰ দোসো, এহি নিৰত্তাম, ধম্মেন রজ্জং কারেস্সামা’’তি আহ. বোধিসত্তো পুরোহিতস্স সরীরে অধিমুচ্চিত্ৰা পুরতো গন্ত্ৰা ‘‘পরিগ্গণ্হিস্সাম তাৰ, মহারাজা’’তি আহ. তে তম্হা গামা অঞ্ঞং গামং গচ্ছন্তা অন্তরামগ্গে একিস্সা মহল্লিকায সদ্দং অস্সোসুং. সা কিরেকা দলিদ্দিত্থী দ্ৰে ধীতরো ৰযপ্পত্তা রক্খমানা তাসং অরঞ্ঞং গন্তুং ন দেতি. সযং অরঞ্ঞতো দারূনি চেৰ সাকঞ্চ আহরিত্ৰা ধীতরো পটিজগ্গতি. সা তং দিৰসং একং গুম্বং আরুয্হ সাকং গণ্হন্তী পৰট্টমানা ভূমিযং পতিত্ৰা রাজানং মরণেন অক্কোসন্তী গাথমাহ –

৩৪৮.

‘‘কদাস্সু নামযং রাজা, ব্রহ্মদত্তো মরিস্সতি;

যস্স রট্ঠম্হি জীযন্তি, অপ্পতিকা কুমারিকা’’তি.

তত্থ অপ্পতিকাতি অস্সামিকা. সচে হি তাসং সামিকা অস্সু, মং পোসেয্যুং. পাপরঞ্ঞো পন রজ্জে অহং দুক্খং অনুভোমি, কদা নু খো এস মরিস্সতীতি.

এৰং বোধিসত্তানুভাৰেনেৰ সা অক্কোসি. অথ নং পুরোহিতো পটিসেধেন্তো গাথমাহ –

৩৪৯.

‘‘দুব্ভাসিতঞ্হি তে জম্মি, অনত্থপদকোৰিদে;

কুহিং রাজা কুমারীনং, ভত্তারং পরিযেসতী’’তি.

তং সুত্ৰা মহল্লিকা দ্ৰে গাথা অভাসি –

৩৫০.

‘‘ন মে দুব্ভাসিতং ব্রহ্মে, কোৰিদত্থপদা অহং;

অরক্খিতা জানপদা, অধম্মবলিনা হতা.

৩৫১.

‘‘রত্তিঞ্হি চোরা খাদন্তি, দিৰা খাদন্তি তুণ্ডিযা;

রট্ঠস্মিং কূটরাজস্স, বহু অধম্মিকো জনো;

দুজ্জীৰে দুব্ভরে দারে, কুতো ভত্তা কুমারিযো’’তি.

তত্থ কোৰিদত্থপদাতি অহং অত্থপদে কারণপদে কোৰিদা ছেকা, মা ত্ৰং এতং পাপরাজানং পসংসি. দুজ্জীৰেতি দুজ্জীৰে রট্ঠে দুব্ভরে দারে জাতে মনুস্সেসু ভীততসিতেসু অরঞ্ঞে ৰসন্তেসু কুতো ভত্তা কুমারিযো, কুতো কুমারিযো ভত্তারং লভিস্সন্তীতি অত্থো.

তে তস্সা ৰচনং সুত্ৰা ‘‘যুত্তং সা কথেতী’’তি ততো পরং গচ্ছন্তা একস্স কস্সকস্স সদ্দং অস্সোসুং. তস্স কির কসন্তস্স সালিযো নাম বলিবদ্দো ফালেন পহটো সযি. সো রাজানং অক্কোসন্তো গাথমাহ –

৩৫২.

‘‘এৰং সযতু পঞ্চালো, সঙ্গামে সত্তিযা হতো;

যথাযং কপণো সেতি, হতো ফালেন সালিযো’’তি.

তত্থ যথাতি যথা অযং ৰেদনাপ্পত্তো সালিযবলিবদ্দো সেতি, এৰং সযতূতি অত্থো.

অথ নং পুরোহিতো পটিসেধেন্তো গাথমাহ –

৩৫৩.

‘‘অধম্মেন তুৰং জম্ম, ব্রহ্মদত্তস্স কুজ্ঝসি;

যো ত্ৰং সপসি রাজানং, অপরজ্ঝিত্ৰান অত্তনো’’তি.

তত্থ অধম্মেনাতি অকারণেন অসভাৰেন.

তং সুত্ৰা সো তিস্সো গাথা অভাসি –

৩৫৪.

‘‘ধম্মেন ব্রহ্মদত্তস্স, অহং কুজ্ঝামি ব্রাহ্মণ;

অরক্খিতা জানপদা অধম্মবলিনা হতা.

৩৫৫.

‘‘রত্তিঞ্হি চোরা খাদন্তি, দিৰা খাদন্তি তুণ্ডিযা;

রট্ঠস্মিং কূটরাজস্স, বহু অধম্মিকো জনো.

৩৫৬.

‘‘সা নূন পুন রে পক্কা, ৰিকালে ভত্তমাহরি;

ভত্তহারিং অপেক্খন্তো, হতো ফালেন সালিযো’’তি.

তত্থ ধম্মেনাতি কারণেনেৰ, অকারণেন অক্কোসতীতি সঞ্ঞং মা করি. সা নূন পুন রে পক্কা, ৰিকালে ভত্তমাহরীতি, ব্রাহ্মণ, সা ভত্তহারিকা ইত্থী পাতোৰ মম ভত্তং পচিত্ৰা আহরন্তী অধম্মবলিসাধকেহি ব্রহ্মদত্তস্স দাসেহি পলিবুদ্ধা ভৰিস্সতি, তে পরিৰিসিত্ৰা পুন ময্হং ভত্তং পক্কং ভৰিস্সতি, তেন কারণেন ৰিকালে ভত্তং আহরি, ‘‘অজ্জ ৰিকালে ভত্তং আহরী’’তি চিন্তেত্ৰা ছাতজ্ঝত্তো অহং তং ভত্তহারিং ওলোকেন্তো গোণং অট্ঠানে পতোদেন ৰিজ্ঝিং, তেনেস পাদং উক্খিপিত্ৰা ফালং পহরন্তো হতো ফালেন সালিযো. তস্মা ‘‘এস মযা হতো’’তি সঞ্ঞং মা করি, পাপরঞ্ঞোযেৰ হতো নামেস, মা তস্স ৰণ্ণং ভণীতি.

তে পুরতো গন্ত্ৰা একস্মিং গামে ৰসিংসু. পুনদিৰসে পাতোৰ একা কূটধেনু গোদোহকং পাদেন পহরিত্ৰা সদ্ধিং খীরেন পৰট্টেসি. সো ব্রহ্মদত্তং অক্কোসন্তো গাথমাহ –

৩৫৭.

‘‘এৰং হঞ্ঞতু পঞ্চালো, সঙ্গামে অসিনা হতো;

যথাহমজ্জ পহতো, খীরঞ্চ মে পৰট্টিত’’ন্তি.

তং সুত্ৰা পুরোহিতো পটিসেধেন্তো গাথমাহ –

৩৫৮.

‘‘যং পসু খীরং ছড্ডেতি, পসুপালং ৰিহিংসতি;

কিং তত্থ ব্রহ্মদত্তস্স, যং নো গরহতে ভৰ’’ন্তি.

ব্রাহ্মণেন গাথায ৰুত্তায পুন সো তিস্সো গাথা অভাসি –

৩৫৯.

‘‘গারয্হো ব্রহ্মে পঞ্চালো, ব্রহ্মদত্তস্স রাজিনো;

অরক্খিতা জানপদা, অধম্মবলিনা হতা.

৩৬০.

‘‘রত্তিঞ্হি চোরা খাদন্তি, দিৰা খাদন্তি তুণ্ডিযা;

রট্ঠস্মিং কূটরাজস্স, বহু অধম্মিকো জনো.

৩৬১.

‘‘চণ্ডা অটনকা গাৰী, যং পুরে ন দুহামসে;

তং দানি অজ্জ দোহাম, খীরকামেহুপদ্দুতা’’তি.

তত্থ চণ্ডাতি ফরুসা. অটনকাতি পলাযনসীলা. খীরকামেহীতি অধম্মিকরঞ্ঞো পুরিসেহি বহুং খীরং আহরাপেন্তেহি উপদ্দুতা দুহাম. সচে হি সো ধম্মেন রজ্জং কারেয্য, ন নো এৰরূপং ভযং আগচ্ছেয্যাতি.

তে ‘‘সো যুত্তং কথেতী’’তি তম্হা গামা নিক্খম্ম মহামগ্গং আরুয্হ নগরাভিমুখা গমিংসু. একস্মিঞ্চ গামে বলিসাধকা অসিকোসত্থায একং তরুণং কবরৰচ্ছকং মারেত্ৰা চম্মং গণ্হিংসু. ৰচ্ছকমাতা ধেনু পুত্তসোকেন তিণং ন খাদতি পানীযং ন পিৰতি, পরিদেৰমানা আহিণ্ডতি. তং দিস্ৰা গামদারকা রাজানং অক্কোসন্তা গাথমাহংসু –

৩৬২.

‘‘এৰং কন্দতু পঞ্চালো, ৰিপুত্তো ৰিপ্পসুক্খতু;

যথাযং কপণা গাৰী, ৰিপুত্তা পরিধাৰতী’’তি.

তত্থ পরিধাৰতীতি পরিদেৰমানো ধাৰতি.

ততো পুরোহিতো ইতরং গাথমাহ –

৩৬৩.

‘‘যং পসু পসুপালস্স, সম্ভমেয্য রৰেয্য ৰা;

কোনীধ অপরাধত্থি, ব্রহ্মদত্তস্স রাজিনো’’তি.

তত্থ সম্ভমেয্য রৰেয্য ৰাতি ভমেয্য ৰা ৰিরৰেয্য ৰা. ইদং ৰুত্তং হোতি – তাতা, পসু নাম পসুপালস্স রক্খন্তস্সেৰ ধাৰতিপি ৰিরৰতিপি, তিণম্পি ন খাদতি পানীযম্পি ন পিৰতি, ইধ রঞ্ঞো কো নু অপরাধোতি.

ততো গামদারকা দ্ৰে গাথা অভাসিংসু –

৩৬৪.

‘‘অপরাধো মহাব্রহ্মে, ব্রহ্মদত্তস্স রাজিনো;

অরক্খিতা জানপদা, অধম্মবলিনা হতা.

৩৬৫.

‘‘রত্তিঞ্হি চোরা খাদন্তি, দিৰা খাদন্তি তুণ্ডিযা;

রট্ঠস্মিং কূটরাজস্স, বহু অধম্মিকো জনো;

কথং নো অসিকোসত্থা, খীরপা হঞ্ঞতে পজা’’তি.

তত্থ মহাব্রহ্মেতি মহাব্রাহ্মণ. রাজিনোতি রঞ্ঞো. কথং নোতি কথং নু কেন নাম কারণেন. খীরপা হঞ্ঞতে পজাতি পাপরাজস্স সেৰকেহি খীরপকো ৰচ্ছকো হঞ্ঞতি, ইদানি সা ধেনু পুত্তসোকেন পরিদেৰতি, সোপি রাজা অযং ধেনু ৰিয পরিদেৰতূতি রাজানং অক্কোসিংসুযেৰ.

তে ‘‘সাধু ৰো কারণং ৰদথা’’তি ৰত্ৰা পক্কমিংসু. অথন্তরামগ্গে একিস্সা সুক্খপোক্খরণিযা কাকা তুণ্ডেহি ৰিজ্ঝিত্ৰা মণ্ডূকে খাদন্তি. বোধিসত্তো তেসু তং ঠানং সম্পত্তেসু অত্তনো আনুভাৰেন মণ্ডূকেন –

৩৬৬.

‘‘এৰং খজ্জতু পঞ্চালো, হতো যুদ্ধে সপুত্তকো;

যথাহমজ্জ খজ্জামি, গামিকেহি অরঞ্ঞজো’’তি. –

রাজানং অক্কোসাপেসি.

তত্থ গামিকেহীতি গামৰাসীহি.

তং সুত্ৰা পুরোহিতো মণ্ডূকেন সদ্ধিং সল্লপন্তো গাথমাহ –

৩৬৭.

‘‘ন সব্বভূতেসু ৰিধেন্তি রক্খং, রাজানো মণ্ডূক মনুস্সলোকে;

নেত্তাৰতা রাজা অধম্মচারী, যং তাদিসং জীৰমদেয্যু ধঙ্কা’’তি.

তত্থ জীৰন্তি জীৰন্তং. অদেয্যুন্তি খাদেয্যুং. ধঙ্কাতি কাকা. এত্তাৰতা রাজা অধম্মিকো নাম ন হোতি, কিং সক্কা অরঞ্ঞং পৰিসিত্ৰা রঞ্ঞা তং রক্খন্তেন চরিতুন্তি.

তং সুত্ৰা মণ্ডূকো দ্ৰে গাথা অভাসি –

৩৬৮.

‘‘অধম্মরূপো ৰত ব্রহ্মচারী, অনুপ্পিযং ভাসসি খত্তিযস্স;

ৰিলুপ্পমানায পুথুপ্পজায, পূজেসি রাজং পরমপ্পমাদং.

৩৬৯.

‘‘সচে ইদং ব্রহ্মে সুরজ্জকং সিযা, ফীতং রট্ঠং মুদিতং ৰিপ্পসন্নং;

ভুত্ৰা বলিং অগ্গপিণ্ডঞ্চ কাকা, ন মাদিসং জীৰমদেয্যু ধঙ্কা’’তি.

তত্থ ব্রহ্মচারীতি পুরোহিতং গরহন্তো আহ. খত্তিযস্সাতি এৰরূপস্স পাপরঞ্ঞো. ৰিলুপ্পমানাযাতি ৰিলুম্পমানায, অযমেৰ ৰা পাঠো. পুথুপ্পজাযাতি ৰিপুলায পজায ৰিনাসিযমানায. পূজেসীতি পসংসি. সুরজ্জকন্তি ছন্দাদিৰসেন অগন্ত্ৰা দস রাজধম্মে অকোপেন্তেন অপ্পমত্তেন রঞ্ঞা রক্খিযমানং সচে ইদং সুরজ্জকং ভৰেয্য. ফীতন্তি দেৰেসু সম্মাধারং অনুপ্পৰেচ্ছন্তেসু সম্পন্নসস্সং. ন মাদিসন্তি এৰং সন্তে মাদিসং জীৰমানঞ্ঞেৰ কাকা ন খাদেয্যুং.

এৰং ছসুপি ঠানেসু অক্কোসনং বোধিসত্তস্সেৰ আনুভাৰেন অহোসি;

তং সুত্ৰা রাজা চ পুরোহিতো চ ‘‘অরঞ্ঞৰাসিং তিরচ্ছানগতং মণ্ডূকং উপাদায সব্বে অম্হেযেৰ অক্কোসন্তী’’তি ৰত্ৰা ততো নগরং গন্ত্ৰা ধম্মেন রজ্জং কারেত্ৰা মহাসত্তস্সোৰাদে ঠিতা দানাদীনি পুঞ্ঞানি করিংসু.

সত্থা কোসলরঞ্ঞো ইমং ধম্মদেসনং আহরিত্ৰা, ‘‘মহারাজ, রঞ্ঞা নাম অগতিগমনং পহায ধম্মেন রজ্জং কারেতব্ব’’ন্তি ৰত্ৰা জাতকং সমোধানেসি ‘‘তদা গন্ধতিন্দুকদেৰতা অহমেৰ অহোসি’’ন্তি.

গন্ধতিন্দুকজাতকৰণ্ণনা দসমা.

জাতকুদ্দানং

কিংছন্দ কুম্ভ জযদ্দিস ছদ্দন্ত, অথ পণ্ডিতসম্ভৰ সিরকপি;

দকরক্খস পণ্ডরনাগৰরো, অথ সম্বুল তিন্দুকদেৰসুতোতি.

তিংসনিপাতৰণ্ণনা নিট্ঠিতা.