অট্ঠকথা > সুত্তপিটক (অট্ঠকথা) > খুদ্দকনিকায (অট্ঠকথা)

VRI Vol 6
MMR Vol 6
PTS Vol 6

Misc. Paragraph

খুদ্দকনিকাযে

জাতক-অট্ঠকথা

(ছট্ঠো ভাগো)

২২. মহানিপাতো

নমো তস্স ভগৰতো অরহতো সম্মাসম্বুদ্ধস্স

মা ¶ ¶ ¶ পণ্ডিচ্চযং ৰিভাৰযাতি ইদং সত্থা জেতৰনে ৰিহরন্তো মহাভিনিক্খমনং আরব্ভ কথেসি. একদিৰসঞ্হি ভিক্খূ ধম্মসভাযং সন্নিসিন্না ভগৰতো নেক্খম্মপারমিং ৰণ্ণযন্তা নিসীদিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ভিক্খৰে, ইদানি মম পূরিতপারমিস্স রজ্জং ছড্ডেত্ৰা মহাভিনিক্খমনং ¶ নাম অনচ্ছরিযং. অহঞ্হি পুব্বে অপরিপক্কে ঞাণে পারমিযো পূরেন্তোপি রজ্জং ছড্ডেত্ৰা নিক্খন্তোযেৰা’’তি ৰত্ৰা তেহি যাচিতো অতীতং আহরি.

অতীতে কাসিরট্ঠে বারাণসিযং কাসিরাজা নাম ধম্মেন রজ্জং কারেসি. তস্স সোল়সসহস্সা ইত্থিযো অহেসুং. তাসু একাপি পুত্তং ৰা ধীতরং ৰা ন লভি. নাগরা ‘‘অম্হাকং রঞ্ঞো ৰংসানুরক্খকো একোপি পুত্তো নত্থী’’তি রাজঙ্গণে সন্নিপতিত্ৰা কুসজাতকে (জা. ২.২০.১ আদযো) আগতনযেনেৰ রাজানং এৰমাহংসু ‘‘দেৰ, পুত্তং পত্থেথা’’তি. রাজা ¶ তেসং ৰচনং সুত্ৰা সোল়সসহস্সা ইত্থিযো ‘‘তুম্হে পুত্তং পত্থেথা’’তি আণাপেসি. তা চন্দাদীনং দেৰতানং আযাচনউপট্ঠানাদীনি কত্ৰা পত্থেন্তিযোপি পুত্তং ৰা ধীতরং ৰা ন লভিংসু. অগ্গমহেসী পনস্স মদ্দরাজধীতা চন্দাদেৰী নাম সীলসম্পন্না অহোসি. রাজা ‘‘ভদ্দে, ত্ৰম্পি পুত্তং পত্থেহী’’তি আহ. সা পুণ্ণমদিৰসে উপোসথং সমাদিযিত্ৰা চূল়সযনে নিপন্নাৰ অত্তনো সীলং আৰজ্জেত্ৰা ‘‘সচাহং অখণ্ডসীলা ইমিনা মে সচ্চেন ¶ পুত্তো উপ্পজ্জতূ’’তি সচ্চকিরিযং অকাসি.

তস্সা সীলতেজেন সক্কস্স ভৰনং উণ্হাকারং দস্সেসি. সক্কো আৰজ্জেন্তো তং কারণং ঞত্ৰা ‘‘চন্দাদেৰী পুত্তং পত্থেতি, হন্দাহং পুত্তং দস্সামী’’তি তস্সানুচ্ছৰিকং পুত্তং উপধারেন্তো বোধিসত্তং পস্সি. বোধিসত্তোপি তদাৰীসতিৰস্সানি বারাণসিযং রজ্জং কারেত্ৰা ততো চুতো উস্সদনিরযে নিব্বত্তিত্ৰা অসীতিৰস্সসহস্সানি তত্থ পচ্চিত্ৰা ততো চৰিত্ৰা তাৰতিংসভৰনে নিব্বত্তি. তত্থাপি যাৰতাযুকং ঠত্ৰা ততো চৰিত্ৰা উপরিদেৰলোকং গন্তুকামো অহোসি. সক্কো তস্স সন্তিকং গন্ত্ৰা ‘‘মারিস, তযি মনুস্সলোকে উপ্পন্নে পারমিযো চ তে পূরিস্সন্তি, মহাজনস্স ৰুড্ঢি চ ভৰিস্সতি, অযং কাসিরঞ্ঞো চন্দাদেৰী নাম অগ্গমহেসী পুত্তং পত্থেতি, তস্সা কুচ্ছিযং উপ্পজ্জাহী’’তি ৰত্ৰা অঞ্ঞেসঞ্চ চৰনধম্মানং পঞ্চসতানং দেৰপুত্তানং পটিঞ্ঞং গহেত্ৰা সকট্ঠানমেৰ অগমাসি. সো ‘‘সাধূ’’তি সম্পটিচ্ছিত্ৰা পঞ্চহি দেৰপুত্তসতেহি সদ্ধিং দেৰলোকতো চৰিত্ৰা সযং চন্দাদেৰিযা কুচ্ছিম্হি পটিসন্ধিং গণ্হি. ইতরে পন দেৰপুত্তা অমচ্চভরিযানং কুচ্ছীসু পটিসন্ধিং গণ্হিংসু.

তদা চন্দাদেৰিযা কুচ্ছি ৰজিরপুণ্ণা ৰিয অহোসি. সা গব্ভস্স পতিট্ঠিতভাৰং ঞত্ৰা রঞ্ঞো আরোচেসি. তং সুত্ৰা রাজা গব্ভস্স পরিহারং দাপেসি. সা পরিপুণ্ণগব্ভা দসমাসচ্চযেন ধঞ্ঞপুঞ্ঞলক্খণসম্পন্নং পুত্তং ৰিজাযি. তং দিৰসমেৰ অমচ্চগেহেসু পঞ্চ কুমারসতানি জাযিংসু. তস্মিং খণে রাজা অমচ্চগণপরিৰুতো মহাতলে নিসিন্নো অহোসি. অথস্স ¶ ‘‘পুত্তো, তে দেৰ, জাতো’’তি আরোচযিংসু. তেসং ৰচনং সুত্ৰা রঞ্ঞো পুত্তপেমং উপ্পজ্জিত্ৰা ছৰিযাদীনি ছিন্দিত্ৰা অট্ঠিমিঞ্জং ¶ আহচ্চ অট্ঠাসি, অব্ভন্তরে পীতি উপ্পজ্জি, হদযং সীতলং জাতং. সো অমচ্চে পুচ্ছি ‘‘তুট্ঠা নু খো তুম্হে, মম পুত্তো জাতো’’তি? ‘‘কিং কথেথ, দেৰ, মযং পুব্বে অনাথা, ইদানি পন সনাথা জাতা, সামিকো নো লদ্ধো’’তি আহংসু. রাজা মহাসেনগুত্তং পক্কোসাপেত্ৰা আণাপেসি ‘‘মম পুত্তস্স পরিৰারো লদ্ধুং ৰট্টতি, গচ্ছ ত্ৰং অমচ্চগেহেসু অজ্জ জাতা দারকা কিত্তকা নামাতি ওলোকেহী’’তি. সো ‘‘সাধূ’’তি সম্পটিচ্ছিত্ৰা অমচ্চগেহানি গন্ত্ৰা ওলোকেন্তো পঞ্চ কুমারসতানি দিস্ৰা পুনাগন্ত্ৰা রঞ্ঞো আরোচেসি.

রাজা পঞ্চন্নং দারকসতানং কুমারপসাধনানি পেসেত্ৰা পুন পঞ্চ ধাতিসতানি চ দাপেসি. মহাসত্তস্স পন অতিদীঘাদিদোসৰজ্জিতা ¶ অলম্বত্থনিযো মধুরথঞ্ঞাযো চতুসট্ঠি ধাতিযো অদাসি. অতিদীঘায হি ইত্থিযা পস্সে নিসীদিত্ৰা থঞ্ঞং পিৰতো দারকস্স গীৰা দীঘা হোতি, অতিরস্সায পস্সে নিসীদিত্ৰা থঞ্ঞং পিৰন্তো দারকো নিপ্পীল়িতখন্ধট্ঠিকো হোতি, অতিকিসায পস্সে নিসীদিত্ৰা থঞ্ঞং পিৰতো দারকস্স ঊরূ রুজ্জন্তি, অতিথূলায পস্সে নিসীদিত্ৰা থঞ্ঞং পিৰন্তো দারকো পক্খপাদো হোতি, অতিকাল়িকায খীরং অতিসীতলং হোতি, অতিওদাতায খীরং অতিউণ্হং হোতি, লম্বত্থনিযা পস্সে নিসীদিত্ৰা থঞ্ঞং পিৰন্তো দারকো নিপ্পীল়িতনাসিকো হোতি. কাসানঞ্চ পন ইত্থীনং খীরং অতিঅম্বিলং হোতি, সাসানঞ্চ পন ইত্থীনং খীরং অতিকটুকাদিভেদং হোতি, তস্মা তে সব্বেপি দোসে ৰিৰজ্জেত্ৰা অলম্বত্থনিযো মধুরথঞ্ঞাযো চতুসট্ঠি ধাতিযো দত্ৰা মহন্তং সক্কারং কত্ৰা চন্দাদেৰিযাপি ৰরং অদাসি. সাপি গহিতকং কত্ৰা ঠপেসি.

রাজা কুমারস্স নামগ্গহণদিৰসে লক্খণপাঠকে ব্রাহ্মণে পক্কোসাপেত্ৰা তেসং মহন্তং সক্কারং কত্ৰা কুমারস্স অন্তরাযাভাৰং পুচ্ছি. তে তস্স লক্খণসম্পত্তিং দিস্ৰা ‘‘মহারাজ, ধঞ্ঞপুঞ্ঞলক্খণসম্পন্নো অযং কুমারো, তিট্ঠতু একদীপো, দ্ৰিসহস্সপরিৰারানং চতুন্নম্পি মহাদীপানং রজ্জং কারেতুং সমত্থো হোতি, নাস্স কোচি অন্তরাযো ¶ পঞ্ঞাযতী’’তি ৰদিংসু. রাজা তেসং ৰচনং সুত্ৰা তুস্সিত্ৰা কুমারস্স নামং করোন্তো যস্মা কুমারস্স জাতদিৰসে সকলকাসিরট্ঠে দেৰো ৰস্সি, যস্মা চ রঞ্ঞো চেৰ অমচ্চানঞ্চ হদযং সীতলং জাতং, যস্মা চ তেমযমানো জাতো, তস্মা ‘‘তেমিযকুমারো’’তিস্স নামং অকাসি. অথ নং ধাতিযো একমাসিকং অলঙ্করিত্ৰা রঞ্ঞো সন্তিকং আনযিংসু. রাজা পিযপুত্তং আলিঙ্গিত্ৰা সীসে চুম্বিত্ৰা অঙ্কে নিসীদাপেত্ৰা রমযমানো নিসীদি.

তস্মিং ¶ খণে চত্তারো চোরা আনীতা. রাজা তে দিস্ৰা ‘‘তেসু একস্স চোরস্স সকণ্টকাহি কসাহি পহারসহস্সং করোথ, একস্স সঙ্খলিকায বন্ধিত্ৰা বন্ধনাগারপৰেসনং করোথ, একস্স সরীরে সত্তিপহারং করোথ, একস্স সূলারোপনং করোথা’’তি আণাপেসি. অথ মহাসত্তো পিতু ৰচনং সুত্ৰা ভীততসিতো হুত্ৰা ‘‘অহো মম পিতা রজ্জং নিস্সায অতিভারিযং নিরযগামিকম্মং অকাসী’’তি চিন্তেসি. পুনদিৰসে পন তং সেতচ্ছত্তস্স হেট্ঠা অলঙ্কতসিরিসযনে নিপজ্জাপেসুং. সো থোকং নিদ্দাযিত্ৰা পবুদ্ধো অক্খীনি উম্মীলেত্ৰা সেতচ্ছত্তং ওলোকেন্তো মহন্তং সিরিৰিভৰং পস্সি. অথস্স পকতিযাপি ভীততসিতস্স অতিরেকতরং ভযং উপ্পজ্জি. সো ‘‘কুতো নু ¶ খো অহং ইমং চোরগেহং আগতোম্হী’’তি উপধারেন্তো জাতিস্সরঞাণেন দেৰলোকতো আগতভাৰং ঞত্ৰা ততো পরং ওলোকেন্তো উস্সদনিরযে পক্কভাৰং পস্সি, ততো পরং ওলোকেন্তো তস্মিংযেৰ নগরে রাজভাৰং অঞ্ঞাসি.

অথস্স ‘‘অহং ৰীসতিৰস্সানি বারাণসিযং রজ্জং কারেত্ৰা অসীতিৰস্সসহস্সানি উস্সদনিরযে পচ্চিং, ইদানি পুনপি ইমস্মিংযেৰ চোরগেহে নিব্বত্তোম্হি, পিতা মে হিয্যো চতূসু চোরেসু আনীতেসু তথারূপং ফরুসং নিরযসংৰত্তনিকং কথং কথেসি, সচাহং রজ্জং কারেস্সামি, পুনপি নিরযে নিব্বত্তিত্ৰা মহাদুক্খং অনুভৰিস্সামী’’তি আৰজ্জেন্তস্স মহন্তং ভযং উপ্পজ্জি. বোধিসত্তস্স কঞ্চনৰণ্ণং সরীরং হত্থেন পরিমদ্দিতং পদুমং ৰিয মিলাতং দুব্বণ্ণং অহোসি. সো ‘‘কথং নু খো ইমম্হা চোরগেহা মুচ্চেয্য’’ন্তি চিন্তেন্তো নিপজ্জি. অথ নং একস্মিং অত্তভাৰে মাতুভূতপুব্বা ছত্তে ¶ অধিৰত্থা দেৰধীতা অস্সাসেত্ৰা ‘‘তাত তেমিযকুমার, মা ভাযি, মা সোচি, মা চিন্তযি. সচে ইতো মুচ্চিতুকামোসি, ত্ৰং অপীঠসপ্পীপি পীঠসপ্পী ৰিয হোহি, অবধিরোপি বধিরো ৰিয হোহি, অমূগোপি মূগো ৰিয হোহি, ইমানি তীণি অঙ্গানি অধিট্ঠায অত্তনো পণ্ডিতভাৰং মা পকাসেহী’’তি ৰত্ৰা পঠমং গাথমাহ –

‘‘মা পণ্ডিচ্চযং ৰিভাৰয, বালমতো ভৰ সব্বপাণিনং;

সব্বো তং জনো ওচিনাযতু, এৰং তৰ অত্থো ভৰিস্সতী’’তি.

তত্থ পণ্ডিচ্চযন্তি পণ্ডিচ্চং, অযমেৰ ৰা পাঠো. বালমতোতি বালো ইতি সম্মতো. সব্বো জনোতি সকলো অন্তোজনো চেৰ বহিজনো চ. ওচিনাযতূতি ‘‘নীহরথেতং কাল়কণ্ণি’’ন্তি অৰমঞ্ঞতু, অৰজানাতূতি অত্থো.

সো তস্সা ৰচনেন অস্সাসং পটিলভিত্ৰা –

‘‘করোমি ¶ তে তং ৰচনং, যং মং ভণসি দেৰতে;

অত্থকামাসি মে অম্ম, হিতকামাসি দেৰতে’’তি. –

ইমং গাথং ৰত্ৰা তানি তীণি অঙ্গানি অধিট্ঠাসি. সা চ দেৰধীতা অন্তরধাযি. রাজা পুত্তস্স অনুক্কণ্ঠনত্থায তানি পঞ্চ কুমারসতানি তস্স সন্তিকেযেৰ ঠপেসি. তে দারকা থঞ্ঞত্থায রোদন্তি পরিদেৰন্তি. মহাসত্তো পন নিরযভযতজ্জিতো ‘‘রজ্জতো মে সুস্সিত্ৰা মতমেৰ সেয্যো’’তি ন রোদতি ন পরিদেৰতি. অথস্স ধাতিযো তং পৰত্তিং ঞত্ৰা চন্দাদেৰিযা ¶ আরোচযিংসু. সাপি রঞ্ঞো আরোচেসি. রাজা নেমিত্তকে ব্রাহ্মণে পক্কোসাপেত্ৰা পুচ্ছি. অথ ব্রাহ্মণা আহংসু ‘‘দেৰ, কুমারস্স পকতিৰেলং অতিক্কমিত্ৰা থঞ্ঞং দাতুং ৰট্টতি, এৰং সো রোদমানো থনং দল়্হং গহেত্ৰা সযমেৰ পিৰিস্সতী’’তি. ততো পট্ঠায ধাতিযো কুমারস্স পকতিৰেলং অতিক্কমিত্ৰা থঞ্ঞং দেন্তি. দদমানা চ কদাচি একৰারং অতিক্কমিত্ৰা দেন্তি, কদাচি সকলদিৰসং খীরং ন দেন্তি.

সো ¶ নিরযভযতজ্জিতো সুস্সন্তোপি থঞ্ঞত্থায ন রোদতি, ন পরিদেৰতি. অথ নং অরোদন্তম্পি দিস্ৰা ‘‘পুত্তো মে ছাতো’’তি মাতা ৰা থঞ্ঞং পাযেতি, কদাচি ধাতিযো ৰা পাযেন্তি. সেসদারকা থঞ্ঞং অলদ্ধৰেলাযমেৰ রোদন্তি পরিদেৰন্তি. মহাসত্তো পন নিরযভযতজ্জিতো ন রোদতি, ন পরিদেৰতি, ন নিদ্দাযতি, ন হত্থপাদে সমিঞ্জতি, ন সদ্দং করোতি. অথস্স ধাতিযো ‘‘পীঠসপ্পীনং হত্থপাদা নাম ন এৰরূপা হোন্তি, মূগানং হনুকপরিযোসানং নাম ন এৰরূপং হোতি, বধিরানং কণ্ণসোতানি নাম ন এৰরূপানি হোন্তি, ভৰিতব্বমেত্থ কারণেন, ৰীমংসিস্সাম ন’’ন্তি চিন্তেত্ৰা ‘‘খীরেন তাৰ নং ৰীমংসিস্সামা’’তি সকলদিৰসং খীরং ন দেন্তি. সো সুস্সন্তোপি খীরত্থায সদ্দং ন করোতি. অথস্স মাতা ‘‘পুত্তো মে ছাতো’’তি সযমেৰ থঞ্ঞং পাযেতি. এৰং অন্তরন্তরা খীরং অদত্ৰা একসংৰচ্ছরং ৰীমংসন্তাপিস্স অন্তরং ন পস্সিংসু.

ততো অমচ্চাদযো রঞ্ঞো আরোচেসুং ‘‘একৰস্সিকদারকা নাম পূৰখজ্জকং পিযাযন্তি, তেন নং ৰীমংসিস্সামা’’তি পঞ্চ কুমারসতানি তস্স সন্তিকেযেৰ নিসীদাপেত্ৰা নানাপূৰখজ্জকানি উপনামেত্ৰা বোধিসত্তস্স অৰিদূরে ঠপেত্ৰা ‘‘যথারুচি তানি পূৰখজ্জকানি ¶ গণ্হথা’’তি পটিচ্ছন্নট্ঠানে তিট্ঠন্তি. সেসদারকা কলহং করোন্তা অঞ্ঞমঞ্ঞং পহরন্তা তং তং গহেত্ৰা খাদন্তি. মহাসত্তো পন অত্তানং ওৰদিত্ৰা ‘‘তাত তেমিযকুমার, নিরযভযং ইচ্ছন্তো পূৰখজ্জকং ইচ্ছাহী’’তি নিরযভযতজ্জিতো পূৰখজ্জকং ন ওলোকেসি. এৰং পূৰখজ্জকেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ‘‘দ্ৰিৰস্সিকদারকা নাম ফলাফলং পিযাযন্তি, তেন নং ৰীমংসিস্সামা’’তি নানাফলানি উপনামেত্ৰা বোধিসত্তস্স অৰিদূরে ঠপেত্ৰা ৰীমংসিংসু. সেসদারকা ¶ কলহং কত্ৰা যুজ্ঝন্তা তং তং গহেত্ৰা খাদন্তি. সো নিরযভযতজ্জিতো তম্পি ন ওলোকেসি. এৰং ফলাফলেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ‘‘তিৰস্সিকদারকা নাম কীল়নভণ্ডকং পিযাযন্তি, তেন নং ৰীমংসিস্সামা’’তি নানাসুৰণ্ণমযানি হত্থিঅস্সরূপকাদীনি কারাপেত্ৰা বোধিসত্তস্স অৰিদূরে ঠপেসুং. সেসদারকা অঞ্ঞমঞ্ঞং ৰিলুম্পন্তা গণ্হিংসু. মহাসত্তো পন ন কিঞ্চি ওলোকেসি. এৰং কীল়নভণ্ডকেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ¶ ‘‘চতুৰস্সিকদারকা নাম ভোজনং পিযাযন্তি, তেন নং ৰীমংসিস্সামা’’তি নানাভোজনানি উপনামেসুং. সেসদারকা তং পিণ্ডং পিণ্ডং কত্ৰা ভুঞ্জন্তি. মহাসত্তো পন অত্তানং ওৰদিত্ৰা ‘‘তাত তেমিযকুমার, অলদ্ধভোজনানং তে অত্তভাৰানং গণনা নাম নত্থী’’তি নিরযভযতজ্জিতো তম্পি ন ওলোকেসি. অথস্স মাতা সযমেৰ হদযেন ভিজ্জমানেন ৰিয অসহন্তেন সহত্থেন ভোজনং ভোজেসি. এৰং ভোজনেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ‘‘পঞ্চৰস্সিকদারকা নাম অগ্গিনো ভাযন্তি, তেন নং ৰীমংসিস্সামা’’তি রাজঙ্গণে অনেকদ্ৰারযুত্তং মহন্তং গেহং কারেত্ৰা তালপণ্ণেহি ছাদেত্ৰা তং সেসদারকেহি পরিৰুতং তস্স মজ্ঝে নিসীদাপেত্ৰা অগ্গিং দেন্তি. সেসদারকা অগ্গিং দিস্ৰা ৰিরৰন্তা পলাযিংসু. মহাসত্তো পন চিন্তেসি ‘‘নিরযঅগ্গিসন্তাপনতো ইদমেৰ অগ্গিসন্তাপনং সতগুণেন সহস্সগুণেন সতসহস্সগুণেন ৰরতর’’ন্তি নিরোধসমাপন্নো মহাথেরো ৰিয নিচ্চলোৰ অহোসি. অথ নং অগ্গিম্হি আগচ্ছন্তে গহেত্ৰা অপনেন্তি. এৰং অগ্গিনাপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ¶ ‘‘ছৰস্সিকদারকা নাম মত্তহত্থিনো ভাযন্তি, তেন নং ৰীমংসিস্সামা’’তি একং হত্থিং সুসিক্খিতং সিক্খাপেত্ৰা বোধিসত্তং সেসদারকেহি পরিৰুতং রাজঙ্গণে নিসীদাপেত্ৰা তং হত্থিং মুঞ্চন্তি. সো কোঞ্চনাদং নদন্তো সোণ্ডায ভূমিযং পোথেন্তো ভযং দস্সেন্তো আগচ্ছতি. সেসদারকা তং দিস্ৰা মরণভযভীতা দিসাৰিদিসাসু পলাযিংসু. মহাসত্তো পন মত্তহত্থিং আগচ্ছন্তং দিস্ৰা চিন্তেসি ‘‘চণ্ডনিরযে পচ্চনতো চণ্ডহত্থিনো হত্থে মরণমেৰ সেয্যো’’তি নিরযভযতজ্জিতো তত্থেৰ নিসীদি. সুসিক্খিতো হত্থী মহাসত্তং পুপ্ফকলাপং ৰিয উক্খিপিত্ৰা অপরাপরং কত্ৰা অকিলমেত্ৰাৰ গচ্ছতি. এৰং হত্থিনাপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ‘‘সত্তৰস্সিকদারকা নাম সপ্পস্স ভাযন্তি, তেন নং ৰীমংসিস্সামা’’তি বোধিসত্তং সেসদারকেহি সদ্ধিং রাজঙ্গণে নিসীদাপেত্ৰা উদ্ধটদাঠে কতমুখবন্ধে সপ্পে ৰিস্সজ্জেসুং. সেসদারকা তে দিস্ৰা ৰিরৰন্তা পলাযিংসু. মহাসত্তো পন নিরযভযং আৰজ্জেত্ৰা ‘‘চণ্ডসপ্পস্স ¶ মুখে ৰিনাসমেৰ ৰরতর’’ন্তি নিরোধসমাপন্নো মহাথেরো ৰিয নিচ্চলোৰ অহোসি. অথস্স সপ্পো সকলসরীরং ৰেঠেত্ৰা মত্থকে ফণং কত্ৰা অচ্ছি. তদাপি সো নিচ্চলোৰ অহোসি. এৰং সপ্পেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু ¶ .

ততো ‘‘অট্ঠৰস্সিকদারকা নাম নটসমজ্জং পিযাযন্তি, তেন নং ৰীমংসিস্সামা’’তি তং পঞ্চদারকসতেহি সদ্ধিং রাজঙ্গণে নিসীদাপেত্ৰা নটসমজ্জং কারাপেসুং. সেসদারকা তং নটসমজ্জং দিস্ৰা ‘‘সাধু সাধূ’’তি ৰদন্তা মহাহসিতং হসন্তি. মহাসত্তো পন ‘‘নিরযে নিব্বত্তকালে তৰ খণমত্তম্পি হাসো ৰা সোমনস্সং ৰা নত্থী’’তি নিরযভযং আৰজ্জেত্ৰা নিচ্চলোৰ অহোসি, তং ন ওলোকেসি. এৰং নটসমজ্জেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ‘‘নৰৰস্সিকদারকা নাম অসিনো ভাযন্তি, তেন নং ৰীমংসিস্সামা’’তি তং পঞ্চদারকসতেহি সদ্ধিং রাজঙ্গণে নিসীদাপেত্ৰা দারকানং কীল়নকালে একো পুরিসো ফলিকৰণ্ণং অসিং গহেত্ৰা পরিব্ভমন্তো নদন্তো ৰগ্গন্তো তাসেন্তো লঙ্ঘন্তো অপ্ফোটেন্তো মহাসদ্দং করোন্তো ‘‘কাসিরঞ্ঞো কির কাল়কণ্ণী একো পুত্তো অত্থি, সো কুহিং, সীসমস্স ছিন্দিস্সামী’’তি অভিধাৰতি. তং পুরিসং দিস্ৰা সেসদারকা ভীততসিতা হুত্ৰা ৰিরৰন্তা দিসাৰিদিসাসু পলাযিংসু. মহাসত্তো পন নিরযভযং আৰজ্জেত্ৰা অজানন্তো ৰিয নিসীদি. অথ ¶ নং সো পুরিসো অসিনা সীসে পরামসিত্ৰা ‘‘সীসং তে ছিন্দিস্সামী’’তি তাসেন্তোপি তাসেতুং অসক্কোন্তো অপগমি. এৰং খগ্গেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো দসৰস্সিককালে পনস্স বধিরভাৰৰীমংসনত্থং সিরিসযনে নিসীদাপেত্ৰা সাণিযা পরিক্খিপাপেত্ৰা চতূসু পস্সেসু ছিদ্দানি কত্ৰা তস্স অদস্সেত্ৰা হেট্ঠাসযনে সঙ্খধমকে নিসীদাপেত্ৰা একপ্পহারেনেৰ সঙ্খে ধমাপেন্তি, একনিন্নাদং অহোসি. অমচ্চা চতূসু পস্সেসু ঠত্ৰা সাণিযা ছিদ্দেহি ওলোকেন্তাপি মহাসত্তস্স একদিৰসম্পি সতিসম্মোসং ৰা হত্থপাদৰিকারং ৰা ফন্দনমত্তং ৰা ন পস্সিংসু. এৰং একসংৰচ্ছরং সঙ্খসদ্দেনপি অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো ¶ পরম্পি একাদসৰস্সিককালে একসংৰচ্ছরং তথেৰ ভেরিসদ্দেন ৰীমংসন্তাপিস্স নেৰ অন্তরং পস্সিংসু.

ততো দ্ৰাদসৰস্সিককালে ‘‘দীপেন নং ৰীমংসিস্সামা’’তি ‘‘রত্তিভাগে অন্ধকারে হত্থং ৰা পাদং ৰা ফন্দাপেতি নু খো, নো’’তি ঘটেসু দীপে জালেত্ৰা সেসদীপে নিব্বাপেত্ৰা থোকং অন্ধকারে সযাপেত্ৰা ঘটেহি দীপে উক্খিপিত্ৰা একপ্পহারেনেৰ আলোকং কত্ৰা ইরিযাপথং উপধারেন্তি. এৰং দীপেনপি একসংৰচ্ছরং অন্তরন্তরা ৰীমংসন্তাপিস্স কিঞ্চি ফন্দনমত্তম্পি ন পস্সিংসু.

ততো তেরসৰস্সিককালে ‘‘ফাণিতেন ¶ নং ৰীমংসিস্সামা’’তি সকলসরীরং ফাণিতেন মক্খেত্ৰা বহুমক্খিকে ঠানে নিপজ্জাপেসুং. মক্খিকা উট্ঠহন্তি, তা তস্স সকলসরীরং পরিৰারেত্ৰা সূচীহি ৰিজ্ঝমানা ৰিয খাদন্তি. সো নিরোধসমাপন্নো মহাথেরো ৰিয নিচ্চলোৰ অহোসি. এৰং ফাণিতেনপি একসংৰচ্ছরং অন্তরন্তরা ৰীমংসন্তাপিস্স কিঞ্চি ফন্দনমত্তম্পি ন পস্সিংসু.

অথস্স চুদ্দসৰস্সিককালে ‘‘ইদানি পনেস মহল্লকো জাতো সুচিকামো অসুচিজিগুচ্ছকো, অসুচিনা নং ৰীমংসিস্সামা’’তি ততো পট্ঠায নং নেৰ ন্হাপেন্তি ন চ আচমাপেন্তি. সো উচ্চারপস্সাৰং কত্ৰা তত্থেৰ পলিপন্নো সযতি. দুগ্গন্ধভাৰেন পনস্স অন্তরুধীনং নিক্খমনকালো ৰিয অহোসি, অসুচিগন্ধেন মক্খিকা খাদন্তি. সো নিচ্চলোৰ অহোসি ¶ . অথ নং পরিৰারেত্ৰা ঠিতা ধাতিযো আহংসু ‘‘তাত তেমিযকুমার, ত্ৰং মহল্লকো জাতো, কো তং সব্বদা পটিজগ্গিস্সতি, কিং ন লজ্জসি, কস্মা নিপন্নোসি, উট্ঠায তে সরীরং পটিজগ্গাহী’’তি অক্কোসন্তি পরিভাসন্তি. সো তথারূপে পটিকূলে গূথরাসিম্হি নিমুগ্গোপি দুগ্গন্ধভাৰেন যোজনসতমত্থকে ঠিতানম্পি হদযুপ্পতনসমত্থস্স গূথনিরযস্স দুগ্গন্ধভাৰং আৰজ্জেত্ৰা নিচ্চলোৰ অহোসি. এৰং অসুচিনাপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

ততো পন্নরসৰস্সিককালে ‘‘অঙ্গারেন নং ৰীমংসিস্সামা’’তি অথস্স হেট্ঠামঞ্চকে অগ্গিকপল্লানি ঠপযিংসু ‘‘অপ্পেৰ নাম উণ্হেন পীল়িতো ¶ দুক্খৰেদনং অসহন্তো ৰিপ্ফন্দনাকারং দস্সেয্যা’’তি. অথস্স সরীরে ফোটানি উট্ঠহন্তি. মহাসত্তো ‘‘অৰীচিনিরযসন্তাপো যোজনসতমত্থকে ফরতি, তম্হা দুক্খতো ইদং দুক্খং সতগুণেন সহস্সগুণেন সতসহস্সগুণেন ৰরতর’’ন্তি অধিৰাসেত্ৰা নিচ্চলোৰ অহোসি. অথস্স মাতাপিতরো ভিজ্জমানহদযা ৰিয মনুস্সে পটিক্কমাপেত্ৰা তং ততো অগ্গিসন্তাপনতো অপনেত্ৰা ‘‘তাত তেমিযকুমার, মযং তৰ অপীঠসপ্পিআদিভাৰং জানাম. ন হি এতেসং এৰরূপানি হত্থপাদকণ্ণসোতানি হোন্তি, ত্ৰং অম্হেহি পত্থেত্ৰা লদ্ধপুত্তকো, মা নো নাসেহি, সকলজম্বুদীপে ৰসন্তানং রাজূনং সন্তিকে গরহতো নো মোচেহী’’তি যাচিংসু. এৰং সো তেহি যাচিতোপি অসুণন্তো ৰিয হুত্ৰা নিচ্চলোৰ নিপজ্জি. অথস্স মাতাপিতরো রোদমানা পরিদেৰমানা পটিক্কমন্তি ¶ . একদা মাতা একিকা উপসঙ্কমিত্ৰা যাচতি, একদা পিতা এককোৰ উপসঙ্কমিত্ৰা যাচতি. এৰং একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

অথস্স সোল়সৰস্সিককালে অমচ্চব্রাহ্মণাদযো চিন্তযিংসু ‘‘পীঠসপ্পী ৰা হোতু, মূগো ৰা বধিরো ৰা হোতু, ৰযে পরিণতে রজনীযে অরজ্জন্তা নাম নত্থি, দুস্সনীযে অদুস্সন্তা নাম নত্থি, সমযে সম্পত্তে পুপ্ফৰিকসনং ৰিয হি ধম্মতা এসা, নাটকানম্পিস্স পচ্চুপট্ঠাপেত্ৰা তাহি নং ৰীমংসিস্সামা’’তি. ততো উত্তমরূপধরা দেৰকঞ্ঞাযো ৰিয ৰিলাসসম্পন্না নাটকিত্থিযো পক্কোসাপেত্ৰা ‘‘যা কুমারং হসাপেতুং ৰা কিলেসেহি বন্ধিতুং ৰা সক্কোতি, সা তস্স অগ্গমহেসী ভৰিস্সতী’’তি ৰত্ৰা কুমারং গন্ধোদকেন ন্হাপেত্ৰা দেৰপুত্তং ৰিয অলঙ্করিত্ৰা দেৰৰিমানসদিসে সিরিগব্ভে সুপঞ্ঞত্তে সিরিসযনে আরোপেত্ৰা গন্ধদামপুপ্ফদামধূমৰাসচুণ্ণাদীহি অন্তোগব্ভং একগন্ধসমোদকং কত্ৰা পটিক্কমিংসু. অথ নং তা ইত্থিযো পরিৰারেত্ৰা নচ্চগীতেহি চেৰ মধুরৰচনাদীহি চ নানপ্পকারেহি অভিরমাপেতুং ৰাযমিংসু. সো বুদ্ধিসম্পন্নতায তা ইত্থিযো অনোলোকেত্ৰা ‘‘ইমা ইত্থিযো মম সরীরসম্ফস্সং মা ¶ ৰিন্দন্তূ’’তি অধিট্ঠহিত্ৰা অস্সাসপস্সাসে সন্নিরুম্ভি, অথস্স সরীরং থদ্ধং অহোসি. তা তস্স সরীরসম্ফস্সং অৰিন্দন্তিযো হুত্ৰা ‘‘থদ্ধসরীরো এস, নাযং মনুস্সো, যক্খো ¶ ভৰিস্সতী’’তি ভীততসিতা হুত্ৰা অত্তানং সন্ধারেতুং অসক্কোন্তিযো পলাযিংসু. এৰং নাটকেনপি একসংৰচ্ছরং অন্তরন্তরা ৰীমংসন্তাপিস্স নেৰ অন্তরং পস্সিংসু.

এৰং সোল়স সংৰচ্ছরানি সোল়সহি মহাৰীমংসাহি চেৰ অনেকাহি খুদ্দকৰীমংসাহি চ ৰীমংসমানাপি তস্স চিত্তং পরিগ্গণ্হিতুং নাসক্খিংসু.

ততো রাজা ৰিপ্পটিসারী হুত্ৰা লক্খণপাঠকে ব্রাহ্মণে পক্কোসাপেত্ৰা ‘‘তুম্হে কুমারস্স জাতকালে ‘ধঞ্ঞপুঞ্ঞলক্খণসম্পন্নো অযং কুমারো, নাস্স কোচি অন্তরাযো পঞ্ঞাযতী’তি মে কথযিত্থ, ইদানি পন সো পীঠসপ্পী মূগবধিরো জাতো, কথা ৰো ন সমেতী’’তি আহ. ব্রাহ্মণা ৰদিংসু ‘‘মহারাজ, আচরিযেহি অদিট্ঠকং নাম নত্থি, অপিচ খো পন, দেৰ, ‘রাজকুলেহি পত্থেত্ৰা লদ্ধপুত্তকো কাল়কণ্ণী’তি ¶ ৰুত্তে ‘তুম্হাকং দোমনস্সং সিযা’তি ন কথযিম্হা’’তি. অথ নে রাজা এৰমাহ ‘‘ইদানি পন কিং কাতুং ৰট্টতী’’তি? ‘‘মহারাজ, ইমস্মিং কুমারে ইমস্মিং গেহে ৰসন্তে তযো অন্তরাযা পঞ্ঞাযিস্সন্তি – জীৰিতস্স ৰা অন্তরাযো, সেতচ্ছত্তস্স ৰা অন্তরাযো, অগ্গমহেসিযা ৰা অন্তরাযো’’তি. ‘‘তস্মা, দেৰ, পপঞ্চং অকত্ৰা অৰমঙ্গলরথে অৰমঙ্গলঅস্সে যোজেত্ৰা তত্থ নং নিপজ্জাপেত্ৰা পচ্ছিমদ্ৰারেন নীহরিত্ৰা আমকসুসানে চতুব্ভিত্তিকং আৰাটং খণিত্ৰা নিখণিতুং ৰট্টতী’’তি. রাজা অন্তরাযভযেন ভীতো তেসং ৰচনং ‘‘সাধূ’’তি সম্পটিচ্ছি.

তদা চন্দাদেৰী তং পৰত্তিং সুত্ৰা তুরিততুরিতাৰ একিকা রাজানং উপসঙ্কমিত্ৰা ৰন্দিত্ৰা ‘‘দেৰ, তুম্হেহি ময্হং ৰরো দিন্নো, মযা চ গহিতকো কত্ৰা ঠপিতো, ইদানি তং মে দেথা’’তি যাচি. ‘‘গণ্হাহি, দেৰী’’তি. ‘‘দেৰ, পুত্তস্স মে রজ্জং দেথা’’তি. ‘‘ন সক্কা, দেৰী’’তি. ‘‘কিংকারণা, দেৰা’’তি. ‘‘পুত্তো, তে দেৰি, কাল়কণ্ণী’’তি. ‘‘তেন হি, দেৰ, যাৰজীৰং অদদন্তাপি সত্ত ৰস্সানি দেথা’’তি. ‘‘ন সক্কা, দেৰী’’তি. ‘‘তেন হি, দেৰ, ছ ¶ ৰস্সানি দেথা’’তি. ‘‘ন সক্কা, দেৰী’’তি. ‘‘তেন হি, দেৰ, পঞ্চ ৰস্সানি দেথা’’তি. ‘‘ন সক্কা, দেৰী’’তি. ‘‘তেন হি, দেৰ, চত্তারি ৰস্সানি দেথা’’তি. ‘‘ন সক্কা, দেৰী’’তি. ‘‘তেন হি, দেৰ, তীণি ৰস্সানি দেথা’’তি. ‘‘ন সক্কা, দেৰী’’তি. ‘‘তেন হি, দেৰ, দ্ৰে ৰস্সানি দেথা’’তি. ‘‘ন সক্কা, দেৰী’’তি. ‘‘তেন ¶ হি, দেৰ, একৰস্সং রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, সত্ত মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, ছ মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, পঞ্চ মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, চত্তারি মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, তীণি মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, দ্ৰে মাসানি রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, একমাসং রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, অড্ঢমাসং রজ্জং দেথা’’তি. ‘‘ন সক্কা, দেৰী’’তি. ‘‘তেন হি, দেৰ, সত্ত দিৰসানি রজ্জং দেথা’’তি. রাজা ‘‘সাধু, দেৰি, গণ্হাহী’’তি আহ. সা তস্মিং খণে পুত্তং অলঙ্কারাপেত্ৰা ‘‘তেমিযকুমারস্স ইদং রজ্জ’’ন্তি নগরে ভেরিং চরাপেত্ৰা সকলনগরং অলঙ্কারাপেত্ৰা পুত্তং হত্থিক্খন্ধং আরোপেত্ৰা সেতচ্ছত্তং তস্স মত্থকে কারাপেত্ৰা নগরং পদক্খিণং কত্ৰা পুন আগন্ত্ৰা অন্তোনগরং পৰেসেত্ৰা তং সিরিসযনে নিপজ্জাপেত্ৰা পিযপুত্তং সব্বরত্তিং যাচি ‘‘তাত তেমিযকুমার, তং নিস্সায সোল়স ৰস্সানি নিদ্দং অলভিত্ৰা রোদমানায মে অক্খীনি উপক্কানি, সোকেন মে হদযং ভিজ্জমানং ৰিয অহোসি, অহং তৰ অপীঠসপ্পিআদিভাৰং জানামি, মা মং অনাথং করী’’তি. সা ইমিনা উপাযেনেৰ পুনদিৰসেপি পুনদিৰসেপীতি পঞ্চ দিৰসানি যাচি.

অথ ছট্ঠে দিৰসে রাজা সুনন্দং নাম সারথিং পক্কোসাপেত্ৰা ‘‘তাত, সুনন্দসারথি স্ৰে পাতোৰ অৰমঙ্গলরথে অৰমঙ্গলঅস্সে যোজেত্ৰা কুমারং তত্থ নিপজ্জাপেত্ৰা পচ্ছিমদ্ৰারেন নীহরিত্ৰা আমকসুসানে চতুব্ভিত্তিকং আৰাটং খণিত্ৰা তত্থ নং পক্খিপিত্ৰা কুদ্দালপিট্ঠেন মত্থকং ভিন্দিত্ৰা জীৰিতক্খযং পাপেত্ৰা উপরি পংসুং দত্ৰা পথৰিৰড্ঢনকম্মং ¶ কত্ৰা ন্হত্ৰা এহী’’তি আণাপেসি. সো ‘‘সাধু, দেৰা’’তি সম্পটিচ্ছি. অথ ছট্ঠম্পি রত্তিং দেৰী কুমারং যাচিত্ৰা ‘‘তাত তেমিযকুমার, তৰ পিতা কাসিরাজা তং স্ৰে পাতোৰ আমকসুসানে নিখণিতুং আণাপেসি, স্ৰে পাতোৰ মরণং পাপুণিস্সসি পুত্তা’’তি আহ. তং সুত্ৰা মহাসত্তস্স ‘‘তাত তেমিযকুমার, সোল়স ৰস্সানি তযা কতো ৰাযামো ¶ ইদানি মত্থকং পক্কো’’তি ¶ চিন্তেন্তস্স অব্ভন্তরে পীতি উপ্পজ্জি. মাতুযা পনস্স হদযং ভিজ্জমানং ৰিয অহোসি, এৰং সন্তেপি ‘‘মনোরথো মত্থকং পাপুণিস্সতী’’তি মাতুযা সদ্ধিং নালপি.

অথস্সা রত্তিযা অচ্চযেন পাতোৰ সুনন্দো সারথি রথং যোজেন্তো দেৰতানুভাৰেন মহাসত্তস্স পারমিতানুভাৰেন চ মঙ্গলরথে মঙ্গলঅস্সে যোজেত্ৰা রথং রাজদ্ৰারে ঠপেত্ৰা মহাতলং অভিরুহিত্ৰা সিরিগব্ভং পৰিসিত্ৰা দেৰিং ৰন্দিত্ৰা এৰমাহ – ‘‘দেৰি, ময্হং মা কুজ্ঝ, রঞ্ঞো আণা’’তি ৰত্ৰা পুত্তং আলিঙ্গিত্ৰা নিপন্নং দেৰিং পিট্ঠিহত্থেন অপনেত্ৰা পুপ্ফকলাপং ৰিয কুমারং উক্খিপিত্ৰা পাসাদা ওতরি. তদা চন্দাদেৰী উরং পহরিত্ৰা মহন্তেন সদ্দেন পরিদেৰিত্ৰা মহাতলে ওহীযি. অথ নং মহাসত্তো ওলোকেত্ৰা ‘‘মযি অকথেন্তে মাতা হদযেন ফলিতেন মরিস্সতী’’তি কথেতুকামো হুত্ৰাপি ‘‘সচে অহং কথেস্সামি, সোল়স ৰস্সানি কতো ৰাযামো মে মোঘো ভৰিস্সতি, অকথেন্তো পনাহং অত্তনো চ মাতাপিতূনঞ্চ মহাজনস্স চ পচ্চযো ভৰিস্সামী’’তি অধিৰাসেসি.

অথ নং সারথি রথং আরোপেত্ৰা ‘‘পচ্ছিমদ্ৰারাভিমুখং রথং পেসেস্সামী’’তি চিন্তেত্ৰা রথং পেসেসি. তদা মহাসত্তস্স পারমিতানুভাৰেন দেৰতাৰিগ্গহিতো হুত্ৰা রথং নিৰত্তাপেত্ৰা পাচীনদ্ৰারাভিমুখং রথং পেসেসি, অথ রথচক্কং উম্মারে পতিহঞ্ঞি. মহাসত্তোপি তস্স সদ্দং সুত্ৰা ‘‘মনোরথো মে মত্থকং পত্তো’’তি সুট্ঠুতরং তুট্ঠচিত্তো অহোসি. রথো নগরা নিক্খমিত্ৰা দেৰতানুভাৰেন তিযোজনিকং ঠানং গতো. তত্থ ৰনঘটং সারথিস্স আমকসুসানং ৰিয উপট্ঠাসি. সো ‘‘ইদং ঠানং ফাসুক’’ন্তি সল্লক্খেত্ৰা রথং মগ্গা ওক্কমাপেত্ৰা মগ্গপস্সে ঠপেত্ৰা রথা ওরুয্হ মহাসত্তস্স আভরণভণ্ডং ওমুঞ্চিত্ৰা ভণ্ডিকং কত্ৰা একমন্তং ঠপেত্ৰা কুদ্দালং আদায রথস্স অৰিদূরে ঠানে চতুব্ভিত্তিকং আৰাটং খণিতুং আরভি.

ততো বোধিসত্তো চিন্তেসি ‘‘অযং মে ৰাযামকালো, অহঞ্হি সোল়স ৰস্সানি হত্থপাদে ন চালেসিং, কিং নু খো মে বলং অত্থি, উদাহু নো’’তি. সো উট্ঠায ৰামহত্থেন দক্খিণহত্থং, দক্খিণহত্থেন ৰামহত্থং ¶ ¶ পরামসন্তো উভোহি হত্থেহি পাদে সম্বাহিত্ৰা রথা ওতরিতুং চিত্তং উপ্পাদেসি. তাৰদেৰস্স পাদপতিতট্ঠানে ৰাতপুণ্ণভস্তচম্মং ৰিয মহাপথৰী অব্ভুগ্গন্ত্ৰা রথস্স পচ্ছিমন্তং আহচ্চ অট্ঠাসি. মহাসত্তো রথা ওতরিত্ৰা কতিপযে ৰারে অপরাপরং চঙ্কমিত্ৰা ‘‘ইমিনাৰ নিযামেন একদিৰসং যোজনসতম্পি মে গন্তুং বলং অত্থী’’তি ঞত্ৰা ‘‘সচে, সারথি, মযা সদ্ধিং ৰিরুজ্ঝেয্য, অত্থি নু খো মে তেন সহ পটিৰিরুজ্ঝিতুং বল’’ন্তি উপধারেন্তো রথস্স পচ্ছিমন্তং ¶ গহেত্ৰা কুমারকানং কীল়নযানকং ৰিয উক্খিপিত্ৰা রথং পরিব্ভমেন্তো অট্ঠাসি. অথস্স ‘‘অত্থি মে তেন সহ পটিৰিরুজ্ঝিতুং বল’’ন্তি সল্লক্খেত্ৰা পসাধনত্থায চিত্তং উপ্পজ্জি.

তংখণঞ্ঞেৰ সক্কস্স ভৰনং উণ্হাকারং দস্সেসি. সক্কো আৰজ্জেন্তো তং কারণং ঞত্ৰা ‘‘তেমিযকুমারস্স মনোরথো মত্থকং পত্তো, ইদানি পসাধনত্থায চিত্তং উপ্পন্নং, কিং এতস্স মানুসকেন পসাধনেনা’’তি দিব্বপসাধনং গাহাপেত্ৰা ৰিস্সকম্মদেৰপুত্তং পক্কোসাপেত্ৰা ‘‘তাত ৰিস্সকম্ম দেৰপুত্ত, ত্ৰং গচ্ছ, কাসিরাজস্স পুত্তং তেমিযকুমারং অলঙ্করোহী’’তি আণাপেসি. সো ‘‘সাধূ’’তি সম্পটিচ্ছিত্ৰা তাৰতিংসভৰনতো ওতরিত্ৰা তস্স সন্তিকং গন্ত্ৰা দসহি দুস্সসহস্সেহি ৰেঠনং কত্ৰা দিব্বেহি চেৰ মানুসকেহি চ অলঙ্কারেহি সক্কং ৰিয তং অলঙ্করিত্ৰা সকট্ঠানমেৰ গতো. সো দেৰরাজলীলায সারথিস্স খণনোকাসং গন্ত্ৰা আৰাটতীরে ঠত্ৰা পুচ্ছন্তো ততিযং গাথমাহ –

‘‘কিং নু সন্তরমানোৰ, কাসুং খণসি সারথি;

পুট্ঠো মে সম্ম অক্খাহি, কিং কাসুযা করিস্সসী’’তি.

তং সুত্ৰা সারথি আৰাটং খণন্তো উদ্ধং অনোলোকেত্ৰাৰ চতুত্থং গাথামাহ –

‘‘রঞ্ঞো মূগো চ পক্খো চ, পুত্তো জাতো অচেতসো;

সোম্হি রঞ্ঞা সমজ্ঝিট্ঠো, পুত্তং মে নিখণং ৰনে’’তি.

তত্থ পক্খোতি পীঠসপ্পী. ‘‘মূগো’’তি ৰচনেনেৰ পনস্স বধিরভাৰোপি সিজ্ঝতি বধিরস্স হি পটিৰচনং কথেতুং অসক্কুণেয্যত্তা. অচেতসোতি অচিত্তকো ৰিয জাতো. সোল়স ৰস্সানি অকথিতত্তা এৰমাহ ¶ . সমজ্ঝিট্ঠোতি আণত্তো, পেসিতোতি অত্থো. নিখণং ৰনেতি ৰনে নিখণেয্যাসি.

‘‘ন ¶ বধিরো ন মূগোস্মি, ন পক্খো ন চ ৰীকলো;

অধম্মং সারথি কযিরা, মং চে ত্ৰং নিখণং ৰনে.

‘‘ঊরূ ¶ বাহুঞ্চ মে পস্স, ভাসিতঞ্চ সুণোহি মে;

অধম্মং সারথি কযিরা, মং চে ত্ৰং নিখণং ৰনে’’তি.

তত্থ ন বধিরোতি সম্ম সারথি, সচে তং রাজা এৰরূপং পুত্তং মারাপেতুং আণাপেসি, অহং পন এৰরূপো ন ভৰামীতি দীপেতুং এৰমাহ. মং চে ত্ৰং নিখণং ৰনেতি সচে বধিরভাৰাদিৰিরহিতং এৰরূপং মং ৰনে নিখণেয্যাসি, অধম্মং কম্মং করেয্যাসীতি অত্থো. ‘‘ঊরূ’’তি ইদং সো পুরিমগাথং সুত্ৰাপি নং অনোলোকেন্তমেৰ দিস্ৰা ‘‘অলঙ্কতসরীরমস্স দস্সেস্সামী’’তি চিন্তেত্ৰা আহ. তস্সত্থো – সম্ম সারথি, ইমে কঞ্চনকদলিক্খন্ধসদিসে ঊরূ, কনকচ্ছৰিং বাহুঞ্চ মে পস্স, মধুরৰচনঞ্চ মে সুণাহীতি.

ততো সারথি এৰং চিন্তেসি ‘‘কো নু খো এস, আগতকালতো পট্ঠায অত্তানমেৰ ৰণ্ণেতী’’তি. সো আৰাটখণনং পহায উদ্ধং ওলোকেন্তো তস্স রূপসম্পত্তিং দিস্ৰা ‘‘অযং পুরিসো কো নু খো, মনুস্সো ৰা দেৰো ৰা’’তি অজানন্তো ইমং গাথমাহ –

‘‘দেৰতা নুসি গন্ধব্বো, অদু সক্কো পুরিন্দদো;

কো ৰা ত্ৰং কস্স ৰা পুত্তো, কথং জানেমু তং ময’’ন্তি.

অথস্স মহাসত্তো অত্তানং আচিক্খিত্ৰা ধম্মং দেসেন্তো আহ –

‘‘নম্হি দেৰো ন গন্ধব্বো, নম্হি সক্কো পুরিন্দদো;

কাসিরঞ্ঞো অহং পুত্তো, যং কাসুযা নিহঞ্ঞসি.

‘‘তস্স রঞ্ঞো অহং পুত্তো, যং ত্ৰং সম্মূপজীৰসি;

অধম্মং সারথি কযিরা, মং চে ত্ৰং নিখণং ৰনে.

‘‘যস্স ¶ রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো.

‘‘যথা ¶ রুক্খো তথা রাজা, যথা সাখা তথা অহং;

যথা ছাযূপগো পোসো, এৰং ত্ৰমসি সারথি;

অধম্মং সারথি কযিরা, মং চে ত্ৰং নিখণং ৰনে’’তি.

তত্থ নিহঞ্ঞসীতি নিহনিস্সসি. যং ত্ৰং এত্থ নিহনিস্সামীতি সঞ্ঞায কাসুং খণসি, সো অহন্তি দীপেতি. সো ‘‘রাজপুত্তো অহ’’ন্তি ৰুত্তেপি ন সদ্দহতিযেৰ, মধুরকথায পনস্স বজ্ঝিত্ৰা ধম্মং সুণন্তো অট্ঠাসি. মিত্তদুব্ভোতি পরিভুত্তছাযস্স রুক্খস্স পত্তং ৰা সাখং ৰা অঙ্কুরং ৰা ভঞ্জন্তো মিত্তঘাতকো হোতি লামকপুরিসো, কিমঙ্গং পন সামিপুত্তঘাতকো. ছাযূপগোতি পরিভোগত্থায ছাযং উপগতো পুরিসো ৰিয রাজানং নিস্সায জীৰমানো ত্ৰন্তি ৰদতি.

সো এৰং ¶ কথেন্তেপি বোধিসত্তে ন সদ্দহতিযেৰ. অথ মহাসত্তো ‘‘সদ্দহাপেস্সামি ন’’ন্তি দেৰতানং সাধুকারেন চেৰ অত্তনো ঘোসেন চ ৰনঘটং উন্নাদেন্তো দস মিত্তপূজগাথা নাম আরভি –

‘‘পহূতভক্খো ভৰতি, ৰিপ্পৰুট্ঠো সকংঘরা;

বহূ নং উপজীৰন্তি, যো মিত্তানং ন দুব্ভতি.

‘‘যং যং জনপদং যাতি, নিগমে রাজধানিযো;

সব্বত্থ পূজিতো হোতি, যো মিত্তানং ন দুব্ভতি.

‘‘নাস্স চোরা পসাহন্তি, নাতিমঞ্ঞন্তি খত্তিযা;

সব্বে অমিত্তে তরতি, যো মিত্তানং ন দুব্ভতি.

‘‘অক্কুদ্ধো সঘরং এতি, সভাযং পটিনন্দিতো;

ঞাতীনং উত্তমো হোতি, যো মিত্তানং ন দুব্ভতি.

‘‘সক্কত্ৰা সক্কতো হোতি, গরু হোতি সগারৰো;

ৰণ্ণকিত্তিভতো হোতি, যো মিত্তানং ন দুব্ভতি.

‘‘পূজকো ¶ ¶ লভতে পূজং, ৰন্দকো পটিৰন্দনং;

যসোকিত্তিঞ্চ পপ্পোতি, যো মিত্তানং ন দুব্ভতি.

‘‘অগ্গি যথা পজ্জলতি, দেৰতাৰ ৰিরোচতি;

সিরিযা অজহিতো হোতি, যো মিত্তানং ন দুব্ভতি.

‘‘গাৰো তস্স পজাযন্তি, খেত্তে ৰুত্তং ৰিরূহতি;

ৰুত্তানং ফলমস্নাতি, যো মিত্তানং ন দুব্ভতি.

‘‘দরিতো পব্বতাতো ৰা, রুক্খতো পতিতো নরো;

চুতো পতিট্ঠং লভতি, যো মিত্তানং ন দুব্ভতি.

‘‘ৰিরূল়্হমূলসন্তানং, নিগ্রোধমিৰ মালুতো;

অমিত্তা নপ্পসাহন্তি, যো মিত্তানং ন দুব্ভতী’’তি.

তত্থ সকং ঘরাতি সকঘরা, অযমেৰ ৰা পাঠো. ন দুব্ভতীতি ন দুস্সতি. মিত্তানন্তি বুদ্ধাদীনং কল্যাণমিত্তানং ন দুব্ভতি. ‘‘সব্বত্থ পূজিতো হোতী’’তি ইদং সীৰলিৰত্থুনা ৰণ্ণেতব্বং. ন পসাহন্তীতি পসয্হকারং কাতুং ন সক্কোন্তি. ইদং সংকিচ্চসামণেরৰত্থুনা দীপেতব্বং. ‘‘নাতিমঞ্ঞন্তি খত্তিযা’’তি ইদং জোতিকসেট্ঠিৰত্থুনা দীপেতব্বং. তরতীতি অতিক্কমতি. সঘরন্তি অত্তঘরং. মিত্তানং দুব্ভন্তো অত্তনো ঘরং আগচ্ছন্তোপি ঘট্টিতচিত্তো কুদ্ধোৰ আগচ্ছতি, অযং পন অকুদ্ধোৰ সকঘরং এতি. পটিনন্দিতোতি ¶ বহূনং সন্নিপাতট্ঠানে অমিত্তদুব্ভিনো গুণকথং কথেন্তি, তায সো পটিনন্দিতো হোতি পমুদিতচিত্তো.

সক্কত্ৰা সক্কতো হোতীতি পরং সক্কত্ৰা সযম্পি পরেহি সক্কতো হোতি. গরু হোতি সগারৰোতি পরেসু সগারৰো সযম্পি পরেহি গরুকো হোতি. ৰণ্ণকিত্তিভতোতি ভতৰণ্ণকিত্তি, গুণঞ্চেৰ কিত্তিসদ্দঞ্চ উক্খিপিত্ৰা চরন্তো নাম হোতীতি অত্থো. পূজকোতি মিত্তানং পূজকো হুত্ৰা সযম্পি পূজং লভতি. ৰন্দকোতি বুদ্ধাদীনং কল্যাণমিত্তানং ৰন্দকো হুত্ৰা পুনব্ভৰে পটিৰন্দনং লভতি. যসোকিত্তিঞ্চাতি ইস্সরিযপরিৰারঞ্চেৰ গুণকিত্তিঞ্চ পপ্পোতি. ইমায গাথায চিত্তগহপতিনো ৰত্থু (ধ. প. ৭৩-৭৪) কথেতব্বং.

পজ্জলতীতি ¶ ¶ ইস্সরিযপরিৰারেন পজ্জলতি. সিরিযা অজহিতো হোতীতি এত্থ অনাথপিণ্ডিকস্স ৰত্থু (ধ. প. ১১৯-১২০) কথেতব্বং. অস্নাতীতি পরিভুঞ্জতি. ‘‘পতিট্ঠং লভতী’’তি ইদং চূল়পদুমজাতকেন (জা. ১.২.৮৫-৮৬) দীপেতব্বং. ৰিরূল়্হমূলসন্তানন্তি ৰড্ঢিতমূলপারোহং. অমিত্তা নপ্পসাহন্তীতি এত্থ কুররঘরিযসোণত্থেরস্স মাতু গেহং পৰিট্ঠচোরৰত্থু কথেতব্বং.

সুনন্দো সারথি এত্তকাহি গাথাহি ধম্মং দেসেন্তম্পি তং অসঞ্জানিত্ৰা ‘‘কো নু খো অয’’ন্তি আৰাটখণনং পহায রথসমীপং গন্ত্ৰা তত্থ তঞ্চ পসাধনভণ্ডঞ্চ উভযং অদিস্ৰা পুন আগন্ত্ৰা ওলোকেন্তো তং সঞ্জানিত্ৰা তস্স পাদেসু পতিত্ৰা অঞ্জলিং পগ্গয্হ যাচন্তো ইমং গাথমাহ –

‘‘এহি তং পটিনেস্সামি, রাজপুত্ত সকং ঘরং;

রজ্জং কারেহি ভদ্দন্তে, কিং অরঞ্ঞে করিস্সসী’’তি.

‘‘অলং মে তেন রজ্জেন, ঞাতকেহি ধনেন ৰা;

যং মে অধম্মচরিযায, রজ্জং লব্ভেথ সারথী’’তি.

‘‘পুণ্ণপত্তং মং লাভেহি, রাজপুত্ত ইতো গতো;

পিতা মাতা চ মে দজ্জুং, রাজপুত্ত তযী গতে.

‘‘ওরোধা চ কুমারা চ, ৰেসিযানা চ ব্রাহ্মণা;

তেপি অত্তমনা দজ্জুং, রাজপুত্ত তযী গতে.

‘‘হত্থারোহা ¶ অনীকট্ঠা, রথিকা পত্তিকারকা;

তেপি অত্তমনা দজ্জুং, রাজপুত্ত তযী গতে.

‘‘বহুধঞ্ঞা জানপদা, নেগমা চ সমাগতা;

উপাযনানি মে দজ্জুং, রাজপুত্ত তযী গতে’’তি.

তত্থ ¶ পুণ্ণপত্তন্তি তুট্ঠিদাযং. দজ্জুন্তি সত্তরতনৰস্সং ৰস্সন্তা ৰিয মম অজ্ঝাসযপূরণং তুট্ঠিদাযং দদেয্যুং. ইদং সো ‘‘অপ্পেৰ ¶ নাম মযি অনুকম্পায গচ্ছেয্যা’’তি চিন্তেত্ৰা আহ. ৰেসিযানা চাতি ৰেস্সা চ. উপাযনানীতি পণ্ণাকারানি.

‘‘পিতু মাতু চহং চত্তো, রট্ঠস্স নিগমস্স চ;

অথো সব্বকুমারানং, নত্থি ময্হং সকং ঘরং.

‘‘অনুঞ্ঞাতো অহং মত্যা, সঞ্চত্তো পিতরা মহং;

একোরঞ্ঞে পব্বজিতো, ন কামে অভিপত্থযে’’তি.

তত্থ পিতু মাতু চাতি পিতরা চ মাতরা চ অহং চত্তো. ইতরেসুপি এসেৰ নযো. মত্যাতি সম্ম সারথি, অহং সত্তাহং রজ্জং পরিচ্ছিন্দিত্ৰা ৰরং গণ্হন্তিযা মাতরা অনুঞ্ঞাতো নাম. সঞ্ছত্তোতি সুট্ঠু চত্তো. পব্বজিতোতি পব্বজিত্ৰা অরঞ্ঞে ৰসনত্থায নিক্খন্তোতি অত্থো.

এৰং মহাসত্তস্স অত্তনো গুণে কথেন্তস্স পীতি উপ্পজ্জি, ততো পীতিৰেগেন উদানং উদানেন্তো আহ –

‘‘অপি অতরমানানং, ফলাসাৰ সমিজ্ঝতি;

ৰিপক্কব্রহ্মচরিযোস্মি, এৰং জানাহি সারথি.

‘‘অপি ¶ অতরমানানং, সম্মদত্থো ৰিপচ্চতি;

ৰিপক্কব্রহ্মচরিযোস্মি, নিক্খন্তো অকুতোভযো’’তি.

তত্থ ফলাসাৰাতি অতরমানস্স মম সোল়সৰস্সেহি কতৰাযামস্স সমিদ্ধং অজ্ঝাসযফলং দস্সেতুং এৰমাহ. ৰিপক্কব্রহ্মচরিযোস্মীতি নিট্ঠপ্পত্তমনোরথো. সম্মদত্থো ৰিপচ্চতীতি সম্মা উপাযেন কারণেন কত্তব্বকিচ্চং সম্পজ্জতি.

‘‘এৰং ৰগ্গুকথো সন্তো, ৰিসট্ঠৰচনো চসি;

কস্মা পিতু চ মাতুচ্চ, সন্তিকে ন ভণী তদা’’তি.

‘‘নাহং অসন্ধিতা পক্খো, ন বধিরো অসোততা;

নাহং অজিৰ্হতা মূগো, মা মং মূগমধারযি.

‘‘পুরিমং সরামহং জাতিং, যত্থ রজ্জমকারযিং;

কারযিত্ৰা তহিং রজ্জং, পাপত্থং নিরযং ভুসং.

‘‘ৰীসতিঞ্চেৰ ৰস্সানি, তহিং রজ্জমকারযিং;

অসীতিৰস্সসহস্সানি, নিরযম্হি অপচ্চিসং.

‘‘তস্স ¶ রজ্জস্সহং ভীতো, মা মং রজ্জাভিসেচযুং;

তস্মা পিতু চ মাতুচ্চ, সন্তিকে ন ভণিং তদা.

‘‘উচ্ছঙ্গে ¶ মং নিসাদেত্ৰা, পিতা অত্থানুসাসতি;

একং হনথ বন্ধথ, একং খারাপতচ্ছিকং;

একং সূলস্মিং উপ্পেথ, ইচ্চস্স মনুসাসতি.

‘‘তাযাহং ফরুসং সুত্ৰা, ৰাচাযো সমুদীরিতা;

অমূগো মূগৰণ্ণেন, অপক্খো পক্খসম্মতো;

সকে মুত্তকরীসস্মিং, অচ্ছাহং সম্পরিপ্লুতো.

‘‘কসিরঞ্চ পরিত্তঞ্চ, তঞ্চ দুক্খেন সংযুতং;

কোমং জীৰিতমাগম্ম, ৰেরং কযিরাথ কেনচি.

‘‘পঞ্ঞায চ অলাভেন, ধম্মস্স চ অদস্সনা;

কোমং জীৰিতমাগম্ম, ৰেরং কযিরাথ কেনচি.

‘‘অপি অতরমানানং, ফলাসাৰ সমিজ্ঝতি;

ৰিপক্কব্রহ্মচরিযোস্মি, এৰং জানাহি সারথি.

‘‘অপি অতরমানানং, সম্মদত্থো ৰিপচ্চতি;

ৰিপক্কব্রহ্মচরিযোস্মি, নিক্খন্তো অকুতোভযো’’তি.

তত্থ অসন্ধিতাতি সন্ধীনং অভাৰেন. অসোততাতি সোতানং অভাৰেন. অজিৰ্হতাতি সম্পরিৰত্তনজিৰ্হায অভাৰেন মূগো অহং ন ¶ ভৰামি. যত্থাতি যায জাতিযা বারাণসিনগরে রজ্জং অকারযিং. পাপত্থন্তি পাপতং. পতিতো অস্মীতি ৰদতি. রজ্জাভিসেচযুন্তি রজ্জে অভিসেচযুং. নিসাদেত্ৰাতি নিসীদাপেত্ৰা. অত্থানুসাসতীতি অত্থং অনুসাসতি. খারাপতচ্ছিকন্তি সত্তীহি পহরিত্ৰা খারাহি পতচ্ছিকং করোথ. উপ্পেথাতি আৰুনথ. ইচ্চস্স মনুসাসতীতি এৰমস্স অত্থং অনুসাসতি. তাযাহন্তি তাযো ৰাচাযো অহং. পক্খসম্মতোতি পক্খো ইতি সম্মতো অহোসিং. অচ্ছাহন্তি অচ্ছিং অহং, অৰসিন্তি অত্থো. সম্পরিপ্লুতোতি সম্পরিকিণ্ণো, নিমুগ্গো হুত্ৰাতি অত্থো.

কসিরন্তি দুক্খং. পরিত্তন্তি অপ্পং. ইদং ৰুত্তং হোতি – সম্মসারথি, সচেপি সত্তানং জীৰিতং ¶ দুক্খম্পি সমানং বহুচিরট্ঠিতিকং ভৰেয্য, পত্থেয্য, পরিত্তম্পি সমানং সচে সুখং ভৰেয্য, পত্থেয্য, ইদং পন কসিরঞ্চ পরিত্তঞ্চ সকলেন ৰট্টদুক্খেন সংযুত্তং সন্নিহিতং ওমদ্দিতং. কোমন্তি কো ইমং. ৰেরন্তি পাণাতিপাতাদিপঞ্চৰিধং ৰেরং. কেনচীতি কেনচি কারণেন ¶ . পঞ্ঞাযাতি ৰিপস্সনাপঞ্ঞায অলাভেন. ধম্মস্সাতি সোতাপত্তিমগ্গস্স অদস্সনেন. পুন উদানগাথাযো অগন্তুকামতায থিরভাৰদস্সনত্থং কথেসি.

তং সুত্ৰা সুনন্দো সারথি ‘‘অযং কুমারো এৰরূপং রজ্জসিরিং কুণপং ৰিয ছড্ডেত্ৰা অত্তনো অধিট্ঠানং অভিন্দিত্ৰা ‘‘পব্বজিস্সামীতি অরঞ্ঞং পৰিট্ঠো, মম ইমিনা দুজ্জীৰিতেন কো অত্থো, অহম্পি তেন সদ্ধিং পব্বজিস্সামী’’তি চিন্তেত্ৰা ইমং গাথমাহ –

‘‘অহম্পি পব্বজিস্সামি, রাজপুত্ত তৰন্তিকে;

অৰ্হাযস্সু মং ভদ্দন্তে, পব্বজ্জা মম রুচ্চতী’’তি.

তত্থ তৰন্তিকেতি তৰ সন্তিকে. অৰ্হাযস্সূতি ‘‘এহি পব্বজাহী’’তি পক্কোসস্সু.

এৰং তেন যাচিতোপি মহাসত্তো ‘‘সচাহং ইদানেৰ তং পব্বাজেস্সামি, মাতাপিতরো ইধ নাগচ্ছিস্সন্তি, অথ নেসং পরিহানি ভৰিস্সতি, ইমে অস্সা চ রথো চ পসাধনভণ্ডঞ্চ ইধেৰ নস্সিস্সন্তি, ‘যক্খো সো, খাদিতো নু খো তেন সারথী’তি গরহাপি ¶ মে উপ্পজ্জিস্সতী’’তি চিন্তেত্ৰা অত্তনো চ গরহামোচনত্থং মাতাপিতূনঞ্চ ৰুড্ঢিং সম্পস্সন্তো অস্সে চ রথঞ্চ পসাধনভণ্ডঞ্চ তস্স ইণং কত্ৰা দস্সেন্তো ইমং গাথমাহ –

‘‘রথং নিয্যাদযিত্ৰান, অনণো এহি সারথি;

অনণস্স হি পব্বজ্জা, এতং ইসীহি ৰণ্ণিত’’ন্তি.

তত্থ এতন্তি এতং পব্বজ্জাকরণং বুদ্ধাদীহি ইসীহি ৰণ্ণিতং পসত্থং থোমিতং.

তং সুত্ৰা সারথি ‘‘সচে মযি নগরং গতে এস অঞ্ঞত্থ গচ্ছেয্য, পিতা চস্স ইমং পৰত্তিং সুত্ৰা ‘পুত্তং মে দস্সেহী’তি পুন আগতো ইমং ন পস্সেয্য, রাজদণ্ডং মে করেয্য, তস্মা অহং অত্তনো গুণং কথেত্ৰা অঞ্ঞত্থাগমনত্থায পটিঞ্ঞং গণ্হিস্সামী’’তি চিন্তেন্তো গাথাদ্ৰযমাহ –

‘‘যদেৰ ¶ ত্যাহং ৰচনং, অকরং ভদ্দমত্থু তে;

তদেৰ মে ত্ৰং ৰচনং, যাচিতো কত্তুমরহসি.

‘‘ইধেৰ তাৰ অচ্ছস্সু, যাৰ রাজানমানযে;

অপ্পেৰ তে পিতা দিস্ৰা, পতীতো সুমনো সিযা’’তি.

‘‘করোমি তে তং ৰচনং, যং মং ভণসি সারথি;

অহম্পি দট্ঠুকামোস্মি, পিতরং মে ইধাগতং.

‘‘এহি সম্ম নিৰত্তস্সু, কুসলং ৰজ্জাসি ঞাতিনং;

মাতরং পিতরং ময্হং, ৰুত্তো ৰজ্জাসি ৰন্দন’’ন্তি.

তত্থ করোমি তেতন্তি করোমি তে এতং ৰচনং. এহি সম্ম নিৰত্তস্সূতি সম্ম সারথি, তত্থ গন্ত্ৰা এহি, এত্তোৰ খিপ্পমেৰ নিৰত্তস্সু. ৰুত্তো ৰজ্জাসীতি মযা ৰুত্তো হুত্ৰা ‘‘পুত্তো ৰো তেমিযকুমারো ৰন্দতী’’তি ৰন্দনং ৰদেয্যাসীতি অত্থো.

ইতি ৰত্ৰা মহাসত্তো সুৰণ্ণকদলি ৰিয ওনমিত্ৰা পঞ্চপতিট্ঠিতেন বারাণসিনগরাভিমুখো মাতাপিতরো ৰন্দিত্ৰা সারথিস্স সাসনং ¶ অদাসি. সো সাসনং গহেত্ৰা কুমারং পদক্খিণং কত্ৰা রথমারুয্হ নগরাভিমুখো পাযাসি. তমত্থং পকাসেন্তো সত্থা আহ –

‘‘তস্স পাদে গহেত্ৰান, কত্ৰা চ নং পদক্খিণং;

সারথি রথমারুয্হ, রাজদ্ৰারং উপাগমী’’তি.

তস্সত্থো – ভিক্খৰে, এৰং ৰুত্তো সো সারথি, তস্স কুমারস্স পাদে গহেত্ৰা তং পদক্খিণং কত্ৰা রথং আরুয্হ রাজদ্ৰারং উপাগমীতি.

তস্মিং খণে চন্দাদেৰী সীহপঞ্জরং ৰিৰরিত্ৰা ‘‘কা নু খো মে পুত্তস্স পৰত্তী’’তি সারথিস্স ¶ আগমনমগ্গং ওলোকেন্তী তং এককং আগচ্ছন্তং দিস্ৰা উরং পহরিত্ৰা পরিদেৰি. তমত্থং পকাসেন্তো সত্থা আহ –

‘‘সুঞ্ঞং মাতা রথং দিস্ৰা, একং সারথিমাগতং;

অস্সুপুণ্ণেহি নেত্তেহি, রোদন্তী নং উদিক্খতি.

‘‘অযং সো সারথি এতি, নিহন্ত্ৰা মম অত্রজং;

নিহতো নূন মে পুত্তো, পথব্যা ভূমিৰড্ঢনো.

‘‘অমিত্তা নূন নন্দন্তি, পতীতা নূন ৰেরিনো;

আগতং সারথিং দিস্ৰা, নিহন্ত্ৰা মম অত্রজং.

‘‘সুঞ্ঞং মাতা রথং দিস্ৰা, একং সারথিমাগতং;

অস্সুপুণ্ণেহি নেত্তেহি, রোদন্তী পরিপুচ্ছি নং.

‘‘কিং নু মূগো কিংনু পক্খো, কিংনু সো ৰিলপী তদা;

নিহঞ্ঞমানো ভূমিযা, তং মে অক্খাহি সারথি.

‘‘কথং হত্থেহি পাদেহি, মূগপক্খো ৰিৰজ্জযি;

নিহঞ্ঞমানো ভূমিযা, তং মে অক্খাহি পুচ্ছিতো’’তি.

তত্থ মাতাতি তেমিযকুমারস্স মাতা. পথব্যা ভূমিৰড্ঢনোতি সো মম পুত্তো ভূমিৰড্ঢনো হুত্ৰা পথব্যা নিহতো নূন. রোদন্তী পরিপুচ্ছি নন্তি তং রথং একমন্তং ঠপেত্ৰা মহাতলং ¶ অভিরুয্হ চন্দাদেৰিং ৰন্দিত্ৰা একমন্তে ঠিতং সারথিং পরিপুচ্ছি. কিন্নূতি কিং নু সো মম ¶ পুত্তো মূগো এৰ পক্খো এৰ. তদাতি যদা নং ত্ৰং কাসুযং পক্খিপিত্ৰা কুদ্দালেন মত্থকে পহরি, তদা. নিহঞ্ঞমানো ভূমিযাতি তযা ভূমিযং নিহঞ্ঞমানো কিং নু ৰিলপি. তং মেতি তং সব্বং অপরিহাপেত্ৰা মে অক্খাহি. ৰিৰজ্জযীতি ‘‘অপেহি সারথি, মা মং মারেহী’’তি কথং হত্থেহি পাদেহি চ ফন্দন্তো তং অপনুদি, তং মে কথেহীতি অত্থো.

‘‘অক্খেয্যং ¶ তে অহং অয্যে, দজ্জাসি অভযং মম;

যং মে সুতং ৰা দিট্ঠং ৰা, রাজপুত্তস্স সন্তিকে’’তি.

তত্থ দজ্জাসীতি সচে অভযং দদেয্যাসি, সো ইদং ‘‘সচাহং ‘তৰ পুত্তো নেৰ মূগো ন পক্খো মধুরকথো ধম্মকথিকো’তি ৰক্খামি, অথ ‘কস্মা তং গহেত্ৰা নাগতোসী’তি রাজা কুদ্ধো রাজদণ্ডম্পি মে করেয্য, অভযং তাৰ যাচিস্সামী’’তি চিন্তেত্ৰা আহ.

‘‘অভযং সম্ম তে দম্মি, অভীতো ভণ সারথি;

যং তে সুতং ৰা দিট্ঠং ৰা, রাজপুত্তস্স সন্তিকে’’তি.

‘‘ন সো মূগো ন সো পক্খো, ৰিসট্ঠৰচনো চ সো;

রজ্জস্স কির সো ভীতো, অকরা আলযে বহূ.

‘‘পুরিমং সরতি সো জাতিং, যত্থ রজ্জমকারযি;

কারযিত্ৰা তহিং রজ্জং, পাপত্থ নিরযং ভুসং.

‘‘ৰীসতিঞ্চেৰ ৰস্সানি, তহিং রজ্জমকারযি;

অসীতিৰস্সসহস্সানি, নিরযম্হি অপচ্চি সো.

‘‘তস্স রজ্জস্স সো ভীতো, মা মং রজ্জাভিসেচযুং;

তস্মা পিতু চ মাতুচ্চ, সন্তিকে ন ভণী তদা.

‘‘অঙ্গপচ্চঙ্গসম্পন্নো ¶ , আরোহপরিণাহৰা;

ৰিসট্ঠৰচনো পঞ্ঞো, মগ্গে সগ্গস্স তিট্ঠতি.

‘‘সচে ¶ ত্ৰং দট্ঠুকামাসি, রাজপুত্তং তৰত্রজং;

এহি তং পাপযিস্সামি, যত্থ সম্মতি তেমিযো’’তি.

তত্থ ৰিসট্ঠৰচনোতি অপলিবুদ্ধকথো. অকরা আলযে বহূতি তুম্হাকং ৰঞ্চনানি বহূনি অকাসি. পঞ্ঞোতি পঞ্ঞৰা. সচে ত্ৰন্তি রাজানং ধুরং কত্ৰা উভোপি তে এৰমাহ. যত্থ সম্মতি তেমিযোতি যত্থ ৰো পুত্তো মযা গহিতপটিঞ্ঞো হুত্ৰা অচ্ছতি, তত্থ পাপযিস্সামি, ইদানি পপঞ্চং অকত্ৰা লহুং গন্তুং ৰট্টতীতি আহ.

কুমারো ¶ পন সারথিং পেসেত্ৰা পব্বজিতুকামো অহোসি. তদা সক্কো তস্স মনং ঞত্ৰা তস্মিং খণে ৰিস্সকম্মদেৰপুত্তং পক্কোসাপেত্ৰা ‘‘তাত ৰিস্সকম্মদেৰপুত্ত, তেমিযকুমারো পব্বজিতুকামো, ত্ৰং তস্স পণ্ণসালঞ্চ পব্বজিতপরিক্খারঞ্চ মাপেত্ৰা এহী’’তি পেসেসি. সো ‘‘সাধূ’’তি সম্পটিচ্ছিত্ৰা ৰেগেন গন্ত্ৰা তিযোজনিকে ৰনসণ্ডে অত্তনো ইদ্ধিবলেন রমণীযং অস্সমং মাপেত্ৰা রত্তিট্ঠানদিৰাট্ঠানঞ্চ পোক্খরণিঞ্চ আৰাটঞ্চ অকালফলসম্পন্নং রুক্খঞ্চ কত্ৰা পণ্ণসালসমীপে চতুৰীসতিহত্থপ্পমাণং চঙ্কমং মাপেত্ৰা অন্তোচঙ্কমে চ ফলিকৰণ্ণং রুচিরং ৰালুকং ওকিরিত্ৰা সব্বে পব্বজিতপরিক্খারে মাপেত্ৰা ‘‘যে পব্বজিতুকামা, তে ইমে গহেত্ৰা পব্বজন্তূ’’তি ভিত্তিযং অক্খরানি লিখিত্ৰা চণ্ডৰাল়ে চ অমনাপসদ্দে সব্বে মিগপক্খিনো চ পলাপেত্ৰা সকট্ঠানমেৰ গতো.

তস্মিং খণে মহাসত্তো তং দিস্ৰা সক্কদত্তিযভাৰং ঞত্ৰা, পণ্ণসালং পৰিসিত্ৰা ৰত্থানি অপনেত্ৰা, রত্তৰাকচীরং নিৰাসেত্ৰা একং পারুপিত্ৰা অজিনচম্মং একংসে কত্ৰা জটামণ্ডলং বন্ধিত্ৰা কাজং অংসে কত্ৰা কত্তরদণ্ডমাদায পণ্ণসালতো নিক্খমিত্ৰা পব্বজিতসিরিং সমুব্বহন্তো অপরাপরং চঙ্কমিত্ৰা ‘‘অহো সুখং, অহো সুখ’’ন্তি উদানং উদানেন্তো পণ্ণসালং পৰিসিত্ৰা কট্ঠত্থরণে নিসিন্নো পঞ্চ অভিঞ্ঞা অট্ঠ সমাপত্তিযো চ নিব্বত্তেত্ৰা সাযন্হসমযে পণ্ণসালতো নিক্খমিত্ৰা চঙ্কমনকোটিযং ঠিতকাররুক্খতো পণ্ণানি গহেত্ৰা ¶ , সক্কদত্তিযভাজনে অলোণকে অতক্কে নিধূপনে উদকে সেদেত্ৰা অমতং ৰিয পরিভুঞ্জিত্ৰা চত্তারো ব্রহ্মৰিহারে ভাৰেত্ৰা তত্থ ৰাসং কপ্পেসি.

কাসিরাজাপি সুনন্দসারথিস্স ৰচনং সুত্ৰা মহাসেনগুত্তং পক্কোসাপেত্ৰা তরমানরূপোৰ গমনসজ্জং কারেতুং আহ –

‘‘যোজযন্তু ¶ রথে অস্সে, কচ্ছং নাগান বন্ধথ;

উদীরযন্তু সঙ্খপণৰা, ৰাদন্তু একপোক্খরা.

‘‘ৰাদন্তু ভেরী সন্নদ্ধা, ৰগ্গূ ৰাদন্তু দুন্দুভী;

নেগমা চ মং অন্ৰেন্তু, গচ্ছং পুত্তনিৰেদকো.

‘‘ওরোধা চ কুমারা চ, ৰেসিযানা চ ব্রাহ্মণা;

খিপ্পং যানানি যোজেন্তু, গচ্ছং পুত্তনিৰেদকো.

‘‘হত্থারোহা অনীকট্ঠা, রথিকা পত্তিকারকা;

খিপ্পং যানানি যোজেন্তু, গচ্ছং পুত্তনিৰেদকো.

‘‘সমাগতা জানপদা, নেগমা চ সমাগতা;

খিপ্পং যানানি যোজেন্তু, গচ্ছং পুত্তনিৰেদকো’’তি.

তত্থ ¶ উদীরযন্তূতি সদ্দং মুঞ্চন্তু. ৰাদন্তূতি ৰজ্জন্তু. একপোক্খরাতি একমুখভেরিযো. সন্নদ্ধাতি সুট্ঠু নদ্ধা. ৰগ্গূতি মধুরস্সরা. গচ্ছন্তি গমিস্সামি. পুত্তনিৰেদকোতি পুত্তস্স নিৰেদকো ওৰাদকো হুত্ৰা গচ্ছামি. তং ওৰদিত্ৰা মম ৰচনং গাহাপেত্ৰা তত্থেৰ তং রতনরাসিম্হি ঠপেত্ৰা অভিসিঞ্চিত্ৰা আনেতুং গচ্ছামীতি অধিপ্পাযেনেৰমাহ. নেগমাতি কুটুম্বিকজনা. সমাগতাতি সন্নিপতিতা হুত্ৰা.

এৰং রঞ্ঞা আণত্তা সারথিনো অস্সে যোজেত্ৰা রথে রাজদ্ৰারে ঠপেত্ৰা রঞ্ঞো আরোচেসুং. তমত্থং পকাসেন্তো সত্থা আহ –

‘‘অস্সে চ সারথী যুত্তে, সিন্ধৰে সীঘৰাহনে;

রাজদ্ৰারং উপাগচ্ছুং, যুত্তা দেৰ ইমে হযা’’তি.

তত্থ ¶ অস্সেতি সিন্ধৰে সিন্ধৰজাতিকে সীঘৰাহনে জৰসম্পন্নে অস্সে আদায. সারথীতি সারথিনো. যুত্তেতি রথেসু যোজিতে. উপাগচ্ছুন্তি তে রথেসু যুত্তে অস্সে আদায আগমংসু, আগন্ত্ৰা চ পন ‘‘যুত্তা, দেৰ, ইমে হযা’’তি আরোচেসুং.

ততো ¶ সারথীনং ৰচনং সুত্ৰা রাজা উপড্ঢগাথমাহ –

‘‘থূলা জৰেন হাযন্তি, কিসা হাযন্তি থামুনা’’তি.

তং সুত্ৰা সারথিনোপি উপড্ঢগাথমাহংসু –

‘‘কিসে থূলে ৰিৰজ্জেত্ৰা, সংসট্ঠা যোজিতা হযা’’তি.

তস্সত্থো – দেৰ, কিসে চ থূলে চ এৰরূপে অস্সে অগ্গণ্হিত্ৰা ৰযেন ৰণ্ণেন জৰেন বলেন সদিসা হযা যোজিতাতি.

অথ রাজা পুত্তস্স সন্তিকং গচ্ছন্তো চত্তারো ৰণ্ণে অট্ঠারস সেনিযো সব্বঞ্চ বলকাযং সন্নিপাতাপেসি. তস্স সন্নিপাতেন্তস্সেৰ তযো দিৰসা অতিক্কন্তা. অথ চতুত্থে দিৰসে কাসিরাজা নগরতো নিক্খমিত্ৰা গহেতব্বযুত্তকং গাহাপেত্ৰা অস্সমপদং গন্ত্ৰা পুত্তেন সদ্ধিং পটিনন্দিতো পটিসন্থারমকাসি. তমত্থং পকাসেন্তো সত্থা আহ –

‘‘ততো রাজা তরমানো, যুত্তমারুয্হ সন্দনং;

ইত্থাগারং অজ্ঝভাসি, সব্বাৰ অনুযাথ মং.

‘‘ৰাল়বীজনিমুণ্হীসং, খগ্গং ছত্তঞ্চ পণ্ডরং;

উপাধী রথমারুয্হ, সুৰণ্ণেহি অলঙ্কতা.

‘‘ততো স রাজা পাযাসি, পুরক্খত্ৰান সারথিং;

খিপ্পমেৰ উপাগচ্ছি, যত্থ সম্মতি তেমিযো.

‘‘তঞ্চ ¶ দিস্ৰান আযন্তং, জলন্তমিৰ তেজসা;

খত্তসঙ্ঘপরিব্যূল়্হং, তেমিযো এতদব্রৰি.

‘‘কচ্চি নু তাত কুসলং, কচ্চি তাত অনামযং;

সব্বা চ রাজকঞ্ঞাযো, অরোগা ময্হ মাতরো.

‘‘কুসলঞ্চেৰ ¶ ¶ মে পুত্ত, অথো পুত্ত অনামযং;

সব্বা চ রাজকঞ্ঞাযো, অরোগা তুয্হ মাতরো.

‘‘কচ্চি অমজ্জপো তাত, কচ্চি তে সুরমপ্পিযং;

কচ্চি সচ্চে চ ধম্মে চ, দানে তে রমতে মনো.

‘‘অমজ্জপো অহং পুত্ত, অথো মে সুরমপ্পিযং;

অথো সচ্চে চ ধম্মে চ, দানে মে রমতে মনো.

‘‘কচ্চি অরোগং যোগ্গং তে, কচ্চি ৰহতি ৰাহনং;

কচ্চি তে ব্যাধযো নত্থি, সরীরস্সুপতাপনা.

‘‘অথো অরোগং যোগ্গং মে, অথো ৰহতি ৰাহনং;

অথো মে ব্যাধযো নত্থি, সরীরস্সুপতাপনা.

‘‘কচ্চি অন্তা চ তে ফীতা, মজ্ঝে চ বহলা তৰ;

কোট্ঠাগারঞ্চ কোসঞ্চ, কচ্চি তে পটিসন্থতং.

‘‘অথো অন্তা চ মে ফীতা, মজ্ঝে চ বহলা মম;

কোট্ঠাগারঞ্চ কোসঞ্চ, সব্বং মে পটিসন্থতং.

‘‘স্ৰাগতং তে মহারাজ, অথো তে অদুরাগতং;

পতিট্ঠপেন্তু পল্লঙ্কং, যত্থ রাজা নিসক্কতী’’তি.

তত্থ উপাধী রথমারুয্হাতি সুৰণ্ণপাদুকা চ রথং আরোপেন্তূতি অত্থো. ইমে তযো পাদে পুত্তস্স তত্থেৰ অভিসেককরণত্থায ‘‘পঞ্চ রাজককুধভণ্ডানি গণ্হথা’’তি আণাপেন্তো রাজা আহ. সুৰণ্ণেহি অলঙ্কতাতি ইদং পাদুকং সন্ধাযাহ. উপাগচ্ছীতি উপাগতো অহোসি. কায ৰেলাযাতি? মহাসত্তস্স কারপণ্ণানি পচিত্ৰা নিব্বাপেন্তস্স নিসিন্নৰেলায. জলন্তমিৰ তেজসাতি রাজতেজেন জলন্তং ৰিয. খত্তসঙ্ঘপরিব্যূল়্হন্তি কথাফাসুকেন অমচ্চসঙ্ঘেন পরিৰুতং, খত্তিযসমূহেহি ¶ ৰা পরিৰারিতং. এতদব্রৰীতি কাসিরাজানং বহি খন্ধাৰারং নিৰাসাপেত্ৰা ¶ পদসাৰ পণ্ণসালং আগন্ত্ৰা তং ৰন্দিত্ৰা নিসিন্নং পটিসন্থারং করোন্তো এতং ৰচনং অব্রৰি.

কুসলং অনামযন্তি উভযেনপি পদেন আরোগ্যমেৰ পুচ্ছতি. কচ্চি অমজ্জপোতি কচ্চি মজ্জং ন পিৰসীতি পুচ্ছতি. ‘‘অপ্পমত্তো’’তিপি পাঠো, কুসলধম্মেসু নপ্পমজ্জসীতি অত্থো. সুরমপ্পিযন্তি সুরাপানং অপ্পিযং. ‘‘সুরমপ্পিযা’’তিপি পাঠো, সুরা অপ্পিযাতি অত্থো. ধম্মেতি দসৰিধে রাজধম্মে. যোগ্গন্তি যুগে যুঞ্জিতব্বং তে তৰ অস্সগোণাদিকং. কচ্চি ৰহতীতি কচ্চি অরোগং হুত্ৰা ৰহতি. ৰাহনন্তি হত্থিঅস্সাদি সব্বং ৰাহনং. সরীরস্সুপতাপনাতি সরীরস্স উপতাপকরা. অন্তাতি পচ্চন্তজনপদা. ফীতাতি ইদ্ধা সুভিক্খা, ৰত্থাভরণেহি ৰা অন্নপানেহি ৰা পরিপুণ্ণা গাল়্হৰাসা. মজ্ঝে চাতি রট্ঠস্স মজ্ঝে. বহলাতি গামনিগমা ঘনৰাসা. পটিসন্থতন্তি পটিচ্ছাদিতং গুত্তং, পরিপুণ্ণং ৰা. যত্থ রাজা নিসক্কতীতি যস্মিং পল্লঙ্কে রাজা নিসীদিস্সতি, তং পঞ্ঞাপেন্তূতি ৰদতি.

রাজা মহাসত্তে গারৰেন পল্লঙ্কে ন নিসীদতি. অথ ¶ মহাসত্তো ‘‘সচে পল্লঙ্কে ন নিসীদতি, পণ্ণসন্থারং পঞ্ঞাপেথা’’তি ৰত্ৰা তস্মিং পঞ্ঞত্তে নিসীদনত্থায রাজানং নিমন্তেন্তো গাথমাহ –

‘‘ইধেৰ তে নিসীদস্সু, নিযতে পণ্ণসন্থরে;

এত্তো উদকমাদায, পাদে পক্খালযস্সু তে’’তি.

তত্থ নিযতেতি সুসন্থতে. এত্তোতি পরিভোগউদকং দস্সেন্তো আহ.

রাজা মহাসত্তে গারৰেন পণ্ণসন্থারেপি অনিসীদিত্ৰা ভূমিযং এৰ নিসীদি. মহাসত্তোপি পণ্ণসালং পৰিসিত্ৰা তং কারপণ্ণকং নীহরিত্ৰা রাজানং তেন নিমন্তেন্তো গাথমাহ –

‘‘ইদম্পি পণ্ণকং ময্হং, রন্ধং রাজ অলোণকং;

পরিভুঞ্জ মহারাজ, পাহুনো মেসিধাগতো’’তি.

‘‘ন ¶ চাহং পণ্ণং ভুঞ্জামি, ন হেতং ময্হ ভোজনং;

সালীনং ওদনং ভুঞ্জে, সুচিং মংসূপসেচন’’ন্তি.

তত্থ ন চাহন্তি পটিক্খেপৰচনং.

রাজা তথারূপং অত্তনো রাজভোজনং ৰণ্ণেত্ৰা তস্মিং মহাসত্তে গারৰেন থোকং পণ্ণকং হত্থতলে ঠপেত্ৰা ‘‘তাত, ত্ৰং এৰরূপং ভোজনং ভুঞ্জসী’’তি পুত্তেন সদ্ধিং পিযকথং কথেন্তো নিসীদি. তস্মিং খণে চন্দাদেৰী ওরোধেন পরিৰুতা একমগ্গেন আগন্ত্ৰা বোধিসত্তস্স অস্সমপদং পত্ৰা পিযপুত্তং দিস্ৰা তত্থেৰ পতিত্ৰা ৰিসঞ্ঞী অহোসি. ততো পটিলদ্ধস্সাসা পতিতট্ঠানতো উট্ঠহিত্ৰা আগন্ত্ৰা বোধিসত্তস্স পাদে দল়্হং গহেত্ৰা ৰন্দিত্ৰা অস্সুপুণ্ণেহি নেত্তেহি রোদিত্ৰা ৰন্দনট্ঠানতো উট্ঠায একমন্তং নিসীদি. অথ নং রাজা ‘‘ভদ্দে, তৰ পুত্তস্স ভোজনং পস্সাহী’’তি ৰত্ৰা থোকং পণ্ণকং তস্সা হত্থে ঠপেত্ৰা সেসইত্থীনম্পি থোকং থোকং অদাসি. তা সব্বাপি ‘‘সামি, এৰরূপং ভোজনং ভুঞ্জসী’’তি ৰদন্তিযো তং গহেত্ৰা অত্তনো অত্তনো সীসে কত্ৰা ‘‘অতিদুক্করং করোসি, সামী’’তি ৰত্ৰা নমস্সমানা নিসীদিংসু. রাজা পুন ‘‘তাত, ইদং ময্হং অচ্ছরিযং হুত্ৰা উপট্ঠাতী’’তি ৰত্ৰা ইমং গাথমাহ –

‘‘অচ্ছেরকং মং পটিভাতি, এককম্পি রহোগতং;

এদিসং ভুঞ্জমানানং, কেন ৰণ্ণো পসীদতী’’তি.

তত্থ এককন্তি তাত, তং এককম্পি রহোগতং ইমিনা ভোজনেন যাপেন্তং দিস্ৰা মম অচ্ছরিযং হুত্ৰা উপট্ঠাতি. এদিসন্তি এৰরূপং অলোণকং অতক্কং নিধূপনং রন্ধং পত্তং ভুঞ্জন্তানং কেন কারণেন ৰণ্ণো পসীদতীতি নং পুচ্ছি.

‘‘একো রাজ নিপজ্জামি, নিযতে পণ্ণসন্থরে;

তায মে একসেয্যায, রাজ ৰণ্ণো পসীদতি.

‘‘ন ¶ চ নেত্তিংসবন্ধা মে, রাজরক্খা উপট্ঠিতা;

তায মে সুখসেয্যায, রাজৰণ্ণো পসীদতি.

‘‘অতীতং ¶ নানুসোচামি, নপ্পজপ্পামিনাগতং;

পচ্চুপ্পন্নেন যাপেমি, তেন ৰণ্ণো পসীদতি.

‘‘অনাগতপ্পজপ্পায, অতীতস্সানুসোচনা;

এতেন বালা সুস্সন্তি, নল়োৰ হরিতো লুতো’’তি.

তত্থ নেত্তিংসবন্ধাতি খগ্গবন্ধা. রাজরক্খাতি রাজানং রক্খিতা. নপ্পজপ্পামীতি ন পত্থেমি. হরিতোতি হরিতৰণ্ণো. লুতোতি লুঞ্চিত্ৰা আতপে খিত্তনল়ো ৰিয.

অথ রাজা ‘‘ইধেৰ নং অভিসিঞ্চিত্ৰা আদায গমিস্সামী’’তি চিন্তেত্ৰা রজ্জেন নিমন্তেন্তো আহ –

‘‘হত্থানীকং রথানীকং, অস্সে পত্তী চ ৰম্মিনো;

নিৰেসনানি রম্মানি, অহং পুত্ত দদামি তে.

‘‘ইত্থাগারম্পি তে দম্মি, সব্বালঙ্কারভূসিতং;

তা পুত্ত পটিপজ্জস্সু, ত্ৰং নো রাজা ভৰিস্সসি.

‘‘কুসলা নচ্চগীতস্স, সিক্খিতা চাতুরিত্থিযো;

কামে তং রমযিস্সন্তি, কিং অরঞ্ঞে করিস্সসি.

‘‘পটিরাজূহি তে কঞ্ঞা, আনযিস্সং অলঙ্কতা;

তাসু পুত্তে জনেত্ৰান, অথ পচ্ছা পব্বজিস্সসি.

‘‘যুৰা চ দহরো চাসি, পঠমুপ্পত্তিকো সুসু;

রজ্জং কারেহি ভদ্দন্তে, কিং অরঞ্ঞে করিস্সসী’’তি.

তত্থ হত্থানীকন্তি দসহত্থিতো পট্ঠায হত্থানীকং নাম, তথা রথানীকং. ৰম্মিনোতি ৰম্মবদ্ধসূরযোধে. কুসলাতি ছেকা. সিক্খিতাতি অঞ্ঞেসুপি ইত্থিকিচ্চেসু সিক্খিতা. চাতুরিত্থিযোতি চতুরা ৰিলাসা ইত্থিযো, অথ ৰা চতুরা নাগরা ইত্থিযো, অথ ৰা চতুরা ¶ নাম ¶ নাটকিত্থিযো. পটিরাজূহি তে কঞ্ঞাতি অঞ্ঞেহি রাজূহি তৰ রাজকঞ্ঞাযো আনযিস্সামি. যুৰাতি যোব্বনপ্পত্তো. দহরোতি তরুণো. পঠমুপ্পত্তিকোতি পঠমৰযেন উপ্পত্তিতো সমুগ্গতো. সুসূতি অতিতরুণো.

ইতো পট্ঠায বোধিসত্তস্স ধম্মকথা হোতি –

‘‘যুৰা চরে ব্রহ্মচরিযং, ব্রহ্মচারী যুৰা সিযা;

দহরস্স হি পব্বজ্জা, এতং ইসীহি ৰণ্ণিতং.

‘‘যুৰা ¶ চরে ব্রহ্মচরিযং, ব্রহ্মচারী যুৰা সিযা;

ব্রহ্মচরিযং চরিস্সামি, নাহং রজ্জেন মত্থিকো.

‘‘পস্সামি ৰোহং দহরং, অম্ম তাত ৰদন্তরং;

কিচ্ছালদ্ধং পিযং পুত্তং, অপ্পত্ৰাৰ জরং মতং.

‘‘পস্সামি ৰোহং দহরিং, কুমারিং চারুদস্সনিং;

নৰৰংসকল়ীরংৰ, পলুগ্গং জীৰিতক্খযং.

‘‘দহরাপি হি মীযন্তি, নরা চ অথ নারিযো;

তত্থ কো ৰিস্সসে পোসো, ‘দহরোম্হী’তি জীৰিতে.

‘‘যস্স রত্যা ৰিৰসানে, আযু অপ্পতরং সিযা;

অপ্পোদকেৰ মচ্ছানং, কিং নু কোমারকং তহিং.

‘‘নিচ্চমব্ভাহতো লোকো, নিচ্চঞ্চ পরিৰারিতো;

অমোঘাসু ৰজন্তীসু, কিং মং রজ্জেভিসিঞ্চসী’’তি.

‘‘কেন ¶ মব্ভাহতো লোকো, কেন চ পরিৰারিতো;

কাযো অমোঘা গচ্ছন্তি, তং মে অক্খাহি পুচ্ছিতো’’তি.

‘‘মচ্চুনাব্ভাহতো লোকো, জরায পরিৰারিতো;

রত্যো অমোঘা গচ্ছন্তি, এৰং জানাহি খত্তিয.

‘‘যথাপি ¶ তন্তে ৰিততে, যং যদেৰূপৰীযতি;

অপ্পকং হোতি ৰেতব্বং, এৰং মচ্চান জীৰিতং.

‘‘যথা ৰারিৰহো পূরো, গচ্ছং নুপনিৰত্ততি;

এৰমাযু মনুস্সানং, গচ্ছং নুপনিৰত্ততি.

‘‘যথা ৰারিৰহো পূরো, ৰহে রুক্খেপকূলজে;

এৰং জরামরণেন, ৰুয্হন্তে সব্বপাণিনো’’তি.

তত্থ ব্রহ্মচারী যুৰা সিযাতি ব্রহ্মচরিযং চরন্তো যুৰা ভৰেয্য. ইসীহি ৰণ্ণিতন্তি বুদ্ধাদীহি ইসীহি থোমিতং পসত্থং. নাহং রজ্জেন মত্থিকোতি অহং রজ্জেন অত্থিকো ন হোমি. অম্ম তাত ৰদন্তরন্তি ‘‘অম্ম, তাতা’’তি ৰদন্তং. পলুগ্গন্তি মচ্চুনা লুঞ্চিত্ৰা গহিতং. যস্স রত্যা ৰিৰসানেতি মহারাজ, যস্স মাতুকুচ্ছিম্হি পটিসন্ধিগ্গহণকালতো পট্ঠায রত্তিদিৰাতিক্কমেন অপ্পতরং আযু হোতি. কোমারকং তহিন্তি তস্মিং ৰযে তরুণভাৰো কিং করিস্সতি.

কেন মব্ভাহতোতি কেন অব্ভাহতো. ইদং রাজা সংখিত্তেন ভাসিতস্স অত্থং অজানন্তোৰ পুচ্ছতি. রত্যোতি রত্তিযো. তা হি ইমেসং সত্তানং আযুঞ্চ ৰণ্ণঞ্চ বলঞ্চ খেপেন্তিযো এৰ গচ্ছন্তীতি অমোঘা গচ্ছন্তি নামাতি ৰেদিতব্বং ¶ . যং যদেৰূপৰীযতীতি যং যং তন্তং উপৰীযতি. ৰেতব্বন্তি তন্তস্মিং ৰীতে সেসং ৰেতব্বং যথা অপ্পকং হোতি, এৰং সত্তানং জীৰিতং. নুপনিৰত্ততীতি তস্মিং তস্মিং খণে গতং গতমেৰ হোতি, ন উপনিৰত্ততি. ৰহে রুক্খেপকূলজেতি উপকূলজে রুক্খে ৰহেয্য.

রাজা ¶ মহাসত্তস্স ধম্মকথং সুত্ৰা ‘‘কিং মে ঘরাৰাসেনা’’তি অতিৰিয উক্কণ্ঠিতো পব্বজিতুকামো হুত্ৰা ‘‘নাহং তাৰ পুন নগরং গমিস্সামি, ইধেৰ পব্বজিস্সামি. সচে পন মে পুত্তো নগরং গচ্ছেয্য, সেতচ্ছত্তমস্স দদেয্য’’ন্তি চিন্তেত্ৰা তং ৰীমংসিতুং পুন রজ্জেন নিমন্তেন্তো আহ –

‘‘হত্থানীকং রথানীকং, অস্সে পত্তী চ ৰম্মিনো;

নিৰেসনানি রম্মানি, অহং পুত্ত দদামি তে.

‘‘ইত্থাগারম্পি ¶ তে দম্মি, সব্বালঙ্কারভূসিতং;

তা পুত্ত পটিপজ্জস্সু, ত্ৰং নো রাজা ভৰিস্সসি.

‘‘কুসলা নচ্চগীতস্স, সিক্খিতা চাতুরিত্থিযো;

কামে তং রমযিস্সন্তি, কিং অরঞ্ঞে করিস্সসি.

‘‘পটিরাজূহি তে কঞ্ঞা, আনযিস্সং অলঙ্কতা;

তাসু পুত্তে জনেত্ৰান, অথ পচ্ছা পব্বজিস্সসি.

‘‘যুৰা চ দহরো চাসি, পঠমুপ্পত্তিকো সুসু;

রজ্জং কারেহি ভদ্দন্তে, কিং অরঞ্ঞে করিস্সসি.

‘‘কোট্ঠাগারঞ্চ কোসঞ্চ, ৰাহনানি বলানি চ;

নিৰেসনানি রম্মানি, অহং পুত্ত দদামি তে.

‘‘গোমণ্ডলপরিব্যূল়্হো, দাসিসঙ্ঘপুরক্খতো;

রজ্জং কারেহি ভদ্দন্তে, কিং অরঞ্ঞে করিস্সসী’’তি.

তত্থ গোমণ্ডলপরিব্যূল়্হোতি সুভঙ্গীনং রাজকঞ্ঞানং মণ্ডলেন পুরক্খতো.

অথ মহাসত্তো রজ্জেন অনত্থিকভাৰং পকাসেন্তো আহ –

‘‘কিং ¶ ধনেন যং খীযেথ, কিং ভরিযায মরিস্সতি;

কিং যোব্বনেন জিণ্ণেন, যং জরাযাভিভুয্যতি.

‘‘তত্থ কা নন্দি কা খিড্ডা, কা রতী কা ধনেসনা;

কিং মে পুত্তেহি দারেহি, রাজ মুত্তোস্মি বন্ধনা.

‘‘যোহং এৰং পজানামি, মচ্চু মে নপ্পমজ্জতি;

অন্তকেনাধিপন্নস্স, কা রতী কা ধনেসনা.

‘‘ফলানমিৰ ¶ পক্কানং, নিচ্চং পতনতো ভযং;

এৰং জাতান মচ্চানং, নিচ্চং মরণতো ভযং.

‘‘সাযমেকে ন দিস্সন্তি, পাতো দিট্ঠা বহূ জনা;

পাতো এতে ন দিস্সন্তি, সাযং দিট্ঠা বহূ জনা.

‘‘অজ্জেৰ ¶ কিচ্চং আতপং, কো জঞ্ঞা মরণং সুৰে;

ন হি নো সঙ্গরং তেন, মহাসেনেন মচ্চুনা.

‘‘চোরা ধনস্স পত্থেন্তি, রাজ মুত্তোস্মি বন্ধনা;

এহি রাজ নিৰত্তস্সু, নাহং রজ্জেন মত্থিকো’’তি.

তত্থ যং খীযেথাতি মহারাজ, কিং ত্ৰং মং ধনেন নিমন্তেসি, যং খীযেথ খযং গচ্ছেয্য. ধনং ৰা হি পুরিসং চজতি, পুরিসো ৰা তং ধনং চজিত্ৰা গচ্ছতীতি সব্বথাপি খযগামীযেৰ হোতি, কিং ত্ৰং মং তেন ধনেন নিমন্তেসি. কিং ভরিযাযাতি ভরিযায কিং করিস্সামি, যা মযি ঠিতেযেৰ মরিস্সতি. জিণ্ণেনাতি জরায অনুপরিতেন অনুভূতেন. অভিভুয্যতীতি অভিভৰিয্যতি. তত্থাতি তস্মিং এৰং জরামরণধম্মে লোকসন্নিৰাসে. কা নন্দীতি কা নাম তুট্ঠি. খিড্ডাতি কীল়া. রতীতি পঞ্চকামগুণরতি. বন্ধনাতি কামবন্ধনা মুত্তো অস্মি, মহারাজাতি ঝানেন ৰিক্খম্ভিতত্তা এৰমাহ. মচ্চু মেতি মম মচ্চু নপ্পমজ্জতি, নিচ্চং মম ৰধায অপ্পমতোযেৰাতি. যো অহং এৰং পজানামি, তস্স মম অন্তকেন অধিপন্নস্স ৰধিতস্স ¶ কা নাম রতি, কা ধনেসনাতি. নিচ্চন্তি জাতকালতো পট্ঠায সদা জরামরণতো ভযমেৰ উপ্পজ্জতি.

আতপন্তি কুসলকম্মৰীরিযং. কিচ্চন্তি কত্তব্বং. কো জঞ্ঞা মরণং সুৰেতি সুৰে ৰা পরসুৰে ৰা মরণং ৰা জীৰিতং ৰা কো জানেয্য. সঙ্গরন্তি সঙ্কেতং. মহাসেনেনাতি পঞ্চৰীসতিভযবাত্তিংসকম্মকরণছন্নৰুতিরোগপ্পমুখাদিৰসেন পুথুসেনেন. চোরা ধনস্সাতি ধনত্থায জীৰিতং চজন্তা চোরা ধনস্স পত্থেন্তি নাম, অহং পন ধনপত্থনাসঙ্খাতা বন্ধনা মুত্তো অস্মি, ন মে ধনেনত্থোতি অত্থো. নিৰত্তস্সূতি মম ৰচনেন সম্মা নিৰত্তস্সু, রজ্জং পহায নেক্খম্মং পটিসরণং কত্ৰা পব্বজস্সু. যং পন চিন্তেসি ‘‘ইমং রজ্জে পতিট্ঠাপেস্সামী’’তি, তং মা চিন্তযি, নাহং রজ্জেন অত্থিকোতি. ইতি মহাসত্তস্স ধম্মদেসনা সহানুসন্ধিনা মত্থকং পত্তা.

তং সুত্ৰা রাজানঞ্চ চন্দাদেৰিঞ্চ আদিং কত্ৰা সোল়সসহস্সা ওরোধা চ অমচ্চাদযো চ সব্বে পব্বজিতুকামা অহেসুং. রাজাপি নগরে ¶ ভেরিং চরাপেসি ‘‘যে মম পুত্তস্স সন্তিকে পব্বজিতুং ইচ্ছন্তি, তে পব্বজন্তূ’’তি ¶ . সব্বেসঞ্চ সুৰণ্ণকোট্ঠাগারাদীনং দ্ৰারানি ৰিৰরাপেত্ৰা ‘‘অসুকট্ঠানে চ মহানিধিকুম্ভিযো অত্থি, অত্থিকা গণ্হন্তূ’’তি সুৰণ্ণপট্টে অক্খরানি লিখাপেত্ৰা মহাথম্ভে বন্ধাপেসি. তে নাগরা যথাপসারিতে আপণে চ ৰিৰটদ্ৰারানি গেহানি চ পহায নগরতো নিক্খমিত্ৰা রঞ্ঞো সন্তিকং আগমিংসু. রাজা মহাজনেন সদ্ধিং মহাসত্তস্স সন্তিকে পব্বজি. সক্কদত্তিযং তিযোজনিকং অস্সমপদং পরিপুণ্ণং অহোসি. মহাসত্তো পণ্ণসালাযো ৰিচারেসি, মজ্ঝে ঠিতা পণ্ণসালাযো ইত্থীনং দাপেসি. কিংকারণা? ভীরুকজাতিকা এতাতি. পুরিসানং পন বহিপণ্ণসালাযো দাপেসি. তা সব্বাপি পণ্ণসালাযো ৰিস্সকম্মদেৰপুত্তোৰ মাপেসি. তে চ ফলধররুক্খে ৰিস্সকম্মদেৰপুত্তোযেৰ অত্তনো ইদ্ধিযা মাপেসি. তে সব্বে ৰিস্সকম্মেন নিম্মিতেসু ফলধররুক্খেসু উপোসথদিৰসে ভূমিযং পতিতপতিতানি ফলানি গহেত্ৰা পরিভুঞ্জিত্ৰা সমণধম্মং করোন্তি. তেসু যো কামৰিতক্কং ৰা ব্যাপাদৰিতক্কং ৰা ৰিহিংসাৰিতক্কং ৰা ৰিতক্কেতি, তস্স মনং জানিত্ৰা মহাসত্তো আকাসে নিসীদিত্ৰা মধুরধম্মং কথেসি. তে জনা বোধিসত্তস্স মধুরধম্মং সুত্ৰা একগ্গচিত্তা হুত্ৰা খিপ্পমেৰ অভিঞ্ঞা চ সমাপত্তিযো চ নিব্বত্তেসুং.

তদা একো সামন্তরাজা ‘‘কাসিরাজা কির বারাণসিনগরতো নিক্খমিত্ৰা ৰনং পৰিসিত্ৰা পব্বজিতো’’তি সুত্ৰা ‘‘বারাণসিং গণ্হিস্সামী’’তি নগরা নিক্খমিত্ৰা বারাণসিং পত্ৰা নগরং পৰিসিত্ৰা অলঙ্কতনগরং দিস্ৰা রাজনিৰেসনং আরুয্হ সত্তৰিধং ৰররতনং ওলোকেত্ৰা ¶ ‘‘কাসিরঞ্ঞো ইমং ধনং নিস্সায একেন ভযেন ভৰিতব্ব’’ন্তি চিন্তেন্তো সুরাসোণ্ডে পক্কোসাপেত্ৰা পুচ্ছি ‘‘তুম্হাকং রঞ্ঞো ইধ নগরে ভযং উপ্পন্নং অত্থী’’তি? ‘‘নত্থি, দেৰা’’তি. ‘‘কিং কারণা’’তি. ‘‘অম্হাকং রঞ্ঞো পুত্তো তেমিযকুমারো ‘বারাণসিং রজ্জং ন করিস্সামী’তি অমূগোপি মূগো ৰিয হুত্ৰা ইমম্হা নগরা নিক্খমিত্ৰা ৰনং পৰিসিত্ৰা ইসিপব্বজ্জং পব্বজি, তেন কারণেন অম্হাকং রাজা মহাজনেন সদ্ধিং ইমম্হা নগরা নিক্খমিত্ৰা তেমিযকুমারস্স সন্তিকং গন্ত্ৰা পব্বজিতো’’তি আরোচেসুং. সামন্তরাজা তেসং ৰচনং সুত্ৰা তুস্সিত্ৰা ‘‘অহম্পি পব্বজিস্সামী’’তি চিন্তেত্ৰা ¶ ‘‘তাত, তুম্হাকং রাজা কতরদ্ৰারেন নিক্খন্তো’’তি পুচ্ছি. ‘‘দেৰ, পাচীনদ্ৰারেনা’’তি ৰুত্তে অত্তনো পরিসায সদ্ধিং তেনেৰ পাচীনদ্ৰারেন নিক্খমিত্ৰা নদীতীরেন পাযাসি.

মহাসত্তোপি তস্স আগমনং ঞত্ৰা ৰনন্তরং আগন্ত্ৰা আকাসে নিসীদিত্ৰা মধুরধম্মং দেসেসি. সো পরিসায সদ্ধিং তস্স সন্তিকেযেৰ পব্বজি. এৰং অপরেপি সত্ত রাজানো ‘‘বারাণসিনগরং গণ্হিস্সামী’’তি আগতা. তেপি রাজানো সত্ত রজ্জানি ছড্ডেত্ৰা বোধিসত্তস্স সন্তিকেযেৰ পব্বজিংসু. হত্থীপি অরঞ্ঞহত্থী জাতা, অস্সাপি অরঞ্ঞঅস্সা জাতা, রথাপি অরঞ্ঞেযেৰ ৰিনট্ঠা, ভণ্ডাগারেসু কহাপণে অস্সমপদে ৰালুকং কত্ৰা ৰিকিরিংসু. সব্বেপি অভিঞ্ঞাসমাপত্তিযো নিব্বত্তেত্ৰা জীৰিতপরিযোসানে ব্রহ্মলোকপরাযণা অহেসুং. তিরচ্ছানগতা হত্থিঅস্সাপি ইসিগণে চিত্তং পসাদেত্ৰা ছকামাৰচরলোকেসু নিব্বত্তিংসু.

সত্থা ইমং ধম্মদেসনং আহরিত্ৰা সচ্চানি পকাসেত্ৰা ‘‘ন, ভিক্খৰে, ইদানেৰ, পুব্বেপি রজ্জং পহায নিক্খন্তোযেৰা’’তি ৰত্ৰা জাতকং সমোধানেসি – ‘‘তদা ছত্তে অধিৰত্থা দেৰধীতা উপ্পলৰণ্ণা ¶ অহোসি, সুনন্দো সারথি সারিপুত্তো, মাতাপিতরো মহারাজকুলানি, সেসপরিসা বুদ্ধপরিসা, মূগপক্খপণ্ডিতো পন অহমেৰ সম্মাসম্বুদ্ধো অহোসি’’ন্তি.

কোযং ¶ ¶ মজ্ঝে সমুদ্দস্মিন্তি ইদং সত্থা জেতৰনে ৰিহরন্তো মহাভিনিক্খমনং আরব্ভ কথেসি. একদিৰসঞ্হি ভিক্খূ ধম্মসভাযং সন্নিসিন্না তথাগতস্স মহাভিনিক্খমনং ৰণ্ণযন্তা নিসীদিংসু. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি তথাগতো মহাভিনিক্খমনং নিক্খন্তোযেৰা’’তি ৰত্ৰা তেহি যাচিতো অতীতং আহরি.

অতীতে ৰিদেহরট্ঠে মিথিলাযং মহাজনকো নাম রাজা রজ্জং কারেসি. তস্স দ্ৰে পুত্তা অহেসুং অরিট্ঠজনকো চ পোলজনকো চাতি. তেসু রাজা জেট্ঠপুত্তস্স উপরজ্জং অদাসি, কনিট্ঠস্স সেনাপতিট্ঠানং অদাসি. অপরভাগে মহাজনকো কালমকাসি. তস্স সরীরকিচ্চং কত্ৰা রঞ্ঞো অচ্চযেন অরিট্ঠজনকো রাজা হুত্ৰা ইতরস্স উপরজ্জং অদাসি. তস্সেকো পাদমূলিকো অমচ্চো রঞ্ঞো সন্তিকং গন্ত্ৰা ‘‘দেৰ, উপরাজা তুম্হে ঘাতেতুকামো’’তি আহ. রাজা তস্স পুনপ্পুনং কথং সুত্ৰা কনিট্ঠস্স সিনেহং ভিন্দিত্ৰা পোলজনকং সঙ্খলিকাহি বন্ধাপেত্ৰা রাজনিৰেসনতো অৰিদূরে একস্মিং গেহে ৰসাপেত্ৰা আরক্খং ঠপেসি. কুমারো ‘‘সচাহং ভাতু ৰেরীম্হি, সঙ্খলিকাপি মে হত্থপাদা মা মুচ্চন্তু, দ্ৰারম্পি মা ৰিৰরীযতু, সচে নো ৰেরীম্হি, সঙ্খলিকাপি মে হত্থপাদা মুচ্চন্তু, দ্ৰারম্পি ৰিৰরীযতূ’’তি সচ্চকিরিযমকাসি. তাৰদেৰ ¶ সঙ্খলিকাপি খণ্ডাখণ্ডং ছিজ্জিংসু, দ্ৰারম্পি ৰিৰটং. সো নিক্খমিত্ৰা একং পচ্চন্তগামং গন্ত্ৰা ৰাসং কপ্পেসি.

পচ্চন্তগামৰাসিনো তং সঞ্জানিত্ৰা উপট্ঠহিংসু. রাজাপি তং গাহাপেতুং নাসক্খি. সো অনুপুব্বেন পচ্চন্তজনপদং হত্থগতং কত্ৰা মহাপরিৰারো হুত্ৰা ‘‘অহং পুব্বে ভাতু ন ৰেরী, ইদানি পন ৰেরীম্হী’’তি মহাজনপরিৰুতো মিথিলং গন্ত্ৰা বহিনগরে খন্ধাৰারং কত্ৰা ৰাসং কপ্পেসি. নগরৰাসিনো যোধা ‘‘কুমারো কির আগতো’’তি সুত্ৰা যেভুয্যেন হত্থিঅস্সৰাহনাদীনি গহেত্ৰা তস্সেৰ সন্তিকং আগমিংসু, অঞ্ঞেপি নাগরা আগমিংসু. সো ভাতু সাসনং পেসেসি ‘‘নাহং পুব্বে তুম্হাকং ৰেরী, ইদানি পন ৰেরীম্হি, ছত্তং ৰা মে দেথ, যুদ্ধং ৰা’’তি. রাজা তং সুত্ৰা ¶ যুদ্ধং কাতুং ইচ্ছন্তো অগ্গমহেসিং আমন্তেত্ৰা ‘‘ভদ্দে, যুদ্ধে জযপরাজযো ¶ নাম ন সক্কা ঞাতুং, সচে মম অন্তরাযো হোতি, ত্ৰং গব্ভং রক্খেয্যাসী’’তি ৰত্ৰা মহতিযা সেনায পরিৰুতো নগরা নিক্খমি.

অথ নং যুদ্ধে পোলজনকস্স যোধা জীৰিতক্খযং পাপেসুং. তদা ‘‘রাজা মতো’’তি সকলনগরে এককোলাহলং জাতং. দেৰীপি তস্স মতভাৰং ঞত্ৰা সীঘং সীঘং সুৰণ্ণসারাদীনি গহেত্ৰা পচ্ছিযং পক্খিপিত্ৰা মত্থকে কিলিট্ঠপিলোতিকং অত্থরিত্ৰা উপরি তণ্ডুলে ওকিরিত্ৰা কিলিট্ঠপিলোতিকং নিৰাসেত্ৰা সরীরং ৰিরূপং কত্ৰা পচ্ছিং সীসে ঠপেত্ৰা দিৰা দিৰস্সেৰ নিক্খমি, ন কোচি নং সঞ্জানি. সা উত্তরদ্ৰারেন নিক্খমিত্ৰা কত্থচি অগতপুব্বত্তা মগ্গং অজানন্তী দিসং ৰৰত্থাপেতুং অসক্কোন্তী কেৰলং ‘‘কালচম্পানগরং নাম অত্থী’’তি সুতত্তা ‘‘কালচম্পানগরং গমিকা নাম অত্থী’’তি পুচ্ছমানা একিকা সালাযং নিসীদি. কুচ্ছিম্হি পনস্সা নিব্বত্তসত্তো ন যো ৰা সো ৰা, পূরিতপারমী মহাসত্তো নিব্বত্তি.

তস্স তেজেন সক্কস্স ভৰনং কম্পি. সক্কো আৰজ্জেন্তো তং কারণং ঞত্ৰা ‘‘তস্সা কুচ্ছিযং নিব্বত্তসত্তো মহাপুঞ্ঞো, মযা গন্তুং ৰট্টতী’’তি চিন্তেত্ৰা পটিচ্ছন্নযোগ্গং মাপেত্ৰা তত্থ মঞ্চং পঞ্ঞাপেত্ৰা মহল্লকপুরিসো ৰিয যোগ্গং পাজেন্তো তায নিসিন্নসালায দ্ৰারে ঠত্ৰা ‘‘কালচম্পানগরং গমিকা নাম অত্থী’’তি পুচ্ছি. ‘‘অহং, তাত, গমিস্সামী’’তি. ‘‘তেন ¶ হি যোগ্গং আরুয্হ নিসীদ, অম্মা’’তি. ‘‘তাত, অহং পরিপুণ্ণগব্ভা, ন সক্কা মযা যোগ্গং অভিরুহিতুং, পচ্ছতো পচ্ছতো গমিস্সামি, ইমিস্সা পন মে পচ্ছিযা ওকাসং দেহী’’তি. ‘‘অম্ম, কিং ৰদেসি, যোগ্গং পাজেতুং জাননসমত্থো নাম মযা সদিসো নত্থি. অম্ম, মা ভাযি, আরুয্হ নিসীদা’’তি. সা ‘‘তাত, সাধূ’’তি ৰদতি. সো তস্সা আরোহনকালে অত্তনো আনুভাৰেন ৰাতপুণ্ণভস্তচম্মং ৰিয পথৰিং উন্নামেত্ৰা যোগ্গস্স পচ্ছিমন্তে পহরাপেসি. সা অভিরুয্হ সযনে নিপজ্জিত্ৰাৰ ‘‘অযং দেৰতা ভৰিস্সতী’’তি অঞ্ঞাসি. সা দিব্বসযনে নিপন্নমত্তাৰ নিদ্দং ওক্কমি.

অথ ¶ নং সক্কো তিংসযোজনমত্থকে একং নদিং পত্ৰা পবোধেত্ৰা ‘‘অম্ম, ওতরিত্ৰা নদিযং ন্হাযিত্ৰা উস্সীসকে সাটকযুগং অত্থি, তং নিৰাসেহি, অন্তোযোগ্গে পুটভত্তং অত্থি, তং ভুঞ্জাহী’’তি আহ. সা তথা কত্ৰা পুন নিপজ্জিত্ৰা সাযন্হসমযে কালচম্পানগরং পত্ৰা দ্ৰারট্টালকপাকারে দিস্ৰা ‘‘তাত, কিং নাম নগরমেত’’ন্তি পুচ্ছি. ‘‘কালচম্পানগরং, অম্মা’’তি. ‘‘কিং ৰদেসি, তাত, ননু অম্হাকং নগরতো কালচম্পানগরং সট্ঠিযোজনমত্থকে হোতী’’তি? ‘‘এৰং, অম্ম, অহং পন উজুমগ্গং জানামী’’তি. অথ নং দক্খিণদ্ৰারসমীপে ওতারেত্ৰা ¶ ‘‘অম্ম, অম্হাকং গামো পুরতো অত্থি, ত্ৰং গন্ত্ৰা নগরং পৰিসাহী’’তি ৰত্ৰা পুরতো গন্ত্ৰা ৰিয সক্কো অন্তরধাযিত্ৰা সকট্ঠানমেৰ গতো.

দেৰীপি একিকাৰ সালাযং নিসীদি. তস্মিং খণে একো দিসাপামোক্খো আচরিযো কালচম্পানগরৰাসী মন্তজ্ঝাযকো ব্রাহ্মণো পঞ্চহি মাণৰকসতেহি পরিৰুতো ন্হানত্থায গচ্ছন্তো দূরতোৰ ওলোকেত্ৰা তং অভিরূপং সোভগ্গপ্পত্তং তত্থ নিসিন্নং দিস্ৰা তস্সা কুচ্ছিযং মহাসত্তস্সানুভাৰেন সহ দস্সনেনেৰ কনিট্ঠভগিনিসিনেহং উপ্পাদেত্ৰা মাণৰকে বহি ঠপেত্ৰা এককোৰ সালং পৰিসিত্ৰা ‘‘ভগিনি, কতরগামৰাসিকা ত্ৰ’’ন্তি পুচ্ছি. ‘‘তাত, মিথিলাযং অরিট্ঠজনকরঞ্ঞো অগ্গমহেসীম্হী’’তি. ‘‘অম্ম, ইধ কস্মা আগতাসী’’তি? ‘‘তাত, পোলজনকেন রাজা মারিতো, অথাহং ভীতা ‘গব্ভং অনুরক্খিস্সামী’তি আগতা’’তি. ‘‘অম্ম, ইমস্মিং পন তে নগরে কোচি ঞাতকো অত্থী’’তি? ‘‘নত্থি, তাতা’’তি. তেন হি মা চিন্তযি, অহং উদিচ্চব্রাহ্মণো মহাসালো দিসাপামোক্খআচরিযো, অহং তং ভগিনিট্ঠানে ঠপেত্ৰা পটিজগ্গিস্সামি, ত্ৰং ‘‘ভাতিকা’’তি মং ৰত্ৰা পাদেসু গহেত্ৰা পরিদেৰাতি. সা মহাসদ্দং কত্ৰা ¶ তস্স পাদেসু গহেত্ৰা পরিদেৰি. তে দ্ৰেপি অঞ্ঞমঞ্ঞং পরিদেৰিংসু.

অথস্স অন্তেৰাসিকা মহাসদ্দং সুত্ৰা খিপ্পং উপধাৰিত্ৰা ‘‘আচরিয, কিং তে হোতী’’তি পুচ্ছিংসু. সো আহ – ‘‘কনিট্ঠভগিনী মে এসা, অসুককালে নাম মযা ৰিনা জাতা’’তি. অথ মাণৰা ‘‘তৰ ভগিনিং দিট্ঠকালতো পট্ঠায মা চিন্তযিত্থ আচরিযা’’তি আহংসু. সো মাণৰে পটিচ্ছন্নযোগ্গং আহরাপেত্ৰা তং তত্থ নিসীদাপেত্ৰা ‘‘তাতা, ৰো ¶ গন্ত্ৰা ব্রাহ্মণিযা মম কনিট্ঠভগিনিভাৰং কথেত্ৰা সব্বকিচ্চানি কাতুং ৰদেথা’’তি ৰত্ৰা গেহং পেসেসি. তে গন্ত্ৰা ব্রাহ্মণিযা কথেসুং. অথ নং ব্রাহ্মণীপি উণ্হোদকেন ন্হাপেত্ৰা সযনং পঞ্ঞাপেত্ৰা নিপজ্জাপেসি. অথ ব্রাহ্মণোপি ন্হাত্ৰা আগতো ভোজনকালে ‘‘ভগিনিং মে পক্কোসথা’’তি পক্কোসাপেত্ৰা তায সদ্ধিং একতো ভুঞ্জিত্ৰা অন্তোনিৰেসনেযেৰ তং পটিজগ্গি.

সা ন চিরস্সেৰ সুৰণ্ণৰণ্ণং পুত্তং ৰিজাযি, ‘‘মহাজনককুমারো’’তিস্স অয্যকসন্তকং নামমকাসি. সো ৰড্ঢমানো দারকেহি সদ্ধিং কীল়ন্তো যে তং রোসেন্তি, তে অসম্ভিন্নখত্তিযকুলে জাতত্তা মহাবলৰতায চেৰ মানথদ্ধতায চ দল়্হং গহেত্ৰা পহরতি. তদা তে মহাসদ্দেন রোদন্তা ‘‘কেন পহটা’’তি ৰুত্তে ‘‘ৰিধৰাপুত্তেনা’’তি ৰদন্তি. অথ কুমারো চিন্তেসি ‘‘ইমে মং ‘ৰিধৰাপুত্তো’তি অভিণ্হং ৰদন্তি, হোতু, মম মাতরং পুচ্ছিস্সামী’’তি. সো একদিৰসং ¶ মাতরং পুচ্ছি ‘‘অম্ম, কো ময্হং পিতা’’তি? অথ নং মাতা ‘‘তাত, ব্রাহ্মণো তে পিতা’’তি ৰঞ্চেসি. সো পুনদিৰসেপি দারকে পহরন্তো ‘‘ৰিধৰাপুত্তো’’তি ৰুত্তে ‘‘ননু ব্রাহ্মণো মে পিতা’’তি ৰত্ৰা ‘‘ব্রাহ্মণো কিং তে হোতী’’তি ৰুত্তে চিন্তেসি ‘‘ইমে মং, ব্রাহ্মণো তে কিং হোতী’তি অভিণ্হং ৰদন্তি, মাতা মে ইদং কারণং যথাভূতং ন কথেসি, সা অত্তনো মনেন মে ন কথেস্সতি, হোতু, কথাপেস্সামি ন’’ন্তি. সো থঞ্ঞং পিৰন্তো থনং দন্তেহি ডংসিত্ৰা ‘‘অম্ম, মে পিতরং কথেহি, সচে ন কথেস্সসি, থনং তে ছিন্দিস্সামী’’তি আহ. সা পুত্তং ৰঞ্চেতুং অসক্কোন্তী ‘‘তাত, ত্ৰং মিথিলাযং অরিট্ঠজনকরঞ্ঞো পুত্তো, পিতা তে পোলজনকেন মারিতো, অহং তং অনুরক্খন্তী ইমং নগরং আগতা, অযং ব্রাহ্মণো মং ভগিনিট্ঠানে ঠপেত্ৰা পটিজগ্গতী’’তি কথেসি. সো তং সুত্ৰা ততো পট্ঠায ‘‘ৰিধৰাপুত্তো’’তি ৰুত্তেপি ন কুজ্ঝি.

সো সোল়সৰস্সব্ভন্তরেযেৰ তযো ৰেদে চ সব্বসিপ্পানি চ উগ্গণ্হি ¶ , সোল়সৰস্সিককালে পন উত্তমরূপধরো অহোসি. অথ সো ‘‘পিতু সন্তকং রজ্জং গণ্হিস্সামী’’তি চিন্তেত্ৰা মাতরং পুচ্ছি ‘‘অম্ম, কিঞ্চি ধনং তে হত্থে অত্থি, উদাহু নো, অহং ৰোহারং কত্ৰা ধনং উপ্পাদেত্ৰা ¶ পিতু সন্তকং রজ্জং গণ্হিস্সামী’’তি. অথ নং মাতা আহ – ‘‘তাত, নাহং তুচ্ছহত্থা আগতা, তযো মে হত্থে ধনসারা অত্থি, মুত্তসারো, মণিসারো, ৰজিরসারোতি, তেসু একেকো রজ্জগ্গহণপ্পমাণো, তং গহেত্ৰা রজ্জং গণ্হ, মা ৰোহারং করী’’তি. ‘‘অম্ম, ইদম্পি ধনং ময্হমেৰ উপড্ঢং কত্ৰা দেহি, তং পন গহেত্ৰা সুৰণ্ণভূমিং গন্ত্ৰা বহুং ধনং আহরিত্ৰা রজ্জং গণ্হিস্সামী’’তি. সো উপড্ঢং আহরাপেত্ৰা ভণ্ডিকং কত্ৰা সুৰণ্ণভূমিং গমিকেহি ৰাণিজেহি সদ্ধিং নাৰায ভণ্ডং আরোপেত্ৰা পুন নিৰত্তিত্ৰা মাতরং ৰন্দিত্ৰা ‘‘অম্ম, অহং সুৰণ্ণভূমিং গমিস্সামী’’তি আহ. অথ নং মাতা আহ – ‘‘তাত, সমুদ্দো নাম অপ্পসিদ্ধিকো বহুঅন্তরাযো, মা গচ্ছ, রজ্জগ্গহণায তে ধনং বহূ’’তি. সো ‘‘গচ্ছিস্সামেৰ অম্মা’’তি মাতরং ৰন্দিত্ৰা গেহা নিক্খম্ম নাৰং অভিরুহি.

তং দিৰসমেৰ পোলজনকস্স সরীরে রোগো উপ্পজ্জি, অনুট্ঠানসেয্যং সযি. তদা সত্ত জঙ্ঘসতানি নাৰং অভিরুহিংসু. নাৰা সত্তদিৰসেহি সত্ত যোজনসতানি গতা. সা অতিচণ্ডৰেগেন গন্ত্ৰা অত্তানং ৰহিতুং নাসক্খি, ফলকানি ভিন্নানি, ততো ততো উদকং উগ্গতং, নাৰা সমুদ্দমজ্ঝে নিমুগ্গা. মহাজনা রোদন্তি পরিদেৰন্তি, নানাদেৰতাযো নমস্সন্তি. মহাসত্তো পন নেৰ রোদতি ন পরিদেৰতি, ন দেৰতাযো নমস্সতি, নাৰায পন নিমুজ্জনভাৰং ঞত্ৰা সপ্পিনা সক্খরং ওমদ্দিত্ৰা কুচ্ছিপূরং খাদিত্ৰা দ্ৰে মট্ঠকসাটকে তেলেন তেমেত্ৰা দল়্হং নিৰাসেত্ৰা কূপকং নিস্সায ঠিতো নাৰায নিমুজ্জনসমযে কূপকং অভিরুহি. মহাজনা ¶ মচ্ছকচ্ছপভক্খা জাতা, সমন্তা উদকং অড্ঢূসভমত্তং লোহিতং অহোসি. মহাসত্তো কূপকমত্থকে ঠিতোৰ ‘‘ইমায নাম দিসায মিথিলনগর’’ন্তি দিসং ৰৰত্থপেত্ৰা কূপকমত্থকা উপ্পতিত্ৰা মচ্ছকচ্ছপে অতিক্কম্ম মহাবলৰতায উসভমত্থকে পতি. তং দিৰসমেৰ পোলজনকো কালমকাসি. ততো পট্ঠায মহাসত্তো মণিৰণ্ণাসু ঊমীসু পরিৰত্তন্তো সুৰণ্ণক্খন্ধো ৰিয সমুদ্দং ¶ তরতি. সো যথা একদিৰসং, এৰং সত্তাহং তরতি, ‘‘ইদানি পুণ্ণমীদিৰসো’’তি ৰেলং পন ওলোকেত্ৰা লোণোদকেন মুখং ৰিক্খালেত্ৰা উপোসথিকো হোতি.

তদা ¶ চ ‘‘যে মাতুপট্ঠানাদিগুণযুত্তা সমুদ্দে মরিতুং অননুচ্ছৰিকা সত্তা, তে উদ্ধারেহী’’তি চতূহি লোকপালেহি মণিমেখলা নাম দেৰধীতা সমুদ্দরক্খিকা ঠপিতা হোতি. সা সত্ত দিৰসানি সমুদ্দং ন ওলোকেসি, দিব্বসম্পত্তিং অনুভৰন্তিযা কিরস্সা সতি পমুট্ঠা. ‘‘দেৰসমাগমং গতা’’তিপি ৰদন্তি. অথ সা ‘‘অজ্জ মে সত্তমো দিৰসো সমুদ্দং অনোলোকেন্তিযা, কা নু খো পৰত্তী’’তি ওলোকেন্তী মহাসত্তং দিস্ৰা ‘‘সচে মহাজনককুমারো সমুদ্দে নস্সিস্স, দেৰসমাগমপৰেসনং ন লভিস্স’’ন্তি চিন্তেত্ৰা মহাসত্তস্স অৰিদূরে অলঙ্কতেন সরীরেন আকাসে ঠত্ৰা মহাসত্তং ৰীমংসমানা পঠমং গাথমাহ –

‘‘কোযং মজ্ঝে সমুদ্দস্মিং, অপস্সং তীরমাযুহে;

কং ত্ৰং অত্থৰসং ঞত্ৰা, এৰং ৰাযমসে ভুস’’ন্তি.

তত্থ অপস্সং তীরমাযুহেতি তীরং অপস্সন্তোৰ আযূহতি ৰীরিযং করোতি.

অথ মহাসত্তো তস্সা ৰচনং সুত্ৰা ‘‘অজ্জ মে সত্তমো দিৰসো সমুদ্দং তরন্তস্স, ন মে দুতিযো সত্তো দিট্ঠপুব্বো, কো নু মং ৰদতী’’তি আকাসং ওলোকেন্তো তং দিস্ৰা দুতিযং গাথমাহ –

‘‘নিসম্ম ৰত্তং লোকস্স, ৰাযামস্স চ দেৰতে;

তস্মা মজ্ঝে সমুদ্দস্মিং, অপস্সং তীরমাযুহে’’তি.

তত্থ নিসম্ম ৰত্তং লোকস্সাতি অহং লোকস্স ৰত্তকিরিযং দিস্ৰা উপধারেত্ৰা ৰিহরামীতি অত্থো. ৰাযামস্স চাতি ৰাযামস্স চ আনিসংসং নিসামেত্ৰা ৰিহরামীতি দীপেতি. তস্মাতি যস্মা ¶ নিসম্ম ৰিহরামি, ‘‘পুরিসকারো নাম ন নস্সতি, সুখে পতিট্ঠাপেতী’’তি জানামি, তস্মা তীরং অপস্সন্তোপি আযূহামি ৰীরিযং করোমি, ন উক্কণ্ঠামীতি.

সা তস্স ধম্মকথং সুত্ৰা উত্তরি সোতুকামা হুত্ৰা পুন গাথমাহ –

‘‘গম্ভীরে ¶ অপ্পমেয্যস্মিং, তীরং যস্স ন দিস্সতি;

মোঘো তে পুরিসৰাযামো, অপ্পত্ৰাৰ মরিস্সসী’’তি.

তত্থ অপ্পত্ৰাতি তীরং অপ্পত্ৰাযেৰ.

অথ নং মহাসত্তো ‘‘দেৰতে, কিং নামেতং কথেসি, ৰাযামং কত্ৰা মরন্তোপি গরহতো মুচ্চিস্সামী’’তি ৰত্ৰা গাথমাহ –

‘‘অনণো ¶ ঞাতিনং হোতি, দেৰানং পিতুনঞ্চ সো;

করং পুরিসকিচ্চানি, ন চ পচ্ছানুতপ্পতী’’তি.

তত্থ অনণোতি ৰাযামং করোন্তো ঞাতীনঞ্চেৰ দেৰতানঞ্চ ব্রহ্মানঞ্চ অন্তরে অনণো হোতি অগরহিতো অনিন্দিতো. করং পুরিসকিচ্চানীতি যথা সো পুগ্গলো পুরিসেহি কত্তব্বানি কম্মানি করং পচ্ছাকালে ন চ অনুতপ্পতি, যথা নানুসোচতি, এৰাহম্পি ৰীরিযং করোন্তো পচ্ছাকালে নানুতপ্পামি নানুসোচামীতি অত্থো.

‘‘অপারনেয্যং যং কম্মং, অফলং কিলমথুদ্দযং;

তত্থ কো ৰাযামেনত্থো, মচ্চু যস্সাভিনিপ্পত’’ন্তি.

তত্থ অপারনেয্যন্তি ৰাযামেন মত্থকং অপাপেতব্বং. মচ্চু যস্সাভিনিপ্পতন্তি যস্স অট্ঠানে ৰাযামকরণস্স মরণমেৰ নিপ্ফন্নং, তত্থ কো ৰাযামেনত্থোতি.

এৰং দেৰধীতায ৰুত্তে তং অপ্পটিভানং করোন্তো মহাসত্তো উত্তরি গাথা আহ –

‘‘অপারনেয্যমচ্চন্তং ¶ , যো ৰিদিত্ৰান দেৰতে;

ন রক্খে অত্তনো পাণং, জঞ্ঞা সো যদি হাপযে.

‘‘অধিপ্পাযফলং একে, অস্মিং লোকস্মি দেৰতে;

পযোজযন্তি কম্মানি, তানি ইজ্ঝন্তি ৰা ন ৰা.

‘‘সন্দিট্ঠিকং কম্মফলং, ননু পস্সসি দেৰতে;

সন্না অঞ্ঞে তরামহং, তঞ্চ পস্সামি সন্তিকে.

‘‘সো অহং ¶ ৰাযমিস্সামি, যথাসত্তি যথাবলং;

গচ্ছং পারং সমুদ্দস্স, কস্সং পুরিসকারিয’’ন্তি.

তত্থ অচ্চন্তন্তি যো ‘‘ইদং কম্মং ৰীরিযং কত্ৰা নিপ্ফাদেতুং ন সক্কা, অচ্চন্তমেৰ অপারনেয্য’’ন্তি ৰিদিত্ৰা চণ্ডহত্থিআদযো অপরিহরন্তো অত্তনো পাণং ন রক্খতি. জঞ্ঞা সো যদি হাপযেতি সো যদি তাদিসেসু ঠানেসু ৰীরিযং হাপেয্য, জানেয্য তস্স কুসীতভাৰস্স ফলং. ত্ৰং যং ৰা তং ৰা নিরত্থকং ৰদসীতি দীপেতি. পাল়িযং পন ‘‘জঞ্ঞা সো যদি হাপয’’ন্তি লিখিতং, তং অট্ঠকথাসু নত্থি. অধিপ্পাযফলন্তি অত্তনো অধিপ্পাযফলং সম্পস্সমানা একচ্চে পুরিসা কসিৰণিজ্জাদীনি কম্মানি পযোজযন্তি, তানি ইজ্ঝন্তি ৰা ন ৰা ইজ্ঝন্তি. ‘‘এত্থ গমিস্সামি, ইদং উগ্গহেস্সামী’’তি পন কাযিকচেতসিকৰীরিযং করোন্তস্স তং ইজ্ঝতেৰ, তস্মা তং কাতুং ৰট্টতিযেৰাতি দস্সেতি. সন্না অঞ্ঞে তরামহন্তি অঞ্ঞে জনা মহাসমুদ্দে সন্না নিমুগ্গা ৰীরিযং অকরোন্তা মচ্ছকচ্ছপভক্খা জাতা, অহং পন এককোৰ তরামি. তঞ্চ পস্সামি সন্তিকেতি ইদং মে ৰীরিযফলং পস্স, মযা ইমিনা অত্তভাৰেন দেৰতা নাম ¶ ন দিট্ঠপুব্বা, সোহং তঞ্চ ইমিনা দিব্বরূপেন মম সন্তিকে ঠিতং পস্সামি. যথাসত্তি যথাবলন্তি অত্তনো সত্তিযা চ বলস্স চ অনুরূপং. কস্সন্তি করিস্সামি.

ততো দেৰতা তস্স তং দল়্হৰচনং সুত্ৰা থুতিং করোন্তী গাথমাহ –

‘‘যো ত্ৰং এৰং গতে ওঘে, অপ্পমেয্যে মহণ্ণৰে;

ধম্মৰাযামসম্পন্নো, কম্মুনা নাৰসীদসি;

সো ত্ৰং তত্থেৰ গচ্ছাহি, যত্থ তে নিরতো মনো’’তি.

তত্থ ¶ এৰং গতেতি এৰরূপে গম্ভীরে ৰিত্থতে মহাসমুদ্দে. ধম্মৰাযামসম্পন্নোতি ধম্মৰাযামেন সমন্নাগতো. কম্মুনাতি অত্তনো পুরিসকারকম্মেন. নাৰসীদসীতি ন অৰসীদসি. যত্থ তেতি যস্মিং ঠানে তৰ মনো নিরতো, তত্থেৰ গচ্ছাহীতি.

সা এৰঞ্চ পন ৰত্ৰা ‘‘পণ্ডিত মহাপরক্কম, কুহিং তং নেমী’’তি পুচ্ছি. ‘‘মিথিলনগর’’ন্তি ৰুত্তে সা মহাসত্তং পুপ্ফকলাপং ৰিয উক্খিপিত্ৰা উভোহি ¶ হত্থেহি পরিগ্গয্হ উরে নিপজ্জাপেত্ৰা পিযপুত্তং আদায গচ্ছন্তী ৰিয আকাসে পক্খন্দি. মহাসত্তো সত্তাহং লোণোদকেন উপক্কসরীরো হুত্ৰা দিব্বফস্সেন ফুট্ঠো নিদ্দং ওক্কমি. অথ নং সা মিথিলং নেত্ৰা অম্বৰনুয্যানে মঙ্গলসিলাপট্টে দক্খিণপস্সেন নিপজ্জাপেত্ৰা উয্যানদেৰতাহি তস্স আরক্খং গাহাপেত্ৰা সকট্ঠানমেৰ গতা.

তদা পোলজনকস্স পুত্তো নত্থি. একা পনস্স ধীতা অহোসি, সা সীৰলিদেৰী নাম পণ্ডিতা ব্যত্তা. অমচ্চা তমেনং মরণমঞ্চে নিপন্নং পুচ্ছিংসু ‘‘মহারাজ, তুম্হেসু দিৰঙ্গতেসু রজ্জং কস্স দস্সামা’’তি? অথ নে রাজা ‘‘তাতা, মম ধীতরং সীৰলিদেৰিং আরাধেতুং সমত্থস্স রজ্জং দেথ, যো ৰা পন চতুরস্সপল্লঙ্কস্স উস্সীসকং জানাতি, যো ৰা পন সহস্সথামধনুং আরোপেতুং সক্কোতি, যো ৰা পন সোল়স মহানিধী নীহরিতুং সক্কোতি, তস্স রজ্জং দেথা’’তি আহ. অমচ্চা ‘‘দেৰ, তেসং নো নিধীনং উদ্দানং কথেথা’’তি আহংসু. অথ রাজা –

‘‘সূরিযুগ্গমনে নিধি, অথো ওক্কমনে নিধি;

অন্তো নিধি বহি নিধি, ন অন্তো ন বহি নিধি.

‘‘আরোহনে ¶ মহানিধি, অথো ওরোহনে নিধি;

চতূসু মহাসালেসু, সমন্তা যোজনে নিধি.

‘‘দন্তগ্গেসু মহানিধি, ৰালগ্গেসু চ কেপুকে;

রুক্খগ্গেসু মহানিধি, সোল়সেতে মহানিধী.

‘‘সহস্সথামো পল্লঙ্কো, সীৰলিআরাধনেন চা’’তি. –

মহানিধীহি সদ্ধিং ইতরেসম্পি উদ্দানং কথেসি. রাজা ইমং কথং ৰত্ৰা কালমকাসি.

অমচ্চা ¶ রঞ্ঞো অচ্চযেন তস্স মতকিচ্চং কত্ৰা সত্তমে দিৰসে সন্নিপতিত্ৰা মন্তযিংসু ‘‘অম্ভো রঞ্ঞা ‘অত্তনো ধীতরং আরাধেতুং সমত্থস্স রজ্জং দাতব্ব’ন্তি ৰুত্তং, কো তং আরাধেতুং সক্খিস্সতী’’তি. তে ‘‘সেনাপতি ৰল্লভো’’তি ৰত্ৰা তস্স সাসনং পেসেসুং. সো সাসনং সুত্ৰা ‘‘সাধূ’’তি সম্পটিচ্ছিত্ৰা রজ্জত্থায রাজদ্ৰারং গন্ত্ৰা অত্তনো ¶ আগতভাৰং রাজধীতায আরোচাপেসি. সা তস্স আগতভাৰং ঞত্ৰা ‘‘অত্থি নু খ্ৰস্স সেতচ্ছত্তসিরিং ধারেতুং ধিতী’’তি তস্স ৰীমংসনত্থায ‘‘খিপ্পং আগচ্ছতূ’’তি আহ. সো তস্সা সাসনং সুত্ৰা তং আরাধেতুকামো সোপানপাদমূলতো পট্ঠায জৰেনাগন্ত্ৰা তস্সা সন্তিকে অট্ঠাসি. অথ নং সা ৰীমংসমানা ‘‘মহাতলে জৰেন ধাৰা’’তি আহ. সো ‘‘রাজধীতরং তোসেস্সামী’’তি ৰেগেন পক্খন্দি. অথ নং ‘‘পুন এহী’’তি আহ. সো পুন ৰেগেন আগতো. সা তস্স ধিতিযা ৰিরহিতভাৰং ঞত্ৰা ‘‘এহি সম্ম, পাদে মে সম্বাহা’’তি আহ. সো তস্সা আরাধনত্থং নিসীদিত্ৰা পাদে সম্বাহি. অথ নং সা উরে পাদেন পহরিত্ৰা উত্তানকং পাতেত্ৰা ‘‘ইমং অন্ধবালপুরিসং ধিতিৰিরহিতং পোথেত্ৰা গীৰাযং গহেত্ৰা নীহরথা’’তি দাসীনং সঞ্ঞং অদাসি. তা তথা করিংসু. সো তেহি ‘‘কিং সেনাপতী’’তি পুট্ঠো ‘‘মা কথেথ, সা নেৰ মনুস্সিত্থী, যক্খিনী’’তি আহ. ততো ভণ্ডাগারিকো গতো, তম্পি তথেৰ লজ্জাপেসি. তথা সেট্ঠিং, ছত্তগ্গাহং, অসিগ্গাহন্তি সব্বেপি তে লজ্জাপেসিযেৰ.

অথ অমচ্চা সন্নিপতিত্ৰা ‘‘রাজধীতরং আরাধেতুং সমত্থো নাম নত্থি, সহস্সথামধনুং আরোপেতুং সমত্থস্স রজ্জং দেথা’’তি আহ, তম্পি কোচি আরোপেতুং নাসক্খি. ততো ‘‘চতুরস্সপল্লঙ্কস্স উস্সীসকং জানন্তস্স রজ্জং দেথা’’তি আহ, তম্পি কোচি ন জানাতি. ততো সোল়স মহানিধী নীহরিতুং সমত্থস্স রজ্জং দেথা’’তি আহ, তেপি কোচি নীহরিতুং ¶ নাসক্খি. ততো ‘‘অম্ভো অরাজিকং নাম রট্ঠং পালেতুং ন সক্কা, কিং নু খো কাতব্ব’’ন্তি মন্তযিংসু. অথ নে পুরোহিতো আহ – ‘‘ভো তুম্হে মা চিন্তযিত্থ, ফুস্সরথং নাম ৰিস্সজ্জেতুং ৰট্টতি, ফুস্সরথেন হি লদ্ধরাজা সকলজম্বুদীপে রজ্জং কারেতুং সমত্থো হোতী’’তি. তে ‘‘সাধূ’’তি সম্পটিচ্ছিত্ৰা নগরং অলঙ্কারাপেত্ৰা মঙ্গলরথে চত্তারো কুমুদৰণ্ণে অস্সে যোজেত্ৰা উত্তমপচ্চত্থরণং অত্থরিত্ৰা পঞ্চ রাজককুধভণ্ডানি আরোপেত্ৰা চতুরঙ্গিনিযা সেনায পরিৰারেসুং. ‘‘সসামিকস্স রথস্স পুরতো তূরিযানি ৰজ্জন্তি, অসামিকস্স পচ্ছতো ৰজ্জন্তি, তস্মা সব্বতূরিযানি ¶ পচ্ছতো ৰাদেথা’’তি ৰত্ৰা সুৰণ্ণভিঙ্কারেন রথধুরঞ্চ পতোদঞ্চ অভিসিঞ্চিত্ৰা ‘‘যস্স রজ্জং কারেতুং পুঞ্ঞং অত্থি, তস্স সন্তিকং গচ্ছতূ’’তি রথং ৰিস্সজ্জেসুং. অথ রথো রাজগেহং পদক্খিণং কত্ৰা ৰেগেন মহাৰীথিং অভিরুহি.

সেনাপতিআদযো ¶ ‘‘ফুস্সরথো মম সন্তিকং আগচ্ছতূ’’তি চিন্তযিংসু. সো সব্বেসং গেহানি অতিক্কমিত্ৰা নগরং পদক্খিণং কত্ৰা পাচীনদ্ৰারেন নিক্খমিত্ৰা উয্যানাভিমুখো পাযাসি. অথ নং ৰেগেন গচ্ছন্তং দিস্ৰা ‘‘নিৰত্তেথা’’তি আহংসু. পুরোহিতো ‘‘মা নিৰত্তযিত্থ, ইচ্ছন্তো যোজনসতম্পি গচ্ছতু, মা নিৰারেথা’’তি আহ. রথো উয্যানং পৰিসিত্ৰা মঙ্গলসিলাপট্টং পদক্খিণং কত্ৰা আরোহনসজ্জো হুত্ৰা অট্ঠাসি. পুরোহিতো মহাসত্তং নিপন্নকং দিস্ৰা অমচ্চে আমন্তেত্ৰা ‘‘অম্ভো একো সিলাপট্টে নিপন্নকো পুরিসো দিস্সতি, সেতচ্ছত্তানুচ্ছৰিকা পনস্স ধিতি অত্থীতি ৰা নত্থীতি ৰা ন জানাম, সচে এস পুঞ্ঞৰা ভৰিস্সতি, অম্হে ন ওলোকেস্সতি, কাল়কণ্ণিসত্তো সচে ভৰিস্সতি, ভীততসিতো উট্ঠায কম্পমানো ওলোকেস্সতি, তস্মা খিপ্পং সব্বতূরিযানি পগ্গণ্হথা’’তি আহ. তাৰদেৰ অনেকসতানি তূরিযানি পগ্গণ্হিংসু. তদা তূরিযসদ্দো সাগরঘোসো ৰিয অহোসি.

মহাসত্তো তেন সদ্দেন পবুজ্ঝিত্ৰা সীসং ৰিৰরিত্ৰা ওলোকেন্তো মহাজনং দিস্ৰা ‘‘সেতচ্ছত্তেন মে আগতেন ভৰিতব্ব’’ন্তি চিন্তেত্ৰা পুন সীসং পারুপিত্ৰা পরিৰত্তিত্ৰা ৰামপস্সেন নিপজ্জি. পুরোহিতো তস্স পাদে ৰিৰরিত্ৰা লক্খণানি ওলোকেন্তো ‘‘তিট্ঠতু অযং একো দীপো, চতুন্নম্পি মহাদীপানং রজ্জং কারেতুং সমত্থো হোতী’’তি পুন তূরিযানি পগ্গণ্হাপেসি. অথ মহাসত্তো ¶ মুখং ৰিৰরিত্ৰা পরিৰত্তিত্ৰা দক্খিণপস্সেন নিপজ্জিত্ৰা মহাজনং ওলোকেসি. তদা পুরোহিতো পরিসং উস্সারেত্ৰা অঞ্জলিং পগ্গয্হ অৰকুজ্জো হুত্ৰা ‘‘উট্ঠেহি, দেৰ, রজ্জং তে পাপুণাতী’’তি আহ. অথ নং মহাসত্তো ‘‘রাজা ৰো কুহী’’ন্তি পুচ্ছিত্ৰা ‘‘কালকতো দেৰা’’তি ৰুত্তে ‘‘তস্স পুত্তো ৰা ভাতা ৰা নত্থী’’তি পুচ্ছিত্ৰা ‘‘নত্থি দেৰা’’তি ৰুত্তে ‘‘তেন হি সাধু রজ্জং কারেস্সামী’’তি ৰত্ৰা উট্ঠায সিলাপট্টে পল্লঙ্কেন নিসীদি. অথ নং তত্থেৰ অভিসিঞ্চিংসু. সো মহাজনকো নাম রাজা অহোসি. সো রথৰরং অভিরুয্হ মহন্তেন সিরিৰিভৰেন নগরং পৰিসিত্ৰা রাজনিৰেসনং অভিরুহন্তো ¶ ‘‘সেনাপতিআদীনং তানেৰ ঠানানি হোন্তূ’’তি ৰিচারেত্ৰা মহাতলং অভিরুহি.

রাজধীতা পন পুরিমসঞ্ঞায এৰ তস্স ৰীমংসনত্থং একং পুরিসং আণাপেসি ‘‘তাত, ত্ৰং গচ্ছ, রাজানং উপসঙ্কমিত্ৰা এৰং ৰদেহি ‘দেৰ, সীৰলিদেৰী তুম্হে পক্কোসতি, খিপ্পং কিরাগচ্ছতূ’’’তি. সো গন্ত্ৰা তথা আরোচেসি. রাজা পণ্ডিতো তস্স ৰচনং সুত্ৰাপি অস্সুণন্তো ৰিয ‘‘অহো সোভনো ৰতাযং পাসাদো’’তি পাসাদমেৰ ৰণ্ণেতি. সো তং সাৰেতুং অসক্কোন্তো গন্ত্ৰা রাজধীতায তং পৰত্তিং আরোচেসি ‘‘অয্যে, রাজা তুম্হাকং ৰচনং ন সুণাতি, পাসাদমেৰ ৰণ্ণেতি, তুম্হাকং ৰচনং তিণং ৰিয ন গণেতী’’তি. সা তস্স ৰচনং সুত্ৰা ¶ ‘‘সো মহজ্ঝাসযো পুরিসো ভৰিস্সতী’’তি চিন্তেত্ৰা দুতিযম্পি ততিযম্পি পেসেসি. রাজাপি অত্তনো রুচিযা পকতিগমনেন সীহো ৰিয ৰিজম্ভমানো পাসাদং অভিরুহি. তস্মিং উপসঙ্কমন্তে রাজধীতা তস্স তেজেন সকভাৰেন সণ্ঠাতুং অসক্কোন্তী আগন্ত্ৰা হত্থালম্বকং অদাসি.

সো তস্সা হত্থং ওলম্বিত্ৰা মহাতলং অভিরুহিত্ৰা সমুস্সিতসেতচ্ছত্তে রাজপল্লঙ্কে নিসীদিত্ৰা অমচ্চে আমন্তেত্ৰা ‘‘অম্ভো, অত্থি পন ৰো রঞ্ঞা কালং করোন্তেন কোচি ওৰাদো দিন্নো’’তি পুচ্ছিত্ৰা ‘‘আম, দেৰা’’তি ৰুত্তে ‘‘তেন হি ৰদেথা’’তি আহ. দেৰ ‘‘সীৰলিদেৰিং আরাধেতুং সমত্থস্স রজ্জং দেথা’’তি তেন ৰুত্তন্তি. সীৰলিদেৰিযা আগন্ত্ৰা হত্থালম্বকো দিন্নো, অযং তাৰ আরাধিতা নাম, অঞ্ঞং ৰদেথাতি. দেৰ ‘‘চতুরস্সপল্লঙ্কস্স উস্সীসকং জানিতুং সমত্থস্স রজ্জং দেথা’’তি তেন ৰুত্তন্তি. রাজা ‘‘ইদং দুজ্জানং, উপাযেন সক্কা জানিতু’’ন্তি চিন্তেত্ৰা সীসতো সুৰণ্ণসূচিং নীহরিত্ৰা সীৰলিদেৰিযা হত্থে ঠপেসি ‘‘ইমং ঠপেহী’’তি ¶ . সা তং গহেত্ৰা পল্লঙ্কস্স উস্সীসকে ঠপেসি. ‘‘খগ্গং অদাসী’’তিপি ৰদন্তিযেৰ. সো তায সঞ্ঞায ‘‘ইদং উস্সীসক’’ন্তি ঞত্ৰা তেসং কথং অস্সুণন্তো ৰিয ‘‘কিং কথেথা’’তি ৰত্ৰা পুন তেহি তথা ৰুত্তে ‘‘ইদং জানিতুং ন গরু, এতং উস্সীসক’’ন্তি ৰত্ৰা ‘‘অঞ্ঞং ৰদেথা’’তি আহ. দেৰ, ‘‘সহস্সথামধনুং আরোপেতুং সমত্থস্স রজ্জং দেথা’’তি তেন ৰুত্তন্তি. ‘‘তেন হি আহরথ ন’’ন্তি আহরাপেত্ৰা সো ধনুং পল্লঙ্কে যথানিসিন্নোৰ ¶ ইত্থীনং কপ্পাসফোটনধনুং ৰিয আরোপেত্ৰা ‘‘অঞ্ঞং ৰদেথা’’তি আহ. ‘‘দেৰ, সোল়স মহানিধী নীহরিতুং সমত্থস্স রজ্জং দেথা’’তি তেন ৰুত্তন্তি. ‘‘তেসং কিঞ্চি উদ্দানং অত্থী’’তি পুচ্ছিত্ৰা ‘‘আম, দেৰা’’তি ৰুত্তে ‘‘তেন হি নং কথেথা’’তি আহ. তে ‘‘সূরিযুগ্গমনে নিধী’’তি উদ্দানং কথযিংসু. তস্স তং সুণন্তস্সেৰ গগনতলে পুণ্ণচন্দো ৰিয সো অত্থো পাকটো অহোসি.

অথ নে রাজা আহ – ‘‘অজ্জ, ভণে, ৰেলা নত্থি, স্ৰে নিধী গণ্হিস্সামী’’তি. সো পুনদিৰসে অমচ্চে সন্নিপাতেত্ৰা পুচ্ছি ‘‘তুম্হাকং রাজা পচ্চেকবুদ্ধে ভোজেসী’’তি? ‘‘আম, দেৰা’’তি. সো চিন্তেসি ‘‘সূরিযোতি নাযং সূরিযো, সূরিযসদিসত্তা পন পচ্চেকবুদ্ধা সূরিযা নাম, তেসং পচ্চুগ্গমনট্ঠানে নিধিনা ভৰিতব্ব’’ন্তি. ততো রাজা ‘‘তেসু পচ্চেকবুদ্ধেসু আগচ্ছন্তেসু পচ্চুগ্গমনং করোন্তো কতরং ঠানং গচ্ছতী’’তি পুচ্ছিত্ৰা ‘‘অসুকট্ঠানং নাম দেৰা’’তি ৰুত্তে ‘‘তং ঠানং খণিত্ৰা নিধিং নীহরথা’’তি নিধিং নীহরাপেসি. ‘‘গমনকালে অনুগচ্ছন্তো কত্থ ঠত্ৰা উয্যোজেসী’’তি পুচ্ছিত্ৰা ‘‘অসুকট্ঠানে নামা’’তি ৰুত্তে ‘‘ততোপি নিধিং নীহরথা’’তি নিধিং ¶ নীহরাপেসি. অথ মহাজনা উক্কুট্ঠিসহস্সানি পৰত্তেন্তা ‘‘সূরিযুগ্গমনে নিধী’’তি ৰুত্তত্তা সূরিযুগ্গমনদিসাযং খণন্তা ৰিচরিংসু. অথো ‘‘ওক্কমনে নিধী’’তি ৰুত্তত্তা সূরিযত্থঙ্গমনদিসাযং খণন্তা ৰিচরিংসু. ‘‘ইদং পন ধনং ইধেৰ হোতি, অহো অচ্ছরিয’’ন্তি পীতিসোমনস্সং পৰত্তযিংসু. অন্তোনিধীতি রাজগেহে মহাদ্ৰারস্স অন্তোউম্মারা নিধিং নীহরাপেসি. বহি নিধীতি বহিউম্মারা নিধিং নীহরাপেসি. ন অন্তো ন বহি নিধীতি হেট্ঠাউম্মারতো নিধিং নীহরাপেসি ¶ . আরোহনে নিধীতি মঙ্গলহত্থিং আরোহনকালে সুৰণ্ণনিস্সেণিযা অত্থরণট্ঠানতো নিধিং নীহরাপেসি. অথো ওরোহনে নিধীতি হত্থিক্খন্ধতো ওরোহনট্ঠানতো নিধিং নীহরাপেসি. চতূসু মহাসালেসূতি ভূমিযং কতউপট্ঠানট্ঠানে সিরিসযনস্স চত্তারো মঞ্চপাদা সালমযা, তেসং হেট্ঠা চতস্সো নিধিকুম্ভিযো নীহরাপেসি. সমন্তাযোজনে নিধীতি যোজনং নাম রথযুগপমাণং, সিরিসযনস্স সমন্তা রথযুগপ্পমাণতো নিধিং নীহরাপেসি. দন্তগ্গেসু মহানিধীতি মঙ্গলহত্থিট্ঠানে তস্স দ্ৰিন্নং দন্তানং অভিমুখট্ঠানতো ¶ নিধিং নীহরাপেসি. ৰালগ্গেসূতি মঙ্গলহত্থিট্ঠানে তস্স ৰালধিসম্মুখট্ঠানতো নিধিং নীহরাপেসি. কেপুকেতি কেপুকং ৰুচ্চতি উদকং, মঙ্গলপোক্খরণিতো উদকং নীহরাপেত্ৰা নিধিং দস্সেসি. রুক্খগ্গেসু মহানিধীতি উয্যানে মহাসালরুক্খমূলে ঠিতমজ্ঝন্হিকসমযে পরিমণ্ডলায রুক্খচ্ছাযায অন্তো নিধিং নীহরাপেসি. এৰং সোল়স মহানিধযো নীহরাপেত্ৰা ‘‘অঞ্ঞং কিঞ্চি অত্থী’’তি পুচ্ছি. ‘‘নত্থি দেৰা’’তি ৰদিংসু. মহাজনো হট্ঠতুট্ঠো অহোসি.

অথ রাজা ‘‘ইদং ধনং দানমুখে ৰিকিরিস্সামী’’তি নগরমজ্ঝে চেৰ চতূসু নগরদ্ৰারেসু চাতি পঞ্চসু ঠানেসু পঞ্চ দানসালাযো কারাপেত্ৰা মহাদানং পট্ঠপেসি, কালচম্পানগরতো অত্তনো মাতরঞ্চ ব্রাহ্মণঞ্চ পক্কোসাপেত্ৰা মহন্তং সক্কারং অকাসি. তস্স তরুণরজ্জেযেৰ সকলং ৰিদেহরট্ঠং ‘‘অরিট্ঠজনকরঞ্ঞো কির পুত্তো মহাজনকো নাম রাজা রজ্জং কারেতি, সো কির পণ্ডিতো উপাযকুসলো, পস্সিস্সাম ন’’ন্তি দস্সনত্থায সঙ্খুভিতং অহোসি. ততো ততো বহুং পণ্ণাকারং গহেত্ৰা আগমিংসু, নাগরাপি মহাছণং সজ্জযিংসু. রাজনিৰেসনে অত্থরণাদীনি সন্থরিত্ৰা গন্ধদামমালাদামাদীনি ওসারেত্ৰা ৰিপ্পকিণ্ণলাজাকুসুমৰাসধূমগন্ধাকারং কারেত্ৰা নানপ্পকারং পানভোজনং উপট্ঠাপেসুং. রঞ্ঞো পণ্ণাকারত্থায রজতসুৰণ্ণভাজনাদীসু অনেকপ্পকারানি খাদনীযভোজনীযমধুফাণিতফলাদীনি গহেত্ৰা ¶ তত্থ তত্থ পরিৰারেত্ৰা অট্ঠংসু. একতো অমচ্চমণ্ডলং নিসীদি, একতো ব্রাহ্মণগণো, একতো সেট্ঠিআদযো নিসীদিংসু, একতো উত্তমরূপধরা নাটকিত্থিযো নিসীদিংসু, ব্রাহ্মণাপি সোত্থিকারেন মুখমঙ্গলিকানি কথেন্তি, নচ্চগীতাদীসু কুসলা নচ্চগীতাদীনি পৰত্তযিংসু, অনেকসতানি তূরিযানি ¶ পৰজ্জিংসূ. তদা রাজনিৰেসনং যুগন্ধরৰাতৰেগেন পহটা সাগরকুচ্ছি ৰিয একনিন্নাদং অহোসি. ওলোকিতোলোকিতট্ঠানং কম্পতি.

অথ মহাসত্তো সেতচ্ছত্তস্স হেট্ঠা রাজাসনে নিসিন্নোৰ সক্কসিরিসদিসং মহন্তং সিরিৰিলাসং ওলোকেত্ৰা অত্তনো মহাসমুদ্দে কতৰাযামং অনুস্সরি. তস্স ‘‘ৰীরিযং নাম কত্তব্বযুত্তকং, সচাহং মহাসমুদ্দে ¶ ৰীরিযং নাকরিস্সং, ন ইমং সম্পত্তিং অলভিস্স’’ন্তি তং ৰাযামং অনুস্সরন্তস্স পীতি উপ্পজ্জি. সো পীতিৰেগেন উদানং উদানেন্তো আহ –

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

‘‘দুক্খূপনীতোপি নরো সপঞ্ঞো, আসং ন ছিন্দেয্য সুখাগমায;

বহূ হি ফস্সা অহিতা হিতা চ, অৰিতক্কিতা মচ্চুমুপব্বজন্তি.

‘‘অচিন্তিতম্পি ভৰতি, চিন্তিতম্পি ৰিনস্সতি;

ন হি চিন্তামযা ভোগা, ইত্থিযা পুরিসস্স ৰা’’তি.

তত্থ আসীসেথেৰাতি আসাছেদকম্মং অকত্ৰা অত্তনো কম্মং আসং করোথেৰ. ন নিব্বিন্দেয্যাতি ৰীরিযং করোন্তো ন নিব্বিন্দেয্য ন অলসেয্য. যথা ইচ্ছিন্তি যথা রাজভাৰং ইচ্ছিং, তথেৰ রাজা জাতোম্হি. উব্ভতন্তি নীহটং. দুক্খূপনীতোতি কাযিকচেতসিকদুক্খেন ফুট্ঠোপীতি অত্থো. অহিতা হিতা চাতি দুক্খফস্সা অহিতা, সুখফস্সা হিতা. অৰিতক্কিতাতি ¶ অৰিতক্কিতারো অচিন্তিতারো. ইদং ৰুত্তং হোতি – তেসু ফস্সেসু অহিতফস্সেন ফুট্ঠা সত্তা ‘‘হিতফস্সোপি অত্থীতি ৰীরিযং করোন্তা তং ¶ পাপুণন্তী’’তি অচিন্তেত্ৰা ৰীরিযং ন করোন্তি, তে ইমস্স অত্থস্স অৰিতক্কিতারো হিতফস্সং অলভিত্ৰাৰ মচ্চুমুপব্বজন্তি মরণং পাপুণন্তি, তস্মা ৰীরিযং কত্তব্বমেৰাতি.

অচিন্তিতম্পীতি ¶ ইমেসং সত্তানং অচিন্তিতম্পি হোতি, চিন্তিতম্পি ৰিনস্সতি. মযাপি হি ‘‘অযুজ্ঝিত্ৰাৰ রজ্জং লভিস্সামী’’তি ইদং অচিন্তিতং, ‘‘সুৰণ্ণভূমিতো ধনং আহরিত্ৰা যুজ্ঝিত্ৰা পিতু সন্তকং রজ্জং গণ্হিস্সামী’’তি পন চিন্তিতং, ইদানি মে চিন্তিতং নট্ঠং, অচিন্তিতং জাতং. ন হি চিন্তামযা ভোগাতি ইমেসং সত্তানঞ্হি ভোগা চিন্তায অনিপ্ফজ্জনতো চিন্তামযা নাম ন হোন্তি, তস্মা ৰীরিযমেৰ কত্তব্বং. ৰীরিযৰতো হি অচিন্তিতম্পি হোতীতি.

সো ততো পট্ঠায দস রাজধম্মে অকোপেত্ৰা ধম্মেন সমেন রজ্জং কারেসি, পচ্চেকবুদ্ধে চ উপট্ঠাসি. অপরভাগে সীৰলিদেৰী ধঞ্ঞপুঞ্ঞলক্খণসম্পন্নং পুত্তং ৰিজাযি, ‘‘দীঘাৰুকুমারো’’তিস্স নামং করিংসু. তস্স ৰযপ্পত্তস্স রাজা উপরজ্জং দত্ৰা সত্তৰস্সসহস্সানি রজ্জং কারেসি. সো একদিৰসং উয্যানপালেন ফলাফলেসু চেৰ নানাপুপ্ফেসু চ আভতেসু তানি দিস্ৰা তুট্ঠো হুত্ৰা তস্স সম্মানং কারেত্ৰা ‘‘সম্ম উয্যানপাল, অহং উয্যানং পস্সিস্সামি, ত্ৰং অলঙ্করোহি ন’’ন্তি আহ. সো ‘‘সাধু, দেৰা’’তি সম্পটিচ্ছিত্ৰা তথা কত্ৰা রঞ্ঞো পটিৰেদেসি. সো হত্থিক্খন্ধৰরগতো মহন্তেন পরিৰারেন নগরা নিক্খমিত্ৰা উয্যানদ্ৰারং পাপুণি. তত্র চ দ্ৰে অম্বা অত্থি নীলোভাসা. একো অফলো, একো ফলধরো. সো পন অতিমধুরো, রঞ্ঞা অগ্গফলস্স অপরিভুত্তত্তা ততো কোচি ফলং গহেতুং ন উস্সহতি. রাজা হত্থিক্খন্ধৰরগতোৰ ততো একং ফলং গহেত্ৰা পরিভুঞ্জি, তস্স তং জিৰ্হগ্গে ঠপিতমত্তমেৰ দিব্বোজং ৰিয উপট্ঠাসি. সো ‘‘নিৰত্তনকালে বহূ খাদিস্সামী’’তি চিন্তেসি. ‘‘রঞ্ঞা অগ্গফলং পরিভুত্ত’’ন্তি ঞত্ৰা উপরাজানং আদিং কত্ৰা অন্তমসো হত্থিমেণ্ডঅস্সমেণ্ডাদযোপি ফলং গহেত্ৰা পরিভুঞ্জিংসু. অঞ্ঞে ফলং অলভন্তা দণ্ডেহি সাখং ভিন্দিত্ৰা নিপণ্ণমকংসু. রুক্খো ওভগ্গৰিভগ্গো অট্ঠাসি, ইতরো পন মণিপব্বতো ৰিয ৰিলাসমানো ঠিতো.

রাজা উয্যানা নিক্খন্তো তং দিস্ৰা ‘‘ইদং কি’’ন্তি অমচ্চে পুচ্ছতি. ‘‘দেৰেন অগ্গফলং পরিভুত্তন্তি মহাজনেন ৰিলুম্পিতো দেৰা’’তি আহংসু. ‘‘কিং নু খো ভণে, ইমস্স ¶ পন নেৰ পত্তং, ন ৰণ্ণো খীণো’’তি? ‘‘নিপ্ফলতায ন খীণো, দেৰা’’তি. তং সুত্ৰা রাজা সংৰেগং পটিলভিত্ৰা ¶ ‘‘অযং রুক্খো নিপ্ফলতায ¶ নীলোভাসো ঠিতো, অযং পন সফলতায ওভগ্গৰিভগ্গো ঠিতো. ইদম্পি রজ্জং সফলরুক্খসদিসং, পব্বজ্জা পন নিপ্ফলরুক্খসদিসা. সকিঞ্চনস্সেৰ ভযং, নাকিঞ্চনস্স. তস্মা অহং ফলরুক্খো ৰিয অহুত্ৰা নিপ্ফলরুক্খসদিসো ভৰিস্সামি, ইমং সম্পত্তিং চজিত্ৰা নিক্খম্ম পব্বজিস্সামী’’তি দল়্হং সমাদানং কত্ৰা মনং অধিট্ঠহিত্ৰা নগরং পৰিসিত্ৰা পাসাদদ্ৰারে ঠিতোৰ সেনাপতিং পক্কোসাপেত্ৰা ‘‘মহাসেনাপতি, অজ্জ মে পট্ঠায ভত্তহারকঞ্চেৰ মুখোদকদন্তকট্ঠদাযকঞ্চ একং উপট্ঠাকং ঠপেত্ৰা অঞ্ঞে মং দট্ঠুং মা লভন্তু, পোরাণকৰিনিচ্ছযামচ্চে গহেত্ৰা রজ্জং অনুসাসথ, অহং ইতো পট্ঠায উপরিপাসাদতলে সমণধম্মং করিস্সামী’’তি ৰত্ৰা পাসাদমারুয্হ এককোৰ সমণধম্মং অকাসি. এৰং গতে কালে মহাজনো রাজঙ্গণে সন্নিপতিত্ৰা মহাসত্তং অদিস্ৰা ‘‘ন নো রাজা পোরাণকো ৰিয হোতী’’তি ৰত্ৰা গাথাদ্ৰযমাহ –

‘‘অপোরাণং ৰত ভো রাজা, সব্বভুম্মো দিসম্পতি;

নজ্জ নচ্চে নিসামেতি, ন গীতে কুরুতে মনো.

‘‘ন মিগে নপি উয্যানে, নপি হংসে উদিক্খতি;

মূগোৰ তুণ্হিমাসীনো, ন অত্থমনুসাসতী’’তি.

তত্থ মিগেতি সব্বসঙ্গাহিকৰচনং, পুব্বে হত্থী যুজ্ঝাপেতি, মেণ্ডে যুজ্ঝাপেতি, অজ্জ তেপি ন ওলোকেতীতি অত্থো. উয্যানেতি উয্যানকীল়ম্পি নানুভোতি. হংসেতি পঞ্চপদুমসঞ্ছন্নাসু উয্যানপোক্খরণীসু হংসগণং ন ওলোকেতি. মূগোৰাতি ভত্তহারকঞ্চ উপট্ঠাকঞ্চ পুচ্ছিংসু ‘‘ভো রাজা, তুম্হেহি সদ্ধিং কিঞ্চি অত্থং মন্তেতী’’তি. তে ‘‘ন মন্তেতী’’তি ৰদিংসু. তস্মা এৰমাহংসু.

রাজা কামেসু অনল্লীযন্তেন ৰিৰেকনিন্নেন চিত্তেন অত্তনো কুলূপকপচ্চেকবুদ্ধে অনুস্সরিত্ৰা ‘‘কো নু খো মে তেসং সীলাদিগুণযুত্তানং অকিঞ্চনানং ৰসনট্ঠানং আচিক্খিস্সতী’’তি তীহি গাথাহি উদানং উদানেসি –

‘‘সুখকামা ¶ রহোসীলা, ৰধবন্ধা উপারতা;

কস্স নু অজ্জ আরামে, দহরা ৰুদ্ধা চ অচ্ছরে.

‘‘অতিক্কন্তৰনথা ¶ ¶ ধীরা, নমো তেসং মহেসিনং;

যে উস্সুকম্হি লোকম্হি, ৰিহরন্তি মনুস্সুকা.

‘‘তে ছেত্ৰা মচ্চুনো জালং, ততং মাযাৰিনো দল়্হং;

ছিন্নালযত্তা গচ্ছন্তি, কো তেসং গতিমাপযে’’তি.

তত্থ সুখকামাতি নিব্বানসুখকামা. রহোসীলাতি পটিচ্ছন্নসীলা ন অত্তনো গুণপ্পকাসনা. দহরা ৰুড্ঢা চাতি দহরা চেৰ মহল্লকা চ. অচ্ছরেতি ৰসন্তি.

তস্সেৰং তেসং গুণে অনুস্সরন্তস্স মহতী পীতি উপ্পজ্জি. অথ মহাসত্তো পল্লঙ্কতো উট্ঠায উত্তরসীহপঞ্জরং ৰিৰরিত্ৰা উত্তরদিসাভিমুখো সিরসি অঞ্জলিং পতিট্ঠাপেত্ৰা ‘‘এৰরূপেহি গুণেহি সমন্নাগতা পচ্চেকবুদ্ধা’’তি নমস্সমানো ‘‘অতিক্কন্তৰনথা’’তিআদিমাহ. তত্থ অতিক্কন্তৰনথাতি পহীনতণ্হা. মহেসিনন্তি মহন্তে সীলক্খন্ধাদযো গুণে এসিত্ৰা ঠিতানং. উস্সুকম্হীতি রাগাদীহি উস্সুক্কং আপন্নে লোকস্মিং. মচ্চুনো জালন্তি কিলেসমারেন পসারিতং তণ্হাজালং. ততং মাযাৰিনোতি অতিমাযাৰিনো. কো তেসং গতিমাপযেতি কো মং তেসং পচ্চেকবুদ্ধানং নিৰাসট্ঠানং পাপেয্য, গহেত্ৰা গচ্ছেয্যাতি অত্থো.

তস্স পাসাদেযেৰ সমণধম্মং করোন্তস্স চত্তারো মাসা অতীতা. অথস্স অতিৰিয পব্বজ্জায চিত্তং নমি, অগারং লোকন্তরিকনিরযো ৰিয খাযি, তযো ভৰা আদিত্তা ৰিয উপট্ঠহিংসু. সো পব্বজ্জাভিমুখেন চিত্তেন ‘‘কদা নু খো ইমং সক্কভৰনং ৰিয অলঙ্কতপ্পটিযত্তং মিথিলং পহায হিমৰন্তং পৰিসিত্ৰা পব্বজিতৰেসগহণকালো ময্হং ভৰিস্সতী’’তি চিন্তেত্ৰা মিথিলৰণ্ণনং নাম আরভি –

‘‘কদাহং ¶ মিথিলং ফীতং, ৰিভত্তং ভাগসো মিতং;