📜
নমো তস্স ভগৰতো অরহতো সম্মাসম্বুদ্ধস্স
খুদ্দকনিকাযে
জাতকপাল়ি
(দুতিযো ভাগো)
১৭. চত্তালীসনিপাতো
৫২১. তেসকুণজাতকং (১)
‘‘ৰেস্সন্তরং ¶ ¶ ¶ তং পুচ্ছামি, সকুণ ভদ্দমত্থু তে;
রজ্জং কারেতুকামেন, কিং সু কিচ্চং কতং ৰরং’’.
‘‘চিরস্সং ৰত মং তাতো, কংসো বারাণসিগ্গহো;
পমত্তো অপ্পমত্তং মং, পিতা পুত্তং অচোদযি.
‘‘পঠমেনেৰ ৰিতথং, কোধং হাসং নিৰারযে;
ততো কিচ্চানি কারেয্য, তং ৰতং আহু খত্তিয.
‘‘যং ¶ ত্ৰং তাত তপোকম্মং [তপে কম্মং (সী. স্যা. পী.)], পুব্বে কতমসংসযং;
রত্তো দুট্ঠো চ যং কযিরা, ন তং কযিরা ততো পুন [পুনং (পী.)].
‘‘খত্তিযস্স পমত্তস্স, রট্ঠস্মিং রট্ঠৰড্ঢন;
সব্বে ভোগা ৰিনস্সন্তি, রঞ্ঞো তং ৰুচ্চতে অঘং.
‘‘সিরী তাত অলক্খী চ [সিরী চ তাত লক্খী চ (স্যা. পী.)], পুচ্ছিতা এতদব্রৰুং;
উট্ঠান [উট্ঠানে (স্যা.)] ৰীরিযে পোসে, রমাহং অনুসূযকে.
‘‘উসূযকে ¶ দুহদযে, পুরিসে কম্মদুস্সকে;
কালকণ্ণী মহারাজ, রমতি [রমাতি (ক.)] চক্কভঞ্জনী.
‘‘সো ত্ৰং সব্বেসু সুহদযো [সো ত্ৰং সব্বেসং সুহদযো (স্যা. পী.), সো ত্ৰং সব্বে সুহদযো (ক.)], সব্বেসং রক্খিতো ভৰ;
অলক্খিং নুদ মহারাজ, লক্খ্যা ভৰ নিৰেসনং.
‘‘স ¶ লক্খীধিতিসম্পন্নো, পুরিসো হি মহগ্গতো;
অমিত্তানং কাসিপতি, মূলং অগ্গঞ্চ ছিন্দতি.
‘‘সক্কোপি হি ভূতপতি, উট্ঠানে নপ্পমজ্জতি;
স কল্যাণে ধিতিং কত্ৰা, উট্ঠানে কুরুতে মনো.
‘‘গন্ধব্বা পিতরো দেৰা, সাজীৰা [সঞ্জীৰা (পী.)] হোন্তি তাদিনো;
উট্ঠাহতো [উট্ঠহতো (স্যা. পী.)] অপ্পমজ্জতো [মপ্পমজ্জতো (ক.)], অনুতিট্ঠন্তি দেৰতা.
‘‘সো অপ্পমত্তো অক্কুদ্ধো [অক্কুট্ঠো (পী.)], তাত কিচ্চানি কারয;
ৰাযমস্সু চ কিচ্চেসু, নালসো ৰিন্দতে সুখং.
‘‘তত্থেৰ তে ৰত্তপদা, এসাৰ [এসা চ (পী.)] অনুসাসনী;
অলং মিত্তে সুখাপেতুং, অমিত্তানং দুখায [দুক্খায (পী.)] চ’’.
‘‘সক্খিসি ত্ৰং [সক্খী তুৰং (সী. স্যা. পী.)] কুণ্ডলিনি, মঞ্ঞসি খত্তবন্ধুনি [খত্তিযবন্ধুনী (পী.)];
রজ্জং কারেতুকামেন, কিং সু কিচ্চং কতং ৰরং’’.
‘‘দ্ৰেৰ তাত পদকানি, যত্থ [যেসু (পী.)] সব্বং পতিট্ঠিতং;
অলদ্ধস্স চ যো লাভো, লদ্ধস্স চানুরক্খণা.
‘‘অমচ্চে তাত জানাহি, ধীরে অত্থস্স কোৰিদে;
অনক্খা কিতৰে তাত, অসোণ্ডে অৰিনাসকে.
‘‘যো চ তং তাত রক্খেয্য, ধনং যঞ্চেৰ তে সিযা;
সূতোৰ রথং সঙ্গণ্হে, সো তে কিচ্চানি কারযে.
‘‘সুসঙ্গহিতন্তজনো, সযং ৰিত্তং অৰেক্খিয;
নিধিঞ্চ ইণদানঞ্চ, ন করে পরপত্তিযা.
‘‘সযং ¶ ¶ আযং ¶ ৰযং [আযৰযং (পী.)] জঞ্ঞা, সযং জঞ্ঞা কতাকতং;
নিগ্গণ্হে নিগ্গহারহং, পগ্গণ্হে পগ্গহারহং.
‘‘সযং জানপদং অত্থং, অনুসাস রথেসভ;
মা তে অধম্মিকা যুত্তা, ধনং রট্ঠঞ্চ নাসযুং.
‘‘মা চ ৰেগেন কিচ্চানি, করোসি [কারেসি (সী. স্যা. পী.)] কারযেসি ৰা;
ৰেগসা হি কতং কম্মং, মন্দো পচ্ছানুতপ্পতি.
‘‘মা তে অধিসরে মুঞ্চ, সুবাল়্হমধিকোধিতং [কোপিতং (সী. স্যা.)];
কোধসা হি বহূ ফীতা, কুলা অকুলতং গতা.
‘‘মা তাত ইস্সরোম্হীতি, অনত্থায পতারযি;
ইত্থীনং পুরিসানঞ্চ, মা তে আসি দুখুদ্রযো.
‘‘অপেতলোমহংসস্স, রঞ্ঞো কামানুসারিনো;
সব্বে ভোগা ৰিনস্সন্তি, রঞ্ঞো তং ৰুচ্চতে অঘং.
‘‘তত্থেৰ তে ৰত্তপদা, এসাৰ অনুসাসনী;
দক্খস্সুদানি পুঞ্ঞকরো, অসোণ্ডো অৰিনাসকো;
সীলৰাস্সু [সীলৰাস্স (টীকা)] মহারাজ, দুস্সীলো ৰিনিপাতিকো’’ [ৰিনিপাতকো (পী.)].
‘‘অপুচ্ছিম্হ কোসিযগোত্তং [অপুচ্ছিম্হা কোসিযগোত্তং (স্যা.), অপুচ্ছম্হাপি কোসিকং (পী.)], কুণ্ডলিনিং তথেৰ চ;
ত্ৰং দানি ৰদেহি জম্বুক [জম্বুক ত্ৰং দানি ৰদেহি (স্যা. পী.)], বলানং বলমুত্তমং’’.
‘‘বলং পঞ্চৰিধং লোকে, পুরিসস্মিং মহগ্গতে;
তত্থ বাহুবলং নাম, চরিমং ৰুচ্চতে বলং.
‘‘ভোগবলঞ্চ দীঘাৰু, দুতিযং ৰুচ্চতে বলং;
অমচ্চবলঞ্চ ¶ দীঘাৰু, ততিযং ৰুচ্চতে বলং.
‘‘অভিজচ্চবলং চেৰ, তং চতুত্থং অসংসযং;
যানি চেতানি সব্বানি, অধিগণ্হাতি পণ্ডিতো.
‘‘তং বলানং বলং সেট্ঠং, অগ্গং পঞ্ঞাবং বলং [ৰরং (সী.)];
পঞ্ঞাবলেনুপত্থদ্ধো, অত্থং ৰিন্দতি পণ্ডিতো.
‘‘অপি ¶ চে লভতি মন্দো, ফীতং ধরণিমুত্তমং;
অকামস্স পসয্হং ৰা, অঞ্ঞো তং পটিপজ্জতি.
‘‘অভিজাতোপি চে হোতি, রজ্জং লদ্ধান খত্তিযো;
দুপ্পঞ্ঞো হি কাসিপতি, সব্বেনপি ন জীৰতি.
‘‘পঞ্ঞাৰ ¶ সুতং ৰিনিচ্ছিনী [পঞ্ঞা সুতৰিনিচ্ছিনী (স্যা. পী.)], পঞ্ঞা কিত্তি সিলোকৰড্ঢনী [ৰদ্ধনী (পী.)];
পঞ্ঞাসহিতো নরো ইধ, অপি দুক্খে সুখানি ৰিন্দতি.
‘‘পঞ্ঞঞ্চ খো অসুস্সূসং, ন কোচি অধিগচ্ছতি;
বহুস্সুতং অনাগম্ম, ধম্মট্ঠং অৰিনিব্ভুজং.
‘‘যো চ ধম্মৰিভঙ্গঞ্ঞূ [যো ধম্মঞ্চ ৰিভাগঞ্ঞূ (পী.)], কালুট্ঠাযী মতন্দিতো;
অনুট্ঠহতি কালেন, কম্মফলং তস্স ইজ্ঝতি [কম্মফলং তস্সিজ্ঝতি, ফলং তস্স সমিজ্ঝতি (ক.)].
‘‘অনাযতন [না’নাযতন (পী.)] সীলস্স, অনাযতন [না’নাযতন (পী.)] সেৰিনো;
ন নিব্বিন্দিযকারিস্স, সম্মদত্থো ৰিপচ্চতি.
‘‘অজ্ঝত্তঞ্চ পযুত্তস্স, তথাযতনসেৰিনো;
অনিব্বিন্দিযকারিস্স, সম্মদত্থো ৰিপচ্চতি.
‘‘যোগপ্পযোগসঙ্খাতং, সম্ভতস্সানুরক্খণং;
তানি ¶ ত্ৰং তাত সেৰস্সু, মা অকম্মায রন্ধযি;
অকম্মুনা হি দুম্মেধো, নল়াগারংৰ সীদতি’’.
‘‘ধম্মং চর মহারাজ, মাতাপিতূসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, পুত্তদারেসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, মিত্তামচ্চেসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, ৰাহনেসু বলেসু চ;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং ¶ চর মহারাজ, গামেসু নিগমেসু চ…পে….
‘‘ধম্মং চর মহারাজ, রট্ঠেসু [রট্ঠে (পী.)] জনপদেসু চ…পে….
‘‘ধম্মং চর মহারাজ, সমণ [সমণে (স্যা. ক.)] ব্রাহ্মণেসু চ…পে….
‘‘ধম্মং চর মহারাজ, মিগপক্খীসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং ¶ চর মহারাজ, ধম্মো চিণ্ণো সুখাৰহো [ধম্মো সুচিণ্ণো সুখমাৰহতি (ক.)];
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, সইন্দা [ইন্দো (পী.), সিন্দা (ক.)] দেৰা সব্রহ্মকা;
সুচিণ্ণেন দিৰং পত্তা, মা ধম্মং রাজ পামদো [পমাদো (পী. ক.)].
‘‘তত্থেৰ ¶ তে [ৰেতে (পী.)] ৰত্তপদা, এসাৰ [এসা চ (পী.)] অনুসাসনী;
সপ্পঞ্ঞসেৰী কল্যাণী, সমত্তং সাম [সামং (ক.)] তং ৰিদূ’’তি.
তেসকুণজাতকং পঠমং.
৫২২. সরভঙ্গজাতকং (২)
‘‘অলঙ্কতা কুণ্ডলিনো সুৰত্থা, ৰেল়ুরিযমুত্তাথরুখগ্গবন্ধা [বদ্ধা (পী.)];
রথেসভা তিট্ঠথ কে নু তুম্হে, কথং ৰো জানন্তি মনুস্সলোকে’’.
‘‘অহমট্ঠকো ভীমরথো পনাযং, কালিঙ্গরাজা পন উগ্গতোযং [উগ্গতো অযং (পী.), উগ্গতাযং (ক.)];
সুসঞ্ঞতানং ইসীনং [সুসঞ্ঞতানিসিনং (পী.)] দস্সনায, ইধাগতা পুচ্ছিতাযেম্হ পঞ্হে’’.
‘‘ৰেহাযসং ¶ তিট্ঠসি [তিট্ঠতি (পী.)] অন্তলিক্খে, পথদ্ধুনো পন্নরসেৰ চন্দো;
পুচ্ছামি তং যক্খ মহানুভাৰ, কথং তং জানন্তি মনুস্সলোকে’’.
‘‘যমাহু দেৰেসু সুজম্পতীতি, মঘৰাতি ¶ তং আহু মনুস্সলোকে;
স দেৰরাজা ইদমজ্জ পত্তো, সুসঞ্ঞতানং ইসীনং দস্সনায’’.
‘‘দূরে সুতা নো ইসযো সমাগতা, মহিদ্ধিকা ইদ্ধিগুণূপপন্না;
ৰন্দামি তে অযিরে পসন্নচিত্তো, যে জীৰলোকেত্থ মনুস্সসেট্ঠা’’.
গন্ধো ইসীনং চিরদিক্খিতানং [দক্খিতানং (স্যা. পী.)], কাযা চুতো গচ্ছতি মালুতেন;
ইতো পটিক্কম্ম সহস্সনেত্ত, গন্ধো ইসীনং অসুচি দেৰরাজ’’.
‘‘গন্ধো ইসীনং চিরদিক্খিতানং, কাযা চুতো গচ্ছতু মালুতেন;
ৰিচিত্রপুপ্ফং সুরভিংৰ মালং, গন্ধঞ্চ এতং পাটিকঙ্খাম ভন্তে;
ন হেত্থ দেৰা পটিক্কূলসঞ্ঞিনো’’.
‘‘পুরিন্দদো ভূতপতী যসস্সী, দেৰানমিন্দো সক্কো [ইদং পদং নত্থি (সী. স্যা. পী. পোত্থকেসু)] মঘৰা সুজম্পতি;
স দেৰরাজা অসুরগণপ্পমদ্দনো, ওকাসমাকঙ্খতি পঞ্হ পুচ্ছিতুং.
‘‘কো ¶ নেৰিমেসং ইধ পণ্ডিতানং, পঞ্হে পুট্ঠো নিপুণে ব্যাকরিস্সতি;
তিণ্ণঞ্চ রঞ্ঞং মনুজাধিপানং, দেৰানমিন্দস্স চ ৰাসৰস্স’’.
‘‘অযং ¶ ইসি [ইসী (সী. পী.)] সরভঙ্গো তপস্সী [যসস্সী (সী.)], যতো জাতো ৰিরতো মেথুনস্মা;
আচেরপুত্তো [আচরিযপুত্তো (পী. ক.)] সুৰিনীতরূপো, সো নেসং পঞ্হানি ৰিযাকরিস্সতি’’.
‘‘কোণ্ডঞ্ঞ পঞ্হানি ৰিযাকরোহি, যাচন্তি তং ইসযো সাধুরূপা;
কোণ্ডঞ্ঞ এসো মনুজেসু ধম্মো, যং ৰুদ্ধ [ৰদ্ধ (পী.), বুদ্ধ (ক.)] মাগচ্ছতি এস ভারো’’.
‘‘কতাৰকাসা ¶ পুচ্ছন্তু ভোন্তো, যং কিঞ্চি পঞ্হং মনসাভিপত্থিতং;
অহঞ্হি তং তং ৰো ৰিযাকরিস্সং, ঞত্ৰা সযং লোকমিমং পরঞ্চ’’.
‘‘ততো চ মঘৰা সক্কো, অত্থদস্সী পুরিন্দদো;
অপুচ্ছি পঠমং পঞ্হং, যঞ্চাসি অভিপত্থিতং’’.
‘‘কিং সূ ৰধিত্ৰা ন কদাচি সোচতি, কিস্সপ্পহানং ইসযো ৰণ্ণযন্তি;
কস্সীধ ¶ ৰুত্তং ফরুসং খমেথ, অক্খাহি মে কোণ্ডঞ্ঞ এতমত্থং’’.
‘‘কোধং ৰধিত্ৰা ন কদাচি সোচতি, মক্খপ্পহানং ইসযো ৰণ্ণযন্তি;
সব্বেসং ৰুত্তং ফরুসং খমেথ, এতং খন্তিং উত্তমমাহু সন্তো’’.
‘‘সক্কা উভিন্নং [হি দ্ৰিন্নং (পী.)] ৰচনং তিতিক্খিতুং, সদিসস্স ৰা সেট্ঠতরস্স [সেট্ঠনরস্স (পী.)] ৰাপি;
কথং নু হীনস্স ৰচো খমেথ, অক্খাহি মে কোণ্ডঞ্ঞ এতমত্থং’’.
‘‘ভযা ¶ হি সেট্ঠস্স ৰচো খমেথ, সারম্ভহেতূ পন সাদিসস্স;
যো চীধ হীনস্স ৰচো খমেথ, এতং খন্তিং উত্তমমাহু সন্তো’’.
‘‘কথং ৰিজঞ্ঞা চতুপত্থরূপং [চতুমট্ঠরূপং (স্যা. পী.)], সেট্ঠং সরিক্খং অথৰাপি হীনং;
ৰিরূপরূপেন চরন্তি সন্তো, তস্মা হি সব্বেসং ৰচো খমেথ’’.
‘‘ন হেতমত্থং মহতীপি সেনা, সরাজিকা যুজ্ঝমানা লভেথ;
যং ¶ খন্তিমা সপ্পুরিসো লভেথ, খন্তী বলস্সূপসমন্তি ৰেরা’’.
‘‘সুভাসিতং তে অনুমোদিযান, অঞ্ঞং তং পুচ্ছামি তদিঙ্ঘ ব্রূহি;
যথা অহুং [অহূ (সী. স্যা. পী.)] দণ্ডকী নাল়িকেরো [নাল়িকীরো (সী. স্যা. পী.)], অথজ্জুনো কলাবু চাপি রাজা;
তেসং গতিং ব্রূহি সুপাপকম্মিনং, কত্থূপপন্না ইসিনং ৰিহেঠকা’’.
‘‘কিসঞ্হি [কিসংপি (পী.)] ৰচ্ছং অৰকিরিয দণ্ডকী, উচ্ছিন্নমূলো সজনো সরট্ঠো;
কুক্কুল়নামে নিরযম্হি পচ্চতি, তস্স ফুলিঙ্গানি পতন্তি কাযে.
‘‘যো সঞ্ঞতে পব্বজিতে অহেঠযি [অৰঞ্চসি (পী.)], ধম্মং ভণন্তে সমণে অদূসকে;
তং নাল়িকেরং সুনখা পরত্থ, সঙ্গম্ম খাদন্তি ৰিফন্দমানং.
‘‘অথজ্জুনো ¶ নিরযে সত্তিসূলে, অৰংসিরো পতিতো উদ্ধংপাদো [উদ্ধপাদো (স্যা.), অদ্ধপাদো (পী.)];
অঙ্গীরসং গোতমং হেঠযিত্ৰা, খন্তিং তপস্সিং চিরব্রহ্মচারিং.
‘‘যো ¶ খণ্ডসো পব্বজিতং অছেদযি, খন্তিং ৰদন্তং সমণং অদূসকং;
কলাবুৰীচিং উপপজ্জ পচ্চতি, মহাপতাপং [মহাভিতাপং (পী.)] কটুকং ভযানকং.
‘‘এতানি সুত্ৰা নিরযানি পণ্ডিতো, অঞ্ঞানি পাপিট্ঠতরানি চেত্থ;
ধম্মং চরে সমণব্রাহ্মণেসু, এৰঙ্করো সগ্গমুপেতি ঠানং’’.
‘‘সুভাসিতং ¶ তে অনুমোদিযান, অঞ্ঞং তং পুচ্ছামি তদিঙ্ঘ ব্রূহি;
কথংৰিধং সীলৰন্তং ৰদন্তি, কথংৰিধং পঞ্ঞৰন্তং ৰদন্তি;
কথংৰিধং সপ্পুরিসং ৰদন্তি, কথংৰিধং নো সিরি নো জহাতি’’.
‘‘কাযেন ৰাচায চ যো’ধ [যো চ (পী.)] সঞ্ঞতো, মনসা চ কিঞ্চি ন করোতি পাপং;
ন অত্তহেতূ অলিকং ভণেতি [ভণাতি (সী. স্যা. পী.)], তথাৰিধং সীলৰন্তং ৰদন্তি.
‘‘গম্ভীরপঞ্হং মনসাভিচিন্তযং [মনসা ৰিচিন্তযং (সী.)], নাচ্চাহিতং কম্ম করোতি লুদ্দং;
কালাগতং ¶ [কালাভতং (পী.)] অত্থপদং ন রিঞ্চতি, তথাৰিধং পঞ্ঞৰন্তং ৰদন্তি.
‘‘যো ¶ ৰে কতঞ্ঞূ কতৰেদি ধীরো, কল্যাণমিত্তো দল়্হভত্তি চ হোতি;
দুখিতস্স সক্কচ্চ করোতি কিচ্চং, তথাৰিধং সপ্পুরিসং ৰদন্তি.
‘‘এতেহি সব্বেহি গুণেহুপেতো, সদ্ধো মুদূ সংৰিভাগী ৰদঞ্ঞূ;
সঙ্গাহকং সখিলং সণ্হৰাচং, তথাৰিধং নো সিরি নো জহাতি’’.
‘‘সুভাসিতং তে অনুমোদিযান, অঞ্ঞং তং পুচ্ছামি তদিঙ্ঘ ব্রূহি;
সীলং সিরিঞ্চাপি সতঞ্চ ধম্মং, পঞ্ঞঞ্চ কং সেট্ঠতরং ৰদন্তি’’.
‘‘পঞ্ঞা হি সেট্ঠা কুসলা ৰদন্তি, নক্খত্তরাজারিৰ তারকানং;
সীলং সীরী চাপি সতঞ্চ ধম্মো [ধম্মা (পী.)], অন্ৰাযিকা পঞ্ঞৰতো ভৰন্তি’’.
‘‘সুভাসিতং তে অনুমোদিযান, অঞ্ঞং তং পুচ্ছামি তদিঙ্ঘ ব্রূহি;
কথংকরো ¶ কিন্তিকরো কিমাচরং, কিং সেৰমানো লভতীধ পঞ্ঞং;
পঞ্ঞায দানিপ্পটিপং [দানি পটিপদং (সী. স্যা. পী.)] ৰদেহি, কথংকরো পঞ্ঞৰা হোতি মচ্চো’’.
‘‘সেৰেথ ৰুদ্ধে নিপুণে বহুস্সুতে, উগ্গাহকো চ পরিপুচ্ছকো সিযা;
সুণেয্য সক্কচ্চ সুভাসিতানি, এৰংকরো পঞ্ঞৰা হোতি মচ্চো.
‘‘ ¶ পঞ্ঞৰা কামগুণে অৰেক্খতি, অনিচ্চতো দুক্খতো রোগতো চ;
এৰং ৰিপস্সী পজহাতি ছন্দং, দুক্খেসু কামেসু মহব্ভযেসু.
‘‘স ৰীতরাগো পৰিনেয্য দোসং, মেত্তং [মেত্ত (স্যা. ক.)] চিত্তং ভাৰযে [ভাৰেয্য (সী. স্যা. ক.)] অপ্পমাণং;
সব্বেসু ভূতেসু নিধায দণ্ডং, অনিন্দিতো ব্রহ্মমুপেতি ঠানং’’.
‘‘মহত্থিযং [মহিদ্ধিযং (সী. স্যা. পী.)] আগমনং অহোসি, তৰমট্ঠকা [মট্ঠক (সী. স্যা. ক.)] ভীমরথস্স চাপি;
কালিঙ্গরাজস্স চ উগ্গতস্স, সব্বেস ¶ ৰো কামরাগো পহীনো’’.
‘‘এৰমেতং পরচিত্তৰেদি, সব্বেস নো কামরাগো পহীনো;
করোহি ওকাসমনুগ্গহায, যথা গতিং তে অভিসম্ভৰেম’’.
‘‘করোমি ওকাসমনুগ্গহায, তথা হি ৰো কামরাগো পহীনো;
ফরাথ কাযং ৰিপুলায পীতিযা, যথা গতিং মে অভিসম্ভৰেথ’’.
‘‘সব্বং ¶ করিস্সাম তৰানুসাসনিং, যং যং তুৰং ৰক্খসি ভূরিপঞ্ঞ;
ফরাম কাযং ৰিপুলায পীতিযা, যথা গতিং তে অভিসম্ভৰেম’’.
‘‘কতায [কতাযং (সী. পী.)] ৰচ্ছস্স কিসস্স পূজা, গচ্ছন্তু ভোন্তো ইসযো সাধুরূপা;
ঝানে রতা হোথ সদা সমাহিতা, এসা রতী পব্বজিতস্স সেট্ঠা’’.
‘‘সুত্ৰান ¶ গাথা পরমত্থসংহিতা, সুভাসিতা ইসিনা পণ্ডিতেন;
তে ৰেদজাতা অনুমোদমানা, পক্কামু ¶ [পক্কমু (ক.)] দেৰা দেৰপুরং যসস্সিনো.
‘‘গাথা ইমা অত্থৰতী সুব্যঞ্জনা, সুভাসিতা ইসিনা পণ্ডিতেন;
যো কোচিমা অট্ঠিকত্ৰা [অট্ঠিং কত্ৰা (ক.)] সুণেয্য, লভেথ পুব্বাপরিযং ৰিসেসং;
লদ্ধান পুব্বাপরিযং ৰিসেসং, অদস্সনং মচ্চুরাজস্স গচ্ছে’’.
‘‘সালিস্সরো সারিপুত্তো, মেণ্ডিস্সরো চ কস্সপো;
পব্বতো অনুরুদ্ধো চ, কচ্চাযনো চ দেৰলো [দেৰিলো (স্যা. ক.)].
‘‘অনুসিস্সো চ আনন্দো, কিসৰচ্ছো চ কোলিতো;
নারদো উদাযী থেরো [নারদো পুণ্ণো মন্তানীপুত্তো (সী.)], পরিসা বুদ্ধপরিসা;
সরভঙ্গো লোকনাথো, এৰং ধারেথ জাতক’’ন্তি.
সরভঙ্গজাতকং দুতিযং.
৫২৩. অলম্বুসাজাতকং (৩)
‘‘অথ ব্রৰি ব্রহা ইন্দো, ৰত্রভূ জযতং পিতা;
দেৰকঞ্ঞং পরাভেত্ৰা, সুধম্মাযং অলম্বুসং.
‘‘মিস্সে দেৰা তং যাচন্তি, তাৰতিংসা সইন্দকা;
ইসিপ্পলোভনে ¶ [ইসিপলোভিকে (সী. স্যা.), ইসিং পলোভিকে (পী.)] গচ্ছ, ইসিসিঙ্গং অলম্বুসে.
‘‘পুরাযং অম্হে অচ্চেতি [নাচ্চেতি (স্যা. ক.)], ৰত্তৰা [ৰতৰা (সী. স্যা. পী.)] ব্রহ্মচরিযৰা;
নিব্বানাভিরতো ৰুদ্ধো [ৰদ্ধো (পী.), বুদ্ধো (স্যা. ক.)], তস্স মগ্গানি আৰর’’.
‘‘দেৰরাজ কিমেৰ ত্ৰং, মমেৰ তুৰং সিক্খসি;
ইসিপ্পলোভনে [ইসিপলোভিকে (সী. স্যা.), ইসিং পলোভিকে (পী.)] গচ্ছ, সন্তি অঞ্ঞাপি অচ্ছরা.
‘‘মাদিসিযো ¶ পৰরা চেৰ, অসোকে নন্দনে ৰনে;
তাসম্পি হোতু পরিযাযো, তাপি যন্তু পলোভনা’’ [পলোভিকা (স্যা. পী.)].
‘‘অদ্ধা ¶ হি সচ্চং ভণসি, সন্তি অঞ্ঞাপি অচ্ছরা;
তাদিসিযো পৰরা চেৰ, অসোকে নন্দনে ৰনে.
‘‘ন তা এৰং পজানন্তি, পারিচরিযং পুমং গতা;
যাদিসং ত্ৰং পজানাসি, নারি সব্বঙ্গসোভনে.
‘‘ত্ৰমেৰ গচ্ছ কল্যাণি, ইত্থীনং পৰরা চসি;
তৰেৰ ৰণ্ণরূপেন, সৰসমানযিস্সসি’’ [ৰসমানাপযিস্সসি (স্যা.), ৰসমানামযিস্সসি (পী.), তং ৰসমানযিস্সসি (ক.)].
‘‘ন ৰাহং ন গমিস্সামি, দেৰরাজেন পেসিতা;
ৰিভেমি চেতং আসাদুং, উগ্গতেজো হি ব্রাহ্মণো.
‘‘অনেকে নিরযং পত্তা, ইসিমাসাদিযা জনা;
আপন্না মোহসংসারং, তস্মা লোমানি হংসযে’’.
‘‘ইদং ৰত্ৰান পক্কামি, অচ্ছরা কামৰণ্ণিনী;
মিস্সা মিস্সিতু [মিস্সেতু (সী. স্যা. পী.)] মিচ্ছন্তী, ইসিসিঙ্গং অলম্বুসা.
‘‘সা চ তং ৰনমোগয্হ, ইসিসিঙ্গেন রক্খিতং;
বিম্বজালকসঞ্ছন্নং ¶ , সমন্তা অড্ঢযোজনং.
‘‘পাতোৰ পাতরাসম্হি, উদণ্হসমযং [উদযসমযং (স্যা.), উদন্তসমযং (ক.)] পতি;
অগ্গিট্ঠং পরিমজ্জন্তং, ইসিসিঙ্গং উপাগমি’’.
‘‘কা নু ৰিজ্জুরিৰাভাসি, ওসধী ৰিয তারকা;
ৰিচিত্তহত্থাভরণা [ৰিচিত্তৰত্থাভরণা (সী.)], আমুত্তমণিকুণ্ডলা [আমুক্কমণিকুণ্ডলা (?)].
‘‘আদিচ্চৰণ্ণসঙ্কাসা, হেমচন্দনগন্ধিনী;
সঞ্ঞতূরূ মহামাযা, কুমারী চারুদস্সনা.
‘‘ৰিলগ্গা [ৰিলাকা (সী. স্যা. পী.)] মুদুকা সুদ্ধা, পাদা তে সুপ্পতিট্ঠিতা;
গমনা কামনীযা [কমনা কমনীযা (সী. পী.)] তে, হরন্তিযেৰ মে মনো.
‘‘অনুপুব্বাৰ ¶ তে ঊরূ, নাগনাসসমূপমা;
ৰিমট্ঠা তুয্হং সুস্সোণী, অক্খস্স ফলকং যথা.
‘‘উপ্পলস্সেৰ কিঞ্জক্খা, নাভি তে সাধু সণ্ঠিতা;
পূরা কণ্হঞ্জনস্সেৰ, দূরতো পটিদিস্সতি.
‘‘দুৰিধা জাতা উরজা, অৰণ্টা সাধু পচ্চুদা;
পযোধরা অপতিতা [অপ্পতীতা (সী. স্যা. পী.)], অড্ঢলাবুসমা থনা.
‘‘দীঘা কম্বুতলাভাসা, গীৰা এণেয্যকা যথা;
পণ্ডরাৰরণা ৰগ্গু, চতুত্থমনসন্নিভা.
‘‘উদ্ধগ্গা ¶ চ অধগ্গা চ, দুমগ্গপরিমজ্জিতা;
দুৰিজা নেলসম্ভূতা, দন্তা তৰ সুদস্সনা.
‘‘অপণ্ডরা লোহিতন্তা, জিঞ্জূক [জিঞ্জুক (সী. স্যা. পী.)] ফলসন্নিভা;
আযতা ¶ চ ৰিসালা চ, নেত্তা তৰ সুদস্সনা.
‘‘নাতিদীঘা সুসম্মট্ঠা, কনকব্যা [কনকগ্গা (পী.)] সমোচিতা;
উত্তমঙ্গরুহা তুয্হং, কেসা চন্দনগন্ধিকা.
‘‘যাৰতা কসিগোরক্খা, ৰাণিজানং [ৰণিজানং (পী.)] চ যা গতি;
ইসীনঞ্চ পরক্কন্তং, সঞ্ঞতানং তপস্সিনং.
‘‘ন তে সমসমং পস্সে, অস্মিং পথৰি [পুথুৰি (পী.)] মণ্ডলে;
কো ৰা ত্ৰং কস্স ৰা পুত্তো, কথং জানেমু তং মযং’’.
‘‘ন পঞ্হকালো ভদ্দন্তে, কস্সপেৰং গতে সতি;
এহি সম্ম রমিস্সাম, উভো অস্মাকমস্সমে;
এহি তং উপগূহিস্সং [উপগুয্হিস্সং (স্যা.)], রতীনং কুসলো ভৰ’’.
‘‘ইদং ৰত্ৰান পক্কামি, অচ্ছরা কামৰণ্ণিনী;
মিস্সা মিস্সিতুমিচ্ছন্তী, ইসিসিঙ্গং অলম্বুসা’’.
‘‘সো চ ৰেগেন নিক্খম্ম, ছেত্ৰা দন্ধপরক্কমং [দন্ধপদক্কমং (ক.)];
তমুত্তমাসু ৰেণীসু, অজ্ঝপ্পত্তো [অজ্ঝাপত্তো (পী.)] পরামসি;
‘‘তমুদাৰত্ত ¶ কল্যাণী, পলিস্সজি সুসোভনা [সুসোভণী (স্যা. ক.)];
চৰিতম্হি [চৰি তম্হা (স্যা. ক.)] ব্রহ্মচরিযা, যথা তং অথ তোসিতা.
‘‘মনসা অগমা ইন্দং, ৰসন্তং নন্দনে ৰনে;
তস্সা সঙ্কপ্পমঞ্ঞায, মঘৰা দেৰকুঞ্জরো.
‘‘পল্লঙ্কং পহিণী খিপ্পং, সোৰণ্ণং সোপৰাহনং;
সউত্তরচ্ছদপঞ্ঞাসং, সহস্সপটিযত্থতং [পটিকত্থতং (সী.)].
‘‘তমেনং ¶ তত্থ ধারেসি, উরে কত্ৰান সোভনা;
যথা একমুহুত্তংৰ, তীণি ৰস্সানি ধারযি.
‘‘ৰিমদো তীহি ৰস্সেহি, পবুজ্ঝিত্ৰান ব্রাহ্মণো;
অদ্দসাসি হরিত [হরী (পী.)] রুক্খে, সমন্তা অগ্গিযাযনং.
‘‘নৰপত্তৰনং ফুল্লং, কোকিলগ্গণঘোসিতং;
সমন্তা পৰিলোকেত্ৰা, রুদং অস্সূনি ৰত্তযি.
‘‘ন ¶ জুহে ন জপে [জপ্পে (ক.)] মন্তে, অগ্গিহুত্তং পহাপিতং;
কো নু মে পারিচরিযায, পুব্বে চিত্তং পলোভযি.
‘‘অরঞ্ঞে মে ৰিহরতো, যো মে তেজা হ সম্ভুতং [সম্ভতং (পী.)];
নানারত্নপরিপূরং, নাৰংৰ গণ্হি অণ্ণৰে’’.
‘‘অহং তে পারিচরিযায, দেৰরাজেন পেসিতা;
অৰধিং [অৰধী (স্যা. পী. ক.)] চিত্তং চিত্তেন, পমাদো [পমাদা (স্যা. পী.)] ত্ৰং ন বুজ্ঝসি’’.
‘‘ইমানি কির মং তাতো, কস্সপো অনুসাসতি;
কমলাসদিসিত্থিযো [সরিসিত্থিযো (স্যা. পী.)], তাযো বুজ্ঝেসি মাণৰ.
‘‘উরে গণ্ডাযো বুজ্ঝেসি, তাযো বুজ্ঝেসি মাণৰ;
ইচ্চানুসাসি মং তাতো, যথা মং অনুকম্পকো.
‘‘তস্সাহং ৰচনং নাকং, পিতু ৰুদ্ধস্স সাসনং;
অরঞ্ঞে নিম্মনুস্সম্হি, স্ৰজ্জ ঝাযামি [স্ৰাজ্জজ্ঝাযামি (সী. পী.)] এককো.
‘‘সোহং ¶ তথা করিস্সামি, ধিরত্থু জীৰিতেন মে;
পুন ৰা তাদিসো হেস্সং, মরণং মে ভৰিস্সতি’’.
‘‘তস্স ¶ তেজং [তেজঞ্চ (সী. পী.)] ৰীরিযঞ্চ, ধিতিং [ধিতিঞ্চ (পী.)] ঞত্ৰা অৰট্ঠিতং [সুৰড্ঢিতং (সী.)];
সিরসা অগ্গহী পাদে, ইসিসিঙ্গং অলম্বুসা.
‘‘মা মে কুজ্ঝ [কুজ্ঝি (পী.)] মহাৰীর, মা মে কুজ্ঝ [কুজ্ঝি (পী.)] মহাইসে;
মহা অত্থো মযা চিণ্ণো, তিদসানং যসস্সিনং;
তযা সংকম্পিতং আসি, সব্বং দেৰপুরং তদা’’.
‘‘তাৰতিংসা চ যে দেৰা, তিদসানঞ্চ ৰাসৰো;
ত্ৰঞ্চ ভদ্দে সুখী হোহি, গচ্ছ কঞ্ঞে যথাসুখং’’.
‘‘তস্স পাদে গহেত্ৰান, কত্ৰা চ নং পদক্খিণং;
অঞ্জলিং পগ্গহেত্ৰান, তম্হা ঠানা অপক্কমি.
‘‘যো চ তস্সাসি পল্লঙ্কো, সোৰণ্ণো সোপৰাহনো;
সউত্তরচ্ছদপঞ্ঞাসো, সহস্সপটিযত্থতো;
তমেৰ পল্লঙ্কমারুয্হ, অগা দেৰান সন্তিকে.
‘‘তমোক্কমিৰ আযন্তিং, জলন্তিং ৰিজ্জুতং যথা;
পতীতো সুমনো ৰিত্তো, দেৰিন্দো অদদা ৰরং’’.
‘‘ৰরঞ্চে ¶ মে অদো সক্ক, সব্বভূতানমিস্সর;
নিসিপ্পলোভিকা [ন ইসিপলোভিকা (স্যা.), ন ইসিপলোভিযং (পী.)] গচ্ছে, এতং সক্ক ৰরং ৰরে’’তি.
অলম্বুসাজাতকং ততিযং.
৫২৪. সঙ্খপালজাতকং (৪)
‘‘অরিযাৰকাসোসি পসন্ননেত্তো, মঞ্ঞে ¶ ভৰং পব্বজিতো কুলম্হা;
কথং নু ৰিত্তানি পহায ভোগে, পব্বজি নিক্খম্ম ঘরা সপঞ্ঞ’’ [সপঞ্ঞো (স্যা.), সপঞ্ঞা (পী.)].
‘‘সযং ¶ ৰিমানং নরদেৰ দিস্ৰা, মহানুভাৰস্স মহোরগস্স;
দিস্ৰান পুঞ্ঞান মহাৰিপাকং, সদ্ধাযহং পব্বজিতোম্হি রাজ’’.
‘‘ন কামকামা ন ভযা ন দোসা, ৰাচং মুসা পব্বজিতা ভণন্তি;
অক্খাহি মে পুচ্ছিতো এতমত্থং, সুত্ৰান মে জাযিহিতিপ্পসাদো’’.
‘‘ৰাণিজ্জ [ৰণিজ্জ (পী.)] রট্ঠাধিপ গচ্ছমানো, পথে অদ্দসাসিম্হি ভোজপুত্তে [মিলাচপুত্তে (সী. পী.)];
পৰদ্ধকাযং উরগং মহন্তং, আদায গচ্ছন্তে পমোদমানে’’.
‘‘সোহং সমাগম্ম জনিন্দ তেহি, পহট্ঠলোমো অৰচম্হি ভীতো;
কুহিং অযং নীযতি [নিয্যতি (ক.)] ভীমকাযো, নাগেন কিং কাহথ ভোজপুত্তা.
‘‘নাগো অযং নীযতি ভোজনত্থা [ভোজনত্থং (সী. স্যা. পী.)], পৰদ্ধকাযো ¶ উরগো মহন্তো;
সাদুঞ্চ থূলঞ্চ মুদুঞ্চ মংসং, ন ত্ৰং রসঞ্ঞাসি ৰিদেহপুত্ত.
‘‘ইতো মযং গন্ত্ৰা সকং নিকেতং [নিকেতনং (পী.)], আদায সত্থানি ৰিকোপযিত্ৰা;
মংসানি ভোক্খাম [ভক্খাম (স্যা.)] পমোদমানা, মযঞ্হি ৰে সত্তৰো পন্নগানং.
‘‘সচে অযং নীযতি ভোজনত্থা, পৰদ্ধকাযো উরগো মহন্তো;
দদামি ৰো বলিবদ্দানি [বলিৰদ্দানি (পী.)] সোল়স, নাগং ইমং মুঞ্চথ বন্ধনস্মা.
‘‘অদ্ধা ¶ হি নো ভক্খো অযং মনাপো, বহূ চ নো উরগা ভুত্তপুব্বা [বহুং চ নো উরগো ভুত্তপুব্বো (ক.)];
করোম তে তং ৰচনং অল়ার [আল়ার (ক.) এৰমুপরিপি], মিত্তঞ্চ নো হোহি ৰিদেহপুত্ত.
‘‘তদস্সু তে বন্ধনা মোচযিংসু, যং নত্থুতো পটিমোক্কস্স পাসে;
মুত্তো চ সো বন্ধনা নাগরাজা, পক্কামি পাচীনমুখো মুহুত্তং.
‘‘গন্ত্ৰান পাচীনমুখো মুহুত্তং, পুণ্ণেহি ¶ নেত্তেহি পলোকযী মং;
তদাস্সহং পিট্ঠিতো অন্ৰগচ্ছিং, দসঙ্গুলিং অঞ্জলিং পগ্গহেত্ৰা.
‘‘গচ্ছেৰ ¶ খো ত্ৰং তরমানরূপো, মা তং অমিত্তা পুনরগ্গহেসুং;
দুক্খো হি লুদ্দেহি পুনা সমাগমো, অদস্সনং ভোজপুত্তান গচ্ছ.
‘‘অগমাসি সো রহদং ৰিপ্পসন্নং, নীলোভাসং রমণীযং সুতিত্থং;
সমোততং [সমোনতং (স্যা. ক.)] জম্বুহি ৰেতসাহি, পাৰেক্খি নিত্তিণ্ণভযো পতীতো.
‘‘সো তং পৰিস্স ন চিরস্স নাগো, দিব্বেন মে পাতুরহুং জনিন্দ;
উপট্ঠহী মং পিতরংৰ পুত্তো, হদযঙ্গমং কণ্ণসুখং ভণন্তো.
‘‘ত্ৰং ¶ মেসি মাতা চ পিতা [পিতা চ (পী.)] অল়ার, অব্ভন্তরো পাণদদো সহাযো;
সকঞ্চ ইদ্ধিং পটিলাভকোস্মি [পটিলাভিতোস্মি (পী.)], অল়ার পস্স মে নিৰেসনানি;
পহূতভক্খং বহুঅন্নপানং, মসক্কসারং ¶ ৰিয ৰাসৰস্স’’.
‘‘তং ভূমিভাগেহি উপেতরূপং, অসক্খরা চেৰ মুদূ সুভা চ;
নীচত্তিণা [নীচা তিণা (স্যা. পী.)] অপ্পরজা চ ভূমি, পাসাদিকা যত্থ জহন্তি সোকং.
‘‘অনাৰকুলা ৰেল়ুরিযূপনীলা, চতুদ্দিসং অম্বৰনং সুরম্মং;
পক্কা চ পেসী চ ফলা সুফুল্লা, নিচ্চোতুকা ধারযন্তী ফলানি.
‘‘তেসং ৰনানং নরদেৰ মজ্ঝে, নিৰেসনং ভস্সরসন্নিকাসং;
রজতগ্গল়ং সোৰণ্ণমযং উল়ারং, ওভাসতী ৰিজ্জুরিৰন্তলিক্খে.
‘‘মণীমযা সোণ্ণমযা [সোৰণ্ণমযা (সী. স্যা. পী.)] উল়ারা, অনেকচিত্তা সততং সুনিম্মিতা;
পরিপূরা কঞ্ঞাহি অলঙ্কতাভি, সুৰণ্ণকাযূরধরাহি রাজ.
‘‘সো সঙ্খপালো তরমানরূপো, পাসাদমারুয্হ অনোমৰণ্ণো;
সহস্সথম্ভং অতুলানুভাৰং, যত্থস্স ¶ ভরিযা মহেসী অহোসি.
‘‘একা ¶ চ নারী তরমানরূপা, আদায ৰেল়ুরিযমযং মহগ্ঘং;
সুভং মণিং জাতিমন্তূপপন্নং, অচোদিতা আসনমব্ভিহাসি.
‘‘ততো মং উরগো হত্থে গহেত্ৰা, নিসীদযী পামুখআসনস্মিং;
ইদমাসনং অত্র ভৰং নিসীদতু, ভৰঞ্হি মে অঞ্ঞতরো গরূনং.
‘‘অঞ্ঞা চ নারী তরমানরূপা, আদায ৰারিং উপসঙ্কমিত্ৰা;
পাদানি পক্খালযী মে জনিন্দ, ভরিযাৰ [ভরিযা চ (পী.)] ভত্তূ পতিনো পিযস্স.
‘‘অপরা চ নারী তরমানরূপা, পগ্গয্হ সোৰণ্ণমযায [সোৰণ্ণমযা (পী.)] পাতিযা;
অনেকসূপং ৰিৰিধং ৰিযঞ্জনং, উপনামযী ভত্ত মনুঞ্ঞরূপং.
‘‘তুরিযেহি [তূরিযেহি (ক.)] মং ভারত ভুত্তৰন্তং, উপট্ঠহুং ভত্তু মনো ৰিদিত্ৰা;
ততুত্তরিং [তদুত্তরিং (ক.)] মং নিপতী মহন্তং, দিব্বেহি ¶ কামেহি অনপ্পকেহি.
‘‘ভরিযা ¶ মমেতা তিসতা অল়ার, সব্বত্তমজ্ঝা পদুমুত্তরাভা;
অল়ার এতাস্সু তে কামকারা, দদামি তে তা পরিচারযস্সু.
‘‘সংৰচ্ছরং দিব্বরসানুভুত্ৰা, তদাস্সুহং [তদস্সহং (পী.)] উত্তরিমজ্ঝভাসিং [উত্তরি পচ্চভাসিং (সী. স্যা.), উত্তরিং পচ্চভাসিং (পী.)];
নাগস্সিদং কিন্তি কথঞ্চ লদ্ধং, কথজ্ঝগমাসি ৰিমানসেট্ঠং’’.
‘‘অধিচ্চ ¶ লদ্ধং পরিণামজং তে, সযংকতং উদাহু দেৰেহি দিন্নং;
পুচ্ছামি তং [তে (পী.)] নাগরাজেতমত্থং, কথজ্ঝগমাসি ৰিমানসেট্ঠং’’.
‘‘নাধিচ্চ লদ্ধং ন পরিণামজং মে, ন সযংকতং নাপি দেৰেহি দিন্নং;
সকেহি কম্মেহি অপাপকেহি, পুঞ্ঞেহি মে লদ্ধমিদং ৰিমানং’’.
‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;
অক্খাহি মে নাগরাজেতমত্থং, কথং ¶ নু তে লদ্ধমিদং ৰিমানং’’.
‘‘রাজা অহোসিং মগধানমিস্সরো, দুয্যোধনো নাম মহানুভাৰো;
সো ইত্তরং জীৰিতং সংৰিদিত্ৰা, অসস্সতং ৰিপরিণামধম্মং.
‘‘অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং [অদাসি (পী.)];
ওপানভূতং মে ঘরং তদাসি, সন্তপ্পিতা সমণব্রাহ্মণা চ.
[অযং গাথা পী. পোত্থকে নত্থি] ‘‘মালঞ্চ গন্ধঞ্চ ৰিলেপনঞ্চ, পদীপিযং [পদীপযং (স্যা. ক.)] যানমুপস্সযঞ্চ;
অচ্ছাদনং সেয্যমথন্নপানং, সক্কচ্চ দানানি অদম্হ তত্থ [অযং গাথা পী. পোত্থকে নত্থি].
‘‘তং ¶ মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;
তেনেৰ মে লদ্ধমিদং ৰিমানং, পহূতভক্খং বহুঅন্নপানং’’;
‘‘নচ্চেহি গীতেহি চুপেতরূপং, চিরট্ঠিতিকং ন চ সস্সতাযং.
‘‘অপ্পানুভাৰা তং মহানুভাৰং, তেজস্সিনং ¶ হন্তি অতেজৰন্তো;
কিমেৰ দাঠাৰুধ কিং পটিচ্চ, হত্থত্ত [হত্থত্থ (সী. স্যা. পী.)] মাগচ্ছি ৰনিব্বকানং [ৰণিব্বকানং (সী.)].
‘‘ভযং নু তে অন্ৰগতং মহন্তং, তেজো নু তে নান্ৰগং দন্তমূলং;
কিমেৰ দাঠাৰুধ কিং পটিচ্চ, কিলেসমাপজ্জি ৰনিব্বকানং’’.
‘‘ন মে ভযং অন্ৰগতং মহন্তং, তেজো ন সক্কা মম তেহি হন্তুং [তেভিহন্তুং (স্যা. ক.)];
সতঞ্চ ধম্মানি সুকিত্তিতানি, সমুদ্দৰেলাৰ দুরচ্চযানি.
‘‘চাতুদ্দসিং পঞ্চদসিং অল়ার, উপোসথং নিচ্চমুপাৰসামি;
অথাগমুং সোল়স ভোজপুত্তা, রজ্জুং গহেত্ৰান দল়্হঞ্চ পাসং.
‘‘ভেত্ৰান নাসং অতিকস্স [অন্তকস্স (ক.)] রজ্জুং, নযিংসু মং সম্পরিগয্হ লুদ্দা;
এতাদিসং দুক্খমহং তিতিক্খং [তিতিক্খিং (পী.)], উপোসথং অপ্পটিকোপযন্তো’’.
‘‘একাযনে ¶ ¶ তং পথে অদ্দসংসু, বলেন ¶ ৰণ্ণেন চুপেতরূপং;
সিরিযা পঞ্ঞায চ ভাৰিতোসি, কিং পত্থযং [কিমত্থিযং (সী. স্যা. পী.)] নাগ তপো করোসি.
‘‘ন পুত্তহেতূ ন ধনস্স হেতু, ন আযুনো চাপি অল়ার হেতু;
মনুস্সযোনিং অভিপত্থযানো, তস্মা পরক্কম্ম তপো করোমি’’.
‘‘ত্ৰং লোহিতক্খো ৰিহতন্তরংসো, অলঙ্কতো কপ্পিতকেসমস্সু;
সুরোসিতো লোহিতচন্দনেন, গন্ধব্বরাজাৰ দিসা পভাসসি [পভাসি (ক.)].
‘‘দেৰিদ্ধিপত্তোসি মহানুভাৰো, সব্বেহি কামেহি সমঙ্গিভূতো;
পুচ্ছামি তং নাগরাজেতমত্থং, সেয্যো ইতো কেন মনুস্সলোকো’’.
‘‘অল়ার নাঞ্ঞত্র মনুস্সলোকা, সুদ্ধী ৰ সংৰিজ্জতি সংযমো ৰা;
অহঞ্চ লদ্ধান মনুস্সযোনিং, কাহামি জাতিমরণস্স অন্তং’’.
‘‘সংৰচ্ছরো ¶ মে ৰসতো [ৰুসিতো (পী.)] তৰন্তিকে, অন্নেন পানেন উপট্ঠিতোস্মি;
আমন্তযিত্ৰান পলেমি নাগ, চিরপ্পৰুট্ঠোস্মি [চিরপ্পৰুত্থো অস্মি (পী.)] অহং জনিন্দ’’.
‘‘পুত্তা চ দারা অনুজীৰিনো চ [চ’নুজীৰিনো (স্যা. পী.)], নিচ্চানুসিট্ঠা উপতিট্ঠতে তং;
কচ্চিন্নু তং নাভিসপিত্থ [নাভিসংসিত্থ (স্যা. পী.)] কোচি, পিযঞ্হি মে দস্সনং তুয্হং [তুয্হ (পী.)] অল়ার’’.
‘‘যথাপি ¶ মাতূ চ পিতূ অগারে, পুত্তো পিযো পটিৰিহিতো ৰসেয্য [সেয্যো (পী.)];
ততোপি ময্হং ইধমেৰ সেয্যো, চিত্তঞ্হি তে নাগ মযী পসন্নং’’.
‘‘মণী মমং ৰিজ্জতি লোহিতঙ্কো [লোহিতঙ্গো (ক.)], ধনাহরো মণিরতনং উল়ারং;
আদায ত্ৰং [তং (পী.)] গচ্ছ সকং নিকেতং, লদ্ধা ধনং তং মণিমোস্সজস্সু’’.
‘‘দিট্ঠা মযা মানুসকাপি কামা, অসস্সতা ৰিপরিণামধম্মা;
আদীনৰং কামগুণেসু দিস্ৰা, সদ্ধাযহং পব্বজিতোম্হি রাজ.
‘‘দুমপ্ফলানীৰ ¶ পতন্তি মাণৰা, দহরা চ ৰুদ্ধা চ সরীরভেদা;
এতম্পি দিস্ৰা পব্বজিতোম্হি রাজ, অপণ্ণকং সামঞ্ঞমেৰ সেয্যো’’.
‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;
নাগঞ্চ সুত্ৰান তৰঞ্চল়ার, কাহামি পুঞ্ঞানি অনপ্পকানি’’.
‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;
নাগঞ্চ সুত্ৰান মমঞ্চ রাজ, করোহি পুঞ্ঞানি অনপ্পকানী’’তি.
সঙ্খপালজাতকং চতুত্থং.
৫২৫. চূল়সুতসোমজাতকং (৫)
‘‘আমন্তযামি ¶ ¶ নিগমং, মিত্তামচ্চে পরিস্সজে [পারিসজ্জে (সী. স্যা.)];
সিরস্মিং পলিতং জাতং, পব্বজ্জং দানি রোচহং’’.
‘‘অভুম্মে কথং নু ভণসি, সল্লং মে দেৰ উরসি কপ্পেসি [কম্পেসি (পী.)];
সত্তসতা তে ভরিযা, কথং ¶ নু তে তা ভৰিস্সন্তি’’.
‘‘পঞ্ঞাযিহিন্তি এতা, দহরা অঞ্ঞম্পি তা গমিস্সন্তি;
সগ্গঞ্চস্স পত্থযানো, তেন অহং পব্বজিস্সামি’’.
‘‘দুল্লদ্ধং মে আসি সুতসোম, যস্স তে হোমহং মাতা;
যং মে ৰিলপন্তিযা, অনপেক্খো পব্বজসি দেৰ.
‘‘দুল্লদ্ধং মে আসি সুতসোম, যং তং অহং ৰিজাযিস্সং;
যং মে ৰিলপন্তিযা, অনপেক্খো পব্বজসি দেৰ’’.
‘‘কো নামেসো ধম্মো, সুতসোম কা চ নাম পব্বজ্জা;
যং নো অম্হে জিণ্ণে, অনপেক্খো পব্বজসি দেৰ.
‘‘পুত্তাপি তুয্হং বহৰো, দহরা অপ্পত্তযোব্বনা;
মঞ্জূ তেপি [তে (সী. পী.)] তং অপস্সন্তা, মঞ্ঞে ¶ দুক্খং নিগচ্ছন্তি’’.
‘‘পুত্তেহি চ মে এতেহি, দহরেহি অপ্পত্তযোব্বনেহি;
মঞ্জূহি সব্বেহিপি তুম্হেহি, চিরম্পি ঠত্ৰা ৰিনাসভাৰো’’ [ৰিনাভাৰো (সী. স্যা. পী.)].
‘‘ছিন্নং ¶ নু তুয্হং হদযং, অদু তে [আদু (সী. পী.), আদূ (স্যা.)] করুণা চ নত্থি অম্হেসু;
যং নো ৰিকন্দন্তিযো [ৰিক্কন্দন্তিযো (সী.)], অনপেক্খো পব্বজসি দেৰ’’.
‘‘ন চ ময্হং ছিন্নং হদযং, অত্থি করুণাপি ময্হং তুম্হেসু;
সগ্গঞ্চ পত্থযানো, তেন অহং [তেনাহং (সী. স্যা.), তেনমহং (পী.)] পব্বজিস্সামি’’.
‘‘দুল্লদ্ধং মে আসি, সুতসোম যস্স তে অহং ভরিযা;
যং মে ৰিলপন্তিযা, অনপেক্খো পব্বজসি দেৰ.
‘‘দুল্লদ্ধং মে আসি, সুতসোম যস্স তে অহং ভরিযা;
যং মে কুচ্ছিপটিসন্ধিং [মং কুচ্ছিমতিং সন্তিং (পী.)], অনপেক্খো ¶ পব্বজসি দেৰ.
‘‘পরিপক্কো মে গব্ভো, কুচ্ছিগতো যাৰ নং ৰিজাযামি;
মাহং একা ৰিধৰা, পচ্ছা দুক্খানি অদ্দক্খিং’’.
‘‘পরিপক্কো তে গব্ভো, কুচ্ছিগতো ইঙ্ঘ ত্ৰং [ত্ৰ (সী.), নং (পী.)] ৰিজাযস্সু;
পুত্তং অনোমৰণ্ণং, তং হিত্ৰা পব্বজিস্সামি’’.
‘‘মা ¶ ত্ৰং চন্দে রুদি, মা সোচি ৰনতিমিরমত্তক্খি;
আরোহ ৰরপাসাদং [চ পাসাদং (পী.)], অনপেক্খো অহং গমিস্সামি’’.
‘‘কো ¶ তং অম্ম কোপেসি, কিং রোদসি পেক্খসি চ মং বাল়্হং;
কং অৰজ্ঝং ঘাতেমি [ঘাতেমি কং অৰজ্ঝং (পী.), তং অৰজ্ঝং ঘাতেমি (ক.)], ঞাতীনং উদিক্খমানানং’’.
‘‘ন হি সো সক্কা হন্তুং, ৰিজিতাৰী [জীৰিতাৰী (পী.)] যো মং তাত কোপেসি;
পিতা তে মং তাত অৰচ, অনপেক্খো ¶ অহং গমিস্সামি’’.
‘‘যোহং পুব্বে নিয্যামি, উয্যানং মত্তকুঞ্জরে চ যোধেমি;
সুতসোমে পব্বজিতে, কথং নু দানি করিস্সামি’’.
‘‘মাতুচ্চ [মাতু চ (সী. স্যা.)] মে রুদন্ত্যা [রুদত্যা (পী.)], জেট্ঠস্স চ ভাতুনো অকামস্স;
হত্থেপি তে গহেস্সং, ন হি গচ্ছসি [গঞ্ছিসি (পী.)] নো অকামানং’’.
‘‘উট্ঠেহি ত্ৰং ধাতি, ইমং কুমারং রমেহি অঞ্ঞত্থ;
মা মে পরিপন্থমকাসি [মকা (সী. পী.)], সগ্গং মম পত্থযানস্স’’.
‘‘যং নূনিমং দদেয্যং [জহেয্যং (পী.)] পভঙ্করং, কো নু মে ইমিনাত্থো [কো নু মে ইমিনা অত্থো (সী. স্যা.), কো নু মে নত্থো (পী.)];
সুতসোমে পব্বজিতে, কিং নু মেনং করিস্সামি’’.
‘‘কোসো ¶ চ তুয্হং ৰিপুলো, কোট্ঠাগারঞ্চ তুয্হং পরিপূরং;
পথৰী চ তুয্হং ৰিজিতা, রমস্সু ¶ মা পব্বজি [পব্বজস্সু (সী.), পব্বজ (পী.)] দেৰ’’.
‘‘কোসো চ ময্হং ৰিপুলো, কোট্ঠাগারঞ্চ ময্হং পরিপূরং;
পথৰী চ ময্হং ৰিজিতা, তং হিত্ৰা পব্বজিস্সামি’’.
‘‘ময্হম্পি ধনং পহূতং, সঙ্খাতুং [সঙ্খ্যাতুং (সী.)] নোপি দেৰ সক্কোমি;
তং তে দদামি সব্বম্পি [তং দেৰ তে দদামি সব্বম্পি (সী.), তং তে দদামি সব্বং (পী.)], রমস্সু মা পব্বজি দেৰ’’.
‘‘জানামি [জানামি তে (সী. স্যা.)] ধনং পহূতং, কুলৰদ্ধন পূজিতো তযা চস্মি;
সগ্গঞ্চ পত্থযানো, তেন অহং পব্বজিস্সামি’’.
‘‘উক্কণ্ঠিতোস্মি বাল়্হং, অরতি মং সোমদত্ত আৰিসতি [আৰীসতি (ক.)];
বহুকাপি [বহুকা হি (সী. স্যা.)] মে অন্তরাযা, অজ্জেৰাহং পব্বজিস্সামি’’.
‘‘ইদঞ্চ তুয্হং রুচিতং, সুতসোম অজ্জেৰ দানি ত্ৰং পব্বজ;
অহম্পি পব্বজিস্সামি, ন ¶ উস্সহে তযা ৰিনা অহং ঠাতুং’’.
‘‘ন হি সক্কা পব্বজিতুং, নগরে ন হি পচ্চতি জনপদে চ’’;
‘‘সুতসোমে পব্বজিতে, কথং নু দানি করিস্সাম’’.
‘‘উপনীযতিদং মঞ্ঞে, পরিত্তং উদকংৰ চঙ্কৰারম্হি;
এৰং সুপরিত্তকে জীৰিতে, ন চ পমজ্জিতুং কালো.
‘‘উপনীযতিদং ¶ মঞ্ঞে, পরিত্তং উদকংৰ চঙ্কৰারম্হি;
এৰং সুপরিত্তকে জীৰিতে, অন্ধবালা [অথ বালা (সী. স্যা. পী.)] পমজ্জন্তি.
‘‘তে ৰড্ঢযন্তি নিরযং, তিরচ্ছানযোনিঞ্চ পেত্তিৰিসযঞ্চ;
তণ্হায বন্ধনবদ্ধা, ৰড্ঢেন্তি অসুরকাযং’’.
‘‘ঊহঞ্ঞতে ¶ রজগ্গং, অৰিদূরে পুব্বকম্হি চ [পুপ্ফকম্হি চ (সী. পী.)] পাসাদে;
মঞ্ঞে নো কেসা ছিন্না, যসস্সিনো ¶ ধম্মরাজস্স’’.
‘‘অযমস্স পাসাদো, সোৰণ্ণ [সোৰণ্ণো (পী.)] পুপ্ফমাল্যৰীতিকিণ্ণো;
যহি [যম্হি (পী.)] মনুৰিচরি রাজা, পরিকিণ্ণো ইত্থাগারেহি.
‘‘অযমস্স পাসাদো, সোৰণ্ণপুপ্ফমাল্যৰীতিকিণ্ণো;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘ইদমস্স কূটাগারং, সোৰণ্ণপুপ্ফমাল্যৰীতিকিণ্ণং;
যহিমনুৰিচরি রাজা, পরিকিণ্ণো ইত্থাগারেহি.
‘‘ইদমস্স কূটাগারং, সোৰণ্ণ [সোৰণ্ণং (পী.)] পুপ্ফমাল্যৰীতিকিণ্ণং;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘অযমস্স অসোকৰনিকা, সুপুপ্ফিতা সব্বকালিকা রম্মা;
যহিমনুৰিচরি রাজা, পরিকিণ্ণো ¶ ইত্থাগারেহি.
‘‘অযমস্স অসোকৰনিকা, সুপুপ্ফিতা সব্বকালিকা রম্মা;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘ইদমস্স উয্যানং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ইত্থাগারেহি.
‘‘ইদমস্স উয্যানং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘ইদমস্স কণিকারৰনং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ইত্থাগারেহি.
‘‘ইদমস্স কণিকারৰনং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ¶ ঞাতিসঙ্ঘেন.
‘‘ইদমস্স পাটলিৰনং [পাটলীৰনং (সী.)], সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ইত্থাগারেহি.
‘‘ইদমস্স পাটলিৰনং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘ইদমস্স ¶ ¶ অম্বৰনং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ইত্থাগারেহি.
‘‘ইদমস্স অম্বৰনং, সুপুপ্ফিতং সব্বকালিকং রম্মং;
যহিমনুৰিচরি রাজা, পরিকিণ্ণো ঞাতিসঙ্ঘেন.
‘‘অযমস্স পোক্খরণী, সঞ্ছন্না অণ্ডজেহি ৰীতিকিণ্ণা;
যহিমনুৰিচরি রাজা, পরিকিণ্ণো ¶ ইত্থাগারেহি.
‘‘অযমস্স পোক্খরণী, সঞ্ছন্না অণ্ডজেহি ৰীতিকিণ্ণা;
যহিমনুৰিচরি রাজা, পরিকিণ্ণো ঞাতিসঙ্ঘেন’’.
‘‘রাজা ৰো খো [রাজা খো (সী. স্যা. পী.)] পব্বজিতো, সুতসোমো রজ্জং ইমং পহত্ৰান [পহন্ত্ৰান (স্যা. ক.)];
কাসাযৰত্থৰসনো, নাগোৰ এককো [এককোৰ (সী.)] চরতি’’.
‘‘মাস্সু পুব্বে রতিকীল়িতানি, হসিতানি চ অনুস্সরিত্থ [অনুস্সরিত্থো (পী.)];
মা ৰো কামা হনিংসু, রম্মং হি [সুরম্মঞ্হি (স্যা. ক.)] সুদস্সনং [সুদস্সনং নাম (সী.)] নগরং.
‘‘মেত্তচিত্তঞ্চ [মেত্তঞ্চ (পী.)] ভাৰেথ, অপ্পমাণং দিৰা চ রত্তো চ;
অগচ্ছিত্থ [অথ গঞ্ছিত্থ (সী. স্যা. পী.)] দেৰপুর, আৰাসং পুঞ্ঞকম্মিন’’ন্তি [পুঞ্ঞকম্মানন্তি (পী.)].
চূল়সুতসোমজাতকং পঞ্চমং.
চত্তালীসনিপাতং নিট্ঠিতং.
তস্সুদ্দানং –
সুৰপণ্ডিতজম্বুককুণ্ডলিনো ¶ , ৰরকঞ্ঞমলম্বুসজাতকঞ্চ;
পৰরুত্তমসঙ্খসিরীৰ্হযকো, সুতসোমঅরিন্ধমরাজৰরো.
১৮. পণ্ণাসনিপাতো
৫২৬. নিল়িনিকাজাতকং (১)
‘‘উদ্দয্হতে ¶ ¶ ¶ [উড্ডয্হতে (সী. পী.)] জনপদো, রট্ঠঞ্চাপি ৰিনস্সতি;
এহি নিল়িনিকে [নিল়িকে (সী. স্যা. পী.), এৰমুপরিপি] গচ্ছ, তং মে ব্রাহ্মণমানয’’.
‘‘নাহং দুক্খক্খমা রাজ, নাহং অদ্ধানকোৰিদা;
কথং অহং গমিস্সামি, ৰনং কুঞ্জরসেৰিতং’’.
‘‘ফীতং জনপদং গন্ত্ৰা, হত্থিনা চ রথেন চ;
দারুসঙ্ঘাটযানেন, এৰং গচ্ছ নিল়িনিকে.
‘‘হত্থিঅস্সরথে পত্তী, গচ্ছেৰাদায খত্তিযে;
তৰেৰ ৰণ্ণরূপেন, ৰসং তমানযিস্সসি’’.
‘‘কদলীধজপঞ্ঞাণো, আভুজীপরিৰারিতো;
এসো পদিস্সতি রম্মো, ইসিসিঙ্গস্স অস্সমো.
‘‘এসো অগ্গিস্স সঙ্খাতো, এসো ধূমো পদিস্সতি;
মঞ্ঞে নো অগ্গিং হাপেতি, ইসিসিঙ্গো মহিদ্ধিকো’’.
‘‘তঞ্চ ¶ দিস্ৰান আযন্তিং, আমুত্তমণিকুণ্ডলং;
ইসিসিঙ্গো পাৰিসি ভীতো, অস্সমং পণ্ণছাদনং.
‘‘অস্সমস্স চ সা দ্ৰারে, গেণ্ডুকেনস্স [ভেণ্ডুকেনস্স (সী. পী.)] কীল়তি;
ৰিদংসযন্তী অঙ্গানি, গুয্হং পকাসিতানি চ.
‘‘তঞ্চ দিস্ৰান কীল়ন্তিং, পণ্ণসালগতো জটী;
অস্সমা নিক্খমিত্ৰান, ইদং ৰচনমব্রৰি.
‘‘অম্ভো কো নাম সো রুক্খো, যস্স তেৰংগতং ফলং;
দূরেপি খিত্তং পচ্চেতি, ন তং ওহায গচ্ছতি’’.
‘‘অস্সমস্স ¶ মম [মং (সী.)] ব্রহ্মে, সমীপে গন্ধমাদনে;
বহৰো [পব্বতে (সী.)] তাদিসা রুক্খা, যস্স তেৰংগতং ফলং;
দূরেপি খিত্তং পচ্চেতি, ন মং ওহায গচ্ছতি’’.
‘‘এতূ ¶ [এতু (সী. স্যা. ক.)] ভৰং অস্সমিমং অদেতু, পজ্জঞ্চ ভক্খঞ্চ পটিচ্ছ দম্মি;
ইদমাসনং অত্র ভৰং নিসীদতু, ইতো ভৰং মূলফলানি ভুঞ্জতু’’ [খাদতু (সী.)].
‘‘কিং তে ইদং ঊরূনমন্তরস্মিং, সুপিচ্ছিতং কণ্হরিৰপ্পকাসতি;
অক্খাহি মে পুচ্ছিতো এতমত্থং, কোসে নু তে উত্তমঙ্গং পৰিট্ঠং’’.
‘‘অহং ৰনে মূলফলেসনং চরং, আসাদযিং ¶ [অস্সাদযিং (ক.)] অচ্ছং সুঘোররূপং;
সো মং পতিত্ৰা সহসাজ্ঝপত্তো, পনুজ্জ মং অব্বহি [অব্বুহি (স্যা. ক.)] উত্তমঙ্গং.
‘‘স্ৰাযং ৰণো খজ্জতি কণ্ডুৰাযতি, সব্বঞ্চ কালং ন লভামি সাতং;
পহো ভৰং কণ্ডুমিমং ৰিনেতুং, কুরুতং ভৰং যাচিতো ব্রাহ্মণত্থং’’.
‘‘গম্ভীররূপো তে ৰণো সলোহিতো, অপূতিকো ৰণগন্ধো [পক্কগন্ধো (সী.), পন্নগন্ধো (স্যা. পী.)] মহা চ;
করোমি তে কিঞ্চি কসাযযোগং, যথা ভৰং পরমসুখী ভৰেয্য’’.
‘‘ন ¶ মন্তযোগা ন কসাযযোগা, ন ওসধা ব্রহ্মচারি [ব্রহ্মচারী (সী. স্যা. পী.)] কমন্তি;
ঘট্টে মুদুকেন [যং তে মুদু তেন (সী.), যং তে মুদূ তেন (পী.)] ৰিনেহি কণ্ডুং [কণ্ডুকং (পী.)], যথা অহং পরমসুখী ভৰেয্যং’’.
‘‘ইতো নু ভোতো কতমেন অস্সমো, কচ্চি ভৰং অভিরমসি [অভিরমসী (পী.)] অরঞ্ঞে;
কচ্চি নু তে [কচ্চি তে (পী.)] মূলফলং পহূতং, কচ্চি ভৰন্তং ন ৰিহিংসন্তি ৰাল়া’’.
‘‘ইতো ¶ উজুং উত্তরাযং দিসাযং, খেমানদী হিমৰতা পভাৰী [পভাতি (সী. পী.)];
তস্সা তীরে অস্সমো ময্হ রম্মো, অহো ভৰং অস্সমং ময্হং পস্সে.
‘‘অম্বা চ সালা তিলকা চ জম্বুযো, উদ্দালকা পাটলিযো চ ফুল্লা;
সমন্ততো কিম্পুরিসাভিগীতং, অহো ভৰং অস্সমং ময্হং পস্সে.
‘‘তালা চ মূলা চ ফলা চ মেত্থ, ৰণ্ণেন গন্ধেন উপেতরূপং;
তং ভূমিভাগেহি উপেতরূপং, অহো ভৰং অস্সমং ময্হং পস্সে.
‘‘ফলা চ মূলা চ পহূতমেত্থ, ৰণ্ণেন গন্ধেন রসেনুপেতা;
আযন্তি চ লুদ্দকা তং পদেসং, মা মে ততো মূলফলং অহাসুং’’.
‘‘পিতা মমং মূলফলেসনং গতো, ইদানি আগচ্ছতি সাযকালে;
উভোৰ গচ্ছামসে অস্সমং তং, যাৰ ¶ পিতা মূলফলতো এতু’’.
‘‘অঞ্ঞে ¶ বহূ ইসযো সাধুরূপা, রাজীসযো অনুমগ্গে ৰসন্তি;
তে যেৰ পুচ্ছেসি মমস্সমং তং, তে তং নযিস্সন্তি মমং সকাসে’’.
‘‘ন তে কট্ঠানি ভিন্নানি, ন তে উদকমাভতং;
অগ্গীপি তে ন হাপিতো [হাসিতো (সী. স্যা.)], কিং নু মন্দোৰ ঝাযসি.
‘‘ভিন্নানি কট্ঠানি হুতো চ অগ্গি, তপনীপি তে সমিতা ব্রহ্মচারী [ব্রহ্মচারি (?)];
পীঠঞ্চ ময্হং উদকঞ্চ হোতি, রমসি তুৰং [ত্ৰং (সী.)] ব্রহ্মভূতো পুরত্থা.
‘‘অভিন্নকট্ঠোসি ¶ অনাভতোদকো, অহাপিতগ্গীসি [অহাপিতগ্গীপি (ক.)] অসিদ্ধভোজনো [অসিট্ঠভোজনো (ক.)];
ন মে তুৰং আলপসী মমজ্জ, নট্ঠং নু কিং চেতসিকঞ্চ দুক্খং’’.
‘‘ইধাগমা জটিলো ব্রহ্মচারী, সুদস্সনেয্যো সুতনূ ৰিনেতি;
নেৰাতিদীঘো ন পনাতিরস্সো, সুকণ্হকণ্হচ্ছদনেহি ভোতো.
‘‘অমস্সুজাতো ¶ অপুরাণৰণ্ণী, আধাররূপঞ্চ পনস্স কণ্ঠে;
দ্ৰে যমা [দ্ৰে পস্স (সী.), দ্ৰাস্স (পী.)] গণ্ডা উরেসু জাতা, সুৰণ্ণতিন্দুকনিভা [সুৰণ্ণপিন্দূপনিভা (সী.), সুৰণ্ণতিণ্ডুসন্নিভা (স্যা.), সোৰন্নপিণ্ডূপনিভা (পী.)] পভস্সরা.
‘‘মুখঞ্চ তস্স ভুসদস্সনেয্যং, কণ্ণেসু লম্বন্তি চ কুঞ্চিতগ্গা;
তে জোতরে চরতো মাণৰস্স, সুত্তঞ্চ যং সংযমনং জটানং.
‘‘অঞ্ঞা ¶ চ তস্স সংযমানি [সংযমনী (সী. পী.)] চতস্সো, নীলা পীতা [নীলাপি তা (পী.)] লোহিতিকা [লোহিতকা (স্যা. পী. ক.)] চ সেতা;
তা পিংসরে [সংসরে (সী. স্যা.)] চরতো মাণৰস্স, তিরিটি [চিরীটি (সী. পী.)] সঙ্ঘারিৰ পাৰুসম্হি.
‘‘ন মিখলং মুঞ্জমযং ধারেতি, ন সন্থরে [সন্তচে (সী.), সন্তচং (পী.), সন্তরে (ক.)] নো পন পব্বজস্স;
তা জোতরে জঘনন্তরে [জঘনৰরে (সী. পী.)] ৰিলগ্গা, সতেরতা ৰিজ্জুরিৰন্তলিক্খে.
‘‘অখীলকানি চ অৰণ্টকানি, হেট্ঠা নভ্যা কটিসমোহিতানি;
অঘট্টিতা নিচ্চকীল়ং করোন্তি, হং তাত কিংরুক্খফলানি তানি.
‘‘জটা ¶ চ তস্স ভুসদস্সনেয্যা, পরোসতং ৰেল্লিতগ্গা সুগন্ধা;
দ্ৰেধা সিরো সাধু ৰিভত্তরূপো, অহো নু খো ময্হ তথা জটাস্সু.
‘‘যদা চ সো পকিরতি তা জটাযো, ৰণ্ণেন গন্ধেন উপেতরূপা;
নীলুপ্পলং ৰাতসমেরিতংৰ, তথেৰ সংৰাতি পনস্সমো অযং.
‘‘পঙ্কো চ তস্স ভুসদস্সনেয্যো, নেতাদিসো যাদিসো ময্হং কাযে [কাযো (সী. স্যা. পী.)];
সো ৰাযতী এরিতো মালুতেন, ৰনং যথা অগ্গগিম্হে সুফুল্লং.
‘‘নিহন্তি ¶ সো রুক্খফলং পথব্যা, সুচিত্তরূপং রুচিরং দস্সনেয্যং;
খিত্তঞ্চ তস্স পুনরেতি হত্থং, হং তাত কিংরুক্খফলং নু খো তং.
‘‘দন্তা চ তস্স ভুসদস্সনেয্যা, সুদ্ধা সমা সঙ্খৰরূপপন্না;
মনো পসাদেন্তি ৰিৰরিযমানা, ন হি [ন হ (সী. পী.)] নূন সো সাকমখাদি তেহি.
‘‘অকক্কসং ¶ অগ্গল়িতং মুহুং মুদুং, উজুং অনুদ্ধতং অচপলমস্স ভাসিতং;
রুদং মনুঞ্ঞং করৰীকসুস্সরং, হদযঙ্গমং রঞ্জযতেৰ মে মনো.
‘‘বিন্দুস্সরো নাতিৰিসট্ঠৰাক্যো [নাতিৰিস্সট্ঠৰাক্যো (সী. স্যা. পী.)], ন নূন সজ্ঝাযমতিপ্পযুত্তো;
ইচ্ছামি ভো [খো (সী. স্যা. পী.)] তং পুনদেৰ দট্ঠুং, মিত্তো হি [মিত্তং হি (সী. স্যা. পী.)] মে মাণৰোহু [মাণৰাহু (সী. স্যা.), মাণৰাহূ (পী.)] পুরত্থা.
‘‘সুসন্ধি ¶ সব্বত্থ ৰিমট্ঠিমং ৰণং, পুথূ [পুথুং (পী.), পুথু (ক.)] সুজাতং খরপত্তসন্নিভং;
তেনেৰ মং উত্তরিযান মাণৰো, ৰিৰরিতং ঊরুং জঘনেন পীল়যি.
‘‘তপন্তি আভন্তি ৰিরোচরে চ, সতেরতা ৰিজ্জুরিৰন্তলিক্খে;
বাহা মুদূ অঞ্জনলোমসাদিসা, ৰিচিত্রৰট্টঙ্গুলিকাস্স সোভরে.
‘‘অকক্কসঙ্গো ¶ ন চ দীঘলোমো, নখাস্স দীঘা অপি লোহিতগ্গা;
মুদূহি বাহাহি পলিস্সজন্তো, কল্যাণরূপো রমযং [রময্হং (ক.)] উপট্ঠহি.
‘‘দুমস্স ¶ তূলূপনিভা পভস্সরা, সুৰণ্ণকম্বুতলৰট্টসুচ্ছৰী;
হত্থা মুদূ তেহি মং সংফুসিত্ৰা, ইতো গতো তেন মং দহন্তি তাত.
‘‘ন নূন [ন হ নূন (সী. পী.)] সো খারিৰিধং অহাসি, ন নূন সো কট্ঠানি সযং অভঞ্জি;
ন নূন সো হন্তি দুমে কুঠারিযা [কুধারিযা (ক.)], ন হিস্স [ন পিস্স (সী. স্যা. পী.)] হত্থেসু খিলানি অত্থি.
‘‘অচ্ছো চ খো তস্স ৰণং অকাসি, সো মংব্রৰি সুখিতং মং করোহি;
তাহং করিং তেন মমাসি সোখ্যং, সো চব্রৰি সুখিতোস্মীতি ব্রহ্মে.
‘‘অযঞ্চ তে মালুৰপণ্ণসন্থতা, ৰিকিণ্ণরূপাৰ মযা চ তেন চ;
কিলন্তরূপা উদকে রমিত্ৰা, পুনপ্পুনং পণ্ণকুটিং ৰজাম.
‘‘ন মজ্জ মন্তা পটিভন্তি তাত, ন অগ্গিহুত্তং নপি যঞ্ঞতন্তং [যঞ্ঞতন্ত্রং (সী.), যঞ্ঞং তত্র (পী. ক.), যঞ্ঞতত্র (স্যা.)];
ন চাপি তে মূলফলানি ভুঞ্জে, যাৰ ¶ ন পস্সামি তং ব্রহ্মচারিং.
‘‘অদ্ধা ¶ পজানাসি তুৰম্পি তাত, যস্সং দিসং [দিসাযং (স্যা. পী. ক.)] ৰসতে ব্রহ্মচারী;
তং মং দিসং পাপয তাত খিপ্পং, মা তে অহং অমরিমস্সমম্হি.
‘‘ৰিচিত্রফুল্লং [ৰিচিত্রপুপ্ফং (সী. পী.)] হি ৰনং সুতং মযা, দিজাভিঘুট্ঠং দিজসঙ্ঘসেৰিতং;
তং মং ৰনং পাপয তাত খিপ্পং, পুরা তে পাণং ৰিজহামি অস্সমে’’.
‘‘ইমস্মাহং জোতিরসে ৰনম্হি, গন্ধব্বদেৰচ্ছরসঙ্ঘসেৰিতে;
ইসীনমাৰাসে সনন্তনম্হি, নেতাদিসং অরতিং পাপুণেথ.
‘‘ভৰন্তি মিত্তানি অথো ন হোন্তি, ঞাতীসু মিত্তেসু করোন্তি পেমং;
অযঞ্চ জম্মো কিস্স ৰা নিৰিট্ঠো, যো নেৰ জানাতি কুতোম্হি আগতো.
‘‘সংৰাসেন হি মিত্তানি, সন্ধিযন্তি [সন্ধীযন্তি (সী. পী.)] পুনপ্পুনং;
স্ৰেৰ মিত্তো [সা চ মেত্তি (পী.)] অসংগন্তু, অসংৰাসেন জীরতি.
‘‘সচে ¶ তুৰং দক্খসি ব্রহ্মচারিং, সচে তুৰং সল্লপে [সল্লপি (সী.)] ব্রহ্মচারিনা;
সম্পন্নসস্সংৰ মহোদকেন, তপোগুণং খিপ্পমিমং পহিস্সসি [পহস্সসি (সী. স্যা. পী.)].
‘‘পুনপি ¶ [পুনপ্পি (পী.)] চে দক্খসি ব্রহ্মচারিং, পুনপি [পুনপ্পি (পী.)] চে সল্লপে ব্রহ্মচারিনা;
সম্পন্নসস্সংৰ মহোদকেন, উস্মাগতং খিপ্পমিমং পহিস্সসি.
‘‘ভূতানি ¶ হেতানি [এতানি (পী.)] চরন্তি তাত, ৰিরূপরূপেন মনুস্সলোকে;
ন তানি সেৰেথ নরো সপঞ্ঞো, আসজ্জ নং নস্সতি ব্রহ্মচারী’’তি.
নিল়িনিকাজাতকং [নল়িনীজাতকং (সী.), নল়িনিজাতকং (পী.)] পঠমং.
৫২৭. উম্মাদন্তীজাতকং (২)
‘‘নিৰেসনং কস্স নুদং সুনন্দ, পাকারেন পণ্ডুমযেন গুত্তং;
কা দিস্সতি অগ্গিসিখাৰ দূরে, ৰেহাযসং [ৰেহাসযং (সী. পী.)] পব্বতগ্গেৰ অচ্চি.
‘‘ধীতা ¶ ন্ৰযং [নযং (সী. পী.), ন্ৰাযং (স্যা.)] কস্স সুনন্দ হোতি, সুণিসা ন্ৰযং [নযং (সী. পী.), ন্ৰাযং (স্যা.)] কস্স অথোপি ভরিযা;
অক্খাহি মে খিপ্পমিধেৰ পুট্ঠো, অৰাৰটা যদি ৰা অত্থি ভত্তা’’.
‘‘অহঞ্হি জানামি জনিন্দ এতং, মত্যা চ পেত্যা চ অথোপি অস্সা;
তৰেৰ সো পুরিসো ভূমিপাল, রত্তিন্দিৰং অপ্পমত্তো তৰত্থে.
‘‘ইদ্ধো চ ফীতো চ সুৰড্ঢিতো [সুবাল়্হিকো (পী.)] চ, অমচ্চো চ তে অঞ্ঞতরো জনিন্দ;
তস্সেসা ভরিযাভিপারকস্স [অহিপারকস্স (সী. পী.), অভিপাদকস্স (ক.)], উম্মাদন্তী [উম্মাদন্তীতি (ক.)] নামধেয্যেন রাজ’’.
‘‘অম্ভো ¶ অম্ভো নামমিদং ইমিস্সা, মত্যা চ পেত্যা চ কতং সুসাধু;
তদা [তথা (সী. স্যা. পী.)] হি ময্হং অৰলোকযন্তী, উম্মত্তকং উম্মদন্তী অকাসি’’.
‘‘যা পুণ্ণমাসে [পুণ্ণমাযে (ক.)] মিগমন্দলোচনা, উপাৰিসি পুণ্ডরীকত্তচঙ্গী;
দ্ৰে পুণ্ণমাযো তদহূ অমঞ্ঞহং, দিস্ৰান পারাৰতরত্তৰাসিনিং.
‘‘অল়ারপম্হেহি ¶ সুভেহি ৰগ্গুভি, পলোভযন্তী মং যদা উদিক্খতি;
ৰিজম্ভমানা হরতেৰ মে মনো, জাতা ৰনে কিম্পুরিসীৰ পব্বতে.
‘‘তদা হি ব্রহতী সামা, আমুত্তমণিকুণ্ডলা;
একচ্চৰসনা নারী, মিগী ভন্তাৰুদিক্খতি.
‘‘কদাস্সু মং তম্বনখা সুলোমা, বাহামুদূ চন্দনসারলিত্তা;
ৰট্টঙ্গুলী সন্নতধীরকুত্তিযা, নারী উপঞ্ঞিস্সতি সীসতো সুভা.
‘‘কদাস্সু মং কঞ্চনজালুরচ্ছদা, ধীতা তিরীটিস্স ৰিলগ্গমজ্ঝা;
মুদূহি বাহাহি পলিস্সজিস্সতি, ব্রহাৰনে জাতদুমংৰ মালুৰা.
‘‘কদাস্সু ¶ [কদাস্সু মং (স্যা. ক.)] লাখারসরত্তসুচ্ছৰী, বিন্দুত্থনী পুণ্ডরীকত্তচঙ্গী;
মুখং মুখেন উপনামযিস্সতি, সোণ্ডোৰ সোণ্ডস্স সুরায থালং.
‘‘যদাদ্দসং [যথাদ্দসং (পী.)] তং তিট্ঠন্তিং, সব্বভদ্দং [সব্বগত্তং (সী. স্যা. পী.)] মনোরমং;
ততো ¶ সকস্স চিত্তস্স, নাৰবোধামি কঞ্চিনং [কিঞ্চিনং (ক.), কিঞ্চনং (পী.)].
‘‘উম্মাদন্তিমহং ¶ দট্ঠা [দিট্ঠা (সী. স্যা. পী. ক.)], আমুত্তমণিকুণ্ডলং;
ন সুপামি দিৰারত্তিং, সহস্সংৰ পরাজিতো.
‘‘সক্কো চে [চ (সী. পী.)] মে ৰরং দজ্জা, সো চ লব্ভেথ মে ৰরো;
একরত্তং দ্ৰিরত্তং [দিরত্তং (পী.)] ৰা, ভৰেয্যং অভিপারকো;
উম্মাদন্ত্যা রমিত্ৰান, সিৰিরাজা ততো সিযং’’ [সিযা (স্যা. পী.)].
‘‘ভূতানি মে ভূতপতী নমস্সতো, আগম্ম যক্খো ইদমেতদব্রৰি;
রঞ্ঞো মনো উম্মদন্ত্যা নিৰিট্ঠো, দদামি তে তং পরিচারযস্সু’’.
‘‘পুঞ্ঞা ৰিধংসে অমরো ন চম্হি, জনো চ মে পাপমিদঞ্চ [পাপমিদন্তি (সী. পী.)] জঞ্ঞা;
ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.
‘‘জনিন্দ নাঞ্ঞত্র তযা মযা ৰা, সব্বাপি কম্মস্স কতস্স জঞ্ঞা;
যং তে মযা উম্মদন্তী পদিন্না, ভুসেহি রাজা ৰনথং সজাহি’’.
‘‘যো পাপকং কম্ম করং মনুস্সো, সো ¶ মঞ্ঞতি মাযিদ [মাযিধ (ক.)] মঞ্ঞিংসু অঞ্ঞে;
পস্সন্তি ভূতানি করোন্তমেতং, যুত্তা চ যে হোন্তি নরা পথব্যা.
‘‘অঞ্ঞো নু তে কোচি [কোধ (পী.)] নরো পথব্যা, সদ্ধেয্য [সদ্দহেয্য (সী.)] লোকস্মি ন মে পিযাতি;
ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.
‘‘অদ্ধা ¶ পিযা ময্হ জনিন্দ এসা, ন সা মমং অপ্পিযা ভূমিপাল;
গচ্ছেৰ ত্ৰং উম্মদন্তিং ভদন্তে, সীহোৰ সেলস্স গুহং উপেতি’’.
‘‘ন পীল়িতা অত্তদুখেন ধীরা, সুখপ্ফলং কম্ম পরিচ্চজন্তি;
সম্মোহিতা ৰাপি সুখেন মত্তা, ন পাপকম্মঞ্চ [পাপকং কম্ম (পী.)] সমাচরন্তি’’.
‘‘তুৰঞ্হি মাতা চ পিতা চ ময্হং, ভত্তা পতী পোসকো দেৰতা চ;
দাসো অহং তুয্হ সপুত্তদারো, যথাসুখং সামি [সিব্ব (সী.), সীৰি (স্যা.)] করোহি কামং’’.
‘‘যো ইস্সরোম্হীতি করোতি পাপং, কত্ৰা ¶ চ সো নুত্তসতে [নুত্তপতে (পী.)] পরেসং;
ন তেন সো জীৰতি দীঘমাযু [দীঘমাযুং (সী. স্যা.)], দেৰাপি পাপেন সমেক্খরে নং.
‘‘অঞ্ঞাতকং সামিকেহী পদিন্নং, ধম্মে ঠিতা যে পটিচ্ছন্তি দানং;
পটিচ্ছকা দাযকা চাপি তত্থ, সুখপ্ফলঞ্ঞেৰ করোন্তি কম্মং’’.
‘‘অঞ্ঞো ¶ নু তে কোচি নরো পথব্যা, সদ্ধেয্য লোকস্মি ন মে পিযাতি;
ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.
‘‘অদ্ধা পিযা ময্হ জনিন্দ এসা, ন সা মমং অপ্পিযা ভূমিপাল;
যং তে মযা উম্মদন্তী পদিন্না, ভুসেহি রাজা ৰনথং সজাহি’’.
‘‘যো ¶ অত্তদুক্খেন পরস্স দুক্খং, সুখেন ৰা অত্তসুখং দহাতি;
যথেৰিদং ময্হ তথা পরেসং, যো [সো (পী.)] এৰং জানাতি [পজানাতি (ক.)] স ৰেদি ধম্মং.
‘‘অঞ্ঞো নু তে কোচি নরো পথব্যা, সদ্ধেয্য ¶ লোকস্মি ন মে পিযাতি;
ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.
‘‘জনিন্দ জানাসি পিযা মমেসা, ন সা মমং অপ্পিযা ভূমিপাল;
পিযেন তে দম্মি পিযং জনিন্দ, পিযদাযিনো দেৰ পিযং লভন্তি’’.
‘‘সো নূনাহং ৰধিস্সামি, অত্তানং কামহেতুকং;
ন হি ধম্মং অধম্মেন, অহং ৰধিতুমুস্সহে’’.
‘‘সচে তুৰং ময্হ সতিং [সন্তি (ক.)] জনিন্দ, ন কামযাসি নরৰীর সেট্ঠ;
চজামি নং সব্বজনস্স সিব্যা [সিব্ব (সী. পী.), মজ্ঝে (স্যা.)], মযা পমুত্তং ততো অৰ্হযেসি [অৰ্হযাসি (ক.)] নং’’.
‘‘অদূসিযং চে অভিপারক ত্ৰং, চজাসি কত্তে অহিতায ত্যস্স;
মহা চ তে উপৰাদোপি অস্স, ন চাপি ত্যস্স নগরম্হি পক্খো’’.
‘‘অহং সহিস্সং উপৰাদমেতং, নিন্দং পসংসং গরহঞ্চ সব্বং;
মমেতমাগচ্ছতু ভূমিপাল, যথাসুখং ¶ সিৰি [সিব্ব (সী. পী.)] করোহি কামং’’.
‘‘যো ¶ নেৰ নিন্দং ন পনপ্পসংসং, আদিযতি গরহং নোপি পূজং;
সিরী চ লক্খী চ অপেতি তম্হা, আপো সুৰুট্ঠীৰ যথা থলম্হা’’.
‘‘যং কিঞ্চি দুক্খঞ্চ সুখঞ্চ এত্তো, ধম্মাতিসারঞ্চ মনোৰিঘাতং;
উরসা অহং পচ্চুত্তরিস্সামি [পটিচ্ছিস্সামি (সী. স্যা.), পচ্চুপদিস্সামি (পী.)] সব্বং, পথৰী যথা থাৰরানং তসানং’’.
‘‘ধম্মাতিসারঞ্চ মনোৰিঘাতং, দুক্খঞ্চ নিচ্ছামি অহং পরেসং;
একোৰিমং হারযিস্সামি ভারং, ধম্মে ঠিতো কিঞ্চি অহাপযন্তো’’.
‘‘সগ্গূপগং পুঞ্ঞকম্মং জনিন্দ, মা মে তুৰং অন্তরাযং অকাসি;
দদামি তে উম্মদন্তিং পসন্নো, রাজাৰ যঞ্ঞে ধনং ব্রাহ্মণানং’’.
‘‘অদ্ধা তুৰং কত্তে হিতেসি ময্হং, সখা মমং উম্মদন্তী তুৰঞ্চ;
নিন্দেয্যু দেৰা পিতরো চ সব্বে, পাপঞ্চ ¶ পস্সং অভিসম্পরাযং’’.
‘‘ন হেতধম্মং সিৰিরাজ ৰজ্জুং, সনেগমা জানপদা চ সব্বে;
যং তে মযা উম্মদন্তী পদিন্না, ভুসেহি রাজা ৰনথং সজাহি’’.
‘‘অদ্ধা ¶ তুৰং কত্তে হিতেসি ময্হং, সখা মমং উম্মদন্তী তুৰঞ্চ;
সতঞ্চ ধম্মানি সুকিত্তিতানি, সমুদ্দৰেলাৰ দুরচ্চযানি’’.
‘‘আহুনেয্যো ¶ মেসি হিতানুকম্পী, ধাতা ৰিধাতা চসি কামপালো;
তযী হুতা রাজ মহপ্ফলা হি [মহপ্ফলা হি মে (পী.)], কামেন মে উম্মদন্তিং পটিচ্ছ’’.
‘‘অদ্ধা হি সব্বং অভিপারক ত্ৰং, ধম্মং অচারী মম কত্তুপুত্ত;
অঞ্ঞো নু তে কো ইধ সোত্থিকত্তা, দ্ৰিপদো নরো অরুণে জীৰলোকে’’.
‘‘তুৰং নু সেট্ঠো ত্ৰমনুত্তরোসি, ত্ৰং ধম্মগূ [ধম্মগুত্তো (সী.)] ধম্মৰিদূ সুমেধো;
সো ধম্মগুত্তো চিরমেৰ জীৰ, ধম্মঞ্চ ¶ মে দেসয ধম্মপাল’’.
‘‘তদিঙ্ঘ অভিপারক, সুণোহি ৰচনং মম;
ধম্মং তে দেসযিস্সামি, সতং আসেৰিতং অহং.
‘‘সাধু ধম্মরুচি রাজা, সাধু পঞ্ঞাণৰা নরো;
সাধু মিত্তানমদ্দুব্ভো, পাপস্সাকরণং সুখং.
‘‘অক্কোধনস্স ৰিজিতে, ঠিতধম্মস্স রাজিনো;
সুখং মনুস্সা আসেথ, সীতচ্ছাযায সঙ্ঘরে.
‘‘ন চাহমেতং অভিরোচযামি, কম্মং অসমেক্খকতং অসাধু;
যে ৰাপি ঞত্ৰান সযং করোন্তি, উপমা ইমা ময্হং তুৰং সুণোহি.
‘‘গৰং চে তরমানানং, জিম্হং গচ্ছতি পুঙ্গৰো;
সব্বা তা জিম্হং গচ্ছন্তি, নেত্তে জিম্হং গতে সতি.
‘‘এৰমেৰ [এৰমেৰং (পী.)] মনুস্সেসু, যো হোতি সেট্ঠসম্মতো;
সো চে অধম্মং চরতি, পগেৰ ইতরা পজা;
সব্বং ¶ রট্ঠং দুখং সেতি, রাজা চে হোতি অধম্মিকো.
‘‘গৰং ¶ চে তরমানানং, উজুং গচ্ছতি পুঙ্গৰো;
সব্বা গাৰী উজুং যন্তি, নেত্তে উজুং গতে সতি.
‘‘এৰমেৰ মনুস্সেসু, যো হোতি সেট্ঠসম্মতো;
সো সচে ধম্মং চরতি, পগেৰ ইতরা পজা;
সব্বং রট্ঠং সুখং সেতি, রাজা চে হোতি ধম্মিকো.
‘‘ন চাপাহং অধম্মেন, অমরত্তমভিপত্থযে;
ইমং ৰা পথৰিং সব্বং, ৰিজেতুং অভিপারক.
‘‘যঞ্হি কিঞ্চি মনুস্সেসু, রতনং ইধ ৰিজ্জতি;
গাৰো দাসো হিরঞ্ঞঞ্চ, ৰত্থিযং হরিচন্দনং.
‘‘অস্সিত্থিযো ¶ [অস্সিত্থিযো চ (সী.)] রতনং মণিকঞ্চ, যঞ্চাপি মে চন্দসূরিযা অভিপালযন্তি;
ন তস্স হেতু ৰিসমং চরেয্যং, মজ্ঝে সিৰীনং উসভোম্হি জাতো.
‘‘নেতা হিতা [নেতাভি তা (সী.)] উগ্গতো রট্ঠপালো, ধম্মং সিৰীনং অপচাযমানো;
সো ধম্মমেৰানুৰিচিন্তযন্তো, তস্মা সকে চিত্তৰসে ন ৰত্তো’’.
‘‘অদ্ধা তুৰং মহারাজ, নিচ্চং অব্যসনং সিৰং;
করিস্সসি চিরং রজ্জং, পঞ্ঞা হি তৰ তাদিসী.
‘‘এতং তে অনুমোদাম, যং ধম্মং নপ্পমজ্জসি;
ধম্মং পমজ্জ খত্তিযো, রট্ঠা [ঠানা (সী.)] চৰতি ইস্সরো.
‘‘ধম্মং চর মহারাজ, মাতাপিতূসু খত্তিয;
ইধ ¶ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, পুত্তদারেসু খত্তিয…পে….
‘‘ধম্মং চর মহারাজ, মিত্তামচ্চেসু খত্তিয…পে….
‘‘ধম্মং চর মহারাজ, ৰাহনেসু বলেসু চ…পে….
‘‘ধম্মং চর মহারাজ, গামেসু নিগমেসু চ…পে….
‘‘ধম্মং ¶ চর মহারাজ, রট্ঠেসু জনপদেসু চ…পে….
‘‘ধম্মং চর মহারাজ, সমণব্রাহ্মণেসু চ…পে….
‘‘ধম্মং চর মহারাজ, মিগপক্খীসু খত্তিয…পে….
‘‘ধম্মং চর মহারাজ, ধম্মো চিণ্ণো সুখাৰহো;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, সইন্দা দেৰা সব্রহ্মকা;
সুচিণ্ণেন দিৰং পত্তা, মা ধম্মং রাজ পামদো’’তি.
উম্মাদন্তীজাতকং দুতিযং.
৫২৮. মহাবোধিজাতকং (৩)
‘‘কিং ¶ নু দণ্ডং কিমজিনং, কিং ছত্তং কিমুপাহনং;
কিমঙ্কুসঞ্চ পত্তঞ্চ, সঙ্ঘাটিঞ্চাপি ব্রাহ্মণ;
তরমানরূপোহাসি [গণ্হাসি (সী. স্যা. পী.)], কিং নু পত্থযসে দিসং’’.
‘‘দ্ৰাদসেতানি ¶ ৰস্সানি, ৰুসিতানি তৰন্তিকে;
নাভিজানামি সোণেন, পিঙ্গলেনাভিকূজিতং.
‘‘স্ৰাযং দিত্তোৰ নদতি, সুক্কদাঠং ৰিদংসযং;
তৰ সুত্ৰা সভরিযস্স, ৰীতসদ্ধস্স মং পতি’’.
‘‘অহু এস কতো দোসো, যথা ভাসসি ব্রাহ্মণ;
এস ভিয্যো পসীদামি, ৰস ব্রাহ্মণ মাগমা’’.
‘‘সব্বসেতো পুরে আসি, ততোপি সবলো অহু;
সব্বলোহিতকো দানি, কালো পক্কমিতুং মম.
‘‘অব্ভন্তরং পুরে আসি, ততো মজ্ঝে ততো বহি;
পুরা নিদ্ধমনা হোতি, সযমেৰ ৰজামহং.
‘‘ৰীতসদ্ধং ন সেৰেয্য, উদপানংৰনোদকং;
সচেপি নং অনুখণে, ৰারি কদ্দমগন্ধিকং.
‘‘পসন্নমেৰ সেৰেয্য, অপ্পসন্নং ৰিৰজ্জযে;
পসন্নং পযিরুপাসেয্য, রহদং ৰুদকত্থিকো.
‘‘ভজে ¶ ভজন্তং পুরিসং, অভজন্তং ন ভজ্জযে [ভাজযে (পী.)];
অসপ্পুরিসধম্মো সো, যো ভজন্তং ন ভজ্জতি [ভাজতি (পী.)].
‘‘যো ¶ ভজন্তং ন ভজতি, সেৰমানং ন সেৰতি;
স ৰে মনুস্সপাপিট্ঠো, মিগো সাখস্সিতো যথা.
‘‘অচ্চাভিক্খণসংসগ্গা, অসমোসরণেন চ;
এতেন মিত্তা জীরন্তি, অকালে যাচনায চ.
‘‘তস্মা নাভিক্খণং গচ্ছে, ন চ গচ্ছে চিরাচিরং;
কালেন যাচং যাচেয্য, এৰং মিত্তা ন জীযরে [জীররে (স্যা. পী.)].
‘‘অতিচিরং নিৰাসেন, পিযো ভৰতি অপ্পিযো;
আমন্ত খো তং গচ্ছাম, পুরা তে হোম অপ্পিযা’’.
‘‘এৰং চে যাচমানানং, অঞ্জলিং নাৰবুজ্ঝসি;
পরিচারকানং সতং [পরিচারিকানং সত্তানং (সী. স্যা. পী.)], ৰচনং ন করোসি নো;
এৰং তং অভিযাচাম, পুন কযিরাসি পরিযাযং’’.
‘‘এৰং চে নো ৰিহরতং, অন্তরাযো ন হেস্সতি;
তুয্হং ৰাপি [তুম্হঞ্চাপি (সী.), তুয্হঞ্চাপি (পী.)] মহারাজ, ময্হং ৰা [অম্হং ৰা (সী.), ময্হঞ্চ (পী.)] রট্ঠৰদ্ধন;
অপ্পেৰ নাম পস্সেম, অহোরত্তানমচ্চযে’’.
‘‘উদীরণা ¶ চে সংগত্যা, ভাৰায মনুৰত্ততি;
অকামা অকরণীযং ৰা, করণীযং ৰাপি কুব্বতি;
আকামাকরণীযম্হি, ক্ৰিধ পাপেন লিপ্পতি [লিম্পতি (স্যা. ক.)].
‘‘সো চে অত্থো চ ধম্মো চ, কল্যাণো ন চ পাপকো;
ভোতো চে ৰচনং সচ্চং, সুহতো ৰানরো মযা.
‘‘অত্তনো চে হি ৰাদস্স, অপরাধং ৰিজানিযা [ৰিজানিয (সী. স্যা. পী.)];
ন ¶ মং ত্ৰং গরহেয্যাসি, ভোতো ৰাদো হি তাদিসো’’.
‘‘ইস্সরো ¶ সব্বলোকস্স, সচে কপ্পেতি জীৰিতং;
ইদ্ধিং [ইদ্ধি (পী. ক.)] ব্যসনভাৰঞ্চ, কম্মং কল্যাণপাপকং;
নিদ্দেসকারী পুরিসো, ইস্সরো তেন লিপ্পতি.
‘‘সো চে অত্থো চ ধম্মো চ, কল্যাণো ন চ পাপকো;
ভোতো চে ৰচনং সচ্চং, সুহতো ৰানরো মযা.
‘‘অত্তনো চে হি ৰাদস্স, অপরাধং ৰিজানিযা;
ন মং ত্ৰং গরহেয্যাসি, ভোতো ৰাদো হি তাদিসো’’.
‘‘সচে পুব্বেকতহেতু, সুখদুক্খং নিগচ্ছতি;
পোরাণকং কতং পাপং, তমেসো মুচ্চতে [মুঞ্চতে (সী. স্যা.)] ইণং;
পোরাণকইণমোক্খো, ক্ৰিধ পাপেন লিপ্পতি.
‘‘সো চে অত্থো চ ধম্মো চ, কল্যাণো ন চ পাপকো;
ভোতো চে ৰচনং সচ্চং, সুহতো ৰানরো মযা.
‘‘অত্তনো চে হি ৰাদস্স, অপরাধং ৰিজানিযা;
ন মং ত্ৰং গরহেয্যাসি, ভোতো ৰাদো হি তাদিসো’’.
‘‘চতুন্নংযেৰুপাদায, রূপং সম্ভোতি পাণিনং;
যতো চ রূপং সম্ভোতি, তত্থেৰানুপগচ্ছতি;
ইধেৰ জীৰতি জীৰো, পেচ্চ পেচ্চ ৰিনস্সতি.
উচ্ছিজ্জতি অযং লোকো, যে বালা যে চ পণ্ডিতা;
উচ্ছিজ্জমানে লোকস্মিং, ক্ৰিধ পাপেন লিপ্পতি.
‘‘সো ¶ চে অত্থো চ ধম্মো চ, কল্যাণো ন চ পাপকো;
ভোতো চে ৰচনং সচ্চং, সুহতো ৰানরো মযা.
‘‘অত্তনো চে হি ৰাদস্স, অপরাধং ৰিজানিযা;
ন মং ত্ৰং গরহেয্যাসি, ভোতো ৰাদো হি তাদিসো’’.
‘‘আহু ¶ খত্তৰিদা [খত্তৰিধা (সী. স্যা. পী.)] লোকে, বালা পণ্ডিতমানিনো.
মাতরং পিতরং হঞ্ঞে, অথো জেট্ঠম্পি ভাতরং;
হনেয্য পুত্ত [পুত্তে চ (পী.)] দারে চ, অত্থো চে তাদিসো সিযা.
‘‘যস্স ¶ রুক্খস্স ছাযায, নিসীদেয্য সযেয্য ৰা;
ন তস্স সাখং ভঞ্জেয্য, মিত্তদুব্ভো [মিত্তদূভী (পী.)] হি পাপকো.
‘‘অথ অত্থে সমুপ্পন্নে, সমূলমপি অব্বহে [অব্ভহে (স্যা. ক.)];
অত্থো মে সম্বলেনাপি, সুহতো ৰানরো মযা.
[অযং গাথা সীহল়পোত্থকে নত্থি] ‘‘সো চে অত্থো চ ধম্মো চ, কল্যাণো ন চ পাপকো;
ভোতো চে ৰচনং সচ্চং, সুহতো ৰানরো মযা [অযং গাথা সীহল়পোত্থকে নত্থি].
‘‘অত্তনো চে হি ৰাদস্স, অপরাধং ৰিজানিযা;
ন মং ত্ৰং গরহেয্যাসি, ভোতো ৰাদো হি তাদিসো.
‘‘অহেতুৰাদো পুরিসো, যো চ ইস্সরকুত্তিকো;
পুব্বেকতী চ উচ্ছেদী, যো চ খত্তৰিদো নরো.
‘‘এতে অসপ্পুরিসা লোকে, বালা পণ্ডিতমানিনো;
করেয্য তাদিসো পাপং, অথো অঞ্ঞম্পি কারযে;
অসপ্পুরিসসংসগ্গো ¶ , দুক্খন্তো [দুক্কটো (সী.)] কটুকুদ্রযো.
‘‘উরব্ভরূপেন ৰকস্সু [বকাসু (সী. স্যা.), ৰকাসু (পী.)] পুব্বে, অসংকিতো অজযূথং উপেতি;
হন্ত্ৰা উরণিং অজিকং [অজিযং (সী. স্যা. পী.)] অজঞ্চ, উত্রাসযিত্ৰা [চিত্রাসযিত্ৰা (সী. পী.)] যেন কামং পলেতি.
‘‘তথাৰিধেকে সমণব্রাহ্মণাসে, ছদনং কত্ৰা ৰঞ্চযন্তি মনুস্সে;
অনাসকা থণ্ডিলসেয্যকা চ, রজোজল্লং উক্কুটিকপ্পধানং;
পরিযাযভত্তঞ্চ অপানকত্তা, পাপাচারা অরহন্তো ৰদানা.
‘‘এতে অসপ্পুরিসা লোকে, বালা পণ্ডিতমানিনো;
করেয্য তাদিসো পাপং, অথো অঞ্ঞম্পি কারযে;
অসপ্পুরিসসংসগ্গো, দুক্খন্তো কটুকুদ্রযো.
‘‘যমাহু ¶ নত্থি ৰীরিযন্তি, অহেতুঞ্চ পৰদন্তি [হেতুঞ্চ অপৰদন্তি (সী. স্যা. পী.)] যে;
পরকারং অত্তকারঞ্চ, যে তুচ্ছং সমৰণ্ণযুং.
‘‘এতে অসপ্পুরিসা লোকে, বালা পণ্ডিতমানিনো;
করেয্য তাদিসো পাপং, অথো অঞ্ঞম্পি কারযে;
অসপ্পুরিসসংসগ্গো, দুক্খন্তো কটুকুদ্রযো.
‘‘সচে ¶ হি ৰীরিযং নাস্স, কম্মং কল্যাণপাপকং;
ন ¶ ভরে ৰড্ঢকিং রাজা, নপি যন্তানি কারযে.
‘‘যস্মা চ ৰীরিযং অত্থি, কম্মং কল্যাণপাপকং;
তস্মা যন্তানি কারেতি, রাজা ভরতি ৰড্ঢকিং.
‘‘যদি ৰস্সসতং দেৰো, ন ৰস্সে ন হিমং পতে;
উচ্ছিজ্জেয্য অযং লোকো, ৰিনস্সেয্য অযং পজা.
‘‘যস্মা চ ৰস্সতী দেৰো, হিমঞ্চানুফুসাযতি;
তস্মা সস্সানি পচ্চন্তি, রট্ঠঞ্চ পালিতে [পল্লতে (সী. পী.), পোলযতে (স্যা.)] চিরং.
‘‘গৰং চে তরমানানং, জিম্হং গচ্ছতি পুঙ্গৰো;
সব্বা তা জিম্হং গচ্ছন্তি, নেত্তে জিম্হং [জিম্হ (পী.)] গতে সতি.
‘‘এৰমেৰ [এৰমেৰং (পী.)] মনুস্সেসু, যো হোতি সেট্ঠসম্মতো;
সো চে অধম্মং চরতি, পগেৰ ইতরা পজা;
সব্বং রট্ঠং দুখং সেতি, রাজা চে হোতি অধম্মিকো.
‘‘গৰং চে তরমানানং, উজুং গচ্ছতি পুঙ্গৰো;
সব্বা গাৰী উজুং যন্তি, নেত্তে উজুং [উজূ (পী.)] গতে সতি.
‘‘এৰমেৰ মনুস্সেসু, যো হোতি সেট্ঠসম্মতো;
সো সচে [চেৰ (সী.), চেপি (ক.)] ধম্মং চরতি, পগেৰ ইতরা পজা;
সব্বং রট্ঠং সুখং সেতি, রাজা চে হোতি ধম্মিকো.
‘‘মহারুক্খস্স ফলিনো, আমং ছিন্দতি যো ফলং;
রসঞ্চস্স ন জানাতি, বীজঞ্চস্স ৰিনস্সতি.
‘‘মহারুক্খূপমং ¶ রট্ঠং, অধম্মেন পসাসতি;
রসঞ্চস্স ন জানাতি, রট্ঠঞ্চস্স ৰিনস্সতি.
‘‘মহারুক্খস্স ¶ ফলিনো, পক্কং ছিন্দতি যো ফলং;
রসঞ্চস্স ৰিজানাতি, বীজঞ্চস্স ন নস্সতি.
‘‘মহারুক্খূপমং রট্ঠং, ধম্মেন যো পসাসতি;
রসঞ্চস্স ৰিজানাতি, রট্ঠঞ্চস্স ন নস্সতি.
‘‘যো চ রাজা জনপদং, অধম্মেন পসাসতি;
সব্বোসধীহি সো রাজা, ৰিরুদ্ধো হোতি খত্তিযো.
‘‘তথেৰ নেগমে হিংসং, যে যুত্তা কযৰিক্কযে;
ওজদানবলীকারে, স কোসেন ৰিরুজ্ঝতি.
‘‘পহারৰরখেত্তঞ্ঞূ ¶ , সঙ্গামে কতনিস্সমে [কতনিযমে (ক.)];
উস্সিতে হিংসযং রাজা, স বলেন ৰিরুজ্ঝতি.
‘‘তথেৰ ইসযো হিংসং, সঞ্ঞতে [সংযমে (স্যা. ক.)] ব্রহ্মচারিযো [ব্রহ্মচারিনো (সী.)];
অধম্মচারী খত্তিযো, সো সগ্গেন ৰিরুজ্ঝতি.
‘‘যো চ রাজা অধম্মট্ঠো, ভরিযং হন্তি অদূসিকং;
লুদ্দং পসৰতে ঠানং [পাপং (সী.)], পুত্তেহি চ ৰিরুজ্ঝতি.
‘‘ধম্মং চরে জানপদে, নেগমেসু [নিগমেসু (সী.)] বলেসু চ;
ইসযো চ ন হিংসেয্য, পুত্তদারে সমং চরে.
‘‘স তাদিসো ভূমিপতি, রট্ঠপালো অকোধনো;
সপত্তে ¶ [সামন্তে (সী. স্যা. পী.)] সম্পকম্পেতি, ইন্দোৰ অসুরাধিপো’’তি.
মহাবোধিজাতকং ততিযং.
পণ্ণাসনিপাতং নিট্ঠিতং.
তস্সুদ্দানং –
সনিল়ীনিকমৰ্হযনো পঠমো, দুতিযো পন সউম্মদন্তিৰরো;
ততিযো পন বোধিসিরীৰ্হযনো, কথিতা পন তীণি জিনেন সুভাতি.
১৯. সট্ঠিনিপাতো
৫২৯. সোণকজাতকং (১)
‘‘তস্স ¶ ¶ ¶ সুত্ৰা সতং দম্মি, সহস্সং দিট্ঠ [দট্ঠু (সী. পী.)] সোণকং;
কো মে সোণকমক্খাতি, সহাযং পংসুকীল়িতং’’.
‘‘অথব্রৰী মাণৰকো, দহরো পঞ্চচূল়কো;
ময্হং সুত্ৰা সতং দেহি, সহস্সং দিট্ঠ [দট্ঠু (সী. পী.)] সোণকং;
অহং তে সোণকক্খিস্সং [অহং সোণকমক্খিস্সং (সী. পী.), অহং তে সোণকমক্খিস্সং (স্যা.)], সহাযং পংসুকীল়িতং’’.
‘‘কতমস্মিং [কতরস্মিং (সী. স্যা. পী.)] সো জনপদে, রট্ঠেসু নিগমেসু চ;
কত্থ সোণকমদ্দক্খি [কত্থ তে সোণকো দিট্ঠো (সী. পী.)], তং মে অক্খাহি পুচ্ছিতো’’.
‘‘তৰেৰ দেৰ ৰিজিতে, তৰেৰুয্যানভূমিযা;
উজুৰংসা মহাসালা, নীলোভাসা মনোরমা.
‘‘তিট্ঠন্তি মেঘসমানা, রম্মা অঞ্ঞোঞ্ঞনিস্সিতা;
তেসং মূলম্হি [মূলস্মিং (সী. পী.), মূলস্মি (স্যা.)] সোণকো, ঝাযতী অনুপাদনো [অনুপাদিনো (স্যা.), অনুপাদানো (পী.)];
উপাদানেসু লোকেসু, ডয্হমানেসু নিব্বুতো.
‘‘ততো চ রাজা পাযাসি, সেনায চতুরঙ্গিযা;
কারাপেত্ৰা সমং মগ্গং, অগমা যেন সোণকো.
‘‘উয্যানভূমিং গন্ত্ৰান, ৰিচরন্তো ব্রহাৰনে;
আসীনং ¶ সোণকং দক্খি, ডয্হমানেসু নিব্বুতং’’.
‘‘কপণো ৰতযং ভিক্খু, মুণ্ডো সঙ্ঘাটিপারুতো;
অমাতিকো অপিতিকো, রুক্খমূলস্মি ঝাযতি’’.
‘‘ইমং ৰাক্যং নিসামেত্ৰা, সোণকো এতদব্রৰি;
‘ন রাজ কপণো হোতি, ধম্মং কাযেন ফস্সযং [ফুসযং (ক.)].
‘যো ¶ চ [যোধ (সী. স্যা.)] ধম্মং নিরংকত্ৰা [নিরাকত্ৰা (?)], অধম্মমনুৰত্ততি;
স রাজ কপণো হোতি, পাপো পাপপরাযনো’’’.
‘‘‘অরিন্দমোতি ¶ মে নামং, কাসিরাজাতি মং ৰিদূ;
কচ্চি ভোতো সুখস্সেয্যা [সুখা সেয্যা (পী.), সুখসেয্যো (ক.)], ইধ পত্তস্স সোণক’’’.
‘‘সদাপি ভদ্রমধনস্স, অনাগারস্স ভিক্খুনো;
ন তেসং কোট্ঠে ওপেন্তি, ন কুম্ভিং ন খল়োপিযং [ন কুম্ভে ন কল়োপিযা (স্যা. পী.)];
পরনিট্ঠিতমেসানা, তেন যাপেন্তি সুব্বতা.
‘‘দুতিযম্পি ভদ্রমধনস্স, অনাগারস্স ভিক্খুনো;
অনৰজ্জপিণ্ডো [অনৰজ্জো পিণ্ডা (পী.)] ভোত্তব্বো, ন চ কোচূপরোধতি.
‘‘ততিযম্পি ভদ্রমধনস্স, অনাগারস্স ভিক্খুনো;
নিব্বুতো পিণ্ডো ভোত্তব্বো, ন চ কোচূপরোধতি.
‘‘চতুত্থম্পি [চতুত্থং (পী.)] ভদ্রমধনস্স, অনাগারস্স ভিক্খুনো;
মুত্তস্স রট্ঠে চরতো, সঙ্গো যস্স ন ৰিজ্জতি.
‘‘পঞ্চমম্পি [পঞ্চমং (পী.)] ভদ্রমধনস্স, অনাগারস্স ভিক্খুনো;
নগরম্হি ডয্হমানম্হি, নাস্স কিঞ্চি অডয্হথ.
‘‘ছট্ঠম্পি ¶ [ছট্ঠং (পী.)] ভদ্রমধনস্স, অনাগারস্স ভিক্খুনো;
রট্ঠে ৰিলুম্পমানম্হি [ৰিলুপ্পমানম্হি (ক.)], নাস্স কিঞ্চি অহীরথ [অহারথ (সী. স্যা.)].
‘‘সত্তমম্পি [সত্তমং (পী.)] ভদ্রমধনস্স, অনাগারস্স ভিক্খুনো;
চোরেহি রক্খিতং মগ্গং, যে চঞ্ঞে পরিপন্থিকা;
পত্তচীৰরমাদায, সোত্থিং গচ্ছতি সুব্বতো.
‘‘অট্ঠমম্পি [অট্ঠমং (পী.)] ভদ্রমধনস্স, অনাগারস্স ভিক্খুনো;
যং যং দিসং পক্কমতি, অনপেক্খোৰ গচ্ছতি’’.
‘‘বহূপি ভদ্রা [বহূনি সমণভদ্রানি (সী.), বহূপি ভদ্রকা এতে (পী.)] এতেসং, যো ত্ৰং ভিক্খু পসংসসি;
অহঞ্চ গিদ্ধো কামেসু, কথং কাহামি সোণক.
‘‘পিযা ¶ মে মানুসা কামা, অথো দিব্যাপি মে পিযা;
অথ কেন নু ৰণ্ণেন, উভো লোকে লভামসে’’.
‘‘কামে গিদ্ধা [কামেসু গিদ্ধা (সী. পী.)] কামরতা, কামেসু অধিমুচ্ছিতা;
নরা পাপানি কত্ৰান, উপপজ্জন্তি দুগ্গতিং.
‘‘যে চ কামে পহন্ত্ৰান [পহত্ৰান (সী. পী.)], নিক্খন্তা অকুতোভযা;
একোদিভাৰাধিগতা, ন তে গচ্ছন্তি দুগ্গতিং.
‘‘উপমং তে করিস্সামি, তং সুণোহি অরিন্দম;
উপমায মিধেকচ্চে [পিধেকচ্চে (সী. পী.)], অত্থং জানন্তি পণ্ডিতা.
‘‘গঙ্গায ¶ কুণপং দিস্ৰা, ৰুয্হমানং মহণ্ণৰে;
ৰাযসো সমচিন্তেসি, অপ্পপঞ্ঞো অচেতসো.
‘‘‘যানঞ্চ ¶ ৰতিদং লদ্ধং, ভক্খো চাযং অনপ্পকো’;
তত্থ রত্তিং তত্থ দিৰা, তত্থেৰ নিরতো মনো.
‘‘খাদং নাগস্স মংসানি, পিৰং ভাগীরথোদকং [ভাগিরসোদকং (সী. স্যা. পী. ক.)];
সম্পস্সং ৰনচেত্যানি, ন পলেত্থ [পলেত্ৰা (ক.)] ৰিহঙ্গমো.
‘‘তঞ্চ [তংৰ (পী.)] ওতরণী গঙ্গা, পমত্তং কুণপে রতং;
সমুদ্দং অজ্ঝগাহাসি [অজ্ঝগাহযি (পী.)], অগতী যত্থ পক্খিনং.
‘‘সো চ ভক্খপরিক্খীণো, উদপত্ৰা [উপ্পতিত্ৰা (সী. স্যা.), উদাপত্ৰা (পী.)] ৰিহঙ্গমো.
ন পচ্ছতো ন পুরতো, নুত্তরং নোপি দক্খিণং.
‘‘দীপং সো নজ্ঝগাগঞ্ছি [ন অজ্ঝগঞ্ছি (সী.), ন অজ্ঝগচ্ছি (পী.)], অগতী যত্থ পক্খিনং;
সো চ তত্থেৰ পাপত্থ, যথা দুব্বলকো তথা.
‘‘তঞ্চ সামুদ্দিকা মচ্ছা, কুম্ভীলা মকরা সুসূ;
পসয্হকারা খাদিংসু, ফন্দমানং ৰিপক্খকং [ৰিপক্খিনং (সী. পী.), ৰিপক্খিকং (স্যা.)].
‘‘এৰমেৰ ¶ তুৰং রাজ, যে চঞ্ঞে কামভোগিনো;
গিদ্ধা চে ন ৰমিস্সন্তি, কাকপঞ্ঞাৰ [কাকপঞ্ঞায (সী. স্যা. পী.)] তে ৰিদূ.
‘‘এসা তে উপমা রাজ, অত্থসন্দস্সনী কতা;
ত্ৰঞ্চ পঞ্ঞাযসে তেন, যদি কাহসি ৰা ন ৰা.
‘‘একৰাচম্পি দ্ৰিৰাচং, ভণেয্য অনুকম্পকো;
ততুত্তরিং ন ভাসেয্য, দাসোৰয্যস্স [দাসো অয্যস্স (সী.), দাসো অযিরস্স (পী.)] সন্তিকে’’.
‘‘ইদং ৰত্ৰান পক্কামি, সোণকো অমিতবুদ্ধিমা [সোণকো’মিতবুদ্ধিমা (?)];
ৰেহাসে অন্তলিক্খস্মিং, অনুসাসিত্ৰান খত্তিযং’’.
‘‘কো ¶ নুমে রাজকত্তারো, সুদ্দা ৰেয্যত্তমাগতা [সূতা ৰেয্যত্তিমাগতা (সী. স্যা. পী.)];
রজ্জং নিয্যাদযিস্সামি, নাহং রজ্জেন মত্থিকো.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং’’ [ৰসমন্নগা (পী.)].
‘‘অত্থি তে দহরো পুত্তো, দীঘাৰু রট্ঠৰড্ঢনো;
তং রজ্জে অভিসিঞ্চস্সু, সো নো রাজা ভৰিস্সতি’’.
‘‘খিপ্পং কুমারমানেথ, দীঘাৰুং রট্ঠৰড্ঢনং;
তং রজ্জে অভিসিঞ্চিস্সং, সো ৰো রাজা ভৰিস্সতি’’.
‘‘ততো ¶ কুমারমানেসুং, দীঘাৰুং রট্ঠৰড্ঢনং;
তং দিস্ৰা আলপী রাজা, একপুত্তং মনোরমং.
‘‘সট্ঠি গামসহস্সানি, পরিপুণ্ণানি সব্বসো;
তে পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং [ৰসমন্নগা (পী.)].
‘‘সট্ঠি নাগসহস্সানি, সব্বালঙ্কারভূসিতা;
সুৰণ্ণকচ্ছা মাতঙ্গা, হেমকপ্পনৰাসসা.
‘‘আরূল়্হা ¶ গামণীযেহি, তোমরঙ্কুসপাণিভি;
তে পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং.
‘‘সট্ঠি ¶ অস্সসহস্সানি, সব্বালঙ্কারভূসিতা;
আজানীযাৰ জাতিযা, সিন্ধৰা সীঘৰাহিনো.
‘‘আরূল়্হা গামণীযেহি, ইল্লিযাচাপধারিভি [ইন্দিযাচাপধারিভি (ক.)];
তে পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং.
‘‘সট্ঠি রথসহস্সানি, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
তে পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং.
‘‘সট্ঠি ধেনুসহস্সানি, রোহঞ্ঞা পুঙ্গৰূসভা;
তা পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং কাকোৰ দুম্মেধো, কামানং ৰসমন্ৰগং.
‘‘সোল়সিত্থিসহস্সানি ¶ , সব্বালঙ্কারভূসিতা;
ৰিচিত্রৰত্থাভরণা, আমুত্তমণিকুণ্ডলা;
তা পুত্ত পটিপজ্জস্সু, রজ্জং নিয্যাদযামি তে.
‘‘অজ্জেৰ পব্বজিস্সামি, কো জঞ্ঞা মরণং সুৰে;
মাহং ¶ কাকোৰ দুম্মেধো, কামানং ৰসমন্ৰগং’’.
‘‘দহরস্সেৰ ¶ মে তাত, মাতা মতাতি মে সুতং;
তযা ৰিনা অহং তাত, জীৰিতুম্পি ন উস্সহে.
‘‘যথা আরঞ্ঞকং নাগং, পোতো অন্ৰেতি পচ্ছতো;
জেস্সন্তং গিরিদুগ্গেসু, সমেসু ৰিসমেসু চ.
‘‘এৰং তং অনুগচ্ছামি, পুত্তমাদায [পত্তমাদায (পী.)] পচ্ছতো;
সুভরো তে ভৰিস্সামি, ন তে হেস্সামি দুব্ভরো’’.
‘‘যথা সামুদ্দিকং নাৰং, ৰাণিজানং ধনেসিনং;
ৰোহারো তত্থ গণ্হেয্য, ৰাণিজা ব্যসনী [ব্যসনং (ক.)] সিযা.
‘‘এৰমেৰাযং পুত্তকলি [পুত্তক (স্যা.)], অন্তরাযকরো মম [মমং (পী.)];
ইমং কুমারং পাপেথ, পাসাদং রতিৰড্ঢনং.
‘‘তত্থ কম্বুসহত্থাযো, যথা সক্কংৰ অচ্ছরা;
তা নং তত্থ রমেস্সন্তি [রমিস্সন্তি (স্যা. ক.)], তাহি চেসো [মেসো (পী.)] রমিস্সতি.
‘‘ততো কুমারং পাপেসুং, পাসাদং রতিৰড্ঢনং;
তং দিস্ৰা অৰচুং কঞ্ঞা, দীঘাৰুং রট্ঠৰড্ঢনং.
‘‘দেৰতা নুসি গন্ধব্বো, অদু [আদু (সী. পী.)] সক্কো পুরিন্দদো;
কো ৰা ত্ৰং কস্স ৰা পুত্তো, কথং জানেমু তং মযং’’.
‘‘নম্হি দেৰো ন গন্ধব্বো, নাপি [নম্হি (ক.)] সক্কো পুরিন্দদো;
কাসিরঞ্ঞো অহং পুত্তো, দীঘাৰু রট্ঠৰড্ঢনো;
মমং [মম (পী.)] ভরথ ভদ্দং ৰো [ভদ্দন্তে (ক.)], অহং ভত্তা ভৰামি ৰো’’.
‘‘তং ¶ তত্থ অৰচুং কঞ্ঞা, দীঘাৰুং রট্ঠৰড্ঢনং;
‘কুহিং রাজা অনুপ্পত্তো, ইতো রাজা কুহিং গতো’’’.
‘‘পঙ্কং রাজা অতিক্কন্তো, থলে রাজা পতিট্ঠিতো;
অকণ্টকং অগহনং, পটিপন্নো মহাপথং.
‘‘অহঞ্চ পটিপন্নোস্মি, মগ্গং দুগ্গতিগামিনং;
সকণ্টকং সগহনং, যেন গচ্ছন্তি দুগ্গতিং’’.
‘‘তস্স ¶ ¶ তে স্ৰাগতং রাজ, সীহস্সেৰ গিরিব্বজং;
অনুসাস মহারাজ, ত্ৰং নো সব্বাসমিস্সরো’’তি.
সোণকজাতকং পঠমং.
৫৩০. সংকিচ্চজাতকং (২)
‘‘দিস্ৰা নিসিন্নং রাজানং, ব্রহ্মদত্তং রথেসভং;
অথস্স পটিৰেদেসি, যস্সাসি অনুকম্পকো.
‘‘সংকিচ্চাযং অনুপ্পত্তো, ইসীনং সাধুসম্মতো;
তরমানরূপো নিয্যাহি, খিপ্পং পস্স মহেসিনং.
‘‘ততো চ রাজা তরমানো, যুত্তমারুয্হ সন্দনং;
মিত্তামচ্চপরিব্যূল়্হো [পরিব্বূল়্হো (সী. পী.)], অগমাসি রথেসভো.
‘‘নিক্খিপ্প পঞ্চ ককুধানি, কাসীনং রট্ঠৰড্ঢনো;
ৰাল়বীজনি [ৰা ল়ৰীজনী (সী. পী.)] মুণ্হীসং, খগ্গং ছত্তঞ্চুপাহনং;
‘‘ওরুয্হ রাজা যানম্হা, ঠপযিত্ৰা পটিচ্ছদং;
আসীনং ¶ দাযপস্সস্মিং, সংকিচ্চমুপসঙ্কমি.
‘‘উপসঙ্কমিত্ৰা সো রাজা, সম্মোদি ইসিনা সহ;
তং কথং ৰীতিসারেত্ৰা, একমন্তং উপাৰিসি.
‘‘একমন্তং নিসিন্নোৰ, অথ কালং অমঞ্ঞথ;
ততো পাপানি কম্মানি, পুচ্ছিতুং পটিপজ্জথ.
‘‘ইসিং পুচ্ছাম [পুচ্ছামি (সী. পী.)] সংকিচ্চং, ইসীনং সাধুসম্মতং;
আসীনং দাযপস্সস্মিং, ইসিসঙ্ঘপুরক্খতং [পুরক্খিতং (ক.)].
‘‘কং গতিং পেচ্চ গচ্ছন্তি, নরা ধম্মাতিচারিনো;
অতিচিণ্ণো মযা ধম্মো, তং মে অক্খাহি পুচ্ছিতো.
‘‘ইসী অৰচ সংকিচ্চো, কাসীনং রট্ঠৰড্ঢনং;
আসীনং দাযপস্সস্মিং, মহারাজ সুণোহি মে.
‘‘উপ্পথেন ¶ ৰজন্তস্স, যো মগ্গমনুসাসতি;
তস্স চে ৰচনং কযিরা, নাস্স মগ্গেয্য কণ্টকো.
‘‘অধম্মং ¶ পটিপন্নস্স, যো ধম্মমনুসাসতি;
তস্স চে ৰচনং কযিরা, ন সো গচ্ছেয্য দুগ্গতিং.
‘‘ধম্মো পথো মহারাজ, অধম্মো পন উপ্পথো;
অধম্মো নিরযং নেতি, ধম্মো পাপেতি সুগ্গতিং.
‘‘অধম্মচারিনো রাজ, নরা ৰিসমজীৰিনো;
যং গতিং পেচ্চ গচ্ছন্তি, নিরযে তে সুণোহি মে.
‘‘সঞ্জীৰো কাল়সুত্তো চ, সঙ্ঘাতো [সঙ্খাটো (স্যা. ক.)] দ্ৰে চ রোরুৰা;
অথাপরো ¶ মহাৰীচি, তাপনো [তপনো (সী. পী.)] চ পতাপনো.
‘‘ইচ্চেতে অট্ঠ নিরযা, অক্খাতা দুরতিক্কমা;
আকিণ্ণা লুদ্দকম্মেহি, পচ্চেকা সোল়সুস্সদা.
‘‘কদরিযতাপনা [কদরিযতপনা (সী. পী.)] ঘোরা, অচ্চিমন্তো [অচ্চিমন্তা (পী.)] মহব্ভযা;
লোমহংসনরূপা চ, ভেস্মা পটিভযা দুখা.
‘‘চতুক্কণ্ণা চতুদ্ৰারা, ৰিভত্তা ভাগসো মিতা;
অযোপাকারপরিযন্তা, অযসা পটিকুজ্জিতা.
‘‘তেসং অযোমযা ভূমি, জলিতা তেজসা যুতা;
সমন্তা যোজনসতং, ফুটা [ফরিত্ৰা (অ. নি. ৩.৩৬; পে. ৰ. ৭১)] তিট্ঠন্তি সব্বদা.
‘‘এতে পতন্তি নিরযে, উদ্ধংপাদা অৰংসিরা;
ইসীনং অতিৰত্তারো, সঞ্ঞতানং তপস্সিনং.
‘‘তে ভূনহুনো পচ্চন্তি, মচ্ছা বিলকতা যথা;
সংৰচ্ছরে অসঙ্খেয্যে, নরা কিব্বিসকারিনো.
‘‘ডয্হমানেন গত্তেন, নিচ্চং সন্তরবাহিরং;
নিরযা নাধিগচ্ছন্তি, দ্ৰারং নিক্খমনেসিনো.
‘‘পুরত্থিমেন ¶ ধাৰন্তি, ততো ধাৰন্তি পচ্ছতো;
উত্তরেনপি ধাৰন্তি, ততো ধাৰন্তি দক্খিণং;
যং যঞ্হি দ্ৰারং গচ্ছন্তি, তং তদেৰ পিধীযরে [পিথিয্যতি (সী.), পিথিয্যরে (স্যা.), পিথীযরে (পী.)].
‘‘বহূনি ৰস্সসহস্সানি, জনা নিরযগামিনো;
বাহা পগ্গয্হ কন্দন্তি, পত্ৰা দুক্খং অনপ্পকং.
‘‘আসীৰিসংৰ ¶ কুপিতং, তেজস্সিং দুরতিক্কমং;
ন সাধুরূপে আসীদে, সঞ্ঞতানং তপস্সিনং.
‘‘অতিকাযো ¶ মহিস্সাসো, অজ্জুনো কেককাধিপো;
সহস্সবাহু উচ্ছিন্নো, ইসিমাসজ্জ গোতমং.
‘‘অরজং রজসা ৰচ্ছং, কিসং অৰকিরিয দণ্ডকী;
তালোৰ মূলতো [সমূলো (ক.)] ছিন্নো, স রাজা ৰিভৰঙ্গতো.
‘‘উপহচ্চ মনং মজ্ঝো [মেজ্ঝো (ক.)], মাতঙ্গস্মিং যসস্সিনে;
সপারিসজ্জো উচ্ছিন্নো, মজ্ঝারঞ্ঞং তদা অহু.
‘‘কণ্হদীপাযনাসজ্জ, ইসিং অন্ধকৰেণ্ডযো [ৰেণ্হুযো (সী. পী.), পিণ্হযো (?)];
অঞ্ঞোঞ্ঞং [অঞ্ঞমঞ্ঞং (সী. পী.)] মুসলা [মুসলে (সী. স্যা. পী.)] হন্ত্ৰা, সম্পত্তা যমসাধনং [যমসাদনং (পী.)].
‘‘অথাযং ইসিনা সত্তো, অন্তলিক্খচরো পুরে;
পাৰেক্খি পথৰিং [পঠৰিং (সী. স্যা. পী.)] চেচ্চো, হীনত্তো পত্তপরিযাযং.
‘‘তস্মা হি ছন্দাগমনং, নপ্পসংসন্তি পণ্ডিতা;
অদুট্ঠচিত্তো ভাসেয্য, গিরং সচ্চূপসংহিতং.
‘‘মনসা চে পদুট্ঠেন, যো নরো পেক্খতে মুনিং;
ৰিজ্জাচরণসম্পন্নং, গন্তা সো নিরযং অধো.
‘‘যে ৰুড্ঢে [ৰদ্ধে (ক.)] পরিভাসন্তি, ফরুসূপক্কমা জনা;
অনপচ্চা অদাযাদা, তালৰত্থু [তালৰত্থূ (স্যা.), তালাৰত্থু (পী.)] ভৰন্তি তে.
‘‘যো ¶ চ পব্বজিতং হন্তি, কতকিচ্চং মহেসিনং;
স কাল়সুত্তে নিরযে, চিররত্তায পচ্চতি.
‘‘যো ¶ চ রাজা অধম্মট্ঠো, রট্ঠৰিদ্ধংসনো মগো [চুতো (সী.)];
তাপযিত্ৰা জনপদং, তাপনে পেচ্চ পচ্চতি.
‘‘সো চ ৰস্সসহস্সানি [ৰস্সসহস্সানং (সী. স্যা.)], সতং দিব্বানি পচ্চতি;
অচ্চিসঙ্ঘপরেতো সো, দুক্খং ৰেদেতি ৰেদনং.
‘‘তস্স অগ্গিসিখা কাযা, নিচ্ছরন্তি পভস্সরা;
তেজোভক্খস্স গত্তানি, লোমেহি চ [লোমগ্গেহি চ (সী. স্যা. পী.)] নখেহি চ.
‘‘ডয্হমানেন গত্তেন, নিচ্চং সন্তরবাহিরং;
দুক্খাভিতুন্নো নদতি, নাগো তুত্তট্টিতো [তুত্তদ্দিতো (সী.)] যথা.
‘‘যো লোভা পিতরং হন্তি, দোসা ৰা পুরিসাধমো;
স কাল়সুত্তে নিরযে, চিররত্তায পচ্চতি.
‘‘স ¶ তাদিসো পচ্চতি লোহকুম্ভিযং, পক্কঞ্চ সত্তীহি হনন্তি নিত্তচং;
অন্ধং করিত্ৰা মুত্তকরীসভক্খং, খারে নিমুজ্জন্তি তথাৰিধং নরং.
‘‘তত্তং পক্কুথিতমযোগুল়ঞ্চ [পক্কুধিতমযোগুল়ঞ্চ (ক.)], দীঘে চ ফালে চিররত্ততাপিতে;
ৰিক্খম্ভমাদায ৰিবন্ধ [ৰিবদ্ধ (সী.), ৰিভজ্জ (স্যা. পী.)] রজ্জুভি, ৰিৰটে মুখে সম্পৰিসন্তি [সংচৰন্তি (সী. স্যা. পী.)] রক্খসা.
‘‘সামা চ সোণা সবলা চ গিজ্ঝা, কাকোল়সঙ্ঘা চ দিজা অযোমুখা;
সঙ্গম্ম ¶ খাদন্তি ৰিপ্ফন্দমানং, জিৰ্হং ৰিভজ্জ ৰিঘাসং সলোহিতং.
‘‘তং ¶ দড্ঢতালং পরিভিন্নগত্তং, নিপ্পোথযন্তা অনুৰিচরন্তি রক্খসা;
রতী হি নেসং দুখিনো পনীতরে, এতাদিসস্মিং নিরযে ৰসন্তি;
যে কেচি লোকে ইধ পেত্তিঘাতিনো.
‘‘পুত্তো চ মাতরং হন্ত্ৰা, ইতো গন্ত্ৰা যমক্খযং;
ভুসমাপজ্জতে দুক্খং, অত্তকম্মফলূপগো.
‘‘অমনুস্সা অতিবলা, হন্তারং জনযন্তিযা;
অযোমযেহি ৰাল়েহি [ফালেহি (পী.)], পীল়যন্তি পুনপ্পুনং.
‘‘তমস্সৰং [তং পস্সৰং (সী. স্যা.), তং পস্সুতং (পী.)] সকা গত্তা, রুহিরং [রুধিরং (সী. স্যা.)] অত্তসম্ভৰং;
তম্বলোহৰিলীনংৰ, তত্তং পাযেন্তি মত্তিঘং [মত্তিযং (সী.)].
‘‘জিগুচ্ছং কুণপং পূতিং, দুগ্গন্ধং গূথকদ্দমং;
পুব্বলোহিতসঙ্কাসং, রহদমোগয্হ [রহদোগ্গয্হ (ক.)] তিট্ঠতি.
‘‘তমেনং কিমযো তত্থ, অতিকাযা অযোমুখা;
ছৰিং ভেত্ৰান [ছেত্ৰান (সী. পী.)] খাদন্তি, সংগিদ্ধা [পগিদ্ধা (সী. স্যা. পী.)] মংসলোহিতে.
‘‘সো চ তং নিরযং পত্তো, নিমুগ্গো সতপোরিসং;
পূতিকং কুণপং ৰাতি, সমন্তা সতযোজনং.
‘‘চক্খুমাপি হি চক্খূহি, তেন গন্ধেন জীযতি;
এতাদিসং ¶ ব্রহ্মদত্ত, মাতুঘো লভতে দুখং.
‘‘খুরধারমনুক্কম্ম, তিক্খং দুরভিসম্ভৰং;
পতন্তি গব্ভপাতিযো [গব্ভপাতিনিযো (সী. স্যা. পী.)], দুগ্গং ৰেতরণিং [ৰেত্তরণিং (স্যা. ক.)] নদিং.
‘‘অযোমযা সিম্বলিযো, সোল়সঙ্গুলকণ্টকা;
উভতো অভিলম্বন্তি, দুগ্গং ৰেতরণিং [ৰেত্তরণিং (স্যা. ক.)] নদিং.
‘‘তে ¶ অচ্চিমন্তো তিট্ঠন্তি, অগ্গিক্খন্ধাৰ আরকা;
আদিত্তা জাতৰেদেন, উদ্ধং যোজনমুগ্গতা.
‘‘এতে ¶ ৰজন্তি [সজন্তি (সী. পী.), পজ্জন্তি (স্যা.)] নিরযে, তত্তে তিখিণকণ্টকে;
নারিযো চ অতিচারা [অতিচারিনিযো (সী. স্যা. পী.)], নরা চ পরদারগূ.
‘‘তে পতন্তি অধোক্খন্ধা, ৰিৰত্তা ৰিহতা পুথূ;
সযন্তি ৰিনিৰিদ্ধঙ্গা, দীঘং জগ্গন্তি সব্বদা [সংৰরিং (সী. পী.)].
‘‘ততো রত্যা ৰিৰসানে [ৰিৰসনে (সী. স্যা. পী.)], মহতিং পব্বতূপমং;
লোহকুম্ভিং পৰজ্জন্তি, তত্তং অগ্গিসমূদকং.
‘‘এৰং দিৰা চ রত্তো চ, দুস্সীলা মোহপারুতা;
অনুভোন্তি সকং কম্মং, পুব্বে দুক্কটমত্তনো.
‘‘যা চ ভরিযা ধনক্কীতা, সামিকং অতিমঞ্ঞতি;
সস্সুং ৰা সসুরং ৰাপি, জেট্ঠং ৰাপি ননন্দরং [ননন্দনং (স্যা. ক.)].
‘‘তস্সা ৰঙ্কেন জিৰ্হগ্গং, নিব্বহন্তি সবন্ধনং;
স ব্যামমত্তং কিমিনং, জিৰ্হং পস্সতি অত্তনি [অত্তনো (সী. স্যা.)];
ৰিঞ্ঞাপেতুং ¶ ন সক্কোতি, তাপনে পেচ্চ পচ্চতি.
‘‘ওরব্ভিকা সূকরিকা, মচ্ছিকা মিগবন্ধকা;
চোরা গোঘাতকা লুদ্দা, অৰণ্ণে ৰণ্ণকারকা.
‘‘সত্তীহি লোহকূটেহি, নেত্তিংসেহি উসূহি চ;
হঞ্ঞমানা খারনদিং, পপতন্তি [সম্পতন্তি (ক.)] অৰংসিরা.
‘‘সাযং পাতো কূটকারী, অযোকূটেহি হঞ্ঞতি;
ততো ৰন্তং দুরত্তানং, পরেসং ভুঞ্জরে [ভুঞ্জতে (সী. স্যা. পী.)] সদা.
‘‘ধঙ্কা ভেরণ্ডকা [ভেদণ্ডকা (ক.)] গিজ্ঝা, কাকোল়া চ অযোমুখা;
ৰিপ্ফন্দমানং খাদন্তি, নরং কিব্বিসকারকং [কিব্বিসকারিনং (পী.)].
‘‘যে মিগেন মিগং হন্তি, পক্খিং ৰা পন পক্খিনা;
অসন্তো রজসা ছন্না, গন্তা [গতা (ক.)] তে নিরযুস্সদং [নিরযং অধো (পী.)].
‘‘সন্তো ¶ চ [সন্তোৰ (স্যা.)] উদ্ধং গচ্ছন্তি, সুচিণ্ণেনিধ কম্মুনা;
সুচিণ্ণস্স ফলং পস্স, সইন্দা [সহিন্দা (সী.)] দেৰা সব্রহ্মকা.
‘‘তং ¶ তং ব্রূমি মহারাজ, ধম্মং রট্ঠপতী চর;
তথা [তথা তথা (সী. স্যা. পী.)] রাজ চরাহি ধম্মং, যথা তং সুচিণ্ণং নানুতপ্পেয্য পচ্ছা’’তি.
সংকিচ্চজাতকং দুতিযং.
সট্ঠিনিপাতং নিট্ঠিতং.
তস্সুদ্দানং –
অথ সট্ঠিনিপাতম্হি, সুণাথ মম ভাসিতং;
জাতকসৰ্হযনো ¶ পৰরো, সোণকঅরিন্দমসৰ্হযনো;
তথা ৰুত্তরথেসভকিচ্চৰরোতি.
২০. সত্ততিনিপাতো
৫৩১. কুসজাতকং (১)
‘‘ইদং ¶ ¶ ¶ তে রট্ঠং সধনং সযোগ্গং, সকাযুরং সব্বকামূপপন্নং;
ইদং তে রজ্জং [রট্ঠং (ক.)] অনুসাস অম্ম, গচ্ছামহং যত্থ পিযা পভাৰতী’’.
‘‘অনুজ্জুভূতেন হরং মহন্তং, দিৰা চ রত্তো চ নিসীথকালে [নিসীদ কালে (ক.)];
পটিগচ্ছ ত্ৰং খিপ্পং কুসাৰতিং কুস [কুসাৰতিং (স্যা. ক.)], নিচ্ছামি দুব্বণ্ণমহং ৰসন্তং’’.
‘‘নাহং গমিস্সামি ইতো কুসাৰতিং, পভাৰতী ৰণ্ণপলোভিতো তৰ;
রমামি মদ্দস্স নিকেতরম্মে, হিত্ৰান রট্ঠং তৰ দস্সনে রতো.
‘‘পভাৰতী ৰণ্ণপলোভিতো তৰ, সম্মূল়্হরূপো ৰিচরামি মেদিনিং [মেদনিং (স্যা. ক.)];
দিসং ন জানামি কুতোম্হি আগতো, তযম্হি মত্তো মিগমন্দলোচনে.
‘‘সুৰণ্ণচীরৰসনে, জাতরূপসুমেখলে;
সুস্সোণি ¶ তৰ কামা হি [কামেহি (সী. স্যা. পী.)], নাহং রজ্জেন মত্থিকো’’.
‘‘অব্ভূতি [অব্ভূ হি (সী.), অভূতি (স্যা.), অব্ভু হি (পী.)] তস্স ভো হোতি, যো অনিচ্ছন্তমিচ্ছতি;
অকামং রাজ কামেসি [কামেহি (সী. পী.)], অকন্তং কন্তু [অকন্তো কন্ত (সী. স্যা. পী.)] মিচ্ছসি’’.
‘‘অকামং ৰা সকামং ৰা, যো নরো লভতে পিযং;
লাভমেত্থ পসংসাম, অলাভো তত্থ পাপকো’’.
‘‘পাসাণসারং ¶ খণসি, কণিকারস্স দারুনা;
ৰাতং জালেন বাধেসি, যো অনিচ্ছন্তমিচ্ছসি’’.
‘‘পাসাণো নূন তে হদযে, ওহিতো মুদুলক্খণে;
যো তে সাতং ন ৰিন্দামি, তিরোজনপদাগতো.
‘‘যদা মং ভকুটিং [ভূকুটিং (সী. পী.)] কত্ৰা, রাজপুত্তী উদিক্খতি [রাজপুত্তি উদিক্খসি (সী. পী.)];
আল়ারিকো তদা হোমি, রঞ্ঞো মদ্দস্সন্তেপুরে [মদ্দস্স থীপুরে (সী. পী.) এৰমুপরিপি].
‘‘যদা উম্হযমানা মং, রাজপুত্তী উদিক্খতি [রাজপুত্তি উদিক্খসি (সী. পী.)];
নাল়ারিকো তদা হোমি, রাজা হোমি তদা কুসো’’.
‘‘সচে ¶ হি ৰচনং সচ্চং, নেমিত্তানং ভৰিস্সতি;
নেৰ মে ত্ৰং পতী অস্স, কামং ছিন্দন্তু সত্তধা’’.
‘‘সচে হি ৰচনং সচ্চং, অঞ্ঞেসং যদি ৰা মমং;
নেৰ তুয্হং পতী অত্থি, অঞ্ঞো সীহস্সরা কুসা’’.
‘‘নেক্খং গীৰং তে কারেস্সং, পত্ৰা খুজ্জে কুসাৰতিং;
সচে মং নাগনাসূরূ, ওলোকেয্য পভাৰতী.
‘‘নেক্খং ¶ গীৰং তে কারেস্সং, পত্ৰা খুজ্জে কুসাৰতিং;
সচে মং নাগনাসূরূ, আলপেয্য পভাৰতী.
‘‘নেক্খং গীৰং তে কারেস্সং, পত্ৰা খুজ্জে কুসাৰতিং;
সচে মং নাগনাসূরূ, উম্হাযেয্য পভাৰতী.
‘‘নেক্খং গীৰং তে কারেস্সং, পত্ৰা খুজ্জে কুসাৰতিং;
সচে মং নাগনাসূরূ, পম্হাযেয্য পভাৰতী.
‘‘নেক্খং গীৰং তে কারেস্সং, পত্ৰা খুজ্জে কুসাৰতিং;
সচে মে নাগনাসূরূ, পাণীহি উপসম্ফুসে’’.
‘‘ন হি নূনাযং রাজপুত্তী, কুসে সাতম্পি ৰিন্দতি;
আল়ারিকে ভতে পোসে, ৰেতনেন অনত্থিকে’’.
‘‘ন হি নূনাযং সা [নূন অযং (সী. স্যা.)] খুজ্জা, লভতি জিৰ্হায ছেদনং;
সুনিসিতেন সত্থেন, এৰং দুব্ভাসিতং ভণং’’.
‘‘মা ¶ নং রূপেন পামেসি, আরোহেন পভাৰতি;
মহাযসোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
মহদ্ধনোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
মহব্বলোতি কত্ৰান, করস্সু রুচিরে পিযং.
‘‘মা ¶ নং রূপেন পামেসি, আরোহেন পভাৰতি;
মহারট্ঠোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
মহারাজাতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
সীহস্সরোতি কত্ৰান, করস্সু রুচিরে পিযং.
‘‘মা ¶ নং রূপেন পামেসি, আরোহেন পভাৰতি;
ৰগ্গুস্সরোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
বিন্দুস্সরোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
মঞ্জুস্সরোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
মধুস্সরোতি [মধুরস্সরোতি (সী.)] কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
সতসিপ্পোতি কত্ৰান, করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
খত্তিযোতিপি কত্ৰান [করিত্ৰান (সী.)], করস্সু রুচিরে পিযং.
‘‘মা নং রূপেন পামেসি, আরোহেন পভাৰতি;
কুসরাজাতি কত্ৰান, করস্সু রুচিরে পিযং’’.
‘‘এতে ¶ নাগা উপত্থদ্ধা, সব্বে তিট্ঠন্তি ৰম্মিতা [ৰম্মিকা (স্যা.)];
পুরা মদ্দন্তি পাকারং, আনেন্তেতং পভাৰতিং’’.
‘‘সত্ত ¶ বিলে [খণ্ডে (সী. পী.)] করিত্ৰান, অহমেতং পভাৰতিং;
খত্তিযানং পদস্সামি, যে মং হন্তুং ইধাগতা’’.
‘‘অৰুট্ঠহি রাজপুত্তী, সামা কোসেয্যৰাসিনী;
অস্সুপুণ্ণেহি নেত্তেহি, দাসীগণপুরক্খতা’’.
‘‘তং নূন কক্কূপনিসেৰিতং মুখং, আদাসদন্তাথরুপচ্চৰেক্খিতং;
সুভং সুনেত্তং ৰিরজং অনঙ্গণং, ছুদ্ধং ৰনে ঠস্সতি খত্তিযেহি.
‘‘তে নূন মে অসিতে ৰেল্লিতগ্গে, কেসে মুদূ চন্দনসারলিত্তে;
সমাকুলে সীৰথিকায মজ্ঝে, পাদেহি গিজ্ঝা পরিকড্ঢিস্সন্তি [পরিকড্ঢযন্তি (সী. স্যা. পী.)].
‘‘তা নূন মে তম্বনখা সুলোমা, বাহা মুদূ চন্দনসারলিত্তা;
ছিন্না ৰনে উজ্ঝিতা খত্তিযেহি, গয্হ ধঙ্কো [ৰকো (পী.)] গচ্ছতি যেন কামং.
‘‘তে নূন তালূপনিভে অলম্বে, নিসেৰিতে কাসিকচন্দনেন;
থনেসু মে লম্বিস্সতি [লম্বহীতি (পী.)] সিঙ্গালো [সিগালো (সী. স্যা. পী.)], মাতূৰ পুত্তো তরুণো তনূজো.
‘‘তং ¶ নূন সোণিং পুথুলং সুকোট্টিতং, নিসেৰিতং কঞ্চনমেখলাহি;
ছিন্নং ৰনে খত্তিযেহী অৰত্থং, সিঙ্গালসঙ্ঘা পরিকড্ঢিস্সন্তি [গয্হা ৰকো গচ্ছতি যেনকামং (পী.)].
‘‘সোণা ¶ ¶ ধঙ্কা [ৰকা (পী.)] সিঙ্গালা চ, যে চঞ্ঞে সন্তি দাঠিনো;
অজরা নূন হেস্সন্তি, ভক্খযিত্ৰা পভাৰতিং.
‘‘সচে মংসানি হরিংসু, খত্তিযা দূরগামিনো;
অট্ঠীনি অম্ম যাচিত্ৰা, অনুপথে দহাথ নং.
‘‘খেত্তানি অম্ম কারেত্ৰা, কণিকারেত্থ রোপয [রোপযে (ক.)];
যদা তে পুপ্ফিতা অস্সু, হেমন্তানং হিমচ্চযে;
সরেয্যাথ মমং [মম (পী.)] অম্ম, এৰংৰণ্ণা পভাৰতী’’.
‘‘তস্সা মাতা উদট্ঠাসি, খত্তিযা দেৰৰণ্ণিনী;
দিস্ৰা অসিঞ্চ সূনঞ্চ, রঞ্ঞো মদ্দস্সন্তেপুরে’’.
‘‘ইমিনা নূন অসিনা, সুসঞ্ঞং তনুমজ্ঝিমং;
ধীতরং মদ্দ [মম (সী.), মদ্দো (পী.)] হন্ত্ৰান, খত্তিযানং পদস্সসি’’ [পদস্সতি (পী. ক.)].
‘‘ন মে অকাসি ৰচনং, অত্থকামায পুত্তিকে;
সাজ্জ লোহিতসঞ্ছন্না, গচ্ছসি [গঞ্ছিসি (সী. পী.)] যমসাধনং.
‘‘এৰমাপজ্জতী পোসো, পাপিযঞ্চ নিগচ্ছতি;
যো ৰে হিতানং ৰচনং, ন করোতি [ন করং (সী.)] অত্থদস্সিনং.
‘‘সচে চ অজ্জ [ত্ৰং অম্ম (সী.)] ধারেসি [ৰারেসি (পী.)], কুমারং চারুদস্সনং;
কুসেন ¶ জাতং খত্তিযং, সুৰণ্ণমণিমেখলং;
পূজিতং [পূজিতা (পী.)] ঞাতিসঙ্ঘেহি, ন গচ্ছসি [গঞ্ছিসি (সী. পী.)] যমক্খযং.
‘‘যত্থস্সু ভেরী নদতি, কুঞ্জরো চ নিকূজতি [নিকুঞ্জতি (পী.)];
খত্তিযানং কুলে ভদ্দে, কিং নু সুখতরং ততো.
‘‘অস্সো চ সিসতি [অস্সো হসিসতি (সী.), অস্সো হসিযতি (স্যা.), অস্সো চ সিংসতি (পী.)] দ্ৰারে, কুমারো উপরোদতি;
খত্তিযানং কুলে ভদ্দে, কিং নু সুখতরং ততো.
‘‘মযূরকোঞ্চাভিরুদে, কোকিলাভিনিকূজিতে;
খত্তিযানং কুলে ভদ্দে, কিং নু সুখতরং ততো’’.
‘‘কহং ¶ নু সো সত্তুমদ্দনো, পররট্ঠপ্পমদ্দনো;
কুসো সোল়ারপঞ্ঞাণো, যো নো দুক্খা পমোচযে’’.
‘‘ইধেৰ সো সত্তুমদ্দনো, পররট্ঠপ্পমদ্দনো;
কুসো সোল়ারপঞ্ঞাণো, যো তে সব্বে ৰধিস্সতি’’ [যো নো দুক্খা পমোচযে (সী.), সো নো সব্বে ৰধিস্সতি (পী.)].
‘‘উম্মত্তিকা নু ভণসি, অন্ধবালা পভাসসি [আদু বালাৰ ভাসসি (সী. পী.)];
কুসো চে আগতো অস্স, কিং ন [কিন্নু (স্যা. ক.)] জানেমু তং মযং’’.
‘‘এসো ¶ আল়ারিকো পোসো, কুমারীপুরমন্তরে;
দল়্হং কত্ৰান সংৰেল্লিং, কুম্ভিং ধোৰতি ওণতো’’.
‘‘ৰেণী ত্ৰমসি চণ্ডালী, অদূসি কুলগন্ধিনী;
কথং মদ্দকুলে জাতা, দাসং কযিরাসি কামুকং’’.
‘‘নম্হি ৰেণী ন চণ্ডালী, ন চম্হি কুলগন্ধিনী;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি’’.
‘‘যো ¶ ব্রাহ্মণসহস্সানি, সদা ভোজেতি ৰীসতিং;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি’’.
‘‘যস্স নাগসহস্সানি, সদা যোজেন্তি ৰীসতিং;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি.
‘‘যস্স অস্সসহস্সানি, সদা যোজেন্তি ৰীসতিং;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি.
‘‘যস্স রথসহস্সানি, সদা যোজেন্তি ৰীসতিং;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি.
[( ) অযং গাথা সী. পী. পোত্থকেসুযেৰ দিস্সতি] (‘‘যস্স উসভসহস্সানি, সদা যোজেন্তি ৰীসতিং;
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি) [( ) অযং গাথা সী. পী. পোত্থকেসুযেৰ দিস্সতি].
‘‘যস্স ধেনুসহস্সানি, সদা দুহন্তি ৰীসতিং [দুয্হন্তি ৰীসতি (সী. পী.)];
ওক্কাকপুত্তো ভদ্দন্তে, ত্ৰং নু দাসোতি মঞ্ঞসি’’.
‘‘তগ্ঘ ¶ তে দুক্কটং বালে, যং খত্তিযং মহব্বলং;
নাগং মণ্ডূকৰণ্ণেন, ন নং [ন তং (সী. পী.)] অক্খাসিধাগতং’’ [অক্খাসি আগতং (সী.)].
‘‘অপরাধং মহারাজ, ত্ৰং নো খম রথেসভ;
যং তং অঞ্ঞাতৰেসেন, নাঞ্ঞাসিম্হা ইধাগতং’’.
‘‘মাদিসস্স ন তং ছন্নং, যোহং আল়ারিকো ভৰে;
ত্ৰঞ্ঞেৰ মে পসীদস্সু, নত্থি তে দেৰ দুক্কটং’’.
‘‘গচ্ছ বালে খমাপেহি, কুসরাজং মহব্বলং;
খমাপিতো কুসো রাজা [কুসরাজা (সব্বত্থ)], সো তে দস্সতি জীৰিতং’’.
‘‘পিতুস্স ৰচনং সুত্ৰা, দেৰৰণ্ণী পভাৰতী;
সিরসা অগ্গহী পাদে, কুসরাজং মহব্বলং’’.
‘‘যামা ¶ রত্যো অতিক্কন্তা, তামা দেৰ তযা ৰিনা;
ৰন্দে তে সিরসা পাদে, মা মে কুজ্ঝং রথেসভ.
‘‘সব্বং ¶ [সচ্চং (সী. স্যা. পী.)] তে পটিজানামি, মহারাজ সুণোহি মে;
ন চাপি অপ্পিযং তুয্হং, করেয্যামি অহং পুন.
‘‘এৰং চে যাচমানায, ৰচনং মে ন কাহসি;
ইদানি মং তাতো হন্ত্ৰা, খত্তিযানং পদস্সতি’’.
‘‘এৰং তে যাচমানায, কিং ন কাহামি তে ৰচো;
ৰিকুদ্ধো ত্যস্মি কল্যাণি, মা ত্ৰং ভাযি পভাৰতি.
‘‘সব্বং তে পটিজানামি, রাজপুত্তি সুণোহি মে;
ন চাপি অপ্পিযং তুয্হং, করেয্যামি অহং পুন.
‘‘তৰ কামা হি সুস্সোণি, পহু [বহু (স্যা.), বহূ (পী.), বহুং (ক.)] দুক্খং তিতিক্খিসং [তিতিক্খিস্সং (সী. পী.)];
বহুং মদ্দকুলং হন্ত্ৰা, নযিতুং তং পভাৰতি’’.
‘‘যোজযন্তু রথে অস্সে, নানাচিত্তে সমাহিতে;
অথ দক্খথ মে ৰেগং, ৰিধমন্তস্স [ৰিধমেন্তস্স (সব্বত্থ)] সত্তৰো’’.
‘‘তঞ্চ তত্থ উদিক্খিংসু, রঞ্ঞো মদ্দস্সন্তেপুরে;
ৰিজম্ভমানং সীহংৰ, ফোটেন্তং দিগুণং ভুজং.
‘‘হত্থিক্খন্ধঞ্চ ¶ আরুয্হ, আরোপেত্ৰা পভাৰতিং;
সঙ্গামং ওতরিত্ৰান, সীহনাদং নদী কুসো.
‘‘তস্স তং নদতো সুত্ৰা, সীহস্সেৰিতরে মিগা;
খত্তিযা ¶ ৰিপলাযিংসু, কুসসদ্দভযট্টিতা [কুসসদ্দভযট্ঠিতা (পী.)].
‘‘হত্থারোহা অনীকট্ঠা, রথিকা পত্তিকারকা;
অঞ্ঞমঞ্ঞস্স ছিন্দন্তি, কুসসদ্দভযট্টিতা.
‘‘তস্মিং সঙ্গামসীসস্মিং, পস্সিত্ৰা হট্ঠ [তুট্ঠ (সী.)] মানসো;
কুসস্স রঞ্ঞো দেৰিন্দো, অদা ৰেরোচনং মণিং.
‘‘সো তং ৰিজিত্ৰা সঙ্গামং, লদ্ধা ৰেরোচনং মণিং;
হত্থিক্খন্ধগতো রাজা, পাৰেক্খি নগরং পুরং.
‘‘জীৰগ্গাহং [জীৰগাহং (সী. পী.)] গহেত্ৰান, বন্ধিত্ৰা সত্ত খত্তিযে;
সসুরস্সুপনামেসি, ইমে তে দেৰ সত্তৰো.
‘‘সব্বেৰ তে ৰসং গতা, অমিত্তা ৰিহতা তৰ;
কামং করোহি তে তযা, মুঞ্চ ৰা তে হনস্সু ৰা’’.
‘‘তুয্হেৰ সত্তৰো এতে, ন হি তে ময্হ সত্তৰো;
ত্ৰঞ্ঞেৰ নো মহারাজ, মুঞ্চ ৰা তে হনস্সু ৰা’’.
‘‘ইমা ¶ তে ধীতরো সত্ত, দেৰকঞ্ঞূপমা সুভা;
দদাহি নেসং একেকং, হোন্তু জামাতরো তৰ’’.
‘‘অম্হাকঞ্চেৰ তাসঞ্চ, ত্ৰং নো সব্বেসমিস্সরো;
ত্ৰঞ্ঞেৰ নো মহারাজ, দেহি নেসং যদিচ্ছসি’’.
‘‘একমেকস্স একেকং, অদা সীহস্সরো কুসো;
খত্তিযানং তদা তেসং, রঞ্ঞো মদ্দস্স ধীতরো.
‘‘পীণিতা তেন লাভেন, তুট্ঠা সীহস্সরে কুসে;
সকরট্ঠানি ¶ পাযিংসু, খত্তিযা সত্ত তাৰদে.
‘‘পভাৰতিঞ্চ আদায, মণিং ৰেরোচনং সুভং [তদা (পী.)];
কুসাৰতিং কুসো রাজা, অগমাসি মহব্বলো.
‘‘ত্যস্সু ¶ একরথে যন্তা, পৰিসন্তা কুসাৰতিং;
সমানা ৰণ্ণরূপেন, নাঞ্ঞমঞ্ঞাতিরোচিসুং [নাঞ্ঞমঞ্ঞমতিরোচযুং (সী.)].
‘‘মাতা পুত্তেন সঙ্গচ্ছি [সঙ্গঞ্ছি (সী. স্যা. পী.)], উভযো চ জযম্পতী;
সমগ্গা তে তদা আসুং, ফীতং ধরণিমাৰসু’’ন্তি.
কুসজাতকং পঠমং.
৫৩২. সোণনন্দজাতকং (২)
‘‘দেৰতা নুসি গন্ধব্বো, অদু [আদু (সী. স্যা.)] সক্কো পুরিন্দদো;
মনুস্সভূতো ইদ্ধিমা, কথং জানেমু তং মযং’’.
‘‘নাপি দেৰো ন গন্ধব্বো, নাপি সক্কো পুরিন্দদো;
মনুস্সভূতো ইদ্ধিমা, এৰং জানাহি ভারধ’’ [ভারভ (ক.)].
‘‘কতরূপমিদং ভোতো [ভোতো (সী. পী.)], ৰেয্যাৰচ্চং অনপ্পকং;
দেৰম্হি ৰস্সমানম্হি, অনোৰস্সং ভৰং অকা.
‘‘ততো ৰাতাতপে ঘোরে, সীতচ্ছাযং ভৰং অকা;
ততো অমিত্তমজ্ঝেসু [অমিত্তমজ্ঝে চ (সী.)], সরতাণং ভৰং অকা.
‘‘ততো ফীতানি রট্ঠানি, ৰসিনো তে ভৰং অকা;
ততো একসতং খত্যে, অনুযন্তে [অনুযুত্তে (পী.)] ভৰং অকা.
‘‘পতীতাস্সু ¶ ¶ মযং ভোতো, ৰদ তং [ৰর তং (সী. স্যা. পী.)] ভঞ্জ [ভঞ্ঞ (সী. পী.), ভুঞ্জ (স্যা. ক.)] মিচ্ছসি;
হত্থিযানং অস্সরথং, নারিযো চ অলঙ্কতা;
নিৰেসনানি রম্মানি, মযং ভোতো দদামসে.
‘‘অথ ৰঙ্গে [অথ ৰা সঙ্গে (সী. পী.)] ৰা মগধে, মযং ভোতো দদামসে;
অথ ৰা অস্সকাৰন্তী [অস্সকাৰন্তিং (সী. স্যা. পী.)], সুমনা দম্ম তে মযং.
‘‘উপড্ঢং ৰাপি রজ্জস্স, মযং ভোতো দদামসে;
সচে তে অত্থো রজ্জেন, অনুসাস যদিচ্ছসি’’.
‘‘ন ¶ মে অত্থোপি রজ্জেন, নগরেন ধনেন ৰা;
অথোপি জনপদেন, অত্থো ময্হং ন ৰিজ্জতি.
‘‘ভোতোৰ রট্ঠে ৰিজিতে, অরঞ্ঞে অত্থি অস্সমো;
পিতা ময্হং জনেত্তী চ, উভো সম্মন্তি অস্সমে.
‘‘তেসাহং [তেস্ৰহং (ক.)] পুব্বাচরিযেসু, পুঞ্ঞং ন লভামি কাতৰে;
ভৰন্তং অজ্ঝাৰরং কত্ৰা, সোণং [সোনং (পী.)] যাচেমু সংৰরং’’.
‘‘করোমি তে তং ৰচনং, যং মং ভণসি ব্রাহ্মণ;
এতঞ্চ খো নো অক্খাহি, কীৰন্তো হোন্তু যাচকা’’.
‘‘পরোসতং জানপদা, মহাসালা চ ব্রাহ্মণা;
ইমে চ খত্তিযা সব্বে, অভিজাতা যসস্সিনো;
ভৰঞ্চ রাজা মনোজো, অলং হেস্সন্তি যাচকা’’.
‘‘হত্থী অস্সে চ যোজেন্তু, রথং সন্নয্হ সারথি [নং রথি (পী.)];
আবন্ধনানি গণ্হাথ, পাদাসুস্সারযদ্ধজে [পাদেসুস্সারযং ধজে (সী.), পাদাসুস্সারযং ধজে (পী.)];
অস্সমং ¶ তং গমিস্সামি, যত্থ সম্মতি কোসিযো’’.
‘‘ততো চ রাজা পাযাসি, সেনায চতুরঙ্গিনী;
অগমা অস্সমং রম্মং, যত্থ সম্মতি কোসিযো’’.
‘‘কস্স কাদম্বযো [কস্স কাদম্বমযো (ক.)] কাজো, ৰেহাসং চতুরঙ্গুলং;
অংসং অসম্ফুসং এতি, উদহারায [উদহারস্স (সী. স্যা. পী.)] গচ্ছতো’’.
‘‘অহং সোণো মহারাজ, তাপসো সহিতব্বতো [সহিতং ৰতো (পী.)];
ভরামি মাতাপিতরো, রত্তিন্দিৰমতন্দিতো.
‘‘ৰনে ফলঞ্চ মূলঞ্চ, আহরিত্ৰা দিসম্পতি;
পোসেমি মাতাপিতরো, পুব্বে কতমনুস্সরং’’.
‘‘ইচ্ছাম ¶ অস্সমং গন্তুং, যত্থ সম্মতি কোসিযো;
মগ্গং নো সোণ অক্খাহি, যেন গচ্ছেমু [গচ্ছাম (সী.)] অস্সমং’’.
‘‘অযং ¶ একপদী রাজ, যেনেতং [যেন তং (ক.)] মেঘসন্নিভং;
কোৰিল়ারেহি সঞ্ছন্নং, এত্থ সম্মতি কোসিযো’’.
‘‘ইদং ৰত্ৰান পক্কামি, তরমানো মহাইসি;
ৰেহাসে অন্তলিক্খস্মিং, অনুসাসিত্ৰান খত্তিযে.
‘‘অস্সমং পরিমজ্জিত্ৰা, পঞ্ঞপেত্ৰান [পঞ্ঞপেত্ৰান (সী. স্যা.)] আসনং;
পণ্ণসালং পৰিসিত্ৰা, পিতরং পটিবোধযি.
‘‘ইমে আযন্তি রাজানো, অভিজাতা যসস্সিনো;
অস্সমা নিক্খমিত্ৰান, নিসীদ ত্ৰং [নিসীদাহি (সী.)] মহাইসে.
‘‘তস্স তং ৰচনং সুত্ৰা, তরমানো মহাইসি;
অস্সমা ¶ নিক্খমিত্ৰান, সদ্ৰারম্হি উপাৰিসি’’.
‘‘তঞ্চ দিস্ৰান আযন্তং, জলন্তংরিৰ তেজসা;
খত্যসঙ্ঘপরিব্যূল়্হং, কোসিযো এতদব্রৰি.
‘‘কস্স ভেরী মুদিঙ্গা চ [মুতিঙ্গা চ (পী.)], সঙ্খা পণৰদিন্দিমা [দেণ্ডিমা (সী. পী.)];
পুরতো পটিপন্নানি, হাসযন্তা রথেসভং.
‘‘কস্স কঞ্চনপট্টেন, পুথুনা ৰিজ্জুৰণ্ণিনা;
যুৰা কলাপসন্নদ্ধো, কো এতি সিরিযা জলং.
‘‘উক্কামুখপহট্ঠংৰ, খদিরঙ্গারসন্নিভং;
মুখঞ্চ রুচিরা ভাতি, কো এতি সিরিযা জলং.
‘‘কস্স পগ্গহিতং ছত্তং, সসলাকং মনোরমং;
আদিচ্চরংসাৰরণং, কো এতি সিরিযা জলং.
‘‘কস্স অঙ্গং পরিগ্গয্হ, ৰাল়বীজনিমুত্তমং;
চরন্তি ৰরপুঞ্ঞস্স [ৰরপঞ্ঞস্স (সী. পী.)], হত্থিক্খন্ধেন আযতো.
‘‘কস্স সেতানি ছত্তানি, আজানীযা চ ৰম্মিতা;
সমন্তা পরিকিরেন্তি [পরিকিরন্তি (সী. স্যা. পী.)], কো এতি সিরিযা জলং.
‘‘কস্স ¶ একসতং খত্যা, অনুযন্তা [অনুযুত্তা (পী.)] যসস্সিনো;
সমন্তানুপরিযন্তি, কো এতি সিরিযা জলং.
‘‘হত্থি অস্সরথ পত্তি [হত্থী অস্সা রথা পত্তী (সী.)], সেনা চ চতুরঙ্গিনী;
সমন্তানুপরিযন্তি [সমন্তা অনুপরিযাতি (পী.)], কো এতি সিরিযা জলং.
‘‘কস্সেসা ¶ মহতী সেনা, পিট্ঠিতো অনুৰত্ততি;
অক্খোভণী ¶ [অক্খাভনী (সী.), অক্খোভিনী (স্যা.)] অপরিযন্তা, সাগরস্সেৰ ঊমিযো’’.
‘‘রাজাভিরাজা [রাজাধিরাজা (ক.)] মনোজো, ইন্দোৰ জযতং পতি;
নন্দস্সজ্ঝাৰরং এতি, অস্সমং ব্রহ্মচারিনং.
‘‘তস্সেসা মহতী সেনা, পিট্ঠিতো অনুৰত্ততি;
অক্খোভণী অপরিযন্তা, সাগরস্সেৰ ঊমিযো’’.
‘‘অনুলিত্তা চন্দনেন, কাসিকুত্তমধারিনো [কাসিকৰত্থধারিনো (পী.)];
সব্বে পঞ্জলিকা হুত্ৰা, ইসীনং অজ্ঝুপাগমুং’’.
‘‘কচ্চি নু ভোতো কুসলং, কচ্চি ভোতো অনামযং;
কচ্চি উঞ্ছেন যাপেথ, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা [সিরিংসপা (সী. স্যা. পী.)];
ৰনে ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘কুসলঞ্চেৰ নো রাজ, অথো রাজ অনামযং;
অথো উঞ্ছেন যাপেম, অথো মূলফলা বহূ.
‘‘অথো ডংসা মকসা চ [ডংসা চ মকসা (সী.), ডংসা চ মকসা চ (পী.)], অপ্পমেৰ সরীসপা [সিরিংসপা (সী. স্যা. পী.)];
ৰনে ৰাল়মিগাকিণ্ণে, হিংসা ময্হং [অ ম্হং (সী. পী.)] ন ৰিজ্জতি.
‘‘বহূনি ৰস্সপূগানি, অস্সমে সম্মতং [ৰসতো (সী.)] ইধ;
নাভিজানামি উপ্পন্নং, আবাধং অমনোরমং.
‘‘স্ৰাগতং তে মহারাজ, অথো তে অদুরাগতং;
ইস্সরোসি অনুপ্পত্তো, যং ইধত্থি পৰেদয.
‘‘তিন্দুকানি ¶ পিযালানি, মধুকে কাসুমারিযো [কাসমারিযো (সী. স্যা.)];
ফলানি ¶ খুদ্দকপ্পানি, ভুঞ্জ রাজ ৰরং ৰরং.
‘‘ইদম্পি পানীযং সীতং, আভতং গিরিগব্ভরা;
ততো পিৰ মহারাজ, সচে ত্ৰং অভিকঙ্খসি’’.
‘‘পটিগ্গহিতং যং দিন্নং, সব্বস্স অগ্ঘিযং কতং;
নন্দস্সাপি নিসামেথ, ৰচনং সো [যং (সী.), যং সো (পী.)] পৰক্খতি.
‘‘অজ্ঝাৰরম্হা নন্দস্স, ভোতো সন্তিকমাগতা;
সুণাতু [সুণাতু মে (সী. স্যা.)] ভৰং ৰচনং, নন্দস্স পরিসায চ’’.
‘‘পরোসতং ¶ জানপদা [জনপদা (পী.)], মহাসালা চ ব্রাহ্মণা;
ইমে চ খত্তিযা সব্বে, অভিজাতা যসস্সিনো;
ভৰঞ্চ রাজা মনোজো, অনুমঞ্ঞন্তু মে ৰচো.
‘‘যে চ সন্তি [যে ৰসন্তি (সী.), যে হি সন্তি (পী.)] সমীতারো, যক্খানি ইধ মস্সমে;
অরঞ্ঞে ভূতভব্যানি, সুণন্তু ৰচনং মম.
‘‘নমো কত্ৰান ভূতানং, ইসিং ৰক্খামি সুব্বতং;
সো ত্যাহং দক্খিণা বাহু, তৰ কোসিয সম্মতো.
‘‘পিতরং মে জনেত্তিঞ্চ, ভত্তুকামস্স মে সতো;
ৰীর পুঞ্ঞমিদং ঠানং, মা মং কোসিয ৰারয.
‘‘সব্ভি হেতং উপঞ্ঞাতং, মমেতং উপনিস্সজ;
উট্ঠানপারিচরিযায, দীঘরত্তং তযা কতং;
মাতাপিতূসু পুঞ্ঞানি, মম লোকদদো ভৰ.
‘‘তথেৰ সন্তি মনুজা, ধম্মে ধম্মপদং ৰিদূ;
মগ্গো ¶ সগ্গস্স লোকস্স, যথা জানাসি ত্ৰং ইসে.
‘‘উট্ঠানপারিচরিযায, মাতাপিতুসুখাৰহং;
তং মং পুঞ্ঞা নিৰারেতি, অরিযমগ্গাৰরো নরো’’.
‘‘সুণন্তু ¶ ভোন্তো ৰচনং, ভাতুরজ্ঝাৰরা মম;
কুলৰংসং মহারাজ, পোরাণং পরিহাপযং;
অধম্মচারী জেট্ঠেসু [যো জেট্ঠো (সী.)], নিরযং সোপপজ্জতি [সো উপপজ্জতি (সী. স্যা. পী.)].
‘‘যে চ ধম্মস্স কুসলা, পোরাণস্স দিসম্পতি;
চারিত্তেন চ সম্পন্না, ন তে গচ্ছন্তি দুগ্গতিং.
‘‘মাতাপিতা চ ভাতা চ, ভগিনী ঞাতিবন্ধৰা;
সব্বে জেট্ঠস্স তে ভারা, এৰং জানাহি ভারধ [ভারথ (স্যা.)].
‘‘আদিযিত্ৰা গরুং ভারং, নাৰিকো ৰিয উস্সহে;
ধম্মঞ্চ নপ্পমজ্জামি, জেট্ঠো চস্মি রথেসভ’’.
‘‘অধিগমা [অধিগতম্হা (সী.), অধিগম্হা (স্যা.), অধিগতম্হ (পী.)] তমে ঞাণং, জালংৰ জাতৰেদতো;
এৰমেৰ নো ভৰং ধম্মং, কোসিযো পৰিদংসযি.
‘‘যথা উদযমাদিচ্চো, ৰাসুদেৰো পভঙ্করো;
পাণীনং পৰিদংসেতি, রূপং কল্যাণপাপকং;
এৰমেৰ নো ভৰং ধম্মং, কোসিযো পৰিদংসযি’’.
‘‘এৰং ¶ মে যাচমানস্স, অঞ্জলিং নাৰবুজ্ঝথ;
তৰ পদ্ধচরো [তৰ পট্ঠচরো (স্যা.), তৰ বদ্ধঞ্চরো (পী.), তৰুপট্ঠচরো (ক.)] হেস্সং, ৰুট্ঠিতো পরিচারকো’’.
‘‘অদ্ধা নন্দ ৰিজানাসি [পজানাসি (সী.)], সদ্ধম্মং সব্ভি দেসিতং;
অরিযো ¶ অরিযসমাচারো, বাল়্হং ত্ৰং মম রুচ্চসি.
‘‘ভৰন্তং ৰদামি ভোতিঞ্চ, সুণাথ ৰচনং মম;
নাযং ভারো ভারমতো [ভারমত্তো (সী. স্যা.)], অহু ময্হং কুদাচনং.
‘‘তং মং উপট্ঠিতং সন্তং, মাতাপিতুসুখাৰহং;
নন্দো অজ্ঝাৰরং কত্ৰা, উপট্ঠানায যাচতি.
‘‘যো ৰে ইচ্ছতি কামেন, সন্তানং ব্রহ্মচারিনং;
নন্দং ৰো ৰরথ একো [নন্দং ৰদথ একে (পী.)], কং নন্দো উপতিট্ঠতু’’.
‘‘তযা ¶ তাত অনুঞ্ঞাতা, সোণ তং নিস্সিতা মযং;
উপঘাতুং [উপঘাযিতুং (সী.)] লভে নন্দং, মুদ্ধনি ব্রহ্মচারিনং’’.
‘‘অস্সত্থস্সেৰ তরুণং, পৰাল়ং মালুতেরিতং;
চিরস্সং নন্দং দিস্ৰান, হদযং মে পৰেধতি.
‘‘যদা সুত্তাপি সুপিনে [সুপ্পন্তে (স্যা. পী.)], নন্দং পস্সামি আগতং;
উদগ্গা সুমনা হোমি, নন্দো নো আগতো অযং.
‘‘যদা চ পটিবুজ্ঝিত্ৰা, নন্দং পস্সামি নাগতং;
ভিয্যো আৰিসতী সোকো, দোমনস্সঞ্চনপ্পকং.
‘‘সাহং অজ্জ চিরস্সম্পি, নন্দং পস্সামি আগতং;
ভত্তুচ্চ [ভত্তুঞ্চ (ক.)] ময্হঞ্চ পিযো, নন্দো নো পাৰিসী ঘরং.
‘‘পিতুপি নন্দো সুপ্পিযো, যং নন্দো নপ্পৰসে [পাৰিসী (পী.)] ঘরা [ঘরং (স্যা. পী. ক.)];
লভতূ তাত নন্দো তং, মং নন্দো উপতিট্ঠতু’’.
‘‘অনুকম্পিকা ¶ পতিট্ঠা চ, পুব্বে রসদদী চ নো;
মগ্গো সগ্গস্স লোকস্স, মাতা তং ৰরতে ইসে.
‘‘পুব্বে রসদদী গোত্তী, মাতা পুঞ্ঞূপসংহিতা;
মগ্গো সগ্গস্স লোকস্স, মাতা তং ৰরতে ইসে’’.
‘‘আকঙ্খমানা পুত্তফলং, দেৰতায নমস্সতি;
নক্খত্তানি চ পুচ্ছতি, উতুসংৰচ্ছরানি চ.
‘‘তস্সা উতুম্হি ন্হাতায [উতুসিনাতায (পী.)], হোতি গব্ভস্স ৰোক্কমো [গব্ভস্স’ৰক্কমো (সী. স্যা. পী.)];
তেন দোহল়িনী হোতি, সুহদা তেন ৰুচ্চতি.
‘‘সংৰচ্ছরং ¶ ৰা ঊনং ৰা, পরিহরিত্ৰা ৰিজাযতি;
তেন সা জনযন্তীতি, জনেত্তি [জনেত্তী (সী. স্যা. পী.)] তেন ৰুচ্চতি.
‘‘থনখীরেন [থনক্খীরেন (সী.)] গীতেন, অঙ্গপাৰুরণেন [অঙ্গপাপুরণেন (পী.)] চ;
রোদন্তং পুত্তং [এৰ (পী.)] তোসেতি, তোসেন্তী তেন ৰুচ্চতি.
‘‘ততো ¶ ৰাতাতপে ঘোরে, মমং কত্ৰা উদিক্খতি;
দারকং অপ্পজানন্তং, পোসেন্তী তেন ৰুচ্চতি.
‘‘যঞ্চ মাতুধনং হোতি, যঞ্চ হোতি পিতুদ্ধনং;
উভযম্পেতস্স গোপেতি, অপি পুত্তস্স নো সিযা.
‘‘এৰং পুত্ত অদুং পুত্ত, ইতি মাতা ৰিহঞ্ঞতি;
পমত্তং পরদারেসু, নিসীথে পত্তযোব্বনে;
সাযং পুত্তং অনাযন্তং, ইতি মাতা ৰিহঞ্ঞতি.
‘‘এৰং কিচ্ছা ভতো পোসো, মাতু অপরিচারকো;
মাতরি মিচ্ছা চরিত্ৰান, নিরযং সোপপজ্জতি.
‘‘এৰং ¶ কিচ্ছা ভতো পোসো, পিতু অপরিচারকো;
পিতরি মিচ্ছা চরিত্ৰান, নিরযং সোপপজ্জতি.
‘‘ধনাপি ধনকামানং, নস্সতি ইতি মে সুতং;
মাতরং অপরিচরিত্ৰান, কিচ্ছং ৰা সো নিগচ্ছতি.
‘‘ধনাপি ধনকামানং, নস্সতি ইতি মে সুতং;
পিতরং অপরিচরিত্ৰান, কিচ্ছং ৰা সো নিগচ্ছতি.
‘‘আনন্দো চ পমোদো চ, সদা হসিতকীল়িতং;
মাতরং পরিচরিত্ৰান, লব্ভমেতং ৰিজানতো.
‘‘আনন্দো চ পমোদো চ, সদা হসিতকীল়িতং;
পিতরং পরিচরিত্ৰান, লব্ভমেতং ৰিজানতো.
‘‘দানঞ্চ পেয্যৰজ্জঞ্চ [পিযৰাচা চ (সী. স্যা. ক.)], অত্থচরিযা চ যা ইধ;
সমানত্ততা [সমানত্তা (পী.)] চ ধম্মেসু, তত্থ তত্থ যথারহং;
এতে খো সঙ্গহা লোকে, রথস্সাণীৰ যাযতো.
এতে চ সঙ্গহা নাস্সু, ন মাতা পুত্তকারণা;
লভেথ মানং পূজং ৰা [পূজঞ্চ (পী.)], পিতা ৰা পুত্তকারণা.
‘‘যস্মা চ সঙ্গহা [সঙ্গহে (দী. নি. ৩.২৭৩; অ. নি. ৪.৩২) তদট্ঠকথাযো ওলোকেতব্বা] এতে, সম্মপেক্খন্তি [সমৰেক্খন্তি (সী. স্যা. পী.) অ. নি. ৪.৩২] পণ্ডিতা;
তস্মা মহত্তং পপ্পোন্তি, পাসংসা চ ভৰন্তি তে.
‘‘ব্রহ্মাতি ¶ ¶ [ব্রহ্মা হি (পী.)] মাতাপিতরো, পুব্বাচরিযাতি ৰুচ্চরে;
আহুনেয্যা ¶ চ পুত্তানং, পজায অনুকম্পকা.
‘‘তস্মা হি নে নমস্সেয্য, সক্করেয্য চ পণ্ডিতো;
অন্নেন অথো [মথো (পী.), অথ (অ. নি. ৪.৬৩; ইতিৰু. ১০৬)] পানেন, ৰত্থেন সযনেন চ;
উচ্ছাদনেন ন্হাপনেন [নহাপনেন (সী. পী.)], পাদানং ধোৰনেন চ.
‘‘তায নং পারিচরিযায [পরিচরিযায (পী.)], মাতাপিতূসু পণ্ডিতা;
ইধেৰ নং পসংসন্তি, পেচ্চ সগ্গে পমোদতী’’তি.
সোণনন্দজাতকং দুতিযং.
সত্ততিনিপাতং নিট্ঠিতং.
তস্সুদ্দানং –
অথ সত্ততিমম্হি নিপাতৰরে, সভাৰন্তু কুসাৰতিরাজৰরো;
অথ সোণসুনন্দৰরো চ পুন, অভিৰাসিতসত্ততিমম্হি সুতেতি.
২১. অসীতিনিপাতো
৫৩৩. চূল়হংসজাতকং (১)
‘‘সুমুখ ¶ ¶ ¶ অনুপচিনন্তা, পক্কমন্তি ৰিহঙ্গমা;
গচ্ছ তুৰম্পি মা কঙ্খি, নত্থি বদ্ধে [বন্ধে (স্যা. ক.)] সহাযতা’’.
‘‘গচ্ছে ৰাহং ন ৰা গচ্ছে, ন তেন অমরো সিযং;
সুখিতং তং উপাসিত্ৰা, দুক্খিতং তং কথং জহে.
‘‘মরণং ৰা তযা সদ্ধিং, জীৰিতং ৰা তযা ৰিনা;
তদেৰ মরণং সেয্যো, যঞ্চে জীৰে তযা ৰিনা.
‘‘নেস ধম্মো মহারাজ, যং তং এৰং গতং জহে;
যা গতি তুয্হং সা ময্হং, রুচ্চতে ৰিহগাধিপ.
‘‘কা নু পাসেন বদ্ধস্স [বন্ধস্স (স্যা. ক.)], গতি অঞ্ঞা মহানসা;
সা কথং চেতযানস্স, মুত্তস্স তৰ রুচ্চতি.
‘‘কং ৰা ত্ৰং পস্সসে অত্থং, মম তুয্হঞ্চ পক্খিম;
ঞাতীনং ৰাৰসিট্ঠানং, উভিন্নং জীৰিতক্খযে.
‘‘যং ন কঞ্চনদেপিঞ্ছ [দেপিচ্ছ (সী. পী.), দ্ৰেপিচ্ছ (স্যা.)], অন্ধেন তমসা গতং;
তাদিসে সঞ্চজং পাণং, কমত্থমভিজোতযে’’.
‘‘কথং নু পততং সেট্ঠ, ধম্মে অত্থং ন বুজ্ঝসি [বুজ্ঝসে (সী.)];
ধম্মো অপচিতো সন্তো, অত্থং দস্সেতি পাণিনং.
‘‘সোহং ধম্মং অপেক্খানো, ধম্মা চত্থং সমুট্ঠিতং;
ভত্তিঞ্চ ¶ তযি সম্পস্সং, নাৰকঙ্খামি জীৰিতং’’.
‘‘অদ্ধা এসো সতং ধম্মো, যো মিত্তো মিত্তমাপদে;
ন চজে জীৰিতস্সাপি, হেতুধম্মমনুস্সরং.
‘‘স্ৰাযং ধম্মো চ তে চিণ্ণো, ভত্তি চ ৰিদিতা মযি;
কামং করস্সু ময্হেতং, গচ্ছেৰানুমতো মযা’’.
‘‘অপি ¶ ¶ ত্ৰেৰং গতে কালে, যং খণ্ডং [বদ্ধং (সী.), বন্ধং (পী.)] ঞাতিনং মযা;
তযা তং বুদ্ধিসম্পন্নং [বুদ্ধিসম্পন্ন (সী. স্যা. পী.)], অস্স পরমসংৰুতং.
‘‘ইচ্চেৰং [ইচ্চেৰ (সী. পী.)] মন্তযন্তানং, অরিযানং অরিযৰুত্তিনং;
পচ্চদিস্সথ নেসাদো, আতুরানমিৰন্তকো.
‘‘তে সত্তুমভিসঞ্চিক্খ, দীঘরত্তং হিতা দিজা;
তুণ্হীমাসিত্থ উভযো, ন সঞ্চলেসুমাসনা [ন চ সঞ্চেসু’মাসনা (সী. পী.)].
‘‘ধতরট্ঠে চ দিস্ৰান, সমুড্ডেন্তে ততো ততো;
অভিক্কমথ ৰেগেন, দিজসত্তু দিজাধিপে.
‘‘সো চ ৰেগেনভিক্কম্ম, আসজ্জ পরমে দিজে;
পচ্চকমিত্থ [পচ্চকম্পিত্থ (সী. স্যা. পী.)] নেসাদো, বদ্ধা ইতি ৰিচিন্তযং.
‘‘একংৰ বদ্ধমাসীনং, অবদ্ধঞ্চ পুনাপরং;
আসজ্জ বদ্ধমাসীনং, পেক্খমানমদীনৰং.
‘‘ততো সো ৰিমতোযেৰ, পণ্ডরে অজ্ঝভাসথ;
পৰড্ঢকাযে আসীনে, দিজসঙ্ঘগণাধিপে.
‘‘যং নু পাসেন মহতা, বদ্ধো ন কুরুতে দিসং;
অথ ¶ কস্মা অবদ্ধো ত্ৰং, বলী পক্খি ন গচ্ছসি.
‘‘কিন্নু ত্যাযং [তা’যং (সী. পী. ক.)] দিজো হোতি, মুত্তো বদ্ধং উপাসসি;
ওহায সকুণা যন্তি, কিং একো অৰহীযসি’’.
‘‘রাজা মে সো দিজামিত্ত, সখা পাণসমো চ মে;
নেৰ নং ৰিজহিস্সামি, যাৰ কালস্স পরিযাযং.
‘‘কথং পনাযং ৰিহঙ্গো, নাদ্দস পাসমোড্ডিতং;
পদঞ্হেতং মহন্তানং, বোদ্ধুমরহন্তি আপদং.
‘‘যদা পরাভৰো হোতি, পোসো জীৰিতসঙ্খযে;
অথ জালঞ্চ পাসঞ্চ, আসজ্জাপি ন বুজ্ঝতি.
‘‘অপি ¶ ত্ৰেৰ মহাপঞ্ঞ, পাসা বহুৰিধা ততা [ততা (স্যা. ক.)];
গুয্হমাসজ্জ [গূল়্হমাসজ্জ (সী. পী.)] বজ্ঝন্তি, অথেৰং জীৰিতক্খযে’’.
‘‘অপি নাযং তযা সদ্ধিং, সংৰাসস্স [সম্ভাসস্স (সী. পী.)] সুখুদ্রযো;
অপি নো অনুমঞ্ঞাসি, অপি নো জীৰিতং দদে’’.
‘‘ন চেৰ মে ত্ৰং বদ্ধোসি, নপি ইচ্ছামি তে ৰধং;
কামং খিপ্পমিতো গন্ত্ৰা, জীৰ ত্ৰং অনিঘো চিরং’’.
‘‘নেৰাহমেতমিচ্ছামি ¶ , অঞ্ঞত্রেতস্স জীৰিতা;
সচে একেন তুট্ঠোসি, মুঞ্চেতং মঞ্চ ভক্খয.
‘‘আরোহপরিণাহেন, তুল্যাস্মা [তুল্যাম্হা (ক.)] ৰযসা উভো;
ন তে লাভেন জীৰত্থি [জীনত্থি (সী. স্যা. পী.)], এতেন নিমিনা তুৰং.
‘‘তদিঙ্ঘ ¶ সমপেক্খস্সু [সমৰেক্খসু (সী. পী.)], হোতু গিদ্ধি তৰম্হসু [তৰস্মসু (সী. স্যা.)];
মং পুব্বে বন্ধ পাসেন, পচ্ছা মুঞ্চ দিজাধিপং.
‘‘তাৰদেৰ চ তে লাভো, কতাস্স [কতস্সা (সী. পী.)] যাচনায চ;
মিত্তি চ ধতরট্ঠেহি, যাৰজীৰায তে সিযা’’.
‘‘পস্সন্তু নো মহাসঙ্ঘা, তযা মুত্তং ইতো গতং;
মিত্তামচ্চা চ ভচ্চা চ, পুত্তদারা চ বন্ধৰা.
‘‘ন চ তে তাদিসা মিত্তা, বহূনং [বহুন্নং (সী. পী.)] ইধ ৰিজ্জতি;
যথা ত্ৰং ধতরট্ঠস্স, পাণসাধারণো সখা.
‘‘সো তে সহাযং মুঞ্চামি, হোতু রাজা তৰানুগো;
কামং খিপ্পমিতো গন্ত্ৰা, ঞাতিমজ্ঝে ৰিরোচথ’’.
‘‘সো পতীতো পমুত্তেন, ভত্তুনা [ভত্তুনো (স্যা.)] ভত্তুগারৰো;
অজ্ঝভাসথ ৰক্কঙ্গো [ৰঙ্কঙ্গো (স্যা.)], ৰাচং কণ্ণসুখং ভণং.
‘‘এৰং লুদ্দক নন্দস্সু, সহ সব্বেহি ঞাতিভি;
যথাহমজ্জ নন্দামি, মুত্তং দিস্ৰা দিজাধিপং’’.
‘‘এহি ¶ তং অনুসিক্খামি, যথা ত্ৰমপি লচ্ছসে;
লাভং তৰাযং [যথাযং (সী. পী.)] ধতরট্ঠো, পাপং কিঞ্চি [কঞ্চি (সী.)] ন দক্খতি.
‘‘খিপ্পমন্তেপুরং নেত্ৰা [গন্ত্ৰা (স্যা. ক.)], রঞ্ঞো দস্সেহি নো উভো;
অবদ্ধে পকতিভূতে, কাজে [কাচে (পী.)] উভযতো ঠিতে.
‘‘ধতরট্ঠা মহারাজ, হংসাধিপতিনো ইমে;
অযঞ্হি ¶ রাজা হংসানং, অযং সেনাপতীতরো.
‘‘অসংসযং ইমং দিস্ৰা, হংসরাজং নরাধিপো;
পতীতো সুমনো ৰিত্তো [চিত্তো (ক.)], বহুং দস্সতি তে ধনং’’.
‘‘তস্স তং ৰচনং সুত্ৰা, কম্মুনা উপপাদযি;
খিপ্পমন্তেপুরং গন্ত্ৰা, রঞ্ঞো হংসে অদস্সযি;
অবদ্ধে পকতিভূতে, কাজে উভযতো ঠিতে.
‘‘ধতরট্ঠা ¶ মহারাজ, হংসাধিপতিনো ইমে;
অযঞ্হি রাজা হংসানং, অযং সেনাপতীতরো’’.
‘‘কথং পনিমে ৰিহঙ্গা [ৰিহগা (সী. পী.)], তৰ হত্থত্তমাগতা [হত্থত্থ’মাগতা (সী. স্যা. পী.)];
কথং লুদ্দো মহন্তানং, ইস্সরে ইধ অজ্ঝগা’’.
‘‘ৰিহিতা সন্তিমে পাসা, পল্ললেসু জনাধিপ;
যং যদাযতনং মঞ্ঞে, দিজানং পাণরোধনং.
‘‘তাদিসং পাসমাসজ্জ, হংসরাজা অবজ্ঝথ;
তং অবদ্ধো উপাসীনো, মমাযং অজ্ঝভাসথ.
‘‘সুদুক্করং অনরিযেহি, দহতে ভাৰমুত্তমং;
ভত্তুরত্থে পরক্কন্তো, ধম্মযুত্তো [ধম্মে যুত্তো (সী. পী.)] ৰিহঙ্গমো.
‘‘অত্তনাযং [অত্তনো যং (স্যা.)] চজিত্ৰান, জীৰিতং জীৰিতারহো;
অনুত্থুনন্তো আসীনো, ভত্তু যাচিত্থ জীৰিতং.
‘‘তস্স তং ৰচনং সুত্ৰা, পসাদমহমজ্ঝগা;
ততো নং পামুচিং [পামুঞ্চিং (পী. ক.)] পাসা, অনুঞ্ঞাসিং সুখেন চ.
‘‘‘সো ¶ ¶ পতীতো পমুত্তেন, ভত্তুনা ভত্তুগারৰো;
অজ্ঝভাসথ ৰক্কঙ্গো, ৰাচং কণ্ণসুখং ভণং.
‘‘‘এৰং লুদ্দক নন্দস্সু, সহ সব্বেহি ঞাতিভি;
যথাহমজ্জ নন্দামি, মুত্তং দিস্ৰা দিজাধিপং.
‘‘‘এহি তং অনুসিক্খামি, যথা ত্ৰমপি লচ্ছসে;
লাভং তৰাযং ধতরট্ঠো, পাপং কিঞ্চি ন দক্খতি.
‘‘‘খিপ্পমন্তেপুরং নেত্ৰা [গন্ত্ৰা (সব্বত্থ)], রঞ্ঞো দস্সেহি নো উভো;
অবদ্ধে পকতিভূতে, কাজে উভযতো ঠিতে.
‘‘‘ধতরট্ঠা মহারাজ, হংসাধিপতিনো ইমে;
অযঞ্হি রাজা হংসানং, অযং সেনাপতীতরো.
‘‘‘অসংসযং ইমং দিস্ৰা, হংসরাজং নরাধিপো;
পতীতো সুমনো ৰিত্তো, বহুং দস্সতি তে ধনং’.
‘‘এৰমেতস্স ৰচনা, আনীতামে উভো মযা;
এত্থেৰ হি ইমে আসুং [অস্সু (সী. স্যা. পী.)], উভো অনুমতা মযা.
‘‘সোযং এৰং গতো পক্খী, দিজো পরমধম্মিকো;
মাদিসস্স হি লুদ্দস্স, জনযেয্যাথ মদ্দৰং.
‘‘উপাযনঞ্চ ¶ তে দেৰ, নাঞ্ঞং পস্সামি এদিসং;
সব্বসাকুণিকাগামে, তং পস্স মনুজাধিপ’’.
‘‘দিস্ৰা নিসিন্নং রাজানং, পীঠে সোৰণ্ণযে সুভে;
অজ্ঝভাসথ ৰক্কঙ্গো, ৰাচং কণ্ণসুখং ভণং.
‘‘কচ্চিন্নু ¶ ভোতো কুসলং, কচ্চি ভোতো অনামযং;
কচ্চি রট্ঠমিদং ফীতং, ধম্মেন মনুসাসসি’’.
‘‘কুসলঞ্চেৰ মে হংস, অথো হংস অনামযং;
অথো রট্ঠমিদং ফীতং, ধম্মেন মনুসাসহং’’ [মনুসিস্সতি (সী. পী.)].
‘‘কচ্চি ভোতো অমচ্চেসু, দোসো কোচি ন ৰিজ্জতি;
কচ্চি চ [কচ্চিন্নু (সী. পী.)] তে তৰত্থেসু, নাৰকঙ্খন্তি জীৰিতং’’.
‘‘অথোপি ¶ মে অমচ্চেসু, দোসো কোচি ন ৰিজ্জতি;
অথোপি তে [অথোপিমে (সী. পী.)] মমত্থেসু, নাৰকঙ্খন্তি জীৰিতং’’.
‘‘কচ্চি তে সাদিসী ভরিযা, অস্সৰা পিযভাণিনী;
পুত্তরূপযসূপেতা, তৰ ছন্দৰসানুগা’’.
‘‘অথো মে সাদিসী ভরিযা, অস্সৰা পিযভাণিনী;
পুত্তরূপযসূপেতা, মম ছন্দৰসানুগা’’.
‘‘ভৰন্তং [ভৰং তু (সী. পী.), ভৰন্নু (স্যা.)] কচ্চি নু মহা-সত্তুহত্থত্ততং [হত্থত্থতং (সী. স্যা. পী.)] গতো;
দুক্খমাপজ্জি ৰিপুলং, তস্মিং পঠমমাপদে.
‘‘কচ্চি যন্তাপতিত্ৰান, দণ্ডেন সমপোথযি;
এৰমেতেসং জম্মানং, পাতিকং [পাকতিকং (সী. পী.)] ভৰতি তাৰদে’’.
‘‘খেমমাসি মহারাজ, এৰমাপদিযা সতি [এৰমাপদি সংসতি (সী. পী.)];
ন চাযং কিঞ্চি রস্মাসু, সত্তূৰ সমপজ্জথ.
‘‘পচ্চগমিত্থ নেসাদো, পুব্বেৰ অজ্ঝভাসথ;
তদাযং সুমুখোযেৰ, পণ্ডিতো পচ্চভাসথ.
‘‘তস্স ¶ তং ৰচনং সুত্ৰা, পসাদমযমজ্ঝগা;
ততো মং পামুচী পাসা, অনুঞ্ঞাসি সুখেন চ.
‘‘ইদঞ্চ সুমুখেনেৰ, এতদত্থায চিন্তিতং;
ভোতো সকাসেগমনং [সকাসে + আগমনং], এতস্স ধনমিচ্ছতা’’.
‘‘স্ৰাগতঞ্চেৰিদং ভৰতং, পতীতো চস্মি দস্সনা;
এসো চাপি বহুং ৰিত্তং, লভতং যাৰদিচ্ছতি’’ [যাৰতিচ্ছতি (সী. পী.)].
‘‘সন্তপ্পযিত্ৰা ¶ নেসাদং, ভোগেহি মনুজাধিপো;
অজ্ঝভাসথ ৰক্কঙ্গং, ৰাচং কণ্ণসুখং ভণং’’.
‘‘যং খলু ধম্মমাধীনং, ৰসো ৰত্ততি কিঞ্চনং;
সব্বত্থিস্সরিযং তৰ [সব্বত্থিস্সরিযং ভৰতং (সী. স্যা. পী.), সব্বিস্সরিযং ভৰতং (স্যা. ক.)], তং পসাস [পসাসথ (সী. স্যা. পী.)] যদিচ্ছথ.
‘‘দানত্থং ¶ উপভোত্তুং ৰা, যং চঞ্ঞং উপকপ্পতি;
এতং দদামি ৰো ৰিত্তং, ইস্সরিযং [ইস্সেরং (সী.), ইস্সরং (পী.)] ৰিস্সজামি ৰো’’.
‘‘যথা চ ম্যাযং সুমুখো, অজ্ঝভাসেয্য পণ্ডিতো;
কামসা বুদ্ধিসম্পন্নো, তং ম্যাস্স পরমপ্পিযং’’.
‘‘অহং খলু মহারাজ, নাগরাজারিৰন্তরং;
পটিৰত্তুং ন সক্কোমি, ন মে সো ৰিনযো সিযা.
‘‘অম্হাকঞ্চেৰ সো [যো (সী. পী.)] সেট্ঠো, ত্ৰঞ্চ উত্তমসত্তৰো;
ভূমিপালো মনুস্সিন্দো, পূজা বহূহি হেতুহি.
‘‘তেসং উভিন্নং ভণতং, ৰত্তমানে ৰিনিচ্ছযে;
নন্তরং [নান্তরং (সী. পী.)] পটিৰত্তব্বং, পেস্সেন [পেসেন (ক.)] মনুজাধিপ’’.
‘‘ধম্মেন ¶ কির নেসাদো, পণ্ডিতো অণ্ডজো ইতি;
ন হেৰ অকতত্তস্স, নযো এতাদিসো সিযা.
‘‘এৰং অগ্গপকতিমা, এৰং উত্তমসত্তৰো;
যাৰতত্থি মযা দিট্ঠা, নাঞ্ঞং পস্সামি এদিসং.
‘‘তুট্ঠোস্মি ৰো পকতিযা, ৰাক্যেন মধুরেন চ;
এসো চাপি মমচ্ছন্দো, চিরং পস্সেয্য ৰো উভো’’.
‘‘যং কিচ্চং [যংকিঞ্চি (পী.)] পরমে মিত্তে, কতমস্মাসু [রস্মাসু (সী. পী.)] তং তযা;
পত্তা নিস্সংসযং ত্যাম্হা [ত্যম্হা (পী.)], ভত্তিরস্মাসু যা তৰ.
‘‘অদুঞ্চ নূন সুমহা, ঞাতিসঙ্ঘস্স মন্তরং;
অদস্সনেন অস্মাকং [অম্হাকং (সী. পী.)], দুক্খং বহূসু পক্খিসু.
‘‘তেসং সোকৰিঘাতায, তযা অনুমতা মযং;
তং পদক্খিণতো কত্ৰা, ঞাতিং [ঞাতী (সী. স্যা. পী.)] পস্সেমুরিন্দম [পস্সেমরিন্দম (সী. পী.)].
‘‘অদ্ধাহং ৰিপুলং পীতিং, ভৰতং ৰিন্দামি দস্সনা;
এসো চাপি মহা অত্থো, ঞাতিৰিস্সাসনা সিযা’’.
‘‘ইদং ¶ ৰত্ৰা ধতরট্ঠো [ধতরট্ঠা (সী.)], হংসরাজা নরাধিপং;
উত্তমং জৰমন্ৰায [উত্তমজৰমত্তায (সী. পী.)], ঞাতিসঙ্ঘং উপাগমুং.
‘‘তে ¶ অরোগে অনুপ্পত্তে, দিস্ৰান পরমে দিজে;
কেকাতি মকরুং হংসা, পুথুসদ্দো অজাযথ.
‘‘তে পতীতা পমুত্তেন, ভত্তুনা ভত্তুগারৰা;
সমন্তা পরিকিরিংসু [পরিকরিংসু (সী. স্যা. পী.)], অণ্ডজা লদ্ধপচ্চযা’’.
‘‘এৰং ¶ মিত্তৰতং অত্থা, সব্বে হোন্তি পদক্খিণা;
হংসা যথা ধতরট্ঠা, ঞাতিসঙ্ঘং উপাগমু’’ন্তি.
চূল় [চুল্ল (সী. স্যা. পী.)] হংসজাতকং পঠমং.
৫৩৪. মহাহংসজাতকং (২)
‘‘এতে হংসা পক্কমন্তি, ৰক্কঙ্গা ভযমেরিতা;
হরিত্তচ হেমৰণ্ণ, কামং সুমুখ পক্কম.
‘‘ওহায মং ঞাতিগণা, একং পাসৰসং গতং;
অনপেক্খমানা গচ্ছন্তি, কিং একো অৰহীযসি.
‘‘পতেৰ পততং সেট্ঠ, নত্থি বদ্ধে সহাযতা;
মা অনীঘায হাপেসি, কামং সুমুখ পক্কম’’.
‘‘নাহং দুক্খপরেতোপি [দুক্খপরেতো’’তি (জা. ১.১৫.১৩৬) অট্ঠকথাযো ওলোকেতব্বা], ধতরট্ঠ তুৰং [তৰং (সী. পী.)] জহে;
জীৰিতং মরণং ৰা মে, তযা সদ্ধিং ভৰিস্সতি.
‘‘নাহং দুক্খপরেতোপি, ধতরট্ঠ তুৰং জহে;
ন মং অনরিযসংযুত্তে, কম্মে যোজেতুমরহসি.
‘‘সকুমারো সখা ত্যস্মি, সচিত্তে চস্মি তে [সমিতে (পী.), ত্যস্মি তে (ক.)] ঠিতো;
ঞাতো সেনাপতি ত্যাহং, হংসানং পৰরুত্তম.
‘‘কথং ¶ অহং ৰিকত্থিস্সং [ৰিকত্তিস্সং (পী.)], ঞাতিমজ্ঝে ইতো গতো;
তং হিত্ৰা পততং সেট্ঠ, কিং তে ৰক্খামিতো গতো;
ইধ পাণং চজিস্সামি, নানরিযং [ন অনরিযং (পী.)] কত্তুমুস্সহে’’.
‘‘এসো ¶ হি ধম্মো সুমুখ, যং ত্ৰং অরিযপথে ঠিতো;
যো ভত্তারং সখারং মং, ন পরিচ্চত্তুমুস্সহে.
‘‘তঞ্হি মে পেক্খমানস্স, ভযং নত্ৰেৰ জাযতি;
অধিগচ্ছসি ত্ৰং ময্হং, এৰং ভূতস্স জীৰিতং’’.
‘‘ইচ্চেৰং ¶ [ইচ্চেৰ (সী. পী.)] মন্তযন্তানং, অরিযানং অরিযৰুত্তিনং;
দণ্ডমাদায নেসাদো, আপতী [আপদী (ক.)] তুরিতো ভুসং.
‘‘তমাপতন্তং দিস্ৰান, সুমুখো অতিব্রূহযি [অপরিব্রূহযি (সী. পী.)];
অট্ঠাসি পুরতো রঞ্ঞো, হংসো ৰিস্সাসযং ব্যধং [ব্যথং (সী. স্যা. পী.)].
‘‘মা ভাযি পততং সেট্ঠ, ন হি ভাযন্তি তাদিসা;
অহং যোগং পযুঞ্জিস্সং, যুত্তং ধম্মূপসংহিতং;
তেন পরিযাপদানেন [পরিযাদানেন (ক.)], খিপ্পং পাসা পমোক্খসি’’.
‘‘তস্স তং ৰচনং সুত্ৰা, সুমুখস্স সুভাসিতং;
পহট্ঠলোমো নেসাদো, অঞ্জলিস্স পণামযি.
‘‘ন মে সুতং ৰা দিট্ঠং ৰা, ভাসন্তো মানুসিং দিজো;
অরিযং ব্রুৰানো [ব্রূহন্তো (স্যা. ক.)] ৰক্কঙ্গো, চজন্তো মানুসিং গিরং.
‘‘কিন্নু তাযং দিজো হোতি, মুত্তো বদ্ধং উপাসসি;
ওহায সকুণা যন্তি, কিং একো অৰহীযসি’’.
‘‘রাজা মে সো দিজামিত্ত, সেনাপচ্চস্স কারযিং;
তমাপদে পরিচ্চত্তুং, নুস্সহে ৰিহগাধিপং.
‘‘মহাগণায ভত্তা মে, মা একো ব্যসনং অগা;
তথা ¶ তং সম্ম নেসাদ, ভত্তাযং অভিতো রমে’’.
‘‘অরিযৰত্তসি ¶ ৰক্কঙ্গ, যো পিণ্ডমপচাযসি;
চজামি তে তং ভত্তারং, গচ্ছথূভো [গচ্ছতু ভো (পী.)] যথাসুখং’’.
‘‘সচে অত্তপ্পযোগেন, ওহিতো হংসপক্খিনং;
পটিগণ্হাম তে সম্ম, এতং অভযদক্খিণং.
‘‘নো চে অত্তপ্পযোগেন, ওহিতো হংসপক্খিনং;
অনিস্সরো মুঞ্চমম্হে, থেয্যং কযিরাসি লুদ্দক’’.
‘‘যস্স ত্ৰং ভতকো [ভটকো (ক.)] রঞ্ঞো, কামং তস্সেৰ পাপয;
তত্থ সংযমনো [সংযমানো (পী.)] রাজা, যথাভিঞ্ঞং করিস্সতি’’.
‘‘ইচ্চেৰং ৰুত্তো নেসাদো, হেমৰণ্ণে হরিত্তচে;
উভো হত্থেহি সঙ্গয্হ [পগ্গয্হ (স্যা. ক.)], পঞ্জরে অজ্ঝৰোদহি.
‘‘তে পঞ্জরগতে পক্খী, উভো ভস্সরৰণ্ণিনে;
সুমুখং ধতরট্ঠঞ্চ, লুদ্দো আদায পক্কমি’’.
‘‘হরীযমানো ¶ ধতরট্ঠো, সুমুখং এতদব্রৰি;
বাল়্হং ভাযামি সুমুখ, সামায লক্খণূরুযা;
অস্মাকং ৰধমঞ্ঞায, অথত্তানং ৰধিস্সতি.
‘‘পাকহংসা চ সুমুখ, সুহেমা হেমসুত্তচা;
কোঞ্চী সমুদ্দতীরেৰ, কপণা নূন রুচ্ছতি’’.
‘‘এৰং মহন্তো লোকস্স, অপ্পমেয্যো মহাগণী;
একিত্থিমনুসোচেয্য, নযিদং পঞ্ঞৰতামিৰ.
‘‘ৰাতোৰ ¶ গন্ধমাদেতি, উভযং ছেকপাপকং;
বালো আমকপক্কংৰ, লোলো অন্ধোৰ আমিসং.
‘‘অৰিনিচ্ছযঞ্ঞু অত্থেসু, মন্দোৰ পটিভাসি [পটিভাতি (ক.)] মং;
কিচ্চাকিচ্চং ন জানাসি, সম্পত্তো কালপরিযাযং.
‘‘অড্ঢুম্মত্তো উদীরেসি, যো সেয্যা মঞ্ঞসিত্থিযো;
বহুসাধারণা হেতা, সোণ্ডানংৰ সুরাঘরং.
‘‘মাযা ¶ চেসা মরীচী চ, সোকো রোগো চুপদ্দৰো;
খরা চ বন্ধনা চেতা, মচ্চুপাসা গুহাসযা [পচ্চুপাসো গুহাসযো (সী. পী.)];
তাসু যো ৰিস্সসে পোসো, সো নরেসু নরাধমো’’.
‘‘যং ৰুদ্ধেহি উপঞ্ঞাতং, কো তং নিন্দিতুমরহতি;
মহাভূতিত্থিযো নাম, লোকস্মিং উদপজ্জিসুং.
‘‘খিড্ডা পণিহিতা ত্যাসু, রতি ত্যাসু পতিট্ঠিতা;
বীজানি ত্যাসু রূহন্তি, যদিদং সত্তা পজাযরে;
তাসু কো নিব্বিদে [নিব্বিজে (ক.)] পোসো, পাণমাসজ্জ পাণিভি [পাণহি (সী.)].
‘‘ত্ৰমেৰ নঞ্ঞো সুমুখ, থীনং অত্থেসু যুঞ্জসি;
তস্স ত্যজ্জ ভযে জাতে, ভীতেন জাযতে মতি.
‘‘সব্বো হি সংসযং পত্তো, ভযং ভীরু তিতিক্খতি;
পণ্ডিতা চ মহন্তানো [মহত্তানো (সী.)], অত্থে যুঞ্জন্তি দুয্যুজে.
‘‘এতদত্থায রাজানো, সূরমিচ্ছন্তি মন্তিনং;
পটিবাহতি যং সূরো, আপদং অত্তপরিযাযং.
‘‘মা ¶ নো অজ্জ ৰিকন্তিংসু, রঞ্ঞো সূদা মহানসে;
তথা হি ৰণ্ণো পত্তানং, ফলং ৰেল়ুংৰ তং ৰধি.
‘‘মুত্তোপি ¶ ন ইচ্ছি [নিচ্ছসি (ক.)] উড্ডেতুং [ওড্ডেতুং (সী.)], সযং বন্ধং উপাগমি;
সোপজ্জ সংসযং পত্তো, অত্থং গণ্হাহি মা মুখং’’.
‘‘সো তং [ত্ৰং (স্যা. পী.)] যোগং পযুঞ্জস্সু, যুত্তং ধম্মূপসংহিতং [ধম্মোপসঞ্হিতং (ক.)];
তৰ পরিযাপদানেন, মম পাণেসনং চর’’.
‘‘মা ভাযি পততং সেট্ঠ, ন হি ভাযন্তি তাদিসা;
অহং যোগং পযুঞ্জিস্সং, যুত্তং ধম্মূপসংহিতং [ধম্মোপসঞ্হিতং (ক.)];
মম পরিযাপদানেন, খিপ্পং পাসা পমোক্খসি’’.
‘‘সো [স (সী.)] লুদ্দো হংসকাজেন [হংসকাচেন (পী.)], রাজদ্ৰারং উপাগমি;
পটিৰেদেথ মং রঞ্ঞো, ধতরট্ঠাযমাগতো’’.
‘‘তে ¶ দিস্ৰা পুঞ্ঞসংকাসে, উভো লক্খণসম্মতে [লক্খঞ্ঞাসম্মতে (সী. পী.)];
খলু সংযমনো রাজা, অমচ্চে অজ্ঝভাসথ.
‘‘দেথ লুদ্দস্স ৰত্থানি, অন্নং পানঞ্চ ভোজনং;
কামং করো হিরঞ্ঞস্স, যাৰন্তো এস ইচ্ছতি’’.
‘‘দিস্ৰা লুদ্দং পসন্নত্তং, কাসিরাজা তদব্রৰি;
যদ্যাযং [যদাযং (সী. স্যা. পী.)] সম্ম খেমক, পুণ্ণা হংসেহি তিট্ঠতি.
‘‘কথং রুচিমজ্ঝগতং, পাসহত্থো উপাগমি;
ওকিণ্ণং ঞাতিসঙ্ঘেহি, নিম্মজ্ঝিমং [নিমজ্ঝিমং (সী. পী. ক.)] কথং গহি’’.
‘‘অজ্জ মে সত্তমা রত্তি, অদনানি [আদানানি (স্যা. পী. ক.)] উপাসতো [উপাগতো (ক.)];
পদমেতস্স ¶ অন্ৰেসং, অপ্পমত্তো ঘটস্সিতো.
‘‘অথস্স পদমদ্দক্খিং, চরতো অদনেসনং;
তত্থাহং ওদহিং পাসং, এৰং তং [এৰেতং (সী. পী.)] দিজমগ্গহিং’’.
‘‘লুদ্দ দ্ৰে ইমে সকুণা, অথ একোতি ভাসসি;
চিত্তং নু তে ৰিপরিযত্তং [ৰিপরিযত্থং (পী.)], অদু কিন্নু জিগীসসি’’ [জিগিংসসি (সী. পী.)].
‘‘যস্স লোহিতকা তালা, তপনীযনিভা সুভা;
উরং সংহচ্চ তিট্ঠন্তি, সো মে বন্ধং উপাগমি.
‘‘অথাযং ভস্সরো পক্খী, অবদ্ধো বদ্ধমাতুরং;
অরিযং ব্রুৰানো অট্ঠাসি, চজন্তো মানুসিং গিরং’’.
‘‘অথ কিং [অথ কিন্নু (সী. পী.), কথং নু (স্যা.)] দানি সুমুখ, হনুং সংহচ্চ তিট্ঠসি;
অদু মে পরিসং পত্তো, ভযা ভীতো ন ভাসসি’’.
‘‘নাহং ¶ কাসিপতি ভীতো, ওগয্হ পরিসং তৰ;
নাহং ভযা ন ভাসিস্সং, ৰাক্যং অত্থম্হি তাদিসে’’.
‘‘ন তে অভিসরং পস্সে, ন রথে নপি পত্তিকে;
নাস্স চম্মং ৰ কীটং ৰা, ৰম্মিতে চ ধনুগ্গহে.
‘‘ন ¶ হিরঞ্ঞং সুৰণ্ণং ৰা, নগরং ৰা সুমাপিতং;
ওকিণ্ণপরিখং দুগ্গং, দল়্হমট্টালকোট্ঠকং;
যত্থ পৰিট্ঠো সুমুখ, ভাযিতব্বং ন ভাযসি’’.
‘‘ন মে অভিসরেনত্থো, নগরেন ধনেন ৰা;
অপথেন পথং যাম, অন্তলিক্খেচরা মযং.
‘‘সুতা ¶ চ পণ্ডিতা ত্যম্হা, নিপুণা অত্থচিন্তকা [চত্থচিন্তকা (ক.)];
ভাসেমত্থৰতিং ৰাচং, সচ্চে চস্স পতিট্ঠিতো.
‘‘কিঞ্চ তুয্হং অসচ্চস্স, অনরিযস্স করিস্সতি;
মুসাৰাদিস্স লুদ্দস্স, ভণিতম্পি সুভাসিতং’’.
‘‘তং ব্রাহ্মণানং ৰচনা, ইমং খেমমকারযি [খেমিকারযি (সী. পী.)];
অভযঞ্চ তযা ঘুট্ঠং, ইমাযো দসধা দিসা.
‘‘ওগয্হ তে পোক্খরণিং, ৰিপ্পসন্নোদকং সুচিং;
পহূতং চাদনং তত্থ, অহিংসা চেত্থ পক্খিনং.
‘‘ইদং সুত্ৰান নিগ্ঘোসং, আগতম্হ তৰন্তিকে;
তে তে বন্ধস্ম পাসেন, এতং তে ভাসিতং মুসা.
‘‘মুসাৰাদং পুরক্খত্ৰা, ইচ্ছালোভঞ্চ পাপকং;
উভো সন্ধিমতিক্কম্ম, অসাতং উপপজ্জতি’’.
‘‘নাপরজ্ঝাম সুমুখ, নপি লোভাৰ মগ্গহিং;
সুতা চ পণ্ডিতাত্যত্থ, নিপুণা অত্থচিন্তকা.
‘‘অপ্পেৰত্থৰতিং ৰাচং, ব্যাহরেয্যুং [ব্যাকরেয্যুং (সী. পী.)] ইধাগতা;
তথা তং সম্ম নেসাদো, ৰুত্তো সুমুখ মগ্গহি’’.
‘‘নেৰ ভীতা [ভূতা (স্যা. ক.)] কাসিপতি, উপনীতস্মি জীৰিতে;
ভাসেমত্থৰতিং ৰাচং, সম্পত্তা কালপরিযাযং.
‘‘যো মিগেন মিগং হন্তি, পক্খিং ৰা পন পক্খিনা;
সুতেন ৰা সুতং কিণ্যা [কিণে (সী. পী.)], কিং অনরিযতরং ততো.
‘‘যো ¶ ¶ ¶ চারিযরুদং [চ অরিযরুদং (সী. পী.)] ভাসে, অনরিযধম্মৰস্সিতো [অনরিযধম্মমৰস্সিতো (সী.)];
উভো সো ধংসতে লোকা, ইধ চেৰ পরত্থ চ.
‘‘ন মজ্জেথ যসং পত্তো, ন ব্যাধে [ব্যথে (সী. পী.)] পত্তসংসযং;
ৰাযমেথেৰ কিচ্চেসু, সংৰরে ৰিৰরানি চ.
‘‘যে ৰুদ্ধা অব্ভতিক্কন্তা [নাব্ভচিক্খন্তা (ক.)], সম্পত্তা কালপরিযাযং;
ইধ ধম্মং চরিত্ৰান, এৰংতে [এৰেতে (সী. পী.)] তিদিৰং গতা.
‘‘ইদং সুত্ৰা কাসিপতি, ধম্মমত্তনি পালয;
ধতরট্ঠঞ্চ মুঞ্চাহি, হংসানং পৰরুত্তমং’’.
‘‘আহরন্তুদকং পজ্জং, আসনঞ্চ মহারহং;
পঞ্জরতো পমোক্খামি, ধতরট্ঠং যসস্সিনং.
‘‘তঞ্চ সেনাপতিং ধীরং, নিপুণং অত্থচিন্তকং;
যো সুখে সুখিতো রঞ্ঞে [রঞ্ঞো (সী. স্যা. পী. ক.)], দুক্খিতে হোতি দুক্খিতো.
‘‘এদিসো খো অরহতি, পিণ্ডমস্নাতু ভত্তুনো;
যথাযং সুমুখো রঞ্ঞো, পাণসাধারণো সখা’’.
‘‘পীঠঞ্চ সব্বসোৰণ্ণং, অট্ঠপাদং মনোরমং;
মট্ঠং কাসিকমত্থন্নং [কাসিকপত্থিণ্ণং (সী.), কাসিকৰত্থিনং (স্যা. পী.)], ধতরট্ঠো উপাৰিসি.
‘‘কোচ্ছঞ্চ সব্বসোৰণ্ণং, ৰেয্যগ্ঘপরিসিব্বিতং;
সুমুখো অজ্ঝুপাৰেক্খি, ধতরট্ঠস্সনন্তরা [অনন্তরং (সী.)].
‘‘তেসং কঞ্চনপত্তেহি, পুথূ আদায কাসিযো;
হংসানং অভিহারেসুং, অগ্গরঞ্ঞো পৰাসিতং’’.
‘‘দিস্ৰা ¶ অভিহটং অগ্গং, কাসিরাজেন পেসিতং;
কুসলো খত্তধম্মানং, ততো পুচ্ছি অনন্তরা.
‘‘কচ্চিন্নু ভোতো কুসলং, কচ্চি ভোতো অনামযং;
কচ্চি রট্ঠমিদং ফীতং, ধম্মেন মনুসাসসি’’.
‘‘কুসলঞ্চেৰ ¶ মে হংস, অথো হংস অনামযং;
অথো রট্ঠমিদং ফীতং, ধম্মেনং মনুসাসহং.
‘‘কচ্চি ভোতো অমচ্চেসু, দোসো কোচি ন ৰিজ্জতি;
কচ্চি চ তে তৰত্থেসু, নাৰকঙ্খন্তি জীৰিতং’’.
‘‘অথোপি মে অমচ্চেসু, দোসো কোচি ন ৰিজ্জতি;
অথোপি তে মমত্থেসু, নাৰকঙ্খন্তি জীৰিতং’’.
‘‘কচ্চি ¶ তে সাদিসী ভরিযা, অস্সৰা পিযভাণিনী;
পুত্তরূপযসূপেতা, তৰ ছন্দৰসানুগা’’.
‘‘অথো মে সাদিসী ভরিযা, অস্সৰা পিযভাণিনী;
পুত্তরূপযসূপেতা, মম ছন্দৰসানুগা’’.
‘‘কচ্চি রট্ঠং অনুপ্পীল়ং, অকুতোচিউপদ্দৰং;
অসাহসেন ধম্মেন, সমেন মনুসাসসি’’.
‘‘অথো রট্ঠং অনুপ্পীল়ং, অকুতোচিউপদ্দৰং;
অসাহসেন ধম্মেন, সমেন মনুসাসহং’’.
‘‘কচ্চি সন্তো অপচিতা, অসন্তো পরিৰজ্জিতা;
নো চে [চ (স্যা. ক.)] ধম্মং নিরংকত্ৰা, অধম্মমনুৰত্তসি’’.
‘‘সন্তো ¶ চ মে অপচিতা, অসন্তো পরিৰজ্জিতা;
ধম্মমেৰানুৰত্তামি, অধম্মো মে নিরঙ্কতো’’.
‘‘কচ্চি নানাগতং [কচ্চি নুনাগতং (স্যা. ক.)] দীঘং, সমৰেক্খসি খত্তিয;
কচ্চি মত্তো [ন মত্তো (সী.)] মদনীযে, পরলোকং ন সন্তসি’’.
‘‘নাহং অনাগতং [অহং অনাগতং (স্যা.)] দীঘং, সমৰেক্খামি পক্খিম;
ঠিতো দসসু ধম্মেসু, পরলোকং ন সন্তসে [সন্তসিং (স্যা.)].
‘‘দানং সীলং পরিচ্চাগং, অজ্জৰং মদ্দৰং তপং;
অক্কোধং অৰিহিংসঞ্চ, খন্তিঞ্চ [খন্তী চ (ক.)] অৰিরোধনং.
‘‘ইচ্চেতে কুসলে ধম্মে, ঠিতে পস্সামি অত্তনি;
ততো মে জাযতে পীতি, সোমনস্সঞ্চনপ্পকং.
‘‘সুমুখো ¶ চ অচিন্তেত্ৰা, ৰিসজ্জি [ৰিস্সজি (সী. পী.)] ফরুসং গিরং;
ভাৰদোসমনঞ্ঞায, অস্মাকাযং ৰিহঙ্গমো.
‘‘সো কুদ্ধো ফরুসং ৰাচং, নিচ্ছারেসি অযোনিসো;
যানস্মাসু [যানস্মাসু (সী. স্যা পী.)] ন ৰিজ্জন্তি, নযিদং [ন ইদং (সী. পী.)] পঞ্ঞৰতামিৰ’’.
‘‘অত্থি মে তং অতিসারং, ৰেগেন মনুজাধিপ;
ধতরট্ঠে চ বদ্ধস্মিং, দুক্খং মে ৰিপুলং অহু.
‘‘ত্ৰং নো পিতাৰ পুত্তানং, ভূতানং ধরণীরিৰ;
অস্মাকং অধিপন্নানং, খমস্সু রাজকুঞ্জর’’.
‘‘এতং [এৰং (স্যা. ক.)] তে অনুমোদাম, যং ভাৰং ন নিগূহসি;
খিলং পভিন্দসি পক্খি, উজুকোসি ৰিহঙ্গম’’.
‘‘যং ¶ ¶ কিঞ্চি রতনং অত্থি, কাসিরাজ নিৰেসনে;
রজতং জাতরূপঞ্চ, মুত্তা ৰেল়ুরিযা বহূ.
‘‘মণযো সঙ্খমুত্তঞ্চ, ৰত্থকং হরিচন্দনং;
অজিনং দন্তভণ্ডঞ্চ, লোহং কাল়াযসং বহুং;
এতং দদামি ৰো ৰিত্তং, ইস্সরিযং [ইস্সেরং (সী.), ইস্সরং (স্যা. পী. ক.)] ৰিস্সজামি ৰো’’.
‘‘অদ্ধা অপচিতা ত্যম্হা, সক্কতা চ রথেসভ;
ধম্মেসু ৰত্তমানানং, ত্ৰং নো আচরিযো ভৰ.
‘‘আচরিয সমনুঞ্ঞাতা, তযা অনুমতা মযং;
তং পদক্খিণতো কত্ৰা, ঞাতিং [ঞাতী (সী. স্যা. পী.)] পস্সেমুরিন্দম’’ [পস্সেমরিন্দম (সী. পী.)].
‘‘সব্বরত্তিং চিন্তযিত্ৰা, মন্তযিত্ৰা যথাতথং;
কাসিরাজা অনুঞ্ঞাসি, হংসানং পৰরুত্তমং’’.
‘‘ততো রত্যা ৰিৰসানে, সূরিযুগ্গমনং [সুরিযস্সুগ্গমনং (সী. স্যা.), সুরিযুগ্গমনং (পী.)] পতি;
পেক্খতো কাসিরাজস্স, ভৰনা তে [ভৰনতো (স্যা. ক.)] ৰিগাহিসুং’’.
‘‘তে অরোগে অনুপ্পত্তে, দিস্ৰান পরমে দিজে;
কেকাতি মকরুং হংসা, পুথুসদ্দো অজাযথ.
‘‘তে ¶ পতীতা পমুত্তেন, ভত্তুনা ভত্তুগারৰা;
সমন্তা পরিকিরিংসু, অণ্ডজা লদ্ধপচ্চযা’’.
‘‘এৰং মিত্তৰতং অত্থা, সব্বে হোন্তি পদক্খিণা;
হংসা যথা ধতরট্ঠা, ঞাতিসঙ্ঘং উপাগমু’’ন্তি.
মহাহংসজাতকং দুতিযং.
৫৩৫. সুধাভোজনজাতকং (৩)
‘‘নেৰ ¶ কিণামি নপি ৰিক্কিণামি, ন চাপি মে সন্নিচযো চ অত্থি [ইধত্থি (স্যা.)];
সুকিচ্ছরূপং ৰতিদং পরিত্তং, পত্থোদনো নালমযং দুৰিন্নং’’.
‘‘অপ্পম্হা অপ্পকং দজ্জা, অনুমজ্ঝতো মজ্ঝকং;
বহুম্হা বহুকং দজ্জা, অদানং নুপপজ্জতি [ন উপপজ্জতি (সী. পী.)].
‘‘তং তং ৰদামি কোসিয, দেহি দানানি ভুঞ্জ চ;
অরিযমগ্গং সমারূহ [অরিযং মগ্গং সমারুহ (সী. পী.)], নেকাসী লভতে সুখং’’.
‘‘মোঘঞ্চস্স ¶ হুতং হোতি, মোঘঞ্চাপি সমীহিতং;
অতিথিস্মিং যো নিসিন্নস্মিং, একো ভুঞ্জতি ভোজনং.
‘‘তং তং ৰদামি কোসিয, দেহি দানানি ভুঞ্জ চ;
অরিযমগ্গং সমারূহ, নেকাসী লভতে সুখং’’.
‘‘সচ্চঞ্চস্স হুতং হোতি, সচ্চঞ্চাপি সমীহিতং;
অতিথিস্মিং যো নিসিন্নস্মিং, নেকো ভুঞ্জতি ভোজনং.
‘‘তং তং ৰদামি কোসিয, দেহি দানানি ভুঞ্জ চ;
অরিযমগ্গং সমারূহ, নেকাসী লভতে সুখং’’.
‘‘সরঞ্চ জুহতি পোসো, বহুকায গযায চ;
দোণে তিম্বরুতিত্থস্মিং, সীঘসোতে মহাৰহে.
‘‘অত্র চস্স হুতং হোতি, অত্র চস্স সমীহিতং;
অতিথিস্মিং ¶ যো নিসিন্নস্মিং, নেকো ভুঞ্জতি ভোজনং.
‘‘তং ¶ তং ৰদামি কোসিয, দেহি দানানি ভুঞ্জ চ;
অরিযমগ্গং সমারূহ, নেকাসী লভতে সুখং’’.
‘‘বল়িসঞ্হি সো নিগিলতি [নিগ্গিলতি (সী. পী.)], দীঘসুত্তং সবন্ধনং;
অতিথিস্মিং যো নিসিন্নস্মিং, একো ভুঞ্জতি ভোজনং.
‘‘তং তং ৰদামি কোসিয, দেহি দানানি ভুঞ্জ চ;
অরিযমগ্গং সমারূহ, নেকাসী লভতে সুখং’’.
‘‘উল়ারৰণ্ণা ৰত ব্রাহ্মণা ইমে, অযঞ্চ ৰো সুনখো কিস্স হেতু;
উচ্চাৰচং ৰণ্ণনিভং ৰিকুব্বতি, অক্খাথ নো ব্রাহ্মণা কে নু তুম্হে’’.
‘‘চন্দো চ সূরিযো চ [সূরিযো চ (ক.)] উভো ইধাগতা, অযং পন মাতলি দেৰসারথি;
সক্কোহমস্মি তিদসানমিন্দো, এসো চ খো পঞ্চসিখোতি ৰুচ্চতি.
‘‘পাণিস্সরা মুদিঙ্গা চ [মুতিঙ্গা চ (সী. স্যা. পী.)], মুরজালম্বরানি চ;
সুত্তমেনং পবোধেন্তি, পটিবুদ্ধো চ নন্দতি’’.
‘‘যে কেচিমে মচ্ছরিনো কদরিযা, পরিভাসকা সমণব্রাহ্মণানং;
ইধেৰ নিক্খিপ্প সরীরদেহং, কাযস্স ¶ ভেদা নিরযং ৰজন্তি’’.
‘‘যে কেচিমে সুগ্গতিমাসমানা [সুগ্গতিমাসসানা (সী. পী.), সুগ্গতাসিসমানা (ক.)], ধম্মে ঠিতা সংযমে সংৰিভাগে;
ইধেৰ নিক্খিপ্প সরীরদেহং, কাযস্স ভেদা সুগতিং ৰজন্তি’’.
‘‘ত্ৰং ¶ নোসি ঞাতি পুরিমাসু জাতিসু, সো মচ্ছরী রোসকো [কোসিযো (স্যা. ক.)] পাপধম্মো;
তৰেৰ অত্থায ইধাগতম্হা, মা পাপধম্মো নিরযং গমিত্থ’’ [অপত্থ (ক. সী. স্যা. পী.)].
‘‘অদ্ধা ¶ হি মং ৰো হিতকামা, যং মং সমনুসাসথ;
সোহং তথা করিস্সামি, সব্বং ৰুত্তং হিতেসিভি.
‘‘এসাহমজ্জেৰ উপারমামি, ন চাপিহং [ন চাপহং (সী. পী.)] কিঞ্চি করেয্য পাপং;
ন চাপি মে কিঞ্চি অদেয্যমত্থি, ন চাপিদত্ৰা উদকং পিৰামি [উদকম্পহং পিবে (সী.)].
‘‘এৰঞ্চ মে দদতো সব্বকালং [সব্বকালে (ক.)], ভোগা ইমে ৰাসৰ খীযিস্সন্তি;
ততো অহং পব্বজিস্সামি সক্ক, হিত্ৰান কামানি যথোধিকানি’’.
‘‘নগুত্তমে গিরিৰরে গন্ধমাদনে, মোদন্তি ¶ তা দেৰৰরাভিপালিতা;
অথাগমা ইসিৰরো সব্বলোকগূ, সুপুপ্ফিতং দুমৰরসাখমাদিয.
‘‘সুচিং সুগন্ধং তিদসেহি সক্কতং, পুপ্ফুত্তমং অমরৰরেহি সেৰিতং;
অলদ্ধ মচ্চেহি ৰ দানৰেহি ৰা, অঞ্ঞত্র দেৰেহি তদারহং হিদং [হিতং (স্যা.)].
‘‘ততো চতস্সো কনকত্তচূপমা, উট্ঠায নারিযো পমদাধিপা মুনিং;
আসা চ সদ্ধা চ সিরী ততো হিরী, ইচ্চব্রৰুং নারদদেৰ ব্রাহ্মণং.
‘‘সচে ¶ অনুদ্দিট্ঠং তযা মহামুনি, পুপ্ফং ইমং পারিছত্তস্স ব্রহ্মে;
দদাহি নো সব্বা গতি তে ইজ্ঝতু, তুৰম্পি নো হোহি যথেৰ ৰাসৰো.
‘‘তং যাচমানাভিসমেক্খ নারদো, ইচ্চব্রৰী সংকলহং উদীরযি;
ন ময্হমত্থত্থি ইমেহি কোচি নং, যাযেৰ ৰো সেয্যসি সা পিল়ন্ধথ’’ [পিল়য্হথ (সী. পী.)].
‘‘ত্ৰং নোত্তমেৰাভিসমেক্খ নারদ, যস্সিচ্ছসি ¶ তস্সা অনুপ্পৰেচ্ছসু;
যস্সা হি নো নারদ ত্ৰং পদস্সসি, সাযেৰ নো হেহিতি সেট্ঠসম্মতা’’.
‘‘অকল্লমেতং ৰচনং সুগত্তে, কো ব্রাহ্মণো সংকলহং উদীরযে;
গন্ত্ৰান ভূতাধিপমেৰ পুচ্ছথ, সচে ন জানাথ ইধুত্তমাধমং’’.
‘‘তা নারদেন পরমপ্পকোপিতা, উদীরিতা ৰণ্ণমদেন মত্তা;
সকাসে [সকাসং (ক.)] গন্ত্ৰান সহস্সচক্খুনো, পুচ্ছিংসু ভূতাধিপং কা নু সেয্যসি’’.
‘‘তা দিস্ৰা আযত্তমনা পুরিন্দদো, ইচ্চব্রৰী দেৰৰরো কতঞ্জলী;
সব্বাৰ ৰো হোথ সুগত্তে সাদিসী, কো নেৰ ভদ্দে কলহং উদীরযি’’.
‘‘যো ¶ সব্বলোকচ্চরিতো [সব্বলোকং চরকো (সী. স্যা. পী.)] মহামুনি, ধম্মে ঠিতো নারদো [নারদ (স্যা.)] সচ্চনিক্কমো;
সো নোব্রৰি [ব্রৰী (সী. স্যা. পী.)] গিরিৰরে গন্ধমাদনে, গন্ত্ৰান ভূতাধিপমেৰ পুচ্ছথ;
সচে ন জানাথ ইধুত্তমাধমং’’.
‘‘অসু ¶ [অসূ (স্যা.)] ব্রহারঞ্ঞচরো মহামুনি, নাদত্ৰা ভত্তং ৰরগত্তে ভুঞ্জতি;
ৰিচেয্য দানানি দদাতি কোসিযো, যস্সা হি সো দস্সতি সাৰ সেয্যসি’’.
‘‘অসূ ¶ হি যো সম্মতি দক্খিণং দিসং, গঙ্গায তীরে হিমৰন্তপস্সনি [হিমৰন্তপস্মনি (সী. পী. ক.)];
স কোসিযো দুল্লভপানভোজনো, তস্স সুধং পাপয দেৰসারথি’’.
‘‘স [সো (স্যা.)] মাতলী দেৰৰরেন পেসিতো, সহস্সযুত্তং অভিরুয্হ সন্দনং;
সুখিপ্পমেৰ [স খিপ্পমেৰ (সী. পী.)] উপগম্ম অস্সমং, অদিস্সমানো মুনিনো সুধং অদা’’.
‘‘উদগ্গিহুত্তং উপতিট্ঠতো হি মে, পভঙ্করং লোকতমোনুদুত্তমং;
সব্বানি ভূতানি অধিচ্চ [অতিচ্চ (সী. পী.)] ৰাসৰো, কো নেৰ মে পাণিসু কিং সুধোদহি.
‘‘সঙ্খূপমং সেতমতুল্যদস্সনং, সুচিং সুগন্ধং পিযরূপমব্ভুতং;
অদিট্ঠপুব্বং মম জাতু চক্খুভি [জাতচক্খুহি (সী. পী.)], কা দেৰতা পাণিসু কিং সুধোদহি’’.
‘‘অহং ¶ ¶ মহিন্দেন মহেসি পেসিতো, সুধাভিহাসিং তুরিতো মহামুনি;
জানাসি মং মাতলি দেৰসারথি, ভুঞ্জস্সু ভত্তুত্তম মাভিৰারযি [মা ৰিচারযি (সী. পী.)].
‘‘ভুত্তা চ সা দ্ৰাদস হন্তি পাপকে, খুদং পিপাসং অরতিং দরক্লমং [দরথং কিলং (স্যা.), দরথক্খমং (ক.)];
কোধূপনাহঞ্চ ৰিৰাদপেসুণং, সীতুণ্হতন্দিঞ্চ রসুত্তমং ইদং’’.
‘‘ন কপ্পতী মাতলি ময্হ ভুঞ্জিতুং, পুব্বে অদত্ৰা ইতি মে ৰতুত্তমং;
ন চাপি একাস্নমরীযপূজিতং [একাসনং অরিযপূজিতং (সী. পী.)], অসংৰিভাগী চ সুখং ন ৰিন্দতি’’.
‘‘থীঘাতকা যে চিমে পারদারিকা, মিত্তদ্দুনো যে চ সপন্তি সুব্বতে;
সব্বে চ তে মচ্ছরিপঞ্চমাধমা, তস্মা অদত্ৰা উদকম্পি নাস্নিযে [নাস্মিযে (সী. পী.)].
‘‘সো হিত্থিযা ৰা পুরিসস্স ৰা পন, দস্সামি দানং ৰিদুসম্পৰণ্ণিতং;
সদ্ধা ৰদঞ্ঞূ ইধ ৰীতমচ্ছরা, ভৰন্তি ¶ হেতে সুচিসচ্চসম্মতা’’ [সম্মসম্মতা (সী.)].
‘‘অতো মতা [মুতা (সী. পী.)] দেৰৰরেন পেসিতা, কঞ্ঞা চতস্সো কনকত্তচূপমা;
আসা চ সদ্ধা চ সিরী ততো হিরী [সিরী হিরী ততো (পী.)], তং অস্সমং আগমু [আগমুং (সী. পী. ক.)] যত্থ কোসিযো.
‘‘তা ¶ দিস্ৰা সব্বো পরমপ্পমোদিতো [সব্বা পরমপ্পমোদিতা (স্যা.)], সুভেন ৰণ্ণেন সিখারিৰগ্গিনো;
কঞ্ঞা চতস্সো চতুরো চতুদ্দিসা, ইচ্চব্রৰী মাতলিনো চ সম্মুখা.
‘‘পুরিমং দিসং কা ত্ৰং পভাসি দেৰতে, অলঙ্কতা তারৰরাৰ ওসধী;
পুচ্ছামি তং কঞ্চনৰেল্লিৰিগ্গহে, আচিক্খ মে ত্ৰং কতমাসি দেৰতা.
‘‘সিরাহ দেৰীমনুজেভি [মনুজেসু (সী. স্যা. পী.)] পূজিতা, অপাপসত্তূপনিসেৰিনী সদা;
সুধাৰিৰাদেন তৰন্তিমাগতা, তং ¶ মং সুধায ৰরপঞ্ঞ ভাজয.
‘‘যস্সাহমিচ্ছামি সুধং [সুখং (পী.)] মহামুনি, সো [স (সী. পী.)] সব্বকামেহি নরো পমোদতি;
সিরীতি মং জানহি জূহতুত্তম, তং মং সুধায ৰরপঞ্ঞ ভাজয’’.
‘‘সিপ্পেন ৰিজ্জাচরণেন বুদ্ধিযা, নরা উপেতা পগুণা সকম্মুনা [সকম্মনা (সী. পী.)];
তযা ৰিহীনা ন লভন্তি কিঞ্চনং [কিঞ্চিনং (ক.)], তযিদং ন সাধু যদিদং তযা কতং.
‘‘পস্সামি ¶ পোসং অলসং মহগ্ঘসং, সুদুক্কুলীনম্পি অরূপিমং নরং;
তযানুগুত্তো সিরি জাতিমামপি [জাতিমং অপি (সী.)], পেসেতি দাসং ৰিয ভোগৰা সুখী.
‘‘তং তং অসচ্চং অৰিভজ্জসেৰিনিং, জানামি মূল়্হং ৰিদুরানুপাতিনিং;
ন তাদিসী অরহতি আসনূদকং, কুতো সুধা গচ্ছ ন ময্হ রুচ্চসি’’.
‘‘কা ¶ সুক্কদাঠা পটিমুক্ককুণ্ডলা, চিত্তঙ্গদা কম্বুৰিমট্ঠধারিনী;
ওসিত্তৰণ্ণং পরিদয্হ সোভসি, কুসগ্গিরত্তং অপিল়য্হ মঞ্জরিং.
‘‘মিগীৰ ভন্তা সরচাপধারিনা, ৰিরাধিতা মন্দমিৰ উদিক্খসি;
কো তে দুতীযো ইধ মন্দলোচনে, ন ¶ ভাযসি একিকা কাননে ৰনে’’.
‘‘ন মে দুতীযো ইধ মত্থি কোসিয, মসক্কসারপ্পভৰম্হি দেৰতা;
আসা সুধাসায তৰন্তিমাগতা, তং মং সুধায ৰরপঞ্ঞ ভাজয’’.
‘‘আসায যন্তি ৰাণিজা ধনেসিনো, নাৰং সমারুয্হ পরেন্তি অণ্ণৰে;
তে তত্থ সীদন্তি অথোপি একদা, জীনাধনা এন্তি ৰিনট্ঠপাভতা.
‘‘আসায খেত্তানি কসন্তি কস্সকা, ৰপন্তি বীজানি করোন্তুপাযসো;
ঈতীনিপাতেন অৰুট্ঠিতায [অৰুট্ঠিকায (সী. পী.)] ৰা, ন কিঞ্চি ৰিন্দন্তি ততো ফলাগমং.
‘‘অথত্তকারানি করোন্তি ভত্তুসু, আসং পুরক্খত্ৰা নরা সুখেসিনো;
তে ভত্তুরত্থা অতিগাল়্হিতা পুন, দিসা পনস্সন্তি অলদ্ধ কিঞ্চনং.
‘‘হিত্ৰান [জহিত্ৰ (সী. স্যা. পী.)] ধঞ্ঞঞ্চ ধনঞ্চ ঞাতকে, আসায সগ্গাধিমনা সুখেসিনো;
তপন্তি ¶ লূখম্পি তপং চিরন্তরং, কুমগ্গমারুয্হ [কুম্মগ্গমারুয্হ (সী. স্যা. পী.)] পরেন্তি দুগ্গতিং.
‘‘আসা ¶ ৰিসংৰাদিকসম্মতা ইমে, আসে সুধাসং [সুধায (স্যা পী. ক.)] ৰিনযস্সু অত্তনি;
ন তাদিসী অরহতি আসনূদকং, কুতো সুধা গচ্ছ ন ময্হ রুচ্চসি’’.
‘‘দদ্দল্লমানা যসসা যসস্সিনী, জিঘঞ্ঞনামৰ্হযনং দিসং পতি;
পুচ্ছামি তং কঞ্চনৰেল্লিৰিগ্গহে, আচিক্খ মে ত্ৰং কতমাসি দেৰতা’’.
‘‘সদ্ধাহ দেৰীমনুজেহি [দেৰীমনুজেসু (সী. স্যা. পী.)] পূজিতা, অপাপসত্তূপনিসেৰিনী সদা;
সুধাৰিৰাদেন তৰন্তিমাগতা, তং মং সুধায ৰরপঞ্ঞ ভাজয’’.
‘‘দানং দমং চাগমথোপি সংযমং, আদায সদ্ধায করোন্তি হেকদা;
থেয্যং মুসা কূটমথোপি পেসুণং, করোন্তি হেকে পুন ৰিচ্চুতা তযা.
‘‘ভরিযাসু পোসো সদিসীসু পেক্খৰা [পেখৰা (পী.)], সীলূপপন্নাসু পতিব্বতাসুপি;
ৰিনেত্ৰান ¶ [ৰিনেত্ৰা (সী. স্যা. পী.)] ছন্দং কুলিত্থিযাসুপি [কুলধীতিযাসুপি (সী. পী.)], করোতি সদ্ধং পুন [পন (সী. পী.)] কুম্ভদাসিযা.
‘‘ত্ৰমেৰ সদ্ধে পরদারসেৰিনী, পাপং করোসি কুসলম্পি রিঞ্চসি;
ন তাদিসী অরহতি আসনূদকং, কুতো সুধা গচ্ছ ন ময্হ রুচ্চসি’’.
‘‘জিঘঞ্ঞরত্তিং ¶ অরুণস্মিমূহতে, যা দিস্সতি উত্তমরূপৰণ্ণিনী;
তথূপমা মং পটিভাসি দেৰতে, আচিক্খ মে ত্ৰং কতমাসি অচ্ছরা.
‘‘কালা ¶ নিদাঘেরিৰ অগ্গিজারিৰ [অগ্গজাতিৰ (সী.), অগ্গিজাতিৰ (পী.)], অনিলেরিতা লোহিতপত্তমালিনী;
কা তিট্ঠসি মন্দমিগাৰলোকযং [মন্দমিৰাৰলোকযং (সী. পী.)], ভাসেসমানাৰ গিরং ন মুঞ্চসি’’.
‘‘হিরাহ দেৰীমনুজেহি পূজিতা, অপাপসত্তূপনিসেৰিনী সদা;
সুধাৰিৰাদেন তৰন্তিমাগতা, সাহং ন সক্কোমি সুধম্পি যাচিতুং;
কোপীনরূপা ৰিয যাচনিত্থিযা’’.
‘‘ধম্মেন ঞাযেন সুগত্তে লচ্ছসি, এসো ¶ হি ধম্মো ন হি যাচনা সুধা;
তং তং অযাচন্তিমহং নিমন্তযে, সুধায যঞ্চিচ্ছসি তম্পি দম্মি তে.
‘‘সা ত্ৰং মযা অজ্জ সকম্হি অস্সমে, নিমন্তিতা কঞ্চনৰেল্লিৰিগ্গহে;
তুৰঞ্হি মে সব্বরসেহি পূজিযা, তং পূজযিত্ৰান সুধম্পি অস্নিযে’’.
‘‘সা কোসিযেনানুমতা জুতীমতা, অদ্ধা হিরি রম্মং পাৰিসি যস্সমং;
উদকৰন্তং [উদঞ্ঞৰন্তং (সী. পী.)] ফলমরিযপূজিতং, অপাপসত্তূপনিসেৰিতং সদা.
‘‘রুক্খগ্গহানা বহুকেত্থ পুপ্ফিতা, অম্বা পিযালা পনসা চ কিংসুকা;
সোভঞ্জনা লোদ্দমথোপি পদ্মকা, কেকা চ ভঙ্গা তিলকা সুপুপ্ফিতা.
‘‘সালা ¶ করেরী বহুকেত্থ জম্বুযো, অস্সত্থনিগ্রোধমধুকৰেতসা [ৰেদিসা (ক.)];
উদ্দালকা পাটলি সিন্দুৰারকা [সিন্দুৰারিতা (বহূসু)], মনুঞ্ঞগন্ধা মুচলিন্দকেতকা.
‘‘হরেণুকা ৰেল়ুকা কেণু [ৰেণু (সী. পী.)] তিন্দুকা, সামাকনীৰারমথোপি ¶ চীনকা;
মোচা কদলী বহুকেত্থ সালিযো, পৰীহযো আভূজিনো চ [আভুজিনোপি (সী. স্যা.)] তণ্ডুলা.
‘‘তস্সেৰুত্তরপস্সেন [তস্স চ উত্তরে পস্সে (সী. পী.), তস্স চ উত্তরপস্সেন (স্যা.)], জাতা পোক্খরণী সিৰা;
অকক্কসা অপব্ভারা, সাধু অপ্পটিগন্ধিকা.
‘‘তত্থ মচ্ছা সন্নিরতা, খেমিনো বহুভোজনা;
সিঙ্গূ সৰঙ্কা সংকুলা [সকুলা (সী. স্যা. পী.)], সতৰঙ্কা চ রোহিতা;
আল়িগগ্গরকাকিণ্ণা, পাঠীনা কাকমচ্ছকা.
‘‘তত্থ পক্খী সন্নিরতা, খেমিনো বহুভোজনা;
হংসা কোঞ্চা মযূরা চ, চক্কৰাকা চ কুক্কুহা;
কুণালকা বহূ চিত্রা, সিখণ্ডী জীৰজীৰকা.
‘‘তত্থ পানায মাযন্তি, নানা মিগগণা বহূ;
সীহা ব্যগ্ঘা ৰরাহা চ, অচ্ছকোকতরচ্ছযো.
‘‘পলাসাদা ¶ গৰজা চ, মহিংসা [মহিসা (সী. স্যা. পী.)] রোহিতা রুরূ;
এণেয্যা চ ৰরাহা চ, গণিনো নীকসূকরা;
কদলিমিগা বহুকেত্থ, বিল়ারা সসকণ্ণিকা [সসকণ্ণকা (সী.)].
‘‘ছমাগিরী পুপ্ফৰিচিত্রসন্থতা, দিজাভিঘুট্ঠা দিজসঙ্ঘসেৰিতা’’.
‘‘সা ¶ সুত্তচা নীলদুমাভিলম্বিতা, ৰিজ্জু মহামেঘরিৰানুপজ্জথ;
তস্সা ¶ সুসম্বন্ধসিরং কুসামযং, সুচিং সুগন্ধং অজিনূপসেৰিতং;
অত্রিচ্চ [অত্রিচ্ছ (সী. স্যা. পী.)] কোচ্ছং হিরিমেতদব্রৰি, ‘নিসীদ কল্যাণি সুখযিদমাসনং’.
‘‘তস্সা তদা কোচ্ছগতায কোসিযো, যদিচ্ছমানায জটাজিনন্ধরো [জটাজুতিন্ধরো (স্যা. ক.)];
নৰেহি পত্তেহি সযং সহূদকং, সুধাভিহাসী তুরিতো মহামুনি.
‘‘সা তং পটিগ্গয্হ উভোহি পাণিভি, ইচ্চব্রৰি অত্তমনা জটাধরং;
‘হন্দাহং এতরহি পূজিতা তযা, গচ্ছেয্যং ব্রহ্মে তিদিৰং জিতাৰিনী’.
‘‘সা কোসিযেনানুমতা জুতীমতা, উদীরিতা [উদিরযি (ক.)] ৰণ্ণমদেন মত্তা;
সকাসে গন্ত্ৰান সহস্সচক্খুনো, অযং সুধা ৰাসৰ দেহি মে জযং.
‘‘তমেন [তমেনং (স্যা. ক.)] সক্কোপি তদা অপূজযি, সহিন্দদেৰা [সহিন্দা চ দেৰা (সী. পী.)] সুরকঞ্ঞমুত্তমং;
সা পঞ্জলী দেৰমনুস্সপূজিতা, নৰম্হি কোচ্ছম্হি যদা উপাৰিসি’’.
‘‘তমেৰ ¶ সংসী [তমেৰ অসংসী (স্যা.)] পুনদেৰ মাতলিং, সহস্সনেত্তো তিদসানমিন্দো;
গন্ত্ৰান ৰাক্যং মম ব্রূহি কোসিযং, আসায সদ্ধা [সদ্ধ (পী.)] সিরিযা চ কোসিয;
হিরী সুধং কেন মলত্থ হেতুনা.
‘‘তং ¶ সু ৰত্থং উদতারযী রথং, দদ্দল্লমানং উপকারিযসাদিসং [উপকিরিযসাদিসং (সী. স্যা. পী.)].
জম্বোনদীসং তপনেয্যসন্নিভং [সন্তিকং (সী.পী.)], অলঙ্কতং কঞ্চনচিত্তসন্নিভং.
‘‘সুৰণ্ণচন্দেত্থ বহূ নিপাতিতা, হত্থী গৰস্সা কিকিব্যগ্ঘদীপিযো [কিম্পুরিসব্যগ্ঘদীপিযো (ক.)];
এণেয্যকা লঙ্ঘমযেত্থ পক্খিনো [পক্খিযো (সী. পী.)], মিগেত্থ ৰেল়ুরিযমযা যুধা যুতা.
‘‘তত্থস্সরাজহরযো অযোজযুং, দসসতানি সুসুনাগসাদিসে;
অলঙ্কতে কঞ্চনজালুরচ্ছদে, আৰেল়িনে সদ্দগমে অসঙ্গিতে.
‘‘তং যানসেট্ঠং অভিরুয্হ মাতলি, দিসা ইমাযো [দস দিসা ইমা (সী. স্যা. পী.)] অভিনাদযিত্থ;
নভঞ্চ সেলঞ্চ ৰনপ্পতিনিঞ্চ [ৰনস্পতীনি চ (সী. পী.), ৰনপ্পতিঞ্চ (স্যা. ক.)], সসাগরং ¶ পব্যধযিত্থ [পব্যাথযিত্থ (সী. পী.)] মেদিনিং.
‘‘স খিপ্পমেৰ উপগম্ম অস্সমং, পাৰারমেকংসকতো কতঞ্জলী;
বহুস্সুতং ৰুদ্ধং ৰিনীতৰন্তং, ইচ্চব্রৰী মাতলি দেৰব্রাহ্মণং.
‘‘ইন্দস্স ৰাক্যং নিসামেহি কোসিয, দূতো অহং পুচ্ছতি তং পুরিন্দদো;
আসায সদ্ধা সিরিযা চ কোসিয, হিরী সুধং কেন মলত্থ হেতুনা’’.
‘‘অন্ধা ¶ ¶ সিরী মং পটিভাতি মাতলি, সদ্ধা অনিচ্চা পন দেৰসারথি;
আসা ৰিসংৰাদিকসম্মতা হি মে, হিরী চ অরিযম্হি গুণে পতিট্ঠিতা’’.
‘‘কুমারিযো যাচিমা গোত্তরক্খিতা, জিণ্ণা চ যা যা চ সভত্তুইত্থিযো;
তা ছন্দরাগং পুরিসেসু উগ্গতং, হিরিযা নিৰারেন্তি সচিত্তমত্তনো.
‘‘সঙ্গামসীসে সরসত্তিসংযুতে, পরাজিতানং পততং পলাযিনং;
হিরিযা নিৰত্তন্তি জহিত্ৰ [জহিত্ৰান (স্যা. ক.)] জীৰিতং, তে ¶ সম্পটিচ্ছন্তি পুনা হিরীমনা.
‘‘ৰেলা যথা সাগরৰেগৰারিনী, হিরায হি পাপজনং নিৰারিনী;
তং সব্বলোকে হিরিমরিযপূজিতং, ইন্দস্স তং ৰেদয দেৰসারথি’’.
‘‘কো তে ইমং কোসিয দিট্ঠিমোদহি, ব্রহ্মা মহিন্দো অথ ৰা পজাপতি;
হিরায দেৰেসু হি সেট্ঠসম্মতা, ধীতা মহিন্দস্স মহেসি জাযথ’’.
‘‘হন্দেহি দানি তিদিৰং অপক্কম [সমক্কম (সী. পী.)], রথং সমারুয্হ মমাযিতং ইমং [ইদং (স্যা. ক.)];
ইন্দো চ তং ইন্দসগোত্ত কঙ্খতি, অজ্জেৰ ত্ৰং ইন্দসহব্যতং ৰজ’’.
‘‘এৰং ৰিসুজ্ঝন্তি [সমিজ্ঝন্তি (সী. পী.)] অপাপকম্মিনো, অথো সুচিণ্ণস্স ফলং ন নস্সতি;
যে কেচি মদ্দক্খু সুধায ভোজনং, সব্বেৰ তে ইন্দসহব্যতং গতা’’.
‘‘হিরী ¶ উপ্পলৰণ্ণাসি, কোসিযো দানপতি ভিক্খু;
অনুরুদ্ধো পঞ্চসিখো, আনন্দো আসি মাতলি.
‘‘সূরিযো কস্সপো ভিক্খু, মোগ্গল্লানোসি চন্দিমা;
নারদো ¶ সারিপুত্তোসি, সম্বুদ্ধো আসি ৰাসৰো’’তি.
সুধাভোজনজাতকং ততিযং.
৫৩৬. কুণালজাতকং (৪)
এৰমক্খাযতি, এৰমনুসূযতি [সুয্যতি (ক.)]. সব্বোসধধরণিধরে নেকপুপ্ফমাল্যৰিততে গজ-গৰজ মহিংস-রুরু-চমর-পসদ-খগ্গ-গোকণ্ণ-সীহ-ব্যগ্ঘ-দীপি-অচ্ছ-কোক-তরচ্ছ-উদ্দার-কদলিমিগ- বিল়ার-সস-কণ্ণিকানুচরিতেআকিণ্ণনেলমণ্ডলমহাৰরাহনাগকুলকরেণু [কণেরু (সী. পী.)] -সঙ্ঘাধিৰুট্ঠে [ৰুত্থে (সী. পী.)] ইস্সমিগ- সাখমিগ-সরভমিগ-এণীমিগ-ৰাতমিগ-পসদমিগ-পুরিসালু [পুরিসল্লু (সী. পী.)] -কিম্পুরিস-যক্খ-রক্খসনিসেৰিতে অমজ্জৰমঞ্জরীধর-পহট্ঠ [ব্রহট্ঠ (সী. পী.)] -পুপ্ফফুসিতগ্গা [পুপ্ফিতগ্গ (সী. পী.)] নেকপাদপগণৰিততেকুরর-চকোর-ৰারণ-মযূর-পরভত- জীৰঞ্জীৰক-চেলাৰকা-ভিঙ্কার-করৰীকমত্তৰিহঙ্গগণ-সতত [ৰিহঙ্গসত (সী. পী.)] সম্পঘুট্ঠেঅঞ্জন-মনোসিলা-হরিতাল- হিঙ্গুলকহেম-রজতকনকানেকধাতুসতৰিনদ্ধপটিমণ্ডিতপ্পদেসে ¶ এৰরূপে খলু, ভো, রম্মে ৰনসণ্ডে কুণালো নাম সকুণো পটিৰসতি অতিৰিয চিত্তো অতিৰিয চিত্তপত্তচ্ছদনো.
তস্সেৰ খলু, ভো, কুণালস্স সকুণস্স অড্ঢুড্ঢানি ইত্থিসহস্সানি পরিচারিকা দিজকঞ্ঞাযো. অথ খলু, ভো, দ্ৰে দিজকঞ্ঞাযো কট্ঠং মুখেন ডংসিত্ৰা [ডসিত্ৰা (সী. পী.) এৰমুপরিপি] তং কুণালং সকুণং মজ্ঝে নিসীদাপেত্ৰা উড্ডেন্তি [ডেন্তি (সী. পী.) এৰমুপরিপি] – ‘‘মা নং কুণালং সকুণং অদ্ধানপরিযাযপথে কিলমথো উব্বাহেত্থা’’তি [উব্বাহেথাতি (স্যা. ক.)].
পঞ্চসতা [পঞ্চসত (পী.)] দিজকঞ্ঞাযো হেট্ঠতো হেট্ঠতো উড্ডেন্তি – [ডেন্তি (সী. পী.) এৰমুপরিপি] ‘‘সচাযং কুণালো ¶ সকুণো আসনা পরিপতিস্সতি, মযং তং পক্খেহি পটিগ্গহেস্সামাতি.
পঞ্চসতা দিজকঞ্ঞাযো উপরূপরি উড্ডেন্তি – [ডেন্তি (সী. পী.) এৰমুপরিপি] ‘‘মা নং কুণালং সকুণং আতপো পরিতাপেসী’’তি [পরিকাপীতি (সী. পী.)].
পঞ্চসতা ¶ পঞ্চসতা [সী. পী. পোত্থকেসু ‘‘পঞ্চসতা’’তি সকিদেৰ আগতং] দিজকঞ্ঞাযো উভতোপস্সেন উড্ডেন্তি – [ডেন্তি (সী. পী.) এৰমুপরিপি] ‘‘মা নং কুণালং সকুণং সীতং ৰা উণ্হং ৰা তিণং ৰা রজো ৰা ৰাতো ৰা উস্সাৰো ৰা উপপ্ফুসী’’তি.
পঞ্চসতা দিজকঞ্ঞাযো পুরতো পুরতো উড্ডেন্তি – ‘‘মা নং কুণালং সকুণং গোপালকা ৰা পসুপালকা ৰা তিণহারকা ৰা কট্ঠহারকা ৰা ৰনকম্মিকা ৰা কট্ঠেন ৰা কঠলেন ৰা [কথলায ৰা (ক.)] পাণিনা ৰা ( ) [(পাসাণেন ৰা) (স্যা.)] লেড্ডুনা ৰা দণ্ডেন ৰা সত্থেন ৰা সক্খরাহি ৰা [সক্খরায ৰা (সী.)] পহারং অদংসু. মাযং কুণালো সকুণো গচ্ছেহি ৰা লতাহি ৰা রুক্খেহি ৰা সাখাহি ৰা [ইদং পদদ্ৰযং সী. পী. পোত্থকেসু নত্থি] থম্ভেহি ৰা পাসাণেহি ৰা বলৰন্তেহি ৰা পক্খীহি সঙ্গমেসী’’তি [সঙ্গামেসীতি (সী. পী.)].
পঞ্চসতা দিজকঞ্ঞাযো পচ্ছতো পচ্ছতো উড্ডেন্তি সণ্হাহি সখিলাহি মঞ্জূহি মধুরাহি ৰাচাহি সমুদাচরন্তিযো – ‘‘মাযং কুণালো সকুণো আসনে পরিযুক্কণ্ঠী’’তি.
পঞ্চসতা দিজকঞ্ঞাযো দিসোদিসং উড্ডেন্তি অনেকরুক্খৰিৰিধৰিকতিফলমাহরন্তিযো – ‘‘মাযং কুণালো সকুণো খুদায পরিকিলমিত্থা’’তি.
অথ খলু, ভো, তা [নত্থি সী. পী. পোত্থকেসু] দিজকঞ্ঞাযো তং কুণালং সকুণং আরামেনেৰ আরামং উয্যানেনেৰ উয্যানং ¶ নদীতিত্থেনেৰ নদীতিত্থং পব্বতসিখরেনেৰ পব্বতসিখরং অম্বৰনেনেৰ অম্বৰনং জম্বুৰনেনেৰ জম্বুৰনং লবুজৰনেনেৰ লবুজৰনং নাল়িকেরসঞ্চারিযেনেৰ [সঞ্জাদিযেনেৰ (পী.)] নাল়িকেরসঞ্চারিযং খিপ্পমেৰ অভিসম্ভোন্তি ¶ রতিত্থায [রতত্থায (সী. পী.)].
অথ খলু, ভো, কুণালো সকুণো তাহি দিজকঞ্ঞাহি দিৰসং পরিব্যূল়্হো এৰং অপসাদেতি – ‘‘নস্সথ তুম্হে ৰসলিযো, ৰিনস্সথ তুম্হে ৰসলিযো, চোরিযো ধুত্তিযো অসতিযো লহুচিত্তাযো কতস্স অপ্পটিকারিকাযো অনিলো ৰিয যেনকামংগমাযো’’তি.
তস্সেৰ খলু, ভো, হিমৰতো পব্বতরাজস্স পুরত্থিমদিসাভাগে সুসুখুমসুনিপুণগিরিপ্পভৰ [প্পভৰা (সী. পী.)] – হরিতুপযন্তিযো.
উপ্পল ¶ পদুম কুমুদ নল়িন সতপত্ত সোগন্ধিক মন্দালক [মন্দালৰ (সী. পী.), মন্দারৰ (ক.)] সম্পতিৰিরূল়্হসুচিগন্ধ মনুঞ্ঞমাৰকপ্পদেসে [পাৰকপ্পদেসে (সী. পী.)].
কুরৰক-মুচলিন্দ-কেতক-ৰেদিস-ৰঞ্জুল [ৰেতসমঞ্জুল (সী.)] -পুন্নাগবকুল-তিলক-পিযক-হসনসাল-সল়লচম্পক অসোক-নাগরুক্খ-তিরীটি-ভুজপত্ত-লোদ্দ-চন্দনোঘৰনেকাল়াগরু-পদ্মক-পিযঙ্গু-দেৰদারুকচোচগহনে ককুধকুটজঅঙ্কোল-কচ্চিকার [কচ্ছিকার (ক.)] -কণিকার-কণ্ণিকার-কনৰের-কোরণ্ডক-কোৰিল়ার-কিংসুক-যোধিক ৰনমল্লিক [নৰমল্লিক (সী. পী.)] -মনঙ্গণ-মনৰজ্জ-ভণ্ডি-সুরুচির-ভগিনিমালামল্যধরে জাতিসুমনমধুগন্ধিক- [মধুকবন্ধুক (ক.)] ধনুতক্কারি [ধনুকারি (সী.), ধনুকারিক (পী.)] তালীস-তগরমুসীরকোট্ঠ-কচ্ছৰিততে অতিমুত্তকসংকুসুমিতলতাৰিততপটিমণ্ডিতপ্পদেসে হংস-পিলৰ-কাদম্ব-কারণ্ডৰাভিনদিতে ৰিজ্জাধর-সিদ্ধ [সিন্ধৰ (সী. পী.)] -সমণ-তাপসগণাধিৰুট্ঠে ৰরদেৰ-যক্খ-রক্খস-দানৰ-গন্ধব্ব-কিন্নরমহোরগানুচিণ্ণপ্পদেসে এৰরূপে খলু, ভো, রম্মে ৰনসণ্ডে পুণ্ণমুখো নাম ফুস্সকোকিলো পটিৰসতি অতিৰিয মধুরগিরো ৰিলাসিতনযনো মত্তক্খো [সৰিলাসিতনযনমত্তক্খো (ক.)].
তস্সেৰ খলু, ভো, পুণ্ণমুখস্স ফুস্সকোকিলস্স অড্ঢুড্ঢানি ইত্থিসতানি পরিচারিকা দিজকঞ্ঞাযো. অথ খলু, ভো, দ্ৰে দিজকঞ্ঞাযো কট্ঠং মুখেন ডংসিত্ৰা তং পুণ্ণমুখং ফুস্সকোকিলং মজ্ঝে নিসীদাপেত্ৰা উড্ডেন্তি ¶ – ‘‘মা নং পুণ্ণমুখং ফুস্সকোকিলং অদ্ধানপরিযাযপথে কিলমথো উব্বাহেত্থা’’তি.
পঞ্ঞাস ¶ দিজকঞ্ঞাযো হেট্ঠতো হেট্ঠতো উড্ডেন্তি – ‘‘সচাযং পুণ্ণমুখো ফুস্সকোকিলো আসনা পরিপতিস্সতি, মযং তং পক্খেহি পটিগ্গহেস্সামা’’তি.
পঞ্ঞাস দিজকঞ্ঞাযো উপরূপরি উড্ডেন্তি – ‘‘মা নং পুণ্ণমুখং ফুস্সকোকিলং আতপো পরিতাপেসী’’তি.
পঞ্ঞাস পঞ্ঞাস দিজকঞ্ঞাযো উভতোপস্সেন উড্ডেন্তি – ‘‘মা নং পুণ্ণমুখং ফুস্সকোকিলং সীতং ৰা উণ্হং ৰা তিণং ৰা রজো ৰা ৰাতো ৰা উস্সাৰো ৰা উপপ্ফুসী’’তি.
পঞ্ঞাস ¶ দিজকঞ্ঞাযো পুরতো পুরতো উড্ডেন্তি – ‘‘মা নং পুণ্ণমুখং ফুস্সকোকিলং গোপালকা ৰা পসুপালকা ৰা তিণহারকা ৰা কট্ঠহারকা ৰা ৰনকম্মিকা ৰা কট্ঠেন ৰা কথলায ৰা পাণিনা ৰা লেড্ডুনা ৰা দণ্ডেন ৰা সত্থেন ৰা সক্খরাহি ৰা পহারং অদংসু. মাযং পুণ্ণমুখো ফুস্সকোকিলো গচ্ছেহি ৰা লতাহি ৰা রুক্খেহি ৰা সাখাহি ৰা থম্ভেহি ৰা পাসাণেহি ৰা বলৰন্তেহি ৰা পক্খীহি সঙ্গামেসী’’তি.
পঞ্ঞাস দিজকঞ্ঞাযো পচ্ছতো পচ্ছতো উড্ডেন্তি সণ্হাহি সখিলাহি মঞ্জূহি মধুরাহি ৰাচাহি সমুদাচরন্তিযো – ‘‘মাযং পুণ্ণমুখো ফুস্সকোকিলো আসনে পরিযুক্কণ্ঠী’’তি.
পঞ্ঞাস দিজকঞ্ঞাযো দিসোদিসং উড্ডেন্তি অনেকরুক্খৰিৰিধৰিকতিফলমাহরন্তিযো – ‘‘মাযং পুণ্ণমুখো ফুস্সকোকিলো খুদায পরিকিলমিত্থা’’তি.
অথ খলু, ভো, তা দিজকঞ্ঞাযো তং পুণ্ণমুখং ফুস্সকোকিলং ¶ আরামেনেৰ আরামং উয্যানেনেৰ উয্যানং নদীতিত্থেনেৰ নদীতিত্থং পব্বতসিখরেনেৰ পব্বতসিখরং অম্বৰনেনেৰ অম্বৰনং জম্বুৰনেনেৰ জম্বুৰনং লবুজৰনেনেৰ লবুজৰনং নাল়িকেরসঞ্চারিযেনেৰ নাল়িকেরসঞ্চারিযং খিপ্পমেৰ অভিসম্ভোন্তি রতিত্থায.
অথ খলু, ভো, পুণ্ণমুখো ফুস্সকোকিলো তাহি দিজকঞ্ঞাহি দিৰসং পরিব্যূল়্হো এৰং পসংসতি – ‘‘সাধু, সাধু, ভগিনিযো, এতং খো, ভগিনিযো, তুম্হাকং পতিরূপং কুলধীতানং, যং তুম্হে ভত্তারং পরিচরেয্যাথা’’তি.
অথ ¶ খলু, ভো, পুণ্ণমুখো ফুস্সকোকিলো যেন কুণালো সকুণো তেনুপসঙ্কমি. অদ্দসংসু খো কুণালস্স সকুণস্স পরিচারিকা দিজকঞ্ঞাযো তং পুণ্ণমুখং ফুস্সকোকিলং দূরতোৰ আগচ্ছন্তং; দিস্ৰান যেন পুণ্ণমুখো ফুস্সকোকিলো তেনুপসঙ্কমিংসু; উপসঙ্কমিত্ৰা তং পুণ্ণমুখং ফুস্সকোকিলং এতদৰোচুং – ‘‘অযং, সম্ম পুণ্ণমুখ, কুণালো সকুণো অতিৰিয ফরুসো অতিৰিয ফরুসৰাচো, অপ্পেৰনাম তৰম্পি আগম্ম পিযৰাচং লভেয্যামা’’তি. ‘‘অপ্পেৰনাম, ভগিনিযো’’তি ৰত্ৰা যেন কুণালো সকুণো তেনুপসঙ্কমি; উপসঙ্কমিত্ৰা কুণালেন ¶ সকুণেন সদ্ধিং পটিসম্মোদিত্ৰা একমন্তং নিসীদি. একমন্তং নিসিন্নো খো পুণ্ণমুখো ফুস্সকোকিলো তং কুণালং সকুণং এতদৰোচ – ‘‘কিস্স ত্ৰং, সম্ম কুণাল, ইত্থীনং সুজাতানং কুলধীতানং সম্মাপটিপন্নানং মিচ্ছাপটিপন্নো’সি [পটিপন্নো (সী. পী.)]? অমনাপভাণীনম্পি কির, সম্ম কুণাল, ইত্থীনং মনাপভাণিনা ভৰিতব্বং, কিমঙ্গ পন মনাপভাণীন’’ন্তি!
এৰং ৰুত্তে, কুণালো সকুণো তং পুণ্ণমুখং ফুস্সকোকিলং এৰং অপসাদেসি – ‘‘নস্স ত্ৰং, সম্ম জম্ম ৰসল, ৰিনস্স ত্ৰং, সম্ম জম্ম ৰসল, কো নু তযা ৰিযত্তো জাযাজিনেনা’’তি. এৰং অপসাদিতো চ পন পুণ্ণমুখো ফুস্সকোকিলো ততোযেৰ [ততো হেৰ (সী. পী.)] পটিনিৰত্তি.
অথ খলু, ভো, পুণ্ণমুখস্স ফুস্সকোকিলস্স অপরেন সমযেন নচিরস্সেৰ [অচিরস্সেৰ অচ্চযেন (ক.)] খরো আবাধো উপ্পজ্জি লোহিতপক্খন্দিকা. বাল়্হা ৰেদনা ৰত্তন্তি মারণন্তিকা [মরণন্তিকা (স্যা.)]. অথ খলু, ভো, পুণ্ণমুখস্স ফুস্সকোকিলস্স পরিচারিকানং দিজকঞ্ঞানং এতদহোসি – ‘‘আবাধিকো খো অযং পুণ্ণমুখো ফুস্সকোকিলো, অপ্পেৰনাম ইমম্হা আবাধা ৰুট্ঠহেয্যা’’তি একং অদুতিযং ওহায যেন কুণালো সকুণো তেনুপসঙ্কমিংসু. অদ্দসা খো কুণালো সকুণো তা দিজকঞ্ঞাযো দূরতোৰ আগচ্ছন্তিযো, দিস্ৰান তা দিজকঞ্ঞাযো এতদৰোচ – ‘‘কহং পন তুম্হং ৰসলিযো ভত্তা’’তি? ‘‘আবাধিকো খো, সম্ম কুণাল, পুণ্ণমুখো ফুস্সকোকিলো অপ্পেৰনাম তম্হা আবাধা ৰুট্ঠহেয্যা’’তি. এৰং ৰুত্তে, কুণালো সকুণো তা দিজকঞ্ঞাযো এৰং অপসাদেসি – ‘‘নস্সথ তুম্হে ৰসলিযো, ৰিনস্সথ তুম্হে ৰসলিযো, চোরিযো ধুত্তিযো অসতিযো লহুচিত্তাযো কতস্স অপ্পটিকারিকাযো অনিলো ৰিয যেনকামংগমাযো’’তি; ৰত্ৰা যেন পুণ্ণমুখো ফুস্সকোকিলো তেনুপসঙ্কমি; উপসঙ্কমিত্ৰা তং ¶ পুণ্ণমুখং ফুস্সকোকিলং এতদৰোচ – ‘‘হং, সম্ম, পুণ্ণমুখা’’তি. ‘‘হং, সম্ম, কুণালা’’তি.
অথ খলু, ভো কুণালো সকুণো তং পুণ্ণমুখং ফুস্সকোকিলং পক্খেহি চ মুখতুণ্ডকেন ¶ চ পরিগ্গহেত্ৰা ৰুট্ঠাপেত্ৰা নানাভেসজ্জানি পাযাপেসি. অথ খলু, ভো, পুণ্ণমুখস্স ফুস্সকোকিলস্স সো আবাধো পটিপ্পস্সম্ভীতি. অথ খলু, ভো, কুণালো সকুণো তং পুণ্ণমুখং ¶ ফুস্সকোকিলং গিলানৰুট্ঠিতং [গিলানাৰুট্ঠিতং (সী. স্যা. পী.)] অচিরৰুট্ঠিতং গেলঞ্ঞা এতদৰোচ –
‘‘দিট্ঠা মযা, সম্ম পুণ্ণমুখ, কণ্হা দ্ৰেপিতিকা পঞ্চপতিকায ছট্ঠে পুরিসে চিত্তং পটিবন্ধন্তিযা, যদিদং কবন্ধে [কৰন্ধে (সী. পী.)] পীঠসপ্পিম্হীতি. ভৰতি চ পনুত্তরেত্থ [পুনুত্তচেত্থ (ক.) এৰমুপরিপি] ৰাক্যং –
‘‘অথজ্জুনো নকুলো ভীমসেনো [ভিম্মসেনো (সী. স্যা. পী.)], যুধিট্ঠিলো সহদেৰো [সীহদেৰো (ক.)] চ রাজা;
এতে পতী পঞ্চ মত্তিচ্চ নারী, অকাসি খুজ্জৰামনকেন [খুজ্জৰামনেন (পী.)] পাপ’’ন্তি.
‘‘দিট্ঠা মযা, সম্ম পুণ্ণমুখ, সচ্চতপাপী [সচ্চতপাৰী (সী. পী.), পঞ্চতপাৰী (স্যা.)] নাম সমণী সুসানমজ্ঝে ৰসন্তী চতুত্থভত্তং পরিণামযমানা সুরাধুত্তকেন [তুলাপুত্তকেন (সী. পী.), সা সুরাধুত্তকেন (ক.)] পাপমকাসি.
‘‘দিট্ঠা মযা, সম্ম পুণ্ণমুখ, কাকৰতী [কাকাতী (সী.), কাকাতি (পী.)] নাম দেৰী সমুদ্দমজ্ঝে ৰসন্তী ভরিযা ৰেনতেয্যস্স নটকুৰেরেন পাপমকাসি.
দিট্ঠা মযা, সম্ম পুণ্ণমুখ, কুরুঙ্গদেৰী [কুরঙ্গৰী (সী. পী.)] নাম লোমসুদ্দরী [লোমসুন্দরী (সী. স্যা. পী.)] এল়িককুমারং [এল়মারকং (সী.), এল়ককুমারং (স্যা.), এল়কমারং (পী.)] কামযমানা ছল়ঙ্গকুমারধনন্তেৰাসিনা পাপমকাসি.
এৰঞ্হেতং ¶ মযা ঞাতং, ব্রহ্মদত্তস্স মাতরং [মাতুকা (স্যা.)] ওহায কোসলরাজং পঞ্চালচণ্ডেন পাপমকাসি.
‘‘এতা চ অঞ্ঞা চ অকংসু পাপং, তস্মাহমিত্থীনং ন ৰিস্সসে নপ্পসংসে;
মহী যথা জগতি সমানরত্তা, ৰসুন্ধরা ইতরীতরাপতিট্ঠা [ইতরীতরানং পতিট্ঠা (স্যা.), ইত্তরীতরপ্পতিট্ঠা (?)];
সব্বসহা অফন্দনা অকুপ্পা, তথিত্থিযো তাযো ন ৰিস্সসে নরো.
‘‘সীহো ¶ যথা লোহিতমংসভোজনো, ৰাল়মিগো পঞ্চাৰুধো [পঞ্চহত্থো (সী. পী.)] সুরুদ্ধো;
পসয্হখাদী পরহিংসনে রতো, তথিত্থিযো তাযো ন ৰিস্সসে নরো.
‘‘ন খলু [ন খলু ভো (স্যা. ক.)], সম্ম পুণ্ণমুখ, ৰেসিযো নারিযো গমনিযো, ন হেতা বন্ধকিযো নাম, ৰধিকাযো নাম এতাযো, যদিদং ৰেসিযো নারিযো গমনিযো’’তি.
‘‘চোরো ¶ [চোরা (সী. স্যা. পী.)] ৰিয ৰেণিকতা, মদিরাৰ [মদিরা ৰিয (সী. স্যা.), মদিরিৰ (পী.)] দিদ্ধা [দিট্ঠা (ক.), ৰিসদুট্ঠা (স্যা.)] ৰাণিজো [ৰাণিজা (পী.)] ৰিয ৰাচাসন্থুতিযো, ইস্সসিঙ্ঘমিৰ ৰিপরিৰত্তাযো [পরিৰত্তাযো (পী.), ৰিপরিৰত্তারো (ক.)], উরগামিৰ দুজিৰ্হাযো, সোব্ভমিৰ পটিচ্ছন্না, পাতালমিৰ দুপ্পূরা রক্খসী ৰিয দুত্তোসা, যমোৰেকন্তহারিযো, সিখীরিৰ সব্বভক্খা, নদীরিৰ সব্বৰাহী, অনিলো ৰিয যেনকামংচরা, নেরু ৰিয অৰিসেসকরা, ৰিসরুক্খো ৰিয নিচ্চফলিতাযো’’তি. ভৰতি চ পনুত্তরেত্থ ৰাক্যং –
‘‘যথা ¶ চোরো যথা দিদ্ধো, ৰাণিজোৰ ৰিকত্থনী;
ইস্সসিঙ্ঘমিৰ পরিৰত্তা [মিৰাৰট্টো (সী.), মিৰাৰত্তা (পী.)], দুজিৰ্হা [দুজ্জিৰ্হ (পী.)] উরগো ৰিয.
‘‘সোব্ভমিৰ পটিচ্ছন্না, পাতালমিৰ দুপ্পুরা;
রক্খসী ৰিয দুত্তোসা, যমোৰেকন্তহারিযো.
[যথা সিখী নদীৰাহো, অনিলো কামচারৰা;§নেরূৰ অৰিসেসা চ, ৰিসরুক্খো ৰিয নিচ্চফলা;§নাসযন্তি ঘরে ভোগং, রতনানন্তকরিত্থি যোতি; (সী. স্যা.)]
‘‘যথা সিখী নদী ৰাতো, নেরুনাৰ সমাগতা.
ৰিসরুক্খো ৰিয নিচ্চফলা, নাসযন্তি ঘরে ভোগং;
রতনন্তকরিত্থিযো’’তি [যথা সিখী নদীৰাহো, অনিলো কামচারৰা;§নেরূৰ অৰিসেসা চ, ৰিসরুক্খো ৰিয নিচ্চফলা;§নাসযন্তি ঘরে ভোগং, রতনানন্তকরিত্থি যোতি; (সী. স্যা.)].
‘‘চত্তারিমানি, সম্ম পুণ্ণমুখ, যানি (ৰত্থূনি কিচ্চে জাতে অনত্থচরানি ভৰন্তি; তানি) [( ) সী. স্যা. পোত্থকেসু ন দিস্সতি] পরকুলে ন ৰাসেতব্বানি – গোণং ধেনুং যানং ভরিযা. চত্তারি এতানি পণ্ডিতো ধনানি [যানি (সী. স্যা. পী.)] ঘরা ন ৰিপ্পৰাসযে.
‘গোণং ¶ ধেনুঞ্চ যানঞ্চ, ভরিযং ঞাতিকুলে ন ৰাসযে;
ভঞ্জন্তি রথং অযানকা, অতিৰাহেন হনন্তি পুঙ্গৰং;
দোহেন হনন্তি ৰচ্ছকং, ভরিযা ঞাতিকুলে পদুস্সতী’’’তি.
‘‘ছ ইমানি, সম্ম পুণ্ণমুখ, যানি (ৰত্থূনি) [( ) সী. পী. পোত্থকেসু নু দিস্সতি] কিচ্চে জাতে অনত্থচরানি ভৰন্তি –
‘অগুণং ধনু ঞাতিকুলে চ ভরিযা, পারং নাৰা অক্খভগ্গঞ্চ যানং;
দূরে ¶ মিত্তো পাপসহাযকো চ, কিচ্চে জাতে অনত্থচরানি ভৰ’’’ন্তি.
‘‘অট্ঠহি খলু, সম্ম পুণ্ণমুখ, ঠানেহি ইত্থী সামিকং অৰজানাতি. দলিদ্দতা, আতুরতা, জিণ্ণতা, সুরাসোণ্ডতা, মুদ্ধতা, পমত্ততা, সব্বকিচ্চেসু অনুৰত্তনতা, সব্বধনঅনুপ্পদানেন ¶ – ইমেহি খলু, সম্ম পুণ্ণমুখ, অট্ঠহি ঠানেহি ইত্থী সামিকং অৰজানাতি. ভৰতি চ পনুত্তরেত্থ ৰাক্যং –
‘দলিদ্দং আতুরঞ্চাপি, জিণ্ণকং সুরসোণ্ডকং;
পমত্তং মুদ্ধপত্তঞ্চ, সব্বকিচ্চেসু [রত্তং কিচ্চেসু (সী. পী.)] হাপনং;
সব্বকামপ্পদানেন [সব্বকামপণিধানেন (স্যা)], অৰজানাতি [অৰজানন্তি (সী. পী.)] সামিক’’’ন্তি.
‘‘নৰহি খলু, সম্ম পুণ্ণমুখ, ঠানেহি ইত্থী পদোসমাহরতি. আরামগমনসীলা চ হোতি, উয্যানগমনসীলা চ হোতি, নদীতিত্থগমনসীলা চ হোতি, ঞাতিকুলগমনসীলা চ হোতি, পরকুলগমনসীলা চ হোতি, আদাসদুস্সমণ্ডনানুযোগমনুযুত্তসীলা চ হোতি, মজ্জপাযিনী চ হোতি, নিল্লোকনসীলা চ হোতি, সদ্ৰারঠাযিনী [পদ্ৰারট্ঠাযিনী (সী. স্যা. পী.)] চ হোতি – ইমেহি খলু, সম্ম পুণ্ণমুখ, নৰহি ঠানেহি ইত্থী পদোসমাহরতীতি. ভৰতি চ পনুত্তরেত্থ ৰাক্যং –
‘আরামসীলা চ [আরামসীলা (সী. পী.)] উয্যানং, নদী ঞাতি পরকুলং;
আদাসদুস্সমণ্ডনমনুযুত্তা, যা ¶ চিত্থী মজ্জপাযিনী.
‘যা ¶ চ নিল্লোকনসীলা, যা চ সদ্ৰারঠাযিনী;
নৰহেতেহি ঠানেহি, পদোসমাহরন্তি ইত্থিযো’’’তি.
‘‘চত্তালীসায [চত্তালীসাযি (পী. ক.)] খলু, সম্ম পুণ্ণমুখ, ঠানেহি ইত্থী পুরিসং অচ্চাচরতি [অচ্চাৰদতি (সী. স্যা. পী.)]. ৰিজম্ভতি, ৰিনমতি, ৰিলসতি, ৰিলজ্জতি, নখেন নখং ঘট্টেতি, পাদেন পাদং অক্কমতি, কট্ঠেন পথৰিং ৰিলিখতি [লিখতি (সী. পী.)], দারকং উল্লঙ্ঘতি উল্লঙ্ঘাপেতি [দারকং উল্লঙ্ঘেতি ওলঙ্ঘেতি (সী. পী.)], কীল়তি কীল়াপেতি, চুম্বতি চুম্বাপেতি, ভুঞ্জতি ভুঞ্জাপেতি, দদাতি, যাচতি, কতমনুকরোতি, উচ্চং ভাসতি, নীচং ভাসতি, অৰিচ্চং ভাসতি, ৰিৰিচ্চং ভাসতি, নচ্চেন গীতেন ৰাদিতেন রোদনেন [রোদিতেন (সী. পী.)] ৰিলসিতেন ৰিভূসিতেন জগ্ঘতি, পেক্খতি, কটিং চালেতি, গুয্হভণ্ডকং সঞ্চালেতি, ঊরুং ৰিৰরতি, ঊরুং পিদহতি, থনং দস্সেতি, কচ্ছং দস্সেতি, নাভিং দস্সেতি, অক্খিং নিখনতি, ভমুকং উক্খিপতি, ওট্ঠং উপলিখতি [ওট্ঠং পলিখতি জিৰ্হং পলিখতি (সী. পী.)], জিৰ্হং নিল্লালেতি, দুস্সং মুঞ্চতি, দুস্সং পটিবন্ধতি, সিরসং মুঞ্চতি, সিরসং বন্ধতি – ইমেহি খলু, সম্ম পুণ্ণমুখ, চত্তালীসায ঠানেহি ইত্থী পুরিসং অচ্চাচরতি.
‘‘পঞ্চৰীসায [পঞ্চৰীসাহি (পী. ক.)] খলু, সম্ম পুণ্ণমুখ, ঠানেহি ইত্থী পদুট্ঠা ৰেদিতব্বা ভৰতি. সামিকস্স পৰাসং ৰণ্ণেতি, পৰুট্ঠং ন ¶ সরতি, আগতং নাভিনন্দতি, অৰণ্ণং তস্স ভণতি, ৰণ্ণং ¶ তস্স ন ভণতি, অনত্থং তস্স চরতি, অত্থং তস্স ন চরতি, অকিচ্চং তস্স করোতি, কিচ্চং তস্স ন করোতি, পরিদহিত্ৰা সযতি, পরম্মুখী নিপজ্জতি, পরিৰত্তকজাতা খো পন হোতি কুঙ্কুমিযজাতা, দীঘং অস্সসতি, দুক্খং ৰেদযতি, উচ্চারপস্সাৰং অভিণ্হং গচ্ছতি, ৰিলোমমাচরতি, পরপুরিসসদ্দং সুত্ৰা কণ্ণসোতং ৰিৰরমোদহতি [ৰিৰরতি কমোদহতি (পী.)], নিহতভোগা খো পন হোতি, পটিৰিস্সকেহি সন্থৰং করোতি, নিক্খন্তপাদা খো পন হোতি, ৰিসিখানুচারিনী অতিচারিনী খো পন হোতি, নিচ্চং [নত্থি সী. স্যা. পী. পোত্থকেসু] সামিকে অগারৰা পদুট্ঠমনসঙ্কপ্পা, অভিণ্হং দ্ৰারে তিট্ঠতি, কচ্ছানি অঙ্গানি থনানি দস্সেতি, দিসোদিসং গন্ত্ৰা পেক্খতি – ইমেহি খলু, সম্ম পুণ্ণমুখ, পঞ্চৰীসায [পঞ্চৰীসাহি (ক.)] ঠানেহি ইত্থী পদুট্ঠা ৰেদিতব্বা ভৰতি. ভৰতি চ পনুত্তরেত্থ ৰাক্যং –
‘পৰাসং ¶ তস্স ৰণ্ণেতি, গতং তস্স ন সোচতি [পৰাস’মস্স ৰণ্ণেতি গতিং নানুসোচতি (সী. পী.)];
দিস্ৰান পতিমাগতং [দিস্ৰাপতিং আগতং (সী. পী.)] নাভিনন্দতি;
ভত্তারৰণ্ণং ন কদাচি ভাসতি, এতে পদুট্ঠায ভৰন্তি লক্খণা.
‘অনত্থং তস্স চরতি অসঞ্ঞতা, অত্থঞ্চ হাপেতি অকিচ্চকারিনী;
পরিদহিত্ৰা ¶ সযতি পরম্মুখী, এতে পদুট্ঠায ভৰন্তি লক্খণা.
‘পরিৰত্তজাতা চ [পরাৰত্তকজাতা চ (সী.)] ভৰতি কুঙ্কুমী, দীঘঞ্চ অস্সসতি দুক্খৰেদিনী;
উচ্চারপস্সাৰমভিণ্হং গচ্ছতি, এতে পদুট্ঠায ভৰন্তি লক্খণা.
‘‘ৰিলোমমাচরতি অকিচ্চকারিনী, সদ্দং নিসামেতি পরস্স ভাসতো;
নিহতভোগা চ করোতি সন্থৰং, এতে পদুট্ঠায ভৰন্তি লক্খণা.
‘কিচ্ছেন লদ্ধং কসিরাভতং [কসিরেনাভতং (সী.)] ধনং, ৰিত্তং ৰিনাসেতি দুক্খেন সম্ভতং;
পটিৰিস্সকেহি চ করোতি সন্থৰং, এতে পদুট্ঠায ভৰন্তি লক্খণা.
‘নিক্খন্তপাদা ৰিসিখানুচারিনী, নিচ্চঞ্চ সামিম্হি [নিচ্চং সসামিম্হি (পী. ক.)] পদুট্ঠমানসা;
অতিচারিনী হোতি অপেতগারৰা [তথেৰ’গারৰা (সী. পী.)], এতে পদুট্ঠায ভৰন্তি লক্খণা.
‘অভিক্খণং ¶ তিট্ঠতি দ্ৰারমূলে, থনানি কচ্ছানি চ দস্সযন্তী;
দিসোদিসং ¶ পেক্খতি ভন্তচিত্তা, এতে পদুট্ঠায ভৰন্তি লক্খণা.
‘সব্বা নদী ৰঙ্কগতী [ৰঙ্কনদী (ক.)], সব্বে কট্ঠমযা ৰনা;
সব্বিত্থিযো করে পাপং, লভমানে নিৰাতকে.
‘সচে লভেথ খণং ৰা রহো ৰা, নিৰাতকং ৰাপি লভেথ তাদিসং;
সব্বাৰ ইত্থী কযিরুং নু [করেয্যু নো (সী.), করেয্যুং নো (পী.)] পাপং, অঞ্ঞং অলত্থ [অলদ্ধা (স্যা. পী. ক.)] পীঠসপ্পিনাপি সদ্ধিং.
‘‘নরানমারামকরাসু ¶ নারিসু, অনেকচিত্তাসু অনিগ্গহাসু চ;
সব্বত্থ নাপীতিকরাপি [সব্ব’ত্তনা’পীতিকারাপি (সী. স্যা.)] চে সিযা [সিযুং (স্যা.)], ন ৰিস্সসে তিত্থসমা হি নারিযো’’তি.
‘যং ৰে [যঞ্চ (স্যা. ক.)] দিস্ৰা কণ্ডরীকিন্নরানং [কিন্নরকিন্নরীনং (স্যা.), কিন্নরীকিন্নরানং (ক.)], সব্বিত্থিযো ন রমন্তি অগারে;
তং তাদিসং মচ্চং চজিত্ৰা ভরিযা, অঞ্ঞং দিস্ৰা পুরিসং পীঠসপ্পিং.
‘বকস্স চ বাৰরিকস্স [পাৰারিকস্স (সী.), বাৰরিযস্স (স্যা.)] রঞ্ঞো, অচ্চন্তকামানুগতস্স ভরিযা;
অৰাচরী [অচ্চাচরি (স্যা.), অনাচরি (ক.)] পট্ঠৰসানুগস্স [বদ্ধৰসানুগস্স (সী. স্যা.), পত্তৰসানুগতস্স (ক.)], কং ৰাপি ইত্থী নাতিচরে তদঞ্ঞং.
‘পিঙ্গিযানী ¶ ¶ সব্বলোকিস্সরস্স, রঞ্ঞো পিযা ব্রহ্মদত্তস্স ভরিযা;
অৰাচরী পট্ঠৰসানুগস্স, তং ৰাপি সা নাজ্ঝগা কামকামিনী.
‘লুদ্ধানং [খুদ্দানং (সী. স্যা. পী.)] লহুচিত্তানং, অকতঞ্ঞূন দুব্ভিনং;
নাদেৰসত্তো পুরিসো, থীনং সদ্ধাতুমরহতি.
‘ন তা পজানন্তি কতং ন কিচ্চং, ন মাতরং পিতরং ভাতরং ৰা;
অনরিযা সমতিক্কন্তধম্মা, সস্সেৰ চিত্তস্স ৰসং ৰজন্তি.
‘চিরানুৰুট্ঠম্পি [চিরানুৰুত্থম্পি (সী. পী.)] পিযং মনাপং, অনুকম্পকং পাণসমম্পি ভত্তুং [সন্তং (সী. স্যা. পী.)];
আৰাসু কিচ্চেসু চ নং জহন্তি, তস্মাহমিত্থীনং ন ৰিস্সসামি.
‘থীনঞ্হি চিত্তং যথা ৰানরস্স, কন্নপ্পকন্নং যথা রুক্খছাযা;
চলাচলং হদযমিত্থিযানং, চক্কস্স নেমি ৰিয পরিৰত্ততি.
‘যদা তা পস্সন্তি সমেক্খমানা, আদেয্যরূপং পুরিসস্স ৰিত্তং;
সণ্হাহি ¶ ৰাচাহি নযন্তি মেনং, কম্বোজকা জলজেনেৰ অস্সং.
‘যদা ন পস্সন্তি সমেক্খমানা, আদেয্যরূপং পুরিসস্স ৰিত্তং;
সমন্ততো নং পরিৰজ্জযন্তি, তিণ্ণো নদীপারগতোৰ কুল্লং.
‘সিলেসূপমাং ¶ সিখিরিৰ সব্বভক্খা, তিক্খমাযা নদীরিৰ সীঘসোতা;
সেৰন্তি হেতা পিযমপ্পিযঞ্চ, নাৰা যথা ওরকূলং [ওরকুলং (সী.) এৰমুপরিপি] পরঞ্চ.
‘ন তা একস্স ন দ্ৰিন্নং, আপণোৰ পসারিতো;
যো তা ময্হন্তি মঞ্ঞেয্য, ৰাতং জালেন বাধযে [বন্ধযে (স্যা. ক.)].
‘যথা নদী চ পন্থো চ, পানাগারং সভা পপা;
এৰং লোকিত্থিযো নাম, ৰেলা তাসং ন ৰিজ্জতি [কেসুচি পোত্থকেসু ইমিস্সা গাথায পুব্বদ্ধাপরদ্ধং ৰিপরিযাযেন দিস্সতি].
‘ঘতাসনসমা এতা, কণ্হসপ্পসিরূপমা;
গাৰো বহিতিণস্সেৰ, ওমসন্তি ৰরং ৰরং.
‘ঘতাসনং কুঞ্জরং কণ্হসপ্পং, মুদ্ধাভিসিত্তং পমদা চ সব্বা;
এতে নরো [এতেন সো (পী.)] নিচ্চযতো [নিচ্চযত্তো (সী. পী.)] ভজেথ, তেসং হৰে দুব্বিদু সব্বভাৰো [সচ্চভাৰো (স্যা.)].
‘নচ্চন্তৰণ্ণা ¶ ¶ ন বহূনং কন্তা, ন দক্খিণা পমদা সেৰিতব্বা;
ন পরস্স ভরিযা ন ধনস্স হেতু, এতিত্থিযো পঞ্চ ন সেৰিতব্বা’’’.
অথ খলু, ভো, আনন্দো গিজ্ঝরাজা কুণালস্স সকুণস্স আদিমজ্ঝকথাপরিযোসানং [আদিমজ্ঝগাথাপরিযোসানং (স্যা. ক.)] ৰিদিত্ৰা তাযং ৰেলাযং ইমা গাথাযো অভাসি –
‘‘পুণ্ণম্পি চেমং পথৰিং ধনেন, দজ্জিত্থিযা পুরিসো সম্মতায;
লদ্ধা খণং অতিমঞ্ঞেয্য তম্পি, তাসং ৰসং অসতীনং ন গচ্ছে.
‘‘উট্ঠাহকং ¶ চেপি অলীনৰুত্তিং, কোমারভত্তারং পিযং মনাপং;
আৰাসু কিচ্চেসু চ নং জহন্তি, তস্মাহমিত্থীনং [তস্মা হি ইত্থীনং (সী. পী.)] ন ৰিস্সসামি.
‘‘ন ৰিস্সসে ইচ্ছতি মন্তি পোসো, ন ৰিস্সসে রোদতি মে সকাসে;
সেৰন্তি হেতা পিযমপ্পিযঞ্চ, নাৰা যথা ওরকূলং পরঞ্চ.
‘‘ন ৰিস্সসে সাখপুরাণসন্থতং, ন ¶ ৰিস্সসে মিত্তপুরাণচোরং;
ন ৰিস্সসে রাজানং সখা [রাজা সখা (সী. পী.)] মমন্তি, ন ৰিস্সসে ইত্থি দসন্ন মাতরং.
‘‘ন ৰিস্সসে রামকরাসু নারিসু, অচ্চন্তসীলাসু অসঞ্ঞতাসু;
অচ্চন্তপেমানুগতস্স ভরিযা, ন ৰিস্সসে তিত্থসমা হি নারিযো.
‘‘হনেয্যুং ছিন্দেয্যুং ছেদাপেয্যুম্পি [হনেয্যু ছিন্দেয্যুংপি ছদযেয্যুং (সী. পী.), হনেয্যুংপি ছিন্দেয্যুংপি ছেদাপেয্যুংপি (স্যা.)], কণ্ঠেপি [কণ্ঠম্পি (সী. স্যা.)] ছেত্ৰা রুধিরং পিৰেয্যুং;
মা দীনকামাসু অসঞ্ঞতাসু, ভাৰং করে গঙ্গতিত্থূপমাসু.
‘‘মুসা তাসং যথা সচ্চং, সচ্চং তাসং যথা মুসা;
গাৰো বহিতিণস্সেৰ, ওমসন্তি ৰরং ৰরং.
‘‘গতেনেতা পলোভেন্তি, পেক্খিতেন ম্হিতেন চ;
অথোপি দুন্নিৰত্থেন, মঞ্জুনা ভণিতেন চ.
‘‘চোরিযো কথিনা [কঠিনা (সী. স্যা. পী.)] হেতা, ৰাল়া চ লপসক্খরা;
ন তা কিঞ্চি ন জানন্তি, যং মনুস্সেসু ৰঞ্চনং.
‘‘অসা ¶ লোকিত্থিযো নাম, ৰেলা তাসং ন ৰিজ্জতি;
সারত্তা চ পগব্ভা চ, সিখী সব্বঘসো যথা.
‘‘নত্থিত্থীনং ¶ পিযো নাম, অপ্পিযোপি ন ৰিজ্জতি;
সেৰন্তি হেতা পিযমপ্পিযঞ্চ, নাৰা যথা ওরকূলং পরঞ্চ.
‘‘নত্থিত্থীনং পিযো নাম, অপ্পিযোপি ন ৰিজ্জতি;
ধনত্তা [ধনত্থা (স্যা.)] পটিৰল্লন্তি, লতাৰ দুমনিস্সিতা.
‘‘হত্থিবন্ধং ¶ অস্সবন্ধং, গোপুরিসঞ্চ মণ্ডলং [চণ্ডলং (সী. স্যা. পী.)];
ছৰডাহকং পুপ্ফছড্ডকং, সধনমনুপতন্তি নারিযো.
‘‘কুলপুত্তম্পি জহন্তি অকিঞ্চনং, ছৰকসমসদিসম্পি [ছৰকসমং (স্যা. পী.)];
অনুগচ্ছন্তি [গচ্ছন্তি (পী.)] অনুপতন্তি, ধনহেতু হি নারিযো’’তি [ধনহেতু চ নারিযো (স্যা.), ধনহেতু নারিযো (পী.)].
অথ খলু, ভো, নারদো দেৰব্রাহ্মণো আনন্দস্স গিজ্ঝরাজস্স আদিমজ্ঝকথাপরিযোসানং ৰিদিত্ৰা তাযং ৰেলাযং ইমা গাথাযো অভাসি –
‘‘চত্তারোমে ন পূরেন্তি, তে মে সুণাথ ভাসতো;
সমুদ্দো ব্রাহ্মণো রাজা, ইত্থী চাপি দিজম্পতি.
‘‘সরিতা সাগরং যন্তি, যা কাচি পথৰিস্সিতা;
তা সমুদ্দং ন পূরেন্তি, ঊনত্তা হি ন পূরতি.
‘‘ব্রাহ্মণো চ অধীযান, ৰেদমক্খানপঞ্চমং;
ভিয্যোপি সুতমিচ্ছেয্য, ঊনত্তা হি ন পূরতি.
‘‘রাজা চ পথৰিং সব্বং, সসমুদ্দং সপব্বতং;
অজ্ঝাৰসং ৰিজিনিত্ৰা, অনন্তরতনোচিতং;
পারং ¶ সমুদ্দং পত্থেতি, ঊনত্তা হি ন পূরতি.
‘‘একমেকায ইত্থিযা, অট্ঠট্ঠ পতিনো সিযা;
সূরা চ বলৰন্তো চ, সব্বকামরসাহরা;
করেয্য নৰমে ছন্দং, ঊনত্তা হি ন পূরতি.
‘‘সব্বিত্থিযো ¶ সিখিরিৰ সব্বভক্খা, সব্বিত্থিযো নদীরিৰ সব্বৰাহী;
সব্বিত্থিযো কণ্টকানংৰ সাখা, সব্বিত্থিযো ধনহেতু ৰজন্তি.
‘‘ৰাতঞ্চ জালেন নরো পরামসে, ওসিঞ্চযে [ওসঞ্চিযা (সী. পী.)] সাগরমেকপাণিনা;
সকেন হত্থেন করেয্য ঘোসং [সকেন কালেন হনেয্য ঘোসনং (পী.)], যো সব্বভাৰং পমদাসু ওসজে.
‘‘চোরীনং বহুবুদ্ধীনং, যাসু সচ্চং সুদুল্লভং;
থীনং ভাৰো দুরাজানো, মচ্ছস্সেৰোদকে গতং.
‘‘অনলা মুদুসম্ভাসা, দুপ্পূরা তা নদীসমা;
সীদন্তি নং ৰিদিত্ৰান, আরকা পরিৰজ্জযে.
‘‘আৰট্টনী মহামাযা, ব্রহ্মচরিযৰিকোপনা;
সীদন্তি নং ৰিদিত্ৰান, আরকা পরিৰজ্জযে.
‘‘যং ¶ এতা [যঞ্চেতা (স্যা.)] উপসেৰন্তি, ছন্দসা ৰা ধনেন ৰা;
জাতৰেদোৰ সণ্ঠানং, খিপ্পং অনুদহন্তি ন’’ন্তি.
অথ ¶ খলু, ভো, কুণালো সকুণো নারদস্স দেৰব্রাহ্মণস্স আদিমজ্ঝকথাপরিযোসানং ৰিদিত্ৰা তাযং ৰেলাযং ইমা গাথাযো অভাসি –
‘‘সল্লপে নিসিতখগ্গপাণিনা, পণ্ডিতো অপি পিসাচদোসিনা;
উগ্গতেজমুরগম্পি আসিদে, একো একায পমদায নালপে [একো একপমদং হি নালপে (পী.) একো একপমাদায নালপে (?)].
‘‘লোকচিত্তমথনা হি নারিযো, নচ্চগীতভণিতম্হিতাৰুধা;
বাধযন্তি অনুপট্ঠিতস্সতিং [অনুপট্ঠিতাসতী (পী.)], দীপে রক্খসিগণোৰ [দীপরক্খসিগণাৰ (সী.)] ৰাণিজে.
‘‘নত্থি ¶ তাসং ৰিনযো ন সংৰরো, মজ্জমংসনিরতা [মজ্জমংসাভিরতা (ক.)] অসঞ্ঞতা;
তা গিলন্তি পুরিসস্স পাভতং, সাগরেৰ মকরং তিমিঙ্গলো [তিমিঙ্গিলো (সী. পী.)].
‘‘পঞ্চকামগুণসাতগোচরা, উদ্ধতা অনিযতা অসঞ্ঞতা;
ওসরন্তি পমদা পমাদিনং, লোণতোযৰতিযংৰ আপকা.
‘‘যং নরং উপলপেন্তি [উপরমন্তি (সী. পী.), পলাপেন্তি (ক.)] নারিযো, ছন্দসা ৰ ¶ রতিযা ধনেন ৰা;
জাতৰেদসদিসম্পি তাদিসং, রাগদোসৰধিযো [রাগদোসৰতিযো (সী. পী.)] দহন্তি নং.
‘‘অড্ঢং ঞত্ৰা পুরিসং মহদ্ধনং, ওসরন্তি সধনা সহত্তনা;
রত্তচিত্তমতিৰেঠযন্তি নং, সাল মালুৰলতাৰ কাননে.
‘‘তা উপেন্তি ৰিৰিধেন ছন্দসা, চিত্রবিম্বমুখিযো অলঙ্কতা;
উহসন্তি [ঊহসন্তি (সী. পী.), ওহসন্তি (স্যা.)] পহসন্তি নারিযো, সম্বরোৰ [সংৰরোৰ (স্যা. পী. ক.)] সতমাযকোৰিদা.
‘‘জাতরূপমণিমুত্তভূসিতা, সক্কতা পতিকুলেসু নারিযো;
রক্খিতা অতিচরন্তি সামিকং, দানৰংৰ হদযন্তরস্সিতা [হদযন্তনিস্সিতা (ক.), হদযন্তরনিস্সিতা (স্যা.)].
‘‘তেজৰাপি ¶ হি নরো ৰিচক্খণো, সক্কতো বহুজনস্স পূজিতো;
নারিনং ৰসগতো ন ভাসতি, রাহুনা উপহতোৰ চন্দিমা.
‘‘যং করেয্য কুপিতো দিসো দিসং, দুট্ঠচিত্তো ¶ ৰসমাগতং অরিং [অরি (সী. পী.)];
তেন ভিয্যো ব্যসনং নিগচ্ছতি, নারিনং ৰসগতো অপেক্খৰা.
‘‘কেসলূননখছিন্নতজ্জিতা, পাদপাণিকসদণ্ডতাল়িতা;
হীনমেৰুপগতা হি নারিযো, তা রমন্তি কুণপেৰ মক্খিকা.
‘‘তা কুলেসু ৰিসিখন্তরেসু ৰা, রাজধানিনিগমেসু ৰা পুন [ৰা পন (স্যা.)];
ওড্ডিতং নমুচিপাসৰাকরং [ৰাগুরং (স্যা.)], চক্খুমা পরিৰজ্জে সুখত্থিকো.
‘‘ওস্সজিত্ৰ ¶ কুসলং তপোগুণং, যো অনরিযচরিতানি মাচরি;
দেৰতাহি নিরযং নিমিস্সতি, ছেদগামিমণিযংৰ ৰাণিজো.
‘‘সো ইধ গরহিতো পরত্থ চ, দুম্মতী উপহতো [উপগতো (সী. পী.)] সকম্মুনা;
গচ্ছতী অনিযতো গল়াগল়ং, দুট্ঠগদ্রভরথোৰ উপ্পথে.
‘‘সো উপেতি নিরযং পতাপনং, সত্তিসিম্বলিৰনঞ্চ ¶ আযসং;
আৰসিত্ৰা তিরচ্ছানযোনিযং, পেতরাজৰিসযং ন মুঞ্চতি [মুচ্চতি (ক.)].
‘‘দিব্যখিড্ডরতিযোং ¶ চ নন্দনে, চক্কৰত্তিচরিতঞ্চ মানুসে;
নাসযন্তি পমদা পমাদিনং, দুগ্গতিঞ্চ পটিপাদযন্তি নং.
‘‘দিব্যখিড্ডরতিযো ন দুল্লভা, চক্কৰত্তিচরিতঞ্চ মানুসে;
সোণ্ণব্যম্হনিলযা [সুৰণ্ণব্যম্হনিলযা (স্যা. ক.), সোৰণ্ণব্যম্হনিলযা (পী.)] চ অচ্ছরা, যে চরন্তি পমদাহনত্থিকা.
‘‘কামধাতুসমতিক্কমা গতি, রূপধাতুযা ভাৰো [রূপধাতুযা ভৰো (সী.), রূপধাতুসম্ভৰো (স্যা.)] ন দুল্লভো;
ৰীতরাগৰিসযূপপত্তিযা, যে চরন্তি পমদাহনত্থিকা.
‘‘সব্বদুক্খসমতিক্কমং সিৰং, অচ্চন্তমচলিতং অসঙ্খতং;
নিব্বুতেহি সুচিহী ন দুল্লভং, যে চরন্তি পমদাহনত্থিকা’’তি.
‘‘কুণালোহং তদা আসিং, উদাযী ফুস্সকোকিলো;
আনন্দো ¶ গিজ্ঝরাজাসি, সারিপুত্তো চ নারদো;
পরিসা বুদ্ধপরিসা, এৰং ধারেথ জাতক’’ন্তি.
কুণালজাতকং চতুত্থং.
৫৩৭. মহাসুতসোমজাতকং (৫)
‘‘কস্মা তুৰং রসক এদিসানি, করোসি কম্মানি সুদারুণানি;
হনাসি ইত্থী পুরিসে চ মূল়্হো, মংসস্স হেতু অদু [আদু (সী. স্যা.)] ধনস্স কারণা’’.
‘‘নং ¶ অত্তহেতূ ন ধনস্স কারণা, ন পুত্তদারস্স সহাযঞাতিনং;
ভত্তা চ মে ভগৰা ভূমিপালো, সো খাদতি মংসং ভদন্তেদিসং’’.
‘‘সচে তুৰং ভত্তুরত্থে পযুত্তো, করোসি কম্মানি সুদারুণানি;
পাতোৰ অন্তেপুরং পাপুণিত্ৰা, লপেয্যাসি মে রাজিনো সম্মুখে তং’’.
‘‘তথা করিস্সামি অহং ভদন্তে, যথা তুৰং [যমেৰ ত্ৰং (সী.)] ভাসসি কাল়হত্থি;
পাতোৰ অন্তেপুরং পাপুণিত্ৰা, ৰক্খামি ¶ তে রাজিনো সম্মুখে তং’’.
ততো ¶ রত্যা ৰিৰসানে [ৰিৰসনে (সী. স্যা. পী.)], সূরিযুগ্গমনং পতি;
কাল়ো রসকমাদায, রাজানং উপসঙ্কমি;
উপসঙ্কম্ম [উপসঙ্কমিত্ৰা (সী. স্যা. পী.)] রাজানং, ইদং ৰচনমব্রৰি.
‘‘সচ্চং কির মহারাজ, রসকো পেসিতো তযা;
হনতি ইত্থিপুরিসে, তুৰং মংসানি খাদসি’’.
‘‘এৰমেৰ তথা কাল়, রসকো পেসিতো মযা;
মম অত্থং করোন্তস্স, কিমেতং পরিভাসসি’’.
‘‘আনন্দো সব্বমচ্ছানং, খাদিত্ৰা রসগিদ্ধিমা;
পরিক্খীণায পরিসায, অত্তানং খাদিযা মতো.
‘‘এৰং পমত্তো রসগারৰে রত্তো [রতো (সী. স্যা. পী.)], বালো যদী আযতি নাৰবুজ্ঝতি;
ৰিধম্ম পুত্তে চজি [চজিত্ৰা (ক.)] ঞাতকে চ, পরিৰত্তিয অত্তানঞ্ঞেৰ [অত্তানমেৰ (সী. পী.)] খাদতি.
‘‘ইদং ¶ তে সুত্ৰান ৰিগেতু [ৰিহেতু (সী. পী.)] ছন্দো, মা ভক্খযী [মা ভক্খসী (সী. পী.)] রাজ মনুস্সমংসং;
মা ত্ৰং ইমং কেৰলং ৰারিজোৰ, দ্ৰিপদাধিপ [দিপদাদিপ (সী. পী.) এৰমুপরিপি] সুঞ্ঞমকাসি রট্ঠং’’.
‘‘সুজাতো নাম নামেন, ওরসো তস্স অত্রজো [তস্স ওরস অত্রজো (সী.), তস্স অত্রজ ওরসো (পী.)];
জম্বুপেসিমলদ্ধান, মতো সো তস্স সঙ্খযে.
‘‘এৰমেৰ ¶ অহং কাল়, ভুত্ৰা ভক্খং রসুত্তমং;
অলদ্ধা মানুসং মংসং, মঞ্ঞে হিস্সামি [হেস্সামি (সী. স্যা.), হস্সামি (পী.)] জীৰিতং’’.
‘‘মাণৰ অভিরূপোসি, কুলে জাতোসি সোত্থিযে;
ন ত্ৰং অরহসি তাত, অভক্খং ভক্খযেতৰে’’.
‘‘রসানং অঞ্ঞতরং এতং, কস্মা [যস্মা (সী. পী.)] মং ত্ৰং নিৰারযে;
সোহং তত্থ গমিস্সামি, যত্থ লচ্ছামি এদিসং.
‘‘সোৰাহং নিপ্পতিস্সামি, ন তে ৰচ্ছামি সন্তিকে;
যস্স মে দস্সনেন ত্ৰং, নাভিনন্দসি ব্রাহ্মণ’’.
‘‘অদ্ধা অঞ্ঞেপি দাযাদে, পুত্তে লচ্ছাম মাণৰ;
ত্ৰঞ্চ জম্ম ৰিনস্সস্সু, যত্থ পত্তং ন তং সুণে’’.
‘‘এৰমেৰ তুৰং রাজ, দ্ৰিপদিন্দ সুণোহি মে;
পব্বাজেস্সন্তি তং রট্ঠা, সোণ্ডং মাণৰকং যথা’’.
‘‘সুজাতো নাম নামেন, ভাৰিতত্তান সাৰকো;
অচ্ছরং কামযন্তোৰ, ন সো ভুঞ্জি ন সো পিৰি.
‘‘কুসগ্গেনুদকমাদায ¶ [কুসগ্গে উদকমাদায (সী. পী.)], সমুদ্দে উদকং মিনে;
এৰং মানুসকা কামা, দিব্বকামান সন্তিকে.
‘‘এৰমেৰ অহং কাল়, ভুত্ৰা ভক্খং রসুত্তমং;
অলদ্ধা মানুসং মংসং, মঞ্ঞে হিস্সামি জীৰিতং’’.
‘‘যথাপি ¶ তে ধতরট্ঠা, হংসা ৰেহাযসঙ্গমা;
অভুত্তপরিভোগেন [অৰুত্তিপরিভোগেন (সী. পী.), অযুত্তপরিভোগেন (স্যা.)], সব্বে অব্ভত্থতং গতা.
‘‘এৰমেৰ ¶ তুৰং রাজ, দ্ৰিপদিন্দ সুণোহি মে;
অভক্খং রাজ ভক্খেসি, তস্মা পব্বাজযন্তি তং’’.
‘‘তিট্ঠাহীতি মযা ৰুত্তো, সো ত্ৰং গচ্ছসি পম্মুখো [পামুখো (ক.)];
অট্ঠিতো ত্ৰং ঠিতোম্হীতি, লপসি ব্রহ্মচারিনি;
ইদং তে সমণাযুত্তং, অসিঞ্চ মে মঞ্ঞসি কঙ্কপত্তং’’ [কঙ্খপত্তং (স্যা. ক.)].
‘‘ঠিতোহমস্মী সধম্মেসু রাজ, ন নামগোত্তং পরিৰত্তযামি;
চোরঞ্চ লোকে অঠিতং ৰদন্তি, আপাযিকং নেরযিকং ইতো চুতং.
‘‘সচে ত্ৰং সদ্দহসি [সচেপি সহসি (সী. পী.)] রাজ, সুতং গণ্হাহি খত্তিয [খত্তিযং (স্যা.)];
তেন যঞ্ঞং যজিত্ৰান, এৰং সগ্গং গমিস্সসি’’.
‘‘কিস্মিং নু রট্ঠে তৰ জাতিভূমি [জাতভূমি (সী.)], অথ কেন অত্থেন ইধানুপত্তো;
অক্খাহি মে ব্রাহ্মণ এতমত্থং, কিমিচ্ছসী দেমি তযজ্জ পত্থিতং’’.
‘‘গাথা চতস্সো ধরণীমহিস্সর, সুগম্ভিরত্থা ৰরসাগরূপমা;
তৰেৰ অত্থায ইধাগতোস্মি, সুণোহি গাথা পরমত্থসংহিতা’’.
‘‘ন ৰে রুদন্তি মতিমন্তো সপঞ্ঞা, বহুস্সুতা ¶ যে বহুট্ঠানচিন্তিনো;
দীপঞ্হি এতং পরমং নরানং, যং পণ্ডিতা সোকনুদা ভৰন্তি.
‘‘অত্তানং ¶ ঞাতী উদাহু [উদ (সী. পী.)] পুত্তদারং, ধঞ্ঞং ধনং রজতং জাতরূপং;
কিমেৰ ত্ৰং [কিমো নু ত্ৰং (সী. পী.)] সুতসোমানুতপ্পে, কোরব্যসেট্ঠ ৰচনং সুণোম তেতং’.
‘‘নেৰাহমত্তানমনুত্থুনামি, ন পুত্তদারং ন ধনং ন রট্ঠং;
সতঞ্চ ধম্মো চরিতো পুরাণো, তং সঙ্করং [সঙ্গরং (সী. স্যা. পী.) এৰমুপরিপি] ব্রাহ্মণস্সানুতপ্পে.
‘‘কতো মযা সঙ্করো ব্রাহ্মণেন, রট্ঠে সকে ইস্সরিযে ঠিতেন;
তং সঙ্করং ব্রাহ্মণসপ্পদায, সচ্চানুরক্খী পুনরাৰজিস্সং’’.
‘‘নেৰাহমেতং অভিসদ্দহামি, সুখী নরো মচ্চুমুখা পমুত্তো;
অমিত্তহত্থং পুনরাৰজেয্য, কোরব্যসেট্ঠ ন হি মং উপেসি.
‘‘মুত্তো ¶ তুৰং পোরিসাদস্স হত্থা, গন্ত্ৰা ¶ সকং মন্দিরং কামকামী;
মধুরং পিযং জীৰিতং লদ্ধ রাজ, কুতো তুৰং এহিসি মে সকাসং’’.
‘‘মতং ৰরেয্য পরিসুদ্ধসীলো, ন জীৰিতং [ন হি জীৰিতং (সী.)] গরহিতো পাপধম্মো;
ন হি তং নরং তাযতি [তাযতে (সী. স্যা. পী. ক.)] দুগ্গতীহি, যস্সাপি হেতু অলিকং ভণেয্য.
‘‘সচেপি ৰাতো গিরিমাৰহেয্য, চন্দো চ সূরিযো চ ছমা পতেয্যুং;
সব্বা চ নজ্জো পটিসোতং ৰজেয্যুং, ন ত্ৰেৰহং রাজ মুসা ভণেয্যং.
[অযং গাথা সী. পী. পোত্থকেসু ন দিস্সতি] ‘‘নভং ¶ ফলেয্য উদধীপি সুস্সে, সংৰট্টযে ভূতধরা ৰসুন্ধরা;
সিলুচ্চযো মেরু সমূলমুপ্পতে, ন ত্ৰেৰহং রাজ মুসা ভণেয্যং’’ [অযং গাথা সী. পী. পোত্থকেসু ন দিস্সতি].
‘‘অসিঞ্চ সত্তিঞ্চ পরামসামি, সপথম্পি তে সম্ম অহং করোমি;
তযা পমুত্তো অনণো ভৰিত্ৰা, সচ্চানুরক্খী পুনরাৰজিস্সং’’.
‘‘যো তে কতো সঙ্করো ব্রাহ্মণেন, রট্ঠে সকে ইস্সরিযে ঠিতেন;
তং সঙ্করং ব্রাহ্মণসপ্পদায, সচ্চানুরক্খী পুনরাৰজস্সু’’.
‘‘যো মে কতো সঙ্করো ব্রাহ্মণেন, রট্ঠে ¶ সকে ইস্সরিযে ঠিতেন;
তং সঙ্করং ব্রাহ্মণসপ্পদায, সচ্চানুরক্খী পুনরাৰজিস্সং’’.
‘‘মুত্তো চ সো পোরিসাদস্স হত্থা, গন্ত্ৰান তং ব্রাহ্মণং এতদৰোচ;
সুণোম [সুণোমি (সী. স্যা.)] গাথাযো সতারহাযো, যা মে সুতা অস্সু হিতায ব্রহ্মে’’.
‘‘সকিদেৰ সুতসোম, সব্ভি হোতি [হোতু (পী.)] সমাগমো;
সা নং সঙ্গতি পালেতি, নাসব্ভি বহুসঙ্গমো.
‘‘সব্ভিরেৰ সমাসেথ, সব্ভি কুব্বেথ সন্থৰং;
সতং সদ্ধম্মমঞ্ঞায, সেয্যো হোতি ন পাপিযো.
‘‘জীরন্তি ৰে রাজরথা সুচিত্তা, অথো সরীরম্পি জরং উপেতি;
সতঞ্চ ধম্মো ন জরং উপেতি, সন্তো হৰে সব্ভি পৰেদযন্তি.
‘‘নভঞ্চং ¶ দূরে পথৰী চ দূরে, পারং ¶ সমুদ্দস্স তদাহু দূরে;
ততো হৰে দূরতরং ৰদন্তি, সতঞ্চ ধম্মো [ধম্মং (সী. পী.)] অসতঞ্চ রাজ’’.
‘‘সহস্সিযা [সহস্সিযো (সী. পী.)] ইমা গাথা, নহিমা [ন ইমা, (সী. পী.) নযিমা (স্যা.)] গাথা সতারহা;
চত্তারি ত্ৰং সহস্সানি, খিপ্পং গণ্হাহি ব্রাহ্মণ’’.
‘‘আসীতিযা নাৰুতিযা [অসীতিযা নৰুতিযা (পী.)] চ গাথা, সতারহা চাপি ভৰেয্য [ভৰেয্যু (সী. স্যা. পী.)] গাথা;
পচ্চত্তমেৰ সুতসোম জানহি, সহস্সিযা নাম কা অত্থি [সহস্সিযো নাম ইধত্থি (সী.)] গাথা’’.
‘‘ইচ্ছামি ৰোহং সুতৰুদ্ধিমত্তনো, সন্তোতি মং [সন্তো মমং (স্যা.), সন্তো চ মং (সী. পী. ক.)] সপ্পুরিসা ভজেয্যুং;
অহং সৰন্তীহি মহোদধীৰ, ন হি তাত তপ্পামি সুভাসিতেন.
‘‘অগ্গি ¶ যথা তিণকট্ঠং দহন্তো, ন তপ্পতী সাগরোৰ [সাগরো ৰা (সী. পী.)] নদীহি;
এৰম্পি তে পণ্ডিতা রাজসেট্ঠ, সুত্ৰা ন তপ্পন্তি সুভাসিতেন.
‘‘সকস্স দাসস্স যদা সুণোমি, গাথং অহং অত্থৰতিং [গাথা অহং অত্থৰতী (সী. পী.)] জনিন্দ;
তমেৰ সক্কচ্চ নিসামযামি, ন ¶ হি তাত ধম্মেসু মমত্থি তিত্তি’’.
‘‘ইদং ¶ তে রট্ঠং সধনং সযোগ্গং, সকাযুরং সব্বকামূপপন্নং;
কিং কামহেতু পরিভাসসিমং [ভাসসে মং (সী. স্যা. পী.)], গচ্ছামহং পোরিসাদস্স ঞত্তে’’ [পোরিসাদস্স কন্তে (সী. পী.), পোরিসাদস্সুপন্তে (ক.)].
‘‘অত্তানুরক্খায ভৰন্তি হেতে, হত্থারোহা রথিকা পত্তিকা চ;
অস্সারুহা [অস্সারোহা (স্যা. পী.)] যে চ ধনুগ্গহাসে, সেনং পযুঞ্জাম হনাম সত্তুং’’.
‘‘সুদুক্করং পোরিসাদো অকাসি, জীৰং গহেত্ৰান অৰস্সজী মং;
তং তাদিসং পুব্বকিচ্চং সরন্তো, দুব্ভে অহং তস্স কথং জনিন্দ’’.
‘‘ৰন্দিত্ৰা সো পিতরং মাতরঞ্চ, অনুসাসেত্ৰা নেগমঞ্চ বলঞ্চ;
সচ্চৰাদী সচ্চানুরক্খমানো, অগমাসি সো যত্থ পোরিসাদো’’.
‘‘কতো মযা সঙ্করো ব্রাহ্মণেন, রট্ঠে সকে ইস্সরিযে ঠিতেন;
তং সঙ্করং ব্রাহ্মণসপ্পদায, সচ্চানুরক্খী ¶ পুনরাগতোস্মি;
যজস্সু যঞ্ঞং খাদ মং পোরিসাদ’’.
‘‘ন হাযতে খাদিতং [খাদিতুং (সী. স্যা. পী.)] ময্হং পচ্ছা, চিতকা অযং তাৰ সধূমিকাৰ [সধূমকা চ (স্যা.)];
নিদ্ধূমকে পচিতং সাধুপক্কং, সুণোম [সুণোমি (সী.), সুণাম (পী.)] গাথাযো সতারহাযো’’.
‘‘অধম্মিকো ¶ ত্ৰং পোরিসাদকাসি [পোরিসাদমকাসি (ক.)], রট্ঠা চ ভট্ঠো উদরস্স হেতু;
ধম্মঞ্চিমা অভিৰদন্তি গাথা, ধম্মো চ অধম্মো চ কুহিং সমেতি.
‘‘অধম্মিকস্স লুদ্দস্স, নিচ্চং লোহিতপাণিনো;
নত্থি সচ্চং কুতো ধম্মো, কিং সুতেন করিস্সসি’’.
‘‘যো মংসহেতু মিগৰং চরেয্য, যো ৰা হনে পুরিসমত্তহেতু;
উভোপি তে পেচ্চ সমা ভৰন্তি, কস্মা নো [কস্মা নু (ক.)] অধম্মিকং ব্রূসি মং ত্ৰং’’.
‘‘পঞ্চ পঞ্চনখা ভক্খা, খত্তিযেন পজানতা;
অভক্খং রাজ ভক্খেসি, তস্মা অধম্মিকো তুৰং’’.
‘‘মুত্তো তুৰং পোরিসাদস্স হত্থা, গন্ত্ৰা সকং মন্দিরং কামকামী;
অমিত্তহত্থং ¶ পুনরাগতোসি, ন খত্তধম্মে কুসলোসি রাজ’’.
‘‘যে ¶ খত্তধম্মে কুসলা ভৰন্তি, পাযেন তে নেরযিকা ভৰন্তি;
তস্মা অহং খত্তধম্মং পহায, সচ্চানুরক্খী পুনরাগতোস্মি;
যজস্সু যঞ্ঞং খাদ মং পোরিসাদ’’.
‘‘পাসাদৰাসা পথৰীগৰস্সা, কামিত্থিযো কাসিকচন্দনঞ্চ;
সব্বং তহিং লভসি [লব্ভতি (পী.)] সামিতায, সচ্চেন কিং পস্সসি আনিসংসং’’.
‘‘যে ¶ কেচিমে অত্থি রসা পথব্যা, সচ্চং তেসং সাধুতরং রসানং;
সচ্চে ঠিতা সমণব্রাহ্মণা চ, তরন্তি জাতিমরণস্স পারং’’.
‘‘মুত্তো তুৰং পোরিসাদস্স হত্থা, গন্ত্ৰা সকং মন্দিরং কামকামী;
অমিত্তহত্থং পুনরাগতোসি, ন হি নূন তে মরণভযং জনিন্দ;
অলীনচিত্তো অসি [চ’সি (সী. স্যা. পী.)] সচ্চৰাদী’’.
‘‘কতা ¶ মে কল্যাণা অনেকরূপা, যঞ্ঞা যিট্ঠা যে ৰিপুলা পসত্থা;
ৰিসোধিতো পরলোকস্স মগ্গো, ধম্মে ঠিতো কো মরণস্স ভাযে.
‘‘কতা মে কল্যাণা অনেকরূপা, যঞ্ঞা যিট্ঠা যে ৰিপুলা পসত্থা;
অনানুতপ্পং পরলোকং গমিস্সং, যজস্সু যঞ্ঞং অদ [খাদ (সী. স্যা. পী.)] মং পোরিসাদ.
‘‘পিতা চ মাতা চ উপট্ঠিতা মে, ধম্মেন মে ইস্সরিযং পসত্থং;
ৰিসোধিতো পরলোকস্স মগ্গো, ধম্মে ঠিতো কো মরণস্স ভাযে.
‘‘পিতা চ মাতা চ উপট্ঠিতা মে, ধম্মেন মে ইস্সরিযং পসত্থং;
অনানুতপ্পং পরলোকং গমিস্সং, যজস্সু যঞ্ঞং অদ মং পোরিসাদ.
‘‘ঞাতীসু ¶ মিত্তেসু কতা মে কারা [কতূপকারো (স্যা. ক.)], ধম্মেন মে ইস্সরিযং পসত্থং;
ৰিসোধিতো পরলোকস্স মগ্গো, ধম্মে ঠিতো কো মরণস্স ভাযে.
‘‘ঞাতীসুং ¶ মিত্তেসু কতা মে কারা, ধম্মেন মে ইস্সরিযং পসত্থং;
অনানুতপ্পং পরলোকং গমিস্সং, যজস্সু যঞ্ঞং অদ মং পোরিসাদ.
‘‘দিন্নং মে দানং বহুধা বহূনং, সন্তপ্পিতা সমণব্রাহ্মণা চ;
ৰিসোধিতো পরলোকস্স মগ্গো, ধম্মে ঠিতো কো মরণস্স ভাযে.
‘‘দিন্নং মে দানং বহুধা বহূনং, সন্তপ্পিতা সমণব্রাহ্মণা চ;
অনানুতপ্পং পরলোকং গমিস্সং, যজস্সু যঞ্ঞং অদ মং পোরিসাদ’’.
‘‘ৰিসং পজানং পুরিসো অদেয্য, আসীৰিসং জলিতমুগ্গতেজং;
মুদ্ধাপি তস্স ৰিফলেয্য [ৰিপতেয্য (সী. পী.)] সত্তধা, যো তাদিসং সচ্চৰাদিং অদেয্য’’.
‘‘সুত্ৰা ধম্মং ৰিজানন্তি, নরা কল্যাণপাপকং;
অপি গাথা সুণিত্ৰান, ধম্মে মে রমতে [রমতী (সী. পী.)] মনো’’.
‘‘সকিদেৰ ¶ মহারাজ [সুতসোম (সী. পী.)], সব্ভি হোতি সমাগমো;
সা নং সঙ্গতি পালেতি, নাসব্ভি বহুসঙ্গমো.
‘‘সব্ভিরেৰ ¶ সমাসেথ, সব্ভি কুব্বেথ সন্থৰং;
সতং সদ্ধম্মমঞ্ঞায, সেয্যো হোতি ন পাপিযো.
‘‘জীরন্তি ৰে রাজরথা সুচিত্তা, অথো সরীরম্পি জরং উপেতি;
সতঞ্চ ধম্মো ন জরং উপেতি, সন্তো হৰে সব্ভি পৰেদযন্তি.
‘‘নভঞ্চং ¶ দূরে পথৰী চ দূরে, পারং সমুদ্দস্স তদাহু দূরে;
ততো হৰে দূরতরং ৰদন্তি, সতঞ্চ ধম্মো [ধম্মং (সী. পী.)] অসতঞ্চ রাজ’’.
‘‘গাথা ইমা অত্থৰতী সুব্যঞ্জনা, সুভাসিতা তুয্হ জনিন্দ সুত্ৰা;
আনন্দি ৰিত্তো সুমনো পতীতো, চত্তারি তে সম্ম ৰরে দদামি’’.
‘‘যো নত্তনো মরণং বুজ্ঝসি তুৰং [বুজ্ঝসে ত্ৰং (সী. পী.), বুজ্ঝসে তুৰং (স্যা.)], হিতাহিতং ৰিনিপাতঞ্চ সগ্গং;
গিদ্ধো রসে দুচ্চরিতে নিৰিট্ঠো, কিং ত্ৰং ৰরং দস্সসি পাপধম্ম.
‘‘অহঞ্চ তং দেহি ৰরন্তি ৰজ্জং, ত্ৰঞ্চাপি দত্ৰান অৰাকরেয্য;
সন্দিট্ঠিকং ¶ কলহমিমং ৰিৰাদং, কো পণ্ডিতো জানমুপব্বজেয্য’’.
‘‘ন তং ৰরং অরহতি জন্তু দাতুং, যং ৰাপি দত্ৰান অৰাকরেয্য;
ৰরস্সু সম্ম অৰিকম্পমানো, পাণং চজিত্ৰানপি দস্সমেৰ’’.
‘‘অরিযস্স অরিযেন সমেতি সখ্যং [সক্খি (সী. স্যা. পী.)], পঞ্ঞস্স পঞ্ঞাণৰতা সমেতি;
পস্সেয্য তং ৰস্সসতং অরোগং [আরোগ্যং (ক.)], এতং ৰরানং পঠমং ৰরামি’’.
‘‘অরিযস্স অরিযেন সমেতি সখ্যং, পঞ্ঞস্স পঞ্ঞাণৰতা সমেতি;
পস্সাসি মং ৰস্সসতং অরোগং, এতং ৰরানং পঠমং দদামি’’.
‘‘যে ¶ খত্তিযাসে ইধ ভূমিপালা, মুদ্ধাভিসিত্তা কতনামধেয্যা;
ন তাদিসে ভূমিপতী অদেসি, এতং ৰরানং দুতিযং ৰরামি’’.
‘‘যে খত্তিযাসে ইধ ভূমিপালা, মুদ্ধাভিসিত্তা কতনামধেয্যা;
ন ¶ তাদিসে ভূমিপতী অদেমি, এতং ৰরানং দুতিযং দদামি’’.
‘‘পরোসতং খত্তিযা তে গহিতা, তলাৰুতা অস্সুমুখা রুদন্তা;
সকে তে রট্ঠে পটিপাদযাহি, এতং ৰরানং ততিযং ৰরামি’’.
‘‘পরোসতং খত্তিযা মে গহিতা, তলাৰুতা অস্সুমুখা রুদন্তা;
সকে তে রট্ঠে পটিপাদযামি [সকেন রট্ঠেন পটিপাদযামি তে (সী.)], এতং ৰরানং ততিযং দদামি’’.
‘‘ছিদ্দং তে রট্ঠং ব্যথিতা [ব্যথিতং (সী.), ব্যাধিতং (পী.)] ভযা হি, পুথূ নরা লেণমনুপ্পৰিট্ঠা;
মনুস্সমংসং ৰিরমেহি [ৰিরমাহি (স্যা.)] রাজ, এতং ৰরানং চতুত্থং ৰরামি’’.
‘‘অদ্ধা ¶ হি সো ভক্খো মম [মমং (সী. স্যা. পী.)] মনাপো, এতস্স হেতুম্হি [হেতুম্পি (পী.)] ৰনং পৰিট্ঠো;
সোহং কথং এত্তো উপারমেয্যং, অঞ্ঞং ৰরানং চতুত্থং ৰরস্সু’’.
‘‘নং ¶ ৰে পিযং মেতি জনিন্দ তাদিসো, অত্তং নিরংকচ্চ [নিরংকত্ৰা (সী. স্যা. পী.)] পিযানি সেৰতি;
অত্তাৰ ¶ সেয্যো পরমা চ [পরমাৰ (বহূসু) জা. ১.৬.৮১ সংসন্দেতব্বং] সেয্যো, লব্ভা পিযা ওচিতত্থেন [ওচিতত্তেন (ক.)] পচ্ছা’’.
‘‘পিযং মে মানুসং মংসং, সুতসোম ৰিজানহি;
নম্হি সক্কা [নম্হি সক্কো (সী. পী.)] নিৰারেতুং, অঞ্ঞং [অঞ্ঞং তুৰং (সী. স্যা. পী.)] ৰরং সম্ম ৰরস্সু’’.
‘‘যো ৰে পিযং মেতি পিযানুরক্খী [পিযানুকঙ্খী (সী. পী.)], অত্তং নিরংকচ্চ পিযানি সেৰতি;
সোণ্ডোৰ পিত্ৰা ৰিসমিস্সপানং [পীত্ৰন ৰিসস্স থালং (সী. পী.), পিত্ৰা ৰিসমিস্সথালং (স্যা. ক.)], তেনেৰ সো হোতি দুক্খী পরত্থ.
‘‘যো চীধ সঙ্খায পিযানি হিত্ৰা, কিচ্ছেনপি সেৰতি অরিযধম্মে [অরিযধম্মং (সী. পী.)];
দুক্খিতোৰ পিত্ৰান যথোসধানি, তেনেৰ সো হোতি সুখী পরত্থ’’.
‘‘ওহাযহং পিতরং মাতরঞ্চ, মনাপিযে কামগুণে চ [কামগুণেপি (স্যা. ক.)] পঞ্চ;
এতস্স হেতুম্হি ৰনং পৰিট্ঠো, তং তে ৰরং কিন্তি মহং দদামি’’.
‘‘ন পণ্ডিতা দিগুণমাহু ৰাক্যং, সচ্চপ্পটিঞ্ঞাৰ ভৰন্তি সন্তো;
ৰরস্সু সম্ম ইতি মং অৰোচ, ইচ্চব্রৰী ত্ৰং ন হি তে সমেতি’’.
‘‘অপুঞ্ঞলাভং ¶ অযসং অকিত্তিং, পাপং বহুং দুচ্চরিতং কিলেসং;
মনুস্সমংসস্স কতে [ভৰো (স্যা. ক.)] উপাগা, তং তে ৰরং কিন্তি মহং দদেয্যং.
‘‘নং ¶ তং ৰরং অরহতি জন্তু দাতুং, যং ৰাপি দত্ৰান অৰাকরেয্য;
ৰরস্সু সম্ম অৰিকম্পমানো, পাণং চজিত্ৰানপি দস্সমেৰ’’.
‘‘পাণং চজন্তি সন্তো নাপি ধম্মং, সচ্চপ্পটিঞ্ঞাৰ ভৰন্তি সন্তো;
দত্ৰা ৰরং খিপ্পমৰাকরোহি, এতেন সম্পজ্জ সুরাজসেট্ঠ.
‘‘চজে ধনং [ধনং চজে (সী.)] অঙ্গৰরস্স হেতু [যো পন অঙ্গহেতু (সী. পী.)], অঙ্গং চজে জীৰিতং রক্খমানো;
অঙ্গং ধনং জীৰিতঞ্চাপি সব্বং, চজে নরো ধম্মমনুস্সরন্তো’’.
‘‘যস্মা হি ধম্মং পুরিসো ৰিজঞ্ঞা, যে চস্স কঙ্খং ৰিনযন্তি সন্তো;
তং হিস্স দীপঞ্চ পরাযণঞ্চ, ন ¶ তেন মিত্তিং জিরযেথ [জরযেথ (সী. পী.)] পঞ্ঞো.
‘‘অদ্ধা হি সো ভক্খো মম মনাপো, এতস্স হেতুম্হি ৰনং পৰিট্ঠো;
সচে চ মং যাচসি এতমত্থং, এতম্পি তে সম্ম ৰরং দদামি.
‘‘সত্থা চ মে হোসি সখা চ মেসি, ৰচনম্পি তে সম্ম অহং অকাসিং;
তুৰম্পি [ত্ৰংপি (স্যা. ক.)] মে সম্ম করোহি ৰাক্যং, উভোপি গন্ত্ৰান পমোচযাম’’.
‘‘সত্থা চ তে হোমি সখা চ ত্যম্হি, ৰচনম্পি মে সম্ম তুৰং অকাসি;
অহম্পি তে সম্ম করোমি ৰাক্যং, উভোপি গন্ত্ৰান পমোচযাম’’.
‘‘কম্মাসপাদেনং ¶ ¶ ৰিহেঠিতত্থ [ৰিহেঠিতম্হা (স্যা. ক.)], তলাৰুতা অস্সুমুখা রুদন্তা;
ন জাতু দুব্ভেথ ইমস্স রঞ্ঞো, সচ্চপ্পটিঞ্ঞং ¶ মে পটিস্সুণাথ’’.
‘‘কম্মাসপাদেন ৰিহেঠিতম্হা, তলাৰুতা অস্সুমুখা রুদন্তা;
ন জাতু দুব্ভেম ইমস্স রঞ্ঞো, সচ্চপ্পটিঞ্ঞং তে পটিস্সুণাম’’.
‘‘যথা পিতা ৰা অথ ৰাপি মাতা, অনুকম্পকা অত্থকামা পজানং;
এৰমেৰ ৰো [এৰমেৰ (সী.), এৰম্পি ৰো (স্যা.)] হোতু অযঞ্চ রাজা, তুম্হে চ ৰো হোথ যথেৰ পুত্তা’’.
‘‘যথা পিতা ৰা অথ ৰাপি মাতা, অনুকম্পকা অত্থকামা পজানং;
এৰমেৰ নো হোতু [এৰম্পি নো (স্যা.)] অযঞ্চ রাজা, মযম্পি হেস্সাম যথেৰ [তথেৰ (পী.)] পুত্তা’’.
‘‘চতুপ্পদং সকুণঞ্চাপি মংসং, সূদেহি রন্ধং সুকতং সুনিট্ঠিতং;
সুধংৰ ইন্দো পরিভুঞ্জিযান, হিত্ৰা কথেকো রমসী অরঞ্ঞে.
‘‘তা খত্তিযা ৰল্লিৰিলাকমজ্ঝা, অলঙ্কতা সম্পরিৰারযিত্ৰা;
ইন্দংৰ দেৰেসু পমোদযিংসু, হিত্ৰা ¶ কথেকো রমসী অরঞ্ঞে.
‘‘তম্বূপধানে বহুগোণকম্হি, সুভম্হি [সুচিম্হি (সী. পী.)] সব্বস্সযনম্হি সঙ্গে [সঞ্ঞতে (সী. পী.), লঙ্গতে (স্যা.)];
সেয্যস্স [সযনস্স (সী. স্যা. পী. ক.)] মজ্ঝম্হি সুখং সযিত্ৰা, হিত্ৰা কথেকো রমসী অরঞ্ঞে.
‘‘পাণিস্সরং ¶ কুম্ভথূণং নিসীথে, অথোপি ৰে নিপ্পুরিসম্পি তূরিযং;
বহুং সুগীতঞ্চ সুৰাদিতঞ্চ, হিত্ৰা কথেকো রমসী অরঞ্ঞে.
‘‘উয্যানসম্পন্নং পহূতমাল্যং, মিগাজিনূপেতপুরং [মিগাচিরূপেতপুরং (সী. পী.)] সুরম্মং;
হযেহি নাগেহি রথেহুপেতং, হিত্ৰা কথেকো রমসী অরঞ্ঞে’’.
‘‘কাল়পক্খে যথা চন্দো, হাযতেৰ সুৰে সুৰে;
কাল়পক্খূপমো রাজ, অসতং হোতি সমাগমো.
‘‘যথাহং [যথা (সী.)] রসকমাগম্ম, সূদং কাপুরিসাধমং [সূদকং পুরিসাধমং (সী. পী.)];
অকাসিং পাপকং কম্মং, যেন গচ্ছামি দুগ্গতিং.
‘‘সুক্কপক্খে যথা চন্দো, ৰড্ঢতেৰ সুৰে সুৰে;
সুক্কপক্খূপমো রাজ, সতং হোতি সমাগমো.
‘‘যথাহং তুৰমাগম্ম, সুতসোম ৰিজানহি;
কাহামি কুসলং কম্মং, যেন গচ্ছামি সুগ্গতিং.
‘‘থলে যথা ৰারি জনিন্দ ৰুট্ঠং [ৰট্টং (সী. পী.)], অনদ্ধনেয্যং ন চিরট্ঠিতীকং;
এৰম্পি ¶ হোতি অসতং সমাগমো, অনদ্ধনেয্যো উদকং থলেৰ.
‘‘সরে যথা ৰারি জনিন্দ ৰুট্ঠং, চিরট্ঠিতীকং নরৰীরসেট্ঠ [নরৰিরিযসেট্ঠ (সী. পী.)];
এৰম্পি ৰে [এৰম্পি মে (স্যা.), এৰম্পি চে (পী. ক.)] হোতি সতং সমাগমো, চিরট্ঠিতীকো [চিরট্ঠিতিকং (ক.)] উদকং সরেৰ.
‘‘অব্যাযিকো ¶ ¶ হোতি সতং সমাগমো, যাৰম্পি তিট্ঠেয্য তথেৰ হোতি;
খিপ্পঞ্হি ৰেতি অসতং সমাগমো, তস্মা সতং ধম্মো অসব্ভি আরকা’’.
‘‘ন সো রাজা যো [রাজা ন সো যো (ক.)] অজেয্যং জিনাতি, ন সো সখা যো সখারং জিনাতি;
ন সা ভরিযা যা পতিনো ন ৰিভেতি, ন তে পুত্তা [পুত্তা ন তে (ক.)] যে ন ভরন্তি জিণ্ণং.
‘‘ন সা সভা যত্থ ন সন্তি সন্তো, ন তে সন্তো [সন্তো ন তে (ক.)] যে ন ভণন্তি ধম্মং;
রাগঞ্চ দোসঞ্চ পহায মোহং, ধম্মং ভণন্তাৰ ভৰন্তি সন্তো.
‘‘নাভাসমানং জানন্তি, মিস্সং বালেহি পণ্ডিতং;
ভাসমানঞ্চ জানন্তি, দেসেন্তং অমতং পদং.
‘‘ভাসযে ¶ জোতযে ধম্মং, পগ্গণ্হে ইসিনং ধজং;
সুভাসিতদ্ধজা ইসযো, ধম্মো হি ইসিনং ধজো’’তি.
মহাসুতসোমজাতকং পঞ্চমং.
অসীতিনিপাতং নিট্ঠিতং.
তস্সুদ্দানং –
সুমুখো পন হংসৰরো চ মহা, সুধভোজনিকো চ পরো পৰরো;
সকুণালদিজাধিপতিৰ্হযনো, সুতসোমৰরুত্তমসৰ্হযনোতি.
২২. মহানিপাতো
৫৩৮. মূগপক্খজাতকং (১)
‘‘মা ¶ ¶ ¶ পণ্ডিচ্চযং [পণ্ডিতিযং (সী.), পণ্ডিচ্চিযং (পী.)] ৰিভাৰয, বালমতো ভৰ সব্বপাণিনং;
সব্বো তং জনো ওচিনাযতু, এৰং তৰ অত্থো ভৰিস্সতি’’.
‘‘করোমি তে তং ৰচনং, যং মং ভণসি দেৰতে;
অত্থকামাসি মে অম্ম, হিতকামাসি দেৰতে’’.
‘‘কিং নু সন্তরমানোৰ, কাসুং খণসি সারথি;
পুট্ঠো মে সম্ম অক্খাহি, কিং কাসুযা করিস্সসি’’.
‘‘রঞ্ঞো মূগো চ পক্খো চ, পুত্তো জাতো অচেতসো;
সোম্হি রঞ্ঞা সমজ্ঝিট্ঠো, পুত্তং মে নিখণং ৰনে’’.
‘‘ন বধিরো ন মূগোস্মি, ন পক্খো ন চ ৰীকলো [নপি পঙ্গুলো (সী. পী.), ন চ পিঙ্গলো (স্যা.)];
অধম্মং সারথি কযিরা, মং চে ত্ৰং নিখণং ৰনে’’.
‘‘ঊরূ বাহুং [বাহূ (সী. ক.)] চ মে পস্স, ভাসিতঞ্চ সুণোহি মে;
অধম্মং সারথি কযিরা, মং চে ত্ৰং নিখণং ৰনে’’.
‘‘দেৰতা নুসি গন্ধব্বো, অদু [আদু (সী.), আদূ (স্যা.)] সক্কো পুরিন্দদো;
কো ৰা ত্ৰং কস্স ৰা পুত্তো, কথং জানেমু তং মযং’’.
‘‘নম্হি দেৰো ন গন্ধব্বো, নাপি সক্কো পুরিন্দদো;
কাসিরঞ্ঞো অহং পুত্তো, যং কাসুযা নিখঞ্ঞসি [নিঘঞ্ঞসি (সী. পী.), নিখঞ্ছসি (?)].
‘‘তস্স ¶ রঞ্ঞো অহং পুত্তো, যং ত্ৰং সম্মূপজীৰসি [সমুপজীৰসি (সী. পী.)];
অধম্মং সারথি কযিরা, মং চে ত্ৰং নিখণং ৰনে.
‘‘যস্স রুক্খস্স ছাযায, নিসীদেয্য সযেয্য ৰা;
ন তস্স সাখং ভঞ্জেয্য, মিত্তদুব্ভো [মিত্তদূভো (সী. পী.)] হি পাপকো.
‘‘যথা ¶ রুক্খো তথা রাজা, যথা সাখা তথা অহং;
যথা ছাযূপগো পোসো, এৰং ত্ৰমসি সারথি;
অধম্মং সারথি কযিরা, মং চে ত্ৰং নিখণং ৰনে.
‘‘পহূতভক্খো ¶ [বহুত্তভক্খো (ক.)] ভৰতি, ৰিপ্পৰুট্ঠো [ৰিপ্পৰুত্থো (সী. পী.), ৰিপ্পমুত্তো (ক.)] সকং [সকা (সী. পী.)] ঘরা;
বহূ নং উপজীৰন্তি, যো মিত্তানং ন দুব্ভতি.
‘‘যং যং জনপদং যাতি, নিগমে রাজধানিযো;
সব্বত্থ পূজিতো হোতি, যো মিত্তানং ন দুব্ভতি.
‘‘নাস্স চোরা পসাহন্তি [পসহন্তি (সী. স্যা. পী.)], নাতিমঞ্ঞন্তি খত্তিযা [নাতিমঞ্ঞেতি খত্তিযো (সী. স্যা. পী.)];
সব্বে অমিত্তে তরতি, যো মিত্তানং ন দুব্ভতি.
‘‘অক্কুদ্ধো সঘরং এতি, সভাযং [সভায (সী. স্যা. পী.)] পটিনন্দিতো;
ঞাতীনং উত্তমো হোতি, যো মিত্তানং ন দুব্ভতি.
‘‘সক্কত্ৰা সক্কতো হোতি, গরু হোতি সগারৰো [গরুকো হোতি গারৰো (ক.)];
ৰণ্ণকিত্তিভতো হোতি, যো মিত্তানং ন দুব্ভতি.
‘‘পূজকো লভতে পূজং, ৰন্দকো পটিৰন্দনং;
যসো কিত্তিঞ্চ পপ্পোতি, যো মিত্তানং ন দুব্ভতি.
‘‘অগ্গি যথা পজ্জলতি, দেৰতাৰ ৰিরোচতি;
সিরিযা ¶ অজহিতো হোতি, যো মিত্তানং ন দুব্ভতি.
‘‘গাৰো তস্স পজাযন্তি, খেত্তে ৰুত্তং ৰিরূহতি;
ৰুত্তানং ফলমস্নাতি, যো মিত্তানং ন দুব্ভতি.
‘‘দরিতো পব্বতাতো ৰা, রুক্খতো পতিতো নরো;
চুতো পতিট্ঠং লভতি, যো মিত্তানং ন দুব্ভতি.
‘‘ৰিরূল়্হমূলসন্তানং, নিগ্রোধমিৰ মালুতো;
অমিত্তা নপ্পসাহন্তি, যো মিত্তানং ন দুব্ভতি’’.
‘‘এহি তং পটিনেস্সামি, রাজপুত্ত সকং ঘরং;
রজ্জং কারেহি ভদ্দন্তে, কিং অরঞ্ঞে করিস্সসি’’.
‘‘অলং ¶ মে তেন রজ্জেন, ঞাতকেহি [ঞাতকেন (স্যা. ক.)] ধনেন ৰা;
যং মে অধম্মচরিযায, রজ্জং লব্ভেথ সারথি’’.
‘‘পুণ্ণপত্তং মং লাভেহি [পলাভেহি (সী. পী.)], রাজপুত্ত ইতো গতো;
পিতা মাতা চ মে দজ্জুং, রাজপুত্ত তযী গতে.
‘‘ওরোধা চ কুমারা চ, ৰেসিযানা চ ব্রাহ্মণা;
তেপি অত্তমনা দজ্জুং, রাজপুত্ত তযী গতে.
‘‘হত্থারোহা [হত্থারূহা (সী. পী.) এৰমুপরিপি] অনীকট্ঠা, রথিকা পত্তিকারকা;
তেপি অত্তমনা দজ্জুং [তেপি দজ্জুং পতীতামে (সী. পী.)], রাজপুত্ত তযী গতে.
‘‘বহুধঞ্ঞা ¶ জানপদা [বহূ জানপদা চঞ্ঞে (সী.), বহূ জনপদা চঞ্ঞে (পী.)], নেগমা চ সমাগতা;
উপাযনানি মে দজ্জুং, রাজপুত্ত তযী গতে’’.
‘‘পিতু মাতু চহং চত্তো, রট্ঠস্স নিগমস্স চ;
অথো ¶ সব্বকুমারানং, নত্থি ময্হং সকং ঘরং.
‘‘অনুঞ্ঞাতো অহং মত্যা, সঞ্চত্তো পিতরা মহং;
একোরঞ্ঞে পব্বজিতো, ন কামে অভিপত্থযে.
‘‘অপি অতরমানানং, ফলাসাৰ সমিজ্ঝতি;
ৰিপক্কব্রহ্মচরিযোস্মি, এৰং জানাহি সারথি.
‘‘অপি অতরমানানং, সম্মদত্থো ৰিপচ্চতি;
ৰিপক্কব্রহ্মচরিযোস্মি, নিক্খন্তো অকুতোভযো’’.
‘‘এৰং ৰগ্গুকথো সন্তো, ৰিসট্ঠৰচনো চসি [চ সো (স্যা. ক.)];
কস্মা পিতু চ মাতুচ্চ, সন্তিকে ন ভণী তদা’’.
‘‘নাহং অসন্ধিতা [অসত্থিতা (সী.)] পক্খো, ন বধিরো অসোততা;
নাহং অজিৰ্হতা মূগো, মা মং মূগমধারযি [মূগো অধারযি (সী.)].
‘‘পুরিমং সরামহং জাতিং, যত্থ রজ্জমকারযিং;
কারযিত্ৰা তহিং রজ্জং, পাপত্থং নিরযং ভুসং.
‘‘ৰীসতিঞ্চেৰ ¶ ৰস্সানি, তহিং রজ্জমকারযিং;
অসীতিৰস্সসহস্সানি, নিরযম্হি অপচ্চিসং [অপচ্চসিং (স্যা.), অপচ্চযিং (পী.)].
‘‘তস্স রজ্জস্সহং ভীতো, মা মং রজ্জাভিসেচযুং [রজ্জেভিসেচযুং (স্যা. ক.)];
তস্মা পিতু চ মাতুচ্চ, সন্তিকে ন ভণিং তদা.
‘‘উচ্ছঙ্গে মং নিসাদেত্ৰা, পিতা অত্থানুসাসতি;
একং হনথ বন্ধথ, একং খারাপতচ্ছিকং [খরাপতিচ্ছকং (স্যা.), খরাপটিচ্ছকং (ক.)];
একং সূলস্মিং উপ্পেথ [অপ্পেথ (সী.), উব্বেথ (স্যা.), অচ্চেথ (পী.)], ইচ্চস্স মনুসাসতি.
‘‘তাযাহং ¶ [তস্সাহং (সী. পী.)] ফরুসং সুত্ৰা, ৰাচাযো সমুদীরিতা;
অমূগো মূগৰণ্ণেন, অপক্খো পক্খসম্মতো;
সকে মুত্তকরীসস্মিং, অচ্ছাহং সম্পরিপ্লুতো.
‘‘কসিরঞ্চ পরিত্তঞ্চ, তঞ্চ দুক্খেন সংযুতং;
কোমং [কো তং (সী. পী.)] জীৰিতমাগম্ম, ৰেরং কযিরাথ কেনচি.
‘‘পঞ্ঞায চ অলাভেন, ধম্মস্স চ অদস্সনা;
কোমং [কো তং (সী. পী.)] জীৰিতমাগম্ম, ৰেরং কযিরাথ কেনচি.
‘‘অপি ¶ অতরমানানং, ফলাসাৰ সমিজ্ঝতি;
ৰিপক্কব্রহ্মচরিযোস্মি, এৰং জানাহি সারথি.
‘‘অপি অতরমানানং, সম্মদত্থো ৰিপচ্চতি;
ৰিপক্কব্রহ্মচরিযোস্মি, নিক্খন্তো অকুতোভযো’’.
‘‘অহম্পি পব্বজিস্সামি, রাজপুত্ত তৰন্তিকে;
অৰ্হাযস্সু [অৰ্হযস্সু (সী. পী.)] মং ভদ্দন্তে, পব্বজ্জা মম রুচ্চতি’’.
‘‘রথং নিয্যাদযিত্ৰান, অনণো এহি সারথি;
অনণস্স হি পব্বজ্জা, এতং ইসীহি ৰণ্ণিতং’’.
‘‘যদেৰ ত্যাহং ৰচনং, অকরং ভদ্দমত্থু তে;
তদেৰ মে ত্ৰং ৰচনং, যাচিতো কত্তুমরহসি.
‘‘ইধেৰ ¶ তাৰ অচ্ছস্সু, যাৰ রাজানমানযে;
অপ্পেৰ তে পিতা দিস্ৰা, পতীতো সুমনো সিযা’’.
‘‘করোমি তেতং ৰচনং, যং মং ভণসি সারথি;
অহম্পি ¶ দট্ঠুকামোস্মি, পিতরং মে ইধাগতং.
‘‘এহি সম্ম নিৰত্তস্সু, কুসলং ৰজ্জাসি ঞাতিনং;
মাতরং পিতরং ময্হং, ৰুত্তো ৰজ্জাসি ৰন্দনং’’.
তস্স পাদে গহেত্ৰান, কত্ৰা চ নং পদক্খিণং;
সারথি রথমারুয্হ, রাজদ্ৰারং উপাগমি.
‘‘সুঞ্ঞং মাতা রথং দিস্ৰা, একং সারথিমাগতং;
অস্সুপুণ্ণেহি নেত্তেহি, রোদন্তী নং উদিক্খতি.
‘‘অযং সো সারথি এতি, নিহন্ত্ৰা মম অত্রজং;
নিহতো নূন মে পুত্তো, পথব্যা ভূমিৰড্ঢনো.
‘‘অমিত্তা নূন নন্দন্তি, পতীতা নূন ৰেরিনো;
আগতং সারথিং দিস্ৰা, নিহন্ত্ৰা মম অত্রজং.
‘‘সুঞ্ঞং মাতা রথং দিস্ৰা, একং সারথিমাগতং;
অস্সুপুণ্ণেহি নেত্তেহি, রোদন্তী পরিপুচ্ছি নং [রোদন্তী পরিপুচ্ছতি (সী. পী.), রোদন্তী নং পরিপুচ্ছতি (স্যা.)].
‘‘কিন্নু মূগো কিং নু পক্খো, কিন্নু সো ৰিলপী তদা;
নিহঞ্ঞমানো ভূমিযা, তং মে অক্খাহি সারথি.
‘‘কথং হত্থেহি পাদেহি, মূগপক্খো ৰিৰজ্জযি;
নিহঞ্ঞমানো ভূমিযা, তং মে অক্খাহি পুচ্ছিতো’’.
‘‘অক্খেয্যং ¶ [অক্খিস্সং (সী. পী.)] তে অহং অয্যে, দজ্জাসি অভযং মম;
যং মে সুতং ৰা দিট্ঠং ৰা, রাজপুত্তস্স সন্তিকে’’.
‘‘অভযং সম্ম তে দম্মি, অভীতো ভণ সারথি;
যং ¶ তে সুতং ৰা দিট্ঠং ৰা, রাজপুত্তস্স সন্তিকে’’.
‘‘ন সো মূগো ন সো পক্খো, ৰিসট্ঠৰচনো চ সো;
রজ্জস্স কির সো ভীতো, অকরা [অকরী (সী. পী.)] আলযে বহূ.
‘‘পুরিমং ¶ সরতি সো জাতিং, যত্থ রজ্জমকারযি;
কারযিত্ৰা তহিং রজ্জং, পাপত্থ নিরযং ভুসং.
‘‘ৰীসতিঞ্চেৰ ৰস্সানি, তহিং রজ্জমকারযি;
অসীতিৰস্সসহস্সানি, নিরযম্হি অপচ্চি সো.
‘‘তস্স রজ্জস্স সো ভীতো, মা মং রজ্জাভিসেচযুং;
তস্মা পিতু চ মাতুচ্চ, সন্তিকে ন ভণী তদা.
‘‘অঙ্গপচ্চঙ্গসম্পন্নো, আরোহপরিণাহৰা;
ৰিসট্ঠৰচনো পঞ্ঞো, মগ্গে সগ্গস্স তিট্ঠতি.
‘‘সচে ত্ৰং দট্ঠুকামাসি, রাজপুত্তং [রাজপুত্তি (সী.)] তৰত্রজং;
এহি তং পাপযিস্সামি, যত্থ সম্মতি তেমিযো’’.
‘‘যোজযন্তু রথে অস্সে, কচ্ছং নাগান [নাগানি (স্যা. ক.)] বন্ধথ;
উদীরযন্তু সঙ্খপণৰা, ৰাদন্তু [ৰদন্তু (সী.), নদন্তু (স্যা. ক.), ৰদতং (পী.)] একপোক্খরা.
‘‘ৰাদন্তু [নদন্তু (সী. স্যা. পী.)] ভেরী সন্নদ্ধা, ৰগ্গূ ৰাদন্তু দুন্দুভী;
নেগমা চ মং অন্ৰেন্তু, গচ্ছং পুত্তনিৰেদকো [নিৰাদকো (স্যা. ক.)].
‘‘ওরোধা চ কুমারা চ, ৰেসিযানা চ ব্রাহ্মণা;
খিপ্পং যানানি যোজেন্তু, গচ্ছং পুত্তনিৰেদকো [নিৰাদকো (স্যা. ক.)].
‘‘হত্থারোহা অনীকট্ঠা, রথিকা পত্তিকারকা;
খিপ্পং ¶ যানানি যোজেন্তু, গচ্ছং পুত্তনিৰেদকো [নিৰাদকো (স্যা. ক.)].
‘‘সমাগতা জানপদা, নেগমা চ সমাগতা;
খিপ্পং যানানি যোজেন্তু, গচ্ছং পুত্তনিৰেদকো’’ [নিৰাদকো (স্যা. ক.)].
‘‘অস্সে চ সারথী যুত্তে, সিন্ধৰে সীঘৰাহনে;
রাজদ্ৰারং উপাগচ্ছুং, যুত্তা দেৰ ইমে হযা’’.
‘‘থূলা জৰেন হাযন্তি, কিসা হাযন্তি থামুনা;
কিসে থূলে ৰিৰজ্জেত্ৰা, সংসট্ঠা যোজিতা হযা’’.
‘‘ততো ¶ ¶ রাজা তরমানো, যুত্তমারুয্হ সন্দনং;
ইত্থাগারং অজ্ঝভাসি [অভাসথ (ক.)], সব্বাৰ অনুযাথ মং.
‘‘ৰালবীজনিমুণ্হীসং, খগ্গং ছত্তঞ্চ পণ্ডরং;
উপাধি রথমারুয্হ [উপাদিরথমারুয্হ (সী.), উপাধী রথমারুয্হ (স্যা.)], সুৰণ্ণেহি অলঙ্কতা.
‘‘ততো স [চ (সী. স্যা. পী.)] রাজা পাযাসি, পুরক্খত্ৰান সারথিং;
খিপ্পমেৰ উপাগচ্ছি, যত্থ সম্মতি তেমিযো.
‘‘তঞ্চ দিস্ৰান আযন্তং, জলন্তমিৰ তেজসা;
খত্তসঙ্ঘপরিব্যূল়্হং [পরিব্বূল়্হং (সী.)], তেমিযো এতদব্রৰি’’.
‘‘কচ্চি নু তাত কুসলং, কচ্চি তাত অনামযং;
সব্বা চ [কচ্চিন্নু (সী. পী.)] রাজকঞ্ঞাযো, অরোগা ময্হ মাতরো’’.
‘‘কুসলঞ্চেৰ মে পুত্ত, অথো পুত্ত অনামযং;
সব্বা চ রাজকঞ্ঞাযো, অরোগা তুয্হ মাতরো’’.
‘‘কচ্চি অমজ্জপো [কচ্চিস্স’মজ্জপো (সী. পী.)] তাত, কচ্চি তে সুরমপ্পিযং;
কচ্চি ¶ সচ্চে চ ধম্মে চ, দানে তে রমতে মনো’’.
‘‘অমজ্জপো অহং পুত্ত, অথো মে সুরমপ্পিযং;
অথো সচ্চে চ ধম্মে চ, দানে মে রমতে মনো’’.
‘‘কচ্চি অরোগং যোগ্গং তে, কচ্চি ৰহতি ৰাহনং;
কচ্চি তে ব্যাধযো নত্থি, সরীরস্সুপতাপনা’’.
‘‘অথো অরোগং যোগ্গং মে, অথো ৰহতি ৰাহনং;
অথো মে ব্যাধযো নত্থি, সরীরস্সুপতাপনা’’ [সরীরস্সুপতাপিযা (স্যা. ক.)].
‘‘কচ্চি অন্তা চ তে ফীতা, মজ্ঝে চ বহলা তৰ;
কোট্ঠাগারঞ্চ কোসঞ্চ, কচ্চি তে পটিসন্থতং’’ [পটিসণ্ঠিতং (স্যা. ক.)].
‘‘অথো অন্তা চ মে ফীতা, মজ্ঝে চ বহলা মম;
কোট্ঠাগারঞ্চ কোসঞ্চ, সব্বং মে পটিসন্থতং’’.
‘‘স্ৰাগতং ¶ তে মহারাজ, অথো তে অদুরাগতং;
পতিট্ঠপেন্তু [পতিট্ঠাপেন্তু (সী. স্যা. পী.)] পল্লঙ্কং, যত্থ রাজা নিসক্কতি’’.
‘‘ইধেৰ তে নিসীদস্সু [নিসিন্নস্স (সী. স্যা. পী.), নিসিন্নস্সু (ক.)], নিযতে পণ্ণসন্থরে;
এত্তো উদকমাদায, পাদে পক্খালযস্সু [পক্খালযন্তু (সী.), পক্খালযন্তি (পী.)] তে’’.
‘‘ইদম্পি পণ্ণকং ময্হং, রন্ধং রাজ অলোণকং;
পরিভুঞ্জ মহারাজ, পাহুনো মেসিধাগতো’’ [আগতো (সী. স্যা.)].
‘‘ন ¶ চাহং [ন ৰাহং (ক.)] পণ্ণং ভুঞ্জামি, ন হেতং ময্হ ভোজনং;
সালীনং ওদনং ভুঞ্জে, সুচিং মংসূপসেচনং’’.
‘‘অচ্ছেরকং মং পটিভাতি, এককম্পি রহোগতং;
এদিসং ¶ ভুঞ্জমানানং, কেন ৰণ্ণো পসীদতি’’.
‘‘একো রাজ নিপজ্জামি, নিযতে পণ্ণসন্থরে;
তায মে একসেয্যায, রাজ ৰণ্ণো পসীদতি.
‘‘ন চ নেত্তিংসবন্ধা [নেত্তিসবদ্ধা (সী. পী.)] মে, রাজরক্খা উপট্ঠিতা;
তায মে সুখসেয্যায, রাজ ৰণ্ণো পসীদতি.
‘‘অতীতং নানুসোচামি, নপ্পজপ্পামিনাগতং [নপ্পজপ্পাম’নাগতং (সী. স্যা. পী.)];
পচ্চুপ্পন্নেন যাপেমি, তেন ৰণ্ণো পসীদতি.
‘‘অনাগতপ্পজপ্পায, অতীতস্সানুসোচনা;
এতেন বালা সুস্সন্তি, নল়োৰ হরিতো লুতো’’.
‘‘হত্থানীকং রথানীকং, অস্সে পত্তী চ ৰম্মিনো;
নিৰেসনানি রম্মানি, অহং পুত্ত দদামি তে.
‘‘ইত্থাগারম্পি তে দম্মি, সব্বালঙ্কারভূসিতং;
তা পুত্ত পটিপজ্জস্সু [তাসু পুত্তে পটিপজ্জ (ক.)], ত্ৰং নো রাজা ভৰিস্সসি.
‘‘কুসলা নচ্চগীতস্স, সিক্খিতা চাতুরিত্থিযো [চতুরিত্থিযো (সী. পী.)];
কামে তং রমযিস্সন্তি, কিং অরঞ্ঞে করিস্সসি.
‘‘পটিরাজূহি ¶ তে কঞ্ঞা, আনযিস্সং অলঙ্কতা;
তাসু পুত্তে জনেত্ৰান, অথ পচ্ছা পব্বজিস্সসি.
‘‘যুৰা চ দহরো চাসি [চাপি (স্যা. ক.)], পঠমুপ্পত্তিকো [পঠমুপ্পত্তিতো (সী. পী.)] সুসু;
রজ্জং কারেহি ভদ্দন্তে, কিং অরঞ্ঞে করিস্সসি’’.
‘‘যুৰা চরে ব্রহ্মচরিযং, ব্রহ্মচারী যুৰা সিযা;
দহরস্স ¶ হি পব্বজ্জা, এতং ইসীহি ৰণ্ণিতং.
‘‘যুৰা চরে ব্রহ্মচরিযং, ব্রহ্মচারী যুৰা সিযা;
ব্রহ্মচরিযং চরিস্সামি, নাহং রজ্জেন মত্থিকো.
‘‘পস্সামি ৰোহং দহরং, অম্ম তাত ৰদন্তরং [ৰদং নরং (সী.)];
কিচ্ছালদ্ধং পিযং পুত্তং, অপ্পত্ৰাৰ জরং মতং.
‘‘পস্সামি ৰোহং দহরিং, কুমারিং চারুদস্সনিং;
নৰৰংসকল়ীরংৰ, পলুগ্গং জীৰিতক্খযং [জীৰিতক্খযে (সী. পী.)].
‘‘দহরাপি ¶ হি মিয্যন্তি, নরা চ অথ নারিযো;
তত্থ কো ৰিস্সসে পোসো, দহরোম্হীতি জীৰিতে.
‘‘যস্স রত্যা ৰিৰসানে, আযু অপ্পতরং সিযা;
অপ্পোদকেৰ মচ্ছানং, কিং নু কোমারকং [কোমারতং (ক.)] তহিং.
‘‘নিচ্চমব্ভাহতো লোকো, নিচ্চঞ্চ পরিৰারিতো;
অমোঘাসু ৰজন্তীসু, কিং মং রজ্জেভিসিঞ্চসি’’ [রজ্জেন সিঞ্চসি (সী. পী.)].
‘‘কেন মব্ভাহতো লোকো, কেন চ পরিৰারিতো;
কাযো অমোঘা গচ্ছন্তি, তং মে অক্খাহি পুচ্ছিতো’’.
‘‘মচ্চুনাব্ভাহতো লোকো, জরায পরিৰারিতো;
রত্যো অমোঘা গচ্ছন্তি, এৰং জানাহি খত্তিয.
‘‘যথাপি তন্তে ৰিততে [ৰিতন্তে (স্যা. ক.)], যং যদেৰূপৰিয্যতি [যং যং দেৰূপৰিয্যতি (সী. পী.)];
অপ্পকং হোতি ৰেতব্বং, এৰং মচ্চান জীৰিতং.
‘‘যথা ¶ ৰারিৰহো পূরো, গচ্ছং নুপনিৰত্ততি [ন পরিৰত্ততি (স্যা.), নুপরিৰত্ততি (ক.)];
এৰমাযু ¶ মনুস্সানং, গচ্ছং নুপনিৰত্ততি.
‘‘যথা ৰারিৰহো পূরো, ৰহে রুক্খেপকূলজে;
এৰং জরামরণেন, ৰুয্হন্তে সব্বপাণিনো’’.
‘‘হত্থানীকং রথানীকং, অস্সে পত্তী চ ৰম্মিনো;
নিৰেসনানি রম্মানি, অহং পুত্ত দদামি তে.
‘‘ইত্থাগারম্পি তে দম্মি, সব্বালঙ্কারভূসিতং;
তা পুত্ত পটিপজ্জস্সু, ত্ৰং নো রাজা ভৰিস্সসি.
‘‘কুসলা নচ্চগীতস্স, সিক্খিতা চাতুরিত্থিযো;
কামে তং রমযিস্সন্তি, কিং অরঞ্ঞে করিস্সসি.
‘‘পটিরাজূহি তে কঞ্ঞা, আনযিস্সং অলঙ্কতা;
তাসু পুত্তে জনেত্ৰান, অথ পচ্ছা পব্বজিস্সসি.
‘‘যুৰা চ দহরো চাসি, পঠমুপ্পত্তিকো সুসু;
রজ্জং কারেহি ভদ্দন্তে, কিং অরঞ্ঞে করিস্সসি.
‘‘কোট্ঠাগারঞ্চ কোসঞ্চ, ৰাহনানি বলানি চ;
নিৰেসনানি রম্মানি, অহং পুত্ত দদামি তে.
‘‘গোমণ্ডলপরিব্যূল়্হো, দাসিসঙ্ঘপুরক্খতো;
রজ্জং কারেহি ভদ্দন্তে, কিং অরঞ্ঞে করিস্সসি’’.
‘‘কিং ¶ ধনেন যং খীযেথ [কিং ধনেন যং জীযেথ (সী.), কিং মং ধনেন কীযেথ (স্যা. ক.)], কিং ভরিযায মরিস্সতি;
কিং যোব্বনেন জিণ্ণেন [চিণ্ণেন (সী. পী.), ৰণ্ণেন (ক.)], যং জরাযাভিভুয্যতি [যং জরা অভিহেস্সতি (সী. পী.)].
‘‘তত্থ কা নন্দি কা খিড্ডা, কা রতি কা ধনেসনা;
কিং ¶ মে পুত্তেহি দারেহি, রাজ মুত্তোস্মি বন্ধনা.
‘‘যোহং [সোহং (সী. পী.)] এৰং পজানামি, মচ্চু মে নপ্পমজ্জতি;
অন্তকেনাধিপন্নস্স, কা রতী কা ধনেসনা.
‘‘ফলানমিৰ ¶ পক্কানং, নিচ্চং পতনতো ভযং;
এৰং জাতান মচ্চানং, নিচ্চং মরণতো ভযং.
‘‘সাযমেকে ন দিস্সন্তি, পাতো দিট্ঠা বহূ জনা;
পাতো একে ন দিস্সন্তি, সাযং দিট্ঠা বহূ জনা.
‘‘অজ্জেৰ কিচ্চং আতপ্পং, কো জঞ্ঞা মরণং সুৰে;
ন হি নো সঙ্করং [সঙ্গরং (সী. পী.) ম. নি. ৩.২৭২] তেন, মহাসেনেন মচ্চুনা.
‘‘চোরা ধনস্স পত্থেন্তি, রাজমুত্তোস্মি বন্ধনা;
এহি রাজ নিৰত্তস্সু, নাহং রজ্জেন মত্থিকো’’তি.
মূগপক্খজাতকং পঠমং.
৫৩৯. মহাজনকজাতকং (২)
‘‘কোযং মজ্ঝে সমুদ্দস্মিং, অপস্সং তীরমাযুহে;
কং [কিং (স্যা. ক.)] ত্ৰং অত্থৰসং ঞত্ৰা, এৰং ৰাযমসে ভুসং’’.
‘‘নিসম্ম ৰত্তং লোকস্স, ৰাযামস্স চ দেৰতে;
তস্মা মজ্ঝে সমুদ্দস্মিং, অপস্সং তীরমাযুহে’’.
‘‘গম্ভীরে অপ্পমেয্যস্মিং, তীরং যস্স ন দিস্সতি;
মোঘো তে পুরিসৰাযামো, অপ্পত্ৰাৰ মরিস্সসি’’.
‘‘অনণো ¶ ঞাতিনং হোতি, দেৰানং পিতুনঞ্চ [পিতুনো চ (সী. পী.)] সো;
করং পুরিসকিচ্চানি, ন চ পচ্ছানুতপ্পতি’’.
‘‘অপারণেয্যং যং কম্মং, অফলং কিলমথুদ্দযং;
তত্থ কো ৰাযমেনত্থো, মচ্চু যস্সাভিনিপ্পতং’’ [যস্সাভিনিপ্ফতং (স্যা.)].
‘‘অপারণেয্যমচ্চন্তং ¶ , যো ৰিদিত্ৰান দেৰতে;
ন রক্খে অত্তনো পাণং, জঞ্ঞা সো যদি হাপযে.
‘‘অধিপ্পাযফলং একে, অস্মিং লোকস্মি দেৰতে;
পযোজযন্তি কম্মানি, তানি ইজ্ঝন্তি ৰা ন ৰা.
‘‘সন্দিট্ঠিকং ¶ কম্মফলং, ননু পস্সসি দেৰতে;
সন্না অঞ্ঞে তরামহং, তঞ্চ পস্সামি সন্তিকে.
‘‘সো অহং ৰাযমিস্সামি, যথাসত্তি যথাবলং;
গচ্ছং পারং সমুদ্দস্স, কস্সং [কাসং (সী. পী.)] পুরিসকারিযং’’.
‘‘যো ত্ৰং এৰং গতে ওঘে, অপ্পমেয্যে মহণ্ণৰে;
ধম্মৰাযামসম্পন্নো, কম্মুনা নাৰসীদসি;
সো ত্ৰং তত্থেৰ গচ্ছাহি, যত্থ তে নিরতো মনো’’.
‘‘আসীসেথেৰ ¶ [আসিংসেথেৰ (সী. স্যা. পী.)] পুরিসো, ন নিব্বিন্দেয্য পণ্ডিতো;
পস্সামি ৰোহং অত্তানং, যথা ইচ্ছিং তথা অহু.
‘‘আসীসেথেৰ পুরিসো, ন নিব্বিন্দেয্য পণ্ডিতো;
পস্সামি ৰোহং অত্তানং, উদকা থলমুব্ভতং.
‘‘ৰাযমেথেৰ পুরিসো, ন নিব্বিন্দেয্য পণ্ডিতো;
পস্সামি ৰোহং অত্তানং, যথা ইচ্ছিং তথা অহু.
‘‘ৰাযমেথেৰ পুরিসো, ন নিব্বিন্দেয্য পণ্ডিতো;
পস্সামি ৰোহং অত্তানং, উদকা থলমুব্ভতং.
‘‘দুক্খূপনীতোপি নরো সপঞ্ঞো, আসং ন ছিন্দেয্য সুখাগমায;
বহূ হি ফস্সা অহিতা হিতা চ, অৰিতক্কিতা মচ্চুমুপব্বজন্তি [মচ্চুমুপ্পজ্জন্তি (স্যা.)].
‘‘অচিন্তিতম্পি ভৰতি, চিন্তিতম্পি ৰিনস্সতি;
ন হি চিন্তামযা ভোগা, ইত্থিযা পুরিসস্স ৰা’’.
‘‘অপোরাণং [অপুরাণং (সী. পী.)] ৰত ভো রাজা, সব্বভুম্মো দিসম্পতি;
নাজ্জ নচ্চে [ন চ নচ্চে (ক.)] নিসামেতি, ন গীতে কুরুতে মনো.
‘‘ন মিগে [মগে (ক.)] নপি উয্যানে, নপি হংসে উদিক্খতি;
মূগোৰ তুণ্হিমাসীনো, ন অত্থমনুসাসতি’’.
‘‘সুখকামা ¶ ¶ রহোসীলা, ৰধবন্ধা উপারতা [উপারুতা (স্যা. ক.)];
কস্স [কেসং (সী. পী.)] নু অজ্জ আরামে, দহরা ৰুদ্ধা চ অচ্ছরে.
‘‘অতিক্কন্তৰনথা ¶ ধীরা, নমো তেসং মহেসিনং;
যে উস্সুকম্হি লোকম্হি, ৰিহরন্তি মনুস্সুকা.
‘‘তে ছেত্ৰা মচ্চুনো জালং, ততং [তন্তং (সী. স্যা. পী.), তং তং (ক.)] মাযাৰিনো দল়ং;
ছিন্নালযত্তা [সন্তালযন্তা (স্যা. ক.)] গচ্ছন্তি, কো তেসং গতিমাপযে’’ [নেসং গতি পাপযে (ক.)].
‘‘কদাহং মিথিলং [মিধিলং (ক.)] ফীতং, ৰিভত্তং ভাগসো মিতং;
পহায পব্বজিস্সামি, তং কুদাস্সু [কদাস্সু (সী. পী.), কদাসু (স্যা.)] ভৰিস্সতি.
‘‘কদাহং মিথিলং ফীতং, ৰিসালং সব্বতোপভং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, বহুপাকারতোরণং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, দল়্হমট্টালকোট্ঠকং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, সুৰিভত্তং মহাপথং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, সুৰিভত্তন্তরাপণং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, গৰস্সরথপীল়িতং;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ মিথিলং ফীতং, আরামৰনমালিনিং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, উয্যানৰনমালিনিং;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিথিলং ফীতং, পাসাদৰনমালিনিং;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ মিথিলং ফীতং, তিপুরং রাজবন্ধুনিং;
মাপিতং সোমনস্সেন, ৰেদেহেন যসস্সিনা;
পহায পব্বজিস্সামি, তং কুদাস্সু ভৰিস্সতি.
‘‘কদাহং ৰেদেহে ফীতে, নিচিতে ধম্মরক্খিতে;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ ৰেদেহে ফীতে, অজেয্যে ধম্মরক্খিতে;
পহায পব্বজিস্সামি, তং কুদাস্সু ভৰিস্সতি.
‘‘কদাহং অন্তেপুরং [কদা অন্তেপুরং (সী. পী.)] রম্মং, ৰিভত্তং ভাগসো মিতং;
পহায পব্বজিস্সামি, তং কুদাস্সু ভৰিস্সতি.
‘‘কদাহং অন্তেপুরং রম্মং, সুধামত্তিকলেপনং;
পহায পব্বজিস্সামি, তং কুদাস্সু ভৰিস্সতি.
‘‘কদাহং অন্তেপুরং রম্মং, সুচিগন্ধং মনোরমং;
পহায পব্বজিস্সামি, তং কুদাস্সু ভৰিস্সতি.
‘‘কদাহং কূটাগারে চ, ৰিভত্তে ভাগসো মিতে;
পহায পব্বজিস্সামি, তং কুদাস্সু ভৰিস্সতি.
‘‘কদাহং কূটাগারে চ, সুধামত্তিকলেপনে;
পহায পব্বজিস্সামি, তং কুদাস্সু ভৰিস্সতি.
‘‘কদাহং কূটাগারে চ, সুচিগন্ধে মনোরমে;
পহায ¶ পব্বজিস্সামি, তং কুদাস্সু ভৰিস্সতি.
‘‘কদাহং কূটাগারে চ, লিত্তে চন্দনফোসিতে;
পহায পব্বজিস্সামি, তং কুদাস্সু ভৰিস্সতি.
‘‘কদাহং সোণ্ণপল্লঙ্কে [সুৰণ্ণপল্লঙ্কে (সী. স্যা. পী.)], গোনকে চিত্তসন্থতে;
পহায পব্বজিস্সামি, তং কুদাস্সু ভৰিস্সতি.
[অযং গাথা সী. পী. পোত্থকেসু ন দিস্সতি] ‘‘কদাহং মণিপল্লঙ্কে, গোনকে চিত্তসন্থতে;
পহায পব্বজিস্সামি, তং কুদাস্সু ভৰিস্সতি [অযং গাথা সী. পী. পোত্থকেসু ন দিস্সতি].
‘‘কদাহং ¶ কপ্পাসকোসেয্যং, খোমকোটুম্বরানি চ;
পহায পব্বজিস্সামি, তং কুদাস্সু ভৰিস্সতি.
‘‘কদাহং পোক্খরণী রম্মা, চক্কৰাকপকূজিতা [চক্কৰাকূপকূজিতা (সী. পী.)];
মন্দালকেহি সঞ্ছন্না, পদুমুপ্পলকেহি চ;
পহায পব্বজিস্সামি, তং কুদাস্সু ভৰিস্সতি.
‘‘কদাহং হত্থিগুম্বে চ, সব্বালঙ্কারভূসিতে;
সুৰণ্ণকচ্ছে মাতঙ্গে, হেমকপ্পনৰাসসে.
‘‘আরূল়্হে গামণীযেহি, তোমরঙ্কুসপাণিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ ¶ অস্সগুম্বে চ, সব্বালঙ্কারভূসিতে;
আজানীযেৰ জাতিযা, সিন্ধৰে সীঘৰাহনে.
‘‘আরূল়্হে গামণীযেহি, ইল্লিযাচাপধারিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং রথসেনিযো, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং সোৰণ্ণরথে, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং সজ্ঝুরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ অস্সরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ ওট্ঠরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং গোণরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং অজরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে ¶ গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং মেণ্ডরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং মিগরথে চ, সন্নদ্ধে উস্সিতদ্ধজে;
দীপে অথোপি ৰেয্যগ্ঘে, সব্বালঙ্কারভূসিতে.
‘‘আরূল়্হে গামণীযেহি, চাপহত্থেহি ৰম্মিভি;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ হত্থারোহে চ, সব্বালঙ্কারভূসিতে;
নীলৰম্মধরে সূরে, তোমরঙ্কুসপাণিনে [পাণিনো (স্যা. ক.)];
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ অস্সারোহে চ, সব্বালঙ্কারভূসিতে;
নীলৰম্মধরে সূরে, ইল্লিযাচাপধারিনে [ধারিনো (স্যা. ক.)];
পহায পব্বজিস্সামি, তং কুদাস্সু ভৰিস্সতি.
‘‘কদাহং রথারোহে চ, সব্বালঙ্কারভূসিতে;
নীলৰম্মধরে সূরে, চাপহত্থে কলাপিনে [কলাপিনো (স্যা. ক.)];
পহায পব্বজিস্সামি, তং কুদাস্সু ভৰিস্সতি.
[অযং গাথা সী. পী. পোত্থকেসু ন দিস্সতি] ‘‘কদাহং ধনুগ্গহে চ, সব্বালঙ্কারভূসিতে;
নীলৰম্মধরে সূরে, চাপহত্থে কলাপিনে;
পহায পব্বজিস্সামি, তং কুদাস্সু ভৰিস্সতি [অযং গাথা সী. পী. পোত্থকেসু ন দিস্সতি].
‘‘কদাহং রাজপুত্তে চ, সব্বালঙ্কারভূসিতে;
চিত্রৰম্মধরে সূরে, কঞ্চনাৰেল়ধারিনে;
পহায পব্বজিস্সামি, তং কুদাস্সু ভৰিস্সতি.
‘‘কদাহং অরিযগণে চ, ৰতৰন্তে [ৰত্থৰন্তে (সী. স্যা. পী.)] অলঙ্কতে;
হরিচন্দনলিত্তঙ্গে, কাসিকুত্তমধারিনে;
পহায পব্বজিস্সামি, তং কুদাস্সু ভৰিস্সতি.
[অযং গাথা সী. পী. পোত্থকেসু ন দিস্সতি] ‘‘কদাহং ¶ অমচ্চগণে চ, সব্বালঙ্কারভূসিতে;
পীতৰম্মধরে সূরে, পুরতো গচ্ছমালিনে [গচ্ছমালিনো (স্যা. ক.)];
পহায ¶ পব্বজিস্সামি, তং কুদাস্সু ভৰিস্সতি [অযং গাথা সী. পী. পোত্থকেসু ন দিস্সতি].
‘‘কদাহং [কদা (সী. পী.)] সত্তসতা ভরিযা, সব্বালঙ্কারভূসিতা;
পহায পব্বজিস্সামি, তং কুদাস্সু ভৰিস্সতি.
‘‘কদাহং [কদা (সী. পী.)] সত্তসতা ভরিযা, সুসঞ্ঞা তনুমজ্ঝিমা;
পহায পব্বজিস্সামি, তং কুদাস্সু ভৰিস্সতি.
‘‘কদাহং [কদা (সী. পী.)] সত্তসতা ভরিযা, অস্সৰা পিযভাণিনী;
পহায পব্বজিস্সামি, তং কুদাস্সু ভৰিস্সতি.
‘‘কদাহং ¶ [কদা (সী. পী.)] সতপলং কংসং, সোৰণ্ণং সতরাজিকং;
পহায পব্বজিস্সামি, তং কুদাস্সু ভৰিস্সতি.
‘‘কদাস্সু মং হত্থিগুম্বা, সব্বালঙ্কারভূসিতা;
সুৰণ্ণকচ্ছা মাতঙ্গা, হেমকপ্পনৰাসসা.
‘‘আরূল়্হা গামণীযেহি, তোমরঙ্কুসপাণিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং অস্সগুম্বা, সব্বালঙ্কারভূসিতা;
আজানীযাৰ জাতিযা, সিন্ধৰা সীঘৰাহনা.
‘‘আরূল়্হা গামণীযেহি, ইল্লিযাচাপধারিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং রথসেনী, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং সোণ্ণরথা [সোৰণ্ণরথা (পী. ক.)], সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং ¶ মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং সজ্ঝুরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা ¶ গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং অস্সরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু ¶ মং ওট্ঠরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং গোণরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং অজরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং ¶ মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং মেণ্ডরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং মিগরথা, সন্নদ্ধা উস্সিতদ্ধজা;
দীপা অথোপি ৰেয্যগ্ঘা, সব্বালঙ্কারভূসিতা.
‘‘আরূল়্হা গামণীযেহি, চাপহত্থেহি ৰম্মিভি;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং হত্থারোহা, সব্বালঙ্কারভূসিতা;
নীলৰম্মধরা সূরা, তোমরঙ্কুসপাণিনো;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু ¶ মং অস্সারোহা, সব্বালঙ্কারভূসিতা;
নীলৰম্মধরা সূরা, ইল্লিযাচাপধারিনো;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু ¶ মং রথারোহা, সব্বালঙ্কারভূসিতা;
নীলৰম্মধরা সূরা, চাপহত্থা কলাপিনো;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং ধনুগ্গহা, সব্বালঙ্কারভূসিতা;
নীলৰম্মধরা সূরা, চাপহত্থা কলাপিনো;
যন্তং ¶ মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং রাজপুত্তা, সব্বালঙ্কারভূসিতা;
চিত্রৰম্মধরা সূরা, কঞ্চনাৰেল়ধারিনো;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং অরিযগণা, ৰতৰন্তা অলঙ্কতা;
হরিচন্দনলিত্তঙ্গা, কাসিকুত্তমধারিনো;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং অমচ্চগণা, সব্বালঙ্কারভূসিতা;
পীতৰম্মধরা সূরা, পুরতো গচ্ছমালিনো [গচ্ছমালিনী (স্যা. ক.)];
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং সত্তসতা ভরিযা, সব্বালঙ্কারভূসিতা;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং সত্তসতা ভরিযা, সুসঞ্ঞা তনুমজ্ঝিমা;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাস্সু মং সত্তসতা ভরিযা, অস্সৰা পিযভাণিনী;
যন্তং মং নানুযিস্সন্তি, তং কুদাস্সু ভৰিস্সতি.
‘‘কদাহং ¶ পত্তং গহেত্ৰান, মুণ্ডো সঙ্ঘাটিপারুতো;
পিণ্ডিকায চরিস্সামি, তং কুদাস্সু ভৰিস্সতি.
‘‘কদাহং পংসুকূলানং, উজ্ঝিতানং [উজ্ঝিট্ঠানং (ক.)] মহাপথে;
সঙ্ঘাটিং ধারযিস্সামি, তং কুদাস্সু ভৰিস্সতি.
‘‘কদাহং সত্তাহসম্মেঘে [সত্তাহং মেঘে (সী. স্যা.)], ওৰট্ঠো অল্লচীৰরো;
পিণ্ডিকায চরিস্সামি, তং কুদাস্সু ভৰিস্সতি.
‘‘কদাহং ¶ ¶ সব্বত্থ গন্ত্ৰা [সব্বহং ঠানং (সী.), সব্বণ্হং গন্ত্ৰা (স্যা.), সব্বাহং ঠানং (পী.), সব্বট্ঠানং (ক.)], রুক্খা রুক্খং ৰনা ৰনং;
অনপেক্খো গমিস্সামি, তং কুদাস্সু ভৰিস্সতি.
‘‘কদাহং গিরিদুগ্গেসু, পহীনভযভেরৰো;
অদুতিযো গমিস্সামি [ৰিহরিস্সামি (সী. পী.)], তং কুদাস্সু ভৰিস্সতি.
‘‘কদাহং ৰীণং ৰরুজ্জকো [ৰীণরুজ্জকো (স্যা.), ৰীণং ৰিরুজ্জকো (ক.)], সত্ততন্তিং মনোরমং;
চিত্তং উজুং করিস্সামি, তং কুদাস্সু ভৰিস্সতি.
‘‘কদাহং রথকারোৰ, পরিকন্তং উপাহনং;
কামসঞ্ঞোজনে ছেচ্ছং [ছেত্ৰা (ক.)], যে দিব্বে যে চ মানুসে’’.
‘‘তা চ সত্তসতা ভরিযা, সব্বালঙ্কারভূসিতা;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘তা চ সত্তসতা ভরিযা, সুসঞ্ঞা তনুমজ্ঝিমা;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘তা চ সত্তসতা ভরিযা, অস্সৰা পিযভাণিনী;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘তা ¶ চ সত্তসতা ভরিযা, সব্বালঙ্কারভূসিতা;
হিত্ৰা সম্পদ্দৰী [সম্পদ্দযী (সী.)] রাজা, পব্বজ্জায পুরক্খতো.
‘‘তা চ সত্তসতা ভরিযা, সুসঞ্ঞা তনুমজ্ঝিমা;
হিত্ৰা সম্পদ্দৰী রাজা, পব্বজ্জায পুরক্খতো.
‘‘তা চ সত্তসতা ভরিযা, অস্সৰা পিযভাণিনী;
হিত্ৰা সম্পদ্দৰী রাজা, পব্বজ্জায পুরক্খতো’’.
‘‘হিত্ৰা সতপলং কংসং, সোৰণ্ণং সতরাজিকং;
অগ্গহী মত্তিকং পত্তং, তং দুতিযাভিসেচনং’’.
‘‘ভেস্মা [ৰেস্মা (সী.), ভিংসা (পী.), ভীসা (ক.)] অগ্গিসমা জালা, কোসা ডয্হন্তি ভাগসো;
রজতং জাতরূপঞ্চ, মুত্তা ৰেল়ুরিযা বহূ.
‘‘মণযো ¶ সঙ্খমুত্তা চ, ৰত্থিকং হরিচন্দনং;
অজিনং দণ্ডভণ্ডঞ্চ, লোহং কাল়াযসং বহূ;
এহি রাজ নিৰত্তস্সু, মা তেতং ৰিনসা ধনং’’ [ৰিনস্সা ধনং (স্যা. ক.)].
‘‘সুসুখং ৰত জীৰাম, যেসং নো নত্থি কিঞ্চনং;
মিথিলায দয্হমানায, ন মে কিঞ্চি অদয্হথ’’.
‘‘অটৰিযো ¶ সমুপ্পন্না, রট্ঠং ৰিদ্ধংসযন্তি তং;
এহি রাজ নিৰত্তস্সু, মা রট্ঠং ৰিনসা ইদং’’.
‘‘সুসুখং ৰত জীৰাম, যেসং নো নত্থি কিঞ্চনং;
রট্ঠে ৰিলুম্পমানম্হি, ন [মা (ক.)] মে কিঞ্চি অহীরথ.
‘‘সুসুখং ¶ ৰত জীৰাম, যেসং নো নত্থি কিঞ্চনং;
পীতিভক্খা ভৰিস্সাম, দেৰা আভস্সরা যথা’’.
‘‘কিম্হেসো মহতো ঘোসো, কা নু গামেৰ কীল়িযা [গামে কিলীলিযা (সী.)];
সমণ তেৰ [সমণঞ্ঞেৰ (সী. পী.), সমণত্ৰেৰ (স্যা.)] পুচ্ছাম, কত্থেসো অভিসটো জনো’’.
‘‘মমং ওহায গচ্ছন্তং, এত্থেসো অভিসটো জনো;
সীমাতিক্কমনং যন্তং, মুনিমোনস্স পত্তিযা;
মিস্সং নন্দীহি গচ্ছন্তং, কিং জানমনুপুচ্ছসি’’.
‘‘মাস্সু তিণ্ণো অমঞ্ঞিত্থ [অমঞ্ঞিত্থো (সী. স্যা. পী.)], সরীরং ধারযং ইমং;
অতীরণেয্য যমিদং [অতীরণেয্যমিদং কম্মং (সী. স্যা. পী.)], বহূ হি পরিপন্থযো’’.
‘‘কো নু মে পরিপন্থস্স, মমং এৰংৰিহারিনো;
যো নেৰ দিট্ঠে নাদিট্ঠে, কামানমভিপত্থযে’’.
‘‘নিদ্দা তন্দী ৰিজম্ভিতা, অরতী ভত্তসম্মদো;
আৰসন্তি সরীরট্ঠা, বহূ হি পরিপন্থযো’’.
‘‘কল্যাণং ৰত মং ভৰং, ব্রাহ্মণ মনুসাসতি [মনুসাসসি (সী.)];
ব্রাহ্মণ তেৰ [ব্রাহ্মণঞ্ঞেৰ (সী.)] পুচ্ছামি, কো নু ত্ৰমসি মারিস’’.
‘‘নারদো ইতি মে নামং [নামেন (স্যা. ক.)], কস্সপো ইতি মং ৰিদূ;
ভোতো সকাসমাগচ্ছিং, সাধু সব্ভি সমাগমো.
‘‘তস্স ¶ তে সব্বো আনন্দো, ৰিহারো উপৰত্ততু;
যং ঊনং [যদূনং (সী. স্যা. পী.)] তং পরিপূরেহি, খন্তিযা উপসমেন চ.
‘‘পসারয সন্নতঞ্চ, উন্নতঞ্চ পসারয [পহারয (স্যা. পী. ক.)];
কম্মং ¶ ৰিজ্জঞ্চ ধম্মঞ্চ, সক্কত্ৰান পরিব্বজ’’.
‘‘বহূ হত্থী চ অস্সে চ, নগরে জনপদানি চ;
হিত্ৰা জনক পব্বজিতো, কপালে [কপল্লে (সী. পী.)] রতিমজ্ঝগা.
‘‘কচ্চি নু তে জানপদা, মিত্তামচ্চা চ ঞাতকা;
দুব্ভিমকংসু জনক, কস্মা তে তং অরুচ্চথ’’.
‘‘ন ¶ মিগাজিন জাতুচ্ছে [জাতুচ্চ (সী. পী.)], অহং কঞ্চি কুদাচনং;
অধম্মেন জিনে ঞাতিং, ন চাপি ঞাতযো মমং.
‘‘দিস্ৰান লোকৰত্তন্তং, খজ্জন্তং কদ্দমীকতং;
হঞ্ঞরে বজ্ঝরে চেত্থ, যত্থ সন্নো [সত্তো (সী.)] পুথুজ্জনো;
এতাহং উপমং কত্ৰা, ভিক্খকোস্মি মিগাজিন’’.
‘‘কো নু তে ভগৰা সত্থা, কস্সেতং ৰচনং সুচি;
ন হি কপ্পং ৰা ৰিজ্জং ৰা, পচ্চক্খায রথেসভ;
সমণং আহু ৰত্তন্তং, যথা দুক্খস্সতিক্কমো’’.
‘‘ন মিগাজিন জাতুচ্ছে, অহং কঞ্চি কুদাচনং;
সমণং ব্রাহ্মণং ৰাপি, সক্কত্ৰা অনুপাৰিসিং’’.
‘‘মহতা চানুভাৰেন, গচ্ছন্তো সিরিযা জলং;
গীযমানেসু গীতেসু, ৰজ্জমানেসু ৰগ্গুসু.
‘‘তূরিযতাল়সঙ্ঘুট্ঠে [তুরিযতাল়িতসঙ্ঘুট্ঠে (সী. পী.)], সম্মতালসমাহিতে;
স মিগাজিন মদ্দক্খিং, ফলিং [ফলং (সী. পী. ক.)] অম্বং তিরোচ্ছদং;
হঞ্ঞমানং [তুজ্জমানং (সী.), তুদমানং (স্যা.), তদ্দমানং (পী.), হতমানং (ক.)] মনুস্সেহি, ফলকামেহি জন্তুভি.
‘‘সো ¶ খোহং তং সিরিং হিত্ৰা, ওরোহিত্ৰা মিগাজিন;
মূলং অম্বস্সুপাগচ্ছিং, ফলিনো নিপ্ফলস্স চ.
‘‘ফলিং ¶ [ফলং (সী. পী. ক.)] অম্বং হতং দিস্ৰা, ৰিদ্ধংস্তং ৰিনল়ীকতং;
অথেকং [অথেতং (সী. পী.)] ইতরং অম্বং, নীলোভাসং মনোরমং.
‘‘এৰমেৰ নূনম্হেপি [নূন অম্হে (সী. পী.)], ইস্সরে বহুকণ্টকে;
অমিত্তা নো ৰধিস্সন্তি, যথা অম্বো ফলী হতো.
‘‘অজিনম্হি হঞ্ঞতে দীপি, নাগো দন্তেহি হঞ্ঞতে;
ধনম্হি ধনিনো হন্তি, অনিকেতমসন্থৰং;
ফলী অম্বো অফলো চ, তে সত্থারো উভো মম’’.
‘‘সব্বো জনো পব্যাধিতো, রাজা পব্বজিতো ইতি;
হত্থারোহা অনীকট্ঠা, রথিকা পত্তিকারকা.
‘‘অস্সাসযিত্ৰা জনতং, ঠপযিত্ৰা পটিচ্ছদং;
পুত্তং রজ্জে ঠপেত্ৰান, অথ পচ্ছা পব্বজিস্সসি’’.
‘‘চত্তা ¶ মযা জানপদা, মিত্তামচ্চা চ ঞাতকা;
সন্তি পুত্তা ৰিদেহানং, দীঘাৰু রট্ঠৰড্ঢনো;
তে রজ্জং কারযিস্সন্তি, মিথিলাযং পজাপতি’’.
‘‘এহি তং অনুসিক্খামি, যং ৰাক্যং মম রুচ্চতি;
রজ্জং তুৰং কারযসি [কারযন্তী (সী. স্যা. পী.)], পাপং দুচ্চরিতং বহুং;
কাযেন ৰাচা মনসা, যেন গচ্ছসি [কঞ্ছিসি (সী. পী.)] দুগ্গতিং.
‘‘পরদিন্নকেন পরনিট্ঠিতেন, পিণ্ডেন যাপেহি স ধীরধম্মো’’.
‘‘যোপি ¶ চতুত্থে ভত্তকালে ন ভুঞ্জে, অজুট্ঠমারীৰ [অজদ্ধুমারীৰ (সী.), অজ্ঝুট্ঠমারিৰ (স্যা.), অজদ্ধুমারিৰ (পী.) মজ্ঝিমনিকাযে, অঙ্গুত্তরনিকাযে চ পস্সিতব্বং] খুদায মিয্যে;
ন ত্ৰেৰ পিণ্ডং লুল়িতং অনরিযং, কুলপুত্তরূপো সপ্পুরিসো ন সেৰে;
তযিদং ন সাধু তযিদং ন সুট্ঠু, সুনখুচ্ছিট্ঠকং জনক ভুঞ্জসে তুৰং’’.
‘‘ন ¶ চাপি মে সীৰলি সো অভক্খো, যং হোতি চত্তং গিহিনো সুনস্স ৰা;
যে কেচি ভোগা ইধ ধম্মলদ্ধা, সব্বো সো ভক্খো অনৰযোতি [অনৰজ্জোতি (সী. পী.)] ৰুত্তো’’.
‘‘কুমারিকে উপসেনিযে, নিচ্চং নিগ্গল়মণ্ডিতে;
কস্মা তে একো ভুজো জনতি, একো তে ন জনতী ভুজো’’.
‘‘ইমস্মিং মে সমণ হত্থে, পটিমুক্কা দুনীৰরা [দুনীধুরা (সী. পী.)];
সঙ্ঘাতা [সংঘট্টা (স্যা. ক.)] জাযতে সদ্দো, দুতিযস্সেৰ সা গতি.
‘‘ইমস্মিং মে সমণ হত্থে, পটিমুক্কো একনীৰরো [একনীধুরো (সী. পী.)];
সো অদুতিযো ন জনতি, মুনিভূতোৰ তিট্ঠতি.
‘‘ৰিৰাদপ্পত্তো [ৰিৰাদমত্তো (পী.)] দুতিযো, কেনেকো ৰিৰদিস্সতি;
তস্স তে সগ্গকামস্স, একত্তমুপরোচতং’’.
‘‘সুণাসি সীৰলি কথা [গাথা (সী. স্যা. পী.)], কুমারিযা পৰেদিতা;
পেসিযা [পেস্সিযা (সী. পী.)] মং গরহিত্থো, দুতিযস্সেৰ সা গতি.
‘‘অযং ¶ দ্ৰেধাপথো ভদ্দে, অনুচিণ্ণো পথাৰিহি;
তেসং ত্ৰং একং গণ্হাহি, অহমেকং পুনাপরং.
‘‘মাৰচ [নেৰ (সী. পী.), মা চ (স্যা. ক.)] মং ত্ৰং পতি মেতি, নাহং [মাহং (সী. পী.)] ভরিযাতি ৰা পুন’’;
‘‘ইমমেৰ কথযন্তা, থূণং নগরুপাগমুং.
‘‘কোট্ঠকে উসুকারস্স, ভত্তকালে উপট্ঠিতে;
তত্রা চ সো উসুকারো, (একং দণ্ডং উজুং কতং;) [( ) নত্থি বহূসু]
একঞ্চ চক্খুং নিগ্গয্হ, জিম্হমেকেন পেক্খতি’’.
‘‘এৰং ¶ নো সাধু পস্সসি, উসুকার সুণোহি মে;
যদেকং চক্খুং নিগ্গয্হ, জিম্হমেকেন পেক্খসি’’.
‘‘দ্ৰীহি ¶ সমণ চক্খূহি, ৰিসালং ৰিয খাযতি;
অসম্পত্ৰা পরমং [পরং (সী. পী.)] লিঙ্গং, নুজুভাৰায কপ্পতি.
‘‘একঞ্চ চক্খুং নিগ্গয্হ, জিম্হমেকেন পেক্খতো;
সম্পত্ৰা পরমং লিঙ্গং, উজুভাৰায কপ্পতি.
‘‘ৰিৰাদপ্পত্তো [ৰিৰাদমত্তো (পী.)] দুতিযো, কেনেকো ৰিৰদিস্সতি;
তস্স তে সগ্গকামস্স, একত্তমুপরোচতং’’.
‘‘সুণাসি সীৰলি কথা [গাথা (সী. স্যা. পী.)], উসুকারেন ৰেদিতা;
পেসিযা মং গরহিত্থো, দুতিযস্সেৰ সা গতি.
‘‘অযং দ্ৰেধাপথো ভদ্দে, অনুচিণ্ণো পথাৰিহি;
তেসং ত্ৰং একং গণ্হাহি, অহমেকং পুনাপরং.
‘‘মাৰচ মং ত্ৰং পতি মেতি, নাহং ভরিযাতি ৰা পুন’’;
‘‘মুঞ্জাৰেসিকা ¶ পৰাল়্হা, একা ৰিহর সীৰলী’’তি.
মহাজনকজাতকং দুতিযং.
৫৪০. সুৰণ্ণসামজাতকং (৩)
‘‘কো নু মং উসুনা ৰিজ্ঝি, পমত্তং উদহারকং [হারিকং (স্যা.), হারিযং (ক.)];
খত্তিযো ব্রাহ্মণো ৰেস্সো, কো মং ৰিদ্ধা নিলীযসি.
‘‘ন মে মংসানি খজ্জানি, চম্মেনত্থো ন ৰিজ্জতি;
অথ কেন নু ৰণ্ণেন, ৰিদ্ধেয্যং মং অমঞ্ঞথ.
‘‘কো ৰা ত্ৰং কস্স ৰা পুত্তো, কথং জানেমু তং মযং;
পুট্ঠো মে সম্ম অক্খাহি, কিং মং ৰিদ্ধা নিলীযসি’’.
‘‘রাজাহমস্মি কাসীনং, পীল়িযক্খোতি মং ৰিদূ;
লোভা রট্ঠং পহিত্ৰান, মিগমেসং চরামহং.
‘‘ইস্সত্থে চস্মি কুসলো, দল়্হধম্মোতি ৰিস্সুতো;
নাগোপি মে ন মুচ্চেয্য, আগতো উসুপাতনং.
‘‘কো ¶ ¶ ৰা ত্ৰং কস্স ৰা পুত্তো [ত্ৰং চ কস্স ৰা পুত্তোসি (সী. পী.)], কথং জানেমু তং মযং;
পিতুনো অত্তনো চাপি, নামগোত্তং পৰেদয’’.
‘‘নেসাদপুত্তো ভদ্দন্তে, সামো ইতি মং ঞাতযো;
আমন্তযিংসু জীৰন্তং, স্ৰজ্জেৰাহং গতো [স্ৰাজ্জেৰঙ্গতো (স্যা.), স্ৰজ্জেৰঙ্গতে (ক.)] সযে.
‘‘ৰিদ্ধোস্মি পুথুসল্লেন, সৰিসেন যথা মিগো;
সকম্হি লোহিতে রাজ, পস্স সেমি পরিপ্লুতো.
‘‘পটিৰামগতং ¶ [পটিধম্ম গতং (সী. পী.)] সল্লং, পস্স ধিম্হামি [ৰিহাম্হি (সী. পী.)] লোহিতং;
আতুরো ত্যানুপুচ্ছামি, কিং মং ৰিদ্ধা নিলীযসি.
‘‘অজিনম্হি হঞ্ঞতে দীপি, নাগো দন্তেহি হঞ্ঞতে;
অথ কেন নু ৰণ্ণেন, ৰিদ্ধেয্যং মং অমঞ্ঞথ’’.
‘‘মিগো উপট্ঠিতো আসি, আগতো উসুপাতনং;
তং দিস্ৰা উব্বিজী সাম, তেন কোধো মমাৰিসি’’.
‘‘যতো সরামি অত্তানং, যতো পত্তোস্মি ৰিঞ্ঞুতং;
ন মং মিগা উত্তসন্তি, অরঞ্ঞে সাপদানিপি.
‘‘যতো নিধিং পরিহরিং, যতো পত্তোস্মি যোব্বনং;
ন মং মিগা উত্তসন্তি, অরঞ্ঞে সাপদানিপি.
‘‘ভীরূ কিম্পুরিসা রাজ, পব্বতে গন্ধমাদনে;
সম্মোদমানা গচ্ছাম, পব্বতানি ৰনানি চ.
(‘‘ন মং মিগা উত্তসন্তি, অরঞ্ঞে সাপদানিপি;) [( ) নত্থি সী. স্যা. পী. পোত্থকেসু]
অথ কেন নু ৰণ্ণেন, উত্রাসন্তি মিগা মমং’’ [উত্রাসে সো মিগো মমং (সী. পী.)].
‘‘ন তং তস [ন তদ্দসা (সী. পী.)] মিগো সাম, কিং তাহং অলিকং ভণে;
কোধলোভাভিভূতাহং, উসুং তে তং অৰস্সজিং [অৰিস্সজিং (স্যা.)].
‘‘কুতো নু সাম আগম্ম, কস্স ৰা পহিতো তুৰং;
উদহারো নদিং গচ্ছ, আগতো মিগসম্মতং’’.
‘‘অন্ধা ¶ মাতাপিতা ময্হং, তে ভরামি ব্রহাৰনে;
তেসাহং উদকাহারো, আগতো মিগসম্মতং.
‘‘অত্থি নেসং উসামত্তং, অথ সাহস্স জীৰিতং;
উদকস্স অলাভেন ¶ , মঞ্ঞে অন্ধা মরিস্সরে.
‘‘ন মে ইদং তথা দুক্খং, লব্ভা হি পুমুনা ইদং;
যঞ্চ অম্মং ন পস্সামি, তং মে দুক্খতরং ইতো.
‘‘ন ¶ মে ইদং তথা দুক্খং, লব্ভা হি পুমুনা ইদং;
যঞ্চ তাতং ন পস্সামি, তং মে দুক্খতরং ইতো.
‘‘সা নূন কপণা অম্মা, চিররত্তায রুচ্ছতি [রুচ্চতি (ক.)];
অড্ঢরত্তেৰ রত্তে ৰা, নদীৰ অৰসুচ্ছতি [অৰসুস্সতি (স্যা.)].
‘‘সো নূন কপণো তাতো, চিররত্তায রুচ্ছতি [রুচ্চতি (ক.)];
অড্ঢরত্তেৰ রত্তে ৰা, নদীৰ অৰসুচ্ছতি [অৰসুস্সতি (স্যা.)].
‘‘উট্ঠানপাদচরিযায [পারিচরিযায (সী. পী.)], পাদসম্বাহনস্স চ;
সাম তাত ৰিলপন্তা, হিণ্ডিস্সন্তি ব্রহাৰনে.
‘‘ইদম্পি দুতিযং সল্লং, কম্পেতি হদযং মমং;
যঞ্চ অন্ধে ন পস্সামি, মঞ্ঞে হিস্সামি [যঞ্চ হেস্সামি (সী. পী.), তং মেং হিস্সামি (ক.)] জীৰিতং’’.
‘‘মা বাল়্হং পরিদেৰেসি, সাম কল্যাণদস্সন;
অহং কম্মকরো হুত্ৰা, ভরিস্সং তে ব্রহাৰনে.
‘‘ইস্সত্থে চস্মি কুসলো, দল়্হধম্মোতি ৰিস্সুতো;
অহং কম্মকরো হুত্ৰা, ভরিস্সং তে ব্রহাৰনে.
‘‘মিগানং [মগানং (ক.)] ৰিঘাসমন্ৰেসং, ৰনমূলফলানি চ;
অহং কম্মকরো হুত্ৰা, ভরিস্সং তে ব্রহাৰনে.
‘‘কতমং তং ৰনং সাম, যত্থ মাতাপিতা তৰ;
অহং ¶ তে তথা ভরিস্সং, যথা তে অভরী তুৰং’’.
‘‘অযং ¶ একপদী রাজ, যোযং উস্সীসকে মম;
ইতো গন্ত্ৰা অড্ঢকোসং, তত্থ নেসং অগারকং;
যত্থ মাতাপিতা ময্হং, তে ভরস্সু ইতো গতো.
‘‘নমো তে কাসিরাজত্থু, নমো তে কাসিৰড্ঢন;
অন্ধা মাতাপিতা ময্হং, তে ভরস্সু ব্রহাৰনে.
‘‘অঞ্জলিং তে পগ্গণ্হামি, কাসিরাজ নমত্থু তে;
মাতরং পিতরং ময্হং, ৰুত্তো ৰজ্জাসি ৰন্দনং’’.
‘‘ইদং ৰত্ৰান সো সামো, যুৰা কল্যাণদস্সনো;
মুচ্ছিতো ৰিসৰেগেন, ৰিসঞ্ঞী সমপজ্জথ.
‘‘স রাজা পরিদেৰেসি, বহুং কারুঞ্ঞসঞ্হিতং;
অজরামরোহং আসিং, অজ্জেতং ঞামি [অজ্জহঞ্ঞামি (ক.)] নো পুরে;
সামং কালঙ্কতং দিস্ৰা, নত্থি মচ্চুস্স নাগমো.
‘‘যস্সু ¶ মং পটিমন্তেতি, সৰিসেন সমপ্পিতো;
স্ৰজ্জেৰং গতে কালে, ন কিঞ্চি মভিভাসতি.
‘‘নিরযং নূন গচ্ছামি, এত্থ মে নত্থি সংসযো;
তদা হি পকতং পাপং, চিররত্তায কিব্বিসং.
‘‘ভৰন্তি তস্স ৰত্তারো, গামে কিব্বিসকারকো;
অরঞ্ঞে নিম্মনুস্সম্হি, কো মং ৰত্তুমরহতি.
‘‘সারযন্তি হি কম্মানি, গামে সংগচ্ছ মাণৰা;
অরঞ্ঞে ¶ নিম্মনুস্সম্হি, কো নু মং সারযিস্সতি’’.
‘‘সা দেৰতা অন্তরহিতা, পব্বতে গন্ধমাদনে;
রঞ্ঞোৰ অনুকম্পায, ইমা গাথা অভাসথ.
‘‘আগুং কির মহারাজ, অকরি [অকরা (সী.)] কম্ম দুক্কটং;
অদূসকা পিতাপুত্তা, তযো একূসুনা হতা.
‘‘এহি তং অনুসিক্খামি, যথা তে সুগতী সিযা;
ধম্মেনন্ধে ৰনে পোস, মঞ্ঞেহং সুগতী তযা.
‘‘স ¶ রাজা পরিদেৰিত্ৰা, বহুং কারুঞ্ঞসঞ্হিতং;
উদককুম্ভমাদায, পক্কামি দক্খিণামুখো.
‘‘কস্স নু এসো পদসদ্দো, মনুস্সস্সেৰ আগতো;
নেসো সামস্স নিগ্ঘোসো, কো নু ত্ৰমসি মারিস.
‘‘সন্তঞ্হি সামো ৰজতি, সন্তং পাদানি নেযতি [উত্তহি (সী.)];
নেসো সামস্স নিগ্ঘোসো, কো নু ত্ৰমসি মারিস’’.
‘‘রাজাহমস্মি কাসীনং, পীল়িযক্খোতি মং ৰিদূ;
লোভা রট্ঠং পহিত্ৰান, মিগমেসং চরামহং.
‘‘ইস্সত্থে চস্মি কুসলো, দল়্হধম্মোতি ৰিস্সুতো;
নাগোপি মে ন মুচ্চেয্য, আগতো উসুপাতনং’’.
‘‘স্ৰাগতং তে মহারাজ, অথো তে অদুরাগতং;
ইস্সরোসি অনুপ্পত্তো, যং ইধত্থি পৰেদয.
‘‘তিন্দুকানি পিযালানি, মধুকে কাসুমারিযো;
ফলানি ¶ খুদ্দকপ্পানি, ভুঞ্জ রাজ ৰরং ৰরং.
‘‘ইদম্পি পানীযং সীতং, আভতং গিরিগব্ভরা;
ততো পিৰ মহারাজ, সচে ত্ৰং অভিকঙ্খসি’’.
‘‘নালং ¶ অন্ধা ৰনে দট্ঠুং, কো নু ৰো ফলমাহরি;
অনন্ধস্সেৰযং সম্মা, নিৰাপো ময্হ খাযতি’’.
‘‘দহরো যুৰা নাতিব্রহা, সামো কল্যাণদস্সনো;
দীঘস্স কেসা অসিতা, অথো সূনগ্গ [সোনগ্গ (ক.)] ৰেল্লিতা.
‘‘সো হৰে ফলমাহরিত্ৰা, ইতো আদায [আদা (সী. পী.)] কমণ্ডলুং;
নদিং গতো উদহারো, মঞ্ঞে ন দূরমাগতো’’.
‘‘অহং তং অৰধিং সামং, যো তুয্হং পরিচারকো;
যং কুমারং পৰেদেথ, সামং কল্যাণদস্সনং.
‘‘দীঘস্স কেসা অসিতা, অথো সূনগ্গৰেল্লিতা;
তেসু লোহিতলিত্তেসু, সেতি সামো মযা হতো’’.
‘‘কেন ¶ দুকূলমন্তেসি, হতো সামোতি ৰাদিনা;
হতো সামোতি সুত্ৰান, হদযং মে পৰেধতি.
‘‘অস্সত্থস্সেৰ তরুণং, পৰাল়ং মালুতেরিতং;
হতো সামোতি সুত্ৰান, হদযং মে পৰেধতি’’.
‘‘পারিকে কাসিরাজাযং, সো সামং মিগসম্মতে;
কোধসা উসুনা ৰিজ্ঝি, তস্স মা পাপমিচ্ছিম্হা’’.
‘‘কিচ্ছা লদ্ধো পিযো পুত্তো, যো অন্ধে অভরী ৰনে;
তং ¶ একপুত্তং ঘাতিম্হি, কথং চিত্তং ন কোপযে’’.
‘‘কিচ্ছা লদ্ধো পিযো পুত্তো, যো অন্ধে অভরী ৰনে;
তং একপুত্তং ঘাতিম্হি, অক্কোধং আহু পণ্ডিতা’’.
‘‘মা বাল়্হং পরিদেৰেথ, হতো সামোতি ৰাদিনা;
অহং কম্মকরো হুত্ৰা, ভরিস্সামি ব্রহাৰনে.
‘‘ইস্সত্থে চস্মি কুসলো, দল়্হধম্মোতি ৰিস্সুতো;
অহং কম্মকরো হুত্ৰা, ভরিস্সামি ব্রহাৰনে.
‘‘মিগানং ৰিঘাসমন্ৰেসং, ৰনমূলফলানি চ;
অহং কম্মকরো হুত্ৰা, ভরিস্সামি ব্রহাৰনে’’.
‘‘নেস ধম্মো মহারাজ, নেতং অম্হেসু কপ্পতি;
রাজা ত্ৰমসি অম্হাকং, পাদে ৰন্দাম তে মযং’’.
‘‘ধম্মং নেসাদ ভণথ, কতা অপচিতী তযা;
পিতা ত্ৰমসি [ত্ৰমহি (?)] অম্হাকং, মাতা ত্ৰমসি পারিকে’’.
‘‘নমো ¶ তে কাসিরাজত্থু, নমো তে কাসিৰড্ঢন;
অঞ্জলিং তে পগ্গণ্হাম, যাৰ সামানুপাপয.
‘‘তস্স পাদে সমজ্জন্তা [পৰট্টন্তা (পী.)], মুখঞ্চ ভুজদস্সনং;
সংসুম্ভমানা অত্তানং, কালমাগমযামসে’’.
‘‘ব্রহা ৰাল়মিগাকিণ্ণং, আকাসন্তংৰ দিস্সতি;
যত্থ সামো হতো সেতি, চন্দোৰ পতিতো ছমা.
‘‘ব্রহা ¶ ¶ ৰাল়মিগাকিণ্ণং, আকাসন্তংৰ দিস্সতি;
যত্থ সামো হতো সেতি, সূরিযোৰ পতিতো ছমা.
‘‘ব্রহা ৰাল়মিগাকিণ্ণং, আকাসন্তংৰ দিস্সতি;
যত্থ সামো হতো সেতি, পংসুনা পতিকুন্তিতো [কুণ্ঠিতো (সী. স্যা. পী.) এৰমুপরিপি].
‘‘ব্রহা ৰাল়মিগাকিণ্ণং, আকাসন্তংৰ দিস্সতি;
যত্থ সামো হতো সেতি, ইধেৰ ৰসথস্সমে’’.
‘‘যদি তত্থ সহস্সানি, সতানি নিযুতানি [নহুতানি (সী. স্যা. পী.)] চ;
নেৰম্হাকং ভযং কোচি, ৰনে ৰাল়েসু ৰিজ্জতি’’.
‘‘ততো অন্ধানমাদায, কাসিরাজা ব্রহাৰনে;
হত্থে গহেত্ৰা পক্কামি, যত্থ সামো হতো অহু.
‘‘দিস্ৰান পতিতং সামং, পুত্তকং পংসুকুন্থিতং;
অপৰিদ্ধং ব্রহারঞ্ঞে, চন্দংৰ পতিতং ছমা.
‘‘দিস্ৰান পতিতং সামং, পুত্তকং পংসুকুন্থিতং;
অপৰিদ্ধং ব্রহারঞ্ঞে, সূরিযংৰ পতিতং ছমা.
‘‘দিস্ৰান পতিতং সামং, পুত্তকং পংসুকুন্থিতং;
অপৰিদ্ধং ব্রহারঞ্ঞে, কলূনং [করুণং (সী. পী.)] পরিদেৰযুং.
‘‘দিস্ৰান পতিতং সামং, পুত্তকং পংসুকুন্থিতং;
বাহা পগ্গয্হ পক্কন্দুং, অধম্মো কির ভো ইতি.
‘‘বাল়্হং খো ত্ৰং পমত্তোসি, সাম কল্যাণদস্সন;
যো অজ্জেৰং [স্ৰজ্জেৰং (ক.) এৰমুপরিপি] গতে কালে, ন কিঞ্চি মভিভাসসি.
‘‘বাল়্হং ¶ খো ত্ৰং পদিত্তোসি, সাম কল্যাণদস্সন;
যো অজ্জেৰং গতে কালে, ন কিঞ্চি মভিভাসসি.
‘‘বাল়্হং খো ত্ৰং পকুদ্ধোসি, সাম কল্যাণদস্সন;
যো অজ্জেৰং গতে কালে, ন কিঞ্চি মভিভাসসি.
‘‘বাল়্হং ¶ খো ত্ৰং পসুত্তোসি, সাম কল্যাণদস্সন;
যো অজ্জেৰং গতে কালে, ন কিঞ্চি মভিভাসসি.
‘‘বাল়্হং ¶ খো ত্ৰং ৰিমনোসি, সাম কল্যাণদস্সন;
যো অজ্জেৰং গতে কালে, ন কিঞ্চি মভিভাসসি.
‘‘জটং ৰলিনং পংসুগতং [পঙ্কহতং (সী. পী.)], কো দানি সণ্ঠপেস্সতি [সণ্ঠপেস্সতি (সী. স্যা. পী.)];
সামো অযং কালঙ্কতো, অন্ধানং পরিচারকো.
‘‘কো মে সম্মজ্জমাদায [চে সম্মজ্জনাদায (সী.), নো সম্মজ্জনাদায (স্যা.), মে সম্মজ্জনাদায (পী.)], সম্মজ্জিস্সতি অস্সমং;
সামো অযং কালঙ্কতো, অন্ধানং পরিচারকো.
‘‘কো দানি ন্হাপযিস্সতি, সীতেনুণ্হোদকেন চ;
সামো অযং কালঙ্কতো, অন্ধানং পরিচারকো.
‘‘কো দানি ভোজযিস্সতি, ৰনমূলফলানি চ;
সামো অযং কালঙ্কতো, অন্ধানং পরিচারকো’’.
‘‘দিস্ৰান পতিতং সামং, পুত্তকং পংসুকুন্থিতং;
অট্টিতা পুত্তসোকেন, মাতা সচ্চং অভাসথ.
‘‘যেন সচ্চেনযং সামো, ধম্মচারী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন ¶ সচ্চেনযং সামো, ব্রহ্মচারী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, সচ্চৰাদী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, মাতাপেত্তিভরো [মাতাপেতিভরো (স্যা.), মাতাপিত্তিভরো (ক.)] অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, কুলে জেট্ঠাপচাযিকো;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, পাণা পিযতরো মম;
এতেন সচ্চৰজ্জেন, ৰিসং সামস্স হঞ্ঞতু.
‘‘যং ¶ কিঞ্চিত্থি কতং পুঞ্ঞং, ময্হঞ্চেৰ পিতুচ্চ তে;
সব্বেন তেন কুসলেন, ৰিসং সামস্স হঞ্ঞতু’’.
‘‘দিস্ৰান পতিতং সামং, পুত্তকং পংসুকুন্থিতং;
অট্টিতো পুত্তসোকেন, পিতা সচ্চং অভাসথ.
‘‘যেন ¶ সচ্চেনযং সামো, ধম্মচারী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, ব্রহ্মচারী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, সচ্চৰাদী পুরে অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন ¶ সচ্চেনযং সামো, মাতাপেত্তিভরো অহু;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, কুলে জেট্ঠাপচাযিকো;
এতেন সচ্চৰজ্জেন, ৰিসং সামস্স হঞ্ঞতু.
‘‘যেন সচ্চেনযং সামো, পাণা পিযতরো মম;
এতেন সচ্চৰজ্জেন, ৰিসং সামস্স হঞ্ঞতু.
‘‘যং কিঞ্চিত্থি [কিঞ্চত্থি (সী. পী.)] কতং পুঞ্ঞং, ময্হঞ্চেৰ মাতুচ্চ তে;
সব্বেন তেন কুসলেন, ৰিসং সামস্স হঞ্ঞতু.
‘‘সা দেৰতা অন্তরহিতা, পব্বতে গন্ধমাদনে;
সামস্স অনুকম্পায, ইমং সচ্চং অভাসথ.
‘‘পব্বত্যাহং গন্ধমাদনে, চিররত্তনিৰাসিনী [চিরং রত্তং নিৰাসিনী (স্যা.)];
ন মে পিযতরো কোচি, অঞ্ঞো সামেন [সামা ন (সী. পী.)] ৰিজ্জতি;
এতেন সচ্চৰজ্জেন, ৰিসং সামস্স হঞ্ঞতু.
‘‘সব্বে ৰনা গন্ধমযা, পব্বতে গন্ধমাদনে;
এতেন সচ্চৰজ্জেন, ৰিসং সামস্স হঞ্ঞতু’’.
তেসং ¶ লালপ্পমানানং, বহুং কারুঞ্ঞসঞ্হিতং;
খিপ্পং সামো সমুট্ঠাসি, যুৰা কল্যাণদস্সনো.
‘‘সামোহমস্মি ভদ্দং ৰো [ভদ্দন্তে (ক.)], সোত্থিনাম্হি সমুট্ঠিতো;
মা বাল়্হং পরিদেৰেথ, মঞ্জুনাভিৰদেথ মং’’.
‘‘স্ৰাগতং তে মহারাজ, অথো তে অদুরাগতং;
ইস্সরোসি ¶ অনুপ্পত্তো, যং ইধত্থি পৰেদয.
‘‘তিন্দুকানি পিযালানি, মধুকে কাসুমারিযো;
ফলানি খুদ্দকপ্পানি, ভুঞ্জ রাজ ৰরং ৰরং.
‘‘অত্থি ¶ মে পানিযং সীতং, আভতং গিরিগব্ভরা;
ততো পিৰ মহারাজ, সচে ত্ৰং অভিকঙ্খসি’’.
‘‘সম্মুয্হামি পমুয্হামি, সব্বা মুয্হন্তি মে দিসা;
পেতং তং সামমদ্দক্খিং, কো নু ত্ৰং সাম জীৰসি’’.
‘‘অপি জীৰং মহারাজ, পুরিসং গাল়্হৰেদনং;
উপনীতমনসঙ্কপ্পং, জীৰন্তং মঞ্ঞতে মতং.
‘‘অপি জীৰং মহারাজ, পুরিসং গাল়্হৰেদনং;
তং নিরোধগতং সন্তং, জীৰন্তং মঞ্ঞতে মতং.
‘‘যো মাতরং পিতরং ৰা, মচ্চো ধম্মেন পোসতি;
দেৰাপি নং তিকিচ্ছন্তি, মাতাপেত্তিভরং নরং.
‘‘যো মাতরং পিতরং ৰা, মচ্চো ধম্মেন পোসতি;
ইধেৰ নং পসংসন্তি, পেচ্চ সগ্গে পমোদতি’’.
‘‘এস ভিয্যো পমুয্হামি, সব্বা মুয্হন্তি মে দিসা;
সরণং তং সাম গচ্ছামি [সরণং সাম গচ্ছামি (স্যা. ক.)], ত্ৰঞ্চ মে সরণং ভৰ’’.
‘‘ধম্মং চর মহারাজ, মাতাপিতূসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, পুত্তদারেসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং ¶ ¶ চর মহারাজ, মিত্তামচ্চেসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, ৰাহনেসু বলেসু চ;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, গামেসু নিগমেসু চ;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, রট্ঠেসু জনপদেসু চ;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, সমণব্রাহ্মণেসু চ;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, মিগপক্খীসু খত্তিয;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং ¶ চর মহারাজ, ধম্মো চিণ্ণো সুখাৰহো;
ইধ ধম্মং চরিত্ৰান, রাজ সগ্গং গমিস্সসি.
‘‘ধম্মং চর মহারাজ, সইন্দা দেৰা সব্রহ্মকা;
সুচিণ্ণেন দিৰং পত্তা, মা ধম্মং রাজ পামদো’’তি.
সুৰণ্ণসামজাতকং [সামজাতকং (সী. পী.)] ততিযং.
৫৪১. নিমিজাতকং (৪)
‘‘অচ্ছেরং ¶ ৰত লোকস্মিং, উপ্পজ্জন্তি ৰিচক্খণা;
যদা অহু নিমিরাজা, পণ্ডিতো কুসলত্থিকো.
‘‘রাজা সব্বৰিদেহানং, অদা দানং অরিন্দমো;
তস্স তং দদতো দানং, সঙ্কপ্পো উদপজ্জথ;
দানং ৰা ব্রহ্মচরিযং ৰা, কতমং সু মহপ্ফলং.
তস্স সঙ্কপ্পমঞ্ঞায, মঘৰা দেৰকুঞ্জরো;
সহস্সনেত্তো পাতুরহু, ৰণ্ণেন ৰিহনং [নিহনং (সী. পী.), ৰিহতং (স্যা. ক.)] তমং.
সলোমহট্ঠো ¶ মনুজিন্দো, ৰাসৰং অৰচা নিমি;
‘‘দেৰতা নুসি গন্ধব্বো, অদু সক্কো পুরিন্দদো.
‘‘ন চ মে তাদিসো ৰণ্ণো, দিট্ঠো ৰা যদি ৰা সুতো;
[নত্থি সী. পী. পোত্থকেসু] আচিক্খ মে ত্ৰং ভদ্দন্তে, কথং জানেমু তং মযং’’ [নত্থি সী. পী. পোত্থকেসু].
সলোমহট্ঠং ঞত্ৰান, ৰাসৰো অৰচা নিমিং;
‘‘সক্কোহমস্মি দেৰিন্দো, আগতোস্মি তৰন্তিকে;
অলোমহট্ঠো মনুজিন্দ, পুচ্ছ পঞ্হং যমিচ্ছসি’’.
সো চ তেন কতোকাসো, ৰাসৰং অৰচা নিমি;
‘‘পুচ্ছামি তং মহারাজ [মহাবাহু (সী. পী.), দেৰরাজ (ক.)], সব্বভূতানমিস্সর;
দানং ৰা ব্রহ্মচরিযং ৰা, কতমং সু মহপ্ফলং’’.
সো পুট্ঠো নরদেৰেন, ৰাসৰো অৰচা নিমিং;
‘‘ৰিপাকং ব্রহ্মচরিযস্স, জানং অক্খাসিজানতো.
‘‘হীনেন ¶ ব্রহ্মচরিযেন, খত্তিযে উপপজ্জতি;
মজ্ঝিমেন চ দেৰত্তং, উত্তমেন ৰিসুজ্ঝতি.
‘‘ন ¶ হেতে সুলভা কাযা, যাচযোগেন কেনচি;
যে কাযে উপপজ্জন্তি, অনাগারা তপস্সিনো.
‘‘দুদীপো [দুতিপো (ক.)] সাগরো সেলো, মুজকিন্দো [মুচলিন্দো (সী. স্যা. পী.), মুজকিন্তো (ক.)] ভগীরসো;
উসিন্দরো [উসীনরো (সী. পী.)] কস্সপো চ [অট্ঠকো চ (সী. পী.), অত্থকো চ (স্যা.)], অসকো চ পুথুজ্জনো.
‘‘এতে চঞ্ঞে চ রাজানো, খত্তিযা ব্রাহ্মণা বহূ;
পুথুযঞ্ঞং যজিত্ৰান, পেতত্তং [পেতং তে (সী. পী.)] নাতিৰত্তিসুং.
‘‘অথ যীমে [অদ্ধা ইমে (সী. পী.), অদ্ধাযিমে (স্যা.)] অৰত্তিংসু, অনাগারা তপস্সিনো;
সত্তিসযো যামহনু, সোমযামো [সোমযাগো (সী. স্যা. পী.)] মনোজৰো.
‘‘সমুদ্দো মাঘো ভরতো চ, ইসি কালপুরক্খতো [কালিকরিক্খিযো (সী. পী.)];
অঙ্গীরসো কস্সপো চ, কিসৰচ্ছো অকত্তি [অকিত্তি (সী. পী.), অকন্তি (স্যা.)] চ.
‘‘উত্তরেন ¶ নদী সীদা, গম্ভীরা দুরতিক্কমা;
নল়গ্গিৰণ্ণা জোতন্তি, সদা কঞ্চনপব্বতা.
‘‘পরূল়্হকচ্ছা তগরা, রূল়্হকচ্ছা ৰনা নগা;
তত্রাসুং দসসহস্সা, পোরাণা ইসযো পুরে.
‘‘অহং ¶ সেট্ঠোস্মি দানেন, সংযমেন দমেন চ;
অনুত্তরং ৰতং কত্ৰা, পকিরচারী সমাহিতে.
‘‘জাতিমন্তং অজচ্চঞ্চ, অহং উজুগতং নরং;
অতিৰেলং নমস্সিস্সং, কম্মবন্ধূ হি মাণৰা [মাতিযা (সী. পী.)].
‘‘সব্বে ৰণ্ণা অধম্মট্ঠা, পতন্তি নিরযং অধো;
সব্বে ৰণ্ণা ৰিসুজ্ঝন্তি, চরিত্ৰা ধম্মমুত্তমং’’.
ইদং ৰত্ৰান মঘৰা, দেৰরাজা সুজম্পতি;
ৰেদেহমনুসাসিত্ৰা, সগ্গকাযং অপক্কমি.
‘‘ইমং ভোন্তো নিসামেথ, যাৰন্তেত্থ সমাগতা;
ধম্মিকানং মনুস্সানং, ৰণ্ণং উচ্চাৰচং বহুং.
‘‘যথা অযং নিমিরাজা, পণ্ডিতো কুসলত্থিকো;
রাজা সব্বৰিদেহানং, অদা দানং অরিন্দমো.
‘‘তস্স তং দদতো দানং, সঙ্কপ্পো উদপজ্জথ;
দানং ৰা ব্রহ্মচরিযং ৰা, কতমং সু মহপ্ফলং’’.
অব্ভুতো ৰত লোকস্মিং, উপ্পজ্জি লোমহংসনো;
দিব্বো রথো পাতুরহু, ৰেদেহস্স যসস্সিনো.
দেৰপুত্তো ¶ মহিদ্ধিকো, মাতলি দেৰসারথি;
নিমন্তযিত্থ রাজানং, ৰেদেহং মিথিলগ্গহং.
‘‘এহিমং রথমারুয্হ, রাজসেট্ঠ দিসম্পতি;
দেৰা দস্সনকামা তে, তাৰতিংসা সইন্দকা;
সরমানা ¶ হি তে দেৰা, সুধম্মাযং সমচ্ছরে’’.
ততো ¶ রাজা তরমানো, ৰেদেহো মিথিলগ্গহো;
আসনা ৰুট্ঠহিত্ৰান, পমুখো রথমারুহি.
অভিরূল়্হং রথং দিব্বং, মাতলি এতদব্রৰি;
‘‘কেন তং নেমি মগ্গেন, রাজসেট্ঠ দিসম্পতি;
যেন ৰা পাপকম্মন্তা, পুঞ্ঞকম্মা চ যে নরা’’.
‘‘উভযেনেৰ মং নেহি, মাতলি দেৰসারথি;
যেন ৰা পাপকম্মন্তা, পুঞ্ঞকম্মা চ যে নরা’’.
‘‘কেন তং পঠমং নেমি, রাজসেট্ঠ দিসম্পতি;
যেন ৰা পাপকম্মন্তা, পুঞ্ঞকম্মা চ যে নরা’’.
‘‘নিরযে [নিরিযং (স্যা. ক.)] তাৰ পস্সামি, আৰাসে [আৰাসং (স্যা. ক.)] পাপকম্মিনং;
ঠানানি লুদ্দকম্মানং, দুস্সীলানঞ্চ যা গতি’’.
দস্সেসি মাতলি রঞ্ঞো, দুগ্গং ৰেতরণিং নদিং;
কুথিতং খারসংযুত্তং, তত্তং অগ্গিসিখূপমং [অগ্গিসমোদকং (ক.)].
নিমী হৰে মাতলিমজ্ঝভাসথ [মাতলিমজ্ঝভাসি (স্যা.)], দিস্ৰা জনং পতমানং ৰিদুগ্গে;
‘‘ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা ৰেতরণিং পতন্তি’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে দুব্বলে বলৰন্তা জীৰলোকে, হিংসন্তি রোসন্তি সুপাপধম্মা;
তে লুদ্দকম্মা পসৰেত্ৰ পাপং, তেমে জনা ৰেতরণিং পতন্তি’’.
‘‘সামা ¶ চ সোণা সবলা চ গিজ্ঝা, কাকোলসঙ্ঘা অদন্তি [অদেন্তি (সী. স্যা. পী.) এৰমুপরিপি] ভেরৰা;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনে কাকোলসঙ্ঘা অদন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে ¶ কেচিমে মচ্ছরিনো কদরিযা, পরিভাসকা সমণব্রাহ্মণানং;
হিংসন্তি রোসন্তি সুপাপধম্মা, তে লুদ্দকম্মা পসৰেত্ৰ পাপং;
তেমে জনে কাকোলসঙ্ঘা অদন্তি’’.
‘‘সজোতিভূতা পথৰিং কমন্তি, তত্তেহি ¶ খন্ধেহি চ পোথযন্তি;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা খন্ধহতা সযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে জীৰলোকস্মি সুপাপধম্মিনো, নরঞ্চ নারিঞ্চ অপাপধম্মং;
হিংসন্তি রোসন্তি সুপাপধম্মা [সুপাপধম্মিনো (ক.)], তে লুদ্দকম্মা পসৰেত্ৰ পাপং;
তেমে জনা খন্ধহতা সযন্তি’’.
‘‘অঙ্গারকাসুং ¶ অপরে ফুণন্তি [থুনন্তি (সী. স্যা.), ফুনন্তি (পী.)], নরা রুদন্তা পরিদড্ঢগত্তা;
ভযঞ্হি মং ৰিদন্তি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা অঙ্গারকাসুং ফুণন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে ¶ কেচি পূগায ধনস্স [পূগাযতনস্স (সী. পী.)] হেতু, সক্খিং করিত্ৰা ইণং জাপযন্তি;
তে জাপযিত্ৰা জনতং জনিন্দ, তে লুদ্দকম্মা পসৰেত্ৰ পাপং;
তেমে জনা অঙ্গারকাসুং ফুণন্তি’’.
‘‘সজোতিভূতা জলিতা পদিত্তা, পদিস্সতি মহতী লোহকুম্ভী;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা অৰংসিরা লোহকুম্ভিং পতন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে সীলৰন্তং [সীলৰং (পী.)] সমণং ব্রাহ্মণং ৰা, হিংসন্তি রোসন্তি সুপাপধম্মা;
তে লুদ্দকম্মা পসৰেত্ৰ পাপং, তেমে জনা অৰংসিরা লোহকুম্ভিং পতন্তি’’.
‘‘লুঞ্চন্তি ¶ গীৰং অথ ৰেঠযিত্ৰা [অৰিৰেঠযিত্ৰা (ক.)], উণ্হোদকস্মিং পকিলেদযিত্ৰা [পকিলেদযিত্ৰা (সী. পী.)];
ভযঞ্হি মং ৰিন্দতি সূত দিস্ৰা, পুচ্ছামি ¶ তং মাতলি দেৰসারথি;
ইমে নু মচ্চা কিমকংসু পাপং, যেমে জনা লুত্তসিরা সযন্তি’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে জীৰলোকস্মি সুপাপধম্মিনো, পক্খী গহেত্ৰান ৰিহেঠযন্তি তে;
ৰিহেঠযিত্ৰা সকুণং জনিন্দ, তে লুদ্দকামা পসৰেত্ৰ পাপং;
তেমে জনা লুত্তসিরা সযন্তি.
‘‘পহূততোযা অনিগাধকূলা [অনিখাতকূলা (সী. স্যা. পী.)], নদী অযং সন্দতি সুপ্পতিত্থা;
ঘম্মাভিতত্তা মনুজা পিৰন্তি, পীতঞ্চ [পিৰতং চ (সী. স্যা. পী. ক.)] তেসং ভুস হোতি পানি.
‘‘ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, পীতঞ্চ তেসং ভুস হোতি পানি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং ¶ পাপকম্মানং, জানং অক্খাসিজানতো.
‘‘যে সুদ্ধধঞ্ঞং পলাসেন মিস্সং, অসুদ্ধকম্মা কযিনো দদন্তি;
ঘম্মাভিতত্তান পিপাসিতানং, পীতঞ্চ তেসং ভুস হোতি পানি’’.
‘‘উসূহি ¶ সত্তীহি চ তোমরেহি, দুভযানি পস্সানি তুদন্তি কন্দতং;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা সত্তিহতা সযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে জীৰলোকস্মি অসাধুকম্মিনো, অদিন্নমাদায করোন্তি জীৰিকং;
ধঞ্ঞং ধনং রজতং জাতরূপং, অজেল়কঞ্চাপি পসুং মহিংসং [মহীসং (সী. পী.)];
তে লুদ্দকম্মা পসৰেত্ৰ পাপং, তেমে জনা সত্তিহতা সযন্তি’’.
‘‘গীৰায বদ্ধা কিস্স ইমে পুনেকে, অঞ্ঞে ¶ ৰিকন্তা [ৰিকত্তা (সী. পী.)] বিলকতা সযন্তি [পুনেকে (সী. পী.)];
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা বিলকতা সযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘ওরব্ভিকা সূকরিকা চ মচ্ছিকা, পসুং মহিংসঞ্চ অজেল়কঞ্চ;
হন্ত্ৰান সূনেসু পসারযিংসু, তে লুদ্দকম্মা পসৰেত্ৰ পাপং;
তেমে জনা বিলকতা সযন্তি.
‘‘রহদো ¶ ¶ অযং মুত্তকরীসপূরো, দুগ্গন্ধরূপো অসুচি পূতি ৰাতি;
খুদাপরেতা মনুজা অদন্তি, ভযঞ্হি মং ৰিন্দতি সূত দিস্ৰা;
পুচ্ছামি তং মাতলি দেৰসারথি, ইমে নু মচ্চা কিমকংসু পাপং;
যেমে জনা মুত্তকরীসভক্খা’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং ¶ পাপকম্মানং, জানং অক্খাসিজানতো.
‘‘যে কেচিমে কারণিকা ৰিরোসকা, পরেসং হিংসায সদা নিৰিট্ঠা;
তে লুদ্দকম্মা পসৰেত্ৰ পাপং, মিত্তদ্দুনো মীল়্হমদন্তি বালা.
‘‘রহদো অযং লোহিতপুব্বপূরো, দুগ্গন্ধরূপো অসুচি পূতি ৰাতি;
ঘম্মাভিতত্তা মনুজা পিৰন্তি, ভযঞ্হি মং ৰিন্দতি সূত দিস্ৰা;
পুচ্ছামি তং মাতলি দেৰসারথি, ইমে নু মচ্চা কিমকংসু পাপং;
যেমে জনা লোহিতপুব্বভক্খা’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে মাতরং ৰা পিতরং ৰা জীৰলোকে [পিতরং ৰ জীৰলোকে (সী.), পিতরং ৰ লোকে (পী.)], পারাজিকা অরহন্তে হনন্তি;
তে লুদ্দকম্মা পসৰেত্ৰ পাপং, তেমে জনা লোহিতপুব্বভক্খা’’.
‘‘জিৰ্হঞ্চ ¶ পস্স বল়িসেন ৰিদ্ধং, ৰিহতং যথা সঙ্কুসতেন চম্মং;
ফন্দন্তি ¶ মচ্ছাৰ থলম্হি খিত্তা, মুঞ্চন্তি খেল়ং রুদমানা কিমেতে.
‘‘ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা ৰঙ্কঘস্তা সযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে কেচি সন্ধানগতা [সন্থানগতা (সী. পী.), সণ্ঠানগতা (স্যা.)] মনুস্সা, অগ্ঘেন অগ্ঘং কযং হাপযন্তি;
কুটেন কুটং ধনলোভহেতু, ছন্নং যথা ৰারিচরং ৰধায.
‘‘ন হি কূটকারিস্স ভৰন্তি তাণা, সকেহি কম্মেহি পুরক্খতস্স;
তে লুদ্দকম্মা পসৰেত্ৰ পাপং, তেমে জনা ৰঙ্কঘস্তা সযন্তি’’.
‘‘নারী ইমা সম্পরিভিন্নগত্তা, পগ্গয্হ কন্দন্তি ভুজে দুজচ্চা;
সম্মক্খিতা [সমক্খিতা (স্যা.), সমক্খিকা (ক.)] লোহিতপুব্বলিত্তা, গাৰো যথা আঘাতনে ৰিকন্তা;
তা ¶ ভূমিভাগস্মিং সদা নিখাতা, খন্ধাতিৰত্তন্তি সজোতিভূতা.
‘‘ভযঞ্হি ¶ মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমা নু নারিযো কিমকংসু পাপং, যা ভূমিভাগস্মিং সদা নিখাতা;
খন্ধাতিৰত্তন্তি সজোতিভূতা’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘কোলিত্থিযাযো [কোলিনিযাযো (সী. পী.)] ইধ জীৰলোকে, অসুদ্ধকম্মা অসতং অচারুং;
তা দিত্তরূপা [ধুত্তরূপা (ক.)] পতি ৰিপ্পহায, অঞ্ঞং অচারুং রতিখিড্ডহেতু;
তা জীৰলোকস্মিং রমাপযিত্ৰা, খন্ধাতিৰত্তন্তি সজোতিভূতা.
‘‘পাদে গহেত্ৰা কিস্স ইমে পুনেকে, অৰংসিরা নরকে পাতযন্তি;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে ¶ নু মচ্চা কিমকংসু পাপং, যেমে জনা অৰংসিরা নরকে পাতযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে জীৰলোকস্মি অসাধুকম্মিনো, পরস্স দারানি অতিক্কমন্তি;
তে তাদিসা উত্তমভণ্ডথেনা, তেমে জনা অৰংসিরা নরকে পাতযন্তি.
‘‘তে ৰস্সপূগানি বহূনি তত্থ, নিরযেসু দুক্খং ৰেদনং ৰেদযন্তি;
ন হি পাপকারিস্স [কূটকারিস্স (ক.)] ভৰন্তি তাণা, সকেহি কম্মেহি পুরক্খতস্স;
তে লুদ্দকম্মা পসৰেত্ৰ পাপং, তেমে জনা অৰংসিরা নরকে পাতযন্তি’’.
‘‘উচ্চাৰচামে ¶ ৰিৰিধা উপক্কমা, নিরযেসু দিস্সন্তি সুঘোররূপা;
ভযঞ্হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু পাপং, যেমে জনা অধিমত্তা দুক্খা তিব্বা;
খরা ¶ কটুকা ৰেদনা ৰেদযন্তি’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পাপকম্মানং, জানং অক্খাসিজানতো.
‘‘যে জীৰলোকস্মি সুপাপদিট্ঠিনো, ৰিস্সাসকম্মানি করোন্তি মোহা;
পরঞ্চ দিট্ঠীসু সমাদপেন্তি, তে পাপদিট্ঠিং [পাপদিট্ঠী (সী. স্যা.), পাপদিট্ঠীসু (পী.)] পসৰেত্ৰ পাপং;
তেমে জনা অধিমত্তা দুক্খা তিব্বা, খরা কটুকা ৰেদনা ৰেদযন্তি.
‘‘ৰিদিতা তে মহারাজ, আৰাসা পাপকম্মিনং;
ঠানানি লুদ্দকম্মানং, দুস্সীলানঞ্চ যা গতি;
উয্যাহি দানি রাজীসি, দেৰরাজস্স সন্তিকে’’.
‘‘পঞ্চথূপং ¶ দিস্সতিদং ৰিমানং, মালাপিল়ন্ধা সযনস্স মজ্ঝে;
তত্থচ্ছতি নারী মহানুভাৰা, উচ্চাৰচং ইদ্ধি ৰিকুব্বমানা.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু নারী কিমকাসি সাধুং, যা মোদতি সগ্গপত্তা ৰিমানে’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘যদি ¶ তে সুতা বীরণী জীৰলোকে, আমাযদাসী অহু ব্রাহ্মণস্স;
সা পত্তকালে [পত্তকালং (সী. স্যা. পী.)] অতিথিং ৰিদিত্ৰা, মাতাৰ পুত্তং সকিমাভিনন্দী;
সংযমা সংৰিভাগা চ, সা ৰিমানস্মি মোদতি.
‘‘দদ্দল্লমানা আভেন্তি [আভন্তি (স্যা. ক.)], ৰিমানা সত্ত নিম্মিতা;
তত্থ যক্খো মহিদ্ধিকো, সব্বাভরণভূসিতো;
সমন্তা অনুপরিযাতি, নারীগণপুরক্খতো.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু মচ্চো কিমকাসি সাধুং, যো মোদতি সগ্গপত্তো ৰিমানে’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘সোণদিন্নো গহপতি, এস দানপতী অহু;
এস পব্বজিতুদ্দিস্স, ৰিহারে সত্ত কারযি.
‘‘সক্কচ্চং তে উপট্ঠাসি, ভিক্খৰো তত্থ ৰাসিকে;
অচ্ছাদনঞ্চ ভত্তঞ্চ, সেনাসনং পদীপিযং.
অদাসি ¶ উজুভূতেসু, ৰিপ্পসন্নেন চেতসা.
‘‘চাতুদ্দসিং পঞ্চদসিং, যা চ [যা ৰ (সী. পী.)] পক্খস্স অট্ঠমী [অট্ঠমিং (সী. পী.)];
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসী, সদা সীলেসু সংৰুতো;
সংযমা সংৰিভাগা চ, সো ৰিমানস্মি মোদতি.
‘‘পভাসতি মিদং ব্যম্হং, ফলিকাসু সুনিম্মিতং;
নারীৰরগণাকিণ্ণং, কূটাগারৰরোচিতং;
উপেতং অন্নপানেহি, নচ্চগীতেহি চূভযং.
‘‘ৰিত্তী ¶ হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু সাধুং, যে মোদরে সগ্গপত্তা ৰিমানে’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘যা কাচি নারিযো ইধ জীৰলোকে, সীলৰন্তিযো উপাসিকা;
দানে রতা নিচ্চং পসন্নচিত্তা, সচ্চে ঠিতা উপোসথে অপ্পমত্তা;
সংযমা সংৰিভাগা চ, তা ৰিমানস্মি মোদরে.
‘‘পভাসতি মিদং ব্যম্হং, ৰেল়ুরিযাসু নিম্মিতং;
উপেতং ¶ ভূমিভাগেহি, ৰিভত্তং ভাগসো মিতং.
‘‘আল়ম্বরা মুদিঙ্গা চ, নচ্চগীতা সুৰাদিতা;
দিব্বা সদ্দা নিচ্ছরন্তি, সৰনীযা মনোরমা.
‘‘নাহং এৰংগতং জাতু [জাতং (ক.)], এৰংসুরুচিরং পুরে;
সদ্দং সমভিজানামি, দিট্ঠং ৰা যদি ৰা সুতং.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু সাধুং, যে মোদরে সগ্গপত্তা ৰিমানে’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘যে কেচি মচ্চা ইধ জীৰলোকে, সীলৰন্তা [সীলৰন্তো (সী. পী.)] উপাসকা;
আরামে উদপানে চ, পপা সঙ্কমনানি চ;
অরহন্তে সীতিভূতে [অরহন্তেসু সীতিভূতেসু (ক.)], সক্কচ্চং পটিপাদযুং.
‘‘চীৰরং ¶ পিণ্ডপাতঞ্চ, পচ্চযং সযনাসনং;
অদংসু উজুভূতেসু, ৰিপ্পসন্নেন চেতসা.
‘‘চাতুদ্দসিং পঞ্চদসিং, যা চ পক্খস্স অট্ঠমী;
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসুং, সদা সীলেসু সংৰুতা;
সংযমা সংৰিভাগা চ, তে ৰিমানস্মি মোদরে.
‘‘পভাসতি ¶ মিদং ব্যম্হং, ফলিকাসু সুনিম্মিতং;
নারীৰরগণাকিণ্ণং, কূটাগারৰরোচিতং.
‘‘উপেতং অন্নপানেহি, নচ্চগীতেহি চূভযং;
নজ্জো চানুপরিযাতি, নানাপুপ্ফদুমাযুতা.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু মচ্চো কিমকাসি সাধুং, যো মোদতী সগ্গপত্তো ৰিমানে’’.
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘মিথিলাযং গহপতি, এস দানপতী অহু;
আরামে উদপানে চ, পপা সঙ্কমনানি চ;
অরহন্তে সীতিভূতে, সক্কচ্চং পটিপাদযি.
‘‘চীৰরং পিণ্ডপাতঞ্চ, পচ্চযং সযনাসনং;
অদাসি উজুভূতেসু, ৰিপ্পসন্নেন চেতসা.
‘‘চাতুদ্দসিং পঞ্চদসিং, যা চ পক্খস্স অট্ঠমী;
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসী, সদা সীলেসু সংৰুতো;
সংযমা সংৰিভাগা চ, সো ৰিমানস্মি মোদতি’’.
‘‘পভাসতি মিদং ব্যম্হং, ফলিকাসু সুনিম্মিতং [ৰেল়ুরিযাসু নিম্মিতং (পী.)];
নারীৰরগণাকিণ্ণং ¶ , কূটাগারৰরোচিতং.
‘‘উপেতং ¶ অন্নপানেহি, নচ্চগীতেহি চূভযং;
নজ্জো চানুপরিযাতি, নানাপুপ্ফদুমাযুতা.
‘‘রাজাযতনা কপিত্থা চ, অম্বা সালা চ জম্বুযো;
তিন্দুকা চ পিযালা চ, দুমা নিচ্চফলা বহূ.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু মচ্চো কিমকাসি সাধুং, যো মোদতী সগ্গপত্তো ৰিমানে’’.
‘‘তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘মিথিলাযং গহপতি, এস দানপতী অহু;
আরামে উদপানে চ, পপা সঙ্কমনানি চ;
অরহন্তে সীতিভূতে, সক্কচ্চং পটিপাদযি.
‘‘চীৰরং পিণ্ডপাতঞ্চ, পচ্চযং সযনাসনং;
অদাসি উজুভূতেসু, ৰিপ্পসন্নেন চেতসা.
‘‘চাতুদ্দসিং পঞ্চদসিং, যা চ পক্খস্স অট্ঠমী;
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসী, সদা সীলেসু সংৰুতো;
সংযমা সংৰিভাগা চ, সো ৰিমানস্মি মোদতি’’.
‘‘পভাসতি ¶ ¶ মিদং ব্যম্হং, ৰেল়ুরিযাসু নিম্মিতং;
উপেতং ভূমিভাগেহি, ৰিভত্তং ভাগসো মিতং.
‘‘আল়ম্বরা মুদিঙ্গা চ, নচ্চগীতা সুৰাদিতা;
দিব্যা সদ্দা নিচ্ছরন্তি, সৰনীযা মনোরমা.
‘‘নাহং এৰংগতং জাতু [জাতং (ক.)], এৰংসুরুচিযং পুরে;
সদ্দং সমভিজানামি, দিট্ঠং ৰা যদি ৰা সুতং.
‘‘ৰিত্তী ¶ হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু মচ্চো কিমকাসি সাধুং, যো মোদতি সগ্গপত্তো ৰিমানে’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘বারাণসিযং গহপতি, এস দানপতী অহু;
আরামে উদপানে চ, পপা সঙ্কমনানি চ;
অরহন্তে সীতিভূতে, সক্কচ্চং পটিপাদযি.
‘‘চীৰরং পিণ্ডপাতঞ্চ, পচ্চযং সযনাসনং;
অদাসি উজুভূতেসু, ৰিপ্পসন্নেন চেতসা.
‘‘চাতুদ্দসিং পঞ্চদসিং, যা চ পক্খস্স অট্ঠমী;
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসী, সদাসীলেসু সংৰুতো;
সংযমা ¶ সংৰিভাগা চ, সো ৰিমানস্মি মোদতি.
‘‘যথা উদযমাদিচ্চো, হোতি লোহিতকো মহা;
তথূপমং ইদং ব্যম্হং, জাতরূপস্স নিম্মিতং.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
অযং নু মচ্চো কিমকাসি সাধুং, যো মোদতী সগ্গপত্তো ৰিমানে’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘সাৰত্থিযং গহপতি, এস দানপতী অহু;
আরামে উদপানে চ, পপা সঙ্কমনানি চ;
অরহন্তে সীতিভূতে, সক্কচ্চং পটিপাদযি.
‘‘চীৰরং পিণ্ডপাতঞ্চ, পচ্চযং সযনাসনং;
অদাসি উজুভূতেসু, ৰিপ্পসন্নেন চেতসা.
‘‘চাতুদ্দসিং ¶ ¶ পঞ্চদসিং, যা চ পক্খস্স অট্ঠমী;
পাটিহারিযপক্খঞ্চ, অট্ঠঙ্গসুসমাহিতং.
‘‘উপোসথং উপৰসী, সদা সীলেসু সংৰুতো;
সংযমা সংৰিভাগা চ, সো ৰিমানস্মি মোদতি.
‘‘ৰেহাযসা মে বহুকা, জাতরূপস্স নিম্মিতা;
দদ্দল্লমানা আভেন্তি, ৰিজ্জুৰব্ভঘনন্তরে.
‘‘ৰিত্তী ¶ হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমে নু মচ্চা কিমকংসু সাধুং, যে মোদরে সগ্গপত্তা ৰিমানে’’.
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘সদ্ধায সুনিৰিট্ঠায, সদ্ধম্মে সুপ্পৰেদিতে;
অকংসু সত্থু ৰচনং, সম্মাসম্বুদ্ধসাসনে [সম্মাসম্বুদ্ধসাৰকা (স্যা.), সম্মাসম্বুদ্ধসাসনং (পী.)];
তেসং এতানি ঠানানি, যানি ত্ৰং রাজ পস্সসি.
‘‘ৰিদিতা তে মহারাজ, আৰাসা পাপকম্মিনং;
অথো কল্যাণকম্মানং, ঠানানি ৰিদিতানি তে;
উয্যাহি দানি রাজীসি, দেৰরাজস্স সন্তিকে’’.
‘‘সহস্সযুত্তং হযৰাহিং, দিব্বযানমধিট্ঠিতো;
যাযমানো মহারাজা, অদ্দা সীদন্তরে নগে;
দিস্ৰানামন্তযী সূতং, ‘‘ইমে কে নাম পব্বতা’’.
[অযং গাথা সী. স্যা. পী. পোত্থকেসু অট্ঠকথাযঞ্চ ন দিস্সতি] তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো [অযং গাথা সী. স্যা. পী. পোত্থকেসু অট্ঠকথাযঞ্চ ন দিস্সতি].
‘‘সুদস্সনো করৰীকো, ঈসধরো [ইসিন্ধরো (স্যা.), ঈসন্ধরো (ক.)] যুগন্ধরো;
নেমিন্ধরো ৰিনতকো, অস্সকণ্ণো গিরী ব্রহা.
‘‘এতে ¶ সীদন্তরে নগা, অনুপুব্বসমুগ্গতা;
মহারাজানমাৰাসা ¶ , যানি ত্ৰং রাজ পস্সসি.
‘‘অনেকরূপং রুচিরং, নানাচিত্রং পকাসতি;
আকিণ্ণং ইন্দসদিসেহি, ব্যগ্ঘেহেৰ সুরক্খিতং [পুরক্খিতং (স্যা. ক.)].
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমং নু দ্ৰারং কিমভঞ্ঞমাহু [কিমভিঞ্ঞমাহু (সী. পী.)], (মনোরম দিস্সতি দূরতোৰ.) [( ) অযং পাঠো স্যামপোত্থকেযেৰ দিস্সতি]
তস্স ¶ পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘চিত্রকূটোতি যং আহু, দেৰরাজপৰেসনং;
সুদস্সনস্স গিরিনো, দ্ৰারঞ্হেতং পকাসতি.
‘‘অনেকরূপং রুচিরং, নানাচিত্রং পকাসতি;
আকিণ্ণং ইন্দসদিসেহি, ব্যগ্ঘেহেৰ সুরক্খিতং;
পৰিসেতেন রাজীসি, অরজং ভূমিমক্কম’’.
‘‘সহস্সযুত্তং হযৰাহিং, দিব্বযানমধিট্ঠিতো;
যাযমানো মহারাজা, অদ্দা দেৰসভং ইদং.
‘‘যথা সরদে আকাসে [আকাসো (সী. স্যা. পী.)], নীলোভাসো পদিস্সতি;
তথূপমং ইদং ব্যম্হং, ৰেল়ুরিযাসু নিম্মিতং.
‘‘ৰিত্তী হি মং ৰিন্দতি সূত দিস্ৰা, পুচ্ছামি তং মাতলি দেৰসারথি;
ইমং ¶ নু ব্যম্হং কিমভঞ্ঞমাহু [কিমভিঞ্ঞমাহু (সী. পী.)], (মনোরম দিস্সতি দূরতোৰ.) [( ) অযং পাঠো স্যামপোত্থকেযেৰ দিস্সতি]
তস্স পুট্ঠো ৰিযাকাসি, মাতলি দেৰসারথি;
ৰিপাকং পুঞ্ঞকম্মানং, জানং অক্খাসিজানতো.
‘‘সুধম্মা ¶ ইতি যং আহু, পস্সেসা [এসেসা (স্যা. ক.)] দিস্সতে সভা;
ৰেল়ুরিযারুচিরা চিত্রা, ধারযন্তি সুনিম্মিতা.
‘‘অট্ঠংসা সুকতা থম্ভা, সব্বে ৰেল়ুরিযামযা;
যত্থ দেৰা তাৰতিংসা, সব্বে ইন্দপুরোহিতা.
‘‘অত্থং দেৰমনুস্সানং, চিন্তযন্তা সমচ্ছরে;
পৰিসেতেন রাজীসি, দেৰানং অনুমোদনং’’.
‘‘তং দেৰা পটিনন্দিংসু, দিস্ৰা রাজানমাগতং;
‘‘স্ৰাগতং তে মহারাজ, অথো তে অদুরাগতং;
নিসীদ দানি রাজীসি, দেৰরাজস্স সন্তিকে’’.
‘‘সক্কোপি পটিনন্দিত্থ [পটিনন্দিত্ৰা (ক.)], ৰেদেহং মিথিলগ্গহং;
নিমন্তযিত্থ [নিমন্তযী চ (সী. পী.)] কামেহি, আসনেন চ ৰাসৰো.
‘‘সাধু খোসি অনুপ্পত্তো, আৰাসং ৰসৰত্তিনং;
ৰস দেৰেসু রাজীসি, সব্বকামসমিদ্ধিসু;
তাৰতিংসেসু দেৰেসু, ভুঞ্জ কামে অমানুসে’’.
‘‘যথা ¶ যাচিতকং যানং, যথা যাচিতকং ধনং;
এৰংসম্পদমেৰেতং, যং পরতো দানপচ্চযা.
‘‘ন চাহমেতমিচ্ছামি, যং পরতো দানপচ্চযা;
সযংকতানি ¶ পুঞ্ঞানি, তং মে আৰেণিকং [আৰেণিযং (সী. স্যা. পী.), আৰেনিকং (ক.)] ধনং.
‘‘সোহং গন্ত্ৰা মনুস্সেসু, কাহামি কুসলং বহুং;
দানেন সমচরিযায, সংযমেন দমেন চ;
যং কত্ৰা সুখিতো হোতি, ন চ পচ্ছানুতপ্পতি’’.
‘‘বহূপকারো নো ভৰং, মাতলি দেৰসারথি;
যো মে কল্যাণকম্মানং, পাপানং পটিদস্সযি’’ [পটিদংসযি (পী.)].
‘‘ইদং ৰত্ৰা নিমিরাজা, ৰেদেহো মিথিলগ্গহো;
পুথুযঞ্ঞং যজিত্ৰান, সংযমং অজ্ঝুপাগমী’’তি.
নিমিজাতকং [নেমিরাজজাতকং (স্যা.)] চতুত্থং.
৫৪২. উমঙ্গজাতকং (৫)
‘‘পঞ্চালো ¶ সব্বসেনায, ব্রহ্মদত্তোযমাগতো;
সাযং পঞ্চালিযা সেনা, অপ্পমেয্যা মহোসধ.
‘‘ৰীথিমতী [পিট্ঠিমতী (সী. পী.), ৰিদ্ধিমতী (স্যা.)] পত্তিমতী, সব্বসঙ্গামকোৰিদা;
ওহারিনী সদ্দৰতী, ভেরিসঙ্খপ্পবোধনা.
‘‘লোহৰিজ্জা অলঙ্কারা, ধজিনী ৰামরোহিনী;
সিপ্পিযেহি সুসম্পন্না, সূরেহি সুপ্পতিট্ঠিতা.
‘‘দসেত্থ পণ্ডিতা আহু, ভূরিপঞ্ঞা রহোগমা [রহোগতা (স্যা. ক.)];
মাতা একাদসী রঞ্ঞো, পঞ্চালিযং পসাসতি.
‘‘অথেত্থেকসতং ¶ খত্যা, অনুযন্তা যসস্সিনো;
অচ্ছিন্নরট্ঠা ব্যথিতা, পঞ্চালিযং [পঞ্চালীনং (বহূসু)] ৰসং গতা.
‘‘যংৰদা-তক্করা রঞ্ঞো, অকামা পিযভাণিনো;
পঞ্চালমনুযাযন্তি, অকামা ৰসিনো গতা.
‘‘তায সেনায মিথিলা, তিসন্ধিপরিৰারিতা;
রাজধানী ৰিদেহানং, সমন্তা পরিখঞ্ঞতি.
‘‘উদ্ধং ¶ তারকজাতাৰ, সমন্তা পরিৰারিতা;
মহোসধ ৰিজানাহি, কথং মোক্খো ভৰিস্সতি’’.
‘‘পাদে দেৰ পসারেহি, ভুঞ্জ কামে রমস্সু চ;
হিত্ৰা পঞ্চালিযং সেনং, ব্রহ্মদত্তো পলাযিতি’’ [পলাযতি (সী. স্যা.)].
‘‘রাজা সন্থৰকামো তে, রতনানি পৰেচ্ছতি;
আগচ্ছন্তু ইতো [ততো (সী. স্যা.)] দূতা, মঞ্জুকা পিযভাণিনো.
‘‘ভাসন্তু মুদুকা ৰাচা, যা ৰাচা পটিনন্দিতা;
পঞ্চালো চ ৰিদেহো চ [পঞ্চালা চ ৰিদেহা চ (সী. পী.)], উভো একা ভৰন্তু তে’’.
‘‘কথং নু কেৰট্ট মহোসধেন, সমাগমো আসি তদিঙ্ঘ ব্রূহি;
কচ্চি তে পটিনিজ্ঝত্তো, কচ্চি তুট্ঠো মহোসধো’’.
‘‘অনরিযরূপো ¶ পুরিসো জনিন্দ, অসম্মোদকো থদ্ধো অসব্ভিরূপো;
যথা মূগো চ বধিরো চ, ন কিঞ্চিত্থং অভাসথ’’ [অভাসিত্থ (ক.)].
‘‘অদ্ধা ¶ ইদং মন্তপদং সুদুদ্দসং, অত্থো সুদ্ধো নরৰীরিযেন দিট্ঠো;
তথা হি কাযো মম সম্পৰেধতি, হিত্ৰা সযং কো পরহত্থমেস্সতি’’.
‘‘ছন্নঞ্হি একাৰ মতী সমেতি, যে পণ্ডিতা উত্তমভূরিপত্তা;
যানং অযানং অথ ৰাপি ঠানং, মহোসধ ত্ৰম্পি মতিং করোহি’’.
‘‘জানাসি খো রাজ মহানুভাৰো, মহব্বলো চূল়নিব্রহ্মদত্তো;
রাজা চ তং ইচ্ছতি মারণত্থং [কারণত্থং (সী. পী.)], মিগং যথা ওকচরেন লুদ্দো.
‘‘যথাপি মচ্ছো বল়িসং, ৰঙ্কং মংসেন ছাদিতং;
আমগিদ্ধো ন জানাতি, মচ্ছো মরণমত্তনো.
‘‘এৰমেৰ তুৰং রাজ, চূল়নেয্যস্স ধীতরং;
কামগিদ্ধো ন জানাসি, মচ্ছোৰ মরণমত্তনো.
‘‘সচে গচ্ছসি পঞ্চালং, খিপ্পমত্তং জহিস্সতি;
মিগং পন্থানুবন্ধংৰ [পথানুপন্নংৰ (সী. স্যা. পী.)], মহন্তং ভযমেস্সতি’’.
‘‘মযমেৰ বালম্হসে এল়মূগা, যে উত্তমত্থানি তযী লপিম্হা;
কিমেৰ ¶ ত্ৰং নঙ্গলকোটিৰড্ঢো, অত্থানি জানাসি যথাপি অঞ্ঞে’’.
‘‘ইমং গলে গহেত্ৰান, নাসেথ ৰিজিতা মম;
যো মে রতনলাভস্স, অন্তরাযায ভাসতি’’.
‘‘ততো ¶ চ সো অপক্কম্ম, ৰেদেহস্স উপন্তিকা;
অথ আমন্তযী দূতং, মাধরং [মঢরং (সী.), মাধুরং (স্যা.), মাঠরং (পী.)] সুৰপণ্ডিতং.
‘‘এহি ¶ সম্ম হরিতপক্খ [হরীপক্খ (সী. পী.)], ৰেয্যাৰচ্চং করোহি মে;
অত্থি পঞ্চালরাজস্স, সাল়িকা সযনপালিকা.
‘তং বন্ধনেন [তং পত্থরেন (সী. পী.), তং সন্থৰেন (স্যা.)] পুচ্ছস্সু, সা হি সব্বস্স কোৰিদা;
সা তেসং সব্বং জানাতি, রঞ্ঞো চ কোসিযস্স চ.
‘‘‘আমো’তি সো পটিস্সুত্ৰা, মাধরো সুৰপণ্ডিতো;
অগমাসি হরিতপক্খো [হরীপক্খো (সী. পী.)], সাল়িকায উপন্তিকং.
‘‘ততো চ খো সো গন্ত্ৰান, মাধরো সুৰপণ্ডিতো;
অথামন্তযি সুঘরং, সাল়িকং মঞ্জুভাণিকং.
‘কচ্চি তে সুঘরে খমনীযং, কচ্চি ৰেস্সে অনামযং;
কচ্চি তে মধুনা লাজা, লব্ভতে সুঘরে তুৰং’ [তৰ (সী. পী.)].
‘কুসলঞ্চেৰ মে সম্ম, অথো সম্ম অনামযং;
অথো মে মধুনা লাজা, লব্ভতে সুৰপণ্ডিত.
‘কুতো নু সম্ম আগম্ম, কস্স ৰা পহিতো তুৰং;
ন ¶ চ মেসি ইতো পুব্বে, দিট্ঠো ৰা যদি ৰা সুতো’’.
‘‘অহোসিং সিৰিরাজস্স, পাসাদে সযনপালকো;
ততো সো ধম্মিকো রাজা, বদ্ধে মোচেসি বন্ধনা’’.
‘‘তস্স মেকা দুতিযাসি, সাল়িকা মঞ্জুভাণিকা;
তং তত্থ অৰধী সেনো, পেক্খতো সুঘরে মম’’.
‘‘তস্সা কামা হি সম্মত্তো, আগতোস্মি তৰন্তিকে;
সচে করেয্য [করেয্যাসি (সী.), করেযু (স্যা.), করেয্যাসি মে (পী.)] ওকাসং, উভযোৰ ৰসামসে’’.
‘‘সুৰোৰ সুৰিং কামেয্য, সাল়িকো পন সাল়িকং;
সুৰস্স সাল়িকাযেৰ [সাল়িকায চ (সী. পী.)], সংৰাসো হোতি কীদিসো’’.
‘‘যোযং ¶ কামে [যং যং কামী (সী. পী.)] কামযতি, অপি চণ্ডালিকামপি;
সব্বো হি সদিসো হোতি, নত্থি কামে অসাদিসো’’.
‘‘অত্থি জম্পাৰতী [জম্বাৰতী (সী. স্যা.), চম্পাৰতী (ক.)] নাম, মাতা সিৰিস্স [সিব্বিস্স (সী. পী.)] রাজিনো;
সা ভরিযা ৰাসুদেৰস্স, কণ্হস্স মহেসী পিযা.
‘‘রট্ঠৰতী [রথৰতী (সী. পী.), রতনৰতী (স্যা.)] কিম্পুরিসী, সাপি ৰচ্ছং অকামযি;
মনুস্সো মিগিযা সদ্ধিং, নত্থি কামে অসাদিসো’’.
‘‘হন্দ খ্ৰাহং গমিস্সামি, সাল়িকে মঞ্জুভাণিকে;
পচ্চক্খানুপদঞ্হেতং, অতিমঞ্ঞসি নূন মং’’.
‘‘ন ¶ সিরী তরমানস্স, মাধর সুৰপণ্ডিত;
ইধেৰ তাৰ অচ্ছস্সু, যাৰ রাজান দক্খসি [দক্খিসি (পী.)];
সোস্সি [সোস্সসি (সী.)] সদ্দং মুদিঙ্গানং, আনুভাৰঞ্চ রাজিনো’’.
‘‘যো ¶ নু খ্ৰাযং তিব্বো সদ্দো, তিরোজনপদে [তিরোজনপদং (পী. ক.)] সুতো;
ধীতা পঞ্চালরাজস্স, ওসধী ৰিয ৰণ্ণিনী;
তং দস্সতি ৰিদেহানং, সো ৰিৰাহো ভৰিস্সতি’’.
‘‘এদিসো মা [নেদিসো তে (সী.)] অমিত্তানং, ৰিৰাহো হোতু মাধর;
যথা পঞ্চালরাজস্স, ৰেদেহেন ভৰিস্সতি’’.
‘‘আনযিত্ৰান ৰেদেহং, পঞ্চালানং রথেসভো;
ততো নং ঘাতযিস্সতি, নস্স সখী ভৰিস্সতি’’.
‘‘হন্দ খো মং অনুজানাহি, রত্তিযো সত্তমত্তিযো;
যাৰাহং সিৰিরাজস্স, আরোচেমি মহেসিনো;
লদ্ধো চ মে আৰসথো, সাল়িকায উপন্তিকং’’ [উপন্তিকা (সী. ক.)].
‘‘হন্দ খো তং অনুজানামি, রত্তিযো সত্তমত্তিযো;
সচে ত্ৰং সত্তরত্তেন, নাগচ্ছসি মমন্তিকে;
মঞ্ঞে ওক্কন্তসত্তং [ওক্কন্তসন্তং (স্যা. পী. ক.)] মং, মতায আগমিস্সসি’’.
‘‘ততো ¶ চ খো সো গন্ত্ৰান, মাধরো সুৰপণ্ডিতো;
মহোসধস্স অক্খাসি, সাল়িকাৰচনং ইদং’’.
‘‘যস্সেৰ ঘরে ভুঞ্জেয্য ভোগং, তস্সেৰ অত্থং পুরিসো চরেয্য’’;
‘‘হন্দাহং গচ্ছামি পুরে জনিন্দ, পঞ্চালরাজস্স পুরং সুরম্মং;
নিৰেসনানি মাপেতুং, ৰেদেহস্স যসস্সিনো.
‘‘নিৰেসনানি ¶ মাপেত্ৰা, ৰেদেহস্স যসস্সিনো;
যদা তে পহিণেয্যামি, তদা এয্যাসি খত্তিয’’.
‘‘ততো চ পাযাসি পুরে মহোসধো, পঞ্চালরাজস্স পুরং সুরম্মং;
নিৰেসনানি মাপেতুং, ৰেদেহস্স যসস্সিনো’’.
‘‘নিৰেসনানি মাপেত্ৰা, ৰেদেহস্স যসস্সিনো;
অথস্স পাহিণী দূতং, [নত্থি সী. পী. পোত্থকেসু] ৰেদেহং মিথিলগ্গহং [নত্থি সী. পী. পোত্থকেসু];
এহি দানি মহারাজ, মাপিতং তে নিৰেসনং’’.
‘‘ততো চ রাজা পাযাসি, সেনায চতুরঙ্গিযা [চতুরঙ্গিনিযা (ক.)];
অনন্তৰাহনং দট্ঠুং, ফীতং কপিলিযং [কম্পিল্লিযং (সী. পী.)] পুরং’’.
‘‘ততো ¶ চ খো সো গন্ত্ৰান, ব্রহ্মদত্তস্স পাহিণি;
‘আগতো’স্মি মহারাজ, তৰ পাদানি ৰন্দিতুং.
‘দদাহি দানি মে ভরিযং, নারিং সব্বঙ্গসোভিনিং;
সুৰণ্ণেন পটিচ্ছন্নং, দাসীগণপুরক্খতং’’’.
‘‘স্ৰাগতং তেৰ [তে (সী.), তেপি (স্যা.), তেন (পী.)] ৰেদেহ, অথো তে অদুরাগতং;
নক্খত্তংযেৰ পরিপুচ্ছ, অহং কঞ্ঞং দদামি তে;
সুৰণ্ণেন পটিচ্ছন্নং, দাসীগণপুরক্খতং’’.
‘‘ততো চ রাজা ৰেদেহো, নক্খত্তং পরিপুচ্ছথ [পরিপুচ্ছতি (স্যা. ক.)];
নক্খত্তং পরিপুচ্ছিত্ৰা, ব্রহ্মদত্তস্স পাহিণি.
‘‘দদাহি ¶ দানি মে ভরিযং, নারিং সব্বঙ্গসোভিনিং;
সুৰণ্ণেন পটিচ্ছন্নং, দাসীগণপুরক্খতং’’.
‘‘দদামি দানি তে ভরিযং, নারিং সব্বঙ্গসোভিনিং;
সুৰণ্ণেন ¶ পটিচ্ছন্নং, দাসীগণপুরক্খতং’’.
‘‘হত্থী অস্সা রথা পত্তী, সেনা তিট্ঠন্তি ৰম্মিতা [ৰম্মিকা (স্যা. ক.)];
উক্কা পদিত্তা ঝাযন্তি, কিন্নু মঞ্ঞন্তি পণ্ডিতা.
‘‘হত্থী অস্সা রথা পত্তী, সেনা তিট্ঠন্তি ৰম্মিতা [ৰম্মিকা (স্যা. ক.)];
উক্কা পদিত্তা ঝাযন্তি, কিং নু কাহন্তি [কাহতি (ক.)] পণ্ডিত’’.
‘‘রক্খতি তং মহারাজ, চূল়নেয্যো মহব্বলো;
পদুট্ঠো ব্রহ্মদত্তেন [পদুট্ঠো তে ব্রহ্মদত্তো (সী. স্যা. পী.)], পাতো তং ঘাতযিস্সতি’’.
‘‘উব্বেধতি মে হদযং, মুখঞ্চ পরিসুস্সতি;
নিব্বুতিং নাধিগচ্ছামি, অগ্গিদড্ঢোৰ আতপে.
‘‘কম্মারানং যথা উক্কা, অন্তো ঝাযতি নো বহি;
এৰম্পি হদযং ময্হং, অন্তো ঝাযতি নো বহি’’.
‘‘পমত্তো মন্তনাতীতো, ভিন্নমন্তোসি খত্তিয;
ইদানি খো তং তাযন্তু, পণ্ডিতা মন্তিনো জনা.
‘‘অকত্ৰামচ্চস্স ৰচনং, অত্থকামহিতেসিনো;
অত্তপীতিরতো রাজা, মিগো কূটেৰ ওহিতো.
‘‘যথাপি মচ্ছো বল়িসং, ৰঙ্কং মংসেন ছাদিতং;
আমগিদ্ধো ন জানাতি, মচ্ছো মরণমত্তনো.
‘‘এৰমেৰ ¶ তুৰং রাজ, চূল়নেয্যস্স ধীতরং;
কামগিদ্ধো ¶ ন জানাসি, মচ্ছোৰ মরণমত্তনো.
‘‘সচে গচ্ছসি পঞ্চালং, খিপ্পমত্তং জহিস্সসি;
মিগং পন্থানুবন্ধংৰ, মহন্তং ভযমেস্সতি.
‘‘অনরিযরূপো ¶ পুরিসো জনিন্দ, অহীৰ উচ্ছঙ্গগতো ডসেয্য;
ন তেন মিত্তিং কযিরাথ ধীরো [পঞ্ঞো (পী.)], দুক্খো হৰে কাপুরিসেন [কাপুরিসেহি (ক.)] সঙ্গমো.
‘‘যদেৰ [যং ত্ৰেৰ (সী. স্যা. পী.)] জঞ্ঞা পুরিসং [পুরিসো (স্যা. ক.)] জনিন্দ, সীলৰাযং বহুস্সুতো;
তেনেৰ মিত্তিং কযিরাথ ধীরো, সুখো হৰে সপ্পুরিসেন সঙ্গমো’’.
‘‘বালো তুৰং এল়মূগোসি রাজ, যো উত্তমত্থানি মযী লপিত্থো;
কিমেৰহং নঙ্গলকোটিৰড্ঢো, অত্থানি জানামি [জানিস্সং (সী. স্যা. পী.)] যথাপি অঞ্ঞে.
‘‘ইমং গলে গহেত্ৰান, নাসেথ ৰিজিতা মম;
যো মে রতনলাভস্স, অন্তরাযায ভাসতি’’.
‘‘মহোসধ অতীতেন, নানুৰিজ্ঝন্তি পণ্ডিতা;
কিং মং অস্সংৰ সম্বন্ধং, পতোদেনেৰ ৰিজ্ঝসি.
‘‘সচে পস্সসি মোক্খং ৰা, খেমং ৰা পন পস্সসি;
তেনেৰ ¶ মং অনুসাস, কিং অতীতেন ৰিজ্ঝসি’’.
‘‘অতীতং মানুসং কম্মং, দুক্করং দুরভিসম্ভৰং;
ন তং সক্কোমি মোচেতুং, ত্ৰং পজানস্সু [ত্ৰম্পি জানস্সু (সী. পী.)] খত্তিয.
‘‘সন্তি ৰেহাযসা [ৰেহাসযা (সী. পী.)] নাগা, ইদ্ধিমন্তো যসস্সিনো;
তেপি আদায গচ্ছেয্যুং, যস্স হোন্তি তথাৰিধা.
‘‘সন্তি ৰেহাযসা অস্সা, ইদ্ধিমন্তো যসস্সিনো;
তেপি আদায গচ্ছেয্যুং, যস্স হোন্তি তথাৰিধা.
‘‘সন্তি ৰেহাযসা পক্খী, ইদ্ধিমন্তো যসস্সিনো;
তেপি আদায গচ্ছেয্যুং, যস্স হোন্তি তথাৰিধা.
‘‘সন্তি ¶ ৰেহাযসা যক্খা, ইদ্ধিমন্তো যসস্সিনো;
তেপি আদায গচ্ছেয্যুং, যস্স হোন্তি তথাৰিধা.
‘‘অতীতং মানুসং কম্মং, দুক্করং দুরভিসম্ভৰং;
ন তং সক্কোমি মোচেতুং, অন্তলিক্খেন খত্তিয’’.
‘‘অতীরদস্সী পুরিসো, মহন্তে উদকণ্ণৰে;
যত্থ সো লভতে গাধং [নাৰং (ক.)], তত্থ সো ৰিন্দতে সুখং.
‘‘এৰং ¶ অম্হঞ্চ রঞ্ঞো চ, ত্ৰং পতিট্ঠা মহোসধ;
ত্ৰং নোসি মন্তিনং সেট্ঠো, অম্হে দুক্খা পমোচয’’.
‘‘অতীতং মানুসং কম্মং, দুক্করং দুরভিসম্ভৰং;
ন তং সক্কোমি মোচেতুং, ত্ৰং পজানস্সু সেনক’’.
‘‘সুণোহি ¶ মেতং [এতং (সী. ক.)] ৰচনং, পস্স সেনং [পস্সসে’তং (সী. পী.)] মহব্ভযং;
সেনকং দানি পুচ্ছামি, কিং কিচ্চং ইধ মঞ্ঞসি’’.
‘‘অগ্গিং ৰা দ্ৰারতো দেম, গণ্হামসে ৰিকন্তনং [ৰিকত্তনং (সী. পী.)];
অঞ্ঞমঞ্ঞং ৰধিত্ৰান, খিপ্পং হিস্সাম জীৰিতং;
মা নো রাজা ব্রহ্মদত্তো, চিরং দুক্খেন মারযি’’.
‘‘সুণোহি মেতং ৰচনং, পস্স সেনং মহব্ভযং;
পুক্কুসং দানি পুচ্ছামি, কিং কিচ্চং ইধ মঞ্ঞসি’’.
‘‘ৰিসং খাদিত্ৰা মিয্যাম, খিপ্পং হিস্সাম জীৰিতং;
মা নো রাজা ব্রহ্মদত্তো, চিরং দুক্খেন মারযি’’.
‘‘সুণোহি মেতং ৰচনং, পস্স সেনং মহব্ভযং;
কামিন্দং [কাৰিন্দং (সী. পী.)] দানি পুচ্ছামি, কিং কিচ্চং ইধ মঞ্ঞসি’’.
‘‘রজ্জুযা বজ্ঝ মিয্যাম, পপাতা পপতামসে [পপতেমসে (সী. পী.)];
মা নো রাজা ব্রহ্মদত্তো, চিরং দুক্খেন মারযি’’.
‘‘সুণোহি মেতং ৰচনং, পস্স সেনং মহব্ভযং;
দেৰিন্দং দানি পুচ্ছামি, কিং কিচ্চং ইধ মঞ্ঞসি’’.
‘‘অগ্গিং ¶ ৰা দ্ৰারতো দেম, গণ্হামসে ৰিকন্তনং;
অঞ্ঞমঞ্ঞং ৰধিত্ৰান, খিপ্পং হিস্সাম জীৰিতং;
ন নো সক্কোতি মোচেতুং, সুখেনেৰ মহোসধো’’.
‘‘যথা কদলিনো সারং, অন্ৰেসং নাধিগচ্ছতি;
এৰং অন্ৰেসমানা নং, পঞ্হং নজ্ঝগমামসে.
‘‘যথা সিম্বলিনো ¶ সারং, অন্ৰেসং নাধিগচ্ছতি;
এৰং অন্ৰেসমানা নং, পঞ্হং নজ্ঝগমামসে.
‘‘অদেসে ৰত নো ৰুট্ঠং, কুঞ্জরানংৰনোদকে;
সকাসে দুম্মনুস্সানং, বালানং অৰিজানতং.
‘‘উব্বেধতি মে হদযং, মুখঞ্চ পরিসুস্সতি;
নিব্বুতিং নাধিগচ্ছামি, অগ্গিদড্ঢোৰ আতপে.
‘‘কম্মারানং ¶ যথা উক্কা, অন্তো ঝাযতি নো বহি;
এৰম্পি হদযং ময্হং, অন্তো ঝাযতি নো বহি’’.
‘‘ততো সো পণ্ডিতো ধীরো, অত্থদস্সী মহোসধো;
ৰেদেহং দুক্খিতং দিস্ৰা, ইদং ৰচনমব্রৰি.
‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, রাহুগ্গহংৰ [রাহুগহিতংৰ (সী. স্যা. পী.)] চন্দিমং.
‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, রাহুগ্গহংৰ সূরিযং.
‘‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, পঙ্কে সন্নংৰ কুঞ্জরং.
‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, পেল়াবদ্ধংৰ পন্নগং.
[অযং গাথা সী. পী. পোত্থকেসু ন দিস্সতি] ‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, পক্খিং বদ্ধংৰ পঞ্জরে [অযং গাথা সী. পী. পোত্থকেসু ন দিস্সতি].
‘মা ¶ ¶ ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, মচ্ছে জালগতেরিৰ.
‘মা ত্ৰং ভাযি মহারাজ, মা ত্ৰং ভাযি রথেসভ;
অহং তং মোচযিস্সামি, সযোগ্গবলৰাহনং.
‘মা ত্ৰং ভাযি মহারাজ, মা ত্ৰং ভাযি রথেসভ;
পঞ্চালং ৰাহযিস্সামি [বাহযিস্সামি (স্যা.), ৰারযিস্সামি (ক.)], কাকসেনংৰ লেড্ডুনা.
‘অদু পঞ্ঞা কিমত্থিযা, অমচ্চো ৰাপি তাদিসো;
যো তং সম্বাধপক্খন্দং [সম্বাধপক্খন্তং (সী. পী.)], দুক্খা ন পরিমোচযে’’’.
‘‘এথ মাণৰা উট্ঠেথ, মুখং সোধেথ সন্ধিনো;
ৰেদেহো সহমচ্চেহি, উমঙ্গেন [উম্মগ্গেন (সী. পী.), উম্মঙ্গে (স্যা.) এৰমুপরিপি] গমিস্সতি’’.
‘‘তস্স তং ৰচনং সুত্ৰা, পণ্ডিতস্সানুচারিনো [পণ্ডিতস্সানুসারিনো (সী. স্যা. পী.)];
উমঙ্গদ্ৰারং ৰিৰরিংসু, যন্তযুত্তে চ অগ্গল়ে’’.
‘‘পুরতো সেনকো যাতি, পচ্ছতো চ মহোসধো;
মজ্ঝে চ রাজা ৰেদেহো, অমচ্চপরিৰারিতো’’.
‘‘উমঙ্গা নিক্খমিত্ৰান, ৰেদেহো নাৰমারুহি;
অভিরূল়্হঞ্চ তং ঞত্ৰা [অভিরুয্হঞ্চ ঞত্ৰান (স্যা. ক.)], অনুসাসি মহোসধো.
‘অযং ¶ তে সসুরো দেৰ, অযং সস্সু জনাধিপ;
যথা মাতু পটিপত্তি, এৰং তে হোতু সস্সুযা.
‘যথাপি নিযকো ভাতা, সউদরিযো একমাতুকো;
এৰং পঞ্চালচন্দো তে, দযিতব্বো রথেসভ.
‘অযং ¶ পঞ্চালচন্দী তে, রাজপুত্তী অভিচ্ছিতা [অভিজ্ঝিতা (সী. স্যা. পী.)];
কামং করোহি তে তায, ভরিযা তে রথেসভ’’’.
‘‘আরুয্হ নাৰং তরমানো, কিন্নু তীরম্হি তিট্ঠসি;
কিচ্ছা মুত্তাম্হ দুক্খতো, যাম দানি মহোসধ’’.
‘‘নেস ¶ ধম্মো মহারাজ, যোহং সেনায নাযকো;
সেনঙ্গং পরিহাপেত্ৰা, অত্তানং পরিমোচযে.
‘‘নিৰেসনম্হি তে দেৰ, সেনঙ্গং পরিহাপিতং;
তং দিন্নং ব্রহ্মদত্তেন, আনযিস্সং রথেসভ’’.
‘‘অপ্পসেনো মহাসেনং, কথং ৰিগ্গয্হ [নিগ্গয্হ (স্যা. ক.)] ঠস্সসি;
দুব্বলো বলৰন্তেন, ৰিহঞ্ঞিস্সসি পণ্ডিত’’.
‘‘অপ্পসেনোপি চে মন্তী, মহাসেনং অমন্তিনং;
জিনাতি রাজা রাজানো, আদিচ্চোৰুদযং তমং’’.
‘‘সুসুখং ৰত সংৰাসো, পণ্ডিতেহীতি সেনক;
পক্খীৰ পঞ্জরে বদ্ধে, মচ্ছে জালগতেরিৰ;
অমিত্তহত্থত্তগতে [অমিত্তস্স হত্থগতে (ক.)], মোচযী নো মহোসধো’’.
‘‘এৰমেতং [এৰমেৰ (স্যা.)] মহারাজ, পণ্ডিতা হি সুখাৰহা;
পক্খীৰ পঞ্জরে বদ্ধে, মচ্ছে জালগতেরিৰ;
অমিত্তহত্থত্তগতে, মোচযী নো মহোসধো’’.
‘‘রক্খিত্ৰা কসিণং রত্তিং, চূল়নেয্যো মহব্বলো;
উদেন্তং অরুণুগ্গস্মিং, উপকারিং উপাগমি.
‘‘আরুয্হ ¶ পৰরং নাগং, বলৰন্তং সট্ঠিহাযনং;
রাজা অৰোচ পঞ্চালো, চূল়নেয্যো মহব্বলো.
‘‘সন্নদ্ধো মণিৰম্মেন [মণিচম্মেন (স্যা.)], সরমাদায পাণিনা;
পেসিযে অজ্ঝভাসিত্থ, পুথুগুম্বে সমাগতে.
‘‘হত্থারোহে অনীকট্ঠে, রথিকে পত্তিকারকে;
উপাসনম্হি কতহত্থে, ৰালৰেধে সমাগতে’’.
‘‘পেসেথ ¶ কুঞ্জরে দন্তী, বলৰন্তে সট্ঠিহাযনে;
মদ্দন্তু কুঞ্জরা নগরং, ৰেদেহেন সুমাপিতং.
‘‘ৰচ্ছদন্তমুখা সেতা, তিক্খগ্গা অট্ঠিৰেধিনো;
পণুন্না ধনুৰেগেন, সম্পতন্তুতরীতরা.
‘‘মাণৰা ¶ ৰম্মিনো সূরা, চিত্রদণ্ডযুতাৰুধা;
পক্খন্দিনো মহানাগা, হত্থীনং হোন্তু সম্মুখা.
‘‘সত্তিযো তেলধোতাযো, অচ্চিমন্তা [অচ্চিমন্তী (সী.)] পভস্সরা;
ৰিজ্জোতমানা তিট্ঠন্তু, সতরংসীৰ [সতরংসা ৰিয (সী.)] তারকা.
‘‘আৰুধবলৰন্তানং, গুণিকাযূরধারিনং;
এতাদিসানং যোধানং, সঙ্গামে অপলাযিনং;
ৰেদেহো কুতো মুচ্চিস্সতি, সচে পক্খীৰ কাহিতি.
‘‘তিংস মে পুরিসনাৰুত্যো, সব্বেৰেকেকনিচ্চিতা;
যেসং সমং ন পস্সামি, কেৰলং মহিমং চরং.
‘‘নাগা চ কপ্পিতা দন্তী, বলৰন্তো সট্ঠিহাযনা;
যেসং ¶ খন্ধেসু সোভন্তি, কুমারা চারুদস্সনা;
‘‘পীতালঙ্কারা পীতৰসনা, পীতুত্তরনিৰাসনা;
নাগখন্ধেসু সোভন্তি, দেৰপুত্তাৰ নন্দনে.
‘‘পাঠীনৰণ্ণা নেত্তিংসা, তেলধোতা পভস্সরা;
নিট্ঠিতা নরধীরেহি [নরৰীরেহি (সী. স্যা. পী.)], সমধারা সুনিস্সিতা.
‘‘ৰেল্লালিনো ৰীতমলা, সিক্কাযসমযা দল়্হা;
গহিতা বলৰন্তেহি, সুপ্পহারপ্পহারিভি.
‘‘সুৰণ্ণথরুসম্পন্না, লোহিতকচ্ছুপধারিতা;
ৰিৰত্তমানা সোভন্তি, ৰিজ্জুৰব্ভঘনন্তরে.
‘‘পটাকা [পতাকা (সী. পী.), পথকা (স্যা.)] ৰম্মিনো সূরা, অসিচম্মস্স কোৰিদা;
ধনুগ্গহা সিক্খিতরা [থরুগ্গহা সিক্খিতারো (সী. পী.)], নাগখন্ধে নিপাতিনো [নাগখন্ধাতিপাতিনো (সী. পী.)].
‘‘এতাদিসেহি পরিক্খিত্তো, নত্থি মোক্খো ইতো তৰ;
পভাৰং তে ন পস্সামি, যেন ত্ৰং মিথিলং ৰজে’’.
‘‘কিং নু সন্তরমানোৰ, নাগং পেসেসি কুঞ্জরং;
পহট্ঠরূপো আপতসি [আগমসি (স্যা.), আতপসি (ক.)], সিদ্ধত্থোস্মীতি [লদ্ধত্থোস্মীতি (সী. স্যা. পী.)] মঞ্ঞসি.
‘‘ওহরেতং ¶ ¶ ধনুং চাপং, খুরপ্পং পটিসংহর;
ওহরেতং সুভং ৰম্মং, ৰেল়ুরিযমণিসন্থতং’’ [ৰেল়ুরিযমণিসন্নিভং (স্যা.)].
‘‘পসন্নমুখৰণ্ণোসি, মিতপুব্বঞ্চ ভাসসি;
হোতি খো মরণকালে, এদিসী [তাদিসী (সী. পী.)] ৰণ্ণসম্পদা’’.
‘‘মোঘং তে গজ্জিতং রাজ, ভিন্নমন্তোসি খত্তিয;
দুগ্গণ্হোসি ¶ [দুগ্গণ্হো হি (সী. স্যা. পী.)] তযা রাজা, খল়ুঙ্কেনেৰ [খল়ুঙ্গেনেৰ (ক.)] সিন্ধৰো.
‘‘তিণ্ণো হিয্যো রাজা গঙ্গং, সামচ্চো সপরিজ্জনো;
হংসরাজং যথা ধঙ্কো, অনুজ্জৰং পতিস্সসি’’.
‘‘সিঙ্গালা রত্তিভাগেন, ফুল্লং দিস্ৰান কিংসুকং;
মংসপেসীতি মঞ্ঞন্তা, পরিব্যূল়্হা মিগাধমা.
‘‘ৰীতিৰত্তাসু রত্তীসু, উগ্গতস্মিং দিৰাকরে [দিৰাকরে (সী. স্যা. পী.)];
কিংসুকং ফুল্লিতং দিস্ৰা, আসচ্ছিন্না মিগাধমা.
‘‘এৰমেৰ তুৰং রাজ, ৰেদেহং পরিৰারিয [পরিৰারয (স্যা. পী.), পরিৰারিতং (ক.)];
আসচ্ছিন্নো গমিস্সসি, সিঙ্গালা কিংসুকং যথা’’.
‘‘ইমস্স হত্থে পাদে চ, কণ্ণনাসঞ্চ ছিন্দথ;
যো মে অমিত্তং হত্থগতং, ৰেদেহং পরিমোচযি.
‘‘ইমং মংসংৰ পাতব্যং [মংসংৰ পাতব্বং (সী. পী.), মংসঞ্চ পাতব্যং (ক.)], সূলে কত্ৰা পচন্তু নং;
যো মে অমিত্তং হত্থগতং, ৰেদেহং পরিমোচযি.
‘‘যথাপি আসভং চম্মং, পথব্যা ৰিতনিয্যতি;
সীহস্স অথো ব্যগ্ঘস্স, হোতি সঙ্কুসমাহতং.
‘‘এৰং তং ৰিতনিত্ৰান, ৰেধযিস্সামি সত্তিযা;
যো মে অমিত্তং হত্থগতং, ৰেদেহং পরিমোচযি’’.
‘‘সচে মে হত্থে পাদে চ, কণ্ণনাসঞ্চ ছেচ্ছসি;
এৰং পঞ্চালচন্দস্স, ৰেদেহো ছেদযিস্সতি.
‘‘সচে ¶ মে হত্থে পাদে চ, কণ্ণনাসঞ্চ ছেচ্ছসি;
এৰং ¶ পঞ্চালচন্দিযা, ৰেদেহো ছেদযিস্সতি.
‘‘সচে মে হত্থে পাদে চ, কণ্ণনাসঞ্চ ছেচ্ছসি;
এৰং নন্দায দেৰিযা, ৰেদেহো ছেদযিস্সতি.
‘‘সচে মে হত্থে পাদে চ, কণ্ণনাসঞ্চ ছেচ্ছসি;
এৰং তে পুত্তদারস্স, ৰেদেহো ছেদযিস্সতি.
‘‘সচে ¶ মংসংৰ পাতব্যং, সূলে কত্ৰা পচিস্সসি;
এৰং পঞ্চালচন্দস্স, ৰেদেহো পাচযিস্সতি.
‘‘সচে মংসংৰ পাতব্যং, সূলে কত্ৰা পচিস্সসি;
এৰং পঞ্চালচন্দিযা, ৰেদেহো পাচযিস্সতি.
‘‘সচে মংসংৰ পাতব্যং, সূলে কত্ৰা পচিস্সসি;
এৰং নন্দায দেৰিযা, ৰেদেহো পাচযিস্সতি.
‘‘সচে মংসংৰ পাতব্যং, সূলে কত্ৰা পচিস্সসি;
এৰং তে পুত্তদারস্স, ৰেদেহো পাচযিস্সতি.
‘‘সচে মং ৰিতনিত্ৰান, ৰেধযিস্সসি সত্তিযা;
এৰং পঞ্চালচন্দস্স, ৰেদেহো ৰেধযিস্সতি.
‘‘সচে মং ৰিতনিত্ৰান, ৰেধযিস্সসি সত্তিযা;
এৰং পঞ্চালচন্দিযা, ৰেদেহো ৰেধযিস্সতি.
‘‘সচে মং ৰিতনিত্ৰান, ৰেধযিস্সসি সত্তিযা;
এৰং নন্দায দেৰিযা, ৰেদেহো ৰেধযিস্সতি.
‘‘সচে মং ৰিতনিত্ৰান, ৰেধযিস্সসি সত্তিযা;
এৰং ¶ তে পুত্তদারস্স, ৰেদেহো ৰেধযিস্সতি;
এৰং নো মন্তিতং রহো, ৰেদেহেন মযা সহ.
‘‘যথাপি পলসতং চম্মং, কোন্তিমন্তাসুনিট্ঠিতং [কোন্তীমন্তীসুনিট্ঠিতং (সী. পী.)];
উপেতি তনুতাণায, সরানং পটিহন্তৰে.
‘‘সুখাৰহো ¶ দুক্খনুদো, ৰেদেহস্স যসস্সিনো;
মতিং তে পটিহঞ্ঞামি, উসুং পলসতেন ৰা’’.
‘‘ইঙ্ঘ পস্স মহারাজ, সুঞ্ঞং অন্তেপুরং তৰ;
ওরোধা চ কুমারা চ, তৰ মাতা চ খত্তিয;
উমঙ্গা নীহরিত্ৰান, ৰেদেহস্সুপনামিতা’’.
‘‘ইঙ্ঘ অন্তেপুরং ময্হং, গন্ত্ৰান ৰিচিনাথ নং;
যথা ইমস্স ৰচনং, সচ্চং ৰা যদি ৰা মুসা’’.
‘‘এৰমেতং মহারাজ, যথা আহ মহোসধো;
সুঞ্ঞং অন্তেপুরং সব্বং, কাকপট্টনকং যথা’’.
‘‘ইতো গতা মহারাজ, নারী সব্বঙ্গসোভনা;
কোসম্বফলকসুস্সোণী [কোসুম্ভফলকসুস্সোণী (সী. স্যা. পী.)], হংসগগ্গরভাণিনী.
‘‘ইতো ¶ নীতা মহারাজ, নারী সব্বঙ্গসোভনা;
কোসেয্যৰসনা সামা, জাতরূপসুমেখলা.
‘‘সুরত্তপাদা কল্যাণী, সুৰণ্ণমণিমেখলা;
পারেৰতক্খী সুতনূ, বিম্বোট্ঠা তনুমজ্ঝিমা.
‘‘সুজাতা ভুজলট্ঠীৰ, ৰেদীৰ [ৰেল্লীৰ (সী. পী.)] তনুমজ্ঝিমা;
দীঘস্সা ¶ কেসা অসিতা, ঈসকগ্গপৰেল্লিতা.
‘‘সুজাতা মিগছাপাৰ, হেমন্তগ্গিসিখারিৰ;
নদীৰ গিরিদুগ্গেসু, সঞ্ছন্না খুদ্দৰেল়ুভি.
‘‘নাগনাসূরু কল্যাণী, পরমা [পঠমা (সী. পী.)] তিম্বরুত্থনী;
নাতিদীঘা নাতিরস্সা, নালোমা নাতিলোমসা’’.
‘‘নন্দায নূন মরণেন, নন্দসি সিরিৰাহন;
অহঞ্চ নূন নন্দা চ, গচ্ছাম যমসাধনং’’.
‘‘দিব্বং অধীযসে মাযং, অকাসি চক্খুমোহনং;
যো মে অমিত্তং হত্থগতং, ৰেদেহং পরিমোচযি’’.
‘‘অধীযন্তি ¶ মহারাজ [অধিযন্তি ৰে মহারাজ (স্যা. ক.)], দিব্বমাযিধ পণ্ডিতা;
তে মোচযন্তি অত্তানং, পণ্ডিতা মন্তিনো জনা.
‘‘সন্তি মাণৰপুত্তা মে, কুসলা সন্ধিছেদকা;
যেসং কতেন মগ্গেন, ৰেদেহো মিথিলং গতো’’.
‘‘ইঙ্ঘ পস্স মহারাজ, উমঙ্গং সাধু মাপিতং;
হত্থীনং অথ অস্সানং, রথানং অথ পত্তিনং;
আলোকভূতং তিট্ঠন্তং, উমঙ্গং সাধু মাপিতং’’ [নিট্ঠিতং (সী. স্যা. পী.)].
‘‘লাভা ৰত ৰিদেহানং, যস্সিমেদিসা পণ্ডিতা;
ঘরে ৰসন্তি ৰিজিতে, যথা ত্ৰংসি মহোসধ’’.
‘‘ৰুত্তিঞ্চ পরিহারঞ্চ, দিগুণং ভত্তৰেতনং;
দদামি ৰিপুলে ভোগে, ভুঞ্জ কামে রমস্সু চ;
মা ¶ ৰিদেহং পচ্চগমা, কিং ৰিদেহো করিস্সতি’’.
‘‘যো চজেথ মহারাজ, ভত্তারং ধনকারণা;
উভিন্নং হোতি গারয্হো, অত্তনো চ পরস্স চ;
যাৰ জীৰেয্য ৰেদেহো, নাঞ্ঞস্স পুরিসো সিযা.
‘‘যো ¶ চজেথ মহারাজ, ভত্তারং ধনকারণা;
উভিন্নং হোতি গারয্হো, অত্তনো চ পরস্স চ;
যাৰ তিট্ঠেয্য ৰেদেহো, নাঞ্ঞস্স ৰিজিতে ৰসে’’.
‘‘দম্মি নিক্খসহস্সং তে, গামাসীতিঞ্চ কাসিসু;
দাসিসতানি চত্তারি, দম্মি ভরিযাসতঞ্চ তে;
সব্বং সেনঙ্গমাদায, সোত্থিং গচ্ছ মহোসধ.
‘‘যাৰ দদন্তু হত্থীনং, অস্সানং দিগুণং ৰিধং;
তপ্পেন্তু অন্নপানেন, রথিকে পত্তিকারকে’’.
‘‘হত্থী অস্সে রথে পত্তী, গচ্ছেৰাদায পণ্ডিত;
পস্সতু তং মহারাজা, ৰেদেহো মিথিলং গতং [মিথিলগ্গহং (ক.)].
‘‘হত্থী অস্সা রথা পত্তী, সেনা পদিস্সতে মহা;
চতুরঙ্গিনী ভীসরূপা, কিং নু মঞ্ঞসি পণ্ডিত’’ [মঞ্ঞন্তি পণ্ডিতা (সী. স্যা. পী.)].
‘‘আনন্দো ¶ তে মহারাজ, উত্তমো পটিদিস্সতি;
সব্বং সেনঙ্গমাদায, সোত্থিং পত্তো মহোসধো’’.
‘‘যথা পেতং সুসানস্মিং, ছড্ডেত্ৰা চতুরো জনা;
এৰং কপিলযে ত্যম্হ [কপ্পিলিযে ত্যম্হা (স্যা.), কম্পিল্লিযে ত্যম্হা (সী.), কম্পিল্লিযরট্ঠে (পী.)], ছড্ডযিত্ৰা ইধাগতা.
‘‘অথ ¶ ত্ৰং কেন ৰণ্ণেন, কেন ৰা পন হেতুনা;
কেন ৰা অত্থজাতেন, অত্তানং পরিমোচযি’’.
‘‘অত্থং অত্থেন ৰেদেহ, মন্তং মন্তেন খত্তিয;
পরিৰারযিং [পরিৰারযিস্সং (সী. স্যা.)] রাজানং, জম্বুদীপংৰ সাগরো’’.
‘‘দিন্নং নিক্খসহস্সং মে, গামাসীতি চ কাসিসু;
দাসীসতানি চত্তারি, দিন্নং ভরিযাসতঞ্চ মে;
সব্বং সেনঙ্গমাদায, সোত্থিনাম্হি ইধাগতো’’.
‘‘সুসুখং ৰত সংৰাসো, পণ্ডিতেহীতি সেনক;
পক্খীৰ পঞ্জরে বদ্ধে, মচ্ছে জালগতেরিৰ;
অমিত্তহত্থত্তগতে [অমিত্তস্স হত্থগতে (ক.)], মোচযী নো মহোসধো’’.
‘‘এৰমেতং মহারাজ, পণ্ডিতা হি সুখাৰহা;
পক্খীৰ পঞ্জরে বদ্ধে, মচ্ছে জালগতেরিৰ;
অমিত্তহত্থত্তগতে, মোচযী নো মহোসধো’’.
‘‘আহঞ্ঞন্তু ¶ সব্বৰীণা, ভেরিযো দিন্দিমানি চ;
ধমেন্তু মাগধা সঙ্খা, ৰগ্গূ নদন্তু দুন্দুভী’’.
‘‘ওরোধা চ কুমারা চ, ৰেসিযানা চ ব্রাহ্মণা;
বহুং অন্নঞ্চ পানঞ্চ, পণ্ডিতস্সাভিহারযুং.
‘‘হত্থারোহা অনীকট্ঠা, রথিকা পত্তিকারকা;
বহুং অন্নঞ্চ পানঞ্চ, পণ্ডিতস্সাভিহারযুং.
‘‘সমাগতা জানপদা, নেগমা চ সমাগতা;
বহুং ¶ অন্নঞ্চ পানঞ্চ, পণ্ডিতস্সাভিহারযুং.
‘‘বহুজনো ¶ পসন্নোসি, দিস্ৰা পণ্ডিতমাগতং;
পণ্ডিতম্হি অনুপ্পত্তে, চেলুক্খেপো অৰত্তথা’’তি.
উমঙ্গজাতকং [মহাউম্মগ্গজাতকং (সী. পী.), মহোসধজাতকং (স্যা.§ক.)] পঞ্চমং.
৫৪৩. ভূরিদত্তজাতকং (৬)
‘‘যং কিঞ্চি রতনং অত্থি, ধতরট্ঠনিৰেসনে;
সব্বানি তে উপযন্তু, ধীতরং দেহি রাজিনো’’.
‘‘ন নো ৰিৰাহো নাগেহি, কতপুব্বো কুদাচনং;
তং ৰিৰাহং অসংযুত্তং, কথং অম্হে করোমসে’’.
‘‘জীৰিতং নূন তে চত্তং, রট্ঠং ৰা মনুজাধিপ;
ন হি নাগে কুপিতম্হি, চিরং জীৰন্তি তাদিসা.
‘‘যো ত্ৰং দেৰ মনুস্সোসি, ইদ্ধিমন্তং অনিদ্ধিমা;
ৰরুণস্স নিযং পুত্তং, যামুনং অতিমঞ্ঞসি’’.
‘‘নাতিমঞ্ঞামি রাজানং, ধতরট্ঠং যসস্সিনং;
ধতরট্ঠো হি নাগানং, বহূনমপি ইস্সরো.
‘‘অহি মহানুভাৰোপি, ন মে ধীতরমারহো;
খত্তিযো চ ৰিদেহানং, অভিজাতা সমুদ্দজা’’.
‘‘কম্বলস্সতরা উট্ঠেন্তু, সব্বে নাগে নিৰেদয;
বারাণসিং পৰজ্জন্তু, মা চ কঞ্চি [কিঞ্চি (সী. পী. ক.)] ৰিহেঠযুং’’.
‘‘নিৰেসনেসু ¶ ¶ সোব্ভেসু, রথিযা চচ্চরেসু চ;
রুক্খগ্গেসু চ লম্বন্তু, ৰিততা তোরণেসু চ.
‘‘অহম্পি সব্বসেতেন, মহতা সুমহং পুরং;
পরিক্খিপিস্সং ভোগেহি, কাসীনং জনযং ভযং’’.
তস্স তং ৰচনং সুত্ৰা, উরগানেকৰণ্ণিনো;
বারাণসিং পৰজ্জিংসু, ন চ কঞ্চি ৰিহেঠযুং.
নিৰেসনেসু সোব্ভেসু, রথিযা চচ্চরেসু চ;
রুক্খগ্গেসু চ লম্বিংসু, ৰিততা তোরণেসু চ.
তেসু ¶ দিস্ৰান লম্বন্তে, পুথূ কন্দিংসু নারিযো;
নাগে সোণ্ডিকতে দিস্ৰা, পস্সসন্তে মুহুং মুহুং.
বারাণসী পব্যধিতা, আতুরা সমপজ্জথ;
বাহা পগ্গয্হ পক্কন্দুং, ‘‘ধীতরং দেহি রাজিনো’’.
‘‘পুপ্ফাভিহারস্স ৰনস্স মজ্ঝে, কো লোহিতক্খো ৰিততন্তরংসো;
কা কম্বুকাযূরধরা সুৰত্থা, তিট্ঠন্তি নারিযো দস ৰন্দমানা.
‘‘কো ত্ৰং ব্রহাবাহু ৰনস্স মজ্ঝে, ৰিরোচসি ঘতসিত্তোৰ অগ্গি;
মহেসক্খো অঞ্ঞতরোসি যক্খো, উদাহু নাগোসি মহানুভাৰো’’.
‘‘নাগোহমস্মি ¶ ইদ্ধিমা, তেজস্সী [তেজসী (সী. স্যা. পী. ক.)] দুরতিক্কমো;
ডংসেয্যং তেজসা কুদ্ধো, ফীতং জনপদং অপি.
‘‘সমুদ্দজা হি মে মাতা, ধতরট্ঠো চ মে পিতা;
সুদস্সনকনিট্ঠোস্মি, ভূরিদত্তোতি মং ৰিদূ’’.
‘‘যং গম্ভীরং সদাৰট্টং, রহদং ভিস্মং পেক্খসি;
এস দিব্যো মমাৰাসো, অনেকসতপোরিসো.
‘‘মযূরকোঞ্চাভিরুদং, নীলোদং ৰনমজ্ঝতো;
যমুনং পৰিস মা ভীতো, খেমং ৰত্তৰতং [ৰত্তৰতিং (স্যা. ক.)] সিৰং’’.
‘‘তত্থ পত্তো সানুচরো, সহ পুত্তেন ব্রাহ্মণ;
পূজিতো ময্হং কামেহি, সুখং ব্রাহ্মণ ৰচ্ছসি’’.
‘‘সমা সমন্তপরিতো, পহূততগরা [বহুকা তগ্গরা (সী. স্যা. পী.)] মহী;
ইন্দগোপকসঞ্ছন্না, সোভতি হরিতুত্তমা.
‘‘রম্মানি ৰনচেত্যানি, রম্মা হংসূপকূজিতা;
ওপুপ্ফাপদ্মা তিট্ঠন্তি, পোক্খরঞ্ঞো [পোক্খরঞ্ঞা (স্যা. পী.)] সুনিম্মিতা.
‘‘অট্ঠংসা ¶ ¶ সুকতা থম্ভা, সব্বে ৰেল়ুরিযামযা;
সহস্সথম্ভা পাসাদা, পূরা কঞ্ঞাহি জোতরে.
‘‘ৰিমানং উপপন্নোসি, দিব্যং পুঞ্ঞেহি অত্তনো;
অসম্বাধং সিৰং রম্মং, অচ্চন্তসুখসংহিতং.
‘‘মঞ্ঞে সহস্সনেত্তস্স, ৰিমানং নাভিকঙ্খসি;
ইদ্ধী হি ত্যাযং ৰিপুলা, সক্কস্সেৰ জুতীমতো’’.
‘‘মনসাপি ¶ ন পত্তব্বো, আনুভাৰো জুতীমতো;
পরিচারযমানানং, সইন্দানং [ইন্দানং (স্যা. ক.)] ৰসৰত্তিনং’’.
‘‘তং ৰিমানং অভিজ্ঝায, অমরানং সুখেসিনং;
উপোসথং উপৰসন্তো, সেমি ৰম্মিকমুদ্ধনি’’.
‘‘অহঞ্চ মিগমেসানো, সপুত্তো পাৰিসিং ৰনং;
তং মং মতং ৰা জীৰং ৰা, নাভিৰেদেন্তি ঞাতকা.
‘‘আমন্তযে ভূরিদত্তং, কাসিপুত্তং যসস্সিনং;
তযা নো সমনুঞ্ঞাতা, অপি পস্সেমু ঞাতকে’’.
‘‘এসো হি ৰত মে ছন্দো, যং ৰসেসি মমন্তিকে;
ন হি এতাদিসা কামা, সুলভা হোন্তি মানুসে.
‘‘সচে ত্ৰং নিচ্ছসে ৰত্থুং, মম কামেহি পূজিতো;
মযা ত্ৰং সমনুঞ্ঞাতো, সোত্থিং পস্সাহি ঞাতকে’’.
‘‘ধারযিমং মণিং দিব্যং, পসুং পুত্তে চ ৰিন্দতি;
অরোগো সুখিতো হোতি [হোহি (স্যা.)], গচ্ছেৰাদায ব্রাহ্মণ’’.
‘‘কুসলং পটিনন্দামি, ভূরিদত্ত ৰচো তৰ;
পব্বজিস্সামি জিণ্ণোস্মি, ন কামে অভিপত্থযে’’.
‘‘ব্রহ্মচরিযস্স চে ভঙ্গো, হোতি ভোগেহি কারিযং;
অৰিকম্পমানো এয্যাসি, বহুং দস্সামি তে ধনং’’.
‘‘কুসলং পটিনন্দামি, ভূরিদত্ত ৰচো তৰ;
পুনপি আগমিস্সামি, সচে অত্থো ভৰিস্সতি’’.
‘‘ইদং ¶ ¶ ৰত্ৰা ভূরিদত্তো, পেসেসি চতুরো জনে;
এথ গচ্ছথ উট্ঠেথ, খিপ্পং পাপেথ ব্রাহ্মণং.
তস্স তং ৰচনং সুত্ৰা, উট্ঠায চতুরো জনা;
পেসিতা ভূরিদত্তেন, খিপ্পং পাপেসু ব্রাহ্মণং.
‘‘মণিং ¶ পগ্গয্হ মঙ্গল্যং, সাধুৰিত্তং [সাধুচিত্তং (পী.)] মনোরমং;
সেলং ব্যঞ্জনসম্পন্নং, কো ইমং মণিমজ্ঝগা’’.
‘‘লোহিতক্খসহস্সাহি, সমন্তা পরিৰারিতং;
অজ্জ কালং পথং [পদং (সী. পী.)] গচ্ছং, অজ্ঝগাহং মণিং ইমং’’.
‘‘সুপচিণ্ণো অযং সেলো, অচ্চিতো মহিতো [মানিতো (ক.)] সদা;
সুধারিতো সুনিক্খিত্তো, সব্বত্থমভিসাধযে.
‘‘উপচারৰিপন্নস্স, নিক্খেপে ধারণায ৰা;
অযং সেলো ৰিনাসায, পরিচিণ্ণো অযোনিসো.
‘‘ন ইমং অকুসলো [কুসলং (ক.)] দিব্যং, মণিং ধারেতুমারহো;
পটিপজ্জ সতং নিক্খং, দেহিমং রতনং মম’’.
‘‘ন চ ম্যাযং মণী কেয্যো, গোহি [কেহি (ক.)] ৰা রতনেহি ৰা;
সেলো ব্যঞ্জনসম্পন্নো, নেৰ কেয্যো মণী মম’’.
‘‘নো চে তযা মণী কেয্যো, গোহি [কেহি (ক.)] ৰা রতনেহি ৰা;
অথ কেন মণী কেয্যো, তং মে অক্খাহি পুচ্ছিতো’’.
‘‘যো মে সংসে মহানাগং, তেজস্সিং দুরতিক্কমং;
তস্স ¶ দজ্জং ইমং সেলং, জলন্তমিৰ তেজসা’’.
‘‘কো নু ব্রাহ্মণৰণ্ণেন, সুপণ্ণো পততং ৰরো;
নাগং জিগীসমন্ৰেসি, অন্ৰেসং ভক্খমত্তনো.
‘‘নাহং দিজাধিপো হোমি, ন দিট্ঠো গরুল়ো মযা;
আসীৰিসেন ৰিত্তোতি [ৰিত্তোস্মি (স্যা. ক.)], ৰজ্জো ব্রাহ্মণ মং ৰিদূ’’.
‘‘কিং নু তুয্হং বলং অত্থি, কিং সিপ্পং ৰিজ্জতে তৰ;
কিস্মিং ৰা ত্ৰং পরত্থদ্ধো, উরগং নাপচাযসি’’.
‘‘আরঞ্ঞিকস্স ¶ ইসিনো, চিররত্তং তপস্সিনো;
সুপণ্ণো কোসিযস্সক্খা, ৰিসৰিজ্জং অনুত্তরং.
‘‘তং ভাৰিতত্তঞ্ঞতরং, সম্মন্তং পব্বতন্তরে;
সক্কচ্চং তং উপট্ঠাসিং, রত্তিন্দিৰমতন্দিতো.
‘‘সো তদা পরিচিণ্ণো মে, ৰত্তৰা ব্রহ্মচরিযৰা;
দিব্বং পাতুকরী মন্তং, কামসা ভগৰা মম.
‘‘ত্যাহং মন্তে পরত্থদ্ধো, নাহং ভাযামি ভোগিনং;
আচরিযো ৰিসঘাতানং, অলম্পানোতি [আলম্বানোতি (সী. পী.), আলম্বাযনোতি (স্যা.)] মং ৰিদূ’’.
‘‘গণ্হামসে ¶ মণিং তাত, সোমদত্ত ৰিজানহি;
মা দণ্ডেন সিরিং পত্তং, কামসা পজহিম্হসে’’.
‘‘সকং নিৰেসনং পত্তং, যো তং ব্রাহ্মণ পূজযি;
এৰং কল্যাণকারিস্স, কিং মোহা দুব্ভিমিচ্ছসি’’.
‘‘সচে ¶ ত্ৰং [সচে হি (সী. পী. ক.)] ধনকামোসি, ভূরিদত্তো পদস্সতি [ভূরিদত্তং পদিস্সসি (ক.)];
তমেৰ গন্ত্ৰা যাচস্সু, বহুং দস্সতি তে ধনং’’.
‘‘হত্থগতং পত্তগতং, নিকিণ্ণং খাদিতুং ৰরং;
মা নো সন্দিট্ঠিকো অত্থো, সোমদত্ত উপচ্চগা’’.
‘‘পচ্চতি নিরযে ঘোরে, মহিস্সমপি ৰিৰরতি [মহিস্সমৰ দীযতি (সী. পী.), মহিমস্স ৰিন্দ্রীযতি (স্যা.)];
মিত্তদুব্ভী হিতচ্চাগী, জীৰরেৰাপি সুস্সতি [জীৰরে চাপি সুস্সরে (সী. পী.)].
‘‘সচে ত্ৰং [সচে হি (সী. পী. ক.)] ধনকামোসি, ভূরিদত্তো পদস্সতি;
মঞ্ঞে অত্তকতং ৰেরং, নচিরং ৰেদযিস্সসি’’.
‘‘মহাযঞ্ঞং যজিত্ৰান, এৰং সুজ্ঝন্তি ব্রাহ্মণা;
মহাযঞ্ঞং যজিস্সাম, এৰং মোক্খাম পাপকা’’.
‘‘হন্দ দানি অপাযামি, নাহং অজ্জ তযা সহ;
পদম্পেকং [পদমেকং (স্যা. ক.)] ন গচ্ছেয্যং, এৰং কিব্বিসকারিনা’’.
‘‘ইদং ¶ ৰত্ৰান পিতরং, সোমদত্তো বহুস্সুতো;
উজ্ঝাপেত্ৰান ভূতানি, তম্হা ঠানা অপক্কমি.
‘‘গণ্হাহেতং মহানাগং, আহরেতং মণিং মম;
ইন্দগোপকৰণ্ণাভো, যস্স লোহিতকো সিরো.
‘‘কপ্পাসপিচুরাসীৰ, এসো কাযো পদিস্সতি [কায’স্স দিস্সতি (সী. পী.)];
ৰম্মিকগ্গগতো সেতি, তং ত্ৰং গণ্হাহি ব্রাহ্মণ’’.
‘‘অথোসধেহি দিব্বেহি, জপ্পং মন্তপদানি চ;
এৰং তং অসক্খি সত্থুং [সট্ঠুং (সী. পী.), যুট্ঠুং (স্যা.), সুত্তুং (ক.)], কত্ৰা পরিত্তমত্তনো’’.
‘‘মমং ¶ দিস্ৰান আযন্তং, সব্বকামসমিদ্ধিনং;
ইন্দ্রিযানি অহট্ঠানি, সাৰং [সামং (সী. পী.)] জাতং মুখং তৰ.
‘‘পদ্মং যথা হত্থগতং, পাণিনা পরিমদ্দিতং;
সাৰং জাতং [যন্তং (ক.)] মুখং তুয্হং, মমং দিস্ৰান এদিসং.
‘‘কচ্চি নু তে নাভিসসি [তে নাভিসযি (সী.), তে নাভিস্সসি (স্যা.)], কচ্চি তে অত্থি ৰেদনা;
যেন সাৰং মুখং তুয্হং, মমং দিস্ৰান আগতং’’.
‘‘সুপিনং ¶ তাত অদ্দক্খিং, ইতো মাসং অধোগতং;
দক্খিণং ৰিয মে বাহুং, ছেত্ৰা রুহিরমক্খিতং;
পুরিসো আদায পক্কামি, মম রোদন্তিযা সতি.
‘‘যতোহং [যতো তং (সী.)] সুপিনমদ্দক্খিং, সুদস্সন ৰিজানহি;
ততো দিৰা ৰা রত্তিং ৰা, সুখং মে নোপলব্ভতি’’.
‘‘যং পুব্বে পরিৰারিংসু [পরিচারিংসু (সী. পী.)], কঞ্ঞা রুচিরৰিগ্গহা;
হেমজালপটিচ্ছন্না, ভূরিদত্তো ন দিস্সতি.
‘‘যং পুব্বে পরিৰারিংসু [পরিচারিংসু (সী. পী.)], নেত্তিংসৰরধারিনো;
কণিকারাৰ সম্ফুল্লা, ভূরিদত্তো ন দিস্সতি.
‘‘হন্দ ¶ দানি গমিস্সাম, ভূরিদত্তনিৰেসনং;
ধম্মট্ঠং সীলসম্পন্নং, পস্সাম তৰ ভাতরং’’.
‘‘তঞ্চ দিস্ৰান আযন্তিং, ভূরিদত্তস্স মাতরং;
বাহা পগ্গয্হ পক্কন্দুং, ভূরিদত্তস্স নারিযো.
‘‘পুত্তং তেয্যে ন জানাম, ইতো মাসং অধোগতং;
মতং ¶ ৰা যদি ৰা জীৰং, ভূরিদত্তং যসস্সিনং’’.
‘‘সকুণী হতপুত্তাৰ, সুঞ্ঞং দিস্ৰা কুলাৰকং;
চিরং দুক্খেন ঝাযিস্সং, ভূরিদত্তং অপস্সতী [ইমিস্সা গাথাযানন্তরে সী. পী. পোত্থকেসু – ‘‘সকুণী হতপুত্তাৰ, সুঞ্ঞং দিস্ৰা কুলাৰকং; তেন তেন পধাৰিস্স, পিযপুত্তং অপস্সতী’’তি ইতি অযম্পি গাথা আগতা].
‘‘কুররী হতছাপাৰ, সুঞ্ঞং দিস্ৰা কুলাৰকং;
চিরং দুক্খেন ঝাযিস্সং, ভূরিদত্তং অপস্সতী.
‘‘সা নূন চক্কৰাকীৰ, পল্ললস্মিং অনোদকে;
চিরং দুক্খেন ঝাযিস্সং, ভূরিদত্তং অপস্সতী.
‘‘কম্মারানং যথা উক্কা, অন্তো ঝাযতি নো বহি;
এৰং ঝাযামি সোকেন, ভূরিদত্তং অপস্সতী’’.
‘‘সালাৰ সম্পমথিতা [সম্পমদ্দিতা (স্যা. ক.)], মালুতেন পমদ্দিতা;
সেন্তি পুত্তা চ দারা চ, ভূরিদত্তনিৰেসনে’’.
‘‘ইদং সুত্ৰান নিগ্ঘোসং, ভূরিদত্তনিৰেসনে;
অরিট্ঠো চ সুভোগো [সুভগো (সী. পী.)] চ, পধাৰিংসু অনন্তরা [উপধাৰিংসু অনন্তরা (সী. পী.)].
‘‘অম্ম ¶ অস্সাস মা সোচি, এৰংধম্মা হি পাণিনো;
চৰন্তি উপপজ্জন্তি, এসস্স পরিণামিতা’’.
‘‘অহম্পি তাত জানামি, এৰংধম্মা হি পাণিনো;
সোকেন চ পরেতস্মি, ভূরিদত্তং অপস্সতী.
‘‘অজ্জ চে মে ইমং রত্তিং, সুদস্সন ৰিজানহি;
ভূরিদত্তং অপস্সন্তী, মঞ্ঞে হিস্সামি জীৰিতং’’.
‘‘অম্ম ¶ অস্সাস মা সোচি, আনযিস্সাম ভাতরং;
দিসোদিসং ¶ গমিস্সাম, ভাতুপরিযেসনং চরং.
‘‘পব্বতে গিরিদুগ্গেসু, গামেসু নিগমেসু চ;
ওরেন সত্তরত্তস্স [ওরেন দসরত্তস্স (সী. পী.)], ভাতরং পস্স আগতং’’.
‘‘হত্থা পমুত্তো উরগো, পাদে তে নিপতী ভুসং;
কচ্চি নু তং ডংসী তাত [কচ্চি তং নু ডসী তাত (সী.), কচ্চি নু ডংসিতো তাত (স্যা.), কচ্চিতানুডসী তাত (পী.)], মা ভাযি সুখিতো ভৰ’’.
‘‘নেৰ ময্হং অযং নাগো, অলং দুক্খায কাযচি;
যাৰতত্থি অহিগ্গাহো, মযা ভিয্যো ন ৰিজ্জতি’’.
‘‘কো নু ব্রাহ্মণৰণ্ণেন, দিত্তো [দত্তো (সী. স্যা. পী.)] পরিসমাগতো;
অৰ্হাযন্তু সুযুদ্ধেন, সুণন্তু পরিসা মম’’.
‘‘ত্ৰং মং নাগেন আলম্প, অহং মণ্ডূকছাপিযা;
হোতু নো অব্ভুতং তত্থ, আসহস্সেহি পঞ্চহি’’.
‘‘অহঞ্হি ৰসুমা অড্ঢো, ত্ৰং দলিদ্দোসি মাণৰ;
কো নু তে পাটিভোগত্থি, উপজূতঞ্চ কিং সিযা.
‘‘উপজূতঞ্চ মে অস্স, পাটিভোগো চ তাদিসো;
হোতু নো অব্ভুতং তত্থ, আসহস্সেহি পঞ্চহি’’.
‘‘সুণোহি মে মহারাজ, ৰচনং ভদ্দমত্থু তে;
পঞ্চন্নং মে সহস্সানং, পাটিভোগো হি কিত্তিম’’.
‘‘পেত্তিকং ৰা ইণং হোতি, যং ৰা হোতি সযংকতং;
কিং ত্ৰং এৰং বহুং ময্হং, ধনং যাচসি ব্রাহ্মণ’’.
‘‘অলম্পানো হি নাগেন, মমং অভিজিগীসতি [অভিজিগিংসতি (সী. স্যা. পী.)];
অহং ¶ মণ্ডূকছাপিযা, ডংসযিস্সামি ব্রাহ্মণং.
‘‘তং ত্ৰং দট্ঠুং মহারাজ, অজ্জ রট্ঠাভিৰড্ঢন;
খত্তসঙ্ঘপরিব্যূল়্হো, নিয্যাহি অহিদস্সনং’’ [অভিদস্সনং (সী. পী.)].
‘‘নেৰ ¶ ¶ তং অতিমঞ্ঞামি, সিপ্পৰাদেন মাণৰ;
অতিমত্তোসি সিপ্পেন, উরগং নাপচাযসি’’.
‘‘অহম্পি নাতিমঞ্ঞামি, সিপ্পৰাদেন ব্রাহ্মণ;
অৰিসেন চ নাগেন, ভুসং ৰঞ্চযসে জনং.
‘‘এৰং চেতং জনো জঞ্ঞা, যথা জানামি তং অহং;
ন ত্ৰং লভসি আলম্প, ভুসমুট্ঠিং [থুসমুট্ঠিং (স্যা.), সত্তুমুট্ঠিং (সী. পী.)] কুতো ধনং’’.
‘‘খরাজিনো জটী দুম্মী [রুম্মী (সী. স্যা. পী.)], দিত্তো পরিসমাগতো;
যো ত্ৰং এৰং গতং নাগং, অৰিসো অতিমঞ্ঞসি.
‘‘আসজ্জ খো নং জঞ্ঞাসি, পুণ্ণং উগ্গস্স তেজসো;
মঞ্ঞে তং ভস্মরাসিংৰ, খিপ্পমেসো করিস্সতি’’.
‘‘সিযা ৰিসং সিলুত্তস্স, দেড্ডুভস্স সিলাভুনো;
নেৰ লোহিতসীসস্স, ৰিসং নাগস্স ৰিজ্জতি’’.
‘‘সুতমেতং অরহতং, সঞ্ঞতানং তপস্সিনং;
ইধ দানানি দত্ৰান, সগ্গং গচ্ছন্তি দাযকা;
জীৰন্তো দেহি দানানি, যদি তে অত্থি দাতৰে.
‘‘অযং নাগো মহিদ্ধিকো, তেজস্সী দুরতিক্কমো;
তেন তং ডংসযিস্সামি, সো তং ভস্মং করিস্সতি’’.
‘‘মযাপেতং ¶ সুতং সম্ম, সঞ্ঞতানং তপস্সিনং;
ইধ দানানি দত্ৰান, সগ্গং গচ্ছন্তি দাযকা;
ত্ৰমেৰ দেহি জীৰন্তো, যদি তে অত্থি দাতৰে.
‘‘অযং অজমুখী [অচ্চিমুখী (সী. স্যা. পী.)] নাম, পুণ্ণা উগ্গস্স তেজসো;
তায তং ডংসযিস্সামি, সা তং ভস্মং করিস্সতি’’.
‘‘যা ধীতা ধতরট্ঠস্স, ৰেমাতা ভগিনী মম;
সা তং ডংসত্ৰজমুখী [সা দিস্সতু অচ্চিমুখী (সী. পী.)], পুণ্ণা উগ্গস্স তেজসো’’.
‘‘ছমাযং চে নিসিঞ্চিস্সং, ব্রহ্মদত্ত ৰিজানহি;
তিণলতানি ওসধ্যো, উস্সুস্সেয্যুং অসংসযং.
‘‘উদ্ধং ¶ চে পাতযিস্সামি, ব্রহ্মদত্ত ৰিজানহি;
সত্ত ৰস্সানিযং দেৰো, ন ৰস্সে ন হিমং পতে.
‘‘উদকে চে নিসিঞ্চিস্সং, ব্রহ্মদত্ত ৰিজানহি;
যাৰন্তোদকজা [যাৰতা ওদকা (সী.), যাৰতা উদকজা (পী.)] পাণা, মরেয্যুং মচ্ছকচ্ছপা’’.
‘‘লোক্যং ¶ সজন্তং উদকং, পযাগস্মিং পতিট্ঠিতং;
কোমং অজ্ঝোহরী ভূতো, ওগাল়্হং যমুনং নদিং’’.
‘‘যদেস লোকাধিপতী যসস্সী, বারাণসিং পক্রিয [পকিরপরী (সী. পী.), পকিরহরী (স্যা.)] সমন্ততো;
তস্সাহ পুত্তো উরগূসভস্স, সুভোগোতি মং ব্রাহ্মণ ৰেদযন্তি’’.
‘‘সচে হি পুত্তো উরগূসভস্স, কাসিস্স ¶ [কংসস্স (সী. পী.)] রঞ্ঞো অমরাধিপস্স;
মহেসক্খো অঞ্ঞতরো পিতা তে, মচ্চেসু মাতা পন তে অতুল্যা;
ন তাদিসো অরহতি ব্রাহ্মণস্স, দাসম্পি ওহারিতুং [ওহাতুং (সী. পী.)] মহানুভাৰো’’.
‘‘রুক্খং নিস্সায ৰিজ্ঝিত্থো, এণেয্যং পাতুমাগতং;
সো ৰিদ্ধো দূরমচরি [দূর’মসরা (সী. পী.)], সরৰেগেন সীঘৰা [সেখৰা (সী. পী.), পেক্খৰা (স্যা. ক.)].
‘‘তং ত্ৰং পতিতমদ্দক্খি, অরঞ্ঞস্মিং ব্রহাৰনে;
সমং সকাজমাদায, সাযং নিগ্রোধুপাগমি.
‘‘সুকসাল়িকসঙ্ঘুট্ঠং, পিঙ্গলং [পিঙ্গিযং (সী. স্যা. পী.)] সন্থতাযুতং;
কোকিলাভিরুদং রম্মং, ধুৰং হরিতসদ্দলং.
‘‘তত্থ তে সো পাতুরহু, ইদ্ধিযা যসসা জলং;
মহানুভাৰো ভাতা মে, কঞ্ঞাহি পরিৰারিতো.
‘‘সো তেন পরিচিণ্ণো ত্ৰং, সব্বকামেহি তপ্পিতো;
অদুট্ঠস্স তুৰং দুব্ভি, তং তে ৰেরং ইধাগতং.
‘‘খিপ্পং ¶ গীৰং পসারেহি, ন তে দস্সামি জীৰিতং;
ভাতু পরিসরং ৰেরং, ছেদযিস্সামি তে সিরং’’.
‘‘অজ্ঝাযকো যাচযোগী, আহুতগ্গি চ ব্রাহ্মণো;
এতেহি তীহি ঠানেহি, অৰজ্ঝো হোতি [ভৰতি (সী. স্যা. পী.)] ব্রাহ্মণো’’.
‘‘যং পূরং ধতরট্ঠস্স, ওগাল়্হং যমুনং নদিং;
জোততে ¶ সব্বসোৰণ্ণং, গিরিমাহচ্চ যামুনং.
‘‘তত্থ তে পুরিসব্যগ্ঘা, সোদরিযা মম ভাতরো;
যথা তে তত্থ ৰক্খন্তি, তথা হেস্সসি ব্রাহ্মণ’’.
‘‘অনিত্তরা ইত্তরসম্পযুত্তা, যঞ্ঞা চ ৰেদা চ সুভোগলোকে;
তদগ্গরয্হঞ্হি ৰিনিন্দমানো, জহাতি ৰিত্তঞ্চ সতঞ্চ ধম্মং.
‘‘অজ্ঝেনমরিযা ¶ পথৰিং জনিন্দা, ৰেস্সা কসিং পারিচরিযঞ্চ সুদ্দা;
উপাগু পচ্চেকং যথাপদেসং, কতাহু এতে ৰসিনাতি আহু’’.
‘‘ধাতা ৰিধাতা ৰরুণো কুৰেরো, সোমো যমো চন্দিমা ৰাযু সূরিযো;
এতেপি যঞ্ঞং পুথুসো যজিত্ৰা, অজ্ঝাযকানং অথো সব্বকামে.
‘‘ৰিকাসিতা চাপসতানি পঞ্চ, যো অজ্জুনো বলৰা ভীমসেনো;
সহস্সবাহু অসমো পথব্যা, সোপি তদা মাদহি জাতৰেদং’’.
‘‘যো ব্রাহ্মণে ভোজযি দীঘরত্তং, অন্নেন ¶ পানেন যথানুভাৰং;
পসন্নচিত্তো অনুমোদমানো, সুভোগ দেৰঞ্ঞতরো অহোসি’’.
‘‘মহাসনং ¶ দেৰমনোমৰণ্ণং, যো সপ্পিনা অসক্খি ভোজেতুমগ্গিং [জেতুমগ্গিং (সী. পী.)];
স যঞ্ঞতন্তং ৰরতো যজিত্ৰা, দিব্বং গতিং মুচলিন্দজ্ঝগচ্ছি’’.
‘‘মহানুভাৰো ৰস্সসহস্সজীৰী, যো পব্বজী দস্সনেয্যো উল়ারো;
হিত্ৰা অপরিযন্তরট্ঠং [রথং (সী. পী.)] সসেনং, রাজা দুদীপোপি জগাম [দুদীপোপজ্ঝগামি (স্যা.)] সগ্গং’’.
‘‘যো সাগরন্তং সাগরো ৰিজিত্ৰা, যূপং সুভং সোণ্ণমযং [সোৰণ্ণমযং (স্যা. ক.)] উল়ারং;
উস্সেসি ৰেস্সানরমাদহানো, সুভোগ দেৰঞ্ঞতরো অহোসি.
‘‘যস্সানুভাৰেন সুভোগ গঙ্গা, পৰত্তথ [পৰত্ততি (স্যা. ক.)] দধিসন্নিসিন্নং [দধিসন্ন (সী. পী.)] সমুদ্দং;
সলোমপাদো পরিচরিযমগ্গিং, অঙ্গো সহস্সক্খপুরজ্ঝগচ্ছি’’.
‘‘মহিদ্ধিকো দেৰৰরো যসস্সী, সেনাপতি ¶ তিদিৰে ৰাসৰস্স;
সো সোমযাগেন মলং ৰিহন্ত্ৰা, সুভোগ দেৰঞ্ঞতরো অহোসি’’.
‘‘অকারযি লোকমিমং পরঞ্চ, ভাগীরথিং হিমৰন্তঞ্চ গিজ্ঝং [গিজ্ঝং (স্যা. ক.), ৰিঞ্ঝং (?)];
যো ইদ্ধিমা দেৰৰরো যসস্সী, সোপি তদা আদহি জাতৰেদং.
‘‘মালাগিরী ¶ হিমৰা যো চ গিজ্ঝো [ৰিজ্ঝো (ক.), ৰিজ্ঝা (স্যা.)], সুদস্সনো নিসভো কুৰেরু [কাকনেরু (সী. পী.), কাকৰেরু (স্যা.)];
এতে চ অঞ্ঞে চ নগা মহন্তা, চিত্যা কতা যঞ্ঞকরেহি মাহু’’.
‘‘অজ্ঝাযকং মন্তগুণূপপন্নং, তপস্সিনং যাচযোগোতিধাহু [তিচাহ (সী. পী.), তি চাহু (ক.)];
তীরে সমুদ্দস্সুদকং সজন্তং [সিঞ্চন্তং (ক.)], সাগরোজ্ঝোহরি তেনপেয্যো.
‘‘আযাগৰত্থূনি পুথূ পথব্যা, সংৰিজ্জন্তি ব্রাহ্মণা ৰাসৰস্স;
পুরিমং দিসং পচ্ছিমং দক্খিণুত্তরং, সংৰিজ্জমানা জনযন্তি ৰেদং’’.
‘‘কলী হি ধীরান কটং মগানং, ভৰন্তি ¶ ৰেদজ্ঝগতানরিট্ঠ;
মরীচিধম্মং অসমেক্খিতত্তা, মাযাগুণা নাতিৰহন্তি পঞ্ঞং.
‘‘ৰেদা ন তাণায ভৰন্তি দস্স, মিত্তদ্দুনো ভূনহুনো নরস্স;
ন তাযতে পরিচিণ্ণো চ অগ্গি, দোসন্তরং মচ্চমনরিযকম্মং.
‘‘সব্বঞ্চ ¶ মচ্চা সধনং সভোগং [সধনা সভোগা (সী. স্যা. পী. ক.)], আদীপিতং দারু তিণেন মিস্সং;
দহং ন তপ্পে [ন তপ্পে অগ্গি (ক.)] অসমত্থতেজো, কো তং সুভিক্খং দ্ৰিরসঞ্ঞু কযিরা [দিরসঞ্ঞ কুরিযা (সী.), দিরসঞ্ঞু কুরিযা (পী.)].
‘‘যথাপি ¶ খীরং ৰিপরিণামধম্মং, দধি ভৰিত্ৰা নৰনীতম্পি হোতি;
এৰম্পি অগ্গি ৰিপরিণামধম্মো, তেজো সমোরোহতী যোগযুত্তো.
‘‘ন দিস্সতী অগ্গিমনুপ্পৰিট্ঠো, সুক্খেসু কট্ঠেসু নৰেসু চাপি;
নামত্থমানো [নামন্থমানো (সী. পী.)] অরণীনরেন, নাকম্মুনা জাযতি জাতৰেদো.
‘‘সচে হি অগ্গি অন্তরতো ৰসেয্য, সুক্খেসু ¶ কট্ঠেসু নৰেসু চাপি;
সব্বানি সুস্সেয্যু ৰনানি লোকে, সুক্খানি কট্ঠানি চ পজ্জলেয্যুং.
‘‘করোতি চে দারুতিণেন পুঞ্ঞং, ভোজং নরো ধূমসিখিং পতাপৰং;
অঙ্গারিকা লোণকরা চ সূদা, সরীরদাহাপি করেয্যু পুঞ্ঞং.
‘‘অথ চে হি এতে ন করোন্তি পুঞ্ঞং, অজ্ঝেনমগ্গিং ইধ তপ্পযিত্ৰা;
ন কোচি লোকস্মিং করোতি পুঞ্ঞং, ভোজং নরো ধূমসিখিং পতাপৰং.
‘‘কথঞ্হি লোকাপচিতো সমানো, অমনুঞ্ঞগন্ধং বহূনং অকন্তং;
যদেৰ মচ্চা পরিৰজ্জযন্তি, তদপ্পসত্থং দ্ৰিরসঞ্ঞু ভুঞ্জে.
‘‘সিখিম্পি দেৰেসু ৰদন্তি হেকে, আপং মিলক্খূ [মিলক্খা (সী. পী.)] পন দেৰমাহু;
সব্বেৰ এতে ৰিতথং ভণন্তি [গণ্হন্তি (ক.)], অগ্গী ন দেৰঞ্ঞতরো ন চাপো.
‘‘অনিন্দ্রিযবদ্ধমসঞ্ঞকাযং ¶ [নিরিন্দ্রিযং অন্তং অসঞ্ঞকাযং (সী. পী.), অনিদ্রিযং সন্তমসঞ্ঞকাযং (স্যা.)], ৰেস্সানরং ¶ কম্মকরং পজানং;
পরিচরিয মগ্গিং সুগতিং কথং ৰজে, পাপানি কম্মানি পকুব্বমানো [পকূব্বমানো (স্যা. ক.)].
‘‘সব্বাভিভূ তাহুধ জীৰিকত্থা, অগ্গিস্স ব্রহ্মা পরিচারকোতি;
সব্বানুভাৰী চ ৰসী কিমত্থং, অনিম্মিতো নিম্মিতং ৰন্দিতস্স.
‘‘হস্সং অনিজ্ঝানখমং অতচ্ছং, সক্কারহেতু পকিরিংসু পুব্বে;
তে লাভসক্কারে অপাতুভোন্তে, সন্ধাপিতা [সন্থম্ভিতা (সী. পী.), সন্ধাভিতা (স্যা.), সন্তাপিতা (ক.)] জন্তুভি সন্তিধম্মং.
‘‘অজ্ঝেনমরিযা পথৰিং জনিন্দা, ৰেস্সা কসিং পারিচরিযঞ্চ সুদ্দা;
উপাগু পচ্চেকং যথাপদেসং, কতাহু এতে ৰসিনাতি আহু.
‘‘এতঞ্চ সচ্চং ৰচনং ভৰেয্য, যথা ইদং ভাসিতং ব্রাহ্মণেহি;
নাখত্তিযো জাতু লভেথ রজ্জং, নাব্রাহ্মণো মন্তপদানি সিক্খে;
নাঞ্ঞত্র ৰেস্সেহি কসিং করেয্য, সুদ্দো ¶ ন মুচ্চে পরপেসনায [পরপেস্সিতায (সী. পী.)].
‘‘যস্মা চ এতং ৰচনং অভূতং, মুসাৰিমে ওদরিযা ভণন্তি;
তদপ্পপঞ্ঞা অভিসদ্দহন্তি, পস্সন্তি তং পণ্ডিতা অত্তনাৰ.
‘‘খত্যা ¶ ¶ হি ৰেস্সানং [খত্তা ন ৰেস্সা ন (সী. পী.)] বলিং হরন্তি, আদায সত্থানি চরন্তি ব্রাহ্মণা;
তং তাদিসং সঙ্খুভিতং পভিন্নং, কস্মা ব্রহ্মা নুজ্জু করোতি লোকং.
‘‘সচে হি সো ইস্সরো সব্বলোকে, ব্রহ্মা বহূভূতপতী [ব্রহ্মপহূ ভূতপতী (স্যা.)] পজানং;
কিং সব্বলোকং ৰিদহী অলক্খিং, কিং সব্বলোকং ন সুখিং অকাসি.
‘‘সচে হি সো ইস্সরো সব্বলোকে, ব্রহ্মা বহূভূতপতী পজানং;
মাযা মুসাৰজ্জমদেন [মুসাৰঞ্চনপদেন (ক.)] চাপি, লোকং অধম্মেন কিমত্থমকারি [কিমত্থ’কাসি (সী. পী.), কিমত্থকারী (স্যা.)].
‘‘সচে হি সো ইস্সরো সব্বলোকে, ব্রহ্মা বহূভূতপতী পজানং;
অধম্মিকো ¶ ভূতপতী অরিট্ঠ, ধম্মে সতি যো ৰিদহী অধম্মং.
‘‘কীটা পটঙ্গা উরগা চ ভেকা [ভিঙ্গা (স্যা.)], হন্ত্ৰা কিমী সুজ্ঝতি মক্খিকা চ;
এতেপি ধম্মা অনরিযরূপা, কম্বোজকানং ৰিতথা বহূনং.
‘‘সচে হি সো সুজ্ঝতি যো হনাতি, হতোপি সো সগ্গমুপেতি ঠানং;
ভোৰাদি ভোৰাদিন মারযেয্যুং [মারভেয্যুং (ক.)], যে চাপি তেসং অভিসদ্দহেয্যুং.
‘‘নেৰ ¶ মিগা ন পসূ নোপি গাৰো, আযাচন্তি অত্তৰধায কেচি;
ৰিপ্ফন্দমানে ইধ জীৰিকত্থা, যঞ্ঞেসু পাণে পসুমারভন্তি [মাহরন্তি (সী. স্যা. পী.)].
‘‘যূপুস্সনে [যূপস্স তে (সী.), যূপস্স নে (পী.)] পসুবন্ধে চ বালা, চিত্তেহি ৰণ্ণেহি মুখং নযন্তি;
অযং তে যূপো কামদুহো পরত্থ, ভৰিস্সতি সস্সতো সম্পরাযে.
‘‘সচে চ যূপে মণিসঙ্খমুত্তং, ধঞ্ঞং ¶ ধনং রজতং জাতরূপং;
সুক্খেসু কট্ঠেসু নৰেসু চাপি, সচে দুহে তিদিৰে সব্বকামে;
তেৰিজ্জসঙ্ঘাৰ পুথূ যজেয্যুং, অব্রাহ্মণং [ন ব্রাহ্মণা (সী. স্যা.)] কঞ্চি ন যাজযেয্যুং.
‘‘কুতো চ যূপে মণিসঙ্খমুত্তং, ধঞ্ঞং ধনং রজতং জাতরূপং;
সুক্খেসু কট্ঠেসু নৰেসু চাপি, কুতো দুহে তিদিৰে সব্বকামে.
‘‘সঠা চ লুদ্দা চ পলুদ্ধবালা [উপলদ্ধবালা (সী. পী.)], চিত্তেহি ৰণ্ণেহি মুখং নযন্তি;
আদায অগ্গিং মম দেহি ৰিত্তং, ততো সুখী হোহিসি সব্বকামে.
‘‘তমগ্গিহুত্তং সরণং পৰিস্স, চিত্তেহি ৰণ্ণেহি মুখং নযন্তি;
ওরোপযিত্ৰা কেসমস্সুং নখঞ্চ, ৰেদেহি ৰিত্তং অতিগাল়্হযন্তি [অতিগাল়যন্তি (সী. পী.)].
‘‘কাকা ¶ উলূকংৰ রহো লভিত্ৰা, একং সমানং বহুকা সমেচ্চ;
অন্নানি ভুত্ৰা কুহকা কুহিত্ৰা, মুণ্ডং ¶ করিত্ৰা যঞ্ঞপথোস্সজন্তি.
‘‘এৰঞ্হি সো ৰঞ্চিতো ব্রাহ্মণেহি, একো সমানো বহুকা [বহুহী (সী.)] সমেচ্চ;
তে যোগযোগেন ৰিলুম্পমানা, দিট্ঠং অদিট্ঠেন ধনং হরন্তি.
‘‘অকাসিযা ¶ রাজূহিৰানুসিট্ঠা, তদস্স আদায ধনং হরন্তি;
তে তাদিসা চোরসমা অসন্তা, ৰজ্ঝা ন হঞ্ঞন্তি অরিট্ঠ লোকে.
‘‘ইন্দস্স বাহারসি দক্খিণাতি, যঞ্ঞেসু ছিন্দন্তি পলাসযট্ঠিং;
তং চেপি সচ্চং মঘৰা ছিন্নবাহু, কেনস্স ইন্দো অসুরে জিনাতি.
‘‘তঞ্চেৰ তুচ্ছং মঘৰা সমঙ্গী, হন্তা অৰজ্ঝো পরমো স দেৰো [সুদেৰো (স্যা. ক.)];
মন্তা ইমে ব্রাহ্মণা তুচ্ছরূপা, সন্দিট্ঠিকা ৰঞ্চনা এস লোকে.
‘‘মালাগিরি হিমৰা যো চ গিজ্ঝো, সুদস্সনো নিসভো কুৰেরু;
এতে চ অঞ্ঞে চ নগা মহন্তা, চিত্যা ¶ কতা যঞ্ঞকরেহি মাহু.
‘‘যথাপকারানি হি ইট্ঠকানি, চিত্যা কতা যঞ্ঞকরেহি মাহু;
ন পব্বতা হোন্তি তথাপকারা, অঞ্ঞা দিসা অচলা তিট্ঠসেলা.
‘‘ন ¶ ইট্ঠকা হোন্তি সিলা চিরেন [চিরেনপি (সী. পী.)], ন তত্থ সঞ্জাযতি অযো ন লোহং;
যঞ্ঞঞ্চ এতং পরিৰণ্ণযন্তা, চিত্যা কতা যঞ্ঞকরেহি মাহু.
‘‘অজ্ঝাযকং মন্তগুণূপপন্নং, তপস্সিনং যাচযোগোতিধাহু;
তীরে সমুদ্দস্সুদকং সজন্তং, তং সাগরোজ্ঝোহরি তেনপেয্যো.
‘‘পরোসহস্সম্পি সমন্তৰেদে, মন্তূপপন্নে নদিযো ৰহন্তি;
ন তেন ব্যাপন্নরসূদকা ন, কস্মা সমুদ্দো অতুলো অপেয্যো.
‘‘যে কেচি কূপা ইধ জীৰলোকে, লোণূদকা কূপখণেহি খাতা;
ন ব্রাহ্মণজ্ঝোহরণেন [ব্রাহ্মণজ্ঝোহরি তেন (ক.)] তেসু, আপো ¶ অপেয্যো দ্ৰিরসঞ্ঞু মাহু.
‘‘পুরে পুরত্থা কা কস্স ভরিযা, মনো মনুস্সং অজনেসি পুব্বে;
তেনাপি ধম্মেন ন কোচি হীনো, এৰম্পি ৰোস্সগ্গৰিভঙ্গমাহু [ৰোস্সগ্গৰিভাগমাহু (সী.)].
‘‘চণ্ডালপুত্তোপি অধিচ্চ ৰেদে, ভাসেয্য মন্তে কুসলো মতীমা [মুতীমা (সী. পী.)];
ন তস্স মুদ্ধাপি ফলেয্য সত্তধা, মন্তা ইমে অত্তৰধায কতা [কত্ত (সী. পী.)].
‘‘ৰাচাকতা গিদ্ধিকতা [গিদ্ধিগতা (ক.)] গহীতা, দুম্মোচযা কব্যপথানুপন্না;
বালান চিত্তং ৰিসমে নিৰিট্ঠং, তদপ্পপঞ্ঞা অভিসদ্দহন্তি.
‘‘সীহস্স ¶ ব্যগ্ঘস্স চ দীপিনো চ, ন ৰিজ্জতী পোরিসিযংবলেন;
মনুস্সভাৰো চ গৰংৰ পেক্খো, জাতী হি তেসং অসমা সমানা [সমানং (স্যা. ক.)].
‘‘সচে চ রাজা পথৰিং ৰিজিত্ৰা, সজীৰৰা অস্সৰপারিসজ্জো;
সযমেৰ সো সত্তুসঙ্ঘং ৰিজেয্য, তস্সপ্পজা ¶ নিচ্চসুখী [নিচ্চসুখা (পী.)] ভৰেয্য.
‘‘খত্তিযমন্তা চ তযো চ ৰেদা, অত্থেন এতে সমকা ভৰন্তি;
তেসঞ্চ অত্থং অৰিনিচ্ছিনিত্ৰা, ন বুজ্ঝতী ওঘপথংৰ ছন্নং.
‘‘খত্তিযমন্তা ¶ চ তযো চ ৰেদা, অত্থেন এতে সমকা ভৰন্তি;
লাভো অলাভো অযসো যসো চ, সব্বেৰ তেসং চতুন্নঞ্চ [সব্বে তে সব্বেসং চতুন্ন (সী. পী.)] ধম্মা.
‘‘যথাপি ইব্ভা ধনধঞ্ঞহেতু, কম্মানি করোন্তি [কারেন্তি (সী. স্যা. পী.)] পুথূ পথব্যা;
তেৰিজ্জসঙ্ঘা চ তথেৰ অজ্জ, কম্মানি করোন্তি [কারেন্তি (সী. স্যা. পী.)] পুথূ পথব্যা.
‘‘ইব্ভেহি যে তে [এতে (সী. স্যা. পী.)] সমকা ভৰন্তি, নিচ্চুস্সুকা কামগুণেসু যুত্তা;
কম্মানি করোন্তি [কারেন্তি (সী. স্যা. পী.)] পুথূ পথব্যা, তদপ্পপঞ্ঞা দ্ৰিরসঞ্ঞুরা তে’’.
‘‘কস্স ভেরী মুদিঙ্গা চ, সঙ্খাপণৰদিন্দিমা;
পুরতো পটিপন্নানি, হাসযন্তা রথেসভং.
‘‘কস্স কঞ্চনপট্টেন, পুথুনা ৰিজ্জুৰণ্ণিনা;
যুৰা ¶ কলাপসন্নদ্ধো, কো এতি সিরিযা জলং.
‘‘উক্কামুখপহট্ঠংৰ ¶ , খদিরঙ্গারসন্নিভং;
মুখঞ্চ রুচিরা ভাতি, কো এতি সিরিযা জলং.
‘‘কস্স জম্বোনদং ছত্তং, সসলাকং মনোরমং;
আদিচ্চরংসাৰরণং, কো এতি সিরিযা জলং.
‘‘কস্স অঙ্গং [অঙ্কং (সী. পী.)] পরিগ্গয্হ, ৰাল়বীজনিমুত্তমং;
উভতো ৰরপুঞ্ঞস্স [চরতে ৰরপঞ্ঞস্স (সী. পী.)], মুদ্ধনি উপরূপরি.
‘‘কস্স পেখুণহত্থানি, চিত্রানি চ মুদূনি চ;
কঞ্চনমণিদণ্ডানি [তপঞ্ঞমণিদণ্ডানি (সী. পী.), সুৰণ্ণমণিদণ্ডানি (স্যা. ক.)], চরন্তি দুভতো মুখং.
‘‘খদিরঙ্গারৰণ্ণাভা, উক্কামুখপহংসিতা;
কস্সেতে কুণ্ডলা ৰগ্গূ, সোভন্তি দুভতো মুখং.
‘‘কস্স ৰাতেন ছুপিতা, নিদ্ধন্তা মুদুকাল়কা [মুদুকাল়কং (সী.), মুদু কাল়িকা (স্যা.)];
সোভযন্তি নলাটন্তং, নভা ৰিজ্জুরিৰুগ্গতা.
‘‘কস্স এতানি অক্খীনি, আযতানি পুথূনি চ;
কো সোভতি ৰিসালক্খো, কস্সেতং উণ্ণজং মুখং.
‘‘কস্সেতে লপনজাতা [লপনজা সুদ্ধা (সী. পী.)], সুদ্ধা সঙ্খৰরূপমা;
ভাসমানস্স সোভন্তি, দন্তা কুপ্পিলসাদিসা.
‘‘কস্স লাখারসসমা, হত্থপাদা সুখেধিতা;
কো সো বিম্বোট্ঠসম্পন্নো, দিৰা সূরিযোৰ ভাসতি.
‘‘হিমচ্চযে হিমৰতি [হেমৰতো (সী. স্যা. পী.)], মহাসালোৰ পুপ্ফিতো;
কো ¶ সো ওদাতপাৰারো, জযং ইন্দোৰ সোভতি.
‘‘সুৰণ্ণপীল়কাকিণ্ণং ¶ , মণিদণ্ডৰিচিত্তকং;
কো সো পরিসমোগয্হ, ঈসং খগ্গং পমুঞ্চতি [ঈসো খগ্গংৰ মুঞ্চতি (সী. পী.), ভন্তে খগ্গং পমুঞ্চতি (স্যা.)].
‘‘সুৰণ্ণৰিকতা ¶ চিত্তা, সুকতা চিত্তসিব্বনা [সিব্বিনী (স্যা. ক.)];
কো সো ওমুঞ্চতে পাদা, নমো কত্ৰা মহেসিনো’’.
‘‘ধতরট্ঠা হি তে নাগা, ইদ্ধিমন্তো যসস্সিনো;
সমুদ্দজায উপ্পন্না, নাগা এতে মহিদ্ধিকা’’তি.
ভূরিদত্তজাতকং ছট্ঠং.
৫৪৪. চন্দকুমারজাতকং (৭)
‘‘রাজাসি লুদ্দকম্মো, একরাজা পুপ্ফৰতীযা;
সো পুচ্ছি ব্রহ্মবন্ধুং, খণ্ডহালং পুরোহিতং মূল়্হং.
‘সগ্গান মগ্গমাচিক্খ [সগ্গমগ্গমাচিক্খ (সী. পী.)], ত্ৰংসি ব্রাহ্মণ ধম্মৰিনযকুসলো;
যথা ইতো ৰজন্তি সুগতিং, নরা পুঞ্ঞানি কত্ৰান’.
‘অতিদানং দদিত্ৰান, অৰজ্ঝে ¶ দেৰ ঘাতেত্ৰা;
এৰং ৰজন্তি সুগতিং, নরা পুঞ্ঞানি কত্ৰান’.
‘কিং পন তং অতিদানং, কে চ অৰজ্ঝা ইমস্মি লোকস্মিং;
এতঞ্চ খো নো অক্খাহি, যজিস্সামি দদামি [যজিস্সাম দদাম (সী. পী.)] দানানি’.
‘পুত্তেহি দেৰ যজিতব্বং, মহেসীহি নেগমেহি চ;
উসভেহি আজানিযেহি চতূহি, সব্বচতুক্কেন দেৰ যজিতব্বং’’’.
‘‘তং সুত্ৰা অন্তেপুরে, কুমারা মহেসিযো চ হঞ্ঞন্তু;
একো অহোসি নিগ্ঘোসো, ভিস্মা অচ্চুগ্গতো সদ্দো’’.
‘‘গচ্ছথ ৰদেথ কুমারে, চন্দং সূরিযঞ্চ ভদ্দসেনঞ্চ;
সূরঞ্চ ৰামগোত্তঞ্চ, পচুরা [পসুরা (সী. পী. ক.)] কির হোথ যঞ্ঞত্থায.
‘‘কুমারিযোপি ৰদেথ, উপসেনং ¶ [উপসেনিং (সী.), উপসেণিং (পী.)] কোকিলঞ্চ মুদিতঞ্চ;
নন্দঞ্চাপি কুমারিং, পচুরা [পসুরা (সী. পী. ক.)] কির হোথ যঞ্ঞত্থায.
‘‘ৰিজযম্পি ময্হং মহেসিং, এরাৰতিং [একপতিং (পী.), এরাপতিং (ক.)] কেসিনিং সুনন্দঞ্চ;
লক্খণৰরূপপন্না, পচুরা কির হোথ যঞ্ঞত্থায.
‘‘গহপতযো ¶ ¶ চ ৰদেথ, পুণ্ণমুখং ভদ্দিযং সিঙ্গালঞ্চ;
ৰড্ঢঞ্চাপি গহপতিং, পচুরা কির হোথ যঞ্ঞত্থায’’.
‘‘তে তত্থ গহপতযো, অৰোচিসুং সমাগতা পুত্তদারপরিকিণ্ণা;
সব্বেৰ সিখিনো দেৰ করোহি, অথ ৰা নো দাসে সাৰেহি’’.
‘‘অভযংকরম্পি মে হত্থিং, নাল়াগিরিং অচ্চুগ্গতং ৰরুণদন্তং [নাল়াগিরিং অচ্চুতং ৰরুণদন্তং (সী.), রাজগিরিং অচ্চুতৰরুণদন্তং (পী.)];
আনেথ খো নে খিপ্পং, যঞ্ঞত্থায ভৰিস্সন্তি.
‘‘অস্সরতনম্পি [অস্সতরম্পি (সী. পী.), অস্সরতনম্পি মে (স্যা.)] কেসিং, সুরামুখং পুণ্ণকং ৰিনতকঞ্চ;
আনেথ খো নে খিপ্পং, যঞ্ঞত্থায ভৰিস্সন্তি.
‘‘উসভম্পি ¶ [উসভম্পি মে (স্যা.)] যূথপতিং অনোজং, নিসভং গৰম্পতিং তেপি ময্হং আনেথ;
সমূহ [সমুপা (সী. পী.), সম্মুখা (স্যা.)] করোন্তু সব্বং, যজিস্সামি দদামি দানানি.
‘‘সব্বং [সব্বম্পি (স্যা.)] পটিযাদেথ, যঞ্ঞং পন উগ্গতম্হি সূরিযম্হি;
আণাপেথ চ কুমারে [আণাপেথ চন্দকুমারে (স্যা. ক.)], অভিরমন্তু ইমং রত্তিং.
‘‘সব্বং [সব্বম্পি (স্যা.)] উপট্ঠপেথ, যঞ্ঞং পন উগ্গতম্হি সূরিযম্হি;
ৰদেথ দানি কুমারে, অজ্জ খো [ৰো (পী.)] পচ্ছিমা রত্তি’’.
‘‘তংতং মাতা অৰচ, রোদন্তী আগন্ত্ৰা ৰিমানতো;
যঞ্ঞো কির তে পুত্ত, ভৰিস্সতি চতূহি পুত্তেহি’’.
‘‘সব্বেপি ময্হং পুত্তা চত্তা, চন্দস্মিং হঞ্ঞমানস্মিং;
পুত্তেহি যঞ্ঞং যজিত্ৰান, সুগতিং সগ্গং গমিস্সামি’’.
‘‘মা তং [মা (সী. পী.)] পুত্ত সদ্দহেসি, সুগতি কির হোতি পুত্তযঞ্ঞেন;
নিরযানেসো মগ্গো, নেসো মগ্গো হি সগ্গানং.
‘‘দানানি ¶ দেহি কোণ্ডঞ্ঞ, অহিংসা সব্বভূতভব্যানং’’;
এস মগ্গো সুগতিযা, ন চ মগ্গো পুত্তযঞ্ঞেন’’.
‘‘আচরিযানং ¶ ৰচনা, ঘাতেস্সং চন্দঞ্চ সূরিযঞ্চ;
পুত্তেহি যঞ্ঞং [পুত্তেহি (সী. স্যা. পী.)] যজিত্ৰান দুচ্চজেহি, সুগতিং সগ্গং গমিস্সামি’’.
‘‘তংতং পিতাপি অৰচ, ৰসৰত্তী ওরসং সকং পুত্তং;
যঞ্ঞো কির তে পুত্ত, ভৰিস্সতি চতূহি পুত্তেহি’’.
‘‘সব্বেপি ময্হং পুত্তা চত্তা, চন্দস্মিং হঞ্ঞমানস্মিং;
পুত্তেহি যঞ্ঞং যজিত্ৰান, সুগতিং সগ্গং গমিস্সামি’’.
‘‘মা তং পুত্ত সদ্দহেসি, সুগতি কির হোতি পুত্তযঞ্ঞেন;
নিরযানেসো মগ্গো, নেসো মগ্গো হি সগ্গানং.
‘‘দানানি ¶ দেহি কোণ্ডঞ্ঞ, অহিংসা সব্বভূতভব্যানং;
এস মগ্গো সুগতিযা, ন চ মগ্গো পুত্তযঞ্ঞেন’’.
‘‘আচরিযানং ৰচনা, ঘাতেস্সং চন্দঞ্চ সূরিযঞ্চ;
পুত্তেহি যঞ্ঞং যজিত্ৰান দুচ্চজেহি, সুগতিং সগ্গং গমিস্সামি’’.
‘‘দানানি দেহি কোণ্ডঞ্ঞ, অহিংসা সব্বভূতভব্যানং;
পুত্তপরিৰুতো তুৰং, রট্ঠং জনপদঞ্চ পালেহি’’.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থী অস্সে চ পালেম.
‘‘মা ¶ নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থিছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, অস্সছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স [ইদং পদং সী. পী. পোত্থকেসু নত্থি];
যস্স হোন্তি তৰ কামা, অপি রট্ঠা পব্বাজিতা;
ভিক্খাচরিযং চরিস্সাম’’.
‘‘দুক্খং ¶ খো মে জনযথ, ৰিলপন্তা জীৰিতস্স কামা হি;
মুঞ্চেথ [মুঞ্চথ (সী. পী.)] দানি কুমারে, অলম্পি মে হোতু পুত্তযঞ্ঞেন’’.
‘‘পুব্বেৰ খোসি মে ৰুত্তো, দুক্করং দুরভিসম্ভৰঞ্চেতং;
অথ নো উপক্খটস্স যঞ্ঞস্স, কস্মা করোসি ৰিক্খেপং.
‘‘সব্বে ৰজন্তি সুগতিং, যে যজন্তি যেপি যাজেন্তি;
যে চাপি অনুমোদন্তি, যজন্তানং এদিসং মহাযঞ্ঞং’’.
‘‘অথ কিস্স জনো [চ নো (সী. স্যা. পী.)] পুব্বে, সোত্থানং ব্রাহ্মণে অৰাচেসি;
অথ নো অকারণস্মা, যঞ্ঞত্থায দেৰ ঘাতেসি.
‘‘পুব্বেৰ নো দহরকালে [দহরকে সমানে (সী. পী.)], ন হনেসি [ন মারেসি (সী. পী.)] ন ঘাতেসি;
দহরম্হা যোব্বনং পত্তা, অদূসকা তাত হঞ্ঞাম.
‘‘হত্থিগতে অস্সগতে, সন্নদ্ধে পস্স নো মহারাজ;
যুদ্ধে ৰা যুজ্ঝমানে ৰা, ন হি মাদিসা সূরা হোন্তি যঞ্ঞত্থায.
‘‘পচ্চন্তে ৰাপি কুপিতে, অটৰীসু ৰা মাদিসে নিযোজেন্তি;
অথ নো অকারণস্মা, অভূমিযং তাত হঞ্ঞাম.
‘‘যাপি ¶ হি তা সকুণিযো, ৰসন্তি তিণঘরানি কত্ৰান;
তাসম্পি পিযা পুত্তা, অথ নো ত্ৰং দেৰ ঘাতেসি.
‘‘মা তস্স সদ্দহেসি, ন মং খণ্ডহালো ঘাতেয্য;
মমঞ্হি ¶ সো ঘাতেত্ৰান, অনন্তরা তম্পি দেৰ ঘাতেয্য.
‘‘গামৰরং নিগমৰরং দদন্তি, ভোগম্পিস্স মহারাজ;
অথগ্গপিণ্ডিকাপি, কুলে কুলে হেতে ভুঞ্জন্তি.
‘‘তেসম্পি তাদিসানং, ইচ্ছন্তি দুব্ভিতুং মহারাজ;
যেভুয্যেন এতে, অকতঞ্ঞুনো ব্রাহ্মণা দেৰ.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থী অস্সে চ পালেম.
‘‘মা ¶ নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থিছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, অস্সছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স;
যস্স হোন্তি তৰ কামা, অপি রট্ঠা পব্বাজিতা;
ভিক্খাচরিযং চরিস্সাম’’.
‘‘দুক্খং খো মে জনযথ, ৰিলপন্তা জীৰিতস্স কামা হি;
মুঞ্চেথ দানি কুমারে, অলম্পি মে হোতু পুত্তযঞ্ঞেন’’.
‘‘পুব্বেৰ খোসি মে ৰুত্তো, দুক্করং দুরভিসম্ভৰঞ্চেতং;
অথ নো উপক্খটস্স যঞ্ঞস্স, কস্মা করোসি ৰিক্খেপং.
‘‘সব্বে ৰজন্তি সুগতিং, যে যজন্তি যেপি যাজেন্তি;
যে চাপি অনুমোদন্তি, যজন্তানং এদিসং মহাযঞ্ঞং’’.
‘‘যদি ¶ কির যজিত্ৰা পুত্তেহি, দেৰলোকং ইতো চুতা যন্তি;
ব্রাহ্মণো তাৰ যজতু, পচ্ছাপি যজসি তুৰং রাজা.
‘‘যদি কির যজিত্ৰা পুত্তেহি, দেৰলোকং ইতো চুতা যন্তি;
এস্ৰেৰ খণ্ডহালো, যজতং সকেহি পুত্তেহি.
‘‘এৰং জানন্তো খণ্ডহালো, কিং পুত্তকে ন ঘাতেসি;
সব্বঞ্চ ঞাতিজনং, অত্তানঞ্চ ন ঘাতেসি.
‘‘সব্বে ¶ ৰজন্তি নিরযং, যে যজন্তি যেপি যাজেন্তি;
যে চাপি অনুমোদন্তি, যজন্তানং এদিসং মহাযঞ্ঞং.
[অযং গাথা সী. স্যা. পী. পোত্থকেসু ন দিস্সতি] ‘‘সচে হি সো সুজ্ঝতি যো হনাতি, হতোপি সো সগ্গমুপেতি ঠানং;
ভোৰাদি ভোৰাদিন মারযেয্যুং, যে চাপি তেসং অভিসদ্দহেয্যুং’’ [অযং গাথা সী. স্যা. পী. পোত্থকেসু ন দিস্সতি].
‘‘কথঞ্চ কির পুত্তকামাযো, গহপতযো ঘরণিযো চ;
নগরম্হি ন উপরৰন্তি রাজানং, মা ঘাতযি ওরসং পুত্তং.
‘‘কথঞ্চ ¶ কির পুত্তকামাযো, গহপতযো ঘরণিযো চ;
নগরম্হি ন উপরৰন্তি রাজানং, মা ঘাতযি অত্রজং পুত্তং.
‘‘রঞ্ঞো চম্হি অত্থকামো, হিতো চ সব্বজনপদস্স [সব্বদা জনপদস্স (সী. পী.)];
ন কোচি অস্স পটিঘং, মযা জানপদো ন পৰেদেতি’’.
‘‘গচ্ছথ ¶ ৰো ঘরণিযো, তাতঞ্চ ৰদেথ খণ্ডহালঞ্চ;
মা ঘাতেথ কুমারে, অদূসকে সীহসঙ্কাসে.
‘‘গচ্ছথ ৰো ঘরণিযো, তাতঞ্চ ৰদেথ খণ্ডহালঞ্চ;
মা ঘাতেথ কুমারে, অপেক্খিতে সব্বলোকস্স’’.
‘‘যং নূনাহং জাযেয্যং, রথকারকুলেসু ৰা;
পুক্কুসকুলেসু ৰা ৰেস্সেসু ৰা জাযেয্যং;
ন হজ্জ মং রাজ যঞ্ঞে [যঞ্ঞত্থায (সী. পী.)] ঘাতেয্য’’.
‘‘সব্বা সীমন্তিনিযো গচ্ছথ, অয্যস্স খণ্ডহালস্স;
পাদেসু নিপতথ, অপরাধাহং ন পস্সামি.
‘‘সব্বা সীমন্তিনিযো গচ্ছথ, অয্যস্স খণ্ডহালস্স;
পাদেসু নিপতথ, কিন্তে ভন্তে মযং অদূসেম’’.
‘‘কপণা [কপণং (সী. পী.)] ৰিলপতি সেলা, দিস্ৰান ভাতরে [ভাতরো (সী. স্যা. পী. ক.)] উপনীতত্তে;
যঞ্ঞো কির মে উক্খিপিতো, তাতেন সগ্গকামেন’’.
‘‘আৰত্তি পরিৰত্তি চ, ৰসুলো সম্মুখা রঞ্ঞো;
মা নো পিতরং অৰধি, দহরম্হা যোব্বনং পত্তা’’.
‘‘এসো তে ৰসুল পিতা, সমেহি পিতরা সহ;
দুক্খং খো মে জনযসি, ৰিলপন্তো অন্তেপুরস্মিং;
মুঞ্চেথ দানি কুমারে, অলম্পি মে হোতু পুত্তযঞ্ঞেন’’.
‘‘পুব্বেৰ খোসি মে ৰুত্তো, দুক্করং দুরভিসম্ভৰঞ্চেতং;
অথ ¶ নো উপক্খটস্স যঞ্ঞস্স, কস্মা করোসি ৰিক্খেপং.
‘‘সব্বে ¶ ৰজন্তি সুগতিং, যে যজন্তি যেপি যাজেন্তি;
যে চাপি অনুমোদন্তি, যজন্তানং এদিসং মহাযঞ্ঞং’’.
‘‘সব্বরতনস্স ¶ যঞ্ঞো উপক্খটো, একরাজ তৰ পটিযত্তো;
অভিনিক্খমস্সু দেৰ, সগ্গং গতো ত্ৰং পমোদিস্সসি’’.
‘‘দহরা সত্তসতা এতা, চন্দকুমারস্স ভরিযাযো;
কেসে পকিরিত্ৰান [পরিকিরিত্ৰান (সী. পী.), ৰিকিরিত্ৰান (স্যা. ক.)], রোদন্তিযো মগ্গমনুযাযিংসু [মগ্গমনুযন্তি (সী. পী.), মগ্গমনুযাযন্তি (স্যা.)].
‘‘অপরা পন সোকেন, নিক্খন্তা নন্দনে ৰিয দেৰা;
কেসে পকিরিত্ৰান [পরিকিরিত্ৰান (সী. পী.), ৰিকিরিত্ৰান (স্যা. ক.)], রোদন্তিযো মগ্গমনুযাযিংসু’’ [মগ্গমনুযন্তি (সী. পী.), মগ্গমনুযাযন্তি (স্যা.)].
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যন্তি চন্দসূরিযা, যঞ্ঞত্থায একরাজস্স.
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যন্তি চন্দসূরিযা, মাতু কত্ৰা হদযসোকং.
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যন্তি চন্দসূরিযা, জনস্স কত্ৰা হদযসোকং.
‘‘মংসরসভোজনা ন্হাপকসুন্হাপিতা [নহাপকসুনহাতা (পী.)], কুণ্ডলিনো অগলুচন্দনৰিলিত্তা;
নিয্যন্তি চন্দসূরিযা, যঞ্ঞত্থায একরাজস্স.
[ইমা দ্ৰে গাথা নত্থি পী পোত্থকে] ‘‘মংসরসভোজনা ন্হাপকসুন্হাপিতা, কুণ্ডলিনো অগলুচন্দনৰিলিত্তা;
নিয্যন্তি চন্দসূরিযা, মাতু কত্ৰা হদযসোকং.
‘‘মংসরসভোজনা ন্হাপকসুন্হাপিতা, কুণ্ডলিনো অগলুচন্দনৰিলিত্তা;
নিয্যন্তি ¶ চন্দসূরিযা, জনস্স কত্ৰা হদযসোকং [ইমা দ্ৰে গাথা নত্থি পী পোত্থকে].
‘‘যস্সু পুব্বে হত্থিৰরধুরগতে, হত্থীহি [হত্থিকা (স্যা.), পত্তিকা (পী.)] অনুৰজন্তি;
ত্যজ্জ চন্দসূরিযা, উভোৰ পত্তিকা যন্তি.
‘‘যস্সু ¶ পুব্বে অস্সৰরধুরগতে, অস্সেহি [অস্সকা (স্যা.), পত্তিকা (পী.)] অনুৰজন্তি;
ত্যজ্জ চন্দসূরিযা, উভোৰ পত্তিকা যন্তি.
‘‘যস্সু পুব্বে রথৰরধুরগতে, রথেহি [রথিকা (স্যা.), পত্তিকা (পী.)] অনুৰজন্তি;
ত্যজ্জ চন্দসূরিযা, উভোৰ পত্তিকা যন্তি.
‘‘যেহিস্সু পুব্বে নীযিংসু [নিয্যংসু (সী. পী.)], তপনীযকপ্পনেহি তুরঙ্গেহি;
ত্যজ্জ চন্দসূরিযা, উভোৰ পত্তিকা যন্তি’’.
‘‘যদি সকুণি মংসমিচ্ছসি, ডযস্সু [উয্যস্সু (স্যা. ক.)] পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি পুত্তেহি.
‘‘যদি ¶ সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি কঞ্ঞাহি.
‘‘যদি সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি মহেসীহি.
‘‘যদি সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি গহপতীহি.
‘‘যদি সকুণি মংসমিচ্ছসি, ডযস্সু পুব্বে পুপ্ফৰতিযা;
যজতেত্থ একরাজা, সম্মূল়্হো চতূহি হত্থীহি.
‘‘যদি সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি অস্সেহি.
‘‘যদি সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো চতূহি উসভেহি.
‘‘যদি ¶ সকুণি মংসমিচ্ছসি, ডযস্সু পুব্বেন পুপ্ফৰতিযা;
যজতেত্থ একরাজা, সম্মূল়্হো সব্বচতুক্কেন’’.
‘‘অযমস্স পাসাদো, ইদং অন্তেপুরং সুরমণীযং [সোৰণ্ণো পুপ্ফমল্যৰিকিণ্ণো (ক.)];
তেদানি অয্যপুত্তা, চত্তারো ৰধায নিন্নীতা.
‘‘ইদমস্স কূটাগারং, সোৰণ্ণং পুপ্ফমল্যৰিকিণ্ণং;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স ¶ উয্যানং, সুপুপ্ফিতং সব্বকালিকং রম্মং;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স অসোকৰনং, সুপুপ্ফিতং সব্বকালিকং রম্মং;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স কণিকারৰনং, সুপুপ্ফিতং সব্বকালিকং রম্মং;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স পাটলিৰনং, সুপুপ্ফিতং সব্বকালিকং রম্মং;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স অম্বৰনং, সুপুপ্ফিতং সব্বকালিকং রম্মং;
তেদানি অয্যপুত্তা, চত্তারো ৰধায নিন্নীতা.
‘‘অযমস্স ¶ পোক্খরণী, সঞ্ছন্না পদুমপুণ্ডরীকেহি;
নাৰা চ সোৰণ্ণৰিকতা, পুপ্ফৰল্লিযা [পুপ্ফাৰলিযা (সী. পী.)] চিত্তা সুরমণীযা;
তেদানি ¶ অয্যপুত্তা, চত্তারো ৰধায নিন্নীতা’’.
‘‘ইদমস্স হত্থিরতনং, এরাৰণো গজো বলী দন্তী;
তেদানি অয্যপুত্তা, চত্তারো ৰধায নিন্নীতা.
‘‘ইদমস্স অস্সরতনং, একখূরো [একখূরো ৰেগো (স্যা.)] অস্সো;
তেদানি অয্যপুত্তা, চত্তারো ৰধায নিন্নীতা.
‘‘অযমস্স অস্সরথো, সাল়িয [সাল়িয ৰিয (স্যা.)] নিগ্ঘোসো সুভো রতনৰিচিত্তো;
যত্থস্সু অয্যপুত্তা, সোভিংসু নন্দনে ৰিয দেৰা;
তেদানি অয্যপুত্তা, চত্তারো ৰধায নিন্নীতা.
‘‘কথং নাম সামসমসুন্দরেহি, চন্দনমুদুকগত্তেহি [চন্দনমরকতগত্তেহি (সী. পী.)];
রাজা যজিস্সতে যঞ্ঞং, সম্মূল়্হো চতূহি পুত্তেহি.
‘‘কথং নাম সামসমসুন্দরাহি, চন্দনমুদুকগত্তাহি;
রাজা যজিস্সতে যঞ্ঞং, সম্মূল়্হো চতূহি কঞ্ঞাহি.
‘‘কথং ¶ নাম সামসমসুন্দরাহি, চন্দনমুদুকগত্তাহি;
রাজা যজিস্সতে যঞ্ঞং, সম্মূল়্হো চতূহি মহেসীহি.
‘‘কথং নাম সামসমসুন্দরেহি, চন্দনমুদুকগত্তেহি;
রাজা যজিস্সতে যঞ্ঞং, সম্মূল়্হো চতূহি গহপতীহি.
‘‘যথা হোন্তি গামনিগমা, সুঞ্ঞা অমনুস্সকা ব্রহারঞ্ঞা;
তথা ¶ হেস্সতি পুপ্ফৰতিযা, যিট্ঠেসু চন্দসূরিযেসু’’.
‘‘উম্মত্তিকা ভৰিস্সামি, ভূনহতা পংসুনা চ [পংসুনাৰ (স্যা. ক.)] পরিকিণ্ণা;
সচে চন্দৰরং [চন্দকুমারং (স্যা.)] হন্তি, পাণা মে দেৰ রুজ্ঝন্তি [নিরুজ্ঝন্তি (সী.), ভিজ্জন্তি (স্যা.)].
‘‘উম্মত্তিকা ভৰিস্সামি, ভূনহতা পংসুনা চ পরিকিণ্ণা;
সচে সূরিযৰরং হন্তি, পাণা মে দেৰ রুজ্ঝন্তি’’.
‘‘কিং নু মা ন রমাপেয্যুং, অঞ্ঞমঞ্ঞং পিযংৰদা;
ঘট্টিকা উপরিক্খী চ, পোক্খরণী চ ভারিকা [ঘট্টিযা ওপরক্খী চ পোক্খরক্খী চ নাযিকা (সী.) ঘট্টিযা ওপরক্খী চ পোক্খরক্খী চ গাযিকা (পী.)];
চন্দসূরিযেসু নচ্চন্তিযো, সমা তাসং ন ৰিজ্জতি’’.
‘‘ইমং ময্হং হদযসোকং, পটিমুঞ্চতু [পটিমুচ্চতু (ক.)] খণ্ডহাল তৰ মাতা;
যো ময্হং হদযসোকো, চন্দম্হি ৰধায নিন্নীতে.
‘‘ইমং ¶ ময্হং হদযসোকং, পটিমুঞ্চতু খণ্ডহাল তৰ মাতা;
যো ময্হং হদযসোকো, সূরিযম্হি ৰধায নিন্নীতে.
‘‘ইমং ময্হং হদযসোকং, পটিমুঞ্চতু খণ্ডহাল তৰ জাযা;
যো ময্হং হদযসোকো, চন্দম্হি ৰধায নিন্নীতে.
‘‘ইমং ময্হং হদযসোকং, পটিমুঞ্চতু খণ্ডহাল তৰ জাযা;
যো ময্হং হদযসোকো, সূরিযম্হি ৰধায নিন্নীতে.
‘‘মা ¶ চ পুত্তে মা চ পতিং, অদ্দক্খি খণ্ডহাল তৰ মাতা;
যো ঘাতেসি কুমারে, অদূসকে সীহসঙ্কাসে.
‘‘মা চ পুত্তে মা চ পতিং, অদ্দক্খি খণ্ডহাল তৰ মাতা;
যো ঘাতেসি কুমারে, অপেক্খিতে সব্বলোকস্স.
‘‘মা ¶ চ পুত্তে মা চ পতিং, অদ্দক্খি খণ্ডহাল তৰ জাযা;
যো ঘাতেসি কুমারে, অদূসকে সীহসঙ্কাসে.
‘‘মা চ পুত্তে মা চ পতিং, অদ্দক্খি খণ্ডহাল তৰ জাযা;
যো ঘাতেসি কুমারে, অপেক্খিতে সব্বলোকস্স’’.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থী অস্সে চ পালেম.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, হত্থিছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স;
অপি নিগল়বন্ধকাপি, অস্সছকণানি উজ্ঝেম.
‘‘মা নো দেৰ অৰধি, দাসে নো দেহি খণ্ডহালস্স;
যস্স হোন্তি তৰ কামা, অপি রট্ঠা পব্বাজিতা;
ভিক্খাচরিযং চরিস্সাম.
‘‘দিব্বং দেৰ উপযাচন্তি, পুত্তত্থিকাপি দলিদ্দা;
পটিভানানিপি হিত্ৰা, পুত্তে ন লভন্তি একচ্চা.
‘‘আসীসিকানি [অস্সাসকানি (সী. পী.), আসাসকানি (স্যা.)] করোন্তি, পুত্তা নো জাযন্তু ততো পপুত্তা [পুত্তা (সী. পী.)];
অথ নো অকারণস্মা, যঞ্ঞত্থায দেৰ ঘাতেসি.
‘‘উপযাচিতকেন পুত্তং লভন্তি, মা তাত নো অঘাতেসি;
মা কিচ্ছালদ্ধকেহি পুত্তেহি, যজিত্থো ইমং যঞ্ঞং.
‘‘উপযাচিতকেন ¶ পুত্তং লভন্তি, মা তাত নো অঘাতেসি;
মা ¶ কপণলদ্ধকেহি পুত্তেহি, অম্মায নো ৰিপ্পৰাসেসি’’.
‘‘বহুদুক্খা [বহুদুক্খং (স্যা. ক.)] পোসিয চন্দং, অম্ম তুৰং জীযসে পুত্তং;
ৰন্দামি খো তে পাদে, লভতং তাতো পরলোকং.
‘‘হন্দ চ মং উপগুয্হ, পাদে তে অম্ম ৰন্দিতুং দেহি;
গচ্ছামি দানি পৰাসং [ৰিপ্পৰাসং (ক.)], যঞ্ঞত্থায একরাজস্স.
‘‘হন্দ ¶ চ মং উপগুয্হ [উপগুয্হ (স্যা. ক.)], পাদে তে অম্ম ৰন্দিতুং দেহি;
গচ্ছামি দানি পৰাসং, মাতু কত্ৰা হদযসোকং.
হন্দ চ মং উপগুয্হ [উপগুয্হ (স্যা. ক.)], পাদে তে অম্ম ৰন্দিতুং দেহি;
গচ্ছামি দানি পৰাসং, জনস্স কত্ৰা হদযসোকং’’.
‘‘হন্দ চ পদুমপত্তানং, মোল়িং বন্ধস্সু গোতমিপুত্ত;
চম্পকদলমিস্সাযো [চম্পকদলিৰীতিমিস্সাযো (সী. পী.), চম্পকদলিমিস্সাযো (ক.)], এসা তে পোরাণিকা পকতি.
‘‘হন্দ চ ৰিলেপনং তে, পচ্ছিমকং চন্দনং ৰিলিম্পস্সু;
যেহি চ সুৰিলিত্তো, সোভসি রাজপরিসাযং.
‘‘হন্দ চ মুদুকানি ৰত্থানি, পচ্ছিমকং কাসিকং নিৰাসেহি;
যেহি চ সুনিৰত্থো, সোভসি রাজপরিসাযং.
‘‘মুত্তামণিকনকৰিভূসিতানি, গণ্হস্সু হত্থাভরণানি;
যেহি চ হত্থাভরণেহি, সোভসি রাজপরিসাযং’’.
‘‘ন হি নূনাযং রট্ঠপালো, ভূমিপতি জনপদস্স দাযাদো;
লোকিস্সরো মহন্তো, পুত্তে স্নেহং জনযতি’’.
‘‘ময্হম্পি ¶ পিযা পুত্তা, অত্তা চ পিযো তুম্হে চ ভরিযাযো;
সগ্গঞ্চ পত্থযানো [পত্থযমানো (স্যা. ক.)], তেনাহং ঘাতযিস্সামি’’.
‘‘মং পঠমং ঘাতেহি, মা মে হদযং দুক্খং ফালেসি;
অলঙ্কতো [অনলঙ্কতো (ক.)] সুন্দরকো, পুত্তো দেৰ তৰ সুখুমালো.
‘‘হন্দয্য মং হনস্সু, পরলোকে [সলোকা (সী. স্যা. ক.)] চন্দকেন [চন্দিযেন (সী. পী. ক.)] হেস্সামি;
পুঞ্ঞং করস্সু ৰিপুলং, ৰিচরাম উভোপি পরলোকে’’.
‘‘মা ত্ৰং চন্দে রুচ্চি মরণং [ইদং পদং নত্থি সী. পী. পোত্থকেসু], বহুকা তৰ দেৰরা ৰিসালক্খি;
তে তং রমযিস্সন্তি, যিট্ঠস্মিং গোতমিপুত্তে’’.
‘‘এৰং ৰুত্তে চন্দা অত্তানং, হন্তি হত্থতলকেহি’’;
‘‘অলমেত্থ [অলমত্থু (সী. পী.)] জীৰিতেন, পিস্সামি [পাযামি (সী. পী.)] ৰিসং মরিস্সামি.
‘‘ন ¶ ¶ হি নূনিমস্স রঞ্ঞো, মিত্তামচ্চা চ ৰিজ্জরে সুহদা;
যে ন ৰদন্তি রাজানং, মা ঘাতযি ওরসে পুত্তে.
‘‘ন হি নূনিমস্স রঞ্ঞো, ঞাতী মিত্তা চ ৰিজ্জরে সুহদা;
যে ন ৰদন্তি রাজানং, মা ঘাতযি অত্রজে পুত্তে.
‘‘ইমে তেপি ময্হং পুত্তা, গুণিনো কাযূরধারিনো রাজ;
তেহিপি যজস্সু যঞ্ঞং, অথ মুঞ্চতু [মুচ্চতু (পী. ক.)] গোতমিপুত্তে.
‘‘বিলসতং মং কত্ৰান, যজস্সু সত্তধা মহারাজ;
মা জেট্ঠপুত্তমৰধি, অদূসকং সীহসঙ্কাসং.
‘‘বিলসতং মং কত্ৰান, যজস্সু সত্তধা মহারাজ;
মা ¶ জেট্ঠপুত্তমৰধি, অপেক্খিতং সব্বলোকস্স’’.
‘‘বহুকা তৰ দিন্নাভরণা, উচ্চাৰচা সুভণিতম্হি;
মুত্তামণিৰেল়ুরিযা, এতং তে পচ্ছিমকং দানং’’.
‘‘যেসং পুব্বে খন্ধেসু, ফুল্লা মালাগুণা ৰিৰত্তিংসু;
তেসজ্জপি সুনিসিতো [পিতনিসিতো (সী. পী.)], নেত্তিংসো ৰিৰত্তিস্সতি খন্ধেসু.
‘‘যেসং পুব্বে খন্ধেসু, চিত্তা মালাগুণা ৰিৰত্তিংসু;
তেসজ্জপি সুনিসিতো, নেত্তিংসো ৰিৰত্তিস্সতি খন্ধেসু.
‘‘অচিরং [অচিরা (সী. স্যা. পী.)] ৰত নেত্তিংসো, ৰিৰত্তিস্সতি রাজপুত্তানং খন্ধেসু;
অথ মম হদযং ন ফলতি, তাৰ দল়্হবন্ধঞ্চ মে আসি.
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যাথ চন্দসূরিযা, যঞ্ঞত্থায একরাজস্স.
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যাথ চন্দসূরিযা, মাতু কত্ৰা হদযসোকং.
‘‘কাসিকসুচিৰত্থধরা, কুণ্ডলিনো অগলুচন্দনৰিলিত্তা;
নিয্যাথ চন্দসূরিযা, জনস্স কত্ৰা হদযসোকং.
‘‘মংসরসভোজনা ন্হাপকসুন্হাপিতা, কুণ্ডলিনো অগলুচন্দনৰিলিত্তা;
নিয্যাথ চন্দসূরিযা, যঞ্ঞত্থায একরাজস্স.
‘‘মংসরসভোজনা ¶ ন্হাপকসুন্হাপিতা, কুণ্ডলিনো অগলুচন্দনৰিলিত্তা;
নিয্যাথ চন্দসূরিযা, মাতু কত্ৰা হদযসোকং.
‘‘মংসরসভোজনা ন্হাপকসুন্হাপিতা, কুণ্ডলিনো অগলুচন্দনৰিলিত্তা;
নিয্যাথ ¶ চন্দসূরিযা, জনস্স কত্ৰা হদযসোকং’’.
‘‘সব্বস্মিং ¶ উপক্খটস্মিং, নিসীদিতে চন্দস্মিং [চন্দিযস্মিং (সী. পী.), চন্দসূরিযস্মিং (স্যা.)] যঞ্ঞত্থায;
পঞ্চালরাজধীতা পঞ্জলিকা, সব্বপরিসায সমনুপরিযাযি [সব্বপরিসমনুপরিযাসি (সী. পী.), সব্বপরিসন্তরমনুপরিযাসি (স্যা.)].
‘‘যেন সচ্চেন খণ্ডহালো, পাপকম্মং করোতি দুম্মেধো;
এতেন সচ্চৰজ্জেন, সমঙ্গিনী সামিকেন হোমি.
‘‘যে ইধত্থি অমনুস্সা, যানি চ যক্খভূতভব্যানি;
করোন্তু মে ৰেয্যাৰটিকং, সমঙ্গিনী সামিকেন হোমি.
‘‘যা দেৰতা ইধাগতা, যানি চ যক্খভূতভব্যানি;
সরণেসিনিং অনাথং তাযথ মং, যাচামহং পতিমাহং অজেযং’’ [অজিয্যং (সী.)].
‘‘তং সুত্ৰা অমনুস্সো, অযোকূটং পরিব্ভমেত্ৰান;
ভযমস্স জনযন্তো, রাজানং ইদমৰোচ.
‘‘বুজ্ঝস্সু খো রাজকলি, মা তাহং [মা তেহং (স্যা.)] মত্থকং নিতাল়েসিং [নিতালেমি (সী. পী.), নিপ্ফালেসিং (ক.)];
মা জেট্ঠপুত্তমৰধি, অদূসকং সীহসঙ্কাসং.
‘‘কো তে দিট্ঠো রাজকলি, পুত্তভরিযাযো হঞ্ঞমানাযো [হঞ্ঞমানা (ক.)];
সেট্ঠি চ গহপতযো, অদূসকা সগ্গকামা হি.
‘‘তং সুত্ৰা খণ্ডহালো, রাজা চ অব্ভুতমিদং দিস্ৰান;
সব্বেসং বন্ধনানি মোচেসুং, যথা তং অনুপঘাতং [অপাপানং (সী. পী.)].
‘‘সব্বেসু ¶ ৰিপ্পমুত্তেসু, যে তত্থ সমাগতা তদা আসুং;
সব্বে একেকলেড্ডুকমদংসু, এস ৰধো খণ্ডহালস্স’’.
‘‘সব্বে ¶ পৰিট্ঠা [পতিংসু (সী.), পতিত্ৰা (পী.)] নিরযং, যথা তং পাপকং করিত্ৰান;
ন হি পাপকম্মং কত্ৰা, লব্ভা সুগতিং ইতো গন্তুং’’.
‘‘সব্বেসু ৰিপ্পমুত্তেসু, যে তত্থ সমাগতা তদা আসুং;
চন্দং অভিসিঞ্চিংসু, সমাগতা রাজপরিসা [রাজপুরিসা (স্যা.)] চ.
‘‘সব্বেসু ৰিপ্পমুত্তেসু, যে [যা (স্যা.)] তত্থ সমাগতা তদা আসুং;
চন্দং অভিসিঞ্চিংসু, সমাগতা রাজকঞ্ঞাযো চ.
‘‘সব্বেসু ৰিপ্পমুত্তেসু, যে তত্থ সমাগতা তদা আসুং;
চন্দং অভিসিঞ্চিংসু, সমাগতা দেৰপরিসা [দেৰপুরিসা (স্যা.)] চ.
‘‘সব্বেসু ৰিপ্পমুত্তেসু, যে [যা (স্যা.)] তত্থ সমাগতা তদা আসুং;
চন্দং অভিসিঞ্চিংসু, সমাগতা দেৰকঞ্ঞাযো চ.
‘‘সব্বেসু ৰিপ্পমুত্তেসু, যে তত্থ সমাগতা তদা আসুং;
চেলুক্খেপমকরুং, সমাগতা রাজপরিসা [রাজপুরিসা (স্যা.)] চ.
‘‘সব্বেসু ¶ ৰিপ্পমুত্তেসু, যে [যা (স্যা.)] তত্থ সমাগতা তদা আসুং;
চেলুক্খেপমকরুং, সমাগতা রাজকঞ্ঞাযো চ.
‘‘সব্বেসু ৰিপ্পমুত্তেসু, যে তত্থ সমাগতা তদা আসুং;
চেলুক্খেপমকরুং, সমাগতা দেৰপরিসা [দেৰপুরিসা (স্যা.)] চ.
‘‘সব্বেসু ৰিপ্পমুত্তেসু, যে [যা (স্যা.)] তত্থ সমাগতা তদা আসুং;
চেলুক্খেপমকরুং, সমাগতা দেৰকঞ্ঞাযো চ.
‘‘সব্বেসু ৰিপ্পমুত্তেসু, বহূ আনন্দিতা অহুং [বহু আনন্দনো অহু ৰংসো (সী.), বহু আনন্দিতো অহু ৰংসো (পী.)];
নন্দিং ¶ পৰেসি নগরং [ৰাদিংসু নন্দিপৰেসনগরং (স্যা.), নন্দিং পৰেসি নগরে (ক.)], বন্ধনা মোক্খো অঘোসিত্থা’’তি.
চন্দকুমারজাতকং [খণ্ডহালজাতকং (সী. পী.)] সত্তমং.
৫৪৫. মহানারদকস্সপজাতকং (৮)
‘‘অহু ¶ ¶ রাজা ৰিদেহানং, অঙ্গতি [অঙ্গাতি (সী.) এৰমুপরিপি] নাম খত্তিযো;
পহূতযোগ্গো ধনিমা, অনন্তবলপোরিসো.
সো চ পন্নরসিং [পন্নরসে (স্যা. ক.)] রত্তিং, পুরিমযামে অনাগতে;
চাতুমাসা [চাতুমস্স (সী. পী.)] কোমুদিযা, অমচ্চে সন্নিপাতযি.
‘‘পণ্ডিতে সুতসম্পন্নে, মিতপুব্বে [মিহিতপুব্বে (সী. পী.)] ৰিচক্খণে;
ৰিজযঞ্চ সুনামঞ্চ, সেনাপতিং অলাতকং.
‘‘তমনুপুচ্ছি ৰেদেহো, ‘‘পচ্চেকং ব্রূথ সং রুচিং;
চাতুমাসা কোমুদজ্জ, জুণ্হং ব্যপহতং [ব্যপগতং (সী. পী.)] তমং;
কাযজ্জ রতিযা রত্তিং, ৰিহরেমু ইমং উতুং’’.
‘‘ততো সেনাপতি রঞ্ঞো, অলাতো এতদব্রৰি;
‘‘হট্ঠং যোগ্গং বলং সব্বং, সেনং সন্নাহযামসে.
‘‘নিয্যাম দেৰ যুদ্ধায, অনন্তবলপোরিসা;
যে তে ৰসং ন আযন্তি, ৰসং উপনযামসে [উপনিয্যামসে (ক.)];
এসা ময্হং সকা দিট্ঠি, অজিতং ওজিনামসে.
অলাতস্স ¶ ৰচো সুত্ৰা, সুনামো এতদব্রৰি;
‘‘সব্বে তুয্হং মহারাজ, অমিত্তা ৰসমাগতা.
‘‘নিক্খিত্তসত্থা পচ্চত্থা, নিৰাতমনুৰত্তরে;
উত্তমো উস্সৰো অজ্জ, ন যুদ্ধং মম রুচ্চতি.
‘‘অন্নপানঞ্চ খজ্জঞ্চ, খিপ্পং অভিহরন্তু তে;
রমস্সু দেৰ কামেহি, নচ্চগীতে সুৰাদিতে’’.
সুনামস্স ৰচো সুত্ৰা, ৰিজযো এতদব্রৰি;
‘‘সব্বে কামা মহারাজ, নিচ্চং তৰ মুপট্ঠিতা.
‘‘ন হেতে দুল্লভা দেৰ, তৰ কামেহি মোদিতুং;
সদাপি কামা সুলভা, নেতং চিত্তমতং [চিত্তং মতী (ক.)] মম.
‘‘সমণং ¶ ব্রাহ্মণং ৰাপি, উপাসেমু বহুস্সুতং;
যো নজ্জ ৰিনযে কঙ্খং, অত্থধম্মৰিদূ ইসে’’.
ৰিজযস্স ৰচো সুত্ৰা, রাজা অঙ্গতি মব্রৰি;
‘‘যথা ৰিজযো ভণতি, ময্হম্পেতংৰ রুচ্চতি.
‘‘সমণং ¶ ব্রাহ্মণং ৰাপি, উপাসেমু বহুস্সুতং;
যো নজ্জ ৰিনযে কঙ্খং, অত্থধম্মৰিদূ ইসে.
‘‘সব্বেৰ সন্তা করোথ মতিং, কং উপাসেমু পণ্ডিতং;
যো [কো (সী. পী.)] নজ্জ ৰিনযে কঙ্খং, অত্থধম্মৰিদূ ইসে’’.
‘‘ৰেদেহস্স ৰচো সুত্ৰা, অলাতো এতদব্রৰি;
‘‘অত্থাযং ¶ মিগদাযস্মিং, অচেলো ধীরসম্মতো.
‘‘গুণো কস্সপগোত্তাযং, সুতো চিত্রকথী গণী;
তং দেৰ [তদেৰ (ক.)] পযিরুপাসেমু [পযিরুপাসয (সী. পী.)], সো নো কঙ্খং ৰিনেস্সতি’’.
‘‘অলাতস্স ৰচো সুত্ৰা, রাজা চোদেসি সারথিং;
‘‘মিগদাযং গমিস্সাম, যুত্তং যানং ইধানয’’.
তস্স যানং অযোজেসুং, দন্তং রূপিযপক্খরং [রূপিযুপক্খরং (ক.)];
সুক্কমট্ঠপরিৰারং, পণ্ডরং দোসিনামুখং.
‘‘তত্রাসুং কুমুদাযুত্তা, চত্তারো সিন্ধৰা হযা;
অনিলূপমসমুপ্পাতা [অনিলূপমসমুপ্পাদা (ক.)], সুদন্তা সোণ্ণমালিনো.
‘‘সেতচ্ছত্তং সেতরথো, সেতস্সা সেতবীজনী;
ৰেদেহো সহমচ্চেহি, নিয্যং চন্দোৰ সোভতি.
‘‘তমনুযাযিংসু বহৰো, ইন্দিখগ্গধরা [ইন্দখগ্গধরা (সী.), ইট্ঠিখগ্গধরা (পী.)] বলী;
অস্সপিট্ঠিগতা ৰীরা, নরা নরৰরাধিপং.
সো মুহুত্তংৰ যাযিত্ৰা, যানা ওরুয্হ খত্তিযো;
ৰেদেহো সহমচ্চেহি, পত্তী গুণমুপাগমি.
যেপি তত্থ তদা আসুং, ব্রাহ্মণিব্ভা সমাগতা;
ন তে অপনযী রাজা, অকতং ভূমিমাগতে.
‘‘ততো ¶ সো মুদুকা ভিসিযা, মুদুচিত্তকসন্থতে [মুদুচিত্তকল়ন্দকে (সী. পী.)];
মুদুপচ্চত্থতে রাজা, একমন্তং উপাৰিসি.
‘‘নিসজ্জ রাজা সম্মোদি, কথং সারণিযং ততো;
‘‘কচ্চি ¶ যাপনিযং ভন্তে, ৰাতানমৰিযগ্গতা [ৰাতানমৰিসগ্গতা (সী. পী.), ৰাতানমৰিযত্ততা (স্যা.)].
‘‘কচ্চি অকসিরা ৰুত্তি, লভসি [লব্ভতি (সী. পী.)] পিণ্ডযাপনং [পিণ্ডিযাপনং (স্যা. ক.)];
অপাবাধো চসি কচ্চি, চক্খুং ন পরিহাযতি’’.
তং গুণো পটিসম্মোদি, ৰেদেহং ৰিনযে রতং;
‘‘যাপনীযং মহারাজ, সব্বমেতং তদূভযং.
‘‘কচ্চি ¶ তুয্হম্পি ৰেদেহ, পচ্চন্তা ন বলীযরে;
কচ্চি অরোগং যোগ্গং তে, কচ্চি ৰহতি ৰাহনং;
কচ্চি তে ব্যাধযো নত্থি, সরীরস্সুপতাপিযা’’ [সরীরস্সুপতাপিকা (সী. পী.), সরীরস্সুপতাপনা (?)].
পটিসম্মোদিতো রাজা, ততো পুচ্ছি অনন্তরা;
অত্থং ধম্মঞ্চ ঞাযঞ্চ, ধম্মকামো রথেসভো.
‘‘কথং ধম্মং চরে মচ্চো, মাতাপিতূসু কস্সপ;
কথং চরে আচরিযে, পুত্তদারে কথং চরে.
‘‘কথং চরেয্য ৰুড্ঢেসু, কথং সমণব্রাহ্মণে;
কথঞ্চ বলকাযস্মিং, কথং জনপদে চরে.
‘‘কথং ধম্মং চরিত্ৰান, মচ্চা গচ্ছন্তি [পেচ্চ গচ্ছতি (সী. স্যা. পী.)] সুগ্গতিং;
কথঞ্চেকে অধম্মট্ঠা, পতন্তি নিরযং অথো’’.
‘‘ৰেদেহস্স ৰচো সুত্ৰা, কস্সপো এতদব্রৰি;
‘‘‘সুণোহি মে মহারাজ, সচ্চং অৰিতথং পদং.
‘‘‘নত্থি ধম্মচরিতস্স [ধম্মস্স চিণ্ণস্স (সী.)], ফলং কল্যাণপাপকং;
নত্থি ¶ দেৰ পরো লোকো, কো ততো হি ইধাগতো.
‘‘‘নত্থি ¶ দেৰ পিতরো ৰা, কুতো মাতা কুতো পিতা;
নত্থি আচরিযো নাম, অদন্তং কো দমেস্সতি.
‘‘‘সমতুল্যানি ভূতানি, নত্থি জেট্ঠাপচাযিকা;
নত্থি বলং ৰীরিযং ৰা, কুতো উট্ঠানপোরিসং;
নিযতানি হি ভূতানি, যথা গোটৰিসো তথা.
‘‘‘লদ্ধেয্যং লভতে মচ্চো, তত্থ দানফলং কুতো;
নত্থি দানফলং দেৰ, অৰসো দেৰৰীরিযো.
‘‘‘বালেহি দানং পঞ্ঞত্তং, পণ্ডিতেহি পটিচ্ছিতং;
অৰসা দেন্তি ধীরানং, বালা পণ্ডিতমানিনো.
‘‘‘সত্তিমে সস্সতা কাযা, অচ্ছেজ্জা অৰিকোপিনো;
তেজো পথৰী আপো চ, ৰাযো সুখং দুখঞ্চিমে;
জীৰে চ সত্তিমে কাযা, যেসং ছেত্তা ন ৰিজ্জতি.
‘‘‘নত্থি হন্তা ৰ ছেত্তা ৰা, হঞ্ঞে যেৰাপি [হঞ্ঞরে ৰাপি (সী. স্যা. পী.)] কোচি নং;
অন্তরেনেৰ কাযানং, সত্থানি ৰীতিৰত্তরে.
‘‘‘যো ¶ চাপি [যোপাযং (সী. পী.), যো চাযং (স্যা. ক.)] সিরমাদায, পরেসং নিসিতাসিনা;
ন সো ছিন্দতি তে কাযে, তত্থ পাপফলং কুতো.
‘‘‘চুল্লাসীতিমহাকপ্পে, সব্বে সুজ্ঝন্তি সংসরং;
অনাগতে তম্হি কালে, সঞ্ঞতোপি ন সুজ্ঝতি.
‘‘‘চরিত্ৰাপি বহুং ভদ্রং, নেৰ সুজ্ঝন্তিনাগতে;
পাপঞ্চেপি ¶ বহুং কত্ৰা, তং খণং নাতিৰত্তরে.
‘‘‘অনুপুব্বেন নো সুদ্ধি, কপ্পানং চুল্লসীতিযা;
নিযতিং নাতিৰত্তাম, ৰেলন্তমিৰ সাগরো’’’.
কস্সপস্স ৰচো সুত্ৰা, অলাতো এতদব্রৰি;
‘‘যথা ভদন্তো ভণতি, ময্হম্পেতংৰ রুচ্চতি.
‘‘অহম্পি পুরিমং জাতিং, সরে সংসরিতত্তনো;
পিঙ্গলো নামহং আসিং, লুদ্দো গোঘাতকো পুরে.
‘‘বারাণসিযং ¶ ফীতাযং, বহুং পাপং কতং মযা;
বহূ মযা হতা পাণা, মহিংসা সূকরা অজা.
‘‘ততো চুতো ইধ জাতো, ইদ্ধে সেনাপতীকুলে;
নত্থি নূন ফলং পাপং, যোহং [পাপে সোহং (সী. পী.)] ন নিরযং গতো.
অথেত্থ বীজকো নাম, দাসো আসি পটচ্চরী [পল়চ্চরী (সী. পী.), পটজ্জরী (ক.)];
উপোসথং উপৰসন্তো, গুণসন্তিকুপাগমি.
কস্সপস্স ৰচো সুত্ৰা, অলাতস্স চ ভাসিতং;
পস্সসন্তো মুহুং উণ্হং, রুদং অস্সূনি ৰত্তযি.
তমনুপুচ্ছি ৰেদেহো, ‘‘কিমত্থং সম্ম রোদসি;
কিং তে সুতং ৰা দিট্ঠং ৰা, কিং মং ৰেদেসি ৰেদনং’’.
ৰেদেহস্স ৰচো সুত্ৰা, বীজকো এতদব্রৰি;
‘‘নত্থি মে ৰেদনা দুক্খা, মহারাজ সুণোহি মে.
‘‘অহম্পি পুরিমং জাতিং, সরামি সুখমত্তনো;
সাকেতাহং ¶ পুরে আসিং, ভাৰসেট্ঠি গুণে রতো.
‘‘সম্মতো ব্রাহ্মণিব্ভানং, সংৰিভাগরতো সুচি;
ন চাপি পাপকং কম্মং, সরামি কতমত্তনো.
‘‘ততো চুতাহং ৰেদেহ, ইধ জাতো দুরিত্থিযা;
গব্ভম্হি কুম্ভদাসিযা, যতো জাতো সুদুগ্গতো.
‘‘এৰম্পি ¶ দুগ্গতো সন্তো, সমচরিযং অধিট্ঠিতো;
উপড্ঢভাগং ভত্তস্স, দদামি যো মে ইচ্ছতি.
‘‘চাতুদ্দসিং পঞ্চদসিং, সদা উপৰসামহং;
ন চাপি [ন অহং (ক.)] ভূতে হিংসামি, থেয্যঞ্চাপি ৰিৰজ্জযিং.
‘‘সব্বমেৰ হি নূনেতং, সুচিণ্ণং ভৰতি নিপ্ফলং;
নিরত্থং মঞ্ঞিদং সীলং, অলাতো ভাসতী যথা.
‘‘কলিমেৰ নূন গণ্হামি, অসিপ্পো ধুত্তকো যথা;
কটং অলাতো গণ্হাতি, কিতৰোসিক্খিতো যথা.
‘‘দ্ৰারং ¶ নপ্পটিপস্সামি, যেন গচ্ছামি সুগ্গতিং;
তস্মা রাজ পরোদামি, সুত্ৰা কস্সপভাসিতং’’.
বীজকস্স ৰচো সুত্ৰা, রাজা অঙ্গতি মব্রৰি;
‘‘নত্থি দ্ৰারং সুগতিযা, নিযতিং [নিযতং (স্যা.)] কঙ্খ বীজক.
‘‘সুখং ৰা যদি ৰা দুক্খং, নিযতিযা কির লব্ভতি;
সংসারসুদ্ধি সব্বেসং, মা তুরিত্থো [তুরিতো (স্যা.)] অনাগতে.
‘‘অহম্পি পুব্বে কল্যাণো, ব্রাহ্মণিব্ভেসু ব্যাৰটো [ৰাৰটো (ক.)];
ৰোহারমনুসাসন্তো ¶ , রতিহীনো তদন্তরা’’.
‘‘পুনপি ভন্তে দক্খেমু, সঙ্গতি চে ভৰিস্সতি’’;
ইদং ৰত্ৰান ৰেদেহো, পচ্চগা সনিৰেসনং.
ততো রত্যা ৰিৰসানে, উপট্ঠানম্হি অঙ্গতি;
অমচ্চে সন্নিপাতেত্ৰা, ইদং ৰচনমব্রৰি.
‘‘চন্দকে মে ৰিমানস্মিং, সদা কামে ৰিধেন্তু মে;
মা উপগচ্ছুং অত্থেসু, গুয্হপ্পকাসিযেসু চ.
‘‘ৰিজযো চ সুনামো চ, সেনাপতি অলাতকো;
এতে অত্থে নিসীদন্তু, ৰোহারকুসলা তযো’’.
ইদং ৰত্ৰান ৰেদেহো, কামেৰ বহুমঞ্ঞথ;
ন চাপি ব্রাহ্মণিব্ভেসু, অত্থে কিস্মিঞ্চি ব্যাৰটো.
ততো দ্ৰেসত্তরত্তস্স, ৰেদেহস্সত্রজা পিযা;
রাজকঞ্ঞা রুচা [রুজা (সী. পী.) এৰমুপরিপি] নাম, ধাতিমাতরমব্রৰি.
‘অলঙ্করোথ মং খিপ্পং, সখিযো চালঙ্করোন্তু [চ করোন্তু (সী. পী.)] মে;
সুৰে পন্নরসো দিব্যো, গচ্ছং ইস্সরসন্তিকে’ [পিতুস্স সন্তিকে (স্যা.)].
তস্সা ¶ মাল্যং অভিহরিংসু, চন্দনঞ্চ মহারহং;
মণিসঙ্খমুত্তারতনং, নানারত্তে চ অম্বরে.
তঞ্চ ¶ সোৰণ্ণযে [সোণ্ণমযে (ক.)] পীঠে, নিসিন্নং বহুকিত্থিযো;
পরিকিরিয পসোভিংসু [অসোভিংসু (সী. স্যা. পী.)], রুচং রুচিরৰণ্ণিনিং.
সা চ সখিমজ্ঝগতা, সব্বাভরণভূসিতা;
সতেরতা ¶ অব্ভমিৰ, চন্দকং পাৰিসী রুচা.
উপসঙ্কমিত্ৰা ৰেদেহং, ৰন্দিত্ৰা ৰিনযে রতং;
সুৰণ্ণখচিতে [সুৰণ্ণৰিকতে (সী. পী.)] পীঠে, একমন্তং উপাৰিসি’’.
তঞ্চ দিস্ৰান ৰেদেহো, অচ্ছরানংৰ সঙ্গমং;
রুচং সখিমজ্ঝগতং, ইদং ৰচনমব্রৰি.
‘‘কচ্চি রমসি পাসাদে, অন্তোপোক্খরণিং পতি;
কচ্চি বহুৰিধং খজ্জং, সদা অভিহরন্তি তে.
‘‘কচ্চি বহুৰিধং মাল্যং, ওচিনিত্ৰা কুমারিযো;
ঘরকে করোথ পচ্চেকং, খিড্ডারতিরতা মুহুং [অহু (স্যা. ক.)].
‘‘কেন ৰা ৰিকলং তুয্হং, কিং খিপ্পং আহরন্তু তে;
মনোকরস্সু কুড্ডমুখী [কুট্টমুখী (সী. পী.)], অপি চন্দসমম্হিপি’’ [অপি চন্দসমম্পি তে (ক.)].
ৰেদেহস্স ৰচো সুত্ৰা, রুচা পিতরমব্রৰি;
‘‘সব্বমেতং মহারাজ, লব্ভতিস্সরসন্তিকে.
‘‘সুৰে পন্নরসো দিব্যো, সহস্সং আহরন্তু মে;
যথাদিন্নঞ্চ দস্সামি, দানং সব্বৰনীস্ৰহং’’ [সব্বৰণীস্ৰহং (স্যা. ক.)].
রুচায ৰচনং সুত্ৰা, রাজা অঙ্গতি মব্রৰি;
‘‘বহুং ৰিনাসিতং ৰিত্তং, নিরত্থং অফলং তযা.
‘‘উপোসথে ৰসং নিচ্চং, অন্নপানং ন ভুঞ্জসি;
নিযতেতং অভুত্তব্বং, নত্থি পুঞ্ঞং অভুঞ্জতো’’.
‘‘বীজকোপি হি সুত্ৰান, তদা কস্সপভাসিতং;
পস্সসন্তো ¶ মুহুং উণ্হং, রুদং অস্সূনি ৰত্তযি.
‘‘যাৰ ¶ রুচে জীৰমানা [জীৰসিনো (সী. পী.)], মা ভত্তমপনামযি;
নত্থি ভদ্দে পরো লোকো, কিং নিরত্থং ৰিহঞ্ঞসি’’.
ৰেদেহস্স ৰচো সুত্ৰা, রুচা রুচিরৰণ্ণিনী;
জানং পুব্বাপরং ধম্মং, পিতরং এতদব্রৰি.
‘‘সুতমেৰ ¶ পুরে আসি, সক্খি [পচ্চক্খং (ক.)] দিট্ঠমিদং মযা;
বালূপসেৰী যো হোতি, বালোৰ সমপজ্জথ.
‘‘মূল়্হো হি মূল়্হমাগম্ম, ভিয্যো মোহং নিগচ্ছতি;
পতিরূপং অলাতেন, বীজকেন চ মুয্হিতুং.
‘‘ত্ৰঞ্চ দেৰাসি সপ্পঞ্ঞো, ধীরো অত্থস্স কোৰিদো;
কথং বালেহি সদিসং, হীনদিট্ঠিং উপাগমি.
‘‘সচেপি সংসারপথেন সুজ্ঝতি, নিরত্থিযা পব্বজ্জা গুণস্স;
কীটোৰ অগ্গিং জলিতং অপাপতং, উপপজ্জতি মোহমূল়্হো [মোমুহো (সী. পী.)] নগ্গভাৰং.
‘‘সংসারসুদ্ধীতি পুরে নিৰিট্ঠা, কম্মং ৰিদূসেন্তি বহূ অজানং [বহূ পজা (ক.)];
পুব্বে কলী দুগ্গহিতোৰঅত্থা [অত্থো (ক.), দুগ্গহিতোৰ’নত্থা (?)], দুম্মো চ যা বলিসা অম্বুজোৰ.
‘‘উপমং তে করিস্সামি, মহারাজ তৰত্থিযা;
উপমায ¶ মিধেকচ্চে, অত্থং জানন্তি পণ্ডিতা.
‘‘ৰাণিজানং যথা নাৰা, অপ্পমাণভরা [অপ্পমাণহরা (পী.)] গরু;
অতিভারং সমাদায, অণ্ণৰে অৰসীদতি.
‘‘এৰমেৰ নরো পাপং, থোকং থোকম্পি আচিনং;
অতিভারং সমাদায, নিরযে অৰসীদতি.
‘‘ন তাৰ ভারো পরিপূরো, অলাতস্স মহীপতি;
আচিনাতি চ তং পাপং, যেন গচ্ছতি দুগ্গতিং.
‘‘পুব্বেৰস্স ¶ কতং পুঞ্ঞং, অলাতস্স মহীপতি;
তস্সেৰ দেৰ নিস্সন্দো, যঞ্চেসো লভতে সুখং.
‘‘খীযতে চস্স তং পুঞ্ঞং, তথা হি অগুণে রতো;
উজুমগ্গং অৰহায [অপাহায (সী.)], কুম্মগ্গমনুধাৰতি.
‘‘তুলা যথা পগ্গহিতা, ওহিতে তুলমণ্ডলে;
উন্নমেতি তুলাসীসং, ভারে ওরোপিতে সতি.
‘‘এৰমেৰ নরো পুঞ্ঞং, থোকং থোকম্পি আচিনং;
সগ্গাতিমানো দাসোৰ, বীজকো সাতৰে [সাধৰে (ক.)] রতো.
‘‘যমজ্জ বীজকো দাসো, দুক্খং পস্সতি অত্তনি;
পুব্বেৰস্স [পুব্বে তস্স (সী. পী.)] কতং পাপং, তমেসো পটিসেৰতি.
‘‘খীযতে চস্স তং পাপং, তথা হি ৰিনযে রতো;
কস্সপঞ্চ সমাপজ্জ, মা হেৰুপ্পথমাগমা.
‘‘যং ¶ ¶ যঞ্হি রাজ ভজতি, সন্তং ৰা যদি ৰা অসং;
সীলৰন্তং ৰিসীলং ৰা, ৰসং তস্সেৰ গচ্ছতি.
‘‘যাদিসং কুরুতে মিত্তং, যাদিসং চূপসেৰতি;
সোপি তাদিসকো হোতি, সহৰাসো হি [সহৰাসোপি (ক.)] তাদিসো.
‘‘সেৰমানো সেৰমানং, সম্ফুট্ঠো সম্ফুসং পরং;
সরো দিদ্ধো কলাপংৰ, অলিত্তমুপলিম্পতি;
উপলেপভযা [উপলিম্পভযা (ক.)] ধীরো, নেৰ পাপসখা সিযা.
‘‘পূতিমচ্ছং কুসগ্গেন, যো নরো উপনয্হতি;
কুসাপি পূতি ৰাযন্তি, এৰং বালূপসেৰনা.
‘‘তগরঞ্চ পলাসেন, যো নরো উপনয্হতি;
পত্তাপি সুরভি ৰাযন্তি, এৰং ধীরূপসেৰনা.
‘‘তস্মা পত্তপুটস্সেৰ [ফলপুটস্সেৰ (সী. পী.)], ঞত্ৰা সম্পাকমত্তনো;
অসন্তে নোপসেৰেয্য, সন্তে সেৰেয্য পণ্ডিতো;
অসন্তো নিরযং নেন্তি, সন্তো পাপেন্তি সুগ্গতিং’’.
অহম্পি ¶ জাতিযো সত্ত, সরে সংসরিতত্তনো;
অনাগতাপি সত্তেৰ, যা গমিস্সং ইতো চুতা.
‘‘যা মে সা সত্তমী জাতি, অহু পুব্বে জনাধিপ;
কম্মারপুত্তো মগধেসু, অহুং রাজগহে পুরে.
‘‘পাপং সহাযমাগম্ম, বহুং পাপং কতং মযা;
পরদারস্স হেঠেন্তো, চরিম্হা অমরা ৰিয.
‘‘তং ¶ কম্মং নিহিতং অট্ঠা, ভস্মচ্ছন্নোৰ পাৰকো;
অথ অঞ্ঞেহি কম্মেহি, অজাযিং ৰংসভূমিযং.
‘‘কোসম্বিযং সেট্ঠিকুলে, ইদ্ধে ফীতে মহদ্ধনে;
একপুত্তো মহারাজ, নিচ্চং সক্কতপূজিতো.
‘‘তত্থ মিত্তং অসেৰিস্সং, সহাযং সাতৰে রতং;
পণ্ডিতং সুতসম্পন্নং, সো মং অত্থে নিৰেসযি.
‘‘চাতুদ্দসিং পঞ্চদসিং, বহুং রত্তিং উপাৰসিং;
তং কম্মং নিহিতং অট্ঠা, নিধীৰ উদকন্তিকে.
‘‘অথ পাপান কম্মানং, যমেতং মগধে কতং;
ফলং পরিযাগ মং [পরিযাগ তং (সী.), পরিযাগতং (স্যা. পী.)] পচ্ছা, ভুত্ৰা দুট্ঠৰিসং যথা.
‘‘ততো ¶ চুতাহং ৰেদেহ, রোরুৰে নিরযে চিরং;
সকম্মুনা অপচ্চিস্সং, তং সরং ন সুখং লভে.
‘‘বহুৰস্সগণে তত্থ, খেপযিত্ৰা বহুং দুখং;
ভিন্নাগতে [ভেণ্ণাকটে (সী. পী.)] অহুং রাজ, ছগলো উদ্ধতপ্ফলো [ছকলো উদ্ধিতপ্ফলো (সী. পী.)].
‘‘সাতপুত্তা মযা ৰূল়্হা, পিট্ঠিযা চ রথেন চ;
তস্স কম্মস্স নিস্সন্দো, পরদারগমনস্স মে.
‘‘ততো চুতাহং ৰেদেহ, কপি আসিং ব্রহাৰনে;
নিলুঞ্চিতফলো [নিলিচ্ছিতফলো (সী. পী.)] যেৰ, যূথপেন পগব্ভিনা;
তস্স কম্মস্স নিস্সন্দো, পরদারগমনস্স মে.
‘‘ততো ¶ চুতাহং ৰেদেহ, দস্সনেসু [দসণ্ণেসু (সী. পী.), দসন্নেসু (স্যা.)] পসূ অহুং;
নিলুঞ্চিতো ¶ জৰো ভদ্রো, যোগ্গং ৰূল়্হং চিরং মযা;
তস্স কম্মস্স নিস্সন্দো, পরদারগমনস্স মে.
‘‘ততো চুতাহং ৰেদেহ, ৰজ্জীসু কুলমাগমা;
নেৰিত্থী ন পুমা আসিং, মনুস্সত্তে সুদুল্লভে;
তস্স কম্মস্স নিস্সন্দো, পরদারগমনস্স মে.
‘‘ততো চুতাহং ৰেদেহ, অজাযিং নন্দনে ৰনে;
ভৰনে তাৰতিংসাহং, অচ্ছরা কামৰণ্ণিনী [ৰরৰণ্ণিনী (ক.)].
‘‘ৰিচিত্তৰত্থাভরণা, আমুত্তমণিকুণ্ডলা;
কুসলা নচ্চগীতস্স, সক্কস্স পরিচারিকা.
‘‘তত্থ ঠিতাহং ৰেদেহ, সরামি জাতিযো ইমা;
অনাগতাপি সত্তেৰ, যা গমিস্সং ইতো চুতা.
‘‘পরিযাগতং তং কুসলং, যং মে কোসম্বিযং কতং;
দেৰে চেৰ মনুস্সে চ, সন্ধাৰিস্সং ইতো চুতা.
‘‘সত্ত জচ্চো [জচ্চা (স্যা. পী.)] মহারাজ, নিচ্চং সক্কতপূজিতা;
থীভাৰাপি ন মুচ্চিস্সং, ছট্ঠা নিগতিযো [ছট্ঠা গতিযো (স্যা.)] ইমা.
‘‘সত্তমী চ গতি দেৰ, দেৰপুত্তো মহিদ্ধিকো;
পুমা দেৰো ভৰিস্সামি [ভৰিস্সতি (ক.)], দেৰকাযস্মিমুত্তমো.
‘‘অজ্জাপি সন্তানমযং, মালং গন্থেন্তি নন্দনে;
দেৰপুত্তো জৰো নাম, যো মে মালং পটিচ্ছতি.
‘‘মুহুত্তো ¶ ৰিয সো দিব্যো, ইধ ৰস্সানি সোল়স;
রত্তিন্দিৰো ¶ চ সো দিব্যো, মানুসিং সরদোসতং.
‘‘ইতি কম্মানি অন্ৰেন্তি, অসঙ্খেয্যাপি জাতিযো;
কল্যাণং যদি ৰা পাপং, ন হি কম্মং ৰিনস্সতি [পনস্সতি (সী. পী.)].
‘‘যো ¶ ইচ্ছে পুরিসো হোতুং, জাতিং জাতিং [জাতিজাতিং (সী. পী.)] পুনপ্পুনং;
পরদারং ৰিৰজ্জেয্য, ধোতপাদোৰ কদ্দমং.
‘‘যা ইচ্ছে পুরিসো হোতুং, জাতিং জাতিং পুনপ্পুনং;
সামিকং অপচাযেয্য, ইন্দংৰ পরিচারিকা.
‘‘যো ইচ্ছে দিব্যভোগঞ্চ, দিব্বমাযুং যসং সুখং;
পাপানি পরিৰজ্জেত্ৰা [পরিৰজ্জেয্য (ক.)], তিৰিধং ধম্মমাচরে.
‘‘কাযেন ৰাচা মনসা, অপ্পমত্তো ৰিচক্খণো;
অত্তনো হোতি অত্থায, ইত্থী ৰা যদি ৰা পুমা.
‘‘যে কেচিমে মানুজা জীৰলোকে, যসস্সিনো সব্বসমন্তভোগা;
অসংসযং তেহি পুরে সুচিণ্ণং, কম্মস্সকাসে পুথু সব্বসত্তা.
‘‘ইঙ্ঘানুচিন্তেসি সযম্পি দেৰ, কুতোনিদানা তে ইমা জনিন্দ;
যা তে ইমা অচ্ছরাসন্নিকাসা, অলঙ্কতা কঞ্চনজালছন্না’’.
ইচ্চেৰং পিতরং কঞ্ঞা, রুচা তোসেসি অঙ্গতিং;
মূল়্হস্স ¶ মগ্গমাচিক্খি, ধম্মমক্খাসি সুব্বতা.
অথাগমা ব্রহ্মলোকা, নারদো মানুসিং পজং;
জম্বুদীপং অৰেক্খন্তো, অদ্দা রাজানমঙ্গতিং.
‘‘ততো পতিট্ঠা পাসাদে, ৰেদেহস্স পুরত্থতো [পুরক্খতো (স্যা. ক.)];
তঞ্চ দিস্ৰানানুপ্পত্তং, রুচা ইসিমৰন্দথ.
‘‘অথাসনম্হা ওরুয্হ, রাজা ব্যথিতমানসো [ব্যম্হিতমানসো (সী. স্যা. পী.)];
নারদং পরিপুচ্ছন্তো, ইদং ৰচনমব্রৰি.
‘‘কুতো ¶ নু আগচ্ছসি দেৰৰণ্ণি, ওভাসযং সব্বদিসা [সংৰরিং (সী. পী.)] চন্দিমাৰ;
অক্খাহি মে পুচ্ছিতো নামগোত্তং, কথং তং জানন্তি মনুস্সলোকে’’.
‘‘অহঞ্হি দেৰতো ইদানি এমি, ওভাসযং সব্বদিসা [সংৰরিং (সী. পী.)] চন্দিমাৰ;
অক্খামি তে পুচ্ছিতো নামগোত্তং, জানন্তি মং নারদো কস্সপো চ’’.
‘‘অচ্ছেররূপং তৰ [ৰত (সী. পী.)] যাদিসঞ্চ, ৰেহাযসং গচ্ছসি তিট্ঠসী চ;
পুচ্ছামি তং নারদ এতমত্থং, অথ কেন ৰণ্ণেন তৰাযমিদ্ধি’’.
‘‘সচ্চঞ্চ ¶ ¶ ধম্মো চ দমো চ চাগো, গুণা মমেতে পকতা পুরাণা;
তেহেৰ ধম্মেহি সুসেৰিতেহি, মনোজৰো যেন কামং গতোস্মি’’.
‘‘অচ্ছেরমাচিক্খসি পুঞ্ঞসিদ্ধিং, সচে হি এতেহি [এতে ত্ৰং (সী. পী.)] যথা ৰদেসি;
পুচ্ছামি তং নারদ এতমত্থং, পুট্ঠো চ মে সাধু ৰিযাকরোহি’’.
‘‘পুচ্ছস্সু মং রাজ তৰেস অত্থো, যং সংসযং কুরুসে ভূমিপাল;
অহং তং নিস্সংসযতং গমেমি, নযেহি ঞাযেহি চ হেতুভী চ’’.
‘‘পুচ্ছামি তং নারদ এতমত্থং, পুট্ঠো চ মে নারদ মা মুসা ভণি;
অত্থি নু দেৰা পিতরো নু অত্থি, লোকো পরো অত্থি জনো যমাহু’’.
‘‘অত্থেৰ ¶ দেৰা পিতরো চ অত্থি, লোকো পরো অত্থি জনো যমাহু;
কামেসু গিদ্ধা চ নরা পমূল়্হা, লোকং পরং ন ৰিদূ মোহযুত্তা’’.
‘‘অত্থীতি ¶ চে নারদ সদ্দহাসি, নিৰেসনং পরলোকে মতানং;
ইধেৰ মে পঞ্চ সতানি দেহি, দস্সামি তে পরলোকে সহস্সং’’.
‘‘দজ্জেমু খো পঞ্চ সতানি ভোতো, জঞ্ঞামু চে সীলৰন্তং ৰদঞ্ঞুং [ৰতঞ্ঞুং (ক.)];
লুদ্দং তং ভোন্তং নিরযে ৰসন্তং, কো চোদযে পরলোকে সহস্সং.
‘‘ইধেৰ যো হোতি অধম্মসীলো [অকম্মসীলো (পী.)], পাপাচারো অলসো লুদ্দকম্মো;
ন পণ্ডিতা তস্মিং ইণং দদন্তি, ন হি আগমো হোতি তথাৰিধম্হা.
‘‘দক্খঞ্চ পোসং মনুজা ৰিদিত্ৰা, উট্ঠানকং [উট্ঠাহকং (সী.)] সীলৰন্তং ৰদঞ্ঞুং;
সযমেৰ ভোগেহি নিমন্তযন্তি, কম্মং করিত্ৰা পুন মাহরেসি’’.
‘‘ইতো চুতো [গতো (সী. পী.)] দক্খসি তত্থ রাজ, কাকোলসঙ্ঘেহি ৰিকস্সমানং [কাকোল়সঙ্ঘেহিপি কড্ঢমানং (সী. পী.)];
তং খজ্জমানং নিরযে ৰসন্তং, কাকেহি গিজ্ঝেহি চ সেনকেহি [সোণকেহি (স্যা. ক.)];
সঞ্ছিন্নগত্তং ¶ রুহিরং সৰন্তং, কো চোদযে পরলোকে সহস্সং.
‘‘অন্ধংতমং ¶ তত্থ ন চন্দসূরিযা, নিরযো সদা তুমুলো ঘোররূপো;
সা নেৰ রত্তী ন দিৰা পঞ্ঞাযতি, তথাৰিধে কো ৰিচরে ধনত্থিকো.
‘‘সবলো চ সামো চ দুৰে সুৰানা, পৰদ্ধকাযা বলিনো মহন্তা;
খাদন্তি দন্তেহি অযোমযেহি, ইতো পণুন্নং পরলোকপত্তং [পরলোকে পতন্তং (ক.)].
‘‘তং খজ্জমানং নিরযে ৰসন্তং, লুদ্দেহি ৰাল়েহি অঘম্মিগেহি চ;
সঞ্ছিন্নগত্তং রুহিরং সৰন্তং, কো চোদযে পরলোকে সহস্সং.
‘‘উসূহি সত্তীহি চ সুনিসিতাহি, হনন্তি ৰিজ্ঝন্তি চ পচ্চমিত্তা [পোথযন্তি (ক.)];
কাল়ূপকাল়া নিরযম্হি ঘোরে, পুব্বে নরং দুক্কটকম্মকারিং.
‘‘তং ¶ হঞ্ঞমানং নিরযে ৰজন্তং, কুচ্ছিস্মিং পস্সস্মিং ৰিপ্ফালিতূদরং;
সঞ্ছিন্নগত্তং ¶ রুহিরং সৰন্তং, কো চোদযে পরলোকে সহস্সং.
‘‘সত্তী উসূ তোমরভিণ্ডিৰালা, ৰিৰিধাৰুধা ৰস্সন্তি তত্থ দেৰা;
পতন্তি অঙ্গারমিৰচ্চিমন্তো, সিলাসনী ৰস্সতি লুদ্দকম্মে.
‘‘উণ্হো চ ৰাতো নিরযম্হি দুস্সহো, ন তম্হি সুখং লব্ভতি [সেতি (ক.)] ইত্তরম্পি;
তং তং ৰিধাৰন্তমলেনমাতুরং, কো চোদযে পরলোকে সহস্সং.
‘‘সন্ধাৰমানম্পি ¶ [সন্ধাৰমানং তং (সী. পী.)] রথেসু যুত্তং, সজোতিভূতং পথৰিং কমন্তং;
পতোদলট্ঠীহি সুচোদযন্তং [সুচোদিযন্তং (সী. পী.)], কো চোদযে পরলোকে সহস্সং.
‘‘তমারুহন্তং খুরসঞ্চিতং গিরিং, ৰিভিংসনং পজ্জলিতং ভযানকং;
সঞ্ছিন্নগত্তং রুহিরং সৰন্তং, কো চোদযে পরলোকে সহস্সং.
‘‘তমারুহন্তং পব্বতসন্নিকাসং, অঙ্গাররাসিং জলিতং ভযানকং;
সুদড্ঢগত্তং ¶ কপণং রুদন্তং, কো চোদযে পরলোকে সহস্সং.
‘‘অব্ভকূটসমা উচ্চা, কণ্টকনিচিতা [কণ্টকাপচিতা (সী. পী.), কণ্টকাহিচিতা (স্যা.)] দুমা;
অযোমযেহি তিক্খেহি, নরলোহিতপাযিভি.
‘‘তমারুহন্তি নারিযো, নরা চ পরদারগূ;
চোদিতা সত্তিহত্থেহি, যমনিদ্দেসকারিভি.
‘‘তমারুহন্তং নিরযং, সিম্বলিং রুহরিমক্খিতং;
ৰিদড্ঢকাযং [ৰিদুট্ঠকাযং (পী.)] ৰিতচং, আতুরং গাল়্হৰেদনং.
‘‘পস্সসন্তং মুহুং উণ্হং, পুব্বকম্মাপরাধিকং;
দুমগ্গে ৰিতচং গত্তং [দুমগ্গৰিটপগ্গতং (সী.)], কো তং যাচেয্য তং ধনং.
‘‘অব্ভকূটসমা উচ্চা, অসিপত্তাচিতা দুমা;
অযোমযেহি তিক্খেহি, নরলোহিতপাযিভি.
‘‘তমারুহন্তং অসিপত্তপাদপং, অসীহি তিক্খেহি চ ছিজ্জমানং [পভিজ্জমানং (ক.)];
সঞ্ছিন্নগত্তং রুহিরং সৰন্তং, কো চোদযে পরলোকে সহস্সং.
‘‘ততো ¶ নিক্খন্তমত্তং তং, অসিপত্তাচিতা দুমা [অসিপত্তনিরযা দুখা (সী. পী.)];
সম্পতিতং ৰেতরণিং, কো তং যাচেয্য তং ধনং.
‘‘খরা খরোদকা [খারোদিকা (সী.), খরোদিকা (পী.)] তত্তা, দুগ্গা ৰেতরণী নদী;
অযোপোক্খরসঞ্ছন্না, তিক্খা পত্তেহি সন্দতি.
‘‘তত্থ ¶ সঞ্ছিন্নগত্তং তং, ৰুয্হন্তং রুহিরমক্খিতং;
ৰেতরঞ্ঞে অনালম্বে, কো তং যাচেয্য তং ধনং’’.
‘‘ৰেধামি ¶ রুক্খো ৰিয ছিজ্জমানো, দিসং ন জানামি পমূল়্হসঞ্ঞো;
ভযানুতপ্পামি মহা চ মে ভযা, সুত্ৰান কথা [গাথা (সী. স্যা. পী.)] তৰ ভাসিতা ইসে.
‘‘আদিত্তে ৰারিমজ্ঝংৰ, দীপংৰোঘে মহণ্ণৰে;
অন্ধকারেৰ পজ্জোতো, ত্ৰং নোসি সরণং ইসে.
‘‘অত্থঞ্চ ধম্মং অনুসাস মং ইসে, অতীতমদ্ধা অপরাধিতং মযা;
আচিক্খ মে নারদ সুদ্ধিমগ্গং, যথা অহং নো নিরযং পতেয্যং’’.
‘‘যথা অহু ধতরট্ঠো ( ) [এত্থ কিঞ্চি ঊনং ৰিয দিস্সতি], ৰেস্সামিত্তো অট্ঠকো যামতগ্গি;
উসিন্দরো চাপি সিৰী চ রাজা, পরিচারকা সমণব্রাহ্মণানং.
‘‘এতে চঞ্ঞে চ রাজানো, যে সগ্গৰিসযং [সক্কৰিসযং (সী. পী.)] গতা;
অধম্মং পরিৰজ্জেত্ৰা, ধম্মং চর মহীপতি.
‘‘অন্নহত্থা চ তে ব্যম্হে, ঘোসযন্তু পুরে তৰ;
কো ছাতো কো চ তসিতো, কো মালং কো ৰিলেপনং;
নানারত্তানং ৰত্থানং, কো নগ্গো পরিদহিস্সতি.
‘‘কো ¶ ¶ পন্থে ছত্তমানেতি [ছত্ত’মাদেতি (সী. স্যা. পী.)], পাদুকা চ মুদূ সুভা;
ইতি সাযঞ্চ পাতো চ, ঘোসযন্তু পুরে তৰ.
‘‘জিণ্ণং পোসং গৰস্সঞ্চ, মাস্সু যুঞ্জ যথা পুরে;
পরিহারঞ্চ দজ্জাসি, অধিকারকতো বলী.
‘‘কাযো তে রথসঞ্ঞাতো, মনোসারথিকো লহু;
অৰিহিংসাসারিতক্খো, সংৰিভাগপটিচ্ছদো.
‘‘পাদসঞ্ঞমনেমিযো, হত্থসঞ্ঞমপক্খরো;
কুচ্ছিসঞ্ঞমনব্ভন্তো, ৰাচাসঞ্ঞমকূজনো.
‘‘সচ্চৰাক্যসমত্তঙ্গো, অপেসুঞ্ঞসুসঞ্ঞতো;
গিরাসখিলনেলঙ্গো, মিতভাণিসিলেসিতো.
‘‘সদ্ধালোভসুসঙ্খারো, নিৰাতঞ্জলিকুব্বরো;
অথদ্ধতানতীসাকো [অত্থদ্ধতানতীসাকো (সী. পী.)], সীলসংৰরনন্ধনো.
‘‘অক্কোধনমনুগ্ঘাতী, ধম্মপণ্ডরছত্তকো;
বাহুসচ্চমপালম্বো, ঠিতচিত্তমুপাধিযো [ধিতিচিত্তমুপাধিযো (ক.)].
‘‘কালঞ্ঞুতাচিত্তসারো, ৰেসারজ্জতিদণ্ডকো;
নিৰাতৰুত্তিযোত্তকো [নিৰাতৰুত্তিযোত্তঙ্গো (ক.)], অনতিমানযুগো লহু.
‘‘অলীনচিত্তসন্থারো ¶ , ৰুদ্ধিসেৰী রজোহতো;
সতি পতোদো ধীরস্স, ধিতি যোগো চ রস্মিযো.
‘‘মনো দন্তং পথং নেতি [পথ’ন্ৰেতি (সী. পী.)], সমদন্তেহি ৰাহিভি;
ইচ্ছা ¶ লোভো চ কুম্মগ্গো, উজুমগ্গো চ সংযমো.
‘‘রূপে সদ্দে রসে গন্ধে, ৰাহনস্স পধাৰতো;
পঞ্ঞা আকোটনী রাজ, তত্থ অত্তাৰ সারথি.
‘‘সচে এতেন যানেন, সমচরিযা দল়্হা ধিতি;
সব্বকামদুহো রাজ, ন জাতু নিরযং ৰজে’’.
‘‘অলাতো ¶ দেৰদত্তোসি, সুনামো আসি ভদ্দজি;
ৰিজযো সারিপুত্তোসি, মোগ্গল্লানোসি বীজকো.
‘‘সুনক্খত্তো লিচ্ছৰিপুত্তো, গুণো আসি অচেলকো;
আনন্দো সা রুচা আসি, যা রাজানং পসাদযি.
‘‘ঊরুৰেল়কস্সপো রাজা, পাপদিট্ঠি তদা অহু;
মহাব্রহ্মা বোধিসত্তো, এৰং ধারেথ জাতক’’ন্তি.
মহানারদকস্সপজাতকং অট্ঠমং.
৫৪৬. ৰিধুরজাতকং (৯)
দোহল়কণ্ডং
‘‘পণ্ডু কিসিযাসি দুব্বলা, ৰণ্ণরূপং [ৰণ্ণরূপে (ক.)] নতৰেদিসং পুরে;
ৰিমলে অক্খাহি পুচ্ছিতা, কীদিসী তুয্হং সরীরৰেদনা’’.
‘‘ধম্মো মনুজেসু মাতীনং [মাতিনং (সী. পী.)], দোহল়ো নাম জনিন্দ ৰুচ্চতি;
ধম্মাহতং ¶ নাগকুঞ্জর, ৰিধুরস্স হদযাভিপত্থযে’’.
‘‘চন্দং খো ত্ৰং দোহল়াযসি, সূরিযং ৰা অথ ৰাপি মালুতং;
দুল্লভঞ্হি [দুল্লভে (সী. পী.)] ৰিধুরস্স দস্সনং [দস্সনে (সী. পী.)], কো ৰিধুরমিধ মানযিস্সতি’’.
‘‘কিন্নু তাত তুৰং পজ্ঝাযসি, পদুমং হত্থগতংৰ তে মুখং;
কিন্নু দুম্মনরূপোসি ইস্সর, মা ত্ৰং সোচি অমিত্ততাপন’’.
‘‘মাতা ¶ ¶ হি তৰ ইরন্ধতি [ইরন্দতি (সী. স্যা. পী.)], ৰিধুরস্স হদযং ধনিযতি;
দুল্লভঞ্হি ৰিধুরস্স দস্সনং, কো ৰিধুরমিধ মানযিস্সতি’’.
‘‘তস্স ভত্তুপরিযেসনং [ভত্তুপরিযেসনং (সী. পী.)] চর, যো ৰিধুরমিধ মানযিস্সতি’’;
‘‘পিতুনো চ সা সুত্ৰান ৰাক্যং, রত্তিং নিক্খম্ম অৰস্সুতিং চরি’’.
‘‘কে গন্ধব্বে রক্খসে চ নাগে, কে কিম্পুরিসে চাপি মানুসে;
কে ¶ পণ্ডিতে সব্বকামদদে [সব্বকামদে (সী. পী.)], দীঘরত্তং ভত্তা মে ভৰিস্সতি’’.
‘‘অস্সাস হেস্সামি তে পতি, ভত্তা তে হেস্সামি অনিন্দলোচনে;
পঞ্ঞা হি মমং তথাৰিধা, অস্সাস হেস্সসি ভরিযা মম.
‘‘অৰচাসি পুণ্ণকং ইরন্ধতী [ইরন্দতী (সী. পী.)], পুব্বপথানুগতেন চেতসা;
এহি গচ্ছাম পিতু মমন্তিকে [পিতু মম সন্তিকং (ক.)], এসোৰ তে এতমত্থং পৰক্খতি.
‘‘অলঙ্কতা সুৰসনা, মালিনী চন্দনুস্সদা;
যক্খং হত্থে গহেত্ৰান, পিতুসন্তিকুপাগমি’’.
‘‘নাগৰর ৰচো সুণোহি মে, পতিরূপং পটিপজ্জ সুঙ্কিযং;
পত্থেমি অহং ইরন্ধতিং, তায সমঙ্গিং করোহি মং তুৰং.
‘‘সতং হত্থী সতং অস্সা, সতং অস্সতরীরথা;
সতং ৰলভিযো পুণ্ণা, নানারত্নস্স কেৰলা;
তে নাগ পটিপজ্জস্সু, ধীতরং দেহিরন্ধতিং’’.
‘‘যাৰ ¶ ¶ আমন্তযে ঞাতী, মিত্তে চ সুহদজ্জনে [সুহদংজনং (সী. পী.)];
অনামন্ত কতং কম্মং, তং পচ্ছা অনুতপ্পতি’’.
ততো সো ৰরুণো নাগো, পৰিসিত্ৰা নিৰেসনং;
ভরিযং আমন্তযিত্ৰান, ইদং ৰচনমব্রৰি.
‘‘অযং সো পুণ্ণকো যক্খো, যাচতী মং ইরন্ধতিং;
বহুনা ৰিত্তলাভেন, তস্স দেম পিযং মমং’’.
‘‘ন ধনেন ন ৰিত্তেন, লব্ভা অম্হং ইরন্ধতী;
সচে চ খো হদযং পণ্ডিতস্স, ধম্মেন লদ্ধা ইধ মাহরেয্য;
এতেন ৰিত্তেন কুমারি লব্ভা, নাঞ্ঞং ধনং উত্তরি পত্থযাম’’.
ততো সো ৰরুণো নাগো, নিক্খমিত্ৰা নিৰেসনা;
পুণ্ণকামন্তযিত্ৰান, ইদং ৰচনমব্রৰি.
‘‘ন ¶ ধনেন ন ৰিত্তেন, লব্ভা অম্হং ইরন্ধতী;
সচে তুৰং হদযং পণ্ডিতস্স, ধম্মেন লদ্ধা ইধ মাহরেসি;
এতেন ৰিত্তেন কুমারি লব্ভা, নাঞ্ঞং ধনং উত্তরি পত্থযাম’’.
‘‘যং পণ্ডিতোত্যেকে ৰদন্তি লোকে, তমেৰ বালোতি পুনাহু অঞ্ঞে;
অক্খাহি ¶ মে ৰিপ্পৰদন্তি এত্থ, কং পণ্ডিতং নাগ তুৰং ৰদেসি’’.
‘‘কোরব্যরাজস্স ধনঞ্চযস্স [ধনঞ্জযস্স (সী. স্যা. পী.)], যদি তে সুতো ৰিধুরো নাম কত্তা;
আনেহি তং পণ্ডিতং ধম্মলদ্ধা, ইরন্ধতী পদচরা [পদ্ধচরা (সী. পী.), পট্ঠচরা (স্যা. ক.)] তে হোতু.
‘‘ইদঞ্চ সুত্ৰা ৰরুণস্স ৰাক্যং, উট্ঠায যক্খো পরমপ্পতীতো;
তত্থেৰ সন্তো পুরিসং অসংসি, আনেহি আজঞ্ঞমিধেৰ যুত্তং.
‘‘জাতরূপমযা ¶ কণ্ণা, কাচম্হিচমযা [কাচম্হমযা (সী.), কাচম্ভমযা (পী.)] খুরা;
জম্বোনদস্স পাকস্স, সুৰণ্ণস্স উরচ্ছদো’’.
‘‘দেৰৰাহৰহং যানং, অস্সমারুয্হ পুণ্ণকো;
অলঙ্কতো কপ্পিতকেসমস্সু, পক্কামি ৰেহাযসমন্তলিক্খে [অন্তলিক্খং (ক.)].
‘‘সো পুণ্ণকো কামরাগেন [কামৰেগেন (সী. পী.)] গিদ্ধো, ইরন্ধতিং নাগকঞ্ঞং জিগীসং [জিগিংসং (সী. স্যা. পী.)];
গন্ত্ৰান তং ভূতপতিং যসস্সিং, ইচ্চব্রৰী ৰেস্সৰণং কুৰেরং.
‘‘ভোগৰতী নাম মন্দিরে, ৰাসা ¶ হিরঞ্ঞৰতীতি ৰুচ্চতি;
নগরে নিম্মিতে কঞ্চনমযে, মণ্ডলস্স উরগস্স নিট্ঠিতং.
‘‘অট্টালকা ওট্ঠগীৰিযো, লোহিতঙ্কস্স মসারগল্লিনো;
পাসাদেত্থ সিলামযা, সোৰণ্ণরতনেহি ছাদিতা.
‘‘অম্বা তিলকা চ জম্বুযো, সত্তপণ্ণা মুচলিন্দকেতকা;
পিযঙ্গু [পিযকা (সী. পী.), পিযঙ্গুকা (স্যা.)] উদ্দালকা সহা, উপরিভদ্দকা সিন্দুৰারকা [ভিন্দুৰারিতা (স্যা. পী.), ভিন্ধৰারিতা (ক.)].
‘‘চম্পেয্যকা নাগমল্লিকা, ভগিনীমালা অথ মেত্থ কোলিযা;
এতে দুমা পরিণামিতা, সোভযন্তি উরগস্স মন্দিরং [মন্দিরে (স্যা. ক.)].
‘‘খজ্জুরেত্থ ¶ সিলামযা, সোৰণ্ণধুৰপুপ্ফিতা বহূ;
যত্থ ৰসতো পপাতিকো, নাগরাজা ৰরুণো মহিদ্ধিকো.
‘‘তস্স কোমারিকা ভরিযা, ৰিমলা কঞ্চনৰেল্লিৰিগ্গহা;
কালা ¶ তরুণাৰ উগ্গতা, পুচিমন্দত্থনী চারুদস্সনা.
‘‘লাখারসরত্তসুচ্ছৰী ¶ , কণিকারাৰ নিৰাতপুপ্ফিতা [কণিকারোৰ নিৰাতপুপ্ফিতো (সী. পী.)];
তিদিৰোকচরাৰ অচ্ছরা, ৰিজ্জুৰব্ভঘনা ৰিনিস্সটা.
‘‘সা দোহল়িনী সুৰিম্হিতা, ৰিধুরস্স হদযং ধনিযতি;
তং তেসং দেমি ইস্সর, তেন তে দেন্তি ইরন্ধতিং মমং’’.
‘‘সো পুণ্ণকো ভূতপতিং যসস্সিং, আমন্তয ৰেস্সৰণং কুৰেরং;
তত্থেৰ সন্তো [সন্তং (পী.)] পুরিসং অসংসি, আনেহি আজঞ্ঞমিধেৰ যুত্তং.
‘‘জাতরূপমযা কণ্ণা, কাচম্হিচমযা খুরা;
জম্বোনদস্স পাকস্স, সুৰণ্ণস্স উরচ্ছদো.
‘‘দেৰৰাহৰহং যানং, অস্সমারুয্হ পুণ্ণকো;
অলঙ্কতো কপ্পিতকেসমস্সু, পক্কামি ৰেহাযসমন্তলিক্খে’’.
‘‘সো ¶ অগ্গমা রাজগহং সুরম্মং, অঙ্গস্স ¶ রঞ্ঞো নগরং দুরাযুতং [দুরাসদং (স্যা.)];
পহূতভক্খং বহুঅন্নপানং, মসক্কসারং ৰিয ৰাসৰস্স.
‘‘মযূরকোঞ্চাগণসম্পঘুট্ঠং, দিজাভিঘুট্ঠং দিজসঙ্ঘসেৰিতং;
নানাসকুন্তাভিরুদং সুৰঙ্গণং [সুভঙ্গণং (সী. পী.)], পুপ্ফাভিকিণ্ণং হিমৰংৰ পব্বতং.
‘‘সো পুণ্ণকো ৰেপুলমাভিরূহি [ৰেপুল্লমাভিরুচ্ছি (সী. পী.)], সিলুচ্চযং কিম্পুরিসানুচিণ্ণং;
অন্ৰেসমানো মণিরতনং উল়ারং, তমদ্দসা পব্বতকূটমজ্ঝে.
‘‘দিস্ৰা মণিং পভস্সরং জাতিমন্তং [জাতিৰন্তং (সী. স্যা.)], মনোহরং [ধনাহরং (সী. পী. ক.)] মণিরতনং উল়ারং;
দদ্দল্লমানং যসসা যসস্সিনং, ওভাসতী ৰিজ্জুরিৰন্তলিক্খে.
‘‘তমগ্গহী ৰেল়ুরিযং মহগ্ঘং, মনোহরং নাম মহানুভাৰং;
আজঞ্ঞমারুয্হ মনোমৰণ্ণো, পক্কামি ৰেহাযসমন্তলিক্খে.
‘‘সো ¶ অগ্গমা [অগমা (স্যা. পী. ক.)] নগরমিন্দপত্থং, ওরুয্হুপাগচ্ছি সভং কুরূনং;
সমাগতে একসতং সমগ্গে, অৰ্হেত্থ যক্খো অৰিকম্পমানো.
‘‘কো নীধ রঞ্ঞং ৰরমাভিজেতি, কমাভিজেয্যাম ৰরদ্ধনেন [ৰরংধনেন (সী. পী.)];
কমনুত্তরং রতনৰরং জিনাম, কো ৰাপি নো জেতি ৰরদ্ধনেন’’.
‘‘কুহিং ¶ নু রট্ঠে তৰ জাতিভূমি, ন কোরব্যস্সেৰ ৰচো তৰেদং;
অভীতোসি [অভিভোসি (সী. পী.)] নো ৰণ্ণনিভায সব্বে, অক্খাহি মে নামঞ্চ বন্ধৰে চ’’.
‘‘কচ্চাযনো মাণৰকোস্মি রাজ, অনূননামো ইতি মৰ্হযন্তি;
অঙ্গেসু মে ঞাতযো বন্ধৰা চ, অক্খেন দেৰস্মি ইধানুপত্তো’’.
‘‘কিং মাণৰস্স রতনানি অত্থি, যে তং জিনন্তো হরে অক্খধুত্তো;
বহূনি রঞ্ঞো রতনানি অত্থি, তে ত্ৰং দলিদ্দো কথমৰ্হযেসি’’.
‘‘মনোহরো ¶ ¶ নাম মণী মমাযং, মনোহরং মণিরতনং উল়ারং;
ইমঞ্চ আজঞ্ঞমমিত্ততাপনং, এতং মে জিনিত্ৰা হরে অক্খধুত্তো’’.
‘‘একো মণী মাণৰ কিং করিস্সতি, আজানিযেকো পন কিং করিস্সতি;
বহূনি রঞ্ঞো মণিরতনানি অত্থি, আজানিযা ৰাতজৰা অনপ্পকা’’.
দোহল়কণ্ডং নাম.
মণিকণ্ডং
‘‘ইদঞ্চ মে মণিরতনং, পস্স ত্ৰং দ্ৰিপদুত্তম;
ইত্থীনং ৰিগ্গহা চেত্থ, পুরিসানঞ্চ ৰিগ্গহা.
‘‘মিগানং ৰিগ্গহা চেত্থ, সকুণানঞ্চ ৰিগ্গহা;
নাগরাজা সুপণ্ণা চ [নাগরাজে সুপণ্ণে চ (সী. স্যা. পী.)], মণিম্হি পস্স নিম্মিতং.
‘‘হত্থানীকং ¶ রথানীকং, অস্সে পত্তী চ ৰম্মিনে [ধজানি চ (পী.)];
চতুরঙ্গিনিমং সেনং, মণিম্হি পস্স নিম্মিতং.
‘‘হত্থারোহে অনীকট্ঠে, রথিকে পত্তিকারকে;
বলগ্গানি ৰিযূল়্হানি [ৰিযূহানি (স্যা. ক.)], মণিম্হি পস্স নিম্মিতং.
‘‘পুরং উদ্ধাপসম্পন্নং [উদ্দাপসম্পন্নং (সী. পী.), অট্টালসম্পন্নং (স্যা.)], বহুপাকারতোরণং;
সিঙ্ঘাটকেসু ভূমিযো, মণিম্হি পস্স নিম্মিতং.
‘‘এসিকা ¶ পরিখাযো চ, পলিখং অগ্গল়ানি চ;
অট্টালকে চ দ্ৰারে চ, মণিম্হি পস্স নিম্মিতং.
‘‘পস্স তোরণমগ্গেসু, নানাদিজা গণা বহূ;
হংসা কোঞ্চা মযূরা চ, চক্কৰাকা চ কুক্কুহা.
‘‘কুণালকা বহূ চিত্রা, সিখণ্ডী জীৰজীৰকা;
নানাদিজগণাকিণ্ণং, মণিম্হি পস্স নিম্মিতং.
‘‘পস্স নগরং সুপাকারং, অব্ভুতং লোমহংসনং;
সমুস্সিতধজং রম্মং, সোণ্ণৰালুকসন্থতং.
‘‘পস্সেত্থ [পস্স ত্ৰং (সী. পী.)] পণ্ণসালাযো, ৰিভত্তা ভাগসো মিতা;
নিৰেসনে নিৰেসে চ, সন্ধিব্যূহে পথদ্ধিযো.
‘‘পানাগারে ¶ চ সোণ্ডে চ, সূনা [সূণা (সী. পী.), সুদ্দা (স্যা. ক.)] ওদনিযা ঘরা;
ৰেসী চ গণিকাযো চ, মণিম্হি পস্স নিম্মিতং.
‘‘মালাকারে চ রজকে, গন্ধিকে অথ দুস্সিকে;
সুৰণ্ণকারে মণিকারে, মণিম্হি পস্স নিম্মিতং.
‘‘আল়ারিকে চ সূদে চ, নটনাটকগাযিনো;
পাণিস্সরে কুম্ভথূনিকে, মণিম্হি পস্স নিম্মিতং.
‘‘পস্স ভেরী মুদিঙ্গা চ, সঙ্খা পণৰদিন্দিমা;
সব্বঞ্চ তাল়াৰচরং, মণিম্হি পস্স নিম্মিতং.
‘‘সম্মতালঞ্চ ¶ ৰীণঞ্চ, নচ্চগীতং সুৰাদিতং;
তূরিযতাল়িতসঙ্ঘুট্ঠং ¶ , মণিম্হি পস্স নিম্মিতং.
‘‘লঙ্ঘিকা মুট্ঠিকা চেত্থ, মাযাকারা চ সোভিযা;
ৰেতালিকে [ৰেত্তলিকে (ক.)] চ জল্লে চ, মণিম্হি পস্স নিম্মিতং.
‘‘সমজ্জা চেত্থ ৰত্তন্তি, আকিণ্ণা নরনারিভি;
মঞ্চাতিমঞ্চে ভূমিযো, মণিম্হি পস্স নিম্মিতং.
‘‘পস্স মল্লে সমজ্জস্মিং, ফোটেন্তে [পাঠেন্তে (সী. স্যা. পী.)] দিগুণং ভুজং;
নিহতে নিহতমানে চ, মণিম্হি পস্স নিম্মিতং.
‘‘পস্স পব্বতপাদেসু, নানামিগগণা বহূ;
সীহা ব্যগ্ঘা ৰরাহা চ, অচ্ছকোকতরচ্ছযো.
‘‘পলাসাদা গৰজা চ, মহিংসা রোহিতা রুরূ;
এণেয্যা চ ৰরাহা [সরভা (স্যা.)] চ, গণিনো নীক [নিঙ্ক (সী. স্যা. পী.)] সূকরা.
‘‘কদলিমিগা বহূ চিত্রা, বিল়ারা সসকণ্টকা;
নানামিগগণাকিণ্ণং, মণিম্হি পস্স নিম্মিতং.
‘‘নজ্জাযো সুপতিত্থাযো, সোণ্ণৰালুকসন্থতা;
অচ্ছা সৰন্তি অম্বূনি, মচ্ছগুম্বনিসেৰিতা.
‘‘কুম্ভীলা মকরা চেত্থ, সুসুমারা চ কচ্ছপা;
পাঠীনা পাৰুসা মচ্ছা, বলজা [ৰলজা (সী.), ৰালজা (পী.)] মুঞ্জরোহিতা.
‘‘নানাদিজগণাকিণ্ণা, নানাদুমগণাযুতা;
ৰেল়ুরিযক-রোদাযো [ৰেল়ুরিযফলকরোদাযো (সী.)], মণিম্হি পস্স নিম্মিতং.
‘‘পস্সেত্থ ¶ পোক্খরণিযো, সুৰিভত্তা চতুদ্দিসা;
নানাদিজগণাকিণ্ণা, পুথুলোমনিসেৰিতা.
‘‘সমন্তোদকসম্পন্নং ¶ , মহিং সাগরকুণ্ডলং;
উপেতং ৰনরাজেহি, মণিম্হি পস্স নিম্মিতং.
‘‘পুরতো ৰিদেহে পস্স, গোযানিযে চ পচ্ছতো;
কুরুযো জম্বুদীপঞ্চ, মণিম্হি পস্স নিম্মিতং.
‘‘পস্স ¶ চন্দং সূরিযঞ্চ, ওভাসন্তে চতুদ্দিসা;
সিনেরুং অনুপরিযন্তে, মণিম্হি পস্স নিম্মিতং.
‘‘সিনেরুং হিমৰন্তঞ্চ, সাগরঞ্চ মহীতলং [মহিদ্ধিকং (সী. পী.), মহিদ্ধিযং (স্যা.)];
চত্তারো চ মহারাজে, মণিম্হি পস্স নিম্মিতং.
‘‘আরামে ৰনগুম্বে চ, পাটিযে [পিট্ঠিযে (ক.)] চ সিলুচ্চযে;
রম্মে কিম্পুরিসাকিণ্ণে, মণিম্হি পস্স নিম্মিতং.
‘‘ফারুসকং চিত্তলতং, মিস্সকং নন্দনং ৰনং;
ৰেজযন্তঞ্চ পাসাদং, মণিম্হি পস্স নিম্মিতং.
‘‘সুধম্মং তাৰতিংসঞ্চ, পারিছত্তঞ্চ পুপ্ফিতং;
এরাৰণং নাগরাজং, মণিম্হি পস্স নিম্মিতং.
‘‘পস্সেত্থ দেৰকঞ্ঞাযো, নভা ৰিজ্জুরিৰুগ্গতা;
নন্দনে ৰিচরন্তিযো, মণিম্হি পস্স নিম্মিতং.
‘‘পস্সেত্থ দেৰকঞ্ঞাযো, দেৰপুত্তপলোভিনী;
দেৰপুত্তে ¶ রমমানে [চরমানে (সী. পী.)], মণিম্হি পস্স নিম্মিতং.
‘‘পরোসহস্সপাসাদে, ৰেল়ুরিযফলসন্থতে;
পজ্জলন্তে চ [পজ্জলন্তেন (সী. স্যা. পী.)] ৰণ্ণেন, মণিম্হি পস্স নিম্মিতং.
‘‘তাৰতিংসে চ যামে চ, তুসিতে চাপি নিম্মিতে;
পরনিম্মিতৰসৰত্তিনো [পরনিম্মিতাভিরতিনো (সী. পী.)], মণিম্হি পস্স নিম্মিতং.
‘‘পস্সেত্থ পোক্খরণিযো, ৰিপ্পসন্নোদিকা সুচী;
মন্দালকেহি সঞ্ছন্না, পদুমুপ্পলকেহি চ.
‘‘দসেত্থ রাজিযো সেতা, দসনীলা [দস্সনীযা (ক.)] মনোরমা;
ছ পিঙ্গলা পন্নরস, হলিদ্দা চ চতুদ্দস.
‘‘ৰীসতি তত্থ সোৰণ্ণা, ৰীসতি রজতামযা;
ইন্দগোপকৰণ্ণাভা, তাৰ দিস্সন্তি তিংসতি.
‘‘দসেত্থ কাল়িযো ছচ্চ, মঞ্জেট্ঠা পন্নৰীসতি;
মিস্সা বন্ধুকপুপ্ফেহি, নীলুপ্পলৰিচিত্তিকা.
‘‘এৰং ¶ ¶ সব্বঙ্গসম্পন্নং, অচ্চিমন্তং পভস্সরং;
ওধিসুঙ্কং মহারাজ, পস্স ত্ৰং দ্ৰিপদুত্তম’’.
মণিকণ্ডং নাম.
অক্খকণ্ডং
‘‘উপাগতং রাজ মুপেহি লক্খং, নেতাদিসং মণিরতনং তৰত্থি;
ধম্মেন জিস্সাম [জিয্যাম (সী. স্যা. পী.)] অসাহসেন, জিতো চ নো খিপ্পমৰাকরোহি.
‘‘পঞ্চাল ¶ -পচ্চুগ্গত-সূরসেন, মচ্ছা [মজ্ঝা (ক.)] চ মদ্দা সহ কেককেভি;
পস্সন্তু নোতে অসঠেন যুদ্ধং, ন নো সভাযং ন করোন্তি কিঞ্চি’’.
‘‘তে পাৰিসুং অক্খমদেন মত্তা, রাজা কুরূনং পুণ্ণকো চাপি যক্খো;
রাজা কলিং ৰিচ্চিনমগ্গহেসি, কটং অগ্গহী পুণ্ণকো নাম যক্খো.
‘‘তে তত্থ জূতে উভযে সমাগতে, রঞ্ঞং সকাসে সখীনঞ্চ মজ্ঝে;
অজেসি যক্খো নরৰীরসেট্ঠং, তত্থপ্পনাদো তুমুলো বভূৰ’’.
‘‘জযো মহারাজ পরাজযো চ, আযূহতং অঞ্ঞতরস্স হোতি;
জনিন্দ জীনোসি [জিন্নোসি (স্যা.), জিতোসি (পী.) জিনোম্হি (ক.)] ৰরদ্ধনেন, জিতো চ মে খিপ্পমৰাকরোহি’’.
‘‘হত্থী ¶ গৰস্সা মণিকুণ্ডলা চ, যঞ্চাপি ময্হং [অঞ্ঞং (ক.)] রতনং পথব্যা;
গণ্হাহি কচ্চান ৰরং ধনানং, আদায ¶ যেনিচ্ছসি তেন গচ্ছ’’.
‘‘হত্থী গৰস্সা মণিকুণ্ডলা চ, যঞ্চাপি তুয্হং রতনং পথব্যা;
তেসং ৰরো ৰিধুরো নাম কত্তা, সো মে জিতো তং মে অৰাকরোহি’’.
‘‘অত্তা চ মে সো সরণং গতী চ, দীপো চ লেণো চ পরাযণো চ;
অসন্তুলেয্যো মম সো ধনেন, পাণেন মে সাদিসো এস কত্তা’’.
‘‘চিরং ৰিৰাদো মম তুয্হঞ্চস্স, কামঞ্চ পুচ্ছাম তমেৰ গন্ত্ৰা;
এসোৰ নো ৰিৰরতু এতমত্থং, যং ৰক্খতী হোতু কথা [তথা (স্যা. ক.)] উভিন্নং’’.
‘‘অদ্ধা হি সচ্চং ভণসি, ন চ মাণৰ সাহসং;
তমেৰ গন্ত্ৰা পুচ্ছাম, তেন তুস্সামুভো জনা’’.
‘‘সচ্চং নু দেৰা ৰিদহূ কুরূনং, ধম্মে ঠিতং ৰিধুরং নামমচ্চং;
দাসোসি রঞ্ঞো উদ ৰাসি ঞাতি, ৰিধুরোতি সঙ্খা কতমাসি লোকে’’.
‘‘আমাযদাসাপি ¶ ভৰন্তি হেকে, ধনেন ¶ কীতাপি ভৰন্তি দাসা;
সযম্পি হেকে উপযন্তি দাসা, ভযা পণুন্নাপি ভৰন্তি দাসা.
‘‘এতে ¶ নরানং চতুরোৰ দাসা, অদ্ধা হি যোনিতো অহম্পি জাতো;
ভৰো চ রঞ্ঞো অভৰো চ রঞ্ঞো, দাসাহং দেৰস্স পরম্পি গন্ত্ৰা;
ধম্মেন মং মাণৰ তুয্হ দজ্জা’’.
‘‘অযং [অযম্পি (স্যা. ক.)] দুতীযো ৰিজযো মমজ্জ, পুট্ঠো হি কত্তা ৰিৰরেত্থ [ৰিৰরিত্থ (সী. স্যা. ক.)] পঞ্হং;
অধম্মরূপো ৰত রাজসেট্ঠো, সুভাসিতং নানুজানাসি ময্হং’’.
‘‘এৰং চে নো সো ৰিৰরেত্থ পঞ্হং, দাসোহমস্মি ন চ খোস্মি ঞাতি;
গণ্হাহি কচ্চান ৰরং ধনানং, আদায যেনিচ্ছসি তেন গচ্ছ’’.
অক্খকণ্ডং নাম.
ঘরাৰাসপঞ্হা
‘‘ৰিধুর ৰসমানাস্স, গহট্ঠস্স সকং ঘরং;
খেমা ৰুত্তি কথং অস্স, কথন্নু অস্স সঙ্গহো.
‘‘অব্যাবজ্ঝং [অব্যাপজ্ঝং (সী. স্যা. পী.)] কথং অস্স, সচ্চৰাদী চ মাণৰো;
অস্মা ¶ লোকা পরং লোকং, কথং পেচ্চ ন সোচতি’’.
তং তত্থ গতিমা ধিতিমা, মতিমা অত্থদস্সিমা;
সঙ্খাতা [সঙ্খাতো (ক.)] সব্বধম্মানং, ৰিধুরো এতদব্রৰি.
‘‘ন সাধারণদারস্স, ন ভুঞ্জে সাদুমেককো;
ন সেৰে লোকাযতিকং, নেতং পঞ্ঞায ৰড্ঢনং.
‘‘সীলৰা ৰত্তসম্পন্নো, অপ্পমত্তো ৰিচক্খণো;
নিৰাতৰুত্তি অত্থদ্ধো, সুরতো সখিলো মুদু.
‘‘সঙ্গহেতা ¶ চ মিত্তানং, সংৰিভাগী ৰিধানৰা;
তপ্পেয্য অন্নপানেন, সদা সমণব্রাহ্মণে.
‘‘ধম্মকামো সুতাধারো, ভৰেয্য পরিপুচ্ছকো;
সক্কচ্চং পযিরুপাসেয্য, সীলৰন্তে বহুস্সুতে.
‘‘ঘরমাৰসমানস্স, গহট্ঠস্স সকং ঘরং;
খেমা ৰুত্তি সিযা এৰং, এৰং নু অস্স সঙ্গহো.
‘‘অব্যাবজ্ঝং ¶ সিযা এৰং, সচ্চৰাদী চ মাণৰো;
অস্মা লোকা পরং লোকং, এৰং পেচ্চ ন সোচতি’’.
ঘরাৰাসপঞ্হা নাম.
লক্খণকণ্ডং
‘‘এহি দানি গমিস্সাম, দিন্নো নো ইস্সরেন মে;
মমেৰত্থং [তমেৰত্থং (পী.)] পটিপজ্জ, এস ধম্মো সনন্তনো’’.
‘‘জানামি মাণৰ তযাহমস্মি, দিন্নোহমস্মি তৰ ইস্সরেন;
তীহঞ্চ ¶ তং ৰাসযেমু অগারে, যেনদ্ধুনা অনুসাসেমু পুত্তে’’.
‘‘তং মে তথা হোতু ৰসেমু তীহং, কুরুতং ভৰজ্জ ঘরেসু কিচ্চং;
অনুসাসতং পুত্তদারে ভৰজ্জ, যথা তযী পেচ্চ [পচ্ছা (সী. পী.)] সুখী ভৰেয্য’’.
‘‘সাধূতি ৰত্ৰান পহূতকামো, পক্কামি যক্খো ৰিধুরেন সদ্ধিং;
তং কুঞ্জরাজঞ্ঞহযানুচিণ্ণং, পাৰেক্খি অন্তেপুরমরিযসেট্ঠো’’.
‘‘কোঞ্চং মযূরঞ্চ পিযঞ্চ কেতং, উপাগমি তত্থ সুরম্মরূপং;
পহূতভক্খং বহুঅন্নপানং, মসক্কসারং ৰিয ৰাসৰস্স’’.
‘‘তত্থ ¶ নচ্চন্তি গাযন্তি, অৰ্হাযন্তি ৰরাৰরং;
অচ্ছরা ৰিয দেৰেসু, নারিযো সমলঙ্কতা.
‘‘সমঙ্গিকত্ৰা পমদাহি যক্খং, অন্নেন পানেন চ ধম্মপালো;
অত্থত্থ [অগ্গত্থ (স্যা. অট্ঠ.)] মেৰানুৰিচিন্তযন্তো, পাৰেক্খি ভরিযায তদা সকাসে.
‘‘তং ¶ চন্দনগন্ধরসানুলিত্তং, সুৰণ্ণজম্বোনদনিক্খসাদিসং;
ভরিযংৰচা এহি সুণোহি ভোতি, পুত্তানি আমন্তয তম্বনেত্তে.
‘‘সুত্ৰান ৰাক্যং পতিনো অনুজ্জা [অনোজা (স্যা. ক.)], সুণিসংৰচ তম্বনখিং সুনেত্তং;
আমন্তয ৰম্মধরানি চেতে, পুত্তানি ইন্দীৰরপুপ্ফসামে’’.
‘‘তে আগতে মুদ্ধনি ধম্মপালো, চুম্বিত্ৰা পুত্তে অৰিকম্পমানো;
আমন্তযিত্ৰান অৰোচ ৰাক্যং, দিন্নাহং রঞ্ঞা ইধ মাণৰস্স.
‘‘তস্সজ্জহং অত্তসুখী ৰিধেয্যো, আদায যেনিচ্ছতি তেন গচ্ছতি;
অহঞ্চ ৰো সাসিতুমাগতোস্মি [অনুসাসিতুং আগতোস্মি (স্যা. ক.)], কথং অহং অপরিত্তায গচ্ছে.
‘‘সচে ¶ ¶ ৰো রাজা কুরুরট্ঠৰাসী [কুরুখেত্তৰাসী (সী. পী.)], জনসন্ধো পুচ্ছেয্য পহূতকামো;
কিমাভিজানাথ পুরে পুরাণং, কিং ৰো পিতা অনুসাসে পুরত্থা.
‘‘সমাসনা ¶ হোথ মযাৰ সব্বে, কোনীধ রঞ্ঞো অব্ভতিকো মনুস্সো;
তমঞ্জলিং করিয ৰদেথ এৰং, মা হেৰং দেৰ ন হি এস ধম্মো;
ৰিযগ্ঘরাজস্স নিহীনজচ্চো, সমাসনো দেৰ কথং ভৰেয্য’’.
লক্খণকণ্ডং [পেক্খণকণ্ডং (সী. ক.)] নাম.
রাজৰসতি
‘‘সো চ পুত্তে [মিত্তে (সী. পী.)] অমচ্চে চ, ঞাতযো সুহদজ্জনে;
অলীনমনসঙ্কপ্পো, ৰিধুরো এতদব্রৰি.
‘‘এথয্যো [এথয্যা (স্যা.)] রাজৰসতিং, নিসীদিত্ৰা সুণাথ মে;
যথা রাজকুলং পত্তো, যসং পোসো নিগচ্ছতি.
‘‘ন হি রাজকুলং পত্তো, অঞ্ঞাতো লভতে যসং;
নাসূরো নাপি দুম্মেধো, নপ্পমত্তো কুদাচনং.
‘‘যদাস্স সীলং পঞ্ঞঞ্চ, সোচেয্যং চাধিগচ্ছতি;
অথ ৰিস্সসতে ত্যম্হি, গুয্হঞ্চস্স ন রক্খতি.
‘‘তুলা যথা পগ্গহিতা, সমদণ্ডা সুধারিতা;
অজ্ঝিট্ঠো ন ৰিকম্পেয্য, স রাজৰসতিং ৰসে.
‘‘তুলা যথা পগ্গহিতা, সমদণ্ডা সুধারিতা;
সব্বানি অভিসম্ভোন্তো, স রাজৰসতিং ৰসে.
‘‘দিৰা ¶ ৰা যদি ৰা রত্তিং, রাজকিচ্চেসু পণ্ডিতো;
অজ্ঝিট্ঠো ন ৰিকম্পেয্য, স রাজৰসতিং ৰসে.
‘‘দিৰা ¶ ৰা যদি ৰা রত্তিং, রাজকিচ্চেসু পণ্ডিতো;
সব্বানি অভিসম্ভোন্তো, স রাজৰসতিং ৰসে.
‘‘যো চস্স সুকতো মগ্গো, রঞ্ঞো সুপ্পটিযাদিতো;
ন তেন ৰুত্তো গচ্ছেয্য, স রাজৰসতিং ৰসে.
‘‘ন রঞ্ঞো সদিসং [সমকং (সী. স্যা. পী.)] ভুঞ্জে, কামভোগে কুদাচনং;
সব্বত্থ পচ্ছতো গচ্ছে, স রাজৰসতিং ৰসে.
‘‘ন ¶ রঞ্ঞো সদিসং ৰত্থং, ন মালং ন ৰিলেপনং;
আকপ্পং সরকুত্তিং ৰা, ন রঞ্ঞো সদিসমাচরে;
অঞ্ঞং করেয্য আকপ্পং, স রাজৰসতিং ৰসে.
‘‘কীল়ে রাজা অমচ্চেহি, ভরিযাহি পরিৰারিতো;
নামচ্চো রাজভরিযাসু, ভাৰং কুব্বেথ পণ্ডিতো.
‘‘অনুদ্ধতো অচপলো, নিপকো সংৰুতিন্দ্রিযো;
মনোপণিধিসম্পন্নো, স রাজৰসতিং ৰসে.
‘‘নাস্স ভরিযাহি কীল়েয্য, ন মন্তেয্য রহোগতো;
নাস্স কোসা ধনং গণ্হে, স রাজৰসতিং ৰসে.
‘‘ন নিদ্দং বহু মঞ্ঞেয্য [ন নিদ্দন্নং বহুং মঞ্ঞে (সী. পী.)], ন মদায সুরং পিৰে;
নাস্স দাযে মিগে হঞ্ঞে, স রাজৰসতিং ৰসে.
‘‘নাস্স পীঠং ন পল্লঙ্কং, ন কোচ্ছং ন নাৰং [নাগং (সী. পী.)] রথং;
সম্মতোম্হীতি ¶ আরূহে, স রাজৰসতিং ৰসে.
‘‘নাতিদূরে ভজে [ভৰে (সী. পী.)] রঞ্ঞো, নাচ্চাসন্নে ৰিচক্খণো;
সম্মুখঞ্চস্স তিট্ঠেয্য, সন্দিস্সন্তো সভত্তুনো.
‘‘ন ৰে [মে (স্যা. ক.)] রাজা সখা হোতি, ন রাজা হোতি মেথুনো;
খিপ্পং কুজ্ঝন্তি রাজানো, সূকেন’ক্খীৰ ঘট্টিতং.
‘‘ন পূজিতো মঞ্ঞমানো, মেধাৰী পণ্ডিতো নরো;
ফরুসং পতিমন্তেয্য, রাজানং পরিসংগতং.
‘‘লদ্ধদ্ৰারো ¶ লভে দ্ৰারং [লদ্ধৰারোলভে ৰারং (পী.)], নেৰ রাজূসু ৰিস্সসে;
অগ্গীৰ সংযতো তিট্ঠে [অগ্গীৰ যতো তিট্ঠেয্য (সী. পী.)], স রাজৰসতিং ৰসে.
‘‘পুত্তং ৰা ভাতরং ৰা সং, সম্পগ্গণ্হাতি খত্তিযো;
গামেহি নিগমেহি ৰা, রট্ঠেহি জনপদেহি ৰা;
তুণ্হীভূতো উপেক্খেয্য, ন ভণে ছেকপাপকং.
‘‘হত্থারোহে অনীকট্ঠে, রথিকে পত্তিকারকে;
তেসং কম্মাৰদানেন [কম্মাপৰাদেন (স্যা.)], রাজা ৰড্ঢেতি ৰেতনং;
ন তেসং অন্তরা গচ্ছে, স রাজৰসতিং ৰসে.
‘‘চাপোৰূনুদরো ধীরো [চাপোৰ ওনমে ধীরো (স্যা.)], ৰংসোৰাপি পকম্পযে;
পটিলোমং ন ৰত্তেয্য, স রাজৰসতিং ৰসে.
‘‘চাপোৰূনুদরো ¶ অস্স, মচ্ছোৰস্স অজিৰ্হৰা [অজিৰ্হতা (স্যা. ক.)];
অপ্পাসী নিপকো সূরো, স রাজৰসতিং ৰসে.
‘‘ন ¶ বাল়্হং ইত্থিং গচ্ছেয্য, সম্পস্সং তেজসঙ্খযং;
কাসং সাসং দরং বল্যং, খীণমেধো নিগচ্ছতি.
‘‘নাতিৰেলং পভাসেয্য, ন তুণ্হী সব্বদা সিযা;
অৰিকিণ্ণং মিতং ৰাচং, পত্তে কালে উদীরযে.
‘‘অক্কোধনো অসঙ্ঘট্টো, সচ্চো সণ্হো অপেসুণো;
সম্ফং গিরং ন ভাসেয্য, স রাজৰসতিং ৰসে.
[অযং গাথা নত্থি পী. পোত্থকে] ‘‘মাতাপেত্তিভরো অস্স, কুলে জেট্ঠাপচাযিকো;
সণ্হো সখিলসম্ভাসো [হিরিওত্তপ্পসম্পন্নো (সী. ক.)], স রাজৰসতিং ৰসে [অযং গাথা নত্থি পী. পোত্থকে].
‘‘ৰিনীতো সিপ্পৰা দন্তো, কতত্তো নিযতো মুদু;
অপ্পমত্তো সুচি দক্খো, স রাজৰসতিং ৰসে.
‘‘নিৰাতৰুত্তি ৰুদ্ধেসু, সপ্পতিস্সো সগারৰো;
সুরতো সুখসংৰাসো, স রাজৰসতিং ৰসে.
‘‘আরকা ¶ পরিৰজ্জেয্য, সহিতুং পহিতং জনং;
ভত্তারঞ্ঞেৰুদিক্খেয্য, ন চ অঞ্ঞস্স রাজিনো.
‘‘সমণে ব্রাহ্মণে চাপি, সীলৰন্তে বহুস্সুতে;
সক্কচ্চং পযিরুপাসেয্য, স রাজৰসতিং ৰসে.
‘‘সমণে ব্রাহ্মণে চাপি, সীলৰন্তে বহুস্সুতে;
সক্কচ্চং অনুৰাসেয্য, স রাজৰসতিং ৰসে.
‘‘সমণে ব্রাহ্মণে চাপি, সীলৰন্তে বহুস্সুতে;
তপ্পেয্য ¶ অন্নপানেন, স রাজৰসতিং ৰসে.
‘‘সমণে ব্রাহ্মণে চাপি, সীলৰন্তে বহুস্সুতে;
আসজ্জ পঞ্ঞে সেৰেথ, আকঙ্খং ৰুদ্ধিমত্তনো.
‘‘দিন্নপুব্বং ন হাপেয্য, দানং সমণব্রাহ্মণে;
ন চ কিঞ্চি নিৰারেয্য, দানকালে ৰণিব্বকে.
‘‘পঞ্ঞৰা বুদ্ধিসম্পন্নো, ৰিধানৰিধিকোৰিদো;
কালঞ্ঞূ সমযঞ্ঞূ চ, স রাজৰসতিং ৰসে.
‘‘উট্ঠাতা কম্মধেয্যেসু, অপ্পমত্তো ৰিচক্খণো;
সুসংৰিহীতকম্মন্তো, স রাজৰসতিং ৰসে.
‘‘খলং ¶ সালং পসুং খেত্তং, গন্তা চস্স অভিক্খণং;
মিতং ধঞ্ঞং নিধাপেয্য, মিতংৰ পাচযে ঘরে.
‘‘পুত্তং ৰা ভাতরং ৰা সং, সীলেসু অসমাহিতং;
অনঙ্গৰা হি তে বালা, যথা পেতা তথেৰ তে;
চোল়ঞ্চ নেসং পিণ্ডঞ্চ, আসীনানং পদাপযে.
‘‘দাসে কম্মকরে পেস্সে, সীলেসু সুসমাহিতে;
দক্খে উট্ঠানসম্পন্নে, আধিপচ্চম্হি ঠাপযে.
‘‘সীলৰা চ অলোলো [অলোভো (স্যা. ক.)] চ, অনুরক্খো [অনুরত্তো (সী. পী.)] চ রাজিনো;
আৰী রহো হিতো তস্স, স রাজৰসতিং ৰসে.
‘‘ছন্দঞ্ঞূ ¶ রাজিনো চস্স, চিত্তট্ঠো অস্স রাজিনো;
অসঙ্কুসকৰুত্তি’স্স, স রাজৰসতিং ৰসে.
‘‘উচ্ছাদযে ¶ চ ন্হাপযে [অচ্ছাদনে চ ন্হাপে চ (স্যা. ক.)], ধোৰে পাদে অধোসিরং;
আহতোপি ন কুপ্পেয্য, স রাজৰসতিং ৰসে.
‘‘কুম্ভম্পঞ্জলিং করিযা [কুরিযা (সী.)], চাটঞ্চাপি [ৰাযসং ৰা (সী. পী.)] পদক্খিণং;
কিমেৰ সব্বকামানং, দাতারং ধীরমুত্তমং.
‘‘যো দেতি সযনং ৰত্থং, যানং আৰসথং ঘরং;
পজ্জুন্নোরিৰ ভূতানি, ভোগেহি অভিৰস্সতি.
‘‘এসয্যো রাজৰসতি, ৰত্তমানো যথা নরো;
আরাধযতি রাজানং, পূজং লভতি ভত্তুসু’’.
রাজৰসতি নাম.
অন্তরপেয্যালং
‘‘এৰং সমনুসাসিত্ৰা, ঞাতিসঙ্ঘং ৰিচক্খণো;
পরিকিণ্ণো সুহদেহি, রাজানমুপসঙ্কমি.
‘‘ৰন্দিত্ৰা সিরসা পাদে, কত্ৰা চ নং পদক্খিণং;
ৰিধুরো অৰচ রাজানং, পগ্গহেত্ৰান অঞ্জলিং.
‘‘অযং মং মাণৰো নেতি, কত্তুকামো [গন্তুকামো (ক.)] যথামতি;
ঞাতীনত্থং পৰক্খামি, তং সুণোহি অরিন্দম.
‘‘পুত্তে ¶ চ মে উদিক্খেসি, যঞ্চ মঞ্ঞং ঘরে ধনং;
যথা পেচ্চ [পচ্ছা (স্যা. ক.)] ন হাযেথ, ঞাতিসঙ্ঘো মযী গতে.
‘‘যথেৰ খলতী ভূম্যা, ভূম্যাযেৰ পতিট্ঠতি;
এৰেতং খলিতং ময্হং, এতং পস্সামি অচ্চযং’’.
‘‘সক্কা ¶ ন গন্তুং ইতি ময্হ হোতি, ছেত্ৰা [ঝত্ৰা (সী. পী.)] ৰধিত্ৰা ইধ কাতিযানং;
ইধেৰ হোহী ইতি ময্হ রুচ্চতি, মা ত্ৰং অগা উত্তমভূরিপঞ্ঞ’’.
‘‘মা ¶ হেৰধম্মেসু মনং পণীদহি, অত্থে চ ধম্মে চ যুত্তো ভৰস্সু;
ধিরত্থু কম্মং অকুসলং অনরিযং, যং কত্ৰা পচ্ছা নিরযং ৰজেয্য.
‘‘নেৰেস ধম্মো ন পুনেত [পুনেতি (স্যা. ক.)] কিচ্চং, অযিরো হি দাসস্স জনিন্দ ইস্সরো;
ঘাতেতুং ঝাপেতুং অথোপি হন্তুং, ন চ ময্হ কোধত্থি ৰজামি চাহং’’.
‘‘জেট্ঠপুত্তং উপগুয্হ, ৰিনেয্য হদযে দরং;
অস্সুপুণ্ণেহি নেত্তেহি, পাৰিসী সো মহাঘরং’’.
‘‘সালাৰ সম্মপতিতা [সম্পমথিতা (সী. পী.)], মালুতেন পমদ্দিতা;
সেন্তি পুত্তা চ দারা চ, ৰিধুরস্স নিৰেসনে.
‘‘ইত্থিসহস্সং ভরিযানং, দাসিসত্তসতানি চ;
বাহা পগ্গয্হ পক্কন্দুং, ৰিধুরস্স নিৰেসনে.
‘‘ওরোধা চ কুমারা চ, ৰেসিযানা চ ব্রাহ্মণা;
বাহা পগ্গয্হ পক্কন্দুং, ৰিধুরস্স নিৰেসনে.
‘‘হত্থারোহা ¶ অনীকট্ঠা, রথিকা পত্তিকারকা;
বাহা পগ্গয্হ পক্কন্দুং, ৰিধুরস্স নিৰেসনে.
‘‘সমাগতা জানপদা, নেগমা চ সমাগতা;
বাহা পগ্গয্হ পক্কন্দুং, ৰিধুরস্স নিৰেসনে.
‘‘ইত্থিসহস্সং ভরিযানং, দাসিসত্তসতানি চ;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘ওরোধা চ কুমারা চ, দাসিসত্তসতানি চ;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘হত্থারোহা অনীকট্ঠা, দাসিসত্তসতানি চ;
বাহা পগ্গয্হ পক্কন্দুং, কস্মা নো ৰিজহিস্সসি.
‘‘সমাগতা ¶ জানপদা, দাসিসত্তসতানি চ;
বাহা পগ্গয্হ পক্কন্দুং, কস্মা নো ৰিজহিস্সসি’’.
‘‘কত্ৰা ¶ ঘরেসু কিচ্চানি, অনুসাসিত্ৰা সকং জনং;
মিত্তামচ্চে চ ভচ্চে চ [সুহজ্জে (পী. ক.)], পুত্তদারে চ বন্ধৰে.
‘‘কম্মন্তং সংৰিধেত্ৰান, আচিক্খিত্ৰা ঘরে ধনং;
নিধিঞ্চ ইণদানঞ্চ, পুণ্ণকং এতদব্রৰি.
‘‘অৰসী তুৰং ময্হ তীহং অগারে, কতানি কিচ্চানি ঘরেসু ময্হং;
অনুসাসিতা পুত্তদারা মযা চ, করোম কচ্চান [কিচ্চানি (স্যা. ক.)] যথামতিং তে’’.
‘‘সচে ¶ হি কত্তে অনুসাসিতা তে, পুত্তা চ দারা অনুজীৰিনো চ;
হন্দেহি দানী তরমানরূপো, দীঘো হি অদ্ধাপি অযং পুরত্থা.
‘‘অছম্ভিতোৰ [অযম্ভিতোৰ (সী. পী.)] গণ্হাহি, আজানেয্যস্স ৰালধিং;
ইদং পচ্ছিমকং তুয্হং, জীৰলোকস্স দস্সনং’’.
‘‘সোহং কিস্স নু ভাযিস্সং, যস্স মে নত্থি দুক্কটং;
কাযেন ৰাচা মনসা, যেন গচ্ছেয্য দুগ্গতিং’’.
‘‘সো অস্সরাজা ৰিধুরং ৰহন্তো, পক্কামি ৰেহাযসমন্তলিক্খে;
সাখাসু সেলেসু অসজ্জমানো, কালাগিরিং খিপ্পমুপাগমাসি’’.
‘‘ইত্থিসহস্সং ভরিযানং, দাসিসত্তসতানি চ;
বাহা পগ্গয্হ পক্কন্দুং, যক্খো ¶ ব্রাহ্মণৰণ্ণেন;
ৰিধুরং আদায গচ্ছতি.
‘‘সমাগতা ¶ জানপদা, নেগমা চ সমাগতা;
বাহা পগ্গয্হ পক্কন্দুং, যক্খো ব্রাহ্মণৰণ্ণেন;
ৰিধুরং আদায গচ্ছতি.
‘‘ইত্থিসহস্সং ভরিযানং, দাসিসত্তসতানি চ;
বাহা পগ্গয্হ পক্কন্দুং, পণ্ডিতো সো কুহিং গতো.
‘‘সমাগতা জানপদা, নেগমা চ সমাগতা;
বাহা পগ্গয্হ পক্কন্দুং, পণ্ডিতো সো কুহিং গতো’’.
‘‘সচে সো সত্তরত্তেন, নাগচ্ছিস্সতি পণ্ডিতো;
সব্বে অগ্গিং পৰেক্খাম [পৰিস্সাম (স্যা.)], নত্থত্থো জীৰিতেন নো’’.
‘‘পণ্ডিতো চ ৰিযত্তো চ, ৰিভাৰী চ ৰিচক্খণো;
খিপ্পং মোচিয অত্তানং, মা ভাযিত্থাগমিস্সতি’’ [খিপ্পং মোচেস্সত’ত্তানং, মা ভাথ আগমিস্সতি (সী. পী.)].
অন্তরপেয্যালং নাম.
সাধুনরধম্মকণ্ডং
‘‘সো ¶ তত্থ গন্ত্ৰান ৰিচিন্তযন্তো, উচ্চাৰচা চেতনকা [চেতনতা (ক.)] ভৰন্তি;
নযিমস্স জীৰেন মমত্থি কিঞ্চি, হন্ত্ৰানিমং ¶ হদযমানযিস্সং’’ [আদিযিস্সং (সী. পী.)].
‘‘সো তত্থ গন্ত্ৰা পব্বতন্তরস্মিং [পব্বতপাদস্মিং (ক.)], অন্তো পৰিসিত্ৰান পদুট্ঠচিত্তো;
অসংৰুতস্মিং জগতিপ্পদেসে, অধোসিরং ধারযি কাতিযানো.
‘‘সো লম্বমানো নরকে পপাতে, মহব্ভযে লোমহংসে ৰিদুগ্গে;
অসন্তসন্তো কুরূনং কত্তুসেট্ঠো, ইচ্চব্রৰি পুণ্ণকং নাম যক্খং.
‘‘অরিযাৰকাসোসি ¶ অনরিযরূপো, অসঞ্ঞতো সঞ্ঞতসন্নিকাসো;
অচ্চাহিতং কম্মং করোসি লুদ্রং, ভাৰে চ তে কুসলং নত্থি কিঞ্চি.
‘‘যং মং পপাতস্মিং পপাতুমিচ্ছসি, কো নু তৰত্থো মরণেন ময্হং;
অমানুসস্সেৰ তৰজ্জ ৰণ্ণো, আচিক্খ মে ত্ৰং কতমাসি দেৰতা’’.
‘‘যদি তে সুতো পুণ্ণকো নাম যক্খো, রঞ্ঞো কুৰেরস্স হি সো সজিব্বো [সজীৰো (সী. পী.)];
ভূমিন্ধরো ¶ ৰরুণো নাম নাগো, ব্রহা সুচী ৰণ্ণবলূপপন্নো.
‘‘তস্সানুজং ধীতরং কামযামি, ইরন্ধতী নাম সা নাগকঞ্ঞা;
তস্সা সুমজ্ঝায পিযায হেতু, পতারযিং তুয্হ ৰধায ধীর’’.
‘‘মা হেৰ ত্ৰং [তে (স্যা. ক.)] যক্খ অহোসি মূল়্হো, নট্ঠা বহূ দুগ্গহীতেন লোকে [লোকা (সী. স্যা. ক.)];
কিং তে সুমজ্ঝায পিযায কিচ্চং, মরণেন মে ইঙ্ঘ সুণোমি [সুণোম (সী. পী.)] সব্বং’’.
‘‘মহানুভাৰস্স মহোরগস্স, ধীতুকামো ঞাতিভতো [ঞাতিগতো (পী.)] হমস্মি;
তং যাচমানং সসুরো অৰোচ, যথা মমঞ্ঞিংসু সুকামনীতং.
‘‘দজ্জেমু ¶ খো তে সুতনুং সুনেত্তং, সুচিম্হিতং চন্দনলিত্তগত্তং;
সচে তুৰং হদযং পণ্ডিতস্স, ধম্মেন লদ্ধা ইধ মাহরেসি;
এতেন ৰিত্তেন কুমারি লব্ভা, নঞ্ঞং ধনং উত্তরি পত্থযাম.
‘‘এৰং ¶ ন মূল়্হোস্মি সুণোহি কত্তে, ন চাপি মে দুগ্গহিতত্থি কিঞ্চি;
হদযেন তে ধম্মলদ্ধেন নাগা, ইরন্ধতিং নাগকঞ্ঞং দদন্তি.
‘‘তস্মা অহং তুয্হং ৰধায যুত্তো, এৰং মমত্থো মরণেন তুয্হং;
ইধেৰ তং নরকে পাতযিত্ৰা, হন্ত্ৰান তং হদযমানযিস্সং’’.
‘‘খিপ্পং মমং উদ্ধর কাতিযান, হদযেন মে যদি তে অত্থি কিচ্চং;
যে কেচিমে সাধুনরস্স ধম্মা, সব্বেৰ তে পাতুকরোমি অজ্জ’’.
‘‘সো ¶ পুণ্ণকো কুরূনং কত্তুসেট্ঠং, নগমুদ্ধনি খিপ্পং পতিট্ঠপেত্ৰা;
অস্সত্থমাসীনং সমেক্খিযান, পরিপুচ্ছি কত্তারমনোমপঞ্ঞং.
‘‘সমুদ্ধতো মেসি তুৰং পপাতা, হদযেন তে অজ্জ মমত্থি কিচ্চং;
যে কেচিমে সাধুনরস্স ধম্মা, সব্বেৰ মে পাতুকরোহি অজ্জ’’.
‘‘সমুদ্ধতো ¶ ত্যস্মি অহং পপাতা, হদযেন মে যদি তে অত্থি কিচ্চং;
যে কেচিমে সাধুনরস্স ধম্মা, সব্বেৰ তে পাতুকরোমি অজ্জ’’.
‘‘যাতানুযাযী ¶ চ ভৰাহি মাণৰ, অল্লঞ্চ [অদ্দঞ্চ (সী. পী.)] পাণিং পরিৰজ্জযস্সু;
মা চস্সু মিত্তেসু কদাচি দুব্ভী, মা চ ৰসং অসতীনং নিগচ্ছে’’.
‘‘কথং নু যাতং অনুযাযী হোতি, অল্লঞ্চ পাণিং দহতে কথং সো;
অসতী চ কা কো পন মিত্তদুব্ভো, অক্খাহি মে পুচ্ছিতো এতমত্থং’’.
‘‘অসন্থুতং [অসন্ধৰং (স্যা. ক.)] নোপি চ দিট্ঠপুব্বং, যো আসনেনাপি নিমন্তযেয্য;
তস্সেৰ অত্থং পুরিসো করেয্য, যাতানুযাযীতি তমাহু পণ্ডিতা.
‘‘যস্সেকরত্তম্পি ঘরে ৰসেয্য, যত্থন্নপানং পুরিসো লভেয্য;
ন তস্স পাপং মনসাপি চিন্তযে, অদুব্ভী ¶ পাণিং দহতে মিত্তদুব্ভো.
‘‘যস্স রুক্খস্স ছাযায, নিসীদেয্য সযেয্য ৰা;
ন তস্স সাখং ভঞ্জেয্য, মিত্তদুব্ভো হি পাপকো.
‘‘পুণ্ণম্পি চেমং পথৰিং ধনেন, দজ্জিত্থিযা পুরিসো সম্মতায;
লদ্ধা খণং অতিমঞ্ঞেয্য তম্পি, তাসং ৰসং অসতীনং ন গচ্ছে.
‘‘এৰং খো যাতং অনুযাযী হোতি, অল্লঞ্চ পাণিং দহতে পুনেৰং;
অসতী চ সা সো পন মিত্তদুব্ভো, সো ধম্মিকো হোতি জহস্সু অধম্মং’’.
সাধুনরধম্মকণ্ডং নাম.
কালাগিরিকণ্ডং
‘‘অৰসিং ¶ অহং তুয্হং তীহং অগারে, অন্নেন পানেন উপট্ঠিতোস্মি;
মিত্তো মমাসী ৰিসজ্জামহং তং, কামং ঘরং উত্তমপঞ্ঞ গচ্ছ.
‘‘অপি হাযতু নাগকুলা [নাগকুলস্স (সী. স্যা. পী.)] অত্থো, অলম্পি মে নাগকঞ্ঞায হোতু;
সো ত্ৰং সকেনেৰ সুভাসিতেন, মুত্তোসি মে অজ্জ ৰধায পঞ্ঞ’’.
‘‘হন্দ ¶ ¶ তুৰং যক্খ মমম্পি নেহি, সসুরং তে [সস্সুরং নু তে (সী. স্যা. পী. ক.)] অত্থং মযি চরস্সু;
মযঞ্চ নাগাধিপতিং ৰিমানং, দক্খেমু নাগস্স অদিট্ঠপুব্বং’’.
‘‘যং ৰে নরস্স অহিতায অস্স, ন তং পঞ্ঞো অরহতি দস্সনায;
অথ কেন ৰণ্ণেন অমিত্তগামং, তুৰমিচ্ছসি উত্তমপঞ্ঞ গন্তুং’’.
‘‘অদ্ধা পজানামি অহম্পি এতং, ন তং পঞ্ঞো অরহতি দস্সনায;
পাপঞ্চ মে নত্থি কতং কুহিঞ্চি, তস্মা ন সঙ্কে মরণাগমায’’.
‘‘হন্দ চ ঠানং অতুলানুভাৰং, মযা সহ দক্খসি এহি কত্তে;
যত্থচ্ছতি নচ্চগীতেহি নাগো, রাজা যথা ৰেস্সৰণো নল়িঞ্ঞং [নিল়িঞ্ঞং (স্যা.), নিল়ঞ্ঞং (ক.)].
‘‘তং ¶ নাগকঞ্ঞা চরিতং গণেন, নিকীল়িতং নিচ্চমহো চ রত্তিং;
পহূতমাল্যং [বহুত্তমল্লং (ক.)] বহুপুপ্ফছন্নং [বহুপুপ্ফসঞ্ছন্নং (ক.)], ওভাসতী ¶ ৰিজ্জুরিৰন্তলিক্খে.
‘‘অন্নেন পানেন উপেতরূপং, নচ্চেহি গীতেহি চ ৰাদিতেহি;
পরিপূরং কঞ্ঞাহি অলঙ্কতাহি, উপসোভতি ৰত্থপিলন্ধনেন [ৰত্থপিলন্ধনেহি (ক.)].
‘‘সো পুণ্ণকো কুরূনং কত্তুসেট্ঠং, নিসীদযী পচ্ছতো আসনস্মিং;
আদায কত্তারমনোমপঞ্ঞং, উপানযী ভৰনং নাগরঞ্ঞো.
‘‘পত্ৰান ঠানং অতুলানুভাৰং, অট্ঠাসি কত্তা পচ্ছতো পুণ্ণকস্স;
সামগ্গি পেক্খমানো [সামগ্গিপেক্খী পন (সী. স্যা. পী.)] নাগরাজা, পুব্বেৰ জামাতরমজ্ঝভাসথ’’.
‘‘যন্নু তুৰং অগমা মচ্চলোকং, অন্ৰেসমানো হদযং পণ্ডিতস্স;
কচ্চি সমিদ্ধেন ইধানুপত্তো, আদায কত্তারমনোমপঞ্ঞং’’.
‘‘অযঞ্হি সো আগতো যং ত্ৰমিচ্ছসি, ধম্মেন লদ্ধো মম ধম্মপালো;
তং পস্সথ সম্মুখা [তং পস্স ধম্মং সমুখা (ক.)] ভাসমানং, সুখো ¶ হৰে [ভৰে (পী.)] সপ্পুরিসেহি সঙ্গমো’’.
কালাগিরিকণ্ডং নাম.
‘‘অদিট্ঠপুব্বং ¶ দিস্ৰান, মচ্চো মচ্চুভযট্টিতো [ভযদ্দিতো (সী. পী.)];
ব্যম্হিতো নাভিৰাদেসি, নযিদং পঞ্ঞৰতামিৰ’’.
‘‘ন চম্হি ব্যম্হিতো নাগ, ন চ মচ্চুভযট্টিতো;
ন ৰজ্ঝো অভিৰাদেয্য, ৰজ্ঝং ৰা নাভিৰাদযে.
‘‘কথং নো অভিৰাদেয্য, অভিৰাদাপযেথ ৰে;
যং নরো হন্তুমিচ্ছেয্য, তং কম্মং নুপপজ্জতি’’.
‘‘এৰমেতং ¶ যথা ব্রূসি, সচ্চং ভাসসি পণ্ডিত;
ন ৰজ্ঝো অভিৰাদেয্য, ৰজ্ঝং ৰা নাভিৰাদযে.
‘‘কথং নো অভিৰাদেয্য, অভিৰাদাপযেথ ৰে;
যং নরো হন্তুমিচ্ছেয্য, তং কম্মং নুপপজ্জতি’’.
‘‘অসস্সতং সস্সতং নু তৰযিদং, ইদ্ধীজুতীবলৰীরিযূপপত্তি [ইদ্ধিং জুতিং বলং ৰীরিযূপপত্তি (ক.)];
পুচ্ছামি তং নাগরাজেতমত্থং, কথং নু তে লদ্ধমিদং ৰিমানং.
‘‘অধিচ্চলদ্ধং পরিণামজং তে, সযংকতং উদাহু দেৰেহি দিন্নং;
অক্খাহি মে নাগরাজেতমত্থং, যথেৰ তে লদ্ধমিদং ৰিমানং.
‘‘নাধিচ্চলদ্ধং ¶ ন পরিণামজং মে, ন সযংকতং নাপি দেৰেহি দিন্নং;
সকেহি কম্মেহি অপাপকেহি, পুঞ্ঞেহি মে লদ্ধমিদং ৰিমানং’’.
‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;
ইদ্ধীজুতীবলৰীরিযূপপত্তি, ইদঞ্চ তে নাগ মহাৰিমানং’’.
‘‘অহঞ্চ ¶ ভরিযা চ মনুস্সলোকে, সদ্ধা উভো দানপতী অহুম্হা;
ওপানভূতং মে ঘরং তদাসি, সন্তপ্পিতা সমণব্রাহ্মণা চ.
‘‘মালঞ্চ গন্ধঞ্চ ৰিলেপনঞ্চ, পদীপিযং সেয্যমুপস্সযঞ্চ;
অচ্ছাদনং সাযনমন্নপানং, সক্কচ্চ দানানি অদম্হ তত্থ.
‘‘তং মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;
ইদ্ধীজুতীবলৰীরিযূপপত্তি, ইদঞ্চ মে ধীর মহাৰিমানং’.
‘‘এৰং ¶ চে তে লদ্ধমিদং ৰিমানং, জানাসি পুঞ্ঞানং ফলূপপত্তিং;
তস্মা হি ধম্মং চর অপ্পমত্তো, যথা ৰিমানং পুন মাৰসেসি’.
‘‘নযিধ সন্তি সমণব্রাহ্মণা চ, যেসন্নপানানি দদেমু কত্তে;
অক্খাহি মে পুচ্ছিতো এতমত্থং, যথা ৰিমানং পুন মাৰসেম’’.
‘‘ভোগী হি তে সন্তি ইধূপপন্না, পুত্তা চ দারা অনুজীৰিনো চ;
তেসু তুৰং ৰচসা কম্মুনা চ, অসম্পদুট্ঠো চ ভৰাহি নিচ্চং.
‘‘এৰং তুৰং নাগ অসম্পদোসং, অনুপালয ৰচসা কম্মুনা চ;
ঠত্ৰা ইধ যাৰতাযুকং ৰিমানে, উদ্ধং ইতো গচ্ছসি দেৰলোকং’’.
‘‘অদ্ধা ¶ হি সো সোচতি রাজসেট্ঠো, তযা ৰিনা যস্স তুৰং সজিব্বো;
দুক্খূপনীতোপি তযা সমেচ্চ, ৰিন্দেয্য পোসো সুখমাতুরোপি’’.
‘‘অদ্ধা ¶ সতং ভাসসি নাগ ধম্মং, অনুত্তরং অত্থপদং সুচিণ্ণং;
এতাদিসিযাসু হি আপদাসু, পঞ্ঞাযতে মাদিসানং ৰিসেসো’’.
‘‘অক্খাহি ¶ নো তাযং মুধা নু লদ্ধো, অক্খেহি নো তাযং অজেসি জূতে;
ধম্মেন লদ্ধো ইতি তাযমাহ [মা’য’মাহ (স্যা.)], কথং নু ত্ৰং হত্থমিমস্স মাগতো’’.
‘‘যো মিস্সরো তত্থ অহোসি রাজা, তমাযমক্খেহি অজেসি জূতে;
সো মং জিতো রাজা ইমস্সদাসি, ধম্মেন লদ্ধোস্মি অসাহসেন.
‘‘মহোরগো অত্তমনো উদগ্গো, সুত্ৰান ধীরস্স সুভাসিতানি;
হত্থে গহেত্ৰান অনোমপঞ্ঞং, পাৰেক্খি ভরিযায তদা সকাসে.
‘‘যেন ত্ৰং ৰিমলে পণ্ডু, যেন ভত্তং ন রুচ্চতি;
ন চ মে তাদিসো ৰণ্ণো, অযমেসো তমোনুদো.
‘‘যস্স তে হদযেনত্থো, আগতাযং পভঙ্করো;
তস্স ৰাক্যং নিসামেহি, দুল্লভং দস্সনং পুন.
‘‘দিস্ৰান ¶ তং ৰিমলা ভূরিপঞ্ঞং, দসঙ্গুলী অঞ্জলিং পগ্গহেত্ৰা;
হট্ঠেন ভাৰেন পতীতরূপা, ইচ্চব্রৰি কুরূনং কত্তুসেট্ঠং.
‘‘অদিট্ঠপুব্বং দিস্ৰান, মচ্চো মচ্চুভযট্টিতো;
ব্যম্হিতো নাভিৰাদেসি, নযিদং পঞ্ঞৰতামিৰ’’.
‘‘ন ¶ চম্হি ব্যম্হিতো নাগি, ন চ মচ্চুভযট্টিতো;
ন ৰজ্ঝো অভিৰাদেয্য, ৰজ্ঝং ৰা নাভিৰাদযে.
‘‘কথং নো অভিৰাদেয্য, অভিৰাদাপযেথ ৰে;
যং নরো হন্তুমিচ্ছেয্য, তং কম্মং নুপপজ্জতি’’.
‘‘এৰমেতং যথা ব্রূসি, সচ্চং ভাসসি পণ্ডিত;
ন ৰজ্ঝো অভিৰাদেয্য, ৰজ্ঝং ৰা নাভিৰাদযে.
‘‘কথং নো অভিৰাদেয্য, অভিৰাদাপযেথ ৰে;
যং নরো হন্তুমিচ্ছেয্য, তং কম্মং নুপপজ্জতি’’.
‘‘অসস্সতং সস্সতং নু তৰযিদং, ইদ্ধীজুতীবলৰীরিযূপপত্তি;
পুচ্ছামি তং নাগকঞ্ঞেতমত্থং, কথং নু তে লদ্ধমিদং ৰিমানং.
‘‘অধিচ্চলদ্ধং পরিণামজং তে, সযংকতং উদাহু দেৰেহি দিন্নং;
অক্খাহি ¶ মে নাগকঞ্ঞেতমত্থং, যথেৰ তে লদ্ধমিদং ৰিমানং’’.
‘‘নাধিচ্চলদ্ধং ন পরিণামজং মে, ন সযং কতং নাপি দেৰেহি দিন্নং;
সকেহি কম্মেহি অপাপকেহি, পুঞ্ঞেহি মে লদ্ধমিদং ৰিমানং’’.
‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;
ইদ্ধীজুতীবলৰীরিযূপপত্তি, ইদঞ্চ তে নাগি মহাৰিমানং’’.
‘‘অহঞ্চ ¶ খো সামিকো চাপি ময্হং, সদ্ধা উভো দানপতী অহুম্হা;
ওপানভূতং মে ঘরং তদাসি, সন্তপ্পিতা সমণব্রাহ্মণা চ.
‘‘মালঞ্চ ¶ গন্ধঞ্চ ৰিলেপনঞ্চ, পদীপিযং সেয্যমুপস্সযঞ্চ;
অচ্ছাদনং সাযনমন্নপানং, সক্কচ্চং দানানি অদম্হ তত্থ.
‘‘তং মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;
ইদ্ধীজুতীবলৰীরিযূপপত্তি ¶ , ইদঞ্চ মে ধীর মহাৰিমানং’’.
‘‘এৰং চে তে লদ্ধমিদং ৰিমানং, জানাসি পুঞ্ঞানং ফলূপপত্তিং;
তস্মা হি ধম্মং চর অপ্পমত্তা, যথা ৰিমানং পুন মাৰসেসি’’.
‘‘নযিধ সন্তি সমণব্রাহ্মণা চ, যেসন্নপানানি দদেমু কত্তে;
অক্খাহি মে পুচ্ছিতো এতমত্থং, যথা ৰিমানং পুন মাৰসেম’’.
‘‘ভোগী হি তে সন্তি ইধূপপন্না, পুত্তা চ দারা অনুজীৰিনো চ;
তেসু তুৰং ৰচসা কম্মুনা চ, অসম্পদুট্ঠা চ ভৰাহি নিচ্চং.
‘‘এৰং তুৰং নাগি অসম্পদোসং, অনুপালয ৰচসা কম্মুনা চ;
ঠত্ৰা ইধ যাৰতাযুকং ৰিমানে, উদ্ধং ইতো গচ্ছসি দেৰলোকং’’.
‘‘অদ্ধা হি সো সোচতি রাজসেট্ঠো, তযা ৰিনা যস্স তুৰং সজিব্বো;
দুক্খূপনীতোপি ¶ তযা সমেচ্চ, ৰিন্দেয্য পোসো সুখমাতুরোপি’’.
‘‘অদ্ধা ¶ সতং ভাসসি নাগি ধম্মং, অনুত্তরং অত্থপদং সুচিণ্ণং;
এতাদিসিযাসু হি আপদাসু, পঞ্ঞাযতে মাদিসানং ৰিসেসো’’.
‘‘অক্খাহি নো তাযং মুধা নু লদ্ধো, অক্খেহি নো তাযং অজেসি জূতে;
ধম্মেন লদ্ধো ইতি তাযমাহ, কথং নু ত্ৰং হত্থমিমস্স মাগতো’’.
‘‘যো মিস্সরো তত্থ অহোসি রাজা, তমাযমক্খেহি অজেসি জূতে;
সো মং জিতো রাজা ইমস্সদাসি, ধম্মেন লদ্ধোস্মি অসাহসেন.
‘‘যথেৰ ৰরুণো নাগো, পঞ্হং পুচ্ছিত্থ পণ্ডিতং;
তথেৰ নাগকঞ্ঞাপি, পঞ্হং পুচ্ছিত্থ পণ্ডিতং.
‘‘যথেৰ ৰরুণং নাগং, ধীরো তোসেসি পুচ্ছিতো;
তথেৰ নাগকঞ্ঞম্পি, ধীরো তোসেসি পুচ্ছিতো.
‘‘উভোপি তে অত্তমনে ৰিদিত্ৰা, মহোরগং নাগকঞ্ঞঞ্চ ধীরো [ৰিধূরো (ক.)];
অছম্ভী ¶ অভীতো অলোমহট্ঠো, ইচ্চব্রৰি ৰরুণং নাগরাজানং.
‘‘মা রোধযি [মা হেঠযি (পী.)] নাগ আযাহমস্মি, যেন তৰত্থো ইদং সরীরং;
হদযেন মংসেন করোহি কিচ্চং, সযং করিস্সামি যথামতি তে’’.
‘‘পঞ্ঞা ¶ হৰে হদযং পণ্ডিতানং, তে ত্যম্হ পঞ্ঞায মযং সুতুট্ঠা;
অনূননামো লভতজ্জ দারং, অজ্জেৰ তং কুরুযো পাপযাতু’’.
‘‘স ¶ পুণ্ণকো অত্তমনো উদগ্গো, ইরন্ধতিং নাগকঞ্ঞং লভিত্ৰা;
হট্ঠেন ভাৰেন পতীতরূপো, ইচ্চব্রৰি কুরূনং কত্তুসেট্ঠং.
‘‘ভরিযায মং ত্ৰং অকরি সমঙ্গিং, অহঞ্চ তে ৰিধুর করোমি কিচ্চং;
ইদঞ্চ তে মণিরতনং দদামি, অজ্জেৰ তং কুরুযো পাপযামি’’.
‘‘অজেয্যমেসা তৰ হোতু মেত্তি, ভরিযায ¶ কচ্চান পিযায সদ্ধিং;
আনন্দি ৰিত্তো [আনন্দচিত্তো (স্যা. পী.)] সুমনো পতীতো, দত্ৰা মণিং মঞ্চ নযিন্দপত্থং.
‘‘স পুণ্ণকো কুরূনং কত্তুসেট্ঠং, নিসীদযী পুরতো আসনস্মিং;
আদায কত্তারমনোমপঞ্ঞং, উপানযী নগরং ইন্দপত্থং.
‘‘মনো মনুস্সস্স যথাপি গচ্ছে, ততোপিস্স খিপ্পতরং [ততোপি সংখিপ্পতরং (সী. পী.)] অহোসি;
স পুণ্ণকো কুরূনং কত্তুসেট্ঠং, উপানযী নগরং ইন্দপত্থং’’.
‘‘এতিন্দপত্থং নগরং পদিস্সতি, রম্মানি চ অম্বৰনানি ভাগসো;
অহঞ্চ ভরিযায সমঙ্গিভূতো, তুৰঞ্চ পত্তোসি সকং নিকেতং’’.
‘‘স পুণ্ণকো কুরূনং কত্তুসেট্ঠং, ওরোপিয ধম্মসভায মজ্ঝে;
আজঞ্ঞমারুয্হ অনোমৰণ্ণো, পক্কামি ¶ ৰেহাযসমন্তলিক্খে.
‘‘তং ¶ দিস্ৰা রাজা পরমপ্পতীতো, উট্ঠায বাহাহি পলিস্সজিত্ৰা;
অৰিকম্পযং ধম্মসভায মজ্ঝে, নিসীদযী পমুখমাসনস্মিং’’.
‘‘ত্ৰং নো ৰিনেতাসি রথংৰ নদ্ধং, নন্দন্তি তং কুরুযো দস্সনেন;
অক্খাহি মে পুচ্ছিতো এতমত্থং, কথং পমোক্খো অহু মাণৰস্স’’.
‘‘যং মাণৰোত্যাভিৰদী জনিন্দ, ন সো মনুস্সো নরৰীরসেট্ঠ;
যদি তে সুতো পুণ্ণকো নাম যক্খো, রঞ্ঞো কুৰেরস্স হি সো সজিব্বো.
‘‘ভূমিন্ধরো ৰরুণো নাম নাগো, ব্রহা সুচী ৰণ্ণবলূপপন্নো;
তস্সানুজং ধীতরং কামযানো, ইরন্ধতী নাম সা নাগকঞ্ঞা.
‘‘তস্সা সুমজ্ঝায পিযায হেতু, পতারযিত্থ মরণায ময্হং;
সো চেৰ ভরিযায সমঙ্গিভূতো, অহঞ্চ ¶ অনুঞ্ঞাতো মণি চ লদ্ধো’’.
‘‘রুক্খো হি ময্হং পদ্ধারে [ঘরদ্ৰারে (স্যা.)] সুজাতো, পঞ্ঞাক্খন্ধো সীলমযস্স সাখা;
অত্থে চ ধম্মে চ ঠিতো নিপাকো, গৰপ্ফলো হত্থিগৰস্সছন্নো.
‘‘নচ্চগীততূরিযাভিনাদিতে, উচ্ছিজ্জ সেনং [মেনং (সী. পী.)] পুরিসো অহাসি;
সো নো অযং আগতো সন্নিকেতং, রুক্খস্সিমস্সাপচিতিং করোথ.
‘‘যে ¶ ¶ কেচি ৰিত্তা মম পচ্চযেন, সব্বেৰ তে পাতুকরোন্তু অজ্জ;
তিব্বানি কত্ৰান উপাযনানি, রুক্খস্সিমস্সাপচিতিং করোথ.
‘‘যে কেচি বদ্ধা মম অত্থি রট্ঠে, সব্বেৰ তে বন্ধনা মোচযন্তু;
যথেৰ যং বন্ধনস্মা পমুত্তো, এৰমেতে মুঞ্চরে বন্ধনস্মা.
‘‘উন্নঙ্গলা মাসমিমং করোন্তু, মংসোদনং ব্রাহ্মণা ভক্খযন্তু;
অমজ্জপা মজ্জরহা পিৰন্তু, পুণ্ণাহি ¶ থালাহি পলিস্সুতাহি.
‘‘মহাপথং নিচ্চ সমৰ্হযন্তু, তিব্বঞ্চ রক্খং ৰিদহন্তু রট্ঠে;
যথাঞ্ঞমঞ্ঞং ন ৰিহেঠযেয্যুং, রুক্খস্সিমস্সাপচিতিং করোথ’’.
ওরোধা চ কুমারা চ, ৰেসিযানা চ ব্রাহ্মণা;
বহুং অন্নঞ্চ পানঞ্চ, পণ্ডিতস্সাভিহারযুং.
হত্থারোহা অনীকট্ঠা, রথিকা পত্তিকারকা;
বহুং অন্নঞ্চ পানঞ্চ, পণ্ডিতস্সাভিহারযুং.
সমাগতা জানপদা, নেগমা চ সমাগতা;
বহুং অন্নঞ্চ পানঞ্চ, পণ্ডিতস্সাভিহারযুং.
বহুজনো পসন্নোসি, দিস্ৰা পণ্ডিতমাগতে;
পণ্ডিতম্হি অনুপ্পত্তে, চেলুক্খেপো পৰত্তথাতি.
ৰিধুরজাতকং নৰমং.
৫৪৭. ৰেস্সন্তরজাতকং (১০)
দসৰরকথা
‘‘ফুস্সতী ¶ ¶ ¶ [ফুসতি (সী. পী.)] ৰরৰণ্ণাভে, ৰরস্সু দসধা ৰরে;
পথব্যা চারুপুব্বঙ্গি, যং তুয্হং মনসো পিযং’’.
‘‘দেৰরাজ নমো ত্যত্থু, কিং পাপং পকতং মযা;
রম্মা চাৰেসি মং ঠানা, ৰাতোৰ ধরণীরুহং’’.
‘‘ন চেৰ তে কতং পাপং, ন চ মে ত্ৰমসি অপ্পিযা;
পুঞ্ঞঞ্চ তে পরিক্খীণং, যেন তেৰং ৰদামহং.
‘‘সন্তিকে মরণং তুয্হং, ৰিনাভাৰো ভৰিস্সতি;
পটিগণ্হাহি মে এতে, ৰরে দস পৰেচ্ছতো’’.
‘‘ৰরং চে মে অদো সক্ক, সব্বভূতানমিস্সর;
সিৰিরাজস্স ভদ্দন্তে, তত্থ অস্সং নিৰেসনে.
‘‘নীলনেত্তা নীলভমু, নিলক্খী চ যথা মিগী;
ফুস্সতী নাম নামেন, তত্থপস্সং পুরিন্দদ.
‘‘পুত্তং লভেথ ৰরদং, যাচযোগং [যাচযোগিং (ক.)] অমচ্ছরিং;
পূজিতং পটিরাজূহি, কিত্তিমন্তং যসস্সিনং.
‘‘গব্ভং মে ধারযন্তিযা, মজ্ঝিমঙ্গং অনুন্নতং;
কুচ্ছি অনুন্নতো অস্স, চাপংৰ লিখিতং সমং.
‘‘থনা মে নপ্পপতেয্যুং, পলিতা ন সন্তু ৰাসৰ;
কাযে রজো ন লিম্পেথ, ৰজ্ঝঞ্চাপি পমোচযে.
‘‘মযূরকোঞ্চাভিরুদে, নারিৰরগণাযুতে;
খুজ্জচেলাপকাকিণ্ণে ¶ , সূদমাগধৰণ্ণিতে.
‘‘চিত্রগ্গল়েরুঘুসিতে, সুরামংসপবোধনে;
সিৰিরাজস্স ভদ্দন্তে, তত্থস্সং মহেসী পিযা’’.
‘‘যে তে দস ৰরা দিন্না, মযা সব্বঙ্গসোভনে;
সিৰিরাজস্স ৰিজিতে, সব্বে তে লচ্ছসী ৰরে.
‘‘ইদং ¶ ৰত্ৰান মঘৰা, দেৰরাজা সুজম্পতি;
ফুস্সতিযা ৰরং দত্ৰা, অনুমোদিত্থ ৰাসৰো.
দসৰরকথা নাম.
হেমৰন্তং
‘‘পরূল়্হকচ্ছনখলোমা ¶ ¶ , পঙ্কদন্তা রজস্সিরা;
পগ্গয্হ দক্খিণং বাহুং, কিং মং যাচন্তি ব্রাহ্মণা’’.
‘‘রতনং দেৰ যাচাম, সিৰীনং রট্ঠৰড্ঢনং;
দদাহি পৰরং নাগং, ঈসাদন্তং উরূল়্হৰং’’.
‘‘দদামি ন ৰিকম্পামি, যং মং যাচন্তি ব্রাহ্মণা;
পভিন্নং কুঞ্জরং দন্তিং, ওপৰয্হং গজুত্তমং’’.
‘‘হত্থিক্খন্ধতো ওরুয্হ, রাজা চাগাধিমানসো;
ব্রাহ্মণানং অদা দানং, সিৰীনং রট্ঠৰড্ঢনো’’.
‘‘তদাসি যং ভিংসনকং, তদাসি লোমহংসনং;
হত্থিনাগে পদিন্নম্হি, মেদনী সম্পকম্পথ.
‘‘তদাসি যং ভিংসনকং, তদাসি লোমহংসনং;
হত্থিনাগে পদিন্নম্হি, খুব্ভিত্থ নগরং তদা.
‘‘সমাকুলং পুরং আসি, ঘোসো চ ৰিপুলো মহা;
হত্থিনাগে ¶ পদিন্নম্হি, সিৰীনং রট্ঠৰড্ঢনে’’.
‘‘উগ্গা চ রাজপুত্তা চ, ৰেসিযানা চ ব্রাহ্মণা;
হত্থারোহা অনীকট্ঠা, রথিকা পত্তিকারকা.
‘‘কেৰলো চাপি নিগমো, সিৰযো চ সমাগতা;
দিস্ৰা নাগং নীযমানং, তে রঞ্ঞো পটিৰেদযুং.
‘‘ৰিধমং দেৰ তে রট্ঠং, পুত্তো ৰেস্সন্তরো তৰ;
কথং নো হত্থিনং দজ্জা, নাগং রট্ঠস্স পূজিতং.
‘‘কথং নো কুঞ্জরং দজ্জা, ঈসাদন্তং উরূল়্হৰং;
খেত্তঞ্ঞুং সব্বযুদ্ধানং, সব্বসেতং গজুত্তমং.
‘‘পণ্ডুকম্বলসঞ্ছন্নং, ¶ পভিন্নং সত্তুমদ্দনং;
দন্তিং সৰাল়বীজনিং, সেতং কেলাসসাদিসং.
‘‘সসেতচ্ছত্তং ¶ সউপাধেয্যং, সাথব্বনং সহত্থিপং;
অগ্গযানং রাজৰাহিং, ব্রাহ্মণানং অদা গজং [ধনং (সী. পী.), দানং (স্যা.)].
‘‘অন্নং পানঞ্চ যো [সো (সী. স্যা. ক.)] দজ্জা, ৰত্থসেনাসনানি চ;
এতং খো দানং পতিরূপং, এতং খো ব্রাহ্মণারহং.
‘‘অযং তে ৰংসরাজা নো, সিৰীনং রট্ঠৰড্ঢনো [রট্ঠৰড্ঢনং (সী.), রট্ঠৰড্ঢন (পী.)];
কথং ৰেস্সন্তরো পুত্তো, গজং ভাজেতি সঞ্জয.
‘‘সচে ত্ৰং ন করিস্সসি, সিৰীনং ৰচনং ইদং;
মঞ্ঞে তং সহ পুত্তেন, সিৰী হত্থে করিস্সরে’’.
‘‘কামং ¶ জনপদো মাসি, রট্ঠঞ্চাপি ৰিনস্সতু;
নাহং সিৰীনং ৰচনা, রাজপুত্তং অদূসকং;
পব্বাজেয্যং সকা রট্ঠা, পুত্তো হি মম ওরসো.
‘‘কামং জনপদো মাসি, রট্ঠঞ্চাপি ৰিনস্সতু;
নাহং সিৰীনং ৰচনা, রাজপুত্তং অদূসকং;
পব্বাজেয্যং সকা রট্ঠা, পুত্তো হি মম অত্রজো.
‘‘ন চাহং তস্মিং দুব্ভেয্যং, অরিযসীলৰতো হি সো;
অসিলোকোপি মে অস্স, পাপঞ্চ পসৰে বহুং;
কথং ৰেস্সন্তরং পুত্তং, সত্থেন ঘাতযামসে’’.
‘‘মা নং দণ্ডেন সত্থেন, ন হি সো বন্ধনারহো;
পব্বাজেহি চ নং রট্ঠা, ৰঙ্কে ৰসতু পব্বতে’’.
‘‘এসো চে সিৰীনং ছন্দো, ছন্দং ন পনুদামসে;
ইমং সো ৰসতু রত্তিং, কামে চ পরিভুঞ্জতু.
‘‘ততো রত্যা ৰিৰসানে, সূরিযস্সুগ্গমনং পতি [সূরিযুগ্গমনে সতি (ক.)];
সমগ্গা সিৰযো হুত্ৰা, রট্ঠা পব্বাজযন্তু নং’’.
‘‘উট্ঠেহি ¶ কত্তে তরমানো, গন্ত্ৰা ৰেস্সন্তরং ৰদ;
সিৰযো দেৰ তে কুদ্ধা, নেগমা চ সমাগতা.
‘‘উগ্গা চ রাজপুত্তা চ, ৰেসিযানা চ ব্রাহ্মণা;
হত্থারোহা অনীকট্ঠা, রথিকা পত্তিকারকা;
কেৰলো ¶ চাপি নিগমো, সিৰযো চ সমাগতা.
‘‘অস্মা রত্যা ৰিৰসানে, সূরিযস্সুগ্গমনং পতি;
সমগ্গা সিৰযো হুত্ৰা, রট্ঠা পব্বাজযন্তি তং.
‘‘স ¶ কত্তা তরমানোৰ, সিৰিরাজেন পেসিতো;
আমুত্তহত্থাভরণা, সুৰত্থো চন্দনভূসিতো.
‘‘সীসং ন্হাতো উদকে সো, আমুত্তমণিকুণ্ডলো;
উপাগমি পুরং রম্মং, ৰেস্সন্তরনিৰেসনং.
‘‘তত্থদ্দস কুমারং সো, রমমানং সকে পুরে;
পরিকিণ্ণং অমচ্চেহি, তিদসানংৰ ৰাসৰং.
‘‘সো তত্থ গন্ত্ৰা তরমানো, কত্তা ৰেস্সন্তরংব্রৰি;
দুক্খং তে ৰেদযিস্সামি, মা মে কুজ্ঝি রথেসভ.
‘‘ৰন্দিত্ৰা রোদমানো সো, কত্তা রাজানমব্রৰি;
ভত্তা মেসি মহারাজ, সব্বকামরসাহরো.
‘‘দুক্খং তে ৰেদযিস্সামি, তত্থ অস্সাসযন্তু মং;
সিৰযো দেৰ তে কুদ্ধা, নেগমা চ সমাগতা.
‘‘উগ্গা চ রাজপুত্তা চ, ৰেসিযানা চ ব্রাহ্মণা;
হত্থারোহা অনীকট্ঠা, রথিকা পত্তিকারকা;
কেৰলো চাপি নিগমো, সিৰযো চ সমাগতা.
‘‘অস্মা রত্যা ৰিৰসানে, সূরিযস্সুগ্গমনং পতি;
সমগ্গা সিৰযো হুত্ৰা, রট্ঠা পব্বাজযন্তি তং’’.
‘‘কিস্মিং ¶ মে সিৰযো কুদ্ধা, নাহং পস্সামি দুক্কটং;
তং মে কত্তে ৰিযাচিক্খ, কস্মা পব্বাজযন্তি মং’’.
‘‘উগ্গা ¶ চ রাজপুত্তা চ, ৰেসিযানা চ ব্রাহ্মণা;
হত্থারোহা অনীকট্ঠা, রথিকা পত্তিকারকা;
নাগদানেন খিয্যন্তি, তস্মা পব্বাজযন্তি তং’’.
‘‘হদযং চক্খুম্পহং দজ্জং, কিং মে বাহিরকং ধনং;
হিরঞ্ঞং ৰা সুৰণ্ণং ৰা, মুত্তা ৰেল়ুরিযা মণি.
‘‘দক্খিণং ৰাপহং বাহুং, দিস্ৰা যাচকমাগতে;
দদেয্যং ন ৰিকম্পেয্যং, দানে মে রমতে মনো.
‘‘কামং মং সিৰযো সব্বে, পব্বাজেন্তু হনন্তু ৰা;
নেৰ দানা ৰিরমিস্সং, কামং ছিন্দন্তু সত্তধা’’.
‘‘এৰং ¶ তং সিৰযো আহু, নেগমা চ সমাগতা;
কোন্তিমারায তীরেন, গিরিমারঞ্জরং পতি;
যেন পব্বাজিতা যন্তি, তেন গচ্ছতু সুব্বতো’’.
‘‘সোহং তেন গমিস্সামি, যেন গচ্ছন্তি দূসকা;
রত্তিন্দিৰং মে খমথ, যাৰ দানং দদামহং’’.
‘‘আমন্তযিত্থ রাজানং, মদ্দিং সব্বঙ্গসোভনং;
যং তে কিঞ্চি মযা দিন্নং, ধনং ধঞ্ঞঞ্চ ৰিজ্জতি.
‘‘হিরঞ্ঞং ৰা সুৰণ্ণং ৰা, মুত্তা ৰেল়ুরিযা বহূ;
সব্বং তং নিদহেয্যাসি, যঞ্চ তে পেত্তিকং ধনং.
‘‘তমব্রৰি ¶ রাজপুত্তী, মদ্দী সব্বঙ্গসোভনা;
কুহিং দেৰ নিদহামি, তং মে অক্খাহি পুচ্ছিতো’’.
‘‘সীলৰন্তেসু দজ্জাসি, দানং মদ্দি যথারহং;
ন হি দানা পরং অত্থি, পতিট্ঠা সব্বপাণিনং.
‘‘পুত্তেসু মদ্দি দযেসি, সস্সুযা সসুরম্হি চ;
যো চ তং ভত্তা মঞ্ঞেয্য, সক্কচ্চং তং উপট্ঠহে.
‘‘নো চে তং ভত্তা মঞ্ঞেয্য, মযা ৰিপ্পৰসেন তে;
অঞ্ঞং ভত্তারং পরিযেস, মা কিসিত্থো [মা কিলিত্থ (সী. পী.)] মযা ৰিনা’’.
‘‘অহঞ্হি ¶ ৰনং গচ্ছামি, ঘোরং ৰাল়মিগাযুতং;
সংসযো জীৰিতং ময্হং, এককস্স ব্রহাৰনে’’.
‘‘তমব্রৰি রাজপুত্তী, মদ্দী সব্বঙ্গসোভনা;
‘‘অভুম্মে কথং নু ভণসি, পাপকং ৰত ভাসসি.
‘‘নেস ধম্মো মহারাজ, যং ত্ৰং গচ্ছেয্য এককো;
অহম্পি তেন গচ্ছামি, যেন গচ্ছসি খত্তিয.
‘‘মরণং ৰা তযা সদ্ধিং, জীৰিতং ৰা তযা ৰিনা;
তদেৰ মরণং সেয্যো, যং চে জীৰে তযা ৰিনা.
‘‘অগ্গিং উজ্জালযিত্ৰান [নিজ্জালযিত্ৰান (সী. পী.)], একজালসমাহিতং;
তত্থ মে [তত্থেৰ (স্যা. ক.)] মরণং সেয্যো, যং চে জীৰে তযা ৰিনা.
‘‘যথা আরঞ্ঞকং নাগং, দন্তিং অন্ৰেতি হত্থিনী;
জেস্সন্তং গিরিদুগ্গেসু, সমেসু ৰিসমেসু চ.
‘‘এৰং ¶ ¶ তং অনুগচ্ছামি, পুত্তে আদায পচ্ছতো;
সুভরা তে ভৰিস্সামি, ন তে হেস্সামি দুব্ভরা.
‘‘ইমে কুমারে পস্সন্তো, মঞ্জুকে পিযভাণিনে;
আসীনে [আসনে (ক.)] ৰনগুম্বস্মিং, ন রজ্জস্স সরিস্সসি.
‘‘ইমে কুমারে পস্সন্তো, মঞ্জুকে পিযভাণিনে;
কীল়ন্তে ৰনগুম্বস্মিং, ন রজ্জস্স সরিস্সসি.
‘‘ইমে কুমারে পস্সন্তো, মঞ্জুকে পিযভাণিনে;
অস্সমে রমণীযম্হি, ন রজ্জস্স সরিস্সসি.
‘‘ইমে কুমারে পস্সন্তো, মঞ্জুকে পিযভাণিনে;
কীল়ন্তে অস্সমে রম্মে, ন রজ্জস্স সরিস্সসি.
‘‘ইমে কুমারে পস্সন্তো, মালধারী অলঙ্কতে;
অস্সমে রমণীযম্হি, ন রজ্জস্স সরিস্সসি.
‘‘ইমে কুমারে পস্সন্তো, মালধারী অলঙ্কতে;
কীল়ন্তে অস্সমে রম্মে, ন রজ্জস্স সরিস্সসি.
‘‘যদা ¶ দক্খিসি নচ্চন্তে, কুমারে মালধারিনে;
অস্সমে রমণীযম্হি, ন রজ্জস্স সরিস্সসি.
‘‘যদা দক্খিসি নচ্চন্তে, কুমারে মালধারিনে;
কীল়ন্তে অস্সমে রম্মে, ন রজ্জস্স সরিস্সসি.
‘‘যদা ¶ দক্খিসি মাতঙ্গং, কুঞ্জরং সট্ঠিহাযনং;
একং অরঞ্ঞে চরন্তং, ন রজ্জস্স সরিস্সসি.
‘‘যদা দক্খিসি মাতঙ্গং, কুঞ্জরং সট্ঠিহাযনং;
সাযং পাতো ৰিচরন্তং, ন রজ্জস্স সরিস্সসি.
‘‘যদা করেণুসঙ্ঘস্স, যূথস্স পুরতো ৰজং;
কোঞ্চং কাহতি মাতঙ্গো, কুঞ্জরো সট্ঠিহাযনো;
তস্স তং নদতো সুত্ৰা, ন রজ্জস্স সরিস্সসি.
‘‘দুভতো ৰনৰিকাসে, যদা দক্খিসি কামদো;
ৰনে ৰাল়মিগাকিণ্ণে, ন রজ্জস্স সরিস্সসি.
‘‘মিগং দিস্ৰান সাযন্হং, পঞ্চমালিনমাগতং;
কিম্পুরিসে চ নচ্চন্তে, ন রজ্জস্স সরিস্সসি.
‘‘যদা ¶ সোস্সসি নিগ্ঘোসং, সন্দমানায সিন্ধুযা;
গীতং কিম্পুরিসানঞ্চ, ন রজ্জস্স সরিস্সসি.
‘‘যদা সোস্সসি নিগ্ঘোসং, গিরিগব্ভরচারিনো;
ৰস্সমানস্সুলূকস্স, ন রজ্জস্স সরিস্সসি.
‘‘যদা সীহস্স ব্যগ্ঘস্স, খগ্গস্স গৰযস্স চ;
ৰনে সোস্সসি ৰাল়ানং, ন রজ্জস্স সরিস্সসি.
‘‘যদা মোরীহি পরিকিণ্ণং, বরিহীনং মত্থকাসিনং;
মোরং দক্খিসি নচ্চন্তং, ন রজ্জস্স সরিস্সসি.
‘‘যদা মোরীহি পরিকিণ্ণং, অণ্ডজং চিত্রপক্খিনং;
মোরং দক্খিসি নচ্চন্তং, ন রজ্জস্স সরিস্সসি.
‘‘যদা ¶ মোরীহি পরিকিণ্ণং, নীলগীৰং সিখণ্ডিনং;
মোরং দক্খিসি নচ্চন্তং, ন রজ্জস্স সরিস্সসি.
‘‘যদা ¶ দক্খিসি হেমন্তে, পুপ্ফিতে ধরণীরুহে;
সুরভিং সম্পৰাযন্তে, ন রজ্জস্স সরিস্সসি.
‘‘যদা হেমন্তিকে মাসে, হরিতং দক্খিসি মেদনিং [মেদিনিং (সী. পী.)];
ইন্দগোপকসঞ্ছন্নং, ন রজ্জস্স সরিস্সসি.
‘‘যদা দক্খিসি হেমন্তে, পুপ্ফিতে ধরণীরুহে;
কুটজং বিম্বজালঞ্চ, পুপ্ফিতং লোদ্দপদ্মকং [লোমপদ্ধকং (সী. পী.)];
সুরভিং সম্পৰাযন্তে, ন রজ্জস্স সরিস্সসি.
‘‘যদা হেমন্তিকে মাসে, ৰনং দক্খিসি পুপ্ফিতং;
ওপুপ্ফানি চ পদ্মানি, ন রজ্জস্স সরিস্সসি’’.
হেমৰন্তং নাম.
দানকণ্ডং
‘‘তেসং লালপ্পিতং সুত্ৰা, পুত্তস্স সুণিসায চ;
কলুনং [করুণং (সী. পী.), কলূনং (স্যা. ক.)] পরিদেৰেসি, রাজপুত্তী যসস্সিনী.
‘‘সেয্যো ¶ ৰিসং মে খাযিতং, পপাতা পপতেয্যহং;
রজ্জুযা বজ্ঝ মিয্যাহং, কস্মা ৰেস্সন্তরং পুত্তং;
পব্বাজেন্তি অদূসকং.
‘‘অজ্ঝাযকং দানপতিং, যাচযোগং অমচ্ছরিং;
পূজিতং ¶ পটিরাজূহি, কিত্তিমন্তং যসস্সিনং;
কস্মা ৰেস্সন্তরং পুত্তং, পব্বাজেন্তি অদূসকং.
‘‘মাতাপেত্তিভরং জন্তুং, কুলে জেট্ঠাপচাযিকং;
কস্মা ৰেস্সন্তরং পুত্তং, পব্বাজেন্তি অদূসকং.
‘‘রঞ্ঞো হিতং দেৰিহিতং, ঞাতীনং সখিনং হিতং;
হিতং সব্বস্স রট্ঠস্স, কস্মা ৰেস্সন্তরং পুত্তং;
পব্বাজেন্তি অদূসকং.
‘‘মধূনিৰ পলাতানি, অম্বাৰ পতিতা ছমা;
এৰং হেস্সতি তে রট্ঠং, পব্বাজেন্তি অদূসকং.
‘‘হংসো ¶ নিখীণপত্তোৰ, পল্ললস্মিং অনূদকে;
অপৰিট্ঠো অমচ্চেহি, একো রাজা ৰিহিয্যসি.
‘‘তং তং ব্রূমি মহারাজ, অত্থো তে মা উপচ্চগা;
মা নং সিৰীনং ৰচনা, পব্বাজেসি অদূসকং’’.
‘‘ধম্মস্সাপচিতিং কুম্মি, সিৰীনং ৰিনযং ধজং;
পব্বাজেমি সকং পুত্তং, পাণা পিযতরো হি মে’’.
‘‘যস্স পুব্বে ধজগ্গানি, কণিকারাৰ পুপ্ফিতা;
যাযন্তমনুযাযন্তি, স্ৰজ্জেকোৰ গমিস্সতি.
‘‘যস্স পুব্বে ধজগ্গানি, কণিকারৰনানিৰ;
যাযন্তমনুযাযন্তি ¶ , স্ৰজ্জেকোৰ গমিস্সতি.
‘‘যস্স পুব্বে অনীকানি, কণিকারাৰ পুপ্ফিতা;
যাযন্তমনুযাযন্তি, স্ৰজ্জেকোৰ গমিস্সতি.
‘‘যস্স পুব্বে অনীকানি, কণিকারৰনানিৰ;
যাযন্তমনুযাযন্তি, স্ৰজ্জেকোৰ গমিস্সতি.
‘‘ইন্দগোপকৰণ্ণাভা, গন্ধারা পণ্ডুকম্বলা;
যাযন্তমনুযাযন্তি, স্ৰজ্জেকোৰ গমিস্সতি.
‘‘যো ¶ পুব্বে হত্থিনা যাতি, সিৰিকায রথেন চ;
স্ৰজ্জ ৰেস্সন্তরো রাজা, কথং গচ্ছতি পত্তিকো.
‘‘কথং চন্দনলিত্তঙ্গো, নচ্চগীতপ্পবোধনো;
খুরাজিনং ফরসুঞ্চ, খারিকাজঞ্চ হাহিতি [হারিতি (স্যা. ক.)].
‘‘কস্মা নাভিহরিস্সন্তি, কাসাৰ অজিনানি চ;
পৰিসন্তং ব্রহারঞ্ঞং, কস্মা চীরং ন বজ্ঝরে.
‘‘কথং নু চীরং ধারেন্তি, রাজপব্বাজিতা জনা;
কথং কুসমযং চীরং, মদ্দী পরিদহিস্সতি.
‘‘কাসিযানি চ ধারেত্ৰা, খোমকোটুম্বরানি চ;
কুসচীরানি ধারেন্তী, কথং মদ্দী করিস্সতি.
‘‘ৰয্হাহি ¶ পরিযাযিত্ৰা, সিৰিকায রথেন চ;
সা কথজ্জ অনুজ্ঝঙ্গী, পথং গচ্ছতি পত্তিকা.
‘‘যস্সা মুদুতলা হত্থা, চরণা চ সুখেধিতা;
সা কথজ্জ অনুজ্ঝঙ্গী, পথং গচ্ছতি পত্তিকা.
‘‘যস্সা ¶ মুদুতলা পাদা, চরণা চ সুখেধিতা;
পাদুকাহি সুৰণ্ণাহি, পীল়মানাৰ গচ্ছতি;
সা কথজ্জ অনুজ্ঝঙ্গী, পথং গচ্ছতি পত্তিকা.
‘‘যাস্সু ইত্থিসহস্সানং, পুরতো গচ্ছতি মালিনী;
সা কথজ্জ অনুজ্ঝঙ্গী, ৰনং গচ্ছতি একিকা.
‘‘যাস্সু সিৰায সুত্ৰান, মুহুং উত্তসতে পুরে;
সা কথজ্জ অনুজ্ঝঙ্গী, ৰনং গচ্ছতি ভীরুকা.
‘‘যাস্সু ইন্দসগোত্তস্স, উলূকস্স পৰস্সতো;
সুত্ৰান নদতো ভীতা, ৰারুণীৰ পৰেধতি;
সা কথজ্জ অনুজ্ঝঙ্গী, ৰনং গচ্ছতি ভীরুকা.
‘‘সকুণী হতপুত্তাৰ, সুঞ্ঞং দিস্ৰা কুলাৰকং;
চিরং দুক্খেন ঝাযিস্সং, সুঞ্ঞং আগম্মিমং পুরং.
‘‘সকুণী হতপুত্তাৰ, সুঞ্ঞং দিস্ৰা কুলাৰকং;
কিসা পণ্ডু ভৰিস্সামি, পিযে পুত্তে অপস্সতী.
‘‘সকুণী হতপুত্তাৰ, সুঞ্ঞং দিস্ৰা কুলাৰকং;
তেন তেন পধাৰিস্সং, পিযে পুত্তে অপস্সতী.
‘‘কুররী ¶ [কুরুরী (স্যা. ক.)] হতছাপাৰ, সুঞ্ঞং দিস্ৰা কুলাৰকং;
চিরং দুক্খেন ঝাযিস্সং, সুঞ্ঞং আগম্মিমং পুরং.
‘‘কুররী হতছাপাৰ, সুঞ্ঞং দিস্ৰা কুলাৰকং;
কিসা পণ্ডু ভৰিস্সামি, পিযে পুত্তে অপস্সতী.
‘‘কুররী ¶ হতছাপাৰ, সুঞ্ঞং দিস্ৰা কুলাৰকং;
তেন তেন পধাৰিস্সং, পিযে পুত্তে অপস্সতী.
‘‘সা ¶ নূন চক্কৰাকীৰ, পল্ললস্মিং অনূদকে;
চিরং দুক্খেন ঝাযিস্সং, সুঞ্ঞং আগম্মিমং পুরং.
‘‘সা নূন চক্কৰাকীৰ, পল্ললস্মিং অনূদকে;
কিসা পণ্ডু ভৰিস্সামি, পিযে পুত্তে অপস্সতী.
‘‘সা নূন চক্কৰাকীৰ, পল্ললস্মিং অনূদকে;
তেন তেন পধাৰিস্সং, পিযে পুত্তে অপস্সতী.
‘‘এৰং মে ৰিলপন্তিযা, রাজা পুত্তং অদূসকং;
পব্বাজেসি ৰনং রট্ঠা, মঞ্ঞে হিস্সামি জীৰিতং’’.
‘‘তস্সা লালপ্পিতং সুত্ৰা, সব্বা অন্তেপুরে বহূ [অহু (স্যা. ক.)];
বাহা পগ্গয্হ পক্কন্দুং, সিৰিকঞ্ঞা সমাগতা.
‘‘সালাৰ সম্পমথিতা, মালুতেন পমদ্দিতা;
সেন্তি পুত্তা চ দারা চ, ৰেস্সন্তরনিৰেসনে.
‘‘ওরোধা চ কুমারা চ, ৰেসিযানা চ ব্রাহ্মণা;
বাহা পগ্গয্হ পক্কন্দুং, ৰেস্সন্তরনিৰেসনে.
‘‘হত্থারোহা অনীকট্ঠা, রথিকা পত্তিকারকা;
বাহা পগ্গয্হ পক্কন্দুং, ৰেস্সন্তরনিৰেসনে.
‘‘ততো রত্যা ৰিৰসানে, সূরিযস্সুগ্গমনং পতি;
অথ ৰেস্সন্তরো রাজা, দানং দাতুং উপাগমি.
‘‘ৰত্থানি ¶ ৰত্থকামানং, সোণ্ডানং দেথ ৰারুণিং;
ভোজনং ভোজনত্থীনং, সম্মদেৰ পৰেচ্ছথ.
‘‘মা চ কিঞ্চি ৰনিব্বকে, হেট্ঠযিত্থ ইধাগতে;
তপ্পেথ অন্নপানেন, গচ্ছন্তু পটিপূজিতা.
‘‘অথেত্থ ৰত্ততী সদ্দো, তুমুলো ভেরৰো মহা;
দানেন তং নীহরন্তি, পুন দানং অদা তুৰং [অযং গাথা সী. স্যা. পী. পোত্থকেসু ন দিস্সতি].
‘‘তেসু ¶ মত্তা কিলন্তাৰ, সম্পতন্তি ৰনিব্বকা;
নিক্খমন্তে মহারাজে, সিৰীনং রট্ঠৰড্ঢনে.
‘‘অচ্ছেচ্ছুং ¶ ৰত ভো রুক্খং, নানাফলধরং দুমং;
যথা ৰেস্সন্তরং রট্ঠা, পব্বাজেন্তি অদূসকং.
‘‘অচ্ছেচ্ছুং ৰত ভো রুক্খং, সব্বকামদদং দুমং;
যথা ৰেস্সন্তরং রট্ঠা, পব্বাজেন্তি অদূসকং.
‘‘অচ্ছেচ্ছুং ৰত ভো রুক্খং, সব্বকামরসাহরং;
যথা ৰেস্সন্তরং রট্ঠা, পব্বাজেন্তি অদূসকং.
‘‘যে ৰুড্ঢা যে চ দহরা, যে চ মজ্ঝিমপোরিসা;
বাহা পগ্গয্হ পক্কন্দুং, নিক্খমন্তে মহারাজে;
সিৰীনং রট্ঠৰড্ঢনে.
‘‘অতিযক্খা ¶ ৰস্সৰরা, ইত্থাগারা চ রাজিনো;
বাহা পগ্গয্হ পক্কন্দুং, নিক্খমন্তে মহারাজে;
সিৰীনং রট্ঠৰড্ঢনে.
‘‘থিযোপি তত্থ পক্কন্দুং, যা তম্হি নগরে অহু;
নিক্খমন্তে মহারাজে, সিৰীনং রট্ঠৰড্ঢনে.
‘‘যে ব্রাহ্মণা যে চ সমণা, অঞ্ঞে ৰাপি ৰনিব্বকা;
বাহা পগ্গয্হ পক্কন্দুং, অধম্মো কির ভো ইতি.
‘‘যথা ৰেস্সন্তরো রাজা, যজমানো সকে পুরে;
সিৰীনং ৰচনত্থেন, সম্হা রট্ঠা নিরজ্জতি.
‘‘সত্ত হত্থিসতে দত্ৰা, সব্বালঙ্কারভূসিতে;
সুৰণ্ণকচ্ছে মাতঙ্গে, হেমকপ্পনৰাসসে.
‘‘আরূল়্হে গামণীযেহি, তোমরঙ্কুসপাণিভি;
এস ৰেস্সন্তরো রাজা, সম্হা রট্ঠা নিরজ্জতি.
‘‘সত্ত অস্সসতে দত্ৰা, সব্বালঙ্কারভূসিতে;
আজানীযেৰ জাতিযা, সিন্ধৰে সীঘৰাহনে.
‘‘আরূল়্হে গামণীযেহি, ইল্লিযাচাপধারিভি;
এস ৰেস্সন্তরো রাজা, সম্হা রট্ঠা নিরজ্জতি.
‘‘সত্ত রথসতে দত্ৰা, সন্নদ্ধে উস্সিতদ্ধজে;
দীপে অথোপি ৰেযগ্ঘে, সব্বালঙ্কারভূসিতে.
‘‘আরূল়্হে ¶ ¶ গামণীযেহি, চাপহত্থেহি ৰম্মিভি;
এস ¶ ৰেস্সন্তরো রাজা, সম্হা রট্ঠা নিরজ্জতি.
‘‘সত্ত ইত্থিসতে দত্ৰা, একমেকা রথে ঠিতা;
সন্নদ্ধা নিক্খরজ্জূহি, সুৰণ্ণেহি অলঙ্কতা.
‘‘পীতালঙ্কারা পীতৰসনা, পীতাভরণৰিভূসিতা;
অল়ারপম্হা হসুলা, সুসঞ্ঞা তনুমজ্ঝিমা;
এস ৰেস্সন্তরো রাজা, সম্হা রট্ঠা নিরজ্জতি.
‘‘সত্ত ধেনুসতে দত্ৰা, সব্বা কংসুপধারণা [কুসুমধারিনে (ক.)];
এস ৰেস্সন্তরো রাজা, সম্হা রট্ঠা নিরজ্জতি.
‘‘সত্ত দাসিসতে দত্ৰা, সত্ত দাসসতানি চ;
এস ৰেস্সন্তরো রাজা, সম্হা রট্ঠা নিরজ্জতি.
‘‘হত্থী অস্সরথে [অস্সে রথে (স্যা.)] দত্ৰা, নারিযো চ অলঙ্কতা;
এস ৰেস্সন্তরো রাজা, সম্হা রট্ঠা নিরজ্জতি.
‘‘তদাসি যং ভিংসনকং, তদাসি লোমহংসনং;
মহাদানে পদিন্নম্হি, মেদনী সম্পকম্পথ.
‘‘তদাসি যং ভিংসনকং, তদাসি লোমহংসনং;
যং পঞ্জলিকতো রাজা, সম্হা রট্ঠা নিরজ্জতি.
‘‘অথেত্থ ৰত্ততী সদ্দো, তুমুলো ভেরৰো মহা;
দানেন তং নীহরন্তি, পুন দানং অদা তুৰং.
‘‘তেসু ¶ মত্তা কিলন্তাৰ, সম্পতন্তি ৰনিব্বকা;
নিক্খমন্তে মহারাজে, সিৰীনং রট্ঠৰড্ঢনে’’.
‘‘আমন্তযিত্থ রাজানং, সঞ্জযং ধম্মিনং ৰরং [ধম্মিকংৰরং (স্যা. ক.)];
অৰরুদ্ধসি মং দেৰ, ৰঙ্কং গচ্ছামি পব্বতং.
‘‘যে হি কেচি মহারাজ, ভূতা যে চ ভৰিস্সরে;
অতিত্তাযেৰ কামেহি, গচ্ছন্তি যমসাধনং.
‘‘স্ৰাহং ¶ সকে অভিস্সসিং, যজমানো সকে পুরে;
সিৰীনং ৰচনত্থেন, সম্হা রট্ঠা নিরজ্জতি.
‘‘অঘং তং পটিসেৰিস্সং, ৰনে ৰাল়মিগাকিণ্ণে;
খগ্গদীপিনিসেৰিতে, অহং পুঞ্ঞানি করোমি;
তুম্হে পঙ্কম্হি সীদথ’’.
‘‘অনুজানাহি ¶ মং অম্ম, পব্বজ্জা মম রুচ্চতি;
স্ৰাহং সকে অভিস্সসিং, যজমানো সকে পুরে;
সিৰীনং ৰচনত্থেন, সম্হা রট্ঠা নিরজ্জতি.
‘‘অঘং তং পটিসেৰিস্সং, ৰনে ৰাল়মিগাকিণ্ণে;
খগ্গদীপিনিসেৰিতে, অহং পুঞ্ঞানি করোমি;
তুম্হে পঙ্কম্হি সীদথ [ৰঙ্কং গচ্ছামি পব্বতং (ক.)].
‘‘অনুজানামি তং পুত্ত, পব্বজ্জা তে সমিজ্ঝতু;
অযঞ্চ মদ্দী কল্যাণী, সুসঞ্ঞা তনুমজ্ঝিমা;
অচ্ছতং সহ পুত্তেহি, কিং অরঞ্ঞে করিস্সতি’’.
‘‘নাহং ¶ অকামা দাসিম্পি, অরঞ্ঞং নেতুমুস্সহে;
সচে ইচ্ছতি অন্ৰেতু, সচে নিচ্ছতি অচ্ছতু’’.
‘‘ততো সুণ্হং মহারাজা, যাচিতুং পটিপজ্জথ;
মা চন্দনসমাচারে, রজোজল্লং অধারযি.
‘‘মা কাসিযানি ধারেত্ৰা [কাসিযানি চ ধারেত্ৰা (ক.)], কুসচীরং অধারযি;
দুক্খো ৰাসো অরঞ্ঞস্মিং, মা হি ত্ৰং লক্খণে গমি.
‘‘তমব্রৰি রাজপুত্তী, মদ্দী সব্বঙ্গসোভনা;
নাহং তং সুখমিচ্ছেয্যং, যং মে ৰেস্সন্তরং ৰিনা’’.
‘‘তমব্রৰি মহারাজা, সিৰীনং রট্ঠৰড্ঢনো;
ইঙ্ঘ মদ্দী নিসামেতি, ৰনে যে হোন্তি দুস্সহা.
‘‘বহূ কীটা পটঙ্গা চ, মকসা মধুমক্খিকা;
তেপি তং তত্থ হিংসেয্যুং, তং তে দুক্খতরং সিযা.
‘‘অপরে ¶ পস্স সন্তাপে, নদীনুপনিসেৰিতে;
সপ্পা অজগরা নাম, অৰিসা তে মহব্বলা.
‘‘তে মনুস্সং মিগং ৰাপি, অপি মাসন্নমাগতং;
পরিক্খিপিত্ৰা ভোগেহি, ৰসমানেন্তি অত্তনো.
‘‘অঞ্ঞেপি কণ্হজটিনো [কণ্হজটিলা (ক.)], অচ্ছা নাম অঘম্মিগা;
ন তেহি পুরিসো দিট্ঠো, রুক্খমারুয্হ মুচ্চতি.
‘‘সঙ্ঘট্টযন্তা সিঙ্গানি, তিক্খগ্গাতিপ্পহারিনো [তিক্খগ্গানি পহারিনো (সী. স্যা.)];
মহিংসা ৰিচরন্তেত্থ, নদিং সোতুম্বরং পতি.
‘‘দিস্ৰা ¶ ¶ মিগানং যূথানং, গৰং সঞ্চরতং ৰনে;
ধেনুৰ ৰচ্ছগিদ্ধাৰ, কথং মদ্দি করিস্সসি.
‘‘দিস্ৰা সম্পতিতে ঘোরে, দুমগ্গেসু প্লৰঙ্গমে;
অখেত্তঞ্ঞায তে মদ্দি, ভৰিস্সতে মহব্ভযং.
‘‘যা ত্ৰং সিৰায সুত্ৰান, মুহুং উত্তসযী [উত্তসসে (সী. স্যা. ক.)] পুরে;
সা ত্ৰং ৰঙ্কমনুপ্পত্তা, কথং মদ্দি করিস্সসি.
‘‘ঠিতে মজ্ঝন্হিকে [মজ্ঝন্তিকে (সী. স্যা. পী.)] কালে, সন্নিসিন্নেসু পক্খিসু;
সণতেৰ ব্রহারঞ্ঞং, তত্থ কিং গন্তুমিচ্ছসি’’.
‘‘তমব্রৰি রাজপুত্তী, মদ্দী সব্বঙ্গসোভনা;
যানি এতানি অক্খাসি, ৰনে পটিভযানি মে;
সব্বানি অভিসম্ভোস্সং, গচ্ছঞ্ঞেৰ রথেসভ.
‘‘কাসং কুসং পোটকিলং, উসিরং মুঞ্জপব্বজং [মুঞ্জবব্বজং (সী.)];
উরসা পনুদহিস্সামি, নস্স হেস্সামি দুন্নযা.
‘‘বহূহি ৰত চরিযাহি, কুমারী ৰিন্দতে পতিং;
উদরস্সুপরোধেন, গোহনুৰেঠনেন চ.
‘‘অগ্গিস্স পারিচরিযায, উদকুম্মুজ্জনেন চ;
ৰেধব্যং [ৰেধব্বং (সী. পী.)] কটুকং লোকে, গচ্ছঞ্ঞেৰ রথেসভ.
‘‘অপিস্সা ¶ হোতি অপ্পত্তো, উচ্ছিট্ঠমপি ভুঞ্জিতুং;
যো নং হত্থে গহেত্ৰান, অকামং পরিকড্ঢতি;
ৰেধব্যং কটুকং লোকে, গচ্ছঞ্ঞেৰ রথেসভ.
‘‘কেসগ্গহণমুক্খেপা ¶ , ভূম্যা চ পরিসুম্ভনা;
দত্ৰা চ নোপক্কমতি, বহুদুক্খং অনপ্পকং;
ৰেধব্যং কটুকং লোকে, গচ্ছঞ্ঞেৰ রথেসভ.
‘‘সুকচ্ছৰী ৰেধৰেরা, দত্ৰা সুভগমানিনো;
অকামং পরিকড্ঢন্তি, উলূকঞ্ঞেৰ ৰাযসা;
ৰেধব্যং কটুকং লোকে, গচ্ছঞ্ঞেৰ রথেসভ.
‘‘অপি ঞাতিকুলে ফীতে, কংসপজ্জোতনে ৰসং;
নেৰাভিৰাক্যং ন লভে, ভাতূহি সখিনীহিপি [সখিকাহি চ (সী. পী.)];
ৰেধব্যং কটুকং লোকে, গচ্ছঞ্ঞেৰ রথেসভ.
‘‘নগ্গা ¶ নদী অনূদকা, নগ্গং রট্ঠং অরাজকং;
ইত্থীপি ৰিধৰা নগ্গা, যস্সাপি দস ভাতরো;
ৰেধব্যং কটুকং লোকে, গচ্ছঞ্ঞেৰ রথেসভ.
‘‘ধজো রথস্স পঞ্ঞাণং, ধূমো পঞ্ঞাণমগ্গিনো;
রাজা রথস্স পঞ্ঞাণং, ভত্তা পঞ্ঞাণমিত্থিযা;
ৰেধব্যং কটুকং লোকে, গচ্ছঞ্ঞেৰ রথেসভ.
‘‘যা দলিদ্দী দলিদ্দস্স, অড্ঢা অড্ঢস্স কিত্তিমং;
তং ৰে দেৰা পসংসন্তি, দুক্করঞ্হি করোতি সা.
‘‘সামিকং অনুবন্ধিস্সং, সদা কাসাযৰাসিনী;
পথব্যাপি অভিজ্জন্ত্যা [অভেজ্জন্ত্যা (সী. পী.)], ৰেধব্যং কটুকিত্থিযা.
‘‘অপি সাগরপরিযন্তং, বহুৰিত্তধরং মহিং;
নানারতনপরিপূরং ¶ , নিচ্ছে ৰেস্সন্তরং ৰিনা.
‘‘কথং নু তাসং হদযং, সুখরা ৰত ইত্থিযো;
যা সামিকে দুক্খিতম্হি, সুখমিচ্ছন্তি অত্তনো.
‘‘নিক্খমন্তে ¶ মহারাজে, সিৰীনং রট্ঠৰড্ঢনে;
তমহং অনুবন্ধিস্সং, সব্বকামদদো হি মে’’.
‘‘তমব্রৰি মহারাজা, মদ্দিং সব্বঙ্গসোভনং;
ইমে তে দহরা পুত্তা, জালী কণ্হাজিনা চুভো;
নিক্খিপ্প লক্খণে গচ্ছ, মযং তে পোসযামসে’’ [পোসিযামসে (সী. পী. ক.)].
‘‘তমব্রৰি রাজপুত্তী, মদ্দী সব্বঙ্গসোভনা;
পিযা মে পুত্তকা দেৰ, জালী কণ্হাজিনা চুভো;
ত্যম্হং তত্থ রমেস্সন্তি, অরঞ্ঞে জীৰসোকিনং’’.
‘‘তমব্রৰি মহারাজা, সিৰীনং রট্ঠৰড্ঢনো;
সালীনং ওদনং ভুত্ৰা, সুচিং মংসূপসেচনং;
রুক্খফলানি ভুঞ্জন্তা, কথং কাহন্তি দারকা.
‘‘ভুত্ৰা সতপলে কংসে, সোৰণ্ণে সতরাজিকে;
রুক্খপত্তেসু ভুঞ্জন্তা, কথং কাহন্তি দারকা.
‘‘কাসিযানি চ ধারেত্ৰা, খোমকোটুম্বরানি চ;
কুসচীরানি ধারেন্তা, কথং কাহন্তি দারকা.
‘‘ৰয্হাহি ¶ পরিযাযিত্ৰা, সিৰিকায রথেন চ;
পত্তিকা পরিধাৰন্তা, কথং কাহন্তি দারকা.
‘‘কূটাগারে ¶ সযিত্ৰান, নিৰাতে ফুসিতগ্গল়ে;
সযন্তা রুক্খমূলস্মিং, কথং কাহন্তি দারকা.
‘‘পল্লঙ্কেসু সযিত্ৰান, গোনকে চিত্তসন্থতে;
সযন্তা তিণসন্থারে, কথং কাহন্তি দারকা.
‘‘গন্ধকেন ৰিলিম্পিত্ৰা, অগরুচন্দনেন চ;
রজোজল্লানি ধারেন্তা, কথং কাহন্তি দারকা.
‘‘চামরমোরহত্থেহি, বীজিতঙ্গা সুখেধিতা [সুখে ঠিতা (স্যা. পী.)];
ফুট্ঠা ডংসেহি মকসেহি, কথং কাহন্তি দারকা’’.
‘‘তমব্রৰি ¶ রাজপুত্তী, মদ্দী সব্বঙ্গসোভনা;
মা দেৰ পরিদেৰেসি, মা চ ত্ৰং ৰিমনো অহু;
যথা মযং ভৰিস্সাম, তথা হেস্সন্তি দারকা.
‘‘ইদং ৰত্ৰান পক্কামি, মদ্দী সব্বঙ্গসোভনা;
সিৰিমগ্গেন অন্ৰেসি, পুত্তে আদায লক্খণা’’.
ততো ৰেস্সন্তরো রাজা, দানং দত্ৰান খত্তিযো;
পিতু মাতু চ ৰন্দিত্ৰা, কত্ৰা চ নং পদক্খিণং.
চতুৰাহিং রথং যুত্তং, সীঘমারুয্হ সন্দনং;
আদায পুত্তদারঞ্চ, ৰঙ্কং পাযাসি পব্বতং.
ততো ৰেস্সন্তরো রাজা, যেনাসি বহুকো জনো;
‘‘আমন্ত খো তং গচ্ছাম, অরোগা হোন্তু ঞাতযো’’.
‘‘ইঙ্ঘ ¶ মদ্দি নিসামেহি, রম্মরূপংৰ দিস্সতি;
আৰাসং সিৰিসেট্ঠস্স, পেত্তিকং ভৰনং মম’’.
‘‘তং ব্রাহ্মণা অন্ৰগমুং, তে নং অস্সে অযাচিসুং;
যাচিতো পটিপাদেসি, চতুন্নং চতুরো হযে’’’.
‘‘ইঙ্ঘ মদ্দি নিসামেহি, চিত্তরূপংৰ দিস্সতি;
মিগরোহিচ্চৰণ্ণেন, দক্খিণস্সা ৰহন্তি মং’’.
‘‘অথেত্থ পঞ্চমো আগা, সো তং রথমযাচথ;
তস্স তং যাচিতোদাসি, ন চস্সুপহতো মনো.
‘‘ততো ¶ ৰেস্সন্তরো রাজা, ওরোপেত্ৰা [ওতারেত্ৰা (ক.)] সকং জনং;
অস্সাসযি অস্সরথং, ব্রাহ্মণস্স ধনেসিনো’’.
‘‘ত্ৰং মদ্দি কণ্হং গণ্হাহি, লহু এসা কনিট্ঠিকা;
অহং জালিং গহেস্সামি, গরুকো ভাতিকো হি সো’’.
‘‘রাজা কুমারমাদায, রাজপুত্তী চ দারিকং;
সম্মোদমানা পক্কামুং, অঞ্ঞমঞ্ঞং পিযংৰদা’’.
দানকণ্ডং নাম.
ৰনপৰেসনং
‘‘যদি ¶ কেচি মনুজা এন্তি, অনুমগ্গে পটিপথে;
মগ্গং তে পটিপুচ্ছাম, কুহিং ৰঙ্কতপব্বতো.
‘‘তে তত্থ অম্হে পস্সিত্ৰা, কলুনং পরিদেৰযুং;
দুক্খং ¶ তে পটিৰেদেন্তি, দূরে ৰঙ্কতপব্বতো’’.
‘‘যদি পস্সন্তি পৰনে, দারকা ফলিনে [ফলিতে (সী. স্যা. পী.)] দুমে;
তেসং ফলানং হেতুম্হি, উপরোদন্তি দারকা.
‘‘রোদন্তে দারকে দিস্ৰা, উব্বিদ্ধা [উব্বিগ্গা (সী. স্যা. পী.)] ৰিপুলা দুমা;
সযমেৰোনমিত্ৰান, উপগচ্ছন্তি দারকে.
‘‘ইদং অচ্ছেরকং দিস্ৰা, অব্ভুতং লোমহংসনং;
সাধুকারং পৰত্তেসি, মদ্দী সব্বঙ্গসোভনা.
‘‘অচ্ছেরং ৰত লোকস্মিং, অব্ভুতং লোমহংসনং;
ৰেস্সন্তরস্স তেজেন, সযমেৰোনতা দুমা’’.
‘‘সঙ্খিপিংসু পথং যক্খা, অনুকম্পায দারকে;
নিক্খন্তদিৰসেনেৰ, চেতরট্ঠং উপাগমুং’’.
‘‘তে গন্ত্ৰা দীঘমদ্ধানং, চেতরট্ঠং উপাগমুং;
ইদ্ধং ফীতং জনপদং, বহুমংসসুরোদনং’’.
‘‘চেতিযো পরিৰারিংসু, দিস্ৰা লক্খণমাগতং;
সুখুমালী ৰত অয্যা, পত্তিকা পরিধাৰতি.
‘‘ৰয্হাহি ¶ পরিযাযিত্ৰা, সিৰিকায রথেন চ;
সাজ্জ মদ্দী অরঞ্ঞস্মিং, পত্তিকা পরিধাৰতি’’.
‘‘তং দিস্ৰা চেতপামোক্খা, রোদমানা উপাগমুং;
কচ্চি নু দেৰ কুসলং, কচ্চি দেৰ অনামযং;
কচ্চি ¶ পিতা অরোগো তে, সিৰীনঞ্চ অনামযং.
‘‘কো তে বলং মহারাজ, কো নু তে রথমণ্ডলং;
অনস্সকো অরথকো, দীঘমদ্ধানমাগতো;
কচ্চামিত্তেহি পকতো, অনুপ্পত্তোসিমং দিসং’’.
‘‘কুসলঞ্চেৰ ¶ মে সম্ম, অথো সম্ম অনামযং;
অথো পিতা অরোগো মে, সিৰীনঞ্চ অনামযং.
‘‘অহঞ্হি কুঞ্জরং দজ্জং, ঈসাদন্তং উরূল়্হৰং;
খেত্তঞ্ঞুং সব্বযুদ্ধানং, সব্বসেতং গজুত্তমং.
‘‘পণ্ডুকম্বলসঞ্ছন্নং, পভিন্নং সত্তুমদ্দনং;
দন্তিং সৰাল়বীজনিং, সেতং কেলাসসাদিসং.
‘‘সসেতচ্ছত্তং সউপাধেয্যং, সাথপ্পনং সহত্থিপং;
অগ্গযানং রাজৰাহিং, ব্রাহ্মণানং অদাসহং.
‘‘তস্মিং মে সিৰযো কুদ্ধা, পিতা চুপহতোমনো;
অৰরুদ্ধসি মং রাজা, ৰঙ্কং গচ্ছামি পব্বতং;
ওকাসং সম্মা জানাথ, ৰনে যত্থ ৰসামসে’’.
‘‘স্ৰাগতং তে মহারাজ, অথো তে অদুরাগতং;
ইস্সরোসি অনুপ্পত্তো, যং ইধত্থি পৰেদয.
‘‘সাকং ভিসং মধুং মংসং, সুদ্ধং সালিনমোদনং;
পরিভুঞ্জ মহারাজ, পাহুনো নোসি আগতো’’.
‘‘পটিগ্গহিতং ¶ যং দিন্নং, সব্বস্স অগ্ঘিযং কতং;
অৰরুদ্ধসি মং রাজা, ৰঙ্কং গচ্ছামি পব্বতং;
ওকাসং সম্মা জানাথ, ৰনে যত্থ ৰসামসে’’.
‘‘ইধেৰ তাৰ অচ্ছস্সু, চেতরট্ঠে রথেসভ;
যাৰ চেতা গমিস্সন্তি, রঞ্ঞো সন্তিক যাচিতুং.
‘‘নিজ্ঝাপেতুং ¶ মহারাজং, সিৰীনং রট্ঠৰড্ঢনং;
তং তং চেতা পুরক্খত্ৰা, পতীতা লদ্ধপচ্চযা;
পরিৰারেত্ৰান গচ্ছন্তি, এৰং জানাহি খত্তিয’’.
‘‘মা ৰো রুচ্চিত্থ গমনং, রঞ্ঞো সন্তিক যাচিতুং;
নিজ্ঝাপেতুং মহারাজং, রাজাপি তত্থ নিস্সরো.
‘‘অচ্চুগ্গতা হি সিৰযো, বলগ্গা নেগমা চ যে;
তে ৰিধংসেতুমিচ্ছন্তি, রাজানং মম কারণা’’.
‘‘সচে ¶ এসা পৰত্তেত্থ, রট্ঠস্মিং রট্ঠৰড্ঢন;
ইধেৰ রজ্জং কারেহি, চেতেহি পরিৰারিতো.
‘‘ইদ্ধং ফীতঞ্চিদং রট্ঠং, ইদ্ধো জনপদো মহা;
মতিং করোহি ত্ৰং দেৰ, রজ্জস্স মনুসাসিতুং’’.
‘‘ন মে ছন্দো মতি অত্থি, রজ্জস্স অনুসাসিতুং;
পব্বাজিতস্স রট্ঠস্মা, চেতপুত্তা সুণাথ মে.
‘‘অতুট্ঠা সিৰযো আসুং, বলগ্গা নেগমা চ যে;
পব্বাজিতস্স রট্ঠস্মা, চেতা রজ্জেভিসেচযুং.
‘‘অসম্মোদিযম্পি ¶ ৰো অস্স, অচ্চন্তং মম কারণা;
সিৰীহি ভণ্ডনঞ্চাপি, ৰিগ্গহো মে ন রুচ্চতি.
‘‘অথস্স ভণ্ডনং ঘোরং, সম্পহারো অনপ্পকো;
একস্স কারণা ময্হং, হিংসেয্য বহুকো জনো.
‘‘পটিগ্গহিতং যং দিন্নং, সব্বস্স অগ্ঘিযং কতং;
অৰরুদ্ধসি মং রাজা, ৰঙ্কং গচ্ছামি পব্বতং;
ওকাসং সম্মা জানাথ, ৰনে যত্থ ৰসামসে’’.
‘‘তগ্ঘ তে মযমক্খাম, যথাপি কুসলা তথা;
রাজিসী যত্থ সম্মন্তি, আহুতগ্গী সমাহিতা.
‘‘এস সেলো মহারাজ, পব্বতো গন্ধমাদনো;
যত্থ ত্ৰং সহ পুত্তেহি, সহ ভরিযায চচ্ছসি.
‘‘তং চেতা অনুসাসিংসু, অস্সুনেত্তা রুদংমুখা;
ইতো গচ্ছ মহারাজ, উজুং যেনুত্তরা মুখো.
‘‘অথ দক্খিসি ভদ্দন্তে, ৰেপুল্লং নাম পব্বতং;
নানাদুমগণাকিণ্ণং, সীতচ্ছাযং মনোরমং.
‘‘তমতিক্কম্ম ¶ ভদ্দন্তে, অথ দক্খিসি আপগং;
নদিং কেতুমতিং নাম, গম্ভীরং গিরিগব্ভরং.
‘‘পুথুলোমমচ্ছাকিণ্ণং, সুপতিত্থং মহোদকং;
তত্থ ন্হত্ৰা পিৰিত্ৰা চ, অস্সাসেত্ৰা সপুত্তকে.
‘‘অথ ¶ দক্খিসি ভদ্দন্তে, নিগ্রোধং মধুপিপ্ফলং;
রম্মকে ¶ সিখরে জাতং, সীতচ্ছাযং মনোরমং.
‘‘অথ দক্খিসি ভদ্দন্তে, নাল়িকং নাম পব্বতং;
নানাদিজগণাকিণ্ণং, সেলং কিম্পুরিসাযুতং.
‘‘তস্স উত্তরপুব্বেন, মুচলিন্দো নাম সো সরো;
পুণ্ডরীকেহি সঞ্ছন্নো, সেতসোগন্ধিকেহি চ.
‘‘সো ৰনং মেঘসঙ্কাসং, ধুৰং হরিতসদ্দলং;
সীহোৰামিসপেক্খীৰ ৰনসণ্ডং ৰিগাহয;
পুপ্ফরুক্খেহি সঞ্ছন্নং, ফলরুক্খেহি চূভযং.
‘‘তত্থ বিন্দুস্সরা ৰগ্গূ, নানাৰণ্ণা বহূ দিজা;
কূজন্তমুপকূজন্তি, উতুসংপুপ্ফিতে দুমে.
‘‘গন্ত্ৰা গিরিৰিদুগ্গানং, নদীনং পভৰানি চ;
সো অদ্দস [দক্খসি (সী. পী.)] পোক্খরণিং, করঞ্জককুধাযুতং.
‘‘পুথুলোমমচ্ছাকিণ্ণং, সুপতিত্থং মহোদকং;
সমঞ্চ চতুরংসঞ্চ, সাদুং অপ্পটিগন্ধিযং.
‘‘তস্সা উত্তরপুব্বেন, পণ্ণসালং অমাপয;
পণ্ণসালং অমাপেত্ৰা, উঞ্ছাচরিযায ঈহথ’’.
ৰনপৰেসনং নাম.
জূজকপব্বং
‘‘অহু ৰাসী কলিঙ্গেসু, জূজকো নাম ব্রাহ্মণো;
তস্সাসি দহরা ভরিযা, নামেনামিত্ততাপনা.
‘‘তা নং তত্থ গতাৰোচুং, নদিং উদকহারিযা;
থিযো ¶ নং পরিভাসিংসু, সমাগন্ত্ৰা কুতূহলা.
‘‘অমিত্তা ¶ নূন তে মাতা, অমিত্তো নূন তে পিতা;
যে তং জিণ্ণস্স পাদংসু, এৰং দহরিযং সতিং.
‘‘অহিতং ¶ ৰত তে ঞাতী, মন্তযিংসু রহোগতা;
যে তং জিণ্ণস্স পাদংসু, এৰং দহরিযং সতিং.
‘‘অমিত্তা ৰত তে ঞাতী, মন্তযিংসু রহোগতা;
যে তং জিণ্ণস্স পাদংসু, এৰং দহরিযং সতিং.
‘‘দুক্কটং ৰত তে ঞাতী, মন্তযিংসু রহোগতা;
যে তং জিণ্ণস্স পাদংসু, এৰং দহরিযং সতিং.
‘‘পাপকং ৰত তে ঞাতী, মন্তযিংসু রহোগতা;
যে তং জিণ্ণস্স পাদংসু, এৰং দহরিযং সতিং.
‘‘অমনাপং ৰত তে ঞাতী, মন্তযিংসু রহোগতা;
যে তং জিণ্ণস্স পাদংসু, এৰং দহরিযং সতিং.
‘‘অমনাপৰাসং ৰসি, জিণ্ণেন পতিনা সহ [এৰং দহরিযা সতী (সী. পী.)];
যা ত্ৰং ৰসসি জিণ্ণস্স, মতং তে জীৰিতা ৰরং.
‘‘ন হি নূন তুয্হং কল্যাণি, পিতা মাতা চ সোভনে;
অঞ্ঞং ভত্তারং ৰিন্দিংসু, যে তং জিণ্ণস্স পাদংসু;
এৰং দহরিযং সতিং.
‘‘দুযিট্ঠং তে নৰমিযং, অকতং অগ্গিহুত্তকং;
যে তং জিণ্ণস্স পাদংসু, এৰং দহরিযং সতিং.
‘‘সমণে ব্রাহ্মণে নূন, ব্রাহ্মণচরিযপরাযণে;
সা ¶ ত্ৰং লোকে অভিসপি, সীলৰন্তে বহুস্সুতে;
যা ত্ৰং ৰসসি জিণ্ণস্স, এৰং দহরিযা সতী.
‘‘ন দুক্খং অহিনা দট্ঠং, ন দুক্খং সত্তিযা হতং;
তঞ্চ দুক্খঞ্চ তিব্বঞ্চ, যং পস্সে জিণ্ণকং পতিং.
‘‘নত্থি খিড্ডা নত্থি রতি, জিণ্ণেন পতিনা সহ;
নত্থি অল্লাপসল্লাপো, জগ্ঘিতুম্পি [জগ্ঘিতম্পি (সী. পী.)] ন সোভতি.
‘‘যদা চ দহরো দহরা, মন্তযন্তি [মন্তযিংসু (স্যা. ক.)] রহোগতা;
সব্বেসং সোকা নস্সন্তি, যে কেচি হদযস্সিতা.
‘‘দহরা ¶ ত্ৰং রূপৰতী, পুরিসানংভিপত্থিতা;
গচ্ছ ঞাতিকুলে অচ্ছ, কিং জিণ্ণো রমযিস্সতি’’.
‘‘ন ¶ তে ব্রাহ্মণ গচ্ছামি, নদিং উদকহারিযা;
থিযো মং পরিভাসন্তি, তযা জিণ্ণেন ব্রাহ্মণ’’.
‘‘মা মে ত্ৰং অকরা কম্মং, মা মে উদকমাহরি;
অহং উদকমাহিস্সং, মা ভোতি কুপিতা অহু’’.
‘‘নাহং তম্হি কুলে জাতা, যং ত্ৰং উদকমাহরে;
এৰং ব্রাহ্মণ জানাহি, ন তে ৰচ্ছামহং ঘরে.
‘‘সচে মে দাসং দাসিং ৰা, নানযিস্সসি ব্রাহ্মণ;
এৰং ব্রাহ্মণ জানাহি, ন তে ৰচ্ছামি সন্তিকে’’.
‘‘নত্থি মে সিপ্পঠানং ৰা, ধনং ধঞ্ঞঞ্চ ব্রাহ্মণি;
কুতোহং ¶ দাসং দাসিং ৰা, আনযিস্সামি ভোতিযা;
অহং ভোতিং উপট্ঠিস্সং, মা ভোতি কুপিতা অহু’’.
‘‘এহি তে অহমক্খিস্সং, যথা মে ৰচনং সুতং;
এস ৰেস্সন্তরো রাজা, ৰঙ্কে ৰসতি পব্বতে.
‘‘তং ত্ৰং গন্ত্ৰান যাচস্সু, দাসং দাসিঞ্চ ব্রাহ্মণ;
সো তে দস্সতি যাচিতো, দাসং দাসিঞ্চ খত্তিযো’’.
‘‘জিণ্ণোহমস্মি দুব্বলো [অবলো (সী. পী. ক.)], দীঘো চদ্ধা সুদুগ্গমো;
মা ভোতি পটিদেৰেসি, মা চ ত্ৰং [মা ভোতি (স্যা. ক.)] ৰিমনা অহু;
অহং ভোতিং উপট্ঠিস্সং, মা ভোতি কুপিতা অহু’’.
‘‘যথা অগন্ত্ৰা সঙ্গামং, অযুদ্ধোৰ পরাজিতো;
এৰমেৰ তুৰং ব্রহ্মে, অগন্ত্ৰাৰ পরাজিতো.
‘‘সচে মে দাসং দাসিং ৰা, নানযিস্সসি ব্রাহ্মণ;
এৰং ব্রাহ্মণ জানাহি, ন তে ৰচ্ছামহং ঘরে;
অমনাপং তে করিস্সামি, তং তে দুক্খং ভৰিস্সতি.
‘‘নক্খত্তে উতুপুব্বেসু, যদা মং দক্খিসিলঙ্কতং;
অঞ্ঞেহি সদ্ধিং রমমানং, তং তে দুক্খং ভৰিস্সতি.
‘‘অদস্সনেন ¶ ময্হং তে, জিণ্ণস্স পরিদেৰতো;
ভিয্যো ৰঙ্কা চ পলিতা, বহূ হেস্সন্তি ব্রাহ্মণ’’.
‘‘ততো সো ব্রাহ্মণো ভীতো, ব্রাহ্মণিযা ৰসানুগো;
অট্টিতো কামরাগেন, ব্রাহ্মণিং এতদব্রৰি’’.
‘‘পাথেয্যং ¶ ¶ মে করোহি ত্ৰং, সংকুল্যা সগুল়ানি চ [সঙ্কুলা সঙ্গুল়ানি চ (স্যা.), অঙ্গুল়া সকলানি চ (ক.)];
মধুপিণ্ডিকা চ সুকতাযো, সত্তুভত্তঞ্চ ব্রাহ্মণি.
‘‘আনযিস্সং মেথুনকে, উভো দাসকুমারকে;
তে তং পরিচরিস্সন্তি, রত্তিন্দিৰমতন্দিতা’’.
‘‘ইদং ৰত্ৰা ব্রহ্মবন্ধু, পটিমুঞ্চি উপাহনা;
ততো সো মন্তযিত্ৰান, ভরিযং কত্ৰা পদক্খিণং.
‘‘পক্কামি সো রুণ্ণমুখো, ব্রাহ্মণো সহিতব্বতো;
সিৰীনং নগরং ফীতং, দাসপরিযেসনং চরং’’.
‘‘সো তত্থ গন্ত্ৰা অৰচ [অৰচাসি (স্যা. ক.)], যে তত্থাসুং সমাগতা;
কুহিং ৰেস্সন্তরো রাজা, কত্থ পস্সেমু খত্তিযং’’.
‘‘তে জনা তং অৰচিংসু, যে তত্থাসুং সমাগতা;
তুম্হেহি ব্রহ্মে পকতো, অতিদানেন খত্তিযো;
পব্বাজিতো সকা রট্ঠা, ৰঙ্কে ৰসতি পব্বতে.
‘‘তুম্হেহি ব্রহ্মে পকতো, অতিদানেন খত্তিযো;
আদায পুত্তদারঞ্চ, ৰঙ্কে ৰসতি পব্বতে’’.
‘‘সো চোদিতো ব্রাহ্মণিযা, ব্রাহ্মণো কামগিদ্ধিমা;
অঘং তং পটিসেৰিত্থ, ৰনে ৰাল়মিগাকিণ্ণে;
খগ্গদীপিনিসেৰিতে.
‘‘আদায বেল়ুৰং দণ্ডং, অগ্গিহুত্তং কমণ্ডলুং;
সো পাৰিসি ব্রহারঞ্ঞং, যত্থ অস্সোসি কামদং.
‘‘তং ¶ পৰিট্ঠং ব্রহারঞ্ঞং, কোকা নং পরিৰারযুং;
ৰিক্কন্দি সো ৰিপ্পনট্ঠো, দূরে পন্থা অপক্কমি.
‘‘ততো ¶ সো ব্রাহ্মণো গন্ত্ৰা, ভোগলুদ্ধো অসঞ্ঞতো;
ৰঙ্কস্সোরোহণে নট্ঠে, ইমা গাথা অভাসথ’’.
‘‘কো রাজপুত্তং নিসভং, জযন্তমপরাজিতং;
ভযে খেমস্স দাতারং, কো মে ৰেস্সন্তরং ৰিদূ.
‘‘যো যাচতং পতিট্ঠাসি, ভূতানং ধরণীরিৰ;
ধরণূপমং মহারাজং, কো মে ৰেস্সন্তরং ৰিদূ.
‘‘যো যাচতং গতী আসি, সৰন্তীনংৰ সাগরো;
সাগরূপমং [উদধূপমং (সী. স্যা. পী.), তথূপমং (ক.)] মহারাজং, কো মে ৰেস্সন্তরং ৰিদূ.
‘‘কল্যাণতিত্থং ¶ সুচিমং, সীতূদকং মনোরমং;
পুণ্ডরীকেহি সঞ্ছন্নং, যুত্তং কিঞ্জক্খরেণুনা;
রহদূপমং [সরূপমং (ক.)] মহারাজং, কো মে ৰেস্সন্তরং ৰিদূ.
‘‘অস্সত্থংৰ পথে জাতং, সীতচ্ছাযং মনোরমং;
সন্তানং ৰিসমেতারং, কিলন্তানং পটিগ্গহং;
তথূপমং মহারাজং, কো মে ৰেস্সন্তরং ৰিদূ.
‘‘নিগ্রোধংৰ পথে জাতং, সীতচ্ছাযং মনোরমং;
সন্তানং ৰিসমেতারং, কিলন্তানং পটিগ্গহং;
তথূপমং মহারাজং, কো মে ৰেস্সন্তরং ৰিদূ.
‘‘অম্বং ইৰ পথে জাতং, সীতচ্ছাযং মনোরমং;
সন্তানং ¶ ৰিসমেতারং, কিলন্তানং পটিগ্গহং;
তথূপমং মহারাজং, কো মে ৰেস্সন্তরং ৰিদূ.
‘‘সালং ইৰ পথে জাতং, সীতচ্ছাযং মনোরমং;
সন্তানং ৰিসমেতারং, কিলন্তানং পটিগ্গহং;
তথূপমং মহারাজং, কো মে ৰেস্সন্তরং ৰিদূ.
‘‘দুমং ইৰ পথে জাতং, সীতচ্ছাযং মনোরমং;
সন্তানং ৰিসমেতারং, কিলন্তানং পটিগ্গহং;
তথূপমং মহারাজং, কো মে ৰেস্সন্তরং ৰিদূ.
‘‘এৰঞ্চ ¶ মে ৰিলপতো, পৰিট্ঠস্স ব্রহাৰনে;
অহং জানন্তি যো ৰজ্জা, নন্দিং সো জনযে মম.
‘‘এৰঞ্চ মে ৰিলপতো, পৰিট্ঠস্স ব্রহাৰনে;
অহং জানন্তি যো ৰজ্জা, তায সো একৰাচায;
পসৰে পুঞ্ঞং অনপ্পকং’’.
‘‘তস্স চেতো পটিস্সোসি, অরঞ্ঞে লুদ্দকো চরং;
তুম্হেহি ব্রহ্মে পকতো, অতিদানেন খত্তিযো;
পব্বাজিতো সকা রট্ঠা, ৰঙ্কে ৰসতি পব্বতে.
‘‘তুম্হেহি ব্রহ্মে পকতো, অতিদানেন খত্তিযো;
আদায ¶ পুত্তদারঞ্চ, ৰঙ্কে ৰসতি পব্বতে.
‘‘অকিচ্চকারী দুম্মেধো, রট্ঠা পৰনমাগতো;
রাজপুত্তং গৰেসন্তো, বকো মচ্ছমিৰোদকে.
‘‘তস্স ¶ ত্যাহং ন দস্সামি, জীৰিতং ইধ ব্রাহ্মণ;
অযঞ্হি তে মযা নুন্নো [মযা’রুল়্হো (ক.)], সরো পিস্সতি লোহিতং.
‘‘সিরো তে ৰজ্ঝযিত্ৰান, হদযং ছেত্ৰা সবন্ধনং;
পন্থসকুণং [বন্ধসকুণং (ক.)] যজিস্সামি, তুয্হং মংসেন ব্রাহ্মণ.
‘‘তুয্হং মংসেন মেদেন, মত্থকেন চ ব্রাহ্মণ;
আহুতিং পগ্গহেস্সামি, ছেত্ৰান হদযং তৰ.
‘‘তং মে সুযিট্ঠং সুহুতং, তুয্হং মংসেন ব্রাহ্মণ;
ন চ ত্ৰং রাজপুত্তস্স, ভরিযং পুত্তে চ নেস্সসি’’.
‘‘অৰজ্ঝো ব্রাহ্মণো দূতো, চেতপুত্ত সুণোহি মে;
তস্মা হি দূতং ন হন্তি, এস ধম্মো সনন্তনো.
‘‘নিজ্ঝত্তা সিৰযো সব্বে, পিতা নং দট্ঠুমিচ্ছতি;
মাতা চ দুব্বলা তস্স, অচিরা চক্খূনি জীযরে.
‘‘তেসাহং পহিতো দূতো, চেতপুত্ত সুণোহি মে;
রাজপুত্তং নযিস্সামি, যদি জানাসি সংস মে.
‘‘পিযস্স মে পিযো দূতো, পুণ্ণপত্তং দদামি তে’’;
‘‘ইমঞ্চ ¶ মধুনো তুম্বং, মিগসত্থিঞ্চ ব্রাহ্মণ;
তঞ্চ ¶ তে দেসমক্খিস্সং, যত্থ সম্মতি কামদো’’.
জূজকপব্বং নাম.
চূল়ৰনৰণ্ণনা
‘‘এস সেলো মহাব্রহ্মে, পব্বতো গন্ধমাদনো;
যত্থ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ [আসটঞ্চ (ক.)] মসং জটং;
চম্মৰাসী ছমা সেতি, জাতৰেদং নমস্সতি.
‘‘এতে নীলা পদিস্সন্তি, নানাফলধরা দুমা;
উগ্গতা অব্ভকূটাৰ, নীলা অঞ্জনপব্বতা.
‘‘ধৰস্সকণ্ণা খদিরা, সালা ফন্দনমালুৰা;
সম্পৰেধন্তি ৰাতেন, সকিং পীতাৰ মাণৰা.
‘‘উপরি ¶ দুমপরিযাযেসু, সঙ্গীতিযোৰ সুয্যরে;
নজ্জুহা কোকিলসঙ্ঘা [কোকিলা সিঙ্ঘা (ক.)], সম্পতন্তি দুমা দুমং.
‘‘অৰ্হযন্তেৰ গচ্ছন্তং, সাখাপত্তসমীরিতা;
রমযন্তেৰ আগন্তং, মোদযন্তি নিৰাসিনং;
যত্থ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ মসং জটং;
চম্মৰাসী ছমা সেতি, জাতৰেদং নমস্সতি.
‘‘অম্বা কপিত্থা পনসা, সালা জম্বূ ৰিভীতকা;
হরীতকী আমলকা, অস্সত্থা বদরানি চ.
‘‘চারুতিম্বরুক্খা ¶ চেত্থ, নিগ্রোধা চ কপিত্থনা;
মধুমধুকা থেৰন্তি, নীচে পক্কা চুদুম্বরা.
‘‘পারেৰতা ভৰেয্যা চ, মুদ্দিকা চ মধুত্থিকা;
মধুং অনেলকং তত্থ, সকমাদায ভুঞ্জরে.
‘‘অঞ্ঞেত্থ ¶ পুপ্ফিতা অম্বা, অঞ্ঞে তিট্ঠন্তি দোৰিলা;
অঞ্ঞে আমা চ পক্কা চ, ভেকৰণ্ণা তদূভযং.
‘‘অথেত্থ হেট্ঠা পুরিসো, অম্বপক্কানি গণ্হতি;
আমানি চেৰ পক্কানি, ৰণ্ণগন্ধরসুত্তমে.
‘‘অতেৰ মে অচ্ছরিযং, হিঙ্কারো পটিভাতি মং;
দেৰানমিৰ আৰাসো, সোভতি নন্দনূপমো.
‘‘ৰিভেদিকা নাল়িকেরা, খজ্জুরীনং ব্রহাৰনে;
মালাৰ গন্থিতা ঠন্তি, ধজগ্গানেৰ দিস্সরে;
নানাৰণ্ণেহি পুপ্ফেতি, নভং তারাচিতামিৰ.
‘‘কুটজী কুট্ঠতগরা, পাটলিযো চ পুপ্ফিতা;
পুন্নাগা গিরিপুন্নাগা, কোৰিল়ারা চ পুপ্ফিতা.
‘‘উদ্দালকা সোমরুক্খা, অগরুফল্লিযা [অগরুভল্লিযা (সী. স্যা. পী.)] বহূ;
পুত্তজীৰা [পুটজীৰা (ক.)] চ ককুধা, অসনা চেত্থ পুপ্ফিতা.
‘‘কুটজা সলল়া নীপা [নিম্বা (ক.)], কোসম্বা লবুজা ধৰা;
সালা চ পুপ্ফিতা তত্থ, পলালখলসন্নিভা.
‘‘তস্সাৰিদূরে ¶ পোক্খরণী, ভূমিভাগে মনোরমে;
পদুমুপ্পলসঞ্ছন্না, দেৰানমিৰ নন্দনে.
‘‘অথেত্থ ¶ পুপ্ফরসমত্তা, কোকিলা মঞ্জুভাণিকা;
অভিনাদেন্তি পৰনং, উতুসম্পুপ্ফিতে দুমে.
‘‘ভস্সন্তি মকরন্দেহি, পোক্খরে পোক্খরে মধূ;
অথেত্থ ৰাতা ৰাযন্তি, দক্খিণা অথ পচ্ছিমা;
পদুমকিঞ্জক্খরেণূহি, ওকিণ্ণো হোতি অস্সমো.
‘‘থূলা সিঙ্ঘাটকা চেত্থ, সংসাদিযা পসাদিযা [সংসারিযা পসারিযা (ক.)];
মচ্ছকচ্ছপব্যাৰিদ্ধা, বহূ চেত্থ মুপযানকা;
মধুং ভিসেহি সৰতি, খিরসপ্পিমুল়ালিভি.
‘‘সুরভী ¶ তং ৰনং ৰাতি, নানাগন্ধসমোদিতং [নানাগন্ধসমেরিতং (সী. স্যা. পী.)];
সম্মদ্দতেৰ [সমোদতেৰ (ক.)] গন্ধেন, পুপ্ফসাখাহি তং ৰনং;
ভমরা পুপ্ফগন্ধেন, সমন্তা মভিনাদিতা.
‘‘অথেত্থ সকুণা সন্তি, নানাৰণ্ণা বহূ দিজা;
মোদন্তি সহ ভরিযাহি, অঞ্ঞমঞ্ঞং পকূজিনো.
‘‘নন্দিকা জীৰপুত্তা চ, জীৰপুত্তা পিযা চ নো;
পিযা পুত্তা পিযা নন্দা, দিজা পোক্খরণীঘরা.
‘‘মালাৰ গন্থিতা ঠন্তি, ধজগ্গানেৰ দিস্সরে;
নানাৰণ্ণেহি পুপ্ফেহি, কুসলেহেৰ সুগন্থিতা [সুগন্থিকা (সী. পী.)];
যত্থ ¶ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ মসং জটং;
চম্মৰাসী ছমা সেতি, জাতৰেদং নমস্সতি’’.
‘‘ইদঞ্চ মে সত্তুভত্তং, মধুনা পটিসংযুতং;
মধুপিণ্ডিকা চ সুকতাযো, সত্তুভত্তং দদামি তে’’.
‘‘তুয্হেৰ সম্বলং হোতু, নাহং ইচ্ছামি সম্বলং;
ইতোপি ব্রহ্মে গণ্হাহি, গচ্ছ ব্রহ্মে যথাসুখং.
‘‘অযং একপদী এতি, উজুং গচ্ছতি অস্সমং;
ইসীপি অচ্চুতো তত্থ, পঙ্কদন্তো রজস্সিরো;
ধারেন্তো ব্রাহ্মণৰণ্ণং, আসদঞ্চ মসং জটং.
‘‘চম্মৰাসী ছমা সেতি, জাতৰেদং নমস্সতি;
তং ত্ৰং গন্ত্ৰান পুচ্ছস্সু, সো তে মগ্গং পৰক্খতি’’.
ইদং ¶ সুত্ৰা ব্রহ্মবন্ধু, চেতং কত্ৰা পদক্খিণং;
উদগ্গচিত্তো পক্কামি, যেনাসি অচ্চুতো ইসি.
চূল়ৰনৰণ্ণনা.
মহাৰনৰণ্ণনা
গচ্ছন্তো ¶ সো ভারদ্ৰাজো, অদ্দস্স অচ্চুতং ইসিং;
দিস্ৰান তং ভারদ্ৰাজো, সম্মোদি ইসিনা সহ.
‘‘কচ্চি নু ভোতো কুসলং, কচ্চি ভোতো অনামযং;
কচ্চি উঞ্ছেন যাপেসি, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা;
ৰনে ¶ ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘কুসলঞ্চেৰ মে ব্রহ্মে, অথো ব্রহ্মে অনামযং;
অথো উঞ্ছেন যাপেমি, অথো মূলফলা বহূ.
‘‘অথো ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, হিংসা ময্হং ন ৰিজ্জতি.
‘‘বহূনি ৰস্সপূগানি, অস্সমে ৰসতো মম;
নাভিজানামি উপ্পন্নং, আবাধং অমনোরমং.
‘‘স্ৰাগতং তে মহাব্রহ্মে, অথো তে অদুরাগতং;
অন্তো পৰিস ভদ্দন্তে, পাদে পক্খালযস্সু তে.
‘‘তিন্দুকানি পিযালানি, মধুকে কাসুমারিযো;
ফলানি খুদ্দকপ্পানি, ভুঞ্জ ব্রহ্মে ৰরং ৰরং.
‘‘ইদম্পি পানীযং সীতং, আভতং গিরিগব্ভরা;
ততো পিৰ মহাব্রহ্মে, সচে ত্ৰং অভিকঙ্খসি’’.
‘‘পটিগ্গহিতং যং দিন্নং, সব্বস্স অগ্ঘিযং কতং;
সঞ্জযস্স সকং পুত্তং, সিৰীহি ৰিপ্পৰাসিতং;
তমহং দস্সনমাগতো, যদি জানাসি সংস মে’’.
‘‘ন ¶ ভৰং এতি পুঞ্ঞত্থং, সিৰিরাজস্স দস্সনং;
মঞ্ঞে ভৰং পত্থযতি, রঞ্ঞো ভরিযং পতিব্বতং;
মঞ্ঞে কণ্হাজিনং দাসিং, জালিং দাসঞ্চ ইচ্ছসি.
‘‘অথ ৰা তযো মাতাপুত্তে, অরঞ্ঞা নেতুমাগতো;
ন ¶ তস্স ভোগা ৰিজ্জন্তি, ধনং ধঞ্ঞঞ্চ ব্রাহ্মণ’’.
‘‘অকুদ্ধরূপোহং ¶ ভোতো [ভোতো (সী. পী.)], নাহং যাচিতুমাগতো;
সাধু দস্সনমরিযানং, সন্নিৰাসো সদা সুখো.
‘‘অদিট্ঠপুব্বো সিৰিরাজা, সিৰীহি ৰিপ্পৰাসিতো;
তমহং দস্সনমাগতো, যদি জানাসি সংস মে’’.
‘‘এস সেলো মহাব্রহ্মে, পব্বতো গন্ধমাদনো;
যত্থ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ মসং জটং;
চম্মৰাসী ছমা সেতি, জাতৰেদং নমস্সতি.
‘‘এতে নীলা পদিস্সন্তি, নানাফলধরা দুমা;
উগ্গতা অব্ভকূটাৰ নীলা অঞ্জনপব্বতা.
‘‘ধৰস্সকণ্ণা খদিরা, সালা ফন্দনমালুৰা;
সম্পৰেধন্তি ৰাতেন, সকিং পীতাৰ মাণৰা.
‘‘উপরি দুমপরিযাযেসু, সঙ্গীতিযোৰ সুয্যরে;
নজ্জুহা কোকিলসঙ্ঘা, সম্পতন্তি দুমা দুমং.
‘‘অৰ্হযন্তেৰ গচ্ছন্তং, সাখাপত্তসমীরিতা;
রমযন্তেৰ আগন্তং, মোদযন্তি নিৰাসিনং;
যত্থ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ মসং জটং;
চম্মৰাসী ছমা সেতি, জাতৰেদং নমস্সতি.
‘‘করেরিমালা ¶ ৰিততা, ভূমিভাগে মনোরমে;
সদ্দলাহরিতা ভূমি, ন তত্থুদ্ধংসতে রজো.
‘‘মযূরগীৰসঙ্কাসা, তূলফস্সসমূপমা;
তিণানি নাতিৰত্তন্তি, সমন্তা চতুরঙ্গুলা.
‘‘অম্বা জম্বূ কপিত্থা চ, নীচে পক্কা চুদুম্বরা;
পরিভোগেহি রুক্খেহি, ৰনং তং রতিৰড্ঢনং.
‘‘ৰেল়ুরিযৰণ্ণসন্নিভং ¶ ¶ , মচ্ছগুম্বনিসেৰিতং;
সুচিং সুগন্ধং সলিলং, আপো তত্থপি সন্দতি.
‘‘তস্সাৰিদূরে পোক্খরণী, ভূমিভাগে মনোরমে;
পদুমুপ্পলসঞ্ছন্না, দেৰানমিৰ নন্দনে.
‘‘তীণি উপ্পলজাতানি, তস্মিং সরসি ব্রাহ্মণ;
ৰিচিত্তং নীলানেকানি, সেতা লোহিতকানি চ.
‘‘খোমাৰ তত্থ পদুমা, সেতসোগন্ধিকেহি চ;
কলম্বকেহি সঞ্ছন্নো, মুচলিন্দো নাম সো সরো.
‘‘অথেত্থ পদুমা ফুল্লা, অপরিযন্তাৰ দিস্সরে;
গিম্হা হেমন্তিকা ফুল্লা, জণ্ণুতগ্ঘা উপত্থরা.
‘‘সুরভী সম্পৰাযন্তি, ৰিচিত্তপুপ্ফসন্থতা;
ভমরা পুপ্ফগন্ধেন, সমন্তা মভিনাদিতা.
‘‘অথেত্থ উদকন্তস্মিং, রুক্খা তিট্ঠন্তি ব্রাহ্মণ;
কদম্বা পাটলী ফুল্লা, কোৰিল়ারা চ পুপ্ফিতা.
‘‘অঙ্কোলা কচ্ছিকারা চ, পারিজঞ্ঞা চ পুপ্ফিতা;
ৰারণা ¶ ৰযনা [সাযনা (সী. পী.), ৰুয্হনা (স্যা.)] রুক্খা, মুচলিন্দমুভতো [মুচলিন্দমভিতো (সী. পী.)] সরং.
‘‘সিরীসা সেতপারিসা [সেতৰারিসা (সী. পী.)], সাধু ৰাযন্তি পদ্মকা;
নিগ্গুণ্ডী সিরীনিগ্গুণ্ডী [সরনিগ্গুণ্ডী (ক.)], অসনা চেত্থ পুপ্ফিতা.
‘‘পঙ্গুরা [পঙ্কুরা (স্যা.), পঙ্গুলা (ক.)] বহুলা সেলা, সোভঞ্জনা চ পুপ্ফিতা;
কেতকা কণিকারা চ, কনৰেরা চ পুপ্ফিতা.
‘‘অজ্জুনা অজ্জুকণ্ণা চ, মহানামা চ পুপ্ফিতা;
সুপুপ্ফিতগ্গা তিট্ঠন্তি, পজ্জলন্তেৰ কিংসুকা.
‘‘সেতপণ্ণী সত্তপণ্ণা, কদলিযো কুসুম্ভরা;
ধনুতক্কারী পুপ্ফেহি, সীসপাৰরণানি চ.
‘‘অচ্ছিৰা সল্লৰা [সবলা (সী.), সিমলা (পী.)] রুক্খা, সল্লকিযো চ পুপ্ফিতা;
সেতগেরু চ তগরা, মংসিকুট্ঠা কুলাৰরা.
‘‘দহরা ¶ রুক্খা চ ৰুদ্ধা চ, অকুটিলা চেত্থ পুপ্ফিতা;
অস্সমং উভতো ঠন্তি, অগ্যাগারং সমন্ততো.
‘‘অথেত্থ উদকন্তস্মিং, বহুজাতো ফণিজ্জকো;
মুগ্গতিযো করতিযো, সেৰালসীসকা বহূ.
‘‘উদ্দাপৰত্তং ¶ [উদ্ধাপৰত্তং (স্যা. পী.)] উল্লুল়িতং, মক্খিকা হিঙ্গুজালিকা;
দাসিমকঞ্জকো [দাসিমা কোঞ্জকো (ক.)] চেত্থ, বহূ নীচেকল়ম্বকা.
‘‘এলম্ফুরকসঞ্ছন্না [এলম্বরকসঞ্ছন্না (সী. পী.), এল়ম্বকেহি সঞ্ছন্না (স্যা.)], রুক্খা তিট্ঠন্তি ব্রাহ্মণ;
সত্তাহং ধারিযমানানং, গন্ধো তেসং ন ছিজ্জতি.
‘‘উভতো ¶ সরং মুচলিন্দং, পুপ্ফা তিট্ঠন্তি সোভনা;
ইন্দীৰরেহি সঞ্ছন্নং, ৰনং তং উপসোভতি.
‘‘অড্ঢমাসং ধারিযমানানং, গন্ধো তেসং ন ছিজ্জতি;
নীলপুপ্ফী সেতৰারী, পুপ্ফিতা গিরিকণ্ণিকা;
কলেরুক্খেহি [কটেরুকেহি (সী.), কটেরুক্খেহি (পী.)] সঞ্ছন্নং, ৰনং তং তুলসীহি চ.
‘‘সম্মদ্দতেৰ গন্ধেন, পুপ্ফসাখাহি তং ৰনং;
ভমরা পুপ্ফগন্ধেন, সমন্তা মভিনাদিতা.
‘‘তীণি কক্কারুজাতানি, তস্মিং সরসি ব্রাহ্মণ;
কুম্ভমত্তানি চেকানি, মুরজমত্তানি তা উভো.
‘‘অথেত্থ সাসপো বহুকো, নাদিযো [নারিযো (ক.)] হরিতাযুতো;
অসী তালাৰ তিট্ঠন্তি, ছেজ্জা ইন্দীৰরা বহূ.
‘‘অপ্ফোটা সুরিযৰল্লী চ, কাল়ীযা [কোল়ীযা (ক.)] মধুগন্ধিযা;
অসোকা মুদযন্তী চ, ৰল্লিভো খুদ্দপুপ্ফিযো.
‘‘কোরণ্ডকা অনোজা চ, পুপ্ফিতা নাগমল্লিকা [নাগৰল্লিকা (সী. পী.)];
রুক্খমারুয্হ তিট্ঠন্তি, ফুল্লা কিংসুকৰল্লিযো.
‘‘কটেরুহা ¶ চ ৰাসন্তী, যূথিকা মধুগন্ধিযা;
নিলিযা সুমনা ভণ্ডী, সোভতি পদুমুত্তরো.
‘‘পাটলী সমুদ্দকপ্পাসী, কণিকারা চ পুপ্ফিতা;
হেমজালাৰ দিস্সন্তি, রুচিরগ্গি সিখূপমা.
‘‘যানি তানি চ পুপ্ফানি, থলজানুদকানি চ;
সব্বানি ¶ তত্থ দিস্সন্তি, এৰং রম্মো মহোদধি.
‘‘অথস্সা পোক্খরণিযা, বহুকা ৰারিগোচরা;
রোহিতা নল়পী [নল়পে (ক.)] সিঙ্গূ, কুম্ভিলা মকরা সুসূ.
‘‘মধু চ মধুলট্ঠি চ, তালিসা চ পিযঙ্গুকা;
কুটন্দজা ভদ্দমুত্তা [উন্নকা ভদ্দমুট্ঠা চ (ক.)], সেতপুপ্ফা চ লোলুপা.
‘‘সুরভী ¶ চ রুক্খা তগরা, বহুকা তুঙ্গৰণ্টকা [তুঙ্গৰল্লিকা (ক.)];
পদ্মকা নরদা কুট্ঠা, ঝামকা চ হরেণুকা.
‘‘হলিদ্দকা গন্ধসিলা, হিরিৰেরা চ গুগ্গুলা;
ৰিভেদিকা চোরকা কুট্ঠা, কপ্পুরা চ কলিঙ্গুকা.
‘‘অথেত্থ সীহব্যগ্ঘা চ, পুরিসালূ চ হত্থিযো;
এণেয্যা পসদা চেৰ, রোহিচ্চা সরভা মিগা.
‘‘কোট্ঠসুণা সুণোপি চ, তুলিযা নল়সন্নিভা;
চামরী চলনী লঙ্ঘী, ঝাপিতা মক্কটা পিচু.
‘‘কক্কটা কটমাযা চ, ইক্কা গোণসিরা বহূ;
খগ্গা ৰরাহা নকুলা, কাল়কেত্থ বহূতসো.
‘‘মহিংসা সোণসিঙ্গালা, পম্পকা চ সমন্ততো;
আকুচ্ছা পচলাকা চ, চিত্রকা চাপি দীপিযো.
‘‘পেলকা চ ৰিঘাসাদা, সীহা গোগণিসাদকা;
অট্ঠপাদা চ মোরা চ, ভস্সরা চ কুকুত্থকা.
‘‘চঙ্কোরা ¶ কুক্কুটা নাগা, অঞ্ঞমঞ্ঞং পকূজিনো;
বকা বলাকা নজ্জুহা, দিন্দিভা কুঞ্জৰাজিতা [কুঞ্জৰাদিকা (সী. পী.)].
‘‘ব্যগ্ঘিনসা ¶ লোহপিট্ঠা, পম্মকা [পম্পকা (সী. পী.), চপ্পকা (স্যা.), পব্বকা (ক.)] জীৰজীৰকা;
কপিঞ্জরা তিত্তিরাযো, কুলা চ পটিকুত্থকা.
‘‘মন্দালকা চেলকেটু, ভণ্ডুতিত্তিরনামকা;
চেলাৰকা পিঙ্গলাযো [পিঙ্গুলাযো (সী. পী.)], গোটকা অঙ্গহেতুকা.
‘‘করৰিযা চ সগ্গা চ, উহুঙ্কারা চ কুক্কুহা;
নানাদিজগণাকিণ্ণং, নানাসরনিকূজিতং.
‘‘অথেত্থ সকুণা সন্তি, নীলকা [সাল়িকা (ক.)] মঞ্জুভাণিকা;
মোদন্তি সহ ভরিযাহি, অঞ্ঞমঞ্ঞং পকূজিনো.
‘‘অথেত্থ সকুণা সন্তি, দিজা মঞ্জুস্সরা সিতা;
সেতচ্ছিকুটা ভদ্রক্খা, অণ্ডজা চিত্রপেখুণা.
‘‘অথেত্থ সকুণা সন্তি, দিজা মঞ্জুস্সরা সিতা;
সিখণ্ডী নীলগীৰাহি, অঞ্ঞমঞ্ঞং পকূজিনো.
‘‘কুকুত্থকা কুল়ীরকা, কোট্ঠা পোক্খরসাতকা;
কালামেয্যা বলিযক্খা, কদম্বা সুৰসাল়িকা.
‘‘হলিদ্দা ¶ লোহিতা সেতা, অথেত্থ নলকা বহূ;
ৰারণা ভিঙ্গরাজা চ, কদম্বা সুৰকোকিলা.
‘‘উক্কুসা কুররা হংসা, আটা পরিৰদেন্তিকা;
পাকহংসা ¶ অতিবলা, নজ্জুহা জীৰজীৰকা.
‘‘পারেৰতা রৰিহংসা, চক্কৰাকা নদীচরা;
ৰারণাভিরুদা রম্মা, উভো কালূপকূজিনো.
‘‘অথেত্থ সকুণা সন্তি, নানাৰণ্ণা বহূ দিজা;
মোদন্তি সহ ভরিযাহি, অঞ্ঞমঞ্ঞং পকূজিনো.
‘‘অথেত্থ সকুণা সন্তি, নানাৰণ্ণা বহূ দিজা;
সব্বে মঞ্জূ নিকূজন্তি, মুচলিন্দমুভতোসরং.
‘‘অথেত্থ সকুণা সন্তি, করৰিযা নাম তে দিজা [করৰী নাম তে দিজা (সী. পী.)];
মোদন্তি সহ ভরিযাহি, অঞ্ঞমঞ্ঞং পকূজিনো.
‘‘অথেত্থ ¶ সকুণা সন্তি, করৰিযা নাম তে দিজা;
সব্বে মঞ্জূ নিকূজন্তি, মুচলিন্দমুভতোসরং.
‘‘এণেয্যপসদাকিণ্ণং, নাগসংসেৰিতং ৰনং;
নানালতাহি সঞ্ছন্নং, কদলীমিগসেৰিতং.
‘‘অথেত্থ সাসপো বহুকো [সামা বহুকা (স্যা. ক.)], নীৰারো ৰরকো বহু;
সালি অকট্ঠপাকো চ, উচ্ছু তত্থ অনপ্পকো.
‘‘অযং একপদী এতি, উজুং গচ্ছতি অস্সমং;
খুদং [খুদ্দং (স্যা. ক.)] পিপাসং অরতিং, তত্থ পত্তো ন ৰিন্দতি;
যত্থ ৰেস্সন্তরো রাজা, সহ পুত্তেহি সম্মতি.
‘‘ধারেন্তো ব্রাহ্মণৰণ্ণং, আসদঞ্চ মসং জটং;
চম্মৰাসী ছমা সেতি, জাতৰেদং নমস্সতি’’.
ইদং ¶ সুত্ৰা ব্রহ্মবন্ধু, ইসিং কত্ৰা পদক্খিণং;
উদগ্গচিত্তো পক্কামি, যত্থ ৰেস্সন্তরো অহু’’.
মহাৰনৰণ্ণনা.
দারকপব্বং
‘‘উট্ঠেহি ¶ জালি পতিট্ঠ, পোরাণং ৰিয দিস্সতি;
ব্রাহ্মণং ৰিয পস্সামি, নন্দিযো মাভিকীররে’’.
‘‘অহম্পি তাত পস্সামি, যো সো ব্রহ্মাৰ দিস্সতি;
অদ্ধিকো ৰিয [অত্থিকো ৰিয (সী. পী.)] আযাতি, অতিথী নো ভৰিস্সতি’’.
‘‘কচ্চি নু ভোতো কুসলং, কচ্চি ভোতো অনামযং;
কচ্চি উঞ্ছেন যাপেথ, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘কুসলঞ্চেৰ নো ব্রহ্মে, অথো ব্রহ্মে অনামযং;
অথো উঞ্ছেন যাপেম, অথো মূলফলা বহূ.
‘‘অথো ¶ ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, হিংসা অম্হং [ময্হং (স্যা. ক.)] ন ৰিজ্জতি’’.
‘‘সত্ত নো মাসে ৰসতং, অরঞ্ঞে জীৰসোকিনং [জীৰিসোকিনং (স্যা.)];
ইদম্পি পঠমং পস্সাম, ব্রাহ্মণং দেৰৰণ্ণিনং;
আদায ৰেল়ুৰং দণ্ডং, অগ্গিহুত্তং কমণ্ডলুং.
‘‘স্ৰাগতং তে মহাব্রহ্মে, অথো তে অদুরাগতং;
অন্তো পৰিস ভদ্দন্তে, পাদে পক্খালযস্সু তে.
‘‘তিন্দুকানি ¶ পিযালানি, মধুকে কাসুমারিযো;
ফলানি খুদ্দকপ্পানি, ভুঞ্জ ব্রহ্মে ৰরং ৰরং.
‘‘ইদম্পি পানীযং সীতং, আভতং গিরিগব্ভরা;
ততো পিৰ মহাব্রহ্মে, সচে ত্ৰং অভিকঙ্খসি.
‘‘অথ ত্ৰং কেন ৰণ্ণেন, কেন ৰা পন হেতুনা;
অনুপ্পত্তো ব্রহারঞ্ঞং, তং মে অক্খাহি পুচ্ছিতো’’.
‘‘যথা ৰারিৰহো পূরো, সব্বকালং ন খীযতি;
এৰং তং যাচিতাগচ্ছিং, পুত্তে মে দেহি যাচিতো’’.
‘‘দদামি ন ৰিকম্পামি, ইস্সরো নয ব্রাহ্মণ;
পাতো গতা রাজপুত্তী, সাযং উঞ্ছাতো এহিতি.
‘‘একরত্তিং ¶ ৰসিত্ৰান, পাতো গচ্ছসি ব্রাহ্মণ;
তস্সা ন্হাতে উপঘাতে, অথ নে মালধারিনে.
‘‘একরত্তিং ৰসিত্ৰান, পাতো গচ্ছসি ব্রাহ্মণ;
নানাপুপ্ফেহি সঞ্ছন্নে, নানাগন্ধেহি ভূসিতে;
নানামূলফলাকিণ্ণে, গচ্ছ স্ৰাদায ব্রাহ্মণ’’.
‘‘ন ৰাসমভিরোচামি, গমনং ময্হ রুচ্চতি;
অন্তরাযোপি মে অস্স, গচ্ছঞ্ঞেৰ রথেসভ.
‘‘ন হেতা যাচযোগী নং, অন্তরাযস্স কারিযা;
ইত্থিযো মন্তং [ইত্থিকামন্তং (ক.)] জানন্তি, সব্বং গণ্হন্তি ৰামতো.
‘‘সদ্ধায ¶ দানং দদতো, মাসং অদক্খি মাতরং;
অন্তরাযম্পি ¶ সা কযিরা, গচ্ছঞ্ঞেৰ রথেসভ.
‘‘আমন্তযস্সু তে পুত্তে, মা তে মাতরমদ্দসুং;
সদ্ধায দানং দদতো, এৰং পুঞ্ঞং পৰড্ঢতি.
‘‘আমন্তযস্সু তে পুত্তে, মা তে মাতরমদ্দসুং;
মাদিসস্স ধনং দত্ৰা, রাজ সগ্গং গমিস্সসি’’.
‘‘সচে ত্ৰং নিচ্ছসে দট্ঠুং, মম ভরিযং পতিব্বতং;
অয্যকস্সপি দস্সেহি, জালিং কণ্হাজিনং চুভো.
‘‘ইমে কুমারে দিস্ৰান, মঞ্জুকে পিযভাণিনে;
পতীতো সুমনো ৰিত্তো, বহুং দস্সতি তে ধনং’’.
‘‘অচ্ছেদনস্স ভাযামি, রাজপুত্ত সুণোহি মে;
রাজদণ্ডায মং দজ্জা, ৰিক্কিণেয্য হনেয্য ৰা;
জিনো ধনঞ্চ দাসে চ, গারয্হস্স ব্রহ্মবন্ধুযা’’.
‘‘ইমে কুমারে দিস্ৰান, মঞ্জুকে পিযভাণিনে;
ধম্মে ঠিতো মহারাজা, সিৰীনং রট্ঠৰড্ঢনো;
লদ্ধা পীতিসোমনস্সং, বহুং দস্সতি তে ধনং’’.
‘‘নাহং তম্পি করিস্সামি, যং মং ত্ৰং অনুসাসসি;
দারকেৰ অহং নেস্সং, ব্রাহ্মণ্যা পরিচারকে’’.
‘‘ততো কুমারা ব্যথিতা [ব্যধিতা (সী. পী. ক.)], সুত্ৰা লুদ্দস্স ভাসিতং;
তেন তেন পধাৰিংসু, জালী কণ্হাজিনা চুভো’’.
‘‘এহি ¶ তাত পিযপুত্ত, পূরেথ মম পারমিং;
হদযং ¶ মেভিসিঞ্চেথ, করোথ ৰচনং মম.
‘‘যানা নাৰা চ মে হোথ, অচলা ভৰসাগরে;
জাতিপারং তরিস্সামি, সন্তারেস্সং সদেৰকং’’.
‘‘এহি অম্ম পিযধীতি, পূরেথ মম পারমিং [পিযা মে দানপারমী (স্যা. ক.)];
হদযং মেভিসিঞ্চেথ, করোথ ৰচনং মম.
‘‘যানা ¶ নাৰা চ মে হোথ, অচলা ভৰসাগরে;
জাতিপারং তরিস্সামি, উদ্ধরিস্সং সদেৰকং’’.
‘‘ততো কুমারে আদায, জালিং কণ্হাজিনং চুভো;
ব্রাহ্মণস্স অদা দানং, সিৰীনং রট্ঠৰড্ঢনো.
‘‘ততো কুমারে আদায, জালিং কণ্হাজিনং চুভো;
ব্রাহ্মণস্স অদা ৰিত্তো, পুত্তকে দানমুত্তমং.
‘‘তদাসি যং ভিংসনকং, তদাসি লোমহংসনং;
যং কুমারে পদিন্নম্হি, মেদনী সম্পকম্পথ.
‘‘তদাসি যং ভিংসনকং, তদাসি লোমহংসনং;
যং পঞ্জলিকতো রাজা, কুমারে সুখৰচ্ছিতে;
ব্রাহ্মণস্স অদা দানং, সিৰীনং রট্ঠৰড্ঢনো’’.
‘‘ততো সো ব্রাহ্মণো লুদ্দো, লতং দন্তেহি ছিন্দিয;
লতায হত্থে বন্ধিত্ৰা, লতায অনুমজ্জথ [অনুপজ্জথ (ক.)].
‘‘ততো সো রজ্জুমাদায, দণ্ডঞ্চাদায ব্রাহ্মণো;
আকোটযন্তো ¶ তে নেতি, সিৰিরাজস্স পেক্খতো’’.
‘‘ততো কুমারা পক্কামুং, ব্রাহ্মণস্স পমুঞ্চিয;
অস্সুপুণ্ণেহি নেত্তেহি, পিতরং সো উদিক্খতি.
‘‘ৰেধমস্সত্থপত্তংৰ, পিতু পাদানি ৰন্দতি;
পিতু পাদানি ৰন্দিত্ৰা, ইদং ৰচনমব্রৰি.
‘‘অম্মা চ তাত নিক্খন্তা, ত্ৰঞ্চ নো তাত দস্সসি;
যাৰ অম্মম্পি পস্সেমু, অথ নো তাত দস্সসি.
‘‘অম্মা চ তাত নিক্খন্তা, ত্ৰঞ্চ নো তাত দস্সসি;
মা নো ত্ৰং তাত অদদা, যাৰ অম্মাপি এতু নো;
তদাযং ব্রাহ্মণো কামং, ৰিক্কিণাতু হনাতু ৰা.
‘‘বলঙ্কপাদো ¶ [বিলঙ্কপাদো (ক.)] অন্ধনখো [অদ্ধনখো (সী. স্যা. পী.)], অথো ওৰদ্ধপিণ্ডিকো [ওবন্ধপিণ্ডিকো (ক.)];
দীঘুত্তরোট্ঠো চপলো, কল়ারো ভগ্গনাসকো.
‘‘কুম্ভোদরো ¶ ভগ্গপিট্ঠি, অথো ৰিসমচক্খুকো;
লোহমস্সু হরিতকেসো, ৰলীনং তিলকাহতো.
‘‘পিঙ্গলো চ ৰিনতো চ, ৰিকটো চ ব্রহা খরো;
অজিনানি চ সন্নদ্ধো, অমনুস্সো ভযানকো.
‘‘মনুস্সো উদাহু যক্খো, মংসলোহিতভোজনো;
গামা অরঞ্ঞমাগম্ম, ধনং তং তাত যাচতি.
‘‘নীযমানে পিসাচেন, কিং নু তাত উদিক্খসি;
অস্মা নূন তে হদযং, আযসং দল়্হবন্ধনং.
‘‘যো ¶ নো বদ্ধে ন জানাসি, ব্রাহ্মণেন ধনেসিনা;
অচ্চাযিকেন লুদ্দেন, যো নো গাৰোৰ সুম্ভতি.
‘‘ইধেৰ অচ্ছতং কণ্হা, ন সা জানাতি কিস্মিঞ্চি;
মিগীৰ খীরসম্মত্তা, যূথা হীনা পকন্দতি.
‘‘ন মে ইদং তথা দুক্খং, লব্ভা হি পুমুনা ইদং;
যঞ্চ অম্মং ন পস্সামি, তং মে দুক্খতরং ইতো.
‘‘ন মে ইদং তথা দুক্খং, লব্ভা হি পুমুনা ইদং;
যঞ্চ তাতং ন পস্সামি, তং মে দুক্খতরং ইতো.
‘‘সা নূন কপণা অম্মা, চিররত্তায রুচ্ছতি [রুজ্জতি (স্যা. ক.)];
কণ্হাজিনং অপস্সন্তী, কুমারিং চারুদস্সনিং.
‘‘সো নূন কপণো তাতো, চিররত্তায রুচ্ছতি;
কণ্হাজিনং অপস্সন্তো, কুমারিং চারুদস্সনিং.
‘‘সা নূন কপণা অম্মা, চিরং রুচ্ছতি অস্সমে;
কণ্হাজিনং অপস্সন্তী, কুমারিং চারুদস্সনিং.
‘‘সো নূন কপণো তাতো, চিরং রুচ্ছতি অস্সমে;
কণ্হাজিনং অপস্সন্তো, কুমারিং চারুদস্সনিং.
‘‘সা নূন কপণা অম্মা, চিররত্তায রুচ্ছতি;
অড্ঢরত্তে ৰ রত্তে ৰা, নদীৰ অৰসুচ্ছতি.
‘‘সো ¶ নূন কপণো তাতো, চিররত্তায রুচ্ছতি;
অড্ঢরত্তে ৰ রত্তে ৰা, নদীৰ অৰসুচ্ছতি.
‘‘ইমে ¶ ¶ তে জম্বুকা রুক্খা, ৰেদিসা সিন্দুৰারকা [সিন্ধুৰারিতা (বহূসু)];
ৰিৰিধানি রুক্খজাতানি, তানি অজ্জ জহামসে.
‘‘অস্সত্থা পনসা চেমে, নিগ্রোধা চ কপিত্থনা;
ৰিৰিধানি ফলজাতানি, তানি অজ্জ জহামসে.
‘‘ইমে তিট্ঠন্তি আরামা, অযং সীতূদকা [সীতোদিকা (সী. পী.)] নদী;
যত্থস্সু পুব্বে কীল়াম, তানি অজ্জ জহামসে.
‘‘ৰিৰিধানি পুপ্ফজাতানি, অস্মিং উপরিপব্বতে;
যানস্সু পুব্বে ধারেম, তানি অজ্জ জহামসে.
‘‘ৰিৰিধানি ফলজাতানি, অস্মিং উপরিপব্বতে;
যানস্সু পুব্বে ভুঞ্জাম, তানি অজ্জ জহামসে.
‘‘ইমে নো হত্থিকা অস্সা, বলিবদ্দা চ নো ইমে;
যেহিস্সু পুব্বে কীল়াম, তানি অজ্জ জহামসে’’.
‘‘নীযমানা কুমারা তে, পিতরং এতদব্রৰুং;
অম্মং আরোগ্যং ৰজ্জাসি, ত্ৰঞ্চ তাত সুখী ভৰ.
‘‘ইমে নো হত্থিকা অস্সা, বলিবদ্দা চ নো ইমে;
তানি অম্মায দজ্জেসি, সোকং তেহি ৰিনেস্সতি.
‘‘ইমে নো হত্থিকা অস্সা, বলিবদ্দা চ নো ইমে;
তানি অম্মা উদিক্খন্তী, সোকং পটিৰিনেস্সতি.
‘‘ততো ৰেস্সন্তরো রাজা, দানং দত্ৰান খত্তিযো;
পণ্ণসালং পৰিসিত্ৰা, কলুনং পরিদেৰযি’’.
‘‘কং ¶ ন্ৰজ্জ ছাতা তসিতা, উপরুচ্ছন্তি দারকা;
সাযং সংৰেসনাকালে, কো নে দস্সতি ভোজনং.
‘‘কং ন্ৰজ্জ ছাতা তসিতা, উপরুচ্ছন্তি দারকা;
সাযং সংৰেসনাকালে, অম্মা ছাতম্হ দেথ নো.
‘‘কথং ¶ নু পথং গচ্ছন্তি, পত্তিকা অনুপাহনা;
সন্তা সূনেহি পাদেহি, কো নে হত্থে গহেস্সতি.
‘‘কথং নু সো ন লজ্জেয্য, সম্মুখা পহরং মম;
অদূসকানং পুত্তানং, অলজ্জী ৰত ব্রাহ্মণো.
‘‘যোপি মে দাসিদাসস্স, অঞ্ঞো ৰা পন পেসিযো;
তস্সাপি সুৰিহীনস্স, কো লজ্জী পহরিস্সতি.
‘‘ৰারিজস্সেৰ ¶ মে সতো, বদ্ধস্স কুমিনামুখে;
অক্কোসতি পহরতি, পিযে পুত্তে অপস্সতো.
‘‘অদু চাপং গহেত্ৰান, খগ্গং বন্ধিয ৰামতো;
আনেস্সামি সকে পুত্তে, পুত্তানঞ্হি ৰধো দুখো.
‘‘অট্ঠানমেতং [অদ্ধা হি মেতং (পী.)] দুক্খরূপং, যং কুমারা ৰিহঞ্ঞরে;
সতঞ্চ ধম্মমঞ্ঞায, কো দত্ৰা অনুতপ্পতি’’.
‘‘সচ্চং কিরেৰমাহংসু, নরা একচ্চিযা ইধ;
যস্স নত্থি সকা মাতা, যথা নত্থি [পিতা অত্থি (ক.)] তথেৰ সো.
‘‘এহি কণ্হে মরিস্সাম, নত্থত্থো জীৰিতেন নো;
দিন্নম্হাতি ¶ [দিন্নম্হাপি (সী. স্যা.), দিন্নমাসি (ক.)] জনিন্দেন, ব্রাহ্মণস্স ধনেসিনো;
অচ্চাযিকস্স লুদ্দস্স, যো নো গাৰোৰ সুম্ভতি.
‘‘ইমে তে জম্বুকা রুক্খা, ৰেদিসা সিন্দুৰারকা;
ৰিৰিধানি রুক্খজাতানি, তানি কণ্হে জহামসে.
‘‘অস্সত্থা পনসা চেমে, নিগ্রোধা চ কপিত্থনা;
ৰিৰিধানি ফলজাতানি, তানি কণ্হে জহামসে.
‘‘ইমে তিট্ঠন্তি আরামা, অযং সীতূদকা নদী;
যত্থস্সু পুব্বে কীল়াম, তানি কণ্হে জহামসে.
‘‘ৰিৰিধানি পুপ্ফজাতানি, অস্মিং উপরিপব্বতে;
যানস্সু পুব্বে ধারেম, তানি কণ্হে জহামসে.
‘‘ৰিৰিধানি ¶ ফলজাতানি, অস্মিং উপরিপব্বতে;
যানস্সু পুব্বে ভুঞ্জাম, তানি কণ্হে জহামসে.
‘‘ইমে নো হত্থিকা অস্সা, বলিবদ্দা চ নো ইমে;
যেহিস্সু পুব্বে কীল়াম, তানি কণ্হে জহামসে’’.
‘‘নীযমানা কুমারা তে, ব্রাহ্মণস্স পমুঞ্চিয;
তেন তেন পধাৰিংসু, জালী কণ্হাজিনা চুভো’’.
‘‘ততো সো রজ্জুমাদায, দণ্ডঞ্চাদায ব্রাহ্মণো;
আকোটযন্তো তে নেতি, সিৰিরাজস্স পেক্খতো’’.
‘‘তং তং কণ্হাজিনাৰোচ, অযং মং তাত ব্রাহ্মণো;
লট্ঠিযা পটিকোটেতি, ঘরে জাতংৰ দাসিযং.
‘‘ন ¶ চাযং ব্রাহ্মণো তাত, ধম্মিকা হোন্তি ব্রাহ্মণা;
যক্খো ¶ ব্রাহ্মণৰণ্ণেন, খাদিতুং তাত নেতি নো;
নীযমানে পিসাচেন, কিং নু তাত উদিক্খসি’’.
‘‘ইমে নো পাদকা দুক্খা, দীঘো চদ্ধা সুদুগ্গমো;
নীচে চোলম্বতে সূরিযো, ব্রাহ্মণো চ ধারেতি [তরেতি (সী. স্যা. পী.)] নো.
‘‘ওকন্দামসে [ওক্কন্তামসি (ক.)] ভূতানি, পব্বতানি ৰনানি চ;
সরস্স সিরসা ৰন্দাম, সুপতিত্থে চ আপকে [আৰকে (ক.)].
‘‘তিণলতানি ওসধ্যো, পব্বতানি ৰনানি চ;
অম্মং আরোগ্যং ৰজ্জাথ, অযং নো নেতি ব্রাহ্মণো.
‘‘ৰজ্জন্তু ভোন্তো অম্মঞ্চ, মদ্দিং অস্মাক মাতরং;
সচে অনুপতিতুকামাসি, খিপ্পং অনুপতিযাসি নো.
‘‘অযং একপদী এতি, উজুং গচ্ছতি অস্সমং;
তমেৰানুপতেয্যাসি, অপি পস্সেসি নে লহুং.
‘‘অহো ৰত রে জটিনী, ৰনমূলফলহারিকে [হারিযা (স্যা. ক.)];
সুঞ্ঞং দিস্ৰান অস্সমং, তং তে দুক্খং ভৰিস্সতি.
‘‘অতিৰেলং ¶ নু অম্মায, উঞ্ছা লদ্ধো অনপ্পকো [উঞ্ছালদ্ধং অনপ্পকং (স্যা.)];
যা নো বদ্ধে ন জানাসি, ব্রাহ্মণেন ধনেসিনা.
‘‘অচ্চাযিকেন লুদ্দেন, যো নো গাৰোৰ সুম্ভতি;
অপজ্জ অম্মং পস্সেমু, সাযং উঞ্ছাতো আগতং.
‘‘দজ্জা অম্মা ব্রাহ্মণস্স, ফলং খুদ্দেন মিস্সিতং;
তদাযং ¶ অসিতো ধাতো, ন বাল়্হং ধারযেয্য [তরযেয্য (সী. স্যা. পী.)] নো.
‘‘সূনা চ ৰত নো পাদা, বাল়্হং ধারেতি ব্রাহ্মণো;
ইতি তত্থ ৰিলপিংসু, কুমারা মাতুগিদ্ধিনো’’.
দারকপব্বং নাম.
মদ্দীপব্বং
‘‘তেসং লালপ্পিতং সুত্ৰা, তযো ৰাল়া ৰনে মিগা;
সীহো ব্যগ্ঘো চ দীপি চ, ইদং ৰচনমব্রৰুং.
‘‘মা ¶ হেৰ নো রাজপুত্তী, সাযং উঞ্ছাতো আগমা;
মা হেৰম্হাক নিব্ভোগে, হেঠযিত্থ ৰনে মিগা.
‘‘সীহো চ নং ৰিহেঠেয্য, ব্যগ্ঘো দীপি চ লক্খণং;
নেৰ জালীকুমারস্স, কুতো কণ্হাজিনা সিযা;
উভযেনেৰ জীযেথ, পতিং পুত্তে চ লক্খণা’’.
‘‘খণিত্তিকং মে পতিতং, দক্খিণক্খি চ ফন্দতি;
অফলা ফলিনো রুক্খা, সব্বা মুয্হন্তি মে দিসা.
‘‘তস্সা সাযন্হকালস্মিং, অস্সমাগমনং পতি;
অত্থঙ্গতম্হি সূরিযে, ৰাল়া পন্থে উপট্ঠহুং.
‘‘নীচে চোলম্বতে সূরিযো, দূরে চ ৰত অস্সমো;
যঞ্চ নেসং ইতো হস্সং [হিস্সং (ক.)], তং তে ভুঞ্জেয্যু ভোজনং.
‘‘সো নূন খত্তিযো একো, পণ্ণসালায অচ্ছতি;
তোসেন্তো দারকে ছাতে, মমং দিস্ৰা অনাযতিং.
‘‘তে ¶ নূন পুত্তকা ময্হং, কপণায ৰরাকিযা;
সাযং ¶ সংৰেসনাকালে, খীরপীতাৰ অচ্ছরে.
‘‘তে নূন পুত্তকা ময্হং, কপণায ৰরাকিযা;
সাযং সংৰেসনাকালে, ৰারিপীতাৰ অচ্ছরে.
‘‘তে নূন পুত্তকা ময্হং, কপণায ৰরাকিযা;
পচ্চুগ্গতা মং তিট্ঠন্তি, ৰচ্ছা বালাৰ মাতরং.
‘‘তে নূন পুত্তকা ময্হং, কপণায ৰরাকিযা;
পচ্চুগ্গতা মং তিট্ঠন্তি, হংসাৰুপরিপল্ললে.
‘‘তে নূন পুত্তকা ময্হং, কপণায ৰরাকিযা;
পচ্চুগ্গতা মং তিট্ঠন্তি, অস্সমস্সাৰিদূরতো.
‘‘একাযনো একপথো, সরা সোব্ভা চ পস্সতো;
অঞ্ঞং মগ্গং ন পস্সামি, যেন গচ্ছেয্য অস্সমং.
‘‘মিগা নমত্থু রাজানো, কাননস্মিং মহব্বলা;
ধম্মেন ভাতরো হোথ, মগ্গং মে দেথ যাচিতা.
‘‘অৰরুদ্ধস্সাহং ভরিযা, রাজপুত্তস্স সিরীমতো;
তং চাহং নাতিমঞ্ঞামি, রামং সীতাৰনুব্বতা.
‘‘তুম্হে ¶ চ পুত্তে পস্সথ, সাযং সংৰেসনং পতি;
অহঞ্চ পুত্তে পস্সেয্যং, জালিং কণ্হাজিনং চুভো.
‘‘বহুং চিদং মূলফলং, ভক্খো চাযং অনপ্পকো;
ততো উপড্ঢং দস্সামি, মগ্গং মে দেথ যাচিতা.
‘‘রাজপুত্তী চ নো মাতা, রাজপুত্তো চ নো পিতা;
ধম্মেন ¶ ভাতরো হোথ, মগ্গং মে দেথ যাচিতা’’.
‘‘তস্সা লালপ্পমানায, বহুং কারুঞ্ঞসঞ্হিতং;
সুত্ৰা নেলপতিং ৰাচং, ৰাল়া পন্থা অপক্কমুং’’.
‘‘ইমম্হি নং পদেসম্হি, পুত্তকা পংসুকুণ্ঠিতা;
পচ্চুগ্গতা মং তিট্ঠন্তি, ৰচ্ছা বালাৰ মাতরং.
‘‘ইমম্হি ¶ নং পদেসম্হি, পুত্তকা পংসুকুণ্ঠিতা;
পচ্চুগ্গতা মং তিট্ঠন্তি, হংসাৰুপরিপল্ললে.
‘‘ইমম্হি নং পদেসম্হি, পুত্তকা পংসুকুণ্ঠিতা;
পচ্চুগ্গতা মং তিট্ঠন্তি, অস্সমস্সাৰিদূরতো.
‘‘দ্ৰে মিগা ৰিয [তে মিগাৰিয (সী. স্যা. পী.)] উক্কণ্ণা [ওক্কণ্ণা (ক.)], সমন্তা মভিধাৰিনো;
আনন্দিনো পমুদিতা, ৰগ্গমানাৰ কম্পরে;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘ছকলীৰ মিগী ছাপং, পক্খী মুত্তাৰ পঞ্জরা;
ওহায পুত্তে নিক্খমিং, সীহীৰামিসগিদ্ধিনী;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘ইদং নেসং পদক্কন্তং, নাগানমিৰ পব্বতে;
চিতকা পরিকিণ্ণাযো, অস্সমস্সাৰিদূরতো;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘ৰালিকাযপি ওকিণ্ণা, পুত্তকা পংসুকুণ্ঠিতা;
সমন্তা মভিধাৰন্তি, তে ন পস্সামি দারকে.
‘‘যে ¶ মং পুরে পচ্চুট্ঠেন্তি [পচ্চুদেন্তি (সী. স্যা. পী.)], অরঞ্ঞা দূরমাযতিং;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘ছকলিংৰ মিগিং ছাপা, পচ্চুগ্গন্তুন মাতরং;
দূরে মং পৰিলোকেন্তি [অপলোকেন্তি (ক.), পটিৰিলোকেন্তি (স্যা.)], তে ন পস্সামি দারকে.
‘‘ইদং ¶ নেসং কীল়ানকং, পতিতং পণ্ডুবেল়ুৰং;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘থনা চ ময্হিমে পূরা, উরো চ সম্পদালতি;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘উচ্ছঙ্গেকো ৰিচিনাতি, থনমেকাৰলম্বতি;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘যস্সু ¶ সাযন্হসমযং, পুত্তকা পংসুকুণ্ঠিতা;
উচ্ছঙ্গে মে ৰিৰত্তন্তি, তে ন পস্সামি দারকে.
‘‘অযং সো অস্সমো পুব্বে, সমজ্জো পটিভাতি মং;
ত্যজ্জ পুত্তে অপস্সন্ত্যা, ভমতে ৰিয অস্সমো.
‘‘কিমিদং অপ্পসদ্দোৰ, অস্সমো পটিভাতি মং;
কাকোলাপি ন ৰস্সন্তি, মতা মে নূন দারকা.
‘‘কিমিদং অপ্পসদ্দোৰ, অস্সমো পটিভাতি মং;
সকুণাপি ন ৰস্সন্তি, মতা মে নূন দারকা.
‘‘কিমিদং তুণ্হিভূতোসি, অপি রত্তেৰ মে মনো;
কাকোলাপি ন ৰস্সন্তি, মতা মে নূন দারকা.
‘‘কিমিদং ¶ তুণ্হিভূতোসি, অপি রত্তেৰ মে মনো;
সকুণাপি ন ৰস্সন্তি, মতা মে নূন দারকা.
‘‘কচ্চি নু মে অয্যপুত্ত, মিগা খাদিংসু দারকে;
অরঞ্ঞে ইরিণে ৰিৰনে, কেন নীতা মে দারকা.
‘‘অদু তে পহিতা দূতা, অদু সুত্তা পিযংৰদা;
অদু বহি নো নিক্খন্তা, খিড্ডাসু পসুতা নু তে.
‘‘নেৰাসং কেসা দিস্সন্তি, হত্থপাদা চ জালিনো;
সকুণানঞ্চ ওপাতো, কেন নীতা মে দারকা.
‘‘ইদং ততো দুক্খতরং, সল্লৰিদ্ধো যথা ৰণো;
ত্যজ্জ পুত্তে ন পস্সামি, জালিং কণ্হাজিনং চুভো.
‘‘ইদম্পি দুতিযং সল্লং, কম্পেতি হদযং মম;
যঞ্চ পুত্তে ন পস্সামি, ত্ৰঞ্চ মং নাভিভাসসি.
‘‘অজ্জেৰ [অজ্জ চে (স্যা.)] মে ইমং রত্তিং, রাজপুত্ত ন সংসসি;
মঞ্ঞে ওক্কন্তসন্তং [উক্কন্তসত্তং (সী. পী.)] মং, পাতো দক্খিসি নো মতং’’.
‘‘নূন ¶ মদ্দী ৰরারোহা, রাজপুত্তী যসস্সিনী;
পাতো গতাসি উঞ্ছায, কিমিদং সাযমাগতা’’.
‘‘ননু ¶ ত্ৰং সদ্দমস্সোসি, যে সরং পাতুমাগতা;
সীহস্সপি নদন্তস্স, ব্যগ্ঘস্স চ নিকুজ্জিতং.
‘‘অহু পুব্বনিমিত্তং মে, ৰিচরন্ত্যা ব্রহাৰনে;
খণিত্তো মে হত্থা পতিতো, উগ্গীৰঞ্চাপি [উঙ্গীৰঞ্চাপি (ক.)] অংসতো.
‘‘তদাহং ¶ ব্যথিতা ভীতা, পুথু কত্ৰান পঞ্জলিং;
সব্বদিসা নমস্সিস্সং, অপি সোত্থি ইতো সিযা.
‘‘মা হেৰ নো রাজপুত্তো, হতো সীহেন দীপিনা;
দারকা ৰা পরামট্ঠা, অচ্ছকোকতরচ্ছিহি.
‘‘সীহো ব্যগ্ঘো চ দীপি চ, তযো ৰাল়া ৰনে মিগা;
তে মং পরিযাৰরুং মগ্গং, তেন সাযম্হি আগতা.
‘‘অহং পতিঞ্চ পুত্তে চ, আচেরমিৰ মাণৰো;
অনুট্ঠিতা দিৰারত্তিং, জটিনী ব্রহ্মচারিনী.
‘‘অজিনানি পরিদহিত্ৰা, ৰনমূলফলহারিযা;
ৰিচরামি দিৰারত্তিং, তুম্হং কামা হি পুত্তকা.
‘‘অহং সুৰণ্ণহলিদ্দিং, আভতং পণ্ডুবেল়ুৰং;
রুক্খপক্কানি চাহাসিং, ইমে ৰো পুত্ত কীল়না.
‘‘ইমং মূলাল়িৰত্তকং, সালুকং চিঞ্চভেদকং;
ভুঞ্জ খুদ্দেহি সংযুত্তং, সহ পুত্তেহি খত্তিয.
‘‘পদুমং জালিনো দেহি, কুমুদঞ্চ কুমারিযা;
মালিনে পস্স নচ্চন্তে, সিৰি পুত্তানি অৰ্হয.
‘‘ততো কণ্হাজিনাযপি, নিসামেহি রথেসভ;
মঞ্জুস্সরায ৰগ্গুযা, অস্সমং উপযন্তিযা [উপগন্থিযা (স্যা. ক.)].
‘‘সমানসুখদুক্খম্হা, রট্ঠা পব্বাজিতা উভো;
অপি ¶ সিৰি পুত্তে পস্সেসি, জালিং কণ্হাজিনং চুভো.
‘‘সমণে ¶ ব্রাহ্মণে নূন, ব্রহ্মচরিযপরাযণে;
অহং লোকে অভিস্সপিং, সীলৰন্তে বহুস্সুতে;
ত্যজ্জ পুত্তে ন পস্সামি, জালিং কণ্হাজিনং চুভো’’.
‘‘ইমে ¶ তে জম্বুকা রুক্খা, ৰেদিসা সিন্দুৰারকা;
ৰিৰিধানি রুক্খজাতানি, তে কুমারা ন দিস্সরে.
‘‘অস্সত্থা পনসা চেমে, নিগ্রোধা চ কপিত্থনা;
ৰিৰিধানি ফলজাতানি, তে কুমারা ন দিস্সরে.
‘‘ইমে তিট্ঠন্তি আরামা, অযং সীতূদকা নদী;
যত্থস্সু পুব্বে কীল়িংসু, তে কুমারা ন দিস্সরে.
‘‘ৰিৰিধানি পুপ্ফজাতানি, অস্মিং উপরিপব্বতে;
যানস্সু পুব্বে ধারিংসু, তে কুমারা ন দিস্সরে.
‘‘ৰিৰিধানি ফলজাতানি, অস্মিং উপরিপব্বতে;
যানস্সু পুব্বে ভুঞ্জিংসু, তে কুমারা ন দিস্সরে.
‘‘ইমে তে হত্থিকা অস্সা, বলিবদ্দা চ তে ইমে;
যেহিস্সু পুব্বে কীল়িংসু, তে কুমারা ন দিস্সরে’’.
‘‘ইমে সামা সসোলূকা, বহুকা কদলীমিগা;
যেহিস্সু পুব্বে কীল়িংসু, তে কুমারা ন দিস্সরে.
‘‘ইমে হংসা চ কোঞ্চা চ, মযূরা চিত্রপেখুণা;
যেহিস্সু পুব্বে কীল়িংসু, তে কুমারা ন দিস্সরে’’.
‘‘ইমা ¶ তা ৰনগুম্বাযো, পুপ্ফিতা সব্বকালিকা;
যত্থস্সু পুব্বে কীল়িংসু, তে কুমারা ন দিস্সরে.
‘‘ইমা তা পোক্খরণী রম্মা, চক্কৰাকূপকূজিতা;
মন্দালকেহি সঞ্ছন্না, পদুমুপ্পলকেহি চ;
যত্থস্সু পুব্বে কীল়িংসু, তে কুমারা ন দিস্সরে.
‘‘ন তে কট্ঠানি ভিন্নানি, ন তে উদকমাহতং;
অগ্গিপি তে ন হাপিতো, কিং নু মন্দোৰ ঝাযসি.
‘‘পিযো ¶ পিযেন সঙ্গম্ম, সমো মে [সমোহং (স্যা.), সম্মোহং (ক.)] ব্যপহঞ্ঞতি;
ত্যজ্জ পুত্তে ন পস্সামি, জালিং কণ্হাজিনং চুভো’’.
‘‘ন খো নো দেৰ পস্সামি, যেন তে নীহতা মতা;
কাকোলাপি ন ৰস্সন্তি, মতা মে নূন দারকা.
‘‘ন খো নো দেৰ পস্সামি, যেন তে নীহতা মতা;
সকুণাপি ন ৰস্সন্তি, মতা মে নূন দারকা’’.
‘‘সা ¶ তত্থ পরিদেৰিত্ৰা, পব্বতানি ৰনানি চ;
পুনদেৰস্সমং গন্ত্ৰা, রোদি সামিকসন্তিকে [সামিকসন্তিকে রোদি (সী. স্যা. পী.)].
‘‘‘ন খো নো দেৰ পস্সামি, যেন তে নীহতা মতা;
কাকোলাপি ন ৰস্সন্তি, মতা মে নূন দারকা.
‘‘‘ন খো নো দেৰ পস্সামি, যেন তে নীহতা মতা;
সকুণাপি ন ৰস্সন্তি, মতা মে নূন দারকা.
‘‘‘ন খো নো দেৰ পস্সামি, যেন তে নীহতা মতা;
ৰিচরন্তি ¶ রুক্খমূলেসু, পব্বতেসু গুহাসু চ’.
‘‘ইতি মদ্দী ৰরারোহা, রাজপুত্তী যসস্সিনী;
বাহা পগ্গয্হ কন্দিত্ৰা, তত্থেৰ পতিতা ছমা’’.
‘‘তমজ্ঝপত্তং রাজপুত্তিং, উদকেনাভিসিঞ্চথ;
অস্সত্থং নং ৰিদিত্ৰান, অথ নং এতদব্রৰি’’.
‘‘আদিযেনেৰ তে মদ্দি, দুক্খং নক্খাতুমিচ্ছিসং;
দলিদ্দো যাচকো ৰুড্ঢো, ব্রাহ্মণো ঘরমাগতো.
‘‘তস্স দিন্না মযা পুত্তা, মদ্দি মা ভাযি অস্সস;
মং পস্স মদ্দি মা পুত্তে, মা বাল়্হং পরিদেৰসি;
লচ্ছাম পুত্তে জীৰন্তা, অরোগা চ ভৰামসে.
‘‘পুত্তে পসুঞ্চ ধঞ্ঞঞ্চ, যঞ্চ অঞ্ঞং ঘরে ধনং;
দজ্জা সপ্পুরিসো দানং, দিস্ৰা যাচকমাগতং;
অনুমোদাহি মে মদ্দি, পুত্তকে দানমুত্তমং’’.
‘‘অনুমোদামি ¶ তে দেৰ, পুত্তকে দানমুত্তমং;
দত্ৰা চিত্তং পসাদেহি, ভিয্যো দানং দদো ভৰ.
‘‘যো ত্ৰং মচ্ছেরভূতেসু, মনুস্সেসু জনাধিপ;
ব্রাহ্মণস্স অদা দানং, সিৰীনং রট্ঠৰড্ঢনো’’.
‘‘নিন্নাদিতা তে পথৰী, সদ্দো তে তিদিৰঙ্গতো;
সমন্তা ৰিজ্জুতা আগুং, গিরীনংৰ পতিস্সুতা.
‘‘তস্স তে অনুমোদন্তি, উভো নারদপব্বতা;
ইন্দো ¶ চ ব্রহ্মা পজাপতি, সোমো যমো ৰেস্সৰণো;
সব্বে দেৰানুমোদন্তি, তাৰতিংসা সইন্দকা.
‘‘ইতি ¶ মদ্দী ৰরারোহা, রাজপুত্তী যসস্সিনী;
ৰেস্সন্তরস্স অনুমোদি, পুত্তকে দানমুত্তমং’’.
মদ্দীপব্বং নাম.
সক্কপব্বং
ততো রত্যা ৰিৰসানে, সূরিযস্সুগ্গমনং পতি;
সক্কো ব্রাহ্মণৰণ্ণেন, পাতো তেসং অদিস্সথ.
‘‘কচ্চি নু ভোতো কুসলং, কচ্চি ভোতো অনামযং;
কচ্চি উঞ্ছেন যাপেথ, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘কুসলঞ্চেৰ নো ব্রহ্মে, অথো ব্রহ্মে অনামযং;
অথো উঞ্ছেন যাপেম, অথো মূলফলা বহূ.
‘‘অথো ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, হিংসা ময্হং ন ৰিজ্জতি.
‘‘সত্ত নো মাসে ৰসতং, অরঞ্ঞে জীৰসোকিনং;
ইদং দুতিযং পস্সাম, ব্রাহ্মণং দেৰৰণ্ণিনং;
আদায ৰেল়ুৰং দণ্ডং, ধারেন্তং অজিনক্খিপং.
‘‘স্ৰাগতং ¶ তে মহাব্রহ্মে, অথো মে অদুরাগতং;
অন্তো ¶ পৰিস ভদ্দন্তে, পাদে পক্খালযস্সু তে.
‘‘তিন্দুকানি পিযালানি, মধুকে কাসুমারিযো;
ফলানি খুদ্দকপ্পানি, ভুঞ্জ ব্রহ্মে ৰরং ৰরং.
‘‘ইদম্পি পানীযং সীতং, আভতং গিরিগব্ভরা;
ততো পিৰ মহাব্রহ্মে, সচে ত্ৰং অভিকঙ্খসি.
‘‘অথ ত্ৰং কেন ৰণ্ণেন, কেন ৰা পন হেতুনা;
অনুপ্পত্তো ব্রহারঞ্ঞং, তং মে অক্খাহি পুচ্ছিতো’’.
‘‘যথা ৰারিৰহো পূরো, সব্বকালং ন খীযতি;
এৰং তং যাচিতাগচ্ছিং, ভরিযং মে দেহি যাচিতো’’.
‘‘দদামি ¶ ন ৰিকম্পামি, যং মং যাচসি ব্রাহ্মণ;
সন্তং নপ্পটিগুয্হামি, দানে মে রমতী মনো’’.
‘‘মদ্দিং হত্থে গহেত্ৰান, উদকস্স কমণ্ডলুং;
ব্রাহ্মণস্স অদা দানং, সিৰীনং রট্ঠৰড্ঢনো.
‘‘তদাসি যং ভিংসনকং, তদাসি লোমহংসনং;
মদ্দিং পরিচজন্তস্স, মেদনী সম্পকম্পথ.
‘‘নেৰ সা মদ্দী ভাকুটি, ন সন্ধীযতি ন রোদতি;
পেক্খতেৰস্স তুণ্হী সা, এসো জানাতি যং ৰরং’’.
‘‘কোমারী ¶ যস্সাহং ভরিযা, সামিকো মম ইস্সরো;
যস্সিচ্ছে তস্স মং দজ্জা, ৰিক্কিণেয্য হনেয্য ৰা’’.
‘‘তেসং সঙ্কপ্পমঞ্ঞায, দেৰিন্দো এতদব্রৰি;
সব্বে জিতা তে পচ্চূহা, যে দিব্বা যে চ মানুসা.
‘‘নিন্নাদিতা তে পথৰী, সদ্দো তে তিদিৰঙ্গতো;
সমন্তা ৰিজ্জুতা আগুং, গিরীনংৰ পতিস্সুতা.
‘‘তস্স তে অনুমোদন্তি, উভো নারদপব্বতা;
ইন্দো চ ব্রহ্মা পজাপতি, সোমো যমো ৰেস্সৰণো;
সব্বে দেৰানুমোদন্তি, দুক্করঞ্হি করোতি সো.
‘‘দুদ্দদং ¶ দদমানানং, দুক্করং কম্ম কুব্বতং;
অসন্তো নানুকুব্বন্তি, সতং ধম্মো দুরন্নযো.
‘‘তস্মা সতঞ্চ অসতং, নানা হোতি ইতো গতি;
অসন্তো নিরযং যন্তি, সন্তো সগ্গপরাযণা.
‘‘যমেতং কুমারে অদা, ভরিযং অদা ৰনে ৰসং;
ব্রহ্মযানমনোক্কম্ম, সগ্গে তে তং ৰিপচ্চতু’’.
‘‘দদামি ভোতো ভরিযং, মদ্দিং সব্বঙ্গসোভনং;
ত্ৰঞ্চেৰ মদ্দিযা ছন্নো, মদ্দী চ পতিনা সহ.
‘‘যথা ¶ পযো চ সঙ্খো চ, উভো সমানৰণ্ণিনো;
এৰং তুৰঞ্চ মদ্দী চ, সমানমনচেতসা.
‘‘অৰরুদ্ধেত্থ অরঞ্ঞস্মিং, উভো সম্মথ অস্সমে;
খত্তিযা গোত্তসম্পন্না, সুজাতা মাতুপেত্তিতো;
যথা পুঞ্ঞানি কযিরাথ, দদন্তা অপরাপরং’’.
‘‘সক্কোহমস্মি ¶ দেৰিন্দো, আগতোস্মি তৰন্তিকে;
ৰরং ৰরস্সু রাজিসি, ৰরে অট্ঠ দদামি তে’’.
‘‘ৰরং চে মে অদো সক্ক, সব্বভূতানমিস্সর;
পিতা মং অনুমোদেয্য, ইতো পত্তং সকং ঘরং;
আসনেন নিমন্তেয্য, পঠমেতং ৰরং ৰরে.
‘‘পুরিসস্স ৰধং ন রোচেয্যং, অপি কিব্বিসকারকং;
ৰজ্ঝং ৰধম্হা মোচেয্যং, দুতিযেতং ৰরং ৰরে.
‘‘যে ৰুড্ঢা যে চ দহরা, যে চ মজ্ঝিমপোরিসা;
মমেৰ উপজীৰেয্যুং, ততিযেতং ৰরং ৰরে.
‘‘পরদারং ন গচ্ছেয্যং, সদারপসুতো সিযং;
থীনং ৰসং ন গচ্ছেয্যং, চতুত্থেতং ৰরং ৰরে.
‘‘পুত্তো মে সক্ক জাযেথ, সো চ দীঘাযুকো সিযা;
ধম্মেন জিনে পথৰিং, পঞ্চমেতং ৰরং ৰরে.
‘‘ততো রত্যা ৰিৰসানে, সূরিযস্সুগ্গমনং পতি;
দিব্বা ভক্খা পাতুভৰেয্যুং, ছট্ঠমেতং ৰরং ৰরে.
‘‘দদতো ¶ ¶ মে ন খীযেথ, দত্ৰা নানুতপেয্যহং;
দদং চিত্তং পসাদেয্যং, সত্তমেতং ৰরং ৰরে.
‘‘ইতো ৰিমুচ্চমানাহং, সগ্গগামী ৰিসেসগূ;
অনিৰত্তি ততো অস্সং, অট্ঠমেতং ৰরং ৰরে’’.
‘‘তস্স তং ৰচনং সুত্ৰা, দেৰিন্দো এতদব্রৰি;
অচিরং ৰত তে ততো, পিতা তং দট্ঠুমেস্সতি’’.
‘‘ইদং ৰত্ৰান মঘৰা, দেৰরাজা সুজম্পতি;
ৰেস্সন্তরে ৰরং দত্ৰা, সগ্গকাযং অপক্কমি’’.
সক্কপব্বং নাম.
মহারাজপব্বং
‘‘কস্সেতং ¶ মুখমাভাতি, হেমং ৰুত্তত্তমগ্গিনা;
নিক্খংৰ জাতরূপস্স, উক্কামুখপহংসিতং.
‘‘উভো সদিসপচ্চঙ্গা, উভো সদিসলক্খণা;
জালিস্স সদিসো একো, একা কণ্হাজিনা যথা.
‘‘সীহা বিলাৰ নিক্খন্তা, উভো সম্পতিরূপকা;
জাতরূপমযাযেৰ, ইমে দিস্সন্তি দারকা’’.
‘‘কুতো নু ভৰং ভারদ্ৰাজ, ইমে আনেসি দারকে;
অজ্জ রট্ঠং অনুপ্পত্তো, কুহিং গচ্ছসি ব্রাহ্মণ’’ [ইদং গাথদ্ধং পী পোত্থকে নত্থি].
‘‘ময্হং তে দারকা দেৰ, দিন্না ৰিত্তেন সঞ্জয;
অজ্জ পন্নরসা রত্তি, যতো লদ্ধা [দিন্না (সী. পী.)] মে দারকা’’.
‘‘কেন ¶ ৰা ৰাচপেয্যেন, সম্মাঞাযেন সদ্দহে;
কো তেতং দানমদদা, পুত্তকে দানমুত্তমং’’.
‘‘যো যাচতং পতিট্ঠাসি, ভূতানং ধরণীরিৰ;
সো মে ৰেস্সন্তরো রাজা, পুত্তেদাসি ৰনে ৰসং.
‘‘যো যাচতং গতী আসি, সৰন্তীনংৰ সাগরো;
সো মে ৰেস্সন্তরো রাজা, পুত্তেদাসি ৰনে ৰসং’’.
‘‘দুক্কটং ¶ ৰত ভো রঞ্ঞা, সদ্ধেন ঘরমেসিনা;
কথং নু পুত্তকে দজ্জা, অরঞ্ঞে অৰরুদ্ধকো.
‘‘ইমং ভোন্তো নিসামেথ, যাৰন্তেত্থ সমাগতা;
কথং ৰেস্সন্তরো রাজা, পুত্তেদাসি ৰনে ৰসং.
‘‘দাসিং দাসং চ [দাসং দাসি চ (সী. পী.)] সো দজ্জা, অস্সং চস্সতরীরথং;
হত্থিঞ্চ কুঞ্জরং দজ্জ, কথং সো দজ্জ দারকে’’.
‘‘যস্স নস্স [নত্থি (সী. পী.)] ঘরে দাসো, অস্সো চস্সতরীরথো;
হত্থী চ কুঞ্জরো নাগো, কিং সো দজ্জা পিতামহ’’.
‘‘দানমস্স পসংসাম, ন চ নিন্দাম পুত্তকা;
কথং নু হদযং আসি, তুম্হে দত্ৰা ৰনিব্বকে’’.
‘‘দুক্খস্স হদযং আসি, অথো উণ্হম্পি পস্সসি;
রোহিনীহেৰ ¶ তম্বক্খী, পিতা অস্সূনি ৰত্তযি’’.
‘‘যং ¶ তং কণ্হাজিনাৰোচ, অযং মং তাত ব্রাহ্মণো;
লট্ঠিযা পটিকোটেতি, ঘরে জাতংৰ দাসিযং.
‘‘ন চাযং ব্রাহ্মণো তাত, ধম্মিকা হোন্তি ব্রাহ্মণা;
যক্খো ব্রাহ্মণৰণ্ণেন, খাদিতুং তাত নেতি নো;
নীযমানে পিসাচেন, কিন্নু তাত উদিক্খসি’’.
‘‘রাজপুত্তী চ ৰো মাতা, রাজপুত্তো চ ৰো পিতা;
পুব্বে মে অঙ্গমারুয্হ, কিং নু তিট্ঠথ আরকা’’.
‘‘রাজপুত্তী চ নো মাতা, রাজপুত্তো চ নো পিতা;
দাসা মযং ব্রাহ্মণস্স, তস্মা তিট্ঠাম আরকা’’.
‘‘মা সম্মেৰং অৰচুত্থ, ডয্হতে হদযং মম;
চিতকাযংৰ মে কাযো, আসনে ন সুখং লভে.
‘‘মা সম্মেৰং অৰচুত্থ, ভিয্যো সোকং জনেথ মং;
নিক্কিণিস্সামি দব্বেন, ন ৰো দাসা ভৰিস্সথ.
‘‘কিমগ্ঘিযঞ্হি ¶ ৰো তাত, ব্রাহ্মণস্স পিতা অদা;
যথাভূতং মে অক্খাথ, পটিপাদেন্তু ব্রাহ্মণং’’.
‘‘সহস্সগ্ঘঞ্হি মং তাত, ব্রাহ্মণস্স পিতা অদা;
অথ [অচ্ছং (সী. স্যা. ক.)] কণ্হাজিনং কঞ্ঞং, হত্থিনা চ সতেন চ’’ [হত্থিআদিসতেন চ (স্যা.), হত্থিনাদিসতেন চ (ক.)].
‘‘উট্ঠেহি কত্তে তরমানো, ব্রাহ্মণস্স অৰাকর;
দাসিসতং দাসসতং, গৰং হত্থুসভং সতং;
জাতরূপসহস্সঞ্চ ¶ , পুত্তানং দেহি নিক্কযং.
‘‘ততো কত্তা তরমানো, ব্রাহ্মণস্স অৰাকরি;
দাসিসতং দাসসতং, গৰং হত্থুসভং সতং;
জাতরূপসহস্সঞ্চ, পুত্তানংদাসি নিক্কযং’’.
‘‘নিক্কিণিত্ৰা নহাপেত্ৰা, ভোজযিত্ৰান দারকে;
সমলঙ্করিত্ৰা ভণ্ডেন, উচ্ছঙ্গে উপৰেসযুং.
‘‘সীসং ন্হাতে সুচিৰত্থে, সব্বাভরণভূসিতে;
রাজা অঙ্কে করিত্ৰান, অয্যকো পরিপুচ্ছথ.
‘‘কুণ্ডলে ঘুসিতে মালে, সব্বাভরণভূসিতে;
রাজা অঙ্কে করিত্ৰান, ইদং ৰচনমব্রৰি.
‘‘কচ্চি ¶ উভো অরোগা তে, জালি মাতাপিতা তৰ;
কচ্চি উঞ্ছেন যাপেথ, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘অথো উভো অরোগা মে, দেৰ মাতাপিতা মম;
অথো ¶ উঞ্ছেন যাপেন্তি, অথো মূলফলা বহূ.
‘‘অথো ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, হিংসা নেসং ন ৰিজ্জতি.
‘‘খণন্তালুকলম্বানি, বিলানি তক্কলানি চ;
কোলং ভল্লাতকং বেল্লং, সা নো আহত্ৰ পোসতি.
‘‘যঞ্চেৰ ¶ সা আহরতি, ৰনমূলফলহারিযা;
তং নো সব্বে সমাগন্ত্ৰা, রত্তিং ভুঞ্জাম নো দিৰা.
‘‘অম্মাৰ নো কিসা পণ্ডু, আহরন্তী দুমপ্ফলং;
ৰাতাতপেন সুখুমালী, পদুমং হত্থগতামিৰ.
‘‘অম্মায পতনূকেসা, ৰিচরন্ত্যা ব্রহাৰনে;
ৰনে ৰাল়মিগাকিণ্ণে, খগ্গদীপিনিসেৰিতে.
‘‘কেসেসু জটং বন্ধিত্ৰা, কচ্ছে জল্লমধারযি;
চম্মৰাসী ছমা সেতি, জাতৰেদং নমস্সতি.
‘‘পুত্তা পিযা মনুস্সানং, লোকস্মিং উদপজ্জিসুং;
ন হি নূনম্হাকং অয্যস্স, পুত্তে স্নেহো অজাযথ’’.
‘‘দুক্কটঞ্চ হি নো পুত্ত, ভূনহচ্চং কতং মযা;
যোহং সিৰীনং ৰচনা, পব্বাজেসিমদূসকং.
‘‘যং মে কিঞ্চি ইধ অত্থি, ধনং ধঞ্ঞঞ্চ ৰিজ্জতি;
এতু ¶ ৰেস্সন্তরো রাজা, সিৰিরট্ঠে পসাসতু’’.
‘‘ন দেৰ ময্হং ৰচনা, এহিতি সিৰিসুত্তমো;
সযমেৰ দেৰো গন্ত্ৰা, সিঞ্চ ভোগেহি অত্রজং’’.
‘‘ততো সেনাপতিং রাজা, সজ্জযো অজ্ঝভাসথ;
হত্থী অস্সা রথা পত্তী, সেনা সন্নাহযন্তু নং;
নেগমা চ মং অন্ৰেন্তু, ব্রাহ্মণা চ পুরোহিতা.
‘‘ততো ¶ সট্ঠিসহস্সানি, যোধিনো [যুথিনো (ক.)] চারুদস্সনা;
খিপ্পমাযন্তু সন্নদ্ধা, নানাৰণ্ণেহিলঙ্কতা.
‘‘নীলৰত্থধরা নেকে [নীলৰণ্ণধরানেকে (সী. পী.), নীলৰত্থধরা একে (?)], পীতানেকে নিৰাসিতা;
অঞ্ঞে লোহিতউণ্হীসা, সুদ্ধানেকে নিৰাসিতা;
খিপ্পমাযন্তু সন্নদ্ধা, নানাৰণ্ণেহিলঙ্কতা.
‘‘হিমৰা যথা গন্ধধরো, পব্বতো গন্ধমাদনো;
নানারুক্খেহি সঞ্ছন্নো, মহাভূতগণালযো.
‘‘ওসধেহি ¶ চ দিব্বেহি, দিসা ভাতি পৰাতি চ;
খিপ্পমাযন্তু সন্নদ্ধা, দিসা ভন্তু পৰন্তু চ.
‘‘ততো নাগসহস্সানি, যোজযন্তু চতুদ্দস;
সুৰণ্ণকচ্ছা মাতঙ্গা, হেমকপ্পনৰাসসা.
‘‘আরূল়্হা গামণীযেহি, তোমরঙ্কুসপাণিভি;
খিপ্পমাযন্তু সন্নদ্ধা, হত্থিক্খন্ধেহি দস্সিতা.
‘‘ততো অস্সসহস্সানি, যোজযন্তু চতুদ্দস;
আজানীযাৰ ¶ জাতিযা, সিন্ধৰা সীঘৰাহনা.
‘‘আরূল়্হা গামণীযেহি, ইল্লিযাচাপধারিভি;
খিপ্পমাযন্তু সন্নদ্ধা, অস্সপিট্ঠে অলঙ্কতা.
‘‘ততো রথসহস্সানি, যোজযন্তু চতুদ্দস;
অযোসুকতনেমিযো, সুৰণ্ণচিতপক্খরে.
‘‘আরোপেন্তু ধজে তত্থ, চম্মানি কৰচানি চ;
ৰিপ্পালেন্তু [ৰিপ্ফালেন্তু (সী. স্যা. পী.)] চ চাপানি, দল়্হধম্মা পহারিনো;
খিপ্পমাযন্তু সন্নদ্ধা, রথেসু রথজীৰিনো’’.
‘‘লাজাওলোপিযা [লাজা ওলোকিরা (ক.)] পুপ্ফা, মালাগন্ধৰিলেপনা;
অগ্ঘিযানি চ তিট্ঠন্তু, যেন মগ্গেন এহিতি.
‘‘গামে গামে সতং কুম্ভা, মেরযস্স সুরায চ;
মগ্গম্হি পতিতিট্ঠন্তু [পতিতা ঠন্তু (স্যা. ক.)], যেন মগ্গেন এহিতি.
‘‘মংসা পূৰা সঙ্কুলিযো, কুম্মাসা মচ্ছসংযুতা;
মগ্গম্হি পতিতিট্ঠন্তু, যেন মগ্গেন এহিতি.
‘‘সপ্পি তেলং দধি খীরং, কঙ্গুবীজা [কঙ্গুৰীহি (সী. পী.), কঙ্গুপিট্ঠা (স্যা.)] বহূ সুরা;
মগ্গম্হি পতিতিট্ঠন্তু, যেন মগ্গেন এহিতি.
‘‘আল়ারিকা ¶ চ সূদা চ, নটনট্টকগাযিনো;
পাণিস্সরা কুম্ভথূণিযো, মন্দকা সোকজ্ঝাযিকা [সোকচ্ছাযিকা (ক.)].
‘‘আহঞ্ঞন্তু ¶ সব্বৰীণা, ভেরিযো দিন্দিমানি চ;
খরমুখানি ¶ ধমেন্তু [ৰদন্তু (সী. পী.)], নদন্তু একপোক্খরা.
‘‘মুদিঙ্গা পণৰা সঙ্খা, গোধা পরিৰদেন্তিকা;
দিন্দিমানি চ হঞ্ঞন্তু, কুতুম্প [কুটুম্বা (সী. স্যা. পী.)] দিন্দিমানি চ’’.
‘‘সা সেনা মহতী আসি, উয্যুত্তা সিৰিৰাহিনী;
জালিনা মগ্গনাযেন, ৰঙ্কং পাযাসি পব্বতং.
‘‘কোঞ্চং নদতি মাতঙ্গো, কুঞ্জরো সট্ঠিহাযনো;
কচ্ছায বদ্ধমানায, কোঞ্চং নদতি ৰারণো.
‘‘আজানীযা হসিযন্তি [হসিস্সিংসু (সী. পী.)], নেমিঘোসো অজাযথ;
অব্ভং রজো অচ্ছাদেসি, উয্যুত্তা সিৰিৰাহিনী.
‘‘সা সেনা মহতী আসি, উয্যুত্তা হারহারিনী;
জালিনা মগ্গনাযেন, ৰঙ্কং পাযাসি পব্বতং.
‘‘তে পাৰিংসু ব্রহারঞ্ঞং, বহুসাখং মহোদকং [বহুদিজং (পী.)];
পুপ্ফরুক্খেহি সঞ্ছন্নং, ফলরুক্খেহি চূভযং.
‘‘তত্থ বিন্দুস্সরা ৰগ্গূ, নানাৰণ্ণা বহূ দিজা;
কূজন্তমুপকূজন্তি, উতুসম্পুপ্ফিতে দুমে.
‘‘তে গন্ত্ৰা দীঘমদ্ধানং, অহোরত্তানমচ্চযে;
পদেসং তং উপাগচ্ছুং, যত্থ ৰেস্সন্তরো অহু’’.
মহারাজপব্বং নাম.
ছখত্তিযকম্মং
‘‘তেসং সুত্ৰান নিগ্ঘোসং, ভীতো ৰেস্সন্তরো অহু;
পব্বতং অভিরুহিত্ৰা, ভীতো সেনং উদিক্খতি.
‘‘ইঙ্ঘ ¶ মদ্দি নিসামেহি, নিগ্ঘোসো যাদিসো ৰনে;
আজানীযা হসিযন্তি, ধজগ্গানি চ দিস্সরে.
‘‘ইমে ¶ ¶ নূন অরঞ্ঞস্মিং, মিগসঙ্ঘানি লুদ্দকা;
ৰাগুরাহি পরিক্খিপ্প, সোব্ভং পাতেত্ৰা তাৰদে;
ৰিক্কোসমানা তিব্বাহি, হন্তি নেসং ৰরং ৰরং.
‘‘যথা মযং অদূসকা, অরঞ্ঞে অৰরুদ্ধকা;
অমিত্তহত্থত্তং গতা, পস্স দুব্বলঘাতকং’’.
‘‘অমিত্তা নপ্পসাহেয্যুং, অগ্গীৰ উদকণ্ণৰে;
তদেৰ ত্ৰং ৰিচিন্তেহি, অপি সোত্থি ইতো সিযা’’.
‘‘ততো ৰেস্সন্তরো রাজা, ওরোহিত্ৰান পব্বতা;
নিসীদি পণ্ণসালাযং, দল়্হং কত্ৰান মানসং’’.
‘‘নিৰত্তযিত্ৰান রথং, ৰুট্ঠপেত্ৰান সেনিযো;
একং অরঞ্ঞে ৰিহরন্তং, পিতা পুত্তং উপাগমি.
‘‘হত্থিক্খন্ধতো ওরুয্হ, একংসো পঞ্জলীকতো;
পরিকিণ্ণো [পরিক্খিত্তো (সী. পী.)] অমচ্চেহি, পুত্তং সিঞ্চিতুমাগমি.
‘‘তত্থদ্দস কুমারং সো, রম্মরূপং সমাহিতং;
নিসিন্নং পণ্ণসালাযং, ঝাযন্তং অকুতোভযং.
‘‘তঞ্চ দিস্ৰান আযন্তং, পিতরং পুত্তগিদ্ধিনং;
ৰেস্সন্তরো চ মদ্দী চ, পচ্চুগ্গন্ত্ৰা অৰন্দিসুং.
‘‘মদ্দী চ সিরসা পাদে, সসুরস্সাভিৰাদযি;
‘মদ্দী ¶ অহঞ্হি তে দেৰ, পাদে ৰন্দামি তে সুণ্হা’ [হুসা (সী. স্যা. পী.)];
তেসু তত্থ পলিসজ্জ, পাণিনা পরিমজ্জথ’’.
‘‘কচ্চি ৰো কুসলং পুত্ত, কচ্চি পুত্ত অনামযং;
কচ্চি উঞ্ছেন যাপেথ, কচ্চি মূলফলা বহূ.
‘‘কচ্চি ডংসা মকসা চ, অপ্পমেৰ সরীসপা;
ৰনে ৰাল়মিগাকিণ্ণে, কচ্চি হিংসা ন ৰিজ্জতি’’.
‘‘অত্থি নো জীৰিকা দেৰ, সা চ যাদিসকীদিসা;
কসিরা জীৰিকা হোম [অহোসি (?)], উঞ্ছাচরিযায জীৰিতং.
‘‘অনিদ্ধিনং ¶ মহারাজ, দমেতস্সংৰ সারথি;
ত্যম্হা অনিদ্ধিকা দন্তা, অসমিদ্ধি দমেতি নো.
‘‘অপি নো কিসানি মংসানি, পিতু মাতু অদস্সনা;
অৰরুদ্ধানং মহারাজ, অরঞ্ঞে জীৰসোকিনং’’.
‘‘যেপি ¶ তে সিৰিসেট্ঠস্স, দাযাদাপত্তমানসা;
জালী কণ্হাজিনা চুভো, ব্রাহ্মণস্স ৰসানুগা;
অচ্চাযিকস্স লুদ্দস্স, যো নে গাৰোৰ সুম্ভতি.
‘‘তে রাজপুত্তিযা পুত্তে, যদি জানাথ সংসথ;
পরিযাপুণাথ নো খিপ্পং, সপ্পদট্ঠংৰ মাণৰং’’.
‘‘উভো কুমারা নিক্কীতা, জালী কণ্হাজিনা চুভো;
ব্রাহ্মণস্স ধনং দত্ৰা, পুত্ত মা ভাযি অস্সস’’.
‘‘কচ্চি ¶ নু তাত কুসলং, কচ্চি তাত অনামযং;
কচ্চি নু তাত মে মাতু, চক্খু ন পরিহাযতি’’.
‘‘কুসলঞ্চেৰ মে পুত্ত, অথো পুত্ত অনামযং;
অথো চ পুত্ত তে মাতু, চক্খু ন পরিহাযতি’’.
‘‘কচ্চি অরোগং যোগ্গং তে, কচ্চি ৰহতি ৰাহনং;
কচ্চি ফীতো জনপদো, কচ্চি ৰুট্ঠি ন ছিজ্জতি’’.
‘‘অথো অরোগং যোগ্গং মে, অথো ৰহতি ৰাহনং;
অথো ফীতো জনপদো, অথো ৰুট্ঠি ন ছিজ্জতি’’.
‘‘ইচ্চেৰং মন্তযন্তানং, মাতা নেসং অদিস্সথ;
রাজপুত্তী গিরিদ্ৰারে, পত্তিকা অনুপাহনা.
‘‘তঞ্চ দিস্ৰান আযন্তং, মাতরং পুত্তগিদ্ধিনিং;
ৰেস্সন্তরো চ মদ্দী চ, পচ্চুগ্গন্ত্ৰা অৰন্দিসুং.
‘‘মদ্দী চ সিরসা পাদে, সস্সুযা অভিৰাদযি;
মদ্দী অহঞ্হি তে অয্যে, পাদে ৰন্দামি তে সুণ্হা’’.
‘‘মদ্দিঞ্চ পুত্তকা দিস্ৰা, দূরতো সোত্থিমাগতা;
কন্দন্তা মভিধাৰিংসু, ৰচ্ছবালাৰ মাতরং.
‘‘মদ্দী ¶ চ পুত্তকে দিস্ৰা, দূরতো সোত্থিমাগতে;
ৰারুণীৰ পৰেধেন্তী, থনধারাভিসিঞ্চথ’’.
‘‘সমাগতানং ঞাতীনং, মহাঘোসো অজাযথ;
পব্বতা সমনাদিংসু, মহী পকম্পিতা অহু.
‘‘ৰুট্ঠিধারং পৰত্তেন্তো, দেৰো পাৰস্সি তাৰদে;
অথ ¶ ৰেস্সন্তরো রাজা, ঞাতীহি সমগচ্ছথ.
‘‘নত্তারো ¶ সুণিসা পুত্তো, রাজা দেৰী চ একতো;
যদা সমাগতা আসুং, তদাসি লোমহংসনং.
‘‘পঞ্জলিকা তস্স যাচন্তি, রোদন্তা ভেরৰে ৰনে;
ৰেস্সন্তরঞ্চ মদ্দিঞ্চ, সব্বে রট্ঠা সমাগতা;
ত্ৰং নোসি ইস্সরো রাজা, রজ্জং কারেথ নো উভো’’.
ছখত্তিযকম্মং নাম.
‘‘ধম্মেন রজ্জং কারেন্তং, রট্ঠা পব্বাজযিত্থ মং;
ত্ৰঞ্চ জানপদা চেৰ, নেগমা চ সমাগতা’’.
‘‘দুক্কটঞ্চ হি নো পুত্ত, ভূনহচ্চং কতং মযা;
যোহং সিৰীনং ৰচনা, পব্বাজেসিমদূসকং’’.
‘‘যেন কেনচি ৰণ্ণেন, পিতু দুক্খং উদব্বহে;
মাতু ভগিনিযা চাপি, অপি পাণেহি অত্তনো’’.
‘‘ততো ৰেস্সন্তরো রাজা, রজোজল্লং পৰাহযি;
রজোজল্লং পৰাহেত্ৰা, সঙ্খৰণ্ণং [সচ্চৰণ্ণং (সী. স্যা.)] অধারযি’’.
‘‘সীসং ন্হাতো সুচিৰত্থো, সব্বাভরণভূসিতো;
পচ্চযং নাগমারুয্হ, খগ্গং বন্ধি পরন্তপং.
‘‘ততো ¶ সট্ঠিসহস্সানি, যোধিনো চারুদস্সনা;
সহজাতা পকিরিংসু, নন্দযন্তা রথেসভং.
‘‘ততো ¶ মদ্দিম্পি ন্হাপেসুং, সিৰিকঞ্ঞা সমাগতা;
ৰেস্সন্তরো তং পালেতু, জালী কণ্হাজিনা চুভো;
অথোপি তং মহারাজা, সঞ্জযো অভিরক্খতু’’.
‘‘ইদঞ্চ পচ্চযং লদ্ধা, পুব্বে সংক্লেসমত্তনো;
আনন্দিযং আচরিংসু, রমণীযে গিরিব্বজে.
‘‘ইদঞ্চ পচ্চযং লদ্ধা, পুব্বে সংক্লেসমত্তনো;
আনন্দি ৰিত্তা সুমনা, পুত্তে সঙ্গম্ম লক্খণা.
‘‘ইদঞ্চ পচ্চযং লদ্ধা, পুব্বে সংক্লেসমত্তনো;
আনন্দি ৰিত্তা পতীতা, সহ পুত্তেহি লক্খণা’’.
‘‘একভত্তা ¶ পুরে আসিং, নিচ্চং থণ্ডিলসাযিনী;
ইতি মেতং ৰতং আসি, তুম্হং কামা হি পুত্তকা.
‘‘তং মে ৰতং সমিদ্ধজ্জ, তুম্হে সঙ্গম্ম পুত্তকা;
মাতুজম্পি তং পালেতু, পিতুজম্পি চ পুত্তক;
অথোপি তং মহারাজা, সঞ্জযো অভিরক্খতু.
‘‘যং কিঞ্চিত্থি কতং পুঞ্ঞং, ময্হঞ্চেৰ পিতুচ্চ তে;
সব্বেন তেন কুসলেন, অজরো অমরো ভৰ’’.
‘‘কপ্পাসিকঞ্চ কোসেয্যং, খোমকোটুম্বরানি চ;
সস্সু ¶ সুণ্হায পাহেসি, যেহি মদ্দী অসোভথ.
‘‘ততো হেমঞ্চ কাযূরং, গীৰেয্যং রতনামযং;
সস্সু সুণ্হায পাহেসি, যেহি মদ্দী অসোভথ.
‘‘ততো হেমঞ্চ কাযূরং, অঙ্গদং মণিমেখলং;
সস্সু সুণ্হায পাহেসি, যেহি মদ্দী অসোভথ.
‘‘উণ্ণতং মুখফুল্লঞ্চ, নানারত্তে চ মাণিকে [মাণিযে (সী. পী.)];
সস্সু সুণ্হায পাহেসি, যেহি মদ্দী অসোভথ.
‘‘উগ্গত্থনং গিঙ্গমকং, মেখলং পাটিপাদকং [পটিপাদুকং (সী. স্যা.), পালিপাদকং (পী.)];
সস্সু সুণ্হায পাহেসি, যেহি মদ্দী অসোভথ.
‘‘সুত্তঞ্চ ¶ সুত্তৰজ্জঞ্চ, উপনিজ্ঝায সেয্যসি;
অসোভথ রাজপুত্তী, দেৰকঞ্ঞাৰ নন্দনে.
‘‘সীসং ন্হাতা সুচিৰত্থা, সব্বালঙ্কারভূসিতা;
অসোভথ রাজপুত্তী, তাৰতিংসেৰ অচ্ছরা.
‘‘কদলীৰ ৰাতচ্ছুপিতা, জাতা চিত্তলতাৰনে;
দন্তাৰরণসম্পন্না, রাজপুত্তী অসোভথ.
‘‘সকুণী মানুসিনীৰ, জাতা চিত্তপত্তা পতী;
নিগ্রোধপক্কবিম্বোট্ঠী, রাজপুত্তী অসোভথ.
‘‘তস্সা চ নাগমানেসুং, নাতিবদ্ধংৰ কুঞ্জরং;
সত্তিক্খমং সরক্খমং, ঈসাদন্তং উরূল়্হৰং.
‘‘সা মদ্দী নাগমারুহি, নাতিবদ্ধংৰ কুঞ্জরং;
সত্তিক্খমং ¶ সরক্খমং, ঈসাদন্তং উরূল়্হৰং’’.
‘‘সব্বম্হি ¶ তংঅরঞ্ঞম্হি, যাৰন্তেত্থ মিগা অহুং;
ৰেস্সন্তরস্স তেজেন, নঞ্ঞমঞ্ঞং ৰিহেঠযুং.
‘‘সব্বম্হি তংঅরঞ্ঞম্হি, যাৰন্তেত্থ দিজা অহুং;
ৰেস্সন্তরস্স তেজেন, নঞ্ঞমঞ্ঞং ৰিহেঠযুং.
‘‘সব্বম্হি তংঅরঞ্ঞম্হি, যাৰন্তেত্থ মিগা অহুং;
একজ্ঝং সন্নিপাতিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘সব্বম্হি তংঅরঞ্ঞম্হি, যাৰন্তেত্থ দিজা অহুং;
একজ্ঝং সন্নিপাতিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘সব্বম্হি তংঅরঞ্ঞম্হি, যাৰন্তেত্থ মিগা অহুং;
নাস্সু মঞ্জূ নিকূজিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘সব্বম্হি তংঅরঞ্ঞম্হি, যাৰন্তেত্থ দিজা অহুং;
নাস্সু মঞ্জূ নিকূজিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘পটিযত্তো ¶ রাজমগ্গো, ৰিচিত্তো পুপ্ফসন্থতো;
ৰসি ৰেস্সন্তরো যত্থ, যাৰতাৰ জেতুত্তরা.
‘‘ততো সট্ঠিসহস্সানি, যোধিনো চারুদস্সনা;
সমন্তা পরিকিরিংসু, ৰেস্সন্তরে ¶ পযাতম্হি;
সিৰীনং রট্ঠৰড্ঢনে.
‘‘ওরোধা চ কুমারা চ, ৰেসিযানা চ ব্রাহ্মণা;
সমন্তা পরিকিরিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘হত্থারোহা অনীকট্ঠা, রথিকা পত্তিকারকা;
সমন্তা পরিকিরিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘সমাগতা জানপদা, নেগমা চ সমাগতা;
সমন্তা পরিকিরিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘করোটিযা ¶ চম্মধরা, ইল্লীহত্থা [ইন্দিহত্থা (স্যা. ক.), খগ্গহত্থা (সী. পী.)] সুৰম্মিনো;
পুরতো পটিপজ্জিংসু, ৰেস্সন্তরে পযাতম্হি;
সিৰীনং রট্ঠৰড্ঢনে.
‘‘তে পাৰিসুং পুরং রম্মং, মহাপাকারতোরণং;
উপেতং অন্নপানেহি, নচ্চগীতেহি চূভযং.
‘‘ৰিত্তা জানপদা আসুং, নেগমা চ সমাগতা;
অনুপ্পত্তে কুমারম্হি, সিৰীনং রট্ঠৰড্ঢনে.
‘‘চেলুক্খেপো অৰত্তিত্থ, আগতে ধনদাযকে;
নন্দিং পৰেসি [নন্দি-প্পৰেসি (সী. স্যা. পী.)] নগরে, বন্ধনা মোক্খো অঘোসথ.
‘‘জাতরূপমযং ¶ ¶ ৰস্সং, দেৰো পাৰস্সি তাৰদে;
ৰেস্সন্তরে পৰিট্ঠম্হি, সিৰীনং রট্ঠৰড্ঢনে.
‘‘ততো ৰেস্সন্তরো রাজা, দানং দত্ৰান খত্তিযো;
কাযস্স ভেদা সপ্পঞ্ঞো, সগ্গং সো উপপজ্জথা’’তি.
ৰেস্সন্তরজাতকং দসমং.
মহানিপাত নিট্ঠিতা.
জাতকপাল়ি নিট্ঠিতা.