📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

মহানিদ্দেস-অট্ঠকথা

গন্থারম্ভকথা

অৰিজ্জালঙ্গিং ঘাতেন্তো, নন্দিরাগঞ্চ মূলতো;

ভাৰেন্তট্ঠঙ্গিকং মগ্গং, ফুসি যো অমতং পদং.

পাপুণিত্ৰা জিনো বোধিং, মিগদাযং ৰিগাহিয;

ধম্মচক্কং পৰত্তেত্ৰা, থেরং কোণ্ডঞ্ঞমাদিতো.

অট্ঠারসন্নং কোটীনং, বোধেসি তাপসো তহিং;

ৰন্দেহং সিরসা তঞ্চ, সব্বসত্তানমুত্তমং.

তথা ধম্মুত্তমঞ্চেৰ, সঙ্ঘঞ্চাপি অনুত্তরং;

সংখিত্তেন হি যো ৰুত্তং, ধম্মচক্কং ৰিভাগসো.

সারিপুত্তো মহাপঞ্ঞো, সত্থুকপ্পো জিনত্রজো;

ধম্মচক্কং ৰিভাজেত্ৰা, মহানিদ্দেসমব্রৰি;

পাঠো ৰিসিট্ঠো নিদ্দেসো, তংনামৰিসেসিতো চ.

তং সারিপুত্তং জিনরাজপুত্তং, থেরং থিরানেকগুণাধিৰাসং;

পঞ্ঞাপভাৰুগ্গতচারুকিত্তিং, সুনীচৰুত্তিঞ্চ অথো নমিত্ৰা.

খমাদযাদিযুত্তেন, যুত্তমুত্তাদিৰাদিনা;

বহুস্সুতেন থেরেন, দেৰেন অভিযাচিতো.

মহাৰিহারৰাসীনং, সজ্ঝাযম্হি পতিট্ঠিতো;

গহেতব্বং গহেত্ৰান, পোরাণেসু ৰিনিচ্ছযং.

অৰোক্কমেন্তো সমযং সকঞ্চ, অনামসন্তো সমযং পরঞ্চ;

পুব্বোপদেসট্ঠকথানযঞ্চ, যথানুরূপং উপসংহরন্তো.

ঞাণপ্পভেদাৰহনস্স তস্স, যোগীহি নেকেহি নিসেৰিতস্স;

অত্থং অপুব্বং অনুৰণ্ণযন্তো, সুত্তঞ্চ যুত্তিঞ্চ অনুক্কমেন্তো.

আরভিস্সং সমাসেন, মহানিদ্দেসৰণ্ণনং;

সদ্ধম্মবহুমানেন, নাত্তুক্কংসনকম্যতা.

ৰক্খামহং অট্ঠকথং জনস্স, হিতায সদ্ধম্মচিরট্ঠিতত্থং;

সক্কচ্চ সদ্ধম্মপজোতিকং তং, সুণাথ ধারেথ চ সাধু সন্তোতি.

তত্থ ‘‘পাঠো ৰিসিট্ঠো নিদ্দেসো, তংনামৰিসেসিতো চা’’তি ৰুত্তত্তা দুৰিধো পাঠো – ব্যঞ্জনপাঠো, অত্থপাঠো চ. তেসু ব্যঞ্জনপাঠো অক্খরপদব্যঞ্জনআকারনিরুত্তিনিদ্দেসৰসেন ছব্বিধো. অত্থপাঠো সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছব্বিধো. তত্থ তীসু দ্ৰারেসু পরিসুদ্ধপযোগভাৰেন ৰিসুদ্ধকরুণানং চিত্তেন পৰত্তিতদেসনা ৰাচাহি অকথিতত্তা অদেসিতত্তা অক্খরমিতি সঞ্ঞিতা, তং পারাযনিকব্রাহ্মণানং মনসা পুচ্ছিতপঞ্হানং ৰসেন ভগৰতা রতনঘরে নিসীদিত্ৰা সম্মসিতপট্ঠানমহাপকরণৰসেন চ অক্খরং নামাতি গহেতব্বং.

অথ ৰা অপরিপুণ্ণং পদং অক্খরমিতি গহেতব্বং ‘‘সট্ঠিৰস্সসহস্সানী’’তি এৰমাদীসু (পে. ৰ. ৮০২; জা. ১.৪.৫৪; নেত্তি. ১২০) ৰিয. এত্থ হি সকার নকার সোকারাদীনি অক্খরমিতি, একক্খরং ৰা পদং অক্খরমিতি একে. ‘‘যাযং তণ্হা পোনোভৰিকা’’তি এৰমাদীসু (মহাৰ. ১৪; ৰিভ. ২০৩; ম. নি. ৩.৩৭৪; পটি. ম. ২.৩০) ৰিভত্যন্তং অত্থজোতকং অক্খরপিণ্ডং পদং. ‘‘নামঞ্চ রূপঞ্চা’’তি এৰমাদীসু (ধ. স. দুকমাতিকা ১০৯; সু. নি. ৮৭৮; মহানি. ১০৭; চূল়নি. অজিতমাণৰপুচ্ছানিদ্দেসো ৬; নেত্তি. ৪৫) বহুঅক্খরেহি যুত্তং পদং নাম. সংখিত্তেন ৰুত্তং পদং ৰিভাৰেতি. পদেন অভিহিতং ব্যঞ্জযতি ব্যত্তং পাকটং করোতীতি ব্যঞ্জনং, ৰাক্যমেৰ. ‘‘চত্তারো ইদ্ধিপাদা’’তি সঙ্খেপেন কথিতমত্থং. ‘‘কতমে চত্তারো? ইধ, ভিক্খৰে, ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি. ৰীরিযচিত্তৰীমংসসমাধিপধানসঙ্খারসমন্নাগতং ইদ্ধিপাদং ভাৰেতী’’তিআদীসু (ৰিভ. ৪৩১; সং. নি. ৫.৮১৩; দী. নি. ৩.৩০৬; অ. নি. ৪.২৭৬) পাকটকরণভাৰেন ব্যঞ্জনং নাম. ব্যঞ্জনৰিভাগপকাসো আকারো. ‘‘তত্থ কতমো ছন্দো? যো ছন্দো ছন্দিকতা কত্তুকম্যতা’’তি এৰমাদীসু (ৰিভ. ৪৩৩) কথিতব্যঞ্জনং অনেকৰিধেন ৰিভাগকরণং আকারো নাম. আকারাভিহিতস্স নিব্বচনং নিরুত্তি. ‘‘ফস্সো, ৰেদনা’’তি এৰমাদীসু (ধ. স. ১) আকারেন কথিতং ‘‘ফুসতীতি ফস্সো. ৰেদিযতীতি ৰেদনা’’তি নীহরিত্ৰা ৰচনং নিরুত্তি নাম. নিব্বচনৰিত্থারো নিস্সেসতো দেসোতি নিদ্দেসো, ৰেদিযতীতি ৰেদনাতি নিব্বচনলদ্ধপদং ‘‘সুখা দুক্খা অদুক্খমসুখা, সুখযতীতি সুখা, দুক্খযতীতি দুক্খা, নেৰ দুক্খযতি ন সুখযতীতি অদুক্খমসুখা’’তি অত্থৰিত্থারো নিরৰসেসেন কথিতত্তা নিদ্দেসো নাম.

এৰং ছব্বিধানি ব্যঞ্জনপদানি জানিত্ৰা চ ছসু অত্থপদেসু সঙ্খেপতো কাসনা দীপনা সঙ্কাসনা, ‘‘মঞ্ঞমানো খো, ভিক্খু, বন্ধো মারস্স অমঞ্ঞমানো মুত্তো পাপিমতো’’তি এৰমাদীসু সঙ্খেপেন অত্থদীপনা সঙ্কাসনা নাম. এসো পন থেরো ‘‘বুদ্ধেন ভগৰতা এৰং সঙ্খেপং কত্ৰা ৰুত্তমত্থং ‘অঞ্ঞাতং ভগৰা, অঞ্ঞাতং সুগতা’’’তি কথেতুং সমত্থো পটিৰিজ্ঝি.

উপরি ৰত্তব্বমত্থং আদিতো কাসনা দীপনা পকাসনা, ‘‘সব্বং, ভিক্খৰে, আদিত্ত’’ন্তি এৰমাদীসু (মহাৰ. ৫৪; সং. নি. ৪.২৮) পচ্ছা কথিতব্বমত্থং পঠমৰচনেন দীপনা পকাসনা নাম. এৰং পঠমং দীপিতং অত্থং পুন পাকটং কত্ৰা দীপনেন ‘‘কিঞ্চ, ভিক্খৰে, সব্বং আদিত্তং? চক্খুং, ভিক্খৰে, আদিত্তং, রূপা আদিত্তা’’তি এৰমাদীসু (মহাৰ. ৫৪; সং. নি. ৪.২৮) কথিতেসু ‘‘তিক্খিন্দ্রিযো সঙ্খেপেন ৰুত্তং পটিৰিজ্ঝতী’’তি কথিতত্তা দ্ৰে অত্থপদানি তিক্খিন্দ্রিযস্স উপকারৰসেন ৰুত্তানি.

সংখিত্তস্স ৰিত্থারাভিধানং সকিং ৰুত্তস্স চ পুনপি অভিধানং ৰিৰরণং, ‘‘কুসলা ধম্মা’’তি (ধ. স. ১) সঙ্খেপেন নিক্খিত্তস্স. ‘‘কতমে ধম্মা কুসলা? যস্মিং সমযে কামাৰচরং কুসলং চিত্তং উপ্পন্নং হোতী’’তি (ধ. স. ১) নিদ্দেসৰসেন ৰিত্থারণং ৰিত্থারৰসেন পুন কথনং ৰিৰরণং নাম.

তং ৰিভাগকরণং ৰিভজনং, ‘‘যস্মিং সমযে’’তি (ধ. স. ১) ৰিৰরিতে কুসলে ধম্মে ‘‘তস্মিং সমযে ফস্সো হোতি, ৰেদনা হোতী’’তি (ধ. স. ১) ৰিভাগকরণং ৰিভজনং নাম. ৰিৰরস্স ৰিত্থারাভিধানেন ৰিভত্তস্স চ উপমাভিধানেন পটিপাদনং উত্তানীকরণং, ৰিৰরণেন ৰিৰরিতত্থস্স ‘‘কতমো তস্মিং সমযে ফস্সো হোতি? যো তস্মিং সমযে ফস্সো ফুসনা সম্ফুসনা’’তি (ধ. স. ২) অতিৰিৰরিত্ৰা কথনঞ্চ ৰিভজনেন ৰিভত্তস্স ‘‘সেয্যথাপি, ভিক্খৰে, গাৰী নিচ্চম্মা, এৰমেৰ খ্ৰাহং, ভিক্খৰে, ফস্সাহারো দট্ঠব্বোতি ৰদামী’’তি (সং. নি. ২.৬৩) এৰমাদিউপমাকথনঞ্চ উত্তানীকরণং নাম. ধম্মং সুণন্তানং ধম্মদেসনেন চিত্তস্স অনেকৰিধেন সোমনস্সউপ্পাদনঞ্চ অতিখিণবুদ্ধীনং অনেকৰিধেন ঞাণস্স তিখিণভাৰকরণঞ্চ পঞ্ঞত্তি নাম, তেসং সুণন্তানং তংচিত্ততোসনেন তংচিত্তনিসামনেন চ পঞ্ঞাযতীতি পঞ্ঞত্তি. তত্থ ভগৰা অক্খরেহি সঙ্কাসযতি, পদেহি পকাসযতি, ব্যঞ্জনেহি ৰিৰরতি, আকারেহি ৰিভজতি, নিরুত্তীহি উত্তানীকরোতি, নিদ্দেসেহি পঞ্ঞাপযতীতি. কিং ৰুত্তং হোতি? বুদ্ধা ভগৰন্তো একচ্চে ৰেনেয্যে একস্মিং দেসনে অক্খরেহি অত্থসঙ্কাসনং করোন্তি…পে… নিদ্দেসেহি অত্থপঞ্ঞাপনং করোন্তীতি অযমেত্থ অধিপ্পাযো.

অথ ৰা অক্খরেহি সঙ্কাসযিত্ৰা পদেহি পকাসযতি, ব্যঞ্জনেহি ৰিৰরিত্ৰা আকারেহি ৰিভজতি, নিরুত্তীহি উত্তানীকত্ৰা নিদ্দেসেহি পঞ্ঞাপযতি. কিং ৰুত্তং হোতি? এৰরূপেন ধম্মদেসনেন একচ্চেসু ঠানেসু একচ্চানং ৰেনেয্যানং ৰিনযতীতি.

অথ ৰা অক্খরেহি উগ্ঘাটযিত্ৰা পদেহি পকাসেন্তো ৰিনযতি উগ্ঘটিতঞ্ঞুং, ব্যঞ্জনেহি ৰিৰরিত্ৰা আকারেহি ৰিভজন্তো ৰিনযতি ৰিপঞ্চিতঞ্ঞুং, নিরুত্তীহি উত্তানীকত্ৰা নিদ্দেসেহি পঞ্ঞাপেন্তো ৰিনযতি নেয্যং. ইতি ৰেনেয্যৰসেনপি যোজেতব্বমেৰ.

অত্থতো পনেত্থ কতমো ব্যঞ্জনপাঠো, কতমো অত্থপাঠোতি? বুদ্ধানং ভগৰন্তানং ধম্মং দেসেন্তানং যো অত্থাৰগমকো সৰিঞ্ঞত্তিকসদ্দো, সো ব্যঞ্জনপাঠো. যো তেন অভিসমেতব্বো লক্খণরসাদিসহিতো ধম্মো, সো অত্থপাঠোতি ৰেদিতব্বো. পুনপি সন্ধাযভাসিতো ব্যঞ্জনভাসিতো সাৰসেসপাঠো অনৰসেসপাঠো নীতো নেয্যোতি ছব্বিধো পাঠো. তত্থ অনেকত্থৰত্তা সন্ধাযভাসিতো ‘‘মাতরং পিতরং হন্ত্ৰা, রাজানো দ্ৰে চ খত্তিযে’’তি এৰমাদি (ধ. প. ২৯৪). একত্থৰত্তা ব্যঞ্জনভাসিতো ‘মনোপুব্বঙ্গমা ধম্মা’’তি এৰমাদি (ধ. প. ১.২; নেত্তি. ৮৯, ৯২; পেটকো. ১৪). সাৰসেসো ‘‘সব্বং, ভিক্খৰে, আদিত্ত’’ন্তি এৰমাদি (মহাৰ. ৫৪; সং. নি. ৪.২৮). ৰিপরীতো অনৰসেসো ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তী’’তি এৰমাদি (মহানি. ১৫৬; চূল়নি. মোঘরাজমাণৰপুচ্ছানিদ্দেসো ৮৫; পটি. ম. ৩.৫). যথা ৰচনং, তথা অৰগন্তব্বো নীতো ‘‘অনিচ্চং দুক্খং অনত্তা’’তি এৰমাদি. যুত্তিযা অনুস্সরিতব্বো নেয্যো ‘‘একপুগ্গলো ভিক্খৰে’’তি এৰমাদি (অ. নি. ১.১৭০).

অত্থো পন অনেকপ্পকারো পাঠত্থো সভাৰত্থো ঞাযত্থো পাঠানুরূপো নপাঠানুরূপো সাৰসেসত্থো নিরৰসেসত্থো নীতত্থো নেয্যত্থো ইচ্চাদি. তত্থ যো অপ্পস্সত্থস্স ঞাপনত্থমুচ্চারিযতে, সো পাঠত্থো ‘‘সাত্থং সব্যঞ্জন’’ন্তিআদীসু (পারা. ১; দী. নি. ১.১৯০) ৰিয. রূপারূপধম্মানং লক্খণরসাদিসভাৰত্থো ‘‘সম্মাদিট্ঠিং ভাৰেতী’’তিআদীসু (ৰিভ. ৪৮৫; সং. নি. ৫.৩) ৰিয. যো ঞাযমানো হিতায সংৰত্ততি, সো ঞাতুং অরহতীতি ঞাযত্থো – ‘‘অত্থৰাদী ধম্মৰাদী’’তিআদীসু (দী. নি. ১.৯, ১৯৪; ৩.২৩৮; ম. নি. ১.৪১১) ৰিয. যথাপাঠং ভাসিতো পাঠানুরূপো ‘‘চক্খু, ভিক্খৰে, পুরাণকম্ম’’ন্তি (সং. নি. ৪.১৪৬) ভগৰতা ৰুত্তং. তস্মা চক্খুমপি কম্মন্তি. ব্যঞ্জনচ্ছাযায অত্থং পটিবাহযমানেন ৰুত্তো অত্থো নপাঠানুরূপো, সো পাঠতো অননুঞ্ঞাতো অকতপটিক্খেপো ৰিযুত্তো. সো চ সঙ্গহেতব্বম্পি অসঙ্গহেত্ৰা, পরিৰজ্জেতব্বম্পি ৰা কিঞ্চি অপরিৰজ্জেত্ৰা পরিসেসং কত্ৰা ৰুত্তো সাৰসেসত্থো ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং (সং. নি. ৪.৬০; মহানি. ১০৭). সব্বে তসন্তি দণ্ডস্স, সব্বে ভাযন্তি মচ্চুনো’’তিআদীসু (ধ. প. ১২৯) ৰিয. ৰিপরীতো নিরৰসেসত্থো ‘‘সন্ধাৰিতং সংসরিতং মমঞ্চেৰ তুম্হাকঞ্চ (দী. নি. ২.১৫৫; মহাৰ. ২৮৭; নেত্তি. ১১৪). তত্র, ভিক্খৰে, কো মন্তা কো সদ্ধাতা…পে… অঞ্ঞত্র দিট্ঠপদেহী’’তিআদীসু (অ. নি. ৭.৬৬) ৰিয. সদ্দৰসেনেৰ ৰেদিতব্বো নীতত্থো ‘‘রূপা সদ্দা রসা গন্ধা, ফোট্ঠব্বা চ মনোরমা’’তিআদীসু (সং. নি. ১.১৫১, ১৬৫; মহাৰ. ৩৩) ৰিয. সম্মুতিৰসেন ৰেদিতব্বো নেয্যত্থো ‘‘চত্তারোমে, ভিক্খৰে, ৰলাহকূপমা পুগ্গলা’’তিআদীসু (অ. নি. ৪.১০১-১০২) ৰিয. এৰমিধ পাঠঞ্চ অত্থঞ্চ ৰিৰরিত্ৰা ঠিতো অসংহীরো ভৰতি পরৰাদীহি দীঘরত্তং তিত্থৰাসেন.

ইতি অসংহীরভাৰেন যাৰ আগমাধিগমসম্পদং, তাৰ ৰত্তুং সক্কোতি. সঙ্খেপৰিত্থারনযেন হেতুদাহরণাদীহি অৰবোধযিতুং সমত্থো. এৰংৰিধো অত্তানঞ্চ পরঞ্চ সোধেতুং সমত্থভাৰেন দুস্সীল্যদিট্ঠিমলৰিরহিতত্তা সুচি. দুস্সীলো হি অত্তানং উপহনতি, তেন নাদেয্যৰাচো চ ভৰতি সব্যোহারমানো ইধ নিচ্চাতুরো ৰেজ্জোৰ. দুদ্দিট্ঠি পরং উপহনতি, নাৰস্সযো চ ভৰতি ৰাল়গহাকুলো ইৰ কমলসণ্ডো. উভযৰিপন্নো পন সব্বথাপি অনুপাসনীযো ভৰতি গূথগতমিৰ ছৰালাতং গূথগতো ৰিয চ কণ্হসপ্পো. উভযসম্পন্নো পন সব্বথাপি উপাসনীযো সেৰিতব্বো চ ৰিঞ্ঞূহি, নিরুপদ্দৰো ইৰ রতনাকরো, এৰং ভূতো এৰং অমচ্ছরো অহীনাচরিযমুট্ঠি. সুত্তসুত্তানুলোমআচরিযৰাদঅত্তনোমতিসঙ্খাতানঞ্চ চতুন্নং অপরিচ্চাগী, তেসং ৰসেন ব্যাখ্যাতো.

‘‘একংসৰচনং একং, ৰিভজ্জৰচনং পদং;

ততিযং পটিপুচ্ছেয্য, চতুত্থং পন ঠাপযে’’তি.

এতেসং ৰা অপরিচ্চাগী. ততো এৰ সোতূনং হিতে নিযুত্তত্তা নেসং অৰবোধনং পতি অকিলাসু ভৰতীতি. আহ চেত্থ –

‘‘পাঠত্থৰিদসংহীরো, ৰত্তা সুচি অমচ্ছরো;

চতুন্নং অপরিচ্চাগী, দেসকস্স হিতান্ৰিতো’’তি.

এত্থ দেসকস্সাতি দেসকো অস্স, ভৰেয্যাতি অত্থো. হিতান্ৰিতোতি হিতে অনুগতো হিতচিত্তো. সো এসো সুচিত্তা পিযো, চতুন্নং অপরিচ্চাগিত্তা গরু, অসংহীরত্তা ভাৰনীযো, দেসকত্তা ৰত্তা, হিতান্ৰিতত্তা ৰচনক্খমো, পাঠত্থৰিদত্তা গম্ভীরকথং কত্তা, অমচ্ছরত্তা ন চাট্ঠানে নিযোজকো ইতি –

‘‘পিযো গরু ভাৰনীযো, ৰত্তা চ ৰচনক্খমো;

গম্ভীরঞ্চ কথং কত্তা, নো চাট্ঠানে নিযোজকো’’তি. (অ. নি. ৭.৩৭; নেত্তি. ১১৩);

‘‘অভিহিতো দেসকো সো, তাৰ দানি অভিধীযতে’’.

তত্থ ধম্মগরুত্তা কথং ন পরিভৰতি, আচরিযগরুত্তা কথিকং ন পরিভৰতি, সদ্ধাপঞ্ঞাদিগুণপটিমণ্ডিতত্তা অত্তানং ন পরিভৰতি, অসঠামাযাৰিত্তা অমতাভিমুখত্তা চ অৰিক্খিত্তচিত্তো ভৰতি, সুমেধত্তা যোনিসো মনসি করোতীতি. ৰুত্তঞ্হেতং –

‘‘পঞ্চহি, ভিক্খৰে, ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্তং. কতমেহি পঞ্চহি? ন কথং পরিভোতি, ন কথিকং পরিভোতি, ন অত্তানং পরিভোতি, অৰিক্খিত্তচিত্তো ধম্মং সুণাতি একগ্গচিত্তো, যোনিসো মনসি করোতী’’তি (অ. নি. ৫.১৫১).

তংলক্খণপ্পত্তত্তা ভাৰনং ভজতীতি. আহ চেত্থ –

‘‘ধম্মাচরিযগরু সদ্ধাপঞ্ঞাদিগুণমণ্ডিতো;

অসঠামাযাৰিকস্স, সুমেধো অমতাভিমুখো’’. –

ইতি ৰত্তা চ সোতা চ.

এৰং ৰুত্তপ্পকারং ব্যঞ্জনঞ্চ অত্থঞ্চ দস্সেত্ৰা ইদানি যো অতিঅগ্গং কত্ৰা কথিতত্তা মহাসমুদ্দমহাপথৰী ৰিয মহা চ সো নিদ্দেসো চাতি মহানিদ্দেসো, তং মহানিদ্দেসং ৰণ্ণযিস্সামি.

তদেতং মহানিদ্দেসং অত্থসম্পন্নং ব্যঞ্জনসম্পন্নং গম্ভীরং গম্ভীরত্থং লোকুত্তরপ্পকাসকং সুঞ্ঞতপ্পটিসংযুত্তং পটিপত্তিমগ্গফলৰিসেসসাধনং পটিপত্তিপটিপক্খপটিসেধনং যোগাৰচরানং ঞাণৰররতনাকরভূতং ধম্মকথিকানং ধম্মকথাৰিলাসৰিসেসহেতুভূতং সংসারভীরুকানং দুক্খনিস্সরণতদুপাযদস্সনেন অস্সাসজননত্থং তপ্পটিপক্খনাসনত্থঞ্চ গম্ভীরত্থানঞ্চ অনেকেসং সুত্তন্তপদানং অত্থৰিৰরণেন সুজনহদযপরিতোসজননত্থং, তথাগতেন অরহতা সম্মাসম্বুদ্ধেন সব্বত্থ অপ্পটিহতসব্বঞ্ঞুতঞ্ঞাণমহাদীপোভাসেন সকলজনৰিত্থতমহাকরুণাসিনেহেন ৰেনেয্যজনহদযগতকিলেসন্ধকারৰিধমনত্থং সমুজ্জলিতস্স সদ্ধম্মমহাপদীপস্স তদধিপ্পাযৰিকাসনসিনেহপরিসেকেন পঞ্চৰস্সসহস্সমতিচিরসমুজ্জলনমিচ্ছতা লোকানুকম্পকেন সত্থুকপ্পেন ধম্মরাজস্স ধম্মসেনাপতিনা আযস্মতা সারিপুত্তত্থেরেন ভাসিতং সুত্ৰা আযস্মা আনন্দো পঠমমহাসঙ্গীতিকালে যথাসুতমেৰ সঙ্গহং আরোপেসি.

সো পনেস ৰিনযপিটকং সুত্তন্তপিটকং অভিধম্মপিটকন্তি তীসু পিটকেসু সুত্তন্তপিটকপরিযাপন্নো, দীঘনিকাযো মজ্ঝিমনিকাযো সংযুত্তনিকাযো অঙ্গুত্তরনিকাযো খুদ্দকনিকাযোতি পঞ্চসু মহানিকাযেসু খুদ্দকমহানিকাযপরিযাপন্নো, সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লন্তি নৰসু সত্থুসাসনঙ্গেসু যথাসম্ভৰং গাথঙ্গৰেয্যাকরণঙ্গদ্ৰযসঙ্গহিতো.

‘‘দ্ৰাসীতি বুদ্ধতো গণ্হিং, দ্ৰেসহস্সানি ভিক্খুতো;

চতুরাসীতি সহস্সানি, যে মে ধম্মা পৰত্তিনো’’তি. (থেরগা. ১০২৭) –

ধম্মভণ্ডাগারিকত্থেরেন পঞ্চসু ঠানেসু এতদগ্গং আরোপিতেন পটিঞ্ঞাতানং চতুরাসীতিযা ধম্মক্খন্ধসহস্সানং ভিক্খুতো গহিতেসু দ্ৰীসু ধম্মক্খন্ধসহস্সেসু অনেকসতধম্মক্খন্ধসঙ্গহিতো. তস্স দ্ৰে ৰগ্গা অট্ঠকৰগ্গো পারাযনৰগ্গো খগ্গৰিসাণসুত্তঞ্চ, একেকস্মিং ৰগ্গে সোল়স সোল়স কত্ৰা খগ্গৰিসাণসুত্তঞ্চাতি তেত্তিংস সুত্তানি কামসুত্তাদিখগ্গৰিসাণসুত্তপরিযোসানানি. এৰং অনেকধা ৰৰত্থাপিতস্স ইমস্স মহানিদ্দেসস্স অনুপুব্বপদত্থৰণ্ণনং করিস্সামি. অযঞ্হি মহানিদ্দেসো পাঠতো অত্থতো চ উদ্দিসন্তেন নিদ্দিসন্তেন চ সক্কচ্চং উদ্দিসিতব্বো নিদ্দিসিতব্বো চ, উগ্গণ্হন্তেনাপি সক্কচ্চং উগ্গণ্হিতব্বো ধারেতব্বো চ. তং কিস্স হেতু? গম্ভীরত্তা ইমস্স মহানিদ্দেসস্স লোকহিতায লোকে চিরট্ঠিতত্থন্তি.

১. অট্ঠকৰগ্গো

১. কামসুত্তনিদ্দেসৰণ্ণনা

তত্থ কামসুত্তং আদি. তস্মিম্পি ‘‘কামং কামযমানস্সা’’তি গাথা আদি. সা উদ্দেসনিদ্দেসপটিনিদ্দেসৰসেন তিধা ঠিতা. ‘‘কামং কামযমানস্সা’’তি এৰমাদি উদ্দেসো. ‘‘কামাতি উদ্দানতো দ্ৰে কামা – ৰত্থুকামা চ কিলেসকামা চা’’তি নিদ্দেসো. ‘‘কতমে ৰত্থুকামা? মনাপিকা রূপা’’তি এৰমাদি পটিনিদ্দেসো.

১. তত্থ কামন্তি মনাপিযরূপাদিতেভূমকধম্মসঙ্খাতং ৰত্থুকামং. কামযমানস্সাতি ইচ্ছমানস্স. তস্স চেতং সমিজ্ঝতীতি তস্স কামযমানস্স সত্তস্স তং কামসঙ্খাতং ৰত্থু সমিজ্ঝতি চে, সচে সো তং লভতীতি ৰুত্তং হোতি. অদ্ধা পীতিমনো হোতীতি একংসং তুট্ঠচিত্তো হোতি. লদ্ধাতি লভিত্ৰা. মচ্চোতি সত্তো. যদিচ্ছতীতি যং ইচ্ছতি. ইদং পন সঙ্খেপতো পদত্থসম্বন্ধমত্তমেৰ, ৰিত্থারো পন উপরি পাল়িযং আগতনযেনেৰ ৰেদিতব্বো. যথা চ ইমস্মিং, এৰং ইতো পরং সব্বেসুপীতি.

কামাতি উদ্দিসিতব্বপদং. উদ্দানতোতি নিদ্দিসিতব্বপদং. উদ্দানতোতি ৰগ্গৰসেন ‘‘মচ্ছুদ্দানং কিনেয্যা’’তি আদীসু ৰিয. অথ ৰা উপরূপরি দানতো উদ্দানং, উদ্ধং উদ্ধং সোধনতো ব্যৰদানট্ঠেন ৰোদানং ৰিয. ৰিত্থারকরণভাৰেন ৰা. কামা ইতি পাঠসেসং কত্ৰা ৰত্তব্বং. দ্ৰেতি গণনপরিচ্ছেদো, ন একং, ন তযো. ৰত্থুকামা চাতি মনাপিযরূপাদিৰত্থুকামা চ. উপতাপনট্ঠেন ৰিবাধনট্ঠেন চ কিলেসকামা চ. তেসু ৰত্থুকামো পরিঞ্ঞেয্যো, কিলেসকামো পহাতব্বো. তত্থ ৰত্থুকামো কিলেসকামেন পত্থযিতব্বোতি কামীযতীতি কামো. কিলেসকামো ৰত্থুকামানং পচ্চাসীসনস্স কারণভাৰেন কামীযতে অনেনাতি কামো. তত্থ রূপাদিক্খন্ধে সঙ্গহিতো ৰত্থুকামো, সঙ্খারক্খন্ধে সঙ্গহিতো কিলেসকামো. ছহি ৰিঞ্ঞাণেহি ৰিজানিতব্বো ৰত্থুকামো, মনোৰিঞ্ঞাণেন জানিতব্বো কিলেসকামো. কিলেসানং পতিট্ঠট্ঠেন কারণট্ঠেন আরম্মণট্ঠেন চ ৰত্থুকামো.

‘‘নেতে কামা যানি চিত্রানি লোকে, সঙ্কপ্পরাগো পুরিসস্স কামো;

তিট্ঠন্তি চিত্রানি তথেৰ লোকে, অথেত্থ ধীরা ৰিনযন্তি ছন্দ’’ন্তি. (অ. নি. ৬.৬৩);

নন্দমাণৰক- (ধ. প. অট্ঠ. ১.৬৮ উপ্পলৰণ্ণত্থেরীৰত্থু) সোরেয্যসেট্ঠিপুত্তাদীনং (ধ. প. ৪৩) ৰত্থূনি চেত্থ নিদস্সনং. কিলেসকামো তাপনট্ঠেন বাধনট্ঠেন চ সযং কামেতীতি কামো. ৰুত্তম্পি চেতং ‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতী’’তি চ ‘‘রত্তো খো, ব্রাহ্মণ, পাণম্পি হনতি, অদিন্নম্পি আদিযতি, পরদারম্পি গচ্ছতি, মুসাপি ভণতী’’তি (অ. নি. ৩.৫৪) চ এৰমাদি নিদস্সনং.

তমেৰ পটিনিদ্দেসৰসেন ৰিত্থারেত্ৰা ৰত্তুকামো – ‘‘কতমে ৰত্থুকামা’’তিআদিমাহ. তত্থ কতমেতি কথেতুকম্যতাপুচ্ছা. পঞ্চৰিধা হি পুচ্ছা, তাসং ৰিভাগো উপরি পাল়িযংযেৰ আৰি ভৰিস্সতি. তাসু অযং কথেতুকম্যতাপুচ্ছা. তত্থ মনাপিকাতি মনং অপ্পাযন্তি ৰদ্ধেন্তীতি মনাপা, মনাপা এৰ মনাপিকা. রূপাতি কম্মচিত্তউতুআহারসমুট্ঠানৰসেন চতুসমুট্ঠানিকা রূপারম্মণা. রূপযন্তীতি রূপা, ৰণ্ণৰিকারং আপজ্জমানা হদযঙ্গতভাৰং পকাসেন্তীতি অত্থো.

তত্থ কেনট্ঠেন রূপন্তি? রুপ্পনট্ঠেন. ৰুত্তঞ্হেতং ভগৰতা –

‘‘কিঞ্চ, ভিক্খৰে, রূপং ৰদেথ? রুপ্পতীতি খো, ভিক্খৰে, তস্মা ‘রূপ’ন্তি ৰুচ্চতি. কেন রুপ্পতি? সীতেনপি রুপ্পতি, উণ্হেনপি রুপ্পতি, জিঘচ্ছাযপি রুপ্পতি, পিপাসাযপি রুপ্পতি, ডংসমকসৰাতাতপসরীসপসম্ফস্সেনপি রুপ্পতি. রুপ্পতীতি খো, ভিক্খৰে, তস্মা ‘রূপ’ন্তি ৰুচ্চতী’’তি (সং. নি. ৩.৭৯).

তত্থ রুপ্পতীতি কুপ্পতি ঘট্টীযতি পীল়ীযতি, ভিজ্জতীতি অত্থো. সীতেন তাৰ রুপ্পনং লোকন্তরিকনিরযে পাকটং. মহিংসকরট্ঠাদীসুপি হিমপাতসীতলেসু পদেসেসু এতং পাকটমেৰ. তত্থ হি সত্তা সীতেন ভিন্নছিন্নসরীরা জীৰিতক্খযম্পি পাপুণন্তি.

উণ্হেন রুপ্পনং অৰীচিমহানিরযে পাকটং. তত্থ হি তত্তায লোহপথৰিযা নিপজ্জাপেত্ৰা পঞ্চৰিধবন্ধনাদিকরণকালে সত্তা মহাদুক্খং অনুভৰন্তি.

জিঘচ্ছায রুপ্পনং পেত্তিৰিসযে চেৰ দুব্ভিক্খকালে চ পাকটং. পেত্তিৰিসযস্মিঞ্হি সত্তা দ্ৰে তীণি বুদ্ধন্তরানি কিঞ্চিদেৰ আমিসং হত্থেন গহেত্ৰা মুখে পক্খিপন্তা নাম ন হোন্তি, অন্তোউদরং আদিত্তসুসিররুক্খো ৰিয হোতি. দুব্ভিক্খে কঞ্জিকমত্তম্পি অলভিত্ৰা মরণসত্তানং পমাণং নত্থি.

পিপাসায রুপ্পনং কালকঞ্জিকাদীসু পাকটং. তত্থ হি সত্তা দ্ৰে তীণি বুদ্ধন্তরানি হদযতেমনমত্তং ৰা জিৰ্হাতেমনমত্তং ৰা উদকবিন্দুম্পি লদ্ধুং ন সক্কোন্তি. ‘‘পানীযং পিৰিস্সামা’’তি নদিং গতানং জলং ৰালুকাতলং সম্পজ্জতি. মহাসমুদ্দং পক্খন্তানম্পি সমুদ্দো পিট্ঠিপাসাণোযেৰ হোতি. তে সুস্সন্তা বলৰদুক্খপীল়িতা ৰিরৰন্তি. ডংসাদীহি রুপ্পনং ডংসমক্খিকাদিবহুলেসু পদেসেসু পাকটং. তং পন – ‘‘কতমং তং রূপং সনিদস্সনং? সপ্পটিঘ’’ন্তি আদিনা নযেন অভিধম্মে (ধ. স. ৬৫৬, ৬৫৮) ৰিত্থারিতমেৰ.

সপ্পন্তীতি সদ্দা, উদাহরীযন্তীতি অত্থো. উতুচিত্তৰসেন দ্ৰিসমুট্ঠানিকা সদ্দা. গন্ধযন্তীতি গন্ধা, অত্তনো ৰত্থূনি সূচযন্তীতি অত্থো. রসন্তি তে সত্তাতি রসা, অস্সাদেন্তীতি অত্থো. ফুসীযন্তীতি ফোট্ঠব্বা. এতে গন্ধাদযো চতুসমুট্ঠানিকাৰ. তেসং ৰিভাগো অভিধম্মে (ধ. স. ৬২২-৬২৪) ৰিত্থারিতোযেৰ.

তমেৰত্থং ৰিত্থারৰসেন দস্সেন্তো ‘‘অত্থরণা পাৰুরণা’’তিআদিমাহ. তত্থ অত্থরিত্ৰা নিপজ্জিযন্তীতি অত্থরণা. সরীরং ৰেঠেত্ৰা পারুপীযন্তীতি পাৰুরণা. অন্তোজাতাদযো চত্তারো দাসী চ দাসো চ দাসিদাসা. খেত্তং নাম যস্মিং পুব্বণ্ণং রুহতি. ৰত্থু নাম যস্মিং অপরণ্ণং রুহতি. যত্থ ৰা উভযম্পি রুহতি, তং খেত্তং. তদত্থায কতভূমিভাগো ৰত্থু. খেত্তৰত্থুসীসেন চেত্থ ৰাপীতল়াকাদীনিপি সঙ্গহিতানি. হিরঞ্ঞন্তি কহাপণো. সুৰণ্ণন্তি জাতরূপং. তেসং গহণেন লোহমাসকো জতুমাসকো দারুমাসকোতি সব্বেপি সঙ্গহং গচ্ছন্তি. গামনিগমরাজধানিযোতি এককুটিকাদি গামো. আপণযুত্তো নিগমো. একস্স রঞ্ঞো আণাপৰত্তিট্ঠানং রাজধানী. রট্ঠন্তি জনপদেকদেসং. জনপদোতি কাসিকোসলাদিজনপদো. কোসোতি চতুব্বিধো কোসো – হত্থী অস্সো রথো পত্তি. কোট্ঠাগারন্তি তিৰিধং কোট্ঠাগারং – ধনকোট্ঠাগারং ধঞ্ঞকোট্ঠাগারং ৰত্থকোট্ঠাগারং. যং কিঞ্চীতি অনৰসেসপরিযাদানৰচনং. রজনীযন্তি রঞ্জেতুং যুত্তট্ঠেন.

ইতো পরং তিকৰসেন দস্সেতুং অতীতত্তিকঅজ্ঝত্তত্তিকহীনত্তিকওকাসত্তিকসংযোগত্তিককামাৰচরত্তিকৰসেন ছত্তিকে আহ. তত্থ অতীতত্তিকে তাৰ অত্তনো সভাৰং উপ্পাদাদিক্খণং ৰা পত্ৰা অতিক্কন্তাতি অতীতা. তদুভযম্পি ন আগতাতি অনাগতা. তং তং কারণং পটিচ্চ উপ্পন্নাতি পচ্চুপ্পন্না. ইদং ভৰেন পরিচ্ছন্নং. পটিসন্ধিতো হি পট্ঠায অতীতভৰেসু নিব্বত্তা অনন্তরভৰে ৰা নিব্বত্তা হোন্তু কপ্পকোটিসতসহস্সমত্থকে ৰা, সব্বে অতীতাযেৰ নাম. চুতিতো পট্ঠায অনাগতভৰেসু নিব্বত্তনকা কামা অনন্তরভৰে ৰা নিব্বত্তন্তু কপ্পকোটিসতসহস্সমত্থকে ৰা, সব্বে অনাগতাযেৰ নাম. চুতিপটিসন্ধিঅন্তরে পৰত্তা কামা পচ্চুপ্পন্না নাম.

অজ্ঝত্তত্তিকে ‘‘এৰং পৰত্তমানা মযং অত্তাতি গহণং গমিস্সামা’’তি ইমিনা ৰিয অধিপ্পাযেন অত্তানং অধিকারং কত্ৰা পৰত্তা অত্তনো সন্তানে পৰত্তা পাটিপুগ্গলিকা কামা অজ্ঝত্তা কামা নাম. ততো বহিভূতা পন ইন্দ্রিযবদ্ধা ৰা অনিন্দ্রিযবদ্ধা ৰা বহিদ্ধা নাম. ততিযপদং তদুভযৰসেন ৰুত্তং.

হীনত্তিকে হীনাতি লামকা. মজ্ঝিমাতি হীনপণীতানং মজ্ঝে ভৰাতি মজ্ঝিমা. অৰসেসা উত্তমট্ঠেন পণীতা. অপি চ উপাদাযুপাদায হীনমজ্ঝিমপণীততা ৰেদিতব্বা. নেরযিকানঞ্হি কামা কোটিপ্পত্তা হীনা নাম. তে উপাদায তিরচ্ছানেসু নাগসুপণ্ণানং কামা পণীতা নাম. সেসতিরচ্ছানগতানং কামা মজ্ঝিমা নাম. তেসম্পি কামা হীনা. তে উপাদায মহেসক্খপেতানং কামা পণীতা নাম. অৰসেসানং কামা মজ্ঝিমা নাম. তেসম্পি হীনা. তে উপাদায জানপদানং কামা পণীতা নাম. পচ্চন্তৰাসীনং কামা মজ্ঝিমা নাম. তেসম্পি হীনা. তে উপাদায গামভোজকানং কামা পণীতা নাম. তেসং পরিচারিকানং কামা মজ্ঝিমা নাম. তেসম্পি হীনা. তে উপাদায জনপদসামিকানং কামা পণীতা নাম. তেসং পরিচারিকানং কামা মজ্ঝিমা নাম. তেসম্পি হীনা. তে উপাদায পদেসরাজূনং কামা পণীতা নাম. তেসং অমচ্চানং কামা মজ্ঝিমা নাম. তেসম্পি হীনা. তে উপাদায চক্কৰত্তিরঞ্ঞো কামা পণীতা নাম. তস্স অমচ্চানং কামা মজ্ঝিমা নাম. তস্সপি হীনা. তে উপাদায ভুম্মদেৰানং কামা পণীতা নাম. তেসং পরিচারিকানং দেৰানং কামা মজ্ঝিমা নাম. তেসম্পি হীনা. তে উপাদায চাতুমহারাজিকানং দেৰানং কামা পণীতাতিআদিনা নযেন যাৰ অকনিট্ঠদেৰানং কামা মত্থকপ্পত্তা পণীতা নাম. এৰং উপাদাযুপাদায হীনমজ্ঝিমপণীততা ৰেদিতব্বা.

ওকাসত্তিকে আপাযিকা কামাতি অৰড্ঢিসঙ্খাতেসু অপগতঅযেসু চতূসু অপাযেসু নিব্বত্তকামা আপাযিকা. মনুস্সেসু নিব্বত্তকামা মানুসিকা. দেৰেসু নিব্বত্তকামা দিব্বা.

সংযোগত্তিকে পচ্চুপট্ঠিতানং কামানং পরিভুঞ্জনতো ঠপেত্ৰা নেরযিকে সেসঅপাযসত্তানং মনুস্সানং চাতুমহারাজিকে দেৰে উপাদায যাৰ তুসিতকাযিকানঞ্চ দেৰানং কামা পচ্চুপট্ঠিতা কামা নাম. পকতিপটিযত্তারম্মণতো অতিরেকেন রমিতুকামতাকালে যথারুচিতং আরম্মণং নিম্মিনিত্ৰা নিম্মিনিত্ৰা রমন্তীতি নিম্মানরতীনং দেৰানং কামা নিম্মিতা কামা নাম. অত্তনো অজ্ঝাসযং ঞত্ৰা পরেহি নিম্মিতে আরম্মণে সেৰন্তীতি পরনিম্মিতৰসৰত্তীনং কামা পরনিম্মিতা কামা নাম. পরিগ্গহিতাতি ‘‘ময্হং এত’’ন্তি গহিতা কামা. অপরিগ্গহিতাতি তথা অপরিগ্গহিতা উত্তরকুরুকানং কামা. মমাযিতাতি তণ্হাৰসেন ‘‘মম এত’’ন্তি গহিতা. অমমাযিতাতি ৰুত্তপটিপক্খা.

সব্বেপি কামাৰচরা ধম্মাতি ‘‘হেট্ঠতো অৰীচিনিরযং পরিযন্তং করিত্ৰা’’তিআদিনা (ধ. স. ১২৮৭) নযেন ৰুত্তেসু কামাৰচরধম্মেসু পরিযাপন্না. তত্রাযং ৰচনত্থো – উদ্দানতো দ্ৰে কামা, ৰত্থুকামো চ কিলেসকামো চাতি. তত্থ কিলেসকামো অত্থতো ছন্দরাগো. ৰত্থুকামো তেভূমকং ৰট্টং. কিলেসকামো চেত্থ কামেতীতি কামো. ইতরো কামীযতীতি. যস্মিং পন পদেসে দুৰিধোপেসো কামো পৰত্তিৰসেন অৰচরতি, সো চতুন্নং অপাযানং মনুস্সানং ছন্নঞ্চ দেৰলোকানং ৰসেন একাদসৰিধো পদেসো কামো এত্থ অৰচরতীতি কামাৰচরো. তত্থ পরিযাপন্নধম্মে সন্ধায ‘‘সব্বেপি কামাৰচরা ধম্মা’’তি ৰুত্তং. অত্তনো সভাৰং ধারেন্তীতি ধম্মা. রূপাৰচরা ধম্মাতি ‘‘হেট্ঠতো ব্রহ্মলোকং পরিযন্তং করিত্ৰা উপরিতো অকনিট্ঠে দেৰে অন্তোকরিত্ৰা’’তিআদিনা (ধ. স. ১২৮৯) নযেন ৰুত্তানং রূপাৰচরধম্মানং ৰসেন সব্বেপি ধম্মা রূপাৰচরা. অরূপাৰচরা ধম্মাতি ‘‘হেট্ঠতো আকাসানঞ্চাযতনুপগে দেৰে পরিযন্তং করিত্ৰা উপরিতো নেৰসঞ্ঞানাসঞ্ঞাযতনুপগে দেৰে অন্তোকরিত্ৰা’’তিআদিনা (ধ. স. ১২৯১) নযেন ৰুত্তা সব্বেপি অরূপাৰচরা ধম্মা. তত্থ রূপে অৰচরন্তীতি রূপাৰচরা. অরূপে অৰচরন্তীতি অরূপাৰচরা. তণ্হাৰত্থুকাতি পতিট্ঠট্ঠেন কারণট্ঠেন চ তণ্হায ৰত্থুভূতা. তণ্হারম্মণাতি তণ্হাপৰত্তিৰসেন তণ্হায আরম্মণভূতা. কামনীযট্ঠেনাতি পচ্চাসীসিতব্বট্ঠেন. রজনীযট্ঠেনাতি রঞ্জেতুং যুত্তট্ঠেন. মদনীযট্ঠেনাতি কুলমদাদিমদং উপ্পাদনীযট্ঠেন.

তত্থ ‘‘কতমে ৰত্থুকামা? মনাপিকা রূপা’’তিআদিং কত্ৰা ‘‘যং কিঞ্চি রজনীযং ৰত্থূ’’তি পরিযোসানং সৰিঞ্ঞাণকঅৰিঞ্ঞাণকৰসেন ৰুত্তং. অৰসেসং একচতুক্কাদিকছত্তিকন্তি ৰেদিতব্বং.

এৰং ৰত্থুকামং দস্সেত্ৰা কিলেসকামং দস্সেতুং ‘‘কতমে কিলেসকামা’’তিআদিমাহ. তত্থ ছন্দোতি দুব্বলরাগো. রাগোতি ততো বলৰতরো. উপরি তযোপি রাগা ইমেহি বলৰতরা. কামেসূতি পঞ্চসু কামগুণেসু. কামচ্ছন্দোতি কামসঙ্খাতো ছন্দো, ন কত্তুকম্যতাছন্দো, ন ধম্মচ্ছন্দো. কামনৰসেন রজ্জনৰসেন চ কামোযেৰ রাগো কামরাগো. কামনৰসেন নন্দনৰসেন চ কামোযেৰ নন্দী কামনন্দী. এৰং সব্বত্থ কামত্থং ৰিদিত্ৰা তণ্হাযনট্ঠেন কামতণ্হা. সিনেহনট্ঠেন কামস্নেহো. পরিডয্হনট্ঠেন কামপরিল়াহো. মুচ্ছনট্ঠেন কামমুচ্ছা. গিলিত্ৰা পরিনিট্ঠাপনট্ঠেন কামজ্ঝোসানং. ৰট্টস্মিং ওঘেহি ওসীদাপেতীতি কামোঘো. ৰট্টস্মিং যোজেতীতি কামযোগো. দল়্হৰসেন তণ্হাদিট্ঠিগ্গহণং উপাদানং. চিত্তং নীৰরতি পরিযোনন্ধতীতি নীৰরণং.

অদ্দসন্তি অদ্দক্খিং. কামাতি আলপনং. তেতি তৰ. মূলন্তি পতিট্ঠং. সঙ্কপ্পাতি পরিকপ্পেন. ন তং সঙ্কপ্পযিস্সামীতি তং পরিকপ্পনং ন করিস্সামি. ন হোহিসীতি ন ভৰিস্সসি.

ইচ্ছমানস্সাতি পচ্চাসীসন্তস্স. সাদিযমানস্সাতি অস্সাদিযমানস্স. পত্থযমানস্সাতি পত্থনং উপ্পাদেন্তস্স. পিহযমানস্সাতি পাপুণিতুং ইচ্ছং উপ্পাদেন্তস্স. অভিজপ্পমানস্সাতি তণ্হাৰসেন তিত্তিং উপ্পাদেন্তস্স. অথ ৰা অভিৰদন্তস্স.

খত্তিযস্স ৰাতিআদি চতুজ্জাতিৰসেন ৰুত্তং. গহট্ঠস্স ৰা পব্বজিতস্স ৰাতি লিঙ্গৰসেন ৰুত্তং. দেৰস্স ৰা মনুস্সস্স ৰাতি উপপত্তিৰসেন ৰুত্তং. ইজ্ঝতীতি নিপ্ফজ্জতি. সমিজ্ঝতীতি সম্মা নিপ্ফজ্জতি. ইজ্ঝতি ৰিসেসরূপপটিলাভৰসেন. লভতি দস্সনীযরূপপটিলাভৰসেন. পটিলভতি পসাদনীযরূপপটিলাভৰসেন. অধিগচ্ছতি সণ্ঠানরূপপটিলাভৰসেন. ৰিন্দতি ছৰিপ্পসাদরূপপটিলাভৰসেন. অথ ৰা পুঞ্ঞমহত্তেন ইজ্ঝতি. জাতিমহত্তেন লভতি. ইস্সরিযমহত্তেন পটিলভতি. সুখমহত্তেন অধিগচ্ছতি. সম্পত্তিমহত্তেন ৰিন্দতীতি.

একংসৰচনন্তি এককোট্ঠাসৰচনং. ‘‘একংসং চীৰরং কত্ৰা (পারা. ৩৪৯, ৩৬৭), একংসব্যাকরণীযো পঞ্হো’’তিআদীসু (দী. নি. ৩.৩১২; অ. নি. ৪.৪২) ৰিয অনেকংসগহণপটিক্খেপো. নিস্সংসযৰচনন্তি সংসযৰিরহিতৰচনং, সন্দেহপটিক্খেপৰচনন্তি অত্থো. নিক্কঙ্খাৰচনন্তি ‘‘কথমিদং কথমিদ’’ন্তি কঙ্খাপটিক্খেপৰচনং. অদ্ৰেজ্ঝৰচনন্তি দ্ৰিধাভাৰং দ্ৰেজ্ঝং, তংঅভাৰেন অদ্ৰেজ্ঝৰচনং. দ্ৰিধাভাৰৰিরহিতং ‘‘অদ্ৰেজ্ঝৰচনা বুদ্ধা’’তিআদীসু ৰিয ৰিমতিপটিক্খেপো. অদ্ৰেল়্হকৰচনন্তি দ্ৰিহদযাভাৰেন অদ্ৰেল়্হকং. ‘‘ইতিহাস, ইতিহাসা’’তি দ্ৰেল়্হকপটিক্খেপৰচনং. নিযোগৰচনন্তি একস্মিং অত্থে দ্ৰে ন যুজ্জন্তীতি নিযোগৰচনং দ্ৰিধাপথপটিক্খেপো. অঞ্ঞত্থ পন ‘‘নিযোগা অনাগতারম্মণা নত্থী’’তি আগতং. অপণ্ণকৰচনন্তি পলাসরহিতং সারৰচনং অৰিরদ্ধকারণং ‘‘অপণ্ণকং ঠানমেকে’’তিআদীসু (জা. ১.১.১) ৰিয, অপণ্ণকমণি ৰিয সপ্পতিট্ঠৰচনং. অৰত্থাপনৰচনমেতন্তি এতং ৰচনং ওতরিত্ৰা পতিট্ঠিতং সন্তিট্ঠাপনং ঠপনং.

যানি ইমস্মিং মহানিদ্দেসে ৰিভত্তিং আরোপিতানি পদানি, তানি ৰিভত্তিং গচ্ছন্তানি তীহি কারণেহি ৰিভত্তিং গচ্ছন্তি, নানা হোন্তানি চতূহি কারণেহি নানা ভৰন্তি. অপরদীপনা পনেত্থ দ্ৰে ঠানানি গচ্ছন্তি. কথং? তানি হি ব্যঞ্জনৰসেন উপসগ্গৰসেন অত্থৰসেন ৰাতি ইমেহি তীহি কারণেহি ৰিভত্তিং গচ্ছন্তি. তত্থ ‘‘কোধো কুজ্ঝনা কুজ্ঝিতত্তং, দোসো দুস্সনা দুস্সিতত্ত’’ন্তি (ধ. স. ১০৬৬) এৰং ব্যঞ্জনৰসেন ৰিভত্তিগমনং ৰেদিতব্বং. তত্থ হি একোৰ কোধো ব্যঞ্জনৰসেন এৰং ৰিভত্তিং লভতি. ‘‘ইজ্ঝতি সমিজ্ঝতি লভতি পটিলভতি গচ্ছতি অধিগচ্ছতী’’তি এৰং পন উপসগ্গৰসেন ৰিভত্তিগমনং ৰেদিতব্বং. ‘‘পণ্ডিচ্চং কোসল্লং নেপুঞ্ঞং ৰেভব্যা চিন্তা উপপরিক্খা’’তি (ধ. স. ১৬) এৰং অত্থৰসেন ৰিভত্তিগমনং ৰেদিতব্বং.

তেসু পীতিপদনিদ্দেসে তাৰ ইমা তিস্সো ৰিভত্তিযো লব্ভন্তি. পীতি পামোজ্জন্তি হি ব্যঞ্জনৰসেন ৰিভত্তিগমনং হোতি. আমোদনা পমোদনা পহাসোতি উপসগ্গৰসেন. ৰিত্তি তুট্ঠি ওদগ্যং অত্তমনতাতি অত্থৰসেন. ইমিনা নযেন সব্বপদনিদ্দেসেসু ৰিভত্তিগমনং ৰেদিতব্বং.

নানা হোন্তানিপি নামনানত্তেন লক্খণনানত্তেন কিচ্চনানত্তেন পটিক্খেপনানত্তেনাতি ইমেহি চতূহি কারণেহি নানা হোন্তি. তত্থ ‘‘কতমো তস্মিং সমযে ব্যাপাদো হোতি? যো তস্মিং সমযে দোসো দুস্সনা’’তি এত্থ ব্যাপাদোতি ৰা দোসোতি ৰা দ্ৰেপি এতে কোধো এৰ, নামেন পন নানত্তং গতাতি এৰং নামনানত্তেন নানত্তং ৰেদিতব্বং.

রাসট্ঠেন চ পঞ্চপি খন্ধা একোৰ খন্ধো হোতি. এত্থ পন রূপং রুপ্পনলক্খণং, ৰেদনা ৰেদযিতলক্খণা, সঞ্ঞা সঞ্জাননলক্খণা, চেতনা চেতযিতলক্খণা, ৰিঞ্ঞাণং ৰিজাননলক্খণন্তি ইমিনা লক্খণনানত্তেন পঞ্চক্খন্ধা হোন্তি. এৰং লক্খণনানত্তেন নানত্তং ৰেদিতব্বং.

‘‘চত্তারো সম্মপ্পধানা – ইধ ভিক্খু অনুপ্পন্নানং পাপকানং অকুসলানং ধম্মানং অনুপ্পাদায…পে… চিত্তং পগ্গণ্হাতি পদহতী’’তি (ৰিভ. ৩৯০; দী. নি. ২.৪০২) একমেৰ ৰীরিযং কিচ্চনানত্তেন চতূসু ঠানেসু আগতং. এৰং কিচ্চনানত্তেন নানত্তং ৰেদিতব্বং.

‘‘চত্তারো অসদ্ধম্মা কোধগরুতা, ন সদ্ধম্মগরুতা, মক্খগরুতা, ন সদ্ধম্মগরুতা, লাভগরুতা, ন সদ্ধম্মগরুতা, সক্কারগরুতা, ন সদ্ধম্মগরুতা’’তি এৰমাদীসু (অ. নি. ৪.৪৪) পন পটিক্খেপনানত্তেন নানত্তং ৰেদিতব্বং.

ইমানি পন চত্তারি নানত্তানি ন পীতিযাযেৰ লব্ভন্তি, সব্বেসুপি যথালাভৰসেন লব্ভন্তি. পীতিযা হি পীতীতি নামং, চিত্তস্স চিত্তন্তি নামং. পীতি চ ফরণলক্খণা, ৰেদনা ৰেদযিতলক্খণা, সঞ্ঞা সঞ্জাননলক্খণা, চেতনা চেতযিতলক্খণা, ৰিঞ্ঞাণং ৰিজাননলক্খণং.

তথা পীতি ফরণকিচ্চা, ৰেদনা অনুভৰনকিচ্চা, সঞ্ঞা সঞ্জাননকিচ্চা, চেতনা চেতযিতকিচ্চা, ৰিঞ্ঞাণং ৰিজাননকিচ্চন্তি এৰং কিচ্চনানত্তেন নানত্তং ৰেদিতব্বং. পটিক্খেপনানত্তং পীতিপদে নত্থি.

অলোভাদিনিদ্দেসে পন ‘‘অলোভো অলুব্ভনা অলুব্ভিতত্ত’’ন্তিআদিনা (ধ. স. ৩৫) নযেন লব্ভতীতি এৰং পটিক্খেপনানত্তেন নানত্তং ৰেদিতব্বং. এৰং সব্বপদনিদ্দেসেসু লব্ভমানৰসেন চতুব্বিধম্পি নানত্তং ৰেদিতব্বং.

অপরদীপনা পন পদত্থুতি ৰা হোতি দল়্হীকম্মং ৰাতি এৰং দ্ৰে ঠানানি গচ্ছতি. যট্ঠিকোটিযা উপ্পীল়েন্তেন ৰিয হি সকিমেৰ ‘‘পীতী’’তি ৰুত্তে এতং পদং ফুল্লিতমণ্ডিতৰিভূসিতং নাম ন হোতি, পুনপ্পুনং ব্যঞ্জনৰসেন উপসগ্গৰসেন অত্থৰসেন ‘‘পীতি পামোজ্জং আমোদনা পমোদনা হাসো পহাসো ৰিত্তী’’তি (ধ. স. ৯) ৰুত্তে ফুল্লিতমণ্ডিতৰিভূসিতং নাম হোতি. যথা হি দহরকুমারং নহাপেত্ৰা মনোরমং ৰত্থং পরিদহাপেত্ৰা পুপ্ফানি পিল়ন্ধাপেত্ৰা অক্খীনি অঞ্জেত্ৰা অথস্স নলাটে একমেৰ মনোসিলাবিন্দুং করেয্য, ন তস্স এত্তাৰতা চিত্ততিলকো নাম হোতি, নানাৰণ্ণেহি পন পরিৰারেত্ৰা বিন্দূসু কতেসু চিত্ততিলকো নাম হোতি. এৰং সম্পদমিদং ৰেদিতব্বং. অযং পদত্থুতি নাম.

ব্যঞ্জনৰসেন পন উপসগ্গৰসেন অত্থৰসেন চ পুনপ্পুনং ভণনমেৰ দল়্হীকম্মং নাম. যথা হি ‘‘আৰুসো’’তি ৰা ‘‘ভন্তে’’তি ৰা ‘‘যক্খো’’তি ৰা ‘‘সপ্পো’’তি ৰা ৰুত্তে দল়্হীকম্মং নাম ন হোতি, ‘‘আৰুসো আৰুসো, ভন্তে ভন্তে, যক্খো যক্খো, সপ্পো সপ্পো’’তি ৰুত্তে পন দল়্হীকম্মং নাম হোতি, এৰমেৰ সকিংদেৰ যট্ঠিকোটিযা উপ্পীল়েন্তেন ৰিয ‘‘পীতী’’তি ৰুত্তমত্তে দল়্হীকম্মং নাম ন হোতি, পুনপ্পুনং ব্যঞ্জনৰসেন উপসগ্গৰসেন অত্থৰসেন ‘‘পীতি পামোজ্জং আমোদনা পমোদনা হাসো পহাসো ৰিত্তী’’তি ৰুত্তেযেৰ দল়্হীকম্মং নাম হোতীতি এৰং অপরদীপনা দ্ৰে ঠানানি গচ্ছতি. এতিস্সাপি ৰসেন লব্ভমানকপদনিদ্দেসেসু সব্বত্থ অত্থো ৰেদিতব্বো.

তত্থ পীনযতীতি পীতি. সা সম্পিযাযনলক্খণা, কাযচিত্তপীণনরসা ফরণরসা ৰা, ওদগ্যপচ্চুপট্ঠানা. যা পঞ্চকামগুণপটিসঞ্ঞুত্তাতি যা রূপাদিপঞ্চকামকোট্ঠাসপটিসংযুত্তা পীতি, সা পীনযতীতি পীতি, ইদং সভাৰপদং. পমুদিতস্স ভাৰো পামোজ্জং. আমোদনাকারো আমোদনা. পমোদনাকারো পমোদনা. যথা ৰা ভেসজ্জানং ৰা তেলানং ৰা উণ্হোদকসীতোদকানং ৰা একতো করণং ‘‘মোদনা’’তি ৰুচ্চতি, এৰমযম্পি পীতিধম্মানং একতো করণেন মোদনা. উপসগ্গৰসেন পন মণ্ডেত্ৰা ‘‘আমোদনা পমোদনা’’তি ৰুত্তা.

হাসেতীতি হাসো. পহাসেতীতি পহাসো, হট্ঠপহট্ঠাকারানমেতং অধিৰচনং. ৰিত্তীতি ৰিত্তং, ধনস্সেতং নামং. অযং পন সোমনস্সপচ্চযত্তা ৰিত্তিসরিক্খতায ৰিত্তি. যথা হি ধনিনো ধনং পটিচ্চ সোমনস্সং উপ্পজ্জতি, এৰং পীতিমতোপি পীতিং পটিচ্চ সোমনস্সং উপ্পজ্জতি. তস্মা ‘‘ৰিত্তী’’তি ৰুত্তা. তুট্ঠীতি সভাৰসণ্ঠিতায পীতিযা এতং নামং. পীতিমা পন পুগ্গলো কাযচিত্তানং উগ্গতত্তা অব্ভুগ্গতত্তা ‘‘উদগ্গো’’তি ৰুচ্চতি, উদগ্গস্স ভাৰো ওদগ্যং.

অত্তনো মনতা অত্তমনতা. অনভিরদ্ধস্স হি মনো দুক্খপদট্ঠানত্তা ন অত্তনো মনো নাম হোতি, অভিরদ্ধস্স সুখপদট্ঠানত্তা অত্তনো মনো নাম হোতি, ইতি অত্তনো মনতা অত্তমনতা, সকমনতা, সকমনস্স ভাৰোতি অত্থো. সা পন যস্মা ন অঞ্ঞস্স কস্সচি অত্তনো মনতা, চিত্তস্সেৰ পনেসা ভাৰো চেতসিকো ধম্মো, তস্মা ‘‘অত্তমনতা চিত্তস্সা’’তি ৰুত্তা.

চিত্তৰিচিত্ততায চিত্তং. আরম্মণং মিনমানং জানাতীতি মনো. মানসন্তি মনো এৰ, ‘‘অন্তলিক্খচরো পাসো, য্ৰাযং চরতি মানসো’’তি (মহাৰ. ৩৩; সং. নি. ১.১৫১) হি এত্থ পন সম্পযুত্তকধম্মো ‘‘মানসো’’তি ৰুত্তো.

‘‘কথঞ্হি ভগৰা তুয্হং, সাৰকো সাসনে রতো;

অপ্পত্তমানসো সেক্খো, কালংকযিরা জনে সুতা’’তি. (সং. নি. ১.১৫৯) –

এত্থ অরহত্তং ‘‘মানস’’ন্তি ৰুত্তং. ইধ পন মনো এৰ মানসং, ব্যঞ্জনৰসেন হেতং পদং ৰড্ঢিতং.

হদযন্তি চিত্তং. ‘‘চিত্তং ৰা তে খিপিস্সামি, হদযং ৰা তে ফালেস্সামী’’তি (সু. নি. আল়ৰকসুত্তং; সং. নি. ১.২৩৭; ২৪৬) এত্থ উরো ‘‘হদয’’ন্তি ৰুত্তং. ‘‘হদযা হদযং মঞ্ঞে অঞ্ঞায তচ্ছতী’’তি (ম. নি. ১.৬৩) এত্থ চিত্তং. ‘‘ৰক্কং হদয’’ন্তি (খু. পা. ৩.দ্ৰতিংসাকারো; দী. নি. ২.৩৭৭; ম. নি. ১.১১০) এত্থ হদযৰত্থু. ইধ পন চিত্তমেৰ অব্ভন্তরট্ঠেন ‘‘হদয’’ন্তি ৰুত্তং. তমেৰ পরিসুদ্ধট্ঠেন পণ্ডরং, ভৰঙ্গং সন্ধাযেতং ৰুত্তং. যথাহ – ‘‘পভস্সরমিদং, ভিক্খৰে, চিত্তং, তঞ্চ খো আগন্তুকেহি উপক্কিলেসেহি উপক্কিলিট্ঠ’’ন্তি (অ. নি. ১.৪৯). ততো নিক্খন্তত্তা পন অকুসলম্পি গঙ্গায নিক্খন্তা নদী গঙ্গা ৰিয গোধাৰরিতো নিক্খন্তা গোধাৰরী ৰিয চ ‘‘পণ্ডর’’ন্ত্ৰেৰ ৰুত্তং.

মনো মনাযতনন্তি ইধ পন মনোগ্গহণং মনস্সেৰ আযতনভাৰদীপনত্থং. তেনেতং দীপেতি ‘‘নযিদং দেৰাযতনং ৰিয মনস্স আযতনত্তা মনাযতনং, অথ খো মনো এৰ আযতনং মনাযতন’’ন্তি. তত্থ নিৰাসট্ঠানট্ঠেন আকরট্ঠেন সমোসরণট্ঠানট্ঠেন সঞ্জাতিদেসট্ঠেন কারণট্ঠেন চ আযতনং ৰেদিতব্বং. তথা হি লোকে ‘‘ইস্সরাযতনং, ৰাসুদেৰাযতন’’ন্তিআদীসু নিৰাসট্ঠানং ‘‘আযতন’’ন্তি ৰুচ্চতি. ‘‘সুৰণ্ণাযতনং, রজতাযতন’’ন্তিআদীসু আকরো. সাসনে পন ‘‘মনোরমে আযতনে, সেৰন্তি নং ৰিভঙ্গমা’’তিআদীসু (অ. নি. ৫.৩৮) সমোসরণট্ঠানং. ‘‘দক্খিণাপথো গুন্নং আযতন’’ন্তিআদীসু সঞ্জাতিদেসো. ‘‘তত্র তত্রেৰ সক্খিভব্বতং পাপুণাতি সতি সতিআযতনে’’তিআদীসু (অ. নি. ৩.১০২; ৫.২৩; ম. নি. ৩.১৫৮) কারণং. ইধ পন সঞ্জাতিদেসট্ঠেন সমোসরণঠানট্ঠেন কারণট্ঠেনাতি তিধাপি ৰট্টতি.

ফস্সাদযো হি ধম্মা এত্থ সঞ্জাযন্তীতি সঞ্জাতিদেসট্ঠেনপি এতং আযতনং. বহিদ্ধা রূপসদ্দগন্ধরসফোট্ঠব্বা আরম্মণভাৰেনেত্থ ওসরন্তীতি সমোসরণঠানট্ঠেনপি আযতনং. ফস্সাদীনং পন সহজাতাদিপচ্চযট্ঠেন কারণত্তা কারণট্ঠেনপি আযতনন্তি ৰেদিতব্বং. তদেৰ মননলক্খণে ইন্দট্ঠং কারেতীতি ইন্দ্রিযং, মনো এৰ ইন্দ্রিযং মনিন্দ্রিযং.

ৰিজানাতীতি ৰিঞ্ঞাণং. ৰিঞ্ঞাণমেৰ খন্ধো ৰিঞ্ঞাণক্খন্ধো. তস্স রাসিআদিৰসেন অত্থো ৰেদিতব্বো. ‘‘মহাউদকক্খন্ধোত্ৰেৰ সঙ্খং গচ্ছতী’’তি (অ. নি. ৪.৫১) এত্থ হি রাসট্ঠেন খন্ধো ৰুত্তো. ‘‘সীলক্খন্ধো সমাধিক্খন্ধো’’তিআদীসু (দী. নি. ৩.৫৫৫) গুণট্ঠেন. ‘‘অদ্দসা খো ভগৰা মহন্তং দারুক্খন্ধ’’ন্তি (সং. নি. ৪.২৪১-২৪২) এত্থ পণ্ণত্তিমত্তট্ঠেন. ইধ পন রুল়্হিতো খন্ধো ৰুত্তো. রাসট্ঠেন হি ৰিঞ্ঞাণক্খন্ধস্স একদেসো একং ৰিঞ্ঞাণং. তস্মা যথা রুক্খস্স একদেসং ছিন্দন্তো ‘‘রুক্খং ছিন্দতী’’তি ৰুচ্চতি, এৰমেৰ ৰিঞ্ঞাণক্খন্ধস্স একদেসভূতং একম্পি ৰিঞ্ঞাণং রূল়্হিতো ‘‘ৰিঞ্ঞাণক্খন্ধো’’তি ৰুত্তং.

তজ্জা মনোৰিঞ্ঞাণধাতূতি তেসং ফস্সাদীনং ধম্মানং অনুচ্ছৰিকা মনোৰিঞ্ঞাণধাতু. ইমস্মিঞ্হি পদে একমেৰ চিত্তং মিননট্ঠেন মনো, ৰিজাননট্ঠেন ৰিঞ্ঞাণং, সভাৰট্ঠেন নিস্সত্তট্ঠেন ৰা ধাতূতি তীহি নামেহি ৰুত্তং. সহগতোতি অৰিজহিতো. সহজাতোতি সদ্ধিং নিগ্গতো. সংসট্ঠোতি সংসগ্গো হুত্ৰা ঠিতো. সম্পযুত্তোতি সমং পকারেহি যুত্তো. কতমেহি পকারেহীতি? একুপ্পাদাদীহি. নত্থি কেচি ধম্মা কেহিচি ধম্মেহি সম্পযুত্তাতি? আমন্তা. ইতি হি ইমস্স পঞ্হস্স পটিক্খেপে ‘‘ননু অত্থি কেচি ধম্মা কেহিচি ধম্মেহি সহগতা সহজাতা সংসট্ঠা একুপ্পাদা একনিরোধা একৰত্থুকা একারম্মণা’’তি (কথা. ৪৭৩) এৰং একুপ্পাদতাদীনং ৰসেন সম্পযোগত্থো ৰুত্তো. ইতি ইমেহি একুপ্পাদতাদীহি সমং পকারেহি যুত্তো সম্পযুত্তো. একুপ্পাদোতি একতো উপ্পন্নো, ন ৰিনাতি অত্থো. একনিরোধোতি একতো নিরোধো. একৰত্থুকোতি হদযৰত্থুৰসেন একৰত্থুকো. একারম্মণোতি রূপাদিৰসেন একারম্মণো.

এত্থ সহগতসদ্দো তব্ভাৰে, ৰোকিণ্ণে, আরম্মণে, নিস্সযে, সংসট্ঠেতি পঞ্চসু অত্থেসু দিস্সতি জিনৰচনে. ‘‘যাযং তণ্হা পোনোভৰিকা নন্দিরাগসহগতা’’তি (মহাৰ. ১৪; ৰিভ. ২০৩; ম. নি. ৩.৩৭৪; সং. নি. ৫.১০৮১; পটি. ম. ২.৩০) এত্থ তব্ভাৰে ৰেদিতব্বো, নন্দিরাগভূতাতি অত্থো. ‘‘যা, ভিক্খৰে, ৰীমংসা কোসজ্জসহগতা কোসজ্জসম্পযুত্তা’’তি (সং. নি. ৫.৮৩২) এত্থ ৰোকিণ্ণে, অন্তরন্তরা উপ্পজ্জমানেন কোসজ্জেন ৰোকিণ্ণাতি অযমেত্থ অত্থো. ‘‘লাভী হোতি রূপসহগতানং ৰা সমাপত্তীনং অরূপসহগতানং ৰা সমাপত্তীন’’ন্তি (পু. প. ৩-৬) এত্থ আরম্মণে, রূপারম্মণানং অরূপারম্মণানন্তি অত্থো. ‘‘অট্ঠিকসঞ্ঞাসহগতং সতিসম্বোজ্ঝঙ্গং ভাৰেতী’’তি (সং. নি. ৫.২৩৮) এত্থ নিস্সযে, অট্ঠিকসঞ্ঞং নিস্সায অট্ঠিকসঞ্ঞং ভাৰেত্ৰা পটিলদ্ধন্তি অত্থো. ‘‘ইদং সুখং ইমায পীতিযা সহগতং হোতি সহজাতং সম্পযুত্ত’’ন্তি (ৰিভ. ৫৭৮) এত্থ সংসট্ঠে, সংমিস্সন্তি অত্থো. ইমস্মিম্পি ঠানে সংসট্ঠে আগতো.

সহজাতসদ্দো ‘‘সহজাতং পুরেজাতং পচ্ছাজাত’’ন্তি (পট্ঠ. ১.১.৪৩৫) এত্থ ৰিয সহজাতে. সংসট্ঠসদ্দো ‘‘গিহীহি সংসট্ঠো’’তি চ, ‘‘এৰং সংসট্ঠো, ভন্তে’’তি (সং. নি. ৩.৩) চাতি এৰমাদীসু সংসগ্গে. ‘‘কিসে থূলে ৰিৰজ্জেত্ৰা সংসট্ঠা যোজিতা হযা’’তি (জা. ২.২২.৭০) এত্থ সদিসে.

‘‘পুচিমন্দপরিৰারো, অম্বো তে দধিৰাহন;

মূলং মূলেন সংসট্ঠং, সাখা সাখা নিসেৰরে’’তি. (জা. ১.২.৭২) –

এত্থ উপচিতে. ‘‘চিত্তসংসট্ঠা ধম্মা’’তি (ধ. স. দুকমাতিকা ৫৯) এত্থ চিত্তসম্পযুত্তধম্মে. ইধ পন যো ফলপ্পদানে অৰিযোগধম্মো ৰিনিব্ভোগং অকত্ৰা একুপ্পাদাদিধম্মো হুত্ৰা ‘‘সম্পযুত্তো’’তি ৰুচ্চতি. তংৰিসযো. অথ ৰা ‘‘সহগতো’’তি ৰত্ৰা পচ্ছতো পচ্ছতো আগতসুত্তেন ৰিয সো ন হোতীতি দস্সেতুং ‘‘সহজাতো’’তি ৰুত্তং. একতো উপ্পন্নরূপারূপং ৰিয সোপি ন হোতীতি দস্সেতুং ‘‘সংসট্ঠো’’তি ৰুত্তং.

খীরোদকং ৰিয চ সোপি ন হোতীতি দস্সেতুং ‘‘সম্পযুত্তো’’তি ৰুত্তং. ৰিনিব্ভোগং কাতুং অসক্কুণেয্যট্ঠেন হি সহুপ্পন্না ধম্মা সম্পযুত্তাপি অত্থি খীরতেলং ৰিয. তথা ৰিপ্পযুত্তাপি খীরতো অপনীতং নৰনীতং ৰিয. এৰং লক্খণসম্পযুত্তো একুপ্পাদাদিলক্খণোযেৰ হোতীতি দস্সেতুং ‘‘একুপ্পাদো’’তিআদি ৰুত্তং. এত্থ একুপ্পাদসহজাতানং কিং নানত্তং? উপ্পাদে অন্তরৰিরহিতো একুপ্পাদো. খীরকালমুত্তস্সাপি দধিনো মথনে মথনে পাকটং নৰনীতং ৰিয পুরেভত্তপচ্ছাভত্তৰসেন একদিৰসমেৰ জাতো ৰিয সো ন হোতীতি দস্সেতুং একক্খণে নিব্বত্তোতি সহজাতো. একৰত্থুকোতি পতিট্ঠট্ঠেন একপরিচ্ছেদেন একৰত্থুকো, দ্ৰিন্নং ভিক্খূনং একৰত্থুকতা ৰিয ঠানন্তরৰিরহিতো. একারম্মণোতি অনিযতেকারম্মণো ন চক্খুৰিঞ্ঞাণং ৰিযাতি এৰমেকে ৰণ্ণযন্তি.

মচ্চোতি মূলপদং. রূপাদীসু সত্তো লগ্গো লগ্গিতোতি সত্তো. ৰুত্তঞ্হেতং ‘‘সত্তো সত্তোতি, ভন্তে, ৰুচ্চতি, কিত্তাৰতা নু খো, ভন্তে, ‘সত্তো’তি ৰুচ্চতীতি? রূপে খো, রাধ, যো ছন্দো যো রাগো যা নন্দী যা তণ্হা, তত্র সত্তো তত্র ৰিসত্তো, তস্মা ‘সত্তো’তি ৰুচ্চতী’’তি (সং. নি. ৩.১৬১; মহানি. ৭). সত্তযোগেন ৰা সত্তো. সুগতিদুগ্গতিং নরতীতি নরো. মনুনো পুত্তোতি মানৰো. উপকরণেন সযং পোসযতীতি পোসো. পুং ৰুচ্চতি নিরযো, তং গলতীতি পুগ্গলো. জীৰিতিন্দ্রিযং ধারেতীতি জীৰো. চুতিতো জাতিং গচ্ছতীতি জাগু. জিযতীতি জন্তু. ইন্দ্রিযেন গচ্ছতীতি ইন্দগু. অথ ৰা ইন্দভূতেন কম্মুনা গচ্ছতীতি ইন্দগু. ‘‘হিন্দগূ’’তিপি পাল়ি. হিন্দন্তি মরণং, তং গচ্ছতীতি হিন্দগু. মনুতো জাতোতি মনুজো. যং সাদিযতীতি যং রূপাদিং অস্সাদিযতি. সেসং ৰুত্তনযমেৰ. ইতো পরং ৰুত্তমত্থং নিগমেন্তো তেনাহ ভগৰা –

‘‘কামং কামযমানস্স…পে… লদ্ধা মচ্চো যদিচ্ছতী’’তি;

ইতো পরং এত্তকম্পি অৰত্ৰা ৰিসেসমত্তমেৰ ৰক্খাম.

২. তস্স চে কামযানস্সাতি তস্স পুগ্গলস্স কামে ইচ্ছমানস্স, কামেন ৰা যাযমানস্স. ছন্দজাতস্সাতি জাততণ্হস্স. জন্তুনোতি সত্তস্স. তে কামা পরিহাযন্তীতি তে কামা পরিহাযন্তি চে. সল্লৰিদ্ধোৰ রুপ্পতীতি অথ সো অযোমযাদিনা সল্লেন ৰিদ্ধো ৰিয পীল়ীযতি. ইতো পরং ৰুত্তং ৰজ্জেত্ৰা অৰুত্তেসু যং যং অনুত্তানং, তং তদেৰ কথযিস্সামি.

চক্খুপীণনং আরম্মণং পাপুণনৰসেন যাযতি গচ্ছতি. দস্সনীযৰসেন পিযত্তং আরম্মণৰসেন অপ্পাপেতীতি নিয্যতি. সৰনীযং হুত্ৰা কণ্ণসোতপীণনং আরম্মণৰসেন পরিকড্ঢতীতি ৰুয্হতি. সরিতব্বং হুত্ৰা চিত্তপীণনং আরম্মণৰসেন গহেত্ৰা উপসংহরীযতীতি সংহরীযতি. যথাতি ওপম্মত্থে নিপাতো. হত্থিনা যাযতি গচ্ছতীতি হত্থিযানেন ৰা, ৰাইতি ৰিকপ্পত্থে. অস্সেন যাযতি গচ্ছতীতি অস্সযানেন ৰা. গোযুত্তং ৰয্হাদিযানং গোযানং, তেন গোযানেন. অজযানাদীসুপি এসেৰ নযো. ইট্ঠৰসেন জাতো সঞ্জাতো.

আরম্মণপিযত্তৰসেন নিব্বত্তো অভিনিব্বত্তো. আরম্মণমনাপভাৰেন পাতুভূতো. অথ ৰা কামরাগৰসেন জাতো সঞ্জাতো. কামনন্দিৰসেন নিব্বত্তো অভিনিব্বত্তো. কামতণ্হাৰসেন কামসিনেহৰসেন কামচ্ছন্দৰসেন কামপরিল়াহৰসেন চ পাতুভূতোতি ৰেদিতব্বো.

তে ৰা কামা পরিহাযন্তীতি তে ৰত্থুকামাদযো পরিহাযন্তি ৰিগচ্ছন্তি. সো ৰা কামেহি পরিহাযতীতি এসো খত্তিযাদিপুগ্গলো ৰত্থুকামাদিকামেহি পরিহাযতি ৰিগচ্ছতি ‘‘পুব্বেৰ মচ্চং ৰিজহন্তি ভোগা, মচ্চো ধনে পুব্বতরং জহাতী’’তি (জা. ১.৫.২) এৰমাদীসু ৰিয. কথন্তি কেন পকারেন. তিট্ঠন্তস্সেৰাতি ধরন্তস্সেৰ. তে ভোগেতি তে ৰত্থুকামাদযো ভোগে. রাজানো ৰাতি পথব্যাদিরাজানো. হরন্তীতি গহেত্ৰা গচ্ছন্তি, অপহরন্তি ৰা. চোরা ৰাতি সন্ধিচ্ছেদাদিকা. অগ্গি ৰাতি দাৰগ্গিআদি. দহতীতি ঝাপেতি ভস্মং করোতি. উদকং ৰাতি ওঘাদিউদকং. ৰহতীতি গহেত্ৰা মহাসমুদ্দং পাপেতি. অপ্পিযা ৰাতি অকন্তা অমনাপা. দাযাদা হরন্তীতি দাযজ্জৰিরহিতা অস্সামিকা হরন্তি. নিহিতং ৰাতি নিধানং কত্ৰা ঠপিতং. নাধিগচ্ছতীতি ন ৰিন্দতি ন পটিলভতি, ন পস্সতীতি অত্থো. দুপ্পযুত্তাতি ৰিসমপযোগেন যোজিতা কসিৰাণিজ্জাদিকম্মন্তা. ভিজ্জন্তীতি ভেদং পাপুণন্তি, ন পৰত্তন্তীতি অত্থো. ‘‘ভঞ্জন্তি রথং অযানকা’’তিআদীসু (জা. ২.২১.২৯৬) সম্ভৰো ৰেদিতব্বো.

কুলে ৰা কুলঙ্গারো উপ্পজ্জতীতি খত্তিযাদিকুলে কুলঝাপকো কুলে অন্তিমপুরিসো নিব্বত্ততি. ‘‘কুলঙ্করো’’তিপি পাল়ি. যো তে ভোগে ৰিকিরতীতি যো এসো কুলে পচ্ছিমকো তে হিরঞ্ঞাদিকে ভোগে খেপেতি. ৰিধমতীতি ৰিযোগং করোতি, দূরে খিপতি. ৰিদ্ধংসেতীতি নাসেতি অদস্সনং গমেতি. অথ ৰা ইত্থিধুত্তো হুত্ৰা ৰিকিরতি. সুরাধুত্তো হুত্ৰা ৰিধমতি. অক্খধুত্তো হুত্ৰা ৰিদ্ধংসেতি. ৰিকিরতি ৰা উপ্পন্নং আযং অজাননেন. ৰিধমতি ৰিস্সজ্জনমুখং অজাননেন. ৰিদ্ধংসেতি ঠপিতট্ঠানে আরক্খং অসংৰিধানেনাতি এৰমাদিনা যোজেতব্বং.

অনিচ্চতাযেৰ অট্ঠমীতি ৰিনাসভাৰো এৰ অট্ঠমো. হাযন্তীতি অদস্সনং যন্তি. পরিহাযন্তীতি ন পুন পঞ্ঞাযন্তি. পরিধংসেন্তীতি ঠানতো অপগচ্ছন্তি. পরিপতন্তীতি পগ্ঘরন্তি. অন্তরধাযন্তীতি অন্তরধানং অদস্সনং গচ্ছন্তি. ৰিপ্পলুজ্জন্তীতি চুণ্ণৰিচুণ্ণা হুত্ৰা অপগচ্ছন্তি.

তিট্ঠন্তেৰ তে ভোগেতি তেসং ধনানং ঠিতকালে ‘‘তিট্ঠন্তে নিব্বুতে চাপী’’তি এৰমাদীসু (ৰি. ৰ. ৮০৬) ৰিয. সোতি সো ভোগসামিকো পুগ্গলো. চৰতি দেৰলোকতো. মরতি মনুস্সলোকতো. ৰিপ্পলুজ্জতি নাগসুপণ্ণাদিলোকতো. অথ ৰা হাযতি ধঞ্ঞকোট্ঠাগারৰসেন. পরিহাযতি ধনকোট্ঠাগারৰসেন. পরিধংসতি বলিবদ্দহত্থিঅস্সাদিৰসেন. পরিপততি দাসিদাসৰসেন. অন্তরধাযতি দারাভরণৰসেন. নস্সতি উদকাদিৰসেনাতি একে ৰণ্ণযন্তি.

অযোমযেনাতি কাল়লোহাদিনিব্বত্তেন. সল্লেনাতি কণ্ডেন. অট্ঠিমযেনাতি মনুস্সট্ঠিং ঠপেত্ৰা অৰসেসেন. দন্তমযেনাতি হত্থিদন্তাদিনা. ৰিসাণমযেনাতি গোৰিসাণাদিনা. কট্ঠমযেনাতি ৰেল়ুকট্ঠাদিনা. ৰিদ্ধোতি ৰুত্তপ্পকারসল্লানং অঞ্ঞতরঞ্ঞতরেন পহটো. রুপ্পতীতি ৰিকিরতি, ৰিকারং আপজ্জতি. কুপ্পতীতি চলতি, কোপং উপ্পাদেতি. ঘট্টীযতীতি ঘট্টিতো হোতি. পীল়ীযতীতি পীল়িতো হোতি, লদ্ধপ্পহারো কুপ্পতি. ‘‘ততিযদিৰসে সলাকং পৰেসেত্ৰা ধোৰনকালে ঘট্টীযতি. খারপ্পদানে পীল়ীযতি. পহারধোৰনে ৰা রুপ্পতি. তস্মিং দুক্খুপ্পাদনে কুপ্পতি. সলাকপৰেসনে পীল়ীযতি. খারপ্পদানে ঘট্টীযতী’’তি এৰমেকে ৰণ্ণযন্তি.

ব্যাধিতোতি লদ্ধপ্পহারো হুত্ৰা পীল়িতো. দোমনস্সিতোতি দোমনস্সপ্পত্তো. ৰিপরিণামঞ্ঞথাভাৰাতি পকতিভাৰং জহিত্ৰা অঞ্ঞথাভাৰং উপনীতেন, অন্তোসোসাদি সোকো চ ৰাচাৰিপ্পলাপো পরিদেৰো চ কাযপীল়নাদি দুক্খঞ্চ চিত্তপীল়নাদি দোমনস্সঞ্চ ভুসো আযাসো উপাযাসো চ. এতে ৰুত্তপ্পকারা সোকাদযো উপ্পজ্জন্তি সমুদাচারং গচ্ছন্তি.

৩. ততিযগাথাযং সঙ্খেপত্থো – যো পন ইমে কামে তত্থ ছন্দরাগৰিক্খম্ভনেন ৰা সমুচ্ছেদেন ৰা অত্তনো পাদেন সপ্পস্স সিরং ৰিয পরিৰজ্জেতি, সো ভিক্খু সব্বলোকং ৰিপ্ফারেত্ৰা ঠিতত্তা লোকে ৰিসত্তিকাসঙ্খাতং তণ্হং সতো হুত্ৰা সমতিৰত্ততীতি.

যোতি ৰিভজিতব্বং পদং. যো যাদিসোতিআদীনি তস্স ৰিভজনপদানি. এত্থ চ যস্মা যোতি অত্থপদং. তঞ্চ অনিযমেন পুগ্গলং দীপেতি. তস্মা তস্স অত্থং দস্সেন্তো অনিযমেন পুগ্গলদীপকং যো-সদ্দমেৰ আহ. তস্মা এত্থ এৰমত্থো ৰেদিতব্বো – যোতি যো কোচীতি. যস্মা যো যো কোচি নাম, সো অৰস্সং যথালিঙ্গযথাযুত্তযথাৰিহিতযথাপ্পকারযংঠানপত্তযংধম্মসমন্নাগতৰসেন একেনাকারেন পঞ্ঞাযতি, তস্মা তং তত্থ ঞাপেতুং তং ভেদং পকাসেন্তো ‘‘যাদিসো’’তিআদিমাহ. তত্থ যাদিসোতি লিঙ্গৰসেন যাদিসো ৰা তাদিসো ৰা হোতু, দীঘো ৰা রস্সো ৰা কাল়ো ৰা ওদাতো ৰা মঙ্গুরচ্ছৰি ৰা কিসো ৰা থূলো ৰাতি অত্থো.

যথাযুত্তোতি যোগৰসেন যেন ৰা তেন ৰা যুত্তো হোতু, নৰকম্মযুত্তো ৰা উদ্দেসযুত্তো ৰা ৰাসধুরযুত্তো ৰাতি অত্থো. যথাৰিহিতোতি যথাঠপিতো নৰকম্মাধিট্ঠাযিকাদিৰসেন. যথাপকারোতি যথাপকারেন পতিট্ঠিতো পদীপনাযকাদিৰসেন. যংঠানপ্পত্তোতি যং ঠানন্তরং পত্তো সেনাপতিসেট্ঠিট্ঠানাদিৰসেন. যংধম্মসমন্নাগতোতি যেন ধম্মেন উপাগতো ধুতঙ্গাদিৰসেন.

ৰিক্খম্ভনতো ৰাতি উপচারপ্পনাসমাধীতি কিলেসানং দূরীকরণতো ৰা ঘটপ্পহারেন সেৰালানং ৰিয. সমুচ্ছেদতো ৰাতি পুন অপ্পৰত্তিং কত্ৰা অচ্চন্ততো মগ্গেন কিলেসানং উচ্ছিন্নমূলতো পহানৰসেন সমুচ্ছেদতো ৰা. অট্ঠিকঙ্কলূপমা কামাতিআদীনি একাদস পদানি ৰিপস্সনাৰসেন ৰুত্তানি.

বুদ্ধানুস্সতিং ভাৰেন্তোপীতিআদীনি ছ পদানি মরণস্সতিং ভাৰেন্তোপি, উপসমানুস্সতিং ভাৰেন্তোপীতি ইমানি চ উপচারজ্ঝানৰসেন ৰুত্তানি. আনাপানস্সতিং ভাৰেন্তোপি, কাযগতাসতিং ভাৰেন্তোপি, পঠমং ঝানং ভাৰেন্তোপীতিআদীনি নেৰসঞ্ঞানাসঞ্ঞাযতনসমাপত্তিং ভাৰেন্তোপীতি পরিযোসানানি অপ্পনাজ্ঝানৰসেন ৰুত্তানি. তত্থ অট্ঠিকঙ্কলূপমা কামাতি সুনিক্কন্তং নিক্কন্তং নিম্মংসং লোহিতমক্খিতং অট্ঠিকঙ্কলং উপমা এতেসং কামানন্তি অট্ঠিকঙ্কলূপমা কামা. অপ্পস্সাদট্ঠেনাতি ‘‘অপ্পং পরিত্তং সুখস্সাদং আদীনৰো এত্থ ভিয্যো’’তি দস্সনট্ঠেন. পস্সন্তোতি ‘‘যাৰদেৰ পন সো কুক্কুরো কিলমথস্স ৰিঘাতস্স ভাগী অস্সা’’তি ঞাণচক্খুনা পস্সন্তো. পরিৰজ্জেতীতি দূরঙ্গমেতি. ৰুত্তঞ্হেতং ভগৰতা –

‘‘সেয্যথাপি, গহপতি, কুক্কুরো জিঘচ্ছাদুব্বল্যপরেতো গোঘাতকসূনং পচ্চুপট্ঠিতো অস্স, তমেনং দক্খো গোঘাতকো ৰা গোঘাতকন্তেৰাসী ৰা অট্ঠিকঙ্কলং সুনিক্কন্তং নিক্কন্তং নিম্মংসং লোহিতমক্খিতং উপসুম্ভেয্য. তং কিং মঞ্ঞসি, গহপতি, অপি নু খো সো কুক্কুরো অম্হং অট্ঠিকঙ্কলং সুনিক্কন্তং নিক্কন্তং নিম্মংসং লোহিতমক্খিতং পলেহন্তো জিঘচ্ছাদুব্বল্যং পটিৰিনেয্যা’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘অদুঞ্হি, ভন্তে, অট্ঠিকঙ্কলং সুনিক্কন্তং নিক্কন্তং নিম্মংসং লোহিতমক্খিতং, যাৰদেৰ পন সো কুক্কুরো কিলমথস্স ৰিঘাতস্স ভাগী অস্সা’’তি. ‘‘এৰমেৰ খো, গহপতি, অরিযসাৰকো ইতি পটিসঞ্চিক্খতি ‘অট্ঠিকঙ্কলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো’তি. এৰমেতং যথাভূতং সম্মপ্পঞ্ঞায দিস্ৰা যাযং উপেক্খা নানত্তা নানত্তসিতা, তং অভিনিৰজ্জেত্ৰা যাযং উপেক্খা একত্তা একত্তসিতা, যত্থ সব্বসো লোকামিসুপাদানা অপরিসেসা নিরুজ্ঝন্তি, তমেৰূপেক্খং ভাৰেতী’’তি (ম. নি. ২.৪২).

গিজ্ঝাদীহি সাধারণা মংসপেসি উপমা এতেসন্তি মংসপেসূপমা. বহূনং সাধারণট্ঠেন বহুসাধারণা. আদিত্তং তিণুক্কং উপমা এতেসন্তি তিণুক্কূপমা. অনুদহনট্ঠেনাতি হত্থাদিঝাপনট্ঠেন. সাধিকপোরিসপ্পমাণা ৰীতচ্চিকানং ৰীতধূমানং অঙ্গারানং পূরা অঙ্গারকাসু উপমা এতেসন্তি অঙ্গারকাসূপমা. মহাপরিল়াহট্ঠেনাতি মহন্তপরিতাপনট্ঠেন. আরামরামণেয্যাদিকং সুপিনং উপমা এতেসন্তি সুপিনকূপমা. ইত্তরপচ্চুপট্ঠানট্ঠেনাতি অপ্পত্ৰা, ন উপগন্ত্ৰা তিট্ঠনট্ঠেন. যাচিতেন লদ্ধং যানাদিভণ্ডং উপমা এতেসন্তি যাচিতকূপমা. তাৰকালিকট্ঠেনাতি অনিবন্ধনট্ঠেন. সম্পন্নফলরুক্খো উপমা এতেসন্তি রুক্খফলূপমা. সম্ভঞ্জনপরিভঞ্জনট্ঠেনাতি সাখাভঞ্জনট্ঠেন চেৰ সমন্ততো ভঞ্জিত্ৰা রুক্খপাতনট্ঠেন চ. অসি চ সূনা চ উপমা এতেসন্তি অসিসূনূপমা. অধিকুট্টনট্ঠেনাতি ছিন্দনট্ঠেন. সত্তিসূলং উপমা এতেসন্তি সত্তিসূলূপমা. ৰিনিৰিজ্ঝনট্ঠেনাতি নিপতেত্ৰা গমনট্ঠেন. ভযজননট্ঠেন সপ্পসিরং উপমা এতেসন্তি সপ্পসিরূপমা. সপ্পটিভযট্ঠেনাতি সহ অভিমুখে ভযট্ঠেন. দুক্খজননং অগ্গিক্খন্ধং উপমা এতেসন্তি অগ্গিক্খন্ধূপমা. মহাভিতাপনট্ঠেনাতি মহন্তঅভিতাপকাযপীল়াউপ্পাদনট্ঠেনাতি কামং পরিৰজ্জেতীতি. ৰুত্তঞ্হেতং –

‘‘সেয্যথাপি, গহপতি, গিজ্ঝো ৰা কঙ্কো ৰা কুললো ৰা মংসপেসিং আদায উড্ডীযেয্য, তমেনং গিজ্ঝাপি কঙ্কাপি কুললাপি অনুপতিত্ৰা অনুপতিত্ৰা ৰিতচ্ছেয্যুং ৰিস্সজ্জেয্যুং. তং কিং মঞ্ঞসি, গহপতি, সচে সো গিজ্ঝো ৰা কঙ্কো ৰা কুললো ৰা তং মংসপেসিং ন খিপ্পমেৰ পটিনিস্সজ্জেয্য, সো ততোনিদানং মরণং ৰা নিগচ্ছেয্য, মরণমত্তং ৰা দুক্খ’’ন্তি ‘‘এৰং, ভন্তে’’. ‘‘এৰমেৰ খো, গহপতি, অরিযসাৰকো ইতি পটিসঞ্চিক্খতি ‘মংসপেসূপমা কামা ৰুত্তা ভগৰতা…পে… তমেৰূপেক্খং ভাৰেতি. সেয্যথাপি, গহপতি, পুরিসো আদিত্তং তিণুক্কং আদায পটিৰাতং গচ্ছেয্য. তং কিং মঞ্ঞসি, গহপতি, সচে সো পুরিসো তং আদিত্তং তিণুক্কং ন খিপ্পমেৰ পটিনিস্সজ্জেয্য, তস্স সা আদিত্তা তিণুক্কা হত্থং ৰা দহেয্য, বাহুং ৰা দহেয্য, অঞ্ঞতরং ৰা অঞ্ঞতরং ৰা অঙ্গপচ্চঙ্গং দহেয্য, সো ততোনিদানং মরণং ৰা নিগচ্ছেয্য, মরণমত্তং ৰা দুক্খ’’ন্তি? ‘‘এৰং, ভন্তে’’. ‘‘এৰমেৰ খো, গহপতি, অরিযসাৰকো ইতি পটিসঞ্চিক্খতি ‘তিণুক্কূপমা কামা ৰুত্তা ভগৰতা বহুদুক্খা বহুপাযাসা…পে… তমেৰূপেক্খং ভাৰেতি. সেয্যথাপি, গহপতি, অঙ্গারকাসু সাধিকপোরিসা পূরা অঙ্গারানং ৰীতচ্চিকানং ৰীতধূমানং. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপ্পটিক্কূলো, তমেনং দ্ৰে বলৰন্তো পুরিসা নানাবাহাসু গহেত্ৰা অঙ্গারকাসুং উপকড্ঢেয্যুং. তং কিং মঞ্ঞসি গহপতি, অপি নু সো পুরিসো ইতি চিতি চেৰ কাযং সন্নামেয্যা’’তি? ‘‘এৰং, ভন্তে’’. ‘‘তং কিস্সহেতু’’? ‘‘ৰিদিতঞ্হি, ভন্তে, তস্স পুরিসস্স ‘ইমঞ্চ অহং অঙ্গারকাসুং পপতিস্সামি, ততোনিদানং মরণং ৰা নিগচ্ছিস্সামি মরণমত্তং ৰা দুক্খ’’’ন্তি. ‘‘এৰমেৰ খো গহপতি অরিযসাৰকো ইতি পটিসঞ্চিক্খতি ‘অঙ্গারকাসূপমা কামা ৰুত্তা ভগৰতা…পে… তমেৰূপেক্খং ভাৰেতি. সেয্যথাপি, গহপতি, পুরিসো সুপিনকং পস্সেয্য আরামরামণেয্যকং ৰনরামণেয্যকং ভূমিরামণেয্যকং পোক্খরণিরামণেয্যকং, সো পটিবুদ্ধো ন কিঞ্চি পটিপস্সেয্য. এৰমেৰ খো, গহপতি, অরিযসাৰকো ইতি পটিসঞ্চিক্খতি ‘সুপিনকূপমা কামা ৰুত্তা ভগৰতা…পে… তমেৰূপেক্খং ভাৰেতি. সেয্যথাপি, গহপতি, পুরিসো যাচিতকং ভোগং যাচিত্ৰা যানং ৰা পোরিসেয্যং পৰরমণিকুণ্ডলং. সো তেহি যাচিতকেহি ভোগেহি পুরক্খতো পরিৰুতো অন্তরাপণং পটিপজ্জেয্য. তমেনং জনো দিস্ৰা এৰং ৰদেয্য ‘ভোগী ৰত ভো পুরিসো, এৰং কির ভো ভোগিনো ভোগানি ভুঞ্জন্তী’তি. তমেনং সামিকা যত্থ যত্থেৰ তানি পস্সেয্যুং, তত্থ তত্থেৰ তানি হরেয্যুং. তং কিং মঞ্ঞসি, গহপতি, অলং নু খো তস্স পুরিসস্স অঞ্ঞথত্তাযা’’তি? ‘‘এৰং, ভন্তে’’. ‘‘তং কিস্সহেতু’’? ‘‘সামিনো হি, ভন্তে, তানি হরন্তী’’তি. ‘‘এৰমেৰ খো, গহপতি, অরিযসাৰকো ইতি পটিসঞ্চিক্খতি ‘যাচিতকূপমা কামা ৰুত্তা ভগৰতা…পে… তমেৰূপেক্খং ভাৰেতি. সেয্যথাপি, গহপতি, গামস্স ৰা নিগমস্স ৰা অৰিদূরে তিব্বো ৰনসণ্ডো, তত্রস্স রুক্খো সম্পন্নফলো চ উপপন্নফলো চ. ন চস্সু কানিচি ফলানি ভূমিযং পতিতানি. অথ পুরিসো আগচ্ছেয্য ফলত্থিকো ফলগৰেসী ফলপরিযেসনং চরমানো. সো তং ৰনসণ্ডং অজ্ঝোগাহেত্ৰা তং রুক্খং পস্সেয্য সম্পন্নফলঞ্চ উপপন্নফলঞ্চ. তস্স এৰমস্স ‘অযং খো রুক্খো সম্পন্নফলো চ উপপন্নফলো চ, নত্থি চ কানিচি ফলানি ভূমিযং পতিতানি, জানামি খো পনাহং রুক্খং আরোপিতুং. যংনূনাহং ইমং রুক্খং আরোহিত্ৰা যাৰদত্থঞ্চ খাদেয্যং, উচ্ছঙ্গঞ্চ পূরেয্য’ন্তি? সো তং রুক্খং আরোহিত্ৰা যাৰদত্থঞ্চ খাদেয্য, উচ্ছঙ্গঞ্চ পূরেয্য. অথ দুতিযো পুরিসো আগচ্ছেয্য ফলত্থিকো ফলগৰেসী ফলপরিযেসনং চরমানো তিণ্হং কুঠারিং আদায. সো তং ৰনসণ্ডং অজ্ঝোগাহেত্ৰা তং রুক্খং পস্সেয্য সম্পন্নফলঞ্চ উপপন্নফলঞ্চ. তস্স এৰমস্স ‘অযং খো রুক্খো সম্পন্নফলো চ উপপন্নফলো চ, নত্থি চ কানিচি ফলানি ভূমিযং পতিতানি, ন খো পনাহং জানামি রুক্খং আরোহিতুং. যংনূনাহং ইমং রুক্খং মূলতো ছেত্ৰা যাৰদত্থঞ্চ খাদেয্যং, উচ্ছঙ্গঞ্চ পূরেয্য’ন্তি. সো তং রুক্খং মূলতোৰ ছিন্দেয্য. তং কিং মঞ্ঞসি, গহপতি, অমুকো সো পুরিসো পঠমং রুক্খং আরূল়্হো, সচে সো ন খিপ্পমেৰ ওরোহেয্য, তস্স সো রুক্খো পপতন্তো হত্থং ৰা ভঞ্জেয্য পাদং ৰা ভঞ্জেয্য অঞ্ঞতরং ৰা অঞ্ঞতরং ৰা অঙ্গপচ্চঙ্গং ভঞ্জেয্য, সো ততোনিদানং মরণং ৰা নিগচ্ছেয্য, মরণমত্তং ৰা দুক্খ’’ন্তি? ‘‘এৰং, ভন্তে’’. ‘‘এৰমেৰ খো, গহপতি, অরিযসাৰকো ইতি পটিসঞ্চিক্খতি ‘রুক্খফলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো’তি. এৰমেতং যথাভূতং সম্মপ্পঞ্ঞায দিস্ৰা যাযং উপেক্খা নানত্তা নানত্তসিতা, তং অভিনিৰজ্জেত্ৰা যাযং উপেক্খা একত্তা একত্তসিতা. যত্থ সব্বসো লোকামিসূপাদানা অপরিসেসা নিরুজ্ঝন্তি. তমেৰূপেক্খং ভাৰেতী’’তি (ম. নি. ২.৪৩-৪৮).

এৰং অট্ঠিকঙ্কলাদিকঅগ্গিক্খন্ধূপমপরিযোসানতো ৰিপস্সনং দস্সেত্ৰা ইদানি উপচারসমাধিং দস্সেন্তো ‘‘বুদ্ধানুস্সতিং ভাৰেন্তো’’তিআদিমাহ.

তত্থ পুনপ্পুনং উপ্পজ্জনতো সতি এৰ অনুস্সতি. পৰত্তিতব্বট্ঠানম্হিযেৰ চ পৰত্তত্তা সদ্ধাপব্বজিতস্স কুলপুত্তস্স অনুরূপা সতীতিপি অনুস্সতি. বুদ্ধং আরব্ভ উপ্পন্না অনুস্সতি বুদ্ধানুস্সতি. অরহতাদিবুদ্ধগুণারম্মণায সতিযা এতং অধিৰচনং, তং বুদ্ধানুস্সতিং. ভাৰেন্তোতি ৰড্ঢেন্তো ব্যূহেন্তো. ধম্মং আরব্ভ উপ্পন্না অনুস্সতি ধম্মানুস্সতি, স্ৰাক্খাততাদিধম্মগুণারম্মণায সতিযা এতং অধিৰচনং. সঙ্ঘং আরব্ভ উপ্পন্না অনুস্সতি সঙ্ঘানুস্সতি, সুপ্পটিপন্নতাদিসঙ্ঘগুণারম্মণায সতিযা এতং অধিৰচনং. সীলং আরব্ভ উপ্পন্না অনুস্সতি সীলানুস্সতি, অত্তনো অখণ্ডতাদিসীলগুণারম্মণায সতিযা এতং অধিৰচনং. চাগং আরব্ভ উপ্পন্না অনুস্সতি চাগানুস্সতি, অত্তনো মুত্তচাগতাদিচাগগুণারম্মণায সতিযা এতং অধিৰচনং. দেৰতা আরব্ভ উপ্পন্না অনুস্সতি দেৰতানুস্সতি, দেৰতা সক্খিট্ঠানে ঠপেত্ৰা অত্তনো সদ্ধাদিগুণারম্মণায সতিযা এতং অধিৰচনং. আনাপানে আরব্ভ উপ্পন্না সতি আনাপানস্সতি, আনাপাননিমিত্তারম্মণায সতিযা এতং অধিৰচনং. মরণং আরব্ভ উপ্পন্না সতি মরণস্সতি, একভৰপরিযাপন্নজীৰিতিন্দ্রিযুপচ্ছেদসঙ্খাতমরণারম্মণায সতিযা এতং অধিৰচনং.

কুচ্ছিতানং কেসাদীনং পটিক্কূলানং আযত্তা আকরত্তা কাযোতি সঙ্খং গতে সরীরে গতা পৰত্তা সতি কাযগতাসতি, তাদিসং ৰা কাযং গতা সতি ‘‘কাযগতসতী’’তি ৰত্তব্বে রস্সং অকত্ৰা ‘‘কাযগতাসতী’’তি ৰুত্তং. কেসাদিকেসু কাযকোট্ঠাসেসু পটিক্কূলনিমিত্তারম্মণায সতিযা এতং অধিৰচনং. উপসমং আরব্ভ উপ্পন্না অনুস্সতি. উপসমানুস্সতি, সব্বদুক্খূপসমারম্মণায সতিযা এতং অধিৰচনং.

ৰিতক্কৰিচারপীতিসুখচিত্তেকগ্গতাসম্পযুত্তং পঠমজ্ঝানং ভাৰেন্তো. পীতিসুখচিত্তেকগ্গতাসম্পযুত্তং দুতিযজ্ঝানং ভাৰেন্তো. সুখচিত্তেকগ্গতাসম্পযুত্তং ততিযজ্ঝানং ভাৰেন্তো. উপেক্খাচিত্তেকগ্গতাসম্পযুত্তং চতুত্থজ্ঝানং ভাৰেন্তো…পে… নেৰসঞ্ঞানাসঞ্ঞাযতনং ভাৰেন্তোপি কামে পরিৰজ্জেতীতি.

ৰিক্খম্ভনপ্পহানং দস্সেত্ৰা ইদানি সমুচ্ছেদেন কামানং পহানং দস্সেতুং ‘‘সোতাপত্তিমগ্গং ভাৰেন্তোপী’’তিআদিমাহ. তত্থ মগ্গসোতস্স আপজ্জনং সোতাপত্তি, সোতাপত্তিযা মগ্গো সোতাপত্তিমগ্গো. অপাযগমনীযে কামেতি যেহি অপাযং গচ্ছন্তি, তে অপাযগমনীযে কামে সমুচ্ছেদতো সোতাপত্তিমগ্গং ভাৰেন্তো পরিৰজ্জেতি. পটিসন্ধিৰসেন সকিংযেৰ ইমং লোকং আগচ্ছতীতি সকদাগামী, তস্স মগ্গো সকদাগামিমগ্গো. তং মগ্গং ভাৰেন্তো. ওল়ারিকেতি পরিল়াহপ্পত্তে. পটিসন্ধিৰসেনেৰ কামভৰং নাগচ্ছতীতি অনাগামী, তস্স মগ্গো অনাগামিমগ্গো. তং মগ্গং ভাৰেন্তো. অনুসহগতেতি সুখুমভাৰপ্পত্তে. কিলেসেহি আরকত্তা, কিলেসারীনং হতত্তা, সংসারচক্কস্স অরানং হতত্তা, পাপকরণে রহাভাৰা, পচ্চযাদীনং অরহত্তা চ অরহং, অরহতো ভাৰো অরহত্তং. কিং তং? অরহত্তফলং. অরহত্তস্স মগ্গো অরহত্তমগ্গো. তং অরহত্তমগ্গং ভাৰেন্তো. সব্বেন সব্বন্তি সব্বেনাকারেন সব্বং. সব্বথা সব্বন্তি সব্বপ্পকারেন সব্বং. অসেসং নিস্সেসন্তি নিরৰসেসং গন্ধমত্তম্পি অট্ঠপেত্ৰা. অথ ৰা সব্বেন সব্বং মূলৰসেন. সব্বথা সব্বং আকারনিপ্পদেসৰসেন. অসেসং নিস্সেসং ভাৰনানিপ্পদেসৰসেন. তথা পুরিমেন দুচ্চরিতাভাৰেন. দুতিযেন পরিযুট্ঠানাভাৰেন. ততিযেন অনুসযাভাৰেন এৰমেকে ৰণ্ণযন্তি.

সপ্পো ৰুচ্চতি অহীতি যো কোচি সরন্তো গচ্ছতি. কেনট্ঠেনাতি কেন অত্থেন. সংসপ্পন্তো গচ্ছতীতি যস্মা সম্মা সংসরন্তো গচ্ছতীতি সপ্পো. ভুজন্তোতি ৰঙ্কৰঙ্কো হুত্ৰা. পন্নসিরোতি নিপন্নসীসো হুত্ৰা. সিরেন সুপতীতি সীসং ভোগন্তরে কত্ৰা সুপনভাৰেন সিরসা সুপতীতি সরীসপো. বিলে সযতীতি বিলাসযো. ‘‘বিলসযো’’তিপি পাল়ি, তং সুন্দরং. গুহাযং সেতীতি গুহাসযো. দাঠা তস্স আৰুধোতি তস্স সপ্পস্স দুৰে দাঠা পহরণসত্থসঙ্খাতো আৰুধো. ৰিসং তস্স ঘোরন্তি তস্স সপ্পস্স ব্যাপকসঙ্খাতং ৰিসং দারুণং কক্খল়ং. জিৰ্হা তস্স দুৰিধাতি তস্স সপ্পস্স দ্ৰেধা জিৰ্হা. দ্ৰীহি জিৰ্হাহি রসং সাযতীতি দুৰিধাহি জিৰ্হাহি রসং জানাতি অস্সাদং ৰিন্দতি সাদিযতীতি. জীৰিতুং কামযতীতি জীৰিতুকামো. অমরিতুং কামযতীতি অমরিতুকামো. সুখং কামযতীতি সুখকামো. দুক্খপ্পটিক্কূলোতি দুক্খং অনিচ্ছমানো. পাদেনাতি অত্তনো পাদেন. সপ্পসিরন্তি সপ্পস্স সীসং. ৰজ্জেয্যাতি দূরতো ৰজ্জেয্য. ৰিৰজ্জেয্যাতি তস্স পমাণেন. পরিৰজ্জেয্যাতি সমন্ততো. অভিনিৰজ্জেয্যাতি চতুত্থপ্পমাণেন. অথ ৰা পুরিমেন সীসতো. দুতিযততিযেন দ্ৰীহি পস্সেহি. চতুত্থেন পচ্ছতো. ‘‘কামে পন অপ্পত্তস্স পরিযেসনমূলদুক্খৰত্থুভাৰেন ৰজ্জেয্য. পত্তস্স আরক্খমূলদুক্খৰত্থুভাৰেন ৰিৰজ্জেয্য. অঞ্ঞাণপরিল়াহদুক্খৰত্থুভাৰেন পরিৰজ্জেয্য. ৰিনাসমুখে পিযৰিপ্পযোগদুক্খৰত্থুভাৰেন অভিনিৰজ্জেয্যা’’তি এৰমেকে ৰণ্ণযন্তি.

রঞ্জনৰসেন রাগো. বলৰরঞ্জনট্ঠেন সারাগো. ৰিসযে সত্তানং অনু অনু নযনতো অনুনযো. অনুরুজ্ঝতীতি অনুরোধো, কামেতীতি অত্থো. যত্থ কত্থচি ভৰে সত্তা এতায নন্দন্তীতি নন্দী, সযং ৰা নন্দতীতি নন্দী. নন্দী চ সা রঞ্জনট্ঠেন রাগো চাতি নন্দিরাগো. তত্থ একস্মিং আরম্মণে সকিং উপ্পন্না তণ্হা নন্দী, পুনপ্পুনং উপ্পজ্জমানা নন্দিরাগোতি ৰুচ্চতি. চিত্তস্স সারাগোতি যো হেট্ঠা ‘‘বলৰরঞ্জনট্ঠেন সারাগো’’তি ৰুত্তো, সো ন সত্তস্স, চিত্তস্সেৰ সারাগোতি অত্থো.

ইচ্ছন্তি এতায আরম্মণানীতি ইচ্ছা. বহলকিলেসভাৰেন মুচ্ছন্তি এতায পাণিনোতি মুচ্ছা. গিলিত্ৰা পরিনিট্ঠপেত্ৰা গহণৰসেন অজ্ঝোসানং. ইমিনা সত্তা গিজ্ঝন্তি গেধং আপজ্জন্তীতি গেধো. বহলট্ঠেন ৰা গেধো. ‘‘গেধং ৰা পন পৰনসণ্ড’’ন্তি হি বহলট্ঠেনেৰ ৰুত্তং. অনন্তরপদং উপসগ্গৰসেন ৰড্ঢিতং, সব্বতোভাগেন ৰা গেধোতি পলিগেধো. সজ্জন্তি এতেনাতি সঙ্গো. লগ্গনট্ঠেন ৰা সঙ্গো. ওসীদনট্ঠেন পঙ্কো. আকড্ঢনৰসেন এজা. ‘‘এজা ইমং পুরিসং পরিকড্ঢতি তস্স তস্সেৰ ভৰস্স অভিনিব্বত্তিযা’’তি হি ৰুত্তং. ৰঞ্চনট্ঠেন মাযা. ৰট্টস্মিং সত্তানং জননট্ঠেন জনিকা. ‘‘তণ্হা জনেতি পুরিসং, চিত্তমস্স ৰিধাৰতী’’তি (সং. নি. ১.৫৫) হি ৰুত্তং. ৰট্টস্মিং সত্তে দুক্খেন সংযোজযমানা জনেতীতি সঞ্জননী. ঘটনট্ঠেন সিব্বিনী. অযঞ্হি ৰট্টস্মিং সত্তে চুতিপটিসন্ধিৰসেন সিব্বতি ঘটেতি তুন্নকারো ৰিয পিলোতিকায পিলোতিকং, তস্মা ‘‘ঘটনট্ঠেন সিব্বিনী’’তি ৰুত্তা. অনেকপ্পকারং ৰিসযজালং তণ্হাৰিপ্ফন্দিতনিৰেসসঙ্খাতং ৰা জালমস্সা অত্থীতি জালিনী.

আকড্ঢনট্ঠেন সীঘসোতা সরিতা ৰিযাতি সরিতা. অল্লট্ঠেন ৰা সরিতা. ৰুত্তঞ্হেতং ‘‘সরিতানি সিনেহিতানি চ সোমনস্সানি ভৰন্তি জন্তুনো’’তি (ধ. প. ৩৪১). অল্লানি চেৰ সিনিদ্ধানি চাতি অযঞ্হেত্থ অত্থো. অনযব্যসনাপাদনট্ঠেন কুম্মানুবন্ধসুত্তকং ৰিযাতি সুত্তং. ৰুত্তঞ্হেতং ‘‘সুত্তন্তি খো, ভিক্খৰে, নন্দিরাগস্সেতং অধিৰচন’’ন্তি (সং. নি. ২.১৫৯). রূপাদীসু ৰিত্থতট্ঠেন ৰিসতা. তস্স তস্স পটিলাভত্থায সত্তে আযূহাপেতীতি আযূহিনী. উক্কণ্ঠিতুং অপদানতো সহাযট্ঠেন দুতিযা. অযঞ্হি সত্তানং ৰট্টস্মিং উক্কণ্ঠিতুং ন দেতি, গতগতট্ঠানে পিযসহাযো ৰিয অভিরমাপেতি. তেনেৰ ৰুত্তং –

‘‘তণ্হাদুতিযো পুরিসো, দীঘমদ্ধানসংসরং;

ইত্থভাৰঞ্ঞথাভাৰং, সংসারং নাতিৰত্ততী’’তি. (ইতিৰু. ১৫; অ. নি. ৪.৯; মহানি. ১৯১; চূল়নি. পাযাযনানুগীতিগাথানিদ্দেস ১০৭);

পণিধানকৰসেন পণিধি. ভৰনেত্তীতি ভৰরজ্জু. এতায হি সত্তা রজ্জুযা গীৰাযং বদ্ধা গোণা ৰিয ইচ্ছিতিচ্ছিতট্ঠানং নিয্যন্তি. তং তং আরম্মণং ৰনতি ভজতি অল্লীযতীতি ৰনং, ৰনতি যাচতীতি ৰা ৰনং. ৰনথোতি ব্যঞ্জনেন পদং ৰড্ঢিতং. অনত্থদুক্খানং ৰা সমুট্ঠাপনট্ঠেন গহনট্ঠেন চ ৰনং ৰিযাতি ৰনং. বলৰতণ্হাযেতং নামং. গহনতরট্ঠেন পন ততো বলৰতরা ৰনথো নাম. তেন ৰুত্তং –

‘‘ৰনং ছিন্দথ মা রুক্খং, ৰনতো জাযতে ভযং;

ছেত্ৰা ৰনঞ্চ ৰনথঞ্চ, নিব্বনা হোথ ভিক্খৰো’’তি. (ধ. প. ২৮৩);

সন্থৰনৰসেন সন্থৰো, সংসগ্গোতি অত্থো. সো দুৰিধো – তণ্হাসন্থৰো মিত্তসন্থৰো চ. তেসু ইধ তণ্হাসন্থৰো অধিপ্পেতো. সিনেহৰসেন স্নেহো. আলযকরণৰসেন কম্পমানা অপেক্খতীতি অপেক্খা. ৰুত্তম্পি চেতং ‘‘ইমানি তে দেৰ চতুরাসীতি নগরসহস্সানি কুসাৰতীরাজধানিপ্পমুখানি, এত্থ দেৰ ছন্দং জনেহি জীৰিতে অপেক্খং করোহী’’তি (দী. নি. ২.২৬৬). আলযং করোহীতি অযঞ্হেত্থ অত্থো. পাটিযেক্কে পাটিযেক্কে আরম্মণে বন্ধতীতি পটিবন্ধু, ঞাতকট্ঠেন ৰা পাটিযেক্কো বন্ধূতিপি পটিবন্ধু. নিচ্চসন্নিস্সিতট্ঠেনপি সত্তানং তণ্হাসমো বন্ধু নাম নত্থি. আরম্মণানং অসনতো আসা. অজ্ঝোত্থরণতো চেৰ তিত্তিং অনুগন্ত্ৰাৰ পরিভুঞ্জনতো চাতি অত্থো. আসীসনৰসেন আসীসনা. আসীসিতস্স ভাৰো আসীসিতত্তং.

ইদানি তস্সা পৰত্তিট্ঠানং দস্সেতুং ‘‘রূপাসা’’তিআদি ৰুত্তং. তত্থ আসীসনৰসেন আসাতি আসায অত্থং গহেত্ৰা রূপে আসা রূপাসা. এৰং নৰপি পদানি ৰেদিতব্বানি. এত্থ চ পুরিমানি পঞ্চ পঞ্চকামগুণৰসেন ৰুত্তানি, পরিক্খারলোভৰসেন ছট্ঠং. তং ৰিসেসতো পব্বজিতানং, ততো পরানি তীণি অতিত্তিযৰত্থুৰসেন গহট্ঠানং. ন হি তেসং ধনপুত্তজীৰিতেহি অঞ্ঞং পিযতরং অত্থি. ‘‘ইদং ময্হং, ইদং ময্হ’’ন্তি ৰা ‘‘অসুকেন মে ইদং দিন্নং, ইদং দিন্ন’’ন্তি ৰা এৰং সত্তে জপ্পাপেতীতি জপ্পা. পরতো দ্ৰে পদানি উপসগ্গেন ৰড্ঢিতানি, ততো পরং অঞ্ঞেনাকারেন ৰিভজিতুং আরদ্ধত্তা পুন ‘‘জপ্পা’’তি ৰুত্তং. জপ্পনাকারো জপ্পনা. জপ্পিতস্স ভাৰো জপ্পিতত্তং. পুনপ্পুনং ৰিসযে লুম্পতি আকড্ঢতীতি লোলুপো, লোলুপস্স ভাৰো লোলুপ্পং. লোলুপ্পনাকারো লোলুপ্পাযনা. লোলুপ্পসমঙ্গিনো ভাৰো লোলুপ্পাযিতত্তং.

পুচ্ছঞ্জিকতাতি যায তণ্হায লাভট্ঠানেসু পুচ্ছং চালযমানা সুনখা ৰিয কম্পমানা ৰিচরন্তি, তং তস্সা কম্পনতণ্হায নামং. সাধু মনাপমনাপে ৰিসযে কামেতীতি সাধুকামো, তস্স ভাৰো সাধুকম্যতা. মাতামাতুচ্ছাতিআদিকে অযুত্তট্ঠানে রাগোতি অধম্মরাগো. যুত্তট্ঠানেপি বলৰা হুত্ৰা উপ্পন্নো লোভো ৰিসমলোভো. ‘‘রাগো ৰিসম’’ন্তিআদিৰচনতো (ৰিভ. ৯২৪) ৰা যুত্তট্ঠানে ৰা অযুত্তট্ঠানে ৰা উপ্পন্নো ছন্দরাগো অধম্মট্ঠেন অধম্মরাগো. ৰিসমট্ঠেন ৰিসমলোভোতি ৰেদিতব্বো. আরম্মণানং নিকামনৰসেন নিকন্তি. নিকামনাকারো নিকামনা. পত্থযনৰসেন পত্থনা. পিহাযনৰসেন পিহনা. সুট্ঠু পত্থনা সম্পত্থনা. পঞ্চসু কামগুণেসু তণ্হা কামতণ্হা. রূপারূপভৰেসু তণ্হা ভৰতণ্হা. উচ্ছেদসঙ্খাতে ৰিভৰে তণ্হা ৰিভৰতণ্হা. সুদ্ধে রূপভৰস্মিংযেৰ তণ্হা রূপতণ্হা. অরূপভৰে তণ্হা অরূপতণ্হা. উচ্ছেদদিট্ঠিসহগতো রাগো, নিরোধে তণ্হা নিরোধতণ্হা. রূপে তণ্হা রূপতণ্হা. সদ্দে তণ্হা সদ্দতণ্হা. গন্ধতণ্হাদীসুপি এসেৰ নযো. ওঘাদযো ৰুত্তত্থাৰ.

কুসলধম্মে আৰরতীতি আৰরণং. ছাদনৰসেন ছদনং. সত্তে ৰট্টস্মিং বন্ধতীতি বন্ধনং. চিত্তং উপহন্ত্ৰা কিলিস্সতি সংকিলিট্ঠং করোতীতি উপক্কিলেসো. থামগতট্ঠেন অনু অনু সেতীতি অনুসযো. উপ্পজ্জমানং চিত্তং পরিযুট্ঠাতীতি পরিযুট্ঠানং, উপ্পজ্জিতুং অপদানেন কুসলৰারং গণ্হাতীতি অত্থো. ‘‘চোরা মগ্গে পরিযুট্ঠিংসু, ধুত্তা মগ্গে পরিযুট্ঠিংসূ’’তিআদীসু (চূল়ৰ. ৪৩০) হি মগ্গং গণ্হিংসূতি অত্থো. এৰমিধাপি গহণট্ঠেন পরিযুট্ঠানং ৰেদিতব্বং. পলিৰেঠনট্ঠেন লতা ৰিযাতি লতা. ‘‘লতা উপ্পজ্জ তিট্ঠতী’’তি (ধ. প. ৩৪০) আগতট্ঠানেপি অযং তণ্হা লতাতি ৰুত্তা. ৰিৰিধানি ৰত্থূনি ইচ্ছতীতি ৰেৰিচ্ছং. ৰট্টদুক্খস্স মূলন্তি দুক্খমূলং. তস্সেৰ দুক্খস্স নিদানন্তি দুক্খনিদানং. তং দুক্খং ইতো পভৰতীতি দুক্খপ্পভৰো. বন্ধনট্ঠেন পাসো ৰিযাতি পাসো, মারস্স পাসো মারপাসো. দুরুগ্গিলনট্ঠেন বল়িসং ৰিযাতি বল়িসং, মারস্স বল়িসং মারবল়িসং. তণ্হাভিভূতা মারস্স ৰিসযং নাতিক্কমন্তি, তেসং উপরি মারো ৰসং ৰত্তেতীতি ইমিনা পরিযাযেন মারস্স ৰিসযোতি মারৰিসযো. সন্দনট্ঠেন তণ্হাৰ নদী তণ্হানদী. অজ্ঝোত্থরণট্ঠেন তণ্হাৰ জালং তণ্হাজালং. যথা সুনখা গদ্দূলবদ্ধা যদিচ্ছকং নিয্যন্তি, এৰং তণ্হাবদ্ধা সত্তাতি দল়্হবন্ধনট্ঠেন গদ্দূলং ৰিযাতি গদ্দূলং, তণ্হাৰ গদ্দূলং তণ্হাগদ্দূলং. দুপ্পূরণট্ঠেন তণ্হাৰ সমুদ্দো তণ্হাসমুদ্দো. অভিজ্ঝাযনট্ঠেন অভিজ্ঝা. লুব্ভন্তি এতেন, সযং ৰা লুব্ভতি, লুব্ভনমত্তমেৰ ৰা তন্তি লোভো. সম্পযুত্তকানং অকুসলানং পতিট্ঠট্ঠেন মূলং.

ৰিসত্তিকাতীতি ৰিসত্তিকা ইতি. কেনট্ঠেনাতি কেন সভাৰেন. ৰিসতাতি ৰিত্থটা রূপাদীসু. ৰিসালাতি ৰিপুলা. ৰিসটাতি তেভূমকব্যাপকৰসেন ৰিসটা. পুরিমৰচনমেৰ তকারস্স টকারং কত্ৰা ব্যঞ্জনৰিভাগং কত্ৰা ৰুত্তং. ৰিসক্কতীতি পরিসপ্পতি সহতি ৰা. রত্তো হি রাগৰত্থুনা পাদেন তাল়িযমানোপি সহতি. ওসক্কনং ৰিপ্ফন্দনং ৰা ‘‘ৰিসক্কন’’ন্তিপি ৰদন্তি. ‘‘কুসলাকুসলানং পতী’’তি কেচি ৰণ্ণযন্তি. ৰিসংহরতীতি তথা তথা কামেসু আনিসংসং পস্সন্তী ৰিৰিধেহি আকারেহি নেক্খম্মাভিমুখপ্পৰত্তিতো চিত্তং সংহরতি সঙ্খিপতি, ৰিসং ৰা দুক্খং, তং হরতি, ৰহতীতি অত্থো. ৰিসংৰাদিকাতি অনিচ্চাদিং নিচ্চাদিতো গণ্হন্তী ৰিসংৰাদিকা হোতি. দুক্খনিব্বত্তকস্স কম্মস্স হেতুভাৰতো ৰিসমূলা, ৰিসং ৰা দুক্খদুক্খাদিভূতা ৰেদনা মূলং এতিস্সাতি ৰিসমূলা. দুক্খসমুদযত্তা ৰিসং ফলং এতিস্সাতি ৰিসফলা. যায তণ্হায রূপাদিকস্স দুক্খস্সেৰ পরিভোগো হোতি, ন অমতস্সাতি সা ‘‘ৰিসপরিভোগা’’তি ৰুত্তা. সব্বত্থ নিরুত্তিৰসেন পদসিদ্ধি ৰেদিতব্বা.

তস্সা ৰিসযং দস্সেতুকামো ‘‘ৰিসালা ৰা পন সা তণ্হা রূপে’’তিআদিমাহ. তত্থ ৰিসালা ৰা পনাতি মহন্তী এৰ তণ্হাযনট্ঠেন তণ্হা, রূপাদযো পঞ্চ পঞ্চকামগুণিকরাগৰসেন ৰুত্তা. কুলে গণেতিআদীনি একাদস পদানি লোলুপ্পাদৰসেন ৰুত্তানি. কামধাতুত্তিকো কম্মৰট্টৰসেন ৰিভত্তো, কামভৰত্তিকো ৰিপাকৰট্টৰসেন ৰিভত্তো, সঞ্ঞাভৰত্তিকো সঞ্ঞাৰসেন ৰিভত্তো, একৰোকারভৰত্তিকো খন্ধৰসেন ৰিভত্তো. অতীতত্তিকো কালৰসেন, দিট্ঠচতুক্কো আরম্মণৰসেন, অপাযত্তিকো ওকাসৰসেন, খন্ধত্তিকো নিস্সত্তনিজ্জীৰৰসেন ৰিভত্তোতি ঞাতব্বং. তত্রাযং সঙ্খেপেন অত্থদীপনা ৰিভাৰনা চ –

‘‘তত্থ কতমা কামধাতু? হেট্ঠতো অৰীচিনিরযং পরিযন্তং করিত্ৰা উপরিতো পরনিম্মিতৰসৰত্তিদেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা রূপং ৰেদনা সঞ্ঞা সঙ্খারা ৰিঞ্ঞাণং, অযং ৰুচ্চতি কামধাতু’’ (ধ. স. ১২৮৭).

‘‘তত্থ কতমা রূপধাতু? হেট্ঠতো ব্রহ্মলোকং পরিযন্তং করিত্ৰা উপরিতো অকনিট্ঠে দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা, অযং ৰুচ্চতি রূপধাতু’’ (ধ. স. ১২৮৯).

‘‘তত্থ কতমা অরূপধাতু? হেট্ঠতো আকাসানঞ্চাযতনুপগে দেৰে পরিযন্তং করিত্ৰা উপরিতো নেৰসঞ্ঞানাসঞ্ঞাযতনুপগে দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা, অযং ৰুচ্চতি অরূপধাতূ’’তি (ধ. স. ১২৯১). অট্ঠকথাযং পন ‘‘কামধাতূতি কামভৰো, পঞ্চক্খন্ধা লব্ভন্তি. রূপধাতূতি রূপভৰো, পঞ্চক্খন্ধা লব্ভন্তি. অরূপধাতূতি অরূপভৰো, চত্তারো খন্ধা লব্ভন্তী’’তি ৰুত্তং.

অথ ৰা কামরাগসঙ্খাতেন কামেন যুত্তা ধাতু কামধাতু, কামসঙ্খাতা ৰা ধাতু কামধাতু. কামং পহায রূপেন যুত্তা ধাতু রূপধাতু, রূপসঙ্খাতা ৰা ধাতু রূপধাতু. কামঞ্চ রূপঞ্চ পহায অরূপেন যুত্তা ধাতু অরূপধাতু, অরূপসঙ্খাতা ৰা ধাতু অরূপধাতু. তা এৰ ধাতুযো পুন ভৰপরিযাযেন ৰুত্তা. ভৰন্তীতি হি ভৰাতি ৰুচ্চন্তি. সঞ্ঞায যুত্তো ভৰো, সঞ্ঞাৰতং ৰা ভৰো, সঞ্ঞা ৰা এত্থ ভৰে অত্থীতি সঞ্ঞাভৰো. সো কামভৰো চ অসঞ্ঞাভৰমুত্তো রূপভৰো চ নেৰসঞ্ঞানাসঞ্ঞাভৰমুত্তো অরূপভৰো চ হোতি.

ন সঞ্ঞাভৰো অসঞ্ঞাভৰো, সো রূপভৰেকদেসো. ওল়ারিকত্তাভাৰতো নেৰসঞ্ঞা, সুখুমত্তেন সব্ভাৰতো নাসঞ্ঞাতি নেৰসঞ্ঞানাসঞ্ঞা, তায যুত্তো ভৰো নেৰসঞ্ঞানাসঞ্ঞাভৰো. অথ ৰা ওল়ারিকায সঞ্ঞায অভাৰা সুখুমায চ ভাৰা নেৰসঞ্ঞানাসঞ্ঞা অস্মিং ভৰেতি নেৰসঞ্ঞানাসঞ্ঞাভৰো, সো অরূপভৰেকদেসো. একেন রূপক্খন্ধেন ৰোকিণ্ণো ভৰো, একো ৰা ৰোকারো, অস্স ভৰস্সাতি একৰোকারভৰো, সো অসঞ্ঞাভৰোৰ. চতূহি অরূপক্খন্ধেহি ৰোকিণ্ণো ভৰো, চত্তারো ৰা ৰোকারা অস্স ভৰস্সাতি চতুৰোকারভৰো, সো অরূপভৰো এৰ. পঞ্চহি খন্ধেহি ৰোকিণ্ণো ভৰো, পঞ্চ ৰা ৰোকারা অস্স ভৰস্সাতি পঞ্চৰোকারভৰো, সো কামভৰো চ রূপভৰেকদেসো চ হোতি. অতীতত্তিকো হেট্ঠা ৰুত্তনযোৰ. দিট্ঠন্তি চতুসমুট্ঠানিকং রূপারম্মণং. সুতন্তি দ্ৰিসমুট্ঠানিকং সদ্দারম্মণং. মুতন্তি ফুসিত্ৰা গহেতব্বানি চতুসমুট্ঠানিকানি গন্ধরসফোট্ঠব্বারম্মণানি. ৰিঞ্ঞাতব্বং নাম মনসা জানিতব্বং ধম্মারম্মণং. তেসু দিট্ঠসুতমুতৰিঞ্ঞাতব্বেসু ধম্মেসু. ৰিসটা ৰিত্থতাতি মহন্তা পত্থটা.

অপাযলোকেতি ৰড্ঢিসঙ্খাতস্স অযস্স অভাৰেন অপাযো, তস্মিং অপাযলোকে. খন্ধলোকেতি রাসট্ঠেন রূপাদযো পঞ্চক্খন্ধা এৰ লোকো. ধাতুলোকেতি সুঞ্ঞতট্ঠেন চক্খুধাতুআদযো অট্ঠারস ধাতুযো এৰ লোকো. আযতনলোকেতি আযতনাদীহি কারণেহি দ্ৰাদসাযতনানি এৰ লোকো. সব্বেপি লুজ্জনপলুজ্জনট্ঠেন লোকো, ৰুত্তপ্পকারে লোকে ৰিসটা ৰিত্থটাতি ৰিসত্তিকা. সতোতি সরতীতি সতো, পুগ্গলেন সতি ৰুত্তা.

তত্থ সরণলক্খণা সতি. সরন্তি তায, সযং ৰা সরতি, সরণমত্তমেৰ ৰা এসাতি সতি. সা পনেসা অপিলাপনলক্খণা, অসম্মোসনরসা, আরক্খপচ্চুপট্ঠানা, ৰিসযাভিমুখভাৰপচ্চুপট্ঠানা ৰা, থিরসঞ্ঞাপদট্ঠানা, কাযাদিসতিপট্ঠানপদট্ঠানা ৰা. আরম্মণে দল়্হপতিট্ঠিতত্তা পন এসিকা ৰিয, চক্খুদ্ৰারাদীনং রক্খণতো দোৰারিকো ৰিয চ দট্ঠব্বা.

তস্সা পৰত্তিট্ঠানং দস্সেন্তো ‘‘কাযে কাযানুপস্সনাসতিপট্ঠানং ভাৰেন্তো সতো’’তিআদিনা নযেন চতুব্বিধং সতিপট্ঠানমাহ. তত্থ কাযেতি রূপকাযে. রূপকাযো হি ইধ অঙ্গপচ্চঙ্গানং কেসাদীনঞ্চ ধম্মানং সমূহট্ঠেন হত্থিকাযরথকাযাদযো ৰিয ‘‘কাযো’’তি অধিপ্পেতো. যথা চ সমূহট্ঠেন, এৰং কুচ্ছিতানং আযট্ঠেন. কুচ্ছিতানঞ্হি পরমজেগুচ্ছানং সো আযোতিপি কাযো. আযোতি উপ্পত্তিদেসো. তত্রাযং ৰচনত্থো – আযন্তি ততোতি আযো. কে আযন্তীতি? কুচ্ছিতা কেসাদযো. ইতি কুচ্ছিতানং কেসাদীনং আযোতি কাযো.

কাযানুপস্সনাতি কাযস্স অনুপস্সনা, কাযং ৰা অনুপস্সনা, ‘‘কাযে’’তি চ ৰত্ৰাপি পুন ‘‘কাযানুপস্সনা’’তি দুতিযং কাযগ্গহণং অসম্মিস্সতো ৰৰত্থানঘনৰিনিব্ভোগাদিদস্সনত্থং কতন্তি ৰেদিতব্বং.

তেন ন কাযে ৰেদনানুপস্সনা চিত্তধম্মানুপস্সনা ৰা, অথ খো কাযানুপস্সনাযেৰাতি কাযসঙ্খাতে ৰত্থুস্মিং কাযানুপস্সনাকারস্সেৰ দস্সনেন অসম্মিস্সতো ৰৰত্থানং দস্সিতং হোতি, তথা ন কাযে অঙ্গপচ্চঙ্গৰিনিমুত্তএকধম্মানুপস্সনা, নাপি কেসলোমাদিৰিনিমুত্তইত্থিপুরিসানুপস্সনা. যোপি চেত্থ কেসলোমাদিকো ভূতুপাদাযসমূহসঙ্খাতো কাযো, তত্থাপি ন ভূতুপাদাযৰিনিমুত্তএকধম্মানুপস্সনা, অথ খো রথসম্ভারানুপস্সকস্স ৰিয অঙ্গপচ্চঙ্গসমূহানুপস্সনা, নগরাৰযৰানুপস্সকস্স ৰিয কেসলোমাদিসমূহানুপস্সনা, কদলিক্খন্ধপত্তৰট্টিৰিনিভুজনকস্স ৰিয রিত্তমুট্ঠিৰিনিৰেঠকস্স ৰিয চ ভূতুপাদাযসমূহানুপস্সনাযেৰাতি সমূহৰসেনেৰ কাযসঙ্খাতস্স ৰত্থুনো নানপ্পকারতো দস্সেন্তেন ঘনৰিনিব্ভোগো দস্সিতো হোতি. ন হেত্থ যথাৰুত্তসমূহৰিনিমুত্তো কাযো ৰা ইত্থী ৰা পুরিসো ৰা অঞ্ঞো ৰা কোচি ধম্মো দিস্সতি, যথাৰুত্তধম্মসমূহমত্তেযেৰ পন তথা তথা সত্তা মিচ্ছাভিনিৰেসং করোন্তি. তেনাহু পোরাণা –

‘‘যং পস্সতি ন তং দিট্ঠং, যং দিট্ঠং তং ন পস্সতি;

অপস্সং বজ্ঝতে মূল়্হো, বজ্ঝমানো ন মুচ্চতী’’তি. (দী. নি. অট্ঠ. ২.৩৭৩; ম. নি. অট্ঠ. ১.১০৬);

ঘনৰিনিব্ভোগাদিদস্সনত্থন্তি ৰুত্তং. আদিসদ্দেন চেত্থ অযম্পি অত্থো ৰেদিতব্বো. অযঞ্হি এতস্মিং কাযে কাযানুপস্সনাযেৰ, ন অঞ্ঞধম্মানুপস্সনা. যথা অনুদকভূতাযপি মরীচিযা উদকানুপস্সনা হোতি, ন এৰং অনিচ্চদুক্খানত্তাসুভভূতেযেৰ ইমস্মিং কাযে নিচ্চসুখত্তসুভভাৰানুপস্সনা, অথ খো কাযানুপস্সনা অনিচ্চদুক্খানত্তাসুভাকারসমূহানুপস্সনাযেৰাতি ৰুত্তং হোতি.

অথ ৰা য্ৰাযং মহাসতিপট্ঠানে ‘‘ইধ, ভিক্খৰে, ভিক্খু অরঞ্ঞগতো ৰা…পে… সো সতোৰ অস্সসতী’’তিআদিনা (দী. নি. ২.৩৭৪; ম. নি. ১.১০৭) নযেন অস্সাসপস্সাসাদিচুণ্ণিকজাতঅট্ঠিকপরিযোসানো কাযো ৰুত্তো, যো চ পটিসম্ভিদাযং সতিপট্ঠানকথাযং ‘‘ইধেকচ্চো পথৰীকাযং অনিচ্চতো অনুপস্সতি. আপোকাযং. তেজোকাযং. ৰাযোকাযং. কেসকাযং. লোমকাযং. ছৰিকাযং. চম্মকাযং. মংসকাযং. রুহিরকাযং. ন্হারুকাযং. অট্ঠিকাযং. অট্ঠিমিঞ্জকায’’ন্তি কাযো ৰুত্তো, তস্স সব্বস্স ইমস্মিংযেৰ কাযে অনুপস্সনতো কাযে কাযানুপস্সনাতি এৰম্পি অত্থো দট্ঠব্বো.

অথ ৰা কাযে ‘‘অহ’’ন্তি ৰা ‘‘মম’’ন্তি ৰা এৰং গহেতব্বস্স যস্স কস্সচি অনুপস্সনতো তস্স তস্সেৰ পন কেসলোমাদিকস্স নানাধম্মসমূহস্স অনুপস্সনতো কাযে কেসাদিসমূহসঙ্খাতকাযানুপস্সনাতি এৰমত্থো দট্ঠব্বো. অপি চ ‘‘ইমস্মিং কাযে অনিচ্চতো অনুপস্সতি, নো নিচ্চতো’’তিআদিনা (পটি. ম. ৩.৩৫) অনুক্কমেন পটিসম্ভিদাযং আগতনযস্স সব্বস্সেৰ অনিচ্চলক্খণাদিনো আকারসমূহসঙ্খাতস্স কাযস্স অনুপস্সনতোপি কাযে কাযানুপস্সনাতি এৰম্পি অত্থো দট্ঠব্বো. অযং পন চতুসতিপট্ঠানসাধারণো অত্থো.

সতিপট্ঠানন্তি তযো সতিপট্ঠানা সতিগোচরোপি, তিধা পটিপন্নেসু সাৰকেসু সত্থুনো পটিঘানুনযৰীতিৰত্ততাপি, সতিপি. ‘‘চতুন্নং, ভিক্খৰে, সতিপট্ঠানানং সমুদযঞ্চ অত্থঙ্গমঞ্চ দেসিস্সামি, তং সুণাথ সাধুকং মনসি করোথ…পে… কো চ, ভিক্খৰে, কাযস্স সমুদযো? আহারসমুদযা কাযসমুদযো’’তিআদীসু (সং. নি. ৫.৪০৮) হি সতিগোচরো ‘‘সতিপট্ঠান’’ন্তি ৰুচ্চতি. তথা ‘‘কাযো উপট্ঠানং, নো সতি, সতি উপট্ঠানঞ্চেৰ সতি চা’’তিআদীসুপি (পটি. ম. ৩.৩৫). তস্সত্থো – পতিট্ঠাতি অস্মিন্তি পট্ঠানং. কা পতিট্ঠাতি? সতি. সতিযা পট্ঠানং সতিপট্ঠানং, পধানট্ঠানন্তি ৰা পট্ঠানং, সতিযা পট্ঠানং সতিপট্ঠানং, হত্থিট্ঠানঅস্সট্ঠানাদীনি ৰিয.

‘‘তযো সতিপট্ঠানা যদরিযো সেৰতি, যদরিযো সেৰমানো সত্থা গণমনুসাসিতুমরহতী’’তি (ম. নি. ৩.৩০৪, ৩১১) এত্থ তিধা পটিপন্নেসু সাৰকেসু সত্থুনো পটিঘানুনযৰীতিৰত্ততা ‘‘সতিপট্ঠান’’ন্তি ৰুত্তা. তস্সত্থো – পট্ঠপেতব্বতো পট্ঠানং, পৰত্তযিতব্বতোতি অত্থো. কেন পট্ঠপেতব্বোতি? সতিযা, সতিযা পট্ঠানং সতিপট্ঠানন্তি. ‘‘চত্তারো সতিপট্ঠানা ভাৰিতা বহুলীকতা সত্ত বোজ্ঝঙ্গে পরিপূরেন্তী’’তিআদীসু (ম. নি. ৩.১৪৭) পন সতিযেৰ ‘‘সতিপট্ঠান’’ন্তি ৰুচ্চতি. তস্সত্থো – পতিট্ঠাতীতি পট্ঠানং, উপট্ঠাতি ওক্কন্তিত্ৰা পক্খন্দিত্ৰা পৰত্ততীতি অত্থো. সতিযেৰ পট্ঠানন্তি সতিপট্ঠানং. অথ ৰা সরণট্ঠেন সতি, উপট্ঠানট্ঠেন পট্ঠানং. ইতি সতি চ সা পট্ঠানঞ্চাতিপি সতিপট্ঠানং. ইদমিধ অধিপ্পেতং. তং সতিপট্ঠানং. ভাৰেন্তোতি ৰড্ঢেন্তো. এত্থ চ যং তিধা পটিপন্নেসু সাৰকেসু সত্থুনো পটিঘানুনযৰীতিৰত্ততা ‘‘সতিপট্ঠান’’ন্তি ৰুত্তং, তং ইমিনা সুত্তেন গহেতব্বং. ৰুত্তঞ্হেতং ভগৰতা –

‘‘তযো সতিপট্ঠানা যদরিযো সেৰতি, যদরিযো সেৰমানো সত্থা গণমনুসাসিতুমরহতী’’তি (ম. নি. ৩.৩০৪, ৩১১) ইতি খো পনেতং ৰুত্তং, কিঞ্চেতং পটিচ্চ ৰুত্তং. ইধ, ভিক্খৰে, সত্থা সাৰকানং ধম্মং দেসেতি অনুকম্পকো হিতেসী অনুকম্পং উপাদায ‘‘ইদং ৰো হিতায ইদং ৰো সুখাযা’’তি. তস্স সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি, ৰোক্কম্ম চ সত্থু সাসনা ৰত্তন্তি. তত্র, ভিক্খৰে, তথাগতো ন চেৰ অনত্তমনো হোতি, ন চ অনত্তমনতং পটিসংৰেদেতি, অনৰস্সুতো চ ৰিহরতি সতো সম্পজানো. ইদং, ভিক্খৰে, পঠমং সতিপট্ঠানং. যদরিযো…পে… মরহতি.

‘‘পুন চপরং, ভিক্খৰে, সত্থা…পে… ইদং ৰো সুখাযাতি. তস্স একচ্চে সাৰকা ন সুস্সূসন্তি…পে… ৰত্তন্তি. একচ্চে সাৰকা সুস্সূসন্তি…পে… ন চ ৰোক্কম্ম সত্থু সাসনা ৰত্তন্তি. তত্র, ভিক্খৰে, তথাগতো ন চেৰ অনত্তমনো হোতি, ন চ অনত্তমনতং পটিসংৰেদেতি, ন চ অত্তমনো হোতি, ন চ অত্তমনতং পটিসংৰেদেতি. অনত্তমনতা চ অত্তমনতা চ তদুভযং অভিনিৰজ্জেত্ৰা উপেক্খকো ৰিহরতি সতো সম্পজানো. ইদং ৰুচ্চতি, ভিক্খৰে, দুতিযং…পে….

‘‘পুন চপরং…পে… ইদং ৰো সুখাযাতি. তস্স সাৰকা সুস্সূসন্তি…পে… ৰত্তন্তি. তত্র, ভিক্খৰে, তথাগতো অত্তমনো চেৰ হোতি, অত্তমনতঞ্চ পটিসংৰেদেতি, অনৰস্সুতো চ ৰিহরতি সতো সম্পজানো. ইদং ৰুচ্চতি, ভিক্খৰে, ততিয’’ন্তি (দী. নি. ৩.৩১১).

এৰং পটিঘানুনযেহি অনৰস্সুততা নিচ্চং উপট্ঠিতসতিতায তদুভযং ৰীতিৰত্ততা ‘‘সতিপট্ঠান’’ন্তি ৰুত্তা. বুদ্ধানমেৰ কির নিচ্চং উপট্ঠিতসতিতা হোতি, ন পচ্চেকবুদ্ধাদীনন্তি.

ৰেদনাসু ৰেদনানুপস্সনাতিআদীসু ৰেদনাদীনং পুন ৰচনে পযোজনং কাযানুপস্সনাযং ৰুত্তনযেনেৰ যথাযোগং যোজেত্ৰা ৰেদিতব্বং. অযম্পি সাধারণত্থো. সুখাদীসু অনেকপ্পভেদাসু ৰেদনাসু ৰিসুং ৰিসুং অনিচ্চাদিতো একেকৰেদনানুপস্সনা. সরাগাদিকে সোল়সপ্পভেদে চিত্তে ৰিসুং ৰিসুং অনিচ্চাদিতো একেকচিত্তানুপস্সনা. কাযৰেদনাচিত্তানি ঠপেত্ৰা সেসতেভূমকধম্মেসু ৰিসুং ৰিসুং অনিচ্চাদিতো একেকধম্মানুপস্সনা সতিপট্ঠানসুত্তন্তে ৰুত্তনযেন নীৰরণাদিধম্মানুপস্সনাতি. এত্থ চ কাযেতি একৰচনং, সরীরস্স একত্তা. চিত্তেতি একৰচনং, চিত্তস্স সভাৰভেদাভাৰতো জাতিগ্গহণেন কতন্তি ৰেদিতব্বং. যথা চ ৰেদনাদযো অনুপস্সিতব্বা, তথানুপস্সন্তো ৰেদনাসু ৰেদনানুপস্সনা, চিত্তে চিত্তানুপস্সনা, ধম্মেসু ধম্মানুপস্সনাতি ৰেদিতব্বা. কথং ৰেদনা অনুপস্সিতব্বা? সুখা তাৰ ৰেদনা দুক্খতো, দুক্খা ৰেদনা সল্লতো, অদুক্খমসুখা অনিচ্চতো অনুপস্সিতব্বা. যথাহ –

‘‘যো সুখং দুক্খতো অদ্দ, দুক্খমদ্দক্খি সল্লতো;

অদুক্খমসুখং সন্তং, অদ্দক্খি নং অনিচ্চতো;

স ৰে সম্মদ্দসো ভিক্খু, পরিজানাতি ৰেদনা’’তি. (সং. নি. ৪.২৫৩);

সব্বা এৰ চেতা দুক্খতোপি অনুপস্সিতব্বা. ৰুত্তঞ্হেতং ‘‘যং কিঞ্চি ৰেদযিতং, তং দুক্খস্মিন্তি ৰদামী’’তি (সং. নি. ৪.২৫৯). সুখদুক্খতোপি চ অনুপস্সিতব্বা. যথাহ ‘‘সুখা ৰেদনা ঠিতিসুখা, ৰিপরিণামদুক্খা. দুক্খা ৰেদনা ঠিতিদুক্খা, ৰিপরিণামসুখা. অদুক্খমসুখা ৰেদনা ঞাণসুখা, অঞ্ঞাণদুক্খা’’তি (ম. নি. ১.৪৬৫). অপি চ অনিচ্চাদিসত্তৰিপস্সনাৰসেনাপি অনুপস্সিতব্বা. চিত্তধম্মেসুপি চিত্তং তাৰ আরম্মণাধিপতিসহজাতভূমিকম্মৰিপাককিরিযাদিনানত্তভেদানং অনিচ্চাদিসত্তানুপস্সনানং সরাগাদিসোল়সভেদানঞ্চ ৰসেন অনুপস্সিতব্বং. ধম্মা সলক্খণসামঞ্ঞলক্খণানং সুঞ্ঞতধম্মস্স অনিচ্চাদিসত্তানুপস্সনানং সন্তাসন্তাদীনঞ্চ ৰসেন অনুপস্সিতব্বা.

ইমে চত্তারো সতিপট্ঠানা পুব্বভাগে নানাচিত্তেসু লব্ভন্তি. অঞ্ঞেনেৰ হি চিত্তেন কাযং পরিগ্গণ্হাতি, অঞ্ঞেন ৰেদনং, অঞ্ঞেন চিত্তং, অঞ্ঞেন ধম্মে পরিগ্গণ্হাতি, লোকুত্তরমগ্গক্খণে পন একচিত্তেযেৰ লব্ভন্তীতি. আদিতো হি কাযং পরিগ্গণ্হিত্ৰা আগতস্স ৰিপস্সনাসম্পযুত্তা সতি কাযানুপস্সনা নাম, তায সতিযা সমন্নাগতো পুগ্গলো কাযানুপস্সী নাম. ৰিপস্সনং উস্সুক্কাপেত্ৰা অরিযমগ্গং পত্তস্স মগ্গক্খণে মগ্গসম্পযুত্তা সতি কাযানুপস্সনা নাম, তায সতিযা সমন্নাগতো পুগ্গলো কাযানুপস্সী নাম.

ৰেদনং পরিগ্গণ্হিত্ৰা চিত্তং পরিগ্গণ্হিত্ৰা ধম্মে পরিগ্গণ্হিত্ৰা আগতস্স ৰিপস্সনাসম্পযুত্তা সতি ধম্মানুপস্সনা নাম, তায সতিযা সমন্নাগতো পুগ্গলো ধম্মানুপস্সী নাম. ৰিপস্সনং উস্সুক্কাপেত্ৰা অরিযমগ্গং পত্তস্স মগ্গক্খণে মগ্গসম্পযুত্তা সতি ধম্মানুপস্সনা নাম, তায সতিযা সমন্নাগতো পুগ্গলো ধম্মানুপস্সী নাম, এৰং তাৰ দেসনা পুগ্গলে তিট্ঠতি, কাযে পন ‘‘সুভ’’ন্তি ৰিপল্লাসপ্পহানা কাযপরিগ্গাহিকা সতি মগ্গেন সমিজ্ঝতীতি কাযানুপস্সনা নাম. ৰেদনায ‘‘সুখ’’ন্তি ৰিপল্লাসপ্পহানা ৰেদনাপরিগ্গাহিকা সতি মগ্গেন সমিজ্ঝতীতি ৰেদনানুপস্সনা নাম. চিত্তে ‘‘নিচ্চ’’ন্তি ৰিপল্লাসপ্পহানা চিত্তপরিগ্গাহিকা সতি মগ্গেন সমিজ্ঝতীতি চিত্তানুপস্সনা নাম. ধম্মেসু ‘‘অত্তা’’তি ৰিপল্লাসপ্পহানা ধম্মপরিগ্গাহিকা সতি মগ্গেন সমিজ্ঝতীতি ধম্মানুপস্সনা নাম. ইতি একাৰ মগ্গসম্পযুত্তা সতি চতুকিচ্চসাধকট্ঠেন চত্তারি নামানি লভতি. তেন ৰুত্তং ‘‘লোকুত্তরমগ্গক্খণে পন একচিত্তেযেৰ লব্ভন্তী’’তি.

পুন উপকারৰসেন চ অপরিহীনৰসেন চ গুণৰসেন চ অপরে তযো চতুক্কা ৰুত্তা. তত্থ অসতিপরিৰজ্জনাযাতি ন সতি অসতি, সতি এত্থ নত্থীতি ৰা অসতি, মুট্ঠস্সতিযা এতং অধিৰচনং. পরিৰজ্জনাযাতি সমন্ততো ৰজ্জনেন. ভত্তনিক্খিত্তকাকসদিসে হি মুট্ঠসতিপুগ্গলে পরিৰজ্জনেন উপট্ঠিতসতিপুগ্গলসেৰনেন ঠাননিসজ্জাদীসু সতিসমুট্ঠাপনত্থং নিন্নপোণপব্ভারচিত্ততায চ সতি উপ্পজ্জতি. সতিকরণীযানং ধম্মানন্তি সতিযা কাতব্বানং ধম্মানং. কতত্তাতি কতভাৰেন. চতুন্নং মগ্গানং কতত্তা, ভাৰিতত্তাতি অত্থো. সতিপরিবন্ধানং ধম্মানং হতত্তাতি কামচ্ছন্দাদীনং নাসিতভাৰেন. সতিনিমিত্তানং ধম্মানং অসম্মুট্ঠত্তাতি সতিযা কারণানং কাযাদিআরম্মণানং অনট্ঠভাৰেন.

সতিযা সমন্নাগতত্তাতি সতিযা সম্মা আগতত্তা অপরিহীনত্তা চ. ৰসিতত্তাতি ৰসিভাৰপ্পত্তেন. পাগুঞ্ঞতাযাতি পগুণভাৰেন. অপচ্চোরোহণতাযাতি অনিৰত্তনভাৰেন অপচ্চোসক্কনভাৰেন.

সত্তত্তাতি সভাৰেন ৰিজ্জমানত্তা. সন্তত্তাতি নিব্বুতসভাৰত্তা. সমিতত্তাতি কিলেসানং ৰূপসমিতভাৰত্তা. সন্তধম্মসমন্নাগতত্তাতি সপ্পুরিসধম্মেহি অপরিহীনত্তা. বুদ্ধানুস্সতিআদযো হেট্ঠা ৰুত্তনযা এৰ. সরণকৰসেন সতি, ইদং সতিযা সভাৰপদং. পুনপ্পুনং সরণতো অনুস্সরণৰসেন অনুস্সতি. অভিমুখং গন্ত্ৰা ৰিয সরণতো পটিসরণৰসেন পটিস্সতি. উপসগ্গৰসেন ৰা ৰড্ঢিতমত্তমেৰ. সরণাকারো সরণতা. যস্মা পন সরণতাতি তিণ্ণং সরণানম্পি নামং, তস্মা তং পটিসেধেতুং পুন সতিগ্গহণং কতং. সতিসঙ্খাতা সরণতাতি অযঞ্হেত্থ অত্থো. সুতপরিযত্তস্স ধারণভাৰতো ধারণতা. অনুপৰিসনসঙ্খাতেন ওগাহনট্ঠেন অপিলাপনভাৰো অপিলাপনতা. যথা হি উদকে লাবুকটাহাদীনি পলৰন্তি, ন অনুপৰিসন্তি, ন তথা আরম্মণে সতি. আরম্মণঞ্হি এসা অনুপৰিসতি, তস্মা ‘‘অপিলাপনতা’’তি ৰুত্তা. চিরকতচিরভাসিতানং ন সম্মুস্সনভাৰতো অসম্মুস্সনতা. উপট্ঠানলক্খণে জোতনলক্খণে চ ইন্দট্ঠং কারেতীতি ইন্দ্রিযং, সতিসঙ্খাতং ইন্দ্রিযং সতিন্দ্রিযং. পমাদে ন কম্পতীতি সতিবলং. যাথাৰসতি নিয্যানসতি কুসলসতীতি সম্মাসতি. বুজ্ঝনকস্স অঙ্গোতি বোজ্ঝঙ্গো, পসট্ঠো সুন্দরো ৰা বোজ্ঝঙ্গো সম্বোজ্ঝঙ্গো, সতিযেৰ সম্বোজ্ঝঙ্গো সতিসম্বোজ্ঝঙ্গো.

একাযনমগ্গোতি একমগ্গো, অযং মগ্গো ন দ্ৰেধাপথভূতোতি এৰমত্থো দট্ঠব্বো. অথ ৰা একেন অযিতব্বোতি একাযনো. একেনাতি গণসঙ্গণিকং পহায ৰূপকট্ঠেন পৰিৰিত্তচিত্তেন. অযিতব্বো পটিপজ্জিতব্বো, অযন্তি ৰা এতেনাতি অযনো, সংসারতো নিব্বানং গচ্ছতীতি অত্থো. একস্স অযনো একাযনো. একস্সাতি সেট্ঠস্স. সব্বসত্তানং সেট্ঠোৰ ভগৰা, তস্মা ‘‘ভগৰতো’’তি ৰুত্তং হোতি. কিঞ্চাপি হি তেন অঞ্ঞেপি অযন্তি, এৰং সন্তেপি ভগৰতোৰ সো অযনো তেন উপ্পাদিতত্তা. যথাহ ‘‘সো হি ব্রাহ্মণ ভগৰা অনুপ্পন্নস্স মগ্গস্স উপ্পাদেতা’’তিআদি (সং. নি. ১.২১৫; পটি. ম. ৩.৫; ম. নি. ৩.৭৯). অযতীতি ৰা অযনো, গচ্ছতি পৰত্ততীতি অত্থো. একস্মিং অযনো একাযনো. ইমস্মিংযেৰ ধম্মৰিনযে পৰত্ততি, ন অঞ্ঞত্থাতি ৰুত্তং হোতি. যথাহ ‘‘ইমস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো উপলব্ভতী’’তি (দী. নি. ২.২১৪). দেসনাভেদোযেৰ হেসো, অত্থতো পন একোৰ. অপি চ একং অযতীতি একাযনো. পুব্বভাগে নানামুখভাৰনানযেন পৰত্তোপি অপরভাগে একং নিব্বানমেৰ গচ্ছতীতি ৰুত্তং হোতি. যথাহ ব্রহ্মা সহম্পতি –

‘‘একাযনং জাতিখযন্তদস্সী, মগ্গং পজানাতি হিতানুকম্পী;

এতেন মগ্গেন তরিংসু পুব্বে, তরিস্সন্তি যে চ তরন্তি ওঘ’’ন্তি. (সং. নি. ৫.৩৮৪, ৪০৯);

মগ্গোতি কেনট্ঠেন মগ্গো? নিব্বানং গমনট্ঠেন, নিব্বানত্থিকেহি মগ্গনীযট্ঠেন চ. উপেতোতি আসন্নং গতো. সমুপেতোতি ততো আসন্নতরং গতো. উভযেনপি সতিযা অপরিহীনোতি অত্থো. উপগতোতি উপগন্ত্ৰা ঠিতো. সমুপগতোতি সম্পযুত্তো হুত্ৰা ঠিতো. ‘‘উপাগতো সমুপাগতো’’তিপি পাল়ি. উভযেনাপি সতিসমীপং আগতোতি অত্থো. উপপন্নোতি অৰিযোগাপন্নো. সমুপপন্নোতি পরিপুণ্ণো. সমন্নাগতোতি অৰিকলো ৰিজ্জমানো. ‘‘উপেতো সমুপেতোতি দ্ৰীহি পদেহি পৰত্তং কথিতং. উপগতো সমুপগতোতি দ্ৰীহি পদেহি পটিৰেধো. উপপন্নো সমুপপন্নো সমন্নাগতোতি তীহি পদেহি পটিলাভো কথিতো’’তি এৰমেকে ৰণ্ণযন্তি.

লোকে ৰা সা ৰিসত্তিকাতি যা এসা অনেকপ্পকারেন ৰুত্তা ৰিসত্তিকা, সা খন্ধলোকে এৰ, ন অঞ্ঞত্র খন্ধেহি পৰত্ততীতি অত্থো. লোকে ৰা তং ৰিসত্তিকন্তি খন্ধলোকে এৰ পৰত্তং এতং ৰিসত্তিকসঙ্খাতং তণ্হং. তরতি কামে পরিৰজ্জেন্তো. উত্তরতি কিলেসে পজহন্তো. পতরতি তেসং পতিট্ঠাহেতুং ছিন্দন্তো. সমতিক্কমতি সংসারং অতিক্কমন্তো. ৰীতিৰত্ততি পটিসন্ধিঅভব্বুপ্পত্তিকং করোন্তো. অথ ৰা তরতি উত্তরতি কাযানুপস্সনেন. পতরতি ৰেদনানুপস্সনেন. সমতিক্কমতি চিত্তানুপস্সনেন. অথ ৰা তরতি সীলেন. উত্তরতি সমাধিনা. পতরতি ৰিপস্সনায. সমতিক্কমতি মগ্গেন. ৰীতিৰত্ততি ফলেনাতি এৰমাদিনা যোজেতব্বং.

৪. চতুত্থগাথায অযং সঙ্খেপত্থো – যো একং সালিখেত্তাদিখেত্তং ৰা ঘরৰত্থাদিৰত্থুং ৰা কহাপণসঙ্খাতং হিরঞ্ঞং ৰা গোঅস্সাদিভেদং গৰাস্সং ৰা অন্তোজাতাদিদাসে ৰা ভতকাদিকম্মকরে ৰা ইত্থিসঞ্ঞিতা থিযো ৰা ঞাতিবন্ধৰাদিবন্ধূ ৰা অঞ্ঞে ৰা মনাপিযরূপাদিকে পুথুকামে অনুগিজ্ঝতীতি. সালিক্খেত্তন্তি যত্থ সালিযো ৰিরুহন্তি. ৰীহিক্খেত্তাদীসুপি এসেৰ নযো. ৰীহীতি অৰসেসৰীহযো. মোদযতীতি মুগ্গো. ঘরৰত্থুন্তি ঘরপতিট্ঠাপনত্থং কতাকতভূমিভাগো. কোট্ঠকৰত্থাদীসুপি এসেৰ নযো. কোট্ঠকোতি দ্ৰারকোট্ঠাদি. পুরেতি ঘরস্স পুরতো. পচ্ছাতি ঘরস্স পচ্ছতো. এত্থ আরামেন্তি চিত্তং তোসেন্তীতি আরামো, পুপ্ফেনপি ফলেনপি ছাযাযপি দকেনপি রমন্তীতি অত্থো.

পসুকাদযোতি এল়কাদযো. অন্তোজাতকোতি অন্তোঘরদাসিযা কুচ্ছিম্হি জাতো. ধনক্কীতকোতি ধনেন কীণিত্ৰা পরিৰত্তেত্ৰা গহিতো. সামং ৰাতি সযং ৰা. দাসব্যন্তি দাসস্স ভাৰো দাসব্যং, তং দাসব্যং. উপেতীতি উপগচ্ছতি. অকামকো ৰাতি অত্তনো অরুচিযা ৰা করমরানীতো.

তে চত্তারো পুনপি দস্সেতুং ‘‘আমায দাসাপি ভৰন্তি হেকে’’তি আহ. আমায দাসাতি অন্তোজাতদাসা. ‘‘যত্থ দাসো আমজাতো ঠিতো থুল্লানি গচ্ছতী’’তি এত্থাপি এতেৰ ৰুত্তা. ধনেন কীতাতি ধনদাসা. সামঞ্চ একেতি সযং দাসা. ভযাপণুন্নাতি অকামদাসা. ভযেন পণুন্না খিপিতা.

ভতকাতি ভতিযা জীৰনকা. কসিকম্মাদিকম্মং করোন্তীতি কম্মকরা. উপজীৰিনোতি সম্মন্তনাদিনা উপগন্ত্ৰা নিস্সযং কত্ৰা জীৰন্তীতি উপজীৰিনো.

ইত্থীতি থিযতি এতিস্সং গব্ভোতি ইত্থী. পরিগ্গহোতি সহাযী সস্সামিকা. মাতাপিতিবন্ধৰাপি ঞাতিবন্ধু. সগোত্তো গোত্তবন্ধু. একাচরিযকুলে ৰা একজাতিমন্তং ৰা উগ্গহিতমন্তো মন্তবন্ধু. ধনুসিপ্পাদিসদ্ধিং উগ্গহিতকো সিপ্পবন্ধু. ‘‘মিত্তবন্ধৰাতিপি বন্ধূ’’তি কত্থচি পোত্থকে পাঠো দিস্সতি.

গিজ্ঝতীতি কিলেসকামেন পত্থেতি. অনুগিজ্ঝতীতি অনু অনু গিজ্ঝতি পুনপ্পুনং পত্থেতি. পলিগিজ্ঝতীতি সমন্ততো পত্থেতি. পলিবজ্ঝতীতি ৰিসেসেন পত্থেতি. ‘‘ওল়ারিকত্তেন নিমিত্তগ্গাহৰসেন গিজ্ঝতি, অনুগিজ্ঝতি, অনুব্যঞ্জনগ্গাহৰসেন পলিগিজ্ঝতি, পলিবজ্ঝতী’’তি এৰমেকে ৰণ্ণযন্তি.

৫. পঞ্চমগাথাযং অযং সঙ্খেপত্থো – তং পুগ্গলং অবলখ্যা কিলেসা বলীযন্তি সহন্তি মদ্দন্তি. সদ্ধাবলাদিৰিরহেন ৰা অবলং তং পুগ্গলং অবলা কিলেসা বলীযন্তি, অবলত্তা বলীযন্তীতি অত্থো. অথ ৰা তং কামগিদ্ধং কামরত্তং কামপরিযেসন্তঞ্চ সীহাদযো চ পাকটপরিস্সযা, কাযদুচ্চরিতাদযো চ অপাকটপরিস্সযা মদ্দন্তি. ততো অপাকটপরিস্সযেহি অভিভূতং তং পুগ্গলং জাতিআদিদুক্খং ভিন্নং নাৰং উদকং ৰিয অন্ৰেতি.

অবলাতি নত্থি এতেসং বলন্তি অবলা, বলৰিরহিতা. দুব্বলাতি মন্দপযোগাবলেন কত্তব্বকিচ্চৰিরহিতা. অপ্পবলাতি অপ্পং পরিত্তং এতেসং বলন্তি অপ্পবলা, যুজ্ঝিতুং অসমত্থা. অপ্পথামকাতি অপ্পো পরিত্তো থামো এতেসং ৰাযামো উস্সাহোতি অপ্পথামকা. হীনা নিহীনা পযোগহীনেন. ওমকা থামহীনেন. লামকা পচ্চযহীনেন. ছতুক্কা অজ্ঝাসযহীনেন. পরিত্তা পত্তিহীনেন. সহন্তীতি মদ্দন্তি ঘট্টনং উপ্পাদেন্তি. পরিসহন্তীতি সব্বতো মদ্দন্তি. অভিভৰন্তি অপরাপরং উপ্পত্তিৰসেন. অজ্ঝোত্থরন্তি পুনপ্পুনং উপ্পত্তিৰসেন. পরিযাদিযন্তি সুস্সোসেত্ৰা ঠানেন. মদ্দন্তি কুসলুপ্পত্তিনিৰারণেন.

সদ্ধাবলন্তি সদ্দহন্তি এতায, সযং ৰা সদ্দহতি, সদ্দহনমত্তমেৰ ৰা এসাতি সদ্ধা. সা সদ্দহনলক্খণা, ওকপ্পনলক্খণা ৰা, সম্পসাদনরসা উদকপ্পসাদকমণি ৰিয. পক্খন্দনরসা ৰা ওঘুত্তরণো ৰিয. অকালুসিযপচ্চুপট্ঠানা, অধিমুত্তিপচ্চুপট্ঠানা ৰা. সদ্ধেয্যৰত্থুপদট্ঠানা, সোতাপত্তিযঙ্গপদট্ঠানা ৰা. সা হত্থৰিত্তবীজানি ৰিয দট্ঠব্বা. অসদ্ধিযে ন কম্পতীতি সদ্ধাবলং. ৰীরিযবলন্তি ৰীরস্স ভাৰো ৰীরিযং, ৰীরানং ৰা কম্মং ৰীরিযং, ৰিধিনা ৰা নযেন উপাযেন ঈরযিতব্বং পৰত্তযিতব্বন্তি ৰীরিযং. তং পনেতং উপত্থম্ভনলক্খণঞ্চ পগ্গহণলক্খণঞ্চ ৰীরিযং, সহজাতানং উপত্থম্ভনরসং, অসংসীদনভাৰপচ্চুপট্ঠানং, ‘‘সংৰিগ্গো যোনিসো পদহতী’’তি ৰচনতো (অ. নি. ৪.১১৩) সংৰেগপদট্ঠানং, ৰীরিযারম্ভৰত্থুপদট্ঠানং ৰা. সম্মা আরদ্ধং সব্বসম্পত্তীনং মূলন্তি দট্ঠব্বং. কোসজ্জে ন কম্পতীতি ৰীরিযবলং. সতিযা লক্খণাদীনি ৰুত্তানেৰ.

মুট্ঠস্সচ্চে ন কম্পতীতি সতিবলং. সহজাতানি সম্মা আধীযতি ঠপেতীতি সমাধি. সো পামোক্খলক্খণো অৰিক্খেপলক্খণো ৰা, সহজাতানং ধম্মানং আরম্মণে সম্পিণ্ডনরসো ন্হানিযচুণ্ণানং উদকং ৰিয, উপসমপচ্চুপট্ঠানো, ঞাণপচ্চুপট্ঠানো ৰা. ‘‘সমাহিতো যথাভূতং পজানাতি পস্সতী’’তি হি ৰুত্তং. ৰিসেসতো সুখপদট্ঠানো নিৰাতে পদীপচ্চীনং ঠিতি ৰিয চেতসো ঠিতীতি দট্ঠব্বো. উদ্ধচ্চে ন কম্পতীতি সমাধিবলং. পজানাতীতি পঞ্ঞা. কিং পজানাতি? ‘‘ইদং দুক্খ’’ন্তিআদিনা (মহাৰ. ১৫) নযেন অরিযসচ্চানি. সা যথাসভাৰপটিৰেধলক্খণা, অক্খলিতপটিৰেধলক্খণা ৰা কুসলিস্সাসখিত্তউসুপটিৰেধো ৰিয, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসকো ৰিয. অৰিজ্জায ন কম্পতীতি পঞ্ঞাবলং. হিরিবলং ওত্তপ্পবলন্তি অহিরিকে ন কম্পতীতি হিরিবলং. অনোত্তপ্পে ন কম্পতীতি ওত্তপ্পবলং. অযং উভযৰসেন অত্থৰণ্ণনা হোতি. কাযদুচ্চরিতাদীহি হিরীযতীতি হিরী, লজ্জাযেতং অধিৰচনং. তেহি এৰ ওত্তপ্পতীতি ওত্তপ্পং, পাপতো উব্বেগস্সেতং অধিৰচনং.

তেসং নানাকরণদীপনত্থং – ‘‘সমুট্ঠানং অধিপতি, লজ্জাদিলক্খণেন চা’’তি ইমং মাতিকং ঠপেত্ৰা অযং ৰিত্থারকথা ৰুত্তা – অজ্ঝত্তসমুট্ঠানা হিরী নাম, বহিদ্ধাসমুট্ঠানং ওত্তপ্পং নাম. অত্তাধিপতি হিরী নাম, লোকাধিপতি ওত্তপ্পং নাম. লজ্জাসভাৰসণ্ঠিতা হিরী নাম, ভযসভাৰসণ্ঠিতং ওত্তপ্পং নাম. সপ্পতিস্সৰলক্খণা হিরী নাম, ৰজ্জভীরুকভযদস্সাৰিলক্খণং ওত্তপ্পং নাম.

তত্থ অজ্ঝত্তসমুট্ঠানং হিরিং চতূহি কারণেহি সমুট্ঠাপেতি – জাতিং পচ্চৰেক্খিত্ৰা, ৰযং পচ্চৰেক্খিত্ৰা, সূরভাৰং পচ্চৰেক্খিত্ৰা, বাহুসচ্চং পচ্চৰেক্খিত্ৰা. কথং? ‘‘পাপকরণং নামেতং ন জাতিসম্পন্নানং কম্মং, হীনজচ্চানং কেৰট্টাদীনং ইদং কম্মং, মাদিসস্স জাতিসম্পন্নস্স ইদং কম্মং কাতুং ন যুত্ত’’ন্তি এৰং তাৰ জাতিং পচ্চৰেক্খিত্ৰা পাণাতিপাতাদিপাপং অকরোন্তো হিরিং সমুট্ঠাপেতি. তথা ‘‘পাপকরণং নামেতং দহরেহি কত্তব্বং কম্মং, মাদিসস্স ৰযে ঠিতস্স ইদং কম্মং কাতুং ন যুত্ত’’ন্তি এৰং ৰযং পচ্চৰেক্খিত্ৰা পাণাতিপাতাদিপাপং অকরোন্তো হিরিং সমুট্ঠাপেতি. তথা ‘‘পাপকম্মং নামেতং দুব্বলজাতিকানং কম্মং, মাদিসস্স সূরভাৰসম্পন্নস্স ইদং কম্মং কাতুং ন যুত্ত’’ন্তি এৰং সূরভাৰং পচ্চৰেক্খিত্ৰা পাণাতিপাতাদিপাপং অকরোন্তো হিরিং সমুট্ঠাপেতি. তথা ‘‘পাপকম্মং নামেতং অন্ধবালানং কম্মং, ন পণ্ডিতানং. মাদিসস্স পণ্ডিতস্স বহুস্সুতস্স ইদং কম্মং কাতুং ন যুত্ত’’ন্তি এৰং বাহুসচ্চং পচ্চৰেক্খিত্ৰা পাণাতিপাতাদিপাপং অকরোন্তো হিরিং সমুট্ঠাপেতি. এৰং অজ্ঝত্তসমুট্ঠানং হিরিং চতূহি কারণেহি সমুট্ঠাপেতি. সমুট্ঠাপেত্ৰা চ পন অত্তনো চিত্তে হিরিং পৰেসেত্ৰা পাপকম্মং ন করোতি. এৰং অজ্ঝত্তসমুট্ঠানা হিরী নাম হোতি. কথং বহিদ্ধাসমুট্ঠানং ওত্তপ্পং নাম? ‘‘সচে ত্ৰং পাপকম্মং করিস্সসি, চতূসু পরিসাসু গরহপ্পত্তো ভৰিস্সসি –

‘‘গরহিস্সন্তি তং ৰিঞ্ঞূ, অসুচিং নাগরিকো যথা;

ৰজ্জিতো সীলৰন্তেহি, কথং ভিক্খু করিস্সসী’’তি. (ধ. স. অট্ঠ. ১ কামাৰচরকুসল ধম্মুদ্দেসকথা) –

এৰং পচ্চৰেক্খন্তো হি বহিদ্ধাসমুট্ঠিতেন ওত্তপ্পেন পাপকম্মং ন করোতি, এৰং বহিদ্ধাসমুট্ঠানং ওত্তপ্পং নাম হোতি.

কথং অত্তাধিপতি হিরী নাম? ইধেকচ্চো কুলপুত্তো অত্তানং অধিপতিং জেট্ঠকং কত্ৰা ‘‘মাদিসস্স সদ্ধাপব্বজিতস্স বহুস্সুতস্স ধুতঙ্গধরস্স ন যুত্তং পাপকম্মং কাতু’’ন্তি পাপং ন করোতি. এৰং অত্তাধিপতি হিরী নাম হোতি. তেনাহ ভগৰা ‘‘সো অত্তানংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতী’’তি (ধ. স. অট্ঠ. ১ কামাৰচরকুসল ধম্মুদ্দেসকথা; অ. নি. ৩.৪০).

কথং লোকাধিপতি ওত্তপ্পং নাম? ইধেকচ্চো কুলপুত্তো লোকং অধিপতিং জেট্ঠকং কত্ৰা পাপকম্মং ন করোতি. যথাহ –

‘‘মহা খো পনাযং লোকসন্নিৰাসো, মহন্তস্মিং খো পন লোকসন্নিৰাসে সন্তি সমণব্রাহ্মণা ইদ্ধিমন্তো দিব্বচক্খুকা পরচিত্তৰিদুনো, তে দূরতোপি পস্সন্তি, আসন্নাপি ন দিস্সন্তি, চেতসাপি চিত্তং জানন্তি. তেপি মং এৰং জানেয্যুং ‘পস্সথ ভো ইমং কুলপুত্তং সদ্ধায অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি. দেৰতাপি খো সন্তি ইদ্ধিমন্তিনিযো দিব্বচক্খুকা পরচিত্তৰিদুনিযো, তা দূরতোপি পস্সন্তি, আসন্নাপি ন দিস্সন্তি, চেতসাপি চিত্তং জানন্তি. তাপি মং এৰং জানেয্যুং ‘পস্সথ ভো ইমং কুলপুত্তং সদ্ধায অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি. সো ইতি পটিসঞ্চিক্খতি ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি. সো লোকংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতী’’তি (ধ. স. অট্ঠ. ১ কামাৰচরকুসল ধম্মুদ্দেসকথা; অ. নি. ৩.৪০).

এৰং লোকাধিপতি ওত্তপ্পং নাম হোতি. ‘‘লজ্জাসভাৰসণ্ঠিতা হিরী, ভযসভাৰসণ্ঠিতং ওত্তপ্প’’ন্তি এত্থ পন লজ্জাতি লজ্জনাকারো, তেন সভাৰেন সণ্ঠিতা হিরী. ভযন্তি অপাযভযং, তেন সভাৰেন সণ্ঠিতং ওত্তপ্পং. তদুভযম্পি পাপপরিৰজ্জনে পাকটং হোতি. একচ্চো হি যথা নাম একো কুলপুত্তো উচ্চারপস্সাৰাদীনি করোন্তো লজ্জিতব্বযুত্তকং একং দিস্ৰা লজ্জনাকারপ্পত্তো ভৰেয্য হীল়িতো, এৰমেৰ অজ্ঝত্তং লজ্জীধম্মং ওক্কমিত্ৰা পাপকম্মং ন করোতি. একচ্চো অপাযভযভীতো হুত্ৰা পাপকম্মং ন করোতি.

তত্রিদং ওপম্মং – যথা হি দ্ৰীসু অযোগুল়েসু একো সীতলো ভৰেয্য গূথমক্খিতো, একো উণ্হো আদিত্তো. তত্থ পণ্ডিতো সীতলং গূথমক্খিতত্তা জিগুচ্ছন্তো ন গণ্হাতি, ইতরং ডাহভযেন. তত্থ সীতলস্স গূথমক্খনজিগুচ্ছায অগণ্হনং ৰিয অজ্ঝত্তং লজ্জীধম্মং ওক্কমিত্ৰা পাপস্স অকরণং, উণ্হস্স ডাহভযেন অগণ্হনং ৰিয অপাযভযেন পাপস্স অকরণং ৰেদিতব্বং.

‘‘সপ্পতিস্সৰলক্খণা হিরী, ৰজ্জভীরুকভযদস্সাৰিলক্খণং ওত্তপ্প’’ন্তি ইদম্পি দ্ৰযং পাপপরিৰজ্জনে এৰ পাকটং হোতি. একচ্চো হি জাতিমহত্তপচ্চৰেক্খণা সত্থুমহত্তপচ্চৰেক্খণা দাযজ্জমহত্তপচ্চৰেক্খণা সব্রহ্মচারিমহত্তপচ্চৰেক্খণাতি চতূহি কারণেহি সপ্পতিস্সৰলক্খণং হিরিং সমুট্ঠাপেত্ৰা পাপং ন করোতি. একচ্চো অত্তানুৰাদভযং পরানুৰাদভযং দণ্ডভযং দুগ্গতিভযন্তি চতূহাকারেহি ৰজ্জভীরুকভাৰদস্সাৰিলক্খণং ওত্তপ্পং সমুট্ঠাপেত্ৰা পাপং ন করোতি. তত্থ জাতিমহত্তপচ্চৰেক্খণাদীনি চেৰ অত্তানুৰাদভযাদীনি চ ৰিত্থারেত্ৰা কথেতব্বানি. এৰং ৰুত্তং সত্তৰিধং বলং যস্স পুগ্গলস্স নত্থি, তে কিলেসা তং পুগ্গলং সহন্তি…পে… পরিযাদিযন্তি মদ্দন্তীতি.

দ্ৰে পরিস্সযাতি পাকটাপাকটৰসেন দ্ৰে এৰ উপদ্দৰা, ন একং, ন তীণি. তে ৰিভাগতো দস্সেতুং ‘‘কতমে পাকটপরিস্সযা’’তিআদিমাহ. তত্থ কোকাতি কেকা. অযমেৰ ৰা পাঠো. চোরাতি চোরিযকম্মেহি যুত্তা. মাণৰাতি সাহসিককম্মেহি যুত্তা. কতকম্মাতি সন্ধিচ্ছেদাদিকতচোরিককম্মা. অকতকম্মাতি তং কম্মং কাতুং নিক্খন্তা. এত্থ অস্সূতি ভৰেয্যুন্তি অত্থো. চক্খুরোগোতি চক্খুস্মিং উপ্পন্নরোগো, রুজতীতি রোগো. চক্খুরোগোতিআদযো ৰত্থুৰসেন ৰেদিতব্বা. নিব্বত্তিতপসাদানঞ্হি রোগো নাম নত্থি. কণ্ণরোগোতি বহিকণ্ণরোগো. মুখরোগোতি মুখে উপ্পন্নরোগো. দন্তরোগোতি দন্তসূলং. কাসোতি খযরোগো. সাসোতি স্ৰাসো উগ্গাররোগো. পিনাসোতি বহিনাসিকায রোগো. ডাহোতি অব্ভন্তরে উপ্পজ্জনকো উণ্হো. মুচ্ছাতি সতিৰিস্সজ্জনকা. পক্খন্দিকাতি লোহিতপক্খন্দিকা অতিসারো. সূলাতি আমসূলা কুচ্ছিৰাতো. ৰিসূচিকাতি মহন্তো ৰিরেচনকো. কিলাসোতি সবলো. সোসোতি সুক্খনকো সোসব্যাধি. অপমারোতি অমনুস্সগ্গাহো ৰেরিযক্খাবাধো. দদ্দূতি দদ্দুপীল়কা. কণ্ডূতি খুদ্দকপীল়কা. কচ্ছূতি মহাকচ্ছু. রখসাতি নখেহি ৰিলিখিতট্ঠানে রোগো. ‘‘নখসা’’তিপি পাল়ি. ৰিতচ্ছিকাতি হত্থতলপাদতলেসু হীরং হীরং কত্ৰা ফালেন্তো উপ্পজ্জনকরোগো. লোহিতপিত্তন্তি সোণিতপিত্তং, রত্তপিত্তন্তি ৰুত্তং হোতি. মধুমেহোতি সরীরব্ভন্তরে উক্কট্ঠরোগো. ৰুত্তঞ্হেতং ‘‘অপি চ মধুমেহো আবাধো উক্কট্ঠো’’তি (পাচি. ১৫).

অংসাতি অরিসরোগো. পীল়কাতি লোহিতপীল়কা. ভগং দালযতীতি ভগন্দলা, ৰচ্চমগ্গং ফালেতীতি অত্থো. পিত্তসমুট্ঠানাতি পিত্তেন সমুট্ঠানং উপ্পত্তি এতেসন্তি পিত্তসমুট্ঠানা. তে কির দ্ৰত্তিংস হোন্তি. সেম্হসমুট্ঠানাদীসুপি এসেৰ নযো. সন্নিপাতিকাতি ৰাতপিত্তসেম্হানং সন্নিপাতেন একীভাৰেন উপ্পন্না. আবাধট্ঠেন আবাধা. উতুপরিণামজাতি উতুপরিণামেন. অচ্চুণ্হাতি সীতেন উপ্পজ্জনকরোগা. ৰিসমপরিহারজাতি অতিট্ঠাননিসজ্জাদিনা ৰিসমপরিহারেন জাতা. ওপক্কমিকাতি ৰধবন্ধনাদিনা উপক্কমেন জাতা. কম্মৰিপাকজাতি বলৰকম্মৰিপাকসম্ভূতা. সীতং উণ্হং…পে… সম্ফস্সোতি ইমে পাকটা এৰ. ইতি ৰাতি এৰং ৰা. ইমে ৰুচ্চন্তীতি নিগমেন্তো আহ.

কতমে পটিচ্ছন্নপরিস্সযাতি অপাকটা অচ্ছাদিতউপদ্দৰা কতমেতি পুচ্ছতি. তত্থ কাযদুচ্চরিতন্তি পাণাতিপাতঅদিন্নাদানমিচ্ছাচারচেতনা ৰেদিতব্বা. ৰচীদুচ্চরিতন্তি মুসাৰাদপিসুণৰাচাফরুসৰাচাসম্ফপ্পলাপচেতনা ৰেদিতব্বা. মনোদুচ্চরিতন্তি অভিজ্ঝাব্যাপাদমিচ্ছাদিট্ঠিযো ৰেদিতব্বা. কাযে পৰত্তং, কাযতো ৰা পৰত্তং, দুট্ঠু চরিতং, কিলেসপূতিকত্তা ৰা দুট্ঠু চরিতন্তি কাযদুচ্চরিতং. ৰচীমনোদুচ্চরিতেসুপি এসেৰ নযো.

কামীযন্তীতি কামা, পঞ্চ কামগুণা. কামেসু ছন্দো কামচ্ছন্দো. কামযতীতি ৰা কামো, কামো এৰ ছন্দো, কামচ্ছন্দো ন কত্তুকম্যতাছন্দো, ন ধম্মচ্ছন্দো ৰা. কামতণ্হাৰ এৰংনামিকা. কুসলধম্মে নীৰরতীতি নীৰরণং, কামচ্ছন্দো এৰ নীৰরণং কামচ্ছন্দনীৰরণং. এৰং সেসেসুপি. ব্যাপজ্জতি তেন চিত্তং পূতিভাৰং উপগচ্ছতি, ব্যাপাদযতি ৰা ৰিনযাচাররূপসম্পত্তিহিতসুখাদীনীতি ৰা ব্যাপাদো. থিননতা থিনং. মিদ্ধনতা মিদ্ধং, অনুস্সাহসংহননতা অসত্তিৰিঘাততা চাতি অত্থো. থিনঞ্চ মিদ্ধঞ্চ থিনমিদ্ধং. তত্থ থিনং অনুস্সাহনলক্খণং, ৰীরিযৰিনোদনরসং, সংসীদনপচ্চুপট্ঠানং. মিদ্ধং অকম্মঞ্ঞতালক্খণং, ওনহনরসং, লীনভাৰপচ্চুপট্ঠানং, পচলাযিকানিদ্দাপচ্চুপট্ঠানং ৰা. উভযম্পি অরতিতন্দীৰিজম্ভিতাদীসু অযোনিসোমনসিকারপদট্ঠানন্তি.

উদ্ধতস্স ভাৰো উদ্ধচ্চং. তং অৰূপসমলক্খণং ৰাতাভিঘাতচলজলং ৰিয, অনৰট্ঠানরসং ৰাতাভিঘাতচলধজপটাকং ৰিয, ভন্তত্তপচ্চুপট্ঠানং পাসাণাভিঘাতসমুদ্ধতভস্মং ৰিয, চেতসো অৰূপসমো অযোনিসোমনসিকারপদট্ঠানং. চিত্তৰিক্খেপোতি দট্ঠব্বং. কুচ্ছিতং কতং কুকতং, তস্স ভাৰো কুক্কুচ্চং. তং পচ্ছানুতাপলক্খণং, কতাকতানুসোচনরসং, ৰিপ্পটিসারপচ্চুপট্ঠানং, কতাকতপদট্ঠানং দাসব্যং ৰিয দট্ঠব্বং. উদ্ধচ্চঞ্চ কুক্কুচ্চঞ্চ উদ্ধচ্চকুক্কুচ্চং. ৰিগতা চিকিচ্ছাতি ৰিচিকিচ্ছা, সভাৰং ৰা ৰিচিনন্তো এতায কিচ্ছতি কিলমতীতি ৰিচিকিচ্ছা, সা সংসযলক্খণা, সংসপ্পনরসা, অনিচ্ছযপচ্চুপট্ঠানা, অনেকংসগ্গাহপচ্চুপট্ঠানা ৰা, অযোনিসোমনসিকারপদট্ঠানা. পটিপত্তিঅন্তরাযকরাতি দট্ঠব্বা.

রজ্জনলক্খণো রাগো. দুস্সনলক্খণো দোসো. মুয্হনলক্খণো মোহো. কুজ্ঝনলক্খণো কোধো, চণ্ডিক্কলক্খণো ৰা, আঘাতকরণরসো, দূসনপচ্চুপট্ঠানো. উপনন্ধনলক্খণো উপনাহো, ৰেরঅপ্পটিনিস্সজ্জনরসো, কোধানুবন্ধভাৰপচ্চুপট্ঠানো. ৰুত্তঞ্চেতং ‘‘পুব্বকালং কোধো, অপরকালং উপনাহো’’তিআদি (ৰিভ. ৮৯১).

পরগুণমক্খনলক্খণো মক্খো. তেসং ৰিনাসনরসো, তদচ্ছাদনপচ্চুপট্ঠানো. যুগগ্গাহলক্খণো পল়াসো, পরগুণেহি অত্তনো গুণানং সমীকরণরসো, পরেসং গুণপ্পমাণেন উপট্ঠানপচ্চুপট্ঠানো.

পরসম্পত্তিখীযনলক্খণা ইস্সা, তস্স অক্খমনলক্খণা ৰা, তত্থ অনভিরতিরসা, ততো ৰিমুখভাৰপচ্চুপট্ঠানা. অত্তনো সম্পত্তিনিগূহনলক্খণং মচ্ছরিযং, অত্তনো সম্পত্তিযা পরেহি সাধারণভাৰং অক্খমনরসং, সঙ্কোচনপচ্চুপট্ঠানং.

কতপাপপটিচ্ছাদনলক্খণা মাযা, তস্স নিগূহনরসা, তদাৰরণপচ্চুপট্ঠানা. অত্তনো অৰিজ্জমানগুণপ্পকাসনলক্খণং সাঠেয্যং, তেসং সমুদাহরণরসং, সরীরাকারেহিপি তেসং ৰিভূতকরণপচ্চুপট্ঠানং.

চিত্তস্স উদ্ধুমাতভাৰলক্খণো থম্ভো, অপ্পতিস্সৰৰুত্তিরসো, অমদ্দৰপচ্চুপট্ঠানো. করণুত্তরিযলক্খণো সারম্ভো, ৰিপচ্চনীকতারসো, অগারৰপচ্চুপট্ঠানো.

উণ্ণতিলক্খণো মানো, অহংকাররসো, উদ্ধুমাতভাৰপচ্চুপট্ঠানো. অব্ভুণ্ণতিলক্খণো অতিমানো, অতিৰিয অহংকাররসো, অচ্চুদ্ধুমাতভাৰপচ্চুপট্ঠানো.

মত্তভাৰলক্খণো মদো, মদগ্গহণরসো, উম্মাদপচ্চুপট্ঠানো. পঞ্চসু কামগুণেসু চিত্তস্স ৰোস্সগ্গলক্খণো পমাদো, ৰোস্সগ্গানুপ্পদনরসো, সতিৰিপ্পৰাসপচ্চুপট্ঠানোতি এৰং ইমেসং ধম্মানং লক্খণাদীনি ৰেদিতব্বানি. অযমেত্থ সঙ্খেপো, ৰিত্থারো পন ‘‘তত্থ কতমো কোধো’’তিআদিনা ৰিভঙ্গে (ৰিভ. ৮৯১) ৰুত্তনযেনেৰ ৰেদিতব্বো.

ৰিসেসতো চেত্থ আমিসগিদ্ধো অত্তনা অলভন্তো অঞ্ঞস্স লাভিনো কুজ্ঝতি, তস্স সকিং উপ্পন্নো কোধো কোধোযেৰ. তদুত্তরি উপনাহো. সো এৰং কুদ্ধো উপনয্হন্তো চ সন্তেপি অঞ্ঞস্স লাভিনো গুণং মক্খেতি ‘‘অহম্পি তাদিসো’’তি চ যুগগ্গাহং গণ্হাতি. অযমস্স মক্খো চ পলাসো চ, সো এৰং মক্খী পলাসী তস্স লাভসক্কারাদীসু ‘‘কিং ইমস্স ইমিনা’’তি ইস্সতি পদুস্সতি, অযমস্স ইস্সা. সচে পনস্স কাচি সম্পত্তি হোতি, তস্সা তেন সাধারণভাৰং ন সহতি, ইদমস্স মচ্ছেরং. লাভহেতু খো পন অত্তনো সন্তেপি দোসে পটিচ্ছাদেতি, অযমস্স মাযা. অসন্তেপি গুণে পকাসেতি, ইদমস্স সাঠেয্যং. সো এৰং পটিপন্নো সচে পন যথাধিপ্পাযং লাভং লভতি, তেন থদ্ধো হোতি অমুদুচিত্তো ‘‘ন ইদং এৰং কাতব্ব’’ন্তি ওৰদিতুং অসক্কুণেয্যো, অযমস্স থম্ভো. সচে পন নং কোচি কিঞ্চি ৰদতি ‘‘ন ইদং এৰং কাতব্ব’’ন্তি, তেন সারদ্ধচিত্তো হোতি, ভাকুটিকমুখো ‘‘কো মে ত্ৰ’’ন্তি পসয্হভাণী, অযমস্স সারম্ভো. ততো থম্ভেন ‘‘অহমেৰ সেয্যো’’তি অত্তানং মঞ্ঞন্তো মানী হোতি. সারম্ভেন ‘‘কে ইমে’’তি পরে অতিমঞ্ঞন্তো অতিমানী, অযমস্স মানো চ অতিমানো চ. সো তেহি মানাতিমানেহি জাতিমদাদিঅনেকরূপং মদং জনেতি, মত্তো সমানো কামগুণাদিভেদেসু ৰত্থূসু পমজ্জতি, অযমস্স মদো চ পমাদো চাতি ৰেদিতব্বং.

সব্বে কিলেসাতি সব্বেপি অকুসলা ধম্মা. উপতাপনট্ঠেন ৰিবাধনট্ঠেন চ কিলেসা. কিলেসপূতিকত্তা দুচ্চরিতা. কিলেসদরথকরণট্ঠেন দরথা. অন্তোডাহাদিকরণট্ঠেন পরিল়াহা. সদা তাপনট্ঠেন সন্তাপা. অকোসল্লসম্ভূতট্ঠেন অভিসঙ্খরণট্ঠেন চ সব্বে অকুসলাভিসঙ্খারা.

কেনট্ঠেনাতি কেন অত্থেন. অভিভৰনাদিতিৰিধং অত্থং দস্সেতুং ‘‘পরিসহন্তীতি পরিস্সযা’’তিআদিমাহ. পরিসহন্তীতি দুক্খং উপ্পাদেন্তি অভিভৰন্তি. পরিহানায সংৰত্তন্তীতি কুসলানং ধম্মানং পরিচ্চজনায সংৰত্তন্তি. তত্রাসযাতি তস্মিং সরীরে অকুসলা ধম্মা আসযন্তি নিৰসন্তি উপ্পজ্জন্তীতি অত্থো. তে পরিস্সযাতি কাযদুচ্চরিতাদযো উপদ্দৰা. কুসলানং ধম্মানং অন্তরাযাযাতি উপরি ৰত্তব্বানং সম্মাপটিপদাদিতো কোসল্লসম্ভূতানং ধম্মানং অন্তরধানায অদস্সনত্থায সংৰত্তন্তি. সম্মাপটিপদাযাতি সুন্দরায পসট্ঠায ৰা পটিপদায, ন মিচ্ছাপটিপদায. অনুলোমপটিপদাযাতি অৰিরুদ্ধপটিপদায, ন পটিলোমপটিপদায. অপচ্চনীকপটিপদাযাতি ন পচ্চনীকপটিপদায, অপচ্চত্থিকপটিপদায. অন্ৰত্থপটিপদাযাতি অত্থঅনুগতায পটিপদায, উপরূপরি ৰড্ঢিতায পটিপদায. যথা অত্থো, তথা পটিপজ্জিতব্বায পটিপদাযাতি ৰুত্তং হোতি. ‘‘অত্তত্থপটিপদাযা’’তিপি পাল়ি, তং ন সুন্দরং. ধম্মানুধম্মপটিপদাযাতি ধম্মো নাম নৰলোকুত্তরধম্মো. অনুধম্মো নাম ৰিপস্সনাদি. তস্স ধম্মস্স অনুরূপা ধম্মপটিপদা ধম্মানুধম্মপটিপদা, তস্সা ধম্মানুধম্মপটিপদায.

সীলেসু পরিপূরিকারিতাযাতি পাতিমোক্খসীলেসু পারিপূরিং কত্ৰা ঠিততায. ইন্দ্রিযেসু গুত্তদ্ৰারতাযাতি ‘‘চক্খুনা রূপং দিস্ৰা’’তিআদিনা (দী. নি. ১.২১৩; অ. নি. ৩.১৬; ম. নি. ২.২৪; চূল়নি. মেত্তগূমাণৰপুচ্ছানিদ্দেস ১৮) নযেন ৰুত্তেসু মনচ্ছট্ঠেসু ইন্দ্রিযেসু সুগোপিতদ্ৰারভাৰস্স. ভোজনে মত্তঞ্ঞুতাযাতি পটিগ্গহণাদীসু পমাণযুত্ততায. অলংসাটকাদিং মুঞ্চিত্ৰা মিতভোজনতায.

জাগরিযানুযোগস্সাতি ‘‘দিৰসং চঙ্কমেন নিসজ্জায আৰরণীযেহি ধম্মেহী’’তি (অ. নি. ৩.১৬; ম. নি. ২.২৪) এৰমাদিনা নযেন পঞ্চ জাগরণধম্মে অনুযোগস্স. সতিসম্পজঞ্ঞস্সাতি সব্বকম্মট্ঠানভাৰনানুযুত্তানং সব্বযোগীনং সব্বদা উপকারকস্স সতিসম্পজঞ্ঞস্স.

সতিপট্ঠানানন্তি আরম্মণেসু ওক্কন্তিত্ৰা পক্কন্দিত্ৰা উপট্ঠানতো পট্ঠানং, সতিযেৰ পট্ঠানং সতিপট্ঠানং. কাযৰেদনাচিত্তধম্মেসু পনস্সা অসুভদুক্খানিচ্চানত্তাকারগহণৰসেন সুভসুখনিচ্চত্তসঞ্ঞাপহানকিচ্চসাধনৰসেন চ পৰত্তিতো চতুধা পভেদো হোতি, তেসং চতুন্নং সতিপট্ঠানানং.

চতুন্নং সম্মপ্পধানানন্তি পদহন্তি এতেনাতি পধানং, সোভনং পধানং সম্মপ্পধানং, সম্মা ৰা পদহন্তি এতেনাতি সম্মপ্পধানং, সোভনং ৰা তং কিলেসৰিরূপত্তৰিরহতো, পধানঞ্চ হিতসুখনিপ্ফাদকট্ঠেন সেট্ঠভাৰাৰহনতো, পধানভাৰকরণতো চাতি সম্মপ্পধানং, ৰীরিযস্সেতং অধিৰচনং. উপ্পন্নুপ্পন্নানং অনুপ্পন্নুপ্পন্নানঞ্চ চতুন্নং অকুসলকুসলানং পহানানুপ্পত্তিউপ্পাদট্ঠিতিকিচ্চসাধনৰসেন পৰত্তিতো পনস্স চতুধা পভেদো হোতি, তেসং চতুন্নং সম্মপ্পধানানং.

চতুন্নং ইদ্ধিপাদানন্তি এত্থ ছন্দৰীরিযচিত্তৰীমংসাসু একেকো ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো. ইজ্ঝন্তি ৰা এতায সত্তা ইদ্ধা ৰুদ্ধা উক্কংসগতা হোন্তীতি ইদ্ধি. পঠমেন অত্থেন ইদ্ধিযেৰ পাদোতি ইদ্ধিপাদো, ইদ্ধিকোট্ঠাসোতি অত্থো. দুতিযেন অত্থেন ইদ্ধিযা পাদোতি ইদ্ধিপাদো, পাদোতি পতিট্ঠা অধিগমুপাযোতি অত্থো. তেন হি যস্মা উপরূপরিৰিসেসসঙ্খাতং ইদ্ধিং পজ্জন্তি পাপুণন্তি, তস্মা পাদোতি ৰুচ্চতি. তেসং চতুন্নং ইদ্ধিপাদানং.

সত্তন্নং বোজ্ঝঙ্গানন্তি বোধিযা, বোধিস্স ৰা অঙ্গাতি বোজ্ঝঙ্গা. ইদং ৰুত্তং হোতি, যা এসা ধম্মসামগ্গী যায লোকুত্তরমগ্গক্খণে উপ্পজ্জমানায লীনুদ্ধচ্চপতিট্ঠানাযূহনকামসুখত্তকিলমথানুযোগউচ্ছেদসস্সতাভিনিৰেসাদীনং অনেকেসং উপদ্দৰানং পটিপক্খভূতায সতিধম্মৰিচযৰীরিযপীতিপস্সদ্ধিসমাধিউপেক্খাসঙ্খাতায ধম্মসামগ্গিযা অরিযসাৰকো বুজ্ঝতীতি কত্ৰা ‘‘বোধী’’তি ৰুচ্চতি, বুজ্ঝতীতি কিলেসসন্তাননিদ্দায উট্ঠহতি, চত্তারি ৰা অরিযসচ্চানি পটিৰিজ্ঝতি, নিব্বানমেৰ ৰা সচ্ছিকরোতি, তস্সা ধম্মসামগ্গিসঙ্খাতায বোধিযা অঙ্গাতিপি বোজ্ঝঙ্গা ঝানঙ্গমগ্গঙ্গাদীনি ৰিয. যো পনেস যথাৰুত্তপ্পকারায এতায ধম্মসামগ্গিযা বুজ্ঝতীতি কত্ৰা অরিযসাৰকো ‘‘বোধী’’তি ৰুচ্চতি, তস্স বোধিস্স অঙ্গাতিপি বোজ্ঝঙ্গা সেনঙ্গরথঙ্গাদযো ৰিয. তেনাহু অট্ঠকথাচরিযা ‘‘বুজ্ঝনকস্স পুগ্গলস্স অঙ্গাতি বোজ্ঝঙ্গা’’তি. তেসং সত্তন্নং বোজ্ঝঙ্গানং.

অরিযস্স অট্ঠঙ্গিকস্স মগ্গস্সাতি অরিযোতি তংতংমগ্গৰজ্ঝকিলেসেহি আরকত্তা অরিযভাৰকরত্তা অরিযফলপটিলাভকরত্তা চ অরিযো. অট্ঠঙ্গানি অস্সাতি অট্ঠঙ্গিকো. স্ৰাযং চতুরঙ্গিকা ৰিয সেনা, পঞ্চঙ্গিকং ৰিয চ তূরিযং অঙ্গমত্তমেৰ হোতি, অঙ্গৰিনিমুত্তো নত্থি. নিব্বানং মগ্গতি, কিলেসে ৰা মারেন্তো গচ্ছতীতি মগ্গো, তস্স অরিযস্স অট্ঠঙ্গিকস্স মগ্গস্স ভাৰনানুযোগস্স. ইমেসং কুসলানং ধম্মানন্তি ৰুত্তপ্পকারানং লোকিযলোকুত্তরকুসলধম্মানং. অন্তরাযাযাতি লোকুত্তরকুসলধম্মানং অন্তরাযায অন্তরধানায লোকিযকুসলধম্মানং পরিচ্চাগায.

তেসু লোকুত্তরকুসলধম্মানং উপ্পজ্জিতুং অপ্পদানট্ঠেন পরিস্সযা নাম. তে হি উপ্পজ্জিত্ৰা নিরুজ্ঝমানা উপদ্দৰং নাৰহন্তি. তত্থেতেতি তস্মিং অত্তভাৰে এতে. পাপকাতি লামকা. অত্তভাৰসন্নিস্সযাতি অত্তভাৰং উপনিস্সায আরম্মণং কত্ৰা উপ্পজ্জন্তীতি অত্তভাৰসন্নিস্সযা. দকেতি উদকে.

ৰুত্তং হেতন্তি কথিতঞ্হি এতং. সান্তেৰাসিকোতি অন্তেৰাসিকসঙ্খাতেন কিলেসেন সহ ৰসতীতি সান্তেৰাসিকো. সাচরিযকোতি সমুদাচরণসঙ্খাতেন কিলেসেন সহ ৰসতীতি সাচরিযকো.

চক্খুনা রূপং দিস্ৰাতি চক্খুৰিঞ্ঞাণেন রূপং পস্সিত্ৰা. উপরি সোতেন সদ্দং সুত্ৰাতিআদীসুপি এসেৰ নযো. উপ্পজ্জন্তীতি সমুদাচরন্তি. সরসঙ্কপ্পাতি নানারম্মণে সংসরণৰসেন উপ্পন্না পরিকপ্পা. সংযোজনিযাতি আরম্মণভাৰং উপগন্ত্ৰা সংযোজনসম্বন্ধনেন সংযোজনানং হিতা. ত্যস্সাতি তে পাপকা অস্স পুগ্গলস্স. অন্তো ৰসন্তীতি অব্ভন্তরে চিত্তে নিৰসন্তি. অন্ৰাসৰন্তীতি কিলেসসন্তানং অনুগন্ত্ৰা ভুসং সৰন্তি অনুবন্ধন্তি. তে নন্তি তং পুগ্গলং এতে অকুসলা ধম্মা. সমুদাচরন্তীতি সম্মা আচরন্তি পৰত্তন্তীতি অত্থো.

কিলিস্সনট্ঠেন মলা. সত্তুঅত্থেন অমিত্তা. ৰেরিঅত্থেন সপত্তা. হননট্ঠেন ৰধকা. পচ্চামিত্তট্ঠেন পচ্চত্থিকা. অথ ৰা মলা সূরিযস্সোপক্কিলেসৰলাহকা ৰিয. অমিত্তা সূরিযস্স ধূমং ৰিয. সপত্তা সূরিযস্স হিমং ৰিয. ৰধকা সূরিযস্স রজং ৰিয. পচ্চত্থিকা সূরিযস্স রাহু ৰিয. ‘‘মলা সুৰণ্ণস্স মলং ৰিয চিত্তপ্পভানাসকা. অমিত্তা কাল়লোহমলং ৰিয চিত্তে সিনিদ্ধভাৰনাসকা, সপত্তা যুগনদ্ধং যুজ্ঝন্তা সপত্তা ৰিয চিত্তে পতিট্ঠিতধম্মধংসকা. ৰধকা মনুস্সঘাতকা ৰিয ধম্মঘাতকা. পচ্চত্থিকা রঞ্ঞা উপগতস্স ৰিনাসো ৰিয মোক্খমগ্গস্স পটিসেধকা’’তি এৰমেকে ৰণ্ণযন্তি.

অনত্থজননোতি ন অত্থং অনত্থং, তং অনত্থং উপ্পাদেতীতি অনত্থজননো. কো সো? লোভো. চিত্তপ্পকোপনোতি চিত্তস্স পকোপনো চলনো, কুসলং নিৰারেত্ৰা চিত্তং রুন্ধতীতি অত্থো. ভযমন্তরতো জাতন্তি অব্ভন্তরে অত্তনো চিত্তেযেৰ জাতং, অনত্থজননাদিভযহেতু. তং জনো নাৰবুজ্ঝতীতি তং ভযং বালমহাজনো অৰগন্ত্ৰা ওতরিত্ৰা ন জানাতি. অত্থন্তি লুদ্ধো পুগ্গলো লোকিযলোকুত্তরঅত্থং ন জানাতি. ধম্মন্তি তস্স হেতুং. অন্ধতমন্তি বহলন্ধকারং. যন্তি যস্মা, যং নরং ৰা. সহতেতি অভিভৰতি.

অজ্ঝত্তন্তি সকসন্তানে. উপ্পজ্জমানা উপ্পজ্জন্তীতি পুব্বন্ততো উদ্ধং উপ্পজ্জমানা অহিতায উপ্পজ্জন্তি দুক্খায. তদুভযেন অফাসুৰিহারায. অহিতাযাতি চেতসিকদুক্খত্থায. দুক্খাযাতি কাযিকদুক্খত্থায. অফাসুৰিহারাযাতি তদুভযেন ন সুখৰিহারত্থায. অথ ৰা ‘‘উপ্পজ্জমানা উপ্পজ্জন্তীতি ভৰঙ্গচলনতো পট্ঠায যাৰ ৰোট্ঠব্বনা, তাৰ উপ্পজ্জমানা নাম. ৰোট্ঠব্বনং পন পত্ৰা অনিৰত্তনভাৰেন উপ্পজ্জন্তি নামা’’তি এৰমেকে ৰণ্ণযন্তি.

তচসারংৰ সম্ফলন্তি অত্তনো ফলেন নাসিতং তচসারসঙ্খাতং ৰেল়ু ৰিয. অরতীতি কুসলেসু ধম্মেসু উক্কণ্ঠিততা. রতীতি পঞ্চকামগুণে অভিরতি. লোমহংসোতি কণ্টকসদিসো হুত্ৰা উদ্ধগ্গলোমো. ইতোনিদানাতি অযং অত্তভাৰো নিদানং পচ্চযো এতেসন্তি ইতোনিদানা. ইতোজাতি ইতো অত্তভাৰতো জাতা. ইতো সমুট্ঠায মনোৰিতক্কাতি যথা দীঘসুত্তকেন পাদে বদ্ধং কাকং কুমারকা তস্স সুত্তস্স পরিযন্তং অঙ্গুলিং ৰেঠেত্ৰা ওস্সজ্জন্তি, সো দূরং গন্ত্ৰাপি পুন তেসং পাদমূলেযেৰ পততি, এৰমেৰ ইতো অত্তভাৰতো সমুট্ঠায পাপৰিতক্কা চিত্তং ওস্সজ্জন্তি.

‘‘সান্তেৰাসিকো’’তিআদিকং পঠমসুত্তং কিলেসেন সহৰাসং সন্ধায ৰুত্তং. ‘‘তযোমে, ভিক্খৰে, অন্তরামলা’’তিআদিকং দুতিযং কুসলধম্মমলীনকরণৰসেন অত্থানত্থস্স অজাননৰসেন চ. ‘‘তযো খো, মহারাজ, পুরিসস্স ধম্মা অজ্ঝত্তং উপ্পজ্জমানা’’তিআদিকং ততিযং অত্তনো নিস্সযঘাতনৰসেন. ‘‘রাগো চ দোসো চ ইতোনিদানা’’তিআদিকং চতুত্থং কিলেসানং পতিট্ঠাদস্সনৰসেন ৰুত্তন্তি ঞাতব্বং.

ততো ততো পরিস্সযতোতি তম্হা তম্হা উপদ্দৰা. তং পুগ্গলন্তি ৰুত্তপ্পকারকিলেসসমঙ্গীপুগ্গলং. দুক্খং অন্ৰেতীতি দুক্খং অনু এতি মাতু পচ্ছতো খীরপিৰকো ৰিয. অনুগচ্ছতীতি সমীপং গচ্ছতি চোরঘাতকো ৰিয ৰজ্ঝপ্পত্তস্স. অন্ৰাযিকং হোতীতি সম্পত্তং হোতি ধম্মগন্থিকায পরিচ্ছেদো ৰিয. জাতিদুক্খন্তি জাতিসদ্দস্স তাৰ অনেকে অত্থা পৰেদিতা. যথা –

ভৰো কুলং নিকাযো চ, সীলং পঞ্ঞত্তি লক্খণং;

পসূতি সন্ধি চেৰাতি, জাতিঅত্থা পৰেদিতা.

তথা হিস্স ‘‘একম্পি জাতিং দ্ৰেপি জাতিযো’’তিআদীসু (পারা. ১২; দী. নি. ১.৩১; ম. নি. ২.২৫৭) ভৰো অত্থো. ‘‘অক্খিত্তো অনুপক্কুট্ঠো জাতিৰাদেনা’’তি (দী. নি. ১.৩০৩) এত্থ কুলং. ‘‘অত্থি, ৰিসাখে, নিগণ্ঠা নাম সমণজাতী’’তি (অ. নি. ৩.৭১) এত্থ নিকাযো. ‘‘যতোহং, ভগিনি, অরিযায জাতিযা জাতো নাভিজানামী’’তি (ম. নি. ২.৩৫১) এত্থ অরিযসীলং. ‘‘তিরিযা নাম তিণজাতি নাভিযা উগ্গন্ত্ৰা নভং আহচ্চ ঠিতা অহোসী’’তি (অ. নি. ৫.১৯৬) এত্থ পঞ্ঞত্তি. ‘‘জাতি দ্ৰীহি খন্ধেহি সঙ্গহিতা’’তি (ধাতু. ৭১) এত্থ সঙ্খতলক্খণং. ‘‘সম্পতিজাতো, আনন্দ, বোধিসত্তো’’তি (দী. নি. ২.৩১; ম. নি. ৩.২০৭) এত্থ পসূতি. ‘‘ভৰপচ্চযা জাতী’’তি (মহাৰ. ১; উদা. ১; ম. নি. ১.৪০৩; সং. নি. ২.৫৩; ৰিভ. ২২৫; কথা. ৪৫০) চ, ‘‘জাতিপি দুক্খা’’তি (মহাৰ. ১৪; ৰিভ. ১৯০; দী. নি. ২.৩৮৭; ম. নি. ২.৩৭৩; সং. নি. ৫.১০৮১; পটি. ম. ২.৩০) চ এত্থ পরিযাযতো পটিসন্ধিক্খণো, নিপ্পরিযাযতো পন তত্থ তত্থ নিব্বত্তমানানং সত্তানং যে যে খন্ধা পাতুভৰন্তি, তেসং তেসং পঠমপাতুভাৰো জাতি নাম.

কস্মা পনেসা জাতি দুক্খাতি চে? অনেকেসং দুক্খানং ৰত্থুভাৰতো. অনেকানি হি দুক্খানি. সেয্যথিদং – দুক্খদুক্খং ৰিপরিণামদুক্খং সঙ্খারদুক্খং পটিচ্ছন্নদুক্খং অপ্পটিচ্ছন্নদুক্খং পরিযাযদুক্খং নিপ্পরিযাযদুক্খন্তি.

তত্থ কাযিকচেতসিকা দুক্খৰেদনা সভাৰতো চ নামতো চ দুক্খত্তা ‘‘দুক্খদুক্খ’’ন্তি ৰুচ্চতি.

সুখৰেদনা ৰিপরিণামেন দুক্খুপ্পত্তিহেতুতো ৰিপরিণামদুক্খং. উপেক্খাৰেদনা চেৰ অৰসেসা চ তেভূমকা সঙ্খারা উদযব্বযপীল়িতত্তা সঙ্খারদুক্খং.

কণ্ণসূলদন্তসূলরাগজপরিল়াহদোসমোহজপরিল়াহাদি কাযিকচেতসিকো আবাধো পুচ্ছিত্ৰা জানিতব্বতো উপক্কমস্স চ অপাকটভাৰতো পটিচ্ছন্নদুক্খং. অপাকটদুক্খন্তিপি ৰুচ্চতি.

দ্ৰত্তিংসকম্মকারণাদিসমুট্ঠানো আবাধো অপুচ্ছিত্ৰাৰ জানিতব্বতো উপক্কমস্স চ পাকটভাৰতো অপ্পটিচ্ছন্নদুক্খং. পাকটদুক্খন্তিপি ৰুচ্চতি.

ঠপেত্ৰা দুক্খদুক্খং সেসং দুক্খসচ্চৰিভঙ্গে আগতং জাতিআদি সব্বম্পি তস্স তস্স দুক্খস্স ৰত্থুভাৰতো পরিযাযদুক্খং. দুক্খদুক্খং পন নিপ্পরিযাযদুক্খন্তি ৰুচ্চতি.

তত্রাযং জাতি যং তং বালপণ্ডিতসুত্তাদীসু (ম. নি. ৩.২৪৬ আদযো) ভগৰতাপি উপমাৰসেন পকাসিতং আপাযিকং দুক্খং, যঞ্চ সুগতিযম্পি মনুস্সলোকে গব্ভোক্কন্তিমূলকাদিভেদং দুক্খং উপ্পজ্জতি, তস্স ৰত্থুভাৰতো দুক্খা.

তত্রিদং গব্ভোক্কন্তিমূলকাদিভেদং দুক্খং – অযঞ্হি সত্তো মাতুকুচ্ছিম্হি নিব্বত্তমানো ন উপ্পলপদুমপুণ্ডরিকাদীসু নিব্বত্ততি, অথ খো হেট্ঠা আমাসযস্স উপরি পক্কাসযস্স উদরপটলপিট্ঠিকণ্টকানং ৰেমজ্ঝে পরমসম্বাধে তিব্বন্ধকারে নানাকুণপগন্ধপরিভাৰিতে অসুচিপরমদুগ্গন্ধপৰনৰিচরিতে অধিমত্তজেগুচ্ছে কুচ্ছিপ্পদেসে পূতিমচ্ছপূতিকুম্মাসচন্দনিকাদীসু কিমি ৰিয নিব্বত্ততি. সো তত্থ নিব্বত্তো দস মাসে মাতুকুচ্ছিসম্ভৰেন উস্মনা পুটপাকং ৰিয পচ্চমানো পিট্ঠপিণ্ডি ৰিয সেদিযমানো সমিঞ্জনপসারণাদিৰিরহিতো অধিমত্তং দুক্খং পচ্চনুভোতীতি, ইদং তাৰ গব্ভোক্কন্তিমূলকং দুক্খং.

যং পন সো মাতু সহসা উপক্খলনগমননিসীদনৰুট্ঠানপরিৰত্তনাদীসু সুরাধুত্তহত্থগতো এল়কো ৰিয অহিতুণ্ডিকহত্থগতো সপ্পপোতকো ৰিয চ আকড্ঢনপরিকড্ঢনওধুননদ্ধুননাদিনা উপক্কমেন অধিমত্তং দুক্খং অনুভৰতি, যঞ্চ মাতু সীতুদকপানকালে সীতনরকুপপন্নো ৰিয উণ্হযাগুভত্তাদিঅজ্ঝোহরণকালে অঙ্গারৰুট্ঠিসম্পরিকিণ্ণো ৰিয লোণম্বিলাদিঅজ্ঝোহরণকালে খারাপটিচ্ছকাদিকম্মকারণপত্তো ৰিয তিব্বং দুক্খং অনুভোতি, ইদং গব্ভপরিহরণমূলকং দুক্খং.

যং পনস্স মূল়্হগব্ভায মাতুযা মিত্তামচ্চসুহজ্জাদীহিপি অদস্সনারহে দুক্খুপ্পত্তিট্ঠানে ছেদনফালনাদীহি দুক্খং উপ্পজ্জতি, ইদং গব্ভৰিপত্তিমূলকং দুক্খং.

যং ৰিজাযমানায মাতুযা কম্মজেহি ৰাতেহি পরিৰত্তেত্ৰা নরকপপাতং ৰিয অতিভযানকং যোনিমগ্গং পটিপাতিযমানস্স পরমসম্বাধেন চ যোনিমুখেন তাল়চ্ছিগ্গল়েন ৰিয মহানাগস্স নিকড্ঢিযমানস্স নরকসত্তস্স ৰিয চ সঙ্ঘাতপব্বতেহি ৰিচুণ্ণিযমানস্স দুক্খং উপ্পজ্জতি, ইদং ৰিজাযনমূলকং দুক্খং.

যং পন জাতস্স তরুণৰণসদিসসুখুমালসরীরস্স হত্থগ্গহণন্হাপনধোৰনচোল়পরিমজ্জনাদিকালে সূচিমুখখুরধারাহি ৰিজ্ঝনফালনসদিসং দুক্খং উপ্পজ্জতি, ইদং মাতুকুচ্ছিতো বহিনিক্খমনমূলকং দুক্খং.

যং পন ততো পরং পৰত্তিযং অত্তনাৰ অত্তানং ৰধেন্তস্স অচেলকৰতাদিৰসেন আতাপনপরিতাপনানুযোগমনুযুত্তস্স কোধৰসেন অভুঞ্জন্তস্স উব্বন্ধন্তস্স চ দুক্খং হোতি, ইদং অত্তূপক্কমমূলকং দুক্খং.

যং পন পরতো ৰধবন্ধনাদীনি অনুভৰন্তস্স দুক্খং উপ্পজ্জতি, ইদং পরূপক্কমমূলকং দুক্খন্তি.

ইতি ইমস্স সব্বস্সাপি দুক্খস্স অযং জাতি ৰত্থুমেৰ হোতি, ইদং জাতিদুক্খং অন্ৰেতি.

জরাদুক্খন্তি দুৰিধা জরা – সঙ্খতলক্খণঞ্চ খণ্ডিচ্চাদিসম্মতো সন্ততিযং একভৰপরিযাপন্নো খন্ধপুরাণভাৰো চ, সা ইধ অধিপ্পেতা. সা পনেসা দুক্খা সঙ্খারদুক্খভাৰতো চেৰ দুক্খৰত্থুতো চ. যং হিদং অঙ্গপচ্চঙ্গসিথিলভাৰতো ইন্দ্রিযৰিকারৰিরূপতা যোব্বনৰিনাসবলূপঘাতসতিমতিৰিপ্পৰাসপরপরিভৰাদিঅনেকপচ্চযং কাযিকচেতসিকং দুক্খমুপ্পজ্জতি, জরা তস্স ৰত্থু. তেনেতং ৰুচ্চতি –

‘‘অঙ্গানং সিথিলভাৰা, ইন্দ্রিযানং ৰিকারতো;

যোব্বনস্স ৰিনাসেন, বলস্স উপঘাততো.

‘‘ৰিপ্পৰাসা সতাদীনং, পুত্তদারেহি অত্তনো;

অপ্পসাদনীযতো চেৰ, ভিয্যো বালত্তপত্তিযা.

‘‘পপ্পোতি দুক্খং যং মচ্চো, কাযিকং মানসং তথা;

সব্বমেতং জরাহেতু, যস্মা তস্মা জরা দুখা’’তি. (ৰিভ. অট্ঠ. ১৯২; ৰিসুদ্ধি. ২.৫৪২);

ইদং জরাদুক্খং অন্ৰেতীতি সম্বন্ধো. ব্যাধীতি ৰিৰিধং দুক্খং আদহতি ৰিদহতীতি ব্যাধি. ব্যাধযতি তাপযতি কম্পযতীতি ৰা ব্যাধি.

মরণদুক্খন্তি এত্থাপি দুৰিধং মরণং সঙ্খতলক্খণঞ্চ, যং সন্ধায ৰুত্তং ‘‘জরামরণং দ্ৰীহি খন্ধেহি সঙ্গহিত’’ন্তি (ধাতু. ৭১). একভৰপরিযাপন্নজীৰিতিন্দ্রিযপবন্ধৰিচ্ছেদো চ, যং সন্ধায ৰুত্তং ‘‘নিচ্চং মরণতো ভয’’ন্তি (সু. নি. ৫৮১; জা. ১.১১.৮৮). তং ইধ অধিপ্পেতং. জাতিপচ্চযা মরণং উপক্কমমরণং সরসমরণং আযুক্খযমরণং পুঞ্ঞক্খযমরণন্তিপি তস্সেৰ নামং. পুন খণিকমরণং সম্মুতিমরণং সমুচ্ছেদমরণন্তি অযম্পি ভেদো ৰেদিতব্বো. পৰত্তে রূপারূপধম্মানং ভেদো খণিকমরণং নাম. তিস্সো মতো ফুস্সো মতোতি ইদং পরমত্থতো সত্তস্স অভাৰা, সস্সং মতং, রুক্খো মতোতি ইদম্পি জীৰিতিন্দ্রিযস্স অভাৰা সম্মুতিমরণং নাম. খীণাসৰস্স অপ্পটিসন্ধিকা কালকিরিযা সমুচ্ছেদমরণং নাম. বাহিরসম্মুতিমরণং ঠপেত্ৰা ইতরং সম্মুতিমরণঞ্চ ইধ যথাৰুত্তপ্পবন্ধৰিচ্ছেদনভাৰেন সঙ্গহিতং, দুক্খস্স পন ৰত্থুভাৰতো দুক্খং. তেনেতং ৰুচ্চতি –

‘‘পাপস্স পাপকম্মাদি-নিমিত্তমনুপস্সতো;

ভদ্দস্সাপসহন্তস্স, ৰিযোগং পিযৰত্থুকং;

মীযমানস্স যং দুক্খং, মানসং অৰিসেসতো.

‘‘সব্বেসঞ্চাপি যং সন্ধি-বন্ধনচ্ছেদনাদিকং;

ৰিতুজ্জমানমম্মানং, হোতি দুক্খং সরীরজং.

‘‘অসয্হমপ্পতিকারং, দুক্খস্সেতস্সিদং যতো;

মরণং ৰত্থু তেনেতং, দুক্খমিচ্চেৰ ভাসিত’’ন্তি. (ৰিভ. অট্ঠ. ১৯৩; ৰিসুদ্ধি. ২.৫৪৩);

সোকপরিদেৰদুক্খদোমনস্সুপাযাসদুক্খন্তি এত্থ সোকাদীসু সোকো নাম ঞাতিব্যসনাদীহি ফুট্ঠস্স অন্তোনিজ্ঝানলক্খণো চিত্তসন্তাপো. দুক্খো পনস্স দুক্খদুক্খত্তা চেৰ দুক্খস্স চ ৰত্থুভাৰতো. তেনেতং ৰুচ্চতি –

‘‘সত্তানং হদযং সোকো, সল্লং ৰিয ৰিতুজ্জতি;

অগ্গিতত্তোৰ নারাচো, ভুসঞ্চ ডহতে পুন.

‘‘সমাৰহতি চ ব্যাধি-জরামরণভেদনং;

দুক্খম্পি ৰিৰিধং যস্মা, তস্মা দুক্খোতি ৰুচ্চতী’’তি. (ৰিভ. অট্ঠ. ১৯৪; ৰিসুদ্ধি. ২.৫৪৪);

পরিদেৰো নাম ঞাতিব্যসনাদীহি ফুট্ঠস্স ৰচীপলাপো. দুক্খো পনস্স সংসারদুক্খভাৰতো দুক্খৰত্থুতো চ. তেনেতং ৰুচ্চতি –

‘‘যং সোকসল্লৰিহতো পরিদেৰমানো, কণ্ঠোট্ঠতালুতলসোসজমপ্পসয্হং;

ভিয্যোধিমত্তমধিগচ্ছতিযেৰ দুক্খং, দুক্খোতি তেন ভগৰা পরিদেৰমাহা’’তি. (ৰিভ. অট্ঠ. ১৯৫; ৰিসুদ্ধি. ২.৫৪৫);

দুক্খং নাম কাযপীল়নলক্খণং কাযিকং দুক্খং. দুক্খং পনস্স দুক্খদুক্খত্তা চেৰ মানসদুক্খাৰহনতো চ. তেনেতং ৰুচ্চতি –

‘‘পীল়েতি কাযিকমিদং, দুক্খং দুক্খঞ্চ মানসং ভিয্যো;

জনযতি যস্মা তস্মা, দুক্খন্তি ৰিসেসতো ৰুত্ত’’ন্তি. (ৰিভ. অট্ঠ. ১৯৬-১৯৭; ৰিসুদ্ধি. ২.৫৪৬);

দোমনস্সং নাম চিত্তপীল়নলক্খণং মানসং দুক্খং. দুক্খং পনস্স দুক্খদুক্খত্তা চেৰ কাযিকদুক্খাৰহনতো চ. চেতোদুক্খসমপ্পিতা হি কেসে পকিরিয কন্দন্তি, উরানি পতিপিসেন্তি, আৰট্টন্তি, ৰিৰট্টন্তি, ছিন্নপপাতং পপতন্তি, সত্থং আহরন্তি, ৰিসং খাদন্তি, রজ্জুযা উব্বন্ধন্তি, অগ্গিং পৰিসন্তি, নানপ্পকারং দুক্খং অনুভৰন্তি. তেনেতং ৰুচ্চতি –

‘‘পীল়েতি যতো চিত্তং, কাযস্স চ পীল়নং সমাৰহতি;

দুক্খন্তি দোমনস্সম্পি, দোমনস্সং ততো অহূ’’তি. (ৰিভ. অট্ঠ. ১৯৬-১৯৭; ৰিসুদ্ধি. ২.৫৪৭);

উপাযাসো নাম ঞাতিব্যসনাদীহি ফুট্ঠস্স অধিমত্তচেতোদুক্খপ্পভাৰিতো দোসোযেৰ. সঙ্খারক্খন্ধপরিযাপন্নো একো ধম্মোতি একে. দুক্খো পনস্স সঙ্খারদুক্খভাৰতো চিত্তং পরিদহনতো কাযস্স ৰিহননতো চ. তেনেতং ৰুচ্চতি –

‘‘চিত্তস্স চ পরিদহনা, কাযস্স ৰিহননতো চ অধিমত্তং;

যং দুক্খমুপাযাসো, জনেতি দুক্খো ততো ৰুত্তো’’তি. (ৰিভ. অট্ঠ. ১৯৮; ৰিসুদ্ধি. ২.৫৪৮);

এত্থ চ মন্দগ্গিনা অন্তোভাজনে পাকো ৰিয সোকো, তিক্খগ্গিনা পচ্চমানস্স ভাজনতো বহি নিক্খমনং ৰিয পরিদেৰো, বহি নিক্খন্তাৰসেসস্স নিক্খমিতুম্পি অপ্পহোন্তস্স অন্তোভাজনেযেৰ যাৰ পরিক্খযা পাকো ৰিয উপাযাসো দট্ঠব্বো.

নেরযিকং দুক্খন্তি নিরযে পঞ্চৰিধবন্ধনাদিকং দুক্খং অন্ৰেতি, তং দেৰদূতসুত্তেন দীপেতব্বং. তেনেতং ৰুচ্চতি –

‘‘জাযেথ নো চে নরকেসু সত্তো, তত্থগ্গিদাহাদিকমপ্পসয্হং;

লভেথ দুক্খং নু কুহিং পতিট্ঠং, ইচ্চাহ দুক্খাতি মুনীধ জাতি’’ন্তি. (ৰিভ. অট্ঠ. ১৯১; ৰিসুদ্ধি. ২.৫৪১);

তিরচ্ছানযোনিকং দুক্খন্তি তিরচ্ছানেসু কসাপতোদতাল়নৰিজ্ঝনাদিকং অনেকৰিধং দুক্খং অন্ৰেতি, তং বালপণ্ডিতসুত্ততো গহেতব্বং. তেনেতং ৰুচ্চতি –

‘‘দুক্খং তিরচ্ছেসু কসাপতোদদণ্ডাভিঘাতাদিভৰং অনেকং;

যং তং কথং তত্থ ভৰেয্য জাতিং, ৰিনা তহিং জাতি ততোপি দুক্খা’’তি. (ৰিভ. অট্ঠ. ১৯১; ৰিসুদ্ধি. ২.৫৪১);

পেত্তিৰিসযিকং দুক্খন্তি পেতেসু পন খুপ্পিপাস ৰাতাতপাদিনিব্বত্তং দুক্খঞ্চ লোকন্তরে তিব্বন্ধকারে অসয্হসীতাদিদুক্খঞ্চ অন্ৰেতি. তেনেতং ৰুচ্চতি –

‘‘পেতেসু দুক্খং পন খুপ্পিপাসাৰাতাতপাদিপ্পভৰং ৰিচিত্তং;

যস্মা অজাতস্স ন তত্থ অত্থি, তস্মাপি দুক্খং মুনি জাতিমাহ.

‘‘তিব্বন্ধকারে চ অসয্হসীতে, লোকন্তরে যং অসুরেসু দুক্খং;

ন তং ভৰে তত্থ ন চস্স জাতি, যতো অযং জাতি ততোপি দুক্খা’’তি. (ৰিভ. অট্ঠ. ১৯১; ৰিসুদ্ধি. ২.৫৪১);

মানুসিকং দুক্খন্তি মনুস্সেসু ৰধবন্ধনাদিকং দুক্খং. গব্ভোক্কন্তিমূলকং দুক্খন্তি ‘‘অযঞ্হি সত্তো মাতুকুচ্ছিম্হি নিব্বত্তমানো ন উপ্পলপদুমপুণ্ডরিকাদীসু নিব্বত্ততী’’তিআদিনা নযেন যং জাতিদুক্খং ৰুত্তং, ইদং তাৰ গব্ভোক্কন্তিমূলকং দুক্খং অন্ৰেতি. গব্ভে ঠিতিমূলকং দুক্খন্তি যং পন ‘‘সো মাতু সহসা উপক্খলনগমননিসীদনা’’তিআদিনা নযেন যং তিব্বং দুক্খং ৰুত্তং, ইদং গব্ভে ঠিতিমূলকং দুক্খং অন্ৰেতি. গব্ভা ৰুট্ঠানমূলকং দুক্খন্তি ‘‘যং পনস্স মূল়্হগব্ভায মাতুযা মিত্তামচ্চসুহজ্জাদীহিপি অদস্সনারহে দুক্খুপ্পত্তিট্ঠানে’’তিআদিনা নযেন যং দুক্খং ৰুত্তং, ইদং মাতুকুচ্ছিতো বহি নিক্খন্তমূলকং দুক্খং অন্ৰেতি. তেনেতং ৰুচ্চতি –

‘‘যঞ্চাপি গূথনরকে ৰিয মাতুগব্ভে,

সত্তো ৰসং চিরমতো বহি নিক্খমনঞ্চ;

পপ্পোতি দুক্খমতিঘোরমিদম্পি নত্থি,

জাতিং ৰিনা ইতিপি জাতি অযঞ্হি দুক্খা.

‘‘কিং ভাসিতেন বহুনা ননু যং কুহিঞ্চি,

অত্থীধ কিঞ্চিরপি দুক্খমিদং কদাচি;

নেৰত্থি জাতিৰিরহে যদতো মহেসি,

দুক্খাতি সব্বপঠমং ইমমাহ জাতি’’ন্তি. (ৰিভ. অট্ঠ. ১৯১; ৰিসুদ্ধি. ২.৫৪১);

জাতস্সূপনিবন্ধকং দুক্খন্তি জাতস্স উপনিবন্ধনং ন্হানলেপনখাদনপিৰনাদিজগ্গনদুক্খং অন্ৰেতি. জাতস্স পরাধেয্যকং দুক্খন্তি পরস্স অঞ্ঞস্স আযত্তং ইস্সরিযদুক্খং অন্ৰেতি. ‘‘সব্বং পরৰসং দুক্খ’’ন্তি হি ৰুত্তং. অত্তূপক্কমং দুক্খন্তি যং অত্তনাৰ অত্তানং ৰধেন্তস্স অচেলকৰতাদিৰসেন আতাপনপরিতাপনানুযোগমনুযুত্তস্স কোধৰসেন অভুঞ্জন্তস্স উব্বন্ধন্তস্স চ দুক্খং হোতি, ইদং অত্তূপক্কমং দুক্খং অন্ৰেতি. পরূপক্কমং দুক্খন্তি যং পরতো ৰধবন্ধনাদীনি অনুভৰন্তস্স উপ্পজ্জতি, ইদং পরূপক্কমং দুক্খং অন্ৰেতি. দুক্খদুক্খন্তি কাযিকচেতসিকা দুক্খা ৰেদনা সভাৰতো চ নামতো চ দুক্খত্তা দুক্খদুক্খং, ইদং দুক্খদুক্খং অন্ৰেতি. সঙ্খারদুক্খন্তি উপেক্খাৰেদনা চেৰ অৰসেসা চ তেভূমকসঙ্খারা উদযব্বযপীল়িতত্তা সঙ্খারদুক্খং, ইদং সঙ্খারদুক্খং অন্ৰেতি. ৰিপরিণামদুক্খন্তি সুখৰেদনা ৰিপরিণামদুক্খস্স হেতুতো ৰিপরিণামদুক্খং, ইদং ৰিপরিণামদুক্খং অন্ৰেতি.

মাতুমরণন্তি মাতুযা মরণং. পিতুমরণন্তি পিতুনো মরণং. ভাতুমরণন্তি জেট্ঠকনিট্ঠভাতূনং মরণং. ভগিনিমরণন্তি জেট্ঠকনিট্ঠভগিনীনং মরণং. পুত্তমরণন্তি পুত্তানং মরণং. ধীতুমরণন্তি ধীতূনং মরণং. ঞাতিব্যসনং দুক্খন্তি ঞাতীনং ব্যসনং, চোররোগভযাদীহি ঞাতিক্খযো, ঞাতিৰিনাসোতি অত্থো. তেন ঞাতিব্যসনেন ফুট্ঠস্স অজ্ঝোত্থটস্স অভিভূতস্স উপ্পন্নং দুক্খং ঞাতিব্যসনং দুক্খং, তং ঞাতিব্যসনং দুক্খং অন্ৰেতি. সেসেসুপি এসেৰ নযো. অযং পন ৰিসেসো – ভোগানং ব্যসনং ভোগব্যসনং, রাজচোরাদিৰসেন ভোগক্খযো, ভোগৰিনাসোতি অত্থো. ৰুত্তনযেন তং ভোগব্যসনং দুক্খং অন্ৰেতি. রোগব্যসনন্তি রোগো এৰ ব্যসনং রোগব্যসনং. রোগো হি আরোগ্যং ব্যসতি ৰিনাসেতীতি ব্যসনং, ৰুত্তনযেন তং রোগব্যসনং দুক্খং অন্ৰেতি. সীলব্যসনং দুক্খন্তি সীলস্স ব্যসনং সীলব্যসনং, দুস্সীল্যস্সেতং নামং. ৰুত্তনযেন তং সীলব্যসনং দুক্খং অন্ৰেতি. সম্মাদিট্ঠিং ৰিনাসযমানা উপ্পন্না দিট্ঠিযেৰ ব্যসনং দিট্ঠিব্যসনং, ৰুত্তনযেন তং দিট্ঠিব্যসনং দুক্খং অন্ৰেতি. এত্থ চ পুরিমানি দ্ৰে অনিপ্ফন্নানি, পচ্ছিমানি তীণি নিপ্ফন্নানি তিলক্খণাহতানি. পুরিমানি চ তীণি নেৰ কুসলানি নাকুসলানি. সীলদিট্ঠিব্যসনদ্ৰযং অকুসলং.

যথাতি ওপম্মে. ভিন্নং নাৰন্তি সিথিলবন্ধনং নাৰং, জজ্জরীভূতং ৰা পদরুগ্ঘাটিমং ৰা. দকমেসিন্তি উদকদাযিং উদকপ্পৰেসনিং. ততো ততো উদকং অন্ৰেতীতি ততো ততো ভিন্নট্ঠানতো উদকং পৰিসতি. পুরতোপীতি নাৰায পুরিমভাগতোপি. পচ্ছতোপীতি তস্সা পচ্ছিমভাগতোপি. হেট্ঠতোপীতি অধোভাগতোপি. পস্সতোপীতি উভযপস্সতোপি. যং অন্তরন্তরা ন ৰুত্তং, তং পাঠানুসারেন ৰেদিতব্বং.

তস্মা কাযগতাসতিআদিভাৰনায জন্তু, সদা সতো হুত্ৰা ৰিক্খম্ভনসমুচ্ছেদৰসেন রূপাদীসু ৰত্থুকামেসু সব্বপ্পকারম্পি কিলেসকামং পরিৰজ্জেন্তো কামানি পরিৰজ্জেয্য. এৰং তে কামে পহায তপ্পহানকরমগ্গেনেৰ চতুব্বিধম্পি ওঘং তরেয্য তরিতুং সক্কুণেয্য. ততো যথা পুরিসো গরুকং নাৰং উদকং সিঞ্চিত্ৰা লহুকায নাৰায অপ্পকসিরেনেৰ পারগূ ভৰেয্য পারং গচ্ছেয্য, এৰমেৰং অত্তভাৰনাৰং কিলেসূদকগরুকং সিঞ্চিত্ৰা লহুকেন অত্তভাৰেন পারগূ ভৰেয্য. সব্বধম্মপারং নিব্বানং গতো ভৰেয্য, অরহত্তপ্পত্তিযা গচ্ছেয্য অনুপাদিসেসায নিব্বানধাতুযা পরিনিব্বানেনাতি অরহত্তনিকূটেন দেসনং নিট্ঠাপেসি.

তস্মাতি যস্মা জাতিআদিকং দুক্খং এতং পুগ্গলং অন্ৰেতি, তস্মা. তংকারণা তংহেতূতিআদীসুপি এসেৰ নযো. যস্মা ৰুত্তপ্পকারদুক্খং এতং অন্ৰেতি, তংহেতু. যস্মা অন্ৰেতি তপ্পচ্চযা, যস্মা অন্ৰেতি তংনিদানন্তি এৰং পদযোজনা কাতব্বা. হেতূতিআদীনি কারণৰেৰচনানি. কারণঞ্হি তেন তস্স ফলং হিনোতি পৰত্ততীতি হেতু. তং তং পটিচ্চ ফলং এতি পৰত্ততীতি পচ্চযো. ‘‘হন্দ নং গণ্হথা’’তি দস্সেন্তং ৰিয অত্তনো ফলং নিদেতীতি নিদানং.

‘‘তংকারণাতি অকারণনিক্কারণপটিসেধো. তংহেতূতি অহেতুমহাভূতহেতুপটিসেধো. তপ্পচ্চযাতি অপ্পচ্চযেন সদ্ধিং অসাধারণপচ্চযপটিসেধো. তংনিদানাতি অনিদানেন সহ আগমাধিগমনিদানপটিসেধো’’তি এৰমেকে ৰণ্ণযন্তি. এতং আদীনৰং সম্পস্সমানোতি এতং ৰুত্তপ্পকারং উপদ্দৰং ৰিপস্সনাঞাণেন সম্মা পস্সমানো দক্খমানো.

সদাতি মূলপদং. পুন সদাতি অত্থপদং. সদাতি সব্বদিৰসে. সব্বদাতি সব্বস্মিং কালে. সব্বকালন্তি পুব্বণ্হাদিসব্বকালং. নিচ্চকালন্তি দিৰসে দিৰসে. ধুৰকালন্তি অব্বোচ্ছিন্নকালং. সততন্তি নিরন্তরং. সমিতন্তি একীভূতং. অব্বোকিণ্ণন্তি অঞ্ঞেন অসম্মিস্সং. পোঙ্খানুপোঙ্খন্তি পটিপাটিযা ঘটিতং ‘‘পোঙ্খানুপোঙ্খং অৰিরাধিতং উপট্ঠাতী’’তিআদীসু (সং. নি. ৫.১১১৫) ৰিয. উদকূমিকজাতন্তি নিব্বত্তউদকঊমিতরঙ্গং ৰিয. অৰীচীতি অৰিরল়ং. সন্ততীতি অনুপচ্ছিন্নং. সহিতন্তি ঘটিতং একীভূতং ৰা ‘‘সহিতং মে, অসহিতং তে’’তিআদীসু (দী. নি. ১.২০২) ৰিয. ফস্সিতন্তি ফুসিতং ‘‘নিৰাতে ফুসিতগ্গলে’’তিআদীসু ৰিয. পুরেভত্তং পচ্ছাভত্তন্তি দ্ৰে পদানি দিৰাকালৰিভাগৰসেন. পুরিমং যামং মজ্ঝিমং যামং পচ্ছিমং যামন্তি তীণি রত্তিৰিভাগৰসেন. কাল়ে জুণ্হেতি অড্ঢমাসৰসেন. ৰস্সে…পে… গিম্হেতি তীণি উতুৰসেন. পুরিমে ৰযোখন্ধে…পে… পচ্ছিমে ৰযোখন্ধেতি তীণি ৰযোৰিভাগৰসেন ৰুত্তানীতি ঞাতব্বং.

সতোতি চতূহি কারণেহি সতো. ‘‘কাযে কাযানুপস্সনাসতিপট্ঠানং ভাৰেন্তো সতো’’তিআদীনি ‘‘এৰং সমুচ্ছেদতো কামে পরিৰজ্জেয্যা’’তি পরিযোসানানি ৰুত্তত্থানেৰ. অপি চ সত্তত্তা সতোতি তীসু ৰত্থূসু সত্তভাৰেন ৰা তযো কিলেসে পটিক্কমাপেতুং সত্তিভাৰেন ৰা সতত্তা সতো. সন্তত্তাতি কিলেসোপক্কিলেসে পলাপেত্ৰা ঠানেন চ আরম্মণেন চ পমোচেত্ৰা সন্তত্তা সতো. সমিতত্তাতি ইট্ঠফলদাযকপুঞ্ঞেন চ অনিট্ঠফলদাযকপাপেন চ সমিতত্তা সতো. সন্তধম্মসমন্নাগতোতি সপ্পুরিসধম্মে ভজনতো বুদ্ধাদিঅরিযপুগ্গলে সেৰনতো সন্তধম্মসমন্নাগতত্তা সতো.

ৰত্থুকামে পরিজানিত্ৰাতি এতে ৰুত্তপ্পকারে তেভূমকে ৰত্থুকামে তীরণপরিঞ্ঞায জানিত্ৰা. পহাযাতি কিলেসকামে পহানপরিঞ্ঞায পরিচ্চজিত্ৰা. পজহিত্ৰাতি ছড্ডেত্ৰা. কিং কচৰরং ৰিয পিটকেনাতি? ন হি, অপি চ খো তং ৰিনোদেত্ৰা তরিত্ৰা ৰিজ্ঝিত্ৰা নীহরিত্ৰা. কিং বলিবদ্দমিৰ পতোদেনাতি? ন হি, অথ খো তং ব্যন্তিং করিত্ৰা ৰিগতন্তং করিত্ৰা. যথাস্স অন্তোপি নাৰসিস্সতি, অন্তমসো ভঙ্গমত্তম্পি, তথা তং করিত্ৰা. কথং পন তং তথা কতন্তি? অনভাৰং গহেত্ৰা অনু অভাৰং গমেত্ৰা. সমুচ্ছেদপ্পহানেন যথা সমুচ্ছিন্না হোতি, তথা করিত্ৰাতি ৰুত্তং হোতি. এস নযো কামচ্ছন্দনীৰরণাদীসু.

কামোঘন্তিআদীসু পঞ্চকামগুণিকরাগো অৰসীদনট্ঠেন ‘‘কামোঘো’’তি ৰুচ্চতি. ভৰোঘোতি রূপারূপভৰেসু ছন্দরাগো ঝাননিকন্তি চ. দিট্ঠোঘোতি সস্সতদিট্ঠাদিসহগতা ভৰে পত্থনাযেৰ, দিট্ঠোঘো ভৰোঘে এৰ সমোধানং গচ্ছতি. অৰিজ্জোঘো চতূসু সচ্চেসু অঞ্ঞাণং. তত্থ কামগুণে অস্সাদতো মনসি করোতো অনুপ্পন্নো চ কামোঘো উপ্পজ্জতি, উপ্পন্নো চ কামোঘো সংৰড্ঢতি. মহগ্গতধম্মে অস্সাদতো মনসি করোতো অনুপ্পন্নো চ ভৰোঘো উপ্পজ্জতি, উপ্পন্নো চ সংৰড্ঢতি. তেভূমকধম্মেসু চতুৰিপল্লাসপদট্ঠানভাৰেন অনুপ্পন্নো চ অৰিজ্জোঘো উপ্পজ্জতি, উপ্পন্নো চ সংৰড্ঢতীতি ৰেদিতব্বো. ৰুত্তনযপচ্চনীকতো সুক্কপক্খো ৰিত্থারেতব্বো.

অপ্পণিহিতৰিমোক্খং পটিপন্নো কামোঘং, অনিমিত্তৰিমোক্খং পটিপন্নো ভৰোঘং, সুঞ্ঞতৰিমোক্খং পটিপন্নো অৰিজ্জোঘঞ্চ তরেয্য. পঠমমগ্গৰসেন তরেয্য, দুতিযমগ্গৰসেন উত্তরেয্য, ততিযমগ্গৰসেন পতরেয্য, চতুত্থমগ্গৰসেন সমতিক্কমেয্য, ফলৰসেন ৰীতিৰত্তেয্যাতি. অথ ৰা ‘‘কামোঘৰসেন তরেয্য, ভৰোঘৰসেন উত্তরেয্য, দিট্ঠোঘৰসেন পতরেয্য, অৰিজ্জোঘৰসেন সমতিক্কমেয্য, সব্বোঘৰসেন ৰীতিৰত্তেয্যা’’তি এৰমেকে ৰণ্ণযন্তি.

গরুকন্তি ন সল্লহুকং. ভারিকন্তি ভারভণ্ডং এত্থ ঠপযন্তীতি ভারিকং. উদকং সিত্ৰাতি উদকং সিঞ্চিত্ৰা. ওসিঞ্চিত্ৰাতি অতিরেকং সিঞ্চিত্ৰা. ছড্ডেত্ৰাতি পাতেত্ৰা. লহুকাযাতি সল্লহুকায. খিপ্পন্তি সীঘং. লহুন্তি তংখণং. অপ্পকসিরেনেৰাতি নিদুক্খেনেৰ. পারং ৰুচ্চতি অমতং নিব্বানন্তি সক্কাযওরতো পারভূতং পারং. তণ্হাৰানতো নিক্খন্তং নিব্বানং কথীযতি. যোসোতি যো এসো. সব্বসঙ্খারসমথোতিআদি সব্বং নিব্বানমেৰ. যস্মা হি তং আগম্ম সব্বসঙ্খারৰিপ্ফন্দিতানি সমন্তি ৰূপসমন্তি, তস্মা ‘‘সব্বসঙ্খারসমথো’’তি ৰুচ্চতি. যস্মা চেতং আগম্ম সব্বে উপধযো পটিনিস্সট্ঠা হোন্তি, সব্বা তণ্হা খীযন্তি, সব্বে কিলেসরজ্জা ৰিরজ্জন্তি, সব্বং দুক্খং নিরুজ্ঝতি, তস্মা ‘‘সব্বূপধিপটিনিস্সগ্গো, তণ্হক্খযো, ৰিরাগো, নিরোধো’’তি ৰুচ্চতি. যা পনেসা তণ্হা ভৰেন ভৰং, ফলেন ৰা সদ্ধিং কম্মং ৰিনতি সংসিব্বতীতি কত্ৰা ৰানন্তি ৰুচ্চতি, ততো নিক্খন্তং ৰানতোতি নিব্বানং. পারং গচ্ছেয্য নিমিত্তৰসেন একতো ৰুট্ঠানগোত্রভুঞাণেন নিব্বানপারং পাপুণেয্য. অধিগচ্ছেয্য নিমিত্তপৰত্তেহি উভতোৰুট্ঠানমগ্গঞাণেন নিব্বানপারং ৰিসেসেন পাপুণেয্য. ফুসেয্য নিব্বানারম্মণফলচিত্তৰসেন নিব্বানপারং ফুসেয্য. সচ্ছিকরেয্য গুণৰসেন ফুসিত্ৰা পচ্চৰেক্খণঞাণেন নিব্বানপারং পচ্চক্খং করেয্য. অথ ৰা ‘‘পঠমমগ্গেন পারং গচ্ছেয্য, দুতিযেন অধিগচ্ছেয্য, ততিযেন ফুসেয্য, চতুত্থেন সচ্ছি করেয্যা’’তি এৰমেকে ৰণ্ণযন্তি. যোপি পারং গন্তুকামোতি যো কোচি ৰিপস্সনাঞাণে ঠিতো পুগ্গলো নিব্বানপারং গন্তুকামো, সোপি অৰস্সং তত্থ গমিস্সতীতি পারগূ. ৰুত্তঞ্হেতং – ‘‘ওতিণ্ণোম্হি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহী’’তিআদি. পুব্বভাগে অজ্ঝাসযৰসেন ৰিপস্সনাযোগেন চ, সোপি পারগূ নাম. যোপি পারং গচ্ছতীতি যোপি মগ্গসমঙ্গী নিব্বানপারং গচ্ছতি, সোপি পারগূ নাম. যোপি পারং গতোতি যোপি মগ্গেন কিচ্চং নিট্ঠাপেত্ৰা ফলে ঠিতো নিব্বানপারঙ্গতো, সোপি পারগূ নাম.

তং জিনৰচনেন দস্সেতুং ‘‘ৰুত্তম্পি হেতং ভগৰতা – তিণ্ণো পারঙ্গতো থলে তিট্ঠতি ব্রাহ্মণো’’তিআদিমাহ. অভিঞ্ঞাপারগূতি অধিগতেন ঞাণেন ঞাতপরিঞ্ঞায নিব্বানপারং গন্তুকামো গচ্ছতি, গতোতি পারগূ. পরিঞ্ঞাপারগূতি সব্বধম্মানং তীরণপরিঞ্ঞায সমতিক্কমিত্ৰা ৰুত্তনযেন পারগূ. পহানপারগূতি সমুদযপক্খিকানং কিলেসানং পহানপরিঞ্ঞায সমতিক্কমিত্ৰা ৰুত্তনযেন পারগূ. যো হি সব্বধম্মং পরিজানাতি, সো তীহি পরিঞ্ঞাহি পরিজানাতি ঞাতপরিঞ্ঞায তীরণপরিঞ্ঞায পহানপরিঞ্ঞাযাতি. তত্থ কতমা ঞাতপরিঞ্ঞা? সব্বধম্মং জানাতি ‘‘ইমে অজ্ঝত্তিকা, ইমে বাহিরা, ইদমস্স লক্খণং, ইমানি রসপচ্চুপট্ঠানপদট্ঠানানী’’তি, অযং ঞাতপরিঞ্ঞা. কতমা তীরণপরিঞ্ঞা? এৰং ঞাতং কত্ৰা লব্ভমানৰসেন সব্বধম্মং তীরেতি ‘‘অনিচ্চতো দুক্খতো রোগতো’’তিআদিনা (সং. নি. ৩.১২২), অযং তীরণপরিঞ্ঞা. কতমা পহানপরিঞ্ঞা? এৰং তীরযিত্ৰা অগ্গমগ্গেন ধম্মেসু ছন্দরাগং পজহতি, অযং পহানপরিঞ্ঞাতি. ইমা পরিঞ্ঞাযো সন্ধায ‘‘সো অভিঞ্ঞাপারগূ পরিঞ্ঞাপারগূ পহানপারগূ’’তি আহ.

ভাৰনাপারগূতি ভাৰনায কোটিং পত্ৰা মগ্গৰসেন নিব্বানপারং গতো. সচ্ছিকিরিযাপারগূতি ফলনিব্বানৰসেন সচ্ছি কিরিযাফলনিব্বানপারং গতো. সমাপত্তিপারগূতি অট্ঠন্নং সমাপত্তীনং পারং পত্তো. সব্বধম্মানন্তি পঞ্চক্খন্ধাদিসব্বধম্মানং. সব্বদুক্খানন্তি জাতিদুক্খাদিসব্বদুক্খানং. সব্বকিলেসানন্তি কাযদুচ্চরিতাদিসব্বকিলেসানং. অরিযমগ্গানন্তি সোতাপত্তিমগ্গাদিচতুন্নং অরিযমগ্গানং. নিরোধস্সাতি নিব্বানস্স. সব্বসমাপত্তীনন্তি সব্বাসম্পি অট্ঠন্নং রূপারূপসমাপত্তীনং. সোতি সো অরিযো. ৰসিপ্পত্তোতি ৰসীভাৰপ্পত্তো. অথ ৰা কন্তভাৰং ইস্সরিযভাৰং নিপ্ফন্নভাৰং পত্তো. পারমিপ্পত্তোতি পারমীতি অৰসানং নিট্ঠানং, উত্তমভাৰং ৰা তং পত্তো. কত্থ পত্তোতি আহ ‘‘অরিযস্মিং সীলস্মি’’ন্তিআদি. তত্থ অরিযস্মিং সীলস্মিন্তি নিদ্দোসে সীলস্মিং. অরিযস্মিং সমাধিস্মিন্তি নিদ্দোসে সমাধিস্মিং. অরিযায পঞ্ঞাযাতি নিদ্দোসায পঞ্ঞায. অরিযায ৰিমুত্তিযাতি নিদ্দোসায ফলৰিমুত্তিযা. পুরিমেন ৰাচাকম্মন্তাজীৰা গহিতা, দুতিযেন ৰাযামসতিসমাধযো গহিতা, ততিযেন ৰিতক্কসম্মাদিট্ঠিযো গহিতা, চতুত্থেন তংসম্পযুত্তা সেসধম্মা গহিতাতি ৰেদিতব্বা.

অন্তগতোতি মগ্গেন সঙ্খারলোকন্তং গতো. অন্তপ্পত্তোতি তমেৰ লোকন্তং ফলেন পত্তো. কোটিগতোতি মগ্গেন সঙ্খারকোটিং গতো. কোটিপ্পত্তোতি তমেৰ কোটিং ফলেন পত্তো. পরিযন্তগতোতি মগ্গেন খন্ধাযতনাদিলোকপরিযন্তং পরিচ্ছেদং পরিৰটুমং কত্ৰা গতো. পরিযন্তপ্পত্তোতি তমেৰ লোকং ফলেন পরিযন্তং কত্ৰা পত্তো. ৰোসানগতোতি মগ্গেন অৰসানং গতো. ৰোসানপ্পত্তোতি ফলেন অৰসানং পত্তো. তাণগতোতি মগ্গেন তাযনং গতো. তাণপ্পত্তোতি ফলেন তাযনং পত্তো. লেণগতোতি মগ্গেন নিলীযনং গতো. লেণপ্পত্তোতি তং ফলেন নিলীযনং পত্তো. সরণগতোতি মগ্গেন পতিট্ঠং গতো. সরণপ্পত্তোতি ফলেন সরণং পত্তো. অভযগতোতি মগ্গেন নিব্ভযং গতো. অভযপ্পত্তোতি ফলেন নিব্ভযং নিব্বানং পত্তো. অচ্চুতগতোতি চুতিৰিরহিতং নিব্বানং মগ্গেন গতো. অচ্চুতপ্পত্তোতি তং ফলেন পত্তো. অমতগতোতি মরণরহিতং নিব্বানং মগ্গেন গতো. অমতপ্পত্তোতি তং ফলেন পত্তো. নিব্বানগতোতি তণ্হাৰানতো নিক্খন্তং নিব্বানং মগ্গেন গতো. নিব্বানপ্পত্তোতি তমেৰ ফলেন পত্তো. সো ৰুট্ঠৰাসোতি সো অরহা দসসু অরিযৰাসেসু ৰসি পরিৰসি ৰুট্ঠো ৰুট্ঠাতি চ ৰুট্ঠৰাসো. চিণ্ণচরণোতি সীলেন সহ অট্ঠসু সমাপত্তীসু চিণ্ণৰসীতি চিণ্ণচরণো. গতদ্ধোতি সংসারদ্ধানং অতিক্কন্তো. গতদিসোতি সুপিনন্তেনপি অগতপুব্বং নিব্বানদিসং গতো. গতকোটিকোতি অনুপাদিসেসনিব্বানকোটিং গতো হুত্ৰা ঠিতো. পালিতব্রহ্মচরিযোতি রক্খিতব্রহ্মচরিযো. উত্তমদিট্ঠিপ্পত্তোতি উত্তমং সম্মাদিট্ঠিং পত্তো. পটিৰিদ্ধাকুপ্পোতি অকুপ্পং অচলনং অরহত্তফলং পটিৰিজ্ঝিত্ৰা ঠিতো. সচ্ছিকতনিরোধোতি নিরোধং নিব্বানং সচ্ছিকত্ৰা ঠিতো.

দুক্খং তস্স পরিঞ্ঞাতন্তি তিৰিধং দুক্খং তেন সমতিক্কমিত্ৰা পরিচ্ছিন্নং. অভিঞ্ঞেয্যন্তি সভাৰলক্খণাৰবোধৰসেন সোভনেন আকারেন জানিতব্বং. অভিঞ্ঞাতন্তি অধিকেন ঞাণেন ঞাতং. পরিঞ্ঞেয্যন্তি সামঞ্ঞলক্খণাৰবোধৰসেন কিচ্চসমাপন্নৰসেন চ ব্যাপিত্ৰা পরিজানিতব্বং. পরিঞ্ঞাতন্তি সমন্ততো ঞাতং. ভাৰেতব্বন্তি ৰড্ঢেতব্বং. সচ্ছিকাতব্বন্তি পচ্চক্খং কাতব্বং. দুৰিধা হি সচ্ছিকিরিযা পটিলাভসচ্ছিকিরিযা আরম্মণসচ্ছিকিরিযা চাতি.

উক্খিত্তপলিঘোতি এত্থ পলিঘোতি ৰট্টমূলিকা অৰিজ্জা. অযঞ্হি দুক্খিপনট্ঠেন ‘‘পলিঘো’’তি ৰুচ্চতি. তেনেস তস্সা উক্খিত্তত্তা ‘‘উক্খিত্তপলিঘো’’তি ৰুত্তো. সংকিণ্ণপরিখোতি পরিখা ৰুচ্চতি পুনব্ভৰদাযকো ভৰেসু জাযনৰসেন চেৰ সংসরণৰসেন চ ‘‘জাতিসংসারো’’তি লদ্ধনামানং পুনব্ভৰক্খন্ধানং পচ্চযো কম্মাভিসঙ্খারো. সো হি পুনপ্পুনং উপ্পত্তিকরণৰসেন পরিক্খিপিত্ৰা ঠিতত্তা ‘‘পরিখা’’তি ৰুচ্চতি. তেনেস তস্সা সংকিণ্ণত্তা ৰিকিণ্ণত্তা ‘‘সংকিণ্ণপরিখো’’তি ৰুত্তো. অব্বূল়্হেসিকোতি এসিকাতি ৰট্টমূলিকা তণ্হা. অযঞ্হি গম্ভীরানুগতট্ঠেন ‘‘এসিকা’’তি ৰুচ্চতি. তেনেস তস্সা অব্বূল়্হত্তা লুঞ্চিত্ৰা ছড্ডিতত্তা ‘‘অব্বূল়্হেসিকো’’তি ৰুচ্চতি. নিরগ্গল়োতি অগ্গল়ং ৰুচ্চন্তি ওরম্ভাগজনকানি কামভৰে উপ্পত্তিপচ্চযানি ওরম্ভাগিযানি. এতানি হি মহাকৰাটং ৰিয নগরদ্ৰারং চিত্তং পিদহিত্ৰা ঠিতত্তা ‘‘অগ্গল়’’ন্তি ৰুচ্চন্তি. তেনেস তেসং নিরগ্গল়ত্তা ভিন্নত্তা ‘‘নিরগ্গল়ো’’তি ৰুত্তো. অরিযোতি নিক্কিলেসো পরিসুদ্ধো. পন্নদ্ধজোতি পাতিতমানদ্ধজো. পন্নভারোতি খন্ধভারকিলেসভারঅভিসঙ্খারভারপঞ্চকামগুণভারা পন্না ওরোপিতা অস্সাতি পন্নভারো. অপি চ ইধ মানভারস্সেৰ ওরোপিতত্তা ‘‘পন্নভারো’’তি অধিপ্পেতো. ৰিসংযুত্তোতি চতূহি যোগেহি সব্বকিলেসেহি চ ৰিসংযুত্তো. ইধ পন মানযোগেনেৰ ৰিসংযুত্তত্তা ‘‘ৰিসংযুত্তো’’তি অধিপ্পেতো.

এত্তাৰতা থেরেন মগ্গেন কিলেসে খেপেত্ৰা নিরোধসযনৰরগতস্স খীণাসৰস্স নিব্বানারম্মণং ফলসমাপত্তিং অপ্পেত্ৰা ৰিহরণকালো দস্সিতো. যথা হি দ্ৰে নগরানি একং চোরনগরং, একং খেমনগরং. অথ একস্স মহাযোধস্স এৰং ইচ্ছা উপ্পজ্জেয্য ‘‘যাৰিমং চোরনগরং তিট্ঠতি, তাৰ খেমনগরং ভযতো ন মুচ্চতি. চোরনগরং অনগরং করিস্সামী’’তি সন্নাহং কত্ৰা খগ্গং গহেত্ৰা চোরনগরং উপসঙ্কমিত্ৰা নগরদ্ৰারে উস্সাপিতে এসিকত্থম্ভে খগ্গেন ছিন্দিত্ৰা সদ্ধিং দ্ৰারবাহাহি কৰাটং ভিন্দিত্ৰা পলিঘং উক্খিপিত্ৰা পাকারং ভিন্দন্তো পরিখং সংকিরিত্ৰা নগরসোভনত্থায উস্সাপিতে ধজে পাতেত্ৰা নগরং অগ্গিনা ঝাপেত্ৰা খেমনগরং পৰিসিত্ৰা উপরিপাসাদমারুয্হ ঞাতিগণপরিৰুতো সুরসভোজনং ভুঞ্জেয্য. এৰং চোরনগরং ৰিয সক্কাযো, খেমনগরং ৰিয নিব্বানং, মহাযোধো ৰিয যোগাৰচরো. তস্সেৰং হোতি ‘‘যাৰ সক্কাযৰট্টং ৰট্টতি, তাৰ দ্ৰত্তিংসকম্মকারণেহি অট্ঠনৰুতিরোগেহি পঞ্চৰীসতিমহব্ভযেহি চ পরিমুচ্চনং নত্থী’’তি. সো মহাযোধো ৰিয সন্নাহং সীলসন্নাহং কত্ৰা পঞ্ঞাতিণ্হখগ্গং গহেত্ৰা খগ্গেন এসিকত্থম্ভে ৰিয অরহত্তমগ্গেন তণ্হেসিকং ছিন্দিত্ৰা, সো যোধো সদ্ৰারবাহকং নগরকৰাটং ৰিয পঞ্চোরম্ভাগিযসংযোজনগ্গল়ং উগ্ঘোটেত্ৰা, সো যোধো পলিঘং ৰিয অৰিজ্জাপলিঘং উক্খিপিত্ৰা, সো যোধো পাকারং ভিন্দন্তো পরিখং ৰিয কম্মাভিসঙ্খারপাকারং ভিন্দন্তো জাতিসংসারপরিখং সংকিরিত্ৰা, সো যোধো নগরসোভনত্থায উস্সাপিতে ধজে ৰিয মানদ্ধজে পাতেত্ৰা সক্কাযনগরং ঝাপেত্ৰা, সো যোধো খেমনগরং পৰিসিত্ৰা উপরিপাসাদে সুরসভোজনং ভুঞ্জন্তো ৰিয নিব্বাননগরং পৰিসিত্ৰা অমতনিরোধারম্মণং ফলসমাপত্তিসুখং অনুভৰমানো কালং ৰীতিনামেতি. ৰুত্তঞ্হেতং ভগৰতা (অ. নি. ৫.৭১) –

‘‘কথঞ্চ, ভিক্খৰে, ভিক্খু উক্খিত্তপলিঘো হোতি? ইধ, ভিক্খৰে, ভিক্খুনো অৰিজ্জা পহীনা হোতি উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. এৰং খো, ভিক্খৰে, ভিক্খু উক্খিত্তপলিঘো হোতি.

‘‘কথঞ্চ, ভিক্খৰে, ভিক্খু সংকিণ্ণপরিখো হোতি? ইধ, ভিক্খৰে, ভিক্খুনো পোনোভৰিকো জাতিসংসারো পহীনো হোতি…পে… এৰং খো, ভিক্খৰে, ভিক্খু সংকিণ্ণপরিখো হোতি.

‘‘কথঞ্চ, ভিক্খৰে, ভিক্খু অব্বূল়্হেসিকো হোতি? ইধ, ভিক্খৰে, ভিক্খুনো তণ্হা পহীনা হোতি…পে… এৰং খো, ভিক্খৰে, ভিক্খু অব্বূল়্হেসিকো হোতি.

‘‘কথঞ্চ, ভিক্খৰে, ভিক্খু নিরগ্গল়ো হোতি? ইধ, ভিক্খৰে, ভিক্খুনো পঞ্চোরম্ভাগিযানি সংযোজনানি পহীনানি হোন্তি…পে… এৰং খো, ভিক্খৰে, ভিক্খু নিরগ্গল়ো হোতি.

‘‘কথঞ্চ, ভিক্খৰে, ভিক্খু অরিযো পন্নদ্ধজো পন্নভারো ৰিসংযুত্তো হোতি? ইধ, ভিক্খৰে, ভিক্খুনো অস্মিমানো পহীনো হোতি উচ্ছিন্নমূলো তালাৰত্থুকতো অনভাৰংকতো আযতিং অনুপ্পাদধম্মো. এৰং খো, ভিক্খৰে, ভিক্খু অরিযো পন্নদ্ধজো পন্নভারো ৰিসংযুত্তো হোতি (অ. নি. ৫.৭১).

‘‘এৰং ৰিমুত্তচিত্তং খো, ভিক্খৰে, ভিক্খুং সইন্দা দেৰা সব্রহ্মকা সপজাপতিকা অন্ৰেসং নাধিগচ্ছন্তি ‘ইদংনিস্সিতং তথাগতস্স ৰিঞ্ঞাণ’’’ন্তি (ম. নি. ১.২৪৬).

পঞ্চঙ্গৰিপ্পহীনোতি কামচ্ছন্দাদিপঞ্চঙ্গানি ৰিৰিধেহি উপাযেহি পজহিত্ৰা ঠিতো. ৰুত্তঞ্হেতং –

‘‘কথঞ্চাৰুসো, ভিক্খু পঞ্চঙ্গৰিপ্পহীনো হোতি? ইধাৰুসো, ভিক্খুনো কামচ্ছন্দো পহীনো হোতি, ব্যাপাদো পহীনো হোতি, থিনমিদ্ধং পহীনং হোতি, উদ্ধচ্চকুক্কুচ্চং পহীনং হোতি, ৰিচিকিচ্ছা পহীনা হোতি. এৰং খো, আৰুসো, ভিক্খু পঞ্চঙ্গৰিপ্পহীনো হোতী’’তি (দী. নি. ৩.৩৪৮, ৩৬০).

ছল়ঙ্গসমন্নাগতোতি ছন্নং অঙ্গানং পূরেত্ৰা ছসু দ্ৰারেসু রূপাদিআরম্মণে পটিঘানুনযং ৰজ্জেত্ৰা উপেক্খাৰসেন সতো সম্পজানো হুত্ৰা ৰিহরণৰসেন ছল়ঙ্গানি পূরেত্ৰা পরিপুণ্ণং কত্ৰা ঠিতত্তা ‘‘ছল়ঙ্গসমন্নাগতো’’তি ৰুত্তো. ৰুত্তঞ্হেতং –

‘‘কথঞ্চাৰুসো, ভিক্খু ছল়ঙ্গসমন্নাগতো হোতি? ইধাৰুসো, ভিক্খু চক্খুনা রূপং দিস্ৰা নেৰ সুমনো হোতি ন দুম্মনো, উপেক্খকো ৰিহরতি সতো সম্পজানো. সোতেন সদ্দং সুত্ৰা…পে… ঘানেন গন্ধং ঘাযিত্ৰা, জিৰ্হায রসং সাযিত্ৰা, কাযেন ফোট্ঠব্বং ফুসিত্ৰা, মনসা ধম্মং ৰিঞ্ঞায নেৰ সুমনো হোতি ন দুম্মনো, উপেক্খকো ৰিহরতি সতো সম্পজানো. এৰং খো, আৰুসো, ভিক্খু ছল়ঙ্গসমন্নাগতো হোতী’’তি (দী. নি. ৩.৩৪৮, ৩৬০).

একারক্খোতি সতিআরক্খেন একো উত্তমো আরক্খো অস্সাতি একারক্খো. ৰুত্তঞ্হেতং –

‘‘কথঞ্চাৰুসো, ভিক্খু একারক্খো হোতি? ইধাৰুসো, ভিক্খু সতারক্খেন চেতসা সমন্নাগতো ৰিহরতি. এৰং খো, আৰুসো, ভিক্খু একারক্খো হোতী’’তি (দী. নি. ৩.৩৪৮, ৩৬০).

চতুরাপস্সেনোতি পঞ্ঞায পটিসেৰনপরিৰজ্জনৰিনোদনপজহনানং ৰসেন চতুন্নং অপস্সযানং ইতো চিতো চ অপরিৰত্তমানানং ৰসেন চতুরাপস্সেনো, তেসং পাপুণিত্ৰা ঠিতো. ৰুত্তঞ্হেতং –

‘‘কথঞ্চাৰুসো, ভিক্খু চতুরাপস্সেনো হোতি? ইধাৰুসো, ভিক্খু সঙ্খাযেকং পটিসেৰতি, সঙ্খাযেকং পরিৰজ্জেতি. সঙ্খাযেকং ৰিনোদেতি, সঙ্খাযেকং পজহতী’’তিআদিনা (দী. নি. ৩.৩৪৮, ৩৬০) নযেন ৰিত্থারেতব্বং.

পণুন্নপচ্চেকসচ্চোতি ‘‘ইদমেৰ দস্সনং সচ্চং, ইদমেৰ সচ্চ’’ন্তি এৰং পাটিএক্কং গহিতত্তা পচ্চেকসঙ্খাতানি দিট্ঠিসচ্চানি পণুন্নানি নিহটানি পহীনানি অস্সাতি পণুন্নপচ্চেকসচ্চো.

সমৰযসট্ঠেসনোতি এত্থ অৰযাতি অনূনা. সট্ঠাতি ৰিস্সট্ঠা. সম্মা অৰযা সট্ঠা এসনা অস্সাতি সমৰযসট্ঠেসনো. সম্মা ৰিস্সট্ঠসব্বএসনোতি অত্থো. কেৰলীতি পরিপুণ্ণো. ৰুসিতৰাতি ৰুসিতব্রহ্মচরিযো, গরুসংৰাসে অরিযমগ্গেপি দসসু অরিযৰাসেসুপি ৰুসিতৰন্তো. উত্তমপুরিসোতি খীণকিলেসত্তা ৰিসেসপুরিসো আজঞ্ঞপুরিসো. পরমপুরিসোতি উত্তমপুরিসো, পরমং ৰা পটিলাভং পত্তত্তা উত্তমং পত্তব্বং অরহত্তপটিলাভং পত্তো অনুত্তরপুঞ্ঞক্খেত্তভূতো উত্তমপুরিসো, তেনেৰত্থেন পরমপুরিসো. অনুত্তরং সমাপত্তিং সমাপজ্জিতুং অমতং পটিলাভং পত্তত্তা পরমপত্তিপ্পত্তো. অথ ৰা ‘‘ঘরাৰাসে আদীনৰং সঞ্জানিত্ৰা সাসনপৰিসনৰসেন উত্তমপুরিসো. অত্তভাৰে আদীনৰং সঞ্জানিত্ৰা ৰিপস্সনাপৰিসনৰসেন পরমপুরিসো. কিলেসে আদীনৰং সঞ্জানিত্ৰা অরিযভূমন্তরং পৰিট্ঠো পরমপত্তিপ্পত্তোতি এৰমেকে ৰণ্ণযন্তি.

নেৰাচিনতীতি কুসলাকুসলানং পহীনত্তা তেসং ৰিপাকং ন ৰড্ঢেতি. নাপচিনতীতি ফলে ঠিতত্তা ন ৰিদ্ধংসেতি. অপচিনিত্ৰা ঠিতোতি পটিপ্পস্সদ্ধিপহানে ঠিতত্তা কিলেসে ৰিদ্ধংসেত্ৰা ঠিতো. ইতো পরং তীহিপি পদেহি মগ্গফলৰসেনেৰ যোজেতব্বং. নেৰ পজহতীতি পহাতব্বাভাৰেন কিলেসে ন পজহতি. ন উপাদিযতীতি তণ্হামানদিট্ঠীহি গহেতব্বাভাৰতো তেহি ন গণ্হাতি. পজহিত্ৰা ঠিতোতি চজিত্ৰা ঠিতো. নেৰ সংসিব্বতীতি তণ্হাৰসেন নেৰ সংসিব্বতি. ন উস্সিনেতীতি মানৰসেন ন উক্কংসতি. ৰিসিনিত্ৰা ঠিতোতি তণ্হাসংসীৰনং অকত্ৰা ঠিতোতি এৰমেকে ৰণ্ণযন্তি. নেৰ ৰিধূপেতীতি কিলেসগ্গিং ন নিব্বাপেতি. ন সন্ধূপেতীতি কিলেসগ্গিং ন জালাপেতি. ৰিধূপেত্ৰা ঠিতোতি তং নিব্বাপেত্ৰা ঠিতো.

অসেক্খেন সীলক্খন্ধেনাতি সিক্খিতব্বাভাৰেন অসেক্খেন ৰাচাকম্মন্তাজীৰসীলক্খন্ধেন সীলরাসিনা সমন্নাগতত্তা ঠিতো, অপরিহীনভাৰেন ঠিতো. সমাধিক্খন্ধেনাতি ৰাযামসতীহি সম্পযুত্তেন সমাধিনা. ৰিমুত্তিক্খন্ধেনাতি ফলৰিমুত্তিসম্পযুত্তক্খন্ধেন. ৰিমুত্তিঞাণদস্সনক্খন্ধেনাতি পচ্চৰেক্খণঞাণেন. সচ্চং সম্পটিপাদিযিত্ৰাতি চতুঅরিযসচ্চং সভাৰৰসেন সকসন্তানে সম্পাদিযিত্ৰা পটিৰিজ্ঝিত্ৰা ঠিতো. এজং সমতিক্কমিত্ৰাতি কম্পনতণ্হং অতিক্কমিত্ৰা. কিলেসগ্গিন্তি রাগাদিকিলেসগ্গিং. পরিযাদিযিত্ৰাতি খেপেত্ৰা নিব্বাপেত্ৰা. অপরিগমনতাযাতি সংসারে অগমনভাৰেন পুনাগমনাভাৰেনাতি অত্থো. কটং সমাদাযাতি জযগ্গাহং গহেত্ৰা. মুত্তিপটিসেৰনতাযাতি সব্বকিলেসেহি মুচ্চিত্ৰা রূপাদিআরম্মণসেৰনৰসেন. অথ ৰা সব্বকিলেসেহি মুত্তফলসমাপত্তিসেৰনৰসেন. মেত্তায পারিসুদ্ধিযাতি উপক্কিলেসমুত্তায পরিসুদ্ধভাৰে ঠিতায মেত্তায ঠিতো. করুণাদীসুপি এসেৰ নযো.

অচ্চন্তপারিসুদ্ধিযাতি অতিক্কন্তপরিসুদ্ধভাৰেন পরিসুদ্ধিযা অন্তং পাপুণিত্ৰা ঠিতো. অতম্মযতাযাতি তণ্হাদিট্ঠিমানা ‘‘তম্মযা’’তি ৰুচ্চন্তি. তেসং অভাৰো অতম্মযতা, তায তণ্হাদিট্ঠিমানৰিরহিততায ঠিতো. ৰুত্তঞ্হেতং –

‘‘সো তাদিসো লোকৰিদূ সুমেধো, সব্বেসু ধম্মেসু অতম্মযো মুনী’’তি (অ. নি. ৩.৪০). এত্থাপি তণ্হামানদিট্ঠিৰিরহিতোতি অত্থো. ৰিমুত্তত্তাতি সব্বকিলেসেহি মুত্তভাৰেন. সন্তুস্সিতত্তাতি যথালাভযথাবলযথাসারুপ্পসন্তোসৰসেন সন্তুট্ঠভাৰেন ঠিতো.

খন্ধপরিযন্তেতি একচতুপঞ্চক্খন্ধানং তীহি পরিঞ্ঞগ্গীহি ঝাপেত্ৰা অন্তে অৰসানে ঠিতো, নত্থি এতস্স অন্তোতি ৰা পরিযন্তং, তস্মিং পরিযন্তে. ধাতুপরিযন্তাদীসুপি এসেৰ নযো. অযং পন ৰিসেসো – ধাতুপরিযন্তেতি অট্ঠারসন্নং ধাতূনং পরিযন্তে. আযতনপরিযন্তেতি দ্ৰাদসন্নং আযতনানং. গতিপরিযন্তেতি নিরযাদিপঞ্চন্নং গতীনং. উপপত্তিপরিযন্তেতি সুগতিদুগ্গতীসু নিব্বত্তিযা. পটিসন্ধিপরিযন্তেতি কামরূপারূপভৰেসু পটিসন্ধিযা. ভৰপরিযন্তেতি একৰোকারচতুপঞ্চসঞ্ঞাঅসঞ্ঞানেৰসঞ্ঞানাসঞ্ঞাকামরূপঅরূপভৰানং. সংসারপরিযন্তেতি খন্ধধাতুআযতনানং অব্বোচ্ছিন্নপৰত্তিযা. ৰট্টপরিযন্তেতি কম্মৰিপাককিলেসৰট্টানং পরিযন্তে. অন্তিমে ভৰেতি অৰসানে উপপত্তিভৰে. অন্তিমে সমুস্সযে ঠিতোতি অৰসানে সমুস্সযে সরীরে ঠিতো. অন্তিমদেহধরোতি অন্তিমং অৰসানদেহং সরীরং ধারেতীতি অন্তিমদেহধরো. অরহাতি আরকত্তা অরীনং, অরানঞ্চ হতত্তা, পচ্চযাদীনং অরহত্তা, পাপকরণে রহাভাৰা অরহা.

তস্সাযং পচ্ছিমকোতি তস্স খীণাসৰস্স অযং সমুস্সযো অত্তভাৰো অৰসানো. চরিমোতি অপ্পো মন্দো চরিমো আলোপো, চরিমং কবল়ং ৰিয. পুন পটিসন্ধিযা নত্থিভাৰং সন্ধায ‘‘জাতিমরণসংসারো, নত্থি তস্স পুনব্ভৰো’’তি আহ. জননং জাতি, মরন্তি তেনাতি মরণং, খন্ধাদীনং অব্বোচ্ছিন্না সংসারপৰত্তি চ তস্স খীণাসৰস্স পুন নত্থীতি ৰুত্তং গাথং নিগমেন্তো আহ তেনাহ ভগৰা –

‘‘তস্মা জন্তু…পে… নাৰং সিত্ৰাৰ পারগূ’’তি.

ইমস্মিং সুত্তে যং অন্তরন্তরা ন ৰুত্তং, তং পাঠানুসারেন গহেতব্বং.

সদ্ধম্মপ্পজ্জোতিকায মহানিদ্দেসট্ঠকথায

কামসুত্তনিদ্দেসৰণ্ণনা নিট্ঠিতা.

২. গুহট্ঠকসুত্তনিদ্দেসৰণ্ণনা

৭. দুতিযে – সত্তোতি লগ্গো. গুহাযন্তি কাযে. কাযো হি রাগাদীনং ৰাল়ানং ৰসনোকাসতো ‘‘গুহা’’তি ৰুচ্চতি. বহুনাভিছন্নোতি বহুনা রাগাদিকিলেসজাতেন অভিচ্ছন্নো. এতেন অজ্ঝত্তবন্ধনং ৰুত্তং. তিট্ঠন্তি রাগাদিৰসেন তিট্ঠন্তো. মোহনস্মিং পগাল়্হোতি মোহনং ৰুচ্চতি কামগুণো. এত্থ হি দেৰমনুস্সা মুয্হন্তি তেসু অজ্ঝোগাল়্হা হুত্ৰা; এতেন বাহিরবন্ধনং ৰুত্তং. দূরে ৰিৰেকা হি তথাৰিধো সোতি সো তথারূপো নরো তিৰিধাপি কাযৰিৰেকাদিৰিৰেকা দূরে, অনাসন্নে. কিংকারণা? কামা হি লোকে ন হি সুপ্পহাযাতি যস্মা লোকে কামা সুপ্পহাযা ন হোন্তি, তস্মাতি ৰুত্তং হোতি.

সত্তোতি হি খো ৰুত্তন্তি ‘‘সত্তো, নরো, মানৰো’’তি এৰমাদিনা নযেন কথিতোযেৰ. গুহা তাৰ ৰত্তব্বাতি গুহা তাৰ কথেতব্বা. কাযোতি ৰাতিআদীসু অযং তাৰ পদযোজনা – কাযো ইতি ৰা গুহা ইতি ৰা…পে… কুম্ভো ইতি ৰাতি. তত্থ কাযোতি ‘‘কুচ্ছিতানং আযোতি কাযো’’তিআদিনা হেট্ঠা সতিপট্ঠানকথাযং ৰুত্তোযেৰ. রাগাদিৰাল়ানং ৰসনোকাসট্ঠেন গুহা, ‘‘পটিচ্ছাদনট্ঠেনা’’তিপি একে. ‘‘দূরঙ্গমং একচরং, অসরীরং গুহাসয’’ন্তিআদীসু (ধ. প. ৩৭) ৰিয. রাগাদীহি ঝাপনট্ঠেন দেহো ‘‘তে হিত্ৰা মানুসং দেহ’’ন্তিআদীসু (দী. নি. ২.৩৩২ থোকং ৰিসদিসং) ৰিয. পমত্তকরণট্ঠেন সন্দেহো ‘‘ভিজ্জতি পূতিসন্দেহো, মরণন্তঞ্হি জীৰিত’’ন্তিআদীসু (ধ. প. ১৪৮) ৰিয. সংসারে সঞ্চরণট্ঠেন নাৰা ‘‘সিঞ্চ ভিক্খু ইমং নাৰং, সিত্তা তে লহুমেস্সতী’’তিআদীসু (ধ. প. ৩৬৯) ৰিয. ইরিযাপথস্স অত্থিভাৰট্ঠেন রথো ‘‘রথো সীলপরিক্খারো, ঝানক্খো চক্কৰীরিযো’’তিআদীসু (সং. নি. ৫.৪) ৰিয. অচ্চুগ্গতট্ঠেন ধজো ‘‘ধজো রথস্স পঞ্ঞাণ’’ন্তিআদীসু (জা. ২.২২.১৮৪১) ৰিয.

কিমিকুলানং আৰাসভাৰেন ৰম্মিকো ‘‘ৰম্মিকোতি খো, ভিক্খু, ইমস্সেতং চাতুমহাভূতিকস্স কাযস্স অধিৰচন’’ন্তিআদীসু (ম. নি. ১.২৫১) ৰিয. যথেৰ হি বাহিরকো ৰম্মিকো, ৰমতি ৰন্তকো ৰন্তুস্সযো ৰন্তসিনেহসম্বদ্ধোতি চতূহি কারণেহি ‘‘ৰম্মিকো’’তি ৰুচ্চতি. সো হি অহিনকুলউন্দূরঘরগোল়িকাদযো নানপ্পকারে পাণকে ৰমতীতি ৰম্মিকো. উপচিকাহি ৰন্তকোতি ৰম্মিকো. উপচিকাহি ৰমিত্ৰা মুখতুণ্ডকেহি উক্খিত্তপংসুচুণ্ণেন কটিপ্পমাণেনপি পোরিসপ্পমাণেনপি উস্সিতোতি ৰম্মিকো. উপচিকাহি ৰন্তখেল়সিনেহেন আবদ্ধতায সত্তসত্তাহং দেৰে ৰস্সন্তেপি ন ৰিপ্পকিরীযতি, নিদাঘেপি ততো পংসুমুট্ঠিং গহেত্ৰা তস্মিং মুট্ঠিনা পীল়িযমানে সিনেহো নিক্খমতি, এৰং ৰন্তসিনেহেন সম্বদ্ধোতি ৰম্মিকো. এৰমযং কাযোপি ‘‘অক্খিম্হা অগ্গিগূথকো’’তিআদিনা নযেন নানপ্পকারং অসুচিকলিমলং ৰমতীতি ৰম্মিকো. বুদ্ধপচ্চেকবুদ্ধখীণাসৰা ইমস্মিং অত্তভাৰে নিকন্তিপরিযাদানেন অত্তভাৰং ছড্ডেত্ৰা গতাতি অরিযেহি ৰন্তকোতিপি ৰম্মিকো. যেহি চাযং তীহি অট্ঠিসতেহি উস্সিতো নহারুসম্বদ্ধো মংসাৰলেপনো অল্লচম্মপরিযোনদ্ধো ছৰিরঞ্জিতো সত্তে ৰঞ্চেতি, তং সব্বং অরিযেহি ৰন্তমেৰাতি ৰন্তুস্সযোতিপি ৰম্মিকো. ‘‘তণ্হা জনেতি পুরিসং, চিত্তমস্স ৰিধাৰতী’’তি (সং. নি. ১.৫৫-৫৭) এৰং তণ্হায জনিতত্তা অরিযেহি ৰন্তেনেৰ তণ্হাসিনেহেন সম্বদ্ধো অযন্তি ৰন্তসিনেহেন সম্বদ্ধোতিপি ৰম্মিকো. যথা চ ৰম্মিকস্স অন্তো নানপ্পকারা পাণকা তত্থেৰ জাযন্তি, উচ্চারপস্সাৰং করোন্তি, গিলানা সযন্তি, মতা নিপতন্তি. ইতি সো তেসং সূতিঘরং ৰচ্চকুটি গিলানসালা সুসানঞ্চ হোতি. এৰং খত্তিযমহাসালাদীনম্পি কাযো ‘‘অযং গোপিতরক্খিতো মণ্ডিতপসাদিতো মহানুভাৰানং কাযো’’তি অচিন্তেত্ৰা ছৰিনিস্সিতা পাণা চম্মনিস্সিতা পাণা মংসনিস্সিতা পাণা নহারুনিস্সিতা পাণা অট্ঠিনিস্সিতা পাণা অট্ঠিমিঞ্জনিস্সিতা পাণাতি এৰং কুলগণনায অসীতিমত্তানি কিমিকুলসহস্সানি অন্তোকাযস্মিংযেৰ জাযন্তি, উচ্চারপস্সাৰং করোন্তি, গেলঞ্ঞেন আতুরিতানি সযন্তি, মতামতা নিপতন্তি. ইতি অযম্পি তেসং পাণানং সূতিঘরং ৰচ্চকুটি গিলানসালা সুসানঞ্চ হোতীতি ‘‘ৰম্মিকো’’তি সঙ্খং গতো.

মনাপামনাপপতনট্ঠেন নগরং ‘‘সক্কাযনগর’’ন্তিআদীসু ৰিয. রোগাদীনং নীল়ভাৰেন কুলাৰকভাৰেন নীল়ং ‘‘রোগনীল়ং পভঙ্গুর’’ন্তিআদীসু (ধ. প. ১৪৮) ৰিয. পটিসন্ধিযা নিৰাসগেহট্ঠেন কুটি ‘‘পঞ্চদ্ৰারাযং কুটিকাযং পসক্কিযা’’তিআদীসু (থেরগা. ১২৫) ৰিয. পূতিভাৰেন গণ্ডো ‘‘রোগোতি ভিক্খৰে, গণ্ডোতি ভিক্খৰে, সল্লোতি ভিক্খৰে, কাযস্সেতং অধিৰচন’’ন্তিআদীসু (অ. নি. ৯.১৫) ৰিয. ভিজ্জনট্ঠেন কুম্ভো ‘‘কুম্ভূপমং কাযমিমং ৰিদিত্ৰা’’তিআদীসু (ধ. প. ৪০) ৰিয. কাযস্সেতং অধিৰচনন্তি এতং ৰুত্তপ্পকারং চতুমহাভূতমযস্স কুচ্ছিতধম্মানং আযস্স অধিৰচনং, কথনন্তি অত্থো. গুহাযন্তি সরীরস্মিং. সত্তোতি অল্লীনো. ৰিসত্তোতি ৰণ্ণরাগাদিৰসেন ৰিৰিধো অল্লীনো. সণ্ঠানরাগৰসেন আসত্তো. তত্থেৰ ‘‘সুভং সুখ’’ন্তি গহণৰসেন লগ্গো. অত্তগ্গহণৰসেন লগ্গিতো. পলিবুদ্ধোতি ফস্সরাগৰসেন অমুঞ্চিত্ৰা ঠিতো. ভিত্তিখিলেতি ভিত্তিযং আকোটিতখাণুকে. নাগদন্তেতি তথেৰ হত্থিদন্তসদিসে ৰঙ্কদণ্ডকে. সত্তন্তি ভিত্তিখিলে লগ্গং. ৰিসত্তন্তি নাগদন্তে লগ্গং. আসত্তন্তি চীৰরৰংসে লগ্গং. লগ্গন্তি চীৰররজ্জুযা লগ্গং. লগ্গিতন্তি পীঠপাদে লগ্গং. পলিবুদ্ধন্তি মঞ্চপাদে লগ্গন্তি এৰমাদিনা নযেন যোজেতব্বং.

লগ্গনাধিৰচনন্তি ৰিসেসেন অল্লীযনকথনং. ছন্নোতি ৰুত্তপ্পকারেহি কিলেসেহি ছাদিতো. পুনপ্পুনং উপ্পত্তিৰসেন উপরূপরি ছন্নোতি উচ্ছন্নো. আৰুতোতি আৰরিতো. নিৰুতোতি ৰারিতো. ওফুতোতি অৰত্থরিত্ৰা ছাদিতো. পিহিতোতি ভাজনেন উক্খলিমুখং ৰিয পলিগুণ্ঠিতো. পটিচ্ছন্নোতি আৰটো. পটিকুজ্জিতোতি অধোমুখং ঠপিতো. তত্থ তিণপণ্ণাদীহি ছাদিতং ৰিয ছন্নো. উচ্ছন্নো নদিং আৰরণসেতু ৰিয. আৰুতো জনসঞ্চরণমগ্গাৰরণং ৰিয.

ৰিনিবদ্ধো মানৰসেনাতি নানাৰিধেন মানাতিমানৰসেন নানাৰিধে আরম্মণে বদ্ধো হুত্ৰা তিট্ঠতি. পরামট্ঠো দিট্ঠিৰসেনাতি দ্ৰাসট্ঠিদিট্ঠীনং ৰসেন পরামট্ঠো আমসিত্ৰা গহিতো. ৰিক্খেপগতো উদ্ধচ্চৰসেনাতি আরম্মণে অসন্তিট্ঠনৰসেন চিত্তৰিক্খেপং পত্তো উপগতো. অনিট্ঠঙ্গতো ৰিচিকিচ্ছাৰসেনাতি রতনত্তযাদীসু কঙ্খাসঙ্খাতায ৰিচিকিচ্ছায ৰসেন সন্নিট্ঠানং অপ্পত্তো. থামগতো অনুসযৰসেনাতি দুন্নীহরণঅপ্পহীনানুসযৰসেন থিরভাৰং পত্তো উপগতো হুত্ৰা তিট্ঠতি.

রূপূপযন্তি তণ্হাদিট্ঠূপযৰসেন রূপং উপগন্ত্ৰা আরম্মণং কত্ৰা. ৰিঞ্ঞাণং তিট্ঠমানং তিট্ঠতীতি তস্মিং আরম্মণে রূপারম্মণং ৰিঞ্ঞাণং তিট্ঠন্তং তিট্ঠতি. রূপারম্মণং রূপপতিট্ঠন্তি রূপমেৰ আরম্মণং আলম্বিত্ৰা রূপমেৰ পতিট্ঠং কত্ৰা. নন্দূপসেচনন্তি সপ্পীতিকতণ্হোদকেন আসিত্তং ৰিঞ্ঞাণং. ৰুদ্ধিন্তি ৰুদ্ধিভাৰং. ৰিরূল়্হিন্তি জৰনৰসেন উপরিতো ৰিরূল়্হিভাৰং. ৰেপুল্লন্তি তদারম্মণৰসেন ৰেপুল্লং.

অত্থি রাগোতিআদীনি লোভস্সেৰ নামানি. সো হি রঞ্জনৰসেন রাগো, নন্দনৰসেন নন্দী, তণ্হাযনৰসেন তণ্হাতি ৰুচ্চতি. পতিট্ঠিতং তত্থ ৰিঞ্ঞাণং ৰিরূল়্হন্তি কম্মং জৰাপেত্ৰা পটিসন্ধিআকড্ঢনসমত্থতায পতিট্ঠিতঞ্চেৰ ৰিরূল়্হঞ্চ. যত্থাতি তেভূমকৰট্টে ভুম্মং. সব্বত্থ ৰা পুরিমপদে এতং ভুম্মং. অত্থি তত্থ সঙ্খারানং ৰুদ্ধীতি ইদং ইমস্মিং ৰিপাকৰট্টে ঠিতস্স আযতিং ৰট্টহেতুকে সঙ্খারে সন্ধায ৰুত্তং. যত্থ অত্থি আযতিং পুনব্ভৰাভিনিব্বত্তীতি যস্মিং ঠানে আযতিং পুনব্ভৰাভিনিব্বত্তি অত্থি. তত্থ পুরিমসুত্তং রূপাদিআরম্মণলগ্গনৰসেন ৰুত্তং, দুতিযসুত্তং তদেৰারম্মণং অভিনন্দনৰসেন ৰুত্তং, ততিযং ৰিঞ্ঞাণপতিট্ঠানৰসেন ৰুত্তং, চতুত্থং চতুব্বিধআহারৰসেন, কুসলাকুসলৰিঞ্ঞাণপতিট্ঠানৰসেন ৰুত্তন্তি ঞাতব্বং.

যেভুয্যেনাতি পাযেন. মুয্হন্তীতি মোহং আপজ্জন্তি. সম্মুয্হন্তীতি ৰিসেসেন মুয্হন্তি. সম্পমুয্হন্তীতি সব্বাকারেন মুয্হন্তি. অথ ৰা রূপারম্মণং পটিচ্চ মুয্হন্তি, সদ্দারম্মণং পটিচ্চ সম্মুয্হন্তি, মুতারম্মণং পটিচ্চ সম্পমুয্হন্তি. অৰিজ্জায অন্ধীকতাতি অট্ঠসু ঠানেসু অঞ্ঞাণায অৰিজ্জায অন্ধীকতা. ‘‘গতা’’তি ৰা পাঠো, অন্ধভাৰং উপগতাতি অত্থো. পগাল়্হোতি পৰিট্ঠো. ওগাল়্হোতি হেট্ঠাভাগং পৰিট্ঠো. অজ্ঝোগাল়্হোতি অধিওগাহিত্ৰা অৰত্থরিত্ৰা ৰিসেসেন পৰিট্ঠো নিমুগ্গোতি অধোমুখং হুত্ৰা পৰিট্ঠো. অথ ৰা দস্সনসংসগ্গেন ওগাল়্হো. সৰনসংসগ্গেন অজ্ঝোগাল়্হো. ৰচনসংসগ্গেন নিমুগ্গো. সপ্পুরিসসংসগ্গৰিরহিতো ৰা ওগাল়্হো. সদ্ধম্মসেৰনৰিরহিতো ৰা অজ্ঝোগাল়্হো. ধম্মানুধম্মপটিপত্তিৰিরহিতো ৰা নিমুগ্গো.

ৰিৰেকাতি ৰিৰিত্তি, ৰিৰিচ্চনং ৰা ৰিৰেকো. তযোতি গণনপরিচ্ছেদো. কাযৰিৰেকোতি কাযেন ৰিৰিত্তি, ৰিনা অপসক্কনং. চিত্তৰিৰেকাদীসুপি এসেৰ নযো. ইধ ভিক্খূতি ইমস্মিং সাসনে. সংসারে ভযং ইক্খনতো ভিক্খু. ৰিৰিত্তন্তি সুঞ্ঞং, অপ্পসদ্দং অপ্পনিগ্ঘোসন্তি অত্থো. এতদেৰ হি সন্ধায ৰিভঙ্গে ‘‘ৰিৰিত্তন্তি সন্তিকে চেপি সেনাসনং হোতি, তঞ্চ অনাকিণ্ণং গহট্ঠেহি পব্বজিতেহি, তেন তং ৰিৰিত্ত’’ন্তি (ৰিভ. ৫২৬) ৰুত্তং. সেতি চেৰ আসতি চ এত্থাতি সেনাসনং, মঞ্চপীঠাদীনমেতমধিৰচনং. তেনাহ –

‘‘সেনাসনন্তি মঞ্চোপি সেনাসনং, পীঠম্পি… ভিসিপি… বিব্বোহনম্পি… ৰিহারোপি… অড্ঢযোগোপি… পাসাদোপি… অট্টোপি… মাল়োপি… লেণম্পি… গুহাপি… রুক্খমূলম্পি… ৰেল়ুগুম্বোপি… যত্থ ৰা পন ভিক্খূ পটিক্কমন্তি, সব্বমেতং সেনাসন’’ন্তি (ৰিভ. ৫২৭).

অপি চ ৰিহারো অড্ঢযোগো পাসাদো হম্মিযং গুহাতি ইদং ৰিহারসেনাসনং নাম. মঞ্চো পীঠং ভিসি বিব্বোহনন্তি ইদং মঞ্চপীঠসেনাসনং নাম. চিমিলিকা চম্মখণ্ডো তিণসন্থারো পণ্ণসন্থারোতি ইদং সন্থতসেনাসনং নাম. যত্থ ৰা পন ভিক্খূ পটিক্কমন্তি, ইদং ওকাসসেনাসনং নামাতি এৰং চতুব্বিধং সেনাসনং হোতি. তং সব্বম্পি সেনাসনগ্গহণেন গহিতমেৰ.

ইধ পনস্স সকুণসদিসস্স চাতুদ্দিসস্স ভিক্খুনো অনুচ্ছৰিকসেনাসনং দস্সেন্তো ‘‘অরঞ্ঞং রুক্খমূল’’ন্তিআদিমাহ. তত্থ অরঞ্ঞন্তি ‘‘নিক্খমিত্ৰা বহি ইন্দখীলা সব্বমেতং অরঞ্ঞ’’ন্তি (ৰিভ. ৫২৯) ইদং ভিক্খুনীনং ৰসেন আগতং. ‘‘আরঞ্ঞকং নাম সেনাসনং পঞ্চধনুসতিকং পচ্ছিম’’ন্তি (পারা. ৬৫৪) ইদং পন ইমস্স ভিক্খুনো অনুরূপং. তস্স লক্খণং ৰিসুদ্ধিমগ্গে ধুতঙ্গনিদ্দেসে (ৰিসুদ্ধি. ১.৩১) ৰুত্তং. রুক্খমূলন্তি যংকিঞ্চি সন্তচ্ছাযং ৰিৰিত্তং রুক্খমূলং. পব্বতন্তি সেলং. তত্থ হি উদকসোণ্ডীসু উদককিচ্চং কত্ৰা সীতায রুক্খচ্ছাযায নিসিন্নস্স নানাদিসাসু খাযমানাসু সীতেন ৰাতেন বীজিযমানস্স চিত্তং একগ্গং হোতি. কন্দরন্তি কং ৰুচ্চতি উদকং, তেন দারিতং, উদকেন ভিন্নং পব্বতপদেসং. যং ‘‘নদীতুম্ব’’ন্তিপি ‘‘নদীকুঞ্জ’’ন্তিপি ৰদন্তি. তত্থ হি রজতপট্টসদিসা ৰালুকা হোতি, মত্থকে মণিৰিতানং ৰিয ৰনগহনং, মণিখন্ধসদিসং উদকং সন্দতি. এৰরূপং কন্দরং ওরুয্হ পানীযং পিৰিত্ৰা গত্তানি সীতানি কত্ৰা ৰালুকং উস্সাপেত্ৰা পংসুকূলচীৰরং পঞ্ঞপেত্ৰা নিসিন্নস্স সমণধম্মং করোতো চিত্তং একগ্গং হোতি. গিরিগুহন্তি দ্ৰিন্নং পব্বতানং অন্তরং, একস্মিংযেৰ ৰা উমঙ্গসদিসং মহাৰিৰরং. সুসানলক্খণং ৰিসুদ্ধিমগ্গে (ৰিসুদ্ধি. ১.৩৪) ৰুত্তং.

ৰনপত্থন্তি গামন্তং অতিক্কমিত্ৰা মনুস্সানং অনুপচারট্ঠানং যত্থ ন কসন্তি ন ৰপন্তি. তেনেৰাহ ‘‘ৰনপত্থন্তি দূরানমেতং সেনাসনানং অধিৰচন’’ন্তিআদি (ৰিভ. ৫৩১). অব্ভোকাসন্তি অচ্ছন্নং. আকঙ্খমানো পনেত্থ চীৰরকুটিং কত্ৰা ৰসতি. পলালপুঞ্জন্তি পলালরাসিং. মহাপলালপুঞ্জতো হি পলালং নিক্কড্ঢিত্ৰা পব্ভারলেণসদিসে আলযে করোন্তি, গচ্ছগুম্বাদীনম্পি উপরি পলালং পক্খিপিত্ৰা হেট্ঠা নিসিন্না সমণধম্মং করোন্তি. সব্বমেতং সন্ধায ৰুত্তং ‘‘কাযেন ৰিৰিত্তো ৰিহরতী’’তিআদি. একো চঙ্কমং অধিট্ঠাতি পৰত্তযতীতি ৰুত্তং হোতি. ইরিযতীতি ইরিযাপথং ৰত্তযতি. ৰত্ততীতি ইরিযাপথৰুত্তিং উপ্পাদেতি. পালেতীতি ইরিযাপথং রক্খতি. যপেতীতি যপযতি. যাপেতীতি যাপযতি.

পঠমং ঝানং সমাপন্নস্সাতি কুসলজ্ঝানসমঙ্গিস্স. নীৰরণেহি চিত্তং ৰিৰিত্তন্তি উপচারেন নীৰরণেহি ৰিৰিত্তম্পি সমানং অন্তোঅপ্পনাযং সুট্ঠু ৰিৰিত্তং নাম হোতীতি দস্সেতুং ‘‘পঠমং ঝানং সমাপন্নস্স নীৰরণেহি চিত্তং ৰিৰিত্তং হোতী’’তি ৰুত্তং. এসেৰ নযো ৰিতক্কৰিচারপীতিসুখদুক্খেহি দুতিযততিযচতুত্থজ্ঝানানি সমাপন্নানন্তি. রূপসঞ্ঞাযাতি কুসলৰিপাককিরিযৰসেন পঞ্চদসন্নং রূপাৰচরজ্ঝানানং সঞ্ঞায. পটিঘসঞ্ঞাযাতি চক্খুরূপাদিসঙ্ঘট্টনেন উপ্পন্নায কুসলাকুসলৰিপাকৰসেন দ্ৰিপঞ্চৰিঞ্ঞাণসঙ্খাতায পটিঘসঞ্ঞায চ. নানত্তসঞ্ঞাযাতি নানারম্মণে পৰত্তায চতুচত্তালীসকামাৰচরসঞ্ঞায চ চিত্তং ৰিৰিত্তং হোতি সুঞ্ঞং হোতি.

আকাসানঞ্চাযতনং সমাপন্নস্সাতি এত্থ নাস্স অন্তোতি অনন্তং, আকাসং অনন্তং আকাসানন্তং, আকাসানন্তমেৰ আকাসানঞ্চং, তং আকাসানঞ্চং অধিট্ঠানট্ঠেন আযতনমস্স সসম্পযুত্তধম্মস্স ঝানস্স দেৰানং দেৰাযতনমিৰাতি আকাসানঞ্চাযতনং, কসিণুগ্ঘাটিমাকাসারম্মণঝানস্সেতং অধিৰচনং. তং আকাসানঞ্চাযতনং সমাপন্নস্স কুসলকিরিযঝানং সমাপন্নস্স. রূপসঞ্ঞাযাতি সঞ্ঞাসীসেন রূপাৰচরজ্ঝানতো চেৰ তদারম্মণতো চ. রূপাৰচরজ্ঝানম্পি হি ‘‘রূপ’’ন্তি ৰুচ্চতি ‘‘রূপী রূপানি পস্সতী’’তিআদীসু (পটি. ম. ১.২০৯), তস্স আরম্মণম্পি ‘‘বহিদ্ধা রূপানি পস্সতি সুৰণ্ণদুব্বণ্ণানী’’তিআদীসুপি (পটি. ম. ১.২০৯). তস্মা ইধ রূপে সঞ্ঞা রূপসঞ্ঞাতি এৰং সঞ্ঞাসীসেন রূপাৰচরজ্ঝানস্সেতং অধিৰচনং. রূপে সঞ্ঞা অস্সাতি রূপসঞ্ঞং, রূপমস্স নামন্তি ৰুত্তং হোতি. এৰং পথৰীকসিণাদিভেদস্স তদারম্মণস্স চেতং অধিৰচনন্তি ৰেদিতব্বং. এতায কুসলৰিপাককিরিযাৰসেন পঞ্চদসৰিধায ঝানসঙ্খাতায রূপসঞ্ঞায. এতায চ পথৰীকসিণাদিৰসেন অট্ঠৰিধায আরম্মণসঙ্খাতায রূপসঞ্ঞায.

পটিঘসঞ্ঞাযাতি চক্খাদীনং ৰত্থূনং রূপাদীনং আরম্মণানঞ্চ পটিঘাতেন সমুপ্পন্না সঞ্ঞা পটিঘসঞ্ঞা, রূপসঞ্ঞাদীনং এতং অধিৰচনং. যথাহ – ‘‘তত্থ কতমা পটিঘসঞ্ঞা? রূপসঞ্ঞা সদ্দসঞ্ঞা গন্ধসঞ্ঞা রসসঞ্ঞা ফোট্ঠব্বসঞ্ঞা, ইমা ৰুচ্চন্তি পটিঘসঞ্ঞাযো’’তি (ৰিভ. ৬০৩). তা কুসলৰিপাকা পঞ্চ অকুসলৰিপাকা পঞ্চাতি এতায পটিঘসঞ্ঞায.

নানত্তসঞ্ঞাযাতি নানত্তে গোচরে পৰত্তায সঞ্ঞায, নানত্তায ৰা সঞ্ঞায. যথাহ – ‘‘তত্থ কতমা নানত্তসঞ্ঞা? অসমাপন্নস্স মনোধাতুসমঙ্গিস্স ৰা মনোৰিঞ্ঞাণধাতুসমঙ্গিস্স ৰা সঞ্ঞা সঞ্জাননা সঞ্জানিতত্তং, ইমা ৰুচ্চন্তি নানত্তসঞ্ঞাযো’’তি (ৰিভ. ৬০৪) এৰং ৰিভঙ্গে ৰিভজিত্ৰা ৰুত্তা. তা ইধ অধিপ্পেতা. অসমাপন্নস্স মনোধাতুমনোৰিঞ্ঞাণধাতুসঙ্গহিতা সঞ্ঞা রূপসদ্দাদিভেদে নানত্তে নানাসভাৰে গোচরে পৰত্তন্তি. যস্মা চেসা অট্ঠ কামাৰচরকুসলসঞ্ঞা, দ্ৰাদস অকুসলসঞ্ঞা, একাদস কামাৰচরকুসলৰিপাকসঞ্ঞা, দ্ৰে অকুসলৰিপাকসঞ্ঞা, একাদস কামাৰচরকিরিযসঞ্ঞাতি এৰং চতুচত্তালীসম্পি সঞ্ঞা নানত্তা নানাসভাৰা অঞ্ঞমঞ্ঞং অসদিসা, তস্মা ‘‘নানত্তসঞ্ঞা’’তি ৰুত্তা, তায নানত্তসঞ্ঞায.

চিত্তং ৰিৰিত্তং হোতীতি আকাসানঞ্চাযতনং সমাপন্নস্স রূপসঞ্ঞাপটিঘসঞ্ঞানানত্তসঞ্ঞাসঙ্খাতাহি সঞ্ঞাহি ঝানচিত্তং ৰিৰিত্তং হোতি ৰিনা হোতি অপসক্কনং হোতি. ৰিঞ্ঞাণঞ্চাযতনন্তি এতদেৰ ৰিঞ্ঞাণং অধিট্ঠানট্ঠেন আযতনমস্সাতি ৰিঞ্ঞাণঞ্চাযতনং, আকাসে পৰত্তৰিঞ্ঞাণারম্মণস্স ঝানস্সেতং অধিৰচনং. তং ঝানং সমাপন্নস্স ৰুত্তপ্পকারায আকাসানঞ্চাযতনসঞ্ঞায চিত্তং ৰিৰিত্তং হোতি.

আকিঞ্চঞ্ঞাযতনন্তি এত্থ পন নাস্স কিঞ্চনন্তি অকিঞ্চনং, অন্তমসো ভঙ্গমত্তম্পি অস্স অৰসিট্ঠং নত্থীতি ৰুত্তং হোতি. অকিঞ্চনস্স ভাৰো আকিঞ্চঞ্ঞং, আকাসানঞ্চাযতনৰিঞ্ঞাণাপগমস্সেতং অধিৰচনং. তং আকিঞ্চঞ্ঞং অধিট্ঠানট্ঠেন আযতনমস্সাতি আকিঞ্চঞ্ঞাযতনং, আকাসে পৰত্তিতৰিঞ্ঞাণাপগমারম্মণঝানস্সেতং অধিৰচনং. তং আকিঞ্চঞ্ঞাযতনং সমাপন্নস্স তায ৰিঞ্ঞাণঞ্চাযতনসঞ্ঞায চিত্তং ৰিৰিত্তং.

নেৰসঞ্ঞানাসঞ্ঞাযতনন্তি এত্থ পন যায সঞ্ঞায ভাৰতো তং ‘‘নেৰসঞ্ঞানাসঞ্ঞাযতন’’ন্তি ৰুচ্চতি, যথাপটিপন্নস্স সা সঞ্ঞা হোতি, তং তাৰ দস্সেতুং ৰিভঙ্গে (ৰিভ. ৬২০) ‘‘নেৰসঞ্ঞীনাসঞ্ঞী’’তি উদ্ধরিত্ৰা তঞ্ঞেৰ ‘‘আকিঞ্চঞ্ঞাযতনং সন্ততো মনসি করোতি, সঙ্খারাৰসেসসমাপত্তিং ভাৰেতি, তেন ৰুচ্চতি নেৰসঞ্ঞীনাসঞ্ঞী’’তি ৰুত্তং. তত্থ সন্ততো মনসি করোতীতি ‘‘সন্তোৰতাযং সমাপত্তি, যত্র হি নাম নত্থিভাৰম্পি আরম্মণং করিত্ৰা ৰসতী’’তি এৰং সন্তারম্মণতায নং ‘‘সন্তা’’তি মনসি করোতি. তং নেৰসঞ্ঞানাসঞ্ঞাযতনং অপ্পেত্ৰা নিসিন্নস্স তায আকিঞ্চঞ্ঞাযতনসঞ্ঞায ঝানচিত্তং সুঞ্ঞং হোতি.

সোতাপন্নস্সাতি সোতাপত্তিফলং পত্তস্স. সক্কাযদিট্ঠিযাতি ৰীসতিৰত্থুকায সক্কাযদিট্ঠিযা. ৰিচিকিচ্ছাযাতি অট্ঠসু ঠানেসু কঙ্খায. সীলব্বতপরামাসাতি ‘‘সীলেন সুদ্ধি, ৰতেন সুদ্ধী’’তি পরামসিত্ৰা উপ্পজ্জনকদিট্ঠি. দিট্ঠানুসযাতি অপ্পহীনট্ঠেন সন্তানে অনুসযকা দিট্ঠানুসযা. তথা ৰিচিকিচ্ছানুসযা. তদেকট্ঠেহি চাতি তেহি সক্কাযদিট্ঠিআদীহি একতো ঠিতেহি চ. উপতাপেন্তি ৰিবাধেন্তি চাতি কিলেসা, তেহি সক্কাযদিট্ঠিযাদিকিলেসেহি চিত্তং ৰিৰিত্তং সুঞ্ঞং হোতি. এত্থ ‘‘তদেকট্ঠ’’ন্তি দুৰিধং একট্ঠং পহানেকট্ঠং সহজেকট্ঠঞ্চ. অপাযগমনীযা হি কিলেসা যাৰ সোতাপত্তিমগ্গেন ন পহীযন্তি, তাৰ দিট্ঠিৰিচিকিচ্ছাহি সহ একস্মিং পুগ্গলে ঠিতাতি পহানেকট্ঠা. দসসু হি কিলেসেসু ইধ দিট্ঠিৰিচিকিচ্ছা এৰ আগতা. অনুসযেসু দিট্ঠানুসযৰিচিকিচ্ছানুসযা আগতা. সেসা পন অপাযগমনীযো লোভো দোসো মোহো মানো থিনং উদ্ধচ্চং অহিরিকং অনোত্তপ্পন্তি অট্ঠ কিলেসা দিট্ঠিৰিচিকিচ্ছাহি সহ পহানেকট্ঠা হুত্ৰা দ্ৰীহি অনুসযেহি সদ্ধিং সোতাপত্তিমগ্গেন পহীযন্তি. রাগদোসমোহপমুখেসু ৰা দিযড্ঢেসু কিলেসসহস্সেসু সোতাপত্তিমগ্গেন দিট্ঠিযা পহীযমানায দিট্ঠিযা সহ ৰিচিকিচ্ছা পহীনা, দিট্ঠানুসযৰিচিকিচ্ছানুসযেহি সহ অপাযগমনীযা সব্বকিলেসা পহানেকট্ঠৰসেন পহীযন্তি. সহজেকট্ঠা পন দিট্ঠিযা সহ ৰিচিকিচ্ছায চ সহ একেকস্মিং চিত্তে ঠিতা অৰসেসকিলেসা.

সোতাপত্তিমগ্গেন হি চত্তারি দিট্ঠিসহগতানি ৰিচিকিচ্ছাসহগতঞ্চাতি পঞ্চ চিত্তানি পহীযন্তি. তত্থ দ্ৰীসু দিট্ঠিসম্পযুত্তঅসঙ্খারিকচিত্তেসু পহীযমানেসু তেহি সহজাতো লোভো মোহো উদ্ধচ্চং অহিরিকং অনোত্তপ্পন্তি ইমে কিলেসা সহজেকট্ঠৰসেন পহীযন্তি, দ্ৰীসু দিট্ঠিসম্পযুত্তসসঙ্খারিকচিত্তেসু পহীযমানেসু তেহি সহজাতো লোভো মোহো থিনং উদ্ধচ্চং অহিরিকং অনোত্তপ্পন্তি ইমে কিলেসা সহজেকট্ঠৰসেন পহীযন্তি, ৰিচিকিচ্ছাসহগতচিত্তে পহীযমানে তেন সহজাতো মোহো উদ্ধচ্চং অহিরিকং অনোত্তপ্পন্তি ইমে কিলেসা সহজেকট্ঠৰসেন পহীযন্তি. তেহি দুৰিধেকট্ঠেহি কিলেসেহি চিত্তং ৰিৰিত্তং হোতীতি মগ্গচিত্তং ৰিৰিচ্চতি, ফলচিত্তং ৰিৰিত্তং ৰিযুত্তং অপসক্কিতং সুঞ্ঞং হোতীতি অত্থো.

সকদাগামিস্স ওল়ারিকা কামরাগসঞ্ঞোজনাতি ওল়ারিকভূতা কাযদ্ৰারে ৰীতিক্কমস্স পচ্চযভাৰেন থূলভূতা মেথুনরাগসঙ্খাতা সঞ্ঞোজনা. সো হি কামভৰে সঞ্ঞোজেতীতি ‘‘সঞ্ঞোজন’’ন্তি ৰুচ্চতি. পটিঘসঞ্ঞোজনাতি ব্যাপাদসঞ্ঞোজনা. সো হি আরম্মণে পটিহঞ্ঞতীতি ‘‘পটিঘ’’ন্তি ৰুচ্চতি. তে এৰ থামগতট্ঠেন সন্তানে অনুসেন্তীতি অনুসযা. অণুসহগতাতি সুখুমভূতা কামরাগসঞ্ঞোজনা পটিঘসঞ্ঞোজনা অণুসহগতা কামরাগানুসযা পটিঘানুসযাতি অপ্পহীনট্ঠেন সন্তানে অনুসযনৰসেন সুখুমভূতা কামরাগপটিঘানুসযা. তদেকট্ঠেহি চাতি ৰুত্তত্থেহি দুৰিধেকট্ঠেহি কিলেসেহি চিত্তং ৰিৰিত্তং সুঞ্ঞং হোতি.

অরহতোতি কিলেসারীনং হতত্তা ‘‘অরহা’’তি লদ্ধনামস্স. রূপরাগাতি রূপভৰে ছন্দরাগা. অরূপরাগাতি অরূপভৰে ছন্দরাগা. মানাতি অরহত্তমগ্গৰজ্ঝা মানা এৰ. তথা উদ্ধচ্চঅৰিজ্জামানানুসযাদযো অরহত্তমগ্গৰজ্ঝা. এতেসু উণ্ণতিলক্খণো মানো. অৰূপসমলক্খণং উদ্ধচ্চং. অন্ধভাৰলক্খণা অৰিজ্জা. রূপরাগঅরূপরাগৰসেন পৰত্তা ভৰরাগানুসযা. তদেকট্ঠেহি চাতি তেহি একতো ঠিতেহি চ কিলেসেহি. বহিদ্ধা চ সব্বনিমিত্তেহীতি অজ্ঝত্তচিত্তসন্তানে অকুসলক্খন্ধে উপাদায ‘‘বহিদ্ধা’’তি সঙ্খং গতেহি অজ্ঝত্তং মুঞ্চিত্ৰা বহিদ্ধা পৰত্তেহি সব্বসঙ্খারনিমিত্তেহি মগ্গচিত্তং ৰিৰিচ্চতি ৰিনা হোতি অপসক্কতি, ফলচিত্তং ৰিৰিত্তং ৰিযুত্তং অপসক্কিতং হোতি.

তত্থ কিলেসপটিপাটিযা মগ্গপটিপাটিযা চাতি দ্ৰিধা অনুসযানং অভাৰো ৰেদিতব্বো. কিলেসপটিপাটিযা হি কামরাগানুসযপটিঘানুসযানং ততিযমগ্গেন অভাৰো হোতি, মানানুসযস্স চতুত্থমগ্গেন, দিট্ঠানুসযৰিচিকিচ্ছানুসযানং পঠমমগ্গেন, ভৰরাগানুসযাৰিজ্জানুসযানং চতুত্থমগ্গেনেৰ. মগ্গপটিপাটিযা পন পঠমমগ্গেন দিট্ঠানুসযৰিচিকিচ্ছানুসযানং অভাৰো হোতি, দুতিযমগ্গেন কামরাগানুসযপটিঘানুসযানং তনুভাৰো, ততিযমগ্গেন সব্বসো অভাৰো, চতুত্থমগ্গেন মানানুসযভৰরাগানুসযাৰিজ্জানুসযানং অভাৰো হোতি. চিত্তৰিৰেকোতি মহগ্গতলোকুত্তরচিত্তানং কিলেসেহি সুঞ্ঞভাৰো, তুচ্ছভাৰোতি অত্থো.

উপধিৰিৰেকোতি কিলেসক্খন্ধঅভিসঙ্খারসঙ্খাতানং উপধীনং সুঞ্ঞভাৰো. উপধিং তাৰ দস্সেতুং ‘‘উপধি ৰুচ্চন্তি কিলেসা চা’’তিআদিমাহ. রাগাদযো যস্স উপ্পজ্জন্তি, তং উপতাপেন্তি ৰিবাধেন্তীতি কিলেসা চ. উপাদানগোচরা রূপাদযো পঞ্চক্খন্ধা চ. উপাদানসম্ভূতা পুঞ্ঞাপুঞ্ঞআনেঞ্জাভিসঙ্খারা চ. অমতন্তি নত্থি এতস্স মরণসঙ্খাতং মতন্তি অমতং, কিলেসৰিসপটিপক্খত্তা অগদন্তিপি অমতং. সংসারযোনিগতিউপপত্তিৰিঞ্ঞাণট্ঠিতিসত্তাৰাসেসু সংসিব্বতি ৰিনতীতি তণ্হা ‘‘ৰান’’ন্তি ৰুচ্চতি, তং তত্থ নত্থীতি নিব্বানং. ৰিৰেকট্ঠকাযানন্তি গণসঙ্গণিকায অপগতসরীরানং. নেক্খম্মাভিরতানন্তি নেক্খম্মে কামাদিতো নিক্খন্তে পঠমজ্ঝানাদিকে অভিরতানং তন্নিন্নানং. পরমৰোদানপ্পত্তানন্তি উত্তমপরিসুদ্ধভাৰফলং পাপুণিত্ৰা ঠিতানং. ‘‘উপক্কিলেসাভাৰেন পরিসুদ্ধচিত্তানং, কিলেসেহি মুত্তভাৰেন পরমৰোদানপ্পত্তানং. ৰিক্খম্ভনপ্পহানেন পরিসুদ্ধচিত্তানং, সমুচ্ছেদপ্পহানেন পরমৰোদানপ্পত্তান’’ন্তি এৰমেকে ৰণ্ণযন্তি. নিরূপধীনন্তি ৰিগতূপধীনং. ৰিসঙ্খারগতানন্তি সঙ্খারারম্মণং চজিত্ৰা ৰিগতসঙ্খারং নিব্বানং আরম্মণৰসেন উপগতানং. ৰিসঙ্খারগতং চিত্তন্তি এত্থপি হি নিব্বানমেৰ ‘‘ৰিসঙ্খার’’ন্তি ৰুত্তং.

ৰিদূরেতি ৰিৰিধে দূরে. সুৰিদূরেতি সুট্ঠু ৰিদূরে. ন সন্তিকেতি ন সমীপে. ন সামন্তাতি ন একপস্সে. অনাসন্নেতি অনচ্চন্তসমীপে. ৰিৰেকট্ঠেতি অতিদূরে, ৰিগতেতি অত্থো. তাদিসোতি তংসদিসো. তস্সণ্ঠিতোতি তেন আকারেন ঠিতো. তপ্পকারোতি তেন পকারেন ঠিতো. তপ্পটিভাগোতি তংকোট্ঠাসিকো. অথ ৰা ‘‘অত্তভাৰগুহায লগ্গভাৰেন তাদিসো. কিলেসেহি ছন্নভাৰেন তস্সণ্ঠিতো. মোহনস্মিং পগাল়্হভাৰেন তপ্পকারো. তীহি ৰিৰেকেহি দূরভাৰেন তপ্পটিভাগোতি এৰমেকে ৰণ্ণযন্তি.

দুপ্পহাযাতি সুখেন পহাতব্বা ন হোন্তি. দুচ্চজ্জাতি সুখেন জহিতুং ন সক্কা. দুপ্পরিচ্চজ্জাতি সব্বাকারেন জহিতুং ন সক্কা. দুন্নিম্মদযাতি নিম্মদং অমদং কাতুং ন সক্কা. দুব্বিনিৰেঠযাতি ৰিনিৰেঠনং মোচনং কাতুং ন সক্কা. দুত্তরাতি উত্তরিত্ৰা অতিক্কন্তুং ন সক্কা. দুপ্পতরাতি ৰিসেসেত্ৰা তরিতুং ন সক্কা. দুস্সমতিক্কমাতি দুক্খেন অতিক্কমিতব্বা. দুব্বিনিৰত্তাতি নিৰত্তেতুং দুক্খা. অথ ৰা ‘‘পকতিৰসেন দুপ্পরিচ্চজ্জা. গোণপতাসং ৰিয দুন্নিম্মদযা. নাগপাসং ৰিয দুব্বিনিৰেঠযা. গিম্হসমযে মরুকন্তারং ৰিয দুত্তরা দুপ্পতরা. ব্যগ্ঘপরিগ্গহিতা অটৰী ৰিয দুস্সমতিক্কমা. সমুদ্দৰীচি ৰিয দুব্বিনিৰত্তাতি এৰমেকে ৰণ্ণযন্তি.

৮. এৰং পঠমগাথায ‘‘দূরে ৰিৰেকা হি তথাৰিধো’’তি সাধেত্ৰা পুন তথাৰিধানং সত্তানং ধম্মতং আৰি করোন্তো ‘‘ইচ্ছানিদানা’’তিআদিগাথমাহ. তত্থ ইচ্ছানিদানাতি তণ্হাহেতুকা. ভৰসাতবদ্ধাতি সুখৰেদনাদিম্হি ভৰসাতেন বদ্ধা. তে দুপ্পমুঞ্চাতি তে ভৰসাতৰত্থুভূতা ধম্মা. তে ৰা তত্থ বদ্ধা ইচ্ছানিদানা সত্তা দুপ্পমোচযা. ন হি অঞ্ঞমোক্খাতি অঞ্ঞে চ মোচেতুং ন সক্কোন্তি. কারণৰচনং ৰা এতং. তে সত্তা দুপ্পমুঞ্চা. কস্মা? যস্মা অঞ্ঞেন মোচেতব্বা ন হোন্তি. যদি সত্তা মুঞ্চেয্যুং, সকেন থামেন মুঞ্চেয্যুন্তি অযমস্স অত্থো. পচ্ছা পুরে ৰাপি অপেক্খমানাতি অনাগতে অতীতে ৰা কামে অপেক্খমানা. ইমে ৰ কামে পুরিমে ৰ জপ্পন্তি ইমে ৰা পচ্চুপ্পন্নে কামে পুরিমে ৰা দুৰিধেপি অতীতানাগতে বলৰতণ্হায পত্থযমানা. ইমেসঞ্চ দ্ৰিন্নং পদানং ‘‘তে দুপ্পমুঞ্চা ন হি অঞ্ঞমোক্খা’’তি ইমিনাৰ সহ সম্বন্ধো ৰেদিতব্বো. ইতরথা অপেক্খমানা জপ্পং কিং করোন্তি, কিং ৰা কতাতি ন পঞ্ঞাযেয্যুং.

ভৰসাতবদ্ধাতি ভৰে সাতং ভৰসাতং, তেন ভৰসাতেন সুখস্সাদেন বদ্ধা হুত্ৰা ঠিতা. তং ভাজেত্ৰা দস্সেতুং ‘‘একং ভৰসাতং – সুখা ৰেদনা’’তিআদিমাহ. যোব্বনভাৰো যোব্বঞ্ঞং. অরোগভাৰো আরোগ্যং. জীৰিতিন্দ্রিযস্স পৰত্তভাৰো জীৰিতং. লাভোতি চতুন্নং পচ্চযানং লাভো. যসোতি পরিৰারো. পসংসাতি কিত্তি. সুখন্তি কাযিকচেতসিকং সুখং. মনাপিকা রূপাতি মনৰড্ঢনকা রূপা. সেসেসুপি এসেৰ নযো.

চক্খুসম্পদাতি চক্খুস্স সম্পদা. ‘‘ময্হং চক্খু সম্পন্নং মণিৰিমানে উগ্ঘাটিতসীহপঞ্জরং ৰিয খাযতী’’তি উপ্পন্নং সুখস্সাদং সন্ধায ‘‘চক্খুসম্পদা’’তি ৰুত্তং. সোতসম্পদাদীসুপি এসেৰ নযো. সুখায ৰেদনায সাতবদ্ধা…পে… ৰিবদ্ধাতি ৰিৰিধাকারেন বদ্ধা. আবদ্ধাতি ৰিসেসেন আদিতো বদ্ধা. লগ্গাতি আরম্মণেন সদ্ধিং অপ্পিতা. লগ্গিতাতি নাগদন্তে ফাণিতৰারকো ৰিয লগ্গিতা. যমেত্থ চ অৰুত্তং, তং সত্তো ৰিসত্তোতিআদিম্হি ৰুত্তনযেন গহেতব্বং.

ন হি অঞ্ঞমোক্খাতি ন পরেহি মোক্খা. তে ৰা ভৰসাতৰত্থূ দুপ্পমুঞ্চাতি ভৰে সুখস্সাদৰত্থুভূতা ধম্মা তে মুঞ্চিতুং দুক্খা. সত্তা ৰা এত্তো দুম্মোচযাতি সত্তা এৰ ৰা এতস্মা ভৰসাতৰত্থুতো মোচেতুং দুক্খা.

দুরুদ্ধরাতি উদ্ধরিতুং দুক্খা. দুস্সমুদ্ধরাতি সমন্ততো ছিন্নতটে নরকাৰাটে পতিতো ৰিয উদ্ধং কত্ৰা উদ্ধরিতুং দুক্খা. দুব্বুট্ঠাপযাতি উট্ঠাপেতুং দুক্খা. দুস্সমুট্ঠাপযাতি সুখুমঅত্তভাৰং পথৰিযং পতিট্ঠাপনং ৰিয উস্সাপেতুং অতিৰিয দুক্খা.

তে অত্তনা পলিপপলিপন্নাতি গম্ভীরকদ্দমে যাৰ সীসতো নিমুগ্গা ন সক্কোন্তি. পরং পলিপপলিপন্নং উদ্ধরিতুন্তি অপরং তথেৰ নিমুগ্গং হত্থে ৰা সীসে ৰা গহেত্ৰা উদ্ধরিত্ৰা থলে পতিট্ঠাপেতুং ন সক্কোন্তি. সো ৰত চুন্দাতি সোতি ৰত্তব্বাকারপুগ্গলনিদ্দেসো. তস্স ‘‘যো’’তি ইমং উদ্দেসৰচনং আহরিত্ৰা যো অত্তনা পলিপপলিপন্নো, সো ৰত, চুন্দ, পরং পলিপপলিপন্নং উদ্ধরিস্সতীতি. এৰং সেসপদেসু সম্বন্ধো ৰেদিতব্বো. পলিপপলিপন্নোতি গম্ভীরকদ্দমে নিমুগ্গো ৰুচ্চতি. যথা, চুন্দ, কোচি পুরিসো যাৰ সীসতো গম্ভীরকদ্দমে নিমুগ্গো, পরম্পি তথেৰ নিমুগ্গং হত্থে ৰা সীসে ৰা গহেত্ৰা উদ্ধরিস্সতীতি নেতং ঠানং ৰিজ্জতি. ন হি তং কারণমত্থি, যেন সো তং উদ্ধরিত্ৰা থলে পতিট্ঠাপেয্যাতি. অদন্তো অৰিনীতো অপরিনিব্বুতোতি এত্থ পন অনিব্বিসেৰনতায অদন্তো. অসিক্খিতৰিনযতায অৰিনীতো. অনিব্বুতকিলেসতায অপরিনিব্বুতোতি ৰেদিতব্বো. সো তাদিসো পরং দমেস্সতি নিব্বিসেৰনং করিস্সতি, ৰিনেস্সতি তিস্সো সিক্খা সিক্খাপেস্সতি. পরিনিব্বাপেস্সতি তস্স কিলেসে নিব্বাপেস্সতি.

নত্থঞ্ঞো কোচীতি অঞ্ঞো কোচি পুগ্গলো মোচেতুং সমত্থো নত্থি. সকেন থামেনাতি অত্তনো ঞাণথামেন. বলেনাতি ঞাণবলেন. ৰীরিযেনাতি ঞাণসম্পযুত্তচেতসিকৰীরিযেন. পুরিসপরক্কমেনাতি পরং পরং ঠানং অক্কমনেন মহন্তৰীরিযেন.

নাহং সহিস্সামীতি অহং ন সহিস্সামি ন সক্কোমি, ন ৰাযমিস্সামীতি ৰুত্তং হোতি. পমোচনাযাতি পমোচেতুং. কথংকথিন্তি সকঙ্খং. ধোতকাতি আলপনং. তরেসীতি তরেয্যাসি.

‘‘অত্তনা হি কতং পাপং, অত্তনা সংকিলিস্সতি;

অত্তনা অকতং পাপং, অত্তনাৰ ৰিসুজ্ঝতি;

সুদ্ধী অসুদ্ধি পচ্চত্তং, নাঞ্ঞো অঞ্ঞং ৰিসোধযে’’তি. (ধ. প. ১৬৫; কথা. ৭৪৩) –

এত্থাযমত্থো – যেন অত্তনা অকুসলং কম্মং কতং হোতি, সো চতূসু অপাযেসু দুক্খং অনুভৰন্তো অত্তনাৰ সংকিলিস্সতি. যেন পন অত্তনা অকতং পাপং, সো সুগতিঞ্চেৰ অগতিঞ্চ গচ্ছন্তো অত্তনাৰ ৰিসুজ্ঝতি. কুসলকম্মসঙ্খাতা সুদ্ধি অকুসলকম্মসঙ্খাতা চ অসুদ্ধি পচ্চত্তং কারকসত্তানং অত্তনিযেৰ ৰিপচ্চতি. অঞ্ঞো পুগ্গলো অঞ্ঞং পুগ্গলং ন ৰিসোধযে নেৰ ৰিসোধেতি, ন কিলেসেতীতি ৰুত্তং হোতি.

তিট্ঠতেৰ নিব্বানন্তি অমতমহানিব্বানং তিট্ঠতিযেৰ. নিব্বানগামিমগ্গোতি পুব্বভাগৰিপস্সনাতো পট্ঠায অরিযমগ্গো. তিট্ঠামহং সমাদপেতাতি অহং গণ্হাপেতা পতিট্ঠাপেতা তিট্ঠামি. এৰং ওৰদিযমানা এৰং অনুসাসিযমানাতি মযা এৰং ওৰদিযমানা এৰং অনুসাসিযমানা. এত্থ উপ্পন্নে ৰত্থুস্মিং ৰদন্তো ওৰদতি নাম, অনুপ্পন্নে ৰত্থুস্মিং অনুসাসন্তো ‘‘অযসোপি তে ভৰিস্সতী’’তিআদিৰসেন অনাগতং দস্সেন্তো অনুসাসতি নাম. সম্মুখা ৰদন্তোপি ওৰদতি নাম, পরম্মুখা দূতসাসনং ৰা পেসেন্তো অনুসাসতি নাম. সকিং ৰদন্তোপি ওৰদতি নাম, পুনপ্পুনং ৰদন্তো অনুসাসতি নাম. ওৰদন্তো এৰ ৰা অনুসাসতি নাম. অপ্পেকচ্চেতি অপি একচ্চে, একেতি অত্থো. অচ্চন্তনিট্ঠং নিব্বানং আরাধেন্তীতি খযৰযসঙ্খাতং অন্তং অতীতন্তি অচ্চন্তং, অচ্চন্তঞ্চ তং সব্বসঙ্খারানং অপ্পৰত্তিট্ঠানত্তা নিট্ঠঞ্চাতি অচ্চন্তনিট্ঠং, একন্তনিট্ঠং, সততনিট্ঠন্তি অত্থো. তং অচ্চন্তনিব্বানং আরাধেন্তি সম্পাদেন্তি. নারাধেন্তীতি ন সম্পাদেন্তি, ন পটিলভন্তীতি অত্থো. এত্থ ক্যাহন্তি এতেসু কিং অহং, কিং করোমীতি অত্থো. মগ্গক্খাযীতি পটিপদামগ্গক্খাযী. আচিক্খতি কথেতি. অত্তনা পটিপজ্জমানা মুঞ্চেয্যুন্তি পটিপজ্জন্তা মযং মুঞ্চেয্যুং.

অতীতং উপাদাযাতি অতীতং পটিচ্চ. কথং পুরে অপেক্খং করোতীতি কেন পকারেন ইক্খং ওলোকনং করোতি. এৰংরূপো অহোসিন্তি দীঘরস্সঅণুকথূলাদিৰসেন এৰংজাতিকো এৰরূপো অভৰিং. তত্থ নন্দিং সমন্নানেতীতি তস্মিং রূপারম্মণে তণ্হং সম্মা আনযতি উপনেতি. ৰেদনাদীসুপি এসেৰ নযো.

‘‘ইতি মে চক্খূ’’তিআদযো ৰত্থুআরম্মণৰসেন তণ্হুপ্পত্তিং দস্সেন্তো আহ. ইতি রূপাতীতি এৰং রূপা ইতি. তত্থ ছন্দরাগপটিবদ্ধন্তি তেসু চক্খুরূপেসু দুব্বলসঙ্খাতো ছন্দো চ বলৰসঙ্খাতো রাগো চ, তেন ছন্দরাগেন পটিবদ্ধং অল্লীনং. ৰিঞ্ঞাণন্তি জৰনচিত্তং. ছন্দরাগপটিবদ্ধত্তা ৰিঞ্ঞাণস্সাতি তস্স জৰনৰিঞ্ঞাণস্স ছন্দরাগেন বদ্ধভাৰা. তদভিনন্দতীতি তং আরম্মণং তণ্হাৰসেন অভিনন্দতি.

যানিস্স তানীতি যানি অস্স তানি. পুব্বেতি অতীতে. সদ্ধিন্তি একতো. হসিতলপিতকীল়িতানীতি দন্তৰিদংসাদিহসিতানি চ, ৰচীভেদং কত্ৰা লপিতানি চ, কাযখিড্ডাদিকীল়িতানি চ. তদস্সাদেতীতি তং অস্সাদযতি অস্সাদং ৰিন্দতি সাদিযতি. তং নিকামেতীতি তং নিকামযতি পচ্চাসীসতি. ৰিত্তিং আপজ্জতীতি তুট্ঠিং পাপুণাতি.

সিযন্তি ভৰেয্যং. অপ্পটিলদ্ধস্স পটিলাভাযাতি অপ্পত্তস্স পাপুণনত্থায. চিত্তং পণিদহতীতি চিত্তং ঠপেতি. চেতসো পণিধানপচ্চযাতি চিত্তস্স ঠপনকারণা.

সীলেন ৰাতি পঞ্চসীলাদিসীলেন ৰা. ৰতেন ৰাতি ধুতঙ্গসমাদানেন ৰা. তপেন ৰাতি ৰীরিযসমাদানেন ৰা. ব্রহ্মচরিযেন ৰাতি মেথুনৰিরতিযা ৰা. দেৰো ৰাতি মহানুভাৰো দেৰরাজা ৰা. দেৰঞ্ঞতরো ৰাতি তেসং অঞ্ঞতরো ৰা.

জপ্পন্তাতি গুণৰসেন কথেন্তা. পজপ্পন্তাতি পকারেন কথেন্তা. অভিজপ্পন্তাতি ৰিসেসেন কথেন্তা, উপসগ্গৰসেন ৰা ৰড্ঢিতং.

৯. এৰং পঠমগাথায ‘‘দূরে ৰিৰেকা হি তথাৰিধো’’তি সাধেত্ৰা দুতিযগাথায চ তথাৰিধানং ধম্মতং আৰি কত্ৰা ইদানি তেসং পাপকরণং আৰি করোন্তো ‘‘কামেসু গিদ্ধা’’তি গাথমাহ.

তস্সত্থো – তে সত্তা কামেসু পরিভোগতণ্হায গিদ্ধা, পরিযেসনাদিমনুযুত্তত্তা পসুতা, সম্মোহমাপন্নত্তা পমূল়্হা, অৰগমনতায মচ্ছরিযতায বুদ্ধাদীনং ৰচনং অনাদিযতায চ অৰদানিযা, কাযৰিসমাদিম্হি ৰিসমে নিৰিট্ঠা, অন্তকালে মরণদুক্খূপনীতা, ‘‘কিংসু ভৰিস্সাম ইতো চুতাসে’’তি পরিদেৰযন্তীতি.

গিদ্ধাতি কামরাগেন গিদ্ধা. গধিতাতি সঙ্কপ্পরাগেন পচ্চাসীসমানা হুত্ৰা গধিতা. মুচ্ছিতাতি কামতণ্হায মুচ্ছাপরেতা. অজ্ঝোসন্নাতি কামনন্দিযা অধিওসন্না অজ্ঝোত্থটা. লগ্গাতি কামসিনেহেন অল্লীনা. লগ্গিতাতি কামপরিল়াহেন একীভূতা. পলিবুদ্ধাতি কামসঞ্ঞায আৰট্টিতা. অথ ৰা ‘‘দিট্ঠিদস্সনে গিদ্ধা. অভিণ্হদস্সনে গধিতা. সংসগ্গকিরিযস্মিং মুচ্ছিতা. ৰিস্সাসকিরিযস্মিং অজ্ঝোসন্না. সিনেহৰল়ঞ্জস্মিং লগ্গা. দ্ৰযংদ্ৰযসমাপত্তিম্হি লগ্গিতা. অপরাপরং অমুঞ্চমানা হুত্ৰা পলিবুদ্ধা’’তি এৰমেকে ৰণ্ণযন্তি.

এসন্তীতি পচ্চাসীসন্তি. গৰেসন্তীতি মগ্গযন্তি. পরিযেসন্তীতি সব্বাকারেন ইচ্ছন্তি পত্থেন্তি. অথ ৰা দিট্ঠারম্মণে সুভাসুভং অত্থি, নত্থীতি এসন্তি. সুভাসুভারম্মণে পচ্চক্খং কত্ৰা ৰল়ঞ্জনত্থায পিযং করোন্তা গৰেসন্তি. চিত্তৰসেন এসন্তি. পযোগৰসেন গৰেসন্তি. করণৰসেন পরিযেসন্তি. তে দুৰিধে কামে পটিচ্চ ওতরিত্ৰা চরন্তীতি তচ্চরিতা. তে চ কামে বহুলং যেভুয্যেন ৰড্ঢেন্তি পৰত্তযন্তীতি তব্বহুলা. তে চ কামে গরুং কত্ৰা রহন্তীতি তগ্গরুকা. তেসু কামেসু নিন্না নমিতা হুত্ৰা ৰসন্তীতি তন্নিন্না. তেসু কামেসু সন্নিন্না হুত্ৰা ৰসন্তীতি তপ্পোণা. তেসু কামেসু অৰলম্বিতা হুত্ৰা তেসুযেৰ নমিতা ৰসন্তীতি তপ্পব্ভারা. তেসু কামেসু অৰত্থরিত্ৰা মুচ্ছাপরেতপ্পসঙ্গা হুত্ৰা ৰদন্তীতি তদধিমুত্তা. তে চ কামে অধিপতিং জেট্ঠকং কত্ৰা ৰসন্তীতি তদধিপতেয্যা. অথ ৰা ‘‘আরম্মণস্স ইট্ঠভাৰেন তচ্চরিতা. আরম্মণস্স কন্তভাৰেন তব্বহুলা. আরম্মণস্স মনাপভাৰেন তগ্গরুকা. আরম্মণস্স পিযভাৰেন তন্নিন্না. আরম্মণস্স কামুপসংহিতভাৰেন তপ্পোণা. আরম্মণস্স রজনীযভাৰেন তপ্পব্ভারা. আরম্মণস্স মুচ্ছনীযভাৰেন তদধিমুত্তা. আরম্মণস্স বন্ধনীযভাৰেন তদধিপতেয্যা’’তি এৰমেকে ৰণ্ণযন্তি.

রূপে পরিযেসন্তীতিআদীসু পরিযেসন্তীতি অলদ্ধস্স লাভায এসনৰসেন. পটিলভন্তীতি হত্থগতৰসেন. পরিভুঞ্জন্তীতি ৰল়ঞ্জনৰসেন ৰুত্তন্তি ঞাতব্বং. কলহং ৰিৰাদং করোতীতি কলহকারকো. তস্মিং নিযুত্তোতি কলহপসুতো. কম্মকারকাদীসুপি এসেৰ নযো. গোচরে চরন্তোতি ৰেসিযাদিগোচরে, সতিপট্ঠানাদিগোচরে ৰা চরমানো. তেসু নিযুত্তো গোচরপসুতো. আরম্মণূপনিজ্ঝানৰসেন ঝানং অস্স অত্থীতি ঝাযী. তস্মিং নিযুত্তো ঝানপসুতো.

অৰগচ্ছন্তীতি অপাযং গচ্ছন্তি. মচ্ছরিনোতি সকসম্পত্তিং নিগুহন্তা. ৰচনন্তি কথনং. ব্যপথন্তি ৰাক্যপথং. দেসনন্তি ৰিস্সজ্জনওৰাদং. অনুসিট্ঠিন্তি অনুসাসনিং. নাদিযন্তীতি ন গণ্হন্তি ন গরুং করোন্তি. ‘‘ন পটিস্সন্তী’’তি ৰা পাঠো, সোযেৰ অত্থো. ৰত্থুতো মচ্ছরিযদস্সনত্থং ‘‘পঞ্চ মচ্ছরিযানি আৰাসমচ্ছরিয’’ন্তিআদি ৰুত্তং. তত্থ আৰাসে মচ্ছরিযং আৰাসমচ্ছরিযং. সেসপদেসুপি এসেৰ নযো.

আৰাসো নাম সকলারামোপি পরিৰেণম্পি একোৰরকোপি রত্তিট্ঠানাদীনিপি. তেসু ৰসন্তা সুখং ৰসন্তি, পচ্চযে লভন্তি. একো ভিক্খু ৰত্তসম্পন্নস্সেৰ পেসলস্স ভিক্খুনো তত্থ আগমনং ন ইচ্ছতি, আগতোপি ‘‘খিপ্পং গচ্ছতূ’’তি চিন্তেসি, ইদং আৰাসমচ্ছরিযং নাম. ভণ্ডনকারকাদীনং পন তত্থ ৰাসং অনিচ্ছতো আৰাসমচ্ছরিযং নাম ন হোতি.

কুলন্তি উপট্ঠাককুলম্পি ঞাতিকুলম্পি. তত্থ অঞ্ঞস্স উপসঙ্কমনং অনিচ্ছতো কুলমচ্ছরিযং হোতি. পাপপুগ্গলস্স পন উপসঙ্কমনং অনিচ্ছতোপি মচ্ছরিযং নাম ন হোতি. সো হি তেসং পসাদভেদায পটিপজ্জতি. পসাদং রক্খিতুং সমত্থস্সেৰ পন ভিক্খুনো তত্থ উপসঙ্কমনং অনিচ্ছতো মচ্ছরিযং নাম হোতি.

লাভোতি চতুপচ্চযলাভোৰ. তং অঞ্ঞস্মিং সীলৰন্তেযেৰ লভন্তে ‘‘মা লভতূ’’তি চিন্তেন্তস্স লাভমচ্ছরিযং হোতি. যো পন সদ্ধাদেয্যং ৰিনিপাতেতি, অপরিভোগদুপ্পরিভোগাদিৰসেন ৰিনাসেতি, পূতিভাৰং গচ্ছন্তম্পি অঞ্ঞস্স ন দেতি, তং দিস্ৰা ‘‘সচে ইমং এস ন লভেয্য, অঞ্ঞো সীলৰা লভেয্য, পরিভোগং গচ্ছেয্যা’’তি চিন্তেন্তস্স মচ্ছরিযং নাম নত্থি.

ৰণ্ণো নাম সরীরৰণ্ণোপি গুণৰণ্ণোপি. তত্থ সরীরৰণ্ণে মচ্ছরী ‘‘পরো পাসাদিকো রূপৰা’’তি ৰুত্তে তং ন কথেতুকামো হোতি. গুণৰণ্ণমচ্ছরী পরস্স সীলেন ধুতঙ্গেন পটিপদায আচারেন ৰণ্ণং ন কথেতুকামো হোতি.

ধম্মোতি পরিযত্তিধম্মো চ পটিৰেধধম্মো চ. তত্থ অরিযসাৰকা পটিৰেধধম্মং ন মচ্ছরাযন্তি, অত্তনা পটিৰিদ্ধধম্মে সদেৰকস্স লোকস্স পটিৰেধং ইচ্ছন্তি. তং পন পটিৰেধং ‘‘পরে জানন্তূ’’তি ইচ্ছন্তি, তন্তিধম্মেযেৰ পন ধম্মমচ্ছরিযং নাম হোতি. তেন সমন্নাগতো পুগ্গলো যং গুল়্হং গন্থং ৰা কথামগ্গং ৰা জানাতি, তং অঞ্ঞে ন জানাপেতুকামো হোতি. যো পন পুগ্গলং উপপরিক্খিত্ৰা ধম্মানুগ্গহেন ধম্মং ৰা উপপরিক্খিত্ৰা পুগ্গলানুগ্গহেন ন দেতি, অযং ধম্মমচ্ছরী নাম ন হোতি. তত্থ একচ্চো পুগ্গলো লোলো হোতি, কালেন সমণো হোতি, কালেন ব্রাহ্মণো, কালেন নিগণ্ঠো. যো হি ভিক্খু ‘‘অযং পুগ্গলো পৰেণিআগতং তন্তিং সণ্হং সুখুমং ধম্মন্তরং ভিন্দিত্ৰা আলুল়েস্সতী’’তি ন দেতি, অযং পুগ্গলং উপপরিক্খিত্ৰা ধম্মানুগ্গহেন ন দেতি নাম. যো পন ‘‘অযং ধম্মো সণ্হো সুখুমো, সচাযং পুগ্গলো গণ্হিস্সতি, অঞ্ঞং ব্যাকরিত্ৰা অত্তানং আৰি কত্ৰা নস্সিস্সতী’’তি ন দেতি, অযং ধম্মং উপপরিক্খিত্ৰা পুগ্গলানুগ্গহেন ন দেতি নাম. যো পন ‘‘সচাযং ইমং ধম্মং গণ্হিস্সতি, অম্হাকং সমযং ভিন্দিতুং সমত্থো ভৰিস্সতী’’তি ন দেতি, অযং ধম্মমচ্ছরী নাম হোতি.

ইমেসু পঞ্চসু মচ্ছরিযেসু আৰাসমচ্ছরিযেন তাৰ যক্খো ৰা পেতো ৰা হুত্ৰা তস্সেৰ আৰাসস্স সঙ্কারং সীসেন উক্খিপিত্ৰা ৰিচরতি. কুলমচ্ছরিযেন তস্মিং কুলে অঞ্ঞেসং দানমাননাদীনি করোন্তে দিস্ৰা ‘‘ভিন্নং ৰতিদং কুলং মমা’’তি চিন্তযতো লোহিতম্পি মুখতো উগ্গচ্ছতি, কুচ্ছিৰিরেচনম্পি হোতি, অন্তানিপি খণ্ডাখণ্ডানি হুত্ৰা নিক্খমন্তি. লাভমচ্ছরিযেন সঙ্ঘস্স ৰা গণস্স ৰা সন্তকে লাভে মচ্ছরাযিত্ৰা পুগ্গলিকপরিভোগং ৰিয পরিভুঞ্জিত্ৰা যক্খো ৰা পেতো ৰা মহাঅজগরো ৰা হুত্ৰা নিব্বত্ততি. সরীরৰণ্ণগুণৰণ্ণমচ্ছরেন পন পরিযত্তিধম্মমচ্ছরিযেন চ অত্তনোৰ ৰণ্ণং ৰণ্ণেতি, পরেসং ৰণ্ণে ‘‘কিং ৰণ্ণো এসো’’তি তং তং দোসং ৰদন্তো পরিযত্তিধম্মঞ্চ কস্সচি কিঞ্চি অদেন্তো দুব্বণ্ণো চেৰ এল়মূগো চ হোতি.

অপি চ আৰাসমচ্ছরিযেন লোহগেহে পচ্চতি, কুলমচ্ছরিযেন অপ্পলাভো হোতি, লাভমচ্ছরিযেন গূথনিরযে নিব্বত্ততি, ৰণ্ণমচ্ছরিযেন ভৰে ভৰে নিব্বত্তস্স ৰণ্ণো নাম ন হোতি, ধম্মমচ্ছরিযেন কুক্কুল়নিরযে নিব্বত্ততীতি.

মচ্ছরাযনৰসেন মচ্ছরিযং. মচ্ছরাযনাকারো মচ্ছরাযনা. মচ্ছরেন অযিতস্স মচ্ছেরসমঙ্গিনো ভাৰো মচ্ছরাযিতত্তং. ‘‘ময্হমেৰ হোন্তু, মা অঞ্ঞস্সা’’তি সব্বাপি অত্তনো সম্পত্তিযো ব্যাপেতুং ন ইচ্ছতীতি ৰিৰিচ্ছো, ৰিৰিচ্ছস্স ভাৰো ৰেৰিচ্ছং, মুদুমচ্ছরিযস্সেতং নামং. কদরিযো ৰুচ্চতি অনাদরো, তস্স ভাৰো কদরিযং, থদ্ধমচ্ছরিযস্সেতং নামং. তেন হি সমন্নাগতো পুগ্গলো পরম্পি পরেসং দদমানং নিৰারেতি. ৰুত্তম্পি চেতং –

‘‘কদরিযো পাপসঙ্কপ্পো, মিচ্ছাদিট্ঠিঅনাদরো;

দদমানং নিৰারেতি, যাচমানান ভোজন’’ন্তি. (সং. নি. ১.১৩২);

যাচকে দিস্ৰা কটুকভাৰেন চিত্তং অঞ্চতি সঙ্কোচেতীতি কটুকঞ্চুকো, তস্স ভাৰো কটুকঞ্চুকতা. অপরো নযো – কটুকঞ্চুকতা ৰুচ্চতি কটচ্ছুগ্গাহো. সমতিত্তিকপুণ্ণায হি উক্খলিযা ভত্তং গণ্হন্তো সব্বতোভাগেন সঙ্কুটিতেন অগ্গকটচ্ছুনা গণ্হাতি পূরেত্ৰা গহেতুং ন সক্কোতি, এৰং মচ্ছরিপুগ্গলস্স চিত্তং সঙ্কুচতি, তস্মিং সঙ্কুচিতে কাযোপি তথেৰ সঙ্কুচতি পটিকুটতি পটিনিৰট্টতি ন সম্পসারীযতীতি মচ্ছেরং ‘‘কটুকঞ্চুকতা’’তি ৰুত্তং.

অগ্গহিতত্তং চিত্তস্সাতি পরেসং উপকারকরণে দানাদিনা আকারেন যথা ন সম্পসারীযতি, এৰং আৰরিত্ৰা গহিতভাৰো চিত্তস্স. যস্মা পন মচ্ছরিপুগ্গলো অত্তনো সন্তকং পরেসং অদাতুকামো হোতি, পরসন্তকং গণ্হিতুকামো. তস্মা ‘‘ইদং অচ্ছরিযং ময্হমেৰ হোতু, মা অঞ্ঞস্সা’’তি পৰত্তিৰসেনস্স অত্তসম্পত্তিনিগূহনলক্খণতা পরসম্পত্তিগ্গহণলক্খণতা চ ৰেদিতব্বা.

খন্ধমচ্ছরিযম্পি মচ্ছরিযন্তি অত্তনো পঞ্চক্খন্ধসঙ্খাতং উপপত্তিভৰং অঞ্ঞেহি অসাধারণং ‘‘অচ্ছরিযং ময্হমেৰ হোতু, মা অঞ্ঞস্সা’’তি পৰত্তং মচ্ছরিযং খন্ধমচ্ছরিযং নাম. ধাতুআযতনমচ্ছরিযেসুপি এসেৰ নযো. গাহোতি গাহনিচ্ছযৰসেন গহণং. অৰদঞ্ঞুতাযাতি সব্বঞ্ঞুবুদ্ধানম্পি কথিতং অজাননভাৰেন. যাচকানং অদদমানো হি তেহি কথিতং ন জানাতি নাম. জনা পমত্তাতি সতিৰিপ্পৰাসা জনা. ৰচনন্তি সঙ্খেপৰচনং. ব্যপ্পথন্তি ৰিত্থারৰচনং. দেসনন্তি উপমং দস্সেত্ৰা অত্থসন্দস্সনৰচনং. অনুসিট্ঠিন্তি পুনপ্পুনং সংলক্খাপনৰচনং. অথ ৰা দস্সেত্ৰা কথনং ৰচনং নাম. গণ্হাপেত্ৰা কথনং ব্যপ্পথং নাম. তোসেত্ৰা কথনং দেসনং নাম. পদস্সেত্ৰা কথনং অনুসিট্ঠি নাম. অথ ৰা পরিতাপদুক্খং নাসেত্ৰা কথনং ৰচনং নাম. পরিল়াহদুক্খং নাসেত্ৰা কথনং ব্যপ্পথং নাম. অপাযদুক্খং নাসেত্ৰা কথনং দেসনং নাম. ভৰদুক্খং নাসেত্ৰা কথনং অনুসিট্ঠি নাম. অথ ৰা দুক্খসচ্চপরিঞ্ঞাপটিৰেধযুত্তং ৰচনং. সমুদযসচ্চপহানপটিৰেধযুত্তং ব্যপ্পথং. নিরোধসচ্চসচ্ছিকিরিযপটিৰেধযুত্তং দেসনং. মগ্গসচ্চভাৰনাপটিৰেধযুত্তং অনুসিট্ঠীতি এৰমাদিনা নযেন একে ৰণ্ণযন্তি.

ন সুস্সুসন্তীতি ন সুণন্তি. ন সোতং ওদহন্তীতি সৰনত্থং কণ্ণসোতং ন ঠপেন্তি. ন অঞ্ঞা চিত্তং উপট্ঠপেন্তীতি জাননত্থং চিত্তং ন পতিট্ঠপেন্তি. অনস্সৰাতি ওৰাদং অসুণমানা. অৰচনকরাতি সুণমানাপি ৰচনং ন করোন্তীতি অৰচনকরা. পটিলোমৰুত্তিনোতি পটাণী হুত্ৰা পৰত্তনকা. অঞ্ঞেনেৰ মুখং করোন্তীতি করোন্তাপি মুখং ন দেন্তীতি অত্থো.

ৰিসমেতি কাযসুচরিতাদিসম্মতস্স সমস্স পটিপক্খত্তা ৰিসমং, তস্মিং ৰিসমে. নিৰিট্ঠাতি পৰিট্ঠা দুন্নীহরা. কাযকম্মেতি কাযতো পৰত্তে, কাযেন ৰা পৰত্তে কাযকম্মে. ৰচীকম্মাদীসুপি এসেৰ নযো.

তত্থ কাযকম্মৰচীকম্মমনোকম্মানি দুচ্চরিতৰসেন ৰিভত্তানি, পাণাতিপাতাদযো দসঅকুসলকম্মপথৰসেন ৰিভত্তাতি ঞাতব্বং. অযং তাৰেত্থ সাধারণপদৰণ্ণনা, অসাধারণেসু পন পাণস্স অতিপাতো পাণাতিপাতো, পাণৰধো পাণঘাতোতি ৰুত্তং হোতি. পাণোতি চেত্থ ৰোহারতো সত্তো, পরমত্থতো জীৰিতিন্দ্রিযং. তস্মিং পন পাণে পাণসঞ্ঞিনো জীৰিতিন্দ্রিযুপচ্ছেদকউপক্কমসমুট্ঠাপিতা কাযৰচীদ্ৰারানং অঞ্ঞতরদ্ৰারপৰত্তা ৰধকচেতনা পাণাতিপাতো. সো গুণৰিরহিতেসু তিরচ্ছানগতাদীসু পাণেসু খুদ্দকে পাণে অপ্পসাৰজ্জো, মহাসরীরে মহাসাৰজ্জো. কস্মা? পযোগমহন্ততায, পযোগসমত্তেপি ৰত্থুমহন্ততায. গুণৰন্তেসু মনুস্সাদীসু অপ্পগুণে পাণে অপ্পসাৰজ্জো, মহাগুণে মহাসাৰজ্জো. সরীরগুণানং পন সমভাৰে সতি কিলেসানং উপক্কমানঞ্চ মুদুতায অপ্পসাৰজ্জো, তিব্বতায মহাসাৰজ্জোতি ৰেদিতব্বো.

তস্স পঞ্চ সম্ভারা হোন্তি – পাণো পাণসঞ্ঞিতা ৰধকচিত্তং উপক্কমো তেন মরণন্তি. ছপ্পযোগা – সাহত্থিকো আণত্তিকো নিস্সগ্গিযো থাৰরো ৰিজ্জামযো ইদ্ধিমযোতি. ইমস্মিং পনত্থে ৰিত্থারিযমানে অতিপপঞ্চো হোতি, তস্মা নং ন ৰিত্থারযিস্সাম. অঞ্ঞঞ্চ এৰরূপং, অত্থিকেহি পন সমন্তপাসাদিকং ৰিনযট্ঠকথং (পারা. অট্ঠ. ২.১৭২) ওলোকেত্ৰা গহেতব্বং.

অদিন্নস্স আদানং অদিন্নাদানং, পরস্স হরণং থেয্যং চোরিকাতি ৰুত্তং হোতি. তত্থ অদিন্নন্তি পরপরিগ্গহিতং, যত্থ পরো যথাকামকারিতং আপজ্জন্তো অদণ্ডারহো অনুপৰজ্জো চ হোতি, তস্মিং পন পরপরিগ্গহিতে পরপরিগ্গহিতসঞ্ঞিনো তদাদাযকউপক্কমসমুট্ঠাপিকা থেয্যচেতনা অদিন্নাদানং. তং হীনে পরসন্তকে ৰত্থুস্মিং অপ্পসাৰজ্জং, পণীতে মহাসাৰজ্জং. কস্মা? ৰত্থুপণীততায, ৰত্থুসমত্তে সতি গুণাধিকানং সন্তকে ৰত্থুস্মিং মহাসাৰজ্জং. তং তং গুণাধিকং উপাদায ততো ততো হীনগুণস্স সন্তকে ৰত্থুস্মিং অপ্পসাৰজ্জং.

তস্স পঞ্চ সম্ভারা হোন্তি – পরপরিগ্গহিতং পরপরিগ্গহিতসঞ্ঞিতা থেয্যচিত্তং উপক্কমো তেন হরণন্তি. ছপ্পযোগা সাহত্থিকাদযোৰ. তে চ খো যথানুরূপং থেয্যাৰহারো পসয্হাৰহারো পটিচ্ছন্নাৰহারো পরিকপ্পাৰহারো কুসাৰহারোতি ইমেসং পঞ্চন্নং অৰহারানং ৰসেন পৰত্তন্তি. অযমেত্থ সঙ্খেপো. ৰিত্থারো পন সমন্তপাসাদিকাযং ৰুত্তো.

কামেসুমিচ্ছাচারোতি এত্থ পন কামেসূতি মেথুনসমাচারেসু. মিচ্ছাচারোতি একন্তনিন্দিতো লামকাচারো. লক্খণতো পন অসদ্ধম্মসেৰনাধিপ্পাযেন কাযদ্ৰারপ্পৰত্তা অগমনীযট্ঠানৰীতিক্কমচেতনা কামেসুমিচ্ছাচারো.

তত্থ অগমনীযট্ঠানং নাম পুরিসানং তাৰ মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সারক্খা সপরিদণ্ডাতি মাতুরক্খিতাদযো দস, ধনক্কীতা ছন্দৰাসিনী ভোগৰাসিনী পটৰাসিনী ওদপত্তকিনী ওভতচুম্বটকা দাসী চ ভরিযা কম্মকারী চ ভরিযা ধজাহটা মুহুত্তিকাতি এতা ধনক্কীতাদযো দসাতি ৰীসতি ইত্থিযো. ইত্থীসু পন দ্ৰীন্নং সারক্খসপরিদণ্ডানং দসন্নঞ্চ ধনক্কীতাদীনন্তি দ্ৰাদসন্নং ইত্থীনং অঞ্ঞে পুরিসা, ইদং অগমনীযট্ঠানং নাম.

সো পনেস মিচ্ছাচারো সীলাদিগুণরহিতে অগমনীযট্ঠানে অপ্পসাৰজ্জো, সীলাদিগুণসম্পন্নে মহাসাৰজ্জো. তস্স চত্তারো সম্ভারা – অগমনীযৰত্থু তস্মিং সেৰনচিত্তং সেৰনপযোগো মগ্গেন মগ্গপটিপত্তিঅধিৰাসনন্তি. একো পযোগো সাহত্থিকো এৰ.

মুসাতি ৰিসংৰাদনপুরেক্খারস্স অত্থভঞ্জনকো ৰচীপযোগো কাযপযোগো ৰা. ৰিসংৰাদনাধিপ্পাযেন পনস্স পরৰিসংৰাদককাযৰচীপযোগসমুট্ঠাপিকা চেতনা মুসাৰাদো. অপরো নযো – মুসাতি অভূতং অতচ্ছং ৰত্থু. ৰাদোতি তস্স ভূততো তচ্ছতো ৰিঞ্ঞাপনং. লক্খণতো পন অতথং ৰত্থুং তথতো পরং ৰিঞ্ঞাপেতুকামস্স তথাৰিঞ্ঞত্তিসমুট্ঠাপিকা চেতনা মুসাৰাদো. সো যমত্থং ভঞ্জতি, তস্স অপ্পতায অপ্পসাৰজ্জো, মহন্ততায মহাসাৰজ্জো. অপি চ গহট্ঠানং অত্তনো সন্তকং অদাতুকামতায ‘‘নত্থী’’তিআদিনযপ্পৰত্তো অপ্পসাৰজ্জো, সক্খিনা হুত্ৰা অত্থভঞ্জনত্থং ৰুত্তো মহাসাৰজ্জো. পব্বজিতানং অপ্পকম্পি তেলং ৰা সপ্পিং ৰা লভিত্ৰা হসাধিপ্পাযেন ‘‘অজ্জ গামে তেলং নদী মঞ্ঞে সন্দতী’’তি পূরণকথানযেন পৰত্তো অপ্পসাৰজ্জো, অদিট্ঠংযেৰ পন দিট্ঠন্তিআদিনা নযেন ৰদন্তানং মহাসাৰজ্জো.

তস্স চত্তারো সম্ভারা হোন্তি – অতথং ৰত্থু ৰিসংৰাদনচিত্তং তজ্জো ৰাযামো পরস্স তদত্থৰিজাননন্তি. একো পযোগো সাহত্থিকোৰ. সো চ কাযেন ৰা কাযপটিবদ্ধেন ৰা ৰাচায ৰা পরৰিসংৰাদককিরিযাকরণে দট্ঠব্বো. তায চে কিরিযায পরো তমত্থং জানাতি, অযং কিরিযসমুট্ঠাপিকা চেতনাক্খণেযেৰ মুসাৰাদকম্মুনা বজ্ঝতি.

পিসুণৰাচাতিআদীসু যায ৰাচায যস্স তং ৰাচং ভাসতি, তস্স হদযে অত্তনো পিযভাৰং পরস্স চ সুঞ্ঞভাৰং করোতি, সা পিসুণৰাচা. যায পন অত্তানম্পি পরম্পি ফরুসং করোতি, যা ৰাচা সযম্পি ফরুসা নেৰ কণ্ণসুখা ন হদযঙ্গমা, অযং ফরুসৰাচা. যেন সম্ফং পলপতি নিরত্থকং, সো সম্ফপ্পলাপো. তেসং মূলভূতাপি চেতনা পিসুণৰাচাদিনামমেৰ লভতি, সা এৰ ইধ অধিপ্পেতাতি.

তত্থ সংকিলিট্ঠচিত্তস্স পরেসং ৰা ভেদায অত্তনো পিযকম্যতায ৰা কাযৰচীপযোগসমুট্ঠাপিকা চেতনা পিসুণৰাচা. সা যস্স ভেদং করোতি, তস্স অপ্পগুণায অপ্পসাৰজ্জা, মহাগুণতায মহাসাৰজ্জা.

তস্সা চত্তারো সম্ভারা হোন্তি – ভিন্দিতব্বো পরো ‘‘ইতি ইমে নানা ভৰিস্সন্তি ৰিনা ভৰিস্সন্তী’’তি ভেদপুরেক্খারতা ৰা, ‘‘ইতি অহং পিযো ভৰিস্সামি ৰিস্সাসিকো’’তি ৰিযকম্যতা ৰা, তজ্জো ৰাযামো, তস্স তদত্থৰিজাননন্তি.

পরস্স মম্মচ্ছেদককাযৰচীপযোগসমুট্ঠাপিকা একন্তফরুসচেতনা ফরুসৰাচা. মম্মচ্ছেদকোপি পযোগো চিত্তসণ্হতায ফরুসৰাচা ন হোতি. মাতাপিতরো হি কদাচি পুত্তকে এৰম্পি ৰদন্তি ‘‘চোরা ৰো খণ্ডাখণ্ডিকং করোন্তূ’’তি, উপ্পলপত্তম্পি চ নেসং উপরি পতন্তং ন ইচ্ছন্তি. আচরিযুপজ্ঝাযা চ কদাচি নিস্সিতকে এৰং ৰদন্তি ‘‘কিং ইমে অহিরিকা অনোত্তপ্পিনো চরন্তি, নিদ্ধমথ নে’’তি. অথ চ নেসং আগমাধিগমসম্পত্তিং ইচ্ছন্তি. যথা চ চিত্তসণ্হতায ফরুসৰাচা ন হোতি, এৰং ৰচনসণ্হতায অফরুসৰাচাপি ন হোতি. ন হি মারাপেতুকামস্স ‘‘ইমং সুখং সযাপেথা’’তি ৰচনং অফরুসৰাচা হোতি, চিত্তফরুসতায পনেসা ফরুসৰাচাৰ, সা যং সন্ধায পৰত্তিতা. তস্স অপ্পগুণতায অপ্পসাৰজ্জা, মহাগুণতায মহাসাৰজ্জা. তস্সা তযো সম্ভারা – অক্কোসিতব্বো পরো কুপিতচিত্তং অক্কোসনন্তি.

অনত্থৰিঞ্ঞাপিকা কাযৰচীপযোগসমুট্ঠাপিকা অকুসলচেতনা সম্ফপ্পলাপো. সো আসেৰনমন্দতায অপ্পসাৰজ্জো, আসেৰনমহন্ততায মহাসাৰজ্জো. তস্স দ্ৰে সম্ভারা হোন্তি – ভারতযুদ্ধসীতাহরণাদিনিরত্থককথাপুরেক্খারতা তথারূপীকথাকথনঞ্চাতি.

অভিজ্ঝাযতীতি অভিজ্ঝা, পরভণ্ডাভিমুখী হুত্ৰা তন্নিন্নতায পৰত্ততীতি অত্থো. সা ‘‘অহো ৰত ইদং মমাস্সা’’তি এৰং পরভণ্ডাভিজ্ঝাযনলক্খণা. অদিন্নাদানং ৰিয অপ্পসাৰজ্জা মহাসাৰজ্জা চ. তস্সা দ্ৰে সম্ভারা হোন্তি – পরভণ্ডং অত্তনো পরিণামনঞ্চাতি. পরভণ্ডৰত্থুকে হি লোভে উপ্পন্নেপি ন তাৰ কম্মপথভেদো হোতি, যাৰ ‘‘অহো ৰতিদং মমাস্সা’’তি অত্তনো ন পরিণামেতি.

হিতসুখং ব্যাপাদযতীতি ব্যাপাদো, সো পরৰিনাসায মনোপদোসলক্খণো. ফরুসৰাচা ৰিয অপ্পসাৰজ্জো মহাসাৰজ্জো চ. তস্স দ্ৰে সম্ভারা হোন্তি – পরসত্তো চ তস্স চ ৰিনাসচিন্তাতি. পরসত্তৰত্থুকে হি কোধে উপ্পন্নেপি ন তাৰ কম্মপথভেদো হোতি, যাৰ ‘‘অহো ৰতাযং উচ্ছিজ্জেয্য ৰিনস্সেয্যা’’তি তস্স ৰিনাসং ন চিন্তেসি.

যথাভুচ্চগহণাভাৰেন মিচ্ছা পস্সতীতি মিচ্ছাদিট্ঠি. সা ‘‘নত্থি দিন্ন’’ন্তিআদিনা নযেন ৰিপরীতদস্সনলক্খণা. সম্ফপ্পলাপো ৰিয অপ্পসাৰজ্জা মহাসাৰজ্জা চ.

সঞ্ঞী, অসঞ্ঞী, নেৰসঞ্ঞীনাসঞ্ঞী ভৰিস্সামাতি রূপাদিৰসেন কঙ্খন্তি. ভৰিস্সাম নু খো মযন্তিআদিনা অত্তানং কঙ্খন্তি. তত্থ ভৰিস্সাম নু খো. ন নু খো ভৰিস্সামাতি তস্স সস্সতাকারঞ্চ উচ্ছেদাকারঞ্চ নিস্সায অনাগতে অত্তানং ৰিজ্জমানতঞ্চ অৰিজ্জমানতঞ্চ কঙ্খন্তি. কিং নু খো ভৰিস্সামাতি জাতিলিঙ্গুপপত্তিযো নিস্সায ‘‘খত্তিযা নু খো ভৰিস্সাম, ব্রাহ্মণৰেস্সসুদ্দগহট্ঠপব্বজিতদেৰমনুস্সানং অঞ্ঞতরা’’তি কঙ্খন্তি. কথং নু খো ভৰিস্সামাতি সণ্ঠানাকারং নিস্সায ‘‘দীঘা নু খো ভৰিস্সাম, রস্সওদাতকণ্হপমাণিকঅপ্পমাণিকাদীনং অঞ্ঞতরা’’তি কঙ্খন্তি. কেচি পন ‘‘ইস্সরনিম্মানাদীনি নিস্সায ‘কেন নু খো কারণেন ভৰিস্সামা’তি হেতুতো কঙ্খন্তী’’তি ৰদন্তি. কিং হুত্ৰা কিং ভৰিস্সাম নু খো মযন্তি জাতিআদীনি নিস্সায ‘‘খত্তিযা হুত্ৰা নু খো ব্রাহ্মণা ভৰিস্সাম…পে… দেৰা হুত্ৰা মনুস্সা’’তি অত্তনো পরম্পরং কঙ্খন্তি. সব্বত্থেৰ পন অদ্ধানন্তি কালাধিৰচনমেতং.

১০. যস্মা এতদেৰ তস্মা হি সিক্খেথ…পে… আহু ধীরাতি. তত্থ সিক্খেথাতি তিস্সো সিক্খা আৰজ্জেয্য. ইধেৰাতি ইমস্মিংযেৰ সাসনে. তত্থ সিক্খিতব্বাতি সিক্খা. তিস্সোতি গণনপরিচ্ছেদো. অধিসীলসিক্খাতি অধিকং উত্তমং সীলন্তি অধিসীলং, অধিসীলঞ্চ তং সিক্খিতব্বট্ঠেন সিক্খা চাতি অধিসীলসিক্খা. এস নযো অধিচিত্তঅধিপঞ্ঞাসিক্খাসু.

কতমং পনেত্থ সীলং, কতমং অধিসীলং, কতমং চিত্তং, কতমং অধিচিত্তং, কতমা পঞ্ঞা, কতমা অধিপঞ্ঞাতি? ৰুচ্চতে – পঞ্চঙ্গদসঙ্গসীলং তাৰ সীলমেৰ. তঞ্হি বুদ্ধে উপ্পন্নেপি অনুপ্পন্নেপি লোকে পৰত্ততি. উপ্পন্নে বুদ্ধে তস্মিং সীলে বুদ্ধাপি সাৰকাপি মহাজনং সমাদপেন্তি, অনুপ্পন্নে বুদ্ধে পচ্চেকবুদ্ধা চ কম্মৰাদিনো চ ধম্মিকা সমণব্রাহ্মণা চ চক্কৰত্তী চ মহারাজানো মহাবোধিসত্তা চ সমাদপেন্তি, সামম্পি পণ্ডিতা সমণব্রাহ্মণা সমাদিযন্তি. তে তং কুসলং ধম্মং পরিপূরেত্ৰা দেৰেসু চ মনুস্সেসু চ সম্পত্তিং অনুভোন্তি.

পাতিমোক্খসংৰরসীলং পন ‘‘অধিসীল’’ন্তি ৰুচ্চতি. তঞ্হি সূরিযো ৰিয পজ্জোতানং সিনেরু ৰিয পব্বতানং সব্বলোকিযসীলানং অধিকঞ্চেৰ উত্তমঞ্চ, বুদ্ধুপ্পাদেযেৰ চ পৰত্ততি, ন ৰিনা বুদ্ধুপ্পাদা. ন হি তং পঞ্ঞত্তিং উদ্ধরিত্ৰা অঞ্ঞো সত্তো ঠপেতুং সক্কোতি. বুদ্ধাযেৰ পন সব্বসো কাযৰচীদ্ৰারঅজ্ঝাচারসোতং ছিন্দিত্ৰা তস্স তস্স ৰীতিক্কমস্স অনুচ্ছৰিকং তং সীলসংৰরং পঞ্ঞপেন্তি. পাতিমোক্খসংৰরতোপি চ মগ্গফলসম্পযুত্তমেৰ সীলং অধিসীলং.

কামাৰচরানি পন অট্ঠ কুসলচিত্তানি লোকিযঅট্ঠসমাপত্তিচিত্তানি চ একজ্ঝং কত্ৰা চিত্তমেৰাতি ৰেদিতব্বানি. বুদ্ধুপ্পাদানুপ্পাদে চস্স পৰত্তি, সমাদপনং সমাদানঞ্চ সীলে ৰুত্তনযেনেৰ ৰেদিতব্বং.

ৰিপস্সনাপাদকং অট্ঠসমাপত্তিচিত্তং পন ‘‘অধিচিত্ত’’ন্তি ৰুচ্চতি. তঞ্হি অধিসীলং ৰিয সীলানং, সব্বলোকিযচিত্তানং অধিকঞ্চেৰ উত্তমঞ্চ, বুদ্ধুপ্পাদেযেৰ চ হোতি, ন ৰিনা বুদ্ধুপ্পাদা. ততোপি চ মগ্গফলচিত্তমেৰ অধিচিত্তং.

‘‘অত্থি দিন্নং অত্থি যিট্ঠ’’ন্তিআদিনযপ্পৰত্তং (ম. নি. ২.৯৪) পন কম্মস্সকতাঞাণং পঞ্ঞা. সা হি বুদ্ধে উপ্পন্নেপি অনুপ্পন্নেপি লোকে পৰত্ততি. উপ্পন্নে বুদ্ধে তস্সা পঞ্ঞায বুদ্ধাপি সাৰকাপি মহাজনং সমাদপেন্তি, অনুপ্পন্নে বুদ্ধে পচ্চেকবুদ্ধা চ কম্মৰাদিনো চ ধম্মিকা সমণব্রাহ্মণা চ চক্কৰত্তী চ মহারাজানো মহাবোধিসত্তা চ সমাদপেন্তি, সামম্পি পণ্ডিতা সত্তা সমাদিযন্তি. তথা হি অঙ্কুরো দসৰস্সসহস্সানি মহাদানং অদাসি. ৰেলামো ৰেস্সন্তরো অঞ্ঞে চ বহূ পণ্ডিতমনুস্সা মহাদানানি অদংসু. তে তং কুসলং ধম্মং পরিপূরেত্ৰা দেৰেসু চ মনুস্সেসু চ সম্পত্তিং অনুভৰিংসু.

তিলক্খণাকারপরিচ্ছেদকং পন ৰিপস্সনাঞাণং ‘‘অধিপঞ্ঞা’’তি ৰুচ্চতি. সা হি অধিসীলঅধিচিত্তানি ৰিয সীলচিত্তানং, সব্বলোকিযপঞ্ঞানং অধিকা চেৰ উত্তমা চ, ন চ ৰিনা বুদ্ধুপ্পাদা লোকে পৰত্ততি. ততোপি চ মগ্গফলপঞ্ঞাৰ অধিপঞ্ঞা.

ইদানি একেকং দস্সেন্তো ‘‘কতমা অধিসীলসিক্খা – ইধ ভিক্খু সীলৰা হোতি, পাতিমোক্খসংৰরসংৰুতো ৰিহরতী’’তিআদিমাহ. ইধাতি ৰচনং পুব্বভাগকরণীযসম্পদায সম্পন্নস্স সব্বপকারসীলপরিপূরকস্স পুগ্গলস্স সন্নিস্সযভূতসাসনপরিদীপনং, অঞ্ঞসাসনস্স চ তথাভাৰপটিসেধনং. ৰুত্তঞ্হেতং – ‘‘ইধেৰ, ভিক্খৰে, সমণো…পে… সুঞ্ঞা পরপ্পৰাদা সমণেভি অঞ্ঞেহী’’তি (ম. নি. ১.১৩৯-১৪০). ভিক্খূতি তস্স সীলস্স পরিপূরকস্স পুগ্গলস্স পরিদীপনং. পাতিমোক্খসংৰরসংৰুতোতি ইদমস্স পাতিমোক্খসংৰরে পতিট্ঠিতভাৰপরিদীপনং. ৰিহরতীতি ইদমস্স তদনুরূপৰিহারসমঙ্গীভাৰপরিদীপনং. আচারগোচরসম্পন্নোতি ইদমস্স পাতিমোক্খসংৰরস্স উপকারকধম্মপরিদীপনং. অণুমত্তেসু ৰজ্জেসু ভযদস্সাৰীতি ইদমস্স পাতিমোক্খতো অচৰনধম্মতাপরিদীপনং. সমাদাযাতি ইদমস্স সিক্খাপদানং অনৰসেসতো আদানপরিদীপনং. সিক্খতীতি ইদমস্স সিক্খায সমঙ্গীভাৰপরিদীপনং. সিক্খাপদেসূতি ইদমস্স সিক্খিতব্বধম্মপরিদীপনং.

তত্থ ভিক্খূতি সংসারে ভযং ইক্খতীতি ভিক্খু. সীলমস্স অত্থীতি সীলৰাতি এত্থ সীলন্তি সীলনট্ঠেন সীলং. কিমিদং সীলনং নাম? সমাধানং ৰা, কাযকম্মাদীনং সুসীল্যৰসেন অৰিপ্পকিণ্ণতাতি অত্থো. উপধারণং ৰা, কুসলানং ধম্মানং পতিট্ঠাৰসেন আধারভাৰোতি অত্থো. এতদেৰ হি এত্থ অত্থদ্ৰযং সদ্দলক্খণৰিদূ অনুজানন্তি. অঞ্ঞে পন ‘‘অধিসেৰনট্ঠেন আচারট্ঠেন সীলনট্ঠেন সিরট্ঠেন সীতলট্ঠেন সিৰট্ঠেন সীল’’ন্তি ৰণ্ণযন্তি.

সীলনং লক্খণং তস্স, ভিন্নস্সাপি অনেকধা;

সনিদস্সনত্তং রূপস্স, যথা ভিন্নস্সনেকধা.

যথা হি নীলপীতাদিভেদেননেকধা ভিন্নস্সাপি রূপাযতনস্স সনিদস্সনত্তং লক্খণং নীলাদিভেদেন ভিন্নস্সাপি সনিদস্সনভাৰানতিক্কমনতো. তথা সীলস্স চেতনাদিভেদেন অনেকধা ভিন্নস্সাপি যদেতং কাযকম্মাদীনং সমাধানৰসেন, কুসলানঞ্চ ধম্মানং পতিট্ঠাৰসেন ৰুত্তং সীলনং, তদেৰ লক্খণং চেতনাদিভেদেন ভিন্নস্সাপি সমাধানপতিট্ঠাভাৰানতিক্কমনতো. এৰং লক্খণস্স পনস্স –

দুস্সীল্যৰিদ্ধংসনতা, অনৰজ্জগুণো তথা;

কিচ্চসম্পত্তিঅত্থেন, রসো নাম পৰুচ্চতি.

তস্মা ইদং সীলং নাম কিচ্চট্ঠেন রসেন দুস্সীল্যৰিদ্ধংসনরসং, সম্পত্তিঅত্থেন রসেন অনৰজ্জরসন্তি ৰেদিতব্বং.

সোচেয্যপচ্চুপট্ঠানং, তযিদং তস্স ৰিঞ্ঞুভি;

ওত্তপ্পঞ্চ হিরী চেৰ, পদট্ঠানন্তি ৰণ্ণিতং.

তঞ্হিদং সীলং ‘‘কাযসোচেয্যং ৰচীসোচেয্যং মনোসোচেয্য’’ন্তি এৰং ৰুত্তসোচেয্যপচ্চুপট্ঠানং, সোচেয্যভাৰেন পচ্চুপট্ঠাতি গহণভাৰং গচ্ছতি. হিরোত্তপ্পঞ্চ পন তস্স ৰিঞ্ঞূহি পদট্ঠানন্তি ৰণ্ণিতং, আসন্নকারণন্তি অত্থো. হিরোত্তপ্পে হি সতি সীলং উপ্পজ্জতি চেৰ তিট্ঠতি চ, অসতি নেৰ উপ্পজ্জতি চেৰ ন তিট্ঠতি চাতি এৰংৰিধেন সীলেন সীলৰা হোতি. এতং সীলং নাম পাণাতিপাতাদীহি ৰা ৰিরমন্তস্স, ৰত্তপটিপত্তিং ৰা পূরেন্তস্স চেতনাদযো ধম্মা ৰেদিতব্বা. ৰুত্তঞ্হেতং পটিসম্ভিদাযং ‘‘কিং সীলন্তি? চেতনা সীলং, চেতসিকং সীলং, সংৰরো সীলং, অৰীতিক্কমো সীল’’ন্তি (পটি. ম. ১.৩৯).

তত্থ চেতনা সীলং নাম পাণাতিপাতাদীহি ৰা ৰিরমন্তস্স ৰত্তপটিপত্তিং ৰা পূরেন্তস্স চেতনা. চেতসিকং সীলং নাম পাণাতিপাতাদীহি ৰিরমন্তস্স ৰিরতি. অপি চ চেতনা সীলং নাম পাণাতিপাতাদীনি পজহন্তস্স সত্তকম্মপথচেতনা. চেতসিকং সীলং নাম ‘‘অভিজ্ঝং পহায ৰিগতাভিজ্ঝেন চেতসা ৰিহরতী’’তিআদিনা (দী. নি. ১.২১৭) নযেন সংযুত্তমহাৰগ্গে ৰুত্তা অনভিজ্ঝাব্যাপাদসম্মাদিট্ঠিধম্মা. সংৰরো সীলন্তি এত্থ পঞ্চৰিধেন সংৰরো ৰেদিতব্বো – পাতিমোক্খসংৰরো সতিসংৰরো ঞাণসংৰরো খন্তিসংৰরো ৰীরিযসংৰরো. তস্স নানাকরণং উপরি আৰি ভৰিস্সতি. অৰীতিক্কমো সীলন্তি সমাদিন্নসীলস্স কাযিকৰাচসিকো অৰীতিক্কমো. এত্থ চ সংৰরসীলং, অৰীতিক্কমসীলন্তি ইদমেৰ নিপ্পরিযাযতো সীলং. চেতনাসীলং, চেতসিকং সীলন্তি পরিযাযতো সীলন্তি ৰেদিতব্বং.

পাতিমোক্খন্তি সিক্খাপদসীলং. তঞ্হি যো নং পাতি রক্খতি, তং মোক্খেতি মোচেতি আপাযিকাদীহি দুক্খেহি, তস্মা ‘‘পাতিমোক্খ’’ন্তি ৰুত্তং. পাতিমোক্খসংৰরসংৰুতোতি পাতিমোক্খসংৰরসীলেন সমন্নাগতো. আচারগোচরসম্পন্নোতি আচারেন চেৰ গোচরেন চ সম্পন্নো. অণুমত্তেসূতি অপ্পমত্তকেসু. ৰজ্জেসূতি অকুসলধম্মেসু. ভযদস্সাৰীতি ভযদস্সী. সমাদাযাতি সম্মা আদিযিত্ৰা. সিক্খতি সিক্খাপদেসূতি তং তং সিক্খাপদং সমাদিযিত্ৰা সিক্খতি. অপি চ সমাদায সিক্খতি সিক্খাপদেসূতি যংকিঞ্চি সিক্খাপদেসু সিক্খাকোট্ঠাসেসু সিক্খিতব্বং কাযিকং ৰা চেতসিকং ৰা, তং সব্বং সমাদায সিক্খতি.

খুদ্দকো সীলক্খন্ধোতি সঙ্ঘাদিসেসাদিসাৰসেসো সীলক্খন্ধো. মহন্তোতি পারাজিকাদিনিরৰসেসো. যস্মা পন পাতিমোক্খসীলেন ভিক্খু সাসনে পতিট্ঠাতি নাম, তস্মা তং ‘‘পতিট্ঠা’’তি ৰুত্তং. পতিট্ঠহতি ৰা এত্থ ভিক্খু, কুসলা ধম্মা এৰ ৰা এত্থ পতিট্ঠহন্তীতি পতিট্ঠা. অযমত্থো ‘‘সীলে পতিট্ঠায নরো সপঞ্ঞো’’তি (সং. নি. ১.২৩, ১৯২) চ, ‘‘পতিট্ঠানলক্খণং, মহারাজ, সীলং সব্বেসং কুসলানং ধম্মান’’ন্তি (মি. প. ২.১.৯) চ, ‘‘সীলে পতিট্ঠিতো খো, মহারাজ…পে… সব্বে কুসলা ধম্মা ন পরিহাযন্তী’’তি (মি. প. ২.১.৯) চ আদিসুত্তৰসেন ৰেদিতব্বো.

তদেতং পুব্বুপ্পত্তিঅত্থেন আদি. ৰুত্তম্পি চেতং ‘‘তস্মাতিহ ত্ৰং উত্তিয আদিমেৰ ৰিসোধেহি কুসলেসু ধম্মেসু. কো চাদি কুসলানং ধম্মানং, সীলঞ্চ সুৰিসুদ্ধং দিট্ঠি চ উজুকা’’তি (সং. নি. ৫.৩৮২). যথা হি নগরৰড্ঢকী নগরং মাপেতুকামো পঠমং নগরট্ঠানং সোধেতি, ততো অপরভাগে ৰীথিচতুক্কসিঙ্ঘাটকাদিপরিচ্ছেদেন ৰিভজিত্ৰাৰ নগরং মাপেতি. এৰমেৰ যোগাৰচরো আদিতো সীলং ৰিসোধেতি, ততো অপরভাগে সমাধিৰিপস্সনামগ্গফলনিব্বানানি সচ্ছিকরোতি. যথা ৰা পন রজকো পঠমং তীহি খারেহি ৰত্থং ধোৰিত্ৰা পরিসুদ্ধে ৰত্থে যদিচ্ছকং রঙ্গজাতং উপনেতি, যথা ৰা পন ছেকো চিত্তকারো রূপং লিখিতুকামো আদিতোৰ ভিত্তিপরিকম্মং করোতি, ততো অপরভাগে রূপং সমুট্ঠাপেতি. এৰমেৰ যোগাৰচরো আদিতোৰ সীলং ৰিসোধেত্ৰা অপরভাগে সমথৰিপস্সনাদযো ধম্মে সচ্ছিকরোতি. তস্মা সীলং ‘‘আদী’’তি ৰুত্তং.

তদেতং চরণসরিক্খতায চরণং. চরণাতি হি পাদা ৰুচ্চন্তি. যথা হি ছিন্নচরণস্স পুরিসস্স দিসং গমনাভিসঙ্খারো ন জাযতি, পরিপুণ্ণপাদস্সেৰ জাযতি, এৰমেৰ যস্স সীলং ভিন্নং হোতি খণ্ডং অপরিপুণ্ণং, তস্স নিব্বানগমনায ঞাণগমনং ন সম্পজ্জতি. যস্স পন তং অভিন্নং হোতি অখণ্ডং পরিপুণ্ণং, তস্স নিব্বানগমনায ঞাণগমনং সম্পজ্জতি. তস্মা সীলং ‘‘চরণ’’ন্তি ৰুত্তং.

তদেতং সংযমনৰসেন সংযমো. সংৰরণৰসেন সংৰরোতি উভযেনাপি সীলসংযমো চেৰ সীলসংৰরো চ কথিতো. ৰচনত্থো পনেত্থ সংযমেতি ৰীতিক্কমৰিপ্ফন্দনং, পুগ্গলং ৰা সংযমেতি ৰীতিক্কমৰসেন তস্স ৰিপ্ফন্দিতুং ন দেতীতি সংযমো. ৰীতিক্কমস্স পৰেসনদ্ৰারং সংৰরতি পিদহতীতি সংৰরো.

মোক্খন্তি উত্তমং মুখভূতং ৰা. যথা হি সত্তানং চতুব্বিধো আহারো মুখেন পৰিসিত্ৰা অঙ্গমঙ্গানি ফরতি, এৰং যোগিনোপি চতুভূমককুসলং সীলমুখেন পৰিসিত্ৰা অত্থসিদ্ধিং সম্পাদেতি. তেন ‘‘মোক্খ’’ন্তি. পমুখে সাধূতি পামোক্খং, পুব্বঙ্গমং সেট্ঠং পধানন্তি অত্থো. কুসলানং ধম্মানং সমাপত্তিযাতি চতুভূমককুসলানং পটিলাভত্থায পামোক্খং পুব্বঙ্গমং সেট্ঠং পধানন্তি ৰেদিতব্বং.

ৰিৰিচ্চেৰ কামেহীতি কামেহি ৰিৰিচ্চ ৰিনা হুত্ৰা অপক্কমিত্ৰা. যো পনাযমেত্থ এৰকারো, সো নিযমত্থোতি ৰেদিতব্বো. যস্মা চ নিযমত্থো, তস্মা তস্মিং পঠমং ঝানং উপসম্পজ্জ ৰিহরণসমযে অৰিজ্জমানানম্পি কামানং তস্স পঠমজ্ঝানস্স পটিপক্খভাৰং কামপরিচ্চাগেনেৰ চস্স অধিগমং দীপেতি. কথং? ‘‘ৰিৰিচ্চেৰ কামেহী’’তি এৰঞ্হি নিযমে করিযমানে ইদং পঞ্ঞাযতি, নূনিমস্স ঝানস্স কামা পটিপক্খভূতা, যেসু সতি ইদং ন পৰত্ততি অন্ধকারে সতি পদীপোভাসো ৰিয, তেসং পরিচ্চাগেনেৰ চস্স অধিগমো হোতি ওরিমতীরপরিচ্চাগেন পারিমতীরস্সেৰ. তস্মা নিযমং করোতীতি.

তত্থ সিযা ‘‘কস্মা পনেস পুব্বপদেযেৰ ৰুত্তো ন উত্তরপদে, কিং অকুসলেহি ধম্মেহি অৰিৰিচ্চাপি ঝানং উপসম্পজ্জ ৰিহরেয্যা’’তি? ন খো পনেতং এৰং দট্ঠব্বং. তংনিস্সরণতো হি পুব্বপদে এৰ এস ৰুত্তো. কামধাতুসমতিক্কমনতো হি কামরাগপটিপক্খতো চ ইদং ঝানং কামানমেৰ নিস্সরণং. যথাহ – ‘‘কামানমেতং নিস্সরণং যদিদং নেক্খম্ম’’ন্তি (ইতিৰু. ৭২). উত্তরপদেপি পন যথা ‘‘ইধেৰ, ভিক্খৰে, সমণো, ইধ দুতিযো সমণো’’তি (ম. নি. ১.১৩৯) এত্থ এৰকারো আনেত্ৰা ৰুচ্চতি, এৰং ৰত্তব্বো. ন হি সক্কা ইতো অঞ্ঞেহিপি নীৰরণসঙ্খাতেহি অকুসলেহি ধম্মেহি অৰিৰিচ্চ ঝানং উপসম্পজ্জ ৰিহরিতুং. তস্মা ৰিৰিচ্চেৰ কামেহি ৰিৰিচ্চেৰ অকুসলেহি ধম্মেহীতি এৰং পদদ্ৰযেপি এস দট্ঠব্বো. পদদ্ৰযেপি চ কিঞ্চাপি ৰিৰিচ্চাতি ইমিনা সাধারণৰচনেন তদঙ্গৰিৰেকাদযো কাযৰিৰেকাদযো চ সব্বেপি ৰিৰেকা সঙ্গহং গচ্ছন্তি, তথাপি পুব্বভাগে কাযৰিৰেকচিত্তৰিৰেকৰিক্খম্ভনৰিৰেকা দট্ঠব্বা. লোকুত্তরমগ্গক্খণে কাযৰিৰেকচিত্তৰিৰেকসমুচ্ছেদৰিৰেকনিস্সরণৰিৰেকা.

কামেহীতি ইমিনা পন পদেন যে চ ইধ ‘‘কতমে ৰত্থুকামা মনাপিকা রূপা’’তিআদিনা নযেন ৰত্থুকামা ৰুত্তা, যে চ ইধেৰ ৰিভঙ্গে ‘‘ছন্দো কামো রাগো কামো ছন্দরাগো কামো সঙ্কপ্পো কামো রাগো কামো সঙ্কপ্পরাগো কামো’’তি এৰং কিলেসকামা ৰুত্তা, তে সব্বেপি সঙ্গহিতা ইচ্চেৰ দট্ঠব্বা. এৰঞ্হি সতি ৰিৰিচ্চেৰ কামেহীতি ৰত্থুকামেহিপি ৰিৰিচ্চেৰাতি অত্থো যুজ্জতি. তেন কাযৰিৰেকো ৰুত্তো হোতি.

ৰিৰিচ্চ অকুসলেহি ধম্মেহীতি কিলেসকামেহি সব্বাকুসলেহি ৰা ৰিৰিচ্চাতি অত্থো যুজ্জতি. তেন চিত্তৰিৰেকো ৰুত্তো হোতি. পুরিমেন চেত্থ ৰত্থুকামেহি ৰিৰেকৰচনতো এৰ কামসুখপরিচ্চাগো, দুতিযেন কিলেসকামেহি ৰিৰেকৰচনতো নেক্খম্মসুখপরিগ্গহো ৰিভাৰিতো হোতি. এৰং ৰত্থুকামকিলেসকামৰিৰেকৰচনতোযেৰ চ এতেসং পঠমেন সংকিলেসৰত্থুপ্পহানং, দুতিযেন সংকিলেসপ্পহানং. পঠমেন লোলভাৰস্স হেতুপরিচ্চাগো, দুতিযেন বালভাৰস্স. পঠমেন চ পযোগসুদ্ধি, দুতিযেন আসযপোসনং ৰিভাৰিতং হোতীতি ঞাতব্বং. এস তাৰ নযো ‘‘কামেহী’’তি এত্থ ৰুত্তকামেসু ৰত্থুকামপক্খে.

কিলেসকামপক্খে পন ছন্দোতি চ রাগোতি চ এৰমাদীহি অনেকভেদো কামচ্ছন্দোৰ ‘‘কামো’’তি অধিপ্পেতো. সো চ অকুসলপরিযাপন্নোপি সমানো ‘‘তত্থ কতমো কামচ্ছন্দো, কামো’’তিআদিনা নযেন ৰিভঙ্গে ঝানপটিপক্খতো ৰিসুং ৰুত্তো. কিলেসকামত্তা ৰা পুরিমপদে ৰুত্তো, অকুসলপরিযাপন্নত্তা দুতিযপদে. অনেকভেদতো চস্স কামতোতি অৰত্ৰা কামেহীতি ৰুত্তং. অঞ্ঞেসম্পি চ ধম্মানং অকুসলভাৰে ৰিজ্জমানে ‘‘তত্থ কতমে অকুসলা ধম্মা, কামচ্ছন্দো’’তিআদিনা নযেন ৰিভঙ্গে (ৰিভ. ৫৬৪) উপরিঝানঙ্গানং পচ্চনীকপটিপক্খভাৰদস্সনতো নীৰরণানেৰ ৰুত্তানি. নীৰরণানি হি ঝানঙ্গপচ্চনীকানি তেসং ঝানঙ্গানেৰ পটিপক্খানি, ৰিদ্ধংসকানি ৰিঘাতকানীতি ৰুত্তং হোতি. তথা হি ‘‘সমাধি কামচ্ছন্দস্স পটিপক্খো, পীতি ব্যাপাদস্স, ৰিতক্কো থিনমিদ্ধস্স, সুখং উদ্ধচ্চকুক্কুচ্চস্স, ৰিচারো ৰিচিকিচ্ছাযা’’তি পেটকে ৰুত্তং.

এৰমেত্থ ৰিৰিচ্চেৰ কামেহীতি ইমিনা কামচ্ছন্দস্স ৰিক্খম্ভনৰিৰেকো ৰুত্তো হোতি, ৰিৰিচ্চ অকুসলেহি ধম্মেহীতি ইমিনা পঞ্চন্নম্পি নীৰরণানং. অগ্গহিতগ্গহণেন পন পঠমেন কামচ্ছন্দস্স, দুতিযেন সেসনীৰরণানং. তথা পঠমেন তীসু অকুসলমূলেসু পঞ্চকামগুণভেদৰিসযস্স লোভস্স, দুতিযেন আঘাতৰত্থুভেদাদিৰিসযানং দোসমোহানং. ওঘাদীসু ৰা ধম্মেসু পঠমেন কামোঘকামযোগকামাসৰকামুপাদানঅভিজ্ঝাকাযগন্থকামরাগসংযোজনানং, দুতিযেন অৰসেসওঘযোগাসৰউপাদানগন্থসংযোজনানং. পঠমেন চ তণ্হায তংসম্পযুত্তকানঞ্চ, দুতিযেন অৰিজ্জায তংসম্পযুত্তকানঞ্চ. অপি চ পঠমেন লোভসম্পযুত্তঅট্ঠচিত্তুপ্পাদানং, দুতিযেন সেসানং চতুন্নং অকুসলচিত্তুপ্পাদানং ৰিক্খম্ভনৰিৰেকো ৰুত্তো হোতীতি ৰেদিতব্বো.

এত্তাৰতা চ পঠমস্স ঝানস্স পহানঙ্গং দস্সেত্ৰা ইদানি সম্পযোগঙ্গং দস্সেতুং ‘‘সৰিতক্কং সৰিচার’’ন্তিআদি ৰুত্তং. তত্থ আরম্মণে চিত্তস্স অভিনিরোপনলক্খণো ৰিতক্কো, আরম্মণানুমজ্জনলক্খণো ৰিচারো. সন্তেপি চ নেসং কত্থচি অৰিযোগে ওল়ারিকট্ঠেন পুব্বঙ্গমট্ঠেন চ ঘণ্ডাভিঘাতো ৰিয চেতসো পঠমাভিনিপাতো ৰিতক্কো, সুখুমট্ঠেন অনুমজ্জনসভাৰেন চ ঘণ্ডানুরৰো ৰিয অনুপবন্ধো ৰিচারো. ৰিপ্ফারৰা চেত্থ ৰিতক্কো পঠমুপ্পত্তিকালে পরিপ্ফন্দনভূতো চিত্তস্স, আকাসে উপ্পতিতুকামস্স পক্খিনো পক্খৰিক্খেপো ৰিয, পদুমাভিমুখপাতো ৰিয চ গন্ধানুবন্ধচেতসো ভমরস্স. সন্তৰুত্তি ৰিচারো নাতিপরিপ্ফন্দনভাৰো চিত্তস্স, আকাসে উপ্পতিতস্স পক্খিনো পক্খপ্পসারণং ৰিয, পরিব্ভমনং ৰিয চ পদুমাভিমুখপতিতস্স ভমরস্স পদুমস্স উপরিভাগে.

দুকনিপাতট্ঠকথাযং পন ‘‘আকাসে গচ্ছতো মহাসকুণস্স উভোহি পক্খেহি ৰাতং গহেত্ৰা পক্খে সন্নিসীদাপেত্ৰা গমনং ৰিয আরম্মণে চেতসো অভিনিরোপনভাৰেন পৰত্তো ৰিতক্কো, ৰাতগ্গহণত্থং পক্খে ফন্দাপযমানস্স গমনং ৰিয অনুমজ্জনভাৰেন পৰত্তো ৰিচারো’’তি ৰুত্তং. তং অনুপ্পবন্ধেন পৰত্তিযং যুজ্জতি. সো পন নেসং ৰিসেসো পঠমদুতিযজ্ঝানেসু পাকটো হোতি. অপি চ মলগ্গহিতং কংসভাজনং একেন হত্থেন দল়্হং গহেত্ৰা ইতরেন হত্থেন চুণ্ণতেলৰালণ্ডুপকেন পরিমজ্জন্তস্স দল়্হগ্গহণহত্থো ৰিয ৰিতক্কো. পরিমজ্জনহত্থো ৰিয ৰিচারো. তথা কুম্ভকারস্স দণ্ডপ্পহারেন চক্কং ভমযিত্ৰা ভাজনং করোন্তস্স উপ্পীল়নহত্থো ৰিয ৰিতক্কো. ইতো চিতো চ সঞ্চরণহত্থো ৰিয ৰিচারো. তথা মণ্ডলং করোন্তস্স মজ্ঝে সন্নিরুম্ভিত্ৰা ঠিতকণ্টকো ৰিয অভিনিরোপনো ৰিতক্কো. বহি পরিব্ভমনকণ্টকো ৰিয অনুমজ্জমানো ৰিচারো. ইতি ইমিনা চ ৰিতক্কেন ইমিনা চ ৰিচারেন সহ ৰত্ততি রুক্খো ৰিয পুপ্ফেন চ ফলেন চাতি ইদং ঝানং ‘‘সৰিতক্কং সৰিচার’’ন্তি ৰুচ্চতি.

ৰিৰেকজন্তি এত্থ ৰিৰিত্তি ৰিৰেকো, নীৰরণৰিগমোতি অত্থো. ৰিৰিত্তোতি ৰা ৰিৰেকো, নীৰরণৰিৰিত্তো ঝানসম্পযুত্তধম্মরাসীতি অত্থো. তস্মা ৰিৰেকা, তস্মিং ৰা ৰিৰেকে জাতন্তি ৰিৰেকজং. পীতিসুখন্তি এত্থ পিণযতীতি পীতি, সা সম্পিযাযনলক্খণা. সা পনেসা খুদ্দিকাপীতি, খণিকাপীতি, ওক্কন্তিকাপীতি, উব্বেগাপীতি, ফরণাপীতীতি পঞ্চৰিধা হোতি.

তত্থ খুদ্দিকাপীতি সরীরে লোমহংসমত্তমেৰ কাতুং সক্কোতি. খণিকাপীতি খণে খণে ৰিজ্জুপ্পাদসদিসা হোতি. ওক্কন্তিকাপীতি সমুদ্দতীরং ৰীচি ৰিয, কাযং ওক্কমিত্ৰা ওক্কমিত্ৰা ভিজ্জতি. উব্বেগাপীতি বলৰতী হোতি, কাযং উদ্ধগ্গং কত্ৰা আকাসে লঙ্ঘাপনপ্পমাণপত্তা.

ফরণাপীতি অতিবলৰতী হোতি. তায হি উপ্পন্নায সকলসরীরং ধমিত্ৰা পূরিতৰত্থি ৰিয মহতা উদকোঘেন পক্খন্দপব্বতকুচ্ছি ৰিয চ অনুপরিপ্ফুটং হোতি. সা পনেসা পঞ্চৰিধা পীতি গব্ভং গণ্হন্তী পরিপাকং গচ্ছন্তী দুৰিধং পস্সদ্ধিং পরিপূরেতি কাযপস্সদ্ধিঞ্চ চিত্তপস্সদ্ধিঞ্চ, পস্সদ্ধি গব্ভং গণ্হন্তী পরিপাকং গচ্ছন্তী দুৰিধম্পি সুখং পরিপূরেতি কাযিকং চেতসিকঞ্চ, সুখং গব্ভং গণ্হন্তং পরিপাকং গচ্ছন্তং তিৰিধং সমাধিং পরিপূরেতি খণিকসমাধিং উপচারসমাধিং অপ্পনাসমাধিঞ্চাতি. তাসু যা অপ্পনাসমাধিস্স মূলং হুত্ৰা ৰড্ঢমানা সমাধিসম্পযোগঙ্গতা ফরণাপীতি, অযং ইমস্মিং অত্থে অধিপ্পেতা পীতীতি.

ইতরং পন সুখযতীতি সুখং, যস্স উপ্পজ্জতি, তং সুখিতং করোতীতি অত্থো. সুখনং ৰা সুখং, সুট্ঠু ৰা খাদতি খণতি চ কাযচিত্তাবাধন্তি সুখং, সোমনস্সৰেদনাযেতং নামং. তং সাতলক্খণং. সন্তেপি চ নেসং কত্থচি অৰিপ্পযোগে ইট্ঠারম্মণপটিলাভতুট্ঠি পীতি, পটিলদ্ধরসানুভৰনং সুখং. যত্থ পীতি, তত্থ সুখং, যত্থ সুখং, তত্থ ন নিযমতো পীতি. সঙ্খারক্খন্ধসঙ্গহিতা পীতি, ৰেদনাক্খন্ধসঙ্গহিতং সুখং. কন্তারখিন্নস্স ৰনন্তোদকদস্সনসৰনেসু ৰিয পীতি, ৰনচ্ছাযপ্পৰেসনউদকপরিভোগেসু ৰিয সুখং. তস্মিং তস্মিং সমযে পাকটভাৰতো চেতং ৰুত্তন্তি ৰেদিতব্বং. ইতি অযঞ্চ পীতি ইদঞ্চ সুখং অস্স ঝানস্স, অস্মিং ৰা ঝানে অত্থীতি ইদং ঝানং ‘‘পীতিসুখ’’ন্তি ৰুচ্চতি.

অথ ৰা পীতি চ সুখঞ্চ পীতিসুখং ধম্মৰিনযাদযো ৰিয. ৰিৰেকজং পীতিসুখং অস্স ঝানস্স, অস্মিং ৰা ঝানে অত্থীতি এৰম্পি ৰিৰেকজংপীতিসুখং. যথেৰ হি ঝানং, এৰং পীতিসুখম্পেত্থ ৰিৰেকজমেৰ হোতি, তঞ্চস্স অত্থি, তস্মা অলোপসমাসং কত্ৰা একপদেনেৰ ‘‘ৰিৰেকজংপীতিসুখ’’ন্তিপি ৰত্তুং যুজ্জতি.

পঠমন্তি গণনানুপুব্বতা পঠমং, ইদং পঠমং উপ্পন্নন্তিপি পঠমং. ঝানন্তি দুৰিধং ঝানং আরম্মণূপনিজ্ঝানং লক্খণূপনিজ্ঝানঞ্চাতি. তত্থ অট্ঠ সমাপত্তিযো পথৰীকসিণাদিআরম্মণং উপনিজ্ঝাযন্তীতি আরম্মণূপনিজ্ঝানন্তি সঙ্খ্যং গতা. ৰিপস্সনামগ্গফলানি পন লক্খণূপনিজ্ঝানং নাম. তত্থ ৰিপস্সনা অনিচ্চাদিলক্খণস্স উপনিজ্ঝানতো লক্খণূপনিজ্ঝানং. ৰিপস্সনায কতকিচ্চস্স মগ্গেন ইজ্ঝনতো মগ্গো লক্খণূপনিজ্ঝানং, ফলং পন নিরোধসচ্চং তথলক্খণং উপনিজ্ঝাযতীতি লক্খণূপনিজ্ঝানং. তেসু ইধ পুব্বভাগে আরম্মণূপনিজ্ঝানং, লোকুত্তরমগ্গক্খণে লক্খণূপনিজ্ঝানং অধিপ্পেতং. তস্মা আরম্মণূপনিজ্ঝানতো চ লক্খণূপনিজ্ঝানতো চ পচ্চনীকঝাপনতো চ ঝানন্তি ৰেদিতব্বং.

উপসম্পজ্জাতি উপগন্ত্ৰা, পাপুণিত্ৰাতি ৰুত্তং হোতি. উপসম্পাদযিত্ৰা ৰা, নিপ্ফাদেত্ৰাতি ৰুত্তং হোতি. ৰিহরতীতি তদনুরূপেন ইরিযাপথৰিহারেন ইরিযতি, ৰুত্তপ্পকারঝানসমঙ্গী হুত্ৰা অত্তভাৰস্স ইরিযনং ৰুত্তিং অভিনিপ্ফাদেতি.

তং পনেতং পঠমজ্ঝানং পঞ্চঙ্গৰিপ্পহীনং পঞ্চঙ্গসমন্নাগতং তিৰিধকল্যাণং, দসলক্খণসম্পন্নং. তত্থ কামচ্ছন্দো ব্যাপাদো থিনমিদ্ধং উদ্ধচ্চকুক্কুচ্চং ৰিচিকিচ্ছাতি ইমেসং পঞ্চন্নং নীৰরণানং পহানৰসেন পঞ্চঙ্গৰিপ্পহীনতা ৰেদিতব্বা. ন হি এতেসু অপ্পহীনেসু ঝানং উপ্পজ্জতি. তেনস্সেতানি পহানঙ্গানীতি ৰুচ্চন্তি. কিঞ্চাপি হি ঝানক্খণে অঞ্ঞেপি অকুসলা ধম্মা পহীযন্তি, তথাপি এতানেৰ ৰিসেসেন ঝানন্তরাযকরানি. কামচ্ছন্দেন হি নানাৰিসযপ্পলোভিতং চিত্তং ন একত্তারম্মণে সমাধিযতি, কামচ্ছন্দাভিভূতং ৰা, তং ন কামধাতুপ্পহানায পটিপদং পটিপজ্জতি. ব্যাপাদেন ৰা আরম্মণে পটিহঞ্ঞমানং ন নিরন্তরং পৰত্ততি. থিনমিদ্ধাভিভূতং অকম্মঞ্ঞং হোতি. উদ্ধচ্চকুক্কুচ্চপরেতং অৰূপসন্তমেৰ হুত্ৰা পরিব্ভমতি. ৰিচিকিচ্ছায উপহতং ঝানাধিগমসাধিকং পটিপদং নারোহতি. ইতি ৰিসেসেন ঝানন্তরাযকরত্তা এতানেৰ পহানঙ্গানীতি ৰুত্তানি.

যস্মা পন ৰিতক্কো আরম্মণে চিত্তং অভিনিরোপেতি, ৰিচারো অনুপবন্ধতি, তেহি অৰিক্খেপায সম্পাদিতপযোগস্স চেতসো পযোগসম্পত্তিসম্ভৰা পীতি পীণনং সুখঞ্চ উপব্রূহনং করোতি. অথস্স সেসসম্পযুত্তধম্মা এতেহি অভিনিরোপনানুবন্ধনপীণনুপব্রূহনেহি অনুগ্গহিতা একগ্গতা একত্তারম্মণে সমং সম্মা চ আধিযতি. তস্মা ৰিতক্কো ৰিচারো পীতি সুখং চিত্তেকগ্গতাতি ইমেসং পঞ্চন্নং উপ্পত্তিৰসেন পঞ্চঙ্গসমন্নাগততা ৰেদিতব্বা. উপ্পন্নেসু হি এতেসু পঞ্চসু ঝানং উপ্পন্নং নাম হোতি. তেনস্স এতানি পঞ্চঙ্গসমন্নাগতানীতি ৰুচ্চন্তি. তস্মা ন এতেহি সমন্নাগতং অঞ্ঞদেৰ ঝানং নাম অত্থীতি গহেতব্বং. যথা পন অঙ্গমত্তৰসেনেৰ চতুরঙ্গিনী সেনা, পঞ্চঙ্গিকং তূরিযং, অট্ঠঙ্গিকো চ মগ্গোতি ৰুচ্চতি, এৰমিদম্পি অঙ্গমত্তৰসেনেৰ পঞ্চঙ্গিকন্তি ৰা পঞ্চঙ্গসমন্নাগতন্তি ৰা ৰুচ্চতীতি ৰেদিতব্বং.

এতানি চ পঞ্চঙ্গানি কিঞ্চাপি উপচারক্খণেপি অত্থি, অথ খো উপচারে পকতিচিত্ততো বলৰতরানি. ইধ পন উপচারতোপি বলৰতরানি রূপাৰচরলক্খণপ্পত্তানি নিপ্ফন্নানি. এত্থ হি ৰিতক্কো সুৰিসদেন আকারেন আরম্মণে চিত্তং অভিনিরোপযমানো উপ্পজ্জতি. ৰিচারো অতিৰিয আরম্মণং অনুমজ্জমানো. পীতিসুখং সব্বাৰন্তম্পি কাযং ফরমানং. তেনেৰাহ – ‘‘নাস্স কিঞ্চি সব্বাৰতো কাযস্স ৰিৰেকজেন পীতিসুখেন অপ্ফুটং হোতী’’তি (দী. নি. ১.২২৬). চিত্তেকগ্গতাপি হেট্ঠিমম্হি সমুগ্গপটলে উপরিমং সমুগ্গপটলং ৰিয আরম্মণেসু ফুসিতা হুত্ৰা উপ্পজ্জতি, অযমেতেসং ইতরেহি ৰিসেসো. তত্থ চিত্তেকগ্গতা কিঞ্চাপি ‘‘সৰিতক্কং সৰিচার’’ন্তি ইমস্মিং পাঠে ন নিদ্দিট্ঠা, তথাপি ৰিভঙ্গে (ৰিভ. ৫৬৫) ‘‘ঝানন্তি ৰিতক্কো ৰিচারো পীতি সুখং চিত্তেকগ্গতা’’তি এৰং ৰুত্তত্তা অঙ্গমেৰ. যেন হি অধিপ্পাযেন ভগৰতা উদ্দেসো কতো, সোযেৰ তেন ৰিভঙ্গে পকাসিতোতি.

তিৰিধকল্যাণং

তিৰিধকল্যাণং দসলক্খণসম্পন্নন্তি এত্থ পন আদিমজ্ঝপরিযোসানৰসেনতিৰিধকল্যাণতা. তেসংযেৰ চ আদিমজ্ঝপরিযোসানানং লক্খণৰসেন দসলক্খণসম্পন্নতা ৰেদিতব্বা. তত্রাযং পাল়ি –

‘‘পঠমস্স ঝানস্স পটিপদাৰিসুদ্ধি আদি, উপেক্খানুব্রূহনা মজ্ঝে, সম্পহংসনা পরিযোসানং, পঠমস্স ঝানস্স পটিপদাৰিসুদ্ধি আদি. আদিস্স কতি লক্খণানি? আদিস্স তীণি লক্খণানি – যো তস্স পরিপন্থো, ততো চিত্তং ৰিসুজ্ঝতি, ৰিসুদ্ধত্তা চিত্তং মজ্ঝিমং সমথনিমিত্তং পটিপজ্জতি, পটিপন্নত্তা তত্থ চিত্তং পক্খন্দতি. যঞ্চ পরিপন্থতো চিত্তং ৰিসুজ্ঝতি, যঞ্চ ৰিসুদ্ধত্তা চিত্তং মজ্ঝিমং সমথনিমিত্তং পটিপজ্জতি, যঞ্চ পটিপন্নত্তা তত্থ চিত্তং পক্খন্দতি. পঠমস্স ঝানস্স পটিপদাৰিসুদ্ধি আদি, আদিস্স ইমানি তীণি লক্খণানি. তেন ৰুচ্চতি – ‘পঠমং ঝানং আদিকল্যাণঞ্চেৰ হোতি তিলক্খণসম্পন্নঞ্চা’তি.

‘‘পঠমস্স ঝানস্স উপেক্খানুব্রূহনা মজ্ঝে. মজ্ঝস্স কতি লক্খণানি? মজ্ঝস্স তীণি লক্খণানি – ৰিসুদ্ধং চিত্তং অজ্ঝুপেক্খতি, সমথপটিপন্নং অজ্ঝুপেক্খতি, একত্তুপট্ঠানং অজ্ঝুপেক্খতি. যঞ্চ ৰিসুদ্ধং চিত্তং অজ্ঝুপেক্খতি, যঞ্চ সমথপটিপন্নং অজ্ঝুপেক্খতি, যঞ্চ একত্তুপট্ঠানং অজ্ঝুপেক্খতি. পঠমস্স ঝানস্স উপেক্খানুব্রূহনা মজ্ঝে, মজ্ঝস্স ইমানি তীণি লক্খণানি. তেন ৰুচ্চতি – ‘পঠমং ঝানং মজ্ঝেকল্যাণঞ্চেৰ হোতি তিলক্খণসম্পন্নঞ্চা’তি.

‘‘পঠমস্স ঝানস্স সম্পহংসনা পরিযোসানং. পরিযোসানস্স কতি লক্খণানি? পরিযোসানস্স চত্তারি লক্খণানি – তত্থ জাতানং ধম্মানং অনতিৰত্তনট্ঠেন সম্পহংসনা, ইন্দ্রিযানং একরাসট্ঠেন সম্পহংসনা, তদুপগৰীরিযৰাহনট্ঠেন সম্পহংসনা, আসেৰনট্ঠেন সম্পহংসনা. পঠমস্স ঝানস্স সম্পহংসনা পরিযোসানং, পরিযোসানস্স ইমানি চত্তারি লক্খণানি. তেন ৰুচ্চতি ‘পঠমং ঝানং পরিযোসানকল্যাণঞ্চেৰ হোতি চতুলক্খণসম্পন্নঞ্চা’’’তি (পটি. ম. ১.১৫৮).

‘‘তত্র পটিপদাৰিসুদ্ধি নাম সসম্ভারিকো উপচারো. উপেক্খানুব্রূহনা নাম অপ্পনা. সম্পহংসনা নাম পচ্চৰেক্খণা’’তি এৰমেকে ৰণ্ণযন্তি. যস্মা পন ‘‘একত্তগতং চিত্তং পটিপদাৰিসুদ্ধিপক্খন্দঞ্চেৰ হোতি উপেক্খানুব্রূহিতঞ্চ ঞাণেন চ সম্পহংসিত’’ন্তি পাল়িযং ৰুত্তং, তস্মা অন্তোঅপ্পনাযমেৰ আগমনৰসেন পটিপদাৰিসুদ্ধি, তত্রমজ্ঝত্তুপেক্খায কিচ্চৰসেন উপেক্খানুব্রূহনা, ধম্মানং অনতিৰত্তনাদিভাৰসাধনেন পরিযোদাপকস্স ঞাণস্স কিচ্চনিপ্ফত্তিৰসেন সম্পহংসনা চ ৰেদিতব্বা.

কথং? যস্মিঞ্হি ৰারে অপ্পনা উপ্পজ্জতি, তস্মিং যো নীৰরণসঙ্খাতো কিলেসগণো তস্স ঝানস্স পরিপন্থো, ততো চিত্তং ৰিসুজ্ঝতি. ৰিসুদ্ধত্তা আৰরণৰিরহিতং হুত্ৰা মজ্ঝিমং সমথনিমিত্তং পটিপজ্জতি. মজ্ঝিমসমথনিমিত্তং নাম সমপ্পৰত্তো অপ্পনাসমাধিযেৰ. তদনন্তরং পন পুরিমচিত্তং একসন্ততিপরিণামনযেন তথত্তং উপগচ্ছমানং মজ্ঝিমং সমথনিমিত্তং পটিপজ্জতি নাম, এৰং পটিপন্নত্তা তথত্তুপগমনেন তত্থ পক্খন্দতি নাম. এৰং তাৰ পুরিমচিত্তে ৰিজ্জমানাকারনিপ্ফাদিকা পঠমস্স ঝানস্স উপ্পাদক্খণেযেৰ আগমনৰসেন পটিপদাৰিসুদ্ধি ৰেদিতব্বা.

এৰং ৰিসুদ্ধস্স পন তস্স পুন ৰিসোধেতব্বাভাৰতো ৰিসোধনে ব্যাপারং অকরোন্তো ৰিসুদ্ধং চিত্তং অজ্ঝুপেক্খতি নাম. সমথভাৰূপগমনেন সমথপটিপন্নস্স পুন সমাধানে ব্যাপারং অকরোন্তো সমথপটিপন্নং অজ্ঝুপেক্খতি নাম. সমথপটিপন্নভাৰতো এৰ চস্স কিলেসসংসগ্গং পহায একত্তেন উপট্ঠিতস্স পুন একত্তুপট্ঠানে ব্যাপারং অকরোন্তো একত্তুপট্ঠানং অজ্ঝুপেক্খতি নাম. এৰং তত্রমজ্ঝত্তুপেক্খায কিচ্চৰসেন উপেক্খানুব্রূহনা ৰেদিতব্বা.

যে পনেতে এৰং উপেক্খানুব্রূহিতে তত্থ জাতা সমাধিপঞ্ঞাসঙ্খাতা যুগনদ্ধধম্মা অঞ্ঞমঞ্ঞং অনতিৰত্তমানা হুত্ৰা পৰত্তা, যানি চ সদ্ধাদীনি ইন্দ্রিযানি নানাকিলেসেহি ৰিমুত্তত্তা ৰিমুত্তিরসেন একরসানি হুত্ৰা পৰত্তানি, যঞ্চেস তদুপগং তেসং অনতিৰত্তনএকরসভাৰানং অনুচ্ছৰিকং ৰীরিযং ৰাহযতি, যা চস্স তস্মিং খণে পৰত্তা আসেৰনা, সব্বেপি তে আকারা যস্মা ঞাণেন সংকিলেসৰোদানেসু তং তং আদীনৰঞ্চ আনিসংসঞ্চ দিস্ৰা তথা তথা সম্পহংসিতত্তা ৰিসোধিতত্তা পরিযোদাপিতত্তা নিপ্ফন্নাৰ, তস্মা ‘‘ধম্মানং অনতিৰত্তনাদিভাৰসাধনেন পরিযোদাপকস্স ঞাণস্স কিচ্চনিপ্ফত্তিৰসেন সম্পহংসনা ৰেদিতব্বা’’তি ৰুত্তং.

ৰিতক্কৰিচারানং ৰূপসমাতি ৰিতক্কস্স চ ৰিচারস্স চাতি ইমেসং দ্ৰিন্নং ৰূপসমা সমতিক্কমা, দুতিযজ্ঝানক্খণে অপাতুভাৰাতি ৰুত্তং হোতি. তত্থ কিঞ্চাপি দুতিযজ্ঝানে সব্বেপি পঠমজ্ঝানধম্মা ন সন্তি, অঞ্ঞেযেৰ হি পঠমজ্ঝানে ফস্সাদযো, অঞ্ঞে ইধ. ওল়ারিকস্স পন ওল়ারিকস্স অঙ্গস্স সমতিক্কমা পঠমজ্ঝানতো পরেসং দুতিযজ্ঝানাদীনং অধিগমো হোতীতি দস্সনত্থং ‘‘ৰিতক্কৰিচারানং ৰূপসমা’’তি এৰং ৰুত্তন্তি ৰেদিতব্বং. অজ্ঝত্তন্তি ইধ নিযকজ্ঝত্তং অধিপ্পেতং, ৰিভঙ্গে পন ‘‘অজ্ঝত্তং পচ্চত্ত’’ন্তি (ৰিভ. ৫৭৩) এত্তকমেৰ ৰুত্তং. যস্মা নিযকজ্ঝত্তং অধিপ্পেতং, তস্মা অত্তনি জাতং, অত্তনো সন্তানে নিব্বত্তন্তি অযমেত্থ অত্থো.

সম্পসাদনন্তি সম্পসাদনং ৰুচ্চতি সদ্ধা. সম্পসাদনযোগতো ঝানম্পি সম্পসাদনং, নীলৰণ্ণযোগতো নীলৰত্থং ৰিয. যস্মা ৰা তং ঝানং সম্পসাদনসমন্নাগতত্তা ৰিতক্কৰিচারক্খোভৰূপসমনেন চ চেতো সম্পসাদযতি, তস্মাপি ‘‘সম্পসাদন’’ন্তি ৰুত্তং. ইমস্মিঞ্চ অত্থৰিকপ্পে সম্পসাদনং চেতসোতি এৰং পদসম্বন্ধো ৰেদিতব্বো. পুরিমস্মিং পন অত্থৰিকপ্পে চেতসোতি এতং একোদিভাৰেন সদ্ধিং যোজেতব্বং.

তত্রাযং অত্থযোজনা – একো উদেতীতি একোদি, ৰিতক্কৰিচারেহি অনজ্ঝারূল়্হত্তা অগ্গো সেট্ঠো হুত্ৰা উদেতীতি অত্থো. সেট্ঠোপি হি লোকে একোতি ৰুচ্চতি. ৰিতক্কৰিচারৰিরহিতো ৰা একো অসহাযো হুত্ৰাতিপি ৰত্তুং ৰট্টতি. অথ ৰা সম্পযুত্তধম্মে উদাযতীতি উদি, উট্ঠাপেতীতি অত্থো. সেট্ঠট্ঠেন একো চ সো উদি চাতি একোদি, সমাধিস্সেতং অধিৰচনং. ইতি ইমং একোদিং ভাৰেতি ৰড্ঢেতীতি ইদং দুতিযজ্ঝানং একোদিভাৰং. সো পনাযং একোদি যস্মা চেতসো, ন সত্তস্স, ন জীৰস্স. তস্মা এতং ‘‘চেতসো একোদিভাৰ’’ন্তি ৰুত্তং.

ননু চাযং সদ্ধা পঠমজ্ঝানেপি অত্থি, অযঞ্চ একোদিনামকো সমাধি, অথ কস্মা ইদমেৰ ‘‘সম্পসাদনং চেতসো একোদিভাৰ’’ন্তি ৰুত্তন্তি? ৰুচ্চতে – অদুঞ্হি পঠমজ্ঝানং ৰিতক্কৰিচারক্খোভেন ৰীচিতরঙ্গসমাকুলমিৰ জলং ন সুপ্পসন্নং হোতি, তস্মা সতিযাপি সদ্ধায সম্পসাদনন্তি ন ৰুত্তং. ন সুপ্পসন্নত্তাযেৰ চেত্থ সমাধিপি ন সুট্ঠু পাকটো, তস্মা একোদিভাৰন্তিপি ন ৰুত্তং. ইমস্মিং পন ঝানে ৰিতক্কৰিচারপলিবোধাভাৰেন লদ্ধোকাসা বলৰতী সদ্ধা, বলৰসদ্ধাসহাযপটিলাভেনেৰ চ সমাধিপি পাকটো. তস্মা ইদমেৰ এৰং ৰুত্তন্তি ৰেদিতব্বং.

অৰিতক্কং অৰিচারন্তি ভাৰনায পহীনত্তা এতস্মিং, এতস্স ৰা ৰিতক্কো নত্থীতি অৰিতক্কং. ইমিনাৰ নযেন অৰিচারং. এত্থাহ ‘‘ননু চ ‘ৰিতক্কৰিচারানং ৰূপসমা’তি ইমিনাপি অযমত্থো সিদ্ধো. অথ কস্মা পুন ৰুত্তং ‘অৰিতক্কং অৰিচার’’’ন্তি? ৰুচ্চতে – এৰমেতং, সিদ্ধোৰাযমত্থো. ন পনেতং তদত্থদীপকং, ননু অৰোচুম্হ ‘‘ওল়ারিকস্স পন ওল়ারিকস্স অঙ্গস্স সমতিক্কমা পঠমজ্ঝানতো পরেসং দুতিযজ্ঝানাদীনং সমধিগমো হোতীতি দস্সনত্থং ‘ৰিতক্কৰিচারানং ৰূপসমা’তি এৰং ৰুত্ত’’ন্তি.

অপি চ ৰিতক্কৰিচারানং ৰূপসমা ইদং সম্পসাদনং, ন কিলেসকালুস্সিযস্স. ৰিতক্কৰিচারানঞ্চ ৰূপসমা একোদিভাৰং, ন উপচারজ্ঝানমিৰ নীৰরণপ্পহানা, ন পঠমজ্ঝানমিৰ চ অঙ্গপাতুভাৰাতি এৰং সম্পসাদনএকোদিভাৰানং হেতুপরিদীপকমিদং ৰচনং. তথা ৰিতক্কৰিচারানং ৰূপসমা ইদং অৰিতক্কং অৰিচারং, ন ততিযচতুত্থজ্ঝানানি ৰিয চক্খুৰিঞ্ঞাণাদীনি ৰিয চ অভাৰাতি, এৰং অৰিতক্কঅৰিচারভাৰস্স হেতুপরিদীপকঞ্চ, ন ৰিতক্কৰিচারাভাৰমত্তপরিদীপকং. ৰিতক্কৰিচারাভাৰমত্তপরিদীপকমেৰ পন ‘‘অৰিতক্কং অৰিচার’’ন্তি ইদং ৰচনং. তস্মা পুরিমং ৰত্ৰাপি পুন ৰত্তব্বমেৰাতি.

সমাধিজন্তি পঠমজ্ঝানসমাধিতো সম্পযুত্তসমাধিতো ৰা জাতন্তি অত্থো. তত্থ কিঞ্চাপি পঠমম্পি সম্পযুত্তসমাধিতো জাতং, অথ খো অযমেৰ সমাধি ‘‘সমাধী’’তি ৰত্তব্বতং অরহতি, ৰিতক্কৰিচারক্খোভৰিরহেন অতিৰিয অচলত্তা সুপ্পসন্নত্তা চ. তস্মা ইমস্স ৰণ্ণভণনত্থং ইদমেৰ ‘‘সমাধিজ’’ন্তি ৰুত্তং. পীতিসুখন্তি ইদং ৰুত্তনযমেৰ.

দুতিযন্তি গণনানুপুব্বতা দুতিযং. ইদং দুতিযং উপ্পন্নন্তিপি দুতিযং.

পীতিযা চ ৰিরাগাতি ৰিরাগো নাম ৰুত্তপ্পকারায পীতিযা জিগুচ্ছনং ৰা সমতিক্কমো ৰা. উভিন্নং পন অন্তরা চ-সদ্দো সম্পিণ্ডনত্থো, সো ৰূপসমং ৰা সম্পিণ্ডেতি ৰিতক্কৰিচারৰূপসমং ৰা. তত্থ যদা ৰূপসমমেৰ সম্পিণ্ডেতি, তদা পীতিযা ৰিরাগা চ, কিঞ্চ ভিয্যো ৰূপসমা চাতি এৰং যোজনা ৰেদিতব্বা. ইমিস্সা চ যোজনায ৰিরাগো জিগুচ্ছনত্থো হোতি, তস্মা পীতিযা জিগুচ্ছনা চ সমতিক্কমা চাতি অযমত্থো দট্ঠব্বো. যদা পন ৰিতক্কৰিচারৰূপসমং সম্পিণ্ডেতি, তদা পীতিযা চ ৰিরাগা, কিঞ্চ ভিয্যো ৰিতক্কৰিচারানঞ্চ ৰূপসমাতি এৰং যোজনা ৰেদিতব্বা. ইমিস্সা চ যোজনায ৰিরাগো সমতিক্কমনত্থো হোতি, তস্মা পীতিযা চ সমতিক্কমা ৰিতক্কৰিচারানঞ্চ ৰূপসমাতি অযমত্থো দট্ঠব্বো.

কামঞ্চেতে ৰিতক্কৰিচারা দুতিযজ্ঝানেযেৰ ৰূপসন্তা, ইমস্স পন ঝানস্স মগ্গপরিদীপনত্থং ৰণ্ণভণনত্থঞ্চেতং ৰুত্তং. ‘‘ৰিতক্কৰিচারানং ৰূপসমা’’তি হি ৰুত্তে ইদং পঞ্ঞাযতি ‘‘নূন ৰিতক্কৰিচারৰূপসমো মগ্গো ইমস্স ঝানস্সা’’তি. যথা চ ততিযে অরিযমগ্গে অপ্পহীনানম্পি সক্কাযদিট্ঠাদীনং ‘‘পঞ্চন্নং ওরম্ভাগিযানং সংযোজনানং পহানা’’তি (ম. নি. ২.১৩২-১৩৩) এৰং পহানং ৰুচ্চমানং ৰণ্ণভণনং হোতি, তদধিগমায উস্সুক্কানং উস্সাহজনকং, এৰমেৰ ইধ অৰূপসন্তানম্পি ৰিতক্কৰিচারানং ৰূপসমো ৰুচ্চমানো ৰণ্ণভণনং হোতি, তেনাযমত্থো ৰুত্তো ‘‘পীতিযা চ সমতিক্কমা ৰিতক্কৰিচারানঞ্চ ৰূপসমা’’তি.

উপেক্খকো চ ৰিহরতীতি এত্থ উপপত্তিতো ইক্খতীতি উপেক্খা, সমং পস্সতি, অপক্খপতিতা হুত্ৰা পস্সতীতি অত্থো. তায ৰিসদায ৰিপুলায থামগতায সমন্নাগতত্তা ততিযজ্ঝানসমঙ্গী ‘‘উপেক্খকো’’তি ৰুচ্চতি.

উপেক্খা পন দসৰিধা হোতি – ছল়ঙ্গুপেক্খা ব্রহ্মৰিহারুপেক্খা বোজ্ঝঙ্গুপেক্খা ৰীরিযুপেক্খা সঙ্খারুপেক্খা ৰেদনুপেক্খা ৰিপস্সনুপেক্খা তত্রমজ্ঝত্তুপেক্খা ঝানুপেক্খা পারিসুদ্ধুপেক্খাতি.

তত্থ যা ‘‘ইধ, ভিক্খৰে, ভিক্খু চক্খুনা রূপং দিস্ৰা নেৰ সুমনো হোতি ন দুম্মনো, উপেক্খকো চ ৰিহরতি সতো সম্পজানো’’তি (ম. নি. ৬.১) এৰমাগতা খীণাসৰস্স ছসু দ্ৰারেসু ইট্ঠানিট্ঠছল়ারম্মণাপাথে পরিসুদ্ধপকতিভাৰাৰিজহনাকারভূতা উপেক্খা, অযং ছল়ঙ্গুপেক্খা নাম.

যা পন ‘‘উপেক্খাসহগতেন চেতসা একং দিসং ফরিত্ৰা ৰিহরতী’’তি (দী. নি. ১.৫৫৬; ম. নি. ১.৭৭) এৰমাগতা সত্তেসু মজ্ঝত্তাকারভূতা উপেক্খা, অযং ব্রহ্মৰিহারুপেক্খা নাম.

যা পন ‘‘উপেক্খাসম্বোজ্ঝঙ্গং ভাৰেতি ৰিৰেকনিস্সিত’’ন্তি (ম. নি. ২.২৪৭) এৰমাগতা সহজাতানং ধম্মানং মজ্ঝত্তাকারভূতা উপেক্খা, অযং বোজ্ঝঙ্গুপেক্খা নাম.

যা পন ‘‘কালেন কালং উপেক্খানিমিত্তং মনসি করোতী’’তি (অ. নি. ৩.১০৩) এৰমাগতা অনচ্চারদ্ধনাতিসিথিলৰীরিযসঙ্খাতা উপেক্খা, অযং ৰীরিযুপেক্খা নাম.

যা পন ‘‘কতি সঙ্খারুপেক্খা সমথৰসেন উপ্পজ্জন্তি, কতি সঙ্খারুপেক্খা ৰিপস্সনাৰসেন উপ্পজ্জন্তি? অট্ঠ সঙ্খারুপেক্খা সমথৰসেন উপ্পজ্জন্তি, দস সঙ্খারুপেক্খা ৰিপস্সনাৰসেন উপ্পজ্জন্তী’’তি (পটি. ম. ১.৫৭) এৰমাগতা নীৰরণাদিপটিসঙ্খাসন্তিট্ঠনাগহণে মজ্ঝত্তভূতা উপেক্খা, অযং সঙ্খারুপেক্খা নাম.

যা পন ‘‘যস্মিং সমযে কামাৰচরং কুসলং চিত্তং উপ্পন্নং হোতি উপেক্খাসহগত’’ন্তি (ধ. স. ১৫০) এৰমাগতা অদুক্খমসুখসঙ্খাতা উপেক্খা, অযং ৰেদনুপেক্খা নাম.

যা পন ‘‘যদত্থি যং ভূতং, তং পজহতি, উপেক্খং পটিলভতী’’তি (ম. নি. ৩.৭১-৭২; অ. নি. ৭.৫৫) এৰমাগতা ৰিচিননে মজ্ঝত্তভূতা উপেক্খা, অযং ৰিপস্সনুপেক্খা নাম.

যা পন ছন্দাদীসু যেৰাপনকেসু আগতা সহজাতানং সমৰাহিতভূতা উপেক্খা, অযং তত্রমজ্ঝত্তুপেক্খা নাম.

যা পন ‘‘উপেক্খকো চ ৰিহরতী’’তি এৰমাগতা অগ্গসুখেপি তস্মিং অপক্খপাতজননী উপেক্খা, অযং ঝানুপেক্খা নাম.

যা পন ‘‘উপেক্খাসতিপারিসুদ্ধিং চতুত্থং ঝান’’ন্তি (ধ. স. ১৬৫; দী. নি. ১.২৩২) এৰমাগতা সব্বপচ্চনীকপরিসুদ্ধা পচ্চনীকৰূপসমনেপি অব্যাপারভূতা উপেক্খা, অযং পারিসুদ্ধুপেক্খা নাম.

তত্থ ছল়ঙ্গুপেক্খা চ ব্রহ্মৰিহারুপেক্খা চ বোজ্ঝঙ্গুপেক্খা চ তত্রমজ্ঝত্তুপেক্খা চ ঝানুপেক্খা চ পারিসুদ্ধুপেক্খা চ অত্থতো একা, তত্রমজ্ঝত্তুপেক্খাৰ হোতি. তেন তেন অৰত্থাভেদেন পনস্সা অযং ভেদো. একস্সাপি সতো সত্তস্স কুমারযুৰথেরসেনাপতিরাজাদিৰসেন ভেদো ৰিয, তস্মা তাসু যত্থ ছল়ঙ্গুপেক্খা, ন তত্থ বোজ্ঝঙ্গুপেক্খাদযো. যত্থ ৰা পন বোজ্ঝঙ্গুপেক্খা, ন তত্থ ছল়ঙ্গুপেক্খাদযো হোন্তীতি ৰেদিতব্বা.

যথা চেতাসং অত্থতো একীভাৰো, এৰং সঙ্খারুপেক্খাৰিপস্সনুপেক্খানম্পি. পঞ্ঞা এৰ হি এসা, কিচ্চৰসেন দ্ৰিধা ভিন্না, যথা হি পুরিসস্স সাযং গেহং পৰিট্ঠং সপ্পং অজপদদণ্ডং গহেত্ৰা পরিযেসমানস্স তং থুসকোট্ঠকে নিপন্নং দিস্ৰা ‘‘সপ্পো নু খো নো’’তি অৰলোকেন্তস্স সোৰত্থিকত্তযং দিস্ৰা নিব্বেমতিকস্স ‘‘সপ্পো ন সপ্পো’’তি ৰিচিননে মজ্ঝত্ততা উপ্পজ্জতি, এৰমেৰ যা আরদ্ধৰিপস্সকস্স ৰিপস্সনাঞাণেন লক্খণত্তযে দিট্ঠে সঙ্খারানং অনিচ্চভাৰাদিৰিচিননে মজ্ঝত্ততা উপ্পজ্জতি, অযং ৰিপস্সনুপেক্খা. যথা পন তস্স পুরিসস্স অজপদদণ্ডকেন গাল়্হং সপ্পং গহেত্ৰা ‘‘কিন্তাহং ইমং সপ্পং অৰিহেঠেন্তো অত্তানঞ্চ ইমিনা অডংসাপেন্তো মুঞ্চেয্য’’ন্তি মুঞ্চনাকারমেৰ পরিযেসতো গহণে মজ্ঝত্ততা হোতি, এৰমেৰ যা লক্খণত্তযস্স দিট্ঠত্তা আদিত্তে ৰিয তযো ভৰে পস্সতো সঙ্খারগ্গহণে মজ্ঝত্ততা, অযং সঙ্খারুপেক্খা. ইতি ৰিপস্সনুপেক্খায সিদ্ধায সঙ্খারুপেক্খাপি সিদ্ধাৰ হোতি. ইমিনা পনেসা ৰিচিননগ্গহণেসু মজ্ঝত্ততাসঙ্খাতেন কিচ্চেন দ্ৰিধা ভিন্নাতি. ৰীরিযুপেক্খা পন ৰেদনুপেক্খা চ অঞ্ঞমঞ্ঞঞ্চ অৰসেসাহি চ অত্থতো ভিন্নাযেৰাতি. আহ চেত্থ –

‘‘মজ্ঝত্তব্রহ্মবোজ্ঝঙ্গছল়ঙ্গঝানসুদ্ধিযো;

ৰিপস্সনা চ সঙ্খারৰেদনাৰীরিযং ইতি.

‘‘ৰিত্থারতো দসোপেক্খা-ছমজ্ঝত্তাদিতো ততো;

দুৰে পঞ্ঞা ততো দ্ৰীহি, চতস্সোৰ ভৰন্তিমা’’তি.

ইতি ইমাসু উপেক্খাসু ঝানুপেক্খা ইধ অধিপ্পেতা. সা মজ্ঝত্তলক্খণা, অনাভোগরসা, অব্যাপারপচ্চুপট্ঠানা, পীতিৰিরাগপদট্ঠানাতি. এত্থাহ – ‘‘ননু চাযং অত্থতো তত্রমজ্ঝত্তুপেক্খাৰ হোতি, সা চ পঠমদুতিযজ্ঝানেসুপি অত্থি. তস্মা তত্রাপি ‘উপেক্খকো চ ৰিহরতী’তি এৰমযং ৰত্তব্বা সিযা, সা কস্মা ন ৰুত্তা’’তি? অপরিব্যত্তকিচ্চতো. অপরিব্যত্তঞ্হি তস্সা তত্থ কিচ্চং, ৰিতক্কাদীহি অভিভূতত্তা. ইধ পনাযং ৰিতক্কৰিচারপীতীহি অনভিভূতত্তা উক্খিত্তসিরা ৰিয হুত্ৰা পরিব্যত্তকিচ্চা জাতা, তস্মা ৰুত্তাতি.

সতো চ সম্পজানোতি এত্থ সরতীতি সতো. সম্পজানাতীতি সম্পজানো. ইতি পুগ্গলেন সতি চ সম্পজঞ্ঞঞ্চ ৰুত্তং. তত্থ সরণলক্খণা সতি, অসম্মুস্সনরসা আরক্খপচ্চুপট্ঠানা. অসম্মোহলক্খণং সম্পজঞ্ঞং, তীরণরসং, পৰিচযপচ্চুপট্ঠানং.

তত্থ কিঞ্চাপি ইদং সতিসম্পজঞ্ঞং পুরিমজ্ঝানেসুপি অত্থি, মুট্ঠস্সতিস্স হি অসম্পজানস্স উপচারমত্তম্পি ন সম্পজ্জতি, পগেৰ অপ্পনা. ওল়ারিকত্তা পন তেসং ঝানানং ভূমিযং ৰিয পুরিসস্স চিত্তস্স গতি সুখা হোতি, অব্যত্তং তত্থ সতিসম্পজঞ্ঞকিচ্চং. ওল়ারিকঙ্গপ্পহানেন পন সুখুমত্তা ইমস্স ঝানস্স পুরিসস্স খুরধারাযং ৰিয সতিসম্পজঞ্ঞকিচ্চপরিগ্গহিতা এৰ চিত্তস্স গতি ইচ্ছিতব্বাতি ইধেৰ ৰুত্তং. কিঞ্চ ভিয্যো – যথা ধেনুপগো ৰচ্ছো ধেনুতো অপনীতো অরক্খিযমানো পুনদেৰ ধেনুং উপগচ্ছতি, এৰমিদং ততিযজ্ঝানসুখং পীতিতো অপনীতম্পি সতিসম্পজঞ্ঞারক্খেন অরক্খিযমানং পুনদেৰ পীতিং উপগচ্ছেয্য, পীতিসম্পযুত্তমেৰ সিযা, সুখে ৰাপি সত্তা সারজ্জন্তি. ইদঞ্চ অতিমধুরসুখং, ততো পরং সুখাভাৰা. সতিসম্পজঞ্ঞানুভাৰেন পনেত্থ সুখে অসারজ্জনা হোতি, নো অঞ্ঞথাতি ইমম্পি অত্থৰিসেসং দস্সেতুং ইদমিধেৰ ৰুত্তন্তি ৰেদিতব্বং.

ইদানি সুখঞ্চ কাযেন পটিসংৰেদেতীতি এত্থ কিঞ্চাপি ততিযজ্ঝানসমঙ্গিনো সুখপটিসংৰেদনাভোগো নত্থি, এৰং সন্তেপি যস্মা তস্স নামকাযেন সম্পযুত্তং সুখং. যং ৰা তং নামকাযসম্পযুত্তং সুখং, তংসমুট্ঠানেনস্স যস্মা অতিপণীতেন রূপেন রূপকাযো ফুটো, যস্স ফুটত্তা ঝানা ৰুট্ঠিতোপি সুখং পটিসংৰেদেয্য, তস্মা এতমত্থং দস্সেন্তো ‘‘সুখঞ্চ কাযেন পটিসংৰেদেতী’’তি আহ.

ইদানি যং তং অরিযা আচিক্খন্তি উপেক্খকো সতিমা সুখৰিহারীতি এত্থ যংঝানহেতু যংঝানকারণা তং ততিযজ্ঝানসমঙ্গীপুগ্গলং বুদ্ধাদযো অরিযা আচিক্খন্তি দেসেন্তি পঞ্ঞপেন্তি পট্ঠপেন্তি ৰিৰরন্তি ৰিভজন্তি উত্তানীকরোন্তি পকাসেন্তি, পসংসন্তীতি অধিপ্পাযো. কিন্তি? উপেক্খকো সতিমা সুখৰিহারীতি. তং ততিযজ্ঝানং উপসম্পজ্জ ৰিহরতীতি এৰমেত্থ যোজনা ৰেদিতব্বা.

কস্মা পন তং তে এৰং পসংসন্তীতি? পসংসারহতো. অযঞ্হি যস্মা অতিমধুরসুখে সুখপারমিপ্পত্তেপি ততিযজ্ঝানে উপেক্খকো, ন তত্থ সুখাভিসঙ্গেন আকড্ঢীযতি. যথা চ পীতি ন উপ্পজ্জতি, এৰং উপট্ঠিতসতিতায সতিমা. যস্মা চ অরিযকন্তং অরিযজনসেৰিতমেৰ চ অসংকিলিট্ঠং সুখং নামকাযেন পটিসংৰেদেতি, তস্মা পসংসারহো. ইতি পসংসারহতো নং অরিযা তে এৰং পসংসাহেতুভূতে গুণে পকাসেন্তো ‘‘উপেক্খকো সতিমা সুখৰিহারী’’তি এৰং পসংসন্তীতি ৰেদিতব্বং. ততিযন্তি গণনানুপুব্বতা ততিযং, ইদং ততিযং উপ্পন্নন্তিপি ততিযং.

সুখস্স চ পহানা দুক্খস্স চ পহানাতি কাযিকসুখস্স চ কাযিকদুক্খস্স চ পহানা. পুব্বেৰাতি তঞ্চ খো পুব্বেৰ, ন চতুত্থজ্ঝানক্খণে. সোমনস্সদোমনস্সানং অত্থঙ্গমাতি চেতসিকসুখস্স চ চেতসিকদুক্খস্স চাতি ইমেসম্পি দ্ৰিন্নং পুব্বেৰ অত্থঙ্গমা, পহানা ইচ্চেৰ ৰুত্তং হোতি.

কদা পন নেসং পহানং হোতি? চতুন্নং ঝানানং উপচারক্খণে. সোমনস্সঞ্হি চতুত্থজ্ঝানস্স উপচারক্খণেযেৰ পহীযতি, দুক্খদোমনস্সসুখানি পঠমদুতিযততিযজ্ঝানানং উপচারক্খণেসু. এৰমেতেসং পহানক্কমেন অৰুত্তানং, ইন্দ্রিযৰিভঙ্গে পন ইন্দ্রিযানং উদ্দেসক্কমেনেৰ ইধাপি ৰুত্তানং সুখদুক্খসোমনস্সদোমনস্সানং পহানং ৰেদিতব্বং.

যদি পনেতানি তস্স তস্স ঝানস্স উপচারক্খণেযেৰ পহীযন্তি, অথ কস্মা ‘‘কত্থ চুপ্পন্নং দুক্খিন্দ্রিযং অপরিসেসং নিরুজ্ঝতি? ইধ, ভিক্খৰে, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি, এত্থ চুপ্পন্নং দুক্খিন্দ্রিযং অপরিসেসং নিরুজ্ঝতি. কত্থ চুপ্পন্নং দোমনস্সিন্দ্রিযং… সুখিন্দ্রিযং… সোমনস্সিন্দ্রিযং অপরিসেসং নিরুজ্ঝতি? ইধ, ভিক্খৰে, ভিক্খু, সুখস্স চ পহানা…পে… চতুত্থং ঝানং উপসম্পজ্জ ৰিহরতি. এত্থ চুপ্পন্নং সোমনস্সিন্দ্রিযং অপরিসেসং নিরুজ্ঝতী’’তি (সং. নি. ৫.৫১০) এৰং ঝানেস্ৰেৰ নিরোধো ৰুত্তোতি. অতিসযনিরোধত্তা. অতিসযনিরোধো হি নেসং পঠমজ্ঝানাদীসু, ন নিরোধোযেৰ. নিরোধোযেৰ পন উপচারক্খণে নাতিসযনিরোধো.

তথা হি নানাৰজ্জনে পঠমজ্ঝানূপচারে নিরুদ্ধস্সাপি দুক্খিন্দ্রিযস্স ডংসমকসাদিসম্ফস্সেন ৰা ৰিসমাসনুপতাপেন ৰা সিযা উপ্পত্তি, ন ত্ৰেৰ অন্তোঅপ্পনাযং. উপচারে ৰা নিরুদ্ধম্পেতং ন সুট্ঠু নিরুদ্ধং হোতি, পটিপক্খেন অৰিহতত্তা. অন্তোঅপ্পনাযং পন পীতিফরণেন সব্বো কাযো সুখোক্কন্তো হোতি, সুখোক্কন্তকাযস্স চ সুট্ঠু নিরুদ্ধং হোতি দুক্খিন্দ্রিযং, পটিপক্খেন ৰিহতত্তা. নানাৰজ্জনেযেৰ চ দুতিযজ্ঝানূপচারে পহীনস্সাপি দোমনস্সিন্দ্রিযস্স যস্মা এতং ৰিতক্কৰিচারপচ্চযেপি কাযকিলমথে চিত্তুপঘাতে চ সতি উপ্পজ্জতি, ৰিতক্কৰিচারাভাৰে নেৰ উপ্পজ্জতি. যত্থ পন উপ্পজ্জতি, তত্থ ৰিতক্কৰিচারভাৰে. অপ্পহীনাযেৰ চ দুতিযজ্ঝানূপচারে ৰিতক্কৰিচারাতি তত্থস্স সিযা উপ্পত্তি, ন ত্ৰেৰ দুতিযজ্ঝানে, পহীনপ্পচ্চযত্তা. তথা ততিযজ্ঝানূপচারে পহীনস্সাপি সুখিন্দ্রিযস্স পীতিসমুট্ঠানপণীতরূপফুটকাযস্স সিযা উপ্পত্তি, ন ত্ৰেৰ ততিযজ্ঝানে. ততিযজ্ঝানে হি সুখস্স পচ্চযভূতা পীতি সব্বসো নিরুদ্ধাতি. তথা চতুত্থজ্ঝানূপচারে পহীনস্সাপি সোমনস্সিন্দ্রিযস্স আসন্নত্তা, অপ্পনাপত্তায উপেক্খায অভাৰেন সম্মা অনতিক্কন্তত্তা চ সিযা উপ্পত্তি, ন ত্ৰেৰ চতুত্থজ্ঝানে. তস্মা এৰ চ ‘‘এত্থুপ্পন্নং দুক্খিন্দ্রিযং অপরিসেসং নিরুজ্ঝতী’’তি তত্থ তত্থ অপরিসেসগ্গহণং কতন্তি.

এত্থাহ – ‘‘অথেৰং তস্স তস্স ঝানস্সুপচারে পহীনাপি এতা ৰেদনা ইধ কস্মা সমাহটা’’তি? সুখগ্গহণত্থং. যা হি অযং অদুক্খমসুখন্তি এত্থ অদুক্খমসুখা ৰেদনা ৰুত্তা, সা সুখুমা দুব্বিঞ্ঞেয্যা, ন সক্কা সুখেন গহেতুং, তস্মা যথা নাম দুট্ঠস্স যথা ৰা তথা ৰা উপসঙ্কমিত্ৰা গহেতুং অসক্কুণেয্যস্স গোণস্স সুখগহণত্থং গোপো একস্মিং ৰজে সব্বা গাৰো সমাহরতি, অথেকেকং নীহরন্তো পটিপাটিযা আগতং ‘‘অযং সো গণ্হথ ন’’ন্তি তম্পি গাহাপেতি, এৰমেৰ ভগৰা সুখগ্গহণত্থং সব্বা এতা সমাহরীতি. এৰঞ্হি সমাহটা এতা দস্সেত্ৰা ‘‘যং নেৰ সুখং, ন দুক্খং, ন সোমনস্সং, ন দোমনস্সং, অযং অদুক্খমসুখা ৰেদনা’’তি সক্কা হোতি এসা গাহযিতুং.

অপি চ অদুক্খমসুখায চেতোৰিমুত্তিযা পচ্চযদস্সনত্থঞ্চাপি এতা ৰুত্তাতি ৰেদিতব্বা. দুক্খপ্পহানাদযো হি তস্সা পচ্চযা. যথাহ – ‘‘চত্তারো খো, আৰুসো, পচ্চযা অদুক্খমসুখায চেতোৰিমুত্তিযা সমাপত্তিযা. ইধাৰুসো, ভিক্খু সুখস্স চ পহানা …পে… চতুত্থং ঝানং উপসম্পজ্জ ৰিহরতি. ইমে খো, আৰুসো, চত্তারো পচ্চযা অদুক্খমসুখায চেতোৰিমুত্তিযা সমাপত্তিযা’’তি (ম. নি. ১.৪৫৮). যথা ৰা অঞ্ঞত্থ পহীনাপি সক্কাযদিট্ঠিআদযো ততিযমগ্গস্স ৰণ্ণভণনত্থং ‘‘তত্থ পহীনা’’তি ৰুত্তা, এৰং ৰণ্ণভণনত্থম্পেতস্স ঝানস্সেতা ইধ ৰুত্তাতিপি ৰেদিতব্বা. পচ্চযঘাতেন ৰা এত্থ রাগদোসানং অতিদূরভাৰং দস্সেতুম্পেতা ৰুত্তাতি ৰেদিতব্বা. এতাসু হি সুখং সোমনস্সস্স পচ্চযো, সোমনস্সং রাগস্স, দুক্খং দোমনস্সস্স, দোমনস্সং দোসস্স. সুখাদিঘাতেন চ তে সপ্পচ্চযা রাগদোসা হতাতি অতিদূরে হোন্তীতি.

অদুক্খমসুখন্তি দুক্খাভাৰেন অদুক্খং, সুখাভাৰেন অসুখং. এতেনেত্থ সুখদুক্খপটিপক্খভূতং ততিযৰেদনং দীপেতি, ন দুক্খসুখাভাৰমত্তং. ততিযৰেদনা নাম অদুক্খমসুখা, উপেক্খাতিপি ৰুচ্চতি. সা ইট্ঠানিট্ঠৰিপরীতানুভৰনলক্খণা, মজ্ঝত্তরসা, অৰিভূতপচ্চুপট্ঠানা, সুখনিরোধপদট্ঠানাতি ৰেদিতব্বা.

উপেক্খাসতিপারিসুদ্ধিন্তি উপেক্খায জনিতসতিপারিসুদ্ধিং. ইমস্মিঞ্হি ঝানে সুপরিসুদ্ধা সতি, যা চ তস্সা সতিযা পারিসুদ্ধি, সা উপেক্খায কতা, ন অঞ্ঞেন. তস্মা এতং ‘‘উপেক্খাসতিপারিসুদ্ধি’’ন্তি ৰুচ্চতি. যায চ উপেক্খায এত্থ সতি পারিসুদ্ধি হোতি, সা অত্থতো তত্রমজ্ঝত্ততাতি ৰেদিতব্বা. ন কেৰলঞ্চেত্থ তায সতিযেৰ পরিসুদ্ধা, অপি চ খো সব্বেপি সম্পযুত্তধম্মা, সতিসীসেন পন দেসনা ৰুত্তা.

তত্থ কিঞ্চাপি অযং উপেক্খা হেট্ঠাপি তীসু ঝানেসু ৰিজ্জতি, যথা পন দিৰা সূরিযপ্পভাভিভৰা সোম্মভাৰেন চ অত্তনো উপকারকত্তেন ৰা সভাগায রত্তিযা অলাভা দিৰা ৰিজ্জমানাপি চন্দলেখা অপরিসুদ্ধা হোতি অপরিযোদাতা, এৰমযম্পি তত্রমজ্ঝত্তুপেক্খাচন্দলেখা ৰিতক্কাদিপচ্চনীকধম্মতেজাভিভৰা সভাগায চ উপেক্খাৰেদনারত্তিযা অপটিলাভা ৰিজ্জমানাপি পঠমজ্ঝানাদিভেদেসু অপরিসুদ্ধা হোতি. তস্সা চ অপরিসুদ্ধায দিৰা অপরিসুদ্ধচন্দলেখায পভা ৰিয সহজাতাপি সতিআদযো অপরিসুদ্ধাৰ হোন্তি. তস্মা তেসু একম্পি ‘‘উপেক্খাসতিপারিসুদ্ধি’’ন্তি ন ৰুত্তং. ইধ পন ৰিতক্কাদিপচ্চনীকধম্মতেজাভিভৰাভাৰা সভাগায চ উপেক্খাৰেদনারত্তিযা পটিলাভা অযং তত্রমজ্ঝত্তুপেক্খাচন্দলেখা অতিৰিয পরিসুদ্ধা, তস্সা পরিসুদ্ধত্তা পরিসুদ্ধচন্দলেখায পভা ৰিয সহজাতাপি সতিআদযো পরিসুদ্ধা হোন্তি পরিযোদাতা. তস্মা ইদমেৰ ‘‘উপেক্খাসতিপারিসুদ্ধি’’ন্তি ৰুত্তন্তি ৰেদিতব্বং. চতুত্থন্তি গণনানুপুব্বতা চতুত্থং. ইদং চতুত্থং উপ্পন্নন্তিপি চতুত্থং.

পঞ্ঞৰা হোতীতি পঞ্ঞা অস্স অত্থীতি পঞ্ঞৰা. উদযত্থগামিনিযাতি উদযগামিনিযা চেৰ অত্থগামিনিযা চ. সমন্নাগতোতি পরিপুণ্ণো. অরিযাযাতি নিদ্দোসায. নিব্বেধিকাযাতি নিব্বেধপক্খিকায. দুক্খক্খযগামিনিযাতি নিব্বানগামিনিযা. সো ইদং দুক্খন্তি এৰমাদীসু ‘‘এত্তকং দুক্খং ন ইতো ভিয্যো’’তি সব্বম্পি দুক্খসচ্চং সরসলক্খণপটিৰেধেন যথাভূতং পজানাতি পটিৰিজ্ঝতি. তস্স চ দুক্খস্স নিব্বত্তিকং তণ্হং ‘‘অযং দুক্খসমুদযো’’তি. তদুভযম্পি যং ঠানং পত্ৰা নিরুজ্ঝতি, তং তেসং অপ্পৰত্তিং নিব্বানং ‘‘অযং দুক্খনিরোধো’’তি. তস্স চ সম্পাপকং অরিযমগ্গং ‘‘অযং দুক্খনিরোধগামিনী পটিপদা’’তি সরসলক্খণপটিৰেধেন যথাভূতং পজানাতি পটিৰিজ্ঝতীতি এৰমত্থো ৰেদিতব্বো.

এৰং সরূপতো সচ্চানি দস্সেত্ৰা ইদানি কিলেসৰসেন পরিযাযতো দস্সেন্তো ‘‘ইমে আসৰা’’তিআদিমাহ. তে ৰুত্তনযেনেৰ ৰেদিতব্বা. এৰং তিস্সো সিক্খাযো দস্সেত্ৰা ইদানি তাসং পারিপূরিক্কমং দস্সেতুং ‘‘ইমা তিস্সো সিক্খাযো আৰজ্জন্তো সিক্খেয্যা’’তিআদিমাহ. তস্সত্থো – পচ্চেকং পরিপূরেতুং আৰজ্জন্তোপি সিক্খেয্য, আৰজ্জিত্ৰাপি ‘‘অযং নাম সিক্খা’’তি জানন্তোপি সিক্খেয্য, জানিত্ৰা পুনপ্পুনং পস্সন্তোপি সিক্খেয্য, পস্সিত্ৰা যথাদিট্ঠং পচ্চৰেক্খন্তোপি সিক্খেয্য, পচ্চৰেক্খিত্ৰা তত্থেৰ চিত্তং অচলং কত্ৰা পতিট্ঠপেন্তোপি সিক্খেয্য, তংতংসিক্খাসম্পযুত্তসদ্ধাৰীরিযসতিসমাধিপঞ্ঞাহি সকসককিচ্চং করোন্তোপি সিক্খেয্য, অভিঞ্ঞেয্যাভিজাননকালেপি তং তং কিচ্চং করোন্তোপি তিস্সো সিক্খাযো সিক্খেয্য, অধিসীলং আচরেয্য, অধিচিত্তং সম্মা চরেয্য, অধিপঞ্ঞং সমাদায ৰত্তেয্য.

ইধাতি মূলপদং. ইমিস্সা দিট্ঠিযাতিআদীহি দসহি পদেহি সিক্খত্তযসঙ্খাতং সব্বঞ্ঞুবুদ্ধসাসনমেৰ কথিতং. তঞ্হি বুদ্ধেন ভগৰতা দিট্ঠত্তা দিট্ঠীতি ৰুচ্চতি. তস্সেৰ খমনৰসেন খন্তি, রুচ্চনৰসেন রুচি, গহণৰসেন আদাযো, সভাৰট্ঠেন ধম্মো, সিক্খিতব্বট্ঠেন ৰিনযো, তদুভযেনপি ধম্মৰিনযো, পৰুত্তৰসেন পাৰচনং, সেট্ঠচরিযট্ঠেন ব্রহ্মচরিযং, অনুসিট্ঠিদানৰসেন সত্থুসাসনন্তি ৰুচ্চতি. তস্মা ‘‘ইমিস্সা দিট্ঠিযা’’তিআদীসু ইমিস্সা বুদ্ধদিট্ঠিযা ইমিস্সা বুদ্ধখন্তিযা ইমিস্সা বুদ্ধরুচিযা ইমস্মিং বুদ্ধআদাযে ইমস্মিং বুদ্ধধম্মে ইমস্মিং বুদ্ধৰিনযে.

‘‘যে খো ত্ৰং, গোতমি, ধম্মে জানেয্যাসি ‘ইমে ধম্মা সরাগায সংৰত্তন্তি, নো ৰিরাগায, সঞ্ঞোগায সংৰত্তন্তি, নো ৰিসঞ্ঞোগায, আচযায সংৰত্তন্তি, নো অপচযায, মহিচ্ছতায সংৰত্তন্তি, নো অপ্পিচ্ছতায, অসন্তুট্ঠিযা সংৰত্তন্তি, নো সন্তুট্ঠিযা, সঙ্গণিকায সংৰত্তন্তি, নো পৰিৰেকায, কোসজ্জায সংৰত্তন্তি, নো ৰীরিযারম্ভায, দুব্ভরতায সংৰত্তন্তি, নো সুভরতাযা’তি. একংসেন, গোতমি, ধারেয্যাসি ‘নেসো ধম্মো, নেসো ৰিনযো, নেতং সত্থুসাসন’ন্তি.

‘‘যে চ খো ত্ৰং, গোতমি, ধম্মে জানেয্যাসি ‘ইমে ধম্মা ৰিরাগায সংৰত্তন্তি, নো সরাগায…পে… সুভরতায সংৰত্তন্তি, নো দুব্ভরতাযা’তি. একংসেন, গোতমি, ধারেয্যাসি ‘এসো ধম্মো, এসো ৰিনযো, এতং সত্থুসাসন’’’ন্তি (অ. নি. ৮.৫৩; চূল়ৰ. ৪০৬) –

এৰং ৰুত্তে ইমস্মিং বুদ্ধধম্মৰিনযে ইমস্মিং বুদ্ধপাৰচনে ইমস্মিং বুদ্ধব্রহ্মচরিযে ইমস্মিং বুদ্ধসাসনেতি এৰমত্থো ৰেদিতব্বো.

অপি চেতং সিক্খত্তযসঙ্খাতং সকলং সাসনং ভগৰতা দিট্ঠত্তা সম্মাদিট্ঠিপচ্চযত্তা সম্মাদিট্ঠিপুব্বঙ্গমত্তা চ দিট্ঠি. ভগৰতো খমনৰসেন খন্তি. রুচ্চনৰসেন রুচি. গহণৰসেন আদাযো. অত্তনো কারকং অপাযেসু অপতমানং কত্ৰা ধারেতীতি ধম্মো. সোৰ সংকিলেসপক্খং ৰিনেতীতি ৰিনযো. ধম্মো চ সো ৰিনযো চাতি ধম্মৰিনযো. কুসলধম্মেহি ৰা অকুসলধম্মানং এস ৰিনযোতি ধম্মৰিনযো. তেনেৰ ৰুত্তং –

‘‘যে চ খো ত্ৰং, গোতমি, ধম্মে জানেয্যাসি ‘ইমে ধম্মা ৰিরাগায সংৰত্তন্তি, নো সরাগায…পে… একংসেন গোতমি ধারেয্যাসি ‘এসো ধম্মো, এসো ৰিনযো, এতং সত্থুসাসন’’’ন্তি (অ. নি. ৮.৫৩; চূল়ৰ. ৪০৬).

ধম্মেন ৰা ৰিনযো, ন দণ্ডাদীহীতি ধম্মৰিনযো. ৰুত্তম্পি চেতং –

‘‘দণ্ডেনেকে দমযন্তি, অঙ্কুসেহি কসাহি চ;

অদণ্ডেন অসত্থেন, নাগো দন্তো মহেসিনা’’তি. (চূল়ৰ. ৩৪২; ম. নি. ২.৩৫২);

তথা –

‘‘ধম্মেন নীযমানানং, কা উসূযা ৰিজানত’’ন্তি. (মহাৰ. ৬৩);

ধম্মায ৰা ৰিনযো ধম্মৰিনযো. অনৰজ্জধম্মত্থঞ্হেস ৰিনযো, ন ভৰভোগামিসত্থং. তেনাহ ভগৰা ‘‘নযিদং, ভিক্খৰে, ব্রহ্মচরিযং ৰুস্সতি জনকুহনত্থ’’ন্তি (অ. নি. ৪.২৫) ৰিত্থারো. পুণ্ণত্থেরোপি আহ ‘‘অনুপাদাপরিনিব্বানত্থং খো, আৰুসো, ভগৰতি ব্রহ্মচরিযং ৰুস্সতী’’তি (ম. নি. ১.২৫৯). ৰিসিট্ঠং ৰা নযতীতি ৰিনযো. ধম্মতো ৰিনযো ধম্মৰিনযো. সংসারধম্মতো হি সোকাদিধম্মতো ৰা এস ৰিসিট্ঠং নিব্বানং নযতি. ধম্মস্স ৰা ৰিনযো, ন তিত্থকরানন্তি ধম্মৰিনযো. ধম্মভূতো হি ভগৰা, তস্সেৰ ৰিনযো.

যস্মা ৰা ধম্মা এৰ অভিঞ্ঞেয্যা পরিঞ্ঞেয্যা পহাতব্বা ভাৰেতব্বা সচ্ছিকাতব্বা চ, তস্মা এস ধম্মেসু ৰিনযো, ন সত্তেসু ন জীৰেসু চাতি ধম্মৰিনযো. সাত্থসব্যঞ্জনতাদীহি অঞ্ঞেসং ৰচনতো পধানং ৰচনন্তি পৰচনং, পৰচনমেৰ পাৰচনং. সব্বচরিযাহি ৰিসিট্ঠচরিযভাৰেন ব্রহ্মচরিযং. দেৰমনুস্সানং সত্থুভূতস্স ভগৰতো সাসনন্তি সত্থুসাসনং. সত্থুভূতং ৰা সাসনন্তিপি সত্থুসাসনং. ‘‘সো ৰো মমচ্চযেন সত্থাতি (দী. নি. ২.২১৬) হি ধম্মৰিনযোৰ সত্থা’’তি ৰুত্তোতি এৰমেতেসং পদানং অত্থো ৰেদিতব্বো.

যস্মা পন ইমস্মিংযেৰ সাসনে সব্বপ্পকারজ্ঝাননিব্বত্তকো ভিক্খু দিস্সতি, ন অঞ্ঞত্র, তস্মা তত্থ তত্থ ‘‘ইমিস্সা’’তি চ ‘‘ইমস্মি’’ন্তি চ অযং নিযমো কতোতি ৰেদিতব্বো.

জীৰন্তি তেন তংসম্পযুত্তকা ধম্মাতি জীৰিতং. অনুপালনলক্খণে ইন্দট্ঠং কারেতীতি ইন্দ্রিযং. জীৰিতমেৰ ইন্দ্রিযং জীৰিতিন্দ্রিযং. তং পৰত্তসন্ততাধিপতেয্যং হোতি. লক্খণাদীহি পন অত্তনা অৰিনিভুত্তানং ধম্মানং অনুপালনলক্খণং জীৰিতিন্দ্রিযং, তেসং পৰত্তনরসং, তেসংযেৰ ঠপনপচ্চুপট্ঠানং, যাপযিতব্বধম্মপদট্ঠানং. সন্তেপি চ অনুপালনলক্খণাদিম্হি ৰিধানে অত্থিক্খণেযেৰ তং তে ধম্মে অনুপালেতি, উদকং ৰিয উপ্পলাদীনি. যথাসকং পচ্চযেহি উপ্পন্নেপি চ ধম্মে পালেতি, ধাতি ৰিয কুমারং, সযংপৰত্তিতধম্মসম্বন্ধেনেৰ চ পৰত্ততি, নিযামকো ৰিয নাৰং. ন ভঙ্গতো উদ্ধং পৰত্তযতি, অত্তনো চ পৰত্তযিতব্বানঞ্চ অভাৰা. ন ভঙ্গক্খণে ঠপেতি, সযং ভিজ্জমানত্তা, খীযমানো ৰিয ৰট্টিসিনেহো পদীপসিখং, ন চ অনুপালনপৰত্তনট্ঠপনানুভাৰৰিরহিতং, যথাৰুত্তক্খণে তস্স তস্স সাধনতোতি দট্ঠব্বং. ঠিতিপরিত্ততায ৰাতি ঠিতিক্খণস্স মন্দতায থোকতায. অপ্পকন্তি মন্দং লামকং. সরসপরিত্ততায ৰাতি অত্তনো পচ্চযভূতানং কিচ্চানং সম্পত্তীনং ৰা অপ্পতায দুব্বলতায.

তেসং দ্ৰিন্নং কারণং ৰিভাগতো দস্সেতুং ‘‘কথং ঠিতিপরিত্ততাযা’’তিআদিমাহ. তত্থ ‘‘অতীতে চিত্তক্খণে জীৰিত্থাতি এৰমাদি পঞ্চৰোকারভৰে পৰত্তিযং চিত্তস্স নিরুজ্ঝনকালে সব্বস্মিং রূপারূপধম্মে অনিরুজ্ঝন্তেপি রূপতো অরূপস্স পট্ঠানভাৰেন অরূপজীৰিতং সন্ধায, চুতিচিত্তেন ৰা সদ্ধিং সব্বেসং রূপারূপানং নিরুজ্ঝনভাৰেন পঞ্চৰোকারভৰে চুতিচিত্তং সন্ধায, চতুৰোকারভৰে রূপস্স অভাৰেন চতুৰোকারভৰং সন্ধায কথিত’’ন্তি ৰেদিতব্বং. অতীতে চিত্তক্খণেতি অতীতচিত্তস্স ভঙ্গক্খণসমঙ্গীকালে তংসমঙ্গীপুগ্গলো ‘‘জীৰিত্থ’’ ইতি ৰত্তুং লব্ভতি. ন জীৰতীতি ‘‘জীৰতী’’তিপি ৰত্তুং ন লব্ভতি. ন জীৰিস্সতীতি ‘‘জীৰিস্সতী’’তিপি ৰত্তুং ন লব্ভতি. অনাগতে চিত্তক্খণে জীৰিস্সতীতি অনাগতচিত্তস্স অনুপ্পজ্জনক্খণসমঙ্গীকালে ‘‘জীৰিস্সতী’’তি ৰত্তুং লব্ভতি. ন জীৰতীতি ‘‘জীৰতী’’তি ৰত্তুং ন লব্ভতি. ন জীৰিত্থাতি ‘‘জীৰিত্থ’’ইতিপি ৰত্তুং ন লব্ভতি. পচ্চুপ্পন্নে চিত্তক্খণেতি পচ্চুপ্পন্নচিত্তক্খণসমঙ্গীকালে. জীৰতীতি ‘‘ইদানি জীৰতী’’তি ৰত্তুং লব্ভতি. ন জীৰিত্থাতি ‘‘জীৰিত্থ’’ইতি ৰত্তুং ন লব্ভতি. ন জীৰিস্সতীতি ‘‘জীৰিস্সতী’’তিপি ৰত্তুং ন লব্ভতি.

জীৰিতং অত্তভাৰো চ সুখদুক্খা চাতি অযং গাথা পঞ্চৰোকারভৰং অমুঞ্চিত্ৰা লব্ভমানায দুক্খায ৰেদনায গহিতত্তা পঞ্চৰোকারভৰমেৰ সন্ধায ৰুত্তাতি ৰেদিতব্বা. কথং? জীৰিতন্তি জীৰিতসীসেন সঙ্খারক্খন্ধো. অত্তভাৰোতি রূপক্খন্ধো. ‘‘উপেক্খা পন সন্তত্তা, সুখমিচ্চেৰ ভাসিতা’’তি (ৰিভ. অট্ঠ. ২৩২) ৰুত্তত্তা উপেক্খাৰেদনা অন্তোকরিত্ৰা সুখদুক্খা চাতি ৰেদনাক্খন্ধো, চিত্তং ইতি ৰিঞ্ঞাণক্খন্ধো ৰুত্তো. ইমেসং চতুন্নং খন্ধানং কথিতত্তাযেৰ খন্ধলক্খণেন একলক্খণভাৰেন লক্খণাকারৰসেন সঞ্ঞাক্খন্ধোপি কথিতোতি ৰেদিতব্বো. এৰং ৰুত্তেসু পঞ্চসু খন্ধেসু অরূপধম্মং মুঞ্চিত্ৰা কম্মসমুট্ঠানাদিরূপস্স অপ্পৰত্তনভাৰেন একচিত্তসমাযুত্তাতি অরূপপধানভাৰো কথিতো হোতি. কথং? অসঞ্ঞসত্তে রূপম্পি ইধুপচিতকম্মবলং অমুঞ্চিত্ৰাৰ পৰত্ততি, নিরোধসমাপন্নানং রূপম্পি পঠমসমাপন্নসমাপত্তিবলং অমুঞ্চিত্ৰাৰ পৰত্ততি. এৰং অত্তনো অপ্পৰত্তিট্ঠানেপি রূপপৰত্তিং অত্তনো সন্তকমেৰ কত্ৰা পৰত্তনসভাৰস্স অরূপধম্মস্স অত্তনো পৰত্তিট্ঠানে রূপপৰত্তিযা পধানকারণভাৰেন একচিত্তসমাযুত্তাতি চিত্তপধানভাৰো কথিতোতি ৰেদিতব্বো.

এৰং পঞ্চৰোকারভৰে পৰত্তিযং রূপপৰত্তিযা পধানভূতচিত্তনিরোধেন রূপে ধরমানেযেৰ পৰত্তানং নিরোধো নাম হোতীতি অরূপধম্মৰসেন এৰ ‘‘লহুসো ৰত্ততে খণো’’তি ৰুত্তং. অথ ৰা পঞ্চৰোকারভৰে চুতিচিত্তং সন্ধায কথিতাতি ৰেদিতব্বা. এৰং কথিযমানে সুখদুক্খা চাতি কাযিকচেতসিকসুখৰেদনা চ কাযিকচেতসিকদুক্খৰেদনা চ চুতিচিত্তক্খণে অহোন্তীপি একসন্ততিৰসেন চুতিচিত্তেন সদ্ধিং নিরুজ্ঝতীতি কথিতা. চতুৰোকারভৰং ৰা সন্ধায কথিতাতিপি ৰেদিতব্বা. কথং? অঞ্ঞস্মিং ঠানে অত্তভাৰোতি সঞ্ঞাক্খন্ধস্স ৰুত্তভাৰেন অত্তভাৰোতি সঞ্ঞাক্খন্ধোৰ গহিতো. ব্রহ্মলোকে কাযিকসুখদুক্খদোমনস্সং অহোন্তম্পি সুখদুক্খা চাতি ৰেদনাসামঞ্ঞতো লব্ভমানো ৰেদনাক্খন্ধো গহিতোতি ৰেদিতব্বং. সেসং ৰুত্তসদিসমেৰ. ইমেসু চ তীসু ৰিকপ্পেসু কেৰলাতি ধুৰসুখসুভঅত্তা নত্থি, কেৰলং তেহি অৰোমিস্সা. লহুসো ৰত্ততি খণোতি ৰুত্তনযেন একচিত্তক্খণিকতায লহুকো অতিপরিত্তো জীৰিতাদীনং খণো ৰত্ততি.

একতো দ্ৰিন্নং চিত্তানং অপ্পৰত্তিং দস্সেন্তো ‘‘চুল্লাসীতিসহস্সানী’’তি গাথমাহ. চুল্লাসীতিসহস্সানি, কপ্পা তিট্ঠন্তি যে মরূতি যে দেৰগণা চতুরাসীতি কপ্পসহস্সানি আযুং গহেত্ৰা নেৰসঞ্ঞানাসঞ্ঞাযতনে তিট্ঠন্তি. ‘‘যে নরা’’তিপি পাল়ি. ন ত্ৰেৰ তেপি জীৰন্তি, দ্ৰীহি চিত্তসমোহিতাতি তেপি দেৰা দ্ৰীহি চিত্তেহি সমোহিতা একতো হুত্ৰা যুগনদ্ধেন চিত্তেন ন তু এৰ জীৰন্তি, একেনেকেন চিত্তেন জীৰন্তীতি অত্থো.

ইদানি মরণকালং দস্সেন্তো ‘‘যে নিরুদ্ধা’’তি গাথমাহ. তত্থ যে নিরুদ্ধাতি যে খন্ধা নিরুদ্ধা অত্থঙ্গতা. মরন্তস্সাতি মতস্স. তিট্ঠমানস্স ৰাতি ধরমানস্স ৰা. সব্বেপি সদিসা খন্ধাতি চুতিতো উদ্ধং নিরুদ্ধক্খন্ধা ৰা পৰত্তে নিরুদ্ধক্খন্ধা ৰা পুন ঘটেতুং অসক্কুণেয্যট্ঠেন সব্বেপি খন্ধা সদিসা. গতা অপ্পটিসন্ধিকাতি নিরুদ্ধক্খন্ধানং পুন আগন্ত্ৰা পটিসন্ধানাভাৰেন গতা অপ্পটিসন্ধিকাতি ৰুচ্চন্তি.

ইদানি তীসু কালেসু নিরুদ্ধক্খন্ধানং নানত্তং নত্থীতি দস্সেতুং ‘‘অনন্তরা’’তি গাথমাহ. তত্থ অনন্তরা চ যে ভগ্গা, যে চ ভগ্গা অনাগতাতি যে খন্ধা অনন্তরাতীতা হুত্ৰা ভিন্না নিরুদ্ধা, যে চ অনাগতা খন্ধা ভিজ্জিস্সন্তি. তদন্তরেতি তেসং অন্তরে নিরুদ্ধানং পচ্চুপ্পন্নখন্ধানং. ৰেসমং নত্থি লক্খণেতি ৰিসমস্স ভাৰো ৰেসমং, তং ৰেসমং নত্থি, তেহি নানত্তং নত্থীতি অত্থো. লক্খীযতীতি লক্খণং, তস্মিং লক্খণে.

ইদানি অনাগতক্খন্ধানং ৰত্তমানক্খন্ধেহি অসম্মিস্সভাৰং কথেন্তো ‘‘অনিব্বত্তেন ন জাতো’’তি গাথমাহ. অনিব্বত্তেন ন জাতোতি অজাতেন অপাতুভূতেন অনাগতক্খন্ধেন ন জাতো ন নিব্বত্তো. এতেন অনাগতক্খন্ধস্স ৰত্তমানক্খন্ধেন অসম্মিস্সভাৰং কথেসি. পচ্চুপ্পন্নেন জীৰতীতি খণপচ্চুপ্পন্নেন ৰত্তমানক্খন্ধেন জীৰতি. এতেন একক্খণে দ্ৰীহি চিত্তেহি ন জীৰতীতি কথিতং. চিত্তভগ্গা মতোতি দ্ৰীহি চিত্তেহি একক্খণে অজীৰনভাৰেন চিত্তভঙ্গেন মতো. ‘‘উপরিতো চিত্তভঙ্গা’’তিপি পাল়ি, তং উজুকমেৰ. পঞ্ঞত্তি পরমত্থিযাতি ‘‘রূপং জীরতি মচ্চানং, নামগোত্তং ন জীরতী’’তি (সং. নি. ১.৭৬) ৰচনক্কমেন পণ্ণত্তিমত্তং ন জীরণসভাৰেন পরমা ঠিতি এতিস্সাতি পরমত্থিযা, সভাৰট্ঠিতিকাতি অত্থো. ‘‘দত্তো মতো, মিত্তো মতো’’তি পণ্ণত্তিমত্তমেৰ হি তিট্ঠতি. অথ ৰা পরমত্থিযাতি পরমত্থিকা. পরমো অত্থো এতিস্সাতি পরমত্থিকা. অজটাকাসোতি পঞ্ঞত্তিযা নত্থিধম্মং পটিচ্চ কথনং ৰিয মতোতি পঞ্ঞত্তি নত্থিধম্মং পটিচ্চ ন কথিযতি, জীৰিতিন্দ্রিযভঙ্গসঙ্খাতং ধম্মং পটিচ্চ কথিযতি.

অনিধানগতা ভগ্গাতি যে খন্ধা ভিন্না, তে নিধানং নিহিতং নিচযং ন গচ্ছন্তীতি অনিধানগতা. পুঞ্জো নত্থি অনাগতেতি অনাগতেপি নেসং পুঞ্জভাৰো রাসিভাৰো নত্থি. নিব্বত্তাযেৰ তিট্ঠন্তীতি পচ্চুপ্পন্নৰসেন উপ্পন্না ঠিতিক্খণে ৰযধম্মাৰ হুত্ৰা তিট্ঠন্তি. কিমিৰ? আরগ্গে সাসপূপমাতি সূচিমুখে সাসপো ৰিয.

ইদানি খন্ধানং দস্সনভাৰং দস্সেন্তো ‘‘নিব্বত্তান’’ন্তি গাথমাহ. তত্থ নিব্বত্তানং ধম্মানন্তি পচ্চুপ্পন্নানং খন্ধানং. ভঙ্গো নেসং পুরক্খতোতি এতেসং ভেদো পুরতো কত্ৰা ঠপিতো. পলোকধম্মাতি নস্সনসভাৰা. পুরাণেহি অধিস্সিতাতি পুরে উপ্পন্নেহি খন্ধেহি ন মিস্সিতা ন সংসগ্গা.

ইদানি খন্ধানং অদস্সনভাৰং দস্সেন্তো ‘‘অদস্সনতো আযন্তী’’তি গাথমাহ. তত্থ অদস্সনতো আযন্তীতি অদিস্সমানাযেৰ আগচ্ছন্তি উপ্পজ্জন্তি. ভঙ্গা গচ্ছন্তিদস্সনন্তি ভেদা ভঙ্গতো উদ্ধং অদস্সনভাৰং গচ্ছন্তি. ৰিজ্জুপ্পাদোৰ আকাসেতি ৰিৰটাকাসে ৰিজ্জুলতানিচ্ছরণং ৰিয. উপ্পজ্জন্তি ৰযন্তি চাতি পুব্বন্ততো উদ্ধং উপ্পজ্জন্তি চ ভিজ্জন্তি চ, নস্সন্তীতি অত্থো. ‘‘উদেতি আপূরতি ৰেতি চন্দো’’তি (জা. ১.৫.৩) এৰমাদীসু ৰিয.

এৰং ঠিতিপরিত্ততং দস্সেত্ৰা ইদানি সরসপরিত্ততং দস্সেন্তো ‘‘কথং সরসপরিত্ততাযা’’তিআদিমাহ. তত্থ অস্সাসূপনিবন্ধং জীৰিতন্তি অব্ভন্তরপৰিসননাসিকৰাতপটিবদ্ধং জীৰিতিন্দ্রিযং. পস্সাসোতি বহিনিক্খমননাসিকৰাতো. অস্সাসপস্সাসোতি তদুভযং. মহাভূতূপনিবন্ধন্তি চতুসমুট্ঠানিকানং পথৰীআপতেজৰাযানং মহাভূতানং পটিবদ্ধং জীৰিতং. কবল়ীকারাহারূপনিবন্ধন্তি অসিতপীতাদিকবল়ীকারআহারেন উপনিবন্ধং. উস্মূপনিবন্ধন্তি কম্মজতেজোধাতূপনিবন্ধং. ৰিঞ্ঞাণূপনিবন্ধন্তি ভৰঙ্গৰিঞ্ঞাণূপনিবন্ধং. যং সন্ধায ৰুত্তং ‘‘আযু উস্মা চ ৰিঞ্ঞাণং, যদা কাযং জহন্তিম’’ন্তি (সং. নি. ৩.৯৫).

ইদানি নেসং দুব্বলকারণং দস্সেন্তো ‘‘মূলম্পি ইমেসং দুব্বল’’ন্তিআদিমাহ. তত্থ মূলম্পীতি পতিট্ঠট্ঠেন মূলভূতম্পি. অস্সাসপস্সাসানঞ্হি করজকাযো মূলং. মহাভূতাদীনং অৰিজ্জাকম্মতণ্হাহারা. ইমেসন্তি ৰুত্তপ্পকারানং অস্সাসাদীনং জীৰিতিন্দ্রিযপৰত্তিকারণৰসেন ৰুত্তানং. এতেসু হি একেকস্মিং অসতি জীৰিতিন্দ্রিযং ন তিট্ঠতি. দুব্বলন্তি অপ্পথামং. পুব্বহেতূপীতি অতীতজাতিযং ইমস্স ৰিপাকৰট্টস্স হেতুভূতা কারণসঙ্খাতা অৰিজ্জাসঙ্খারতণ্হুপাদানভৰাপি. ইমেসং দুব্বলা যে পচ্চযা তেপি দুব্বলাতি যে আরম্মণাদিসাধারণপচ্চযা. পভাৰিকাতি পধানং হুত্ৰা উপ্পাদিকা ভৰতণ্হা. সহভূমীতি সহভৰিকাপি রূপারূপধম্মা. সম্পযোগাপীতি একতো যুত্তাপি অরূপধম্মা. সহজাপীতি সদ্ধিং একচিত্তে উপ্পন্নাপি. যাপি পযোজিকাতি চুতিপটিসন্ধিৰসেন যোজেতুং নিযুত্তাতি পযোজিকা, ৰট্টমূলকা তণ্হা. ৰুত্তঞ্হেতং ‘‘তণ্হাদুতিযো পুরিসো’’তি (ইতিৰু. ১৫, ১০৫). নিচ্চদুব্বলাতি নিরন্তরেন দুব্বলা. অনৰট্ঠিতাতি ন অৰট্ঠিতা, ওতরিত্ৰা ন ঠিতা. পরিপাতযন্তি ইমেতি ইমে অঞ্ঞমঞ্ঞং পাতযন্তি খেপযন্তি. অঞ্ঞমঞ্ঞস্সাতি অঞ্ঞো অঞ্ঞস্স, একো একস্সাতি অত্থো. হি-ইতি কারণত্থে নিপাতো. নত্থি তাযিতাতি তাযনো রক্খকো নত্থি. ন চাপি ঠপেন্তি অঞ্ঞমঞ্ঞন্তি অঞ্ঞে অঞ্ঞং ঠপেতুং ন সক্কোন্তি. যোপি নিব্বত্তকো সো ন ৰিজ্জতীতি যোপি ইমেসং উপ্পাদকো ধম্মো, সো ইদানি নত্থি.

ন চ কেনচি কোচি হাযতীতি কোচি একোপি কস্সচি ৰসেন ন পরিহাযতি. গন্ধব্বা চ ইমে হি সব্বসোতি সব্বে হি ইমে খন্ধা সব্বাকারেন ভঙ্গং পাপুণিতুং যুত্তা. পুরিমেহি পভাৰিতা ইমেতি পুব্বহেতুপচ্চযেহি ইমে ৰত্তমানকা উপ্পাদিকা. যেপি পভাৰিকাতি যেপি ইমে ৰত্তমানকা উপ্পাদকা পুব্বহেতুপচ্চযা. তে পুরে মতাতি তে ৰুত্তপ্পকারপচ্চযা ৰত্তমানং অপাপুণিত্ৰা পঠমমেৰ মরণং পত্তা. পুরিমাপি চ পচ্ছিমাপি চাতি পুরিমা পুব্বহেতুপচ্চযাপি চ পচ্ছিমা ৰত্তমানে পচ্চযসমুপ্পন্না চ. অঞ্ঞমঞ্ঞং ন কদাচি মদ্দসংসূতি অঞ্ঞমঞ্ঞং কিস্মিঞ্চি কালে ন দিট্ঠপুব্বা. ম-কারো পদসন্ধিৰসেন ৰুত্তো.

চাতুমহারাজিকানং দেৰানন্তি ধতরট্ঠৰিরূল়্হকৰিরূপক্খকুৰেরসঙ্খাতা চতুমহারাজা ইস্সরা এতেসন্তি চাতুমহারাজিকা. রূপাদীহি দিব্বন্তি কীল়ন্তীতি দেৰা. তে সিনেরুপব্বতস্স ৰেমজ্ঝে হোন্তি. তেসু অত্থি পব্বতট্ঠকাপি, অত্থি আকাসট্ঠকাপি. তেসং পরম্পরা চক্কৰাল়পব্বতং পত্তা. খিড্ডাপদোসিকা মনোপদোসিকা সীতৰলাহকা উণ্হৰলাহকা চন্দিমা দেৰপুত্তো সূরিযো দেৰপুত্তোতি এতে সব্বেপি চাতুমহারাজিকদেৰলোকট্ঠা এৰ তেসং চাতুমহারাজিকানং জীৰিতং. উপাদাযাতি পটিচ্চ. পরিত্তকন্তি ৰুদ্ধিপটিসেধো. থোকন্তি মন্দকালং, দীঘদিৰসপটিসেধো. খণিকন্তি মন্দকালং, কালন্তরপটিসেধো. লহুকন্তি সল্লহুকং, অলসপটিসেধো. ইতরন্তি সীঘবলৰপটিসেধো. অনদ্ধনীযন্তি কালৰসেন ন অদ্ধানক্খমং. নচিরট্ঠিতিকন্তি দিৰসেন চিরং ন তিট্ঠতীতি নচিরট্ঠিতিকং, দিৰসপটিসেধো.

তাৰতিংসানন্তি তেত্তিংসজনা তত্থ উপপন্নাতি তাৰতিংসা. অপি চ তাৰতিংসাতি তেসং দেৰানং নামমেৰাতিপি ৰুত্তং. তেপি অত্থি পব্বতট্ঠকা, অত্থি আকাসট্ঠকা, তেসং পরম্পরা চক্কৰাল়পব্বতং পত্তা. তথা যামাদীনং. একদেৰলোকেপি হি দেৰানং পরম্পরা চক্কৰাল়পব্বতং অপ্পত্তা নাম নত্থি. দিব্বসুখং যাতা পযাতা সম্পত্তাতি যামা. তুট্ঠা পহট্ঠাতি তুসিতা. পকতিপটিযত্তারম্মণতো অতিরেকেন নিম্মিতুকামকালে যথারুচিতে ভোগে নিম্মিনিত্ৰা রমন্তীতি নিম্মানরতী. চিত্তাচারং ঞত্ৰা পরেহি নিম্মিতেসু ভোগেসু ৰসং ৰত্তেন্তীতি পরনিম্মিতৰসৰত্তী. ব্রহ্মকাযে ব্রহ্মঘটায নিযুত্তাতি ব্রহ্মকাযিকা. সব্বেপি পঞ্চৰোকারব্রহ্মানো গহিতা.

গমনিযোতি গন্ধব্বো. সম্পরাযোতি পরলোকো. যো ভিক্খৰে চিরং জীৰতি, সো ৰস্সসতন্তি যো চিরং তিট্ঠমানো, সো ৰস্সসতমত্তং তিট্ঠতি. অপ্পং ৰা ভিয্যোতি ৰস্সসততো উপরি তিট্ঠমানো দ্ৰে ৰস্সসতানি তিট্ঠমানো নাম নত্থি. হীল়েয্য নন্তি নং জীৰিতং অৰঞ্ঞাতং করেয্য, লামকতো চিন্তেয্য. ‘‘হীল়েয্যান’’ন্তি চ পঠন্তি. অচ্চযন্তীতি অতিক্কমন্তি. অহোরত্তাতি রত্তিন্দিৰপরিচ্ছেদা. উপরুজ্ঝতীতি জীৰিতিন্দ্রিযং নিরুজ্ঝতি, অভাৰং উপগচ্ছতি. আযু খিয্যতি মচ্চানন্তি সত্তানং আযুসঙ্খারো খযং যাতি. কুন্নদীনংৰ ওদকন্তি যথা উদকচ্ছিন্নায কুন্নদিযা উদকং, এৰং মচ্চানং আযু খিয্যতি. পরমত্থতো হি অতিপরিত্তো সত্তানং জীৰিতক্খণো একচিত্তক্খণিকমত্তোযেৰ. যথা নাম রথচক্কং পৰত্তমানম্পি একেনেৰ নেমিপদেসেন পৰত্ততি, তিট্ঠমানম্পি একেনেৰ তিট্ঠতি, এৰমেৰ একচিত্তক্খণিকং সত্তানং জীৰিতং তস্মিং চিত্তে নিরুদ্ধমত্তে সত্তো নিরুদ্ধোতি ৰুচ্চতি.

ধীরাতি ধীরা ইতি. পুন ধীরাতি পণ্ডিতা. ধিতিমাতি ধিতি অস্স অত্থীতি ধিতিমা. ধিতিসম্পন্নাতি পণ্ডিচ্চেন সমন্নাগতা. ধীকতপাপাতি গরহিতপাপা. তংযেৰ পরিযাযং দস্সেতুং ‘‘ধী ৰুচ্চতি পঞ্ঞা’’তিআদিমাহ. তত্থ পজানাতীতি পঞ্ঞা. কিং পজানাতি? ‘‘ইদং দুক্খ’’ন্তিআদিনা নযেন অরিযসচ্চানি. অট্ঠকথাযং পন ‘‘পঞ্ঞাপনৰসেন পঞ্ঞা’’তি ৰুত্তা. কিন্তি পঞ্ঞাপেতি? ‘‘অনিচ্চং দুক্খং অনত্তা’’তি পঞ্ঞাপেতি. সাৰ অৰিজ্জায অভিভৰনতো অধিপতিযট্ঠেন ইন্দ্রিযং, দস্সনলক্খণে ৰা ইন্দট্ঠং কারেতীতিপি ইন্দ্রিযং, পঞ্ঞাৰ ইন্দ্রিযং পঞ্ঞিন্দ্রিযং. সা পনেসা ওভাসনলক্খণা, পজাননলক্খণা চ; যথা হি চতুভিত্তিকে গেহে রত্তিভাগে দীপে জলিতে অন্ধকারং নিরুজ্ঝতি, আলোকো পাতুভৰতি, এৰমেৰ ওভাসনলক্খণা পঞ্ঞা. পঞ্ঞোভাসসমো ওভাসো নাম নত্থি. পঞ্ঞৰতো হি একপল্লঙ্কেন নিসিন্নস্স দসসহস্সিলোকধাতু একালোকা হোতি. তেনাহ থেরো –

‘‘যথা, মহারাজ, পুরিসো অন্ধকারে গেহে তেলপ্পদীপং পৰেসেয্য, পৰিট্ঠো পদীপো অন্ধকারং ৰিদ্ধংসেতি, ওভাসং জনেতি, আলোকং ৰিদংসেতি, পাকটানি চ রূপানি করোতি; এৰমেৰ খো, মহারাজ, পঞ্ঞা উপ্পজ্জমানা অৰিজ্জন্ধকারং ৰিদ্ধংসেতি, ৰিজ্জোভাসং জনেতি, ঞাণালোকং ৰিদংসেতি, পাকটানি অরিযসচ্চানি করোতি. এৰং খো, মহারাজ, ওভাসনলক্খণা পঞ্ঞা’’তি (মি. প. ২.১.১৫).

যথা পন ছেকো ভিসক্কো আতুরানং সপ্পাযাসপ্পাযানি ভোজনাদীনি জানাতি, এৰং পঞ্ঞা উপ্পজ্জমানা কুসলাকুসলে সেৰিতব্বাসেৰিতব্বে হীনপ্পণীতকণ্হসুক্কসপ্পটিভাগঅপ্পটিভাগে ধম্মে পজানাতি. ৰুত্তম্পি চেতং ধম্মসেনাপতিনা ‘‘পজানাতি পজানাতীতি খো, আৰুসো, তস্মা পঞ্ঞৰাতি ৰুচ্চতি. কিঞ্চ পজানাতি? ইদং দুক্খন্তি পজানাতী’’তি (ম. নি. ১.৪৪৯) ৰিত্থারেতব্বং. এৰমস্সা পজাননলক্খণতা ৰেদিতব্বা.

অপরো নযো – যথাসভাৰপটিৰেধলক্খণা পঞ্ঞা, অক্খলিতপটিৰেধলক্খণা ৰা, কুসলিস্সাসখিত্তউসুপটিৰেধো ৰিয. ৰিসযোভাসরসা, পদীপো ৰিয. অসম্মোহপচ্চুপট্ঠানা, অরঞ্ঞগতসুদেসকো ৰিয.

খন্ধধীরাতি পঞ্চসু খন্ধেসুঞাণং পৰত্তেন্তীতি খন্ধধীরা. অট্ঠারসসু ধাতূসু ঞাণং পৰত্তেন্তীতি ধাতুধীরা. সেসেসুপি ইমিনা নযেন অত্থো নেতব্বো. তে ধীরা এৰমাহংসূতি এতে পণ্ডিতা এৰং কথযিংসু. কথেন্তীতি ‘‘অপ্পকং পরিত্তক’’ন্তি কথযন্তি. ভণন্তীতি ‘‘থোকং খণিক’’ন্তি ভাসন্তি. দীপযন্তীতি ‘‘লহুকং ইত্তর’’ন্তি পতিট্ঠপেন্তি. ৰোহরন্তীতি ‘‘অনদ্ধনিকং নচিরট্ঠিতিক’’ন্তি নানাৰিধেন ব্যৰহরন্তি.

১১. ইদানি যে তথা ন করোন্তি, তেসং ব্যসনুপ্পত্তিং দস্সেন্তো ‘‘পস্সামী’’তি গাথমাহ. তত্থ পস্সামীতি মংসচক্খুআদীহি পেক্খামি. লোকেতি অপাযাদিম্হি. পরিফন্দমানন্তি ইতো চিতো চ ফন্দমানং. পজং ইমন্তি ইমং সত্তকাযং. তণ্হাগতন্তি তণ্হায গতং অভিভূতং নিপাতিতন্তি অধিপ্পাযো. ভৰেসূতি কামভৰাদীসু. হীনা নরাতি হীনকম্মন্তা নরা. মচ্চুমুখে লপন্তীতি অন্তকালে সম্পত্তে মরণমুখে পরিদেৰন্তি. অৰীততণ্হাসেতি অৰিগততণ্হা. ভৰাতি কামভৰাদিকা. ভৰেসূতি কামভৰাদিকেসু. অথ ৰা ভৰাভৰেসূতি ভৰভৰেসু, পুনপ্পুনভৰেসূতি ৰুত্তং হোতি.

পস্সামীতি মংসচক্খুনাপি পস্সামীতি দুৰিধং মংসচক্খু – সসম্ভারচক্খু পসাদচক্খূতি. তত্থ যোযং অক্খিকূপকে পতিট্ঠিতো হেট্ঠা অক্খিকূপকট্ঠিকেন উপরি ভমুকট্ঠিকেন উভতো অক্খিকূটেহি বহিদ্ধা অক্খিলোমেহি পরিচ্ছিন্নো অক্খিকূপকমজ্ঝা নিক্খন্তেন ন্হারুসুত্তকেন মত্থলুঙ্গে আবদ্ধো সেতকণ্হমণ্ডলৰিচিত্তো মংসপিণ্ডো, ইদং সসম্ভারচক্খু নাম. যো পন এত্থ সিতো এত্থ পটিবদ্ধো চতুন্নং মহাভূতানং উপাদায পসাদো, ইদং পসাদচক্খু নাম. ইদমধিপ্পেতং. তদেতং তস্স সসম্ভারচক্খুনো সেতমণ্ডলপরিক্খিত্তস্স কণ্হমণ্ডলস্স মজ্ঝে অভিমুখে ঠিতানং সরীরসণ্ঠানুপ্পত্তিপদেসে দিট্ঠমণ্ডলে সত্তসু পিচুপটলেসু আসিত্ততেলং পিচুপটলানি ৰিয সত্তক্খিপটলানি ব্যাপেত্ৰা পমাণতো ঊকাসিরমত্তং চক্খুৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি.

তং চক্খতীতি চক্খু, তেন মংসচক্খুনা পস্সামি. দিব্বচক্খুনাতি ‘‘অদ্দসং খো অহং, ভিক্খৰে, দিব্বেন চক্খুনা ৰিসুদ্ধেনা’’তি (ম. নি. ১.২৮৪) এৰংৰিধেন দিব্বচক্খুনা. পঞ্ঞাচক্খুনাতি ‘‘ৰিরজং ৰীতমলং ধম্মচক্খুং উদপাদী’’তি (ম. নি. ২.৩৯৫; মহাৰ. ১৬) এৰং আগতেন পঞ্ঞাচক্খুনা. বুদ্ধচক্খুনাতি ‘‘অদ্দসং খো অহং, ভিক্খৰে, বুদ্ধচক্খুনা লোকং ৰোলোকেন্তো’’তি (ম. নি. ১.২৮৩) এৰমাগতেন বুদ্ধচক্খুনা. সমন্তচক্খুনাতি ‘‘সমন্তচক্খু ৰুচ্চতি সব্বঞ্ঞুতঞ্ঞাণ’’ন্তি (চূল়নি. ধোতকমাণৰপুচ্ছাইদ্দেস ৩২; মোঘরাজমাণৰপুচ্ছানিদ্দেস ৮৫) এৰমাগতেন সমন্তচক্খুনা. পস্সামীতি মংসচক্খুনা হত্থতলে ঠপিতামলকং ৰিয রূপগতং মংসচক্খুনা. দক্খামীতি সঞ্জানামি দিব্বেন চক্খুনা চুতূপপাতং. ওলোকেমীতি অৰলোকেমি পঞ্ঞাচক্খুনা চতুসচ্চং. নিজ্ঝাযামীতি চিন্তেমি বুদ্ধচক্খুনা সদ্ধাপঞ্চমকানি ইন্দ্রিযানি. উপপরিক্খামীতি সমন্ততো ইক্খামি পরিযেসামি সমন্তচক্খুনা পঞ্চ নেয্যপথে.

তণ্হাফন্দনায ফন্দমানন্তি তণ্হাচলনায চলমানং. ইতো পরং দিট্ঠিফন্দনাদিদিট্ঠিব্যসনেন দুক্খেন ফন্দমানপরিযোসানং ৰুত্তনযত্তা উত্তানমেৰ. সম্ফন্দমানন্তি পুনপ্পুনং ফন্দমানং. ৰিপ্ফন্দমানন্তি নানাৰিধেন চলমানং. ৰেধমানন্তি কম্পমানং. পৰেধমানন্তি পধানেন কম্পমানং. সম্পৰেধমানন্তি পুনপ্পুনং কম্পমানং. উপসগ্গেন ৰা পদং ৰড্ঢিতং.

তণ্হানুগতন্তি তণ্হায অনুপৰিট্ঠং. তণ্হাযানুসটন্তি তণ্হায অনুপত্থটং. তণ্হাযাসন্নন্তি তণ্হায নিমুগ্গং. তণ্হায পাতিতন্তি তণ্হায খিত্তং. ‘‘পরিপাতিত’’ন্তি ৰা পাঠো. অভিভূতন্তি তণ্হায মদ্দিতং অজ্ঝোত্থটং. পরিযাদিন্নচিত্তন্তি খেপেত্ৰা গহিতচিত্তং. অথ ৰা ওঘেন গতং ৰিয তণ্হাগতং. উপাদিণ্ণকরূপপচ্চযেহি পতিত্ৰা গতং ৰিয তণ্হানুগতং. উদকপিট্ঠিং ছাদেত্ৰা পত্থটনীলিকা উদকপিট্ঠি ৰিয তণ্হানুসটং. ৰচ্চকূপে নিমুগ্গং ৰিয তণ্হাযাসন্নং. রুক্খগ্গতো পতিত্ৰা নরকে পতিতং ৰিয তণ্হাপাতিতং. উপাদিণ্ণকরূপং সংযোগং ৰিয তণ্হায অভিভূতং. উপাদিণ্ণকরূপপরিগ্গাহকস্স উপ্পন্নৰিপস্সনং ৰিয তণ্হায পরিযাদিন্নচিত্তং. অথ ৰা কামচ্ছন্দেন তণ্হাগতং. কামপিপাসায তণ্হানুগতং. কামাসৰেন তণ্হানুসটং. কামপরিল়াহেন তণ্হাযাসন্নং. কামজ্ঝোসানেন তণ্হায পাতিতং. কামোঘেন তণ্হায অভিভূতং. কামুপাদানেন তণ্হায পরিযাদিন্নচিত্তন্তি এৰমেকে ৰণ্ণযন্তি. কামভৰেতি কামাৰচরে. রূপভৰেতি রূপাৰচরে. অরূপভৰেতি অরূপাৰচরে. তেসং নানত্তং হেট্ঠা পকাসিতংযেৰ.

ভৰাভৰেসূতি ভৰাভৰেতি ভৰোতি কামধাতু. অভৰোতি রূপারূপধাতু. অথ ৰা ভৰোতি কামধাতু রূপধাতু. অভৰোতি অরূপধাতু. তেসু ভৰাভৰেসু. কম্মভৰেতি কম্মৰট্টে. পুনব্ভৰেতি পোনোভৰিকে ৰিপাকৰট্টে. কামভৰেতি কামধাতুযা. কম্মভৰেতি কম্মৰট্টে. তত্থ কম্মভৰো ভাৰযতীতি ভৰো. কামভৰে পুনব্ভৰেতি কামধাতুযা উপপত্তিভৰে ৰিপাকৰট্টে. ৰিপাকভৰো ভৰতীতি ভৰো. রূপভৰাদীসুপি এসেৰ নযো. এত্থ চ ‘‘কামভৰে রূপভৰে অরূপভৰে’’তি ওকাসভৰং সন্ধায ৰুত্তং. তীসুপি ‘‘কম্মভৰে’’তি কম্মভৰং, তথা ‘‘পুনব্ভৰে’’তি উপপত্তিভৰং সন্ধায ৰুত্তং. পুনপ্পুনব্ভৰেতি অপরাপরং উপ্পত্তিযং. গতিযাতি পঞ্চগতিযা অঞ্ঞতরায. অত্তভাৰাভিনিব্বত্তিযাতি অত্তভাৰানং অভিনিব্বত্তিযা. অৰীততণ্হাতি মূলপদং. অৰিগততণ্হাতি খণিকসমাধি ৰিয খণিকপ্পহানাভাৰেন ন ৰিগতা তণ্হা এতেসন্তি অৰিগততণ্হা. অচত্ততণ্হাতি তদঙ্গপ্পহানাভাৰেন অপরিচ্চত্ততণ্হা. অৰন্ততণ্হাতি ৰিক্খম্ভনপ্পহানাভাৰেন ন ৰন্ততণ্হাতি অৰন্ততণ্হা. অমুত্ততণ্হাতি অচ্চন্তসমুচ্ছেদপ্পহানাভাৰেন ন মুত্ততণ্হা. অপ্পহীনতণ্হাতি পটিপ্পস্সদ্ধিপ্পহানাভাৰেন ন পহীনতণ্হা. অপ্পটিনিস্সট্ঠতণ্হাতি নিস্সরণপ্পহানাভাৰেন ভৰে পতিট্ঠিতং অনুসযকিলেসং অপ্পটিনিস্সজ্জিত্ৰা ঠিতত্তা অপ্পটিনিস্সট্ঠতণ্হা.

১২. ইদানি যস্মা অৰিগততণ্হা এৰং ফন্দন্তি চ লপন্তি চ, তস্মা তণ্হাৰিনযে সমাদপেন্তো ‘‘মমাযিতে’’তি গাথমাহ. তত্থ মমাযিতেতি তণ্হাদিট্ঠিমমত্তেহি ‘‘মম’’ন্তি পরিগ্গহিতে ৰত্থুস্মিং. পস্সথাতি সোতারে আলপন্তো আহ. এতম্পীতি এতম্পি আদীনৰং. সেসং পাকটমেৰ.

দ্ৰে মমত্তাতি দ্ৰে আলযা. যাৰতাতি পরিচ্ছেদনিযমত্থে নিপাতো. তণ্হাসঙ্খাতেনাতি তণ্হাকোট্ঠাসেন, সঙ্খা সঙ্খাতন্তি অত্থতো একং ‘‘সঞ্ঞানিদানা হি পপঞ্চসঙ্খা’’তিআদীসু (সু. নি. ৮৮০) ৰিয. সীমকতন্তি অপরিচ্ছেদদোসৰিরহিতং মরিযাদকতং ‘‘তিযোজনপরমং সীমং সম্মন্নিতু’’ন্তি আদীসু (মহাৰ. ১৪০) ৰিয. ওধিকতন্তি ৰচনপরিচ্ছেদদোসৰিরহিতং পরিচ্ছেদকতং সীমন্তরিকরুক্খো ৰিয. পরিযন্তকতন্তি পরিচ্ছেদকতং. সীমন্তরিকরুক্খো পন দ্ৰিন্নং সাধারণং, অযং পন একাবদ্ধতালপন্তি ৰিয কতন্তি পরিযন্তকতং. পরিগ্গহিতন্তি কালন্তরেপি পরাযত্তং মুঞ্চিত্ৰা সব্বাকারেন গহিতং. মমাযিতন্তি আলযকতং ৰস্সূপগতং সেনাসনং ৰিয. ইদং মমন্তি সমীপে ঠিতং. এতং মমন্তি দূরে ঠিতং. এত্তকন্তি পরিক্খারনিযমনং ‘‘এত্তকম্পি নপ্পটিভাসেয্যা’’তি ৰিয. এত্তাৰতাতি পরিচ্ছেদত্থেপি নিপাতনিযমনং ‘‘এত্তাৰতা খো মহানামা’’তি ৰিয. কেৰলম্পি মহাপথৰিন্তি সকলম্পি মহাপথৰিং.

অট্ঠসতং তণ্হাৰিচরিতন্তি অট্ঠুত্তরসতং তণ্হাগমনৰিত্থারং. অট্ঠুত্তরসতং কথং হোতীতি চে? রূপতণ্হা…পে… ধম্মতণ্হাতি এৰং চক্খুদ্ৰারাদীসু জৰনৰীথিযা পৰত্তা তণ্হা ‘‘সেট্ঠিপুত্তো, ব্রাহ্মণপুত্তো’’তি এৰমাদীসু পিতিতো লদ্ধনামা ৰিয পিতুসদিসারম্মণে ভূতা. এত্থ চ রূপারম্মণা রূপে তণ্হাতি রূপতণ্হা. সা কামরাগভাৰেন রূপং অস্সাদেন্তী পৰত্তমানা কামতণ্হা. সস্সতদিট্ঠিসহগতরাগভাৰেন ‘‘রূপং নিচ্চং ধুৰং সস্সত’’ন্তি এৰং অস্সাদেন্তী পৰত্তমানা ভৰতণ্হা. উচ্ছেদদিট্ঠিসহগতরাগভাৰেন ‘‘রূপং উচ্ছিজ্জতি ৰিনস্সতি পচ্ছেদং ভৰিস্সতী’’তি এৰং অস্সাদেন্তী পৰত্তমানা ৰিভৰতণ্হাতি এৰং তিৰিধা হোতি. যথা চ রূপতণ্হা, তথা সদ্দতণ্হাদযোপীতি এতানি অট্ঠারস তণ্হাৰিচরিতানি হোন্তি. তানি অজ্ঝত্তরূপাদীসু অট্ঠারস, বহিদ্ধারূপাদীসু অট্ঠারসাতি ছত্তিংস, ইতি অতীতানি ছত্তিংস, অনাগতানি ছত্তিংস, পচ্চুপ্পন্নানি ছত্তিংসাতি অট্ঠসতং. অজ্ঝত্তিকস্স উপাদায ‘‘অস্মী’’তি হোতি, ‘‘ইত্থস্মী’’তি হোতীতি ৰা এৰমাদীনি অজ্ঝত্তিকরূপাদিনিস্সিতানি অট্ঠারস, বাহিরস্সুপাদায ইমিনা ‘‘অস্মী’’তি হোতি, ইমিনা ‘‘ইত্থস্মী’’তি হোতীতি বাহিররূপাদিনিস্সিতানি অট্ঠারসাতি ছত্তিংস. ইতি অতীতানি ছত্তিংস, অনাগতানি ছত্তিংস, পচ্চুপ্পন্নানি ছত্তিংসাতি এৰম্পি অট্ঠসততণ্হাৰিচরিতানি হোন্তি.

ৰীসতিৰত্থুকা সক্কাযদিট্ঠীতি রূপাদীনং পঞ্চন্নং খন্ধানং একেকম্পি ‘‘রূপং অত্ততো সমনুপস্সতী’’তিআদিনা (পটি. ম. ১.১৩০-১৩১) নযেন চতুধা গাহৰসেন পৰত্তানি ৰত্থূনি কত্ৰা উপ্পন্না ৰিজ্জমানট্ঠেন সতি খন্ধপঞ্চকসঙ্খাতে কাযে দিট্ঠীতি সক্কাযদিট্ঠি. দসৰত্থুকা মিচ্ছাদিট্ঠীতি ‘‘নত্থি দিন্নং, নত্থি যিট্ঠ’’ন্তিআদিনযপ্পৰত্তা মিচ্ছাদিট্ঠি, অযাথাৰদিট্ঠি ৰিরজ্ঝিত্ৰা গহণতো ৰা ৰিতথা দিট্ঠি মিচ্ছাদিট্ঠি, অনত্থাৰহত্তা পণ্ডিতেহি কুচ্ছিতা দিট্ঠীতিপি মিচ্ছাদিট্ঠি. সা অযোনিসো অভিনিৰেসলক্খণা, পরামাসরসা, মিচ্ছাভিনিৰেসপচ্চুপট্ঠানা, অরিযানমদস্সনকামতাদিপদট্ঠানা, পরমৰজ্জাতি দট্ঠব্বা. দসৰত্থুকা অন্তগ্গাহিকা দিট্ঠীতি সস্সতো লোকো, অসস্সতো লোকো, অন্তৰা লোকো’’তি আদিনযপ্পৰত্তা একেকং কোট্ঠাসং পতিট্ঠং কত্ৰা গহণৰসেন এৰং পৰত্তা দিট্ঠি দসৰত্থুকা অন্তগ্গাহিকা দিট্ঠি. যা এৰরূপা দিট্ঠীতি যা এৰংজাতিকা দিট্ঠি. দিট্ঠিগতন্তি দিট্ঠীসু গতং. ইদং দস্সনং দ্ৰাসট্ঠিদিট্ঠিঅন্তোগধত্তাতি দিট্ঠিগতং, দিট্ঠিযেৰ দুরতিক্কমনট্ঠেন গহনং দিট্ঠিগহনং তিণগহনৰনগহনপব্বতগহনানি ৰিয. সাসঙ্কসপ্পটিভযট্ঠেন দিট্ঠিকন্তারং চোরকন্তারৰাল়কন্তারনিরুদককন্তারদুব্ভিক্খকন্তারা ৰিয. সম্মাদিট্ঠিযা ৰিনিৰিজ্ঝনট্ঠেন ৰিলোমনট্ঠেন চ দিট্ঠিৰিসূকাযিকং. মিচ্ছাদস্সনঞ্হি উপ্পজ্জমানং সম্মাদস্সনং ৰিনিৰিজ্ঝতি চেৰ ৰিলোমেতি চ. কদাচি সস্সতস্স, কদাচি উচ্ছেদস্স গহণতো দিট্ঠিযা ৰিরূপং ফন্দিতন্তি দিট্ঠিৰিপ্ফন্দিতং. দিট্ঠিগতিকো হি একস্মিং পতিট্ঠাতুং ন সক্কোতি. কদাচি সস্সতং অনুস্সরতি, কদাচি উচ্ছেদং. দিট্ঠিযেৰ বন্ধনট্ঠেন সংযোজনন্তি দিট্ঠিসংযোজনং. সুসুমারাদযো ৰিয পুরিসং আরম্মণং দল়্হং গণ্হাতীতি গাহো. পতিট্ঠহনতো পতিট্ঠাহো. অযঞ্হি বলৰপৰত্তিভাৰেন পতিট্ঠহিত্ৰা গণ্হাতি. নিচ্চাদিৰসেন অভিনিৰিসতীতি অভিনিৰেসো. ধম্মসভাৰং অতিক্কমিত্ৰা নিচ্চাদিৰসেন পরতো আমসতীতি পরামাসো. অনত্থাৰহত্তা কুচ্ছিতো মগ্গো, কুচ্ছিতানং ৰা অপাযানং মগ্গোতি কুম্মগ্গো. অযাথাৰপথতো মিচ্ছাপথো. যথা হি দিসামূল়্হেন ‘‘অযং অসুকগামস্স নাম পথো’’তি গহিতোপি তং গামং ন সম্পাপেতি, এৰং দিট্ঠিগতিকেন ‘‘সুগতিপথো’’তি গহিতাপি দিট্ঠি সুগতিং ন পাপেতীতি অযাথাৰপথতো মিচ্ছাপথো. মিচ্ছাসভাৰতো মিচ্ছত্তং. তত্থেৰ পরিব্ভমনতো তরন্তি এত্থ বালাতি তিত্থং, তিত্থঞ্চ তং অনত্থানঞ্চ আযতনন্তি তিত্থাযতনং, তিত্থিযানং ৰা সঞ্জাতিদেসট্ঠেন নিৰাসট্ঠানট্ঠেন চ আযতনন্তিপি তিত্থাযতনং. ৰিপরিযেসভূতো গাহো, ৰিপরিযেসতো ৰা গাহোতি ৰিপরিযেসগ্গাহো. অসভাৰগাহোতি ৰিপরীতগ্গাহো. ‘‘অনিচ্চে নিচ্চ’’ন্তি আদিনযপ্পৰত্তৰসেন পরিৰত্তেত্ৰা গাহো ৰিপল্লাসগ্গাহো. অনুপাযগাহো মিচ্ছাগাহো. অযাথাৰকস্মিং ৰত্থুস্মিং ন সভাৰস্মিং ৰত্থুস্মিং তথং যাথাৰকং সভাৰন্তি গাহো ‘‘অযাথাৰকস্মিং যাথাৰক’’ন্তি গাহো. যাৰতাতি যত্তকা. দ্ৰাসট্ঠিদিট্ঠিগতানীতি ব্রহ্মজালে (দী. নি. ১.২৯ আদযো) আগতানি দ্ৰাসট্ঠিদিট্ঠিগতানি.

অচ্ছেদসংকিনোপি ফন্দন্তীতি অচ্ছিন্দিত্ৰা পসয্হ বলক্কারেন গণ্হিস্সন্তীতি উপ্পন্নসংকিনোপি চলন্তি. অচ্ছিন্দন্তেপীতি ৰুত্তনযেন অচ্ছিজ্জন্তেপি. অচ্ছিন্নেপীতি ৰুত্তনযেন অচ্ছিন্দিত্ৰা গহিতেপি. ৰিপরিণামসংকিনোপীতি পরিৰত্তেত্ৰা অঞ্ঞথাভাৰেন আসংকিনোপি. ৰিপরিণামন্তেপীতি ৰিপরিৰত্তনকালেপি. ৰিপরিণতেপীতি ৰিপরিৰত্তিতেপি. ফন্দন্তীতি চলন্তি. সম্ফন্দন্তীতি সব্বাকারেন চলন্তি. ৰিপ্ফন্দন্তীতি ৰিৰিধাকারেন ফন্দন্তি. ৰেধন্তীতি ভযং দিস্ৰা কম্পন্তি. পৰেধন্তীতি ছম্ভিতত্তা ভযেন ৰিসেসেন কম্পন্তি. সম্পৰেধন্তীতি লোমহংসনভযেন সব্বাকারেন কম্পন্তি. ফন্দমানেতি উপযোগবহুৰচনং. অপ্পোদকেতি মন্দোদকে. পরিত্তোদকেতি লুল়িতোদকে. উদকপরিযাদানেতি খীণোদকে. বলাকাহি ৰাতি ৰুত্তাৰসেসাহি পক্খিজাতীহি. পরিপাতিযমানাতি ৰিহিংসিযমানা ঘট্টিযমানা. উক্খিপিযমানাতি কদ্দমন্তরতো নীহরিযমানা গিলিযমানা ৰা. খজ্জমানাতি খাদিযমানা. ফন্দন্তি কাকেহি. সম্ফন্দন্তি কুললেহি. ৰিপ্ফন্দন্তি বলাকাহি. ৰেধন্তি তুণ্ডেন গহিতকালে মরণৰসেন. পৰেধন্তি ৰিজ্ঝনকালে. সম্পৰেধন্তি মরণসমীপে.

পস্সিত্ৰাতি অগুণং পস্সিত্ৰা. তুলযিত্ৰাতি গুণাগুণং তুলযিত্ৰা. তীরযিত্ৰাতি গুণাগুণং ৰিত্থারেত্ৰা. ৰিভাৰযিত্ৰাতি ৰত্থুহানভাগিং মুঞ্চিত্ৰা ৰজ্জেত্ৰা. ৰিভূতং কত্ৰাতি নিপ্ফত্তিং পাপেত্ৰা আৰেণিকং কত্ৰা. অথ ৰা সংকিণ্ণদোসং মোচেত্ৰা ৰত্থুৰিভাগকরণেন পস্সিত্ৰা. অপরিচ্ছেদদোসং মোচেত্ৰা পমাণকরণৰসেন তুলযিত্ৰা. ৰত্থুদোসং মোচেত্ৰা ৰিভাগকরণৰসেন তীরযিত্ৰা. সম্মোহদোসং মোচযিত্ৰা অগ্গৰিভাগকরণৰসেন ৰিভাৰযিত্ৰা. ঘনদোসং মোচেত্ৰা পকতিৰিভাগকরণেন ৰিভূতং কত্ৰা. পহাযাতি পজহিত্ৰা. পটিনিস্সজ্জিত্ৰাতি নিস্সজ্জিত্ৰা. অমমাযন্তোতি তণ্হাদিট্ঠীহি আলযং অকরোন্তো. অগণ্হন্তোতি দিট্ঠিযা পুব্বভাগে পঞ্ঞায তং ন গণ্হন্তো. অপরামসন্তোতি ৰিতক্কেন ঊহনং অকরোন্তো. অনভিনিৰেসন্তোতি নিযামোক্কন্তিদিট্ঠিৰসেন নপ্পৰিসন্তো.

অকুব্বমানোতি পরিগ্গাহতণ্হাৰসেন অকরোন্তো. অজনযমানোতি পোনোভৰিকতণ্হাৰসেন অজনযমানো. অসঞ্জনযমানোতি ৰিসেসেন অসঞ্জনযমানো. অনিব্বত্তযমানোতি পত্থনাতণ্হাৰসেন ন নিব্বত্তযমানো. অনভিনিব্বত্তযমানোতি সব্বাকারেন ন অভিনিব্বত্তযমানো. উপসগ্গৰসেন ৰা এতানি পদানি ৰড্ঢিতানি. এৰমেত্থ পঠমগাথায অস্সাদং.

১৩. ততো পরাহি চতূহি গাথাহি আদীনৰঞ্চ দস্সেত্ৰা ইদানি সউপাযং নিস্সরণং নিস্সরণানিসংসঞ্চ দস্সেতুং, সব্বাহি ৰা এতাহি কামানং আদীনৰং ওকারং সংকিলেসঞ্চ দস্সেত্ৰা ইদানি নেক্খম্মে আনিসংসং দস্সেতুং ‘‘উভোসু অন্তেসূ’’তি গাথাদ্ৰযমাহ. তত্থ উভোসু অন্তেসূতি ফস্সফস্সসমুদযাদীসু দ্ৰীসু, দ্ৰীসু পরিচ্ছেদেসু. ৰিনেয্য ছন্দন্তি ছন্দরাগং ৰিনেত্ৰা. ফস্সং পরিঞ্ঞাযাতি চক্খুসম্ফস্সাদিফস্সং, ফস্সানুসারেন ৰা তংসম্পযুত্তে সব্বেপি অরূপধম্মে, তেসং ৰত্থুদ্ৰারারম্মণৰসেন রূপধম্মে চাতি সকলম্পি নামরূপং তীহি পরিঞ্ঞাহি পরিজানিত্ৰা. অনানুগিদ্ধোতি রূপাদীসু সব্বধম্মেসু অগিদ্ধো. যদত্তগরহী তদকুব্বমানোতি যং অত্তনা গরহতি, তং অকুরুমানো. ন লিম্পতী দিট্ঠসুতেসু ধীরোতি সো এৰরূপো ধিতিসম্পন্নো ধীরো দিট্ঠেসু চ সুতেসু চ ধম্মেসু দ্ৰিন্নং লেপানং একেনাপি লেপেন ন লিম্পতি, আকাসমিৰ নিরুপলিত্তো অচ্চন্তৰোদানপ্পত্তো হোতি.

ফস্সো একো অন্তোতি ফস্সো একপরিচ্ছেদো. ফুসতীতি ফস্সো. স্ৰাযং ফুসনলক্খণো, সঙ্ঘট্টনরসো, সন্নিপাতপচ্চুপট্ঠানো, আপাথগতৰিসযপদট্ঠানো. অযঞ্হি অরূপধম্মোপি সমানো আরম্মণে ফুসনাকারেনেৰ পৰত্ততীতি ফুসনলক্খণো. একদেসেনেৰ অনল্লীযমানোপি রূপং ৰিয চক্খুং, সদ্দো ৰিয চ সোতং চিত্তং আরম্মণঞ্চ সঙ্ঘট্টেতীতি সঙ্ঘট্টনরসো, ৰত্থারম্মণসঙ্ঘট্টনতো ৰা উপ্পন্নত্তা সম্পত্তিঅত্থেনপি রসেন ‘‘সঙ্ঘট্টনরসো’’তি ৰেদিতব্বো. ৰুত্তঞ্হেতং অট্ঠকথাযং –

‘‘চতুভূমকফস্সো নো ফুসনলক্খণো নাম নত্থি, সঙ্ঘট্টনরসো পন পঞ্চদ্ৰারিকোৰ হোতি. পঞ্চদ্ৰারিকস্স হি ফুসনলক্খণোতিপি সঙ্ঘট্টনরসোতিপি নামং. মনোদ্ৰারিকস্স ফুসনলক্খণোত্ৰেৰ নামং, ন সঙ্ঘট্টনরসো’’তি (ধ. স. অট্ঠ. ১, কামাৰচরকুসল, ধম্মুদ্দেসকথা).

ইদঞ্চ ৰত্ৰা ইদং সুত্তং (মি. প. ২.৩.৮) আভতং –

‘‘যথা, মহারাজ, দ্ৰে মেণ্ডা যুজ্ঝেয্যুং, যথা একো মেণ্ডো, এৰং চক্খু দট্ঠব্বং. যথা দুতিযো মেণ্ডো, এৰং রূপং দট্ঠব্বং. যথা তেসং সন্নিপাতো, এৰং ফস্সো দট্ঠব্বো. এৰং ফুসনলক্খণো চ ফস্সো সঙ্ঘট্টনরসো চ. যথা, মহারাজ, দ্ৰে সম্মা ৰজ্জেয্যুং, দ্ৰে পাণী ৰজ্জেয্যুং. যথা একো পাণি, এৰং চক্খু দট্ঠব্বং. যথা দুতিযো পাণি, এৰং রূপং দট্ঠব্বং. যথা তেসং সন্নিপাতো, এৰং ফস্সো দট্ঠব্বো. এৰং ফুসনলক্খণো চ ফস্সো সঙ্ঘট্টনরসো চা’’তি ৰিত্থারো.

যথা ৰা ‘‘চক্খুনা রূপং দিস্ৰা’’তিআদীসু (ধ. স. ১৩৫২, ১৩৫৪) চক্খুৰিঞ্ঞাণাদীনি চক্খুআদিনামেন ৰুত্তানি, এৰমিধাপি তানি চক্খুআদিনামেনেৰ ৰুত্তানীতি ৰেদিতব্বানি. তস্মা ‘‘এৰং চক্খু দট্ঠব্ব’’ন্তিআদীসু এৰং চক্খুৰিঞ্ঞাণং দট্ঠব্বন্তি ইমিনা নযেন অত্থো ৰেদিতব্বো. এৰং সন্তে চিত্তারম্মণসঙ্ঘট্টনতো ইমস্মিম্পি সুত্তে কিচ্চট্ঠেনেৰ রসেন ‘‘সঙ্ঘট্টনরসো’’তি সিদ্ধো হোতি. তিণ্ণং সন্নিপাতসঙ্খাতস্স পন অত্তনো কারণস্স ৰসেন পৰেদিতত্তা সন্নিপাতপচ্চুপট্ঠানো. অযঞ্হি তত্থ তত্থ ‘‘তিণ্ণং সঙ্গতি ফস্সো’’তি এৰং কারণস্সেৰ ৰসেন পৰেদিতোতি. ইমস্স চ সুত্তপদস্স তিণ্ণং সঙ্গতিযা ফস্সোতি অযমত্থো, ন সঙ্গতিমত্তমেৰ ফস্সো.

এৰং পৰেদিতত্তা পন তেনেৰাকারেন পচ্চুপট্ঠাতীতি ‘‘সন্নিপাতপচ্চুপট্ঠানো’’তি ৰুত্তো. ফলট্ঠেন পন পচ্চুপট্ঠানেনেস ৰেদনাপচ্চুপট্ঠানো নাম হোতি. ৰেদনং হেস পচ্চুপট্ঠাপেতি, উপ্পাদেতীতি অত্থো. উপ্পাদযমানো চ যথা বহিদ্ধা উণ্হপচ্চযাপি সমানা লাখাসঙ্খাতধাতুনিস্সিতা উস্মা অত্তনো নিস্সযে মুদুভাৰকারী হোতি, ন অত্তনো পচ্চযভূতেপি বহিদ্ধা ৰীতচ্চিতঙ্গারসঙ্খাতে উণ্হভাৰে. এৰং ৰত্থারম্মণসঙ্খাতঅঞ্ঞপচ্চযোপি সমানো চিত্তনিস্সিতত্তা অত্তনো নিস্সযভূতে চিত্তে এৰ এস ৰেদনুপ্পাদকো হোতি, ন অত্তনো পচ্চযভূতেপি ৰত্থুম্হি আরম্মণেৰাতি ৰেদিতব্বো. তজ্জেন সমন্নাহারেন পন ইন্দ্রিযেন চ পরিক্খতে ৰিসযে অনন্তরাযেন উপ্পজ্জনতো এস ‘‘আপাথগতৰিসযপদট্ঠানো’’তি ৰুচ্চতি.

ফস্সো যতো সমুদেতি উপ্পজ্জতি, সো ‘‘ফস্সসমুদযো’’তি ৰুচ্চতি. ৰুত্তঞ্হেতং – ‘‘সল়াযতনপচ্চযা ফস্সো’’তি (মহাৰ. ১; ৰিভ. ২২৫). অতীতদুকো কালৰসেন ৰুত্তো. ৰেদনাদুকো ‘‘উপেক্খা পন সন্তত্তা, সুখমিচ্চেৰ ভাসিতা’’তি (ৰিভ. অট্ঠ. ২৩২) ৰুত্তত্তা উপেক্খাৰেদনং সুখমেৰ কত্ৰা সুখদুক্খৰসেন, নামরূপদুকো রূপারূপৰসেন, আযতনদুকো সংসারপৰত্তিৰসেন, সক্কাযদুকো পঞ্চক্খন্ধৰসেন ৰুত্তোতি ৰেদিতব্বো. তত্থ সুখযতীতি সুখা. ৰেদযতীতি ৰেদনা. দুক্খযতীতি দুক্খা. নমনলক্খণং নামং. রুপ্পনলক্খণং রূপং. চক্খাযতনাদীনি ছ অজ্ঝত্তিকানি. রূপাযতনাদীনি ছ বাহিরানি. রূপক্খন্ধাদযো পঞ্চক্খন্ধা ৰিজ্জমানট্ঠেন সক্কাযো. অৰিজ্জাকম্মতণ্হাআহারফস্সনামরূপা সক্কাযসমুদযো.

চক্খুসম্ফস্সোতি চক্খতীতি চক্খু, রূপং অস্সাদেতি ৰিভাৰেতি চাতি অত্থো. চক্খুতো পৰত্তো সম্ফস্সো চক্খুসম্ফস্সো. সো পন অত্তনা সম্পযুত্তায ৰেদনায সহজাতঅঞ্ঞমঞ্ঞনিস্সযৰিপাকআহারসম্পযুত্তঅত্থিঅৰিগতৰসেন অট্ঠধা পচ্চযো হোতি. সুণাতীতি সোতং. তং সসম্ভারসোতবিলস্স অন্তো তনুতম্বলোমাচিতে অঙ্গুলিৰেঠকসণ্ঠানে পদেসে সোতৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি. সোততো পৰত্তো সম্ফস্সো সোতসম্ফস্সো. ঘানসম্ফস্সাদীসুপি এসেৰ নযো. ঘাযতীতি ঘানং. তং সসম্ভারবিলস্স অন্তো অজপদসণ্ঠানে পদেসে ঘানৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি. জীৰিতমৰ্হাযতীতি জিৰ্হা, সাযনট্ঠেন ৰা জিৰ্হা. সা সসম্ভারজিৰ্হায অতিঅগ্গমূলপস্সানি ৰজ্জেত্ৰা উপরিমতলমজ্ঝে ভিন্নউপ্পলদলগ্গসণ্ঠানে পদেসে জিৰ্হাৰিঞ্ঞাণাদীনং যথারহং ৰত্থুদ্ৰারভাৰং সাধযমানা তিট্ঠতি. কুচ্ছিতানং সাসৰধম্মানং আযোতি কাযো. আযোতি উপ্পত্তিদেসো. যাৰতা ইমস্মিং কাযে উপাদিণ্ণপৰত্তি নাম অত্থি, তত্থ যেভুয্যেন কাযপ্পসাদো কাযৰিঞ্ঞাণাদীনং যথারহং ৰত্থুদ্ৰারভাৰং সাধযমানো তিট্ঠতি. মুনাতীতি মনো, ৰিজানাতীতি অত্থো. মনোতি সহাৰজ্জনভৰঙ্গং; মনতো পৰত্তো সম্ফস্সো মনোসম্ফস্সো.

ছব্বিধম্পি ফস্সং দুৰিধমেৰ হোতীতি দস্সেতুং ‘‘অধিৰচনসম্ফস্সো পটিঘসম্ফস্সো’’তি আহ. মনোদ্ৰারিকো অধিৰচনসম্ফস্সো. পঞ্চদ্ৰারিকো ৰত্থারম্মণাদিপটিঘেন উপ্পজ্জনতো পটিঘসম্ফস্সো.

সুখৰেদনায আরম্মণে সুখৰেদনীযো. দুক্খৰেদনায আরম্মণে দুক্খৰেদনীযো. অদুক্খমসুখৰেদনায আরম্মণে অদুক্খমসুখৰেদনীযো. তত্থ সুখযতীতি সুখং, যস্সুপ্পজ্জতি, তং সুখিতং করোতীতি অত্থো. সুট্ঠু ৰা খনতি, খাদতি চ কাযচিত্তাবাধন্তি সুখং. দুক্খযতীতি দুক্খং, যস্সুপ্পজ্জতি, তং দুক্খিতং করোতীতি অত্থো. ন দুক্খং ন সুখন্তি অদুক্খমসুখং, ম-কারো পদসন্ধিৰসেন ৰুত্তো.

কুসলোতিআদযো জাতিৰসেন ৰুত্তা. তত্থ কুসলোতি একৰীসতিকুসলচিত্তসম্পযুত্তো. অকুসলোতি দ্ৰাদসাকুসলচিত্তসম্পযুত্তো. অব্যাকতোতি অৰসেসৰিপাককিরিযাব্যাকতচিত্তসম্পযুত্তো.

পুন ভৰপ্পভেদৰসেন নিদ্দিসন্তো ‘‘কামাৰচরো’’তিআদিমাহ. চতুপঞ্ঞাসকামাৰচরচিত্তসম্পযুত্তো কামাৰচরো. কামং পহায রূপে অৰচরতীতি রূপাৰচরো, কুসলাব্যাকতৰসেন পঞ্চদসরূপাৰচরচিত্তসম্পযুত্তো. কামঞ্চ রূপঞ্চ পহায অরূপে অৰচরতীতি অরূপাৰচরো, কুসলাব্যাকতৰসেন দ্ৰাদসারূপাৰচরচিত্তসম্পযুত্তো.

ইদানি অভিনিৰেসৰসেন দস্সেন্তো ‘‘সুঞ্ঞতো’’তিআদিমাহ. তত্থ সুঞ্ঞতোতি রাগদোসমোহেহি সুঞ্ঞত্তা সুঞ্ঞতো. রাগদোসমোহনিমিত্তেহি অনিমিত্তত্তা অনিমিত্তো. রাগদোসমোহপণিধীনং অভাৰতো অপ্পণিহিতোতি ৰুচ্চতি.

ইদানি ৰট্টপরিযাপন্নঅপরিযাপন্নৰসেন দস্সেন্তো ‘‘লোকিযো’’তিআদিমাহ. লোকো ৰুচ্চতি লুজ্জনপলুজ্জনট্ঠেন ৰট্টং, তস্মিং পরিযাপন্নভাৰেন লোকে নিযুত্তোতি লোকিযো. উত্তিণ্ণোতি উত্তরো, লোকে অপরিযাপন্নভাৰেন লোকতো উত্তরোতি লোকুত্তরো. ফুসনাতি ফুসনাকারো. সম্ফুসনা সম্ফুসিতত্তন্তি উপসগ্গেন পদং ৰড্ঢিতং.

এৰং ঞাতং কত্ৰাতি এৰং পাকটং কত্ৰা জানন্তো তীরেতি তীরযতি, উপরি ৰত্তব্বাকারেন চিন্তেতি. অনিচ্চন্তিকতায আদিঅন্তৰন্ততায চ অনিচ্চতো তীরেতি. উপ্পাদৰযপটিপীল়নতায দুক্খৰত্থুতায চ দুক্খতো. পচ্চযযাপনীযতায রোগমূলতায চ রোগতো. দুক্খতাসূলযোগিতায কিলেসাসুচিপগ্ঘরতায উপ্পাদজরাভঙ্গেহি উদ্ধুমাতপরিপক্কপভিন্নতায চ গণ্ডতো. পীল়াজনকতায অন্তোতুদনতায দুন্নীহরণীযতায চ সল্লতো. ৰিগরহণীযতায অৰড্ঢিআৰহনতায অঘৰত্থুতায চ অঘতো. অসেরিভাৰজনকতায আবাধপদট্ঠানতায চ আবাধতো. অৰসতায অৰিধেয্যতায চ পরতো. ব্যাধিজরামরণেহি লুজ্জনপলুজ্জনতায পলোকতো. অনেকব্যসনাৰহনতায ঈতিতো. অৰিদিতানংযেৰ ৰিপুলানং অনত্থানং আৰহনতো সব্বূপদ্দৰৰত্থুতায চ উপদ্দৰতো. সব্বভযানং আকরতায চ দুক্খৰূপসমসঙ্খাতস্স পরমস্সাসস্স পটিপক্খভূততায চ ভযতো. অনেকেহি অনত্থেহি অনুবদ্ধতায দোসূপসট্ঠতায, উপসগ্গো ৰিয অনধিৰাসনারহতায চ উপসগ্গতো. ব্যাধিজরামরণেহি চেৰ লাভাদীহি চ লোকধম্মেহি পচলিততায চলতো. উপক্কমেন চেৰ সরসেন চ পভঙ্গুপগমনসীলতায পভঙ্গুতো. সব্বাৰত্থাৰিনিপাতিতায, থিরভাৰস্স চ অভাৰতায অধুৰতো. অতাযনতায চেৰ অলব্ভনেয্যখেমতায চ অতাণতো. অল্লীযিতুং অনরহতায, অল্লীনানম্পি চ লেণকিচ্চাকারিতায অলেণতো. নিস্সিতানং ভযসারকত্তাভাৰেন অসরণতো. যথাপরিকপ্পিতেহি ধুৰসুভসুখত্তভাৰেহি রিত্ততায রিত্ততো. রিত্ততাযেৰ তুচ্ছতো, অপ্পকত্তা ৰা. অপ্পকম্পি হি লোকে ‘‘তুচ্ছ’’ন্তি ৰুচ্চতি. সামিনিৰাসিৰেদক কারকাধিট্ঠাযকৰিরহিততায সুঞ্ঞতো.

সযঞ্চ অসামিকভাৰাদিতায অনত্ততো. পৰত্তিদুক্খতায, দুক্খস্স চ আদীনৰতায আদীনৰতো. অথ ৰা আদীনং ৰাতি গচ্ছতি পৰত্ততীতি আদীনৰো, কপণমনুস্সস্সেতং অধিৰচনং. খন্ধাপি চ কপণাযেৰাতি আদীনৰসদিসতায আদীনৰতো. জরায চেৰ মরণেন চাতি দ্ৰেধা পরিণামপকতিতায ৰিপরিণামধম্মতো. দুব্বলতায, ফেগ্গু ৰিয সুখভঞ্জনীযতায চ অসারকতো. অঘহেতুতায অঘমূলতো. মিত্তমুখসপত্তো ৰিয ৰিস্সাসঘাতিতায ৰধকতো. ৰিগতভৰতায ৰিভৰসম্ভূততায চ ৰিভৰতো. আসৰপদট্ঠানতায সাসৰতো. হেতুপচ্চযেহি অভিসঙ্খততায সঙ্খততো. মচ্চুমারকিলেসমারানং আমিসভূততায মারামিসতো. জাতিজরাব্যাধিমরণপকতিতায জাতিজরাব্যাধিমরণধম্মতো. সোকপরিদেৰউপাযাসহেতুতায সোকপরিদেৰউপাযাসধম্মতো. তণ্হাদিট্ঠিদুচ্চরিতসংকিলেসানং ৰিসযধম্মতায সংকিলেসধম্মতো. অৰিজ্জাকম্মতণ্হাসল়াযতনৰসেন উপ্পত্তিতো সমুদযতো. তেসং অভাৰেন অত্থঙ্গমতো. ফস্সে ছন্দরাগৰসেন মধুরস্সাদেন অস্সাদতো. ফস্সস্স ৰিপরিণামেন আদীনৰতো. উভিন্নং নিস্সরণেন নিস্সরণতো তীরেতীতি সব্বেসু চ ইমেসু ‘‘তীরেতী’’তি পাঠসেসো দট্ঠব্বো.

পজহতীতি সকসন্তানতো নীহরতি. ৰিনোদেতীতি তুদতি. ব্যন্তিং করোতীতি ৰিগতন্তং করোতি. অনভাৰং গমেতীতি অনু অনু অভাৰং গমেতি. অরিযমগ্গসত্থেন উচ্ছিন্নং তণ্হাঅৰিজ্জামযং মূলমেতেসন্তি উচ্ছিন্নমূলা. তালৰত্থু ৰিয নেসং ৰত্থু কতন্তি তালাৰত্থুকতা. যথা হি তালরুক্খং সমূলং উদ্ধরিত্ৰা তস্স ৰত্থুমত্তে তস্মিং পদেসে কতে ন পুন তস্স তালস্স উপ্পত্তি পঞ্ঞাযতি, এৰং অরিযমগ্গসত্থেন সমূলে রূপাদিরসে উদ্ধরিত্ৰা তেসং পুব্বে উপ্পন্নপুব্বভাৰেন ৰত্থুমত্তে চিত্তসন্তানে কতে সব্বেপি তে ‘‘তালাৰত্থুকতা’’তি ৰুচ্চন্তি. যস্সেসোতি যস্স পুগ্গলস্স এসো গেধো. সমুচ্ছিন্নোতি উচ্ছিন্নো. ৰূপসন্তোতি ফলেন ৰূপসন্তো. পটিপস্সদ্ধোতি পটিপস্সদ্ধিপ্পহানেন পটিপস্সম্ভিতো. উপসগ্গেন ৰা পদং ৰড্ঢিতং. অভব্বুপ্পত্তিকোতি পুন উপ্পজ্জিতুং অভব্বো. ঞাণগ্গিনা দড্ঢোতি মগ্গঞাণগ্গিনা ঝাপিতো. অথ ৰা ৰিসনিক্খিত্তং ভাজনেন সহ ছড্ডিতং ৰিয ৰত্থুনা সহ পহীনো. মূলচ্ছিন্নৰিসৰল্লি ৰিয সমূলচ্ছিন্নোতি সমুচ্ছিন্নো. উদ্ধনে উদকং সিঞ্চিত্ৰা নিব্বাপিতঅঙ্গারং ৰিয ৰূপসন্তো. নিব্বাপিতঅঙ্গারে পতিতউদকফুসিতং ৰিয পটিপস্সদ্ধো. অঙ্কুরুপ্পত্তিযা হেতুচ্ছিন্নবীজং ৰিয অভব্বুপ্পত্তিকো. অসনিপাতৰিসরুক্খো ৰিয ঞাণগ্গিনা দড্ঢোতি এৰমেকে ৰণ্ণযন্তি.

ৰীতগেধোতি ইদং সকভাৰপরিচ্চজনৰসেন ৰুত্তং. ৰিগতগেধোতি ইদং আরম্মণে সালযভাৰপরিচ্চজনৰসেন. চত্তগেধোতি ইদং পুন অনাদিযনভাৰদস্সনৰসেন. মুত্তগেধোতি ইদং সন্ততিতো ৰিনিমোচনৰসেন. পহীনগেধোতি ইদং মুত্তস্সাপি ক্ৰচি অনৰট্ঠানদস্সনৰসেন. পটিনিস্সট্ঠগেধোতি ইদং আদিন্নপুব্বস্স নিস্সগ্গদস্সনৰসেন ৰুত্তং. ৰীতরাগো ৰিগতরাগো চত্তরাগোতি ৰুত্তনযেন যোজেতব্বং. তত্থ গিজ্ঝনৰসেন গেধো. রঞ্জনৰসেন রাগো. নিচ্ছাতোতি নিত্তণ্হো. ‘‘নিচ্ছদো’’তিপি পাঠো, তণ্হাছদনৰিরহিতোতি অত্থো. নিব্বুতোতি নিব্বুতসভাৰো. সীতিভূতোতি সীতসভাৰো. সুখপটিসংৰেদীতি কাযিকচেতসিকসুখং অনুভৰনসভাৰো. ব্রহ্মভূতেনাতি উত্তমসভাৰেন. অত্তনাতি চিত্তেন.

কতত্তা চাতি পাপকম্মানং কতভাৰেন চ. অকতত্তা চাতি কুসলানং অকতভাৰেন চ. কতং মে কাযদুচ্চরিতং, অকতং মে কাযসুচরিতন্তিআদযো দ্ৰারৰসেন অৰিরতিৰিরতিৰসেন কম্মপথৰসেন চ ৰুত্তা. সীলেসুম্হি ন পরিপূরকারীতিআদযো চতুপারিসুদ্ধিসীলৰসেন. জাগরিযমননুযুত্তোতি পঞ্চজাগরণৰসেন. সতিসম্পজঞ্ঞেনাতি সাত্থকাদিসম্পজঞ্ঞৰসেন. চত্তারো সতিপট্ঠানাতিআদযো বোধিপক্খিযধম্মা লোকিযলোকুত্তরৰসেন. দুক্খং মে অপরিঞ্ঞাতন্তিআদযো চত্তারো অরিযসচ্চৰসেন ৰুত্তাতি ৰেদিতব্বং. তে অত্থতো তত্থ তত্থ ৰুত্তনযত্তা পাকটাযেৰ.

ধীরো পণ্ডিতোতি সত্ত পদা ৰুত্তত্থাযেৰ. অপি চ দুক্খে অকম্পিযট্ঠেন ধীরো. সুখে অনুপ্পিলৰট্ঠেন পণ্ডিতো. দিট্ঠধম্মিকসম্পরাযিকত্থে কতপরিচযট্ঠেন পঞ্ঞৰা. অত্তত্থপরত্থে নিচ্চলট্ঠেন বুদ্ধিমা. গম্ভীরউত্তানত্থে অপচ্চোসক্কনট্ঠেন ঞাণী. গুল়্হপটিচ্ছন্নত্থে ওভাসনট্ঠেন ৰিভাৰী. নিক্কিলেসব্যৰদানট্ঠেন তুলাসদিসোতি মেধাৰী. ন লিম্পতীতি সজাতিযা ন লিম্পতি আকাসে লেখা ৰিয. ন পলিম্পতীতি ৰিসেসেন ন লিম্পতি. ন উপলিম্পতীতি সঞ্ঞোগো হুত্ৰাপি ন লিম্পতি হত্থতলে লেখা ৰিয. অলিত্তোতি সঞ্ঞোগো হুত্ৰাপি ন কিলিস্সতি কাসিকৰত্থে ঠপিতমণিরতনং ৰিয. অপলিত্তোতি ৰিসেসেন ন কিলিস্সতি মণিরতনে পলিৰেঠিতকাসিকৰত্থং ৰিয. অনুপলিত্তোতি উপগন্ত্ৰাপি ন অল্লীযতি পোক্খরপত্তে উদকবিন্দু ৰিয. নিক্খন্তোতি বহি নিক্খন্তো বন্ধনাগারতো পলাতো ৰিয. নিস্সটোতি পাপপহীনো অমিত্তস্স পটিচ্ছাপিতকিলিট্ঠৰত্থু ৰিয. ৰিপ্পমুত্তোতি সুট্ঠু মুত্তো গয্হূপগে ৰত্থুম্হি রতিং নাসেত্ৰা পুন নাগমনং ৰিয. ৰিসঞ্ঞুত্তোতি কিলেসেহি একতো ন যুত্তো ব্যাধিনা মুত্তগিলানো ৰিয. ৰিমরিযাদিকতেন চেতসাতি ৰিগতমরিযাদকতেন চিত্তেন, সব্বভৰেন সব্বারম্মণেন সব্বকিলেসেহি মুত্তচিত্তেনাতি অত্থো.

১৪. সঞ্ঞং পরিঞ্ঞাতি গাথায পন অযং সঙ্খেপত্থো – ন কেৰলঞ্চ ফস্সমেৰ, অপি চ খো পন কামসঞ্ঞাদিভেদং সঞ্ঞং, সঞ্ঞানুসারেন ৰা পুব্বে ৰুত্তনযেনেৰ নামরূপং তীহি পরিঞ্ঞাহি পরিজানিত্ৰা ইমায পটিপদায চতুব্বিধম্পি ৰিতরেয্য ওঘং, ততো সো তিণ্ণোঘো তণ্হাদিট্ঠিপরিগ্গহেসু তণ্হাদিট্ঠিকিলেসপ্পহানেন অনুপলিত্তো খীণাসৰমুনি রাগাদিসল্লানং অব্বূল়্হত্তা অব্বূল়্হসল্লো, সতিৰেপুল্লপ্পত্তিযা অপ্পমত্তো চরং, পুব্বভাগে ৰা অপ্পমত্তো চরন্তো তেন অপ্পমাদচারেন অব্বূল়্হসল্লো হুত্ৰা সকপরত্তভাৰাদিভেদং নাসীসতি লোকমিমং পরঞ্চ, অঞ্ঞদত্থু চরিমচিত্তনিরোধা নিরুপাদানোৰ জাতৰেদো পরিনিব্বাতীতি অরহত্তনিকূটেন দেসনং নিট্ঠাপেসি, ধম্মনেত্তিঠপনমেৰ করোন্তো; ন তু ইমায দেসনায মগ্গং ৰা ফলং ৰা উপ্পাদেসি, খীণাসৰস্স দেসিতত্তাতি.

নীলাদিভেদং আরম্মণং সঞ্জানাতীতি সঞ্ঞা. সা সঞ্জাননলক্খণা পচ্চাভিঞ্ঞাণরসা. চতুভূমিকসঞ্ঞা হি নোসঞ্জাননলক্খণা নাম নত্থি, সব্বা সঞ্জাননলক্খণাৰ. যা পনেত্থ অভিঞ্ঞাণেন সঞ্জানাতি, সা পচ্চাভিঞ্ঞাণরসা নাম হোতি. তস্সা ৰড্ঢকিস্স দারুম্হি অভিঞ্ঞাণং কত্ৰা পুন তেন অভিঞ্ঞাণেন তং পচ্চাভিজাননকালে, পুরিসস্স কাল়তিলকাদিঅভিঞ্ঞাণং সল্লক্খেত্ৰা পুন তেন অভিঞ্ঞাণেন ‘‘অসুকো নাম এসো’’তি তস্স পচ্চাভিজাননকালে, রঞ্ঞো পিল়ন্ধনগোপকভণ্ডাগারিকস্স তস্মিং তস্মিং পিল়ন্ধনে নামপণ্ণকং বন্ধিত্ৰা ‘‘অসুকং পিল়ন্ধনং নাম আহরা’’তি ৰুত্তে দীপং জালেত্ৰা সারগব্ভং পৰিসিত্ৰা পণ্ণং ৰাচেত্ৰা তস্স তস্সেৰ পিল়ন্ধনস্স আহরণকালে চ পৰত্তি ৰেদিতব্বা.

অপরো নযো – সব্বসঙ্গাহিকৰসেন হি সঞ্জাননলক্খণা সঞ্ঞা, পুনসঞ্জাননপচ্চযনিমিত্তকরণরসা দারুআদীসু তচ্ছকাদযো ৰিয, যথাগহিতনিমিত্তৰসেন অভিনিৰেসকরণপচ্চুপট্ঠানা হত্থিদস্সকঅন্ধো ৰিয, আরম্মণে অনোগাল়্হৰুত্তিতায অচিরট্ঠানপচ্চুপট্ঠানা ৰা ৰিজ্জু ৰিয, যথাউপট্ঠিতৰিসযপদট্ঠানা তিণপুরিসকেসু মিগপোতকানং পুরিসাতি উপ্পন্নসঞ্ঞা ৰিয. যা পনেত্থ ঞাণসম্পযুত্তা হোতি, সা ঞাণমেৰ অনুৰত্ততি, সসম্ভারপথৰীআদীসু সেসধম্মা পথৰীআদীনি ৰিযাতি ৰেদিতব্বা.

কামপটিসঞ্ঞুত্তা সঞ্ঞা কামসঞ্ঞা. ব্যাপাদপটিসঞ্ঞুত্তা সঞ্ঞা ব্যাপাদসঞ্ঞা. ৰিহিংসাপটিসঞ্ঞুত্তা সঞ্ঞা ৰিহিংসাসঞ্ঞা. তেসু দ্ৰে সত্তেসুপি সঙ্খারেসুপি উপ্পজ্জন্তি. কামসঞ্ঞা হি পিযে মনাপে সত্তে ৰা সঙ্খারে ৰা ৰিতক্কেন্তস্স উপ্পজ্জতি. ব্যাপাদসঞ্ঞা অপ্পিযে অমনাপে সত্তে ৰা সঙ্খারে ৰা কুজ্ঝিত্ৰা ওলোকনকালতো পট্ঠায যাৰ ৰিনাসনা উপ্পজ্জতি. ৰিহিংসাসঞ্ঞা সঙ্খারেসু ন উপ্পজ্জতি. সঙ্খারো হি দুক্খাপেতব্বো নাম নত্থি. ‘‘ইমে সত্তা হঞ্ঞন্তু ৰা, উচ্ছিজ্জন্তু ৰা, ৰিনস্সন্তু ৰা, মা ৰা অহেসু’’ন্তি চিন্তনকালে পন সত্তেসু উপ্পজ্জতি. নেক্খম্মপটিসঞ্ঞুত্তা সঞ্ঞা নেক্খম্মসঞ্ঞা, সা অসুভপুব্বভাগে কামাৰচরা হোতি, অসুভঝানে রূপাৰচরা, তং ঝানং পাদকং কত্ৰা উপ্পন্নমগ্গফলকালে লোকুত্তরা. অব্যাপাদপটিসঞ্ঞুত্তা সঞ্ঞা অব্যাপাদসঞ্ঞা, সা মেত্তাপুব্বভাগে কামাৰচরা হোতি, মেত্তাঝানে রূপাৰচরা, তং ঝানং পাদকং কত্ৰা উপ্পন্নমগ্গফলকালে লোকুত্তরা. অৰিহিংসাপটিসঞ্ঞুত্তা সঞ্ঞা অৰিহিংসাসঞ্ঞা, সা করুণাপুব্বভাগে কামাৰচরা, করুণাঝানে রূপাৰচরা, তং ঝানং পাদকং কত্ৰা উপ্পন্নমগ্গফলকালে লোকুত্তরা. যদা অলোভো সীসং হোতি, তদা ইতরে দ্ৰে তদন্ৰাযিকা ভৰন্তি. যদা মেত্তা সীসং হোতি, তদা ইতরে দ্ৰে তদন্ৰাযিকা ভৰন্তি. যদা করুণা সীসং হোতি, তদা ইতরে দ্ৰে তদন্ৰাযিকা ভৰন্তি. রূপারম্মণং আরব্ভ উপ্পন্না সঞ্ঞা রূপসঞ্ঞা. সদ্দসঞ্ঞাদীসুপি এসেৰ নযো. ইদং তস্সাযেৰ আরম্মণতো নামং. আরম্মণানং ৰুত্তত্তা চক্খুসম্ফস্সজাদিৰত্থূনিপি ৰুত্তানেৰ হোন্তি.

যা এৰরূপা সঞ্ঞাতি অঞ্ঞাপি ‘‘পটিঘসম্ফস্সজা সঞ্ঞা অধিৰচনসম্ফস্সজা সঞ্ঞা’’তি এৰমাদিকা ৰেদিতব্বা. তত্থ অধিৰচনসম্ফস্সজা সঞ্ঞাতিপি পরিযাযেন ছদ্ৰারিকাযেৰ. তযো হি অরূপিনো খন্ধা সযং পিট্ঠিৰট্টকা হুত্ৰা অত্তনা সহজাতসঞ্ঞায ‘‘অধিৰচনসম্ফস্সজা সঞ্ঞা’’তি নামং করোন্তি, নিপ্পরিযাযেন পন পটিঘসম্ফস্সজা সঞ্ঞা নাম পঞ্চদ্ৰারিকা সঞ্ঞা, অধিৰচনসম্ফস্সজা সঞ্ঞা নাম মনোদ্ৰারিকা সঞ্ঞা. এতা অতিরেকসঞ্ঞা পরিগ্গহিতাতি ৰেদিতব্বা.

সঞ্ঞাতি সভাৰনামং. সঞ্জাননাতি সঞ্জাননাকারো. সঞ্জানিতত্তন্তি সঞ্জানিতভাৰো.

অৰিজ্জোঘন্তি পূরেতুং অযুত্তট্ঠেন কাযদুচ্চরিতাদি অৰিন্দিযং নাম, অলদ্ধব্বন্তি অত্থো. তং অৰিন্দিযং ৰিন্দতীতি অৰিজ্জা. তব্বিপরীততো কাযসুচরিতাদি ৰিন্দিযং নাম, তং ৰিন্দিযং ন ৰিন্দতীতি অৰিজ্জা. খন্ধানং রাসট্ঠং, আযতনানং আযতনট্ঠং, ধাতূনং সুঞ্ঞট্ঠং, ইন্দ্রিযানং অধিপতিযট্ঠং, সচ্চানং তথট্ঠং অৰিদিতং করোতীতিপি অৰিজ্জা. দুক্খাদীনং পীল়নাদিৰসেন ৰুত্তং চতুব্বিধং অত্থং অৰিদিতং করোতীতিপি অৰিজ্জা. অন্তৰিরহিতে সংসারে যোনিগতিভৰৰিঞ্ঞাণট্ঠিতিসত্তাৰাসেসু সত্তে জৰাপেতীতি অৰিজ্জা. পরমত্থতো অৰিজ্জমানেসু ইত্থিপুরিসাদীসু জৰতি, ৰিজ্জমানেসু খন্ধাদীসু ন জৰতীতি অৰিজ্জা. অপি চ চক্খুৰিঞ্ঞাণাদীনং ৰত্থারম্মণানং পটিচ্চসমুপ্পাদপটিচ্চসমুপ্পন্নানঞ্চ ধম্মানং ছাদনতোপি অৰিজ্জা, তং অৰিজ্জোঘং. কামোঘৰসেন উত্তরেয্য. ভৰোঘৰসেন পতরেয্য. দিট্ঠোঘৰসেন সমতিক্কমেয্য. অৰিজ্জোঘৰসেন ৰীতিৰত্তেয্য. অথ ৰা সোতাপত্তিমগ্গেন পহানৰসেন উত্তরেয্য. সকদাগামিমগ্গেন পহানৰসেন পতরেয্য. অনাগামিমগ্গেন পহানৰসেন সমতিক্কমেয্য. অরহত্তমগ্গেন পহানৰসেন ৰীতিৰত্তেয্য. অথ ৰা ‘‘তরেয্যাদিপঞ্চপদং তদঙ্গাদিপঞ্চপহানেন যোজেতব্ব’’ন্তি কেচি ৰদন্তি.

‘‘মোনং ৰুচ্চতি ঞাণ’’ন্তি ৰত্ৰা তং পভেদতো দস্সেতুং ‘‘যা পঞ্ঞা পজাননা’’তিআদিমাহ. তং ৰুত্তনযমেৰ ঠপেত্ৰা ‘‘অমোহো ধম্মৰিচযো’’তি পদং. অমোহো কুসলেসু ধম্মেসু অভাৰনায পটিপক্খো ভাৰনাহেতু. অমোহেন অৰিপরীতং গণ্হাতি মূল়্হস্স ৰিপরীতগ্গহণতো. অমোহেন যাথাৰং যাথাৰতো ধারেন্তো যথাসভাৰে পৰত্ততি. মূল়্হো হি ‘‘তচ্ছং অতচ্ছং, অতচ্ছঞ্চ তচ্ছ’’ন্তি গণ্হাতি; তথা ইচ্ছিতালাভদুক্খং ন হোতি. অমূল়্হস্স ‘‘তং কুতেত্থ লব্ভা’’তি এৰমাদিপচ্চৰেক্খণসম্ভৰতো মরণদুক্খং ন হোতি. সম্মোহমরণঞ্হি দুক্খং, ন চ তং অমূল়্হস্স হোতি. পব্বজিতানং সুখসংৰাসো হোতি, তিরচ্ছানযোনিযং নিব্বত্তি ন হোতি. মোহেন হি নিচ্চসম্মূল়্হা তিরচ্ছানযোনিং উপপজ্জন্তি. মোহপটিপক্খো চ অমোহো মোহৰসেন অমজ্ঝত্তভাৰস্স অভাৰকরো. অমোহেন অৰিহিংসাসঞ্ঞা ধাতুসঞ্ঞা মজ্ঝিমায পটিপত্তিযা পটিপজ্জনং, পচ্ছিমগন্থদ্ৰযস্স পভেদনঞ্চ হোতি. পচ্ছিমানি দ্ৰে সতিপট্ঠানানি তস্সেৰ আনুভাৰেন ইজ্ঝন্তি. অমোহো দীঘাযুকতায পচ্চযো হোতি. অমূল়্হো হি হিতাহিতং ঞত্ৰা অহিতং পরিৰজ্জেন্তো হিতঞ্চ পটিসেৰমানো দীঘাযুকো হোতি, অত্তসম্পত্তিযা অপরিহীনো হোতি. অমূল়্হো হি অত্তনো হিতমেৰ করোন্তো অত্তানং সম্পাদেতি. অরিযৰিহারস্স পচ্চযো হোতি, উদাসিনপক্খেসু নিব্বুতো হোতি অমূল়্হস্স সব্বাভিসঙ্গতায অভাৰতো. অমোহেন অনত্তদস্সনং হোতি. অসম্মূল়্হো হি যাথাৰগহণকুসলো অপরিণাযকং খন্ধপঞ্চকং অপরিণাযকতো বুজ্ঝতি. যথা চ এতেন অনত্তদস্সনং, এৰং অত্তদস্সনং মোহেন. কো হি নাম অত্তসুঞ্ঞতং বুজ্ঝিত্ৰা পুন সম্মোহং আপজ্জেয্যাতি.

তেন ঞাণেন সমন্নাগতোতি এতেন ৰুত্তপ্পকারেন ঞাণেন সমঙ্গীভূতো সেক্খাদযো মুনি. মোনপ্পত্তোতি পটিলদ্ধঞাণো মুনিভাৰং পত্তো. তীণীতি গণনপরিচ্ছেদো. মোনেয্যানীতি মুনিভাৰকরা মোনেয্যকরা পটিপদা ধম্মা. কাযমোনেয্যন্তিআদীসু ৰিঞ্ঞত্তিকাযরূপকাযৰসেন পঞ্ঞাপেতব্বং কাযমোনেয্যং. ৰিঞ্ঞত্তিৰাচাসদ্দৰাচাৰসেন পঞ্ঞাপেতব্বং ৰচীমোনেয্যং. মনোদ্ৰারিকচিত্তাদিৰসেন পঞ্ঞাপেতব্বং মনোমোনেয্যং. তিৰিধকাযদুচ্চরিতানং পহানন্তি পাণাতিপাতাদিৰিধানং কাযতো পৰত্তানং দুট্ঠু চরিতানং পজহনং. কাযসুচরিতন্তি কাযতো পৰত্তং সুট্ঠু চরিতং. কাযারম্মণে ঞাণন্তি কাযং আরম্মণং কত্ৰা অনিচ্চাদিৰসেন পৰত্তং কাযারম্মণে ঞাণং. কাযপরিঞ্ঞাতি কাযং ঞাততীরণপ্পহানপরিঞ্ঞাহি জাননৰসেন পৰত্তং ঞাণং. পরিঞ্ঞাসহগতো মগ্গোতি অজ্ঝত্তিকং কাযং সম্মসিত্ৰা উপ্পাদিতমগ্গো পরিঞ্ঞাসহগতো. কাযে ছন্দরাগস্স পহানন্তি কাযে তণ্হাছন্দরাগস্স পজহনং. কাযসঙ্খারনিরোধোতি অস্সাসপস্সাসানং নিরোধো আৰরণো, চতুত্থজ্ঝানসমাপত্তিসমাপজ্জনং. ৰচীসঙ্খারনিরোধোতি ৰিতক্কৰিচারানং নিরোধো আৰরণো, দুতিযজ্ঝানসমাপত্তিসমাপজ্জনং. চিত্তসঙ্খারনিরোধোতি সঞ্ঞাৰেদনানং নিরোধো আৰরণো, সঞ্ঞাৰেদযিতনিরোধসমাপত্তিসমাপজ্জনং.

পঠমগাথায কাযমুনিন্তিআদীসু কাযদুচ্চরিতপ্পহানৰসেন কাযমুনি. ৰচীদুচ্চরিতপ্পহানৰসেন ৰাচামুনি. মনোদুচ্চরিতপ্পহানৰসেন মনোমুনি. সব্বাকুসলপ্পহানৰসেন অনাসৰমুনি. মোনেয্যসম্পন্নন্তি জানিতব্বং জানিত্ৰা ফলে ঠিতত্তা মোনেয্যসম্পন্নং. আহু সব্বপ্পহাযিনন্তি সব্বকিলেসে পজহিত্ৰা ঠিতত্তা সব্বপ্পহাযিনং কথযন্তি.

দুতিযগাথায নিন্হাতপাপকন্তি যো অজ্ঝত্তবহিদ্ধসঙ্খাতে সব্বস্মিম্পি আযতনে অজ্ঝত্তবহিদ্ধারম্মণৰসেন উপ্পত্তিরহানি সব্বপাপকানি মগ্গঞাণেন নিন্হায ধোৰিত্ৰা ঠিতত্তা নিন্হাতপাপকং আহূতি এৰমত্থো দট্ঠব্বো. অগারমজ্ঝে ৰসন্তা অগারমুনিনো. পব্বজ্জুপগতা অনগারমুনিনো. তত্থ সেক্খা সেক্খমুনিনো. অরহন্তো অসেক্খমুনিনো. পচ্চেকবুদ্ধা পচ্চেকমুনিনো. সম্মাসম্বুদ্ধা মুনিমুনিনো.

পুন কথেতুকম্যতাপুচ্ছাৰসেন ‘‘কতমে অগারমুনিনো’’তি আহ. অগারিকাতি কসিগোরক্খাদিঅগারিককম্মে নিযুত্তা. দিট্ঠপদাতি দিট্ঠনিব্বানা. ৰিঞ্ঞাতসাসনাতি ৰিঞ্ঞাতং সিক্খত্তযসাসনং এতেসন্তি ৰিঞ্ঞাতসাসনা. অনগারাতি কসিগোরক্খাদিঅগারিযকম্মং এতেসং নত্থীতি পব্বজিতা ‘‘অনগারা’’তি ৰুচ্চন্তি. সত্ত সেক্খাতি সোতাপন্নাদযো সত্ত. তীসু সিক্খাসু সিক্খন্তীতি সেক্খা. অরহন্তো ন সিক্খন্তীতি অসেক্খা. তং তং কারণং পটিচ্চ এককাৰ অনাচরিযকাৰ চতুসচ্চং বুজ্ঝিতৰন্তোতি পচ্চেকবুদ্ধা পচ্চেকমুনিনো.

মুনিমুনিনো ৰুচ্চন্তি তথাগতাতি এত্থ অট্ঠহি কারণেহি ভগৰা তথাগতো – তথা আগতোতি তথাগতো, তথা গতোতি তথাগতো, তথলক্খণং আগতোতি তথাগতো, তথধম্মে যাথাৰতো অভিসম্বুদ্ধোতি তথাগতো, তথদস্সিতায তথাগতো, তথৰাদিতায তথাগতো, তথাকারিতায তথাগতো, অভিভৰনট্ঠেন তথাগতোতি.

কথং ভগৰা তথা আগতোতি তথাগতো? যথা সব্বলোকহিতায উস্সুক্কমাপন্না পুরিমকা সম্মাসম্বুদ্ধা আগতা. কিং ৰুত্তং হোতি? যেনাভিনীহারেন পুরিমকা ভগৰন্তো আগতা, তেনেৰ অম্হাকম্পি ভগৰা আগতো. অথ ৰা যথা পুরিমকা ভগৰন্তো দানসীলনেক্খম্মপঞ্ঞাৰীরিযখন্তিসচ্চাধিট্ঠানমেত্তুপেক্খাসঙ্খাতা দস পারমিযো দস উপপারমিযো দস পরমত্থপারমিযোতি সমতিংসপারমিযো পূরেত্ৰা অঙ্গপরিচ্চাগং নযনধনরজ্জপুত্তদারপরিচ্চাগন্তি ইমে পঞ্চ মহাপরিচ্চাগে পরিচ্চজিত্ৰা পুব্বযোগপুব্বচরিযধম্মক্খানঞাতত্থচরিযাদযো পূরেত্ৰা বুদ্ধিচরিযায কোটিং পত্ৰা আগতা, তথা অম্হাকম্পি ভগৰা আগতো. যথা চ পুরিমকা ভগৰন্তো চত্তারো সতিপট্ঠানে, চত্তারো সম্মপ্পধানে, চত্তারো ইদ্ধিপাদে, পঞ্চিন্দ্রিযানি, পঞ্চ বলানি, সত্ত বোজ্ঝঙ্গে, অরিযং অট্ঠঙ্গিকং মগ্গং ভাৰেত্ৰা পূরেত্ৰা আগতা, তথা অম্হাকম্পি ভগৰা আগতো. এৰং তথা আগতোতি তথাগতো.

‘‘যথা চ দীপঙ্করবুদ্ধআদযো, সব্বঞ্ঞুভাৰং মুনযো ইধাগতা;

তথা অযং সক্যমুনীপি আগতো, তথাগতো ৰুচ্চতি তেন চক্খুমা’’তি.

কথং তথা গতোতি তথাগতো? যথা সম্পতিজাতা পুরিমকা ভগৰন্তো গতা. কথঞ্চ তে গতা? তে হি সম্পতিজাতা সমেহি পাদেহি পথৰিযং পতিট্ঠায উত্তরাভিমুখা সত্তপদৰীতিহারেন গতা. যথাহ –

‘‘সম্পতিজাতো, আনন্দ, বোধিসত্তো সমেহি পাদেহি পথৰিযং পতিট্ঠহিত্ৰা উত্তরাভিমুখো সত্তপদৰীতিহারেন গচ্ছতি, সেতম্হি ছত্তে অনুধারিযমানে সব্বা চ দিসা অনুৰিলোকেতি, আসভিঞ্চ ৰাচং ভাসতি – ‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’’তি (দী. নি. ২.৩১; ম. নি. ৩.২০৭).

তঞ্চস্স গমনং তথং অহোসি অৰিতথং অনেকেসং ৰিসেসাধিগমানং পুব্বনিমিত্তভাৰেন. যঞ্হি সো সম্পতিজাতো সমেহি পাদেহি পতিট্ঠাতি, ইদমস্স চতুরিদ্ধিপাদপটিলাভস্স পুব্বনিমিত্তং. উত্তরমুখভাৰো পনস্স সব্বলোকুত্তরভাৰস্স পুব্বনিমিত্তং. সত্তপদৰীতিহারো সত্তবোজ্ঝঙ্গরতনপটিলাভস্স. ‘‘সুৰণ্ণদণ্ডা ৰীতিপতন্তি চামরা’’তি (সু. নি. ৬৯৩) এত্থ ৰুত্তচামরুক্খেপো পন সব্বতিত্থিযনিম্মদনস্স. সেতচ্ছত্তধারণং অরহত্তৰিমুত্তিৰরৰিমলসেতচ্ছত্তপটিলাভস্স. সব্বদিসানুৰিলোকনং সব্বঞ্ঞুতানাৰরণঞাণপটিলাভস্স. আসভিৰাচাভাসনং পন অপ্পটিৰত্তিযৰরধম্মচক্কপৰত্তনস্স পুব্বনিমিত্তং. তথা অযং ভগৰাপি গতো. তঞ্চস্স গমনং তথং অহোসি অৰিতথং তেসংযেৰ ৰিসেসাধিগমানং পুব্বনিমিত্তভাৰেন. তেনাহু পোরাণা –

‘‘মুহুত্তজাতোৰ গৰম্পতী যথা, সমেহি পাদেহি ফুসী ৰসুন্ধরং;

সো ৰিক্কমী সত্ত পদানি গোতমো, সেতঞ্চ ছত্তং অনুধারযুং মরূ.

‘‘গন্ত্ৰান সো সত্ত পদানি গোতমো, দিসা ৰিলোকেসি সমা সমন্ততো;

অট্ঠঙ্গুপেতং গিরমব্ভুদীরযি, সীহো যথা পব্বতমুদ্ধনিট্ঠিতো’’তি. (পটি. ম. অট্ঠ. ১.১.৩৭; ইতিৰু. অট্ঠ. ৩৮);

এৰং তথা গতোতি তথাগতো.

অথ ৰা যথা পুরিমকা ভগৰন্তো, অযম্পি ভগৰা তথেৰ নেক্খম্মেন কামচ্ছন্দং…পে… পঠমজ্ঝানেন নীৰরণে…পে… অনিচ্চানুপস্সনায নিচ্চসঞ্ঞং…পে… অরহত্তমগ্গেন সব্বকিলেসে পহায গতো, এৰম্পি তথা গতোতি তথাগতো.

কথং তথলক্খণং আগতোতি তথাগতো? পথৰীধাতুযা কক্খল়ত্তলক্খণং তথং অৰিতথং, আপোধাতুযা পগ্ঘরণলক্খণং, তেজোধাতুযা উণ্হত্তলক্খণং, ৰাযোধাতুযা ৰিত্থম্ভনলক্খণং, আকাসধাতুযা অসম্ফুট্ঠলক্খণং, ৰিঞ্ঞাণধাতুযা ৰিজাননলক্খণং.

রূপস্স রুপ্পনলক্খণং, ৰেদনায ৰেদযিতলক্খণং, সঞ্ঞায সঞ্জাননলক্খণং, সঙ্খারানং অভিসঙ্খরণলক্খণং, ৰিঞ্ঞাণস্স ৰিজাননলক্খণং.

ৰিতক্কস্স অভিনিরোপনলক্খণং, ৰিচারস্স অনুমজ্জনলক্খণং, পীতিযা ফরণলক্খণং, সুখস্স সাতলক্খণং, চিত্তেকগ্গতায অৰিক্খেপলক্খণং, ফস্সস্স ফুসনলক্খণং.

সদ্ধিন্দ্রিযস্স অধিমোক্খলক্খণং, ৰীরিযিন্দ্রিযস্স পগ্গহলক্খণং, সতিন্দ্রিযস্স উপট্ঠানলক্খণং, সমাধিন্দ্রিযস্স অৰিক্খেপলক্খণং, পঞ্ঞিন্দ্রিযস্স পজাননলক্খণং.

সদ্ধাবলস্স অস্সদ্ধিযে অকম্পিযলক্খণং, ৰীরিযবলস্স কোসজ্জে, সতিবলস্স মুট্ঠস্সচ্চে, সমাধিবলস্স উদ্ধচ্চে, পঞ্ঞাবলস্স অৰিজ্জায অকম্পিযলক্খণং.

সতিসম্বোজ্ঝঙ্গস্স উপট্ঠানলক্খণং, ধম্মৰিচযসম্বোজ্ঝঙ্গস্স পৰিচযলক্খণং, ৰীরিযসম্বোজ্ঝঙ্গস্স পগ্গহলক্খণং, পীতিসম্বোজ্ঝঙ্গস্স ফরণলক্খণং, পস্সদ্ধিসম্বোজ্ঝঙ্গস্স উপসমলক্খণং, সমাধিসম্বোজ্ঝঙ্গস্স অৰিক্খেপলক্খণং, উপেক্খাসম্বোজ্ঝঙ্গস্স পটিসঙ্খানলক্খণং.

সম্মাদিট্ঠিযা দস্সনলক্খণং, সম্মাসঙ্কপ্পস্স অভিনিরোপনলক্খণং, সম্মাৰাচায পরিগ্গহলক্খণং, সম্মাকম্মন্তস্স সমুট্ঠানলক্খণং, সম্মাআজীৰস্স ৰোদানলক্খণং, সম্মাৰাযামস্স পগ্গহলক্খণং, সম্মাসতিযা উপট্ঠানলক্খণং, সম্মাসমাধিস্স অৰিক্খেপলক্খণং.

অৰিজ্জায অঞ্ঞাণলক্খণং, সঙ্খারানং চেতনালক্খণং, ৰিঞ্ঞাণস্স ৰিজাননলক্খণং, নামস্স নমনলক্খণং, রূপস্স রুপ্পনলক্খণং, সল়াযতনস্স আযতনলক্খণং, ফস্সস্স ফুসনলক্খণং, ৰেদনায ৰেদযিতলক্খণং, তণ্হায হেতুলক্খণং, উপাদানস্স গহণলক্খণং, ভৰস্স আযূহনলক্খণং, জাতিযা নিব্বত্তিলক্খণং, জরায জীরণলক্খণং, মরণস্স চুতিলক্খণং.

ধাতূনং সুঞ্ঞতলক্খণং, আযতনানং আযতনলক্খণং, সতিপট্ঠানানং উপট্ঠানলক্খণং, সম্মপ্পধানানং পদহনলক্খণং, ইদ্ধিপাদানং ইজ্ঝনলক্খণং, ইন্দ্রিযানং অধিপতিলক্খণং, বলানং অকম্পিযলক্খণং, বোজ্ঝঙ্গানং নিয্যানলক্খণং, মগ্গস্স হেতুলক্খণং.

সচ্চানং তথলক্খণং, সমথস্স অৰিক্খেপলক্খণং, ৰিপস্সনায অনুপস্সনালক্খণং, সমথৰিপস্সনানং একরসলক্খণং, যুগনদ্ধানং অনতিৰত্তনলক্খণং.

সীলৰিসুদ্ধিযা সংৰরণলক্খণং, চিত্তৰিসুদ্ধিযা অৰিক্খেপলক্খণং, দিট্ঠিৰিসুদ্ধিযা দস্সনলক্খণং, খযে ঞাণস্স সমুচ্ছেদলক্খণং, অনুপ্পাদে ঞাণস্স পস্সদ্ধিলক্খণং, ছন্দস্স মূললক্খণং.

মনসিকারস্স সমুট্ঠানলক্খণং, ফস্সস্স সমোধানলক্খণং, ৰেদনায সমোসরণলক্খণং, সমাধিস্স পমুখলক্খণং, সতিযা আধিপতেয্যলক্খণং, পঞ্ঞায ততুত্তরিযলক্খণং, ৰিমুত্তিযা সারলক্খণং, অমতোগধস্স নিব্বানস্স পরিযোসানলক্খণং তথং অৰিতথং, এতং তথলক্খণং ঞাণগতিযা আগতো অৰিরজ্ঝিত্ৰা পত্তো অনুপ্পত্তোতি তথাগতো. এৰং তথলক্খণং আগতোতি তথাগতো.

কথং তথধম্মে যাথাৰতো অভিসম্বুদ্ধোতি তথাগতো? তথধম্মা নাম চত্তারি অরিযসচ্চানি. যথাহ –

‘‘চত্তারিমানি, ভিক্খৰে, তথানি অৰিতথানি অনঞ্ঞথানি. কতমানি চত্তারি? ‘ইদং দুক্খ’ন্তি, ভিক্খৰে, তথমেতং অৰিতথমেতং অনঞ্ঞথমেত’’ন্তি ৰিত্থারো (সং. নি. ৫.১০৯০).

তানি চ ভগৰা অভিসম্বুদ্ধোতি তথানং অভিসম্বুদ্ধত্তা তথাগতোতি ৰুচ্চতি. অভিসম্বুদ্ধত্থো হি এত্থ গতসদ্দো.

অপি চ জরামরণস্স জাতিপচ্চযসম্ভূতসমুদাগতট্ঠো তথো অৰিতথো অনঞ্ঞথো…পে… সঙ্খারানং অৰিজ্জাপচ্চযসম্ভূতসমুদাগতট্ঠো তথো অৰিতথো অনঞ্ঞথো. তথা অৰিজ্জায সঙ্খারানং পচ্চযট্ঠো…পে… জাতিযা জরামরণস্স পচ্চযট্ঠো তথো অৰিতথো অনঞ্ঞথো. তং সব্বং ভগৰা অভিসম্বুদ্ধো, তস্সাপি তথানং অভিসম্বুদ্ধত্তা তথাগতো. এৰং তথধম্মে যাথাৰতো অভিসম্বুদ্ধোতি তথাগতো.

কথং তথদস্সিতায তথাগতো? ভগৰা যং সদেৰকে লোকে…পে… সদেৰমনুস্সায পজায অপরিমাণাসু লোকধাতূসু অপরিমাণানং সত্তানং চক্খুদ্ৰারে আপাথং আগচ্ছন্তং রূপারম্মণং নাম অত্থি, তং সব্বাকারেন জানাতি পস্সতি. এৰং জানতা পস্সতা চ তেন তং ইট্ঠানিট্ঠাদিৰসেন ৰা দিট্ঠসুতমুতৰিঞ্ঞাতেসু লব্ভমানকপদৰসেন ৰা ‘‘কতমং তং রূপং রূপাযতনং? যং রূপং চতুন্নং মহাভূতানং উপাদায ৰণ্ণনিভা সনিদস্সনং সপ্পটিঘং নীলং পীতক’’ন্তিআদিনা (ধ. স. ৬১৬) নযেন অনেকেহি নামেহি তেরসহি ৰারেহি দ্ৰিপঞ্ঞাসায নযেহি ৰিভজ্জমানং তথমেৰ হোতি, ৰিতথং নত্থি. এস নযো সোতদ্ৰারাদীসুপি আপাথমাগচ্ছন্তেসু সদ্দাদীসু. ৰুত্তম্পি চেতং ভগৰতা –

‘‘যং, ভিক্খৰে, সদেৰকস্স লোকস্স…পে… সদেৰমনুস্সায পজায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তমহং জানামি…পে… তমহং অব্ভঞ্ঞাসিং. তং তথাগতস্স ৰিদিতং, তং তথাগতো ন উপট্ঠাসী’’তি (অ. নি. ৪.২৪).

এৰং তথদস্সিতায তথাগতো. তত্থ তথদস্সীঅত্থে তথাগতোতি পদসম্ভৰো ৰেদিতব্বো.

কথং তথৰাদিতায তথাগতো? যং রত্তিং ভগৰা বোধিমণ্ডে অপরাজিতপল্লঙ্কে নিসিন্নো চতুন্নং মারানং মত্থকং মদ্দিত্ৰা অনুত্তরং সম্মাসম্বোধিং অভিসম্বুদ্ধো, যঞ্চ রত্তিং যমকসালানমন্তরে অনুপাদিসেসায নিব্বানধাতুযা পরিনিব্বাযি, এত্থন্তরে পঞ্চচত্তালীসৰস্সপরিমাণে কালে পঠমবোধিযম্পি মজ্ঝিমবোধিযম্পি পচ্ছিমবোধিযম্পি যং ভগৰতা ভাসিতং সুত্তং গেয্যং…পে… ৰেদল্লং. সব্বং তং অত্থতো ব্যঞ্জনতো চ অনুপৰজ্জং অনূনমনধিকং সব্বাকারপরিপুণ্ণং রাগমদনিম্মদনং দোসমোহমদনিম্মদনং, নত্থি তত্থ ৰালগ্গমত্তম্পি পক্খলিতং, সব্বং তং একমুদ্দিকায লঞ্ছিতং ৰিয, একনাল়িযা মিতং ৰিয, একতুলায তুলিতং ৰিয চ তথমেৰ হোতি অৰিতথং অনঞ্ঞথং. যথাহ –

‘‘যঞ্চ, চুন্দ, রত্তিং তথাগতো অনুত্তরং সম্মাসম্বোধিং অভিসম্বুজ্ঝতি, যঞ্চ রত্তিং অনুপাদিসেসায নিব্বানধাতুযা পরিনিব্বাযতি, যং এতস্মিং অন্তরে ভাসতি লপতি নিদ্দিসতি, সব্বং তং তথেৰ হোতি নো অঞ্ঞথা, তস্মা ‘তথাগতো’তি ৰুচ্চতী’’তি (দী. নি. ৩.১৮৮).

গদঅত্থো হি এত্থ গতসদ্দো. এৰং তথৰাদিতায তথাগতো.

অপি চ আগদনং আগদো, ৰচনন্তি অত্থো. তথো অৰিপরীতো আগদো অস্সাতি দকারস্স তকারং কত্ৰা তথাগতোতি এৰমেতস্মিং অত্থে পদসিদ্ধি ৰেদিতব্বা.

কথং তথাকারিতায তথাগতো? ভগৰতো হি ৰাচায কাযো অনুলোমেতি, কাযস্সাপি ৰাচা. তস্মা যথাৰাদী তথাকারী, যথাকারী তথাৰাদী চ হোতি. এৰংভূতস্স চস্স যথা ৰাচা, কাযোপি তথা গতো পৰত্তোতি অত্থো. যথা চ কাযো, ৰাচাপি তথা গতা পৰত্তাতি তথাগতো. তেনেৰাহ – ‘‘যথাৰাদী, ভিক্খৰে, তথাগতো তথাকারী, যথাকারী তথাৰাদী. ইতি যথাৰাদী তথাকারী, যথাকারী তথাৰাদী. ‘তস্মা তথাগতো’তি ৰুচ্চতী’’তি (অ. নি. ৪.২৩). এৰং তথাকারিতায তথাগতো.

কথং অভিভৰনট্ঠেন তথাগতো? উপরি ভৰগ্গং হেট্ঠা অৰীচিং পরিযন্তং কত্ৰা তিরিযং অপরিমাণাসু লোকধাতূসু সব্বসত্তে অভিভৰতি সীলেন সমাধিনা পঞ্ঞায ৰিমুত্তিযা ৰিমুত্তিঞাণদস্সনেন, ন তস্স তুলা ৰা পমাণং ৰা অত্থি, অথ খো অতুলো অপ্পমেয্যো অনুত্তরো রাজাতিরাজা দেৰানং অতিদেৰো সক্কানং অতিসক্কো ব্রহ্মানং অতিব্রহ্মা. তেনাহ –

‘‘সদেৰকে, ভিক্খৰে, লোকে…পে… সদেৰমনুস্সায পজায তথাগতো অভিভূ অনভিভূতো অঞ্ঞদত্থুদসো ৰসৰত্তী, তস্মা ‘তথাগতো’তি ৰুচ্চতী’’তি (অ. নি. ৪.২৩).

তত্থেৰং পদসিদ্ধি ৰেদিতব্বা – অগদো ৰিয অগদো. কো পনেস? দেসনাৰিলাসো চেৰ পুঞ্ঞুস্সযো চ. তেন হেস মহানুভাৰো ভিসক্কো দিব্বাগদেন সপ্পে ৰিয সব্বপরপ্পৰাদিনো সদেৰকঞ্চ লোকং অভিভৰতি. ইতি সব্বলোকাভিভৰনে তথো অৰিপরীতো দেসনাৰিলাসমযো চেৰ পুঞ্ঞমযো চ অগদো অস্সাতি দকারস্স তকারং কত্ৰা তথাগতোতি ৰেদিতব্বো. এৰং অভিভৰনট্ঠেন তথাগতো.

অপি চ তথায গতোতিপি তথাগতো, তথং গতোতিপি তথাগতো. গতোতি অৰগতো, অতীতো পত্তো পটিপন্নোতি অত্থো. তত্থ সকলং লোকং তীরণপরিঞ্ঞায তথায গতো অৰগতোতি তথাগতো, লোকসমুদযং পহানপরিঞ্ঞায তথায গতো অতীতোতি তথাগতো, লোকনিরোধং সচ্ছিকিরিযায তথায গতো পত্তোতি তথাগতো, লোকনিরোধগামিনিং পটিপদং তথং গতো পটিপন্নোতি তথাগতো. তেন যং ৰুত্তং ভগৰতা –

‘‘লোকো, ভিক্খৰে, তথাগতেন অভিসম্বুদ্ধো, লোকস্মা তথাগতো ৰিসংযুত্তো. লোকসমুদযো, ভিক্খৰে, তথাগতেন অভিসম্বুদ্ধো, লোকসমুদযো তথাগতস্স পহীনো. লোকনিরোধো, ভিক্খৰে, তথাগতেন অভিসম্বুদ্ধো, লোকনিরোধো তথাগতস্স সচ্ছিকতো. লোকনিরোধগামিনী পটিপদা, ভিক্খৰে, তথাগতেন অভিসম্বুদ্ধা, লোকনিরোধগামিনী পটিপদা তথাগতস্স ভাৰিতা. যং, ভিক্খৰে, সদেৰকস্স লোকস্স…পে… অনুৰিচরিতং মনসা, সব্বং তং তথাগতেন অভিসম্বুদ্ধং. তস্মা ‘তথাগতো’তি ৰুচ্চতী’’তি (অ. নি. ৪.২৩).

তস্স এৰম্পি অত্থো ৰেদিতব্বো. ইদম্পি চ তথাগতস্স তথাগতভাৰদীপেন মুখমত্তমেৰ. সব্বাকারেন পন তথাগতোৰ তথাগতস্স তথাগতভাৰং ৰণ্ণেয্য. যস্মা পন সব্ববুদ্ধা তথাগতগুণেনাপি সমসমা, তস্মা সব্বেসং ৰসেন ‘‘তথাগতা’’তি আহ.

অরহন্তোতি কিলেসেহি আরকত্তা, অরীনং অরানঞ্চ হতত্তা, পচ্চযাদীনং অরহত্তা, পাপকরণে রহাভাৰা তথাগতো অরহং. আরকা হি সো সব্বকিলেসেহি সুৰিদূরৰিদূরে ঠিতো মগ্গেন সৰাসনানং কিলেসানং ৰিদ্ধংসিতত্তাতি আরকত্তা অরহং.

‘‘সো ততো আরকা নাম, যস্স যেনাসমঙ্গিতা;

অসমঙ্গী চ দোসেহি, নাথো তেনারহং মতো’’.

তে চানেন কিলেসারযো মগ্গেন হতাতি অরীনং হতত্তাপি অরহং.

‘‘যস্মা রাগাদিসঙ্খাতা, সব্বেপি অরযো হতা;

পঞ্ঞাসত্থেন নাথেন, তস্মাপি অরহং মতো’’.

যঞ্চেতং অৰিজ্জাভৰতণ্হামযনাভিং পুঞ্ঞাদিঅভিসঙ্খারানং জরামরণনেমিং আসৰসমুদযমযেন অক্খেন ৰিজ্ঝিত্ৰা তিভৰরথে সমাযোজিতং অনাদিকালপ্পৰত্তং সংসারচক্কং, তস্সানেন বোধিমণ্ডে ৰীরিযপাদেহি সীলপথৰিযং পতিট্ঠায সদ্ধাহত্থেন কম্মক্খযকরং ঞাণফরসুং গহেত্ৰা সব্বে অরা হতাতি অরহং.

‘‘অরা সংসারচক্কস্স, হতা ঞাণাসিনা যতো;

লোকনাথেন তেনেস, ‘অরহ’ন্তি পৰুচ্চতি’’.

অগ্গদক্খিণেয্যত্তা চ চীৰরাদিপচ্চযে অরহতি পূজাৰিসেসঞ্চ, তেনেৰ চ উপ্পন্নে তথাগতে যে কেচি মহেসক্খা দেৰমনুস্সা, ন তে অঞ্ঞত্থ পূজং করোন্তি. তথা হি ব্রহ্মা সহম্পতি সিনেরুমত্তেন রতনদামেন তথাগতং পূজেসি, যথাবলঞ্চ অঞ্ঞে দেৰা চ মনুস্সা চ বিম্বিসারকোসলরাজাদযো. পরিনিব্বুতম্পি চ ভগৰন্তং উদ্দিস্স ছন্নৰুতিকোটিধনং ৰিস্সজ্জেত্ৰা অসোকমহারাজা সকলজম্বুদীপে চতুরাসীতিৰিহারসহস্সানি পতিট্ঠাপেসি. কো পন ৰাদো অঞ্ঞেসং পূজাৰিসেসানন্তি পচ্চযাদীনং অরহত্তাপি অরহং.

‘‘পূজাৰিসেসং সহ পচ্চযেহি, যস্মা অযং অরহতি লোকনাথো;

অত্থানুরূপং অরহন্তি লোকে, তস্মা জিনো অরহতি নামমেতং’’.

যথা চ লোকে যে কেচি পণ্ডিতমানিনো বালা অসিলোকভযেন রহো পাপং করোন্তি, এৰমেস ন কদাচি পাপং করোতীতি পাপকরণে রহাভাৰতোপি অরহং.

‘‘যস্মা নত্থি রহো নাম, পাপকম্মেসু তাদিনো;

রহাভাৰেন তেনেস, অরহং ইতি ৰিস্সুতো’’.

এৰং সব্বথাপি –

‘‘আরকত্তা হতত্তা চ, কিলেসারীন সো মুনি;

হতসংসারচক্কারো, পচ্চযাদীন চারহো;

ন রহো করোতি পাপানি, অরহং তেন ৰুচ্চতী’’তি.

যস্মা পন সব্বে বুদ্ধা অরহত্তগুণেনাপি সমসমা, তস্মা সব্বেসম্পি ৰসেন ‘‘অরহন্তো’’তি আহ. সম্মাসম্বুদ্ধাতি সম্মা সামঞ্চ সব্বধম্মানং বুদ্ধত্তা সম্মাসম্বুদ্ধো. তথা হেস সব্বধম্মে সম্মাসম্বুদ্ধো, অভিঞ্ঞেয্যে ধম্মে অভিঞ্ঞেয্যতো, পরিঞ্ঞেয্যে ধম্মে পরিঞ্ঞেয্যতো, পহাতব্বে ধম্মে পহাতব্বতো, সচ্ছিকাতব্বে ধম্মে সচ্ছিকাতব্বতো, ভাৰেতব্বে ধম্মে ভাৰেতব্বতো. তেনেৰাহ –

‘‘অভিঞ্ঞেয্যং অভিঞ্ঞাতং, ভাৰেতব্বঞ্চ ভাৰিতং;

পহাতব্বং পহীনং মে, তস্মা বুদ্ধোস্মি ব্রাহ্মণা’’তি. (সু. নি. ৫৬৩; ম. নি. ২.৩৯৯);

অথ ৰা চক্খু দুক্খসচ্চং, তস্স মূলকারণভাৰেন সমুট্ঠাপিকা পুরিমতণ্হা সমুদযসচ্চং, উভিন্নং অপ্পৰত্তি নিরোধসচ্চং, নিরোধপজাননা পটিপদা মগ্গসচ্চন্তি এৰং একেকপদুদ্ধারেনাপি সব্বধম্মে সম্মা সামঞ্চ বুদ্ধো. এস নযো সোতঘানজিৰ্হাকাযমনেসু. এতেনেৰ চ নযেন রূপাদীনি ছ আযতনানি, চক্খুৰিঞ্ঞাণাদযো ছ ৰিঞ্ঞাণকাযা, চক্খুসম্ফস্সাদযো ছ ফস্সা, চক্খুসম্ফস্সজা ৰেদনাদযো ছ ৰেদনা, রূপসঞ্ঞাদযো ছ সঞ্ঞা, রূপসঞ্চেতনাদযো ছ চেতনা, রূপতণ্হাদযো ছ তণ্হাকাযা, রূপৰিতক্কাদযো ছ ৰিতক্কা, রূপৰিচারাদযো ছ ৰিচারা, রূপক্খন্ধাদযো পঞ্চক্খন্ধা, দস কসিণানি, দস অনুস্সতিযো, উদ্ধুমাতকসঞ্ঞাদিৰসেন দস সঞ্ঞা, কেসাদযো দ্ৰত্তিংসাকারা, দ্ৰাদসাযতনানি, অট্ঠারস ধাতুযো, কামভৰাদযো নৰ ভৰা, পঠমাদীনি চত্তারি ঝানানি, মেত্তাভাৰনাদযো চতস্সো অপ্পমঞ্ঞাযো, চতস্সো অরূপসমাপত্তিযো, পটিলোমতো জরামরণাদীনি, অনুলোমতো অৰিজ্জাদীনি পটিচ্চসমুপ্পাদঙ্গানি চ যোজেতব্বানি.

তত্রাযং একপদযোজনা – জরামরণং দুক্খসচ্চং, জাতি সমুদযসচ্চং, উভিন্নং নিস্সরণং নিরোধসচ্চং, নিরোধপজাননা পটিপদা মগ্গসচ্চন্তি এৰং একেকপদুদ্ধারেন সব্বধম্মে সম্মা সামঞ্চ বুদ্ধো অনুবুদ্ধো পটিৰিদ্ধো. যং ৰা পন কিঞ্চি অত্থি নেয্যং নাম, সব্বস্স সম্মা সম্বুদ্ধত্তা ৰিমোক্খন্তিকঞাণৰসেন সম্মাসম্বুদ্ধো. তেসং পন ৰিভাগো উপরি আৰি ভৰিস্সতি. যস্মা পন সব্ববুদ্ধা সম্মাসম্বুদ্ধগুণেনাপি সমসমা, তস্মা সব্বেসম্পি ৰসেন ‘‘সম্মাসম্বুদ্ধা’’তি আহ.

মোনেনাতি কামঞ্হি মোনেয্যপটিপদাসঙ্খাতেন মগ্গঞাণমোনেন মুনি নাম হোতি, ইধ পন তুণ্হীভাৰং সন্ধায ‘‘ন মোনেনা’’তি ৰুত্তং. মূল়্হরূপোতি তুচ্ছরূপো. অৰিদ্দসূতি অৰিঞ্ঞূ. এৰরূপো হি তুণ্হীভূতোপি মুনি নাম ন হোতি. অথ ৰা মোনেয্যমুনি নাম ন হোতি, তুচ্ছভাৰো চ পন অঞ্ঞাণী চ হোতীতি অত্থো. যো চ তুলংৰ পগ্গয্হাতি যথা হি তুলং গহেত্ৰা ঠিতো অতিরেকং চে হোতি, হরতি, ঊনং চে হোতি, পক্খিপতি; এৰমেৰ সো অতিরেকং হরন্তো ৰিয পাপং হরতি পরিৰজ্জেতি, ঊনকে পক্খিপন্তো ৰিয কুসলং পরিপূরেতি. এৰঞ্চ পন করোন্তো সীলসমাধিপঞ্ঞাৰিমুত্তিৰিমুত্তিঞাণদস্সনসঙ্খাতং ৰরং উত্তমমেৰ আদায পাপানি অকুসলকম্মানি পরিৰজ্জেতি স মুনি নামাতি অত্থো. তেন সো মুনীতি কস্মা পন সো মুনীতি চে? যং হেট্ঠা ৰুত্তকারণং, তেন সো মুনীতি অত্থো. যো মুনাতি উভো লোকেতি যো পুগ্গলো ইমস্মিং খন্ধাদিলোকে তুলং আরোপেত্ৰা মিনন্তো ৰিয ‘‘ইমে অজ্ঝত্তিকা খন্ধা, ইমে বাহিরা’’তিআদিনা নযেন ইমে উভো অত্থে মুনাতি. মুনি তেন পৰুচ্চতীতি তেন পন কারণেন ‘‘মুনী’’তি ৰুচ্চতিযেৰাতি অত্থো.

অসতঞ্চাতি গাথায অযং সঙ্খেপত্থো – য্ৰাযং অকুসলকুসলপ্পভেদো, অসতঞ্চ সতঞ্চ ধম্মো, তং ‘‘অজ্ঝত্তং বহিদ্ধা’’তি ইমস্মিং সব্বলোকে পৰিচযঞাণেন অসতঞ্চ সতঞ্চ ঞত্ৰা ধম্মং. তস্স ঞাতত্তা এৰ, রাগাদিভেদতো সত্তৰিধং সঙ্গং তণ্হাদিট্ঠিভেদতো দুৰিধং জালঞ্চ অতিচ্চ অতিক্কমিত্ৰা ঠিতো, সো তেন মোনসঙ্খাতেন পৰিচযঞাণেন সমন্নাগতত্তা মুনি. দেৰমনুস্সেহি পূজিতোতি ইদং পনস্স থুতিৰচনং. সো হি খীণাসৰমুনিত্তা দেৰমনুস্সানং পূজারহো হোতি, তস্মা এৰং ৰুত্তোতি.

সল্লন্তি মূলপদং. সত্ত সল্লানীতি গণনপরিচ্ছেদো. রাগসল্লন্তি রঞ্জনট্ঠেন রাগো চ পীল়াজনকতায অন্তোতুদনতায দুন্নীহরণতায সল্লঞ্চাতি রাগসল্লং. দোসসল্লাদীসুপি এসেৰ নযো. অব্বূল়্হসল্লোতি মূলপদং. অব্বহিতসল্লোতি নীহটসল্লো. উদ্ধতসল্লোতি উদ্ধং হটসল্লো উদ্ধরিতসল্লো. সমুদ্ধতসল্লোতি উপসগ্গৰসেন ৰুত্তো. উপ্পাটিতসল্লোতি লুঞ্চিতসল্লো. সমুপ্পাটিতসল্লোতি উপসগ্গৰসেনেৰ.

সক্কচ্চকারীতি দানাদীনং কুসলধম্মানং ভাৰনায পুগ্গলস্স ৰা দেয্যধম্মস্স ৰা সক্কচ্চকরণৰসেন সক্কচ্চকারী. সততভাৰকরণেন সাতচ্চকারী. অট্ঠিতকরণেন অট্ঠিতকারী. যথা নাম ককণ্টকো থোকং গন্ত্ৰা থোকং তিট্ঠতি, ন নিরন্তরং গচ্ছতি; এৰমেৰ যো পুগ্গলো একদিৰসং দানং দত্ৰা পূজং ৰা কত্ৰা ধম্মং ৰা সুত্ৰা সমণধম্মং ৰা কত্ৰা পুন চিরস্সং করোতি, তং ন নিরন্তরং পৰত্তেতি. সো ‘‘অসাতচ্চকারী, অনট্ঠিতকারী’’তি ৰুচ্চতি. অযং এৰং ন করোতীতি অট্ঠিতকারী. অনোলীনৰুত্তিকোতি নিরন্তরকরণসঙ্খাতস্স ৰিপ্ফারস্স ভাৰেন ন লীনৰুত্তিকোতি অনোলীনৰুত্তিকো. অনিক্খিত্তচ্ছন্দোতি কুসলকরণে ৰীরিযচ্ছন্দস্স অনিক্খিত্তভাৰেন অনিক্খিত্তচ্ছন্দো. অনিক্খিত্তধুরোতি ৰীরিযধুরস্স অনোরোপনেন অনিক্খিত্তধুরো, অনোসক্কিতমানসোতি অত্থো. যো তত্থ ছন্দো চ ৰাযামো চাতি যো তেসু কুসলধম্মেসু কত্তুকম্যতাধম্মচ্ছন্দো চ পযত্তসঙ্খাতো ৰাযামো চ. উস্সহনৰসেন উস্সাহো চ. অধিমত্তুস্সহনৰসেন উস্সোল়্হী চ. ৰাযামো চেসো পারং গমনট্ঠেন. উস্সাহো চেসো পুব্বঙ্গমনট্ঠেন. উস্সোল়্হী চেসো অধিমত্তট্ঠেন. অপ্পটিৰানি চাতি অনিৰত্তনা চ. সতি চ সম্পজঞ্ঞন্তি সরতীতি সতি. সম্পজানাতীতি সম্পজঞ্ঞং, সমন্ততো পকারেহি জানাতীতি অত্থো. সাত্থকসম্পজঞ্ঞং সপ্পাযসম্পজঞ্ঞং গোচরসম্পজঞ্ঞং অসম্মোহসম্পজঞ্ঞন্তি ইমস্স সম্পজানস্স ৰসেন ভেদো ৰেদিতব্বো. আতপ্পন্তি কিলেসতাপনৰীরিযং. পধানন্তি উত্তমৰীরিযং. অধিট্ঠানন্তি কুসলকরণে পতিট্ঠাভাৰো. অনুযোগোতি অনুযুঞ্জনং. অপ্পমাদোতি নপ্পমজ্জনং, সতিযা অৰিপ্পৰাসো.

ইমং লোকং নাসীসতীতি মূলপদং. সকত্তভাৰন্তি অত্তনো অত্তভাৰং. পরত্তভাৰন্তি পরলোকে অত্তভাৰং. সকরূপৰেদনাদযো অত্তনো পঞ্চক্খন্ধে, পররূপৰেদনাদযো চ পরলোকে পঞ্চক্খন্ধে. কামধাতুন্তি কামভৰং. রূপধাতুন্তি রূপভৰং. অরূপধাতুন্তি অরূপভৰং. পুন রূপারূপৰসেন দুকং দস্সেতুং কামধাতুং রূপধাতুং একং কত্ৰা, অরূপধাতুং একং কত্ৰা ৰুত্তং. গতিং ৰাতি পতিট্ঠানৰসেন পঞ্চগতি ৰুত্তা. উপপত্তিং ৰাতি নিব্বত্তিৰসেন চতুযোনি ৰুত্তা. পটিসন্ধিং ৰাতি তিণ্ণং ভৰানং ঘটনৰসেন পটিসন্ধি ৰুত্তা. ভৰং ৰাতি কম্মভৰৰসেন. সংসারং ৰাতি খন্ধাদীনং অব্বোচ্ছিন্নৰসেন. ৰট্টং ৰাতি তেভূমকৰট্টং নাসীসতীতি.

সদ্ধম্মপ্পজ্জোতিকায মহানিদ্দেসট্ঠকথায

গুহট্ঠকসুত্তনিদ্দেসৰণ্ণনা নিট্ঠিতা.

৩. দুট্ঠট্ঠকসুত্তনিদ্দেসৰণ্ণনা

১৫. দুট্ঠট্ঠকে পঠমগাথাযং তাৰ তত্থ ৰদন্তীতি ভগৰন্তং ভিক্খুসঙ্ঘঞ্চ উপৰদন্তি. দুট্ঠমনাপি একে, অথোপি ৰে সচ্চমনাতি একচ্চে দুট্ঠচিত্তা, একচ্চে তথসঞ্ঞিনোপি হুত্ৰা তিত্থিযা তুট্ঠচিত্তা, যে তেসং সুত্ৰা সদ্দহিংসু, তে সচ্চমনাতি অধিপ্পাযো. ৰাদঞ্চ জাতন্তি এতং অক্কোসৰাদং উপ্পন্নং. মুনি নো উপেতীতি অকারকতায চ অকুপ্পনতায চ বুদ্ধমুনি ন উপেতি. তস্মা মুনী নত্থি খিলো কুহিঞ্চীতি তেন কারণেন অযং মুনি, রাগাদিখিলেহি নত্থি খিলো কুহিঞ্চীতি ৰেদিতব্বো.

দুট্ঠমনাতি উপ্পন্নেহি দোসেহি দূসিতচিত্তা. ৰিরুদ্ধমনাতি তেহি কিলেসেহি কুসলস্স দ্ৰারং অদত্ৰা আৰরিতচিত্তা. পটিৰিরুদ্ধমনাতি উপসগ্গৰসেন পদং ৰড্ঢিতং. আহতমনাতি পটিঘেন আহতং চিত্তং এতেসন্তি আহতমনা. পচ্চাহতমনাতি উপসগ্গৰসেনেৰ. আঘাতিতমনাতি ৰিহিংসাৰসেন আঘাতিতং মনং এতেসন্তি আঘাতিতমনা. পচ্চাঘাতিতমনাতি উপসগ্গৰসেনেৰ. অথ ৰা ‘‘কোধৰসেন দুট্ঠমনা, উপনাহৰসেন পদুট্ঠমনা, মক্খৰসেন ৰিরুদ্ধমনা, পল়াসৰসেন পটিৰিরুদ্ধমনা, দোসৰসেন আহতপচ্চাহতমনা, ব্যাপাদৰসেন আঘাতিতপচ্চাঘাতিতমনা. পচ্চযানং অলাভেন দুট্ঠমনা পদুট্ঠমনা, অযসেন ৰিরুদ্ধমনা পটিৰিরুদ্ধমনা, গরহেন আহতপচ্চাহতমনা, দুক্খৰেদনাসমঙ্গীভাৰেন আঘাতিতপচ্চাঘাতিতমনা’’তি এৰমাদিনা নযেন একে ৰণ্ণযন্তি. উপৰদন্তীতি গরহং উপ্পাদেন্তি. অভূতেনাতি অসংৰিজ্জমানেন.

সদ্দহন্তাতি পসাদৰসেন সদ্ধং উপ্পাদেন্তা. ওকপ্পেন্তাতি গুণৰসেন ওতরিত্ৰা অৰকপ্পযন্তা. অধিমুচ্চন্তাতি সম্পসাদনৰসেন সন্নিট্ঠানং কত্ৰা তেসং কথং অধিৰাসেন্তা. সচ্চমনাতি তচ্ছমনা. সচ্চসঞ্ঞিনোতি তচ্ছসঞ্ঞিনো. তথমনাতি অৰিপরীতমনা. ভূতমনাতি ভূতত্থমনা. যাথাৰমনাতি নিচ্চলমনা. অৰিপরীতমনাতি নিচ্ছযমনা. তত্থ ‘‘সচ্চমনা সচ্চসঞ্ঞিনো’’তি সচ্চৰাদিগুণং, ‘‘তথমনা তথসঞ্ঞিনো’’তি সচ্চসদ্ধাগুণং, ‘‘ভূতমনা ভূতসঞ্ঞিনো’’তি ঠিতগুণং, ‘‘যাথাৰমনা যাথাৰসঞ্ঞিনো’’তি পচ্চযিকগুণং, ‘‘অৰিপরীতমনা অৰিপরীতসঞ্ঞিনো’’তি অৰিসংৰাদগুণং কথিতন্তি ঞাতব্বং.

পরতোঘোসোতি অঞ্ঞেসং সন্তিকা উপ্পন্নসদ্দো. অক্কোসোতি জাতিআদীসু দসসু অক্কোসেসু অঞ্ঞতরো. যো ৰাদং উপেতীতি যো পুগ্গলো উপৰাদং উপগচ্ছতি. কারকো ৰাতি কতদোসো ৰা. কারকতাযাতি দোসস্স কতভাৰেন ৰুচ্চমানোতি কথিযমানো. উপৰদিযমানোতি দোসং উপৰজ্জমানো. কুপ্পতীতি কোপং করোতি.

খীলজাততাপি নত্থীতি চিত্তবন্ধভাৰচিত্তকচৰরভাৰসঙ্খাতং পটিঘখিলং জাতং অস্সাতি খিলজাতো, তস্স ভাৰো খিলজাততা, তাপি নত্থি ন সন্তি. পঞ্চপি চেতোখিলাতি কামে অৰীতরাগো, কাযে অৰীতরাগো, রূপে অৰীতরাগো, যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতি, অঞ্ঞতরং দেৰনিকাযং পণিধায ব্রহ্মচরিযং চরতি ‘‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি, দেৰঞ্ঞতরো ৰা’’তি (ম. নি. ১.১৮৬) এৰরূপা পঞ্চপি চিত্তস্স বন্ধভাৰকচৰরভাৰসঙ্খাতা চেতোখিলা নত্থি.

১৬. ইমঞ্চ গাথং ৰত্ৰা ভগৰা আনন্দত্থেরং পুচ্ছি – ‘‘এৰং খুংসেত্ৰা ৰম্ভেত্ৰা ৰুচ্চমানা ভিক্খূ, আনন্দ, কিং ৰদন্তী’’তি, ‘‘ন কিঞ্চি ভগৰা’’তি. ‘‘ন, আনন্দ, ‘অহং সীলৰা’তি সব্বত্থ তুণ্হী ভৰিতব্বং. লোকে হি নাভাসমানং জানন্তি, মিস্সং বালেহি পণ্ডিত’’ন্তি (সং. নি. ২.২৪১) ৰত্ৰা ‘‘ভিক্খূ, আনন্দ, তে মনুস্সে এৰং পটিচোদেন্তূ’’তি ধম্মদেসনত্থায ‘‘অভূতৰাদী নিরযং উপেতী’’তি (ধ. প. ৩০৬; উদা. ৩৮; ইতিৰু. ৪৮; সু. নি. ৬৬৬) ইমং গাথং অভাসি. থেরো তং উগ্গহেত্ৰা ভিক্খূ আহ – ‘‘মনুস্সা তুম্হেহি ইমায গাথায পটিচোদেতব্বা’’তি. ভিক্খূ তথা অকংসু. পণ্ডিতমনুস্সা তুণ্হী অহেসুং. রাজাপি রাজপুরিসে সব্বত্থ পেসেত্ৰা যেসং ধুত্তানং লঞ্জং দত্ৰা তিত্থিযা তং মারাপেসুং, তে গহেত্ৰা নিগ্গয্হ তং পৰত্তিং ঞত্ৰা তিত্থিযে পরিভাসি. মনুস্সাপি তিত্থিযে দিস্ৰা লেড্ডুনা হনন্তি, পংসুনা ওকিরন্তি ‘‘ভগৰতো অযসং উপ্পাদেসু’’ন্তি. আনন্দত্থেরো তং দিস্ৰা ভগৰতো আরোচেসি, ভগৰা থেরস্স ইমং গাথমভাসি ‘‘সকঞ্হি দিট্ঠিং…পে… ৰদেয্যা’’তি.

তস্স অত্থো – যাযং দিট্ঠি তিত্থিযজনস্স ‘‘সুন্দরিং মারেত্ৰা সমণানং সক্যপুত্তিযানং অৰণ্ণং পকাসেত্ৰা এতেনুপাযেন লদ্ধং সক্কারং সাদিযিস্সামা’’তি সো তং দিট্ঠিং কথং অতিক্কমেয্য? অথ খো সো অযসো তমেৰ তিত্থিযজনং পচ্চাগতো তং দিট্ঠিং অচ্চেতুং অসক্কোন্তং. যো ৰা সস্সতাদিৰাদী, সোপি সকং দিট্ঠিং কথমচ্চযেয্য, তেন দিট্ঠিছন্দেন অনুনীতো তায চ দিট্ঠিরুচিযা নিৰিট্ঠো, অপি চ খো পন সযং সমত্তানি পকুব্বমানো অত্তনাৰ পরিপুণ্ণানি তানি দিট্ঠিগতানি করোন্তো যথা জানেয্য, তথেৰ ৰদেয্যাতি.

অৰণ্ণং পকাসযিত্ৰাতি অগুণং পাকটং কত্ৰা. সক্কারন্তি চতুন্নং পচ্চযানং সক্কচ্চকরণং. সম্মানন্তি চিত্তেন বহুমাননং. পচ্চাহরিস্সামাতি এতং লাভাদিং নিব্বত্তেস্সাম. এৰংদিট্ঠিকাতি এৰংলদ্ধিকা. যথা তং ‘‘লাভাদিং নিব্বত্তেস্সামা’’তি এৰং অযং লদ্ধি তেসং অত্থি, তথা ‘‘অত্থি মে ৰুত্তপ্পকারো ধম্মো’’তি এতেসং খমতি চেৰ রুচ্চতি চ, এৰংসভাৰমেৰ ৰা তেসং চিত্তং ‘‘অত্থি মে চিত্ত’’ন্তি. তদা তেসং দিট্ঠি ৰা, দিট্ঠিযা সহ খন্তি ৰা, দিট্ঠিখন্তীহি সদ্ধিং রুচি ৰা, দিট্ঠিখন্তিরুচীহি সদ্ধিং লদ্ধি ৰা, দিট্ঠিখন্তিরুচিলদ্ধীহি সদ্ধিং অজ্ঝাসযো ৰা, দিট্ঠিখন্তিরুচিলদ্ধিঅজ্ঝাসযেহি সদ্ধিং অধিপ্পাযো ৰা হোতীতি দস্সেন্তো ‘‘এৰংদিট্ঠিকা…পে… এৰংঅধিপ্পাযা’’তি আহ. সকং দিট্ঠিন্তি অত্তনো দস্সনং. সকং খন্তিন্তি অত্তনো সহনং. সকং রুচিন্তি অত্তনো রুচিং. সকং লদ্ধিন্তি অত্তনো লদ্ধিং. সকং অজ্ঝাসযন্তি অত্তনো অজ্ঝাসযং. সকং অধিপ্পাযন্তি অত্তনো ভাৰং. অতিক্কমিতুন্তি সমতিক্কমিতুং. অথ খো স্ৰেৰ অযসোতি সো এৰ অযসো একংসেন. তে পচ্চাগতোতি তেসং পতিআগতো. তেতি সামিঅত্থে উপযোগৰচনং.

অথ ৰাতি অত্থন্তরদস্সনং. সস্সতোতি নিচ্চো ধুৰো. লোকোতি অত্তভাৰো. ইদমেৰ সচ্চং, মোঘমঞ্ঞন্তি ইদং এৰ তচ্ছং তথং, অঞ্ঞং তুচ্ছং. সমত্তাতি সম্পুণ্ণা. সমাদিন্নাতি সম্মা আদিন্না. গহিতাতি উপগন্ত্ৰা গহিতা.

পরামট্ঠাতি সব্বাকারেন পরামসিত্ৰা গহিতা. অভিনিৰিট্ঠাতি ৰিসেসেন লদ্ধপ্পতিট্ঠা. অসস্সতোতি ৰুত্তৰিপরিযাযেন ৰেদিতব্বো.

অন্তৰাতি সঅন্তো. অনন্তৰাতি ৰুদ্ধিঅনন্তৰা. তং জীৰন্তি সো জীৰো, লিঙ্গৰিপল্লাসো কতো. জীৰোতি চ অত্তাযেৰ. তথাগতোতি সত্তো, ‘‘অরহ’’ন্তি একে. পরং মরণাতি মরণতো উদ্ধং, পরলোকেতি অত্থো. ন হোতি তথাগতো পরং মরণাতি মরণতো উদ্ধং ন হোতি. হোতি চ ন চ হোতি তথাগতো পরং মরণাতি মরণতো উদ্ধং হোতি চ ন হোতি চ. নেৰ হোতি ন ন হোতি তথাগতো পরং মরণাতি উচ্ছেদৰসেন নেৰ হোতি, তক্কিকৰসেন ন ন হোতি.

সকায দিট্ঠিযাতিআদযো করণৰচনং. অল্লীনোতি একীভূতো.

সযং সমত্তং করোতীতি অত্তনা ঊনভাৰং মোচেত্ৰা সম্মা অত্তং সমত্তং করোতি. পরিপুণ্ণন্তি অতিরেকদোসং মোচেত্ৰা সম্পুণ্ণং. অনোমন্তি হীনদোসং মোচেত্ৰা অলামকং. অগ্গন্তি আদিং. সেট্ঠন্তি পধানং নিদ্দোসং. ৰিসেসন্তি জেট্ঠকং. পামোক্খন্তি অধিকং. উত্তমন্তি ৰিসেসং ন হেট্ঠিমং. পৰরং করোতীতি অতিরেকেন উত্তমং করোতি. অথ ৰা ‘‘আসযদোসমোচনেন অগ্গং, সংকিলেসদোসমোচনেন সেট্ঠং, উপক্কিলেসদোসমোচনেন ৰিসেসং, পমত্তদোসমোচনেন পামোক্খং, মজ্ঝিমদোসমোচনেন উত্তমং, উত্তমমজ্ঝিমদোসমোচনেন পৰরং করোতী’’তি এৰমেকে ৰণ্ণযন্তি. অযং সত্থা সব্বঞ্ঞূতি অযং অম্হাকং সত্থা সব্বজাননৰসেন সব্বঞ্ঞূ. অযং ধম্মো স্ৰাক্খাতোতি অযং অম্হাকং ধম্মো সুট্ঠু অক্খাতো. অযং গণো সুপ্পটিপন্নোতি অযং অম্হাকং গণো সুট্ঠু পটিপন্নো. অযং দিট্ঠি ভদ্দিকাতি অযং অম্হাকং লদ্ধি সুন্দরা. অযং পটিপদা সুপঞ্ঞত্তাতি অযং অম্হাকং পুব্বভাগা অত্তন্ত পাদিপটিপদা সুট্ঠু পঞ্ঞত্তা. অযং মগ্গো নিয্যানিকোতি অযং অম্হাকং নিয্যামোক্কন্তিকো মগ্গো নিয্যানিকোতি সযং সমত্তং করোতি.

কথেয্য ‘‘সস্সতো লোকো’’তি. ভণেয্য ‘‘ইদমেৰ সচ্চং মোঘমঞ্ঞ’’ন্তি. দীপেয্য ‘‘অন্তৰা লোকো’’তি. ৰোহরেয্য নানাৰিধেন গণ্হাপেয্য ‘‘হোতি চ ন চ হোতী’’তি.

১৭. অথ রাজা সত্তাহচ্চযেন তং কুণপং ছড্ডাপেত্ৰা সাযন্হসমযং ৰিহারং গন্ত্ৰা ভগৰন্তং অভিৰাদেত্ৰা আহ – ‘‘ননু, ভন্তে, ঈদিসে অযসে উপ্পন্নে ময্হম্পি আরোচেতব্বং সিযা’’তি? এৰং ৰুত্তে ভগৰা ‘‘ন, মহারাজ, ‘অহং সীলৰা গুণসম্পন্নো’তি পরেসং আরোচেতুং অরিযানং পটিরূপ’’ন্তি ৰত্ৰা তস্সা অট্ঠুপ্পত্তিযা ‘‘যো অত্তনো সীলৰতানীতি অৰসেসগাথাযো অভাসি.

তত্থ সীলৰতানীতি পাতিমোক্খাদীনি সীলানি, আরঞ্ঞিকাদীনি ধুতঙ্গৰতানি চ. অনানুপুট্ঠোতি অপুচ্ছিতো. পাৰাতি ৰদতি. অনরিযধম্মং কুসলা তমাহু, যো আতুমানং সযমেৰ পাৰাতি যো এৰং অত্তানং সযমেৰ ৰদতি, তস্স তং ৰাদং ‘‘অনরিযধম্মো এসো’’তি কুসলা এৰং কথেন্তি.

অত্থি সীলঞ্চেৰ ৰতঞ্চাতি সীলনট্ঠেন সীলঞ্চেৰ অত্থি, সমাদানট্ঠেন ৰতঞ্চ অত্থি, ৰতং ন সীলন্তি ৰুত্তত্থেন ৰতং অত্থি, তং ন সীলং. কতমন্তি কথেতুকম্যতাপুচ্ছা. ইধ ভিক্খু সীলৰাতিআদযো ৰুত্তনযা এৰ. সংৰরট্ঠেনাতি সংৰরণট্ঠেন, ৰীতিক্কমদ্ৰারং পিদহনট্ঠেন. সমাদানট্ঠেনাতি তং তং সিক্খাপদং সম্মা আদানট্ঠেন. আরঞ্ঞিকঙ্গন্তি অরঞ্ঞে নিৰাসো সীলং অস্সাতি আরঞ্ঞিকো, তস্স অঙ্গং আরঞ্ঞিকঙ্গং. পিণ্ডপাতিকঙ্গন্তি ভিক্খাসঙ্খাতানং পরআমিসপিণ্ডানং পাতো পিণ্ডপাতো, পরেহি দিন্নানং পিণ্ডানং পত্তে নিপতনন্তি ৰুত্তং হোতি. তং পিণ্ডপাতং উঞ্ছতি তং তং কুলং উপসঙ্কমন্তো গৰেসতীতি পিণ্ডপাতিকো, পিণ্ডায ৰা পতিতুং ৰতমেতস্সাতি পিণ্ডপাতী. পতিতুন্তি চরিতুং. পিণ্ডপাতী এৰ পিণ্ডপাতিকো, তস্স অঙ্গং পিণ্ডপাতিকঙ্গং. অঙ্গন্তি কারণং ৰুচ্চতি. তস্মা যেন সমাদানেন সো পিণ্ডপাতিকো হোতি, তস্সেতং অধিৰচনন্তি ৰেদিতব্বং. এতেনেৰ নযেন রথিকাসুসানসঙ্কারকূটাদীনং যত্থ কত্থচি পংসূনং উপরি ঠিতত্তা অব্ভুগ্গতট্ঠেন তেসু পংসুকূলমিৰাতি পংসুকূলং. অথ ৰা পংসু ৰিয কুচ্ছিতভাৰং উলতীতি পংসুকূলং, কুচ্ছিতভাৰং গচ্ছতীতি ৰুত্তং হোতি. এৰং লদ্ধনিব্বচনস্স পংসুকূলস্স ধারণং পংসুকূলং, পংসুকূলং সীলমস্সাতি পংসুকূলিকো, পংসুকূলিকস্স অঙ্গং পংসুকূলিকঙ্গং. সঙ্ঘাটিউত্তরাসঙ্গঅন্তরৰাসকসঙ্খাতং তিচীৰরং সীলমস্সাতি তেচীৰরিকো, তেচীৰরিকস্স অঙ্গং তেচীৰরিকঙ্গং. সপদানচারিকঙ্গন্তি দানং ৰুচ্চতি অৰখণ্ডনং, অপেতং দানতো অপদানং, অনৰখণ্ডনন্তি অত্থো. সহ অপদানেন সপদানং, অৰখণ্ডনৰিরহিতং, অনুঘরন্তি ৰুত্তং হোতি. সপদানং চরিতুং ইদমস্স সীলন্তি সপদানচারী, সপদানচারীযেৰ সপদানচারিকো, তস্স অঙ্গং সপদানচারিকঙ্গং. খলুপচ্ছাভত্তিকঙ্গন্তি খলূতি পটিসেধনত্থে নিপাতো. পৰারিতেন সতা পচ্ছা লদ্ধং ভত্তং পচ্ছাভত্তং নাম, তস্স পচ্ছাভত্তস্স ভোজনং পচ্ছাভত্তভোজনং, তস্মিং পচ্ছাভত্তভোজনে পচ্ছাভত্তসঞ্ঞং কত্ৰা পচ্ছাভত্তং সীলমস্সাতি পচ্ছাভত্তিকো, ন পচ্ছাভত্তিকো খলুপচ্ছাভত্তিকো, সমাদানৰসেন পটিক্খিত্তাতিরিত্তভোজনস্সেতং নামং, তস্স অঙ্গং খলুপচ্ছাভত্তিকঙ্গং. নেসজ্জিকঙ্গন্তি সযনং পটিক্খিপিত্ৰা নিসজ্জায ৰিহরিতুং সীলমস্সাতি নেসজ্জিকো, তস্স অঙ্গং নেসজ্জিকঙ্গং. যথাসন্থতিকঙ্গন্তি যদেৰ সন্থতং যথাসন্থতং, ‘‘ইদং তুয্হং পাপুণাতী’’তি এৰং পঠমং উদ্দিট্ঠসেনাসনস্সেতং অধিৰচনং. তস্মিং যথাসন্থতে ৰিহরিতুং সীলমস্সাতি যথাসন্থতিকো, তস্স অঙ্গং যথাসন্থতিকঙ্গং. সব্বানেৰ পনেতানি তেন তেন সমাদানেন ধুতকিলেসত্তা ধুতস্স ভিক্খুনো অঙ্গানি, কিলেসধুননতো ৰা ধুতন্তি লদ্ধৰোহারং ঞাণং অঙ্গং এতেসন্তি ধুতঙ্গানি. অথ ৰা ধুতানি চ তানি পটিপক্খানং ধুননতো অঙ্গানি চ পটিপত্তিযাতিপি ধুতঙ্গানি. এৰং তাৰেত্থ অত্থতো ৰিঞ্ঞাতব্বো ৰিনিচ্ছযো. সব্বানেৰ চেতানি সমাদানচেতনালক্খণানি. ৰুত্তম্পি চেতং –

‘‘যো সমাদিযতি, সো পুগ্গলো. যেন সমাদিযতি, চিত্তচেতসিকা এতে ধম্মা. যা সমাদানচেতনা, তং ধুতঙ্গং. যং পটিক্খিপতি, তং ৰত্থু’’ন্তি (ৰিসুদ্ধি. ১.২৩).

সব্বানেৰ চ লোলুপ্পৰিদ্ধংসনরসানি, নিল্লোলুপ্পভাৰপচ্চুপট্ঠানানি, অপ্পিচ্ছতাদিঅরিযধম্মপদট্ঠানানি. এৰমেত্থ লক্খণাদীহি ৰিনিচ্ছযো ৰেদিতব্বো.

ৰীরিযসমাদানম্পীতি ৰীরিযগ্গহণম্পি. কামন্তি একংসত্থে নিপাতো. তচো চ ন্হারু চাতি ছৰি চ ন্হারুৰল্লিযো চ. অট্ঠি চাতি সব্বা অট্ঠিযো চ. অৰসিস্সতূতি তিট্ঠতু. উপসুস্সতু মংসলোহিতন্তি সব্বং মংসঞ্চ লোহিতঞ্চ সুক্খতু. ‘‘তচো’’তি একং অঙ্গং, ‘‘ন্হারূ’’তি একং, ‘‘অট্ঠী’’তি একং, ‘‘উপসুস্সতু মংসলোহিত’’ন্তি একং অঙ্গং. যং তন্তি উপরি ৰত্তব্বপদেন সম্বন্ধো. পুরিসথামেনাতি পুরিসস্স কাযিকেন বলেন, বলেনাতি ঞাণবলেন. ৰীরিযেনাতি চেতসিকঞাণৰীরিযতেজেন. পরক্কমেনাতি পরং পরং ঠানং অক্কমনেন উস্সাহপ্পত্তৰীরিযেন. পত্তব্বন্তি যং তং পাপুণিতব্বং. ন তং অপাপুণিত্ৰাতি তং পত্তব্বং অপ্পত্ৰা. ৰীরিযস্স সণ্ঠানং ভৰিস্সতীতি ৰুত্তপ্পকারস্স ৰীরিযস্স সিথিলত্তং ওসীদনং ন ভৰিস্সতি. ‘‘পট্ঠান’’ন্তিপি পাঠো, অযমেৰত্থো. চিত্তং পগ্গণ্হাতীতি চিত্তং উস্সাহং গণ্হাপেতি. পদহতীতি পতিট্ঠাপেতি.

নাসিস্সন্তি ন খাদিস্সামি ন ভুঞ্জিস্সামি. ন পিৰিস্সামীতি যাগুপানাদীনি ন পিৰিস্সামি. ৰিহারতো ন নিক্খমেতি সেনাসনতো বহি ন নিক্খমেয্যং. নপি পস্সং নিপাতেস্সন্তি পস্সং মঞ্চে ৰা পীঠে ৰা ভূমিযং ৰা কটসন্থরকে ৰা পাতনং ঠপনং ন করিস্সামি. তণ্হাসল্লে অনূহতেতি তণ্হাসঙ্খাতে কণ্ডে অনুদ্ধটে, অৰিগতেতি অত্থো.

ইমং পল্লঙ্কন্তি সমন্ততো আভুজিতং ঊরুবদ্ধাসনং. ন ভিন্দিস্সামীতি ন ৰিজহিস্সামি. যাৰ মে ন অনুপাদাযাতি চতূহি উপাদানেহি গহণং অগ্গহেত্ৰা. আসৰেহীতি কামাসৰাদীহি চতূহি আসৰেহি. ৰিমুচ্চিস্সতীতি সমুচ্ছেদৰিমুত্তিযা ন মুচ্চিস্সতি. ন তাৰাহং ইমম্হা আসনা ৰুট্ঠহিস্সামীতি আদিং কত্ৰা যাৰ রুক্খমূলা নিক্খমিস্সামীতি ওকাসৰসেন ৰুত্তা. ইমস্মিঞ্ঞেৰ পুব্বণ্হসমযং অরিযধম্মং আহরিস্সামীতি আদিং কত্ৰা যাৰ গিম্হেতি কালৰসেন ৰুত্তা. পুরিমে ৰযোখন্ধেতিআদযো ৰযৰসেন ৰুত্তা. তত্থ আসনা ন ৰুট্ঠহিস্সামীতি নিসিন্নাসনা ন উট্ঠহিস্সামি. অড্ঢযোগাতি নিকুণ্ডগেহা. পাসাদাতি দীঘপাসাদা. হম্মিযাতি মুণ্ডচ্ছদনগেহা. গুহাযাতি পংসুগুহায. লেণাতি মরিযাদছিন্নচ্ছিদ্দা পব্বতলেণা. কুটিযাতি উল্লিত্তাদিকুটিযা. কূটাগারাতি কণ্ণিকং আরোপেত্ৰা কতগেহতো. অট্টাতি দ্ৰারট্টালকা. মাল়াতি ৰট্টগেহা. উদ্দণ্ডো নাম একো পতিস্সযৰিসেসো. ‘‘তিছদনগেহো’’তিপি একে. উপট্ঠানসালাতি সন্নিপাতসালা ভোজনসালা ৰা. মণ্ডপাদযো পাকটাযেৰ. অরিযধম্মন্তি অনৰজ্জধম্মং, অরিযানং ৰা বুদ্ধপচ্চেকবুদ্ধবুদ্ধসাৰকানং ধম্মং. আহরিস্সামীতি মম চিত্তসমীপং আনযিস্সামি সীলেন. সমাহরিস্সামীতি ৰিসেসেন আনযিস্সামি সমাধিনা. অধিগচ্ছিস্সামীতি পটিলাভৰসেন গমিস্সামি তদঙ্গেন. ফস্সযিস্সামীতি ফুসিস্সামি মগ্গেন. সচ্ছিকরিস্সামীতি পচ্চক্খং করিস্সামি ফলেন. অথ ৰা সোতাপত্তিমগ্গেন আহরিস্সামি. সকদাগামিমগ্গেন সমাহরিস্সামি, অনাগামিমগ্গেন অধিগচ্ছিস্সামি, অরহত্তমগ্গেন ফস্সযিস্সামি, পচ্চৰেক্খণেন সচ্ছিকরিস্সামি. দ্ৰীসুপি নযেসু ফস্সযিস্সামীতি নামকাযেন নিব্বানং ফুসিস্সামীতি অত্থো.

অপুট্ঠোতি মূলপদং, তস্স অপুচ্ছিতোতি অত্থো. অপুচ্ছিতোতি অজানাপিতো. অযাচিতোতি অনাযাচিতো. অনজ্ঝেসিতোতি অনাণাপিতো, ‘‘ন ইচ্ছিতো’’তি একে. অপসাদিতোতি ন পসাদাপিতো. পাৰদতীতি কথযতি. অহমস্মীতি অহং অস্মি ভৰামি. জাতিযা ৰাতি খত্তিযব্রাহ্মণজাতিযা ৰা. গোত্তেন ৰাতি গোতমাদিগোত্তেন ৰা. কোলপুত্তিযেন ৰাতি কুলপুত্তভাৰেন ৰা. ৰণ্ণপোক্খরতায ৰাতি সরীরসুন্দরতায ৰা. ধনেন ৰাতি ধনসম্পত্তিযা ৰা. অজ্ঝেনেন ৰাতি অজ্ঝাযকরণেন ৰা. কম্মাযতনেন ৰাতি কম্মমেৰ কম্মাযতনং, তেন কম্মাযতনেন, কসিগোরক্খকম্মাদিনা ৰা. সিপ্পাযতনেন ৰাতি ধনুসিপ্পাদিনা ৰা. ৰিজ্জাট্ঠানেন ৰাতি অট্ঠারসৰিজ্জাট্ঠানেন ৰা. সুতেন ৰাতি বহুস্সুতগুণেন ৰা. পটিভানেন ৰাতি কারণাকারণপটিভানসঙ্খাতঞাণেন ৰা. অঞ্ঞতরঞ্ঞতরেন ৰা ৰত্থুনাতি জাতিআদীনং একেকেন ৰত্থুনা ৰা.

উচ্চা কুলাতি খত্তিযব্রাহ্মণকুলা, এতেন জাতিগোত্তমহত্তং দীপেতি. মহাভোগকুলাতি গহপতিমহাসালকুলা, এতেন অড্ঢমহত্তং দীপেতি. উল়ারভোগকুলাতি অৰসেসৰেস্সাদিকুলা, এতেন পহূতজাতরূপরজতাদিং দীপেতি. চণ্ডালাপি হি উল়ারভোগা হোন্তি. ঞাতোতি পাকটো. যস্সস্সীতি পরিৰারসম্পন্নো. সুত্তন্তিকোতি সুত্তন্তে নিযুত্তো. ৰিনযধরোতি ৰিনযপিটকধরো. ধম্মকথিকোতি আভিধম্মিকো. আরঞ্ঞিকোতিআদযো ধুতঙ্গপুব্বঙ্গমপটিপত্তিদস্সনত্থং ৰুত্তা. পঠমস্স ঝানস্স লাভীতিআদযো রূপারূপঅট্ঠসমাপত্তিযো দস্সেত্ৰা পটিৰেধদস্সনৰসেন ৰুত্তা. পাৰদতীতি মূলপদং. কথেতীতি ‘‘পিটকাচরিযোস্মী’’তি কথযতি. ভণতীতি ‘‘ধুতঙ্গিকোম্হী’’তি পাকটং করোতি. দীপযতীতি ‘‘রূপজ্ঝানং লাভীম্হী’’তি পরিদীপযতি. ৰোহরতীতি ‘‘অরূপজ্ঝানং লাভীম্হী’’তি ৰাক্যভেদং করোতি.

খন্ধকুসলাতি পঞ্চসু খন্ধেসু সলক্খণসামঞ্ঞলক্খণেসু ছেকা, ঞাততীরণপহানৰসেন কুসলাতি অত্থো. ধাতুআযতনপটিচ্চসমুপ্পাদাদীসুপি এসেৰ নযো. নিব্বানকুসলাতি নিব্বানে ছেকা. অনরিযানন্তি ন অরিযানং. এসো ধম্মোতি এসো সভাৰো. বালানন্তি অপণ্ডিতানং. অসপ্পুরিসানন্তি ন সোভনপুরিসানং. অত্তাতি অত্তানং.

১৮. সন্তোতি রাগাদিকিলেসূপসমেন সন্তো. তথা অভিনিব্বুতত্তো. ইতি’হন্তি সীলেসু অকত্থমানোতি ‘‘অহমস্মি সীলসম্পন্নো’’তিআদিনা নযেন ইতি সীলেসু অকত্থমানো, সীলনিমিত্তং অত্তুপনাযিকং ৰাচং অভাসমানোতি ৰুত্তং হোতি. তমরিযধম্মং কুসলা ৰদন্তীতি তস্স তং অকত্থনং ‘‘অরিযধম্মো এসো’’তি বুদ্ধাদযো খন্ধাদিকুসলা ৰদন্তি. যস্সুস্সদা নত্থি কুহিঞ্চি লোকেতি যস্স খীণাসৰস্স রাগাদযো সত্তুস্সদা কুহিঞ্চি লোকে নত্থি. তস্স তং অকত্থনং ‘‘অরিযধম্মো এসো’’তি এৰং কুসলা ৰদন্তীতি সম্বন্ধো.

সন্তোতি মূলপদং. রাগস্স সমিতত্তাতি রঞ্জনলক্খণস্স রাগস্স সমিতভাৰেন. দোসাদীসুপি এসেৰ নযো. ৰিজ্ঝাতত্তাতি সব্বপরিল়াহানং ঝাপিতত্তা. নিব্বুতত্তাতি সব্বসন্তাপানং নিব্বাপিতভাৰেন. ৰিগতত্তাতি সব্বাকুসলাভিসঙ্খারানং ৰিগতভাৰেন দূরভাৰেন. পটিপস্সদ্ধত্তাতি সব্বাকারেন অভব্বুপ্পত্তিকভাৰেন. সত্তন্নং ধম্মানং ভিন্নত্তা ভিক্খূতি উপরি ৰত্তব্বানং সত্তধম্মানং ভিন্দিত্ৰা ঠিতভাৰেন ভিক্খু. সক্কাযদিট্ঠিৰিচিকিচ্ছাসীলব্বতপরামাসোতি ইমে তযো কিলেসা সোতাপত্তিমগ্গেন ভিন্না, রাগো দোসোতি ইমে দ্ৰে কিলেসা ওল়ারিকা সকদাগামিমগ্গেন ভিন্না, তে এৰ অণুসহগতা অনাগামিমগ্গেন ভিন্না, মোহো মানোতি ইমে দ্ৰে কিলেসা অরহত্তমগ্গেন ভিন্না. অৰসেসে কিলেসে দস্সেতুং ‘‘ভিন্নাস্স হোন্তি পাপকা অকুসলা ধম্মা’’তি আহ. সংকিলেসিকাতি কিলেসপচ্চযা. পোনোভৰিকাতি পুনব্ভৰদাযিকা. সদরাতি কিলেসদরথা এত্থ সন্তীতি সদরা. ‘‘সদ্দরা’’তিপি পাঠো, সহদরথাতি অত্থো. দুক্খৰিপাকাতি ফলকালে দুক্খদাযিকা. আযতিং জাতিজরামরণিযাতি অনাগতে জাতিজরামরণস্স পচ্চযা.

পজ্জেন কতেন অত্তনাতি গাথায অযং পিণ্ডত্থো – যো অত্তনা ভাৰিতেন মগ্গেন পরিনিব্বানং গতো, কিলেসপরিনিব্বানং পত্তো, পরিনিব্বানগতত্তা এৰ চ ৰিতিণ্ণকঙ্খো, ৰিপত্তিসম্পত্তিহানিৰুদ্ধিউচ্ছেদসস্সতঅপুঞ্ঞপুঞ্ঞপ্পভেদং ভৰঞ্চ ৰিভৰঞ্চ ৰিপ্পহায মগ্গৰাসং ৰুসিতৰা খীণপুনব্ভৰোতি এতেসং থুতিৰচনানং অরহো সো ভিক্খূতি.

ইতিহন্তি, ইদহন্তীতি দুৰিধো পাঠো. ইতীতি পদসন্ধিআদযো সন্ধায ‘‘ইদহ’’ন্তি পাঠং ন রোচেন্তি. তত্থ ইতীতি যং ৰুত্তং. পদসন্ধীতি পদানং সন্ধি পদসন্ধি, পদঘটনন্তি অত্থো. পদসংসগ্গোতি পদানং একীভাৰো. পদপারিপূরীতি পদানং পরিপূরণং দ্ৰিন্নং পদানং একীভাৰো. অক্খরসমৰাযোতি একীভূতোপি অপরিপুণ্ণোপি হোতি, অযং ন এৰং. অক্খরানং সমৰাযো সন্নিপাতো হোতীতি দস্সনত্থং ‘‘অক্খরসমৰাযো’’তি আহ. ব্যঞ্জনসিলিট্ঠতাতি ব্যঞ্জনসমুচ্চযো পদমীতি ৰুত্তানং ব্যঞ্জনানং অত্থব্যঞ্জনানং অত্থব্যত্তিকারণানং ৰা মধুরভাৰত্তা পাঠস্স মুদুভাৰো. পদানুপুব্বতা মেতন্তি পদানং অনুপুব্বভাৰো পদানুপুব্বতা, পদপটিপাটিভাৰোতি অত্থো. মেতন্তি এতং. কতমন্তি চে? ইতীতি ইদং. মেতন্তি এত্থ ম-কারো পদসন্ধিৰসেন ৰুত্তো. কত্থী হোতীতি ‘‘অহমস্মি সীলসম্পন্নো’’তি অত্তানং উক্কংসেত্ৰা কথনসীলো হোতি. কত্থতীতি ৰুত্তনযেন কথযতি. ৰিকত্থতীতি ৰিৰিধা কথযতি. কত্থনাতি কথনা. আরতোতি দূরতো রতো. ৰিরতোতি ঠানসঙ্কন্তিৰসেন ৰিগতভাৰেন রতো. পটিৰিরতোতি ততো নিৰত্তিত্ৰা সব্বাকারেন ৰিযুত্তো হুত্ৰা রতো. তত্থ পিসাচং ৰিয দিস্ৰা পলাতো আরতো. হত্থিম্হি মদ্দন্তে ৰিয পরিধাৰিত্ৰা গতো ৰিরতো. যোধসম্পহারং ৰিয পোথেত্ৰা মদ্দেত্ৰা গতো পটিৰিরতো.

খীণাসৰস্সাতি খীণকিলেসাসৰস্স. কম্মুস্সদোতি পুঞ্ঞাভিসঙ্খারঅপুঞ্ঞাভিসঙ্খারআনেঞ্জাভিসঙ্খারসঙ্খাতানং কম্মানং উস্সদো উস্সন্নতা. যস্সিমেতি যস্স খীণাসৰস্স ইমে উস্সদা.

১৯. এৰং খীণাসৰপটিপত্তিং দস্সেত্ৰা ইদানি দিট্ঠিগতিকানং তিত্থিযানং পটিপত্তিঞ্চ দস্সেন্তো আহ ‘‘পকপ্পিতা সঙ্খতা’’তি. তত্থ পকপ্পিতাতি পরিকপ্পিতা. সঙ্খতাতি পচ্চযাভিসঙ্খতা. যস্সাতি যস্স কস্সচি দিট্ঠিগতিকস্স. ধম্মাতি দিট্ঠিযো. পুরক্খতাতি পুরতো কতা. সন্তীতি সংৰিজ্জন্তি. অৰীৰদাতাতি অৰোদাতা. যদত্তনি পস্সতি আনিসংসং, তং নিস্সিতো কুপ্পপটিচ্চসন্তিন্তি যস্সেতে দিট্ঠিধম্মা ‘পুরক্খতা অৰোদাতা সন্তি, সো এৰংৰিধো যস্মা অত্তনি তস্সা দিট্ঠিযা দিট্ঠধম্মিকঞ্চ সক্কারাদিং, সম্পরাযিকঞ্চ গতিৰিসেসাদিং আনিসংসং সম্পস্সতি, তস্মা তঞ্চ আনিসংসং, তঞ্চ কুপ্পতায চ পটিচ্চসমুপ্পন্নতায চ সম্মুতিসন্তিতায চ কুপ্পপটিচ্চসন্তিসঙ্খাতং দিট্ঠিং নিস্সিতো চ হোতি. সো তং নিস্সিতত্তা অত্তানং ৰা উক্কংসেয্য, পরে ৰা ৰম্ভেয্য অভূতেহিপি গুণদোসেহি.

সঙ্খতাতি মূলপদং. সঙ্খতাতি পচ্চযেহি সমাগন্ত্ৰা কতা. উপসগ্গৰসেন পদং ৰড্ঢিতং. অভিসঙ্খতাতি পচ্চযেহি অভিকতা. সণ্ঠপিতাতি পচ্চযৰসেনেৰ সম্মা ঠপিতা. অনিচ্চাতি হুত্ৰা অভাৰেন. পটিচ্চসমুপ্পন্নাতি ৰত্থারম্মণং পটিচ্চ উপ্পন্না. খযধম্মাতি কমেন খযসভাৰা. ৰযধম্মাতি পৰত্তিৰসেন পরিহাযনসভাৰা. ৰিরাগধম্মাতি অনিৰত্তী হুত্ৰা ৰিগচ্ছনসভাৰা. নিরোধধম্মাতি নিরুজ্ঝনসভাৰা, অনুপ্পত্তিধম্মা হুত্ৰা নিরুজ্ঝনসভাৰাতি অত্থো. দিট্ঠিগতিকস্সাতি দ্ৰাসট্ঠিদিট্ঠিযো গহেত্ৰা ঠিতপুগ্গলস্স.

পুরেক্খারাতি পুরে কতা. তণ্হাধজোতি উস্সাপিতট্ঠেন তণ্হাধজো, তণ্হাপটাকা অস্স অত্থীতি তণ্হাধজো. পুরেচারিকট্ঠেন তণ্হা এৰ কেতু অস্সাতি তণ্হাকেতু. তণ্হাধিপতেয্যোতি ছন্দাধিপতিৰসেন, তণ্হা অধিপতিতো আগতাতি ৰা তণ্হাধিপতেয্যো, তণ্হাধিপতি ৰা এতস্স অত্থীতি তণ্হাধিপতেয্যো. দিট্ঠিধজাদীসুপি এসেৰ নযো. অৰোদাতাতি অপরিসুদ্ধা. সংকিলিট্ঠাতি সযং কিলিট্ঠা. সংকিলেসিকাতি তপনীযা.

দ্ৰে আনিসংসে পস্সতীতি দ্ৰে গুণে দক্খতি. দিট্ঠধম্মিকঞ্চ আনিসংসন্তি ইমস্মিংযেৰ অত্তভাৰে পচ্চক্খধম্মানিসংসঞ্চ. সম্পরাযিকন্তি পরলোকে পত্তব্বং আনিসংসঞ্চ. যংদিট্ঠিকো সত্থা হোতীতি সত্থা যথালদ্ধিকো ভৰতি. তংদিট্ঠিকা সাৰকা হোন্তীতি তস্স ৰচনং সুণন্তা সাৰকাপি তথালদ্ধিকা হোন্তি. সক্করোন্তীতি সক্কারপ্পত্তং করোন্তি. গরুং করোন্তীতি গরুকারপ্পত্তং করোন্তি. মানেন্তীতি মনসা পিযাযন্তি. পূজেন্তীতি চতুপচ্চযাভিহারপূজায পূজেন্তি. অপচিতিং করোন্তীতি অপচিতিপ্পত্তং করোন্তি. তত্থ যস্স চত্তারো পচ্চযে সক্করিত্ৰা সুঅভিসঙ্খতে পণীতে কত্ৰা দেন্তি, সো সক্কতো. যস্মিং গরুভাৰং পট্ঠপেত্ৰা দেন্তি, সো গরুকতো. যং মনসা পিযাযন্তি, সো মানিতো. যস্স সব্বম্পেতং করোন্তি, সো পূজিতো. যস্স অভিৰাদনপচ্চুপট্ঠানঅঞ্জলিকম্মাদিৰসেন পরমনিপচ্চকারং করোন্তি, সো অপচিতো. কেচি ‘‘সক্করোন্তি কাযেন, গরুং করোন্তি ৰাচায, মানেন্তি চিত্তেন, পূজেন্তি লাভেনা’’তি ৰণ্ণযন্তি. অলং নাগত্তায ৰাতি নাগভাৰায নাগরাজভাৰায ৰা অলং পরিযত্তং. সুপণ্ণত্তায ৰাতি সুপণ্ণরাজভাৰায. যক্খত্তায ৰাতি যক্খসেনাপতিভাৰায. অসুরত্তায ৰাতি অসুরভাৰায. গন্ধব্বত্তায ৰাতি গন্ধব্বদেৰঘটে নিব্বত্তভাৰায. মহারাজত্তায ৰাতি চতুন্নং মহারাজানং অঞ্ঞতরভাৰায. ইন্দত্তায ৰাতি সক্কভাৰায. ব্রহ্মত্তায ৰাতি ব্রহ্মকাযিকাদীনং অঞ্ঞতরভাৰায. দেৰত্তায ৰাতি সম্মুতিদেৰাদীনং অঞ্ঞতরভাৰায. সুদ্ধিযাতি পরিসুদ্ধভাৰায অলং পরিযত্তং. ৰিসুদ্ধিযাতি সব্বমলরহিতঅচ্চন্তপরিসুদ্ধভাৰায. পরিসুদ্ধিযাতি সব্বাকারেন পরিসুদ্ধভাৰায.

তত্থ তিরচ্ছানযোনিযং অধিপচ্চত্তং সুদ্ধিযা. দেৰলোকে অধিপচ্চত্তং ৰিসুদ্ধিযা. ব্রহ্মলোকে অধিপচ্চত্তং পরিসুদ্ধিযা. চতুরাসীতিকপ্পসহস্সানি অতিক্কমিত্ৰা মুচ্চনত্থং মুত্তিযা. অন্তরাযাভাৰেন মুচ্চনত্থং ৰিমুত্তিযা. সব্বাকারেন মুত্তিযা পরিমুত্তিযা. সুজ্ঝন্তীতি তস্মিং সমযে পব্বজিতভাৰেন সুদ্ধিং পাপুণন্তি. ৰিসুজ্ঝন্তীতি পব্বজ্জং গহেত্ৰা পটিপত্তিযা যুত্তভাৰেন ৰিৰিধেন সুজ্ঝন্তি. পরিসুজ্ঝন্তীতি নিপ্ফত্তিং পাপেত্ৰা সব্বাকারেন সুজ্ঝন্তি. মুচ্চন্তি তেসং সমযন্তরধম্মেন. ৰিমুচ্চন্তি এতস্স সত্থুনো ওৰাদেন. পরিমুচ্চন্তি এতস্স সত্থুনো অনুসাসনেন. সুজ্ঝিস্সামীতিআদযো অনাগতৰসেন ৰুত্তা. আযতিং ফলপাটিকঙ্খীতি অনাগতে ৰিপাকফলমাকঙ্খমানো. ইদং দিট্ঠিগতিকানং ইচ্ছামত্তং. দিট্ঠিগতঞ্হি ইজ্ঝমানং নিরযং ৰা তিরচ্ছানযোনিং ৰা নিপ্ফাদেতি.

অচ্চন্তসন্তীতি অতিঅন্তনিস্সরণসন্তি. তদঙ্গসন্তীতি পঠমজ্ঝানাদিগুণঙ্গেন নীৰরণাদিঅগুণঙ্গং সমেতীতি ঝানং তদঙ্গসন্তি. সম্মুতিসন্তীতি সমাহারৰসেন দিট্ঠিসন্তি. তা ৰিভাগতো দস্সেতুং ‘‘কতমা অচ্চন্তসন্তী’’তিআদিমাহ. অমতং নিব্বানন্তি এৰমাদযো হেট্ঠা ৰুত্তত্থাযেৰ. পঠমং ঝানং সমাপন্নস্স নীৰরণা সন্তা হোন্তীতি এৰমাদযো অন্তো অপ্পনাযং অতিসযৰসেন ৰুত্তা. অপি চ সম্মুতিসন্তি ইমস্মিং অত্থে অধিপ্পেতা, সন্তীতি ইতরে দ্ৰে সন্তিযো পটিক্খিপিত্ৰা সম্মুতিসন্তিমেৰ দীপেতি. কুপ্পসন্তিন্তি ৰিপাকজনকৰসেন পরিৰত্তনৰসেন চলসন্তিং. পকুপ্পসন্তিন্তি ৰিসেসেন চলসন্তিং. এরিতসন্তিন্তি কম্পনসন্তিং. সমেরিতসন্তিন্তি ৰিসেসেন কম্পিতসন্তিং. চলিতসন্তিন্তি তস্সেৰ ৰেৰচনং. ঘট্টিতসন্তিন্তি পীল়িতসন্তিং. সন্তিং নিস্সিতোতি দিট্ঠিসঙ্খাতং সন্তিং নিস্সিতো. অস্সিতোতি আসিতো ৰিসেসেন নিস্সিতো. অল্লীনোতি একীভূতো.

২০. এৰং নিস্সিতে তাৰ ‘‘দিট্ঠীনিৰেসা…পে… আদিযতী চ ধম্ম’’ন্তি তত্থ দিট্ঠীনিৰেসাতি ইদংসচ্চাভিনিৰেসসঙ্খাতানি দিট্ঠিনিৰেসনানি. ন হি স্ৰাতিৰত্তাতি সুখেন অতিৰত্তিতব্বা ন হোন্তি. ধম্মেসু নিচ্ছেয্য সমুগ্গহীতন্তি দ্ৰাসট্ঠিদিট্ঠিগতেসু তং তং সমুগ্গহিতং অভিনিৰিট্ঠধম্মং নিচ্ছিনিত্ৰা পৰত্তা দিট্ঠিনিৰেসা ন হি স্ৰাতিৰত্তাতি ৰুত্তং হোতি. তস্মা নরো তেসু নিৰেসনেসু, নিরস্সতী আদিযতী চ ধম্মন্তি যস্মা ন হি স্ৰাতিৰত্তা, তস্মা নরো তেসুযেৰ দিট্ঠিনিৰেসনেসু অজসীলগোসীলকুক্কুরসীলপঞ্চাতপমরুপ্পপাতউক্কুটিকপ্পধানকণ্টকাপস্সযাদিভেদং সত্থারং ধম্মক্খানং গণাদিভেদঞ্চ তং তং ধম্মং নিরস্সতি চ আদিযতি চ জহতি চ গণ্হাতি চ ৰনমক্কটো ৰিয তং তং সাখন্তি ৰুত্তং হোতি.

এৰং নিরস্সন্তো চ আদিযন্তো চ অনৰট্ঠিতচিত্তত্তা অসন্তেহিপি গুণদোসেহি অত্তনো ৰা পরস্স ৰা যসাযসং উপ্পাদেয্য. দুরতিৰত্তাতি অতিক্কমিতুং দুক্খা. দুত্তরাতি দুউত্তরা. দুপ্পতরা দুস্সমতিক্কমা দুব্বিনিৰত্তাতি উপসগ্গেন ৰড্ঢিতা.

নিচ্ছিনিত্ৰাতি সস্সতৰসেন নিচ্ছযং কত্ৰা. ৰিনিচ্ছিনিত্ৰাতি অত্তৰসেন নানাৰিধেন ৰিনিচ্ছযং কত্ৰা. ৰিচিনিত্ৰাতি পরিযেসিত্ৰা. পৰিচিনিত্ৰাতি অত্তনিযৰসেন সব্বাকারেন পরিযেসিত্ৰা. ‘‘নিচিনিত্ৰা ৰিচ্চিনিত্ৰা’’তিপি পাঠো. ওধিগ্গাহোতি অৰধিযিত্ৰা গাহো. বিলগ্গাহোতি কোট্ঠাসৰসেন গাহো ‘‘বিলসো ৰিভজিত্ৰা’’তিআদীসু (দী. নি. ২.৩৭৮; ম. নি. ১.১১১) ৰিয. ৰরগ্গাহোতি উত্তমগাহো. কোট্ঠাসগ্গাহোতি অৰযৰৰসেন গাহো. উচ্চযগ্গাহোতি রাসিৰসেন গাহো. সমুচ্চযগ্গাহোতি কোট্ঠাসৰসেন রাসিৰসেন চ গাহো. ইদং সচ্চন্তি ইদমেৰ সভাৰং. তচ্ছন্তি তথভাৰং অৰিপরীতসভাৰং. তথন্তি ৰিপরিণামরহিতং. ভূতন্তি ৰিজ্জমানং. যাথাৰন্তি যথাসভাৰং. অৰিপরীতন্তি ন ৰিপরীতং.

নিরস্সতীতি নিঅস্সতি ৰিক্খিপতি. পরৰিচ্ছিন্দনায ৰাতি পরেহি ৰিস্সজ্জাপনেন. অনভিসম্ভুণন্তো ৰাতি অসম্পাপুণন্তো ৰা অসক্কোন্তো ৰা ৰিস্সজ্জেতি. পরো ৰিচ্ছিন্দেতীতি অঞ্ঞো ৰিযোগং করোতি. নত্থেত্থাতি নত্থি এত্থ. সীলং অনভিসম্ভুণন্তোতি সীলং অসম্পাদেন্তো. সীলং নিরস্সতীতি সীলং ৰিস্সজ্জেতি. ইতো পরেসুপি এসেৰ নযো.

২১. যো পনাযং সব্বদিট্ঠিগতাদিদোসধুননায পঞ্ঞায সমন্নাগতত্তা ধোনো, তস্স ধোনস্স হি…পে… অনূপযো সো. কিং ৰুত্তং হোতি? ধোনধম্মসমন্নাগমা ধোনস্স ধুতসব্বপাপস্স অরহতো কত্থচি লোকে তেসু তেসু ভৰেসু সংকপ্পনা দিট্ঠি নত্থি. সো তস্সা দিট্ঠিযা অভাৰা, যায চ অত্তনা কতং পাপকম্মং পটিচ্ছাদেন্তা তিত্থিযা মাযায ৰা মানেন ৰা এৰং অগতিং গচ্ছন্তি, তম্পি মাযঞ্চ মানঞ্চ পহায ধোনো রাগাদীনং দোসানং কেন গচ্ছেয্য, দিট্ঠধম্মে সম্পরাযে ৰা নিরযাদীসু গতিৰিসেসেসু কেন সঙ্খং গচ্ছেয্য, অনূপযো সো, সো হি তণ্হাদিট্ঠিউপযানং দ্ৰিন্নং অভাৰেন অনূপযোতি.

কিং কারণাতি কেন কারণেন. ধোনা ৰুচ্চতি পঞ্ঞাতি ধোনা ইতি কিংকারণা পঞ্ঞা কথীযতি. তায পঞ্ঞায কাযদুচ্চরিতন্তি তায ৰুত্তপ্পকারায পঞ্ঞায কাযতো পৰত্তং দুট্ঠু কিলেসপূতিকত্তা ৰা চরিতন্তি কাযদুচ্চরিতং. ধূতঞ্চ ধোতঞ্চাতি কম্পিতঞ্চ ধোৰিতঞ্চ. সন্ধোতঞ্চাতি সম্মা ধোৰিতঞ্চ. নিদ্ধোতঞ্চাতি ৰিসেসেন সুট্ঠু নিদ্ধোতঞ্চ. রাগো ধুতো চাতিআদযো চতুন্নং মগ্গানং ৰসেন যোজেতব্বা.

সম্মাদিট্ঠিযা মিচ্ছাদিট্ঠি ধুতা চাতি মগ্গসম্পযুত্তায সম্মাদিট্ঠিযা মিচ্ছাদিট্ঠি কম্পিতা চলিতা ধোৰিতা. সম্মাসঙ্কপ্পাদীসুপি এসেৰ নযো. ৰুত্তঞ্হেতং ‘‘সম্মাদিট্ঠিকস্স, ভিক্খৰে, মিচ্ছাদিট্ঠি নিজ্জিণ্ণা হোতী’’তি সুত্তং (অ. নি. ১০.১০৬; দী. নি. ৩.৩৬০) ৰিত্থারেতব্বং. সম্মাঞাণেনাতি মগ্গসম্পযুত্তঞাণেন, পচ্চৰেক্খণঞাণেন ৰা. মিচ্ছাঞাণন্তি ৰিপরীতঞাণং অযাথাৰঞাণং, পাপকিরিযাসু উপচিন্তাৰসেন পাপং কত্ৰা ‘‘সুকতং মযা’’তি পচ্চৰেক্খণাকারেন চ উপ্পন্নো মোহো. সম্মাৰিমুত্তিযা মিচ্ছাৰিমুত্তীতি সমুচ্ছেদৰিমুত্তিযা ৰিপরীতা অযাথাৰৰিমুত্তিযেৰ চেতোৰিমুত্তিসঞ্ঞিতা.

অরহা ইমেহি ধোনেয্যেহি ধম্মেহীতি রাগাদীহি কিলেসেহি দূরে ঠিতো অরহা ইমেহি ৰুত্তপ্পকারেহি কিলেসধোৰনেহি ধম্মেহি উপেতো হোতি. ধোনোতি ধোনো পুগ্গলো, তেনেৰ ‘‘সো ধুতরাগো’’তিআদযো আহ.

মাযা ৰুচ্চতি ৰঞ্চনিকাচরিযাতি ৰঞ্চনকিরিযং ৰঞ্চনকরণং অস্সা অত্থীতি ৰঞ্চনিকাচরিযা. তস্স পটিচ্ছাদনহেতূতি তেসং দুচ্চরিতানং অপ্পকাসনকারণা. পাপিকং ইচ্ছং পণিদহতীতি লামকং পত্থনং পতিট্ঠাপেতি. ‘‘মা মং জঞ্ঞা’’তি ইচ্ছতীতি ‘‘ময্হং কতং পাপং পরে মা জানিংসূ’’তি পচ্চাসীসতি. সঙ্কপ্পেতীতি ৰিতক্কং উপ্পাদেতি. ৰাচং ভাসতীতি জানংযেৰ পণ্ণত্তিং ৰীতিক্কমন্তো ভিক্খু ভারিযং করোতি. ‘‘অম্হাকং ৰীতিক্কমট্ঠানং নাম নত্থী’’তি উপসন্তো ৰিয ভাসতি. কাযেন পরক্কমতীতি ‘‘মযা কতং ইদং পাপকম্মং মা কেচি জানিংসূ’’তি কাযেন ৰত্তং করোতি. ৰিজ্জমানদোসপটিচ্ছাদনতো চক্খুমোহনমাযা অস্সাতি মাযাৰী, মাযাৰিনো ভাৰো মাযাৰিতা. কত্ৰা পাপং পুন পটিচ্ছাদনতো অতিচ্চ অস্সরতি এতায সত্তোতি অচ্চসরা. কাযৰাচাকিরিযাহি অঞ্ঞথা দস্সনতো ৰঞ্চেতীতি ৰঞ্চনা. এতায সত্তা নিকরোন্তীতি নিকতি, মিচ্ছা করোন্তীতি অত্থো. ‘‘নাহং এৰং করোমী’’তি পাপানং ৰিক্খিপনতো নিকিরণা. ‘‘নাহং এৰং করোমী’’তি পরিৰজ্জনতো পরিহরণা. কাযাদীহি সংহরণতো গূহনা. সমভাগেন গূহনা পরিগূহনা. তিণপণ্ণেহি ৰিয গূথং কাযৰচীকম্মেহি পাপং ছাদেতীতি ছাদনা. সব্বতো ভাগেন ছাদনা পরিচ্ছাদনা. ন উত্তানিং কত্ৰা দস্সেতীতি অনুত্তানিকম্মং. ন পাকটং কত্ৰা দস্সেতীতি অনাৰিকম্মং. সুট্ঠু ছাদনা ৰোচ্ছাদনা. কতপটিচ্ছাদনৰসেন পুনপি পাপস্স করণতো পাপকিরিযা. অযং ৰুচ্চতীতি অযং কতপটিচ্ছাদনলক্খণা মাযা নাম ৰুচ্চতি, যায সমন্নাগতো পুগ্গলো ভস্মপটিচ্ছন্নো ৰিয অঙ্গারো, উদকপটিচ্ছন্নো ৰিয খাণু, পিলোতিকপলিৰেঠিতং ৰিয চ সত্থং হোতি.

একৰিধেন মানোতি একপরিচ্ছেদেন এককোট্ঠাসেন মানো. যা চিত্তস্স উন্নতীতি যা চিত্তস্স অব্ভুস্সাপনা, অযং মানোতি অত্থো. এত্থ পুগ্গলং অনামসিত্ৰা নিব্বত্তিতমানোৰ ৰুত্তো.

অত্তুক্কংসনমানোতি অত্তানং উপরি ঠপনমানো. পরৰম্ভনমানোতি পরে লামককরণমানো. ইমে দ্ৰে মানা যেভুয্যেন তথা পৰত্তাকারৰসেন ৰুত্তা.

‘‘সেয্যোহমস্মী’’তি মানোতি জাতিআদীনি নিস্সায ‘‘অহমস্মি সেয্যো’’তি উপ্পন্নো মানো. সদিসমানাদীসুপি এসেৰ নযো. এৰমিমেপি তযো মানা পুগ্গলৰিসেসং অনিস্সায তথা পৰত্তাকারৰসেন ৰুত্তা. তেসু একেকো তিণ্ণম্পি সেয্যসদিসহীনানং উপ্পজ্জতি. তত্থ ‘‘সেয্যোহমস্মী’’তি মানো সেয্যস্সেৰ যাথাৰমানো, সেসানং অযাথাৰমানো. ‘‘সদিসোহমস্মী’’তি মানো সদিসস্সেৰ যাথাৰমানো, সেসানং অযাথাৰমানো. ‘‘হীনোহমস্মী’’তি মানো হীনস্সেৰ যাথাৰমানো, সেসানং অযাথাৰমানো.

চতুব্বিধেন মানো লোকধম্মৰসেন ৰুত্তো. পঞ্চৰিধেন মানো পঞ্চকামগুণৰসেন ৰুত্তো. ছব্বিধেন মানো চক্খাদিসম্পত্তিৰসেন ৰুত্তো. তত্থ মানং জনেতীতি মানং উপ্পাদেতি.

সত্তৰিধেন মাননিদ্দেসে মানোতি উন্নমো. অতিমানোতি ‘‘জাতিআদীহি মযা সদিসো নত্থী’’তি অতিক্কমিত্ৰা মঞ্ঞনৰসেন উপ্পন্নো মানো. মানাতিমানোতি ‘‘অযং পুব্বে মযা সদিসো, ইদানি অহং সেট্ঠো, অযং হীনতরো’’তি উপ্পন্নো মানো. অযং ভারাতিভারো ৰিয পুরিমং সদিসমানং উপাদায মানাতিমানো নামাতি দস্সেতুং ‘‘মানাতিমানো’’তি আহ. ওমানোতি হীনমানো. যো ‘‘হীনোহমস্মী’’তি মানো নাম ৰুত্তো, অযং ওমানো নাম. অপি চেত্থ ‘‘ত্ৰং জাতিমা, কাকজাতি ৰিয তে জাতি. ত্ৰং গোত্তৰা, চণ্ডালগোত্তং ৰিয তে গোত্তং. তুয্হং সরো অত্থি, কাকসরো ৰিয তে সরো’’তি এৰং অত্তানং হেট্ঠা কত্ৰা পৰত্তনৰসেন অযং ‘‘ওমানো’’তি ৰেদিতব্বো.

অধিমানোতি চত্তারি সচ্চানি অপ্পত্ৰা পত্তসঞ্ঞিস্স, চতূহি মগ্গেহি কত্তব্বে কিচ্চে অকতেযেৰ কতসঞ্ঞিস্স, চতুসচ্চধম্মে অনধিগতে অধিগতসঞ্ঞিস্স, অরহত্তে অসচ্ছিকতে সচ্ছিকতসঞ্ঞিস্স উপ্পন্নো অধিগতমানো অধিমানো নাম. অযং পন কস্স উপ্পজ্জতি, কস্স ন উপ্পজ্জতীতি? অরিযসাৰকস্স তাৰ ন উপ্পজ্জতি. সো হি মগ্গফলনিব্বানপহীনকিলেসাৰসিট্ঠকিলেসপচ্চৰেক্খণেন সঞ্জাতসোমনস্সো অরিযগুণপটিৰেধে নিক্কঙ্খো, তস্মা সোতাপন্নাদীনং ‘‘অহং সকদাগামী’’তিআদিৰসেন মানো ন উপ্পজ্জতি, দুস্সীলস্স চ ন উপ্পজ্জতি. সো হি অরিযগুণাধিগমে নিরাসোৰ. সীলৰতোপি পরিচ্চত্তকম্মট্ঠানস্স নিদ্দারামতাদিমনুযুত্তস্স ন উপ্পজ্জতি, পরিসুদ্ধসীলস্স পন কম্মট্ঠানে অপ্পমত্তস্স নামরূপং ৰৰত্থপেত্ৰা পচ্চযপরিগ্গহেন ৰিতিণ্ণকঙ্খস্স তিলক্খণং আরোপেত্ৰা সঙ্খারে সম্মসন্তস্স আরদ্ধৰিপস্সকস্স উপ্পজ্জতি, উপ্পন্নে চ সুদ্ধসমথলাভী সুদ্ধৰিপস্সনালাভী ৰা অন্তরা ঠপেতি. সো হি দসপি ৰস্সানি ৰীসম্পি ৰস্সানি তিংসম্পি ৰস্সানি অসীতিপি ৰস্সানি কিলেসসমুদাচারং অপস্সন্তো ‘‘অহং সোতাপন্নো’’তি ৰা ‘‘সকদাগামী’’তি ৰা ‘‘অনাগামী’’তি ৰা মঞ্ঞতি, সমথৰিপস্সনালাভী পন অরহত্তেযেৰ ঠপেতি. তস্স হি সমাধিবলেন কিলেসা ৰিক্খম্ভিতা, ৰিপস্সনাবলেন সঙ্খারা সুপরিগ্গহিতা, তস্মা সট্ঠিপি ৰস্সানি অসীতিপি ৰস্সানি ৰস্সসতম্পি কিলেসা ন সমুদাচরন্তি, খীণাসৰস্সেৰ চিত্তাচারো হোতি. সো এৰং দীঘরত্তং কিলেসসমুদাচারং অপস্সন্তো অন্তরা অট্ঠত্ৰাৰ ‘‘অরহা অহ’’ন্তি মঞ্ঞতি.

অস্মিমানোতি রূপে অস্মীতিআদিনা নযেন পঞ্চসু খন্ধেসু ‘‘অহং রূপাদযো’’তি উপ্পন্নো মানো. মিচ্ছামানোতি পাপকেহি কম্মাযতনসিপ্পাযতনৰিজ্জাট্ঠানসুতপটিভানসীলব্বতেহি, পাপিকায চ দিট্ঠিযা উপ্পন্নো মানো. তত্থ পাপকং কম্মাযতনং নাম কেৰট্টমচ্ছবন্ধনেসাদানং কম্মং. পাপকং সিপ্পাযতনং নাম মচ্ছজালখিপকুমীনকরণেসু চেৰ পাসওড্ডনসূলারোপনাদীসু চ ছেকতা. পাপকং ৰিজ্জাট্ঠানং নাম যা কাচি পরূপঘাতৰিজ্জা. পাপকং সুতং নাম ভারতযুদ্ধসীতাহরণাদিপটিসংযুত্তং. পাপকং পটিভানং নাম দুব্ভাসিতযুত্তং কপ্পনাটকৰিলপ্পনাদিপটিভানং. পাপকং সীলং নাম অজসীলং গোসীলং. ৰতম্পি অজৰতগোৰতমেৰ. পাপিকা দিট্ঠি পন দ্ৰাসট্ঠিযা দিট্ঠিগতেসু যাকাচি দিট্ঠি. অট্ঠৰিধমানো উত্তানত্থোযেৰ.

নৰৰিধেন মাননিদ্দেসে সেয্যস্স ‘‘সেয্যোহমস্মী’’তিআদযো নৰ মানা পুগ্গলং নিস্সায ৰুত্তা. এত্থ পন সেয্যস্স ‘‘সেয্যোহমস্মী’’তি মানো রাজানঞ্চেৰ পব্বজিতানঞ্চ উপ্পজ্জতি. রাজা হি ‘‘রট্ঠেন ৰা ধনৰাহনেহি ৰা কো মযা সদিসো অত্থী’’তি এতং মানং করোতি. পব্বজিতোপি ‘‘সীলধুতঙ্গাদীহি কো মযা সদিসো অত্থী’’তি এতং মানং করোতি.

সেয্যস্স ‘‘সদিসোহমস্মী’’তি মানোপি এতেসংযেৰ উপ্পজ্জতি. রাজা হি ‘‘রট্ঠেন ৰা ধনৰাহনেহি ৰা অঞ্ঞরাজূহি সদ্ধিং ময্হং কিং নানাকরণ’’ন্তি এতং মানং করোতি. পব্বজিতোপি ‘‘সীলধুতঙ্গাদীহি অঞ্ঞেন ভিক্খুনা ময্হং কিং নানাকরণ’’ন্তি এতং মানং করোতি.

সেয্যস্স ‘‘হীনোহমস্মী’’তি মানোপি এতেসংযেৰ উপ্পজ্জতি. যস্স হি রঞ্ঞো রট্ঠং ৰা ধনৰাহনাদীনি ৰা নাতিসম্পন্নানি হোন্তি, সো ‘‘ময্হং রাজাতি ৰোহারসুখমত্তকমেৰ, কিং রাজা নাম অহ’’ন্তি এতং মানং করোতি. পব্বজিতোপি অপ্পলাভসক্কারো ‘‘অহং ধম্মকথিকো, বহুস্সুতো, মহাথেরোতি কথামত্তমেৰ, কিং ধম্মকথিকো নামাহং, কিং বহুস্সুতো নামাহং, কিং মহাথেরো নামাহং, যস্স মে লাভসক্কারো নত্থী’’তি এতং মানং করোতি.

সদিসস্স ‘‘সেয্যোহমস্মী’’তি মানাদযো অমচ্চাদীনং উপ্পজ্জন্তি. অমচ্চো ৰা হি রট্ঠিযো ৰা ‘‘ভোগযানৰাহনাদীহি কো মযা সদিসো অঞ্ঞো রাজপুরিসো অত্থী’’তি ৰা, ‘‘ময্হং অঞ্ঞেহি সদ্ধিং কিং নানাকরণ’’ন্তি ৰা, ‘‘অমচ্চোতি নামমেৰ ময্হং, ঘাসচ্ছাদনমত্তম্পি মে নত্থি, কিং অমচ্চো নামাহ’’ন্তি ৰা এতে মানে করোতি.

হীনস্স ‘‘সেয্যোহমস্মী’’তি মানাদযো দাসাদীনং উপ্পজ্জন্তি. দাসো হি ‘‘মাতিতো ৰা পিতিতো ৰা কো মযা সদিসো অঞ্ঞো দাসো নাম অত্থি, অঞ্ঞে জীৰিতুং অসক্কোন্তা কুচ্ছিহেতু দাসা নাম জাতা, অহং পন পৰেণীআগতত্তা সেয্যো’’তি ৰা, ‘‘পৰেণীআগতভাৰেন উভতোসুদ্ধিকদাসত্তেন অসুকদাসেন নাম সদ্ধিং কি ময্হং নানাকরণ’’ন্তি ৰা, ‘‘কুচ্ছিৰসেনাহং দাসব্যং উপগতো, মাতাপিতুকোটিযা পন মে দাসট্ঠানং নত্থি, কিং দাসো নাম অহ’’ন্তি ৰা এতে মানে করোতি. যথা চ দাসো, এৰং পুক্কুসচণ্ডালাদযোপি এতে মানে করোন্তিযেৰ.

এত্থ চ সেয্যস্স ‘‘সেয্যোহমস্মী’’তি উপ্পন্নমানোৰ যাথাৰমানো, ইতরে দ্ৰে অযাথাৰমানা. তথা সদিসস্স ‘‘সদিসোহমস্মী’’তি, হীনস্স ‘‘হীনোহমস্মী’’তি উপ্পন্নমানোৰ যাথাৰমানো, ইতরে দ্ৰে অযাথাৰমানা. তত্থ যাথাৰমানা অরহত্তমগ্গৰজ্ঝা, অযাথাৰমানা সোতাপত্তিমগ্গৰজ্ঝা.

এত্থ চ সেয্যস্স ‘‘সেয্যোহমস্মী’’তি মানো উত্তমস্স উত্তমট্ঠেন ‘‘অহং সেয্যো’’তি এৰং উপ্পন্নমানো, সেয্যস্স ‘‘সদিসোহমস্মী’’তি মানো উত্তমস্স সমট্ঠেন ‘‘অহং সদিসো’’তি এৰং উপ্পন্নমানো. সেয্যস্স ‘‘হীনোহমস্মী’’তি মানো উত্তমস্স লামকট্ঠেন ‘‘অহং হীনো’’তি এৰং উপ্পন্নমানো. এৰং সেয্যমানো সদিসমানো হীনমানোতি ইমে তযো মানা সেয্যস্স উপ্পজ্জন্তি. সদিসস্সাপি অহং সেয্যো, সদিসো, হীনোতি তযো মানা উপ্পজ্জন্তি. হীনস্সাপি অহং হীনো, সদিসো, সেয্যোতি তযো মানা উপ্পজ্জন্তি.

দসৰিধমাননিদ্দেসে ইধেকচ্চো মানং জনেতীতি একচ্চো পুগ্গলো মানং জনযতি. জাতিযা ৰাতি খত্তিযভাৰাদিজাতিসম্পত্তিযা ৰা. গোত্তেন ৰাতি গোতমগোত্তাদিনা উক্কট্ঠগোত্তেন ৰা. কোলপুত্তিযেন ৰাতি মহাকুলভাৰেন ৰা. ৰণ্ণপোক্খরতায ৰাতি ৰণ্ণসম্পন্নসরীরতায ৰা. সরীরঞ্হি ‘‘পোক্খর’’ন্তি ৰুচ্চতি, তস্স ৰণ্ণসম্পত্তিযা অভিরূপভাৰেনাতি অত্থো. ধনেন ৰাতি ধনসম্পন্নভাৰেন ৰা, ময্হং নিধানগতস্স ধনস্স পমাণং নত্থীতি অত্থো. অজ্ঝেনেন ৰাতি অজ্ঝাযনৰসেন ৰা. কম্মাযতনেন ৰাতি ‘‘অৰসেসা সত্তা ছিন্নপক্খকাকসদিসা, অহং পন মহিদ্ধিকো মহানুভাৰো’’তি ৰা, ‘‘অহং যং যং কম্মং করোমি, তং তং সমিজ্ঝতী’’তি ৰা এৰমাদিনযপ্পৰত্তেন কম্মাযতনেন ৰা. সিপ্পাযতনেন ৰাতি ‘‘অৰসেসা সত্তা নিসিপ্পা, অহং সিপ্পৰা’’তি এৰমাদিনযপ্পৰত্তেন সিপ্পাযতনেন ৰা. ৰিজ্জাট্ঠানেন ৰাতি ইদং হেট্ঠা ৰুত্তনযমেৰ. সুতেন ৰাতি ‘‘অৰসেসা সত্তা অপ্পস্সুতা, অহং পন বহুস্সুতো’’তি এৰমাদিসুতেন ৰা. পটিভানেন ৰাতি ‘‘অৰসেসা সত্তা অপ্পটিভানা, ময্হং পন পটিভানপ্পমাণং নত্থী’’তি এৰমাদিপটিভানেন ৰা. অঞ্ঞতরঞ্ঞতরেন ৰা ৰত্থুনাতি অৰুত্তেন অঞ্ঞেন ৰত্থুনা ৰা. যো এৰরূপো মানোতি মানকরণৰসেন মানো. মঞ্ঞনা মঞ্ঞিতত্তন্তি আকারভাৰনিদ্দেসো. উস্সিতট্ঠেন উন্নতি. যস্সুপ্পজ্জতি, তং পুগ্গলং উন্নামেতি উক্খিপিত্ৰা ঠপেতীতি উন্নামো. সমুস্সিতট্ঠেন ধজো. উক্খিপনট্ঠেন চিত্তং সম্পগ্গণ্হাতীতি সম্পগ্গাহো. কেতু ৰুচ্চতি বহূসু ধজেসু অচ্চুগ্গতধজো. মানোপি পুনপ্পুনং উপ্পজ্জমানো অপরাপরে উপাদায অচ্চুগ্গতট্ঠেন কেতু ৰিযাতি কেতু, তং কেতুং ইচ্ছতীতি কেতুকম্যং, তস্স ভাৰো কেতুকম্যতা. সা পন চিত্তস্স, ন অত্তনো. তেন ৰুত্তং ‘‘কেতুকম্যতা চিত্তস্সা’’তি. মানসম্পযুত্তঞ্হি চিত্তং কেতুং ইচ্ছতি, তস্স ভাৰো, কেতুসঙ্খাতো মানোতি. ধোনো মাযঞ্চ মানঞ্চ পহায পজহিত্ৰা যো সো ধোনো অরহা হেট্ঠা ৰুত্তনযেন ৰিনোদনব্যন্তিকরণাদিৰসেন কিলেসে পজহিত্ৰা ঠিতো, সো তেন রাগাদিনা কিলেসেন গচ্ছেয্য.

নেরযিকোতি ৰাতি নিরযে নিব্বত্তকসত্তোতি ৰা. তিরচ্ছানযোনিকাদীসুপি এসেৰ নযো. সো হেতু নত্থীতি যেন জনকহেতুনা গতিযাদীসু নিব্বত্তেয্য, সো হেতু নত্থি. পচ্চযোতি তস্সেৰ ৰেৰচনং. কারণন্তি ঠানং. কারণঞ্হি তদাযত্তৰুত্তিতায অত্তনো ফলস্স ঠানন্তি ৰুচ্চতি. তস্মা যেন হেতুনা যেন পচ্চযেন গতিযাদীসু নিব্বত্তেয্য, তং কারণং নত্থি.

২২. যো পন নেসং দ্ৰিন্নং উপযানং ভাৰেন উপযো হোতি, সো উপযো হি…পে… দিট্ঠিমিধেৰ সব্বন্তি. তত্থ উপযোতি তণ্হাদিট্ঠিনিস্সিতো. ধম্মেসু উপেতি ৰাদন্তি ‘‘রত্তো’’তি ৰা ‘‘দুট্ঠো’’তি ৰা এৰং তেসু তেসু ধম্মেসু উপেতি ৰাদং. অনূপযং কেন কথং ৰদেয্যাতি তণ্হাদিট্ঠিপ্পহানেন পন অনূপযং খীণাসৰং কেন রাগেন ৰা দোসেন ৰা কথং ‘‘রত্তো’’তি ৰা ‘‘দুট্ঠো’’তি ৰা ৰদেয্য. এৰং অনুপৰজ্জো চ সো কিং তিত্থিযা ৰিয কতপটিচ্ছাদকো ভৰিস্সতীতি অধিপ্পাযো. অত্তা নিরত্তা ন হি তস্স অত্থীতি তস্স হি অত্তদিট্ঠি ৰা উচ্ছেদদিট্ঠি ৰা নত্থি, গহণমুঞ্চনং ৰাপি অত্তনিরত্তসঞ্ঞিতং নত্থি. কিং কারণা নত্থীতি চে? অধোসি সো দিট্ঠিমিধেৰ সব্বন্তি. যস্মা সো ইধেৰ অত্তভাৰে ঞাণম্বুনা সব্বদিট্ঠিগতং অধোসি পজহি ৰিনোদেসীতি অরহত্তনিকূটেন দেসনং নিট্ঠাপেসি. তং সুত্ৰা রাজা অত্তমনো ভগৰন্তং অভিৰাদেত্ৰা পক্কামীতি.

রত্তোতি ৰাতি রাগেন রত্তোতি ৰা. দুট্ঠোতি ৰাতিআদীসুপি এসেৰ নযো. তে অভিসঙ্খারা অপ্পহীনাতি যে পুঞ্ঞাপুঞ্ঞআনেঞ্জাভিসঙ্খারা, তে অপ্পহীনা. অভিসঙ্খারানং অপ্পহীনত্তাতি তেসং ৰুত্তপ্পকারানং কম্মাভিসঙ্খারানং ন পহীনভাৰেন. গতিযা ৰাদং উপেতীতি পঞ্চন্নং গতীনং অঞ্ঞতরায কথনং উপগচ্ছতি. তেনেৰাহ – ‘‘নেরযিকোতি ৰা…পে… ৰাদং উপেতি উপগচ্ছতী’’তি. ৰদেয্যাতি কথেয্য. গহিতং নত্থীতি গহেতব্বং নত্থি. মুঞ্চিতব্বং নত্থীতি মুঞ্চিত্ৰা ঠিতত্তা মোচেতব্বং নত্থি.

যস্সত্থি গহিতন্তি যস্স পুগ্গলস্স ‘‘অহং মমা’’তি গহিতং অত্থি. তস্সত্থি মুঞ্চিতব্বন্তি তস্স পুগ্গলস্স মোচেতব্বং অত্থি. উপরি পদানি পরিৰত্তেত্ৰা যোজেতব্বানি. গহণং মুঞ্চনা সমতিক্কন্তোতি গহণমোচনা অরহা অতিক্কন্তো. বুদ্ধিপরিহানিৰীতিৰত্তোতি ৰড্ঢিঞ্চ পরিহানিঞ্চ অতিক্কমিত্ৰা পৰত্তো. সো ৰুট্ঠৰাসোতিআদিং কত্ৰা ঞাণগ্গিনা দড্ঢানীতি পরিযোসানং হেট্ঠা ৰুত্তনযমেৰ. অধোসীতি কন্তেসি. ধুনি সন্ধুনি নিদ্ধুনীতি উপসগ্গেন পদং ৰড্ঢিতং.

সদ্ধম্মপ্পজ্জোতিকায মহানিদ্দেসট্ঠকথায

দুট্ঠট্ঠকসুত্তনিদ্দেসৰণ্ণনা নিট্ঠিতা.

৪. সুদ্ধট্ঠকসুত্তনিদ্দেসৰণ্ণনা

২৩. চতুত্থে সুদ্ধট্ঠকে পঠমগাথায তাৰত্থো – ন, ভিক্খৰে, এৰরূপেন দস্সনেন সুদ্ধি হোতি, অপি চ খো কিলেসমলীনত্তা অসুদ্ধং, কিলেসরোগানং অধিগমা সরোগমেৰ চন্দাভং ব্রাহ্মণং, অঞ্ঞং ৰা এৰরূপং দিস্ৰা দিট্ঠিগতিকো বালো অভিজানাতি ‘‘পস্সামি সুদ্ধং পরমং অরোগং, তেন চ দিট্ঠিসঙ্খাতেন দস্সনেন সংসুদ্ধি নরস্স হোতী’’তি, সো এৰং অভিজানন্তো তং দস্সনং ‘‘পরম’’ন্তি ঞত্ৰা তস্মিং দস্সনে সুদ্ধানুপস্সী সমানো তং দস্সনং ‘‘মগ্গঞাণ’’ন্তি পচ্চেতি. তং পন মগ্গঞাণং ন হোতি.

পরমং আরোগ্যপ্পত্তন্তি উত্তমং নিব্যাধিং পাপুণিত্ৰা ঠিতং. তাণপ্পত্তন্তি তথা পালনপ্পত্তং. লেণপ্পত্তন্তি নিলীযনপ্পত্তং.সরণপ্পত্তন্তি পতিট্ঠাপত্তং, দুক্খনাসনং ৰা পত্তং. অভযপ্পত্তন্তি নিব্ভযভাৰপ্পত্তং. অচ্চুতপ্পত্তন্তি নিচ্চলভাৰং পত্তং. অমতপ্পত্তন্তি অমতং মহানিব্বানং পত্তং. নিব্বানপ্পত্তন্তি ৰানৰিরহিতং পত্তং.

অভিজানন্তোতি ৰিসেসেন জানন্তো. আজানন্তোতি আজানমানো. ৰিজানন্তোতি অনেকৰিধেন জানমানো. পটিৰিজানন্তোতি তং তং পটিচ্চ ৰিজানমানো. পটিৰিজ্ঝন্তোতি হদযে কুরুমানো.

চক্খুৰিঞ্ঞাণং রূপদস্সনেনাতি চক্খুৰিঞ্ঞাণেন রূপদস্সনং. ঞাণন্তি পচ্চেতীতি পঞ্ঞা ইতি সদ্দহতি. মগ্গোতি পচ্চেতীতি ‘‘উপাযো’’তি সদ্দহতি. পথোতি সঞ্চারো. নীযানন্তি গহেত্ৰা যাতীতি নীযানং. ‘‘নিয্যান’’ন্তি ৰা পাঠো.

২৪. ‘‘দিট্ঠেন চে সুদ্ধী’’তি দুতিযগাথা. তস্সত্থো – তেন রূপদস্সনসঙ্খাতেন দিট্ঠেন যদি কিলেসসুদ্ধি নরস্স হোতি, তেন ৰা ঞাণেন সো যদি জাতিআদিদুক্খং পজহাতি, এৰং সন্তে অরিযমগ্গতো অঞ্ঞেন অসুদ্ধিমগ্গেনেৰ সো সুজ্ঝতি, রাগাদীহি উপধীহি সউপধিকো এৰ সমানো সুজ্ঝতীতি ৰত্তব্বতং আপন্নো হোতি, ন চ এৰংৰিধো সুজ্ঝতি. তস্মা দিট্ঠী হি নং পাৰ তথা ৰদানং, সা নং দিট্ঠিযেৰ ‘‘মিচ্ছাদিট্ঠিকো অয’’ন্তি কথেতি, দিট্ঠিঅনুরূপং ‘‘সস্সতো লোকো’’তিআদিনা নযেন তথা তথা ৰদতীতি.

রাগেন সহ ৰত্ততীতি সরাগো, রাগৰাতি অত্থো. সদোসোতিআদীসুপি এসেৰ নযো.

২৫. ন ব্রাহ্মণোতি ততিযগাথা. তস্সত্থো – যো পন বাহিতপাপত্তা ব্রাহ্মণো হোতি, সো মগ্গেন অধিগতাসৰক্খযো খীণাসৰব্রাহ্মণো অরিযমগ্গঞাণতো অঞ্ঞেন অভিমঙ্গলসম্মতরূপসঙ্খাতে দিট্ঠে, তথাৰিধসদ্দসঙ্খাতে সুতে, অৰীতিক্কমসঙ্খাতে সীলে, হত্থিৰতাদিভেদে ৰতে, পথৰিআদিভেদে মুতে চ উপ্পন্নেন মিচ্ছাঞাণেন সুদ্ধিং ন আহাতি. সেসমস্স ব্রাহ্মণস্স ৰণ্ণভণনায ৰুত্তং. সো হি তেধাতুকপুঞ্ঞে সব্বস্মিঞ্চ পাপে অনূপলিত্তো, কস্মা? তস্স পহীনত্তা তস্স অত্তদিট্ঠিযা, যস্স কস্সচি ৰা গহণস্স পহীনত্তা অত্তঞ্জহো, পুঞ্ঞাভিসঙ্খারাদীনং অকরণতো ‘‘নযিধ পকুব্বমানো’’তি ৰুচ্চতি. তস্মা নং এৰং পসংসন্তো আহ. সব্বস্সেৰ চস্স পুরিমপাদেন সম্বন্ধো ৰেদিতব্বো – পুঞ্ঞে চ পাপে চ অনূপলিত্তো অত্তঞ্জহো নযিধ পকুব্বমানো ন ব্রাহ্মণো অঞ্ঞতো সুদ্ধিমাহাতি. নাতি পটিক্খেপোতি ন ইতি পটিসেধো.

বাহিত্ৰা সব্বপাপকানীতি গাথাযত্থো – যো চতুত্থমগ্গেন বাহিত্ৰা সব্বপাপকানি ঠিতত্তো ঠিতোইচ্চেৰ ৰুত্তং হোতি. বাহিতপাপত্তা এৰ চ ৰিমলো ৰিমলভাৰং ব্রহ্মভাৰং সেট্ঠভাৰং পত্তো, পটিনিস্সট্ঠসমাধিৰিক্খেপকরকিলেসমলেন অগ্গমগ্গফলসমাধিনা সাধুসমাহিতো, সংসারহেতুসমতিক্কমেন সংসারমতিচ্চ পরিনিট্ঠিতকিচ্চতায কেৰলীতি চ, তণ্হাদিট্ঠীহি অনিস্সিতত্তা অনিস্সিতোতি চ, লোকধম্মেহি নিব্বিকারত্তা তাদীতি চ পৰুচ্চতি. এৰং থুতিরহো স ব্রহ্মা সো ব্রাহ্মণোতি.

অঞ্ঞত্র সতিপট্ঠানেহীতি চত্তারো সতিপট্ঠানে মুঞ্চিত্ৰা. সম্মপ্পধানাদীসুপি এসেৰ নযো.

সন্তেকে সমণব্রাহ্মণাতি একচ্চে লোকসঙ্কেতেন ‘‘সমণব্রাহ্মণা’’তি লদ্ধৰোহারা সংৰিজ্জন্তি. দিট্ঠসুদ্ধিকাতি দিট্ঠেন সুদ্ধিং ইচ্ছমানা. তে একচ্চানং রূপানং দস্সনন্তি এতে দিট্ঠসুদ্ধিকা এতেসং রূপারম্মণানং ওলোকনং. মঙ্গলং পচ্চেন্তীতি ইদ্ধিকারণং বুদ্ধিকারণং সব্বসম্পত্তিকারণং পতিট্ঠাপেন্তি. অমঙ্গলং পচ্চেন্তীতি অনিদ্ধিকারণং ন বুদ্ধিকারণং ন সম্পত্তিকারণং পতিট্ঠাপেন্তি. তে কালতো ৰুট্ঠহিত্ৰাতি এতে দিট্ঠাদিমঙ্গলিকা পুরেতরমেৰ উট্ঠহিত্ৰা. অভিমঙ্গলগতানীতি ৰিসেসেন ৰুড্ঢিকারণগতানি. রূপানি পস্সন্তীতি নানাৰিধানি রূপারম্মণানি দক্খন্তি. চাটকসকুণন্তি এৰংনামকং. ফুস্সৰেল়ুৰলট্ঠিন্তি ফুস্সনক্খত্তেন উপ্পন্নং তরুণবেল়ুৰলট্ঠিং. গব্ভিনিত্থিন্তি সগব্ভং ইত্থিং. কুমারকং খন্ধে আরোপেত্ৰা গচ্ছন্তন্তি তরুণদারকং অংসে উস্সাপেত্ৰা গচ্ছমানং. পুণ্ণঘটন্তি উদকপুণ্ণঘটং. রোহিতমচ্ছন্তি রত্তরোহিতমচ্ছং. আজঞ্ঞরথন্তি সিন্ধৰযুত্তরথং. উসভন্তি মঙ্গলউসভং. গোকপিলন্তি কপিলগাৰিং.

পলালপুঞ্জন্তি থুসরাসিং. তক্কঘটন্তি গোতক্কাদিপূরিতচাটিং. রিত্তঘটন্তি তুচ্ছঘটং. নটন্তি নটকাদিং. ‘‘ধুত্তকিরিয’’ন্তি একে. নগ্গসমণকন্তি নিচ্চোল়সমণং. খরন্তি গদ্রভং. খরযানন্তি গদ্রভযুত্তং ৰয্হাদিকং. একযুত্তযানন্তি একেন ৰাহনেন সংযুত্তং যানং. কাণন্তি একক্খিউভযক্খিকাণং. কুণিন্তি হত্থকুণিং. খঞ্জন্তি খঞ্জপাদং তিরিযগতপাদং. পক্খহতন্তি পীঠসপ্পিং. জিণ্ণকন্তি জরাজিণ্ণং. ব্যাধিকন্তি ব্যাধিপীল়িতং. মতন্তি কালঙ্কতং.

সুতসুদ্ধিকাতি সোতৰিঞ্ঞাণেন সুতেন সুদ্ধিং ইচ্ছমানা. সদ্দানং সৰনন্তি সদ্দারম্মণানং সৰনং. ৰড্ঢাতি ৰাতিআদযো লোকে পৰত্তসদ্দমত্তানি গহেত্ৰা ৰুত্তা. অমঙ্গলং পন ‘‘কাণো’’তিআদিনা তেন তেন নামেন ৰুত্তসদ্দাযেৰ. ‘‘ছিন্দ’’ন্তি ৰাতি হত্থপাদাদিচ্ছিন্নন্তি ৰা. ‘‘ভিন্দ’’ন্তি ৰাতি সীসাদিভিন্নন্তি ৰা. ‘‘দড্ঢ’’ন্তি ৰাতি অগ্গিনা ঝাপিতন্তি ৰা. ‘‘নট্ঠ’’ন্তি ৰাতি চোরাদীহি ৰিনাসিতন্তি ৰা. ‘‘নত্থী’’তি ৰাতি ন ৰিজ্জতীতি ৰা.

সীলসুদ্ধিকাতি সীলেন ৰিসুদ্ধিং ইচ্ছনকা. সীলমত্তেনাতি সংৰরণমত্তেন. সংযমমত্তেনাতি উপরমমত্তেন. সংৰরমত্তেনাতি দ্ৰারথকনমত্তেন. অৰীতিক্কমমত্তেনাতি ন অতিক্কমিতমত্তেন. সমণো মুণ্ডিকাপুত্তোতি মাতিতো লদ্ধনামং. সম্পন্নকুসলন্তি পরিপুণ্ণকুসলং. পরমকুসলন্তি উত্তমকুসলং. উত্তমপত্তিপ্পত্তন্তি উত্তমং অরহত্তং পাপুণিতব্বতং পত্ৰা ঠিতং. অযোজ্জন্তি পরাজেতুং অসক্কুণেয্যং সমণং.

ৰতসুদ্ধিকাতি সমাদানেন ৰতেন সুদ্ধিং ইচ্ছনকা. হত্থিৰতিকা ৰাতি সমাদিন্নং হত্থিৰতং এতেসং অত্থীতি হত্থিৰতিকা, সব্বহত্থিকিরিযং করোন্তীতি অত্থো. কথং? ‘‘অজ্জ পট্ঠায হত্থীহি কাতব্বং করিস্সামী’’তি এৰং উপ্পন্নচিত্তা হত্থীনং গমনাকারং তিট্ঠনাকারং নিসীদনাকারং সযনাকারং উচ্চারপস্সাৰকরণাকারং, অঞ্ঞে হত্থী দিস্ৰা সোণ্ডং উস্সাপেত্ৰা গমনাকারঞ্চ সব্বং করোন্তীতি হত্থিৰতিকা. অস্সৰতিকাদীসুপি লব্ভমানৰসেন যথাযোগং যোজেতব্বং. তেসু অৰসানে দিসাৰতিকা ৰাতি পুরত্থিমাদিদিসানং নমস্সনৰসেন সমাদিন্নদিসাৰতিকা, এতেসং ৰুত্তপ্পকারানং সমণব্রাহ্মণানং ৰতসমাদানং সম্পজ্জমানং হত্থিআদীনং সহব্যতং উপনেতি. সচে খো পনস্স মিচ্ছাদিট্ঠি হোতি ‘‘ইমিনাহং সীলৰতসমাদানব্রহ্মচরিযেন দেৰো ৰা দেৰঞ্ঞতরো ৰা হোমী’’তি চিন্তযন্তস্স নিরযতিরচ্ছানযোনীনং অঞ্ঞতরো হোতীতি ঞাতব্বং. ৰুত্তঞ্হেতং ভগৰতা (ম. নি. ২.৭৯) –

‘‘ইধ, পুণ্ণ, একচ্চো কুক্কুরৰতং ভাৰেতি পরিপুণ্ণং অব্বোকিণ্ণং, কুক্কুরসীলং ভাৰেতি পরিপুণ্ণং অব্বোকিণ্ণং, কুক্কুরচিত্তং ভাৰেতি পরিপুণ্ণং অব্বোকিণ্ণং, কুক্কুরাকপ্পং ভাৰেতি পরিপুণ্ণং অব্বোকিণ্ণং. সো কুক্কুরৰতং ভাৰেত্ৰা পরিপুণ্ণং অব্বোকিণ্ণং, কুক্কুরসীলং ভাৰেত্ৰা পরিপুণ্ণং অব্বোকিণ্ণং, কুক্কুরচিত্তং ভাৰেত্ৰা পরিপুণ্ণং অব্বোকিণ্ণং, কুক্কুরাকপ্পং ভাৰেত্ৰা পরিপুণ্ণং অব্বোকিণ্ণং কাযস্স ভেদা পরং মরণা কুক্কুরানং সহব্যতং উপপজ্জতি. সচে খো পনস্স এৰংদিট্ঠি হোতি ‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা’তি, সাস্স হোতি মিচ্ছাদিট্ঠি. মিচ্ছাদিট্ঠিস্স খো অহং, পুণ্ণ, দ্ৰিন্নং গতীনং অঞ্ঞতরং গতিং ৰদামি নিরযং ৰা তিরচ্ছানযোনিং ৰা. ইতি খো, পুণ্ণ, সম্পজ্জমানং কুক্কুরৰতং কুক্কুরানং সহব্যতং উপনেতি, ৰিপজ্জমানং নিরয’’ন্তি.

গন্ধব্বৰতিকাদযো গন্ধব্বাদীনং সহব্যতং উপগচ্ছন্তীতি অত্থো ন গহেতব্বো, মিচ্ছাদিট্ঠিযা গহিতত্তা নিরযতিরচ্ছানযোনিমেৰ উপগচ্ছন্তীতি গহেতব্বো.

মুতসুদ্ধিকাতি ফুসিতেন সুদ্ধিকা. পথৰিং আমসন্তীতি সসম্ভারিকং মহাপথৰিং কাযেন ফুসন্তি. হরিতন্তি অল্লনীলসদ্দলং. গোমযন্তি গৰাদিগোমযং. কচ্ছপন্তি অট্ঠিকচ্ছপাদিঅনেকৰিধং. ফালং অক্কমন্তীতি অযফালং মদ্দন্তি. তিলৰাহন্তি তিলসকটং তিলরাসিং ৰা. ফুস্সতিলং খাদন্তীতি মঙ্গলপটিসংযুত্তং তিলং খাদন্তি. ফুস্সতেলং মক্খেন্তীতি তথারূপং তিলতেলং সরীরব্ভঞ্জনং করোন্তি. দন্তকট্ঠন্তি দন্তপোণং. মত্তিকায ন্হাযন্তীতি কুঙ্কুট্ঠাদিকায সণ্হমত্তিকায সরীরং উব্বট্টেত্ৰা ন্হাযন্তি. সাটকং নিৰাসেন্তীতি মঙ্গলপটিসংযুত্তং ৰত্থং পরিদহন্তি. ৰেঠনং ৰেঠেন্তীতি সীসৰেঠনং পত্তুণ্ণাদিপটং সীসে ঠপেন্তি পটিমুচ্চন্তি.

তেধাতুকং কুসলাভিসঙ্খারন্তি কামধাতুরূপধাতুঅরূপধাতূসু পটিসন্ধিদাযকং কোসল্লসম্ভূতং পচ্চযাভিসঙ্খারং. সব্বং অকুসলন্তি দ্ৰাদসৰিধং অকোসল্লসম্ভূতং অকুসলং. যতোতি যদা. তে দসৰিধো পুঞ্ঞাভিসঙ্খারো চ, দ্ৰাদসৰিধো অপুঞ্ঞাভিসঙ্খারো চ, চতুব্বিধো আনেঞ্জাভিসঙ্খারো চ যথানুরূপং সমুচ্ছেদপ্পহানেন পহীনা হোন্তি. অত্তদিট্ঠিজহোতি ‘‘এসো মে অত্তা’’তি গহিতদিট্ঠিং জহো. গাহং জহোতি ‘‘এসোহমস্মী’’তি মানসম্পযুত্তগহণং জহো. পুন অত্তঞ্জহোতি ‘‘এতং মমা’’তি তণ্হাগহণৰসেন চ দিট্ঠিগহণৰসেন চ পরামসিত্ৰা গহিতং, পরতো আমট্ঠঞ্চ, তস্মিং অভিনিৰিট্ঠঞ্চ, বলৰতণ্হাৰসেন গিলিত্ৰা অজ্ঝোসিতঞ্চ, বলৰমুচ্ছিতঞ্চ. সব্বং তং চত্তং হোতীতিআদযো ৰুত্তনযাযেৰ.

২৬. এৰং ‘‘ন ব্রাহ্মণো অঞ্ঞতো সুদ্ধিমাহা’’তি ৰত্ৰা ইদানি যে দিট্ঠিগতিকা অঞ্ঞতো সুদ্ধিং ব্রুৰন্তি, তেসং তস্সা দিট্ঠিযা অনিব্বাহকভাৰং দস্সেন্তো ‘‘পুরিমং পহাযা’’তি গাথমাহ. তস্সত্থো – তেহি অঞ্ঞতো সুদ্ধিৰাদা সমানাপি যস্সা দিট্ঠিযা অপ্পহীনত্তা গহণমুঞ্চনং হোতি, তায পুরিমং সত্থারাদিং পহায অপরং নিস্সিতা, এজাসঙ্খাতায তণ্হায অনুগতা অভিভূতা রাগাদিভেদং ন তরন্তি সঙ্গং, তঞ্চ অতরন্তা তং তং ধম্মং উগ্গণ্হন্তি চ নিরস্সজন্তি চ মক্কটোৰ সাখন্তি.

পুরিমং সত্থারং পহাযাতি পুরিমগহিতং সত্থুপটিঞ্ঞং ৰজ্জেত্ৰা. পরং সত্থারং নিস্সিতাতি অঞ্ঞং সত্থুপটিঞ্ঞং নিস্সিতা অল্লীনা. পুরিমং ধম্মক্খানং পহাযাতিআদীসুপি এসেৰ নযো.

এজানুগাতি তণ্হায অনুগা. এজানুগতাতি তণ্হায অনুগতা. এজানুসটাতি তণ্হায অনুসটা পক্খন্দা ৰা. এজায পন্না পতিতাতি তণ্হায নিমুগ্গা চ নিক্খিপিতা চ.

মক্কটোতি ৰানরো. অরঞ্ঞেতি ৰিপিনে. পৰনেতি মহাৰনে. চরমানোতি গচ্ছমানো. এৰমেৰাতি ওপম্মসংসন্দনং. পুথূতি নানা. পুথুদিট্ঠিগতানীতি নানাৰিধানি দিট্ঠিগতানি. গণ্হন্তি চ মুঞ্চন্তি চাতি গহণৰসেন গণ্হন্তি চ চজনৰসেন মুঞ্চন্তি চ. আদিযন্তি চ নিরস্সজন্তি চাতি পলিবোধং করোন্তি চ ৰিস্সজ্জেন্তি চ খিপন্তি চ.

২৭. পঞ্চমগাথায চ সম্বন্ধো – যো চ সো ‘‘দিট্ঠী হি নং পাৰ তথা ৰদান’’ন্তি ৰুত্তো, সো সযং সমাদাযাতি. তত্থ সযন্তি সামং. সমাদাযাতি গহেত্ৰা. ৰতানীতি হত্থিৰতাদীনি. উচ্চাৰচন্তি অপরাপরং, হীনপণীতং ৰা সত্থারতো সত্থারাদিং. সঞ্ঞসত্তোতি কামসঞ্ঞাদীসু লগ্গো. ৰিদ্ৰা চ ৰেদেহি সমেচ্চ ধম্মন্তি পরমত্থৰিদ্ৰা চ অরহা চতূহি মগ্গঞাণৰেদেহি চতুসচ্চধম্মং অভিসমেচ্চাতি. সেসং পাকটমেৰ.

সামং সমাদাযাতি সযমেৰ গহেত্ৰা. আদাযাতি আদিযিত্ৰা গণ্হিত্ৰা. সমাদাযাতি সম্মা আদায. আদিযিত্ৰাতি পলিবোধং কত্ৰা. সমাদিযিত্ৰাতি সম্মা পলিবোধং কত্ৰা. গণ্হিত্ৰাতি অৰিস্সজ্জেত্ৰা. পরামসিত্ৰাতি দস্সিত্ৰা. অভিনিৰিসিত্ৰাতি পতিট্ঠহিত্ৰা. কামসঞ্ঞাদযো ৰুত্তনযা এৰ.

ৰিদ্ৰাতি মেধাৰী. ৰিজ্জাগতোতি ৰিজাননভাৰং গতো. ঞাণীতি পঞ্ঞাসম্পন্নো. ৰিভাৰীতি ঞাণেন ৰীমংসকো. মেধাৰীতি অনিচ্চাদীহি তুলিতঞাণো. পঞ্ঞাতিআদযো হেট্ঠা ৰুত্তনযাযেৰ. চতুসচ্চধম্মং ৰিচিনাতীতি ধম্মৰিচযসম্বোজ্ঝঙ্গো. বোজ্ঝঙ্গত্থো হেট্ঠা ৰুত্তোৰ. ৰীমংসাতি চতুসচ্চধম্মৰিচিননা পঞ্ঞাৰ. ‘‘ৰীমংসা ধম্মচিন্তনা’’তি হি ৰুত্তা. ৰিপস্সনাতি মগ্গসম্পযুত্তা ৰিৰিধাকারেন পস্সনা পঞ্ঞাৰ. সম্মাদিট্ঠীতি সোভনা পসট্ঠা সুন্দরা মগ্গসম্পযুত্তা সম্মাদিট্ঠি. তেহি ৰেদেহীতি এতেহেৰ চতূহি মগ্গঞাণেহি. অন্তগতোতি জাতিজরামরণস্স পরিযোসানং গতো. কোটিগতোতিআদযো হেট্ঠা ৰুত্তনযাৰ. ৰেদানং ৰা অন্তগতোতি জানিতব্বানং অৰসানপ্পত্তো. ৰেদেহি ৰা অন্তগতোতি চতূহি মগ্গঞাণৰেদেহি ৰট্টদুক্খস্স পরিযন্তভাৰেন অন্তসঙ্খাতং নিব্বানং গতো. ৰিদিতত্তাতি ৰিদিতভাৰেন জানিতভাৰেন.

ৰেদানি ৰিচেয্য কেৰলানীতি গাথায অযমত্থো – যো চতূহি মগ্গঞাণৰেদেহি কিলেসক্খযং করোন্তো গতো, সো পরমত্থতো ৰেদগূ নাম হোতি. সোৰ সব্বসমণব্রাহ্মণানং সত্থসঞ্ঞিতানি ৰেদানি তাযেৰ মগ্গভাৰনায কিচ্চতো অনিচ্চাদিৰসেন ৰিচেয্য. তত্থ ছন্দরাগপ্পহানেন তমেৰ সব্বং ৰেদমতিচ্চ যাপি ৰেদপচ্চযা, অঞ্ঞথা ৰা উপ্পজ্জন্তি ৰেদনা, তাসু সব্বৰেদনাসু ৰীতরাগো হোতি. তস্মা তমত্থং দস্সেন্তো ‘‘কিং পত্তিনমাহু ৰেদগু’’ন্তি (সু. নি. ৫৩৩) পুট্ঠো ‘‘ইদং পত্তিন’’ন্তি অৰত্ৰা ‘‘ৰেদানি ৰিচেয্য…পে… ৰেদগূ সো’’তি আহ. যস্মা ৰা যো পৰিচযপঞ্ঞায ৰেদানি ৰিচেয্য, তত্থ ছন্দরাগপ্পহানেন সব্বং ৰেদমতিচ্চ ৰত্ততি. সো সত্থসঞ্ঞিতানি ৰেদানি গতো ঞাতো অতিক্কন্তোৰ হোতি. যো ৰেদনাসু ৰীতরাগো, সোপি ৰেদনাসঞ্ঞিতানি ৰেদানি গতো অতিক্কন্তো, অতিৰেদনং গতোতিপি ৰেদগূ. তস্মা তম্পি অত্থং দস্সেন্তো ‘‘ইদং পত্তিন’’ন্তি অৰত্ৰা ‘‘ৰেদানি ৰিচেয্য…পে… ৰেদগূ সো’’তি আহ.

সমেচ্চাতি ঞাণেন সমাগন্ত্ৰা. অভিসমেচ্চাতি ঞাণেন পটিৰিজ্ঝিত্ৰা. ধম্মন্তি চতুসচ্চধম্মং. সব্বে সঙ্খারাতি সব্বে সপ্পচ্চযা ধম্মা. তে হি সঙ্খতসঙ্খারা নাম. পচ্চযেহি সঙ্গম্ম করীযন্তীতি সঙ্খারা, তে এৰং পচ্চযেহি সঙ্গম্ম কতত্তা ‘‘সঙ্খতা’’তি ৰিসেসেত্ৰা ৰুত্তা. ‘‘কম্মনিব্বত্তা তেভূমকরূপারূপধম্মা অভিসঙ্খতসঙ্খারা’’তি (ৰিসুদ্ধি. ২.৫৮৭) অট্ঠকথাসু ৰুত্তা. তেপি ‘‘অনিচ্চা ৰত সঙ্খারা’’তিআদীসু (দী. নি. ২.২২১, ২৭২; সং. নি. ১.১৮৬) সঙ্খতসঙ্খারেসু সঙ্গহং গচ্ছন্তি. ‘‘অৰিজ্জাগতোযং, ভিক্খৰে, পুরিসপুগ্গলো পুঞ্ঞঞ্চে সঙ্খারং অভিসঙ্খরোতী’’তিআদীসু (সং. নি. ২.৫১) অৰিজ্জাপচ্চযা সঙ্খারাৰ আগতা. তেভূমিককুসলাকুসলচেতনা অভিসঙ্খরণকসঙ্খারা নাম. ‘‘যাৰতিকা অভিসঙ্খারস্স গতি, তাৰতিকং গন্ত্ৰা অক্খাহতং মঞ্ঞে অট্ঠাসী’’তিআদীসু (অ. নি. ৩.১৫) আগতং কাযিকচেতসিকৰীরিযং পযোগাভিসঙ্খারো নাম. ‘‘সঞ্ঞাৰেদযিতনিরোধং সমাপন্নস্স খো, আৰুসো ৰিসাখ, ভিক্খুনো পঠমং নিরুজ্ঝতি ৰচীসঙ্খারো, ততো কাযসঙ্খারো, ততো চিত্তসঙ্খারো’’তিআদীসু (ম. নি. ১.৪৬৪) আগতা ৰিতক্কৰিচারা ৰাচং সঙ্খরোন্তীতি ৰচীসঙ্খারা, অস্সাসপস্সাসা কাযেন সঙ্খরীযন্তীতি কাযসঙ্খারা, সঞ্ঞা চ ৰেদনা চ চিত্তেন সঙ্খরীযন্তীতি চিত্তসঙ্খারা. ইধ পন সঙ্খতসঙ্খারা অধিপ্পেতা. অনিচ্চা হুত্ৰা অভাৰট্ঠেন. দুক্খা পটিপীল়নট্ঠেন. সব্বে ধম্মাতি নিব্বানম্পি অন্তোকত্ৰা ৰুত্তা. অনত্তা অৰসৰত্তনট্ঠেন. অৰিজ্জাপচ্চযা সঙ্খারাতি এত্থ যং পটিচ্চ ফলমেতি, সো পচ্চযো. পটিচ্চাতি ন ৰিনা, অপচ্চক্খিত্ৰাতি অত্থো. এতীতি উপ্পজ্জতি চেৰ পৰত্ততি চাতি অত্থো. অপিচ উপকারকট্ঠো পচ্চযট্ঠো. অৰিজ্জা চ সা পচ্চযো চাতি অৰিজ্জাপচ্চযো, তস্মা অৰিজ্জাপচ্চযা. সঙ্খারা সম্ভৰন্তীতি নিব্বত্তন্তি, এৰং সম্ভৰন্তিসদ্দস্স সেসপদেহিপি যোজনা কাতব্বা.

তত্থ কতমা অৰিজ্জা? দুক্খে অঞ্ঞাণং, দুক্খসমুদযে অঞ্ঞাণং, দুক্খনিরোধে অঞ্ঞাণং, দুক্খনিরোধগামিনিযা পটিপদায অঞ্ঞাণং, পুব্বন্তে অঞ্ঞাণং, অপরন্তে অঞ্ঞাণং, পুব্বন্তাপরন্তে অঞ্ঞাণং, ইদপ্পচ্চযতাপটিচ্চসমুপ্পন্নেসু ধম্মেসু অঞ্ঞাণং. কতমে সঙ্খারা? পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারো, কাযসঙ্খারো ৰচীসঙ্খারো চিত্তসঙ্খারো, অট্ঠ কামাৰচরকুসলচেতনা, পঞ্চ রূপাৰচরকুসলচেতনা পুঞ্ঞাভিসঙ্খারো, দ্ৰাদস অকুসলচেতনা অপুঞ্ঞাভিসঙ্খারো, চতস্সো অরূপাৰচরকুসলচেতনা আনেঞ্জাভিসঙ্খারো, কাযসঞ্চেতনা কাযসঙ্খারো, ৰচীসঞ্চেতনা ৰচীসঙ্খারো, মনোসঞ্চেতনা চিত্তসঙ্খারো.

তত্থ সিযা – কথং পনেতং জানিতব্বং ‘‘ইমে সঙ্খারা অৰিজ্জাপচ্চযা হোন্তী’’তি? অৰিজ্জাভাৰে ভাৰতো. যস্স হি দুক্খাদীসু অৰিজ্জাসঙ্খাতং অঞ্ঞাণং অপ্পহীনং হোতি, সো দুক্খে তাৰ পুব্বন্তাদীসু চ অঞ্ঞাণেন সংসারদুক্খং সুখসঞ্ঞায গহেত্ৰা তস্সেৰ হেতুভূতে তিৰিধেপি সঙ্খারে আরভতি. সমুদযে অঞ্ঞাণেন দুক্খহেতুভূতেপি তণ্হাপরিক্খারে সঙ্খারে সুখহেতুতো মঞ্ঞমানো আরভতি. নিরোধে পন মগ্গে চ অঞ্ঞাণেন দুক্খস্স অনিরোধভূতেপি গতিৰিসেসে দুক্খনিরোধসঞ্ঞী হুত্ৰা নিরোধস্স চ অমগ্গভূতেসুপি যঞ্ঞামরতপাদীসু নিরোধমগ্গসঞ্ঞী হুত্ৰা দুক্খনিরোধং পত্থযমানো যঞ্ঞামরতপাদিমুখেন তিৰিধেপি সঙ্খারে আরভতি.

অপি চ সো তায চতূসু সচ্চেসু অপ্পহীনাৰিজ্জতায ৰিসেসতো জাতিজরারোগমরণাদিঅনেকাদীনৰৰোকিণ্ণম্পি পুঞ্ঞফলসঙ্খাতং দুক্খং দুক্খতো অজানন্তো তস্স অধিগমায কাযৰচীচিত্তসঙ্খারভেদং পুঞ্ঞাভিসঙ্খারং আরভতি দেৰচ্ছরকামকো ৰিয মরুপ্পপাতং. সুখসম্মতস্সাপি চ তস্স পুঞ্ঞফলস্স অন্তে মহাপরিল়াহজনিকং ৰিপরিণামদুক্খতং অপ্পস্সাদতঞ্চ অপস্সন্তোপি তপ্পচ্চযং ৰুত্তপ্পকারমেৰ পুঞ্ঞাভিসঙ্খারং আরভতি সলভো ৰিয দীপসিখাভিনিপাতং, মধুবিন্দুগিদ্ধো ৰিয চ মধুলিত্তসত্থধারালেহনং.

কামুপসেৰনাদীসু চ সৰিপাকেসু আদীনৰং অপস্সন্তো সুখসঞ্ঞায চেৰ কিলেসাভিভূততায চ দ্ৰারত্তযপ্পৰত্তম্পি অপুঞ্ঞাভিসঙ্খারং আরভতি বালো ৰিয গূথকীল়নং, মরিতুকামো ৰিয চ ৰিসখাদনং. আরুপ্পৰিপাকেসু চাপি সঙ্খারৰিপরিণামদুক্খতং অনৰবুজ্ঝমানো সস্সতাদিৰিপল্লাসেন চিত্তসঙ্খারভূতং আনেঞ্জাভিসঙ্খারং আরভতি দিসামূল়্হো ৰিয পিসাচনগরাভিমুখমগ্গগমনং. এৰং যস্মা অৰিজ্জাভাৰতোৰ সঙ্খারভাৰো, ন অভাৰতো. তস্মা জানিতব্বমেতং ‘‘ইমে সঙ্খারা অৰিজ্জাপচ্চযা হোন্তী’’তি.

এত্থাহ – গণ্হাম তাৰ এতং ‘‘অৰিজ্জা সঙ্খারানং পচ্চযো’’তি, কিং পনাযমেকাৰ অৰিজ্জা সঙ্খারানং পচ্চযো, উদাহু অঞ্ঞেপি পচ্চযা সন্তীতি? কিং পনেত্থ যদি তাৰ একাৰ, এককারণৰাদো আপজ্জতি. অথ অঞ্ঞেপি সন্তি, ‘‘অৰিজ্জাপচ্চযা সঙ্খারা’’তি এককারণনিদ্দেসো নুপপজ্জতীতি? ন নুপপজ্জতি. কস্মা? যস্মা –

‘‘একং ন একতো ইধ, নানেকমনেকতোপি নো একং;

ফলমত্থি অত্থি পন এক-হেতুফলদীপনে অত্থো’’. (ৰিভ. অট্ঠ. ২২৬, সঙ্খারপদনিদ্দেস; পটি. ম. অট্ঠ. ১.১.১০৫; ৰিসুদ্ধি. ২.৬১৭);

ভগৰা হি কত্থচি পধানত্তা, কত্থচি পাকটত্তা, কত্থচি অসাধারণত্তা দেসনাৰিলাসস্স চ ৰেনেয্যানঞ্চ অনুরূপতো একমেৰ হেতুং ৰা ফলং ৰা দীপেতি. তস্মা অযমিধ অৰিজ্জা ৰিজ্জমানেসুপি অঞ্ঞেসু ৰত্থারম্মণসহজাতধম্মাদীসু সঙ্খারকারণেসু ‘‘অস্সাদানুপস্সিনো তণ্হা পৰড্ঢতী’’তি (সং. নি. ২.৫২) চ, ‘‘অৰিজ্জাসমুদযা আসৰসমুদযো’’তি (ম. নি. ১.১০৪) চ ৰচনতো অঞ্ঞেসম্পি তণ্হাদীনং সঙ্খারহেতূনং হেতূতি পধানত্তা, ‘‘অৰিদ্ৰা, ভিক্খৰে, অৰিজ্জাগতো পুঞ্ঞাভিসঙ্খারম্পি অভিসঙ্খরোতী’’তি পাকটত্তা, অসাধারণত্তা চ সঙ্খারানং হেতুভাৰেন দীপিতাতি ৰেদিতব্বা. এতেনেৰ চ একেকহেতুফলদীপনপরিহারৰচনেন সব্বত্থ একেকহেতুফলদীপনে পযোজনং ৰেদিতব্বন্তি.

এত্থাহ – এৰং সন্তেপি একন্তানিট্ঠফলায সাৰজ্জায অৰিজ্জায কথং পুঞ্ঞানেঞ্জাভিসঙ্খারপচ্চযত্তং যুজ্জতি? ন হি নিম্ববীজতো উচ্ছু উপ্পজ্জতীতি. কথং ন যুজ্জিস্সতি? লোকস্মিঞ্হি –

‘‘ৰিরুদ্ধো চা ৰিরুদ্ধো চ, সদিসাসদিসো তথা;

ধম্মানং পচ্চযো সিদ্ধো, ৰিপাকা এৰ তে চ ন’’.

ইতি অযং অৰিজ্জা ৰিপাকৰসেন একন্তানিট্ঠফলা, সভাৰৰসেন চ সাৰজ্জাপি সমানা সব্বেসম্পি এতেসং পুঞ্ঞাভিসঙ্খারাদীনং যথানুরূপং ঠানকিচ্চসভাৰৰিরুদ্ধাৰিরুদ্ধপচ্চযৰসেন, সদিসাসদিসপচ্চযৰসেন চ পচ্চযো হোতীতি ৰেদিতব্বা. অপি চ অযং অঞ্ঞোপি পরিযাযো –

‘‘চুতূপপাতে সংসারে, সঙ্খারানঞ্চ লক্খণে;

যো পটিচ্চসমুপ্পন্ন-ধম্মেসু চ ৰিমুয্হতি.

‘‘অভিসঙ্খরোতি সো এতে, সঙ্খারে তিৰিধে যতো;

অৰিজ্জা পচ্চযো তেসং, তিৰিধানম্পযং ততো.

‘‘যথাপি নাম জচ্চন্ধো, নরো অপরিণাযকো;

একদা যাতি মগ্গেন, উম্মগ্গেনাপি একদা.

‘‘সংসারে সংসরং বালো, তথা অপরিণাযকো;

করোতি একদা পুঞ্ঞং, অপুঞ্ঞমপি একদা.

‘‘যদা চ ঞত্ৰা সো ধম্মং, সচ্চানি অভিসমেস্সতি;

তদা অৰিজ্জূপসমা, উপসন্তো চরিস্সতী’’তি.

সঙ্খারপচ্চযা ৰিঞ্ঞাণন্তি ছৰিঞ্ঞাণকাযা চক্খুৰিঞ্ঞাণং সোতৰিঞ্ঞাণং ঘানৰিঞ্ঞাণং জিৰ্হাৰিঞ্ঞাণং কাযৰিঞ্ঞাণং মনোৰিঞ্ঞাণং. তত্থ চক্খুৰিঞ্ঞাণং কুসলৰিপাকং অকুসলৰিপাকন্তি দুৰিধং. তথা সোতঘানজিৰ্হাকাযৰিঞ্ঞাণানি. মনোৰিঞ্ঞাণং পন দ্ৰে ৰিপাকমনোধাতুযো, তিস্সো অহেতুকৰিপাকমনোৰিঞ্ঞাণধাতুযো, অট্ঠ সহেতুকৰিপাকচিত্তানি, পঞ্চ রূপাৰচরৰিপাকচিত্তানি, চত্তারি অরূপাৰচরৰিপাকচিত্তানীতি বাৰীসতিৰিধং. ইতি সব্বানি বাত্তিংসলোকিযৰিপাকৰিঞ্ঞাণানি.

তত্থ সিযা – কথং পনেতং জানিতব্বং ‘‘ইদং ৰুত্তপ্পকারং ৰিঞ্ঞাণং সঙ্খারপচ্চযা হোতী’’তি? উপচিতকম্মাভাৰে ৰিপাকাভাৰতো. ৰিপাকঞ্হেতং, ৰিপাকঞ্চ ন উপচিতকম্মাভাৰে উপ্পজ্জতি, যদি উপ্পজ্জেয্য, সব্বেসং সব্বৰিপাকানি উপ্পজ্জেয্যুং, ন চ উপ্পজ্জন্তীতি জানিতব্বমেতং ‘‘সঙ্খারপচ্চযা ইদং ৰিঞ্ঞাণং হোতী’’তি. সব্বমেৰ হি ইদং পৰত্তিপটিসন্ধিৰসেন দ্ৰেধা পৰত্ততি. তত্থ দ্ৰে পঞ্চৰিঞ্ঞাণানি, দ্ৰে মনোধাতুযো, সোমনস্সসহগতা অহেতুকমনোৰিঞ্ঞাণধাতূতি ইমানি তেরস পঞ্চৰোকারভৰে পৰত্তিযংযেৰ পৰত্তন্তি. সেসানি একূনৰীসতি তীসু ভৰেসু যথানুরূপং পৰত্তিযম্পি পটিসন্ধিযম্পি পৰত্তন্তি.

‘‘লদ্ধপ্পচ্চযমিতি ধম্ম-মত্তমেতং ভৰন্তরমুপেতি;

নাস্স ততো সঙ্কন্তি, ন ততো হেতুং ৰিনা হোতি’’.

ইতি হেতং লদ্ধপ্পচ্চযং রূপারূপধম্মমত্তং উপ্পজ্জমানং ‘‘ভৰন্তরমুপেতী’’তি ৰুচ্চতি, ন সত্তো ন জীৰো. তস্স চ নাপি অতীতভৰতো ইধ সঙ্কন্তি অত্থি, নাপি ততো হেতুং ৰিনা ইধ পাতুভাৰো. এত্থ চ পুরিমং চৰনতো চুতি, পচ্ছিমং ভৰন্তরাদিপটিসন্ধানতো পটিসন্ধীতি ৰুচ্চতি.

এত্থাহ – ননু এৰং অসঙ্কন্তিপাতুভাৰে সতি যে ইমস্মিং মনুস্সত্তভাৰে খন্ধা, তেসং নিরুদ্ধত্তা, ফলপচ্চযস্স চ কম্মস্স তত্থ অগমনতো, অঞ্ঞস্স অঞ্ঞতো চ তং ফলং সিযা, উপভুঞ্জকে চ অসতি কস্স তং ফলং সিযা, তস্মা ন সুন্দরমিদং ৰিধানন্তি? তত্রিদং ৰুচ্চতি –

‘‘সন্তানে যং ফলং এতং, নাঞ্ঞস্স ন চ অঞ্ঞতো;

বীজানং অভিসঙ্খারো, এতস্সত্থস্স সাধকো.

‘‘ফলস্সুপ্পত্তিযা এৰ, সিদ্ধা ভুঞ্জকসম্মুতি;

ফলুপ্পাদেন রুক্খস্স, যথা ফলতি সম্মুতী’’তি.

যোপি ৰদেয্য ‘‘এৰং সন্তেপি এতে সঙ্খারা ৰিজ্জমানা ৰা ফলস্স পচ্চযা সিযুং, অৰিজ্জমানা ৰা. যদি চ ৰিজ্জমানা, পৰত্তিক্খণেযেৰ নেসং ৰিপাকেন ভৰিতব্বং. অথ অৰিজ্জমানা, পৰত্তিতো পুব্বে পচ্ছা চ নিচ্চং ফলাৰহা সিযু’’ন্তি. সো এৰং ৰত্তব্বো –

‘‘কতত্তা পচ্চযা এতে, ন চ নিচ্চং ফলাৰহা;

পাটিভোগাদিকং তত্থ, ৰেদিতব্বং নিদস্সন’’ন্তি.

ৰিঞ্ঞাণপচ্চযা নামরূপন্তি ইধ ৰেদনাসঞ্ঞাসঙ্খারক্খন্ধা নামং, চত্তারি মহাভূতানি চতুন্নঞ্চ মহাভূতানং উপাদাযরূপং রূপং. অভাৰকগব্ভসেয্যকানং অণ্ডজানঞ্চ পটিসন্ধিক্খণে ৰত্থুদসকং কাযদসকন্তি ৰীসতি রূপরূপানি, তযো চ অরূপিনো খন্ধাতি এতে তেৰীসতি ধম্মা ‘‘ৰিঞ্ঞাণপচ্চযা নামরূপ’’ন্তি ৰেদিতব্বা. সভাৰকানং ভাৰদসকং পক্খিপিত্ৰা তেত্তিংস, ওপপাতিকসত্তেসু ব্রহ্মকাযিকাদীনং পটিসন্ধিক্খণে চক্খুসোতৰত্থুদসকানি জীৰিতিন্দ্রিযনৰকঞ্চাতি একূনচত্তালীস রূপরূপানি, তযো চ অরূপিনো খন্ধাতি এতে বাচত্তালীস ধম্মা ‘‘ৰিঞ্ঞাণপচ্চযা নামরূপ’’ন্তি ৰেদিতব্বা. কামভৰে পন সেসওপপাতিকানং, সংসেদজানং ৰা সভাৰকপরিপুণ্ণাযতনানং পটিসন্ধিক্খণে চক্খুসোতঘানজিৰ্হাকাযৰত্থুভাৰদসকানীতি সত্ততি রূপরূপানি, তযো চ অরূপিনো খন্ধাতি এতে তেসত্ততি ধম্মা ‘‘ৰিঞ্ঞাণপচ্চযা নামরূপ’’ন্তি ৰেদিতব্বা. এস উক্কংসো, অৰকংসেন পন তংতংদসকৰিকলানং তস্স তস্স ৰসেন হাপেত্ৰা হাপেত্ৰা পটিসন্ধিযং ৰিঞ্ঞাণপচ্চযা নামরূপসঙ্খা ৰেদিতব্বা. অরূপীনং পন তযোৰ অরূপিনো খন্ধা. অসঞ্ঞীনং রূপতো জীৰিতিন্দ্রিযনৰকমেৰাতি. এস তাৰ পটিসন্ধিযং নযো.

পৰত্তে পন সব্বত্থ রূপপৰত্তিদেসে পটিসন্ধিচিত্তস্স ঠিতিক্খণে পটিসন্ধিচিত্তেন সহ পৰত্তউতুতো উতুসমুট্ঠানং সুদ্ধট্ঠকং পাতুভৰতি. পঠমভৰঙ্গতো পভুতি চিত্তসমুট্ঠানং সুদ্ধট্ঠকং, সদ্দপাতুভাৰকালে উতুতো চেৰ চিত্ততো চ সদ্দনৰকং, কবল়ীকারাহারূপজীৰীনং আহারসমুট্ঠানং সুদ্ধট্ঠকন্তি এৰং আহারসমুট্ঠানস্স, সুদ্ধট্ঠকস্স, উতুচিত্তসমুট্ঠানানঞ্চ দ্ৰিন্নং নৰকানং ৰসেন ছব্বীসতিৰিধং, একেকচিত্তে তিক্খত্তুং উপ্পজ্জমানং ৰুত্তকম্মসমুট্ঠানঞ্চ সত্ততিৰিধন্তি ছন্নৰুতিৰিধং রূপং, তযো চ অরূপিনো খন্ধাতি নৰনৰুতিধম্মা যথাসম্ভৰং ‘‘ৰিঞ্ঞাণপচ্চযা নামরূপ’’ন্তি ৰেদিতব্বা.

তত্থ সিযা – কথং পনেতং জানিতব্বং ‘‘পটিসন্ধিনামরূপং ৰিঞ্ঞাণপচ্চযা হোতী’’তি? সুত্ততো যুত্তিতো চ. সুত্তে হি ‘‘চিত্তানুপরিৰত্তিনো ধম্মা’’তিআদিনা (ধ. স. দুকমাতিকা ৬২) নযেন বহুধা ৰেদনাদীনং ৰিঞ্ঞাণপচ্চযতা সিদ্ধা. যুত্তিতো পন –

‘‘চিত্তজেন হি রূপেন, ইধ দিট্ঠেন সিজ্ঝতি;

অদিট্ঠস্সাপি রূপস্স, ৰিঞ্ঞাণং পচ্চযো ইতী’’তি.

নামরূপপচ্চযা সল়াযতনন্তি নামং ৰুত্তমেৰ. ইধ পন রূপং নিযমতো চত্তারি মহাভূতানি, ছ ৰত্থূনি, জীৰিতিন্দ্রিযন্তি একাদসৰিধং. সল়াযতনং পন চক্খাযতনং সোতঘানজিৰ্হাকাযমনাযতনং.

তত্থ সিযা – কথং পনেতং জানিতব্বং ‘‘নামরূপং সল়াযতনস্স পচ্চযো’’তি? নামরূপভাৰে ভাৰতো. তস্স তস্স হি নামস্স রূপস্স চ ভাৰে তং তং আযতনং হোতি, ন অঞ্ঞথাতি.

সল়াযতনপচ্চযা ফস্সোতি –

‘‘ছল়েৰ ফস্সা সঙ্খেপা, চক্খুসম্ফস্সআদযো;

ৰিঞ্ঞাণমিৰ বাত্তিংস, ৰিত্থারেন ভৰন্তি তে’’.

ফস্সপচ্চযা ৰেদনাতি –

‘‘দ্ৰারতো ৰেদনা ৰুত্তা, চক্খুসম্ফস্সজাদিকা;

ছল়েৰ তা পভেদেন, ইধ বাত্তিংস ৰেদনা’’.

ৰেদনাপচ্চযা তণ্হাতি –

‘‘রূপতণ্হাদিভেদেন, ছ তণ্হা ইধ দীপিতা;

একেকা তিৰিধা তত্থ, পৰত্তাকারতো মতা.

‘‘দুক্খী সুখং পত্থযতি, সুখী ভিয্যোপি ইচ্ছতি;

উপেক্খা পন সন্তত্তা, সুখমিচ্চেৰ ভাসিতা.

‘‘তণ্হায পচ্চযা তস্মা, হোন্তি তিস্সোপি ৰেদনা;

ৰেদনাপচ্চযা তণ্হা, ইতি ৰুত্তা মহেসিনা’’তি.

তণ্হাপচ্চযা উপাদানন্তি চত্তারি উপাদানানি কামুপাদানং দিট্ঠুপাদানং সীলব্বতুপাদানং অত্তৰাদুপাদানং. উপাদানপচ্চযা ভৰোতি ইধ কম্মভৰো অধিপ্পেতো, উপপত্তিভৰো পন পদুদ্ধারৰসেন ৰুত্তো. ভৰপচ্চযা জাতীতি কম্মভৰপচ্চযা জাতি পটিসন্ধিখন্ধানং পাতুভৰো.

তত্থ সিযা – কথং পনেতং জানিতব্বং ‘‘ভৰো জাতিযা পচ্চযো’’তি চে? বাহিরপচ্চযসমত্তেপি হীনপণীততাদিৰিসেসদস্সনতো. বাহিরানঞ্হি জনকজননিসুক্কসোণিতাহারাদীনং পচ্চযানং সমত্তেপি সত্তানং যমকানম্পি সতং হীনপণীততাদিৰিসেসো দিস্সতি. সো চ ন অহেতুকো সব্বদা চ সব্বেসঞ্চ অভাৰতো, ন কম্মভৰতো অঞ্ঞহেতুকো তদভিনিব্বত্তকসত্তানং অজ্ঝত্তসন্তানে অঞ্ঞস্স কারণস্স অভাৰতোতি কম্মভৰহেতুকোৰ. কম্মঞ্হি সত্তানং হীনপণীততাদিৰিসেসস্স হেতু. তেনাহ ভগৰা – ‘‘কম্মং সত্তে ৰিভজতি যদিদং হীনপণীততাযা’’তি (ম. নি. ৩.২৮৯). তস্মা জানিতব্বমেতং ‘‘ভৰো জাতিযা পচ্চযো’’তি.

জাতিপচ্চযা জরামরণন্তিআদীসু যস্মা অসতি জাতিযা জরামরণঞ্চেৰ সোকাদযো চ ধম্মা ন হোন্তি, জাতিযা পন সতি জরামরণঞ্চেৰ জরামরণসঙ্খাতদুক্খধম্মফুট্ঠস্স বালস্স জরামরণাদিসম্বন্ধা ৰা তেন তেন দুক্খধম্মেন ফুট্ঠস্স অনভিসম্বন্ধা ৰা সোকাদযো চ ধম্মা হোন্তি. তস্মা জাতিপচ্চযা জরামরণন্তি. সমেচ্চ অভিসমেচ্চ ধম্মন্তি ঞাণেন সমাগন্ত্ৰা চতুসচ্চধম্মং পটিৰিজ্ঝিত্ৰা.

এৰং দ্ৰাদসপদিকং পচ্চযাকারপ্পৰত্তিং দস্সেত্ৰা ইদানি ৰিৰট্টৰসেন অৰিজ্জাদীনং নিরোধদস্সনত্থং ‘‘অৰিজ্জানিরোধা সঙ্খারনিরোধোতি সমেচ্চ অভিসমেচ্চ ধম্ম’’ন্তিআদিমাহ. তত্থ অৰিজ্জানিরোধাতি অৰিজ্জায অনুপ্পাদনিরোধা পুন অপ্পৰত্তিনিরোধেন. সঙ্খারনিরোধোতি সঙ্খারানং অনুপ্পাদনিরোধো হোতি. এৰং সেসপদেসুপি. ইদং দুক্খন্তিআদযো পুব্বে ৰুত্তনযা এৰ. ইমে ধম্মা অভিঞ্ঞেয্যাতি ইমে তেভূমকা ধম্মা সভাৰলক্খণাৰবোধৰসেন সোভনাকারেন, অধিকেন ঞাণেন ৰা সভাৰতো জানিতব্বা. পরিঞ্ঞেয্যাতি সামঞ্ঞলক্খণাৰবোধৰসেন, কিচ্চসমাপনৰসেন চ ব্যাপিত্ৰা জানিতব্বা. ইমে ধম্মা পহাতব্বাতি ইমে সমুদযপক্খিকা ধম্মা তেন তেন গুণঙ্গেন পহাতব্বা. ভাৰেতব্বাতি ৰড্ঢেতব্বা. সচ্ছিকাতব্বাতি পচ্চক্খং কাতব্বা. দুৰিধা সচ্ছিকিরিযা পটিলাভসচ্ছিকিরিযা চ আরম্মণসচ্ছিকিরিযা চ. ছন্নং ফস্সাযতনানন্তি চক্খাদীনং ছন্নং আযতনানং. সমুদযঞ্চ অত্থঙ্গমঞ্চাতি উপ্পাদঞ্চ নিরোধঞ্চ.

ভূরিপঞ্ঞোতি ভূরি ৰিযাতি ভূরি, তায ভূরিপঞ্ঞায সমন্নাগতো ভূরিপঞ্ঞো. মহাপঞ্ঞোতিআদীসু মহাপঞ্ঞাদীহি সমন্নাগতোতি অত্থো.

তত্রিদং মহাপঞ্ঞাদীনং নানত্তং – কতমা মহাপঞ্ঞা? মহন্তে অত্থে পরিগ্গণ্হাতীতি মহাপঞ্ঞা. মহন্তে ধম্মে…পে… মহন্তা নিরুত্তিযো… মহন্তানি পটিভানানি পরিগ্গণ্হাতীতি মহাপঞ্ঞা. মহন্তে সীলক্খন্ধে পরিগ্গণ্হাতীতি মহাপঞ্ঞা. মহন্তে সমাধিক্খন্ধে…পে… পঞ্ঞাক্খন্ধে… ৰিমুত্তিক্খন্ধে… ৰিমুত্তিঞাণদস্সনক্খন্ধে পরিগ্গণ্হাতীতি মহাপঞ্ঞা. মহন্তানি ঠানাঠানানি…পে… মহাৰিহারসমাপত্তিযো… মহন্তানি অরিযসচ্চানি… মহন্তে সতিপট্ঠানে… সম্মপ্পধানে… ইদ্ধিপাদে… মহন্তানি ইন্দ্রিযানি … বলানি… বোজ্ঝঙ্গানি… মহন্তে অরিযমগ্গে… মহন্তানি সামঞ্ঞফলানি… মহাঅভিঞ্ঞাযো… মহন্তং পরমত্থং নিব্বানং পরিগ্গণ্হাতীতি মহাপঞ্ঞা.

কতমা পুথুপঞ্ঞা? পুথুনানাখন্ধেসু ঞাণং পৰত্ততীতি পুথুপঞ্ঞা. পুথুনানাধাতূসু…পে… পুথুনানাআযতনেসু… পুথুনানাপটিচ্চসমুপ্পাদেসু… পুথুনানাসুঞ্ঞতমনুপলব্ভেসু… পুথুনানাঅত্থেসু… ধম্মেসু… নিরুত্তীসু… পটিভানেসু… পুথুনানাসীলক্খন্ধেসু… পুথুনানাসমাধিপঞ্ঞাৰিমুত্তিৰিমুত্তিঞাণদস্সনক্খন্ধেসু… পুথুনানাঠানাঠানেসু… পুথুনানাৰিহারসমাপত্তীসু… পুথুনানাঅরিযসচ্চেসু… পুথুনানাসতিপট্ঠানেসু… সম্মপ্পধানেসু… ইদ্ধিপাদেসু… ইন্দ্রিযেসু… বলেসু… বোজ্ঝঙ্গেসু… পুথুনানাঅরিযমগ্গেসু… সামঞ্ঞফলেসু… অভিঞ্ঞাসু… পুথুনানাজনসাধারণে ধম্মে সমতিক্কম্ম পরমত্থে নিব্বানে ঞাণং পৰত্ততীতি পুথুপঞ্ঞা.

কতমা হাসপঞ্ঞা? ইধেকচ্চো হাসবহুলো ৰেদবহুলো তুট্ঠিবহুলো পামোজ্জবহুলো সীলং পরিপূরেতি. ইন্দ্রিযসংৰরং পরিপূরেতি. ভোজনে মত্তঞ্ঞুতং…পে… জাগরিযানুযোগং… সীলক্খন্ধং… সমাধিক্খন্ধং… পঞ্ঞাক্খন্ধং… ৰিমুত্তিক্খন্ধং… ৰিমুত্তিঞাণদস্সনক্খন্ধং পরিপূরেতীতি হাসপঞ্ঞা. হাসবহুলো…পে… পামোজ্জবহুলো ঠানাঠানং পটিৰিজ্ঝতীতি হাসপঞ্ঞা. হাসবহুলো ৰিহারসমাপত্তিযো পরিপূরেতীতি হাসপঞ্ঞা. হাসবহুলো অরিযসচ্চানি পটিৰিজ্ঝতীতি হাসপঞ্ঞা. সতিপট্ঠানে ভাৰেতি সম্মপ্পধানে… ইদ্ধিপাদে… ইন্দ্রিযানি… বলানি… বোজ্ঝঙ্গে… অরিযমগ্গং ভাৰেতীতি হাসপঞ্ঞা, হাসবহুলো সামঞ্ঞফলানি সচ্ছিকরোতীতি হাসপঞ্ঞা, অভিঞ্ঞাযো পটিৰিজ্ঝতীতি হাসপঞ্ঞা, হাসবহুলো পরমত্থং নিব্বানং সচ্ছিকরোতীতি হাসপঞ্ঞা.

কতমা জৰনপঞ্ঞা? যং কিঞ্চি রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং রূপং অনিচ্চতো খিপ্পং জৰতীতি জৰনপঞ্ঞা. দুক্খতো, অনত্ততো খিপ্পং জৰতীতি জৰনপঞ্ঞা. যা কাচি ৰেদনা…পে… যা কাচি সঞ্ঞা… যে কেচি সঙ্খারা… যং কিঞ্চি ৰিঞ্ঞাণং অতীতানাগতপচ্চুপ্পন্নং…পে… যং দূরে সন্তিকে ৰা, সব্বং ৰিঞ্ঞাণং অনিচ্চতো… দুক্খতো… অনত্ততো খিপ্পং জৰতীতি জৰনপঞ্ঞা. চক্খুং…পে… জরামরণং অতীতানাগতপচ্চুপ্পন্নং অনিচ্চতো… দুক্খতো… অনত্ততো খিপ্পং জৰতীতি জৰনপঞ্ঞা.

রূপং অতীতানাগতপচ্চুপ্পন্নং অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনাতি তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা রূপনিরোধে নিব্বানে খিপ্পং জৰতীতি জৰনপঞ্ঞা. ৰেদনা… সঞ্ঞা… সঙ্খারা… ৰিঞ্ঞাণং… চক্খুং…পে… জরামরণং অতীতানাগতপচ্চুপ্পন্নং অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনাতি তুলযিত্ৰা…পে… ৰিভূতং কত্ৰা জরামরণনিরোধে নিব্বানে খিপ্পং জৰতীতি জৰনপঞ্ঞা.

রূপং অতীতানাগতপচ্চুপ্পন্নং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মন্তি তুলযিত্ৰা…পে… ৰিভূতং কত্ৰা রূপনিরোধে নিব্বানে খিপ্পং জৰতীতি জৰনপঞ্ঞা. ৰেদনা…পে… সঞ্ঞা… সঙ্খারা… ৰিঞ্ঞাণং… চক্খুং…পে… জরামরণং অতীতানাগতপচ্চুপ্পন্নং অনিচ্চং…পে… নিরোধধম্মন্তি তুলযিত্ৰা…পে… ৰিভূতং কত্ৰা জরামরণনিরোধে নিব্বানে খিপ্পং জৰতীতি জৰনপঞ্ঞা.

কতমা তিক্খপঞ্ঞা? খিপ্পং কিলেসে ছিন্দতীতি তিক্খপঞ্ঞা. উপ্পন্নং কামৰিতক্কং নাধিৰাসেতি. উপ্পন্নং ব্যাপাদৰিতক্কং… উপ্পন্নং ৰিহিংসাৰিতক্কং… উপ্পন্নুপ্পন্নে পাপকে অকুসলে ধম্মে… উপ্পন্নং রাগং… উপ্পন্নং দোসং… মোহং… কোধং… উপনাহং… মক্খং… পল়াসং… ইস্সং… মচ্ছরিযং… মাযং… সাঠেয্যং… থম্ভং… সারম্ভং… মানং… অতিমানং… মদং… পমাদং… সব্বে কিলেসে… সব্বে দুচ্চরিতে… সব্বে অভিসঙ্খারে… সব্বে ভৰগামিকম্মে নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতীতি তিক্খপঞ্ঞা. একম্হি আসনে চত্তারো অরিযমগ্গা, চত্তারি চ সামঞ্ঞফলানি, চতস্সো চ পটিসম্ভিদাযো, ছ অভিঞ্ঞাযো অধিগতা হোন্তি সচ্ছিকতা ফস্সিতা পঞ্ঞাযাতি তিক্খপঞ্ঞা.

কতমা নিব্বেধিকপঞ্ঞা? ইধেকচ্চো সব্বসঙ্খারেসু উব্বেগবহুলো হোতি উত্তাসবহুলো উক্কণ্ঠনবহুলো অরতিবহুলো অনভিরতিবহুলো বহিমুখো ন রমতি সব্বসঙ্খারেসু, অনিব্বিদ্ধপুব্বং অপদালিতপুব্বং লোভক্খন্ধং নিব্বিজ্ঝতি পদালেতীতি নিব্বেধিকপঞ্ঞা. অনিব্বিদ্ধপুব্বং অপদালিতপুব্বং দোসক্খন্ধং…পে… মোহক্খন্ধং… কোধং… উপনাহং…পে… সব্বে ভৰগামিকম্মে নিব্বিজ্ঝতি পদালেতীতি নিব্বেধিকপঞ্ঞা.

২৮. স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰাতি সো ভূরিপঞ্ঞো খীণাসৰো যং কিঞ্চি দিট্ঠং ৰা সুতং ৰা মুতং ৰা তেসু সব্বধম্মেসু মারসেনং ৰিনাসেত্ৰা ঠিতভাৰেন ৰিসেনিভূতো. তমেৰ দস্সিন্তি তং এৰ ৰিসুদ্ধদস্সিং. ৰিৰটং চরন্তন্তি তণ্হাছদনাদিৰিগমেন ৰিৰটং হুত্ৰা চরন্তং. কেনীধ লোকস্মি ৰিকপ্পযেয্যাতি কেন ইধ লোকে তণ্হাকপ্পেন ৰা দিট্ঠিকপ্পেন ৰা কোচি ৰিকপ্পেয্য, তেসং ৰা পহীনত্তা রাগাদিনা পুব্বে ৰুত্তেনাতি.

কামা তে পঠমা সেনাতিআদীসু চতূসু গাথাসু অযমত্থো – যস্মা আদিতোৰ অগারিযভূতে সত্তে ৰত্থুকামেসু কিলেসকামা মোহযন্তি, তে অভিভুয্য অনগারিযভাৰং উপগতানং পন্তেসু ৰা সেনাসনেসু, অঞ্ঞতরঞ্ঞতরেসু ৰা অধিকুসলেসু ধম্মেসু অরতি উপ্পজ্জতি. ৰুত্তঞ্চেতং – ‘‘পব্বজিতেন খো, আৰুসো, অভিরতি দুক্করা’’তি (সং. নি. ৪.৩৩১). ততো তে পরপটিবদ্ধজীৰিকত্তা খুপ্পিপাসা বাধেতি, তায বাধিতানং পরিযেসনতণ্হা চিত্তং কিলমযতি, অথ নেসং কিলন্তচিত্তানং থিনমিদ্ধং ওক্কমতি ততো ৰিসেসমনধিগচ্ছন্তানং দুরভিসম্ভৰেসু অরঞ্ঞৰনপত্থেসু সেনাসনেসু ৰিহরতং উত্রাসসঞ্ঞিতা ভীরু জাযতি, তেসং উস্সঙ্কিতপরিসঙ্কিতানং দীঘরত্তং ৰিৰেকরসমনস্সাদযমানানং ৰিহরতং ‘‘ন সিযা নু খো এস মগ্গো’’তি পটিপত্তিযং ৰিচিকিচ্ছা উপ্পজ্জতি, তং ৰিনোদেত্ৰা ৰিহরতং অপ্পমত্তকেন ৰিসেসাধিগমেন মানমক্খথম্ভা জাযন্তি, তেপি ৰিনোদেত্ৰা ৰিহরতং ততো অধিকতরং ৰিসেসাধিগমং নিস্সায লাভসক্কারসিলোকা উপ্পজ্জন্তি, লাভাদিমুচ্ছিতা ধম্মপটিরূপকানি পকাসেন্তা মিচ্ছাযসং অধিগন্ত্ৰা তত্থ ঠিতা জাতিআদীহি অত্তানং উক্কংসেন্তি, পরং ৰম্ভেন্তি. তস্মা কামাদীনং পঠমসেনাদিভাৰো ৰেদিতব্বো.

এৰমেতং দসৰিধং সেনং উদ্দিসিত্ৰা যস্মা সা কণ্হধম্মসমন্নাগতত্তা কণ্হস্স নমুচিনো উপকারায সংৰত্ততি, তস্মা নং ‘‘তৰ সেনা’’তি নিদ্দিসন্তো আহ – ‘‘এসা নমুচি তে সেনা, কণ্হস্সাভিপ্পহারিনী’’তি. তত্থ অভিপ্পহারিনীতি সমণব্রাহ্মণানং ঘাতিনী নিপ্পোথিনী, অন্তরাযকরীতি অত্থো. ন নং অসূরো জিনাতি, জেত্ৰাৰ লভতে সুখন্তি এৰং তৰ সেনং অসূরো কাযে চ জীৰিতে চ সাপেক্খো পুরিসো ন জিনাতি, সূরো পন জিনাতি, জেত্ৰাৰ মগ্গসুখং ফলসুখঞ্চ অধিগচ্ছতি.

যতো চতূহি অরিযমগ্গেহীতি যদা চতূহি নিদ্দোসনিব্বানমগ্গনসঙ্খাতেহি মগ্গেহি. মারসেনাতি মারস্স সেনা ৰচনকরা কিলেসা. পটিসেনিকরাতি পটিপক্খকরা. জিতা চাতি পরাজযমানা হনিতা চ. পরাজিতা চাতি নিগ্গহিতা চ. ভগ্গাতি ভিন্না. ৰিপ্পলুগ্গাতি চুণ্ণৰিচুণ্ণা. পরম্মুখাতি ৰিমুখভাৰং পাপিতা. ৰিসেনিভূতোতি নিক্কিলেসো হুত্ৰা ঠিতো.

ৰোদাতদস্সিন্তি ব্যৰদাতদস্সিং. তানি ছদনানীতি এতানি তণ্হাদিকিলেসছদনানি. ৰিৰটানীতি পাকটীকতানি. ৰিদ্ধংসিতানীতি ঠিতট্ঠানতো অপহতানি. উগ্ঘাটিতানীতি উপ্পাটিতানি. সমুগ্ঘাটিতানীতি ৰিসেসেন উপ্পাটিতানি.

২৯. ন কপ্পযন্তীতি গাথায সম্বন্ধো অত্থো চ – কিঞ্চ ভিয্যো? তে হি তাদিসা সন্তো দ্ৰিন্নং কপ্পানং পুরেক্খারানঞ্চ কেনচি ন কপ্পযন্তি, ন পুরেক্খরোন্তি. পরমত্থং অচ্চন্তসুদ্ধিং অধিগতত্তা অনচ্চন্তসুদ্ধিংযেৰ অকিরিযসস্সতদিট্ঠিং ‘‘অচ্চন্তসুদ্ধী’’তি ন তে ৰদন্তি. আদানগন্থং গতিতং ৰিসজ্জাতি চতুব্বিধম্পি রূপাদীনং আদাযকত্তা আদানগন্থং অত্তনো চিত্তসন্তানে গথিতং বদ্ধং অরিযমগ্গসত্থেন ৰিস্সজ্জ ছিন্দিত্ৰা. সেসং পাকটমেৰ.

অচ্চন্তসুদ্ধিন্তি অচ্চন্তং পরমত্থং সুদ্ধিং. সংসারসুদ্ধিন্তি সংসারতো সুদ্ধিং. অকিরিযদিট্ঠিন্তি করোতো ন করীযতি পাপন্তি অকিরিযদিট্ঠিং. সস্সতৰাদন্তি ‘‘নিচ্চো ধুৰো সস্সতো’’তি ৰচনং. ন ৰদন্তি ন কথেন্তি.

গন্থাতি নামকাযং গন্থেন্তি, চুতিপটিসন্ধিৰসেন ৰট্টস্মিং ঘটেন্তীতি গন্থা. অভিজ্ঝা চ সা নামকাযঘটনৰসেন গন্থো চাতি অভিজ্ঝাকাযগন্থো. হিতসুখং ব্যাপাদযতীতি ব্যাপাদো. ব্যাপাদো চ সো ৰুত্তনযেন গন্থো চাতি ব্যাপাদো কাযগন্থো. সীলব্বতপরামাসোতি ‘‘ইতো বহিদ্ধা সমণব্রাহ্মণানং সীলেন সুদ্ধি ৰতেন সুদ্ধী’’তি (ধ. স. ১১৪৩, ১২২২) পরতো আমাসো. ইদংসচ্চাভিনিৰেসোতি সব্বঞ্ঞুভাসিতম্পি পটিক্খিপিত্ৰা ‘‘সস্সতো লোকো, ইদমেৰ সচ্চং, মোঘমঞ্ঞ’’ন্তি (ধ. স. ১১৪৪) ইমিনা আকারেন অভিনিৰেসো ইদংসচ্চাভিনিৰেসো. অত্তনো দিট্ঠিযা রাগোতি অত্তনা অভিনিৰিসিত্ৰা গহিতায দিট্ঠিযা ছন্দরাগো. পরৰাদেসু আঘাতোতি পরস্স ৰচনেসু কোপো. অপ্পচ্চযোতি অতুট্ঠাকারো. অত্তনো সীলং ৰাতি অত্তনা সমাদিন্নং গোসীলাদিসীলং ৰা. অত্তনো দিট্ঠীতি অত্তনা গহিতা পরামট্ঠা দিট্ঠি. তেহি গন্থেহীতি এতেহি ৰুত্তেহি নামকাযঘটনেহি. রূপং আদিযন্তীতি চতুসমুট্ঠানিকং রূপারম্মণং আদিযন্তি গণ্হন্তি. উপাদিযন্তীতি উপগন্ত্ৰা গণ্হন্তি তণ্হাগহণেন. পরামসন্তি দিট্ঠিগহণেন. অভিনিৰিসন্তি মানগহণেন. ৰট্টন্তি তেভূমকৰট্টং. গন্থেতি বন্ধনে.

ৰোসজ্জিত্ৰা ৰাতি সম্মা ৰিস্সজ্জিত্ৰা ৰা. গথিতেতি বন্ধনে. গন্থিতেতি গন্থনেন গন্থিতে. ৰিবন্ধেতি ৰিসেসেন বন্ধে. আবন্ধেতি অনেকৰিধেন বন্ধে. পলিবুদ্ধেতি অমুঞ্চিতে. বন্ধনে পোটযিত্ৰাতি তণ্হামানদিট্ঠিবন্ধনানি পপ্পোটযিত্ৰা. ৰিসজ্জাতি চজিত্ৰা.

ইমে পন চত্তারো গন্থে কিলেসপটিপাটিযাপি আহরিতুং ৰট্টতি, মগ্গপটিপাটিযাপি – কিলেসপটিপাটিযা অভিজ্ঝাকাযগন্থো অরহত্তমগ্গেন পহীযতি, ব্যাপাদো কাযগন্থো অনাগামিমগ্গেন, সীলব্বতপরামাসো কাযগন্থো ইদংসচ্চাভিনিৰেসো কাযগন্থো সোতাপত্তিমগ্গেন. মগ্গপটিপাটিযা সীলব্বতপরামাসো কাযগন্থো ইদংসচ্চাভিনিৰেসো কাযগন্থো সোতাপত্তিমগ্গেন, ব্যাপাদো কাযগন্থো অনাগামিমগ্গেন, অভিজ্ঝাকাযগন্থো অরহত্তমগ্গেনাতি. এতে চত্তারো গন্থা যস্স সংৰিজ্জন্তি, তং চুতিপটিসন্ধিৰসেন ৰট্টস্মিং গন্থেন্তি ঘটেন্তীতি গন্থা. তে চতুপ্পভেদা অভিজ্ঝাযন্তি এতায, সযং ৰা অভিজ্ঝাযতি, অভিজ্ঝাযনমত্তমেৰ ৰা এসাতি অভিজ্ঝা. লোভোযেৰ নামকাযং গন্থেতি চুতিপটিসন্ধিৰসেন ৰট্টস্মিং ঘটেতীতি কাযগন্থো. ব্যাপজ্জতি তেন চিত্তং পূতিভাৰং গচ্ছতি, ব্যাপাদযতি ৰা ৰিনযাচাররূপসম্পত্তিহিতসুখাদীনীতি ব্যাপাদো. ‘‘ইতো বহিদ্ধা সমণব্রাহ্মণানং সীলেন সুদ্ধি ৰতেন সুদ্ধী’’তি পরামসনং সীলব্বতপরামাসো, সব্বঞ্ঞুভাসিতম্পি পটিক্খিপিত্ৰা ‘‘সস্সতো লোকো, ইদমেৰ সচ্চং, মোঘমঞ্ঞ’’ন্তিআদিনা আকারেন অভিনিৰিসতীতি ইদংসচ্চাভিনিৰেসো. যথা ৰয্হং ৰাতিআদিং ৰয্হাদিৰিসঙ্খরণং গন্থানং ৰিযোগকরণে উপমং দস্সেন্তো আহ.

ন জনেন্তীতি ন উপ্পাদেন্তি. ন সঞ্জনেন্তীতি ন নিব্বত্তেন্তি. নাভিনিব্বত্তেন্তীতি উপসগ্গৰসেন পদং ৰড্ঢিতং. ন সঞ্জনেন্তীতি উপ্পাদক্খণং. ন নিব্বত্তেন্তি নাভিনিব্বত্তেন্তীতি পৰত্তিক্খণং সন্ধায ৰুত্তং.

৩০. সীমাতিগোতি গাথা একপুগ্গলাধিট্ঠানায দেসনায ৰুত্তা. পুব্বসদিসো এৰ পনস্সা সম্বন্ধো, সো এৰং অত্থৰণ্ণনায সদ্ধিং ৰেদিতব্বো – কিঞ্চ ভিয্যো? সো ঈদিসো ভূরিপঞ্ঞো চতুন্নং কিলেসসীমানং অতীতত্তা সীমাতিগো, বাহিতপাপত্তা চ ব্রাহ্মণো, ইত্থম্ভূতস্স চ তস্স নত্থি, পরচিত্তপুব্বেনিৰাসঞাণেহি ঞত্ৰা ৰা মংসদিব্বচক্খূহি দিস্ৰা ৰা কিঞ্চি সমুগ্গহীতং, অভিনিৰিট্ঠন্তি ৰুত্তং হোতি. সো চ কামরাগাভাৰতো ন রাগরাগী রূপারূপরাগাভাৰতো ন ৰিরাগরত্তো, যতো এৰংৰিধস্স তস্স ‘‘ইদং পরম’’ন্তি কিঞ্চি ইধ উগ্গহীতং নত্থীতি অরহত্তনিকূটেন দেসনং নিট্ঠাপেসি.

চতস্সো সীমাযোতি চত্তারো পরিচ্ছেদা. দিট্ঠানুসযোতি দিট্ঠি চ সা অপ্পহীনট্ঠেন অনুসযো চাতি দিট্ঠানুসযো. ৰিচিকিচ্ছানুসযাদীসুপি এসেৰ নযো. কেনট্ঠেন অনুসযা? অনুসযনট্ঠেন. কো এস অনুসযট্ঠো নামাতি? অপ্পহীনট্ঠো. এতে হি অপ্পহীনট্ঠেন তস্স তস্স সন্তানে অনুসেন্তি নাম, তস্মা ‘‘অনুসযা’’তি ৰুচ্চন্তি. অনুসেন্তীতি অনুরূপং কারণং লভিত্ৰা উপ্পজ্জন্তীতি অত্থো. অথাপি সিযা – অনুসযট্ঠো নাম অপ্পহীনাকারো, অপ্পহীনাকারো চ ‘‘উপ্পজ্জতী’’তি ৰত্তুং ন যুজ্জতি, তস্মা ন অনুসযা উপ্পজ্জন্তীতি. তত্রিদং পটিৰচনং – অপ্পহীনাকারো অনুসযো, অনুসযোতি পন অপ্পহীনট্ঠেন থামগতা কিলেসা ৰুচ্চন্তি. সো চিত্তসম্পযুত্তো সারম্মণো সপ্পচ্চযট্ঠেন সহেতুকো একন্তাকুসলো অতীতোপি হোতি অনাগতোপি পচ্চুপ্পন্নোপি, তস্মা ‘‘উপ্পজ্জতী’’তি ৰত্তুং যুজ্জতি.

তত্রিদং পমাণং – পটিসম্ভিদাযং তাৰ অভিসমযকথাযং (পটি. ম. ৩.২১) ‘‘পচ্চুপ্পন্নে কিলেসে পজহতী’’তি পুচ্ছিত্ৰা অনুসযানং পচ্চুপ্পন্নভাৰস্স অত্থিতায ‘‘থামগতো অনুসযং পজহতী’’তি ৰুত্তং. ধম্মসঙ্গণিযং মোহস্স পদভাজনে (ধ. স. ৩৯০) ‘‘অৰিজ্জানুসযো অৰিজ্জাপরিযুট্ঠানং, অৰিজ্জালঙ্গী মোহো অকুসলমূলং, অযং তস্মিং সমযে মোহো হোতী’’তি অকুসলচিত্তেন সদ্ধিং অৰিজ্জানুসযস্স উপ্পন্নভাৰো ৰুত্তো. কথাৰত্থুস্মিং ‘‘অনুসযা অব্যাকতা অনুসযা অহেতুকা অনুসযা চিত্তৰিপ্পযুত্তা’’তি (কথা. ৬০৫) সব্বে ৰাদা পটিসেধিতা. অনুসযযমকে সত্তন্নং মহাৰারানং অঞ্ঞতরস্মিং উপ্পজ্জনৰারে ‘‘যস্স কামরাগানুসযো উপ্পজ্জতি তস্স পটিঘানুসযো উপ্পজ্জতী’’তিআদি ৰুত্তং. তস্মা ‘‘অনুসেন্তীতি অনুরূপং কারণং লভিত্ৰা উপ্পজ্জন্তী’’তি যং ৰুত্তং, তং ইমিনা তন্তিপ্পমাণেন সুৰুত্তন্তি ৰেদিতব্বং. যম্পি ‘‘চিত্তসম্পযুত্তো সারম্মণো’’তিআদি ৰুত্তং, তম্পি সুৰুত্তমেৰ. অনুসযো হি নামেস পরিনিপ্ফন্নো চিত্তসম্পযুত্তো অকুসলধম্মোতি নিট্ঠমেত্থ গন্তব্বং.

তত্থ দিট্ঠানুসযো চতূসু দিট্ঠিসম্পযুত্তেসু, ৰিচিকিচ্ছানুসযো ৰিচিকিচ্ছাসহগতে, অৰিজ্জানুসযো দ্ৰাদসসু অকুসলচিত্তেসু সহজাতৰসেন আরম্মণৰসেন চ; তযোপি অৰসেসতেভূমকধম্মেসু আরম্মণৰসেন দিট্ঠিৰিচিকিচ্ছামোহা. কামরাগানুসযো চেত্থ লোভসহগতচিত্তেসু সহজাতৰসেন আরম্মণৰসেন চ, মনাপেসু অৰসেসকামাৰচরধম্মেসু আরম্মণৰসেন উপ্পজ্জমানো লোভো. পটিঘানুসযো দোমনস্সসহগতচিত্তেসু সহজাতৰসেন আরম্মণৰসেন চ, অমনাপেসু অৰসেসকামাৰচরধম্মেসু আরম্মণৰসেনেৰ উপ্পজ্জমানো দোসো. মানানুসযো দিট্ঠিৰিপ্পযুত্তলোভসহগতচিত্তেসু সহজাতৰসেন আরম্মণৰসেন চ, দুক্খৰেদনাৰজ্জেসু অৰসেসকামাৰচরধম্মেসু রূপারূপাৰচরধম্মেসু চ আরম্মণৰসেনেৰ উপ্পজ্জমানো মানো. ভৰরাগানুসযো চতূসু দিট্ঠিৰিপ্পযুত্তেসু উপ্পজ্জমানোপি সহজাতৰসেন ৰুত্তো. আরম্মণৰসেনেৰ পন রূপারূপাৰচরধম্মেসু উপ্পজ্জমানো লোভো ৰুত্তো.

তত্থ দিট্ঠানুসযোতি দ্ৰাসট্ঠিৰিধা দিট্ঠি. ৰিচিকিচ্ছানুসযোতি অট্ঠৰত্থুকা ৰিচিকিচ্ছা. তদেকট্ঠা চ কিলেসাতি সহজেকট্ঠৰসেন দিট্ঠিযা ৰিচিকিচ্ছায, সহজেকট্ঠৰসেন একতো ঠিতা. মানানুসযোতি নৰৰিধমানো. পরমত্থঞাণেন ৰা ঞত্ৰাতি পরেসং চিত্তাচারজাননপঞ্ঞায জানিত্ৰা, চেতোপরিযঞাণেন জানিত্ৰাতি ৰুত্তং হোতি. পুব্বেনিৰাসানুস্সতিঞাণেন ৰাতি অতীতে নিৰুট্ঠক্খন্ধানুস্সরণঞাণেন জানিত্ৰা. মংসচক্খুনা ৰাতি পকতিচক্খুনা. দিব্বচক্খুনা ৰাতি দিব্বসদিসেন দিব্বৰিহারসন্নিস্সিতেন ৰা দিব্বচক্খুনা পস্সিত্ৰা. রাগরত্তাতি রাগেন রঞ্জিতা. যে পঞ্চসু কামগুণেসূতি যে পঞ্চসু রূপাদিৰত্থুকামকোট্ঠাসেসু. ৰিরাগরত্তাতি ৰিরাগসঙ্খাতাসু রূপারূপসমাপত্তীসু অতিরত্তা অল্লীনা. যতো কামরাগো চাতি যদা কামভৰে রাগো চ. রূপারূপরাগেসুপি এসেৰ নযো.

সদ্ধম্মপ্পজ্জোতিকায মহানিদ্দেসট্ঠকথায

সুদ্ধট্ঠকসুত্তনিদ্দেসৰণ্ণনা নিট্ঠিতা.

৫. পরমট্ঠকসুত্তনিদ্দেসৰণ্ণনা

৩১. পঞ্চমে পরমট্ঠকসুত্তে পরমন্তি দিট্ঠীসু পরিব্বসানোতি ইদং পরমন্তি গহেত্ৰা সকায সকায দিট্ঠিযা ৰসমানো. যদুত্তরিং কুরুতেতি যং অত্তনো সত্থারাদিং সেট্ঠং করোতি. হীনাতি অঞ্ঞে ততো সব্বমাহাতি তং অত্তনো সত্থারাদিং ঠপেত্ৰা ততো অঞ্ঞে সব্বে ‘‘হীনা ইমে’’তি আহ. তস্মা ৰিৰাদানি অৰীতিৰত্তোতি তেন কারণেন সো দিট্ঠিকলহে অৰীতিৰত্তোৰ হোতি.

ৰসন্তীতি পঠমুপ্পন্নদিট্ঠিৰসেন ৰসন্তি. পৰসন্তীতি পৰিসিত্ৰা ৰসন্তি. আৰসন্তীতি ৰিসেসেন ৰসন্তি. পরিৰসন্তীতি সব্বভাগেন ৰসন্তি. তং উপমায সাধেন্তো ‘‘যথা আগারিকা ৰা’’তিআদিমাহ. আগারিকা ৰাতি ঘরসামিকা. ঘরেসু ৰসন্তীতি অত্তনো ঘরেসু আসঙ্কৰিরহিতা হুত্ৰা নিৰসন্তি. সাপত্তিকা ৰাতি আপত্তিবহুলা. সকিলেসা ৰাতি রাগাদিকিলেসবহুলা. উত্তরিং করোতীতি অতিরেকং করোতি. অযং সত্থা সব্বঞ্ঞূতি ‘অযং অম্হাকং সত্থা সব্বং জানাতি’.

সব্বে পরপ্পৰাদে খিপতীতি সব্বা পরলদ্ধিযো ছড্ডেতি. উক্খিপতীতি নীহরতি. পরিক্খিপতীতি পরম্মুখে করোতি. দিট্ঠিমেধগানীতি দিট্ঠিৰিহেসকানি.

৩২. দুতিযগাথাযত্থো – এৰং অৰীতিৰত্তো চ যং দিট্ঠে সুতে সীলৰতে মুতেতি এতেসু চতূসু ৰত্থূসু উপ্পন্নদিট্ঠিসঙ্খাতে অত্তনি পুব্বে ৰুত্তপ্পকারং আনিসংসং পস্সতি, তদেৰ সো তত্থ সকায দিট্ঠিযা আনিসংসং ‘‘ইদং সেট্ঠ’’ন্তি অভিনিৰিসিত্ৰা অঞ্ঞং সব্বং পরসত্থারাদিকং নিহীনতো পস্সতি.

দ্ৰে আনিসংসে পস্সতীতি দ্ৰে গুণে ওলোকেতি. দিট্ঠধম্মিকঞ্চাতি দিট্ঠে পচ্চক্খে অত্তভাৰে ৰিপচ্চনকরণং. সম্পরাযিকঞ্চাতি পরলোকে পটিলভিতব্বগুণঞ্চ. যংদিট্ঠিকো সত্থাতি যংলদ্ধিকো তিত্থাযতনসামিকো. অলং নাগত্তায ৰাতি নাগরাজভাৰায ৰা পরিযত্তং. সুপণ্ণত্তাদীসুপি এসেৰ নযো. দেৰত্তায ৰাতি সম্মুতিদেৰাদিভাৰায. আযতিং ফলপাটিকঙ্খী হোতীতি অনাগতে ৰিপাকফলং পত্থযানো হোতি. দিট্ঠসুদ্ধিযাপি দ্ৰে আনিসংসে পস্সতীতি চক্খুৰিঞ্ঞাণেন দিট্ঠরূপাযতনস্স ৰসেন সুদ্ধিযা হেতুত্তাপি অত্তনো গহিতগহণেন দ্ৰে গুণে ওলোকেতি. সুতসুদ্ধিযাদীসুপি এসেৰ নযো.

৩৩. ততিযগাথাযত্থো – এৰং পস্সতো চ যং অত্তনো সত্থারাদিং নিস্সিতো অঞ্ঞং পরসত্থারাদিং হীনং পস্সতি, তং পন দস্সনং গন্থমেৰ কুসলা ৰদন্তি, বন্ধনন্তি ৰুত্তং হোতি. যস্মা এতদেৰ, তস্মা হি দিট্ঠং ৰ সুতং মুতং ৰা, সীলব্বতং ভিক্খু ন নিস্সযেয্য, নাভিনিৰেসেয্যাতি ৰুত্তং হোতি.

কুসলাতি খন্ধাদিজাননে ছেকা. খন্ধকুসলাতি রূপাদীসু পঞ্চসু খন্ধেসু কুসলা. ধাতুআযতনপটিচ্চসমুপ্পাদসতিপট্ঠানসম্মপ্পধানইদ্ধিপাদইন্দ্রিযবলবোজ্ঝঙ্গমগ্গফলনিব্বানেসুপি এসেৰ নযো. তত্থ মগ্গকুসলাতি চতূসু মগ্গেসু. ফলকুসলাতি চতূসু ফলেসু. নিব্বানকুসলাতি দুৰিধে নিব্বানে ছেকা. তে কুসলাতি তে এতেসু ৰুত্তপ্পকারেসু ছেকা. এৰং ৰদন্তীতি এৰং কথেন্তি. গন্থো এসোতি পস্সতো চ অত্তনো সত্থারাদিনিস্সিতঞ্চ অঞ্ঞং পরসত্থারাদিং হীনতো দস্সনঞ্চ গন্থো বন্ধনো এসোতি ৰদন্তি. লগ্গনং এতন্তি এতং ৰুত্তপ্পকারং নাগদন্তে লগ্গিতং ৰিয অধোলম্বনং. বন্ধনং এতন্তি নিচ্ছিন্দিতুং দুক্খট্ঠেন সঙ্খলিকাদিবন্ধনং ৰিয এতং বন্ধনং. পলিবোধো এসোতি সংসারতো নিক্খমিতুং অপ্পদানট্ঠেন এসো পলিবোধো.

৩৪. চতুত্থগাথাযত্থো – ন কেৰলং দিট্ঠসুতাদীসু ন নিস্সযেয্য, অপিচ খো পন অসঞ্জাতং উপরূপরি দিট্ঠিম্পি লোকস্মিং ন কপ্পযেয্য, ন জনেয্যাতি ৰুত্তং হোতি. কীদিসং? ঞাণেন ৰা সীলৰতেন ৰাপি, সমাপত্তিঞাণাদিঞাণেন ৰা সীলৰতেন ৰা যা কপ্পিযতি, এতং দিট্ঠিং ন কপ্পেয্য. ন কেৰলঞ্চ দিট্ঠিং ন কপ্পযেয্য, অপিচ খো পন মানেনপি জাতিআদীহি ৰত্থূহি সমোতি অত্তানমনূপনেয্য, হীনো ন মঞ্ঞেথ ৰিসেসি ৰাপীতি.

অট্ঠসমাপত্তিঞাণেন ৰাতি পঠমজ্ঝানাদীনং অট্ঠন্নং সমাপত্তীনং সম্পযুত্তপঞ্ঞায ৰা. পঞ্চাভিঞ্ঞাঞাণেন ৰাতি লোকিযানং পঞ্চন্নং অভিঞ্ঞানং সম্পযুত্তপঞ্ঞায ৰা. মিচ্ছাঞাণেন ৰাতি ৰিপরীতসভাৰেন পৰত্তায পঞ্ঞায অমুত্তে মুত্তং পস্সাতি এৰং উপ্পন্নেন মিচ্ছাঞাণেন ৰা.

৩৫. পঞ্চমগাথাযত্থো – এৰঞ্হি দিট্ঠিং অকপ্পেন্তো অমঞ্ঞমানো চ অত্তং পহায অনুপাদিযানো যং পুব্বে গহিতং, তং পহায পরং অগ্গণ্হন্তো তস্মিম্পি ৰুত্তপ্পকারে ঞাণে দুৰিধং নিস্সযং নো করোতি, অকরোন্তো চ স ৰে ৰিযত্তেসু নানাদিট্ঠিৰসেন ভিন্নেসু সত্তেসু ন ৰগ্গসারী ছন্দাদিৰসেন অগচ্ছনধম্মো হুত্ৰা দ্ৰাসট্ঠিযা দিট্ঠীসু কিঞ্চি দিট্ঠিং ন পচ্চেতি, ন পচ্চাগচ্ছতীতি ৰুত্তং হোতি.

চতূহি উপাদানেহীতি কামুপাদানাদীহি চতূহি ভুসং গহণেহি স ৰে ৰিযত্তেসূতি সো পুগ্গলো নিচ্ছিতেসু. ভিন্নেসূতি দ্ৰিধা ভিন্নেসু.

৩৬. ইদানি যো সো ইমায গাথায ৰুত্তো খীণাসৰো, তস্স ৰণ্ণভণনত্থং ‘‘যস্সূভযন্তে’’তিআদিকা তিস্সো গাথাযো আহ. তত্থ পঠমগাথায যস্সূভযন্তেতি পুব্বে ৰুত্তে ফস্সাদিভেদে. পণিধীতি তণ্হা. ভৰাভৰাযাতি পুনপ্পুনভৰায. ইধ ৰা হুরং ৰাতি সকত্তভাৰাদিভেদে ইধ ৰা পরত্তভাৰাদিভেদে পরত্থ ৰা.

ফস্সো একো অন্তোতি চক্খুসম্ফস্সাদিকো একো কোট্ঠাসো. ফস্সসমুদযোতি ৰত্থারম্মণো. যতো সমুদেতি উপ্পজ্জতি, সো সমুদযো. দুতিযো অন্তোতি দুতিযো কোট্ঠাসো. অতীতন্তি অতি ইতং অতীতং, অতিক্কন্তন্তি ৰুত্তং হোতি. অনাগতন্তি ন আগতং, অনুপ্পন্নন্তি ৰুত্তং হোতি. সুখা ৰেদনাদযো ৰিসভাগৰসেন. নামরূপদুকং নমনরুপ্পনৰসেন. অজ্ঝত্তিকাদযো অজ্ঝত্তবাহিরৰসেন. সক্কাযাদযো খন্ধপঞ্চকানং পৰত্তিসমুদযৰসেন ৰুত্তাতি ৰেদিতব্বা.

সকত্তভাৰোতি অত্তনো অত্তভাৰো. পরত্তভাৰোতি পরস্স অত্তভাৰো.

৩৭. দুতিযগাথায দিট্ঠে ৰাতি দিট্ঠসুদ্ধিযা ৰা. এস নযো সুতাদীসু. সঞ্ঞাতি সঞ্ঞাসমুট্ঠাপিকা দিট্ঠি.

অপরামসন্তন্তি তণ্হামানদিট্ঠীহি ন পরামসন্তং. অনভিনিৰেসন্তন্তি তেহেৰ অনভিনিৰিসন্তং.

‘‘ৰিনিবদ্ধো’’তি ৰাতি মানেন ৰিনিবদ্ধোতি ৰা. ‘‘পরামট্ঠো’’তি ৰাতি পরতো নিচ্চসুখসুভাদীহি পরামট্ঠোতি ৰা. ৰিক্খেপগতোতি উদ্ধচ্চৰসেন. অনিট্ঠঙ্গতোতি ৰিচিকিচ্ছাৰসেন. থামগতোতি অনুসযৰসেন. গতিযাতি গন্তব্বৰসেন.

৩৮. ততিযগাথায ধম্মাপি তেসং ন পটিচ্ছিতাসেতি দ্ৰাসট্ঠিদিট্ঠিগতধম্মাপি তেসং ‘‘ইদমেৰ সচ্চং, মোঘমঞ্ঞ’’ন্তি (উদা. ৫৪) এৰং ন পটিচ্ছিতা. পারঙ্গতো ন পচ্চেতি তাদীতি নিব্বানপারং গতো তেন তেন মগ্গেন পহীনে কিলেসে পুন নাগচ্ছতি পঞ্চহি চ আকারেহি তাদী হোতীতি. সেসং পাকটমেৰ.

ৰীসতিৰত্থুকা সক্কাযদিট্ঠীতি ‘‘রূপং অত্ততো সমনুপস্সতী’’তিআদিনা (পটি. ম. ১.১৩২) নযেন একেকস্মিং খন্ধে চতূহি চতূহি আকারেহি পঞ্চক্খন্ধে পতিট্ঠং কত্ৰা পৰত্তা ৰিজ্জমানে কাযে দিট্ঠি. দসৰত্থুকা মিচ্ছাদিট্ঠীতি ‘‘নত্থি দিন্ন’’ন্তিআদিনযপ্পৰত্তা (ধ. স. ১২২১) দিট্ঠি. অন্তগ্গাহিকাদিট্ঠীতি ‘‘সস্সতো লোকো ইদমেৰ সচ্চং, মোঘমঞ্ঞ’’ন্তিআদিনযপ্পৰত্তা (ম. নি. ৩.২৭) একেকং অন্তং অত্থীতি গহেত্ৰা পৰত্তা দিট্ঠি. যা এৰরূপা দিট্ঠীতি ইদানি ৰুচ্চমানানং একূনৰীসপদানং সাধারণং মূলপদং. যা দিট্ঠি, তদেৰ দিট্ঠিগতং; যা দিট্ঠি, তদেৰ দিট্ঠিগহনন্তি সব্বেসং সম্বন্ধো কাতব্বো. যা অযাথাৰদস্সনট্ঠেন দিট্ঠি, তদেৰ দিট্ঠীসু গতং দস্সনং দ্ৰাসট্ঠিদিট্ঠিযা অন্তোগতত্তাতি দিট্ঠিগতং. হেট্ঠাপিস্স অত্থো ৰুত্তোযেৰ.

দ্ৰিন্নং অন্তানং একন্তগতত্তাতিপি দিট্ঠিগতং. তত্থ সস্সতোতি নিচ্চো. লোকোতি অত্তা. ‘‘ইধ সরীরংযেৰ নস্সতি, অত্তা পন ইধ পরত্থ চ সোযেৰা’’তি মঞ্ঞন্তি. সো হি সামঞ্ঞেৰ আলোকেতীতি কত্ৰা লোকোতি মঞ্ঞতি. অসস্সতোতি অনিচ্চো. অত্তা সরীরেনেৰ সহ নস্সতীতি মঞ্ঞন্তি. অন্তৰাতি পরিত্তে কসিণে ঝানং উপ্পাদেত্ৰা তং পরিত্তকসিণারম্মণং চেতনং ‘‘সপরিযন্তো অত্তা’’তি মঞ্ঞন্তি. অনন্ত ৰাতি ন অন্তৰা অপ্পমাণে কসিণে ঝানং উপ্পাদেত্ৰা তং অপ্পমাণকসিণারম্মণং চেতনং ‘‘অপরিযন্তো অত্তা’’তি মঞ্ঞন্তি. তং জীৰং তং সরীরন্তি জীৰো চ সরীরঞ্চ তংযেৰ. জীৰোতি অত্তা, লিঙ্গৰিপল্লাসেন নপুংসকৰচনং কতং. সরীরন্তি রাসট্ঠেন খন্ধপঞ্চকং. অঞ্ঞং জীৰং অঞ্ঞং সরীরন্তি অঞ্ঞো জীৰো অঞ্ঞং খন্ধপঞ্চকং. হোতি তথাগতো পরং মরণাতি খন্ধা ইধেৰ ৰিনস্সন্তি, সত্তো মরণতো পরং হোতি ৰিজ্জতি ন নস্সতি, তথাগতোতি চেতং সত্তাধিৰচনন্তি. কেচি পন ‘‘তথাগতোতি অরহা’’তি ৰদন্তি. ইমে ন হোতীতি পক্খে দোসং দিস্ৰা এৰং গণ্হন্তি. ন হোতি তথাগতো পরং মরণাতি খন্ধাপি ইধেৰ নস্সন্তি, তথাগতো চ মরণতো পরং ন হোতি উচ্ছিজ্জতি. ইমে হোতীতি পক্খে দোসং দিস্ৰা এৰং গণ্হন্তি. হোতি চ ন চ হোতীতি ইমে একেকপক্খপরিগ্গহে দোসং দিস্ৰা উভযপক্খং গণ্হন্তি. নেৰ হোতি ন ন হোতীতি ইমে উভযপক্খপরিগ্গহে উভযদোসাপত্তিং দিস্ৰা ‘‘হোতি চ ন হোতী’’তি চ ‘‘নেৰ হোতি ন ন হোতী’’তি চ অমরাৰিক্খেপপক্খং গণ্হন্তি.

অযং পনেত্থ অট্ঠকথানযো (পটি. ম. অট্ঠ. ২.১.১১৩) – ‘‘সস্সতো লোকো’’তি ৰাতিআদীহি দসহাকারেহি দিট্ঠিপভেদোৰ ৰুত্তো. তত্থ সস্সতো লোকোতি চ খন্ধপঞ্চকং লোকোতি গহেত্ৰা ‘‘অযং লোকো নিচ্চো ধুৰো সব্বকালিকো’’তি গণ্হন্তস্স সস্সতন্তি গহণাকারপ্পৰত্তা দিট্ঠি. অসস্সতোতি তমেৰ লোকং ‘‘উচ্ছিজ্জতি ৰিনস্সতী’’তি গণ্হন্তস্স উচ্ছেদগ্গহণাকারপ্পৰত্তা দিট্ঠি. অন্তৰাতি পরিত্তকসিণলাভিনো সুপ্পমত্তে ৰা সরাৰমত্তে ৰা কসিণে সমাপন্নস্স অন্তোসমাপত্তিযং পৰত্তিতরূপারূপধম্মে ‘‘লোকো’’তি চ কসিণপরিচ্ছেদন্তেন ‘‘অন্তৰা’’তি চ গণ্হন্তস্স ‘‘অন্তৰা লোকো’’তি গহণাকারপ্পৰত্তা দিট্ঠি. সা সস্সতদিট্ঠিপি হোতি উচ্ছেদদিট্ঠিপি. ৰিপুলকসিণলাভিনো পন তস্মিং কসিণে সমাপন্নস্স অন্তোসমাপত্তিযং পৰত্তিতরূপারূপধম্মে ‘‘লোকো’’তি চ কসিণপরিচ্ছেদন্তেন চ ‘‘অনন্তো’’তি গণ্হন্তস্স ‘‘অনন্তৰা লোকো’’তি গহণাকারপ্পৰত্তা দিট্ঠি. সা সস্সতদিট্ঠি হোতি, উচ্ছেদদিট্ঠিপি. তং জীৰং তং সরীরন্তি ভেদনধম্মস্স সরীরস্সেৰ ‘‘জীৰ’’ন্তি গহিতত্তা ‘‘সরীরে উচ্ছিজ্জমানে জীৰম্পি উচ্ছিজ্জতী’’তি উচ্ছেদগ্গহণাকারপ্পৰত্তা দিট্ঠি. দুতিযপদেন সরীরতো অঞ্ঞস্স জীৰস্স গহিতত্তা ‘‘সরীরে চ উচ্ছিজ্জমানেপি জীৰং ন উচ্ছিজ্জতী’’তি সস্সতগহণাকারপ্পৰত্তা দিট্ঠি. হোতি তথাগতোতিআদীসু ‘‘সত্তো তথাগতো নাম, সো পরং মরণা হোতী’’তি গণ্হতো পঠমা সস্সতদিট্ঠি. ‘‘ন হোতী’’তি গণ্হতো দুতিযা উচ্ছেদদিট্ঠি. ‘‘হোতি চ ন চ হোতী’’তি গণ্হতো ততিযা একচ্চসস্সতদিট্ঠি. ‘‘নেৰ হোতি ন ন হোতী’’তি গণ্হতো চতুত্থা অমরাৰিক্খেপদিট্ঠীতি ৰুত্তপ্পকারা দসৰিধা দিট্ঠি. যথাযোগং ভৰদিট্ঠি চ ৰিভৰদিট্ঠি চাতি দ্ৰিধা হোতি. তাসু একাপি তেসং খীণাসৰানং ন পটিচ্ছিতাতি অত্থো.

যে কিলেসাতি যে কিলেসা সোতাপত্তিমগ্গেন পহীনা, তে কিলেসে. ন পুনেতীতি ন পুন এতি. ন পচ্চেতীতি পুন নিব্বত্তেত্ৰা ন পটিএতি, ন পচ্চাগচ্ছতীতি পচ্চভৰে নাগচ্ছতি. পঞ্চহাকারেহি তাদীতি পঞ্চহি কারণেহি কোট্ঠাসেহি ৰা সদিসো. ইট্ঠানিট্ঠে তাদীতি ইট্ঠারম্মণে চ অনিট্ঠারম্মণে চ অনুনযপটিঘং মুঞ্চিত্ৰা ঠিতত্তা দ্ৰীসু সদিসো. চত্তাৰীতি কিলেসে চজিতৰা. তিণ্ণাৰীতি সংসারং অতিক্কমিতৰা. মুত্তাৰীতি রাগাদিতো মুত্তৰা. তংনিদ্দেসা তাদীতি তেন তেন সীলসদ্ধাদিনা নিদ্দিসিত্ৰা নিদ্দিসিত্ৰা কথেতব্বতো সদিসো.

তং পঞ্চৰিধং ৰিত্থারেত্ৰা কথেতুকামো ‘‘কথং অরহা ইট্ঠানিট্ঠে তাদী’’তিআদিমাহ. তত্থ লাভেপীতি চতুন্নং পচ্চযানং লাভেপি. অলাভেপীতি তেসং অলাভেপি. যসেপীতি পরিৰারেপি. অযসেপীতি পরিৰারৰিপত্তিযাপি. পসংসাযপীতি ৰণ্ণভণনাযপি. নিন্দাযপীতি গরহাযপি. সুখেপীতি কাযিকসুখেপি. দুক্খেপীতি কাযিকদুক্খেপি. একঞ্চে বাহং গন্ধেন লিম্পেয্যুন্তি সচে একং বাহং চতুজাতিযগন্ধেন লেপং উপরূপরি দদেয্যুং. ৰাসিযা তচ্ছেয্যুন্তি যদি একং বাহং ৰড্ঢকী ৰাসিযা তচ্ছেত্ৰা তচ্ছেত্ৰা তনুং করেয্যুং. অমুস্মিং নত্থি রাগোতি অমুস্মিং গন্ধলেপনে সিনেহো নত্থি ন সংৰিজ্জতি. অমুস্মিং নত্থি পটিঘন্তি অমুস্মিং ৰাসিযা তচ্ছনে পটিহননসঙ্খাতং পটিঘং কোপং নত্থি ন সংৰিজ্জতি. অনুনযপটিঘৰিপ্পহীনোতি সিনেহঞ্চ কোপঞ্চ পজহিত্ৰা ঠিতো. উগ্ঘাতিনিঘাতিৰীতিৰত্তোতি অনুনযৰসেন অনুগ্গহঞ্চ পটিঘৰসেন নিগ্গহঞ্চ অতিক্কমিত্ৰা ঠিতো. অনুরোধৰিরোধসমতিক্কন্তোতি অনুনযঞ্চ পটিঘঞ্চ সম্মা অতিক্কন্তো.

সীলে সতীতি সীলে সংৰিজ্জমানে. সীলৰাতি সীলসম্পন্নো. তেন নিদ্দেসং কথনং লভতীতি তাদী. সদ্ধায সতি সদ্ধোতি এৰমাদীসুপি এসেৰ নযো.

সদ্ধম্মপ্পজ্জোতিকায মহানিদ্দেসট্ঠকথায

পরমট্ঠকসুত্তনিদ্দেসৰণ্ণনা নিট্ঠিতা.

৬. জরাসুত্তনিদ্দেসৰণ্ণনা

৩৯. ছট্ঠে জরাসুত্তে অপ্পং ৰত জীৰিতং ইদন্তি ইদং ৰত মনুস্সানং জীৰিতং অপ্পকং পরিত্তং ঠিতিপরিত্ততায সরসপরিত্ততাযাতি গুহট্ঠকসুত্তেপি ৰুত্তনযমেতং. ওরং ৰস্সসতাপি মিয্যতীতি ৰস্সসতা ওরং কললাদিকালেপি মিয্যতি. অতিচ্চাতি ৰস্সসতং অতিক্কমিত্ৰা. জরসাপি মিয্যতীতি জরায মিয্যতি. ইতো পরং গুহট্ঠকসুত্তৰণ্ণনায ৰুত্তনযেনেৰ গহেতব্বং.

অপ্পন্তি মন্দং. গমনীযো সম্পরাযোতি পরলোকো গন্তব্বো. কললকালেপীতি এত্থ কললকালং নাম পটিসন্ধিক্খণে তীহি জাতিউণ্ণংসূহি কতসুত্তগ্গে ঠিততেলবিন্দুপ্পমাণং অচ্ছং ৰিপ্পসন্নকললং হোতি. যং সন্ধায ৰুত্তং –

‘‘তিলতেলস্স যথা বিন্দু, সপ্পিমণ্ডো অনাৰিলো;

এৰং ৰণ্ণপ্পটিভাগং, কললং সম্পৰুচ্চতী’’তি. (সং. নি. অট্ঠ. ১.১.২৩৫; ৰিভ. অট্ঠ. ২৬ পকিণ্ণককথা);

তস্মিং কললকালেপি. চৰতীতি জীৰিতং গল়তি. মরতীতি জীৰিতৰিযোগং আপজ্জতি. অন্তরধাযতীতি অদস্সনং পাপুণাতি. ৰিপ্পলুজ্জতীতি ছিজ্জতি. ‘‘অণ্ডজযোনিযা চৰতি. জলাবুজযোনিযা মরতি. সংসেদজযোনিযা অন্তরধাযতি. ওপপাতিকযোনিযা ৰিপ্পলুজ্জতী’’তি এৰমেকে ৰণ্ণযন্তি. অব্বুদকালেপীতি অব্বুদং নাম কললতো সত্তাহচ্চযেন মংসধোৰনউদকৰণ্ণং হোতি, কললন্তি নামং অন্তরধাযতি. ৰুত্তম্পি চেতং –

‘‘সত্তাহং কললং হোতি, পরিপক্কং সমূহতং;

ৰিৰট্টমানং তব্ভাৰং, অব্বুদং নাম জাযতী’’তি. (সং. নি. অট্ঠ. ১.১.২৩৫);

তস্মিং অব্বুদকালেপি. পেসিকালেপীতি তস্মাপি অব্বুদা সত্তাহচ্চযেন ৰিলীনতিপুসদিসা পেসি নাম সঞ্জাযতি. সা মরিচফাণিতেন দীপেতব্বা. গামদারিকা হি সুপক্কানি মরিচানি গহেত্ৰা সাটকন্তে ভণ্ডিকং কত্ৰা পীল়েত্ৰা মণ্ডং আদায কপালে পক্খিপিত্ৰা আতপে ঠপেন্তি, তং সুক্খমানং সব্বভাগেহি মুচ্চতি. এৰরূপা পেসি হোতি, অব্বুদন্তি নামং অন্তরধাযতি. ৰুত্তম্পি চেতং –

‘‘সত্তাহং অব্বুদং হোতি, পরিপক্কং সমূহতং;

ৰিৰট্টমানং তব্ভাৰং, পেসি নাম পজাযতী’’তি. (সং. নি. অট্ঠ. ১.১.২৩৫);

তস্মিং পেসিকালেপি. ঘনকালেপীতি ততোপি পেসিতো সত্তাহচ্চযেন কুক্কুটণ্ডসণ্ঠানো ঘনো নাম মংসপিণ্ডো নিব্বত্ততি, পেসীতি নামং অন্তরধাযতি. ৰুত্তম্পি চেতং –

‘‘সত্তাহং পেসি ভৰতি, পরিপক্কং সমূহতং;

ৰিৰট্টমানং তব্ভাৰং, ঘনোতি নাম জাযতি.

‘‘যথা কুক্কুটিযা অণ্ডং, সমন্তা পরিমণ্ডলং;

এৰং ঘনস্স সণ্ঠানং, নিব্বত্তং কম্মপচ্চযা’’তি. (সং. নি. অট্ঠ. ১.১.২৩৫);

তস্মিং ঘনকালেপি. পসাখকালেপীতি পঞ্চমে সত্তাহে দ্ৰিন্নং দ্ৰিন্নং হত্থপাদানং সীসস্স চত্থায পঞ্চ পীল়কা জাযন্তি, যং সন্ধায ৰুত্তং – ‘‘পঞ্চমে, ভিক্খৰে, সত্তাহে পঞ্চ পীল়কা সণ্ঠহন্তি কম্মতো’’তি. তস্মিং পসাখকালেপি. ততো পরং ছট্ঠসত্তমাদীনি সত্তাহানি অতিক্কম্ম দেসনং সঙ্খিপিত্ৰা দ্ৰাচত্তালীসসত্তাহে পরিণতকালে কেসলোমনখাদীনং উপ্পত্তিকালঞ্চ. তস্স চ নাভিতো উট্ঠিতো নাল়ো মাতু উদরপটলেন একাবদ্ধো হোতি, সো উপ্পলদণ্ডকো ৰিয ছিদ্দো, তেন আহাররসো সংসরিত্ৰা আহারসমুট্ঠানরূপং সমুট্ঠাপেতি. এৰং সো দসমাসে যাপেতি, তং সব্বং অৰত্ৰা ‘‘সূতিঘরে’’তি আহ. যং সন্ধায ৰুত্তং –

‘‘কেসা লোমা নখানি চ’’;

‘‘যঞ্চস্স ভুঞ্জতী মাতা, অন্নং পানঞ্চ ভোজনং;

তেন সো তত্থ যাপেতি, মাতুকুচ্ছিগতো নরো’’তি. (সং. নি. ১.২৩৫; কথা. ৬৯২);

তত্থ সূতিঘরেতি সূতিকঘরে, ৰিজাযনঘরেতি অত্থো. ‘‘সূতিকাঘরে’’তি ৰা পাঠো, সূতিকাযাতি পদচ্ছেদো. অদ্ধমাসিকোপীতি জাতদিৰসতো পট্ঠায অদ্ধমাসো এতস্স অত্থীতি অদ্ধমাসিকো. দ্ৰেমাসিকাদীসুপি এসেৰ নযো. জাতদিৰসতো পট্ঠায একং সংৰচ্ছরং এতস্স অত্থীতি সংৰচ্ছরিকো. উপরি দ্ৰেৰস্সিকাদীসুপি এসেৰ নযো.

যদা জিণ্ণো হোতীতি যস্মিং কালে জরাজিণ্ণো ভৰতি জজ্জরীভূতো. ৰুদ্ধোতি ৰযোৰুদ্ধো. মহল্লকোতি জাতিমহল্লকো. অদ্ধগতোতি তযো অদ্ধে অতিক্কন্তো. ৰযোঅনুপ্পত্তোতি ততিযং ৰযং অনুপ্পত্তো. খণ্ডদন্তোতি অন্তরন্তরা পতিতা দন্তা ফালিতা চ জরানুভাৰেন খণ্ডা দন্তা জাতা অস্সাতি খণ্ডদন্তো. পলিতকেসোতি পণ্ডরকেসো. ৰিলূনন্তি লুঞ্চিত্ৰা গহিতকেসা ৰিয খল্লাটসীসো. খলিতসিরোতি মহাখল্লাটসীসো. ৰলিনন্তি সঞ্জাতৰলি. তিলকাহতগত্তোতি সেততিলককাল়তিলকেহি ৰিকিণ্ণসরীরো. ভোগ্গোতি ভগ্গো, ইমিনাপিস্স ৰঙ্কভাৰং দীপেতি. দণ্ডপরাযণোতি দণ্ডপটিস্সরণো দণ্ডদুতিযো. সো জরাযপীতি সো পুগ্গলো জরাযপি অভিভূতো মরতি. নত্থি মরণম্হা মোক্খোতি মরণতো মুঞ্চনুপাযো নত্থি নুপলব্ভতি.

ফলানমিৰ পক্কানং, পাতো পতনতো ভযন্তি পরিপাকগতানং সিথিলৰণ্টানং পনসফলাদিপক্কানং পচ্চূসকালে অৰস্সং পতিস্সন্তীতি ফলসামিকানং ভাযমানানং ৰিয. এৰং জাতান মচ্চানং, নিচ্চং মরণতো ভযন্তি এৰমেৰ উপ্পন্নানং সত্তানং মচ্চুসঙ্খাতমরণতো সততং কালং ভযং.

যথাপি কুম্ভকারস্সাতি যথা নাম মত্তিকাভাজনং করোন্তস্স. কতং মত্তিকভাজনন্তি (সু. নি. ৫৮২) তেন নিট্ঠাপিতভাজনং. সব্বং ভেদনপরিযন্তন্তি পক্কাপক্কং সব্বং ভেদনং ভিজ্জপরিযন্তং অৰসানং অস্সাতি ভেদনপরিযন্তং. এৰং মচ্চান জীৰিতন্তি এৰমেৰ সত্তানং আযুসঙ্খারং.

দহরা চ মহন্তা চাতি তরুণা চ মহল্লকা চ. যে বালা যে চ পণ্ডিতাতি যে চ অস্সাসপস্সাসাযত্তা জীৰিতা বালা যে চ পণ্ডিচ্চেন সমন্নাগতা বুদ্ধাদযো. সব্বে মচ্চুৰসং যন্তীতি এতে ৰুত্তপ্পকারা দহরাদযো সব্বে মচ্চুনো ইস্সরিযং উপগচ্ছন্তি.

তেসং মচ্চুপরেতানন্তি এতেসং মচ্চুনা পরিৰারিতানং. গচ্ছতং পরলোকতোতি ইতো মনুস্সলোকতো পরলোকং গচ্ছন্তানং. ন পিতা তাযতে পুত্তন্তি পিতা পুত্তং ন রক্খতি. ঞাতী ৰা পন ঞাতকেতি মাতাপিতিপক্খিকা ঞাতী ৰা তেযেৰ ঞাতকে রক্খিতুং ন সক্কোন্তি.

পেক্খতঞ্ঞেৰ ঞাতীনন্তি ৰুত্তৰিধানংযেৰ ঞাতীনং পেক্খন্তানংযেৰ ওলোকেন্তানংযেৰ. পস্স লালপ্পতং পুথূতি পস্সাতি আলপনং. লালপন্তানং ৰিলপন্তানং পুথূনং নানপ্পকারানং. একমেকোৰ মচ্চানং, গোৰজ্ঝো ৰিয নিয্যতীতি সত্তানং একমেকো ৰধায নিয্যমানগোণো ৰিয মরণায নিয্যতি পাপুণীযতি. এৰমব্ভাহতো লোকোতি এৰমেৰ সত্তলোকো ভুসং আহতো. মচ্চুনা চ জরায চাতি মরণেন চ জরায চ অভিভূতো.

৪০. মমাযিতেতি মমাযিতৰত্থুকারণা. ৰিনাভাৰং সন্তমেৰিদন্তি সন্তং ৰিজ্জমানং ৰিনাভাৰমেৰ ইদং, ন সক্কা অৰিনাভাৰেন ভৰিতুন্তি ৰুত্তং হোতি.

সোচন্তীতি চিত্তেন সোচনং করোন্তি. কিলমন্তীতি কাযেন কিলমথং পাপুণন্তি. পরিদেৰন্তীতি নানাৰিধং ৰাচাৰিলাপং ভণন্তি. উরত্তাল়িং কন্দন্তীতি উরং তাল়েত্ৰা তাল়েত্ৰা কন্দন্তি. সম্মোহং আপজ্জন্তীতি সম্মোহভাৰং পাপুণন্তি.

অনিচ্চোতি হুত্ৰা অভাৰট্ঠেন. সঙ্খতোতি পচ্চযেহি সঙ্গম্ম কতো. পটিচ্চসমুপ্পন্নোতি পচ্চযসামগ্গিং পটিচ্চ ন পচ্চক্খায সহ সম্মা চ উপ্পন্নো. খযধম্মোতি খযং গমনসভাৰো. ৰযধম্মোতি ৰযং গমনসভাৰো, ভঙ্গৰসেন ভঙ্গগমনসভাৰোতি অত্থো. ৰিরাগধম্মোতি ৰিরজ্জনসভাৰো. নিরোধধম্মোতি নিরুজ্ঝনসভাৰো. য্ৰাযং পরিগ্গহোতি যো অযং পরিগ্গহো. ‘‘যায পরিগ্গহো’’তিপি পাঠো, অযমেৰ পদচ্ছেদো. নিচ্চোতি সততকালিকো. ধুৰোতি থিরো. সস্সতোতি অচৰনো. অৰিপরিণামধম্মোতি পকতিঅজহনসভাৰো. সস্সতি সমং তথেৰ ঠস্সতীতি চন্দসূরিযসিনেরুমহাসমুদ্দপথৰীপব্বতাদযো ৰিয তিট্ঠেয্য.

নানাভাৰোতি জাতিযা নানাভাৰো. ৰিনাভাৰোতি মরণেন ৰিযোগভাৰো. অঞ্ঞথাভাৰোতি সব্ভাৰতো অঞ্ঞথাভাৰো. পুরিমানং পুরিমানং খন্ধানন্তি অনন্তরে পুরে উপ্পন্নানং খন্ধানং. ৰিপরিণামঞ্ঞথাভাৰাতি পকতিভাৰং জহিত্ৰা অঞ্ঞথাভাৰেন. পচ্ছিমা পচ্ছিমা খন্ধাদযো পৰত্তন্তি উপ্পজ্জন্তীতি সম্বন্ধো.

সব্বং ঘরাৰাসপলিবোধন্তি সকলং গিহিভাৰজটং. ঞাতিমিত্তামচ্চপলিবোধন্তি মাতাপিতুপক্খিকা ঞাতী, মিত্তা সহাযা, অমচ্চা ভচ্চা. সন্নিধিপলিবোধন্তি নিধানজটং ছিন্দিত্ৰা. কেসমস্সুং ওহারেত্ৰাতি কেসে চ মস্সূনি চ ওরোপযিত্ৰা. কাসাযানি ৰত্থানীতি কসাযরসপীতানি ৰত্থানি.

৪১. মামকোতি মম উপাসকো ভিক্খু ৰাতি সঙ্খং গতো, বুদ্ধাদীনি ৰা ৰত্থূনি মমাযমানো.

তেসং তেসং সত্তানন্তি অনেকেসং সত্তানং সাধারণনিদ্দেসো. ‘‘যঞ্ঞদত্তস্স মরণং, সোমদত্তস্স মরণ’’ন্তি এৰঞ্হি দিৰসম্পি কথিযমানে নেৰ সত্তা পরিযাদানং গচ্ছন্তি, ন সব্বং অপরত্তদীপনং সিজ্ঝতি. ইমেহি পন দ্ৰীহি পদেহি ন কোচি সত্তো অপরিযাদিন্নো হোতি, ন কিঞ্চি অপরত্তাদীপনং ন সিজ্ঝতি. তম্হা তম্হাতি অযং গতিৰসেন অনেকেসং নিকাযানং সাধারণনিদ্দেসো. সত্তনিকাযাতি সত্তানং নিকাযা, সত্তঘটা সত্তসমূহাতি অত্থো. চুতীতি চৰনৰসেন ৰুত্তং. একচতুপঞ্চক্খন্ধায চুতিযা সামঞ্ঞৰচনমেতং. চৰনতাতি ভাৰৰচনেন লক্খণনিদস্সনং. ভেদোতি চুতিখন্ধানং ভঙ্গুপ্পত্তিপরিদীপনং. অন্তরধানন্তি ঘটস্স ৰিয ভিন্নস্স ভিন্নানং খন্ধানং যেন কেনচি পরিযাযেন ঠানাভাৰপরিদীপনং. মচ্চুমরণন্তি মচ্চুসঙ্খাতং মরণং, ন খণিকমরণং. কালো নাম অন্তকো, তস্স কিরিযাতি কালংকিরিযা. এত্তাৰতা সম্মুতিমরণং দীপিতং. ইদানি পরমত্থেন দীপেতুং ‘‘খন্ধানং ভেদো’’তিআদিমাহ. পরমত্থেন হি খন্ধাযেৰ ভিজ্জন্তি, ন সত্তো নাম কোচি মরতি. খন্ধেসু পন ভিজ্জমানেসু সত্তো মরতি, ভিন্নেসু ‘‘মতো’’তি ৰোহারো হোতি.

এত্থ চ চতুৰোকারপঞ্চৰোকারৰসেন খন্ধানং ভেদো, একৰোকারৰসেন কল়েৰরস্স নিক্খেপো. চতুৰোকারৰসেন ৰা খন্ধানং ভেদো, সেসদ্ৰযৰসেন কল়েৰরস্স নিক্খেপো ৰেদিতব্বো. কস্মা? কামরূপভৰদ্ৰযেপি রূপকাযসঙ্খাতস্স কল়েৰরস্স সব্ভাৰতো. যস্মা ৰা চাতুমহারাজিকাদীসু খন্ধা ভিজ্জন্তেৰ, ন কিঞ্চি নিক্খিপন্তি, তস্মা তেসং ৰসেন খন্ধানং ভেদো, মনুস্সাদীসু কল়েৰরস্স নিক্খেপো. এত্থ চ কল়েৰরস্স নিক্খেপকরণতো মরণং ‘‘কল়েৰরস্স নিক্খেপো’’তি ৰুত্তং. জীৰিতিন্দ্রিযস্সুপচ্ছেদোতি ইমিনা ইন্দ্রিযবদ্ধস্সেৰ মরণং নাম হোতি, অনিন্দ্রিযবদ্ধস্স মরণং নাম নত্থীতি দস্সেতি. ‘‘সস্সং মতং, রুক্খো মতো’’তি ইদং পন ৰোহারমত্তমেৰ. অত্থতো পন এৰরূপানি ৰচনানি সস্সাদীনং খযৰযভাৰমেৰ দীপেন্তি. রূপগতন্তি রূপমেৰ রূপগতং. ৰেদনাগতন্তিআদীসুপি এসেৰ নযো.

তত্থ পুব্বেৰ মচ্চন্তি মচ্চং ৰা ভোগা পুব্বেৰ পঠমতরঞ্ঞেৰ ৰিজহন্তি. মচ্চো ৰা তে ভোগে পুব্বতরং জহতি. কামকামীতি চোররাজানং আলপতি. অম্ভো কামে কামযমান কামকামি ভোগিনো নাম লোকে অসস্সতা, ভোগেসু ৰা নট্ঠেসু জীৰমানা চ অভোগিনো হোন্তি. ভোগে ৰা পহায সযং নস্সন্তি, তস্মা অহং মহাজনস্স সোককালেপি ন সোচামীতি অত্থো.

ৰিদিতা মযা সত্তুক লোকধম্মাতি চোররাজানং আলপন্তো আহ. অম্ভো সত্তুক মযা লাভো অলাভো যসো অযসোতিআদযো লোকধম্মা ৰিদিতা. যথেৰ হি চন্দো উদেতি চ পূরতি চ পুন চ খীযতি, যথা চ সূরিযো অন্ধকারং ৰিধমেন্তো মহন্তং লোকপ্পদেসং তপিত্ৰান পুন সাযং অত্থং পলেতি অত্থং গচ্ছতি ন দিস্সতি, এৰমেৰ ভোগা উপ্পজ্জন্তি চ ৰিনস্সন্তি চ, তত্থ কিং সোকেন, তস্মা ন সোচামীতি অত্থো.

তণ্হামঞ্ঞনায মঞ্ঞতীতি তণ্হায জনিতমানমঞ্ঞনায মঞ্ঞতি. মানং করোতি দিট্ঠিমঞ্ঞনাযাতি দিট্ঠিং উপনিস্সযং কত্ৰা উপ্পন্নায মঞ্ঞনায. মানমঞ্ঞনাযাতি সহজাতমানমঞ্ঞনায. কিলেসমঞ্ঞনাযাতি ৰুত্তপ্পকারায উপতাপনট্ঠেন কিলেসমঞ্ঞনায মঞ্ঞতি.

কুহাতি ৰিম্হাপকা. থদ্ধাতি খাণু ৰিয থদ্ধা. লপাতি পচ্চযনিমিত্তেন লপনকা.

৪২. সঙ্গতন্তি সমাগতং, দিট্ঠং ফুট্ঠং ৰা. পিযাযিতন্তি পিযকতং.

সঙ্গতন্তি সম্মুখীভূতং. সমাগতন্তি সমীপং আগতং. সমাহিতন্তি একীভূতং. সন্নিপতিতন্তি পিণ্ডিতং. সুপিনগতোতি সুপিনং পৰিট্ঠো. সেনাব্যূহং পস্সতীতি সেনাসন্নিৰেসং দক্খতি. আরামরামণেয্যকন্তি পুপ্ফারামাদীনং রমণীযভাৰং. ৰনরামণেয্যকাদীসুপি এসেৰ নযো. পেতন্তি ইতো পরলোকং গতং. কালঙ্কতন্তি মতং.

৪৩. নামংযেৰাৰসিস্সতি, অক্খেয্যন্তি সব্বং রূপাদিধম্মজাতং পহীযতি, নামমত্তমেৰ তু অৰসিস্সতি ‘‘বুদ্ধরক্খিতো ধম্মরক্খিতো’’তি এৰং অক্খাতুং কথেতুং.

যে চক্খুৰিঞ্ঞাণাভিসম্ভূতাতি যে সযং চক্খুৰিঞ্ঞাণেন অভিসম্ভূতা রাসিকতা দিট্ঠা চতুসমুট্ঠানিকা রূপা. সোতৰিঞ্ঞাণাভিসম্ভূতাতি পরতোঘোসেন সোতৰিঞ্ঞাণেন রাসিকতা সুতা দ্ৰিসমুট্ঠানিকা সদ্দা.

৪৪. মুনযোতি খীণাসৰমুনযো. খেমদস্সিনোতি নিব্বানদস্সিনো.

সোকোতি সোকনিদ্দেসে – ব্যসতীতি ব্যসনং, হিতসুখং খিপতি ৰিদ্ধংসেতীতি অত্থো. ঞাতীনং ব্যসনং ঞাতিব্যসনং, চোররোগভযাদীহি ঞাতিক্খযো ঞাতিৰিনাসোতি অত্থো. তেন ঞাতিব্যসনেন. ফুট্ঠস্সাতি অজ্ঝোত্থটস্স, অভিভূতস্স সমন্নাগতস্সাতি অত্থো. সেসেসুপি এসেৰ নযো. অযং পন ৰিসেসো – ভোগানং ব্যসনং ভোগব্যসনং, রাজচোরাদিৰসেন ভোগক্খযো ভোগৰিনাসোতি অত্থো. রোগোযেৰ ব্যসনং রোগব্যসনং. রোগো হি আরোগ্যং ব্যসতি ৰিনাসেতীতি ব্যসনং. সীলস্স ব্যসনং সীলব্যসনং, দুস্সিল্যস্সেতং নামং. সম্মাদিট্ঠিং ৰিনাসযমানা উপ্পন্না দিট্ঠিযেৰ ব্যসনং দিট্ঠিব্যসনং. এত্থ চ পুরিমানি দ্ৰে অনিপ্ফন্নানি, পচ্ছিমানি তীণি নিপ্ফন্নানি তিলক্খণব্ভাহতানি. পুরিমানি চ তীণি নেৰ কুসলানি নাকুসলানি, সীলদিট্ঠিব্যসনদ্ৰযং অকুসলং.

অঞ্ঞতরঞ্ঞতরেনাতি গহিতেসু ৰা যেন কেনচি অগ্গহিতেসু ৰা মিত্তামচ্চব্যসনাদীসু যেন কেনচি. সমন্নাগতস্সাতি সমনুবন্ধস্স অপরিমুচ্চমানস্স. অঞ্ঞতরঞ্ঞতরেন দুক্খধম্মেনাতি যেন কেনচি সোকদুক্খস্স উপ্পত্তিহেতুনা. সোকোতি সোচনকৰসেন সোকো. ইদং তেহি কারণেহি উপ্পজ্জনকসোকস্স সভাৰপচ্চত্তং. সোচনাতি সোচনাকারো. সোচিতত্তন্তি সোচিতভাৰো. অন্তোসোকোতি অব্ভন্তরসোকো. দুতিযপদং উপসগ্গেন ৰড্ঢিতং. সো হি অব্ভন্তরং সুক্খাপেন্তো ৰিয পরিসুক্খাপেন্তো ৰিয উপ্পজ্জতীতি ‘‘অন্তোসোকো অন্তোপরিসোকো’’তি ৰুচ্চতি. অন্তোদাহোতি অব্ভন্তরদাহো. দুতিযপদং উপসগ্গেন ৰড্ঢিতং. চেতসো পরিজ্ঝাযনাতি চিত্তস্স ঝাননাকারো. সোকো হি উপ্পজ্জমানো অগ্গি ৰিয চিত্তং ঝাপেতি দহতি, ‘‘চিত্তং মে ঝামং, ন মে কিঞ্চি পটিভাতী’’তি ৰদাপেতি. দুক্খিতো মনো দুম্মনো, তস্স ভাৰো দোমনস্সং. অনুপৰিট্ঠট্ঠেন সোকোৰ সল্লন্তি সোকসল্লং.

পরিদেৰনিদ্দেসে – ‘‘ময্হং ধীতা, ময্হং পুত্তো’’তি এৰং আদিস্স আদিস্স দেৰন্তি রোদন্তি এতেনাতি আদেৰো. তং তং ৰণ্ণং পরিকিত্তেত্ৰা পরিকিত্তেত্ৰা দেৰন্তি এতেনাতি পরিদেৰো. ততো পরানি দ্ৰে দ্ৰে পদানি পুরিমদ্ৰযস্সেৰ আকারভাৰনিদ্দেসৰসেন ৰুত্তানি. ৰাচাতি ৰচনং. পলাপোতি তুচ্ছং নিরত্থকৰচনং. উপ্পড্ঢভণিতঅঞ্ঞভণিতাদিৰসেন ৰিরূপো পলাপো ৰিপ্পলাপো. লালপ্পোতি পুনপ্পুনং লপনং. লালপ্পনাকারো লালপ্পনা. লালপ্পিতস্স ভাৰো লালপ্পিতত্তং. মচ্ছরিযাদীনি ৰুত্তত্থানেৰ.

৪৫. সত্তমগাথা এৰং মরণব্ভাহতে লোকে অনুরূপপটিপত্তিদস্সনত্থং ৰুত্তা. তত্থ পতিলীনচরস্সাতি ততো ততো পতিলীনং চিত্তং কত্ৰা চরন্তস্স. ভিক্খুনোতি কল্যাণপুথুজ্জনস্স ৰা সেক্খস্স ৰা. সামগ্গিযমাহু তস্স তং, যো অত্তানং ভৰনে ন দস্সযেতি তস্সেতং পতিরূপমাহু, যো এৰংপটিপন্নো নিরযাদিভেদে ভৰনে অত্তানং ন দস্সযে. এৰঞ্হি সো ইমম্হা মরণা মুচ্চেয্যাতি অধিপ্পাযো.

পতিলীনচরা ৰুচ্চন্তীতি ততো ততো লীনচিত্তাচারা কথীযন্তি. সত্ত সেক্খাতি অধিসীলাদীসু তীসু সিক্খাসু সিক্খন্তীতি সোতাপত্তিমগ্গট্ঠং আদিং কত্ৰা যাৰ অরহত্তমগ্গট্ঠা সত্ত সেক্খা. অরহাতি ফলট্ঠো. সো নিট্ঠিতচিত্তত্তা পতিলীনো. সেক্খানং পতিলীনচরণভাৰে কারণং দস্সেন্তো ‘‘কিং কারণা’’তিআদিমাহ. তে ততো ততোতি তে সত্ত সেক্খা তেহি তেহি আরম্মণেহি চিত্তং পতিলীনেন্তাতি অত্তনো চিত্তং নিলীনেন্তা. পতিকুটেন্তাতি সঙ্কোচেন্তা. পতিৰট্টেন্তাতি কটসারকং ৰিয আভুজেন্তা. সন্নিরুদ্ধন্তাতি সন্নিরুজ্ঝন্তা. সন্নিগণ্হন্তাতি নিগ্গহং কুরুমানা. সন্নিৰারেন্তাতি ৰারযমানা. রক্খন্তাতি রক্খং কুরুমানা. গোপেন্তাতি চিত্তমঞ্জূসায গোপযমানা.

ইদানি দ্ৰারৰসেন দস্সেন্তো ‘‘চক্খুদ্ৰারে’’তিআদিমাহ. তত্থ চক্খুদ্ৰারেতি চক্খুৰিঞ্ঞাণদ্ৰারে. সোতদ্ৰারাদীসুপি এসেৰ নযো. ভিক্খুনোতি পুথুজ্জনকল্যাণকস্স ৰা ভিক্খুনো, সেক্খস্স ৰা ভিক্খুনোতি ভিক্খুসদ্দস্স ৰচনত্থং অৰত্ৰা ইধাধিপ্পেতভিক্খুযেৰ দস্সিতো. তত্থ পুথুজ্জনো চ সো কিলেসানং অসমুচ্ছিন্নত্তা, কল্যাণো চ সীলাদিপটিপত্তিযুত্তত্তাতি পুথুজ্জনকল্যাণোৰ পুথুজ্জনকল্যাণকো, তস্স পুথুজ্জনকল্যাণকস্স. অধিসীলাদীনি সিক্খতীতি সেক্খো, তস্স সেক্খস্স ৰা সোতাপন্নস্স ৰা সকদাগামিনো ৰা অনাগামিনো ৰা.

আসন্তি নিসীদন্তি এত্থাতি আসনং. যত্থাতি যেসু মঞ্চপীঠাদীসু. মঞ্চোতিআদীনি আসনস্স পভেদৰচনানি. মঞ্চোপি হি নিসজ্জাযপি ওকাসত্তা ইধ আসনেসু ৰুত্তো, সো পন মসারকবুন্দিকাবদ্ধকুল়ীরপাদকআহচ্চপাদকানং অঞ্ঞতরো. পীঠম্পি তেসং অঞ্ঞতরমেৰ. ভিসীতি উণ্ণভিসি চোল়ভিসি ৰাকভিসি তিণভিসি পণ্ণভিসীনং অঞ্ঞতরা. তট্টিকাতি তালপণ্ণাদীহি ৰিনিত্ৰা কতা. চম্মখণ্ডোতি নিসজ্জারহো যো কোচি চম্মখণ্ডো. তিণসন্থারাদযো তিণাদীনি গুম্বেত্ৰা কতা. অসপ্পাযরূপদস্সনেনাতি অসপ্পাযানং ইট্ঠরূপানং ওলোকনেন. রিত্তন্তি অব্ভন্তরতো তুচ্ছং. ৰিৰিত্তন্তি বহিদ্ধাপৰেসনেন সুঞ্ঞং. পৰিৰিত্তন্তি কোচি গহট্ঠো তত্থ নত্থীতি অতিরেকেন সুঞ্ঞং. অসপ্পাযসদ্দস্সৰনেপি এসেৰ নযো. পঞ্চহি কামগুণেহীতি ইত্থিরূপসদ্দগন্ধরসফোট্ঠব্বেহি পঞ্চহি কামকোট্ঠাসেহি. ৰুত্তম্পি চেতং –

‘‘রূপা সদ্দা রসা গন্ধা, ফোট্ঠব্বা চ মনোরমা;

পঞ্চ কামগুণা লোকে, ইত্থিরূপস্মিং দিস্সরে’’তি. (অ. নি. ৫.৫৫);

ভজতোতি চিত্তেন সেৰনং করোন্তস্স. সম্ভজতোতি সম্মা সেৰন্তস্স. সেৰতোতি উপসঙ্কমন্তস্স. নিসেৰতোতি নিস্সযং কত্ৰা সেৰন্তস্স. সংসেৰতোতি সুট্ঠু সেৰন্তস্স. পটিসেৰতোতি পুনপ্পুনং উপসঙ্কমন্তস্স.

গণসামগ্গীতি সমণানং একীভাৰো সমগ্গভাৰো. ধম্মসামগ্গীতি সত্ততিংসবোধিপক্খিযধম্মানং সমূহভাৰো. অনভিনিব্বত্তিসামগ্গীতি অনিব্বত্তমানানং অনুপ্পজ্জমানানং অনুপাদিসেসায নিব্বানধাতুযা পরিনিব্বুতানং অরহন্তানং সমূহো. সমগ্গাতি কাযেন অৰিযোগা. সম্মোদমানাতি চিত্তেন সুট্ঠু মোদমানা তুস্সমানা. অৰিৰদমানাতি ৰাচায ৰিৰাদং অকুরুমানা. খীরোদকীভূতাতি খীরেন সংসট্ঠউদকসদিসা.

তে একতো পক্খন্দন্তীতি তে বোধিপক্খিযধম্মা একং আরম্মণং পৰিসন্তি. পসীদন্তীতি তস্মিংযেৰ আরম্মণে পসাদমাপজ্জন্তি. অনুপাদিসেসাযাতি উপাদিৰিরহিতায.

নিব্বানধাতুযাতি অমতমহানিব্বানধাতুযা. ঊনত্তং ৰাতি এত্থ উনভাৰো ঊনত্তং, অপরিপুণ্ণভাৰোতি অত্থো. পুণ্ণত্তং ৰাতি পরিপুণ্ণভাৰো পুণ্ণত্তং, পুণ্ণভাৰো ৰা ন পঞ্ঞাযতি নত্থীতি অত্থো.

নেরযিকানন্তি নিরযে নিব্বত্তনককম্মানং অত্থিভাৰেন. নিরযং অরহন্তীতি নেরযিকা, তেসং নেরযিকানং. নিরযো ভৰনন্তি নিরযো এৰ তেসং ৰসনট্ঠানং ঘরং. তিরচ্ছানযোনিকানন্তিআদীসুপি এসেৰ নযো. তস্সেসা সামগ্গীতি তস্স খীণাসৰস্স এসা নিব্বানসামগ্গী. এতং ছন্নন্তি এতং অনুচ্ছৰিকং. পতিরূপন্তি সদিসং পটিভাগং, অসদিসং অপ্পটিভাগং ন হোতি. অনুচ্ছৰিকন্তি এতং সমণব্রাহ্মণানং ৰা ধম্মানং, মগ্গফলনিব্বানসাসনধম্মানং ৰা অনুচ্ছৰিকং. তেসং ছৰিং ছাযং সুন্দরভাৰং অন্ৰেতি অনুগচ্ছতি, অথ খো সন্তিকাৰ তেহি ধম্মেহি অনুচ্ছৰিকত্তা এৰ চ অনুলোমং. তেসঞ্চ অনুলোমেতি, অথ খো ন ৰিলোমং ন পচ্চনীকভাৰে ঠিতং.

৪৬. ইদানি ‘‘যো অত্তানং ভৰনে ন দস্সযে’’তি এৰং খীণাসৰো ৰিভাৰিতো, তস্স ৰণ্ণভণনত্থং ইতো পরা তিস্সো গাথাযো আহ. তত্থ পঠমগাথায সব্বত্থাতি দ্ৰাদসসু আযতনেসু. ন পিযং কুব্বতি নোপি অপ্পিযন্তি নিদ্দেসে পিযাতি চিত্তে পীতিকরা. তে ৰিভাগতো দস্সেন্তো ‘‘কতমে সত্তা পিযা, ইধ যস্স তে হোন্তী’’তি আহ. তত্থ যস্স তেতি যে অস্স তে. হোন্তীতি ভৰন্তি. অত্থকামাতি ৰড্ঢিকামা. হিতকামাতি সুখকামা. ফাসুকামাতি সুখৰিহারকামা. যোগক্খেমকামাতি চতূহি যোগেহি খেমং নিব্ভযং কামা. মমাযতীতি মাতা. পিযাযতীতি পিতা. ভজতীতি ভাতা. ভগিনীতি এত্থাপি এসেৰ নযো. পুং তাযতি রক্খতীতি পুত্তো. কুলৰংসং ধারেতীতি ধীতা. মিত্তা সহাযা. অমচ্চা ভচ্চা. ঞাতী পিতুপক্খিকা. সালোহিতা মাতিপক্খিকা. ইমে সত্তা পিযাতি ইমে সত্তা পীতিজনকা. ৰুত্তৰিপরিযাযেন অপ্পিযা ৰেদিতব্বা.

৪৭. যদিদং দিট্ঠসুতমুতেসু ৰাতি এত্থ পন যদিদং দিট্ঠসুতং, এত্থ ৰা মুতেসু ৰা ধম্মেসু; এৰং মুনি ন উপলিম্পতীতি এৰং সম্বন্ধো ৰেদিতব্বো.

উদকথেৰোতি উদকস্স থেৰো. ‘‘উদকত্থেৰকো’’তিপি পাঠো. পদুমপত্তেতি পদুমিনিপত্তে.

৪৮. ধোনো ন হি তেন মঞ্ঞতি, যদিদং দিট্ঠসুতমুতেসু ৰাতি অত্রাপি যদিদং দিট্ঠসুতং, তেন ৰত্থুনা ন মঞ্ঞতি, মুতেসু ৰা ধম্মেসু ন মঞ্ঞতীতি এৰমেৰ সম্বন্ধো ৰেদিতব্বো. ন হি সো রজ্জতি, নো ৰিরজ্জতীতি বালপুথুজ্জনো ৰিয ন রজ্জতি, কল্যাণপুথুজ্জনসেক্খা ৰিয ন ৰিরজ্জতি, রাগস্স খীণত্তা ‘‘ৰিরত্তো’’ত্ৰেৰ সঙ্খং গচ্ছতি. সেসং পাকটমেৰাতি.

তায পঞ্ঞায কাযদুচ্চরিতন্তি সম্পযুত্তায পুব্বভাগাযেৰ ৰা পঞ্ঞায পরিগ্গহেতব্বে পরিগ্গণ্হন্তো যোগী তিৰিধং কাযদুচ্চরিতং সমুচ্ছেদৰসেন ধুনাতি. অযঞ্চ পুগ্গলো ৰিপন্নধম্মং দেসনাধম্মেসু ধুনন্তেসু তংধম্মসমঙ্গীপুগ্গলোপি ধুনাতি নাম. তে চ ধম্মে পঞ্ঞায অত্তনো পৰত্তিক্খণে ধুনিতুমারদ্ধো ধুতাতি ৰুচ্চতি, যথা ভুঞ্জিতুমারদ্ধো ভুত্তোতি ৰুচ্চতি. লক্খণং পনেত্থ সদ্দসত্থতো ৰেদিতব্বং. ধুতন্তি কত্তুসাধনং. ধুতং পঠমমগ্গেন. ধোতং দুতিযমগ্গেন. সন্ধোতং ততিযমগ্গেন. নিদ্ধোতং চতুত্থমগ্গেন.

ধোনো দিট্ঠং ন মঞ্ঞতীতি অরহা মংসচক্খুনা দিট্ঠং দিব্বচক্খুনা দিট্ঠং রূপাযতনং ন মঞ্ঞতি তীহি মঞ্ঞনাহি, কথং? রূপাযতনং সুভসঞ্ঞায সুখসঞ্ঞায চ পস্সন্তো ন তত্থ ছন্দরাগং জনেতি ন তং অস্সাদেতি নাভিনন্দতি, এৰং দিট্ঠং তণ্হামঞ্ঞনায ন মঞ্ঞতি. ‘‘ইতি মে রূপং সিযা অনাগতমদ্ধান’’ন্তি ৰা পনেত্থ নন্দিং ন সমন্নানেতি. রূপসম্পদং ৰা আকঙ্খমানো দানং ন দেতি, সীলং ন সমাদিযতি, উপোসথকম্মং ন করোতি. এৰম্পি দিট্ঠং তণ্হামঞ্ঞনায ন মঞ্ঞতি, অত্তনো পন পরস্স চ রূপসম্পত্তিৰিপত্তিং নিস্সায মানং ন জনেতি. ‘‘ইমিনাহং সেয্যোস্মীতি ৰা, সদিসোস্মীতি ৰা, হীনোস্মীতি ৰা’’তি এৰং দিট্ঠং মানমঞ্ঞনায ন মঞ্ঞতি. রূপাযতনং পন ‘‘নিচ্চং ধুৰং সস্সত’’ন্তি ন মঞ্ঞতি. অত্তানং ‘‘অত্তনিয’’ন্তি ন মঞ্ঞতি. মঙ্গলং ‘‘অমঙ্গল’’ন্তি ন মঞ্ঞতি. এৰং দিট্ঠং দিট্ঠিমঞ্ঞনায ন মঞ্ঞতি. দিট্ঠস্মিং ন মঞ্ঞতীতি রূপস্মিং অত্তানং সমনুপস্সননযেন অমঞ্ঞন্তো দিট্ঠস্মিং ন মঞ্ঞতি. যথা ৰা থনে থঞ্ঞং, এৰং রূপস্মিং রাগাদযোতি অমঞ্ঞন্তোপি দিট্ঠস্মিং ন মঞ্ঞতি. তস্মিংযেৰ পনস্স দিট্ঠিমঞ্ঞনায অমঞ্ঞিতে ৰত্থুস্মিং সিনেহং মানঞ্চ ন উপ্পাদযতো তণ্হামানমঞ্ঞনাপি নত্থীতি ৰেদিতব্বা. এৰং দিট্ঠস্মিং ন মঞ্ঞতি. দিট্ঠতো ন মঞ্ঞতীতি এত্থ পন দিট্ঠতোতি নিস্সক্কৰচনং. তস্মা সউপকারণস্স অত্তনো ৰা পরস্স ৰা যথাৰুত্তপ্পভেদতো দিট্ঠতো উপপত্তি ৰা নিগ্গমনং ৰা দিট্ঠতো ৰা অঞ্ঞো অত্তাতি অমঞ্ঞমানো দিট্ঠতো ন মঞ্ঞতীতি ৰেদিতব্বো. অযমস্স ন দিট্ঠিমঞ্ঞনা. তস্মিংযেৰ পনস্স দিট্ঠিমঞ্ঞনায অমঞ্ঞিতে ৰত্থুস্মিং সিনেহং মানঞ্চ ন উপ্পাদযতো ন তণ্হামানমঞ্ঞনাপি ৰেদিতব্বা.

দিট্ঠা মেতি ন মঞ্ঞতীতি এত্থ পন ‘‘এতং মমা’’তি তণ্হাৰসেন অমমাযমানো দিট্ঠং তণ্হামঞ্ঞনায ন মঞ্ঞতি. সুতন্তি মংসসোতেনপি সুতং, দিব্বসোতেনপি সুতং, সদ্দাযতনস্সেতং অধিৰচনং. মুতন্তি মুত্ৰা মুনিত্ৰা চ গহিতং আহচ্চ উপগন্ত্ৰাতি অত্থো. ইন্দ্রিযানং আরম্মণানঞ্চ অঞ্ঞমঞ্ঞং সংকিলেসে ৰিঞ্ঞাতন্তি ৰুত্তং হোতি. গন্ধরসফোট্ঠব্বাযতনানং এতং অধিৰচনং. ৰিঞ্ঞাতন্তি মনসা ৰিঞ্ঞাতং, সেসানং সত্তানং আযতনানমেতং অধিৰচনং, ধম্মারম্মণস্স ৰা, ইধ পন সক্কাযপরিযাপন্নমেৰ লব্ভতি. ৰিত্থারো পনেত্থ দিট্ঠৰারে ৰুত্তনযেন ৰেদিতব্বো.

ইদানি ভগৰতা ৰুত্তসুত্তৰসেন দস্সেন্তো ‘‘অস্মীতি ভিক্খৰে’’তিআদিমাহ. তত্থ অস্মীতি ভৰামি, নিচ্চস্সেতং অধিৰচনং. মঞ্ঞিতমেতন্তি দিট্ঠিকপ্পনং এতং. অযমহমস্মীতি অযং অহং অস্মি ভৰামি.

অঞ্ঞত্র সতিপট্ঠানেহীতি ঠপেত্ৰা চতুসতিপট্ঠানে.

সব্বে বালপুথুজ্জনা রজ্জন্তীতি সকলা অন্ধবালা নানাজনা লগ্গন্তি. সত্ত সেক্খা ৰিরজ্জন্তীতি সোতাপন্নাদযো সত্ত অরিযজনা ৰিরাগং আপজ্জন্তি. অরহা নেৰ রজ্জতি নো ৰিরজ্জতীতি কিলেসানং পরিনিব্বাপিতত্তা উভযম্পি ন করোতি. খযা রাগস্সাতিআদযো তিৰিধাপি নিব্বানমেৰ.

সদ্ধম্মপ্পজ্জোতিকায মহানিদ্দেসট্ঠকথায

জরাসুত্তনিদ্দেসৰণ্ণনা নিট্ঠিতা.

৭. তিস্সমেত্তেয্যসুত্তনিদ্দেসৰণ্ণনা

৪৯. সত্তমে তিস্সমেত্তেয্যসুত্তে মেথুনমনুযুত্তস্সাতি মেথুনধম্মং সমাযুত্তস্স. ইতীতি এৰমাহ. আযস্মাতি পিযৰচনমেতং. তিস্সোতি নামং তস্স থেরস্স. সোপি হি তিস্সোতি নামেন. মেত্তেয্যোতি গোত্তং, গোত্তৰসেনেৰ এস পাকটো অহোসি. তস্মা অট্ঠুপ্পত্তিযং (সু. নি. অট্ঠ. ২.৮২১) ৰুত্তং – ‘‘তিস্সমেত্তেয্যা নাম দ্ৰে সহাযা’’তি. ৰিঘাতন্তি উপঘাতং. ব্রূহীতি আচিক্খ. মারিসাতি পিযৰচনমেতং, নিদ্দুক্খাতি ৰুত্তং হোতি. সুত্ৰান তৰ সাসনন্তি তৰ ৰচনং সুত্ৰা. ৰিৰেকে সিক্খিস্সামসেতি সহাযং আরব্ভ ধম্মদেসনং যাচন্তো ভণতি, সো পন সিক্খিতসিক্খোযেৰ.

মেথুনধম্মো নামাতি ইদং নিদ্দিসিতব্বস্স মেথুনধম্মস্স উপদেসপদং. অসদ্ধম্মোতি অসতং নীচজনানং ধম্মো. গামধম্মোতি গামৰাসীনং সেৰনধম্মো. ৰসলধম্মোতি ৰসলানং ধম্মো, কিলেসৰস্সনতো ৰা সযমেৰ ৰসলো ধম্মোতি ৰসলধম্মো. দুট্ঠুল্লোতি দুট্ঠো চ কিলেসেহি দুট্ঠত্তা, থূলো চ অনিপুণভাৰতোতি দুট্ঠুল্লো. যস্মা চ তস্স ধম্মস্স পরিৰারভূতং দস্সনম্পি গহণম্পি আমসনম্পি ফুসনম্পি ঘট্টনম্পি দুট্ঠুল্লং, তস্মাপি দুট্ঠুল্লো সো মেথুনধম্মো. ওদকন্তিকোতি উদকং অস্স অন্তে সুদ্ধত্থং আদিযতীতি উদকন্তো, উদকন্তোযেৰ ওদকন্তিকো. রহো পটিচ্ছন্নে ওকাসে কত্তব্বতায রহস্সো. ৰিনযে পন ‘‘দুট্ঠুল্লং ওদকন্তিকং রহস্স’’ন্তি (পারা. ৩৯) পাঠো. তত্থ তীসু পদেসু যো সোতি পদং পরিৰত্তেত্ৰা যং তন্তি কত্ৰা যোজেতব্বং ‘‘যং তং দুট্ঠুল্লং, সো মেথুনধম্মো, যং তং ওদকন্তিকং সো মেথুনধম্মো, যং তং রহস্সং, সো মেথুনধম্মো’’তি. ইধ পন ‘‘যো সো অসদ্ধম্মো, সো মেথুনধম্মো…পে… যো সো রহস্সো, সো মেথুনধম্মো’’তি এৰং যোজনা ৰেদিতব্বা. দ্ৰযেন দ্ৰযেন সমাপজ্জিতব্বতো দ্ৰযংদ্ৰযসমাপত্তি. তত্থ যোজনা – যা সা দ্ৰযংদ্ৰযসমাপত্তি, সো মেথুনধম্মো নামাতি. কিংকারণা ৰুচ্চতি মেথুনধম্মোতি কেন কারণেন কেন পরিযাযেন মেথুনধম্মোতি কথীযতি. তং কারণং দস্সেন্তো ‘‘উভিন্নং রত্তান’’ন্তিআদিমাহ. তত্থ উভিন্নং রত্তানন্তি দ্ৰিন্নং ইত্থিপুরিসানং রাগেন রঞ্জিতানং. সারত্তানন্তি ৰিসেসেন সুট্ঠু রঞ্জিতানং. অৰস্সুতানন্তি কিলেসেন তিন্তানং. পরিযুট্ঠিতানন্তি কুসলাচারং পরিযাদিযিত্ৰা মদ্দিত্ৰা ঠিতানং ‘‘মগ্গে চোরা পরিযুট্ঠিতা’’তিআদীসু ৰিয. পরিযাদিন্নচিত্তানন্তি কুসলচিত্তং পরিযাদিযিত্ৰা খেপেত্ৰা ঠিতচিত্তানং. উভিন্নং সদিসানন্তি দ্ৰিন্নং কিলেসেন সদিসানং. ধম্মোতি সভাৰো. তং কারণাতি তেন কারণেন. তং উপমায সাধেন্তো ‘‘উভো কলহকারকা’’তিআদিমাহ. তত্থ উভো কলহকারকাতি পুব্বভাগে কলহকারকা দ্ৰে. মেথুনকাতি ৰুচ্চন্তীতি সদিসাতি ৰুচ্চন্তি. ভণ্ডনকারকাতি তত্থ তত্থ গন্ত্ৰা ভণ্ডনং করোন্তা. ভস্সকারকাতি ৰাচাকলহং করোন্তা. ৰিৰাদকারকাতি নানাৰচনং করোন্তা. অধিকরণকারকাতি ৰিনিচ্ছযপাপুণনৰিসেসকারণং করোন্তা. ৰাদিনোতি ৰাদপটিৰাদিনো. সল্লাপকাতি ৰাচং কথেন্তা এৰমেৰন্তি উপমাসংসন্দনং.

যুত্তস্সাতি সঞ্ঞুত্তস্স. পযুত্তস্সাতি আদরেন যুত্তস্স. আযুত্তস্সাতি ৰিসেসেন যুত্তস্স. সমাযুত্তস্সাতি একতো যুত্তস্স. তচ্চরিতস্সাতি তংচরিতং করোন্তস্স. তব্বহুলস্সাতি তংবহুলং করোন্তস্স. তগ্গরুকস্সাতি তংগরুং করোন্তস্স. তন্নিন্নস্সাতি তস্মিং নতচিত্তস্স. তপ্পোণস্সাতি তস্মিং নতকাযস্স. তপ্পব্ভারস্সাতি তস্মিং অভিমুখকাযস্স. তদধিমুত্তস্সাতি তস্মিং অধিহরিতস্স. তদধিপতেয্যস্সাতি তং অধিপতিং জেট্ঠকং কত্ৰা পৰত্তস্স.

ৰিঘাতন্তি নিদ্দেসস্স উদ্দেসৰচনং. ৰিঘাতন্তি পীল়নং. উপঘাতন্তি সমীপং কত্ৰা পীল়নং. পীল়নন্তি ঘট্টনং. ঘট্টনন্তি পীল়নং. সব্বং অঞ্ঞমঞ্ঞৰেৰচনং. উপদ্দৰন্তি হিংসনং. উপসগ্গন্তি তত্থ তত্থ উপগন্ত্ৰা পীল়নাকারং. ব্রূহীতি কথেহি. আচিক্খাতি ৰিস্সজ্জেহি. দেসেহীতি দস্সেহি. পঞ্ঞপেহীতি ঞাপেহি. পট্ঠপেহীতি ঠপেহি. ৰিৰরাতি পাকটং করোহি. ৰিভজাতি ভাজেহি. উত্তানীকরোহীতি তীরং পাপেহি. পকাসেহীতি পাকটং করোহি.

তুয্হং ৰচনন্তি তৰ ৰাচং. ব্যপ্পথন্তি ৰচনং. দেসনন্তি আচিক্খনং. অনুসাসনন্তি ওৰাদং. অনুসিট্ঠন্তি অনুসাসনং. সুত্ৰাতি সোতেন সুত্ৰা. সুণিত্ৰাতি তস্সেৰ ৰেৰচনং. উগ্গহেত্ৰাতি সম্মা গহেত্ৰা. উপধারযিত্ৰাতি অনাসেত্ৰা. উপলক্খযিত্ৰাতি সল্লক্খেত্ৰা.

৫০. মুস্সতে ৰাপি সাসনন্তি পরিযত্তিপটিপত্তিতো দুৰিধম্পি সাসনং নস্সতি. ৰাপীতি পদপূরণমত্তং. এতং তস্মিং অনরিযন্তি তস্মিং পুগ্গলে এতং অনরিযং, যদিদং মিচ্ছাপটিপদা. গারৰাধিৰচনন্তি গুণৰিসিট্ঠসব্বসত্তুত্তমগরুগারৰাধিৰচনং. তেনাহু পোরাণা –

‘‘ভগৰাতি ৰচনং সেট্ঠং, ভগৰাতি ৰচনমুত্তমং;

গরু গারৰযুত্তো সো, ভগৰা তেন ৰুচ্চতী’’তি. (ৰিসুদ্ধি. ১.১৪২);

চতুব্বিধং ৰা নামং আৰত্থিকং, লিঙ্গিকং, নেমিত্তিকং, অধিচ্চসমুপ্পন্নন্তি. অধিচ্চসমুপ্পন্নং নাম লোকিযৰোহারেন ‘‘যদিচ্ছক’’ন্তি ৰুত্তং হোতি. তত্থ ৰচ্ছো, দম্মো, বলীবদ্ধোতি এৰমাদি আৰত্থিকং, দণ্ডী, ছত্তী, সিখী, করীতি এৰমাদি লিঙ্গিকং, তেৰিজ্জো, ছল়ভিঞ্ঞোতি এৰমাদি নেমিত্তিকং, সিরিৰড্ঢকো, ধনৰড্ঢকোতি এৰমাদি ৰচনত্থং অনপেক্খিত্ৰা পৰত্তং অধিচ্চসমুপ্পন্নং. ইদং পন ভগৰাতি নামং নেমিত্তিকং, ন মহামাযায, ন সুদ্ধোদনমহারাজেন, ন অসীতিযা ঞাতিসহস্সেহি কতং, ন সক্কসন্তুসিতাদীহি দেৰতাৰিসেসেহি কতং. ৰক্খতি চ ‘‘ভগৰাতি নেতং নামং মাতরা কতং…পে… পটিলাভা সচ্ছিকা পঞ্ঞত্তি যদিদং ভগৰা’’তি (মহানি. ৮৪).

‘‘ভাগ্যৰা ভগ্গৰা যুত্তো, ভগেহি চ ৰিভত্তৰা;

ভত্তৰা ৰন্তগমনো, ভৰেসু ভগৰা ততো’’তি. (ৰিসুদ্ধি. ১.১৪৪);

তত্থ –

‘‘ৰণ্ণাগমো ৰণ্ণৰিপরিযাযো, দ্ৰে চাপরে ৰণ্ণৰিকারনাসা;

ধাতূনমত্থাতিসযেন যোগো, তদুচ্চতে পঞ্চৰিধং নিরুত্তি’’ন্তি. –

এৰং ৰুত্তনিরুত্তিলক্খণং গহেত্ৰা পদসিদ্ধি ৰেদিতব্বা. তত্থ ‘‘নক্খত্তরাজারিৰ তারকান’’ন্তি এত্থ রকারাগমো ৰিয অৰিজ্জমানস্স অক্খরস্স আগমো ৰণ্ণাগমো নাম. ‘‘হিংসনা, হিংসো’’তি ৰত্তব্বে ‘‘সীহো’’তি ৰিয ৰিজ্জমানক্খরানং হেট্ঠুপরিযৰসেন পরিৰত্তনং ৰণ্ণৰিপরিযাযো নাম. ‘‘নৰে ছন্নকে দানং দিয্যতী’’তি এত্থ অকারস্স একারাপজ্জনতা ৰিয অঞ্ঞক্খরস্স অঞ্ঞক্খরাপজ্জনতা ৰণ্ণৰিকারো নাম. ‘‘জীৰনস্স মূতো জীৰনমূতো’’তি ৰত্তব্বে ‘‘জীমূতো’’তি ৰকারনকারানং ৰিনাসো ৰিয ৰিজ্জমানক্খরৰিনাসো ৰণ্ণৰিনাসো নাম. ‘‘ফরুসাহি ৰাচাহি পক্রুব্বমানো আসজ্জ মং ত্ৰং ৰদসি কুমারা’’তি এত্থ পক্রুব্বমানোতি পদস্স অভিভৰমানোতি অত্থপটিপাদনং ৰিয তত্থ তত্থ যথাযোগং ৰিসেসত্থযোগো ধাতূনং অত্থাতিসযেন যোগো নাম.

এৰং নিরুত্তিলক্খণং গহেত্ৰা সদ্দনযেন ৰা পিসোদরাদিনিস্সিতো পতিট্ঠানীতি পিসোদরাদিপক্খেপলক্খণং গহেত্ৰা যস্মা লোকিযলোকুত্তরসুখাভিনিব্বত্তকং দানসীলাদিপারপ্পত্তং ভাগ্যমস্স অত্থি, তস্মা ‘‘ভাগ্যৰা’’তি ৰত্তব্বে ‘‘ভগৰা’’তি ৰুচ্চতীতি ঞাতব্বং.

যস্মা পন লোভদোসমোহৰিপরীতমনসিকারঅহিরিকানোত্তপ্পকোধূপনাহমক্খপল়াসইস্সা- মচ্ছরিযমাযাসাঠেয্যথম্ভসারম্ভমানাতিমানমদপমাদতণ্হাঅৰিজ্জাতিৰিধাকুসলমূলদুচ্চরিত- সংকিলেসমলৰিসমসঞ্ঞাৰিতক্কপপঞ্চচতুব্বিধৰিপরিযেসআসৰগন্থওঘযোগঅগতি- তণ্হুপ্পাদুপাদানপঞ্চচেতোখীলৰিনিবন্ধনীৰরণাভিনন্দনছৰিৰাদমূলতণ্হাকাযসত্তানুসয- অট্ঠমিচ্ছত্তনৰতণ্হামূলকদসাকুসলকম্মপথদ্ৰাসট্ঠিদিট্ঠিগতঅট্ঠসততণ্হাৰিচরিতপ্পভেসব্বদরথ- পরিল়াহকিলেসসতসহস্সানি, সঙ্খেপতো ৰা পঞ্চ কিলেসখন্ধঅভিসঙ্খারদেৰপুত্তমচ্চুমারে অভঞ্জি, তস্মা ভগ্গত্তা এতেসং পরিস্সযানং ‘‘ভগ্গৰা’’তি ৰত্তব্বে ‘‘ভগৰা’’তি ৰুচ্চতি. আহ চেত্থ –

‘‘ভগ্গরাগো ভগ্গদোসো, ভগ্গমোহো অনাসৰো;

ভগ্গাস্স পাপকা ধম্মা, ভগৰা তেন ৰুচ্চতী’’তি. (পারা. অট্ঠ. ১.৯৬; ৰিসুদ্ধি. ১.১৪৪);

ভাগ্যৰন্ততায চস্স সতপুঞ্ঞজলক্খণৰরস্স রূপকাযসম্পত্তি দীপিতা হোতি. ভগ্গদোসতায ধম্মকাযসম্পত্তি. তথা লোকিযসরিক্খকানং বহুমতভাৰো, গহট্ঠপব্বজিতেহি অভিগমনীযতা, অভিগতানঞ্চ নেসং কাযচিত্তদুক্খাপনযনে পটিবলভাৰো, আমিসদানধম্মদানেহি উপকারিতা, লোকিযলোকুত্তরসুখেহি চ সঞ্ঞোজনসমত্থতা দীপিতা হোতি.

যস্মা চ লোকে ইস্সরিযধম্মযসসিরিকামপযত্তেসু ছসু ধম্মেসু ভগসদ্দো পৰত্ততি, পরমঞ্চস্স সকচিত্তে ইস্সরিযং, অণিমালঙ্ঘিমাদিকং ৰা লোকিযসম্মতং সব্বাকারপরিপূরং অত্থি, তথা লোকুত্তরো ধম্মো, লোকত্তযব্যাপকো যথাভুচ্চগুণাধিগতো অতিৰিয পরিসুদ্ধো যসো, রূপকাযদস্সনব্যাৰটজননযনপ্পসাদজননসমত্থা সব্বাকারপরিপূরা সব্বঙ্গপচ্চঙ্গসিরী, যং যং এতেন ইচ্ছিতং পত্থিতং অত্তহিতং পরহিতং ৰা, তস্স তস্স তথেৰ অভিনিপ্ফন্নত্তা ইচ্ছিতিচ্ছিতত্থনিপ্ফত্তিসঞ্ঞিতো কামো, সব্বলোকগরুভাৰপ্পত্তিহেতুভূতো সম্মাৰাযামসঙ্খাতো পযত্তো চ অত্থি, তস্মা ইমেহি ভগেহি যুত্তত্তাপি ভগা অস্স সন্তীতি ইমিনা অত্থেন ‘‘ভগৰা’’তি ৰুচ্চতি.

যস্মা পন কুসলাদীহি ভেদেহি সব্বধম্মে, খন্ধাযতনধাতুসচ্চইন্দ্রিযপটিচ্চসমুপ্পাদাদীহি ৰা কুসলাদিধম্মে, পীল়নসঙ্খতসন্তাপৰিপরিণামট্ঠেন ৰা দুক্খমরিযসচ্চং, আযূহননিদানসংযোগপলিবোধট্ঠেন সমুদযং, নিস্সরণৰিৰেকাসঙ্খতঅমতট্ঠেন নিরোধং, নিয্যানিকহেতুদস্সনাধিপতেয্যট্ঠেন মগ্গং ৰিভত্তৰা, ৰিভজিত্ৰা ৰিৰরিত্ৰা দেসিতৰাতি ৰুত্তং হোতি, তস্মা ‘‘ৰিভত্তৰা’’তি ৰত্তব্বে ‘‘ভগৰা’’তি ৰুচ্চতি.

যস্মা চ এস দিব্বব্রহ্মঅরিযৰিহারে কাযচিত্তউপধিৰিৰেকে সুঞ্ঞতপ্পণিহিতানিমিত্তৰিমোক্খে অঞ্ঞে চ লোকিযলোকুত্তরে উত্তরিমনুস্সধম্মে ভজি সেৰি বহুলমকাসি, তস্মা ‘‘ভত্তৰা’’তি ৰত্তব্বে ‘‘ভগৰা’’তি ৰুচ্চতি.

যস্মা পন তীসু ভৰেসু তণ্হাসঙ্খাতং গমনং অনেন ৰন্তং, তস্মা ‘‘ভৰেসু ৰন্তগমনো’’তি ৰত্তব্বে ভৰসদ্দতো ভকারং গমনসদ্দতো গকারং ৰন্তসদ্দতো ৰকারঞ্চ দীঘং কত্ৰা আদায ‘‘ভগৰা’’তি ৰুচ্চতি, যথা লোকে ‘‘মেহনস্স খস্স মালা’’তি ৰত্তব্বে ‘‘মেখলা’’তি ৰুচ্চতি.

পুন অপরম্পি পরিযাযং নিদ্দিসন্তো ‘‘অপি চ ভগ্গরাগোতি ভগৰা’’তিআদিমাহ. তত্থ ভগ্গো রাগো অস্সাতি ভগ্গরাগো. ভগ্গদোসাদীসুপি এসেৰ নযো. কণ্ডকোতি ৰিনিৰিজ্ঝনট্ঠেন কিলেসা এৰ. ভজীতি উদ্দেসৰসেন ৰিভাগং কত্ৰা ভাজেসি. ৰিভজীতি নিদ্দেসৰসেন ৰিৰিধা ভাজেসি. পৰিভজীতি পটিনিদ্দেসৰসেন পকারেন ৰিভজি. উগ্ঘটিতঞ্ঞূনং ৰসেন ভজি. ৰিপঞ্চিতঞ্ঞূনং ৰসেন ৰিভজি. নেয্যানং ৰসেন পৰিভজি.

ধম্মরতনন্তি –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতী’’তি. (খু. পা. অট্ঠ. ৬.৩; দী. নি. অট্ঠ. ২.৩৩) –

এৰং ৰণ্ণিতং ধম্মরতনং তিৰিধেন ভাজেসি. ভৰানং অন্তকরোতি কামভৰাদীনং নৰন্নং ভৰানং পরিচ্ছেদং পরিযন্তং পরিৰটুমং কারকো. ভাৰিতকাযোতি ৰড্ঢিতকাযো. তথা ইতরেসুপি. ভজীতি সেৰি. অরঞ্ঞৰনপত্থানীতি গামস্স ৰা নগরস্স ৰা ইন্দখীলতো বহি অরঞ্ঞং. ৰনপত্থানি মনুস্সূপচারাতিক্কন্তানি ৰনসণ্ডানি. পন্তানীতি যত্থ মনুস্সা ন কসন্তি ন ৰপন্তি দূরানি সেনাসনানি. কেচি পন ‘‘ৰনপত্তানীতি যস্মা যত্থ ব্যগ্ঘাদযো অত্থি, তং ৰনং তে পালযন্তি রক্খন্তি, তস্মা তেহি রক্খিতত্তা ৰনপত্তানী’’তি ৰদন্তি. সেনাসনানীতি সেতি চেৰ আসতি চ এত্থাতি সেনাসনানি. অপ্পসদ্দানীতি ৰচনসদ্দেন অপ্পসদ্দানি. অপ্পনিগ্ঘোসানীতি গামনগরনিগ্ঘোসসদ্দেন অপ্পনিগ্ঘোসানি. ৰিজনৰাতানীতি অন্তোসঞ্চরণজনস্স সরীরৰাতেন ৰিরহিতানি. ‘‘ৰিজনৰাদানী’’তিপি পাঠো, ‘‘অন্তোজনৰাদেন ৰিরহিতানী’’তি অত্থো. ‘‘ৰিজনপাতানী’’তিপি পাঠো, ‘‘জনসঞ্চারৰিরহিতানী’’তি অত্থো. মনুস্সরাহস্সেয্যকানীতি মনুস্সানং রহস্সকরণট্ঠানানি. পটিসল্লানসারুপ্পানীতি ৰিৰেকানুরূপানি. ভাগী ৰাতি ‘‘ভাগো চীৰরাদিকোট্ঠাসো অস্স অত্থী’’তি ভাগী. ‘‘পটিলাভৰসেন অত্থরসাদিভাগো অস্স অত্থী’’তি ভাগী. অত্থরসস্সাতি হেতুফলসম্পত্তিসঙ্খাতস্স অত্থরসস্স. ধম্মরসস্সাতি হেতুসম্পত্তিসঙ্খাতস্স ধম্মরসস্স. ৰুত্তঞ্হেতং ‘‘হেতুফলে ঞাণং অত্থপটিসম্ভিদা, হেতুম্হি ঞাণং ধম্মপটিসম্ভিদা’’তি (ৰিভ. ৭২০). ৰিমুত্তিরসস্সাতি ফলসম্পত্তিসঙ্খাতস্স ৰিমুত্তিরসস্স. ৰুত্তম্পি চেতং ‘‘কিচ্চসম্পত্তিঅত্থেন, রসো নাম পৰুচ্চতী’’তি (পটি. ম. অট্ঠ. ১.১.২ মাতিকাৰণ্ণনা; ৰিসুদ্ধি. ১.৮).

চতুন্নং ঝানানন্তি পঠমজ্ঝানাদীনং চতুন্নং ঝানানং. চতুন্নং অপ্পমঞ্ঞানন্তি মেত্তাদীনং ফরণপ্পমাণৰিরহিতানং চতুন্নং ব্রহ্মৰিহারানং. চতুন্নং অরূপসমাপত্তীনন্তি আকাসানঞ্চাযতনাদীনং চতুন্নং অরূপজ্ঝানানং. অট্ঠন্নং ৰিমোক্খানন্তি ‘‘রূপী রূপানি পস্সতী’’তিআদিনা (ধ. স. ২৪৮) নযেন ৰুত্তানং আরম্মণৰিমুত্তানং অট্ঠন্নং ৰিমোক্খানং. অভিভাযতনানন্তি এত্থ অভিভূতানি আযতনানি এতেসং ঝানানন্তি অভিভাযতনানি, ঝানানি. আযতনানীতি অধিট্ঠানট্ঠেন আযতনসঙ্খাতানি কসিণারম্মণানি. ঞাণুত্তরিকো হি পুগ্গলো ৰিসদঞাণোতি কিং এত্থ আরম্মণে সমাপজ্জিতব্বং, ন মযি চিত্তেকগ্গতাকরণে ভারো অত্থীতি তানি আরম্মণানি অভিভৰিত্ৰা সমাপজ্জতি. সহ নিমিত্তুপ্পাদেনেৰেত্থ অপ্পনং নিব্বত্তেতীতি অত্থো. এৰং উপ্পাদিতানি ঝানানি অভিভাযতনানীতি ৰুচ্চন্তি, তেসং অট্ঠন্নং অভিভাযতনানং. নৰন্নং অনুপুব্বৰিহারসমাপত্তীনন্তি পুব্বং পুব্বং অনু অনুপুব্বং, অনুপুব্বং ৰিহরিতব্বতো সমাপজ্জিতব্বতো অনুপুব্বৰিহারসমাপত্তি, অনুপটিপাটিযা সমাপজ্জিতব্বাতি অত্থো, তাসং নৰন্নং অনুপুব্বৰিহারসমাপত্তীনং. দসন্নং সঞ্ঞাভাৰনানন্তি গিরিমানন্দসুত্তে (অ. নি. ১০.৬০) আগতানং অনিচ্চসঞ্ঞাদীনং দসন্নং সঞ্ঞাভাৰনানং. দসন্নং কসিণসমাপত্তীনন্তি সকলট্ঠেন কসিণসঙ্খাতানং পথৰীকসিণজ্ঝানাদীনং দসন্নং ঝানানং. আনাপানস্সতিসমাধিস্সাতি আনাপানস্সতিসম্পযুত্তসমাধিস্স. অসুভসমাপত্তিযাতি অসুভজ্ঝানসমাপত্তিযা. দসন্নং তথাগতবলানন্তি দসবলবলানং দসন্নং. চতুন্নং ৰেসারজ্জানন্তি ৰিসারদভাৰানং চতুন্নং ৰেসারজ্জানং. চতুন্নং পটিসম্ভিদানন্তি পটিসম্ভিদাঞাণানং চতুন্নং. ছন্নং অভিঞ্ঞাণানন্তি ইদ্ধিৰিধাদীনং ছন্নং অভিঞ্ঞাণানং. ছন্নং বুদ্ধধম্মানন্তি ‘‘সব্বং কাযকম্মং ঞাণানুপরিৰত্তী’’তিআদিনা (চূল়নি. মোঘরাজমাণৰপুচ্ছানিদ্দেস ৮৫; নেত্তি. ১৫) নযেন উপরি আগতানং ছন্নং বুদ্ধধম্মানং.

তত্থ চীৰরাদযো ভাগ্যসম্পত্তিৰসেন ৰুত্তা. অত্থরসতিকো পটিৰেধৰসেন ৰুত্তো. অধিসীলতিকো পটিপত্তিৰসেন. ঝানত্তিকো রূপারূপজ্ঝানৰসেন. ৰিমোক্খত্তিকো সমাপত্তিৰসেন. সঞ্ঞাচতুক্কো উপচারপ্পনাৰসেন. সতিপট্ঠানাদযো সত্ততিংসবোধিপক্খিযধম্মৰসেন. তথাগতবলানন্তিআদযো আৰেণিকধম্মৰসেন ৰুত্তাতি ৰেদিতব্বা.

ইতো পরং ভগৰাতি নেতং নামন্তিআদি ‘‘অত্থমনুগতা অযং পঞ্ঞত্তী’’তি ঞাপনত্থং ৰুত্তং. তত্থ সমণা পব্বজ্জুপগতা. ব্রাহ্মণা ভোৰাদিনো সমিতপাপবাহিতপাপা ৰা. দেৰতা সক্কাদযো ব্রহ্মানো চ. ৰিমোক্খন্তিকন্তি ৰিমোক্খো অরহত্তমগ্গো, ৰিমোক্খস্স অন্তো অরহত্তফলং, তস্মিং ৰিমোক্খন্তে ভৰং ৰিমোক্খন্তিকং নামং. সব্বঞ্ঞুভাৰো হি অরহত্তমগ্গেন সিজ্ঝতি, অরহত্তফলাধিগমেন সিদ্ধো হোতি. তস্মা সব্বঞ্ঞুভাৰো ৰিমোক্খন্তে ভৰো হোতি. তং নেমিত্তিকম্পি নামং ৰিমোক্খন্তে ভৰং নাম হোতি. তেন ৰুত্তং – ‘‘ৰিমোক্খন্তিকমেতং বুদ্ধানং ভগৰন্তান’’ন্তি. বোধিযা মূলে সহ সব্বঞ্ঞুতঞ্ঞাণস্স পটিলাভাতি মহাবোধিরুক্খমূলে যথাৰুত্তক্খণে সব্বঞ্ঞুতঞ্ঞাণস্স পটিলাভেন সহ. সচ্ছিকা পঞ্ঞত্তীতি অরহত্তফলসচ্ছিকিরিযায সব্বধম্মসচ্ছিকিরিযায ৰা জাতা পঞ্ঞত্তি. যদিদং ভগৰাতি যা অযং ভগৰাতি পঞ্ঞত্তি.

দ্ৰীহি কারণেহীতি দ্ৰীহি কোট্ঠাসেহি. পরিযত্তিসাসনন্তি তেপিটকং বুদ্ধৰচনং. পটিপত্তীতি পটিপজ্জতি এতাযাতি পটিপত্তি. যং তস্স পরিযাপুটন্তি তেন পুগ্গলেন যং পরিযাপুটং সজ্ঝাযিতং করণত্থে সামিৰচনং. ‘‘পরিযাপুট্ট’’ন্তিপি পাঠো. সুত্তন্তি উভতোৰিভঙ্গনিদ্দেসখন্ধকপরিৰারা, সুত্তনিপাতে মঙ্গলসুত্ত- (খু. পা. ৫.১ আদযো; সু. নি. ২৬১ আদযো) রতনসুত্ত- (খু. পা. ৬.১ আদযো) তুৰটকসুত্তানি (সু. নি. ৯২১ আদযো), অঞ্ঞম্পি চ সুত্তনামকং তথাগতৰচনং সুত্তন্তি ৰেদিতব্বং. গেয্যন্তি সব্বম্পি সগাথকং সুত্তং গেয্যন্তি ৰেদিতব্বং, ৰিসেসেন সংযুত্তকে সকলোপি সগাথাৰগ্গো. ৰেয্যাকরণন্তি সকলং অভিধম্মপিটকং নিগ্গাথকং সুত্তং, যঞ্চ অঞ্ঞম্পি অট্ঠহি অঙ্গেহি অসঙ্গহিতং বুদ্ধৰচনং, তং ‘‘ৰেয্যাকরণ’’ন্তি ৰেদিতব্বং. গাথাতি ধম্মপদং, থেরগাথা, থেরীগাথা, সুত্তনিপাতে নোসুত্তনামিকা সুদ্ধিকগাথা চ ‘‘গাথা’’তি ৰেদিতব্বা. উদানন্তি সোমনস্সঞাণমযিকগাথাপটিসংযুত্তা দ্ৰেঅসীতি সুত্তন্তা ‘‘উদান’’ন্তি ৰেদিতব্বং. ইতিৰুত্তকন্তি ‘‘ৰুত্তঞ্হেতং ভগৰতা’’তিআদিনযপ্পৰত্তা (ইতিৰু. ১ আদযো) দসুত্তরসতসুত্তন্তা ‘‘ইতিৰুত্তক’’ন্তি ৰেদিতব্বং. জাতকন্তি অপণ্ণকজাতকাদীনি (জা. ১.১.১) পণ্ণাসাধিকানি পঞ্চজাতকসতানি ‘‘জাতক’’ন্তি ৰেদিতব্বং. অব্ভুতধম্মন্তি ‘‘চত্তারোমে, ভিক্খৰে, অচ্ছরিযা অব্ভুতধম্মা আনন্দে’’তিআদিনযপ্পৰত্তা (দী. নি. ২.২০৯; অ. নি. ৪.১২৯) সব্বেপি অচ্ছরিযঅব্ভুতধম্মপটিসংযুত্তা সুত্তন্তা ‘‘অব্ভুতধম্ম’’ন্তি ৰেদিতব্বং. ৰেদল্লন্তি চূল়ৰেদল্ল- (ম. নি. ১.৪৬০ আদযো) মহাৰেদল্ল- (ম. নি. ১.৪৪৯ আদযো) সম্মাদিট্ঠি- (ম. নি. ১.৮৯ আদযো) সক্কপঞ্হ- (দী. নি. ২.৩৪৪ আদযো) সঙ্খারভাজনিযমহাপুণ্ণমসুত্তাদযো (ম. নি. ৩.৮৫ আদযো) সব্বেপি ৰেদঞ্চ তুট্ঠিঞ্চ লদ্ধা লদ্ধা পুচ্ছিতসুত্তন্তা ‘‘ৰেদল্ল’’ন্তি ৰেদিতব্বং. ইদং পরিযত্তিসাসনন্তি ইদং ৰুত্তপ্পকারং তেপিটকং বুদ্ধৰচনং পরিযাপুণিতব্বট্ঠেন পরিযত্তি, অনুসাসনট্ঠেন সাসনন্তি কত্ৰা পরিযত্তিসাসনং. তম্পি মুস্সতীতি তম্পি পরিযত্তিসাসনং নস্সতি. সম্মুস্সতীতি আদিতো নস্সতি. পরিবাহিরো হোতীতি পরম্মুখো হোতি.

কতমং পটিপত্তিসাসনন্তি লোকুত্তরধম্মতো পুব্বভাগো তদত্থং পটিপজ্জীযতীতি পটিপত্তি. সাসীযন্তি এত্থ ৰেনেয্যাতি সাসনং. সম্মাপটিপদাতিআদযো ৰুত্তনযা এৰ.

পাণম্পি হনতীতি জীৰিতিন্দ্রিযম্পি ঘাতেতি. অদিন্নম্পি আদিযতীতি পরপরিগ্গহিতম্পি ৰত্থুং গণ্হাতি. সন্ধিম্পি ছিন্দতীতি ঘরসন্ধিম্পি ছিন্দতি. নিল্লোপম্পি হরতীতি গামে পহরিত্ৰা মহাৰিলোপম্পি করোতি. একাগারিকম্পি করোতীতি পণ্ণাসমত্তেহিপি সট্ঠিমত্তেহিপি পরিৰারেত্ৰা জীৰগ্গাহং গহেত্ৰাপি ধনং আহরাপেতি. পরিপন্থেপি তিট্ঠতীতি পন্থদূহনকম্মং করোতি. পরদারম্পি গচ্ছতীতি পরদারেসু চারিত্তং আপজ্জতি. মুসাপি ভণতীতি অত্থভঞ্জনকং মুসাপি ৰদতি. অনরিযধম্মোতি অনরিযসভাৰো.

৫১. একো পুব্বে চরিত্ৰানাতি পব্বজ্জাসঙ্খাতেন ৰা গণাৰৰস্সগ্গট্ঠেন ৰা পুব্বে লোকে ৰিহরিত্ৰা. যানং ভন্তংৰ তং লোকে, হীনমাহু পুথুজ্জনন্তি তং ৰিব্ভন্তকং পুগ্গলং যথা হত্থিযানাদিযানং অদন্তং ৰিসমম্পি আরোহতি, আরোহনকম্পি ভঞ্জতি, পপাতেপি পপততি, এৰং কাযদুচ্চরিতাদিৰিসমারোহনেন নিরযাদীসু, অত্থভঞ্জনেন জাতিপপাতাদীসু পপতনেন চ যানং ভন্তংৰ হীনং পুথুজ্জনঞ্চ আহূতি.

পব্বজ্জাসঙ্খাতেন ৰাতি পব্বজ্জাকোট্ঠাসেন ৰা ‘‘পব্বজিতো সমণো’’তি গণনারোপনেন ৰা. গণাৰৰস্সগ্গট্ঠেন ৰাতি গণসঙ্গণিকারামতং ৰিস্সজ্জেত্ৰা ৰস্সগ্গট্ঠেন ৰা.

একো পটিক্কমতীতি এককোৰ গামতো নিৰত্ততি. যো নিসেৰতীতি নিদ্দেসস্স উদ্দেসপদং. অপরেন সমযেনাতি অঞ্ঞস্মিং কালে অপরভাগে. বুদ্ধন্তি সব্বঞ্ঞুবুদ্ধং. ধম্মন্তি স্ৰাক্খাততাদিগুণযুত্তং ধম্মং. সঙ্ঘন্তি সুপ্পটিপন্নতাদিগুণযুত্তং সঙ্ঘং. সিক্খন্তি অধিসীলাদিসিক্খিতব্বং সিক্খং. পচ্চক্খাযাতি বুদ্ধাদিং পটিক্খিপিত্ৰা. হীনাযাতি হীনত্থায গিহিভাৰায. আৰত্তিত্ৰাতি নিৰত্তিত্ৰা. সেৰতি একৰারং সেৰতি. নিসেৰতি অনেকৰিধেন সেৰতি. সংসেৰতি অল্লীযিত্ৰা সেৰতি. পটিসেৰতি পুনপ্পুনং সেৰতি.

ভন্তন্তি ৰিব্ভন্তং. অদন্তন্তি দন্তভাৰং অনুপনীতং. অকারিতন্তি সুসিক্খিতকিরিযং অসিক্খাপিতং. অৰিনীতন্তি ন ৰিনীতং আচারসম্পত্তিযা অসিক্খিতং. উপ্পথং গণ্হাতীতি ৰুত্তপ্পকারং যানং অদন্তাতিযুত্তং ভন্তং ৰিসমমগ্গং উপেতি. ৰিসমং খাণুম্পি পাসাণম্পি অভিরুহতীতি ৰিসমং হুত্ৰা ঠিতং খরখাণুম্পি তথা পব্বতপাসাণম্পি আরোহতি. যানম্পি আরোহনকম্পি ভঞ্জতীতি ৰয্হাদিযানং আরোহন্তস্স পাজেন্তস্স হত্থপাদাদিম্পি ভিন্দতি. পপাতেপি পপততীতি একতোচ্ছিন্নপব্ভারপপাতেপি পাতেতি. সো ৰিব্ভন্তকোতি সো পটিক্কন্তকো. ভন্তযানপটিভাগোতি অনৰট্ঠিতযানসদিসো. উপ্পথং গণ্হাতীতি কুসলকম্মপথতো পটিক্কমিত্ৰা অপাযপথভূতং উপ্পথং মিচ্ছামগ্গং উপেতি. ৰিসমং কাযকম্মং অভিরুহতীতি সমস্স পটিপক্খং কাযদুচ্চরিতসঙ্খাতং ৰিসমং কাযকম্মং আরোহতি. সেসেসুপি এসেৰ নযো. নিরযে অত্তানং ভঞ্জতীতি নিরস্সাদসঙ্খাতে নিরযে অত্তভাৰং চুণ্ণৰিচুণ্ণং করোতি. মনুস্সলোকে অত্তানং ভঞ্জতীতি ৰিৰিধকম্মকারণৰসেন ভঞ্জতি. দেৰলোকে অত্তানং ভঞ্জতীতি পিযৰিপ্পযোগাদিদুক্খৰসেন. জাতিপপাতম্পি পপততীতি জাতিপপাতেপি পাতেতি. জরাপপাতাদীসুপি এসেৰ নযো. মনুস্সলোকেতি ইধ অধিপ্পেতলোকমেৰ দস্সেতি.

পুথুজ্জনাতি নিদ্দেসস্স উদ্দেসপদং. তত্থ পুথুজ্জনাতি –

পুথূনং জননাদীহি, কারণেহি পুথুজ্জনো;

পুথুজ্জনন্তোগধত্তা, পুথুৰাযং জনো ইতি.

সো হি পুথূনং নানপ্পকারানং কিলেসাদীনং জননাদীহিপি কারণেহি পুথুজ্জনো. তং ৰিভাগতো দস্সেতুং ‘‘পুথু কিলেসে জনেন্তী’’তিআদিমাহ. তত্থ বহূনং নানপ্পকারানং সক্কাযদিট্ঠীনং অৰিহতত্তা ৰা তা জনেন্তি, তাহি জনিতাতি ৰা পুথুজ্জনা. অৰিহতমেৰত্থং জনসদ্দো ৰদতি. পুথু সত্থারানং মুখুল্লোকিকাতি এত্থ পুথূ নানাজনা সত্থুপটিঞ্ঞা এতেসন্তি পুথুজ্জনাতি ৰচনত্থো. পুথু সব্বগতীহি অৰুট্ঠিতাতি এত্থ জনেতব্বা জনযন্তি এত্থাতি জনা, গতিযো. পুথূ জনা এতেসন্তি পুথুজ্জনা. ইতো পরে জাযন্তি এতেহীতি জনা, অভিসঙ্খারাদযো. তে এতেসং ৰিজ্জন্তীতি পুথুজ্জনা. অভিসঙ্খরণাদিঅত্থো এৰ ৰা জনসদ্দো দট্ঠব্বো. নানাসন্তাপেহি সন্তপন্তীতি রাগগ্গিআদযো সন্তাপা. তে এৰ ৰা সব্বেপি ৰা কিলেসা পরিল়াহা. পুথু পঞ্চসু কামগুণেসূতি এত্থ জাযতীতি জনো, রাগো গেধোতি এৰমাদিকো, পুথু জনো এতেসন্তি পুথুজ্জনা. পুথু জাতা রত্তাতি এৰং রাগাদিঅত্থো এৰ ৰা জনসদ্দো দট্ঠব্বো. পলিবুদ্ধাতি সম্বদ্ধা. আৰুতাতি আৰরিতা. নিৰুতাতি ৰারিতা. ওৰুতাতি উপরিতো পিহিতা. পিহিতাতি হেট্ঠাভাগেন পিহিতা. পটিচ্ছন্নাতি অপাকটা. পটিকুজ্জিতাতি অধোমুখগতা.

অথ ৰা পুথূনং ৰা গণনপথমতীতানং অরিযধম্মপরম্মুখানং নীচধম্মসমাচারানং জনানং অন্তোগধত্তাপি পুথুজ্জনা. পুথু ৰা অযং ৰিসুংযেৰ সঙ্খং গতো, ৰিসংসট্ঠো সীলসুতাদিগুণযুত্তেহি অরিযেহি জনোতিপি পুথুজ্জনো.

এৰং যে তে –

‘‘দুৰে পুথুজ্জনা ৰুত্তা, বুদ্ধেনাদিচ্চবন্ধুনা;

অন্ধো পুথুজ্জনো একো, কল্যাণেকো পুথুজ্জনো’’তি. –

দ্ৰেৰ পুথুজ্জনা ৰুত্তা, তেসু অন্ধপুথুজ্জনো ৰুত্তো হোতীতি ৰেদিতব্বো.

৫২. যসো কিত্তি চাতি লাভসক্কারো পসংসা চ. পুব্বেতি পব্বজিতভাৰে. হাযতে ৰাপি তস্স সাতি তস্স ৰিব্ভন্তকস্স সতো সো চ যসো সা চ কিত্তি হাযতি. এতম্পি দিস্ৰাতি এতম্পি পুব্বে যসকিত্তীনং লাভং পচ্ছা চ হানিং দিস্ৰা. সিক্খেথ মেথুনং ৰিপ্পহাতৰেতি তিস্সো সিক্খাযো সিক্খেথ. কিং কারণা? মেথুনং ৰিপ্পহাতৰে, মেথুনপ্পহানত্থাযাতি ৰুত্তং হোতি.

কিত্তিৰণ্ণগতোতি ভগৰা কিত্তিৰণ্ণো, কিত্তিসদ্দঞ্চেৰ গুণঞ্চ উক্খিপিত্ৰা ৰদন্তো হোতীতি অত্থো. চিত্তং নানানযেন কথনং অস্স অত্থীতি চিত্তকথী. কল্যাণপটিভানোতি সুন্দরপঞ্ঞো.

হাযতীতি নিদ্দেসস্স উদ্দেসপদং. পরিহাযতীতি সমন্ততো হাযতি. পরিধংসতীতি অধোপথৰিং পততি. পরিপততীতি সমন্ততো অপগচ্ছতি. অন্তরধাযতীতি অদস্সনং যাতি. ৰিপ্পলুজ্জতীতি উচ্ছিজ্জতি.

খুদ্দকো সীলক্খন্ধোতি থুল্লচ্চযাদি. মহন্তো সীলক্খন্ধোতি পারাজিকসংঙ্ঘাদিসেসো.

মেথুনধম্মস্স পহানাযাতি তদঙ্গাদিপহানেন পজহনত্থায. ৰূপসমাযাতি মলানং ৰূপসমনত্থায. পটিনিস্সগ্গাযাতি পক্খন্দনপরিচ্চাগপটিনিস্সগ্গত্থায. পটিপস্সদ্ধিযাতি পটিপস্সদ্ধিসঙ্খাতস্স ফলস্স অত্থায.

৫৩. যো হি মেথুনং ন ৰিপ্পজহতি সঙ্কপ্পেহি…পে… তথাৰিধো. তত্থ পরেতোতি সমন্নাগতো. পরেসং নিগ্ঘোসন্তি উপজ্ঝাযাদীনং নিন্দাৰচনং. মঙ্কু হোতীতি দুম্মনো হোতি.

কামসঙ্কপ্পেনাতি কামপটিসংযুত্তেন ৰিতক্কেন. উপরিট্ঠেপি এসেৰ নযো. ফুট্ঠোতি ৰিতক্কেহি ফুসিতো. পরেতোতি অপরিহীনো. সমোহিতোতি সম্মা ওহিতো অন্তো পৰিট্ঠো. কপণো ৰিযাতি দুগ্গতমনুস্সো ৰিয. মন্দো ৰিযাতি অঞ্ঞাণী ৰিয. মোমূহো ৰিযাতি সম্মোহভূতো ৰিয. ঝাযতীতি চিন্তেতি. পজ্ঝাযতীতি ভুসং চিন্তেতি. নিজ্ঝাযতীতি অনেকৰিধেন চিন্তেতি. অপজ্ঝাযতীতি ততো অপগন্ত্ৰা চিন্তেতি. উলূকোতি উলূকসকুণো. রুক্খসাখাযন্তি রুক্খে উট্ঠিতসাখায, ৰিটপে ৰা. মূসিকং মগযমানোতি মূসিকং গৰেসমানো, ‘‘মগ্গযমানো’’তিপি পঠন্তি. কোত্থূতি সিঙ্গালো. বিল়ারোতি বব্বু. সন্ধিসমলসঙ্কটিরেতি দ্ৰিন্নং ঘরানং অন্তরে চ উদকনিদ্ধমনচিক্খল্লকচৰরনিক্খিপনট্ঠানে চ থণ্ডিলে চ. ৰহচ্ছিন্নোতি পিট্ঠিগীৰমংসচ্ছিন্নো. ইতো পরা গাথা পাকটসম্বন্ধা এৰ.

৫৪. তাসু সত্থানীতি কাযদুচ্চরিতাদীনি. তানি হি অত্তনো পরেসঞ্চ ছেদনট্ঠেন ‘‘সত্থানী’’তি ৰুচ্চন্তি. তেসু ৰাযং ৰিসেসেন তাৰ আদিতো মুসাৰচনসত্থানেৰ করোতি, ‘‘ইমিনা কারণেনাহং ৰিব্ভন্তো’’তি ভণন্তো. তেনেৰাহ – ‘‘এস খ্ৰস্স মহাগেধো, মোসৰজ্জং পগাহতী’’তি. তত্থ এস খ্ৰস্সাতি এস খো অস্স. মহাগেধোতি মহাবন্ধনং. কতমোতি চে? যদিদং মোসৰজ্জং পগাহতি, স্ৰাযং মুসাৰাদজ্ঝোগাহো ‘‘মহাগেধো’’তি ৰেদিতব্বো.

তীণি সত্থানীতি তযো ছেদকা. কাযদুচ্চরিতং কাযসত্থং. ৰচীসত্থাদীসুপি এসেৰ নযো. তং ৰিভাগতো দস্সেতুং ‘‘তিৰিধং কাযদুচ্চরিতং কাযসত্থ’’ন্তি আহ. সম্পজানমুসা ভাসতীতি জানন্তো তুচ্ছং ৰাচং ভাসতি. অভিরতো অহং ভন্তে অহোসিং পব্বজ্জাযাতি সাসনে পব্বজ্জায অনভিরতিৰিরহিতো অহং আসিং. মাতা মে পোসেতব্বাতি মাতা মযা পোসেতব্বা. তেনম্হি ৰিব্ভন্তোতি ভণতীতি তেন কারণেন পটিক্কন্তো অস্মীতিপি কথেতি. পিতা মে পোসেতব্বোতিআদীসুপি এসেৰ নযো.

এসো তস্স মহাগেধোতি তস্স পুগ্গলস্স এসো মহাবন্ধো. মহাৰনন্তি মহন্তং দুট্ঠৰনং. গহনন্তি দুরতিক্কমং. কন্তারোতি চোরকন্তারাদিসদিসো. ৰিসমোতি কণ্টকৰিসমো. কুটিলোতি ৰঙ্ককটকসদিসো. পঙ্কোতি পল্ললসদিসো. পলিপোতি কদ্দমসদিসো. পলিবোধোতি মহাদুক্খো. মহাবন্ধনন্তি মহন্তং দুমোচযবন্ধনং. যদিদং সম্পজানমুসাৰাদোতি যো অযং সম্পজানমুসাৰাদো.

সভগ্গতো ৰাতি সভাযং ঠিতো ৰা. পরিসগ্গতো ৰাতি গামপরিসাযং ঠিতো ৰা. ঞাতিমজ্ঝগতো ৰাতি দাযাদানং মজ্ঝে ঠিতো ৰা. পূগমজ্ঝগতো ৰাতি সেনীনং মজ্ঝে ঠিতো ৰা. রাজকুলমজ্ঝগতো ৰাতি রাজকুলস্স মজ্ঝে মহাৰিনিচ্ছযে ঠিতো ৰা. অভিনীতোতি পুচ্ছনত্থায নীতো. সক্খিপুট্ঠোতি সক্খিং কত্ৰা পুচ্ছিতো. এহম্ভো পুরিসাতি আলপনমেতং. অত্তহেতু ৰা পরহেতু ৰাতি অত্তনো ৰা পরস্স ৰা হত্থপাদাদিহেতু ৰা ধনহেতু ৰা. আমিসকিঞ্চিক্খহেতু ৰাতি এত্থ আমিসন্তি লাভো অধিপ্পেতো. কিঞ্চিক্খন্তি যং ৰা তং ৰা অপ্পমত্তকং, অন্তমসো তিত্তিরৰট্টকসপ্পিপিণ্ডনৰনীতপিণ্ডাদিমত্তকস্সপি লাভস্স হেতূতি অত্থো. সম্পজানমুসা ভাসতীতি জানন্তোযেৰ মুসাৰাদং করোতি.

পুন অঞ্ঞং পরিযাযং দস্সেন্তো ‘‘অপি চ তীহাকারেহি মুসাৰাদো হোতি, পুব্বেৰস্স হোতী’’তিআদিমাহ. তত্থ তীহাকারেহীতি সম্পজানমুসাৰাদস্স অঙ্গভূতেহি তীহি কারণেহি. পুব্বেৰস্স হোতীতি পুব্বভাগেযেৰ অস্স পুগ্গলস্স এৰং হোতি ‘‘মুসা ভণিস্স’’ন্তি. ভণন্তস্স হোতীতি ভণমানস্স হোতি. ভণিতস্স হোতীতি ভণিতে অস্স হোতি. যং ৰত্তব্বং তস্মিং ৰুত্তে হোতীতি অত্থো. অথ ৰা ভণিতস্সাতি ৰুত্তৰতো নিট্ঠিতৰচনস্স হোতীতি. যো এৰং পুব্বভাগেপি জানাতি, ভণন্তোপি জানাতি, পচ্ছাপি জানাতি ‘‘মুসা মযা ভণিত’’ন্তি, সো এৰং ৰদন্তো মুসাৰাদকম্মুনা বজ্ঝতীতি অযমেত্থ অত্থো দস্সিতো. কিঞ্চাপি দস্সিতো, অথ খো অযমেত্থ ৰিসেসো – পুচ্ছা তাৰ হোতি, ‘‘মুসা ভণিস্স’’ন্তি পুব্বভাগো অত্থি, ‘‘মুসা মযা ভণিত’’ন্তি পচ্ছাভাগো নত্থি. ৰুত্তমত্তমেৰ হি কোচি পমুস্সতি কিং তস্স মুসাৰাদো হোতি, ন হোতীতি? সা এৰং অট্ঠকথাসু ৰিস্সজ্জিতা – পুব্বভাগে ‘‘মুসা ভণিস্স’’ন্তি চ, ভণন্তস্স ‘‘মুসা ভণামী’’তি চ জানতো পচ্ছাভাগে ‘‘মুসা মযা ভণিত’’ন্তি ন সক্কা ন ভৰিতুং, সচেপি ন হোতি, মুসাৰাদোযেৰ. পুরিমমেৰ হি অঙ্গদ্ৰযং পমাণং. যস্সাপি পুব্বভাগে ‘‘মুসা ভণিস্স’’ন্তি আভোগো নত্থি, ভণন্তো পন ‘‘মুসা ভণামী’’তি জানাতি. ভণিতেপি ‘‘মুসা মযা ভণিত’’ন্তি জানাতি. সো মুসাৰাদেন ন কারেতব্বো. পুব্বভাগো হি পমাণতরো. তস্মিং অসতি দৰা ভণিতং ৰা, রৰা ভণিতং ৰা হোতীতি.

এত্থ চ তংঞাণতা চ ঞাণসমোধানঞ্চ পরিচ্চজিতব্বং. তংঞাণতা পরিচ্চজিতব্বাতি যেন চিত্তেন ‘‘মুসা ভণিস্স’’ন্তি জানাতি, তেনেৰ ‘‘মুসা ভণামী’’তি চ, ‘‘মুসা মযা ভণিত’’ন্তি চ জানাতীতি এৰং একচিত্তেনেৰ তীসু খণেসু জানাতীতি অযং তংঞাণতা পরিচ্চজিতব্বা. ন হি সক্কা তেনেৰ চিত্তেন তং চিত্তং জানিতুং, যথা ন সক্কা তেনেৰ অসিনা সো অসি ছিন্দিতুন্তি. পুরিমং পুরিমং পন চিত্তং পচ্ছিমস্স পচ্ছিমস্স চিত্তস্স তথা উপ্পত্তিযা পচ্চযো হুত্ৰা নিরুজ্ঝতি. তেনেতং ৰুচ্চতি –

‘‘পমাণং পুব্বভাগোৰ, তস্মিং সতি ন হেস্সতি;

সেসদ্ৰযন্তি নত্থেত, মিতি ৰাচা তিৰঙ্গিকা’’তি. (পারা. অট্ঠ. ২.২০০);

ঞাণসমোধানং পরিচ্চজিতব্বন্তি এতানি তীণি চিত্তানি একক্খণে উপ্পজ্জন্তীতি ন গহেতব্বানি. ইদঞ্হি চিত্তং নাম –

‘‘অনিরুদ্ধম্হি পঠমে, ন উপ্পজ্জতি পচ্ছিমং;

নিরন্তরুপ্পজ্জনতো, একং ৰিয পকাসতী’’তি. (পারা. অট্ঠ. ২.২০০);

ইতো পরং পন য্ৰাযং অজানংযেৰ ‘‘জানামী’’তিআদিনা নযেন সম্পজানমুসা ভণতি, যস্মা সো ‘‘ইদং অভূত’’ন্তি এৰংদিট্ঠিকো হোতি, তস্স হি অত্থেৰ অযং লদ্ধি. তথা ‘‘ইদং অভূত’’ন্তি এৰমস্স খমতি চেৰ রুচ্চতি চ. এৰমস্স সঞ্ঞা, এৰংসভাৰমেৰ চস্স চিত্তং ‘‘ইদং অভূত’’ন্তি. যদা পন মুসা ৰত্তুকামো হোতি, তদা তং দিট্ঠিং ৰা দিট্ঠিযা সহ খন্তিং ৰা দিট্ঠিখন্তীহি সদ্ধিং রুচিং ৰা দিট্ঠিখন্তিরুচীহি সদ্ধিং সঞ্ঞং ৰা দিট্ঠিখন্তিরুচিসঞ্ঞাহি সদ্ধিং ভাৰং ৰা ৰিনিধায নিক্খিপিত্ৰা পটিচ্ছাদেত্ৰা অভূতং কত্ৰা ভণতি. তস্মা তেসম্পিৰসেন অঙ্গভেদং দস্সেতুং ‘‘অপি চ চতূহাকারেহী’’তিআদি ৰুত্তং.

এত্থ চ ৰিনিধায দিট্ঠিন্তি বলৰধম্মৰিনিধানৰসেনেতং ৰুত্তং. ৰিনিধায খন্তিন্তিআদীনি ততো দুব্বলদুব্বলানং ৰিনিধানৰসেন. ৰিনিধায সঞ্ঞন্তি ইদং পনেত্থ সব্বদুব্বলধম্মৰিনিধানৰসেন. সঞ্ঞামত্তম্পি নাম অৰিনিধায সম্পজানমুসা ভাসিস্সতীতি নেতং ঠানং ৰিজ্জতি.

৫৫. মন্দোৰ পরিকিস্সতীতি পাণৰধাদীনি করোন্তো ততোনিদানঞ্চ দুক্খমনুভোন্তো ভোগপরিযেসনারক্খণানি চ করোন্তো মোমূহো ৰিয পরিকিলিস্সতি.

তমেনং রাজানো গহেত্ৰা ৰিৰিধা কম্মকারণা কারেন্তীতি ন রাজানো করোন্তি, রাজাধীনপুরিসা নানাৰিধানি কম্মকারণানি করোন্তি. কসাহিপি তাল়েন্তীতি কসাদণ্ডকেহিপি ৰিতজ্জেন্তি. ৰেত্তেহীতি ৰেত্তলতাহি. অদ্ধদণ্ডকেহীতি মুগ্গরেহি, পহারসাধনত্থং ৰা চতুহত্থদণ্ডং দ্ৰেধা ছেত্ৰা গহিতদণ্ডকেহি. বিলঙ্গথালিকন্তি কঞ্জিযউক্খলিককম্মকারণং. তং করোন্তা সীসকপালং উপ্পাটেত্ৰা তত্তং অযোগুল়ং সণ্ডাসেন গহেত্ৰা তত্থ পক্খিপন্তি, তেন মত্থলুঙ্গং পক্কুট্ঠিত্ৰা উপরি উত্তরতি. সঙ্খমুণ্ডিকন্তি সঙ্খমুণ্ডকম্মকারণং. তং করোন্তা উত্তরোট্ঠউভতোকণ্ণচূল়িকগলৰাটকপরিচ্ছেদেন চম্মং ছিন্দিত্ৰা সব্বকেসে একতো গণ্ঠিং কত্ৰা দণ্ডকেন ৰেঠেত্ৰা উপ্পাটেন্তি, সহ কেসেহি চম্মং উট্ঠহতি. ততো সীসকটাহং থূলসক্খরাহি ঘংসিত্ৰা ধোৰন্তা সঙ্খৰণ্ণং করোন্তি. রাহুমুখন্তি রাহুমুখকম্মকারণং. তং করোন্তা সঙ্কুনা মুখং ৰিৰরিত্ৰা অন্তোমুখে দীপং জালেন্তি, কণ্ণচূল়িকাহি ৰা পট্ঠায মুখং নিখাদনেন খনন্তি, লোহিতং পগ্ঘরিত্ৰা মুখং পূরেতি.

জোতিমালিকন্তি সকলসরীরং তেলপিলোতিকায ৰেঠেত্ৰা আলিম্পেন্তি. হত্থপজ্জোতিকন্তি হত্থে তেলপিলোতিকায ৰেঠেত্ৰা দীপং ৰিয পজ্জালেন্তি. এরকৰত্তিকন্তি এরকৰত্তকম্মকারণং. তং করোন্তা হেট্ঠাগীৰতো পট্ঠায চম্মৰট্টে কন্তিত্ৰা গোপ্ফকে পাতেন্তি. অথ নং যোত্তেহি বন্ধিত্ৰা কড্ঢন্তি. সো অত্তনো চম্মৰট্টে অক্কমিত্ৰা অক্কমিত্ৰা পততি. চিরকৰাসিকন্তি চিরকৰাসিককম্মকারণং. তং করোন্তা তথেৰ চম্মৰট্টে কন্তিত্ৰা কটিযং ঠপেন্তি, কটিতো পট্ঠায কন্তিত্ৰা গোপ্ফকেসু ঠপেন্তি, উপরিমেহি হেট্ঠিমসরীরং চিরকনিৰাসননিৰত্থং ৰিয হোতি. এণেয্যকন্তি এণেয্যককম্মকারণং. তং করোন্তা উভোসু কপ্পরেসু চ উভোসু জণ্ণুকেসু চ অযৰলযানি দত্ৰা অযসূলানি কোট্টেন্তি, সো চতূহি অযসূলেহি ভূমিযং পতিট্ঠহতি. অথ নং পরিৰারেত্ৰা অগ্গিং করোন্তি. ‘‘এণেয্যকো জোতিপরিগ্গহো যথা’’তি আগতট্ঠানেপি ইদমেৰ ৰুত্তং. তং সন্ধিতো সন্ধিতো সূলানি অপনেত্ৰা চতূহি অট্ঠিকোটীহিযেৰ ঠপেন্তি. এৰরূপা কম্মকারণা নাম নত্থি.

বল়িসমংসিকন্তি উভতোমুখেহি বল়িসেহি পহরিত্ৰা চম্মমংসন্হারূনি উপ্পাটেন্তি. কহাপণিকন্তি সকলসরীরং তিণ্হাহি ৰাসীহি কোটিতো পট্ঠায কহাপণমত্তং কহাপণমত্তং পাতেন্তা কোট্টেন্তি. খারাপতচ্ছিকন্তি সরীরং তত্থ তত্থ আৰুধেহি পহরিত্ৰা কোচ্ছেহি খারং ঘংসেন্তি, চম্মমংসন্হারূনি পগ্ঘরিত্ৰা পসৰন্তি, অট্ঠিকসঙ্খলিকাৰ তিট্ঠতি. পলিঘপরিৰত্তিকন্তি একেন পস্সেন নিপজ্জাপেত্ৰা কণ্ণচ্ছিদ্দেন অযসূলং কোট্টেত্ৰা পথৰিযা একাবদ্ধং করোন্তি. অথ নং পাদে গহেত্ৰা আৰিঞ্ছন্তি. পলালপীঠকন্তি ছেকা কারণিকা ছৰিচম্মং অচ্ছিন্দিত্ৰা নিসদপোতকাহি অট্ঠীনি ছিন্দিত্ৰা কেসেসু গহেত্ৰা উক্খিপন্তি, মংসরাসিযেৰ হোতি. অথ নং কেসেহেৰ পরিযোনন্ধিত্ৰা গণ্হন্তি, পলালপীঠং ৰিয কত্ৰা পলিৰেঠেন্তি. সুনখেহিপীতি কতিপযানি দিৰসানি আহারং অদত্ৰা ছাতসুনখেহি খাদাপেন্তি. তে মুহুত্তেন অট্ঠিসঙ্খলিকমেৰ করোন্তি. এৰম্পি কিস্সতীতি এৰম্পি ৰিঘাতং পাপুণাতি. পরিকিস্সতীতি সব্বভাগেন ৰিঘাতং পাপুণাতি. পরিকিলিস্সতীতি উপতাপং পাপুণাতি.

পুন অঞ্ঞং কারণং দস্সেন্তো ‘‘অথ ৰা কামতণ্হায অভিভূতো’’তিআদিমাহ. তত্থ কামতণ্হাযাতি পঞ্চকামগুণিকলোভেন. অভিভূতোতি তেন মদ্দিতো. পরিযাদিন্নচিত্তোতি কুসলাচারং খেপেত্ৰা গহিতচিত্তো. ভোগে পরিযেসন্তোতি ধনং গৰেসমানো. নাৰায মহাসমুদ্দং পক্খন্দতীতি তরণীসঙ্খাতায নাৰায মহন্তং লোণসাগরং পৰিসতি. সীতস্স পুরক্খতোতি সীতং পুরতো কত্ৰা. উণ্হস্স পুরক্খতোতি উণ্হং পুরতো কত্ৰা. ডংসাতি পিঙ্গলমক্খিকা. মকসাতি মকসা এৰ. পীল়িযমানোতি ডংসাদিসম্ফস্সেহি ৰিহেসিযমানো. খুপ্পিপাসায মিয্যমানোতি খুদ্দাপিপাসায মরমানো. তিগুম্বং গচ্ছতীতিআদীনি মূলপদং গচ্ছতীতিপরিযোসানানি চতুৰীসতি পদানি রট্ঠনামেন ৰুত্তানি. মরুকন্তারং গচ্ছতীতি ৰালুককন্তারং তারকসঞ্ঞায গচ্ছতি. জণ্ণুপথন্তি জাণূহি গন্তব্বমগ্গং. অজপথন্তি অজেহি গন্তব্বমগ্গং. মেণ্ডপথেপি এসেৰ নযো.

সঙ্কুপথন্তি খাণুকে কোট্টেত্ৰা তেহি উগ্গমিতব্বং খাণুমগ্গং, তং গচ্ছন্তো পব্বতপাদে ঠত্ৰা অযসিঙ্ঘাটকং যোত্তেন বন্ধিত্ৰা উদ্ধং খিপিত্ৰা পব্বতে লগ্গাপেত্ৰা যোত্তেনারুয্হ ৰজিরগ্গেন লোহদণ্ডেন পব্বতং ৰিজ্ঝিত্ৰা খাণুকং কোট্টেত্ৰা তত্থ ঠত্ৰা সিঙ্ঘাটকং আকড্ঢিত্ৰা পুন উপরি লগ্গাপেত্ৰা তত্থ ঠিতো চম্মযোত্তং ওলম্বেত্ৰা তং আদায ওতরিত্ৰা হেট্ঠিমখাণুকে বন্ধিত্ৰা ৰামহত্থেন যোত্তং গহেত্ৰা দক্খিণহত্থেন মুগ্গরং আদায যোত্তং পহরিত্ৰা খাণুকং নীহরিত্ৰা পুন অভিরুহতি. এতেনুপাযেন পব্বতমত্থকং অভিরুয্হ পরতো ওতরন্তো পুরিমনযেনেৰ পঠমং পব্বতমত্থকে খাণুকং কোট্টেত্ৰা চম্মপসিব্বকে যোত্তং বন্ধিত্ৰা খাণুকে ৰেঠেত্ৰা সযং অন্তোপসিব্বকে নিসীদিত্ৰা মক্কটকানং সুত্তৰিস্সজ্জনাকারেন যোত্তং ৰিনিৰেঠেত্ৰা ওতরতি. তেন ৰুত্তং – ‘‘খাণুকে কোট্টেত্ৰা তেহি উগ্গমিতব্বং খাণুমগ্গ’’ন্তি. ছত্তপথন্তি চম্মছত্তেন ৰাতং গাহাপেত্ৰা সকুণেহি ৰিয ওতরিতব্বং মগ্গং. ৰংসপথন্তি ৰেণুগুম্বছেদনসত্থেন ছিন্দিত্ৰা রুক্খং ফরসুনা কোট্টেত্ৰা মগ্গং করোন্তো ৰেল়ুৰনে নিস্সেণিং কত্ৰা ৰেল়ুগুম্বে আরুয্হ ৰেল়ুং ছিন্দিত্ৰা অপরস্স ৰেল়ুগুম্বস্স উপরি পাতেত্ৰা ৰেল়ুগুম্বমত্থকেনেৰ গন্তব্বং মগ্গং সন্ধায ‘‘ৰংসপথং গচ্ছতী’’তি ৰুত্তন্তি ৰেদিতব্বং.

গৰেসন্তো ন ৰিন্দতি, অলাভমূলকম্পি দুক্খং দোমনস্সং পটিসংৰেদেতীতি অৰিন্দনমূলকম্পি কাযিকচেতসিকং দুক্খং পটিলভতি.

লদ্ধাতি লভিত্ৰা. আরক্খমূলকন্তি রক্খণমূলকম্পি. কিন্তি মে ভোগেতি কেন উপাযেন মম ভোগে. নেৰ রাজানো হরেয্যুং…পে… ন অপ্পিযা দাযাদা হরেয্যুন্তি. গোপযতোতি মঞ্জূসাদীহি গোপযন্তস্স. ৰিপ্পলুজ্জন্তীতি ৰিনস্সন্তি.

৫৬. এতমাদীনৰং ঞত্ৰা, মুনি পুব্বাপরে ইধাতি এতং ‘‘যসো কিত্তি চ যা পুব্বে, হাযতে ৰাপি তস্স সা’’তি ইতো পভুতি ৰুত্তে পুব্বাপরে ইধ ইমস্মিং সাসনে পুব্বতো অপরে সমণভাৰতো ৰিব্ভন্তকভাৰে আদীনৰং মুনি ঞত্ৰা.

দল়্হং করেয্যাতি নিদ্দেসপদস্স উদ্দেসপদং. থিরং করেয্যাতি অসিথিলং করেয্য. দল়্হং সমাদানো অস্সাতি থিরপটিঞ্ঞো ভৰেয্য. অৰট্ঠিতসমাদানোতি সন্নিট্ঠানপটিঞ্ঞো.

৫৭. এতং অরিযানমুত্তমন্তি যদিদং ৰিৰেকচরিযা, এতং বুদ্ধাদীনং অরিযানং উত্তমং. তস্মা ৰিৰেকংযেৰ সিক্খেথাতি অধিপ্পাযো. ন তেন সেট্ঠো মঞ্ঞেথাতি তেন চ ৰিৰেকেন অত্তানং ‘‘সেট্ঠো অহ’’ন্তি ন মঞ্ঞেয্য, তেন মানথদ্ধো ন ভৰেয্যাতি ৰুত্তং হোতি.

উন্নতিন্তি উস্সাপনং. উন্নমন্তি উগ্গন্ত্ৰা পট্ঠপনং. মানন্তি অহংকারং. থামন্তি বলক্কারং. থম্ভন্তি থদ্ধকরণং. থদ্ধোতি অমদ্দৰো. পত্থদ্ধোতি ৰিসেসেন অমদ্দৰো. পগ্গহিতসিরোতি উট্ঠিতসীসো. সামন্তাতি ন আরকা. আসন্নেতি ন দূরে. অৰিদূরেতি সমীপে. উপকট্ঠেতি সন্তিকে.

৫৮. রিত্তস্সাতি ৰিৰিত্তস্স, কাযদুচ্চরিতাদীহি ৰিরহিতস্স. ওঘতিণ্ণস্স পিহযন্তি, কামেসু গধিতা পজাতি ৰত্থুকামেসু লগ্গা সত্তা তস্স চতুরোঘতিণ্ণস্স পিহযন্তি ইণাযিকা ৰিয আণণ্যস্সাতি অরহত্তনিকূটেন দেসনং নিট্ঠাপেসি.

রিত্তস্সাতি সব্বকিলেসেহি তুচ্ছস্স. ৰিৰিত্তস্সাতি সুঞ্ঞস্স. পৰিৰিত্তস্সাতি এককস্স. ইদানি যেহি রিত্তো হোতি, তে দস্সেন্তো ‘‘কাযদুচ্চরিতেন রিত্তস্সা’’তিআদিমাহ. তত্থ কিলেসপটিপাটিযা মগ্গপটিপাটিযাতি দ্ৰিধা রিত্ততা ৰেদিতব্বা. কিলেসপটিপাটিযা তাৰ রাগো মোহো থম্ভো সারম্ভো মানো মদোতি, ইমেহি ছহি কিলেসেহি অরহত্তমগ্গেন রিত্তো হোতি; দোসো কোধো উপনাহো পমাদোতি, ইমেহি চতূহি কিলেসেহি অনাগামিমগ্গেন রিত্তো হোতি; অতিমানো মক্খো পল়াসো ইস্সা মচ্ছরিযং মাযা সাঠেয্যন্তি, ইমেহি সত্তহি সোতাপত্তিমগ্গেন রিত্তো হোতি.

মগ্গপটিপাটিযা পন সোতাপত্তিমগ্গেন অতিমানো মক্খো পল়াসো ইস্সা মচ্ছরিযং মাযা সাঠেয্যন্তি; ইমেহি সত্তহি রিত্তো হোতি, অনাগামিমগ্গেন দোসো কোধো উপনাহো পমাদোতি, ইমেহি চতূহি রিত্তো হোতি; অরহত্তমগ্গেন রাগো মোহো থম্ভো সারম্ভো মানো মদোতি, ইমেহি ছহি রিত্তো হোতি. তীণি দুচ্চরিতানি সব্বকিলেসেহীতিআদিনা নযেন অৰসেসাপি যথাযোগং যোজেতব্বা.

ৰত্থুকামে পরিজানিত্ৰাতি তেভূমকে ৰত্থুকামে ঞাততীরণপরিঞ্ঞাহি সমাপনৰসেন জানিত্ৰা. কিলেসকামে পহাযাতি ছন্দাদযো কিলেসকামে পহানপরিঞ্ঞায জহিত্ৰা. ব্যন্তিং করিত্ৰাতি ৰিগতন্তং ৰিগতকোটিং করিত্ৰা.

কামোঘং তিণ্ণস্সাতি অনাগামিমগ্গেন অৰসানসঙ্খাতং কামোঘং তরিত্ৰা ঠিতস্স. ভৰোঘন্তি অরহত্তমগ্গেন. দিট্ঠোঘন্তি সোতাপত্তিমগ্গেন. অৰিজ্জোঘন্তি অরহত্তমগ্গেন. সব্বং সংসারপথন্তি সব্বখন্ধধাতুআযতনপটিপাটিসঙ্খাতং পথং অরহত্তমগ্গেনেৰ তরিত্ৰা ঠিতস্স. সোতাপত্তিমগ্গেন উত্তিণ্ণস্স. সকদাগামিমগ্গেন নিত্তিণ্ণস্স. অনাগামিমগ্গেন কামধাতুং অতিক্কন্তস্স. অরহত্তমগ্গেন সব্বভৰং সমতিক্কন্তস্স. ফলসমাপত্তিৰসেন ৰীতিৰত্তস্স. পারংগতস্সাতিআদীনি নিব্বানৰসেন ৰুত্তানি. যথা ইণাযিকা আণণ্যন্তি পৰড্ঢকইণং আদায ৰিচরন্তা আণণ্যং. পত্থেন্তীতি পত্থনং উপ্পাদেন্তি. আবাধিকা আরোগ্যন্তি পিত্তাদিরোগাতুরো ভেসজ্জকিরিযায তংরোগৰূপসমনত্থং আরোগ্যং. যথা বন্ধনবদ্ধাতি নক্খত্তদিৰসে বন্ধনাগারে বদ্ধপুরিসা. যথা দাসা ভুজিস্সন্তি যস্মা ভুজিস্সা পুরিসা যং ইচ্ছন্তি, তং করোন্তি, ন নং কোচি বলক্কারেন ততো নিৰত্তেতি, তস্মা দাসা ভুজিস্সভাৰং পত্থেন্তি. যথা কন্তারদ্ধানপক্খন্দাতি যস্মা বলৰন্তো পুরিসা হত্থভারং গহেত্ৰা সজ্জাৰুধা সপরিৰারা কন্তারং পটিপজ্জন্তি, তে চোরা দূরতোৰ দিস্ৰা পলাযন্তি. তে সোত্থিনা কন্তারং নিত্থরিত্ৰা খেমন্তং পত্ৰা হট্ঠতুট্ঠা হোন্তি. তস্মা কন্তারপক্খন্দা খেমন্তভূমিং পত্থেন্তি. দেসনাপরিযোসানে তিস্সো সোতাপত্তিফলং পত্ৰা পচ্ছা পব্বজিত্ৰা অরহত্তং সচ্ছাকাসি.

সদ্ধম্মপজ্জোতিকায মহানিদ্দেসট্ঠকথায

তিস্সমেত্তেয্যসুত্তনিদ্দেসৰণ্ণনা নিট্ঠিতা.

৮. পসূরসুত্তনিদ্দেসৰণ্ণনা

৫৯. অট্ঠমে পসূরসুত্তনিদ্দেসে পঠমগাথায তাৰ সঙ্খেপো – ইমে দিট্ঠিগতিকা অত্তনো দিট্ঠিং সন্ধায ‘‘ইধেৰ সুদ্ধী’’তি ৰদন্তি. অঞ্ঞেসু পন ধম্মেসু ৰিসুদ্ধিং নাহু, এৰং যং অত্তনো সত্থারাদিং নিস্সিতা, তত্থেৰ ‘‘এস ৰাদো সুভো’’তি এৰং সুভৰাদা হুত্ৰা পুথূ সমণব্রাহ্মণা ‘‘সস্সতো লোকো’’তিআদীসু পচ্চেকসচ্চেসু নিৰিট্ঠা.

সব্বে পরৰাদে খিপন্তীতি সব্বা পরলদ্ধিযো ছড্ডেন্তি. উক্খিপন্তীতি দূরতো খিপন্তি. পরিক্খিপন্তীতি সমন্ততো খিপন্তি. সুভৰাদাতি নিদ্দেসস্স উদ্দেসপদং. সোভনৰাদাতি ‘‘এতং সুন্দর’’ন্তি কথেন্তা. পণ্ডিতৰাদাতি ‘‘পণ্ডিতা ময’’ন্তি এৰং কথেন্তা. থিরৰাদাতি ‘‘নিদ্দোসৰাদং ৰদামা’’তি কথেন্তা. ঞাযৰাদাতি ‘‘যুত্তৰাদং ৰদামা’’তি কথেন্তা. হেতুৰাদাতি ‘‘কারণসহিতং ৰদামা’’তি কথেন্তা. লক্খণৰাদাতি ‘‘সল্লক্খেতব্বং ৰদামা’’তি ৰদন্তা. কারণৰাদাতি ‘‘উদাহরণযুত্তৰাদং ৰদামা’’তি কথেন্তা. ঠানৰাদাতি ‘‘পক্কমিতুং অসক্কুণেয্যৰাদং ৰদামা’’তি ৰদন্তা.

নিৰিট্ঠাতি অন্তোপৰিট্ঠা. পতিট্ঠিতাতি তত্থেৰ ঠিতা.

৬০. এৰং নিৰিট্ঠা চ ‘‘তে ৰাদকামা’’তি দুতিযগাথা. তত্থ বালং দহন্তী মিথু অঞ্ঞমঞ্ঞন্তি ‘‘অযং বালো, অযং বালো’’তি এৰং দ্ৰেপি জনা অঞ্ঞমঞ্ঞং বালং দহন্তি, বালতো পস্সন্তি. ৰদন্তি তে অঞ্ঞসিতা কথোজ্জন্তি তে অঞ্ঞমঞ্ঞসত্থারাদিনিস্সিতা কলহং ৰদন্তি. পসংসকামা কুসলাৰদানাতি পসংসত্থিকা উভোপি ‘‘মযং কুসলাৰদানা পণ্ডিতৰাদা’’তি এৰং সঞ্ঞিনো হুত্ৰা.

ৰাদত্থিকাতি ৰাদেন অত্থিকা. ৰাদাধিপ্পাযাতি ৰাদজ্ঝাসযা. ৰাদপুরেক্খারাতি ৰাদমেৰ পুরতো কত্ৰা চরমানা. ৰাদপরিযেসনং চরন্তাতি ৰাদমেৰ গৰেসনং চরমানা. ৰিগয্হাতি পৰিসিত্ৰা. ওগয্হাতি ওতরিত্ৰা. অজ্ঝোগাহেত্ৰাতি নিমুজ্জিত্ৰা. পৰিসিত্ৰাতি অন্তোকত্ৰা.

অনোজৰন্তীতি নিহীনওজৰতী, তেজৰিরহিতাতি অত্থো. সা কথাতি এসা ৰাচা. কথোজ্জং ৰদন্তীতি নিত্তেজং ভণন্তি. এৰং ৰদানেসু চ তেসু একো নিযমতো এৰ.

৬১. যুত্তো কথাযন্তি গাথা. তত্থ যুত্তো কথাযন্তি ৰাদকথায উস্সুক্কো. পসংসমিচ্ছং ৰিনিঘাতি হোতীতি অত্তনো পসংসং ইচ্ছন্তো ‘‘কথং নু খো নিগ্গহেস্সামী’’তিআদিনা নযেন পুব্বেৰ ৰাদা কথংকথী ৰিনিঘাতী হোতি. অপাহতস্মিন্তি পঞ্হৰীমংসকেহি ‘‘অত্থাপগতং তে ভণিতং, ব্যঞ্জনাপগতং তে ভণিত’’ন্তিআদিনা নযেন অপহরিতে ৰাদে. নিন্দায সো কুপ্পতীতি এৰং অপাহতস্মিঞ্চ ৰাদে উপ্পন্নায নিন্দায সো কুপ্পতি. রন্ধমেসীতি যস্স রন্ধমেৰ গৰেসন্তো.

থোমনন্তি ৰণ্ণভণনং. কিত্তিন্তি পাকটকরণং. ৰণ্ণহারিযন্তি গুণৰড্ঢনং. পুব্বেৰ সল্লাপাতি সল্লাপতো পুরেতরমেৰ. ‘‘কথমিদং কথমিদ’’ন্তি কথংকথা অস্স অত্থীতি কথংকথী. জযো নু খো মেতি মম জযো. কথং নিগ্গহন্তি কেন পকারেন নিগ্গণ্হনং. পটিকম্মং করিস্সামীতি মম লদ্ধিং পরিসুদ্ধিং করিস্সামি. ৰিসেসন্তি অতিরেকং. পটিৰিসেসন্তি পুনপ্পুনং ৰিসেসং. আৰেঠিযং করিস্সামীতি পরিৰেঠনং করিস্সামি. নিব্বেঠিযন্তি মম নিব্বেঠনং মোচনং নিক্খমনং. ছেদন্তি ৰাদছিন্দনং. মণ্ডলন্তি ৰাদসঙ্ঘাতং. পারিসজ্জাতি পরিচারিকা. পাসারিকাতি কারণিতা. অপহরন্তীতি পটিবাহন্তি.

অত্থাপগতন্তি অত্থতো অপগতং, অত্থো নত্থীতি. অত্থতো অপহরন্তীতি অত্থম্হা পটিবাহন্তি. অত্থো তে দুন্নিতোতি তৰ অত্থো ন সম্মা উপনীতো. ব্যঞ্জনং তে দুরোপিতন্তি তৰ ব্যঞ্জনং দুপ্পতিট্ঠাপিতং. নিগ্গহো তে অকতোতি তযা নিগ্গহো ন কতো. পটিকম্মং তে দুক্কটন্তি তযা অত্তনো লদ্ধিপতিট্ঠাপনং দুট্ঠু কতং. ৰিসমকথং দুক্কথিতন্তি ন সম্মা কথিতং. দুব্ভণিতন্তি ভণন্তেনপি দুট্ঠু ভণিতং. দুল্লপিতন্তি ন সম্মা ৰিস্সজ্জিতং. দুরুত্তন্তি অঞ্ঞথা ভণিতং. দুব্ভাসিতন্তি ৰিরূপং ভাসিতং.

নিন্দাযাতি গরহণেন. গরহাযাতি দোসকথনেন. অকিত্তিযাতি অগুণকথনেন. অৰণ্ণহারিকাযাতি অগুণৰড্ঢনেন.

কুপ্পতীতি পকতিভাৰং জহেত্ৰা চলতি. ব্যাপজ্জতীতি দোসৰসেন পূতিভাৰং আপজ্জতি. পতিট্ঠীযতীতি কোধৰসেন গণভাৰং গচ্ছতি. কোপঞ্চাতি কুপিতভাৰং. দোসঞ্চাতি দূসনং. অপচ্চযঞ্চাতি অতুট্ঠাকারঞ্চ. পাতুকরোতীতি পাকটং করোতি. রন্ধমেসীতি অন্তরগৰেসী. ৰিরন্ধমেসীতি ছিদ্দগৰেসী. অপরদ্ধমেসীতি গুণং অপনেত্ৰা দোসমেৰ গৰেসী. খলিতমেসীতি পক্খলনগৰেসী. গল়িতমেসীতি পতনগৰেসী. ‘‘ঘট্টিতমেসী’’তিপি পাঠো, তস্স পীল়নগৰেসীতি অত্থো. ৰিৰরমেসীতি দোসগৰেসী.

৬২. ন কেৰলঞ্চ সো কুপ্পতি, অপিচ খো পন ‘‘যমস্স ৰাদ’’ন্তি গাথা. তত্থ পরিহীনমাহু, অপাহতন্তি অত্থব্যঞ্জনাদিতো অপাহতং পরিহীনং ৰদন্তি. পরিদেৰতীতি ততোনিমিত্তং সো ‘‘অঞ্ঞং মযা আৰজ্জিত’’ন্তিআদীহি ৰিপ্পলপতি. সোচতীতি ‘‘তস্স জযো’’তিআদীনি আরব্ভ সোচতি. ‘‘উপচ্চগা ম’’ন্তি অনুত্থুনাতীতি ‘‘সো মং ৰাদেন ৰাদং অতিক্কন্তো’’তিআদিনা নযেন সুট্ঠুতরং ৰিপ্পলপতি.

পরিহাপিতন্তি ন ৰড্ঢিতং. অঞ্ঞং মযা আৰজ্জিতন্তি অঞ্ঞং কারণং মযা অৰনমিতং. চিন্তিতন্তি ৰীমংসিতং. মহাপক্খোতি মহন্তো ঞাতিপক্খো এতস্সাতি মহাপক্খো. মহাপরিসোতি মহাপরিচারিকপরিসো. মহাপরিৰারোতি মহাদাসদাসিপরিৰারো. পরিসা চাযং ৰগ্গাতি অযঞ্চ পরিসা ৰগ্গা, ন একা. পুন ভঞ্জিস্সামীতি পুন ভিন্দিস্সামি.

৬৩. এতে ৰিৰাদা সমণেসূতি এত্থ পন সমণা ৰুচ্চন্তি বাহিরপরিব্বাজকা. এতেসু উগ্ঘাতিনিঘাতি হোতীতি এতেসু ৰাদেসু জযপরাজযাদিৰসেন চিত্তউগ্ঘাতনিঘাতং ৰা পাপুণন্তো উগ্ঘাতি চ নিঘাতি চ হোতি. ৰিরমে কথোজ্জন্তি পজহেয্য কলহং. ন হঞ্ঞদত্থত্থি পসংসলাভাতি ন হি এত্থ পসংসলাভতো অঞ্ঞো অত্থো অত্থি. উত্তানো ৰাতি ন গম্ভীরোতি অত্থো ‘‘পঞ্চিমে কামগুণা’’তিআদীসু (অ. নি. ৬.৬৩) ৰিয.

গম্ভীরো ৰাতি দুপ্পৰেসো অপ্পতিট্ঠো পটিচ্চসমুপ্পাদো ৰিয. গূল়্হো ৰাতি পটিচ্ছন্নো হুত্ৰা ঠিতো ‘‘অভিরম নন্দ অহং তে পাটিভোগো’’তিআদীসু (উদা. ২২) ৰিয. পটিচ্ছন্নো ৰাতি অপাকটো ‘‘মাতরং পিতরং হন্ত্ৰা’’তিআদীসু (ধ. প. ২৯৪; নেত্তি. ১১৩) ৰিয. নেয্যো ৰাতি নীহরিত্ৰা কথেতব্বো ‘‘অসদ্ধো অকতঞ্ঞূ চা’’তিআদীসু (ধ. প. ৯৭) ৰিয. নীতো ৰাতি পাল়িযা ঠিতনিযামেন কথেতব্বো ‘‘চত্তারোমে, ভিক্খৰে, অরিযৰংসা’’তিআদীসু (অ. নি. ৪.২৮) ৰিয. অনৰজ্জো ৰাতি নিদ্দোসত্থো ‘‘কুসলা ধম্মা’’তিআদীসু (ধ. স. তিকমাতিকা ১) ৰিয. নিক্কিলেসো ৰাতি কিলেসৰিরহিতো ৰিপস্সনা ৰিয. ৰোদানো ৰাতি পরিসুদ্ধো লোকুত্তরং ৰিয. পরমত্থো ৰাতি উত্তমত্থো উত্তমত্থভূতো অত্থো খন্ধধাতুআযতননিব্বানানি ৰিয.

৬৪. ছট্ঠগাথাযত্থো – যস্মা চ ন হঞ্ঞদত্থত্থি পসংসলাভা, তস্মা পরমং লাভং লভন্তোপি ‘‘সুন্দরো অয’’ন্তি তত্থ দিট্ঠিযা পসংসিতো ৰা পন হোতীতি তং ৰাদং পরিসায মজ্ঝে দীপেত্ৰা ততো সো তেন জযত্থেন তুট্ঠিং ৰা দন্তৰিদংসকং ৰা আপজ্জন্তো হস্সতি, মানেন চ উন্নমতি. কিং কারণং? যস্মা তং জযত্থং পপ্পুয্য যথামনো জাতো.

থম্ভযিত্ৰাতি পূরেত্ৰা. ব্রূহযিত্ৰাতি ৰড্ঢেত্ৰা. ইমিস্সা গাথায নিদ্দেসো উত্তানত্থো.

৬৫. এৰং উন্নমতো চ ‘‘যা উন্নতী’’তি গাথা. তত্থ মানাতিমানং ৰদতে পনেসোতি এসো পন তং উন্নতিং ‘‘ৰিঘাতভূমী’’তি অবুজ্ঝমানো মানঞ্চ অতিমানঞ্চ ৰদতি. এৰং ইমিস্সাপি গাথায নিদ্দেসো উত্তানত্থো.

৬৬. এৰং ৰাদে দোসং দস্সেত্ৰা ইদানি তস্স ৰাদং অসম্পটিচ্ছন্তো ‘‘সূরো’’তি গাথমাহ. তত্থ রাজখাদাযাতি রাজখাদনীযেন, ভত্তৰেতনেনাতি ৰুত্তং হোতি. অভিগজ্জমেতি পটিসূরমিচ্ছন্তি যথা সো পটিসূরং ইচ্ছন্তো অভিগজ্জন্তো এতি, এৰং দিট্ঠিগতিকো দিট্ঠিগতিকন্তি দস্সেতি. যেনেৰ সো তেন পলেহীতি যেন সো তুয্হং পটিসূরো, তেন গচ্ছ. পুব্বেৰ নত্থি যদিদং যুধাযাতি যং পন কিলেসজাতং যুদ্ধায সিযা, তং ইধ পুব্বেৰ নত্থি, বোধিমূলেযেৰস্স পহীনন্তি দস্সেতি.

সূরোতি নিদ্দেসস্স উদ্দেসপদং. সুট্ঠু উরো সূরো, ৰিস্সট্ঠউরো নিন্নউরোতি অত্থো. ৰীরোতি পরক্কমৰন্তো. ৰিক্কন্তোতি সঙ্গামং পৰিসন্তো. অভীরূতিআদযো ৰুত্তনযা এৰ. পুট্ঠোতি নিদ্দেসস্স উদ্দেসপদং. পোসিতোতি থূলকতো. আপাদিতোতি উপড্ঢবলিতো পটিপাদিতো. ৰড্ঢিতোতি ততো ততো ভাৰিতো.

গজ্জন্তোতি অব্যত্তসরেন গজ্জন্তো. উগ্গজ্জন্তোতি উক্কুট্ঠিং করোন্তো. অভিগজ্জন্তোতি সীহনাদং করোন্তো. এতীতি আগচ্ছতি. উপেতীতি ততো সমীপং গচ্ছতি. উপগচ্ছতীতি ততো সমীপং গন্ত্ৰা ন নিৰত্ততি. পটিসূরন্তি নিব্ভযং. পটিপুরিসন্তি সত্তুপুরিসং. পটিসত্তুন্তি সত্তু হুত্ৰা অভিমুখে ঠিতং. পটিমল্লন্তি পটিসেধং হুত্ৰা যুজ্ঝন্তং. ইচ্ছন্তোতি আকঙ্খমানো.

পলেহীতি গচ্ছ. ৰজাতি মা তিট্ঠ. গচ্ছাতি সমীপং উপসঙ্কম. অভিক্কমাতি পরক্কমং করোহি.

বোধিযা মূলেতি মহাবোধিরুক্খস্স সমীপে. যে পটিসেনিকরা কিলেসাতি যে কিলেসা পটিপক্খকরা. পটিলোমকরাতি পটাণীকরা. পটিকণ্টককরাতি ৰিনিৰিজ্ঝনকরা. পটিপক্খকরাতি সত্তুকরা.

৬৭. ইতো পরং সেসগাথা পাকটসম্বন্ধা এৰ. তত্থ ৰিৰাদযন্তীতি ৰিৰদন্তি. পটিসেনিকত্তাতি পটিলোমকারকা. ‘‘ন ত্ৰং ইমং ধম্মৰিনযং আজানাসী’’তিআদিনা নযেন ৰিরুদ্ধৰচনং ৰিৰাদো.

সহিতং মেতি মম ৰচনং অত্থসংহিতং. অসহিতং তেতি তৰ ৰচনং অনত্থসংহিতং. অধিচিণ্ণং তে ৰিপরাৰত্তন্তি যং তং অধিচিণ্ণং চিরকালসেৰনৰসেন পগুণং, তং মম ৰাদং আগম্ম নিৰত্তং. আরোপিতো তে ৰাদোতি তুয্হং উপরি মযা দোসো আরোপিতো. চর ৰাদপ্পমোক্খাযাতি ভত্তপুটং আদায তং তং উপসঙ্কমিত্ৰা ৰাদা পমোক্খত্থায উত্তরং পরিযেসমানো ৰিচর. নিব্বেঠেহি ৰাতি অথ ৰা মযা আরোপিতদোসতো অত্তানং মোচেহি. সচে পহোসীতি সচে সক্কোসি.

আৰেঠিযায আৰেঠিযন্তি আৰেঠেত্ৰা নিৰত্তনেন নিৰত্তনং. নিব্বেঠিযায নিব্বেঠিযন্তি দোসতো মোচনেন মোচনং. ছেদেন ছেদন্তি এৰমাদি হেট্ঠা ৰুত্তনযত্তা যথাযোগং যোজেতব্বং.

৬৮. ৰিসেনিকত্ৰাতি কিলেসসেনং ৰিনাসেত্ৰা. কিং লভেথাতি পটিমল্লং কিং লভিস্সসি. পসূরাতি তং পরিব্বাজকং আলপতি. যেসীধ নত্থীতি যেসং ইধ নত্থি. ইমাযপি গাথায নিদ্দেসো উত্তানত্থোযেৰ.

৬৯. পৰিতক্কন্তি ‘‘জযো নু খো মে ভৰিস্সতী’’তিআদীনি ৰিতক্কেন্তো. ধোনেন যুগং সমাগমাতি ধুতকিলেসেন বুদ্ধেন সদ্ধিং যুগগ্গাহং সমাপন্নো. ন হি ত্ৰং সক্খসি সম্পযাতৰেতি কোত্থুআদযো ৰিয সীহাদীহি ধোনেন সহ যুগং গহেত্ৰা একপদম্পি সম্পযাতুং যুগগ্গাহমেৰ ৰা সম্পাদেতুং ন সক্খিস্সসীতি.

মনোতি নিদ্দেসস্স উদ্দেসপদং. চিত্তন্তি চিত্ততায চিত্তং. ‘‘আরম্মণং মিনমানং জানাতী’’তি মনো. মানসন্তি মনো এৰ. ‘‘অন্তলিক্খচরো পাসো, য্ৰাযং চরতি মানসো’’তি (মহাৰ. ৩৩; সং. নি. ১.১৫১) হি এত্থ পন সম্পযুত্তকধম্মো মানসোতি ৰুত্তো.

‘‘কথঞ্হি ভগৰা তুয্হং, সাৰকো সাসনে রতো;

অপ্পত্তমানসো সেক্খো, কালংকযিরা জনেসুতা’’তি. (সং. নি. ১.১৫৯) –

এত্থ অরহত্তং মানসন্তি ৰুত্তং. ইধ পন মনোৰ মানসং, ব্যঞ্জনৰসেন হেতং পদং ৰড্ঢিতং.

হদযন্তি চিত্তং. ‘‘চিত্তং ৰা তে খিপিস্সামি, হদযং ৰা তে ফালেস্সামী’’তি (সু. নি. আল়ৰকসুত্ত; সং. নি. ১.২৩৭) এত্থ উরো হদযন্তি ৰুত্তং. ‘‘হদযা হদযং মঞ্ঞে অঞ্ঞায তচ্ছতী’’তি (ম. নি. ১.৬৩) এত্থ চিত্তং. ‘‘ৰক্কং হদয’’ন্তি (দী. নি. ২.৩৭৭; ম. নি. ১.১১০; খু. পা. ৩.দ্ৰত্তিংসাকার) এত্থ হদযৰত্থু. ইধ পন চিত্তমেৰ অব্ভন্তরট্ঠেন ‘‘হদয’’ন্তি ৰুত্তং. তমেৰ পরিসুদ্ধট্ঠেন পণ্ডরং, ভৰঙ্গং সন্ধাযেতং ৰুত্তং. যথাহ ‘‘পভস্সরমিদং, ভিক্খৰে, চিত্তং, তঞ্চ খো আগন্তুকেহি উপক্কিলেসেহি উপক্কিলিট্ঠ’’ন্তি (অ. নি. ১.৪৯). ততো নিক্খন্তত্তা পন অকুসলম্পি গঙ্গায নিক্খন্তা নদী গঙ্গা ৰিয গোধাৰরিতো নিক্খন্তা গোধাৰরি ৰিয চ ‘‘পণ্ডর’’ন্ত্ৰেৰ ৰুত্তং.

মনো মনাযতনন্তি ইধ পন মনোগহণং মনস্সেৰ আযতনভাৰদীপনত্থং. তেনেতং দীপেতি ‘‘নযিদং দেৰাযতনং ৰিয মনস্স আযতনত্তা মনাযতনং, অথ খো মনো এৰ আযতনং মনাযতন’’ন্তি. তত্থ নিৰাসট্ঠানট্ঠেন আকরট্ঠেন সমোসরণট্ঠানট্ঠেন সঞ্জাতিদেসট্ঠেন কারণট্ঠেন চ আযতনং ৰেদিতব্বং. তথা হি লোকে ‘‘ইস্সরাযতনং ৰাসুদেৰাযতন’’ন্তিআদীসু নিৰাসট্ঠানং আযতনন্তি ৰুচ্চতি. ‘‘সুৰণ্ণাযতনং রজতাযতন’’ন্তিআদীসু আকরো. সাসনে পন ‘‘মনোরমে আযতনে, সেৰন্তি নং ৰিহঙ্গমা’’তিআদীসু (অ. নি. ৫.৩৮) সমোসরণট্ঠানং. ‘‘দক্খিণাপথো গুন্নং আযতন’’ন্তিআদীসু সঞ্জাতিদেসো. ‘‘তত্র তত্রেৰ সক্খিভব্বতং পাপুণাতি সতি সতিআযতনে’’তিআদীসু (অ. নি. ৩.১০২; ম. নি. ৩.১৫৮) কারণং. ইধ পন সঞ্জাতিদেসট্ঠেন সমোসরণট্ঠানট্ঠেন কারণট্ঠেনাতি তিধাপি ৰট্টতি.

ফস্সাদযো হি ধম্মা এত্থ সঞ্জাযন্তীতি সঞ্জাতিদেসট্ঠেনপি এতং আযতনং. বহিদ্ধা রূপসদ্দগন্ধরসফোট্ঠব্বা আরম্মণভাৰেনেত্থ ওসরন্তীতি সমোসরণট্ঠানট্ঠেনপি আযতনং. ফস্সাদীনং পন সহজাতাদিপচ্চযট্ঠেন কারণত্তা কারণট্ঠেনাপি আযতনন্তি ৰেদিতব্বং. মনিন্দ্রিযং ৰুত্তত্থমেৰ.

ৰিজানাতীতি ৰিঞ্ঞাণং. ৰিঞ্ঞাণমেৰ খন্ধো ৰিঞ্ঞাণক্খন্ধো. তস্স রাসিআদিৰসেন অত্থো ৰেদিতব্বো. ‘‘মহাউদকক্খন্ধোত্ৰেৰ সঙ্খং গচ্ছতী’’তি (অ. নি. ৪.৫১) এত্থ হি রাসট্ঠেন খন্ধো ৰুত্তো. ‘‘সীলক্খন্ধো সমাধিক্খন্ধো’’তিআদীসু (দী. নি. ৩.৩৫৫) গুণট্ঠেন. ‘‘অদ্দস খো ভগৰা মহন্তং দারুক্খন্ধ’’ন্তি (সং. নি. ৪.২৪১) এত্থ পণ্ণত্তিমত্তট্ঠেন. ইধ পন রূল়্হিতো খন্ধো ৰুত্তো. রাসট্ঠেন হি ৰিঞ্ঞাণক্খন্ধস্স একদেসো একং ৰিঞ্ঞাণং. তস্মা যথা রুক্খস্স একদেসং ছিন্দন্তো রুক্খং ছিন্দতীতি ৰুচ্চতি, এৰমেৰ ৰিঞ্ঞাণক্খন্ধস্স একদেসভূতং একম্পি ৰিঞ্ঞাণং রূল়্হিতো ৰিঞ্ঞাণক্খন্ধোতি ৰুত্তং.

তজ্জা মনোৰিঞ্ঞাণধাতূতি তেসং ফস্সাদীনং ধম্মানং অনুচ্ছৰিকা মনোৰিঞ্ঞাণধাতু. ইমস্মিঞ্হি পদে একমেৰ চিত্তং মিননট্ঠেন মনো, ৰিজাননট্ঠেন ৰিঞ্ঞাণং, সভাৰট্ঠেন নিস্সত্তট্ঠেন ৰা ধাতূতি তীহি নামেহি ৰুত্তং.

সদ্ধিং যুগং সমাগমন্তি একপ্পহারেন সদ্ধিং. সম্মাগন্ত্ৰাতি পাপুণিত্ৰা. যুগগ্গাহং গণ্হিত্ৰাতি যুগপটিভাগং গহেত্ৰা. সাকচ্ছেতুন্তি সদ্ধিং কথেতুং. সল্লপিতুন্তি অল্লাপসল্লাপং কাতুং. সাকচ্ছং সমাপজ্জিতুন্তি সদ্ধিং কথনং পটিপজ্জিতুং. ন পটিবলভাৰে কারণং দস্সেতুং ‘‘তং কিস্সহেতু, পসূরো পরিব্বাজকো হীনো’’তিআদিমাহ. সো হি ভগৰা অগ্গো চাতি অসদিসদানঅগ্গত্তা অসমানপঞ্ঞত্তা অগ্গো চ. সেট্ঠো চাতি সব্বগুণেহি অপ্পটিসমট্ঠেন সেট্ঠো চ. মোক্খো চাতি সৰাসনেহি কিলেসেহি মুত্তত্তা মোক্খো চ. উত্তমো চাতি অত্তনো উত্তরিতরৰিরহিতত্তা উত্তমো চ. পৰরো চাতি সব্বলোকেন অভিপত্থনীযত্তা পৰরো চ. মত্তেন মাতঙ্গেনাতি পভিন্নমদেন হত্থিনা.

কোত্থুকোতি জিরণসিঙ্গালো. সীহেন মিগরঞ্ঞা সদ্ধিন্তি কেসরসীহেন মিগরাজেন সহ. তরুণকোতি ছাপকো. ধেনুপকোতি খীরপকো. উসভেনাতি মঙ্গলসম্মতেন উসভেন. চলককুনা সদ্ধিন্তি চলমানককুনা সদ্ধিং. ধঙ্কোতি কাকো. গরুল়েন ৰেনতেয্যেন সদ্ধিন্তি এত্থ গরুল়েনাতি জাতিৰসেন নামং. ৰেনতেয্যেনাতি গোত্তৰসেন. চণ্ডালোতি ছৰচণ্ডালো. রঞ্ঞা চক্কৰত্তিনাতি চাতুদ্দীপিকচক্কৰত্তিনা. পংসুপিসাচকোতি কচৰরছড্ডনট্ঠানে নিব্বত্তকো যক্খো. ইন্দেন দেৰরঞ্ঞা সদ্ধিন্তি সক্কেন দেৰরাজেন সহ. সো হি ভগৰা মহাপঞ্ঞোতিআদীনি ছপ্পদানি হেট্ঠা ৰিত্থারিতানি. তত্থ পঞ্ঞাপভেদকুসলোতি অত্তনো অনন্তৰিকপ্পে পঞ্ঞাভেদে ছেকো. পভিন্নঞাণোতি অনন্তপ্পভেদপত্তঞাণো. এতেন পঞ্ঞাপভেদকুসলত্তেপি সতি তাসং পঞ্ঞানং অনন্তভেদত্তং দস্সেতি. অধিগতপটিসম্ভিদোতি পটিলদ্ধঅগ্গচতুপটিসম্ভিদঞাণো. চতুৰেসারজ্জপ্পত্তোতি চত্তারি ৰিসারদভাৰসঙ্খাতানি ঞাণানি পত্তো. যথাহ –

‘‘সম্মাসম্বুদ্ধস্স তে পটিজানতো ‘ইমে ধম্মা অনভিসম্বুদ্ধা’তি, তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৰে, ন সমনুপস্সামি, এতমহং, ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘খীণাসৰস্স তে পটিজানতো ‘ইমে আসৰা অপরিক্খীণা’তি…পে… ‘যে খো পন তে অন্তরাযিকা ধম্মা ৰুত্তা, তে পটিসেৰতো নালং অন্তরাযাযা’’তি…পে… যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযাতি, তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, ভিক্খৰে, ন সমনুপস্সামি, এতমহং, ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামী’’তি (অ. নি. ৪.৮; ম. নি. ১.১৫০).

দসবলবলধারীতি দস বলানি এতেসন্তি দসবলা, দসবলানং বলানি দসবলবলানি, তানি দসবলবলানি ধারযতীতি দসবলবলধারী, দসবলঞাণবলধারীতি অত্থো. এতেহি তীহি ৰচনেহি অনন্তপ্পভেদানং নেয্যানং পভেদমুখমত্তং দস্সিতং. সোযেৰ পঞ্ঞাপযোগৰসেন অভিমঙ্গলসম্মতট্ঠেন পুরিসাসভো. অসন্তাসট্ঠেন পুরিসসীহো. মহন্তট্ঠেন পুরিসনাগো. পজাননট্ঠেন পুরিসাজঞ্ঞো. লোককিচ্চধুরৰহনট্ঠেন পুরিসধোরয্হো.

অথ তেজাদিকং অনন্তঞাণতো লদ্ধং গুণৰিসেসং দস্সেতুকামো তেসং তেজাদীনং অনন্তঞাণমূলভাৰং দস্সেন্তো ‘‘অনন্তঞাণো’’তি ৰত্ৰা ‘‘অনন্ততেজো’’তিআদিমাহ. তত্থ অনন্তঞাণোতি গণনৰসেন চ পভাৰৰসেন চ অন্তৰিরহিতঞাণো. অনন্ততেজোতি ৰেনেয্যসন্তানে মোহতমৰিধমনেন অনন্তঞাণতেজো. অনন্তযসোতি পঞ্ঞাগুণেহেৰ লোকত্তযৰিত্থতানন্তকিত্তিঘোসো. অড্ঢোতি পঞ্ঞাধনসমিদ্ধিযা সমিদ্ধো. মহদ্ধনোতি পঞ্ঞাধনৰড্ঢত্তেপি পভাৰমহত্তেন মহন্তং পৰত্তপঞ্ঞাধনমস্সাতি মহদ্ধনো. ‘‘মহাধনো’’তি ৰা পাঠো. ধনৰাতি পসংসিতব্বপঞ্ঞাধনৰত্তা নিচ্চযুত্তপঞ্ঞাধনৰত্তা অতিসযভাৰেন পঞ্ঞাধনৰত্তা ধনৰা. এতেসুপি হি তীসু অত্থেসু ইদং ৰচনং সদ্দৰিদূ ইচ্ছন্তি.

এৰং পঞ্ঞাগুণেন ভগৰতো অত্তসম্পত্তিসিদ্ধিং দস্সেত্ৰা পুন পঞ্ঞাগুণেনেৰ লোকহিতসম্পত্তিসিদ্ধিং দস্সেন্তো ‘‘নেতা’’তিআদিমাহ. তত্থ ৰেনেয্যে সংসারসঙ্খাতভযট্ঠানতো নিব্বানসঙ্খাতং খেমট্ঠানং নেতা. তত্থ নযনকালে এৰ সংৰরৰিনযপহানৰিনযৰসেন ৰেনেয্যে ৰিনেতা. ধম্মদেসনাকালে এৰ সংসযচ্ছেদনেন অনুনেতা. সংসযং ছিন্দিত্ৰা সঞ্ঞাপেতব্বং অত্থং পঞ্ঞাপেতা. তথা পঞ্ঞাপিতানং নিচ্ছযকরণেন নিজ্ঝাপেতা. তথা নিজ্ঝাপিতস্স অত্থস্স পটিপত্তিপযোজনৰসেন পেক্খেতা. তথাপটিপন্নে পটিপত্তিবলেন পসাদেতা. সো হি ভগৰাতি এত্থ হি-কারো অনন্তরং ৰুত্তস্স অত্থস্স কারণোপদেসে নিপাতো.

অনুপ্পন্নস্স মগ্গস্স উপ্পাদেতাতি সকসন্তানে নউপ্পন্নপুব্বস্স ছঅসাধারণঞাণহেতুভূতস্স অরিযমগ্গস্স বোধিমূলে লোকহিতত্থং সকসন্তানে উপ্পাদেতা. অসঞ্জাতস্স মগ্গস্স সঞ্জনেতাতি ৰেনেয্যসন্তানে অসঞ্জাতপুব্বস্স সাৰকপারমীঞাণহেতুভূতস্স অরিযমগ্গস্স ধম্মচক্কপ্পৰত্তনতো পভুতি যাৰজ্জকালা ৰেনেয্যসন্তানে সঞ্জনেতা. সাৰকৰেনেয্যানম্পি হি সন্তানে ভগৰতা ৰুত্তৰচনেনেৰ অরিযমগ্গস্স সঞ্জননতো ভগৰা সঞ্জনেতা নাম হোতি. অনক্খাতস্স মগ্গস্স অক্খাতাতি অট্ঠধম্মসমন্নাগতানং বুদ্ধভাৰায কথাভিনীহারানং বোধিসত্তানং বুদ্ধভাৰায ব্যাকরণং দত্ৰা অনক্খাতপুব্বস্স পারমিতামগ্গস্স ‘‘বুদ্ধো ভৰিস্সতী’’তি ব্যাকরণমত্তেনেৰ বোধিমূলে উপ্পজ্জিতব্বস্স অরিযমগ্গস্স অক্খাতা. অযং নযো পচ্চেকবোধিসত্তব্যাকরণেপি লব্ভতিযেৰ. মগ্গঞ্ঞূতি পচ্চৰেক্খণাৰসেন অত্তনো উপ্পাদিতস্স অরিযমগ্গস্স ঞাতা. মগ্গৰিদূতি ৰেনেয্যসন্তানে জনেতব্বস্স অরিযমগ্গস্স কুসলো. মগ্গকোৰিদোতি বোধিসত্তানং অক্খাতব্বমগ্গে ৰিচক্খণো. অথ ৰা অভিসম্বোধিপটিপত্তি মগ্গঞ্ঞূ, পচ্চেকবোধিপটিপত্তি মগ্গৰিদূ, সাৰকবোধিপটিপত্তি মগ্গকোৰিদো. অথ ৰা –

‘‘এতেন মগ্গেন তরিংসু পুব্বে,

তরিস্সন্তি যে চ তরন্তি ওঘ’’ন্তি. (সং. নি. ৫.৪০৯) –

ৰচনতো যথাযোগং অতীতানাগতপচ্চুপ্পন্নবুদ্ধপচ্চেকবুদ্ধসাৰকানং মগ্গৰসেন চ সুঞ্ঞতানিমিত্তঅপ্পণিহিতমগ্গৰসেন চ উগ্ঘটিতঞ্ঞূৰিপঞ্চিতঞ্ঞূনেয্যপুগ্গলানং মগ্গৰসেন চ যথাক্কমেনেত্থ যোজনং করোন্তি. মগ্গানুগা চ পনস্সাতি ভগৰতো গতমগ্গানুগামিনো হুত্ৰা. এত্থ চ-সদ্দো হেতুঅত্থে নিপাতো, এতেন চ ভগৰতা মগ্গুপ্পাদনাদিগুণাধিগমায হেতু ৰুত্তো হোতি. পন-সদ্দো কতত্থে নিপাতো, তেন ভগৰতা কতমগ্গকরণং ৰুত্তং হোতি. পচ্ছা সমন্নাগতাতি পঠমং গতস্স ভগৰতো পচ্ছা সীলাদিগুণেন সমন্নাগতা. ইতি থেরো ‘‘অনুপ্পন্নস্স মগ্গস্স উপ্পাদেতা’’তিআদীহি যস্মা সব্বেপি ভগৰতো সীলাদযো গুণা অরহত্তমগ্গমেৰ নিস্সায আগতা, তস্মা অরহত্তমগ্গমেৰ নিস্সায গুণং কথেসি.

জানং জানাতীতি জানিতব্বং জানাতি, সব্বঞ্ঞুতায যংকিঞ্চি পঞ্ঞায জানিতব্বং নাম অত্থি, তং সব্বং পঞ্চনেয্যপথভূতং পঞ্ঞায জানাতীতি অত্থো. পস্সং পস্সতীতি পস্সিতব্বং পস্সতি, সব্বদস্সাৰিতায তংযেৰ নেয্যপথং চক্খুনা দিট্ঠং ৰিয করোন্তো পঞ্ঞাচক্খুনা পস্সতীতি অত্থো. যথা ৰা একচ্চো ৰিপরীতং গণ্হন্তো জানন্তোপি ন জানাতি, পস্সন্তোপি ন পস্সতি, ন এৰং ভগৰা. ভগৰা পন যথাসভাৰং গণ্হন্তো জানন্তো জানাতিযেৰ, পস্সন্তো পস্সতিযেৰ. স্ৰাযং নযন পরিণাযকট্ঠেন চক্খুভূতো. ৰিদিততাদিঅত্থেন ঞাণভূতো. অৰিপরীতসভাৰট্ঠেন ৰা পরিযত্তিধম্মপৰত্তনতো হদযেন চিন্তেত্ৰা ৰাচায নিচ্ছারিতধম্মমযোতি ৰা ধম্মভূতো. সেট্ঠট্ঠেন ব্রহ্মভূতো. অথ ৰা চক্খু ৰিয ভূতোতি চক্খুভূতো. ঞাণং ৰিয ভূতোতি ঞাণভূতো. অৰিপরীতধম্মো ৰিয ভূতোতি ধম্মভূতো. ব্রহ্মা ৰিয ভূতোতি ব্রহ্মভূতো. য্ৰাযং ধম্মস্স ৰচনতো ৰত্তনতো ৰা ৰত্তা. নানপ্পকারেহি ৰচনতো ৰত্তনতো ৰা পৰত্তা. অত্থং নীহরিত্ৰা দস্সনতো অত্থস্স নিন্নেতা. অমতাধিগমায পটিপত্তিদেসনতো, অমতপ্পকাসনায ৰা ধম্মদেসনায অমতস্স অধিগমাপনতো অমতস্স দাতা. লোকুত্তরস্স ধম্মস্স উপ্পাদিতত্তা ৰেনেয্যানুরূপেন যথাসুখং লোকুত্তরধম্মস্স দানেন চ ধম্মেসু ইস্সরোতি ধম্মস্সামী. তথাগতপদং হেট্ঠা ৰুত্তত্থং.

ইদানি ‘‘জানং জানাতী’’তিআদীহি ৰুত্তগুণং সব্বঞ্ঞুতায ৰিসেসেত্ৰা দস্সেতুকামো সব্বঞ্ঞুতং সাধেন্তো ‘‘নত্থী’’তিআদিমাহ. এৰংভূতস্স হি তস্স ভগৰতো পারমিতাপুঞ্ঞফলপ্পভাৰনিপ্ফন্নেন অরহত্তমগ্গঞাণেন সব্বধম্মেসু সৰাসনস্স সম্মোহস্স ৰিহতত্তা অসম্মোহতো সব্বধম্মানং ঞাতত্তা অঞ্ঞাতং নাম নত্থি. তথেৰ চ সব্বধম্মানং চক্খুনা ৰিয ঞাণচক্খুনা দিট্ঠত্তা অদিট্ঠং নাম নত্থি. ঞাণেন পত্তত্তা অৰিদিতং নাম নত্থি. অসম্মোহসচ্ছিকিরিযায সচ্ছিকতত্তা অসচ্ছিকতং নাম নত্থি. অসম্মোহপঞ্ঞায ফুট্ঠত্তা পঞ্ঞায অফস্সিতং নাম নত্থি.

পচ্চুপ্পন্নন্তি পচ্চুপ্পন্নং কালং ৰা ধম্মং ৰা. উপাদাযাতি আদায, অন্তোকত্ৰাতি অত্থো. উপাদাযৰচনেনেৰ কালৰিনিমুত্তং নিব্বানম্পি গহিতমেৰ হোতি. ‘‘অতীতা’’দিৰচনানি চ ‘‘নত্থী’’তিআদিৰচনেনেৰ ঘটিযন্তি, ‘‘সব্বে’’তিআদিৰচনেন ৰা. সব্বে ধম্মাতি সব্বসঙ্খতাসঙ্খতধম্মপরিযাদানং. সব্বাকারেনাতি সব্বধম্মেসু একেকস্সেৰ ধম্মস্স অনিচ্চাকারাদিসব্বাকারপরিযাদানং. ঞাণমুখেতি ঞাণাভিমুখে. আপাথং আগচ্ছন্তীতি ওসরণং উপেন্তি. জানিতব্বন্তি পদং নেয্যন্তি পদস্স অত্থৰিৰরণত্থং ৰুত্তং.

অত্তত্থো ৰাতিআদীসু ৰা-সদ্দো সমুচ্চযত্থো. অত্তত্থোতি অত্তনো অত্থো. পরত্থোতি পরেসং তিণ্ণং লোকানং অত্থো. উভযত্থোতি অত্তনো চ পরেসঞ্চাতি সকিংযেৰ উভিন্নং অত্থো. দিট্ঠধম্মিকোতি দিট্ঠধম্মে নিযুত্তো, দিট্ঠধম্মপ্পযোজনো ৰা অত্থো. সম্পরাযে নিযুত্তো, সম্পরাযপ্পযোজনো ৰা সম্পরাযিকো. উত্তানোতিআদীসু ৰোহারৰসেন ৰত্তব্বো সুখপতিট্ঠত্তা উত্তানো. ৰোহারং অতিক্কমিত্ৰা ৰত্তব্বো সুঞ্ঞতাপটিসংযুত্তো দুক্খপতিট্ঠত্তা গম্ভীরো. লোকুত্তরো অচ্চন্ততিরোক্খত্তা গূল়্হো. অনিচ্চতাদিকো ঘনাদীহি পটিচ্ছন্নত্তা পটিচ্ছন্নো. অপচুরৰোহারেন ৰত্তব্বো যথারুতং অগ্গহেত্ৰা অধিপ্পাযস্স নেতব্বতো নেয্যো. পচুরৰোহারেন ৰত্তব্বো ৰচনমত্তেনেৰ অধিপ্পাযস্স নীতত্তা নীতো. সুপরিসুদ্ধসীলসমাধিৰিপস্সনত্থো তদঙ্গৰিক্খম্ভনৰসেন ৰজ্জৰিরহিতত্তা অনৰজ্জো. কিলেসসমুচ্ছেদনতো অরিযমগ্গত্থো নক্কিলেসো. কিলেসপটিপ্পস্সদ্ধত্তা অরিযফলত্থো ৰোদানো. সঙ্খতাসঙ্খতেসু অগ্গধম্মত্তা নিব্বানং পরমত্থো. পরিৰত্ততীতি বুদ্ধঞাণস্স ৰিসযভাৰতো অবহিভূতত্তা অন্তোবুদ্ধঞাণে ব্যাপিত্ৰা ৰা সমন্তা ৰা অলঙ্করিত্ৰা ৰা ৰিসেসেন ৰা ৰত্ততি.

‘‘সব্বং কাযকম্ম’’ন্তিআদীহি ভগৰতো ঞাণৰিসযতং দস্সেতি. ঞাণানুপরিৰত্তীতি ঞাণং অনুপরিৰত্তি, ঞাণৰিরহিতং ন হোতীতি অত্থো. অপ্পটিহতন্তি নিরাৰরণতং দস্সেতি. পুন সব্বঞ্ঞুতং উপমায সাধেতুকামো ‘‘যাৰতক’’ন্তিআদিমাহ. তত্থ জানিতব্বন্তি নেয্যং. নেয্যপরিযন্তো নেয্যাৰসানমস্স অত্থীতি নেয্যপরিযন্তিকং. অসব্বঞ্ঞূনং পন নেয্যাৰসানমেৰ নত্থি. ঞাণপরিযন্তিকেপি এসেৰ নযো. পুরিমযমকে ৰুত্তত্থমেৰ ইমিনা যমকেন ৰিসেসেত্ৰা দস্সেতি, ততিযযমকেন পটিসেধৰসেন নিযমেত্ৰা দস্সেতি. এত্থ চ নেয্যং ঞাণস্স পথত্তা নেয্যপথো. অঞ্ঞমঞ্ঞপরিযন্তট্ঠাযিনোতি নেয্যঞ্চ ঞাণঞ্চ খেপেত্ৰা ঠানতো অঞ্ঞমঞ্ঞস্স পরিযন্তে ঠানসীলা.

আৰজ্জনপটিবদ্ধাতি মনোদ্ৰারাৰজ্জনাযত্তা, আৰজ্জিতানন্তরমেৰ জানাতীতি অত্থো. আকঙ্খপটিবদ্ধাতি রুচিআযত্তা, আৰজ্জনানন্তরং জৰনঞাণেন জানাতীতি অত্থো. ইতরানি দ্ৰে পদানি ইমেসং দ্ৰিন্নং পদানং যথাক্কমেন অত্থপ্পকাসনত্থং ৰুত্তানি. আসযং জানাতীতি এত্থ আসযন্তি নিস্সযন্তি এত্থাতি আসযো, মিচ্ছাদিট্ঠিযা সম্মাদিট্ঠিযা কামাদীহি নেক্খম্মাদীহি ৰা পরিভাৰিতস্স সন্তানস্সেতং অধিৰচনং. সত্তসন্তানং অনুসেন্তি অনুপৰত্তেন্তীতি অনুসযা, থামগতানং কামরাগাদীনংৰ এতং অধিৰচনং. অনুসযং জানাতীতি অনুসযকথা হেট্ঠা ৰুত্তাযেৰ.

চরিতন্তি পুব্বে কতকুসলাকুসলকম্মং. অধিমুত্তিন্তি সম্পতি কুসলে অকুসলে ৰা চিত্তৰোসগ্গো. অপ্পরজক্খেতি পঞ্ঞামযে অক্খিম্হি অপ্পং রাগাদিরজো এতেসন্তি অপ্পরজক্খা. অপ্পং রাগাদিরজো এতেসন্তি ৰা অপ্পরজক্খা, তে অপ্পরজক্খে. মহারজক্খেতি ঞাণমযে অক্খিম্হি মহন্তং রাগাদিরজো এতেসন্তি মহারজক্খা. মহন্তং রাগাদিরজো এতেসন্তি ৰা মহারজক্খা, তে মহারজক্খে. তিক্খিন্দ্রিযে মুদিন্দ্রিযেতি তিক্খানি সদ্ধাদীনি ইন্দ্রিযানি এতেসন্তি তিক্খিন্দ্রিযা. মুদূনি সদ্ধাদীনি ইন্দ্রিযানি এতেসন্তি মুদিন্দ্রিযা. স্ৰাকারে দ্ৰাকারেতি সুন্দরা সদ্ধাদযো আকারা কোট্ঠাসা এতেসন্তি স্ৰাকারা. কুচ্ছিতা গরহিতা অসদ্ধাদযো আকারা কোট্ঠাসা এতেসন্তি দ্ৰাকারা. সুৰিঞ্ঞাপযে দুৰিঞ্ঞাপযেতি যে কথিতং কারণং সল্লক্খেন্তি সুখেন সক্কা হোন্তি ৰিঞ্ঞাপেতুং, তে সুৰিঞ্ঞাপযা. তব্বিপরীতা দুৰিঞ্ঞাপযা. ভব্বাভব্বেতি ভব্বে চ অভব্বে চ. অরিযায জাতিযা ভৰন্তি জাযন্তীতি ভব্বা. ৰত্তমানসমীপে ৰত্তমানৰচনং. ভৰিস্সন্তি জাযিস্সন্তি ৰাতি ভব্বা, ভাজনভূতাতি অত্থো. যে অরিযমগ্গপটিৰেধস্স অনুচ্ছৰিকা উপনিস্সযসম্পন্না, তে ভব্বা. ৰুত্তপটিপক্খা অভব্বা.

সত্তে পজানাতীতি রূপাদিকে আরম্মণে লগ্গে লগ্গিতে সত্তে পজানাতি. সদেৰকো লোকোতি সহ দেৰেহি সদেৰকো. সহ মারেন সমারকো. সহ ব্রহ্মুনা সব্রহ্মকো. সহ সমণব্রাহ্মণেহি সস্সমণব্রাহ্মণী. পজাতত্তা পজা. সহ দেৰমনুস্সেহি সদেৰমনুস্সা. ‘‘পজা’’তি সত্তলোকস্স পরিযাযৰচনমেতং. তত্থ সদেৰকৰচনেন পঞ্চকামাৰচরদেৰগ্গহণং, সমারকৰচনেন ছট্ঠকামাৰচরদেৰগ্গহণং. সব্রহ্মকৰচনেন ব্রহ্মকাযিকাদিব্রহ্মগ্গহণং. সস্সমণব্রাহ্মণীৰচনেন সাসনস্স পচ্চত্থিকপচ্চামিত্তসমণব্রাহ্মণগ্গহণং সমিতপাপবাহিতপাপসমণব্রাহ্মণগ্গহণঞ্চ. পজাৰচনেন সত্তলোকগ্গহণং. সদেৰমনুস্সৰচনেন সম্মুতিদেৰঅৰসেসমনুস্সগ্গহণং. এৰমেত্থ তীহি পদেহি ওকাসলোকো. দ্ৰীহি পজাৰসেন সত্তলোকো গহিতোতি ৰেদিতব্বো.

অপরো নযো – সদেৰকগ্গহণেন অরূপাৰচরলোকো গহিতো, সমারকগ্গহণেন ছকামাৰচরলোকো, সব্রহ্মকগ্গহণেন রূপাৰচরব্রহ্মলোকো, সস্সমণব্রাহ্মণাদিগ্গহণেন চতুপরিসৰসেন সম্মুতিদেৰেহি ৰা সহ মনুস্সলোকো, অৰসেসসব্বসত্তলোকো ৰা. অপি চেত্থ সদেৰকৰচনেন উক্কট্ঠপরিচ্ছেদতো সব্বস্সপি লোকস্স অন্তোবুদ্ধঞাণে পরিৰত্তনভাৰং সাধেতি. ততো যেসং সিযা ‘‘মারো মহানুভাৰো ছকামাৰচরিস্সরো ৰসৰত্তী, কিং সোপি অন্তোবুদ্ধঞাণে পরিৰত্ততী’’তি. তেসং ৰিমতিং ৰিধমেন্তো ‘‘সমারকো’’তি আহ. যেসং পন সিযা ‘‘ব্রহ্মা মহানুভাৰো, একঙ্গুলিযা একস্মিং চক্কৰাল়সহস্সে আলোকং ফরতি. দ্ৰীহি…পে… দসহি অঙ্গুলীহি দসসু চক্কৰাল়সহস্সেসু আলোকং ফরতি, অনুত্তরঞ্চ ঝানসমাপত্তিসুখং পটিসংৰেদেতি, কিং সোপি অন্তোবুদ্ধঞাণে পরিৰত্ততী’’তি. তেসং ৰিমতিং ৰিধমেন্তো ‘‘সব্রহ্মকো’’তি আহ. ততো যেসং সিযা ‘‘পুথূ সমণব্রাহ্মণা সাসনপচ্চত্থিকা, কিং তেপি অন্তোবুদ্ধঞাণে পরিৰত্তন্তী’’তি. তেসং ৰিমতিং ৰিধমেন্তো ‘‘সস্সমণব্রাহ্মণী পজা’’তি আহ.

এৰং উক্কট্ঠানং অন্তোবুদ্ধঞাণে পরিৰত্তনভাৰং পকাসেত্ৰা অথ সম্মুতিদেৰে অৰসেসমনুস্সে চ উপাদায উক্কট্ঠপরিচ্ছেদৰসেন সেসসত্তলোকস্স অন্তোবুদ্ধঞাণে পরিৰত্তনভাৰং পকাসেন্তো ‘‘সদেৰমনুস্সা’’তি আহ. অযমেত্থ অনুসন্ধিক্কমো. পোরাণা পনাহু ‘‘সদেৰকোতি দেৰতাহি সদ্ধিং অৰসেসলোকো. সমারকোতি মারেন সদ্ধিং অৰসেসলোকো. সব্রহ্মকোতি ব্রহ্মেহি সদ্ধিং অৰসেসলোকো. এৰং সব্বেপি তিভৰূপগে সত্তে তীহাকারেহি তীসু পদেসু পক্খিপিত্ৰা পুন দ্ৰীহাকারেহি পরিযাদাতুং ‘সস্সমণব্রাহ্মণী পজা সদেৰমনুস্সা’তি ৰুত্তং. এৰং পঞ্চহি পদেহি তেন তেন আকারেন তেধাতুকমেৰ পরিযাদিন্নং হোতী’’তি.

অন্তমসোতি উপরিমন্তেন. তিমিতিমিঙ্গলন্তি এত্থ তিমি নাম একা মচ্ছজাতি, তিমিং গিলিতুং সমত্থা ততো মহন্তসরীরা তিমিঙ্গলা নাম একা মচ্ছজাতি, তিমিঙ্গলম্পি গিলিতুং সমত্থা পঞ্চযোজনসতিকসরীরা তিমিতিমিঙ্গলা নাম একা মচ্ছজাতি. ইধ জাতিগ্গহণেন একৰচনং কতন্তি ৰেদিতব্বং. গরুল়ং ৰেনতেয্যন্তি এত্থ গরুল়োতি জাতিৰসেন নামং. ৰেনতেয্যোতি গোত্তৰসেন. পদেসেতি একদেসে. সারিপুত্তসমাতি সব্ববুদ্ধানং ধম্মসেনাপতিত্থেরে গহেত্ৰা ৰুত্তন্তি ৰেদিতব্বং. সেসসাৰকা হি পঞ্ঞায ধম্মসেনাপতিত্থেরেন সমা নাম নত্থি. যথাহ – ‘‘এতদগ্গং, ভিক্খৰে, মম সাৰকানং ভিক্খূনং মহাপঞ্ঞানং যদিদং সারিপুত্তো’’তি (অ. নি. ১.১৮৮-১৮৯). অট্ঠকথাযঞ্চ (ৰিসুদ্ধি. ১.১৭১; পটি. ম. অট্ঠ. ২.৩.৫) ৰুত্তং –

‘‘লোকনাথং ঠপেত্ৰান, যে চঞ্ঞে সন্তি পাণিনো;

পঞ্ঞায সারিপুত্তস্স, কলং নাগ্ঘন্তি সোল়সি’’ন্তি.

ফরিত্ৰাতি বুদ্ধঞাণং সব্বদেৰমনুস্সানম্পি পঞ্ঞং পাপুণিত্ৰা ঠানতো তেসং পঞ্ঞং ফরিত্ৰা ব্যাপিত্ৰা তিট্ঠতি. অভিভৰিত্ৰাতি সব্বদেৰমনুস্সানম্পি পঞ্ঞং অতিক্কমিত্ৰা, তেসং অৰিসযভূতম্পি সব্বং নেয্যং অভিভৰিত্ৰা তিট্ঠতীতি অত্থো.

পটিসম্ভিদাযং (পটি. ম. ৩.৫) পন ‘‘অতিঘংসিত্ৰা’’তি পাঠো, ঘংসিত্ৰা তুদিত্ৰাতি অত্থো. যেপি তেতিআদীহি এৰং ফরিত্ৰা অভিভৰিত্ৰা ঠানস্স পচ্চক্খকারণং দস্সেতি. তত্থ পণ্ডিতাতি পণ্ডিচ্চেন সমন্নাগতা. নিপুণাতি সণ্হসুখুমবুদ্ধিনো সুখুমে অত্থন্তরে পটিৰিজ্ঝনসমত্থা. কতপরপ্পৰাদাতি ৰিঞ্ঞাতপরপ্পৰাদা চেৰ পরেহি সদ্ধিং কতৰাদপরিচযা চ. ৰালৰেধিরূপাতি ৰালৰেধিধনুগ্গহসদিসা. ৰো ভিন্দন্তা মঞ্ঞে চরন্তি পঞ্ঞাগতেন দিট্ঠিগতানীতি ৰালৰেধী ৰিয ৰালং সুখুমানিপি পরেসং দিট্ঠিগমনানি অত্তনো পঞ্ঞাগমনেন ভিন্দন্তা ৰিয চরন্তীতি অত্থো. অথ ৰা ‘‘গূথগতং মুত্তগত’’ন্তিআদীসু (অ. নি. ৯.১১) ৰিয পঞ্ঞা এৰ পঞ্ঞাগতং. দিট্ঠিযো এৰ দিট্ঠিগতানি. পঞ্হে অভিসঙ্খরিত্ৰা অভিসঙ্খরিত্ৰাতি দ্ৰিপদম্পি তিপদম্পি চতুপদম্পি পুচ্ছং রচযিত্ৰা তেসং পঞ্হানং অতিবহুকত্তা সব্বসঙ্গহত্থং দ্ৰিক্খত্তুং ৰুত্তং. গূল়্হানি চ পটিচ্ছন্নানি চ অত্থজাতানীতি পাঠসেসো. তেসং তথা ৰিনযং দিস্ৰা অত্তনা অভিসঙ্খতং পঞ্হং পুচ্ছন্তীতি এৰং ভগৰতা অধিপ্পেতত্তা পঞ্হং পুচ্ছন্তি. অঞ্ঞেসং পন পুচ্ছায ওকাসমেৰ অদত্ৰা ভগৰা উপসঙ্কমন্তানং ধম্মং দেসেতি. যথাহ –

‘‘তে পঞ্হং অভিসঙ্খরোন্তি ‘ইমং মযং পঞ্হং সমণং গোতমং উপসঙ্কমিত্ৰা পুচ্ছিস্সাম, সচে নো সমণো গোতমো এৰং পুট্ঠো এৰং ব্যাকরিস্সতি, এৰমস্স মযং ৰাদং আরোপেস্সাম, এৰং চেপি নো পুট্ঠো এৰং ব্যাকরিস্সতি, এৰম্পিস্স মযং ৰাদং আরোপেস্সামা’তি. তে সুণন্তি ‘সমণো খলু ভো গোতমো অমুকং নাম গামং ৰা নিগমং ৰা ওসটো’তি. তে যেন সমণো গোতমো তেনুপসঙ্কমন্তি. তে সমণো গোতমো ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. তে সমণেন গোতমেন ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ন চেৰ সমণং গোতমং পঞ্হং পুচ্ছন্তি, কুতোস্স ৰাদং আরোপেস্সন্তি, অঞ্ঞদত্থু সমণস্সেৰ গোতমস্স সাৰকা সম্পজ্জন্তী’’তি (ম. নি. ১.২৮৯).

কস্মা পঞ্হে ন পুচ্ছন্তীতি চে? ভগৰা কির পরিসমজ্ঝে ধম্মং দেসেন্তো পরিসায অজ্ঝাসযং ওলোকেতি, ততো পস্সতি ‘‘ইমে পণ্ডিতা গূল়্হং রহস্সং পঞ্হং ওৰট্টিকসারং কত্ৰা আগতা’’তি. সো তেহি অপুট্ঠোযেৰ ‘‘পঞ্হপুচ্ছায এত্তকা দোসা, ৰিস্সজ্জনে এত্তকা, অত্থে, পদে, অক্খরে এত্তকাতি; ইমং পঞ্হং পুচ্ছন্তো এৰং পুচ্ছেয্য, ৰিস্সজ্জেন্তো এৰং ৰিস্সজ্জেয্যা’’তি; ইতি ওৰট্টিকসারং কত্ৰা আনীতে পঞ্হে ধম্মকথায অন্তরে পক্খিপিত্ৰা দস্সেতি. তে পণ্ডিতা ‘‘সেয্যা ৰত নো, যে মযং ইমে পঞ্হে ন পুচ্ছিম্হা. সচেপি মযং পুচ্ছেয্যাম, অপ্পতিট্ঠিতে নো কত্ৰা সমণো গোতমো খিপেয্যা’’তি অত্তমনা ভৰন্তি.

অপি চ বুদ্ধা নাম ধম্মং দেসেন্তা পরিসং মেত্তায ফরন্তি. মেত্তাফরণেন দসবলেসু মহাজনস্স চিত্তং পসীদতি. বুদ্ধা নাম রূপগ্গপ্পত্তা হোন্তি দস্সনসম্পন্না মধুরস্সরা মুদুজিৰ্হা সুফুসিতদন্তাৰরণা, অমতেন হদযং সিঞ্চন্তা ৰিয ধম্মং কথেন্তি. তত্র নেসং মেত্তাফরণেন পসন্নচিত্তানং এৰং হোতি – ‘‘এৰরূপং অদ্ৰেজ্ঝকথং অমোঘকথং নিয্যানিককথং কথেন্তেন ভগৰতা সদ্ধিং ন সক্খিস্সাম পচ্চনীকগ্গাহং গণ্হিতু’’ন্তি অত্তনো পসন্নভাৰেনেৰ পঞ্হে ন পুচ্ছন্তীতি.

কথিতা ৰিস্সজ্জিতা ৰাতি ‘‘এৰং তুম্হে পুচ্ছথা’’তি অপুচ্ছিতপঞ্হানং উচ্চারণেন তে পঞ্হা ভগৰতা কথিতা এৰ হোন্তি. যথা চ তে ৰিস্সজ্জেতব্বা, তথা ৰিস্সজ্জিতা এৰ হোন্তি. নিদ্দিট্ঠকারণাতি ইমিনা কারণেন ইমিনা হেতুনা এৰং হোন্তীতি এৰং সহেতুকং কত্ৰা ৰিস্সজ্জনেন ভগৰতা নিদ্দিট্ঠকারণা এৰ হোন্তি তে পঞ্হা. উপক্খিত্তকা চ তে ভগৰতো সম্পজ্জন্তীতি খত্তিযপণ্ডিতাদযো ভগৰতো পঞ্হৰিস্সজ্জনেনেৰ ভগৰতো সমীপে খিত্তকা পক্খিত্তকা সম্পজ্জন্তি; সাৰকা ৰা সম্পজ্জন্তি, উপাসকা ৰাতি অত্থো; সাৰকসম্পত্তিং ৰা পাপুণন্তি, উপাসকসম্পত্তিং ৰাতি ৰুত্তং হোতি. অথাতি অনন্তরত্থে, তেসং উপক্খিত্তকসম্পত্তিসমনন্তরমেৰাতি অত্থো. তত্থাতি তস্মিং ঠানে, তস্মিং অধিকারে ৰা. অতিরোচতীতি অতিৰিয জোততি পকাসতি. যদিদং পঞ্ঞাযাতি যাযং ভগৰতো পঞ্ঞা, তায পঞ্ঞায ভগৰাৰ অতিরোচতীতি অত্থো. ইতি-সদ্দো কারণত্থো, ইমিনা কারণেনাতি অত্থো. সেসং সব্বত্থ পাকটমেৰাতি.

সদ্ধম্মপ্পজ্জোতিকায মহানিদ্দেসট্ঠকথায

পসূরসুত্তনিদ্দেসৰণ্ণনা নিট্ঠিতা.

৯. মাগণ্ডিযসুত্তনিদ্দেসৰণ্ণনা

৭০. নৰমে মাগণ্ডিযসুত্তনিদ্দেসে পঠমগাথায তাৰ অজপালনিগ্রোধমূলে নানারূপানি নিম্মিনিত্ৰা অভিকামং আগতং মারধীতরং দিস্ৰান তণ্হং অরতিং রগঞ্চ ছন্দমত্তম্পি মেথুনস্মিং নাহোসি, কিমেৰিদং ইমিস্সা দারিকায মুত্তকরীসপুণ্ণং রূপং দিস্ৰা ভৰিস্সতি, সব্বথা পাদাপি নং সম্ফুসিতুং ন ইচ্ছে, কুতোনেন সংৰসিতুন্তি.

মুত্তপুণ্ণন্তি আহারউতুৰসেন ৰত্থিপুটন্তরং পূরেত্ৰা ঠিতমুত্তেন পূরিতং. করীসপুণ্ণন্তি পক্কাসযসঙ্খাতে হেট্ঠানাভিপিট্ঠিকণ্টকমূলানং অন্তরে উব্বেধেন অট্ঠঙ্গুলমত্তে অন্তাৰসানে ঠিতৰচ্চেন পুণ্ণং. সেম্হপুণ্ণন্তি উদরপটলে ঠিতএকপত্তপ্পমাণেন সেম্হেন পূরিতং. রুহিরপুণ্ণন্তি যকনস্স হেট্ঠাভাগং পূরেত্ৰা হদযৰক্কপপ্ফাসানং উপরি থোকং থোকং পগ্ঘরন্তেন ৰক্কহদযযকনপপ্ফাসে তেমযমানেন ঠিতেন একপত্তস্স পূরণমত্তেন সন্নিচিতলোহিতসঙ্খাতেন চ কেসলোমনখদন্তানং মংসৰিনিমুত্তট্ঠানঞ্চেৰ থদ্ধসুক্খচম্মঞ্চ ঠপেত্ৰা ধমনীজালানুসারেন সব্বং উপাদিণ্ণকসরীরং ফরিত্ৰা ঠিতসংসরণলোহিতসঙ্খাতেন চ দুৰিধেন রুহিরেন পুণ্ণং.

অট্ঠিসঙ্ঘাতন্তি সকলসরীরে হেট্ঠা অট্ঠীনং উপরিট্ঠিতানি সাধিকানি তীণি অট্ঠিসতানি, তেহি অট্ঠীহি ঘটিতং. ন্হারুসম্বন্ধন্তি সকলসরীরে অট্ঠীনি আবন্ধিত্ৰা ঠিতানি নৰ ন্হারুসতানি, তেহি ন্হারূহি সম্বন্ধং আবন্ধং. রুধিরমংসাৰলেপনন্তি সংসরণলোহিতেন চ সাধিকানি তীণি অট্ঠিসতানি অনুলিম্পেত্ৰা ঠিতেন নৰমংসপেসিসতেন চ অনুলিত্তং সরীরং. চম্মৰিনদ্ধন্তি সকলসরীরং পরিযোনন্ধিত্ৰা পাকটকিলোমকস্স উপরি ছৰিযা হেট্ঠা ঠিতং চম্মং, তেন চম্মেন ৰিনদ্ধং পরিযোনদ্ধং. ‘‘চম্মাৰনদ্ধ’’ন্তিপি পাল়ি. ছৰিযা পটিচ্ছন্নন্তি অতিসুখুমছৰিযা পটিচ্ছন্নং ছাদেত্ৰা ঠিতং. ছিদ্দাৰছিদ্দন্তি অনেকছিদ্দং. উগ্ঘরন্তন্তি অক্খিমুখাদীহি উগ্ঘরন্তং. পগ্ঘরন্তন্তি অধোভাগেন পগ্ঘরন্তং. কিমিসঙ্ঘনিসেৰিতন্তি সূচিমুখাদীহি নানাপাণকুলসমূহেহি আসেৰিতং. নানাকলিমলপরিপূরন্তি অনেকৰিধেহি অসুচিকোট্ঠাসেহি পূরিতং.

৭১. ততো মাগণ্ডিযো ‘‘পব্বজিতা নাম মানুসকে কামে পহায দিব্বকামত্থায পব্বজন্তি, অযঞ্চ দিব্বেপি কামে ন ইচ্ছতি, ইদম্পি ইত্থিরতনং, কা নু অস্স দিট্ঠী’’তি পুচ্ছিতুং দুতিযং গাথমাহ. তত্থ এতাদিসং চে রতনন্তি দিব্বিত্থিরতনং সন্ধায ভণতি. নারিন্তি অত্তনো ধীতরং সন্ধায. দিট্ঠিগতং সীলৰতং নু জীৰিতন্তি দিট্ঠিঞ্চ সীলঞ্চ ৰতঞ্চ জীৰিতঞ্চ. ভৰূপপত্তিঞ্চ ৰদেসি কীদিসন্তি অত্তনো ভৰূপপত্তিং ৰা তুৰং কীদিসং ৰদেসি.

৭২. ইতো পরা দ্ৰে গাথা ৰিস্সজ্জনপুচ্ছানযেন পৰত্তত্তা পাকটসম্বন্ধাযেৰ. তাসু পঠমগাথায সঙ্খেপত্থো – তস্স ময্হং মাগণ্ডিয দ্ৰাসট্ঠিদিট্ঠিগতধম্মেসু নিচ্ছিনিত্ৰা ‘‘ইদমেৰ সচ্চং, মোঘমঞ্ঞ’’ন্তি (ম. নি. ৩.২৭, ৩০১) এৰং ইদং ৰদামীতি সমুগ্গহীতং ন হোতি নত্থি ন ৰিজ্জতি, কিং কারণা? অহঞ্হি পস্সন্তো দিট্ঠীসু আদীনৰং কঞ্চি দিট্ঠিং অগ্গহেত্ৰা সচ্চানি পৰিচিনন্তো অজ্ঝত্তং রাগাদীনং সন্তিভাৰেন অজ্ঝত্তসন্তিসঙ্খাতং নিব্বানমেৰ অদ্দসন্তি.

আদীনৰন্তি উপদ্দৰং. সদুক্খন্তি কাযিকদুক্খেন সদুক্খং. সৰিঘাতন্তি চেতসিকদুক্খেন সহিতং. সউপাযাসন্তি উপাযাসসহিতং. সপরিল়াহন্তি সদরথং. ন নিব্বিদাযাতি ন ৰট্টে নিব্বিন্দনত্থায. ন ৰিরাগাযাতি ন ৰট্টে ৰিরাগত্থায. ন নিরোধাযাতি ন ৰট্টস্স নিরোধত্থায. ন উপসমাযাতি ন ৰট্টস্স উপসমত্থায. ন অভিঞ্ঞাযাতি ন ৰট্টস্স অভিজাননত্থায. ন সম্বোধাযাতি ন কিলেসনিদ্দাৰিগমেন ৰট্টতো সম্বুজ্ঝনত্থায. ন নিব্বানাযাতি ন অমতনিব্বানত্থায. এত্থ পন ‘‘নিব্বিদাযা’’তি ৰিপস্সনা. ‘‘ৰিরাগাযা’’তি মগ্গো. ‘‘নিরোধায উপসমাযা’’তি নিব্বানং. ‘‘অভিঞ্ঞায সম্বোধাযা’’তি মগ্গো. ‘‘নিব্বানাযা’’তি নিব্বানমেৰ. এৰং একস্মিং ঠানে ৰিপস্সনা, তীসু মগ্গো, তীসু নিব্বানং ৰুত্তন্তি এৰং ৰৰত্থানকথা ৰেদিতব্বা. পরিযাযেন পন সব্বানিপেতানি মগ্গৰেৰচনানিপি নিব্বানৰেৰচনানিপি হোন্তিযেৰ.

অজ্ঝত্তং রাগস্স সন্তিন্তি অজ্ঝত্তরাগস্স সন্তভাৰেন নিব্বুতভাৰেন অজ্ঝত্তসন্তিসঙ্খাতং নিব্বানং ওলোকেসিং. দোসস্স সন্তিন্তিআদীসুপি এসেৰ নযো. পচিনন্তি নিদ্দেসস্স উদ্দেসপদং. ৰিচিনন্তোতি সচ্চানি ৰড্ঢেন্তো ৰিভাৰেন্তো. পৰিচিনন্তোতি তানেৰ পচ্চেকং ৰিভাৰেন্তো. কেচি ‘‘গৰেসন্তো’’তি ৰণ্ণযন্তি. অদস্সন্তি ওলোকেসিং. অদক্খিন্তি ৰিনিৰিজ্ঝিং. অফস্সিন্তি পঞ্ঞায ফুসিং. পটিৰিজ্ঝিন্তি ঞাণেন পচ্চক্খং অকাসিং.

৭৩. দুতিযগাথায সঙ্খেপত্থো – যানিমানি দিট্ঠিগতানি তেহি তেহি সত্তেহি ৰিনিচ্ছিনিত্ৰা গহিতত্তা ‘‘ৰিনিচ্ছযা’’তি চ অত্তনো পচ্চযেহি অভিসঙ্খতভাৰাদিনা নযেন ‘‘পকপ্পিতানী’’তি চ ৰুচ্চন্তি, তে ৰে মুনী দিট্ঠিগতধম্মে অগ্গহেত্ৰা অজ্ঝত্তসন্তীতি যমেতমত্থং ব্রূসি, আচিক্খ মে, কথং নু ধীরেহি পৰেদিতং তং কথং পকাসিতং ধীরেহীতি ৰদতি.

ইমিস্সা গাথায নিদ্দেসো উত্তানত্থো ঠপেত্ৰা পরমত্থপদং. তত্থ যং পরমত্থন্তি যং উত্তমং নিব্বানং.

৭৪. অথস্স ভগৰা যথা যেন উপাযেন তং পদং ধীরেহি পকাসিতং, তং উপাযং সপটিপক্খং দস্সেন্তো ‘‘ন দিট্ঠিযা’’তি গাথমাহ. তত্থ ন দিট্ঠিযাতিআদীহি দিট্ঠিসুতিঅট্ঠসমাপত্তিঞাণবাহিরসীলব্বতানি পটিক্খিপতি. ‘‘সুদ্ধিমাহা’’তি এত্থ ৰুত্তং আহ-সদ্দং সব্বত্থ নকারেন সদ্ধিং যোজেত্ৰা পুরিমপদত্তযং নেত্ৰা ‘‘দিট্ঠিযা সুদ্ধিং নাহ ন কথেমী’’তি এৰমত্থো ৰেদিতব্বো. যথা চেত্থ, এৰং উত্তরপদেসুপি. তত্থ চ অদিট্ঠিযা নাহাতি দসৰত্থুকং সম্মাদিট্ঠিং ৰিনা ন কথেমি. তথা অস্সুতিযাতি নৰঙ্গং সৰনং ৰিনা. অঞাণাতি কম্মস্সকতসচ্চানুলোমিকঞাণং ৰিনা. অসীলতাতি পাতিমোক্খসংৰরং ৰিনা. অব্বতাতি ধুতঙ্গৰতং ৰিনা. নোপি তেনাতি তেসু একমেকেন দিট্ঠিআদিমত্তেনাপি ন কথেমীতি এৰমত্থো ৰেদিতব্বো. এতে চ নিস্সজ্জ অনুগ্গহাযাতি এতে চ পুরিমদিট্ঠিআদিভেদে কণ্হপক্খিকে ধম্মে সমুগ্ঘাতকরণেন নিস্সজ্জ, পচ্ছিমে অদিট্ঠিআদিভেদে সুক্কপক্খিকেপি অতম্মযতাপজ্জনেন অনুগ্গহায. সন্তো অনিস্সায ভৰং ন জপ্পেতি ইমায পটিপত্তিযা রাগাদিৰূপসমেন সন্তো চক্খাদীসু কঞ্চি ধম্মং অনিস্সায একম্পি ভৰং ন জপ্পে, অপিহেতুং অপত্থেতুং সমত্থো সিযা, অযমস্স অজ্ঝত্তসন্তীতি অধিপ্পাযো.

সৰনম্পি ইচ্ছিতব্বন্তি সুত্তাদিৰসেন সুণনম্পি আকঙ্খিতব্বং. সম্ভারা ইমে ধম্মাতি সম্মাদিট্ঠিআদিকা ইমে ধম্মা উপকারট্ঠেন সম্ভারা হোন্তি. কণ্হপক্খিকানন্তি অকুসলপক্খে ভৰানং. সমুগ্ঘাততো পহানং ইচ্ছিতব্বন্তি সম্মা হননতো সমুচ্ছেদতো পহানং আকঙ্খিতব্বং. তেধাতুকেসু কুসলেসু ধম্মেসূতি কামরূপারূপসঙ্খাতেসু তেভূমকেসু কোসল্লসম্ভূতেসু. অতম্মযতাতি নিত্তণ্হভাৰো.

৭৫. এৰং ৰুত্তে ৰচনত্থং অসল্লক্খেন্তো মাগণ্ডিযো ‘‘নো চে কিরা’’তি গাথমাহ. তত্থ দিট্ঠাদীনি ৰুত্তনযানেৰ. কণ্হপক্খিকানিযেৰ পন সন্ধায উভযত্রাপি আহ. আহ-সদ্দং পন ‘‘নো চে’’তি সদ্দেন যোজেত্ৰা নো চে কির আহ নো চে কির কথেসীতি এৰং অত্থো দট্ঠব্বো. মোমূহন্তি অতিমূল়্হং, মোহনং ৰা. পচ্চেন্তীতি জানন্তি. ইমিস্সাপি গাথায নিদ্দেসো উত্তানো.

৭৬. অথস্স ভগৰা তং দিট্ঠিং নিস্সায পুচ্ছং পটিক্খিপন্তো ‘‘দিট্ঠিঞ্চ নিস্সাযা’’তি গাথমাহ. তস্সত্থো – ত্ৰং মাগণ্ডিয দিট্ঠিং নিস্সায পুনপ্পুনং পুচ্ছমানো যানি তে দিট্ঠিগতানি সমুগ্গহিতানি, তেস্ৰেৰ সমুগ্গহীতেসু পমোহং আগতো ত্ৰং ইতো চ মযা ৰুত্তঅজ্ঝত্তসন্তিতো পটিপত্তিতো ধম্মদেসনতো ৰা অণুম্পি যুত্তসঞ্ঞং ন পস্সসি, তেন কারণেন ত্ৰং ইমং ধম্মং মোমূহতো পস্সসীতি.

লগ্গনং নিস্সায লগ্গনন্তি দিট্ঠিলগ্গনং অল্লীযিত্ৰা দিট্ঠিলগ্গনং. বন্ধনন্তি দিট্ঠিবন্ধনং. পলিবোধন্তি দিট্ঠিপলিবোধং.

অন্ধকারং পক্খন্দোসীতি বহলন্ধকারং পৰিট্ঠোসি. যুত্তসঞ্ঞন্তি সমণধম্মে যুত্তসঞ্ঞং. পত্তসঞ্ঞন্তি সমণধম্মে পটিলদ্ধসঞ্ঞং. লগ্গনসঞ্ঞন্তি সঞ্জানিতসঞ্ঞং. কারণসঞ্ঞন্তি হেতুসঞ্ঞং. ঠানসঞ্ঞন্তি কারণসঞ্ঞং. ন পটিলভসীতি ন ৰিন্দসি. কুতো ঞাণন্তি মগ্গঞাণং পন কেন কারণেন লভিস্সসি. অনিচ্চং ৰাতি হুত্ৰা অভাৰট্ঠেন পঞ্চক্খন্ধা অনিচ্চং. অনিচ্চসঞ্ঞানুলোমং ৰাতি ‘‘পঞ্চক্খন্ধা অনিচ্চা’’তি উপ্পন্না সঞ্ঞা অনিচ্চসঞ্ঞা, তায সঞ্ঞায অনুলোমং অপ্পটিক্কূলং অনিচ্চসঞ্ঞানুলোমং. কিং তং? ৰিপস্সনাঞাণং. দ্ৰিন্নং ৰিপস্সনাঞাণানং দুক্খানত্তসঞ্ঞানুলোমানম্পি এসেৰ নযো.

৭৭. এৰং সমুগ্গহিতেসু পমোহেন মাগণ্ডিযস্স ৰিৰাদাপত্তিং দস্সেত্ৰা ইদানি তেসু অঞ্ঞেসু চ ধম্মেসু ৰিগতপ্পমোহস্স অত্তনো নিব্বিৰাদতং দস্সেন্তো ‘‘সমো ৰিসেসী’’তি গাথমাহ. তস্সত্থো – যো এৰং তিধা মানেন ৰা দিট্ঠিযা ৰা পুগ্গলেন ৰা মঞ্ঞতি, সো তেন মানেন তায ৰা দিট্ঠিযা তেন ৰা পুগ্গলেন ৰিৰদেয্য. যো পন অম্হাদিসো ইমাসু তীসু ৰিধাসু অৰিকম্পমানো, সমো ৰিসেসীতি ন তস্স হোতি, ন চ হীনোতি পাঠসেসো. ইমিস্সাপি গাথায নিদ্দেসো উত্তানোৰ.

৭৮. কিঞ্চ ভিয্যো – ‘‘সচ্চন্তি সো’’তি গাথা. তস্সত্থো – সো এৰরূপো পহীনমানদিট্ঠিকো ‘‘মাদিসো ‘বাহিতপাপত্তা’দিনা নযেন ব্রাহ্মণো, ইদমেৰ সচ্চ’’ন্তি কিং ৰদেয্য কিং ৰত্থুং ভণেয্য, কেন ৰা কারণেন ভণেয্য, ‘‘ময্হং সচ্চং, তুয্হং মুসা’’তি ৰা কেন মানেন দিট্ঠিযা পুগ্গলেন ৰা ৰিৰদেয্য. যস্মিং মাদিসে খীণাসৰে ‘‘সদিসোহমস্মী’’তি পৰত্তিযা সমং ৰা, ইতরদ্ৰযভাৰেন পৰত্তিযা ৰিসমং ৰা মঞ্ঞিতং নত্থি, সমানাদীসু কেন ৰাদং পটিসংযুজেয্য পটিপ্ফরেয্যাতি. ইমিস্সাপি গাথায নিদ্দেসো উত্তানো.

৭৯. ননু একংসেনেৰ এৰরূপো পুগ্গলো? ‘‘ওকং পহাযা’’তি গাথা. তত্থ ওকং পহাযাতি রূপধাত্ৰাদিৰিঞ্ঞাণস্সোকাসং তত্র ছন্দরাগপ্পহানেন ছড্ডেত্ৰা. অনিকেতসারীতি রূপনিমিত্তনিকেতাদীনি তণ্হাৰসেন অসরন্তো. গামে অকুব্বং মুনি সন্থৰানীতি গামে গিহিসন্থৰানি অকরোন্তো. কামেহি রিত্তোতি কামেসু ছন্দরাগাভাৰেন সব্বকামেহি পুথুভূতো. অপুরক্খরানোতি আযতিং অত্তভাৰং অনভিনিব্বত্তেন্তো. কথং ন ৰিগ্গয্হ জনেন কযিরাতি জনেন সদ্ধিং ৰিগ্গাহিককথং ন কথেয্য.

হালিদ্দকানীতি এৰংনামকো গহপতি. যেনাযস্মা মহাকচ্চানো তেনুপসঙ্কমীতি যেনাতি ভুম্মত্থে করণৰচনং. তস্মা যত্থ মহাকচ্চানো, তত্থ উপসঙ্কমীতি এৰমেত্থ অত্থো দট্ঠব্বো. যেন ৰা কারণেন মহাকচ্চানো দেৰমনুস্সেহি উপসঙ্কমিতব্বো, তেন কারণেন উপসঙ্কমীতি এৰমেত্থ অত্থো দট্ঠব্বো. কেন চ কারণেন মহাকচ্চানো উপসঙ্কমিতব্বো? নানপ্পকারগুণৰিসেসাধিগমাধিপ্পাযেন, সাদুফলূপভোগাধিপ্পাযেন দিজগণেহি নিচ্চফলিতমহারুক্খো ৰিয. উপসঙ্কমীতি চ গতোতি ৰুত্তং হোতি. উপসঙ্কমিত্ৰাতি উপসঙ্কমনপরিযোসানদীপনং. অথ ৰা এৰং গতো ততো আসন্নতরং ঠানং মহাকচ্চানস্স সমীপসঙ্খাতং গন্ত্ৰাতিপি ৰুত্তং হোতি.

অভিৰাদেত্ৰাতি পঞ্চপতিট্ঠিতেন ৰন্দিত্ৰা. ইদানি যেনত্থেন মহাকচ্চানস্স উপট্ঠানং আগতো, তং পুচ্ছিতুকামো দসনখসমোধানসমুজ্জলং অঞ্জলিং সিরসি পতিট্ঠাপেত্ৰা একমন্তং নিসীদি. একমন্তন্তি ভাৰনপুংসকনিদ্দেসো ‘‘ৰিসমং চন্দিমসূরিযা পরিৰত্তন্তী’’তিআদীসু (অ. নি. ৪.৭) ৰিয. তস্মা যথা নিসিন্নো একমন্তং নিসিন্নো হোতি, এৰং নিসীদীতি এৰমেত্থ অত্থো দট্ঠব্বো. ভুম্মত্থে ৰা এতং উপযোগৰচনং. নিসীদীতি নিসজ্জং কপ্পেসি. পণ্ডিতা হি দেৰমনুস্সা গরুট্ঠানিযং উপসঙ্কমিত্ৰা আসনকুসলতায একমন্তং নিসীদন্তি. অযঞ্চ গহপতি তেসং অঞ্ঞতরো, তস্মা একমন্তং নিসীদি.

কথং নিসিন্নো চ পন একমন্তং নিসিন্নো হোতীতি? ছ নিসজ্জদোসে ৰজ্জেত্ৰা. সেয্যথিদং? অতিদূরং অচ্চাসন্নং উপরিৰাতং উন্নতপ্পদেসং অতিসম্মুখং অতিপচ্ছাতি. অতিদূরে নিসিন্নো হি সচে কথেতুকামো হোতি, উচ্চাসদ্দেন কথেতব্বং হোতি. অচ্চাসন্নে নিসিন্নো সঙ্ঘট্টনং করোতি. উপরিৰাতে নিসিন্নো সরীরগন্ধেন বাধতি. উন্নতপ্পদেসে নিসিন্নো অগারৰং পকাসেতি. অতিসম্মুখা নিসিন্নো সচে দট্ঠুকামো হোতি, চক্খুনা চক্খুং আহচ্চ দট্ঠব্বং হোতি. অতিপচ্ছা নিসিন্নো সচে দট্ঠুকামো হোতি, গীৰং পসারেত্ৰা দট্ঠব্বং হোতি. তস্মা অযম্পি এতে ছ নিসজ্জদোসে ৰজ্জেত্ৰা নিসীদি. তেন ৰুত্তং – ‘‘একমন্তং নিসীদী’’তি.

এতদৰোচাতি এতং অৰোচ. ৰুত্তমিদং ভন্তে কচ্চান ভগৰতা অট্ঠকৰগ্গিযে মাগণ্ডিযপঞ্হেতি অট্ঠকৰগ্গিযম্হি মাগণ্ডিযপঞ্হো নাম অত্থি, তস্মিং পঞ্হে.

রূপধাতূতি রূপক্খন্ধো অধিপ্পেতো. রূপধাতুরাগৰিনিবন্ধন্তি রূপধাতুম্হি রাগেন ৰিনিবদ্ধং. ৰিঞ্ঞাণন্তি কম্মৰিঞ্ঞাণং. ওকসারীতি গেহসারী আলযসারী. কস্মা পনেত্থ ‘‘ৰিঞ্ঞাণধাতু খো গহপতী’’তি ন ৰুত্তন্তি? সম্মোহৰিঘাতত্থং. ‘‘ওকো’’তি হি অত্থতো পচ্চযো ৰুচ্চতি, পুরেজাতঞ্চ কম্মৰিঞ্ঞাণং পচ্ছাজাতস্স কম্মৰিঞ্ঞাণস্সপি ৰিপাকৰিঞ্ঞাণস্সপি, ৰিপাকৰিঞ্ঞাণঞ্চ ৰিপাকৰিঞ্ঞাণস্সপি কম্মৰিঞ্ঞাণস্সপি পচ্চযো হোতি, তস্মা ‘‘কতরং নু খো ইধ ৰিঞ্ঞাণ’’ন্তি সম্মোহো ভৰেয্য. তস্স ৰিঘাতত্থং তং অগ্গহেত্ৰা অসম্ভিন্নাৰ দেসনা কতাতি. অপিচ ৰিপাকআরম্মণৰসেন চতস্সো অভিসঙ্খারৰিঞ্ঞাণট্ঠিতিযোতি ৰুত্তাতি তা দস্সেতুম্পি ইধ ৰিঞ্ঞাণং ন গহিতং.

উপযুপাদানাতি তণ্হূপযদিট্ঠূপযৰসেন দ্ৰে উপযা, কামুপাদানাদীনি চত্তারি উপাদানানি চ. চেতসো অধিট্ঠানাভিনিৰেসানুসযাতি অকুসলচিত্তস্স অধিট্ঠানভূতা চেৰ অভিনিৰেসভূতা চ অনুসযভূতা চ. তথাগতস্সাতি সম্মাসম্বুদ্ধস্স. সব্বেসম্পি হি খীণাসৰানং এতে পহীনাৰ, সত্থু পন খীণাসৰভাৰো লোকে অতিপাকটোতি উপরিমকোটিযা এৰং ৰুত্তং. ৰিঞ্ঞাণধাতুযাতি ইধ ৰিঞ্ঞাণং কস্মা গহিতং? কিলেসপ্পহানদস্সনত্থং. কিলেসা হি ন কেৰলং চতূসুযেৰ খন্ধেসু পহীনা পহীযন্তি, পঞ্চসুপি পহীযন্তিযেৰাতি কিলেসপ্পহানদস্সনত্থং গহিতং. এৰং খো গহপতি অনোকসারী হোতীতি এৰং কম্মৰিঞ্ঞাণেন ওকং অসরন্তেন অনোকসারী নাম হোতি.

রূপনিমিত্তনিকেতৰিসারৰিনিবন্ধাতি রূপমেৰ কিলেসানং পচ্চযট্ঠেন নিমিত্তং, আরম্মণকিরিযসঙ্খাতেন নিৰাসট্ঠেন নিকেতন্তি রূপনিমিত্তনিকেতং. ৰিসারো চ ৰিনিবন্ধো চ ৰিসারৰিনিবন্ধা. উভযেনপি হি কিলেসানং পত্থটভাৰো চ ৰিনিবন্ধনভাৰো চ ৰুত্তো, রূপনিমিত্তনিকেতে ৰিসারৰিনিবন্ধাতি রূপনিমিত্তনিকেতৰিসারৰিনিবন্ধা, তস্মা রূপনিমিত্তনিকেতম্হি উপ্পন্নেন কিলেসৰিসারেন চেৰ কিলেসৰিনিবন্ধনেন চাতি অত্থো. নিকেতসারীতি ৰুচ্চতীতি আরম্মণকরণৰসেন নিৰাসট্ঠানট্ঠেন নিকেতসারীতি ৰুচ্চতি. পহীনাতি তে রূপনিমিত্তনিকেতে কিলেসৰিসারৰিনিবন্ধা পহীনা.

কস্মা পনেত্থ পঞ্চক্খন্ধা চ ‘‘ওকা’’তি ৰুত্তা, ছ আরম্মণানি ‘‘নিকেত’’ন্তি? ছন্দরাগস্স বলৰদুব্বলতায. সমানেপি হি এতেসং আলযট্ঠেন ৰিসযভাৰে ওকোতি নিপ্পরিযাযেন সুদ্ধং গেহমেৰ ৰুচ্চতি, নিকেতন্তি ‘‘অজ্জ অসুকট্ঠানে কীল়িস্সামা’’তি কতসঙ্কেতানং নিৰাসনট্ঠানং উয্যানাদি. তত্থ যথা পুত্তদারধনধঞ্ঞপুণ্ণগেহে ছন্দরাগো বলৰা হোতি, এৰং অজ্ঝত্তিকেসু খন্ধেসু. যথা পন উয্যানট্ঠানাদীসু ততো দুব্বলতরো হোতি, এৰং বাহিরেসু ছসু আরম্মণেসূতি ছন্দরাগস্স বলৰদুব্বলতায এৰং দেসনা কতাতি ৰেদিতব্বা.

সুখিতেসু সুখিতোতি উপট্ঠাকেসু ধনধঞ্ঞলাভাদিৰসেন সুখিতেসু ‘‘ইদানাহং মনাপং চীৰরং মনাপং ভোজনং লভিস্সামী’’তি গেহস্সিতসুখেন সুখিতো হোতি, তেহি পত্তসম্পত্তিং অত্তনা অনুভৰমানো ৰিয চরতি. দুক্খিতেসু দুক্খিতোতি তেসং কেনচিদেৰ কারণেন দুক্খে উপ্পন্নে সযং দ্ৰিগুণেন দুক্খেন দুক্খিতো হোতি. কিচ্চকরণীযেসূতি কিচ্চসঙ্খাতেসু করণীযেসু. ৰোযোগং আপজ্জতীতি উপযোগং সযং তেসং কিচ্চানং কত্তব্বতং আপজ্জতি.

কামেসূতি ৰত্থুকামেসু. এৰং খো গহপতি কামেহি অরিত্তো হোতীতি এৰং কিলেসকামেহি অরিত্তো হোতি.

অন্তো কামানং ভাৰেন অতুচ্ছো. সুক্কপক্খো তেসং অভাৰেন রিত্তো তুচ্ছোতি ৰেদিতব্বো.

পুরক্খরানোতি ৰট্টং পুরতো কুরুমানো. এৰংরূপো সিযন্তিআদীসু দীঘরস্সকাল়োদাতাদীসু রূপেসু এৰংরূপো নাম ভৰেয্যন্তি পত্থেতি. সুখাদীসু ৰেদনাসু এৰংৰেদনো নাম. নীলসঞ্ঞাদীসু সঞ্ঞাসু এৰংসঞ্ঞো নাম. পুঞ্ঞাভিসঙ্খারাদীসু সঙ্খারেসু এৰংসঙ্খারো নাম. চক্খুৰিঞ্ঞাণাদীসু ৰিঞ্ঞাণেসু এৰংৰিঞ্ঞাণো নাম ভৰেয্যন্তি পত্থেতি.

অপুরক্খরানোতি ৰট্টং পুরতো অকুরুমানো. সহিতং মে, অসহিতং তেতি তুয্হং ৰচনং অসহিতং অসিলিট্ঠং, ময্হং সহিতং সিলিট্ঠং মধুরং মধুরপানসদিসং. অধিচিণ্ণং তে ৰিপরাৰত্তন্তি যং তুয্হং দীঘেন কালেন পরিচিতং সুপ্পগুণং, তং মম ৰাদং আগম্ম সব্বং খণেন ৰিপরাৰত্তং নিৰত্তং. আরোপিতো তে ৰাদোতি তুয্হং দোসো মযা আরোপিতো. চর ৰাদপ্পমোক্খাযাতি তং তং আচরিযং উপসঙ্কমিত্ৰা উত্তরং পরিযেসন্তো ইমস্স ৰাদস্স মোক্খায চর আহিণ্ড. নিব্বেঠেহি ৰা সচে পহোসীতি অথ সযমেৰ পহোসি, ইধেৰ নিব্বেঠেহীতি.

৮০. সো এৰরূপো ‘‘যেহি ৰিৰিত্তো’’তি গাথা. তত্থ যেহীতি যেহি দিট্ঠিগতাদীহি. ৰিৰিত্তো ৰিচরেয্যাতি রিত্তো চরেয্য. ন তানি উগ্গয্হ ৰদেয্য নাগোতি ‘‘আগুং ন করোতী’’তিআদিনা (চূল়নি. ভদ্রাৰুধমাণৰপুচ্ছানিদ্দেস ৭০; পারাযনানুগীতিনিদ্দেস ১০২) নযেন নাগো তানি দিট্ঠিগতানি উগ্গহেত্ৰা ন চরেয্য. এলম্বুজন্তি এলসঞ্ঞিতে অম্বুম্হি জাতং কণ্টকনাল়ং ৰারিজং, পদুমন্তি ৰুত্তং হোতি. যথা জলেন পঙ্কেন চনূপলিত্তন্তি তং পদুমং যথা জলেন চ পঙ্কেন চ অনুপলিত্তং হোতি. এৰং মুনি সন্তিৰাদো অগিদ্ধোতি এৰং অজ্ঝত্তসন্তিৰাদো মুনি গেধাভাৰেন অগিদ্ধো. কামে চ লোকে চ অনূপলিত্তোতি দুৰিধেপি কামে অপাযাদিকে চ লোকে দ্ৰীহি সিলেসেহি অনুপলিত্তো হোতি.

আগুং ন করোতীতি অকুসলাদিদোসং ন করোতি. ন গচ্ছতীতি অগতিৰসেন ন গচ্ছতি. নাগচ্ছতীতি পহীনকিলেসে ন উপেতি. পাপকাতি লামকা. অকুসলাতি অকোসল্লসম্ভূতা. তে কিলেসে ন পুনেতীতি যে কিলেসা পহীনা, তে কিলেসে পুন ন এতি. ন পচ্চেতীতি পটি ন উপেতি. ন পচ্চাগচ্ছতীতি পুন ন নিৰত্ততি.

খরদণ্ডোতি খরপত্তদণ্ডো ফরুসদণ্ডো. চত্তগেধোতি ৰিস্সট্ঠগেধো. ৰন্তগেধোতি ৰমিতগেধো. মুত্তগেধোতি ছিন্নবন্ধনগেধো. পহীনগেধোতি পজহিতগেধো. পটিনিস্সট্ঠগেধোতি যথা ন পুন চিত্তং আরুহতি, এৰং পটিৰিস্সজ্জিতগেধো. উপরি ৰীতরাগাদীসুপি এসেৰ নযো. সব্বানেৰ তানি গহিতগ্গহণস্স ৰিস্সট্ঠভাৰৰেৰচনানি.

৮১. কিঞ্চ ভিয্যো – ‘‘ন ৰেদগূ’’তি গাথা. তত্থ ন ৰেদগূ দিট্ঠিযাযকোতি চতুমগ্গৰেদগূ মাদিসো দিট্ঠিযাযকো ন হোতি, দিট্ঠিযা গচ্ছন্তো ৰা, তং সারতো পচ্চেন্তো ৰা ন হোতি. তত্থ ৰচনত্থো – যাযতীতি যাযকো. করণৰচনেন দিট্ঠিযা যাযতীতি দিট্ঠিযাযকো. উপযোগত্থে সামিৰচনেনপি দিট্ঠিযা যাতীতিপি দিট্ঠিযাযকো. ন মুতিযা স মানমেতীতি মুতরূপাদিভেদায মুতিযাপি সো মানং ন এতি. ন হি তম্মযো সোতি তণ্হাদিট্ঠিৰসেন তম্মযো হোতি তপ্পরাযণো, অযং পন ন তাদিসো. ন কম্মুনা নোপি সুতেন নেয্যোতি পুঞ্ঞাভিসঙ্খারাদিনা কম্মুনা ৰা, সুতসুদ্ধিআদিনা সুতেন ৰা সো নেতব্বো ন হোতি. অনূপনীতো স নিৰেসনেসূতি সো দ্ৰিন্নম্পি উপযানং পহীনত্তা সব্বেসু তণ্হাদিট্ঠিনিৰেসনেসু অনুপনীতো.

মুতরূপেন ৰাতি এত্থ মুতরূপং নাম গন্ধরসফোট্ঠব্বানি. মানং নেতীতি অস্মিমানং ন এতি. ন উপেতীতি সমীপং ন এতি. ন উপগচ্ছতীতি উপগন্ত্ৰা ন তিট্ঠতি. তম্মযোতি তপ্পকতো.

৮২. তস্স চ এৰংৰিধস্স ‘‘সঞ্ঞাৰিরত্তস্সা’’তি গাথা. তত্থ সঞ্ঞাৰিরত্তস্সাতি নেক্খম্মসঞ্ঞাপুব্বঙ্গমায ভাৰনায পহীনকামাদিসঞ্ঞস্স. ইমিনা পদেন উভতোভাগৰিমুত্তো সমথযানিকো অধিপ্পেতো. পঞ্ঞাৰিমুত্তস্সাতি ৰিপস্সনাপুব্বঙ্গমায ভাৰনায সব্বকিলেসেহি ৰিমুত্তস্স. ইমিনা সুক্খৰিপস্সকো অধিপ্পেতো. সঞ্ঞঞ্চ দিট্ঠিঞ্চ যে অগ্গহেসুং, তে ঘট্টমানা ৰিচরন্তি লোকেতি যে পন কামসঞ্ঞাদিকং সঞ্ঞং অগ্গহেসুং, তে ৰিসেসতো গহট্ঠা কামাধিকরণং, যে চ দিট্ঠিং অগ্গহেসুং, তে ৰিসেসতো পব্বজিতা ধম্মাধিকরণং অঞ্ঞমঞ্ঞং ঘট্টেন্তা ৰিচরন্তীতি.

যো সমথপুব্বঙ্গমং অরিযমগ্গং ভাৰেতীতি যো পুগ্গলো সমথপুব্বঙ্গমং পুরেচারিকং কত্ৰা সহৰিপস্সনং অরিযমগ্গং ভাৰেতি, পঠমং সমাধিং উপ্পাদেত্ৰা পচ্ছা সহৰিপস্সনং অরিযমগ্গং উপ্পাদেতীতি অত্থো. তস্স আদিতোতি তস্স পুগ্গলস্স পঠমজ্ঝানাদিতো. উপাদাযাতি পটিচ্চ আগম্ম. গন্থা ৰিক্খম্ভীতা হোন্তীতি গন্থা দূরীকতা ভৰন্তি. অরহত্তে পত্তেতি অরহত্তফলং পত্তে. অরহতোতি অরহত্তফলে ঠিতস্স. গন্থা চ মোহা চাতিআদযো সব্বে কিলেসা পহীনা হোন্তি.

যো ৰিপস্সনাপুব্বঙ্গমং অরিযমগ্গং ভাৰেতীতি যো পুগ্গলো ৰিপস্সনং পুব্বঙ্গমং পুরেচারিকং কত্ৰা অরিযমগ্গং ভাৰেতি, পঠমং ৰিপস্সনং উপ্পাদেত্ৰা পচ্ছা অরিযমগ্গসম্পযুত্তং সমাধিং ভাৰেতীতি অত্থো. তস্স আদিতো উপাদাযাতি তস্স পুগ্গলস্স ৰিপস্সনতো পট্ঠায ৰিপস্সনং পটিচ্চ. মোহা ৰিক্খম্ভিতা হোন্তীতি এত্থ ৰিক্খম্ভিতাতি দূরং পাপিতা সঞ্ঞাৰসেন. ঘট্টেন্তীতি যে কামসঞ্ঞাদিং গণ্হন্তি, তে সঞ্ঞাৰসেন পীল়েন্তি. সঙ্ঘট্টেন্তীতি ততো ততো পীল়েন্তি. ইদানি ঘট্টেন্তে দস্সেতুং ‘‘রাজানোপি রাজূহি ৰিৰদন্তী’’তিআদিনা নযেন ৰিত্থারো ৰুত্তো. অঞ্ঞমঞ্ঞং পাণীহিপি উপক্কমন্তীতি এত্থ অঞ্ঞমঞ্ঞং হত্থেহি পহরন্তি. লেড্ডূহীতি কপালখণ্ডেহি. দণ্ডেহীতি অড্ঢদণ্ডকেহি. সত্থেহীতি উভতোধারেহি সত্থেহি.

অভিসঙ্খারানং অপ্পহীনত্তাতি পুঞ্ঞাদিঅভিসঙ্খারানং অপ্পহীনভাৰেন. গতিযা ঘট্টেন্তীতি গন্তব্বায পতিট্ঠাভূতায গতিযা পীল়েন্তি ঘট্টনং আপজ্জন্তি. নিরযাদীসুপি এসেৰ নযো. সেসমেত্থ ৰুত্তনযত্তা উত্তানমেৰ.

সদ্ধম্মপ্পজ্জোতিকায মহানিদ্দেসট্ঠকথায

মাগণ্ডিযসুত্তনিদ্দেসৰণ্ণনা নিট্ঠিতা.

১০. পুরাভেদসুত্তনিদ্দেসৰণ্ণনা

৮৩. দসমে পুরাভেদসুত্তনিদ্দেসে কথংদস্সীতি ইমস্স সুত্তস্স ইতো পরেসঞ্চ পঞ্চন্নং কলহৰিৰাদচূল়ব্যূহমহাব্যূহতুৰটকঅত্তদণ্ডসুত্তানং সম্মাপরিব্বাজনীযসুত্তৰণ্ণনাযং (সু. নি. অট্ঠ. ২.৩৬২ আদযো) ৰুত্তনযেনেৰ সামঞ্ঞতো উপ্পত্তি ৰেদিতব্বা. ৰিসেসতো পন যথেৰ তস্মিং মহাসমযে রাগচরিতদেৰতানং সপ্পাযৰসেন ধম্মং দেসেতুং নিম্মিতবুদ্ধেন অত্তানং পুচ্ছাপেত্ৰা সম্মাপরিব্বাজনীযসুত্তন্ত- (সু. নি. ৩৬১ আদযো) মভাসি, এৰং তস্মিংযেৰ মহাসমযে ‘‘কিং নু খো পুরা সরীরভেদা কত্তব্ব’’ন্তি উপ্পন্নচিত্তানং দেৰতানং চিত্তং ঞত্ৰা তাসং অনুগ্গহত্থং অড্ঢতেল়সভিক্খুসতপরিৰারং নিম্মিতবুদ্ধং আকাসেন আনেত্ৰা তেন অত্তানং পুচ্ছাপেত্ৰা ইমং সুত্তমভাসি.

কথং? বুদ্ধা নাম মহন্তা এতে সত্তৰিসেসা, যং সদেৰকস্স লোকস্স দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা ন কিঞ্চি কত্থচি নীলাদিৰসেন ৰিভত্তরূপারম্মণেসু ৰিভত্তরূপারম্মণং ৰা, ভেরিসদ্দাদিৰসেন ৰিভত্তসদ্দারম্মণাদীসু সদ্দাদিআরম্মণং ৰা অত্থি, যং এতেসং ঞাণমুখে আপাথং নাগচ্ছতি. যথাহ – ‘‘যং, ভিক্খৰে, সদেৰকস্স লোকস্স…পে… সদেৰমনুস্সায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তমহং জানামি তমহং অব্ভঞ্ঞাসি’’ন্তি (অ. নি. ৪.২৪). এৰং সব্বত্থ অপ্পটিহতঞাণো ভগৰা সব্বাপি তা দেৰতা ভব্বাভব্বৰসেন দ্ৰে কোট্ঠাসে অকাসি. ‘‘কম্মাৰরণেন ৰা সমন্নাগতা’’তিআদিনা (পু. প. ১২) হি নযেন ৰুত্তা সত্তা অভব্বা নাম. তে একৰিহারে ৰসন্তেপি বুদ্ধা ন ওলোকেন্তি. ৰিপরীতা পন ভব্বা নাম. তে দূরে ৰসন্তেপি গন্ত্ৰা সঙ্গণ্হন্তি. তস্মিং দেৰতাসন্নিপাতে যে অভব্বা, তে পহায ভব্বে পরিগ্গহেসি. পরিগ্গহেত্ৰা ‘‘এত্তকা এত্থ রাগচরিতা, এত্তকা দোসাদিচরিতা’’তি চরিযৰসেন ছ কোট্ঠাসে অকাসি. অথ নেসং সপ্পাযধম্মদেসনং উপধারেন্তো ‘‘রাগচরিতানং দেৰানং সম্মাপরিব্বাজনীযসুত্তং (সু. নি. ৩৬১ আদযো) কথেস্সামি, দোসচরিতানং কলহৰিৰাদসুত্তং (সু. নি. ৮৬৮ আদযো), মোহচরিতানং মহাব্যূহসুত্তং (সু. নি. ৯০১ আদযো), ৰিতক্কচরিতানং চূল়ব্যূহসুত্তং (সু. নি. ৮৮৪ আদযো), সদ্ধাচরিতানং তুৰটকসুত্তং (সু. নি. ৯২১ আদযো), বুদ্ধিচরিতানং পুরাভেদসুত্তং (সু. নি. ৮৫৪ আদযো) কথেস্সামী’’তি দেসনং ৰৰত্থাপেত্ৰা পুন তং পরিসং মনসাকাসি ‘‘অত্তজ্ঝাসযেন নু খো জানেয্য, পরজ্ঝাসযেন, অট্ঠুপ্পত্তিকেন, পুচ্ছাৰসেনা’’তি. ততো ‘‘পুচ্ছাৰসেন জানেয্যা’’তি ঞত্ৰা ‘‘অত্থি নু খো কোচি দেৰতানং অজ্ঝাসযং গহেত্ৰা চরিযৰসেন পঞ্হং পুচ্ছিতুং সমত্থো’’তি ‘‘তেসু পঞ্চসতেসু ভিক্খূসু একোপি ন সক্কোতী’’তি অদ্দস. ততো অসীতিমহাসাৰকে, দ্ৰে অগ্গসাৰকে চ সমন্নাহরিত্ৰা ‘‘তেপি ন সক্কোন্তী’’তি দিস্ৰা চিন্তেসি – ‘‘সচে পচ্চেকবুদ্ধো ভৰেয্য, সক্কুণেয্য নু খো’’তি. ‘‘সোপি ন সক্কুণেয্যো’’তি ঞত্ৰা ‘‘সক্কসুযামাদীসু কোচি সক্কুণেয্যা’’তি সমন্নাহরি. সচে হি তেসু কোচি সক্কুণেয্য, তং পুচ্ছাপেত্ৰা অত্তনা ৰিস্সজ্জেয্য. ন পন তেসুপি কোচি সক্কোতি. অথস্স এতদহোসি – ‘‘মাদিসো বুদ্ধোযেৰ সক্কুণেয্য, অত্থি পন কত্থচি অঞ্ঞো বুদ্ধো’’তি অনন্তাসু লোকধাতূসু অনন্তঞাণং পত্থরিত্ৰা লোকং ওলোকেন্তো ন অঞ্ঞং বুদ্ধং অদ্দস. অনচ্ছরিযঞ্চেতং, ইদানি অত্তনা সমং ন পস্সেয্য, যো জাতদিৰসেপি ব্রহ্মজালৰণ্ণনাযং (দী. নি. অট্ঠ. ১.৭) ৰুত্তনযেন অত্তনা সমং অপস্সন্তো ‘‘অগ্গোহমস্মি লোকস্সা’’তি (দী. নি. ২.৩১) অপ্পটিৰত্তিযং সীহনাদং নদি. এৰং অঞ্ঞং অত্তনা সমং অপস্সিত্ৰা চিন্তেসি ‘‘সচে অহং পুচ্ছিত্ৰা অহমেৰ ৰিস্সজ্জেয্যং, এৰং তা দেৰতা ন সক্খিস্সন্তি পটিৰিজ্ঝিতুং. অঞ্ঞস্মিং পন বুদ্ধেযেৰ পুচ্ছন্তে মযি চ ৰিস্সজ্জন্তে অচ্ছেরকং ভৰিস্সতি, সক্খিস্সন্তি চ দেৰতা পটিৰিজ্ঝিতুং, তস্মা নিম্মিতবুদ্ধং মাপেস্সামী’’তি অভিঞ্ঞাপাদকং ঝানং সমাপজ্জিত্ৰা ৰুট্ঠায ‘‘পত্তচীৰরগ্গহণং আলোকিতং ৰিলোকিতং সমিঞ্জিতং পসারিতঞ্চ মম সদিসংযেৰ হোতূ’’তি কামাৰচরচিত্তেহি পরিকম্মং কত্ৰা ‘‘পাচীনযুগন্ধরপরিক্খেপতো উল্লঙ্ঘযমানং চন্দমণ্ডলং ভিন্দিত্ৰা নিক্খমন্তো ৰিয আগচ্ছতূ’’তি রূপাৰচরচিত্তেন অধিট্ঠাসি. দেৰসঙ্ঘো তং দিস্ৰা ‘‘অঞ্ঞোপি নু খো ভো, চন্দো উগ্গতো’’তি আহ. অথ চন্দং ওহায আসন্নতরে জাতে ‘‘ন চন্দো, সূরিযো উগ্গতো’’তি. পুন আসন্নতরে জাতে ‘‘ন সূরিযো, দেৰৰিমানং এত’’ন্তি. পুন আসন্নতরে জাতে ‘‘ন দেৰৰিমানং, দেৰপুত্তো এসো’’তি. পুন আসন্নতরে জাতে ‘‘ন দেৰপুত্তো, মহাব্রহ্মা এসো’’তি. পুন আসন্নতরে জাতে ‘‘ন মহাব্রহ্মা, অপরোপি ভো বুদ্ধো আগতো’’তি আহ.

তত্থ পুথুজ্জনদেৰতা চিন্তযিংসু – ‘‘একবুদ্ধস্স তাৰ অযং দেৰতাসন্নিপাতো. দ্ৰিন্নং কীৰমহন্তো ভৰিস্সতী’’তি. অরিযদেৰতা চিন্তযিংসু – ‘‘একিস্সা লোকধাতুযা দ্ৰে বুদ্ধা নাম নত্থি, অদ্ধা ভগৰা অত্তনা সদিসং অঞ্ঞং একং বুদ্ধং নিম্মিনী’’তি. অথস্স দেৰসঙ্ঘস্স পস্সন্তস্সেৰ নিম্মিতবুদ্ধো আগন্ত্ৰা দসবলং অৰন্দিত্ৰাৰ সম্মুখট্ঠানে সমসমং কত্ৰা মাপিতে আসনে নিসীদি. ভগৰতো বাত্তিংসমহাপুরিসলক্খণানি, নিম্মিতস্সাপি, ভগৰতো সরীরা ছব্বণ্ণরস্মিযো নিক্খমন্তি, নিম্মিতস্সাপি, ভগৰতো সরীররস্মিযো নিম্মিতসরীরে পটিহঞ্ঞন্তি, নিম্মিতস্স রস্মিযো ভগৰতো কাযে পটিহঞ্ঞন্তি. তা দ্ৰিন্নম্পি বুদ্ধানং সরীরতো উগ্গম্ম ভৰগ্গং আহচ্চ ততো ততো পটিনিৰত্তিত্ৰা দেৰতানং মত্থকমত্থকপরিযন্তেন ওতরিত্ৰা চক্কৰাল়মুখৰট্টিযং পতিট্ঠহিংসু. সকলচক্কৰাল়গব্ভং সুৰণ্ণমযৰঙ্কগোপানসিৰিনদ্ধমিৰ চেতিযঘরং ৰিরোচিত্থ. দসসহস্সচক্কৰাল়দেৰতা একচক্কৰাল়ে রাসিভূতা দ্ৰিন্নং বুদ্ধানং রস্মিঅব্ভন্তরং পৰিসিত্ৰা অট্ঠংসু. নিম্মিতো নিসীদন্তোযেৰ ‘‘কথংদস্সী কথংসীলো, উপসন্তোতি ৰুচ্চতী’’তিআদিনা নযেন অধিপঞ্ঞাদিকং পুচ্ছন্তো গাথমাহ.

তত্থ পুচ্ছায তাৰ সো নিম্মিতো কথংদস্সীতি অধিপঞ্ঞং, কথংসীলোতি অধিসীলং, উপসন্তোতি অধিচিত্তং পুচ্ছতি. সেসং পাকটমেৰ.

নিম্মিতবুদ্ধাদিৰিভাৰনত্থং পেটকে –

‘‘উপেতি ধম্মং পরিপুচ্ছমানো, কুসলং অত্থুপসঞ্হিতং;

ন জীৰতি ন নিব্বুতো ন মতো, তং পুগ্গলং কতমং ৰদন্তি বুদ্ধা. (পরি. ৪৭৯);

‘‘সংসারখীণো ন চ ৰন্তরাগো, ন চাপি সেক্খো ন চ দিট্ঠধম্মো;

অখীণাসৰো অন্তিমদেহধারী, তং পুগ্গলং কতমং ৰদন্তি বুদ্ধা.

‘‘ন দুক্খসচ্চেন সমঙ্গিভূতো, ন মগ্গসচ্চেন কুতো নিরোধো;

সমুদযসচ্চতো সুৰিদূরৰিদূরো, তং পুগ্গলং কতমং ৰদন্তি বুদ্ধা.

‘‘অহেতুকো নোপি চ রূপনিস্সিতো, অপচ্চযো নোপি চ সো অসঙ্খতো;

অসঙ্খতারম্মণো নোপি চ রূপী, তং পুগ্গলং কতমং ৰদন্তি বুদ্ধা’’তি. –

ৰুত্তং.

তত্থ পঠমগাথা নিম্মিতবুদ্ধং সন্ধায, দুতিযগাথা পচ্ছিমভৰিকবোধিসত্তং সন্ধায, ততিযগাথা অরহত্তফলট্ঠং সন্ধায, চতুত্থগাথা অরূপে নিব্বানপচ্চৰেক্খণমনোদ্ৰারপুরেচারিকচিত্তসমঙ্গিং সন্ধায ৰুত্তাতি ঞাতব্বা. কীদিসেন দস্সনেনাতি কীদিসৰসেন দস্সনেন. কিংসণ্ঠিতেনাতি কিংসরিক্খেন. কিংপকারেনাতি কিংৰিধেন. কিংপটিভাগেনাতি কিংআকারেন.

যং পুচ্ছামীতি যং পুগ্গলং পুচ্ছামি, তং ময্হং ৰিযাকরোহি. যাচামীতি আযাচামি. অজ্ঝেসামীতি আণাপেমি. পসাদেমীতি তৰ সন্তানে সোমনস্সং উপ্পাদেমি. ব্রূহীতি নিদ্দেসস্স উদ্দেসপদং. আচিক্খাতি দেসেতব্বানং ‘‘ইমানি নামানী’’তি নামৰসেন কথেহি. দেসেহীতি দস্সেহি. পঞ্ঞপেহীতি জানাপেহি. ঞাণমুখৰসেন হি অপ্পনং ঠপেন্তো ‘‘পঞ্ঞপেহী’’তি ৰুচ্চতি. পট্ঠপেহীতি পঞ্ঞাপেহি, পৰত্তাপেহীতি অত্থো. ঞাণমুখে ঠপেহীতি ৰা. ৰিৰরাতি ৰিৰটং করোহি, ৰিৰরিত্ৰা দস্সেহীতি অত্থো. ৰিভজাতি ৰিভাগকিরিযায ৰিভাৰেন্তো দস্সেহীতি অত্থো. উত্তানীকরোহীতি পাকটভাৰং করোহি.

অথ ৰা আচিক্খাতি দেসনাদীনং ছন্নং পদানং মূলপদং. দেসনাদীনি ছ পদানি এতস্স অত্থস্স ৰিৰরণত্থং ৰুত্তানি. তত্থ দেসেহীতি উগ্ঘটিতঞ্ঞূনং ৰসেন সঙ্খেপতো পঠমং উদ্দেসৰসেন দেসেহি. উগ্ঘটিতঞ্ঞূ হি সঙ্খেপেন ৰুত্তং পঠমং ৰুত্তঞ্চ পটিৰিজ্ঝন্তি. পঞ্ঞপেহীতি ৰিপঞ্চিতঞ্ঞূনং ৰসেন তেসং চিত্ততোসনেন বুদ্ধিনিসানেন চ পঠমং সংখিত্তস্স ৰিত্থারতো নিদ্দেসৰসেনেৰ পঞ্ঞপেহি. পট্ঠপেহীতি তেসংযেৰ নিদ্দিট্ঠস্স নিদ্দেসস্স পটিনিদ্দেসৰসেন ৰিত্থারিতৰসেন ঠপেতি পট্ঠপেহি. ৰিৰরাতি নিদ্দিট্ঠস্সপি পুনপ্পুনং ৰচনেন ৰিৰরাহি. ৰিভজাতি পুনপ্পুনং ৰুত্তস্সাপি ৰিভাগকরণেন ৰিভজাহি. উত্তানীকরোহীতি ৰিৰটস্স ৰিত্থারতরৰচনেন ৰিভত্তস্স চ নিদস্সনৰচনেন উত্তানিং করোহি. অযং দেসনা নেয্যানম্পি পটিৰেধায হোতীতি.

৮৪. ৰিস্সজ্জনে পন ভগৰা সরূপেন অধিপঞ্ঞাদীনি অৰিস্সজ্জেত্ৰাৰ অধিপঞ্ঞাদিপ্পভাৰেন যেসং কিলেসানং উপসমা ‘‘উপসন্তো’’তি ৰুচ্চতি, নানাদেৰতানং আসযানুলোমেন তেসং উপসমমেৰ দীপেন্তো ‘‘ৰীততণ্হো’’তিআদিকা গাথাযো অভাসি. তত্থ আদিতো অট্ঠন্নং গাথানং ‘‘তং ব্রূমি উপসন্তো’’তি ইমায গাথায সম্বন্ধো ৰেদিতব্বো, ততো পরাসং ‘‘স ৰে সন্তোতি ৰুচ্চতী’’তি ইমিনা সব্বপচ্ছিমেন পদেন.

অনুপদৰণ্ণনানযো – ৰীততণ্হো পুরাভেদাতি যো সরীরভেদা পুব্বমেৰ পহীনতণ্হো. পুব্বমন্তমনিস্সিতোতি অতীতদ্ধাদিভেদং পুব্বঅন্তং অনিস্সিতো. ৰেমজ্ঝে নুপসঙ্খেয্যোতি পচ্চুপ্পন্নেপি অদ্ধনি ‘‘রত্তো’’তিআদিনা নযেন ন উপসঙ্খাতব্বো. তস্স নত্থি পুরক্খতন্তি তস্স অরহতো দ্ৰিন্নং পুরেক্খারানং অভাৰা অনাগতে অদ্ধনি পুরক্খতমপি নত্থি, তং ব্রূমি উপসন্তোতি এৰমেত্থ যোজনা ৰেদিতব্বা. এস নযো সব্বত্থ.

পুরা কাযস্স ভেদাতি করজকাযস্স ভেদতো পুব্বেযেৰ. অত্তভাৰস্সাতি সকলত্তভাৰস্স. কল়েৰরস্স নিক্খেপাতি কল়েৰরস্স নিক্খেপতো সরীরস্স ঠপনতো. জীৰিতিন্দ্রিযস্স উপচ্ছেদাতি দুৰিধস্স জীৰিতিন্দ্রিযস্স উপচ্ছেদতো পুব্বমেৰ.

পুব্বন্তো ৰুচ্চতি অতীতো অদ্ধাতি পুব্বসঙ্খাতো অন্তো কোট্ঠাসো ‘‘অতীতো অদ্ধাতি, অতিক্কন্তো কালো’’তি কথীযতি. অতীতং অদ্ধানং আরব্ভাতি অতীতকালং পটিচ্চ তণ্হা পহীনা.

অপরম্পি ভদ্দেকরত্তপরিযাযং (ম. নি. ৩.২৭২ আদযো) দস্সেন্তো ‘‘অথ ৰা’’তিআদিমাহ. তত্থ এৰংরূপো অহোসিন্তি কাল়োপি সমানো ইন্দনীলমণিৰণ্ণো অহোসিন্তি এৰং মনুঞ্ঞরূপৰসেনেৰ এৰংরূপো অহোসিং. কুসলসুখসোমনস্সৰেদনাৰসেনেৰ এৰংৰেদনো. তং সম্পযুত্তানংযেৰ সঞ্ঞাদীনং ৰসেন এৰংসঞ্ঞো. এৰংসঙ্খারো. এৰংৰিঞ্ঞাণো অহোসিং অতীতমদ্ধানন্তি তত্থ নন্দিং ন সমন্নানেতীতি তেসু রূপাদীসু তণ্হং ৰা তণ্হাসম্পযুত্তদিট্ঠিং ৰা নানুপৰত্তযতি. অপরেন পরিযাযেন মহাকচ্চানভদ্দেকরত্তপরিযাযং দস্সেন্তো ‘‘অথ ৰা ইতি মে চক্খু অহোসী’’তিআদিমাহ. তত্থ চক্খূতি চক্খুপসাদো. রূপাতি চতুসমুট্ঠানিকরূপা. ইমিনা নযেন সেসাযতনানিপি ৰেদিতব্বানি. ৰিঞ্ঞাণন্তি নিস্সযৰিঞ্ঞাণং. ন তদভিনন্দতীতি তং চক্খুঞ্চেৰ রূপঞ্চ তণ্হাদিট্ঠিৰসেন নাভিনন্দতি. ইতি মে মনো অহোসি ইতি ধম্মাতি এত্থ পন মনোতি ভৰঙ্গচিত্তং. ধম্মাতি তেভূমকধম্মারম্মণং. হসিতলপিতকীল়িতানীতি দন্তৰিদংসকহসিতঞ্চ ৰাচালপিতঞ্চ কাযকীল়াদিকীল়িতঞ্চাতি হসিতলপিতকীল়িতানি. ন তদস্সাদেতীতি তানি হসিতাদীনি নাভিনন্দতি. ন তং নিকামেতীতি কন্তং ন করোতি. ন চ তেন ৰিত্তিং আপজ্জতীতি তেন চ তুট্ঠিং ন পাপুণাতি.

তং তং পচ্চযং পটিচ্চ উপ্পন্নোতি পচ্চুপ্পন্নো. রত্তোতি নুপসঙ্খেয্যোতি রাগেন রত্তোতি গণনং ন উপনেতব্বো. উপরিপি এসেৰ নযো. এৰরূপো সিযন্তিআদীসু পণীতমনুঞ্ঞরূপাদিৰসেনেৰ তণ্হাদিট্ঠিপৰত্তনসঙ্খাতা নন্দী সমন্নানযনা ৰেদিতব্বা. ন পণিদহতীতি পত্থনাৰসেন ন ঠপেতি. অপ্পণিধানপচ্চযাতি ন পত্থনাঠপনকারণেন.

৮৫. অসন্তাসীতি তেন তেন অলাভতো অসন্তসন্তো. অৰিকত্থীতি সীলাদীহি অৰিকত্থনসীলো. অকুক্কুচোতি হত্থকুক্কুচ্চাদিৰিরহিতো. মন্তভাণীতি মন্তায পরিগ্গহেত্ৰা ৰাচং ভাসিতা. অনুদ্ধতোতি উদ্ধচ্চৰিরহিতো. স ৰে ৰাচাযতোতি সো ৰাচায যতো সংযতো চতুদোসৰিরহিতং ৰাচং ভাসিতা হোতি.

অক্কোধনোতি যঞ্হি খো ৰুত্তন্তি ‘‘ন কোধনো অকোধনো কোধৰিরহিতো’’তি যং কথিতং, তং পঠমং তাৰ কোধং কথেতুকামো ‘‘অপিচ কোধো তাৰ ৰত্তব্বো’’তি আহ. কোধো তাৰ ৰত্তব্বোতি পঠমং কোধো কথেতব্বো. দসহাকারেহি কোধো জাযতীতি দসহি কারণেহি কোধো উপ্পজ্জতি. অনত্থং মে অচরীতি অৰড্ঢিং মে অকাসি, ইমিনা উপাযেন সব্বপদেসু অত্থো ৰেদিতব্বো. অট্ঠানে ৰা পন কোধো জাযতীতি অকারণে কোধো উপ্পজ্জতি. একচ্চো হি ‘‘দেৰো অতিৰস্সতী’’তি কুপ্পতি, ‘‘ন ৰস্সতী’’তি কুপ্পতি, ‘‘সূরিযো তপ্পতী’’তি কুপ্পতি, ‘‘ন তপ্পতী’’তি কুপ্পতি, ৰাতে ৰাযন্তেপি কুপ্পতি, অৰাযন্তেপি কুপ্পতি, সম্মজ্জিতুং অসক্কোন্তো বোধিপণ্ণানং কুপ্পতি, চীৰরং পারুপিতুং অসক্কোন্তো ৰাতস্স কুপ্পতি, উপক্খলিত্ৰা খাণুকস্স কুপ্পতি. ইদং সন্ধায ৰুত্তং – ‘‘অট্ঠানে ৰা পন কোধো জাযতী’’তি. তত্থ হেট্ঠা নৰসু ঠানেসু সত্তে আরব্ভ উপ্পন্নত্তা কম্মপথভেদো হোতি.

অট্ঠানঘাতো পন সঙ্খারেসু উপ্পন্নো কম্মপথভেদং ন করোতি. চিত্তং আঘাতেন্তো উপ্পন্নোতি চিত্তস্স আঘাতো. ততো বলৰতরো পটিঘাতো. পটিহঞ্ঞনৰসেন পটিঘং. পটিৰিরুজ্ঝতীতি পটিৰিরোধো. কুপ্পনৰসেন কোপো. পকোপো সম্পকোপোতি উপসগ্গৰসেন পদং ৰড্ঢিতং. দুস্সনৰসেন দোসো. পদোসো সম্পদোসোতি উপসগ্গৰসেন পদং ৰড্ঢিতং. চিত্তস্স ব্যাপত্তীতি চিত্তস্স ৰিপন্নতা ৰিপরিৰত্তনাকারো. মনং পদূসযমানো উপ্পজ্জতীতি মনোপদোসো. কুজ্ঝনৰসেন কোধো. কুজ্ঝনাকারো কুজ্ঝনা. কুজ্ঝিতস্স ভাৰো কুজ্ঝিতত্তং. দুস্সতীতি দোসো. দুস্সনাতি দুস্সনাকারো. দুস্সিতত্তন্তি দুস্সিতভাৰো. পকতিভাৰৰিজহনট্ঠেন ব্যাপজ্জনং ব্যাপত্তি. ব্যাপজ্জনাতি ব্যাপজ্জনাকারো. ৰিরুজ্ঝতীতি ৰিরোধো. পুনপ্পুনং ৰিরুজ্ঝতীতি পটিৰিরোধো. ৰিরুদ্ধাকারপটিৰিরুদ্ধাকারৰসেন ৰা ইদং ৰুত্তং. চণ্ডিকো ৰুচ্চতি চণ্ডো, থদ্ধপুগ্গলো, তস্স ভাৰো চণ্ডিক্কং. ন এতেন সুরোপিতং ৰচনং হোতি, দুরুত্তং অপরিপুণ্ণমেৰ হোতীতি অসুরোপো. কুদ্ধকালে হি পরিপুণ্ণৰচনং নাম নত্থি, সচেপি কস্সচি হোতি, তং অপ্পমাণং. অপরে পন ‘‘অস্সুজননট্ঠেন অস্সুরোপনতো অস্সুরোপো’’তি ৰদন্তি, তং অকারণং সোমনস্সস্সাপি অস্সুজননতো. হেট্ঠাৰুত্তঅত্তমনতাপটিপক্খতো ন অত্তমনতাতি অনত্তমনতা. সা পন যস্মা চিত্তস্সেৰ, ন সত্তস্স, তস্মা ‘‘চিত্তস্সা’’তি ৰুত্তং.

অধিমত্তপরিত্ততা ৰেদিতব্বাতি অধিমত্তভাৰো পরিত্তভাৰো চ, বলৰভাৰো মন্দভাৰোতি অত্থো. কঞ্চি কালেতি একদা. ‘‘কঞ্চি কাল’’ন্তিপি পাঠো. চিত্তাৰিলকরণমত্তো হোতীতি চিত্তস্স আৰিলকরণপ্পমাণো, চিত্তকিলিট্ঠকরণপ্পমাণোতি অত্থো. ‘‘চিত্তালসকরণমত্তো’’তিপি পাঠো, তং ন সুন্দরং. তস্স চিত্তকিলমথকরণমত্তোতি অত্থো. ন চ তাৰ মুখকুলানৰিকুলানো হোতীতি মুখস্স সঙ্কোচনৰিসঙ্কোচনো ন চ তাৰ হোতি. ন চ তাৰ হনুসঞ্চোপনো হোতীতি দ্ৰিন্নং হনূনং অপরাপরং চলনো ন চ তাৰ হোতি. ন চ তাৰ ফরুসৰাচং নিচ্ছারণো হোতীতি পরেসং মম্মচ্ছেদকং ফরুসৰাচং মুখতো নীহরণেন বহি নিক্খমনো ন চ তাৰ হোতি. ন চ তাৰ দিসাৰিদিসানুৰিলোকনো হোতীতি পরস্স অব্ভুক্কিরণত্থং দণ্ডাদিঅত্থায দিসঞ্চ অনুদিসঞ্চ পুনপ্পুনং ৰিলোকনো ন চ তাৰ হোতি.

ন চ তাৰ দণ্ডসত্থপরামসনো হোতীতি আঘাতনত্থং দণ্ডঞ্চ একতোধারাদিসত্থঞ্চ আদিযনো ন চ তাৰ হোতি. ন চ তাৰ দণ্ডসত্থঅব্ভুক্কিরণো হোতীতি ৰুত্তপ্পকারং দণ্ডসত্থং উক্খিপিত্ৰা পহরণো ন চ তাৰ হোতি. ন চ তাৰ দণ্ডসত্থঅভিনিপাতনো হোতীতি এতং দুৰিধং পরস্স পহরণত্থং ন চ তাৰ খিপনো হোতি. ন চ তাৰ ছিন্নৰিচ্ছিন্নকরণো হোতীতি দণ্ডসত্থাদিখিপনেন পরসরীরং দ্ৰিধাকরণো চ ৰিৰিধাকারেন ৰণকরণো চ ন তাৰ হোতি. ‘‘ছিদ্দৰিচ্ছিদ্দকরণো’’তিপি পাঠো. ন চ তাৰ সম্ভঞ্জনপলিভঞ্জনো হোতীতি সরীরং ভঞ্জিত্ৰা চুণ্ণৰিচুণ্ণকরণো ন চ তাৰ হোতি. ন চ তাৰ অঙ্গমঙ্গঅপকড্ঢনো হোতীতি অঙ্গপচ্চঙ্গং সম্পগ্গহেত্ৰা অপনেত্ৰা কড্ঢনো ন চ তাৰ হোতি. ন চ তাৰ জীৰিতা ৰোরোপনো হোতীতি জীৰিতিন্দ্রিযতো ৰোরোপনো ন চ তাৰ হোতি. ন চ তাৰ সব্বচাগপরিচ্চাগায সণ্ঠিতো হোতীতি সব্বং পরস্স জীৰিতং নাসেত্ৰা অত্তনো জীৰিতনাসনত্থায সণ্ঠিতো ন চ তাৰ হোতি. ইদং ৰুত্তং হোতি – যদা অঞ্ঞং জীৰিতা ৰোরোপেত্ৰা অত্তানং জীৰিতা ৰোরোপনত্থায ঠিতো, তদা সব্বচাগপরিচ্চাগা নাম হোতি. ৰুত্তঞ্হেতং ভগৰতা –

‘‘কোধং ছেত্ৰা সুখং সেতি, কোধং ছেত্ৰা ন সোচতি;

কোধস্স ৰিসমূলস্স, মধুরগ্গস্স ব্রাহ্মণ;

ৰধং অরিযা পসংসন্তি, তঞ্হি ছেত্ৰা ন সোচতী’’তি. (সং. নি. ১.১৮৭, ২৬৭);

যতোতি যদা. পরপুগ্গলং ঘাটেত্ৰাতি পরপুগ্গলং নাসেত্ৰা. অত্তানং ঘাটেতীতি অত্তানং মারেতি. পরমুস্সদগতোতি অতিবলৰভাৰং গতো. পরমৰেপুল্লপ্পত্তোতি অতিৰিপুলভাৰং পত্তো. কোধস্স পহীনত্তাতি অনাগামিমগ্গেন ৰুত্তপ্পকারস্স কোধস্স পহীনভাৰেন. কোধৰত্থুস্স পরিঞ্ঞাতত্তাতি কোধস্স পতিট্ঠাভূতস্স কারণভূতস্স পিযাপিযঅট্ঠানসঙ্খাতস্স ৰত্থুস্স ঞাততীরণপরিঞ্ঞাহি ব্যাপেত্ৰা ঞাতভাৰেন. কোধহেতুস্স উপচ্ছিন্নত্তাতি কোধস্স জনকহেতুনো দোমনস্সসহগতচিত্তুপ্পাদস্স উচ্ছিন্নভাৰেন.

তাসীতি ভাযনসীলো হোতি. উত্তাসীতি অতিভাযনসীলো. পরিত্তাসীতি সমন্ততো ভাযনসীলো. ভাযতীতি ভযং উপ্পজ্জতি. সন্তাসং আপজ্জতীতি ৰিরূপভাৰং পাপুণাতি. কত্থী হোতীতি অত্তনো ৰণ্ণভণনসীলো হোতি. ৰিকত্থীতি ৰিৰিধা নানপ্পকারতো ৰণ্ণভণনসীলো. জাতিযা ৰাতি খত্তিযভাৰাদিজাতিসম্পত্তিযা ৰা. গোত্তেন ৰাতি গোতমগোত্তাদিনা উক্কট্ঠগোত্তেন ৰা. কোলপুত্তিযেন ৰাতি মহাকুলভাৰেন ৰা. ৰণ্ণপোক্খরতায ৰাতি ৰণ্ণসম্পন্নসরীরতায ৰা. সরীরঞ্হি ‘‘পোক্খর’’ন্তি ৰুচ্চতি, তস্স ৰণ্ণসম্পত্তিযা অভিরূপভাৰেনাতি অত্থো. ধনেন ৰাতিআদীনি উত্তানত্থানেৰ.

কুক্কুচ্চন্তি নিদ্দেসস্স উদ্দেসপদং. তত্থ কুক্কুচ্চন্তি কুচ্ছিতং কতং কুকতং, তস্স ভাৰো কুক্কুচ্চং. তং পচ্ছানুতাপলক্খণং, কতাকতানুসোচনরসং, ৰিপ্পটিসারপচ্চুপট্ঠানং, কতাকতপদট্ঠানং, দাসব্যং ৰিয দট্ঠব্বং. হত্থকুক্কুচ্চম্পীতি হত্থেহি কুচ্ছিতং কতং কুকতং, তস্স ভাৰো হত্থকুক্কুচ্চং. পাদকুক্কুচ্চাদীসুপি এসেৰ নযো.

অকপ্পিযে কপ্পিযসঞ্ঞিতাতি অচ্ছমংসং সূকরমংসন্তি খাদতি, দীপিমংসং মিগমংসন্তি খাদতি, অকপ্পিযভোজনং কপ্পিযভোজনন্তি ভুঞ্জতি, ৰিকালে কালসঞ্ঞিতায ভুঞ্জতি, অকপ্পিযপানকং কপ্পিযপানকন্তি পিৰতি. অযং অকপ্পিযে কপ্পিযসঞ্ঞিতা. কপ্পিযে অকপ্পিযসঞ্ঞিতাতি সূকরমংসং অচ্ছমংসন্তি খাদতি, মিগমংসং দীপিমংসন্তি খাদতি, কপ্পিযভোজনং অকপ্পিযভোজনন্তি ভুঞ্জতি, কালে ৰিকালসঞ্ঞিতায ভুঞ্জতি, কপ্পিযপানকং অকপ্পিযপানকন্তি পিৰতি. অযং কপ্পিযে অকপ্পিযসঞ্ঞিতা. অৰজ্জে ৰজ্জসঞ্ঞিতাতি নিদ্দোসে দোসসঞ্ঞিতা. ৰজ্জে অৰজ্জসঞ্ঞিতাতি সদোসে নিদ্দোসসঞ্ঞিতা. কুক্কুচ্চাযনাতি কুক্কুচ্চাযনাকারো. কুক্কুচ্চাযিতত্তন্তি কুক্কুচ্চাযিতভাৰো. চেতসো ৰিপ্পটিসারোতি চিত্তস্স ৰিরূপো পটিসরণভাৰো. মনোৰিলেখোতি চিত্তস্স ৰিলেখো.

কতত্তা চ অকতত্তা চাতি কাযদুচ্চরিতাদীনং কতভাৰেন চ কাযসুচরিতাদীনং অকতভাৰেন চ. কতং মে কাযদুচ্চরিতন্তি মযা কাযেন কিলেসপূতিকত্তা দুট্ঠু চরিতং কাযেন কতং. অকতং মে কাযসুচরিতন্তি মযা কাযেন সুট্ঠু চরিতং ন কতং. ৰচীদুচ্চরিতৰচীসুচরিতাদীসুপি এসেৰ নযো নিরোধপরিযোসানেসু.

চিত্তস্সাতি ন সত্তস্স ন পোসস্স. উদ্ধচ্চন্তি উদ্ধতাকারো. অৰূপসমোতি ন ৰূপসমো. চেতো ৰিক্খিপতীতি চেতসো ৰিক্খেপো, ভন্তত্তং চিত্তস্সাতি চিত্তস্স ভন্তভাৰো ভন্তযানভন্তগোণাদীনং ৰিয. ইমিনা একারম্মণস্মিংযেৰ ৰিপ্ফন্দনং কথিতং. উদ্ধচ্চঞ্হি একারম্মণে ৰিপ্ফন্দতি, ৰিচিকিচ্ছা নানারম্মণেতি. ইদং ৰুচ্চতি উদ্ধচ্চন্তি অযং উদ্ধতভাৰো কথীযতি.

মুসাৰাদং পহাযাতি এত্থ মুসাতি ৰিসংৰাদনপুরেক্খারস্স অত্থভঞ্জকো ৰচীপযোগো কাযপযোগো ৰা. ৰিসংৰাদনাধিপ্পাযেন পনস্স পরৰিসংৰাদককাযৰচীপযোগসমুট্ঠাপিকা চেতনা মুসাৰাদো.

অপরো নযো – মুসাতি অভূতং অতচ্ছং ৰত্থু. ৰাদোতি তস্স ভূততো তচ্ছতো ৰিঞ্ঞাপনং. লক্খণতো পন অতথং ৰত্থুং তথতো পরং ৰিঞ্ঞাপেতুকামস্স তথাৰিঞ্ঞত্তিসমুট্ঠাপিকা চেতনা মুসাৰাদো, তং মুসাৰাদং. পহাযাতি ইমং মুসাৰাদচেতনাসঙ্খাতং দুস্সীল্যং পজহিত্ৰা. পটিৰিরতোতি পহীনকালতো পট্ঠায ততো দুস্সীল্যতো ওরতো ৰিরতোৰ. নত্থি তস্স ৰীতিক্কমিস্সামীতি চক্খুসোতৰিঞ্ঞেয্যা ধম্মা, পগেৰ কাযৰিঞ্ঞেয্যাতি ইমিনা নযেন অঞ্ঞেসুপি এৰরূপেসু পদেসু অত্থো ৰেদিতব্বো.

সচ্চং ৰদতীতি সচ্চৰাদী. সচ্চেন সচ্চং সন্দহতি ঘটেতীতি সচ্চসন্ধো, ন অন্তরন্তরা মুসা ৰদতীতি অত্থো. যো হি পুরিসো কদাচি মুসা ৰদতি, কদাচি সচ্চং, তস্স মুসাৰাদেন অন্তরিতত্তা সচ্চং সচ্চেন ন ঘটিযতি, তস্মা সো ন সচ্চসন্ধো, অযং পন ন তাদিসো, জীৰিতহেতুপি মুসা অৰত্ৰা সচ্চেন সচ্চং সন্দহতিযেৰাতি সচ্চসন্ধো.

থেতোতি থিরো, থিরকথোতি অত্থো. একো হি পুগ্গলো হলিদ্দিরাগো ৰিয, থুসরাসিম্হি নিখাতখাণু ৰিয, অস্সপিট্ঠে ঠপিতকুম্ভণ্ডমিৰ চ ন থিরকথো হোতি, একো পাসাণলেখা ৰিয, ইন্দখীলা ৰিয চ থিরকথো হোতি, অসিনা সীসং ছিন্দন্তেপি দ্ৰে কথা ন কথেতি, অযং ৰুচ্চতি থেতো.

পচ্চযিকোতি পত্তিযাযিতব্বকো, সদ্ধাযিতব্বকোতি অত্থো. একচ্চো হি পুগ্গলো ন পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে ‘‘মা তস্স ৰচনং সদ্দহথা’’তি ৰত্তব্বতং আপজ্জতি. একো পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে ‘‘যদি তেন ৰুত্তং, ইদমেৰ পমাণং, ইদানি উপপরিক্খিতব্বং নত্থি, এৰমেৰ ইদ’’ন্তি ৰত্তব্বতং আপজ্জতি, অযং ৰুচ্চতি পচ্চযিকো.

অৰিসংৰাদকো লোকস্সাতি তায সচ্চৰাদিতায লোকং ন ৰিসংৰাদেতীতি অত্থো.

পিসুণং ৰাচং পহাযাতিআদীসু যায ৰাচায যস্স তং ৰাচং ভাসতি, তস্স হদযে অত্তনো পিযভাৰং পরস্স চ সুঞ্ঞভাৰং করোতি, সা পিসুণা ৰাচা. যায পন অত্তানম্পি পরম্পি ফরুসং করোতি, যা ৰাচা সযম্পি ফরুসা, নেৰ কণ্ণসুখা ন হদযঙ্গমা, অযং ফরুসা ৰাচা. যেন সম্ফং পলপতি নিরত্থকং, সো সম্ফপ্পলাপো. যা তেসং মূলভূতা চেতনাপি পিসুণৰাচাদিনামমেৰ লভতি, সা এৰ চ ইধ অধিপ্পেতা.

ইমেসং ভেদাযাতি যেসং ইতো ৰুত্তানং সন্তিকে সুতং, তেসং ভেদায. ভিন্নানং ৰা সন্ধাতাতি দ্ৰিন্নং মিত্তানং ৰা সমানুপজ্ঝাযকাদীনং ৰা কেনচিদেৰ কারণেন ভিন্নানং একমেকং উপসঙ্কমিত্ৰা ‘‘তুম্হাকং ঈদিসে কুলে জাতানং এৰং বহুস্সুতানং ইদং ন যুত্ত’’ন্তিআদীনি ৰত্ৰা সন্ধানং কত্তা অনুকত্তা.

অনুপ্পদাতাতি সন্ধানানুপ্পদাতা. দ্ৰে জনে সমগ্গে দিস্ৰা ‘‘তুম্হাকং এৰরূপে কুলে জাতানং এৰরূপেহি গুণেহি সমন্নাগতানং অনুচ্ছৰিকমেত’’ন্তিআদীনি ৰত্ৰা দল়্হীকম্মং কত্তাতি অত্থো. সমগ্গো আরামো অস্সাতি সমগ্গারামো, যত্থ সমগ্গা নত্থি, তত্থ ৰসিতুম্পি ন ইচ্ছতীতি অত্থো. ‘‘সমগ্গরামো’’তিপি পাল়ি, অযমেৰেত্থ অত্থো. সমগ্গরতোতি সমগ্গেসু রতো, তে পহায অঞ্ঞত্র গন্তুম্পি ন ইচ্ছতীতি অত্থো. সমগ্গে দিস্ৰাপি সুত্ৰাপি নন্দতীতি সমগ্গনন্দী. সমগ্গকরণিং ৰাচং ভাসিতাতি যা ৰাচা সত্তে সমগ্গেযেৰ করোতি, তং সামগ্গিগুণপরিদীপিকমেৰ ৰাচং ভাসতি, ন ইতরন্তি.

পরস্স মম্মচ্ছেদককাযৰচীপযোগসমুট্ঠাপিকা একন্তফরুসচেতনা ফরুসা ৰাচা, নেলাতি এলং ৰুচ্চতি দোসো, নস্সা এলন্তি নেলা, নিদ্দোসাতি অত্থো ‘‘নেলঙ্গো সেতপচ্ছাদো’’তি এত্থ (উদা. ৬৫; পেটকো. ২৫) ৰুত্তনেলং ৰিয. কণ্ণসুখাতি ব্যঞ্জনমধুরতায কণ্ণানং সুখা, সূচিৰিজ্ঝনং ৰিয কণ্ণসূলং ন জনেতি. অত্থমধুরতায সকলসরীরে কোপং অজনেত্ৰা পেমং জনেতীতি পেমনীযা. হদযং গচ্ছতি অপটিহঞ্ঞমানা সুখেন চিত্তং পৰিসতীতি হদযঙ্গমা. গুণপরিপুণ্ণতায পুরে ভৰাতি পোরী, পুরে সংৰড্ঢনারী ৰিয সুকুমারাতিপি পোরী, পুরস্স এসাতিপি পোরী, নগরৰাসীনং কথাতি অত্থো. নগরৰাসিনো হি যুত্তকথা হোন্তি, পিতিমত্তং পিতাতি ভাতিমত্তং ভাতাতি ৰদন্তি. এৰরূপী কথা বহুনো জনস্স কন্তা হোতীতি বহুজনকন্তা. কন্তভাৰেনেৰ বহুনো জনস্স মনাপা চিত্তৰুড্ঢিকরাতি বহুজনমনাপা.

অনত্থৰিঞ্ঞাপিকা কাযৰচীপযোগসমুট্ঠাপিকা অকুসলচেতনা সম্ফপ্পলাপো. কালেন ৰদতীতি কালৰাদী, ৰত্তব্বযুত্তকালং সল্লক্খেত্ৰা ৰদতীতি অত্থো. ভূতং তথং তচ্ছং সভাৰমেৰ ৰদতীতি ভূতৰাদী. দিট্ঠধম্মিকসম্পরাযিকত্থসন্নিস্সিতমেৰ কত্ৰা ৰদতীতি অত্থৰাদী. নৰলোকুত্তরধম্মসন্নিস্সিতং কত্ৰা ৰদতীতি ধম্মৰাদী. সংৰরৰিনযপহানৰিনযসন্নিস্সিতং কত্ৰা ৰদতীতি ৰিনযৰাদী.

নিধানং ৰুচ্চতি ঠপনোকাসো, নিধানমস্স অত্থীতি নিধানৰতী, হদযে নিধাতব্বযুত্তকং ৰাচং ভাসিতাতি অত্থো. কালেনাতি এৰরূপিং ভাসমানোপি চ ‘‘অহং নিধানৰতিং ৰাচং ভাসিস্সামী’’তি ন অকালেন ভাসতি, যুত্তকালং পন অপেক্খিত্ৰাৰ ভাসতীতি অত্থো. সাপদেসন্তি সউপমং, সকারণন্তি অত্থো. পরিযন্তৰতিন্তি পরিচ্ছেদং দস্সেত্ৰা যথাস্সা পরিচ্ছেদো পঞ্ঞাযতি, এৰং ভাসতীতি অত্থো. অত্থসংহিতন্তি অনেকেহিপি নযেহি ৰিভজন্তেন পরিযাদাতুং অসক্কুণেয্যতায অত্থসম্পন্নং ভাসতি. যং ৰা সো অত্থৰাদী অত্থং ৰদতি, তেন অত্থেন সহিতত্তা অত্থসংহিতং ৰাচং ভাসতি, ন অঞ্ঞং নিক্খিপিত্ৰা অঞ্ঞং ভাসতীতি ৰুত্তং হোতি. চতুদ্দোসাপগতং ৰাচং ভাসতীতি মুসাৰাদাদীহি চতূহি দোসেহি অপগতং ৰাচং ভাসতি. দ্ৰত্তিংসায তিরচ্ছানকথাযাতি দ্ৰত্তিংসায সগ্গমোক্খানং তিরচ্ছানভূতায কথায.

দস কথাৰত্থূনীতি অপ্পিচ্ছতাদীনি দস ৰিৰট্টনিস্সিতায কথায ৰত্থুভূতানি কারণানি. অপ্পিচ্ছকথন্তি এত্থ অপ্পিচ্ছোতি ইচ্ছাৰিরহিতো অনিচ্ছো নিত্তণ্হো. এত্থ হি ব্যঞ্জনং সাৰসেসং ৰিয, অত্থো পন নিরৰসেসো. ন হি খীণাসৰস্স অণুমত্তাপি ইচ্ছা নাম অত্থি.

অপিচেত্থ অত্রিচ্ছতা পাপিচ্ছতা মহিচ্ছতা অপ্পিচ্ছতাতি অযং ভেদো ৰেদিতব্বো – তত্থ সকলাভে অতিত্তস্স পরলাভপত্থনা অত্রিচ্ছতা নাম, তায সমন্নাগতস্স একভাজনে পক্কপূৰেপি অত্তনো পত্তে পতিতে ন সুপক্কো ৰিয খুদ্দকো ৰিয চ খাযতি, স্ৰেৰ পন পরস্স পত্তে পক্খিত্তো সুপক্কো ৰিয মহন্তো ৰিয চ খাযতি. অসন্তগুণসম্ভাৰনতা পন পটিগ্গহণে চ অমত্তঞ্ঞুতা পাপিচ্ছতা নাম, সা ‘‘ইধেকচ্চো অসদ্ধো সমানো সদ্ধোতি মং জনো জানাতূ’’তিআদিনা (ৰিভ. ৮৫১) নযেন অত্রেৰ আগতাযেৰ. তায চ সমন্নাগতো পুগ্গলো কোহঞ্ঞে পতিট্ঠাতি. সন্তগুণসম্ভাৰনতা পন পটিগ্গহণে চ অমত্তঞ্ঞুতা মহিচ্ছতা নাম, সাপি ‘‘ইধেকচ্চো সদ্ধো সমানো সদ্ধোতি মং জনো জানাতূতি ইচ্ছতি, সীলৰা সমানো সীলৰাতি মং জনো জানাতূ’’তি (ৰিভ. ৮৫১) ইমিনা নযেন আগতাযেৰ. তায সমন্নাগতো পুগ্গলো দুস্সন্তপ্পযো হোতি, ৰিজাতমাতাপিস্স চিত্তং গহেতুং ন সক্কোতি. তেনেতং ৰুচ্চতি –

‘‘অগ্গিক্খন্ধো সমুদ্দো চ, মহিচ্ছো চাপি পুগ্গলো;

সকটেন পচ্চযে দেতু, তযোপেতে অতপ্পযা’’তি. (ম. নি. অট্ঠ. ১.২৫২; অ. নি. অট্ঠ. ১.১.৬৩; উদা. অট্ঠ. ৩১);

সন্তগুণনিগূহনতা পন পটিগ্গহণে চ মত্তঞ্ঞুতা অপ্পিচ্ছতা নাম, তায সমন্নাগতো পুগ্গলো অত্তনি ৰিজ্জমানম্পি গুণং পটিচ্ছাদেতুকামতায সদ্ধো সমানো ‘‘সদ্ধোতি মং জনো জানাতূ’’তি ন ইচ্ছতি. সীলৰা… পৰিৰিত্তো… বহুস্সুতো… আরদ্ধৰীরিযো… সমাধিসম্পন্নো… পঞ্ঞৰা… খীণাসৰো সমানো ‘‘খীণাসৰোতি মং জনো জানাতূ’’তি ন ইচ্ছতি সেয্যথাপি মজ্ঝন্তিকত্থেরো. এৰং অপ্পিচ্ছো চ পন ভিক্খু অনুপ্পন্নং লাভং উপ্পাদেতি, উপ্পন্নং থাৰরং করোতি, দাযকানং চিত্তং আরাধেতি, যথা যথা হি সো অত্তনো অপ্পিচ্ছতায অপ্পং গণ্হাতি, তথা তথা তস্স ৰত্তে পসন্না মনুস্সা বহূ দেন্তি.

অপরোপি চতুব্বিধো অপ্পিচ্ছো পচ্চযঅপ্পিচ্ছো ধুতঙ্গঅপ্পিচ্ছো পরিযত্তিঅপ্পিচ্ছো অধিগমঅপ্পিচ্ছোতি. তত্থ চতূসু পচ্চযেসু অপ্পিচ্ছো পচ্চযঅপ্পিচ্ছো. সো দাযকস্স ৰসং জানাতি, দেয্যধম্মস্স ৰসং জানাতি, অত্তনো থামং জানাতি. যদি হি দেয্যধম্মো বহু হোতি, দাযকো অপ্পং দাতুকামো, দাযকস্স ৰসেন অপ্পং গণ্হাতি. দেয্যধম্মো অপ্পো, দাযকো বহুং দাতুকামো, দেয্যধম্মস্স ৰসেন অপ্পং গণ্হাতি. দেয্যধম্মোপি বহু, দাযকোপি বহুং দাতুকামো, অত্তনো থামং ঞত্ৰা পমাণেনেৰ গণ্হাতি.

ধুতঙ্গসমাদানস্স অত্তনি অত্থিভাৰং ন জানাপেতুকামো ধুতঙ্গঅপ্পিচ্ছো নাম. যো পন বহুস্সুতভাৰং ন জানাপেতুকামো, অযং পরিযত্তিঅপ্পিচ্ছো নাম. যো পন সোতাপন্নাদীসু অঞ্ঞতরো হুত্ৰা সোতাপন্নাদিভাৰং জানাপেতুং ন ইচ্ছতি, অযং অধিগমঅপ্পিচ্ছো নাম. খীণাসৰো পন অত্রিচ্ছতং পাপিচ্ছতং মহিচ্ছতং পহায সব্বসো ইচ্ছাপটিপক্খভূতায অলোভসঙ্খাতায পরিসুদ্ধায অপ্পিচ্ছতায সমন্নাগতত্তা অপ্পিচ্ছো নাম. ‘‘আৰুসো, অত্রিচ্ছতা পাপিচ্ছতা মহিচ্ছতাতি, ইমে ধম্মা পহাতব্বাতি, তেসু আদীনৰং দস্সেত্ৰা এৰরূপং অপ্পিচ্ছতং সমাদায ৰত্তিতব্ব’’ন্তি ৰদন্তো অপ্পিচ্ছকথং কথেতি নাম.

সন্তুট্ঠীকথন্তিআদীসু ৰিসেসত্থমেৰ দীপযিস্সাম, যোজনা পন ৰুত্তনযেনেৰ ৰেদিতব্বা. সন্তুট্ঠীকথন্তি ইতরীতরপচ্চযসন্তোসং নিস্সিতং কথং. সো পনেস সন্তোসো দ্ৰাদসৰিধো হোতি. সেয্যথিদং – চীৰরে যথালাভসন্তোসো, যথাবলসন্তোসো, যথাসারুপ্পসন্তোসোতি তিৰিধো. এৰং পিণ্ডপাতাদীসুপি.

তস্সাযং পভেদৰণ্ণনা – ইধ ভিক্খু চীৰরং লভতি সুন্দরং ৰা অসুন্দরং ৰা. সো তেনেৰ যাপেতি, অঞ্ঞং ন পত্থেতি, লভন্তোপি ন গণ্হাতি. অযমস্স চীৰরে যথালাভসন্তোসো. অথ পন যো পকতিদুব্বলো ৰা হোতি, আবাধজরাভিভূতো ৰা, গরুচীৰরং পারুপন্তো কিলমতি. সো সভাগেন ভিক্খুনা সদ্ধিং তং পরিৰত্তেত্ৰা লহুকেন যাপেন্তোপি সন্তুট্ঠোৰ হোতি. অযমস্স চীৰরে যথাবলসন্তোসো. অপরো পণীতপচ্চযলাভী হোতি. সো পত্তুণ্ণচীৰরাদীনং অঞ্ঞতরং মহগ্ঘচীৰরং, বহূনি ৰা পন চীৰরানি লভিত্ৰা ‘‘ইদং থেরানং চিরপব্বজিতানং, ইদং বহুস্সুতানং অনুরূপং, ইদং গিলানানং, ইদং অপ্পলাভীনং হোতূ’’তি দত্ৰা তেসং পুরাণচীৰরং ৰা সঙ্কারকূটাদিতো ৰা নন্তকানি উচ্চিনিত্ৰা তেহি সঙ্ঘাটিং কত্ৰা ধারেন্তোপি সন্তুট্ঠোৰ হোতি. অযমস্স চীৰরে যথাসারুপ্পসন্তোসো.

ইধ পন ভিক্খু পিণ্ডপাতং লভতি লূখং ৰা পণীতং ৰা, সো তেনেৰ যাপেতি, অঞ্ঞং ন পত্থেতি, লভন্তোপি ন গণ্হাতি. অযমস্স পিণ্ডপাতে যথালাভসন্তোসো. যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা পিণ্ডপাতং লভতি, যেনস্স পরিভুত্তেন অফাসু হোতি, সো তং সভাগস্স ভিক্খুনো দত্ৰা তস্স হত্থতো সপ্পাযভোজনং ভুঞ্জিত্ৰা সমণধম্মং করোন্তোপি সন্তুট্ঠোৰ হোতি. অযমস্স পিণ্ডপাতে যথাবলসন্তোসো. অপরো বহুং পণীতং পিণ্ডপাতং লভতি, সো তং চীৰরং ৰিয থেরচিরপব্বজিতবহুস্সুতঅপ্পলাভীগিলানানং দত্ৰা তেসং ৰা সেসকং পিণ্ডায ৰা চরিত্ৰা মিস্সকাহারং ভুঞ্জন্তোপি সন্তুট্ঠোৰ হোতি. অযমস্স পিণ্ডপাতে যথাসারুপ্পসন্তোসো.

ইধ পন ভিক্খু সেনাসনং লভতি মনাপং ৰা অমনাপং ৰা, সো তেন নেৰ সোমনস্সং ন দোমনস্সং উপ্পাদেতি, অন্তমসো তিণসন্থারকেনাপি যথালদ্ধেনেৰ তুস্সতি. অযমস্স সেনাসনে যথালাভসন্তোসো. যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা সেনাসনং লভতি, যত্থস্স ৰসতো অফাসু হোতি, সো তং সভাগস্স ভিক্খুনো দত্ৰা তস্স সন্তকে সপ্পাযসেনাসনে ৰসন্তোপি সন্তুট্ঠোৰ হোতি. অযমস্স সেনাসনে যথাবলসন্তোসো.

অপরো মহাপুঞ্ঞো লেণমণ্ডপকূটাগারাদীনি বহূনি পণীতসেনাসনানি লভতি, সো তং চীৰরং ৰিয থেরচিরপব্বজিতবহুস্সুতঅপ্পলাভীগিলানানং দত্ৰা যত্থ কত্থচি ৰসন্তোপি সন্তুট্ঠোৰ হোতি. অযমস্স সেনাসনে যথাসারুপ্পসন্তোসো. যোপি ‘‘উত্তমসেনাসনং নাম পমাদট্ঠানং, তত্থ নিসিন্নস্স থিনমিদ্ধং ওক্কমতি, নিদ্দাভিভূতস্স পুন পটিবুজ্ঝতো পাপৰিতক্কা পাতুভৰন্তী’’তি পটিসঞ্চিক্খিত্ৰা তাদিসং সেনাসনং পত্তম্পি ন সম্পটিচ্ছতি, সো তং পটিক্খিপিত্ৰা অব্ভোকাসরুক্খমূলাদীসু ৰসন্তোপি সন্তুট্ঠোৰ হোতি. অযমস্স সেনাসনে যথাসারুপ্পসন্তোসো.

ইধ পন ভিক্খু ভেসজ্জং লভতি লূখং ৰা পণীতং ৰা, সো যং লভতি, তেনেৰ তুস্সতি, অঞ্ঞং ন পত্থেতি, লভন্তোপি ন গণ্হাতি. অযমস্স গিলানপচ্চযে যথালাভসন্তোসো. যো পন তেলেন অত্থিকো ফাণিতং লভতি, সো তং সভাগস্স ভিক্খুনো দত্ৰা তস্স হত্থতো তেলং গহেত্ৰা অঞ্ঞদেৰ ৰা পরিযেসিত্ৰা ভেসজ্জং করোন্তোপি সন্তুট্ঠোৰ হোতি. অযমস্স গিলানপচ্চযে যথাবলসন্তোসো.

অপরো মহাপুঞ্ঞো বহুং তেলমধুফাণিতাদিপণীতভেসজ্জং লভতি, সো তং চীৰরং ৰিয থেরচিরপব্বজিতবহুস্সুতঅপ্পলাভীগিলানানং দত্ৰা তেসং আভতেন যেন কেনচি যাপেন্তোপি সন্তুট্ঠোৰ হোতি. যো পন একস্মিং ভাজনে চতুমধুরং ঠপেত্ৰা একস্মিং মুত্তহরীতকং ‘‘গণ্হ, ভন্তে, যদিচ্ছসী’’তি ৰুচ্চমানো ‘‘সচস্স তেসু অঞ্ঞতরেনপি রোগো ৰূপসম্মতি, অথ মুত্তহরীতকং নাম বুদ্ধাদীহি ৰণ্ণিত’’ন্তি চতুমধুরং পটিক্খিপিত্ৰা মুত্তহরীতকেন ভেসজ্জং করোন্তো পরমসন্তুট্ঠোৰ হোতি. অযমস্স গিলানপচ্চযে যথাসারুপ্পসন্তোসো. ইমেসং পন পচ্চেকপচ্চযেসু তিণ্ণং তিণ্ণং সন্তোসানং যথাসারুপ্পসন্তোসোৰ অগ্গো. অরহা একেকস্মিং পচ্চযে ইমেহি তীহিপি সন্তুট্ঠোৰ.

পৰিৰেককথন্তি পৰিৰেকনিস্সিতং কথং. তযো হি ৰিৰেকা কাযৰিৰেকো চিত্তৰিৰেকো উপধিৰিৰেকোতি. তত্থ একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো পটিক্কমতি, একো অভিক্কমতি, একো চঙ্কমং অধিট্ঠাতি, একো চরতি, একো ৰিহরতীতি অযং কাযৰিৰেকো নাম. অট্ঠ সমাপত্তিযো পন চিত্তৰিৰেকো নাম. নিব্বানং উপধিৰিৰেকো নাম.

ৰুত্তম্পি হেতং – ‘‘কাযৰিৰেকো চ ৰিৰেকট্ঠকাযানং নেক্খম্মাভিরতানং. চিত্তৰিৰেকো চ পরিসুদ্ধচিত্তানং পরমৰোদানপ্পত্তানং. উপধিৰিৰেকো চ নিরুপধীনং পুগ্গলানং ৰিসঙ্খারগতান’’ন্তি (মহানি. ৫৭).

অসংসগ্গকথন্তি এত্থ পন সৰনসংসগ্গো দস্সনসংসগ্গো সমুল্লপনসংসগ্গো সম্ভোগসংসগ্গো কাযসংসগ্গোতি পঞ্চৰিধো সংসগ্গো. তেসু ইধ ভিক্খু সুণাতি ‘‘অমুকস্মিং গামে ৰা নিগমে ৰা ইত্থী ৰা কুমারী ৰা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা’’তি, সো তং সুত্ৰা সংসীদতি ৰিসীদতি, ন সক্কোতি ব্রহ্মচরিযং সন্ধারেতুং, সিক্খাদুব্বল্যং অনাৰিকত্ৰা হীনাযাৰত্ততি. এৰং পরেহি কথিযমানরূপাদিসম্পত্তিং অত্তনা ৰা হসিতলপিতগীতসদ্দং সুণন্তস্স সোতৰিঞ্ঞাণৰীথিৰসেন উপ্পন্নো রাগো সৰনসংসগ্গো নাম.

‘‘ইধ ভিক্খু ন হেৰ খো সুণাতি, অপি চ খো সামং পস্সতি ইত্থিং ৰা কুমারিং ৰা অভিরূপং দস্সনীযং পাসাদিকং পরমায ৰণ্ণপোক্খরতায সমন্নাগতং, সো তং দিস্ৰা সংসীদতি ৰিসীদতি, ন সক্কোতি ব্রহ্মচরিযং সন্ধারেতুং, সিক্খাদুব্বল্যং অনাৰিকত্ৰা হীনাযাৰত্ততি. এৰং ৰিসভাগরূপং ওলোকেন্তস্স পন চক্খুৰিঞ্ঞাণৰীথিৰসেন উপ্পন্নরাগো দস্সনসংসগ্গো নাম.

অঞ্ঞমঞ্ঞং অল্লাপসল্লাপৰসেন উপ্পন্নরাগো পন সমুল্লপনসংসগ্গো নাম. ভিক্খুনো ভিক্খুনিযা সন্তকং ভিক্খুনিযা ৰা ভিক্খুস্স সন্তকং গহেত্ৰা পরিভোগকরণৰসেন উপ্পন্নরাগো সম্ভোগসংসগ্গো নাম. হত্থগ্গাহাদিৰসেন উপ্পন্নরাগো পন কাযসংসগ্গো নাম. অরহা ইমেহি পঞ্চহি সংসগ্গেহি চতূহিপি পরিসাহি সদ্ধিং অসংসট্ঠো, গাহমুত্তকো চেৰ সংসগ্গমুত্তকো চ. অসংসগ্গস্স ৰণ্ণং ভণন্তো অসংসগ্গকথং কথেতি নাম.

ৰীরিযারম্ভকথন্তি এত্থ যো পগ্গহিতৰীরিযো পরিপুণ্ণকাযিকচেতসিকৰীরিযো হোতি, গমনে উপ্পন্নং কিলেসং ঠানং পাপুণিতুং ন দেতি, ঠানে উপ্পন্নং কিলেসং নিসজ্জং, নিসজ্জায উপ্পন্নং কিলেসং সযনং পাপুণিতুং ন দেতি, দণ্ডেন কণ্হসপ্পং উপ্পীল়েত্ৰা গণ্হন্তো ৰিয অমিত্তং গীৰায অক্কমন্তো ৰিয চ ৰিচরতি, তাদিসস্স আরদ্ধৰীরিযস্স ৰণ্ণং ভণন্তো ৰীরিযারম্ভকথং কথেতি নাম.

সীলকথন্তিআদীসু সীলন্তি চতুপারিসুদ্ধিসীলং. সমাধীতি ৰিপস্সনাপাদকা অট্ঠ সমাপত্তিযো. পঞ্ঞাতি লোকিযলোকুত্তরঞাণং. ৰিমুত্তীতি অরহত্তফলৰিমুত্তি. ৰিমুত্তিঞাণদস্সনন্তি একূনৰীসতিৰিধং পচ্চৰেক্খণঞাণং. সীলাদীনং গুণং পকাসেন্তো সীলাদিকথং কথেতি নাম.

সতিপট্ঠানকথন্তিআদীনি সঙ্গজালমতিচ্চ সো মুনীতিপরিযোসানানি পুব্বে ৰুত্তানুসারেন ৰেদিতব্বানি.

৮৬. নিরাসত্তীতি নিত্তণ্হো. ৰিৰেকদস্সী ফস্সেসূতি পচ্চুপ্পন্নেসু চক্খুসম্ফস্সাদীসু অত্তাদিভাৰৰিৰেকং পস্সতি. দিট্ঠীসু চ ন নীযতীতি দ্ৰাসট্ঠিযা দিট্ঠীসু কাযচি দিট্ঠিযা ন নীযতি.

ৰিপরিণতং ৰা ৰত্থুং ন সোচতীতি পকতিভাৰং জহিত্ৰা নট্ঠে কিস্মিঞ্চি ৰত্থুস্মিং ন সোকং আপজ্জতি. ৰিপরিণতস্মিং ৰাতি ৰিনস্সমানে ৰত্থুম্হি.

চক্খুসম্ফস্সোতি চক্খুং ৰত্থুং কত্ৰা চক্খুৰিঞ্ঞাণসহজাতো ফস্সো চক্খুসম্ফস্সো. সেসেসুপি এসেৰ নযো. এত্থ চ পুরিমা চক্খুপসাদাদিৰত্থুকাৰ, মনোসম্ফস্সো হদযৰত্থুকোপি অৰত্থুকোপি সব্বো চতুভূমকো ফস্সো. অধিৰচনসম্ফস্সোতি পরিযাযেন এতস্স নামং হোতিযেৰ. তযো হি অরূপিনো খন্ধা সযং পিট্ঠিৰট্টকা হুত্ৰা অত্তনো সহজাতসম্ফস্সস্স অধিৰচনসম্ফস্সোতি নামং করোন্তি. পটিঘসম্ফস্সোতি নিপ্পরিযাযেন পন পটিঘসম্ফস্সো নাম পঞ্চদ্ৰারিকফস্সো. অধিৰচনসম্ফস্সো নাম মনোদ্ৰারিকফস্সো. সুখৰেদনীযো ফস্সোতি সুখৰেদনায হিতো উপ্পাদকো ফস্সো. ইতরদ্ৰযেপি এসেৰ নযো. কুসলো ফস্সোতি একৰীসতিকুসলচিত্তসহজাতো ফস্সো. অকুসলোতি দ্ৰাদসঅকুসলসহজাতো ফস্সো. অব্যাকতোতি ছপ্পঞ্ঞাসঅব্যাকতসহজাতো ফস্সো. কামাৰচরোতি চতুপঞ্ঞাসকামাৰচরসহজাতো ফস্সো. রূপাৰচরোতি কুসলাদিপঞ্চদসরূপাৰচরসম্পযুত্তো. অরূপাৰচরোতি কুসলাব্যাকতৰসেন দ্ৰাদসঅরূপাৰচরসম্পযুত্তো.

সুঞ্ঞতোতি অনত্তানুপস্সনাৰসেন ৰিপস্সন্তস্স উপ্পন্নো মগ্গো সুঞ্ঞতো, তেন সহজাতো ফস্সো সুঞ্ঞতো ফস্সো. ইতরদ্ৰযেপি এসেৰ নযো. অনিমিত্তোতি এত্থ অনিচ্চানুপস্সনাৰসেন ৰিপস্সন্তস্স উপ্পন্নো মগ্গো অনিমিত্তো. অপ্পণিহিতোতি দুক্খানুপস্সনাৰসেন ৰিপস্সন্তস্স উপ্পন্নো মগ্গো অপ্পণিহিতো. লোকিযোতি লোকো ৰুচ্চতি লুজ্জনপলুজ্জনট্ঠেন ৰট্টো, তস্মিং পরিযাপন্নভাৰেন লোকে নিযুত্তোতি লোকিযো, তেভূমকো ধম্মো. লোকুত্তরোতি লোকতো উত্তরো উত্তিণ্ণোতি লোকুত্তরো, লোকে অপরিযাপন্নভাৰেনপি লোকুত্তরো. অত্তেন ৰাতি অত্তভাৰেন ৰা. অত্তনিযেন ৰাতি অত্তাযত্তেন ৰা.

৮৭. পতিলীনোতি রাগাদীনং পহীনত্তা ততো অপগতো. অকুহকোতি অৰিম্হাপকো তীহি কুহনৰত্থূহি. অপিহালূতি অপিহনসীলো, পত্থনাতণ্হায রহিতোতি ৰুত্তং হোতি. অমচ্ছরীতি পঞ্চমচ্ছেরৰিরহিতো. অপ্পগব্ভোতি কাযপাগব্ভিযাদিৰিরহিতো. অজেগুচ্ছোতি সম্পন্নসীলাদিতায অজেগুচ্ছনীযো অসেচনকো মনাপো. পেসুণেয্যে চ নো যুতোতি দ্ৰীহি আকারেহি উপসংহরিতব্বে পিসুণকম্মে অযুত্তো.

রাগস্স পহীনত্তাতি অরহত্তমগ্গেন রাগকিলেসস্স পহীনভাৰেন. অস্মিমানো পহীনো হোতীতি অস্মীতি উন্নতিমানো সমুচ্ছেদৰসেন পহীনো হোতি.

তীণি কুহনৰত্থূনীতি তীণি ৰিম্হাপনকারণানি. পচ্চযপটিসেৰনসঙ্খাতং কুহনৰত্থূতিআদীসু চীৰরাদীহি নিমন্তিতস্স তদত্থিকস্সেৰ সতো পাপিচ্ছতং নিস্সায পটিক্খিপনেন তে চ গহপতিকে অত্তনি সুপ্পতিট্ঠিতপসাদে ঞত্ৰা পুন তেসং ‘‘অহো অয্যো অপ্পিচ্ছো, ন কিঞ্চি পটিগ্গণ্হিতুং ইচ্ছতি, সুলদ্ধং ৰত নো অস্স, সচে অপ্পমত্তকম্পি কিঞ্চি পটিগ্গণ্হেয্যা’’তি নানাৰিধেহি উপাযেহি পণীতানি চীৰরাদীনি উপনেন্তানং তদনুগ্গহকামতংযেৰ অৰিকত্ৰা পটিগ্গহণেন চ ততো পভুতি অপি সকটভারেহি উপনামনহেতুভূতং ৰিম্হাপনং পচ্চযপটিসেৰনসঙ্খাতং কুহনৰত্থূতি ৰেদিতব্বং. পাপিচ্ছস্সেৰ পন সতো সম্ভাৰনাধিপ্পাযেন কতেন ইরিযাপথেন ৰিম্হাপনং ইরিযাপথসঙ্খাতং কুহনৰত্থূতি ৰেদিতব্বং. পাপিচ্ছস্সেৰ পন সতো উত্তরিমনুস্সধম্মাধিগমপরিদীপনৰাচায তথা তথা ৰিম্হাপনং সামন্তজপ্পনসঙ্খাতং কুহনৰত্থূতি ৰেদিতব্বং.

কতমং পচ্চযপটিসেৰনসঙ্খাতন্তি এত্থ পচ্চযপটিসেৰনন্তি এৰং সঙ্খাতং পচ্চযপটিসেৰনসঙ্খাতং. নিমন্তেন্তীতি ইধ গহপতিকা ‘‘ভিক্খং গণ্হথা’’তি ভিক্খূ নিমন্তেন্তি. অযমেৰ ৰা পাঠো. ‘‘নিমন্তেতী’’তি ৰা ‘‘ৰদন্তী’’তি ৰা কেচি পঠন্তি. তাদিসে নিমন্তাপেন্তি. নিমন্তেন্তীতি পাঠস্স সম্ভৰো দট্ঠব্বো. চীৰরং পচ্চক্খাতীতি চীৰরং পটিক্খিপতি. এতং সারুপ্পং, যং সমণোতি যং চীৰরধারণং সমণো করোতি, এতং সারুপ্পং অনুচ্ছৰিকং. পাপণিকা ৰা নন্তকানীতি আপণদ্ৰারে পতিকানি অন্তৰিরহিতানি পিলোতিকানি. উচ্চিনিত্ৰাতি সংকড্ঢিত্ৰা. উঞ্ছাচরিযাযাতি ভিক্খাচরণেন. পিণ্ডিযালোপেনাতি পিণ্ডং কত্ৰা লদ্ধআলোপেন. পূতিমুত্তেন ৰাতি গোমুত্তেন ৰা. ওসধং করেয্যাতি ভেসজ্জকিচ্চং করেয্য. তদুপাদাযাতি ততো পট্ঠায. ধুতৰাদোতি ধুতগুণৰাদী. ভিয্যো ভিয্যো নিমন্তেন্তীতি উপরূপরি নিমন্তেন্তি. সম্মুখীভাৰাতি সম্মুখীভাৰেন, ৰিজ্জমানতাযাতি অত্থো. পসৰতীতি পটিলভতি. সদ্ধায সম্মুখীভাৰেন সক্কা কাতুন্তি ‘‘সদ্ধায সম্মুখীভাৰা’’তিআদিমাহ. দেয্যধম্মা সুলভা দক্খিণেয্যা চ, সদ্ধা পন দুল্লভা. পুথুজ্জনস্স হি সদ্ধা অথাৰরা, পদৰারে পদৰারে নানা হোতি. তেনেৰস্স মহামোগ্গল্লানসদিসোপি অগ্গসাৰকো পাটিভোগো ভৰিতুং অসক্কোন্তো আহ ‘‘দ্ৰিন্নং খো নেসং আৰুসো ধম্মানং পাটিভোগো ভোগানঞ্চ জীৰিতস্স চ, সদ্ধায পন ত্ৰং পাটিভোগো’’তি.

এৰং তুম্হে পুঞ্ঞেন পরিবাহিরা ভৰিস্সথাতি এত্থ পুঞ্ঞেনাতি নিস্সক্কত্থে করণৰচনং. পুঞ্ঞতো পরিহীনা পরম্মুখা ভৰিস্সথ. ভাকুটিকাতি মুখানং পধানপুরিমট্ঠিতভাৰদস্সনেন ভাকুটিকরণং, মুখসঙ্কোচোতি ৰুত্তং হোতি. ভাকুটিকরণং সীলমস্সাতি ভাকুটিকো, ভাকুটিকস্স ভাৰো ভাকুটিযং. কুহনাতি ৰিম্হাপনা. কুহস্স আযনা কুহাযনা. কুহিতস্স ভাৰো কুহিতত্তং.

পাপিচ্ছোতি অসন্তগুণদীপনকামো. ইচ্ছাপকতোতি ইচ্ছায অপকতো, উপদ্দুতোতি অত্থো. সম্ভাৰনাধিপ্পাযোতি বহুমানজ্ঝাসযো. গমনং সণ্ঠপেতীতি অভিক্কমাদিগমনং অভিসঙ্খরোতি, পাসাদিকভাৰং করোতীতি ৰুত্তং হোতি. ইতরেসুপি এসেৰ নযো. পণিধায গচ্ছতীতি পত্থনং ঠপেত্ৰা গচ্ছতি. সেসেসুপি এসেৰ নযো. সমাহিতো ৰিয গচ্ছতীতি উপচারপ্পত্তো ৰিয গচ্ছতি. সেসেসুপি এসেৰ নযো.

আপাথকজ্ঝাযীৰ হোতীতি সম্মুখা আগতানং মনুস্সানং ঝানং সমাপজ্জন্তো ৰিয সন্তভাৰং দস্সেতি. ইরিযাপথস্সাতি চতুইরিযাপথস্স. আঠপনাতি আদিট্ঠপনা, আদরেন ৰা ঠপনা. ঠপনাতি ঠপনাকারো. সণ্ঠপনাতি অভিসঙ্খরণং, পাসাদিকভাৰকরণন্তি ৰুত্তং হোতি. অরিযধম্মসন্নিস্সিতন্তি লোকুত্তরধম্মপটিবদ্ধং. কুঞ্চিকন্তি অৰাপুরণং. মিত্তাতি সিনেহৰন্তো. সন্দিট্ঠাতি দিট্ঠমত্তা. সম্ভত্তাতি দল়্হমিত্তা. উদ্দণ্ডেতি একো পতিস্সযৰিসেসো.

কোরজিককোরজিকোতি সঙ্কোচসঙ্কোচকো, অতিসঙ্কোচকোতি ৰুত্তং হোতি. ‘‘কোরচককোরচকো’’তি ৰা পাঠো. ভাকুটিকভাকুটিকোতি অতিৰিয মুখসঙ্কোচনসীলো. কুহককুহকোতি অতিৰিয ৰিম্হাপকো. লপকলপকোতি অতিৰিয সল্লাপকো. মুখসম্ভাৰিকোতি অত্তনো মুখৰসেন অঞ্ঞেহি সহ সম্ভাৰিকো, অপ্পিতচিত্তোতি একে. সন্তানন্তি কিলেসসন্ততায সন্তানং. সমাপত্তীনন্তি সমাপজ্জিতব্বানং. গম্ভীরন্তি নিন্নপতিট্ঠানং. গূল়্হন্তি দস্সেতুং দুক্খং. নিপুণন্তি সুখুমং. পটিচ্ছন্নন্তি পদত্থেন দুপ্পটিৰিজ্ঝাধিপ্পাযং. লোকুত্তরন্তি ধম্মদীপকং. সুঞ্ঞতাপটিসঞ্ঞুত্তন্তি নিব্বানপটিসঞ্ঞুত্তং. অথ ৰা লোকুত্তরসুঞ্ঞতাপটিসঞ্ঞুত্তন্তি লোকুত্তরধম্মভূতনিব্বানপটিসঞ্ঞুত্তং.

কাযিকং পাগব্ভিযন্তি কাযে ভৰং কাযিকং. ৰাচসিকচেতসিকেসুপি এসেৰ নযো. অচিত্তীকারকতোতি বহুমানকিরিযরহিতো. অনুপাহনানং চঙ্কমন্তানন্তি উপাহনৰিরহিতানং চঙ্কমন্তানং সমীপে, অনাদরে ৰা সামিৰচনং. সউপাহনোতি উপাহনারূল়্হো হুত্ৰা চঙ্কমতি. নীচে চঙ্কমে চঙ্কমন্তানন্তি অকতপরিচ্ছেদায ভূমিযা চঙ্কমন্তে পরিচ্ছেদং কত্ৰা ৰালুকং আকিরিত্ৰা আলম্বনং যোজেত্ৰা কতচঙ্কমে নীচেপি চঙ্কমে চঙ্কমন্তে. উচ্চে চঙ্কমে চঙ্কমতীতি ইট্ঠকচযনসম্পন্নে ৰেদিকাপরিক্খিত্তে উচ্চে চঙ্কমে চঙ্কমতি. সচে পাকারপরিক্খিত্তো হোতি দ্ৰারকোট্ঠকযুত্তো, পব্বতন্তরৰনন্তরভূমন্তরস্স ৰা সুপ্পটিচ্ছন্নো, তাদিসে চঙ্কমে চঙ্কমিতুং ৰট্টতি, অপ্পটিচ্ছন্নেপি উপচারং মুঞ্চিত্ৰা ৰট্টতি. ঘট্টযন্তোপি তিট্ঠতীতি অতিসমীপে তিট্ঠতি. পুরতোপি তিট্ঠতীতি পুরত্থিমতোপি তিট্ঠতি. ঠিতকোপি ভণতীতি খাণুকো ৰিয অনোনমিত্ৰা ভণতি. বাহাৰিক্খেপকোতি বাহুং খিপিত্ৰা খিপিত্ৰা ভণতি.

অনুপখজ্জাতি সব্বেসং নিসিন্নট্ঠানং পৰিসিত্ৰা. নৰেপি ভিক্খূ আসনেন পটিবাহতীতি অত্তনো পত্তাসনে অনিসীদিত্ৰা পুরে ৰা পচ্ছা ৰা পৰিসন্তো আসনেন পটিবাহতি নাম.

অনাপুচ্ছম্পি কট্ঠং পক্খিপতীতি অনাপুচ্ছিত্ৰা অনপলোকেত্ৰা অগ্গিম্হি দারুং খিপতি. দ্ৰারং পিদহতীতি জন্তাঘরে পিদহতি.

ওতরতীতি উদকতিত্থং পৰিসতি. ন্হাযতীতি সরীরং সিনেহেতি. উত্তরতীতি উদকতিত্থতো তীরং উগ্গচ্ছতি.

ৰোক্কম্মাপীতি অতিক্কমিত্ৰাপি. ওৰরকানীতি গব্ভে পতিট্ঠিতসযনঘরানি.

গূল়্হানীতি পটিচ্ছন্নানি. পটিচ্ছন্নানীতি অঞ্ঞেহি পটিচ্ছাদিতানি.

অনজ্ঝিট্ঠো ৰাতি থেরেহি ‘‘ধম্মং ভণাহী’’তি অনাণত্তো অনাযাচিতো চ.

পাপধম্মোতি লামকধম্মো. অসুচিসঙ্কসরসমাচারোতি অঞ্ঞেহি ‘‘অযং দুস্সীলো’’তি সঙ্কায সরিতব্বো আচারো সংযোগো এতস্সাতি অসুচিসঙ্কসরসমাচারো. সঙ্কস্সরসমাচারোতি সকারং সংযোগং কত্ৰাপি পঠন্তি. পটিচ্ছন্নকম্মন্তোতি পটিচ্ছাদিতকাযৰচীকম্মন্তো. অস্সমণোতি ন সমণো. সমণপটিঞ্ঞোতি ‘‘অহং সমণো’’তি পটিজানন্তো. অব্রহ্মচারীতি সেট্ঠচরিযা ৰিরহিতো. ব্রহ্মচারিপটিঞ্ঞোতি ৰুত্তপটিপক্খো. অন্তোপূতীতি অব্ভন্তরে কুসলধম্মৰিরহিতত্তা অন্তোপূতিভাৰমাপন্নো. অৰস্সুতোতি রাগেন তিন্তো. কসম্বুজাতোতি সঙ্কারসভাৰো. আচারগোচরসম্পন্নোতি এত্থ ভিক্খু সগারৰো সপ্পতিস্সো হিরোত্তপ্পসম্পন্নো সুনিৰত্থো সুপারুতো পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন ওক্খিত্তচক্খু ইরিযাপথসম্পন্নো ইন্দ্রিযেসু গুত্তদ্ৰারো ভোজনে মত্তঞ্ঞূ জাগরিযমনুযুত্তো সতিসম্পজঞ্ঞেন সমন্নাগতো অপ্পিচ্ছো সন্তুট্ঠো আরদ্ধৰীরিযো আভিসমাচারিকেসু সক্কচ্চকারী গরুচিত্তীকারবহুলো ৰিহরতি, অযং ৰুচ্চতি আচারো. এৰং তাৰ আচারো ৰেদিতব্বো.

গোচরো পন তিৰিধো উপনিস্সযগোচরো আরক্খগোচরো উপনিবন্ধগোচরোতি. তত্থ কতমো উপনিস্সযগোচরো? দসকথাৰত্থুগুণসমন্নাগতো কল্যাণমিত্তো, যং নিস্সায অস্সুতং সুণাতি, সুতং পরিযোদাপেতি, কঙ্খং ৰিতরতি, দিট্ঠিং উজুং করোতি, চিত্তং পসাদেতি; যস্স ৰা পন অনুসিক্খমানো সদ্ধায ৰড্ঢতি, সীলেন, সুতেন, চাগেন, পঞ্ঞায ৰড্ঢতি. অযং ৰুচ্চতি উপনিস্সযগোচরো.

কতমো আরক্খগোচরো? ইধ ভিক্খু অন্তরঘরং পৰিট্ঠো ৰীথিং পটিপন্নো ওক্খিত্তচক্খু যুগমত্তদস্সাৰী সুসংৰুতো গচ্ছতি, ন হত্থিং ওলোকেন্তো, ন অস্সং, ন রথং, ন পত্তিং, ন ইত্থিং, ন পুরিসং ওলোকেন্তো, ন উদ্ধং উল্লোকেন্তো, ন অধো ওলোকেন্তো, ন দিসাৰিদিসং পেক্খমানো গচ্ছতি. অযং ৰুচ্চতি আরক্খগোচরো.

কতমো উপনিবন্ধগোচরো? চত্তারো সতিপট্ঠানা যত্থ চিত্তং উপনিবন্ধতি. ৰুত্তঞ্হেতং ভগৰতা – ‘‘কো চ, ভিক্খৰে, ভিক্খুনো গোচরো সকো পেত্তিকো ৰিসযো? যদিদং চত্তারো সতিপট্ঠানা’’তি (সং. নি. ৫.৩৭২), অযং ৰুচ্চতি উপনিবন্ধগোচরোতি. ইতি ইমিনা চ আচারেন ইমিনা চ গোচরেন উপেতো…পে… সমন্নাগতো. তেনপি ৰুচ্চতি আচারগোচরসম্পন্নোতি.

অণুমত্তেসু ৰজ্জেসু ভযদস্সাৰীতি অণুপ্পমাণেসু অসঞ্চিচ্চ আপন্নসেখিযঅকুসলচিত্তুপ্পাদাদিভেদেসু ৰজ্জেসু ভযদস্সনসীলো. সমাদায সিক্খতি সিক্খাপদেসূতি যংকিঞ্চি সিক্খাপদেসু সিক্খিতব্বং, তং সব্বং সম্মা আদায সিক্খতি. এত্থ চ ‘‘পাতিমোক্খসংৰরসংৰুতো’’তি এত্তাৰতা চ পুগ্গলাধিট্ঠানায দেসনায পাতিমোক্খসংৰরসীলং দস্সিতং. ‘‘আচারগোচরসম্পন্নো’’তিআদি পন সব্বং যথাপটিপন্নস্স তং সীলং সম্পজ্জতি, তং পটিপত্তিং দস্সেতুং ৰুত্তন্তি ৰেদিতব্বং.

৮৮. সাতিযেসু অনস্সাৰীতি সাতৰত্থূসু কামগুণেসু তণ্হাসন্থৰৰিরহিতো. সণ্হোতি সণ্হেহি কাযকম্মাদীহি সমন্নাগতো. পটিভানৰাতি পরিযত্তিপরিপুচ্ছাধিগমপটিভানেহি সমন্নাগতো. ন সদ্ধোতি সামং অধিগতধম্মং ন কস্সচি সদ্দহতি. ন ৰিরজ্জতীতি খযা রাগস্স ৰিরত্তত্তা ইদানি ন ৰিরজ্জতি.

যেসং এসাতি যেসং পুগ্গলানং সাতৰত্থূসু কামগুণেসু ইচ্ছা তণ্হা. অপ্পহীনাতি সন্থৰসম্পযুত্তা তণ্হা অরহত্তমগ্গেন অপ্পহীনা. তেসং চক্খুতো রূপতণ্হা সৰতীতি এতেসং চক্খুদ্ৰারতো পৰত্তজৰনৰীথিসম্পযুত্তা রূপারম্মণা তণ্হা উপ্পজ্জতি. আসৰতীতি ওকাসতো যাৰ ভৰগ্গা ধম্মতো যাৰ গোত্রভূ সৰতি. সন্দতীতি নদীসোতং ৰিয অধোমুখং সন্দতি. পৰত্ততীতি পুনপ্পুনং উপ্পত্তিৰসেন পৰত্ততি. সেসদ্ৰারেসুপি এসেৰ নযো. সুক্কপক্খে ৰুত্তৰিপরিযাযেন তণ্হা অরহত্তমগ্গেন সুপ্পহীনা. তেসং চক্খুতো রূপতণ্হা ন সৰতি.

সণ্হেন কাযকম্মেন সমন্নাগতোতি অফরুসেন মুদুনা কাযকম্মেন সমঙ্গীভূতো একীভূতো. ৰচীকম্মাদীসুপি এসেৰ নযো. সণ্হেহি সতিপট্ঠানেহীতিআদীসু সতিপট্ঠানাদযো লোকিযলোকুত্তরমিস্সকা. পরিযাপুণনঅত্থাদিপরিপুচ্ছালোকিযলোকুত্তরধম্মাধিগমৰসেন সল্লক্খণৰিভাৰনৰৰত্থানকরণসমত্থা তিস্সো পটিভানপ্পভেদসঙ্খাতা পঞ্ঞা যস্স অত্থি, সো পটিভানৰা. তস্স পরিযত্তিং নিস্সায পটিভাযতীতি তস্স পুগ্গলস্স পরিযাপুণনং অল্লীযিত্ৰা ঞাণং জাযতি ঞাণং অভিমুখং হোতি. চত্তারো সতিপট্ঠানাতি সত্ততিংস বোধিপক্খিযধম্মা লোকিযলোকুত্তরমিস্সকৰসেন ৰুত্তা. মগ্গফলানি নিব্বত্তিতলোকুত্তরৰসেন. চতস্সো পটিসম্ভিদাযো ছ চ অভিঞ্ঞাযো ৰিমোক্খন্তিকৰসেন ৰুত্তাতি ঞাতব্বা.

তত্থ চতস্সো পটিসম্ভিদাযোতি চত্তারো ঞাণপ্পভেদাতি অত্থো. ইদ্ধিৰিধাদিআসৰক্খযপরিযোসানানি অধিকানি ছ ঞাণানি. তস্সাতি পরস্স, অত্থো পটিভাযতীতি সম্বন্ধো. অত্থোতি সঙ্খেপতো হেতুফলং. তঞ্হি যস্মা হেতুঅনুসারেন অরীযতি অধিগমীযতি পাপুণীযতি, তস্মা অত্থোতি ৰুচ্চতি. পভেদতো পন যংকিঞ্চি পচ্চযুপ্পন্নং নিব্বানং ভাসিতত্থো ৰিপাকো কিরিযাতি ইমে পঞ্চ ধম্মা অত্থোতি ৰেদিতব্বা, তং অত্থং পচ্চৰেক্খন্তস্স সো অত্থো পভেদতো ঞাতো পাকটো হোতি. ধম্মোতি সঙ্খেপতো পচ্চযো. সো হি যস্মা তং তং ৰিদহতি পৰত্তেতি চেৰ পাপেতি চ, তস্মা ধম্মোতি ৰুচ্চতি. পভেদতো পন যো কোচি ফলনিব্বত্তকো হেতু অরিযমগ্গো ভাসিতং কুসলং অকুসলন্তি ইমে পঞ্চ ধম্মা ধম্মোতি ৰেদিতব্বা, তং ধম্মং পচ্চৰেক্খন্তস্স সো ধম্মো পভেদতো ঞাতো পাকটো হোতি, তস্মিং অত্থে চ ধম্মে চ যা সভাৰনিরুত্তি অব্যভিচারী ৰোহারো, তস্স অভিলাপে ভাসনে উদীরণে তং লপিতং ভাসিতং উদীরিতং সভাৰনিরুত্তিসদ্দং আরম্মণং কত্ৰা পচ্চৰেক্খন্তস্স সা নিরুত্তি ঞাতা পাকটা হোতি.

এত্থ অত্থে ঞাতে অত্থো পটিভাযতীতি ইদানি তস্স সদ্দং আহরিত্ৰা ৰুত্তপ্পভেদে অত্থে পাকটীভূতে ৰুত্তপ্পভেদো অত্থো তস্স পুগ্গলস্স পটিভাযতি ঞাণাভিমুখো হোতি. ধম্মে ঞাতে ধম্মো পটিভাযতীতি ৰুত্তপ্পভেদে ধম্মে পাকটীভূতে ৰুত্তপ্পভেদো ধম্মো পটিভাযতি. নিরুত্তিযা ঞাতায নিরুত্তি পটিভাযতীতি ৰুত্তপ্পভেদায নিরুত্তিযা পাকটায ৰুত্তপ্পভেদা নিরুত্তি পটিভাযতি. ইমেসু তীসু ঞাণেসু ঞাণন্তি অত্থধম্মনিরুত্তীসু ইমেসু তীসু সব্বত্থকঞাণমারম্মণং কত্ৰা পচ্চৰেক্খন্তস্স তেসু তীসু ঞাণেসু পভেদগতং ঞাণং, যথাৰুত্তেসু ৰা তেসু তীসু ঞাণেসু গোচরকিচ্চাদিৰসেন ৰিত্থারগতং ঞাণং পটিভানপটিসম্ভিদা. ইমায পটিভানপটিসম্ভিদাযাতি ইমায ৰুত্তপ্পকারায যথাৰুত্তৰিত্থারপঞ্ঞায উপেতো হোতি. সো ৰুচ্চতি পটিভানৰাতি নিগমেন্তো আহ. যস্স পরিযত্তি নত্থীতি পরিযত্তি নাম বুদ্ধৰচনং. তঞ্হি উগ্গণ্হন্তস্স পটিসম্ভিদা ৰিসদা হোন্তি. যস্স পুগ্গলস্স এৰরূপা পরিযত্তি নত্থি. পরিপুচ্ছা নত্থীতি পরিপুচ্ছা নাম পাল়িঅট্ঠকথাদীসু গণ্ঠিপদঅত্থপদৰিনিচ্ছযকথা. উগ্গহিতপাল়িআদীসু হি অত্থং কথেন্তস্স পটিসম্ভিদা ৰিসদা হোন্তি. অধিগমো নত্থীতি অধিগমো নাম অরহত্তপ্পত্তি. অরহত্তঞ্হি পত্তস্স পটিসম্ভিদা ৰিসদা হোন্তি. যস্স ৰুত্তপ্পকারা তিৰিধা সম্পত্তি নত্থি. কিং তস্স পটিভাযিস্সতীতি কেন কারণেন তস্স পুগ্গলস্স পভেদগতং ঞাণং উপট্ঠহিস্সতি.

সামন্তি সযমেৰ. সযং অভিঞ্ঞাতন্তি সযমেৰ তেন ঞাণেন অৰগমিতং. অত্তপচ্চক্খং ধম্মন্তি অত্তনা পটিৰিজ্ঝিতং পচ্চৰেক্খিতং ধম্মং. ন কস্সচি সদ্দহতীতি অত্তপচ্চক্খতায পরেসং ন সদ্দহতি, সদ্ধায ন গচ্ছতি. অৰিজ্জাপচ্চযা সঙ্খারাতিআদিকং দ্ৰাদসপদিকপচ্চযাকারদস্সনৰসেন ৰুত্তং. অৰিজ্জানিরোধাতিআদযো সংসারনিৰত্তিং সন্ধায ৰুত্তা. ইদং দুক্খন্তিআদি সচ্চদস্সনৰসেন. ইমে আসৰাতিআদযো অপরেন পরিযাযেন কিলেসৰসেন পচ্চযদস্সনৰসেন. ইমে ধম্মা অভিঞ্ঞেয্যাতিআদযো অভিঞ্ঞেয্যপরিঞ্ঞেয্যপহাতব্বভাৰেতব্বসচ্ছিকাতব্বধম্মানং দস্সনৰসেন. ছন্নং ফস্সাযতনানন্তিআদযো ফস্সাযতনানং উপ্পত্তিঞ্চ অত্থঙ্গমঞ্চ অস্সাদঞ্চ উপদ্দৰঞ্চ নিস্সরণঞ্চ দস্সনৰসেন. পঞ্চন্নং উপাদানক্খন্ধানং পঞ্চৰীসতিৰিধেন উদযঞ্চ ৰযঞ্চ, তেসু ছন্দরাগৰসেন অস্সাদঞ্চ, তেসং ৰিপরিণামং আদীনৰঞ্চ, নিস্সরণসঙ্খাতং নিব্বানঞ্চ. চতুন্নং মহাভূতানং অৰিজ্জাদিসমুদযঞ্চ, অৰিজ্জাদিনিরোধে অত্থঙ্গমঞ্চ এৰমাদিদস্সনৰসেন ৰুত্তা. এতে ধম্মা তত্থ তত্থ ৰুত্তনযেন ৰেদিতব্বা.

অমতোগধন্তি নত্থি এতস্স মরণসঙ্খাতং মতন্তি অমতং. কিলেসৰিসপটিপক্খত্তা অগদন্তিপি অমতং. তস্মিং নিন্নতায অমতোগধং. অমতপরাযনন্তি ৰুত্তপ্পকারং অমতং পরং অযনং গতি পতিট্ঠা অস্সাতি অমতপরাযনং. অমতপরিযোসানন্তি তং অমতং সংসারস্স নিট্ঠাভূতত্তা পরিযোসানমস্সাতি অমতপরিযোসানং.

৮৯. লাভকম্যা ন সিক্খতীতি লাভপত্থনায সুত্তন্তাদীনি ন সিক্খতি. অৰিরুদ্ধো চ তণ্হায, রসেসু নানুগিজ্ঝতীতি ৰিরোধাভাৰেন চ অৰিরুদ্ধো হুত্ৰা তণ্হায মূলরসাদীসু গেধং নাপজ্জতি.

কেন নু খোতি লাভপত্থনায কারণচিন্তেন পিহস্স পরিযেসনে নিপাতো. লাভাভিনিব্বত্তিযাতি চতুন্নং পচ্চযানং ৰিসেসেন উপ্পত্তিযা. লাভং পরিপাচেন্তোতি পচ্চযে পরিপাচযন্তো.

অত্তদমত্থাযাতি ৰিপস্সনাসম্পযুত্তায পঞ্ঞায অত্তনো দমনত্থায. অত্তসমত্থাযাতি সমাধিসম্পযুত্তায পঞ্ঞায অত্তনো সমাধানত্থায. অত্তপরিনিব্বাপনত্থাযাতি দুৰিধেনাপি ঞাণেন অত্তনো অনুপাদাপরিনিব্বানত্থায. ৰুত্তঞ্হেতং ‘‘অনুপাদাপরিনিব্বানত্থং খো আৰুসো ভগৰতি ব্রহ্মচরিযং ৰুস্সতী’’তি (ম. নি. ১.২৫৯). অপ্পিচ্ছঞ্ঞেৰ নিস্সাযাতি এত্থ পচ্চযঅপ্পিচ্ছো অধিগমঅপ্পিচ্ছো পরিযত্তিঅপ্পিচ্ছো ধুতঙ্গঅপ্পিচ্ছোতি চত্তারো অপ্পিচ্ছা, তেসং নানত্থং হেট্ঠা ৰিত্থারিতং এৰ, তং অপ্পিচ্ছং অল্লীযিত্ৰা. সন্তুট্ঠিঞ্ঞেৰাতি চতূসু পচ্চযেসু চ তিৰিধং সন্তোসং অল্লীযিত্ৰা, এতেসং ৰিভাগো হেট্ঠা ৰিত্থারিতোযেৰ. সল্লেখঞ্ঞেৰাতি কিলেসলেখনং. ইদমত্থিতঞ্ঞেৰাতি ইমেহি কুসলধম্মেহি অত্থি ইদমত্থি, তস্স ভাৰো ইদমত্থিতা, তং ইদমত্থিতংযেৰ নিস্সায অল্লীযিত্ৰা.

রসোতি নিদ্দেসস্স উদ্দেসপদং. মূলরসোতি যংকিঞ্চি মূলং পটিচ্চ নিব্বত্তরসো. খন্ধরসাদীসুপি এসেৰ নযো. অম্বিলন্তি তক্কম্বিলাদি. মধুরন্তি একন্ততো গোসপ্পিআদি. মধু পন কসাৰযুত্তং চিরনিক্খিত্তং কসাৰং হোতি, ফাণিতং খারিযুত্তং চিরনিক্খিত্তং খারিযং হোতি. সপ্পি পন চিরনিক্খিত্তং ৰণ্ণগন্ধে জহন্তম্পি রসং ন জহতীতি তদেৰ একন্তমধুরং. তিত্তকন্তি নিম্বপণ্ণাদি. কটুকন্তি সিঙ্গিৰেরমরিচাদি. লোণিকন্তি সামুদ্দিকলোণাদি. খারিকন্তি ৰাতিঙ্গণকল়ীরাদি. লম্বিকন্তি বদরামলককপিট্ঠসালৰাদি. কসাৰন্তি হরীতকাদি. ইমে সব্বেপি রসা ৰত্থুৰসেন ৰুত্তা. তংতংৰত্থুকো পনেত্থ রসো চ অম্বিলাদীনি নামেহি ৰুত্তোতি ৰেদিতব্বো. সাদূতি ইট্ঠরসো. অসাদূতি অনিট্ঠরসো. ইমিনা পদদ্ৰযেন সব্বোপি রসো পরিযাদিন্নো. সীতন্তি সীতরসো. উণ্হন্তি উণ্হরসো. এৰমযং মূলরসাদিনা ভেদেন ভিন্নোপি রসো লক্খণাদীহি অভিন্নোযেৰ. সব্বোপি হেস জিৰ্হাপটিহননলক্খণো, জিৰ্হাৰিঞ্ঞাণস্স ৰিসযভাৰরসো, তস্সেৰ গোচরপচ্চুপট্ঠানো. তে জিৰ্হগ্গেন রসগ্গানীতি এতে সমণব্রাহ্মণা পসাদজিৰ্হগ্গেন উত্তমরসানি. পরিযেসন্তাতি গৰেসমানা. আহিণ্ডন্তীতি তত্থ তত্থ ৰিচরন্তি. তে অম্বিলং লভিত্ৰা অনম্বিলং পরিযেসন্তীতি তক্কাদিঅম্বিলং লদ্ধা অনম্বিলং গৰেসন্তি. এৰং সব্বং পরিৰত্তেত্ৰা পরিৰত্তেত্ৰা যোজিতং.

পটিসঙ্খা যোনিসো আহারং আহারেতীতি পটিসঙ্খানপঞ্ঞায জানিত্ৰা উপাযেন আহারং আহারেতি. ইদানি উপাযং দস্সেতুং ‘‘নেৰ দৰাযা’’তিআদি ৰুত্তং.

তত্থ নেৰ দৰাযাতি দৰত্থায ন আহারেতি. তত্থ নটলঙ্ঘকাদযো দৰত্থায আহারেন্তি নাম. যঞ্হি ভোজনং ভুত্তস্স নচ্চগীতকব্বসিলোকসঙ্খাতো দৰো অতিরেকতরেন পটিভাতি, তং ভোজনং অধম্মেন ৰিসমেন পরিযেসিত্ৰা তে আহারেন্তি. অযং পন ভিক্খু ন এৰমাহারেতি.

ন মদাযাতি মানমদপুরিসমদানং ৰড্ঢনত্থায ন আহারেতি. তত্থ রাজরাজমহামত্তা মদত্থায আহারেন্তি নাম. তে হি অত্তনো মানমদপুরিসমদানং ৰড্ঢনত্থায পিণ্ডরসভোজনাদীনি পণীতভোজনানি ভুঞ্জন্তি. অযং পন ভিক্খু এৰং নাহারেতি.

ন মণ্ডনাযাতি সরীরমণ্ডনত্থায ন আহারেতি. তত্থ রূপূপজীৰিনিযো মাতুগামা অন্তেপুরিকাদযো চ সপ্পিফাণিতাদীনি পিৰন্তি, সিনিদ্ধমুদুমদ্দৰভোজনং আহারেন্তি. এৰং নো অঙ্গলট্ঠি সুসণ্ঠিতা ভৰিস্সতি, সরীরে ছৰিৰণ্ণো পসন্নো ভৰিস্সতীতি. অযং পন ভিক্খু এৰং ন আহারেতি.

ন ৰিভূসনাযাতি সরীরে মংসৰিভূসনত্থায ন আহারেতি. তত্থ নিব্বুদ্ধমল্লমুট্ঠিকমল্লচেটকাদযো সুসিনিদ্ধেহি মচ্ছমংসাদীহি সরীরং পীণেন্তি ‘‘এৰং নো মংসং উস্সদং ভৰিস্সতি পহারসহনত্থাযা’’তি. অযং পন ভিক্খু এৰং সরীরে মংসৰিভূসনত্থায ন আহারেতি.

যাৰদেৰাতি আহারাহরণপযোজনস্স পরিচ্ছেদনিযমদস্সনং. ইমস্স কাযস্স ঠিতিযাতি ইমস্স চতুমহাভূতিকস্স করজকাযস্স ঠপনত্থায আহারেতি, ইদমস্স আহারাহরণে পযোজনন্তি অত্থো. যাপনাযাতি জীৰিতিন্দ্রিযযাপনত্থায আহারেতি. ৰিহিংসূপরতিযাতি ৰিহিংসা নাম অভুত্তপচ্চযা উপ্পজ্জনকখুদ্দা, তস্সা উপরতিযা ৰূপসমনত্থায আহারেতি. ব্রহ্মচরিযানুগ্গহাযাতি ব্রহ্মচরিযং নাম তিস্সো সিক্খা সকলসাসনং, তস্স অনুগ্গণ্হত্থায আহারেতি.

ইতীতি উপাযনিদস্সনং, ইমিনা উপাযেনাতি অত্থো. পুরাণঞ্চ ৰেদনং পটিহঙ্খামীতি পুরাণৰেদনং নাম অভুত্তপচ্চযা উপ্পজ্জনকৰেদনা, তং পটিহনিস্সামীতি আহারেতি. নৰঞ্চ ৰেদনং ন উপ্পাদেস্সামীতি নৰৰেদনা নাম অতিভুত্তপচ্চযেন উপ্পজ্জনকৰেদনা, ন তং উপ্পাদেস্সামীতি আহারেতি. অথ ৰা নৰৰেদনা নাম ভুত্তপচ্চযা ন উপ্পজ্জনকৰেদনা, তস্সা অনুপ্পন্নায অনুপ্পজ্জনত্থমেৰ আহারেতি.

যাত্রা চ মে ভৰিস্সতীতি যাপনা চ মে ভৰিস্সতি. অনৰজ্জতা চাতি এত্থ অত্থি সাৰজ্জং, অত্থি অনৰজ্জং. তত্থ অধম্মিকপরিযেসনা অধম্মিকপটিগ্গহণং অধম্মেন পরিভোগোতি ইদং সাৰজ্জং নাম. ধম্মেন পন পরিযেসিত্ৰা ধম্মেন পটিগ্গহেত্ৰা পচ্চৰেক্খিত্ৰা পরিভুঞ্জনং অনৰজ্জং নাম. একচ্চো অনৰজ্জেযেৰ সাৰজ্জং করোতি, ‘‘লদ্ধং মে’’তি কত্ৰা পমাণাতিক্কন্তং ভুঞ্জতি, তং জীরাপেতুং অসক্কোন্তো উদ্ধংৰিরেচনঅধোৰিরেচনাদীহি কিলমতি, সকলৰিহারে ভিক্খূ তস্স সরীরপটিজগ্গনভেসজ্জপরিযেসনাদীসু উস্সুক্কং আপজ্জন্তি, ‘‘কিং ইদ’’ন্তি ৰুত্তে ‘‘অসুকস্স নাম উদরং উদ্ধুমাত’’ন্তিআদিং ৰদন্তি. ‘‘এস নিচ্চকালম্পি এৰং পকতিকোযেৰ, অত্তনো কুচ্ছিপ্পমাণং নাম ন জানাতী’’তি নিন্দন্তি গরহন্তি. অযং অনৰজ্জেযেৰ সাৰজ্জং করোতি নাম. এৰং অকত্ৰা ‘‘অনৰজ্জতা চ মে ভৰিস্সতী’’তি আহারেতি.

ফাসুৰিহারো চাতি এত্থাপি অত্থি ফাসুৰিহারো, অত্থি ন ফাসুৰিহারো. তত্থ আহরহত্থকো অলংসাটকো তত্রৰট্টকো কাকমাসকো ভুত্তৰমিতকোতি ইমেসং পঞ্চন্নং ব্রাহ্মণানং ভোজনং ন ফাসুৰিহারো নাম. এতেসু হি আহরহত্থকো নাম বহুং ভুঞ্জিত্ৰা অত্তনো ধম্মতায উট্ঠাতুং অসক্কোন্তো ‘‘আহর হত্থ’’ন্তি ৰদতি. অলংসাটকো নাম অচ্চুদ্ধুমাতকুচ্ছিতায উট্ঠিতোপি সাটকং নিৰাসেতুং ন সক্কোতি. তত্রৰট্টকো নাম উট্ঠাতুং অসক্কোন্তো তত্রেৰ পরিৰট্টতি. কাকমাসকো নাম যথা কাকেহি আমসিতুং সক্কোতি, এৰং যাৰ মুখদ্ৰারা আহারেতি. ভুত্তৰমিতকো নাম মুখেন সন্ধারেতুং অসক্কোন্তো তত্থেৰ ৰমতি. এৰং অকত্ৰা ‘‘ফাসুৰিহারো চ মে ভৰিস্সতী’’তি আহারেতি. ফাসুৰিহারো নাম চতূহি পঞ্চহি আলোপেতি ঊনূদরতা. এত্তকঞ্হি ভুঞ্জিত্ৰা পানীযং পিৰতো চত্তারো ইরিযাপথা সুখেন পৰত্তন্তি. তস্মা ধম্মসেনাপতি এৰমাহ –

‘‘চত্তারো পঞ্চ আলোপে, অভুত্ৰা উদকং পিৰে;

অলং ফাসুৰিহারায, পহিতত্তস্স ভিক্খুনো’’তি. (থেরগা. ৯৮৩; মি. প. ৬.৫.১০);

ইমস্মিং পন ঠানে অঙ্গানি সমোধানেতব্বানি. নেৰ দৰাযাতি হি একং অঙ্গং, ন মদাযাতি একং, ন মণ্ডনাযাতি একং, ন ৰিভূসনাযাতি একং, যাৰদেৰ ইমস্স কাযস্স ঠিতিযা যাপনাযাতি একং, ৰিহিংসূপরতিযা ব্রহ্মচরিযানুগ্গহাযাতি একং, ইতি পুরাণঞ্চ ৰেদনং পটিহঙ্খামি নৰঞ্চ ৰেদনং ন উপ্পাদেস্সামীতি একং, যাত্রা চ মে ভৰিস্সতীতি একং অঙ্গং, অনৰজ্জতা চ ফাসুৰিহারো চাতি অযমেত্থ ভোজনানিসংসো.

মহাসিৰত্থেরো পনাহ – ‘‘হেট্ঠা চত্তারি অঙ্গানি পটিক্খেপো নাম, উপরি পন অট্ঠঙ্গানি সমোধানেতব্বানী’’তি. তত্থ যাৰদেৰ ইমস্স কাযস্স ঠিতিযাতি একং অঙ্গং, যাপনাযাতি একং, ৰিহিংসূপরতিযাতি একং, ব্রহ্মচরিযানুগ্গহাযাতি একং, ইতি পুরাণঞ্চ ৰেদনং পটিহঙ্খামীতি একং, নৰঞ্চ ৰেদনং ন উপ্পাদেস্সামীতি একং, যাত্রা চ মে ভৰিস্সতীতি একং, অনৰজ্জতা চাতি একং, ফাসুৰিহারো পন ভোজনানিসংসোতি. এৰং অট্ঠঙ্গসমন্নাগতং আহারং আহারেতি.

৯০. উপেক্খকোতি ছল়ঙ্গুপেক্খায সমন্নাগতো. সতোতি কাযানুপস্সনাদিসতিযুত্তো.

উপেক্খকোতি ছল়ঙ্গুপেক্খায সমন্নাগতোতি এত্থ ছল়ঙ্গুপেক্খাধম্মো নাম কোতি? ঞাণাদযো. ‘‘ঞাণ’’ন্তি ৰুত্তে কিরিযতো চত্তারি ঞাণসম্পযুত্তানি লব্ভন্তি, ‘‘সততৰিহারো’’তি ৰুত্তে অট্ঠ মহাচিত্তানি লব্ভন্তি, ‘‘রজ্জনদুস্সনং নত্থী’’তি ৰুত্তে দস চিত্তানি লব্ভন্তি. সোমনস্সং আসেৰনৰসেন লব্ভতি. চক্খুনা রূপং দিস্ৰাতি কারণৰসেন চক্খূতি লদ্ধৰোহারেন রূপদস্সনসমত্থেন চক্খুৰিঞ্ঞাণেন রূপং দিস্ৰা. পোরাণা পনাহু – চক্খু রূপং ন পস্সতি অচিত্তকত্তা, চিত্তম্পি ন পস্সতি অচক্খুকত্তা. দ্ৰারারম্মণসঙ্ঘট্টনেন পন পসাদৰত্থুকেন চিত্তেন পস্সতি. ঈদিসেসু পন ঠানেসু ‘‘ধনুনা ৰিজ্ঝতী’’তিআদীসু ৰিয সসম্ভারকথা নাম হোতি. তস্মা চক্খুৰিঞ্ঞাণেন রূপং দিস্ৰাতি অযমেৰেত্থ অত্থো.

নেৰ সুমনো হোতীতি লোভুপ্পত্তিৰসেন ছন্দরাগুপ্পত্তিৰসেন সোমনস্সো ন হোতি. ন দুম্মনোতি পটিঘুপ্পত্তিৰসেন দুট্ঠচিত্তো ন হোতি. উপেক্খকোতি উপপত্তিতো ইক্খকো হোতি, অপক্খপতিতো হুত্ৰা ইরিযাপথং পৰত্তেতি. সতো সম্পজানোতি সতিমা ঞাণসম্পন্নো. মনাপং নাভিগিজ্ঝতীতি মনৰড্ঢনকং ইট্ঠারম্মণং নাভিগিজ্ঝতি ন পত্থেতি. নাভিহংসতীতি ন তুস্সতি. ন রাগং জনেতীতি তত্থ তত্থ রঞ্জনং ন উপ্পাদেতি. তস্স ঠিতোৰ কাযো হোতীতি তস্স খীণাসৰস্স চক্খাদিকাযো কম্পারহিতত্তা ঠিতো নিচ্চলো হোতি. অমনাপন্তি অনিট্ঠারম্মণং. ন মঙ্কু হোতীতি দোমনস্সিতো ন হোতি. অপ্পতিট্ঠিতচিত্তোতি কোধৰসেন ঠিতমনো ন হোতি. অলীনমনসোতি অলীনচিত্তো. অব্যাপন্নচেতসোতি ব্যাপাদরহিতচিত্তো.

রজনীযে ন রজ্জতীতি রজনীযস্মিং ৰত্থুস্মিং ন রাগং উপ্পাদেতি. দুস্সনীযে ন দুস্সতীতি দোসুপ্পাদে ৰত্থুস্মিং ন দোসং উপ্পাদেতি. মোহনীযে ন মুয্হতীতি মোহনীযস্মিং ৰত্থুস্মিং ন মোহং উপ্পাদেতি. কোপনীযে ন কুপ্পতীতি কোধনীযস্মিং ৰত্থুস্মিং ন চলতি. মদনীযে ন মজ্জতীতি মদনীযস্মিং ৰত্থুস্মিং ন সংসীদতি. কিলেসনীযে ন কিলিস্সতীতি উপতপনীযস্মিং ৰত্থুস্মিং ন উপতপ্পতি. দিট্ঠে দিট্ঠমত্তোতি রূপারম্মণে চক্খুৰিঞ্ঞাণেন দিট্ঠে দিট্ঠমত্তো. সুতে সুতমত্তোতি সদ্দাযতনে সোতৰিঞ্ঞাণেন সুতে সুতমত্তো. মুতে মুতমত্তোতি ঘানজিৰ্হাকাযৰিঞ্ঞাণেন পাপুণিত্ৰা গহিতে গহিতমত্তো. ৰিঞ্ঞাতে ৰিঞ্ঞাতমত্তোতি মনোৰিঞ্ঞাণেন ঞাতে ঞাতমত্তো. দিট্ঠে ন লিম্পতীতি চক্খুৰিঞ্ঞাণেন দিট্ঠে রূপারম্মণে তণ্হাদিট্ঠিলেপেন ন লিম্পতি. দিট্ঠে অনূপযোতি রূপারম্মণে নিত্তণ্হো হোতি. অনপাযোতি অপদুট্ঠচিত্তো.

সংৰিজ্জতীতি লব্ভতি. পস্সতীতি ওলোকেতি. ছন্দরাগোতি সিনেহো. রূপারামন্তি রূপং আরামং অস্সাতি রূপারামং. রূপে রতন্তি রূপরতং. রূপে সন্তুট্ঠীতি রূপসম্মুদিতং.

দন্তং নযন্তি সমিতিন্তি উয্যানকীল়ামণ্ডলাদীসু মহাজনমজ্ঝং গচ্ছন্তা দন্তমেৰ গোণজাতিং ৰা অস্সজাতিং ৰা যানে যোজেত্ৰা নযন্তি. রাজাতি তথারূপানেৰ ঠানানি গচ্ছন্তো রাজাপি দন্তমেৰ অভিরুহতি. মনুস্সেসূতি মনুস্সেসুপি চতূহি অরিযমগ্গেহি দন্তো নিব্বিসেৰনোৰ সেট্ঠো. যোতিৰাক্যন্তি যো এৰরূপং অতিক্কমৰচনং পুনপ্পুনং ৰুচ্চমানম্পি তিতিক্খতি ন পটিপ্ফন্দতি ন ৰিহঞ্ঞতি, এৰরূপো দন্তো সেট্ঠোতি অত্থো.

অস্সতরাতি ৰল়ৰায গদ্রভেন জাতা. আজানীযাতি যং অস্সদম্মসারথি কারণং কারেতি, তস্স খিপ্পং জাননসমত্থা. সিন্ধৰাতি সিন্ধৰরট্ঠে জাতা অস্সা. মহানাগাতি কুঞ্জরসঙ্খাতা মহাহত্থিনো. অত্তদন্তোতি এতে অস্সতরা ৰা আজানীযা ৰা সিন্ধৰা ৰা কুঞ্জরা ৰা ৰরা দন্তা, ন অদন্তা. যো পন চতুমগ্গসঙ্খাতেন অত্তদন্তেন দন্ততায অত্তদন্তো নিব্বিসেৰনো, অযং ততোপি ৰরং, সব্বেহিপি এতেহি উত্তরিতরোতি অত্থো.

ন হি এতেহি যানেহীতি যানি এতানি হত্থিযানাদিযানানি, ন হি এতেহি যানেহি কোচি পুগ্গলো সুপিনন্তেনপি অগতপুব্বত্তা ‘‘অগত’’ন্তি সঙ্খাতং নিব্বানদিসং, তং ঠানং গচ্ছেয্য. যথা পুব্বভাগে ইন্দ্রিযদমেন দন্তেন অপরভাগে অরিযমগ্গভাৰনায সুদন্তেন দন্তো নিব্বিসেৰনো সপ্পঞ্ঞো পুগ্গলো তং অগতপুব্বং দিসং গচ্ছতি, দন্তভূমিং পাপুণাতি. তস্মা অত্তদমনমেৰ ৰরন্তি অত্থো.

ৰিধাসু ন ৰিকম্পন্তীতি সেয্যস্স সেয্যোহমস্মীতিআদীসু মানৰিধাসু ন চলন্তি নপ্পৰেধন্তি. ৰিপ্পমুত্তা পুনব্ভৰাতি পুনব্ভৰপটিসন্ধিযা পুনপ্পুনং উপ্পত্তিতো সুট্ঠু মুত্তা মুঞ্চিত্ৰা ঠিতা. দন্তভূমিমনুপ্পত্তাতি একন্তদমনং অরহত্তফলভূমিং পাপুণিত্ৰা ঠিতা. তে লোকে ৰিজিতাৰিনোতি তে অরহন্তো সত্তলোকে ৰিজিতৰিজযা ৰিজিতৰন্তো নাম হোন্তি.

যস্মা চ ভাৰিতিন্দ্রিযো নিব্ভযো নিব্বিকারো দন্তো হোতি, তস্মা তমত্থং দস্সেন্তো ‘‘যস্সিন্দ্রিযানী’’তি গাথমাহ. তস্সত্থো – যস্স চক্খাদীনি ছল়িন্দ্রিযানি গোচরভাৰনায অনিচ্চাদিতিলক্খণং আরোপেত্ৰা ৰাসনাভাৰনায সতিসম্পজঞ্ঞগন্ধং গাহাপেত্ৰা ভাৰিতানি, তানি চ খো অজ্ঝত্তগোচরভাৰনায, এৰং পন বহিদ্ধা চ সব্বলোকেতি যত্থ যত্থ ইন্দ্রিযানং ৰেকল্লতা ৰেকল্লতো ৰা সম্ভৰো, তত্থ নাভিজ্ঝাদিৰসেন ভাৰিতানীতি এৰং নিব্বিজ্ঝ ঞত্ৰা পটিৰিজ্ঝিত্ৰা ইমং পরঞ্চ লোকং সকসন্ততিখন্ধলোকং পরসন্ততিখন্ধলোকঞ্চ দন্তমরণং মরিতুকামো কালং কঙ্খতি, জীৰিতক্খযকালং আগমেতি পতিমানেতি, ন ভাযতি মরণস্স. যথাহ –

‘‘মরণে মে ভযং নত্থি, নিকন্তি নত্থী জীৰিতে’’. (থেরগা. ২০);

‘‘নাভিকঙ্খামি মরণং, নাভিকঙ্খামি জীৰিতং;

কালঞ্চ পতিমানেমি, নিব্বিসং ভতকো যথা’’তি. (থেরগা. ৬০৬, ৬৫৪, ১০০২; মি. প. ২.২.৪ থোকং ৰিসদিসং);

ভাৰিতো স দন্তোতি এৰং ভাৰিতিন্দ্রিযো সো দন্তো.

৯১. নিস্সযতাতি তণ্হাদিট্ঠিনিস্সযা. ঞত্ৰা ধম্মন্তি অনিচ্চাদীহি আকারেহি ধম্মং জানিত্ৰা. অনিস্সিতোতি এৰং তেহি নিস্সযেহি অনিস্সিতো. তেন অঞ্ঞত্র ধম্মঞাণা নত্থি নিস্সযানং অভাৰোতি দীপেতি. ভৰায ৰিভৰায ৰাতি সস্সতায উচ্ছেদায ৰা. ইমিস্সা গাথায নিদ্দেসো উত্তানো.

৯২. তং ব্রূমি উপসন্তোতি তং এৰরূপং একেকগাথায ৰুত্তং উপসন্তোতি কথেমি. অতরী সো ৰিসত্তিকন্তি সো ইমং ৰিসতাদিভাৰেন ৰিসত্তিকাসঙ্খাতং মহাতণ্হং অতরি.

অত্তনো দিট্ঠিযা রাগো অভিজ্ঝাকাযগন্থোতি সযং গহিতদিট্ঠিযা রঞ্জনসঙ্খাতো রাগো অভিজ্ঝাকাযগন্থো. পরৰাদেসু আঘাতো অপ্পচ্চযোতি পরেসং ৰাদপটিৰাদেসু কোপো চ অতুট্ঠাকারো চ ব্যাপাদো কাযগন্থো. অত্তনো সীলং ৰা ৰতং ৰাতি সযং গহিতমেথুনৰিরতিসঙ্খাতং সীলং ৰা গোৰতাদিৰতং ৰা. সীলব্বতং ৰাতি তদুভযং ৰা. পরামাসোতি ইমিনা সুদ্ধীতিআদিৰসেন পরতো আমসতি. অত্তনো দিট্ঠি ইদংসচ্চাভিনিৰেসো কাযগন্থোতি সযং গহিতদিট্ঠিং ‘‘ইদমেৰ সচ্চং মোঘমঞ্ঞ’’ন্তি (উদা. ৫৪; ম. নি. ৩.২৭, ৩০১) অযোনিসো অভিনিৰেসো ইদংসচ্চাভিনিৰেসো কাযগন্থো. গন্থা তস্স ন ৰিজ্জন্তীতি তস্স খীণাসৰস্স দ্ৰে দিট্ঠিগন্থা সোতাপত্তিমগ্গেন ন সন্তি. ব্যাপাদো কাযগন্থো অনাগামিমগ্গেন. অভিজ্ঝাকাযগন্থো অরহত্তমগ্গেন.

৯৩. ইদানি তমেৰ উপসন্তং পসংসন্তো আহ ‘‘ন তস্স পুত্তা’’তি এৰমাদি. তত্থ পুত্তা অত্রজাদযো চত্তারো. এত্থ চ পুত্তপরিগ্গহাদযো পুত্তাদিনামেন ৰুত্তাতি ৰেদিতব্বা. তে হিস্স ন ৰিজ্জন্তি, তেসং ৰা অভাৰেন পুত্তাদযো ন ৰিজ্জন্তীতি. অত্তাতি ‘‘অত্তা অত্থী’’তি গহিতা সস্সতদিট্ঠিং নত্থি. নিরত্তাতি ‘‘উচ্ছিজ্জতী’’তি গহিতা উচ্ছেদদিট্ঠি.

নত্থীতি গহেতব্বং নত্থি. মুঞ্চিতব্বং নত্থীতি মোচেতব্বং নত্থি. যস্স নত্থি গহিতন্তি যস্স পুগ্গলস্স তণ্হাদিট্ঠিৰসেন গহিতং ন ৰিজ্জতি. তস্স নত্থি মুঞ্চিতব্বন্তি তস্স পুগ্গলস্স মুঞ্চিতব্বং ন ৰিজ্জতি. গাহমুঞ্চনসমতিক্কন্তোতি গহণঞ্চ মোচনঞ্চ ৰীতিৰত্তো. ৰুদ্ধিপরিহানিৰীতিৰত্তোতি ৰুড্ঢিঞ্চ হানিঞ্চ অতিক্কন্তো.

৯৪. যেন নং ৰজ্জুং পুথুজ্জনা, অথো সমণব্রাহ্মণাতি যেন তং রাগাদিনা ৰজ্জেন পুথুজ্জনা সব্বেপি দেৰমনুস্সা ইতোৰ বহিদ্ধা সমণব্রাহ্মণা চ রত্তোতি ৰা দুট্ঠোতি ৰা ৰদেয্যুং. তং তস্স অপুরক্খতন্তি তং রাগাদিৰজ্জং তস্স অরহতো অপুরক্খতং. তস্মা ৰাদেসু নেজতীতি তংকারণা নিন্দাৰচনেসু ন কম্পতি.

নেজতীতি নিদ্দেসস্স উদ্দেসপদং. ন ইঞ্জতীতি চলনং ন করোতি. ন চলতীতি ন তত্থ নমতি. ন ৰেধতীতি কম্পেতুং অসক্কুণেয্যতায ন ফন্দতি. নপ্পৰেধতীতি ন কম্পতি. ন সম্পৰেধতীতি ন পরিৰত্ততি.

৯৫. ন উস্সেসু ৰদতেতি ৰিসিট্ঠেসু অত্তানং অন্তোকত্ৰা ‘‘অহং ৰিসিট্ঠো’’তি অতিমানৰসেন ন ৰদতি. এস নযো ইতরেসু দ্ৰীসু. কপ্পং নেতি অকপ্পিযোতি সো এৰরূপো দুৰিধম্পি কপ্পং ন এতি. কস্মা? যস্মা অকপ্পিযো, পহীনকপ্পোতি ৰুত্তং হোতি. ইমিস্সাপি গাথায নিদ্দেসো উত্তানোৰ.

৯৬. সকন্তি ময্হন্তি পরিগ্গহিতং. অসতা চ ন সোচতীতি অৰিজ্জমানাদিনা অসতা চ ন সোচতি. ধম্মেসু চ ন গচ্ছতীতি সব্বধম্মেসু ছন্দাদিৰসেন ন গচ্ছতি. স ৰে সন্তোতি ৰুচ্চতীতি সো এৰরূপো নরুত্তমো ‘‘সন্তো’’তি ৰুচ্চতি. ইমিস্সাপি গাথায নিদ্দেসো উত্তানোৰ. অরহত্তনিকূটেন দেসনং নিট্ঠাপেসি. দেসনাপরিযোসানে কোটিসতসহস্সদেৰতানং অরহত্তপ্পত্তি অহোসি, সোতাপন্নাদীনং গণনা নত্থীতি.

সদ্ধম্মপ্পজ্জোতিকায মহানিদ্দেসট্ঠকথায

পুরাভেদসুত্তনিদ্দেসৰণ্ণনা নিট্ঠিতা.

১১. কলহৰিৰাদসুত্তনিদ্দেসৰণ্ণনা

৯৭. একাদসমে কলহৰিৰাদসুত্তনিদ্দেসে কুতোপহূতা কলহা ৰিৰাদাতি কলহো চ তস্স পুব্বভাগো ৰিৰাদো চাতি ইমে কুতো জাতা. পরিদেৰসোকা সহমচ্ছরা চাতি পরিদেৰসোকা চ সহমচ্ছরা চ কুতো পহূতা. মানাতিমানা সহপেসুণা চাতি মানা চ অতিমানা চ পেসুণা চ কুতো পহূতা. তেতি তে সব্বেপি অট্ঠ কিলেসধম্মা. তদিঙ্ঘ ব্যূহীতি তং মযা পুচ্ছিতমত্থং ব্রূহি, যাচামি তং অহন্তি. যাচনত্থো হি ইঙ্ঘাতি নিপাতো.

একেন আকারেনাতি একেন কারণেন. অপরেন আকারেনাতি অপরেন কারণেন. আগারিকা দণ্ডপসুতাতি গহপতিনো ৰিহেসমানা. পব্বজিতা আপত্তিং আপজ্জন্তাতি অনগারিকা সত্তসু আপত্তিক্খন্ধেসু অঞ্ঞতরং আপজ্জমানা.

কুতোপহূতাতি কুতোভূতা. কুতোজাতাতি কুতো পটিলদ্ধভাৰা. কুতোসঞ্জাতাতি উপসগ্গেন পদং ৰড্ঢিতং. কুতোনিব্বত্তাতি কুতো নিব্বত্তলক্খণং পত্তা. উপসগ্গেন পদং ৰড্ঢেত্ৰা ‘‘কুতোঅভিনিব্বত্তা’’তি ৰুত্তং. কুতোপাতুভূতাতি কুতোপাকটীভূতা. কিং নিদানাতিআদীসু অত্তনো ফলং নিদেতীতি নিদানং. এতস্মা ফলং সমুদেতীতি সমুদযো. এতস্মা ফলং জাযতীতি জাতি. এতস্মা ফলং পভৰতীতি পভৰো. মূলং পুচ্ছতীতি কলহস্স কারণং পুচ্ছতি. কারণঞ্হি পতিট্ঠট্ঠেন মূলং. অত্তনো ফলনিপ্ফাদনত্থং হিনোতি পৰত্ততীতি হেতু. ‘‘হন্দ নং গণ্হথা’’তি দস্সেন্তং ৰিয অত্তনো ফলং নিদেতীতি নিদানং. এতস্মা ফলং সম্ভৰতীতি সম্ভৰো. পভৰতি ফলং এতস্মাতি পভৰো. সমুট্ঠাতি এত্থ ফলং, এতেন ৰা সমুট্ঠাতীতি সমুট্ঠানং. অত্তনো ফলং আহরতীতি আহারো. অপটিক্খিপিতব্বট্ঠেন অত্তনো ফলং আরমেতীতি আরম্মণং. এতং পটিচ্চ অপটিক্খিপিত্ৰা ফলং এতি পৰত্ততীতি পচ্চযো. এতস্মা ফলং সমুদেতীতি সমুদযোতি এৰমেতেসং পদানং ৰচনত্থো ৰেদিতব্বো. তং সন্ধায ‘‘কলহস্স চ ৰিৰাদস্স চ মূলং পুচ্ছতী’’তিআদিনা নযেন দেসনা ৰুত্তা.

৯৮. পিযপ্পহূতাতি পিযৰত্থুতো জাতা. মচ্ছেরযুত্তা কলহা ৰিৰাদাতি ইমিনা কলহৰিৰাদাদীনং ন কেৰলং পিযৰত্থুমেৰ, মচ্ছরিযম্পি পচ্চযং দস্সেতি. কলহৰিৰাদসীসেন চেত্থ সব্বেপি তে ধম্মা ৰুত্তাতি ৰেদিতব্বা. যথা চ এতেসং মচ্ছরিযং, তথা পেসুণানঞ্চ ৰিৰাদং. তেনাহ ‘‘ৰিৰাদজাতেসু চ পেসুণানী’’তি. ইমিস্সা গাথায নিদ্দেসো উত্তানত্থোযেৰ.

৯৯. পিযা সু লোকস্মিং কুতোনিদানা, যে চাপি লোভা ৰিচরন্তি লোকেতি ‘‘পিযপ্পহূতা কলহা’’তি যে এত্থ ৰুত্তা, তে পিযা লোকস্মিং কুতোনিদানা, ন কেৰলঞ্চ পিযা, যে চাপি খত্তিযাদযো লোকে ৰিচরন্তি লোভহেতু লোভেনাভিভূতা ৰিচরন্তি, তেসং সো লোভো চ কুতোনিদানোতি দ্ৰে অত্থে একায পুচ্ছায পুচ্ছতি. কুতোনিদানাতি চেত্থ কিংনিদানা কিংহেতুকাতি পচ্চত্তৰচনস্স তোআদেসো ৰেদিতব্বো, সমাসে চস্স লোপাভাৰো. অথ ৰা নিদানাতি জাতা, উপ্পন্নাতি অত্থো. তস্মা কুতো জাতা কুতো উপ্পন্নাতি ৰুত্তং হোতি. আসা চ নিট্ঠা চাতি আসা চ তস্সা আসায সমিদ্ধি চ. যে সম্পরাযায নরস্স হোন্তীতি যে নরস্স সম্পরাযায হোন্তি, পরাযনা হোন্তীতি ৰুত্তং হোতি. একা এৰাযম্পি পুচ্ছা.

দীপা হোন্তীতি পতিট্ঠা ভৰন্তি. সরণা হোন্তীতি দুক্খনাসনা হোন্তি. নিট্ঠাপরাযনা হোন্তীতি সমিদ্ধিপরাযনা হোন্তি.

১০০. ছন্দানিদানানীতি কামচ্ছন্দাদিছন্দনিদানানি. যে চাপি লোভা ৰিচরন্তীতি যে চাপি খত্তিযাদযো লোভা ৰিচরন্তি, তেসং লোভোপি ছন্দনিদানোতি দ্ৰেপি অত্থে একতো ৰিস্সজ্জেতি. ইতোনিদানাতি ছন্দনিদানা এৰাতি ৰুত্তং হোতি. ‘‘ইতোনিদানা’’তি হি ছন্দং সন্ধাযাহ. ছন্দনিদানা হি লোভাদযো. ‘‘ইতোনিদানা’’তি সদ্দসিদ্ধি চেত্থ ‘‘কুতোনিদানা’’তি এত্থ ৰুত্তনযেন ৰেদিতব্বা. আসায সমিদ্ধি ৰুচ্চতি নিট্ঠাতি অজ্ঝাসযনিব্বত্তিপটিলাভো কথীযতি.

১০১. ৰিনিচ্ছযাতি তণ্হাদিট্ঠিৰিনিচ্ছযা. যে চাপি ধম্মা সমণেন ৰুত্তাতি যে চ অঞ্ঞেপি কোধাদীহি সম্পযুত্তা, তথারূপা ৰা অকুসলা ধম্মা বুদ্ধসমণেন ৰুত্তা, তে কুতোপহূতাতি.

অঞ্ঞজাতিকাতি অঞ্ঞসভাৰা. অঞ্ঞৰিহিতকাতি অঞ্ঞেনাকারেন ঠিতা. সমিতপাপেনাতি নিব্বাপিতপাপেন. বাহিতপাপধম্মেনাতি পহীনলামকধম্মেন. ভিন্নকিলেসমূলেনাতি কিলেসমূলানি ভিন্দিত্ৰা ঠিতেন. সব্বাকুসলমূলবন্ধনা পমুত্তেনাতি দ্ৰাদসঅকুসলবন্ধনং মোচেত্ৰা ঠিতেন. ৰুত্তাতি কথিতা. পৰুত্তাতি পকারেন কথিতা.

১০২. তমূপনিস্সায পহোতি ছন্দোতি তং সুখদুক্খৰেদনং তদুভযৰত্থুসঙ্খাতং সাতাসাতং উপনিস্সায সংযোগৰিযোগপত্থনাৰসেন ছন্দো পহোতি. এত্তাৰতা ‘‘ছন্দো নু লোকস্মিং কুতোনিদানো’’তি অযং পঞ্হো ৰিস্সজ্জিতো হোতি. রূপেসু দিস্ৰা ৰিভৰং ভৰঞ্চাতি রূপেসু ৰযঞ্চ উপ্পাদঞ্চ দিস্ৰা. ৰিনিচ্ছযং কুব্বতি জন্তু লোকেতি অপাযাদিকে লোকে অযং জন্তু ভোগাধিগমত্থং তণ্হাৰিনিচ্ছযং ‘‘অত্তা মে উপ্পন্নো’’তিআদিনা নযেন দিট্ঠিৰিনিচ্ছযঞ্চ কুরুতে. এত্তাৰতা ‘‘ৰিনিচ্ছযা চাপি কুতোপভূতা’’তি অযং পঞ্হো ৰিস্সজ্জিতো হোতি.

সাতাসাতং নিস্সাযাতি মধুরঞ্চ অমধুরঞ্চ উপনিস্সযং কত্ৰা. ইট্ঠানিট্ঠন্তি ইট্ঠারম্মণঞ্চ অনিট্ঠারম্মণঞ্চ.

সুরামেরযমজ্জপ্পমাদট্ঠানানুযোগন্তি এত্থ সুরাতি পিট্ঠসুরা পূৰসুরা ওদনসুরা কিণ্ণপক্খিত্তা সম্ভারসংযুত্তাতি পঞ্চ সুরা. মেরযন্তি পুপ্ফাসৰো ফলাসৰো মধ্ৰাসৰো গুল়াসৰো সম্ভারসংযুত্তোতি পঞ্চ আসৰা. তং সব্বম্পি মদকরণৰসেন মজ্জং. পমাদট্ঠানন্তি পমাদকারণং, যায চেতনায তং মজ্জং পিৰতি, তস্সেতং অধিৰচনং. অনুযোগন্তি তং সুরামেরযমজ্জপ্পমাদট্ঠানানুযোগং অনুআযোগং পুনপ্পুনং করণং. যস্মা চ পন তং অনুযুত্তস্স মে উপ্পন্না চেৰ ভোগা পরিহাযন্তি, অনুপ্পন্না চ নুপ্পজ্জন্তি, তস্মা ‘‘মে ভোগা পরিক্খযং খীণভাৰং গচ্ছন্তী’’তি জানাতি. এৰং সব্বত্থ. ৰিকালৰিসিখাচরিযানুযোগন্তি অৰেলায ৰিসিখাসু চরিযানুযুত্তং. সমজ্জাভিচরণন্তি নচ্চাদিদস্সনৰসেন সমজ্জাভিগমনং. আলস্যানুযোগন্তি কাযালসিযতায যুত্তপ্পযুত্ততং. অপাযমুখানি ন সেৰতীতি ভোগানং ৰিনাসদ্ৰারানি ন সেৰতি.

কসিযা ৰাতি কসিকম্মেন ৰা. ৰণিজ্জায ৰাতি ধম্মিকৰণিজ্জকম্মেন ৰা. গোরক্খেন ৰাতি গোপালকম্মেন ৰা. ইস্সত্থেন ৰাতি ধনুসিপ্পেন ৰা. রাজপোরিসেন ৰাতি রাজসেৰককম্মেন ৰা. সিপ্পঞ্ঞতরেন ৰাতি কুম্ভকারাদিসিপ্পানং অঞ্ঞতরেন ৰা. পটিপজ্জতীতি পযোগং করোতি. চক্খুস্মিং উপ্পন্নে জানাতীতি সসম্ভারচক্খুস্মিং উপ্পন্নে জানাতি. ‘‘অত্তা মে উপ্পন্নো’’তি দিট্ঠিং গণ্হাতি. চক্খুস্মিং অন্তরহিতেতি তস্মিং ৰিনট্ঠে. অত্তা মে অন্তরহিতোতি ‘‘মম অত্তা ৰিনট্ঠো’’তি দিট্ঠিং গণ্হাতি. ৰিগতো মে অত্তাতি ৰীতিক্কন্তো মম অত্তা. সোতস্মিন্তিআদীসুপি এসেৰ নযো.

১০৩. এতেপি ধম্মা দ্ৰযমেৰ সন্তেতি এতে কোধাদযো ধম্মা সাতাসাতদ্ৰযে সন্তে এৰ হোন্তি উপ্পজ্জন্তি. এত্তাৰতা ততিযপঞ্হোপি ৰিস্সজ্জিতো হোতি. ইদানি যো এৰং ৰিস্সজ্জিতেসু এতেসু পঞ্হেসু কথংকথী ভৰেয্য, তস্স কথংকথাপহানূপাযং দস্সেন্তো আহ ‘‘কথংকথী ঞাণপথায সিক্খে’’তি, ঞাণদস্সনঞাণাধিগমনত্থং তিস্সো সিক্খা সিক্খেয্যাতি ৰুত্তং হোতি. কিংকারণা? ঞত্ৰা পৰুত্তা সমণেন ধম্মা. বুদ্ধসমণেন হি ঞত্ৰা ধম্মা ৰুত্তা, নত্থি তস্স ধম্মেসু অঞ্ঞাণং, অত্তনো পন ঞাণানুভাৰেন তে অজানন্তো ন জানেয্য, ন দেসনাদোসেন. তস্মা কথংকথী ঞাণপথায সিক্খে, ঞত্ৰা পৰুত্তা সমণেন ধম্মাতি.

পক্খেপবন্ধনেন ৰা বদ্ধোতি নাগরিকবন্ধেন বদ্ধো. পরিক্খেপবন্ধনেন ৰাতি ৰতিপরিক্খেপবন্ধনেন ৰা. গামবন্ধনেনাতিআদীসু তস্মা তস্মা ঠানতো নিক্খমিতুং অলভন্তো গামবন্ধনাদীহি বদ্ধো নাম হোতি. তস্স বন্ধনস্স মোক্খত্থাযাতি এতস্স ৰুত্তপ্পকারস্স বন্ধনস্স মোচনত্থং.

ঞাণম্পি ঞাণপথোতি পুরে উপ্পন্নং ঞাণং অপরাপরুপ্পন্নস্স ঞাণম্পি ঞাণস্স সঞ্চরণমগ্গোতি ঞাণম্পি ঞাণপথো. ঞাণস্স আরম্মণম্পি ঞাণপথোতি ঞাণস্স পচ্চযোপি তং আলম্বিত্ৰা উপ্পজ্জনতো ঞাণপথো. ঞাণসহভুনোপি ধম্মা ঞাণপথোতি ঞাণেন সহুপ্পন্না অৰসেসা চিত্তচেতসিকা ধম্মাপি ঞাণপথো. ইদানি উপমায সাধেন্তো ‘‘যথা অরিযমগ্গো অরিযপথো’’তিআদিমাহ.

কথংকথী পুগ্গলোতি ৰিচিকিচ্ছাৰন্তো পুগ্গলো. সকঙ্খোতি সদ্ৰেল়্হকো. সৰিলেখোতি চিত্তরাজিৰন্তো. সদ্ৰেল়্হকোতি কঙ্খাৰন্তো. সৰিচিকিচ্ছোতি সন্দেহৰন্তো. ঞাণাধিগমাযাতি ঞাণপটিলাভত্থায. ঞাণফুসনাযাতি ঞাণপটিৰিজ্ঝনত্থায. অথ ৰা ঞাণৰিন্দনত্থায. ঞাণসচ্ছিকিরিযাযাতি ঞাণস্স পচ্চক্খকরণত্থায. সনিদানাহন্তি অহং সনিদানং সপচ্চযং কত্ৰা ধম্মদেসনং করোমি. সপ্পাটিহারিযন্তি নিয্যানিকং কত্ৰা. নো অপ্পাটিহারিযন্তি অনিয্যানিকং অকত্ৰা ধম্মদেসনং করোমি.

১০৪. সাতং অসাতঞ্চ কুতোনিদানাতি এত্থ সাতাসাতন্তি সুখদুক্খৰেদনা এৰ অধিপ্পেতা. ন ভৰন্তি হেতেতি ন ভৰন্তি এতে. ৰিভৰং ভৰঞ্চাপি যমেতমত্থং, এতং মে পব্রূহি যতোনিদানন্তি সাতাসাতানং ৰিভৰং ভৰঞ্চ এতম্পি যং অত্থং. লিঙ্গব্যত্তযো এত্থ কতো. ইদং পন ৰুত্তং হোতি – সাতাসাতানং ৰিভৰো ভৰো চাতি যো এস অত্থো, এতং মে পব্রূহি যতোনিদানন্তি. এত্থ চ সাতাসাতানং ৰিভৰভৰৰত্থুকা ৰিভৰভৰদিট্ঠিযো এৰ ৰিভৰভৰাতি অত্থতো ৰেদিতব্বা. তথা হি ইমস্স পঞ্হস্স ৰিস্সজ্জনপক্খে ‘‘ভৰদিট্ঠিপি ফস্সনিদানা, ৰিভৰদিট্ঠিপি ফস্সনিদানা’’তি উপরি নিদ্দেসে (মহানি. ১০৫) ৰক্খতি. ইমায গাথায নিদ্দেসে ৰত্তব্বং নত্থি.

১০৫. ইতোনিদানন্তি ফস্সনিদানং. ইমাযপি ৰত্তব্বং নত্থি.

১০৬. কিস্মিং ৰিভূতে ন ফুসন্তি ফস্সাতি কিস্মিং ৰীতিৰত্তে চক্খুসম্ফস্সাদযো পঞ্চ ফস্সা ন ফুসন্তি. ইমাযপি ৰত্তব্বং নত্থি.

১০৭. নামঞ্চ রূপঞ্চ পটিচ্চাতি সম্পযুত্তকনামঞ্চ ৰত্থারম্মণরূপঞ্চ পটিচ্চ. রূপে ৰিভূতে ন ফুসন্তি ফস্সাতি রূপে ৰীতিৰত্তে পঞ্চ ফস্সা ন ফুসন্তি.

তিণ্ণং সঙ্গতি ফস্সোতি চক্খুরূপৰিঞ্ঞাণানং তিণ্ণন্নং সঙ্গতিযা ফস্সো জাযতি. চক্খু চ রূপা চ রূপস্মিন্তি পসাদচক্খুঞ্চ রূপারম্মণানি চ রূপভাগে রূপকোট্ঠাসে কত্ৰা. চক্খুসম্ফস্সং ঠপেত্ৰাতি তিণ্ণং সঙ্গতিযা উপ্পন্নফস্সং মুঞ্চিত্ৰা. সম্পযুত্তকা ধম্মা নামস্মিন্তি অৰসেসা ৰেদনাদযো ফস্সেন সহজাতা ধম্মা নামভাগে. সোতঞ্চ পটিচ্চাতিআদীসুপি এসেৰ নযো.

চতূহাকারেহি রূপং ৰিভূতং হোতীতি চতূহি কারণেহি রূপং ৰীতিৰত্তং হোতি. ঞাতৰিভূতেনাতি পাকটং কত্ৰা ৰীতিৰত্তেন. তীরণৰিভূতেনাতি অনিচ্চাদিতো তীরযিত্ৰা ৰীতিৰত্তেন. পহানৰিভূতেনাতি ছন্দরাগপহানতো ৰীতিৰত্তেন. সমতিক্কমৰিভূতেনাতি চতুন্নং অরূপসমাপত্তীনং পটিলাভৰসেন ৰীতিৰত্তেন.

১০৮. কথং সমেতস্সাতি কথং পটিপন্নস্স. ৰিভোতি রূপন্তি রূপং ৰিভৰতি, ন ভৰেয্য ৰা. সুখং দুখঞ্চাতি ইট্ঠানিট্ঠরূপমেৰ পুচ্ছতি.

জানেয্যামাতি জানিস্সাম. আজানেয্যামাতি ৰিসেসেন জানিস্সাম. ৰিজানেয্যামাতি অনেকৰিধেন জানিস্সাম. পটিৰিজানেয্যামাতি সম্মা জানিস্সাম. পটিৰিজ্ঝেয্যামাতি চিত্তেন বুজ্ঝিস্সাম.

১০৯. ন সঞ্ঞসঞ্ঞীতি যথা সমেতস্স ৰিভোতি রূপং, সো পকতিসঞ্ঞায সঞ্ঞীপি ন হোতি. ন ৰিসঞ্ঞসঞ্ঞীতি ৰিসঞ্ঞাযপি ৰিরূপায সঞ্ঞায ৰিসঞ্ঞী ন হোতি উম্মত্তকো ৰা খিত্তচিত্তো ৰা. নোপি অসঞ্ঞীতি সঞ্ঞাৰিরহিতোপি ন হোতি নিরোধসমাপন্নো ৰা অসঞ্ঞসত্তো ৰা. ন ৰিভূতসঞ্ঞীতি ‘‘সব্বসো রূপসঞ্ঞান’’ন্তিআদিনা (ৰিভ. ৫০৮) নযেন সমতিক্কন্তসঞ্ঞীপি ন হোতি অরূপজ্ঝানলাভী. এৰং সমেতস্স ৰিভোতি রূপন্তি এতস্মিং সঞ্ঞসঞ্ঞিতাদিভাৰে অট্ঠত্ৰা যদেতং ৰুত্তং ‘‘সো এৰং সমাহিতে চিত্তে…পে… আকাসানঞ্চাযতনসমাপত্তিপটিলাভত্থায চিত্তং অভিনীহরতী’’তি, এৰং সমেতস্স অরূপমগ্গসমঙ্গিনো ৰিভোতি রূপং. সঞ্ঞানিদানা হি পপঞ্চসঙ্খাতি এৰং পটিপন্নস্সাপি চ যা সঞ্ঞা, তংনিদানা তণ্হাদিট্ঠিপপঞ্চাস্স অপ্পহীনাৰ হোন্তীতি দস্সেতি.

অসঞ্ঞিনো ৰুচ্চন্তি নিরোধসমাপন্নাতি সঞ্ঞাৰেদনা নিরোধেত্ৰা নিরোধসমাপন্না সঞ্ঞাভাৰেন অসঞ্ঞিনোতি কথীযন্তি. অসঞ্ঞসত্তাতি সব্বেন সব্বং সঞ্ঞাভাৰেন অসঞ্ঞভৰে নিব্বত্তা.

সো এৰং সমাহিতে চিত্তেতি তত্থ সোতি সো ভিক্খু. এৰন্তি চতুত্থজ্ঝানক্কমনিদস্সনমেতং, ইমিনা কমেন চতুত্থজ্ঝানং পটিলভিত্ৰাতি ৰুত্তং হোতি. সমাহিতেতি ইমিনা চতুত্থজ্ঝানসমাধিনা সমাহিতে. পরিসুদ্ধেতিআদীসু পন উপেক্খাসতিপারিসুদ্ধিভাৰেন পরিসুদ্ধে. পরিসুদ্ধত্তাযেৰ পরিযোদাতে, পভস্সরেতি ৰুত্তং হোতি. সুখাদীনং পচ্চযানং ঘাতেন ৰিহতরাগাদিঅঙ্গণত্তা অনঙ্গণে. অনঙ্গণত্তা এৰ চ ৰিগতূপক্কিলেসে. অঙ্গণেন হি চিত্তং উপক্কিলিস্সতি. সুভাৰিতত্তা মুদুভূতে, ৰসীভাৰপ্পত্তেতি ৰুত্তং হোতি. ৰসে ৰত্তমানঞ্হি চিত্তং মুদূতি ৰুচ্চতি. মুদুত্তাযেৰ চ কম্মনিযে, কম্মক্খমে কম্মযোগ্গেতি ৰুত্তং হোতি. মুদু হি চিত্তং কম্মনিযং হোতি সুদ্ধন্তমিৰ সুৰণ্ণং. তদুভযম্পি চ সুভাৰিতত্তাযেৰ. যথাহ ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং ভাৰিতং কম্মনিযং হোতি যথযিদং, ভিক্খৰে, চিত্ত’’ন্তি (অ. নি. ১.২২).

এতেসু হি পরিসুদ্ধভাৰাদীসু ঠিতত্তা ঠিতে. ঠিতত্তাযেৰ আনেঞ্জপ্পত্তে অচলে নিরিঞ্জনেতি ৰুত্তং হোতি. মুদুকম্মঞ্ঞভাৰেন ৰা অত্তনো ৰসে ঠিতত্তা ঠিতে. সদ্ধাদীহি পরিগ্গহিতত্তা আনেঞ্জপ্পত্তে. সদ্ধাপরিগ্গহিতঞ্হি চিত্তং অস্সদ্ধিযেন ন ইঞ্জতি, ৰীরিযপরিগ্গহিতং কোসজ্জেন ন ইঞ্জতি, সতিপরিগ্গহিতং পমাদেন ন ইঞ্জতি, সমাধিপরিগ্গহিতং উদ্ধচ্চেন ন ইঞ্জতি, পঞ্ঞাপরিগ্গহিতং অৰিজ্জায ন ইঞ্জতি, ওভাসগতং কিলেসন্ধকারেন ন ইঞ্জতি. ইমেহি ছহি ধম্মেহি পরিগ্গহিতুং আনেঞ্জপ্পত্তং হোতি. এৰং অট্ঠঙ্গসমন্নাগতং চিত্তং অভিনীহারক্খমং হোতি আকাসানঞ্চাযতনসমাপত্তিপটিলাভত্থায.

অপরো নযো – চতুত্থজ্ঝানসমাধিনা সমাহিতে. নীৰরণদূরীভাৰেন পরিসুদ্ধে. ৰিতক্কাদিসমতিক্কমেন পরিযোদাতে. ঝানপটিলাভপচ্চনিকানং পাপকানং ইচ্ছাৰচরানঞ্চ অভাৰেন অনঙ্গণে. ইচ্ছাৰচরানন্তি ইচ্ছায অৰচরানং, ইচ্ছাৰসেন ওতিণ্ণানং পৰত্তানং নানপ্পকারানং কোপঅপ্পচ্চযানন্তি অত্থো. অভিজ্ঝাদীনং চিত্তূপক্কিলেসানং ৰিগমেন ৰিগতূপক্কিলেসে. উভযম্পি চেতং অঙ্গণসুত্তৰত্থসুত্তানুসারেনেৰ (ম. নি. ১.৫৭ আদযো, ৭০ আদযো) ৰেদিতব্বং. ৰসিপ্পত্তিযা মুদুভূতে. ইদ্ধিপাদভাৰূপগমনেন কম্মনিযে. ভাৰনাপারিপূরিযা পণীতভাৰূপগমেন ঠিতে আনেঞ্জপ্পত্তে, যথা আনেঞ্জভাৰং আনেঞ্জপ্পত্তং হোতি, এৰং ঠিতেতি অত্থো. এৰম্পি অট্ঠঙ্গসমন্নাগমেন চিত্তং অভিনীহারক্খমং হোতি আকাসানঞ্চাযতনসমাপত্তিপটিলাভত্থায পাদকং পদট্ঠানভূতং.

আরুপ্পমগ্গসমঙ্গীতি অরূপসমাপত্তিযা গমনমগ্গেন অপরিহীনো. পপঞ্চাযেৰ পপঞ্চসঙ্খাতি তণ্হাদিপপঞ্চাযেৰ পপঞ্চসঙ্খা.

১১০. এত্তাৰতগ্গং নু ৰদন্তি হেকে, যক্খস্স সুদ্ধিং ইধ পণ্ডিতাসে. উদাহু অঞ্ঞম্পি ৰদন্তি এত্তোতি এত্তাৰতা নু ইধ পণ্ডিতা সমণব্রাহ্মণা অগ্গং সুদ্ধিং সত্তস্স ৰদন্তি, উদাহু অঞ্ঞম্পি এত্তো অরূপসমাপত্তিতো অধিকঞ্চ ৰদন্তীতি পুচ্ছতি.

এত্তো অরূপসমাপত্তিতোতি এতস্মা অরূপসমাপত্তিতো.

১১১. এত্তাৰতগ্গম্পি ৰদন্তি হেকেতি একে সস্সতৰাদা সমণব্রাহ্মণা পণ্ডিতমানিনো এত্তাৰতাপি অগ্গং সুদ্ধিং ৰদন্তি. তেসং পনেকে সমযং ৰদন্তীতি তেসঞ্ঞেৰ একে উচ্ছেদৰাদা সমযং উচ্ছেদং ৰদন্তি. অনুপাদিসেসে কুসলাৰদানাতি অনুপাদিসেসে কুসলৰাদা সমানা.

ভৰতজ্জিতাতি ভৰতো ভীতা. ৰিভৰং অভিনন্দন্তীতি উচ্ছেদং পটিচ্চ তুস্সন্তি. তে সত্তস্স সমন্তি তে উচ্ছেদৰাদিনো পুগ্গলস্স সমং অনুপ্পত্তিং ৰদন্তি. উপসমন্তি অতীৰ সমং. ৰূপসমন্তি সন্তং. নিরোধন্তি অনুপ্পাদং. পটিপস্সদ্ধিন্তি অপুনুপ্পত্তিং.

১১২. এতে চ ঞত্ৰা উপনিস্সিতাতি এতে চ দিট্ঠিগতিকে সস্সতুচ্ছেদদিট্ঠিযো নিস্সিতাতি ঞত্ৰা. ঞত্ৰা মুনী নিস্সযে সো ৰীমংসীতি নিস্সযে চ ঞত্ৰা সো ৰীমংসী পণ্ডিতো বুদ্ধমুনি. ঞত্ৰা ৰিমুত্তোতি দুক্খানিচ্চাদিতো ধম্মে ঞত্ৰা ৰিমুত্তো. ভৰাভৰায ন সমেতীতি পুনপ্পুনং উপপত্তিযা ন সমাগচ্ছতি. অপরামসন্তি অপরামসন্তো. পরামাসং নাপজ্জন্তোতি অত্থো.

সদ্ধম্মপ্পজ্জোতিকায মহানিদ্দেসট্ঠকথায

কলহৰিৰাদসুত্তনিদ্দেসৰণ্ণনা নিট্ঠিতা.

১২. চূল়ব্যূহসুত্তনিদ্দেসৰণ্ণনা

দ্ৰাদসমে চূল়ব্যূহসুত্তনিদ্দেসে সকংসকংদিট্ঠিপরিব্বসানাতি ইদম্পি তস্মিংযেৰ মহাসমযে ‘‘সব্বেপিমে দিট্ঠিগতিকা ‘সাধুরূপাম্হা’তি ভণন্তি, কিং নু খো সাধুরূপাৰ ইমে অত্তনো এৰ দিট্ঠিযা পতিট্ঠহন্তি, উদাহু অঞ্ঞম্পি দিট্ঠিং গণ্হন্তী’’তি উপ্পন্নচিত্তানং একচ্চানং দেৰতানং তমত্থং পকাসেতুং পুরিমনযেনেৰ নিম্মিতবুদ্ধেন অত্তানং পুচ্ছাপেত্ৰা ৰুত্তং.

১১৩. তত্থ আদিতো দ্ৰেপি গাথা পুচ্ছাগাথাযেৰ. তাসু সকং সকং দিট্ঠিপরিব্বসানাতি অত্তনো অত্তনো দিট্ঠিযা ৰসমানা. ৰিগ্গয্হ নানা কুসলা ৰদন্তীতি তং দিট্ঠিং বলৰগ্গাহং গহেত্ৰা ‘‘তত্থ কুসলাম্হা’’তি পটিজানমানা পুথু পুথু ৰদন্তি, একং ন ৰদন্তি. যো এৰং জানাতি স ৰেদি ধম্মং, ইদং পটিক্কোসমকেৰলী সোতি তঞ্চ দিট্ঠিং সন্ধায যো এৰং জানাতি, সো ধম্মং ৰেদিযি. ইদং পন পটিক্কোসন্তো হীনো হোতীতি চ ৰদন্তি.

নানা ৰদন্তীতি নানাকারণং ভণন্তি. ৰিৰিধং ৰদন্তীতি নানাৰিধং ভণন্তি. অঞ্ঞোঞ্ঞং ৰদন্তীতি একং অৰত্ৰা অঞ্ঞং অঞ্ঞং গহেত্ৰা ৰদন্তি. অকেৰলী সোতি যো অকুসলো অযং. অসমত্তোতি ন পরিপূরো. অপরিপুণ্ণোতি ন সম্পুণ্ণো.

১১৪. বালোতি হীনো. অক্কুসলোতি অৰিদ্ৰা.

১১৫. ইদানি তিস্সো ৰিস্সজ্জনগাথা হোন্তীতি. তা পুরিমড্ঢেন ৰুত্তমত্থং পচ্ছিমড্ঢেন পটিব্যূহিত্ৰা ঠিতা. তেন ব্যূহেন উত্তরসুত্ততো চ অপ্পকত্তা ইদং সুত্তং ‘‘চূল়ব্যূহ’’ন্তি নামং লভি. তত্থ পঠমগাথাযং তাৰ পরস্স চে ধম্মন্তি পরস্স দিট্ঠিং. সব্বেৰিমে বালাতি এৰং সন্তে সব্বেৰ ইমে বালা হোন্তীতি অধিপ্পাযো. কিংকারণা? সব্বেৰিমে দিট্ঠিপরিব্বসানাতি.

১১৬. সন্দিট্ঠিযা চেৰ ন ৰীৰদাতা, সংসুদ্ধপঞ্ঞা কুসলা মুতীমাতি সকায দিট্ঠিযা অনৰীৰদাতা অৰোদাতা সংকিলিট্ঠাৰ সমানা সংসুদ্ধপঞ্ঞা চ কুসলা চ মুতিমন্তো চ তে হোন্তি চে. অথ ৰা ‘‘সন্দিট্ঠিযা চে ৰদাতা’’তি পাঠো, তস্সত্থো – সকায পন দিট্ঠিযা ৰোদাতা সংসুদ্ধপঞ্ঞা কুসলা মুতিমন্তো হোন্তি চে, ন তেসং কোচীতি এৰং সন্তে তেসং একোপি নিহীনপঞ্ঞো ন হোতি, কিংকারণা? দিট্ঠী হি তেসম্পি তথা সমত্তা, যথা ইতরেসন্তি.

১১৭. ন ৰাহমেতন্তি গাথায সঙ্খেপত্থো – যং তে মিথু দ্ৰে দ্ৰে জনা অঞ্ঞমঞ্ঞং ‘‘বালো’’তি আহু, অহং এতং তথিযন্তি তচ্ছন্তি নেৰ ব্রূমি. কিংকারণা? যস্মা সব্বেৰ তে সকং সকং দিট্ঠিং ‘‘ইদমেৰ সচ্চং মোঘমঞ্ঞ’’ন্তি অকংসু, তেন চ কারণেন পরং ‘‘বালো’’তি দহন্তি. এত্থ চ তথিযং, তথেৰন্তি (সু. নি. অট্ঠ. ২.৮৮৯) দ্ৰেপি পাঠা.

তচ্ছন্তি অতুচ্ছং. তথন্তি অৰিপরীতং, ভূতন্তি সন্তং. যাথাৰন্তি সংৰিজ্জমানং. অৰিপরিতন্তি ন ৰিসঙ্কেতং.

১১৮. যমাহূতি পুচ্ছাগাথায ‘‘যং দিট্ঠিসচ্চং তথিয’’ন্তি একে আহু.

১১৯. একঞ্হি সচ্চন্তি ৰিস্সজ্জনগাথায একং সচ্চং নিরোধো মগ্গো ৰা. যস্মিং পজা নো ৰিৰদে পজানন্তি যম্হি সচ্চে পজানন্তো পজা নো ৰিৰদেয্যুং. সযং থুনন্তীতি অত্তনা ৰদন্তি.

১২০. কস্মা নূতি পুচ্ছাগাথায পৰাদিযাসেতি ৰাদিনো. উদাহু তে তক্কমনুস্সরন্তীতি তে ৰাদিনো উদাহু অত্তনো তক্কমত্তং অনুগচ্ছন্তি.

তক্কপরিযাহতন্তি ৰিতক্কেন সমন্ততো আহতং. ৰীমংসানুচরিতন্তি অত্তনো উপট্ঠিতপঞ্ঞায ৰিচরিতং. সযংপটিভানন্তি অত্তনো পটিভানং.

১২১. ন হেৰাতি ৰিস্সজ্জনগাথায অঞ্ঞত্র সঞ্ঞায নিচ্চানীতি ঠপেত্ৰা সঞ্ঞামত্তেন নিচ্চন্তি গহিতগ্গহণানি. তক্কঞ্চ দিট্ঠীসু পকপ্পযিত্ৰাতি অত্তনো নিচ্চসঙ্কপ্পমত্তং দিট্ঠীসু জনেত্ৰা.

যস্মা পন দিট্ঠীসু ৰিতক্কং জনেন্তা দিট্ঠিযো সঞ্জনেন্তি, তস্মা ৰুত্তং ‘‘দিট্ঠিগতানি জনেন্তি সঞ্জনেন্তী’’তিআদি. জনেন্তীতি উপরূপরি দিট্ঠিং উপ্পাদেন্তা জনেন্তি. সঞ্জনেন্তীতিআদীনি উপসগ্গৰসেন পদং ৰড্ঢেত্ৰা ৰুত্তানি. ময্হং সচ্চন্তি মম ৰচনং তচ্ছং.

১২২. ইদানি এৰং নানাসচ্চেসু অসন্তেসু তক্কমত্তং অনুস্সরন্তানং দিট্ঠিগতিকানং ৰিপ্পটিপত্তিং দস্সেতুং ‘‘দিট্ঠে সুতে’’তিআদিকা গাথাযো অভাসি. তত্থ দিট্ঠেতি দিট্ঠং, দিট্ঠসুদ্ধিন্তি অধিপ্পাযো. এস নযো সুতাদীসু. এতে চ নিস্সায ৰিমানদস্সীতি এতে দিট্ঠিধম্মে নিস্সযিত্ৰা সুদ্ধিভাৰসঙ্খাতং ৰিমানং অসম্মানং পস্সন্তোপি. ৰিনিচ্ছযে ঠত্ৰা পহস্সমানো, বালো পরো অক্কুসলোতি চাহাতি এৰং ৰিমানদস্সীপি তস্মিং দিট্ঠিৰিনিচ্ছযে ঠত্ৰা তুট্ঠিজাতো হাসজাতো হুত্ৰা পরো ‘‘হীনো চ অৰিদ্ৰা চা’’তি এৰং ৰদতিযেৰ.

ন সম্মানেতীতিপি ৰিমানদস্সীতি ন বহুমানং করোতীতি এৰম্পি ৰিমানদস্সী ন বহুমানদস্সী. দোমনস্সং জনেতীতি পঠমং দিট্ঠিনিস্সযং অল্লীযিত্ৰা দোমনস্সং পত্ৰা পচ্ছা দিট্ঠিৰিনিচ্ছযে ঠিতকালে সোমনস্সং উপ্পাদেতীতি অত্থো.

ৰিনিচ্ছযদিট্ঠিযা ঠত্ৰাতি সন্নিট্ঠানং কত্ৰা গহিতদিট্ঠিযা ঠত্ৰা.

১২৩. এৰং সন্তে যেনেৰাতি গাথা. তত্থ সযমত্তনাতি সযমেৰ অত্তানং. ৰিমানেতীতি গরহতি. তদেৰ পাৰাতি তদেৰ ৰচনং দিট্ঠিং ৰদতি, তং ৰা পুগ্গলং.

১২৪. অতিসারদিট্ঠিযাতি গাথাযত্থো – সো এৰং তায লক্খণাতিসারিনিযা অতিসারদিট্ঠিযা সমত্তো পরিপুণ্ণো উদ্ধুমাতো, তেন চ দিট্ঠিমানেন মত্তো ‘‘পরিপুণ্ণো অহং কেৰলী’’তি এৰং পরিপুণ্ণমানী. সযমেৰ অত্তানং মনসা ‘‘অহং পণ্ডিতো’’তি অভিসিঞ্চতি. কিংকারণা? দিট্ঠী হি সা তস্স তথা সমত্তাতি.

সব্বা তা দিট্ঠিযো লক্খণাতিক্কন্তাতি তা সব্বা দ্ৰাসট্ঠিদিট্ঠিযো লক্খণং অতীতা অতিসরন্তীতি অতিক্কন্তা. অনোমোতি অনূনো.

১২৫. পরস্স চেতি গাথায সম্বন্ধো অত্থো চ – কিঞ্চ ভিয্যো? যো সো ৰিনিচ্ছযে ঠত্ৰা পহস্সমানো ‘‘বালো পরো অক্কুসলো’’তি চাহ, তস্স পরস্স চে হি ৰচসা সো তেন ৰুচ্চমানো নিহীনো হোতি, তুমো সহা হোতি নিহীনপঞ্ঞো, সোপি তেনেৰ সহ নিহীনপঞ্ঞো হোতি. সোপি হি তং ‘‘বালো’’তি ৰদতি. অথ তস্স ৰচনং অপ্পমাণং, সো পন সযমেৰ ৰেদগূ চ ধীরো চ হোতি. এৰং সন্তে ন কোচি বালো সমণেসু অত্থি. সব্বেপি হি তে অত্তনো ইচ্ছায পণ্ডিতা.

ৰাচাযাতি কথনেন. ৰচনেনাতি ভাসিতেন. নিন্দিতকারণাতি গরহহেতুনা. গরহিতকারণাতি অৰঞ্ঞাতহেতুনা. উপৰদিতকারণাতি উপৰাদহেতুনা.

১২৬. অঞ্ঞং ইতোতি গাথায সম্বন্ধো অত্থো চ – ‘‘অথ চে সযং ৰেদগূ হোতি ধীরো. ন কোচি বালো সমণেসু অত্থী’’তি এৰঞ্হি ৰুত্তেপি সিযা কস্সচি ‘‘কস্মা’’তি. তত্থ ৰুচ্চতে – যস্মা অঞ্ঞং ইতো যাভিৰদন্তি ধম্মং, অপরদ্ধা সুদ্ধিমকেৰলী তে. এৰম্পি তিত্থ্যা পুথুসো ৰদন্তি, যে ইতো অঞ্ঞং দিট্ঠিং অভিৰদন্তি, তে অপরদ্ধা ৰিরদ্ধা সুদ্ধিমগ্গং, অকেৰলিনো চ তেতি এৰং পুথুতিত্থিযা যস্মা ৰদন্তীতি ৰুত্তং হোতি. কস্মা পনেৰং ৰদন্তীতি চে? সন্দিট্ঠিরাগেন হি তেভিরত্তা, যস্মা সকেন দিট্ঠিরাগেন তে অভিরত্তাতি ৰুত্তং হোতি.

তে সুদ্ধিমগ্গন্তি তে অঞ্ঞতিত্থিযা অকিলিট্ঠমগ্গং. ৰিসুদ্ধিমগ্গন্তি নিদ্দোসমগ্গং. পরিসুদ্ধিমগ্গন্তি সুক্কমগ্গং. ৰোদাতমগ্গন্তি পণ্ডরমগ্গং. পরিযোদাতমগ্গন্তি পভাৰন্তমগ্গং. ৰিরদ্ধাতি ৰুত্তৰিধিনা মগ্গেন ৰিরজ্ঝিত্ৰা ঠিতা. অপরদ্ধাতি অপরজ্ঝিত্ৰা ঠিতা. খলিতাতি পরিহীনা. গলিতাতি ততো ভট্ঠা. অঞ্ঞাযাতি অঞ্ঞাণেন. অপরদ্ধাতি পরাজযমাপন্না. অথ ৰা ‘‘ঞাযাপরদ্ধা’’তিপি পাঠো. ঞাযেন মগ্গেন ৰিরদ্ধাতি অত্থো.

১২৭. এৰং অভিরত্তা চ – ইধেৰ সুদ্ধিন্তি গাথা. তত্থ সকাযনেতি সকমগ্গে. দল়্হং ৰদানাতি দল়্হৰাদা.

থিরৰাদাতি সন্নিট্ঠানৰাদা. বলিকৰাদাতি বলৰন্তৰাদা. অৰট্ঠিতৰাদাতি পতিট্ঠহিত্ৰা কথিতৰাদা.

১২৮. যে এৰঞ্চ দল়্হৰাদা, তেসু যো কোচি তিত্থিযো সকাযনে ৰাপি দল়্হং ৰদানো কমেত্থ বালোতি পরং দহেয্য, সঙ্খেপতো তত্থ সস্সতুচ্ছেদসঙ্খাতে ৰিত্থারতো নত্থিকইস্সরকারকনিযতিআদিভেদে সকে অযনে ‘‘ইদমেৰ সচ্চ’’ন্তি দল়্হং ৰদানো কং পরং এত্থ দিট্ঠিগতে ‘‘বালো’’তি সহ ধম্মেন পস্সেয্য, ননু সব্বোপি তস্স মতেন পণ্ডিতো এৰ সুপ্পটিপন্নো এৰ চ. এৰং সন্তে সযমেৰ সো মেধগমাৰহেয্য, পরং ৰদং বালমসুদ্ধিধম্মং. সোপি পরং ‘‘বালো চ অসুদ্ধিধম্মো চ অয’’ন্তি ৰদন্তো অত্তনাৰ কলহং আৰহেয্য. কস্মা? যস্মা সব্বোপি তস্স মতেন পণ্ডিতোযেৰ সুপ্পটিপন্নোযেৰ চ.

১২৯. এৰং সব্বথাপি ৰিনিচ্ছযে ঠত্ৰা সযং পমায, উদ্ধং স লোকস্মিং ৰিৰাদমেতীতি দিট্ঠিযা ঠত্ৰা সযঞ্চ সত্থারাদিং মিনিত্ৰা সো ভিয্যো ৰিৰাদমেতীতি. এৰং পন ৰিনিচ্ছযেসু আদীনৰং ঞত্ৰা অরিযমগ্গেন হিত্ৰান সব্বানি ৰিনিচ্ছযানি, ন মেধগং কুব্বতি জন্তু লোকেতি অরহত্তনিকূটেন দেসনং নিট্ঠাপেসি.

সযং পমাযাতি অত্তনা মিনিত্ৰা. পমিনিত্ৰাতি পমাণং কত্ৰা. ‘‘পৰিনেত্ৰা’’তিপি পাঠো, তং ন সুন্দরং. উদ্ধং ৰাদেন সদ্ধিন্তি অত্তনো উপরি কথেন্তেন সহ. দেসনাপরিযোসানে পুরাভেদসুত্তে (মহানি. ৮৩) ৰুত্তসদিসো এৰ অভিসমযো অহোসীতি.

সদ্ধম্মপ্পজ্জোতিকায মহানিদ্দেসট্ঠকথায

চূল়ব্যূহসুত্তনিদ্দেসৰণ্ণনা নিট্ঠিতা.

১৩. মহাব্যূহসুত্তনিদ্দেসৰণ্ণনা

১৩০. তেরসমে মহাব্যূহসুত্তনিদ্দেসে যে কেচিমে দিট্ঠিপরিব্বসানাতি ইদম্পি ‘‘কিং নু খো ইমে দিট্ঠিপরিব্বসানা ৰিঞ্ঞূনং সন্তিকা নিন্দমেৰ লভন্তি, উদাহু পসংসম্পী’’তি উপ্পন্নচিত্তানং একচ্চানং দেৰতানং তমত্থং আৰিকাতুং পুরিমনযেনেৰ নিম্মিতবুদ্ধেন অত্তানং পুচ্ছাপেত্ৰা ৰুত্তং. তত্থ অন্ৰানযন্তীতি অনু আনযন্তি পুনপ্পুনং আহরন্তি.

নিন্দমেৰ অন্ৰেন্তীতি গরহমেৰ উপগচ্ছন্তি.

১৩১. ইদানি যস্মা তে ‘‘ইদমেৰ সচ্চ’’ন্তি ৰদন্তাপি দিট্ঠিগতিকৰাদিনো কদাচি কত্থচি পসংসম্পি লভন্তি, যং এতং পসংসাসঙ্খাতং ৰাদফলং, তং অপ্পং, রাগাদীনং সমায সমত্থং ন হোতি, কো পন ৰাদো দুতিযে নিন্দাফলে, তস্মা এতমত্থং দস্সেন্তো ইমং তাৰ ৰিস্সজ্জনগাথং আহ ‘‘অপ্পঞ্হি এতং ন অলং সমায, দুৰে ৰিৰাদস্স ফলানি ব্রূমী’’তি. তত্থ দুৰে ৰিৰাদস্স ফলানীতি নিন্দা চ পসংসা চ জযপরাজযাদীনি ৰা তংসভাগানি. এতম্পি দিস্ৰাতি ‘‘নিন্দা অনিট্ঠা এৰ, পসংসা নালং সমাযা’’তি এতম্পি ৰিৰাদফলে আদীনৰং দিস্ৰা. খেমাভিপস্সং অৰিৰাদভূমিন্তি অৰিৰাদভূমিং নিব্বানং খেমন্তি পস্সমানো.

অপ্পকন্তি মন্দং. পরিত্তকন্তি থোকং. ওমকন্তি হেট্ঠিমকং. লামকন্তি পাপকং. সমাযাতি রাগাদীনং সমনত্থায. উপসমাযাতি উপরূপরি সমনত্থায. ৰূপসমাযাতি সন্নিসীদাপনত্থায. নিব্বানাযাতি অমতমহানিব্বানত্থায. পটিনিস্সগ্গাযাতি মগ্গেন কিলেসানং নিস্সজ্জনত্থায. পটিপস্সদ্ধিযাতি ফলেন পটিপস্সদ্ধানং অনুপ্পজ্জনত্থায নালং.

১৩২. এৰঞ্হি অৰিৰাদমানো – যা কাচিমাতি গাথা. তত্থ সম্মুতিযোতি দিট্ঠিযো. পুথুজ্জাতি পুথুজ্জনসম্ভৰা. সো উপযং কিমেয্যাতি সো উপগন্তব্বট্ঠেন উপযং রূপাদীসু একম্পি ধম্মং কিং উপেয্য, কেন ৰা কারণেন উপেয্য. দিট্ঠে সুতে খন্তিমকুব্বমানোতি দিট্ঠসুতসুদ্ধীসু পেমং অকরোন্তো.

পুথুজ্জনেহি জনিতাতি পুথুজ্জনেহি উপ্পাদিতা. সম্মুতিযোতি দিট্ঠিযো. পুথু নানাজনেহি জনিতা ৰাতি অনেকৰিধেহি দিট্ঠিগতিকেহি উপ্পাদিতা ৰা. নেতীতি ন এতি. ন উপেতীতি সমীপং ন এতি. ন উপগচ্ছতীতি নিৰত্ততি. নাভিনিৰিসতীতি পৰিসিত্ৰা নপ্পতিট্ঠতি.

১৩৩. ইতো বাহিরা পন – সীলুত্তমাতি গাথা তস্সত্থো – সীলংযেৰ ‘‘উত্তম’’ন্তি মঞ্ঞমানা সীলুত্তমাতি একে ভোন্তো সংযমমত্তেন সুদ্ধিং ৰদন্তি, হত্থিৰতাদিঞ্চ ৰতং সমাদায উপট্ঠিতাসে. ইধেৰ দিট্ঠিযং অস্স সত্থুনো সুদ্ধিং ভৰূপনীতা ভৰজ্ঝোসিতা সমানা ৰদন্তি, অপি চ তে কুসলাৰদানা ‘‘কুসলা ময’’ন্তি এৰংৰাদা.

১৩৪. এৰং সীলুত্তমেসু চ তেসু তথা পটিপন্নো যো কোচি – সচে চুতোতি গাথা. তস্সত্থো – সচে ততো সীলৰততো পরৰিচ্ছিন্দনেন ৰা অনভিসম্ভুণন্তো ৰা চুতো হোতি, সো তং সীলব্বতকম্মং পুঞ্ঞাভিসঙ্খারাদিকম্মং ৰা ৰিরাধযিত্ৰা ৰেধতী. ন কেৰলঞ্চ ৰেধতি, অপি চ খো তং সীলব্বতসুদ্ধিং পজপ্পতী চ ৰিপ্পলপতি চ পত্থযতী চ. কিমিৰ? সত্থাৰ হীনো পৰসং ঘরম্হা, ঘরম্হা পৰসন্তো সত্থতো হীনো যথা তং ঘরং ৰা সত্থং ৰা পত্থযতীতি.

পরৰিচ্ছিন্দনায ৰাতি পরেন ৰারিযমানো ৰা. অনভিসম্ভুণন্তো ৰাতি তং পটিপত্তিং অসম্পাদেন্তো ৰা.

অঞ্ঞায অপরদ্ধোতি নিব্বানেন পরিহীনো মগ্গতো ৰা. তং ৰা সত্থং অনুবন্ধতীতি তং ৰা সত্থং সব্বত্থ পচ্ছতো গচ্ছতি.

১৩৫. এৰং পন সীলুত্তমানং পৰেধনকারণং অরিযসাৰকো সীলব্বতং ৰাপি পহায সব্বন্তি গাথা. তত্থ সাৰজ্জানৰজ্জন্তি সব্বাকুসলং লোকিযকুসলঞ্চ. এতং সুদ্ধিং অসুদ্ধিন্তি অপত্থযানোতি পঞ্চকামগুণাদিভেদং সুদ্ধিং অকুসলাদিভেদং অসুদ্ধিঞ্চ অপত্থযমানো. ৰিরতো চরেতি সুদ্ধিযা অসুদ্ধিযা চ ৰিরতো চরেয্য. সন্তি মনুগ্গহাযাতি দিট্ঠিং অগ্গহেত্ৰা.

কণ্হং কণ্হৰিপাকন্তি অকুসলকম্মং অকুসলৰিপাকদাযকং. সুক্কং সুক্কৰিপাকন্তি লোকিযকুসলং অত্তনা সদিসং সুক্কৰিপাকদাযকং.

নিযামাৰক্কন্তিন্তি মগ্গপৰিসনং. সেক্খাতি সত্ত সেক্খা. অগ্গধম্মন্তি উত্তমধম্মং, অরহত্তফলং.

১৩৬. এৰং ইতো বাহিরকে সীলুত্তমে সংযমেন ৰিসুদ্ধিৰাদে তেসঞ্চ ৰিপাকং সীলব্বতপহাযিনো অরহতো চ পটিপত্তিং দস্সেত্ৰা ইদানি অঞ্ঞথাপি সুদ্ধিৰাদে বাহিরকে দস্সেন্তো ‘‘তমূপনিস্সাযা’’তি গাথমাহ. তস্সত্থো – সন্তঞ্ঞেপি সমণব্রাহ্মণা, তে জিগুচ্ছিতং অমরন্তপং ৰা দিট্ঠসুদ্ধিআদীসু ৰা অঞ্ঞতরঞ্ঞতরং উপনিস্সাযঅকিরিযদিট্ঠিযা ৰা উদ্ধংসরা হুত্ৰা ভৰাভৰেসু অৰীততণ্হা সুদ্ধি’মনুত্থুনন্তি ৰদন্তি কথেন্তীতি.

তপোজিগুচ্ছৰাদাতি কাযপীল়নাদিতপেন পাপহিরীযনৰাদা. তপোজিগুচ্ছসারাতি তেনেৰ তপেন হিরীযনসারৰন্তো. উদ্ধংসরাৰাদাতি সংসারেন সুদ্ধিং কথযন্তা.

১৩৭. এৰং তেসং অৰীততণ্হানং সুদ্ধিং অনুত্থুনন্তানং যোপি সুদ্ধিপ্পত্তমেৰ অত্তানং মঞ্ঞেয্য, তস্সাপি অৰীততণ্হত্তা ভৰাভৰেসু তং তং ৰত্থুং পত্থযমানস্স হি জপ্পিতানি পুনপ্পুনং হোন্তিযেৰাতি অধিপ্পাযো. তণ্হা হি আসেৰিতা তণ্হং ৰড্ঢযতেৰ, ন কেৰলঞ্চ জপ্পিতানি, পৰেধিতং ৰাপি পকপ্পিতেসু, তণ্হাদিট্ঠীহি চস্স পকপ্পিতেসু ৰত্থূসু পৰেধিতম্পি হোতীতি ৰুত্তং হোতি. ভৰাভৰেসু পন ৰীততণ্হত্তা আযতিং চুতূপপাতো ইধ যস্স নত্থি, স কেন ৰেধেয্য কুহিং ৰ জপ্পেতি অযমেতিস্সা গাথায সম্বন্ধো.

আগমনন্তি পুন আগমনং. গমনন্তি ইতো অঞ্ঞত্থ গমনং. গমনাগমনন্তি ইতো গন্ত্ৰা পুন নিৰত্তনং. কালন্তি মরণং. গতীতি গমনৰসেন গতিযা গন্তব্বং.

১৩৮. যমাহু ধম্মন্তি পুচ্ছাগাথা.

১৩৯. ইদানি যস্মা একোপি এত্থ ৰাদো সচ্চো নত্থি, কেৰলং দিট্ঠিমত্তকেন হি তে ৰদন্তি, তস্মা তমত্থং দস্সেন্তো ‘‘সকং হী’’তি ইমং তাৰ ৰিস্সজ্জনগাথমাহ. তত্থ সম্মুতিন্তি দিট্ঠিং. অনোমন্তি অনূনং.

১৪০. এৰমেতেসু সকং ধম্মং পরিপুণ্ণং ব্রূৰন্তেসু অঞ্ঞস্স ধম্মং পন হীনন্তি ৰদন্তেসু যস্স কস্সচি – পরস্স চে ৰম্ভযিতেন হীনোতি গাথা. তস্সত্থো – যদি পরস্স নিন্দিতকারণা হীনো ভৰেয্য, ন কোচি ধম্মেসু ৰিসেসি অগ্গো ভৰেয্য. কিংকারণা? পুথূ হি অঞ্ঞস্স ৰদন্তি ধম্মং নিহীনতো সব্বেৰ তে সম্হি দল়্হং ৰদানাসকধম্মে দল়্হৰাদা এৰ.

ৰম্ভযিতকারণাতি ধংসিতকারণা. গরহিতকারণাতি লামককতকারণা. উপৰদিতকারণাতি অক্কোসিতকারণা. সকাযনন্তি সকমগ্গং.

১৪১. কিঞ্চ ভিয্যো – সদ্ধম্মপূজাতি গাথা. তস্সত্থো – তে চ তিত্থিযা যথা পসংসন্তি সকাযনানি, সদ্ধম্মপূজাপি নেসং তথেৰ ৰত্ততি. তে হি অতিৰিয সত্থারাদীনি সত্তরোন্তি. তত্থ যদি তে পমাণা সিযুং, এৰং সন্তে সব্বেৰ ৰাদা তথিযা ভৰেয্যুং. কিংকারণা? সুদ্ধী হি নেসং পচ্চত্তমেৰ. ন সা অঞ্ঞত্থ সিজ্ঝতি, নাপি পরমত্থতো. অত্তনি দিট্ঠিগাহমত্তমেৰ হি তং তেসং পরপচ্চযনেয্যবুদ্ধীনং. পচ্চত্তমেৰাতি পাটেক্কমেৰ.

১৪২. যো পন ৰিপরীততো বাহিতপাপত্তা ব্রাহ্মণো, তস্স ন ব্রাহ্মণস্স পরনেয্যমত্থীতি গাথা. তস্সত্থো – ব্রাহ্মণস্স হি ‘‘সব্বে সঙ্খারা অনিচ্চা’’তিআদিনা নযেন সুদিট্ঠত্তা পরেন নেতব্বং ঞাণং নত্থি. দিট্ঠিধম্মেসু ‘‘ইদমেৰ সচ্চ’’ন্তি নিচ্ছিনিত্ৰা সুমগ্গহীতম্পি নত্থি. তংকারণা সো দিট্ঠিকলহানি অতিক্কন্তো, ন হি সো সেট্ঠতো পস্সতি ধম্মমঞ্ঞং অঞ্ঞত্র সতিপট্ঠানাদীহি.

ন পরনেয্যোতি পরেন নেতব্বো জানাপেতব্বো ন হোতি. ন পরপত্তিযো ন পরপচ্চযোতি পরেসং পচ্চেতব্বো ন হোতি. ন পরপটিবদ্ধগূতি পরেসং পটিবদ্ধগমনো ন হোতি.

১৪৩. জানামীতি গাথায সম্বন্ধো অত্থো চ – এৰং তাৰ পরমত্থব্রাহ্মণো ন হি সেট্ঠতো পস্সতি ধম্মমঞ্ঞং, অঞ্ঞে পন তিত্থিযা পরচিত্তঞাণাদীহি জানন্তাপি পস্সন্তাপি ‘‘জানামি পস্সামি তথেৰ এত’’ন্তি এৰং ৰদন্তাপি চ দিট্ঠিযা সুদ্ধিং পচ্চেন্তি. কস্মা? যস্মা তেসু একোপি অদক্খি চে অদ্দস চেপি তেন পরচিত্তঞাণাদিনা যথাভূতমত্থং, কিঞ্হি তুমস্স তেন তস্স তেন দস্সনেন কিং কতং, কিং দুক্খপরিঞ্ঞা সাধিতা, উদাহু সমুদযপ্পহানাদীনং অঞ্ঞতরং, যতো সব্বথাপি অতিক্কমিত্ৰা অরিযমগ্গং তে তিত্থিযা অঞ্ঞেনেৰ ৰদন্তি সুদ্ধিং, অতিক্কমিত্ৰা ৰা তে তিত্থিযে বুদ্ধাদযো অঞ্ঞেনেৰ ৰদন্তি সুদ্ধিন্তি.

১৪৪. পস্সং নরোতি গাথায সম্বন্ধো অত্থো চ – কিঞ্চ ভিয্যো? য্ৰাযং পরচিত্তঞাণাদীহি অদ্দক্খি, সো পস্সং নরো দক্খতি নামরূপং, ন ততো পরং, দিস্ৰান ৰা ঞস্সতি তানিমেৰ নামরূপানি নিচ্চতো সুখতো ৰা, ন অঞ্ঞথা; সো এৰং পস্সন্তো কামং বহুং পস্সতু অপ্পকং ৰা নামরূপং নিচ্চতো সুখতো চ অথস্স এৰরূপেন দস্সনেন ন হি তেন সুদ্ধিং কুসলা ৰদন্তি.

১৪৫. নিৰিস্সৰাদীতি গাথায সম্বন্ধো অত্থো চ – তেন চ দস্সনেন সুদ্ধিযা অসতিযাপি যো ‘‘জানামি পস্সামি তথেৰ এত’’ন্তি এৰং নিৰিস্সৰাদী, এতং ৰা দস্সনং পটিচ্চ দিট্ঠিযা সুদ্ধিং পচ্চেন্তো ‘‘ইদমেৰ সচ্চ’’ন্তি এৰং নিৰিস্সৰাদী, সো সুব্বিনযো ন হোতি তং তথা পকপ্পিতং অভিসঙ্খতং দিট্ঠিং পুরক্খরানো. সো হি যং সত্থারাদিং নিস্সিতো, তত্থেৰ সুভং ৰদানো সুদ্ধিং ৰদো, ‘‘পরিসুদ্ধিৰাদো পরিসুদ্ধিদস্সনো ৰা অহ’’ন্তি অত্তানং মঞ্ঞমানো তত্থ তথদ্দসা সো, তত্থ সকায দিট্ঠিযা অৰিপরীতমেৰ সো অদ্দস. যথা সা দিট্ঠি পৰত্ততি, তথেৰ তং অদ্দস, ন অঞ্ঞথা পস্সিতুং ইচ্ছতীতি অধিপ্পাযো.

নিৰিস্সৰাদীতি পতিট্ঠহিত্ৰা কথেন্তো. দুব্বিনযোতি ৰিনেতুং দুক্খো. দুপ্পঞ্ঞাপযোতি ঞাপেতুং চিত্তেন লব্ভাপেতুং দুক্খো. দুন্নিজ্ঝাপযোতি চিত্তেন ৰীমংসিত্ৰা গহণত্থং পুনপ্পুনং নিজ্ঝাপযিতুং দুক্খো. দুপ্পেক্খাপযোতি ইক্খাপযিতুং দুক্খো. দুপ্পসাদযোতি চিত্তে পসাদং উপ্পাদেতুং দুক্খো.

অপ্পস্সীতি ঞাণেন পটিৰেধং পাপুণি. পটিৰিজ্ঝীতি চিত্তেন অৰবোধং পাপুণি.

১৪৬. এৰং পকপ্পিতং দিট্ঠিং পুরক্খরানেসু তিত্থিযেসু – ন ব্রাহ্মণো কপ্পমুপেতি সঙ্খাতি গাথা. তত্থ সঙ্খাতি সঙ্খায, জানিত্ৰাতি অত্থো. নপি ঞাণবন্ধূতি সমাপত্তিঞাণাদিনা অকততণ্হাদিট্ঠিবন্ধু. তত্থ ৰিগ্গহো – নাপি অস্স ঞাণেন কতো বন্ধু অত্থীতি নপি ঞাণবন্ধু. সম্মুতিযোতি দিট্ঠিসম্মুতিযো. পুথুজ্জাতি পুথুজ্জনসম্ভৰা. উগ্গহণন্তি মঞ্ঞেতি উগ্গহণন্তি অঞ্ঞে, অঞ্ঞে তা সম্মুতিযো উগ্গণ্হন্তীতি ৰুত্তং হোতি.

উপেক্খতীতি উপপত্তিতো অপক্খপতিতো হুত্ৰা পস্সতি.

১৪৭. কিঞ্চ ভিয্যো – ৰিস্সজ্জ গন্থানীতি গাথা. তত্থ অনুগ্গহোতি উগ্গহণৰিরহিতো, সোপি নাস্স উগ্গহোতি অনুগ্গহো. ন ৰা উগ্গণ্হাতীতি অনুগ্গহো.

গন্থে ৰোস্সজ্জিত্ৰাতি অভিজ্ঝাদিকে গন্থে চজিত্ৰা. ৰিস্সজ্জাতি পুন অনাদিযনৰসেন জহিত্ৰা. গধিতেতি ঘটিতে. গন্থিতেতি সুত্তেন সঙ্গহিতে ৰিয গন্থিতে. বন্ধেতি সুট্ঠু বন্ধে. ৰিবন্ধেতি ৰিৰিধা বন্ধে. পলিবুদ্ধেতি সমন্ততো বন্ধনেন বন্ধে. বন্ধনেতি কিলেসবন্ধনে. ফোটযিত্ৰাতি পপ্ফোটেত্ৰা. সচ্চং ৰিস্সজ্জং করোন্তীতি ৰিসঙ্খরিত্ৰা অপরিভোগং করোন্তি. ৰিকোপেন্তীতি চুণ্ণৰিচুণ্ণং করোন্তি.

১৪৮. কিঞ্চ ভিয্যো – সো এৰরূপো – পুব্বাসৰেতি গাথা. তত্থ পুব্বাসৰেতি অতীতরূপাদীনি আরব্ভ উপ্পজ্জনধম্মকিলেসে. নৰেতি পচ্চুপ্পন্নরূপাদীনি আরব্ভ উপ্পজ্জনধম্মে. ন ছন্দগূতি ছন্দাদিৰসেন ন গচ্ছতি. অনত্তগরহীতি কতাকতৰসেন অত্তানং অগরহন্তো.

১৪৯. এৰং অনত্তগরহী চ – স সব্বধম্মেসূতি গাথা. তত্থ সব্বধম্মেসূতি দ্ৰাসট্ঠিদিট্ঠিধম্মেসু ‘‘যং কিঞ্চি দিট্ঠং ৰা’’তি এৰংপভেদেসু. পন্নভারোতি পতিতভারো. ন কপ্পেতীতি ন কপ্পিযো, দুৰিধম্পি কপ্পং ন করোতীতি অত্থো. নূপরতোতি পুথুজ্জনকল্যাণকসেক্খা ৰিয উপরতিসমঙ্গীপি নো হোতি. ন পত্থিযোতি নিত্তণ্হো. তণ্হা হি পত্থযতীতি পত্থিযা, নাস্স পত্থিযাতি ন পত্থিযো. ইতো পরঞ্চ হেট্ঠা চ তত্থ তত্থ ৰুত্তনযত্তা উত্তানত্থমেৰ. এৰং অরহত্তনিকূটেনেৰ দেসনং নিট্ঠাপেসি, দেসনাপরিযোসানে পুরাভেদসুত্তে (মহানি. ৮৩) ৰুত্তসদিসো এৰ অভিসমযো অহোসীতি.

সদ্ধম্মপ্পজ্জোতিকায মহানিদ্দেসট্ঠকথায

মহাব্যূহসুত্তনিদ্দেসৰণ্ণনা নিট্ঠিতা.

১৪. তুৰটকসুত্তনিদ্দেসৰণ্ণনা

১৫০. চুদ্দসমে তুৰটকসুত্তনিদ্দেসে পুচ্ছামি তন্তি ইদম্পি তস্মিংযেৰ মহাসমযে ‘‘কা নু খো অরহত্তপ্পত্তিযা পটিপত্তী’’তি উপ্পন্নচিত্তানং একচ্চানং দেৰতানং তমত্থং পকাসেতুং পুরিমনযেনেৰ নিম্মিতবুদ্ধেন অত্তানং পুচ্ছাপেত্ৰা ৰুত্তং.

তত্থ আদিপুচ্ছাগাথায তাৰ পুচ্ছামীতি এত্থ অদিট্ঠজোতনাদিৰসেন পুচ্ছা ৰিভজিতা. আদিচ্চবন্ধূতি আদিচ্চস্স গোত্তবন্ধু. ৰিৰেকং সন্তিপদঞ্চাতি ৰিৰেকঞ্চ সন্তিপদঞ্চ. কথং দিস্ৰাতি কেন কারণেন দিস্ৰা, কথং পৰত্তদস্সনো হুত্ৰাতি ৰুত্তং হোতি.

তিস্সো পুচ্ছাতি গণনপরিচ্ছেদো. অদিট্ঠজোতনাতি যং ন দিট্ঠং ন পটিৰিদ্ধং, তস্স পাকটকরণত্থায পুচ্ছা. দিট্ঠসংসন্দনাতি যং ঞাণচক্খুনা দিট্ঠং, তস্স ঘটনত্থায. ৰিমতিচ্ছেদনাতি যা কঙ্খা, তস্সাচ্ছেদনত্থং. পকতিযা লক্খণং অঞ্ঞাতন্তি ধম্মানং তথলক্খণং পকতিযা ন ঞাতং. অদিট্ঠন্তি ন দিট্ঠং. ‘‘ন নিট্ঠ’’ন্তিপি পাঠো. অতুলিতন্তি তুলায তুলিতং ৰিয ন তুলিতং. অতীরিতন্তি তীরণায ন তীরিতং. অৰিভূতন্তি ন পাকটং. অৰিভাৰিতন্তি পঞ্ঞায ন ৰড্ঢিতং. তস্স ঞাণাযাতি তস্স ধম্মস্স লক্খণজাননত্থায. দস্সনাযাতি দস্সনত্থায. তুলনাযাতি তুলনত্থায. তীরণাযাতি তীরণত্থায. ৰিভাৰনাযাতি ৰিভাগকরণত্থায. অঞ্ঞেহি পণ্ডিতেহীতি অঞ্ঞেহি বুদ্ধিসম্পন্নেহি. সংসযপক্খন্দোতি সন্দেহং পৰিট্ঠো.

মনুস্সপুচ্ছাতি মনুস্সানং পুচ্ছা. অমনুস্সপুচ্ছাতি নাগসুপণ্ণাদীনং পুচ্ছা. গহট্ঠাতি অৰসেসগহট্ঠা. পব্বজিতাতি লিঙ্গৰসেন ৰুত্তা. নাগাতি সুফস্সাদযো নাগা. সুপণ্ণাতি সুপণ্ণসংযুত্তৰসেন (সং. নি. ৩.৩৯২ আদযো). যক্খাতি যক্খসংযুত্তৰসেন (সং. নি. ১০.২৩৫ আদযো) চ ৰেদিতব্বা. অসুরাতি পহারাদাদযো. গন্ধব্বাতি পঞ্চসিখগন্ধব্বপুত্তাদযো. মহারাজানোতি চত্তারো মহারাজানো. অহীনিন্দ্রিযন্তি সণ্ঠানৰসেন অৰিকলিন্দ্রিযং. সো নিম্মিতোতি সো ভগৰতা নিম্মিতো বুদ্ধো.

ৰোদানত্থপুচ্ছাতি ৰিসেসধম্মপুচ্ছা. অতীতপুচ্ছাতি অতীতে ধম্মে আরব্ভ পুচ্ছা. অনাগতাদীসুপি এসেৰ নযো. কুসলপুচ্ছাতি অনৰজ্জধম্মপুচ্ছা. অকুসলপুচ্ছাতি সাৰজ্জধম্মপুচ্ছা. অব্যাকতপুচ্ছাতি তদুভযৰিপরীতধম্মপুচ্ছা.

অজ্ঝেসামি তন্তি তং আণাপেমি. কথযস্সু মেতি ময্হং কথেহি. গোত্তঞাতকোতি গোত্তেন ঞাতকো. গোত্তবন্ধূতি গোত্তজ্ঝত্তিকো. একেনাকারেনাতি একেন কোট্ঠাসেন.

সন্তিপদন্তি সন্তিসঙ্খাতং নিব্বানপদং. যে ধম্মা সন্তাধিগমাযাতি যে সতিপট্ঠানাদযো ধম্মা নিব্বানপটিলাভত্থায. সন্তিফুসনাযাতি ঞাণফস্সেন নিব্বানফুসনত্থায. সচ্ছিকিরিযাযাতি পচ্চক্খকরণত্থায. মহন্তং সীলক্খন্ধন্তি মহন্তং সীলরাসিং. সমাধিক্খন্ধাদীসুপি এসেৰ নযো. সীলক্খন্ধাদযো লোকিযলোকুত্তরা, ৰিমুত্তিঞাণদস্সনং লোকিযমেৰ.

তমোকাযস্স পদালনন্তি অৰিজ্জারাসিস্স ৰিদ্ধংসনং. ৰিপল্লাসস্স ভেদনন্তি চতুব্বিধৰিপল্লাসস্স ভেদনং. তণ্হাসল্লস্স অব্বুহনন্তি তণ্হাকণ্টকস্স লুঞ্চনং. অভিসঙ্খারস্স ৰূপসমন্তি পুঞ্ঞাদিঅভিসঙ্খারস্স নিব্বাপনং. ভারস্স নিক্খেপনন্তি পঞ্চক্খন্ধভারস্স ঠপনং. সংসারৰট্টস্স উপচ্ছেদনন্তি সংসারপৰত্তস্স ছেদনং. সন্তাপস্স নিব্বাপনন্তি কিলেসসন্তাপস্স নিব্বুতি. পরিল়াহস্স পটিপস্সদ্ধিন্তি কিলেসদরথস্স সন্নিসীদনং. দেৰদেৰোতি দেৰানং অতিদেৰো.

১৫১. অথ ভগৰা যস্মা যথা পস্সন্তো কিলেসে উপরুন্ধতি, তথা দিস্ৰা তথা পৰত্তদস্সনো হুত্ৰা পরিনিব্বাতি, তস্মা তমত্থং আৰিকরোন্তো নানপ্পকারেন তং দেৰপরিসং কিলেসপ্পহানে নিযোজেন্তো ‘‘মূলং পপঞ্চসঙ্খাযা’’তি আরভিত্ৰা পঞ্চ গাথা অভাসি.

তত্থ আদিগাথায তাৰ সঙ্খেপত্থো – পপঞ্চসঙ্খাতি পপঞ্চাতি সঙ্খাতত্তা পপঞ্চা এৰ পপঞ্চসঙ্খা. তস্সা অৰিজ্জাদযো কিলেসা মূলং, তং পপঞ্চসঙ্খায মূলং অস্মীতি পৰত্তমানঞ্চ সব্বং মন্তায উপরুন্ধে. যা কাচি অজ্ঝত্তং তণ্হা উপ্পজ্জেয্যুং. তাসং ৰিনযায পহানায সদা সতো সিক্খে উপট্ঠিতস্সতি হুত্ৰা সিক্খেয্যাতি.

অজ্ঝত্তসমুট্ঠানা ৰাতি চিত্তে উপ্পন্না ৰা. পুরেভত্তন্তি দিৰাভত্ততো পুরেকালং. অচ্চন্তসংযোগত্থে উপযোগৰচনং, অত্থতো পন ভুম্মমেৰ পুরেভত্তেতি, এস নযো পচ্ছাভত্তাদীসু. পচ্ছাভত্তন্তি দিৰাভত্ততো পচ্ছাকালং. পুরিমং যামন্তি রত্তিযা পঠমকোট্ঠাসং. মজ্ঝিমং যামন্তি রত্তিযা দুতিযকোট্ঠাসং. পচ্ছিমং যামন্তি রত্তিযা ততিযকোট্ঠাসং. কাল়েতি কাল়পক্খে. জুণ্হেতি সুক্কপক্খে. ৰস্সেতি চত্তারো ৰস্সানমাসে. হেমন্তেতি চত্তারো হেমন্তমাসে. গিম্হেতি চত্তারো গিম্হানমাসে. পুরিমে ৰযোখন্ধেতি পঠমে ৰযোকোট্ঠাসে, পঠমৰযেতি অত্থো. তীসু চ ৰযেসু ৰস্সসতাযুকস্স পুরিসস্স একেকস্মিং ৰযে চতুমাসাধিকানি তেত্তিংস ৰস্সানি হোন্তি.

১৫২. এৰং পঠমগাথায তাৰ তীহি সিক্খাহি যুত্তং দেসনং অরহত্তনিকূটেন দেসেত্ৰা পুন মানপ্পহানৰসেন দেসেতুং ‘‘যং কিঞ্চী’’তি গাথমাহ. তত্থ যং কিঞ্চি ধম্মমভিজঞ্ঞা অজ্ঝত্তন্তি যং কিঞ্চি উচ্চাকুলীনতাদিকং অত্তনো গুণং জানেয্য. অথ ৰাপি বহিদ্ধাতি অথ ৰা বহিদ্ধাপি আচরিযুপজ্ঝাযানং ৰা গুণং জানেয্য. ন তেন থামং কুব্বেথাতি তেন গুণেন মানং ন করেয্য.

সতানন্তি সন্তগুণৰন্তানং. সন্তানন্তি নিব্বুতসন্তানং. ন ৰুত্তাতি ন কথিতা. নপ্পৰুত্তাতি ন ৰিস্সজ্জিতা.

১৫৩. ইদানিস্স অকরণৰিধিং দস্সেন্তো ‘‘সেয্যো ন তেনা’’তি গাথমাহ. তস্সত্থো – তেন চ মানেন ‘‘সেয্যোহ’’ন্তি ৰা ‘‘নীচোহ’’ন্তি ৰা ‘‘সরিক্খোহ’’ন্তি ৰাপি ন মঞ্ঞেয্য. তেহি চ উচ্চাকুলীনতাদীহি গুণেহি ফুট্ঠো অনেকরূপেহি ‘‘অহং উচ্চা কুলা পব্বজিতো’’তিআদিনা নযেন অত্তানং ৰিকপ্পেন্তো ন তিট্ঠেয্যাতি.

১৫৪. এৰং মানপ্পহানৰসেনপি দেসেত্ৰা ইদানি সব্বকিলেসূপসমৰসেন দেসেতুং ‘‘অজ্ঝত্তমেৰা’’তি গাথমাহ. তত্থ অজ্ঝত্তমেৰুপসমেতি অত্তনি এৰ রাগাদিসব্বকিলেসে উপসমেয্য. ন অঞ্ঞতো ভিক্খু সন্তিমেসেয্যাতি ঠপেত্ৰা চ সতিপট্ঠানাদীনি অঞ্ঞেন উপাযেন সন্তিং ন পরিযেসেয্য. কুতো নিরত্তা ৰাতি নিরত্তা কুতোযেৰ.

ন এসেয্যাতি সীলব্বতাদীহি ন মগ্গেয্য. ন গৰেসেয্যাতি ন ওলোকেয্য. ন পরিযেসেয্যাতি পুনপ্পুনং ন ইক্খেয্য.

১৫৫. ইদানি অজ্ঝত্তং উপসন্তস্স খীণাসৰস্স তাদিভাৰং দস্সেন্তো ‘‘মজ্ঝে যথা’’তি গাথমাহ. তস্সত্থো – যথা মহাসমুদ্দস্স উপরিহেট্ঠিমভাগানং ৰেমজ্ঝসঙ্খাতে চতুযোজনসহস্সপ্পমাণে মজ্ঝে পব্বতন্তরে ঠিতস্স ৰা মজ্ঝে সমুদ্দস্স ঊমি নো জাযতি, ঠিতোৰ সো হোতি অৰিকম্পমানো, এৰং অনেজো খীণাসৰো লাভাদীসু ঠিতো অস্স অৰিকম্পমানো, সো তাদিসো রাগাদিউস্সদং ভিক্খু ন করেয্য কুহিঞ্চীতি.

উব্বেধেনাতি হেট্ঠাভাগেন. গম্ভীরোতি উদকপিট্ঠিতো পট্ঠায চতুরাসীতিযোজনসহস্সানি গম্ভীরো. ‘‘উব্বেধো’’তিপি পাঠো, তং ন সুন্দরং. হেট্ঠাতি অন্তোউদকং. উপরীতি উদ্ধংউদকং. মজ্ঝেতি ৰেমজ্ঝে. ন কম্পতীতি ঠিতট্ঠানতো ন চলতি. ন ৰিকম্পতীতি ইতো চিতো চ ন চলতি. ন চলতীতি নিচ্চলং হোতি. ন ৰেধতীতি ন ফন্দতি. নপ্পৰেধতীতি ন পরিৰত্ততি. ন সম্পৰেধতীতি ন পরিব্ভমতি. অনেরিতোতি ন এরিতো. অঘট্টিতোতি অক্খোভো. অচলিতোতি ন কম্পিতো. অলুল়িতোতি ন কললীভূতো. তত্র ঊমি নো জাযতীতি তস্মিং ঠানে ৰীচি ন উপ্পজ্জতি.

সত্তন্নং পব্বতানং অন্তরিকাসূতি যুগন্ধরাদীনং সত্তন্নং পব্বতানং অন্তরন্তরা. সীদন্তরাতি অন্তমসো সিম্বলীতূলম্পি তেসু পতিতপতিতং সীদতীতি সীদা, পব্বতন্তরে জাতত্তা অন্তরা. ‘‘অন্তরসীদা’’তিপি পাঠো.

১৫৬. ইদানি এৰং অরহত্তনিকূটেন দেসিতং ধম্মদেসনং অব্ভানুমোদেন্তো তস্স চ অরহত্তস্স আদিপটিপদং পুচ্ছন্তো নিম্মিতবুদ্ধো ‘‘অকিত্তযী’’তি গাথমাহ. তত্থ অকিত্তযীতি আচিক্খি. ৰিৰটচক্খূতি ৰিৰটেহি অনাৰরণেহি পঞ্চহি চক্খূহি সমন্নাগতো. সক্খিধম্মন্তি সকাযত্তং সযং অভিঞ্ঞাতং অত্তপচ্চক্খধম্মং. পরিস্সযৰিনযন্তি পরিস্সযৰিনযনং. পটিপদং ৰদেহীতি ইদানি পটিপত্তিং ৰদেহি. ভদ্দন্তেতি ভদ্দং তৰ অত্থূতি ভগৰন্তং আলপন্তো আহ. অথ ৰা ভদ্দং সুন্দরং তৰ পটিপদং ৰদেহীতিপি ৰুত্তং হোতি. পাতিমোক্খং অথ ৰাপি সমাধিন্তি তমেৰ পটিপদং ভিন্দিত্ৰা পুচ্ছতি. পটিপদন্তি এতেন ৰা মগ্গং পুচ্ছতি. ইতরেহি সীলং সমাধিঞ্চ পুচ্ছতি.

মংসচক্খুনাপীতি সসম্ভারিকমংসচক্খুনাপি. দিব্বচক্খুনাপীতি দিব্বসদিসত্তা দিব্বং. দেৰানঞ্হি সুচরিতকম্মনিব্বত্তং পিত্তসেম্হরুহিরাদীহি অপলিবুদ্ধং উপক্কিলেসৰিনিমুত্ততায দূরেপি আরম্মণসম্পটিচ্ছনসমত্থং দিব্বং পসাদচক্খু হোতি. ইদঞ্চাপি ৰীরিযভাৰনাবলনিব্বত্তং ঞাণচক্খু তাদিসমেৰাতি দিব্বসদিসত্তা দিব্বং. দিব্বৰিহারৰসেন পটিলদ্ধত্তা, অত্তনা চ দিব্বৰিহারসন্নিস্সিতত্তাপি দিব্বং. আলোকপরিগ্গহেন মহাজুতিকত্তাপি দিব্বং. তিরোকুট্টাদিগতরূপদস্সনেন মহাগতিকত্তাপি দিব্বং. তং সব্বং সদ্দসত্থানুসারেন ৰেদিতব্বং. দস্সনট্ঠেন চক্খু, চক্খুকিচ্চকরণেন চক্খুমিৰাতিপি চক্খু, দিব্বঞ্চ তং চক্খু চাতি দিব্বচক্খু. তেন দিব্বচক্খুনাপি ৰিৰটচক্খু. ইদানি পঞ্চৰিধং চক্খুং ৰিত্থারেন কথেতুং ‘‘কথং ভগৰা মংসচক্খুনাপি ৰিৰটচক্খূ’’তিআদিমাহ. মংসচক্খুম্হি ভগৰতো পঞ্চৰণ্ণা সংৰিজ্জন্তীতি এত্থ সসম্ভারাদিকচক্খুম্হি বুদ্ধস্স ভগৰতো পঞ্চ কোট্ঠাসা পচ্চেকং পচ্চেকং উপলব্ভন্তি.

নীলো চ ৰণ্ণোতি উমাপুপ্ফৰণ্ণো. পীতকো চ ৰণ্ণোতি কণিকারপুপ্ফৰণ্ণো. লোহিতকো চ ৰণ্ণোতি ইন্দগোপকৰণ্ণো. কণ্হো চ ৰণ্ণোতি অঞ্জনৰণ্ণো. ওদাতো চ ৰণ্ণোতি ওসধিতারকৰণ্ণো. যত্থ চ অক্খিলোমানি পতিট্ঠিতানীতি যস্মিং ঠানে অক্খিলোমানি পতিট্ঠহিত্ৰা উট্ঠিতানি. তং নীলং হোতি সুনীলন্তি এত্থ নীলন্তি সব্বসঙ্গাহকৰসেন ৰুত্তং. সুনীলন্তি অন্তরৰিরহিতং সুট্ঠু নীলং. পাসাদিকন্তি পসাদজনকং. দস্সনেয্যন্তি দস্সনীযং. উমাপুপ্ফসমানন্তি দকসীতলপুপ্ফসদিসং. তস্স পরতোতি তস্স সমন্তা বাহিরপস্সে. পীতকন্তি সব্বসঙ্গাহকং. সুপীতকন্তি অন্তরৰিরহিতং সুট্ঠু পীতকং. উভযতো চ অক্খিকূটানীতি দ্ৰে চ অক্খিকোটিযো. লোহিতকানীতি সব্বসঙ্গাহকৰসেন ৰুত্তং. সুলোহিতকানীতি অপঞ্ঞাযমানৰিৰরানি সুট্ঠু লোহিতকানি. মজ্ঝে কণ্হন্তি অক্খীনং মজ্ঝিমট্ঠানং অঞ্জনসদিসং কণ্হং. সুকণ্হন্তি অন্তরৰিরহিতং সুট্ঠু কণ্হং. অলূখন্তি পাসাদিকং. সিনিদ্ধন্তি পণীতং. ভদ্দারিট্ঠকসমানন্তি অপনীততচভদ্দারিট্ঠকফলসদিসং. ‘‘অদ্দারিট্ঠকসমান’’ন্তিপি পাল়ি, তস্সা তিন্তকাকসদিসন্তি অত্থো. ওদাতন্তি সব্বসঙ্গাহকৰসেন ৰুত্তং. সুওদাতন্তি অন্তরৰিরহিতং রজতমণ্ডলসদিসং সুট্ঠু ওদাতং. সেতং পণ্ডরন্তি দ্ৰীহিপি অতিওদাততং দস্সেতি. পাকতিকেন মংসচক্খুনাতি পকতিমংসচক্খুনা. অত্তভাৰপরিযাপন্নেনাতি অত্তভাৰসন্নিস্সিতেন. পুরিমসুচরিতকম্মাভিনিব্বত্তেনাতি পুরিমেসু তত্থ তত্থুপ্পন্নেসু অত্তভাৰেসু কাযসুচরিতাদিকম্মুনা উপ্পাদিতেন. সমন্তা যোজনং পস্সতীতি সমন্ততো চতুগাৰুতপ্পমাণে যোজনে তিরোকুট্টাদিগতং রূপং আৰরণৰিরহিতং পকতিমংসচক্খুনা দক্খতি.

দিৰা চেৰ রত্তিঞ্চাতি দিৰসভাগে চ রত্তিভাগে চ. চতুরঙ্গসমন্নাগতোতি চতূহি অঙ্গেহি সমন্নাগতো পরিপুণ্ণঅন্ধকারো আলোকৰিরহিতো. সূরিযো ৰা অত্থঙ্গতোতি সূরভাৰং জনযন্তো উট্ঠিতো সূরিযো ৰিগতো. কাল়পক্খো চ উপোসথোতি কাল়পক্খে চাতুদ্দসীউপোসথদিৰসো চ. তিব্বো চ ৰনসণ্ডোতি গহনো চ রুক্খরাসি. মহা চ কাল়মেঘো অব্ভুট্ঠিতোতি মহন্তো কাল়মেঘো অব্ভপটলো চ উট্ঠিতো হোতি. কুট্টো ৰাতি ইট্ঠকাচযো ৰা. কৰাটং ৰাতি দ্ৰারৰাতপানাদিকৰাটং ৰা. পাকারো ৰাতি মত্তিকাদিপাকারো ৰা. পব্বতো ৰাতি পংসুপব্বতাদিপব্বতো ৰা. গচ্ছং ৰাতি তরুণগচ্ছাদিগচ্ছং ৰা. লতা ৰাতি করৰিন্দাদি লতা ৰা. আৰরণং রূপানং দস্সনাযাতি রূপারম্মণানং দস্সনত্থায পটিসেধং নত্থি. একঞ্চে তিলফলং নিমিত্তং কত্ৰাতি সচে একং তিলবীজং সঞ্ঞাণং কত্ৰা. তিলৰাহে পক্খিপেয্যাতি দ্ৰে সকটে তিলরাসিম্হি খিপেয্য. কেচি পন ‘‘ৰাহো নাম কুম্ভাতিরেকদ্ৰেসকট’’ন্তি ৰদন্তি. তঞ্ঞেৰ তিলফলং উদ্ধরেয্যাতি তংনিমিত্তকতং তিলবীজংযেৰ উদ্ধরিত্ৰা গণ্হেয্য.

দিব্বেন চক্খুনাতি ইদং ৰুত্তত্থমেৰ. ৰিসুদ্ধেনাতি চুতূপপাতদস্সনেন দিট্ঠিৰিসুদ্ধিহেতুত্তা ৰিসুদ্ধেন. যো হি চুতিমত্তমেৰ পস্সতি ন উপপাতং, সো উচ্ছেদদিট্ঠিং গণ্হাতি. যো উপপাতমেৰ পস্সতি ন চুতিং, সো নৰসত্তপাতুভাৰসস্সতদিট্ঠিং গণ্হাতি. যো পন তদুভযং পস্সতি, সো যস্মা দুৰিধম্পি তং দিট্ঠিগতং অতিৰত্ততি, তস্মাস্স তং দস্সনং দিট্ঠিৰিসুদ্ধিহেতু হোতি, উভযঞ্চেতং বুদ্ধপুত্তা পস্সন্তি. তেন ৰুত্তং – ‘‘চুতূপপাতদস্সনেন দিট্ঠিৰিসুদ্ধিহেতুত্তা ৰিসুদ্ধ’’ন্তি. মনুস্সূপচারং অতিক্কমিত্ৰা রূপদস্সনেন অতিক্কন্তমানুসকং, মানুসকং ৰা মংসচক্খুং অতিক্কন্তত্তা অতিক্কন্তমানুসকন্তি ৰেদিতব্বং.

তেন দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতীতি মনুস্সমংসচক্খুনা ৰিয সত্তে ওলোকেতি. চৰমানে উপপজ্জমানেতি এত্থ চুতিক্খণে উপপত্তিক্খণে ৰা দিব্বচক্খুনা দট্ঠুং ন সক্কা. যে পন আসন্নচুতিকা ইদানি চৰিস্সন্তি, তে চৰমানা. যে চ গহিতপটিসন্ধিকা সম্পতিনিব্বত্তাৰ, তে উপপজ্জমানাতি অধিপ্পেতা. তে এৰরূপে চৰমানে উপপজ্জমানে চ পস্সতীতি দস্সেতি. হীনেতি মোহনিস্সন্দযুত্তত্তা হীনে. তব্বিপরীতে পণীতে. সুৰণ্ণেতি অদোসনিস্সন্দযুত্তত্তা ইট্ঠকন্তমনাপৰণ্ণযুত্তে. তব্বিপরীতে দুব্বণ্ণে, অভিরূপে ৰিরূপেতি অত্থো. সুগতেতি সুগতিগতে, অলোভনিস্সন্দযুত্তত্তা ৰা অড্ঢে মহদ্ধনে. দুগ্গতেতি দুগ্গতিগতে, লোভনিস্সন্দযুত্তত্তা ৰা দলিদ্দে অপ্পন্নপানে. যথাকম্মূপগেতি যং যং কম্মং উপচিতং, তেন তেন উপগতে. তত্থ পুরিমেহি ‘‘চৰমানে’’তিআদীহি দিব্বচক্খুকিচ্চং ৰুত্তং. ইমিনা পন পদেন যথাকম্মূপগঞাণকিচ্চং.

তস্স চ ঞাণস্স অযমুপ্পত্তিক্কমো – ইধ ভিক্খু হেট্ঠানিরযাভিমুখং আলোকং ৰড্ঢেত্ৰা নেরযিকে সত্তে পস্সতি মহাদুক্খং অনুভৰমানে, তং দস্সনং দিব্বচক্খুকিচ্চমেৰ. সো এৰং মনসি করোতি ‘‘কিং নু খো কম্মং কত্ৰা ইমে সত্তা এতং দুক্খং অনুভৰন্তী’’তি, অথস্স ‘‘ইদং নাম কত্ৰা’’তি তং কম্মারম্মণং ঞাণং উপ্পজ্জতি. তথা উপরিদেৰলোকাভিমুখং আলোকং ৰড্ঢেত্ৰা নন্দনৰন মিস্সকৰন ফারুসকৰনাদীসু সত্তে পস্সতি মহাসম্পত্তিং অনুভৰমানে. তম্পি দস্সনং দিব্বচক্খুকিচ্চমেৰ. সো এৰং মনসি করোতি ‘‘কিং নু খো কম্মং কত্ৰা ইমে সত্তা এতং সম্পত্তিং অনুভৰন্তী’’তি. অথস্স ‘‘ইদং নাম কত্ৰা’’তি তং কম্মারম্মণং ঞাণমুপ্পজ্জতি. ইদং যথাকম্মূপগঞাণং নাম. ইমস্স ৰিসুং পরিকম্মং নাম নত্থি. যথা চ ইমস্স, এৰং অনাগতংসঞাণস্সাপি. দিব্বচক্খুপাদকানেৰ হি ইমানি দিব্বচক্খুনা সহেৰ ইজ্ঝন্তি.

ইমে ৰত ভোন্তোতিআদীসু ইমেতি দিব্বচক্খুনা দিট্ঠানং নিদস্সনৰচনং. ৰতাতি অনুসোচনত্থে নিপাতো. ভোন্তোতি ভৰন্তো. দুট্ঠু চরিতং, দুট্ঠুং ৰা চরিতং কিলেসপূতিকত্তাতি দুচ্চরিতং; কাযেন দুচ্চরিতং, কাযতো ৰা উপ্পন্নং দুচ্চরিতন্তি কাযদুচ্চরিতং. ইতরেসুপি এসেৰ নযো. সমন্নাগতাতি সমঙ্গীভূতা.

অরিযানং উপৰাদকাতি বুদ্ধপচ্চেকবুদ্ধবুদ্ধসাৰকানং অরিযানং অন্তমসো গিহিসোতাপন্নানম্পি অনত্থকামা হুত্ৰা অন্তিমৰত্থুনা ৰা গুণপরিধংসনেন ৰা উপৰাদকা, অক্কোসকা গরহকাতি ৰুত্তং হোতি. তত্থ ‘‘নত্থি ইমেসং সমণধম্মো, অস্সমণা এতে’’তি ৰদন্তো অন্তিমৰত্থুনা উপৰদতি. ‘‘নত্থি ইমেসং ঝানং ৰা ৰিমোক্খো ৰা মগ্গো ৰা ফলং ৰা’’তিআদীনি ৰদন্তো গুণপরিধংসনেন উপৰদতীতি ৰেদিতব্বো. সো চ ঝানং ৰা উপৰদেয্য অঝানং ৰা, উভযথাপি অরিযূপৰাদোৰ হোতি; অতিভারিযং কম্মং, অনন্তরিযকম্মসদিসং, সগ্গাৰরণং মগ্গাৰরণঞ্চ, সতেকিচ্ছং পন হোতি. তস্মা যো অরিযং উপৰদতি, তেন গন্ত্ৰা সচে অত্তনা ৰুড্ঢতরো হোতি, উক্কুটিকং নিসীদিত্ৰা ‘‘অহং আযস্মন্তং ইদঞ্চিদঞ্চ অৰচং, তং মে খমাহী’’তি খমাপেতব্বো. সচে পন নৰকতরো হোতি, ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা ‘‘অহং, ভন্তে, তুম্হে ইদঞ্চিদঞ্চ অৰচং, তং মে খমথা’’তি খমাপেতব্বো. সচে সো নক্খমতি, দিসাপক্কন্তো ৰা হোতি, সযং ৰা গন্ত্ৰা সদ্ধিৰিহারিকে ৰা পেসেত্ৰা খমাপেতব্বো. সচে নাপি গন্তুং ন পেসেতুং সক্কা হোতি, যে তস্মিং ৰিহারে ভিক্খূ ৰসন্তি, তেসং সন্তিকং গন্ত্ৰা সচে নৰকতরা হোন্তি, উক্কুটিকং নিসীদিত্ৰা সচে ৰুড্ঢতরা, ৰুড্ঢে ৰুত্তনযেনেৰ পটিপজ্জিত্ৰা ‘‘অহং, ভন্তে, অসুকং নাম আযস্মন্তং ইদঞ্চিদঞ্চ অৰচং, তং খমতু মে সো আযস্মা’’তি ৰত্ৰা খমাপেতব্বো. সম্মুখা অখমন্তেপি এতদেৰ কাতব্বং. সচে একচারিকভিক্খু হোতি, নেৰ তস্স ৰসনট্ঠানং ন গতট্ঠানং পঞ্ঞাযতি, একস্স পণ্ডিতস্স ভিক্খুনো সন্তিকং গন্ত্ৰা ‘‘অহং, ভন্তে, অসুকং নাম আযস্মন্তং ইদঞ্চিদঞ্চ অৰচং, তং মে অনুস্সরতো অনুস্সরতো ৰিপ্পটিসারো হোতি, কিং করোমী’’তি ৰত্তব্বং. সো ৰক্খতি ‘‘তুম্হে মা চিন্তযিত্থ, থেরো তুম্হাকং খমতি, চিত্তং ৰূপসমেথা’’তি. তেনপি অরিযস্স গতদিসাভিমুখেন অঞ্জলিং পগ্গহেত্ৰা ‘‘খমথা’’তি ৰত্তব্বং. যদি সো পরিনিব্বুতো হোতি, পরিনিব্বুতমঞ্চট্ঠানং গন্ত্ৰা যাৰ সিৰথিকং গন্ত্ৰাপি খমাপেতব্বো. এৰং কতে নেৰ সগ্গাৰরণং ন মগ্গাৰরণং হোতি, পাকতিকমেৰ হোতীতি.

মিচ্ছাদিট্ঠিকাতি ৰিপরীতদস্সনা. মিচ্ছাদিট্ঠিকম্মসমাদানাতি মিচ্ছাদিট্ঠিৰসেন সমাদিন্ননানাৰিধকম্মা, যে চ মিচ্ছাদিট্ঠিমূলকেসু কাযকম্মাদীসু অঞ্ঞেপি সমাদপেন্তি. এত্থ চ ৰচীদুচ্চরিতগ্গহণেনেৰ অরিযূপৰাদে, মনোদুচ্চরিতগ্গহণেন চ মিচ্ছাদিট্ঠিযা সঙ্গহিতাযপি ইমেসং দ্ৰিন্নং পুনৰচনং মহাসাৰজ্জভাৰদস্সনত্থন্তি ৰেদিতব্বং. মহাসাৰজ্জো হি অরিযূপৰাদো আনন্তরিযসদিসো. ৰুত্তম্পি চেতং –

‘‘সেয্যথাপি, সারিপুত্ত, ভিক্খু সীলসম্পন্নো সমাধিসম্পন্নো পঞ্ঞাসম্পন্নো দিট্ঠেৰ ধম্মে অঞ্ঞং আরাধেয্য, এৰংসম্পদমিদং, সারিপুত্ত, ৰদামি. তং ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে’’তি (ম. নি. ১.১৪৯).

মিচ্ছাদিট্ঠিতো চ মহাসাৰজ্জতরং নাম অঞ্ঞং নত্থি. যথাহ –

‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰংমহাসাৰজ্জং যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিপরমানি ভিক্খৰে, মহাসাৰজ্জানী’’তি (অ. নি. ১.৩১০).

কাযস্স ভেদাতি উপাদিন্নক্খন্ধপরিচ্চাগা. পরং মরণাতি তদনন্তরাভিনিব্বত্তক্খন্ধগ্গহণে. অথ ৰা কাযস্স ভেদাতি জীৰিতিন্দ্রিযস্সুপচ্ছেদা. পরং মরণাতি চুতিচিত্ততো উদ্ধং. অপাযন্তি এৰমাদি সব্বং নিরযৰেৰচনমেৰ. নিরযো হি সগ্গমোক্খহেতুভূতা পুঞ্ঞসম্মতা অযা অপেতত্তা, সুখানং ৰা আযস্স অভাৰা অপাযো. দুক্খস্স গতি পটিসরণন্তি দুগ্গতি, দোসবহুলতায ৰা দুট্ঠেন কম্মুনা নিব্বত্তা গতীতি দুগ্গতি. ৰিৰসা নিপতন্তি তত্থ দুক্কটকারিনোতি ৰিনিপাতো, ৰিনস্সন্তা ৰা এত্থ নিপতন্তি সম্ভিজ্জমানঙ্গপচ্চঙ্গাতিপি ৰিনিপাতো. নত্থি এত্থ অস্সাদসঞ্ঞিতো অযোতি নিরযো.

অথ ৰা অপাযগ্গহণেন তিরচ্ছানযোনিং দীপেতি, তিরচ্ছানযোনি হি অপাযো সুগতিতো অপেতত্তা. ন দুগ্গতি, মহেসক্খানং নাগরাজাদীনং সম্ভৰতো. দুগ্গতিগ্গহণেন পেত্তিৰিসযং দীপেতি, সো হি অপাযো চেৰ দুগ্গতি চ সুখতো অপেতত্তা দুক্খস্স চ গতিভূতত্তা, ন তু ৰিনিপাতো, অসুরকাযসদিসং অৰিনিপতিতত্তা. ৰিনিপাতগ্গহণেন অসুরকাযং দীপেতি. সো হি যথাৰুত্তেন অত্থেন অপাযো চেৰ দুগ্গতি চ সব্বসমুস্সযেহি চ ৰিনিপতিতত্তা ৰিনিপাতোতি ৰুচ্চতি. নিরযগ্গহণেন অৰীচিআদিঅনেকপ্পকারং নিরযমেৰ দীপেতীতি. উপপন্নাতি উপগতা, তত্থ অভিনিব্বত্তাতি অধিপ্পাযো. ৰুত্তৰিপরিযাযেন সুক্কপক্খো ৰেদিতব্বো. অযং পন ৰিসেসো – তত্থ সুগতিগ্গহণেন মনুস্সগতিপি সঙ্গয্হতি. সগ্গগ্গহণেন দেৰগতিযেৰ. তত্থ সুন্দরা গতীতি সুগতি. রূপাদীহি ৰিসযেহি সুট্ঠু অগ্গোতি সগ্গো. সো সব্বোপি লুজ্জনপলুজ্জনট্ঠেন লোকোতি অযং ৰচনত্থো. ইতি দিব্বেন চক্খুনাতিআদি সব্বং নিগমনৰচনং.

এৰং দিব্বেন চক্খুনা পস্সতীতি অযমেত্থ সঙ্খেপত্থো – দিব্বচক্খুঞাণং পরিত্তপচ্চুপ্পন্নঅজ্ঝত্তবহিদ্ধারম্মণৰসেন চতূসু আরম্মণেসু পৰত্ততি. যথাকম্মূপগঞাণং পরিত্তমহগ্গতাতীতঅজ্ঝত্তবহিদ্ধারম্মণৰসেন পঞ্চসু আরম্মণেসু পৰত্ততি. অনাগতংসঞাণং পরিত্তমহগ্গতঅপ্পমাণমগ্গঅনাগতঅজ্ঝত্তবহিদ্ধানৰত্তব্বারম্মণৰসেন অট্ঠসু আরম্মণেসু পৰত্ততীতি.

আকঙ্খমানো চ ভগৰাতি ভগৰা ইচ্ছমানো. একম্পি লোকধাতুং পস্সেয্যাতি একং চক্কৰাল়ং ওলোকেয্য. সহস্সিম্পি চূল়নিকন্তি এত্থ যাৰতা চন্দিমসূরিযা পরিহরন্তি, দিসা ভান্তি ৰিরোচমানা, তাৰ সহস্সধা লোকো, এসা সহস্সিচূল়নিকা নাম. চূল়নিকন্তি খুদ্দকং. দ্ৰিসহস্সিম্পি মজ্ঝিমিকং লোকধাতুন্তি এত্থ সহস্সচক্কৰাল়ানং সহস্সভাগেন গণেত্ৰা দসসতসহস্সচক্কৰাল়পরিমাণা দ্ৰিসহস্সী মজ্ঝিমিকা লোকধাতু নাম. এত্তকেন বুদ্ধানং জাতিক্খেত্তং নাম দস্সিতং. বোধিসত্তানঞ্হি পচ্ছিমভৰে দেৰলোকতো চৰিত্ৰা মাতুকুচ্ছিযং পটিসন্ধিগ্গহণদিৰসে চ মাতুকুচ্ছিতো নিক্খমনদিৰসে চ মহাভিনিক্খমনদিৰসে চ সম্বোধিধম্মচক্কপৰত্তনআযুসঙ্খারোস্সজ্জনপরিনিব্বানদিৰসেসু চ এত্তকং ঠানং কম্পতি.

তিসহস্সিম্পি. মহাসহস্সিম্পি লোকধাতুন্তি সহস্সিতো পট্ঠায ততিযাতি তিসহস্সী, পঠমসহস্সিং সহস্সধা কত্ৰা গণিতং মজ্ঝিমিকং সহস্সধা কত্ৰা গণিতত্তা মহন্তেহি সহস্সেহি গণিতাতি মহাসহস্সী. এত্তাৰতা কোটিসতসহস্সচক্কৰাল়পরিমাণো লোকো দস্সিতো হোতি. গণকপুত্ততিস্সত্থেরো পন এৰমাহ – ‘‘ন হি তিসহস্সিমহাসহস্সিলোকধাতুযা এতং পরিমাণং. ইদঞ্হি আচরিযানং সজ্ঝাযমূলকং ৰাচায পরিহীনট্ঠানং, দসকোটিসতসহস্সচক্কৰাল়পরিমাণং পন ঠানং তিসহস্সিমহাসহস্সিলোকধাতু নামা’’তি. এত্তাৰতা হি ভগৰতো আণাক্খেত্তং নাম দস্সিতং. এতস্মিঞ্হি অন্তরে আটানাটিযপরিত্ত- (দী. নি. ৩.২৭৫ আদযো) ইসিগিলিপরিত্ত- (ম. নি. ৩.১৩৩ আদযো) ধজগ্গপরিত্ত- (সং. নি. ১.২৪৯) বোজ্ঝঙ্গপরিত্তখন্ধপরিত্ত- (অ. নি. ৪.৬৭) মোরপরিত্ত- (জা. ১.২.১৭-১৮) মেত্তপরিত্ত- (খু. পা. ৯.১ আদযো; সু. নি. ১৪৩ আদযো) রতনপরিত্তানং (খু. পা. ৬.১ আদযো; সু. নি. ২২৪ আদযো) আণা ফরতি.

যাৰতকং ৰা পন আকঙ্খেয্যাতি যত্তকং ৰা ইচ্ছেয্য. ইমিনা ৰিসযক্খেত্তং দস্সিতং. বুদ্ধানঞ্হি ৰিসযক্খেত্তস্স পমাণপরিচ্ছেদো নাম নত্থি, নত্থিকভাৰে চস্স ইমং উপমং আহরন্তি – কোটিসতসহস্সচক্কৰাল়ম্হি যাৰ ব্রহ্মলোকা সাসপেহি পূরেত্ৰা সচে কোচি পুরত্থিমায দিসায একচক্কৰাল়ে একং সাসপং পক্খিপন্তো আগচ্ছেয্য, সব্বেপি তে সাসপা পরিক্খযং গচ্ছেয্যুং. ন ত্ৰেৰ পুরত্থিমায দিসায চক্কৰাল়ানি. দক্খিণাদীসুপি এসেৰ নযো. তত্থ বুদ্ধানং অৰিসযো নাম নত্থি. তাৰতকং পস্সেয্যাতি তত্তকং ওলোকেয্য. এৰং পরিসুদ্ধং ভগৰতো দিব্বচক্খূতি দিব্বচক্খুকথং নিট্ঠাপেসি.

কথং ভগৰা পঞ্ঞাচক্খুনাপি ৰিৰটচক্খূতি কেনপ্পকারেন পঞ্ঞাচক্খুনা অপিহিতচক্খু? মহাপঞ্ঞো পুথুপঞ্ঞোতিআদিকং তত্থ অতিরোচতি যদিদং পঞ্ঞাযাতি পরিযোসানং হেট্ঠা ৰুত্তত্থমেৰ.

বুদ্ধচক্খুনাতি ইন্দ্রিযপরোপরিযত্তঞাণেন চ আসযানুসযঞাণেন চ. ইমেসং দ্ৰিন্নং ঞাণানং বুদ্ধচক্খূতি নামং, সব্বঞ্ঞুতঞ্ঞাণস্স সমন্তচক্খূতি, তিণ্ণং মগ্গঞাণানং ধম্মচক্খূতি. লোকং ৰোলোকেন্তো অদ্দস সত্তেতি সত্তে অদ্দক্খি. অপ্পরজক্খেতিআদীসু যেসং ৰুত্তনযেনেৰ পঞ্ঞাচক্খুম্হি রাগাদিরজং অপ্পং, তে অপ্পরজক্খা. যেসং তং মহন্তং, তে মহারজক্খা. যেসং সদ্ধাদীনি ইন্দ্রিযানি তিক্খানি, তে তিক্খিন্দ্রিযা. যেসং তানি মুদূনি, তে মুদিন্দ্রিযা. যেসং তেযেৰ সদ্ধাদযো আকারা সুন্দরা, তে স্ৰাকারা. যে কথিতকারণং সল্লক্খেন্তি, সুখেন সক্কা হোন্তি ৰিঞ্ঞাপেতুং তে সুৰিঞ্ঞাপযা. যে পরলোকঞ্চেৰ ৰজ্জঞ্চ ভযতো পস্সন্তি, তে পরলোকৰজ্জভযদস্সাৰিনো নাম.

উপ্পলিনিযন্তি উপ্পলৰনে. ইতরেসুপি এসেৰ নযো. অন্তোনিমুগ্গপোসীনীতি যানি অন্তোনিমুগ্গানেৰ পোসিযন্তি. উদকং অচ্চুগ্গম্ম তিট্ঠন্তীতি উদকং অতিক্কমিত্ৰা তিট্ঠন্তি. তত্থ যানি যানি অচ্চুগ্গম্ম ঠিতানি, তানি তানি সূরিযরস্মিসম্ফস্সং আগমযমানানি ঠিতানি অজ্জ পুপ্ফনকানি. যানি সমোদকং ঠিতানি, তানি স্ৰে পুপ্ফনকানি. যানি উদকা অনুগ্গতানি অন্তোনিমুগ্গপোসীনি, তানি ততিযদিৰসেৰ পুপ্ফনকানি. উদকা পন অনুগ্গতানি অঞ্ঞানিপি সরোগউপ্পলানি নাম অত্থি, যানি নেৰ পুপ্ফিস্সন্তি, মচ্ছকচ্ছপভক্খানেৰ ভৰিস্সন্তি, তানি পাল়িং নারূল়্হানি, আহরিত্ৰা পন দীপেতব্বানীতি দীপিতানি.

যথেৰ হি তানি চতুব্বিধপুপ্ফানি, এৰমেৰ উগ্ঘটিতঞ্ঞূ ৰিপঞ্চিতঞ্ঞূ নেয্যো পদপরমোতি চত্তারো পুগ্গলা. যস্স পুগ্গলস্স উদাহটৰেলায ধম্মাভিসমযো হোতি, অযং ৰুচ্চতি পুগ্গলো উগ্ঘটিতঞ্ঞূ. যস্স পুগ্গলস্স সংখিত্তেন ভাসিতস্স ৰিত্থারেন অত্থে ৰিভজীযমানে ধম্মাভিসমযো হোতি, অযং ৰুচ্চতি পুগ্গলো ৰিপঞ্চিতঞ্ঞূ. যস্স পুগ্গলস্স উদ্দেসতো পরিপুচ্ছতো যোনিসো মনসিকরোতো কল্যাণমিত্তে সেৰতো ভজতো পযিরুপাসতো ধম্মাভিসমযো হোতি, অযং ৰুচ্চতি পুগ্গলো নেয্যো. যস্স পুগ্গলস্স বহুম্পি সুণতো বহুম্পি ভণতো বহুম্পি ধারযতো বহুম্পি ৰাচতো ন তায জাতিযা ধম্মাভিসমযো হোতি, অযং ৰুচ্চতি পুগ্গলো পদপরমো. তত্থ ভগৰা উপ্পলৰনাদিসদিসং দসসহস্সিলোকধাতুং ওলোকেন্তো অজ্জ পুপ্ফনকানি উগ্ঘটিতঞ্ঞূ, স্ৰে পুপ্ফনকানি ৰিপঞ্চিতঞ্ঞূতি এৰং সব্বাকারতো চ অদ্দস. তত্থ তিণ্ণং পুগ্গলানং ইমস্মিংযেৰ অত্তভাৰে ভগৰতো ধম্মদেসনা অত্থং সাধেতি, পদপরমানং অনাগতত্থায ৰাসনা হোতি.

রাগচরিতোতিআদীসু রজ্জনৰসেন আরম্মণে চরণং এতস্স অত্থীতি রাগচরিতো. দুস্সনৰসেন আরম্মণে চরণং এতস্স অত্থীতি দোসচরিতো. মুয্হনৰসেন আরম্মণে চরণং এতস্স অত্থীতি মোহচরিতো. ৰিতক্কনৰসেন ঊহনৰসেন আরম্মণে চরণং এতস্স অত্থীতি ৰিতক্কচরিতো. ওকপ্পনসদ্ধাৰসেন আরম্মণে চরণং এতস্স অত্থীতি সদ্ধাচরিতো. ঞাণমেৰ চরণং, ঞাণেন ৰা চরণং, ঞাণস্স ৰা চরণং, ঞাণতো ৰা চরণং এতস্স অত্থীতি ঞাণচরিতো. রাগচরিতস্সাতি রাগুস্সদস্স রাগবহুলস্স. পরতোপি এসেৰ নযো.

অসুভকথং কথেতীতি উদ্ধুমাতকাদিদসৰিধং অসুভপটিসংযুত্তকথং আচিক্খতি. ৰুত্তঞ্হেতং – ‘‘অসুভা ভাৰেতব্বা রাগস্স পহানাযা’’তি (অ. নি. ৯.১). মেত্তাভাৰনং আচিক্খতীতি মেত্তাভাৰনং চিত্তসিনেহনং কথেতি. ৰুত্তঞ্হেতং – ‘‘মেত্তা ভাৰেতব্বা ব্যাপাদস্স পহানাযা’’তি. উদ্দেসেতি সজ্ঝাযনে. পরিপুচ্ছাযাতি অট্ঠকথায. কালেন ধম্মস্সৰনেতি যুত্তপ্পত্তকালে উত্তরি পরিযত্তিধম্মস্সৰনে. ধম্মসাকচ্ছাযাতি অঞ্ঞেহি সদ্ধিং সাকচ্ছায. গরুসংৰাসেতি গরূনং পযিরুপাসনে. নিৰেসেতীতি আচরিযানং সন্তিকে পতিট্ঠাপেতি. আনাপানস্সতিং আচিক্খতীতি আনাপানস্সতিসম্পযুত্তকম্মট্ঠানং কথেতি. ৰুত্তঞ্হেতং – ‘‘আনাপানস্সতি ভাৰেতব্বা ৰিতক্কুপচ্ছেদাযা’’তি (অ. নি. ৯.১). পসাদনীযং নিমিত্তং আচিক্খতীতি চূল়ৰেদল্ল- (ম. নি. ১.৪৬০ আদযো) মহাৰেদল্লা- (ম. নি. ১.৪৪৯ আদযো) দিপসাদজনকং সুত্তং কথেতি. বুদ্ধসুবোধিন্তি বুদ্ধস্স ভগৰতো বুদ্ধত্তপটিৰেধং. ধম্মসুধম্মতন্তি নৰৰিধলোকুত্তরধম্মস্স স্ৰাক্খাততং. সঙ্ঘসুপ্পটিপত্তিন্তি অট্ঠৰিধঅরিযসঙ্ঘস্স সুপ্পটিপন্নতাদিসুট্ঠুপটিপত্তিং. সীলানি চ অত্তনোতি অত্তনো সন্তকসীলানি চ. আচিক্খতি ৰিপস্সনানিমিত্তন্তি উদযব্বযাদিপটিসংযুত্তং কথেতি. অনিচ্চাকারন্তি হুত্ৰা অভাৰাকারং. দুক্খাকারন্তি উদযব্বযপটিপীল়নাকারং. অনত্তাকারন্তি অৰসৰত্তনাকারং.

সেলে যথা পব্বতমুদ্ধনিট্ঠিতোতি সেলমযে একগ্ঘনে পব্বতমুদ্ধনি ঠিতোৰ, ন হি তত্থ ঠিতস্স দস্সনত্থং অভিমুখে গীৰুক্খিপনপসারণাদিকিচ্চং অত্থি. তথূপমন্তি তপ্পটিভাগং সেলপব্বতূপমং. অযং পনেত্থ সঙ্খেপত্থো – যথা সেলপব্বতমুদ্ধন্তি ঠিতোৰ চক্খুনা পুরিসো সমন্ততো জনতং পস্সেয্য. সুমেধ সুন্দরপঞ্ঞ সব্বঞ্ঞুতঞ্ঞাণেন সমন্তচক্খু ভগৰা ধম্মমযং পঞ্ঞামযং পাসাদমারুয্হ সযং অপেতসোকো সোকাৰতিণ্ণং জাতিজরাভিভূতঞ্চ জনতং অৰেক্খস্সু উপধারযতু উপপরিক্খতু.

অযং পনেত্থ অধিপ্পাযো – যথা হি পব্বতপাদসামন্তা মহন্তং খেত্তং কত্ৰা তত্থ কেদারপাল়ীসু কুটিযো কত্ৰা রত্তিং অগ্গিং জালেয্য, চতুরঙ্গসমন্নাগতঞ্চ অন্ধকারং অস্স, অথ তস্স পব্বতস্স মত্থকে ঠত্ৰা চক্খুমতো পুরিসস্স ভূমিং ওলোকযতো নেৰ খেত্তং ন কেদারপাল়িযো ন কুটিযো ন তত্থ সযিতমনুস্সা পঞ্ঞাযেয্যুং, কুটিকাসু পন অগ্গিজালমত্তমেৰ পঞ্ঞাযেয্য. এৰং ধম্মপাসাদং আরুয্হ সত্তকাযং ওলোকযতো তথাগতস্স যে তে অকতকল্যাণা সত্তা, তে একৰিহারে দক্খিণজাণুপস্সে নিসিন্নাপি বুদ্ধচক্খুস্স আপাথং নাগচ্ছন্তি, রত্তিং খিত্তসরা ৰিয হোন্তি. যে পন কতকল্যাণা ৰেনেয্যপুগ্গলা, তে এৰস্স দূরেপি ঠিতা আপাথং গচ্ছন্তি, তে এৰ অগ্গি ৰিয হিমৰন্তপব্বতো ৰিয চ. ৰুত্তম্পি চেতং –

‘‘দূরে সন্তো পকাসেন্তি, হিমৰন্তোৰ পব্বতো;

অসন্তেত্থ ন দিস্সন্তি, রত্তিং খিত্তা যথা সরা’’তি. (ধ. প. ৩০৪; নেত্তি. ১১);

সব্বঞ্ঞুতঞ্ঞাণন্তি এত্থ পঞ্চনেয্যপথপ্পভেদং সব্বং অঞ্ঞাসীতি সব্বঞ্ঞূ. সঙ্খতাসঙ্খতাদিভেদা সব্বধম্মা হি সঙ্খারো ৰিকারো লক্খণং নিব্বানং পঞ্ঞত্তীতি পঞ্চেৰ নেয্যপথা হোন্তি. সব্বঞ্ঞুস্স ভাৰো সব্বঞ্ঞুতা, সব্বঞ্ঞুতা এৰ ঞাণং ‘‘সব্বঞ্ঞুতাঞাণ’’ন্তি ৰত্তব্বে ‘‘সব্বঞ্ঞুতঞ্ঞাণ’’ন্তি ৰুত্তং. সব্বঞ্ঞূতি চ কমসব্বঞ্ঞূ সকিংসব্বঞ্ঞূ সততসব্বঞ্ঞূ সত্তিসব্বঞ্ঞূ ঞাতসব্বঞ্ঞূতি পঞ্চৰিধা সব্বঞ্ঞুনো সিযুং. তেসু কমেন সব্বজাননকালাসম্ভৰতো কমসব্বঞ্ঞুতা ন হোতি, সকিং সব্বারম্মণগ্গহণাভাৰতো সকিংসব্বঞ্ঞুতা ন হোতি, চক্খুৰিঞ্ঞাণাদীনং যথারম্মণচিত্তসম্ভৰতো ভৰঙ্গচিত্তৰিরোধতো যুত্তিঅভাৰতো চ সততসব্বঞ্ঞুতা ন হোতি, পরিসেসতো সব্বজাননসমত্থতায সত্তিসব্বঞ্ঞুতা ৰা সিযা, ৰিদিতসব্বধম্মত্তা ঞাতসব্বঞ্ঞুতা ৰা, সত্তিসব্বঞ্ঞুনো সব্বজাননত্তং নত্থীতি তম্পি ন যুজ্জতি, ‘‘ন তস্স অদিট্ঠমিধত্থি কিঞ্চি…পে… সমন্তচক্খূ’’তি ৰুত্তত্তা ঞাতসব্বঞ্ঞুতা এৰ যুজ্জতি. এৰঞ্হি সতি কিচ্চতো অসম্মোহতো কারণসিদ্ধিতো আৰজ্জনপটিবদ্ধতো সব্বঞ্ঞুতমেৰ হোতীতি. তেন ঞাণেনাতি তেন সব্বজাননঞাণেন.

পুন অপরেন পরিযাযেন সব্বঞ্ঞুভাৰসাধনত্থং ‘‘ন তস্সা’’তি গাথমাহ. তত্থ ন তস্স অদ্দিট্ঠমিধত্থি কিঞ্চীতি তস্স তথাগতস্স ইধ ইমস্মিং তেধাতুকে লোকে ইমস্মিং পচ্চুপ্পন্নকালে ৰা পঞ্ঞাচক্খুনা অদিট্ঠং নাম কিঞ্চি অপ্পমত্তকম্পি ন অত্থি ন সংৰিজ্জতি. অত্থীতি ইদং ৰত্তমানকালিকং আখ্যাতপদং, ইমিনা পচ্চুপ্পন্নকালিকস্স সব্বধম্মস্স ঞাতভাৰং দস্সেতি. গাথাবন্ধসুখত্থং পনেত্থ দ-কারো পযুত্তো. অথো অৰিঞ্ঞাতন্তি এত্থ অথোতি ৰচনোপাদানে নিপাতো. অৰিঞ্ঞাতন্তি অতীতকালিকং অৰিঞ্ঞাতং নাম কিঞ্চি ধম্মজাতং নাহোসীতি পাঠসেসো. অব্যযভূতস্স অত্থি-সদ্দস্স গহণে পাঠসেসং ৰিনাপি যুজ্জতিযেৰ. ইমিনা অতীতকালিকস্স সব্বধম্মস্স ঞাতভাৰং দস্সেতি. অজানিতব্বন্তি অনাগতকালিকং অজানিতব্বং নাম ধম্মজাতং ন ভৰিস্সতি নত্থীতি. ইমিনা অনাগতকালিকস্স সব্বধম্মস্স ঞাতভাৰং দস্সেতি. জাননকিরিযাৰিসেসমত্তমেৰ ৰা এত্থ অ-কারো. সব্বং অভিঞ্ঞাসি যদত্থি নেয্যন্তি এত্থ যং তেকালিকং ৰা কালৰিনিমুত্তং ৰা নেয্যং জানিতব্বং কিঞ্চি ধম্মজাতং অত্থি, তং সব্বং তথাগতো অভিঞ্ঞাসি অধিকেন সব্বঞ্ঞুতঞ্ঞাণেন জানি পটিৰিজ্ঝি, এত্থ অত্থি-সদ্দেন তেকালিকস্স কালৰিমুত্তস্স চ গহণা অত্থি-সদ্দো অব্যযভূতোযেৰ দট্ঠব্বো. তথাগতো তেন সমন্তচক্খূতি কালৰসেন ওকাসৰসেন চ নিপ্পদেসত্তা সমন্তা সব্বতো পৰত্তং ঞাণচক্খু অস্সাতি সমন্তচক্খু, তেন যথাৰুত্তেন কারণেন তথাগতো সমন্তচক্খু সব্বঞ্ঞূতি ৰুত্তং হোতি. ইমিস্সা গাথায পুগ্গলাধিট্ঠানায দেসনায সব্বঞ্ঞুতঞ্ঞাণং সাধিতং.

ন ইতিহিতিহন্তি ‘‘এৰং কির আসি, এৰং কির আসী’’তি ন হোতি. ন ইতিকিরাযাতি ‘‘এৰং কির এত’’ন্তি ন হোতি. ন পরম্পরাযাতি পরম্পরকথাযাপি ন হোতি. ন পিটকসম্পদাযাতি অম্হাকং পিটকতন্তিযা সদ্ধিং সমেতীতি ন হোতি. ন তক্কহেতূতি তক্কগ্গাহেনপি ন হোতি. ন আকারপরিৰিতক্কেনাতি ‘‘সুন্দরমিদং কারণ’’ন্তি এৰং কারণপরিৰিতক্কেনপি ন হোতি. ন দিট্ঠিনিজ্ঝানক্খন্তিযাতি অম্হাকং নিজ্ঝাযিত্ৰা খমিত্ৰা গহিতদিট্ঠিযা সদ্ধিং সমেতীতিপি ন হোতি.

অথ ৰাপি সমাধিন্তি এত্থ সমাধিন্তি কুসলচিত্তেকগ্গতা সমাধি. কেনট্ঠেন সমাধীতি? সমাধানট্ঠেন. কিমিদং সমাধানং নাম? একারম্মণে চিত্তচেতসিকানং সমং সম্মা চ আধানং, ঠপনন্তি ৰুত্তং হোতি. তস্মা যস্স ধম্মস্স আনুভাৰেন একারম্মণে চিত্তচেতসিকা সমং সম্মা চ অৰিক্খিপ্পমানা অৰিপ্পকিণ্ণা চ হুত্ৰা তিট্ঠন্তি, ইদং সমাধানন্তি ৰেদিতব্বং. তস্স খো পন সমাধিস্স –

‘‘লক্খণং তু অৰিক্খেপো, ৰিক্খেপদ্ধংসনং রসো;

অকম্পনমুপট্ঠানং, পদট্ঠানং সুখং পন’’. (পটি. ম. অট্ঠ. ১.১.৩);

সমাধি অনাৰিলঅচলভাৰেন আরম্মণে তিট্ঠতীতি ঠিতি. পরতো পদদ্ৰযং উপসগ্গৰসেন ৰড্ঢিতং. অপি চ সম্পযুত্তধম্মে আরম্মণম্হি সম্পিণ্ডেত্ৰা তিট্ঠতীতি সণ্ঠিতি. আরম্মণং ওগাহেত্ৰা অনুপৰিসিত্ৰা তিট্ঠতীতি অৰট্ঠিতি. কুসলপক্খস্মিঞ্হি চত্তারোৰ ধম্মা আরম্মণং ওগাহন্তি সদ্ধা সতি সমাধি পঞ্ঞাতি. তেনেৰ সদ্ধা ‘‘ওকপ্পনা’’তি ৰুত্তা, সতি ‘‘অপিলাপনতা’’তি, সমাধি ‘‘অৰট্ঠিতী’’তি, পঞ্ঞা ‘‘পরিযোগাহনা’’তি. অকুসলপক্খে পন তযো ধম্মা আরম্মণং ওগাহন্তি তণ্হা দিট্ঠি অৰিজ্জাতি. তেনেৰেতে ‘‘ওঘা’’তি ৰুত্তা. চিত্তেকগ্গতা পনেত্থ ন বলৰতী হোতি. যথা হি রজুট্ঠানট্ঠানে উদকেন সিঞ্চিত্ৰা সম্মট্ঠে থোকমেৰ কালং রজো সন্নিসীদতি, সুক্খন্তে সুক্খন্তে পুন পকতিভাৰেনেৰ ৰুট্ঠাতি, এৰমেৰ অকুসলপক্খে চিত্তেকগ্গতা ন বলৰতী হোতি.

উদ্ধচ্চৰিচিকিচ্ছাৰসেন পৰত্তস্স ৰিসাহারস্স পটিপক্খতো অৰিসাহারো. উদ্ধচ্চৰিচিকিচ্ছাৰসেনেৰ গচ্ছন্তং চিত্তং ৰিক্খিপতি নাম. অযং পন তথাৰিধো ৰিক্খেপো ন হোতীতি অৰিক্খেপো. উদ্ধচ্চৰিচিকিচ্ছাৰসেনেৰ চিত্তং ৰিসাহটং নাম হোতি, ইতো চিতো চ হরীযতি, অযং পন এৰং অৰিসাহটমানসস্স ভাৰোতি অৰিসাহটমানসতা. সমথোতি তিৰিধো সমথো চিত্তসমথো অধিকরণসমথো সব্বসঙ্খারসমথোতি. তত্থ অট্ঠসু সমাপত্তীসু চিত্তেকগ্গতা চিত্তসমথো নাম. তঞ্হি আগম্ম চিত্তচলনং চিত্তৰিপ্ফন্দিতং সম্মতি ৰূপসম্মতি, তস্মা সো ‘‘চিত্তসমথো’’তি ৰুচ্চতি. সম্মুখাৰিনযাদিসত্তৰিধো সমথো অধিকরণসমথো নাম. তঞ্হি আগম্ম তানি তানি অধিকরণানি সম্মন্তি ৰূপসম্মন্তি, তস্মা সো ‘‘অধিকরণসমথো’’তি ৰুচ্চতি. যস্মা পন সব্বে সঙ্খারা নিব্বানং আগম্ম সম্মন্তি ৰূপসম্মন্তি ৰূপসম্মন্তি, তস্মা তং ‘‘সব্বসঙ্খারসমথো’’তি ৰুচ্চতি. ইমস্মিং অত্থে চিত্তসমথো অধিপ্পেতো. সমাধিলক্খণে ইন্দট্ঠং কারেতীতি সমাধিন্দ্রিযং. উদ্ধচ্চে ন কম্পতীতি সমাধিবলং. সম্মাসমাধীতি যাথাৰসমাধি নিয্যানিকসমাধি.

১৫৭. অথস্স ভগৰা যস্মা ইন্দ্রিযসংৰরো সীলস্স রক্খা, যস্মা ৰা ইমিনানুক্কমেন দেসিযমানা অযং দেসনা তাসং দেৰতানং সপ্পাযা, তস্মা ইন্দ্রিযসংৰরতো পভুতি পটিপদং দস্সেন্তো ‘‘চক্খূহী’’তিআদি আরদ্ধো. তত্থ চক্খূহি নেৰ লোলস্সাতি অদিট্ঠদক্খিতব্বাদিৰসেন চক্খূহি লোলো নেৰ অস্স. গামকথায আৰরযে সোতন্তি তিরচ্ছানকথায সোতং আৰরেয্য.

চক্খুলোলিযেনাতি চক্খুদ্ৰারে উপ্পন্নলোলৰসেন চক্খুলোলিযেন. অদিট্ঠং দক্খিতব্বন্তি অদিট্ঠপুব্বং রূপারম্মণং পস্সিতুং যুত্তং. দিট্ঠং সমতিক্কমিতব্বন্তি দিট্ঠপুব্বরূপারম্মণং অতিক্কমিতুং যুত্তং. আরামেন আরামন্তি পুপ্ফারামাদিআরামেন ফলারামাদিং ৰা পুপ্ফারামাদিং ৰা. দীঘচারিকন্তি দীঘচরণং. অনৰট্ঠিতচারিকন্তি অসন্নিট্ঠানচরণং. অনুযুত্তো হোতি রূপদস্সনাযাতি রূপারম্মণদস্সনত্থায পুনপ্পুনং যুত্তো হোতি.

অন্তরঘরং পৰিট্ঠোতি উম্মারব্ভন্তরং পৰিট্ঠো. ৰীথিং পটিপন্নোতি অন্তরৰীথিং ওতিণ্ণো. ঘরমুখানি ওলোকেন্তোতি ঘরদ্ৰারানি অৰলোকেন্তো. উদ্ধং উল্লোকেন্তোতি উপরিদিসং উদ্ধংমুখো হুত্ৰা ৰিলোকেন্তো.

চক্খুনা রূপং দিস্ৰাতি কারণৰসেন চক্খূতি লদ্ধৰোহারেন রূপদস্সনসমত্থেন চক্খুৰিঞ্ঞাণেন রূপং দিস্ৰা. পোরাণা পনাহু – ‘‘চক্খু রূপং ন পস্সতি অচিত্তকত্তা, চিত্তং ন পস্সতি অচক্খুকত্তা. দ্ৰারারম্মণসঙ্ঘট্টে পন পসাদৰত্থুকেন চিত্তেন পস্সতি. ঈদিসী পনেসা ‘ধনুনা ৰিজ্ঝতী’তিআদীসু ৰিয সসম্ভারকথা নাম হোতি. তস্মা চক্খুৰিঞ্ঞাণেন রূপং দিস্ৰাতি অযমেত্থ অত্থো’’তি. নিমিত্তগ্গাহীতি ইত্থিপুরিসনিমিত্তং ৰা সুভনিমিত্তাদিকং ৰা কিলেসৰত্থুভূতং নিমিত্তং ছন্দরাগৰসেন গণ্হাতি, দিট্ঠমত্তেযেৰ ন সণ্ঠাতি. অনুব্যঞ্জনগ্গাহীতি কিলেসানং অনুঅনুব্যঞ্জনতো পাকটভাৰকরণতো অনুব্যঞ্জনন্তি লদ্ধৰোহারং হত্থপাদসিতহসিতকথিতআলোকিতৰিলোকিতাদিভেদং আকারং গণ্হাতি. যত্ৰাধিকরণমেনন্তিআদিম্হি যংকারণা যস্স চক্খুন্দ্রিযাসংৰরস্স হেতু এতং পুগ্গলং সতিকৰাটেন চক্খুন্দ্রিযং অসংৰুতং অপিহিতচক্খুদ্ৰারং হুত্ৰা ৰিহরন্তং এতে অভিজ্ঝাদযো ধম্মা অন্ৰাস্সৰেয্যুং অনুপ্পবন্ধেয্যুং অজ্ঝোত্থরেয্যুং. তস্স সংৰরায ন পটিপজ্জতীতি তস্স চক্খুন্দ্রিযস্স সতিকৰাটেন পিদহনত্থায ন পটিপজ্জতি. এৰংভূতোযেৰ চ ন রক্খতি চক্খুন্দ্রিযং. ন চক্খুন্দ্রিযে সংৰরং আপজ্জতীতিপি ৰুচ্চতি. তত্থ কিঞ্চাপি চক্খুন্দ্রিযে সংৰরো ৰা অসংৰরো ৰা নত্থি. ন হি চক্খুপসাদং নিস্সায সতি ৰা মুট্ঠস্সচ্চং ৰা উপ্পজ্জতি. অপিচ যদা রূপারম্মণং চক্খুস্স আপাথং আগচ্ছতি, তদা ভৰঙ্গে দ্ৰিক্খত্তুং উপ্পজ্জিত্ৰা নিরুদ্ধে কিরিযামনোধাতু আৰজ্জনকিচ্চং সাধযমানা উপ্পজ্জিত্ৰা নিরুজ্ঝতি, ততো চক্খুৰিঞ্ঞাণং দস্সনকিচ্চং, ততো মনোধাতু সম্পটিচ্ছনকিচ্চং, ততো ৰিপাকাহেতুকমনোৰিঞ্ঞাণধাতু সন্তীরণকিচ্চং, ততো কিরিযাহেতুকমনোৰিঞ্ঞাণধাতু ৰোট্ঠব্বনকিচ্চং সাধযমানা উপ্পজ্জিত্ৰা নিরুজ্ঝতি, তদনন্তরং জৰনং জৰতি.

তত্রাপি নেৰ ভৰঙ্গসমযে ন আৰজ্জনাদীনং অঞ্ঞতরসমযে সংৰরো ৰা অসংৰরো ৰা অত্থি. জৰনক্খণে পন সচে দুস্সীল্যং ৰা মুট্ঠস্সচ্চং ৰা অঞ্ঞাণং ৰা অক্খন্তি ৰা কোসজ্জং ৰা উপ্পজ্জতি, অসংৰরো হোতি. এৰং হোন্তো পন সো ‘‘চক্খুন্দ্রিযে অসংৰরো’’তি ৰুচ্চতি. কস্মা? যস্মা তস্মিং অসংৰরে সতি দ্ৰারম্পি অগুত্তং হোতি, ভৰঙ্গম্পি আৰজ্জনাদীনিপি ৰীথিচিত্তানি. যথা কিং? যথা নগরে চতূসু দ্ৰারেসু অসংৰুতেসু কিঞ্চাপি অন্তোঘরদ্ৰারকোট্ঠকগব্ভাদযো সংৰুতা, তথাপি অন্তোনগরে সব্বং ভণ্ডং অরক্খিতং অগোপিতমেৰ হোতি. নগরদ্ৰারেন হি পৰিসিত্ৰা চোরা যদিচ্ছন্তি তং করেয্যুং, এৰমেৰ জৰনে দুস্সীল্যাদীসু উপ্পন্নেসু তস্মিং অসংৰরে সতি দ্ৰারম্পি অগুত্তং হোতি ভৰঙ্গম্পি আৰজ্জনাদীনিপি ৰীথিচিত্তানি.

সদ্ধাদেয্যানীতি কম্মঞ্চ ফলঞ্চ ইধলোকঞ্চ পরলোকঞ্চ সদ্দহিত্ৰা দিন্নানি. ‘‘অযং মে ঞাতীতি ৰা, মিত্তোতি ৰা, ইদং ৰা পটিকরিস্সতি, ইদং ৰানেন কতপুব্ব’’ন্তি ৰা এৰং ন দিন্নানীতি অত্থো. এৰং দিন্নানি হি ন সদ্ধাদেয্যানি নাম হোন্তি. ভোজনানীতি চ দেসনাসীসমত্তমেতং, অত্থতো পন সদ্ধাদেয্যানি ভোজনানি ভুঞ্জিত্ৰা চীৰরানি পারুপিত্ৰা সেনাসনানি সেৰমানা গিলানপচ্চযভেসজ্জং পরিভুঞ্জমানাতি সব্বমেতং ৰুত্তমেৰ হোতি.

সেয্যথিদন্তি নিপাতো. তস্সত্থো, কতমো হোতি. নচ্চং নাম যংকিঞ্চি নচ্চং, তং মগ্গং গচ্ছন্তেনাপি গীৰং পসারেত্ৰা দট্ঠুং ন ৰট্টতি. গীতন্তি যংকিঞ্চি গীতং. ৰাদিতন্তি যংকিঞ্চি ৰাদিতং. পেক্খন্তি নটসমজ্জং. অক্খানন্তি ভারতরামাযনাদিকং. যস্মিং ঠানে কথীযতি, তত্থ গন্তুম্পি ন ৰট্টতি. পাণিস্সরন্তি কংসতাল়ং, ‘‘পাণিতাল়’’ন্তিপি ৰদন্তি. ৰেতাল়ন্তি ঘনতাল়ং, ‘‘মন্তেন মতসরীরুট্ঠাপন’’ন্তিপি একে. কুম্ভথূণন্তি চতুরস্সঅম্বণকতাল়ং, ‘‘কুম্ভসদ্দ’’ন্তিপি একে. সোভনকন্তি নটানং অব্ভোক্কিরণং; সোভনকরং ৰা, পটিভানচিত্তন্তি ৰুত্তং হোতি. চণ্ডালন্তি অযোগুল়কীল়া, ‘‘চণ্ডালানং সাণধোৰনকীল়া’’তিপি ৰদন্তি. ৰংসন্তি ৰেণুং উস্সাপেত্ৰা কীল়নং.

ধোৰনন্তি অট্ঠিধোৰনং, একচ্চেসু কির জনপদেসু কালঙ্কতে ঞাতকে ন ঝাপেন্তি, নিখণিত্ৰা ঠপেন্তি. অথ তেসং পূতিভূতং কাযং ঞত্ৰা নীহরিত্ৰা অট্ঠীনি ধোৰিত্ৰা গন্ধেহি মক্খেত্ৰা ঠপেন্তি. তে নক্খত্তকালে একস্মিং ঠানে অট্ঠীনি ঠপেত্ৰা একস্মিং ঠানে সুরাদীনি ঠপেত্ৰা রোদন্তা পরিদেৰন্তা সুরং পিৰন্তি. ৰুত্তম্পি চেতং ‘‘অত্থি ভিক্খৰে দক্খিণেসু জনপদেসু ধোৰনং নাম, তত্থ হোতি অন্নম্পি পানম্পি খজ্জম্পি ভোজ্জম্পি লেয্যম্পি পেয্যম্পি নচ্চম্পি গীতম্পি ৰাদিতম্পি. অত্থেকং ভিক্খৰে ধোৰনং, নেতং নত্থীতি ৰদামী’’তি (অ. নি. ১০.১০৭). একচ্চে পন ‘‘ইন্দজালেন অট্ঠিধোৰনং ধোৰন’’ন্তি ৰদন্তি. হত্থিযুদ্ধাদীসু ভিক্খুনো নেৰ হত্থিআদীহি সদ্ধিং যুজ্ঝিতুং, ন তে যুজ্ঝাপেতুং, ন যুজ্ঝন্তে দট্ঠুং ৰট্টতি. নিব্বুদ্ধন্তি মল্লযুদ্ধং. উয্যোধিকন্তি যত্থ সম্পহারো দিয্যতি. বলগ্গন্তি বলগণনট্ঠানং. সেনাব্যূহন্তি সেনানিৰেসো, সকটব্যূহাদিৰসেন সেনায নিৰেসনং. অনীকদস্সনন্তি ‘‘তযো হত্থী পচ্ছিমং হত্থানীক’’ন্তিআদিনা (পাচি. ৩২৪) নযেন ৰুত্তস্স অনীকস্স দস্সনং.

ন নিমিত্তগ্গাহী হোতীতি ছন্দরাগৰসেন ৰুত্তপ্পকারং নিমিত্তং ন গণ্হাতি. এৰং সেসপদানিপি ৰুত্তপটিপক্খনযেন ৰেদিতব্বানি. যথা চ হেট্ঠা জৰনে দুস্সীল্যাদীসু উপ্পন্নেসু তস্মিং অসংৰরে সতি দ্ৰারম্পি অগুত্তং হোতি, ভৰঙ্গম্পি আৰজ্জনাদীনিপি ৰীথিচিত্তানীতি ৰুত্তং, এৰমিধ তস্মিং সীলাদীসু উপ্পন্নেসু দ্ৰারম্পি গুত্তং হোতি, ভৰঙ্গম্পি আৰজ্জনাদীনিপি ৰীথিচিত্তানি. যথা কিং? যথা নগরদ্ৰারেসু সংৰুতেসু কিঞ্চাপি অন্তোঘরাদযো অসংৰুতা হোন্তি, তথাপি অন্তোনগরে সব্বং ভণ্ডং সুরক্খিতং সুগোপিতমেৰ হোতি, নগরদ্ৰারেসু পিহিতেসু চোরানং পৰেসো নত্থি. এৰমেৰ জৰনে সীলাদীসু উপ্পন্নেসু দ্ৰারম্পি গুত্তং হোতি, ভৰঙ্গম্পি আৰজ্জনাদীনিপি ৰীথিচিত্তানি. তস্মা জৰনক্খণে উপ্পজ্জমানোপি ‘‘চক্খুন্দ্রিযে সংৰরো’’তি ৰুত্তো. ইতো পরং হেট্ঠা চ উপরি চ ৰুত্তপরিযাযেন অত্থো ৰেদিতব্বো.

ৰিসূকদস্সনাতি পটাণীদস্সনতো. গামকথাতি গামৰাসীনং কথা. বাত্তিংসাতি দ্ৰত্তিংস. অনিয্যানিকত্তা সগ্গমোক্খমগ্গানং তিরচ্ছানভূতা কথাতি তিরচ্ছানকথা. তত্থ রাজানং আরব্ভ ‘‘মহাসম্মতো মন্ধাতা ধম্মাসোকো এৰং মহানুভাৰো’’তিআদিনা নযেন পৰত্তা কথা রাজকথা. এস নযো চোরকথাদীসু. তেসু ‘‘অসুকো রাজা অভিরূপো দস্সনীযো’’তিআদিনা নযেন গেহস্সিতকথাৰ তিরচ্ছানকথা হোতি. ‘‘সোপি নাম এৰং মহানুভাৰো খযং গতো’’তি এৰং পৰত্তা পন কম্মট্ঠানভাৰে তিট্ঠতি. চোরেসুপি ‘‘মূলদেৰো এৰং মহানুভাৰো, মেঘমালো এৰং মহানুভাৰো’’তি তেসং কম্মং পটিচ্চ ‘‘অহো সূরা’’তি গেহস্সিতকথাৰ তিরচ্ছানকথা. যুদ্ধেপি ভারতযুদ্ধাদীসু ‘‘অসুকেন অসুকো এৰং মারিতো এৰং ৰিদ্ধো’’তি কামস্সাদৰসেনেৰ কথা তিরচ্ছানকথা. ‘‘তেপি নাম খযং গতা’’তি এৰং পৰত্তা পন সব্বত্থ কম্মট্ঠানমেৰ হোতি.

অপি চ অন্নাদীসু ‘‘এৰং ৰণ্ণৰন্তং গন্ধৰন্তং রসৰন্তং ফস্সসম্পন্নং খাদিম্হ ভুঞ্জিম্হ পিৰিম্হ পরিভুঞ্জিম্হা’’তি কামস্সাদৰসেন কথেতুং ন ৰট্টতি, সাত্থকং পন কত্ৰা ‘‘পুব্বে এৰং ৰণ্ণাদিসম্পন্নং অন্নং পানং ৰত্থং সযনং মালং গন্ধং সীলৰন্তানং অদম্হ, চেতিযপূজং অকরিম্হা’’তি কথেতুং ৰট্টতি. ঞাতিকথাদীসু পন ‘‘অম্হাকং ঞাতকা সূরা সমত্থা’’তি ৰা, ‘‘পুব্বে মযং এৰং ৰিচিত্রেহি যানেহি ৰিচরিম্হা’’তি ৰা অস্সাদৰসেন ৰত্তুং ন ৰট্টতি, সাত্থকং পন কত্ৰা ‘‘তেপি নো ঞাতকা খযং গতা’’তি ৰা, ‘‘পুব্বে মযং এৰরূপা উপাহনা সঙ্ঘস্স অদম্হা’’তি ৰা কথেতুং ৰট্টতি. গামকথাপি সুনিৰিট্ঠদুন্নিৰিট্ঠসুভিক্খদুব্ভিক্খাদিৰসেন ‘‘অসুকগামৰাসিনো সূরা সমত্থা’’তি ৰা এৰং অস্সাদৰসেন ৰত্তুং ন ৰট্টতি, সাত্থকং পন কত্ৰা ‘‘সদ্ধা পসন্না’’তি ৰা, ‘‘খযৰযং গতা’’তি ৰা ৰত্তুং ৰট্টতি.

নিগমনগরজনপদকথাসুপি এসেৰ নযো. ইত্থিকথাপি ৰণ্ণসণ্ঠানাদীনি পটিচ্চ অস্সাদৰসেন ন ৰট্টতি, ‘‘সদ্ধা পসন্না, খযৰযং গতা’’তি এৰমেৰ ৰট্টতি. সূরকথাপি ‘‘নন্দিমিত্তো নাম যোধো সূরো অহোসী’’তি অস্সাদৰসেন ন ৰট্টতি. ‘‘সদ্ধো অহোসি, খযৰযং গতো’’তি এৰমেৰ ৰট্টতি. ৰিসিখাকথাপি ‘‘অসুকা ৰিসিখা সুনিৰিট্ঠা দুন্নিৰিট্ঠা সূরা সমত্থা’’তি অস্সাদৰসেন ন ৰট্টতি. ‘‘সদ্ধা পসন্না, খযৰযং গতা’’ইচ্চেৰ ৰট্টতি.

কুম্ভট্ঠানকথাতি উদকট্ঠানকথা, ‘‘উদকতিত্থকথা’’তিপি ৰুচ্চতি, কুম্ভদাসিকথা ৰা. সাপি ‘‘পাসাদিকা, নচ্চিতুং গাযিতুং ছেকা’’তি অস্সাদৰসেন ন ৰট্টতি, ‘‘সদ্ধা পসন্না’’তিআদিনা নযেন ৰট্টতি. পুব্বপেতকথাতি অতীতঞাতিকথা. তত্থ ৰত্তমানঞাতিকথাসদিসোৰ ৰিনিচ্ছযো.

নানত্তকথাতি পুরিমপচ্ছিমকথাহি ৰিমুত্তা অৰসেসা নানাসভাৰা নিরত্থককথা. লোকক্খাযিকাতি ‘‘অযং লোকো কেন নিম্মিতো? অসুকেন নাম নিম্মিতো. কাকো সেতো অট্ঠীনং সেতত্তা, বলাকা রত্তা লোহিতস্স রত্তত্তা’’তি এৰমাদিকা লোকাযতৰিতণ্ডসল্লাপকথা.

সমুদ্দক্খাযিকা নাম কস্মা সমুদ্দো সাগরো? সাগরদেৰেন খতত্তা সাগরো, ‘‘খতো মে’’তি হত্থমুদ্দায সযং নিৰেদিতত্তা সমুদ্দোতি এৰমাদিকা নিরত্থকা সমুদ্দক্খানকথা. ভৰোতি ৰুদ্ধি. অভৰোতি হানি. ইতি ভৰো ইতি অভৰোতি যং ৰা তং ৰা নিরত্থককারণং ৰত্ৰা পৰত্তিতকথা ইতিভৰাভৰকথা.

আৰরেয্যাতি আৰরণং করেয্য. নিৰারেয্যাতি আরম্মণতো ৰারেয্য. সংৰরেয্যাতি সম্মা নিস্সেসং কত্ৰা ৰারেয্য. রক্খেয্যাতি রক্খং করেয্য. গোপেয্যাতি সংগোপেয্য. পিদহেয্যাতি পিদহনং করেয্য. পচ্ছিন্দেয্যাতি সোতং ছিন্দেয্য.

তেন তেন ন তুস্সন্তীতি তেন তেন অম্বিলাদিনা রসেন ন সন্তোসং আপজ্জন্তি. অপরাপরং পরিযেসন্তীতি উপরূপরি গৰেসন্তি.

১৫৮. ফস্সেনাতি রোগফস্সেন. ভৰঞ্চ নাভিজপ্পেয্যাতি তস্স ফস্সস্স ৰিনোদনত্থায কামভৰাদিভৰঞ্চ ন পত্থেয্য. ভেরৰেসু চ ন সম্পৰেধেয্যাতি তস্স ফস্সস্স পচ্চযভূতেসু সীহব্যগ্ঘাদীসু ভেরৰেসু চ ন সম্পৰেধেয্য, অৰসেসেসু ৰা ঘানিন্দ্রিযমনিন্দ্রিযৰিসযেসু ন সম্পৰেধেয্য. এৰং পরিপূরো ইন্দ্রিযসংৰরো চ ৰুত্তো হোতি. পুরিমেহি ৰা ইন্দ্রিযসংৰরং দস্সেত্ৰা ইমিনা ‘‘অরঞ্ঞে ৰসতা ভেরৰং দিস্ৰা ৰা সুত্ৰা ৰা নপ্পৰেধিতব্ব’’ন্তি দস্সেতি.

একেনাকারেনাতি একেন কারণেন. ভযম্পি ভেরৰম্পি তঞ্ঞেৰাতি ভযন্তি চ ভেরৰন্তি চ খুদ্দকম্পি মহন্তম্পি উত্তাসনিমিত্তমেৰ. তমেৰত্থং দস্সেতুং ‘‘ৰুত্তং হেত’’ন্তিআদিমাহ. ভযন্তি তপ্পচ্চযা উপ্পন্নভযং. ভযানকন্তি আকারনিদ্দেসো. ছম্ভিতত্তন্তি ভযৰসেন গত্তচলনং. লোমহংসোতি লোমানং হংসনং উদ্ধগ্গভাৰো. ইমিনা পদদ্ৰযেন কিচ্চতো ভযং দস্সেত্ৰা পুন ‘‘চেতসো উব্বেগো উত্রাসো’’তি সভাৰতো দস্সেতি. উব্বেগ্গোতি ভীরুকো, উত্রাসোতি চিত্তক্খোভো. জাতিভযন্তি জাতিং পটিচ্চ উপ্পন্নভযং. সেসেসুপি এসেৰ নযো. রাজতো উপ্পন্নভযং রাজভযং. সেসেসুপি এসেৰ নযো. অত্তানুৰাদভযন্তি পাপকম্মিনো অত্তানং অনুৰদন্তস্স উপ্পজ্জনকভযং. পরানুৰাদভযন্তি পরস্স অনুৰাদতো উপ্পজ্জনকভযং.

দণ্ডভযন্তি আগারিকস্স রঞ্ঞা পৰত্তিতদণ্ডং, অনাগারিকস্স ৰিনযদণ্ডং পটিচ্চ উপ্পজ্জনকভযং. দুগ্গতিভযন্তি চত্তারো অপাযে পটিচ্চ উপ্পজ্জনকভযং. ঊমিভযন্তি মহাসমুদ্দে উদকং ওরোহন্তস্স পৰত্তভযং. মহাসমুদ্দে কির মহিন্দৰীচি নাম সট্ঠি যোজনানি উগ্গচ্ছতি, তরঙ্গৰীচি নাম পণ্ণাস যোজনানি, রোহণৰীচি নাম চত্তালীস যোজনানি উগ্গচ্ছতি. এৰরূপা ঊমিযো পটিচ্চ পৰত্তং ঊমিভযং. কুম্ভীলতো পৰত্তং ভযং কুম্ভীলভযং. উদকাৰট্টতো ভযং আৰট্টভযং. সুসুকা ৰুচ্চতি চণ্ডমচ্ছো, ততো ভযং সুসুকাভযং. আজীৰিকভযন্তি জীৰিতৰুত্তিতো ভযং আজীৰিকভযং. অসিলোকভযন্তি গরহতো ভযং.

১৫৯. লদ্ধা ন সন্নিধিং কযিরাতি এতেসং অন্নাদীনং যংকিঞ্চি ধম্মেন লভিত্ৰা ‘‘অরঞ্ঞে চ সেনাসনে ৰসতা দুল্লভ’’ন্তি চিন্তেত্ৰা সন্নিধিং ন করেয্য.

ওদনোতি সালি ৰীহি যৰো গোধুমো কঙ্গু ৰরকো কুদ্রূসকোতি সত্তন্নং ধঞ্ঞানং ধঞ্ঞানুলোমানঞ্চ তণ্ডুলেহি নিব্বত্তো. কুম্মাসোতি যৰেহি নিব্বত্তো. সত্তূতি সালিআদীহি কতসত্তু. মচ্ছো দকসম্ভৰো. মংসং পাকটমেৰ. অম্বপানন্তি আমেহি ৰা পক্কেহি ৰা অম্বেহি কতপানং. তত্থ আমেহি করোন্তেন অম্বতরুণানি ভিন্দিত্ৰা উদকে পক্খিপিত্ৰা আতপে আদিচ্চপাকেন পচিত্ৰা পরিস্সাৰেত্ৰা তদহু পটিগ্গহিতেহি মধুসক্করকপ্পূরাদীহি যোজেত্ৰা কাতব্বং. জম্বুপানন্তি জম্বুফলেহি কতপানং. চোচপানন্তি অট্ঠিকেহি কদলিফলেহি কতপানং. মোচপানন্তি অনট্ঠিকেহি কদলিফলেহি কতপানং. মধুকপানন্তি মধুকানং জাতিরসেন কতপানং. তং পন উদকসম্ভিন্নং ৰট্টতি, সুদ্ধং ন ৰট্টতি. মুদ্দিকপানন্তি মুদ্দিকা উদকে মদ্দিত্ৰা অম্বপানং ৰিয কতপানং. সালূকপানন্তি রত্তুপ্পলনীলুপ্পলাদীনং সালূকে মদ্দিত্ৰা কতপানং. ফারুসকপানন্তি ফারুসকেহি অম্বপানং ৰিয কতপানং. কোসম্বপানন্তি কোসম্বফলেহি কতপানং. কোলপানন্তি কোলফলেহি কতপানং. বদরপানন্তি মহাকোলফলেহি অম্বপানং ৰিয কতপানং. ইমানি একাদস পানানি, তানিপি আদিচ্চপাকানি ৰট্টন্তি.

ঘতপানন্তি সপ্পিপানং. তেলপানন্তি তিলতেলাদীনং পানং. পযোপানন্তি খীরপানং. যাগুপানন্তি সীতলাদিযাগুপানং. রসপানন্তি সাকাদিরসপানং. পিট্ঠখজ্জকন্তি সত্তন্নং তাৰ ধঞ্ঞানং ধঞ্ঞানুলোমানং অপরণ্ণানঞ্চ পিট্ঠং পনসপিট্ঠং লবুজপিট্ঠং অম্বাটকপিট্ঠং সালপিট্ঠং খীরৰল্লিপিট্ঠঞ্চাতি এৰমাদীনং পিট্ঠেহি কতং পিট্ঠখজ্জকং. পূৰখজ্জকম্পি এতেহিযেৰ কতং. মূলখজ্জকন্তি মূলকমূলং খারকমূলং চুচ্চুমূলন্তি এৰমাদি. তচখজ্জকন্তি উচ্ছুতচাদযো. পত্তখজ্জকন্তি নিম্বপণ্ণকুটজপণ্ণপটোলপণ্ণসুলসপণ্ণাদযো. পুপ্ফখজ্জকন্তি মূলকপুপ্ফখারকপুপ্ফসেতৰরণসিগ্গুউপ্পলপদুমকাদযো. ফলখজ্জকন্তি পনসলবুজতালনাল়িকেরঅম্বাটকতিন্তিণিকমাতুলুঙ্গকপিট্ঠফলঅলাবুকুম্ভণ্ডফুস্স- ফলতিম্বরূসকতিলৰাতিঙ্গণচোচমোচমধুকাদীনং ফলানং খজ্জকং.

ন কুহনাযাতি ন ৰিম্হাপনায. ন লপনাযাতি পচ্চযত্থং ন লপনায. ৰিহারং আগতে মনুস্সে দিস্ৰা ‘‘কিমত্থায ভোন্তো আগতা’’তি ভিক্খূ নিমন্তেতুন্তি. ‘‘যদি এৰং গচ্ছথ, অহং পচ্ছতো গহেত্ৰা আগচ্ছামী’’তি এৰং ন লপনায. অথ ৰা অত্তানং উপনেত্ৰা ‘‘অহং তিস্সো, মযি রাজা পসন্নো, মযি অসুকো রাজা অসুকো চ রাজমহামত্তো পসন্নো’’তি এৰং ন লপনায. ন নেমিত্তিকতাযাতি যেন কেনচি পরেসং পচ্চযদানসঞ্ঞাজনকেন কাযৰচীকম্মেন ন নেমিত্তিকতায. ন নিপ্পেসিকতাযাতি যা পরেসং অক্কোসনাদিকিরিযা যস্মা ৰেল়ুপেসিকা ৰিয অব্ভঙ্গং পরস্স গুণং নিপ্পেসেতি নিপুঞ্ছতি, যস্মা ৰা গন্ধজাতং নিপিসিত্ৰা গন্ধমগ্গনা ৰিয পরগুণে নিপিসিত্ৰা ৰিচুণ্ণেত্ৰা এসা লাভমগ্গনা হোতি, তস্মা ‘‘নিপ্পেসিকতা’’তি ৰুচ্চতি. ন এৰরূপায নিপ্পেসিকতায. ন লাভেন লাভং নিজিগীসনতাযাতি এত্থ নিজিগীসনতাতি মগ্গনা, অঞ্ঞতো লদ্ধঞ্হি অঞ্ঞত্থ হরণৰসেন লাভেন লাভমগ্গনা নাম হোতি. ন এৰরূপায লাভেন লাভমগ্গনায.

ন দারুদানেনাতি ন পচ্চযহেতুকেন দারুদানেন ৰিহারে উট্ঠিতঞ্হি অরঞ্ঞতো ৰা আহরিত্ৰা রক্খিতগোপিতদারুং ‘‘এৰং মে পচ্চযং দস্সন্তী’’তি উপট্ঠাকানং দাতুং ন ৰট্টতি. এৰঞ্হি জীৰিকং কপ্পেন্তো অনেসনায মিচ্ছাজীৰেন জীৰতি, সো দিট্ঠেৰ ধম্মে গরহং পাপুণাতি, সম্পরাযে চ অপাযপরিপূরকো হোতি. অত্তনো পুগ্গলিকং দারুং কুসলঙ্গহত্থায দদন্তো কুলদূসকদুক্কটং আপজ্জতি, পরপুগ্গলিকং থেয্যচিত্তেন দদন্তো ভণ্ডগ্ঘেন কারেতব্বো. সঙ্ঘিকেপি এসেৰ নযো. সচে পন তং ইস্সরতায দেতি, গরুভণ্ডৰিস্সজ্জনং আপজ্জতি. কতরং পন দারু গরুভণ্ডং হোতি, কতরং ন হোতীতি? যং তাৰ অরোপিমং সযংজাতং, তং সঙ্ঘেন পরিচ্ছিন্নট্ঠানেযেৰ গরুভণ্ডং, ততো পরং ন গরুভণ্ডং. রোপিমট্ঠানে চ সব্বেন সব্বং গরুভণ্ডং, পমাণতো সূচিদণ্ডকপ্পমাণং গরুভণ্ডং.

ন ৰেল়ুদানেনাতিআদীসুপি ন ৰেল়ুদানেনাতি ন পচ্চযহেতুকেন ৰেল়ুদানেনাতিআদি সব্বং ন দারুদানেনাতি এত্থ ৰুত্তনযেনেৰ ৰেদিতব্বং. ৰেল়ু পন পমাণতো তেলনাল়িপ্পমাণো গরুভণ্ডং, ন ততো হেট্ঠা. মনুস্সা ৰিহারং গন্ত্ৰা ৰেল়ুং যাচন্তি, ভিক্খূ ‘‘সঙ্ঘিকো’’তি দাতুং ন ৰিসহন্তি, মনুস্সা পুনপ্পুনং যাচন্তি ৰা তজ্জেন্তি ৰা, তদা ভিক্খূহি ‘‘দণ্ডকম্মং কত্ৰা গণ্হথা’’তি ৰত্তুং ৰট্টতি, ৰেল়ুদানং নাম ন হোতি. সচে তে দণ্ডকম্মত্থায ৰাসিফরসুআদীনি ৰা খাদনীযং ৰা ভোজনীযং ৰা দেন্তি, গহেতুং ন ৰট্টতি.

ৰিনযট্ঠকথাযং পন ‘‘দড্ঢগেহা মনুস্সা গণ্হিত্ৰা গচ্ছন্তা ন ৰারেতব্বা’’তি ৰুত্তং. সচে সঙ্ঘস্স ৰেল়ুগুম্বে ৰেল়ুদূসিকা উপ্পজ্জতি, তং অকোট্টাপেন্তানং ৰেল়ু নস্সতি. ‘‘কিং কাতব্ব’’ন্তি ভিক্খাচারে মনুস্সানং আচিক্খিতব্বং. সচে কোট্টেতুং ন ইচ্ছন্তি, ‘‘সমং ভাগং লভিস্সথা’’তি ৰত্তব্বা. ন ইচ্ছন্তিযেৰ, ‘‘দ্ৰে কোট্ঠাসে লভিস্সথা’’তি ৰত্তব্বা. এৰম্পি অনিচ্ছন্তেসু নট্ঠেন অত্থো নত্থি, ‘‘তুম্হাকং খণে সতি দণ্ডকম্মং করিস্সথ, কোট্টেত্ৰা গণ্হথা’’তি ৰত্তব্বা, ৰেল়ুদানং নাম ন হোতি. ৰেল়ুগুম্বে অগ্গিম্হি উট্ঠিতেপি উদকেন ৰুয্হমানৰেল়ূসুপি এসেৰ নযো.

পত্তদানে গরুভণ্ডতায অযং ৰিনিচ্ছযো – পত্তম্পি হি যত্থ ৰিক্কাযতি, গন্ধকারাদযো গন্ধপলিৰেঠনাদীনং অত্থায গণ্হন্তি, তাদিসে দুল্লভট্ঠানেযেৰ গরুভণ্ডং হোতি. এস তাৰ কিংসুকপত্তকণ্ণপিল়ন্ধনতালপত্তাদীসু ৰিনিচ্ছযো. তালপণ্ণম্পি ইমস্মিংযেৰ ঠানে কথেতব্বং – তালপণ্ণম্পি হি সযংজাতে তালৰনে সঙ্ঘেন পরিচ্ছিন্নট্ঠানেযেৰ গরুভণ্ডং, ন ততো পরং, রোপিমতালেসু সব্বম্পি গরুভণ্ডং, তস্স পমাণং হেট্ঠিমকোটিযা অট্ঠঙ্গুলপ্পমাণোপি রিত্তপোত্থকো. তিণম্পি এত্থেৰ পক্খিপিত্ৰা কথেতব্বং. যত্থ পন তিণং নত্থি, তত্থ তালনাল়িকেরপণ্ণাদীহিপি ছাদেন্তি. তস্মা তানিপি তিণেনেৰ সঙ্গহিতানি. ইতি মুঞ্জপলালাদীসু যংকিঞ্চি মুট্ঠিপ্পমাণং তিণং. নাল়িকেরপণ্ণাদীসু চ একপণ্ণম্পি সঙ্ঘস্স দিন্নং ৰা তত্থ জাতং ৰা বহিআরামে সঙ্ঘস্স তিণৰত্থুম্হি জাততিণং ৰা রক্খিতগোপিতং ৰা গরুভণ্ডং হোতি. তং পন সঙ্ঘকম্মে চ চেতিযকম্মে চ কতে অতিরেকং পুগ্গলিককম্মে দাতুং ৰট্টতি. হেট্ঠা ৰুত্তদারুৰেল়ূসুপি এসেৰ নযো.

পুপ্ফদানে ‘‘এত্তকেসু রুক্খেসু পুপ্ফানি ৰিস্সজ্জিত্ৰা যাগুভত্তত্থায উপনেন্তু, এত্তকেসু সেনাসনপটিসঙ্খরণে উপনেন্তূ’’তি এৰং নিযমিতট্ঠানেযেৰ পুপ্ফানি গরুভণ্ডানি হোন্তি. যদি সামণেরা পুপ্ফানি ওচিনিত্ৰা রাসিং করোন্তি, পঞ্চঙ্গসমন্নাগতো পুপ্ফভাজকো ভিক্খু ভিক্খুসঙ্ঘং গণেত্ৰা কোট্ঠাসে করোতি. সো সম্পত্তপরিসায সঙ্ঘং অনাপুচ্ছিত্ৰাৰ দাতুং লভতি. অসম্মতেন পন আপুচ্ছিত্ৰা দাতব্বং. ভিক্খুনো পন কস্স পুপ্ফানি দাতুং লব্ভতি, কস্স ন লব্ভতীতি? মাতাপিতূনং গেহং হরিত্ৰাপি গেহতো পক্কোসাপেত্ৰাপি ‘‘ৰত্থুপূজং করোথা’’তি দাতুং লব্ভতি, পিল়ন্ধনত্থায ন লব্ভতি. সেসঞাতীনং পন হরিত্ৰা ন দাতব্বং, পক্কোসাপেত্ৰা পূজনত্থায দাতব্বং. সেসজনস্স পূজনট্ঠানং সম্পত্তস্স অপচ্চাসীসন্তেন দাতব্বং, পুপ্ফদানং নাম ন হোতি.

ৰিহারে বহূনি পুপ্ফানি পুপ্ফন্তি, ভিক্খুনা পিণ্ডায চরন্তেন মনুস্সে দিস্ৰা ‘‘ৰিহারে বহূনি পুপ্ফানি পূজেথা’’তি ৰত্তব্বং, ৰচনমত্তে দোসো নত্থি, ‘‘মনুস্সা খাদনীযভোজনীযং আদায আগমিস্সন্তী’’তি চিত্তেন পন ন ৰত্তব্বং. সচে ৰদতি, খাদনীযভোজনীযং ন পরিভুঞ্জিতব্বং. মনুস্সা অত্তনো ধম্মতায ‘‘ৰিহারে পুপ্ফানি অত্থী’’তি পুচ্ছিত্ৰা ‘‘অসুকদিৰসে ৰিহারং আগমিস্সাম, সামণেরানং পুপ্ফানি ওচিনিতুং মা দেথা’’তি ৰদন্তি. ভিক্খু সামণেরানং কথেতুং পমুট্ঠো, সামণেরেহি পুপ্ফানি ওচিতানি, মনুস্সা ভিক্খুং উপসঙ্কমিত্ৰা মযং তুম্হাকং অসুকদিৰসে এৰং আরোচযিম্হ ‘‘সামণেরানং পুপ্ফানি ওচিনিতুং মা দেথা’’তি, কস্মা ন ৰারযিত্থাতি? ‘‘সতি মে পমুট্ঠা, পুপ্ফানি ওচিনিতমত্তানেৰ, ন তাৰ পূজা কতা’’তি ৰত্তব্বং, ‘‘গণ্হথ পূজেথা’’তি ন ৰত্তব্বং. সচে ৰদতি, আমিসং ন পরিভুঞ্জিতব্বং. অপরো ভিক্খু সামণেরানং আচিক্খতি ‘‘অসুকগামৰাসিনো ‘পুপ্ফানি মা ওচিনিত্থা’তি আহংসূ’’তি মনুস্সাপি আমিসং আহরিত্ৰা দানং দত্ৰা ৰদন্তি ‘‘অম্হাকং মনুস্সা ন বহুকা, সামণেরে অম্হেহি সহ পুপ্ফানি ওচিনিতুং আণাপেথা’’তি. ‘‘সামণেরেহি ভিক্খা লদ্ধা. যে ভিক্খাচারং ন গচ্ছন্তি, তে সযমেৰ জানিস্সন্তি উপাসকা’’তি ৰত্তব্বং. এত্তকং নযং লভিত্ৰা সামণেরে পুত্তে ৰা ভাতিকে ৰা কত্ৰা পুপ্ফানি ওচিনাপেতুং দোসো নত্থি, পুপ্ফদানং নাম ন হোতি.

ফলদানে ফলম্পি পুপ্ফং ৰিয নিযমিতমেৰ গরুভণ্ডং হোতি. ৰিহারে বহুকস্মিং ফলাফলে সতি অফাসুকমনুস্সা আগন্ত্ৰা যাচন্তি, ভিক্খূ ‘‘সঙ্ঘিক’’ন্তি দাতুং ন উস্সহন্তি, মনুস্সা ৰিপ্পটিসারিনো অক্কোসন্তি পরিভাসন্তি, তত্থ কিং কাতব্বন্তি? ফলেহি ৰা রুক্খেহি ৰা পরিচ্ছিন্দিত্ৰা কথিকা কাতব্বা ‘‘অসুকে চ রুক্খে অসুকে চ রুক্খে এত্তকানি ফলানি গণ্হন্তা, এত্তকেসু ৰা রুক্খেসু ফলানি গণ্হন্তা ন ৰারেতব্বা’’তি. চোরা ৰা ইস্সরা ৰা বলক্কারেন গণ্হন্তা ন ৰারেতব্বা. কুদ্ধা হি তে সকলৰিহারম্পি নাসেয্যুং, আদীনৰো পন কথেতব্বোতি.

সিনানদানে সিনানচুণ্ণানি কোট্টিতানি ন গরুভণ্ডানি, অকোট্টিতো রুক্খে ঠিতোৰ রুক্খতচো গরুভণ্ডং, চুণ্ণং পন অগিলানস্স রজননিপক্কং ৰট্টতি. গিলানস্স যংকিঞ্চি চুণ্ণং দাতুং ৰট্টতিযেৰ.

ন চুণ্ণদানেনাতি ৰুত্তনযেন সিরীসচুণ্ণাদীনং দানেন. মত্তিকাদানেমত্তিকা হি যত্থ দুল্লভা হোতি, তত্থেৰ গরুভণ্ডং. সাপি হেট্ঠিমকোটিযা তিংসপলগুল়পিণ্ডপ্পমাণাৰ, ততো হেট্ঠা ন গরুভণ্ডন্তি.

দন্তকট্ঠদানে দন্তকট্ঠং অচ্ছিন্নকমেৰ গরুভণ্ডং. যেসং সামণেরানং সঙ্ঘতো দন্তকট্ঠৰারো পাপুণাতি, তে অত্তনো আচরিযুপজ্ঝাযানং পাটিযেক্কং দাতুং ন লভন্তি. যেহি পন ‘‘এত্তকানি দন্তকট্ঠানি আহরিতব্বানী’’তি পরিচ্ছিন্দিত্ৰা ৰারা গহিতা, তে অতিরেকানি আচরিযুপজ্ঝাযানং দাতুং লভন্তি. একেন ভিক্খুনা দন্তকট্ঠমাল়কতো বহূনি দন্তকট্ঠানি ন গহেতব্বানি, দেৰসিকং একেকমেৰ গহেতব্বং. পাটিযেক্কং ৰসন্তেনাপি ভিক্খুসঙ্ঘং গণযিত্ৰা যত্তকানি অত্তনো পাপুণন্তি, তত্তকানেৰ গহেত্ৰা গন্তব্বং. অন্তরা আগন্তুকেসু ৰা আগতেসু দিসং ৰা পক্কমন্তেসু আহরিত্ৰা গহিতট্ঠানেযেৰ ঠপেতব্বানি. ন মুখোদকদানেনাতি ন মুখধোৰনউদকদানেন.

ন চাটুকম্যতাযাতিআদীসু চাটুকম্যতা ৰুচ্চতি অত্তানং দাসং ৰিয নীচট্ঠানে ঠপেত্ৰা পরস্স খলিতৰচনম্পি সণ্ঠপেত্ৰা পিযকামতায পগ্গয্হৰচনং. ন মুগ্গসূপ্যতাযাতি ন মুগ্গসূপসমানতায. মুগ্গসূপসমানতাতি সচ্চালিকেন জীৰিকং কপ্পনতায এতং অধিৰচনং. যথা হি মুগ্গসূপে পচ্চন্তে বহূ মুগ্গা পাকং গচ্ছন্তি থোকা ন গচ্ছন্তি, এৰমেৰ সচ্চালিকেন জীৰিককপ্পকে পুগ্গলে বহু অলিকং হোতি, অপ্পকং সচ্চং. যথা ৰা মুগ্গসূপস্স অপৰিসনট্ঠানং নাম নত্থি, এৰমেৰ সচ্চালিকৰুত্তিনো পুগ্গলস্স অপ্পতিট্ঠানং নাম নত্থি. সিঙ্ঘাটকং ৰিয ইচ্ছিতিচ্ছিতট্ঠানস্স পতিট্ঠাতি. তেনস্স সা মুসাৰাদিতা ‘‘মুগ্গসূপ্যতা’’তি ৰুত্তা. ন পারিভট্যতাযাতি ন পরিভটকম্মভাৰেন. পরিভটস্স হি কম্মং পারিভট্যং, তস্স ভাৰো পারিভট্যতা, অলঙ্কারকরণাদীহি দারককীল়াপনস্সেতং অধিৰচনং. ন পীঠমদ্দিকতাযাতি ন সহসা ঘরং পৰিসিত্ৰা পীঠকে নিসীদনকতায.

ন ৰত্থুৰিজ্জাযাতিআদীসু ৰত্থুৰিজ্জা নাম গামনিগমনগরাদীনং সুনিৰিট্ঠদুন্নিৰিট্ঠজাননসত্থং. তিরচ্ছানৰিজ্জা নাম অনিয্যানিকত্তা সগ্গমোক্খমগ্গানং তিরচ্ছানভূতা অঙ্গসত্থনিমিত্তাদিকা অৰসেসৰিজ্জা. অঙ্গৰিজ্জা নাম ইত্থিপুরিসানং সুভগদুব্ভগলক্খণজাননং. নক্খত্তৰিজ্জা নাম নক্খত্তানং যোগজাননসত্থং.

ন দূতগমনেনাতি ন দূতেয্যং কত্ৰা গমনেন. ন পহিণগমনেনাতি ন গিহীনং সাসনং গহেত্ৰা ঘরা ঘরং পহিতস্স গমনেন. ন জঙ্ঘপেসনিযেনাতি গামন্তরদেসন্তরাদীসু তেসং তেসং গিহীনং সাসনপটিসাসনং হরণেন. ইদঞ্হি জঙ্ঘপেসনিযং নাম অত্তনো মাতাপিতূনং, যে চাস্স মাতাপিতরো উপট্ঠহন্তি, তেসং সাসনং গহেত্ৰা কত্থচি গমনৰসেন ৰট্টতি. চেতিযস্স ৰা সঙ্ঘস্স ৰা অত্তনো ৰা কম্মং করোন্তানং ৰড্ঢকীনম্পি সাসনং হরিতুং ৰট্টতি. মনুস্সা ‘‘দানং দস্সাম, পূজং করিস্সাম, ভিক্খুসঙ্ঘস্স আচিক্খথা’’তি চ ৰদন্তি; ‘‘অসুকত্থেরস্স নাম দেথা’’তি পিণ্ডপাতং ৰা ভেসজ্জং ৰা চীৰরং ৰা দেন্তি, ‘‘ৰিহারে পূজং করোথা’’তি মালাগন্ধৰিলেপনাদীনি ৰা ধজপটাকাদীনি ৰা নিয্যাতেন্তি. সব্বং হরিতুং ৰট্টতি, জঙ্ঘপেসনিযং নাম ন হোতি. সেসসাসনং গহেত্ৰা গচ্ছন্তস্স পদৰারে পদৰারে দোসো.

ন ৰেজ্জকম্মেনাতি ন ৰেজ্জেন হুত্ৰা কাযতিকিচ্ছনাদিভেসজ্জকরণেন. ভেসজ্জং পন পঞ্চন্নং সহধম্মিকানং কাতব্বং ভিক্খুস্স ভিক্খুনিযা সিক্খমানায সামণেরস্স সামণেরিযা. সমসীলসদ্ধাপঞ্ঞানঞ্হি এতেসং তীসু সিক্খাসু যুত্তানং ভেসজ্জং অকাতুং ন লব্ভতি. মাতাপিতূনং তদুপট্ঠাকানং অত্তনো ৰেয্যাৰচ্চকরস্স পণ্ডুপলাসস্সাতি এতেসং পঞ্চন্নম্পি কাতুং ৰট্টতি. জেট্ঠভাতু, কনিট্ঠভাতু, জেট্ঠভগিনিযা, কনিট্ঠভগিনিযা, চূল়মাতুযা, মহামাতুযা, চূল়পিতুনো, মহাপিতুনো, পিতুচ্ছায, মাতুচ্ছাযাতি এতেসং পন দসন্নম্পি করোন্তেন তেসংযেৰ সন্তকং ভেসজ্জং গহেত্ৰা কেৰলং যোজেত্ৰা দাতব্বং. সচে নপ্পহোতি, অত্তনো সন্তকং তাৰকালিকং দাতব্বং. এতেসং পুত্তপরম্পরা যাৰ সত্তমা কুলপরিৰট্টা, তাৰ চত্তারো পচ্চযে আহরাপেন্তস্স অকতৰিঞ্ঞত্তি ৰা, ভেসজ্জং করোন্তস্স ৰেজ্জকম্মং ৰা, কুলদূসকাপত্তি ৰা ন হোতি.

ন পিণ্ডপটিপিণ্ডকেনাতি এত্থ পিণ্ডপাতো কস্স দাতব্বো, কস্স ন দাতব্বো? মাতাপিতূনং তদুপট্ঠাকানং ৰেয্যাৰচ্চকরস্স পণ্ডুপলাসস্স সম্পত্তস্স দামরিকচোরস্স ইস্সরস্সাপি দাতব্বো. এতেসং দত্ৰা পচ্ছা লদ্ধম্পি পিণ্ডপটিপিণ্ডং নাম ন হোতি. ন দানানুপ্পদানেনাতি অত্তনো দিন্নকানং ন পুন দানেন. ধম্মেনাতি ধম্মেন উপ্পন্নং. সমেনাতি কাযসুচরিতাদিনা. লদ্ধাতি কাযেন লদ্ধা. লভিত্ৰাতি চিত্তেন পাপুণিত্ৰা. অধিগন্ত্ৰাতি সম্পাপুণিত্ৰা. ৰিন্দিত্ৰাতি ঞাণেন ৰিন্দিত্ৰা. পটিলভিত্ৰাতি পুনপ্পুনং লভিত্ৰা.

অন্নসন্নিধিন্তি এত্থ দুৰিধা অন্নকথা ৰিনযৰসেন চ সল্লেখৰসেন চ. ৰিনযৰসেন তাৰ যংকিঞ্চি অন্নং অজ্জ পটিগ্গহিতং অপরজ্জু সন্নিধিকারকং হোতি, তস্স পরিভোগে পাচিত্তিযং. অত্তনা লদ্ধং পন সামণেরানং দত্ৰা তেহি লদ্ধং ঠপাপেত্ৰা দুতিযদিৰসে ভুঞ্জিতুং ৰট্টতি, সল্লেখো পন ন হোতি.

পানসন্নিধিম্হিপি এসেৰ নযো. এত্থ পানং নাম অম্বপানাদীনি অট্ঠ পানানি, যানি চে তেসং অনুলোমানি.

ৰত্থসন্নিধিন্তিআদিম্হি অনধিট্ঠিতাৰিকপ্পিতং সন্নিধি চ হোতি সল্লেখঞ্চ কোপেতি. অযং পরিযায কথাৰ, নিপ্পরিযাযতো পন তিচীৰরসন্তুট্ঠেন ভৰিতব্বং, চতুত্থং লভিত্ৰা অঞ্ঞস্স দাতব্বং. সচে যস্স কস্সচি দাতুং ন সক্কোতি, যস্স পন দাতুকামো হোতি, সো উদ্দেসত্থায ৰা পরিপুচ্ছত্থায ৰা গতো, আগতমত্তে দাতব্বং, অদাতুং ন ৰট্টতি. চীৰরে পন অপ্পহোন্তে সতিযা পচ্চাসায অনুঞ্ঞাতকালং ঠপেতুং ৰট্টতি. সূচিসুত্তচীৰরকারকানং অলাভেন ততো পরম্পি ৰিনযকম্মং কত্ৰা ঠপেতুং ৰট্টতি. ‘‘ইমস্মিং জিণ্ণে পুন ঈদিসং কুতো লভিস্সামী’’তি পন ঠপেতুং ন ৰট্টতি, সন্নিধি চ হোতি, সল্লেখঞ্চ ৰিকোপেতি.

যানসন্নিধিম্হি যানং নাম ৰয্হং রথো সকটং সন্দমানিকা সিৰিকা পাটঙ্কীতি নেতং পব্বজিতস্স যানং. উপাহনা পন পব্বজিতস্স যানংযেৰ. একভিক্খুস্স হি একো অরঞ্ঞত্থায, একা ধোতপাদকত্থাযাতি উক্কংসতো দ্ৰে উপাহনসঙ্ঘাটা ৰট্টন্তি, ততিযং লভিত্ৰা অঞ্ঞস্স দাতব্বো, ‘‘ইমস্মিং জিণ্ণে অঞ্ঞং কুতো লভিস্সামী’’তি হি ঠপেতুং ন ৰট্টতি, সন্নিধি চ হোতি, সল্লেখঞ্চ ৰিকোপেতি.

সযনসন্নিধিম্হি সযনন্তি মঞ্চো. একস্স ভিক্খুনো একো গব্ভে একো দিৰাট্ঠানেতি উক্কংসতো দ্ৰে মঞ্চা ৰট্টন্তি, ততো উত্তরি লভিত্ৰা অঞ্ঞস্স ভিক্খুনো ৰা গণস্স ৰা দাতব্বো, অদাতুং ন ৰট্টতি, সন্নিধি চেৰ হোতি, সল্লেখঞ্চ কোপেতি.

গন্ধসন্নিধিম্হি ভিক্খুনো কণ্ডুকচ্ছুছৰিদোসাদিআবাধে সতি গন্ধো ৰট্টতি. তেন গন্ধেন তস্মিং রোগে ৰূপসন্তে অঞ্ঞেসং ৰা আবাধিকানং দাতব্বো. দ্ৰারে পঞ্চঙ্গুলঘরধূপনাদীসু ৰা উপনেতব্বো. ‘‘পুন রোগে সতি ভৰিস্সতী’’তি ঠপেতুং ন ৰট্টতি, গন্ধসন্নিধি চ হোতি, সল্লেখঞ্চ কোপেতি.

আমিসন্তি অন্নাদিৰুত্তাৰসেসংৰ দট্ঠব্বং. সেয্যথিদং – ইধেকচ্চো ভিক্খু ‘‘তথারূপে কালে উপকারায ভৰিস্সন্তী’’তি তিলতণ্ডুলমুগ্গমাসনাল়িকেরলোণমচ্ছমংসৰল্লূরসপ্পিতেলগুল়- ভাজনাদীনি আহরাপেত্ৰা ঠপেতি. সো ৰস্সকালে কালস্সেৰ সামণেরেহি যাগুং পচাপেত্ৰা ভুঞ্জিত্ৰা ‘‘সামণের উদককদ্দমে দুক্খং গামং পৰিসিতুং, গচ্ছ অসুককুলং গন্ত্ৰা ময্হং ৰিহারে নিসিন্নভাৰং আরোচেহি, অসুককুলতো দধিআদীনি আহরা’’তি পেসেতি. ভিক্খূহি ‘‘কিং, ভন্তে, গামং পৰিসথা’’তি ৰুত্তেপি ‘‘দুপ্পৰেসো আৰুসো ইদানি গামো’’তি ৰদতি. তে ‘‘হোতু, ভন্তে, অচ্ছথ তুম্হে, মযং ভিক্খং পরিযেসিত্ৰা আহরিস্সামা’’তি গচ্ছন্তি. অথ সামণেরোপি দধিআদীনি আহরিত্ৰা ভত্তঞ্চ ব্যঞ্জনঞ্চ সম্পাদেত্ৰা উপনেতি, তং ভুঞ্জন্তস্সেৰ উপট্ঠাকা ভত্তং পহিণন্তি, ততোপি মনাপং মনাপং ভুঞ্জতি. অথ ভিক্খূ পিণ্ডপাতং গহেত্ৰা আগচ্ছন্তি, ততোপি মনাপং মনাপং গীৰাযামকং ভুঞ্জতিযেৰ. এৰং চতুমাসম্পি ৰীতিনামেতি. অযং ৰুচ্চতি ভিক্খু ‘‘মুণ্ডকুটুম্বিকজীৰিকং জীৰতি, ন সমণজীৰিক’’ন্তি. এৰরূপো আমিসসন্নিধি নাম হোতি.

ভিক্খুনো পন ৰসনট্ঠানে একা তণ্ডুলনাল়ি একো গুল়পিণ্ডো চতুভাগমত্তং সপ্পীতি এত্তকং নিধেতুং ৰট্টতি অকালে সম্পত্তচোরানং অত্থায. তে হি এত্তকম্পি আমিসপটিসন্থারং অলভন্তা জীৰিতাপি ৰোরোপেয্যুং, তস্মা সচেপি এত্তকং নত্থি, আহরাপেত্ৰাপি ঠপেতুং ৰট্টতি. অফাসুককালে চ যদেত্থ কপ্পিযং, তং অত্তনাপি পরিভুঞ্জিতুং ৰট্টতি. কপ্পিযকুটিযং পন বহুং ঠপেন্তস্সাপি সন্নিধি নাম নত্থি.

১৬০. ঝাযী ন পাদলোলস্সাতি ঝানাভিরতো চ ন চ পাদলোলো অস্স. ৰিরমে কুক্কুচ্চা নপ্পমজ্জেয্যাতি হত্থকুক্কুচ্চাদিকুক্কুচ্চং ৰিনোদেয্য, সক্কচ্চকারিতায চেত্থ নপ্পমজ্জেয্য.

একত্তমনুযুত্তোতি একীভাৰং অনুযুত্তো. পরমত্থগরুকোতি উত্তমত্থগরুকো. ‘‘সকত্থগরুকো’’তি ৰা পাঠো.

পটিসল্লানারামোতি আরমণং আরামো, ততো ততো আরম্মণতো পটিসংহরিত্ৰা একীভাৰে পটিসল্লানে আরামো যস্স সো পটিসল্লানারামো. অস্সাতি ভৰেয্য. তস্মিং রতোতি পটিসল্লানরতো. এতেহি সীলেসু পরিপূরকারিতং দস্সেতি. তং কিস্স হেতু? সীলৰিপন্নস্স একগ্গতাপি ন সম্পজ্জতি. অজ্ঝত্তং চেতোসমথমনুযুত্তোতি অত্তনো চিত্তসমথে যুত্তো. এত্থ হি অজ্ঝত্তন্তি ৰা অত্তনোতি ৰা এতং একত্থং, ব্যঞ্জনমেৰ নানং. ভুম্মত্থে পনেতং উপযোগৰচনং. অনূতি ইমিনা উপসগ্গেন যোগে সিদ্ধং.

অনিরাকতজ্ঝানোতি বহি অনিহতজ্ঝানো অৰিনাসিতজ্ঝানো ৰা. নীহরণৰিনাসত্থঞ্হি ইদং নিরাকরণং নাম. ‘‘থম্ভং নিরংকত্ৰা নিৰাতৰুত্তী’’তিআদীসু (সু. নি. ৩২৮) চস্স পযোগো দট্ঠব্বো. ৰিপস্সনায সমন্নাগতোতি সত্তৰিধায অনুপস্সনায যুত্তো. সত্তৰিধা অনুপস্সনা নাম অনিচ্চানুপস্সনা দুক্খানুপস্সনা অনত্তানুপস্সনা নিব্বিদানুপস্সনা ৰিরাগানুপস্সনা নিরোধানুপস্সনা পটিনিস্সগ্গানুপস্সনাতি. তা ৰিসুদ্ধিমগ্গে (ৰিসুদ্ধি. ২.৭৪১ আদযো, ৮৪৯ আদযো) ৰিত্থারিতা. ব্যূহেতা সুঞ্ঞাগারানন্তি ৰড্ঢেতা সুঞ্ঞাগারানং. এত্থ চ সমথৰিপস্সনাৰসেন কম্মট্ঠানং গহেত্ৰা রত্তিন্দিৰং সুঞ্ঞাগারং পৰিসিত্ৰা নিসীদমানো ভিক্খু ‘‘ব্রূহেতা সুঞ্ঞাগারান’’ন্তি ৰেদিতব্বো. একভূমকাদিভেদে পাসাদে কুরুমানোপি সুঞ্ঞাগারানং ব্রূহেতাতি দট্ঠব্বো.

সক্কচ্চকারীতিআদীসু দানাদীনং কুসলধম্মানং ভাৰনায পুগ্গলস্স ৰা দেয্যধম্মস্স ৰা সক্কচ্চকারিতাৰসেন সক্কচ্চকারী. অস্সাতি ভৰেয্য. সততভাৰো সাতচ্চং, সাতচ্চকারিতাৰসেন সাতচ্চকারী. নিরন্তরকারিতায অট্ঠিতকারী. যথা নাম ককণ্টকো থোকং গন্ত্ৰা থোকং তিট্ঠতি, ন নিরন্তরং গচ্ছতি, এৰমেৰ যো পুগ্গলো একদিৰসং দানং দত্ৰা পূজং ৰা কত্ৰা ধম্মং ৰা সুত্ৰা সমণধম্মং ৰা কত্ৰা পুন চিরস্সং করোতি, তং ন নিরন্তরং পৰত্তেতি. সো ‘‘অসাতচ্চকারী, ঠিতকারী’’তি ৰুচ্চতি. যো পন এৰং ন হোতি, সো অট্ঠিতকারী. অনোলীনৰুত্তিকোতি নিরন্তরকরণসঙ্খাতস্স ৰিপ্ফারস্স অত্থিতায ন ওলীনৰুত্তিকো. অনিক্খিত্তচ্ছন্দোতি কুসলকিরিযায ৰীরিযচ্ছন্দস্স অনিক্খিত্তভাৰেন অনিক্খিত্তচ্ছন্দো. অনিক্খিত্তধুরোতি ৰীরিযধুরস্স অনোরোপকো, অনোসক্কিতমানসোতি অত্থো.

অপ্পটিৰানীতি অনিৰত্তনং. অধিট্ঠানন্তি কুসলকরণে পতিট্ঠাভাৰো. অনুযোগোতি অনুযুঞ্জনং. অপ্পমাদোতি সতিযা অৰিপ্পৰাসো.

১৬১. তন্দিং মাযং হস্সং খিড্ডন্তি আলসিযঞ্চ মাযঞ্চ হস্সঞ্চ কাযিকং ৰাচসিকং খিড্ডঞ্চ. সৰিভূসন্তি সদ্ধিং ৰিভূসায.

রত্তিন্দিৰং ছকোট্ঠাসং করিত্ৰাতি পুরিমযামমজ্ঝিমযামপচ্ছিমযামৰসেন রত্তিং তযো তথা দিৰাতি ছব্বিধং কোট্ঠাসং কত্ৰা. পঞ্চকোট্ঠাসং পটিজগ্গেয্যাতি রত্তিং মজ্ঝিমযামং ৰিস্সজ্জেত্ৰা অৰসেসপঞ্চকোট্ঠাসেসু ন নিদ্দং ওক্কমেয্য. এককোট্ঠাসং নিপজ্জেয্যাতি একং মজ্ঝিমযামকোট্ঠাসং সতো সম্পজানো নিপজ্জিত্ৰা নিদ্দং ওক্কমেয্য.

ইধ ভিক্খু দিৰসম্পি পুব্বণ্হে মজ্ঝন্হে সাযন্হেতি তযোপি দিৰসকোট্ঠাসা গহিতা. চঙ্কমেন নিসজ্জাযাতি সকলং দিৰসং ইমিনা ইরিযাপথদ্ৰযেনেৰ ৰিহরন্তো চিত্তস্স আৰরণতো আৰরণীযেহি ধম্মেহি পঞ্চহি নীৰরণেহি সব্বাকুসলধম্মেহি ৰা. চিত্তং পরিসোধেয্যাতি তেহি ধম্মেহি চিত্তং ৰিসোধেয্য. ঠানং পনেত্থ কিঞ্চাপি ন গহিতং, চঙ্কমনিসজ্জাসন্নিস্সিতং পন কত্ৰা গহেতব্বমেৰ. পঠমং যামন্তি সকলস্মিম্পি পঠমযামে.

সেয্যন্তি এত্থ কামভোগীসেয্যা পেতসেয্যা সীহসেয্যা তথাগতসেয্যাতি চতস্সো সেয্যা. তত্থ ‘‘যেভুয্যেন, ভিক্খৰে, কামভোগী ৰামেন পস্সেন সেন্তী’’তি (অ. নি. ১.৪২৪৬) অযং কামভোগীসেয্যা. তেসু হি যেভুয্যেন দক্খিণপস্সেন সযানো নাম নত্থি. ‘‘যেভুয্যেন, ভিক্খৰে, পেতা উত্তানা সেন্তী’’তি (অ. নি. ৪.২৪৬) অযং পেতসেয্যা. অপ্পমংসলোহিতত্তা হি অট্ঠিসঙ্ঘাটঘট্টিতা একেন পস্সেন সযিতুং ন সক্কোন্তি, উত্তানাৰ সেন্তি. ‘‘সীহো, ভিক্খৰে, মিগরাজা দক্খিণেন পস্সেন সেয্যং কপ্পেতি…পে… অত্তমনো হোতী’’তি (অ. নি. ৪.২৪৬) অযং সীহসেয্যা. তেজুস্সদত্তা হি সীহো মিগরাজা দ্ৰে পুরিমপাদে একস্মিং পচ্ছিমপাদে একস্মিং ঠানে ঠপেত্ৰা নঙ্গুট্ঠং অন্তরসত্থিম্হি পক্খিপিত্ৰা পুরিমপাদপচ্ছিমপাদনঙ্গুট্ঠানং ঠিতোকাসং সল্লক্খেত্ৰা দ্ৰিন্নং পুরিমপাদানং মত্থকে সীসং ঠপেত্ৰা সযতি. দিৰসম্পি সযিত্ৰা পবুজ্ঝমানো ন উত্রস্তো পবুজ্ঝতি, সীসং পন উক্খিপিত্ৰা পুরিমপাদাদীনং ঠিতোকাসং সল্লক্খেতি. সচে কিঞ্চি ঠানং ৰিজহিত্ৰা ঠিতং হোতি, ‘‘নযিদং তুয্হং জাতিযা, ন সূরভাৰস্স অনুরূপ’’ন্তি অনত্তমনো হুত্ৰা তত্থেৰ সযতি, ন গোচরায পক্কমতি. অৰিজহিত্ৰা ঠিতে পন ‘‘তুয্হং জাতিযা চ সূরভাৰস্স চ অনুরূপমিদ’’ন্তি হট্ঠতুট্ঠো উট্ঠায সীহৰিজম্ভিতং ৰিজম্ভিত্ৰা কেসরভারং ৰিধুনিত্ৰা তিক্খত্তুং সীহনাদং নদিত্ৰা গোচরায পক্কমতি. চতুত্থজ্ঝানসেয্যা পন তথাগতসেয্যাতি ৰুচ্চতি. তাসু ইধ সীহসেয্যা আগতা. অযঞ্হি তেজুস্সদইরিযাপথত্তা উত্তমসেয্যা নাম.

পাদে পাদন্তি দক্খিণপাদে ৰামপাদং. অচ্চাধাযাতি অতিআধায ঈসকং অতিক্কম্ম ঠপেত্ৰা. গোপ্ফকেন হি গোপ্ফকে, জাণুনা ৰা জাণুম্হি সঙ্ঘট্টিযমানে অভিণ্হং ৰেদনা উপ্পজ্জতি, চিত্তং একগ্গং ন হোতি, সেয্যা অফাসু হোতি. যথা পন ন সঙ্ঘট্টেতি, এৰং অতিক্কম্ম ঠপিতে ৰেদনা নুপ্পজ্জতি, চিত্তং একগ্গং হোতি, সেয্যা ফাসু হোতি. তেন ৰুত্তং – ‘‘পাদে পাদং অচ্চাধাযা’’তি. সতো সম্পজানোতি সতিযা চেৰ সম্পজানপঞ্ঞায চ সমন্নাগতো হুত্ৰা. ইমিনা সুপরিগ্গাহকং সতিসম্পজঞ্ঞং কথিতং. উট্ঠানসঞ্ঞং মনসিকরিত্ৰাতি ‘‘অসুকৰেলায নাম উট্ঠহিস্সামী’’তি এৰং উট্ঠানৰেলাপরিচ্ছেদকং উট্ঠানসঞ্ঞং চিত্তে ঠপেত্ৰা. এৰং কত্ৰা নিপন্নো হি যথাপরিচ্ছিন্নকালেযেৰ উট্ঠাতি.

ৰীরিযিন্দ্রিযনিদ্দেসে চেতসিকোতি ইদং ৰীরিযস্স নিযমতো চেতসিকভাৰদীপনত্থং ৰুত্তং, ইদঞ্হি ৰীরিযং ‘‘যদপি, ভিক্খৰে, কাযিকং ৰীরিযং, তদপি ৰীরিযসম্বোজ্ঝঙ্গো, যদপি চেতসিকং ৰীরিযং, তদপি ৰীরিযসম্বোজ্ঝঙ্গোতি. ইতিহিদং উদ্দেসং গচ্ছতী’’তি এৰমাদীসু সুত্তেসু (সং. নি. ৫.২৩৩) চঙ্কমাদীনি করোন্তস্স উপ্পজ্জনতায কাযিকন্তি ৰুচ্চমানম্পি কাযৰিঞ্ঞাণং ৰিয কাযিকং নাম নত্থি, চেতসিকমেৰ পনেতন্তি দীপেতুং ‘‘চেতসিকো’’তি ৰুত্তং. ৰীরিযারম্ভোতি ৰীরিযসঙ্খাতো আরম্ভো. অযঞ্হি আরম্ভসদ্দো কম্মে আপত্তিযং কিরিযাযং ৰীরিযে হিংসাযং ৰিকোপনেতি অনেকেসু অত্থেসু আগতো.

‘‘যং কিঞ্চি দুক্খং সম্ভোতি, সব্বং আরম্ভপচ্চযা;

আরম্ভানং নিরোধেন, নত্থি দুক্খস্স সম্ভৰো’’তি. (সু. নি. ৭৪৯) –

এত্থ হি কম্মং আরম্ভোতি আগতং. ‘‘আরম্ভতি চ ৰিপ্পটিসারী চ হোতী’’তি (অ. নি. ৫.১৪২; পু. প. ১৯১) এত্থ আপত্তি. ‘‘মহাযঞ্ঞা মহারম্ভা, ন তে হোন্তি মহপ্ফলা’’তি (অ. নি. ৪.৩৯; সং. নি. ১.১২০) এত্থ যূপুস্সাপনাদিকিরিযা. ‘‘আরম্ভথ নিক্কমথ, যুঞ্জথ বুদ্ধসাসনে’’তি (সং. নি. ১.১৮৫; কথা. ৩৩৩; নেত্তি. ২৯; পেটকো. ৩৮; মি. প. ৫.১.৪) এত্থ ৰীরিযং. ‘‘সমণং গোতমং উদ্দিস্স পাণং আরম্ভন্তী’’তি (ম. নি. ২.৫১) এত্থ হিংসা. ‘‘বীজগামভূতগামসমারম্ভা পটিৰিরতো হোতী’’তি (দী. নি. ১.১০; ম. নি. ১.২৯৩) এত্থ ছেদনভঞ্জনাদিকং ৰিকোপনং. ইধ পন ৰীরিযমেৰ অধিপ্পেতং. তেনাহ ‘‘ৰীরিযারম্ভোতি ৰীরিযসঙ্খাতো আরম্ভো’’তি. ৰীরিযঞ্হি আরম্ভনৰসেন আরম্ভোতি ৰুচ্চতি. ইদমস্স সভাৰপদং. কোসজ্জতো নিক্খমনৰসেন নিক্কমো. পরং পরং ঠানং অক্কমনৰসেন পরক্কমো. উগ্গন্ত্ৰা যমনৰসেন উয্যামো. ৰাযমনৰসেন ৰাযামো. উস্সহনৰসেন উস্সাহো. অধিমত্তুস্সহনৰসেন উস্সোল়্হী. থিরভাৰট্ঠেন থামো. চিত্তচেতসিকানং ধারণৰসেন অৰিচ্ছেদতো ৰা পৰত্তনৰসেন কুসলসন্তানং ধারেতীতি ধিতি.

অপরো নযো – নিক্কমো চেসো কামানং পনুদনায. পরক্কমো চেসো বন্ধনচ্ছেদায. উয্যামো চেসো ওঘস্স নিত্থরণায. ৰাযামো চেসো পারং গমনট্ঠেন. উস্সাহো চেসো পুব্বঙ্গমট্ঠেন. উস্সোল়্হী চেসো অধিমত্তট্ঠেন. থামো চেসো পলিঘুগ্ঘাটনতায. ধিতি চেসো অট্ঠিতকারিতাযাতি.

‘‘কামং তচো চ ন্হারু চ, অট্ঠি চ অৰসিস্সতূ’’তি (অ. নি. ২.৫) এৰং পৰত্তিকালে অসিথিলপরক্কমৰসেন অসিথিলপরক্কমতা, থিরপরক্কমো দল়্হপরক্কমোতি অত্থো. যস্মা পনেতং ৰীরিযং কুসলকম্মকরণট্ঠানে ছন্দং ন নিক্খিপতি, ধুরং ন নিক্খিপতি, ন ওতারেতি ন ৰিস্সজ্জেতি, অনোসক্কিতমানসতং আৰহতি, তস্মা ‘‘অনিক্খিত্তচ্ছন্দতা অনিক্খিত্তধুরতা’’তি ৰুত্তং. যথা পন তজ্জাতিকে উদকসম্ভিন্নট্ঠানে ধুরৰাহগোণং ‘‘গণ্হথা’’তি ৰদন্তি, সো জাণুনা ভূমিং উপ্পীল়েত্ৰাপি ধুরং ৰহতি, ভূমিযং পতিতুং ন দেতি, এৰমেৰ ৰীরিযং কুসলকম্মকরণট্ঠানে ধুরং ন নিক্খিপতি পগ্গণ্হাতি, তস্মা ‘‘ধুরসম্পগ্গাহো’’তি ৰুত্তং. পগ্গহলক্খণে ইন্দট্ঠং কারেতীতি ৰীরিযিন্দ্রিযং. কোসজ্জে ন কম্পতীতি ৰীরিযবলং. যাথাৰনিয্যানিককুসলৰাযামতায সম্মাৰাযামো.

তন্দীতি জাতিআলসিযং. তন্দিযনাতি তন্দিযনাকারো. তন্দিমনকতাতি তন্দিযা অভিভূতচিত্ততা. অলসস্স ভাৰো আলস্যং, আলস্যাযনাকারো আলস্যাযনা. আলস্যাযিতস্স ভাৰো আলস্যাযিতত্তং. ইতি সব্বেহি ইমেহি পদেহি কিলেসৰসেন কাযালসিযং কথিতং.

ৰঞ্চনিকা চরিযাতি ৰঞ্চনিকা কিরিযা. মা মং জঞ্ঞাতি ৰাচং ভাসতীতি জানংযেৰ পণ্ণত্তিং ৰীতিক্কমন্তো ভিক্খু ভারিযং করোতি, অম্হাকং পন ৰীতিক্কমট্ঠানং নাম নত্থীতি উপসন্তো ৰিয ভাসতি. কাযেন পরক্কমতীতি ‘‘মযা কতং ইদং পাপকম্মং মা কেচি জানিংসূ’’তি কাযেন ৰত্তং করোতি. ৰিজ্জমানদোসপটিচ্ছাদনতো চক্খুমোহনমাযা ৰিযাতি মাযা, মাযাৰিনো ভাৰো মাযাৰিতা. কত্ৰা পাপং পুন পটিচ্ছাদনতো অতি অস্সরতি এতায সত্তোতি অচ্চসরা. কাযৰাচাকিরিযাহি অঞ্ঞথা দস্সনতো ৰঞ্চেতীতি ৰঞ্চনা. এতায সত্তা নিকরোন্তীতি নিকতি, মিচ্ছা করোন্তীতি অত্থো. ‘‘নাহং এৰং করোমী’’তি পাপানং নিক্খিপনতো নিকিরণা. ‘‘নাহং এৰং করোমী’’তি পরিৰজ্জনতো পরিহরণা. কাযাদীহি সংৰরণতো গূহনা. সব্বতো ভাগেন গূহনা পরিগূহনা. তিণপণ্ণেহি ৰিয গূথং কাযৰচীকম্মেহি পাপং ছাদিযতীতি ছাদনা. সব্বতো ভাগেন ছাদনা পরিচ্ছাদনা. ন উত্তানং কত্ৰা দস্সেতীতি অনুত্তানীকম্মং. ন পাকটং কত্ৰা দস্সেতীতি অনাৰিকম্মং. সুট্ঠু ছাদনা ৰোচ্ছাদনা. কতপাপপটিচ্ছাদনৰসেন পুনপি পাপস্স করণতো পাপকিরিযা. অযং ৰুচ্চতীতি অযং কতপটিচ্ছাদনলক্খণা মাযা নাম ৰুচ্চতি. যায সমন্নাগতো পুগ্গলো ভস্মাপটিচ্ছন্নো ৰিয অঙ্গারো, উদকপটিচ্ছন্নো ৰিয খাণু, পিলোতিকায পলিৰেঠিতং ৰিয চ সত্থং হোতি. অতিৰেলং দন্তৰিদংসকং হসতীতি পমাণাতিক্কন্তং দন্তং ৰিৰরিত্ৰা পরেসং দস্সেত্ৰা হাসং সোমনস্সং উপ্পাদেত্ৰা হসতি.

কাযিকা চ খিড্ডাতি কাযেন পৰত্তা কীল়া. এসেৰ নযো ৰাচসিকাযপি. হত্থীহিপি কীল়ন্তীতি হত্থীহি কীল়িতত্থায পুরতো ধাৰনআধাৰনপিট্ঠনিসীদনাদিকীট্ঠায কীল়ন্তি. এসেৰ নযো অস্সরথেসুপি. অট্ঠপদেপি কীল়ন্তীতি একেকায পন্তিযা অট্ঠ অট্ঠ পদানি অস্সাতি অট্ঠপদং, তস্মিং অট্ঠপদে. দসপদেপি এসেৰ নযো. আকাসেপীতি অট্ঠপদদসপদেসু ৰিয আকাসেযেৰ কীল়ন্তি. পরিহারপথেপীতি ভূমিযং নানাপথমণ্ডলং কত্ৰা তত্থ পরিহরিতব্বপথং পরিহরন্তা কীল়ন্তি. সন্তিকাযপি কীল়ন্তীতি সন্তিককীল়ায কীল়ন্তি, একজ্ঝং ঠপিতা সারিযো ৰা পাসাণসক্খরাযো ৰা অচালেন্তা নখেনেৰ অপনেন্তি চ উপনেন্তি চ. সচে তত্থ কাচি চলতি, পরাজযো হোতীতি.

খলিকাযাতি জূতফলকে পাসককীল়ায কীল়ন্তি. ঘটিকাযাতি ঘটিকা ৰুচ্চতি দীঘদণ্ডকেন রস্সদণ্ডকং পহরণকীল়া, তায কীল়ন্তি. সলাকহত্থেনাতি লাখায ৰা মঞ্জট্ঠিযা ৰা পিট্ঠোদকেন ৰা সলাকহত্থং তেমেত্ৰা ‘‘কিং হোতূ’’তি ভূমিযং ৰা ভিত্তিযং ৰা তং পহরিত্ৰা হত্থিঅস্সাদিরূপানি দস্সেন্তা কীল়ন্তি. অক্খেনাতি গুল়েন. পঙ্কচীরেনাতি পঙ্কচীরং ৰুচ্চতি পণ্ণনাল়িকা, তং ধমন্তা কীল়ন্তি. ৰঙ্ককেনাতি গামদারকানং কীল়নকেন খুদ্দকনঙ্গলেন. মোক্খচিকাযাতি সম্পরিৰত্তককীল়ায, আকাসে ৰা দণ্ডং গহেত্ৰা ভূমিযং ৰা সীসং ঠপেত্ৰা হেট্ঠুপরিযভাৰেন পরিৰত্তন্তা কীল়ন্তীতি ৰুত্তং হোতি. চিঙ্গুলকেনাতি চিঙ্গুলকং ৰুচ্চতি তালপণ্ণাদীহি কতং ৰাতপ্পহারেন পরিব্ভমনচক্কং, তেন কীল়ন্তি. পত্তাল়্হকেনাতি পত্তাল়্হকং ৰুচ্চতি পণ্ণনাল়ি, তায ৰালিকাদীনি মিনন্তা কীল়ন্তি. রথকেনাতি খুদ্দকরথেন. ধনুকেনাতি খুদ্দকধনুনা. অক্খরিকাযাতি অক্খরিকা ৰুচ্চতি আকাসে ৰা পিট্ঠিযং ৰা অক্খরজাননকীল়া, তায কীল়ন্তি. মনেসিকাযাতি মনেসিকা ৰুচ্চতি মনসা চিন্তিতজাননকীল়া, তায কীল়ন্তি. যথাৰজ্জেনাতি যথাৰজ্জং ৰুচ্চতি কাণকুণিখুজ্জাদীনং যং যং ৰজ্জং, তং তং পযোজেত্ৰা দস্সনকীল়া, তায কীল়ন্তি. মুখভেরিকন্তি মুখসদ্দেন ভেরী ৰিয ৰাদনং. মুখালম্বরন্তি মুখানুলিত্তভেরিসদ্দকরণং. মুখডিণ্ডিমকন্তি মুখেন পহতভেরিসদ্দকরণং. মুখৰলিমকন্তি ওট্ঠমংসং জিম্হং কত্ৰা সদ্দকরণং. ‘‘মুখতলিক’’ন্তিপি পাঠো, মুখং পরিৰত্তেত্ৰা ধমনং. মুখভেরুল়কন্তি মুখেন ভেরিৰাদনং. নাটকন্তি অভিনযং দস্সেত্ৰা উগ্গণ্হাপনং. ‘‘নট্টক’’ন্তিপি পাঠো. লাপন্তি উক্কুট্ঠিতকরণং. গীতন্তি গাযনং. দৰকম্মন্তি হস্সকীল়াকরণং. অযং ৰাচসিকা খিড্ডাতি অযং কীল়া ৰাচায জাতা ৰচীদ্ৰারে উপ্পন্না.

কেসা চ মস্সু চাতিআদীসু কেসানং কত্তরিকায ঠানাতিরিত্তানি অকত্ৰা কত্তরিকায ছেদনং মস্সূনং দাঠিকং ঠপেত্ৰা কপ্পাসনঞ্চ একতোৰণ্ডিকাদিমালা চ মূলগন্ধাদিগন্ধা চ ছৰিকরণৰিলেপনা চ. গীৰাদীসু পিল়ন্ধনআভরণা চ সীসে পটিমুঞ্চনপসাধনপিল়ন্ধনা চ সরীরনিৰাসনৰিচিত্রৰত্থা চ সংৰেল্লিযবন্ধনপসাধনঞ্চ. ‘‘পরাসন’’ন্তিপি পাঠো. সীসৰেঠনপটসঙ্খাতৰেঠনঞ্চ.

উচ্ছাদনাদীসু মাতুকুচ্ছিতো নিক্খন্তদারকানং সরীরগন্ধো দ্ৰাদসমত্তৰস্সকালে নস্সতি, তেসং সরীরগন্ধহরণত্থায গন্ধচুণ্ণাদীহি উচ্ছাদেন্তি, এৰরূপং উচ্ছাদনং ন ৰট্টতি. পুঞ্ঞৰন্তে পন দারকে ঊরূসু নিপজ্জাপেত্ৰা তেলেন মক্খেত্ৰা হত্থপাদঊরুনাভিআদীনং সণ্ঠানসম্পাদনত্থং পরিমদ্দন্তি, এৰরূপং পরিমদ্দনং ন ৰট্টতি.

ন্হাপনন্তি তেসংযেৰ দারকানং গন্ধাদীহি ন্হাপনং. সম্বাহনন্তি মহামল্লানং ৰিয হত্থপাদে মুগ্গরাদীহি পহরিত্ৰা বাহুৰড্ঢনং. আদাসন্তি যংকিঞ্চি আদাসং পরিহরিতুং ন ৰট্টতি. অঞ্জনং অলঙ্কারঞ্জনমেৰ. মালাতি বদ্ধমালা ৰা অবদ্ধমালা ৰা. ৰিলেপনন্তি যংকিঞ্চি ছৰিরাগকরণং. মুখচুণ্ণকং মুখলেপনন্তি মুখে কাল়পীল়কাদীনং হরণত্থায মত্তিকাকক্কং দেন্তি. তেন লোহিতে চলিতে সাসপকক্কং দেন্তি, তেন দোসে খাদিতে তিলকক্কং দেন্তি, তেন লোহিতে সন্নিসিন্নে হলিদ্দিকক্কং দেন্তি, তেন ছৰিৰণ্ণে আরূল়্হে মুখচুণ্ণকেন মুখং চুণ্ণেন্তি, তং সব্বং ন ৰট্টতি.

হত্থবন্ধাদীসু হত্থে ৰিচিত্রসঙ্খকপালাদীনি বন্ধিত্ৰা ৰিচরন্তি, তং ৰা অঞ্ঞং ৰা সব্বম্পি হত্থাভরণং ন ৰট্টতি. অপরে সিখং বন্ধিত্ৰা ৰিচরন্তি, সুৰণ্ণচীরকমুত্তাৰল়িআদীহি চ তং পরিক্খিপন্তি, তং সব্বং ন ৰট্টতি. অপরে চতুহত্থদণ্ডং ৰা অঞ্ঞং ৰা পন অলঙ্কতদণ্ডকং গহেত্ৰা ৰিচরন্তি, তথা ইত্থিপুরিসরূপাদিৰিচিত্তং ভেসজ্জনাল়িকং সুপরিক্খিত্তং ৰামপস্সে ওলগ্গেন্তি, অপরে অনেকচিত্রকোসং অতিতিখিণং অসিং, পঞ্চৰণ্ণসুত্তসিব্বিতং মকরদন্তকাদিৰিচিত্তং ছত্তং, সুৰণ্ণরজতাদিৰিচিত্রা মোরপিঞ্ছাদিপরিক্খিত্তা উপাহনা, কেচি রতনমত্তাযামং চতুরঙ্গুলৰিত্থতং কেসন্তপরিচ্ছেদং দস্সেত্ৰা মেঘমুখে ৰিজ্জুলতং ৰিয নলাটে উণ্হীসপট্টং বন্ধিত্ৰা চূল়ামণিং ধারেন্তি, চামরৰালবীজনিং ধারেন্তি, তং সব্বং ন ৰট্টতি.

ইমস্স ৰা পূতিকাযস্সাতি ইমস্স চাতুমহাভূতমযস্স কুণপসরীরস্স. কেল়নাতি কীল়াপনা. পরিকেল়নাতি সব্বতো ভাগেন কীল়াপনা. গেধিততাতি অভিকঙ্খিততা. গেধিতত্তন্তি গিদ্ধভাৰো অভিকঙ্খিতভাৰো. চপলতাতি অলঙ্কারকরণং. চাপল্যন্তি চপলভাৰং.

সৰিভূসন্তিআদীসু ৰিভূসায সহ সৰিভূসং. ছৰিরাগকরণসঙ্খাতেন পরিৰারেন সহ সপরিৰারং. পরিভণ্ডেন সহ সপরিভণ্ডং. পরিক্খারেন সহ সপরিক্খারং.

১৬২. আথব্বণন্তি আথব্বণিকমন্তপ্পযোগং. সুপিনন্তি সুপিনসত্থং. লক্খণন্তি মণিলক্খণাদিং. নো ৰিদহেতি নপ্পযোজেয্য. ৰিরুতঞ্চাতি মিগাদীনং ৰট্টেত্ৰা ৰস্সিতং.

আথব্বণিকাতি পরূপঘাতমন্তজাননকা. আথব্বণং পযোজেন্তীতি আথব্বণিকা কির সত্তাহং অলোণকং ভুঞ্জিত্ৰা দব্বে অত্থরিত্ৰা পথৰিযং সযমানা তপং চরিত্ৰা সত্তমে দিৰসে সুসানভূমিং সজ্জেত্ৰা সত্তমে পদে ঠত্ৰা হত্থং ৰট্টেত্ৰা ৰট্টেত্ৰা মুখেন ৰিজ্জং পরিজপ্পন্তি, অথ তেসং কম্মং সমিজ্ঝতি. এৰরূপং সন্ধায ‘‘আথব্বণং পযোজেন্তী’’তি আহ. তত্থ পযোজেন্তীতি যুত্তপ্পযুত্তা হোন্তি. নগরে ৰা রুদ্ধেতি নগরে সমন্ততো রুন্ধিত্ৰা আৰরিত্ৰা গহিতে. সঙ্গামে ৰা পচ্চুপট্ঠিতেতি রণে উপগন্ত্ৰা ঠিতে. পচ্চত্থিকেসু পচ্চামিত্তেসূতি পটাণীভূতেসু ৰেরীসু. ঈতিং উপ্পাদেন্তীতি সরীরচলনং কম্পনং, তস্স উপ্পাদনং করোন্তি. উপদ্দৰন্তি কাযপীল়নং করোন্তি. রোগন্তি ব্যাধিং. পজ্জরকন্তি জরং. সূলন্তি উদ্ধুমাতকং. ৰিসূচিকন্তি ৰিজ্ঝনং. পক্খন্দিকন্তি লোহিতপক্খন্দিকং. করোন্তীতি উপ্পাদেন্তি.

সুপিনপাঠকাতি সুপিনব্যাকরণকা. আদিসন্তীতি ব্যাকরোন্তি. যো পুব্বণ্হসমযং সুপিনং পস্সতীতিআদীসু অচ্চন্তসংযোগে উপযোগৰচনং, পুব্বণ্হসমযেতি অত্থো. এৰং ৰিপাকো হোতীতি ইট্ঠানিট্ঠৰসেন এৰরূপো ৰিপাকো হোতি. অৰকুজ্জ নিপন্নোতি অধোমুখো হুত্ৰা নিপন্নো পস্সতি. এৰং সুপিনপাঠকা সুপিনং আদিসন্তি.

তঞ্চ পন সুপিনং পস্সন্তো চতূহি কারণেহি পস্সতি ধাতুক্খোভতো ৰা অনুভূতপুব্বতো ৰা দেৰতোপসংহারতো ৰা পুব্বনিমিত্ততো ৰাতি. তত্থ পিত্তাদীনং খোভকরণপচ্চযযোগেন খুভিতধাতুকো ধাতুক্খোভতো সুপিনং পস্সতি, পস্সন্তো চ নানাৰিধং সুপিনং পস্সতি. অনুভূতপুব্বতো পস্সন্তো পুব্বে অনুভূতপুব্বং আরম্মণং পস্সতি. দেৰতোপসংহারতো পস্সন্তো দেৰতানং আনুভাৰেন আরম্মণানি পস্সতি. পুব্বনিমিত্ততো পস্সন্তো পুঞ্ঞাপুঞ্ঞৰসেন উপ্পজ্জিতুকামস্স অত্থস্স ৰা অনত্থস্স ৰা পুব্বনিমিত্তভূতং সুপিনং পস্সতি. তত্থ যং ধাতুক্খোভতো অনুভূতপুব্বতো চ সুপিনং পস্সতি, ন তং সচ্চং হোতি. যং দেৰতোপসংহারতো পস্সতি, তং সচ্চং ৰা হোতি অলিকং ৰা. কুদ্ধা হি দেৰতা উপাযেন ৰিনাসেতুকামা ৰিপরীতম্পি কত্ৰা দস্সেন্তি. যং পন পুব্বনিমিত্ততো পস্সতি, তং একন্তসচ্চমেৰ হোতি. এতেসং চতুন্নং মূলকারণানং সংসগ্গভেদতোপি সুপিনভেদো হোতিযেৰ. তঞ্চ পনেতং চতুব্বিধং সুপিনং সেক্খপুথুজ্জনাৰ পস্সন্তি অপ্পহীনৰিপল্লাসত্তা. অসেক্খা ন পস্সন্তি পহীনৰিপল্লাসত্তা.

কিং পনেতং পস্সন্তো সুত্তো পস্সতি, উদাহু পটিবুদ্ধো, উদাহু নেৰ সুত্তো ন পটিবুদ্ধোতি? কিঞ্চেত্থ – যদি তাৰ সুত্তো পস্সতি, অভিধম্মৰিরোধো আপজ্জতি. ভৰঙ্গচিত্তেন হি সুপতি, তং রূপনিমিত্তাদিআরম্মণং রাগাদিসম্পযুত্তং ৰা ন হোতি, সুপিনং পস্সন্তস্স চ ঈদিসানি চিত্তানি উপ্পজ্জন্তি. অথ পটিবুদ্ধো পস্সতি, ৰিনযৰিরোধো আপজ্জতি. যঞ্হি পটিবুদ্ধো পস্সতি, তং সব্বোহারিকচিত্তেন পস্সতি, সব্বোহারিকচিত্তেন চ কতে ৰীতিক্কমে অনাপত্তি নাম নত্থি, সুপিনং পস্সন্তেন পন কতে ৰীতিক্কমে একন্তং অনাপত্তি এৰ. অথ নেৰ সুত্তো ন পটিবুদ্ধো পস্সতি, কো নাম পস্সতি. এৰঞ্চ সতি সুপিনস্স অভাৰোৰ আপজ্জতি, ন অভাৰো. কস্মা? যস্মা কপিনিদ্দাপরেতো পস্সতি. ৰুত্তঞ্হেতং – ‘‘মজ্ঝূপগতো, মহারাজ, কপিনিদ্দাপরেতো সুপিনং পস্সতী’’তি (মি. প. ৫.৩.৫).

কপিনিদ্দাপরেতোতি মক্কটনিদ্দায যুত্তো. যথা হি মক্কটস্স নিদ্দা লহুপরিৰত্তা হোতি, এৰং যা নিদ্দা পুনপ্পুনং কুসলাদিচিত্তৰোকিণ্ণত্তা লহুৰিপরিৰত্তা. যস্সা পৰত্তিযং পুনপ্পুনং ভৰঙ্গতো উত্তরণং হোতি, তায যুত্তো সুপিনং পস্সতি. তেনাযং সুপিনো কুসলোপি হোতি অকুসলোপি অব্যাকতোপি. তত্থ সুপিনন্তে চেতিযৰন্দনধম্মস্সৰনধম্মদেসনাদীনি করোন্তস্স কুসলো, পাণাতিপাতাদীনি করোন্তস্স অকুসলো, দ্ৰীহি অন্তেহি মুত্তো আৰজ্জনতদারম্মণক্খণে অব্যাকতোতি ৰেদিতব্বো. স্ৰাযং দুব্বলৰত্থুকত্তা চেতনায পটিসন্ধিং আকড্ঢিতুং অসমত্থো, পৰত্তে পন অঞ্ঞেহি কুসলাকুসলেহি উপত্থম্ভিতো ৰিপাকং দেতি.

মণিলক্খণাদীসু এৰরূপো মণি পসত্থো, এৰরূপো অপসত্থো, সামিনো আরোগ্যইস্সরিযাদীনং হেতু হোতি, ন হোতীতি এৰং ৰণ্ণসণ্ঠানাদিৰসেন মণিআদীনং লক্খণং আদিসন্তীতি অত্থো. তত্থ আৰুধলক্খণন্তি ঠপেত্ৰা অসিআদীনি অৰসেসং আৰুধং. ইত্থিলক্খণাদীনিপি যম্হি কুলে ইত্থিপুরিসাদযো ৰসন্তি, তস্স ৰুদ্ধিহানিৰসেনেৰ ৰেদিতব্বানি. অজলক্খণাদীসু পন ‘‘এৰরূপানং অজাদীনং মংসং খাদিতব্বং, এৰরূপানং ন খাদিতব্ব’’ন্তি অযম্পি ৰিসেসো ৰেদিতব্বো.

অপি চেত্থ গোধায লক্খণে চিত্তকম্মপিল়ন্ধনাদীসুপি ‘‘এৰরূপায গোধায সতি ইদং নাম হোতী’’তি অযম্পি ৰিসেসো ৰেদিতব্বো. কণ্ণিকালক্খণং পিল়ন্ধনকণ্ণিকাযপি গেহকণ্ণিকাযপি ৰসেন ৰেদিতব্বং. কচ্ছপলক্খণম্পি গোধলক্খণসদিসমেৰ. মিগলক্খণং সব্বসঙ্গাহিকং সব্বচতুপ্পদানং লক্খণৰসেন ৰুত্তং. এৰং লক্খণপাঠকা লক্খণং আদিসন্তীতি এৰং লক্খণসত্থৰাচকা লক্খণং আদিসন্তি কথেন্তি.

নক্খত্তানীতি কত্তিকাদীনি অট্ঠৰীসতি নক্খত্তানি. ইমিনা নক্খত্তেন ঘরপ্পৰেসো কাতব্বোতি গেহপ্পৰেসমঙ্গলং কাতব্বং. মকুটং বন্ধিতব্বন্তি পসাধনমঙ্গলং কাতব্বং. ৰারেয্যন্তি ‘‘ইমস্স দারকস্স অসুককুলতো অসুকনক্খত্তেন দারিকং আনেথা’’তি আৰাহকরণঞ্চ ‘‘ইমং দারিকং অসুকস্স নাম দারকস্স অসুকনক্খত্তেন দেথ, এৰং এতেসং ৰুড্ঢি ভৰিস্সতী’’তি ৰিৰাহকরণঞ্চ ৰত্ৰা ৰারেয্যসঙ্খাতং আৰাহৰিৰাহমঙ্গলং কাতব্বন্তি আদিসন্তি. বীজনীহারোতি বীজানং ৰপ্পত্থায বহি নীহরণং. ‘‘নিহরো’’তিপি পাল়ি. মিগৰাক্কন্তি ইদং সব্বসঙ্গাহিকনামং, সব্বসকুণচতুপ্পদানং রুতঞাণৰসেনেৰ ৰুত্তং. মিগৰাক্কপাঠকাতি সকুন্তচতুপ্পদানং সদ্দব্যাকরণকা. মিগৰাক্কং আদিসন্তীতি তেসং সদ্দং সুত্ৰা ব্যাকরোন্তি. রুতন্তি সদ্দং. ‘‘রুদ’’ন্তি ৰা পাল়ি. ৰস্সিতন্তি ৰাচং. গব্ভকরণীযাতি ৰিনস্সমানস্স গব্ভস্স পুন অৰিনাসায ওসধদানেন গব্ভসণ্ঠানকারকা. গব্ভো হি ৰাতেন পাণকেহি কম্মুনা চাতি তীহি কারণেহি ৰিনস্সতি. তত্থ ৰাতেন ৰিনস্সন্তে ৰাতৰিনাসনং সীতলং ভেসজ্জং দেতি. পাণকেহি ৰিনস্সন্তে পাণকানং পটিকম্মং করোতি. কম্মুনা ৰিনস্সন্তে পন বুদ্ধাপি পটিবাহিতুং ন সক্কোন্তি. তস্মা ন তং ইধ গহিতং. সালাকিযন্তি সলাকৰেজ্জকম্মং. সল্লকত্তিযন্তি সল্লকত্তৰেজ্জকম্মং. কাযতিকিচ্ছন্তি মূলভেসজ্জাদীনি যোজেত্ৰা কাযতিকিচ্ছৰেজ্জকম্মং. ভূতিযন্তি ভূতৰেজ্জকম্মং. কোমারভচ্চন্তি কোমারকৰেজ্জকম্মং. কুহাতি ৰিম্হাপকা. থদ্ধাতি দারুক্খন্ধং ৰিয থদ্ধসরীরা. লপাতি পচ্চযপটিবদ্ধৰচনকা. সিঙ্গিতি মণ্ডনপকতিকা. উন্নল়াতি উগ্গতমাননল়া. অসমাহিতাতি উপচারপ্পনাসমাধিৰিরহিতা.

ন গণ্হেয্যাতিআদীসু উদ্দেসগ্গহণৰসেন ন গণ্হেয্য. সজ্ঝাযৰসেন ন উগ্গণ্হেয্য. চিত্তে ঠপনৰসেন ন ধারেয্য. সমীপং কত্ৰা ঠপনৰসেন ন উপধারেয্য. উপপরিক্খাৰসেন ন উপলক্খেয্য. অঞ্ঞেসং ৰাচনৰসেন নপ্পযোজেয্য.

১৬৩. পেসুণিযন্তি পেসুঞ্ঞং. সেসনিদ্দেসো চ ৰুত্তত্থোযেৰ.

১৬৪. কযৰিক্কযেতি পঞ্চহি সহধম্মিকেহি সদ্ধিং ৰঞ্চনৰসেন ৰা উদযপত্থনাৰসেন ৰা ন তিট্ঠেয্য. উপৰাদং ভিক্খু ন করেয্যাতি উপৰাদকরে কিলেসে অনিব্বত্তেন্তো অত্তনি পরেহি সমণব্রাহ্মণেহি উপৰাদং ন জনেয্য. গামে চ নাভিসজ্জেয্যাতি গামে চ গিহিসংসগ্গাদীহি নাভিসজ্জেয্য. লাভকম্যা জনং ন লপযেয্যাতি লাভকামতায জনং ন লপযেয্য.

যে কযৰিক্কযা ৰিনযে পটিক্খিত্তাতি যে দানপটিগ্গহণৰসেন কযৰিক্কযসিক্খাপদে (পারা. ৫৯৩ আদযো) ন ৰট্টতীতি পটিক্খিত্তা, ইধাধিপ্পেতং কযৰিক্কযং দস্সেতুং ‘‘পঞ্চন্নং সদ্ধিং পত্তং ৰা চীৰরং ৰা’’তিআদিমাহ. তত্থ পঞ্চন্নং সদ্ধিন্তি পঞ্চহি সহধম্মিকেহি সহ. পঞ্চ সহধম্মিকা নাম ভিক্খুভিক্খুনীসিক্খমানসামণেরসামণেরিযো. ৰঞ্চনিযং ৰাতি পটিরূপকং দস্সেত্ৰা ৰঞ্চনিযং ৰা. উদযং ৰা পত্থযন্তোতি ৰুড্ঢিং পত্থেন্তো ৰা. পরিৰত্তেতীতি পরিৰত্তনং করোতি.

ইদ্ধিমন্তোতি ইজ্ঝনপভাৰৰন্তো. দিব্বচক্খুকাতি দিব্বসদিসঞাণচক্খুকা. অথ ৰা দিব্বৰিহারসন্নিস্সযেন লদ্ধঞাণচক্খুকা. পরচিত্তৰিদুনোতি অত্তনো চিত্তেন পরেসং চিত্তজাননকা. তে দূরতোপি পস্সন্তীতি একযোজনতোপি যোজনসততোপি যোজনসহস্সতোপি যোজনসতসহস্সতোপি চক্কৰাল়তোপি দ্ৰেতীণিচত্তারিপঞ্চদসৰীসতিচত্তালীসসহস্সতোপি ততো অতিরেকতোপি চক্কৰাল়তো পস্সন্তি দক্খন্তি. আসন্নাপি ন দিস্সন্তীতি সমীপে ঠিতাপি নিসিন্নাপি ন পঞ্ঞাযন্তি. চেতসাপি চিত্তং পজানন্তীতি অত্তনো চিত্তেনাপি পরেসং চিত্তং পজানন্তি. দেৰতাপি খো সন্তি ইদ্ধিমন্তিনিযোতি দেৰতাপি এৰং সংৰিজ্জন্তি ইজ্ঝনপভাৰৰন্তিনিযো. পরচিত্তৰিদুনিযোতি পরেসং চিত্তং জানন্তিযো. ওল়ারিকেহি ৰা কিলেসেহীতি কাযদুচ্চরিতাদিকেহি ৰা উপতাপেহি. মজ্ঝিমেহি ৰাতি কামৰিতক্কাদিকেহি ৰা. সুখুমেহি ৰাতি ঞাতিৰিতক্কাদিকেহি ৰা. কাযদুচ্চরিতাদযো কম্মপথৰসেন, কামৰিতক্কাদযো ৰট্টমূলককিলেসৰসেন ৰেদিতব্বা.

ঞাতিৰিতক্কাদীসু ‘‘ময্হং ঞাতযো সুখজীৰিনো সম্পত্তিযুত্তা’’তি এৰং পঞ্চকামগুণসন্নিস্সিতেন গেহসন্নিস্সিতপেমেন ঞাতকে আরব্ভ উপ্পন্নৰিতক্কো ঞাতিৰিতক্কো. ‘‘ময্হং ঞাতযো খযং গতা ৰযং গতা সদ্ধা পসন্না’’তি এৰং পৰত্তো পন ঞাতিৰিতক্কো নাম ন হোতি.

‘‘অম্হাকং জনপদো সুভিক্খো সম্পন্নসস্সো’’তি তুট্ঠমানসস্স গেহস্সিতপেমৰসেন উপ্পন্নৰিতক্কো জনপদৰিতক্কো. ‘‘অম্হাকং জনপদে মনুস্সা সদ্ধা পসন্না খযং গতা ৰযং গতা’’তি এৰং পৰত্তো পন জনপদৰিতক্কো নাম ন হোতি.

অমরত্তায ৰিতক্কো, অমরো ৰা ৰিতক্কোতি অমরৰিতক্কো. তত্থ উক্কুটিকপ্পধানাদীহি দুক্খে নিজিণ্ণে সম্পরাযে অত্তা সুখী হোতি. অমরোতি দুক্করকারিকং করোন্তস্স তায দুক্করকারিকায পটিসংযুত্তো ৰিতক্কো অমরত্তায ৰিতক্কো নাম. দিট্ঠিগতিকো পন ‘‘সস্সতং ৰদেসী’’তিআদীনি পুট্ঠো ‘‘এৰন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো’’তি ৰিক্খেপং আপজ্জতি, তস্স সো দিট্ঠিগতপটিসংযুত্তো ৰিতক্কো, যথা অমরো নাম মচ্ছো উদকে গহেত্ৰা মারেতুং ন সক্কা, ইতো চিতো চ ধাৰতি গাহং ন গচ্ছতি, এৰমেৰ একস্মিং পক্খে অসণ্ঠহনতো ন মরতীতি অমরো নাম হোতি, তং দুৰিধম্পি একতো কত্ৰা ‘‘অমরৰিতক্কো’’তি ৰুত্তং.

পরানুদ্দযতাপটিসঞ্ঞুত্তোতি অনুদ্দযতাপটিরূপকেন গেহস্সিতপেমেন পটিসংযুত্তো. উপট্ঠাকেসু নন্দকেসু সোচন্তেসু চ তেহি সদ্ধিং দিগুণং নন্দতি দিগুণং সোচতি, তেসু সুখিতেসু দিগুণং সুখিতো হোতি, দুক্খিতেসু দিগুণং দুক্খিতো হোতি. উপ্পন্নেসু কিচ্চকরণীযেসু অত্তনা ৰোযোগং আপজ্জতি. তানি তানি কিচ্চানি সাধেন্তো পঞ্ঞত্তিং ৰীতিক্কমতি, সল্লেখং কোপেতি. যো তস্মিং সংসট্ঠৰিহারে তস্মিং ৰা ৰোযোগাপজ্জনে গেহস্সিতো ৰিতক্কো, অযং পরানুদ্দযতাপটিসঞ্ঞুত্তো ৰিতক্কো নাম.

লাভসক্কারসিলোকপটিসঞ্ঞুত্তোতি চীৰরাদিলাভেন চেৰ সক্কারেন চ কিত্তিসদ্দেন চ সদ্ধিং আরম্মণকরণৰসেন পটিসঞ্ঞুত্তো. অনৰঞ্ঞত্তিপটিসঞ্ঞুত্তোতি ‘‘অহো ৰত মং পরে ন অৰজানেয্যুং, ন সোধেত্ৰা ৰিসোধেত্ৰা কথেয্যু’’ন্তি এৰং অনৰঞ্ঞাতভাৰপত্থনায সদ্ধিং উপ্পজ্জনকৰিতক্কো. সো তস্মিং ‘‘মা মং পরে অৰজানিংসূ’’তি উপ্পন্নে ৰিতক্কে পঞ্চকামগুণসঙ্খাতগেহনিস্সিতো হুত্ৰা উপ্পন্নৰিতক্কো অনৰঞ্ঞত্তিপটিসঞ্ঞুত্তো ৰিতক্কো.

তত্র তত্র সজ্জতীতি তেসু তেসু আরম্মণেসু লগ্গতি. তত্র তত্র গণ্হাতীতি ৰুত্তপ্পকারং আরম্মণং পৰিসতি. বজ্ঝতীতি তেহি তেহি আরম্মণেহি সদ্ধিং বজ্ঝতি একীভৰতি. অনযব্যসনন্তি তত্থ তত্থ অৰড্ঢিং ৰিনাসং. আপজ্জতীতি পাপুণাতি.

আমিসচক্খুকস্সাতি চীৰরাদিআমিসলোলস্স. লোকধম্মগরুকস্সাতি লোকুত্তরধম্মং মুঞ্চিত্ৰা রূপাদিলোকধম্মমেৰ গরুং কত্ৰা চরন্তস্স. আলপনাতি ৰিহারং আগতমনুস্সে দিস্ৰা ‘‘কিমত্থায ভোন্তো আগতা, কিং ভিক্খূ নিমন্তেতুং, যদি এৰং গচ্ছথ, অহং পচ্ছতো ভিক্খূ গহেত্ৰা আগচ্ছামী’’তি এৰং আদিতোৰ লপনা. অথ ৰা অত্তানং উপনেত্ৰা ‘‘অহং তিস্সো, মযি রাজা পসন্নো, মযি অসুকো চ অসুকো চ রাজমহামত্তো পসন্নো’’তি এৰং অত্তুপনাযিকা লপনাতি আলপনা. লপনাতি পুট্ঠস্স সতো ৰুত্তপ্পকারমেৰ লপনং.

সল্লপনাতি গহপতিকানং উক্কণ্ঠনে ভীতস্স ওকাসং দত্ৰা সুট্ঠু লপনা. উল্লপনাতি ‘‘মহাকুটুম্বিকো মহানাৰিকো মহাদানপতী’’তি এৰং উদ্ধং কত্ৰা লপনা. সমুল্লপনাতি সব্বতো ভাগেন উদ্ধং কত্ৰা লপনা. উন্নহনাতি ‘‘উপাসকা পুব্বে ঈদিসে কালে নৰদানং দেথ, ইদানি কিং ন দেথা’’তি এৰং যাৰ ‘‘দস্সাম ভন্তে, ওকাসং ন লভামা’’তিআদীনি ৰদন্তি, তাৰ উদ্ধং উদ্ধং নহনা, ৰেঠনাতি ৰুত্তং হোতি. অথ ৰা উচ্ছুহত্থং দিস্ৰা ‘‘কুতো আভতং উপাসকা’’তি পুচ্ছতি. উচ্ছুখেত্ততো ভন্তেতি. কিং তত্থ উচ্ছু মধুরন্তি. খাদিত্ৰা ভন্তে জানিতব্বন্তি. ন উপাসকা ‘‘ভিক্খুস্স উচ্ছুং দেথা’’তি ৰত্তুং ৰট্টতীতি যা এৰরূপা নিব্বেঠেন্তস্সপি নিৰেঠনককথা, সা উন্নহনা. সব্বতো ভাগেন পুনপ্পুনং উন্নহনা সমুন্নহনা. উক্কাচনাতি ‘‘এতং কুলং মংযেৰ জানাতি, সচে এত্থ দেয্যধম্মো উপ্পজ্জতি, ময্হংযেৰ দেতী’’তি এৰং উক্খিপিত্ৰা কাচনা উক্কাচনা, উদ্দীপনাতি ৰুত্তং হোতি. সব্বতো ভাগেন পন পুনপ্পুনং উক্কাচনা সমুক্কাচনা. অনুপ্পিযভাণিতাতি পচ্চযৰসেন পুনপ্পুনং পিযৰচনভণনা. সণ্হৰাচতাতি মুদুৰচনতা. সখিলৰাচতাতি মন্দপমাণযুত্তৰচনতা সিথিলৰচনতা ৰা. সিথিলৰাচতাতি অল্লীযৰচনতা. অফরুসৰাচতাতি মধুরৰচনতা.

পুরাণং মাতাপেত্তিকন্তি পুরে উপ্পন্নং মাতাপিতূনং সন্তকং. অন্তরহিতন্তি পটিচ্ছন্নং তিরোভূতং. ঞাযামীতি পাকটো হোমি. অসুকস্স কুলূপকোতি অসুকস্স অমচ্চস্স কুলপযিরুপাসকো. অসুকাযাতি অসুকায উপাসিকায. মং উজ্ঝিত্ৰাতি মং ৰিস্সজ্জিত্ৰা.

১৬৫. পযুত্তন্তি চীৰরাদীহি সম্পযুত্তং, তদত্থং ৰা পযোজিতং. ইমিস্সা গাথায নিদ্দেসো সব্বো হেট্ঠা ৰুত্তনযোৰ.

১৬৬. মোসৰজ্জে ন নিয্যেথাতি মুসাৰাদে ন নিয্যেথ.জীৰিতেনাতি জীৰিকায.

সঠোতি অসন্তগুণদীপনতো ন সম্মা ভাসিতা. সব্বতো ভাগেন সঠো পরিসঠো. যং তত্থাতি যং তস্মিং পুগ্গলে. সঠন্তি অসন্তগুণদীপনং কেরাটিযং. সঠতাতি সঠাকারো. সাঠেয্যন্তি সঠভাৰো. কক্করতাতি পদুমনাল়স্স ৰিয অপরামসনক্খমো ফরুসভাৰো. কক্করিযন্তিপি তস্সেৰ ৰেৰচনং. পরিক্খত্ততা পারিক্খত্তিযন্তি পদদ্ৰযেন নিখণিত্ৰা ঠপিতং ৰিয দল়্হকেরাটিযং ৰুত্তং. কেচি পন ‘‘কক্করতাতি সম্ভাৰযিত্ৰা ৰচনং. কক্করিযন্তি সম্ভাৰযিত্ৰা ৰচনভাৰো. পরিক্খত্ততাতি অলঙ্করণাকারো. পারিক্খত্তিযন্তি অলঙ্করণভাৰো’’তি অত্থং ৰণ্ণযন্তি. ইদং ৰুচ্চতীতি ইদং অত্তনো অৰিজ্জমানগুণপ্পকাসনলক্খণং সাঠেয্যং নাম ৰুচ্চতি. যেন সমন্নাগতস্স পুগ্গলস্স কুচ্ছিং ৰা পিট্ঠিং ৰা জানিতুং ন সক্কা.

‘‘ৰামেন সূকরো হোতি, দক্খিণেন অজামিগো;

সরেন নেলকো হোতি, ৰিসাণেন জরগ্গৰো’’তি. (দী. নি. অট্ঠ. ২.২৯৬; ৰিভ. অট্ঠ. ৮৯৪) –

এৰং ৰুত্তযক্খসূকরসদিসো হোতি. অতিমঞ্ঞতীতি অতিক্কমিত্ৰা মঞ্ঞতি.

কিং পনাযং বহুলাজীৰোতি অযং পন পুগ্গলো কো নাম বহুলাজীৰকো. সব্বং সংভক্খেতীতি লদ্ধং সব্বং খাদতি. অপ্পপুঞ্ঞোতি মন্দপুঞ্ঞো. অপ্পেসক্খোতি পরিৰারৰিরহিতো. পঞ্ঞাসম্পন্নোতি সম্পন্নপঞ্ঞো পরিপুণ্ণপঞ্ঞো. পঞ্হং ৰিস্সজ্জেতীতি পঞ্হং কথেতি ব্যাকরোতি.

১৬৭. সুত্ৰা রুসিতো বহুং ৰাচং, সমণানং ৰা পুথুজনানন্তি রুসিতো ঘট্টিতো পরেহি তেসং সমণানং ৰা খত্তিযাদিভেদানং ৰা অঞ্ঞেসং পুথুজনানং বহুম্পি অনিট্ঠং ৰাচং সুত্ৰা. ন পটিৰজ্জাতি ন পটিৰদেয্য. কিং কারণা? ন হি সন্তো পটিসেনিং করোন্তি.

কক্খল়েনাতি দারুণেন. সন্তোতি নিব্বুতকিলেসা. পটিসেনিন্তি পটিসত্তুং. পটিমল্লন্তি পটিযোধং. পটিকণ্টকন্তি পটিৰেরিং. পটিপক্খন্তি কিলেসপটিপক্খং, কিলেসৰসেন সঙ্গং ন করোন্তীতি অত্থো.

১৬৮. এতঞ্চ ধম্মমঞ্ঞাযাতি সব্বমেতং যথাৰুত্তং ধম্মং ঞত্ৰা. ৰিচিনন্তি ৰিচিনন্তো. সন্তীতি নিব্বুতিং ঞত্ৰাতি নিব্বুতিং রাগাদীনং সন্তীতি ঞত্ৰা.

সমঞ্চাতি কাযসুচরিতাদিং. ৰিসমঞ্চাতি কাযদুচ্চরিতাদিং. পথঞ্চাতি দসকুসলকম্মপথং. ৰিপথঞ্চাতি দসঅকুসলকম্মপথং. সাৰজ্জঞ্চাতি অকুসলঞ্চ. অনৰজ্জঞ্চাতি কুসলঞ্চ. হীনপণীতকণ্হসুক্কৰিঞ্ঞূগরহিতৰিঞ্ঞূপসত্থন্তি ইদম্পি কুসলাকুসলমেৰ. তত্থ কাযসুচরিতাদি সমকরণতো সমং. কাযদুচ্চরিতাদি ৰিসমকরণতো ৰিসমং. দসকুসলকম্মপথা সুগতিগমনপথত্তা পথং. দসঅকুসলকম্মপথা সুগতিগমনপটিপক্খত্তা অপাযগমনপথত্তা ৰিপথং. অকুসলং সদোসত্তা সাৰজ্জং. কুসলং নিদ্দোসত্তা অনৰজ্জং. তথা মোহেন ৰা দোসমোহেন ৰা লোভমোহেন ৰা সম্পযুত্তত্তা হীনং. অলোভঅদোসঅমোহসম্পযুত্তত্তা পণীতং. কণ্হৰিপাকত্তা কণ্হং. সুক্কৰিপাকত্তা সুক্কং. বুদ্ধাদীহি ৰিঞ্ঞূহি গরহিতত্তা ৰিঞ্ঞূগরহিতং. তেহি এৰ থোমিতত্তা ৰিঞ্ঞূপসত্থন্তি ঞাতব্বং.

১৬৯. কিং কারণা নপ্পমজ্জেয্য ইতি চে – অভিভূ হি সোতি গাথা. তত্থ অভিভূতি রূপাদীনং অভিভৰিতা. অনভিভূতোতি তেহি অনভিভূতো. সক্খিধম্মমনীতিহমদ্দসীতি পচ্চক্খমেৰ অনীতিহং ধম্মং অদ্দক্খি. সদা নমস্স’মনুসিক্খেতি সদা নমস্সন্তো তিস্সো সিক্খাযো সিক্খেয্য.

কেহিচি কিলেসেহীতি কেহিচি রাগাদিউপতাপকরেহি কিলেসেহি. অভিভোসি নেতি তে কিলেসে অভিভৰি. সেসং সব্বত্থ পাকটমেৰ.

কেৰলং পন এত্থ ‘‘চক্খূহি নেৰ লোলো’’তিআদীহি ইন্দ্রিযসংৰরো, ‘‘অন্নানমথো পানান’’ন্তিআদীহি সন্নিধিপটিক্খেপমুখেন পচ্চযপটিসেৰনসীলং, মেথুনমোসৰজ্জপেসুণিযাদীহি পাতিমোক্খসংৰরসীলং, ‘‘আথব্বণং সুপিনং লক্খণ’’ন্তিআদীহি আজীৰপারিসুদ্ধিসীলং, ‘‘ঝাযী ন পাদলোলস্সা’’তি ইমিনা সমাধি, ‘‘ৰিচিনং ভিক্খূ’’তি ইমিনা পঞ্ঞা, ‘‘সদা সতো সিক্খে’’তি ইমিনা পুন সঙ্খেপতো তিস্সোপি সিক্খা, ‘‘অথ আসনেসু সযনেসু, অপ্পসদ্দেসু ভিক্খু ৰিহরেয্য, নিদ্দং ন বহুলীকরেয্যা’’তিআদীহি সীলসমাধিপঞ্ঞানং উপকারানুপকারসঙ্গণ্হনৰিনোদনানি ৰুত্তানীতি. এৰং ভগৰা নিম্মিতস্স পরিপুণ্ণপটিপদং ৰত্ৰা অরহত্তনিকূটেন দেসনং নিট্ঠাপেসি, দেসনাপরিযোসানে পুরাভেদসুত্তে (মহানি. ৮৩ আদযো) ৰুত্তসদিসোযেৰাভিসমযো অহোসীতি.

সদ্ধম্মপ্পজ্জোতিকায মহানিদ্দেসট্ঠকথায

তুৰটকসুত্তনিদ্দেসৰণ্ণনা নিট্ঠিতা.

১৫. অত্তদণ্ডসুত্তনিদ্দেসৰণ্ণনা

১৭০. পন্নরসমে অত্তদণ্ডসুত্তনিদ্দেসে অত্তদণ্ডা ভযং জাতন্তি পঠমগাথায অত্থো – যং লোকস্স দিট্ঠধম্মিকং ৰা সম্পরাযিকং ৰা ভযং জাতং, তং সব্বং অত্তদণ্ডা ভযং জাতং অত্তনো দুচ্চরিতকারণা জাতং, এৰং সন্তেপি জনং পস্সথ মেধগং, ইমং সাকিযাদিজনং পস্সথ অঞ্ঞমঞ্ঞং মেধগং হিংসকং বাধকন্তি. এৰং তং পটিৰিরুদ্ধং ৰিপ্পটিপন্নং জনং পরিভাসিত্ৰা অত্তনো সম্মা পটিপত্তিদস্সনেন তস্স সংৰেগং জনেতুং আহ ‘‘সংৰেগং কিত্তযিস্সামি, যথা সংৰিজিতং মযা’’তি. পুব্বে বোধিসত্তেনেৰ সতাতি অধিপ্পাযো.

তযোতি গণনপরিচ্ছেদো. দণ্ডাতি দুচ্চরিতা. কাযদণ্ডোতি কাযদুচ্চরিতং. ৰচীদণ্ডাদীসুপি এসেৰ নযো. তিৰিধং কাযদুচ্চরিতন্তি পাণাতিপাতাদিকাযতো পৰত্তং দুট্ঠুং চরিতং, কিলেসপূতিকত্তা ৰা দুট্ঠু চরিতন্তি লদ্ধনামং তিৰিধং দুচ্চরিতং কাযদুচ্চরিতং. চতুব্বিধন্তি মুসাৰাদাদিচতুব্বিধং. তিৰিধন্তি অভিজ্ঝাদিতিৰিধং. দিট্ঠধম্মিকন্তি দিট্ঠেৰ ধম্মে ইমস্মিংযেৰ অত্তভাৰে পটিসংৰেদনীযং. সম্পরাযিকন্তি অনাগতে অত্তভাৰে পটিসংৰেদনীযং. আগুচারীতি পাপকারী অপরাধকারী. তমেনং রাজা পরিভাসতীতি পাপকারিং রাজা পরিভাসতি, ভযং উপ্পাদেতি. দুক্খং দোমনস্সং পটিসংৰেদেতীতি কাযিকং দুক্খং চেতসিকং দোমনস্সং ৰিন্দতি. এতং ভযং দুক্খং দোমনস্সন্তি এৰরূপং ভযঞ্চ দুক্খঞ্চ দোমনস্সঞ্চ. কুতো তস্সাতি তস্স চোরস্স কুতো উপ্পন্নং. অত্তদণ্ডতো জাতন্তি অত্তনা কতদুচ্চরিততো উপ্পন্নং.

অন্তমসোতি হেট্ঠিমতো. সৰচনীযম্পি করোতি ‘‘ন তে লব্ভা ইতো পক্কমিতু’’ন্তি ইতো ইমম্হা গামাদিনা গন্তুং ন লব্ভা. ন সক্কা বহি নিক্খমিতুন্তি পলিবোধং সঙ্গং করোতি. ধনজানিপচ্চযাপীতি ধনপরিহানিকারণাপি. রাজা তস্স ৰিৰিধা কম্মকারণা কারাপেতি. কসাহিপি তাল়েতীতি কসাদণ্ডকেহি পোথেতি. ৰেত্তেহিপি তাল়েতীতি সকণ্টকৰেত্তলতাহি পোথেতি. অড্ঢদণ্ডকেহীতিআদযো হেট্ঠা ৰুত্তনযাযেৰ. সুনখেহিপি খাদাপেতীতি কতিপযানি দিৰসানি আহারে অদত্ৰা ছাতসুনখেহি খাদাপেতি. তে মুহুত্তেন অট্ঠিকসঙ্খলিকমেৰ করোতি. সূলে উত্তাসেতীতি সূলং আরোপেতি. রাজা ইমেসং চতুন্নং দণ্ডানং ইস্সরোতি ইমাসং চতুন্নং আণানং কাতুং রাজা সমত্থো.

সকেন কম্মেনাতি সযংকতেন কম্মেন. তমেনং নিরযপালাতি এত্থ একচ্চে থেরা ‘‘নিরযপালা নাম নত্থি, যন্তরূপং ৰিয কম্মমেৰ কারণং কারেতী’’তি ৰদন্তি. তেসং তং ‘‘অত্থি নিরযেসু নিরযপালাতি, আমন্তা. অত্থি চ কারণিকা’’তিআদিনা নযেন অভিধম্মে (কথা. ৮৬৬ আদযো) পটিসেধিতমেৰ. যথা হি মনুস্সলোকে কম্মকারণকারকা অত্থি, এৰমেৰ নিরযেসু নিরযপালা অত্থীতি. তত্তং অযোখিলন্তি তিগাৰুতং অত্তভাৰং সম্পজ্জলিতায লোহপথৰিযা উত্তানকং নিপজ্জাপেত্ৰা দক্খিণহত্থে তালপ্পমাণং অযসূলং পৰেসেন্তি, তথা ৰামহত্থাদীসু. যথা চ উত্তানকং নিপজ্জাপেত্ৰা এৰং উরেনপি ৰামপস্সেনপি দক্খিণপস্সেনপি নিপজ্জাপেত্ৰা তং কম্মকারণং করোন্তিযেৰ.

সংৰেসেত্ৰাতি জলিতায লোহপথৰিযা তিগাৰুতং অত্তভাৰং নিপজ্জাপেত্ৰা. কুঠারীহীতি মহতীহি গেহচ্ছাদনস্স একপক্খমত্তাহি কুঠারীহি তচ্ছেন্তি, লোহিতং নদী হুত্ৰা সন্দতি, লোহপথৰিতো জালা উট্ঠহিত্ৰা তচ্ছিতট্ঠানং গণ্হাতি, মহাদুক্খং উপ্পজ্জতি, তচ্ছন্তা পন সুত্তাহতং করিত্ৰা দারু ৰিয অট্ঠংসম্পি ছল়ংসম্পি করোন্তি. ৰাসীহীতি মহাসুপ্পপমাণাহি ৰাসীহি. রথে যোজেত্ৰাতি সদ্ধিং যুগযোত্তউপক্খরচক্ককুব্বরপাজনেহি সব্বতো পজ্জলিতে রথে যোজেত্ৰা. মহন্তন্তি মহাকূটাগারপ্পমাণং. আরোপেন্তীতি সম্পজ্জলিতেহি অযমুগ্গরেহি পোথেন্তা আরোপেন্তি. সকিম্পি উদ্ধন্তি সুপক্কুত্থিতায উক্খলিযা পক্খিত্ততণ্ডুলং ৰিয উদ্ধং অধো তিরিযঞ্চ গচ্ছতি. মহানিরযেতি অৰীচিমহানিরযম্হি.

চতুক্কণ্ণোতি চতুরস্সমঞ্জূসাসদিসো. ৰিভত্তোতি চতুদ্ৰারৰসেন ৰিভত্তো. ভাগসো মিতোতি দ্ৰারৰীথীনং ৰসেন ভাগে ঠপেত্ৰা ঠপেত্ৰা ৰিভত্তো. পরিযন্তোতি পরিক্খিত্তো. অযসাতি উপরি নৰযোজনিকেন অযপত্তেন ছাদিতো. সমন্তা যোজনসতং ফরিত্ৰা তিট্ঠতীতি এৰং ফরিত্ৰা তিট্ঠতি, যথা সমন্তা যোজনসতে ঠত্ৰা ওলোকেন্তস্স অক্খীনি যমকগোল়কা ৰিয নিক্খমন্তি. কদরিযাতপনাতি সব্বেপি তে উস্সদেহি সদ্ধিং অট্ঠ মহানিরযা কদরিযা নিচ্চং তপন্তীতি কদরিযাতপনা. বলৰদুক্খতায ঘোরা. কপ্পট্ঠিকানং অচ্চীনং অত্থিতায অচ্চিমন্তো. আসাদেতুং ঘট্টেতুং দুক্করতায দুরাসদা. দিট্ঠমত্তা ৰা সুতমত্তা ৰা লোমানি হংসেন্তীতি লোমহংসনরূপা. ভীসনতায ভিস্মা. ভযজননতায পটিভযা. সুখাভাৰেন দুখা.

পুরত্থিমায ভিত্তিযাতিআদিগাথানং এৰং অৰীচিনিরযোতি পরিযন্তং কত্ৰা অযং সঙ্খেপত্থো – অগ্গিজালানং ৰা পন সত্তানং ৰা তেসং দুক্খস্স ৰা ৰীচি অন্তরং নত্থি এত্থাতি অৰীচি. তত্র হি পুরত্থিমাদীহি ভিত্তীহি জালারাসি উট্ঠহিত্ৰা পাপকম্মিনো পুগ্গলে ঝাপেন্তো পচ্ছিমাদীসু ভিত্তীসু পটিহঞ্ঞতি পহরতি, তা চ ভিত্তিযো ৰিনিৰিজ্ঝিত্ৰা পরতো যোজনসতং গণ্হাতি, হেট্ঠা উট্ঠিতা উপরি পটিহঞ্ঞতি, উপরি উট্ঠিতা হেট্ঠা পটিহঞ্ঞতি. এৰং তাৰেত্থ জালানং ৰীচি নাম নত্থি. তস্স পন অন্তো যোজনসতট্ঠানং খীরৰল্লিপিট্ঠস্স পূরিতনাল়ি ৰিয সত্তেহি নিরন্তরং পূরিতং চতূহি ইরিযাপথেহি পচ্চন্তানং সত্তানং পমাণং নত্থি, ন চ অঞ্ঞমঞ্ঞং ব্যাবাধেন্তি, সকসকট্ঠানেযেৰ পচ্চন্তি. এৰমেত্থ সত্তানং ৰীচি নাম নত্থি. যথা পন জিৰ্হগ্গে ছ মধুবিন্দূনি সত্তমস্স তম্বলোহবিন্দুনো অনুদহনবলৰতায অব্বোহারিকানি হোন্তি, তথা তত্থ অনুদহনবলৰতায সেসা ছ অকুসলৰিপাকুপেক্খা অব্বোহারিকা হোন্তি, দুক্খমেৰ নিরন্তরং পঞ্ঞাযতি. এৰমেত্থ দুক্খস্স ৰীচি নাম নত্থি. নিরস্সাদট্ঠেন নিরযো.

তত্থ সত্তা মহালুদ্দাতি তস্মিং নিব্বত্তা সত্তা মহন্তা লুদ্দা. মহাকিব্বিসকারিনোতি মহন্তদারুণকম্মকারিনো. অচ্চন্তপাপকম্মন্তাতি একংসেন পাপকম্মিনো. পচ্চন্তি ন চ মিয্যরেতি ছন্নং জালানমন্তরে পচ্চন্তি, ন চ মিয্যন্তি. জাতৰেদসমো কাযোতি তেসং সরীরং অগ্গিসদিসং. তেসং নিরযৰাসিনন্তি তেসং পাপকম্মানং নিরযৰাসীনং. পস্স কম্মানং দল়্হত্তন্তি পাপকম্মানং থিরভাৰং ওলোকেহি. ন ভস্মা হোতি নপী মসীতি ছারিকাপি ন হোতি অঙ্গারোপি. পুরত্থিমেনাতি যদা তং দ্ৰারং অপারুতং হোতি, অথ তদভিমুখা ধাৰন্তি, তেসং তত্থ ছৰিআদীনি ঝাযন্তি. দ্ৰারসমীপং পত্তানঞ্চ তেসং তং পীধীযতি, পচ্ছিমং অপারুতং ৰিয খাযতি. এস নযো সব্বত্থ. অভিনিক্খমিতাসা তেতি নিরযা নিক্খমিতুং আসা এতেসন্তি নিক্খমিতাসা. মোক্খগৰেসিনোতি মুঞ্চনুপাযং এসন্তা গৰেসন্তাপি. ন তে ততো নিক্খমিতুং, লভন্তি কম্মপচ্চযাতি তে সত্তা নিরযতো নিক্খমনদ্ৰারং পাপকম্মপচ্চযা নাধিগচ্ছন্তি. তেসঞ্চ পাপকম্মন্তং, অৰিপক্কং কতং বহুন্তি তেসঞ্চ সত্তানং লামকং দারুণকম্মং অৰিপাকং বহুৰিধং নানপ্পকারং অদিন্নৰিপাকং কতং উপচিতং অত্থি.

সংৰেগন্তি ৰিনিলনং. উব্বেগন্তি ঠিতট্ঠানতো গমনং. উত্রাসন্তি উব্বেজনং অসন্নিট্ঠানং. ভযন্তি চিত্তুত্রাসনং. পীল়নন্তি ঘট্টনং. ঘট্টনন্তি পীল়াকরণং. উপদ্দৰন্তি ঈতিং. উপসগ্গন্তি রুন্ধনং.

১৭১. ইদানি যথানেন সংৰিজিতং, তং পকারং দস্সেন্তো ‘‘ফন্দমান’’ন্তিআদিমাহ. তত্থ ফন্দমানন্তি তণ্হাদিট্ঠীহি কম্পমানং. অপ্পোদকেতি অপ্পে উদকে. অঞ্ঞমঞ্ঞেহি ব্যারুদ্ধে দিস্ৰাতি নানাসত্তে চ অঞ্ঞমঞ্ঞেহি সদ্ধিং ৰিরুদ্ধে দিস্ৰা. মং ভযমাৰিসীতি মং ভযং পৰিট্ঠং.

কিলেসফন্দনায ফন্দমানন্তি রাগাদিকিলেসচলনায চলমানং. পযোগোতি কাযৰচীমনোপযোগো.

ৰিরুদ্ধাতি ৰিরোধমাপন্না. পটিৰিরুদ্ধাতি পটিমুখং হুত্ৰা ৰিরোধমাপন্না, সুট্ঠু ৰিরুদ্ধা ৰা. আহতাতি কোধেন আহতা পহতা. পচ্চাহতাতি পটিমল্লা হুত্ৰা আহতা. আঘাতিতাতি ঘট্টিতা. পচ্চাঘাতিতাতি ৰিসেসেন ঘট্টিতা. পাণীহিপি উপক্কমন্তীতি হত্থেহিপি পহরন্তি.

১৭২. সমন্তমসারো লোকোতি নিরযং আদিং কত্ৰা সমন্ততো লোকো অসারো নিচ্চসারাদিরহিতো. দিসা সব্বা সমেরিতাতি সব্বা দিসা অনিচ্চতায কম্পিতা. ইচ্ছং ভৰনমত্তনোতি অত্তনো তাণং ইচ্ছন্তো. নাদ্দসাসিং অনোসিতন্তি কিঞ্চি ঠানং জরাদীহি অনজ্ঝাৰুট্ঠং নাদ্দক্খিন্তি.

অসারোতি ন সারো, সারৰিরহিতো ৰা. নিস্সারোতি সব্বেন সব্বং সারৰিরহিতো. সারাপগতোতি সারতো অপগতো. নিচ্চসারসারেন ৰাতি সততসারসঙ্খাতেন সারেন ৰা. উপরিপদদ্ৰযেপি এসেৰ নযো. যে পুরত্থিমায দিসায সঙ্খারাতি যে পুরত্থিমায দিসায পচ্চযেহি সঙ্গম্ম সমাগম্ম কতা সঙ্খারা. তেপি এরিতাতি তেপি সঙ্খারা কম্পিতা. সমেরিতাতি সম্মা কম্পিতা. চলিতাতি চলনং গতা. ঘট্টিতাতি উদযব্বযেন পীল়িতা. অনিচ্চতাযাতি হুত্ৰা অভাৰতায. জাতিযা অনুগতাতি নিব্বত্তিযা অনুপৰিট্ঠা. জরায অনুসটাতি পরিপক্কতায অনুপত্থটা. ব্যাধিনা অভিভূতাতি চাতুৰিসমেন উপ্পন্নব্যাধিনা অজ্ঝোত্থটা. মরণেন অব্ভাহতাতি মচ্চুনা অভিআহতা পহতা. অতাণাতি রক্খৰিরহিতা. অলেণাতি লেণৰিরহিতা. অসরণাতি নত্থি এতেসং সরণন্তি অসরণা. অসরণীভূতাতি সযং সরণকিচ্চং ন করোন্তীতি অসরণীভূতা.

অত্তনো ভৰনন্তি নিদ্দেসপদস্স উদ্দেসপদং. তাণন্তি পালনং. লেণন্তি লেণট্ঠানং. সরণন্তি দুক্খনাসনং. গতিন্তি পতিট্ঠং. পরাযনন্তি পরং অযনং. অজ্ঝোসিতংযেৰ অদ্দসন্তি জরাদীহি মদ্দিতংযেৰ অদ্দক্খিং. সব্বং যোব্বঞ্ঞন্তি যোব্বনভাৰো যোব্বঞ্ঞং, সচেতনানং সব্বং যোব্বঞ্ঞং. জরায ওসিতন্তি পরিপাকায জরায অৰসিতং মদ্দিতং. এৰং সব্বত্থ.

১৭৩. ওসানে ত্ৰেৰ ব্যারুদ্ধে, দিস্ৰা মে অরতী অহূতি যোব্বঞ্ঞাদীনং ওসানেযেৰ অন্তগমকে এৰ ৰিনাসকে এৰ জরাদীহি ব্যারুদ্ধে আহতচিত্তে সত্তে দিস্ৰা অরতি মে অহোসি. অথেত্থ সল্লন্তি অথ এতেসু সত্তেসু রাগাদিসল্লং. হদযস্সিতন্তি চিত্তনিস্সিতং.

যোব্বঞ্ঞং জরা ওসাপেতীতি জরা অত্থঙ্গমেতি ৰিনাসেতি. এৰং সব্বত্থ.

১৭৪. ‘‘কথং আনুভাৰং সল্ল’’ন্তি চে? যেন সল্লেন ওতিণ্ণোতি গাথা. তত্থ দিসা সব্বা ৰিধাৰতীতি সব্বা দুচ্চরিতদিসাপি পুরত্থিমাদিদিসাপি ৰিদিসাপি ধাৰতি. তমেৰ সল্লমব্বুয্হ, ন ধাৰতি ন সীদতীতি তমেৰ সল্লং উদ্ধরিত্ৰা তা চ দিসা ন ধাৰতি, চতুরোঘে চ ন সীদতি.

অঞ্ঞাণন্তিআদীসু ঞাণদস্সনপটিপক্খতো অঞ্ঞাণং অদস্সনং. অভিমুখো হুত্ৰা ধম্মেন ন সমেতি ন সমাগচ্ছতীতি অনভিসমযো. অনুরূপতো ধম্মে বুজ্ঝতীতি অনুবোধো. তপ্পটিপক্খতায অননুবোধো. অনিচ্চাদীহি সদ্ধিং যোজেত্ৰা ন বুজ্ঝতীতি অসম্বোধো. অসন্তং অসমঞ্চ বুজ্ঝতীতিপি অসম্বোধো. চতুসচ্চধম্মং ন পটিৰিজ্ঝতীতি অপ্পটিৰেধো. রূপাদীসু একধম্মম্পি অনিচ্চাদিসামঞ্ঞতো ন সঙ্গণ্হাতীতি অসঙ্গাহণা. তমেৰ ধম্মং ন পরিযোগাহতীতি অপরিযোগাহণা. ন সমং পেক্খতীতি অসমপেক্খনা. ধম্মানং সভাৰং পতি ন অপেক্খতীতি অপচ্চৰেক্খণা.

কুসলাকুসলকম্মেসু ৰিপরীতৰুত্তিযা সভাৰগহণাভাৰেন ৰা একম্পি কম্মং এতস্স পচ্চক্খং নত্থি, সযং ৰা কস্সচি ধম্মস্স পচ্চক্খকরণং নাম ন হোতীতি অপচ্চক্খকম্মং. যং এতস্মিং অনুপ্পজ্জমানে চিত্তসন্তানং মেজ্ঝং ভৰেয্য সুচি ৰোদানং, তং দুট্ঠুং মেজ্ঝং ইমিনাতি দুম্মেজ্ঝং. বালানং ভাৰো বাল্যং. মুয্হতীতি মোহো. বলৰতরো মোহো পমোহো. সমন্ততো মুয্হতীতি সম্মোহো. ৰিজ্জায পটিপক্খভাৰতো ন ৰিজ্জাতি অৰিজ্জা. ওঘযোগত্থো ৰুত্তোযেৰ. থামগতট্ঠেন অনুসেতীতি অনুসযো. চিত্তং পরিযুট্ঠাতি অভিভৰতীতি পরিযুট্ঠানং. হিতগ্গহণাভাৰেন হিতাভিমুখং গন্তুং ন সক্কোতি অঞ্ঞদত্থু লঙ্গতিযেৰাতি লঙ্গী, খঞ্জতীতি অত্থো. দুরুগ্ঘাটনট্ঠেন ৰা লঙ্গী. যথা হি মহাপলিঘসঙ্খাতা লঙ্গী দুরুগ্ঘাটা হোতি, এৰমযম্পি লঙ্গী ৰিযাতি লঙ্গী. সেসং উত্তানত্থমেৰ.

যা এৰরূপা কঙ্খাতি এত্থ কঙ্খনৰসেন কঙ্খা. কঙ্খং আনযতীতি কঙ্খাযনা. পুরিমকঙ্খা হি উত্তরকঙ্খং আনযতি নাম. আকারৰসেন ৰা এতং ৰুত্তং. কঙ্খাসমঙ্গিচিত্তং কঙ্খায আযিতত্তা কঙ্খাযিতং নাম. তস্স ভাৰো কঙ্খাযিতত্তং. ৰিমতীতি ৰিগতা মতি ৰিমতি. ৰিচিকিচ্ছাতি ৰিগতা চিকিচ্ছা ৰিচিকিচ্ছা, সভাৰং ৰা ৰিচিনন্তো কিচ্ছতি কিলমতি এতাযাতি ৰিচিকিচ্ছা. সা সংসযলক্খণা, কম্পনরসা, অনিচ্ছযপচ্চুপট্ঠানা, অনেকংসগ্গাহপচ্চুপট্ঠানা ৰা, অযোনিসোমনসিকারপদট্ঠানা, পটিপত্তিযা অন্তরাযকরাতি দট্ঠব্বা.

কম্পনট্ঠেন দ্ৰিধা এল়যতীতি দ্ৰেল়্হকং. পটিপত্তিনিৰারণেন দ্ৰিধাপথো ৰিযাতি দ্ৰেধাপথো. ‘‘নিচ্চং ৰা ইদং অনিচ্চং ৰা’’তিআদিপৰত্তিযা একস্মিং আকারে সণ্ঠাতুং অসমত্থতায সমন্ততো সেতীতি সংসযো. একংসং গহেতুং অসমত্থতায ন একংসগ্গাহোতি অনেকংসগ্গাহো. নিচ্ছেতুং অসক্কোন্তী আরম্মণতো ওসক্কতীতি আসপ্পনা. ওগাহিতুং অসক্কোন্তী পরিসমন্ততো সপ্পতীতি পরিসপ্পনা. পরিযোগাহিতুং অসমত্থতায অপরিযোগাহণা. নিচ্ছযৰসেন আরম্মণে পৰত্তিতুং অসমত্থতায ছম্ভিতত্তং চিত্তস্স, থদ্ধভাৰোতি অত্থো. ৰিচিকিচ্ছা হি উপ্পজ্জিত্ৰা চিত্তং থদ্ধং করোতি, যস্মা পন সা উপ্পজ্জমানা আরম্মণং গহেত্ৰা মনং ৰিলিখন্তী ৰিয, তস্মা মনোৰিলেখোতি ৰুত্তা.

ৰিদ্ধোতি সল্লেন লদ্ধপ্পহারো. ফুট্ঠোতি ঘট্টিতো. পরেতোতি পীল়িতো. ধাৰতীতি পুরতো গচ্ছতি. ৰিধাৰতীতি অনেকৰিধেন গচ্ছতি. সন্ধাৰতীতি ৰেগেন ধাৰতি. সংসরতীতি ইতো চিতো চ চরতি.

অচেলকোতি নিচ্চোলো, নগ্গোতি অত্থো. মুত্তাচারোতি ৰিসট্ঠাচারো, উচ্চারকম্মাদীসু লোকিযকুলপুত্তাচারেন ৰিরহিতো ঠিতকোৰ উচ্চারং করোতি, পস্সাৰং করোতি, খাদতি ভুঞ্জতি. হত্থাপলেখনোতি হত্থে পিণ্ডম্হি ঠিতে জিৰ্হায হত্থং অপলিখতি, উচ্চারং ৰা কত্ৰা হত্থম্হিযেৰ দণ্ডকসঞ্ঞী হুত্ৰা হত্থেন অপলিখতি. তে কির দণ্ডকং ‘‘সত্তো’’তি পঞ্ঞপেন্তি. ভিক্খাগহণত্থং ‘‘এহি ভদন্তে’’তি ৰুত্তো ন এতীতি ন এহিভদন্তিকো. তেন হি ‘‘তিট্ঠ ভদন্তে’’তি ৰুত্তোপি ন তিট্ঠতীতি ন তিট্ঠভদন্তিকো. তদুভযম্পি কির সো ‘‘এতস্স ৰচনং কতং ভৰিস্সতী’’তি ন করোতি.

অভিহটন্তি পুরেতরং গহেত্ৰা আহটং ভিক্খং. উদ্দিস্সকতন্তি ‘‘ইদং তুম্হে উদ্দিস্স কত’’ন্তি এৰং আরোচিতং ভিক্খং. ন নিমন্তনন্তি ‘‘অসুকং নাম কুলং ৰা ৰীথিং ৰা গামং ৰা পৰিসেয্যাথা’’তি এৰং নিমন্তিতভিক্খম্পি ন সাদিযতি ন গণ্হাতি. ন কুম্ভিমুখাতি কুম্ভিতো উদ্ধরিত্ৰা দিয্যমানং ভিক্খং ন গণ্হাতি. ন কল়োপিমুখাতি কল়োপীতি উক্খলি ৰা পচ্ছি ৰা, ততোপি ন গণ্হাতি. কস্মা? কুম্ভিকল়োপিযো মং নিস্সায কটচ্ছুনা পহারং লভন্তীতি. ন এল়কমন্তরন্তি উম্মারং অন্তরং করিত্ৰা দিয্যমানং ন গণ্হাতি. কস্মা? অযং মং নিস্সায অন্তরকরণং লভতীতি. দণ্ডমুসলেসুপি এসেৰ নযো.

ন দ্ৰিন্নন্তি দ্ৰীসু ভুঞ্জমানেসু একস্মিং উট্ঠায দেন্তে ন গণ্হাতি. কস্মা? কবল়ন্তরাযো হোতীতি. ন গব্ভিনিযাতিআদীসু পন ‘‘গব্ভিনিযা কুচ্ছিযং দারকো কিলমতী’’তি, পাযন্তিযা দারকস্স খীরন্তরাযো হোতী’’তি, ‘‘পুরিসন্তরগতায রতিঅন্তরাযো হোতী’’তি ন গণ্হাতি. ন সংকিত্তীসূতি সংকিত্তেত্ৰা কতভত্তেসু. দুব্ভিক্খসমযে কির অচেলকসাৰকা অচেলকানমত্থায ততো ততো তণ্ডুলাদীনি সমাদপেত্ৰা ভত্তং পচন্তি, উক্কট্ঠো অচেলকো ততোপি ন পটিগ্গণ্হাতি. ন যত্থ সাতি যত্থ সুনখো ‘‘পিণ্ডং লভিস্সামী’’তি উপট্ঠিতো হোতি, তত্থ তস্স অদত্ৰা আহটং ন গণ্হাতি. কস্মা? এতস্স পিণ্ডন্তরাযো হোতীতি. সণ্ডসণ্ডচারিনীতি সমূহসমূহচারিনী. সচে হি অচেলকং দিস্ৰা ‘‘ইমস্স ভিক্খং দস্সামা’’তি মনুস্সা ভত্তগেহং পৰিসন্তি, তেসু চ পৰিসন্তেসু কল়োপিমুখাদীসু নিলীনা মক্খিকা উপ্পতিত্ৰা সণ্ডসণ্ডা চরন্তি. ততো আহটং ভিক্খং ন গণ্হাতি. কস্মা? মং নিস্সায মক্খিকানং গোচরন্তরাযো জাতোতি. থুসোদকন্তি সব্বসস্সসম্ভারেহি কতং সোৰীরকং. এত্থ চ সুরাপানমেৰ সাৰজ্জং, অযং পন সব্বেসুপি সাৰজ্জসঞ্ঞী.

একাগারিকোতি যো একস্মিংযেৰ গেহে ভিক্খং লভিত্ৰা নিৰত্ততি. একালোপিকোতি যো একেনেৰ আলোপেন যাপেতি. দ্ৰাগারিকাদীসুপি এসেৰ নযো. একিস্সাপি দত্তিযাতি একায দত্তিযা. দত্তি নাম একা খুদ্দকপাতি হোতি, যত্থ অগ্গভিক্খং পক্খিপিত্ৰা ঠপেন্তি. একাহিকন্তি একদিৰসন্তরিকং. অড্ঢমাসিকন্তি অড্ঢমাসন্তরিকং. পরিযাযভত্তভোজনন্তি ৰারভত্তভোজনং, একাহৰারেন দ্ৰীহৰারেন সত্তাহৰারেন অড্ঢমাসৰারেনাতি এৰং দিৰসৰারেন আভতং ভত্তভোজনং.

সাকভক্খোতিআদীনি ৰুত্তত্থানেৰ. উব্ভট্ঠকোতি উদ্ধং ঠিতকো. উক্কুটিকপ্পধানমনুযুত্তোতি উক্কুটিকং ৰীরিযং অনুযুত্তো. গচ্ছন্তোপি উক্কুটিকোৰ হুত্ৰা উপ্পতিত্ৰা উপ্পতিত্ৰা গচ্ছতি. কণ্টকাপস্সযিকোতি অযকণ্টকে ৰা পকতিকণ্টকে ৰা ভূমিযং কোট্টেত্ৰা তত্থ চম্মং অত্থরিত্ৰা ঠানচঙ্কমাদীনি করোতি. সেয্যন্তি সযন্তোপি তত্থেৰ সেয্যং কপ্পেতি. ফলকসেয্যন্তি রুক্খফলকে সেয্যং. থণ্ডিলসেয্যন্তি থণ্ডিলে উচ্চে ভূমিট্ঠানে সেয্যং. একপস্সযিকোতি একপস্সেনেৰ সযতি. রজোজল্লধরোতি সরীরং তেলেন মক্খেত্ৰা রজুট্ঠানট্ঠানে তিট্ঠতি, অথস্স সরীরে রজোজল্লং লগ্গতি, তং ধারেতি. যথাসন্থতিকোতি লদ্ধং আসনং অকোপেত্ৰা যদেৰ লভতি, তত্থেৰ নিসীদনসীলো. ৰেকটিকোতি ৰিকটখাদনসীলো, ৰিকটন্তি গূথং ৰুচ্চতি. অপানকোতি পটিক্খিত্তসীতুদকপানো. সাযং ততিযং অস্সাতি সাযততিযকং. পাতো মজ্ঝন্হিকে সাযন্তি দিৰসস্স তিক্খত্তুং ‘‘পাপং পৰাহেস্সামী’’তি উদকোরোহনানুযোগং অনুযুত্তো ৰিহরতি.

তে সল্লে অভিসঙ্খরোতীতি তে রাগাদিসত্তসল্লে অভিনিব্বত্তেতি. অভিসঙ্খরোন্তোতি অভিনিব্বত্তেন্তো. সল্লাভিসঙ্খারৰসেনাতি সল্লাভিনিব্বত্তাপনকারণা. পুরত্থিমং দিসং ধাৰতীতি পুরিমং দিসং গচ্ছতি. তে সল্লাভিসঙ্খারা অপ্পহীনাতি এতে রাগাদিসল্লা পযোগা নপ্পহীনা. সল্লাভিসঙ্খারানং অপ্পহীনত্তাতি সল্লপযোগানং অপ্পহীনভাৰেন. গতিযা ধাৰতীতি গতিযং ধাৰতি. গতিযা গতিন্তি গতিতো গতিং.

ন সীদতীতি ন নিমুজ্জতি. ন সংসীদতীতি ন সমন্ততো মুজ্জতি. ন ওসীদতীতি ন ওসক্কতি. ন অৰসীদতীতি ন পচ্চোসক্কতি. ন অৰগচ্ছতীতি ন হেট্ঠা গচ্ছতি.

১৭৫. এৰং মহানুভাৰেন সল্লেন ওতিণ্ণেসু চ সত্তেসু – তত্থ সিক্খানুগীযন্তি, যানি লোকে গধিতানীতি গাথা. তস্সত্থো – যে লোকে পঞ্চ কামগুণা পটিলাভায গিজ্ঝন্তীতি কত্ৰা ‘‘গধিতানী’’তি ৰুচ্চন্তি, চিরকালসেৰিতত্তা ৰা ‘‘গধিতানী’’তি ৰুচ্চন্তি. তত্থ তং নিমিত্তং হত্থিসিক্খাদিকা অনেকা সিক্খা কথীযন্তি, উগ্গয্হন্তি ৰা. পস্সথ যাৰ সমত্থো ৰাযং লোকো, যতো পণ্ডিতো কুলপুত্তো তেসু ৰা গধিতেসু তাসু ৰা সিক্খাসু অধিমুত্তো ন সিযা, অঞ্ঞদত্থু অনিচ্চাদিদস্সনেন নিব্বিজ্ঝ সব্বসো কামে. অত্তনো নিব্বানমেৰ সিক্খেতি.

পটিৰিজ্ঝিত্ৰাতি ঞাণেন নিক্খমেত্ৰা ৰা নিব্বিজ্ঝিত্ৰা ৰা.

১৭৬. ইদানি যথা নিব্বানায সিক্খিতব্বং, তং দস্সেন্তো ‘‘সচ্চো সিযা’’তিআদিমাহ. তত্থ সচ্চোতি ৰাচাসচ্চেন ঞাণসচ্চেন মগ্গসচ্চেন চ সমন্নাগতো. রিত্তপেসুণোতি পহীনপেসুণো. ৰেৰিচ্ছন্তি মচ্ছরিযং.

১৭৭. নিদ্দং তন্দিং সহে থীনন্তি পচলাযিকঞ্চ কাযালসিযঞ্চ চিত্তালসিযঞ্চাতি ইমে তযো ধম্মে অভিভৰেয্য. নিব্বানমানসোতি নিব্বাননিন্নচিত্তো.

কাযস্স অকল্যতাতি খন্ধত্তযসঙ্খাতস্স নামকাযস্স গিলানভাৰো. গিলানো হি অকল্লকোতি ৰুচ্চতি. ৰিনযেপি (পারা. ১৫১) ৰুত্তং – ‘‘নাহং, ভন্তে, অকল্লকো’’তি. অকম্মঞ্ঞতাতি কাযগেলঞ্ঞসঙ্খাতো অকম্মঞ্ঞতাকারো. মেঘো ৰিয আকাসং কাযং ওনয্হতীতি ওনাহো. সব্বতো ভাগেন ওনাহো পরিযোনাহো. অব্ভন্তরে সমোরুন্ধতীতি অন্তোসমোরোধো. মেধতীতি মিদ্ধং, অকম্মঞ্ঞভাৰেন ৰিহিংসতীতি অত্থো. সুপন্তি তেনাতি সুপ্পং. অক্খিদলাদীনং পচলভাৰং করোতীতি পচলাযিকা. সুপ্পনা সুপ্পিতত্তন্তি আকারভাৰনিদ্দেসা. ওলীযনাতি ওলীযনাকারো. দুতিযং উপসগ্গৰসেন ৰড্ঢিতং. লীনন্তি অৰিপ্ফারিকতায পটিকুটিকং. ইতরে দ্ৰে আকারভাৰনিদ্দেসা. থিনন্তি সপ্পিপিণ্ডো ৰিয অৰিপ্ফারিকতায ঘনভাৰেন ঠিতং. থিযনাতি আকারনিদ্দেসো. থিযিতস্স ভাৰো থিযিতত্তং, অৰিপ্ফারৰসেন থদ্ধতাতি অত্থো.

সব্বসঙ্খারধাতুযাতি নিব্বাননিন্নমানসো সব্বতেভূমিকসঙ্খাতধাতুযা. চিত্তং পটিৰাপেত্ৰাতি চিত্তং নিৰত্তাপেত্ৰা. এতং সন্তন্তি এতং নিব্বানং. কিলেসসন্ততায সন্তং. অতপ্পকট্ঠেন পণীতং.

ন পণ্ডিতা উপধিসুখস্স হেতূতি দব্বজাতিকা কামসুখস্স কারণা দানানি ন দেন্তি. কামঞ্চ তে উপধিপরিক্খযাযাতি একংসেন তে পণ্ডিতা কামক্খযায কামক্খেপনত্থং দানানি দেন্তি. অপুনব্ভৰাযাতি নিব্বানত্থায. ঝানানি ভাৰেন্তীতি পঠমজ্ঝানাদীনি ৰড্ঢেন্তি. পুনব্ভৰাযাতি পুনব্ভৰকারণা. তে পণ্ডিতা নিব্বানং অভিমুখং হুত্ৰা দানং দদন্তি.

১৭৮. সাহসাতি রত্তস্স রাগচরিতাদিভেদা সাহসাকারণা. নিদ্দেসো উত্তানত্থোযেৰ.

১৭৯. পুরাণং নাভিনন্দেয্যাতি অতীতং রূপাদিং নাভিনন্দেয্য. নৰেতি পচ্চুপ্পন্নে. হীযমানেতি ৰিনস্সমানে. আকাসং ন সিতো সিযাতি তণ্হানিস্সিতো ন ভৰেয্য. তণ্হা হি রূপাদীনং আকাসনতো ‘‘আকাসো’’তি ৰুচ্চতি.

ৰেমানেতি অভৰমানে. ৰিগচ্ছমানেতি অপগচ্ছমানে.

‘‘আকাসতী’’তি ‘‘আকস্সতী’’তি চ দুৰিধো পাঠো.

১৮০. কিং কারণা আকাসং ন সিতো সিযাতি চে? গেধং ব্রূমীতি গাথা. তস্সত্থো – অহঞ্হি ইমং আকাসসঙ্খাতং তণ্হং রূপাদীসু গিজ্ঝনতো গেধং ব্রূমি ‘‘গেধো’’তি ৰদামি. কিঞ্চ ভিয্যো – অৰহননট্ঠেন ‘‘ওঘো’’তি চ আজৰনট্ঠেন ‘‘আজৰ’’ন্তি চ ‘‘ইদং ময্হং, ইদং ময্হ’’ন্তি জপ্পকারণতো ‘‘জপ্পন’’ন্তি চ দুম্মুঞ্চনট্ঠেন ‘‘আরম্মণ’’ন্তি চ কম্পকরণট্ঠেন ‘‘কম্পন’’ন্তি চ ব্রূমি, এসাৰ লোকস্স পলিবোধট্ঠেন দুরতিক্কমনীযট্ঠেন চ ‘‘কামপঙ্কো দুরচ্চযো’’তি.

আজৰন্তি আপটিসন্ধিতো জৰতি ধাৰতীতি আজৰং, ৰট্টমূলতায পুনব্ভৰে পটিসন্ধিদানতণ্হাযেতং অধিৰচনং. জপ্পনন্তি পত্থনা, তণ্হাযেতং অধিৰচনং. আরম্মণম্পি ৰুচ্চতি তণ্হাতি রূপাদীসু আরম্মণেসু উপ্পন্নতণ্হা মুচ্চিতুং অসক্কুণেয্যট্ঠেন আরম্মণাতি কথীযতি. কামপঙ্কোতি ওসীদনট্ঠেন কললং. কদ্দমোতি সঙ্গট্ঠেন কদ্দমো. তাপনট্ঠেন কিলেসো. নিয্যাসং ৰিয লগ্গাপনট্ঠেন পলিপো. রুন্ধিত্ৰা ধারণট্ঠেন পলিরোধো. এৰমেতং গেধাদিপরিযাযং আকাসং অনিস্সিতো.

১৮১. সচ্চা অৰোক্কমন্তি গাথা. তস্সত্থো – পুব্বে ৰুত্তা তিৰিধাপি সচ্চা অৰোক্কমং মোনেয্যপত্তিযা মুনীতি সঙ্খং গতো নিব্বানথলে তিট্ঠতি ব্রাহ্মণো, স ৰেএৰরূপো সব্বানি আযতনানি নিস্সজ্জিত্ৰা ‘‘সন্তো’’তি ৰুচ্চতি. নিদ্দেসে ৰত্তব্বং নত্থি.

১৮২. কিঞ্চ ভিয্যো – স ৰে ৰিদ্ৰাতি গাথা. তত্থ ঞত্ৰা ধম্মন্তি অনিচ্চাদিনযেন সঙ্খতধম্মং অঞ্ঞায. সম্মা সো লোকে ইরিযানোতি অসম্মাইরিযনকরানং কিলেসানং পহানা সম্মা সো লোকে ইরিযমানো.

১৮৩. এৰং অপিহেন্তো চ – যোধ কামেতি গাথা. তত্থ সঙ্গন্তি সত্তৰিধং সঙ্গং যো অচ্চতরি. নাজ্ঝেতীতি ন অভিজ্ঝাযতি.

১৮৪. তস্মা তুম্হেসুপি যো এৰরূপো হোতুং ইচ্ছতি, তং ৰদামি – যং পুব্বেতি গাথা. তত্থ যং পুব্বেতি অতীতে সঙ্খারে আরব্ভ উপ্পজ্জনধম্মং কিলেসজাতং অতীতং কম্মঞ্চ. পচ্ছা তে মাহু কিঞ্চনন্তি অনাগতেপি সঙ্খারে আরব্ভ উপ্পজ্জনধম্মং রাগাদিকিঞ্চনং মা অহু. মজ্ঝে চে নো গহেস্সসীতি পচ্চুপ্পন্নরূপাদিধম্মেপি ন গহেস্সসি চে. এৰং উপসন্তো চরিস্সসি.

অবীজং করোহীতি মগ্গঞাণেন ন বীজং করোহি. রাগকিঞ্চনন্তি রাগফন্দনং. দোসকিঞ্চনাদীসুপি এসেৰ নযো.

১৮৫. এৰং অরহত্তপ্পত্তিং দস্সেত্ৰা ইদানি অরহতো থুতিৰসেন ইতো পরা গাথাযো অভাসি. তত্থ সব্বসোতি গাথায মমাযিতন্তি মমত্তকরণং. ‘‘মম ইদ’’ন্তি গহিতং ৰা ৰত্থু. অসতা চ ন সোচতীতি অৰিজ্জমানকারণা অসন্তকারণা ন সোচতি. ন জীযতীতি জানিং নাধিগচ্ছতি.

অহু ৰত মেতি ময্হং অহোসি ৰত. তং ৰত মে নত্থীতি যং অতীতে অহোসি, তং ময্হং ইদানি ন সন্তি. সিযা ৰত মেতি যং ময্হং ভৰিস্সতি, তং ৰতাহং ন লভামীতি ইদানি অহং একংসেন ন পাপুণামি.

১৮৬. কিঞ্চ ভিয্যো – যস্স নত্থীতি গাথা. তত্থ কিঞ্চনন্তি কিঞ্চি রূপাদিধম্মজাতং.

অভিসঙ্খতন্তি কম্মেন সঙ্খরিতং. অভিসঞ্চেতযিতন্তি চিত্তেন রাসিকতং. অৰিজ্জায ত্ৰেৰাতি অৰিজ্জায তু এৰ. অসেসৰিরাগনিরোধাতি ৰিরাগসঙ্খাতেন মগ্গেন নিরৰসেসনিরোধা.

সুঞ্ঞতো লোকং অৰেক্খস্সূতি অৰসৰত্তিসল্লক্খণৰসেন ৰা তুচ্ছসঙ্খারসমনুপস্সনৰসেন ৰাতি দ্ৰীহাকারেহি সুঞ্ঞতো লোকং পস্স. অত্তানুদিট্ঠিং ঊহচ্চাতি সক্কাযদিট্ঠিং উদ্ধরিত্ৰা. এৰং মচ্চুতরো সিযাতি এৰং মরণস্স তরণো ভৰেয্য. এৰং লোকং অৰেক্খন্তন্তি এৰং খন্ধলোকং পস্সন্তং. মচ্চুরাজা ন পস্সতীতি মরণরাজা ন ওলোকেতি ন দক্খতি.

নাঞ্ঞং পত্থযতে কিঞ্চীতি অঞ্ঞং অপ্পমত্তকম্পি ন পত্থযতি ন পিহযতি. অঞ্ঞত্র অপ্পটিসন্ধিযাতি নিব্বানং ঠপেত্ৰা. ‘‘অঞ্ঞত্রপ্পটিসন্ধিযা’’তি একপদং কত্ৰাপি পঠন্তি.

১৮৭. কিঞ্চ ভিয্যো – অনিট্ঠুরীতি গাথা. তত্থ অনিট্ঠুরীতি অনিস্সুকী. ‘‘অনিট্ঠরী’’তিপি কেচি পঠন্তি. সব্বধী সমোতি সব্বত্থ সমো, উপেক্খকোতি অধিপ্পাযো. কিং ৰুত্তং হোতি? যো সো ‘‘নত্থি মে’’তি ন সোচতি, তমহং অৰিকম্পিনং পুগ্গলং পুট্ঠো সমানো অনিট্ঠুরী অননুগিদ্ধো, অনেজো সব্বধী সমোতি ইমং তস্মিং পুগ্গলে চতুব্বিধং আনিসংসং ব্রূমীতি.

নিট্ঠুরিযোতি ইস্সুকী. নিট্ঠুরভাৰো নিট্ঠুরিযং, তং নিস্সায এত্তকম্পি নত্থীতি খেল়পাতন্তি অত্থো. নিট্ঠুরিযকম্মন্তি নিট্ঠুরিযকরণং. গহট্ঠো ৰা হি গহট্ঠং ভিক্খু ৰা ভিক্খুং নিস্সায ৰসন্তো অপ্পমত্তকেনেৰ কুজ্ঝিত্ৰা তং নিস্সায এত্তকম্পি নত্থীতি খেল়ং পাতেত্ৰা পাদেন মদ্দন্তো ৰিয নিট্ঠুরিযং নাম করোতি. তস্স তং কম্মং ‘‘নিট্ঠুরিযকম্ম’’ন্তি ৰুচ্চতি. ইস্সাতি সভাৰনিদ্দেসো. ততো পরা দ্ৰে আকারভাৰনিদ্দেসা. ইতরত্তযং পরিযাযৰচনং. লক্খণাদিতো পনেসা পরসম্পত্তীনং উসূযনলক্খণা ইস্সা; তত্থ চ অনভিরতিরসা; ততো ৰিমুখভাৰপচ্চুপট্ঠানা; পরসম্পত্তিপদট্ঠানা.

লাভেপি ন ইঞ্জতীতি পচ্চযলাভে ন চলতি. অলাভেপীতি পচ্চযানং অলাভেপি.

১৮৮. কিঞ্চ ভিয্যো – অনেজস্সাতি গাথা. তত্থ নিসঙ্খতীতি পুঞ্ঞাভিসঙ্খারাদীসু যো কোচি সঙ্খারো. সো হি যস্মা নিসঙ্খরিযতি, নিসঙ্খরোতি ৰা, তস্মা ‘‘নিসঙ্খতী’’তি ৰুচ্চতি. ৰিযারম্ভাতি ৰিৰিধা পুঞ্ঞাভিসঙ্খারাদিকা আরম্ভা. খেমং পস্সতি সব্বধীতি সব্বত্থ অভযমেৰ পস্সতি.

আরম্ভাতি কম্মানং পঠমারম্ভা. ৰিযারম্ভাতি উপরূপরি ৰিৰিধআরম্ভনৰসেন ৰীরিযারম্ভা. তীসু ভৰেসু পটিসন্ধিজনককম্মানং এতং অধিৰচনং. তস্মা ৰিযারম্ভা আরতো.

১৮৯. এৰং পস্সন্তো ন সমেসূতি গাথা. তত্থ ন ৰদতেতি ‘‘সদিসোহমস্মী’’তিআদিনা মানৰসেন সমেসুপি অত্তানং ন ৰদতি ওমেসুপি উস্সেসুপি. নাদেতি ন নিরস্সতীতি রূপাদীসু কঞ্চি ধম্মং ন গণ্হাতি ন নিস্সজ্জতি. সেসং সব্বত্থ তত্থ তত্থ ৰুত্তনযত্তা পাকটমেৰ. এৰং অরহত্তনিকূটেনেৰ দেসনং নিট্ঠাপেসীতি.

সদ্ধম্মপ্পজ্জোতিকায মহানিদ্দেসট্ঠকথায

অত্তদণ্ডসুত্তনিদ্দেসৰণ্ণনা নিট্ঠিতা.

১৬. সারিপুত্তসুত্তনিদ্দেসৰণ্ণনা

১৯০. সোল়সমে ন মে দিট্ঠোতি সারিপুত্তসুত্তনিদ্দেসো. তত্থ ইতো পুব্বেতি ইতো সঙ্কস্সনগরে ওতরণতো পুব্বে. ৰগ্গুৰদোতি সুন্দরৰদো. তুসিতা গণিমাগতোতি তুসিতকাযা চৰিত্ৰা মাতুকুচ্ছিং আগতত্তা তুসিতা আগতো. গণাচরিযত্তা গণী. সন্তুট্ঠট্ঠেন ৰা তুসিতসঙ্খাতা দেৰলোকা গণিং আগতো, তুসিতানং ৰা অরহন্তানং গণিং আগতোতি.

ইমিনা চক্খুনাতি ইমিনা অত্তভাৰপরিযাপন্নেন পকতিমংসচক্খুনা. ইমিনা অত্তভাৰেনাতি ইমিনা পচ্ছিমেন অত্তভাৰেন. তাৰতিংসভৰনেতি তাৰতিংসদেৰলোকে. পারিচ্ছত্তকমূলেতি কোৰিল়াররুক্খস্স হেট্ঠা. পণ্ডুকম্বলসিলাযন্তি রত্তকম্বলসদিসপাসাণপিট্ঠে. ৰস্সং ৰুট্ঠোতি ৰুট্ঠৰস্সো. দেৰগণপরিৰুতোতি দেৰসঙ্ঘেন পরিৰারিতো. ওতিণ্ণোতি অৰতিণ্ণো. ইমং দস্সনং পুব্বেতি অঞ্ঞত্র ইমম্হা দস্সনা পুব্বে. ন দিট্ঠোতি অঞ্ঞদা ন দিট্ঠপুব্বো.

খত্তিযস্স ৰাতি খত্তিযস্স ৰদন্তস্স ন সুতো. ব্রাহ্মণাদীসুপি এসেৰ নযো.

মধুরৰদোতিআদীসু ব্যঞ্জনসম্পন্নং মধুরং ৰদতীতি মধুরৰদো. পেমজনকং পেমারহং ৰদতীতি পেমনীযৰদো. হদযঙ্গমচিত্তে ঠপনযোগ্যং ৰদতীতি হদযঙ্গমৰদো. করৰীকসকুণসদ্দো ৰিয মধুরঘোসো অস্সাতি করৰীকরুতমঞ্জুঘোসো. ৰিস্সট্ঠো চাতি অপলিবুদ্ধো তত্থ তত্থ অপক্খলনো. ৰিঞ্ঞেয্যো চাতি সুৰিজানেয্যো চ. মঞ্জু চাতি মধুরো চ. সৰনীযো চাতি কণ্ণসুখো চ. বিন্দু চাতি ঘনো চ. অৰিসারী চাতি ন পত্থটো চ. গম্ভীরো চাতি ন উত্তানো চ. নিন্নাদি চাতি ঘোসৰন্তো চ. অস্সাতি অস্স সত্থুনো. বহিদ্ধা পরিসাযাতি পরিসতো বহি. ন নিচ্ছরতীতি ন নিক্খমতি. কিংকারণা? এৰরূপো মধুরসদ্দো নিক্কারণা মা ৰিনস্সতূতি. ব্রহ্মস্সরোতি অঞ্ঞে ছিন্নস্সরাপি ভিন্নস্সরাপি কাকস্সরাপি হোন্তি, অযং পন মহাব্রহ্মুনো সরসদিসেন সরেন সমন্নাগতো. মহাব্রহ্মুনো হি পিত্তসেম্হেহি অপলিবুদ্ধত্তা সরো ৰিসুদ্ধো হোতি, ভগৰতাপি কতকম্মং ৰত্থুং সোধেতি, ৰত্থুনো সুদ্ধত্তা নাভিতো পট্ঠায সমুট্ঠহন্তো সরো ৰিসুদ্ধো অট্ঠঙ্গসমন্নাগতাৰ সমুট্ঠাতি. করৰীকো ৰিয ভণতীতি করৰীকভাণী, মত্তকরৰীকরুতমঞ্জুঘোসোতি অত্থো.

তারেতীতি অখেমন্তট্ঠানং অতিক্কামেতি. উত্তারেতীতি খেমন্তভূমিং উপনেন্তো তারেতি. নিত্তারেতীতি অখেমন্তট্ঠানতো নিক্খামেন্তো তারেতি. পতারেতীতি পরিগ্গহেত্ৰা তারেতি, হত্থেন পরিগ্গহেত্ৰা ৰিয তারেতীতি অত্থো. সব্বম্পেতং তারণুত্তারণাদিখেমন্তট্ঠানে ঠপনমেৰাতি আহ – ‘‘খেমন্তভূমিং সম্পাপেতী’’তি. সত্তেতি ৰেনেয্যসত্তে. মহাগহনতায মহানত্থতায দুন্নিত্তরিযতায চ জাতিযেৰ কন্তারো জাতিকন্তারো, তং জাতিকন্তারং.

গণস্স সুস্সূসতীতি গণো অস্স ৰচনং সুস্সূসতি সুণাতি উপলক্খেতি. সোতং ওদহতীতি সোতুকামতায সোতং অৰদহতি পতিট্ঠাপেতি. অঞ্ঞা চিত্তং উপট্ঠপেতীতি ঞাতুকামং চিত্তং পণিদহতি. গণং অকুসলা ৰুট্ঠাপেত্ৰাতি জনসমূহং অকোসল্লসম্ভূতা অকুসলা উট্ঠাপেত্ৰা. কুসলে পতিট্ঠাপেতীতি কোসল্লসম্ভূতে কুসলে ঠপেতি. সঙ্ঘীতি রাসিৰসেন সঙ্ঘো অস্স অত্থীতি সঙ্ঘী. পরিসৰসেন গণো অস্স অত্থীতি গণী. গণস্স আচরিযোতি গণাচরিযো.

১৯১. দুতিযগাথায সদেৰকস্স লোকস্স, যথা দিস্সতীতি সদেৰকস্স লোকস্স ৰিয মনুস্সানম্পি দিস্সতি. যথা ৰা দিস্সতীতি তচ্ছতো অৰিপরীততো দিস্সতি. চক্খুমাতি উত্তমচক্খুমা. একোতি পব্বজ্জাসঙ্খাতাদীহি একো. রতিন্তি নেক্খম্মরতিআদিং.

পতিরূপকোতি সুৰণ্ণপতিরূপকো কুণ্ডলো. মত্তিকাকুণ্ডলোৰাতি মত্তিকায কতকুণ্ডলো ৰিয. লোহড্ঢমাসোৰ সুৰণ্ণছন্নোতি সুৰণ্ণেন পটিচ্ছন্নো লোহমাসকো ৰিয. পরিৰারছন্নাতি পরিৰারেন ছাদিতা. অন্তো অসুদ্ধাতি অব্ভন্তরতো রাগাদীহি অপরিসুদ্ধা. বহি সোভমানাতি চীৰরাদীহি বাহিরতো সুন্দরা.

অকপ্পিতইরিযাপথা চাতি অসজ্জিতইরিযাপথা. পণিধিসম্পন্নাতি পরিপুণ্ণপত্থনা.

ৰিসুদ্ধসদ্দোতি পরিসুদ্ধকিত্তিসদ্দো, যথাভূতথুতিঘোসোতি অত্থো. গতকিত্তিসদ্দসিলোকোতি কিত্তিসদ্দঞ্চ সিলোকঞ্চ গহেত্ৰা চরণসীলো. কত্থ ৰিসুদ্ধসদ্দোতি চে? ‘‘নাগভৰনে চ সুপণ্ণভৰনে চা’’তিআদিনা নযেন ৰিত্থারেত্ৰা ৰুত্তট্ঠানে. ততো চ ভিয্যোতি ততো ৰুত্তপ্পকারতো চ ৰেনেয্যৰসেন অতিরেকতরোপি দিস্সতি.

সব্বং রাগতমন্তি সকলং রাগন্ধকারং. দোসতমাদীসুপি এসেৰ নযো. অন্ধকরণন্তি পঞ্ঞালোকনিৰারণকরণং. অচক্খুকরণন্তি পঞ্ঞাচক্খুনো অকরণং. অঞ্ঞাণকরণন্তি ঞাণেন অজাননকরণং. পঞ্ঞানিরোধিকন্তি পঞ্ঞানযননাসকং. ৰিঘাতপক্খিকন্তি পীল়াকোট্ঠাসিকং. অনিব্বানসংৰত্তনিকন্তি অপচ্চযঅমতনিব্বানত্থায ন সংৰত্তনিকং.

সব্বং তং তেন বোধিঞাণেন বুজ্ঝীতি তং সকলং তেন চতুমগ্গঞাণৰসেন বুজ্ঝি. পঠমমগ্গৰসেন জানি অনুবুজ্ঝি. দুতিযমগ্গৰসেন পুন অঞ্ঞাসি পটিৰিজ্ঝি. ততিযমগ্গৰসেন পটিৰেধং পাপুণি সম্বুজ্ঝি. চতুত্থমগ্গৰসেন নিস্সেসপটিৰেধেন সম্মাবুজ্ঝি. অধিগচ্ছি ফস্সেসি সচ্ছাকাসীতি এতং তযং ফলৰসেন যোজেতব্বং. পঠমদুতিযৰসেন পটিলভি. ততিযৰসেন ঞাণফস্সেন ফুসি. চতুত্থৰসেন পচ্চক্খং অকাসি. অথ ৰা একেকফলস্স তযোপি লব্ভন্তি এৰ.

নেক্খম্মরতিন্তি পব্বজ্জাদীনি নিস্সায উপ্পন্নরতিং. ৰিৰেকরতিন্তি কাযৰিৰেকাদিম্হি উপ্পন্নরতিং. উপসমরতিন্তি কিলেসৰূপসমে রতিং. সম্বোধিরতিন্তি মগ্গং পচ্চৰেক্খন্তস্স উপ্পন্নরতিং.

১৯২. ততিযগাথায বহূনমিধ বদ্ধানন্তি ইধ বহূনং খত্তিযাদীনং সিস্সানং. সিস্সা হি আচরিযপটিবদ্ধৰুত্তিত্তা ‘‘বদ্ধা’’তি ৰুচ্চন্তি. অত্থি পঞ্হেন আগমন্তি অত্থিকো পঞ্হেন আগতোম্হি, অত্থিকানং ৰা পঞ্হেন আগমনং, পঞ্হেন অত্থি আগমনং ৰাতি.

বুদ্ধোতি পদস্স অভাৰেপি তং বুদ্ধন্তি পদে যো সো বুদ্ধো, তং নিদ্দিসিতুকামেন ‘‘বুদ্ধো’’তি ৰুত্তং. সযম্ভূতি উপদেসং ৰিনা সযমেৰ ভূতো. অনাচরিযকোতি সযম্ভূপদস্স অত্থৰিৰরণং. যো হি আচরিযং ৰিনা সচ্চানি পটিৰিজ্ঝতি, সো সযম্ভূ নাম হোতীতি. পুব্বে অননুস্সুতেসূতিআদি অনাচরিযকভাৰস্স অত্থপ্পকাসনং. অননুস্সুতেসূতি আচরিযতো অননুস্সুতেসু. সামন্তি সযমেৰ. অভিসম্বুজ্ঝীতি ভুসং সম্মা পটিৰিজ্ঝি. তত্থ চ সব্বঞ্ঞুতং পাপুণীতি তেসু চ সচ্চেসু সব্বঞ্ঞুভাৰং পাপুণি. যথা সচ্চানি পটিৰিজ্ঝন্তা সব্বঞ্ঞুনো হোন্তি, তথা সচ্চানং পটিৰিদ্ধত্তা এৰং ৰুত্তং. ‘‘সব্বঞ্ঞুতং পত্তো’’তিপি পাঠো. বলেসু চ ৰসীভাৰন্তি দসসু চ তথাগতবলেসু ইস্সরভাৰং পাপুণি. যো সো এৰং ভূতো, সো বুদ্ধোতি ৰুত্তং হোতি. তত্থ সব্বধম্মেসু অপ্পটিহতঞাণনিমিত্তানুত্তরৰিমোক্খাধিগমপরিভাৰিতখন্ধসন্তানং উপাদায পণ্ণত্তিকো, সব্বঞ্ঞুতপদট্ঠানং ৰা সচ্চাভিসম্বোধিমুপাদায পণ্ণত্তিকো সত্তৰিসেসো বুদ্ধো. এত্তাৰতা অত্থতো বুদ্ধৰিভাৰনা কতা হোতি.

ইদানি ব্যঞ্জনতো ৰিভাৰেন্তো ‘‘বুদ্ধোতি কেনট্ঠেন বুদ্ধো’’তিআদিমাহ. তত্থ যথা লোকে অৰগন্তা ‘‘অৰগতো’’তি ৰুচ্চতি, এৰং বুজ্ঝিতা সচ্চানীতি বুদ্ধো. যথা পণ্ণসোসা ৰাতা ‘‘পণ্ণসুসা’’তি ৰুচ্চন্তি, এৰং বোধেতা পজাযাতি বুদ্ধো. সব্বঞ্ঞুতায বুদ্ধোতি সব্বধম্মবুজ্ঝনসমত্থায বুদ্ধিযা বুদ্ধোতি ৰুত্তং হোতি. সব্বদস্সাৰিতায বুদ্ধোতি সব্বধম্মানং ঞাণচক্খুনা দিট্ঠত্তা বুদ্ধোতি ৰুত্তং হোতি. অনঞ্ঞনেয্যতায বুদ্ধোতি অঞ্ঞেন অবোধনীযতো সযমেৰ বুদ্ধত্তা বুদ্ধোতি ৰুত্তং হোতি. ৰিসৰিতায বুদ্ধোতি নানাগুণৰিকসনতো পদুমমিৰ ৰিকসনট্ঠেন বুদ্ধোতি ৰুত্তং হোতি. খীণাসৰসঙ্খাতেন বুদ্ধোতিআদীহি ছহি পরিযাযেহি চিত্তসঙ্কোচকরধম্মপ্পহানেন নিদ্দায ৰিবুদ্ধো পুরিসো ৰিয সব্বকিলেসনিদ্দায ৰিবুদ্ধত্তা বুদ্ধোতি ৰুত্তং হোতি. সঙ্খা সঙ্খাতন্তি অত্থতো একত্তা সঙ্খাতেনাতি ৰচনস্স কোট্ঠাসেনাতি অত্থো. তণ্হালেপদিট্ঠিলেপাভাৰেন নিরুপলেপসঙ্খাতেন সৰাসনানং সব্বকিলেসানং পহীনত্তা একন্তৰচনেন ৰিসেসেত্ৰা ৰুত্তং. একন্তনিক্কিলেসোতি রাগদোসমোহাৰসেসেহি সব্বকিলেসেহি নিক্কিলেসো.

একাযনমগ্গং গতোতি বুদ্ধোতি গমনত্থানং ধাতূনং বুজ্ঝনত্থত্তা বুজ্ঝনত্থাপি ধাতুযো গমনত্থা হোন্তেৰ, তস্মা একাযনমগ্গং গতত্তা বুদ্ধোতি ৰুত্তং হোতি. একাযনমগ্গো চেত্থ –

‘‘মগ্গো পন্থো পথো পজ্জো, অঞ্জসং ৰটুমাযনং;

নাৰা উত্তরসেতূ চ, কুল্লো চ ভিসি সঙ্কমো’’তি. (চূল়নি. পারাযনত্থুতিগাথানিদ্দেস ১০১) –

মগ্গস্স বহূসু নামেসু অযননামেন ৰুত্তমগ্গনামেন ৰুত্তো. তস্মা একমগ্গভূতো মগ্গো, ন দ্ৰেধাপথভূতোতি অত্থো. অথ ৰা একেন অযিতব্বো মগ্গোতি একাযনমগ্গো. একেনাতি গণসঙ্গণিকং পহায পৰিৰিত্তেন. অযিতব্বোতি পটিপজ্জিতব্বো, অযন্তি ৰা এতেনাতি অযনো, সংসারতো নিব্বানং গচ্ছন্তীতি অত্থো. একেসং অযনোতি একাযনো. একেসন্তি সেট্ঠানং. সব্বসত্তসেট্ঠা চ সম্মাসম্বুদ্ধা, তস্মা একেসং মগ্গভূতো সম্মাসম্বুদ্ধানং অযনভূতো মগ্গোতি ৰুত্তং হোতি. অযতীতি ৰা অযনো, গচ্ছতি পৰত্ততীতি অত্থো. একস্মিং অযনো মগ্গোতি একাযনমগ্গো. একস্মিংযেৰ বুদ্ধসাসনে পৰত্তমানো মগ্গো, ন অঞ্ঞত্থাতি ৰুত্তং হোতি. অপি চ একং অযতীতি একাযনো. পুব্বভাগে নানামুখভাৰনানযপ্পৰত্তোপি অপরভাগে একং নিব্বানমেৰ গচ্ছতীতি ৰুত্তং হোতি, তস্মা একাযনমগ্গোতি একনিব্বানগমনমগ্গোতি অত্থো.

একো অনুত্তরং সম্মাসম্বোধিং অভিসম্বুদ্ধোতি ন পরেহি বুদ্ধত্তা বুদ্ধো, কিন্তু সযমেৰ অনুত্তরং সম্মাসম্বোধিং অভিসম্বুদ্ধত্তা বুদ্ধোতি ৰুত্তং হোতি. অবুদ্ধিৰিহতত্তা বুদ্ধিপটিলাভত্তা বুদ্ধোতি বুদ্ধি বুদ্ধং বোধোতি পরিযাযৰচনমেতং. তত্থ যথা ‘‘নীলরত্তগুণযোগা নীলো পটো, রত্তো পটো’’তি ৰুচ্চতি, এৰং বুদ্ধগুণযোগা ‘‘বুদ্ধো’’তি ঞাপেতুং ৰুত্তং.

ততো পরং বুদ্ধোতি নেতং নামন্তিআদি ‘‘অত্থমনুগতা অযং পঞ্ঞত্তী’’তি ঞাপনত্থং ৰুত্তং. তত্থ মিত্তা সহাযা. অমচ্চা ভচ্চা. ঞাতী পিতুপক্খিকা. সালোহিতা মাতুপক্খিকা. সমণা পব্বজ্জুপগতা. ব্রাহ্মণা ভোৰাদিনো, সমিতপাপবাহিতপাপা ৰা. দেৰতা সক্কাদযো ব্রহ্মানো চ. ৰিমোক্খন্তিকন্তি ৰিমোক্খো অরহত্তমগ্গো, ৰিমোক্খস্স অন্তো অরহত্তফলং, তস্মিং ৰিমোক্খন্তে ভৰং ৰিমোক্খন্তিকং নামং. সব্বঞ্ঞুভাৰো হি অরহত্তমগ্গেন সিজ্ঝতি, অরহত্তফলোদযে সিদ্ধং হোতি. তস্মা সব্বঞ্ঞুভাৰো ৰিমোক্খন্তে ভৰো হোতি. তং নেমিত্তিকম্পি নামং ৰিমোক্খন্তে ভৰং নাম হোতি. তেন ৰুত্তং – ‘‘ৰিমোক্খন্তিকমেতং বুদ্ধানং ভগৰন্তান’’ন্তি. বোধিযা মূলে সহ সব্বঞ্ঞুতঞ্ঞাণস্স পটিলাভাতি মহাবোধিরুক্খমূলে যথাৰুত্তক্খণে সব্বঞ্ঞুতঞ্ঞাণস্স পটিলাভেন সহ. সচ্ছিকা পঞ্ঞত্তীতি অরহত্তফলসচ্ছিকিরিযায সব্বধম্মসচ্ছিকিরিযায ৰা জাতা পঞ্ঞত্তি. যদিদং বুদ্ধোতি পঞ্ঞত্তি. অযং ব্যঞ্জনতো বুদ্ধৰিভাৰনা. ইতো পরং ৰহস্সেতং ভারন্তি পরিযোসানং তত্থ তত্থ ৰুত্তনযত্তা যথাপাল়িমেৰ নিয্যাতি.

১৯৩. চতুত্থগাথায ৰিজিগুচ্ছতোতি জাতিআদীহি অট্টীযতো. রিত্তমাসনন্তি ৰিৰিত্তং মঞ্চপীঠং. পব্বতানং গুহাসু ৰাতি পব্বতগুহাসু ৰা রিত্তমাসনং ভজতোতি সম্বন্ধিতব্বং.

জাতিযা ৰিজিগুচ্ছতোতি জাতিং ৰিজিগুচ্ছতো. জরায. ব্যাধিনাতিআদীসুপি এসেৰ নযো. ভজতোতি এৰমাদীসু ভজতোতি ভজন্তস্স. সেৰতোতি সেৰন্তস্স. নিসেৰতোতি সম্মা সেৰন্তস্স. সংসেৰতোতি পুনপ্পুনং সেৰন্তস্স. পটিসেৰতোতি উপগন্ত্ৰা সেৰন্তস্স. পব্বতপব্ভারাতি পব্বতকুচ্ছিযো.

১৯৪. পঞ্চমগাথায উচ্চাৰচেসূতি হীনপণীতেসু. সযনেসূতি ৰিহারাদীসু সেনাসনেসু. কীৰন্তো তত্থ ভেরৰাতি কিত্তকা তত্থ ভযকারণা. ‘‘কুৰন্তো’’তিপি পাঠো, কূজন্তোতি চস্স অত্থো.

কুৰন্তোতি সদ্দাযন্তো. কূজন্তোতি অব্যত্তসদ্দং করোন্তো. নদন্তোতি উক্কুট্ঠিং করোন্তো. সদ্দং করোন্তোতি ৰাচং ভাসন্তো. কতীতি পুচ্ছা. কিত্তকাতি পমাণপুচ্ছা. কীৰতকাতি পরিচ্ছেদপুচ্ছা. কীৰবহুকাতি পমাণপরিচ্ছেদপুচ্ছা. তে ভেরৰাতি এতে ভযজননুপদ্দৰা ভযারম্মণা. কীৰবহুকাতি পুচ্ছিতে আরম্মণে দস্সেতুং ‘‘সীহা ব্যগ্ঘা দীপী’’তিআদীহি ৰিস্সজ্জেতি.

১৯৫. ছট্ঠগাথায কতি পরিস্সযাতি কিত্তকা উপদ্দৰা. অগতং দিসন্তি নিব্বানং. তঞ্হি অগতপুব্বত্তা অগতং, নিদ্দিসিতব্বতো দিসা চাতি. তেন ৰুত্তং – ‘‘অগতং দিস’’ন্তি. অমতং দিস’’ন্তিপি পাঠো. অভিসম্ভৰেতি অভিসম্ভৰেয্য. পন্তম্হীতি পরিযন্তে.

অগতপুব্বা সা দিসাতি যা দিসা সুপিনন্তেনপি ন গতপুব্বা. ন সা দিসা গতপুব্বাতি এসা দিসা ৰুত্তনযেন ন গতপুব্বা. ইমিনা দীঘেন অদ্ধুনাতি অনেন দীঘকালেন.

সমতিত্তিকন্তি অন্তোমুখৰট্টিলেখং পাপেত্ৰা সমভরিতং. অনৰসেকন্তি অনৰসিঞ্চনকং অপরিসিঞ্চনকং কত্ৰা. তেলপত্তন্তি পক্খিত্ততেলং তেলপত্তং. পরিহরেয্যাতি হরেয্য আদায গচ্ছেয্য. এৰং সচিত্তমনুরক্খেতি তং তেলভরিতং পত্তং ৰিয অত্তনো চিত্তং কাযগতায সতিযা গোচরে চেৰ সম্পযুত্তসতিযা চাতি উভিন্নং অন্তরে পক্খিপিত্ৰা যথা মুহুত্তম্পি বহিদ্ধা গোচরে ন ৰিক্খিপতি, তথা পণ্ডিতো যোগাৰচরো রক্খেয্য গোপযেয্য. কিংকারণা? এতস্স হি –

‘‘দুন্নিগ্গহস্স লহুনো, যত্থকামনিপাতিনো;

চিত্তস্স দমথো সাধু, চিত্তং দন্তং সুখাৰহং’’. (ধ. প. ৩৫);

তস্মা –

‘‘সুদুদ্দসং সুনিপুণং, যত্থকামনিপাতিনং;

চিত্তং রক্খেথ মেধাৰী, চিত্তং গুত্তং সুখাৰহং’’. (ধ. প. ৩৬);

ইদঞ্হি –

‘‘দূরঙ্গমং একচরং, অসরীরং গুহাসযং;

যে চিত্তং সংযমেস্সন্তি, মোক্খন্তি মারবন্ধনা’’. (ধ. প. ৩৭);

ইতরস্স পন –

‘‘অনৰট্ঠিতচিত্তস্স, সদ্ধম্মং অৰিজানতো;

পরিপ্লৰপসাদস্স, পঞ্ঞা ন পরিপূরতি’’. (ধ. প. ৩৮);

থিরকম্মট্ঠানসহাযস্স পন –

‘‘অনৰস্সুতচিত্তস্স, অনন্ৰাহতচেতসো;

পুঞ্ঞপাপপহীনস্স, নত্থি জাগরতো ভযং’’. (ধ. প. ৩৯);

তস্মা এতং –

‘‘ফন্দনং চপলং চিত্তং, দূরক্খং দুন্নিৰারযং;

উজুং করোতি মেধাৰী, উসুকারোৰ তেজনং’’. (ধ. প. ৩৩);

এৰং উজুং করোন্তো সচিত্তমনুরক্খে.

পত্থযানো দিসং অগতপুব্বন্তি ইমস্মিং কাযগতাসতিকম্মট্ঠানে কম্মং আরভিত্ৰা অনমতগ্গে সংসারে অগতপুব্বং দিসং পত্থেন্তো ৰুত্তনযেন সকং চিত্তং রক্খেয্যাতি অত্থো. কা পনেসা দিসা নাম –

‘‘মাতাপিতা দিসা পুব্বা, আচরিযা দক্খিণা দিসা;

পুত্তদারা দিসা পচ্ছা, মিত্তামচ্চা চ উত্তরা.

‘‘দাসকম্মকরা হেট্ঠা, উদ্ধং সমণব্রাহ্মণা;

এতা দিসা নমস্সেয্য, অলমত্তো কুলে গিহী’’তি. (দী. নি. ৩.২৭৩) –

এত্থ তাৰ মাতাপিতাদযো ‘‘দিসা’’তি ৰুত্তা.

‘‘দিসা চতস্সো ৰিদিসা চতস্সো, উদ্ধং অধো দস দিসা ইমাযো;

কতমং দিসং তিট্ঠতি নাগরাজা, যমদ্দসা সুপিনে ছব্বিসাণ’’ন্তি. (জা. ১.১৬.১০৪) –

এত্থ পুরত্থিমাদিভেদা দিসাৰ ‘‘দিসা’’তি ৰুত্তা.

‘‘অগারিনো অন্নদপানৰত্থদা, অৰ্হাযিকা তম্পি দিসং ৰদন্তি;

এসা দিসা পরমা সেতকেতু, যং পত্ৰা দুক্খী সুখিনো ভৰন্তী’’তি . (জা. ১.৬.৯) –

এত্থ নিব্বানং ‘‘দিস’’ন্তি ৰুত্তং. ইধাপি তদেৰ অধিপ্পেতং. তণ্হক্খযং ৰিরাগন্তিআদীহি দিস্সতি অপদিস্সতি তস্মা ‘‘দিসা’’তি ৰুচ্চতি. অনমতগ্গে পন সংসারে কেনচি বালপুথুজ্জনেন সুপিনেনপি অগতপুব্বতায ‘‘অগতপুব্বা দিসা নামা’’তি ৰুচ্চতি. তং পত্থযন্তেন কাযগতাসতিযা যোগো করণীযোতি. ৰজতোতিআদীসু এত্থ মগ্গুপ্পাদতো সমীপং ৰজতো. ঠিতিক্খণে গচ্ছতো. ফলোদযতো অতিক্কমতো.

অন্তেতি অন্তম্হি ঠিতে. পন্তেতি ৰনগহনগম্ভীরে ঠিতে. পরিযন্তেতি দূরভাৰেন পরিযন্তে ঠিতে. সেলন্তেতি পব্বতানং অন্তে. ৰনন্তেতি ৰনঘটানং অন্তে. নদন্তেতি নদীনং অন্তে. উদকন্তেতি উদকানং পরিযন্তে. যত্থ ন কসীযতি ন ৰপীযতীতি যস্মিং কসনঞ্চ ৰপনঞ্চ ন করীযতি. জনন্তং অতিক্কমিত্ৰা ঠিতে. মনুস্সানং অনুপচারেতি কসনৰপনৰসেন মনুস্সেহি অনুপচরিতব্বে সেনাসনে.

১৯৬. সত্তমগাথায ক্যাস্স ব্যপ্পথযো অস্সূতি কিদিসানি তস্স ৰচনানি অস্সু.

মুসাৰাদং পহাযাতি এত্থ মুসাতি ৰিসংৰাদনপুরেক্খারস্স অত্থভঞ্জনকো ৰচীপযোগো কাযপযোগো ৰা. ৰিসংৰাদনাধিপ্পাযেন পনস্স পরৰিসংৰাদককাযৰচীপযোগসমুট্ঠাপিকা চেতনা মুসাৰাদো. অপরো নযো – মুসাতি অভূতং অতচ্ছং ৰত্থু, ৰাদোতি তস্স ভূততো তচ্ছতো ৰিঞ্ঞাপনং. লক্খণতো পন অতথং ৰত্থুং তথতো পরং ৰিঞ্ঞাপেতুকামস্স তথাৰিঞ্ঞত্তিসমুট্ঠাপিকা চেতনা মুসাৰাদো. সো যমত্থং ভঞ্জতি, তস্স অপ্পতায অপ্পসাৰজ্জো, মহন্ততায মহাসাৰজ্জো. অপি চ গহট্ঠানং অত্তনো সন্তকং অদাতুকামতায ‘‘নত্থী’’তিআদিনযপ্পৰত্তো অপ্পসাৰজ্জো, সক্খিনা হুত্ৰা অত্থভঞ্জনত্থং ৰুত্তো মহাসাৰজ্জো. পব্বজিতানং অপ্পকম্পি তেলং ৰা সপ্পিং ৰা লভিত্ৰা হসাধিপ্পাযেন ‘‘অজ্জ গামে তেলং নদী মঞ্ঞে সন্দতী’’তি পূরণকথানযেন পৰত্তো অপ্পসাৰজ্জো, অদিট্ঠংযেৰ পন দিট্ঠন্তিআদিনা নযেন ৰদন্তানং মহাসাৰজ্জো.

তস্স চত্তারো সম্ভারা হোন্তি – অতথং ৰত্থু ৰিসংৰাদনচিত্তং তজ্জো ৰাযামো পরস্স তদত্থৰিজাননন্তি. একো পযোগো সাহত্থিকোৰ. সো চ কাযেন ৰা কাযপটিবদ্ধেন ৰা ৰাচায ৰা পরৰিসংৰাদককিরিযাকরণে দট্ঠব্বো. তায চে কিরিযায পরো তমত্থং জানাতি, অযং কিরিযসমুট্ঠাপিকা চেতনাক্খণেযেৰ মুসাৰাদকম্মুনা বজ্ঝতি.

সচ্চং ৰদতীতি সচ্চৰাদী. সচ্চেন সচ্চং সন্দহতি ঘটেতীতি সচ্চসন্ধো, ন অন্তরন্তরা মুসা ৰদতীতি অত্থো. যো হি পুরিসো কদাচি মুসা ৰদতি, কদাচি সচ্চং, তস্স মুসাৰাদেন অন্তরিকতায সচ্চং সচ্চেন ন ঘটিযতি, তস্মা ন সো সচ্চসন্ধো. অযং পন ন তাদিসো, জীৰিতহেতুপি মুসা অৰত্ৰা সচ্চেন সচ্চং সন্দহতিযেৰাতি সচ্চসন্ধো.

থেতোতি থিরো, থিরকথোতি অত্থো. একো পুগ্গলো হলিদ্দিরাগো ৰিয থুসরাসিম্হি নিখাতখাণু ৰিয অস্সপিট্ঠে ঠপিতকুম্ভণ্ডমিৰ চ ন থিরকথো হোতি. একো পাসাণলেখা ৰিয ইন্দখীলো ৰিয চ থিরকথো হোতি, অসিনা সীসং ছিন্দন্তেপি দ্ৰেকথা ন কথেতি. অযং ৰুচ্চতি থেতো.

পচ্চযিকোতি পত্তিযাযিতব্বো, সদ্ধাযিতব্বকোতি অত্থো. একচ্চো হি পুগ্গলো ন পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে ‘‘মা তস্স ৰচনং সদ্দহথা’’তি ৰত্তব্বতং আপজ্জতি. একো পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে ‘‘যদি তেন ৰুত্তং, ইদমেৰ পমাণং, ইদানি উপপরিক্খিতব্বং নত্থি, এৰমেৰ ইদ’’ন্তি ৰত্তব্বতং আপজ্জতি, অযং ৰুচ্চতি পচ্চযিকো. অৰিসংৰাদকো লোকস্সাতি তায সচ্চৰাদিতায লোকং ন ৰিসংৰাদেতীতি অত্থো.

পিসুণং ৰাচং পহাযাতিআদীসু যায ৰাচায যস্স তং ৰাচং ভাসতি, তস্স হদযে অত্তনো পিযভাৰং পরস্স চ সুঞ্ঞভাৰং করোতি, সা পিসুণৰাচা. যায পন অত্তানম্পি পরম্পি ফরুসং করোতি, যা ৰাচা সযম্পি ফরুসা, নেৰ কণ্ণসুখা ন হদযঙ্গমা, অযং ফরুসৰাচা. যেন সম্ফং পলপতি নিরত্থকং, সো সম্ফপ্পলাপো. তেসং মূলভূতাপি চেতনা পিসুণৰাচাদিনামমেৰ লভতি, সা এৰ ইধ অধিপ্পেতাতি.

তত্থ সংকিলিট্ঠচিত্তস্স পরেসং ৰা ভেদায অত্তনো পিযকম্যতায ৰা কাযৰচীপযোগসমুট্ঠাপিকা চেতনা পিসুণৰাচা. সা যস্স ভেদং করোতি, তস্স অপ্পগুণতায অপ্পসাৰজ্জা, মহাগুণতায মহাসাৰজ্জা.

তস্সা চত্তারো সম্ভারা হোন্তি – ভিন্দিতব্বো পরো, ‘‘ইতি ইমে নানা ভৰিস্সন্তি ৰিনা ভৰিস্সন্তী’’তি ভেদপুরেক্খারতা ৰা, ‘‘ইতি অহং পিযো ভৰিস্সামি ৰিস্সাসিকো’’তি পিযকম্যতা ৰা, তজ্জো ৰাযামো, তস্স তদত্থৰিজাননন্তি.

ইমেসং ভেদাযাতি যেসং ইতোতি ৰুত্তানং সন্তিকে সুতং, তেসং ভেদায. ভিন্নানং ৰা সন্ধাতাতি দ্ৰিন্নং মিত্তানং ৰা সমানুপজ্ঝাযকাদীনং ৰা কেনচিদেৰ কারণেন ভিন্নানং একমেকং উপসঙ্কমিত্ৰা ‘‘তুম্হাকং ঈদিসে কুলে জাতানং এৰং বহুস্সুতানং ইদং ন যুত্ত’’ন্তিআদীনি ৰত্ৰা সন্ধানং কত্তা. অনুপ্পদাতাতি সন্ধানানুপ্পদাতা, দ্ৰে জনে সমগ্গে দিস্ৰা ‘‘তুম্হাকং এৰরূপে কুলে জাতানং এৰরূপেহি গুণেহি সমন্নাগতানং অনুচ্ছৰিকমেত’’ন্তিআদীনি ৰত্ৰা দল়্হীকম্মং কত্তাতি অত্থো.

সমগ্গো আরামো অস্সাতি সমগ্গারামো, যত্থ সমগ্গা নত্থি, তত্থ ৰসিতুম্পি ন ইচ্ছতীতি অত্থো. ‘‘সমগ্গরামো’’তিপি পাল়ি, অযমেৰত্থো. সমগ্গরতোতি সমগ্গেসু রতো, তে পহায অঞ্ঞত্র গন্তুম্পি ন ইচ্ছতীতি অত্থো. সমগ্গে দিস্ৰাপি সুত্ৰাপি নন্দতীতি সমগ্গনন্দী. সমগ্গকরণিং ৰাচং ভাসিতাতি যা ৰাচা সত্তে সমগ্গেযেৰ করোতি, তং সামগ্গিগুণপরিদীপকমেৰ ৰাচং ভাসতি, ন ইতরন্তি.

পরস্স মম্মচ্ছেদককাযৰচীপযোগসমুট্ঠাপিকা একন্তফরুসচেতনা ফরুসৰাচা. মম্মচ্ছেদকোপি পযোগো চিত্তসণ্হতায ফরুসৰাচা ন হোতি. মাতাপিতরো হি কদাচি পুত্তকে এৰম্পি ৰদন্তি ‘‘চোরা ৰো খণ্ডাখণ্ডিকং করোন্তূ’’তি, উপ্পলপত্তম্পি চ নেসং উপরি পতন্তং ন ইচ্ছন্তি. আচরিযুপজ্ঝাযা চ কদাচি নিস্সিতকে এৰং ৰদন্তি ‘‘কিং ইমে অহিরিকা অনোত্তপ্পিনো চরন্তি, নিদ্ধমথ নে’’তি. অথ চ নেসং আগমাধিগমসম্পত্তিং ইচ্ছন্তি. যথা চ চিত্তসণ্হতায ফরুসৰাচা ন হোতি, এৰং ৰচনসণ্হতায অফরুসৰাচাপি ন হোতি. ন হি মারাপেতুকামস্স ‘‘ইমং সুখং সযাপেথা’’তি ৰচনং অফরুসৰাচা হোতি, চিত্তফরুসতায পনেসা ফরুসৰাচাৰ, সা যং সন্ধায পৰত্তিতা. তস্স অপ্পগুণতায অপ্পসাৰজ্জা, মহাগুণতায মহাসাৰজ্জা. তস্সা তযো সম্ভারা – অক্কোসিতব্বো পরো কুপিতচিত্তং অক্কোসনাতি.

নেলাতি এলং ৰুচ্চতি দোসো, নাস্সা এলন্তি নেলা, নিদ্দোসাতি অত্থো. ‘‘নেলঙ্গো সেতপচ্ছাদো’’তি (উদা. ৬৫; পেটকো. ২৫) এত্থ ৰুত্তনেলং ৰিয. কণ্ণসুখাতি ব্যঞ্জনমধুরতায কণ্ণানং সুখা, সূচিৰিজ্ঝনং ৰিয কণ্ণসূলং ন জনেতি. অত্থমধুরতায সকলসরীরে কোপং অজনেত্ৰা পেমং জনেতীতি পেমনিযা. হদযং গচ্ছতি অপটিহঞ্ঞমানা সুখেন চিত্তং পৰিসতীতি হদযঙ্গমা. গুণপরিপুণ্ণতায পুরে ভৰাতি পোরী. পুরে সংৰদ্ধনারী ৰিয সুকুমারাতিপি পোরী. পুরস্স এসাতিপি পোরী, নগরৰাসীনং কথাতি অত্থো. নগরৰাসিনো হি যুত্তকথা হোন্তি, পিতিমত্তং পিতাতি ভাতিমত্তং ভাতাতি ৰদন্তি. এৰরূপী কথা বহুনো জনস্স কন্তা হোতীতি বহুজনকন্তা. কন্তভাৰেনেৰ বহুনো জনস্স মনাপা চিত্তৰুড্ঢিকরাতি বহুজনমনাপা.

অনত্থৰিঞ্ঞাপিকা কাযৰচীপযোগসমুট্ঠাপিকা অকুসলচেতনা সম্ফপ্পলাপো. সো আসেৰনমন্দতায অপ্পসাৰজ্জো, আসেৰনমহন্ততায মহাসাৰজ্জো. তস্স দ্ৰে সম্ভারা – ভারতযুদ্ধসীতাহরণাদিনিরত্থককথা পুরেক্খারতা, তথারূপীকথাকথনঞ্চ.

কালেন ৰদতীতি কালৰাদী, ৰত্তব্বযুত্তকালং সল্লক্খেত্ৰা ৰদতীতি অত্থো. ভূতং তচ্ছং সভাৰমেৰ ৰদতীতি ভূতৰাদী. দিট্ঠধম্মিকসম্পরাযিকত্থসন্নিস্সিতমেৰ কত্ৰা ৰদতীতি অত্থৰাদী. নৰলোকুত্তরধম্মসন্নিস্সিতং কত্ৰা ৰদতীতি ধম্মৰাদী. সংৰরৰিনযপহানৰিনযসন্নিস্সিতং কত্ৰা ৰদতীতি ৰিনযৰাদী. নিধানং ৰুচ্চতি ঠপনোকাসো, নিধানমস্সা অত্থীতি নিধানৰতী, হদযে নিধাতব্বযুত্তং ৰাচং ভাসিতাতি অত্থো. কালেনাতি এৰরূপিং ভাসমানোপি চ ‘‘অহং নিধানৰতিং ৰাচং ভাসিস্সামী’’তি ন অকালেন ভাসতি, যুত্তকালং পন অপেক্খিত্ৰাৰ ভাসতীতি অত্থো. সাপদেসন্তি সউপমং, সকারণন্তি অত্থো. পরিযন্তৰতিন্তি পরিচ্ছেদং দস্সেত্ৰা যথাস্সা পরিচ্ছেদো পঞ্ঞাযতি, এৰং ভাসতীতি অত্থো. অত্থসংহিতন্তি অনেকেহি নযেহি ৰিভজন্তেন পরিযাদাতুং অসক্কুণেয্যতায অত্থসম্পন্নং. যং ৰা সো অত্থৰাদী অত্থং ৰদতি, তেন অত্থেন সহিতত্তা অত্থসংহিতং ৰাচং ভাসতি, ন অঞ্ঞং নিক্খিপিত্ৰা অঞ্ঞং ভাসতীতি ৰুত্তং হোতি.

চতূহি ৰচীসুচরিতেহীতি ‘‘মুসাৰাদং পহাযা’’তিআদিনা নযেন ৰুত্তেহি চতূহি ৰাচাহি যুত্তেহি সুট্ঠু চরিতেহি. সমন্নাগতোতি অপরিহীনো. চতুদোসাপগতং ৰাচং ভাসতীতি অপ্পিযাদীহি চতূহি দোসেহি অপগতং পরিহীনং ৰাচং ভাসতি.

অত্থি অগোচরোতি কিঞ্চাপি থেরো সমণাচারং সমণগোচরং কথেতুকামো ‘‘অত্থি অগোচরো, অত্থি গোচরো’’তি পদং উদ্ধরি, যথা পন মগ্গকুসলো পুরিসো মগ্গং আচিক্খন্তো ‘‘ৰামং মুঞ্চ, দক্খিণং গণ্হা’’তি পঠমং মুঞ্চিতব্বং সভযমগ্গং উপ্পথমগ্গং আচিক্খতি, পচ্ছা গহেতব্বং খেমমগ্গং উজুমগ্গং, এৰমেৰ মগ্গকুসলপুরিসসদিসো ধম্মসেনাপতি পঠমং পহাতব্বং বুদ্ধপটিকুট্ঠং অগোচরং আচিক্খিত্ৰা পচ্ছা গোচরং আচিক্খিতুকামো ‘‘কতমো অগোচরো’’তিআদিমাহ. পুরিসেন হি আচিক্খিতমগ্গো সম্পজ্জেয্য ৰা ন ৰা, তথাগতেন আচিক্খিতমগ্গো অপণ্ণকো ইন্দৰিস্সট্ঠং ৰজিরং ৰিয অৰিরজ্ঝনকো নিব্বাননগরংযেৰ সমোসরতি. তেন ৰুত্তং – ‘‘পুরিসো মগ্গকুসলোতি খো তিস্স তথাগতস্সেতং অধিৰচনং অরহতো সম্মাসম্বুদ্ধস্সা’’তি (সং. নি. ৩.৮৪).

যস্মা ৰা সসীসং ন্হানেন পহীনসেদমলজল্লিকস্স পুরিসস্স মালাগন্ধৰিলেপনাদিৰিভূসনৰিধানং ৰিয পহীনপাপধম্মস্স কল্যাণধম্মসমাযোগো সম্পন্নরূপো হোতি, তস্মা সেদমলজল্লিকং ৰিয পহাতব্বং পঠমং অগোচরং আচিক্খিত্ৰা পহীনসেদমলজল্লিকস্স মালাগন্ধৰিলেপনাদিৰিভূসনৰিধানং ৰিয পচ্ছা গোচরং আচিক্খিতুকামোপি ‘‘কতমো অগোচরো’’তিআদিমাহ.

তত্থ গোচরোতি পিণ্ডপাতাদীনং অত্থায উপসঙ্কমিতুং যুত্তট্ঠানং. অযুত্তট্ঠানং অগোচরো. ৰেসিযা গোচরো অস্সাতি ৰেসিযাগোচরো, মিত্তসন্থৰৰসেন উপসঙ্কমিতব্বট্ঠানন্তি অত্থো. তত্থ ৰেসিযা নাম রূপূপজীৰিনিযো যেন কেনচিদেৰ সুলভজ্ঝাচারতা মিত্তসন্থৰসিনেহৰসেন উপসঙ্কমন্তো ৰেসিযাগোচরো নাম হোতি. তস্মা এৰং উপসঙ্কমিতুং ন ৰট্টতি. কিংকারণা? আরক্খৰিপত্তিতো. এৰং উপসঙ্কমন্তস্স হি চিররক্খিতগোপিতোপি সমণধম্মো কতিপাহেনেৰ নস্সতি. সচেপি ন নস্সতি, গরহং লভতি. দক্খিণাৰসেন পন উপসঙ্কমন্তেন সতিং উপট্ঠপেত্ৰা উপসঙ্কমিতব্বং.

ৰিধৰা ৰুচ্চন্তি মতপতিকা ৰা পৰুট্ঠপতিকা ৰা. থুল্লকুমারিযোতি মহল্লিকা অনিব্বিদ্ধকুমারিযো. পণ্ডকাতি লোকামিসনিস্সিতকথাবহুলা উস্সন্নকিলেসা অৰূপসন্তপরিল়াহা নপুংসকা. তেসং সব্বেসম্পি উপসঙ্কমনে আদীনৰো ৰুত্তনযেনেৰ ৰেদিতব্বো. ভিক্খুনীসুপি এসেৰ নযো. অপি চ ভিক্খূ নাম উস্সন্নব্রহ্মচরিযা হোন্তি, তথা ভিক্খুনিযো. তে অঞ্ঞমঞ্ঞং সন্থৰৰসেন কতিপাহেনেৰ রক্খিতগোপিতসমণধম্মং নাসেন্তি. গিলানপুচ্ছকেন পন গন্তুং ৰট্টতি. ভিক্খুনা পুপ্ফানি লভিত্ৰা পূজনত্থাযপি ওৰাদদানত্থাযপি গন্তুং ৰট্টতিযেৰ.

পানাগারন্তি সুরাপানঘরং, তং ব্রহ্মচরিযন্তরাযকরেহি সুরাসোণ্ডেহি অৰিৰিত্তং হোতি. তত্থ তেহি সদ্ধিং সহসোণ্ডৰসেন উপসঙ্কমিতুং ন ৰট্টতি, ব্রহ্মচরিযন্তরাযো হোতি. সংসট্ঠো ৰিহরতি রাজূহীতিআদীসু রাজানোতি অভিসিত্তা ৰা হোন্তু অনভিসিত্তা ৰা, যে রজ্জমনুসাসন্তি. রাজমহামত্তাতি রাজূনং ইস্সরিযসদিসায মহতিযা ইস্সরিযমত্তায সমন্নাগতা. তিত্থিযাতি ৰিপরীতদস্সনা বাহিরপরিব্বাজকা. তিত্থিযসাৰকাতি ভত্তিৰসেন তেসং পচ্চযদাযকা, এতেহি সদ্ধিং সংসগ্গজাতো হোতীতি অত্থো.

অননুলোমিকেন সংসগ্গেনাতি অননুলোমিকসংসগ্গো নাম তিস্সন্নং সিক্খানং অননুলোমো পচ্চনীকসংসগ্গো. যেন ব্রহ্মচরিযন্তরাযং পঞ্ঞত্তিৰীতিক্কমং সল্লেখপরিহানিঞ্চ পাপুণাতি. সেয্যথিদং? রাজরাজমহামত্তেহি সদ্ধিং সহসোকিতা সহনন্দিতা সমসুখদুক্খতা উপ্পন্নেসু কিচ্চকরণীযেসু অত্তনা যোগং আপজ্জনতা তিত্থিযতিত্থিযসাৰকেহি সদ্ধিং একচ্ছন্দরুচিসমাচারতা একচ্ছন্দরুচিসমাচারভাৰাৰহো ৰা সিনেহবহুমানসন্থৰো. তত্থ রাজরাজমহামত্তেহি সদ্ধিং সংসগ্গো ব্রহ্মচরিযন্তরাযকরো, ইতরেহি তিত্থিযসাৰকেহি তেসং লদ্ধিগ্গহণং. তেসং পন ৰাদং ভিন্দিত্ৰা অত্তনো লদ্ধিং গণ্হাপেতুং সমত্থেন উপসঙ্কমিতুং ৰট্টতি.

ইদানি অপরেনপি পরিযাযেন অগোচরং দস্সেতুং ‘‘যানি ৰা পন তানি কুলানী’’তিআদি আরদ্ধং. তত্থ অস্সদ্ধানীতি বুদ্ধাদীসু সদ্ধাৰিরহিতানি. তানি ‘‘বুদ্ধো সব্বঞ্ঞূ, ধম্মো নিয্যানিকো, সঙ্ঘো সুপ্পটিপন্নো’’তি ন সদ্দহন্তি. অপ্পসন্নানীতি চিত্তং পসন্নং অনাৰিলং কাতুং ন সক্কোন্তি. অক্কোসকপরিভাসকানীতি অক্কোসকানি চেৰ পরিভাসকানি চ. ‘‘চোরোসি, বালোসি, মূল়্হোসি, ওট্ঠোসি, গোণোসি, গদ্রভোসি, আপাযিকোসি, নেরযিকোসি, তিরচ্ছানগতোসি, নত্থি তুয্হং সুগতি, দুগ্গতিযেৰ তুয্হং পাটিকঙ্খা’’তি এৰং দসহি অক্কোসৰত্থূহি অক্কোসন্তি. ‘‘হোতু, ইদানি তং পহরিস্সাম, বন্ধিস্সাম, ৰধিস্সামা’’তি এৰং ভযদস্সনেন পরিভাসন্তি চাতি অত্থো.

অনত্থকামানীতি অত্থং ন ইচ্ছন্তি, অনত্থমেৰ ইচ্ছন্তি. অহিতকামানীতি অহিতমেৰ ইচ্ছন্তি, হিতং ন ইচ্ছন্তি. অফাসুকামানীতি ফাসুকং ন ইচ্ছন্তি, অফাসুকমেৰ ইচ্ছন্তি. অযোগক্খেমকামানীতি চতূহি যোগেহি খেমং নিব্ভযং ন ইচ্ছন্তি, সভযমেৰ ইচ্ছন্তি. ভিক্খূনন্তি এত্থ সামণেরাপি সঙ্গহং গচ্ছন্তি. ভিক্খুনীনন্তি এত্থ সিক্খমানাসামণেরিযোপি. সব্বেসম্পি হি ভগৰন্তং উদ্দিস্স পব্বজিতানঞ্চেৰ সরণগতানঞ্চ চতুন্নম্পি পরিসানং তানি অনত্থকামানিযেৰ. তথারূপানি কুলানীতি এৰরূপানি খত্তিযকুলাদীনি কুলানি. সেৰতীতি নিস্সায জীৰতি. ভজতীতি উপসঙ্কমতি. পযিরুপাসতীতি পুনপ্পুনং উপসঙ্কমতি. অযং ৰুচ্চতীতি অযং ৰেসিযাদিগোচরস্স ৰেসিযাদিকো রাজাদিসংসট্ঠস্স রাজাদিকো অস্সদ্ধকুলাদিসেৰকস্স অস্সদ্ধকুলাদিকো চাতি তিপ্পকারোপি অযুত্তগোচরো ‘‘অগোচরো’’তি ৰেদিতব্বো.

তস্স ইমিনাপি পরিযাযেন অগোচরতা ৰেদিতব্বা – ৰেসিযাদিকো তাৰ পঞ্চকামগুণনিস্সযতো অগোচরো ৰেদিতব্বো. যথাহ – ‘‘কো চ, ভিক্খৰে, ভিক্খুনো অগোচরো পরৰিসযো, যদিদং পঞ্চ কামগুণা’’তি. রাজাদিকো ঝানানুযোগস্স অনুপনিস্সযতো লাভসক্কারাসনিচক্কনিপ্ফাদনতো দিট্ঠিৰিপত্তিহেতুতো চ, অস্সদ্ধকুলাদিকো সদ্ধাহানিচিত্তপদোসাৰহনতো অগোচরো.

অন্তরঘরপ্পৰেসাদিকো চ চক্খুনা রূপং দিস্ৰা নিমিত্তগ্গাহাদিকো চ সদ্ধাদেয্যানি ভোজনানি ভুঞ্জিত্ৰা ৰিসূকদস্সনানুযোগো চ পঞ্চ কামগুণা চাতি চতুব্বিধোপি পন কিলেসুপ্পত্তিৰসেন অগোচরোতি ৰেদিতব্বো.

মা ভিক্খৰে অগোচরে চরথাতি চরিতুং অযুত্তট্ঠানে মা চরথ. পরৰিসযেতি সত্তুৰিসযে. অগোচরে ভিক্খৰে চরতন্তি অযুত্তট্ঠানে চরন্তানং. ‘‘চর’’ন্তিপি পাঠো. লচ্ছতীতি লভিস্সতি পস্সিস্সতি. মারোতি দেৰপুত্তমারোপি মচ্চুমারোপি. ওতারন্তি রন্ধং ছিদ্দং ৰিৰরং.

গোচরনিদ্দেসে ন ৰেসিযাগোচরো হোতীতিআদীনি ৰুত্তপটিপক্খৰসেন ৰেদিতব্বানি. অযং পন ৰিসেসো – চত্তারো সতিপট্ঠানা গোচরোতি চরিতুং যুত্তট্ঠানৰসেন চতুসতিপট্ঠানা গোচরো. সকেতি অত্তনো সন্তকে. পেত্তিকে ৰিসযেতি পিতিতো আগতৰিসযে.

আরদ্ধৰীরিযস্সাতি সম্মাউপট্ঠিতচতুসম্মপ্পধানৰীরিযৰন্তস্স. থামগতস্সাতি বলপ্পত্তস্স. দল়্হপরক্কমস্সাতি থিরৰীরিযস্স. যস্সত্থায পেসিতোতি যেন অরহত্তত্থায অত্তভাৰো পরিচ্চত্তো. অত্তত্থে চাতি অত্তনো অত্থে অরহত্তফলে চ. ঞাযে চাতি অরিযে অট্ঠঙ্গিকে মগ্গে চ. লক্খণে চাতি অনিচ্চাদিলক্খণপটিৰেধে চ. কারণে চাতি হেতুম্হি চ. ঠানাঠানে চাতি ঠানে চ অট্ঠানে চ, কারণাকারণে চাতি অত্থো. ইদানি ৰিত্থারেত্ৰা দস্সেতুং ‘‘সব্বে সঙ্খারা অনিচ্চা’’তিআদিমাহ.

১৯৭. অট্ঠমগাথায একোদি নিপকোতি একগ্গচিত্তো পণ্ডিতো.

জাতরূপস্স ওল়ারিকম্পি মলং ধমতীতি সুৰণ্ণস্স থূলং জল্লং অগ্গিসংযোগেন নীহরতি. সন্ধমতীতি সম্মা নীহরতি. নিদ্ধমতীতি অপুনভৰপ্পত্তিকং কত্ৰা নীহরতি. ‘‘ঝাপেতী’’তি কেচি ৰদন্তি. মজ্ঝিমকম্পীতি ততো সুখুমতরম্পি. সুখুমকম্পীতি অতিসুখুমতরম্পি. এৰমেৰাতি ওপম্মসম্পটিপাদনং. অত্তনো ওল়ারিকেপি কিলেসে ধমতীতি কাযদুচ্চরিতাদিকে থূলকিলেসে ৰীরিযাতপেন নীহরতি. মজ্ঝিমকেপি কিলেসেতি কামৰিতক্কাদিকে ওল়ারিকসুখুমানং মজ্ঝিমকেপি. সুখুমকেপীতি ঞাতিৰিতক্কাদিকে অতিসণ্হকেপি কিলেসে. সম্মাদিট্ঠিযা মিচ্ছাদিট্ঠিং ধমতীতি সহ ৰিপস্সনায মগ্গসম্পযুত্তায সম্মাদিট্ঠিযা ৰিপরীতসঙ্খাতং মিচ্ছাদিট্ঠিং নীহরতি. সম্মাসঙ্কপ্পাদীসুপি এসেৰ নযো.

১৯৮. এৰং আযস্মতা সারিপুত্তেন তীহি গাথাহি ভগৰন্তং থোমেত্ৰা পঞ্চহি গাথাহি পঞ্চসতানং সিস্সানমত্থায চ সেনাসনগোচরসীলৰতাদীনি পুচ্ছিতো তমত্থং পকাসেতুং ‘‘ৰিজিগুচ্ছমানস্সা’’তিআদিনা নযেন ৰিস্সজ্জনমারদ্ধং. তত্থ পঠমগাথায তাৰত্থো – জাতিআদীহি জিগুচ্ছমানস্স রিত্তাসনং সযনং সেৰতো ৰে সম্বোধিকামস্স সারিপুত্ত ভিক্খুনো যদিদং ফাসু যো ফাসুৰিহারো যথানুধম্মং যো চ অনুধম্মো, তং তে পৰক্খামি যথা পজানং যথা পজানন্তো ৰদেয্য, এৰং ৰদামীতি. যং ফাসুৰিহারন্তি যং সুখৰিহারং. অসপ্পাযরূপদস্সনেনাতি ইত্থিরূপাদিসমণাসপ্পাযরূপদস্সনেন. তং বোধিং বুজ্ঝিতুকামস্সাতি তং চতুমগ্গঞাণসঙ্খাতং বোধিং বুজ্ঝিতুং ইচ্ছন্তস্স. অনুবুজ্ঝিতুকামস্সাতি অনুরূপায পটিপত্তিযা বুজ্ঝিতুকামস্স. পটিৰিজ্ঝিতুকামস্সাতি অভিমুখে কত্ৰা নিব্বিজ্ঝিতুকামস্স. সম্বুজ্ঝিতুকামস্সাতি পহীনকিলেসে অপচ্চাগমনৰসেন সম্মা বুজ্ঝিতুং ইচ্ছন্তস্স. অধিগন্তুকামস্সাতি পাপুণিতুকামস্স. সচ্ছিকাতুকামস্সাতি পটিলাভসচ্ছিকিরিযায পত্তুকামস্স. অথ ৰা বুজ্ঝিতুকামস্সাতি সোতাপত্তিমগ্গঞাণং ঞাতুকামস্স. অনুবুজ্ঝিতুকামস্সাতি সকদাগামিমগ্গঞাণং পুন ঞাতুকামস্স. পটিৰিজ্ঝিতুকামস্সাতি অনাগামিমগ্গঞাণং পটিৰেধৰসেন ঞাতুকামস্স. সম্বুজ্ঝিতুকামস্সাতি অরহত্তমগ্গঞাণং সম্মা ঞাতুকামস্স. অধিগন্তুকামস্সাতি চতুব্বিধম্পি অধিগন্তুকামস্স. ফস্সিতুকামস্সাতি ঞাণফুসনায ফুসিতুকামস্স. সচ্ছিকাতুকামস্সাতি পচ্চৰেক্খণায পচ্চক্খং কত্তুকামস্স.

চতুন্নং মগ্গানং পুব্বভাগে ৰিপস্সনাতি চতুন্নং অরিযমগ্গানং পুরিমকোট্ঠাসে উপ্পন্নউদযব্বযাদিৰিপস্সনাঞাণানি.

১৯৯. দুতিযগাথায সপরিযন্তচারীতি সীলাদীসু চতূসু পরিযন্তেসু চরমানো. ডংসাধিপাতানন্তি পিঙ্গলমক্খিকানঞ্চ সেসমক্খিকানঞ্চ. তে হি ততো ততো অধিপতিত্ৰা খাদন্তি, তস্মা ‘‘অধিপাতা’’তি ৰুচ্চন্তি. মনুস্সফস্সানন্তি চোরাদিফস্সানং.

চত্তারো পরিযন্তাতি চত্তারো মরিযাদা পরিচ্ছেদা. অন্তোপূতিভাৰং পচ্চৰেক্খমানোতি অব্ভন্তরে কুচ্ছিতভাৰং সীলৰিরহিতভাৰং ওলোকযমানো. অন্তো সীলসংৰরপরিযন্তে চরতীতি সীলসংৰরপরিচ্ছেদব্ভন্তরে চরতি ৰিচরতি. মরিযাদং ন ভিন্দতীতি সীলমরিযাদং সীলপরিচ্ছেদং ন কোপেতি.

আদিত্তপরিযাযং পচ্চৰেক্খমানোতি আদিত্তদেসনং (মহাৰ. ৫৪; সং. নি. ৩.৬১; ৪.২৮) ওলোকেন্তো. অক্খব্ভঞ্জনৰণপটিচ্ছাদনপুত্তমংসূপমং পচ্চৰেক্খমানোতি সাকটিকস্স অক্খব্ভঞ্জনউপমঞ্চ, কুট্ঠব্যাধিনো ৰণানং পটিচ্ছাদনতেলপিলোতিকউপমঞ্চ, কন্তারপটিপন্নানং জাযম্পতিকানং পুত্তমংসখাদনউপমঞ্চ (সং. নি. ২.৬৩; মি. প. ৬.১.২) ওলোকেন্তো. ভদ্দেকরত্তৰিহারং পচ্চৰেক্খমানোতি –

‘‘অতীতং নান্ৰাগমেয্য, নপ্পটিকঙ্খে অনাগতং;

তং ৰে ‘ভদ্দেকরত্তো’তি, সন্তো আচিক্খতে মুনী’’তি. (ম. নি. ৩.২৮০; নেত্তি. ১০৩) –

এৰং ৰুত্তং ভদ্দেকরত্তৰিহারং ওলোকেন্তো. তা উপ্পতিত্ৰা উপ্পতিত্ৰা খাদন্তীতি নিপ্পতিত্ৰা নিপ্পতিত্ৰা খাদন্তি.

২০০. ততিযগাথায পরধম্মিকা নাম সত্তসহধম্মিকৰজ্জা সব্বেপি তে বাহিরকা. কুসলানুএসীতি কুসলধম্মে অন্ৰেসমানো.

সত্ত সহধম্মিকে ঠপেত্ৰাতি ভিক্খুভিক্খুনীসিক্খমানাসামণেরসামণেরীউপাসকউপাসিকাযো ৰজ্জেত্ৰা. অথাপরানিপি অত্থি অভিসম্ভোতব্বানীতি অপরানিপি মদ্দিতব্বানি অত্থি সংৰিজ্জন্তি.

২০১. চতুত্থগাথায আতঙ্কফস্সেনাতি রোগফস্সেন. সীতং অথুণ্হন্তি সীতঞ্চ উণ্হঞ্চ. সো তেহি ফুট্ঠো বহুধাতি সো তেহি আতঙ্কাদীহি অনেকেহি আকারেহি ফুট্ঠো সমানো. অনোকোতি অভিসঙ্খারৰিঞ্ঞাণাদীনং অনোকাসভূতো. অব্ভন্তরধাতুপকোপৰসেন ৰাতি সরীরব্ভন্তরে আপোধাতুক্খোভৰসেন ৰা অঞ্ঞধাতুক্খোভৰসেন ৰা. উণ্হন্তি সরীরব্ভন্তরে তেজোধাতুক্খোভৰসেন উণ্হং ভৰতি. অভিসঙ্খারসহগতৰিঞ্ঞাণস্সাতি কুসলাকুসলচেতনাসম্পযুত্তচিত্তস্স. ওকাসং ন করোতীতি অৰকাসং পতিট্ঠং ন করোতি. অৰত্থিতসমাদানোতি ওতরিত্ৰা গাহকো.

২০২. এৰং ‘‘ভিক্খুনো ৰিজিগুচ্ছতো’’তিআদীহি তীহি গাথাহি পুট্ঠমত্থং ৰিস্সজ্জেত্ৰা ইদানি ‘‘ক্যাস্স ব্যপ্পথযো’’তিআদিনা নযেন পুট্ঠং ৰিস্সজ্জেন্তো ‘‘থেয্যং ন কারে’’তিআদিমাহ. তত্থ ফস্সেতি ফুসেয্য. যদাৰিলত্তং মনসো ৰিজঞ্ঞাতি যং চিত্তস্স আৰিলত্তং ৰিজানেয্য, তং সব্বং ‘‘কণ্হস্স পক্খো’’তি ৰিনোদযেয্য.

অদিন্নাদানং পহাযাতি এত্থ অদিন্নস্স আদানং অদিন্নাদানং, পরসংহরণং, থেয্যং চোরিকাতি ৰুত্তং হোতি. তত্থ অদিন্নন্তি পরপরিগ্গহিতং, যত্থ পরো যথাকামকারিতং আপজ্জন্তো অদণ্ডারহো অনুপৰজ্জো চ হোতি; তস্মিং পরপরিগ্গহিতে পরপরিগ্গহিতসঞ্ঞিনো তদাদাযকউপক্কমসমুট্ঠাপিকা থেয্যচেতনা অদিন্নাদানং. তং হীনে পরস্স সন্তকে অপ্পসাৰজ্জং, পণীতে মহাসাৰজ্জং. কস্মা? ৰত্থুপণীততায. ৰত্থুসমত্তে সতি গুণাধিকানং সন্তকে ৰত্থুস্মিং মহাসাৰজ্জং, তং তং গুণাধিকং উপাদায ততো ততো হীনগুণস্স সন্তকে ৰত্থুস্মিং অপ্পসাৰজ্জং.

তস্স পঞ্চ সম্ভারা হোন্তি – পরপরিগ্গহিতং, পরপরিগ্গহিতসঞ্ঞিতা, থেয্যচিত্তং, উপক্কমো, তেন হরণন্তি. পহাযাতি ইমং অদিন্নাদানচেতনাসঙ্খাতং দুস্সীল্যং পজহিত্ৰা. পটিৰিরতোতি পহীনকালতো পট্ঠায ততো দুস্সীল্যতো ওরতো ৰিরতোৰ. দিন্নমেৰ আদিযতীতি দিন্নাদাযী. চিত্তেনপি দিন্নমেৰ পটিকঙ্খতীতি দিন্নপাটিকঙ্খী. থেনেতীতি থেনো, ন থেনেন অথেনেন. অথেনত্তাযেৰ সুচিভূতেন. অত্তনাতি অত্তভাৰেন, অথেনং সুচিভূতং অত্তভাৰং কত্ৰা ৰিহরতীতি ৰুত্তং হোতি. ইতো পরং ৰুত্তনযমেৰ.

মেত্তাযনৰসেন মেত্তি. মেত্তাকারো মেত্তাযনা. মেত্তায অযিতস্স মেত্তাসমঙ্গিনো চিত্তস্স ভাৰো মেত্তাযিতত্তং. অনুদযতীতি অনুদযা, রক্খতীতি অত্থো. অনুদযাকারো অনুদযনা. অনুদযিতস্স ভাৰো অনুদযিতত্তং. হিতস্স এসনৰসেন হিতেসিতা. অনুকম্পনৰসেন অনুকম্পা. সব্বেহিপি ইমেহি পদেহি উপচারপ্পনাপ্পত্তাৰ মেত্তা ৰুত্তা. ৰিপুলেনাতি এত্থ ফরণৰসেন ৰিপুলতা দট্ঠব্বা. ভূমিৰসেন পন তং মহগ্গতং. পগুণৰসেন অপ্পমাণং. সত্তারম্মণৰসেন চ অপ্পমাণং. ব্যাপাদপচ্চত্থিকপ্পহানেন অৰেরং. দোমনস্সপ্পহানতো অব্যাপজ্জং, নিদ্দুক্খন্তি ৰুত্তং হোতি.

আৰিলন্তি অপ্পসন্নং. লুল়িতন্তি কললং. এরিতন্তি অসন্নিট্ঠানং. ঘট্টিতন্তি আরম্মণেন ঘট্টনমাপাদিতং. চলিতন্তি কম্পমানং. ভন্তন্তি ৰিব্ভন্তং. অৰূপসন্তন্তি অনিব্বুতং.

যো সো মারোতি এৰমাদীসু মহাজনং অনত্থে নিযোজেত্ৰা মারেতীতি মারো. কণ্হকম্মত্তা কণ্হো. কামাৰচরিস্সরত্তা অধিপতি. মরণং পাপনতো অন্তগূ. মুঞ্চিতুং অপ্পদানট্ঠেন নমুচি. মারস্স বল়িসন্তি মারবল়িসং. ৰট্টসন্নিস্সিতট্ঠেন মারস্স আমিসন্তি মারামিসং. ৰসৰত্তনট্ঠেন মারস্স ৰিসযোতি মারৰিসযো. গোচরট্ঠেন মারস্স নিৰাসোতি মারনিৰাসো. কামচারং চরট্ঠেন মারস্স গোচরোতি মারগোচরো. দুপ্পমুঞ্চনট্ঠেন মারস্স বন্ধনন্তি মারবন্ধনং. দুক্খুদ্দযোতি দুক্খবন্ধনো.

২০৩. মূলম্পি তেসং পলিখঞ্ঞ তিট্ঠেতি তেসং কোধাতিমানানং যং অৰিজ্জাদিকং মূলং, তম্পি পলিখণিত্ৰা তিট্ঠেয্য. অদ্ধা ভৰন্তো অভিসম্ভৰেয্যাতি এতং পিযাপিযং অভিভৰন্তো একংসেনেৰ অভিভৰেয্য, ন তত্থ সিথিলং পরক্কমেয্যাতি অধিপ্পাযো.

অৰিজ্জা মূলন্তিআদযো অৰিজ্জা কোধস্স উপনিস্সযসহজাতাদিৰসেন মূলং হোতি. অনুপাযমনসিকারো চ অস্মিমানো চ ইমে দ্ৰে উপনিস্সযৰসেনেৰ. অহিরিকঅনোত্তপ্পউদ্ধচ্চা ইমে তযো উপনিস্সযসহজাতাদিৰসেন মূলানি হোন্তি, তথা অতিমানস্সাপি.

২০৪. পঞ্ঞং পুরক্খত্ৰাতি পঞ্ঞং পুব্বঙ্গমং কত্ৰা. কল্যাণপীতীতি কল্যাণপীতিযা সমন্নাগতো. চতুরো সহেথ পরিদেৰধম্মেতি অনন্তরগাথায ৰুচ্চমানে পরিদেৰনীযধম্মে সহেয্য.

ৰিচযবহুলোতি পরিৰীমংসনবহুলো. পৰিচযবহুলোতি ৰিসেসেন ৰীমংসনবহুলো. পেক্খাযনবহুলোতি ইক্খণবহুলো. সমেক্খাযনবহুলোতি এসনবহুলো. ৰিভূতৰিহারীতি পাকটং কত্ৰা ঞাতৰিহারী.

অভিক্কন্তে পটিক্কন্তেতি এত্থ তাৰ অভিক্কন্তং ৰুচ্চতি গমনং. পটিক্কন্তং নিৰত্তনং. তদুভযম্পি চতূসু ইরিযাপথেসু লব্ভতি. গমনে তাৰ পুরতো কাযং অভিহরন্তো অভিক্কমতি নাম. পটিনিৰত্তেন্তো পটিক্কমতি নাম. ঠানেপি ঠিতকোৰ কাযং পুরতো ওনমেন্তো অভিক্কমতি নাম. পচ্ছতো অপনামেন্তো পটিক্কমতি নাম. নিসজ্জাযপি নিসিন্নকোৰ আসনস্স পুরিমঅঙ্গাভিমুখো সংসরন্তো অভিক্কমতি নাম. পচ্ছিমঅঙ্গপ্পদেসং পচ্ছা সংসরন্তো পটিক্কমতি নাম. নিপজ্জাযপি এসেৰ নযো.

সম্পজানকারী হোতীতি সম্পজঞ্ঞেন সব্বকিচ্চকারী, সম্পজঞ্ঞমেৰ ৰা কারী হোতি. সো হি অভিক্কন্তাদীসু সম্পজঞ্ঞং করোতেৰ, ন কত্থচি সম্পজঞ্ঞৰিরহিতো হোতি. আলোকিতে ৰিলোকিতেতি এত্থ পন আলোকিতং নাম পুরতো পেক্খনং. ৰিলোকিতং নাম অনুদিসাপেক্খনং. অঞ্ঞানিপি হেট্ঠা উপরি পচ্ছতো পেক্খনৰসেন ওলোকিতউল্লোকিতঅপলোকিতানি নাম হোন্তি. তানি ইধ ন গহিতানি. সারুপ্পৰসেন পন ইমানেৰ দ্ৰে গহিতানি, ইমিনা ৰা মুখেন সব্বানি গহিতানেৰাতি.

সমিঞ্জিতে পসারিতেতি পব্বানং সমিঞ্জনপসারণে. সঙ্ঘাটিপত্তচীৰরধারণেতি এত্থ সঙ্ঘাটিচীৰরানং নিৰাসনপারুপনৰসেন, পত্তস্স ভিক্খাপটিগ্গহণাদিৰসেন পরিভোগো ধারণং নাম. অসিতাদীসু অসিতেতি পিণ্ডপাতভোজনে. পীতেতি যাগুআদিপানে. খাযিতেতি পিট্ঠখজ্জকাদিখাদনে. সাযিতেতি মধুফাণিতাদিসাযনে. উচ্চারপস্সাৰকম্মেতি উচ্চারস্স চ পস্সাৰস্স চ করণে. গতাদীসু গতেতি গমনে. ঠিতেতি ঠানে. নিসিন্নেতি নিসজ্জায.

সুত্তেতি সযনে. জাগরিতেতি জাগরণে. ভাসিতেতি কথনে. তত্থ উপাদারূপস্স সদ্দাযতনস্স অপ্পৰত্তে সতি ভাসিতা নাম ন হোতি, তস্মিং পৰত্তন্তে হোতীতি পরিগ্গাহকো ভিক্খু ভাসিতে সম্পজানকারী নাম হোতি. ৰিমুত্তাযতনসীসেন ধম্মং দেসেন্তোপি বাত্তিংসতিরচ্ছানকথং পহায দসকথাৰত্থুনিস্সিতং কথং কথেন্তোপি ভাসিতে সম্পজানকারী নাম. তুণ্হীভাৰেতি অকথনে. তত্থ উপাদারূপস্স সদ্দাযতনস্স পৰত্তিযং তুণ্হীভাৰো নাম নত্থি, অপ্পৰত্তিযং হোতীতি পরিগ্গাহকো ভিক্খু তুণ্হীভাৰে সম্পজানকারী নাম হোতি. অট্ঠতিংসআরম্মণেসু চিত্তরুচিযং কম্মট্ঠানং গহেত্ৰা নিসিন্নোপি দুতিযজ্ঝানং সমাপন্নোপি তুণ্হীভাৰে সম্পজানকারী নাম. এত্থ চ একো ইরিযাপথো দ্ৰীসু ঠানেসু আগতো. সো হেট্ঠা অভিক্কন্তে পটিক্কন্তেতি এত্থ ভিক্খাচারগামং গচ্ছতো আগচ্ছতো চ অদ্ধানগমনৰসেন কথিতো. গতে ঠিতেতি এত্থ ৰিহারে চুণ্ণিকপাদুদ্ধারৰসেন কথিতোতি ৰেদিতব্বো. বুদ্ধানুস্সতিৰসেনাতিআদযো হেট্ঠা তত্থ তত্থ পকাসিতা এৰ.

অরতীতি রতিপটিক্খেপো. অরতিতাতি অরমনাকারো. অনভিরতীতি অনভিরতভাৰো. অনভিরমনাতি অনভিরমনাকারো. উক্কণ্ঠিতাতি উক্কণ্ঠনাকারো. পরিতস্সিতাতি উক্কণ্ঠনৰসেনেৰ পরিতস্সনা.

২০৫. কিং সূ অসিস্সন্তি কিং ভুঞ্জিস্সামি. কুৰ ৰা অসিস্সন্তি কুহিং ৰা অসিস্সামি. দুক্খং ৰত সেত্থ কুৰজ্জ সেস্সন্তি ইমং রত্তিং দুক্খং সযিং, অজ্জ আগমনরত্তিং কত্থ সযিস্সং. এতে ৰিতক্কেতি এতে পিণ্ডপাতনিস্সিতে দ্ৰে, সেনাসননিস্সিতে দ্ৰেতি চত্তারো ৰিতক্কে. অনিকেতচারীতি অপলিবোধচারী নিত্তণ্হচারী.

ফলকে ৰাতি ৰঙ্কাদিফলকপীঠে চ. আগামিরত্তিন্তি আগমনিরত্তিযং. আদেৰনেয্যেতি ৰিসেসেন দেৰনিয্যে. পরিদেৰনেয্যেতি সমন্ততো দেৰনিয্যে.

২০৬. কালেতি পিণ্ডপাতকালে পিণ্ডপাতসঙ্খাতং অন্নং ৰা, চীৰরকালে চীৰরসঙ্খাতং ৰসনং ৰা লদ্ধা ধম্মেন সমেনাতি অধিপ্পাযো. মত্তং স জঞ্ঞাতি পরিগ্গহে চ পরিভোগে চ সো পমাণং জানেয্য. ইধাতি সাসনে, নিপাতমত্তমেৰ ৰা এতং. তোসনত্থন্তি সন্তোসত্থং, এতদত্থং মত্তং জানেয্যাতি ৰুত্তং হোতি. সো তেসু গুত্তোতি সো ভিক্খু তেসু পচ্চযেসু গুত্তো. যতচারীতি সঞ্ঞতৰিহারো, রক্খিতইরিযাপথো রক্খিতকাযৰচীমনোদ্ৰারো চাতি ৰুত্তং হোতি. ‘‘যতিচারী’’তিপি পাঠো, এসোযেৰত্থো. রুসিতোতি রোসিতো. ঘট্টিতোতি ৰুত্তং হোতি.

দ্ৰীহি কারণেহি মত্তং জানেয্যাতি দ্ৰীহি ভাগেহি পমাণং জানেয্য. পটিগ্গহণতো ৰাতি পরেহি দিয্যমানগ্গহণকালতো ৰা. পরিভোগতো ৰাতি পরিভুঞ্জনকালতো ৰা. থোকেপি দিয্যমানেতি অপ্পকেপি দিয্যমানে. কুলানুদযাযাতি কুলানং অনুদযতায. কুলানুরক্খাযাতি কুলানং অনুরক্খণত্থায. পটিগ্গণ্হাতীতি থোকম্পি গণ্হাতি. বহুকেপি দিয্যমানেতি অনপ্পকেপি দিয্যমানে. কাযপরিহারিকং চীৰরং পটিগ্গণ্হাতীতি এত্থ কাযং পরিহরতি পোসেতীতি কাযপরিহারিকং. কুচ্ছিপরিহারিকন্তি কুচ্ছিং পরিহরতি পোসেতীতি কুচ্ছিপরিহারিকং. ইতরীতরপচ্চযসন্তোসেন সমন্নাগতস্স ভিক্খুনো অট্ঠ পরিক্খারা ৰট্টন্তি তীণি চীৰরানি পত্তো দন্তকট্ঠচ্ছেদনৰাসি একা সূচি কাযবন্ধনং পরিস্সাৰনন্তি. ৰুত্তম্পি চেতং –

‘‘তিচীৰরঞ্চ পত্তো চ, ৰাসি সূচি চ বন্ধনং;

পরিস্সাৰনেন অট্ঠেতে, যুত্তযোগস্স ভিক্খুনো’’তি. (দী. নি. অট্ঠ. ১.২১৫; ম. নি. অট্ঠ. ১.২৯৪; ২.৩৪৯; অ. নি. অট্ঠ. ২.৪.১৯৮);

তে সব্বে কাযপরিহারিকাপি হোন্তি কুচ্ছিপরিহারিকাপি. কথং? তিচীৰরং তাৰ নিৰাসেত্ৰা চ পারুপিত্ৰা চ ৰিচরণকালে কাযং পরিহরতি পোসেতীতি কাযপরিহারিকং হোতি. চীৰরকণ্ণেন উদকং পরিস্সাৰেত্ৰা পিৰনকালে খাদিতব্বফলাফলগ্গহণকালে চ কুচ্ছিং পরিহরতি পোসেতীতি কুচ্ছিপরিহারিকং হোতি.

পত্তোপি তেন উদকং উদ্ধরিত্ৰা ন্হানকালে কুটিপরিভণ্ডকরণকালে চ কাযপরিহারিকো হোতি. আহারং গহেত্ৰা ভুঞ্জনকালে কুচ্ছিপরিহারিকো. ৰাসিপি তায দন্তকট্ঠচ্ছেদনকালে মঞ্চপীঠানং অঙ্গপাদচীৰরকুটিদণ্ডকসজ্জনকালে চ কাযপরিহারিকা হোতি. উচ্ছুচ্ছেদননাল়িকেরাদিতচ্ছনকালে কুচ্ছিপরিহারিকা. সূচি চীৰরসিব্বনকালে কাযপরিহারিকা হোতি. পূৰং ৰা ফলং ৰা ৰিজ্ঝিত্ৰা খাদনকালে কুচ্ছিপরিহারিকা. কাযবন্ধনং বন্ধিত্ৰা ৰিচরণকালে কাযপরিহারিকং. উচ্ছুআদীনি বন্ধিত্ৰা গহণকালে কুচ্ছিপরিহারিকং. পরিস্সাৰনং তেন উদকং পরিস্সাৰেত্ৰা ন্হানকালে সেনাসনপরিভণ্ডকরণকালে চ কাযপরিহারিকং, পানীযপাণকপরিস্সাৰনকালে তেনেৰ তিলতণ্ডুলপুথুকাদীনি গহেত্ৰা খাদনকালে চ কুচ্ছিপরিহারিকং.

পটিসঙ্খাযোনিসোতি উপাযেন পথেন পটিসঙ্খায ঞত্ৰা, পচ্চৰেক্খিত্ৰাতি অত্থো. এত্থ চ ‘‘সীতস্স পটিঘাতাযা’’তিআদিনা নযেন ৰুত্তপচ্চৰেক্খণমেৰ যোনিসো পটিসঙ্খাতি ৰেদিতব্বং. তত্থ চীৰরন্তি অন্তরৰাসকাদীসু যংকিঞ্চি. পটিসেৰতীতি পরিভুঞ্জতি নিৰাসেতি ৰা পারুপতি ৰা. যাৰদেৰাতি পযোজনাৰধিপরিচ্ছেদনিযমৰচনং. এত্তকমেৰ হি যোগিনো চীৰরপটিসেৰনে পযোজনং, যদিদং সীতস্স পটিঘাতাযাতিআদি, ন ইতো ভিয্যো. সীতস্সাতি অজ্ঝত্তধাতুক্খোভৰসেন ৰা বহিদ্ধা উতুপরিণামনৰসেন ৰা উপ্পন্নস্স যস্স কস্সচি সীতস্স.

পটিঘাতাযাতি পটিহননত্থং. যথা সরীরে আবাধং ন উপ্পাদেতি, এৰং তস্স ৰিনোদনত্থং. সীতব্ভাহতে হি সরীরে ৰিক্খিত্তচিত্তো যোনিসো পদহিতুং ন সক্কোতি. তস্মা সীতস্স পটিঘাতায চীৰরং সেৰিতব্বন্তি ভগৰা অনুঞ্ঞাসি. এস নযো সব্বত্থ. কেৰলঞ্হেত্থ উণ্হস্সাতি অগ্গিসন্তাপস্স, তস্স ৰনদাহাদীসু সম্ভৰো ৰেদিতব্বো. ডংসমকসৰাতাতপসরীসপসম্ফস্সানন্তি এত্থ পন ডংসাতি ডংসনমক্খিকা. ‘‘অন্ধমক্খিকা’’তিপি ৰুচ্চন্তি. মকসাতি মকসা এৰ. ৰাতাতি সরজঅরজাদিভেদা. আতপোতি সূরিযাতপো. সরীসপাতি যে কেচি সরন্তা গচ্ছন্তি দীঘজাতিকা সপ্পাদযো, তেসং দট্ঠসম্ফস্সো চ ফুট্ঠসম্ফস্সো চাতি দুৰিধো সম্ফস্সো; সোপি চীৰরং পারুপিত্ৰা নিসিন্নং ন বাধতি. তস্মা তাদিসেসু ঠানেসু তেসং পটিঘাতত্থায পটিসেৰতি. যাৰদেৰাতি পুন এতস্স ৰচনং নিযতপযোজনাৰধিপরিচ্ছেদদস্সনত্থং. হিরিকোপীনপটিচ্ছাদনত্থন্তি নিযতপযোজনং, ইতরানি কদাচি হোন্তি. তত্থ হিরিকোপীনন্তি তং তং সম্বাধট্ঠানং. যস্মিং যস্মিঞ্হি অঙ্গে ৰিৰরিযমানে হিরী কুপ্পতি ৰিনস্সতি, তং তং হিরিং কোপনতো হিরিকোপীনন্তি ৰুচ্চতি. তস্স চ হিরিকোপীনস্স পটিচ্ছাদনত্থন্তি হিরিকোপীনপটিচ্ছাদনত্থং. ‘‘হিরিকোপীনং পটিচ্ছাদনত্থ’’ন্তিপি পাঠো.

পিণ্ডপাতন্তি যংকিঞ্চি আহারং. যো হি কোচি আহারো ভিক্খুনো পিণ্ডোল্যেন পত্তে পতিতত্তা ‘‘পিণ্ডপাতো’’তি ৰুচ্চতি. পিণ্ডানং ৰা পাতো পিণ্ডপাতো, তত্থ তত্থ লদ্ধানং ভিক্খানং সন্নিপাতো, সমূহোতি ৰুত্তং হোতি. সেসং হেট্ঠা ৰুত্তনযমেৰ.

সেনাসনন্তি সযনঞ্চ আসনঞ্চ. যত্থ যত্থ হি সেতি ৰিহারে ৰা অড্ঢযোগাদিম্হি ৰা, তং সেনং. যত্থ যত্থ আসতি নিসীদতি, তং আসনং, তং একতো কত্ৰা ‘‘সেনাসন’’ন্তি ৰুচ্চতি. উতুপরিস্সযৰিনোদনপটিসল্লানারামত্থন্তি পরিসহনট্ঠেন উতুযেৰ উতুপরিস্সযো. উতুপরিস্সযস্স ৰিনোদনত্থঞ্চ পটিসল্লানারামত্থঞ্চ. যো সরীরাবাধচিত্তৰিক্খেপকরো অসপ্পাযো উতু সেনাসনপটিসেৰনেন ৰিনোদেতব্বো হোতি, তস্স ৰিনোদনত্থং একীভাৰসুখত্থঞ্চাতি ৰুত্তং হোতি. কামঞ্চ সীতপটিঘাতাদিনাৰ উতুপরিস্সযৰিনোদনং ৰুত্তমেৰ. যথা পন চীৰরপটিসেৰনে ‘‘হিরিকোপীনপটিচ্ছাদনং নিযতপযোজনং, ইতরানি কদাচি কদাচি ভৰন্তী’’তি ৰুত্তং, এৰমিধাপি নিযতউতুপরিস্সযৰিনোদনং সন্ধায ইদং ৰুত্তন্তি ৰেদিতব্বং. অথ ৰা অযং ৰুত্তপ্পকারো উতু উতুযেৰ. পরিস্সযো পন দুৰিধো পাকটপরিস্সযো চ পটিচ্ছন্নপরিস্সযো চ. তত্থ পাকটপরিস্সযো সীহব্যগ্ঘাদযো, পটিচ্ছন্নপরিস্সযো রাগদোসাদযো. তে যত্থ অপরিগুত্তিযা চ অসপ্পাযরূপদস্সনাদিনা চ আবাধং ন করোন্তি, তং সেনাসনং এৰং জানিত্ৰা পচ্চৰেক্খিত্ৰা পটিসেৰন্তো ভিক্খু পটিসঙ্খা যোনিসো সেনাসনং উতুপরিস্সযৰিনোদনত্থং পটিসেৰতীতি ৰেদিতব্বো.

গিলানপচ্চযভেসজ্জপরিক্খারন্তি এত্থ রোগস্স পটিঅযনট্ঠেন পচ্চযো, পচ্চনীকগমনট্ঠেনাতি অত্থো. যস্স কস্সচি সপ্পাযস্সেতং অধিৰচনং. ভিসক্কস্স কম্মং তেন অনুঞ্ঞাতত্তাতি ভেসজ্জং. গিলানপচ্চযোৰ ভেসজ্জং গিলানপচ্চযভেসজ্জং, যং কিঞ্চি গিলানস্স সপ্পাযং ভিসক্ককম্মং তেলমধুফাণিতাদীতি ৰুত্তং হোতি. পরিক্খারোতি পন ‘‘সত্তহি নগরপরিক্খারেহি সুপরিক্খত্তং হোতী’’তিআদীসু (অ. নি. ৭.৬৭) পরিৰারো ৰুচ্চতি. ‘‘রথো সীলপরিক্খারো, ঝানক্খো চক্কৰীরিযো’’তিআদীসু (সং. নি. ৫.৪) অলঙ্কারো. ‘‘যে চ খো ইমে পব্বজিতেন জীৰিতপরিক্খারা সমুদানেতব্বা’’তিআদীসু (ম. নি. ১.১৯১-১৯২) সম্ভারো. ইধ পন সম্ভারোপি পরিৰারোপি ৰট্টতি. তঞ্চ গিলানপচ্চযভেসজ্জং জীৰিতস্স পরিৰারোপি হোতি, জীৰিতনাসকাবাধুপ্পত্তিযা অন্তরং অদত্ৰা রক্খণতো সম্ভারোপি. যথাচিরং পৰত্ততি, এৰমস্স কারণভাৰতো; তস্মা ‘‘পরিক্খারো’’তি ৰুচ্চতি. এৰং গিলানপচ্চযভেসজ্জঞ্চ তং পরিক্খারো চাতি গিলানপচ্চযভেসজ্জপরিক্খারো, তং গিলানপচ্চযভেসজ্জপরিক্খারং. গিলানস্স যং কিঞ্চি সপ্পাযং ভিসক্কানুঞ্ঞাতং তেলমধুফাণিতাদিজীৰিতপরিক্খারন্তি ৰুত্তং হোতি.

উপ্পন্নানন্তি জাতানং ভূতানং নিব্বত্তানং. ৰেয্যাবাধিকানন্তি এত্থ ব্যাবাধোতি ধাতুক্খোভো তংসমুট্ঠানা চ কুট্ঠগণ্ডপীল়কাদযো, ব্যাবাধতো উপ্পন্নত্তা ৰেয্যাবাধিকা. ৰেদনানন্তি দুক্খৰেদনা, অকুসলৰিপাকৰেদনা, তাসং ৰেয্যাবাধিকানং ৰেদনানং. অব্যাবজ্ঝপরমতাযাতি নিদ্দুক্খপরমতায. যাৰ তং দুক্খং সব্বং পহীনং হোতি, তাৰাতি অত্থো.

সন্তুট্ঠো হোতীতি পচ্চযসন্তোসেন সন্তুট্ঠো হোতি. ইতরীতরেন চীৰরেনাতি থূলসুখুমলূখপণীতথিরজিণ্ণানং যেন কেনচি. অথ খো যথালদ্ধাদীনং ইতরীতরেন যেন কেনচি সন্তুট্ঠো হোতীতি অত্থো. চীৰরস্মিঞ্হি তযো সন্তোসা যথালাভসন্তোসো যথাবলসন্তোসো যথাসারুপ্পসন্তোসোতি. পিণ্ডপাতাদীসুপি এসেৰ নযো.

ৰণ্ণৰাদীতি একো সন্তুট্ঠো হোতি, সন্তোসস্স ৰণ্ণং ন কথেতি, একো ন সন্তুট্ঠো হোতি, সন্তোসস্স ৰণ্ণং কথেতি, একো নেৰ সন্তুট্ঠো হোতি, ন সন্তোসস্স ৰণ্ণং কথেতি, একো সন্তুট্ঠো চ হোতি, সন্তোসস্স ৰণ্ণং কথেতি, তং দস্সেতুং ‘‘ইতরীতরচীৰরসন্তুট্ঠিযা চ ৰণ্ণৰাদী’’তি ৰুত্তং. অনেসনন্তি দূতেয্যপহীনগমনানুযোগপ্পভেদং নানপ্পকারং অনেসনং. অপ্পতিরূপন্তি অযুত্তং. অলদ্ধা চাতি অলভিত্ৰা. যথা একচ্চো ‘‘কথং নু খো চীৰরং লভিস্সামী’’তি পুঞ্ঞৰন্তেহি ভিক্খূহি সদ্ধিং একতো হুত্ৰা কোহঞ্ঞং করোন্তো উত্তস্সতি পরিতস্সতি, সন্তুট্ঠো ভিক্খু এৰং অলদ্ধা চ চীৰরং ন পরিতস্সতি. লদ্ধা চাতি ধম্মেন সমেন লভিত্ৰা. অগধিতোতি ৰিগতলোভৰন্তো. অমুচ্ছিতোতি অধিমত্ততণ্হায মুচ্ছং অনাপন্নো. অনজ্ঝাপন্নোতি তণ্হায অনোত্থটো অপরিযোনদ্ধো. আদীনৰদস্সাৰীতি অনেসনাপত্তিযঞ্চ গধিতপরিভোগে চ আদীনৰং পস্সমানো. নিস্সরণপঞ্ঞোতি ‘‘যাৰদেৰ সীতস্স পটিঘাতাযা’’তি (ম. নি. ১.২৩) ৰুত্তং নিস্সরণং এৰ পজানন্তো. ইতরীতরচীৰরসন্তুট্ঠিযাতি যেন কেনচি চীৰরেন সন্তুট্ঠিযা. নেৰত্তানুক্কংসেতীতি ‘‘অহং পংসুকূলিকো, মযা উপসম্পদমাল়েযেৰ পংসুকূলিকঙ্গং গহিতং, কো মযা সদিসো অত্থী’’তি অত্তুক্কংসনং ন করোতি. ন পরং ৰম্ভেতীতি ‘‘ইমে পনঞ্ঞে ভিক্খূ ন পংসুকূলিকা’’তি ৰা ‘‘পংসুকূলিকমত্তম্পি এতেসং নত্থী’’তি ৰা এৰং পরং ন ৰম্ভেতি.

যো হি তত্থ দক্খোতি যো তস্মিং চীৰরসন্তোসে ৰণ্ণৰাদী, তাসু ৰা দক্খো ছেকো ব্যত্তো. অনলসোতি সাতচ্চকিরিযায আলসিযৰিরহিতো. সম্পজানো পটিস্সতোতি সম্পজানপঞ্ঞায চেৰ সতিযা চ যুত্তো. পোরাণেতি ন অধুনুপ্পত্তিকে. অগ্গঞ্ঞেতি ‘‘অগ্গো’’তি জানিতব্বে. অরিযৰংসে ঠিতোতি অরিযানং ৰংসে পতিট্ঠিতো. অরিযৰংসোতি চ যথা হি খত্তিযৰংসো ব্রাহ্মণৰংসো ৰেস্সৰংসো সুদ্দৰংসো সমণৰংসো কুলৰংসো রাজৰংসো, এৰং অযম্পি অট্ঠমো অরিযৰংসো অরিযতন্তি অরিযপৰেণী নাম হোতি. সো খো পনাযং অরিযৰংসো ইমেসং ৰংসানং মূলগন্ধাদীনং কাল়ানুসারিগন্ধাদযো ৰিয অগ্গমক্খাযতি. কে পন তে অরিযা যেসং এসো ৰংসোতি? অরিযা ৰুচ্চন্তি বুদ্ধা চ পচ্চেকবুদ্ধা চ তথাগতসাৰকা চ, এতেসং অরিযানং ৰংসোতি অরিযৰংসো. ইতো পুব্বে হি সতসহস্সকপ্পাদিকানং চতুন্নং অসঙ্খ্যেয্যানং মত্থকে তণ্হঙ্করো মেঙ্কেরো সরণঙ্করো দীপঙ্করোতি চত্তারো বুদ্ধা উপ্পন্না, তে অরিযা, তেসং অরিযানং ৰংসোতি অরিযৰংসো. তেসং বুদ্ধানং পরিনিব্বানতো অপরভাগে একং অসঙ্খ্যেয্যং অতিক্কমিত্ৰা কোণ্ডঞ্ঞো নাম বুদ্ধো উপ্পন্নো…পে… ইমস্মিং কপ্পে ককুসন্ধো কোণাগমনো কস্সপো অম্হাকং ভগৰা গোতমোতি চত্তারো বুদ্ধা উপ্পন্না, তেসং অরিযানং ৰংসোতি অরিযৰংসো. অপি চ অতীতানাগতপচ্চুপ্পন্নানং সব্ববুদ্ধপচ্চেকবুদ্ধসাৰকানং অরিযানং ৰংসোতি অরিযৰংসো, তস্মিং অরিযৰংসে পতিট্ঠিতো.

ইতরীতরেন পিণ্ডপাতেনাতি যেন কেনচি পিণ্ডপাতেন. সেনাসনাদীসুপি এসেৰ নযো. আযতনেসূতি চক্খাদীসু আযতনেসু.

যতোতি সঞ্ঞতো. যত্তোতি যত্তৰা. পটিযত্তোতি অতিৰিয যত্তৰা. গুত্তোতি রক্খিতো. গোপিতোতি মঞ্জূসায ৰিয পট্ঠপিতো. রক্খিতোতি পটিসামিতো. সংৰুতোতি দ্ৰারসংৰরণেন পিহিতো. খুংসিতোতি গরহিতো. ৰম্ভিতোতি অপসাদিতো. ঘট্টিতোতি ঘট্টনমাপাদিতো. গরহিতোতি অৰমঞ্ঞিতো. উপৰদিতোতি অক্কোসিতো.

ফরুসেনাতি মম্মচ্ছেদনৰচনেন. কক্খল়েনাতি দারুণেন. নপ্পটিৰজ্জাতি পটিপ্ফরিত্ৰা ন কথেয্য.

২০৭. ঝানানুযুত্তোতি অনুপ্পন্নুপ্পাদনেন উপ্পন্নসেৰনেন চ ঝানেন অনুযুত্তো. উপেক্খমারব্ভ সমাহিতত্তোতি চতুত্থজ্ঝানুপেক্খং উপ্পাদেত্ৰা সমাহিতচিত্তো. তক্কাসযং কুক্কুচ্চঞ্চুপচ্ছিন্দেতি কামৰিতক্কাদিৰিতক্কঞ্চ কামসঞ্ঞাদিকং ৰিতক্কস্স আসযঞ্চ হত্থকুক্কুচ্চাদিকুক্কুচ্চঞ্চ উপচ্ছিন্দেয্য.

অনুপ্পন্নস্স ৰা পঠমস্স ঝানস্স উপ্পাদাযাতি তস্মিং অত্তভাৰে অনুপ্পন্নস্স ৰা উপ্পজ্জিত্ৰা পরিহীনস্স ৰা পঠমজ্ঝানস্স উপ্পাদনত্থং অত্তনো সন্তানে পটিলাভত্থং. উপ্পন্নং ৰা পঠমং ঝানং আসেৰতীতিআদীসু এত্থ আদরেন সেৰতি পগুণং করোতি ভাৰেতি ৰড্ঢেতি বহুলীকরোতি পুনপ্পুনং করোতি.

উপেক্খাতি চতুত্থজ্ঝানে উপ্পন্না তত্রমজ্ঝত্তুপেক্খা. উপেক্খাতি সভাৰপদং. উপেক্খনাতি উপপত্তিতো ইক্খনাকারো. অজ্ঝুপেক্খনাতি অধিকা হুত্ৰা ইক্খনা. চিত্তসমতাতি চিত্তস্স সমতা চিত্তস্স ঊনাতিরিত্ততং ৰজ্জেত্ৰা সমভাৰো. চিত্তপ্পস্সদ্ধতাতি চিত্তস্স অপ্পগব্ভতা, অথদ্ধভাৰোতি অত্থো. মজ্ঝত্ততা চিত্তস্সাতি ন সত্তস্স ন পোসস্স, চিত্তস্স মজ্ঝত্তভাৰোতি অত্থো. চতুত্থে ঝানে উপেক্খং আরব্ভাতি চতুত্থস্মিং ঝানস্মিং উপ্পন্নং তত্রমজ্ঝত্তুপেক্খং পটিচ্চ. একগ্গচিত্তোতি একারম্মণে পৰত্তচিত্তো. অৰিক্খিত্তচিত্তোতি উদ্ধচ্চৰিরহিতো ন ৰিক্খিত্তচিত্তো.

নৰ ৰিতক্কা ৰুত্তনযা এৰ. কামৰিতক্কানং কামসঞ্ঞাসযোতি কামৰিতক্কং ৰিতক্কেন্তস্স উপ্পন্না কামসঞ্ঞা তেসং ৰিতক্কানং আসযো ৰসনোকাসোতি কামসঞ্ঞাসযো. ব্যাপাদৰিতক্কাদীসুপি এসেৰ নযো.

২০৮. চুদিতো ৰচীভি সতিমাভিনন্দেতি উপজ্ঝাযাদীহি ৰাচাহি চোদিতো সমানো সতিমা হুত্ৰা তং চোদনং অভিনন্দেয্য. ৰাচং পমুঞ্চে কুসলন্তি ঞাণসমুট্ঠিতং ৰাচং পমুঞ্চেয্য. নাতিৰেলন্তি অতিৰেলং পন ৰাচং কালৰেলঞ্চ সীলৰেলঞ্চ অতিক্কন্তং নপ্পমুঞ্চেয্য. জনৰাদধম্মাযাতি জনপরিৰাদকথায. ন চেতযেয্যাতি চেতনং ন উপ্পাদেয্য.

ইদং তে অপ্পত্তন্তি ইদং তৰ ন পত্তং. অসারুপ্পন্তি তৰ পযোগং অসারুপ্পং. অসীলট্ঠন্তি তৰ পযোগং ন সীলে পতিট্ঠন্তি অসীলট্ঠং, সীলে ঠিতস্স পযোগং ন হোতীতি ৰুত্তং হোতি. কেচি ‘‘অসিলিট্ঠ’’ন্তি পঠন্তি, অমট্ঠৰচনন্তি অত্থং ৰণ্ণযন্তি.

নিধীনন্তি তত্থ তত্থ নিদহিত্ৰা ঠপিতানং হিরঞ্ঞসুৰণ্ণাদিপূরানং নিধিকুম্ভীনং. পৰত্তারন্তি কিচ্ছজীৰিকে দুগ্গতমনুস্সে অনুকম্পং কত্ৰা ‘‘এহি সুখেন তে জীৰনুপাযং দস্সেস্সামী’’তি নিধিট্ঠানং নেত্ৰা হত্থং পসারেত্ৰা ‘‘ইমং গহেত্ৰা সুখং জীৰা’’তি আচিক্খিতারং ৰিয. ৰজ্জদস্সিনন্তি দ্ৰে ৰজ্জদস্সিনো ‘‘ইমিনা নং অসারুপ্পেন ৰা খলিতেন ৰা সঙ্ঘমজ্ঝে নিগ্গণ্হিস্সামী’’তি রন্ধগৰেসকো চ অঞ্ঞাতং ঞাপনত্থায ঞাতং অনুগ্গণ্হত্থায সীলাদিনা চস্স ৰুদ্ধিকামতায তং তং ৰজ্জং ওলোকনেন উল্লপনসভাৰসণ্ঠিতো চ. অযং ইধ অধিপ্পেতো. যথা হি দুগ্গতমনুস্সো ‘‘ইমং গণ্হাহী’’তি তজ্জেত্ৰা পোট্ঠেত্ৰাপি নিধিং দস্সেন্তে কোপং ন করোতি, পমুদিতোৰ হোতি, এৰমেৰ এৰরূপে পুগ্গলে অসারুপ্পং ৰা খলিতং ৰা দিস্ৰা আচিক্খন্তে কোপো ন কাতব্বো, তুট্ঠেনেৰ ভৰিতব্বং. ‘‘ভন্তে মহন্তং ৰো কতং কম্মং, ময্হং আচরিযুপজ্ঝাযট্ঠানে ঠত্ৰা ওৰদন্তেহি পুনপি মং ৰদেয্যাথা’’তি পৰারেতব্বমেৰ. নিগ্গয্হৰাদিন্তি একচ্চো হি সদ্ধিৰিহারিকাদীনং অসারুপ্পং ৰা খলিতং ৰা দিস্ৰা ‘‘অযং মে মুখোদকদানাদীহি সক্কচ্চং উপট্ঠহতি, সচে নং ৰক্খামি, ন মং উপট্ঠহিস্সতি, এৰং মম পরিহানি ভৰিস্সতী’’তি ৰত্তুং অৰিসহন্তো ন নিগ্গয্হৰাদী নাম হোতি, সো ইমস্মিং সাসনে কচৰরং আকিরতি. যো পন তথারূপং ৰজ্জং দিস্ৰা ৰজ্জানুরূপং তজ্জেত্ৰা পণামেন্তো দণ্ডকম্মং করোন্তো ৰিহারা নীহরন্তো সিক্খাপেতি, অযং নিগ্গয্হৰাদী নাম সেয্যথাপি সম্মাসম্বুদ্ধো. ৰুত্তঞ্হেতং – ‘‘নিগ্গয্হ নিগ্গয্হাহং, আনন্দ, ৰক্খামি, পৰয্হ পৰয্হাহং, আনন্দ, ৰক্খামি, যো সারো সো ঠস্সতী’’তি (ম. নি. ৩.১৯৬). মেধাৰিন্তি ধম্মোজপঞ্ঞায সমন্নাগতং. তাদিসন্তি এৰরূপং পণ্ডিতং ভজেয্য পযিরুপাসেয্য. তাদিসঞ্হি আচরিযং ভজমানস্স অন্তেৰাসিকস্স সেয্যোৰ হোতি, ন পাপিযো, ৰুড্ঢিযেৰ হোতি, নো পরিহানীতি.

ওৰদেয্যাতি উপ্পন্নে ৰত্থুস্মিং ৰদন্তো ওৰদতি নাম, অনুপ্পন্নে ‘‘অযসোপি তে সিযা’’তিআদিৰসেন অনাগতং দস্সেন্তো অনুসাসতি নাম. সম্মুখা ৰদন্তোপি ওৰদতি নাম, পরম্মুখা দূতং ৰা সাসনং ৰা পেসেন্তো অনুসাসতি নাম. সকিং ৰদন্তোপি ওৰদতি নাম, পুনপ্পুনং ৰদন্তো অনুসাসতি নাম. ওৰদন্তো এৰ ৰা অনুসাসতি নামাতি এৰং ওৰদেয্য অনুসাসেয্য. অসব্ভাতি অকুসলধম্মা নিৰারেয্য, কুসলধম্মে পতিট্ঠপেয্যাতি অত্থো. সতঞ্হি সো পিযো হোতীতি সো এৰরূপো পুগ্গলো বুদ্ধাদীনং সপ্পুরিসানং পিযো হোতি. যে পন অদিট্ঠধম্মা অৰিতিণ্ণপরলোকা আমিসচক্খুকা জীৰিকত্থায পব্বজিতা, তেসং অসতং সো ওৰাদকো অনুসাসকো ‘‘ন ত্ৰং অম্হাকং উপজ্ঝাযো, ন আচরিযো, কস্মা অম্হাকং ওৰদসী’’তি এৰং মুখসত্তীহি ৰিজ্ঝন্তানং অপ্পিযো হোতীতি.

এককম্মন্তি অপলোকনকম্মাদিকং এককম্মং. একুদ্দেসোতি নিদানুদ্দেসাদিকো একুদ্দেসো. সমসিক্খতাতি সমানসিক্খতা. আহতচিত্ততন্তি কোধেন পহতচিত্তভাৰং. খিলজাততন্তি থদ্ধভাৰং. পঞ্চপি চেতোখিলেতি বুদ্ধধম্মসঙ্ঘসিক্খাসব্রহ্মচারীসু পঞ্চসুপি চিত্তস্স থদ্ধভাৰে.

ঞাণসমুট্ঠিতং ৰাচন্তি ঞাণসম্পযুত্তচিত্তেন উপ্পাদিতং ৰাক্যং. মুঞ্চেয্যাতি ৰিস্সজ্জেয্য. অত্থূপসংহিতন্তি অত্থসহিতং কারণসহিতং. ধম্মূপসংহিতন্তি ধম্মেন যুত্তং. কালাতিক্কন্তং ৰাচং ন ভাসেয্যাতি কালাতীতং ৰাচং ন কথেয্য তস্স কালস্স অতিক্কন্তত্তা. ৰেলাতিক্কন্তন্তি মরিযাদাতীতং ৰচনং ন ভণেয্য ৰচনমরিযাদস্স অতিক্কন্তত্তা. উভযৰসেন কালৰেলা.

যো ৰে কালে অসম্পত্তেতি অত্তনো ৰচনকালে অসম্পত্তে. অতিৰেলন্তি ৰেলাতিক্কন্তং কত্ৰা অতিরেকপ্পমাণং ভাসতি. নিহতো সেতীতি নিগ্ঘাতিতো সযতি. কোকিলাযেৰ অত্রজোতি কাকিযা পটিজগ্গিতো কোকিলায অব্ভন্তরে জাতো কোকিলপোতকো ৰিয.

২০৯. অথাপরন্তি অথ ইদানি ইতো পরম্পি. পঞ্চ রজানীতি রূপরাগাদীনি পঞ্চ রজানি. যেসং সতীমা ৰিনযায সিক্খেতি যেসং উপট্ঠিতস্সতি হুত্ৰাৰ ৰিনযনত্থং তিস্সো সিক্খা সিক্খেয্য. এৰং সিক্খন্তো হি রূপেসু…পে… ফস্সেসু সহেথ রাগং, ন অঞ্ঞেতি.

রূপরজোতি রূপারম্মণং পটিচ্চ উপ্পন্নো রাগাদিরজো. সদ্দরজাদীসুপি এসেৰ নযো.

২১০. ততো সো তেসং ৰিনযায সিক্খন্তো অনুক্কমেন – এতেসু ধম্মেসূতি গাথা. তত্থ এতেসূতি রূপাদীসু. কালেন সো সম্মা ধম্মং পরিৰীমংসমানোতি সো ভিক্খু য্ৰাযং ‘‘উদ্ধতে চিত্তে সমথস্স কালো’’তিআদিনা (সং. নি. ৫.২৩৪) নযেন কালো ৰুত্তো, তেন কালেন সব্বং সঙ্খতধম্মং অনিচ্চাদিনযেন পরিৰীমংসমানো. একোদিভূতো ৰিহনে তমং সোতি সো একগ্গচিত্তো সব্বং মোহাদিতমং ৰিহনেয্য, নত্থি এত্থ সংসযো.

উদ্ধতে চিত্তেতি ৰীরিযিন্দ্রিযৰসেন চিত্তে অৰূপসন্তে. বলৰৰীরিযঞ্হি মন্দসমাধিং ৰীরিযস্স উদ্ধচ্চপক্খত্তা উদ্ধচ্চং অভিভৰতি. এৰং উদ্ধতে চিত্তে. সমথস্স কালোতি সমাধিস্স ভাৰনায কালো. সমাহিতে চিত্তেতি উপচারপ্পনাহি চিত্তে সমাহিতে. বলৰসমাধি হি মন্দৰীরিযং সমাধিস্স কোসজ্জপক্খত্তা কোসজ্জং অভিভৰতি. সমাধি ৰীরিযেন সঞ্ঞোজিতো কোসজ্জে পতিতুং ন লভতি. ৰীরিযং সমাধিনা সঞ্ঞোজিতং উদ্ধচ্চে পতিতুং ন লভতি. তস্মা তদুভযং সমং কাতব্বং. উভযসমতায হি অপ্পনা হোতি. ৰিপস্সনায কালোতি এৰং সমাহিতে অনিচ্চাদিৰসেন ৰিৰিধায পস্সনায কালো, সমাধিকম্মিকস্স বলৰতীপি সদ্ধা ৰট্টতি. এৰং সদ্দহন্তো ওকপ্পেন্তো অপ্পনং পাপুণাতি. সমাধিপঞ্ঞাসু পন সমাধিকম্মিকস্স বলৰতী একগ্গতা ৰট্টতি. এৰঞ্হি সো অপ্পনং পাপুণাতি. ৰিপস্সনাকম্মিকস্স পন পঞ্ঞা বলৰতী ৰট্টতি. এৰঞ্হি সো লক্খণপ্পটিৰেধং পাপুণাতি. উভিন্নং পন সমত্তেপি অপ্পনা হোতি এৰ.

কালে পগ্গণ্হতি চিত্তন্তি যস্মিং সমযে অতিসিথিলৰীরিযতাদীহি লীনং চিত্তং হোতি, তস্মিং সমযে ধম্মৰিচযৰীরিযপীতিসম্বোজ্ঝঙ্গসমুট্ঠাপনেন তং চিত্তং পগ্গণ্হাতি. নিগ্গণ্হতীতি যস্মিং সমযে অচ্চারদ্ধৰীরিযতাদীহি উদ্ধতং চিত্তং হোতি, তস্মিং সমযে পস্সদ্ধিসমাধিউপেক্খাসম্বোজ্ঝঙ্গসমুট্ঠাপনেন তং চিত্তং নিগ্গণ্হাতি. সম্পহংসতি কালেনাতি যস্মিং সমযে চিত্তং পঞ্ঞাপযোগমন্দতায ৰা উপসমসুখানং ৰিগমেন ৰা নিরস্সাদং হোতি, তস্মিং সমযে অট্ঠসংৰেগৰত্থুপচ্চৰেক্খণেন সংৰেজেতি. অট্ঠ সংৰেগৰত্থূনি নাম – জাতিজরাব্যাধিমরণানি চত্তারি, অপাযদুক্খং পঞ্চমং, অতীতে ৰট্টমূলকং দুক্খং অনাগতে ৰট্টমূলকং দুক্খং, পচ্চুপ্পন্নে আহারপরিযেট্ঠিমূলকং দুক্খন্তি. রতনত্তযগুণানুস্সরণেনাস্স পসাদং জনেতি. অযং ৰুচ্চতি ‘‘সম্পহংসতি কালেনা’’তি. কালে চিত্তং সমাদহেতি যস্মিং সমযে সদ্ধাপঞ্ঞানং সমাধিৰীরিযানঞ্চ সমভাৰো, তস্মিং কালে চিত্তং সমাদহেয্য.

অজ্ঝুপেক্খতি কালেনাতি যস্মিং সমযে সম্মা পটিপত্তিং আগম্ম অলীনং অনুদ্ধতং অনিরস্সাদং আরম্মণে সমপ্পৰত্তং সমথৰীথিপটিপন্নং চিত্তং হোতি, তদাস্স পগ্গহনিগ্গহসম্পহংসনেসু ন ব্যাপারং আপজ্জতি সারথি ৰিয সমপ্পৰত্তেসু অস্সেসু. অযং ৰুচ্চতি ‘‘অজ্ঝুপেক্খতি কালেনা’’তি. সো যোগী কালকোৰিদোতি এসো ৰুত্তপ্পকারো কম্মট্ঠানযোগে নিযুত্তো পগ্গহনিগ্গহসম্পহংসনসমাদহনঅজ্ঝুপেক্খনকালেসু ছেকো ব্যত্তো. কিম্হি কালম্হীতিআদিনা পগ্গহাদিকালং পুচ্ছতি.

ইদানি পগ্গহাদিকালং ৰিস্সজ্জেন্তো ‘‘লীনে চিত্তম্হী’’তিআদিমাহ. অতিসিথিলৰীরিযতাদীহি চিত্তে লীনভাৰং গতে ধম্মৰিচযৰীরিযপীতিসম্বোজ্ঝঙ্গসমুট্ঠাপনেন পগ্গহো. উদ্ধতস্মিং ৰিনিগ্গহোতি অচ্চারদ্ধৰীরিযতাদীহি উদ্ধতে চিত্তে পস্সদ্ধিসমাধিউপেক্খাসম্বোজ্ঝঙ্গসমুট্ঠাপনেন নিগ্গহো. নিরস্সাদগতং চিত্তং, সম্পহংসেয্য তাৰদেতি পঞ্ঞাপযোগমন্দতায ৰা উপসমসুখানং ৰিগমেন ৰা অস্সাদৰিরহিতং গতং অট্ঠসংৰেগৰত্থুপচ্চৰেক্খণেন ৰা রতনত্তযগুণানুস্সরণেন ৰা তস্মিং খণে চিত্তং সম্পহংসেয্য.

সম্পহট্ঠং যদা চিত্তন্তি যস্মিং কালে ৰুত্তনযেনেৰ সম্পহংসিতং চিত্তং হোতি. অলীনং ভৰতি নুদ্ধতন্তি ৰীরিযসমাধীহি সঞ্ঞোজিতত্তা লীনুদ্ধচ্চৰিরহিতঞ্চ হোতি. সমথনিমিত্তস্সাতি সমথো চ নিমিত্তঞ্চ সমথনিমিত্তং, তস্স সমথনিমিত্তস্স. সো কালোতি যো সো লীনুদ্ধচ্চৰিরহিতকালো ৰুত্তো, সো কালো. অজ্ঝত্তং রমযে মনোতি ঝানসম্পযুত্তং চিত্তং কসিণাদিগোচরজ্ঝত্তে তোসেয্য অভিরমাপেয্য.

এতেন মেৰুপাযেনাতি এতেন ৰুত্তউপাযেন এৰ. ম-কারো পদসন্ধিৰসেন ৰুত্তো. অজ্ঝুপেক্খেয্য তাৰদেতি যদা উপচারপ্পনাহি তং চিত্তং সমাহিতং, তদা ‘‘সমাহিতং চিত্ত’’ন্তি জানিত্ৰা পগ্গহনিগ্গহসম্পহংসনেসু ব্যাপারং অকত্ৰা তস্মিং খণে অজ্ঝুপেক্খনমেৰ করেয্য.

ইদানি ‘‘কিম্হি কালম্হি পগ্গাহো’’তি পুট্ঠগাথং নিগমেন্তো ‘‘এৰং কালৰিদূ ধীরো’’তিআদিমাহ. কালেন কালং চিত্তস্স, নিমিত্তমুপলক্খযেতি কালানুকালং সমাধিসম্পযুত্তচিত্তস্স আরম্মণং সল্লক্খেয্য, উপপরিক্খেয্যাতি অত্থো. সেসং সব্বত্থ পাকটমেৰ. এৰং অরহত্তনিকূটেন দেসনং নিট্ঠাপেসীতি.

সদ্ধম্মপ্পজ্জোতিকায মহানিদ্দেসট্ঠকথায

সারিপুত্তসুত্তনিদ্দেসৰণ্ণনা নিট্ঠিতা.

অট্ঠকৰগ্গৰণ্ণনা নিট্ঠিতা.

সদ্ধম্মপ্পজ্জোতিকা নাম মহানিদ্দেস-অট্ঠকথা নিট্ঠিতা.