মূল > সুত্তপিটক > খুদ্দকনিকায

১. দুৰে ¶ ¶ ¶ হেতূ দুৰে পচ্চযা সাৰকস্স সম্মাদিট্ঠিযা উপ্পাদায – পরতো চ ঘোসো সচ্চানুসন্ধি, অজ্ঝত্তঞ্চ যোনিসো মনসিকারো. তত্থ কতমো পরতো ঘোসো? যা পরতো দেসনা ওৰাদো অনুসাসনী সচ্চকথা সচ্চানুলোমো. চত্তারি সচ্চানি – দুক্খং সমুদযো নিরোধো মগ্গো. ইমেসং চতুন্নং সচ্চানং যা ¶ দেসনা সন্দস্সনা ৰিৰরণা ৰিভজনা উত্তানীকিরিযা [উত্তানিকিরিযা (ক.)] পকাসনা – অযং ৰুচ্চতি সচ্চানুলোমো ঘোসোতি.

২. তত্থ কতমো অজ্ঝত্তং যোনিসো মনসিকারো?

অজ্ঝত্তং যোনিসো মনসিকারো নাম যো যথাদেসিতে ধম্মে বহিদ্ধা আরম্মণং অনভিনীহরিত্ৰা যোনিসো মনসিকারো – অযং ৰুচ্চতি যোনিসো মনসিকারো.

তংআকারো যোনিসো দ্ৰারো ৰিধি উপাযো. যথা পুরিসো সুক্খে কট্ঠে ৰিগতস্নেহে সুক্খায উত্তরারণিযা থলে অভিমন্থমানং ভব্বো জোতিস্স অধিগমায ¶ . তং কিস্স হেতু. যোনিসো অগ্গিস্স অধিগমায. এৰমেৰস্স যমিদং দুক্খসমুদযনিরোধমগ্গানং অৰিপরীতধম্মদেসনং মনসিকরোতি – অযং ৰুচ্চতি যোনিসো মনসিকারো.

যথা ¶ তিস্সো উপমা পুব্বে অস্সুতা চ অস্সুতপুব্বা চ পটিভন্তি. যো হি কোচি কামেসু অৰীতরাগোতি…পে… দুৰে উপমা অযোনিসো কাতব্বা পচ্ছিমেসু ৰুত্তং. তত্থ যো চ পরতো ঘোসো যো চ অজ্ঝত্তং যোনিসো মনসিকারো – ইমে দ্ৰে পচ্চযা. পরতো ঘোসেন যা উপ্পজ্জতি পঞ্ঞা – অযং ৰুচ্চতি সুতমযী পঞ্ঞা. যা অজ্ঝত্তং যোনিসো মনসিকারেন উপ্পজ্জতি পঞ্ঞা – অযং ৰুচ্চতি চিন্তামযী পঞ্ঞাতি. ইমা দ্ৰে পঞ্ঞা ৰেদিতব্বা. পুরিমকা চ দ্ৰে পচ্চযা. ইমে দ্ৰে হেতূ দ্ৰে পচ্চযা সাৰকস্স সম্মাদিট্ঠিযা উপ্পাদায.

৩. তত্থ পরতো ঘোসস্স সচ্চানুসন্ধিস্স দেসিতস্স অত্থং অৰিজানন্তো অত্থপ্পটিসংৰেদী ভৰিস্সতীতি নেতং ঠানং ৰিজ্জতি. ন চ অত্থপ্পটিসংৰেদী যোনিসো মনসিকরিস্সতীতি নেতং ঠানং ৰিজ্জতি. পরতো ঘোসস্স সচ্চানুসন্ধিস্স দেসিতস্স অত্থং ৰিজানন্তো অত্থপ্পটিসংৰেদী ভৰিস্সতীতি ঠানমেতং ৰিজ্জতি. অত্থপ্পটিসংৰেদী চ যোনিসো মনসিকরিস্সতীতি ঠানমেতং ৰিজ্জতি. এস হেতু এতং আরম্মণং এসো উপাযো সাৰকস্স নিয্যানস্স, নত্থঞ্ঞো. সোযং ন চ সুত্তস্স অত্থৰিজাননায সহ যুত্তো নাপি ঘোসানুযোগেন পরতো ঘোসস্স অত্থং অৰিজানন্তেন সক্কা উত্তরিমনুস্সধম্মং অলমরিযঞাণদস্সনং অধিগন্তুং, তস্মা নিব্বাযিতুকামেন সুতমযেন অত্থা পরিযেসিতব্বা. তত্থ ¶ পরিযেসনায অযং অনুপুব্বী ভৰতি সোল়স হারা, পঞ্চ নযা, অট্ঠারস মূলপদানি.

সোল়সহারা নেত্তী, পঞ্চনযা সাসনস্স পরিযেট্ঠি;

অট্ঠারসমূলপদা, কচ্চাযনগোত্তনিদ্দিট্ঠা.

দেসনা ৰিচযো যুত্তি পদট্ঠানং লক্খণং চতুব্যূহো আৰট্টো ৰিভত্তি পরিৰত্তনো ৰেৰচনো পঞ্ঞত্তি ওতরণো সোধনো অধিট্ঠানো পরিক্খারো সমারোপনো – ইমে সোল়স হারা.

দেসনা ¶ ৰিচযো যুত্তি, পদট্ঠানো চ লক্খণো [পদট্ঠানঞ্চ লক্খণং (পী.)];

চতুব্যূহো চ আৰট্টো, ৰিভত্তি পরিৰত্তনো.

ৰেৰচনো চ পঞ্ঞত্তি, ওতরণো চ সোধনো;

অধিট্ঠানো পরিক্খারো, সমারোপনো সোল়সো – [সোল়স হারা (পী. ক.)];

নন্দিযাৰট্টো তিপুক্খলো সীহৰিক্কীল়িতো দিসালোচনো অঙ্কুসোতি.

পঠমো নন্দিযাৰট্টো, দুতিযো চ তিপুক্খলো;

সীহৰিক্কীল়িতো নাম, ততিযো হোতি সো নযো.

দিসালোচনমাহংসু, চতুত্থো নযলঞ্জকো;

পঞ্চমো অঙ্কুসো নাম [পঞ্চমং অঙ্কুসং আহু (পী. ক.)], সব্বে পঞ্চ নযা গতা.

৬. তত্থ কতমানি অট্ঠারস মূলপদানি?

অৰিজ্জা ¶ তণ্হা লোভো দোসো মোহো সুভসঞ্ঞা সুখসঞ্ঞা নিচ্চসঞ্ঞা অত্তসঞ্ঞা সমথো ¶ ৰিপস্সনা অলোভো অদোসো অমোহো অসুভসঞ্ঞা দুক্খসঞ্ঞা অনিচ্চসঞ্ঞা অনত্তসঞ্ঞা, ইমানি অট্ঠারস মূলপদানি. তত্থ নৰ পদানি অকুসলানি যত্থ সব্বং অকুসলং সমোসরতি. নৰ পদানি কুসলানি যত্থ সব্বং কুসলং সমোসরতি.

কতমানি নৰ পদানি অকুসলানি যত্থ সব্বং অকুসলং সমোসরতি?

অৰিজ্জা যাৰ অত্তসঞ্ঞা, ইমানি নৰ পদানি অকুসলানি, যত্থ সব্বং অকুসলং সমোসরতি.

কতমানি নৰ পদানি কুসলানি যত্থ সব্বং কুসলং সমোসরতি?

সমথো যাৰ অনত্তসঞ্ঞা, ইমানি নৰ পদানি কুসলানি যত্থ সব্বং কুসলং সমোসরতি. ইমানি অট্ঠারস মূলপদানি.

তণ্হা ¶ চ অৰিজ্জা লোভো, দোসো তথেৰ মোহো চ;

চত্তারো চ ৰিপল্লাসা, কিলেসভূমি নৰ পদানি.

যে চ সতিপট্ঠানা সমথো, ৰিপস্সনা কুসলমূলং;

এতং সব্বং কুসলং, ইন্দ্রিযভূমি নৰপদানি.

সব্বং কুসলং নৰহি পদেহি যুজ্জতি, নৰহি চেৰ অকুসলং;

এককে নৰ মূলপদানি, উভযতো অট্ঠারস মূলপদানি.

ইমেসং অট্ঠারসন্নং মূলপদানং যানি নৰ পদানি অকুসলানি, অযং দুক্খসমুদযো; যানি নৰ পদানি কুসলানি, অযং দুক্খনিরোধগামিনী পটিপদা. ইতি সমুদযস্স দুক্খং ফলং, দুক্খনিরোধগামিনিযা পটিপদায নিরোধং ফলং. ইমানি ¶ চত্তারি অরিযসচ্চানি ভগৰতা বারাণসিযং দেসিতানি.

৭. তত্থ দুক্খস্স অরিযসচ্চস্স অপরিমাণানি অক্খরানি পদানি ব্যঞ্জনানি আকারানি ¶ নিরুত্তিযো নিদ্দেসা দেসিতা এতস্সেৰত্থস্স সঙ্কাসনায পকাসনায ৰিৰরণায ৰিভজনায উত্তানীকম্মতায পঞ্ঞাপনাযাতি যা এৰং সব্বেসং সচ্চানং. ইতি একমেকং সচ্চং অপরিমাণেহি অক্খরপদব্যঞ্জনআকারনিরুত্তিনিদ্দেসেহি পরিযেসিতব্বং, তঞ্চ ব্যঞ্জনং অত্থপুথুত্তেন পন অত্থেৰ ব্যঞ্জনপুথুত্তেন.

যো হি কোচি সমণো ৰা ব্রাহ্মণো ৰা এৰং ৰদেয্য ‘‘অহং ইদং দুক্খং পচ্চক্খায অঞ্ঞং দুক্খং পঞ্ঞপেস্সামী’’তি তস্স তং ৰাচাৰত্থুকমেৰস্স পুচ্ছিতো চ ন সম্পাযিস্সতি. এৰং সচ্চানি. যঞ্চ রত্তিং ভগৰা অভিসম্বুদ্ধো, যঞ্চ রত্তিং অনুপাদায পরিনিব্বুতো, এত্থন্তরে যং কিঞ্চি ভগৰতা ভাসিতং সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লং, সব্বং তং ধম্মচক্কং পৰত্তিতং. ন কিঞ্চি বুদ্ধানং ভগৰন্তানং ¶ ধম্মদেসনায ধম্মচক্কতো বহিদ্ধা, তস্স সব্বং সুত্তং অরিযধম্মেসু পরিযেসিতব্বং. তত্থ পরিগ্গণ্হনায আলোকসভানি চত্তারি অরিযসচ্চানি থাৰরানি ইমানি.

তত্থ কতমং দুক্খং? জাতি জরা ব্যাধি মরণং সংখিত্তেন পঞ্চুপাদানক্খন্ধা দুক্খা. তত্থাযং লক্খণনিদ্দেসো, পাতুভাৰলক্খণা ¶ জাতি, পরিপাকলক্খণা জরা, দুক্খদুক্খতালক্খণো ব্যাধি, চুতিলক্খণং মরণং, পিযৰিপ্পযোগৰিপরিণামপরিতাপনলক্খণো সোকো, লালপ্পনলক্খণো পরিদেৰো, কাযসম্পীল়নলক্খণং দুক্খং, চিত্তসম্পীল়নলক্খণং দোমনস্সং, কিলেসপরিদহনলক্খণো উপাযাসো, অমনাপসমোধানলক্খণো অপ্পিযসম্পযোগো, মনাপৰিনাভাৰলক্খণো পিযৰিপ্পযোগো, অধিপ্পাযৰিৰত্তনলক্খণো অলাভো, অপরিঞ্ঞালক্খণা পঞ্চুপাদানক্খন্ধা, পরিপাকচুতিলক্খণং জরামরণং, পাতুভাৰচুতিলক্খণং চুতোপপত্তি, পটিসন্ধিনিব্বত্তনলক্খণো সমুদযো, সমুদযপরিজহনলক্খণো নিরোধো, অনুসযসমুচ্ছেদলক্খণো মগ্গো. ব্যাধিলক্খণং দুক্খং, সঞ্জাননলক্খণো সমুদযো, নিয্যানিকলক্খণো মগ্গো, সন্তিলক্খণো নিরোধো. অপ্পটিসন্ধিভাৰনিরোধলক্খণা অনুপাদিসেসা নিব্বানধাতু, দুক্খঞ্চ সমুদযো চ, দুক্খঞ্চ নিরোধো চ, দুক্খঞ্চ মগ্গো চ, সমুদযো চ দুক্খঞ্চ, সমুদযো চ নিরোধো চ, সমুদযো চ মগ্গো চ, নিরোধো চ সমুদযো চ, নিরোধো চ দুক্খঞ্চ, নিরোধো চ মগ্গো চ, মগ্গো চ নিরোধো চ, মগ্গো চ সমুদযো চ, মগ্গো চ দুক্খঞ্চ.

‘‘যমেকরত্তিং ¶ [জাতক ১ ৰীসতিনিপাতে অযোঘরজাতকে] পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততী’’তি.

অট্ঠিমা, আনন্দ, দানুপপত্তিযো একুত্তরিকে সুত্তং – অযং জাতি.

অচরিত্ৰা ¶ [ধ. প. ১৫৫] ব্রহ্মচরিযং, অলদ্ধা যোব্বনে ধনং;

জিণ্ণকোঞ্চাৰ ঝাযন্তি, খীণমচ্ছেৰ পল্ললে.

পঞ্চ পুব্বনিমিত্তানি দেৰেসু – অযং জরা.

সামং তেন কুতো রাজ, তুৰম্পি জরাযন্তি ৰেদেসি;

খত্তিয কম্মস্স ফলো, লোকো ন হি কম্মং পনযতি.

যথাপি [দীঘনিকাযে অধোলিখিতগাথা] কুম্ভকারস্স, কতং মত্তিকভাজনং;

খুদ্দকঞ্চ মহন্তঞ্চ, যং পক্কং যঞ্চ আমকং;

সব্বং ভেদনপরিযন্তং, এৰং মচ্চান জীৰিতং.

মমাযিতে পস্সথ ফন্দমানে [হঞ্ঞমানে (পী) পস্স সু. নি. ৭৮৩], মচ্ছেৰ অপ্পোদকে খীণসোতে;

এতম্পি দিস্ৰা অমমো চরেয্য, ভৰেসু আসত্তিমকুব্বমানো.

ইধ ¶ সোচতি পেচ্চ সোচতি, পাপকারী উভযত্থ সোচতি;

সো সোচতি সো ৰিহঞ্ঞতি, দিস্ৰা কম্মকিলিট্ঠমত্তনো [কম্মকিলিট্ঠং অত্থনো (পী.) পস্স ধ. প. ১৫].

কামেসু [সু. নি. ৭৮০] গিদ্ধা পসুতা পমূল়্হা, অৰদানিযা তে ৰিসমে নিৰিট্ঠা;

দুক্খূপনীতা ¶ পরিদেৰযন্তি, কিংসু ভৰিস্সাম ইতো চুতাসে.

তিস্সো ৰিপত্তিযো – অযং পরিদেৰো.

সতং আসি অযোসঙ্কূ [অযোসঙ্কু (পী. ক.) পস্স থেরগা. ১১৯৭], সব্বে পচ্চত্তৰেদনা;

জলিতা জাতৰেদাৰ, অচ্চিসঙ্ঘসমাকুলা.

মহা ৰত সো পরিল়াহো [পরিদাঘো (পী. ক.) পস্স সং. নি. ৫.১১১৩] সংযুত্তকে সুত্তং সচ্চসংযুত্তেসু – ইদং দুক্খং.

সঙ্কপ্পেহি পরেতো [পরতো (ক.) পস্স সু. নি. ৮২৪] সো, কপণো ৰিয ঝাযতি;

সুত্ৰা পরেসং নিগ্ঘোসং, মঙ্কু হোতি তথাৰিধো.

দ্ৰেমে তপনীযা ধম্মা – ইদং দোমনস্সং.

কম্মারানং যথা উক্কা, অন্তো ডয্হতি নো বহি;

এৰং ডয্হতি মে হদযং, সুত্ৰা নিব্বত্তমম্বুজং.

অযসাৰ ¶ [ধ. প. ২৪০] মলং সমুট্ঠিতং, ততুট্ঠায তমেৰ খাদতি;

এৰং অতিধোনচারিনং, সানি কম্মানি নযন্তি দুগ্গতিং.

দ্ৰেমে তথাগতং অব্ভাচিক্খন্তি, একুত্তরিকে সুত্তং দুকেসু – অযং অপ্পিযসম্পযোগো.

সুপিনেন যথাপি সঙ্গতং, পটিবুদ্ধো পুরিসো ন পস্সতি;

এৰম্পি পিযাযিতং [মমাযিতং (পী. ক.) পস্স সু. নি. ৮১৩] জনং, পেতং কালঙ্কতং [কালকতং (পী.)] ন পস্সতি.

তে দেৰা চৰনধম্মং ৰিদিত্ৰা তীহি ৰাচাহি অনুসাসন্তি. অযং পিযৰিপ্পযোগো.

যম্পিচ্ছং ¶ ন লভতি, তিস্সো মারধীতরো;

তস্স চে কামযানস্স [কামযমানস্স (ক.) পস্স সু. নি. ৭৭৩], ছন্দজাতস্স জন্তুনো;

তে কামা পরিহাযন্তি, সল্লৰিদ্ধোৰ রুপ্পতি.

সংখিত্তেন পঞ্চুপাদানক্খন্ধা দুক্খা.

চক্খু সোতঞ্চ ঘানঞ্চ, জিৰ্হা কাযো ততো মনং;

এতে লোকামিসা ঘোরা, যত্থ সত্তা পুথুজ্জনা.

পঞ্চিমে ভিক্খৰে খন্ধা – ইদং দুক্খং.

অপ্পং ৰত জীৰিতং ইদং, ওরং ৰস্সসতাপি মীযতে [মীযতি (সু. নি. ৮১০)];

অথ ৰাপি অকিচ্ছং জীৰিতং, অথ খো সো জরসাপি মীযতে.

সংযুত্তকে পসেনদিসংযুত্তকে সুত্তং অয্যিকা মে কালঙ্কতা – অযং জরা চ মরণঞ্চ.

‘‘সব্বে ¶ সত্তা মরিস্সন্তি, মরণন্তং হি জীৰিতং;

যথাকম্মং গমিস্সন্তি, অত্তকম্মফলূপগা’’তি [পুঞ্ঞপাপফলূপগাতি (সং. নি. ১.১৩৩)]. –

ইমেহি সুত্তেহি একসদিসেহি চ অঞ্ঞেহি নৰৰিধং সুত্তং তং অনুপৰিট্ঠেহি ¶ লক্খণতো দুক্খং ঞত্ৰা সাধারণঞ্চ অসাধারণঞ্চ দুক্খং অরিযসচ্চং নিদ্দিসিতব্বং. গাথাহি গাথা অনুমিনিতব্বা, ব্যাকরণেহি ৰা ব্যাকরণং – ইদং দুক্খং.

কামেসু সত্তা কামসঙ্গসত্তা [কামপসঙ্গসত্তা (পী.) পস্স উদা. ৬৩], সংযোজনে ৰজ্জমপস্সমানা;

ন হি জাতু সংযোজনসঙ্গসত্তা, ওঘং তরেয্যুং ৰিপুলং মহন্তং.

চত্তারো আসৰা সুত্তং – অযং দুক্খসমুদযো.

পনুণ্ণকোধো [পনুন্নকোধো (পী.) পস্স উদা. ২৬] অভিনিব্বুতত্তো;

দ্ৰেমা ৰিমুত্তিযো, রাগৰিরাগা চ চেতোৰিমুত্তি; অৰিজ্জাৰিরাগা চ পঞ্ঞাৰিমুত্তি – অযং নিরোধো.

এসেৰ মগ্গো নত্থঞ্ঞো, দস্সনস্স ৰিসুদ্ধিযা;

অরিযো অট্ঠঙ্গিকো মগ্গো, মারস্সেতং পমোহনং.

সত্তিমে, ভিক্খৰে, বোজ্ঝঙ্গা – অযং মগ্গো.

তত্থ ¶ কতমানি চত্তারি অরিযসচ্চানি?

‘‘যে ধম্মা [মহাৰ. ৬০] হেতুপ্পভৰা, তেসং হেতুং তথাগতো আহ;

তেসঞ্চ যো নিরোধো, এৰংৰাদী মহাসমণো’’তি.

হেতুপ্পভৰা ¶ ধম্মা দুক্খং, হেতুসমুদযো, যং ভগৰতো ৰচনং. অযং ধম্মো যো নিরোধো, যে হি কেচি সংযোজনিযেসু ধম্মেসু অস্সদানুপস্সিনো ৰিহরন্তি. কিলেসা তণ্হা পৰড্ঢতি, তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি. তত্থ যং সংযোজনং – অযং সমুদযো. যে সংযোজনিযা ধম্মা যে চ সোকপরিদেৰদুক্খদোমনস্সুপাযাসা সম্ভৰন্তি – ইদং দুক্খং. যা সংযোজনিযেসু ধম্মেসু আদীনৰানুপস্সনা – অযং মগ্গো. পরিমুচ্চতি জাতিযা জরায ব্যাধীহি মরণেহি সোকেহি পরিদেৰেহি যাৰ উপাযাসেহি – ইদং নিব্বানং. ইমানি চত্তারি সচ্চানি.

তত্থ কতমা অনুপাদিসেসা নিব্বানধাতু?

অত্থঙ্গতস্স ন পমাণমত্থি, তং হি ৰা নত্থি যেন নং পঞ্ঞপেয্য;

সব্বসঙ্গানং সমূহতত্তা ৰিদূ, সিতা ৰাদসতস্সু [ৰাদসতস্স (পী. ক.)] সব্বে.

ইমানি ¶ অসাধারণানি সুত্তানি. যহিং যহিং সচ্চানি নিদ্দিট্ঠানি, তহিং তহিং সচ্চলক্খণতো ওতারেত্ৰা [ওহারেত্ৰা (পী. ক.)] অপরিমাণেহি ব্যঞ্জনেহি সো অত্থো পরিযেসিতব্বো. তত্থ অত্থানুপরিৰত্তি ব্যঞ্জনেন পুন ব্যঞ্জনানুপরিৰত্তি অত্থেন তস্স একমেকস্স অপরিমাণানি ব্যঞ্জনানি ইমেহি সুত্তেহি যথানিক্খিত্তেহি চত্তারি অরিযসচ্চানি নিদ্দিসিতব্বানি. পঞ্চনিকাযে অনুপৰিট্ঠাহি গাথাহি গাথা অনুমিনিতব্বা, ব্যাকরণেন ব্যাকরণং. ইমানি অসাধারণানি সুত্তানি.

যমেকরত্তিং পঠমং, অট্ঠ দানূপপত্তিযো;

পঞ্চ পুব্বনিমিত্তানি, খীণমচ্ছংৰ পল্ললং.

সামং ¶ তেন কুতো রাজ, তযো দেৰা গিলানকা;

যথাপি কুম্ভকারস্স, যথা নদিদকপ্পনং.

ইধ সোচতি পেচ্চ সোচতি, তীণি দুচ্চরিতানি চ;

কামেসু গিদ্ধা পসুতা, যাৰ তিস্সো ৰিপত্তিযো.

সতং আসি [সতমাযু (সী.), সতধাতু (পী.)] অযোসঙ্কূ, পরিল়াহো মহত্তরো;

সঙ্কপ্পেহি পরেতো সো, তত্থ তপনিযেহি চ.

কম্মারানং যথা উক্কা, তযো অগ্গী পকাসিতা;

অযতো মলমুপ্পন্নং, অব্ভক্খানং তথাগতে.

তিৰিধং দেৰানুসাসন্তি, সুপিনেন সঙ্গমো যথা;

তিস্সো চেৰ মারধীতা, সল্লৰিদ্ধোৰ রুপ্পতি.

চক্খু সোতঞ্চ ঘানঞ্চ, পঞ্চক্খন্ধা পকাসিতা;

অপ্পং ৰত জীৰিতং ইদং, অয্যিকা মে মহল্লিকা.

সব্বে সত্তা মরিস্সন্তি, উপপত্তি চুতিচযং;

কামেসু সত্তা পসুতা, আসৰেহি চতূহি চ.

যম্হি ন মাযা ৰসতি, দ্ৰেমা চেতোৰিমুত্তিযো;

এসেৰ মগ্গো নত্থঞ্ঞো, বোজ্ঝঙ্গা চ সুদেসিতা.

অত্থঙ্গতস্স ¶ ন পমাণমত্থি, গোধিকো পরিনিব্বুতো;

যে ধম্মা হেতুপ্পভৰা, সংযোজনানুপস্সিনো.

১০. তত্থিমানি ¶ সাধারণানি সুত্তানি যেসু সুত্তেসু সাধারণানি সচ্চানি দেসিতানি অনুলোমম্পি পটিলোমম্পি ৰোমিস্সকম্পি. তত্থ অযং আদি.

অৰিজ্জায ¶ নিৰুতো লোকো, [অজিতাতি ভগৰা]

জপ্পাভিলেপনং [জপ্পানুলেপনং (ক.) পস্স সু. নি. ১০৩৯] ব্রূমি, দুক্খমস্স মহব্ভযং.

তত্থ যা অৰিজ্জা চ ৰিৰিচ্ছা চ, অযং সমুদযো. যং মহব্ভযং, ইদং দুক্খং. ইমানি দ্ৰে সচ্চানি – দুক্খঞ্চ সমুদযো চ. ‘‘সংযোজনং সংযোজনিযা চ ধম্মা’’তি সংযুত্তকে চিত্তসংযুত্তকেসু ব্যাকরণং. তত্থ যং সংযোজনং, অযং সমুদযো. যে সংযোজনিযা ধম্মা, ইদং দুক্খং. ইমানি দ্ৰে সচ্চানি – দুক্খঞ্চ সমুদযো চ.

উচ্ছিন্নভৰতণ্হস্স, নেত্তিচ্ছিন্নস্স [সন্তচিত্তস্স (সু. নি. ৭৫১)] ভিক্খুনো;

ৰিক্খীণো জাতিসংসারো, নত্থি দানি পুনব্ভৰো.

যং চিত্তং, ইদং দুক্খং. যো ভৰতণ্হায উপচ্ছেদো, অযং দুক্খনিরোধো. ৰিক্খীণো জাতিসংসারো, নত্থি দানি পুনব্ভৰোতি নিদ্দেসো. ইমানি দ্ৰে সচ্চানি – দুক্খঞ্চ নিরোধো চ. দ্ৰেমা, ভিক্খৰে, ৰিমুত্তিযো; রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি. যং চিত্তং, ইদং দুক্খং. যা ৰিমুত্তি, অযং নিরোধো. ইমানি দ্ৰে সচ্চানি – দুক্খঞ্চ নিরোধো চ.

কুম্ভূপমং [ধ. প. ৪০] কাযমিমং ৰিদিত্ৰা, নগরূপমং চিত্তমিদং ঠপেত্ৰা;

যোধেথ মারং পঞ্ঞাৰুধেন, জিতঞ্চ রক্খে অনিৰেসনো সিযা.

তত্থ ¶ যঞ্চ কুম্ভূপমো কাযো যঞ্চ নগরূপমং চিত্তং, ইদং দুক্খং. যং পঞ্ঞাৰুধেন মারং যোধেথাতি অযং মগ্গো. ইমানি দ্ৰে সচ্চানি. যং, ভিক্খৰে, ন তুম্হাকং, তং পজহিতব্বং. যা সংযোজনা, অযং মগ্গো. যে তে ধম্মা অনত্তনিযা পহাতব্বা, রূপং যাৰ ৰিঞ্ঞাণং, ইদং দুক্খঞ্চ মগ্গো চ.

তত্থ কতমং দুক্খঞ্চ সমুদযো চ নিরোধো চ?

যে ¶ কেচি সোকা পরিদেৰিতা ৰা, দুক্খা চ [দুক্খঞ্চ (পী. ক.) পস্স উদা. ৭০] লোকস্মিমনেকরূপা;

পিযং পটিচ্চপ্পভৰন্তি এতে, পিযে অসন্তে ন ভৰন্তি এতে.

যে সোকপরিদেৰা, যং চ অনেকরূপং দুক্খং, যং পেমতো ভৰতি, ইদং দুক্খং. যং পেমং, অযং সমুদযো. যো তত্থ ছন্দরাগৰিনযো পিযস্স অকিরিযা, অযং নিরোধো. ইমানি তীণি সচ্চানি. তিম্বরুকো পরিব্বাজকো পচ্চেতি ‘‘সযংকতং পরংকত’’ন্তি. যথেসা ৰীমংসা, ইদং দুক্খং. যা ¶ এতে দ্ৰে অন্তে অনুপগম্ম মজ্ঝিমা পটিপদা অৰিজ্জাপচ্চযা সঙ্খারা যাৰ জাতিপচ্চযা জরামরণং, ইদম্পি দুক্খঞ্চ সমুদযো চ. ৰিঞ্ঞাণং নামরূপং সল়াযতনং ফস্সো ৰেদনা ভৰো জাতি জরামরণং, ইদং দুক্খং. অৰিজ্জা সঙ্খারা তণ্হা উপাদানং, অযং সমুদযো. ইতি ইদং সযংকতং ৰীমংসেয্যাতি [ৰীমংসীযতি (পী. ক.)] যঞ্চ পটিচ্চসমুপ্পাদে দুক্খং, ইদং এসো সমুদযো নিদ্দিট্ঠো. অৰিজ্জানিরোধা সঙ্খারনিরোধো চ যাৰ চ জরামরণনিরোধোতি অযং নিরোধো. ইমানি তীণি সচ্চানি দুক্খঞ্চ সমুদযো চ নিরোধো চ.

১১. তত্থ কতমং দুক্খঞ্চ সমুদযো চ মগ্গো চ?

‘‘যো দুক্খমদ্দক্খি [সং. নি. ১.১৫৭] যতোনিদানং, কামেসু সো জন্তু কথং নমেয্য;

কামা হি লোকে সঙ্গাতি ঞত্ৰা, তেসং সতীমা ৰিনযায সিক্খে’’তি.

যো ¶ দুক্খমদ্দক্খি, ইদং দুক্খং. যতো ভৰতি, অযং সমুদযো. সন্দিট্ঠং যতো ভৰতি যাৰ তস্স ৰিনযায সিক্খা, অযং মগ্গো. ইমানি তীণি সচ্চানি.

একাদসঙ্গুত্তরেসু গোপালকোপমসুত্তং.

তত্থ যাৰ রূপসঞ্ঞুত্তা যঞ্চ সল়াযতনং যথা ৰণং পটিচ্ছাদেতি যঞ্চ তিত্থং যথা চ লভতি ধম্মূপসঞ্হিতং উল়ারং পীতিপামোজ্জং চতুব্বিধং চ অত্তভাৰতো ¶ চ ৰত্থু, ইদং দুক্খং. যাৰ আসাটিকং হারেতা [সাটেতা (সী. পী.) পস্স অঙ্গুত্তরনিকাযে] হোতি, অযং সমুদযো. রূপসঞ্ঞুত্তা আসাটকহরণং [আসাটিকসাটনা (পী.)] ৰণপটিচ্ছাদনং ৰীথিঞ্ঞুতা গোচরকুসলঞ্চ, অযং মগ্গো. অৰসেসা ধম্মা অত্থি হেতূ অত্থি পচ্চযা অত্থি নিস্সযা সাৰসেসদোহিতা অনেকপূজা চ কল্যাণমিত্ততপ্পচ্চযা ধম্মা ৰীথিঞ্ঞুতা চ হেতু, ইমানি তীণি সচ্চানি.

তত্থ ¶ কতমং দুক্খঞ্চ মগ্গো চ নিরোধো চ?

সতি কাযগতা উপট্ঠিতা, ছসু ফস্সাযতনেসু সংৰুতো [সংৰরো (পী. ক.) পস্স উদা. ২৫];

সততং ভিক্খু সমাহিতো, জঞ্ঞা [জানেয্য (পী. ক.)] নিব্বানমত্তনো.

তত্থ যা চ কাযগতা সতি যঞ্চ সল়াযতনং যত্থ সব্বঞ্চেতং দুক্খং. যা চ কাযগতা সতি যো চ সীলসংৰরো যো চ সমাধি যত্থ যা সতি, অযং পঞ্ঞাক্খন্ধো. সব্বম্পি সীলক্খন্ধো সমাধিক্খন্ধো, অযং মগ্গো. এৰংৰিহারিনা ঞাতব্বং নিব্বানং. অযং নিরোধো, ইমানি তীণি সচ্চানি. সীলে পতিট্ঠায দ্ৰে ধম্মা ভাৰেতব্বা সমথো চ ৰিপস্সনা চ. তত্থ যং চিত্তসহজাতা ধম্মা, ইদং দুক্খং. যো চ সমথো ¶ যা চ ৰিপস্সনা, অযং মগ্গো. রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি, অযং নিরোধো. ইমানি তীণি সচ্চানি.

আসা চ পীহা অভিনন্দনা চ, অনেকধাতূসু সরা পতিট্ঠিতা;

অঞ্ঞাণমূলপ্পভৰা পজপ্পিতা, সব্বা মযা ব্যন্তিকতা সমূলিকা.

অঞ্ঞাণমূলপ্পভৰাতি পুরিমকেহি সমুদযো. সব্বা মযা ব্যন্তিকতা সমূলিকাতি নিরোধো. ইমানি দ্ৰে সচ্চানি. চতুন্নং ধম্মানং অননুবোধা অপ্পটিৰেধা ৰিত্থারেন কাতব্বং. অরিযস্স সীলস্স সমাধিনো পঞ্ঞায ৰিমুত্তিযা. তত্থ যো ইমেসং চতুন্নং ধম্মানং অননুবোধা অপ্পটিৰেধা, অযং সমুদযো. পটিৰেধো ভৰনেত্তিযা, অযং নিরোধো. অযং সমুদযো চ নিরোধো চ.

যানি [সু. নি. ১০৪১] সোতানি লোকস্মিং, [অজিতাতি ভগৰা]

সোতানং সংৰরং ব্রূমি, পঞ্ঞাযেতে পিধীযরে.

যানি ¶ সোতানীতি অযং সমুদযো. যা চ পঞ্ঞা যা চ সতি নিৰারণং পিধানঞ্চ, অযং মগ্গো. ইমানি দ্ৰে সচ্চানি. সঞ্চেতনিযং সুত্তং দল়্হনেমিযানাকারো ছহি মাসেহি নিদ্দিট্ঠো. তত্থ যং কাযং কাযকম্মং সৰঙ্কং সদোসং সকসাৰং যা সৰঙ্কতা ¶ সদোসতা সকসাৰতা, অযং সমুদযো. এৰং ৰচীকম্মং মনোকম্মং অৰঙ্কং অদোসং অকসাৰং, যা অৰঙ্কতা অদোসতা অকসাৰতা, অযং মগ্গো. এৰং ৰচীকম্মং মনোকম্মং. ইমানি দ্ৰে সচ্চানি সমুদযো চ মগ্গো চ.

তত্থ কতমো সমুদযো চ নিরোধো চ মগ্গো চ?

‘‘নিস্সিতস্স চলিতং, অনিস্সিতস্স চলিতং নত্থি, চলিতে অসতি পস্সদ্ধি, পস্সদ্ধিযা সতি নতি ন হোতি, নতিযা অসতি [অসতিযা (পী.) পস্স উদা. ৭৪] আগতিগতি ন হোতি, আগতিগতিযা অসতি চুতূপপাতো ন হোতি, চুতূপপাতে অসতি নেৰিধ ন হুরং ন উভযমন্তরেন. এসেৰন্তো দুক্খস্সা’’তি.

তত্থ ¶ দ্ৰে নিস্সযা, অযং সমুদযো. যো চ অনিস্সযো, যা চ অনতি, অযং মগ্গো. যা আগতিগতি ন হোতি চুতূপপাতো চ যো এসেৰন্তো দুক্খস্সাতি, অযং নিরোধো. ইমানি তীণি সচ্চানি. অনুপট্ঠিতকাযগতা সতি…পে… যং ৰিমুত্তিঞাণদস্সনং, অযং সমুদযো. একারসউপনিস্সযা ৰিমুত্তিযো যাৰ উপনিস্সযউপসম্পদা উপট্ঠিতকাযগতাসতিস্স ৰিহরতি. সীলসংৰরো সোসানিযো হোতি, যঞ্চ ৰিমুত্তিঞাণদস্সনং, অযং মগ্গো. যা চ ৰিমুত্তি, অযং নিরোধো. ইমানি তীণি সচ্চানি. সমুদযো চ নিরোধো চ মগ্গো চ.

সযং ¶ কতেন সচ্চেন, তেন অত্তনা অভিনিব্বানগতো ৰিতিণ্ণকঙ্খো;

ৰিভৰঞ্চ ঞত্ৰা লোকস্মিং, তাৰ খীণপুনব্ভৰো স ভিক্খু.

যং সচ্চেন, অযং মগ্গো. যং খীণপুনব্ভৰো, অযং নিরোধো. ইমানি দ্ৰে সচ্চানি. পঞ্চ ৰিমুত্তাযতনানি সত্থা ৰা ধম্মং দেসেসি অঞ্ঞতরো ৰা ৰিঞ্ঞূ সব্রহ্মচারীতি ৰিত্থারেন কাতব্বা. তস্স অত্থপ্পটিসংৰেদিস্স পামোজ্জং জাযতি, পমুদিতস্স পীতি জাযতি, যাৰ নিব্বিন্দন্তো ¶ ৰিরজ্জতি, অযং মগ্গো. যা ৰিমুত্তি, অযং নিরোধো. এৰং পঞ্চ ৰিমুত্তাযতনানি ৰিত্থারেন. ইমানি দ্ৰে সচ্চানি নিরোধো চ মগ্গো চ.

ইমানি সাধারণানি সুত্তানি. ইমেহি সাধারণেহি সুত্তেহি যথানিক্খিত্তেহি পটিৰেধতো চ লক্খণতো চ ওতারেত্ৰা অঞ্ঞানি সুত্তানি নিদ্দিসিতব্বানি অপরিহাযন্তেন. গাথাহি গাথা অনুমিনিতব্বা, ব্যাকরণেহি ব্যাকরণং. ইমে চ সাধারণা দস পরিৰড্ঢকা একো চ চতুক্কো নিদ্দেসো সাধারণো. অযঞ্চ পকিণ্ণকনিদ্দেসো. একং পঞ্চ ছ চ সৰেকদেসো সব্বং. ইমে দ্ৰে পরিৰজ্জনা পুরিমকা চ দস. ইমে দ্ৰাদস পরিৰড্ঢকা সচ্চানি. এত্তাৰতা সব্বং সুত্তং নত্থি, তং ব্যাকরণং ৰা গাথা ৰিয. ইমেহি দ্ৰাদসহি পরিৰড্ঢকেহি ন ওতরিতুং অপ্পমত্তেন পরিযেসিত্ৰা নিদ্দিসিতব্বা.

তত্থাযং সঙ্খেপো. সব্বং দুক্খং সত্তহি পদেহি সমোসরণং গচ্ছতি. কতরেহি সত্তহি? অপ্পিযসম্পযোগো চ পিযৰিপ্পযোগো চ, ইমেহি দ্ৰীহি ¶ পদেহি সব্বং দুক্খং নিদ্দিসিতব্বং. তস্স দ্ৰে নিস্সযা – কাযো চ চিত্তঞ্চ ¶ . তেন ৰুচ্চতি ‘‘কাযিকং দুক্খং চেতসিকঞ্চে’’তি, নত্থি তং দুক্খং ন কাযিকং ৰা ন চেতসিকং, সব্বং দুক্খং দ্ৰীহি দুক্খেহি নিদ্দিসিতব্বং কাযিকেন চ চেতসিকেন চ. তীহি দুক্খতাহি সঙ্গহিতং দুক্খদুক্খতায সঙ্খারদুক্খতায ৰিপরিণামদুক্খতায. ইতি তং সব্বং দুক্খং তীহি দুক্খতাহি সঙ্গহিতং. ইতি ইদঞ্চ দুক্খং তিৰিধং. দুৰিধং দুক্খং কাযিকঞ্চ চেতসিকঞ্চ. দুৰিধং অপ্পিযসম্পযোগো চ পিযৰিপ্পযোগো চ. ইদং সত্তৰিধং দুক্খং.

তত্থ তিৰিধো সমুদযো অচতুত্থো অপঞ্চমো. কতমো তিৰিধো? তণ্হা চ দিট্ঠি চ কম্মং. তত্থ তণ্হা চ ভৰসমুদযো কম্মং. তথা [তত্থ (পী.)] নিব্বত্তস্স হীনপণীততা [হীনপণীততায (পী.)], অযং সমুদযো. ইতি যাপি ভৰগতীসু হীনতা চ পণীততা চ, যাপি তীহি দুক্খতাহি সঙ্গহিতা, যোপি দ্ৰীহি মূলেহি সমুদানীতো অৰিজ্জায নিৰুতস্স ভৰতণ্হাসংযুত্তস্স সৰিঞ্ঞাণকো কাযো, সোপি তীহি দুক্খতাহি সঙ্গহিতো.

তথা ৰিপল্লাসতো দিট্ঠিভৰগন্তব্বা. সা সত্তৰিধা নিদ্দিসিতব্বা. একো ৰিপল্লাসো তীণি নিদ্দিসীযতি, চত্তারি ৰিপল্লাসৰত্থূনি. তত্থ কতমো একো ৰিপল্লাসো? যো ৰিপরীতগ্গাহো পটিক্খেপেন, ওতরণং যথা ‘‘অনিচ্চে নিচ্চ’’মিতি ৰিপরীতং গণ্হাতি. এৰং চত্তারো ৰিপল্লাসা. অযমেকো ৰিপল্লাসীযতি সঞ্ঞা চিত্তং দিট্ঠি. কতমানি চত্তারি ৰিপল্লাসৰত্থূনি ¶ ? কাযো ¶ ৰেদনা চিত্তং ধম্মা. এৰং ৰিপল্লাসগতস্স অকুসলঞ্চ পৰড্ঢেতি. তত্থ সঞ্ঞাৰিপল্লাসো দোসং অকুসলমূলং পৰড্ঢেতি. চিত্তৰিপল্লাসো লোভং অকুসলমূলং পৰড্ঢেতি. দিট্ঠিৰিপল্লাসো মোহং অকুসলমূলং পৰড্ঢেতি. তত্থ দোসস্স অকুসলমূলস্স তীণি মিচ্ছত্তানি ফলং – মিচ্ছাৰাচা মিচ্ছাকম্মন্তো মিচ্ছাআজীৰো; লোভস্স অকুসলমূলস্স তীণি মিচ্ছত্তানি ফলং – মিচ্ছাসঙ্কপ্পো মিচ্ছাৰাযামো মিচ্ছাসমাধি; মোহস্স অকুসলমূলস্স দ্ৰে মিচ্ছত্তানি ফলং – মিচ্ছাদিট্ঠি চ মিচ্ছাসতি চ. এৰং অকুসলং সহেতু সপ্পচ্চযং ৰিপল্লাসা চ পচ্চযো, অকুসলমূলানি সহেতূ এতেযেৰ পটিপক্খেন অনূনা অনধিকা দ্ৰীহি পচ্চযেহি নিদ্দিসিতব্বা. নিরোধে চ মগ্গে চ ৰিপল্লাসমুপাদায পরতো [পরিতো (পী.)] পটিপক্খেন চতস্সো.

অৰিজ্জায ¶ নিৰুতো লোকো, চিত্তং সংযোজনম্পি;

সা পচ্ছিন্নভৰতণ্হা, দ্ৰেমা চেৰ ৰিমুত্তিযো.

কুম্ভূপমং কাযমিমং, যং ন তুম্হাকং তং পজহ [জহা (পী. ক.)];

যে কেচি সোকপরিদেৰা, তিম্বরুকো চ সযংকতং.

দুক্খং দিট্ঠি চ উপ্পন্নং, যঞ্চ গোপালকোপমং;

সতি কাযগতা মাহু, সমথো চ ৰিপস্সনা.

আসা পিহা চ অভিনন্দনা চ, চতুন্নমননুবোধনা;

যানি ¶ সোতানি লোকস্মিং, দল়্হং নেমিযানাকারো.

যং নিস্সিতস্স চলিতং, অনুপট্ঠিতকাযগতাসতি;

সযং কতেন সচ্চেন, ৰিমুত্তাযতনেহি চ.

পেটকোপদেসে মহাকচ্চাযনেন ভাসিতে পঠমভূমি অরিযসচ্চপ্পকাসনা নাতং জীৰতা ভগৰতা মাদিসেন সমুদ্দনেন তথাগতেনাতি.

১৩. তত্থ ¶ ¶ কতমং সাসনপ্পট্ঠানং? সংকিলেসভাগিযং সুত্তং, ৰাসনা ভাগিযং সুত্তং, নিব্বেধভাগিযং সুত্তং, অসেক্খভাগিযং সুত্তং, সংকিলেসভাগিযঞ্চ ৰাসনাভাগিযঞ্চ, সংকিলেসভাগিযঞ্চ নিব্বেধভাগিযঞ্চ, সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ, ৰাসনাভাগিযঞ্চ নিব্বেধভাগিযঞ্চ. আণত্তি, ফলং, উপাযো, আণত্তি চ ফলঞ্চ, ফলঞ্চ উপাযো চ, আণত্তি চ ফলঞ্চ উপাযো চ. অস্সাদো, আদীনৰো, নিস্সরণং, অস্সাদো চ আদীনৰো চ, অস্সাদো চ নিস্সরণঞ্চ, আদীনৰো চ নিস্সরণঞ্চ, অস্সাদো চ আদীনৰো চ নিস্সরণঞ্চ. লোকিকং, লোকুত্তরং, লোকিকঞ্চ লোকুত্তরঞ্চ. কম্মং, ৰিপাকো, কম্মঞ্চ ৰিপাকো চ. নিদ্দিট্ঠং, অনিদ্দিট্ঠং, নিদ্দিট্ঠঞ্চ অনিদ্দিট্ঠঞ্চ. ঞাণং, ঞেয্যং, ঞাণঞ্চ ঞেয্যঞ্চ. দস্সনং, ভাৰনা, দস্সনঞ্চ ভাৰনা চ. ৰিপাককম্মং, ন ৰিপাককম্মং, নেৰৰিপাকনৰিপাককম্মং ¶ . সকৰচনং, পরৰচনং, সকৰচনঞ্চ পরৰচনঞ্চ. সত্তাধিট্ঠানং, ধম্মাধিট্ঠানং, সত্তাধিট্ঠানঞ্চ ধম্মাধিট্ঠানঞ্চ. থৰো, সকৰচনাধিট্ঠানং, পরৰচনাধিট্ঠানং, সকৰচনাধিট্ঠানঞ্চ পরৰচনাধিট্ঠানঞ্চ. কিরিযং, ফলং, কিরিযঞ্চ ফলঞ্চ. অনুঞ্ঞাতং, পটিক্খিত্তং, অনুঞ্ঞাতঞ্চ পটিক্খিত্তঞ্চ. ইমানি ছ পটিক্খিত্তানি.

১৪. তত্থ ¶ কতমং সংকিলেসভাগিযং সুত্তং?

কামন্ধা জালসঞ্ছন্না, তণ্হাছদনছাদিতা;

পমত্তবন্ধুনা বদ্ধা, মচ্ছাৰ কুমিনামুখে;

জরামরণমন্ৰেন্তি, ৰচ্ছো খীরপকোৰ [খীরূপকোৰ (ক.) পস্স উদা. ৬৪] মাতরং.

মনোপুব্বঙ্গমা ¶ ধম্মা, মনোসেট্ঠা মনোমযা;

মনসা চে পসন্নেন, ভাসতি ৰা করোতি ৰা;

ততো নং সুখমন্ৰেতি, ছাযাৰ অনপাযিনী.

মহানামস্স সক্কস্স ইদং ভগৰা সক্যানং কপিলৰত্থুম্হি নগরে নযৰিত্থারেন সদ্ধাসীলপরিভাৰিতং সুত্তং ভাৰঞ্ঞেন পরিভাৰিতং তং নাম পচ্ছিমে কালে.

তত্থ কতমং নিব্বেধভাগিযং সুত্তং?

উদ্ধং অধো [উদা. ৬১] সব্বধি ৰিপ্পমুত্তো, অযং অহস্মীতি অনানুপস্সী;

এৰং ৰিমুত্তো উদতারি ওঘং, অতিণ্ণপুব্বং অপুনব্ভৰায.

সীলানি নু খো ভৰন্তি কিমত্থিযানি আনন্দো পুচ্ছতি সত্থারং.

তত্থ ¶ কতমং অসেক্খভাগিযং সুত্তং?

‘‘যস্স সেলূপমং চিত্তং, ঠিতং নানুপকম্পতি;

ৰিরত্তং ¶ রজনীযেসু, কোপনেয্যে [কোপনীযে (ক.) পস্স উদা. ৩৪] ন কুপ্পতি;

যস্সেৰং ভাৰিতং চিত্তং, কুতো তং দুক্খমেস্সতী’’তি.

সারিপুত্তো নাম ভগৰা থেরঞ্ঞতরো সো মং আসজ্জ অপ্পটিনিস্সজ্জ চারিকং পক্কমতি, সারিপুত্তস্স ব্যাকরণং কাতব্বং. যস্স নূন ভগৰা কাযগতা সতি অভাৰিতা অস্স অবহুলীকতা ৰিত্থারেন কাতব্বং.

১৫. তত্থ কতমং সংকিলেসভাগিযঞ্চ ৰাসনাভাগিযঞ্চ?

ছন্নমতিৰস্সতি [উদা. ৪৫], ৰিৰটং নাতিৰস্সতি;

তস্মা ছন্নং ৰিৰরেথ, এৰং তং নাতিৰস্সতি.

ছন্নমতিৰস্সতীতি ¶ সংকিলেসো. ৰিৰটং নাতিৰস্সতীতি ৰাসনা. তমো তমপরাযনোতি ৰিত্থারেন. তত্থ যো চ তমো যো চ তমপরাযনো, অযং সংকিলেসো. যো চ জোতি যো চ জোতিপরাযনো, অযং ৰাসনা.

তত্থ কতমং সংকিলেসভাগিযঞ্চ নিব্বেধভাগিযঞ্চ সুত্তং?

ন তং দল়্হং বন্ধনমাহু ধীরা, যদাযসং দারুজপব্বজঞ্চ [দারুজং পব্বজঞ্চ (পী.) ধ. প. ৩৪৫; সং. নি. ১.১২১];

সারত্তরত্তা মণিকুণ্ডলেসু, পুত্তেসু দারেসু চ যা অপেক্খা.

ন তং দল়্হং বন্ধনমাহু ধীরা, যদা পুত্তেসু দারেসু চ যা অপেক্খা, অযং সংকিলেসো. এতম্পি ¶ ছেত্ৰা পরিব্বজন্তি ধীরা অনপেক্খিনো সব্বকামে পহাযাতি, অযং নিব্বেধো. যং চেতযিতং পকপ্পিতং যা চ নামরূপস্স অৰক্কন্তি হোতি. ইমেহি চতূহি পদেহি সংকিলেসো. পচ্ছিমকেহি চতূহি নিব্বেধো.

তত্থ কতমং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং?

অযং ¶ লোকো সন্তাপজাতো, ফস্সপরেতো রোগং [রোদং (পী.) পস্স উদা. ৩০] ৰদতি অত্ততো;

যেন যেন হি মঞ্ঞন্তি, ততো তং হোতি অঞ্ঞথা.

অঞ্ঞথাভাৰী ভৰসত্তো লোকো, ভৰপরেতো ভৰমেৰাভিনন্দতি;

যদভিনন্দতি তং ভযং, যস্স ভাযতি তং দুক্খং;

ভৰৰিপ্পহানায খো পনিদং ব্রহ্মচরিযং ৰুস্সতি.

যে হি কেচি সমণা ৰা ব্রাহ্মণা ৰা ভৰেন ভৰস্স ৰিপ্পমোক্খমাহংসু, সব্বেতে ‘‘অৰিপ্পমুত্তা ভৰস্মা’’তি ৰদামি. যে ৰা পন কেচি সমণা ৰা ব্রাহ্মণা ৰা ৰিভৰেন ভৰস্স নিস্সরণমাহংসু, সব্বেতে ‘‘অনিস্সটা ভৰস্মা’’তি ৰদামি. উপধিং হি পটিচ্চ দুক্খমিদং সম্ভোতি, সব্বুপাদানক্খযা নত্থি দুক্খস্স সম্ভৰো, লোকমিমং ¶ পস্স, পুথূ অৰিজ্জায পরেতা ভূতা ভূতরতা ভৰা অপরিমুত্তা. যে হি কেচি ভৰা সব্বধি সব্বত্থতায সব্বেতে ভৰা অনিচ্চা দুক্খা ৰিপরিণামধম্মাতি.

‘‘এৰমেতং ¶ যথাভূতং, সম্মপ্পঞ্ঞায পস্সতো;

ভৰতণ্হা পহীযতি, ৰিভৰং নাভিনন্দতি;

সব্বসো তণ্হানং খযা, অসেসৰিরাগনিরোধো নিব্বানং.

‘‘তস্স নিব্বুতস্স ভিক্খুনো, অনুপাদা পুনব্ভৰো ন হোতি;

অভিভূতো মারো ৰিজিতসঙ্গামো, উপেচ্চগা সব্বভৰানি তাদী’’তি.

অযং লোকো সন্তাপজাতো যাৰ দুক্খন্তি যং তণ্হা সংকিলেসো.

যং পুনগ্গহণং যে হি কেচি সমণা ৰা ব্রাহ্মণা ৰা ভৰেন ভৰস্স ৰিমোক্খমাহংসু, সব্বেতে ‘‘অৰিমুত্তা ভৰস্মা’’তি ৰদামি. যে ৰা পন কেচি সমণা ৰা ব্রাহ্মণা ৰা ৰিভৰেন ভৰস্স নিস্সরণমাহংসু ‘‘অনিস্সটা ভৰস্মা’’তি ৰদামি. অযং দিট্ঠিসংকিলেসো, তং দিট্ঠিসংকিলেসো ¶ চ তণ্হাসংকিলেসো চ, উভযমেতং সংকিলেসো. যং পুনগ্গহণং ভৰৰিপ্পহানায ব্রহ্মচরিযং ৰুস্সতি, যাৰ সব্বসো উপাদানক্খযা সম্ভৰা, ইদং নিব্বেধভাগিযং. তস্স ¶ নিব্বুতস্স ভিক্খুনো যাৰ উপচ্চগা সব্বভৰানি তাদীতি ইদং অসেক্খভাগিযং. চত্তারো পুগ্গলা অনুসোতগামী সংকিলেসো ঠিতত্তো চ পটিসোতগামী চ নিব্বেধো. থলে তিট্ঠতীতি অসেক্খভূমি.

১৬. তত্থ কতমং ৰাসনাভাগিযঞ্চ নিব্বেধভাগিযঞ্চ সুত্তং?

‘‘দদতো [উদা. ৭৫; দী. নি. ২.১৯৭] পুঞ্ঞং পৰড্ঢতি, সংযমতো ৰেরং ন চীযতি;

কুসলো চ জহাতি পাপকং, রাগদোসমোহক্খযা সনিব্বুতো’’তি.

‘‘দদতো পুঞ্ঞং পৰড্ঢতি, সংযমতো ৰেরং ন চীযতী’’তি ৰাসনা. ‘‘কুসলো চ জহাতি পাপকং, রাগদোসমোহক্খযা সনিব্বুতো’’তি নিব্বেধো.

সোতানুগতেসু ধম্মেসু ৰচসা পরিচিতেসু মনসানুপেক্খিতেসু দিট্ঠিযা সুপ্পটিৰিদ্ধেসু পঞ্চানিসংসা পাটিকঙ্খা. ইধেকচ্চস্স বহুস্সুতা ধম্মা হোন্তি ধাতা অপমুট্ঠা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা, সো যুঞ্জন্তো ঘটেন্তো ৰাযমন্তো দিট্ঠেৰ ধম্মে ৰিসেসং পপ্পোতি. নো চে দিট্ঠেৰ ধম্মে ৰিসেসং পপ্পোতি, গিলানো পপ্পোতি. নো চে গিলানো ¶ পপ্পোতি, মরণকালসমযে পপ্পোতি. নো চে মরণকালসমযে পপ্পোতি, দেৰভূতো পাপুণাতি. নো চে দেৰভূতো পাপুণাতি, তেন ধম্মরাগেন তায ধম্মনন্দিযা পচ্চেকবোধিং পাপুণাতি.

তত্থাযং দিট্ঠেৰ ধম্মে পাপুণাতি, অযং নিব্বেধো. যং ¶ সম্পরাযে পচ্চেকবোধিং পাপুণাতি, অযং ৰাসনা. ইমানি সোল়স সুত্তানি সব্বসাসনং অতিগ্গণ্হন্তো তিট্ঠন্তি. ইমেহি সোল়সহি সুত্তেহি নৰৰিধো সুত্তন্তো ৰিভত্তো ভৰতি. সো চ পঞ্ঞৰতো নো দুপ্পঞ্ঞস্স, যুত্তস্স নো অযুত্তস্স, অকম্মস্স ৰিহারিস্স পকতিযা লোকে সংকিলেসো ¶ চরতি. সো সংকিলেসো তিৰিধো – তণ্হাসংকিলেসো দিট্ঠিসংকিলেসো দুচ্চরিতসংকিলেসো. ততো সংকিলেসতো উট্ঠহন্তো সংকিলেসো ধম্মেসু পতিট্ঠহতি, লোকিযেসু পতিট্ঠহতীতি. তত্থাকুসলো দিট্ঠতো সচে তং সীলঞ্চ দিট্ঠিঞ্চ পরামসতি, তস্স সো তণ্হাসংকিলেসো হোতি. সচে পনস্স এৰং হোতি ‘‘ইমিনাহং সীলেন ৰা ৰতেন ৰা ব্রহ্মচরিযেন ৰা দেৰো ৰা ভৰিস্সং [ভৰিস্সামি (পী.)] দেৰঞ্ঞতরো ৰা’’তি যস্স হোতি মিচ্ছাদিট্ঠি, এতস্স মিচ্ছাদিট্ঠিসংকিলেসো ভৰতি. সচে পন সীলে পতিট্ঠিতো অপরামট্ঠস্স হি সীলৰতং হোতি, তস্স তং সীলৰতো যোনিসো গহিতং অৰিপ্পটিসারং জনেতি যাৰ ৰিমুত্তিঞাণদস্সনং, তঞ্চ তস্স দিট্ঠেৰ ধম্মে কালঙ্কতস্স ৰা তম্হিযেৰ ৰা পন অপরাপরিযাযেন ৰা, অঞ্ঞেসু খন্ধেসু এৰং সুতং ‘‘সুচরিতং ৰাসনায সংৰত্ততী’’তি ৰাসনাভাগিযং সুত্তং ৰুচ্চতি. তত্থ সীলেসু ঠিতস্স ৰিনীৰরণং চিত্তং, তং ততো সক্কাযদিট্ঠিপ্পহানায ভগৰা ধম্মং দেসেতি. সো অচ্চন্তনিট্ঠং নিব্বানং পাপুণাতি; যদি ৰা সাসনন্তরে, অচ্চন্তং নিব্বানং পাপুণাতি, যদি ৰা একাসনে ছ অভিঞ্ঞে. তত্থ ¶ দ্ৰে পুগ্গলা অরিযধম্মে পাপুণন্তি সদ্ধানুসারী চ ধম্মানুসারী চ. তত্থ ধম্মানুসারী উগ্ঘটিতঞ্ঞূ, সদ্ধানুসারী নেয্যো. তত্থ উগ্ঘটিতঞ্ঞূ দুৰিধো – কোচি তিক্খিন্দ্রিযো কোচি মুদিন্দ্রিযো. তত্থ নেয্যোপি দুৰিধো – কোচি তিক্খিন্দ্রিযো কোচি মুদিন্দ্রিযো. তত্থ যো চ উগ্ঘটিতঞ্ঞূ মুদিন্দ্রিযো, যো চ নেয্যো তিক্খিন্দ্রিযো, ইমে পুগ্গলা অসমিন্দ্রিযা হোন্তি. তত্থ ইমে পুগ্গলা সমিন্দ্রিযা পরিহাযন্তি চ উগ্ঘটিতঞ্ঞুতো, ৰিপঞ্চিতঞ্ঞূ নেয্যতো, ইমে মজ্ঝিমা ভূমিগতা ৰিপঞ্চিতঞ্ঞূ হোতি. ইমে তযো পুগ্গলা.

১৭. তত্থ চতুত্থা পন পঞ্চমা উগ্ঘটিতঞ্ঞূ ৰিপঞ্চিতঞ্ঞূ নেয্যো চ, তত্থ উগ্ঘটিতঞ্ঞূ পুগ্গলো ইন্দ্রিযানি পটিলভিত্ৰা দস্সনভূমিযং ঠিতো সোতাপত্তিফলঞ্চ পাপুণাতি, একবীজী হোতি পঠমো সোতাপন্নো. তত্থ ৰিপঞ্চিতঞ্ঞূ পুগ্গলো ইন্দ্রিযানি পটিলভিত্ৰা দস্সনভূমিযং ঠিতো সোতাপত্তিফলঞ্চ পাপুণাতি, কোলংকোলো চ হোতি দুতিযো সোতাপন্নো ¶ . তত্থ নেয্যো পুগ্গলো ইন্দ্রিযানি পটিলভিত্ৰা দস্সনভূমিযং ঠিতো সোতাপত্তিফলঞ্চ পাপুণাতি, সত্তক্খত্তুপরমো চ হোতি ¶ , অযং ততিযো সোতাপন্নো. ইমে তযো পুগ্গলা ইন্দ্রিযৰেমত্ততায সোতাপত্তিফলে ঠিতা.

উগ্ঘটিতঞ্ঞূ একবীজী হোতি, ৰিপঞ্চিতঞ্ঞূ কোলংকোলো হোতি, নেয্যো সত্তক্খত্তুপরমো হোতি. ইদং নিব্বেধভাগিযং সুত্তং. সচে ¶ পন তদুত্তরি ৰাযমতি, অচ্চন্তনিট্ঠং নিব্বানং পাপুণাতি. তত্থ উগ্ঘটিতঞ্ঞূ পুগ্গলো যো তিক্খিন্দ্রিযো, তে দ্ৰে পুগ্গলা হোন্তি – অনাগামিফলং পাপুণিত্ৰা অন্তরাপরিনিব্বাযী চ উপহচ্চপরিনিব্বাযী চ. তত্থ ৰিপঞ্চিতঞ্ঞূ পুগ্গলো যো তিক্খিন্দ্রিযো, তে দ্ৰে পুগ্গলা হোন্তি – অনাগামিফলং পাপুণন্তি অসঙ্খারপরিনিব্বাযী চ সসঙ্খারপরিনিব্বাযী চ. তত্থ নেয্যো অনাগামিফলং পাপুণন্তো উদ্ধংসোতো অকনিট্ঠগামী হোতি, উগ্ঘটিতঞ্ঞূ চ ৰিপঞ্চিতঞ্ঞূ চ, ইন্দ্রিযনানত্তেন উগ্ঘটিতঞ্ঞূ পুগ্গলো তিক্খিন্দ্রিযো অন্তরাপরিনিব্বাযী হোতি, উগ্ঘটিতঞ্ঞূ মুদিন্দ্রিযো উদ্ধংসোতো অকনিট্ঠগামী হোতি. উগ্ঘটিতঞ্ঞূ চ ৰিপঞ্চিতঞ্ঞূ চ ইন্দ্রিযনানত্তেন উগ্ঘটিতঞ্ঞূ পুগ্গলো তিক্খিন্দ্রিযো সসঙ্খারপরিনিব্বাযী হোতি, তিক্খিন্দ্রিযো অন্তরাপরিনিব্বাযী হোতি, উগ্ঘটিতঞ্ঞূ মুদিন্দ্রিযো উপহচ্চপরিনিব্বাযী হোতি. ৰিপঞ্চিতঞ্ঞূ তিক্খিন্দ্রিযো অসঙ্খারপরিনিব্বাযী হোতি, ৰিপঞ্চিতঞ্ঞূ মুদিন্দ্রিযো সসঙ্খারপরিনিব্বাযী হোতি, নেয্যো উপহচ্চপরিনিব্বাযী হোতি, ৰিপঞ্চিতঞ্ঞূ তিক্খিন্দ্রিযো অসঙ্খারপরিনিব্বাযী হোতি. ৰিপঞ্চিতঞ্ঞূ মুদিন্দ্রিযো সসঙ্খারপরিনিব্বাযী হোতি, নেয্যো উদ্ধংসোতো অকনিট্ঠগামী হোতি. ইতি পঞ্চ অনাগামিনো, ছট্ঠো সকদাগামী, তযো চ সোতাপন্নাতি ইমে নৰ সেক্খা.

তত্থ উগ্ঘটিতঞ্ঞূ পুগ্গলো তিক্খিন্দ্রিযো অরহত্তং পাপুণন্তো দ্ৰে পুগ্গলা হোন্তি উভতোভাগৰিমুত্তো পঞ্ঞাৰিমুত্তো চ. তত্থ উগ্ঘটিতঞ্ঞূ পুগ্গলো মুদিন্দ্রিযো অরহত্তং পাপুণন্তো দ্ৰে পুগ্গলা হোন্তি, ঠিতকপ্পী [ঠিতকপ্পি (পী. ক.) পস্স পু. প. ১৭] চ পটিৰেধনভাৰো পুগ্গলো চ তিক্খিন্দ্রিযো সো অরহত্তং পাপুণন্তো দ্ৰে পুগ্গলা হোন্তি চেতনাভব্বো চ রক্খণাভব্বো চ. তত্থ ৰিপঞ্চিতঞ্ঞূ মুদিন্দ্রিযো অরহত্তং পাপুণন্তো দ্ৰে পুগ্গলা হোন্তি, সচে চেতেতি ন পরিনিব্বাযী, নো চে চেতেতি পরিনিব্বাযীতি. সচে অনুরক্খতি ন পরিনিব্বাযী, নো চে অনুরক্খতি পরিনিব্বাযীতি. তত্থ নেয্যো পুগ্গলো ভাৰনানুযোগমনুযুত্তো পরিহানধম্মো ¶ হোতি কম্মনিযতো ৰা সমসীসি ৰা, ইমে নৰ অরহন্তো ইদং চতুব্বিধং সুত্তং সংকিলেসভাগিযং অসেক্খভাগিযং. ইমেসু পুগ্গলেসু তথাগতস্স দসৰিধং বলং পৰত্ততি.

১৮. কতমং ¶ দসৰিধং? ইধ বুদ্ধানং ভগৰন্তানং অপ্পৰত্তিতে ধম্মচক্কে মহেসক্খা দেৰপুত্তা যাচনায অভিযাতা [অতিযাতা (পী. ক.)] হোন্তি ‘‘দেসেতু সুগতো ধম্ম’’ন্তি. সো অনুত্তরেন বুদ্ধচক্খুনা ৰোলোকেন্তো অদ্দসাসি সত্তানং তযো রাসীনং সম্মত্তনিযতো মিচ্ছত্তনিযতো অনিযতো. তত্থ সম্মত্তনিযতো রাসি মিচ্ছাসতিং আপজ্জেয্যাতি নেতং ঠানং ৰিজ্জতি, অসত্থুকো পরিনিব্বাযেয্যাতি নেতং ঠানং ৰিজ্জতি, সমাপত্তিং আপজ্জেয্যাতি ঠানমেতং ৰিজ্জতি. তত্থ মিচ্ছত্তনিযতো রাসি অরিযসমাপত্তিং পটিপজ্জিস্সতীতি নেতং ঠানং ৰিজ্জতি, অনরিযমিচ্ছাপটিপত্তিং পটিপজ্জিস্সতীতি ঠানমেতং ৰিজ্জতি. তত্থ ¶ অনিযতো রাসি সম্মাপটিপজ্জমানং সম্মত্তনিযতরাসিং গমিস্সতীতি ঠানমেতং ৰিজ্জতি, মিচ্ছাপটিপজ্জমানো সম্মত্তনিযতরাসিং গমিস্সতীতি নেতং ঠানং ৰিজ্জতি. সম্মাপটিপজ্জমানং সম্মত্তনিযতরাসিং গমিস্সতীতি ঠানমেতং ৰিজ্জতি, মিচ্ছাপটিপজ্জমানং মিচ্ছত্তনিযতরাসিং গমিস্সতীতি ঠানমেতং ৰিজ্জতি. ইমে তযো অনুত্তরেন বুদ্ধচক্খুনা ৰোলোকেন্তস্স সম্মাসম্বুদ্ধস্স মে সতো ইমে ধম্মা অনভিসম্বুদ্ধাতি এত্তৰতা মং কোচি সহধম্মেন পটিচোদিস্সতীতি নেতং ঠানং ৰিজ্জতি, ৰীতরাগস্স তে পটিজানতো অখীণাসৰতায সহধম্মেন কোচি পটিচোদিস্সতীতি নেতং ঠানং ৰিজ্জতি. যতো পন ইমস্স অনিযতস্স রাসিস্স ধম্মদেসনা, সা ন দিস্সতি তক্করস্স সম্মাদুক্খক্খযাযাতি নেতং ঠানং ৰিজ্জতি, তথা ওৰদিতো যং পন মে অনিযতরাসি সাৰকো পুব্বেনাপরং ৰিসেসং ন সচ্ছিকরিস্সতীতি নেতং ঠানং ৰিজ্জতি.

১৯. যং খো মুনি নানপ্পকারস্স নানানিরুত্তিযো দেৰনাগযক্খানং দমেতি ধম্মে ৰৰত্থানেন ৰত্ৰা কারণতো অঞ্ঞং পারং গমিস্সতীতি নেতং ঠানং ৰিজ্জতি. ধম্মপটিসম্ভিদা. যতো পনিমা নিরুত্তিতো সত্ত সত্ত নিরুত্তিযো নাভিসম্ভুনেয্যাতি নেতং ঠানং ৰিজ্জতি. নিরুত্তিপটিসম্ভিদা. নিরুত্তি খো পন অভিসমগ্গরতানং সাৰকানং তমত্থমৰিঞ্ঞাপযেতি নেতং ঠানং ৰিজ্জতি. অত্থপটিসম্ভিদা ¶ . মহেসক্খা দেৰপুত্তা উপসঙ্কমিত্ৰা পঞ্হে পুচ্ছিংসু ¶ . কাযিকেন ৰা মানসিকেন ৰা পরিপীল়িতস্স হত্থকুণীতি ৰা পাদে ৰা খঞ্জে দন্ধস্স [দন্তস্স (পী. ক.)] সো অত্থো ন পরিভাজিযতীতি নেতং ঠানং ৰিজ্জতি. পটিভানপটিসম্ভিদা. যম্হি তং তেসং হোতি তম্হি অসন্তং ভৰতীতি নেতং ঠানং ৰিজ্জতি. যং হি নাসং তেসং ন ভৰতি, তম্হি নাসং তেসং ভৰিস্সতীতি নেতং ঠানং ৰিজ্জতি. এৰং সমুদযস্স নিরোধায দস অকুসলকম্মপথা. মারো ৰা ইন্দো ৰা ব্রহ্মা ৰা তথাগতো ৰা চক্কৰত্তী ৰা সো ৰত নাম মাতুগামো ভৰিস্সতীতি নেতং ঠানং ৰিজ্জতি, পুরিসো অস্স রাজা চক্কৰত্তী সক্কো দেৰানমিন্দো ভৰিস্সতীতি ঠানমেতং ৰিজ্জতি. ইতিস্স এৰরূপং বলং এৰরূপং ঞাণং, ইদং ৰুচ্চতি ঠানাট্ঠানঞাণং পঠমং তথাগতবলং তং নিদ্দিসিতব্বং. তীহি রাসীহি চতূহি ৰেসারজ্জেহি চতূহি পটিসম্ভিদাহি ¶ পটিচ্চসমুপ্পাদস্স পৰত্তিযং নিৰত্তিযং ভাগিযঞ্চ. কুসলং কুসলৰিপাকেসু চ উপপজ্জতি যঞ্চ ইত্থিপুরিসানং. ইদং পঠমং বলং তথাগতো এৰং জানাতি.

যেসং পন সম্মত্তনিযতো রাসি, নাযং সব্বত্থগামিনী পটিপদা, নিব্বানগামিনীযেৰাযং পটিপদা. তত্থ সিযা মিচ্ছত্তনিযতো রাসি, এসাপি ন সব্বত্থগামিনী পটিপদা. সক্কাযসমুদযগামিনীযেৰাযং পটিপদা ¶ হোতু, অযং তত্থ তত্থ পটিপত্তিযা ঠিতো গচ্ছতি নিব্বানং, গচ্ছতি অপাযং, গচ্ছতি দেৰমনুস্সস্স. যং যং ৰা পটিপদং পটিপজ্জেয্য সব্বত্থ গচ্ছেয্য, অযং সব্বত্থগামিনী পটিপদা. যং এত্থ ঞাণং যথাভূতং, ইদং ৰুচ্চতি সব্বত্থগামিনী পটিপদাঞাণং দুতিযং তথাগতবলং.

সা খো পনাযং সব্বত্থগামিনী পটিপদা নানাধিমুত্তা কেচি কামেসু কেচি দুক্করকারিযং কেচি অত্তকিলমথানুযোগমনুযুত্তা কেচি সংসারেন সুদ্ধিং পচ্চেন্তি কেচি অনজ্জাভাৰনাতি. তেন তেন চরিতেন ৰিনিবন্ধানং সত্তানং যং ঞাণং যথাভূতং নানাগতং লোকস্স অনেকাধিমুত্তগতং যথাভূতং পজানাতি. ইদং ততিযং তথাগতবলং.

তত্থ সত্তানং অধিমুত্তা ভৰন্তি আসেৰন্তি ভাৰেন্তি বহুলীকরোন্তি. তেসং কম্মুপসযানং তদাধিমুত্তানং. সা চেৰ ধাতু সংৰহতি. কতরা পনেসা ধাতু নেক্খম্মধাতু বলধাতু কাচি সম্পত্তি কাচি মিচ্ছত্তঞ্চ ধাতু অধিমুত্তা ভৰন্তি. অঞ্ঞতরা উত্তরি ন সমনুপস্সন্তি. তে তদেৰট্ঠানং মযা ¶ জরামরণস্স অভিনিৰিস্স ৰোহরন্তি ‘‘ইদমেৰ সচ্চং মোঘমঞ্ঞ’’ন্তি. যথা ভগৰা সক্কস্স দেৰানমিন্দস্স ভাসিতং. যং তত্থ যথাভূতং ঞাণং. ইদং ৰুচ্চতি চতুত্থং তথাগতবলং.

তত্থ যংযেৰ ধাতু [যং যদেৰ ধাতুং (ক.)] সেট্ঠন্তি তং তং কাযেন চ ৰাচায চ আরম্ভন্তি চেতসিকো. আরম্ভো চেতনা কম্মং কাযিকা ¶ ৰাচসিকা আরম্ভো চেতসিকত্তা কম্মন্তরং তথাগতো এৰং পজানাতি ‘‘ইমিনা সত্তেন এৰং ধাতুকেন এৰরূপং কম্মং কতং, তং অতীতমদ্ধানং ইমিনা হেতুনা তস্স এৰরূপো ৰিপাকো ৰিপচ্চতি এতরহি ৰিপচ্চিস্সতি ৰা অনাগতমদ্ধান’’ন্তি. এৰং পচ্চুপ্পন্নমদ্ধানং পজানাতি ‘‘অযং পুগ্গলো এৰংধাতুকো ইদং কম্মং করোতি’’. তণ্হায চ দিট্ঠিযা চ ইমিনা হেতুনা ন তস্স ৰিপাকো দিট্ঠেযেৰ ধম্মে নিব্বত্তিস্সতি, উপপজ্জে ৰা’’তি অপরম্হি ৰা পরিযাযে এৰং পজানাতি ‘‘অযং পুগ্গলো এৰরূপং কম্মং করিস্সতি অনাগতমদ্ধানং, ইমিনা হেতুনা তস্স এৰরূপো ৰিপাকো নিব্বত্তিস্সতি, ইমিনা হেতুনা যানি চত্তারি ¶ কম্মট্ঠানানি ইদং কম্মট্ঠানং পচ্চুপ্পন্নসুখং আযতিং চ সুখৰিপাকং’’ …পে… ইতি অযং অতীতানাগতপচ্চুপ্পন্নানং কম্মসমাদানানং হেতুসো ঠানসো ৰিপাকৰেমত্ততং পজানাতি উচ্চাৰচা হীনপণীততা, ইদং ৰুচ্চতি কম্মৰিপাকঞাণং পঞ্চমং তথাগতবলং.

তথা সত্তা যং ৰা কম্মসমাদানং সমাদিযন্তা তত্থ এৰং পজানাতি ইমস্স পুগ্গলস্স কম্মাধিমুত্তস্স রাগচরিতস্স নেক্খম্মধাতূনং পারিপূরিং গচ্ছন্তি, তস্স রাগানুগতে সুঞ্ঞমানস্স পঠমং ঝানং সংকিলিস্সতি, সচে পুন উত্তরি ৰাযামতো ঝানৰোদানগতে মানসে ৰিসেসভাগিযং পটিপদং অনুযুঞ্জিযতি. তস্স হি ঝানভাগিযংযেৰ পঠমজ্ঝানে ঠিতস্স দুতিযং ঝানং ৰোদানং গচ্ছতি, ততিযঞ্চ ¶ ঝানং সমাপজ্জিতুকামস্স সোমনস্সিন্দ্রিযং চিত্তং পরিযাদায তিট্ঠতি, তস্স সা পীতি অৰিসেসভাগিযং ততিযং ঝানং আদিস্স তিট্ঠতি. সচে তস্স নিস্সরণং যথাভূতং পজানাতি. তথাগতস্স চতুত্থজ্ঝানং ৰোদানং গচ্ছতিযেৰ, চতুত্থস্স ঝানস্স হানভাগিযা ধম্মা, তে চ ধম্মা যত্থ পজাযন্তি যেহি চতুত্থজ্ঝানং ৰোদানং দিস্সতি. এৰং অজ্ঝাসযসমাপত্তিযা যা চতস্সো সমাপত্তিযো তীণি ৰিমোক্খমুখানি অট্ঠ ৰিমোক্খঝানানীতি চত্তারি ঝানানি ৰিমোক্খাতি. অট্ঠ চ ৰিমোক্খা তীণি চ ৰিমোক্খমুখানি. সমাধীতি চত্তারো ¶ সমাধী – ছন্দসমাধি ৰীরিযসমাধি চিত্তসমাধি ৰীমংসাসমাধীতি. সমাপত্তিযো চতস্সো অজ্ঝাসযসমাপত্তিযো ইতি ইমেসং ঝানানং ৰিমোক্খসমাপত্তীতি এৰরূপো সংকিলেসো রাগচরিতস্স পুগ্গলস্স. এৰং দোসচরিতস্স. মোহচরিতস্স. রাগচরিতস্স পুগ্গলস্স এৰরূপং ৰোদানং ইতি যং এত্থ ঞাণং যথাভূতং অসাধারণং সব্বসত্তেহি. ইদং ৰুচ্চতি ছট্ঠং তথাগতবলং.

তত্থ তথাগতো এৰং পজানাতি লোকিকা ধম্মা লোকুত্তরা ধম্মা ভাৰনাভাগিযং ইন্দ্রিযং নামং লভন্তি. আধিপতেয্যভূমিং উপাদায বলং নামং লভন্তি থামগতং মনো মনিন্দ্রিযং তং উপাদায. ৰীরিযং নামং লভন্তি আরম্ভধাতুং উপাদায. ইতিস্স দেৰ এৰরূপং ঞাণং ইমেহি চ ধম্মেহি ইমে পুগ্গলা সমন্নাগতাতিপি ধম্মদেসনং অকাসি. আকারতো চ ৰোকারতো চ আসযজ্ঝাসযস্স ¶ অধিমুত্তিসমন্নাগতানং. ইদং ৰুচ্চতি পরসত্তানং পরপুগ্গলানং ইন্দ্রিযবলৰীরিযৰেমত্ততং ঞাণং সত্তমং তথাগতবলং.

তত্থ চ তথাগতো লোকাদীসু চ ভূমীসু সংযোজনানঞ্চ সেক্খানং দ্ৰীহি বলেহি গতিং পজানাতি, পুব্বেনিৰাসানুস্সতিযা অতীতে সংসারে এতরহি চ পচ্চুপ্পন্নে দিব্বচক্খুনা চুতূপপাতং ইতি ইমানি দ্ৰে বলানি দিব্বচক্খুতো অভিনীহিতানি. সো অতীতমদ্ধানং দিব্বস্স ¶ চক্খুনো গোচরো সো এতরহি সতি গোচরো ইতি অত্তনো চ পরেসং চ পুব্বেনিৰাসঞাণং অনেকৰিধং নানপ্পকারকং পচ্চুপ্পন্নমদ্ধানং দিব্বেন চক্খুনা ইমানি দ্ৰে তথাগতবলানি, অট্ঠমং পুব্বেনিৰাসো, নৰমং দিব্বচক্খু.

পুন চপরং তথাগতো অরিযপুগ্গলানং ঝানং ৰোদানং নিব্বেধভাগিযং পজানাতি অযং পুগ্গলো ইমিনা মগ্গেন ইমায পটিপদায আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সচ্ছিকত্ৰা উপসম্পজ্জ ৰিহরতীতি ইতি অত্তনো চ আসৰানং খযং ঞাণং দিট্ঠেকট্ঠানং চতুভূমিমুপাদায যাৰ নৰন্নং অরহন্তানং আসৰক্খযো ওধিসো সেক্খানং অনোধিসো অরহন্তানং. তত্থ চেতোৰিমুত্তি দ্ৰীহি আসৰেহি অনাসৰা কামাসৰেন চ ভৰাসৰেন চ, পঞ্ঞাৰিমুত্তি দ্ৰীহি আসৰেহি অনাসৰা দিট্ঠাসৰেন চ অৰিজ্জাসৰেন চ, ইমাসং দ্ৰিন্নং ৰিমুত্তীনং যথাভূতং ¶ ঞাণং, ইদং ৰুচ্চতি আসৰক্খযে ঞাণং. দসমং তথাগতবলং.

২০. ইমেসু ¶ দসসু বলেসু ঠিতো তথাগতো পঞ্চৰিধং সাসনং দেসেতি সংকিলেসভাগিযং ৰাসনাভাগিযং দস্সনভাগিযং ভাৰনাভাগিযং অসেক্খভাগিযং. তত্থ যো তণ্হাসংকিলেসো, ইমস্স অলোভো নিস্সরণং. যো দিট্ঠিসংকিলেসো, ইমস্স অমোহো নিস্সরণং. যো দুচ্চরিতসংকিলেসো, ইমস্স তীণি কুসলানি নিস্সরণং. কিং নিদানং? তীণি ইমানি [তীণি হি ইমানি (পী.)] মনোদুচ্চরিতানি – অভিজ্ঝা ব্যাপাদো মিচ্ছাদিট্ঠি. তত্থ অভিজ্ঝা মনোদুচ্চরিতং কাযকম্মং উপট্ঠপেতি, অদিন্নাদানং সব্বঞ্চ তদুপনিব্বদ্ধং ৰাচাকম্মং উপট্ঠপেতি, মুসাৰাদঞ্চ সব্বৰিতথং সব্বং ৰাচমভাৰং সব্বমক্খং পলাসং অভিজ্ঝা অকুসলমূলন্তি, সুচরিতে সুচরিতং মুসাৰাদা অদিন্নাদানা অভিজ্ঝায চেতনা, তত্থ ব্যাপাদো মনোদুচ্চরিতং কাযকম্মং উপট্ঠপেতি, পাণাতিপাতং সব্বঞ্চ মেতং আকড্ঢনং পরিকড্ঢনং নিব্বদ্ধং রোচনং ৰাচাকম্মং উপট্ঠপেতি, পিসুণৰাচং ফরুসৰাচং মিচ্ছাদিট্ঠি মনোদুচ্চরিতঞ্চ অভিজ্ঝং ব্যাপাদং মিচ্ছাদিট্ঠিং পযোজেতি, তস্স যো কোচি মিচ্ছাদিট্ঠি চাগো রাগজো ৰা দোসজো ৰা সব্বসো মিচ্ছাদিট্ঠি সম্ভূতো ইমিনা কারণেন মিচ্ছাদিট্ঠিং উপট্ঠপেতি, কামেসুমিচ্ছাচারং ৰচীকম্মং উপট্ঠপেতি সম্ফপ্পলাপং. ইমানি ¶ তীণি দুচ্চরিতানি অকুসলমূলানি.

যা অভিজ্ঝা, সো লোভো. যো ব্যাপাদো, সো দোসো. যা মিচ্ছাদিট্ঠি, সো মোহো. তানি অট্ঠ মিচ্ছত্তানি উপট্ঠপেন্তি. তেসু গহিতেসু তীসু অকুসলমূলেসু দসৰিধং অকুসলমূলং পারিপূরিং গচ্ছতি, তস্স তিৰিধস্স দুচ্চরিতসংকিলেসস্স ৰাসনাভাগিযঞ্চ সুত্তং নিস্সরণং. তত্থ ¶ যো বহুসিতো নিদ্দেসো যথা লোভো দোসো মোহোপি, তত্থ অসিতুং এত্থ লোভো উস্সদো তেন কারণেন তেসু ৰা ধম্মেসু লোভো পঞ্ঞপিযতি. তত্থাযং মোহো অকুসলং মোহো অযং অৰিজ্জা, সা চতুব্বিধা রূপে অভিনিৰিট্ঠা, রূপং অত্ততো সমনুপস্সতি, অৰিজ্জাগতো রূপৰন্তং অত্তানং, অত্তনি ৰা রূপং, রূপস্মিং ৰা অত্তানং. তত্থ কতমং পদং সক্কাযদিট্ঠিযা উচ্ছেদং ৰদতি ‘‘তং জীৰং তং সরীর’’ন্তি নত্থিকদিট্ঠি অধিচ্চসমুপ্পন্নদিট্ঠি চ অঞ্ঞো চ করোতি, অঞ্ঞো পটিসংৰেদিযতি. পচ্ছিমসট্ঠিকপ্পানং তীণি পদানি সক্কাযদিট্ঠিযা সস্সতং ভজন্তি ‘‘অঞ্ঞং জীৰং অঞ্ঞং সরীর’’ন্তি অকিরিযঞ্চ তং দুক্খমিচ্ছতো অহেতুকা চ পতন্তি অনজ্ঝাভাৰো চ কম্মানং সব্বঞ্চ মানযি [মানতি (পী.)]. তত্থ ‘‘ইদমেৰ সচ্চং মোঘমঞ্ঞ’’ন্তি সংসারেন ¶ সুদ্ধি আজীৰকা ছল়াসীতি পঞ্ঞপেন্তি. যথারূপে সক্কাযদিট্ঠিযা চতুৰত্থুকা, এৰং পঞ্চসু খন্ধেসু ৰীসতিৰত্থুকা সক্কাযদিট্ঠিযা সস্সতং ভজতি. অঞ্ঞাজীৰকা চ সস্সতৰাদিকে চ সীলব্বতং ভজন্তি পরামসন্তি ¶ ইমিনা ভৰিস্সামি দেৰো ৰা দেৰঞ্ঞতরো ৰা, অযং সীলব্বতপরামাসো. তত্থ সক্কাযদিট্ঠিযা সো রূপং অত্ততো সমনুপস্সতি, ‘‘তং জীৰং তং সরীর’’মিতি তং কঙ্খতি ৰিচিকিচ্ছতি নাধিমুচ্চতি নাভিপ্পসীদতি পুব্বন্তে অপরন্তে পুব্বন্তাপরন্তে…পে… ইতি ৰাসনাভাগিযেসু ঠিতস্স অযং উপক্কিলেসো.

২১. তত্থ সদ্ধিন্দ্রিযেন সব্বং ৰিচিকিচ্ছিতং পজহতি, পঞ্ঞিন্দ্রিযেন উদযব্বযং পস্সতি, সমাধিন্দ্রিযেন চিত্তং একোদি করোতি ৰীরিযিন্দ্রিযেন আরভতি. সো ইমেহি পঞ্চহি ইন্দ্রিযেহি সদ্ধানুসারী অৰেচ্চপ্পসাদে নিরতো অনন্তরিযং সমাধিং উপ্পাদেতি. ইন্দ্রিযেহি সুদ্ধেহি ধম্মানুসারী অপ্পচ্চযতায অনন্তরিযং সমাধিং উপ্পাদেতি. সো ‘‘ইদং দুক্খ’’ন্তি যথাভূতং পজানাতি. সচ্চানি ইদং দস্সনভাগিযং সুত্তং. তস্স পঞ্চন্নং ওরম্ভাগিযানং সংযোজনানং তীণি সংযোজনানি দস্সনপহাতব্বানি সব্বেন সব্বং পহীনানি দ্ৰে পুগ্গলকতানি. তত্থ তীণি অকুসলমূলানি ভাৰনাপহাতব্বানি উপরিক্খিত্তানি ছ ভৰে নিব্বত্তেন্তি. তত্থ তেসু অভিজ্ঝায চ ব্যাপাদেসু তনুকতেসু ছ ভৰা পরিক্খযা মরিযাদং গচ্ছন্তি, দ্ৰে ভৰা অৰসিট্ঠা. তস্স অভিজ্ঝা চ ব্যাপাদো চ সব্বেন সব্বং পরিক্খীণা হোন্তি. একো ভৰো অৰসিট্ঠো হোতি. সো চ মানৰসেন নিব্বত্তেতি. কিঞ্চাপি এত্থ অঞ্ঞেপি চত্তারো কিলেসা রূপরাগো ভৰরাগো অৰিজ্জা উদ্ধচ্চং কেতুস্মিমানভূতা নপ্পটিবলা অস্মিমানং ৰিনিৰত্তেতুং, সব্বেপি ¶ তে অস্মিমানস্স পহানং আরভতে. খীণেসু ন চ তেসু ইদমুত্তরিদস্সনভূমিযং পঞ্চসু সেক্খপুগ্গলেসু তীসু চ পটিপ্পন্নকেসু দ্ৰীসু চ ফলট্ঠেসু ভাৰনাভাগিযং সুত্তং. তদুত্তরি অসেক্খভাগিযসুত্তং, কত্থচি ভূমি নিপীল়িযতি. ইদঞ্চ পঞ্চমং সুত্তং. তিণ্ণং পুগ্গলানং দেসিতং পুথুজ্জনস্স সেক্খস্স অসেক্খস্স সংকিলেসভাগিযং ৰাসনাভাগিযং. পুথুজ্জনস্স ¶ দস্সনভাগিযং. ভাৰনাভাগিযং পঞ্চন্নং সেক্খানং. যং পঠমনিদ্দিট্ঠং অসেক্খভাগিযং সব্বেসং অরহন্তানং. সা পন পঞ্চৰিধা সত্তৰীসআকারে [সত্তৰীসং আকারে (পী.)] পরিযেসিতব্বং. এতেসু তস্স গতীনং ততো উত্তরি. তঞ্চ খো সঙ্খেপেন পঞ্ঞাসায আকারেহি ¶ সম্পততি, যে পঞ্ঞাস আকারা সাসনে নিদ্দিট্ঠা, তে সঙ্খিপিযন্তা দসহি আকারেহি পতন্তি. যে অরিযসচ্চং নিক্খেপেন ঠিতে সঙ্খিপিযত্তা অট্ঠসু আকারেসু পতন্তি. চতূসু চ সাধারণেসু সুত্তেসু যা হারসম্পাতস্স ভূমি, তে সঙ্খিপিযন্তা পঞ্চসু সুত্তেসু পতন্তি. সংকিলেসভাগিযে ৰাসনাভাগিযে ভাৰনাভাগিযে নিব্বেধভাগিযে অসেক্খভাগিযে চ. তে সঙ্খিপিযন্তা চতূসু সুত্তেসু পতন্তি. সংকিলেসভাগিযে ৰাসনাভাগিযে নিব্বেধভাগিযে অসেক্খভাগিযে চ. তে সঙ্খিপিযমানা তীসু সুত্তেসু পতন্তি, পুথুজ্জনভাগিযে সেক্খভাগিযে অসেক্খভাগিযে চ. তে সঙ্খিপিযন্তা দ্ৰীসু সুত্তেসু পতন্তি নিব্বেধভাগিযে চ পুব্বযোগভাগিযে চ. যথা ৰুত্তং ¶ ভগৰতা দ্ৰে অত্থৰসে সম্পস্সমানা তথাগতা অরহন্তো সম্মাসম্বুদ্ধা ধম্মং দেসেন্তি সুত্তং গেয্যং…পে… সত্থা পুব্বযোগসমন্নাগতে অপ্পকসিরেন মঞ্ঞমানা ৰসিযন্তি পুব্বযোগা চ ভৰিস্সন্তি সন্তানং মঞ্ঞমানাধরায. তত্থ পঞ্ঞাৰেমত্ততং অত্তনো সমনুপস্সমানেন অট্ঠৰিধে সুত্তসঙ্খেপে, যত্থ যত্থ সক্কোতি, তত্থ তত্থ যোজেতব্বং. তত্থ তত্থ যোজেত্ৰা সুত্তস্স অত্থো নিদ্দিসিতব্বো. ন হি সতি ৰেদনা মনো ধারেত্ৰা সক্কা যেন কেনচি সুত্তস্স অত্থো যথাভূতং নিদ্দিসিতুং.

তত্থ পুরিমকানং সুত্তানং ইমা উদ্দানগাথা

কামন্ধা জালসঞ্ছন্না, পঞ্চ নীৰরণানি চ;

মনোপুব্বঙ্গমা ধম্মা, মহানামো চ সাকিযো.

উদ্ধং অধো ৰিপ্পমুত্তো, যঞ্চ সীলকিমত্থিযা;

যস্স সেলূপমং চিত্তং, উপতিস্স পুচ্ছাদিকা.

যস্স কাযগতাসতি, ছন্নং তমোপরাযণো;

ন তং দল়্হং চেতসিকং, অযং লোকোতিআদিকং.

চত্তারো চেৰ পুগ্গলা, দদতো পুঞ্ঞং পৰড্ঢিতং;

সোতানুগতধম্মেসু, ইমা তেসং উদ্দানগাথা.

সচে ভাযথ [উদা. ৪৪] দুক্খস্স, সচে ৰো দুক্খমপ্পিযং;

মাকত্থ পাপকং কম্মং, আৰি ৰা যদি ৰা রহো.

‘‘অতীতে ¶ , রাধ, রূপে অনপেক্খো হোহী’’তি ৰিত্থারেন কাতব্বা. ‘‘সীলৰন্তেন ¶ , আনন্দ, পুগ্গলেন সদা করণীযা কিন্তিমে অৰিপ্পটিসারো অস্সা’’তি. অযং ৰুচ্চতি আণত্তি.

ধম্মো হৰে রক্খতি ধম্মচারিং, ছত্তং মহন্তং যথ ৰস্সকালে;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

‘‘সব্বে ধম্মা [ধ. প. ২৭৯] অনত্তা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

‘‘সত্তহঙ্গেহি সমন্নাগতো খো, ভিক্খু, অপি হিমৰন্তং পব্বতরাজানং চালেয্য, কো পন ৰাদো ছৰং অৰিজ্জং সত্তকেসু’’ ৰেয্যাকরণং কাতব্বং. অযং উপাযো.

সচে ভাযথ দুক্খস্স, সচে ৰো দুক্খমপ্পিযং;

মাকত্থ পাপকং কম্মং, আৰি ৰা যদি ৰা রহো.

সচে হি পাপকং কম্মং, করোথ ৰা করিস্সথ;

ন ৰো দুক্খা পমোক্খাত্থি, উপচ্চাপি পলাযতং [পলাযতো (পী.)].

পুরিমিকায ¶ গাথায আণত্তি পচ্ছিমিকায ফলং. সীলে পতিট্ঠায দ্ৰে ধম্মা ভাৰেতব্বা যা চ চিত্তভাৰনা যা চ পঞ্ঞাভাৰনা যা চ আণত্তি রাগৰিরাগা চ ফলং.

সীলে পতিট্ঠায [সং. নি. ১.২৩] নরো সপঞ্ঞো, চিত্তং পঞ্ঞঞ্চ ভাৰযং;

আতাপী নিপকো ভিক্খু, সো ইমং ৰিজটযে জটং.

পুরিমিকায অড্ঢগাথায উপাযো, পচ্ছিমিকায অড্ঢগাথায ফলং. নন্দিযো [নন্দিকো (পী. ক.)] সক্কো ইসিৰুত্থপুরিরিকামএকরক্খে [ইসিৰুত্ত… (পী.)] সুত্তং মূলতো উপাদায যাৰ ¶ ছসু ধম্মেসু. উত্তরি পঞ্চসু ধম্মেসু যাচযোগো [যো চ যোগো (পী.)] করণীযো, অযং উপাযো. অসহগতস্স কামাসৰাপি চিত্তং মুচ্চতীতি. সব্বাসু ছসু তীসু. অযং উপাযো চ ফলঞ্চ.

তত্থ কতমা আণত্তি চ ফলঞ্চ উপাযো চ?

সুঞ্ঞতো লোকং অৰেক্খস্সু, মোঘরাজ সদা সতো;

অত্তানুদিট্ঠিং উহচ্চ [ঊহচ্চ (সু. নি. ১১২৫)], এৰং মচ্চুতরো সিযা.

‘‘সুঞ্ঞতো লোকং অৰেক্খস্সু, মোঘরাজা’’তি আণত্তি. ‘‘সদা সতো’’তি উপাযো. ‘‘অত্তানুদিট্ঠিং উহচ্চ, এৰং মচ্চুতরো সিযা’’তি ফলং. সমাধিং, ভিক্খৰে, ভাৰেথ, সমাহিতো, ভিক্খৰে, ভিক্খু রূপং অনিচ্চন্তি পজানাতি. এৰং পস্সং অরিযসাৰকো পরিমুচ্চতি জাতিযাপি…পে… উপাযাসেহিপি ইধ তীণিপি’’.

কামং কামযমানস্স, তস্স চেতং সমিজ্ঝতি. অযং অস্সাদো.

‘‘ধম্মচরিযা ¶ সমচরিযা কুসলচরিযা হেতূহি, ব্রাহ্মণ, এৰমিধেকচ্চে সত্তা কাযস্স ভেদা সুগতিং সগ্গং লোকং উপপজ্জন্তি’’. অযং অস্সাদো.

কামেসু ৰে হঞ্ঞতে সব্বা মুচ্চেৰ – অযং আদীনৰো. পসেনদিসংযুত্তকে সুত্তে পব্বতোপমা – অযং আদীনৰো.

যো কামে পরিৰজ্জেতি, সপ্পস্সেৰ পদা সিরো;

সোমং ৰিসত্তিকং লোকে, সতো সমতিৰত্ততি.

সংযুত্তকে সুত্তং পারিচ্ছত্তকো পণ্ডুপলাসো সন্নিপলাসো – ইদং নিস্সরণং.

যানি [জা. ১.২.১৪৪ দুকনিপাতে] করোতি পুরিসো, তানি অত্তনি পস্সতি;

কল্যাণকারী কল্যাণং, পাপকারী চ পাপকং.

তত্থ যং পাপকারী পচ্চনুভোতি অযং অস্সাদো. লাভালাভঅট্ঠকেসু ব্যাকরণং, তত্থ অলাভো অযসো নিন্দা দুক্খং, অযং আদীনৰো. লাভো যসো সুখং পসংসা, অযং অস্সাদো.

তত্থ কতমং অস্সাদো চ নিস্সরণঞ্চ?

‘‘সুখো ৰিপাকো পুঞ্ঞানং, অধিপ্পাযো চ ইজ্ঝতি;

খিপ্পঞ্চ পরমং সন্তিং, নিব্বানমধিগচ্ছতী’’তি.

যো চ ৰিপাকো পুঞ্ঞানং যা চ অধিপ্পাযস্স ইজ্ঝনা, অযং অস্সাদো. যং খিপ্পঞ্চ পরমং সন্তিং নিব্বানমধিগচ্ছতি, ইদং নিস্সরণং.

বাত্তিংসায চেৰ মহাপুরিসলক্খণেহি সমন্নাগতস্স মহাপুরিসস্স দ্ৰেযেৰ গতিযো হোন্তি, সচে ¶ অগারং অজ্ঝাৰসতি, রাজা ¶ হোতি চক্কৰত্তী যাৰ অভিৰিজিনিত্ৰা অজ্ঝাৰসতি অযং অস্সাদো. সচে অগারস্মা অনগারিযং পব্বজতি সব্বেন ওঘেন [ওসধেন (পী. ক.)] নিস্সরণং অযং অস্সাদো চ নিস্সরণঞ্চ.

তত্থ কতমো আদীনৰো চ নিস্সরণঞ্চ?

আদানস্স [আদিন্নস্স (ক.)] ভযং ঞত্ৰা, জাতিমরণসম্ভৰং;

অনাদাতুং নিব্বত্ততি, জাতিমরণসঙ্খযা.

পুরিমিকায অড্ঢগাথায জাতিমরণসম্ভৰো আদীনৰো. অনাদাতুং নিব্বত্ততি জাতিমরণসঙ্খযাতি নিস্সরণং.

কিচ্ছং ৰতাযং লোকো আপন্নো যমিদং জাযতে চ মীযতে চ. যাৰ কুদস্সুনামস্স দুক্খস্স অন্তো ভৰিস্সতি পরতো ৰাতি এত্থ যা উপরিক্খা, অযং আদীনৰো. যো গেধং ঞত্ৰা অভিনিক্খমতি যাৰ পুরাণকায রাজধানিযা, ইদং নিস্সরণং. অযং আদীনৰো চ নিস্সরণঞ্চ.

তত্থ ¶ কতমো অস্সাদো চ আদীনৰো চ নিস্সরণঞ্চ?

কামা হি চিত্রা ৰিৰিধা [মধুরা (থেরগা. ৭৮৭)] মনোরমা, ৰিরূপরূপেহি মথেন্তি চিত্তং;

তস্মা অহং [থেরগা. ৭৮৭] পব্বজিতোম্হি রাজ, অপণ্ণকং সামঞ্ঞমেৰ সেয্যো.

যং ‘‘কামা হি চিত্রা ৰিৰিধা মনোরমা’’তি অযং অস্সাদো. যং ‘‘ৰিরূপরূপেহি মথেন্তি চিত্ত’’ন্তি অযং আদীনৰো. যং অহং ¶ অগারস্মা পব্বজিতোম্হি রাজ অপণ্ণকং সামঞ্ঞমেৰ সেয্যোতি ইদং নিস্সরণং.

বলৰং বালোপমসুত্তং যং আসায ৰা ৰেদনীযং কম্মং গাহতি, তথা চেপি যং যং পাপকম্মং অনুভোতি, তত্থ দুক্খৰেদনীযেন কম্মেন অভাৰিতকাযেন চ যাৰ পরিত্তচেতসো চ আদীনৰং দস্সেতি সুখৰেদনীযেন কম্মেন অস্সাদেতি. যং পুরাসদিসো হোতি. ভাৰিতচিত্তো ভাৰিতকাযো ভাৰিতপঞ্ঞো মহানামো অপরিত্তচেতসো, ইদং নিস্সরণং.

ন হি পাপং কতং কম্মং, সজ্জুখীরংৰ মুচ্চতি;

ডহন্তং বালমন্ৰেতি, ভস্মচ্ছন্নোৰ [ভস্মাছন্নোৰ (ক.) পস্স ধ. প. ৭১] পাৰকো.

চত্তারি অগতিগমনানি, ইদং লোকিকং সুত্তং.

‘‘যস্সিন্দ্রিযানি সমথঙ্গতানি [সমথং গতানি (পী.) পস্স ধ. প. ৯৪], অস্সা যথা সারথিনা সুদন্তা;

পহীনমানস্স অনাসৰস্স, দেৰাপি তস্স পিহযন্তি তাদিনো’’তি.

‘‘অরিযং ৰো, ভিক্খৰে, সম্মাসমাধিং দেসেস্সামী’’তি ইদং লোকুত্তরং সুত্তং.

তত্থ ¶ কতমং লোকিকং লোকুত্তরঞ্চ সুত্তং?

সত্তিযা ৰিয ওমট্ঠো, দয্হমানোৰ মত্থকে;

কামরাগপ্পহানায, সতো ভিক্খু পরিব্বজে.

‘‘সত্তিযা ৰিয ওমট্ঠো, দয্হমানোৰ মত্থকে’’তি লোকিকং;

‘‘কামরাগপ্পহানায, সতো ভিক্খু পরিব্বজে’’তি লোকুত্তরং;

কবল়ীকারে ¶ আহারে অত্থি ছন্দোতি লোকিকং. নত্থি ছন্দোতি লোকুত্তরং সুত্তং.

যো পাণমতিপাতেতি, মুসাৰাদঞ্চ ভাসতি;

লোকে অদিন্নং আদিযতি [আদিযি (ক.) পস্স অ. নি. ৫.১৭৪], পরদারঞ্চ গচ্ছতি.

সুরামেরযপানঞ্চ, যো নরো অনুযুঞ্জতি;

অপ্পহায ¶ পঞ্চ ৰেরানি, দুস্সীলো ইতি ৰুচ্চতি.

তীণিমানি, ভিক্খৰে, দুচ্চরিতানি. ইদং কম্মং.

সট্ঠিৰস্সসহস্সানি, যথারূপী ৰিপচ্চগা.

‘‘দিট্ঠা মযা, ভিক্খৰে [সং. নি. ৪.১৩৫], ছ ফস্সাযতনিকা নাম নিরযা. দিট্ঠা মযা, ভিক্খৰে, ছ ফস্সাযতনিকা নাম সগ্গা’’. অযং ৰিপাকো.

অযসাৰ মলং সমুট্ঠিতং, ততুট্ঠায তমেৰ খাদতি;

এৰং অতিধোনচারিনং, সানি কম্মানি নযন্তি দুগ্গতিং.

অযসাৰ মলং সমুট্ঠিতং, যাৰ সানি কম্মানীতি ইদং কম্মং. নযন্তি দুগ্গতিন্তি ৰিপাকো.

চতূসু সম্মাপটিপজ্জমানো মাতরি পিতরি তথাগতে তথাগতসাৰকে ¶ যা সম্মাপটিপত্তি, ইদং কম্মং. যং দেৰেসু উপপজ্জতি, অযং ৰিপাকো. ইদং কম্মঞ্চ ৰিপাকো চ.

২৫. তত্থ ¶ কতমং নিদ্দিট্ঠং সুত্তং?

নেলঙ্গো সেতপচ্ছাদো, একারো ৰত্ততী [ৰত্ততে (ক.) উদা. ৬৫] রথো;

অনীঘং পস্স আযন্তং, ছিন্নসোতং অবন্ধনং;

যং ৰা চিত্তং সমণেসু, চিত্তাগহপতি দিস্সতি.

এৰং ইমায গাথায নিদ্দিট্ঠো অত্থো.

গোপালকোপমে ¶ একাদস পদানি. এৰং খো, ভিক্খৰে, ভিক্খু রূপঞ্ঞূ হোতি. যা চ অতিরেকপূজায পূজেতা হোতীতি. ইমানি একাদস পদানি যথাভাসিতানি নিদ্দিট্ঠো অত্থো.

সুখো ৰিৰেকো তুট্ঠস্স, সুতধম্মস্স পস্সতো;

অব্যাপজ্জং [অব্যাপজ্ঝং (পী. ক.) পস্স উদা. ১১] সুখং লোকে, পাণভূতেসু সংযমোতি.

সুখা ৰিরাগতা লোকে, কামানং সমতিক্কমো;

অস্মিমানস্স যো ৰিনযো, এতং ৰে পরমং সুখন্তি.

ইদং অনিদ্দিট্ঠং. অট্ঠ মহাপুরিসৰিতক্কা. ইদং অনিদ্দিট্ঠং.

তত্থ কতমং নিদ্দিট্ঠঞ্চ অনিদ্দিট্ঠঞ্চ?

পসন্ননেত্তো [সু. নি. ৫৫৫] সুমুখো, ব্রহা উজু পতাপৰা;

মজ্ঝে সমণসঙ্ঘস্স, আদিচ্চোৰ ৰিরোচসি.

পসন্ননেত্তো ¶ যাৰ আদিচ্চোৰ ৰিরোচসীতি নিদ্দিট্ঠো. পসন্ননেত্তো যো ভগৰা কথঞ্চ পন পসন্ননেত্ততা, কথং সুমুখতা, কথং ব্রহকাযতা, কথং উজুকতা, কথং পতাপৰতা, কথং ৰিরোচতাতি অনিদ্দিট্ঠো. ফেণপিণ্ডোপমং ৰেয্যাকরণং যথা ফেণপিণ্ডো এৰং রূপং যথা পুব্বুল়ো এৰং ৰেদনা মাযা ৰিঞ্ঞাণং পঞ্চক্খন্ধা পঞ্চহি উপমাহি নিদ্দিট্ঠা. কেন কারণেন ফেণপিণ্ডোপমং রূপং সব্বঞ্চ চক্খুৰিঞ্ঞেয্যং যং ৰা চতূহি আযতনেহি? কথং ৰেদনা পুব্বুল়ূপমা? কতরা চ সা ৰেদনা সুখা দুক্খা অদুক্খমসুখা? এৰমেসা অনিদ্দিট্ঠা. এৰং নিদ্দিট্ঠঞ্চ অনিদ্দিট্ঠঞ্চ.

পঞ্ঞা হি সেট্ঠা লোকস্মিং, যাযং নিব্বেধগামিনী;

যায [যাযং (ক.) পস্স ইতিৰু. ৪১] সম্মা পজানাতি, জাতিমরণসঙ্খযং.

তীণিমানি ¶ ইন্দ্রিযানি অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং, ইদং ঞাণং.

কামেসু [উদা. ৬৩] সত্তা কামসঙ্গসত্তা, সংযোজনে ৰজ্জমপস্সমানা;

ন হি জাতু সংযোজনসঙ্গসত্তা, ওঘং তরেয্যুং ৰিপুলং মহন্তং.

চতূহি ¶ অঙ্গেহি সমন্নাগতা কাযস্স ভেদা দেৰেসু উপ্পজ্জন্তি. উদানে কাপিযং সুত্তং অপণ্ণকপসাদনীযং – ইদং নেয্যং.

সব্বে ধম্মা অনত্তাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

যদা পস্সতীতি ঞাণং. যো সব্বধম্মে অনত্তাকারেন উপট্ঠপেতি ইদং নেয্যং.

চত্তারি অরিযসচ্চানি, তত্থ তীণি নেয্যানি মগ্গসচ্চং সীলক্খন্ধো চ পঞ্ঞাক্খন্ধো চ, ইদং ঞাণঞ্চ নেয্যঞ্চ.

এসেৰ মগ্গো [ধ. প. ২৭৪ ধম্মপদে] নত্থঞ্ঞো, দস্সনস্স ৰিসুদ্ধিযা;

এতঞ্হি তুম্হে পটিপজ্জথ, মারস্সেতং পমোহনং.

চতূহি অঙ্গেহি সমন্নাগতো অরিযসাৰকো অত্তনাৰ [অত্তনাযেৰ (ক.) সং. নি. ৫.১০০৩] অত্তানং ব্যাকরেয্য ‘‘খীণনিরযোম্হি যাৰ সোতাপন্নোহমস্মি অৰিনিপাতধম্মো নিযতো সম্বোধিপরাযণো’’তি. ইদং দস্সনং.

যস্সিন্দ্রিযানি সুভাৰিতানি, অজ্ঝত্তং বহিদ্ধা চ সব্বলোকে;

সো পুগ্গলো মতি চ রূপসঞ্ঞী, সুমোহগতা ন জানাতি [কিংসু মোহগতানু জানাতি (ক.)].

চত্তারি ধম্মপদানি – অনভিজ্ঝা অব্যাপাদো সম্মাসতি সম্মাসমাধি. অযং ¶ ভাৰনা.

ৰচসা মনসাথ কম্মুনা চ, অৰিরুদ্ধো সম্মা ৰিদিত্ৰা [ৰিদিত্ৰান (ক.) সু. নি. ৩৬৭] ধম্মং;

নিব্বানপদাভিপত্থযানো, সম্মা সো লোকে পরিব্বজেয্য.

সোতাপত্তিফলং সচ্ছিকাতুকামেন কতমে ধম্মা মনসিকাতব্বা, ভগৰা আহ পঞ্চুপাদানক্খন্ধা. ইদং দস্সনঞ্চ ভাৰনা চ.

যানি করোতি পুরিসোতি ৰিত্থারো. তীণিমানি, ভিক্খৰে, সুচরিতানি. ইমে ৰিপাকধম্মধম্মা.

রূপং ৰেদযিতং সঞ্ঞা, ৰিঞ্ঞাণং যা চেৰ চেতনা;

নেসোহমস্মি ন মেসো অত্তা, ইতি দিট্ঠো ৰিরজ্জতি.

পঞ্চিমে, ভিক্খৰে, খন্ধা – ইমে নৰিপাকধম্মধম্মা.

তত্থ কতমো নেৰৰিপাকো নৰিপাকধম্মধম্মো?

‘‘যে ¶ এৰং পটিপজ্জন্তি, নযং বুদ্ধেন দেসিতং;

তে দুক্খস্সন্তং করিস্সন্তি, সত্থুসাসনকারকা’’তি.

ইতি যা চ সম্মাপটিপত্তি যো চ নিরোধো, উভযমেতং নেৰৰিপাকো নৰিপাকধম্মো. ব্রহ্মচরিযং ¶ ৰো, ভিক্খৰে, দেসেস্সামি, ব্রহ্মচরিযফলানি চ ব্রহ্মচরিযঞ্চ অরিযো অট্ঠঙ্গিকো মগ্গো ব্রহ্মচরিযফলানি সোতাপত্তিফলং যাৰ অরহত্তং.

সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধান সাসনং.

তীণিমানি, ভিক্খৰে, ৰিমোক্খমুখানি. ইদং সকৰচনং.

নত্থি পুত্তসমং পেমং, নত্থি গোণসমিতং ধনং;

নত্থি সূরিযসমা আভা, সমুদ্দপরমা সরা.

হেতুনা মারিসা কোসিযা সুভাসিতেন সঙ্গামৰিজযো সোপি নাম, ভিক্খৰে, সক্কো দেৰানমিন্দো সকং ফলং পরিভুঞ্জমানোতি ৰিত্থারেন কাতব্বং. ইদং পরৰচনং.

‘‘যং পত্তং যঞ্চ পত্তব্বং, উভযমেতং রজানুকিণ্ণং;

যে এৰংৰাদিনো নত্থি, তেসং কামেসু দোসো’’তি.

ইদং পরৰচনং. যে চ খো তে উভো অন্তে অনুপগম্ম ৰট্টং তেসং নত্থি পঞ্ঞাপনায. ইদং সকৰচনং.

‘‘নন্দতি ¶ ¶ পুত্তেহি পুত্তিমা, গোমা গোহি [ভোগিকো ভোগেহি (পী.) সং. নি. ১.১২] তথেৰ নন্দতি;

উপধী হি নরস্স নন্দনা, ন হি সো নন্দতি যো নিরূপধী’’তি – পরৰচনং.

‘‘সোচতি পুত্তেহি পুত্তিমা, গোমা গোহি তথেৰ সোচতি;

উপধী হি নরস্স সোচনা, ন হি সো সোচতি যো নিরূপধী’’তি – সকৰচনং.

যে কেচি ভূতা ভৰিস্সন্তি যে ৰাপি, সব্বে গমিস্সন্তি পহায দেহং;

তং সব্বজানিং কুসলো ৰিদিত্ৰা, ধম্মে [আতাপিযো (উদা. ৪২)] ঠিতো ব্রহ্মচরিযং চরেয্য.

তযোমে, ভিক্খৰে, সত্থারো, তথাগতো অরহং সেক্খো পটিপদো. ইদং সত্তাধিট্ঠানং.

যঞ্চ কামসুখং [উদা. ১২] লোকে, যঞ্চিদং দিৰিযং সুখং;

তণ্হক্খযসুখস্সেতে, কলং নাগ্ঘন্তি সোল়সিং.

সত্তিমে ¶ , ভিক্খৰে, বোজ্ঝঙ্গা, ইদং ধম্মাধিট্ঠানং.

তত্থ কতমং সত্তাধিট্ঠানঞ্চ ধম্মাধিট্ঠানঞ্চ? দুদ্দসমন্তং সচ্চং দুদ্দসো পটিৰেধো বালেহি, জানতো পস্সতো নত্থি নন্দীতি ৰদামি. দুদ্দসমন্তং সচ্চং দুদ্দসো পটিৰেধো বালেহীতি ধম্মাধিট্ঠানং. জানতো পস্সতো নত্থি নন্দীতি সত্তাধিট্ঠানং. দারুক্খন্ধোপমং গঙ্গায তীরিযা ওরিমঞ্চ তীরং পারিমঞ্চ তীরং থলে ৰা [থলেৰ চ (ক.) সংযুত্তনিকাযে] ন চ উস্সীদনং, মজ্ঝে চ ন সংসীদনং মনুস্সগ্গাহো চ অমনুস্সগ্গাহো চ অন্তোপূতিভাৰো চ, ইদং ধম্মাধিট্ঠানং. এৰং পন ভিক্খু নিব্বাননিন্নো ভৰিস্সতি নিব্বানপরাযণোতি সত্তাধিট্ঠানং. ইদং সত্তাধিট্ঠানঞ্চ ধম্মাধিট্ঠানঞ্চ.

মগ্গানট্ঠঙ্গিকো ¶ সেট্ঠো, সচ্চানং চতুরো পদা;

ৰিরাগো সেট্ঠো ধম্মানং, দ্ৰিপদানঞ্চ চক্খুমা.

তীণিমানি, ভিক্খৰে, অগ্গানি – বুদ্ধো সত্তানং, ৰিরাগো ধম্মানং, সঙ্ঘো গণানং. অযং থৰো.

কাযেন ¶ [ধ. প. ৩৬১] সংৰরো সাধু, সাধু ৰাচায সংৰরো;

মনসা সংৰরো সাধু, সাধু সব্বত্থ সংৰুতো;

সব্বত্থ সংৰুতো ভিক্খু, সব্বদুক্খা পমুচ্চতি.

তীণিমানি, ভিক্খৰে, করণীযানি – কাযসুচরিতং ৰচীসুচরিতং মনোসুচরিতং. ইদং অনুঞ্ঞাতং.

নত্থি পুত্তসমং পেমং. ৰিত্থারো ইদং পটিক্খিত্তং.

তীণিমানি, ভিক্খৰে, অকরণীযানি সযং অভিঞ্ঞায দেসিতানি. কতমানি তীণি? কাযদুচ্চরিতং ৰচীদুচ্চরিতং মনোদুচ্চরিতং. ইদং পটিক্খিত্তং.

তত্থ কতমং অনুঞ্ঞাতঞ্চ পটিক্খিত্তঞ্চ?

কাযেন কুসলং করে, অস্স কাযেন সংৰুতো;

কাযদুচ্চরিতং হিত্ৰা, কাযসুচরিতং চরে.

দ্ৰীহি পঠমপদেহি চতুত্থেন চ পদেন অনুজানাতি. কাযদুচ্চরিতং হিত্ৰাতি ততিযেন পদেন পটিক্খিত্তন্তি. মহাৰিভঙ্গো অচিরতপানাদো.

সচে ¶ ভাযসি দুক্খস্স, মাভিনন্দি অনাগতং;

ৰস্সকালে যথা ছত্তং, কুসলানি কমত্থকে.

সব্বে ¶ ধম্মা অনত্তাতি, সমাগতং ৰিচালযে;

ন ৰো দুক্খা পমোক্খাত্থি, সমথো চ ৰিপস্সনা.

কামচ্ছন্দং উপাদায, যো সো ৰিতক্কেহি খজ্জতি;

সুভাৰিতত্তে বোজ্ঝঙ্গে, সো ইমং ৰিজটযে জটং.

সুঞ্ঞতো লোকং অৰেক্খস্সু, সমাধিভাৰি ভাৰসে;

কামং কামযমানস্স, ধম্মচরিযায সুগতিং.

হঞ্ঞতে সব্বা মুচ্চেৰ, নিপ্পোঠেন্তো চতুদ্দিসা;

যো কামে পরিৰজ্জেতি, পারিছত্তোপমেৰ চ.

যানি ¶ করোতি পুরিসো, লোকধম্মা পকাসিতা;

সুখো ৰিপাকো পুঞ্ঞানং, ততিযং অঞ্ঞং ন ৰিজ্জতি.

আদানস্স ভযং ঞত্ৰা, জাযতে জীযতেপি চ;

কামা হি চিত্রা ৰিৰিধা, অথ লোণসল্লোপমং.

ন হি পাপং কতং কম্মং, অগতীহি চ গচ্ছতি;

যস্সিন্দ্রিযানি সমথঙ্গতানি, তথেৰ পঞ্চঞাণিকো.

সত্তিযা ৰিয ওমট্ঠো, ৰিঞ্ঞাণঞ্চ পতিট্ঠিতা;

যো পাণমতিপাতেতি, তীণি দুচ্চরিতানি চ.

সট্ঠিৰস্সসহস্সানি, খণং লদ্ধান দুল্লভং;

অযসাৰ মলং সমুট্ঠিতং, চতূসু পটিপত্তিসু.

নেলঙ্গো ¶ সেতপচ্ছাদো, অথ গোপালকোপমং;

সুখো ৰিৰেকো তুট্ঠস্স, ৰিতক্কা চ সুদেসিতা.

ফেণপিণ্ডোপমং রূপং, ব্রহা উজু পতাপৰা;

পঞ্ঞা হি সেট্ঠা লোকস্মিং, অনঞ্ঞা তীণি ইন্দ্রিযানি.

কামেসু ¶ সত্তা কামসঙ্গসত্তা, অথ ৰণ্ণো রহস্সৰা;

সব্বে ধম্মা অনত্তাতি, অরিযসচ্চঞ্চ দেসিতং.

এসেৰ মগ্গো নত্থঞ্ঞো, সোতাপন্নোতি ব্যাকরে;

যস্সিন্দ্রিযানি সুভাৰিতানি, অথ ধম্মপদেহি চ.

ৰচসা মনসা চেৰ, পঞ্চক্খন্ধা অনিচ্চতো;

যানি করোতি পুরিসো, তীণি সুচরিতানি চ.

রূপং ৰেদযিতং সঞ্ঞা, পঞ্চক্খন্ধা পকাসিতা;

যো এৰং পটিপজ্জতি, ব্রহ্মা চেৰ ফলানি চ.

সব্বপাপস্স অকরণং, ৰিমোক্খা তং হি দেসিতা;

নত্থি পুত্তসমং পেমং, দেৰানং অসুরান চ.

যং পত্তং যঞ্চ পত্তব্বং, নন্দতি সোচতি নিচ্চং;

যে কেচি ভূতা ভৰিস্সন্তি, সত্থারো চ পকাসিতা.

যঞ্চ ¶ কামসুখং লোকে, বোজ্ঝঙ্গা চ সুদেসিতা;

মগ্গানট্ঠঙ্গিকো সেট্ঠো, তযো চ অগ্গপত্তিযো.

কাযেন সংৰরো সাধু, করণীযঞ্চ দেসিতং;

নত্থি অত্তসমং পেমং, অরিযা তীণি চ দেসিতা.

কাযেন ¶ কুসলং অভিরতো, ৰিনযঞ্চ কামসুখং লোকে;

বোজ্ঝঙ্গা চ সুদেসিতা, দুদ্দসং অনতং চেৰ পরাপরং চ;

পেটকোপদেসে সাসনপ্পট্ঠানং নাম দুতিযভূমি সমত্তা.

৩২. তত্থ ¶ ¶ কতমং সুত্তাধিট্ঠানং?

লোভাধিট্ঠানং দোসাধিট্ঠানং মোহাধিট্ঠানং অলোভাধিট্ঠানং অদোসাধিট্ঠানং অমোহাধিট্ঠানং কাযকম্মাধিট্ঠানং ৰাচাকম্মাধিট্ঠানং মনোকম্মাধিট্ঠানং সদ্ধিন্দ্রিযাধিট্ঠানং ৰীরিযিন্দ্রিযাধিট্ঠানং সতিন্দ্রিযাধিট্ঠানং সমাধিন্দ্রিযাধিট্ঠানং পঞ্ঞিন্দ্রিযাধিট্ঠানং.

ৰিতক্কমথিতস্স [ৰিতক্কনিম্মথিতস্স (ক.) ধ. প. ৩৪৯] জন্তুনো, তিব্বরাগস্স সুভানুপস্সিনো;

ভিয্যো তণ্হা পৰড্ঢতি, এস খো গাল়্হং করোতি বন্ধনং.

ৰিতক্কমথিতস্সাতি কামরাগো. সুভানুপস্সিনোতি কামরাগৰত্থু. ভিয্যো তণ্হা পৰড্ঢতীতি কামতণ্হা. এস গাল়্হং করোতি বন্ধনন্তি রাগং, ইতি যো যো ধম্মো মূলনিক্খিত্তো, সো যেৰেত্থ ধম্মো উগ্গাৰহিতব্বো [উগ্গাপযিতব্বো (পী. ক.)]. ন ভগৰা একং ধম্মং আরব্ভ অঞ্ঞং ধম্মং দেসেতি. যস্স ৰিতক্কেতি কামৰিতক্কো তমেৰ ৰিতক্কং কামৰিতক্কেন নিদ্দিসীযতি. তিব্বরাগস্সাতি তস্সেৰ ৰিতক্কস্স ৰত্থুং নিদ্দিসতি. সুভানুপস্সিনো ভিয্যো তণ্হা পৰড্ঢতীতি তমেৰ রাগং কামতণ্হাতি ¶ নিদ্দিসতি. এস গাল়্হং করোতি বন্ধনন্তি তমেৰ তণ্হাসংযোজনং নিদ্দিসতি. এৰং গাথাসু অনুমিনিতব্বং. এৰং সৰেয্যাকরণেসু.

তত্থ ¶ ভগৰা একং ধম্মং তিৰিধং নিদ্দিসতি, নিস্সন্দতো হেতুতো ফলতো.

দদং পিযো [পস্স সংযুত্তনিকাযে] হোতি ভজন্তি নং বহূ, কিত্তিঞ্চ পপ্পোতি যসো চ ৰড্ঢতি;

অমঙ্কুভূতো পরিসং ৰিগাহতি, ৰিসারদো হোতি নরো অমচ্ছরী.

দদন্তি ¶ যং যং দানং, ইদং দানমযিকং পুঞ্ঞক্রিযং. তত্থ হেতু. যং চেতং. ভজন্তি নং বহূ, কিত্তিন্তি যো চ কল্যাণো কিত্তিসদ্দো লোকে অব্ভুগ্গচ্ছতি, যং বহুকস্স জনস্স পিযো ভৰতি মনাপো চ. যঞ্চ অৰিপ্পটিসারী কালঙ্করোতি অযং নিস্সন্দো. যং কাযস্স ভেদা দেৰেসু উপপজ্জতীতি ইদং ফলং. ইদং লোভাধিট্ঠানং.

যো পাণমতিপাতেতি, মুসাৰাদঞ্চ ভাসতি;

লোকে অদিন্নং আদিযতি, পরদারঞ্চ গচ্ছতি;

সুরামেরযপানঞ্চ, যো নরো অনুযুঞ্জতি [অভিগিজ্ঝতি (পী. ক.) পস্স অ. নি. ৫.১৭৪].

অপ্পহায পঞ্চ ৰেরানি, দুস্সীলো ইতি ৰুচ্চতি;

কাযস্স ভেদা দুপ্পঞ্ঞো, নিরযং সোপপজ্জতি.

যো পাণমতিপাতেতীতি দুট্ঠো পাণমতিপাতেতি. মুসাৰাদঞ্চ ভাসতীতি দোসোপঘাতায মুসাৰাদঞ্চ ভাসতি. সুরামেরযপানঞ্চ, যো নরো অনুযুঞ্জতীতি দোসো নিদানং. যো ¶ চ সুরামেরযপানং অনুযুঞ্জতি যথাপরদারৰিহারী [যথাপমুদিতৰিহারী (ক.)] অমিত্তা জনযন্তি.

পঞ্চ ৰেরানি অপ্পহাযাতি পঞ্চন্নং ভিক্খাপদানং সমতিক্কমনং সব্বেসং দোসজানং সা পণ্ণত্তি, তেনেৰ দোসজনিতেন কম্মেন দুস্সীলো ইতি ৰুচ্চতি সোপি ধম্মো হেতুনা নিদ্দিসিতব্বো, নিস্সন্দেন ফলেন চ.

তীণি বালস্স বাললক্খণানি – দুব্ভাসিতভাসী [দুব্ভাসিতভাসিতা (পী. ক.) পস্স অ. নি. ৩.৩] চ হোতি, দুচ্চিন্তিতচিন্তী চ দুক্কটকম্মকারী চ. তত্থ যং কাযেন চ ৰাচায চ পরক্কমতি, ইদমস্স দুক্কটকম্মকারী. তাযং যথা চ মুসাৰাদং ভাসতি যথা পুব্বনিদ্দিট্ঠং ¶ , ইদমস্স দুব্ভাসিতা. যঞ্চ সঙ্কপ্পেতি মনোদুচ্চরিতং ব্যাপাদং, ইদমস্স দুচ্চিন্তিতচিন্তিতা. যং সো ইমেহি তীহি বাললক্খণেহি সমন্নাগতো তীণি তজ্জানি দুক্খানি দোমনস্সানি অনুভৰতি, সো চ হোতি সভগ্গতো ৰা পরিসগ্গতো ৰা তজ্জং কথং কথন্তি. যদা ভৰতি সো চ পাণাতিপাতাদিদসঅকুসলকম্মপথা, সো ততোনিদানং দুক্খং দোমনস্সং পটিসংৰেদেতীতি. পুন চপরং যদা পস্সতি চোরং রাজাপরাধিকং রঞ্ঞা গহিতং জীৰিতা ৰোরোপেতং, তস্সেৰং ভৰতি সচে মমম্পি রাজা জানেয্য ¶ মমম্পি রাজা গাহাপেত্ৰা জীৰিতা ৰোরোপেয্যাতি, সো ততোনিদানং দুক্খং ¶ দোমনস্সং পটিসংৰেদেতি. পুন চপরং বালো যদা ভৰতি আসনা সমারূল়্হো যাৰ যা মে গতি ভৰিস্সতি ইতো পেচ্চ পরং মরণাতি সো ততোনিদানং দুক্খং দোমনস্সং পটিসংৰেদেতি ইতি বাললক্খণং হেতু. তীণি তজ্জানি দুক্খানি নিস্সন্দো. কাযস্স ভেদা নিরযেসু উপপজ্জতি, ইদং ফলং. ইদং দোসাধিট্ঠানং.

সতঞ্চেৰ সহস্সানং, কপ্পানং সংসরিস্সতি;

অথৰা পি ততো ভিয্যো, গব্ভা গব্ভং গমিস্সথ.

অনুপাদায বুদ্ধৰচনং, সঙ্খারে অত্ততো উপাদায;

দুক্খস্সন্তং করিস্সন্তি, ঠানমেতং ন ৰিজ্জতি.

যো যং অনমতগ্গসংসারং সমাপন্নো জাযতে চ মীযতে চ, অযং অৰিজ্জাহেতুকা. যানিপি চ সঙ্খারানং পযোজনানি, তানিপি অৰিজ্জাপচ্চযানি, যং অদস্সনং বুদ্ধৰচনস্স, অযং অৰিজ্জাসুত্তেযেৰ নিদ্দিট্ঠং. যো চ সঙ্খারে অত্ততো হরতি পঞ্চক্খন্ধে পঞ্চ দিট্ঠিযো উপগচ্ছতি. ‘‘এতং মম, এসোহমস্মি, এসো মে অত্তা’’তি ইদং সুত্তং অৰিজ্জায নিক্খিত্তং, অৰিজ্জায নিক্খিপিতং. এৰং সত্থা সুত্তে নযেন [সুতনযেন (পী.)] ধম্মেন নিদ্দিসতি. অসাধারণেন তংযেৰ তত্থ নিদ্দিসিতব্বং. ন অঞ্ঞং.

যে হি কেচি, ভিক্খৰে, সমণা ৰা ব্রাহ্মণা ৰা ‘‘ইদং দুক্খ’’ন্তি নপ্পজানন্তি চত্তারি সচ্চানি ৰিত্থারেন, যং তত্থ অপ্পজাননা, ইদং দুক্খং, অযং হেতু. অপ্পজানন্তো ৰিৰিধে সঙ্খারে অভিসঙ্খরোতি, অযং নিস্সন্দো. যঞ্চ দিট্ঠিগতানি পরামসতি ‘‘ইদমেৰ সচ্চং মোঘমঞ্ঞ’’ন্তি অযং নিস্সন্দো. যং ¶ পুনব্ভৰং ¶ নিব্বত্তেতি, ইদং ফলং. অযম্পি ধম্মো সনিদ্দিট্ঠো হেতুতো চ ফলতো চ নিস্সন্দতো চ.

এত্থ পন কেচি ধম্মা সাধারণা ভৰন্তি. হেতু খলু আদিতোযেৰ সুত্তে নিক্খিপিস্সন্তি. যথা কিং ভৰে চত্তারিমানি, ভিক্খৰে, অগতিগমনানি. তত্থ যঞ্চ ছন্দাগতিং গচ্ছতি যঞ্চ ভযাগতিং গচ্ছতি, অযং লোভো অকুসলমূলং. যং দোসা, অযং দোসোযেৰ ¶ . যং মোহা, অযং মোহোযেৰ. এৰং ইমানি তীণি অকুসলমূলানি আদিতোযেৰ উপপরিক্খিতব্বানি. যত্থ একং নিদ্দিসিতব্বং, তত্থ একং নিদ্দিসীযতি. তথা দ্ৰে যথা তীণি, ন হি আদীহি অনিক্খিত্তে হেতু ৰা নিস্সন্দো ৰা ফলং ৰা নিদ্দিসিতব্বং.

ছন্দা দোসা ভযা মোহা, যো ধম্মং অতিৰত্ততি;

নিহীযতি [নিহীযতে (পী. ক.) পস্স অ. নি. ৪.১৭] তস্স যসো, কাল়পক্খেৰ চন্দিমা.

কত্থ ছন্দা চ অযং লোভো যথা নিদ্দিট্ঠং পুব্বে. ইদং মোহাধিট্ঠানং.

‘‘অসুভানুপস্সিং [অসুভানুপস্সী (পী.) পস্স ধ. প. ৮] ৰিহরন্তং, ইন্দ্রিযেসু সুসংৰুতং;

ভোজনম্হি চ মত্তঞ্ঞুং, সদ্ধং আরদ্ধৰীরিযং;

তং ৰে নপ্পসহতি মারো, ৰাতো সেলংৰ পব্বত’’ন্তি.

তত্থ যা অসুভায উপপরিক্খা, অযং কামেসু আদীনৰদস্সনেন পরিচ্চাগো. ইন্দ্রিযেসু সুসংৰুতো তস্সেৰ অলোভস্স পারিপূরিযং মম আযতনসোচিতং অনুপাদায. ভোজনম্হি চ মত্তঞ্ঞুন্তি রসতণ্হাপহানং. ইতি অযং অলোভো অসুভানুপস্সিতায ৰত্থুতো ধারযতি, সো অলোভো ¶ হেতু. ইন্দ্রিযেসু গুত্তদ্ৰারতায গোচরতো ধারযতি, ভোজনেমত্তঞ্ঞুতায পরতো ধারযতি, অযং নিস্সন্দো. তং ৰে নপ্পসহতি মারো, ৰাতো সেলং ৰ পব্বতন্তি, ইদং ফলং. ইতি যোযেৰ ধম্মো আদিম্হি নিক্খিত্তো, সোযেৰ মজ্ঝে চেৰ অৰসানে চ.

নাহং, ভিক্খৰে, অঞ্ঞং একধম্মম্পি সমনুপস্সামি অসমুপ্পন্নস্স কামচ্ছন্দস্স অনুপ্পাদায উপ্পন্নস্স ৰা পহানায, যথযিদং [যদিদং (পী. ক.) পস্স অ. নি. ১.১৭] অসুভনিমিত্তং. তত্থ অসুভনিমিত্তং ¶ মনসিকরোন্তস্স অনুপ্পন্নো চেৰ কামচ্ছন্দো ন উপ্পজ্জতি, উপ্পন্নো চ কামচ্ছন্দো পহীযতি. ইদং অলোভস্স ৰত্থু. যং পুন অনুপ্পন্নো কামরাগো পরিযাদিযতি রূপরাগং অরূপরাগং, ইতি ফলং. ইতি অযম্পি চ ধম্মো নিদ্দিট্ঠো হেতুতো চ নিস্সন্দতো চ ফলতো চ. ইদং অলোভাধিট্ঠানং.

একম্পি চে পাণমদুট্ঠচিত্তো, মেত্তাযতি কুসলো [কুসলী (ক.) পস্স ইতিৰু. ২৭] তেন হোতি;

সব্বে চ পাণে মনসানুকম্পং [অনুকম্পমানো (পী.)], পহূতমরিযো পকরোতি পুঞ্ঞং.

একম্পি চে পাণমদুট্ঠচিত্তো মেত্তাযতীতি অযং অদোসো. নিগ্ঘাতেন অস্সাদো, কুসলো তেন হোতীতি তেন কুসলেন ধম্মেন সংযুত্তো ধম্মপঞ্ঞত্তিং গচ্ছতি. কুসলোতি যথা পঞ্ঞায পঞ্ঞো পণ্ডিচ্চেন পণ্ডিতো. পহূতমরিযো পকরোতি পুঞ্ঞন্তি তস্সাযেৰ ৰিপাকো অযং লোকিযস্স, ন হি লোকুত্তরস্স. তত্থ ¶ যা মেত্তাযনা, অযং হেতু. যং কুসলো ভৰতি অযং নিস্সন্দো. যাৰ অব্যাপজ্জো ভূমিযং বহুপুঞ্ঞং পসৰতি, ইদং ফলং. ইতি অদোসো নিদ্দিট্ঠো হেতুতো চ নিস্সন্দতো চ ফলতো চ.

একাদসানিসংসা মেত্তায চেতোৰিমুত্তিযা. তত্থ যা মেত্তাচেতোৰিমুত্তি, অযং অরিযধম্মেসু রাগৰিরাগা চেতোৰিমুত্তি, লোকিকায ভূমিকা হেতু, যং সুখং আযতিং মনাপো হোতি মনুস্সানং, ইমে একাদস ধম্মা নিস্সন্দো. যঞ্চ অকতাৰী ব্রহ্মকাযে উপপজ্জতি. ইদং ফলং. ইদং অদোসাধিট্ঠানং.

পঞ্ঞা হি সেট্ঠা লোকস্মিং, যাযং নিব্বেধগামিনী [নিব্বেধভাগিনী (পী. ক.) পস্স ইতিৰু. ৪১];

যায সম্মা পজানাতি, জাতিমরণসঙ্খযং.

পঞ্ঞা ¶ হি সেট্ঠাতি ৰত্থুং. নিব্বেধগামিনীতি নিব্বানগামিনিযং যথাভূতং পটিৰিজ্ঝতি. সম্মা পজানাতি, জাতিমরণসঙ্খযন্তি অমোহো. পঞ্ঞাতি হেতু. যং পজানাতি অযং নিস্সন্দো. যো জাতিমরণসঙ্খযো, ইদং ফলং. ইতি অমোহো নিদ্দিট্ঠো হেতুনা চ নিস্সন্দেন চ ফলেন চ.

তীণিমানি, ভিক্খৰে [ইতিৰু. ৬২ তিকনিপাতে], ইন্দ্রিযানি অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং. তত্থ কতমং অনঞ্ঞাতঞ্ঞস্সামীতিন্দ্রিযং? ইধ, ভিক্খৰে, ভিক্খু অনভিসমেতস্স দুক্খস্স অরিযসচ্চস্স অভিসমযায ছন্দং জনেতি ৰাযমতি, ৰীরিযং আরভতি ¶ , চিত্তং পগ্গণ্হাতি পদহতি. এৰং চতুন্নং অরিযসচ্চানং কাতব্বং. তত্থ কতমং অঞ্ঞিন্দ্রিযং? ইধ ¶ , ভিক্খৰে, ভিক্খু ‘‘ইদং দুক্খং অরিযসচ্চ’’ন্তি যথাভূতং পজানাতি, যা চ মগ্গো, ইদং অঞ্ঞিন্দ্রিযং. আসৰক্খযা অনাসৰো হোতি, ইদং ৰুচ্চতি অঞ্ঞাতাৰিন্দ্রিযং. তথাযং পঞ্ঞা, অযং হেতু. যং ছন্দং জনেতি ৰাযমতি, যা পজানাতি, অযং নিস্সন্দো. যেন সব্বসো আসৰানং খযা হেতু, যং খযে ঞাণমুপ্পজ্জতি, অনুপ্পাদে ঞাণঞ্চ, অযং নিস্সন্দো. যং অরহত্তং, ইদং ফলং. তত্থ খীণা মে জাতি, ৰুসিতং ব্রহ্মচরিযং, কতং করণীযন্তি, ইদং খযে ঞাণং. নাপরং ইত্থত্তাযাতি পজানামীতি ইদং অনুপ্পাদে ঞাণং. ইতি ইমানি ইন্দ্রিযানি অমোহো নিদ্দিট্ঠো হেতুনা চ নিস্সন্দেন চ ফলেন চ. ইমানি অসাধারণানি নিদ্দিট্ঠানি.

তত্থ কতমানি কুসলমূলানি সাধারণানি? কুসলঞ্চ ৰো, ভিক্খৰে, দেসেস্সামি কুসলমূলঞ্চেৰ. তত্থ কতমং কুসলমূলং? অলোভো অদোসো অমোহো. তত্থ কতমং কুসলং? অট্ঠ সম্মত্তানি সম্মাদিট্ঠি যাৰ সম্মাসমাধি. তত্থ যানি কুসলমূলানি, অযং হেতু. যঞ্চ অলোভো তীণি কম্মানি সমুট্ঠাপেতি সঙ্কপ্পং ৰাযামং সমাধিঞ্চ, অযং অলোভস্স নিস্সন্দো. তত্থ যো অদোসো, অযং হেতু. যং তযো ধম্মে পট্ঠপেতি সম্মাৰাচং সম্মাকম্মন্তং সম্মাআজীৰঞ্চ, অযং নিস্সন্দো. তত্থ ¶ যো অমোহো হেতু, যং দ্ৰে ধম্মে উপট্ঠপেতি অৰিপরীতদস্সনম্পি চ অনভিলাপনং, অযং নিস্সন্দো. ইমস্স ব্রহ্মচরিযস্স যং ফলং, তা দ্ৰে ৰিমুত্তিযো রাগৰিরাগা চেতোৰিমুত্তি অৰিজ্জা ৰিরাগা চ পঞ্ঞাৰিমুত্তি, ইদং ফলং. ইতি ইমানি তীণি কুসলমূলানি নিদ্দিট্ঠানি হেতুতো ¶ চ নিস্সন্দতো চ ফলতো চ. এৰং সাধারণানি কুসলানি পটিৰিজ্ঝিতব্বানি.

যত্থ দুৰে যত্থ তীণি. অযঞ্চেত্থ গাথা.

‘‘তুলমতুলঞ্চ সম্ভৰং, ভৰসঙ্খারমৰস্সজি মুনি;

অজ্ঝত্তরতো সমাহিতো, অভিন্দি কৰচমিৰত্তসম্ভৰ’’ন্তি.

তুলমতুলঞ্চ সম্ভৰন্তি তুলসঙ্খতং অতুলসঙ্খতং. তত্থ যে সঙ্খতা তুলং, তে দ্ৰে ধম্মা অস্সাদো চ আদীনৰো চ তুলিতা ভৰন্তি. এত্তকো কামেসু অস্সাদো. এত্তকো আদীনৰো ইমস্স, ইদং নিস্সরণন্তি ইতি নিব্বানং পজানাতি. দ্ৰীহি কারণেহি অতুলং ন চ সক্কা তুলযিতুং. এত্তকং এতং নেতং পরমত্থীতি তেন অতুলং. অথ পাপুণা রতনং করিত্ৰা অচ্ছরিযভাৰেন ¶ অতুলং. তত্থ কুসলস্স চ অভিসম্ভৰা জাননা পস্সনা, অযং অমোহো. যং তত্থ ঞাতা ওসিরণা ভৰসঙ্খারানং, অযং অলোভো. যং অজ্ঝত্তরতো সমাহিতোতি ৰিক্খেপপটিসংহরণা, অযং অদোসো. ইতি ইমানি তীণি কুসলমূলানি. তুলমতুলসম্ভৰন্তি ¶ অযং অমোহো. যো ভৰসঙ্খারানং সমোসরণং লোভো সম্মাসমাধীনং অস্সাদো, অযং হেতু. যং অজ্ঝত্তরতো অৰিজ্জণ্ডকোসং সম্ভেদো, অযং নিস্সন্দো. সা পৰত্তি ইমানি তীণি নিদ্দিট্ঠানি কুসলমূলানি হেতুতো চ নিস্সন্দতো চ ফলতো চ.

এত্তাৰতা এসা পৰত্তি চ নিৰত্তি চ অকুসলমূলেহি পৰত্ততি, কুসলমূলেহি নিৰত্ততীতি ইমেহি চ তীহি সব্বং অকুসলমূলং সমোসরণং গচ্ছতি. সো ধম্মে ৰা ৰচনতো নিদ্দিট্ঠো তণ্হাতি ৰা কোধোতি ৰা অসম্পজঞ্ঞন্তি ৰা অনুসযোতি ৰা মক্খোতি ৰা পল়াসোতি ৰা অস্সতীতি ৰা ইস্সাতি ৰা মচ্ছরিযন্তি ৰা অঞ্ঞাণন্তি ৰা, তেহি যে চ ৰত্থূহি নিদ্দিসিতব্বং. যস্সিমানি দ্ৰে ৰচনানি ধম্মপদানি নিদ্দিট্ঠানি ন সো অত্থি কিলেসা, যো ইমেসু নৰসু পদেসু সমোধানং সমোসরণং গচ্ছতি. অযং কিলেসো, ন চ লোভো, ন চ দোসো, ন চ মোহো.

যথা অকুসলমূলানি, এৰং কুসলানি পটিক্খেপেন নিদ্দিসিতব্বানি.

৩৭. তত্থ ¶ কতমং কাযকম্মাধিট্ঠানং?

কাযেন কুসলং করে, অস্স কাযেন সংৰুতো;

কাযদুচ্চরিতং হিত্ৰা, কাযেন সুচরিতং চরে.

তীণিমানি, ভিক্খৰে, সুচরিতানি [ইতিৰু. ৬৯ সুচরিতসুত্তে]. পাণাতিপাতা ৰেরমণী, অদিন্নাদানা ৰেরমণী, কামেসুমিচ্ছাচারা ৰেরমণী, ইদং কাযকম্মাধিট্ঠানং.

সুভাসিতং ¶ [সু. নি. ৪৫২ সুত্তনিপাতে] উত্তমমাহু সন্তো, ধম্মং ভণে নাধম্মং তং দুতিযং;

পিযং ভণে নাপ্পিযং তং ততিযং, সচ্চং ভণে নালিকং তং চতুত্থং.

চত্তারিমানি ¶ চ ৰচীসুচরিতানি ইদং ৰাচাকম্মাধিট্ঠানং.

মনেন কুসলং কম্মং, মনসা সংৰুতো ভৰে;

মনোদুচ্চরিতং হিত্ৰা, মনসা সুচরিতং চরে.

তীণিমানি মনোসুচরিতানি, অনভিজ্ঝা, অব্যাপাদো, সম্মাদিট্ঠি, ইদং মনোকম্মাধিট্ঠানং. ইমানি অসাধারণানি সুত্তানি.

তত্থ কতমানি সাধারণানি সুত্তানি?

ৰাচানুরক্খী মনসা সুসংৰুতো, কাযেন চ নাকুসলং কযিরা [অকুসলং ন কযিরা (পী. ক.) পস্স ধ. প. ২৮১];

এতে তযো কম্মপথে ৰিসোধযে, আরাধযে মগ্গমিসিপ্পৰেদিতং.

তিস্সো ইমা, ভিক্খৰে, পারিসুদ্ধিযো – কাযকম্মপারিসুদ্ধি, ৰাচাকম্মপারিসুদ্ধি, মনোকম্মপারিসুদ্ধি.

তত্থ কতমা কাযকম্মপারিসুদ্ধি? পাণাতিপাতা ৰেরমণী, অদিন্নাদানা ৰেরমণী, কামেসুমিচ্ছাচারা ৰেরমণী. তত্থ কতমা ৰচীকম্মপারিসুদ্ধি? মুসাৰাদা ৰেরমণী…পে… সম্ফপ্পলাপা ৰেরমণী. তত্থ কতমা মনোকম্মপারিসুদ্ধি? অনভিজ্ঝা অব্যাপাদো সম্মাদিট্ঠি. ইদং সাধারণসুত্তং.

ইতি ¶ সাধারণানি চ সুত্তানি অসাধারণানি চ সুত্তানি পটিৰিজ্ঝিতব্বানি. পটিৰিজ্ঝিত্ৰা ৰাচায কাযেন চ সুত্তস্স অত্থো নিদ্দিসিতব্বো.

৩৮. তত্থ কতমং সদ্ধিন্দ্রিযাধিট্ঠানং?

যস্স ¶ ¶ সদ্ধা [সং. নি. ১.২৬০; থেরগা. ৫০৭ অট্ঠকনিপাতে চ পস্সিতব্বং] তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৰিতং.

সদ্ধা ৰে নন্দিকা আরাধিকো, নো তস্স সদ্ধোতি;

সব্বং সিযাতি ভগৰন্তং, তথারূপো ধম্মসম্পসাদো.

আরম্ভথ [আরভথ (পী.) পস্স সং. নি. ১.১৮৫] নিক্কমথ, যুঞ্জথ বুদ্ধসাসনে;

ধুনাথ মচ্চুনো সেনং, নল়াগারংৰ কুঞ্জরো.

চত্তারোমে, ভিক্খৰে, সম্মপ্পধানা, ইদং ৰীরিযাধিট্ঠানং.

তত্থ কতমং সতিন্দ্রিযাধিট্ঠানং?

সতীমতো সদা ভদ্দং, ভদ্দমত্থু সতীমতো;

সতীমতো সদা [সুৰে (সং. নি. ১.২৩৮)] সেয্যো, সতীমা সুখমেধতি.

চত্তারো সতিপট্ঠানা ৰিত্থারেন কাতব্বা, ইদং সতিন্দ্রিযাধিট্ঠানং.

তত্থ কতমং সমাধিন্দ্রিযাধিট্ঠানং?

আকঙ্খতো তে নরদম্মসারথি, দেৰা মনুস্সা মনসা ৰিচিন্তিতং;

সব্বেন জঞ্ঞা কসিণাপি পাণিনো, সন্তং সমাধিং অরণং নিসেৰতো.

তযোমে ¶ , ভিক্খৰে, সমাধী – সৰিতক্কো সৰিচারো, অৰিতক্কো ৰিচারমত্তো, অৰিতক্কো অৰিচারো. ইদং সমাধিন্দ্রিযাধিট্ঠানং.

তত্থ ¶ ¶ কতমং পঞ্ঞিন্দ্রিযাধিট্ঠানং?

পঞ্ঞা হি সেট্ঠা লোকস্মিন্তি ৰিত্থারেন.

তিস্সো ইমা, ভিক্খৰে, পঞ্ঞা – সুতমযী, চিন্তামযী, ভাৰনামযী, ইদং পঞ্ঞিন্দ্রিযাধিট্ঠানং সুত্তং, ইমানি ইন্দ্রিযাধিট্ঠানানি অসাধারণানি সুত্তানি.

৩৯. তত্থ কতমানি সাধারণানি ইন্দ্রিযাধিট্ঠানানি সুত্তানি?

অৰীতরাগো [অ. নি. ৬.৫৪] কামেসু, যস্স পঞ্চিন্দ্রিযা মুদূ;

সদ্ধা সতি চ ৰীরিযং, সমথো চ ৰিপস্সনা;

তাদিসং ভিক্খুমাসজ্জ, পুব্বেৰ উপহঞ্ঞতি.

পঞ্চিমানি ইন্দ্রিযানি. সদ্ধিন্দ্রিযাদিইন্দ্রিযং দট্ঠব্বং. তীসু অৰেচ্চপ্পসাদে ৰিত্থারেন সুত্তং কাতব্বং. ইমানি সাধারণানি ইন্দ্রিযাধিট্ঠানানি সুত্তানি. যং যস্স সম্বন্ধং কুসলস্স ৰা অকুসলস্স ৰা তেন তেন অধিট্ঠানেন তং সুত্তং নিদ্দিসিতব্বং, নত্থঞ্ঞো ধম্মো নিদ্দিসিতব্বো. তত্থ সাধারণং কুসলং নাপি কুসলং অকুসলং যথা সাধারণানি চ কুসলমূলানি সাধারণানি চ অকুসলমূলানি উপ্পন্নং কামৰিতক্কং পজহতি…পে… চত্তারো সম্মপ্পধানা কুসলং অকুসলঞ্চ.

ৰিতক্কো হি মমত্থিকো [পমত্থিকো (পী.)], দদং পিযো নরো ইতি;

যো ¶ পাণমতিপাতেতি, তীণি তস্স বাললক্খণং.

সতঞ্চেৰ সহস্সানং, যে চ সমণব্রাহ্মণা;

ছন্দা দোসা ভযা মোহা, চতূহি অগতীহি চ.

অসুভানুপস্সিং ৰিহরন্তং, নিমিত্তেসু অসুভা চ;

একম্পি চে পিযং পাণং, মিত্তা সচে সুভাসিতা.

পঞ্ঞা হি সেট্ঠা লোকস্মিং, অনুঞ্ঞা তীণি ইন্দ্রিযানি;

কুসলাকুসলমূলানি চ, তুলমতুলঞ্চ সম্ভৰং.

কাযেন কুসলং করে, তীণি সুচরিতানি চ;

সুভাসিতং উত্তমমাহু, সন্তো ৰচীসুচরিতানি চ.

কাযেন ¶ চ কুসলং কযিরা, মনোদুচ্চরিতানি চ;

কাযানুরক্খী চ সদা, তিস্সো চ পারিসুদ্ধিযো.

যস্স সদ্ধা তথাগতে, সমুপ্পাদে চ দেসিতো;

আরম্ভথ নিক্কমথ, যা চ সম্মপ্পধানতা.

সতীমতো সদা ভদ্দং, সতিপট্ঠানভাৰনা;

আকঙ্খতো চ অনঞ্ঞাণং, যে চ তীণি সমাধযো.

পঞ্ঞা ¶ হি সেট্ঠা লোকস্মিং, তিস্সো পঞ্ঞা পকাসিতা;

অৰীতরাগো কামেসু, তথেৰ পঞ্চিন্দ্রিযা.

তত্থ ¶ কুসলেহি ধম্মেহি অকুসলেহি ধম্মেহি পুব্বাপরসো সাধুকং উপপরিক্খিযতি. কিংনু খো ইদং সুত্তং আরভি…পে… তেহি সুত্তেহি সহ অধিসন্নট্ঠেহি যুজ্জতি উদাহু ন যুজ্জতীতি?

যথা ভগৰা কিলেসে আদিম্হি তত্থ দেসেতি. কিং দেসিতং? তেসং কিলেসানং পহানং উদাহু নো দেসিতন্তি উপপরিক্খিতব্বং. যদি ন দেসিতং ভগৰতি তেসং কিলেসানং পহানং কুসলা ধম্মা পরিযেসিতব্বা যত্থ তে অকুসলা পহানং গচ্ছন্তি. সচে সমন্নেহমানো ন লভতি. তত্থ অকুসলা ধম্মা অপকড্ঢিতব্বা ৰীমংসিতব্বা, সংকিলেসভাগিযসুত্তং, যদি কিলেসা অপকড্ঢিযন্তা. যে ৰা ন দেন্তি তত্থ উপপরিক্খিতব্বা অরিযমগ্গধম্মা তাসু ভূমীসু কিলেসা পহানং গচ্ছন্তি, উদাহু ন গচ্ছন্তীতি. যত্তকা পন কিলেসা দেসিতা. ন তত্তকা অরিযধম্মা দেসিতা. যত্থ কিলেসা পহানং গচ্ছন্তি, তত্থ যে কিলেসা অরিযধম্মানং পটিপক্খেন ন যুজ্জন্তি, তে অপকড্ঢিতব্বা, সচে অপকড্ঢিযন্তা যোজনং দেতি. তত্থ এৰং ৰীমংসিতব্বং. দ্ৰে তীণি ৰা তদুত্তরি ৰা কিলেসা একেন অরিযমগ্গেন পহানং গচ্ছন্তীতি. সচে এৰং ৰীমংসিযন্তা যোজনং দেতি, তত্থ উপপরিক্খিতব্বং. পরম্পরায ৰা পিটকসম্পদানেন ৰা সুত্তস্স অত্থো চ নত্থো চ. যং ৰা ন সক্কা সুত্তং ¶ নিদ্দিসিতুং নেৰ সুত্তং ৰিচিকিচ্ছিতব্বং. এৰং যথা আদিম্হি কুসলা ধম্মা হোন্তি. যে কিলেসা ¶ তে পহীনেয্যাতি. তে উপপরিক্খিতব্বা. পুরো ৰা কুসলো পটিপক্খেন ৰা পুরো দেসনা, অনূনা অনধিকা উগ্গহেতব্বা. যথা পঠমো উত্তিলো যেসমিদানি কিলেসানং যে অরিযধম্মা দেসিতা ইমে কিলেসা ইমেহি অরিযধম্মেহি পহীযন্তি, উদাহু নপ্পহীযন্তীতি ৰিচিনিতব্বা. যদি উপপরিক্খিযমানা যুজ্জন্তি, গহেতব্বা. অথ ন যুজ্জন্তি, যে কিলেসা অপটিপক্খা হোন্তি, তে কিলেসা অপরিপক্খিতব্বা. যে চ অরিযধম্মা পটিপক্খা হোন্তি, তে অরিযধম্মা অপকড্ঢিতব্বা ¶ . ন হি অরিযধম্মা অনাগামিকিলেসপ্পহানং গচ্ছন্তি, নাপি অরিযধম্মা সব্বকিলেসানং পহানায সংৰত্তন্তি. যথা কুসলা মেত্তা অকুসলো রাগো ন তু কুসলা মেত্তাতি কারেত্ৰা অকুসলস্স রাগস্স পহানায সম্ভৰতি ব্যাপাদো মেত্তায পহানং গচ্ছতি. তস্মা উভো কিলেসা উপপরিক্খিতব্বা. যো যো চ ধম্মো উপদিসিযতি কুসলো ৰা অকুসলো ৰা সো অপকড্ঢিতব্বো. সচে তে যুজ্জন্তি অপকড্ঢিযমানো নত্থি উপপরিক্খিতব্বং. দ্ৰে ৰা কিলেসা একেন অরিযধম্মেন পহীনেয্যাতি দ্ৰীহি ৰা অরিযধম্মেহি একো ৰা কিলেসো পহীযতীতি.

অথ ৰা এৰম্পি উপপরিক্খিযমানং যুজ্জতি, তত্থ ৰীমংসিতব্বং ৰা যথা যুজ্জতি তত্থ ৰীমংসিতব্বং ৰা, যথা ননু সক্কা সুত্তং নিদ্দিসিতুং, ন হি সুত্তে ৰিচিকিচ্ছিতব্বং. কিলেসো ¶ মং অরিযধম্মেসু দেসিতেসু উভযতো উপপরিক্খিতব্বং. কির যে ৰা ইমে কিলেসা দেসিতা যে চ অরিযধম্মা দেসিতা গাথায ৰা ব্যাকরণেন ৰা, কিং নু খো ইমে কিলেসা ইমেহি অরিযধম্মেহি পহীযন্তি, উদাহু নপ্পহীযন্তি? ইমে ৰা অরিযধম্মা ইমেসং কিলেসানং পহানায সংৰত্তন্তীতি. কিঞ্চাপি কুসলেহি ধম্মেহি অকুসলা ধম্মা পহানং গচ্ছন্তি. ন তু সব্বেহি অরিযধম্মেহি সব্বাকুসলা পহানং গচ্ছন্তি. যথা মেত্তা কুসলো অকুসলো চ রাগো ন তু কুসলা মেত্তা অকুসলো রাগোতি কারেত্ৰা মেত্তায রাগো পহানং, ব্যাপাদো মেত্তায পহানং গচ্ছন্তি. এৰং কিলেসোতি কারেত্ৰা সুত্তেন পহানং গচ্ছতি. ন সুত্তো ধম্মোতি কারেত্ৰা সব্বং কিলেসস্স পহানায সংৰত্ততি. যং তু সুত্তস্স অরিযধম্মো সংকিলেসপটিপক্খো, সো তেন পহানং গচ্ছতীতি.

৪১. তত্থ কুসলে দেসিতে সুত্তে ব্যাকরণে ৰা সংকিলেসা ন যুজ্জন্তি অরিযধম্মা ৰা, তে মহাপদেসে নিদ্দিসিতব্বাৰযৰেন অপকড্ঢিতব্বা ¶ . তত্থ কিলেসেহি চ দেসিতেহি অরিযধম্মেসু চ যদিপি তেন অরিযধম্মেন তে কিলেসা পহানং গচ্ছন্তি. তত্থপি উত্তরি উপপরিক্খিতব্বং. কেন কারণেন এতে কিলেসা পজহিতব্বা, কেন কারণেন অরিযধম্মা দেসিতাতি? যেন যেন ৰা আকারেন অরিযধম্মা দেসিতা, তেন তেন পকারেন অযং কিলেসো ঠিতো. অত্থি হি একো কিলেসো, তেন ৰা অরিযধম্মা ন অঞ্ঞথা অঞ্ঞথা পহাতব্বো, যথা দিট্ঠি রাগো অৰিজ্জা চ দস্সনেন পহাতব্বা. সা চে এৰঞ্চ অৰিজ্জা ভাৰনায ভূমি ৰা ধম্মা ভাৰনায পহাতব্বা. সাযেৰ উদ্ধংভাগিযং অসঙ্খতদস্সনায ৰিমুত্তিযা অনিমিত্তেন চেতোসমাধিনা ¶ অমনসিকারেন পহীযতি. এৰং সাত্থং সব্যঞ্জনং উপপরিক্খিতব্বং. যে দস্সনেন পহাতব্বা কিলেসা দস্সনাকারেন অরিযধম্মো দেসিতো, ভাৰনায ¶ পহাতব্বা ভাৰনাকারেন অরিযধম্মো দেসিতো, পতিসেৰনা পহাতব্বা পতিসেৰনাকারেন অরিযধম্মো দেসিতো, এৰং ৰিনোদনপহাতব্বা যাৰ সত্ত আসৰা কাতব্বা, যাৰঞ্ঞথা. অঞ্ঞথা হেস ধম্মো পহাতব্বো অঞ্ঞেনাকারেন অরিযধম্মো দেসিতো, সো অরিযধম্মো অঞ্ঞথা পরিযেসিতব্বো. যদি অযং ধম্মো পরিযেসতো যো চ দেসেতি যেন যেনাকারেন, সো অরিযধম্মো পরিযেসিতব্বো, তেনাকারেন কিলেসো পহীযতি. সো তত্থ উপপরিক্খিতব্বো. অথ ন যুজ্জতি যদি হি তেন সুত্তেন ৰিহিতং সুত্তং ৰীমংসিতব্বং. যথা যুজ্জতি, তথা গহেতব্বং. যথা ন যুজ্জতি, তথা ন গহেতব্বং, অদ্ধা এতং ভগৰতা ন ভাসিতং, আযস্মতা ৰা দুগ্গহিতং, যথা মহাপদেসে নিদ্দিসিতব্বং, ভগৰতা যথাভূতং দেসিতং, যো চ ধম্মো দেসিতো কুসলো চ অকুসলো চ তস্স ধম্মস্স পচ্চযো পরিযেসিতব্বো. ন হি পচ্চযা ৰিনা ধম্মো অপ্পচ্চযো উপ্পজ্জতি. তত্থ কো আকারো পরিযেসনায?

তত্থ তথারূপং সহেতু সপ্পচ্চযং সোযং ধম্মো ৰুত্তোতি ইদং ৰীমংসিতব্বং. সো চ পচ্চযো তিৰিধো – মুদু মজ্ঝো অধিমত্তো. তত্থ মুদুম্হি পচ্চযে মুদুধম্মো গহেতব্বো, এৰং সত্যেস পচ্চযো দুৰিধো পরংপরাপচ্চযো চ সমনন্তরপচ্চযো চ. সো পচ্চযো মুদুতেন ব্যাধিমত্তং পরিযেসিতব্বং. কিং কারণং? অঞ্ঞতরোপি পচ্চযো অঞ্ঞেহি পচ্চযেহি পরিযত্তিং ৰা পারিপূরিং ৰা গচ্ছতি ¶ . তত্থ যো ধম্মো দেসিতো, তস্স ধম্মস্স ¶ এতেন ৰা কারণেন ৰা হেতু পরিযেসিতব্বো. যথা পচ্চযো হেতুনা পচ্চযেন চ, সো তস্স ধম্মস্স নিস্সন্দো পরিযেসিতব্বো. যথা নিদ্দিট্ঠো অধিট্ঠানে পধানং পরিযেসতি, সো পচ্চযো পরিযেসিতব্বো. ন হি মুদুস্স ধম্মস্স অধিমত্তো নিস্সন্দো অধিমত্তস্স ৰা নিস্সন্দস্স মুদুধম্মো, অথ মুদুস্স মুদু মজ্ঝায মজ্ঝো অধিমত্তস্স অধিমত্তো যুজ্জতি, তং গহেতব্বং, অথ ন যুজ্জতি ন গহেতব্বং. যঞ্চ ভগৰা আরভতি ধম্মং দেসেতুং, তংযেৰ ধম্মং মজ্ঝন্তপরিযোসানং দেসেতি, যথা সুত্তাধিট্ঠানে ধম্মা আদিম্হি নিদ্দিসতি, তংযেৰ বহু তস্স সুত্তস্স পরিযোসানং. তস্স হি ধম্মস্স ৰসেন তং সুত্তং হোতি গাথা ৰা ব্যাকরণং খুদ্দকং মহন্তং ৰা, যথা পন দুৰিধা অনুরূপন্তি ৰা থপনা চ দেসনাথপনা. রূপন্তিপি ধম্মস্স পরিযেসিতব্বা. যথা চ ভগৰতা পঞ্চন্নং ইন্দ্রিযানং সংৰরণং দেসিতং তণ্হায নিগ্গহণত্থং ইচ্ছাৰ হোতি. দেসেতি যথা গোপালকোপমে সুত্তে অঞ্ঞেহিপি সুত্তেহি ভগৰা ভাসতি ইচ্ছাৰ হোতি মজ্ঝিমনিকাযে ৰিতক্কো অযং ভগৰতো দেসনানুরূপন্তি ইতি সো ধম্মো অঞ্ঞেসুপি ৰেয্যাকরণেসু পরিযেসিতব্বো. ন হি একং হি সুত্তে দট্ঠব্বো. যুজ্জনং তং গহেতব্বং.

৪২. তত্থ কতমং অনুঞ্ঞাতং? যং কিঞ্চি সুত্তং ভগৰতা ন ভাসিতং তঞ্চ সুত্তেসুযেৰ ¶ ন্দিস্সতি, এৰমেতং ধারেতব্বং. যথা অসুকেন ভাসিতন্তি, তং সুত্তং ৰীমংসিতব্বং. কিং নু খো ইমং সুত্তং ¶ অনুঞ্ঞাতং খমং ভগৰতো উদাহু নানুঞ্ঞাতং খমং, কিঞ্চি রূপঞ্চ সুত্তং ভগৰতো অনুঞ্ঞাতং খমং কিঞ্চি রূপঞ্চ নানুঞ্ঞাতং খমং? যং সব্বসো অনোতারেত্ৰা দসবলো গোচরং দেসেতি, তং সব্বং সুত্তং ভগৰতো নানুঞ্ঞাতং খমং. অত্থিপি সো সাৰকো দসবলানং গোচরং জানাতি ওধিসো অনোধিসো, তং পন বলং সব্বসো ন জানাতি অঞ্ঞথা নাম সৰনেন, যথা আযস্মতা সারিপুত্তেন যেন ব্রাহ্মণো ওৰদিতো, তস্স আযস্মতো নত্থি ইন্দ্রিযবলৰেমত্তঞাণং, তেন পুগ্গলপরো [পুগ্গলো পরোপরঞ্চ (পী.)] পরঞ্চ তং অজানন্তো সতি উত্তরিকরণীযে উপ্পাদিতো, সো ভগৰতা অপসাদিতো. যথাৰ আযস্মা মহাকস্সপো ভাগিনেয্যং ওৰদতি অনন্তরিযসমন্নাগতো ইদ্ধিপাটিহীরেন অঙ্গুলিযো অদীপেত্ৰা ¶ যং সব্বেসং ধম্মানং কম্মসমাদানানং হেতুসো ঠানসো যথাভূতং ঞাণং, তস্স আযস্মতো সংৰিজ্জতে, তেন নং ওৰদতি, তং ভগৰা করোতি.

‘‘সচেপি দস পজ্জোতে, ধারযিস্সসি কস্সপ;

নেৰ দক্খতি রূপানি, চক্খু তস্স ন ৰিজ্জতী’’তি.

অপি চ খো যথা দূতো রাজৰচনেন সত্তমনুসাসতি, এৰং সেসানুগো অঞ্ঞাতকং ঘোসং পরেসং দেসেতি. অনুঞ্ঞাতখমসুত্তং গহেতব্বং. অননুঞ্ঞাতখমং ন গহেতব্বং.

তত্থ কতমো সুত্তসঙ্করো? পঞ্চৰিধং ¶ সুত্তং, সংকিলেসভাগিযং ৰাসনাভাগিযং দস্সনভাগিযং ভাৰনাভাগিযং অসেক্খভাগিযং. অঞ্ঞং আরাধেয্য অঞ্ঞং দেসেতি অঞ্ঞস্স চ সুত্তস্স অত্থং অঞ্ঞম্হি সুত্তে নিদ্দিসতি. সুত্তস্স ৰা হি অনেকাকারং অত্থং নিদ্দিসতি. অরিযধম্মসাধনে অত্থং ৰিৰরতি. ৰাসনাভাগিযস্স অত্থং দস্সনভাগিযেসু নিদ্দিসতি. ওরম্ভাগিযানং সংযোজনানং অত্থং উদ্ধংভাগিযেসু নিদ্দিসতি. মুদুমজ্ঝানং ইন্দ্রিযানং অধিমত্তেসু সুত্তেসু নিদ্দিসতি. ইতি অযং সুত্তং সম্ভেদং হেতুনা চ নিস্সন্দেন চ ফলেন চ নিদ্দেসেন চ মুদুমজ্ঝাধিমত্ততাযপি চ অত্থেন চ ব্যঞ্জনেন চ যো সম্ভেদো, অযং ৰুচ্চতি সুত্তসঙ্করো. যো অসম্ভেদো, অযং ৰুচ্চতি সুত্তৰিচযো.

পুরিমানং ¶ অক্খণ্ডং, যথাভূতস্স পচ্চযো;

নিস্সন্দো ৰাসনাসদ্ধি, অনুঞ্ঞা সুত্তসঙ্করো.

৪৩. তত্থ ¶ ¶ কতমো হারৰিভঙ্গো? যত্থ সোল়স হারা অক্খরসো ভেদং গচ্ছন্তি. তত্থ আদিম্হি দেসনাহারো. তত্থ অযং গাথা কুসলা ৰা অকুসলা ৰা সচ্চানি ৰা সচ্চেকদেসো ৰা. কিং দেসিতন্তি? সুত্তে ৰীমংসা দেসনাহারো. যথা অরিযসচ্চানি নিক্খেপো চত্তারি সচ্চানি ¶ সাধারণানি অসাধারণানি চ. যানি চ অট্ঠারস পদানি দুক্খতো সত্ত পদানি সঙ্খেপেন কাযিকেন চেতসিকেন দুক্খেন, অপ্পিযসম্পযোগেন পিযৰিপ্পযোগেন চ তীহি চ সঙ্খতাহি. তত্থ তীণি সঙ্খতলক্খণানি তিস্সো দুক্খতা উপ্পাদো সঙ্খতলক্খণং, সঙ্খারদুক্খতায দুক্খতা চ সঙ্খতলক্খণং, ৰিপরিণামদুক্খতায দুক্খতাতি অঞ্ঞথত্থং চ সঙ্খতলক্খণং, দুক্খদুক্খতায চ দুক্খতা, ইমেসং তিণ্ণং সঙ্খতলক্খণানং তীসু ৰেদনাভূমীসু অদুক্খমসুখা ৰেদনা উপ্পাদো সঙ্খতলক্খণং, সঙ্খারদুক্খতায চ দুক্খতা তযো সঙ্খতলক্খণং, সুখা ৰেদনায চ ৰিপরিণামদুক্খতায চ দুক্খতাতি অঞ্ঞথত্তং সঙ্খতলক্খণং, দুক্খাৰেদনা দুক্খদুক্খতা চ দুক্খতা ইমম্হি ইমেসু নৰপদেসু পঠমকেসু সত্তসু পদেসু সোল়সসু পদেসু দুক্খা পরিযেসিতব্বা, একাদস দুক্খতায চ লক্খণং ¶ নিদ্দেসে নিদ্দিট্ঠং. পাতুভাৰলক্খণা জাতিযা চ পাতুভাৰচুতিলক্খণো চুতোতি ৰিত্থারেন পন্নরসপদানি কত্তব্বানি, এৰং সাধারণানি অসাধারণানি চ সত্তসু দসসু পদেসু সঞ্ঞাস তিৰিধে চ সাসনপ্পট্ঠানে অট্ঠারসৰিধেসু চ সুত্তাধিট্ঠানেসু দসৰিধেসু চ সুত্তৰিধেয্যেসু সোল়সৰিধেসু চ হারেসু একৰীসতিৰিধায চ পৰিচযৰীমংসাযাতি ইদং দেসিতং. যথাভূতঞ্চ দেসিতন্তি, অযং ৰুচ্চতি দেসনাহারো.

পদং পঞ্হা চ পুচ্ছা চ, কিং পুব্বং কিঞ্চ পচ্ছিমং;

অনুগীতি সা চ ৰিচযো, হারো ৰিচযোতি নিদ্দিট্ঠো.

পদন্তি ¶ পঠমং পদং. তস্স কো অত্থো? যং ভগৰা পুট্ঠো আযস্মতা অজিতেন তং গহেতব্বং, কতিপদানি পুট্ঠানি যথাকিং কেনস্সু নিৰুতো লোকোতি গাথা, ইমানি কতিপদানি চত্তারি ইতি ৰিসজ্জনায পুচ্ছা. যত্তকেহি পদেহি ভগৰতা ৰিসজ্জিতানি পদানি ইতি পুচ্ছায চ যা পদানং সঙ্কাসনা, ইদং ৰুচ্চতি পদন্তি.

পঞ্হাতি ইমানি চত্তারি পদানি. কতি পঞ্হা? একো ৰা দ্ৰে ৰা তদুত্তরি ৰা ইমানি চত্তারি পদানি একো পঞ্হো, অত্থানুপরিৰত্তি ব্যঞ্জনং হোতি, সম্বহুলানিপি পদানি একমেৰত্থং পুচ্ছতি. ইমানি চত্তারি পদানি অনুপরিৰত্তীনি তং ব্যঞ্জনেন একো পঞ্হোৰ হোতি. কেনস্সু ¶ নিৰুতো লোকোতি ¶ লোকং সন্ধায পুচ্ছতি, কেনস্সু নপ্পকাসতি কিস্সাভিলেপনং ব্রূসীতি তংযেৰ পুচ্ছতি. কিংসু তস্স মহব্ভযন্তি তংযেৰ পুচ্ছতি. এৰং অত্থানুপরিৰত্তি ব্যঞ্জনং একো পঞ্হো হোতি, সো পঞ্হো চতুব্বিধো একংসব্যাকরণীযো ৰিভজ্জব্যাকরণীযো পটিপুচ্ছাব্যাকরণীযো ঠপনিযোতি. তত্থ চক্খু অনিচ্চন্তি একংসব্যাকরণীযো, যং অনিচ্চং তং দুক্খন্তি ৰিভজ্জব্যাকরণীযো, সিযা অনিচ্চং ন চক্খু, যানিপি আযতনানি চ ন চক্খু, তানিপি অনিচ্চন্তি ন চক্খুযেৰ, অযং ৰিভজ্জব্যাকরণীযো, যং চক্খু তং চক্খুন্দ্রিযং নেতি পটিপুচ্ছাব্যাকরণীযো, তং চক্খু তথাগতোতি ঠপনিযো. অঞ্ঞত্র চক্খুনাতি ঠপনিযো পঞ্হো. ইদং পঞ্হং ভগৰা কিং পুচ্ছিতো, লোকস্স সংকিলেসো পুচ্ছিতো. কিং কারণং? তিৰিধো হি সংকিলেসো তণ্হাসংকিলেসো চ দিট্ঠিসংকিলেসো চ দুচ্চরিতসংকিলেসো চ. তত্থ অৰিজ্জায নিৰুতোতি অৰিজ্জং দস্সেতি, জপ্পাতি তণ্হং দস্সেতি, মহব্ভযন্তি অকুসলস্স কম্মস্স ৰিপাকং দস্সেতি, সোতং নাম সুখৰেদনীযস্স কম্মস্স দুক্খৰেদনীযো ৰিপাকো ভৰিস্সতীতি নেতং ঠানং ৰিজ্জতীতি ভগৰা ৰিসজ্জেতি, চতূহি যো পদেহি অৰিজ্জায নিৰুতো লোকোতি…পে… এৰং ৰুচ্চতি.

৪৫. তদুত্তরি পটিপুচ্ছতি, সৰন্তি সব্বধি সোতাতি গাথা, চত্তারি পদানি পুচ্ছতি তং ভগৰা দ্ৰীহি পদেহি ৰিসজ্জেতি.

যানি ¶ সোতানি লোকস্মিং, সতি তেসং নিৰারণং;

সোতানং সংৰরং ব্রূমি, পঞ্ঞাযেতে পিধীযরে.

ইমানি চত্তারি পদানি দ্ৰীহি পদেহি ৰিসজ্জেতি. ইদং পদন্তি পুচ্ছিতো, তস্স সংকিলিট্ঠস্স ¶ লোকস্স ৰোদানং পুচ্ছিতো, সোতানি ছ তণ্হাকাযা বহুলাধিৰচনেন নিদ্দিট্ঠা ভৰন্তি সব্বেহি আযতনেহি. তানি সোতানি কেন নিৰারিযন্তীতি পরিযুট্ঠানপহানং পুচ্ছতি, কেন সোতা পিধীযরেতি অনুসযসমুগ্ঘাতং পুচ্ছতি. তত্থ ভগৰা ছসু দ্ৰারেসু সতিযা দেসেতি, যো হি সম্পজানো ৰিহরতি সতিদোৰারিকে চ তস্স ইন্দ্রিযানি গুত্তানি সম্ভৰন্তি. তত্থ গুত্তেসু ইন্দ্রিযেসু যা যা ৰিপস্সনা, সা সা তেসং তেসং সোতানং তস্সা চ অৰিজ্জায যো লোকো নিৰুতো অচ্চন্তপহানায সংৰত্ততি. এৰং সোতানি পিহিতানিপি ভৰন্তি ততো উত্তরি পুচ্ছতি.

পঞ্ঞা ¶ চ সতি চ নামরূপস্স খো তস্স ভগৰন্তং পুট্ঠুমাগম্ম কত্থেতং উপসম্মতি ইমানি চত্তারি পদানি ভগৰা একেন পদেন ৰিসজ্জেতি.

যমেতং পঞ্হং অপুচ্ছি [পুচ্ছসে পঞ্হং (পী. ক.) পস্স সু. নি. ১০৪৩], অজিত তং ৰদামি তে…পে…;

ৰিঞ্ঞাণস্স নিরোধেন, এত্থেতং উপসম্মতি.

ইমিনা পঞ্হেন কিং পুচ্ছতি? অনুপাদিসেসনিব্বানধাতুং পুচ্ছতি, তং ভগৰা অনুপাদিসেসায নিব্বানধাতুযা ৰিসজ্জেতি. তত্থ ¶ পঠমেন পঞ্হেন সংকিলেসং পুচ্ছতি. দুতিযেন পঞ্হেন ৰোদানং পুচ্ছতি. ততিযেন পঞ্হেন সোপাদিসেসনিব্বানধাতুং পুচ্ছতি. চতুত্থেন পঞ্হেন অনুপাদিসেসনিব্বানধাতুং পটিপুচ্ছতি ততো উত্তরি পটিপুচ্ছতি.

যে চ সঙ্খাতধম্মাসে, যে চ সেখা [সেক্খা (ক.) পস্স সু. নি. ১০৪৪] পুথূ ইধ;

তেসং মে নিপকো ইরিযং, পুট্ঠো পব্রূহি মারিস.

ইমানি চত্তারি পদানি পুচ্ছতি. কতি চ পন তে পঞ্হে সঙ্খাতধম্মা চ অরহন্তা সেক্খা চ? কিং পুব্বং কিঞ্চ পচ্ছিমন্তি অযমত্থো. তত্থ কতরং পঠমং পুচ্ছতি, কতরং পচ্ছা? অরহন্তং পঠমং পুচ্ছতি. সেক্খধম্মে তত্থ কেন পদেন সঙ্খাতধম্মাতি অরহন্তো গহিতা, পুথূতি সেক্খা গহিতা. তেসং মে নিপকোতি সাধারণং পদং ভগৰন্তং পুচ্ছতি. তস্স সাধারণানি চ অসাধারণানি চ পঞ্হেসু পুচ্ছিতব্বানি. তং ভগৰা ৰিসজ্জেতি. ন তথা পুট্ঠং, পঠমং পুট্ঠং, তং পচ্ছা ৰিসজ্জেতি. যং পচ্ছা পুচ্ছিতং পঠমং ৰিসজ্জেতি. কিঞ্চ ইদং পুচ্ছিতং ৰিসুদ্ধানং ৰিসুজ্ঝন্তানঞ্চ কা ইরিযাতি ইদং পুচ্ছি, তং কামেসু নাভিগিজ্ঝেয্য. মনসানাৰিলো সিযাতি পরিযুট্ঠানানি ৰিতক্কেন চ ভগৰা নিৰারেতি, দ্ৰে পন ৰিতক্কঅনাৰিলতায ¶ পরিযুট্ঠানং, যথা নীৰরণেসু নিদ্দিট্ঠং. কুসলা সব্বধম্মেসূতি অরহন্তং ৰিসজ্জেতি.

কেনস্সু তরতি ওঘন্তি গাথা, ইমানি চত্তারি পদানি. চত্তারোযেৰ পঞ্হা. কিং ¶ কারণং, ন হি এত্থ অত্থানুপরিৰত্তি ব্যঞ্জনং [যথানুপরিৰত্থিৰজ্জং (পী. ক.)] যথা পঠমং অজিতপঞ্হেসু, তস্স ন একংসেন বহূনি ৰিসজ্জনানি, বহুকা পঞ্হা, একোৰ ন চাপি, সব্বে পুচ্ছতি, পুব্বে ৰিসজ্জিতো, যথা চতুত্থো অজিতোপঞ্হে, যং ¶ এত্থ যথাভূতং পরিযেসনাপদবন্ধেন ৰিসজ্জনাযো এৰং যথাভূতং পরিযেসতি. যো পুন এত্থ যং এৰং পুচ্ছতি তত্থ অযমাকারো পুচ্ছনাযং অন্তোজটা বহিজটাতি গাথা [সং. নি. ১.২৯] পুচ্ছিতৰিসজ্জনায মগ্গিতব্বা. কথং ৰিসজ্জিতাতি ভগৰাতি ৰিসজ্জেতি? সীলে পতিট্ঠায নরো সপঞ্ঞোতি গাথা. তত্থ চিত্তভাৰনায সমথা, পঞ্ঞাভাৰনায ৰিপস্সনা. তত্থ এৰং অনুমীযতি, যে ধম্মা সমথেন চ ৰিপস্সনায চ পহীযন্তি, তে ইমে অন্তোজটা বহিজটা. তত্থ ৰিসজ্জনং সমথেন রাগো পহীযতি, ৰিপস্সনায অৰিজ্জা. অজ্ঝত্তৰত্থুকো রাগো অন্তোজটা, বাহিরৰত্থুকো রাগো বহিজটা. অজ্ঝত্তৰত্থুকা সক্কাযদিট্ঠি, অযং অন্তোজটা. একসট্ঠি দিট্ঠিগতানি চ বাহিরৰত্থুকানি বহিজটা, যা হি অজ্ঝত্তৰত্থুকা যা দিট্ঠিভাগিযেন ভৰিস্সতি, অযং জটা. তথা সংখিত্তেন যা কাচি অজ্ঝত্তৰত্থুকা তণ্হা চ দিট্ঠি চ, অযং অন্তোজটা. যা কাচি বাহিরৰত্থুকা তণ্হা চ দিট্ঠি চ, অযং বহিজটা.

যথা দেৰতা ভগৰন্তং পুচ্ছতি ‘‘চতুচক্কং নৰদ্ৰার’’ন্তি গাথা [সংযুত্তনিকাযে]. তত্থ ভগৰা ৰিসজ্জেতি ‘‘ছেত্ৰা নদ্ধিং ৰরত্তং চা’’তি গাথা, ইদং ভগৰা দুক্খনিরোধগামিনিং পটিপদং ৰিসজ্জেতি. ইমায ৰিসজ্জনায ভগৰা অনুমীযতি ¶ কিলেসে এত্থ পুরিমায গাথায নিদ্দিসিতব্বেন. তং হি চতুচক্কন্তি চত্তারো ৰা হত্থপাদা. নৰদ্ৰারন্তি নৰ ৰণমুখানি. যথা চতুচক্কন্তি চত্তারো উপাদানা, উপাদানপ্পচ্চযা ভৰো, উপাদাননিরোধা ভৰনিরোধো. নৰদ্ৰারন্তি নৰ মানৰিধা, মানজাতিকায হি দুক্খং সেয্যেনম্হি পরসো তীণি তিকানি পুণ্ণং. তিকেন সংযুত্তং হি পঞ্চকামগুণিকো রাগো. তত্থ নদ্ধীতি তণ্হা ৰিসজ্জীযতি. ৰরত্তন্তি মানং ৰিসজ্জেতি, ইচ্ছা লোভো চ পাপকোতি পঞ্চকামগুণিকো রাগো. তত্থ ৰিসমলোভো পাপকোতি নিদ্দিসিযতি সমূলতণ্হন্তি. অঞ্ঞাণমূলকা তণ্হাতি অঞ্ঞাণমূলকা তণ্হা, তণ্হায চ দিট্ঠিযা চ পহানং. যে চ পুন অঞ্ঞেপি কেচি চতুচক্কযোগেন তেনেৰ কারণেন চ যুজ্জন্তি, সংসারগামিনো ধম্মা সব্বে নিদ্দিসিতব্বা. তত্থাযং গাথা ৰিসজ্জনা পুচ্ছায ¶ চ ৰিসজ্জনায সমেতি [সমংতি (পী.)]. যং যদি সন্দেন অথ সহ ব্যাকরণেন অনুগীতিযং চ সো ৰিচযোতি ভগৰা যত্তকানি পদানি নিক্খিপতি, তত্তকেহি অনুগাযতি.

৪৬. অট্ঠহি ¶ , ভিক্খৰে, অঙ্গেহি সমন্নাগতো ভিক্খু দূতেয্যং গন্তুমরহতি [কাতুমরহতি (পী. ক.) পস্স অ. নি. ৮.১৬]. ইমানি অট্ঠ পদানি নিক্খিত্তানি. ছহি পদেহি ভগৰা অনুগাযতি.

‘‘যো ৰে ন ব্যথতি [ব্যাথতি (ক.)] পত্ৰা, পরিসং উগ্গৰাদিনিং;

ন চ হাপেতি ৰচনং, ন চ ছাদেতি সাসনং.

‘‘অসন্দিদ্ধিং চ ভণতি, পুচ্ছিতো ন চ কুপ্পতি;

স ৰে তাদিসকো ভিক্খু, দূতেয্যং গন্তুমরহতী’’তি.

তত্থ পন ভগৰা যত্তকানি পদানি নিক্খিপতি, তত্তকেহি অনুগাযতি. সত্তহি, ভিক্খৰে, অঙ্গেহি সমন্নাগতো কল্যাণমিত্তো পিযো গরুভাৰনীযোতি ৰিত্থারেন, ইদং ভগৰা সত্তহি পদেহি অনুগাযতি. ইতি বহুস্সুতৰা অনুগাযতি, অপ্পতরকথং পদং ৰা নিক্খেপো, বহুস্সুতৰা নৰ পদানি নিক্খেপো, অপ্পতরিকা অনুগীতিযা বহুতরিকা অনুগাযতি. অযং ৰুচ্চতি তে অনুগীতি চ ৰিচযো, অযং ¶ ৰিচযো নাম হারো.

সব্বেসং হারানং, যা ভূমী যো চ গোচরো তেসং;

যুত্তাযুত্তি পরিক্খা, হারো যুত্তীতি নিদ্দিট্ঠো.

হারানং সোল়সন্নং যথা দেসনা যথা ৰিচযো যো চ নিদ্দিসিযতি, অযং নিদ্দেসো. অযং পুচ্ছা সুত্তেসু ন যুজ্জতীতি যা তত্থ ৰীমংসা, অযং যুত্তি.

যথা হি সহেতূ সপ্পচ্চযা সত্তা সংকিলিস্সন্তি, অত্থি হেতু অত্থি পচ্চযো সত্তানং সংকিলেসায, সহেতূ সপ্পচ্চযা সত্তা ৰিসুজ্ঝন্তি, অত্থি হেতু অত্থি পচ্চযো সত্তানং ৰিসুদ্ধিযা. সীলৰতা, আনন্দ, পুগ্গলেন ন ৰেয্যাকরণিযা কিন্তি মে ৰিপ্পটিসারো উপ্পাদেয্য…পে… অব্যাকরণং কত্তব্বং, অযং ৰিসুদ্ধিযা মগ্গো. তস্স হেতু কো পচ্চযো, সীলক্খন্ধস্স ¶ চত্তারি চত্তারি হেতু চ পচ্চযো চ. সপ্পুরিসসংসেৰো যো চ পতিরূপদেসৰাসো চ, অযং উপাদাপচ্চযতা সপ্পচ্চযো. যং পোরাণকম্মং অস্স ৰিপাকো পচ্চযো, তায পচ্চযায অত্তসম্মাপণিধি, অযং ¶ হেতু. ইতি সীলক্খন্ধো সহেতু সপ্পচ্চযোতি ইদং লোকিকং সীলং.

যং পন লোকুত্তরং সীলং, তস্স তীণি ইন্দ্রিযানি পচ্চযো – সদ্ধিন্দ্রিযং ৰীরিযিন্দ্রিযং সমাধিন্দ্রিযং – অযং পচ্চযো. সতিন্দ্রিযঞ্চ পঞ্ঞিন্দ্রিযঞ্চ হেতু. পঞ্ঞায নিব্বেধগামিনিযা, যং সীলং জাযতি. সোতাপন্নস্স চ সীলং তেনাযং হেতু অযং পচ্চযো. যং পুন সমাধিনো পস্সদ্ধি চ পীতি চ পামোজ্জং পচ্চযো. যং সুখং হেতু তেন সমাধিক্খন্ধো সহেতু সপ্পচ্চযো. যং ¶ সমাহিতো যথাভূতং পজানাতি, অযং পঞ্ঞা. তস্স পরতোঘোসো অজ্ঝত্তং চ যোনিসো মনসিকারো হেতু চ পচ্চযো চ, ইতি ইমে তযো খন্ধা সহেতূ সপ্পচ্চযা এৰং সত্ত পঞ্ঞা. সত্তব্যাকরণীসু চ সুত্তেসু ন যুজ্জতি. অযং যুত্তিহারো. সো চতূসু মহাপদেসেসু দট্ঠব্বো.

ধম্মং দেসেতি জিনো, তস্স চ ধম্মস্স যং পদট্ঠানং;

ইতি যাৰ সব্বধম্মা, এসো হারো পদট্ঠানো.

তত্থ পঞ্চকামগুণা কামরাগস্স পদট্ঠানং. যেসং কেসঞ্চি কামরাগো উপ্পজ্জতি উপ্পন্নো ৰা উপ্পজ্জিস্সতি ৰা, এতেসু যেপি পঞ্চসু রূপেসু আযতনেসু নাঞ্ঞত্র এতেহি কামরাগস্স পদট্ঠানন্তি. ৰুচ্চতে, তেন পঞ্চ কামগুণা কামরাগস্স পদট্ঠানং. পঞ্চিন্দ্রিযানি রূপরাগস্স পদট্ঠানং. মনিন্দ্রিযং ভৰরাগস্স পদট্ঠানং. পঞ্চক্খন্ধা সক্কাযদিট্ঠিযা পদট্ঠানং. একসট্ঠি দিট্ঠিগতানি দিট্ঠিরাগস্স পদট্ঠানং. কামধাতু কামরাগস্স পদট্ঠানং. অরূপধাতু অরূপরাগস্স পদট্ঠানং. সুখসঞ্ঞা কামরাগস্স পদট্ঠানং. ব্যাপাদসঞ্ঞা ব্যাপাদস্স পদট্ঠানং. অসম্পজঞ্ঞতা সম্মোহস্স পদট্ঠানং. নৰ আঘাতৰত্থূনি ব্যাপাদস্স পদট্ঠানং. নৰৰিধং মানং [নৰমানং ৰিধমানস্স (পী. ক.)] মানস্স পদট্ঠানং. সুখা ৰেদনা রাগানুসযস্স পদট্ঠানং. দুক্খা ৰেদনা পটিঘানুসযস্স পদট্ঠানং. অদুক্খমসুখা ৰেদনা অৰিজ্জানুসযস্স পদট্ঠানং. অত্তৰাদুপাদানঞ্চ মুসাৰাদো চ লোভস্স পদট্ঠানং. পাণাতিপাতো চ পিসুণৰাচা চ ফরুসৰাচা চ ব্যাপাদস্স পদট্ঠানং. মিচ্ছত্তঞ্চ সম্ফপ্পলাপো চ মোহস্স পদট্ঠানং. ভৰং ভোগঞ্চ ¶ ৰোকারো অহংকারস্স পদট্ঠানং. বাহিরানং পরিগ্গহো ¶ মমংকারস্স ¶ পদট্ঠানং. কাযস্স সঙ্গং [কাযৰঙ্কং (পী.)] দিট্ঠিযা পদট্ঠানং. কাযিকদোসো দোসস্স পদট্ঠানং. কাযিককাসাৰো লোভস্স পদট্ঠানং. যো যো ৰা পন ধম্মো যেন যেন আরম্মণেন উপ্পজ্জতি সচ্চাধিট্ঠানেন ৰা ধম্মাধিট্ঠানেন ৰা অনুসযনেন ৰা, সো ধম্মো তস্স পদট্ঠানং. তেন সারম্মণেন সো ধম্মো উপ্পজ্জতি.

যথা মনুস্সো পুরিমস্স পদস্স পদট্ঠানং অলভন্তো দুতিযং পদং উদ্ধরতি, সো পচ্ছানুপদং সংহরতি. যদি পন যো ন দুতিযপদস্স পদট্ঠানং লভতি, অপরং পদং উদ্ধরতি. তস্স যো চেসো পচ্চযো ভৰতি. এৰং ধম্মো কুসলো ৰা অকুসলো ৰা অব্যাকতো ৰা পদট্ঠানং অলভন্তো ন পৰত্ততি. যথা পযুত্তস্স ধম্মস্স যোনিলাভো [যোনিসো লাভো (পী.)], অযং ৰুচ্চতি পদট্ঠানো হারো.

ৰুত্তম্হি একধম্মে, যে ধম্মা একলক্খণা তেন;

সব্বে ভৰন্তি ৰুত্তা, সো হারো লক্খণো নাম.

যেসঞ্চ সুসমারদ্ধা, নিচ্চং কাযগতাসতীতি গাথায ৰুত্তায কাযগতাসতিযা ৰুত্তা ৰেদনাগতা চিত্তগতা ধম্মগতা চ সতি চতুন্নং সতিপট্ঠানানং একেন সতিপট্ঠানেন. ন হি চিত্তং একস্মিং ৰিঞ্ঞাণট্ঠিতিযা পৰত্ততি, নানাসু গতীসু পৰত্ততি, কাযগতাসতিযা ৰুত্তায ৰুত্তা ৰেদনাগতা চিত্তধম্মগতা চ. ন হি কাযগতাসতিযা ভাৰিতায সতিপট্ঠানা চত্তারো ভাৰনাপারিপূরিং ন গচ্ছন্তি. এৰং ¶ তস্সদিসেসু ধম্মেসু ৰুত্তেসু সব্বধম্মা ৰুত্তা চ ভৰন্তি.

সচিত্তপরিযোদাপনং, এতং বুদ্ধান সাসনন্তি গাথা চেতসিকা ধম্মা ৰুত্তা, চিত্তে রূপং ৰুত্তং. ইদং নামরূপং দুক্খং অরিযসচ্চং. ততো সচিত্তপরিযোদাপনা যং যং ওদপেতি, তং দুক্খং. যেন ওদপেতি, সো মগ্গো. যতো ওদপনা, সো নিরোধো. চক্খুং চ পটিচ্চ রূপে চ উপ্পজ্জতি চক্খুৰিঞ্ঞাণং, তত্থ সহজাতা ৰেদনা সঞ্ঞা চেতনা ফস্সো মনসিকারো এতে তে ধম্মা একলক্খণা উপ্পাদলক্খণেন. যো চ রূপে নিব্বিন্দতি, ৰেদনায সো নিব্বিন্দতি, সঞ্ঞাসঙ্খারৰিঞ্ঞাণেসুপি সো নিব্বিন্দতি. ইতি ¶ যে একলক্খণা ধম্মা, তেসং একম্হি ধম্মে নিদ্দিট্ঠে সব্বে ধম্মা নিদ্দিট্ঠা হোন্তি, অযং ৰুচ্চতি লক্খণো হারো.

নিরুত্তি অধিপ্পাযো চ, ব্যঞ্জনা দেসনায চ;

সুত্তত্থো পুব্বাপরসন্ধি, এসো হারো চতুব্যূহো.

তত্থ কতমা নিরুত্তি, সা কথং পরিযেসিতব্বা [পস্সিতব্বা (পী. ক.)]? যথা ৰুত্তং ভগৰতা একাদসহি অঙ্গেহি সমন্নাগতো ভিক্খু খিপ্পং ধম্মেসু মহত্তং পাপুণাতি, অত্থকুসলো চ হোতি, ধম্মকুসলো চ হোতি, নিরুত্তিকুসলো চ হোতি, ইত্থাধিৰচনকুসলো চ হোতি, পুরিসাধিৰচনকুসলো চ, ৰিপুরিসাধিৰচনকুসলো চ, অতীতাধিৰচনকুসলো চ, অনাগতাধিৰচনকুসলো চ, পচ্চুপ্পন্নাধিৰচনকুসলো চ. একাধিপ্পাযেন কুসলো নানাধিপ্পাযেন কুসলো. কিম্হি ¶ দেসিতং, অতীতানাগতপচ্চুপ্পন্নং. ইত্থাধিৰচনেন পুরিসাধিৰচনেন ৰিপুরিসাধিৰচনেন সব্বং যথাসুত্তং নিদ্দিট্ঠং. তং ব্যঞ্জনতো নিরুত্তিকোসল্লতো যো যং সুত্তস্স সুনিরুত্তিদুন্নিরুত্তিতং অৰেক্খতি, ইদং এৰং নিরোপযিতব্বং. ইদম্পি ন নিরোপযিতব্বং. ইদং ৰুচ্চতে নিরুত্তিকোসল্লং.

৪৯. তত্থ কতমং অধিপ্পাযকোসল্লং? যথাদেসিতস্স সুত্তস্স সব্বস্স ৰারং গচ্ছতি ইমেন ভগৰতা দেসিতব্বন্তি. যথা কিং অপ্পমাদো অমতং পদং, পমাদো মচ্চুনো পদন্তি গাথা. এত্থ ভগৰতো কো অধিপ্পাযো? যে অসীতিমেৰ আকঙ্খন্তি তে অপ্পমত্তা ৰিহরিস্সন্তি, অযং অধিপ্পাযো.

যোগস্স কালং ন নিৰত্ততি যা চ, সো ন তত্থ পাপিন্তৰে ভৰন্তি;

ৰেদনামগ্গইসিনা [ৰেদনামগ্গং ইসিনা (পী.)] পৰেদিতং, ধুতরজাসৰা দুক্খা পমোক্খাতা.

এত্থ ভগৰতো কো অধিপ্পাযো? যে দুক্খে নাস্সাদকা [দুক্খেন সাধকা (পী.)], তে ৰীরিযমারভিস্সন্তি দুক্খক্খযাযাতি. অযং তত্থ ভগৰতো অধিপ্পাযো. ইতি গাথায ৰা ব্যাকরণেন ৰা দেসিতে ইমিনা সুত্তেন সাধকা, যো ¶ এৰং ধম্মানুধম্মং পটিপজ্জতীতি সো অধিপ্পাযো, অযং ৰুচ্চতি দেসনাধিপ্পাযো.

তত্থ কতমো পুব্বাপরসন্ধি? যং ¶ গাথাযং ৰা সুত্তেসু ৰা পদানি অসীতি তানি ভৰন্তি এৰং ৰা এৰমেতি তস্সা গাথায সুত্তস্স ৰা যানি পুরিমানি পদানি যানি চ পচ্ছিমকানি ¶ , তানি সমোসারেতব্বানি. এৰং সো পুব্বাপরেন সন্ধি ঞাযতি. যা একা সমারদ্ধা গাথা দ্ৰে তীণি ৰা তস্স মেকদেসে ভাসিতানং অভাসিতাহি গাথাহি অনিদ্দিট্ঠো অত্থো ভৰতি তদুপধারিতব্বং. যংৰ সব্বা [যং ৰত্তব্বং (পী.)] ইতিস্স পরিযেসমানস্স পরিযেসনা কঙ্খা, তস্স ৰা পুগ্গলস্স পঞ্ঞত্তীনং অপরে পরিযেসিতব্বং. ইদং ৰুচ্চতে পুব্বাপরেন সন্ধি. কোসল্লন্তি ৰত্থুতো নিদানকোসল্লং. ব্যঞ্জনতো নিরুত্তিকোসল্লং. দেসনাধিপ্পাযকোসল্লং. পুব্বাপরেন সন্ধিকোসল্লং. তত্থ তস্স গাথা পরিযেসিতা নিদানং ৰা. উপলব্ভিতুং ন অত্থো নিদ্দিসিতব্বো ৰত্থুতো নিদানকোসল্লং অত্থকোসল্লং ইমেহি চতূহি পদেহি অত্থো পরিযেসিযন্তো যথাভূতং পরিযিট্ঠো হোতি. অথ চ সব্বো ৰত্থুতো ৰা নিদানেন ৰা যো অধিপ্পাযো ব্যঞ্জনো নিরুত্তি সন্ধি চ অনুত্তরো এসো পুব্বাপরেন এৰং সুত্তত্থেন দেসিতব্বং. অযং চতুব্যূহো হারো.

একম্হি পদট্ঠানে, পরিযেসতি সেসকং পদট্ঠানং;

আৰট্টতি পটিপক্খে, আৰট্টো নাম সো হারো.

যথা কিং উন্নল়ানং পমত্তানন্তি গাথাযো. যং পমাদো, ইদং কিস্স পদট্ঠানং? কুসলানং ধম্মানং ওসগ্গস্স. কুসলধম্মোসগ্গো পন কিস্স পদট্ঠানং ¶ ? অকুসলধম্মপটিসেৰনায. কিস্স পদট্ঠানং, কুসলধম্মপটিসেৰনায? কিস্স পদট্ঠানং, কিলেসৰত্থুপটিসেৰনায? ইতি পমাদেন মোহপক্খিযা দিট্ঠি অৰিজ্জা ছন্দরাগপক্খিযা. তত্থ তণ্হা চ দিট্ঠি চত্তারো আসৰা তণ্হা কামাসৰো চ ভৰাসৰো চ দিট্ঠাসৰো চ অৰিজ্জাসৰো চ. তত্থ চিত্তে অত্থীতি দিট্ঠি চেতসিকেসু নিচ্চন্তি পঞ্চসু কামগুণেসু অজ্ঝাৰহনেন কামাসৰো, উপপত্তীসু আসত্তি ভৰাসৰো. তত্থ রূপকাযো ¶ কামাসৰস্স ভৰাসৰস্স চ পদট্ঠানং. নামকাযো দিট্ঠাসৰস্স অৰিজ্জাসৰস্স চ পদট্ঠানং.

তত্থ অল্লিযনায অজ্ঝত্তৰাহনং কামাসৰস্স লক্খণং. পত্থনগন্থনঅভিসঙ্খারকাযসঙ্খারণং ভৰাসৰস্স লক্খণং, অভিনিৰেসো চ পরামাসো চ দিট্ঠাসৰস্স লক্খণং. অপ্পটিৰেধো ধম্মেসু অসম্পজঞ্ঞা চ অৰিজ্জাসৰস্স লক্খণং. ইমে চত্তারো আসৰা চত্তারি উপাদানানি. কামাসৰো কামুপাদানং, ভৰাসৰো ভৰুপাদানং, দিট্ঠাসৰো দিট্ঠুপাদানং, অৰিজ্জাসৰো অত্তৰাদুপাদানং, ইমেহি চতূহি উপাদানেহি পঞ্চক্খন্ধা. তত্থ অৰিজ্জাসৰো চিত্তে পহাতব্বো, সো চিত্তে চিত্তানুপস্সিস্স পহীযতি. দিট্ঠাসৰো ধম্মেসু পহাতব্বো, সো ধম্মেসু ¶ ধম্মানুপস্সিস্স পহীযতি. ভৰাসৰো আসত্তিযা পহাতব্বো, সো ৰেদনাসু ৰেদনানুপস্সিস্স পহীযতি. কামাসৰো পঞ্চসু কামগুণেসু পহাতব্বো, সো কাযে কাযানুপস্সিস্স পহীযতি. তত্থ কাযানুপস্সনা দুক্খমরিযসচ্চং ভজতি. ৰেদনানুপস্সনা পঞ্চন্নং ইন্দ্রিযানং পচ্চযো সুখিন্দ্রিযস্স ¶ দুক্খিন্দ্রিযস্স সোমনস্সিন্দ্রিযস্স দোমনস্সিন্দ্রিযস্স উপেক্খিন্দ্রিযস্স, সত্তকিলেসোপচারো তেন সমুদযং ভজতি. চিত্তে চিত্তানুপস্সনা নিরোধং ভজতি. ধম্মেসু ধম্মানুপস্সনা মগ্গং ভজতি. তেনস্স চতূসু চ দস্সনেন তস্সেৰ সব্বে পহীযন্তি, যেন নিদ্দিট্ঠা পঠমং উন্নল়ানং পমত্তানং তেসং ৰড্ঢন্তি আসৰা. জানতো হি পস্সতো আসৰানং খযো দুক্খং সমুদযো নিরোধো মগ্গো হি অকুসলা ধম্মা. এৰং পরিযেসিতব্বা. যাৰ তস্স অকুসলস্স গতি ততো পটিপক্খেন অকুসলে ধম্মে পরিযেসতি তেসং কিলেসানং হারেন আৰট্টতি. অযং ৰুচ্চতে আৰট্টো হারো. এৰং সুক্কাপি ধম্মা পরিযেসিতব্বা. অকুসলধম্মে আগমিস্স.

তত্থ আৰট্টস্স হারস্স অযং ভূমি সতি উপট্ঠানা চ ৰিপল্লাসা চ চত্তারি ঞাণানি সক্কাযসমুপ্পাদাযগামিনী চ পটিপদা সক্কাযনিরোধগামিনী পটিপদা.

৫১. তত্থ কতমো ৰিভত্তি হারো? যং কিঞ্চি ৰিভজ্জব্যাকরণীযং ৰুচ্চতি ৰিভত্তি হারো. যথা কিং আগন্ত্ৰা চ পুন পুগ্গলো হোতি, নো ৰাগতং ¶ ন পরিভাসতি [নো ৰা ন পরিভাসতি (পী.), ন তাৰাযং পরিভাসি (ক.)] পরিপুচ্ছতায পঞ্হায অতিযনং একস্স কিঞ্চি – অযং ৰুচ্চতে ৰিভত্তি হারো.

তত্থ কতমো পরিৰত্তনো হারো. যং কিঞ্চি পটিপক্খনিদ্দেসো, অযং ৰুচ্চতি পরিৰত্তনো হারো. যথা ৰুত্তং ¶ ভগৰতা সম্মাদিট্ঠিকস্স পুরিসপুগ্গলস্স মিচ্ছাদিট্ঠি নিজ্জিণ্ণা হোতীতি ৰিত্থারেন সব্বানি মগ্গঙ্গানি. অযং ৰুচ্চতে পরিৰত্তনো হারো.

ৰেৰচনেহি অনেকেহি, একং ধম্মং পকাসিতং;

সুত্তে যো জানাতি সুত্তৰিদূ, ৰেৰচনো নাম সো হারো.

যথা আযস্মা সারিপুত্তো একম্হি ৰত্থুম্হি ৰেৰচনেন নানাৰুত্তেন ভগৰতা পসংসিতো ‘‘মহাপঞ্ঞো সারিপুত্তো হাসপঞ্ঞো জৰনপঞ্ঞো’’তি ইদং পঞ্ঞায ৰেৰচনং. যথা চ মগ্গৰিভঙ্গে ¶ নিয্যানত্থো একমেকং মগ্গঙ্গং ৰেৰচনেহি নিদ্দিট্ঠং. এৰং অৰিজ্জায ৰেৰচনা. একং অকুসলমূলং তদেৰ সন্তং তেসু তেসু জনপদেসু তেন তেন পজানন্তি. ন হি অনেন তদেৰপি আলপিযন্তি অঞ্ঞং ভজতি. সব্বকামজহস্স ভিক্খুনোতি কামা আলপিতা. যস্স নিত্থিণ্ণো সঙ্কোতি তেযেৰ কামে সঙ্কাতি আলপতি. সুণমানস্স পুরেতরং রজ্জন্তি তেযেৰ কামে রজ্জন্তি আলপতি. এৰং সুত্তম্হি যো ধম্মো দেসিযতি তস্স পরিযেট্ঠি ‘‘কতমস্স ধম্মস্স ইদং নামং কতমস্স ইদং ৰেৰচন’’ন্তি. সব্বঞ্ঞূ হি যেসং যেসং যা নিরুত্তি হোতি, যথাগামি তেন তেন দেসেতীতি তস্স ৰেৰচনং পরিযেসিতব্বং. অযং ৰেৰচনো হারো.

৫২. তত্থ কতমো পঞ্ঞত্তি হারো? চত্তারি ¶ অরিযসচ্চানীতি সুত্তং নিদ্দিসতি, নিক্খেপপঞ্ঞত্তি. যা সমুদযপঞ্ঞত্তি. কবল়ীকারে আহারে অত্থি ছন্দো অত্থি রাগো যাৰ পতিট্ঠিতং. তত্থ ৰিঞ্ঞাণং পভৰপঞ্ঞত্তিং পঞ্ঞপেতি. কবল়ীকারে আহারে নত্থি ছন্দো…পে… সমুগ্ঘাতি পঞ্ঞত্তি.

তস্স কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতীতি পহানপঞ্ঞত্তিং পঞ্ঞপেতি. তণ্হা যস্স পুরক্খতা পঞ্ঞা ¶ পরিৰত্ততি গাথা মনাপপঞ্ঞত্তিং পঞ্ঞপেতি. এৰং পন মনাপপঞ্ঞত্তীতি একধম্মং ভগৰা পঞ্ঞপেতি. ন হি তণ্হা দুক্খসমুদযোতি কারেত্ৰা সব্বত্থ তণ্হাসমুদযো নিদ্দিসিতব্বো. যথা উপ্পন্নং কামৰিতক্কং নাধিৰাসেতি ৰিনোদেতি পজহতীতি পটিক্খেপপঞ্ঞত্তি. এৰং সব্বেসং ধম্মানং কুসলানঞ্চ অকুসলানঞ্চ যঞ্চস্স ধম্মক্খেত্তং ভৰতি, সো চেৰ ধম্মো তত্থ পৰত্ততি. তদৰসিট্ঠা ধম্মা তস্সানুৰত্তকা হোন্তি. সা দুৰিধা পঞ্ঞত্তি – পরাধীনপঞ্ঞত্তি চ সাধীনপঞ্ঞত্তি চ. কতমা সাধীনপঞ্ঞত্তি? সমাধিং, ভিক্খৰে [পস্স সং. নি. ৩.৫], ভাৰেথ, সমাহিতো, ভিক্খৰে, ভিক্খু যথাভূতং পজানাতি. ‘‘রূপং অনিচ্চ’’ন্তি যথাভূতং পজানাতি, অযং সাধীনপঞ্ঞত্তি পরাধীনপঞ্ঞত্তি চ, সা পঞ্ঞত্তি পঞ্ঞায চ সীলস্স চ, যথা চত্তারি ঝানানি ভাৰেথ. তস্স অত্থি সমাধিন্দ্রিযং মুদূনি চত্তারি ইন্দ্রিযানি তানি চতুপরাধীনানি, তীণি অৰেচ্চপ্পসাদেতি ¶ পরাধীনং সমাধিন্দ্রিযং চত্তারি ইন্দ্রিযানি পরাধীনাতি চতূসু অরিযসচ্চেসু অপরাধীনং পঞ্ঞিন্দ্রিযং সতিপট্ঠানেসু সম্মপ্পধানেসু ৰীরিযিন্দ্রিযং. ইতি সকে পদট্ঠানে সকে খেত্তসাধীনো সো ধম্মো, সো চ তত্থ পঞ্ঞাপেতব্বো. তস্স পটিপক্খা নিঘাতো নিদ্দিসিতব্বো. এত্থাযং অনেকাকারপঞ্ঞত্তি কেন কারণেন অযং ধম্মো পঞ্ঞত্তোতি. অযং ৰুচ্চতে পঞ্ঞত্তি.

৫৩. তত্থ ¶ কতমো ওতরণো হারো? ছসু ধম্মেসু ওতারেতব্বং. কতমেসু ছসু? খন্ধেসু ধাতূসু আযতনেসু ইন্দ্রিযেসু সচ্চেসু পটিচ্চসমুপ্পাদেসু. নত্থি তং সুত্তং ৰা গাথা ৰা ব্যাকরণং ৰা. ইমেসু ছন্নং ধম্মানং অঞ্ঞতরস্মিং ন সন্দিস্সতি. এত্তাৰতা এস সব্বা দেসনা যা তা খন্ধা ৰা ধাতুযো ৰা আযতনানি ৰা সচ্চানি ৰা পটিচ্চসমুপ্পাদো ৰা, তত্থ পঞ্চন্নং খন্ধানং ৰেদনাক্খন্ধো রাগদোসমোহানং পদট্ঠানং. তত্থ তিস্সো ৰেদনাযো তস্স সুখায ৰেদনায সোমনস্সো সৰিচারো, দুক্খায ৰেদনায দোমনস্সো সৰিচারো, অদুক্খমসুখায ৰেদনায উপেক্খো সৰিচারো. যং পুন তত্থ ৰেদযিতং ইদং দুক্খসচ্চং, খন্ধেসু সঙ্খারক্খন্ধো তত্থ কাযো পমত্তং সউপৰত্ততি, তঞ্চ সঙ্খারগতো দ্ৰিধা চ ভৰঙ্গোতরণং কম্মং তীণি চ সঙ্খারানি ¶ পুঞ্ঞাভিসঙ্খারা ৰা অপুঞ্ঞা ৰা আনেঞ্জা ৰা হেতু সব্বসরাগস্স নো ৰীতরাগস্স, দোসস্স অভিসঙ্খারানি চ অৰীতরাগো চেতেতি চ পকপ্পেতি চ, ৰীতরাগো ¶ পন চেতেতি চ নো অভিসঙ্খরোতি, যং উণ্হং ৰজিরং কট্ঠে ৰা রুক্খে ৰা অঞ্ঞত্থ ৰা পতন্তং ভিন্দতি চ ডহতি চ, এৰং সরাগচেতনা চেতেতি চ অভিসঙ্খরোতি চ. যথা সতং ৰজিরং ন ভিন্দতি ন চ ডহতি, এৰং ৰীতরাগচেতনা চেতেতি ন চ অভিসঙ্খরোতি. তত্থ পঞ্চন্নং খন্ধানং একো খন্ধো অনিন্দ্রিযসরীরং সঞ্ঞাক্খন্ধো.

তত্থ ধাতূনং অট্ঠারস ধাতুযো. তত্থ যা রূপী দস ধাতুযো, তাসু দেসিযমানাসু রূপক্খন্ধো নিদ্দিসিতব্বো, দুক্খং অরিযসচ্চং. যেপি চ ছ ৰিঞ্ঞাণকাযা মনোধাতুসত্তমা, তত্থ ৰিঞ্ঞাণক্খন্ধো চ নিদ্দিসিতব্বো, দুক্খং অরিযসচ্চং. ধম্মধাতু পন ধম্মসমোসরণা, সো ধম্মো হেতুনা চ নিস্সন্দেন চ ফলেন চ কিচ্চেন চ ৰেৰচনেন চ যেন যেন উপলব্ভতি, তেন তেন নিদ্দিসিতব্বো. যদি ৰা কুসলা যদি ৰা অকুসলা যদি ৰা অব্যাকতা যদি ৰা অসঙ্খতা. দ্ৰাদসন্নং আযতনানং দস আযতনানি রূপানি তং দুক্খং অরিযসচ্চং নিদ্দিসিতব্বং. রূপক্খন্ধো চ মনাযতনঞ্চ ৰিঞ্ঞাণক্খন্ধেন নিদ্দিসিতব্বং, দুক্খং অরিযসচ্চং. ধম্মাযতনং নানাধম্মসমোসরণং. তত্থ যে ধম্মা ইন্দ্রিযানং ইন্দ্রিযেসু নিদ্দিসিতব্বা, যে অনিন্দ্রিযানং অনিন্দ্রিযেসু নিদ্দিসিতব্বা. পরিযাযতো চ ¶ ওতারেতব্বা. যথা সা ধম্মধাতু তথা ধম্মাযতনং পরিযেসিতব্বং. যাযেৰ হি ধম্মধাতু তদেৰ ধম্মাযতনং অনূনং অনধিকং.

তত্থ পটিচ্চসমুপ্পাদো অত্থি তিৰিধো, অত্থি চতুব্বিধো, অত্থি দুৰিধো. তত্থ তিৰিধো পটিচ্চসমুপ্পাদো হেতুফলনিস্সন্দো. অৰিজ্জা সঙ্খারা তণ্হা উপাদানং চ অযং হেতু, ৰিঞ্ঞাণং ¶ নামরূপং সল়াযতনং ফস্সো ৰেদনা চ অযং পচ্চযো, যো ভৰো অযং ৰিপাকো, যা জাতি মরণং অযং নিস্সন্দো.

কথং চতুব্বিধো হেতু পচ্চযো ৰিপাকো নিস্সন্দো চ? অৰিজ্জা চ তণ্হাসঙ্খারা চ উপাদানং চ – অযং হেতু. ৰিঞ্ঞাণং নামরূপস্স পচ্চযো. নামরূপং উপপজ্জতি, তথা উপপন্নস্স সল়াযতনং ফস্সো ৰেদনা চ – অযং পচ্চযো. যো ভৰো অযং ৰিপাকো. যা জাতি যা চ জরামরণং – অযং নিস্সন্দো.

কথং দুৰিধো পটিচ্চসমুপ্পাদো? অৰিজ্জা সঙ্খারা তণ্হা উপাদানং – অযং সমুদযো. ৰিঞ্ঞাণং নামরূপং সল়াযতনং ফস্সো ৰেদনা ভৰো জাতি মরণঞ্চ ¶ – ইদং দুক্খং. যং পন অৰিজ্জানিরোধা সঙ্খারনিরোধো ইমানি তপ্পটিপক্খেন দ্ৰে সচ্চানি. তস্মা পটিচ্চসমুপ্পাদো যেন আকারেন নিদ্দিট্ঠো, তেন তেন নিদ্দিসিতব্বো.

তথা বাৰীসতি ইন্দ্রিযানি. দ্ৰাদস ইন্দ্রিযানি চক্খুন্দ্রিযানি চক্খুন্দ্রিযং যেন দোমনস্সিন্দ্রিযং, ইদং দুক্খং. পুরিসিন্দ্রিযং চ দিট্ঠিযা চ তণ্হাপদট্ঠানং. যতো পুরিসো পুরিসকানং তং এৰং কাতব্বতা. অথ অজ্ঝত্তং সারজ্জতি. অযং অহংকারো তং যসা সারত্তো বহিদ্ধা পরিযেসতি, অযং মমংকারো এৰং ইত্থী, তত্থ ¶ সুখিন্দ্রিযং চ সোমনস্সিন্দ্রিযং চ পুরিসিন্দ্রিযস্সানুৰত্তকা হোন্তি. তস্স অধিপ্পাযপরিপুণ্ণা লোভধম্মা কুসলমূলে পৰড্ঢেন্তি. তস্স চে অযমধিপ্পাযো ন পারিপূরিং গচ্ছতি. তস্স দুক্খিন্দ্রিযং চ দোমনস্সিন্দ্রিযং চ ৰত্ততি. দোসো চ অকুসলমূলং পৰড্ঢতি. সচে পন উপেক্খা ভাৰেতি উপেক্খিন্দ্রিযস্স অনুৰত্তকামা ভৰতি. অমোহো চ কুসলমূলং পৰড্ঢতি. ইতি সত্ত ইন্দ্রিযানি কিলেসৰত্থুমুপাদায অনন্ৰেমানি অৰমানি সব্বস্স ৰেদনা ইত্থিন্দ্রিযং পুরিসিন্দ্রিযং. তত্থ অট্ঠ ইন্দ্রিযানি সদ্ধিন্দ্রিযং যাৰ অঞ্ঞাতাৰিনো ইন্দ্রিযং, অযং দুক্খনিরোধগামিনী পটিপদা. দসন্নং পঞ্ঞিন্দ্রিযানং কামরাগস্স পদট্ঠানং. মনিন্দ্রিযং ভৰরাগস্স পদট্ঠানং. পঞ্ঞিন্দ্রিযানি রূপরাগস্স পদট্ঠানং. ইত্থিন্দ্রিযং চ পুরিসিন্দ্রিযং চ সত্ত পঞ্ঞত্তিযা পদট্ঠানং. তত্থ যেন যেন ইন্দ্রিযেন যুত্তং ৰা গাথায ওতারেতুং সক্কোতি, তেন তেন নিদ্দিসিতব্বো. এৰং খন্ধেসু ধাতূসু আযতনেসু সচ্চেসু পটিচ্চসমুপ্পাদেসু অযং ওতরণো হারো.

৫৪. তত্থ কতমো সোধনো হারো? যো গাথা একেন আরম্ভো ভাসিস্সন্তি. তত্থ একিস্সা ভাসিতায অৰসিট্ঠাসু ভাসিতাসু সো অত্থো ন নিদ্দিসিতব্বো. কিং কারণং? ন হি ¶ তাৰ সো অত্থো ভাসিতো, সো অভাসিতো ন সক্কা নিদ্দিসিতুং. যথা ¶ কিং অপ্পমাদো অমতং পদন্তি গাথা অযমেকা গাথা নিদ্দিসিতব্বা. কিং কারণং, অত্থিক্খাতাৰ ইমস্স আরম্ভস্স অনভাসিতং?

এৰং [এতং (পী.) পস্স ধ. প. ২২] ৰিসেসতো ঞত্ৰা, অপ্পমাদম্হি পণ্ডিতা;

অপ্পমাদে পমোদন্তি, অরিযানং গোচরে রতাতি.

ইদং ¶ অভাসিতং. ইমিস্সাপি গাথায ভাসিতায অত্থো নিদ্দিসিতব্বো. কিং কারণং, অত্থি তত্থ অৰসিট্ঠং? তে ঝাযিনো [ধ. প. ২৩] সাততিকা, নিচ্চং দল়্হপরক্কমাতি গাথা, এৰং ইমা গাথাযো উপধারিতা যদা ভৰন্তি, তদা অত্থো নিদ্দিসিতব্বো. এৰং অস্সুতপুব্বেসু সুত্তেসু ব্যাকরণেসু ৰা একুদ্দেসো ভাসিতো. যা ৰীমংসা তুলনা ইদং অত্থি কিচ্চং, ইদং সুত্তং ভাসিতং তস্স ৰেৰচনং নিদ্দিট্ঠং ৰা ন ৰাতি. তত্থ যা ৰীমংসা, অযং ৰুচ্চতে সোধনো হারো.

৫৫. তত্থ কতমো অধিট্ঠানো হারো? একত্ততা চ ৰেমত্ততা চ. তত্থ কিতপঞ্ঞত্তি চ কিচ্চপঞ্ঞত্তি চ. সা একত্ততা চ ৰেমত্ততা চ যথা পঞ্ঞত্তি একৰেৰচনেন ৰেমত্ততা পজানাতীতি পঞ্ঞা, সা চ আধিপতেয্যট্ঠেন পঞ্ঞত্তি. যং অনোমত্তিযট্ঠেন পঞ্ঞত্তন্তি. তং অনোমত্তিযট্ঠেন পঞ্ঞাবলং. তনুভূতা ¶ গোচরত্তৰসা সেৰসতি তীসু রতনেসু অনুস্সতি বুদ্ধানুস্সতি ধম্মানুস্সতি সঙ্ঘানুস্সতি অৰিপরীতানুস্সরণতায. সম্মাদিট্ঠি ধম্মানং পৰিচযেন ধম্মৰিচযসম্বোজ্ঝঙ্গো অভিনীহারতো অভিঞ্ঞাতি. সঙ্খেপেন মগ্গা কা ৰত্থু অৰিকোপনতায একত্তা, যথা উণ্হেন সংসট্ঠং উণ্হোদকং, সীতেন সংসট্ঠং সীতোদকং খারোদকং গুল়্হোদকন্তি, ইদং একত্ততা ৰেমত্ততা চ.

অত্থি ¶ পুন ধম্মো নানাধম্মসঙ্ঘতো একতো যথারূপং চত্তারো ৰারেতব্বা, তঞ্চ রূপন্তি একত্ততা. পথৰীধাতু আপো তেজো ৰাযোধাতূতি ৰেমত্ততা. এৰং সব্বা চতস্সো ধাতুযো রূপন্তি একত্ততা, পথৰীধাতু আপো তেজো ৰাযোধাতূতি ৰেমত্ততা. পথৰীধাতূতি লক্খণতো একত্ততা, সংকিণ্ণৰত্থুতো ৰেমত্ততা. যং কিঞ্চি কক্খল়লক্খণং, সব্বং তং পথৰীধাতূতি একত্ততা. কেসা লোমা নখা দন্তা ছৰি চম্মন্তি ৰেমত্ততা. এৰং সব্বং চতস্সো ধাতুযো রূপন্তি একত্তং. সদ্দা গন্ধা রসা ফোট্ঠব্বাতি ৰেমত্ততা.

অত্থি পুন ধম্মো ৰেমত্ততা অঞ্ঞো নামং লভতি. যথা কাযানুপস্সনায নৰসঞ্ঞা ৰিনীলকসঞ্ঞা উদ্ধুমাতকসঞ্ঞা, অযং অসুভসঞ্ঞা, যা একত্ততা আরম্মণতো ৰেমত্ততো, সা এৰং সঞ্ঞাৰেদনাসু আদীনৰং সমনুপস্সতো তথাধিট্ঠানং সমাধিন্দ্রিযং চ সাযেৰ ¶ ধম্মেসু তত্থ সঞ্ঞাভাৰনা ৰীরিযিন্দ্রিযং চ ধম্মেসু ধম্মানুপস্সনা চিত্তে অত্তসঞ্ঞং পজহতো পঞ্ঞিন্দ্রিযং চ চিত্তে চিত্তানুপস্সনা. (ইতি) [( ) নত্থি পী. পোত্থকে] যো কোচি ঞাণপচারো সব্বসো ¶ পঞ্ঞায গোচরো পঞ্ঞা, অযং ৰেমত্ততা, যথা কামরাগো ভৰরাগো দিট্ঠিরাগোতি ৰেমত্ততা তণ্হায. ইতি যং একত্ততায চ ৰেমত্ততায চ ঞাণং ৰীমংসনা তুলনা. অযং অধিট্ঠানো হারো.

৫৬. তত্থ কতমো পরিক্খারো হারো? সহেতু সপ্পচ্চযং ৰোদানঞ্চ সংকিলেসো চ, যং তদুভযং পরিযেট্ঠি, স পরিক্খারো হারো. ইতি ধম্মানং সহেতুকানং হেতু পরিযেসিতব্বো, সপ্পচ্চযানং পচ্চযো পরিযেসিতব্বো.

তত্থ কিং নানাকরণং, হেতুস্স চ পচ্চযস্স চ? সভাৰো হেতু, পরভাৰো পচ্চযো. পরভাৰস্স পচ্চযো হেতুপি, সভাৰস্স হেতুযা পরভাৰস্স কস্সচি পচ্চযো অৰুত্তো হেতু, ৰুত্তো পচ্চযো. অজ্ঝত্তিকো হেতু, বাহিরো পচ্চযো. সভাৰো হেতু, পরভাৰো পচ্চযো. নিব্বত্তকো হেতু, পটিগ্গাহকো [পরিগ্গাহকো (ক.)] পচ্চযো. নেৰাসিকো হেতু, আগন্তুকো পচ্চযো. অসাধারণো হেতু, সাধারণো পচ্চযো. একোযেৰ হেতু, অপরাপরো পচ্চযো.

হেতুস্স উপকরণং সমুদানেতব্বো. সমুদানং হেতু, তত্থ দুৰিধো হেতু. দুৰিধো পচ্চযো – সমনন্তরপচ্চযো চ পরম্পরপচ্চযো চ. হেতুপি দুৰিধো – সমনন্তরহেতু চ পরম্পরহেতু চ. তত্থ কতমো পরম্পরপচ্চযো? অৰিজ্জা নামরূপস্স পরম্পরপচ্চযো, ৰিঞ্ঞাণং সমনন্তরপচ্চযতায পচ্চযো. যদি আদিম্হি অৰিজ্জানিরোধো ভৰতি নামরূপস্স নিরোধোপি. তত্থ সমনন্তরং কিং কারণং পরম্পরপচ্চযো সমনন্তরপচ্চযো সমুদ্দানিতো, অযং পচ্চযতো. তত্থ ¶ কতমো পরম্পরহেতু? ৰিজানন্তস্স পরম্পরহেতুতায হেতু, অঞ্ঞাকারো সমনন্তরহেতুতায হেতু. যস্স হি যং সমনন্তরং নিব্বত্ততি, সো তস্স হেতুপি জাতিনিরোধা বহি আকারনিরোধো, আকারনিরোধা দণ্ডনিরোধো, দণ্ডনিরোধা খণ্ডনিরোধো. এৰং হেতুপি দ্ৰিধা সো তাহি পস্সিতব্বো.

পটিচ্চসমুপ্পাদো ¶ যথা অৰিজ্জাপচ্চযো তস্স পুন কিংপচ্চযো, অযোনিসো মনসিকারো. সো কস্স পচ্চযো সঙ্খারানং, ইতি পচ্চযো চ সমুপ্পন্নং চ তস্স কো হেতু অৰিজ্জাযেৰ ¶ . তথা হি পুরিমা কোটি ন পঞ্ঞাযতি. তত্থ অৰিজ্জানুসযো অৰিজ্জাপরিযুট্ঠানস্স হেতু পুরিমা হেতু পচ্ছা পচ্চযো, সাপি অৰিজ্জাসঙ্খারানং পচ্চযো চতূহি কারণেহি সহজাতপচ্চযতায সমনন্তরপচ্চযতায অভিসন্দনপচ্চযতায পতিট্ঠানপচ্চযতায.

৫৭. কথং সহজাতপচ্চযতায অৰিজ্জাসঙ্খারানং পচ্চযো? যং চিত্তং রাগপরিযুট্ঠং, তত্থ অৰিজ্জাপরিযুট্ঠানেন সব্বং পঞ্ঞায গোচরং হন্তি. তত্থ সঙ্খারা তিপচ্চযট্ঠিকা অদ্ধাভূমিকারমহত্তস্স [লদ্ধা ভূমিকরমহত্তস্স (পী. ক.)] অযং অৰিজ্জাসহসমুপ্পন্নং ৰুদ্ধিং ৰিরূল়্হিং ৰেপুল্লতমাপজ্জন্তী চতূহি কারণেহি পঞ্ঞা পহীযতি. কতমেহি চতূহি? অনুসযো পরিযুট্ঠানং সংযোজনং উপাদানং. তত্থ অনুসযো পরিযুট্ঠানং জাতি পরিযুট্ঠিতা সংযুজ্জতি সংযুত্তা উপাদিযতি উপাদানপচ্চযা ভৰো. এৰং ¶ তে সঙ্খারা তিৰিধা উপ্পন্না ভূমিগতা নাসঞ্ঞত্থ অযং মগ্গেন ৰিনীতত্তাযাতি [ৰিনিভত্তায (পী.), ৰিনিভত্ততায (ক.)] তে থামগতা অপতিৰিনীতাতিপি তে সঙ্খারাতি ৰুচ্চতি, এৰং সহেতুসমুপ্পন্নট্ঠেন অত্থি মেৰ পচ্চযা সঙ্খারানং পচ্চযো নিদ্দিট্ঠং অপনেত্ৰা কুসলং অকুসলং কুসলো চ অকুসলো চ পক্খিপিতব্বো, ৰিপাকধম্মা অপনেত্ৰা ৰচনীযং অৰচনীযং ৰচনীযঞ্চ অৰচনীযঞ্চ পক্খিপিতব্বং, ভৰঅপেৰিরিত্তা, সব্বসুত্তং পরিক্খিপিতব্বং.

দস তথাগতবলানি চত্তারি ৰেসারজ্জানি পুঞ্ঞানি অনঞ্ঞাকতং অৰিজ্জা সমনন্তরপচ্চযতায সঙ্খারানং পচ্চযো যেন চিত্তেন সহ সমুপ্পন্না অৰিজ্জা তস্স চিত্তস্স সমনন্তরচিত্তং সমুপ্পন্নন্তি, তস্স যং সমনন্তরচিত্তং সমুপ্পন্নন্তি, তস্স পচ্ছিমস্স চিত্তস্স পুরিমচিত্তং হেতুপচ্চযতায পচ্চযো, তেন অৰিজ্জা হেতু তেন চিত্তেন উপাদানং অনোকাসকতা ঞাণং ন উপ্পজ্জন্তি. যা তস্স অপ্পমাদা ধাতু অভিজ্ঝাভিসন্দিতা তহিং ৰিপল্লাসা উপ্পজ্জন্তি ‘‘অসুভে সুভ’’ন্তি ‘‘দুক্খে সুখ’’ন্তি, তত্থ সঙ্খারা উপ্পজ্জন্তি রত্তা দুট্ঠা মূলস্স চেতনা রাগপরিযুট্ঠানেন ব্যাপাদপরিযুট্ঠানেন অৰিজ্জাপরিযুট্ঠানেন দিট্ঠিৰিপল্লাসো ৰত্থুনিদ্দেসে নিদ্দিসিতব্বো ¶ , যং ৰিপরীতচিত্তো ৰিজানাতি অযং চিত্তৰিপল্লাসো, যা ৰিপরীতসঞ্ঞা উপগ্গণ্হাতি অযং সঞ্ঞাৰিপল্লাসো. যং ৰিপরীতদিট্ঠি অভিনিৰিসতি অযং দিট্ঠিৰিপল্লাসো. অট্ঠ ¶ মিচ্ছত্তানি ৰড্ঢন্তি, তীণি অকুসলানি অযোনিসো মনসিকারে উপ্পন্নং ৰিঞ্ঞাণঞ্চ ৰিজ্জঞ্চ করোন্তি. ইতি পুব্বাপরন্তে অকুসলানাতরিতরো সঙ্খারা ৰুদ্ধিং ৰেপুল্লতং গচ্ছন্তি. তে চ মহতা চ অপ্পটিৰিদিতা পোনোভৰিকা [পোনোব্ভৰিকা (ক.)] সঙ্খারা ভৰন্তি. ইতি এৰং অৰিজ্জা সহজাতপচ্চযতায সঙ্খারানং পচ্চযো সমনন্তরপচ্চযতায চ.

৫৮. কথং ¶ অভিসন্দনাকারেন অৰিজ্জা সঙ্খারানং পচ্চযো? সা অৰিজ্জা তে সঙ্খারে অভিসন্নেতি পরিপ্ফরতি. সেয্যথাপি নাম উপ্পলং ৰা পদুমং ৰা তং উদকে ৰড্ঢং অস্স, সীতেন ৰারিনা অভিসন্নং পরিসন্দনং ৰুদ্ধিং ৰিরূল়্হিং ৰেপুল্লতং আপজ্জতি. এৰং অভিসন্দনট্ঠেন অৰিজ্জা সঙ্খারানং পচ্চযো.

কথং পতিট্ঠহনট্ঠেন অৰিজ্জা সঙ্খারানং পচ্চযো? তে সঙ্খারা অৰিজ্জাযং নিস্সায ৰুদ্ধিং ৰিরূল়্হিং ৰেপুল্লতং আপজ্জন্তি. সেয্যথাপি নাম উপ্পলং ৰা পদুমং ৰা পথৰিং নিস্সায পথৰিং পতিট্ঠায ৰুদ্ধিং ৰিরূল়্হিং ৰেপুল্লতং আপজ্জতি. এতে সঙ্খারা অৰিজ্জাযং পতিট্ঠিতা অৰিজ্জাযং নিস্সায ৰুদ্ধিং ৰিরূল়্হিং ৰেপুল্লতং গচ্ছন্তি. এৰং পতিট্ঠহনট্ঠেন অৰিজ্জা সঙ্খারানং পচ্চযো.

পুন রাগসহগতস্স কম্মস্স ৰিপাকেন পটিসন্ধিম্হি ভৰো নিব্বত্ততি, তং কম্মস্স [কামস্স (পী.)] সব্বং অভিনিৰিট্ঠং অঞ্ঞাণৰসেন পোনোভৰিকা সঙ্খারাতি ৰুচ্চন্তি, এৰম্পি অৰিজ্জাপচ্চযা সঙ্খারা অত্থি. পুন ¶ পঞ্চসু যে চ সেক্খা পুগ্গলা, যে চ অসঞ্ঞিসমাপত্তিং সমাপন্না, যে চ ভৰগতা, যে চ অন্তোগতাযেৰ সংসেদজা, যে চ ৰা পন অঞ্ঞো হি কোচি অনাগামিভূতা ন চেতেন্তি ন চ পত্থেন্তি, তেসং কিং পচ্চযা সঙ্খারা. পুন রাগা অত্থি তেসং সঙ্খারানি উপাদানানি চিত্তমনুস্সরন্তিযেৰ অৰিপক্কৰিপাকসমূহতা অসমুচ্ছিন্নপচ্চযা তেসং পুন চ গতো ভৰতি. এৰম্পি হি অৰিজ্জাপচ্চযা সঙ্খারা. পুন সা তে ন উপাদানা নপি সঙ্খারা অত্থি, পুন তেসং সত্ত অনুসযা অসমূহতা অসমুচ্ছিন্না তদারম্মণং ভৰতি. ৰিঞ্ঞাণস্স পতিট্ঠায ৰিঞ্ঞাণপচ্চযা নামরূপং. এৰম্পি অৰিজ্জাপচ্চযা সঙ্খারা. পুন সা যং কিঞ্চি কম্মং আচযগামি সব্বং তং অৰিজ্জাৰসেন অভিসঙ্খরিযতি ¶ তণ্হাৰসেন চ অল্লীযতি অঞ্ঞাণৰসেন চ তত্থ আদীনৰম্পি ন জানাতি. তদেৰ ৰিঞ্ঞাণবীজং ভৰতি, সাযেৰ তণ্হাসিনেহো ভৰতি. সাযেৰ অৰিজ্জা সম্মোহোতি. এৰম্পি অৰিজ্জাপচ্চযা সঙ্খারা ৰত্তব্বা. ইতি ইমেহি আকারেহি অৰিজ্জা সঙ্খারানং পচ্চযো.

তত্থ অৰিজ্জায হেতু অযোনিসো মনসিকারো পচ্চযো হোতি. তত্থ অভিচ্ছেদো অযং তত্থ ততিযং বলং [ফলং (পী.)] নিৰত্তি, অযং পটিসন্ধি. তত্থ পুনব্ভৰো যো অৰেচ্ছেদো অসমুগ্ঘাতনট্ঠেন অযং অনুসযো. যথা ¶ পটাকং ৰা সাটকং ৰা দ্ৰে জনা পীল়েসু চ একা ৰা বলং ৰা অস্স নিৰাটস্সেসু, ন পন পীল়েসু সোসেয্য. তত্থ যং সিনেহা আপোধাতু অনুপুল্লনা সোসেতব্বা. উণ্হধাতুমাগম্ম সচে পুন তং আকাসে নিক্খিপেয্য তং উস্সাৰেন যেভুয্যতরং সিনেহমাপজ্জেয্য, ¶ ন হি অনাগম্ম তেজোধাতুং পরিসেসং গচ্ছেয্য. এৰমেৰ ভৰগ্গপরমাপি সমাপত্তি ন অনুরূপস্স সমুগ্ঘাতায সংৰত্ততি. তে হি আলযন্তি সম্মসন্তি, ন চ তণ্হায তণ্হাপহানং গচ্ছন্তি. তত্থ সো অসমুগ্ঘাতো. অৰিজ্জায অনুসযো চ চিত্তস্স সম্পলিবোধো, ইদং পরিযুট্ঠানং. যথাভূতং ৰিঞ্ঞাণস্স অপ্পটিৰেধো অযং অৰিজ্জাআসৰো অৰিজ্জাৰিঞ্ঞাণবীজং ভৰতি. যং বীজং সো হেতু ন সমুচ্ছিজ্জতি, অসমুচ্ছিজ্জন্তো পটিসন্দেহতি. পটিসন্দহন্তো ন সমুগ্ঘাতং গচ্ছতি. অসমুগ্ঘাতং চিত্তং পরিযোনহতি, পরিযোনদ্ধচিত্তো যথাভূতং নপ্পজানাতি, ইতি সঞ্ঞাণস্স সাসৰত্থো, অৰিজ্জত্থো, হেতুঅত্থো, অৰচ্ছেদত্থো, অনিৰত্তিঅত্থো, ফলত্থো পটিসন্ধিঅত্থো, পুনব্ভৰত্থো, অসমুগ্ঘাতত্থো, অনুসযত্থো, পরিযুট্ঠানত্থো, অপটিৰেধনত্থো. এত্তাৰতা অৰিজ্জায খেত্তং নিদ্দিট্ঠং ভৰতি. অযং ৰুচ্চতে পরিক্খারো নাম হারো.

৫৯. তত্থ কতমো সমারোপনো হারো? উগ্ঘটিতম্হি ¶ তম্হি সন্তঞ্চেৰ চ নং ৰিত্থারং পন ৰত্তব্বং. ৰিত্থারৰিধং চিত্তঞ্ঞা অযং সমারোপনো হারো. তত্থ নামনিদ্দেসো উপঘটকা [উগ্ঘটকা (পী.)] ৰত্থুনিদ্দেসো ৰেৰচনং ৰত্থুভূতো ৰিত্থারো. যথা কিং, যা ভিক্খূনং ৰত্ততো [নিৰত্ততো (পী.)] পহাতব্বো, অযং উপঘটনা.

তত্থ ¶ কতমো সমারোপনো? কিঞ্চি ন ৰত্তব্বং, রূপরাগং ৰা নামৰন্তপহাতব্বং [নামমন্তপহাতব্বং (ক.)]. যাৰ ৰিঞ্ঞাণন্তি ৰিত্থারেন কাতব্বানি. অৰিজ্জা তা ওপম্মেন পঞ্ঞাপেতব্বা, অযং সমারোপনো. নিস্সিতচিত্তস্স চ মত্তিকো চ নিস্সযো তণ্হা চ দিট্ঠি চ. তত্থ দিট্ঠি অৰিজ্জা তণ্হা সঙ্খারা. তত্থ দিট্ঠিপচ্চযা তণ্হা ইমে অৰিজ্জাপচ্চযা সঙ্খারা. তত্থ নিস্সিতং ৰিঞ্ঞাণং ইদং সঙ্খারপচ্চযা ৰিঞ্ঞাণং যাৰ জরামরণং, ইদং সংখিত্তেন ভাসিতে অৰসিট্ঠং পরোপযতি.

অনিস্সিতস্স [পস্স উদা. ৭৪] চলিতং নত্থীতি তস্স এৰং দিট্ঠিযা তণ্হায চ পহানং তত্থ দিট্ঠিঅৰিজ্জানিরোধায ভূতং ৰিঞ্ঞাণং সরাগট্ঠানিযেসু ধম্মেসু তং তং ধম্মং উপেচ্চ অঞ্ঞং ধম্মং ধাৰতি মক্কটোপমতায, অথ খ্ৰস্স পরিত্তেসু ধম্মেসু সরাগট্ঠানিযেসু ছন্দরাগো নত্থি কুতো ততো চলনা, অধিমত্তেসু সত্তেসু চিত্তং নিৰেস্সযতি তং অপতিট্ঠিতং ৰিঞ্ঞাণং অনাহারং নিরুজ্ঝতি ৰিঞ্ঞাণনিরোধা নামরূপনিরোধো যাৰ জরামরণনিরোধো. অযং সমারোপনো.

তত্থ ¶ রাগৰসেন ৰিঞ্ঞাণস্স চলিতং সপরিগ্গহো, তস্মিং চলিতে অসতি যো পরিকিলেসোপচারো ¶ তিৰিধো অগ্গি পটিপ্পস্সদ্ধো ভৰতি. তেনাহ চলিতে অসন্তে পস্সদ্ধি হোতি. তত্থ যং সমারোপনা পস্সদ্ধকাযো সুখং ৰেদেতি, সুখিনো চিত্তং সমাধিযতি. যাৰ ৰিমুত্তিতমিতি ঞাণদস্সনং ভৰতি. সো আসৰানং খযা চ ৰিমুত্তি নো উপপজ্জতি. তস্স উপপত্তিস্স আগতিগতিযা অসন্তিযা নেৰিধ ন হুরং ন উভযমন্তরেন. এসেৰন্তো দুক্খস্সাতি অনুপাদিসেসা নিব্বানধাতু. ইদমস্স সুত্তস্স মজ্ঝে সমারোপিতং পটিচ্চসমুপ্পাদে চ ৰিমুত্তিযং চ যোগো ন চ এতং তস্স সংখিত্তেন ভাসিতস্স ৰিত্থারেন অত্থং ৰিভজ্জন্তি. অযং ৰুচ্চতে সমারোপনো হারো. ন চ সংকিলেসভাগিযেন সুত্তেন সংকিলেসভাগিযো যে চ ধম্মা সমারোপযিতব্বা নাঞ্ঞে. এৰং ৰাসনাভাগিযে নিব্বেধভাগিযে, অযং সমারোপনো হারো. ইমে সোল়স হারা.

সুৰীরস্স মহাকচ্চাযনস্স জম্বুৰনৰাসিনো পেটকোপদেসে

৬০. বুদ্ধানং ¶ ¶ ¶ ভগৰন্তানং সাসনং তিৰিধেন সঙ্গহং গচ্ছতি, খন্ধেসু ধাতূসু আযতনেসু চ. তত্থ পঞ্চক্খন্ধা রূপক্খন্ধো যাৰ ৰিঞ্ঞাণক্খন্ধো. দস রূপআযতনানি চক্খু রূপা চ যাৰ কাযো ফোট্ঠব্বা চ, অযং রূপক্খন্ধো. তত্থ ছ ৰেদনাকাযা ৰেদনাক্খন্ধো চক্খুসম্ফস্সজা ৰেদনা যাৰ মনোসম্ফস্সজা ৰেদনা, অযং ৰেদনাক্খন্ধো. তত্থ ছ সঞ্ঞাকাযা সঞ্ঞাক্খন্ধো, রূপসঞ্ঞা যাৰ ধম্মসঞ্ঞা ইমে ছ সঞ্ঞাকাযা, অযং সঞ্ঞাক্খন্ধো. তত্থ ছ চেতনাকাযা সঙ্খারক্খন্ধো, রূপসঞ্চেতনা যাৰ ধম্মসঞ্চেতনা ইমে ছ চেতনাকাযা, অযং সঙ্খারক্খন্ধো. তত্থ ছ ৰিঞ্ঞাণকাযা ৰিঞ্ঞাণক্খন্ধো, চক্খুৰিঞ্ঞাণং যাৰ মনোৰিঞ্ঞাণং ইমে ছ ৰিঞ্ঞাণকাযা, অযং ৰিঞ্ঞাণক্খন্ধো. ইমে পঞ্চক্খন্ধা.

তেসং কা পরিঞ্ঞা? অনিচ্চং দুক্খং সঞ্ঞা অনত্তাতি এসা এতেসং পরিঞ্ঞা. তত্থ কতমো খন্ধত্থো? সমূহত্থো খন্ধত্থো, পুঞ্জত্থো খন্ধত্থো, রাসত্থো খন্ধত্থো. তং ¶ যথা দব্বক্খন্ধো ৰনক্খন্ধো দারুক্খন্ধো অগ্গিক্খন্ধো উদকক্খন্ধো ৰাযুক্খন্ধো ইতি এৰং খন্ধেসু সব্বসঙ্গহোৰ এৰং খন্ধত্থো.

তত্থ অট্ঠারস ধাতুযো চক্খুধাতু রূপধাতু চক্খুৰিঞ্ঞাণধাতু…পে… মনোধাতু ধম্মধাতু মনোৰিঞ্ঞাণধাতু. এতাযো অট্ঠারস ধাতুযো. তাসং পরিঞ্ঞা অনিচ্চং দুক্খং সঞ্ঞা অনত্তাতি এসা এতাসং পরিঞ্ঞা. তত্থ কো ধাতুঅত্থো? ৰুচ্চতে অৰযৰত্থো ধাতুঅত্থো. অৰযৰোতি চক্খু নো পসাদো চক্খুধাতু. এৰং পঞ্চসু ধাতূসু পুন রাগৰৰচ্ছেদত্থো ধাতুঅত্থো. ৰৰচ্ছিন্না হি চক্খুধাতু. এৰং পঞ্চসু পুনরাহ একন্তিপকত্যত্থেন ধাতুঅত্থোতি ৰুচ্চতে. তং যথা, পকতিযা অযং পুরিসো পিত্তিকো সেম্হিকো ৰাতিকো সন্নিপাতিকোতি এৰং পকতিচক্খুধাতু দসন্নং পিযা চ সব্বেসু ইন্দ্রিযেসু…পে… ৰিসভাগত্থো ধাতুঅত্থো.

তত্থ ¶ দ্ৰাদসাযতনানি কতমানি? ছ অজ্ঝত্তিকানি ছ বাহিরানি. চক্খাযতনং যাৰ মনাযতনন্তি অজ্ঝত্তিকং, রূপাযতনং যাৰ ধম্মাযতনন্তি বাহিরং. এতানি দ্ৰাদস আযতনানি. এতেসং কা পরিঞ্ঞা? অনিচ্চং দুক্খং সঞ্ঞা অনত্তাতি, এসা এতেসং পরিঞ্ঞা. অপি ¶ ¶ চ দ্ৰিধা পরিঞ্ঞা ঞাতপরিঞ্ঞা চ পহানপরিঞ্ঞা চ. তত্থ ঞাতপরিঞ্ঞা নাম অনিচ্চং দুক্খং সঞ্ঞা অনত্তাতি, এসা ঞাতপরিঞ্ঞা. পহানপরিঞ্ঞা পন ছন্দরাগপ্পহানা, এসা পহানপরিঞ্ঞা. তত্থ কতমো আযতনত্থো? ৰুচ্চতে আকারত্থো আযতনত্থো. যথা সুৰণ্ণাকরো দুব্বণ্ণাকরো, যথা দ্ৰীহি তেহি আকারেহি তে তে গাৰা উত্তিট্ঠন্তি. এৰং এতেহি চিত্তচেতসিকা গাৰা উত্তিট্ঠন্তি কম্মকিলেসা দুক্খধম্মা চ. পুনরাহ আযদানত্থো আযতনত্থো. যথা রঞ্ঞো আযদানেহি আযো ভৰতি, এৰং আযদানত্থো আযতনত্থো.

৬১. চত্তারি অরিযসচ্চানি দুক্খং সমুদযো নিরোধো মগ্গো চ. দুক্খং যথা সমাসেন ধম্মাচরিযং মানসঞ্চ, সমুদযো সমাসেন অৰিজ্জা চ তণ্হা চ, নিরোধো সমাসেন ৰিজ্জা চ ৰিমুত্তি চ, মগ্গো সমাসেন সমথো চ ৰিপস্সনা চ.

তত্থ সত্ততিংস বোধিপক্খিকা ধম্মা কতমে? চত্তারো সতিপট্ঠানা যাৰ অরিযো অট্ঠঙ্গিকো মগ্গো, এৰমেতে সত্ততিংস বোধিপক্খিকা ধম্মা. যে ধম্মা অতীতানাগতপচ্চুপ্পন্নানং বুদ্ধানং ভগৰন্তানং পচ্চেকবুদ্ধানং সাৰকানং চ নিব্বানায সংৰত্তন্তীতি, সো মগ্গো চত্তারো সতিপট্ঠানা. কতমে চত্তারো? ইধ ভিক্খু কাযে কাযানুপস্সী ৰিহরতি, সম্মপ্পধানং…পে… ইদ্ধিপাদং…পে… ইন্দ্রিযানি…পে… বলানি…পে… তত্থ কো ইন্দ্রিযত্থো? ইন্দত্থো ¶ ইন্দ্রিযত্থো, আধিপতেয্যত্থো ইন্দ্রিযত্থো, পসাদত্থো ইন্দ্রিযত্থো, অসাধারণং কস্স কিরিযত্থো ইন্দ্রিযত্থো অনৰপরিযত্থো বলত্থো, থামত্থো বলত্থো, উপাদাযত্থো বলত্থো, উপত্থম্ভনত্থো বলত্থো.

তত্থ কতমে সত্ত বোজ্ঝঙ্গা? সতিসম্বোজ্ঝঙ্গো যাৰ উপেক্খাসম্বোজ্ঝঙ্গো. তত্থ কতমো অট্ঠঙ্গিকো মগ্গো? সম্মাদিট্ঠি যাৰ সম্মাসমাধি. তত্থ অট্ঠঙ্গিকো মগ্গোতি খন্ধো সীলক্খন্ধো চ সমাধিক্খন্ধো চ পঞ্ঞাক্খন্ধো চ. তত্থ যা চ সম্মাৰাচা যো চ সম্মাকম্মন্তো যো চ সম্মাআজীৰো, অযং সীলক্খন্ধো. যা চ সম্মাসতি যো চ সম্মাৰাযামো যো চ সম্মাসমাধি, অযং সমাধিক্খন্ধো. যো চ সম্মাসঙ্কপ্পো যা চ সম্মাদিট্ঠি, অযং পঞ্ঞাক্খন্ধো. এৰং তাযো তিস্সো সিক্খা. এৰং তীহাকারেহি দস পদানি…পে….

তত্থ ¶ ¶ যোগাৰচরো সীলক্খন্ধে ঠিতো দোসং অকুসলং ন উপাদিযতি, দোসানুসযং সমূহনতি, দোসসল্লং উদ্ধরতি, দুক্খৰেদনং পরিজানাতি, কামধাতুং সমতিক্কমতি. সমাধিক্খন্ধে ঠিতো লোভং অকুসলং ন উপাদিযতি, রাগানুসযং সমূহনতি, লোভসল্লং উদ্ধরতি, সুখৰেদনং পরিজানাতি, রূপধাতুং সমতিক্কমতি. পঞ্ঞাক্খন্ধে ঠিতো মোহং অকুসলং ন উপাদিযতি, অৰিজ্জানুসযং সমূহনতি, মোহসল্লং দিট্ঠিসল্লঞ্চ উদ্ধরতি, অদুক্খমসুখৰেদনং ¶ পরিজানাতি, অরূপধাতুং সমতিক্কমতি. ইতি তীহি খন্ধেহি তীণি অকুসলমূলানি ন উপাদিযতি, চত্তারি সল্লানি উদ্ধরতি, তিস্সো ৰেদনা পরিজানাতি, তেধাতুকং সমতিক্কমতি.

৬২. তত্থ কতমা অৰিজ্জা? যং চতূসু অরিযসচ্চেসু অঞ্ঞাণন্তি ৰিত্থারেন যথা সো পাণসজ্জেসু কথংকথা কাতব্বং. তত্থ কতমং ৰিঞ্ঞাণং? ছ ৰিঞ্ঞাণকাযা ৰেদনা সঞ্ঞা চেতনা ফস্সো মনসিকারো, ইদং নামং. তত্থ কতমং রূপং? চাতুমহাভূতিকং চতুন্নং মহাভূতানং উপাদাযরূপস্স পঞ্ঞত্তিং. ইতি পুরিমকঞ্চ নামং ইদঞ্চ রূপং তদুভযং নামরূপন্তি ৰুচ্চতি. তত্থ ছল়াযতনন্তি ছ অজ্ঝত্তিকানি আযতনানি, চক্খু অজ্ঝত্তিকং আযতনং যাৰ মনো অজ্ঝত্তিকং আযতনং. ফস্সোতি ছ ফস্সকাযা চক্খুসম্ফস্সো যাৰ মনোসম্ফস্সোতি ফস্সো. ছ ৰেদনাকাযা ৰেদনা. তণ্হাতি ছ তণ্হাকাযা তণ্হা. উপাদানন্তি চত্তারি উপাদানানি কামুপাদানং দিট্ঠুপাদানং সীলব্বতুপাদানং অত্তৰাদুপাদানন্তি উপাদানং. ভৰোতি তযো ভৰা কামভৰো রূপভৰো অরূপভৰো. তত্থ কতমা জাতি? যা পঠমং খন্ধানং পঠমং ধাতূনং পঠমং আযতনানং উপ্পত্তি জাতি সঞ্জাতি ওক্কন্তি অভিনিব্বত্তি খন্ধানং পাতুভাৰো, অযং জাতি. তত্থ ¶ কতমা জরা? জরা নাম যং তং খণ্ডিচ্চং পালিচ্চং ৰলিত্তচতা পৰিৰিত্তং চতুন্নং মহাভূতানং ৰিৰণ্ণতং ভগ্গো তং জরা হীযনা পহীযনা আযুনো হানি সংহানি ইন্দ্রিযানং পরিভেদো উপনাহো পরিপাকো, অযং জরা. তত্থ কতমং মরণং? মরণং নাম যং তস্মিং তস্মিং সত্তনিকাযে তেসং তেসং সত্তানং চুতি চৰনতা মরণং কালঙ্কিরিযা উদ্ধুমাতকানং ভেদো কাযস্স জীৰিতিন্দ্রিযস্স উপচ্ছেদো, ইদং মরণং. ইতি পুরিমিকা চ জরা ইদঞ্চ মরণং তদুভযং জরামরণং.

তত্থ ¶ অন্ধকারতিমিসা যথাভূতং অপ্পজাননলক্খণা অৰিজ্জা সঙ্খারানং পদট্ঠানং হ. অভিসঙ্খরণলক্খণা সঙ্খারা, উপচযপুনব্ভৰাভিরোপনপচ্চুপট্ঠানা. তে ৰিঞ্ঞাণস্স পদট্ঠানং. ৰত্থু সৰিঞ্ঞত্তিলক্খণং ৰিঞ্ঞাণং, তং নামরূপস্স পদট্ঠানং. অনেকসন্নিস্সযলক্খণং নামরূপং, তং সল়াযতনস্স পদট্ঠানং. ইন্দ্রিযৰৰত্থাপনলক্খণং সল়াযতনং, তং ফস্সস্স পদট্ঠানং ¶ . সন্নিপাতলক্খণো ফস্সো, সো ৰেদনায পদট্ঠানং. অনুভৰনলক্খণা ৰেদনা, সা তণ্হায পদট্ঠানং. অজ্ঝোসানলক্খণা তণ্হা, সা উপাদানস্স পদট্ঠানং. আদানপরিহননলক্খণং উপাদানং, তং ভৰস্স পদট্ঠানং ¶ . নানাগতিৰিক্খেপলক্খণো ভৰো, সো জাতিযা পদট্ঠানং. খন্ধানং পাতুভাৰলক্খণা জাতি, সা জরায পদট্ঠানং. উপনযপরিপাকলক্খণা জরা, সা মরণস্স পদট্ঠানং. আযুক্খযজীৰিতউপরোধলক্খণং মরণং, তং দুক্খস্স পদট্ঠানং. কাযসম্পীল়নলক্খণং দুক্খং, তং দোমনস্সস্স পদট্ঠানং. চিত্তসম্পীল়নলক্খণং দোমনস্সং, তং সোকস্স পদট্ঠানং. সোচনলক্খণো সোকো, সো পরিদেৰস্স পদট্ঠানং. ৰচীনিচ্ছারণলক্খণো পরিদেৰো, সো উপাযাসস্স পদট্ঠানং. যে আযাসা তে উপাযাসা.

নৰ পদানি যত্থ সব্বো অকুসলপক্খো সঙ্গহং সমোসরণং গচ্ছতি. কতমানি নৰ পদানি? দ্ৰে মূলকিলেসা, তীণি অকুসলমূলানি, চত্তারো ৰিপল্লাসা. তত্থ দ্ৰে মূলকিলেসা অৰিজ্জা চ ভৰতণ্হা চ, তীণি অকুসলমূলানি লোভো দোসো মোহো চ. চত্তারো ৰিপল্লাসা [অ. নি. ৪.৪৯] – ‘‘অনিচ্চে নিচ্চ’’ন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো, ‘‘দুক্খে সুখ’’ন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো, ‘‘অনত্তনি অত্তা’’তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো, ‘‘অসুভে সুভ’’ন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো.

৬৩. তত্থ অৰিজ্জা নাম চতূসু অরিযসচ্চেসু যথাভূতং অঞ্ঞাণং, অযং অৰিজ্জা. ভৰতণ্হা নাম যো ভৰেসু রাগো সারাগো ইচ্ছা মুচ্ছা পত্থনা নন্দী অজ্ঝোসানং অপরিচ্চাগো, অযং ভৰতণ্হা.

লোভো নাম সো তেসু তেসু পরৰত্থূসু পরদব্বেসু পরট্ঠানেসু পরসাপতেয্যেসু পরপরিগ্গহিতেসু ¶ লোভো লুব্ভনা ইচ্ছা মুচ্ছা পত্থনা নন্দী অজ্ঝোসানং অপরিচ্চাগো, অযং লোভো অকুসলমূলং. কস্সেতং মূলং? লোভো লোভজস্স অকুসলস্স কাযকম্মস্স ৰচীকম্মস্স মনোকম্মস্স চ, তথা যথা তংসম্পযুত্তানং চিত্তচেতসিকানং ধম্মানং মূলং.

সো সত্তেসু আঘাতো অক্খন্তি অপ্পচ্চযো ব্যাপাদো পদোসো অনত্থকামতা চেতসো পটিঘাতো, অযং দোসো অকুসলমূলং.

দোসজস্স কাযকম্মস্স ৰচীকম্মস্স মনোকম্মস্স সম্পযুত্তানঞ্চ চিত্তচেতসিকানং ধম্মানং মূলং.

যং চতূসু অরিযসচ্চেসু অনভিসমযো অসম্পজ্জগ্গাহো অপ্পটিৰেধো মোহো মুয্হনা সম্মোহো সম্মুয্হনা অৰিজ্জা তমো অন্ধকারো আৰরণং নীৰরণং ছদনং অচ্ছদনং [অৰেচ্ছদনং (পী. ক.)] অপসচ্ছাগমনং কুসলানং ধম্মানং, অযং মোহো অকুসলমূলং.

মোহজস্স অকুসলস্স কাযকম্মস্স ৰচীকম্মস্স মনোকম্মস্স চ তংসম্পযুত্তকানঞ্চ চিত্তচেতসিকানং ধম্মানং মূলং.

তত্থ ¶ ৰিপল্লাসা জানিতব্বা, ৰিপল্লাসানং ৰত্থু জানিতব্বং. যং ৰিপল্লাসং সিযা, তং জানিতব্বং. তত্থ একো ৰিপল্লাসো তীণি ৰিপল্লাসানি চত্তারি ৰিপল্লাসৰত্থূনি. কতমো একো ৰিপল্লাসো চ, যেন পটিপক্খেন ৰিপল্লাসিতং গণ্হাতি?

‘‘অনিচ্চে নিচ্চ’’ন্তি, ‘‘দুক্খে সুখ’’ন্তি, ‘‘অনত্তনি অত্তা’’তি, ‘‘অসুভে সুভ’’ন্তি, অযং একো ৰিপল্লাসো.

কতমানি চত্তারি ৰিপল্লাসৰত্থূনি?

কাযো ৰেদনা চিত্তং ধম্মা চ. ইমানি চত্তারি ৰিপল্লাসৰত্থূনি.

সঞ্ঞা চিত্তং দিট্ঠি চ. ইমানি তীণি ৰিপল্লাসানি.

তত্থ ¶ মনাপিকে ৰত্থুম্হি ইন্দ্রিযৰত্থে ৰণ্ণাযতনে ৰা যো নিমিত্তস্স উগ্গাহো, অযং সঞ্ঞাৰিপল্লাসো. তত্থ ৰিপরীতচিত্তস্স ৰত্থুম্হি সতি ৰিঞ্ঞত্তি, অযং চিত্তৰিপল্লাসো. তত্থ ৰিপরীতচিত্তস্স তম্হি রূপে ‘‘অসুভে সুভ’’ন্তি যা খন্তি রুচি উপেক্খনা নিচ্ছযো দিট্ঠি নিদস্সনং সন্তীরণা, অযং দিট্ঠিৰিপল্লাসো. তত্থ ৰত্থুভেদেন কাযেসু দ্ৰাদস ৰিপল্লাসা ভৰন্তি. তযো ¶ কাযে তযো ৰেদনায তযো চিত্তে তযো ধম্মে, চত্তারো সঞ্ঞাৰিপল্লাসা চত্তারো চিত্তৰিপল্লাসা চত্তারো দিট্ঠিৰিপল্লাসা, আযতনূপচযতো চক্খুৰিঞ্ঞাণসঞ্ঞাসমঙ্গিস্স রূপেসু দ্ৰাদস ৰিপল্লাসা যাৰ মনো সঞ্ঞাসমঙ্গিস্স, ধম্মেসু দ্ৰাদস ৰিপল্লাসা ছ দ্ৰাদসকা চত্তারি ৰিপল্লাসা ভৰন্তি. আরম্মণনানত্ততো ¶ হি অপরিমিতসঙ্খেয্যানং সত্তানং [অত্তানং (ক.)] অপরিমিতমসঙ্খেয্যা ৰিপল্লাসা ভৰন্তি হীনুক্কট্ঠমজ্ঝিমতায.

৬৪. তত্থ পঞ্চক্খন্ধা চত্তারি অত্তভাৰৰত্থূনি ভৰন্তি. যো রূপক্খন্ধো, সো কাযো অত্তভাৰৰত্থু. যো ৰেদনাক্খন্ধো, সো ৰেদনা অত্তভাৰৰত্থু. যো সঞ্ঞাক্খন্ধো চ সঙ্খারক্খন্ধো চ, তে ধম্মা অত্তভাৰৰত্থু. যো ৰিঞ্ঞাণক্খন্ধো, সো চিত্তং অত্তভাৰৰত্থু. ইতি পঞ্চক্খন্ধা চত্তারি অত্তভাৰৰত্থূনি. তত্থ কাযে ‘‘অসুভে সুভ’’ন্তি ৰিপল্লাসো ভৰতি. এৰং ৰেদনাসু…পে… চিত্তে…পে… ধম্মেসু চ অত্তৰিপল্লাসো ভৰতি. তত্থ চতুন্নং ৰিপল্লাসানং সমুগ্ঘাতনত্থং ভগৰা চত্তারো সতিপট্ঠানে দেসেতি পঞ্ঞপেতি কাযে কাযানুপস্সী ৰিহরতো ‘‘অসুভে সুভ’’ন্তি ৰিপল্লাসং সমুগ্ঘাতেতি, এৰং ৰেদনাসু, চিত্তে, ধম্মেসু চ কাতব্বং.

তত্থ অন্ধকারতিমিসা অপ্পটিৰেধলক্খণা অৰিজ্জা, তস্সা ৰিপল্লাসপদট্ঠানং. অজ্ঝোসানলক্খণা তণ্হা, তস্সা পিযরূপসাতরূপং পদট্ঠানং. অত্তাসযৰঞ্চনালক্খণো লোভো, তস্স অদিন্নাদানং পদট্ঠানং. ইধ ৰিৰাদলক্খণো দোসো, তস্স পাণাতিপাতো পদট্ঠানং. ৰত্থুৰিপ্পটিপত্তিলক্খণো মোহো, তস্স মিচ্ছাপটিপত্তি পদট্ঠানং. সঙ্খতানং ধম্মানং অৰিনাসগ্গহণলক্খণা নিচ্চসঞ্ঞা, তস্সা সব্বসঙ্খারা পদট্ঠানং. সাসৰফস্সোপগমনলক্খণা সুখসঞ্ঞা, তস্সা মমঙ্কারো পদট্ঠানং. ধম্মেসু উপগমনলক্খণা অত্তসঞ্ঞা ¶ , তস্সা অহঙ্কারো পদট্ঠানং. ৰণ্ণসঙ্গহণলক্খণা সুভসঞ্ঞা, তস্সা ইন্দ্রিযঅসংৰরো পদট্ঠানং. এতেহি নৰহি পদেহি উদ্দিট্ঠেহি সব্বো অকুসলপক্খো নিদ্দিট্ঠো ভৰতি, সো চ খো বহুস্সুতেন সক্কা জানিতুং নো অপ্পস্সুতেন, পঞ্ঞৰতা নো দুপ্পঞ্ঞেন, যুত্তেন নো অযুত্তেন.

নৰ ¶ ¶ পদানি কুসলানি যত্থ সব্বো কুসলপক্খো সঙ্গহো সমোসরণং গচ্ছন্তি. কতমানি নৰ পদানি? সমথো ৰিপস্সনা অলোভো অদোসো অমোহো অনিচ্চসঞ্ঞা দুক্খসঞ্ঞা অনত্তসঞ্ঞা অসুভসঞ্ঞা চ.

তত্থ কতমো সমথো? যা চিত্তস্স ঠিতি সণ্ঠিতি অৰট্ঠিতি ঠানং পট্ঠানং উপট্ঠানং সমাধি সমাধানং অৰিক্খেপো অৰিপ্পটিসারো ৰূপসমো মানসো একগ্গং চিত্তস্স, অযং সমথো.

তত্থ কতমা ৰিপস্সনা? খন্ধেসু ৰা ধাতূসু ৰা আযতনেসু ৰা নামরূপেসু ৰা পটিচ্চসমুপ্পাদেসু ৰা পটিচ্চসমুপ্পন্নেসু ৰা ধম্মেসু দুক্খেসু ৰা সমুদযেসু ৰা নিরোধে ৰা মগ্গে ৰা কুসলাকুসলেসু ৰা ধম্মেসু সাৰজ্জঅনৰজ্জেসু ৰা কণ্হসুক্কেসু ৰা সেৰিতব্বঅসেৰিতব্বেসু ৰা সো যথাভূতং ৰিচযো পৰিচযো ৰীমংসা পরৰীমংসা গাহনা অগ্গাহনা পরিগ্গাহনা চিত্তেন পরিচিতনা তুলনা উপপরিক্খা ঞাণং ৰিজ্জা ৰা চক্খু বুদ্ধি মেধা পঞ্ঞা ওভাসো আলোকো আভা পভা খগ্গো নারাচো [নারজ্জো (পী. ক.)] ধম্মৰিচযসম্বোজ্ঝঙ্গো ¶ সম্মাদিট্ঠি মগ্গঙ্গং, অযং ৰিপস্সনা. তেনেসা ৰিপস্সনা ইতি ৰুচ্চতি ৰিৰিধা ৰা এসা ৰিপস্সনাতি, তস্মা এসা ৰিপস্সনাতি ৰুচ্চতি. দ্ৰিধা চেসা হি ৰিপস্সনা ধম্মৰিপস্সনাতি ৰুচ্চতি, দ্ৰিধা ইমায পস্সতি সুভঞ্চ অসুভঞ্চ কণ্হঞ্চ সুক্কঞ্চ সেৰিতব্বঞ্চ অসেৰিতব্বঞ্চ কম্মঞ্চ ৰিপাকঞ্চ বন্ধঞ্চ ৰিমোক্খঞ্চ আচযঞ্চ অপচযঞ্চ পৰত্তিঞ্চ নিৰত্তিঞ্চ সংকিলেসঞ্চ ৰোদানঞ্চ, এৰং ৰিপস্সনাতি ৰুচ্চতি. অথ ৰা ৰিইতি উপসগ্গো পস্সনাতি অত্থো তস্মা ৰিপস্সনাতি ৰুচ্চতে, অযং ৰিপস্সনা.

৬৫. তত্থ দ্ৰে রোগা সত্তানং অৰিজ্জা চ ভৰতণ্হা চ, এতেসং দ্ৰিন্নং রোগানং নিঘাতায ভগৰতা দ্ৰে ভেসজ্জানি ৰুত্তানি সমথো চ ৰিপস্সনা চ. ইমানি দ্ৰে ভেসজ্জানি পটিসেৰেন্তো দ্ৰে অরোগে সচ্ছিকরোতি রাগৰিরাগং চেতোৰিমুত্তিং অৰিজ্জাৰিরাগঞ্চ পঞ্ঞাৰিমুত্তিং. তত্থ তণ্হারোগস্স সমথো ভেসজ্জং, রাগৰিরাগা চেতোৰিমুত্তি অরোগং. অৰিজ্জারোগস্স ৰিপস্সনাভেসজ্জং অৰিজ্জাৰিরাগা পঞ্ঞাৰিমুত্তি অরোগং. এৰঞ্হি ভগৰা চাহ, ‘‘দ্ৰে ধম্মা পরিঞ্ঞেয্যা [পস্স দী. নি. ৩.৩৫২] নামঞ্চ রূপঞ্চ, দ্ৰে ধম্মা পহাতব্বা অৰিজ্জা চ ভৰতণ্হা চ, দ্ৰে ধম্মা ভাৰেতব্বা সমথো চ ৰিপস্সনা ¶ চ, দ্ৰে ধম্মা সচ্ছিকাতব্বা ৰিজ্জা চ ৰিমুত্তি চা’’তি. তত্থ সমথং ভাৰেন্তো রূপং পরিজানাতি, রূপং পরিজানন্তো তণ্হং পজহতি, তণ্হং পজহন্তো রাগৰিরাগা ¶ চেতোৰিমুত্তিং সচ্ছিকরোতি, ৰিপস্সনং ভাৰেন্তো নামং পরিজানাতি, নামং পরিজানন্তো অৰিজ্জং পজহতি, অৰিজ্জং পজহন্তো অৰিজ্জাৰিরাগা পঞ্ঞাৰিমুত্তিং ¶ সচ্ছিকরোতি. যদা ভিক্খুনো দ্ৰে ধম্মা পরিঞ্ঞাতা ভৰন্তি নামঞ্চ রূপঞ্চ, তথাস্স দ্ৰে ধম্মা পহীনা ভৰন্তি অৰিজ্জা চ ভৰতণ্হা চ. দ্ৰে ধম্মা ভাৰিতা ভৰন্তি সমথো চ ৰিপস্সনা চ, দ্ৰে ধম্মা সচ্ছিকাতব্বা ভৰন্তি ৰিজ্জা চ ৰিমুত্তি চ. এত্তাৰতা ভিক্খু কতকিচ্চো ভৰতি. এসা সোপাদিসেসা নিব্বানধাতু. তস্স আযুপরিযাদানা জীৰিতিন্দ্রিযস্স উপরোধা ইদঞ্চ দুক্খং নিরুজ্ঝতি, অঞ্ঞঞ্চ দুক্খং ন উপ্পজ্জতি. তত্থ যো ইমেসং খন্ধানং ধাতুআযতনানং নিরোধো ৰূপসমো অঞ্ঞেসঞ্চ খন্ধধাতুআযতনানং অপ্পটিসন্ধি অপাতুভাৰো, অযং অনুপাদিসেসা নিব্বানধাতু.

তত্থ কতমং অলোভো কুসলমূলং? যংধাতুকো অলোভো অলুব্ভনা অলুব্ভিতত্তং অনিচ্ছা অপত্থনা অকন্তা অনজ্ঝোসানং. অযং অলোভো কুসলমূলং. কস্সেতং মূলং? অলোভজস্স কুসলস্স কাযকম্মস্স ৰচীকম্মস্স মনোকম্মস্স তংসম্পযুত্তানঞ্চ চিত্তচেতসিকানং ধম্মানং মূলং. অথ ৰা অরিযো অট্ঠঙ্গিকো মগ্গো কুসলন্তি ৰুচ্চতি, সো তিণ্ণং মগ্গঙ্গানং মূলং. কতমেসং তিণ্ণং, সম্মাসঙ্কপ্পস্স সম্মাৰাযামস্স সম্মাসমাধিস্স চ ইমেসং মূলন্তি, তস্মা কুসলমূলন্তি ৰুচ্চতি.

তত্থ কতমং অদোসো কুসলমূলং? যা ¶ সত্তেসু ৰা সঙ্খারেসু ৰা অনঘাতো অপ্পটিঘাতো অব্যাপত্তি অব্যাপাদো অদোসো মেত্তা মেত্তাযনা অত্থকামতা হিতকামতা চেতসো পসাদো, অযং অদোসো কুসলমূলং. কস্সেতং মূলং? অদোসজস্স কুসলস্স কাযকম্মস্স ৰচীকম্মস্স মনোকম্মস্স তংসম্পযুত্তানঞ্চ চিত্তচেতসিকানং ধম্মানং মূলং. অথ ৰা তিণ্ণং মগ্গঙ্গানং মূলং. কতমেসং তিণ্ণং? সম্মাৰাচায সম্মাকম্মন্তস্স সম্মাআজীৰস্স চ ইমেসং তিণ্ণং মগ্গঙ্গানং মূলং, তস্মা কুসলমূলন্তি ৰুচ্চতি.

তত্থ কতমং অমোহো কুসলমূলং? যং চতূসু অরিযসচ্চেসু যথাভূতং ঞাণদস্সনং অভিসমযো সম্মা চ পচ্চাগমো পটিৰেধো অমোহো অসম্মুয্হনা অসম্মোহো ৰিজ্জাপকাসো আলোকো অনাৰরণং ¶ সেক্খানং কুসলানং ধম্মানং, অযং অমোহো কুসলমূলং. কস্সেতং মূলং? অমোহজস্স কুসলস্স কাযকম্মস্স ৰচীকম্মস্স মনোকম্মস্স তংসম্পযুত্তানঞ্চ চিত্তচেতসিকানং ধম্মানং মূলং. অথ ৰা দ্ৰিন্নং মগ্গঙ্গানং এতং মূলং. কতমেসং দ্ৰিন্নং? সম্মাদিট্ঠিযা চ সম্মাসতিযা চ ইমেসং দ্ৰিন্নং মগ্গঙ্গানং মূলং, তস্মা কুসলমূলন্তি ৰুচ্চতি. এৰং ¶ ইমেসং তীহি কুসলমূলেহি অট্ঠঙ্গিকো মগ্গো যোজেতব্বো.

৬৬. তত্থ ¶ কতমা অনিচ্চসঞ্ঞা? ‘‘সব্বে সঙ্খারা উপ্পাদৰযধম্মিনো’’তি চ যা সঞ্ঞা সঞ্জাননা ৰৰত্থপনা উগ্গাহো, অযং অনিচ্চসঞ্ঞা. তস্সা কো নিস্সন্দো? অনিচ্চসঞ্ঞায ভাৰিতায বহুলীকতায অট্ঠসু লোকধম্মেসু চিত্তং নানুসন্ধতি ন সন্ধতি ন সণ্ঠহতি, উপেক্খা ৰা পটিক্কূলতা ৰা সণ্ঠহতি, অযমস্সা নিস্সন্দো.

তত্থ কতমা দুক্খসঞ্ঞা? ‘‘সব্বে সঙ্খারা দুক্খা’’তি যা সঞ্ঞা সঞ্জাননা ৰৰত্থপনা উগ্গাহো, অযং দুক্খসঞ্ঞা. তস্সা কো নিস্সন্দো? দুক্খসঞ্ঞায ভাৰিতায বহুলীকতায আলস্সে সংপমাদে ৰিম্হযে চ চিত্তং নানুসন্ধতি ন সন্ধতি ন সণ্ঠহতি, উপেক্খা ৰা পটিক্কূলতা ৰা সণ্ঠহতি, অযমস্সা নিস্সন্দো.

তত্থ কতমা অনত্তসঞ্ঞা? ‘‘সব্বেসু ধম্মেসু অনত্তা’’তি যা সঞ্ঞা সঞ্জাননা ৰৰত্থপনা উগ্গাহো, অযং অনত্তসঞ্ঞা. তস্সা কো নিস্সন্দো, অনত্তসঞ্ঞায ভাৰিতায বহুলীকতায অহঙ্কারো চিত্তং নানুসন্ধতি ন সন্ধতি, মমঙ্কারো ন সণ্ঠহতি, উপেক্খা ৰা পটিক্কূলতা ৰা সণ্ঠহতি, অযমস্সা নিস্সন্দো.

তত্থ কতমা অসুভসঞ্ঞা? ‘‘সত্ত সঙ্খারা ¶ অসুভা’’তি যা সঞ্ঞা সঞ্জাননা ৰৰত্থপনা উগ্গাহো, অযং অসুভসঞ্ঞা. তস্সা কো নিস্সন্দো? অসুভসঞ্ঞায ভাৰিতায বহুলীকতায সুভনিমিত্তে চিত্তং নানুসন্ধতি ন সন্ধতি ন সণ্ঠহতি, উপেক্খা ৰা পটিক্কূলতা ৰা সণ্ঠহতি, অযমস্সা নিস্সন্দো.

তত্থ পঞ্চন্নং খন্ধানং পরিঞ্ঞা ভগৰতা দেসিতা, যো তত্থ অসুভসঞ্ঞা রূপক্খন্ধস্স পরিঞ্ঞত্তং, দুক্খসঞ্ঞা ৰেদনাক্খন্ধস্স পরিঞ্ঞত্তং, অনত্তসঞ্ঞা সঞ্ঞাক্খন্ধস্স সঙ্খারক্খন্ধস্স পরিঞ্ঞত্তং, অনিচ্চসঞ্ঞা ৰিঞ্ঞাণক্খন্ধস্স পরিঞ্ঞত্তং. তত্থ সমথেন তণ্হং সমুগ্ঘাতেতি, ৰিপস্সনা অৰিজ্জং ¶ সমুগ্ঘাতেতি, অদোসেন দোসং সমুগ্ঘাতেতি, অমোহেন মোহং সমুগ্ঘাতেতি, অনিচ্চসঞ্ঞায নিচ্চসঞ্ঞং সমুগ্ঘাতেতি, দুক্খসঞ্ঞায সুখসঞ্ঞং সমুগ্ঘাতেতি, অনত্তসঞ্ঞায অত্তসঞ্ঞং সমুগ্ঘাতেতি, অসুভসঞ্ঞায সুভসঞ্ঞং সমুগ্ঘাতেতি.

চিত্তৰিক্খেপপটিসংহরণলক্খণো সমথো, তস্স ঝানানি পদট্ঠানং. সব্বধম্মং যথাভূতং পটিৰেধলক্খণা ৰিপস্সনা, তস্সা সব্বনেয্যং পদট্ঠানং. ইচ্ছাপটিসংহরণলক্খণো অলোভো, তস্স অদিন্নাদানা ৰেরমণী পদট্ঠানং. অব্যাপাদলক্খণো অদোসো, তস্স পাণাতিপাতা ৰেরমণী ¶ পদট্ঠানং. ৰত্থুঅপ্পটিহতলক্খণো অমোহো, তস্স সম্মাপটিপত্তি পদট্ঠানং. সঙ্খতানং ধম্মানং ৰিনাসগ্গহণলক্খণা অনিচ্চসঞ্ঞা, তস্সা উদযব্বযো পদট্ঠানং. সাসৰফস্সসঞ্জাননলক্খণা দুক্খসঞ্ঞা, তস্সা ৰেদনা পদট্ঠানং. সব্বধম্মঅনুপগমনলক্খণা অনত্তসঞ্ঞা, তস্সা ধম্মসঞ্ঞা ¶ পদট্ঠানং. ৰিনীলকৰিপুব্বকউদ্ধুমাতকসমুগ্গহণলক্খণা অসুভসঞ্ঞা, তস্সা নিব্বিদা পদট্ঠানং. ইমেসু নৰসু পদেসু উপদিট্ঠেসু সব্বো কুসলপক্খো উপদিট্ঠো ভৰতি, সো চ বহুস্সুতেন সক্কা জানিতুং নো অপ্পস্সুতেন, পঞ্ঞৰতা নো দুপ্পঞ্ঞেন, যুত্তেন নো অযুত্তেনাতি.

৬৭. তত্থ নিচ্চসঞ্ঞাধিমুত্তস্স অপরাপরং চিত্তং পণামেন্তো সতিমপচ্চৰেক্খতো অনিচ্চসঞ্ঞা ন উপট্ঠাতি, পঞ্চসু কামগুণেসু সুখস্সাদাধিমুত্তস্স ইরিযাপথস্স অগতিমপচ্চৰেক্খতো দুক্খসঞ্ঞা ন উপট্ঠাতি, খন্ধধাতুআযতনেসু অত্তাধিমুত্তস্স নানাধাতুঅনেকধাতুৰিনিব্ভোগমপচ্চৰেক্খতো অনত্তসঞ্ঞা ন উপট্ঠাতি, ৰণ্ণসণ্ঠানাভিরতস্স কাযে সুভাধিমুত্তস্স চ ৰিপ্পটিচ্ছন্না অসুভসঞ্ঞা ন উপট্ঠাতি.

অৰিপ্পটিসারলক্খণা সদ্ধা, সদ্দহনা পচ্চুপট্ঠানং. তস্স চত্তারি সোতাপত্তিযঙ্গানি পদট্ঠানং. এৰঞ্হি ৰুত্তং ভগৰতা [পস্স সংযুত্তনিকাযে] সদ্ধিন্দ্রিযং ভিক্খৰে, কুহিং দট্ঠব্বং, চতূসু সোতাপত্তিযঙ্গেসু কুসলেসু ধম্মেসু.

সূরাঅপটিক্খেপনলক্খণং ৰীরিযিন্দ্রিযং, ৰীরিযিন্দ্রিযারম্ভো পচ্চুপট্ঠানং. তস্স অতীতা চত্তারো সম্মপ্পধানা পদট্ঠানং. যথা ৰুত্তং ভগৰতা [পস্স সংযুত্তনিকাযে] ৰীরিযিন্দ্রিযং, ভিক্খৰে, কুহিং দট্ঠব্বং, চতূসু সম্মপ্পধানেসু.

সতি ¶ সরণলক্খণা, অসম্মোহপচ্চুপট্ঠানা. তস্স অতীতা চত্তারো সতিপট্ঠানা পদট্ঠানং. যথা ৰুত্তং ভগৰতা ¶ সতিন্দ্রিযং ভিক্খৰে, কুহিং দট্ঠব্বং, চতূসু সতিপট্ঠানেসু.

একগ্গলক্খণো সমাধি, অৰিক্খেপপচ্চুপট্ঠানো, তস্স চত্তারি ঞাণানি পদট্ঠানং. যথা ৰুত্তং ভগৰতা সমাধিন্দ্রিযং, ভিক্খৰে, কুহিং দট্ঠব্বং, চতূসু ঝানেসু.

পজাননলক্খণা পঞ্ঞা, ভূতত্থসন্তীরণা পচ্চুপট্ঠানা, তস্স চত্তারি অরিযসচ্চানি পদট্ঠানং. যথা ৰুত্তং ভগৰতা [পস্স সংযুত্তনিকাযে] পঞ্ঞিন্দ্রিযং, ভিক্খৰে, কুহিং দট্ঠব্বং, চতূসু অরিযসচ্চেসু.

চত্তারি ¶ চক্কানি [পস্স অ. নি. ৪.৩১] পতিরূপদেসৰাসো চক্কং, সপ্পুরিসূপনিস্সযো চক্কং, অত্তসম্মাপণিধানং চক্কং, পুব্বে কতপুঞ্ঞতা চক্কং. তত্থ অরিযসন্নিস্সযলক্খণো পতিরূপদেসৰাসো, সো সপ্পুরিসূপনিস্সযস্স পদট্ঠানং. অরিযসন্নিস্সযলক্খণো সপ্পুরিস্সূপনিস্সযো, সো অত্তসম্মাপণিধানস্স পদট্ঠানং. সম্মাপটিপত্তিলক্খণং অত্তসম্মাপণিধানং, তং পুঞ্ঞানং পদট্ঠানং. কুসলধম্মোপচযলক্খণং পুঞ্ঞং, তং সব্বসম্পত্তীনং পদট্ঠানং.

একাদসসীলমূলকা ধম্মা সীলৰতো অৰিপ্পটিসারো ভৰতি…পে… সো ৰিমুত্তিঞাণদস্সনং ‘‘নাপরং ইত্থত্তাযা’’তি পজাননা. তত্থ ৰেরমণিলক্খণং সীলং, তং অৰিপ্পটিসারস্স পদট্ঠানং. ন অত্তানুৰাদলক্খণো অৰিপ্পটিসারো, সো পামোজ্জস্স পদট্ঠানং. অভিপ্পমোদনলক্খণং পামোজ্জং, তং পীতিযা পদট্ঠানং. অত্তমনলক্খণা পীতি ¶ , সা পস্সদ্ধিযা পদট্ঠানং. কম্মনিযলক্খণা পস্সদ্ধি, সা সুখস্স পদট্ঠানং. অব্যাপাদলক্খণং সুখং, তং সমাধিনো পদট্ঠানং. অৰিক্খেপনলক্খণো সমাধি, সো যথাভূতঞাণদস্সনস্স পদট্ঠানং. অৰিপরীতসন্তীরণলক্খণা পঞ্ঞা, সা নিব্বিদায পদট্ঠানং অনালযনলক্খণা নিব্বিদা, সা ৰিরাগস্স পদট্ঠানং. অসংকিলেসলক্খণো ৰিরাগো, সো ৰিমুত্তিযা পদট্ঠানং. অকুসলধম্মৰিৰেকলক্খণা ৰিমুত্তি, সা ৰিমুত্তিনো ৰোদানস্স পদট্ঠানং.

৬৮. চতস্সো অরিযভূমিযো চত্তারি সামঞ্ঞফলানি. তত্থ যো যথাভূতং পজানাতি, এসা দস্সনভূমি. সোতাপত্তিফলঞ্চ সো যথাভূতং ¶ পজানিত্ৰা নিব্বিন্দতি, ইদং তনুকামরাগস্স পদট্ঠানং ব্যাপাদানং. সকদাগামিফলঞ্চ সণ্হং ৰিরজ্জতি, অযং রাগৰিরাগা চেতোৰিমুত্তি. অনাগামিফলঞ্চ যং অৰিজ্জাৰিরাগা ৰিমুচ্চতি, অযং কতাভূমি. অরহত্তঞ্চ সামঞ্ঞফলানীতি কো ৰচনত্থো, অরিযো অট্ঠঙ্গিকো মগ্গো সামঞ্ঞং, তস্সেতানি ফলানি সামঞ্ঞফলানীতি ৰুচ্চতি. কিস্স ব্রহ্মঞ্ঞফলানীতি ৰুচ্চন্তে? ব্রহ্মঞ্ঞঅরিযো অট্ঠঙ্গিকো মগ্গো, তস্স তানি ফলানীতি ব্রহ্মঞ্ঞফলানীতি ৰুচ্চন্তে.

তত্থ সোতাপন্নো কথং হোতি? সহ সচ্চাভিসমযা অরিযসাৰকস্স তীণি সংযোজনানি পহীযন্তি সক্কাযদিট্ঠি ৰিচিকিচ্ছা সীলব্বতপরামাসো চ, ইমেসং তিণ্ণং সংযোজনানং পহানা পরিক্খযা অরিযসাৰকো হোতি সোতাপন্নো অৰিনিপাতধম্মো যাৰ দুক্খস্সন্তং করোতি.

তত্থ ¶ ¶ কতমা সক্কাযদিট্ঠি? অস্সুতৰা বালো পুথুজ্জনো যাৰ অরিযধম্মে অকোৰিদো, সো রূপং অত্ততো সমনুপস্সতি যাৰ ৰিঞ্ঞাণস্মিং অত্তানং, সো ইমেসু পঞ্চসু খন্ধেসু অত্তগ্গাহো ৰা অত্তনিযগ্গাহো ৰা এসোহমস্মি একস্মিং ৰসৰত্তিকো [অৰত্তিতো (পী. ক.)] পক্খিত্তো অনুগ্গহো অনুসযন্তো অঙ্গমঙ্গন্তি পরতি. যা তথাভূতস্স খন্তি রুচি পেক্খনা আকারপরিৰিতক্কো দিট্ঠিনিজ্ঝাযনা অভিপ্পসন্না, অযং ৰুচ্চতে সক্কাযদিট্ঠীতি.

তত্থ পঞ্চ দিট্ঠিযো উচ্ছেদং ভজন্তি. কতমাযো পঞ্চ? রূপং অত্ততো সমনুপস্সতি, যাৰ ৰিঞ্ঞাণং অত্ততো সমনুপস্সতি, ইমাযো পঞ্চ উচ্ছেদং ভজন্তি, অৰসেসাযো পন্নরস সস্সতং ভজন্তি. ইতি সক্কাযদিট্ঠিপহানা দ্ৰাসট্ঠিদিট্ঠিগতানি পহীযন্তি. পহানা উচ্ছেদং সস্সতঞ্চ ন ভজতি. ইতি উচ্ছেদসস্সতপ্পহানা অরিযসাৰকস্স ন কিঞ্চি দিট্ঠিগতং ভৰতি, অঞ্ঞা ৰা লোকুত্তরায সম্মাদিট্ঠিযা. কথং পন সক্কাযদিট্ঠি ন ভৰতি? ইধ অরিযসাৰকো সুতৰা হোতি, সব্বো সুক্কপক্খো কাতব্বো, যাৰ অরিযধম্মেসু কোৰিদো রূপং অনত্ততো সমনুপস্সতি, যাৰ ৰিঞ্ঞাণং…পে… এৰমস্স সমনুপস্সন্তস্স সক্কাযদিট্ঠি ন ভৰতি.

কথং ¶ ৰিচিকিচ্ছা ন ভৰতি? ইধ অরিযসাৰকো বুদ্ধে ন কঙ্খতি, ন ৰিচিকিচ্ছতি অভিপ্পসীদতি, ইতিপি সো ভগৰাতি সব্বং. ধম্মে ন কঙ্খতি ন ৰিচিকিচ্ছতি সব্বং. যাৰ তণ্হক্খযো ৰিরাগো নিরোধো নিব্বানন্তি, ইমিনা দুতিযেন আকঙ্খিযেন ধম্মেন ¶ সমন্নাগতো হোতি. সঙ্ঘে ন কঙ্খতি…পে… যাৰ পূজা দেৰানঞ্চ মনুস্সানঞ্চাতি, ইমিনা ততিযেন আকঙ্খিযেন ধম্মেন সমন্নাগতো হোতি.

সব্বে সঙ্খারা দুক্খাতি ন কঙ্খতি ন ৰিচিকিচ্ছতি অধিমুচ্চতি অভিপ্পসীদতি. তণ্হা দুক্খসমুদযোতি ন কঙ্খতি ন ৰিচিকিচ্ছতি. তণ্হানিরোধা দুক্খনিরোধোতি ন কঙ্খতি ন ৰিচিকিচ্ছতি. অরিযো অট্ঠঙ্গিকো মগ্গো দুক্খনিরোধগামিনী পটিপদাতি ন কঙ্খতি ন ৰিচিকিচ্ছতি অধিমুচ্চতি অভিপ্পসীদতি. যাৰ বুদ্ধে ৰা ধম্মে ৰা সঙ্ঘে ৰা দুক্খে ৰা সমুদযে ৰা নিরোধে ৰা মগ্গে ৰা কঙ্খাযনা ৰিমতি ৰিচিকিচ্ছা দ্ৰেধাপথা আসপ্পনা [অপ্পনা (পী. ক.) ধ. স. ১০০৮ নিক্খেপকণ্ডে পস্সিতব্বং] পরিসপ্পনা অনৰট্ঠানং অধিট্ঠাগমনং [অনিট্ঠাগমনং (ক.)] অনেকংসো অনেকংসিকতা, তে তস্স পহীনা ভৰন্তি পণুন্না উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা.

৬৯. তত্থ সীলব্বতপরামাসো দ্ৰিধা – সীলস্স ৰা সুদ্ধস্স ৰা. তত্থ সীলস্স সীলব্বতপরামাসো ¶ ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা তত্থ কপোতপাদাহি অচ্ছরাহি সদ্ধিং কীল়িস্সামি রমিস্সামি পরিচরিস্সামীতি. যথাভূতদস্সনন্তি রুচিৰিমুত্তি রাগো রাগপরিৰত্তকা দিট্ঠিরূপনা পস্সনা অসন্তুস্সিতস্স সীলব্বতপরামাসো. তত্থ কতমো সুদ্ধস্স সীলব্বতপরামাসো? ইধেকচ্চো সীলং পরামসতি, সীলেন সুজ্ঝতি, সীলেন নীযতি, সীলেন মুচ্চতি, সুখং ৰীতিক্কমতি, দুক্খং ৰীতিক্কমতি, সুখদুক্খং ¶ ৰীতিক্কমতি অনুপাপুণাতি উপরিমেন. তদুভযং সীলৰতং পরামসতি তদুভযেন সীলৰতেন সুজ্ঝন্তি মুচ্চন্তি নীযন্তি, সুখং ৰীতিক্কমন্তি, দুক্খং ৰীতিক্কমন্তি, সুখদুক্খং ৰীতিক্কমন্তি, অনুপাপুণন্তীতি অৰিসুচিকরং ধম্মং অৰিমুত্তিকরং ধম্মং ৰিসুচিতো ৰিমুত্তিতো পচ্চাগচ্ছন্তস্স যা তথাভূতস্স খন্তি রুচি মুত্তি পেক্খনা আকারপরিৰিতক্কো দিট্ঠিনিজ্ঝাযনা পস্সনা, অযং সুদ্ধস্স সীলব্বতপরামাসো. এতে উভো পরামাসা অরিযসাৰকস্স পহীনা ¶ ভৰন্তি যাৰ আযতিং অনুপ্পাদধম্মা, সো সীলৰা ভৰতি অরিযকন্তেহি সীলেহি সমন্নাগতো অক্খণ্ডেহি যাৰ উপসমসংৰত্তনিকেহি. ইমেসং তিণ্ণং সংযোজনানং পহানা সুতৰা অরিযসাৰকো ভৰতি সোতাপন্নো অৰিনিপাতধম্মো, সব্বং.

সহসচ্চাভিসমযা, ইতি কো ৰচনত্থো? চত্তারো অভিসমযা, পরিঞ্ঞাভিসমযো পহানাভিসমযো সচ্ছিকিরিযাভিসমযো ভাৰনাভিসমযো.

তত্থ অরিযসাৰকো দুক্খং পরিঞ্ঞাভিসমযেন অভিসমেতি, সমুদযং পহানাভিসমযেন অভিসমেতি, নিরোধং সচ্ছিকিরিযাভিসমযেন অভিসমেতি, মগ্গং ভাৰনাভিসমযেন অভিসমেতি. কিং কারণং? দুক্খস্স পরিঞ্ঞাভিসমযো, সমুদযস্স পহানাভিসমযো, নিরোধস্স সচ্ছিকিরিযাভিসমযো, মগ্গস্স ভাৰনাভিসমযো. সমথৰিপস্সনায কথং অভিসমেতি? আরম্মণে চিত্তং উপনিবন্ধেত্ৰা পঞ্চক্খন্ধে দুক্খতো পস্সতি. তত্থ যো উপনিবন্ধো, অযং সমথো. যা পরিযোগাহনা, অযং ৰিপস্সনা. পঞ্চক্খন্ধে ¶ দুক্খাতি পস্সতো যো পঞ্চক্খন্ধেসু আলযো নিকন্তি উপগমনং অজ্ঝোসানা ইচ্ছা মুচ্ছা পণিধি পত্থনা পহীযতি. তত্থ পঞ্চক্খন্ধা দুক্খং. যো তত্থ আলযো নিকন্তি উপগমনং অজ্ঝোসানং ইচ্ছা মুচ্ছা পণিধি পত্থনা, অযং সমুদযো. যং তস্স পহানং, সো নিরোধো সমথো ৰিপস্সনা চ মগ্গো, এৰং তেসং চতুন্নং অরিযসচ্চানং এককালে একক্খণে একচিত্তে অপুব্বং অচরিমং অভিসমযো ভৰতি. তেনাহ ভগৰা ‘‘সহসচ্চাভিসমযা অরিযসাৰকস্স তীণি সংযোজনানি পহীযন্তী’’তি.

৭০. তত্থ ¶ সমথৰিপস্সনা যুগনদ্ধা ৰত্তমানা এককালে একক্খণে একচিত্তে চত্তারি কিচ্চানি করোতি, দুক্খং পরিঞ্ঞাভিসমযেন অভিসমেতি, যাৰ মগ্গং ভাৰনাভিসমযেন অভিসমেতি. কিং কারণা? দুক্খং পরিঞ্ঞাভিসমযো, যাৰ মগ্গং ভাৰনাভিসমযো. এৰং দিট্ঠন্তো যথা নাৰা জলং গচ্ছন্তী চত্তারি কিচ্চানি করোতি, পারিমং তীরং পাপেতি, ওরিমং তীরং জহতি, ভারং ৰহতি, সোতং ছিন্দতি; এৰমেৰ সমথৰিপস্সনা যুগনদ্ধা ৰত্তমানা এককালে একক্খণে একচিত্তে চত্তারি কিচ্চানি করোতি ¶ , দুক্খং পরিঞ্ঞাভিসমযেন অভিসমেতি, যাৰ মগ্গং ভাৰনাভিসমযেন অভিসমেতি. যথা ৰা সূরিযো উদযন্তো এককালে অপুব্বং অচরিমং চত্তারি কিচ্চানি করোতি, অন্ধকারং ৰিধমতি, আলোকং পাতুকরোতি, রূপং নিদস্সীযতি, সীতং পরিযাদিযতি; এৰমেৰ সমথৰিপস্সনা যুগনদ্ধা ৰত্তমানা এককালে…পে… যথা পদীপো জলন্তো এককালে অপুব্বং অচরিমং চত্তারি কিচ্চানি করোতি, অন্ধকারং ৰিধমতি, আলোকং পাতুকরোতি, রূপং ¶ নিদস্সীযতি, উপাদানং পরিযাদিযতি; এৰমেৰ সমথৰিপস্সনা যুগনদ্ধা ৰত্তমানা এককালে…পে….

যদা অরিযসাৰকো সোতাপন্নো ভৰতি অৰিনিপাতধম্মো নিযতো যাৰ দুক্খস্সন্তং করোতি, অযং দস্সনভূমি. সোতাপত্তিফলঞ্চ সোতাপত্তিফলে ঠিতো উত্তরি সমথৰিপস্সনং ভাৰেন্তো যুগনদ্ধা ৰত্তমানা কামরাগব্যাপাদানং যেভুয্যেন পহানা অরিযসাৰকো হোতি. সকদাগামি পরিনিট্ঠিতত্তা সকিদেৰ ইমং লোকং আগন্ত্ৰা দুক্খস্সন্তং করোতি, অযং তনুভূমি.

সকদাগামিফলঞ্চ যো সকদাগামিফলে ঠিতো ৰিপস্সনং ভাৰেন্তো কামরাগব্যাপাদে সানুসযে অনৰসেসং পজহতি, কামরাগব্যাপাদেসু অনৰসেসং পহীনেসু পঞ্চোরম্ভাগিযানি সংযোজনানি পহীনানি ভৰন্তি সক্কাযদিট্ঠি সীলব্বতপরামাসো ৰিচিকিচ্ছা কামচ্ছন্দো ব্যাপাদো চ, ইমেসং পঞ্চন্নং ওরম্ভাগিযানং সংযোজনানং পহানা [পহানায (পী. ক.)] অরিযসাৰকো হোতি অনাগামী তত্থ পরিনিব্বাযী অনাৰত্তিধম্মো তস্মা লোকা, অযং ৰীতরাগভূমি.

অনাগামিফলঞ্চ অনাগামিফলে ঠিতো উত্তরি সমথৰিপস্সনং ভাৰেন্তো পঞ্চ উদ্ধম্ভাগিযানি সংযোজনানি পজহতি রূপরাগঅরূপরাগমানউদ্ধচ্চঅৰিজ্জঞ্চ. ইমেসং পঞ্চন্নং উদ্ধম্ভাগিযানং সংযোজনানং পহানা অরিযসাৰকো অরহা ভৰতি, খীণাসৰো ৰুসিতৰা সম্মদঞ্ঞা [সম্পজঞ্ঞো (পী. ক.)] ৰিমুত্তো পরিক্খীণভৰসংযোজনো অনুপ্পত্তসদত্থো, অযং কতাভূমি.

অরহন্তোৰ ¶ অযং সোপাদিসেসা নিব্বানধাতু. তস্স আযুক্খযা জীৰিতিন্দ্রিযাপরোধা ইদঞ্চ দুক্খং নিরুজ্ঝতি, অঞ্ঞঞ্চ ¶ দুক্খং ন উপ্পজ্জতি. যো ইমস্স দুক্খস্স নিরোধো ৰূপসমো, অঞ্ঞস্স চ অপাতুভাৰো, অযং ¶ অনুপাদিসেসা নিব্বানধাতু. ইমা দ্ৰে নিব্বানধাতুযো. ইতি সচ্চানি ৰুত্তানি. সচ্চাভিসমযো ৰুত্তো, কিলেসৰৰত্থানং ৰুত্তং, পহানং ৰুত্তং, ভূমিযো ৰুত্তা, ফলানি ৰুত্তানি, নিব্বানধাতুযো ৰুত্তা. এৰমিমেসু ৰুত্তেসু সব্ববোধি ৰুত্তা ভৰতি. এত্থ যোগো করণীযো.

৭১. তত্থ কতমাযো নৰ অনুপুব্বসমাপত্তিযো? চত্তারি ঝানানি চতস্সো চ অরূপসমাপত্তিযো নিরোধসমাপত্তি চ. তত্থ চত্তারি ঝানানি কতমানি? ইধ, ভিক্খৰে, [পস্স দীঘনিকাযে] ভিক্খু ৰিৰিচ্চেৰ কামেহীতি ৰিত্থারেন কাতব্বানি. তত্থ কতমা চত্তারো অরূপসমাপত্তিযো? ৰিরাগিনো ৰত ৰত্তব্বো, যাৰ নিরোধসমাপত্তি ৰিত্থারেন কাতব্বা. ইমাযো নৰ অনুপুব্বসমাপত্তিযো.

তত্থ কতমং পঠমং ঝানং? পঞ্চঙ্গৰিপ্পযুত্তং পঞ্চঙ্গসমন্নাগতং. কতমেহি পঞ্চহি অঙ্গেহি ৰিপ্পযুত্তং? পঞ্চহি নীৰরণেহি. তত্থ কতমানি পঞ্চ নীৰরণানি? কামচ্ছন্দোতি ৰিত্থারেতব্বো. তত্থ কতমো কামচ্ছন্দো? যো পঞ্চসু কামগুণেসু ছন্দরাগো পেমং নিকন্তি অজ্ঝোসানং ইচ্ছা মুচ্ছা পত্থনা অপরিচ্চাগো অনুসযো পরিযুট্ঠানং, অযং কামচ্ছন্দনীৰরণং. তত্থ ¶ কতমং ব্যাপাদনীৰরণং? যো সত্তেসু সঙ্খারেসু চ আঘাতো…পে… যথা দোসে তথা নিওট্ঠানা, অযং ব্যাপাদো নীৰরণং. তত্থ কতমং মিদ্ধং? যা চিত্তস্স জল়তা চিত্তস্স গরুত্তং চিত্তস্স অকম্মনীযতা চিত্তস্স নিক্খেপো নিদ্দাযনা পচলিকতা পচলাযনা পচলাযনং, ইদং মিদ্ধং. তত্থ কতমং থিনং [থীনং (পী.)]? যা কাযস্স থিনতা জল়তা কাযস্স গরুত্তা কাযস্স অপ্পস্সদ্ধি, ইদং থিনং. ইতি ইদঞ্চ থিনং পুরিমকঞ্চ মিদ্ধং তদুভযং থিনমিদ্ধনীৰরণন্তি ৰুচ্চতি. তত্থ কতমং উদ্ধচ্চং? যো অৰূপসমো চিত্তস্স, ইদং উদ্ধচ্চং. তত্থ কতমং কুক্কুচ্চং? যো চেতসো ৰিলেখো অলঞ্চনা ৰিলঞ্চনা হদযলেখো ৰিপ্পটিসারো, ইদং কুক্কুচ্চং. ইতি ইদঞ্চ কুক্কুচ্চং পুরিমকঞ্চ উদ্ধচ্চং তদুভযং উদ্ধচ্চকুক্কুচ্চনীৰরণন্তি ৰুচ্চতি. তত্থ কতমং ৰিচিকিচ্ছানীৰরণং? যো বুদ্ধে ৰা ধম্মে ৰা সঙ্ঘে ৰা…পে… অযং ৰিচিকিচ্ছা. অপি ¶ চ খো পন পঞ্চ ৰিচিকিচ্ছাযো সমনন্তরাযিকা দেসন্তরাযিকা সমাপত্তন্তরাযিকা মগ্গন্তরাযিকা সগ্গন্তরাযিকা, ইমাযো পঞ্চ ¶ ৰিচিকিচ্ছাযো ¶ . ইধ পন সমাপত্তন্তরাযিকা ৰিচিকিচ্ছা অধিপ্পেতা. ইমে পঞ্চ নীৰরণা.

তত্থ নীৰরণানীতি কো ৰচনত্থো, কুতো নিৰারযন্তীতি? সব্বতো কুসলপক্খিকা নিৰারযন্তি. কথং [কিং কং (পী. ক.)] নিৰারযন্তি? কামচ্ছন্দো অসুভতো নিৰারযতি, ব্যাপাদো মেত্তায [মেত্ততো (পী.)] নিৰারযতি, থিনং পস্সদ্ধিতো নিৰারযতি, মিদ্ধং ৰীরিযারম্ভতো নিৰারযতি, উদ্ধচ্চং সমথতো নিৰারযতি, কুক্কুচ্চং অৰিপ্পটিসারতো নিৰারযতি, ৰিচিকিচ্ছা পঞ্ঞাতো পটিচ্চসমুপ্পাদতো নিৰারযতি.

অপরো পরিযাযো. কামচ্ছন্দো অলোভতো কুসলমূলতো নিৰারযতি, ব্যাপাদো অদোসতো নিৰারযতি, থিনমিদ্ধং সমাধিতো নিৰারযতি, উদ্ধচ্চকুক্কুচ্চং সতিপট্ঠানেহি নিৰারযতি, ৰিচিকিচ্ছা অমোহতো কুসলমূলতো নিৰারযতি.

অপরো পরিযাযো. তযো ৰিহারা দিব্বৰিহারো ব্রহ্মৰিহারো অরিযৰিহারো. দিব্বৰিহারো চত্তারি ঝানানি, ব্রহ্মৰিহারো চত্তারি অপ্পমাণানি, অরিযৰিহারো সত্ততিংস বোধিপক্খিযা ধম্মা. তত্থ কামচ্ছন্দো উদ্ধচ্চং কুক্কুচ্চঞ্চ দিব্বৰিহারং নিৰারযতি, ব্যাপাদো ব্রহ্মৰিহারং নিৰারযতি, থিনমিদ্ধং ৰিচিকিচ্ছা চ অরিযৰিহারং নিৰারযতি.

অপরো পরিযাযো. কামচ্ছন্দো ব্যাপাদো উদ্ধচ্চকুক্কুচ্চঞ্চ সমথং নিৰারযন্তি, থিনমিদ্ধং ৰিচিকিচ্ছা চ ৰিপস্সনং নিৰারযন্তি, অতো নীৰরণন্তি ৰুচ্চন্তে. ইমেহি ¶ পঞ্চহি অঙ্গেহি ৰিপ্পযুত্তং পঠমং ঝানং.

কতমেহি পঞ্চহি অঙ্গেহি সম্পযুত্তং পঠমং ঝানং? ৰিতক্কৰিচারেহি পীতিযা সুখেন চ চিত্তেকগ্গতায চ. ইমেসং পঞ্চন্নং অঙ্গানং উপ্পাদপটিলাভসমন্নাগমো সচ্ছিকিরিযং পঠমং ঝানং পটিলদ্ধন্তি ৰুচ্চতি. ইমানি পঞ্চ অঙ্গানি উপ্পাদেত্ৰা ৰিহরতীতি, তেন ৰুচ্চতে পঠমং ঝানং উপসম্পজ্জ ৰিহরতীতি দিব্বেন ৰিহারেন.

তত্থ দুতিযং ঝানং চতুরঙ্গসমন্নাগতং পীতিসুখেন চিত্তেকগ্গতায অজ্ঝত্তং সম্পসাদনেন ইমানি চত্তারি অঙ্গানি উপ্পাদেত্ৰা সম্পাদেত্ৰা ৰিহরতি, তেন ৰুচ্চতি দুতিযং ঝানং উপসম্পজ্জ ৰিহরতীতি.

তত্থ ¶ ¶ পঞ্চঙ্গসমন্নাগতং ততিযং ঝানং সতিযা সম্পজঞ্ঞে সুখেন চিত্তেকগ্গতায উপেক্খায ইমানি পঞ্চঙ্গানি উপ্পাদেত্ৰা সম্পাদেত্ৰা ৰিহরতি, তেন ৰুচ্চতি ততিযং ঝানং উপসম্পজ্জ ৰিহরতীতি.

তত্থ চতুত্থং ঝানং চতুরঙ্গসমন্নাগতং উপেক্খায সতিপারিসুদ্ধিযা অদুক্খমসুখায ৰেদনায চিত্তেকগ্গতা চ, ইমেহি চতূহঙ্গেহি সমন্নাগতং চতুত্থং ঝানং. ইতি ইমেসং চতুন্নং অঙ্গানং উপ্পাদো পটিলাভো সমন্নাগমো সচ্ছিকিরিযা চতুত্থং ঝানং পটিলদ্ধন্তি ৰুচ্চতি. ইমানি চত্তারি ঝানানি উপ্পাদেত্ৰা সম্পাদেত্ৰা উপসম্পজ্জ ৰিহরতি, তেন ৰুচ্চতি দিব্বেন ৰিহারেন ৰিহরতীতি.

তত্থ ¶ কতমো অনিচ্চট্ঠো? পীল়নট্ঠো অনিচ্চট্ঠো পভঙ্গট্ঠো সম্পাপনট্ঠো ৰিৰেকট্ঠো অনিচ্চট্ঠো, অযং অনিচ্চট্ঠো.

তত্থ কতমো দুক্খট্ঠো? পীল়নট্ঠো দুক্খট্ঠো সম্পীল়নট্ঠো সংৰেগট্ঠো ব্যাধিনট্ঠো, অযং দুক্খট্ঠো.

তত্থ কতমো সুঞ্ঞট্ঠো? অনুপলিত্তো সুঞ্ঞট্ঠো, অসম্ভাজনট্ঠো গতপট্ঠো [অপ্পট্ঠো (পী.)] ৰিৰট্টট্ঠো, অযং সুঞ্ঞট্ঠো.

তত্থ কতমো অনত্তট্ঠো? অনিস্সরিযট্ঠো অনত্তট্ঠো, অৰসৰত্তনট্ঠো, অকামকারিট্ঠো পরিৰিদট্ঠো, অযং অনত্তট্ঠোতি.

সুত্তত্থসমুচ্চযো নাম সংৰত্তিসন্তিকা পেটকভূমি সমত্তা.

৭২. ঝানং ¶ ¶ ৰিরাগো. চত্তারি ঝানানি ৰিত্থারেন কাতব্বানি. তানি দুৰিধানি; বোজ্ঝঙ্গৰিপ্পযুত্তানি চ বোজ্ঝঙ্গসম্পযুত্তানি চ. তত্থ বোজ্ঝঙ্গৰিপ্পযুত্তানি বাহিরকানি, বোজ্ঝঙ্গসম্পযুত্তানি অরিযপুগ্গলানি. তত্থ যেন ছ পুগ্গলমূলানি তেসং নিক্খিপেত্ৰা রাগচরিতো, দোসচরিতো, মোহচরিতো, রাগদোসচরিতো, রাগমোহচরিতো, দোসমোহচরিতো, সমভাগচরিতো, ইতি ইমেসং পুগ্গলানং ঝানং সমাপজ্জিতানং পঞ্চ নীৰরণানি পটিপক্খো তেসং পটিঘাতায যথা অসমত্থো তীণি অকুসলমূলানি ¶ নিগ্গণ্হাতি. লোভেন অকুসলমূলেন অভিজ্ঝা চ উদ্ধচ্চঞ্চ উপ্পিলৰতং অলোভেন কুসলমূলেন নিগ্গণ্হাতি, কুক্কুচ্চঞ্চ ৰিচিকিচ্ছা চ মোহপক্খো, তং অমোহেন নিগ্গণ্হাতি. দোসো চ থিনমিদ্ধঞ্চ দোসপক্খো, তং অদোসেন নিগ্গণ্হাতি.

তত্থ অলোভস্স পারিপূরিযা নেক্খম্মৰিতক্কং ৰিতক্কেতি. তত্থ অদোসস্স পারিপূরিযা অব্যাপাদৰিতক্কং ৰিতক্কেতি. তত্থ অমোহস্স পারিপূরিযা অৰিহিংসাৰিতক্কং ৰিতক্কেতি. তত্থ অলোভস্স পারিপূরিযা ৰিৰিত্তো হোতি কামেহি. তত্থ অদোসস্স পারিপূরিযা অমোহস্স পারিপূরিযা চ ৰিৰিত্তো হোতি পাপকেহি অকুসলেহি ধম্মেহি, সৰিতক্কং ¶ সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি.

ৰিতক্কাতি তযো ৰিতক্কা – নেক্খম্মৰিতক্কো অব্যাপাদৰিতক্কো অৰিহিংসাৰিতক্কো. তত্থ পঠমাভিনিপাতো ৰিতক্কো, পটিলদ্ধস্স ৰিচরণং ৰিচারো. যথা পুরিসো দূরতো পুরিসং পস্সতি আগচ্ছন্তং, ন চ তাৰ জানাতি এসো ইত্থীতি ৰা পুরিসোতি ৰা যদা তু পটিলভতি ইত্থীতি ৰা পুরিসোতি ৰা এৰং ৰণ্ণোতি ৰা এৰং সণ্ঠানোতি ৰা ইমে ৰিতক্কযন্তো উত্তরি উপপরিক্খন্তি কিং নু খো অযং সীলৰা উদাহু দুস্সীলো অড্ঢো ৰা দুগ্গতোতি ৰা. এৰং ৰিচারো ৰিতক্কে অপ্পেতি, ৰিচারো চরিযতি চ অনুৰত্ততি চ. যথা পক্খী পুব্বং আযূহতি পচ্ছা নাযূহতি যথা আযূহনা এৰং ৰিতক্কো, যথা পক্খানং পসারণং ¶ এৰং ৰিচারো অনুপালতি ৰিতক্কেতি ৰিচরতি ৰিচারেতি. ৰিতক্কযতি ৰিতক্কেতি, অনুৰিচরতি ৰিচারেতি. কামসঞ্ঞায পটিপক্খো ৰিতক্কো, ব্যাপাদসঞ্ঞায ৰিহিংসসঞ্ঞায চ পটিপক্খো ৰিচারো. ৰিতক্কানং কম্মং অকুসলস্স অমনসিকারো, ৰিচারানং কম্মং জেট্ঠানং সংৰারণা. যথা পলিকো তুণ্হিকো সজ্ঝাযং করোতি এৰং ৰিতক্কো, যথা তংযেৰ অনুপস্সতি এৰং ৰিচারো. যথা অপরিঞ্ঞা এৰং ৰিতক্কো. যথা পরিঞ্ঞা এৰং ৰিচারো. নিরুত্তিপটিসম্ভিদাযঞ্চ পটিভানপটিসম্ভিদাযঞ্চ ৰিতক্কো, ধম্মপটিসম্ভিদাযঞ্চ অত্থপটিসম্ভিদাযঞ্চ ৰিচারো. কল্লিতা কোসল্লত্তং চিত্তস্স ৰিতক্কো, অভিনীহারকোসল্লং চিত্তস্স ৰিচারো ¶ . ইদং কুসলং ইদং অকুসলং ইদং ভাৰেতব্বং ইদং পহাতব্বং ইদং সচ্ছিকাতব্বন্তি ৰিতক্কো, যথা পহানঞ্চ ভাৰনা চ সচ্ছিকিরিযা চ এৰং ৰিচারো. ইমেসু ৰিতক্কৰিচারেসু ঠিতস্স দুৰিধং দুক্খং ন উপ্পজ্জতি কাযিকঞ্চ চেতসিকঞ্চ; দুৰিধং সুখং উপ্পজ্জতি কাযিকঞ্চ ¶ চেতসিকঞ্চ. ইতি ৰিতক্কজনিতং চেতসিকং সুখং পীতি কাযিকং সুখং কাযিকোযেৰ. যা তত্থ চিত্তস্স একগ্গতা, অযং সমাধি. ইতি পঠমং ঝানং পঞ্চঙ্গৰিপ্পহীনং পঞ্চঙ্গসমন্নাগতং.

তেসংযেৰ ৰিতক্কৰিচারানং অভিক্খণং আসেৰনায তস্স তপ্পোণমানসং হোতি. তস্স ৰিতক্কৰিচারা ওল়ারিকা খাযন্তি. যঞ্চ পীতিসুখঞ্চ নেক্খম্মঞ্চ ওল়ারিকং ভৰতি. অপি চ সমাধিজা পীতি রতি চ জাযতি. তস্স ৰিচারারম্মণং. তেসং ৰূপসমা অজ্ঝত্তং চেতো সম্পসীদতি. যে ৰিতক্কৰিচারা দ্ৰে ধম্মানুস্সরিতব্বা. পচ্চুপ্পন্না দরণিতব্বং. তেসং ৰূপসমা একোদিভাৰং চিত্তেকগ্গতং হোতি. তস্স একোদিভাৰেন পীতি পারিপূরিং গচ্ছতি. যা পীতি, তং সোমনস্সিন্দ্রিযং, যং সুখং, তং সুখিন্দ্রিযং. যা চিত্তেকগ্গতা, অযং সমাধি. তং দুতিযং ঝানং চতুরঙ্গসমন্নাগতং. সো পীতিযা ৰিরাগা যাতি ওজহি জল্লসহগতং.

৭৩. তত্থ সোমনস্সচিত্তমুপাদানন্তি চ সো তং ৰিচিনন্তো উপেক্খমেৰ মনসিকরোতি. সো পীতিযা ৰিরাগা উপেক্খকো ৰিহরতি. যথা চ পীতিযা সুখমানিতং, তং কাযেন পটিসংৰেদেতি সম্পজানো ৰিহরতি. যেন সতিসম্পজঞ্ঞেন উপেক্খাপারিপূরিং গচ্ছতি. ইদং ততিযং ঝানং চতুরঙ্গসমন্নাগতং.

তথা ¶ কাযিকস্স সুখস্স পহানায পঠমে ঝানে সোমনস্সিন্দ্রিযং নিরুজ্ঝতি. দুতিযে ঝানে দুক্খিন্দ্রিযং নিরুজ্ঝতি. সো সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি ¶ . তত্থ চতূহি ইন্দ্রিযেহি উপেক্খা পসাদা হোতি, দুক্খিন্দ্রিযেন দোমনস্সিন্দ্রিযেন সুখিন্দ্রিযেন সোমনস্সিন্দ্রিযেন চ. তেসং নিরোধা উপেক্খাসম্পজঞ্ঞং হোতি, তত্থ সুখিন্দ্রিযেন সোমনস্সিন্দ্রিযেন চ অসতি হোতি, তেসং নিরোধা সতিমা হোতি, দুক্খিন্দ্রিযেন দোমনস্সিন্দ্রিযেন চ অসম্পজঞ্ঞং, তেসং নিরোধা সম্পজঞ্ঞং হোতি, ইতি উপেক্খায চ সঞ্ঞা, সতো সম্পজানো চিত্তেকগ্গতা চ ইদং ৰুচ্চতে চ চতুত্থং ঝানং.

তত্থ যো রাগচরিতো পুগ্গলো তস্স সুখিন্দ্রিযঞ্চ সোমনস্সিন্দ্রিযঞ্চ; যো দোসচরিতো পুগ্গলো তস্স দুক্খিন্দ্রিযঞ্চ দোমনস্সিন্দ্রিযঞ্চ; যো মোহচরিতো পুগ্গলো তস্স অসতি চ অসম্পজঞ্ঞঞ্চ.

তত্থ ¶ রাগচরিতস্স পুগ্গলস্স ততিযে ঝানে চতুত্থে চ অনুনযো নিরুজ্ঝতি, দোসচরিতস্স পঠমে ঝানে দুতিযে চ পটিঘং নিরুজ্ঝতি, মোহচরিতস্স পুগ্গলস্স পঠমে ঝানে দুতিযে চ অসম্পজঞ্ঞং নিরুজ্ঝতি. ততিযে ঝানে চতুত্থে চ অসতি নিরুজ্ঝতি, এৰমেৰ তেসং তিণ্ণং পুগ্গলানং চত্তারি ঝানানি ৰোদানং গমিস্সন্তি.

তত্থ রাগদোসচরিতস্স পুগ্গলস্স অসম্পজঞ্ঞঞ্চ অনুনযো চ পটিঘঞ্চ, তেন হানভাগিযং [পহানভাগিযং (পী. ক.)] ঝানং হোতি. তত্থ ¶ রাগমোহচরিতস্স পুগ্গলস্স অনুনযত্তং চ আদীনৰং দস্সিতা, তং তস্স হানভাগিযং ঝানং হোতি. তত্থ দোসমোহচরিতস্স পুগ্গলস্স পটিঘো চ অসতি চ অসম্পজঞ্ঞঞ্চ আদীনৰং দস্সিতা তেন তস্স হানভাগিযং ঝানং হোতি.

তত্থ রাগদোসমোহসমভাগচরিতস্স পুগ্গলস্স ৰিসেসভাগিযং ঝানং হোতি, ইমানি চত্তারি ঝানানি সত্তসু পুগ্গলেসু নিদ্দিসিতব্বানি. চতূসু চ সমাধীসু ছন্দসমাধিনা পঠমং ঝানং, ৰীরিযসমাধিনা দুতিযং ঝানং, চিত্তসমাধিনা ততিযং ঝানং, ৰীমংসাসমাধিনা চতুত্থং ঝানং. অপ্পণিহিতেন পঠমং ঝানং, সুঞ্ঞতায দুতিযং ঝানং, অনিমিত্তেন ততিযং ঝানং, আনাপানস্সতিযা চতুত্থং ঝানং. কামৰিতক্কব্যাপাদানঞ্চ তং তং ৰূপসমেন পঠমং ঝানং হোতি, ৰিতক্কৰিচারানং ৰূপসমেন দুতিযং ঝানং, সুখিন্দ্রিযসোমনস্সিন্দ্রিযানং ৰূপসমেন ততিযং ঝানং, কাযসঙ্খারানং ৰূপসমেন চতুত্থং ঝানঞ্চ. চাগাধিট্ঠানেন পঠমং ঝানং, সচ্চাধিট্ঠানেন দুতিযং ঝানং, পঞ্ঞাধিট্ঠানেন ততিযং ঝানং, উপসমাধিট্ঠানেন চতুত্থং ঝানং. ইমানি চত্তারি ঝানানি সঙ্খেপনিদ্দেসেন নিদ্দিট্ঠানি, তত্থ সমাধিন্দ্রিযং পারিপূরিং গচ্ছতি. অনুৰত্তনকানি চত্তারি, তত্থ যো পঠমং ঝানং নিস্সায আসৰক্খযং পাপুণাতি, সো সুখায ¶ পটিপদায দন্ধাভিঞ্ঞায দোমনস্সিন্দ্রিযপটিপক্খেন. যো দুতিযং ঝানং নিস্সায আসৰানং খযং পাপুণাতি, সো সুখায পটিপদায খিপ্পাভিঞ্ঞায দুক্খিন্দ্রিযপটিপক্খেন. যো ততিযং ঝানং নিস্সায আসৰানং খযং পাপুণাতি, সো সুখায পটিপদায দন্ধাভিঞ্ঞায সোমনস্সিন্দ্রিযপটিপক্খেন. যো চতুত্থং ঝানং ¶ নিস্সায আসৰানং খযং পাপুণাতি, সো সুখায পটিপদায খিপ্পাভিঞ্ঞায সুখিন্দ্রিযপটিপক্খেন গতো.

৭৪. যানি ¶ চত্তারি ঝানানি, তেসং ঝানানং ইমানি অঙ্গানি, তেসং অঙ্গানং সমূহো [সম্মোহো (পী. ক.)] অস্স অঙ্গা, অযং ঝানভূমি কো ৰিসেসোতি অস্স ৰিসেসো. ইমে সম্ভারা তেহি অযং সমুদাগমো, তস্স সমুদাগমস্স অযং উপনিসা, তায উপনিসায অযং ভাৰনা. তস্সা ভাৰনায অযং আদীনৰো. তেন অযং পরিহানি. কস্স পরিহানীতি তদুপগজ্ঝাযিনো [তদুপকজ্ঝাযিনো (পী. ক.)]. তং যথা ভণিতং পচ্চৰেক্খন্তো অযং ৰিসেসো. তেন ৰিসেসেন অযং অস্সাদো, সো কস্স অস্সাদো অঝানিযা ঝাযিনো, তস্সা অঝানিযা ঝাযিনো, ইদং কল্লিতা কোসল্লে ঠিতজ্ঝানং অনোমদ্দিযতং গচ্ছতি ঝানবলং, ঝানবলে ঠিতস্স অযং পারমিপ্পত্তস্স ইমানি ঝানঙ্গানি অনাৰিলসঙ্কপ্পো পঠমে ঝানে ঝানঙ্গানি ভাৰী. সো পীতি তদনুসারিত্তাৰ পঠমে ঝানে ঝানঙ্গং তস্সঙ্গুনো চ ধম্মা তদভিসন্নিতায চ. পীতি দুতিযে ঝানে ঝানঙ্গধম্মতা খো পন তথা পৰত্তস্স সহগতং ঝানঙ্গধম্মং সসুখতায অজ্ঝত্তং সম্পসাদো দুতিযে ঝানে ঝানঙ্গং মনোসম্পসাদনতায ¶ তদভিসন্নিতায চ. পীতি দুতিযে ঝানে ঝানঙ্গং অজ্ঝত্তং সম্পসাদনং সমাধিতা [সমাধিকা (পী.)] পীতি দুতিযে ঝানে ঝানঙ্গং, চেতসো একোদিভাৰো দুতিযে ঝানে ঝানঙ্গং, উপেক্খা ফস্সতা ততিযে ঝানে ঝানঙ্গং, সুখং তস্স অঙ্গন্তি চ. চেতসো একোদিভাৰো চতুত্থে ঝানে ঝানঙ্গং, উপেক্খা অদুক্খমসুখা চতুত্থে ঝানে ঝানঙ্গং, অভিনিসাভূমি উপেক্খাসতিপারিসুদ্ধি চতুত্থে ঝানে ঝানঙ্গং. সতিপারিসুদ্ধি চ অনেকজ্ঝাভূমীসু ঝানঙ্গসমাযুত্তা পীতি চেতসো একোদিভাৰো চতুত্থে ঝানে ঝানঙ্গং.

তত্থ কতমা ঝানভূমি? সৰিতক্কে সৰিচারে ৰিৰেকা অনুগতা পঠমে ঝানে ঝানভূমি. অৰিতক্কে অৰিচারে অজ্ঝত্তং সম্পসাদনং জনিতং পীতিমনুগতা দুতিযে ঝানে ঝানভূমি. সুখসাতসমোহিতা সপ্পীতিকা ততিযে ঝানে ঝানভূমি. তস্স সুখদুক্খসহগতা অভিনীহারসহগতা চতুত্থে ঝানে ঝানভূমি. অপ্পমাণসহগতা সত্তারম্মণা পঠমে ঝানে ঝানভূমি. অভিভূমিআযতনসহগতা রূপসঞ্ঞীসু দুতিযে ঝানে ঝানভূমি. ৰিমোক্খসহগতানং ¶ ৰিমোক্খেসু ততিযে ঝানে ঝানভূমি. অনুপস্সনাসহগতা কাযসঙ্খারা সম্মা চতুত্থস্স ঝানস্স ভূমি.

৭৫. তত্থ ¶ কতমে ঝানৰিসেসা? ৰিৰিচ্চেৰ কামেহি ৰিৰিচ্চ পাপকেহি অকুসলেহি ধম্মেহি চিত্তচেতসিকসহগতা কামধাতুসমতিক্কমনতাপি, অযং ঝানৰিসেসো. অৰিতক্কা চেৰ অৰিচারা চ সপ্পীতিকায সতিসহগতায পীতিসহগতা সঞ্ঞামনসিকারা সমুদাচরন্তি. অযং ¶ ঝানৰিসেসো. অৰিতক্কায ভূমিযা অৰিচারেযেৰ সতি অনুগতা উপেক্খাসহগতা মনসিকারা সমুদাচরন্তি. তদনুধম্মতায চ সতি সণ্ডহতি [সন্দহতি (পী.)]. তঞ্চ ভূমিং উপসম্পজ্জ ৰিহরতি, অযং ঝানৰিসেসো. সতিপারিসুদ্ধিসহগতা সঞ্ঞামনসিকারা সমুদাচরন্তি, তঞ্চ ভূমিং উপসম্পজ্জ ৰিহরতি, অযং ঝানৰিসেসো. ৰিঞ্ঞাণঞ্চাযতনসহগতায ভূমিযং আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি, তঞ্চ ভূমিং উপসম্পজ্জ ৰিহরতি, অযং ঝানৰিসেসো.

ঝানসম্ভারা নেক্খম্মৰিতক্কো সম্ভারো কামৰিতক্কৰিনোদনাধিপ্পাযতা. অব্যাপাদৰিতক্কো সম্ভারো ব্যাপাদৰিতক্কপটিৰিনোদনাধিপ্পাযতা. অৰিহিংসাৰিতক্কো সম্ভারো ৰিহিংসাৰিতক্কপটিৰিনোদনাধিপ্পাযতা. ইন্দ্রিযেসু গুত্তদ্ৰারতা অপ্পিচ্ছতা সম্ভারো পরিসুদ্ধাজীৰো চতুন্নং সমাপত্তীনং সম্ভারো অকম্মস্স ৰিহারিতা. মগ্গসম্ভারো সমাপত্তিপজ্জনতা. ফলসম্ভারো ঝাননিব্বত্তিতায ঝানসমুদাগমো. কুসলহেতু যং ঝানং সমুদযং গচ্ছন্তি কো চ [কোচি (ক.)] ন কুতোচি নেক্খম্মপ্পত্তা সমুদাগচ্ছন্তি. আলম্বনিরোধসমাধি সন্তো সমুদাগচ্ছন্তি. অৰীতিক্কন্তা সমুদাগচ্ছন্তি. সুখিন্দ্রিযং সোমনস্সিন্দ্রিযং পহানায তে চ অব্যাপজ্জতায সমুদাগচ্ছন্তি. তং পন সন্ধায সমুদাগচ্ছন্তি. অপরিদাহনায সমুদাগচ্ছন্তি. অযং ঞাণসমুদাগমো.

৭৬. তত্থ কতমা উপনিসা? কল্যাণমিত্ততা ¶ ঝানস্স উপনিসা. কল্যাণসম্পৰঙ্কতা ঝানস্স উপনিসা. ইন্দ্রিযেসু গুত্তদ্ৰারতা ঝানস্স উপনিসা. অসন্তুট্ঠিতা কুসলেসু ধম্মেসু ঝানস্স উপনিসা. সদ্ধম্মস্সৰনং ঝানস্স উপনিসা. সংৰেজনিযে ঠানে সংৰিগ্গস্স যোনিসো পধানং. অযং ঝানোপনিসা.

তত্থ ¶ কতমা ভাৰনা? মেত্তাসেৰনা অব্যাপাদৰিতক্কভাৰনা. করুণাসেৰনা অৰিহিংসাৰিতক্কভাৰনা. মুদিতাভাৰনা পীতিসুখসম্পজঞ্ঞা কারিতা. উপেক্খাভাৰনা পস্সৰতা ¶ উপেক্খাভাৰনা অপস্সৰতা উপেক্খা চ অজ্ঝুপেক্খা চ, অসুভসঞ্ঞাভাৰনা দুক্খাপটিপদা দন্ধাভিঞ্ঞা ভৰসন্ধাভিঞ্ঞা ভৰসন্ধানং, সা ছব্বিধা ভাৰনা ভাৰিতা বহুলীকতা অনুট্ঠিতা ৰত্থুকতা যানীকতা পরিচিতা সুসমারদ্ধা. অযং ভাৰনা.

এৰং ভাৰযন্তস্স অযং আদীনৰো. পঠমে ঝানে সঙ্খারসমন্নাগতো এসো ধম্মো অস্সুতো সাসৰো. সচে এস ধম্মো অযং সীলো আসন্নপটিপক্খো চ এস ধম্মো কামো পতিচারো পতিৰিচারো সমাপত্তীনং চ সব্বোল়ারিকো এস ধম্মো ৰিতক্কৰিচারো চ. তত্থ চিত্তং খোভেন্তি, কাযো চেত্থ কিলমতি, কাযম্হি চেত্থ কিলন্তে চিত্তং ৰিহঞ্ঞতি. অনভিনীহারক্খমোৰ অভিঞ্ঞানং ইমে আদীনৰা পঠমে ঝানে.

দুতিযে ¶ ঝানে ইমে আদীনৰা পীতিফরণসহগতো চ এসো ধম্মো, ন সমুদাচারস্সেতি চিত্তং. অসোধযং উপগমো চেস ধম্মো উপগমিপরিস্সযো [উপগমিপরিচযো (পী.)] দোমনস্সপচ্চত্থিকো চেস ধম্মো. তত্থ তত্থ যুত্তীনং পীতি পরজ্জতো চেস ধম্মো দুক্করং হোতি, অৰত্তসন্তাসভূমিপরিৰজ্জযন্তো চতূসু দুক্খতাসু এস ধম্মো অনুৰিদ্ধাপনসদ্ধায [অনুৰিদ্ধা পস্সতিযা (পী.)] দুক্খতায চ ন পলিবোধদুক্খতায চ অভিঞ্ঞাদুক্খতায চ রোগদুক্খতায চ, ইমে আদীনৰা দুতিযে ঝানে.

তত্থ কতমে আদীনৰা ততিযে ঝানে? উপেক্খাসুখসহগতায তত্থ সাতাৰীনং পঞ্চন্নং উপেক্খাসুখং পরিৰত্তিতো এস ধম্মো তেন নিচ্চসঞ্ঞিতানঞ্চ যং হোতি. দুক্খোপনিযং সুখং চিত্তস্স সঙ্খোভতং উপাদায সুখদুক্খায গতো সৰতি. সুখদুক্খানুকতঞ্চ উপাদায অনভিহারক্খমং চিত্তং হোতি. অভিঞ্ঞায সচ্ছিকিরিযাসু সব্বেপি চেতে ধম্মা তীসু ঝানসমাপত্তীসু চতূহি চ দুক্খতাহি অনুৰিদ্ধানং সা ভযা দুক্খতায পলিবোধদুক্খতায চ অভিঞ্ঞায দুক্খতায চ ইমে আদীনৰা ততিযে ঝানে.

তত্থ ¶ কতমে ¶ আদীনৰা চতুত্থে ঝানে? আকিঞ্চঞ্ঞাসমাপত্তিকা তে ধম্মানুসমাপত্তিকা এতিস্সা চ ভূমিযং সাতানং বালপুথুজ্জনানং অনেকৰিধানি দিট্ঠিগতানি উপ্পজ্জন্তি. ওল়ারিকা সুখুমেহি চ রূপসঞ্ঞাহি অনুৰিধানি এতানি ঝানানি সদা অনুদযমেত্তাঝানকলানুদনুকলায সাধারণা, দুক্করা চ সব্বে চত্তারো মহাসম্ভারা সমুদাগতানি চ এতানি ঝানানি অঞ্ঞমঞ্ঞং নিস্সায সমুদাগচ্ছন্তি. এত্থ সমুদাগতা চ এতে ধম্মা ন সমত্তা হোন্তি. অসমুগ্গহিতনিমিত্তা চ এতে ধম্মা পরিহাযন্তি. নিরুজ্ঝন্তি চ এতে ধম্মা ন উপাদিযন্তি নিরুজ্ঝঙ্গানি চ, এতেসং ধম্মানং ঝানানি নিমিত্তানি ন ঝাননিমিত্তসঞ্ঞা ¶ ৰোকিরতি. অপ্পটিলদ্ধপুব্বা চ ঝাযীৰসেন চ ভৰতি [ঝাযী চ ৰসেন চ ভৰতি (পী. ক.)]. ইমেহি আদীনৰেহি অযং ঝানপরিহানি.

৭৭. নিরোধসমাপত্তিযা অপটিসঙ্খায অৰসেসসঞ্ঞিনো আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি, সো নিরোধসমাপত্তিতো পরিহাযতি. আনেঞ্জসঞ্ঞিনো অসঞ্ঞাযতনং সমাপন্নস্স আকিঞ্চঞ্ঞাযতনসহগতা মনসিকারা সমুদাচরন্তি, তঞ্চ ভূমিং ন পজানাতি, সো ততো পরিহাযতি. আকিঞ্চঞ্ঞাযতনং সমাপন্নস্স ৰিঞ্ঞাণঞ্চাযতনসঞ্ঞা মনসিকারা সমুদাচরন্তি, তঞ্চ ভূমিং ন পজানাতি, সো ততো পরিহাযতি. ৰিঞ্ঞাণঞ্চাযতনং সমাপন্নস্স রূপসঞ্ঞাসহগতা. ৰিত্থারেন…পে… যাৰ পঠমে ঝানে কামসঞ্ঞাসহগতা কাতব্বা. সকস্স ¶ [সা তস্স (পী. ক.)] পরিহাযতি, কলঙ্কজ্ঝানে কলঙ্কং ঝাযতি, পরিসমন্ততো ঝাযতি, ভিন্দন্তো ঝাযতি, ন সজ্ঝাযতি, আযূহন্তো ঝাযতি, কিঞ্চি চ নিপরিচিতো ঝাযতি. অতিৰিধাৰন্তো ঝাযতি, অতিমঞ্ঞন্তো ঝাযতি, কাযসঙ্খারে অপ্পটিসম্ভারে ঝাযতি, পরিযুট্ঠানস্স নিস্সরণং অজানন্তো ঝাযতি, নীৰরণাভিভূতো ঝাযতি, অস্সাপত্তিমনসিকরোন্তো ঝানস্স অস্সাদো কামরাগপরিযুট্ঠানং পহানং ঝানস্স অস্সাদো কামরাগহেতূনং ধম্মানং উদযন্তি, নিরুজ্ঝঙ্গানি এতেসং ধম্মানং ঝানানি উপরিমা সুখুপেক্খা কামকম্মকিলেসানং পহানং অস্সাদো, এৰং খো পুন ঝানস্স অস্সাদো মহাসংৰাসমপ্পীল়িতে লোকসংনিৰাসে অসম্বোধোকাসা ৰিগমেস্সমিদং ঝানপ্পহানা. অযং পলিরোধমপ্পলিরোধলোকসন্নিৰাসে এসনিধমিদং ঝানং অনমতগ্গসংসারসমাপন্নানং সত্তানং সংসারপ্পহাননা আনিসংসো, যমিদং ঝানস্স ¶ অস্সাদো কাযস্স অঝানিযঝাযিনো ভৰতি. অঝানিযঝানিযঝাযীহি অপরামসন্তো অঝানিযঝাযিতং ঝাযতি, যানি কলঙ্কজ্ঝাযিনো পদানি, তানি অনুধিতানি পটিপক্খে.

৭৮. তত্থ কতমং ঝানকোসল্লং? সমাপত্তিকোসল্লং ঝানকোসল্লং, ঝানৰিসেসকোসল্লং ঝানকোসল্লং, ঝানন্তরিককোসল্লং ঝানকোসল্লং, সমাপত্তিৰুট্ঠানকোসল্লং ঝানকোসল্লং, ঝানে সভাৰকোসল্লং ঝানকোসল্লং, ঝানে আদীনৰকোসল্লং ঝানকোসল্লং, ঝানে নিস্সরণকোসল্লং ঝানকোসল্লং, ঝানফলেন ¶ উপাদায কোসল্লং, ঝানফলেন পটিসঙ্খানফলে অপরিহানধম্মতা নিব্বত্তিঝানে চ কীল়িতাপি ৰিসেসভাগিযং ঝানং পটিলব্ভতি. ইদং পনস্সাতি ভৰহারিতা চ আরম্মণানিমিত্তগ্গাহো অনভিনীহারবলং, চিত্তেকগ্গতা নিমিত্তাসু গতিসহিতা সমথবলেন অসংসীদনঞ্চ ঝানে মগ্গফলং সমথং পৰত্তে সমাধিনো উপেক্খাপলিপুব্বাপরনিমিত্তাসযো পগ্গাহিনো [মগ্গাহিনো (পী.)] সতিবলং তং পৰত্তিতানঞ্চ ৰিপস্সনানং সমঞ্ঞাবলে.

তত্থ ¶ কতমা ঝানপারমিতা? সুপারমিতা মেত্তা কামেসু সত্তা কামসঙ্গসত্তাতি [উদা. ৬৩ উদানে পস্সিতব্বং] যম্হি সুত্তে দেসনায ৰোহারেন দ্ৰে সচ্চানি নিদ্দিট্ঠানি, দুক্খঞ্চ সমুদযো চ, ৰিচযেন হারেন যে সংযোজনীযেসু ধম্মেসু ৰজ্জং ন পস্সন্তি, তে ওঘং তরিস্সন্তীতি নেতং ঠানং ৰিজ্জতি. ন তরিস্সন্তীতি অত্থি এসা যুত্তি চ ৰিচযো চ ইদং নু কিস্স পদট্ঠানং, কামেসু সত্তাতি পঞ্চ কামগুণা, তং কামতণ্হায পদট্ঠানং. সংযোজনে ৰজ্জমপস্সমানাতি অৰিজ্জায পদট্ঠানং, ন হি জাতু সংযোজনসঙ্গসত্তা ওঘং তরেয্যুং ৰিপুলং মহন্তন্তি উপাদানস্স পদট্ঠানং. কামেসু সত্তাতি কামা দ্ৰিধা – ৰত্থুকামা চ কিলেসকামা চ, তত্থ ¶ কিলেসকামা কামতণ্হা কামতণ্হায যুত্তা ভৰন্তি রূপতণ্হা ভৰতণ্হা লক্খণেন হারেন, সংযোজনে ৰজ্জমপস্সমানাতি সংযোজনস্স. যো তত্থ ছন্দরাগো তস্স কিং পদট্ঠানং? সুখা ৰেদনা দ্ৰে চ ইন্দ্রিযানি – সুখিন্দ্রিযঞ্চ সোমনস্সিন্দ্রিযঞ্চ. ইতি সুখায ৰেদনায গহিতায তযোপি ৰেদনা গহিতা হোন্তি. ৰেদনাক্খন্ধে গহিতে সব্বে পঞ্চক্খন্ধা গহিতা হোন্তি. রূপসদ্দগন্ধরসফোট্ঠব্বা গহিতা, ৰত্থুকামেসু ¶ গহিতেসু সব্বানি ছ বাহিরানি আযতনানি গহিতানি হোন্তি. অজ্ঝত্তিকবাহিরেসু আযতনেসু যো সতো, অযং ৰুচ্চতে লক্খণো হারো, তত্থ যো ওল়ারিকম্হি কিলেসে অজ্ঝাৰসিতো সব্বকিলেসেসু যো ন ততো সুখুমতরেসু ন ৰীতরাগো ভৰতি. তত্থ বাহিরসংযোজনং মমন্তি অজ্ঝত্তসংযোজনং অহন্তি. তত্থ ভগৰতো কো অধিপ্পাযো? যে ওঘং তরিতুকামা তে সংযোজনীযেসু ধম্মেসু আদীনৰানুপস্সিনো ৰিহরিস্সন্তীতি অযমেত্থ ভগৰতো অধিপ্পাযো. কামেসু সত্তাতি যেসু চ সত্তা যেন চ সত্তা যেসঞ্চ সত্তা অযং চতুব্বিধো আকারো সব্বেসং হারভাগিযো.

৭৯. তত্থ কতমানি তীণি ৰিপল্লাসানি পদট্ঠানানি চ? চিত্তৰিপল্লাসস্স দিট্ঠিৰিপল্লাসস্স সঞ্ঞাৰিপল্লাসস্স তযো ৰিপল্লাসা তীণি অকুসলমূলানি পদট্ঠানং. তীণি অকুসলমূলানি ¶ হীনপ্পণীতকারিযকম্মস্স পদট্ঠানং. চতুন্নঞ্চ উপাদানানং দোসো অকুসলমূলং দিস্সতি. হীনপ্পণীতকারিযকম্মস্স পদট্ঠানং. যথা মাতুযা ৰা পিতুনো ৰা অঞ্ঞতরস্স ৰা পুন উল়ারস্স ভিক্খুনো অভযং দেতি. তত্থ অঞ্ঞো মিচ্ছা পটিপজ্জেয্য কাযেন ৰা ৰাচায ৰা. তত্থ সো ব্যাপাদমুপাদায তেসং উল়ারানং রক্খাৰরণগুত্তিযা অনুপালযন্তো যো উল়ারানং অভযং দেতি. তেসং অভযে দিন্নে যো তত্থ মিচ্ছা পটিপজ্জেয্য. তত্থ সো ব্যাপাদং উপাদাযন্তো দোসজং কম্মং করোতি. যো তত্থ অসাধু ইন্দ্রিযা নীৰরণং যং তেসং অভযং দক্খিণতো সঞ্ঞং ইদং পণীতং কারণং মযা পুন তত্থ মিচ্ছাপটিপত্তি অযং ব্যাপাদো হীনগমিৰকম্মং লোভো মোহো চ ইমানি নীৰরণানি ৰচনানি তানি চত্তারি উপাদানানি ¶ তেহি চতূহি উপাদানেহি যো সো উপাদানো ইত্থী ৰা পুরিসো ৰা তেসং পঞ্চক্খন্ধানং তেযেৰ উপাদানো সমুদযো ইদং দুক্খঞ্চ সমুদযো চ সোযেৰ দেসনাহারো.

তত্থ কামেসু যে ন পজ্জন্তি, তে আদীনৰানুপস্সনায পজ্জন্তি. ইতিস্সা কামধাতুযা নিক্খমিতুকামতা, অযং ৰুচ্চতি নেক্খম্মচ্ছন্দো. যো তত্থ অনভিসঙ্খারানং কিঞ্চি ৰিসোধেতি তস্স ধাৰরা ৰা, অযং অব্যাপাদচ্ছন্দো. কিঞ্চি ৰিহিংসতি, অযং ৰিহিংসাছন্দো. ইতি নেক্খম্মাভিনীহতা তযো ছন্দা – নেক্খম্মচ্ছন্দো অব্যাপাদচ্ছন্দো অৰিহিংসাছন্দো. তত্থ ¶ ¶ নেক্খম্মচ্ছন্দো অলোভো; অব্যাপাদচ্ছন্দো অদোসো; অৰিহিংসাছন্দো অমোহো. ইমানি তীণি কুসলমূলানি অট্ঠসু সম্পত্তেসু পরহিতানি, তেসংযেৰ চতুন্নং উপাদানানং নিরোধায সংৰত্তন্তি. সচে ৰা পুন কম্মং করেয্য কণ্হং ৰা সুক্কং ৰা তস্স ৰিপাকহানায সংৰত্তন্তি. ইদং কম্মং অকণ্হং অসুক্কং কম্মক্খযায সংৰত্ততি. তত্থ যো তিণ্ণং অকুসলমূলানং নিরোধো, অযং নিরোধো. সোযেৰ মগ্গো তত্থ পটিপদানি ইমানি দ্ৰে সচ্চানি ইমানি চত্তারি সচ্চানি আৰট্টো হারো.

কামেসু সত্তাতি যে সেক্খা, তে একেনেৰাকারেন সত্তা. যে পুথুজ্জনা, তে দ্ৰীহাকারেহি সত্তা, তস্সাযং পঞ্হো ৰিভজ্জব্যাকরণীযো ৰত্তব্বো. কিঞ্চাপি সোতাপন্নো পটিসেৰনায, নো চ খো অভিনিৰেসে সত্তো যো হি অপচযায পদহতি, ন উপচযায. সেক্খো হি কিলেসৰসেন কামে পটিসেৰতি. পুথুজ্জনো পন কিলেসসমুট্ঠানায কামে পটিসেৰতি. তত্থ কামেসু সত্তানং চতুওঘং তরিস্সতীতি ৰিভজ্জব্যাকরণীযো, অযং ৰিভত্তি.

৮০. পরিৰত্তনোতি কামে যে নেৰ সজ্জন্তি ন চ সংযোজনেহি সংযুত্তা, তে ওঘং তরিস্সন্তি ৰিপুলং মহন্তন্তি. অযং সুত্তস্স পটিপক্খো.

ৰেৰচনন্তি যো কামেসু সত্তো যো চ তত্থ কামানং গুণো, তত্থ ৰিসো সত্তো. যেপি কামানং আহারা ধম্মা, তত্থ ৰিসো সত্তো. তত্থিমং কামানং ৰেৰচনং পাকো রজো সল্লং গণ্ডো ঈতি উপদ্দৰোতি. যানি ৰা পন অঞ্ঞানি ¶ ৰেৰচনানি তত্থ ৰিসো সত্তোতি ৰেৰচনং. সত্তো বন্ধো মুচ্ছিতো গধিতো অজ্ঝোসিতো কামে অজ্ঝাপন্না পরিমুত্তো তব্বহুলৰিহারীতি. যানি ৰা পন অঞ্ঞানি ৰেৰচনানি, অযং ৰেৰচনো নাম. কামপ্পচারপঞ্ঞত্তিযা কিলেসগোচরপঞ্ঞত্তিযা পঞ্ঞত্তা চিত্তন্তি ৰেৰচনং. সত্তো তব্বহুলৰিহারীতি যানি ৰা পন অঞ্ঞানি. ইমে কামপ্পচারপঞ্ঞত্তিযা কিলেসগোচর পঞ্ঞত্তিযা ¶ পঞ্ঞত্তা, বীজপঞ্ঞত্তিযা পঞ্ঞত্তা, সঙ্খারা সংযোজনপঞ্ঞত্তিযা পঞ্ঞত্তা, উপাদানং হেতুপঞ্ঞত্তিযা পঞ্ঞত্তং, পুগ্গলো পুথুপঞ্ঞত্তিযা পঞ্ঞত্তো.

ওতরণোতি ইমায পটিচ্চসমুপ্পাদো দুক্খঞ্চ সমুদযো চ. যে কিলেসা যে সঙ্খারা সংযোজনানি চ পঞ্চসু খন্ধেসু সঙ্খারক্খন্ধো ধম্মাযতনেসু ¶ অকুসলা ধম্মাযতনানি ইন্দ্রিযেসু সুখিন্দ্রিযঞ্চ, সোমনস্সিন্দ্রিযঞ্চ, অযং ইন্দ্রিযোতরণো.

সোধনোতি এত্তকো. এসেৰ আরম্ভো নিদ্দিসিতব্বো সুত্তত্থো.

অধিট্ঠানোতি ইমে ধম্মা অত্থি একত্ততায পঞ্ঞত্তা অত্থি ৰেমত্ততায. যে সঞ্ঞা বাহিরো কামে, তে ৰেমত্ততায পঞ্ঞত্তা. পঞ্চসু কামগুণেসু সত্তাতি পরিযুট্ঠানৰিপল্লাসা ৰেমত্ততায পঞ্ঞত্তা ওঘং তরেয্যুং. ৰিপুলং মহন্তন্তি অৰিজ্জা একত্ততায পঞ্ঞত্তা.

পরিক্খারোতি তস্স কো হেতু কো পচ্চযো? আরম্মণপচ্চযতায পচ্চযো. অযোনিসো চ মনসিকারো সন্নিস্সযস্স পচ্চযতায পচ্চযো. অৰিজ্জা সমনন্তরপচ্চযতায পচ্চযো. রাগানুসযো হেতুপচ্চযতায পচ্চযো. অযং হেতু, অযং পচ্চযো.

সমারোপনো ¶ পচ্চযোতি যে কামেসু সত্তা সুগতা সুরূপাতি অযং কামধাতুযা ছন্দো রাগো তে অপুঞ্ঞমযা সঙ্খারা. তে কিং পচ্চযা? অৰিজ্জা পচ্চযা. তে কিস্স পচ্চযা? ৰিঞ্ঞাণস্স পচ্চযা. ইতি অৰিজ্জাপচ্চযা সঙ্খারা. সঙ্খারপচ্চযা ৰিঞ্ঞাণং যাৰ জরামরণং এৰমেতস্স কেৰলস্স মহতো দুক্খক্খন্ধস্স সমুদযো হোতি একং সুত্তং গতং. পঞ্চনীৰরণিকং সুত্তং কাতব্বং.

৮১. তত্থ কতমো দেসনাহারো নাম? যা চ অভিজ্ঝা যো চ ব্যাপাদো যঞ্চ উদ্ধচ্চং, অযং তণ্হা. যঞ্চ থিনমিদ্ধং, যঞ্চ কুক্কুচ্চং যা চ ৰিচিকিচ্ছা, অযং দিট্ঠি. যা পন কাযস্স অকম্মনিযতা কিঞ্চাপি তং মিদ্ধং নো তু সভাৰকিলেসতায কিলেসো, ইতি যা চ চিত্তসল্লীযনা যা চ কাযাকম্মনিযতা, অযং পক্খোপকিলেসো ন তু সভাৰকিলেসো. তত্থ অত্তসঞ্ঞানুপচিত্তং কিলমথো কুক্কুচ্চানুপচিত্তং থিনং যা চিত্তস্স লীযনা, ইতি ইমে পঞ্চ নীৰরণা চত্তারি নীৰরণানি সভাৰকিলেসা থিনমিদ্ধং নীৰরণপক্খোপকিলেসো. যথা চত্তারো আসৰা সভাৰআসৰতায আসৰা নো তু চিত্তসাসৰতায ¶ আসৰা. সভাৰতায আসৰা. পক্খে আসৰতায আসৰা. অথ পনাহ সুত্তন্তং যেন তে সম্পযুত্তা ৰা ৰিপ্পযুত্তা ৰা আসৰা, তেযেৰ এতে ৰত্তব্বা সাসৰা ৰা অনাসৰা ৰা.

তত্থ ¶ ¶ কতমো ৰিচযো. অভিজ্ঝা কামতণ্হা রূপতণ্হা ভৰতণ্হা. যং ৰা পন কিঞ্চি অজ্ঝোসানগতং সাসৰা অভিজ্ঝিতস্স মেত্তানুপস্সিয যো অনত্থং চরতি. তত্থ যো ব্যাপাদং উপ্পাদেতি, অচরি চরিস্সতীতি. এৰং নৰ আঘাতৰত্থূনি কত্তব্বানি, তস্সেৰং ব্যাপাদানুপস্সিস্স কিলেসো যো পরিদাহো কাযকিলমথো অকম্মনিযতা মিদ্ধং. চিত্তানুপস্সিস্স পটিঘাতেন খিযনা, ইদং থিনমিদ্ধং. তত্থ অধিকরণঅৰূপসমো, ইদং উদ্ধচ্চং. যং কিং কসথমীতি [করথমীতি (পী. ক.)] ইদং কুক্কুচ্চং. যং যথা ইদং সন্তীরণং, অযং ৰিচিকিচ্ছা. তত্থ অৰিজ্জা চ তণ্হা চ অত্থি, ইদং পরিযুট্ঠানং. আৰরণং নীৰরণং ছদনং উপক্কিলেসো চ অত্থি, ইদং কামচ্ছন্দো কামরাগপরিযুট্ঠানস্স পদট্ঠানং. ব্যাপাদো ব্যাপাদপরিযুট্ঠানস্স পদট্ঠানং. থিনমিদ্ধং থিনমিদ্ধপরিযুট্ঠানস্স পদট্ঠানং. উদ্ধচ্চকুক্কুচ্চং অৰিজ্জাপরিযুট্ঠানস্স পদট্ঠানং. ৰিচিকিচ্ছা ৰিচিকিচ্ছাপরিযুট্ঠানস্স পদট্ঠানং. কামরাগপরিযুট্ঠানং অনুসযসংযোজনস্স পদট্ঠানং. ব্যাপাদপরিযুট্ঠানং পটিঘসংযোজনস্স পদট্ঠানং. থিনমিদ্ধপরিযুট্ঠানং মানসংযোজনস্স পদট্ঠানং. অৰিজ্জাপরিযুট্ঠানঞ্চ ৰিচিকিচ্ছাপরিযুট্ঠানঞ্চ দিট্ঠিসংযোজনস্স পদট্ঠানং.

তত্থ কতমো লক্খণো হারো? কামরাগপরিযুট্ঠানে ৰুত্তে সব্বানি পরিযুট্ঠানানি ৰুত্তানি হোন্তীতি. সংযোজনেসু ৰুত্তেসু সব্বসংযোজনানি ৰুত্তানি হোন্তি. অযং লক্খণো হারো.

৮২. তত্থ কতমো চতুব্যূহো হারো? যে ইমে পঞ্চ নীৰরণা ঝানপটিপক্খো সো দুক্খসমুদযো. যং ফলং, ইদং দুক্খং. তত্থ কামচ্ছন্দস্স ¶ নেক্খম্মৰিতক্কো পটিপক্খো; ব্যাপাদস্স অব্যাপাদৰিতক্কো পটিপক্খো; তিণ্ণং নীৰরণানং অৰিহিংসাৰিতক্কো পটিপক্খো. ইতি ইমে তযো ৰিতক্কা. নেক্খম্মৰিতক্কো সমাধিক্খন্ধং ভজতি. অব্যাপাদৰিতক্কো সীলক্খন্ধং ভজতি. অৰিহিংসাৰিতক্কো পঞ্ঞাক্খন্ধং ভজতি. ইমে তযো খন্ধা. অরিযো অট্ঠঙ্গিকো মগ্গো নীৰরণপ্পহানায সংৰত্ততি. যং নীৰরণপ্পহানং, অযং নিরোধো. ইমানি চত্তারি সচ্চানি. অযং চতুব্যূহো হারো.

তত্থ কতমো আৰট্টো হারো? পঞ্চ নীৰরণানি দস ভৰন্তি. যদপি অজ্ঝত্তং সারজ্জতি ¶ , তদপি নীৰরণং. যদপি বহিদ্ধা সারজ্জতি, তদপি নীৰরণং, এৰং ¶ যাৰ ৰিচিকিচ্ছা ইমে দস নীৰরণা. অজ্ঝত্তবহিদ্ধা কিলেসা ইমানি দ্ৰে সংযোজনানি অজ্ঝত্তসংযোজনঞ্চ বহিদ্ধাসংযোজনঞ্চ. তত্থ অহন্তি অজ্ঝত্তং, মমন্তি বহিদ্ধা. সক্কাযদিট্ঠি অজ্ঝত্তং, একসট্ঠি দিট্ঠিগতানি বহিদ্ধা. যো অজ্ঝত্তং ছন্দরাগো রূপেসু অৰীতরাগো ভৰতি অৰীতচ্ছন্দো. এৰং যাৰ ৰিঞ্ঞাণে, অযং অজ্ঝত্তা তণ্হা. যং ছসু বাহিরেসু আযতনেসু তীসু চ ভৰেসু অজ্ঝোসানং, অযং বহিদ্ধা তণ্হা. ইমানি দ্ৰে সচ্চানি সংযোজনানি সংযোজনীযা চ ধম্মা. তত্থ সংযোজনেসু ধম্মেসু যা নিব্বিদানুপস্সনা চ, অযং মগ্গো. যং সংযোজনপ্পহানং, অযং নিরোধো. অযং আৰট্টো হারো.

তত্থ কতমো ৰিভত্তিহারো? সংযোজনন্তি ন এতং একংসেন. মানসংযোজনং দিট্ঠিভাগিযন্তি ন তং একংসেন অদিট্ঠমানং নিস্সাযমানং ¶ ন পজহতি. যো পঞ্চ উদ্ধম্ভাগিযো মানো কিঞ্চাপি সো দিট্ঠিপক্খে সিযা. ন তু ওরম্ভাগিযং সংযোজনং তস্স পহানায সংৰত্ততীতি. যো চ অহংকারো ন পৰিদ্ধোযং পনস্স এৰং হোতি. কদাসু নামাহং তং সন্তং আযতনং সচ্ছিকত্ৰা উপসম্পজ্জ ৰিহরিস্সামি, যং অরিযা সন্তং আযতনং উপসম্পজ্জ ৰিহরিস্সন্তীতি, অযং অভিজ্ঝা ন চ তং নীৰরণং. অত্থি পন অরহতো কাযকিলেসমিদ্ধঞ্চ ওক্কমতি ন চ তং নীৰরণং তস্স থিনমিদ্ধং নীৰরণন্তি. ন একংসেন. অযং ৰিভত্তিহারো.

পরিৰত্তনোতি পঞ্চ নীৰরণা পঞ্চঙ্গিকেন ঝানেন পহানং গচ্ছন্তি. অযং তেসং পটিপক্খো নীৰরণো অসুকস্স পহীনাতি ন অঞ্ঞানুমিনিতব্বং, পরমত্থমজ্ঝত্তং, অযং পরিৰত্তনা.

তত্থ কতমো ৰেৰচনো? কামচ্ছন্দো ছন্দরাগো পেমং নিকন্তীতি ৰেৰচনং. নীৰরণং ছদনং উপক্কিলেসো পরিযুট্ঠানন্তি ৰেৰচনং.

পঞ্ঞত্তীতি অৰিজ্জাপচ্চযা কিচ্চপঞ্ঞত্তিযা [পচ্চাপঞ্ঞত্তিযা (ক.)] পঞ্ঞত্তি, ব্যাপাদো ৰিক্খেপপঞ্ঞত্তিযা পঞ্ঞত্তি, থিনমিদ্ধং অসমুগ্ঘাতপঞ্ঞত্তিযা পঞ্ঞত্তি. এৰং সব্বেপি এতে পঞ্চ নীৰরণা ইমম্হি সুত্তে ৰিক্খেপপঞ্ঞত্তিযা পঞ্ঞত্তি.

তত্থ কতমো ওতরণো? ইমে পঞ্চ নীৰরণা অৰিজ্জা চ তণ্হা চ তত্থ অৰিজ্জামূলা ¶ নীৰরণা. যা তণ্হা ইমে সঙ্খারা, তে অৰিজ্জাপচ্চযা ¶ ইমে ¶ দ্ৰে ধম্মা পঞ্চসু খন্ধেসু সঙ্খারক্খন্ধপরিযাপন্না, আযতনেসু ধম্মাযতনং, ধাতূসু ধম্মধাতু, ইন্দ্রিযেসু ইমেসং ধম্মানং পদট্ঠানং সুখিন্দ্রিযস্স চ সোমনস্সিন্দ্রিযস্স চ ইত্থিন্দ্রিযস্স চ পুরিসিন্দ্রিযস্স চ.

তত্থ কতমো সোধনো হারো? ইদং সুত্তং যথা আরব্ভ নিক্খিত্তং সো অত্থো ভাসিতো ইমেহি পঞ্চহি পদেহি.

তত্থ কামচ্ছন্দো চ ব্যাপাদো চ ৰিচিকিচ্ছা চ ন একত্ততায পঞ্ঞত্তা, কামাতি ন একত্ততায পঞ্ঞত্তা, অথ খলু ৰেমত্ততায পঞ্ঞত্তা. অযং অধিট্ঠানো হারো.

তত্থ কতমো পরিক্খারো? কামচ্ছন্দস্স অযোনিসো মনসিকারো সুভারম্মণপচ্চযো; সুভনিমিত্তঞ্চ হেতু. ব্যাপাদস্স অযোনিসো মনসিকারো আঘাতৰত্থূনি চ পচ্চযো; পটিঘানুসযো হেতু. থিনমিদ্ধস্স পটিসংহারো পচ্চযো; পৰত্তিযা কিলমথা চলনা তঞ্চ হেতু. উদ্ধচ্চকুক্কুচ্চস্স রজনীযং আরম্মণিযং অস্সাদিযাকিন্দ্রিযং তাৰ অপরিপুণ্ণঞ্চ ঞাণং পচ্চযো; কামসঞ্ঞা চ দিট্ঠিঅনুসযো চ হেতু. ৰিচিকিচ্ছায নৰ মানৰিধা আরম্মণং মানানুসযো, সোৰ পচ্চযো; ৰিচিকিচ্ছানুসযো হেতু. এতে পঞ্চ ধম্মা সহেতু সপ্পচ্চযা উপ্পজ্জন্তি.

তত্থ কতমো সমারোপনো হারো? ইমে পঞ্চ নীৰরণা চত্তারোপি এতে আসৰা গণ্ডাপি [তণ্হাপি (পী.)] এতে সল্লাপি এতে উপাদানানি এতে. তেসু এৰ বাহিরেসু ধম্মেসু সংকিলেসভাগিযং সুত্তন্তি পঞ্ঞত্তিং গচ্ছতি. অযং সমারোপনো হারো.

নিদ্দিট্ঠং ¶ সংকিলেসিকভাগিযং সুত্তং.

৮৩. মনোপুব্বঙ্গমা ধম্মাতি গাথা.

তত্থ কতমো দেসনা হারো? ইমম্হি সুত্তে কো অত্থো খন্ধৰৰত্থানেন ৰিঞ্ঞাণক্খন্ধং দেসেতি, ধাতুৰৰত্থানেন মনোৰিঞ্ঞাণধাতুং, আযতনৰৰত্থানেন মনাযতনং, ইন্দ্রিযৰৰত্থানেন মনিন্দ্রিযং. তস্স কিং পুব্বঙ্গমা ধম্মা? সংখিত্তেন ছ ধম্মা পুব্বঙ্গমা ধম্মা কুসলমূলানি চ ¶ অকুসলমূলানি চ অনিমিত্তং ইমম্হি সুত্তে কুসলমূলং দেসিতং. তত্থ কতমা মনোপুব্বঙ্গমা ধম্মা? মনো তেসং পুব্বঙ্গমং, যথাপি বলস্স রাজা পুব্বঙ্গমো, এৰমেৰ ¶ ধম্মানং মনোপুব্বঙ্গমা. তত্থ তিৰিধানং পুব্বঙ্গমানং নেক্খম্মচ্ছন্দেন অব্যাপাদচ্ছন্দেন অৰিহিংসাছন্দেন. অলোভস্স নেক্খম্মচ্ছন্দেন পুব্বঙ্গমা. অদোসস্স অব্যাপাদচ্ছন্দেন পুব্বঙ্গমা. অমোহস্স অৰিহিংসাছন্দেন পুব্বঙ্গমা. তত্থ মনোসেট্ঠাতি মনসা ইমে ধম্মা উস্সটা মনেন ৰা নিম্মিতা. মনোৰ ইমেসং ধম্মানং সেট্ঠোতি মনোৰ ইমেসং ধম্মানং সেট্ঠজেট্ঠোতি মনোৰ ইমেসং ধম্মানং আধিপচ্চং করোতীতি মনোসেট্ঠা. মনোজৰাতি ¶ যত্থ মনো গচ্ছতি. তত্থ ইমে ধম্মা গচ্ছন্তীতি মনোজৰা. যথা ৰাতো সীঘং গচ্ছতি অঞ্ঞো ৰা কোচি সীঘং গামকো ৰুচ্চতে ৰাতজৰোতি পক্খিগামিকোতি, এৰমেৰ ইমে ধম্মা মনেন সম্পজাযমানা গচ্ছন্তি, তত্থ ইমে ধম্মা গচ্ছন্তীতি মনোজৰাতি. তে তিৰিধা ছন্দসমুদানিতা অনাৰিলতা চ সঙ্কপ্পো. সত্তৰিধা চ কাযিকং সুচরিতং ৰাচসিকং সুচরিতং, তে দস কুসলকম্মপথা. তত্থ মনসা চে পসন্নেনাতি মনোকম্মং. ভাসতি ৰাতি ৰচীকম্মং. করোতি ৰাতি কাযকম্মং. ইমেহি ইমস্মিং সুত্তে দস কুসলকম্মপথা পরমাপি সন্তা সীলৰতা পরমা. সো ভৰতি ৰিৰত্তিযং ন লোকনিয্যানায ৰাসনাভাগিযং সুত্তং ভৰতি. অযং দেসনা.

তত্থ কতমো ৰিচযো হারো? মনোপুব্বঙ্গমা ধম্মাতি কুসলমূলানি চ অট্ঠঙ্গসম্মত্তানি. ইদং সুত্তং.

যুত্তীতি দসন্নং কুসলকম্মপথানং যো ৰিপাকো, সো সুখৰেদনীযো অব্যাপাদস্সঙ্গমানো. ছাযাৰ অনপাযিনীতি অনুগচ্ছতি অত্থি এসা যুত্তি.

পদট্ঠানন্তি অট্ঠারসন্নং মনোপৰিচারানং পদট্ঠানং. মনোপুব্বঙ্গমা ধম্মাতি সব্বকুসলপক্খস্স ইমে ধম্মা পদট্ঠানং. মনসা চে পসন্নেনাতি যো চেতসো পসাদো, ইদং সদ্ধিন্দ্রিযস্স পদট্ঠানং. ভাসতি ৰাতি সম্মাৰাচায. করোতি ৰাতি সম্মাকম্মন্তস্স চ সম্মাৰাযামস্স চ পদট্ঠানং.

লক্খণোতি ¶ ইতি পুব্বঙ্গমা ধম্মাতি ৰেদনাপুব্বঙ্গমাপি এতে, সঞ্ঞাপুব্বঙ্গমাপি এতে, সঙ্খারপুব্বঙ্গমাপি এতে. যে কেচি ধম্মা সহজাতা সব্বে পুব্বঙ্গমা এতেসং ধম্মানং. ততো নং সুখমন্ৰেতীতি সোমনস্সমপি নং অন্ৰেতি যং সুসুখচ্ছাযা তদাপি নং সুখং তদপি অন্ৰেতি.

৮৪. তত্থ ¶ ¶ কতমো চতুব্যূহো হারো? মনোপুব্বঙ্গমাতি ন ইদং একাদিৰচনং. কিং কারণা? সব্বে যেৰ ইমে ছৰিঞ্ঞাণকাযা, ইমম্হি ভগৰতো কো অধিপ্পাযো? যে সুখেন অত্থিকা, তে মনং পসাদেন্তীতি অযং ইমম্হি সুত্তে ভগৰতো অধিপ্পাযো. অত্থো পুব্বেযেৰ নিদ্দিট্ঠো.

যানি হি কুসলমূলানি, তানি অট্ঠানিসংসমত্তা হেতু, অযং অট্ঠঙ্গিকো মগ্গো. দস ঠানানি দেসনাহেতূনি দেসনাপচ্চযা নিদ্দেসনা চ. তত্থ যং মঞ্ঞে দুক্খেন সহ নামরূপং ৰিঞ্ঞাণসচ্চন্তি অঙ্গেন কুসলমূলং পহীযতি, অযং অপ্পহীনভূমিযং সমুদযো. যং তেসং পহানা, অযং নিরোধো. ইমানি চত্তারি সচ্চানি. অযং আৰট্টো হারো.

মনোপুব্বঙ্গমা ধম্মা, মনোসেট্ঠা মনোমযা;

মনসা চে পসন্নেন, ভাসতি ৰা করোতি ৰা;

ততো নং সুখমন্ৰেতি, ছাযাৰ অনপাযিনীতি.

তং ¶ ন একংসেন সমণস্স ৰা ব্রাহ্মণস্স ৰা পন হোতি. তস্স ৰা মিচ্ছাদিট্ঠিকস্স সকসত্থে চিত্তং পসাদেতি, তেন চ পসন্নেন চিত্তেন ভাসতি ব্যাকরোতি ন তং সুখমন্ৰেতি ন ছাযাৰ অনুগামিনী, দুক্খমেৰ তং অন্ৰেতি. যথা ৰহন্তং চক্কং পদমন্ৰেতি, ইদং তং ৰিভজ্জব্যাকরণীযং. মনসা চে পসন্নেন কাযকম্মং ৰচীকম্মং সুখৰেদনীযন্তি সমগ্গতে সুখৰেদনীযং মিচ্ছগ্গতে দুক্খৰেদনীযং, অযং ৰিভত্তি.

তত্থ কতমো পরিৰত্তনো হারো? মনোপুব্বঙ্গমা ধম্মাতি যং মনসা পদুট্ঠেন ভাসতি ৰা করোতি ৰা দুক্খমস্সানুগামিনী, এতানিযেৰ দ্ৰে সুত্তানি ভাসিতানি এস এৰ চ পটিপক্খো. ৰেৰচনন্তি যদিদং মনোচিত্তং ৰিঞ্ঞাণং মনিন্দ্রিযং মনোৰিঞ্ঞাণধাতু.

পঞ্ঞত্তীতি মনোপুব্বঙ্গমা ধম্মাতি অযং মনো কিঞ্চি পঞ্ঞত্তিযা পঞ্ঞত্তং. ধম্মাতি কুসলকম্মপথপঞ্ঞত্তিযা পঞ্ঞত্তং. মনোসেট্ঠাতি ৰিসিট্ঠপঞ্ঞত্তিযা পঞ্ঞত্তং. মনোজৰাতি সহপঞ্ঞত্তিযা পঞ্ঞত্তং. চিত্তন্তি নেক্খম্মপঞ্ঞত্তিযা পঞ্ঞত্তং. মনসা চে পসন্নেনাতি সদ্ধিন্দ্রিযপঞ্ঞত্তিযা পঞ্ঞত্তং. মনসা চে পসন্নেনাতি অনাৰিলসঙ্কপ্পদুতিযজ্ঝানপঞ্ঞত্তিযা পঞ্ঞত্তং ¶ . মনসা চে পসন্নেনাতি ¶ অস্সদ্ধানং পটিপক্খপঞ্ঞত্তিযা পঞ্ঞত্তং. ভাসতি ৰাতি সম্মাৰাচাপঞ্ঞত্তিযা পঞ্ঞত্তং. করোতি ৰাতি সম্মাকম্মন্তপঞ্ঞত্তিযা পঞ্ঞত্তং. ততো ¶ নং সুখমন্ৰেতীতি ঝানসমাধানং. ইন্দ্রিযেসু মনিন্দ্রিযং. পটিচ্চসমুপ্পাদে ৰিঞ্ঞাণং. মনোপুব্বঙ্গমা ধম্মাতি মেত্তা চ মুদুতা চ ঝানেসু দুতিযং ঝানং ততিযঞ্চ. খন্ধেসু সঙ্খারক্খন্ধপরিযাপন্নো. ধাতূসু ধম্মধাতু, আযতনেসু ধম্মাযতনং. যং কুসলং ইন্দ্রিযেসু সুখিন্দ্রিযঞ্চ সোমনস্সিন্দ্রিযঞ্চ পদট্ঠানং. ইমেসং ধম্মানং পটিচ্চসমুপ্পন্নানং ফস্সপচ্চযা সুখৰেদনীযো ফস্সো সুখৰেদনা মনোপৰিচারেসু সোমনস্সৰিচারো ছত্তিংসেসু পঠমপদেসু ছ সোমনস্সনেক্খম্মস্সিতা. ইতি অযং ওতরণো হারো.

তত্থ কতমো সোধনো হারো? যং অত্থং আরব্ভ ইদং সুত্তং ভাসিতং. সো অত্থো নিযুত্তো এতমত্থং আরব্ভ সুত্তং. অযং সোধনো হারো.

৮৫. তত্থ কতমো অধিট্ঠানো হারো? মনোপুব্বঙ্গমা ধম্মাতি ৰেৰচনপঞ্ঞত্তি, ন একত্তপঞ্ঞত্তি. ধম্মাতি একতো ন ৰেৰচনপঞ্ঞত্তি. মনসা চে পসন্নেনাতি সো পসাদো দ্ৰিধো অজ্ঝত্তঞ্চ অব্যাপাদাৰিক্খম্ভনবহিদ্ধা চ ওকপ্পনতো. সো অজ্ঝত্তপসাদো দ্ৰিধো. সমুগ্ঘাতপসাদো চ ৰিক্খম্ভনপসাদো চ ব্যাপাদপরিযুট্ঠানং. ৰিঘাতো ন মূলপসাদো জাতমূলম্পি ৰা. পসাদো সব্যাপাদং ৰিঘাতেন. ততো নং সুখমন্ৰেতীতি সুখং কাযিকঞ্চ চেতসিকঞ্চ অপ্পিযৰিপ্পযোগোপি পিযসম্পযোগোপি নেক্খম্মসুখম্পি পুথুজ্জনসুখম্পি পীতিসম্বোজ্ঝঙ্গম্পি চেতসিকং সুখং ¶ . যম্পি পস্সদ্ধকাযো সুখং ৰেদেতি, তম্পি কাযিকং সুখং বোজ্ঝঙ্গা চ চেতসিকং সুখং. যম্পি পস্সদ্ধকাযো সুখং ৰেদেসি, তম্পি তঞ্চ সুখপদট্ঠানং পঞ্ঞত্তিযা যথাৰুত্তং তং অপরামট্ঠং কুসলানং ধম্মানং. অন্ৰেতীতি অপ্পনা সন্দিস্সতি ন চাযং ৰা পত্তভূতো অন্ৰেতি. তদিদং সুত্তং দ্ৰীহি আকারেহি অধিট্ঠাতব্বং. হেতুনা চ যো পসন্নমানসো ৰিপাকেন চ যো দুক্খৰেদনীযো.

পরিক্খারোতি ভগৰা পঞ্চসতেন ভিক্খুসঙ্ঘেন নগরং পৰিসতি রাজগহং. তত্থ মনুস্সো পুগ্গলো ভগৰন্তং পরিৰিসতি, তস্স পসাদো উপ্পন্নো কুসলমূলপুব্বযোগাৰচরোপি. সো অঞ্ঞেসঞ্চ অক্খাতি, ইদং ৰাচং ভাসতি ¶ লাভা তেসং, যেসং নিৰেসনং ভগৰা পৰিসতি, অম্হাকম্পি যদি ভৰেয্য মযম্পি ভগৰতো সংপসাদং লচ্ছম্হাতি. যেন ভগৰা তেনঞ্জলিং পণামেত্ৰা ‘‘নমো ভগৰতো নমো ভগৰতো’’তি অব্যাপাদমানো একমন্তে অট্ঠাসি. তদনন্তরে ভগৰা ইমং সুত্তং অভাসিত্থ ‘‘মনোপুব্বঙ্গমা ধম্মা’’তি. সব্বং সুত্তং তথা যং পরেসং ভাসতি ইদং ¶ ৰাচাকম্মং. যং অঞ্জলিং পণামেতি, ইদং কাযকম্মং. যো মনোপসাদো, ইদং মনোকম্মং. তত্থ যং পরেসং পকাসেতি ভাসতি ৰণ্ণং. যেসং ভগৰা নিৰেসনং গচ্ছতীতি. সব্বং তস্স অলোভো কুসলমূলং. যং ভগৰতি মেত্তচিত্তো, তস্স অদোসো কুসলমূলং ¶ . যং অঞ্জলিং পণামেতি মানঞ্চ নিগ্গণ্হাতি, তত্থস্স অমোহো কুসলমূলং পাতুভৰতি. যং উল়ারপঞ্ঞং পটিলভতি, ইদমস্স দিট্ঠিৰিপল্লাসপ্পহানং. যং তথাযেৰ সংৰরো হোতি, ইদমস্স সঞ্ঞাৰিপল্লাসপ্পহানং. যং মনস্স পসাদনং, ইদমস্স চিত্তৰিপল্লাসপ্পহানন্তি অকুসলৰিপল্লাসানং ৰিক্খম্ভনং পহানং পচ্চযো. তীণি কুসলমূলানি যো অনাৰিলচিত্তসঙ্কপ্পো, সো তস্স মনসিকারোতি ৰুচ্চতি. যং কিলেসেহি ৰিক্খম্ভনং ইতি ৰিপল্লাসা চ আরম্মণা সপ্পচ্চযতায পচ্চযো কুসলমূলানি চ সন্দিস্সযতায পচ্চযো, সো চ মনসিকারো হেতুনা ইমিনা পচ্চযেন চিত্তং উপ্পন্নং. তত্থ যং সসত্থারম্মণং চিত্তং পৰত্তং অযং বুদ্ধানুস্সতি. যম্পি ভগৰতো গুণে মনসি করোতি, অযমস্স ধম্মানুস্সতি. তত্থ সতিসম্পজঞ্ঞং হেতু, অযঞ্চ পচ্চযো. ৰাচা পঞ্ঞা হেতু ৰিতক্কৰিচারা পচ্চযো. কাযসঙ্খারা কম্মস্স অভিসঙ্খারো নাম হেতু ৰা অপ্পচ্চযো সুখৰেদনীযস্স কম্মস্স উপচযো হেতুকা কম্মস্স পচ্চযো.

৮৬. তত্থ কতমো সমারোপনো হারো? মনসাযেৰ পসন্নেন সতোযেৰেত্থ পসন্নো অপি চ চিত্তৰোদানা সত্তা ৰিমুচ্চন্তীতি তেন সত্তা চিত্তপুব্বঙ্গমা চিত্তেন পসন্নেন চেতনাপি তত্থ চিত্তভূতা ভৰন্তীতি পটিঘা অযং চেতনানং পসাদেন কাযো চস্স পসাদো ¶ , সো চ আরভতি পসাদেন পসন্নো সঞ্ঞানন্তি চস্স অৰিপরীতা, সো পঞ্চৰিধো ৰিক্খম্ভনা, কাযপস্সম্ভনাযেৰা পসাদো চিত্তসিতো চিত্তং পন পুব্বংযেৰ পসন্নং. অযং সমারোপনা. এৰং পঞ্চন্নম্পি পসাদো. ততো নং সুখমন্ৰেতীতি কতমং ভগৰা নিদ্দিসতি? ন হি অত্তসচ্চং তস্স কম্মস্স ৰিপাকো অন্ৰেতি. তস্স উপাযো অনুগচ্ছতি যদা সিতপচ্চযা উপ্পজ্জতে ¶ সোমনস্সং অৰিপ্পটিসারোপি অন্ৰেতি. অযং সমারোপনো হারো.

মহানাম সক্কস্স সুত্তং [পস্স সং. নি. ৫.১০১৭]. তস্মিং চে সমযে অস্সতো অসম্পজানো কালং করেয্য কামে ভৰতি. অস্সতো অভিসমাহারো যো মা ভাযি, মহানাম, যং তং চিত্তং দীঘরত্তং সদ্ধাপরিভাৰিতং সীলপরিভাৰিতং সুতচাগপরিভাৰিতন্তি ৰিত্থারেন কাতব্বং. চাগেন চ পঞ্ঞায চ কিং দস্সেতি? যা সদ্ধা, সা চেতসো পসাদো. যা অনাৰিলসঙ্কপ্পিতা, সা সদ্ধা. কিং কারণা? অনাৰিললক্খণা. অনাৰিললক্খণা হি সদ্ধা. অপরে ¶ আহু গুণপরিসুদ্ধিনিট্ঠাগমনলক্খণা, যঞ্চ অপরে ৰা ৰচনপটিগ্গহলক্খণা সদ্ধা. অপরো পরিযাযো ¶ অত্তানং যদি এৰং ওকপ্পেতি ‘‘নাহং কিঞ্চি জানামীতি এসা অহং তত্থ অনুঞ্ঞত্তা অনঞ্ঞতা’’তি. অযং সদ্ধাতি. অপরো পরিযাযো একসট্ঠিযা দিট্ঠিগতানং আদীনৰানুপস্সনা অনিচ্চং দুক্খমনত্তাতি. তেন চ পদিট্ঠং ভৰতি যথা গম্ভীরে উদপানে উদকং চক্খুনা পস্সতি ন চ কাযেন অভিসম্ভুনাতি. এৰমস্স অরিযা নিজ্ঝানক্খন্তিযা দিট্ঠি ভৰতি, ন চ সচ্ছিকতা. অযং ৰুচ্চতি সদ্ধা. সা চ লোকিকা. অপরো পরিযাযো খমতি পুথুজ্জনভূতস্স ৰীসতি চাতি কো সক্কাযাধীনা ন নিৰেসো. ন এতং একন্তি নযসঞ্ঞা যথাভূতং দিট্ঠিযা তু খলু মুদূহি পঞ্চহি ইন্দ্রিযেহি দস্সনমগ্গেন পহীনা ভৰন্তি. দিট্ঠেকট্ঠা চ কিলেসা, অযং সদ্ধা.

সোতাপত্তঙ্গমদুক্খাযং ভূমিযং পরিপুণ্ণা ৰুচ্চতি. তস্মিংযেৰ ভূমিযং সেক্খসীলং অরিযা ধারন্তি ৰুচ্চতি. তস্মিংযেৰ ভূমিযং মুদুপঞ্ঞা পঞ্ঞিন্দ্রিযন্তি ৰুচ্চতি. তস্মিংযেৰ ভূমিযং খন্ধেহি অনত্থিকতা, অযং চাগো. তস্মা সদ্ধা চাগাধিট্ঠানেন নিদ্দিসিতব্বা. যতিকেন [তেন (ক.)] ভিয্যো মনেন সা হিস্স ৰিপরীতা দিট্ঠিকা অস্সদ্ধা, সা নযনউপধীসু পমত্তা সমাদিন্না. তত্থ সদ্ধিন্দ্রিযং যো কামং পরিৰিস্সন্তি ইতি সন্তপাপপটিনিস্সগ্গা ন চাগাধিট্ঠানং পঞ্ঞিন্দ্রিযেন পঞ্ঞাধিট্ঠানং, সীলেন উপসমাধিট্ঠানং. ইমে চত্তারো ¶ ধম্মা সীলং পরিভাৰযন্তি সদ্ধা সীলং চাগো চ পঞ্ঞাতি. তত্থ সদ্ধায ওঘং তরতি. যং সীলং, অযং অপ্পমাদো. যো চাগো, ইদং পঞ্ঞায কম্মং. যা পঞ্ঞা, ইদং পঞ্ঞিন্দ্রিযং, তত্থ যং সদ্ধিন্দ্রিযং. তং তীসু অৰেচ্চপ্পসাদেসু. যং সীলং, তং সদ্ধিন্দ্রিযেসু. যো চাগো, সো চতূসু ¶ ঝানেসু. যা পঞ্ঞা, সা সচ্চেসু, সতি সব্বত্থগামিনী. তস্স সেক্খস্স ভদ্দিকা ভতি, ভদ্দিকো অভিসম্পরাযো. তস্স সম্মুট্ঠস্সতিকস্স সীলং করোন্তস্স ন কাযসম্মুট্ঠস্সতিতায তানি ৰা ইন্দ্রিযানি তং ৰা কুসলমূলং কম্মৰিপাকং ভৰতি. তস্স তিকস্স অত্থনিদ্দেসো. তত্থ সদ্ধা সীলং চাগো পঞ্ঞা চত্তারো ধম্মা. যা সদ্ধা যা চ পঞ্ঞা, ইদং মনোসুচরিতং. যং সীলং, ইদং কাযিকং ৰাচসিকং সুচরিতং. যো চাগো, ইদং চেতসিকং অলোভো সুচরিতং. ইতি চিত্তে গহিতে পঞ্চক্খন্ধা গহিতা ভৰন্তি. ইমেহি ধম্মেহি সুচরিতং ইদং দুক্খঞ্চ অরিযসচ্চং পদট্ঠানং মগ্গস্স.

৮৭. তত্থ কতমো ৰিচযো হারো? যা চ সদ্ধা যঞ্চ সীলং. তং কিস্স করোতি? যা সদ্ধা তায ভগৰন্তং অনুস্সরতি মত্তেনপি হত্থিনা সমাগতা, অস্স ভো কুক্কুরা সব্বং সীলেন নপ্পটিপজ্জতি কাযেন ৰা ৰাচায ৰা ঠানং ৰিসারদো ভৰতীতি অৰিপ্পটিসারী পঞ্ঞা যস্স পঞ্ঞত্তং উপট্ঠপেতি. তস্স অখণ্ডস্স ¶ সীলং যং ন পচ্ছি তস্সং মোহস্স অকুসলচিত্তং ¶ উপ্পজ্জতি মিচ্ছাদিট্ঠিসহগতং ৰা, অযং ৰিচযো হারো. ধম্মৰাদিনো ভদ্দিকারাতি ভৰিস্সতি অত্থি এসা যুত্তি.

তত্থ কতমো পদট্ঠানো হারো? যমিদং চিত্তং দীঘরত্তং পরিভাৰিতং সদ্ধায সীলেন চাগেন পঞ্ঞায সমাধিনা পঠমজ্ঝানস্স পদট্ঠানং. যা সদ্ধা অস্স অনাৰিলসঙ্কপ্পো, তং দুতিযজ্ঝানস্স পদট্ঠানং. তীণি চ অৰেচ্চপ্পসাদা যং সীলং, তং অরিযকন্তং, তং সীলক্খন্ধস্স পদট্ঠানং. যা পঞ্ঞা, সা পঞ্ঞাক্খন্ধস্স পদট্ঠানং. ইমে চ ধম্মা ইদঞ্চ চিত্তং একোদিভূতসমাধিস্স পদট্ঠানং. সদ্ধা সদ্ধিন্দ্রিযস্স পদট্ঠানং. চাগো সমাধিন্দ্রিযস্স পদট্ঠানং. পঞ্ঞা পঞ্ঞিন্দ্রিযস্স পদট্ঠানং. সদ্ধা চ পঞ্ঞা চ ৰিপস্সনা পদট্ঠানং. সীলঞ্চ চাগো চ সমথস্স পদট্ঠানং. সদ্ধা চ পঞ্ঞা চ অৰিজ্জা ৰিরাগায পঞ্ঞাৰিমুত্তিযা পদট্ঠানং. সীলঞ্চ চাগো চ রাগৰিরাগায চেতোৰিমুত্তিযা পদট্ঠানং.

তত্থ কতমো লক্খণো হারো? ৰিঞ্ঞাণে ৰুত্তে সদ্ধাসতিভাৰিতে সব্বে পঞ্চক্খন্ধা ৰুত্তা ভৰন্তি. সদ্ধায ভণিতায সব্বানি সত্ত ধনানি ভণিতানি হোন্তি সদ্ধাধনং…পে… সীলক্খন্ধে ৰুত্তে সমাধিক্খন্ধো চ পঞ্ঞাক্খন্ধো চ ৰুত্তা ভৰন্তি. যং তং চিত্তং দীঘরত্তং পরিভাৰিতং পচ্ছিমকে ¶ কালে ন তদনুপরিৰত্তি ভৰিস্সতীতি নেতং ঠানং ৰিজ্জতি. তত্থ ¶ সঞ্ঞাপি তদনুপরিৰত্তিনী ভৰতি. যেপি তজ্জাতিকা ধম্মা, তেপি তদনুপরিৰত্তিনো ভৰন্তি. রূপসঞ্ঞা রূপসঞ্চেতনানুপস্সনমনসিকারো এৰং ছন্নং আযতনানং ৰিঞ্ঞাণকাযে, অযং লক্খণো হারো.

তত্থ কতমো চতুব্যূহো হারো? ইধ সুত্তে ভগৰতো কো অধিপ্পাযো? যে ভদ্দিকং ভতিং আকঙ্খেয্য ভদ্দিকঞ্চ অভিসম্পরাযং, তে সদ্ধং সীলং চাগং পঞ্ঞঞ্চ মনসি করিস্সন্তি, অযং অধিপ্পাযো. যে চঞ্ঞেপি সত্তা তথাগতস্স সম্মুখং ন পটিযুজ্ঝন্তে, ইমং ধম্মং সোতা অৰিপ্পটিসারতো কালং করিস্সন্তীতি, অযং অধিপ্পাযো.

৮৮. তত্থ কতমো আৰট্টো হারো? ইদম্পি চত্তারো ধম্মা সদ্ধা চ পঞ্ঞা চ অস্সদ্ধিযঞ্চ অৰিজ্জঞ্চ হনন্তি. সীলঞ্চ চাগো চ তণ্হা চ দোসঞ্চ হনন্তি. তস্স দ্ৰে মূলানি পহীযন্তি. দুক্খং নিৰত্তেতি অপ্পহীনভূমিযঞ্চ দ্ৰিমূলানি পঞ্চক্খন্ধা. দ্ৰে অরিযসচ্চানি সমথো চ ৰিপস্সনা চ. দ্ৰিন্নং মূলানং পহানং. ইমানি দ্ৰে সচ্চানি নিরোধো চ মগ্গো চ. অযং আৰট্টো হারো.

তত্থ ¶ কতমো ৰিভত্তি? যং তং চিত্তং সদ্ধাপরিভাৰিতং…পে… সচে পুথুজ্জনস্স তস্সপি ভদ্দিকা ভতি ভৰিস্সতীতি ন একংসেন তস্স কম্মং দিট্ঠেযেৰ ধম্মে ৰিপাকন্তি পচ্চেস্সতি, অপরম্হি ৰা পরিযাযে ভৰিস্সতি. যং ৰা অতীতং ¶ ৰিপাকায পচ্চুপট্ঠিতং, তপ্পচ্চযানি চেতানি, যে যথা মহাকম্মৰিভঙ্গে ‘‘তেনাযং ৰিভজ্জব্যাকরণিযো নিদ্দেসো ধম্মচারিনো যা ভদ্দিকা ভতী’’তি.

তত্থ কতমা পরিৰত্তনা? অস্সদ্ধিযং দুস্সীল্যং যং মচ্ছেরং দুপ্পঞ্ঞং চ [দুপ্পঞ্ঞিযং (ক.)] যঞ্চ পটিপক্খেন পহীনা ভৰন্তি, অযং পরিৰত্তনা.

তত্থ কতমং ৰেৰচনং? যং তং চিত্তং দীঘরত্তং পরিভাৰিতং চিত্তং মনোৰিঞ্ঞাণং…পে… যং সদ্ধাবলং সদ্ধিন্দ্রিযং, যং সীলং তং সুচরিতং, সংযমো নিযমো দমো খন্ধতা ইমানি তস্স ৰেৰচনানি. যো চাগো সো পটিনিস্সগ্গো অলোভো ৰোসগ্গো চাগোযিট্ঠানং. যা পঞ্ঞা সা পঞ্ঞত্তা পঞ্ঞপ্পভা পঞ্ঞিন্দ্রিযং পঞ্ঞাবলং.

তত্থ ¶ কতমা পঞ্ঞত্তি? যং তং চিত্তং বীজং পঞ্ঞত্তিযা পঞ্ঞত্তং. পরিভাৰনা ৰাসনা পঞ্ঞত্তিযা পঞ্ঞত্তি. সদ্ধা পসাদপঞ্ঞত্তিযা পঞ্ঞত্তা. সীলং সুচরিতপঞ্ঞত্তিযা পঞ্ঞত্তং. চাগো পুঞ্ঞকিরিযপঞ্ঞত্তিযা পঞ্ঞত্তো. পঞ্ঞা ৰীমংসপঞ্ঞত্তিযা পঞ্ঞত্তা. ইমে তযো ধম্মা সদ্ধা সীলং চাগো পঞ্ঞৰতো পারিসুদ্ধিং গচ্ছন্তি.

তত্থ কতমো ওতরণো? যং চিত্তং, তং খন্ধেসু ৰিঞ্ঞাণক্খন্ধো, ধাতূসু মনোৰিঞ্ঞাণধাতু, আযতনেসু মনাযতনং. যে চত্তারো ধম্মা, তে খন্ধেসু সঙ্খারক্খন্ধে পরিযাপন্না…পে… ধাতূসু আযতনেসু.

তত্থ ¶ কতমো সোধনো হারো? ইদং ভগৰতো ভাসিতং মহানামেন সক্কেন পুচ্ছিতেন সব্বং তং নিযুত্তং.

তত্থ কতমো অধিট্ঠানো? ইদং চিত্তং ৰেমত্ততায পঞ্ঞত্তং অকুসলেহি চিত্তেহি অপরিভাৰিতেহি পরিভাৰিতন্তি যানি পুন পরিভাৰিতানি অঞ্ঞেসম্পি তত্থ উপাদায পঞ্ঞত্তং সব্বেপিমে চত্তারো ধম্মা একত্ততায পঞ্ঞত্তা. ভদ্দিকা ভতীতি কামভোগিনো তেৰ রূপধাতু অরূপধাতু মনুস্সাতি সব্বা ভদ্দিকা ভতি তদেৰ কথায পঞ্ঞত্তং, অযং পঞ্ঞত্তি.

তত্থ ¶ কতমো পরিক্খারো? চিত্তস্স ইন্দ্রিযানি পচ্চযো আধিপতেয্যপচ্চযতায মনসিকারো. হেতুপচ্চযতায পচ্চযো. সদ্ধায লোকিকা পঞ্ঞা হেতুপচ্চযতায পচ্চযো. যোনিসো চ মনসিকারো পচ্চযো. সীলস্স পতিরূপদেসৰাসো পচ্চযো. অত্তসম্মাপণিধানঞ্চ হেতু. চাগস্স অলোভো হেতু. অৰিপ্পটিসারো চ হেতুপচ্চযো. পঞ্ঞা পরতো চ ঘোসো অজ্ঝত্তঞ্চ যোনিসো মনসিকারো হেতুপচ্চযো চ.

তত্থ কতমো সমারোপনো? যং তং চিত্তং দীঘরত্তং পরিভাৰিতন্তি চেতসিকাপি. এত্থ সব্বে ধম্মা পরিভাৰিতা ভদ্দিকা তে ভতি ভৰিস্সতি, ভদ্দিকা উপপত্তিকো অভিসম্পরাযো. ইতি যে কেচি মনুস্সকা উপভোগপরিভোগা সব্বে ভদ্দিকা ভতিযেৰ, অযং সমারোপনো.

৮৯. উদ্ধং ¶ অধো সব্বধি ৰীতরাগোতি গাথা [পস্স উদা. ৬১ উদানে]. তত্থ কিং উদ্ধং নাম? যং ¶ ইতো উদ্ধং ভৰিস্সতি অনাগামী, ইদং উদ্ধং. অধো নাম যমতিক্কন্তমতীতং, ইদমৰোচ অপদানতন্তি উদ্ধং. তত্থ অতীতেন সস্সতদিট্ঠি পুব্বন্তাকপ্পিকানং অপরন্তদিট্ঠি কেসঞ্চি, উচ্ছেদদিট্ঠিং যং [উচ্ছেদদিট্ঠিযং (ক.)] ৰুত্তকপ্পিকানং ইমা চেৰ দিট্ঠিযো উচ্ছেদদিট্ঠি চ সস্সতদিট্ঠি চ. তত্থাযং সস্সতদিট্ঠি ইমানি পন্নরস পদানি সক্কাযদিট্ঠি সস্সতং ভজন্তি. রূপৰন্তং মে অত্তা, অত্তনি মে রূপং, রূপং মে অত্তাতি যদুচ্চতে পঞ্ঞং পরিদহন্তি. যা উচ্ছেদদিট্ঠি সা পঞ্চসতানি উচ্ছেদং ভজন্তি. তে ‘‘তং জীৰং তং সরীর’’ন্তি পস্সন্তি, রূপং মে অত্তাতি তথারূপা চতুব্বিধা সক্কাযদিট্ঠি উচ্ছেদেন চ সস্সতেন চ. এৰং পঞ্চসু খন্ধেসু ৰীসতিৰত্থুকায দিট্ঠিযা পন্নরস পদানি পুব্বন্তং ভজন্তি. সস্সতদিট্ঠিযা পঞ্চ পদানি অপরন্তং ভজন্তি উচ্ছেদদিট্ঠিযা. তত্থ ‘‘অযমহমস্মী’’তি পস্সন্তা রূপং অত্ততো সমনুপস্সতি, সো উচ্ছেদৰাদী রূপৰন্তঞ্চ অত্তানং, অত্তনি চ রূপং, রূপস্মিং ৰা অত্তাতি সো পস্সতি চাতি ইতি উচ্ছেদদিট্ঠি চ, অত্ততো পটিস্সরতি সস্সতদিট্ঠি পুব্বন্ততো চ পটিস্সরতি. ‘‘অযমহমস্মী’’তি ন সমনুপস্সতি. তস্স দিট্ঠাসৰা পহানং গচ্ছন্তি. যো তীসু অদ্ধাসু পুব্বন্তে চ অপরন্তে চ তেন তেন নিদ্দিট্ঠানেন উদ্ধং অধো সব্বধি ৰীতরাগো ‘‘অহমস্মী’’তি ন অনুপস্সতীতি ইমিনা দ্ৰারেন ইমিনা পযোগেন ইমিনা উপাযেন ইদং দস্সনভূমি চ সোতাপত্তিফলঞ্চ সো অরিযো পযোগো অনভাৰংগতেন সংসারেন অপুনব্ভৰাতি যো কোচি অরিযো পযোগো ¶ পুনব্ভৰায মুদূনি ৰা পঞ্চিন্দ্রিযানি মজ্ঝানি অধিমত্তানি ৰা সব্বং অপুনব্ভৰপ্পহানায সংৰত্তন্তি. অহন্তি দিট্ঠোঘো কামোঘো ভৰোঘো অৰিজ্জোঘো চ ওধিসো. তত্থ দেসনাহারেন চত্তারি সচ্চানি পঞ্চহি ইন্দ্রিযেহি সোতাপত্তিফলেন চ দ্ৰে সচ্চানি মগ্গো চ নিরোধো চ. সক্কাযসমুদযেন দ্ৰে সচ্চানি দুক্খঞ্চ সমুদযো চ, অযং দেসনা হারো.

তত্থ ¶ কতমো ৰিচযো? ‘‘অযমহমস্মী’’তি অসমনুপস্সন্তো তীণি দস্সনপ্পহাতব্বানি সংযোজনানি পজহতি. অযং ৰিচযো.

তত্থ কতমা যুত্তি? তিৰিধা পুগ্গলা কোচি উগ্ঘটিতঞ্ঞূ কোচি ৰিপঞ্চিতঞ্ঞূ কোচি নেয্যো. উগ্ঘটিতঞ্ঞূ তিক্খিন্দ্রিযো চ ততো ৰিপঞ্চিতঞ্ঞূ মুদিন্দ্রিযো ততো মুদিন্দ্রিযেহি নেয্যো. তত্থ উগ্ঘটিতঞ্ঞূ তিক্খিন্দ্রিযতায দস্সনভূমিমাগম্ম ¶ সোতাপত্তিফলং পাপুণাতি, একবীজকো ভৰতি. অযং পঠমো সোতাপন্নো. ৰিপঞ্চিতঞ্ঞূ মুদূহি ইন্দ্রিযেহি দস্সনভূমিমাগম্ম সোতাপত্তিফলং পাপুণাতি, কোলংকোলো চ হোতি. অযং দুতিযো সোতাপন্নো. তত্থ নেয্যো দস্সনভূমিমাগম্ম সোতাপত্তিফলং পাপুণাতি, সত্তক্খত্তুপরমো চ ভৰতি. অযং ততিযো সোতাপন্নো.

অত্থি এসা যুত্তি মুদুমজ্ঝাধিমত্তেহি ইন্দ্রিযেহি মুদুমজ্ঝাধিমত্তং ভূমিং সচ্ছিকরেয্য সক্কাযদিট্ঠিপ্পহানেন ৰা দিট্ঠিগতানি পজহতি. অযং ¶ যুত্তি.

তত্থ কতমো পদট্ঠানো? তত্থ সক্কাযদিট্ঠি সব্বমিচ্ছাদিট্ঠিযা পদট্ঠানং. সক্কাযো নামরূপস্স পদট্ঠানং. নামরূপং সক্কাযদিট্ঠিযা পদট্ঠানং. পঞ্চ ইন্দ্রিযানি রূপীনি রূপরাগস্স পদট্ঠানং. সল়াযতনং অহংকারস্স পদট্ঠানং. তত্থ কতমো লক্খণো? দ্ৰীসু দিট্ঠীসু পহীনাসু তত্থ একা দিট্ঠি দিট্ঠিগতানি পহানং গচ্ছন্তি. উদ্ধং চ অধো চ ৰীতরাগো সব্বরজনীযেসু ৰীতরাগো হোতি. তজ্জা পরভূমিযং, ইদং পচ্চযন্তি যথাভূতং পস্সতি. সো সব্বপটিচ্চসমুপ্পাদং আমসতি. অযং লক্খণো হারো.

৯০. তত্থ কতমো চতুব্যূহো হারো? ইমম্হি সুত্তে ভগৰতো কো অধিপ্পাযো? যে সত্তা যে নাভিরমিস্সন্তি, তে দিট্ঠিপ্পহানায ৰাযমিস্সন্তি. অযমেত্থ ভগৰতো অধিপ্পাযো. অযং চতুব্যূহো হারো.

তত্থ কতমো আৰট্টো হারো? যানিমানি মুদূনি পঞ্চিন্দ্রিযানি তানি ওরম্ভাগিযানি পঞ্চিন্দ্রিযানি. সব্বেন সব্বং সমূহনন্তি অভিজ্ঝাব্যাপাদো চ ভাৰনাকারেন সেক্খায ৰিমুত্তিযা বলং সদ্ধা, উদ্ধম্ভাগিযানি দিট্ঠিৰসেন বলং সদ্ধা, ৰীরিযিন্দ্রিযং আরভিতত্তা সতিন্দ্রিযং পগ্গহিতত্তা অচ্চন্তং নিট্ঠং গচ্ছন্তি. তত্থ যানি ইন্দ্রিযানি, অযং মগ্গো সংকিলেসপ্পহানং. অযং নিরোধো আযতিং অনুপ্পাদধম্মো, ইদং দুক্খং. অযং আৰট্টো হারো.

তত্থ ¶ কতমো ৰিভত্তি হারো? ‘‘অযমহমস্মী’’তি ¶ যো সমনুপস্সতি, সো চ খো অধিমত্তেন লোকিকা যং ভূমিযং ন তু অরিযেন পযোগেন সো সক্কাযদিট্ঠি পজহতি. যং ৰুচ্চতি তজ্জায ভূমিযা অধিমত্তায. তত্থ তজ্জায ভূমিযং পঞ্চহি আকারেহি অধিমত্ততং পটিলভতি সীলেন ৰতেন বাহুস্সচ্চেন সমাধিনা নেক্খম্মসুখেন. তত্থ অপ্পত্তে পত্তসঞ্ঞী ¶ অধিমানং গণ্হাতি. এতস্মিংযেৰ ৰত্থুপ্পত্তিযং ভগৰা ইদং সুত্তং ভাসতি. সীলৰা ৰতমত্তেনাতি. তত্থ যো অপ্পত্তে পত্তসঞ্ঞী তস্স যো সমাধি, সো সামিসো কাপুরিসসেৰিতো পন সো কাপুরিসা ৰুচ্চন্তি পুথুজ্জনা. আমিসং যঞ্চ অরিযমগ্গমাগম্ম লোকিকা অনরিযং তেন সমাধি হোতি অনরিযো কাপুরিসসেৰিতো. যো পন অরিযাকারেন যথাভূতং ন জানাতি ন পস্সতি [জানাতি পস্সতি (পী.)], সো অধিগমনং পজহতি যো অরিযেন সমাধিনা অকাপুরিসসেৰিতেন নিরামিসেন নীযতি, তত্থ অকাপুরিসা ৰুচ্চন্তি অরিযপুগ্গলা. যো তেহি সেৰিতো সমাধি, সো অকাপুরিসসেৰিতো. তস্মা একং ৰিভজ্জব্যাকরণীযং ‘‘অযমহমস্মী’’তি অসমনুপস্সন্তো তথা পাতেতি.

তত্থ কতমা পরিৰত্তনা? ইমায দস্সনভূমিযা কিলেসা পহাতব্বা, তেহি পহীযন্তি অনিদ্দিট্ঠাপি ভগৰতা নিদ্দিসিতব্বা যো.

তত্থ কতমং ৰেৰচনং? যা ¶ সক্কাযদিট্ঠিযা অত্তদিট্ঠিযা. অযং ভূমি. যে কিলেসা পহাতব্বা. তে অপ্পহীযন্তি অনিদ্দিট্ঠাপি ভগৰতা সস্সতদিট্ঠি চ উচ্ছেদদিট্ঠি চ, সা পরিযন্তদিট্ঠি চ. যা অপরিযন্তদিট্ঠি চ, সা সস্সতদিট্ঠি চ. যা উচ্ছেদদিট্ঠি, সা নত্থিকা দিট্ঠি. যা সস্সতদিট্ঠি, সা অকিরিযদিট্ঠি. ইদং ৰেৰচনং.

তত্থ কতমা পঞ্ঞত্তি? তণ্হা সংযোজনপঞ্ঞত্তিযা পঞ্ঞত্তা. মগ্গো পটিলাভপঞ্ঞত্তিযা পঞ্ঞত্তো. ইন্দ্রিযা পটিলাভপঞ্ঞত্তিযা পঞ্ঞত্তাতি. তত্থ কতমো ওতরণো? সক্কাযো দুক্খং দস্সনপ্পহাতব্বো. সমুদযো মগ্গো. ইন্দ্রিযানি তানি চ নিদ্দিট্ঠানি খন্ধধাতুআযতনেসু.

তত্থ কতমো সোধনো হারো? যঞ্হি আরব্ভ ভগৰতা ইদং সুত্তং ভাসিতং, সো আরব্ভ নিদ্দিট্ঠো. তত্থ কতমো পরিক্খারো? নামরূপস্স হেতুপচ্চযোপি ৰিঞ্ঞাণং হেতু বীজং. তেন অৰিজ্জা চ সঙ্খারা চ পচ্চযো. নিৰত্তিনযো ন অপরো পরিযাযো সব্বভৰো, যে চ সব্বভৰস্স হেতু পরভণ্ডপচ্চযো ইতি সম্মাদিট্ঠি পরতো চ ঘোসো যোনিসো চ মনসিকারো পচ্চযো ¶ . যা পঞ্ঞা উপ্পাদেতি, এসা হেতু সম্মাদিট্ঠিযা সম্মাসঙ্কপ্পো ভৰতি, যা সম্মাসমাধি [সম্মাদিট্ঠি (পী.)], অযং পরিক্খারো.

তত্থ ¶ কতমো সমারোপনো? ‘‘অযমহমস্মী’’তি ¶ অসমনুপস্সী দুক্খতো রোগতো…পে… পন্নরস পদানি. সীলানি ভগৰা কিমত্থিযানি কিমানিসংসানি. সীলানি, আনন্দ, অৰিপ্পটিসারত্থানি যাৰ ৰিমুত্তি. তত্থ দুৰিধো অত্থো – পুরিসত্থো চ ৰচনত্থো চ.

৯১. তত্থ কতমো পুরিসত্থো? যাযং ন পচ্ছানুতাপিতা অযং অৰিপ্পটিসারো, অযং পুরিসত্থো. যথা কোচি ব্রূহযতি ইমত্থমাসেৰতি সো ভণেয্য, কিঞ্চি মমেত্থ অধীনং তস্সত্থায ইদং কিরিযং আরভামীতি. অযং পুরিসত্থো.

তত্থ কতমো ৰচনত্থো? সীলানি কাযিকং ৰা ৰাচসিকং ৰা সুচরিতং অৰিপ্পটিসারোতি. তত্থ সীলস্স ৰতস্স চ ভাসোযেৰ. অনঞ্ঞা সুগতকম্মতা সুচরিতং অযং অৰিপ্পটিসারো. এৰং যাৰ ৰিমুত্তীতি একমেকস্মিং পদে দ্ৰে অত্থা – পুরিসত্থো চ ৰচনত্থো চ, যথা ইমম্হি সুত্তে এৰং সব্বেসু সুত্তেসু দ্ৰে দ্ৰে অত্থা. অযং হি পরমত্থো উত্তমত্থো চ. যং নিব্বানসচ্ছিকং নিস্সায যং সকং সচ্ছিকাতব্বং ভৰতি, সো ৰুচ্চতি কতস্স [সতস্স (ক.)] কত্থোতি. অযং পুন ৰেৰচনং সম্পজানাতি. ইমিনা নিযুত্তত্থমভিলব্ভন্তি ৰচনত্থো. তত্থ যং অত্থং সাৰকো অভিকঙ্খতি. তস্স যো পটিলাভো, অযং পুরিসত্থো. যং যং ভগৰা ধম্মং দেসেতি, তস্স তস্স ধম্মস্স যা অত্থৰিঞ্ঞত্তি. অযং অত্থো, তত্থ ¶ সীলানং অৰিপ্পটিসারো অত্থোপি আনিসংসোপি. এসো চ আনিসংসো যং দুগ্গতিং ন গচ্ছতি. যথা তং ভগৰতা এসানিসংসো ধম্মে সুচিণ্ণে ন দুগ্গতিং গচ্ছতি ধম্মচারী, অযং অত্থো.

যং পুরিসো ভাৰনাভূমিযং সীলানি আরব্ভ সীলেন সংযুত্তো হোতি এৰং যাৰ ৰিমুত্তি তথা সীলক্খন্ধো. তত্থ যো চ অৰিপ্পটিসারো অনুসযৰসেন নিদ্দিট্ঠো, তঞ্চ সীলং অযং সীলক্খন্ধো. পামোজ্জপীতিপস্সদ্ধীতি চ সমাধিন্দ্রিযেন, অযং সমাধিক্খন্ধো. যং সমাহিতো যথাভূতং পজানাতি, অযং পঞ্ঞাক্খন্ধো. ইমে তযো খন্ধা সীলং সমাধি পঞ্ঞা চ তথা সীলং পরিপূরেতি যং ৰীরিযিন্দ্রিযং তেন কারণেন সো সীলং পরিপূরেতি, অনুপ্পন্নস্স চ অকুসলস্স অনুপ্পাদায ৰাযমতি, উপ্পন্নস্স চ পহানায অনুপ্পন্নস্স চ কুসলস্স উপ্পাদায, উপ্পন্নস্স চ কুসলস্স ভিয্যোভাৰায ¶ ইতি ৰীরিযিন্দ্রিযং নিদ্দিট্ঠং. তত্থ যো সমাধিক্খন্ধো ¶ , ইদং সমাধিন্দ্রিযং. পঞ্ঞাক্খন্ধো পঞ্ঞিন্দ্রিযং, তং চতূসু সম্মপ্পধানেসু দট্ঠব্বং. তথা যো অনুপ্পন্নস্স চ অকুসলস্স অনুপ্পাদায ৰাযমতি, ইদং পঠমং সম্মপ্পধানং. যং উপ্পন্নস্স, ইদং দুতিযং. চত্তারি সম্মপ্পধানানি চতূসু ঝানেসু পস্সিতব্বানি. তথা ¶ সীলক্খন্ধেন নেক্খম্মধাতু চ অধিকা [আদিকা (পী.)], তযো চ ৰিতক্কা নেক্খম্মৰিতক্কো অব্যাপাদৰিতক্কো অৰিহিংসাৰিতক্কো চ. সাধারণভূতা. যা পিযাযমানস্স পামোজ্জেন ইদং কাযিকং সুখং আনিতং অনিযমীতিপেমেন, ইদং দুক্খং. যো তত্থ অৰিক্খেপো, অযং সমাধি. ইদং পঞ্চঙ্গিকং পঠমং ঝানং. যা চেতসিকা পস্সদ্ধি সৰিতক্কং সৰিচারং ৰিরোধনং, যো কিলেসো চ পরিদাহো, সো পঠমে ঝানে নিরুদ্ধো. তথা যা চ কিলেসপস্সদ্ধি যা চ ৰিতক্কৰিচারানং পস্সদ্ধি, উভযেপি এতে ধম্মে পস্সদ্ধাযং. তত্থ কাযস্স চিত্তস্স চ সুখং সুখাযনা, ইদং পীতিসুখিনো পস্সদ্ধি. যোপি একোদিভাৰো চিত্তস্স, তেন একোদিভাৰেন যং চিত্তস্স অজ্ঝত্তং সম্পসাদনং, ইদং চতুত্থং ঝানঙ্গং. ইতি অজ্ঝত্তঞ্চ সম্পসাদো চেতসো চ একোদিভাৰো পীতি চ সুখঞ্চ, ইদং দুতিযং ঝানং চতুরঙ্গিকং. যো পস্সদ্ধকাযো সুখং ৰেদেতি, তেন অধিমত্তেন সুখেন ফরিত্ৰা সুখং চেতসিকং যং, সো পীতিৰীতরাগো এৰং তস্স পীতিৰীতরাগতায উপেক্খং পটিলভতি. সো পীতিযা চ ৰিরাগা উপেক্খং পটিলভতি. সুখঞ্চ পটিসংৰেদেতি. সতি চ সম্মা পঞ্ঞায পটিলভতি. সচে সতি একগ্গতা ইদং পঞ্চঙ্গিকং ততিযং ঝানং. যং ¶ সুখিনো চিত্তং সমাধিযতি, অযং একগ্গতায পরাৰিধানভাগিযা, পঠমে ঝানে অত্থি চিত্তেকগ্গতা নো চক্খুস্স ৰেদনা সব্বং পারিপূরিং গচ্ছতি. যথা চতুত্থে ঝানে, তথা যা উপেক্খা পস্সম্ভযং সতিসম্পজঞ্ঞং চিত্তেকগ্গতা চ, ইদং চতুত্থং ঝানং.

৯২. যথা সমাধি দস্সযিতব্বং, তথা পঞ্ঞিন্দ্রিযং তং চতূসু অরিযসচ্চেসু পস্সিতব্বং. যং সমাহিতো যথাভূতং পজানাতি, সা পজাননা চতুব্বিধা অসুভতো দুক্খতো অনত্ততো চ, যদারম্মণং তং দুক্খং অরিযসচ্চং, যং পজানন্তো নিব্বিন্দতি ৰিমুচ্চতি তথা যং কামাসৰস্স পহানং ভৰাসৰস্স দিট্ঠাসৰস্স অৰিজ্জাসৰস্স, অযং নিরোধো অপ্পহীনভূমিযং ¶ আসৰসমুদযো. ইমানি চত্তারি অরিযসচ্চানি যথা পঞ্ঞিন্দ্রিযং পস্সিতব্বং. যথাযং সমাহিতো যথাভূতং পজানাতি, অযং দস্সনভূমি. সোতাপত্তিফলঞ্চ যথাভূতং পজানন্তো নিব্বিন্দতীতি, ইদং তনুকঞ্চ. কামরাগব্যাপাদং সকদাগামিফলঞ্চ যং নিব্বিন্দতি ৰিরজ্জতি, অযং পঠমজ্ঝানভাৰনাভূমি চ রাগৰিরাগা চেতোৰিমুত্তি অনাগামিফলঞ্চ. যং ৰিমুত্তি ৰিমুচ্চতি, অযং অৰিজ্জাৰিরাগা পঞ্ঞাৰিমুত্তি অরহত্তঞ্চ. ইমে অৰিপ্পটিসারা চ ৰীরিযিন্দ্রিযঞ্চ চত্তারো সম্মপ্পধানা অৰিপ্পটিসারা তঞ্চ উপরি যাৰ ¶ সমাধি, এৰং তে চত্তারি ঝানানি সমাধিন্দ্রিযঞ্চ যং সমাহিতো যথাভূতং পজানাতি. ইমে চত্তারো সতিপট্ঠানা সীলপারিপূরিমুপাদায চাগসংহিতেন চ নিব্বেধিকানঞ্চ নিমিত্তানং অনাৰিলমনা, ইদং সতিন্দ্রিযং চত্তারো সতিপট্ঠানা. যং ¶ পুন ইমায ধম্মদেসনায তীসু ঠানেসু দিট্ঠোগমনকিন্দ্রিযং কিলেসপহানেন চ সেক্খসীলং, ইদং সদ্ধিন্দ্রিযং. চত্তারি চ সোতাপত্তিযঙ্গানি ফলানি. সমাধিন্দ্রিযানি সোপনিযাহারীনি সব্বসুত্তেসু নিদ্দিসিতব্বানি. যং ঝানং পটিলভনং ৰীরিযগহিতংযেৰ ঞাণং পটিস্সরতো, অযং সুতমযী পঞ্ঞা. যো সমাধি পুব্বাপরনিমিত্তাভাসো অনোমগতিতায যথাকামো, অযং চিন্তামযী পঞ্ঞা, যং তথাসমাহিতো যথাভূতং পজানাতি, অযং ভাৰনামযী পঞ্ঞা. অযং সুত্তনিদ্দেসো.

ইমং সুত্তং নিব্বেধভাগিযং বুজ্ঝকারধিকং বুজ্ঝিতব্বং. যেহি অঙ্গেহি সমন্নাগতং তং বুজ্ঝিস্সন্তি তস্স অঙ্গানি বুজ্ঝিস্সন্তি, তেন বোজ্ঝঙ্গা. তথা আদিতো যাৰ সীলং ৰতং চেতনা করণীযা, কিস্স সীলানি পারিপূরেতি. অনুপ্পন্নস্স চ অকুসলস্স অনুপ্পাদায উপ্পন্নস্স চ অকুসলস্স পহানায অনুপ্পন্নস্স কুসলস্স উপ্পাদায উপ্পন্নস্স চ কুসলস্স ভিয্যোভাৰায, ইদং ৰীরিযং তস্স তস্স বুজ্ঝিতস্স অঙ্গন্তি. অযং ৰীরিযসম্বোজ্ঝঙ্গো. ইমিনা ৰীরিযেন দ্ৰে ধম্মা আদিতো অৰিপ্পটিসারো পামোজ্জঞ্চ যা পুন পীতি অৰিপ্পটিসারপচ্চযা পামোজ্জপচ্চযা, অযং পীতিসম্বোজ্ঝঙ্গো. যং পীতিমনস্স কাযো পস্সম্ভতি. অযং পস্সদ্ধিসম্বোজ্ঝঙ্গো. তেন ¶ কাযিকসুখমানিতং যং সুখিনো চিত্তং সমাধিযতি, অযং সমাধিসম্বোজ্ঝঙ্গো. যং সমাহিতো যথাভূতং পজানাতি, অযং ধম্মৰিচযসম্বোজ্ঝঙ্গো. যা সীলমুপাদায পঞ্চন্নং বোজ্ঝঙ্গানং উপাদাযানুলোমতা নিমিত্তাযনা পীতিভাগিযানঞ্চ ৰিসেসভাগিযানঞ্চ ¶ অপিলাপনতা সহগতা হোতি অনৰমগ্গো, অযং সতিসম্বোজ্ঝঙ্গো. যং যথাভূতং পজানাতি, অচ্চারদ্ধৰীরিযং করোতি. উদ্ধচ্চভূমীতি কতা অভিপত্থিতং পেসেতি. কোসজ্জভূমীতি গরহিতো রহিতেহি অঙ্গেহি বুজ্ঝতি যং চক্খুসমথপথং, সা উপেক্খাতি. তেন সা উপেক্খা তস্স বোজ্ঝঙ্গস্স অঙ্গন্তি করিত্ৰা উপেক্খাসম্বোজ্ঝঙ্গোতি ৰুচ্চতে. এসো সুত্তনিদ্দেসো.

৯৩. তত্থ কতমা দেসনা? অস্মিং সুত্তে চত্তারি অরিযসচ্চানি দেসিতানি. তত্থ কতমো ৰিচযো? সীলৰতো অৰিপ্পটিসারো যাৰ ৰিমুত্তি ইমিস্সায পুচ্ছায মিনিকিমত্থস্সমীতি দ্ৰে পদানি পুচ্ছা দ্ৰে পদানি ৰিসজ্জনানি দ্ৰীহি পদেহি দ্ৰে অভিঞ্ঞং দ্ৰীহি চেৰ পদেহি ৰিসজ্জনা কিং পুচ্ছতি নিব্বাধিকং কাযভূমিং কম্মস্স তথা হি পতিট্ঠা চ অসেক্খে ধম্মে উপ্পাদেতি. তত্থ কতমা যুত্তি? সীলৰতো ¶ অৰিপ্পটিসারো ভৰতি কিং নিচ্ছন্দস্স ¶ চ ৰিরাগো অত্থি এসা যুত্তি. তত্থ কতমং পদট্ঠানং? ৰীরিযং ৰীরিযিন্দ্রিযস্স পদট্ঠানং. সমাধি সমাধিন্দ্রিযস্স পদট্ঠানং. পঞ্ঞা পঞ্ঞিন্দ্রিযস্স পদট্ঠানং. ৰীরিযং অদোসস্স পদট্ঠানং. সমাধি অলোভস্স পদট্ঠানং. পঞ্ঞা অমোহস্স পদট্ঠানং. ৰীরিযিন্দ্রিযং তিণ্ণং মগ্গঙ্গানং পদট্ঠানং, সম্মাৰাচায সম্মাকম্মন্তস্স সম্মাআজীৰস্স. সমাধিন্দ্রিযং তিণ্ণং মগ্গঙ্গানং পদট্ঠানং, সম্মাসঙ্কপ্পস্স সম্মাৰাচায সম্মাসমাধিনো. পঞ্ঞিন্দ্রিযং দ্ৰিন্নং মগ্গঙ্গানং পদট্ঠানং, সম্মাসতিযা সম্মাদিট্ঠিযা চ.

তত্থ কতমো লক্খণো? সীলক্খন্ধে ৰুত্তে সব্বে তযো খন্ধা ৰুত্তা ভৰন্তি, সীলমেৰ হি সেলোপমতা যথা সেলো সব্বপচ্চত্থিকেহি অকরণীযো এৰং তং চিত্তং সব্বকিলেসেহি ন কম্পতীতি, অযং অমোহো. ৰিরত্তং [পস্স উদা. ৩৪ উদানপাল়িযং] রজনীযেসূতি অযং অলোভো. কোপনেয্যে ন কুপ্পতীতি অযং অদোসো. তত্থ পঞ্ঞা অমোহো কুসলমূলং, অলোভো অলোভোযেৰ, অদোসো অদোসোযেৰ. ইমেহি তীহি কুসলমূলেহি সেক্খভূমিযং ঠিতো অসেক্খমগ্গং উপ্পাদেতি. সেক্খভূমি সম্পত্তিকম্মধম্মে উপ্পাদেতি, সা চ সম্মাৰিমুত্তি, যঞ্চ ৰিমুত্তিরসঞাণদস্সনং ইমে দস অসেক্খানং অরহত্তং ধম্মা. তত্থ অট্ঠঙ্গিকেন মগ্গেন চতুব্বিধা ভাৰনাপি লব্ভতি. সীলভাৰনা কাযভাৰনা চিত্তভাৰনা ¶ পঞ্ঞাভাৰনা চ. তত্থ সম্মাকম্মন্তেন সম্মাআজীৰেন চ কাযো ভাৰিতো. সম্মাৰাচায সম্মাৰাযামেন চ সীলং ভাৰিতং. সম্মাসঙ্কপ্পেন সম্মাসমাধিনা চ চিত্তং ভাৰিতং. সম্মাদিট্ঠিযা সম্মাসতিযা চ পঞ্ঞা ভাৰিতা. ইমায চতুব্বিধায ভাৰনায দ্ৰে ধম্মা ভাৰনাপারিপূরিং গচ্ছন্তি চিত্তং পঞ্ঞঞ্চ. চিত্তং ভাৰনায সমথো, পঞ্ঞা ভাৰনায ৰিপস্সনা. তত্থ পঞ্ঞা অৰিজ্জাপহানেন চিত্তং উপক্কিলেসেহি অমিস্সীকতন্তি. পঞ্ঞা ভাৰনায চিত্তভাৰনংযেৰ পরিপূরেতি. এৰং যস্স সুভাৰিতং চিত্তং কুতো তং দুক্খমেস্সতীতি. অপি চ খো পন তস্স আযস্মতো অব্যাপাদধাতু অধিমুত্তা, ন সো পেতং সমাপন্নো তস্স সঙ্খাপহারং দেতি, সঙ্খাৰিতক্কিতে সরীরে দুক্খং ন ৰেদিযতি, অযং সুত্তত্থো.

৯৪. তত্থ কতমা দেসনা? ইমম্হি সুত্তে দস অসেক্খা অরহত্তধম্মা দেসিতা অপ্পমাণা চ সম্মা ৰিভাৰনা. তত্থ কতমো ৰিচযো? সেলোপমতা যে যে ধম্মা ৰেদনীযসুখদুক্খোপগতা, তে সব্বে নিরূপং ৰানুপস্সন্তানং ৰূপগতা কাযতো ৰেদযিতপরিক্খারো অপ্পৰত্তিতো দুক্খং ন ৰেদিযতি. তত্থ কতমা যুত্তি, যস্সেৰং ভাৰিতং চিত্তং কুতো তং [নং (ক.)] দুক্খমেস্সতীতি. তীসু ভাৰনাসু দুক্খং নক্খমতি চিত্তং চিত্তভাৰনায চ. নিরোধভাৰনায চ ¶ আনন্তরিকা সমাধিভাৰনায চ. ইতি যস্সেৰং ভাৰিতং চিত্তন্তি সমাধি ফলস্স পদট্ঠানং.

তত্থ কতমো লক্খণো? যস্সেৰং ভাৰিতং [পস্স উদা. ৩৪ উদানপাল়িযং] চিত্তন্তি চিত্তানি ভাৰিতানি যথা পঠমং নিদ্দিট্ঠানি পঞ্ঞা সীলং কাযো চিত্তং, সীলম্পি সুভাৰিতং কাযিকচেতসিকঞ্চ ঠিতত্তা নানুপকম্পতীতি ৰেদনাপি তথা সঞ্ঞাপি সঙ্খারাপি. কুতো তং দুক্খমেস্সতীতি সুখম্পি নানুগচ্ছতি, অদুক্খমসুখম্পি নাগতন্তি.

তত্থ কতমো চতুব্যূহো হারো? ইধ ভগৰতো কো অধিপ্পাযো? যে দুক্খেন অধিকা ভৰিস্সন্তি, তে এৰরূপাহি সমাপত্তীহি ৰিরহিস্সন্তি. অযমেত্থ ভগৰতো অধিপ্পাযো. যে চ অপ্পসন্না, তে হি ভৰিস্সন্তি, পসন্নানঞ্চ ¶ পীতিপামোজ্জং ভৰিস্সতি, অযং তত্থ ভগৰতো অধিপ্পাযো. আৰট্টোতি নত্থি আৰট্টনস্স ভূমি.

ৰিভত্তীতি যস্সেৰং ভাৰিতং চিত্তং কুতো তং দুক্খমেস্সতীতি দুৰিধো নিদ্দেসো – দুক্খহেতুনিদ্দেসো চ পটিপক্খনিদ্দেসো চ. কো সো দুক্খহেতু? যতো দুক্খং আগচ্ছতি পটিপক্খে ৰুত্তে সেসধম্মানং সীলং হেতু চ পচ্চযো চ, তে সব্বে ধম্মা ৰুত্তা হোন্তি. একবোধিপক্খিযে ধম্মে ৰুত্তে সব্বে বোধগমনীযা ধম্মা ৰুত্তা ভৰন্তি.

তত্থ কতমো চতুব্যূহো হারো? ইমম্হি সুত্তে ভগৰতো কো অধিপ্পাযো? যে অৰিপ্পটিসারেন ছন্দিকা, তে সীলপারিপূরী ভৰন্তি পামোজ্জছন্দিকা অৰিপ্পটিসারীপারিপূরী, অযমেত্থ ভগৰতো অধিপ্পাযো…পে… অযং চতুব্যূহো হারো.

তত্থ কতমো আৰট্টো? ইদং ¶ সুত্তং নিব্বেধভাগিযং. যো নিব্বেধো, অযং নিরোধো. যেন নিব্বিজ্ঝতি, সো মগ্গো. যং নিব্বিজ্ঝতি, তং দুক্খং. যং নিব্বেধগামিনা মগ্গেন পহীযতি, সমুদযোযং ৰুত্তো.

তত্থ কতমা ৰিভত্তি? সীলৰতো অৰিপ্পটিসারোতি ৰিভজ্জব্যাকরণীযং, পরামসন্তস্স নত্থি অৰিপ্পটিসারো যাৰ দোসকতং কাযেন ৰা ৰাচায ৰা অকুসলং আরভতি. কিঞ্চিপিস্স এৰং হোতি ‘‘সুকতমেতং সুচরিতমেতং নো চস্স তেন অৰিপ্পটিসারেন পামোজ্জং জাযতি ¶ যাৰ ৰিমুত্তি, তস্স সীলৰতো অৰিপ্পটিসারো’’তি ৰিভজ্জব্যাকরণীযং, অযং ৰিভত্তিহারো.

তত্থ কতমা পরিৰত্তনা? ইমেহি সত্তহি উপনিসাসম্পত্তীহি একাদস উপনিসা ৰিভত্তিযং পজহানং পজহন্তি, অযং পরিৰত্তনা.

তত্থ কতমা ৰেৰচনা? ইমেসং অরিযধম্মানং বলবোজ্ঝঙ্গৰিমোক্খসমাধিসমাপত্তীনং ইমানি ৰেৰচনানি.

তত্থ কতমা পঞ্ঞত্তি? সীলৰতো অৰিপ্পটিসারোতি সীলক্খন্ধে নেক্খম্মপঞ্ঞত্তিযা পঞ্ঞত্তং, নিসজ্জপঞ্ঞত্তি চ এৰং দস অঙ্গানি দ্ৰীহি দ্ৰীহি অঙ্গেহি পঞ্ঞত্তানি.

তত্থ কতমো ওতরণো? ইদং নিব্বেধভাগিযসুত্তং পঞ্চসু ওতিণ্ণং যথা যং পঠমং নিদ্দিট্ঠং এৰমিন্দ্রিযাদিখন্ধধাতুআযতনেসু নিদ্দিসিতব্বানি.

তত্থ ¶ কতমো সোধনো হারো? সীলৰতো অৰিপ্পটিসারোতি ন তাৰ সুদ্ধো আরম্ভো অৰিপ্পটিসারিনো পামোজ্জন্তি ন তাৰ সুদ্ধো আরম্ভো যানি একাদস পদানি দেসিতানি যদা তদা সুদ্ধো আরম্ভো, অযং সোধনো.

তত্থ ¶ কতমো অধিট্ঠানো? সীলৰেমত্ততায পঞ্ঞত্তং এৰং দস পদানি সব্বানি সীলক্খন্ধস্স আনিসংসো, তে চ পতিরূপদেসৰাসো চ পচ্চযো অত্তসম্মাপণিধানঞ্চ হেতু, সমাধিক্খন্ধস্স সুখং হেতু পস্সদ্ধি পচ্চযো, যেন ঝানসহজাতি চ ঠানন্তি ঝানঙ্গা অপরো পরিযাযো কামেসু আদীনৰানুপস্সনা সমাধিনো পচ্চযো নেক্খম্মে আনিসংসদস্সাৰিতা হেতু.

তত্থ কতমা সমারোপনা? যং ৰীরিযিন্দ্রিযং, সো সীলক্খন্ধো. যং সীলং, তে চত্তারো ধম্মা পধানা. যং ধম্মানুধম্মপটিপত্তি, সো পাতিমোক্খসংৰরো.

৯৫. যস্স সেলোপমং চিত্তন্তি গাথা [পস্স উদা. ৩৪ উদানে], সেলোপমন্তি উপমা যথা সেলো ৰাতেন ন কম্পতি ন উণ্হেন ন সীতেন সংকম্পতি. যথা অনেকা অচেতনা, তে উণ্হেন মিলাযন্তি, সীতেন অৰসুস্সন্তি, ৰাতেন ভজন্তি. ন এৰং সেলো ৰিরত্তং রজনীযেসু দোসনীযে ন দুস্সতীতি ¶ কারণং দোসনীযে দোমনস্সন্তং, ন দুট্ঠেন ৰা কম্পতি উণ্হেন ৰা, সো মিলাযতি সীতেন ৰা অৰসুস্সতি, এৰং চিত্তং রাগেন নানুস্সতি সীতেন কম্পতীতি. কিং কারণং? ৰিরত্তং রজনীযেসু দোসনীযে ন দুস্সতি. কিং কারণং? দোসনীযে ¶ পনস্সন্তি ন দুস্সতি, অদুট্ঠং তং ন কোসিস্সন্তি, তেন কুপ্পনীযে ন কুপ্পতি, যস্সেৰং ভাৰিতং চিত্তং কুতো তং দুক্খনিদ্দেসো চ ¶ কুতো এৰরূপস্স দুক্খং আগমিস্সতীতি নিদ্দিট্ঠং.

পরিৰত্তনাতি কুতো তং দুক্খমেস্সতীতি যং চেতসিকং সুখং অনুপাদিসেসা অযং নত্থি সোপাদিসেসা অযং অত্থি. পুন এৰমাহংসু তং খণং তং মুহুত্তং উভযমেৰ অৰেদযিতং সোপাদিসেসং যঞ্চ অনুপাদিসেসং যঞ্চ তং খণং তং মুহুত্তং অনুপাদিসেসং যঞ্চ সোপাদিসেসং চ অৰেদযিতং. সুখমাপন্নস্স অনাৰত্তিকন্তি অযমেত্থ ৰিসেসো পরিৰত্তনা.

তত্থ ¶ কতমো ৰেৰচনো? যস্সেৰং ভাৰিতং চিত্তং ৰা ভাৰিতং সুভাৰিতং অনুট্ঠিতং ৰত্থুকতং সুসমারদ্ধং. চিত্তন্তি মনো ৰিঞ্ঞাণং মনিন্দ্রিযং মনোৰিঞ্ঞাণধাতু.

তত্থ ¶ কতমা পঞ্ঞত্তি? চিত্তং মনো সঙ্খারা ৰূপসমপঞ্ঞত্তিযা পঞ্ঞত্তং. সমাধি অসেক্খপঞ্ঞত্তিযা পঞ্ঞত্তো. দুক্খং উচ্ছিন্নপঞ্ঞত্তিযা পঞ্ঞত্তং.

তত্থ কতমো ওতরণো? চিত্তে নিদ্দিট্ঠে পঞ্চক্খন্ধা নিদ্দিট্ঠা হোন্তি, অযং খন্ধেসু ওতরণো, মনোৰিঞ্ঞাণধাতুযা নিদ্দিট্ঠায অট্ঠারস ধাতুযো নিদ্দিট্ঠা হোন্তি, অযং ধাতূসু ওতরণো. মনাযতনে নিদ্দিট্ঠে সব্বানি আযতনানি নিদ্দিট্ঠানি হোন্তি. তত্থ মনাযতনং নামরূপস্স পদট্ঠানং. নামরূপপচ্চযা সল়াযতনং. তথা পটিচ্চসমুপ্পাদে. অযং ওতরণো. তত্থ কতমো সোধনো সুদ্ধোযেৰ আরম্ভো.

তত্থ কতমো অধিট্ঠানো? ছল়িন্দ্রিযং ভাৰনা একত্তাযং পঞ্ঞত্তি ছট্ঠিতেন কাযো একত্তায পঞ্ঞত্তো.

তত্থ কতমো পরিক্খারো? চিত্তস্স পুব্বহেতু সমুপ্পাদায মনসিকারো চ তপ্পোণতা চ যং অসমাহিতভূমিযং চ ৰিসেসধম্মানং অভাৰিতত্তা চিত্তসততং গচ্ছতি, সচে সমাধিনো সুখং হেতু অৰিপ্পটিসারো পচ্চযো, অযং হেতু অযং পচ্চযো পরিক্খারো.

তত্থ ¶ কতমা সমারোপনা? যস্সেৰং ভাৰিতন্তি তস্স ধম্মা সমারোপযিতব্বা. কাযো সীলং পঞ্ঞা ভাৰিতচিত্তন্তি অনভিরতং অনপণতং অনেকং অনুতং অনাপজ্জাসত্তং অযং সমঞ্ঞাযতনা ন তস্স সেক্খস্স সম্মাসমাধি সব্বে অসেক্খা দস অরহন্তধম্মা নিদ্দিট্ঠা হোন্তি. অসেক্খভাগিযানি সুত্তানি.

৯৬. যস্স ¶ নূন, ভন্তে, কাযগতাসতি অভাৰিতা, অযং সো অঞ্ঞতরং সব্রহ্মচারিং [সব্রহ্মচারীনং (ক.)] আসজ্জ সমাপজ্জ অপ্পটিনিসজ্জ জনপদচারিকং পক্কমেয্য, সো আযস্মা ইমস্মিং ৰিপ্পটিজানাতি দ্ৰে পজানি পটিজানাতি চিত্তভাৰনাযঞ্চ দিট্ঠিযা পহানং, কাযভাৰনাযঞ্চ দিট্ঠিপ্পহানং, কাযভাৰনাযঞ্চ তণ্হাপহানং, যং পঠমং উপমং করোতি. অসুচিনাপি সুচিনাপি পথৰী নেৰ অট্টিযতি ন জিগুচ্ছতি ন পীতিপামোজ্জং পটিলভতি, এৰমেৰ ¶ হি পথৰীসমেন সো চেতসা অন্ৰযেন অপ্পকেন অৰেরেন অব্যাপজ্জেন ৰিহরামীতি. ইতি সো আযস্মা কিং পটিজানাতি, কাযভাৰনায সুখিন্দ্রিযপহানং পটিজানাতি, চিত্তভাৰনায সোমনস্সিন্দ্রিযপহানং পটিজানাতি. কাযিকা ৰেদনা রাগানুসযমনুগতানং সুখিন্দ্রিযং পটিক্খিপতি. ন হি ৰেদনাক্খন্ধং যা চেতসিকা সুখৰেদনা তত্থ অযং পটিলাভপচ্চযা উপ্পজ্জতি সুখং সোমনস্সং. সোতং পটিক্খিপতি, ন হি মনোসম্ফস্সজং ৰেদনং. তত্থ চতূসু মহাভূতেসু রূপক্খন্ধস্স অনুসযপটিঘপহানং ভণতি. কামে রূপঞ্চ তঞ্চ অসেক্খভূমিযং. কাযে কাযানুপস্সনা দিট্ঠধম্মসুখৰিহারঞ্চ. বলেন চ উস্সাহেন চ সব্বং মনসি কতত্তানং পহানং ¶ মেদং কতালিকায চ পুরিসেন চ মণ্ডনকজাতিকেন চ, এতেহি ইমস্স মাতাপিতুসম্ভূতং পচ্চৰেক্খণং, সো কাযেন চ কাযানুপস্সনায চ চিত্তেন চ চিত্তানুপস্সনায চ দ্ৰে ধম্মে ধারেতি. কাযকিলেসৰত্থুং চিত্তেন চ চিত্তসন্নিস্সযে চিত্তেন সুভাৰিতেন সত্তন্নং চ সমাপত্তীনং ৰিহরিতুং পটিজানাতি.

গহপতিপুত্তোপমতায চ যথা গহপতিপুত্তস্স নানারঙ্গানং ৰত্থকরণ্ডকো পুণ্ণো ভৰেয্য, সো যং যদেৰ ৰত্থযুগং পুব্বণ্হসমযে আকঙ্খতি, পুব্বণ্হসমযে নিব্বাপেতি, এৰং মজ্ঝন্হিকসমযে, সাযন্হসমযে, এৰমেৰ সো আযস্মা চিত্তস্স সুভাৰিতত্তা যথারূপেন ৰিহারেন আকঙ্খতি পুব্বণ্হসমযং ৰিহরিতুং, তথারূপেন [যথারূপেন (পী. ক.)] পুব্বণ্হসমযং ৰিহরতি, মজ্ঝন্হিকসমযে, সাযন্হসমযে. তেন ৰেস আযস্মতা উপমায মে আসিতায পথৰী ৰা অনুত্তরা ইন্দ্রিযভাৰনা ভাৰিতচিত্তেন. তেন সো আযস্মা ইদং অট্ঠৰিধং ভাৰনং পটিজানাতি চতূসু মহাভূতেসু, কাযভাৰনং উপকচণ্ডালং পুরিসমেতকং ভৰতলাকাসু চিত্তভাৰনং, ইমাহি ভাৰনাহি তায ভাৰনায চ সমথা পারিপূরিমন্তেহি. ইমেহি চতূহি পঞ্ঞাপারিপূরিমন্তেহি.

৯৭. কথং ¶ উপকচণ্ডালং পটিকূলেসু ধম্মেসু অপ্পটিকূলসঞ্ঞী ৰিহরতি? কাযো ¶ পকতিযা অপ্পটিকূলং কাযে উদ্ধুমাতকসঞ্ঞা সংখিত্তেন নৰ সঞ্ঞা ইমে পটিকূলা ধম্মা চেসো আযস্মা পটিকূলতো অজিগুচ্ছিতো কাযগতাসতিযা ভাৰনানুযোগমনুযুত্তো ৰিহরতি, ন হি তস্স জিগুচ্ছপ্পহায চিত্তং পটিকূলতি.

কথং ¶ অপ্পটিকূলেসু ধম্মেসু পটিকূলসঞ্ঞী ৰিহরতীতি? কাযো সব্বলোকস্স অপ্পটিকূলো তং সো আযস্মা অসুভসঞ্ঞায ৰিহরতি. এৰং অপ্পটিকূলেসু ধম্মেসু পটিকূলসঞ্ঞী ৰিহরতি.

কথং পটিকূলেসু চ অপ্পটিকূলেসু চ অপ্পটিকূলসঞ্ঞী ৰিহরতীতি অপি সব্বোযং লোকস্স যমিদং মুণ্ডো পত্তপাণী কুলেসু পিণ্ডায ৰিচরতি, তেন চ সো আযস্মা সুৰণ্ণদুব্বণ্ণেন অপ্পটিকূলসঞ্ঞী চিত্তেন চ কাযেন নিব্বিদাসহগতেন অপ্পটিকূলসঞ্ঞী, এৰং পটিকূলেসু অপ্পটিকূলেসু চ ধম্মেসু অপ্পটিকূলসঞ্ঞী ৰিহরতি.

কথং পটিকূলেসু চ ধম্মেসু অপ্পটিকূলসঞ্ঞী ৰিহরতি? পটিকূলেসু চ ধম্মেসু সুভসঞ্ঞিনো ইত্থিরূপে পটিকূলেসু চ জিগুচ্ছিনো ৰিনীলকৰিপুব্বকে তত্থ সো আযস্মা পটিকূলসঞ্ঞী ৰিহরতি.

কথং পটিকূলেসু ধম্মেসু তদুভযং অভিনিৰজ্জযিত্ৰা উপেক্খকো ৰিহরতি সতো চ সম্পজানো চ? অপ্পটিকূলেসু চ ধম্মেসু সুভসঞ্ঞিনো ইত্থিরূপে পটিকূলেসু চ জিগুচ্ছিনো ৰিনীলকৰিপুব্বকে তদুভযং অভিনিৰজ্জযিত্ৰা ‘নেতং মম’‘নেসোহমস্মি’‘নেসো মে’ অত্তাতি ৰিহরতি. এৰং ¶ তদুভযং অভিনিৰজ্জযিত্ৰা উপেক্খকো ৰিহরতি সতো সম্পজানো.

অপরো পরিযাযো. তেধাতুকো লোকসন্নিৰাসো সব্ববালপুথুজ্জনানং অপ্পটিকূলসঞ্ঞা. তত্থ চ আযস্মা সারিপুত্তো অপ্পটিকূলসঞ্ঞী ৰিহরতি. এৰং অপ্পটিকূলেসু ধম্মেসু পটিকূলসঞ্ঞী ৰিহরতি.

কথং পটিকূলেসু ধম্মেসু অপ্পটিকূলসঞ্ঞী ৰিহরতি? পটিকূলসঞ্ঞিনো সব্বসেক্খা ইধ কা তেধাতুকে সব্বলোকে. তত্থ কতমো ভূমিপ্পত্তো সমাধিফলে সচ্ছিকতো অপ্পটিকূলসঞ্ঞী ৰিহরতি ¶ ? কিং কারণং? ন হি তং অত্থি যস্স লোকস্স পহানায পটিকূলসঞ্ঞী উপ্পাদেয্য.

কথং পটিকূলেসু চ অপ্পটিকূলেসু চ ধম্মেসু পটিকূলসঞ্ঞী ৰিহরতি? তেধাতুকে লোকসন্নিৰাসে যাৰ কামলোকভূমতা হি রাগানং ৰীতরাগানং পটিকূলসমতা রূপারূপধাতুং অপ্পটিকূলসমতা. তত্থ চ আযস্মা সারিপুত্তো পটিকূলসঞ্ঞী ৰিহরতি. এৰং পটিকূলেসু চ অপ্পটিকূলেসু চ ধম্মেসু পটিকূলসঞ্ঞী ৰিহরতি.

কথং ¶ পটিকূলেসু চ অপ্পটিকূলেসু চ ধম্মেসু অপ্পটিকূলসঞ্ঞী ৰিহরতি? যং কিঞ্চি পরতো দুরুত্তানং দুরাগতানং ৰচনপথানং তং ৰচনং অপ্পটিকূলং যাৰতা ৰাচসো অপ্পতিরূপা তথা জনস্স অপ্পটিকূলসঞ্ঞা. তত্থ আযস্মা সারিপুত্তো অভিঞ্ঞায সচ্ছিকতো অপ্পটিকূলসঞ্ঞী ৰিহরতি, এৰং পটিকূলেসু চ অপ্পটিকূলেসু চ ধম্মেসু অপ্পটিকূলসঞ্ঞী ৰিহরতি.

৯৮. কথং ¶ পটিকূলেসু চ অপ্পটিকূলেসু চ ধম্মেসু তদুভযং অভিনিৰজ্জযিত্ৰা উপেক্খকো চ ৰিহরতি সতো চ সম্পজানো? যঞ্চ নেসং সমনুপস্সতি যে ধম্মা দুচ্চরিতা, তে ধম্মা অপ্পটিকূলা. তত্থ আযস্মা সারিপুত্তো ইতি পটিসঞ্চিক্খতি যে ধম্মা দুচ্চরিতা, তে ধম্মা অনিট্ঠৰিপাকা. যে ধম্মা সুচরিতা, তে আচযগামিনো. সো চ সুচরিতং আচযগামিনিং করিত্ৰা দুচ্চরিতং অনিট্ঠৰিপাকং করিত্ৰা তদুভযং অভিনিৰজ্জযিত্ৰা উপেক্খকো ৰিহরতি.

অথ পটিকূলেসু চ ধম্মেসু অপ্পটিকূলেসু চ পটিকূলসঞ্ঞী ৰিহরতি. তণ্হা পটিকূলধম্মা কিং কারণং? তণ্হাৰসেন হি সত্তা দ্ৰীহি ধম্মেহি সত্তা, কবল়ীকারে আহারে রসতণ্হায সত্তা, ফস্সে সুখসঞ্ঞায সত্তা. তত্থাযস্মা সারিপুত্তো কবল়ীকারে চ আহারে পটিকূলসঞ্ঞী ৰিহরতি, ফস্সে চ দুক্খসঞ্ঞী ৰিহরতি. এৰং পটিকূলেসু চ অপ্পটিকূলেসু চ পটিকূলসঞ্ঞী ৰিহরতি.

কথং পটিকূলেসু চ ধম্মেসু অপ্পটিকূলেসু চ ধম্মেসু অপ্পটিকূলসঞ্ঞী ৰিহরতি? তণ্হাক্খযং অনুত্তরং নিব্বানং তথা বালপুথুজ্জনানং পটিকূলসঞ্ঞা পহতসঞ্ঞা চ. তত্থাযস্মতো ¶ সারিপুত্তস্স অপ্পটিকূলসঞ্ঞা অব্যাপাদসঞ্ঞা চ সামং পঞ্ঞায পস্সিত্ৰা এৰং পটিকূলেসু চ ধম্মেসু অপ্পটিকূলসঞ্ঞী ৰিহরতি.

কথং পটিকূলেসু চ অপ্পটিকূলেসু চ ধম্মেসু অপ্পটিকূলসঞ্ঞী ৰিহরতি? ততিযে ¶ চ নিব্বানে পটিকূলসঞ্ঞিনো যসেন চ কিত্তিনি চ অপ্পটিকূলসঞ্ঞিনো. তত্থাযস্মা সারিপুত্তো অস্সাদঞ্চ আদীনৰঞ্চ নিস্সরণঞ্চ যথাভূতং সম্মাপঞ্ঞায পটিজানন্তো পটিকূলঞ্চ অপ্পটিকূলঞ্চ ধম্মং তদুভযং অভিনিৰজ্জযিত্ৰা অপ্পটিকূলসঞ্ঞী ৰিহরতি.

কথং ¶ পটিকূলং অপ্পটিকূলঞ্চ ধম্মং তদুভযং অভিনিৰজ্জযিত্ৰা উপেক্খকো ৰিহরতি? সতো চ সম্পজানো চ, যঞ্চ সমনুপস্সতি অনুনযো অপ্পটিকূলো ধম্মো পটিঘো চ পটিকূলো ধম্মো, তত্থাযস্মা সারিপুত্তো অনুনযস্স পটিঘপ্পহীনত্তা উপেক্খকো ৰিহরতি সতো সম্পজানো চ. যঞ্চস্স সমনুপস্সতি অযং পঞ্চৰিধা অনুত্তরা ইন্দ্রিযভাৰনা. অযং সুত্তনিদ্দেসো.

৯৯. তত্থ কতমো দেসনাহারো? ইমম্হি সুত্তে কিং দেসিতব্বং? তত্থ ৰুচ্চতে, ইমম্হি সুত্তে দিট্ঠধম্মসুখৰিহারো দেসিতো, তথা ৰিমুত্তং চিত্তং পচ্চৰেক্খণা চ অধিপঞ্ঞাধম্মং দেসিতং.

তত্থ কতমো ৰিচযো? যে কাযে কাযানুপস্সিনো ৰিহরন্তি, তেসং চিত্তং অনুনযপ্পটিঘেন ন ৰিহরতি অনুনযপ্পটিঘেন চাভিরমমানস্স চিত্তং সমগ্গতং ভৰিস্সতীতি ভাৰনায বলমেতং, অযং ৰিচযো হারো.

তত্থ কতমো যুত্তিহারো? কাযভাৰনায চ চিত্তভাৰনায চ ন কিঞ্চি সব্রহ্মচারী অতিমঞ্ঞিস্সতীতি. অত্থি এসা যুত্তি, অযং যুত্তিহারো.

তত্থ কতমো পদট্ঠানো হারো? কাযভাৰনায ¶ পঠমস্স সতি উপট্ঠানস্স পদট্ঠানং. যা পথৰীসমচিত্ততা, সা অনিচ্চানুপস্সনায পদট্ঠানং.

তত্থ কতমো লক্খণো? যং পথৰীসমেন চেতসা ৰিহরতি অত্তানুপস্সী পথৰীসমেন গিহী ¶ ৰিহরতি. কো অত্থো পথৰীসমেনাতি? যথা যে চ সেলোপমতায অকম্মযুত্তা এৰমেৰ পথৰীসমো অযং হিরিযতায. অযং লক্খণো.

তত্থ কতমো চতুব্যূহো হারো? ইমম্হি ব্যাকরণে কো তস্স আযস্মতো অধিপ্পাযো? যে কেচি অরহন্তা ইন্দ্রিযভাৰনং আকঙ্খিযন্তি, তে পথৰীসমতং উপ্পাদযিস্সন্তীতি. অযং অধিপ্পাযো.

তত্থ কতমো আৰট্টোতি? নত্থি আৰট্টস্স ভূমি.

তত্থ ¶ কতমো ৰিভত্তি? যো কাযানুপস্সী ৰিহরতি, সো পথৰীসমচিত্ততং পটিলভিস্সতীতি ন একংসেন. কিং কারণং? যে খণ্ডকাদিছিন্নকাদিনো, ন তে পথৰীসমচিত্ততং পটিলভন্তি. সব্বা কাযগতাসতি সেক্খভাৰনায নিব্বানং ফলং, অযং ৰিভত্তি.

তত্থ কতমো পরিৰত্তনো হারো? যে কাযানুপস্সিনো ৰিহরিস্সন্তি, তেসংযেৰ কাযপচ্চযা উপ্পজ্জেয্য আসৰা ৰিঘাতপরিল়াহা, অযং পরিৰত্তনো হারো.

তত্থ কতমো ওতরণো? পঞ্চক্খন্ধা [সত্তেসু চ পঞ্চক্খন্ধা (পী.)] অৰিতিণ্ণা [অৰতিণ্ণা (পী.)] বাৰীসতিন্দ্রিযানি, তথা যং মনিন্দ্রিযং, তং মনোধাতু মনাযতনঞ্চ. যং সমাধিন্দ্রিযং, তং ধম্মধাতু ধম্মাযতনঞ্চ. অযং ওতরণো হারো.

তত্থ ¶ কতমো সোধনো হারো? যে চ মনসা চত্তারো ভাৰেতব্বা, তে সব্বে ভাৰিতা যং তং মনেন পহীনে পত্তব্বতং সব্বত্থ এতস্স চ অত্থায আরম্ভো, সো অত্থো সুদ্ধো. অযং সোধনো হারো.

তত্থ কতমো অধিট্ঠানো? অযং সমাধি একত্ততায পঞ্ঞত্তো, ছ কাযা একত্ততায পঞ্ঞত্তা. পঞ্চিন্দ্রিযানি রূপীনি রূপকাযো. ছ ৰেদনাকাযা ৰেদনাকাযো. ছ সঞ্ঞাকাযা সঞ্ঞাকাযো. ছ চেতনাকাযা চেতনাকাযো. ছ ৰিঞ্ঞাণকাযা ৰিঞ্ঞাণকাযো. সব্বেপি এতে ধম্মা ধম্মকাযোতিযেৰ সঙ্খং গচ্ছন্তি. অযং অধিট্ঠানো.

পরিক্খারোতি ¶ সমাপত্তিকোসল্লঞ্চ ৰীথিকোসল্লঞ্চ [ধীতিকোসল্লঞ্চ (পী.)] হেতু. যঞ্চ গোচরকোসল্লং যঞ্চ কল্লং তং কোসল্লং পচ্চযো. ৰোদানকোসল্লং হেতু, কল্লং পচ্চযো. সুখং হেতু, অব্যাপজ্জং পচ্চযো. অযং পরিক্খারো.

তত্থ কতমো সমারোপনোতি? যথা পথৰী সুচিম্পি নিক্খীপন্তে অসুচিম্পি নিক্খিত্তে তাদিসেযেৰ এৰং কাযো মনাপিকেহিপি ফস্সেহি অমনাপিকেহিপি ফস্সেহি তাদিসোযেৰ পটিঘসম্ফস্সেন ৰা সুখায ৰেদনায তাদিসং যো চিত্তং. ইদং সুত্তং ৰিভত্তং সওপম্মং উগ্ঘটিতঞ্ঞুস্স পুগ্গলস্স ৰিভাগেন. তত্থ সমারোপনায অৰকাসো নত্থি.

১০০. তত্থ ¶ কতমং সুত্তং সংকিলেসভাগিযং? যতো চ কুসলেহি ধম্মেহি ন ৰিরোধতি, ন ৰড্ঢতি, ইমং আদীনৰং ভগৰা দেসেতি, তস্মা ছন্নং ৰিৰরেয্য, ৰিৰটং নাতিৰস্সতি, ততো আদীনৰতো ৰিৰরেয্যাতি তং ¶ তীহি ধম্মেহি নাভিধংসিতাতি অসুভসঞ্ঞায রাগেন নাভিধংসিযতি. মেত্তায দোসেন নাভিধংসিযতি. ৰিপস্সনা মোহেন নাভিধংসিযতি. এৰঞ্চস্স যো যো ধম্মো পটিপক্খো তম্হি তম্হি ধম্মে পরিপূরিস্সতি. যো তস্স ধম্মস্স অকুসলো ধম্মো পটিপক্খো, তেন নাধিৰাসিযতি.

অপরো পরিযাযো. যে ইমে ধম্মা অত্তনা ন সক্কোতি ৰুট্ঠানং, তে এতে ধম্মা দেসিতা. ছন্নমতিৰস্সতীতি তেহি ৰিতক্কং যেন চ সক্কা পুন দেসিতং চিত্তং ৰিভাৰেতুং পরিযোদাপেতুং ৰিৰেকনিন্নস্স ৰিৰেকপোণস্স ৰিৰেকপব্ভারস্স ৰুদ্ধিং ৰিরূল়্হিং ৰেপুল্লতং আপজ্জতি কুসলেসু ধম্মেসু, সেয্যথাপি নাম উপ্পলং ৰা কুমুদং ৰা পদুমং ৰা উদকে সুক্কপক্খে চন্দো যাৰরত্তি যাৰদিৰসো আগচ্ছতি, তস্স ৰুদ্ধিযেৰ পাটিকঙ্খিতব্বা, ন পরিহানি, এৰংৰিধং তং চিত্তং নাভিধংসিযতি. অপরোপেত্থ যো অকূটো অসঠো অমাযাৰী উজু পুরিসো যথাভূতং অত্তানং আৰিকরোতি. তত্থ যো ছাদেতি তস্স অকুসলা ধম্মা চিত্তং অনুধাৰন্তি. ছন্নমতিৰস্সতীতি যো পন হোতি অসঠো অকূটো অমাযাৰী উজু পুরিসো যথাভূতং অত্তানং আৰিকরোতি. তস্স চিত্তং অকুসলেহি ধম্মেহি ন ৰিদ্ধংসিযতি, অযং সুত্তত্থো.

১০১. তত্থ কতমা দেসনা? ইধ দেসিতা দস অকুসলকম্মপথা অধিৰস্সনতায দস কুসলকম্মপথা অনধিৰস্সনতায অকুসলেহি ন ¶ ৰিসুজ্ঝতি. যথা ৰুত্তং ভগৰতা ‘‘চিত্তসংকিলেসা, ভিক্খৰে, সত্তা সংকিলিস্সন্তী’’তি.

তত্থ ¶ কতমো ৰিচযো? যস্সেৰং চিত্তং অধিৰাসিযতি, তস্স বুজ্ঝিতস্স যং ভৰেয্য কূটেয্য, তং আনন্তরিযেনপি সত্থরি ৰা গুণানুকম্পনতায, অযং ৰিচযো.

তত্থ কতমা যুত্তীতি? এৰং অনধিৰসিযন্তং চিত্তং ৰুট্ঠাতি. ৰুট্ঠিতং পতিট্ঠহতি কুসলেসু ধম্মেসূতি অত্থি এসা যুত্তি.

পদট্ঠানন্তি ¶ ছন্নমতিৰস্সতীতি ছন্নং অসংৰরানং পদট্ঠানং, ৰিৰটং নাতিৰস্সতীতি অছন্নং সংৰরণানং. তস্মা ছন্নং ৰিৰরেয্য ৰিৰটং নাতিৰস্সতীতি দেসনায পদট্ঠানং.

লক্খণোতি ছন্নমতিৰস্সতীতি যে কেচি ৰিচিত্তেন ছন্নেন একলক্খণা ধম্মা সব্বে তে অৰিদ্ধংসিযন্তি. তস্মা ছন্নং ৰিৰরেয্য. ৰিৰটং নাতিৰস্সতীতি যে কেচি তেন অচ্ছন্নেন একলক্খণা ধম্মা সব্বে তে নাতিৰস্সন্তীতি লক্খণো হারো.

তত্থ কতমো চতুব্যূহো হারো? ইমম্হি সুত্তে ভগৰতো কো অধিপ্পাযো? যেসং কেসঞ্চি চিত্তং অকুসলা ধম্মা অধিপটিদেসিতা তে যথাধম্মং পটিকরিস্সন্তীতি অযং তত্থ ভগৰতো অধিপ্পাযো. অযং চতুব্যূহো হারো.

আৰট্টোতি ¶ যং ছন্নং তং দুৰিধং কম্পমানং সমুচ্ছিতব্বো. আনন্তরিযসমাধীনং. তত্থ পস্সদ্ধিযঞ্চ মানো আসৰে ৰড্ঢেতি, অস্সদ্ধিযেন চ পমাদং গচ্ছতি, পমাদেন ওনমতি, উন্নল়ভাৰং গচ্ছতি. ৰুত্তং চেতং ভগৰতা ‘‘উন্নল়ানং পমত্তানং তেসং ৰড্ঢন্তি আসৰা’’তি চত্তারি তানি উপাদানানি, যানি চত্তারি উপাদানানি, তে পঞ্চুপাদানক্খন্ধা ভৰন্তি. ইমানি সচ্চানি দুক্খঞ্চ সমুদযো চ. তস্মা ছন্নং ৰিৰরেয্যাতি যেন হেতুনা, তে আসৰা ৰড্ঢন্তি. তেসং পহীনত্তা আসৰা পহীযন্তে. তত্থ অপ্পমাদেন অস্সদ্ধিযং পহীযতি উদ্ধচ্চকুক্কুচ্চপ্পহানেন ওল়ারিকতা তস্স দ্ৰে ধম্মা ন সমথো চ ভাৰনা চ পারিপূরিং গচ্ছন্তি. যো তেসং আসৰানং খযো, অযং নিরোধো. ইমানি চত্তারি সচ্চানি, অযং আৰট্টো.

তত্থ কতমো ৰিভত্তি হারো? ছন্নমতিৰস্সতীতি ন একংসো. কিং কারণং? যস্স অস্সা নিৰত্তনা যথাপি সেক্খানং. যথাৰুত্তং ভগৰতা –

‘‘কিঞ্চাপি ¶ সেক্খো পকরেয্য পাপং, কাযেন ৰাচায উদ চেতসা ৰা;

অভব্বো হি তস্স পরিগুহনায, অভব্বতা দিট্ঠপদস্স হোতী’’তি.

কিঞ্চাপি ¶ তেসং নিৰারণং চিত্তং হোতি. অপি তু অপ্পচ্চযা সমাযে চ তে নিদ্দিসিতব্বা, অযং ৰিভত্তিহারো.

তত্থ কতমো পরিৰত্তনো হারো. ছন্নমতিৰস্সতীতি যস্স যে ধম্মা সব্বং অনৰিৰটং অতিৰস্সিযতি, ৰিৰটং নাতিৰস্সতি, অৰগুণন্তং নাতিৰস্সতি. অযং পরিৰত্তনো হারো.

তত্থ কতমো ৰেৰচনো হারো. ছন্নন্তি আৰুতং নিৰুতং পিহিতং পটিকুজ্জিতং সঞ্ছন্নং পরোধং, ৰিৰটং নাতিৰস্সতীতি যস্স তে ধম্মা পব্বজ্জিতা ¶ ৰিনোদং নাধিৰস্সিতা ৰন্তিকতাতি, অযং ৰেৰচনো হারো.

তত্থ কতমো পঞ্ঞত্তি হারো. ছন্নমতিৰস্সতীতি কিলেসভাগিযপঞ্ঞত্তং ৰিৰটং নাতিৰস্সতীতি সধম্মকিচ্চং যং পটিপদা পঞ্ঞত্তিযা পঞ্ঞত্তং, তস্মা হি ছন্নং ৰিৰরেয্যাতি অনুসাসনপঞ্ঞত্তিযা পঞ্ঞত্তং, ৰিৰটং নাতিৰস্সতীতি নিদ্ধানপঞ্ঞত্তিযা পঞ্ঞত্তং, অযং পঞ্ঞত্তি হারো.

তত্থ কতমো ওতরণো হারো? ছন্নমতিৰস্সতীতি তযো কিলেসা রাগো দোসো মোহো, তে খন্ধেসু সঙ্খারক্খন্ধো…পে… তে পুরা যথা নিদ্দিট্ঠং খন্ধধাতুআযতনেসু, অযং ওতরণো হারো.

তত্থ কতমো সোধনো হারো? যেনারম্ভেন ইদং সুত্তং ভাসতি সো আরম্ভো নিযুত্তো.

অধিট্ঠানোতি ছন্নমতিৰস্সতীতি একত্ততায পঞ্ঞত্তং. কিংকারণং? ইদং হি অতিৰস্সতীতি ইমস্স চ অতিৰস্সতি এৰঞ্চ অতিৰস্সতীতি অযং ৰেমত্ততায যা সুণসাধারণেহি লক্খণেহি পঞ্ঞাপিযতি, সা একত্তপঞ্ঞত্তি.

তত্থ কতমো পরিক্খারো? যঞ্চ তং অতিৰস্সিযন্তি, তস্স দ্ৰে হেতূ দ্ৰে পচ্চযা অকুসলপসুতেৰ ¶ ৰাচকত্তাভিরতি চ. ইমে দ্ৰে অযোনিসোমনসিকারো চ কুসলা ধম্মা ৰোপসগ্গা চ, ইমে দ্ৰে পচ্চযা.

তত্থ কতমো সমারোপনো? ছন্নমতিৰস্সতীতি ৰেমতি পস্সতীতি ছন্নং যং পরিগ্গহিতুং যং অদেসিতুং অপ্পস্সুতং যং কথংকথা ৰিভূতেন ¶ অকুসলমূলেন যং তণ্হায চ তে ৰড্ঢতি দোসাতি সন্নিত্ৰা তে অপ্পসক্খযেন সঙ্খারা. সঙ্খারপচ্চযা ৰিঞ্ঞাণং যাৰ জরামরণং, অযং সমারোপনো ¶ . যং পুন তথা দেসনা, তস্সেৰ অকুসলা ধম্মা ৰুদ্ধিং ৰিরূল়্হিং ৰেপুল্লতমাপজ্জতি তস্স সঙ্খারা নিরোধা, অযং সমারোপনো.

১০২. চত্তারো পুগ্গলা [পস্স অ. নি. ৪.৮৫] তমো তমপরাযনোতি…পে… তত্থ কতমো ৰুচ্চতে তমো নাম? যো তমো অন্ধকারো, যথা ৰুত্তং ভগৰতা ‘‘যথা অন্ধকারে তস্মিং ভযানকে সকম্পিধাতুপুরিসো ন পস্সতি, এৰমেৰ অঞ্ঞাণতো তমোপনন্ধকারো পাপকসকম্মসৰিপাকং ন সদ্ধো হোতি. ইতি এৰং লক্খণতা অঞ্ঞাণং তমো অৰিজ্জা মোহো, যেন সত্তা যথাভূতং নপ্পজানন্তি, ইতি ৰুচ্চতি তমোতি. সো তিণ্ণং চক্খূনং তমো মংসচক্খুনো দিব্বচক্খুনো পঞ্ঞাচক্খুনো, ইমেসং চক্খূনং ইধ তমো নিদ্দিসিযতি অঞ্ঞাণন্তি. তত্থ কতমং অঞ্ঞাণং অদস্সনং? অথ নিস্সযে যং পুব্বন্তে অঞ্ঞাণং অপরন্তে অঞ্ঞাণং পুব্বন্তাপরন্তে অঞ্ঞাণং হেতুম্হি অঞ্ঞাণং পচ্চযম্হি অঞ্ঞাণং তস্স অঞ্ঞাণিনো সমাধিভূতস্স এসো নিস্সন্দো. যং ন জানাতি ইদং সেৰিতব্বং ইদং ন মনসিকাতব্বন্তি. সো তেন তমেন নিদ্দিসিযতি তমোপি যথা ৰুচ্চতি. মূল়্হোতি এৰং চেতনা. তেন তমেন সো পুগ্গলো ৰুচ্চতি. তমোতি ¶ সো তেন তমেন অসমূহতেন অসমুচ্ছিন্নেন তপ্পরমো ভৰতি তপ্পরাযনো, অযং ৰুচ্চতি পুগ্গলো তমো তমপরাযনোতি. পরাযনোযেৰ ধম্মো মনসিকাতব্বো সো তমো দহতি অঞ্ঞচিত্তং উপট্ঠপেতি. তে চস্স ধম্মা নিজ্ঝানক্খমন্তি. সো সুতমযায পঞ্ঞায সমনুপস্সতি.

তত্থ কতমো তমো জোতিপরাযনো? সো তেন পঞ্ঞাৰসেন ইরিযতি এৰং তস্সেৰ ইরিযন্তস্স পরাযনো ভৰতি. অযং ৰুচ্চতে পুগ্গলো তমো জোতিপরাযনো.

তত্থ কতমো পুগ্গলো জোতি জোতিপরাযনো [জোতিপরাযনো (পী.)]? তত্থ ৰুচ্চতি জোতি নাম যং তস্স চে তমস্স পটিপক্খেন যে চ ধম্মে অন্তমসো ঞাণালোকো, সো সুণধম্মো পুগ্গলো তমো জোতিপরাযনো, তত্থ ৰুচ্চতে, যোযং পুগ্গলো তমো জোতিপরাযনো, সো যদি তথারূপং কল্যাণমিত্তং পটিলভতি, যো নং অকুসলতো চ নিৰারেতি ¶ ভাৰিতকুসলতাৰ ভাৰী নিযোজেতীতি ¶ . এৰঞ্চ সদ্ধম্মং দেসেতি. ইমে ধম্মা কুসলা, ইমে ধম্মা অকুসলা. ইমে ধম্মা সাৰজ্জা, ইমে ধম্মা অনৰজ্জা. ইমে ধম্মা সেৰিতব্বা, ইমে ধম্মা ন সেৰিতব্বা. ইমে ধম্মা ভজিতব্বা, ইমে ধম্মা ন ভজিতব্বা. ইমে ধম্মা উপসম্পজ্জ ৰিহাতব্বা, ইমে ধম্মা ন উপসম্পজ্জ ৰিহাতব্বা. ইমে ধম্মা মনসিকাতব্বা, ইমে ধম্মা ন মনসিকাতব্বাতি. পচ্চতে সঞ্ঞায যথা সঞ্ঞাযতি সতিন্দ্রিযানি, সো এৰং পজানাতি. ইমে ধম্মা কুসলা, ইমে ধম্মা অকুসলা. ইমে ধম্মা সাৰজ্জা, ইমে ধম্মা অনৰজ্জা. ইমে ধম্মা সেৰিতব্বা, ইমে ¶ ধম্মা ন সেৰিতব্বা. ইমে ধম্মা ভাৰেতব্বা, ইমে ধম্মা ন ভাৰেতব্বা. ইমে ধম্মা উপসম্পজ্জ ৰিহাতব্বা, ইমে ধম্মা ন উপসম্পজ্জ ৰিহাতব্বা. ইমে ধম্মা মনসিকাতব্বা, ইমে ধম্মা ন মনসিকাতব্বাতি. সো তে ধম্মে সুসুয্যতি, সোতং ওদহতি, অঞ্ঞং চিত্তং উপট্ঠপেতি, তে চস্স ধম্মা নিজ্ঝানক্খমন্তি, সো সুতমযায পঞ্ঞায সমন্নাগতো সো তেন পচ্চযৰসেন ইরিযতি এৰং তস্সেৰ ইরিযন্তি তপ্পরমো ভৰতি তপ্পরাযনো. অযং ৰুচ্চতে পুগ্গলো তমো তমপরাযনো.

তত্থ কতমো পুগ্গলো জোতি তমপরাযনো? জোতি নাম যা তস্সেৰ তমস্স পটিপক্খেন যে ধম্মা অন্তমসো ঞাণালোকো, সো পুন ধম্মো. কতমা উচ্চতে? পঞ্ঞাযতো পণ্ডিতোতি ৰুচ্চতে, সো এৰং পজানাতি. ইমে ধম্মা কুসলা, ইমে ধম্মা অকুসলা. ইমে ধম্মা সাৰজ্জা, ইমে ধম্মা অনৰজ্জা. ইমে ধম্মা সেৰিতব্বা, ইমে ধম্মা ন সেৰিতব্বা. ইমে ধম্মা ভাৰিতব্বা, ইমে ধম্মা ন ভাৰিতব্বা. ইমে ধম্মা উপসম্পজ্জ ৰিহাতব্বা, ইমে ধম্মা ন উপসম্পজ্জ ৰিহাতব্বা. ইমে ধম্মা মনসিকাতব্বা, ইমে ধম্মা ন মনসিকাতব্বা. ইধ পন পাপমিত্তসংসেৰনো পাপমিত্তৰসানুগো অকুসলে ধম্মে অভিৰড্ঢেতি, কুসলে ধম্মে পজহতি. সো তেন পমাদেন পচ্চযসঞ্ঞা অমনসিকত্ৰা অস্সতিঅসম্পজঞ্ঞং আসেৰতি. তযা যো পটিপক্খো তমো, সো পৰড্ঢেতি. সো তমাভিভূতো পরাযনো তমপরমো চেৰ ভৰতি. অযং ¶ ৰুচ্চতি পুগ্গলো জোতি তমপরাযনো.

১০৩. তত্থ কতমো পুগ্গলো জোতি জোতিপরাযনো? তত্থ ৰুচ্চতে সোযং পুগ্গলো কল্যাণমিত্তস্স সন্নিস্সিতো ভৰতি সক্কা সংযোগী কুসলং ¶ গৰেসী, সো কল্যাণমিত্তে উপসঙ্কমিত্ৰা পরিপুচ্ছতি, পরিপঞ্হযতি? কিং কুসলং, কিং অকুসলং? কিং সাৰজ্জং, কিং অনৰজ্জং? কিং সেৰিতব্বং, কিং ন সেৰিতব্বং? কিং ভাৰিতব্বং, কিং ন ভাৰিতব্বং? কিং উপসম্পজ্জ ৰিহাতব্বং, কিং ন উপসম্পজ্জ ৰিহাতব্বং? কিং মনসিকাতব্বং, কিং ন মনসিকাতব্বং? কথং সংকিলেসো হোতি, কথং ৰোদানং হোতি? কথং পৰত্তি হোতি, কথং নিৰত্তি ¶ হোতি? কথং বন্ধো হোতি, কথং মোক্খো হোতি? কথং সক্কাযসমুদযো হোতি, কথং সক্কাযনিরোধো হোতি? সো এত্থ দেসিতং যথা উপট্ঠিতং তথা সম্পটিপজ্জন্তো সো এৰং পজানাতি. ইমে ধম্মা কুসলা, ইমে ধম্মা অকুসলা. এৰং…পে… যাৰ কথং সক্কাযসমুদযো হোতি, কথং সক্কাযনিরোধো হোতীতি ৰিত্থারেন কাতব্বং. সো তে ধম্মে অধিপাটিকঙ্খাতি এৰং লক্খণং ঞাণং ৰিজ্জা আলোকং ৰড্ঢেতি. সো পুগ্গলো তপ্পরমো ভৰতি তপ্পরাযনো, অযং ৰুচ্চতে পুগ্গলো জোতি জোতিপরাযনো.

তত্থ কতমো পুগ্গলো তমো তমপরাযনো? যো অকুসলং ধম্মং দীপেতি. তং ভাৰনায হীনাসু গতীসু উপপত্তিং দস্সেতি, তপ্পরমো ভৰতি তপ্পরাযনো. অযং ৰুচ্চতে পুগ্গলো তমো তমপরাযনো.

তত্থ যো পুগ্গলো তমো জোতিপরাযনো? সো তমেন অকুসলস্স কম্মস্স ৰিপাকং দস্সেতি. তমেতি যং চক্খু কল্যাণমিত্তস্স যেন অকুসলে ধম্মে পজহতি, কুসলে ধম্মে অভিৰড্ঢতি.

তত্থ ¶ যো চ পণীতাসু গতীসু উপপত্তিং দস্সেতি, তপ্পরমো তেন ৰুচ্চতে তমো জোতিপরাযনো.

তত্থ যো পুগ্গলো জোতি তমপরাযনো? কুসলস্স কম্মৰিপাকং দস্সেতি. যং চক্খু পাপমিত্তসংসগ্গেন পাপমিত্তুপসেৰেন পাপমিত্তৰসানুগো অকুসলং ধম্মং অভিৰড্ঢতি, তং ভাৰনায হীনাসু গতীসু উপপত্তিং দস্সেতি. তপ্পরমো তেন ৰুচ্চতে জোতি তমপরাযনো.

তত্থ যো পুগ্গলো জোতি জোতিপরাযনো সো জোতিতা পভাতা [জোতিতভাৰতায (পী.)] যাৰ পণীতাসু গতীসু উপপত্তিং দস্সেতি. তপ্পরমো তেনাহ জোতি জোতিপরাযনো.

জোতিতমপরাযনেন ¶ দস অকুসলানং কম্মানং উদযং দস্সেতি. তমেন পুগ্গলেন অকুসলানং কম্মানং ৰিপাকং দস্সেতি. ন অকুসলানং ধম্মানং ৰিপাকং দস্সেতি. তমেন অট্ঠ মিচ্ছত্তানি দস্সেতি. জোতিনা অট্ঠ সম্মত্তানি দস্সেতি. জোতিনা তমপরাযনেন দস অকুসলকম্মপথে দস্সেতি. জোতিনা পণীতত্তং দস্সেতি. তমেন জোতিপরাযনেন অতপনীযং ধম্মং দস্সেতি. জোতিনা তমপরাযনেন তপনীযং ধম্মং দস্সেতি. অযং সুত্তত্থো.

১০৪. তত্থ ¶ কতমো দেসনা হারো? ইমম্হি সুত্তে কিং দেসিতং? তত্থ ৰুচ্চতে ইমম্হি সুত্তে কুসলাকুসলা ধম্মা দেসিতা. কুসলাকুসলানঞ্চ ধম্মানং ৰিপাকো দেসিতো. হীনপ্পণীতানঞ্চ সত্তানং গতি নানাকারণং দেসিতং. অযং দেসনা হারো.

তত্থ কতমো ৰিচযো হারো? অকুসলস্স ¶ কম্মস্স যো ৰিপাকং পচ্চনুভোতি. তত্থ ঠিতো অকুসলে ধম্মে উপ্পাদিযতি ৰিচযন্তং যুজ্জতি. কুসলস্স কম্মস্স যো ৰিপাকং পচ্চনুভোতি. তত্থ ঠিতো কুসলে ধম্মে উপ্পাদিযতি ৰিচযন্তং যুজ্জতি. অযং ৰিচযো যুত্তি চ.

তত্থ কতমো পদট্ঠানো হারো? যো পুগ্গলো জোতি, সো পচ্চৰেক্খণায পদট্ঠানং. যো পুগ্গলো তমো, সো তমাদিন্নং ৰানুপস্সনায পদট্ঠানন্তি দস্সেতি. তমেন জোতিপরাযনেন অপ্পমাদস্স পদট্ঠানং দস্সেতি, তমো অৰিজ্জায চ দিট্ঠিযা চ পদট্ঠানং দস্সেতি. জোতিনা তমপরাযনেন পমাদস্স চ দিট্ঠিযা চ পদট্ঠানং দস্সেতি. অযং পদট্ঠানো.

তত্থ কতমো লক্খণো হারো? তমেন তমপরাযনেন তমোতি অৰিজ্জায নিদ্দিট্ঠায সব্বকিলেসধম্মা নিদ্দিট্ঠা হোন্তি. তমেন জোতিপরাযনেন জোতিৰিজ্জায নিদ্দিট্ঠায সব্বে বোধিপক্খিযধম্মা নিদ্দিট্ঠা হোন্তি. জোতিতমপরাযনেন পমাদো নিদ্দিট্ঠো হোতি. তমেন জোতিপরাযনেন অপ্পমাদো নিদ্দিট্ঠো হোতি. অযং লক্খণো হারো.

তত্থ কতমো চতুব্যূহো হারো? ইমম্হি সুত্তে ভগৰতো কো অধিপ্পাযো? যে সত্তা নীচকুলিনো, ন তে ইমং সুত্ৰা কুসলে ধম্মে সমাদায ৰত্তিস্সন্তি. যে সত্তা উচ্চকুলিনো, তে ইমং ধম্মদেসনং সুত্ৰা ¶ ভিয্যোসো মত্তায কুসলে ধম্মে সমাদায ৰত্তিস্সন্তীতি. অযং চতুব্যূহো হারো. ভূমিযং উপদেসো.

তত্থ কতমো আৰট্টো হারো? যা অৰিজ্জাতো পভূতি তণ্হা, অযং সমুদযো. যো তমো তমপরাযনো, ইদং দুক্খং. ইমানি দ্ৰে সচ্চানি দুক্খঞ্চ সমুদযো চ জোতি যেন সুত্তেন ধম্মেন পঞ্ঞাপিযতি, সো ¶ ধম্মো পঞ্ঞিন্দ্রিযস্স পদট্ঠানং. তেন অমোহেন তীণি কুসলমূলানি পারিপূরিং গচ্ছন্তি সগ্গস্স পদট্ঠানং.

তত্থ কতমা ৰিভত্তি? তমো তমপরাযনোতি ন একংসেন. কিং কারণং? অত্থি তমো চ ¶ ভৰো অপরাপরিযৰেদনীযেন চ কুসলেন জোতিনা পুগ্গলেন সহোপত্তিভাৰে. অত্থি জোতি চ ভৰো অপরাপরিযৰেদনীযেন চ অকুসলেন তমেন পুগ্গলেন সহোপত্তিভাৰে পরিৰত্তনা তমেসু পটিপক্খোতি জোতিনা তমপরাযনো.

তত্থ কতমো ৰেৰচনো? যো তমো, সো এৰং অত্তব্যাপাদায পটিপন্নো, সো অস্সদ্ধায বালো অকুসলো অব্যত্তো অনাদীনৰদস্সী. যো জোতি, সো অত্তহিতায পটিপন্নো পণ্ডিতো কুসলো ব্যত্তো আদীনৰদস্সী. অযং ৰেৰচনো.

তত্থ কতমা পঞ্ঞত্তি? সো পুগ্গলো ৰিপাকপঞ্ঞত্তিযা পঞ্ঞাপিযতি, অকুসলে পরিযাদিন্নতা পঞ্ঞাপিযতি. জোতিকুসলধম্মুপপত্তিপঞ্ঞত্তিযা পঞ্ঞাপিযতি কুসলধম্মৰিপাকপঞ্ঞত্তিযা চাতি.

ওতরণোতি যে অৰিজ্জাপচ্চযা সঙ্খারা যঞ্চ জরামরণং যা চ অৰিজ্জা, তং পদট্ঠানং, নিদ্দেসেন ৰিজ্জুপ্পাদো অৰিজ্জানিরোধো যো যাৰ জরামরণনিরোধো, ইমে দ্ৰে ধম্মা সঙ্খারক্খন্ধপরিযাপন্না. ধম্মধাতু ধম্মাযতনঞ্চ পদট্ঠানং নিদ্দেসেন ধাতূসু.

তত্থ কতমো সোধনো? ইমস্স সুত্তস্স দেসিতস্স আরম্ভো. অধিট্ঠানোতি ¶ তমোতি ভগৰা ব্রৰীতি, ন একং পুগ্গলং দেসেতি. যাৰতা সত্তানং গতি, তত্থ যে দুচ্চরিতধম্মেন উপপন্না, তে বহুলাধিৰচনেন তমো নিদ্দিসতি. যা জোতি সব্বসত্তেসু কুসলধম্মোপপত্তি সব্বং তং জোতীতি অভিলপতি অযমেকতা পচ্চযো যোনিসোমনসিকারপঞ্ঞত্তি চতুন্নং মহাভূতানং পুগ্গলানং.

তত্থ ¶ কতমো পরিক্খারো? অকুসলস্স পাপমিত্ততা পচ্চযো, অযোনিসো মনসিকারো হেতু. কুসলস্স কল্যাণমিত্ততা পচ্চযো, যোনিসো মনসিকারো হেতু.

তত্থ কতমা সমারোপনাতি? ইধেকচ্চো নীচে কুলে পচ্চাজাতো হোতীতি নীচে কুলে পচ্চাজাতো রূপেসু সদ্দেসু গন্ধেসু রসেসু ফস্সেসু, সো উপপন্নো সব্বম্হি মানুস্সকে উপভোগপরিভোগে. জোতি পণীতেসু কুসলেসু উপপন্নো সব্বম্হি মানুস্সকে উপভোগপরিভোগে উপপন্নোতি.

১০৫. তত্থ ¶ কতমং সংকিলেসভাগিযং নিব্বেধভাগিযং চ সুত্তং? ন তং দল়্হং বন্ধনমাহু ধীরাতি গাথা. কেন কারণেন তং বন্ধনং দল়্হং? চতূহি কারণেহি ইস্সরিযেন সক্কা মোচেতুং ধনেন ৰা অঞ্ঞেন ৰা যাচনায ৰা পরাযনেন ৰা. যেসু চ অযং রাগো মণিকুণ্ডলেসু পুত্তেসু দারেসু চ যা অপেক্খা, ইদমস্স চেতসিকবন্ধনং. তং ন সক্কা ইস্সরিযেন ৰা ধনেন ৰা অঞ্ঞেন ৰা যাচনায ৰা পরাযনেন ৰা মোচেতুং. ন চ তত্থ কোচি অত্থি ¶ পাটিভোগো. ইমিনা বন্ধনতো মোচযিত্থাতি দেৰো ৰা মনুস্সো ৰা তদিদং বন্ধনং রাগানুসযেন চ ছসু বাহিরেসু চ আযতনেসু বন্ধতি. রূপেসু রূপতণ্হা বন্ধতি, যাৰ ধম্মেসু ধম্মতণ্হা. যো ইধ লোকে বন্ধো পরলোকস্মিং বন্ধো নীযতি. সো বন্ধো জাযতি, বন্ধো মীযতি. বন্ধো অস্মা লোকা পরং লোকং গচ্ছতি. ন সক্কা মোচেতুং অঞ্ঞত্র অরিযমগ্গেন ইমঞ্চ বন্ধনং. মরণভাৰঞ্চ উপপত্তিভাৰঞ্চ ভযতো ৰিদিত্ৰা ছন্দরাগং পজহতি. সো ইমং ছন্দরাগং পজহিত্ৰা অতিক্কমতি. অযঞ্চ লোকো ইতো পরং দুতিযো.

তত্থ যং বন্ধনাসঙ্খারানং পহানং ইদং ৰুচ্চতি উভযেসু ঠানেসু ৰীরিযং, গন্ধপরিৰাতো [গন্থপরিৰসো (পী.) গন্থপরিৰুতো (ক.)] সুমুনি নোপলিম্পতি. তথেৰ পরিগ্গহেসু পুত্তেসু দারেসু চ অৰূল়্হো সল্লোতি তস্সেৰ তণ্হায পহানং দস্সেতি. অযং তণ্হামূলস্স পহানা ৰরে [অহনাৰরে (পী.), অহনাৰরো (ক.)] অপ্পমত্তোতি কামো পমাদৰত্ততি পহানায নেক্খম্মাভিরতো অপ্পমাদৰিহারী ভৰতি. তস্স আসযং পহানায নেৰ ইমং লোকং আসীসতি ন পরলোকং. ন ইধলোকং নিস্সিতং, পিযরূপং সাতরূপং আকঙ্খতি. নাপি পরলোকং নিস্সিতং পিযরূপং সাতরূপং ¶ আকঙ্খতি, তেন ৰুচ্চতে ‘‘নাসীসতে লোকমিমং পরং লোকঞ্চা’’তি. যং তস্স পহানং তং ছেদনং অট্ঠকৰগ্গিযেসু মুনি নিদ্দিট্ঠো. সো ইধ ৰিরোধো অট্ঠকৰগ্গিযেসু নাসীসনং ইধ অনাথা. তথাযং তণ্হায তস্স পরিগ্গহস্স ৰত্থুকামস্স ¶ একগাথায এতে সব্বে কামা দস্সিতা. তেন ভগৰা দেসেতি ‘‘এতম্পি ছেত্ৰান পরিব্বজন্তি অনপেক্খিনো সব্বকামে পহাযা’’তি. ইমিস্সা গাথায দ্ৰিধা নিদ্দেসো সংসন্দননিদ্দেসো চ সমযনিদ্দেসো চ, যথা অযং গাথা সংকিলেসভাগিযঞ্চ নিব্বেধভাগিযঞ্চ, এৰং তায গাথায সংকিলেসভাগিযঞ্চ নিব্বেধভাগিযঞ্চ ৰিসজ্জনা. এৰং গাথা সব্বগাথাসু ব্যাকরণেসু ৰা নিদ্দিট্ঠং সুত্তং.

১০৬. তত্থ কতমা দেসনা? ইমং সুত্তং কেনাধিপ্পাযেন দেসিতং. যে রাগচরিতা সত্তা, তে কামে পজহিস্সন্তীতি অযং তত্থ ভগৰতো অধিপ্পাযো.

তত্থ কতমো ৰিচযো? যস্স দসৰত্থুকা কিলেসা উত্তিণ্ণা ৰন্তা ৰিদিতা. কতমে দসৰিধাতি ¶ , কিলেসকামা চ ওরম্ভাগিযউদ্ধম্ভাগিযা চ সংযোজনা দসৰত্থুকানি আযতনানি, অযং ৰিচযো.

তত্থ কতমা যুত্তি? যে সারত্তা তে গাল়্হবন্ধনেন বন্ধন্তি অত্থি এসা যুত্তি.

তত্থ কতমো পদট্ঠানো? সারত্তো মণিকুণ্ডলেসু মমংকারস্স পদট্ঠানং. অপেক্খাতি অতীতৰত্থুস্স সরাগস্স পদট্ঠানং. এতম্পি ছেত্ৰাতি ভাৰনায পদট্ঠানং.

তত্থ কতমো লক্খণো? সারত্তচিত্তো মণিকুণ্ডলেসু যো অহংকারে ৰিসত্তো মমংকারে ৰিসত্তো, যো পুত্তদারে সারত্তো. খেত্তৰত্থুস্মিং সারত্তো. অযং ¶ লক্খণো হারো.

তত্থ কতমো চতুব্যূহো হারো? ইধ সুত্তে ভগৰতো কো অধিপ্পাযো. যে নিব্বানেন ছন্দিকা ভৰিস্সন্তি, তে পুত্তদারে তণ্হং পজহিস্সন্তি. অযং তত্থ ভগৰতো অধিপ্পাযো. ইমানি চত্তারি সচ্চানি.

তত্থ কতমো আৰট্টো? যা পুত্তদারে তণ্হা, অযং সমুদযো. যে উপাদিন্নক্খন্ধা, তে যে চ বাহিরেসু রূপেসু রূপপরিগ্গহো, ইদং দুক্খং, যং ¶ তত্থ ছেদনীযং, অযং নিরোধো. যেন ভিজ্জতি, অযং মগ্গো. ৰিভত্তীতি নত্থি ৰিভত্তিযা ভূমি, পরিৰত্তনোতি পটিপক্খো নিদ্দিট্ঠো.

তত্থ কতমো ৰেৰচনো? নিদ্দিট্ঠো ৰেৰচনো. তত্থ কতমো ওতরণো? অত্থি তণ্হা একো সত্তো ওতিণ্ণো তপ্পচ্চযা ৰিঞ্ঞাণং যাৰ জরামরণং. যা তত্থ ৰেদনা, অযং অৰিজ্জা ৰিজ্জুপ্পাদা অৰিজ্জানিরোধো যাৰ জরামরণনিরোধো.

তত্থ কতমো সোধনো? সুদ্ধো গাথায আরম্ভো. তত্থ কতমো অধিট্ঠানো? ন তং দল়্হং বন্ধনমাহু ধীরাতি একত্ততায পঞ্ঞত্তা, ন ৰেমত্ততায. চত্তারো রাগা কামরাগো রূপরাগো ভৰরাগো দিট্ঠিরাগো চাতি একত্ততায পঞ্ঞত্তা.

তত্থ কতমো পরিক্খারো? যেসং রাগো মণিকুণ্ডলেসু তস্স সুভসঞ্ঞা হেতু, অনুব্যঞ্জনসো ¶ চ নিমিত্তগ্গাহিতা পচ্চযো. যায তে ছিন্নানি তস্স অসুভসঞ্ঞা হেতু, নিমিত্তগ্গহণঅনুব্যঞ্জনগ্গহণৰিনোদনং পচ্চযো.

তত্থ ¶ কতমো সমারোপনো? সারত্তো মণিকুণ্ডলেসু সম্মূল়্হৰিধো দুট্ঠাতিপি এতম্পি [এৰম্পি (পী. ক.)] ছেত্ৰান পরিব্বজন্তীতি তং পরিঞ্ঞাতত্থং পরিৰজ্জিতত্থং পজহিতা, অযং সমারোপনো.

১০৭. যং চেতসিকং যং পকপ্পিতং ৰিত্থারেন পচ্চযো, যং ৰা চেতসিকং কাযিকং চেতসিকং কম্মং. কিংকারণা? চেতসিকা হি চেতনা মনোকম্মাতি ৰুচ্চতে, সা চেতনাকম্মং, যং চেতসিকং ইমং কাযিকঞ্চ ৰাচসিকঞ্চ ইমানি তীণি কম্মানি নিদ্দিট্ঠানি. কাযকম্মং ৰচীকম্মঞ্চ তানি কুসলানি পিযং কাযেন চ ৰাচায চ আরভতি পরামসতি, অযং ৰুচ্চতি সীলব্বতপরামাসো. সঙ্কপ্পনা তে তিৰিধা সঙ্খারা পুঞ্ঞমযা অপুঞ্ঞমযা আনেঞ্জমযা, তপ্পচ্চযা ৰিঞ্ঞাণং তে আরম্মণমেতং হোতি ৰিঞ্ঞাণস্স ঠিতিযা. যা সুভসঞ্ঞা সুখসঞ্ঞা অত্তসঞ্ঞা চ. ইদং চেতসিকং. যং রূপূপগং ৰিঞ্ঞাণং তিট্ঠতি রূপারম্মণং রূপপতিট্ঠিতং নন্দূপসেচনং ৰুদ্ধিং ৰিরূল়্হিং ৰেপুল্লতং গচ্ছতি, অযং সঙ্কপ্পনা, ইতি যং ৰিঞ্ঞাণট্ঠিতীসু ¶ ঠিতং পঠমাভিনিব্বত্তিআরম্মণৰসেন উপাদানং, ইদং ৰুচ্চতি চেতসিকন্তি.

তত্থ ঠিতস্স অরূপস্স যা নিকন্তি অজ্ঝোসানং, ইদম্পি সকম্পিতং মনাপিকেসু রূপেসু পিযরূপসাতরূপেসু আভোগো, ইদং চেতসিকং. যং চেতেতি সত্তেসু [সত্তসু (পী.)] মনাপিকেসু অভিজ্ঝাকাযগন্থো পটিঘানুসযেসু ব্যাপাদকাযগন্থো সব্বে চত্তারো গন্থা, অযং ¶ পঞ্চসু কামগুণেসু পঠমাভিনিপাতো চিত্তস্স যা চেতনা যস্স তত্থ অস্সাদানুপস্সিস্স অনেকা পাপকা অকুসলা ধম্মা চিত্তং অরূপৰতিযো হোন্তি. পুগ্গলো রাগানুবন্ধিভূতো তেহি কিলেসকামেহি যথা কামকরণীযো, অযং ৰুচ্চতে কামেসু পকপ্পনা. এৰং সব্বে চত্তারো ওঘা. যং তেহি কামেহি সংযুত্তো ৰিহরতি ভাৰিতো অজ্ঝোসন্নো, অযং চেতনা. যস্স তথাযং অৰীতরাগস্স অধিগতপেমস্স তস্স ৰিপরিণামঞ্ঞথাভাৰা উপ্পজ্জন্তি সোকপরিদেৰদুক্খদোমনস্সুপাযাসা দুক্খানুপরিৰত্তিতং ৰিঞ্ঞাণং হোতি সরিতস্স ৰযধম্মসমুপ্পাদো চিত্তং পরিযাদিযতি, ইদং ৰুচ্চতি পকপ্পিতন্তি.

একমেকস্স চেতেতি চ পকপ্পেতি চ ৰিঞ্ঞাণস্স ঠিতি যা হোতি, সা চ ঠিতি দ্ৰিধা আরম্মণট্ঠিতি চ আহারট্ঠিতি চ. তত্থ যা আরম্মণট্ঠিতি, অযং নামরূপস্স পচ্চযো ¶ . যা আহারট্ঠিতি যা পুনব্ভৰাভিনিব্বত্তিকা ঠিতি যা চ পোনোভৰিকা ঠিতি, অযং ৰুচ্চতি আরম্মণং. তং হোতি ৰিঞ্ঞাণস্স ঠিতিযা তস্স ৰিঞ্ঞাণপচ্চযা নামরূপং যাৰ জরামরণঞ্চ চেতেতি, অথ চ পুন পত্থযতে যতো ন পোনোভৰিকা অনাগতৰত্থুম্হি, অযং পটিপক্খো নিদ্দিট্ঠো. ন চেতেতি ন পত্থযতি অথ চ দূসেতীতি দুৰিধো নিদ্দেসো. অস্স পুব্বে হোতি তং চেতসিকং তং পকপ্পিতং অসমূহতং তপ্পচ্চযা, অযং ৰিঞ্ঞাণস্স ঠিতি হোতি.

১০৮. অথ ¶ ৰা তস্স অনুসযা আৰিভৰন্তি তপ্পচ্চযা তস্স পুনব্ভৰো নিব্বত্ততি. অথ ৰা নং সংকিযতে অপ্পেতু আগারে ৰা, সুখুমা ৰা সন্তি ৰা ন সংকিযতে কামে তং এৰং নিচ্চেসুপি আগারেসু জাতো হোতি. তং নযতি যং নো কপ্পেতুং এৰং সঙ্খারা চেতিতা পকপ্পিতা চ আরম্মণভূতা ¶ হোন্তি, যা চ চেতনা যা চ পকপ্পনা যঞ্চ ৰত্থু নিব্বত্তং, উভোপি এতে আরম্মণং ৰিঞ্ঞাণস্স তথা চেতনায চ সঙ্কপ্পনায চ পত্থনায চ ভূতা সত্তা চেতেতি চ সঙ্কপ্পেতি চ. যং গৰেসনা ন চ চেতেতি ন চ সঙ্কপ্পেতি. কতমে চ সত্তা ভূতা? যে চ তনুজাতঅণ্ডজাপি অণ্ডকা অনুভিন্না সংসেদজা ন চ সম্ভিন্না ইমে ভূতা. কতমে সম্ভৰেসিনো গব্ভগতা অণ্ডগতা সংসরন্তো ইমে ন চেতেতি ন পত্থেতি ন চ সঙ্কপ্পেতি. অনুসযে ন চ পুনব্ভৰো নিব্বত্তীতি? যে ভূতা সত্তা যে সম্ভৰেসিনো, তে থাৰরা. যে ৰা সতো চেতেন্তি পত্থেন্তি চ যে থাৰরা. তে ন চ চেতেন্তি, ন চ পত্থেন্তি, ন চ সঙ্কপ্পেন্তি, অনুসযেন চ সংসরন্তি.

অপরো পরিযাযো. যে অরিযপুগ্গলা সেক্খা, তত্থ তে ন চ চেতেন্তি, ন চ সঙ্কপ্পেন্তি, অনুসযেন পুন উপ্পজ্জন্তি.

অপরো পরিযাযো. সুখুমা পাণা ভূমিগতা উদকগতা চক্খুনো আপাথং নাগচ্ছন্তি, তে ন চ চেতেন্তি, ন চ সঙ্কপ্পেন্তি, অনুসযেন চ সংসরন্তি.

অপরো পরিযাযো. বাহিকা সব্বে ভিক্খূ অভিমানিকা, তে ন চ চেতেন্তি, ন চ পত্থযন্তি, অনুসযেন চ সংসরন্তি, ন চ চেতেন্তি, ন চ সঙ্কপ্পেন্তি, ন চ অনুসেন্তি. আরম্মণম্পেতং ¶ ন হোতি ৰিঞ্ঞাণস্স ঠিতিযা.

ন চ চেতেতীতি পরিযুট্ঠানসমুগ্ঘাতং দস্সেতি. ন চ অনুসেতীতি অনুসযসমুগ্ঘাতং দস্সেতি ¶ . ন চ চেতেতীতি ওল়ারিকানং কিলেসানং পহানং দস্সেতি. ন চ অনুসেতীতি সুখুমানং কিলেসানং পহানং দস্সেতি. ন চ চেতেতীতি যেন ভূমি চ ন চ পত্থযন্তীতি সকদাগামী অনাগামী, ন চ অনুসেতীতি অরহং, ন চ চেতেতীতি সীলক্খন্ধস্স পটিপক্খেন পহানং দস্সেতি, ন চ পত্থযতীতি সমাধিক্খন্ধস্স পটিপক্খেন পহানং দস্সেতি, ন চ অনুসযতীতি পঞ্ঞাক্খন্ধস্স পটিপক্খেন পহানং দস্সেতি, ন চ চেতেতীতি অপুঞ্ঞমযানং সঙ্খারানং পহানং দস্সেতি, ন চ পত্থযতীতি পুঞ্ঞমযানং সঙ্খারানং পহানং দস্সেতি, ন চ অনুসেতীতি আনেঞ্জমযানং সঙ্খারানং পহানং দস্সেতি, ন চ চেতেতীতি অনঞ্ঞাতঞ্ঞস্সামীতিন্দ্রিযং, ন চ পত্থযতীতি অঞ্ঞিন্দ্রিযং, ন চ অনুসযতীতি অঞ্ঞাতাৰিনো ইন্দ্রিযং. ন চ চেতেতীতি মুদুকা ইন্দ্রিযভাৰনা, ন চ পত্থযতীতি ¶ মজ্ঝইন্দ্রিযভাৰনা, ন চ অনুসেতীতি অধিমত্তা ইন্দ্রিযভাৰনা. অযং সুত্তত্থো.

১০৯. তত্থ কতমা দেসনা? ইধ সুত্তে চত্তারি সচ্চানি দেসিতানি. যঞ্চ চেতযিতং যঞ্চ পকপ্পিতং অত্থি এতং আরম্মণং চিত্তং পতিট্ঠতি ৰিচিনতি [ৰিচিনযতি (পী. ক.)] যুজ্জতি. ন চ চেতেতীতি ন চ পত্থযতীতি অত্থি এৰং আরম্মণং অনুসযে ৰিঞ্ঞাণমিতি ৰিচিনিযতি যুজ্জতি ন চ চেতেতি ন চ পত্থযতি. অনুসযপ্পহানা ৰিঞ্ঞাণট্ঠিতিং ন গৰেসন্তি, ৰিচিযন্তং যুজ্জতি. অযং যুত্তিৰিচযো.

তত্থ কতমো পদট্ঠানো? চেতনা ¶ পরিযুট্ঠানং চেতনাপরিযুট্ঠানস্স পদট্ঠানং. সঙ্কপ্পনং উপাদানস্স পদট্ঠানং. অনুসযো পরিযুট্ঠানস্স পদট্ঠানং. তেসং ছন্দরাগৰিনাসায ভাৰনা ভৰরাগস্স পহানং.

তত্থ কতমো লক্খণো? যং চেতসিকন্তি ৰেদযিতং পকপ্পিতং উগ্গহিতং ৰিঞ্ঞাতং তব্বিঞ্ঞাণং আরম্মণম্পি পচ্চযোপি.

তত্থ কতমো চতুব্যূহো? ইধ সুত্তে ভগৰতো কো অধিপ্পাযো? যে পুনব্ভৰং ন ইচ্ছন্তি, তে ন চেতযিস্সন্তি ন চ পত্থযিস্সন্তীতি, অযং অধিপ্পাযো.

আৰট্টোতি যা চ চেতনা পত্থনা চ অনুসযো চ ৰিঞ্ঞাণট্ঠিতিপহানা চ, ইমানি দ্ৰে সচ্চানি. ৰিভত্তীতি নত্থি ৰিভত্তিযা ভূমি. পরিৰত্তনা পন পটিপক্খং সুত্তং.

তত্থ ¶ কতমো ৰেৰচনো? চেতনা রূপসঞ্চেতনা যাৰধম্মসঞ্চেতনা. যো অনুসযো, তে সত্ত অনুসযা.

পঞ্ঞত্তীতি চেতনাপরিযুট্ঠানং পঞ্ঞত্তিযা পঞ্ঞত্তা. সঙ্কপ্পনং উপাদানপঞ্ঞত্তিযা পঞ্ঞত্তং. অনুসযো হেতুপঞ্ঞত্তিযা পঞ্ঞত্তো. ৰিঞ্ঞাণট্ঠিতি উপপত্তিহেতুপঞ্ঞত্তিযা পঞ্ঞত্তা. চেতনা সঙ্কপ্পনা অনুসযো সমুচ্ছেদো ছন্দরাগৰিনযপঞ্ঞত্তিযা পঞ্ঞত্তো. পঠমে কেচি দ্ৰীহি পরিৰত্তকেহি পটিচ্চসমুপ্পাদো ইদপ্পচ্চযতায মজ্ঝপঞ্ঞত্তি.

ওতরণোতি ¶ দ্ৰীহি পরিৰত্তকেহি দুক্খঞ্চ সমুদযো চ মজ্ঝিমকেহি মগ্গো চ নিরোধো চ. সোধনোতি সুত্তে সুত্তস্স আরম্ভো.

অধিট্ঠানোতি ¶ যঞ্চেতযিতং সব্বং অধিট্ঠানেন একত্তায পঞ্ঞত্তং. সঙ্কপ্পিতন্তি উপাদানেকত্তায পঞ্ঞত্তং. ৰিঞ্ঞাণং একত্তায পঞ্ঞত্তং.

পরিক্খারোতি সুভঞ্চ আরম্মণং অযোনিসো মনসিকারো চেতনা হেতুপচ্চযতায পচ্চযো. ৰিঞ্ঞাণস্স পতিট্ঠানো ধম্মো আরম্মণপচ্চযতায পচ্চযো. তস্স মনসিকারো হেতুপচ্চযতায পচ্চযো.

তত্থ কতমো সমারোপনো? ইদং সুত্তং সঞ্ঞিতং তত্থ চেতেতি ৰিসজ্জনা ইতি নিদ্দিসিতব্বা. তস্স দিট্ঠিযা ৰিঞ্ঞাণপচ্চযা নামরূপং যাৰ জরামরণং, অযং সমারোপনো. আরম্মণমেতং ন হোতি ৰিঞ্ঞাণস্স ঠিতিযা, ৰিঞ্ঞাণনিরোধা নামরূপনিরোধো, নামরূপনিরোধা যাৰ জরামরণনিরোধো.

১১০. তত্থ কতমং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং? অযং লোকো [পস্স উদা. ৩০ উদানে] সন্তাপজাতো যাৰ যে হি কেচি সমণা ৰা ব্রাহ্মণা ৰা ভৰেন ভৰস্স ৰিপ্পমোক্খমাহংসু. সংকিলেসভাগিযং উপধিং হি পটিচ্চ দুক্খমিদং সম্ভোতি, যা তা পন তণ্হা পহীযন্তি, ভৰং নাভিনন্দতীতি নিব্বেধস্স নিব্বুতস্স [নিচ্চুতস্স (পী. ক.)] ভিক্খুনো অনুপাদায পুনব্ভৰো ন হোতি. উপচ্চগা সব্বভৰানি তাদীতি অসেক্খভাগিযং.

তত্থ সন্তাপজাতোতি রাগজো সন্তাপো দোসজো মোহজোতি. তেসং সত্তানং ঠানং দস্সেতি ¶ . লোকো সন্তাপজাতোতি ফস্সো তিৰিধো সুখৰেদনীযো দুক্খৰেদনীযো অদুক্খমসুখৰেদনীযো. তত্থ সুখৰেদনীযো ফস্সো রাগসন্তাপো, দুক্খৰেদনীযো দোসসন্তাপো, অদুক্খমসুখৰেদনীযো মোহসন্তাপো. যথা ¶ চ ভগৰা আহ পঠমকস্স ৰলাহকস্স গোমগ্গে [কোমগ্গে (পী. ক.) পস্স অ. নি. ৩.৩৫] যেহি গহপতিপুত্ত রাগজেহি দোসজেহি মোহজেহি সন্তাপেহি দুক্খং সুপতি, তে মম সন্তাপা ন সন্তি.

রোগং ¶ ৰদতি অত্ততোতি তেহি সন্তাপেহি সন্তাপিতো তিৰিধং ৰিপল্লাসং পটিলভতি সঞ্ঞাৰিপল্লাসং চিত্তৰিপল্লাসং দিট্ঠিৰিপল্লাসং. তত্থ অসুভে সুভন্তি সঞ্ঞাৰিপল্লাসো. দুক্খে সুখন্তি চিত্তৰিপল্লাসো. অনিচ্চে নিচ্চন্তি অনত্তনি অত্তাতি দিট্ঠিৰিপল্লাসো.

যথা চিত্তস্স ৰিপল্লাসো সঞ্ঞাদিট্ঠিতে তিৰিধা ৰিতক্কা – চিত্তৰিতক্কো ৰিপল্লাসো সঞ্ঞাৰিতক্কো ৰিপল্লাসো দিট্ঠিৰিতক্কো ৰিপল্লাসোপি. তত্থ অৰিজ্জা ৰিপল্লাসো গোচরা গতিপতেয্যভূমি, যথা হি তং সঞ্জানাতি যথা ৰিজানাতি যথা সঞ্জানাতি চ ৰিজানাতি চ. যথা খন্তি চেতেতি ইমে চত্তারো ৰিপল্লাসা সত্তা যেহি চতুব্বিধং অত্তভাৰৰত্থুং রোগভূতং গণ্ডভূতং ‘‘অত্তা’’তি ৰদন্তি. রোগং ৰদতি অত্ততোতি অযং আৰট্টো. যেন যেন হি মঞ্ঞতি ততো তং হোতি অঞ্ঞথাতি সুভন্তি মঞ্ঞতি ন তথা হোতি. এৰং সুখন্তি নিচ্চং অত্তাতি সো অঞ্ঞথা ভৰমেৰ সন্তং অনাগতং ভৰং পত্থযতি, তেন ৰুচ্চতি ‘‘ভৰরাগো’’তি. ভৰমেৰাভিনন্দতি, যং অভিনন্দতি, তং দুক্খন্তি পঞ্চক্খন্ধে নিদ্দিসিযতি. যঞ্চ তপ্পচ্চযা সোকপরিদেৰদুক্খং তস্স হি ভাৰেস্সতি. এত্তাৰতা সংকিলেসো হোতি. পহানত্থং খো পন ব্রহ্মচরিযং ¶ ৰুস্সতি. তিণ্ণং সন্তাপানং ছন্দরাগৰিনযো হোতি.

উপধিং হি পটিচ্চ দুক্খমিদং ভৰতীতি যে ভৰমেৰাভিনন্দন্তি যস্স ভাৰেস্সতি, তং দুক্খং তস্স দুক্খস্স পহানমাহ. সব্বসো উপাদানঞ্চ যং নত্থি দুক্খস্স সম্ভৰোতি চত্তারো ৰিপল্লাসা যথা নিদ্দিট্ঠউপাদানমাহ. তস্স পঠমো ৰিপল্লাসো কামুপাদানং, দুতিযং দিট্ঠুপাদানং, ততিযং সীলব্বতুপাদানং, চতুত্থং অত্তৰাদুপাদানং, তেসং যো খযো নত্থি দুক্খস্স সম্ভৰো উপধি নিদানং দুক্খনিরোধমাহ. এৰমেতং যথাভূতং সম্মপ্পঞ্ঞায পস্সতো ৰিভৰতণ্হা ন হোতি. ৰিভৰং নাভিনন্দতীতি দস্সনভূমিং মন্তেতি সব্বসো তণ্হক্খযং নিব্বানন্তি দ্ৰে ৰিমুত্তিযো কথেতি রাগৰিরাগঞ্চ অৰিজ্জাৰিরাগঞ্চ. তস্স ভিক্খুনোতি অনুপাদিসেসনিব্বানধাতুং মন্তেতি. অযং সুত্তস্স অত্থনিদ্দেসো.

১১১. তত্থ ¶ কতমো ৰিচযো? যস্স যত্থ পরিল়াহেতি তস্স পরিডয্হন্তস্স সো যথাভূতং নত্থি নিব্বিন্দতি চ, অযং ৰিচযো চ যুত্তি চ. পদট্ঠানো ¶ রাগজো পরিল়াহো সুখিন্দ্রিযস্স দোমনস্সিন্দ্রিযস্স চ পদট্ঠানং. দোসজো পরিল়াহো সুখিন্দ্রিযস্স দোমনস্সিন্দ্রিযস্স চ পদট্ঠানং. মোহজো পরিল়াহো উপেক্খিন্দ্রিযস্স দোমনস্সিন্দ্রিযস্স চ পদট্ঠানং.

তত্থ কতমো লক্খণো হারো? ফস্সপরেতো ৰেদনাপরেতো সঞ্ঞাপরেতোপি সঙ্খারপরেতোপি যেন যেন মঞ্ঞতি যদি সুভনিমিত্তেন যদি সুখনিমিত্তেন যদি নিচ্চনিমিত্তেন যদি অত্তনিমিত্তেন অসুভে সুভন্তি মঞ্ঞতি, এৰং সব্বং রাগজে পরিল়াহে ৰুত্তে চত্তারো পরিল়াহা ৰুত্তা ভৰন্তি. রাগজো দোসজো মোহজো দিট্ঠিজো ¶ চ রাগং ৰদামীতি অত্ততো ৰদতি. সব্বানি পন্নরস পদানি অনিচ্চং দুক্খন্তি.

তত্থ কতমো চতুব্যূহো? ইধ সুত্তে ভগৰতো কো অধিপ্পাযো? যে পরিল়াহেন ন অচ্ছন্তি তে ভৰং নাভিনন্দন্তি. যে ভৰং নাভিনন্দন্তি, তে পরিনিব্বাযিস্সন্তি. অযং অধিপ্পাযো.

তত্থ কতমো আৰট্টো? সংকিলেসভাগিযেন দুক্খঞ্চ সমুদযঞ্চ নিদ্দিসতি. নিব্বেধভাগিযেন মগ্গঞ্চ নিরোধঞ্চ.

তত্থ কতমা ৰিভত্তি? সন্তাপজাতো রোগজাতো রোগং ৰদতি অত্ততো তং ন একংসেন হোতি অমনসিকারা সন্তাপজাতো খো ন চ রোগং অত্ততো ৰদতি.

তত্থ কতমো পরিৰত্তনো? পক্খপটিপক্খনিদস্সনত্থং ভূমি পরিৰত্তনায.

তত্থ কতমো ৰেৰচনো হারো? রোগঞ্চ অত্ততো ৰদতি সল্লং অত্ততো ৰদতি. পন্নরস পদানি সব্বানি ৰত্তব্বানি.

তত্থ কতমা পঞ্ঞত্তি? সন্তাপজাতোতি দোমনস্সপদট্ঠানং. সব্বে ৰচনপঞ্ঞত্তিযা পঞ্ঞপেতি. রোগং ৰদতি অত্ততো ৰিপল্লাসো সংকিলেসপঞ্ঞত্তিযা পঞ্ঞপেতি. যং নাভিনন্দতি, তং ¶ দুক্খন্তি ৰিপল্লাসনিক্খেপপঞ্ঞত্তিযা পঞ্ঞত্তা. তে অকতসত্তা লোকা মজ্ঝেন ৰেমত্ততায পঞ্ঞত্তা.

তত্থ কতমো ওতরণো? সন্তাপজাতোতি তীণি অকুসলমূলানি, তে সঙ্খারা সঙ্খারক্খন্ধপরিযাপন্না, ধাতূসু ধম্মধাতু, আযতনেসু ¶ ধম্মাযতনং. ইন্দ্রিযেসু ইত্থিন্দ্রিযং পুরিসিন্দ্রিযঞ্চ পদট্ঠানং.

তত্থ ¶ কতমো সোধনো? সুদ্ধো সুত্তস্স আরম্ভো.

তত্থ কতমো অধিট্ঠানো হারো? পরিল়াহোতি যে সত্তা লোকা একত্তপঞ্ঞত্তিযা পঞ্ঞত্তা, তে অকতসত্তা লোকা মজ্ঝেন ৰেমত্ততায পঞ্ঞত্তা.

তত্থ কতমো পরিক্খারো? সন্তাপজাতোতি অযোনিসো মনসিকারো হেতু, ৰিপল্লাসঞ্চ পচ্চযো. তত্থ দ্ৰীহি ধম্মেহি অত্তা অভিনিৰিট্ঠা চিত্তঞ্চ চেতসিকঞ্চ ধম্মে উভযানি তস্স ৰিপরীতেন পরামসতো. অপরো পরিযাযো, চেতসিকেহি ধম্মেহি অত্তসঞ্ঞা অনত্তসঞ্ঞা সমুগ্ঘাতেতি. অপরো পরিযাযো. অনিচ্চসঞ্ঞা চেতসিকেসু ধম্মেসু, ন তু অত্তসঞ্ঞা. ইদং ৰুচ্চতি চিত্তন্তি ৰা মনোতি ৰা ৰিঞ্ঞাণন্তি ৰা ইদং দীঘরত্তং অব্ভুগ্গতং এতং মম, এসোহমস্মি, এসো মে অত্তাতি. তত্থ চেতসিকা ধম্মানুপস্সনা এসাপি ধম্মসঞ্ঞা. তস্স কো হেতু, কো পচ্চযো? অহংকারো হেতু, মমংকারো পচ্চযো.

তত্থ কতমো সমারোপনো? অযং লোকো সন্তাপজাতোতি অকুসলং মন্তেতি ৰিঞ্ঞাণং নামরূপস্স পচ্চযো যাৰ জরামরণন্তি, অযং সমারোপনো.

১১২. এৰমেতং যথাভূতং, সম্মপ্পঞ্ঞায পস্সতি অকুসলমূলানং পহানং. তত্থ অৰিজ্জানিরোধো অৰিজ্জানিরোধা যাৰ জরামরণনিরোধো, অযং সমারোপনো.

চত্তারো ¶ পুগ্গলা [পস্স অ. নি. ৪.৫] – অনুসোতগামী পটিসোতগামী ঠিতত্তো, তিণ্ণো পারঙ্গতো থলে তিট্ঠতি ব্রাহ্মণোতি.

তত্থ যো অনুসোতগামী অযং কামে সেৰতি. পাপঞ্চ কম্মং করোতি যাৰ কামে পটিসেৰতি ¶ . ইদং লোভো অকুসলমূলং, সো যেৰ তণ্হা, সো তেহি কামেহি ৰুয্হতি অনুসোতগামীতি ৰুচ্চতি. যো পুগ্গলো তাহি গমিতো তপ্পচ্চযা তস্স হেতু অকুসলকম্মং করোতি কাযেন চ ৰাচায চ, অযং ৰুচ্চতি পাপকম্মং করোতীতি. তস্স তীণি সোতানি সক্কাযদিট্ঠি ৰিচিকিচ্ছা সীলব্বতপরামাসো. ইমেহি তীহি সোতেহি ¶ তিৰিধধাতুযং উপ্পজ্জতি কামধাতুযং রূপধাতুযং অরূপধাতুযং. তেন পটিপক্খেন যো কামে ন পটিসেৰতি. যো সীলৰতং ন পরামসতি. যো সক্কাযদিট্ঠীনং পহানায কামেসু যথাভূতং আদীনৰং পস্সতি. যেন চ তে ধম্মে পটিসেৰতি. যঞ্চ তপ্পচ্চযা তিট্ঠতি ব্রাহ্মণোতি অরহং কির. তত্থ অরহং তস্স পারঙ্গতো হোতি, পারঙ্গতস্স থলে তিট্ঠতি সোপাদিসেসা নিব্বানধাতু. অনুসোতগামিনীতি দস্সনপ্পহাতব্বানং সংযোজনানং অপ্পহানমাহ. পটিসোতগামিনীতি ফলে দিট্ঠেকট্ঠানঞ্চ কিলেসানং পহানমাহ, ঠিতত্তেন পঞ্চন্নং ওরম্ভাগিযানং সংযোজনানং পহানমাহ. তত্থ অনুসোতগামিনা মগ্গরূপিমাহ. পটিসোতগামিনা ঠিতত্তেন চ মগ্গমিতিমাহ. পারঙ্গতেন সাৰকা অসেক্খা ¶ চ সম্মাসম্বুদ্ধা চ ৰুত্তা. অনুসোতগামিনা সক্কাযসমুদযগামিনিং পটিপদমাহ. পটিসোতগামিনা ঠিতত্তেন সক্কাযনিরোধগামিনিং পটিপদমাহ. পারঙ্গতেন দস অসেক্খা অরহন্তা ধম্মা ৰুত্তা. অযং সুত্তত্থো.

১১৩. তত্থ কতমা দেসনা? ইমস্মিং হি সুত্তে চত্তারি অরিযসচ্চানি দেসিতানি. তেধাতুকলোকসমতিক্কমনঞ্চ.

তত্থ কতমো ৰিচযো হারো? যো কামে পটিসেৰতি পাপং [পাপকং (পী.)] করেয্যাতি যো চ কামে ন পটিসেৰতি সো পাপকম্মং ন করেয্যাতি যো চ ইমেহি দ্ৰীহি ভূমীহি উত্তিণ্ণো পারঙ্গতোতি যা ৰীমংসা অযং ৰিচযো.

যুত্তীতি যুজ্জতি সুত্তেসু, নাযুজ্জতীতি যা ৰীমংসায, অযং যুত্তি. পদট্ঠানোতি অনুসোতগামিনা সত্তন্নং সংযোজনানং পদট্ঠানং. অকুসলস্স কিরিযা অকুসলস্স মূলানং পদট্ঠানং. পটিসোতগামিনা যথাভূতদস্সনস্স পদট্ঠানং. ঠিতত্তেন অসংহারিযায [অসহারিযায (পী.)] পদট্ঠানং. পারঙ্গতোতি কদাচি ভূমিযা পদট্ঠানং.

তত্থ কতমো লক্খণো হারো? যো অনুসোতং গচ্ছতি তণ্হাৰসেন. সব্বেসম্পি কিলেসানং ৰসেন গচ্ছতি. যো পটিসোতং ৰাযমতি. তণ্হায সব্বেসম্পি সো কিলেসানং ৰাযমতি ¶ পটিসোতং. যো ¶ অত্তনা ঠিতো কাযেনপি সো ঠিতো ৰাচাচিত্তেনপি সো ঠিতো. অযং লক্খণো হারো.

তত্থ কতমো চতুব্যূহো? ইধ সুত্তে ভগৰতো কো অধিপ্পাযো? যে অনুসোতগামিনিযা পটিপদায নাভিরমিস্সন্তি, তে পটিসোতং ৰাযমিস্সন্তীতি যাৰ কদাচি ভূমিযং, অযং অধিপ্পাযো. আৰট্টোতি ¶ ইধ সুত্তে চত্তারি সুত্তানি দেসিতানি.

তত্থ কতমো ৰিভত্তি হারো? যো কামে পটিসেৰতি পাপঞ্চ কম্মং করোতি. সো অনুসোতগামীতি ন একংসেন সোতাপন্নোপি কামে পটিসেৰতি. তং ভাগিযঞ্চ পাপকম্মং করোতি. কিঞ্চাপি সেক্খোপি করেয্য পাপং যথা সুত্তে নিদ্দিট্ঠো ন চ সো অনুসোতগামী, ইদং ৰিভজ্জব্যাকরণীযং. ন চ কামে পটিসেৰতি ন চ পাপকম্মং করোতি পটিসোতগামী ন চ একংসেন সব্বে বাহিরকো কামেসু ৰীতরাগো ন চ কামে পটিসেৰতি, তেন চ পাপকম্মং করোতি অনুসোতগামী পটিসোতগামী, অযং ৰিভত্তি.

তত্থ কতমো পরিৰত্তনো হারো? নিদ্দিট্ঠো পটিপক্খো. ৰেৰচনোতি কামেসু ৰত্থুকামাপি কিলেসকামাপি রূপসদ্দগন্ধরসফস্সপুত্তদারদাসকম্মকরপোরিসঞ্চ পরিগ্গহা.

পঞ্ঞত্তীতি সব্বে পুথুজ্জনা একত্তায পঞ্ঞত্তা. অনুসোতগামীতি কিলেসসমুদাচারপঞ্ঞত্তিযা পঞ্ঞত্তা. যে পন সেক্খা পুগ্গলা, তে নিব্বানপঞ্ঞত্তিযা [নিট্ঠানপঞ্ঞত্তিযা (ক.)] পঞ্ঞত্তা. যে পন অনাগামী, তে অসংহারিয পঞ্ঞত্তিযা পঞ্ঞত্তা, অযং পঞ্ঞত্তি.

ওতরণোতি যো অনুসোতগামী, সো দুক্খং. যে তস্স ধম্মা, তে দুক্খস্স সমুদযো. যং রূপং, অযং রূপক্খন্ধো, এৰং পঞ্চপি খন্ধা পটিচ্চসমুপ্পাদো, তে কিলেসা সঙ্খারক্খন্ধপরিযাপন্না ধম্মাযতনং ধম্মধাতু ইন্দ্রিযেসু চ পঞ্ঞত্তা.

সোধনোতি যেনারম্ভেন ইদং সুত্তং দেসিতং, সো আরম্ভো সব্বো সুদ্ধো.

অধিট্ঠানোতি ¶ ¶ পটিসোতগামিনা সব্বে সোতাপন্না একত্তেন ৰা নিদ্দিট্ঠা রাগানুসযপটিসোতগামিনো সেক্খাৰ মগ্গো চ সেক্খো চ পুগ্গলো ঠিতত্তোতি.

ৰীতরাগো ¶ একত্তায পঞ্ঞত্তো. পারঙ্গতোতি সব্বে অরহন্তো সব্বে পচ্চেকবুদ্ধা সম্মাসম্বুদ্ধা চ একত্তায পঞ্ঞত্তা.

পরিক্খারোতি অনুসোতগামিনো পাপমিত্তপচ্চযো কামপরিযুট্ঠানং হেতু. পটিসোতগামিনো দ্ৰে হেতূ দ্ৰে পচ্চযা চ যাৰ সম্মাদিট্ঠিযা উপ্পাদাযদিট্ঠি [উপাদাযদিট্ঠি (পী.)], তস্স পটিলদ্ধমগ্গো হেতু আরম্ভো পচ্চযো কাযিকো চেতসিকস্স কোট্ঠাসো চ. সমারোপনোতি ৰিভত্তি ইদং সুত্তং নত্থি সমারোপনায ভূমি.

১১৪. পঞ্চানিসংসা সোতানুগতানং ধম্মানং [পস্স অ. নি. ৪.১৯১] যাৰ দিট্ঠিযা সুপ্পটিৰিদ্ধানং সুত্তং ৰিত্থারেন কাতব্বং. যুঞ্জতো ঘটেন্তস্স ৰাযমতো গিলানো মরণকালে দেৰভূতো পচ্চেকবোধিং পাপুণাতি. সোতানুগতাতি সদ্ধম্মস্সৰনেন কতং হোতি. ন চ অধিপঞ্ঞাধম্মৰিপস্সনায তস্স চিত্তং তসিতং হোতি, ন চ অনিব্বিদ্ধত্তং, ইদং চ সুত্তং পঞ্চন্নং পুগ্গলানং দেসিতং, সদ্ধানুসারিনো মুদিন্দ্রিযস্স তিক্খিন্দ্রিযস্স চ ধম্মানুসারিনো তিক্খিন্দ্রিযস্স মুদিন্দ্রিযস্স চ. যো পন মোহচরিতো পুগ্গলো ন সক্কোতি যুঞ্জিতুং ঘটিতুং ৰাযমিতুং যথাভূতং যথাসমাধিকা ৰিমুত্তি তং খণং তং লযং তং মুহুত্তং ফলং দস্সেতি. সাধু পরিহাযতি পরো তং দুয্হতি, নো তু সুখঅৰিপাকিনী ভৰতি ¶ . তস্স দিট্ঠে যেৰ চ ধম্মে উপপজ্জঅপরাপরিযৰেদনীযং. তত্থ যো পুগ্গলো ধম্মানুসারী তস্স যদি সোতানুগতা ধম্মা হোন্তি সো যুঞ্জন্তো পাপুণাতি. যো ধম্মানুসারী মুদিন্দ্রিযো, সো গিলানো পাপুণাতি. যো সদ্ধানুসারী তিক্খিন্দ্রিযো, সো মরণকালসমযে পাপুণাতি. যো মুদিন্দ্রিযো, সো দেৰভূতো পাপুণাতি. যদা দেৰভূতো ন পাপুণাতি, ন সো তেনেৰ ধম্মরাগেন তায ধম্মনন্দিযা পচ্চেকবোধিং পাপুণাতি. যো সোতানুগতেসু যুঞ্জতি ঘটেতি ৰাযমতি, সো পুব্বাপন্নেন ৰিসেসং সঞ্জানাতি, সঞ্জানন্তো পাপুণাতি. সচে পন গিলানস্স মনসিকারো হোতি, তত্থ যুঞ্জন্তো পাপুণাতি. সচে পনস্স মরণকালে সংৰিগ্গো হোতি, তত্থ ¶ যুঞ্জন্তো পাপুণাতি. সচে পন ন কত্থচি [কত্থ (পী. ক.), তত্থ (ক.)] সংৰেগো হোতি, তস্স দেৰভূতস্স সুখিনো ধম্মভূতা পাদা এৰং অৰিলপতি. সো এৰং জানাতি ‘‘অযং সো ধম্মৰিনযো যত্থ মযং পুব্বে মনুস্সভূতা ব্রহ্মচরিযং চরিম্হা’’তি. অথ দেৰভূতো পাপুণাতি. দিব্বেসু ৰা পঞ্চসু কামগুণেসু অজ্ঝোসিতো হোতি পমাদৰিহারী, সো তেন কুসলমূলেন পচ্চেকবোধিং পাপুণাতি.

যা পরতোঘোসেন ৰচসা সুপরিচিতা, অযং সুতমযী পঞ্ঞা. যে পন ধম্মা হোন্তি মনসা অনুপেক্খিতা, অযং চিন্তামযী পঞ্ঞা. যং দিট্ঠিযা সুপ্পটিৰিদ্ধা, অযং ভাৰনামযী পঞ্ঞা ¶ . যং সোতানুগতা ৰচসা পরিচিতা হোন্তি, সো চ দিট্ঠে যেৰ ধম্মে পরিনিব্বাযী, অযং অরহং পুগ্গলো. যো উপপজ্জতি দেৰভূতো পাপুণাতি, তত্থ চ পরিনিব্বাযতি, অযং অনাগামী. যো তেন কুসলমূলেন পচ্চেকবোধিং পাপুণাতি, অযং পুব্বযোগসম্ভারসম্ভূতো পুগ্গলো.

সোতানুগতা ¶ ধম্মাতি পঠমং ৰিমুত্তাযতনং, ৰচসা পরিচিতাতি দুতিযং ততিযঞ্চ ৰিমুত্তাযতনং, মনসা অনুপেক্খিতাতি চতুত্থং ৰিমুত্তাযতনং দিট্ঠিযা সুপ্পটিৰিদ্ধাতি পঞ্চমং ৰিমুত্তাযতনং.

সোতানুগতায ৰিমুত্তিযা ৰচসা যা ৰাচা সুপ্পটিৰিদ্ধা অনুপুব্বধম্মস্স সোতেন সুত্ৰা সীলক্খন্ধে পরিপূরেতি, মনসা অনুপেক্খিতা সমাধিক্খন্ধং পরিপূরেতি, দিট্ঠিযা সুপ্পটিৰিদ্ধা পঞ্ঞাক্খন্ধং পরিপূরেতি.

সোতানুগতা ধম্মা বহুস্সুতা হোন্তীতি ৰিত্থারেন কাতব্বং. ইদং পঠমং সদ্ধাপদানং মনসা অনুপেক্খিতাতি পটিসল্লানবহুলো ৰিহরতি, ৰিত্থারেন কাতব্বং. ইদং দুতিযং সদ্ধাপদানং দিট্ঠিযা সুপ্পটিৰিদ্ধাতি অনাসৰা চেতোৰিমুত্তিযা নাপরং ইত্থত্তাযাতি পজানাতীতি. ইদং ততিযং সদ্ধাপদানং.

সোতানুগতা ধম্মাতি সেক্খং সত্থা দস্সেতি. মনসা অনুপেক্খিতাতি অরহত্তং সত্থা দস্সেতি. দিট্ঠিযা সুপ্পটিৰিদ্ধাতি তথাগতং অরহন্তং সম্মাসম্বুদ্ধং সত্থা দস্সেতি.

সোতানুগতা ¶ ধম্মাতি কামানং নিস্সরণং দস্সেতি. মনসা অনুপেক্খিতাতি রূপধাতুযা নিস্সরণং দস্সেতি. দিট্ঠিযা সুপ্পটিৰিদ্ধাতি তেধাতুকানং নিস্সরণং দস্সেতি. অযং সুত্তত্থো.

১১৫. তত্থ কতমো দেসনাহারো? ইমম্হি সুত্তে তযো এসনা দেসিতা সোতানুগতেহি ধম্মেহি ৰচসা পরিচিতেহি কামেসনায সমথমগ্গো. দিট্ঠিযা সুপ্পটিৰিদ্ধেহি ব্রহ্মচরিযেসনায সমথমগ্গো.

ৰিচযোতি যথা সুত্তং মনসিকরোন্তো ৰিচিনন্তো সুতমযিপঞ্ঞং পটিলভতি. যথা চ সো ¶ মনসিকরোতীতি যথা সুতধম্মা তদা চিন্তামযিপঞ্ঞং পটিলভতি. যথা দিট্ঠেৰ ¶ ধম্মে মনসিকরোতি তদা ভাৰনামযিপঞ্ঞং পটিলভতি. অযং ৰিচযো.

সুতেন সুতমযিপঞ্ঞং পটিলভতি. চিন্তায চিন্তামযিপঞ্ঞং ভাৰনায ভাৰনামযিপঞ্ঞং পটিলভতি. অত্থি এসা যুত্তি.

পদট্ঠানোতি সোতানুগতা ধম্মাতি ধম্মস্সৰনস্স পদট্ঠানং. ৰচসা পরিচিতাতি যুঞ্জনায পদট্ঠানং. মনসা অনুপেক্খিতাতি ধম্মানুধম্মায ৰিপস্সনায পদট্ঠানং. দিট্ঠিযা অনুপেক্খিতাতি পঞ্ঞাযপি অনুপেক্খিতা দিট্ঠিযাপি অনুপেক্খিতা.

চতুব্যূহোতি ইমম্হি সুত্তে ভগৰতো কো অধিপ্পাযো? যে ইমাহি দ্ৰীহি পঞ্ঞাহি সমন্নাগতা তেহি….

স নিব্বুতোতি মগ্গফলং অনুপাদিসেসঞ্চ নিব্বানধাতুং মন্তেতি, দানেন ওল়ারিকানং কিলেসানং পহানং মন্তেতি. সীলেন মজ্ঝিমানং, পঞ্ঞায সুখুমকিলেসানং মন্তেতি, রাগদোসমোহক্খযা স নিব্বুতোতি কতা চ ভূমি.

দদতো পুঞ্ঞং পৰড্ঢতি, সংযমতো ৰেরং ন চীযতি;

কুসলো চ জহাতি পাপকন্তি মগ্গো ৰুত্তো;

রাগদোসমোহক্খযা স নিব্বুতোতি মগ্গফলমাহ.

দদতো ¶ পুঞ্ঞং পৰড্ঢতি, সংযমতোতি তীহি পদেহি লোকিকং কুসলমূলং ৰুত্তং. রাগদোসমোহক্খযা স নিব্বুতোতি লোকুত্তরং কুসলমূলং ৰুত্তং.

দদতো পুঞ্ঞং পৰড্ঢতি, সংযমতো ৰেরং ন চীযতীতি পুথুজ্জনভূমিং মন্তেতি. কুসলো চ জহাতি পাপকন্তি সেক্খভূমিং মন্তেতি. রাগদোসমোহক্খযা স নিব্বুতোতি অসেক্খভূমি ৰুত্তা.

দদতো ¶ পুঞ্ঞং পৰড্ঢতি, সংযমতো ৰেরং ন চীযতীতি মগ্গনিযা পটিপদা ৰুত্তা. কুসলো ¶ চ জহাতি পাপকন্তি সেক্খৰিমুত্তি. রাগদোসমোহক্খযা স নিব্বুতোতি অসেক্খৰিমুত্তি.

দদতো পুঞ্ঞং পৰড্ঢতি, সংযমতো ৰেরং ন চীযতীতি দানকথং সীলকথং মগ্গকথং লোকিকানং ধম্মানং দেসনমাহ. কুসলো চ জহাতি পাপকন্তি লোকে আদীনৰানুপস্সনা. রাগদোসমোহক্খযা স নিব্বুতোতি সামুক্কংসিকায ধম্মদেসনাযপি পটিৰিদ্ধা.

দদতো পুঞ্ঞং পৰড্ঢতীতি পাণানং অভযদানেন পাণাতিপাতা ৰেরমণিসত্তানং অভযং দেতি. এৰং সব্বানি সিক্খাপদানি কাতব্বানি. সংযমতো ৰেরং ন চীযতীতি সীলে পতিট্ঠায চিত্তং সংযমেতি, তস্স সংযমতো পারিপূরিং গচ্ছতি. রাগদোসমোহক্খযা স নিব্বুতোতি দ্ৰে ৰিমুত্তিযো. অযং সুত্তনিদ্দেসো.

১১৬. তত্থ কতমা দেসনা? ইমম্হি সুত্তে কিং দেসিতং? দ্ৰে সুগতিযো দেৰা চ মনুস্সা চ, দিব্বা চ পঞ্চকামগুণা, মানুস্সকা চ. দ্ৰীহি পদেহি নিদ্দেসো. দদতো পুঞ্ঞং পৰড্ঢতি, সংযমতো ৰেরং ন চীযতি, কুসলো চ জহাতি পাপকন্তি মগ্গো ৰুত্তো. রাগদোসমোহক্খযা স নিব্বুতোতি দ্ৰে নিব্বানধাতুযো দেসিতা সোপাদিসেসা চ অনুপাদিসেসা চ. অযং দেসনা.

ৰিচযোতি দদতো পুঞ্ঞং পৰড্ঢতীতি ইমিনা পঠমেন পদেন দানমযিকপুঞ্ঞকিরিযৰত্থু ৰুত্তং. তেনস্স আনন্তরিযানং কুসলানং ধম্মানং. দুতিযেন পদেন… যন্তি, নিয্যানিকং সাসনন্তি, অযং অধিপ্পাযো. অস্সৰনেন ¶ চ অমনসিকারেন চ অপ্পটিৰেধেন চ সক্কাযসমুদযগামিনী পটিপদা ৰুত্তা. সৰনেন ¶ চ মনসিকারেন চ পটিৰেধেন চ সক্কাযনিরোধগামিনী পটিপদা ৰুত্তা. অযং আৰট্টো.

ৰিভত্তীতি একংসব্যাকরণীযো. নত্থি তত্থ ৰিভত্তিযা ভূমি. পরিৰত্তনাতি যে পঞ্চানিসংসা, তে পঞ্চাদিনা পটিপক্খেন তেনেৰ দিট্ঠেৰ ধম্মে পাপুণাতি, তং উপপজ্জমানা অপরো পরিযাযো.

ৰেৰচনন্তি সোতানুগতা ধম্মাতি যং সুত্তং দিট্ঠম্পি পঞ্ঞিন্দ্রিযং ৰিঞ্ঞত্তম্পি দিট্ঠিযা সুপ্পটিৰিদ্ধম্পি ৰিভাৰিতম্পি.

পঞ্ঞত্তীতি ¶ সোতানুগতাধম্মাতি দেসনা অৰিজ্জাপঞ্ঞত্তিযা পঞ্ঞত্তং. মনসিকারো পামোজ্জপঞ্ঞত্তিযা পঞ্ঞত্তো, দিট্ঠধম্মাপি আনিসংসপঞ্ঞত্তিযা পঞ্ঞত্তা.

ওতরণোতি তিস্সো পঞ্ঞা ৰচসা পরিচিতেসু সুতমযীপঞ্ঞা মনসা অনুপেক্খিতেসু চিন্তামযীপঞ্ঞা দিট্ঠিযা সুপ্পটিৰিদ্ধাসু ভাৰনামযীপঞ্ঞা. ইমানি অরিযসচ্চানি ইন্দ্রিযানি ৰিজ্জুপ্পাদা অৰিজ্জানিরোধো পটিচ্চসমুপ্পাদো ইন্দ্রিযেসু তীণি ইন্দ্রিযানি, আযতনেসু ধম্মাযতনপরিযাপন্না ধাতূসু ধম্মধাতুপরিযাপন্নাতি. সোধনোতি যো আরম্ভো সুত্তস্স পৰেসো নিযুত্তো.

অধিট্ঠানোতি পঞ্চানিসংসাতি ৰেমত্ততায পঞ্ঞত্তা আনিসংসা সোতা অনুগতাতি ৰেমত্ততায অরিযৰোহারো পঞ্ঞত্তো, ধম্মে চ সৰনন্তি একত্ততায পঞ্ঞত্তং.

পরিক্খারোতি ধম্মস্সৰনস্স পযিরুপাসনা পচ্চযো, সদ্ধা হেতু. মনসা অনুপেক্খিতাতি অত্থপ্পটিসংৰেদিতা পচ্চযো, ধম্মপ্পটিসংৰেদিতা হেতু, দিট্ঠিযা সুপ্পটিৰিদ্ধাতি ¶ সদ্ধম্মস্সৰনঞ্চ মনসিকারো চ পচ্চযো, সুতমযী চিন্তামযী পঞ্ঞা হেতু. সমারোপনোতি ৰিভত্তং সুত্তং অপরো পরিযাযো নিব্বত্তি বলে নত্থি. তত্থ সমারোপনায ভূমি.

১১৭. তত্থ কতমং ৰাসনাভাগিযঞ্চ নিব্বেধভাগিযঞ্চ সুত্তং? দদতো পুঞ্ঞং পৰড্ঢতীতি গাথা. দদতোতি দানমযিকপুঞ্ঞকিরিযৰত্থু ৰুত্তং. সংযমতো ৰেরং ন চীযতীতি সীলমযিকপুঞ্ঞকিরিযৰত্থু ৰুত্তং. কুসলো চ জহাতি পাপকন্তি লোভস্স চ মোহস্স চ ব্যাপাদস্স চ পহানমাহ. রাগদোসমোহক্খযা স নিব্বুতোতি লোভস্স চ মোহস্স চ ব্যাপাদস্স ¶ চ ছন্দরাগৰিনযমাহাতি. দদতো পুঞ্ঞং পৰড্ঢতীতি গাথা অলোভো কুসলমূলং ভৰতি. সংযমতো ৰেরং ন চীযতীতি অদোসো কুসলমূলং ভৰতি. সংযমতো ৰেরং ন চীযতীতি অৰেরা অসপত্তা অব্যাপাদতায সদা. কুসলো চ জহাতি পাপকন্তি ঞাণুপ্পাদা অঞ্ঞাণনিরোধো. চতুত্থপদেন রাগদোসমোহক্খযেন রাগৰিরাগা চেতোৰিমুত্তিমোহক্খযেন অৰিজ্জাৰিরাগা পঞ্ঞাৰিমুত্তি, অযং ৰিচযো.

যুত্তীতি দানে ঠিতো উভযং হি পরিপূরেতি. মচ্ছরিযঞ্চ পজহতি. পুঞ্ঞঞ্চ পৰড্ঢতি. অত্থি এসা যুত্তি.

পদট্ঠানন্তি ¶ দদতো পুঞ্ঞং পৰড্ঢতীতি চাগাধিট্ঠানস্স পদট্ঠানং. সংযমতো ৰেরং ন চীযতীতি পঞ্ঞাধিট্ঠানস্স পদট্ঠানং কুসলো চ জহাতি পাপকন্তি সচ্চাধিট্ঠানস্স পদট্ঠানং. রাগদোসমোহক্খযা স নিব্বুতোতি উপসমাধিট্ঠানস্স পদট্ঠানং. অযং পদট্ঠানো.

তত্থ ¶ কতমো লক্খণো? দদতো পুঞ্ঞং পৰড্ঢতি সংযমতো ৰেরং ন চীযতি. দদতোপি ৰেরং ন করিযাতি কুসলো চ জহাতি পাপকং রাগদোসমোহক্খযা স নিব্বুতো রূপক্খযাপি ৰেদনক্খযাপি, যেন রূপেন দিট্ঠং, তেন তথাগতো পঞ্ঞপেন্তো পঞ্ঞপেয্য রূপস্স খযা ৰিরাগনিরোধাতি এৰং পঞ্চক্খন্ধা.

চতুব্যূহো ইধ ভগৰতো কো অধিপ্পাযো? যে মহাভোগানং পত্থযিস্সন্তি? তে দানং দস্সন্তি পরিস্সযপহানায, যে অৰেরাভিছন্দকা, তে পঞ্চ ৰেরানি পজহিস্সন্তি, যে কুসলাভিছন্দকা, তে অট্ঠঙ্গিকং মগ্গং ভাৰেস্সন্তি অট্ঠন্নং মিচ্ছত্তানং পহানায. যে নিব্বাযিতুকামা, তে রাগদোসমোহং পজহিস্সন্তীতি অযং ভগৰতো অধিপ্পাযো.

আৰট্টোতি যঞ্চ অদদতো মচ্ছরিযং যঞ্চ অসংযমতো ৰেরং যঞ্চ অকুসলস্স পাপস্স অপ্পহানং, অযং দুক্খনিদ্দেসো ন সমুদযো. অলোভেন চ অদোসেন চ অমোহেন চ কুসলেন ইমানি তীণি কুসলমূলানি. তেসং পচ্চযো অট্ঠ সম্মত্তানি, অযং মগ্গো. তেসং রাগদোসমোহানং খযা, অযং নিরোধো.

ৰিভত্তীতি দদতো পুঞ্ঞং পৰড্ঢতীতি ন একংসেন যো রাজদণ্ডভযেন দেতি, যো চ অকপ্পিযস্স পরিভোগেন সীলৰন্তেসু দেতি, ন তস্স পুঞ্ঞং ¶ পৰড্ঢতীতি সো চেতং দানং অকুসলেন দেতি, দণ্ডদানং সত্থদানং অপুঞ্ঞমযং পৰড্ঢতি, ন পুঞ্ঞং. সংযমতো ৰেরং ন চীযতীতি ন একংসেন কিং কারণং যঞ্চ যো পদং দিট্ঠধম্মিকং পস্সতি যদি মম রাজানো গহেত্ৰা হত্থং ৰা ছিন্দেয্য…পে… ন তেন সংযমেন ৰেরং ন করোতি. যো তু এৰং সমাদিযতি পাণাতিপাতস্স ¶ পাপকো ৰিপাকোতি, দিট্ঠে যেৰ ধম্মে অভিসম্পরাযে চ এৰং সব্বস্স অকুসলস্স হেতুতো আরতি. ইমিনা সংযমেন ৰেরং ন চীযতি.

পরিৰত্তনাতি দদতো পুঞ্ঞং পৰড্ঢতীতি অদদতো পুঞ্ঞং ন পৰড্ঢতি. যং দানমযং, তং সংযমতো ৰেরং ন চীযতি, অসংযমতো ৰেরং করীযতি. কুসলো চ জহাতি পাপকং অকুসলো ন জহাতি. রাগদোসমোহক্খযা সনিব্বুতোতি দূতং পেসেত্ৰা পণীতং পেসেত্ৰাপি ন পক্কোসামি, সো ¶ সযমেৰ পন মহাভিক্খুসঙ্ঘপরিৰারো অম্হাকং ৰসনট্ঠানং সম্পত্তো অম্হেহি চ সন্থাগারসালা [সন্ধাগারসালা (ক.)] কারিতা, এত্থ মযং দসবলং আনেত্ৰা মঙ্গলং ভণাপেমাতি চিন্তেত্ৰা উপসঙ্কমিংসু. যেন সন্থাগারং তেনুপসঙ্কমিংসূতি তং দিৰসং কির সন্থাগারে চিত্তকম্মং নিট্ঠাপেত্ৰা অট্টকা মুত্তমত্তা হোন্তি. বুদ্ধা নাম অরঞ্ঞজ্ঝাসযা অরঞ্ঞারামা অন্তোগামে ৰসেয্যুং ৰা নো ৰাতি তস্মা ভগৰতো মনং জানিত্ৰাৰ পটিজগ্গিস্সামাতি চিন্তেত্ৰা তে ভগৰন্তং উপসঙ্কমিংসু. ইদানি পন মনং লভিত্ৰা পটিজগ্গিতুকামা যেন সন্থাগারং, তেনুপসঙ্কমিংসু. সব্বসন্থরিন্তি যথা সব্বং সন্থতং হোতি এৰং যেন ভগৰা তেনুপসঙ্কমিংসূতি. এত্থ পন তে মল্লরাজানো সন্থাগারং পটিজগ্গিত্ৰা নগরৰীথিযোপি সম্মজ্জাপেত্ৰা ধজে উস্সাপেত্ৰা সুৰণ্ণঘটিকদলিযো চ ঠপাপেত্ৰা সকলনগরং দীপমালাহি ৰিপ্পকিণ্ণতারকং ৰিয কত্ৰা খীরপকে [খীরুপকে (পী. ক.)] দারকে খীরং পাযেথ, দহরে কুমারে লহুং লহুং ভোজাপেত্ৰা সযাপেথ, উচ্চাসদ্দং মাকরি, অজ্জ একরত্তিং সত্থা অন্তোগামেৰ ৰসিস্সতি, বুদ্ধা নাম অপ্পসদ্দকামা হোন্তীতি ভেরিং চরাপেত্ৰা সযং দণ্ডকদীপিকা আদায যেন ভগৰা তেনুপসঙ্কমিংসু. ভগৰন্তং যেৰ পুরক্খত্ৰাতি ভগৰন্তং পুরতো ¶ কত্ৰা, তত্থ ভগৰা ভিক্খূনঞ্চেৰ উপাসকানঞ্চ মজ্ঝে নিসিন্নো অতিৰিয ৰিরোচতি. সমন্তপাসাদিকো সুৰণ্ণৰণ্ণো অভিরূপো দস্সনীযো পুরত্থিমকাযতো ¶ সুৰণ্ণৰণ্ণা রস্মি উট্ঠহিত্ৰা গগনতলে অসীতিহত্থং ঠানং গণ্হাতি. পচ্ছিমকাযতো দক্খিণহত্থতো ৰামহত্থতো সুৰণ্ণৰণ্ণা হেট্ঠা পাদতলেহি পৰাল়ৰণ্ণরস্মি উট্ঠহিত্ৰা ঘনপথৰিযং অসীতিহত্থং ঠানং গণ্হাতি, এৰং সমন্তা অসীতিহত্থমত্তং ঠানং ছব্বণ্ণবুদ্ধরস্মিযো ৰিজ্জোতমানা ৰিতণ্ডমানা ৰিধাৰন্তি, সব্বে দিসাভাগা সুৰণ্ণচম্পকপুপ্ফেহি ৰিকিরিযমানা ৰিয সুৰণ্ণঘটতো নিক্খন্তসুৰণ্ণরসধারাহি সিঞ্চমানা ৰিয পসারিতসুৰণ্ণপটপরিক্খিত্তা ৰ্ৰিয ৰেরম্ভৰাতসমুট্ঠিতকিংসুককিংসুকারকণিকারপুপ্ফচুণ্ণসমোকিণ্ণা ৰিয ৰিপ্পকসন্তং অসীতিঅনুব্যঞ্জনব্যামপ্পভা দ্ৰত্তিংসৰরলক্খণসমুজ্জলং সরীরং সমুগ্গততারকং ৰিয গগনতলং ৰিকসিতমিৰ পদুমৰনং সব্বফালিফুল্লো ৰিয যোজনসতিকো পারিচ্ছত্তকো পটিপাটিযা ঠপিতানং দ্ৰত্তিংসচন্দানং দ্ৰত্তিংসসূরিযানং দ্ৰত্তিংসচক্কৰত্তীনং দ্ৰত্তিংসদেৰরাজানং দ্ৰত্তিংসমহাব্রহ্মানং নিব্বুতো অসেক্খস্স নত্থি নিব্বুতি.

ৰেৰচনন্তি দদতো পুঞ্ঞং পৰড্ঢতি, অনুমোদতোপি পুঞ্ঞং পৰড্ঢতি. চিত্তস্স সমাদহতোপি ৰেয্যাৰচ্চকিরিযাযপি পুঞ্ঞং পৰড্ঢতীতি.

পঞ্ঞত্তীতি দদতো পুঞ্ঞং পৰড্ঢতি, অলোভস্স পটিনিস্সযঘাতপঞ্ঞত্তিযা পঞ্ঞত্তং. সংযমতো ¶ ৰেরং ন চীযতীতি অদোসস্স পটিনিস্সযঘাতপঞ্ঞত্তিযা পঞ্ঞত্তং কুসলো চ জহাতি পাপকন্তি অমোহস্স পটিনিস্সযঘাতপঞ্ঞত্তিযা পঞ্ঞত্তং.

ওতরণোতি ¶ পঞ্চসু ইন্দ্রিযেসু দদতো পুঞ্ঞং পৰড্ঢতি, সংযমতো ৰেরং ন চীযতি সংযমেন সীলক্খন্ধো. ওতিণ্ণো ছসু ইন্দ্রিযেসু সংৰরো, অযং সমাধিক্খন্ধো, যং কুসলো চ জহাতি পাপকং, অযং পঞ্ঞাক্খন্ধো, রাগদোসমোহক্খযা স নিব্বুতোতি ৰিমুত্তিক্খন্ধো. ধাতূসু ধম্মধাতু, আযতনেসু মনাযতনং.

সোধনোতি যেনারম্ভেন ইদং সুত্তং দেসিতং সো আরম্ভো সুদ্ধো.

অধিট্ঠানো দানন্তি একত্ততায পঞ্ঞত্তং. চাগো পরিচ্চাগো ধম্মদানং আমিসদানং, অট্ঠ দানানি ৰিত্থারেন কাতব্বানি, অযং ৰেমত্ততা. ন চ দদতো ¶ একত্তপঞ্ঞত্তিযা পঞ্ঞত্তং. খন্তী অনৰজ্জন্তি পঞ্ঞত্তিযা পঞ্ঞত্তং. রাগদোসমোহক্খযা স নিব্বুতোতি রোধৰীরিযপঞ্ঞত্তিযা [যোধ ৰীরিযপঞ্ঞত্তিযা (পী. ক.)] পঞ্ঞত্তা.

পরিক্খারোতি দানস্স পামোজ্জং পচ্চযো, অলোভো হেতু. সংযমতো যোনিসো মনসিকারো হেতু, পরিচ্চাগো পচ্চযো. কুসলো চ জহাতি পাপকন্তি যথাভূতদস্সনং পচ্চযো, ঞাণপ্পটিলাভো হেতু. রাগদোসমোহক্খযা স নিব্বুতোতি পরতো চ ঘোসো অজ্ঝত্তঞ্চ যোনিসো মনসিকারো মগ্গো চ হেতু চ পচ্চযো চ.

সমারোপনোতি দদতো পুঞ্ঞং পৰড্ঢতীতি গাথা তস্স সীলম্পি ৰড্ঢতি. সংযমোপি ৰড্ঢতি. সংযমতো ৰেরং ন চীযতীতি. অঞ্ঞেপি কিলেসা ন চীযন্তি যেপিস্স তপ্পচ্চযা উপ্পজ্জেয্যুং আসৰা ৰিঘাতা, তেপিস্স ন উপ্পজ্জন্তি. রাগদোসমোহক্খযা স নিব্বুতোতি রাগদোসস্সাপি খযা রাগানুসযস্সপি খযা দোসস্স মোহস্সাপি স নিব্বুতোতি সোপাদিসেসা নিব্বানধাতু অনুপাদিসেসাপি. অযং সমারোপনো.

থেরস্স মহাকচ্চাযনস্স পেটকোপদেসে

১১৮. পুব্বা ¶ ¶ কোটি ন পঞ্ঞাযতি অৰিজ্জায চ ভৰতণ্হায চ. তত্থ অৰিজ্জানীৰরণানং তণ্হাসংযোজনানং সত্তানং পুব্বকোটি ন পঞ্ঞাযতি. তত্থ যে সত্তা তণ্হাসংযোজনা, তে অজ্ঝোসানবহুলা মন্দৰিপস্সকা. যে পন উস্সন্নদিট্ঠিকা সত্তা, তে ৰিপস্সনাবহুলা মন্দজ্ঝোসানা.

তত্থ তণ্হাচরিতা সত্তা সত্তসঞ্ঞাভিনিৰিট্ঠা অনুপ্পাদৰযদস্সিনো. তে পঞ্চসু খন্ধেসু অত্তানং সমনুপস্সন্তি ‘‘রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তান’’ন্তি. এৰং পঞ্চক্খন্ধা. অঞ্ঞেহি খন্ধেহি অত্তানং সমনুপস্সন্তি তস্স উস্সন্নদিট্ঠিকা সত্তা ৰিপস্সমানা খন্ধে উজুং অত্ততো সমনুপস্সন্তি. তে রূপং অত্তকো সমনুপস্সন্তি. যং রূপং, সো অত্তা. যো অহং, তং রূপং. সো রূপৰিনাসং পস্সতি, অযং উচ্ছেদৰাদী ¶ . ইতি পঞ্চন্নং খন্ধানং পঠমাভিনিপাতা সক্কাযদিট্ঠিযো পঞ্চ উচ্ছেদং ভজন্তি ‘‘তং জীৰং তং সরীর’’ন্তি. একমেকম্হি খন্ধে তীহি পদেহি পচ্ছিমকেহি সস্সতং ভজতি ‘‘অঞ্ঞং জীৰং অঞ্ঞং সরীর’’ন্তি. ইতো বহিদ্ধাতে পব্বজিতা তণ্হাচরিতা কামসুখল্লিকানুযোগমনুযুত্তা ৰিহরন্তি. তেন যে চ নিস্সন্দেন দিট্ঠিচরিতা অত্তকিলমথানুযোগমনুযুত্তা ¶ ৰিহরন্তি. তেন যেৰ দিট্ঠিসুখেন এত্তাৰতা বাহিরকো পযোগো.

তত্থ দিট্ঠিচরিতা সত্তা যে অরিযধম্মৰিনযং ওতরন্তি, তে ধম্মানুসারিনো হোন্তি. যে তণ্হাচরিতা সত্তা অরিযং ধম্মৰিনযং ওতরন্তি, তে সদ্ধানুসারিনো হোন্তি.

তত্থ যে দিট্ঠিচরিতা সত্তা, তে কামেসু দোসদিট্ঠী, ন চ যে কামেসু অনুসযা সমূহতা, তে অত্তকিলমথানুযোগমনুযুত্তা ৰিহরন্তি. তেসং সত্থা ধম্মং দেসেতি. অঞ্ঞো ৰা সাৰকো কামেহি নত্থি অত্থোতি তে চ পুব্বেযেৰ কামেহি অনত্থিকা ইতি কামে অপ্পকসিরেন পটিনিস্সজ্জন্তি. তে চেতসিকেন দুক্খেন অনজ্ঝোসিতা. তেন ৰুচ্চতি ‘‘সুখা পটিপদা’’তি ¶ . যে পন তণ্হাচরিতা সত্তা, তে কামেসু অজ্ঝোসিতা, তেসং সত্থা ৰা ধম্মং দেসেতি. অঞ্ঞতরো ৰা ভিক্খু কামেহি নত্থি অত্থোতি, তে পিযরূপং দুক্খেন পটিনিস্সজ্জন্তি. তেন ৰুচ্চতি ‘‘দুক্খা পটিপদা’’তি. ইতি ইমে সব্বসত্তা দ্ৰীসু পটিপদাসু সমোসরণং গচ্ছন্তি দুক্খাযঞ্চ সুখাযঞ্চ.

তত্থ যে দিট্ঠিচরিতা সত্তা, তে দ্ৰিধা মুদিন্দ্রিযা চ তিক্খিন্দ্রিযা চ. তত্থ যে দিট্ঠিচরিতা সত্তা তিক্খিন্দ্রিযা সুখেন পটিনিস্সজ্জন্তি, খিপ্পঞ্চ অভিসমেন্তি, তেন ৰুচ্চতি ‘‘খিপ্পাভিঞ্ঞা সুখা পটিপদা’’তি. তত্থ যে দিট্ঠিচরিতা সত্তা মুদিন্দ্রিযা পঠমং তিক্খিন্দ্রিযং উপাদায দন্ধতরং অভিসমেন্তি, তে সুখেন পটিনিস্সজ্জন্তি, দন্ধঞ্চ অভিসমেন্তি. তেন ৰুচ্চতি ‘‘সুখা পটিপদা দন্ধাভিঞ্ঞা’’তি. তত্থ তণ্হাচরিতা সত্তা দ্ৰিধা তিক্খিন্দ্রিযা চ মুদিন্দ্রিযা চ. তত্থ ¶ যে তণ্হাচরিতা সত্তা তিক্খিন্দ্রিযা দুক্খেন পটিনিস্সজ্জন্তি, খিপ্পঞ্চ অভিসমেন্তি. তেন ৰুচ্চতি ‘‘দুক্খা পটিপদা খিপ্পাভিঞ্ঞা’’তি. তত্থ যে তণ্হাচরিতা সত্তা মুদিন্দ্রিযা পঠমং তিক্খিন্দ্রিযং উপাদায দন্ধতরং অভিসমেন্তি, তে দুক্খেন পটিনিস্সজ্জন্তি, দন্ধঞ্চ অভিসমেন্তি. তেন ৰুচ্চতি ‘‘দুক্খা পটিপদা দন্ধাভিঞ্ঞা’’তি. ইমা চতস্সো পটিপদাযো অপঞ্চমা অছট্ঠা. যে হি কেচি নিব্বুতা নিব্বাযিস্সন্তি ¶ ৰা ইমাহি চতূহি পটিপদাহি অনঞ্ঞাহি অযং পটিপদাচতুক্কেন কিলেসে নিদ্দিসতি. যা চতুক্কমগ্গেন অরিযধম্মেসু নিদ্দিসিতব্বা, অযং ৰুচ্চতি সীহৰিক্কীল়িতো নাম নযো.

১১৯. তত্রিমে চত্তারো আহারা. চত্তারো ৰিপল্লাসা উপাদানা যোগা গন্থা আসৰা ওঘা সল্লা ৰিঞ্ঞাণট্ঠিতিযো অগতিগমনাতি, এৰং ইমানি সব্বানি দস পদানি. অযং সুত্তস্স সংসন্দনা.

চত্তারো আহারা. তত্থ যো চ কবল়ীকারো আহারো যো চ ফস্সো আহারো, ইমে তণ্হাচরিতেন পহাতব্বা. তত্থ যো চ মনোসঞ্চেতনাহারো যো চ ৰিঞ্ঞাণাহারো, ইমে দিট্ঠিচরিতেন পহাতব্বা.

পঠমো আহারো পঠমো ৰিপল্লাসো, দুতিযো আহারো দুতিযো ৰিপল্লাসো, ততিযো আহারো ততিযো ৰিপল্লাসো, চতুত্থো আহারো চতুত্থো ৰিপল্লাসো. ইমে চত্তারো ৰিপল্লাসা অপঞ্চমা অছট্ঠা. ইদঞ্চ পমাণা চত্তারো আহারা.

তত্থ ¶ পঠমে ৰিপল্লাসে ঠিতো কামে উপাদিযতি, ইদং কামুপাদানং. দুতিযে ৰিপল্লাসে ঠিতো অনাগতং ভৰং উপাদিযতি, ইদং সীলব্বতুপাদানং. ততিযে ৰিপল্লাসে ঠিতো ৰিপরীতো দিট্ঠিং উপাদিযতি, ইদং দিট্ঠুপাদানং. চতুত্থে ¶ ৰিপল্লাসে ঠিতো খন্ধে অত্ততো উপাদিযতি, ইদং অত্তৰাদুপাদানং.

তত্থ কামুপাদানে ঠিতো কামে অভিজ্ঝাযতি গন্থতি, অযং অভিজ্ঝাকাযগন্থো. সীলব্বতুপাদানে ঠিতো ব্যাপাদং গন্থতি, অযং ব্যাপাদকাযগন্থো. দিট্ঠুপাদানে ঠিতো পরামাসং গন্থতি, অযং পরামাসকাযগন্থো. অত্তৰাদুপাদানে ঠিতো পপঞ্চন্তো গন্থতি, অযং ইদংসচ্চাভিনিৰেসো কাযগন্থো.

তস্স গন্থিতা কিলেসা আসৰন্তি. কিঞ্চি পন ৰুচ্চতি ৰিপ্পটিসারো. যে ৰিপ্পটিসারা [যো ৰিপ্পটিসারো (পী. ক.)] তে অনুসযা. তত্থ অভিজ্ঝাকাযগন্থেন কামাসৰো, ব্যাপাদকাযগন্থেন ভৰাসৰো, পরামাসকাযগন্থেন দিট্ঠাসৰো, ইদং সচ্চাভিনিৰেসকাযগন্থেন অৰিজ্জাসৰো.

তে ¶ চত্তারো আসৰা ৰেপুল্লভাৰং গতা ওঘা হোন্তি, তেন ৰুচ্চন্তি ‘‘ওঘা’’তি. তত্থ কামাসৰো কামোঘো, ভৰাসৰো ভৰোঘো, অৰিজ্জাসৰো অৰিজ্জোঘো, দিট্ঠাসৰো দিট্ঠোঘো.

তে চত্তারো ওঘা আসযমনুপৰিট্ঠা অনুসযসহগতা ৰুচ্চন্তি. সল্লাতি হদযমাহচ্চ তিট্ঠন্তা. তত্থ কামোঘো রাগসল্লং, ভৰোঘো দোসসল্লং, অৰিজ্জোঘো মোহসল্লং, দিট্ঠোঘো দিট্ঠিসল্লং.

ইমেহি চতূহি সল্লেহি পরিযাদিন্নং ৰিঞ্ঞাণং চতূসু ধম্মেসু তিট্ঠতি রূপে ৰেদনায সঞ্ঞায সঙ্খারেসু. ইমা চতস্সো ৰিঞ্ঞাণট্ঠিতিযো. তত্থ রাগসল্লেন নন্দূপসেচনং রূপূপগং ৰিঞ্ঞাণং তিট্ঠতি. দোসসল্লেন ৰেদনূপগং মোহসল্লেন সঞ্ঞূপগং ¶ দিট্ঠিসল্লেন নন্দূপসেচনং সঙ্খারূপগং ৰিঞ্ঞাণং তিট্ঠতি.

চতূহি ৰিঞ্ঞাণট্ঠিতীহি চতুব্বিধং অগতিং গচ্ছন্তি ছন্দা দোসা ভযা মোহা. রাগেন ছন্দা অগতিং গচ্ছতি, দোসেন দোসা অগতিং গচ্ছতি, মোহেন মোহা অগতিং গচ্ছতি, দিট্ঠিযা ভযা অগতিং গচ্ছতি. ইতি ইদঞ্চ কম্মং ইমে চ কিলেসা. অযং সংসারস্স হেতু.

১২০. তত্থিমা ¶ চতস্সো দিসা কবল়ীকারাহারো ‘‘অসুভে সুভ’’ন্তি ৰিপল্লাসো কামুপাদানং কামযোগো অভিজ্ঝাকাযগন্থো কামাসৰো কামোঘো রাগসল্লং রূপূপগা ৰিঞ্ঞাণট্ঠিতি ছন্দা অগতিগমনং. অযং পঠমা দিসা.

ফস্সো আহারো ‘‘দুক্খে সুখ’’ন্তি ৰিপল্লাসো সীলব্বতুপাদানং ভৰযোগোব্যাপাদো কাযগন্থো ভৰাসৰো ভৰোঘো দোসসল্লং ৰেদনূপগা ৰিঞ্ঞাণট্ঠিতি দোসা অগতিগমনং, অযং দুতিযা দিসা.

মনোসঞ্চেতনাহারো ‘‘অনত্তনি অত্তা’’তি ৰিপল্লাসো দিট্ঠুপাদানং দিট্ঠিযোগো পরামাসকাযগন্থো দিট্ঠাসৰো দিট্ঠোঘো দিট্ঠিসল্লং সঞ্ঞূপগা ৰিঞ্ঞাণট্ঠিতি ভযা অগতিগমনং. অযং ততিযা দিসা.

ৰিঞ্ঞাণাহারো ‘‘অনিচ্চে নিচ্চ’’ন্তি ৰিপল্লাসো অত্তৰাদুপাদানং অৰিজ্জাযোগো ইদংসচ্চাভিনিৰেসো কাযগন্থো অৰিজ্জাসৰো অৰিজ্জোঘো মোহসল্লং সঙ্খারূপগা ৰিঞ্ঞাণট্ঠিতি মোহা অগতিগমনং, অযং ¶ চতুত্থী দিসা. ইতি ইমেসং দসন্নং সুত্তানং পঠমেন পদেন পঠমায দিসায আলোকনং. অযং ৰুচ্চতি দিসালোকনা.

চতূহি ¶ ৰিপল্লাসেহি অকুসলপক্খে দিসাৰিলোকনা কিলেসং সংযোজেত্ৰা অযং অকুসলপক্খে দিসাৰিলোকনায ভূমি পঞ্চন্নং দসন্নং সুত্তানং যানি পঠমানি পদানি ইমেসং ধম্মানং কো অত্থো? একো অত্থো, ব্যঞ্জনমেৰ নানং. এৰং দুতিযা এৰং ততিযা এৰং চতুত্থী. অযং পঠমা সংসন্দনা.

ইমিনা পেয্যালেন সব্বে কিলেসা চতূসু পদেসু পক্খিপিতব্বা. ততো কুসলপক্খে চতস্সো পটিপদা চত্তারি ঝানানি চত্তারো সতিপট্ঠানা চত্তারো ৰিহারা দিব্বো ব্রহ্মা অরিযো আনেঞ্জো চত্তারো সম্মপ্পধানা চত্তারো অচ্ছরিযা অব্ভুতধম্মা চত্তারো অধিট্ঠানা চত্তারো সমাধযো ছন্দসমাধি ৰীরিযসমাধি চিত্তসমাধি ৰীমংসাসমাধি. চত্তারো ধম্মা সুখভাগিযা নাঞ্ঞত্র বোজ্ঝঙ্গা নাঞ্ঞত্র তপসা নাঞ্ঞতিন্দ্রিযসংৰরা নাঞ্ঞত্র সব্বনিস্সগ্গা চত্তারি অপ্পমাণানি.

তত্থ দুক্খা পটিপদা দন্ধাভিঞ্ঞা ভাৰিযমানা বহুলীকরিযমানা পঠমং ঝানং পরিপূরেতি, পঠমং ঝানং পরিপুণ্ণং পঠমং সতিপট্ঠানং পরিপূরেতি ¶ , পঠমং সতিপট্ঠানং পরিপুণ্ণং পঠমং ৰিহারং পরিপূরেতি, পঠমো ৰিহারো পরিপুণ্ণো পঠমং সম্মপ্পধানং পরিপূরেতি, পঠমং সম্মপ্পধানং পরিপুণ্ণং পঠমং অচ্ছরিযং অব্ভুতধম্মং পরিপূরেতি, পঠমো অচ্ছরিযো অব্ভুতো ধম্মো পরিপুণ্ণো পঠমং অধিট্ঠানং পরিপূরেতি, পঠমং অধিট্ঠানং পরিপুণ্ণং ছন্দসমাধিং পরিপূরেতি, ছন্দসমাধি পরিপুণ্ণো ইন্দ্রিযসংৰরং পরিপূরেতি, ইন্দ্রিযসংৰরো পরিপুণ্ণো পঠমং মেত্তাঅপ্পমাণং পরিপূরেতি. এৰং যাৰ সব্বনিস্সগ্গো চতুত্থং অপ্পমাণং পরিপূরেতি.

তত্থ পঠমা চ পটিপদা পঠমঞ্চ ঝানং পঠমঞ্চ সতিপট্ঠানং পঠমো চ ৰিহারো পঠমঞ্চ সম্মপ্পধানং ¶ পঠমো চ অচ্ছরিযো অব্ভুতো ধম্মো সচ্চাধিট্ঠানঞ্চ ছন্দসমাধি চ ইন্দ্রিযসংৰরো চ মেত্তা চ অপ্পমাণং. অযং পঠমা দিসা.

দুক্খা চ [দুতিযা চ (ক.)] পটিপদা খিপ্পাভিঞ্ঞা দুতিযং ঝানং দুতিযঞ্চ সতিপট্ঠানং দুতিযো চ ৰিহারো দুতিযঞ্চ সম্মপ্পধানং দুতিযো চ অচ্ছরিযো অব্ভুতো ¶ ধম্মো চাগাধিট্ঠানং চিত্তসমাধি চত্তারো ইদ্ধিপাদা করুণা চ অপ্পমাণং, অযং দুতিযা দিসা.

সুখা চ [ততিযা চ (ক.)] পটিপদা দন্ধাভিঞ্ঞা ততিযঞ্চ ঝানং ততিযঞ্চ সতিপট্ঠানং ততিযো চ ৰিহারো ততিযঞ্চ সম্মপ্পধানং ততিযো চ অচ্ছরিযো অব্ভুতো ধম্মো পঞ্ঞাধিট্ঠানঞ্চ ৰীরিযসমাধি চ বোজ্ঝঙ্গা চ মুদিতা চ অপ্পমাণং. অযং ততিযা দিসা.

সুখা চ [চতুত্থী চ (ক.)] পটিপদা খিপ্পাভিঞ্ঞা চতুত্থং ঝানং চতুত্থঞ্চ সতিপট্ঠানং চতুত্থো চ ৰিহারো চতুত্থঞ্চ সম্মপ্পধানং চতুত্থো চ অচ্ছরিযো অব্ভুতো ধম্মো উপসমাধিট্ঠানঞ্চ ৰীমংসাসমাধি চ সব্বনিস্সগ্গো চ উপেক্খা অপ্পমাণঞ্চ. অযং চতুত্থী দিসা. ইমাসং চতস্সন্নং দিসানং আলোকনা. অযং ৰুচ্চতি দিসালোকনো নাম নযো.

তত্থাযং যোজনা. চত্তারো চ আহারা চতস্সো চ পটিপদা, চত্তারো চ ৰিপল্লাসা চত্তারো চ সতিপট্ঠানা, চত্তারি চ উপাদানানি চত্তারি চ ঝানানি চত্তারো চ যোগা ৰিহারা চ, গন্থা চ সম্মপ্পধানা চ, আসৰা চ অচ্ছরিযা অব্ভুতধম্মা চ, ওঘা চ অধিট্ঠানানি চ, সল্লা চ সমাধযো, ৰিঞ্ঞাণট্ঠিতিযো ¶ চত্তারো চ সুখভাগিযা ধম্মা, চত্তারি চ অগতিগমনানি চত্তারি চ অপ্পমাণানি ইতি কুসলাকুসলানং পটিপক্খৰসেন যোজনা, অযং ৰুচ্চতি দিসালোকনো নযো.

তস্স ¶ চত্তারি সামঞ্ঞফলানি পরিযোসানং, যো চ ধম্মো কুসলাকুসলনিদ্দেসে পঠমো দিসানিদ্দেসো, ইমস্স সোতাপত্তিফলং পরিযোসানং দুতিযং সকদাগামিফলং, ততিযং অনাগামিফলং, চতুত্থং অরহত্তফলং.

তত্থ কতমো তিপুক্খলো নযো? যে চ দুক্খায পটিপদায দন্ধাভিঞ্ঞায খিপ্পাভিঞ্ঞায চ নিয্যন্তি দ্ৰে পুগ্গলা, যে চ সুখায পটিপদায দন্ধাভিঞ্ঞায খিপ্পাভিঞ্ঞায চ নিয্যন্তি দ্ৰে পুগ্গলা.

ইমেসং চতুন্নং পুগ্গলানং যো পুগ্গলো সুখায পটিপদায দন্ধাভিঞ্ঞায নিয্যাতি, যো চ পুগ্গলো দুক্খায পটিপদায খিপ্পাভিঞ্ঞায নিয্যাতি. ইমে দ্ৰে পুগ্গলা ভৰন্তি. তত্থ যো সুখায পটিপদায খিপ্পাভিঞ্ঞায নিয্যাতি ¶ , অযং উগ্ঘটিতঞ্ঞূ. যো পচ্ছিমো পুগ্গলো সাধারণো, অযং ৰিপঞ্চিতঞ্ঞূ. যো পুগ্গলো দন্ধাভিঞ্ঞায দুক্খায পটিপদায নিয্যাতি, অযং নেয্যো. ইমে চত্তারো ভৰিত্ৰা তীণি হোন্তি, তত্থ উগ্ঘটিতঞ্ঞুস্স সমথপুব্বঙ্গমা ৰিপস্সনা, নেয্যস্স ৰিপস্সনাপুব্বঙ্গমো সমথো, ৰিপঞ্চিতঞ্ঞুস্স সমথৰিপস্সনা যুগনদ্ধা. উগ্ঘটিতঞ্ঞুস্স মুদুকা দেসনা, নেয্যস্স তিক্খা দেসনা, ৰিপঞ্চিতঞ্ঞুস্স তিক্খমুদুকা দেসনা.

উগ্ঘটিতঞ্ঞুস্স অধিপঞ্ঞাসিক্খা, নেয্যস্স অধিচিত্তসিক্খা, ৰিপঞ্চিতঞ্ঞুস্স অধিসীলসিক্খা. ইতি ইমেসং পুগ্গলানং চতূহি পটিপদাহি নিয্যানং.

তত্থ ¶ অযং সংকিলেসো, তীণি অকুসলমূলানি তযো ফস্সা তিস্সো ৰেদনা তযো উপৰিচারা তযো সংকিলেসা তযো ৰিতক্কা তযো পরিল়াহা তীণি সঙ্খতলক্খণানি তিস্সো দুক্খতাতি.

তীণি অকুসলমূলানীতি লোভো অকুসলমূলং, দোসো অকুসলমূলং, মোহো অকুসলমূলং. তযো ফস্সাতি সুখৰেদনীযো ফস্সো, দুক্খৰেদনীযো ফস্সো, অদুক্খমসুখৰেদনীযো ফস্সো. তিস্সো ৰেদনাতি সুখা ৰেদনা দুক্খা ৰেদনা অদুক্খমসুখা ৰেদনা. তযো উপৰিচারাতি সোমনস্সোপৰিচারো দোমনস্সোপৰিচারো উপেক্খোপৰিচারো. তযো সংকিলেসাতি রাগো দোসো মোহো. তযো ৰিতক্কাতি কামৰিতক্কো ব্যাপাদৰিতক্কো ৰিহিংসাৰিতক্কো. তযো পরিল়াহাতি ¶ রাগজো দোসজো মোহজো. তীণি সঙ্খতলক্খণানীতি উপ্পাদো ঠিতি ৰযো. তিস্সো দুক্খতাতি দুক্খদুক্খতা ৰিপরিণামদুক্খতা সঙ্খতদুক্খতা.

তত্থ লোভো অকুসলমূলং কুতো সমুট্ঠিতং? তিৰিধং আরম্মণং মনাপিকং অমনাপিকং উপেক্খাঠানিযঞ্চ. তত্থ মনাপিকেন আরম্মণেন লোভো অকুসলমূলং সমুট্ঠহতি. ইতি মনাপিকা আরম্মণা সুখৰেদনীযো ফস্সো, সুখৰেদনীযং ফস্সং পটিচ্চ উপ্পজ্জতে সুখৰেদনা, সুখৰেদনং পটিচ্চ উপ্পজ্জতে সোমনস্সূপৰিচারো, সোমনস্সূপৰিচারং পটিচ্চ উপ্পজ্জতে রাগো, রাগং পটিচ্চ উপ্পজ্জতে কামৰিতক্কো, কামৰিতক্কং পটিচ্চ উপ্পজ্জতে রাগজো পরিল়াহো ¶ রাগজং পরিল়াহং পটিচ্চ উপ্পজ্জতে উপ্পাদো সঙ্খতলক্খণো, উপ্পাদং সঙ্খতলক্খণং পটিচ্চ উপ্পজ্জতে ৰিপরিণামদুক্খতা.

দোসো ¶ অকুসলমূলং কুতো সমুট্ঠিতং? অমনাপিকেন আরম্মণেন দোসো অকুসলমূলং সমুট্ঠিতং. ইতি অমনাপিকা আরম্মণা দুক্খৰেদনীযো ফস্সো, দুক্খৰেদনীযং ফস্সং পটিচ্চ উপ্পজ্জতে দুক্খৰেদনা, দুক্খৰেদনং পটিচ্চ উপ্পজ্জতে দোমনস্সূপৰিচারো, দোমনস্সূপৰিচারং পটিচ্চ উপ্পজ্জতে দোসো, দোসং পটিচ্চ উপ্পজ্জতে ব্যাপাদৰিতক্কো, ব্যাপাদৰিতক্কং পটিচ্চ উপ্পজ্জতে দোসজো পরিল়াহো, দোসজং পরিল়াহং পটিচ্চ উপ্পজ্জতে ঠিতস্স অঞ্ঞথত্তং সঙ্খতলক্খণং, ঠিতস্স অঞ্ঞথত্তং সঙ্খতলক্খণং পটিচ্চ উপ্পজ্জতে দুক্খদুক্খতা ৰেদনা.

মোহো অকুসলমূলং কুতো সমুট্ঠিতং? উপেক্খাঠানিযেন আরম্মণেন মোহো অকুসলমূলং সমুট্ঠিতং. ইতি উপেক্খাঠানিযা আরম্মণা অদুক্খমসুখৰেদনীযো ফস্সো, অদুক্খমসুখৰেদনীযং ফস্সং পটিচ্চ উপ্পজ্জতে অদুক্খমসুখা ৰেদনা, অদুক্খমসুখৰেদনং পটিচ্চ উপ্পজ্জতে উপেক্খূপৰিচারো, উপেক্খূপৰিচারং পটিচ্চ উপ্পজ্জতে মোহো, মোহং পটিচ্চ উপ্পজ্জতে ৰিহিংসাৰিতক্কো, ৰিহিংসাৰিতক্কং পটিচ্চ উপ্পজ্জতে মোহজো পরিল়াহো, মোহজং পরিল়াহং পটিচ্চ উপ্পজ্জতে ৰযো সঙ্খতলক্খণং, ৰযং সঙ্খতলক্খণং পটিচ্চ উপ্পজ্জতে সঙ্খতদুক্খতা, ইতি অযং তিণ্ণং কিলেসানং নিদ্দেসো, অযং ৰুচ্চতে কুসলপক্খে তিপুক্খলো নযো.

ইতি তীণি অকুসলমূলানি ন চতুত্থানি ন পঞ্চমানি, তযো ফস্সাতি তিস্সো ৰেদনা যাৰ সঙ্খতদুক্খতাতি, যো ¶ কোচি অকুসলপক্খো, সব্বো সো তীসু অকুসলমূলেসু সমোসরতি.

তত্থ ¶ কতমো কুসলপক্খো? তীণি কুসলমূলানি, তিস্সো পঞ্ঞা সুতমযী পঞ্ঞা চিন্তামযী পঞ্ঞা ভাৰনামযী পঞ্ঞা. তযো সমাধী সৰিতক্কসৰিচারো…পে… তিস্সো সিক্খা অধিসীলসিক্খা…পে… সিক্খা. তীণি নিমিত্তানি সমথনিমিত্তং পগ্গহনিমিত্তং উপেক্খানিমিত্তং. তযো ৰিতক্কা নেক্খম্মৰিতক্কো…পে… অৰিহিংসাৰিতক্কো. তীণি ইন্দ্রিযানি অনঞ্ঞাতঞ্ঞস্সামীতিন্দ্রিযন্তি ৰিত্থারো. তযো উপৰিচারা নেক্খম্মূপৰিচারো অব্যাপাদূপৰিচারো অৰিহিংসূপৰিচারো. তিস্সো এসনা কামেসনা ভৰেসনা ব্রহ্মচরিযেসনা. তযো খন্ধা সীলক্খন্ধো সমাধিক্খন্ধো পঞ্ঞাক্খন্ধো.

তত্থ ¶ যং অলোভো কুসলমূলং, তং সুতমযিপঞ্ঞং পরিপূরেতি, সুতমযী পঞ্ঞা পরিপুণ্ণা সৰিতক্কং সৰিচারং সমাধিং পরিপূরেতি, সৰিতক্কো সৰিচারো সমাধি পরিপুণ্ণো অধিচিত্তসিক্খং পরিপূরেতি, অধিচিত্তসিক্খা পরিপুণ্ণা সমথনিমিত্তং পরিপূরেতি, সমথনিমিত্তং পরিপুণ্ণং নেক্খম্মৰিতক্কং পরিপূরেতি, নেক্খম্মৰিতক্কো পরিপুণ্ণো অনঞ্ঞাতঞ্ঞস্সামীতিন্দ্রিযং পরিপূরেতি, অনঞ্ঞাতঞ্ঞস্সামীতিন্দ্রিযং পরিপুণ্ণং নেক্খম্মূপৰিচারং পরিপূরেতি, নেক্খম্মূপৰিচারো পরিপুণ্ণো কামেসনং পজহতি, কামেসনপ্পহানং সমাধিক্খন্ধং পরিপূরেতি.

অদোসো কুসলমূলং চিন্তামযিপঞ্ঞং পরিপূরেতি, চিন্তামযী পঞ্ঞা পরিপুণ্ণা অৰিতক্কৰিচারমত্তং সমাধিং পরিপূরেতি ¶ . অৰিতক্কৰিচারমত্তো সমাধি পরিপুণ্ণো অধিসীলসিক্খং পরিপূরেতি, অধিসীলসিক্খা পরিপুণ্ণা উপেক্খানিমিত্তং পরিপূরেতি, উপেক্খানিমিত্তং পরিপুণ্ণং অব্যাপাদৰিতক্কং পরিপূরেতি, অব্যাপাদৰিতক্কো পরিপুণ্ণো অঞ্ঞিন্দ্রিযং পরিপূরেতি, অঞ্ঞিন্দ্রিযং পরিপুণ্ণং অব্যাপাদূপৰিচারং পরিপূরেতি, অব্যাপাদূপৰিচারো পরিপুণ্ণো ভৰেসনং পজহতি, ভৰেসনপ্পহানং সীলক্খন্ধং পরিপূরেতি.

অমোহো কুসলমূলং ভাৰনামযিপঞ্ঞং পরিপূরেতি, ভাৰনামযীপঞ্ঞা পরিপুণ্ণা অৰিতক্কঅৰিচারং সমাধিং পরিপূরেতি, অৰিতক্কো অৰিচারো সমাধি পরিপুণ্ণো অধিপঞ্ঞাসিক্খং পরিপূরেতি, অধিপঞ্ঞাসিক্খা পরিপুণ্ণা পগ্গহনিমিত্তং পরিপূরেতি, পগ্গহনিমিত্তং পরিপুণ্ণং অঞ্ঞাতাৰিনো ইন্দ্রিযং পরিপূরেতি, অঞ্ঞাতাৰিনো ইন্দ্রিযং পরিপুণ্ণং অৰিহিংসূপৰিচারং পরিপূরেতি, অৰিহিংসূপৰিচারো পরিপুণ্ণো ব্রহ্মচরিযেসনং পরিপূরেতি, ব্রহ্মচরিযেসনা পরিপুণ্ণা পঞ্ঞাক্খন্ধং পরিপূরেতি.

ইতি ইমে তযো ধম্মা কুসলপক্খিকা সব্বে কুসলা ধম্মা তীহি তিকনিদ্দেসেহি নিদ্দিসিযন্তি ¶ তীণি ৰিমোক্খমুখানি তস্স পরিযোসানং. তত্থ পঠমেন অপ্পণিহিতং, দুতিযেন সুঞ্ঞতং, ততিযেন অনিমিত্তং. অযং ৰুচ্চতি দুতিযো তিপুক্খলো নাম নযো.

তত্থ যে ইমে তযো পুগ্গলা উগ্ঘটিতঞ্ঞূ ৰিপঞ্চিতঞ্ঞূ নেয্যোতি. ইমেসং তিণ্ণং পুগ্গলানং যে চ পুগ্গলা সুখায পটিপদায খিপ্পাভিঞ্ঞায, সুখায পটিপদায দন্ধাভিঞ্ঞায চ নিয্যন্তি, তে দ্ৰে পুগ্গলা. যে চ দ্ৰে পুগ্গলা দুক্খায ¶ পটিপদায খিপ্পাভিঞ্ঞায, দুক্খায পটিপদায দন্ধাভিঞ্ঞায চ নিয্যন্তি ¶ , ইমে চত্তারো তেন ৰিসেসেন দ্ৰে ভৰন্তি দিট্ঠিচরিতো চ তণ্হাচরিতো চ. ইমে চত্তারো ভৰিত্ৰা তযো ভৰন্তি, তযো ভৰিত্ৰা দ্ৰে ভৰন্তি. ইমেসং দ্ৰিন্নং পুগ্গলানং অযং সংকিলেসো, অৰিজ্জা চ তণ্হা চ, অহিরিকঞ্চ অনোত্তপ্পঞ্চ, অস্সতি চ অসম্পজঞ্ঞঞ্চ, নীৰরণানি চ সংযোজনানি চ, অজ্ঝোসানঞ্চ অভিনিৰেসো চ, অহংকারো চ মমংকারো চ, অস্সদ্ধিযঞ্চ দোৰচস্সঞ্চ, কোসজ্জঞ্চ অযোনিসো চ মনসিকারো, ৰিচিকিচ্ছা চ অভিজ্ঝা চ, অসদ্ধম্মস্সৰনঞ্চ অসমাপত্তি চ.

তত্থ অৰিজ্জা চ অহিরিকঞ্চ অস্সতি চ নীৰরণানি চ অজ্ঝোসানঞ্চ অহংকারো চ অস্সদ্ধিযঞ্চ কোসজ্জঞ্চ ৰিচিকিচ্ছা চ অসদ্ধম্মস্সৰনঞ্চ, অযং একা দিসা.

তণ্হা চ অনোত্তপ্পঞ্চ অসম্পজঞ্ঞঞ্চ সংযোজনানি চ অভিনিৰেসো চ মমংকারো চ দোৰচস্সতা চ অযোনিসো মনসিকারো চ অভিজ্ঝা চ অসমাপত্তি চ, অযং দুতিযা দিসা. দসন্নং দুকানং দস পদানি পঠমানি কাতব্বানি. সংখিত্তেন অত্থং ঞাপেন্তি পটিপক্খে কণ্হপক্খস্স সব্বেসং দুকানং দস পদানি দুতিযকানি, অযং দুতিযা দিসা.

ইতি অকুসলানং ধম্মানং দুক্খনিদ্দেসো, অযং সমুদযো. যং তং ধম্মং অজ্ঝাৰসতি নামঞ্চ রূপঞ্চ ইদং দুক্খং ইতি অযঞ্চ সমুদযো, ইদঞ্চ দুক্খং, ইমানি দ্ৰে সচ্চানি দুক্খঞ্চ সমুদযো চ নন্দিযাৰট্টস্স নযস্স পঠমনিদ্দেসো.

তত্থ কতমো কুসলপক্খো? সমথো চ ৰিপস্সনা চ, ৰিজ্জা চ চরণঞ্চ, সতি চ সম্পজঞ্ঞঞ্চ, হিরী চ ওত্তপ্পঞ্চ, অহংকারপ্পহানঞ্চ ¶ মমংকারপ্পহানঞ্চ, সম্মাৰাযামো চ যোনিসো চ মনসিকারো, সম্মাসতি চ সম্মাসমাধি চ, পঞ্ঞা চ নিব্বিদা চ, সমাপত্তি চ সদ্ধম্মস্সৰনঞ্চ, সোমনস্সঞ্চ ধম্মানুধম্মপ্পটিপত্তি চ.

তত্থ ¶ সমথো চ ৰিজ্জা চ সতি চ হিরী চ অহংকারপ্পহানঞ্চ সম্মাৰাযামো চ সম্মাসতি চ পঞ্ঞা চ সমাপত্তি চ সোমনস্সঞ্চ, ইমে ধম্মা একা দিসা. ৰিপস্সনা চ চরণঞ্চ সম্পজঞ্ঞঞ্চ ওত্তপ্পঞ্চ মমংকারপ্পহানঞ্চ যোনিসো মনসিকারো চ সম্মাসমাধি চ নিব্বিদা চ সদ্ধম্মস্সৰনঞ্চ ধম্মানুধম্মপ্পটিপত্তি চ, অযং দুতিযা দিসা. ইতি কুসলপক্খে চ অকুসলপক্খে চ নন্দিযাৰট্টস্স পন নযস্স চতস্সো দিসা.

তাসু ¶ যানি অকুসলপক্খস্স পঠমানি পদানি অকুসলানি কুসলেহি পহানং গচ্ছন্তি, তানি কুসলপক্খে দুতিযেহি পদেহি পহানং গচ্ছন্তি. তেসং পহানা রাগৰিরাগা চেতোৰিমুত্তি যানি অকুসলপক্খস্স দুতিযানি অকুসলপদানি পহানং গচ্ছন্তি, তানি কুসলপক্খস্স পঠমেহি পদেহি পহানং গচ্ছন্তি. তেসং পহানা অৰিজ্জাৰিরাগা পঞ্ঞাৰিমুত্তি পরিযোসানং. ইমেসং তিণ্ণং নযানং পঠমো নযো সীহৰিক্কীল়িতো নাম. অট্ঠ পদানি চত্তারি চ কুসলানি চত্তারি চ অকুসলানি ইমানি অট্ঠ পদানি মূলপদানি, অত্থনযেন দুতিযো তিপুক্খলো. সো ছহি ধম্মেহি নেতি কুসলমূলানি চ নেতি অকুসলমূলানি চ, ইতি ইমানি ছ পদানি পুরিমকানি চ অট্ঠ মূলপদানি ইমানি চুদ্দস পদানি অট্ঠারসন্নং মূলপদানং. তত্থ ¶ যো পচ্ছিমকো নযো নন্দিযাৰট্টো, সো চতূহি ধম্মেহি নেতি. অৰিজ্জায চ তণ্হায চ সমথেন চ ৰিপস্সনায চ, ইমে চত্তারো ধম্মা ইমানি অট্ঠারস মূলপদানি তীসু নযেসু নিদ্দিট্ঠানি.

তত্থ যানি নৰ পদানি কুসলানি, তত্থ সব্বং কুসলং সমোসরতি. তেসঞ্চ নৰন্নং মূলানং চত্তারি পদানি সীহৰিক্কীল়িতনযে তীণি তিপুক্খলে দ্ৰে নন্দিযাৰট্টে, ইচ্চেতে কুসলস্স পক্খা. তত্থ যানি নৰ পদানি কুসলানি, তত্থ সব্বং কুসলং যুজ্জতি. তত্থ সীহৰিক্কীল়িতে নযে চত্তারি পদানি তীণি তিপুক্খলে দ্ৰে নন্দিযাৰট্টে ইমানি নৰ পদানি কুসলানি নিদ্দিট্ঠানি.

তত্থ যানি নন্দিযাৰট্টে নযে চত্তারি পদানি, তত্থ অট্ঠারস মূলপদানি সমোসরন্তি. যথা কথং, সমথো চ অলোভো চ অদোসো চ অসুভসঞ্ঞা চ দুক্খসঞ্ঞা চ ইমানি কুসলপক্খে পঞ্চ পদানি সমথং ভজন্তি. ৰিপস্সনা চ অমোহো চ অনিচ্চসঞ্ঞা চ অনত্তসঞ্ঞা চ ইমানি চত্তারি পদানি ৰিপস্সনং ভজন্তি. ইমানি নৰ পদানি কুসলানি দ্ৰীসু পদেসু যোজিতানি, তত্থ অকুসলপক্খে নৰন্নং অকুসলমূলপদানং যা চ তণ্হা যো চ লোভো যো চ দোসো যা চ সুভসঞ্ঞা যা চ সুখসঞ্ঞা, ইমানি পঞ্চ পদানি তণ্হং ভজন্তি ¶ . যা চ অৰিজ্জা যো চ মোহো যা চ নিচ্চসঞ্ঞা যা চ অত্তসঞ্ঞা, ইমানি চত্তারি পদানি অৰিজ্জং ভজন্তি. এতানি নৰ পদানি অকুসলানি সুসংখিত্তানি. ইতি তযো নযা একং নযং ন পৰিট্ঠা. এৰং অট্ঠারস মূলপদানি নন্দিযাৰট্টনযে নিদ্দিসিতব্বানি.

কথং ¶ অট্ঠারস মূলপদানি, তিপুক্খলে ¶ নযে যুজ্জন্তি? নৰন্নং পদানং কুসলানং, ৰিপস্সনা চ অমোহো চ অনিচ্চসঞ্ঞা চ অনত্তসঞ্ঞা চ, ইমানি চত্তারি পদানি; অমোহো চ সমথো চ অলোভো চ অসুভসঞ্ঞা চ, ইমানি চত্তারি পদানি; লোভো চ দোসো চ, এৰং ইমানি নৰ পদানি তীসু কুসলেসু যোজেতব্বানি. তত্থ নৰন্নং পদানং অকুসলানং তণ্হা চ লোভো চ সুভসঞ্ঞা চ সুখসঞ্ঞা চ, ইমানি চত্তারি পদানি লোভো অকুসলমূলং; অৰিজ্জা চ মোহো চ নিচ্চসঞ্ঞা চ অত্তসঞ্ঞা চ অযং মোহো অযং দোসো, যে চ ইমানি নৰ পদানি তীসু অকুসলেসু যোজিতানি. এৰং অট্ঠারস মূলপদানি কুসলমূলেসু চ যোজেত্ৰা তিপুক্খলেন নযেন নিদ্দিসিতব্বানি.

কথং অট্ঠারস মূলপদানি সীহৰিক্কীল়িতে নযে যুজ্জন্তি? তণ্হা চ সুভসঞ্ঞা চ, অযং পঠমো ৰিপল্লাসো. লোভো চ সুখসঞ্ঞা চ, অযং দুতিযো ৰিপল্লাসো. অৰিজ্জা চ নিচ্চসঞ্ঞা চ, অযং ততিযো ৰিপল্লাসো. মোহো চ অত্তসঞ্ঞা চ, অযং চতুত্থো ৰিপল্লাসো. ইতি নৰ পদানি অকুসলমূলানি চতূসু পদেসু যোজিতানি. তত্থ নৰন্নং মূলপদানং কুসলানং সমথো চ অসুভসঞ্ঞা চ, ইদং পঠমং সতিপট্ঠানং. অলোভো চ দুক্খসঞ্ঞা চ, ইদং দুতিযং সতিপট্ঠানং. ৰিপস্সনা চ অনিচ্চসঞ্ঞা চ, ইদং ততিযং সতিপট্ঠানং. অমোহো চ অনত্তসঞ্ঞা চ, ইদং চতুত্থং সতিপট্ঠানং. ইমানি অট্ঠারস মূলপদানি সীহৰিক্কীল়িতনযং অনুপৰিট্ঠানি. ইমেসং তিণ্ণং নযানং যা ভূমি চ যো রাগো চ যো দোসো চ একং নযং পৰিসতি. একস্স নযস্স অকুসলে ৰা ধম্মে কুসলে ৰা ধম্মে ৰিঞ্ঞাতে পটিপক্খো অন্ৰেসিতব্বো, পটিপক্খে অন্ৰেসিত্ৰা সো নযো নিদ্দিসিতব্বো, তম্হি নযে ¶ নিদ্দিট্ঠো. যথা একম্হি নযে সব্বে নযা পৰিট্ঠা তথা নিদ্দিসিতব্বা. একম্হি চ নযে অট্ঠারস মূলপদানি পৰিট্ঠানি, তম্হি ধম্মে ৰিঞ্ঞাতে সব্বে ধম্মা ৰিঞ্ঞাতা হোন্তি. ইমেসং তিণ্ণং নযানং সীহৰিক্কীল়িতনযস্স চত্তারি ফলানি পরিযোসানং. পঠমায দিসায পঠমং ফলং, দুতিযায দিসায দুতিযং ফলং, ততিযায দিসায ততিযং ফলং, চতুত্থায দিসায চতুত্থং ফলং. তিপুক্খলস্স নযস্স তীণি ৰিমোক্খমুখানি পরিযোসানং. পঠমায দিসায অপ্পণিহিতং, দুতিযায দিসায সুঞ্ঞতং, ততিযায দিসায অনিমিত্তং. নন্দিযাৰট্টস্স নযস্স রাগৰিরাগা চেতোৰিমুত্তি অৰিজ্জাৰিরাগা চ পঞ্ঞাৰিমুত্তি পরিযোসানং ¶ . পঠমায দিসায রাগৰিরাগা ¶ চেতোৰিমুত্তি, দুতিযায দিসায অৰিজ্জাৰিরাগা পঞ্ঞাৰিমুত্তি. ইমে তযো নযা ইমেসং তিণ্ণং নযানং অট্ঠারসন্নং মূলপদানং আলোকনা, অযং ৰুচ্চতি দিসালোকনো [দিসালোচনো (ক.)] নযো. আলোকেত্ৰান জানাতি ‘‘অযং ধম্মো ইমং ধম্মং ভজতী’’তি সম্মা যোজনা. কুসলপক্খে অকুসলপক্খে চ অযং নযো অঙ্কুসো নাম. ইমে পঞ্চ নযা.

তণ্হা চ অৰিজ্জাপি চ, লোভো দোসো তথেৰ মোহো চ;

চত্তারো চ ৰিপল্লাসা, কিলেসভূমী নৰ পদানি.

যে ¶ চ সতিপট্ঠানা, সমথো চ ৰিপস্সনা কুসলমূলা;

এতং সব্বং কুসলং, ইন্দ্রিযভূমী নৰ পদানি.

সব্বকুসলং নৰহি পদেহি যুজ্জতি, নৰহি চেৰ অকুসলং;

এতে তে মূলপদা, উভতো অট্ঠারস পদানি.

তণ্হা চেৰ অৰিজ্জা চ, সমথো চ ৰিপস্সনা;

যো নেতি সব্বেসু যোগযুত্তো, অযং নযো নন্দিযাৰট্টো.

যং কুসলমূলেহি, নযতি কুসলঅকুসলমূলেহি;

ভূতং তথং অৰিতথং, তিপুক্খলং তং নযং আহু.

সো নেতি ৰিপল্লাসেহি, কিলেসইন্দ্রিযেহি চ;

ধম্মে তং নযং ৰিনযমাহু, সীহৰিক্কীল়িতং নাম.

ৰেয্যাকরণে ৰুত্তে, কুসলতাহি অকুসলতাহি চ;

তযো আলোকযতি, অযং নযো দিসালোচনো নাম.

ওলোকেত্ৰা দিসালোচনেন, উক্খিপিয যং সমানেতি;

সব্বে কুসলাকুসলে, অযং নযো অঙ্কুসো নাম.

পেটকোপদেসে ¶ মহাকচ্চাযনস্স থেরস্স সুত্তৰিভঙ্গস্স

[ৰেভঙ্গিস্স (পী. ক.)] দস্সনং সমত্তং.

যানি ¶ চতুক্কানি অকুসলানি কুসলানি চ সীহৰিক্কীল়িতে নযে নিদ্দিট্ঠানি, তিকানি কুসলানি চ অকুসলানি চ তিপুক্খলে নযে নিদ্দিট্ঠানি, দুকানি কুসলানি চ অকুসলানি চ নন্দিযাৰট্টে নযে নিদ্দিট্ঠানি. যেসু ¶ দ্ৰীসু ধম্মেসু [ৰিসুদ্ধীসু (ক.)] কুসলেসু সো অত্থো তিকেসু ৰিভজ্জমানস্স ভৰভূমি, অথ চ সব্বো [পুব্বো (ক.)] চ অত্থো তীহি ব্যঞ্জনেহি নিদ্দিসতি. তত্তকানি ৰুচ্চতি. যো অত্থো চতূহি পদেহি অট্ঠৰীসতিভাগেহি নত্থিভূমি নিদ্দিসিতুং, অৰচরন্তোৰ চতূহি পদেহি নিদ্দিসতি. ইতি যং যথানিদ্দিট্ঠস্স অৰিকোসনা ইদং পমাণং. যথা সব্বে সমাধযো তীসু সমাধীসু পরিযেসিতব্বা, সৰিতক্কসৰিচারে অৰিতক্কৰিচারমত্তে অৰিতক্কঅৰিচারে ইদং পমাণং, নত্থি চতুত্থো সমাধি. তথা তিস্সো পঞ্ঞা চিন্তামযী সুতমযী ভাৰনামযী সব্বাসু পঞ্ঞাসু নিদ্দিসতি, নত্থি চতুত্থী পঞ্ঞা ন চিন্তামযী ন সুতমযী ন ভাৰনামযী, পঞ্ঞা নাস্স অত্থি ইমেসং ধম্মানং যা অৰিক্খেপনা, ইদং ৰুচ্চতি পমাণন্তি.

থেরস্স মহাকচ্চাযনস্স জম্বুৰনৰাসিনো পেটকোপদেসো