📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀅𑀝𑁆𑀞𑀲𑀸𑀮𑀺𑀦𑀻 𑀦𑀸𑀫

𑀥𑀫𑁆𑀫𑀲𑀗𑁆𑀕𑀡𑀻-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀼, 𑀧𑀜𑁆𑀜𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄;

𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀼, 𑀧𑀯𑀢𑁆𑀢𑀺𑀢𑁆𑀣 𑀬𑀣𑀸𑀭𑀼𑀘𑀺.

𑀤𑀬𑀸𑀬 𑀢𑀸𑀬 𑀲𑀢𑁆𑀢𑁂𑀲𑀼, 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄;

𑀧𑀸𑀝𑀺𑀳𑀻𑀭𑀸𑀯𑀲𑀸𑀦𑀫𑁆𑀳𑀺, 𑀯𑀲𑀦𑁆𑀢𑁄 𑀢𑀺𑀤𑀲𑀸𑀮𑀬𑁂.

𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑀫𑁆𑀳𑀺, 𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀓𑁂;

𑀲𑀺𑀮𑀸𑀲𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑁄, 𑀆𑀤𑀺𑀘𑁆𑀘𑁄𑀯 𑀬𑀼𑀕𑀦𑁆𑀥𑀭𑁂.

𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺, 𑀤𑀲𑀳𑀸𑀕𑀫𑁆𑀫 𑀲𑀩𑁆𑀩𑀲𑁄;

𑀲𑀦𑁆𑀦𑀺𑀲𑀺𑀦𑁆𑀦𑁂𑀦 𑀤𑁂𑀯𑀸𑀦𑀁, 𑀕𑀡𑁂𑀦 𑀧𑀭𑀺𑀯𑀸𑀭𑀺𑀢𑁄.

𑀫𑀸𑀢𑀭𑀁 𑀧𑀫𑀼𑀔𑀁 𑀓𑀢𑁆𑀯𑀸, 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀢𑁂𑀚𑀲𑀸;

𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁, 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀺.

𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄;

𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲 𑀧𑀽𑀚𑁂𑀢𑁆𑀯𑀸, 𑀓𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘𑀜𑁆𑀚𑀮𑀺𑀁.

𑀦𑀺𑀧𑀘𑁆𑀘𑀓𑀸𑀭𑀲𑁆𑀲𑁂𑀢𑀲𑁆𑀲, 𑀓𑀢𑀲𑁆𑀲 𑀭𑀢𑀦𑀢𑁆𑀢𑀬𑁂;

𑀆𑀦𑀼𑀪𑀸𑀯𑁂𑀦 𑀲𑁄𑀲𑁂𑀢𑁆𑀯𑀸, 𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄.

𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁂𑀦, 𑀦𑀺𑀧𑀼𑀡𑀸𑀫𑀮𑀩𑀼𑀤𑁆𑀥𑀺𑀦𑀸;

𑀪𑀺𑀓𑁆𑀔𑀼𑀦𑀸 𑀩𑀼𑀤𑁆𑀥𑀖𑁄𑀲𑁂𑀦, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄.

𑀬𑀁 𑀤𑁂𑀯𑀤𑁂𑀯𑁄 𑀤𑁂𑀯𑀸𑀦𑀁, 𑀤𑁂𑀲𑁂𑀢𑁆𑀯𑀸 𑀦𑀬𑀢𑁄 𑀧𑀼𑀦;

𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀲𑀫𑀸𑀘𑀺𑀓𑁆𑀔𑀺 𑀯𑀺𑀦𑀸𑀬𑀓𑁄.

𑀅𑀦𑁄𑀢𑀢𑁆𑀢𑀤𑀳𑁂 𑀓𑀢𑁆𑀯𑀸, 𑀉𑀧𑀝𑁆𑀞𑀸𑀦𑀁 𑀫𑀳𑁂𑀲𑀺𑀦𑁄;

𑀬𑀜𑁆𑀘 𑀲𑀼𑀢𑁆𑀯𑀸𑀦 𑀲𑁄 𑀣𑁂𑀭𑁄, 𑀆𑀳𑀭𑀺𑀢𑁆𑀯𑀸 𑀫𑀳𑀻𑀢𑀮𑀁.

𑀪𑀺𑀓𑁆𑀔𑀽𑀦𑀁 𑀧𑀬𑀺𑀭𑀼𑀤𑀸𑀳𑀸𑀲𑀺, 𑀇𑀢𑀺 𑀪𑀺𑀓𑁆𑀔𑀽𑀳𑀺 𑀥𑀸𑀭𑀺𑀢𑁄;

𑀲𑀗𑁆𑀕𑀻𑀢𑀺𑀓𑀸𑀮𑁂 𑀲𑀗𑁆𑀕𑀻𑀢𑁄, 𑀯𑁂𑀤𑁂𑀳𑀫𑀼𑀦𑀺𑀦𑀸 𑀧𑀼𑀦.

𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺, 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄;

𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲, 𑀅𑀪𑀺𑀥𑀫𑁆𑀫𑀲𑁆𑀲 𑀆𑀤𑀺𑀢𑁄.

𑀬𑀸 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺, 𑀯𑀲𑀻𑀳𑀺𑀝𑁆𑀞𑀓𑀣𑀸 𑀧𑀼𑀭𑀸;

𑀲𑀗𑁆𑀕𑀻𑀢𑀸 𑀅𑀦𑀼𑀲𑀗𑁆𑀕𑀻𑀢𑀸, 𑀧𑀘𑁆𑀙𑀸𑀧𑀺 𑀘 𑀇𑀲𑀻𑀳𑀺 𑀬𑀸.

𑀆𑀪𑀢𑀸 𑀧𑀦 𑀣𑁂𑀭𑁂𑀦, 𑀫𑀳𑀺𑀦𑁆𑀤𑁂𑀦𑁂𑀢𑀫𑀼𑀢𑁆𑀢𑀫𑀁;

𑀬𑀸 𑀤𑀻𑀧𑀁 𑀤𑀻𑀧𑀯𑀸𑀲𑀻𑀦𑀁, 𑀪𑀸𑀲𑀸𑀬 𑀅𑀪𑀺𑀲𑀗𑁆𑀔𑀢𑀸.

𑀅𑀧𑀦𑁂𑀢𑁆𑀯𑀸 𑀢𑀢𑁄 𑀪𑀸𑀲𑀁, 𑀢𑀫𑁆𑀩𑀧𑀡𑁆𑀡𑀺𑀦𑀺𑀯𑀸𑀲𑀺𑀦𑀁;

𑀆𑀭𑁄𑀧𑀬𑀺𑀢𑁆𑀯𑀸 𑀦𑀺𑀤𑁆𑀤𑁄𑀲𑀁, 𑀪𑀸𑀲𑀁 𑀢𑀦𑁆𑀢𑀺𑀦𑀬𑀸𑀦𑀼𑀕𑀁.

𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺, 𑀅𑀲𑀫𑁆𑀫𑀺𑀲𑁆𑀲𑀁 𑀅𑀦𑀸𑀓𑀼𑀮𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑀻𑀧𑀬𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀁.

𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀺, 𑀆𑀕𑀫𑀝𑁆𑀞𑀓𑀣𑀸𑀲𑀼𑀧𑀺;

𑀕𑀳𑁂𑀢𑀩𑁆𑀩𑀁 𑀕𑀳𑁂𑀢𑁆𑀯𑀸𑀦, 𑀢𑁄𑀲𑀬𑀦𑁆𑀢𑁄 𑀯𑀺𑀘𑀓𑁆𑀔𑀡𑁂.

𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀺, 𑀘𑀭𑀺𑀬𑀸𑀪𑀺𑀜𑁆𑀜𑀸 𑀯𑀺𑀧𑀲𑁆𑀲𑀦𑀸;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦𑀺𑀤𑀁, 𑀬𑀲𑁆𑀫𑀸 𑀲𑀩𑁆𑀩𑀁 𑀧𑀓𑀸𑀲𑀺𑀢𑀁.

𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸𑀦, 𑀲𑀓𑀮𑀸𑀬𑀧𑀺 𑀢𑀦𑁆𑀢𑀺𑀬𑀸;

𑀧𑀤𑀸𑀦𑀼𑀓𑁆𑀓𑀫𑀢𑁄 𑀏𑀯, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀇𑀢𑀺 𑀫𑁂 𑀪𑀸𑀲𑀫𑀸𑀦𑀲𑁆𑀲, 𑀅𑀪𑀺𑀥𑀫𑁆𑀫𑀓𑀣𑀁 𑀇𑀫𑀁;

𑀅𑀯𑀺𑀓𑁆𑀔𑀺𑀢𑁆𑀢𑀸 𑀦𑀺𑀲𑀸𑀫𑁂𑀣, 𑀤𑀼𑀮𑁆𑀮𑀪𑀸 𑀳𑀺 𑀅𑀬𑀁 𑀓𑀣𑀸𑀢𑀺.

𑀦𑀺𑀤𑀸𑀦𑀓𑀣𑀸

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄? 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦. 𑀅𑀢𑀺𑀭𑁂𑀓𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄 𑀳𑁂𑀢𑁆𑀣 ‘𑀅𑀪𑀺’-𑀲𑀤𑁆𑀤𑁄. ‘‘𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺’’ (𑀫. 𑀦𑀺. 𑁩.𑁩𑁮𑁪; 𑀲𑀁. 𑀦𑀺. 𑁫.𑁧𑁯𑁫) ‘‘𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧-𑁨) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀲𑀫𑀼𑀲𑁆𑀲𑀺𑀢𑁂𑀲𑀼 𑀩𑀳𑀽𑀲𑀼 𑀙𑀢𑁆𑀢𑁂𑀲𑀼 𑀘𑁂𑀯 𑀥𑀚𑁂𑀲𑀼 𑀘 𑀬𑀁 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁 𑀯𑀺𑀲𑁂𑀲𑀯𑀡𑁆𑀡𑀲𑀡𑁆𑀞𑀸𑀦𑀜𑁆𑀘 𑀙𑀢𑁆𑀢𑀁, 𑀢𑀁 ‘𑀅𑀢𑀺𑀘𑁆𑀙𑀢𑁆𑀢’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀲𑁂𑀲𑀲𑀫𑁆𑀧𑀦𑁆𑀦𑁄 𑀘 𑀥𑀚𑁄 𑀲𑁄 ‘𑀅𑀢𑀺𑀥𑀚𑁄’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀘 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀩𑀳𑀽𑀲𑀼 𑀭𑀸𑀚𑀓𑀼𑀫𑀸𑀭𑁂𑀲𑀼 𑀘𑁂𑀯 𑀤𑁂𑀯𑁂𑀲𑀼 𑀘 𑀬𑁄 𑀚𑀸𑀢𑀺𑀪𑁄𑀕𑀬𑀲𑀇𑀲𑁆𑀲𑀭𑀺𑀬𑀸𑀤𑀺𑀲𑀫𑁆𑀧𑀢𑁆𑀢𑀻𑀳𑀺 𑀅𑀢𑀺𑀭𑁂𑀓𑀢𑀭𑁄 𑀘𑁂𑀯 𑀯𑀺𑀲𑁂𑀲𑀯𑀦𑁆𑀢𑀢𑀭𑁄 𑀘 𑀭𑀸𑀚𑀓𑀼𑀫𑀸𑀭𑁄 𑀲𑁄 ‘𑀅𑀢𑀺𑀭𑀸𑀚𑀓𑀼𑀫𑀸𑀭𑁄’𑀢𑀺 𑀯𑀼𑀘𑁆𑀘𑀢𑀺, 𑀬𑁄 𑀆𑀬𑀼𑀯𑀡𑁆𑀡𑀇𑀲𑁆𑀲𑀭𑀺𑀬𑀬𑀲𑀲𑀫𑁆𑀧𑀢𑁆𑀢𑀺𑀆𑀤𑀻𑀳𑀺 𑀅𑀢𑀺𑀭𑁂𑀓𑀢𑀭𑁄 𑀘𑁂𑀯 𑀯𑀺𑀲𑁂𑀲𑀯𑀦𑁆𑀢𑀢𑀭𑁄 𑀘 𑀤𑁂𑀯𑁄 𑀲𑁄 ‘𑀅𑀢𑀺𑀤𑁂𑀯𑁄’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀭𑀽𑀧𑁄 𑀩𑁆𑀭𑀳𑁆𑀫𑀸𑀧𑀺 ‘𑀅𑀢𑀺𑀩𑁆𑀭𑀳𑁆𑀫𑀸’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘𑀅𑀪𑀺𑀥𑀫𑁆𑀫𑁄’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀢𑁆𑀢𑀦𑁆𑀢𑀜𑁆𑀳𑀺 𑀧𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀦 𑀦𑀺𑀧𑁆𑀧𑀤𑁂𑀲𑁂𑀦; 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀧𑀼𑀘𑁆𑀙𑀓𑀦𑀬𑀸𑀦𑀁 𑀯𑀲𑁂𑀦 𑀦𑀺𑀧𑁆𑀧𑀤𑁂𑀲𑀢𑁄 𑀯𑀺𑀪𑀢𑁆𑀢𑀸. 𑀢𑀣𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄. 𑀓𑁂𑀯𑀮𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺, 𑀧𑀘𑁆𑀘𑀬𑀸𑀓𑀸𑀭𑁂 𑀘 𑀧𑀜𑁆𑀳𑀧𑀼𑀘𑁆𑀙𑀓𑀁 𑀦𑀢𑁆𑀣𑀺. 𑀲𑀼𑀢𑁆𑀢𑀦𑁆𑀢𑀜𑁆𑀘 𑀧𑀢𑁆𑀯𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀦 𑀦𑀺𑀧𑁆𑀧𑀤𑁂𑀲𑁂𑀦; 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀦𑀬𑀸𑀦𑀁 𑀯𑀲𑁂𑀦 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀸. 𑀢𑀣𑀸 𑀘𑀢𑁆𑀢𑀸𑀭𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺. 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀘 𑀜𑀸𑀡𑀁 𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑀁 𑀦 𑀦𑀺𑀧𑁆𑀧𑀤𑁂𑀲𑁂𑀦; 𑀢𑀣𑀸 𑀓𑀺𑀮𑁂𑀲𑀸. 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁭𑁫𑁧) 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀁. 𑀢𑀣𑀸 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀅𑀦𑁂𑀓𑁂𑀳𑀺 𑀦𑀬𑁂𑀳𑀺 𑀓𑀺𑀮𑁂𑀲𑀸. 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀘 𑀪𑀽𑀫𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄 𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑁄, 𑀦 𑀦𑀺𑀧𑁆𑀧𑀤𑁂𑀲𑁂𑀦; 𑀅𑀪𑀺𑀥𑀫𑁆𑀫𑀁 𑀧𑀦 𑀧𑀢𑁆𑀯𑀸 𑀢𑀺𑀡𑁆𑀡𑀫𑁆𑀧𑀺 𑀦𑀬𑀸𑀦𑀁 𑀯𑀲𑁂𑀦 𑀪𑀽𑀫𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑁄. 𑀏𑀯𑀁 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀓𑀭𑀡𑀧𑀭𑀺𑀘𑁆𑀙𑁂𑀤𑀢𑁄 𑀧𑀦𑁂𑀲 𑀥𑀫𑁆𑀫𑀲𑀗𑁆𑀕𑀡𑀻𑀯𑀺𑀪𑀗𑁆𑀕𑀥𑀸𑀢𑀼𑀓𑀣𑀸𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀢𑁆𑀣𑀼𑀬𑀫𑀓𑀧𑀝𑁆𑀞𑀸𑀦𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀯𑀲𑁂𑀦 𑀞𑀺𑀢𑁄. 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘𑀓𑀣𑀸𑀯𑀢𑁆𑀣𑀼 𑀓𑀲𑁆𑀫𑀸 𑀕𑀳𑀺𑀢𑀁? 𑀦𑀦𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦𑁂𑀢𑀁 𑀞𑀧𑀺𑀢𑀁? 𑀢𑀲𑁆𑀫𑀸 𑀲𑀸𑀯𑀓𑀪𑀸𑀲𑀺𑀢𑀢𑁆𑀢𑀸 𑀙𑀟𑁆𑀟𑁂𑀣 𑀦’𑀦𑁆𑀢𑀺. ‘𑀓𑀺𑀁 𑀧𑀦 𑀙𑀧𑁆𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑁄’𑀢𑀺? ‘𑀏𑀯𑀁 𑀦 𑀯𑀤𑀸𑀫𑀻’𑀢𑀺. ‘𑀅𑀣 𑀓𑀺𑀁 𑀯𑀤𑁂𑀲𑀻’𑀢𑀺. ‘𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀻’𑀢𑀺. ‘𑀓𑀢𑀭𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢 𑀓𑀭𑁄𑀲𑀻’𑀢𑀺? ‘𑀫𑀳𑀸𑀥𑀫𑁆𑀫𑀳𑀤𑀬𑀁 𑀦𑀸𑀫 𑀅𑀢𑁆𑀣𑀺, 𑀏𑀢𑁂𑀦 𑀲𑀳 𑀲𑀢𑁆𑀢𑀸’𑀢𑀺. ‘𑀫𑀳𑀸𑀥𑀫𑁆𑀫𑀳𑀤𑀬𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀓𑀢𑀺𑀧𑀬𑀸𑀯 𑀧𑀜𑁆𑀳𑀸𑀯𑀸𑀭𑀸 𑀅𑀯𑀲𑁂𑀲𑀸, 𑀓𑀣𑀸𑀯𑀢𑁆𑀣𑀼𑀦𑀸𑀯 𑀲𑀤𑁆𑀥𑀺𑀁 𑀲𑀢𑁆𑀢𑀸’𑀢𑀺. ‘𑀦𑁄 𑀓𑀣𑀸𑀯𑀢𑁆𑀣𑀼𑀦𑀸, 𑀫𑀳𑀸𑀥𑀸𑀢𑀼𑀓𑀣𑀸 𑀦𑀸𑀫 𑀅𑀢𑁆𑀣𑀺, 𑀢𑀸𑀬 𑀲𑀤𑁆𑀥𑀺𑀁 𑀲𑀢𑁆𑀢𑀸’𑀢𑀺. ‘𑀫𑀳𑀸𑀥𑀸𑀢𑀼𑀓𑀣𑀸𑀬𑀁 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀅𑀧𑁆𑀧𑀫𑀢𑁆𑀢𑀺𑀓𑀸𑀯 𑀢𑀦𑁆𑀢𑀺 𑀅𑀯𑀲𑁂𑀲𑀸. 𑀓𑀣𑀸𑀯𑀢𑁆𑀣𑀼𑀦𑀸𑀯 𑀲𑀤𑁆𑀥𑀺𑀁 𑀲𑀢𑁆𑀢𑀸’𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀺 𑀤𑁂𑀲𑁂𑀦𑁆𑀢𑁄 𑀓𑀣𑀸𑀯𑀢𑁆𑀣𑀼𑀁 𑀧𑀢𑁆𑀯𑀸 𑀬𑀸 𑀏𑀲𑀸 𑀧𑀼𑀕𑁆𑀕𑀮𑀯𑀸𑀭𑁂 𑀢𑀸𑀯 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀫𑀼𑀔𑀸 𑀯𑀸𑀤𑀬𑀼𑀢𑁆𑀢𑀺 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀣𑀸𑀫𑀕𑁆𑀕𑁂𑀲𑀼 𑀅𑀲𑀫𑁆𑀧𑀼𑀡𑁆𑀡𑀪𑀸𑀡𑀯𑀸𑀭𑀫𑀢𑁆𑀢𑀸𑀬 𑀧𑀸𑀴𑀺𑀬𑀸 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀲𑀸 𑀧𑀦𑁂𑀲𑀸 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺. 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺. 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁…𑀧𑁂… 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺. 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺. 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁…𑀧𑁂…. 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺, 𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺, 𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 (𑀓𑀣𑀸. 𑁧𑁫-𑁧𑁬) 𑀏𑀯𑀁 𑀧𑀞𑀫𑀁 𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀞𑀫𑀁 𑀦𑀺𑀕𑁆𑀕𑀳𑀁, 𑀤𑀼𑀢𑀺𑀬𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑀁 …𑀧𑁂… 𑀅𑀝𑁆𑀞𑀫𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀫𑀁 𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁂𑀦 𑀲𑀢𑁆𑀣𑀸𑀭𑀸 𑀞𑀧𑀺𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀫𑀸𑀢𑀺𑀓𑀸𑀞𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀁 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀇𑀫𑀁 𑀤𑀺𑀲𑁆𑀯𑀸 𑀞𑀧𑁂𑀲𑀺 𑁋 𑀫𑀫 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀫𑀢𑁆𑀣𑀓𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀪𑀸𑀚𑁂𑀲𑁆𑀲𑀢𑀻𑀢𑀺.

𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀇𑀤𑀁 𑀧𑀓𑀭𑀡𑀁 𑀤𑁂𑀲𑁂𑀦𑁆𑀢𑁄 𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀤𑁂𑀲𑁂𑀲𑀺, 𑀲𑀢𑁆𑀣𑀸𑀭𑀸 𑀧𑀦 𑀤𑀺𑀦𑁆𑀦𑀦𑀬𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀤𑁂𑀲𑁂𑀲𑀺. 𑀇𑀢𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀤𑁂𑀲𑀺𑀢𑀢𑁆𑀢𑀸 𑀲𑀓𑀮𑀫𑁆𑀧𑁂𑀢𑀁 𑀧𑀓𑀭𑀡𑀁 𑀩𑀼𑀤𑁆𑀥𑀪𑀸𑀲𑀺𑀢𑀫𑁂𑀯 𑀦𑀸𑀫 𑀚𑀸𑀢𑀁. 𑀬𑀣𑀸 𑀓𑀺𑀁? 𑀬𑀣𑀸 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀦𑁆𑀢𑀸𑀤𑀻𑀦𑀺. 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀜𑁆𑀳𑀺 𑀪𑀕𑀯𑀸 ‘‘𑀬𑀢𑁄𑀦𑀺𑀤𑀸𑀦𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑀁 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀏𑀢𑁆𑀣 𑀘𑁂 𑀦𑀢𑁆𑀣𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀯𑀤𑀺𑀢𑀩𑁆𑀩𑀁 𑀅𑀚𑁆𑀛𑁄𑀲𑀺𑀢𑀩𑁆𑀩𑀁, 𑀏𑀲𑁂𑀯𑀦𑁆𑀢𑁄 𑀭𑀸𑀕𑀸𑀦𑀼𑀲𑀬𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁨) 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀩𑀮𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀅𑀢𑁆𑀣𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀧𑀼𑀘𑁆𑀙𑀺𑀢𑀫𑀢𑁆𑀢𑀓𑁂𑀦𑁂𑀯 𑀅𑀓𑀣𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀅𑀧𑀘𑀺𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀆𑀯𑀼𑀲𑁄 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻’’𑀢𑀺 (𑀫. 𑀦𑀺. 𑁧.𑁨𑁦𑁩) 𑀲𑀸𑀭𑁄𑀧𑀫𑀁 𑀆𑀳𑀭𑀺𑀢𑁆𑀯𑀸 𑀲𑀸𑀭𑀭𑀼𑀓𑁆𑀔𑁄 𑀯𑀺𑀬 𑀪𑀕𑀯𑀸 𑀲𑀸𑀔𑀸𑀧𑀮𑀸𑀲𑀲𑀤𑀺𑀲𑀸 𑀲𑀸𑀯𑀓𑀸, ‘‘𑀲𑁄 𑀳𑀸𑀯𑀼𑀲𑁄 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄’’𑀢𑀺 𑀲𑀢𑁆𑀣𑀸𑀭𑀁 𑀣𑁄𑀫𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀣𑁂𑀭𑁂𑀳𑀺 𑀬𑀸𑀘𑀺𑀢𑁄 𑀲𑀢𑁆𑀣𑀸𑀭𑀸 𑀞𑀧𑀺𑀢𑀫𑀸𑀢𑀺𑀓𑀸𑀬 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 ‘‘𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣 𑀲𑀘𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀬𑀫𑀸𑀦𑀁 𑀲𑀫𑁂𑀢𑀺 𑀕𑀡𑁆𑀳𑁂𑀬𑁆𑀬𑀸𑀣, 𑀦𑁄 𑀘𑁂 𑀫𑀸 𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀢𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀤𑀼𑀓𑁆𑀓𑀣𑀺𑀢𑀁 𑀓𑀘𑁆𑀘𑀸𑀦𑁂𑀦𑀸𑀢𑀺 𑀅𑀯𑀢𑁆𑀯𑀸 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀯𑀺𑀬 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀲𑀢𑀧𑀢𑁆𑀢𑀲𑀲𑁆𑀲𑀺𑀭𑀺𑀓𑀁 𑀫𑀳𑀸𑀫𑀼𑀔𑀁 𑀧𑀽𑀭𑁂𑀦𑁆𑀢𑁄 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄, 𑀫𑀳𑀸𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀫𑀳𑀸𑀓𑀘𑁆𑀘𑀸𑀦𑁄, 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁫) 𑀆𑀳.

𑀏𑀯𑀁 𑀲𑀢𑁆𑀣𑀸𑀭𑀸 𑀅𑀦𑀼𑀫𑁄𑀤𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀲𑀓𑀮𑀁 𑀲𑀼𑀢𑁆𑀢𑀁 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁. 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀳𑀺 𑀯𑀺𑀢𑁆𑀣𑀸𑀭𑀺𑀢𑀲𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀺 𑀤𑁂𑀲𑁂𑀦𑁆𑀢𑁄 𑀓𑀣𑀸𑀯𑀢𑁆𑀣𑀼𑀁 𑀧𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀞𑀧𑁂𑀦𑁆𑀢𑁄 𑀘 𑀧𑀦 𑀇𑀫𑀁 𑀅𑀤𑁆𑀤𑀲 𑁋

𑀫𑀫 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀫𑀢𑁆𑀣𑀓𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀪𑀸𑀚𑁂𑀲𑁆𑀲𑀢𑀻𑀢𑀺.

𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀇𑀫𑀁 𑀧𑀓𑀭𑀡𑀁 𑀤𑁂𑀲𑁂𑀦𑁆𑀢𑁄 𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀤𑁂𑀲𑁂𑀲𑀺, 𑀲𑀢𑁆𑀣𑀸𑀭𑀸 𑀧𑀦 𑀤𑀺𑀦𑁆𑀦𑀦𑀬𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀤𑁂𑀲𑁂𑀲𑀺. 𑀇𑀢𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀤𑁂𑀲𑀺𑀢𑀢𑁆𑀢𑀸 𑀲𑀓𑀮𑀫𑁆𑀧𑁂𑀢𑀁 𑀧𑀓𑀭𑀡𑀁 𑀩𑀼𑀤𑁆𑀥𑀪𑀸𑀲𑀺𑀢𑀫𑁂𑀯 𑀚𑀸𑀢𑀁. 𑀏𑀯𑀁 𑀓𑀣𑀸𑀯𑀢𑁆𑀣𑀼𑀦𑀸𑀯 𑀲𑀤𑁆𑀥𑀺𑀁 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑁄 𑀦𑀸𑀫.

𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀻𑀧𑀓𑀭𑀡𑁂 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑁋 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀭𑀽𑀧𑀯𑀺𑀪𑀢𑁆𑀢𑀺 𑀦𑀺𑀓𑁆𑀔𑁂𑀧𑀭𑀸𑀲𑀺 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀅𑀝𑁆𑀞, 𑀅𑀓𑀼𑀲𑀮𑀢𑁄 𑀤𑁆𑀯𑀸𑀤𑀲, 𑀓𑀼𑀲𑀮𑀯𑀺𑀧𑀸𑀓𑀢𑁄 𑀲𑁄𑀴𑀲, 𑀅𑀓𑀼𑀲𑀮𑀯𑀺𑀧𑀸𑀓𑀢𑁄 𑀲𑀢𑁆𑀢, 𑀓𑀺𑀭𑀺𑀬𑀢𑁄 𑀏𑀓𑀸𑀤𑀲; 𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀧𑀜𑁆𑀘, 𑀯𑀺𑀧𑀸𑀓𑀢𑁄 𑀧𑀜𑁆𑀘, 𑀓𑀺𑀭𑀺𑀬𑀢𑁄 𑀧𑀜𑁆𑀘; 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺, 𑀯𑀺𑀧𑀸𑀓𑀢𑁄 𑀘𑀢𑁆𑀢𑀸𑀭𑀺, 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑀺; 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺, 𑀯𑀺𑀧𑀸𑀓𑀢𑁄 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀺 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀦𑀸𑀫. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀙𑀪𑀸𑀡𑀯𑀸𑀭𑀁, 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀏𑀓𑀯𑀺𑀥𑁂𑀦 𑀤𑀼𑀯𑀺𑀥𑁂𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀭𑀽𑀧𑀯𑀺𑀪𑀢𑁆𑀢𑀺 𑀦𑀸𑀫. 𑀭𑀽𑀧𑀓𑀡𑁆𑀟𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀤𑁆𑀯𑀺𑀪𑀸𑀡𑀯𑀸𑀭𑀁. 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀫𑀽𑀮𑀢𑁄 𑀔𑀦𑁆𑀥𑀢𑁄 𑀤𑁆𑀯𑀸𑀭𑀢𑁄 𑀪𑀽𑀫𑀺𑀢𑁄 𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀦𑀸𑀫𑀢𑁄 𑀮𑀺𑀗𑁆𑀕𑀢𑁄𑀢𑀺 𑀏𑀯𑀁 𑀫𑀽𑀮𑀸𑀤𑀻𑀳𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑁄 𑀦𑀺𑀓𑁆𑀔𑁂𑀧𑀭𑀸𑀲𑀺 𑀦𑀸𑀫. 𑀲𑁄 𑁋

𑀫𑀽𑀮𑀢𑁄 𑀔𑀦𑁆𑀥𑀢𑁄 𑀘𑀸𑀧𑀺, 𑀤𑁆𑀯𑀸𑀭𑀢𑁄 𑀘𑀸𑀧𑀺 𑀪𑀽𑀫𑀺𑀢𑁄;

𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀘𑀸𑀧𑀺, 𑀦𑀸𑀫𑀢𑁄 𑀘𑀸𑀧𑀺 𑀮𑀺𑀗𑁆𑀕𑀢𑁄;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸, 𑀦𑀺𑀓𑁆𑀔𑁂𑀧𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀦𑀺𑀓𑁆𑀔𑁂𑀧𑀓𑀡𑁆𑀟𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀢𑀺𑀫𑀢𑁆𑀢𑀪𑀸𑀡𑀯𑀸𑀭𑀁. 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀧𑀦 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀪𑀽𑀢𑀁 𑀬𑀸𑀯 𑀲𑀭𑀡𑀤𑀼𑀓𑀸 𑀦𑀺𑀓𑁆𑀔𑀺𑀢𑁆𑀢𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀦𑀸𑀫. 𑀬𑀢𑁄 𑀫𑀳𑀸𑀧𑀓𑀭𑀡𑀺𑀬𑀸 𑀪𑀺𑀓𑁆𑀔𑀽 𑀫𑀳𑀸𑀧𑀓𑀭𑀡𑁂 𑀕𑀡𑀦𑀘𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀕𑀡𑀦𑀘𑀸𑀭𑀁 𑀲𑀫𑀸𑀦𑁂𑀦𑁆𑀢𑀺. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀤𑁆𑀯𑀺𑀫𑀢𑁆𑀢𑀪𑀸𑀡𑀯𑀸𑀭𑀁. 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀇𑀢𑀺 𑀲𑀓𑀮𑀫𑁆𑀧𑀺 𑀥𑀫𑁆𑀫𑀲𑀗𑁆𑀕𑀡𑀻𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀢𑁂𑀭𑀲𑀫𑀢𑁆𑀢𑀪𑀸𑀡𑀯𑀸𑀭𑀁. 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺. 𑀏𑀯𑀫𑁂𑀢𑀁 𑁋

𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀭𑀽𑀧𑀜𑁆𑀘, 𑀦𑀺𑀓𑁆𑀔𑁂𑀧𑁄 𑀅𑀢𑁆𑀣𑀚𑁄𑀢𑀦𑀸;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀞𑀸𑀦𑀁, 𑀢𑀫𑁆𑀧𑀺 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁.

𑀢𑀤𑀦𑀦𑁆𑀢𑀭𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀦𑀸𑀫. 𑀢𑀁 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀬𑀢𑀦𑀯𑀺𑀪𑀗𑁆𑀕𑁄 𑀥𑀸𑀢𑀼𑀯𑀺𑀪𑀗𑁆𑀕𑁄 𑀲𑀘𑁆𑀘𑀯𑀺𑀪𑀗𑁆𑀕𑁄 𑀇𑀤𑁆𑀭𑀺𑀬𑀯𑀺𑀪𑀗𑁆𑀕𑁄 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑁄 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁄 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁄 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁄 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁄 𑀛𑀸𑀦𑀯𑀺𑀪𑀗𑁆𑀕𑁄 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄 𑀜𑀸𑀡𑀯𑀺𑀪𑀗𑁆𑀕𑁄 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁.

𑀢𑀢𑁆𑀣 𑀔𑀦𑁆𑀥𑀯𑀺𑀪𑀗𑁆𑀕𑁄 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀧𑀼𑀘𑁆𑀙𑀓𑀸𑀦𑀁 𑀯𑀲𑁂𑀦 𑀢𑀺𑀥𑀸 𑀯𑀺𑀪𑀢𑁆𑀢𑁄. 𑀲𑁄 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀜𑁆𑀘𑀫𑀢𑁆𑀢𑀪𑀸𑀡𑀯𑀸𑀭𑁄, 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁄 𑀧𑀦 𑀅𑀦𑀦𑁆𑀢𑁄 𑀅𑀧𑀭𑀺𑀫𑀸𑀡𑁄 𑀳𑁄𑀢𑀺. 𑀢𑀢𑁄 𑀧𑀭𑀁 𑀆𑀬𑀢𑀦𑀯𑀺𑀪𑀗𑁆𑀕𑀸𑀤𑀬𑁄𑀧𑀺 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀯𑀺𑀪𑀢𑁆𑀢𑀸. 𑀢𑁂𑀲𑀼 𑀆𑀬𑀢𑀦𑀯𑀺𑀪𑀗𑁆𑀕𑁄 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑁄, 𑀥𑀸𑀢𑀼𑀯𑀺𑀪𑀗𑁆𑀕𑁄 𑀤𑁆𑀯𑀺𑀫𑀢𑁆𑀢𑀪𑀸𑀡𑀯𑀸𑀭𑁄. 𑀢𑀣𑀸 𑀲𑀘𑁆𑀘𑀯𑀺𑀪𑀗𑁆𑀕𑁄. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺; 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀦𑁂𑀲 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑀫𑀢𑁆𑀢𑁄. 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑁄 𑀙𑀫𑀢𑁆𑀢𑀪𑀸𑀡𑀯𑀸𑀭𑁄, 𑀧𑀜𑁆𑀳𑀧𑀼𑀘𑁆𑀙𑀓𑀁 𑀧𑀦𑁂𑀢𑁆𑀣 𑀦𑀢𑁆𑀣𑀺. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑀫𑀢𑁆𑀢𑁄; 𑀢𑀣𑀸 𑀲𑀫𑁆𑀫𑀧𑁆𑀧𑀥𑀸𑀦 𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀸. 𑀛𑀸𑀦𑀯𑀺𑀪𑀗𑁆𑀕𑁄 𑀤𑁆𑀯𑀺𑀪𑀸𑀡𑀯𑀸𑀭𑀫𑀢𑁆𑀢𑁄, 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑀫𑀢𑁆𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂𑀧𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺; 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀦𑁂𑀲 𑀅𑀢𑀺𑀭𑁂𑀓𑀪𑀸𑀡𑀯𑀸𑀭𑀫𑀢𑁆𑀢𑁄; 𑀢𑀣𑀸 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄. 𑀜𑀸𑀡𑀯𑀺𑀪𑀗𑁆𑀕𑁄 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑁄; 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀦𑁂𑀲 𑀢𑀺𑀫𑀢𑁆𑀢𑀪𑀸𑀡𑀯𑀸𑀭𑁄. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄𑀧𑀺 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑁄; 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀦𑁂𑀲 𑀢𑀺𑀫𑀢𑁆𑀢𑀪𑀸𑀡𑀯𑀸𑀭𑁄. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄 𑀢𑀺𑀯𑀺𑀥𑁂𑀦 𑀯𑀺𑀪𑀢𑁆𑀢𑁄; 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀦𑁂𑀲 𑀅𑀢𑀺𑀭𑁂𑀓𑀤𑁆𑀯𑀺𑀪𑀸𑀡𑀯𑀸𑀭𑀫𑀢𑁆𑀢𑁄. 𑀲𑀩𑁆𑀩𑁂𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸 𑀅𑀧𑀭𑀺𑀫𑀸𑀡𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀜𑁆𑀘𑀢𑀺𑀁𑀲𑀫𑀢𑁆𑀢𑀪𑀸𑀡𑀯𑀸𑀭𑀁; 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀥𑀸𑀢𑀼𑀓𑀣𑀸𑀧𑀓𑀭𑀡𑀁 𑀦𑀸𑀫. 𑀢𑀁 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄, 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀅𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁, 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁, 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁; 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄, 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢𑀁, 𑀅𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀙𑀪𑀸𑀡𑀯𑀸𑀭𑀫𑀢𑁆𑀢𑀁, 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀸 ‘‘𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀧𑀜𑁆𑀜𑀢𑁆𑀢𑀺 𑀲𑀘𑁆𑀘𑀧𑀜𑁆𑀜𑀢𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀙𑀩𑁆𑀩𑀺𑀥𑁂𑀦 𑀯𑀺𑀪𑀢𑁆𑀢𑀸. 𑀲𑀸 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀧𑀜𑁆𑀘𑀪𑀸𑀡𑀯𑀸𑀭𑀸; 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀧𑀦 𑀅𑀦𑀦𑁆𑀢𑀸 𑀅𑀧𑀭𑀺𑀫𑀸𑀡𑀸𑀯 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀦𑀸𑀫. 𑀢𑀁 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀪𑀢𑁆𑀢𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀇𑀤𑀸𑀦𑀺 𑀧𑁄𑀢𑁆𑀣𑀓𑁂 𑀮𑀺𑀔𑀺𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀗𑁆𑀕𑀻𑀢𑀺𑀆𑀭𑁄𑀧𑀺𑀢𑀦𑀬𑁂𑀦 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀁, 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀬𑀫𑀓𑀁 𑀦𑀸𑀫. 𑀢𑀁 𑀫𑀽𑀮𑀬𑀫𑀓𑀁 𑀔𑀦𑁆𑀥𑀬𑀫𑀓𑀁 𑀆𑀬𑀢𑀦𑀬𑀫𑀓𑀁 𑀥𑀸𑀢𑀼𑀬𑀫𑀓𑀁 𑀲𑀘𑁆𑀘𑀬𑀫𑀓𑀁 𑀲𑀗𑁆𑀔𑀸𑀭𑀬𑀫𑀓𑀁 𑀅𑀦𑀼𑀲𑀬𑀬𑀫𑀓𑀁 𑀘𑀺𑀢𑁆𑀢𑀬𑀫𑀓𑀁 𑀥𑀫𑁆𑀫𑀬𑀫𑀓𑀁 𑀇𑀦𑁆𑀤𑁆𑀭𑀺𑀬𑀬𑀫𑀓𑀦𑁆𑀢𑀺 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁. 𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀯𑀻𑀲𑀪𑀸𑀡𑀯𑀸𑀭𑀲𑀢𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀁 𑀫𑀳𑀸𑀧𑀓𑀭𑀡𑀁 𑀦𑀸𑀫. 𑀧𑀝𑁆𑀞𑀸𑀦𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀁 𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀆𑀳𑀸𑀭𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀛𑀸𑀦𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀕𑀢𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀢𑀸𑀯 𑀘𑀢𑀼𑀯𑀻𑀲𑀢𑀺𑀯𑀺𑀥𑁂𑀦 𑀯𑀺𑀪𑀢𑁆𑀢𑀁.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀧𑀝𑁆𑀞𑀸𑀦𑀁 𑀲𑀫𑀸𑀦𑁂𑀢𑀩𑁆𑀩𑀁. 𑀓𑀼𑀲𑀮𑀢𑁆𑀢𑀺𑀓𑀸𑀤𑀬𑁄 𑀳𑀺 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸, 𑀦𑀸𑀫 𑀳𑁂𑀢𑀽 𑀥𑀫𑁆𑀫𑀸 𑀦𑀳𑁂𑀢𑀽 𑀥𑀫𑁆𑀫𑀸…𑀧𑁂… 𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸𑀢𑀺 𑀇𑀫𑁂 𑀲𑀢𑀁 𑀤𑀼𑀓𑀸. 𑀅𑀧𑀭𑁂𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸…𑀧𑁂… 𑀔𑀬𑁂 𑀜𑀸𑀡𑀁, 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀦𑀸𑀫. 𑀢𑁂𑀲𑀼 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀲𑀢𑀁 𑀤𑀼𑀓𑀸𑀢𑀺 𑀅𑀬𑀁 𑀆𑀳𑀘𑁆𑀘𑀪𑀸𑀲𑀺𑀢𑀸 𑀚𑀺𑀦𑀯𑀘𑀦𑀪𑀽𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀫𑀸𑀢𑀺𑀓𑀸 𑀦𑀸𑀫.

𑀅𑀣𑀸𑀧𑀭𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀓𑀼𑀢𑁄𑀧𑀪𑀯𑀸 𑀓𑁂𑀦 𑀞𑀧𑀺𑀢𑀸 𑀓𑁂𑀦 𑀤𑁂𑀲𑀺𑀢𑀸𑀢𑀺? 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀪𑀯𑀸, 𑀢𑁂𑀦 𑀞𑀧𑀺𑀢𑀸, 𑀢𑁂𑀦 𑀤𑁂𑀲𑀺𑀢𑀸𑀢𑀺. 𑀇𑀫𑁂 𑀞𑀧𑁂𑀦𑁆𑀢𑁄 𑀧𑀦 𑀣𑁂𑀭𑁄 𑀦 𑀲𑀸𑀫𑀼𑀓𑁆𑀓𑀁𑀲𑀺𑀓𑁂𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀞𑀧𑁂𑀲𑀺. 𑀏𑀓𑀼𑀢𑁆𑀢𑀭𑀺𑀬𑀁 𑀧𑀦 𑀏𑀓𑀦𑀺𑀧𑀸𑀢𑀤𑀼𑀓𑀦𑀺𑀧𑀸𑀢𑀲𑀗𑁆𑀕𑀻𑀢𑀺 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑁂𑀳𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸𑀦𑀁 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀅𑀓𑀺𑀮𑀫𑀢𑁆𑀣𑀁 𑀞𑀧𑀺𑀢𑀸. 𑀢𑁂 𑀧𑀦𑁂𑀢𑁂 𑀏𑀓𑀲𑁆𑀫𑀺𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀬𑁂𑀯 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀲𑁂𑀲𑀝𑁆𑀞𑀸𑀦𑁂𑀲𑀼 𑀬𑀸𑀯 𑀲𑀭𑀡𑀤𑀼𑀓𑀸 𑀅𑀪𑀺𑀥𑀫𑁆𑀫𑁄 𑀯𑀺𑀪𑀢𑁆𑀢𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁. 𑀲𑀢𑀁 𑀤𑀼𑀓𑁂 𑀦𑀺𑀲𑁆𑀲𑀸𑀬 𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁄 𑀧𑀭𑀁 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀢𑀢𑁄 𑀧𑀭𑀁 𑀤𑀼𑀓𑀲𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀢𑀺𑀓𑁂 𑀧𑀦 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀤𑀼𑀓𑁂 𑀘 𑀤𑀼𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀏𑀯𑀁 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. (𑀧𑀝𑁆𑀞𑀸. 𑁧.𑁧.𑁩𑁯);

𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂𑀧𑀺 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑀲𑀢𑀁 𑀦𑀺𑀲𑁆𑀲𑀸𑀬 𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑀲𑀢𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀺𑀓𑁂 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑁂 𑀤𑀼𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀧𑀘𑁆𑀘𑀦𑀻𑀬𑁂𑀧𑀺 𑀙𑀳𑀺 𑀦𑀬𑁂𑀳𑀺 𑀧𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. (𑀧𑀝𑁆𑀞𑀸. 𑁧.𑁧.𑁪𑁪);

𑀢𑀢𑁄 𑀧𑀭𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂𑀧𑀺 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀙 𑀦𑀬𑀸 𑀤𑀲𑁆𑀲𑀺𑀢𑀸. 𑀢𑁂𑀦𑀸𑀳 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. (𑀧𑀝𑁆𑀞𑀸. 𑁧.𑁧.𑁪𑁮);

𑀢𑀤𑀦𑀦𑁆𑀢𑀭𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀧𑀺 𑀏𑀢𑁂𑀳𑁂𑀯 𑀙𑀳𑀺 𑀦𑀬𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑁂𑀦𑀸𑀳 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. (𑀧𑀝𑁆𑀞𑀸. 𑁧.𑁧.𑁫𑁨);

𑀏𑀯𑀁 𑀅𑀦𑀼𑀮𑁄𑀫𑁂 𑀙 𑀧𑀝𑁆𑀞𑀸𑀦𑀸𑀦𑀺, 𑀧𑀝𑀺𑀮𑁄𑀫𑁂 𑀙, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀙, 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀙 𑀧𑀝𑁆𑀞𑀸𑀦𑀸𑀦𑀻𑀢𑀺 𑀇𑀤𑀁 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀁 𑀧𑀝𑁆𑀞𑀸𑀦𑀁 𑀫𑀳𑀸𑀧𑀓𑀭𑀡𑀁 𑀦𑀸𑀫.

𑀇𑀤𑀸𑀦𑀺 𑀇𑀫𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀺𑀚𑀸𑀦𑀦𑀢𑁆𑀣𑀁 𑀘𑀢𑁆𑀢𑀸𑀭𑁄 𑀲𑀸𑀕𑀭𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀁𑀲𑀸𑀭𑀲𑀸𑀕𑀭𑁄, 𑀚𑀮𑀲𑀸𑀕𑀭𑁄, 𑀦𑀬𑀲𑀸𑀕𑀭𑁄, 𑀜𑀸𑀡𑀲𑀸𑀕𑀭𑁄𑀢𑀺. 𑀢𑀢𑁆𑀣 𑀲𑀁𑀲𑀸𑀭𑀲𑀸𑀕𑀭𑁄 𑀦𑀸𑀫 𑁋

𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀯𑀼𑀢𑁆𑀢𑀁 𑀲𑀁𑀲𑀸𑀭𑀯𑀝𑁆𑀝𑀁. 𑀲𑁆𑀯𑀸𑀬𑀁 𑀬𑀲𑁆𑀫𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀏𑀢𑁆𑀢𑀓𑀸𑀦𑀜𑁆𑀳𑀺 𑀯𑀲𑁆𑀲𑀲𑀢𑀸𑀦𑀁 𑀯𑀸 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀯𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀁 𑀯𑀸, 𑀓𑀧𑁆𑀧𑀲𑀢𑀸𑀦𑀁 𑀯𑀸 𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀁 𑀯𑀸 𑀫𑀢𑁆𑀣𑀓𑁂 𑀲𑀢𑁆𑀢𑀸 𑀉𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀼𑀩𑁆𑀩𑁂 𑀦𑀸𑀳𑁂𑀲𑀼𑀦𑁆𑀢𑀺 𑀯𑀸, 𑀅𑀲𑀼𑀓𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀸𑀮𑁂 𑀉𑀧𑁆𑀧𑀦𑁆𑀦𑀸, 𑀅𑀲𑀼𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀉𑀧𑁆𑀧𑀦𑁆𑀦𑀸 𑀢𑀢𑁄 𑀧𑀼𑀩𑁆𑀩𑁂 𑀦𑀸𑀳𑁂𑀲𑀼𑀦𑁆𑀢𑀺 𑀯𑀸, 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺; ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀺 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’’𑀢𑀺 (𑀅. 𑀦𑀺. 𑁧𑁦.𑁬𑁧) 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀲𑀁𑀲𑀸𑀭𑀲𑀸𑀕𑀭𑁄 𑀅𑀦𑀫𑀢𑀕𑁆𑀕𑁄𑀯.

𑀫𑀳𑀸𑀲𑀫𑀼𑀤𑁆𑀤𑁄 𑀧𑀦 𑀚𑀮𑀲𑀸𑀕𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄. 𑀢𑀢𑁆𑀣 𑀉𑀤𑀓𑀲𑁆𑀲 𑀆𑀴𑁆𑀳𑀓𑀲𑀢𑁂𑀳𑀺 𑀯𑀸 𑀆𑀴𑁆𑀳𑀓𑀲𑀳𑀲𑁆𑀲𑁂𑀳𑀺 𑀯𑀸 𑀆𑀴𑁆𑀳𑀓𑀲𑀢𑀲𑀳𑀲𑁆𑀲𑁂𑀳𑀺 𑀯𑀸 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀅𑀬𑀁 𑀚𑀮𑀲𑀸𑀕𑀭𑁄 𑀦𑀸𑀫.

𑀓𑀢𑀫𑁄 𑀦𑀬𑀲𑀸𑀕𑀭𑁄? 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀤𑁆𑀯𑁂𑀧𑀺 𑀳𑀺 𑀢𑀦𑁆𑀢𑀺𑀬𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀧𑀲𑀸𑀤𑀩𑀳𑀼𑀮𑀸𑀦𑀁 𑀜𑀸𑀡𑀼𑀢𑁆𑀢𑀭𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀦𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀫𑀸 𑀤𑁆𑀯𑁂? 𑀯𑀺𑀦𑀬𑀜𑁆𑀘 𑀅𑀪𑀺𑀥𑀫𑁆𑀫𑀜𑁆𑀘. 𑀯𑀺𑀦𑀬𑀥𑀭𑀪𑀺𑀓𑁆𑀔𑀽𑀦𑀜𑁆𑀳𑀺 𑀯𑀺𑀦𑀬𑀢𑀦𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀤𑁄𑀲𑀸𑀦𑀼𑀭𑀽𑀧𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀦𑀸𑀫 𑁋 𑀇𑀫𑀲𑁆𑀫𑀺𑀁 𑀤𑁄𑀲𑁂 𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀇𑀤𑀁 𑀦𑀸𑀫 𑀳𑁄𑀢𑀻𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑁋 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑁄𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑁂𑀬𑁆𑀬𑀸𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀦𑀻𑀮𑀧𑁂𑀬𑁆𑀬𑀸𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀲𑀜𑁆𑀘𑀭𑀺𑀢𑁆𑀢𑀧𑁂𑀬𑁆𑀬𑀸𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀅𑀦𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀫𑁆𑀧𑀺 𑀔𑀦𑁆𑀥𑀦𑁆𑀢𑀭𑀁 𑀆𑀬𑀢𑀦𑀦𑁆𑀢𑀭𑀁 𑀥𑀸𑀢𑁆𑀯𑀦𑁆𑀢𑀭𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑀁 𑀩𑀮𑀩𑁄𑀚𑁆𑀛𑀗𑁆𑀕𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀭𑀁 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀕𑀕𑀦𑀢𑀮𑁂 𑀢𑀸𑀭𑀓𑀭𑀽𑀧𑀸𑀦𑀺 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀩𑁆𑀩𑀁 𑀧𑀩𑁆𑀩𑀁 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀯𑀺𑀪𑀚𑀦𑁆𑀢𑁄 𑀤𑀲𑁆𑀲𑁂𑀲𑀺 𑀯𑀢 𑀦𑁄 𑀲𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀢𑀦𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀅𑀦𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀏𑀯𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀦𑀲𑁆𑀲 𑀇𑀤𑀁 𑀯𑀢𑁆𑀣𑀼𑀧𑀺 𑀯𑁂𑀤𑀺𑀢𑀩𑁆𑀩𑀁 𑁋 𑀫𑀳𑀸𑀕𑀢𑀺𑀕𑀫𑀺𑀬𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀧𑀭𑀢𑀻𑀭𑀁 𑀕𑀘𑁆𑀙𑀦𑁆𑀢𑁄 𑀦𑀸𑀯𑀸𑀬 𑀉𑀧𑀭𑀺𑀢𑀮𑁂 𑀦𑀺𑀲𑀺𑀦𑁆𑀦𑁄 𑀫𑀳𑀸𑀲𑀫𑀼𑀤𑁆𑀤𑀁 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦𑁂𑀯 𑀧𑀭𑀢𑀻𑀭𑀁 𑀧𑀜𑁆𑀜𑀸𑀬𑀺𑀢𑁆𑀣, 𑀦 𑀑𑀭𑀺𑀫𑀢𑀻𑀭𑀁, 𑀊𑀫𑀺𑀯𑁂𑀕𑀧𑁆𑀧𑀪𑁂𑀤𑀲𑀫𑀼𑀕𑁆𑀕𑀢𑀚𑀮𑀘𑀼𑀡𑁆𑀡𑀧𑀭𑀺𑀓𑀺𑀡𑁆𑀡𑁄 𑀧𑀦 𑀧𑀲𑀸𑀭𑀺𑀢𑀭𑀚𑀢𑀧𑀝𑁆𑀝𑀲𑀼𑀫𑀦𑀧𑀼𑀧𑁆𑀨𑀲𑀦𑁆𑀣𑀭𑀲𑀤𑀺𑀲𑁄 𑀫𑀳𑀸𑀲𑀫𑀼𑀤𑁆𑀤𑁄𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀫𑀺𑀯𑁂𑀕𑁄 𑀩𑀮𑀯𑀸 𑀉𑀤𑀸𑀳𑀼 𑀘𑀢𑀼𑀯𑀻𑀲𑀢𑀺𑀧𑁆𑀧𑀪𑁂𑀤𑁂 𑀲𑀫𑀦𑁆𑀢𑀧𑀝𑁆𑀞𑀸𑀦𑁂 𑀦𑀬𑀫𑀼𑀔𑀁 𑀩𑀮𑀯𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺 𑁋 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀉𑀧𑀭𑀺 𑀆𑀓𑀸𑀲𑁂𑀦, 𑀏𑀓𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦, 𑀏𑀓𑀢𑁄 𑀯𑁂𑀮𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄; 𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑁆𑀲 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀮𑀯𑀧𑀻𑀢𑀺 𑀉𑀧𑁆𑀧𑀦𑁆𑀦𑀸. 𑀲𑁄 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

𑀅𑀢𑁆𑀣𑁂𑀯 𑀕𑀫𑁆𑀪𑀻𑀭𑀕𑀢𑀁 𑀲𑀼𑀤𑀼𑀩𑁆𑀩𑀼𑀥𑀁,

𑀲𑀬𑀁 𑀅𑀪𑀺𑀜𑁆𑀜𑀸𑀬 𑀲𑀳𑁂𑀢𑀼𑀲𑀫𑁆𑀪𑀯𑀁;

𑀬𑀣𑀸𑀦𑀼𑀧𑀼𑀩𑁆𑀩𑀁 𑀦𑀺𑀔𑀺𑀮𑁂𑀦 𑀤𑁂𑀲𑀺𑀢𑀁,

𑀫𑀳𑁂𑀲𑀺𑀦𑀸 𑀭𑀽𑀧𑀕𑀢𑀁𑀯 𑀧𑀲𑁆𑀲𑀢𑀻𑀢𑀺.

𑀅𑀬𑀁 𑀦𑀬𑀲𑀸𑀕𑀭𑁄 𑀦𑀸𑀫.

𑀓𑀢𑀫𑁄 𑀜𑀸𑀡𑀲𑀸𑀕𑀭𑁄? 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀜𑀸𑀡𑀲𑀸𑀕𑀭𑁄 𑀦𑀸𑀫. 𑀅𑀬𑀁 𑀲𑀁𑀲𑀸𑀭𑀲𑀸𑀕𑀭𑁄 𑀦𑀸𑀫, 𑀅𑀬𑀁 𑀚𑀮𑀲𑀸𑀕𑀭𑁄 𑀦𑀸𑀫, 𑀅𑀬𑀁 𑀦𑀬𑀲𑀸𑀕𑀭𑁄 𑀦𑀸𑀫𑀸𑀢𑀺 𑀳𑀺 𑀅𑀜𑁆𑀜𑁂𑀦 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀜𑀸𑀡𑀲𑀸𑀕𑀭𑁄 𑀦𑀸𑀫. 𑀇𑀫𑁂𑀲𑀼 𑀘𑀢𑀽𑀲𑀼 𑀲𑀸𑀕𑀭𑁂𑀲𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀬𑀲𑀸𑀕𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀇𑀫𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑀅𑀬𑀫𑁆𑀧𑀺 𑀪𑀕𑀯𑀸 𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 ‘𑀇𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀇𑀫𑀁 𑀯𑀢 𑀫𑁂 𑀥𑀫𑁆𑀫𑀁 𑀏𑀲𑀦𑁆𑀢𑀲𑁆𑀲 𑀕𑀯𑁂𑀲𑀦𑁆𑀢𑀲𑁆𑀲 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺, 𑀅𑀣 𑀫𑁂 𑀇𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁂𑀦 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀔𑁂𑀧𑁂𑀢𑁆𑀯𑀸 𑀅𑀬𑀁 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄’𑀢𑀺 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀢𑀢𑁄 𑀢𑀫𑁆𑀳𑀸 𑀧𑀮𑁆𑀮𑀗𑁆𑀓𑀸 𑀯𑀼𑀝𑁆𑀞𑀸𑀬 ‘𑀇𑀫𑀲𑁆𑀫𑀺𑀁 𑀯𑀢 𑀫𑁂 𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥’𑀦𑁆𑀢𑀺 𑀅𑀦𑀺𑀫𑀺𑀲𑁂𑀳𑀺 𑀘𑀓𑁆𑀔𑀽𑀳𑀺 𑀲𑀢𑁆𑀢𑀸𑀳𑀁 𑀧𑀮𑁆𑀮𑀗𑁆𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀤𑁂𑀯𑀢𑀸𑀦𑀁 ‘𑀅𑀚𑁆𑀚𑀸𑀧𑀺 𑀦𑀽𑀦 𑀲𑀺𑀤𑁆𑀥𑀢𑁆𑀣𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀧𑀮𑁆𑀮𑀗𑁆𑀓𑀲𑁆𑀫𑀺𑀜𑁆𑀳𑀺 𑀆𑀮𑀬𑀁 𑀦 𑀯𑀺𑀚𑀳𑀢𑀻’𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺.

𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀯𑀺𑀢𑀓𑁆𑀓𑀁 𑀜𑀢𑁆𑀯𑀸 𑀢𑀸𑀯𑀤𑁂𑀯 𑀢𑀸𑀲𑀁 𑀯𑀺𑀢𑀓𑁆𑀓𑀯𑀽𑀧𑀲𑀫𑀦𑀢𑁆𑀣𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀲𑁆𑀫𑀺𑀜𑁆𑀳𑀺 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘, 𑀜𑀸𑀢𑀺𑀲𑀫𑀸𑀕𑀫𑁂 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘, 𑀧𑀸𑀝𑀺𑀬𑀧𑀼𑀢𑁆𑀢𑀲𑀫𑀸𑀕𑀫𑁂 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘, 𑀲𑀩𑁆𑀩𑀁 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀢𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀫𑁂𑀯 𑀅𑀳𑁄𑀲𑀺. 𑀏𑀯𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀧𑀮𑁆𑀮𑀗𑁆𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑁂 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀲𑀢𑁆𑀢𑀸𑀳𑀁 𑀘𑀗𑁆𑀓𑀫𑀺. 𑀇𑀫𑁂𑀲𑀼 𑀘 𑀏𑀓𑀯𑀻𑀲𑀢𑀺𑀬𑀸 𑀤𑀺𑀯𑀲𑁂𑀲𑀼 𑀏𑀓𑀤𑀺𑀯𑀲𑁂𑀧𑀺 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦 𑀦𑀺𑀓𑁆𑀔𑀦𑁆𑀢𑀸.

𑀘𑀢𑀼𑀢𑁆𑀣𑁂 𑀧𑀦 𑀲𑀢𑁆𑀢𑀸𑀳𑁂 𑀧𑀘𑁆𑀙𑀺𑀫𑀼𑀢𑁆𑀢𑀭𑀸𑀬 𑀤𑀺𑀲𑀸𑀬 𑀭𑀢𑀦𑀖𑀭𑁂 𑀦𑀺𑀲𑀻𑀤𑀺 𑁋 𑀭𑀢𑀦𑀖𑀭𑀁 𑀦𑀸𑀫 𑀦𑁂𑀯 𑀲𑀢𑁆𑀢𑀭𑀢𑀦𑀫𑀬𑀁 𑀕𑁂𑀳𑀁. 𑀲𑀢𑁆𑀢𑀦𑁆𑀦𑀁 𑀧𑀦 𑀧𑀓𑀭𑀡𑀸𑀦𑀁 𑀲𑀫𑁆𑀫𑀲𑀺𑀢𑀝𑁆𑀞𑀸𑀦𑀁 𑀭𑀢𑀦𑀖𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀺𑀁 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀧𑀺 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦 𑀦𑀺𑀓𑁆𑀔𑀦𑁆𑀢𑀸. 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀥𑀸𑀢𑀼𑀓𑀣𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀬𑀫𑀓𑀧𑁆𑀧𑀓𑀭𑀡𑀁 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀧𑀺 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦 𑀦𑀺𑀓𑁆𑀔𑀦𑁆𑀢𑀸. 𑀬𑀤𑀸 𑀧𑀦 𑀫𑀳𑀸𑀧𑀓𑀭𑀡𑀁 𑀑𑀭𑀼𑀬𑁆𑀳 ‘‘𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀲𑀫𑁆𑀫𑀲𑀦𑀁 𑀆𑀭𑀪𑀺, 𑀅𑀣𑀲𑁆𑀲 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀏𑀓𑀦𑁆𑀢𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀫𑀳𑀸𑀧𑀓𑀭𑀡𑁂𑀬𑁂𑀯 𑀑𑀓𑀸𑀲𑀁 𑀮𑀪𑀺. 𑀬𑀣𑀸 𑀳𑀺 𑀢𑀺𑀫𑀺𑀭𑀧𑀺𑀗𑁆𑀕𑀮𑀫𑀳𑀸𑀫𑀘𑁆𑀙𑁄 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀫𑀳𑀸𑀲𑀫𑀼𑀤𑁆𑀤𑁂𑀬𑁂𑀯 𑀑𑀓𑀸𑀲𑀁 𑀮𑀪𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀏𑀓𑀦𑁆𑀢𑀢𑁄 𑀫𑀳𑀸𑀧𑀓𑀭𑀡𑁂𑀬𑁂𑀯 𑀑𑀓𑀸𑀲𑀁 𑀮𑀪𑀺.

𑀲𑀢𑁆𑀣𑀼 𑀏𑀯𑀁 𑀮𑀤𑁆𑀥𑁄𑀓𑀸𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀬𑀣𑀸𑀲𑀼𑀔𑀁 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀭𑀻𑀭𑀢𑁄 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁂𑀲𑀫𑀲𑁆𑀲𑀽𑀳𑀺 𑀘𑁂𑀯 𑀅𑀓𑁆𑀔𑀻𑀦𑀜𑁆𑀘 𑀦𑀻𑀮𑀝𑁆𑀞𑀸𑀦𑁂𑀳𑀺 𑀦𑀻𑀮𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼, 𑀬𑀸𑀲𑀁 𑀯𑀲𑁂𑀦 𑀕𑀕𑀦𑀢𑀮𑀁 𑀅𑀜𑁆𑀚𑀦𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀁 𑀯𑀺𑀬 𑀉𑀫𑀸𑀧𑀼𑀧𑁆𑀨𑀦𑀻𑀮𑀼𑀧𑁆𑀧𑀮𑀤𑀮𑀲𑀜𑁆𑀙𑀦𑁆𑀦𑀁 𑀯𑀺𑀬 𑀯𑀻𑀢𑀺𑀧𑀢𑀦𑁆𑀢𑀫𑀡𑀺𑀢𑀸𑀮𑀯𑀡𑁆𑀝𑀁 𑀯𑀺𑀬 𑀲𑀫𑁆𑀧𑀲𑀸𑀭𑀺𑀢𑀫𑁂𑀘𑀓𑀧𑀝𑀁 𑀯𑀺𑀬 𑀘 𑀅𑀳𑁄𑀲𑀺.

𑀙𑀯𑀺𑀢𑁄 𑀘𑁂𑀯 𑀅𑀓𑁆𑀔𑀻𑀦𑀜𑁆𑀘 𑀧𑀻𑀢𑀝𑁆𑀞𑀸𑀦𑁂𑀳𑀺 𑀧𑀻𑀢𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼; 𑀬𑀸𑀲𑀁 𑀯𑀲𑁂𑀦 𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀪𑀺𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀲𑀼𑀯𑀡𑁆𑀡𑀧𑀝𑀧𑀲𑀸𑀭𑀺𑀢𑀸 𑀯𑀺𑀬 𑀓𑀼𑀗𑁆𑀓𑀼𑀫𑀘𑀼𑀡𑁆𑀡𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼.

𑀫𑀁𑀲𑀮𑁄𑀳𑀺𑀢𑁂𑀳𑀺 𑀘𑁂𑀯 𑀅𑀓𑁆𑀔𑀻𑀦𑀜𑁆𑀘 𑀭𑀢𑁆𑀢𑀝𑁆𑀞𑀸𑀦𑁂𑀳𑀺 𑀮𑁄𑀳𑀺𑀢𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼 𑀬𑀸𑀲𑀁 𑀯𑀲𑁂𑀦 𑀤𑀺𑀲𑀸𑀪𑀸𑀕𑀸 𑀘𑀻𑀦𑀧𑀺𑀝𑁆𑀞𑀘𑀼𑀡𑁆𑀡𑀭𑀜𑁆𑀚𑀺𑀢𑀸 𑀯𑀺𑀬 𑀲𑀼𑀧𑀓𑁆𑀓𑀮𑀸𑀔𑀸𑀭𑀲𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬 𑀚𑀬𑀲𑀼𑀫𑀦𑀧𑀸𑀭𑀺𑀪𑀤𑁆𑀤𑀓𑀩𑀦𑁆𑀥𑀼𑀚𑀻𑀯𑀓𑀓𑀼𑀲𑀼𑀫𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼.

𑀅𑀝𑁆𑀞𑀻𑀳𑀺 𑀘𑁂𑀯 𑀤𑀦𑁆𑀢𑁂𑀳𑀺 𑀘 𑀅𑀓𑁆𑀔𑀻𑀦𑀜𑁆𑀘 𑀲𑁂𑀢𑀝𑁆𑀞𑀸𑀦𑁂𑀳𑀺 𑀑𑀤𑀸𑀢𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼; 𑀬𑀸𑀲𑀁 𑀯𑀲𑁂𑀦 𑀤𑀺𑀲𑀸𑀪𑀸𑀕𑀸 𑀭𑀚𑀢𑀖𑀝𑁂𑀳𑀺 𑀆𑀲𑀺𑀜𑁆𑀘𑀫𑀸𑀦𑀔𑀻𑀭𑀥𑀸𑀭𑀸𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬 𑀲𑀫𑁆𑀧𑀲𑀸𑀭𑀺𑀢𑀭𑀚𑀢𑀧𑀝𑁆𑀝𑀯𑀺𑀢𑀸𑀦𑀸 𑀯𑀺𑀬, 𑀯𑀻𑀢𑀺𑀧𑀢𑀦𑁆𑀢𑀭𑀚𑀢𑀢𑀸𑀮𑀯𑀡𑁆𑀝𑀸 𑀯𑀺𑀬, 𑀓𑀼𑀦𑁆𑀤𑀓𑀼𑀫𑀼𑀤𑀲𑀺𑀦𑁆𑀤𑀼𑀯𑀸𑀭𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀺𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼.

𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀸 𑀧𑀦 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀭𑀻𑀭𑀧𑁆𑀧𑀤𑁂𑀲𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀇𑀢𑀺 𑀢𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀖𑀦𑀫𑀳𑀸𑀧𑀣𑀯𑀺𑀁 𑀕𑀡𑁆𑀳𑀺𑀁𑀲𑀼.

𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀫𑀳𑀸𑀧𑀣𑀯𑀻 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀧𑀺𑀡𑁆𑀟𑀺 𑀯𑀺𑀬 𑀅𑀳𑁄𑀲𑀺. 𑀅𑀣 𑀫𑀳𑀸𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀓𑀁 𑀕𑀡𑁆𑀳𑀺𑀁𑀲𑀼. 𑀧𑀣𑀯𑀺𑀲𑀦𑁆𑀥𑀸𑀭𑀓𑀁 𑀅𑀝𑁆𑀞𑀦𑀳𑀼𑀢𑀸𑀥𑀺𑀓𑀘𑀢𑀼𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀁 𑀉𑀤𑀓𑀁 𑀲𑀼𑀯𑀡𑁆𑀡𑀓𑀮𑀲𑁂𑀳𑀺 𑀆𑀲𑀺𑀜𑁆𑀘𑀫𑀸𑀦𑀯𑀺𑀮𑀻𑀦𑀲𑀼𑀯𑀡𑁆𑀡𑀁 𑀯𑀺𑀬 𑀅𑀳𑁄𑀲𑀺. 𑀉𑀤𑀓𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀸𑀢𑀁 𑀅𑀕𑁆𑀕𑀳𑁂𑀲𑀼𑀁. 𑀙𑀦𑀳𑀼𑀢𑀸𑀥𑀺𑀓𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑁄 𑀯𑀸𑀢𑁄 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀅𑀳𑁄𑀲𑀺. 𑀯𑀸𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼.

𑀉𑀧𑀭𑀺𑀪𑀸𑀕𑁂𑀦 𑀉𑀕𑁆𑀕𑀦𑁆𑀢𑁆𑀯𑀸𑀧𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀕𑀡𑁆𑀳𑀺𑀁𑀲𑀼. 𑀢𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑁂 𑀢𑀢𑁄 𑀬𑀸𑀫𑁂 𑀢𑀢𑁄 𑀢𑀼𑀲𑀺𑀢𑁂 𑀢𑀢𑁄 𑀦𑀺𑀫𑁆𑀫𑀸𑀦𑀭𑀢𑀻 𑀢𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀢𑀢𑁄 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀢𑀢𑁄 𑀯𑁂𑀳𑀧𑁆𑀨𑀮𑁂 𑀢𑀢𑁄 𑀧𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑁂 𑀕𑀡𑁆𑀳𑀺𑀁𑀲𑀼. 𑀘𑀢𑁆𑀢𑀸𑀭𑁄 𑀘 𑀆𑀭𑀼𑀧𑁆𑀧𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼.

𑀢𑀺𑀭𑀺𑀬𑀪𑀸𑀕𑁂𑀳𑀺 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀘𑀦𑁆𑀤𑀫𑁆𑀳𑀺 𑀘𑀦𑁆𑀤𑀧𑁆𑀧𑀪𑀸 𑀦𑀢𑁆𑀣𑀺, 𑀲𑀽𑀭𑀺𑀬𑁂 𑀲𑀽𑀭𑀺𑀬𑀧𑁆𑀧𑀪𑀸 𑀦𑀢𑁆𑀣𑀺, 𑀢𑀸𑀭𑀓𑀭𑀽𑀧𑁂𑀲𑀼 𑀢𑀸𑀭𑀓𑀭𑀽𑀧𑀧𑁆𑀧𑀪𑀸 𑀦𑀢𑁆𑀣𑀺, 𑀤𑁂𑀯𑀢𑀸𑀦𑀁 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑁂𑀲𑀼 𑀘𑁂𑀯 𑀲𑀭𑀻𑀭𑁂𑀲𑀼 𑀘 𑀆𑀪𑀭𑀡𑁂𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀧𑀪𑀸 𑀦𑀢𑁆𑀣𑀺. 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀆𑀮𑁄𑀓𑀨𑀭𑀡𑀲𑀫𑀢𑁆𑀣𑁄 𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑁄 𑀯𑀺𑀬 𑀅𑀳𑁄𑀲𑀺. 𑀘𑀦𑁆𑀤𑀲𑀽𑀭𑀺𑀬𑀢𑀸𑀭𑀓𑀭𑀽𑀧𑀤𑁂𑀯𑀢𑀼𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀦𑀁 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀓𑀫𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀏𑀢𑁆𑀢𑀓𑀁 𑀞𑀸𑀦𑀁 𑀩𑀼𑀤𑁆𑀥𑀭𑀲𑁆𑀫𑀻𑀳𑀺𑀬𑁂𑀯 𑀅𑀚𑁆𑀛𑁄𑀢𑁆𑀣𑀝𑀁 𑀅𑀳𑁄𑀲𑀺. 𑀅𑀬𑀜𑁆𑀘 𑀦𑁂𑀯 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺, 𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺. 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀧𑀦 𑀲𑀫𑁆𑀫𑀲𑀢𑁄 𑀮𑁄𑀓𑀦𑀸𑀣𑀲𑁆𑀲 𑀮𑁄𑀳𑀺𑀢𑀁 𑀧𑀲𑀻𑀤𑀺, 𑀯𑀢𑁆𑀣𑀼𑀭𑀽𑀧𑀁 𑀧𑀲𑀻𑀤𑀺, 𑀙𑀯𑀺𑀯𑀡𑁆𑀡𑁄 𑀧𑀲𑀻𑀤𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀡𑁆𑀡𑀥𑀸𑀢𑀼 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑁂 𑀧𑀤𑁂𑀲𑁂 𑀦𑀺𑀘𑁆𑀘𑀮𑀸𑀯 𑀅𑀝𑁆𑀞𑀸𑀲𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀲𑀢𑁆𑀢𑀸𑀳𑀁 𑀲𑀫𑁆𑀫𑀲𑀺.

𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀲𑀫𑁆𑀫𑀲𑀺𑀢𑀥𑀫𑁆𑀫𑁄 𑀓𑀺𑀢𑁆𑀢𑀓𑁄 𑀅𑀳𑁄𑀲𑀻𑀢𑀺? 𑀅𑀦𑀦𑁆𑀢𑁄 𑀅𑀧𑀭𑀺𑀫𑀸𑀡𑁄 𑀅𑀳𑁄𑀲𑀺. 𑀅𑀬𑀁 𑀢𑀸𑀯 𑀫𑀦𑀲𑀸𑀤𑁂𑀲𑀦𑀸 𑀦𑀸𑀫. 𑀲𑀢𑁆𑀣𑀸 𑀧𑀦 𑀏𑀯𑀁 𑀲𑀢𑁆𑀢𑀸𑀳𑀁 𑀫𑀦𑀲𑀸 𑀘𑀺𑀦𑁆𑀢𑀺𑀢𑀥𑀫𑁆𑀫𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑁄 𑀯𑀲𑁆𑀲𑀲𑀢𑁂𑀦𑀧𑀺 𑀯𑀲𑁆𑀲𑀲𑀳𑀲𑁆𑀲𑁂𑀦𑀧𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑁂𑀦𑀧𑀺 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀧𑀭𑀪𑀸𑀕𑁂𑀧𑀺 𑀳𑀺 𑀢𑀣𑀸𑀕𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀲𑀢𑀲𑀳𑀲𑁆𑀲𑀪𑀸𑀕𑁂𑀦 𑀥𑀫𑁆𑀫𑀦𑁆𑀢𑀭𑀸 𑀥𑀫𑁆𑀫𑀦𑁆𑀢𑀭𑀁 𑀲𑀗𑁆𑀓𑀫𑀺𑀢𑁆𑀯𑀸 𑀲𑀗𑁆𑀓𑀫𑀺𑀢𑁆𑀯𑀸𑀯 𑀤𑁂𑀲𑁂𑀲𑀺. 𑀢𑀬𑁄 𑀫𑀸𑀲𑁂 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀸 𑀯𑁂𑀕𑁂𑀦 𑀧𑀯𑀢𑁆𑀢𑀸 𑀆𑀓𑀸𑀲𑀕𑀗𑁆𑀕𑀸 𑀯𑀺𑀬 𑀅𑀥𑁄𑀫𑀼𑀔𑀞𑀧𑀺𑀢𑀉𑀤𑀓𑀖𑀝𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑀥𑀸𑀭𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀅𑀦𑀦𑁆𑀢𑀸 𑀅𑀧𑀭𑀺𑀫𑀸𑀡𑀸 𑀅𑀳𑁄𑀲𑀺.

𑀩𑀼𑀤𑁆𑀥𑀸𑀦𑀜𑁆𑀳𑀺 𑀪𑀢𑁆𑀢𑀸𑀦𑀼𑀫𑁄𑀤𑀦𑀓𑀸𑀮𑁂𑀧𑀺 𑀣𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀼𑀫𑁄𑀤𑁂𑀦𑁆𑀢𑀸𑀦𑀁 𑀤𑁂𑀲𑀦𑀸 𑀤𑀻𑀖𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸𑀦𑀁 𑀤𑁂𑀲𑀦𑀸 𑀲𑀁𑀬𑀼𑀢𑁆𑀢𑀅𑀗𑁆𑀕𑀼𑀢𑁆𑀢𑀭𑀺𑀓𑀤𑁆𑀯𑁂𑀫𑀳𑀸𑀦𑀺𑀓𑀸𑀬𑀧𑁆𑀧𑀫𑀸𑀡𑀸𑀯 𑀳𑁄𑀢𑀺. 𑀓𑀲𑁆𑀫𑀸? 𑀩𑀼𑀤𑁆𑀥𑀸𑀦𑀜𑁆𑀳𑀺 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄 𑀤𑀦𑁆𑀢𑀸𑀯𑀭𑀡𑀁 𑀲𑀼𑀨𑀼𑀲𑀺𑀢𑀁 𑀫𑀼𑀔𑀸𑀤𑀸𑀦𑀁 𑀲𑀺𑀮𑀺𑀝𑁆𑀞𑀁 𑀚𑀺𑀯𑁆𑀳𑀸 𑀫𑀼𑀤𑀼𑀓𑀸 𑀲𑀭𑁄 𑀫𑀥𑀼𑀭𑁄 𑀯𑀘𑀦𑀁 𑀮𑀳𑀼𑀧𑀭𑀺𑀯𑀢𑁆𑀢𑀁. 𑀢𑀲𑁆𑀫𑀸 𑀢𑀁 𑀫𑀼𑀳𑀼𑀢𑁆𑀢𑀁 𑀤𑁂𑀲𑀺𑀢𑀥𑀫𑁆𑀫𑁄𑀧𑀺 𑀏𑀢𑁆𑀢𑀓𑁄 𑀳𑁄𑀢𑀺. 𑀢𑁂𑀫𑀸𑀲𑀁 𑀤𑁂𑀲𑀺𑀢𑀥𑀫𑁆𑀫𑁄 𑀧𑀦 𑀅𑀦𑀦𑁆𑀢𑁄 𑀅𑀧𑀭𑀺𑀫𑀸𑀡𑁄𑀬𑁂𑀯.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀳𑀺 𑀩𑀳𑀼𑀲𑁆𑀲𑀼𑀢𑁄 𑀢𑀺𑀧𑀺𑀝𑀓𑀥𑀭𑁄 𑀧𑀜𑁆𑀘𑀤𑀲 𑀕𑀸𑀣𑀸𑀲𑀳𑀲𑁆𑀲𑀸𑀦𑀺 𑀲𑀝𑁆𑀞𑀺 𑀧𑀤𑀲𑀳𑀲𑁆𑀲𑀸𑀦𑀺 𑀮𑀢𑀸𑀧𑀼𑀧𑁆𑀨𑀸𑀦𑀺 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀞𑀺𑀢𑀧𑀤𑁂𑀦𑁂𑀯 𑀞𑀢𑁆𑀯𑀸 𑀕𑀡𑁆𑀳𑀸𑀢𑀺 𑀯𑀸 𑀯𑀸𑀘𑁂𑀢𑀺 𑀯𑀸 𑀤𑁂𑀲𑁂𑀢𑀺 𑀯𑀸. 𑀏𑀢𑁆𑀢𑀓𑁄 𑀣𑁂𑀭𑀲𑁆𑀲 𑀏𑀓𑁄 𑀉𑀤𑁆𑀤𑁂𑀲𑀫𑀕𑁆𑀕𑁄 𑀦𑀸𑀫 𑀳𑁄𑀢𑀺. 𑀣𑁂𑀭𑀲𑁆𑀲 𑀳𑀺 𑀅𑀦𑀼𑀧𑀤𑀁 𑀉𑀤𑁆𑀤𑁂𑀲𑀁 𑀤𑀤𑀫𑀸𑀦𑁄 𑀅𑀜𑁆𑀜𑁄 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀲𑀫𑁆𑀧𑀸𑀧𑀼𑀡𑁂𑀬𑁆𑀬. 𑀏𑀯𑀁 𑀅𑀥𑀺𑀫𑀢𑁆𑀢𑀲𑀢𑀺𑀫𑀸 𑀅𑀥𑀺𑀫𑀢𑁆𑀢𑀕𑀢𑀺𑀫𑀸 𑀅𑀥𑀺𑀫𑀢𑁆𑀢𑀥𑀺𑀢𑀺𑀫𑀸 𑀲𑀸𑀯𑀓𑁄 𑀲𑀢𑁆𑀣𑀸𑀭𑀸 𑀢𑁂𑀫𑀸𑀲𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀤𑁂𑀲𑀺𑀢𑀤𑁂𑀲𑀦𑀁 𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀁 𑀉𑀕𑁆𑀕𑀡𑁆𑀳𑀦𑁆𑀢𑁄𑀧𑀺 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀏𑀯𑀁 𑀢𑁂𑀫𑀸𑀲𑀁 𑀦𑀺𑀭𑀦𑁆𑀢𑀭𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀦 𑀢𑀣𑀸𑀕𑀢𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑁆𑀧𑀝𑀺𑀩𑀤𑁆𑀥𑀁 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀓𑀣𑀁 𑀬𑀸𑀧𑁂𑀲𑀻𑀢𑀺? 𑀧𑀝𑀺𑀚𑀕𑁆𑀕𑀦𑁂𑀦𑁂𑀯. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑁄 𑀲𑁄 𑀓𑀸𑀮𑁄 𑀲𑀼𑀯𑀯𑀢𑁆𑀣𑀺𑀢𑁄 𑀲𑀼𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀼𑀧𑀘𑁆𑀘𑀓𑁆𑀔𑁄. 𑀢𑀲𑁆𑀫𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀯 𑀫𑀦𑀼𑀲𑁆𑀲𑀮𑁄𑀓𑁂 𑀓𑀸𑀮𑀁 𑀑𑀮𑁄𑀓𑁂𑀢𑀺. 𑀲𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀢𑁆𑀯𑀸 ‘𑀇𑀫𑀲𑁆𑀲 𑀘𑀻𑀯𑀭𑀕𑁆𑀕𑀳𑀡𑀁 𑀧𑀢𑁆𑀢𑀕𑁆𑀕𑀳𑀡𑀁 𑀲𑀭𑀓𑀼𑀢𑁆𑀢𑀺 𑀆𑀓𑀧𑁆𑀧𑁄 𑀘 𑀏𑀯𑀭𑀽𑀧𑁄 𑀦𑀸𑀫 𑀳𑁄𑀢𑀼, 𑀏𑀢𑁆𑀢𑀓𑀁 𑀦𑀸𑀫 𑀥𑀫𑁆𑀫𑀁 𑀤𑁂𑀲𑁂𑀢𑀽’𑀢𑀺 𑀅𑀥𑀺𑀝𑁆𑀞𑀸𑀬 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑁄𑀢𑀢𑁆𑀢𑀤𑀳𑀁 𑀕𑀘𑁆𑀙𑀢𑀺. 𑀤𑁂𑀯𑀢𑀸 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀤𑁂𑀦𑁆𑀢𑀺. 𑀢𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀞𑀺𑀢𑁄 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀲𑁂𑀮𑀫𑀬𑀁 𑀧𑀢𑁆𑀢𑀁 𑀆𑀤𑀸𑀬 𑀉𑀢𑁆𑀢𑀭𑀓𑀼𑀭𑀼𑀁 𑀕𑀘𑁆𑀙𑀢𑀺. 𑀢𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀸𑀬 𑀘𑀦𑁆𑀤𑀦𑀯𑀦𑀁 𑀕𑀘𑁆𑀙𑀢𑀺.

𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀢𑁆𑀢𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀦𑀬𑀁 𑀤𑁂𑀢𑀺. ‘𑀲𑀸𑀭𑀺𑀧𑀼𑀢𑁆𑀢, 𑀏𑀢𑁆𑀢𑀓𑁄 𑀥𑀫𑁆𑀫𑁄 𑀫𑀬𑀸 𑀤𑁂𑀲𑀺𑀢𑁄’𑀢𑀺 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀦𑀬𑀁 𑀤𑁂𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀯𑁂𑀮𑀦𑁆𑀢𑁂 𑀞𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀲𑀫𑀼𑀤𑁆𑀤𑀲𑀤𑀺𑀲𑀁 𑀦𑀬𑀤𑀸𑀦𑀁 𑀳𑁄𑀢𑀺. 𑀣𑁂𑀭𑀲𑁆𑀲𑀸𑀧𑀺 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀦𑀬𑀲𑀢𑀲𑀳𑀲𑁆𑀲𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀉𑀧𑀝𑁆𑀞𑀸𑀢𑀺𑀬𑁂𑀯.

𑀲𑀢𑁆𑀣𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀓𑀸𑀬 𑀯𑁂𑀮𑀸𑀬 𑀕𑀘𑁆𑀙𑀢𑀻𑀢𑀺? 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀯𑁂𑀮𑀸 𑀦𑀸𑀫 𑀅𑀢𑁆𑀣𑀺, 𑀢𑀸𑀬 𑀯𑁂𑀮𑀸𑀬 𑀕𑀘𑁆𑀙𑀢𑀺. 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀯𑀸 𑀆𑀕𑀘𑁆𑀙𑀦𑁆𑀢𑀁 𑀯𑀸 𑀓𑁂 𑀚𑀸𑀦𑀦𑁆𑀢𑀺 𑀓𑁂 𑀦 𑀚𑀸𑀦𑀦𑁆𑀢𑀻𑀢𑀺? 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀅𑀧𑁆𑀧𑁂𑀲𑀓𑁆𑀔𑀸 𑀤𑁂𑀯𑀢𑀸 𑀦 𑀚𑀸𑀦𑀦𑁆𑀢𑀺. 𑀓𑀲𑁆𑀫𑀸 𑀦 𑀚𑀸𑀦𑀦𑁆𑀢𑀻𑀢𑀺? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀲𑁆𑀲 𑀯𑀸 𑀭𑀲𑁆𑀫𑀺𑀆𑀤𑀻𑀲𑀼 𑀦𑀸𑀦𑀢𑁆𑀢𑀸𑀪𑀸𑀯𑀸. 𑀉𑀪𑀺𑀦𑁆𑀦𑀫𑁆𑀧𑀺 𑀳𑀺 𑀢𑁂𑀲𑀁 𑀭𑀲𑁆𑀫𑀻𑀲𑀼 𑀯𑀸 𑀲𑀭𑁂𑀲𑀼 𑀯𑀸 𑀯𑀘𑀦𑁂𑀲𑀼 𑀯𑀸 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀤𑁂𑀲𑁂𑀲𑀺. 𑀢𑁂𑀲𑀁 𑀅𑀬𑀁 𑀧𑀼𑀩𑁆𑀩𑀬𑁄𑀕𑁄 𑁋 𑀢𑁂 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀔𑀼𑀤𑁆𑀤𑀓𑀯𑀕𑁆𑀕𑀼𑀮𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸 𑀧𑀩𑁆𑀪𑀸𑀭𑁂 𑀑𑀮𑀫𑁆𑀩𑀦𑁆𑀢𑀸 𑀤𑁆𑀯𑀺𑀦𑁆𑀦𑀁 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁 𑀅𑀪𑀺𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀡𑁆𑀳𑀧𑀓𑁆𑀔𑀲𑀼𑀓𑁆𑀓𑀧𑀓𑁆𑀔𑁂 𑀅𑀚𑀸𑀦𑀺𑀢𑁆𑀯𑀸𑀧𑀺 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀫𑀢𑁆𑀢𑀓𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀯𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀣𑁂𑀭𑁄 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀢𑁂𑀲𑀁 𑀤𑁂𑀲𑁂𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑀜𑁆𑀘 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀢𑁆𑀢𑀧𑁆𑀧𑀓𑀭𑀡𑀉𑀕𑁆𑀕𑀳𑀡𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀅𑀳𑁄𑀲𑀺.

𑀅𑀪𑀺𑀥𑀫𑁆𑀫𑁂 𑀯𑀸𑀘𑀦𑀸𑀫𑀕𑁆𑀕𑁄 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀪𑀯𑁄. 𑀫𑀳𑀸𑀧𑀓𑀭𑀡𑁂 𑀕𑀡𑀦𑀘𑀸𑀭𑁄𑀧𑀺 𑀣𑁂𑀭𑁂𑀦𑁂𑀯 𑀞𑀧𑀺𑀢𑁄. 𑀣𑁂𑀭𑁄 𑀳𑀺 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀥𑀫𑁆𑀫𑀦𑁆𑀢𑀭𑀁 𑀅𑀫𑀓𑁆𑀔𑁂𑀢𑁆𑀯𑀸𑀯 𑀲𑀼𑀔𑀁 𑀕𑀳𑁂𑀢𑀼𑀁 𑀥𑀸𑀭𑁂𑀢𑀼𑀁 𑀧𑀭𑀺𑀬𑀸𑀧𑀼𑀡𑀺𑀢𑀼𑀁 𑀯𑀸𑀘𑁂𑀢𑀼𑀜𑁆𑀘 𑀧𑀳𑁄𑀢𑀻𑀢𑀺 𑀕𑀡𑀦𑀘𑀸𑀭𑀁 𑀞𑀧𑁂𑀲𑀺. 𑀏𑀯𑀁 𑀲𑀦𑁆𑀢𑁂 𑀣𑁂𑀭𑁄𑀯 𑀧𑀞𑀫𑀢𑀭𑀁 𑀆𑀪𑀺𑀥𑀫𑁆𑀫𑀺𑀓𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀧𑀞𑀫𑀢𑀭𑀁 𑀆𑀪𑀺𑀥𑀫𑁆𑀫𑀺𑀓𑁄. 𑀲𑁄 𑀳𑀺 𑀦𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺. 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀘 𑀧𑀦 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸,

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸,

𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫𑀁.

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸,

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸,

𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀺.

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸,

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀯𑀺𑀥𑀽𑀧𑀬𑀁 𑀢𑀺𑀝𑁆𑀞𑀢𑀺 𑀫𑀸𑀭𑀲𑁂𑀦𑀁,

𑀲𑀽𑀭𑀺𑀬𑁄𑀯 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺. (𑀫𑀳𑀸𑀯. 𑁧-𑁩; 𑀉𑀤𑀸. 𑁧-𑁩);

𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁 𑀦𑀸𑀫. 𑀥𑀫𑁆𑀫𑀧𑀤𑀪𑀸𑀡𑀓𑀸 𑀧𑀦 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪);

𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺.

𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀦𑀺𑀧𑀦𑁆𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁮) 𑀯𑀼𑀢𑁆𑀢𑀯𑀘𑀦𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁 𑀦𑀸𑀫.

𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀧𑀼𑀧𑁆𑀨𑀤𑀸𑀫𑀁 𑀕𑀦𑁆𑀣𑁂𑀦𑁆𑀢𑁂𑀦 𑀯𑀺𑀬, 𑀭𑀢𑀦𑀸𑀯𑀮𑀺𑀁 𑀆𑀯𑀼𑀦𑀦𑁆𑀢𑁂𑀦 𑀯𑀺𑀬, 𑀘 𑀓𑀣𑀺𑀢𑁄 𑀅𑀫𑀢𑀧𑁆𑀧𑀓𑀸𑀲𑀦𑁄 𑀲𑀤𑁆𑀥𑀫𑁆𑀫𑁄 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁 𑀦𑀸𑀫.

𑀢𑀁 𑀲𑀩𑁆𑀩𑀫𑁆𑀧𑀺 𑀲𑀗𑁆𑀕𑀬𑁆𑀳𑀫𑀸𑀦𑀁 𑀧𑀺𑀝𑀓𑀢𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀓𑀸𑀬𑀢𑁄 𑀧𑀜𑁆𑀘 𑀦𑀺𑀓𑀸𑀬𑀸, 𑀅𑀗𑁆𑀕𑀢𑁄 𑀦𑀯𑀗𑁆𑀕𑀸𑀦𑀺, 𑀥𑀫𑁆𑀫𑀓𑁆𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺. 𑀓𑀣𑀁? 𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀧𑀺𑀝𑀓𑀢𑁄 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀺𑀧𑁆𑀧𑀪𑁂𑀤𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀤𑁆𑀯𑁂 𑀯𑀺𑀪𑀗𑁆𑀕𑀸 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸 𑀲𑁄𑀴𑀲 𑀧𑀭𑀺𑀯𑀸𑀭𑀸𑀢𑀺 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫. 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀤𑀻𑀖𑀦𑀺𑀓𑀸𑀬𑁄. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀺𑀤𑀺𑀬𑀟𑁆𑀠𑀲𑀢𑀤𑁆𑀯𑁂𑀲𑀼𑀢𑁆𑀢𑀲𑀗𑁆𑀕𑀳𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄. 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀺𑀲𑀢𑁆𑀢𑀲𑀼𑀢𑁆𑀢𑀲𑀳𑀲𑁆𑀲𑀲𑀢𑁆𑀢𑀲𑀢𑀤𑁆𑀯𑀸𑀲𑀝𑁆𑀞𑀺𑀲𑀼𑀢𑁆𑀢𑀲𑀗𑁆𑀕𑀳𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄. 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀸𑀤𑀺𑀦𑀯𑀲𑀼𑀢𑁆𑀢𑀲𑀳𑀲𑁆𑀲𑀧𑀜𑁆𑀘𑀲𑀢𑀲𑀢𑁆𑀢𑀧𑀜𑁆𑀜𑀸𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄. 𑀔𑀼𑀤𑁆𑀤𑀓𑀧𑀸𑀞𑀥𑀫𑁆𑀫𑀧𑀤𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀲𑀼𑀢𑁆𑀢𑀦𑀺𑀧𑀸𑀢𑀯𑀺𑀫𑀸𑀦𑀯𑀢𑁆𑀣𑀼𑀧𑁂𑀢𑀯𑀢𑁆𑀣𑀼𑀣𑁂𑀭𑀕𑀸𑀣𑀸𑀣𑁂𑀭𑀻𑀕𑀸𑀣𑀸𑀚𑀸𑀢𑀓𑀦𑀺𑀤𑁆𑀤𑁂𑀲𑀧𑀝𑀺𑀲𑀫𑁆𑀪𑀺𑀤𑀸𑀅𑀧𑀤𑀸𑀦𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀯𑀲𑁂𑀦 𑀧𑀦𑁆𑀦𑀭𑀲𑀧𑁆𑀧𑀪𑁂𑀤𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀦𑀸𑀫. 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀻𑀦𑀺 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫. 𑀢𑀢𑁆𑀣 𑁋

𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸, 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄.

𑀯𑀺𑀯𑀺𑀥𑀸 𑀳𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀸𑀭𑀸𑀚𑀺𑀓𑀸𑀤𑀺𑀲𑀢𑁆𑀢𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑀸𑀤𑀺𑀧𑁆𑀧𑀪𑁂𑀤𑀸 𑀦𑀬𑀸 𑀯𑀺𑀲𑁂𑀲𑀪𑀽𑀢𑀸 𑀘 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀦𑀬𑀸. 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀚𑁆𑀛𑀸𑀘𑀸𑀭𑀦𑀺𑀲𑁂𑀥𑀦𑀢𑁄 𑀘𑁂𑀲 𑀓𑀸𑀬𑀁 𑀯𑀸𑀘𑀜𑁆𑀘 𑀯𑀺𑀦𑁂𑀢𑀺. 𑀢𑀲𑁆𑀫𑀸 𑀯𑀺𑀯𑀺𑀥𑀦𑀬𑀢𑁆𑀢𑀸 𑀯𑀺𑀲𑁂𑀲𑀦𑀬𑀢𑁆𑀢𑀸 𑀓𑀸𑀬𑀯𑀸𑀘𑀸𑀦𑀜𑁆𑀘 𑀯𑀺𑀦𑀬𑀦𑀢𑁄 𑀅𑀬𑀁 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸, 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄’’𑀢𑀺.

𑀇𑀢𑀭𑀁 𑀧𑀦 𑁋

𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘 ‘𑀲𑀼𑀢𑁆𑀢’𑀦𑁆𑀢𑀺 𑀅𑀓𑁆𑀔𑀸𑀢𑀁.

𑀢𑀜𑁆𑀳𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀲𑀽𑀘𑁂𑀢𑀺. 𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀯𑀢𑀺 𑀘𑁂𑀢𑀁 𑀅𑀢𑁆𑀣𑁂, 𑀲𑀲𑁆𑀲𑀫𑀺𑀯 𑀨𑀮𑀁, 𑀧𑀲𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀽𑀤𑀢𑀺 𑀘𑁂𑀢𑀁, 𑀥𑁂𑀦𑀼 𑀯𑀺𑀬 𑀔𑀻𑀭𑀁, 𑀧𑀕𑁆𑀖𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀢𑀲𑀪𑀸𑀕𑀜𑁆𑀘𑁂𑀢𑀁. 𑀬𑀣𑀸 𑀳𑀺 𑀢𑀘𑁆𑀙𑀓𑀸𑀦𑀁 𑀲𑀼𑀢𑁆𑀢𑀁 𑀧𑀫𑀸𑀡𑀁 𑀳𑁄𑀢𑀺 𑀏𑀯𑀫𑁂𑀢𑀫𑁆𑀧𑀺 𑀯𑀺𑀜𑁆𑀜𑀽𑀦𑀁. 𑀬𑀣𑀸 𑀘 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀦 𑀯𑀺𑀤𑁆𑀥𑀁𑀲𑀺𑀬𑀦𑁆𑀢𑀺 𑀏𑀯𑀫𑁂𑀢𑁂𑀦 𑀲𑀗𑁆𑀕𑀳𑀺𑀢𑀸 𑀅𑀢𑁆𑀣𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘 𑀲𑀼𑀢𑁆𑀢𑀦𑁆𑀢𑀺 𑀅𑀓𑁆𑀔𑀸𑀢’’𑀦𑁆𑀢𑀺.

𑀅𑀪𑀺𑀥𑀫𑁆𑀫𑀲𑁆𑀲 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀅𑀧𑀭𑁄 𑀦𑀬𑁄 𑁋

𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄.

𑀅𑀬𑀜𑁆𑀳𑀺 𑀅𑀪𑀺𑀲𑀤𑁆𑀤𑁄 𑀯𑀼𑀟𑁆𑀠𑀺𑀮𑀓𑁆𑀔𑀡𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸𑀥𑀺𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁮𑁪; 𑀲𑀁. 𑀦𑀺. 𑁫.𑁧𑁯𑁫) 𑀯𑀼𑀟𑁆𑀠𑀺𑀬𑀁 𑀆𑀕𑀢𑁄. ‘‘𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁯) 𑀮𑀓𑁆𑀔𑀡𑁂. ‘‘𑀭𑀸𑀚𑀸𑀪𑀺𑀭𑀸𑀚𑀸 𑀫𑀦𑀼𑀚𑀺𑀦𑁆𑀤𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁮) 𑀧𑀽𑀚𑀺𑀢𑁂. ‘‘𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁮𑁫) 𑀧𑀭𑀺𑀘𑁆𑀙𑀺𑀦𑁆𑀦𑁂; 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀲𑀼 (𑀯𑀺. 𑀯. 𑁭𑁫) 𑀅𑀥𑀺𑀓𑁂.

𑀏𑀢𑁆𑀣 𑀘 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬𑁩 𑀆𑀤𑀬𑁄) 𑀦𑀬𑁂𑀦 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀦𑀬𑁂𑀦 𑀆𑀭𑀫𑁆𑀫𑀡𑀸𑀤𑀻𑀳𑀺 𑀮𑀓𑁆𑀔𑀡𑀻𑀬𑀢𑁆𑀢𑀸 𑀲𑀮𑀓𑁆𑀔𑀡𑀸𑀧𑀺. ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁧; 𑀤𑀼𑀓𑀫𑀸𑀢𑀺𑀓𑀸 𑁧𑁨) 𑀦𑀬𑁂𑀦 𑀧𑀽𑀚𑀺𑀢𑀸𑀧𑀺; 𑀧𑀽𑀚𑀸𑀭𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀦𑀬𑁂𑀦 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀧𑀺. ‘‘𑀫𑀳𑀕𑁆𑀕𑀢𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸, 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁨; 𑀤𑀼𑀓𑀫𑀸𑀢𑀺𑀓𑀸 𑁯𑁯) 𑀦𑀬𑁂𑀦 𑀅𑀥𑀺𑀓𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄’’𑀢𑀺.

𑀬𑀁 𑀧𑀦𑁂𑀢𑁆𑀣 𑀅𑀯𑀺𑀲𑀺𑀝𑁆𑀞𑀁, 𑀢𑀁 𑁋

𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽, 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼;

𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸, 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀧𑀭𑀺𑀬𑀢𑁆𑀢𑀺𑀧𑀺 𑀳𑀺 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀧𑀺𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓𑀁𑀆𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁮; 𑀅. 𑀦𑀺. 𑁩.𑁭𑁦) 𑀬𑀁𑀓𑀺𑀜𑁆𑀘𑀺 𑀪𑀸𑀚𑀦𑀫𑁆𑀧𑀺. 𑀢𑀲𑁆𑀫𑀸 𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽 𑀧𑀭𑀺𑀬𑀢𑁆𑀢𑀺𑀪𑀸𑀚𑀦𑀢𑁆𑀣𑀢𑁄 𑀆𑀳𑀼.

𑀇𑀤𑀸𑀦𑀺 𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸𑀢𑀺. 𑀢𑁂𑀦 𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦 𑀧𑀺𑀝𑀓𑀲𑀤𑁆𑀤𑁂𑀦 𑀲𑀳 𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀦𑀬𑁄 𑀘 𑀲𑁄 𑀧𑀺𑀝𑀓𑀜𑁆𑀘 𑀧𑀭𑀺𑀬𑀢𑁆𑀢𑀺𑀪𑀸𑀯𑀢𑁄, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀪𑀸𑀚𑀦𑀢𑁄 𑀘𑀸𑀢𑀺 𑀯𑀺𑀦𑀬𑀧𑀺𑀝𑀓𑀁. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀲𑀼𑀢𑁆𑀢𑀦𑁆𑀢𑀜𑁆𑀘 𑀢𑀁 𑀧𑀺𑀝𑀓𑀜𑁆𑀘𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁. 𑀅𑀪𑀺𑀥𑀫𑁆𑀫𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀏𑀯𑀫𑁂𑀢𑁂 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀏𑀯𑀁 𑀜𑀢𑁆𑀯𑀸 𑀘 𑀧𑀼𑀦𑀧𑀺 𑀢𑁂𑀲𑁆𑀯𑁂𑀯 𑀧𑀺𑀝𑀓𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑁋

𑀤𑁂𑀲𑀦𑀸𑀲𑀸𑀲𑀦𑀓𑀣𑀸𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂.

𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀧𑀭𑀺𑀤𑀻𑀧𑀦𑀸 𑀯𑀺𑀪𑀸𑀯𑀦𑀸 𑀘 𑁋 𑀏𑀢𑀸𑀦𑀺 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀬𑀣𑀸𑀓𑁆𑀓𑀫𑀁 𑀆𑀡𑀸𑀯𑁄𑀳𑀸𑀭𑀧𑀭𑀫𑀢𑁆𑀣𑀤𑁂𑀲𑀦𑀸, 𑀬𑀣𑀸𑀧𑀭𑀸𑀥𑀬𑀣𑀸𑀦𑀼𑀮𑁄𑀫𑀬𑀣𑀸𑀥𑀫𑁆𑀫𑀲𑀸𑀲𑀦𑀸𑀦𑀺, 𑀲𑀁𑀯𑀭𑀸𑀲𑀁𑀯𑀭𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑀏𑀢𑁆𑀣 𑀳𑀺 𑀯𑀺𑀦𑀬𑀧𑀺𑀝𑀓𑀁 𑀆𑀡𑀸𑀭𑀳𑁂𑀦 𑀪𑀕𑀯𑀢𑀸 𑀆𑀡𑀸𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀆𑀡𑀸𑀤𑁂𑀲𑀦𑀸; 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀯𑁄𑀳𑀸𑀭𑀓𑀼𑀲𑀮𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀯𑁄𑀳𑀸𑀭𑀤𑁂𑀲𑀦𑀸; 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀫𑀢𑁆𑀣𑀓𑀼𑀲𑀮𑁂𑀦 𑀪𑀕𑀯𑀢𑀸 𑀧𑀭𑀫𑀢𑁆𑀣𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀤𑁂𑀲𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 𑀧𑀞𑀫𑀁 𑀬𑁂 𑀢𑁂 𑀧𑀘𑀼𑀭𑀸𑀧𑀭𑀸𑀥𑀸 𑀲𑀢𑁆𑀢𑀸 𑀢𑁂 𑀬𑀣𑀸𑀧𑀭𑀸𑀥𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀧𑀭𑀸𑀥𑀲𑀸𑀲𑀦𑀁; 𑀤𑀼𑀢𑀺𑀬𑀁 𑀅𑀦𑁂𑀓𑀚𑁆𑀛𑀸𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀬𑀣𑀸𑀦𑀼𑀮𑁄𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀁; 𑀢𑀢𑀺𑀬𑀁 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 ‘𑀅𑀳𑀁 𑀫𑀫𑀸’𑀢𑀺 𑀲𑀜𑁆𑀜𑀺𑀦𑁄 𑀲𑀢𑁆𑀢𑀸 𑀬𑀣𑀸𑀥𑀫𑁆𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 𑀧𑀞𑀫𑀁 𑀅𑀚𑁆𑀛𑀸𑀘𑀸𑀭𑀧𑀝𑀺𑀧𑀓𑁆𑀔𑀪𑀽𑀢𑁄 𑀲𑀁𑀯𑀭𑀸𑀲𑀁𑀯𑀭𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀲𑀁𑀯𑀭𑀸𑀲𑀁𑀯𑀭𑀓𑀣𑀸; 𑀲𑀁𑀯𑀭𑀸𑀲𑀁𑀯𑀭𑁄𑀢𑀺 𑀔𑀼𑀤𑁆𑀤𑀓𑁄 𑀘𑁂𑀯 𑀫𑀳𑀦𑁆𑀢𑁄 𑀘 𑀲𑀁𑀯𑀭𑀸𑀲𑀁𑀯𑀭𑁄, 𑀓𑀫𑁆𑀫𑀸𑀓𑀫𑁆𑀫𑀁 𑀯𑀺𑀬 𑀘 𑀨𑀮𑀸𑀨𑀮𑀁 𑀯𑀺𑀬 𑀘; 𑀤𑀼𑀢𑀺𑀬𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸 𑀏𑀢𑁆𑀣 𑀓𑀣𑀺𑀢𑀸𑀢𑀺 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸; 𑀢𑀢𑀺𑀬𑀁 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀢𑀻𑀡𑀺 𑀧𑀳𑀸𑀦𑀸𑀦𑀺 𑀘𑀢𑀼𑀩𑁆𑀩𑀺𑀥𑁄 𑀘 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀺𑀦𑀬𑀧𑀺𑀝𑀓𑁂 𑀯𑀺𑀲𑁂𑀲𑁂𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀯𑀺𑀦𑀬𑀧𑀺𑀝𑀓𑁂 𑀘 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁, 𑀓𑀺𑀮𑁂𑀲𑀸𑀦𑀁 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲; 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁, 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀸𑀥𑀺𑀲𑁆𑀲; 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀦𑀼𑀲𑀬𑀧𑁆𑀧𑀳𑀸𑀦𑀁, 𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬.

𑀧𑀞𑀫𑁂 𑀘 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀇𑀢𑀭𑁂𑀲𑀼 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀸𑀦𑀺. 𑀧𑀞𑀫𑁂 𑀘 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁, 𑀇𑀢𑀭𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁.

𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀢𑀦𑁆𑀢𑀺. 𑀅𑀢𑁆𑀣𑁄𑀢𑀺 𑀢𑀲𑁆𑀲𑀸𑀬𑁂𑀯𑀢𑁆𑀣𑁄. 𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀧𑀝𑀺𑀯𑁂𑀥𑁄𑀢𑀺 𑀢𑀦𑁆𑀢𑀺𑀬𑀸 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸. 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀏𑀯𑀁 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀥𑀫𑁆𑀫𑁄𑀢𑀺 𑀳𑁂𑀢𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦). 𑀅𑀢𑁆𑀣𑁄𑀢𑀺 𑀳𑁂𑀢𑀼𑀨𑀮𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦). 𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄; 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀁. 𑀧𑀝𑀺𑀯𑁂𑀥𑁄𑀢𑀺 𑀅𑀪𑀺𑀲𑀫𑀬𑁄. 𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄. 𑀯𑀺𑀲𑀬𑀢𑁄 𑀘 𑀅𑀲𑀫𑁆𑀫𑁄𑀳𑀢𑁄 𑀘; 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄. 𑀢𑁂𑀲𑀁 𑀢𑁂𑀲𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀼 𑀬𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀯𑀸 𑀅𑀢𑁆𑀣𑀚𑀸𑀢𑀁 𑀯𑀸 𑀬𑀸 𑀘𑀸𑀬𑀁 𑀬𑀣𑀸 𑀬𑀣𑀸 𑀜𑀸𑀧𑁂𑀢𑀩𑁆𑀩𑁄 𑀅𑀢𑁆𑀣𑁄 𑀲𑁄𑀢𑀽𑀦𑀁 𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑁄 𑀳𑁄𑀢𑀺 𑀢𑀣𑀸 𑀢𑀣𑀸 𑀢𑀤𑀢𑁆𑀣𑀚𑁄𑀢𑀺𑀓𑀸 𑀤𑁂𑀲𑀦𑀸, 𑀬𑁄 𑀘𑁂𑀢𑁆𑀣 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀲𑀗𑁆𑀔𑀸𑀢𑁄 𑀧𑀝𑀺𑀯𑁂𑀥𑁄 𑀢𑁂𑀲𑀁 𑀢𑁂𑀲𑀁 𑀯𑀸 𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑁋 𑀲𑀩𑁆𑀩𑀫𑁆𑀧𑁂𑀢𑀁 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀧𑁆𑀧𑀜𑁆𑀜𑁂𑀳𑀺, 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄, 𑀤𑀼𑀓𑁆𑀔𑁄𑀕𑀸𑀳𑀁 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀜𑁆𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀁. 𑀏𑀯𑀫𑁆𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀘 𑁋

𑀤𑁂𑀲𑀦𑀸𑀲𑀸𑀲𑀦𑀓𑀣𑀸𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂𑀢𑀺 𑁋

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂𑀢𑀺.

𑀏𑀢𑁆𑀣 𑀧𑀦 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀢𑀺𑀯𑀺𑀥𑁄 𑀧𑀭𑀺𑀬𑀢𑁆𑀢𑀺𑀪𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀲𑁆𑀲𑁄 𑀳𑀺 𑀧𑀭𑀺𑀬𑀢𑁆𑀢𑀺𑀬𑁄 𑁋 𑀅𑀮𑀕𑀤𑁆𑀤𑀽𑀧𑀫𑀸 𑀦𑀺𑀲𑁆𑀲𑀭𑀡𑀢𑁆𑀣𑀸 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺.

𑀢𑀢𑁆𑀣 𑀬𑀸 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸 𑀅𑀬𑀁 𑀅𑀮𑀕𑀤𑁆𑀤𑀽𑀧𑀫𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁, 𑀢𑀫𑁂𑀦𑀁 𑀪𑁄𑀕𑁂 𑀯𑀸 𑀦𑀗𑁆𑀕𑀼𑀝𑁆𑀞𑁂 𑀯𑀸 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀲 𑀲𑁄 𑀅𑀮𑀕𑀤𑁆𑀤𑁄 𑀧𑀝𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂 𑀟𑀁𑀲𑁂𑀬𑁆𑀬, 𑀲𑁄 𑀢𑀢𑁄 𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀁, 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀺, 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀢𑀁 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁮).

𑀬𑀸 𑀧𑀦 𑀲𑀼𑀕𑁆𑀕𑀳𑀺𑀢𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀧𑀽𑀭𑀺𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑁂𑀦 𑀧𑀭𑀺𑀬𑀸𑀧𑀼𑀝𑀸 𑀦 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼, 𑀅𑀬𑀁 𑀦𑀺𑀲𑁆𑀲𑀭𑀡𑀢𑁆𑀣𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁯).

𑀬𑀁 𑀧𑀦 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄 𑀧𑀳𑀻𑀦𑀓𑀺𑀮𑁂𑀲𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄 𑀓𑁂𑀯𑀮𑀁 𑀧𑀯𑁂𑀡𑀺𑀧𑀸𑀮𑀦𑀢𑁆𑀣𑀸𑀬 𑀯𑀁𑀲𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀬𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺.

𑀯𑀺𑀦𑀬𑁂 𑀧𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀲𑀼𑀢𑁆𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀙𑀴𑀪𑀺𑀜𑁆𑀜𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀅𑀪𑀺𑀥𑀫𑁆𑀫𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀸𑀢𑀺 𑀢𑀸𑀲𑀜𑁆𑀘 𑀢𑀢𑁆𑀣𑁂𑀯 𑀧𑀪𑁂𑀤𑀯𑀘𑀦𑀢𑁄. 𑀏𑀯𑀫𑁂𑀢𑁂𑀲𑀼 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀯𑀺𑀚𑁆𑀚𑀸𑀢𑁆𑀢𑀬𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺.

𑀯𑀺𑀦𑀬𑁂 𑀧𑀦 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀜𑁆𑀜𑀸𑀢𑀲𑀼𑀔𑀲𑀫𑁆𑀨𑀲𑁆𑀲𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀨𑀲𑁆𑀲𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑀸𑀤𑀻𑀲𑀼 𑀅𑀦𑀯𑀚𑁆𑀚𑀲𑀜𑁆𑀜𑀻 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁪). 𑀢𑀢𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀲𑀼𑀢𑁆𑀢𑁂 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫) 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁬). 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀥𑀫𑁆𑀫𑀘𑀺𑀦𑁆𑀢𑀁 𑀅𑀢𑀺𑀥𑀸𑀯𑀦𑁆𑀢𑁄 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀘𑀺𑀦𑁆𑀢𑁂𑀢𑀺, 𑀢𑀢𑁄 𑀘𑀺𑀢𑁆𑀢𑀓𑁆𑀔𑁂𑀧𑀁 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺, 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀏𑀯𑀫𑁂𑀢𑁂𑀲𑀼 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀤𑀼𑀲𑁆𑀲𑀻𑀮𑀪𑀸𑀯𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀸𑀘𑀺𑀢𑁆𑀢𑀓𑁆𑀔𑁂𑀧𑀧𑁆𑀧𑀪𑁂𑀤𑀁 𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑁋

𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂𑀢𑀺.

𑀅𑀬𑀫𑁆𑀧𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀺𑀝𑀓𑀸𑀦𑀺 𑀜𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀩𑀫𑁆𑀧𑁂𑀢𑀁 𑀲𑀗𑁆𑀕𑀬𑁆𑀳𑀫𑀸𑀦𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀳𑁄𑀦𑁆𑀢𑀺.

𑀓𑀣𑀁 𑀦𑀺𑀓𑀸𑀬𑀢𑁄 𑀧𑀜𑁆𑀘 𑀦𑀺𑀓𑀸𑀬𑀸𑀢𑀺? 𑀲𑀩𑁆𑀩𑀫𑁂𑀯 𑀳𑁂𑀢𑀁 𑀤𑀻𑀖𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀤𑀻𑀖𑀦𑀺𑀓𑀸𑀬𑁄? 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺.

𑀘𑀢𑀼𑀢𑁆𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀢𑀺𑀯𑀕𑁆𑀕𑁄 𑀬𑀲𑁆𑀲 𑀲𑀗𑁆𑀕𑀳𑁄;

𑀏𑀲 𑀤𑀻𑀖𑀦𑀺𑀓𑀸𑀬𑁄𑀢𑀺, 𑀧𑀞𑀫𑁄 𑀅𑀦𑀼𑀮𑁄𑀫𑀺𑀓𑁄.

𑀓𑀲𑁆𑀫𑀸 𑀧𑀦𑁂𑀲 𑀤𑀻𑀖𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺? 𑀤𑀻𑀖𑀧𑁆𑀧𑀫𑀸𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀲𑀫𑀽𑀳𑀢𑁄 𑀦𑀺𑀯𑀸𑀲𑀢𑁄 𑀘. 𑀲𑀫𑀽𑀳𑀦𑀺𑀯𑀸𑀲𑀸 𑀳𑀺 𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 (𑀲𑀁. 𑀦𑀺. 𑁩.𑁧𑁦𑁦), 𑀧𑁄𑀡𑀺𑀓𑀦𑀺𑀓𑀸𑀬𑁄, 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄’’𑀢𑀺. 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺 𑀲𑀸𑀲𑀦𑀢𑁄 𑀮𑁄𑀓𑀢𑁄 𑀘. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀦𑀺𑀓𑀸𑀬𑀪𑀸𑀯𑁂 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄? 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀸𑀦𑀺 𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀻𑀦𑀺 𑀤𑀺𑀬𑀟𑁆𑀠𑀲𑀢𑀁 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺.

𑀤𑀺𑀬𑀟𑁆𑀠𑀲𑀢𑀲𑀼𑀢𑁆𑀢𑀦𑁆𑀢𑀸, 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺 𑀬𑀢𑁆𑀣 𑀲𑁄;

𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑁄 𑀧𑀜𑁆𑀘, 𑀤𑀲𑀯𑀕𑁆𑀕𑀧𑀭𑀺𑀕𑁆𑀕𑀳𑁄.

𑀓𑀢𑀫𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄? 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀺𑀢𑀸𑀦𑀺 𑀑𑀖𑀢𑀭𑀡𑀸𑀤𑀻𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘 𑀤𑁆𑀯𑀸𑀲𑀝𑁆𑀞𑀺 𑀘 𑀲𑀼𑀢𑁆𑀢𑀸𑀦𑀺.

𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀤𑁆𑀯𑀸𑀲𑀝𑁆𑀞𑀺 𑀘𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀏𑀲𑁄 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄.

𑀓𑀢𑀫𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄? 𑀏𑀓𑁂𑀓𑀅𑀗𑁆𑀕𑀸𑀢𑀺𑀭𑁂𑀓𑀯𑀲𑁂𑀦 𑀞𑀺𑀢𑀸𑀦𑀺 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀸𑀤𑀻𑀦𑀺 𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀲𑀢𑁆𑀢𑀧𑀜𑁆𑀜𑀸𑀲𑀜𑁆𑀘 𑀲𑀼𑀢𑁆𑀢𑀸𑀦𑀺.

𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀲𑀢𑁆𑀢𑀧𑀜𑁆𑀜𑀸𑀲𑀲𑀼𑀢𑁆𑀢𑀸𑀦𑀺, 𑀲𑀗𑁆𑀔𑁆𑀬𑀸 𑀅𑀗𑁆𑀕𑀼𑀢𑁆𑀢𑀭𑁂 𑀅𑀬𑀁.

𑀓𑀢𑀫𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄? 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀔𑀼𑀤𑁆𑀤𑀓𑀧𑀸𑀞, 𑀥𑀫𑁆𑀫𑀧𑀤𑀸𑀤𑀬𑁄 𑀘 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀸 𑀧𑀜𑁆𑀘𑀤𑀲𑀧𑁆𑀧𑀪𑁂𑀤𑀸; 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺.

𑀞𑀧𑁂𑀢𑁆𑀯𑀸 𑀘𑀢𑀼𑀭𑁄𑀧𑁂𑀢𑁂, 𑀦𑀺𑀓𑀸𑀬𑁂 𑀤𑀻𑀖𑀆𑀤𑀺𑀓𑁂;

𑀢𑀤𑀜𑁆𑀜𑀁 𑀩𑀼𑀤𑁆𑀥𑀯𑀘𑀦𑀁, 𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑁄 𑀫𑀢𑁄𑀢𑀺.

𑀏𑀯𑀁 𑀦𑀺𑀓𑀸𑀬𑀢𑁄 𑀧𑀜𑁆𑀘 𑀦𑀺𑀓𑀸𑀬𑀸 𑀳𑁄𑀦𑁆𑀢𑀺.

𑀓𑀣𑀁 𑀅𑀗𑁆𑀕𑀯𑀲𑁂𑀦 𑀦𑀯𑀗𑁆𑀕𑀸𑀦𑀻𑀢𑀺? 𑀲𑀩𑁆𑀩𑀫𑁂𑀯 𑀳𑀺𑀤𑀁 ‘𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮’𑀦𑁆𑀢𑀺 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀫𑀗𑁆𑀕𑀮𑀲𑀼𑀢𑁆𑀢𑀭𑀢𑀦𑀲𑀼𑀢𑁆𑀢𑀦𑀸𑀮𑀓𑀲𑀼𑀢𑁆𑀢𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀺 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄. 𑀲𑀓𑀮𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁, 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀁 𑀣𑁂𑀭𑀕𑀸𑀣𑀸 𑀣𑁂𑀭𑀻𑀕𑀸𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑀸𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀇𑀢𑀺𑀯𑀼. 𑁧) 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸 (𑀤𑀻. 𑀦𑀺. 𑁨.𑁨𑁦𑁯; 𑀅. 𑀦𑀺. 𑁪.𑁧𑁨𑁯) 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀽𑀴𑀯𑁂𑀤𑀮𑁆𑀮𑀫𑀳𑀸𑀯𑁂𑀤𑀮𑁆𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀓𑁆𑀓𑀧𑀜𑁆𑀳𑀲𑀗𑁆𑀔𑀸𑀭𑀪𑀸𑀚𑀦𑀻𑀬𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑀁 𑀅𑀗𑁆𑀕𑀢𑁄 𑀦𑀯𑀗𑁆𑀕𑀸𑀦𑀺.

𑀓𑀣𑀁 𑀥𑀫𑁆𑀫𑀓𑁆𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺? 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀩𑀼𑀤𑁆𑀥𑀯𑀘𑀦𑀁.

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭);

𑀏𑀯𑀁 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀬𑀁 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀁 𑀢𑀢𑁆𑀣 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀕𑀡𑀦𑀸. 𑀕𑀸𑀣𑀸𑀩𑀦𑁆𑀥𑁂𑀲𑀼 𑀧𑀜𑁆𑀳𑀸𑀧𑀼𑀘𑁆𑀙𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑁄. 𑀅𑀪𑀺𑀥𑀫𑁆𑀫𑁂 𑀏𑀓𑀫𑁂𑀓𑀁 𑀢𑀺𑀓𑀤𑀼𑀓𑀪𑀸𑀚𑀦𑀁 𑀏𑀓𑀫𑁂𑀓𑀜𑁆𑀘 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀯𑀺𑀦𑀬𑁂 𑀅𑀢𑁆𑀣𑀺 𑀯𑀢𑁆𑀣𑀼, 𑀅𑀢𑁆𑀣𑀺 𑀫𑀸𑀢𑀺𑀓𑀸, 𑀅𑀢𑁆𑀣𑀺 𑀧𑀤𑀪𑀸𑀚𑀦𑀻𑀬𑀁, 𑀅𑀢𑁆𑀣𑀺 𑀆𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀦𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀦𑁆𑀢𑀭𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀢𑀺𑀓𑀘𑁆𑀙𑁂𑀤𑁄. 𑀢𑀢𑁆𑀣 𑀏𑀓𑀫𑁂𑀓𑁄 𑀓𑁄𑀝𑁆𑀞𑀸𑀲𑁄 𑀏𑀓𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀥𑀫𑁆𑀫𑀓𑁆𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺.

𑀏𑀯𑀫𑁂𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀓𑀸𑀮𑁂 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀦 𑀯𑀲𑀻𑀕𑀡𑁂𑀦 𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁, 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀅𑀬𑀁 𑀤𑀻𑀖𑀦𑀺𑀓𑀸𑀬𑁄…𑀧𑁂… 𑀅𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑁄, 𑀇𑀫𑀸𑀦𑀺 𑀲𑀼𑀢𑁆𑀢𑀸𑀤𑀻𑀦𑀺 𑀦𑀯𑀗𑁆𑀕𑀸𑀦𑀺, 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀇𑀫𑀁 𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀯 𑀲𑀗𑁆𑀕𑀻𑀢𑀁. 𑀦 𑀓𑁂𑀯𑀮𑀜𑁆𑀘 𑀇𑀫𑀫𑁂𑀯 𑀅𑀜𑁆𑀜𑀫𑁆𑀧𑀺 𑀉𑀤𑁆𑀤𑀸𑀦𑀲𑀗𑁆𑀕𑀳𑀯𑀕𑁆𑀕𑀲𑀗𑁆𑀕𑀳𑀧𑁂𑀬𑁆𑀬𑀸𑀮𑀲𑀗𑁆𑀕𑀳𑀏𑀓𑀦𑀺𑀧𑀸𑀢𑀤𑀼𑀓𑀦𑀺𑀧𑀸𑀢𑀸𑀤𑀺𑀦𑀺𑀧𑀸𑀢𑀲𑀗𑁆𑀕𑀳𑀲𑀁𑀬𑀼𑀢𑁆𑀢𑀲𑀗𑁆𑀕𑀳 𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀺𑀅𑀦𑁂𑀓𑀯𑀺𑀥𑀁, 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀁 𑀲𑀗𑁆𑀕𑀳𑀧𑁆𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀯 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀲𑀗𑁆𑀕𑀻𑀢𑀁.

𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑀇𑀤𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀁 𑀧𑀯𑀢𑁆𑀢𑀦𑀲𑀫𑀢𑁆𑀣𑀁 𑀓𑀢𑀦𑁆𑀢𑀺 𑀲𑀜𑁆𑀚𑀸𑀢𑀧𑁆𑀧𑀫𑁄𑀤𑀸 𑀲𑀸𑀥𑀼𑀓𑀸𑀭𑀁 𑀯𑀺𑀬 𑀤𑀤𑀫𑀸𑀦𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀫𑁆𑀧𑀺 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺. 𑀅𑀦𑁂𑀓𑀸𑀦𑀺 𑀘 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁.

𑀏𑀯𑀁 𑀲𑀗𑁆𑀕𑀻𑀢𑁂 𑀧𑀦𑁂𑀢𑁆𑀣 𑀅𑀬𑀁 𑀅𑀪𑀺𑀥𑀫𑁆𑀫𑁄 𑀧𑀺𑀝𑀓𑀢𑁄 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀓𑀸𑀬𑀢𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄, 𑀅𑀗𑁆𑀕𑀢𑁄 𑀯𑁂𑀬𑁆𑀬𑀸𑀓𑀭𑀡𑀁, 𑀥𑀫𑁆𑀫𑀓𑁆𑀔𑀦𑁆𑀥𑀢𑁄 𑀓𑀢𑀺𑀧𑀬𑀸𑀦𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺.

𑀢𑀁 𑀥𑀸𑀭𑀬𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀼𑀩𑁆𑀩𑁂 𑀏𑀓𑁄 𑀪𑀺𑀓𑁆𑀔𑀼 𑀲𑀩𑁆𑀩𑀲𑀸𑀫𑀬𑀺𑀓𑀧𑀭𑀺𑀲𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀢𑁄 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀩𑁆𑀬𑀸𑀓𑀢𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀼𑀲𑀮𑀸 𑀲𑀺𑀬𑀸 𑀅𑀓𑀼𑀲𑀮𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸; 𑀤𑀲𑀸𑀬𑀢𑀦𑀸 𑀅𑀩𑁆𑀬𑀸𑀓𑀢𑀸, 𑀤𑁆𑀯𑁂 𑀆𑀬𑀢𑀦𑀸 𑀲𑀺𑀬𑀸 𑀓𑀼𑀲𑀮𑀸 𑀲𑀺𑀬𑀸 𑀅𑀓𑀼𑀲𑀮𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸; 𑀲𑁄𑀴𑀲 𑀥𑀸𑀢𑀼𑀬𑁄 𑀅𑀩𑁆𑀬𑀸𑀓𑀢𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀲𑀺𑀬𑀸 𑀓𑀼𑀲𑀮𑀸 𑀲𑀺𑀬𑀸 𑀅𑀓𑀼𑀲𑀮𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸; 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀫𑀕𑁆𑀕𑀲𑀘𑁆𑀘𑀁 𑀓𑀼𑀲𑀮𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁; 𑀤𑀲𑀺𑀦𑁆𑀤𑁆𑀭𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀓𑀼𑀲𑀮𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮𑀁, 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀺𑀬𑀸 𑀓𑀼𑀲𑀮𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀺𑀬𑀸 𑀓𑀼𑀲𑀮𑀸 𑀲𑀺𑀬𑀸 𑀅𑀓𑀼𑀲𑀮𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺.

𑀢𑀲𑁆𑀫𑀺𑀁 𑀞𑀸𑀦𑁂 𑀏𑀓𑁄 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 ‘𑀥𑀫𑁆𑀫𑀓𑀣𑀺𑀓 𑀢𑁆𑀯𑀁 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀤𑀻𑀖𑀲𑀼𑀢𑁆𑀢𑀁 𑀆𑀳𑀭𑀲𑀺, 𑀓𑀺𑀁 𑀲𑀼𑀢𑁆𑀢𑀁 𑀦𑀸𑀫𑁂𑀢’𑀦𑁆𑀢𑀺 𑀆𑀳. ‘𑀅𑀪𑀺𑀥𑀫𑁆𑀫𑀲𑀼𑀢𑁆𑀢𑀁 𑀦𑀸𑀫, 𑀆𑀯𑀼𑀲𑁄’𑀢𑀺. ‘𑀅𑀪𑀺𑀥𑀫𑁆𑀫𑀲𑀼𑀢𑁆𑀢𑀁 𑀓𑀲𑁆𑀫𑀸 𑀆𑀳𑀭𑀲𑀺? 𑀓𑀺𑀁 𑀅𑀜𑁆𑀜𑀁 𑀩𑀼𑀤𑁆𑀥𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺? ‘𑀅𑀪𑀺𑀥𑀫𑁆𑀫𑁄 𑀓𑁂𑀦 𑀪𑀸𑀲𑀺𑀢𑁄’𑀢𑀺? ‘𑀦 𑀏𑀲𑁄 𑀩𑀼𑀤𑁆𑀥𑀪𑀸𑀲𑀺𑀢𑁄’𑀢𑀺. ‘𑀓𑀺𑀁 𑀧𑀦 𑀢𑁂, 𑀆𑀯𑀼𑀲𑁄, 𑀯𑀺𑀦𑀬𑀧𑀺𑀝𑀓𑀁 𑀉𑀕𑁆𑀕𑀳𑀺𑀢’𑀦𑁆𑀢𑀺? ‘𑀦 𑀉𑀕𑁆𑀕𑀳𑀺𑀢𑀁, 𑀆𑀯𑀼𑀲𑁄’𑀢𑀺. ‘𑀅𑀯𑀺𑀦𑀬𑀥𑀸𑀭𑀺𑀢𑀸𑀬 𑀫𑀜𑁆𑀜𑁂 𑀢𑁆𑀯𑀁 𑀅𑀚𑀸𑀦𑀦𑁆𑀢𑁄 𑀏𑀯𑀁 𑀯𑀤𑁂𑀲𑀻’𑀢𑀺. ‘𑀯𑀺𑀦𑀬𑀫𑀢𑁆𑀢𑀫𑁂𑀯, 𑀆𑀯𑀼𑀲𑁄, 𑀉𑀕𑁆𑀕𑀳𑀺𑀢’𑀦𑁆𑀢𑀺. ‘𑀢𑀫𑁆𑀧𑀺 𑀢𑁂 𑀤𑀼𑀕𑁆𑀕𑀳𑀺𑀢𑀁, 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀦 𑀉𑀕𑁆𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀺; 𑀢𑀼𑀫𑁆𑀳𑀸𑀤𑀺𑀲𑁂 𑀳𑀺 𑀧𑀩𑁆𑀩𑀸𑀚𑁂𑀦𑁆𑀢𑁄 𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 𑀯𑀸 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺’. ‘𑀓𑀺𑀁 𑀓𑀸𑀭𑀡𑀸’? 𑀯𑀺𑀦𑀬𑀫𑀢𑁆𑀢𑀲𑁆𑀲𑀧𑀺 𑀤𑀼𑀕𑁆𑀕𑀳𑀺𑀢𑀢𑁆𑀢𑀸; 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀢𑁆𑀣 𑀅𑀦𑀸𑀧𑀢𑁆𑀢𑀺, 𑀦 𑀯𑀺𑀯𑀡𑁆𑀡𑁂𑀢𑀼𑀓𑀸𑀫𑁄 𑀇𑀗𑁆𑀖 𑀢𑀸𑀯, 𑀆𑀯𑀼𑀲𑁄, 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀕𑀸𑀣𑀸𑀬𑁄 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀭𑀺𑀬𑀸𑀧𑀼𑀡𑀲𑁆𑀲𑀼, 𑀧𑀘𑁆𑀙𑀸𑀧𑀺 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺 (𑀧𑀸𑀘𑀺. 𑁪𑁪𑁨) 𑀪𑀡𑀢𑀺. ‘‘𑀲𑀼𑀢𑁆𑀢𑀦𑁆𑀢𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀯𑀺𑀦𑀬𑀁 𑀯𑀸 𑀧𑀼𑀘𑁆𑀙𑀢𑀺, 𑀅𑀪𑀺𑀥𑀫𑁆𑀫𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀯𑀺𑀦𑀬𑀁 𑀯𑀸 𑀧𑀼𑀘𑁆𑀙𑀢𑀺, 𑀯𑀺𑀦𑀬𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀼𑀘𑁆𑀙𑀢𑀻’’𑀢𑀺 (𑀧𑀸𑀘𑀺. 𑁧𑁨𑁨𑁧). ‘𑀢𑁆𑀯𑀁 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀦 𑀚𑀸𑀦𑀸𑀲𑀻’𑀢𑀺 𑀏𑀢𑁆𑀢𑀓𑁂𑀦𑀧𑀺 𑀧𑀭𑀯𑀸𑀤𑀻 𑀦𑀺𑀕𑁆𑀕𑀳𑀺𑀢𑁄 𑀳𑁄𑀢𑀺.

𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁 𑀧𑀦 𑀇𑀢𑁄𑀧𑀺 𑀩𑀮𑀯𑀢𑀭𑀁. 𑀢𑀢𑁆𑀭 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀆𑀭𑁄𑀘𑁂𑀢𑀼𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀆𑀭𑁄𑀘𑁂𑀦𑁆𑀢𑁄 ‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀦𑁄 𑀘 𑀲𑀁𑀲𑀸𑀤𑁂𑀦𑁆𑀢𑀺, 𑀥𑀫𑁆𑀫𑀻 𑀘 𑀦𑁂𑀲𑀁 𑀓𑀣𑀸𑀧𑀯𑀢𑁆𑀢𑀺𑀦𑀻 𑀳𑁄𑀢𑀺, 𑀏𑀯𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁧.𑁩𑁪𑁩) 𑀆𑀳. 𑀲𑀢𑁆𑀣𑀸 𑀆𑀪𑀺𑀥𑀫𑁆𑀫𑀺𑀓𑀸 𑀦𑀸𑀫 𑀫𑀫 𑀲𑀸𑀲𑀦𑁂 𑀧𑀭𑀺𑀩𑀸𑀳𑀺𑀭𑀸𑀢𑀺 𑀅𑀯𑀢𑁆𑀯𑀸 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑀁 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀻𑀓𑀁 𑀫𑀳𑀸𑀫𑀼𑀔𑀁 𑀧𑀽𑀭𑁂𑀢𑁆𑀯𑀸 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀲𑀸𑀥𑀼 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀬𑀣𑀸 𑀢𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢 𑀥𑀫𑁆𑀫𑀓𑀣𑀺𑀓𑁄’’𑀢𑀺 (𑀫. 𑀦𑀺. 𑁧.𑁩𑁪𑁩) 𑀆𑀳. 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀬𑁂𑀯 𑀓𑀺𑀭 𑀥𑀫𑁆𑀫𑀓𑀣𑀺𑀓𑀸 𑀦𑀸𑀫, 𑀅𑀯𑀲𑁂𑀲𑀸 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀧𑀺 𑀦 𑀥𑀫𑁆𑀫𑀓𑀣𑀺𑀓𑀸. 𑀓𑀲𑁆𑀫𑀸? 𑀢𑁂 𑀳𑀺 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸 𑀓𑀫𑁆𑀫𑀦𑁆𑀢𑀭𑀁 𑀯𑀺𑀧𑀸𑀓𑀦𑁆𑀢𑀭𑀁 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀥𑀫𑁆𑀫𑀦𑁆𑀢𑀭𑀁 𑀆𑀮𑁄𑀴𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀆𑀪𑀺𑀥𑀫𑁆𑀫𑀺𑀓𑀸 𑀧𑀦 𑀥𑀫𑁆𑀫𑀦𑁆𑀢𑀭𑀁 𑀦 𑀆𑀮𑁄𑀴𑁂𑀦𑁆𑀢𑀺. 𑀢𑀲𑁆𑀫𑀸 𑀆𑀪𑀺𑀥𑀫𑁆𑀫𑀺𑀓𑁄 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀓𑀣𑁂𑀢𑀼 𑀯𑀸 𑀫𑀸 𑀯𑀸, 𑀧𑀼𑀘𑁆𑀙𑀺𑀢𑀓𑀸𑀮𑁂 𑀧𑀦 𑀧𑀜𑁆𑀳𑀁 𑀓𑀣𑁂𑀲𑁆𑀲𑀢𑀻𑀢𑀺. 𑀅𑀬𑀫𑁂𑀯 𑀏𑀓𑀦𑁆𑀢𑀥𑀫𑁆𑀫𑀓𑀣𑀺𑀓𑁄 𑀦𑀸𑀫 𑀳𑁄𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘𑀲𑀼𑀓𑀣𑀺𑀢𑀁 𑀫𑁄𑀕𑁆𑀕𑀮𑁆𑀮𑀸𑀦𑁂𑀦𑀸’𑀢𑀺 𑀆𑀳.

𑀅𑀪𑀺𑀥𑀫𑁆𑀫𑀁 𑀧𑀝𑀺𑀩𑀸𑀳𑁂𑀦𑁆𑀢𑁄 𑀇𑀫𑀲𑁆𑀫𑀺𑀁 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀩𑀸𑀳𑀢𑀺, 𑀲𑀢𑁆𑀣𑀼 𑀯𑁂𑀲𑀸𑀭𑀚𑁆𑀚𑀜𑁆𑀜𑀸𑀡𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑀺, 𑀲𑁄𑀢𑀼𑀓𑀸𑀫𑀁 𑀧𑀭𑀺𑀲𑀁 𑀯𑀺𑀲𑀁𑀯𑀸𑀤𑁂𑀢𑀺, 𑀅𑀭𑀺𑀬𑀫𑀕𑁆𑀕𑁂 𑀆𑀯𑀭𑀡𑀁 𑀩𑀦𑁆𑀥𑀢𑀺, 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀏𑀓𑀲𑁆𑀫𑀺𑀁 𑀲𑀦𑁆𑀤𑀺𑀲𑁆𑀲𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑁄 𑀳𑁄𑀢𑀺. 𑀢𑀁 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑁄 ‘𑀕𑀘𑁆𑀙 𑀯𑀺𑀖𑀸𑀲𑀸𑀤𑁄 𑀳𑀼𑀢𑁆𑀯𑀸 𑀚𑀻𑀯𑀺𑀲𑁆𑀲𑀲𑀻’𑀢𑀺.

𑀅𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀘𑁂 𑀅𑀪𑀺𑀥𑀫𑁆𑀫𑁄 𑀩𑀼𑀤𑁆𑀥𑀪𑀸𑀲𑀺𑀢𑁄, 𑀬𑀣𑀸 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀳𑀲𑁆𑀲𑁂𑀲𑀼 ‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑀸𑀦𑀁 𑀲𑀚𑁆𑀚𑀺𑀢𑀁, 𑀏𑀯𑀫𑀲𑁆𑀲𑀸𑀧𑀺 𑀦𑀺𑀤𑀸𑀦𑀁 𑀲𑀚𑁆𑀚𑀺𑀢𑀁 𑀪𑀯𑁂𑀬𑁆𑀬𑀸’’𑀢𑀺. 𑀲𑁄 ‘𑀚𑀸𑀢𑀓𑀲𑀼𑀢𑁆𑀢𑀦𑀺𑀧𑀸𑀢𑀥𑀫𑁆𑀫𑀧𑀤𑀸𑀤𑀻𑀦𑀁 𑀏𑀯𑀭𑀽𑀧𑀁 𑀦𑀺𑀤𑀸𑀦𑀁 𑀦𑀢𑁆𑀣𑀺, 𑀦 𑀘𑁂𑀢𑀸𑀦𑀺 𑀦 𑀩𑀼𑀤𑁆𑀥𑀪𑀸𑀲𑀺𑀢𑀸𑀦𑀻’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋 ‘𑀧𑀡𑁆𑀟𑀺𑀢, 𑀅𑀪𑀺𑀥𑀫𑁆𑀫𑁄 𑀦𑀸𑀫𑁂𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑁄, 𑀦 𑀅𑀜𑁆𑀜𑁂𑀲𑀁 𑀯𑀺𑀲𑀬𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀑𑀓𑁆𑀓𑀦𑁆𑀢𑀺 𑀧𑀸𑀓𑀝𑀸, 𑀅𑀪𑀺𑀚𑀸𑀢𑀺 𑀧𑀸𑀓𑀝𑀸, 𑀅𑀪𑀺𑀲𑀫𑁆𑀩𑁄𑀥𑀺 𑀧𑀸𑀓𑀝𑀸, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀧𑀸𑀓𑀝𑀁. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀧𑀸𑀓𑀝𑀁, 𑀢𑀺𑀤𑀺𑀯𑀓𑁆𑀓𑀫𑁄 𑀧𑀸𑀓𑀝𑁄, 𑀤𑁂𑀯𑀮𑁄𑀓𑁂 𑀤𑁂𑀲𑀺𑀢𑀪𑀸𑀯𑁄 𑀧𑀸𑀓𑀝𑁄, 𑀤𑁂𑀯𑁄𑀭𑁄𑀳𑀦𑀁 𑀧𑀸𑀓𑀝𑀁. 𑀬𑀣𑀸 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀳𑀢𑁆𑀣𑀺𑀭𑀢𑀦𑀁 𑀯𑀸 𑀅𑀲𑁆𑀲𑀭𑀢𑀦𑀁 𑀯𑀸 𑀣𑁂𑀦𑁂𑀢𑁆𑀯𑀸 𑀬𑀸𑀦𑀓𑁂 𑀬𑁄𑀚𑁂𑀢𑁆𑀯𑀸 𑀯𑀺𑀘𑀭𑀡𑀁 𑀦𑀸𑀫 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀁; 𑀘𑀓𑁆𑀓𑀭𑀢𑀦𑀁 𑀯𑀸 𑀧𑀦 𑀣𑁂𑀦𑁂𑀢𑁆𑀯𑀸 𑀧𑀮𑀸𑀮𑀲𑀓𑀝𑁂 𑀑𑀮𑀫𑁆𑀩𑀺𑀢𑁆𑀯𑀸 𑀯𑀺𑀘𑀭𑀡𑀁 𑀦𑀸𑀫 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀁; 𑀬𑁄𑀚𑀦𑀧𑁆𑀧𑀫𑀸𑀡𑀁 𑀑𑀪𑀸𑀲𑀦𑀲𑀫𑀢𑁆𑀣𑀁 𑀫𑀡𑀺𑀭𑀢𑀦𑀁 𑀯𑀸 𑀧𑀦 𑀓𑀧𑁆𑀧𑀸𑀲𑀧𑀘𑁆𑀙𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀴𑀜𑁆𑀚𑀦𑀁 𑀦𑀸𑀫 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀭𑀸𑀚𑀸𑀭𑀳𑀪𑀡𑁆𑀟𑀢𑀸𑀬; 𑀏𑀯𑀫𑁂𑀯 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀦 𑀅𑀜𑁆𑀜𑁂𑀲𑀁 𑀯𑀺𑀲𑀬𑁄, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑁄. 𑀢𑁂𑀲𑀁 𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀤𑁂𑀲𑀦𑀸. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀑𑀓𑁆𑀓𑀦𑁆𑀢𑀺 𑀧𑀸𑀓𑀝𑀸…𑀧𑁂… 𑀤𑁂𑀯𑁄𑀭𑁄𑀳𑀦𑀁 𑀧𑀸𑀓𑀝𑀁. 𑀅𑀪𑀺𑀥𑀫𑁆𑀫𑀲𑁆𑀲 𑀦𑀺𑀤𑀸𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺 𑀧𑀡𑁆𑀟𑀺𑀢𑀸’𑀢𑀺. 𑀦 𑀳𑀺 𑀲𑀓𑁆𑀓𑀸 𑀏𑀯𑀁 𑀯𑀼𑀢𑁆𑀢𑁂 𑀧𑀭𑀯𑀸𑀤𑀺𑀦𑀸 𑀲𑀳𑀥𑀫𑁆𑀫𑀺𑀓𑀁 𑀉𑀤𑀸𑀳𑀭𑀡𑀁 𑀉𑀤𑀸𑀳𑀭𑀺𑀢𑀼𑀁.

𑀫𑀡𑁆𑀟𑀮𑀸𑀭𑀸𑀫𑀯𑀸𑀲𑀻 𑀢𑀺𑀲𑁆𑀲𑀪𑀽𑀢𑀺𑀢𑁆𑀣𑁂𑀭𑁄 𑀧𑀦 𑀫𑀳𑀸𑀩𑁄𑀥𑀺𑀦𑀺𑀤𑀸𑀦𑁄 𑀏𑀲 𑀅𑀪𑀺𑀥𑀫𑁆𑀫𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦 𑀲𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑁂𑀦 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄 𑀯𑀺𑀳𑀭𑀸𑀫𑀺 𑀢𑀲𑁆𑀲 𑀧𑀤𑁂𑀲𑁂𑀦 𑀯𑀺𑀳𑀸𑀲𑀺’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧) 𑀇𑀫𑀁 𑀧𑀤𑁂𑀲𑀯𑀺𑀳𑀸𑀭𑀲𑀼𑀢𑁆𑀢𑀦𑁆𑀢𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀲𑀺. 𑀤𑀲𑀯𑀺𑀥𑁄 𑀳𑀺 𑀧𑀤𑁂𑀲𑁄 𑀦𑀸𑀫 𑁋 𑀔𑀦𑁆𑀥𑀧𑀤𑁂𑀲𑁄, 𑀆𑀬𑀢𑀦𑀧𑀤𑁂𑀲𑁄, 𑀥𑀸𑀢𑀼𑀧𑀤𑁂𑀲𑁄, 𑀲𑀘𑁆𑀘𑀧𑀤𑁂𑀲𑁄, 𑀇𑀦𑁆𑀤𑁆𑀭𑀺𑀬𑀧𑀤𑁂𑀲𑁄, 𑀧𑀘𑁆𑀘𑀬𑀸𑀓𑀸𑀭𑀧𑀤𑁂𑀲𑁄, 𑀲𑀢𑀺𑀧𑀝𑁆𑀞𑀸𑀦𑀧𑀤𑁂𑀲𑁄, 𑀛𑀸𑀦𑀧𑀤𑁂𑀲𑁄, 𑀦𑀸𑀫𑀧𑀤𑁂𑀲𑁄, 𑀥𑀫𑁆𑀫𑀧𑀤𑁂𑀲𑁄𑀢𑀺. 𑀢𑁂𑀲𑀼 𑀲𑀢𑁆𑀣𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺. 𑀇𑀫𑀁 𑀢𑁂𑀫𑀸𑀲𑀁 𑀥𑀫𑁆𑀫𑀸𑀬𑀢𑀦𑁂 𑀯𑁂𑀤𑀦𑀸𑀯𑀲𑁂𑀦 𑀥𑀫𑁆𑀫𑀥𑀸𑀢𑀼𑀬𑀜𑁆𑀘 𑀯𑁂𑀤𑀦𑀸𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀤𑀼𑀓𑁆𑀔𑀲𑀘𑁆𑀘𑁂 𑀯𑁂𑀤𑀦𑀸𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀯𑁂𑀤𑀦𑀸𑀧𑀜𑁆𑀘𑀓𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀺𑀳𑀸𑀲𑀺. 𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀯𑀝𑁆𑀝𑀁 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀯𑁂𑀤𑀦𑀸𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀛𑀸𑀦𑀗𑁆𑀕𑁂𑀲𑀼 𑀯𑁂𑀤𑀦𑀸𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀦𑀸𑀫𑀁 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀢𑀢𑁆𑀣 𑀯𑁂𑀤𑀦𑀸𑀯𑀲𑁂𑀦𑁂𑀯 𑀯𑀺𑀳𑀸𑀲𑀺. 𑀥𑀫𑁆𑀫𑁂 𑀦𑀺𑀧𑁆𑀧𑀤𑁂𑀲𑁂𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀫𑀁 𑀢𑁂𑀫𑀸𑀲𑀁 𑀯𑁂𑀤𑀦𑀸𑀢𑁆𑀢𑀺𑀓𑀯𑀲𑁂𑀦𑁂𑀯 𑀯𑀺𑀳𑀸𑀲𑀻𑀢𑀺. 𑀏𑀯𑀁 𑀣𑁂𑀭𑁄 𑀧𑀤𑁂𑀲𑀯𑀺𑀳𑀸𑀭𑀲𑀼𑀢𑁆𑀢𑀦𑁆𑀢𑀯𑀲𑁂𑀦 𑀅𑀪𑀺𑀥𑀫𑁆𑀫𑀲𑁆𑀲 𑀦𑀺𑀤𑀸𑀦𑀁 𑀓𑀣𑁂𑀲𑀺.

𑀕𑀸𑀫𑀯𑀸𑀲𑀻 𑀲𑀼𑀫𑀦𑀤𑁂𑀯𑀢𑁆𑀣𑁂𑀭𑁄 𑀧𑀦 𑀳𑁂𑀝𑁆𑀞𑀸𑀮𑁄𑀳𑀧𑀸𑀲𑀸𑀤𑁂 𑀥𑀫𑁆𑀫𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘𑀅𑀬𑀁 𑀧𑀭𑀯𑀸𑀤𑀻 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀅𑀭𑀜𑁆𑀜𑁂 𑀓𑀦𑁆𑀤𑀦𑁆𑀢𑁄 𑀯𑀺𑀬, 𑀅𑀲𑀓𑁆𑀔𑀺𑀓𑀁 𑀅𑀟𑁆𑀟𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀘, 𑀅𑀪𑀺𑀥𑀫𑁆𑀫𑁂 𑀦𑀺𑀤𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀻’𑀢𑀺 𑀯𑀢𑁆𑀯𑀸 𑀦𑀺𑀤𑀸𑀦𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀤𑁂𑀯𑁂𑀲𑀼 𑀯𑀺𑀳𑀭𑀢𑀺 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺 𑁋 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺.

𑀅𑀜𑁆𑀜𑁂𑀲𑀼 𑀧𑀦 𑀲𑀼𑀢𑁆𑀢𑁂𑀲𑀼 𑀏𑀓𑀫𑁂𑀯 𑀦𑀺𑀤𑀸𑀦𑀁. 𑀅𑀪𑀺𑀥𑀫𑁆𑀫𑁂 𑀤𑁆𑀯𑁂 𑀦𑀺𑀤𑀸𑀦𑀸𑀦𑀺 𑁋 𑀅𑀥𑀺𑀕𑀫𑀦𑀺𑀤𑀸𑀦𑀜𑁆𑀘 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘. 𑀢𑀢𑁆𑀣 𑀅𑀥𑀺𑀕𑀫𑀦𑀺𑀤𑀸𑀦𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀯𑁂𑀤𑀺𑀢𑀩𑁆𑀩𑀁. 𑀤𑁂𑀲𑀦𑀸𑀦𑀺𑀤𑀸𑀦𑀁 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸. 𑀏𑀯𑀁 𑀉𑀪𑀬𑀦𑀺𑀤𑀸𑀦𑀲𑀫𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀁 𑀇𑀤𑀁 𑀢𑀸𑀯 𑀧𑀜𑁆𑀳𑀸𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀬𑀁 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀓𑁂𑀦 𑀧𑀪𑀸𑀯𑀺𑀢𑁄? 𑀓𑀢𑁆𑀣 𑀧𑀭𑀺𑀧𑀸𑀘𑀺𑀢𑁄? 𑀓𑀢𑁆𑀣 𑀅𑀥𑀺𑀕𑀢𑁄? 𑀓𑀤𑀸 𑀅𑀥𑀺𑀕𑀢𑁄? 𑀓𑁂𑀦 𑀅𑀥𑀺𑀕𑀢𑁄? 𑀓𑀢𑁆𑀣 𑀯𑀺𑀘𑀺𑀢𑁄? 𑀓𑀤𑀸 𑀯𑀺𑀘𑀺𑀢𑁄? 𑀓𑁂𑀦 𑀯𑀺𑀘𑀺𑀢𑁄? 𑀓𑀢𑁆𑀣 𑀤𑁂𑀲𑀺𑀢𑁄? 𑀓𑀲𑁆𑀲𑀢𑁆𑀣𑀸𑀬 𑀤𑁂𑀲𑀺𑀢𑁄? 𑀓𑀺𑀫𑀢𑁆𑀣𑀁 𑀤𑁂𑀲𑀺𑀢𑁄? 𑀓𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑁄? 𑀓𑁂 𑀲𑀺𑀓𑁆𑀔𑀦𑁆𑀢𑀺? 𑀓𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸? 𑀓𑁂 𑀥𑀸𑀭𑁂𑀦𑁆𑀢𑀺? 𑀓𑀲𑁆𑀲 𑀯𑀘𑀦𑀁? 𑀓𑁂𑀦𑀸𑀪𑀢𑁄𑀢𑀺?

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋 𑀓𑁂𑀦 𑀧𑀪𑀸𑀯𑀺𑀢𑁄𑀢𑀺 𑀩𑁄𑀥𑀺𑀅𑀪𑀺𑀦𑀻𑀳𑀸𑀭𑀲𑀤𑁆𑀥𑀸𑀬 𑀧𑀪𑀸𑀯𑀺𑀢𑁄. 𑀓𑀢𑁆𑀣 𑀧𑀭𑀺𑀧𑀸𑀘𑀺𑀢𑁄𑀢𑀺 𑀅𑀟𑁆𑀠𑀙𑀓𑁆𑀓𑁂𑀲𑀼 𑀚𑀸𑀢𑀓𑀲𑀢𑁂𑀲𑀼. 𑀓𑀢𑁆𑀣 𑀅𑀥𑀺𑀕𑀢𑁄𑀢𑀺 𑀩𑁄𑀥𑀺𑀫𑀽𑀮𑁂. 𑀓𑀤𑀸 𑀅𑀥𑀺𑀕𑀢𑁄𑀢𑀺 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀸𑀲𑀺𑀬𑀁. 𑀓𑁂𑀦𑀸𑀥𑀺𑀕𑀢𑁄𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦. 𑀓𑀢𑁆𑀣 𑀯𑀺𑀘𑀺𑀢𑁄𑀢𑀺 𑀩𑁄𑀥𑀺𑀫𑀡𑁆𑀟𑁂. 𑀓𑀤𑀸 𑀯𑀺𑀘𑀺𑀢𑁄𑀢𑀺 𑀭𑀢𑀦𑀖𑀭𑀲𑀢𑁆𑀢𑀸𑀳𑁂. 𑀓𑁂𑀦 𑀯𑀺𑀘𑀺𑀢𑁄𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦. 𑀓𑀢𑁆𑀣 𑀤𑁂𑀲𑀺𑀢𑁄𑀢𑀺 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼. 𑀓𑀲𑁆𑀲𑀢𑁆𑀣𑀸𑀬 𑀤𑁂𑀲𑀺𑀢𑁄𑀢𑀺 𑀤𑁂𑀯𑀢𑀸𑀦𑀁. 𑀓𑀺𑀫𑀢𑁆𑀣𑀁 𑀤𑁂𑀲𑀺𑀢𑁄𑀢𑀺 𑀘𑀢𑀼𑀭𑁄𑀖𑀦𑀺𑀤𑁆𑀥𑀭𑀡𑀢𑁆𑀣𑀁. 𑀓𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑁄𑀢𑀺 𑀤𑁂𑀯𑁂𑀳𑀺. 𑀓𑁂 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀓𑁆𑀔𑀸 𑀘 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀸 𑀘. 𑀓𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀓𑁂 𑀥𑀸𑀭𑁂𑀦𑁆𑀢𑀻𑀢𑀺 𑀬𑁂𑀲𑀁 𑀯𑀢𑁆𑀢𑀢𑀺 𑀢𑁂 𑀥𑀸𑀭𑁂𑀦𑁆𑀢𑀺. 𑀓𑀲𑁆𑀲 𑀯𑀘𑀦𑀦𑁆𑀢𑀺 𑀪𑀕𑀯𑀢𑁄 𑀯𑀘𑀦𑀁, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀓𑁂𑀦𑀸𑀪𑀢𑁄𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬.

𑀅𑀬𑀜𑁆𑀳𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀤𑁆𑀤𑀚𑀺 𑀲𑁄𑀪𑀺𑀢𑁄 𑀧𑀺𑀬𑀚𑀸𑀮𑀻 𑀧𑀺𑀬𑀧𑀸𑀮𑁄 𑀧𑀺𑀬𑀤𑀲𑁆𑀲𑀻 𑀓𑁄𑀲𑀺𑀬𑀧𑀼𑀢𑁆𑀢𑁄 𑀲𑀺𑀕𑁆𑀕𑀯𑁄 𑀲𑀦𑁆𑀤𑁂𑀳𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑀼𑀤𑀢𑁆𑀢𑁄 𑀥𑀫𑁆𑀫𑀺𑀬𑁄 𑀤𑀸𑀲𑀓𑁄 𑀲𑁄𑀡𑀓𑁄 𑀭𑁂𑀯𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀮𑀸 𑀆𑀪𑀢𑁄. 𑀢𑀢𑁄 𑀉𑀤𑁆𑀥𑀁 𑀢𑁂𑀲𑀁𑀬𑁂𑀯 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑁂𑀳𑀻𑀢𑀺 𑀏𑀯𑀁 𑀢𑀸𑀯 𑀚𑀫𑁆𑀩𑀼𑀤𑀻𑀧𑀢𑀮𑁂 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑁄. 𑀇𑀫𑀁 𑀧𑀦 𑀤𑀻𑀧𑀁 𑁋

𑀢𑀢𑁄 𑀫𑀳𑀺𑀦𑁆𑀤𑁄 𑀇𑀝𑁆𑀝𑀺𑀬𑁄, 𑀉𑀢𑁆𑀢𑀺𑀬𑁄 𑀲𑀫𑁆𑀩𑀮𑁄 𑀢𑀣𑀸;

𑀧𑀡𑁆𑀟𑀺𑀢𑁄 𑀪𑀤𑁆𑀤𑀦𑀸𑀫𑁄 𑀘, 𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸.

𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸𑀢𑀺 (𑀧𑀭𑀺. 𑁩, 𑁮).

𑀇𑀫𑁂𑀳𑀺 𑀫𑀳𑀸𑀦𑀸𑀕𑁂𑀳𑀺 𑀆𑀪𑀢𑁄. 𑀢𑀢𑁄 𑀉𑀤𑁆𑀥𑀁 𑀢𑁂𑀲𑀁𑀬𑁂𑀯 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀲𑀗𑁆𑀔𑀸𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯𑀚𑁆𑀚𑀢𑀦𑀓𑀸𑀮𑀸 𑀆𑀪𑀢𑁄.

𑀲𑀼𑀫𑁂𑀥𑀓𑀣𑀸

𑀏𑀯𑀁 𑀆𑀪𑀢𑀲𑁆𑀲 𑀧𑀦𑀲𑁆𑀲 𑀬𑀁 𑀢𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀅𑀥𑀺𑀕𑀫𑀦𑀺𑀤𑀸𑀦𑀁, 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘 𑀯𑀼𑀢𑁆𑀢𑀁, 𑀢𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀯𑁂𑀤𑀺𑀢𑀩𑁆𑀩𑀸 𑁋

𑀇𑀢𑁄 𑀓𑀺𑀭 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀅𑀫𑀭𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺 𑀉𑀪𑀢𑁄 𑀲𑀼𑀚𑀸𑀢𑁄, 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀺. 𑀢𑀲𑁆𑀲 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀅𑀣𑀲𑁆𑀲 𑀭𑀸𑀲𑀺𑀯𑀟𑁆𑀠𑀓𑁄 𑀅𑀫𑀘𑁆𑀘𑁄 𑀆𑀬𑀧𑁄𑀢𑁆𑀣𑀓𑀁 𑀆𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀧𑀽𑀭𑀺𑀢𑁂 𑀕𑀩𑁆𑀪𑁂 𑀯𑀺𑀯𑀭𑀺𑀢𑁆𑀯𑀸 ‘𑀏𑀢𑁆𑀢𑀓𑀁 𑀢𑁂 𑀓𑀼𑀫𑀸𑀭 𑀫𑀸𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀢𑀓𑀁 𑀧𑀺𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀢𑀓𑀸 𑀅𑀬𑁆𑀬𑀓𑀧𑀬𑁆𑀬𑀓𑀸𑀦𑀁 𑀲𑀦𑁆𑀢𑀓𑀸𑀢𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀥𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀏𑀢𑀁 𑀧𑀝𑀺𑀧𑀚𑁆𑀚𑀸𑀳𑀻’𑀢𑀺 𑀆𑀳. 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘𑀇𑀫𑀁 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀬𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀏𑀓𑀓𑀳𑀸𑀧𑀡𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦 𑀕𑀢𑀸, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀼𑀫𑁂𑀥𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑀼𑀤𑁆𑀥𑀯𑀁𑀲𑁂 (𑀩𑀼. 𑀯𑀁. 𑁨.𑁧-𑁩𑁩) 𑁋

𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀅𑀫𑀭𑀁 𑀦𑀸𑀫 𑀦𑀕𑀭𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁.

𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁, 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀁;

𑀳𑀢𑁆𑀣𑀺𑀲𑀤𑁆𑀤𑀁 𑀅𑀲𑁆𑀲𑀲𑀤𑁆𑀤𑀁, 𑀪𑁂𑀭𑀺𑀲𑀗𑁆𑀔𑀭𑀣𑀸𑀦𑀺 𑀘;

𑀔𑀸𑀤𑀣 𑀧𑀺𑀯𑀣 𑀘𑁂𑀯, 𑀅𑀦𑁆𑀦𑀧𑀸𑀦𑁂𑀦 𑀖𑁄𑀲𑀺𑀢𑀁.

𑀦𑀕𑀭𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀓𑀫𑁆𑀫𑀫𑀼𑀧𑀸𑀕𑀢𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑀁;

𑀲𑀫𑀺𑀤𑁆𑀥𑀁 𑀤𑁂𑀯𑀦𑀕𑀭𑀁𑀯, 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦𑀁.

𑀦𑀕𑀭𑁂 𑀅𑀫𑀭𑀯𑀢𑀺𑀬𑀸, 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀦𑁂𑀓𑀓𑁄𑀝𑀺𑀲𑀦𑁆𑀦𑀺𑀘𑀬𑁄, 𑀧𑀳𑀽𑀢𑀥𑀦𑀥𑀜𑁆𑀜𑀯𑀸.

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄.

𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀤𑀼𑀓𑁆𑀔𑁄 𑀧𑀼𑀦𑀩𑁆𑀪𑀯𑁄 𑀦𑀸𑀫, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁.

𑀚𑀸𑀢𑀺𑀥𑀫𑁆𑀫𑁄 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀳𑀁 𑀢𑀤𑀸;

𑀅𑀚𑀭𑀁 𑀅𑀫𑀢𑀁 𑀔𑁂𑀫𑀁, 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

𑀬𑀁𑀦𑀽𑀦𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

𑀅𑀢𑁆𑀣𑀺 𑀳𑁂𑀳𑀺𑀢𑀺 𑀲𑁄 𑀫𑀕𑁆𑀕𑁄, 𑀦 𑀲𑁄 𑀲𑀓𑁆𑀓𑀸 𑀦 𑀳𑁂𑀢𑀼𑀬𑁂;

𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀢𑀁 𑀫𑀕𑁆𑀕𑀁, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑀬𑀣𑀸𑀧𑀺 𑀤𑀼𑀓𑁆𑀔𑁂 𑀯𑀺𑀚𑁆𑀚𑀦𑁆𑀢𑁂, 𑀲𑀼𑀔𑀁 𑀦𑀸𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀁 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂, 𑀯𑀺𑀪𑀯𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑀓𑁄.

𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀓𑀁.

𑀬𑀣𑀸𑀧𑀺 𑀧𑀸𑀧𑁂 𑀯𑀺𑀚𑁆𑀚𑀦𑁆𑀢𑁂, 𑀓𑀮𑁆𑀬𑀸𑀡𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀫𑁂𑀯 𑀚𑀸𑀢𑀺 𑀯𑀺𑀚𑁆𑀚𑀦𑁆𑀢𑁂, 𑀅𑀚𑀸𑀢𑀺𑀧𑀺𑀘𑁆𑀙𑀺𑀢𑀩𑁆𑀩𑀓𑀁.

𑀬𑀣𑀸 𑀕𑀽𑀣𑀕𑀢𑁄 𑀧𑀼𑀭𑀺𑀲𑁄, 𑀢𑀴𑀸𑀓𑀁 𑀤𑀺𑀲𑁆𑀯𑀸𑀦 𑀧𑀽𑀭𑀺𑀢𑀁;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀢𑀴𑀸𑀓𑀲𑁆𑀲 𑀲𑁄.

𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑁂, 𑀯𑀺𑀚𑁆𑀚𑀦𑁆𑀢𑁂 𑀅𑀫𑀢𑀦𑁆𑀢𑀴𑁂;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀅𑀫𑀢𑀦𑁆𑀢𑀴𑁂.

𑀬𑀣𑀸 𑀅𑀭𑀻𑀳𑀺 𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀦𑁆𑀢𑁂 𑀕𑀫𑀦𑀫𑁆𑀧𑀣𑁂;

𑀦 𑀧𑀮𑀸𑀬𑀢𑀺 𑀲𑁄 𑀧𑀼𑀭𑀺𑀲𑁄, 𑀦 𑀤𑁄𑀲𑁄 𑀅𑀜𑁆𑀚𑀲𑀲𑁆𑀲 𑀲𑁄.

𑀏𑀯𑀁 𑀓𑀺𑀮𑁂𑀲𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀫𑀸𑀦𑁂 𑀲𑀺𑀯𑁂 𑀧𑀣𑁂;

𑀦 𑀕𑀯𑁂𑀲𑀢𑀺 𑀢𑀁 𑀫𑀕𑁆𑀕𑀁, 𑀦 𑀤𑁄𑀲𑁄 𑀲𑀺𑀯𑀫𑀜𑁆𑀚𑀲𑁂.

𑀬𑀣𑀸𑀧𑀺 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄, 𑀯𑀺𑀚𑁆𑀚𑀫𑀸𑀦𑁂 𑀢𑀺𑀓𑀺𑀘𑁆𑀙𑀓𑁂;

𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀺 𑀢𑀁 𑀩𑁆𑀬𑀸𑀥𑀺𑀁, 𑀦 𑀤𑁄𑀲𑁄 𑀲𑁄 𑀢𑀺𑀓𑀺𑀘𑁆𑀙𑀓𑁂.

𑀏𑀯𑀁 𑀓𑀺𑀮𑁂𑀲𑀩𑁆𑀬𑀸𑀥𑀻𑀳𑀺, 𑀤𑀼𑀓𑁆𑀔𑀺𑀢𑁄 𑀧𑀭𑀺𑀧𑀻𑀴𑀺𑀢𑁄;

𑀦 𑀕𑀯𑁂𑀲𑀢𑀺 𑀢𑀁 𑀆𑀘𑀭𑀺𑀬𑀁, 𑀦 𑀤𑁄𑀲𑁄 𑀲𑁄 𑀯𑀺𑀦𑀸𑀬𑀓𑁂.

𑀬𑀣𑀸𑀧𑀺 𑀓𑀼𑀡𑀧𑀁 𑀧𑀼𑀭𑀺𑀲𑁄, 𑀓𑀡𑁆𑀞𑁂 𑀩𑀤𑁆𑀥𑀁 𑀚𑀺𑀕𑀼𑀘𑁆𑀙𑀺𑀬;

𑀫𑁄𑀘𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬, 𑀲𑀼𑀔𑀻 𑀲𑁂𑀭𑀻 𑀲𑀬𑀁𑀯𑀲𑀻.

𑀢𑀣𑁂𑀯𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀲𑀜𑁆𑀘𑀬𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

𑀬𑀣𑀸 𑀉𑀘𑁆𑀘𑀸𑀭𑀝𑁆𑀞𑀸𑀦𑀫𑁆𑀳𑀺, 𑀓𑀭𑀻𑀲𑀁 𑀦𑀭𑀦𑀸𑀭𑀺𑀬𑁄;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀯𑀘𑁆𑀘𑀁 𑀓𑀢𑁆𑀯𑀸 𑀬𑀣𑀸 𑀓𑀼𑀝𑀺𑀁.

𑀬𑀣𑀸𑀧𑀺 𑀚𑀚𑁆𑀚𑀭𑀁 𑀦𑀸𑀯𑀁, 𑀧𑀮𑀼𑀕𑁆𑀕𑀁 𑀉𑀤𑀕𑀸𑀳𑀺𑀦𑀺𑀁;

𑀲𑀸𑀫𑀻 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀯𑀘𑁆𑀙𑀺𑀤𑁆𑀤𑀁 𑀥𑀼𑀯𑀲𑁆𑀲𑀯𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀡𑁆𑀡𑀦𑀸𑀯𑀁𑀯 𑀲𑀸𑀫𑀺𑀓𑀸.

𑀬𑀣𑀸𑀧𑀺 𑀧𑀼𑀭𑀺𑀲𑁄 𑀘𑁄𑀭𑁂𑀳𑀺, 𑀕𑀘𑁆𑀙𑀦𑁆𑀢𑁄 𑀪𑀡𑁆𑀟𑀫𑀸𑀤𑀺𑀬;

𑀪𑀡𑁆𑀟𑀘𑁆𑀙𑁂𑀤𑀪𑀬𑀁 𑀤𑀺𑀲𑁆𑀯𑀸, 𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀢𑀺.

𑀏𑀯𑀫𑁂𑀯 𑀅𑀬𑀁 𑀓𑀸𑀬𑁄, 𑀫𑀳𑀸𑀘𑁄𑀭𑀲𑀫𑁄 𑀯𑀺𑀬;

𑀧𑀳𑀸𑀬𑀺𑀫𑀁 𑀕𑀫𑀺𑀲𑁆𑀲𑀸𑀫𑀺, 𑀓𑀼𑀲𑀮𑀘𑁆𑀙𑁂𑀤𑀦𑀸𑀪𑀬𑀸.

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀦𑁂𑀓𑀓𑁄𑀝𑀺𑀲𑀢𑀁 𑀥𑀦𑀁;

𑀦𑀸𑀣𑀸𑀦𑀸𑀣𑀸𑀦𑀁 𑀤𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺𑀁.

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀥𑀫𑁆𑀫𑀺𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀁;

𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁, 𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀁.

𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣, 𑀦𑀯𑀤𑁄𑀲𑀫𑀼𑀧𑀸𑀕𑀢𑀁;

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀁, 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀁.

𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓𑀁;

𑀉𑀧𑀸𑀕𑀫𑀺𑀁 𑀭𑀼𑀓𑁆𑀔𑀫𑀽𑀮𑀁, 𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀁.

𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄;

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺𑀁.

𑀢𑀢𑁆𑀣𑀧𑁆𑀧𑀥𑀸𑀦𑀁 𑀧𑀤𑀳𑀺𑀁, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀩𑁆𑀪𑀦𑁆𑀢𑀭𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀅𑀪𑀺𑀜𑁆𑀜𑀸𑀩𑀮 𑀧𑀸𑀧𑀼𑀡𑀺𑀦𑁆𑀢𑀺. (𑀩𑀼. 𑀯𑀁. 𑁨.𑁧-𑁩𑁩);

𑀢𑀢𑁆𑀣 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁂𑀦 𑀅𑀲𑁆𑀲𑀫𑀧𑀡𑁆𑀡𑀲𑀸𑀮𑀸𑀘𑀗𑁆𑀓𑀫𑀸 𑀲𑀳𑀢𑁆𑀣𑀸 𑀫𑀸𑀧𑀺𑀢𑀸 𑀯𑀺𑀬 𑀯𑀼𑀢𑁆𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀫𑀳𑀸𑀲𑀢𑁆𑀢𑀜𑁆𑀳𑀺 ‘‘𑀳𑀺𑀫𑀯𑀦𑁆𑀢𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀚𑁆𑀚 𑀥𑀫𑁆𑀫𑀺𑀓𑀧𑀩𑁆𑀩𑀢𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙, 𑀢𑀸𑀢, 𑀅𑀬𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑁄 𑀏𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀫𑀸𑀧𑁂𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀫𑀡𑀻𑀬𑀁 𑀅𑀲𑁆𑀲𑀫𑀁 𑀲𑀼𑀕𑀼𑀢𑁆𑀢𑀁 𑀧𑀡𑁆𑀡𑀲𑀸𑀮𑀁, 𑀫𑀦𑁄𑀭𑀫𑀁 𑀘𑀗𑁆𑀓𑀫𑀜𑁆𑀘 𑀫𑀸𑀧𑁂𑀲𑀺. 𑀪𑀕𑀯𑀸 𑀧𑀦 𑀢𑀤𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀢𑀁 𑀅𑀲𑁆𑀲𑀫𑀧𑀤𑀁 𑀲𑀦𑁆𑀥𑀸𑀬 ‘‘𑀲𑀸𑀭𑀺𑀧𑀼𑀢𑁆𑀢 𑀢𑀲𑁆𑀫𑀺𑀁 𑀥𑀫𑁆𑀫𑀺𑀓𑀧𑀩𑁆𑀩𑀢𑁂 𑁋

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸;

𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢’’𑀦𑁆𑀢𑀺. 𑁋

𑀆𑀳. 𑀢𑀢𑁆𑀣 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀦𑁆𑀢𑀺 𑀲𑀼𑀓𑀢𑁄 𑀫𑀬𑀸. 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸𑀢𑀺 𑀧𑀡𑁆𑀡𑀘𑁆𑀙𑀦𑁆𑀦𑀸 𑀲𑀸𑀮𑀸𑀧𑀺 𑀫𑁂 𑀲𑀼𑀫𑀸𑀧𑀺𑀢𑀸 𑀅𑀳𑁄𑀲𑀺.

𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀧𑀜𑁆𑀘𑀺𑀫𑁂 𑀘𑀗𑁆𑀓𑀫𑀤𑁄𑀲𑀸 𑀦𑀸𑀫 𑀣𑀤𑁆𑀥𑀯𑀺𑀲𑀫𑀢𑀸, 𑀅𑀦𑁆𑀢𑁄𑀭𑀼𑀓𑁆𑀔𑀢𑀸, 𑀕𑀳𑀦𑀘𑁆𑀙𑀦𑁆𑀦𑀢𑀸, 𑀅𑀢𑀺𑀲𑀫𑁆𑀩𑀸𑀥𑀢𑀸, 𑀅𑀢𑀺𑀯𑀺𑀲𑀸𑀮𑀢𑀸𑀢𑀺. 𑀣𑀤𑁆𑀥𑀯𑀺𑀲𑀫𑀪𑀽𑀫𑀺𑀪𑀸𑀕𑀲𑁆𑀫𑀺𑀜𑁆𑀳𑀺 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀲𑁆𑀲 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀺, 𑀨𑁄𑀝𑀸 𑀉𑀝𑁆𑀞𑀳𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀦 𑀮𑀪𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀚𑁆𑀚𑀢𑀺. 𑀫𑀼𑀤𑀼𑀲𑀫𑀢𑀮𑁂 𑀧𑀦 𑀨𑀸𑀲𑀼𑀯𑀺𑀳𑀸𑀭𑀁 𑀆𑀕𑀫𑁆𑀫 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀣𑀤𑁆𑀥𑀯𑀺𑀲𑀫𑀪𑀽𑀫𑀺𑀪𑀸𑀕𑀢𑀸 𑀏𑀓𑁄 𑀤𑁄𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀗𑁆𑀓𑀫𑀦𑀲𑁆𑀲 𑀅𑀦𑁆𑀢𑁄 𑀯𑀸 𑀫𑀚𑁆𑀛𑁂 𑀯𑀸 𑀓𑁄𑀝𑀺𑀬𑀁 𑀯𑀸 𑀭𑀼𑀓𑁆𑀔𑁂 𑀲𑀢𑀺 𑀧𑀫𑀸𑀤𑀫𑀸𑀕𑀫𑁆𑀫 𑀘𑀗𑁆𑀓𑀫𑀦𑁆𑀢𑀲𑁆𑀲 𑀦𑀮𑀸𑀝𑀁 𑀯𑀸 𑀲𑀻𑀲𑀁 𑀯𑀸 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀦𑁆𑀢𑁄𑀭𑀼𑀓𑁆𑀔𑀢𑀸 𑀤𑀼𑀢𑀺𑀬𑁄 𑀤𑁄𑀲𑁄. 𑀢𑀺𑀡𑀮𑀢𑀸𑀤𑀺𑀕𑀳𑀦𑀘𑁆𑀙𑀦𑁆𑀦𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀅𑀦𑁆𑀥𑀓𑀸𑀭𑀯𑁂𑀮𑀸𑀬𑀁 𑀉𑀭𑀕𑀸𑀤𑀺𑀓𑁂 𑀧𑀸𑀡𑁂 𑀅𑀓𑁆𑀓𑀫𑀺𑀢𑁆𑀯𑀸 𑀯𑀸 𑀫𑀸𑀭𑁂𑀢𑀺, 𑀢𑁂𑀳𑀺 𑀯𑀸 𑀤𑀝𑁆𑀞𑁄 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀻𑀢𑀺 𑀕𑀳𑀦𑀘𑁆𑀙𑀦𑁆𑀦𑀢𑀸 𑀢𑀢𑀺𑀬𑁄 𑀤𑁄𑀲𑁄. 𑀅𑀢𑀺𑀲𑀫𑁆𑀩𑀸𑀥𑁂 𑀘𑀗𑁆𑀓𑀫𑁂 𑀯𑀺𑀢𑁆𑀣𑀸𑀭𑀢𑁄 𑀭𑀢𑀦𑀺𑀓𑁂 𑀯𑀸 𑀅𑀟𑁆𑀠𑀭𑀢𑀦𑀺𑀓𑁂 𑀯𑀸 𑀘𑀗𑁆𑀓𑀫𑀦𑁆𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁂 𑀧𑀓𑁆𑀔𑀮𑀺𑀢𑁆𑀯𑀸 𑀦𑀔𑀸𑀧𑀺 𑀅𑀗𑁆𑀕𑀼𑀮𑀺𑀬𑁄𑀧𑀺 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑀺𑀲𑀫𑁆𑀩𑀸𑀥𑀢𑀸 𑀘𑀢𑀼𑀢𑁆𑀣𑁄 𑀤𑁄𑀲𑁄. 𑀅𑀢𑀺𑀯𑀺𑀲𑀸𑀮𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺, 𑀏𑀓𑀕𑁆𑀕𑀢𑀁 𑀦 𑀮𑀪𑀢𑀻𑀢𑀺 𑀅𑀢𑀺𑀯𑀺𑀲𑀸𑀮𑀢𑀸 𑀧𑀜𑁆𑀘𑀫𑁄 𑀤𑁄𑀲𑁄. 𑀧𑀼𑀣𑀼𑀮𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀭𑀢𑀦𑀫𑀢𑁆𑀢𑀅𑀦𑀼𑀘𑀗𑁆𑀓𑀫𑀁 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀁 𑀫𑀼𑀤𑀼𑀢𑀮𑀁 𑀲𑀫𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀼𑀓𑀁 𑀘𑀗𑁆𑀓𑀫𑀁 𑀯𑀝𑁆𑀝𑀢𑀺, 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀤𑀻𑀧𑀧𑁆𑀧𑀲𑀸𑀤𑀓𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀘𑀗𑁆𑀓𑀫𑀦𑀁 𑀯𑀺𑀬, 𑀢𑀸𑀤𑀺𑀲𑀁 𑀢𑀁 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢’’𑀦𑁆𑀢𑀺.

𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀦𑁆𑀢𑀺 𑀅𑀝𑁆𑀞𑀳𑀺 𑀲𑀫𑀡𑀲𑀼𑀔𑁂𑀳𑀺 𑀉𑀧𑁂𑀢𑀁. 𑀅𑀝𑁆𑀞𑀺𑀫𑀸𑀦𑀺 𑀲𑀫𑀡𑀲𑀼𑀔𑀸𑀦𑀺 𑀦𑀸𑀫 𑀥𑀦𑀥𑀜𑁆𑀜𑀧𑀭𑀺𑀕𑁆𑀕𑀳𑀸𑀪𑀸𑀯𑁄 𑀅𑀦𑀯𑀚𑁆𑀚𑀧𑀺𑀡𑁆𑀟𑀧𑀭𑀺𑀬𑁂𑀲𑀦𑀪𑀸𑀯𑁄, 𑀦𑀺𑀩𑁆𑀩𑀼𑀢𑀧𑀺𑀡𑁆𑀟𑀪𑀼𑀜𑁆𑀚𑀦𑀪𑀸𑀯𑁄, 𑀭𑀝𑁆𑀞𑀁 𑀧𑀻𑀴𑁂𑀢𑁆𑀯𑀸 𑀥𑀦𑀲𑀸𑀭𑀁 𑀯𑀸 𑀲𑀻𑀲𑀓𑀳𑀸𑀧𑀡𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑁂𑀲𑀼 𑀭𑀸𑀚𑀓𑀼𑀮𑁂𑀲𑀼 𑀭𑀝𑁆𑀞𑀧𑀻𑀴𑀦𑀓𑀺𑀮𑁂𑀲𑀸𑀪𑀸𑀯𑁄, 𑀉𑀧𑀓𑀭𑀡𑁂𑀲𑀼 𑀦𑀺𑀘𑁆𑀙𑀦𑁆𑀤𑀭𑀸𑀕𑀪𑀸𑀯𑁄, 𑀘𑁄𑀭𑀯𑀺𑀮𑁄𑀧𑁂 𑀦𑀺𑀩𑁆𑀪𑀬𑀪𑀸𑀯𑁄, 𑀭𑀸𑀚𑀭𑀸𑀚𑀫𑀳𑀸𑀫𑀘𑁆𑀘𑁂𑀳𑀺 𑀅𑀲𑀁𑀲𑀝𑁆𑀞𑀪𑀸𑀯𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀪𑀸𑀯𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑀣𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀯𑀲𑀦𑁆𑀢𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀲𑀫𑀡𑀲𑀼𑀔𑀸𑀦𑀺 𑀯𑀺𑀦𑁆𑀤𑀺𑀢𑀼𑀁, 𑀏𑀯𑀁 𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁 𑀢𑀁 𑀅𑀲𑁆𑀲𑀫𑀁 𑀫𑀸𑀧𑁂𑀲𑀺’’ 𑀦𑁆𑀢𑀺.

𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀦𑁆𑀢𑀺 𑀧𑀘𑁆𑀙𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀯𑀲𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀦𑀜𑁆𑀘 𑀲𑀫𑀸𑀧𑀢𑁆𑀢𑀻𑀦𑀜𑁆𑀘 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀣𑀸𑀫𑀧𑁆𑀧𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀩𑀮𑀁 𑀆𑀳𑀭𑀺𑀁. 𑀬𑀣𑀸 𑀢𑀲𑁆𑀫𑀺𑀁 𑀯𑀲𑀦𑁆𑀢𑁄 𑀢𑀁 𑀩𑀮𑀁 𑀆𑀳𑀭𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀏𑀯𑀁 𑀢𑀁 𑀅𑀲𑁆𑀲𑀫𑀁 𑀢𑀲𑁆𑀲 𑀅𑀪𑀺𑀜𑁆𑀜𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀩𑀮𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀫𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣, 𑀦𑀯𑀤𑁄𑀲𑀫𑀼𑀧𑀸𑀕𑀢𑀦𑁆𑀢𑀺 𑀏𑀢𑁆𑀣𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸, 𑀢𑀤𑀸 𑀓𑀺𑀭 𑀓𑀼𑀝𑀺𑀮𑁂𑀡𑀘𑀗𑁆𑀓𑀫𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀲𑀜𑁆𑀙𑀦𑁆𑀦𑀁 𑀭𑀫𑀡𑀻𑀬𑀁 𑀫𑀥𑀼𑀭𑀲𑀮𑀺𑀮𑀸𑀲𑀬𑀁 𑀅𑀧𑀕𑀢𑀯𑀸𑀴𑀫𑀺𑀕𑀪𑀺𑀁𑀲𑀦𑀓𑀲𑀓𑀼𑀡𑀁 𑀧𑀯𑀺𑀯𑁂𑀓𑀓𑁆𑀔𑀫𑀁 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀘𑀗𑁆𑀓𑀫𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀆𑀮𑀫𑁆𑀩𑀦𑀨𑀮𑀓𑀁 𑀲𑀁𑀯𑀺𑀥𑀸𑀬 𑀦𑀺𑀲𑀻𑀤𑀦𑀢𑁆𑀣𑀸𑀬 𑀘𑀗𑁆𑀓𑀫𑀯𑁂𑀫𑀚𑁆𑀛𑁂 𑀲𑀫𑀢𑀮𑀁 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀁 𑀫𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀧𑀡𑁆𑀡𑀲𑀸𑀮𑀸𑀬𑀁 𑀚𑀝𑀸𑀫𑀡𑁆𑀟𑀮𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀼𑀡𑁆𑀟𑀺𑀓𑀸𑀤𑀺𑀓𑁂 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑁂 𑀫𑀡𑁆𑀟𑀧𑁂 𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀗𑁆𑀔𑀧𑀸𑀦𑀻𑀬𑀲𑀭𑀸𑀯𑀸𑀦𑀺 𑀅𑀕𑁆𑀕𑀺𑀲𑀸𑀮𑀸𑀬𑀁 𑀅𑀗𑁆𑀕𑀸𑀭𑀓𑀧𑀮𑁆𑀮𑀤𑀸𑀭𑀼𑀆𑀤𑀻𑀦𑀻𑀢𑀺 𑀏𑀯𑀁 𑀬𑀁 𑀬𑀁 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀢𑀁 𑀲𑀩𑁆𑀩𑀁 𑀫𑀸𑀧𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀪𑀺𑀢𑁆𑀢𑀺𑀬𑀁 ‘‘𑀬𑁂 𑀓𑁂𑀘𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀇𑀫𑁂 𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀽’’𑀢𑀺 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁂 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁂 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀳𑀺𑀫𑀯𑀦𑁆𑀢𑀧𑀸𑀤𑁂 𑀕𑀺𑀭𑀺𑀓𑀦𑁆𑀤𑀭𑀸𑀦𑀼𑀲𑀸𑀭𑁂𑀦 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀸𑀦𑀼𑀭𑀽𑀧𑀁 𑀨𑀸𑀲𑀼𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀤𑀻𑀦𑀺𑀯𑀢𑁆𑀢𑀦𑁂 𑀯𑀺𑀲𑁆𑀲𑀓𑀫𑁆𑀫𑀦𑀺𑀫𑁆𑀫𑀺𑀢𑀁 𑀲𑀓𑁆𑀓𑀤𑀢𑁆𑀢𑀺𑀬𑀁 𑀭𑀫𑀡𑀻𑀬𑀁 𑀅𑀲𑁆𑀲𑀫𑀁 𑀤𑀺𑀲𑁆𑀯𑀸 𑀘𑀗𑁆𑀓𑀫𑀓𑁄𑀝𑀺𑀁 𑀕𑀦𑁆𑀢𑁆𑀯𑀸 𑀧𑀤𑀯𑀮𑀜𑁆𑀚𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀥𑀼𑀯𑀁 𑀧𑀩𑁆𑀩𑀚𑀺𑀢𑀸 𑀥𑀼𑀭𑀕𑀸𑀫𑁂 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑀸 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀣𑁄𑀓𑀁 𑀆𑀕𑀫𑁂𑀢𑁆𑀯𑀸 ‘‘𑀅𑀢𑀺𑀯𑀺𑀬 𑀘𑀺𑀭𑀸𑀬𑀦𑁆𑀢𑀺, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀓𑀼𑀝𑀺𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀪𑀺𑀢𑁆𑀢𑀺𑀬𑀁 𑀅𑀓𑁆𑀔𑀭𑀸𑀦𑀺 𑀯𑀸𑀘𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀸 𑀏𑀢𑁂, 𑀇𑀫𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑀸 𑀦𑀺𑀯𑀢𑁆𑀣𑀧𑀸𑀭𑀼𑀢𑀁 𑀲𑀸𑀝𑀓𑀬𑀼𑀕𑀁 𑀧𑀚𑀳𑀺. 𑀢𑁂𑀦𑀸𑀳 ‘‘𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣𑀸’’𑀢𑀺. 𑀏𑀯𑀁 𑀧𑀯𑀺𑀝𑁆𑀞𑁄 𑀅𑀳𑀁 𑀲𑀸𑀭𑀺𑀧𑀼𑀢𑁆𑀢 𑀢𑀲𑁆𑀲𑀁 𑀧𑀡𑁆𑀡𑀲𑀸𑀮𑀸𑀬𑀁 𑀲𑀸𑀝𑀓𑀁 𑀧𑀚𑀳𑀺𑀁.

𑀦𑀯𑀤𑁄𑀲𑀫𑀼𑀧𑀸𑀕𑀢𑀦𑁆𑀢𑀺 𑀲𑀸𑀝𑀓𑀁 𑀧𑀚𑀳𑀦𑁆𑀢𑁄 𑀦𑀯 𑀤𑁄𑀲𑁂 𑀤𑀺𑀲𑁆𑀯𑀸 𑀧𑀚𑀳𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸𑀦𑀜𑁆𑀳𑀺 𑀲𑀸𑀝𑀓𑀲𑁆𑀫𑀺𑀁 𑀦𑀯 𑀤𑁄𑀲𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀲𑀼 𑀢𑀲𑁆𑀲 𑀫𑀳𑀕𑁆𑀖𑀪𑀸𑀯𑁄 𑀏𑀓𑁄 𑀤𑁄𑀲𑁄, 𑀧𑀭𑀧𑀝𑀺𑀩𑀤𑁆𑀥𑀢𑀸𑀬 𑀉𑀧𑁆𑀧𑀚𑁆𑀚𑀦𑀪𑀸𑀯𑁄 𑀏𑀓𑁄, 𑀧𑀭𑀺𑀪𑁄𑀕𑁂𑀦 𑀮𑀳𑀼𑀁 𑀓𑀺𑀮𑀺𑀲𑁆𑀲𑀦𑀪𑀸𑀯𑁄 𑀏𑀓𑁄, 𑀓𑀺𑀮𑀺𑀝𑁆𑀞𑁄 𑀳𑀺 𑀥𑁄𑀯𑀺𑀢𑀩𑁆𑀩𑁄 𑀘 𑀭𑀚𑀺𑀢𑀩𑁆𑀩𑁄 𑀘 𑀳𑁄𑀢𑀺, 𑀧𑀭𑀺𑀪𑁄𑀕𑁂𑀦 𑀮𑀳𑀼𑀓𑀁 𑀚𑀻𑀭𑀡𑀪𑀸𑀯𑁄 𑀏𑀓𑁄 𑀚𑀺𑀡𑁆𑀡𑀲𑁆𑀲 𑀳𑀺 𑀢𑀼𑀦𑁆𑀦𑀁 𑀯𑀸 𑀅𑀕𑁆𑀕𑀴𑀤𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀧𑀼𑀦𑀧𑀭𑀺𑀬𑁂𑀲𑀦𑀸𑀬 𑀤𑀼𑀭𑀪𑀺𑀲𑀫𑁆𑀪𑀯𑀪𑀸𑀯𑁄 𑀏𑀓𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀅𑀲𑀸𑀭𑀼𑀧𑁆𑀧𑀪𑀸𑀯𑁄 𑀏𑀓𑁄, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁄 𑀏𑀓𑁄, 𑀬𑀣𑀸 𑀳𑀺 𑀦𑀁 𑀧𑀘𑁆𑀘𑀢𑁆𑀣𑀺𑀓𑀸 𑀦 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀕𑁄𑀧𑁂𑀢𑀩𑁆𑀩𑁄 𑀳𑁄𑀢𑀺. 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀪𑀸𑀯𑁄 𑀏𑀓𑁄, 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑀲𑁆𑀲 𑀔𑀦𑁆𑀥𑀪𑀸𑀭𑀫𑀳𑀺𑀘𑁆𑀙𑀪𑀸𑀯𑁄 𑀏𑀓𑁄𑀢𑀺.

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀦𑁆𑀢𑀺 𑀢𑀤𑀸 𑀅𑀳𑀁 𑀲𑀸𑀭𑀺𑀧𑀼𑀢𑁆𑀢 𑀇𑀫𑁂 𑀦𑀯 𑀤𑁄𑀲𑁂 𑀤𑀺𑀲𑁆𑀯𑀸 𑀲𑀸𑀝𑀓𑀁 𑀧𑀳𑀸𑀬 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀁 𑀫𑀼𑀜𑁆𑀚𑀢𑀺𑀡𑀁 𑀳𑀻𑀭𑀁 𑀳𑀻𑀭𑀁 𑀓𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀁 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑀸𑀬 𑀆𑀤𑀺𑀬𑀺𑀦𑁆𑀢𑀺 𑀅𑀢𑁆𑀣𑁄.

𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀦𑁆𑀢𑀺 𑀤𑁆𑀯𑀸𑀤𑀲𑀳𑀺 𑀆𑀦𑀺𑀲𑀁𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀯𑀸𑀓𑀘𑀻𑀭𑀲𑁆𑀫𑀺𑀜𑁆𑀳𑀺 𑀤𑁆𑀯𑀸𑀤𑀲𑀸𑀦𑀺𑀲𑀁𑀲𑀸 𑁋 𑀅𑀧𑁆𑀧𑀕𑁆𑀖𑀁 𑀲𑀼𑀦𑁆𑀤𑀭𑀁 𑀓𑀧𑁆𑀧𑀺𑀬𑀦𑁆𑀢𑀺 𑀅𑀬𑀁 𑀢𑀸𑀯 𑀏𑀓𑁄 𑀆𑀦𑀺𑀲𑀁𑀲𑁄, 𑀲𑀳𑀢𑁆𑀣𑀸 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀅𑀬𑀁 𑀤𑀼𑀢𑀺𑀬𑁄, 𑀧𑀭𑀺𑀪𑁄𑀕𑁂𑀦 𑀲𑀡𑀺𑀓𑀁 𑀓𑀺𑀮𑀺𑀲𑁆𑀲𑀢𑀺 𑀥𑁄𑀯𑀺𑀬𑀫𑀸𑀦𑁂𑀧𑀺 𑀧𑀧𑀜𑁆𑀘𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀢𑀢𑀺𑀬𑁄, 𑀧𑀭𑀺𑀪𑁄𑀕𑁂𑀦 𑀚𑀺𑀡𑁆𑀡𑁂𑀧𑀺 𑀲𑀺𑀩𑁆𑀩𑀺𑀢𑀩𑁆𑀩𑀸𑀪𑀸𑀯𑁄 𑀘𑀢𑀼𑀢𑁆𑀣𑁄, 𑀧𑀼𑀦 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀲𑀼𑀔𑁂𑀦 𑀓𑀭𑀡𑀪𑀸𑀯𑁄 𑀧𑀜𑁆𑀘𑀫𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀲𑀸𑀭𑀼𑀧𑁆𑀧𑀪𑀸𑀯𑁄 𑀙𑀝𑁆𑀞𑁄, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀦𑀺𑀭𑀼𑀧𑀪𑁄𑀕𑀪𑀸𑀯𑁄 𑀲𑀢𑁆𑀢𑀫𑁄, 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀪𑀸𑀯𑁄 𑀅𑀝𑁆𑀞𑀫𑁄, 𑀥𑀸𑀭𑀡𑁂 𑀲𑀮𑁆𑀮𑀳𑀼𑀓𑀪𑀸𑀯𑁄 𑀦𑀯𑀫𑁄, 𑀘𑀻𑀯𑀭𑀧𑀘𑁆𑀘𑀬𑁂 𑀅𑀧𑁆𑀧𑀺𑀘𑁆𑀙𑀪𑀸𑀯𑁄 𑀤𑀲𑀫𑁄, 𑀯𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀺𑀓𑀅𑀦𑀯𑀚𑁆𑀚𑀪𑀸𑀯𑁄 𑀏𑀓𑀸𑀤𑀲𑀫𑁄 𑀯𑀸𑀓𑀘𑀻𑀭𑁂 𑀦𑀝𑁆𑀞𑁂𑀧𑀺 𑀅𑀦𑀧𑁂𑀓𑁆𑀔𑀪𑀸𑀯𑁄 𑀤𑁆𑀯𑀸𑀤𑀲𑀫𑁄𑀢𑀺.

𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓𑀦𑁆𑀢𑀺 𑀓𑀣𑀁 𑀧𑀚𑀳𑀺𑀁? 𑀲𑁄 𑀓𑀺𑀭 𑀯𑀭𑀲𑀸𑀝𑀓𑀬𑀼𑀕𑀁 𑀑𑀫𑀼𑀜𑁆𑀘𑀦𑁆𑀢𑁄 𑀘𑀻𑀯𑀭𑀯𑀁𑀲𑁂 𑀮𑀕𑁆𑀕𑀺𑀢𑀁 𑀅𑀦𑁄𑀚𑀧𑀼𑀧𑁆𑀨𑀤𑀸𑀫𑀲𑀤𑀺𑀲𑀁 𑀭𑀢𑁆𑀢𑀯𑀸𑀓𑀘𑀻𑀭𑀁 𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀅𑀧𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀯𑀸𑀓𑀘𑀻𑀭𑀁 𑀧𑀭𑀺𑀤𑀳𑀺𑀢𑁆𑀯𑀸 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀲𑀦𑁆𑀣𑀭𑀲𑀤𑀺𑀲𑀁 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀚𑀝𑀸𑀫𑀡𑁆𑀟𑀮𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀘𑀽𑀴𑀸𑀬 𑀲𑀤𑁆𑀥𑀺𑀁 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀢𑁆𑀣𑀁 𑀲𑀸𑀭𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀫𑀼𑀢𑁆𑀢𑀸𑀚𑀸𑀮𑀲𑀤𑀺𑀲𑀸𑀬 𑀲𑀺𑀓𑁆𑀓𑀸𑀬 𑀧𑀯𑀸𑀴𑀯𑀡𑁆𑀡𑀁 𑀓𑀼𑀡𑁆𑀟𑀺𑀓𑀁 𑀑𑀤𑀳𑀺𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀗𑁆𑀓𑀓𑀸𑀚𑀁 𑀆𑀤𑀸𑀬 𑀏𑀓𑀺𑀲𑁆𑀲𑀸 𑀓𑀸𑀚𑀓𑁄𑀝𑀺𑀬𑀸 𑀓𑀼𑀡𑁆𑀟𑀺𑀓𑀁, 𑀏𑀓𑀺𑀲𑁆𑀲𑀸 𑀅𑀗𑁆𑀓𑀼𑀲𑀓𑀧𑀘𑁆𑀙𑀺𑀢𑀺𑀤𑀡𑁆𑀟𑀓𑀸𑀤𑀻𑀦𑀺 𑀑𑀮𑀕𑁆𑀕𑁂𑀢𑁆𑀯𑀸 𑀔𑀸𑀭𑀺𑀓𑀸𑀚𑀁 𑀅𑀁𑀲𑁂 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀢𑁆𑀢𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀝𑁆𑀞𑀺𑀳𑀢𑁆𑀣𑁂 𑀫𑀳𑀸𑀘𑀗𑁆𑀓𑀫𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀦𑁆𑀢𑁄 𑀅𑀢𑁆𑀢𑀦𑁄 𑀯𑁂𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀲𑁄𑀪𑀢𑀺 𑀯𑀢 𑀫𑁂 𑀧𑀩𑁆𑀩𑀚𑁆𑀚𑀸, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀲𑀩𑁆𑀩𑁂𑀳𑀺𑀧𑀺 𑀥𑀻𑀭𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸 𑀣𑁄𑀫𑀺𑀢𑀸 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀧𑀳𑀻𑀦𑀁 𑀫𑁂 𑀕𑀺𑀳𑀺𑀩𑀦𑁆𑀥𑀦𑀁, 𑀦𑀺𑀓𑁆𑀔𑀦𑁆𑀢𑁄𑀲𑁆𑀫𑀺 𑀦𑁂𑀓𑁆𑀔𑀫𑁆𑀫𑀁, 𑀮𑀤𑁆𑀥𑀸 𑀫𑁂 𑀉𑀢𑁆𑀢𑀫𑀧𑀩𑁆𑀩𑀚𑁆𑀚𑀸, 𑀓𑀭𑀺𑀲𑁆𑀲𑀸𑀫𑀺 𑀲𑀫𑀡𑀥𑀫𑁆𑀫𑀁, 𑀮𑀪𑀺𑀲𑁆𑀲𑀸𑀫𑀺 𑀅𑀕𑁆𑀕𑀨𑀮𑀲𑀼𑀔’’𑀦𑁆𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀔𑀸𑀭𑀺𑀓𑀸𑀚𑀁 𑀑𑀢𑀸𑀭𑁂𑀢𑁆𑀯𑀸 𑀘𑀗𑁆𑀓𑀫𑀯𑁂𑀫𑀚𑁆𑀛𑁂 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀸𑀧𑀝𑁆𑀝𑁂 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀲𑀺𑀦𑁆𑀦𑁄 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀩𑀺𑀤𑀮𑀫𑀜𑁆𑀘𑀓𑀧𑀲𑁆𑀲𑁂 𑀓𑀝𑁆𑀞𑀢𑁆𑀣𑀭𑀺𑀓𑀸𑀬 𑀦𑀺𑀧𑀦𑁆𑀦𑁄 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀫𑀦𑀁 𑀆𑀯𑀚𑁆𑀚𑁂𑀲𑀺 ‘‘𑀅𑀳𑀁 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀫𑀺𑀢𑀪𑁄𑀕𑀁 𑀅𑀦𑀦𑁆𑀢𑀬𑀲𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀦𑁂𑀓𑁆𑀔𑀫𑀕𑀯𑁂𑀲𑀓𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀧𑀫𑀸𑀤𑀘𑀸𑀭𑀁 𑀘𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀯𑀺𑀯𑁂𑀓𑀜𑁆𑀳𑀺 𑀧𑀳𑀸𑀬 𑀯𑀺𑀘𑀭𑀦𑁆𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀫𑀓𑁆𑀔𑀺𑀓𑀸 𑀔𑀸𑀤𑀦𑁆𑀢𑀺, 𑀇𑀤𑀸𑀦𑀺 𑀫𑀬𑀸 𑀧𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀳𑀜𑁆𑀳𑀺 𑀖𑀭𑀸𑀯𑀸𑀲𑀁 𑀧𑀮𑀺𑀩𑁄𑀥𑀢𑁄 𑀤𑀺𑀲𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀅𑀬𑀜𑁆𑀘 𑀫𑀦𑀸𑀧𑀸 𑀧𑀡𑁆𑀡𑀲𑀸𑀮𑀸, 𑀩𑁂𑀮𑀼𑀯𑀧𑀓𑁆𑀓𑀯𑀡𑁆𑀡𑀸 𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀺, 𑀭𑀚𑀢𑀯𑀡𑁆𑀡𑀸 𑀲𑁂𑀢𑀪𑀺𑀢𑁆𑀢𑀺𑀬𑁄, 𑀓𑀧𑁄𑀢𑀧𑀸𑀤𑀯𑀡𑁆𑀡𑀁 𑀧𑀡𑁆𑀡𑀘𑁆𑀙𑀤𑀦𑀁, 𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑀯𑀡𑁆𑀡𑁄 𑀩𑀺𑀤𑀮𑀫𑀜𑁆𑀘𑀓𑁄, 𑀦𑀺𑀯𑀸𑀲𑀨𑀸𑀲𑀼𑀓𑀁 𑀯𑀲𑀦𑀝𑁆𑀞𑀸𑀦𑀁, 𑀦 𑀏𑀢𑁆𑀢𑁄 𑀅𑀢𑀺𑀭𑁂𑀓𑀢𑀭𑀸 𑀯𑀺𑀬 𑀫𑁂 𑀕𑁂𑀳𑀲𑀫𑁆𑀧𑀤𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀡𑁆𑀡𑀲𑀸𑀮𑀸𑀬 𑀤𑁄𑀲𑁂 𑀯𑀺𑀘𑀺𑀦𑀦𑁆𑀢𑁄 𑀅𑀝𑁆𑀞 𑀤𑁄𑀲𑁂 𑀧𑀲𑁆𑀲𑀺.

𑀧𑀡𑁆𑀡𑀲𑀸𑀮𑀸𑀧𑀭𑀺𑀪𑁄𑀕𑀲𑁆𑀫𑀺𑀜𑁆𑀳𑀺 𑀅𑀝𑁆𑀞 𑀆𑀤𑀻𑀦𑀯𑀸 𑁋 𑀫𑀳𑀸𑀲𑀫𑀸𑀭𑀫𑁆𑀪𑁂𑀦? 𑀤𑀩𑁆𑀩𑀲𑀫𑁆𑀪𑀸𑀭𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀭𑀡𑀧𑀭𑀺𑀬𑁂𑀲𑀦𑀪𑀸𑀯𑁄 𑀏𑀓𑁄 𑀆𑀤𑀻𑀦𑀯𑁄. 𑀢𑀺𑀡𑀧𑀡𑁆𑀡𑀫𑀢𑁆𑀢𑀺𑀓𑀸𑀲𑀼 𑀧𑀢𑀺𑀢𑀸𑀲𑀼 𑀢𑀸𑀲𑀁 𑀧𑀼𑀦𑀧𑁆𑀧𑀼𑀦𑀁 𑀞𑀧𑁂𑀢𑀩𑁆𑀩𑀢𑀸𑀬 𑀦𑀺𑀩𑀤𑁆𑀥𑀚𑀕𑁆𑀕𑀦𑀪𑀸𑀯𑁄 𑀤𑀼𑀢𑀺𑀬𑁄, 𑀲𑁂𑀦𑀸𑀲𑀦𑀁 𑀦𑀸𑀫 𑀫𑀳𑀮𑁆𑀮𑀓𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑁂𑀮𑀸𑀬 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦 𑀳𑁄𑀢𑀻𑀢𑀺 𑀉𑀝𑁆𑀞𑀸𑀧𑀦𑀻𑀬𑀪𑀸𑀯𑁄 𑀢𑀢𑀺𑀬𑁄, 𑀲𑀻𑀢𑀼𑀡𑁆𑀳𑀧𑀝𑀺𑀖𑀸𑀢𑁂𑀦 𑀓𑀸𑀬𑀲𑁆𑀲 𑀲𑀼𑀔𑀼𑀫𑀸𑀮𑀓𑀭𑀡𑀪𑀸𑀯𑁄 𑀘𑀢𑀼𑀢𑁆𑀣𑁄, 𑀕𑁂𑀳𑀁 𑀧𑀯𑀺𑀝𑁆𑀞𑁂𑀦 𑀬𑀁𑀓𑀺𑀜𑁆𑀘𑀺 𑀧𑀸𑀧𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀕𑀭𑀳𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑁄 𑀧𑀜𑁆𑀘𑀫𑁄, ‘‘𑀫𑀬𑁆𑀳’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀓𑀭𑀡𑀪𑀸𑀯𑁄 𑀙𑀝𑁆𑀞𑁄, 𑀕𑁂𑀳𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀦𑀸𑀫𑁂𑀲 𑀤𑀼𑀢𑀺𑀬𑀓𑀯𑀸𑀲𑁄 𑀯𑀺𑀬𑀸𑀢𑀺 𑀲𑀢𑁆𑀢𑀫𑁄 𑀊𑀓𑀸𑀫𑀗𑁆𑀕𑀼𑀮𑀖𑀭𑀕𑁄𑀴𑀺𑀓𑀸𑀤𑀻𑀦𑀁 𑀲𑀸𑀥𑀸𑀭𑀡𑀢𑀸𑀬 𑀩𑀳𑀼𑀲𑀸𑀥𑀸𑀭𑀡𑀪𑀸𑀯𑁄 𑀅𑀝𑁆𑀞𑀫𑁄𑀢𑀺 𑀇𑀫𑁂 𑀅𑀝𑁆𑀞 𑀆𑀤𑀻𑀦𑀯𑁂 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀚𑀳𑀺. 𑀢𑁂𑀦𑀸𑀳 ‘‘𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓’’𑀦𑁆𑀢𑀺.

𑀉𑀧𑀸𑀕𑀫𑀺𑀁 𑀭𑀼𑀓𑁆𑀔𑀫𑀽𑀮𑀁 𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀦𑁆𑀢𑀺 𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀳𑀺 𑀕𑀼𑀡𑁂𑀳𑀺 𑀉𑀧𑁂𑀢𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀸𑀕𑀢𑁄𑀲𑁆𑀫𑀻𑀢𑀺 𑀯𑀤𑀢𑀺.

𑀢𑀢𑁆𑀭𑀺𑀫𑁂 𑀤𑀲 𑀕𑀼𑀡𑀸 𑁋 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀸 𑀏𑀓𑁄 𑀕𑀼𑀡𑁄 𑀉𑀧𑀕𑀫𑀦𑀫𑀢𑁆𑀢𑀫𑁂𑀯 𑀳𑀺 𑀢𑀢𑁆𑀣 𑀳𑁄𑀢𑀻𑀢𑀺. 𑀅𑀧𑁆𑀧𑀝𑀺𑀚𑀕𑁆𑀕𑀦𑀢𑀸 𑀤𑀼𑀢𑀺𑀬𑁄 𑀢𑀜𑁆𑀳𑀺 𑀲𑀫𑁆𑀫𑀝𑁆𑀞𑀫𑁆𑀧𑀺 𑀅𑀲𑀫𑁆𑀫𑀝𑁆𑀞𑀫𑁆𑀧𑀺 𑀧𑀭𑀺𑀪𑁄𑀕𑀨𑀸𑀲𑀼𑀓𑀁 𑀳𑁄𑀢𑀺𑀬𑁂𑀯. 𑀅𑀦𑀼𑀝𑁆𑀞𑀸𑀧𑀦𑀻𑀬𑀪𑀸𑀯𑁄 𑀢𑀢𑀺𑀬𑁄, 𑀕𑀭𑀳𑀁 𑀦𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀢𑁆𑀣 𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀮𑀚𑁆𑀚𑀢𑀻𑀢𑀺 𑀕𑀭𑀳𑀸𑀬 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑁄 𑀘𑀢𑀼𑀢𑁆𑀣𑁄, 𑀅𑀩𑁆𑀪𑁄𑀓𑀸𑀲𑀸𑀯𑀸𑀲𑁄 𑀯𑀺𑀬 𑀓𑀸𑀬𑀁 𑀦 𑀲𑀦𑁆𑀣𑀫𑁆𑀪𑁂𑀢𑀻𑀢𑀺 𑀓𑀸𑀬𑀲𑁆𑀲 𑀅𑀲𑀦𑁆𑀣𑀫𑁆𑀪𑀦𑀪𑀸𑀯𑁄 𑀧𑀜𑁆𑀘𑀫𑁄. 𑀧𑀭𑀺𑀕𑁆𑀕𑀳𑀓𑀭𑀡𑀸𑀪𑀸𑀯𑁄 𑀙𑀝𑁆𑀞𑁄, 𑀕𑁂𑀳𑀸𑀮𑀬𑀧𑀝𑀺𑀓𑁆𑀔𑁂𑀧𑁄 𑀲𑀢𑁆𑀢𑀫𑁄, 𑀩𑀳𑀼𑀲𑀸𑀥𑀸𑀭𑀡𑀕𑁂𑀳𑁂 𑀯𑀺𑀬 ‘‘𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀦𑀁, 𑀦𑀺𑀓𑁆𑀔𑀫𑀣𑀸’’𑀢𑀺 𑀦𑀻𑀳𑀭𑀡𑀸𑀪𑀸𑀯𑁄 𑀅𑀝𑁆𑀞𑀫𑁄, 𑀯𑀲𑀦𑁆𑀢𑀲𑁆𑀲 𑀲𑀧𑁆𑀧𑀻𑀢𑀺𑀓𑀪𑀸𑀯𑁄 𑀦𑀯𑀫𑁄, 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀲𑀼𑀮𑀪𑀢𑀸𑀬 𑀅𑀦𑀧𑁂𑀓𑁆𑀔𑀪𑀸𑀯𑁄 𑀤𑀲𑀫𑁄𑀢𑀺, 𑀇𑀫𑁂 𑀤𑀲 𑀕𑀼𑀡𑁂 𑀤𑀺𑀲𑁆𑀯𑀸 𑀭𑀼𑀓𑁆𑀔𑀫𑀽𑀮𑀁 𑀉𑀧𑀸𑀕𑀢𑁄𑀲𑁆𑀫𑀻𑀢𑀺 𑀯𑀤𑀢𑀺.

𑀇𑀫𑀸𑀦𑀺 𑀏𑀢𑁆𑀢𑀓𑀸𑀦𑀺 𑀓𑀸𑀭𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀲𑀫𑁆𑀧𑀢𑁆𑀢𑀕𑀸𑀫𑁂 𑀫𑀦𑀼𑀲𑁆𑀲𑀸 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀲𑁆𑀲𑀫𑀁 𑀆𑀕𑀫𑁆𑀫 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀦𑀸𑀳𑀁 ‘𑀆𑀳𑀸𑀭𑀁 𑀦 𑀮𑀪𑀸𑀫𑀻’𑀢𑀺 𑀧𑀩𑁆𑀩𑀚𑀺𑀢𑁄 𑀲𑀺𑀦𑀺𑀤𑁆𑀥𑀸𑀳𑀸𑀭𑁄 𑀦𑀸𑀫𑁂𑀲 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑁂 𑀯𑀟𑁆𑀠𑁂𑀢𑀺. 𑀆𑀳𑀸𑀭𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀦𑀢𑁆𑀣𑀺 𑀬𑀁𑀦𑀽𑀦𑀸𑀳𑀁 𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀦𑀺𑀩𑁆𑀩𑀢𑁆𑀢𑀓𑀁 𑀆𑀳𑀸𑀭𑀁 𑀧𑀚𑀳𑀺𑀢𑁆𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀓𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄;

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺𑀁.

‘‘𑀢𑀢𑁆𑀣𑀧𑁆𑀧𑀥𑀸𑀦𑀁 𑀧𑀤𑀳𑀺𑀁, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀩𑁆𑀪𑀦𑁆𑀢𑀭𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀅𑀪𑀺𑀜𑁆𑀜𑀸𑀩𑀮 𑀧𑀸𑀧𑀼𑀡𑀺’’𑀦𑁆𑀢𑀺.

𑀏𑀯𑀁 𑀫𑁂 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲, 𑀯𑀲𑀻𑀪𑀽𑀢𑀲𑁆𑀲 𑀲𑀸𑀲𑀦𑁂;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑀉𑀧𑁆𑀧𑀚𑁆𑀚𑀦𑁆𑀢𑁂 𑀘 𑀚𑀸𑀬𑀦𑁆𑀢𑁂, 𑀩𑀼𑀚𑁆𑀛𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑁂;

𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂 𑀦𑀸𑀤𑁆𑀤𑀲𑀁, 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑁄.

𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀁, 𑀲𑁄𑀥𑁂𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀲𑁆𑀲𑀫𑀸;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑀯𑁂𑀤𑀚𑀸𑀢𑀁 𑀚𑀦𑀁 𑀤𑀺𑀲𑁆𑀯𑀸, 𑀢𑀼𑀝𑁆𑀞𑀳𑀝𑁆𑀞𑀁 𑀧𑀫𑁄𑀤𑀺𑀢𑀁;

𑀑𑀭𑁄𑀳𑀺𑀢𑁆𑀯𑀸𑀦 𑀕𑀕𑀦𑀸, 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑀢𑀸𑀯𑀤𑁂.

‘‘𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄, 𑀯𑁂𑀤𑀚𑀸𑀢𑁄 𑀫𑀳𑀸𑀚𑀦𑁄;

𑀓𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁’’.

𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁’’.

‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄’’𑀢𑀺 𑀓𑀣𑀬𑀦𑁆𑀢𑁄, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀁.

𑀢𑀢𑁆𑀣 𑀞𑀢𑁆𑀯𑀸 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀢𑀼𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

‘‘𑀇𑀥 𑀩𑀻𑀚𑀸𑀦𑀺 𑀭𑁄𑀧𑀺𑀲𑁆𑀲𑀁, 𑀔𑀡𑁄 𑀯𑁂 𑀫𑀸 𑀉𑀧𑀘𑁆𑀘𑀕𑀸’’.

𑀬𑀤𑀺 𑀩𑀼𑀤𑁆𑀥𑀲𑁆𑀲 𑀲𑁄𑀥𑁂𑀣, 𑀏𑀓𑁄𑀓𑀸𑀲𑀁 𑀤𑀤𑀸𑀣 𑀫𑁂;

𑀅𑀳𑀫𑁆𑀧𑀺 𑀲𑁄𑀥𑀬𑀺𑀲𑁆𑀲𑀸𑀫𑀺, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁.

𑀅𑀤𑀁𑀲𑀼 𑀢𑁂 𑀫𑀫𑁄𑀓𑀸𑀲𑀁, 𑀲𑁄𑀥𑁂𑀢𑀼𑀁 𑀅𑀜𑁆𑀚𑀲𑀁 𑀢𑀤𑀸;

‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, 𑀫𑀕𑁆𑀕𑀁 𑀲𑁄𑀥𑁂𑀫𑀳𑀁 𑀢𑀤𑀸.

𑀅𑀦𑀺𑀝𑁆𑀞𑀺𑀢𑁂 𑀧𑀫𑁄𑀓𑀸𑀲𑁂, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀧𑀝𑀺𑀧𑀚𑁆𑀚𑀺 𑀅𑀜𑁆𑀚𑀲𑀁 𑀚𑀺𑀦𑁄.

𑀧𑀘𑁆𑀘𑀼𑀕𑁆𑀕𑀫𑀦𑀸 𑀯𑀢𑁆𑀢𑀦𑁆𑀢𑀺, 𑀯𑀚𑁆𑀚𑀦𑁆𑀢𑀺 𑀪𑁂𑀭𑀺𑀬𑁄 𑀩𑀳𑀽;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀼𑀁.

𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀘 𑀤𑁂𑀯𑀢𑀸;

𑀉𑀪𑁄𑀧𑀺 𑀢𑁂 𑀧𑀜𑁆𑀚𑀮𑀺𑀓𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

𑀤𑁂𑀯𑀸 𑀤𑀺𑀩𑁆𑀩𑁂𑀳𑀺 𑀢𑀼𑀭𑀺𑀬𑁂𑀳𑀺, 𑀫𑀦𑀼𑀲𑁆𑀲𑀸 𑀫𑀸𑀦𑀼𑀲𑁂𑀳𑀺 𑀘;

𑀉𑀪𑁄𑀧𑀺 𑀢𑁂 𑀯𑀚𑁆𑀚𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

𑀤𑀺𑀩𑁆𑀩𑀁 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘, 𑀯𑀭𑀕𑀦𑁆𑀥𑀜𑁆𑀘 𑀓𑁂𑀯𑀮𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

𑀘𑀫𑁆𑀧𑀓𑀁 𑀲𑀮𑀮𑀁 𑀦𑀻𑀧𑀁, 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀁;

𑀤𑀺𑀲𑁄𑀤𑀺𑀲𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀪𑀽𑀫𑀺𑀢𑀮𑀕𑀢𑀸 𑀦𑀭𑀸.

𑀓𑁂𑀲𑁂 𑀫𑀼𑀜𑁆𑀘𑀺𑀢𑁆𑀯𑀸𑀳𑀁 𑀢𑀢𑁆𑀣, 𑀯𑀸𑀓𑀘𑀻𑀭𑀜𑁆𑀘 𑀘𑀫𑁆𑀫𑀓𑀁;

𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀅𑀯𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀳𑀁.

𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀺.

𑀧𑀣𑀯𑀺𑀬𑀁 𑀦𑀺𑀧𑀦𑁆𑀦𑀲𑁆𑀲, 𑀏𑀯𑀁 𑀫𑁂 𑀆𑀲𑀺 𑀘𑁂𑀢𑀲𑁄;

‘‘𑀇𑀘𑁆𑀙𑀫𑀸𑀦𑁄 𑀅𑀳𑀁 𑀅𑀚𑁆𑀚, 𑀓𑀺𑀮𑁂𑀲𑁂 𑀛𑀸𑀧𑀬𑁂 𑀫𑀫.

‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀩𑀼𑀤𑁆𑀥𑁄 𑀳𑁂𑀲𑁆𑀲𑀁 𑀲𑀤𑁂𑀯𑀓𑁂.

‘‘𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁.

‘‘𑀇𑀫𑀺𑀦𑀸 𑀫𑁂 𑀅𑀥𑀺𑀓𑀸𑀭𑁂𑀦, 𑀓𑀢𑁂𑀦 𑀧𑀼𑀭𑀺𑀲𑀼𑀢𑁆𑀢𑀫𑁂;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀼𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁’’.

𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀉𑀲𑁆𑀲𑀻𑀲𑀓𑁂 𑀫𑀁 𑀞𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀧𑀲𑁆𑀲𑀣 𑀇𑀫𑀁 𑀢𑀸𑀧𑀲𑀁, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁.

‘‘𑀅𑀚𑀧𑀸𑀮𑀭𑀼𑀓𑁆𑀔𑀫𑀽𑀮𑁂, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀢𑀢𑁆𑀣 𑀧𑀸𑀬𑀸𑀲𑀁 𑀧𑀕𑁆𑀕𑀬𑁆𑀳, 𑀦𑁂𑀭𑀜𑁆𑀚𑀭𑀫𑀼𑀧𑁂𑀳𑀺𑀢𑀺.

‘‘𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀫𑁆𑀳𑀺, 𑀧𑀸𑀬𑀸𑀲𑀁 𑀅𑀤 𑀲𑁄 𑀚𑀺𑀦𑁄;

𑀧𑀝𑀺𑀬𑀢𑁆𑀢𑀯𑀭𑀫𑀕𑁆𑀕𑁂𑀦, 𑀩𑁄𑀥𑀺𑀫𑀽𑀮𑀫𑀼𑀧𑁂𑀳𑀺𑀢𑀺.

‘‘𑀢𑀢𑁄 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀩𑁄𑀥𑀺𑀫𑀡𑁆𑀟𑀁 𑀅𑀦𑀼𑀢𑁆𑀢𑀭𑁄;

𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

‘‘𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸.

‘‘𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀘𑀺𑀢𑁆𑀢𑁄 𑀘 𑀳𑀢𑁆𑀣𑀸𑀴𑀯𑀓𑁄, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀓𑀸;

𑀉𑀢𑁆𑀢𑀭𑀸 𑀦𑀦𑁆𑀤𑀫𑀸𑀢𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀺𑀓𑀸’’.

𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑀸.

𑀬𑀤𑀺𑀫𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸 𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀧𑀸𑀤𑀫𑀼𑀤𑁆𑀥𑀭𑀺.

𑀬𑁂 𑀢𑀢𑁆𑀣𑀸𑀲𑀼𑀁 𑀚𑀺𑀦𑀧𑀼𑀢𑁆𑀢𑀸, 𑀲𑀩𑁆𑀩𑁂 𑀧𑀤𑀓𑁆𑀔𑀺𑀡𑀫𑀓𑀁𑀲𑀼 𑀫𑀁;

𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼𑀁.

𑀤𑀲𑁆𑀲𑀦𑀁 𑀫𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀳𑀝𑁆𑀞𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸.

𑀲𑀼𑀔𑁂𑀦 𑀲𑀼𑀔𑀺𑀢𑁄 𑀳𑁄𑀫𑀺, 𑀧𑀸𑀫𑁄𑀚𑁆𑀚𑁂𑀦 𑀧𑀫𑁄𑀤𑀺𑀢𑁄;

𑀧𑀻𑀢𑀺𑀬𑀸 𑀘 𑀅𑀪𑀺𑀲𑁆𑀲𑀦𑁆𑀦𑁄, 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀁 𑀢𑀤𑀸.

𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘‘𑀯𑀲𑀻𑀪𑀽𑀢𑁄 𑀅𑀳𑀁 𑀛𑀸𑀦𑁂, 𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀢𑁄.

‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀫𑁆𑀳𑀺, 𑀇𑀲𑀬𑁄 𑀦𑀢𑁆𑀣𑀺 𑀫𑁂 𑀲𑀫𑀸;

𑀅𑀲𑀫𑁄 𑀇𑀤𑁆𑀥𑀺𑀥𑀫𑁆𑀫𑁂𑀲𑀼, 𑀅𑀮𑀪𑀺𑀁 𑀈𑀤𑀺𑀲𑀁 𑀲𑀼𑀔𑀁’’.

𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 𑀫𑀬𑁆𑀳𑀁, 𑀤𑀲𑀲𑀳𑀲𑁆𑀲𑀸𑀥𑀺𑀯𑀸𑀲𑀺𑀦𑁄;

𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀲𑀼𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂;

𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂.

𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀺;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽, 𑀦𑀺𑀲𑁆𑀲𑀤𑁆𑀤𑀸 𑀳𑁄𑀦𑁆𑀢𑀺 𑀦𑀺𑀭𑀸𑀓𑀼𑀮𑀸;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀫𑀳𑀸𑀯𑀸𑀢𑀸 𑀦 𑀯𑀸𑀬𑀦𑁆𑀢𑀺, 𑀦 𑀲𑀦𑁆𑀤𑀦𑁆𑀢𑀺 𑀲𑀯𑀦𑁆𑀢𑀺𑀬𑁄;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸, 𑀲𑀩𑁆𑀩𑁂 𑀧𑀼𑀧𑁆𑀨𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀮𑀢𑀸 𑀯𑀸 𑀬𑀤𑀺 𑀯𑀸 𑀭𑀼𑀓𑁆𑀔𑀸, 𑀨𑀮𑀪𑀸𑀭𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀨𑀮𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸, 𑀭𑀢𑀦𑀸 𑀚𑁄𑀢𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀭𑀢𑀦𑀸 𑀚𑁄𑀢𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀫𑀸𑀦𑀼𑀲𑁆𑀲𑀓𑀸 𑀘 𑀤𑀺𑀩𑁆𑀩𑀸 𑀘, 𑀢𑀼𑀭𑀺𑀬𑀸 𑀯𑀚𑁆𑀚𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀸 𑀕𑀕𑀦𑀸, 𑀅𑀪𑀺𑀯𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀺 𑀅𑀚𑁆𑀚 𑀧𑀯𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀺;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀦𑀺𑀭𑀬𑁂𑀧𑀺 𑀤𑀲𑀲𑀳𑀲𑁆𑀲𑁂, 𑀅𑀕𑁆𑀕𑀻 𑀦𑀺𑀩𑁆𑀩𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀦𑀺𑀩𑁆𑀩𑀼𑀢𑀸 𑀅𑀕𑁆𑀕𑀻, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀯𑀺𑀫𑀮𑁄 𑀳𑁄𑀢𑀺 𑀲𑀽𑀭𑀺𑀬𑁄, 𑀲𑀩𑁆𑀩𑀸 𑀤𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸;

𑀢𑁂𑀧𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀅𑀦𑁄𑀯𑀝𑁆𑀞𑁂𑀦 𑀉𑀤𑀓𑀁, 𑀫𑀳𑀺𑀬𑀸 𑀉𑀩𑁆𑀪𑀺𑀚𑁆𑀚𑀺 𑀢𑀸𑀯𑀤𑁂;

𑀢𑀫𑁆𑀧𑀚𑁆𑀚𑀼𑀩𑁆𑀪𑀺𑀚𑁆𑀚𑀢𑁂 𑀫𑀳𑀺𑀬𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀢𑀸𑀭𑀸𑀕𑀡𑀸 𑀯𑀺𑀭𑁄𑀘𑀦𑁆𑀢𑀺, 𑀦𑀓𑁆𑀔𑀢𑁆𑀢𑀸 𑀕𑀕𑀦𑀫𑀡𑁆𑀟𑀮𑁂;

𑀯𑀺𑀲𑀸𑀔𑀸 𑀘𑀦𑁆𑀤𑀺𑀫𑀸𑀬𑀼𑀢𑁆𑀢𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀩𑀺𑀮𑀸𑀲𑀬𑀸 𑀤𑀭𑀻𑀲𑀬𑀸, 𑀦𑀺𑀓𑁆𑀔𑀫𑀦𑁆𑀢𑀺 𑀲𑀓𑀸𑀲𑀬𑀸;

𑀢𑁂𑀧𑀚𑁆𑀚 𑀆𑀲𑀬𑀸 𑀙𑀼𑀤𑁆𑀥𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀦 𑀳𑁄𑀢𑀺 𑀅𑀭𑀢𑀺 𑀲𑀢𑁆𑀢𑀸𑀦𑀁, 𑀲𑀦𑁆𑀢𑀼𑀝𑁆𑀞𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀲𑀦𑁆𑀢𑀼𑀝𑁆𑀞𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀭𑁄𑀕𑀸 𑀢𑀤𑀼𑀧𑀲𑀫𑁆𑀫𑀦𑁆𑀢𑀺, 𑀚𑀺𑀖𑀘𑁆𑀙𑀸 𑀘 𑀯𑀺𑀦𑀲𑁆𑀲𑀢𑀺;

𑀢𑀸𑀦𑀺𑀧𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀭𑁄𑀕𑁄 𑀢𑀤𑀸 𑀢𑀦𑀼 𑀳𑁄𑀢𑀺, 𑀤𑁄𑀲𑁄 𑀫𑁄𑀳𑁄 𑀯𑀺𑀦𑀲𑁆𑀲𑀢𑀺;

𑀢𑁂𑀧𑀚𑁆𑀚 𑀯𑀺𑀕𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀪𑀬𑀁 𑀢𑀤𑀸 𑀦 𑀪𑀯𑀢𑀺, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀭𑀚𑁄 𑀦𑀼𑀤𑁆𑀥𑀁𑀲𑀢𑀺 𑀉𑀤𑁆𑀥𑀁, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀅𑀦𑀺𑀝𑁆𑀞𑀕𑀦𑁆𑀥𑁄 𑀧𑀓𑁆𑀓𑀫𑀢𑀺, 𑀤𑀺𑀩𑁆𑀩𑀕𑀦𑁆𑀥𑁄 𑀧𑀯𑀸𑀬𑀢𑀺;

𑀲𑁄𑀧𑀚𑁆𑀚 𑀯𑀸𑀬𑀢𑀺 𑀕𑀦𑁆𑀥𑁄, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀲𑀩𑁆𑀩𑁂 𑀤𑁂𑀯𑀸 𑀧𑀤𑀺𑀲𑁆𑀲𑀦𑁆𑀢𑀺, 𑀞𑀧𑀬𑀺𑀢𑁆𑀯𑀸 𑀅𑀭𑀽𑀧𑀺𑀦𑁄;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀬𑀸𑀯𑀢𑀸 𑀦𑀺𑀭𑀬𑀸 𑀦𑀸𑀫, 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀓𑀼𑀝𑁆𑀝𑀸 𑀓𑀯𑀸𑀝𑀸 𑀲𑁂𑀮𑀸 𑀘, 𑀦 𑀳𑁄𑀦𑁆𑀢𑀸𑀯𑀭𑀡𑀸 𑀢𑀤𑀸;

𑀅𑀓𑀸𑀲𑀪𑀽𑀢𑀸 𑀢𑁂𑀧𑀚𑁆𑀚, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀘𑀼𑀢𑀻 𑀘 𑀉𑀧𑀧𑀢𑁆𑀢𑀺 𑀘, 𑀔𑀡𑁂 𑀢𑀲𑁆𑀫𑀺𑀁 𑀦 𑀯𑀺𑀚𑁆𑀚𑀢𑀺;

𑀢𑀸𑀦𑀺𑀧𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀤𑀴𑁆𑀳𑀁 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁, 𑀫𑀸 𑀦𑀺𑀯𑀢𑁆𑀢 𑀅𑀪𑀺𑀓𑁆𑀓𑀫;

𑀫𑀬𑀫𑁆𑀧𑁂𑀢𑀁 𑀯𑀺𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻𑀦𑀘𑀽𑀪𑀬𑀁;

𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑁄𑀤𑀺𑀢𑁄, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀩𑀼𑀤𑁆𑀥𑀸, 𑀅𑀫𑁄𑀖𑀯𑀘𑀦𑀸 𑀚𑀺𑀦𑀸;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑀬𑀣𑀸 𑀔𑀺𑀢𑁆𑀢𑀁 𑀦𑀪𑁂 𑀮𑁂𑀟𑁆𑀟𑀼, 𑀥𑀼𑀯𑀁 𑀧𑀢𑀢𑀺 𑀪𑀽𑀫𑀺𑀬𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

𑀬𑀣𑀸𑀧𑀺 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀫𑀭𑀡𑀁 𑀥𑀼𑀯𑀲𑀲𑁆𑀲𑀢𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

𑀬𑀣𑀸 𑀭𑀢𑁆𑀢𑀺𑀓𑁆𑀔𑀬𑁂 𑀧𑀢𑁆𑀢𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

𑀬𑀣𑀸 𑀦𑀺𑀓𑁆𑀔𑀦𑁆𑀢𑀲𑀬𑀦𑀲𑁆𑀲, 𑀲𑀻𑀳𑀲𑁆𑀲 𑀦𑀤𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

𑀬𑀣𑀸 𑀆𑀧𑀦𑁆𑀦𑀲𑀢𑁆𑀢𑀸𑀦𑀁, 𑀪𑀸𑀭𑀫𑁄𑀭𑁄𑀧𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

𑀳𑀦𑁆𑀤 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀅𑀦𑀼𑀘𑀺𑀡𑁆𑀡𑀁 𑀫𑀳𑀸𑀧𑀣𑀁.

𑀇𑀫𑀁 𑀢𑁆𑀯𑀁 𑀧𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀤𑀸𑀦𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸𑀧𑀺 𑀓𑀼𑀫𑁆𑀪𑁄 𑀲𑀫𑁆𑀧𑀼𑀡𑁆𑀡𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀥𑁄𑀓𑀢𑁄;

𑀯𑀫𑀢𑁂 𑀯𑀼𑀤𑀓𑀁 𑀦𑀺𑀲𑁆𑀲𑁂𑀲𑀁, 𑀦 𑀢𑀢𑁆𑀣 𑀧𑀭𑀺𑀭𑀓𑁆𑀔𑀢𑀺.

𑀢𑀣𑁂𑀯 𑀬𑀸𑀘𑀓𑁂 𑀤𑀺𑀲𑁆𑀯𑀸, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀤𑀤𑀸𑀳𑀺 𑀤𑀸𑀦𑀁 𑀦𑀺𑀲𑁆𑀲𑁂𑀲𑀁, 𑀓𑀼𑀫𑁆𑀪𑁄 𑀯𑀺𑀬 𑀅𑀥𑁄𑀓𑀢𑁄.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀤𑀼𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀲𑀻𑀮𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸𑀧𑀺 𑀘𑀫𑀭𑀻 𑀯𑀸𑀮𑀁, 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀮𑀕𑁆𑀕𑀺𑀢𑀁;

𑀉𑀧𑁂𑀢𑀺 𑀫𑀭𑀡𑀁 𑀢𑀢𑁆𑀣, 𑀦 𑀯𑀺𑀓𑁄𑀧𑁂𑀢𑀺 𑀯𑀸𑀮𑀥𑀺𑀁.

𑀢𑀣𑁂𑀯 𑀘𑀢𑀽𑀲𑀼 𑀪𑀽𑀫𑀻𑀲𑀼, 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑀬;

𑀧𑀭𑀺𑀭𑀓𑁆𑀔 𑀲𑀤𑀸 𑀲𑀻𑀮𑀁, 𑀘𑀫𑀭𑀻 𑀯𑀺𑀬 𑀯𑀸𑀮𑀥𑀺𑀁.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀢𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸 𑀅𑀦𑁆𑀤𑀼𑀖𑀭𑁂 𑀧𑀼𑀭𑀺𑀲𑁄, 𑀘𑀺𑀭𑀯𑀼𑀢𑁆𑀣𑁄 𑀤𑀼𑀔𑀝𑁆𑀝𑀺𑀢𑁄;

𑀦 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀺, 𑀫𑀼𑀢𑁆𑀢𑀺𑀫𑁂𑀯 𑀕𑀯𑁂𑀲𑀢𑀺.

𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀲𑁆𑀲 𑀅𑀦𑁆𑀤𑀼𑀖𑀭𑀁 𑀯𑀺𑀬;

𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀘𑀢𑀼𑀢𑁆𑀣𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸𑀧𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀦𑁆𑀢𑁄, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀓𑀼𑀮𑀸𑀦𑀺 𑀦 𑀯𑀺𑀯𑀚𑁆𑀚𑁂𑀦𑁆𑀢𑁄, 𑀏𑀯𑀁 𑀮𑀪𑀢𑀺 𑀬𑀸𑀧𑀦𑀁.

𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀓𑀸𑀮𑀁, 𑀧𑀭𑀺𑀧𑀼𑀘𑁆𑀙𑀁 𑀩𑀼𑀥𑀁 𑀚𑀦𑀁;

𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀧𑀜𑁆𑀘𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸𑀧𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀮𑀻𑀦𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀫𑀦𑁄 𑀲𑀤𑀸.

𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁 𑀤𑀴𑁆𑀳𑀁;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀙𑀝𑁆𑀞𑀫𑀁 𑀔𑀦𑁆𑀢𑀺𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀙𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀫𑀸𑀦𑀲𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀘;

𑀲𑀩𑁆𑀩𑀁 𑀲𑀳𑀢𑀺 𑀦𑀺𑀓𑁆𑀔𑁂𑀧𑀁, 𑀦 𑀓𑀭𑁄𑀢𑀺 𑀧𑀝𑀺𑀖𑀁 𑀢𑀬𑀸.

𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂𑀲𑀁, 𑀲𑀫𑁆𑀫𑀸𑀦𑀸𑀯𑀫𑀸𑀦𑀓𑁆𑀔𑀫𑁄;

𑀔𑀦𑁆𑀢𑀺𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀲𑀢𑁆𑀢𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀯𑀘𑀦𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀬𑀣𑀸𑀧𑀺 𑀑𑀲𑀫𑀻 𑀦𑀸𑀫, 𑀢𑀼𑀮𑀸𑀪𑀽𑀢𑀸 𑀲𑀤𑁂𑀯𑀓𑁂;

𑀲𑀫𑀬𑁂 𑀉𑀢𑀼𑀯𑀲𑁆𑀲𑁂 𑀯𑀸, 𑀦 𑀯𑁄𑀓𑁆𑀓𑀫𑀢𑀺, 𑀯𑀻𑀣𑀺𑀢𑁄.

𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀘𑁆𑀘𑁂𑀲𑀼, 𑀫𑀸 𑀯𑁄𑀓𑁆𑀓𑀫𑀲𑀺 𑀯𑀻𑀣𑀺𑀢𑁄;

𑀲𑀘𑁆𑀘𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀅𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀢𑁆𑀯𑀁 𑀅𑀘𑀮𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀦 𑀓𑀫𑁆𑀧𑀢𑀺 𑀪𑀼𑀲𑀯𑀸𑀢𑁂𑀳𑀺, 𑀲𑀓𑀝𑁆𑀞𑀸𑀦𑁂𑀯 𑀢𑀺𑀝𑁆𑀞𑀢𑀺.

𑀢𑀣𑁂𑀯 𑀢𑁆𑀯𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑁂, 𑀲𑀩𑁆𑀩𑀤𑀸 𑀅𑀘𑀮𑁄 𑀪𑀯;

𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀦𑀯𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀫𑁂𑀢𑁆𑀢𑀸𑀬 𑀅𑀲𑀫𑁄 𑀳𑁄𑀳𑀺, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑀬𑀣𑀸𑀧𑀺 𑀉𑀤𑀓𑀁 𑀦𑀸𑀫, 𑀓𑀮𑁆𑀬𑀸𑀡𑁂 𑀧𑀸𑀧𑀓𑁂 𑀚𑀦𑁂;

𑀲𑀫𑀁 𑀨𑀭𑀢𑀺 𑀲𑀻𑀢𑁂𑀦, 𑀧𑀯𑀸𑀳𑁂𑀢𑀺 𑀭𑀚𑁄𑀫𑀮𑀁.

𑀢𑀣𑁂𑀯 𑀢𑁆𑀯𑀫𑁆𑀧𑀺 𑀳𑀺𑀢𑀸𑀳𑀺𑀢𑁂, 𑀲𑀫𑀁 𑀫𑁂𑀢𑁆𑀢𑀸𑀬 𑀪𑀸𑀯𑀬;

𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑀇𑀫𑀁 𑀢𑁆𑀯𑀁 𑀤𑀲𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀼𑀮𑀸𑀪𑀽𑀢𑁄 𑀤𑀴𑁆𑀳𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀦𑀺𑀓𑁆𑀔𑀺𑀢𑁆𑀢𑀁 𑀅𑀲𑀼𑀘𑀺𑀁 𑀲𑀼𑀘𑀺𑀁;

𑀉𑀧𑁂𑀓𑁆𑀔𑀢𑀺 𑀉𑀪𑁄𑀧𑁂𑀢𑁂, 𑀓𑁄𑀧𑀸𑀦𑀼𑀦𑀬𑀯𑀚𑁆𑀚𑀺𑀢𑀸.

𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑁂, 𑀢𑀼𑀮𑀸𑀪𑀽𑀢𑁄 𑀲𑀤𑀸 𑀪𑀯;

𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀏𑀢𑁆𑀢𑀓𑀸𑀬𑁂𑀯 𑀢𑁂 𑀮𑁄𑀓𑁂, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸;

𑀢𑀢𑀼𑀤𑁆𑀥𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭, 𑀤𑀴𑁆𑀳𑀁 𑀢𑀢𑁆𑀣 𑀧𑀢𑀺𑀝𑁆𑀞𑀳.

𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀭𑀲𑀮𑀓𑁆𑀔𑀡𑁂;

𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣.

𑀘𑀮𑀢𑀸 𑀭𑀯𑀢𑀺 𑀧𑀣𑀯𑀻, 𑀉𑀘𑁆𑀙𑀼𑀬𑀦𑁆𑀢𑀁𑀯 𑀧𑀻𑀴𑀺𑀢𑀁;

𑀢𑁂𑀮𑀬𑀦𑁆𑀢𑁂 𑀬𑀣𑀸 𑀘𑀓𑁆𑀓𑀁, 𑀏𑀯𑀁 𑀓𑀫𑁆𑀧𑀢𑀺 𑀫𑁂𑀤𑀺𑀦𑀻.

𑀬𑀸𑀯𑀢𑀸 𑀧𑀭𑀺𑀲𑀸 𑀆𑀲𑀺, 𑀩𑀼𑀤𑁆𑀥𑀲𑁆𑀲 𑀧𑀭𑀺𑀯𑁂𑀲𑀦𑁂;

𑀧𑀯𑁂𑀥𑀫𑀸𑀦𑀸 𑀲𑀸 𑀢𑀢𑁆𑀣, 𑀫𑀼𑀘𑁆𑀙𑀺𑀢𑀸 𑀲𑁂𑀲𑀺 𑀪𑀽𑀫𑀺𑀬𑀸.

𑀖𑀝𑀸𑀦𑁂𑀓𑀲𑀳𑀲𑁆𑀲𑀸𑀦𑀺, 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽;

𑀲𑀜𑁆𑀘𑀼𑀡𑁆𑀡𑀫𑀣𑀺𑀢𑀸 𑀢𑀢𑁆𑀣, 𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑀺𑀢𑀸.

𑀉𑀩𑁆𑀩𑀺𑀕𑁆𑀕𑀸 𑀢𑀲𑀺𑀢𑀸 𑀪𑀻𑀢𑀸, 𑀪𑀦𑁆𑀢𑀸 𑀩𑁆𑀬𑀸𑀣𑀺𑀢𑀫𑀸𑀦𑀲𑀸;

𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀤𑀻𑀧𑀗𑁆𑀓𑀭𑀫𑀼𑀧𑀸𑀕𑀫𑀼𑀁.

𑀓𑀺𑀁 𑀪𑀯𑀺𑀲𑁆𑀲𑀢𑀺 𑀮𑁄𑀓𑀲𑁆𑀲, 𑀓𑀮𑁆𑀬𑀸𑀡𑀫𑀣 𑀧𑀸𑀧𑀓𑀁;

𑀲𑀩𑁆𑀩𑁄 𑀉𑀧𑀤𑁆𑀤𑀼𑀢𑁄 𑀮𑁄𑀓𑁄, 𑀢𑀁 𑀯𑀺𑀦𑁄𑀤𑁂𑀳𑀺 𑀘𑀓𑁆𑀔𑀼𑀫.

𑀢𑁂𑀲𑀁 𑀢𑀤𑀸 𑀲𑀜𑁆𑀜𑀸𑀧𑁂𑀲𑀺, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀯𑀺𑀲𑁆𑀲𑀢𑁆𑀣𑀸 𑀳𑁄𑀣 𑀫𑀸 𑀪𑀸𑀣, 𑀇𑀫𑀲𑁆𑀫𑀺𑀁 𑀧𑀣𑀯𑀺𑀓𑀫𑁆𑀧𑀦𑁂.

𑀬𑀫𑀳𑀁 𑀅𑀚𑁆𑀚 𑀩𑁆𑀬𑀸𑀓𑀸𑀲𑀺𑀁, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺;

𑀏𑀲𑁄 𑀲𑀫𑁆𑀫𑀲𑀢𑀺 𑀥𑀫𑁆𑀫𑀁, 𑀧𑀼𑀩𑁆𑀩𑀓𑀁 𑀚𑀺𑀦𑀲𑁂𑀯𑀺𑀢𑀁.

𑀢𑀲𑁆𑀲 𑀲𑀫𑁆𑀫𑀲𑀢𑁄 𑀥𑀫𑁆𑀫𑀁, 𑀩𑀼𑀤𑁆𑀥𑀪𑀽𑀫𑀺𑀁 𑀅𑀲𑁂𑀲𑀢𑁄;

𑀢𑁂𑀦𑀸𑀬𑀁 𑀓𑀫𑁆𑀧𑀺𑀢𑀸 𑀧𑀣𑀯𑀻, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑁂.

𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀫𑀦𑁄 𑀦𑀺𑀩𑁆𑀩𑀸𑀬𑀺 𑀢𑀸𑀯𑀤𑁂;

𑀲𑀩𑁆𑀩𑁂 𑀫𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀼𑀦𑀸𑀧𑀺 𑀅𑀪𑀺𑀯𑀦𑁆𑀤𑀺𑀲𑀼𑀁.

𑀲𑀫𑀸𑀤𑀬𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀁, 𑀤𑀴𑁆𑀳𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀤𑀻𑀧𑀗𑁆𑀓𑀭𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸.

𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀁 𑀧𑀼𑀧𑁆𑀨𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀲𑀫𑁄𑀓𑀺𑀭𑀦𑁆𑀢𑀺 𑀧𑀼𑀧𑁆𑀨𑁂𑀳𑀺, 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀆𑀲𑀦𑀸.

𑀯𑁂𑀤𑀬𑀦𑁆𑀢𑀺 𑀘 𑀢𑁂 𑀲𑁄𑀢𑁆𑀣𑀺𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀫𑀳𑀦𑁆𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀢𑀁 𑀮𑀪𑀲𑁆𑀲𑀼 𑀬𑀣𑀺𑀘𑁆𑀙𑀺𑀢𑀁.

𑀲𑀩𑁆𑀩𑀻𑀢𑀺𑀬𑁄 𑀯𑀺𑀯𑀚𑁆𑀚𑀦𑁆𑀢𑀼, 𑀲𑁄𑀓𑁄 𑀭𑁄𑀕𑁄 𑀯𑀺𑀦𑀲𑁆𑀲𑀢𑀼;

𑀫𑀸 𑀢𑁂 𑀪𑀯𑀦𑁆𑀢𑁆𑀯𑀦𑁆𑀢𑀭𑀸𑀬𑀸, 𑀨𑀼𑀲 𑀔𑀺𑀧𑁆𑀧𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑀬𑀣𑀸𑀧𑀺 𑀲𑀫𑀬𑁂 𑀧𑀢𑁆𑀢𑁂, 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀺𑀦𑁄 𑀤𑀼𑀫𑀸;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀤𑁆𑀥𑀜𑀸𑀡𑁂𑀦 𑀧𑀼𑀧𑁆𑀨𑀲𑀼.

𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀧𑀽𑀭𑀬𑀼𑀁 𑀤𑀲𑀧𑀸𑀭𑀫𑀻;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀧𑀽𑀭𑁂𑀳𑀺 𑀤𑀲𑀧𑀸𑀭𑀫𑀻.

𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀩𑁄𑀥𑀺𑀫𑀡𑁆𑀟𑀫𑁆𑀳𑀺 𑀩𑀼𑀚𑁆𑀛𑀭𑁂;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀚𑁆𑀛𑀲𑁆𑀲𑀼 𑀚𑀺𑀦𑀩𑁄𑀥𑀺𑀬𑀁.

𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀼𑀁;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬.

𑀧𑀼𑀡𑁆𑀡𑀫𑀸𑀬𑁂 𑀬𑀣𑀸 𑀘𑀦𑁆𑀤𑁄, 𑀧𑀭𑀺𑀲𑀼𑀤𑁆𑀥𑁄 𑀯𑀺𑀭𑁄𑀘𑀢𑀺;

𑀢𑀣𑁂𑀯 𑀢𑁆𑀯𑀁 𑀧𑀼𑀡𑁆𑀡𑀫𑀦𑁄, 𑀯𑀺𑀭𑁄𑀘 𑀤𑀲𑀲𑀳𑀲𑁆𑀲𑀺𑀬𑀁.

𑀭𑀸𑀳𑀼𑀫𑀼𑀢𑁆𑀢𑁄 𑀬𑀣𑀸 𑀲𑀽𑀭𑀺𑀬𑁄, 𑀢𑀸𑀧𑁂𑀦 𑀅𑀢𑀺𑀭𑁄𑀘𑀢𑀺;

𑀢𑀣𑁂𑀯 𑀮𑁄𑀓𑀸 𑀫𑀼𑀜𑁆𑀘𑀺𑀢𑁆𑀯𑀸, 𑀯𑀺𑀭𑁄𑀘 𑀲𑀺𑀭𑀺𑀬𑀸 𑀢𑀼𑀯𑀁.

𑀬𑀣𑀸 𑀬𑀸 𑀓𑀸𑀘𑀺 𑀦𑀤𑀺𑀬𑁄, 𑀑𑀲𑀭𑀦𑁆𑀢𑀺 𑀫𑀳𑁄𑀤𑀥𑀺𑀁;

𑀏𑀯𑀁 𑀲𑀤𑁂𑀯𑀓𑀸 𑀮𑁄𑀓𑀸, 𑀑𑀲𑀭𑀦𑁆𑀢𑀼 𑀢𑀯𑀦𑁆𑀢𑀺𑀓𑁂.

𑀢𑁂𑀳𑀺 𑀣𑀼𑀢𑀧𑁆𑀧𑀲𑀢𑁆𑀣𑁄 𑀲𑁄, 𑀤𑀲 𑀥𑀫𑁆𑀫𑁂 𑀲𑀫𑀸𑀤𑀺𑀬;

𑀢𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀧𑀯𑀦𑀁 𑀧𑀸𑀯𑀺𑀲𑀻 𑀢𑀤𑀸.

𑀲𑀼𑀫𑁂𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀤𑀸 𑀢𑁂 𑀪𑁄𑀚𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀉𑀧𑀕𑀘𑁆𑀙𑀼𑀁 𑀲𑀭𑀡𑀁 𑀢𑀲𑁆𑀲, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑀲𑀭𑀡𑀸𑀕𑀫𑀦𑁂 𑀓𑀜𑁆𑀘𑀺, 𑀦𑀺𑀯𑁂𑀲𑁂𑀲𑀺 𑀢𑀣𑀸𑀕𑀢𑁄;

𑀓𑀜𑁆𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀲𑀻𑀮𑁂 𑀤𑀲𑀯𑀺𑀥𑁂 𑀧𑀭𑀁.

𑀓𑀲𑁆𑀲𑀘𑀺 𑀤𑁂𑀢𑀺 𑀲𑀸𑀫𑀜𑁆𑀜𑀁, 𑀘𑀢𑀼𑀭𑁄 𑀨𑀮𑀫𑀼𑀢𑁆𑀢𑀫𑁂;

𑀓𑀲𑁆𑀲𑀘𑀺 𑀅𑀲𑀫𑁂 𑀥𑀫𑁆𑀫𑁂, 𑀤𑁂𑀢𑀺 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

𑀓𑀲𑁆𑀲𑀘𑀺 𑀯𑀭𑀲𑀫𑀸𑀧𑀢𑁆𑀢𑀺𑀬𑁄, 𑀅𑀝𑁆𑀞 𑀤𑁂𑀢𑀺 𑀦𑀭𑀸𑀲𑀪𑁄;

𑀢𑀺𑀲𑁆𑀲𑁄 𑀓𑀲𑁆𑀲𑀘𑀺 𑀯𑀺𑀚𑁆𑀚𑀸𑀬𑁄, 𑀙𑀴𑀪𑀺𑀜𑁆𑀜𑀸 𑀧𑀯𑁂𑀘𑁆𑀙𑀢𑀺.

𑀢𑁂𑀦 𑀬𑁄𑀕𑁂𑀦 𑀚𑀦𑀓𑀸𑀬𑀁, 𑀑𑀯𑀤𑀢𑀺 𑀫𑀳𑀸𑀫𑀼𑀦𑀺;

𑀢𑁂𑀦 𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑀫𑀳𑀸𑀳𑀦𑀼𑀲𑀪𑀓𑁆𑀔𑀦𑁆𑀥𑁄, 𑀤𑀻𑀧𑀗𑁆𑀓𑀭𑀲𑀦𑀸𑀫𑀓𑁄;

𑀩𑀳𑀽 𑀚𑀦𑁂 𑀢𑀸𑀭𑀬𑀢𑀺, 𑀧𑀭𑀺𑀫𑁄𑀘𑁂𑀢𑀺 𑀤𑀼𑀕𑁆𑀕𑀢𑀺𑀁.

𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂;

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁄𑀥𑁂𑀢𑀺 𑀢𑀁 𑀫𑀳𑀸𑀫𑀼𑀦𑀺.

𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀦𑀸𑀣𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

𑀬𑀤𑀸 𑀘 𑀤𑁂𑀯𑀪𑀯𑀦𑀫𑁆𑀳𑀺, 𑀩𑀼𑀤𑁆𑀥𑁄 𑀥𑀫𑁆𑀫𑀤𑁂𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑀧𑀼𑀦 𑀦𑀸𑀭𑀤𑀓𑀽𑀝𑀫𑁆𑀳𑀺, 𑀧𑀯𑀺𑀯𑁂𑀓𑀕𑀢𑁂 𑀚𑀺𑀦𑁂;

𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄.

𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀲𑀼𑀤𑀲𑁆𑀲𑀦𑀲𑀺𑀮𑀼𑀘𑁆𑀘𑀬𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀺.

𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀘𑀭𑀡𑁄, 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀼 𑀧𑀸𑀭𑀕𑀽.

𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁, 𑀇𑀤𑁆𑀥𑀁 𑀨𑀻𑀢𑀁 𑀅𑀳𑀼 𑀢𑀤𑀸;

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢𑀁.

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸.

𑀬𑁂 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀚𑀳𑀦𑁆𑀢𑀺 𑀫𑀸𑀦𑀼𑀲𑀁 𑀪𑀯𑀁;

𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀲𑁂𑀔𑀸, 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺 𑀢𑁂.

𑀲𑀼𑀧𑀼𑀧𑁆𑀨𑀺𑀢𑀁 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀉𑀧𑀲𑁄𑀪𑀢𑀺 𑀲𑀤𑁂𑀯𑀓𑁂.

𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀫𑁂𑀥𑀸 𑀦𑀸𑀫 𑀚𑀦𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑀲𑀼𑀫𑀗𑁆𑀕𑀮𑁄 𑀘 𑀢𑀺𑀲𑁆𑀲𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀺𑀧𑁆𑀨𑀮𑀻𑀢𑀺 𑀧𑀯𑀼𑀘𑁆𑀘𑀢𑀺.

𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑀺 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀸𑀮𑀭𑀸𑀚𑀸𑀯 𑀧𑀼𑀧𑁆𑀨𑀺𑀢𑁄;

𑀧𑀪𑀸 𑀯𑀺𑀥𑀸𑀯𑀢𑀺 𑀢𑀲𑁆𑀲, 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑁂.

𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑀲𑀸 𑀘 𑀇𑀤𑁆𑀥𑀺 𑀲𑁄 𑀘 𑀬𑀲𑁄, 𑀢𑀸𑀦𑀺 𑀘 𑀧𑀸𑀤𑁂𑀲𑀼 𑀘𑀓𑁆𑀓𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸𑀢𑀺.

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁. 𑀤𑀼𑀢𑀺𑀬𑁂 𑀓𑁄𑀝𑀺𑀲𑀳𑀲𑁆𑀲𑀁, 𑀢𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀩𑁄𑀥𑀺𑀲𑀢𑁆𑀢𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀲𑁆𑀲 𑀧𑀦 𑀭𑀫𑁆𑀫𑀯𑀢𑀻 𑀦𑀸𑀫 𑀦𑀕𑀭𑀁, 𑀲𑀼𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀲𑀼𑀚𑀸𑀢𑀸 𑀦𑀸𑀫 𑀫𑀸𑀢𑀸, 𑀪𑀤𑁆𑀤𑁄 𑀘 𑀲𑀼𑀪𑀤𑁆𑀤𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀦𑀼𑀭𑀼𑀤𑁆𑀥𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀢𑀺𑀲𑁆𑀲𑀸 𑀘 𑀉𑀧𑀢𑀺𑀲𑁆𑀲𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀓𑀮𑁆𑀬𑀸𑀡𑀻 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀫𑀗𑁆𑀕𑀮𑁄 𑀲𑀼𑀫𑀦𑁄 𑀭𑁂𑀯𑀢𑁄 𑀲𑁄𑀪𑀺𑀢𑁄𑀢𑀺. 𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀢𑀻𑀲𑀼 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁂𑀲𑀼 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁. 𑀤𑀼𑀢𑀺𑀬𑁂 𑀓𑁄𑀝𑀺𑀲𑀳𑀲𑁆𑀲𑀁. 𑀢𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄. 𑀯𑁂𑀫𑀸𑀢𑀺𑀓𑀪𑀸𑀢𑀸 𑀧𑀦𑀲𑁆𑀲 𑀆𑀦𑀦𑁆𑀤𑀓𑀼𑀫𑀸𑀭𑁄 𑀦𑀸𑀫 𑀦𑀯𑀼𑀢𑀺𑀓𑁄𑀝𑀺𑀲𑀗𑁆𑀔𑁆𑀬𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑁄 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀧𑀼𑀩𑁆𑀩𑀘𑀭𑀺𑀬𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀲𑀩𑁆𑀩𑁂 𑀢𑀗𑁆𑀔𑀡𑀜𑁆𑀜𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼 𑀅𑀬𑀫𑀲𑁆𑀲 𑀢𑀢𑀺𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀬𑀣𑀸 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀸𑀬𑁂𑀯 𑀲𑀭𑀻𑀭𑀧𑁆𑀧𑀪𑀸 𑀳𑁄𑀢𑀺, 𑀦, 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀓𑀸𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑀧𑀣𑀯𑀻𑀧𑀩𑁆𑀩𑀢𑀲𑀫𑀼𑀤𑁆𑀤𑀸𑀤𑀬𑁄 𑀅𑀦𑁆𑀢𑀫𑀲𑁄 𑀉𑀓𑁆𑀔𑀮𑀺𑀬𑀸𑀤𑀻𑀦𑀺 𑀉𑀧𑀸𑀤𑀸𑀬 𑀲𑀼𑀯𑀡𑁆𑀡𑀧𑀝 𑀧𑀭𑀺𑀬𑁄𑀦𑀤𑁆𑀥𑀸 𑀯𑀺𑀬 𑀅𑀳𑁂𑀲𑀼𑀁. 𑀆𑀬𑀼𑀧𑁆𑀧𑀫𑀸𑀡𑀁 𑀧𑀦𑀲𑁆𑀲 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀬𑁄 𑀅𑀢𑁆𑀢𑀦𑁄 𑀧𑀪𑀸𑀬 𑀯𑀺𑀭𑁄𑀘𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑁂𑀦 𑀯𑀺𑀬 𑀲𑀢𑁆𑀢𑀸 𑀦𑀺𑀘𑁆𑀘𑀁 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀯𑀺𑀘𑀭𑀺𑀁𑀲𑀼. 𑀲𑀸𑀬𑀁 𑀧𑀼𑀧𑁆𑀨𑀺𑀢𑀸𑀦𑀁 𑀓𑀼𑀲𑀼𑀫𑀸𑀦𑀁, 𑀧𑀸𑀢𑁄 𑀭𑀯𑀦𑀓𑀲𑀓𑀼𑀡𑀸𑀦𑀜𑁆𑀘 𑀯𑀲𑁂𑀦 𑀮𑁄𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀲𑀮𑁆𑀮𑀓𑁆𑀔𑁂𑀲𑀺. 𑀓𑀺𑀁 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀢𑁂𑀧𑀺 𑀳𑀺 𑀆𑀓𑀗𑁆𑀔𑀫𑀸𑀦𑀸 𑀤𑀲𑀲𑀳𑀲𑁆𑀲𑀺𑀁 𑀯𑀸 𑀮𑁄𑀓𑀥𑀸𑀢𑀼𑀁, 𑀢𑀢𑁄 𑀯𑀸 𑀪𑀺𑀬𑁆𑀬𑁄 𑀆𑀪𑀸𑀬 𑀨𑀭𑁂𑀬𑁆𑀬𑀼𑀁. 𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀅𑀜𑁆𑀜𑁂𑀲𑀁 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀫𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀓𑀸𑀮𑁂 𑀯𑁂𑀲𑁆𑀲𑀦𑁆𑀢𑀭𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀞𑀺𑀢𑁄 𑀲𑀧𑀼𑀢𑁆𑀢𑀤𑀸𑀭𑁄 𑀯𑀗𑁆𑀓𑀧𑀩𑁆𑀩𑀢𑀲𑀤𑀺𑀲𑁂 𑀧𑀩𑁆𑀩𑀢𑁂 𑀯𑀲𑀺. 𑀅𑀣𑁂𑀓𑁄 𑀔𑀭𑀤𑀸𑀞𑀺𑀓𑁄 𑀦𑀸𑀫 𑀬𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑁆𑀯𑁂 𑀤𑀸𑀭𑀓𑁂 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 ‘‘𑀤𑀤𑀸𑀫𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀓𑁂’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀓𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀦𑁆𑀢𑁄 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀅𑀤𑀸𑀲𑀺. 𑀬𑀓𑁆𑀔𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀲𑀢𑁆𑀢𑀲𑁆𑀲 𑀫𑀼𑀴𑀸𑀮𑀓𑀮𑀸𑀧𑀁 𑀯𑀺𑀬 𑀤𑁆𑀯𑁂 𑀤𑀸𑀭𑀓𑁂 𑀔𑀸𑀤𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀯𑀺𑀯𑀝𑀫𑀢𑁆𑀢𑁂 𑀅𑀕𑁆𑀕𑀺𑀚𑀸𑀮𑀁 𑀯𑀺𑀬 𑀮𑁄𑀳𑀺𑀢𑀥𑀸𑀭𑀁 𑀉𑀕𑁆𑀕𑀺𑀭𑀫𑀸𑀦𑀁 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸𑀧𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀦𑀼𑀧𑁆𑀧𑀚𑁆𑀚𑀺, ‘‘𑀲𑀼𑀤𑀺𑀦𑁆𑀦𑀁 𑀯𑀢 𑀫𑁂 𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀧𑀦𑀲𑁆𑀲 𑀲𑀭𑀻𑀭𑁂 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀲𑁄 ‘‘𑀇𑀫𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀢𑀲𑁆𑀲 𑀢𑀁 𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀁𑀲𑀼.

𑀅𑀧𑀭𑀫𑁆𑀧𑀺𑀲𑁆𑀲 𑀧𑀼𑀩𑁆𑀩𑀘𑀭𑀺𑀢𑀁 𑀅𑀢𑁆𑀣𑀺. 𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀬𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀡𑁆𑀟𑀓𑀤𑀻𑀧𑀺𑀓𑀸𑀯𑁂𑀞𑀦𑀦𑀺𑀬𑀸𑀫𑁂𑀦 𑀲𑀓𑀮𑀲𑀭𑀻𑀭𑀁 𑀯𑁂𑀞𑀸𑀧𑁂𑀢𑁆𑀯𑀸 𑀭𑀢𑀦𑀫𑀢𑁆𑀢𑀫𑀓𑀼𑀮𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑀸𑀧𑁂𑀢𑁆𑀯𑀸 𑀢𑀁 𑀲𑀻𑀲𑁂𑀦𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀚𑀸𑀮𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀏𑀯𑀁 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀸𑀬𑀫𑀦𑁆𑀢𑀲𑁆𑀲𑀸𑀧𑀺𑀲𑁆𑀲 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀲𑀼𑀫𑀁 𑀦 𑀕𑀡𑁆𑀳𑀺, 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑁄 𑀳𑀺 𑀦𑀸𑀫𑁂𑀲 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀭𑀓𑁆𑀔𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁,

𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂,

𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫);

𑀇𑀫𑀲𑁆𑀲𑀸𑀧𑀺 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑁄𑀪𑀸𑀲𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀼𑀭𑀼𑀘𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣 𑀪𑀦𑁆𑀢𑁂’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡 𑀓𑀺𑀢𑁆𑀢𑀓𑁂𑀳𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄𑀢𑀺, 𑀓𑀺𑀢𑁆𑀢𑀓𑀸 𑀧𑀦 𑀯𑁄 𑀪𑀦𑁆𑀢𑁂 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽𑀢𑀺. 𑀢𑀤𑀸 𑀲𑀢𑁆𑀣𑀼 𑀧𑀞𑀫𑀲𑀦𑁆𑀦𑀺𑀧𑀸𑀢𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀓𑁄𑀝𑀺𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀆𑀳. ‘‘𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺𑀧𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀤𑀸𑀢𑀼𑀁 𑀦𑁄 𑀦 𑀲𑀓𑁆𑀓𑁄𑀫𑀺, 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀧𑀦 𑀓𑀣𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀲𑀸 𑀘𑀺𑀦𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀣𑀓𑁂 𑀞𑀺𑀢𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀲𑁆𑀲 𑀉𑀡𑁆𑀳𑀪𑀸𑀯𑀁 𑀚𑀦𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀲𑁆𑀫𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀼𑀭𑀼𑀘𑀺 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀢𑁆𑀣𑀸𑀬 𑀘𑀺𑀦𑁆𑀢𑁂𑀲𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀟𑁆𑀠𑀓𑀺𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀪𑀢𑀺𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. 𑀫𑀫 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀕𑁂𑀳𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀬𑁄 𑀬𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀢𑀁 𑀓𑀸𑀢𑀼𑀁 𑀚𑀸𑀦𑀸𑀫𑀻𑀢𑀺. 𑀢𑁂𑀦 𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺. 𑀓𑀺𑀁, 𑀅𑀬𑁆𑀬𑀸𑀢𑀺? 𑀲𑁆𑀯𑀸𑀢𑀦𑀸𑀬 𑀫𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸, 𑀢𑁂𑀲𑀁 𑀦𑀺𑀲𑀻𑀤𑀦𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀲𑀻𑀢𑀺. 𑀅𑀳𑀁 𑀦𑀸𑀫 𑀓𑀭𑁂𑀬𑁆𑀬𑀁, 𑀲𑀘𑁂 𑀫𑁂 𑀪𑀢𑀺𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸𑀢𑀺. 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸𑀢𑀺. ‘‘𑀲𑀸𑀥𑀼 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀤𑁂𑀲𑀁 𑀑𑀮𑁄𑀓𑁂𑀲𑀺.

𑀤𑁆𑀯𑀸𑀤𑀲𑀢𑁂𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑀢𑀮𑁄 𑀅𑀳𑁄𑀲𑀺. 𑀲𑁄 ‘‘𑀏𑀢𑁆𑀢𑀓𑁂 𑀞𑀸𑀦𑁂 𑀲𑀢𑁆𑀢𑀭𑀢𑀦𑀫𑀬𑁄 𑀫𑀡𑁆𑀟𑀧𑁄 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀸𑀯𑀤𑁂𑀯 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀡𑁆𑀟𑀧𑁄 𑀉𑀝𑁆𑀞𑀳𑀺. 𑀢𑀲𑁆𑀲 𑀲𑀼𑀯𑀡𑁆𑀡𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀭𑀚𑀢𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁, 𑀭𑀚𑀢𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑀼𑀯𑀡𑁆𑀡𑀫𑀬𑀸, 𑀫𑀡𑀺𑀢𑁆𑀣𑀫𑁆𑀪𑁂𑀲𑀼 𑀧𑀯𑀸𑀴𑀫𑀬𑀸, 𑀧𑀯𑀸𑀴𑀢𑁆𑀣𑀫𑁆𑀪𑁂𑀲𑀼 𑀫𑀡𑀺𑀫𑀬𑀸, 𑀲𑀢𑁆𑀢𑀭𑀢𑀦𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑀢𑁆𑀢𑀭𑀢𑀦𑀫𑀬𑀸𑀯 𑀖𑀝𑀓𑀸 𑀅𑀳𑁂𑀲𑀼𑀁. 𑀢𑀢𑁄 ‘‘𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑀭𑀦𑁆𑀢𑁂𑀦 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀁 𑀑𑀮𑀫𑁆𑀩𑀢𑀽’’𑀢𑀺 𑀑𑀮𑁄𑀓𑁂𑀲𑀺. 𑀲𑀳 𑀑𑀮𑁄𑀓𑀦𑁂𑀦𑁂𑀯 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀁 𑀑𑀮𑀫𑁆𑀩𑀺, 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑁂𑀯 𑀢𑀽𑀭𑀺𑀬𑀲𑁆𑀲 𑀫𑀥𑀼𑀭𑀲𑀤𑁆𑀤𑁄 𑀦𑀺𑀕𑁆𑀕𑀘𑁆𑀙𑀢𑀺. 𑀤𑀺𑀩𑁆𑀩𑀲𑀗𑁆𑀕𑀻𑀢𑀺𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. ‘‘𑀅𑀦𑁆𑀢𑀭𑀦𑁆𑀢𑀭𑀸 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀑𑀮𑀫𑁆𑀩𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀸𑀯𑀤𑁂𑀯 𑀤𑀸𑀫𑀸𑀦𑀺 𑀑𑀮𑀫𑁆𑀩𑀺𑀁𑀲𑀼. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀘 𑀆𑀥𑀸𑀭𑀓𑀸𑀦𑀺 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀸𑀯𑀤𑁂𑀯 𑀉𑀝𑁆𑀞𑀳𑀺𑀁𑀲𑀼. ‘‘𑀓𑁄𑀡𑁂 𑀓𑁄𑀡𑁂 𑀏𑀓𑁂𑀓𑀸 𑀉𑀤𑀓𑀘𑀸𑀝𑀺𑀬𑁄 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀸𑀯𑀤𑁂𑀯 𑀉𑀤𑀓𑀘𑀸𑀝𑀺𑀬𑁄 𑀉𑀝𑁆𑀞𑀳𑀺𑀁𑀲𑀼 𑀏𑀢𑁆𑀢𑀓𑀁 𑀫𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀳𑀺 𑀅𑀬𑁆𑀬 𑀢𑀯 𑀫𑀡𑁆𑀟𑀧𑀁 𑀑𑀮𑁄𑀓𑁂𑀢𑁆𑀯𑀸 𑀫𑀬𑁆𑀳𑀁 𑀪𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀁 𑀑𑀮𑁄𑀓𑁂𑀲𑀺. 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀡𑁆𑀟𑀧𑀁 𑀑𑀮𑁄𑀓𑁂𑀢𑁆𑀯𑀸 𑀏𑀢𑀤𑀳𑁄𑀲𑀺 ‘‘𑀦𑀸𑀬𑀁 𑀫𑀡𑁆𑀟𑀧𑁄 𑀫𑀦𑀼𑀲𑁆𑀲𑀪𑀽𑀢𑁂𑀦 𑀓𑀢𑁄, 𑀫𑀬𑁆𑀳𑀁 𑀧𑀦 𑀅𑀚𑁆𑀛𑀸𑀲𑀬𑀁 𑀫𑀬𑁆𑀳𑀁 𑀕𑀼𑀡𑀁 𑀆𑀕𑀫𑁆𑀫 𑀅𑀤𑁆𑀥𑀸 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀢𑀢𑁄 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀅𑀬𑀁 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀏𑀯𑀭𑀽𑀧𑁂 𑀫𑀡𑁆𑀟𑀧𑁂 𑀏𑀓𑀤𑀺𑀯𑀲𑀁𑀬𑁂𑀯 𑀤𑀸𑀦𑀁 𑀤𑀸𑀢𑀼𑀁, 𑀲𑀢𑁆𑀢𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀩𑀸𑀳𑀺𑀭𑀓𑀤𑀸𑀦𑀜𑁆𑀳𑀺 𑀢𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀼𑀝𑁆𑀞𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀮𑀗𑁆𑀓𑀢𑀲𑀻𑀲𑀁 𑀧𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀺𑀢𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸, 𑀳𑀤𑀬𑀫𑀁𑀲𑀁 𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀺𑀦𑁆𑀦𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀸𑀕𑀁 𑀦𑀺𑀲𑁆𑀲𑀸𑀬 𑀢𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀺𑀯𑀺𑀚𑀸𑀢𑀓𑁂 𑀤𑁂𑀯𑀲𑀺𑀓𑀁 𑀧𑀜𑁆𑀘𑀲𑀢𑀲𑀳𑀲𑁆𑀲𑀓𑀳𑀸𑀧𑀡𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼, 𑀫𑀚𑁆𑀛𑁂 𑀦𑀕𑀭𑁂 𑀘 𑀤𑀸𑀦𑀁 𑀤𑀤𑀦𑁆𑀢𑀲𑁆𑀲 𑀢𑀁 𑀤𑀸𑀦𑀁 𑀢𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀓𑁆𑀔𑀻𑀦𑀺 𑀬𑀸𑀘𑀺, 𑀢𑀤𑀸 𑀢𑀸𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀤𑀫𑀸𑀦𑀲𑁆𑀲𑁂𑀯 𑀳𑀸𑀲𑁄 𑀉𑀧𑁆𑀧𑀚𑁆𑀚𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀳𑁄𑀲𑀺. 𑀏𑀯𑀁 𑀤𑀸𑀦𑀁 𑀦𑀺𑀲𑁆𑀲𑀸𑀬 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀢𑁆𑀢𑀸𑀳𑀁 𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑁆𑀟𑀧𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁 𑀦𑀸𑀫 𑀅𑀤𑀸𑀲𑀺. 𑀕𑀯𑀧𑀸𑀦𑀦𑁆𑀢𑀺 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑁄𑀮𑀫𑁆𑀩𑁂 𑀔𑀻𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀦𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀖𑀦𑀧𑀸𑀓𑀧𑀓𑁆𑀓𑁂 𑀔𑀻𑀭𑁂 𑀣𑁄𑀓𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀥𑀼𑀲𑀓𑁆𑀓𑀭𑀘𑀼𑀡𑁆𑀡𑀲𑀧𑁆𑀧𑀻𑀳𑀺 𑀅𑀪𑀺𑀲𑀗𑁆𑀔𑀢𑀁 𑀪𑁄𑀚𑀦𑀁 𑀯𑀼𑀘𑁆𑀘𑀢𑀺. 𑀫𑀦𑀼𑀲𑁆𑀲𑀸𑀬𑁂𑀯 𑀧𑀦 𑀧𑀭𑀺𑀯𑀺𑀲𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀤𑁂𑀯𑀸𑀧𑀺 𑀏𑀓𑀦𑁆𑀢𑀭𑀺𑀓𑀸 𑀳𑀼𑀢𑁆𑀯𑀸 𑀧𑀭𑀺𑀯𑀺𑀲𑀺𑀁𑀲𑀼. 𑀤𑁆𑀯𑀸𑀤𑀲𑀢𑁂𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀫𑁆𑀧𑀺 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑀼𑀁 𑀦𑀧𑁆𑀧𑀳𑁄𑀢𑀺𑀬𑁂𑀯. 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀸𑀦𑀺 𑀥𑁄𑀯𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀦𑀁 𑀧𑀽𑀭𑁂𑀢𑁆𑀯𑀸 𑀢𑀺𑀘𑀻𑀯𑀭𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀺. 𑀲𑀗𑁆𑀖𑀦𑀯𑀓𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀢𑀺𑀘𑀻𑀯𑀭𑀲𑀸𑀝𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀅𑀳𑁂𑀲𑀼𑀁. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀬𑀁 𑀧𑀼𑀭𑀺𑀲𑁄 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑁆𑀯𑀁 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀫𑀳𑀸𑀧𑀼𑀭𑀺𑀲𑁄 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀓𑀺𑀭 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀓𑁄 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀪𑀺𑀜𑁆𑀜𑀸, 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀉𑀢𑁆𑀢𑀭𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀧𑀺𑀢𑀸𑀧𑀺 𑀉𑀢𑁆𑀢𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸𑀧𑀺 𑀉𑀢𑁆𑀢𑀭𑀸 𑀦𑀸𑀫, 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀧𑀸𑀮𑀺𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀻𑀯𑀮𑀻 𑀘 𑀅𑀲𑁄𑀓𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀲𑁆𑀫𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀦𑁆𑀥𑀓𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀫𑀳𑀦𑁆𑀢𑀁 𑀆𑀭𑁄𑀤𑀦𑀧𑀭𑀺𑀤𑁂𑀯𑀦𑀁 𑀅𑀳𑁄𑀲𑀺.

𑀏𑀯𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀲𑀼𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁. 𑀤𑀼𑀢𑀺𑀬𑁂 𑀓𑀜𑁆𑀘𑀦𑀧𑀩𑁆𑀩𑀢𑀫𑁆𑀳𑀺 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀫𑀳𑀸𑀲𑀢𑁆𑀢𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀲𑁄 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀤𑀺𑀩𑁆𑀩𑀢𑀽𑀭𑀺𑀬𑁂𑀳𑀺 𑀉𑀧𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑀼𑀲𑁆𑀲𑀬𑀼𑀕𑀸𑀦𑀺 𑀤𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀫𑁂𑀔𑀮𑀁 𑀦𑀸𑀫 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀸, 𑀲𑀭𑀡𑁄 𑀘 𑀪𑀸𑀯𑀺𑀢𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀉𑀤𑁂𑀦𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑁄𑀡𑀸 𑀘 𑀉𑀧𑀲𑁄𑀡𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄𑀯 𑀩𑁄𑀥𑀺, 𑀦𑀯𑀼𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁, 𑀦𑀯𑀼𑀢𑀺𑀬𑁂𑀯 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀻𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀭𑁂𑀯𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀕𑀡𑀦𑀸 𑀦𑀸𑀫 𑀦𑀢𑁆𑀣𑀺, 𑀤𑀼𑀢𑀺𑀬𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀢𑀣𑀸 𑀢𑀢𑀺𑀬𑁂. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑀺𑀤𑁂𑀯𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀯𑀡𑁆𑀡𑀁 𑀯𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀧𑀽𑀚𑀫𑀓𑀸𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀥𑀜𑁆𑀜𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀯𑀺𑀧𑀼𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸𑀧𑀺 𑀯𑀺𑀧𑀼𑀮𑀸 𑀦𑀸𑀫, 𑀯𑀭𑀼𑀡𑁄 𑀘 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀫𑁆𑀪𑀯𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀪𑀤𑁆𑀤𑀸 𑀘 𑀲𑀼𑀪𑀤𑁆𑀤𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄𑀯 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀲𑁄𑀪𑀺𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀚𑀺𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀥𑀫𑁆𑀫𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀥𑀫𑁆𑀫𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸𑀧𑀺 𑀲𑀼𑀥𑀫𑁆𑀫𑀸 𑀦𑀸𑀫, 𑀅𑀲𑀫𑁄 𑀘 𑀲𑀼𑀦𑁂𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀦𑁄𑀫𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀦𑀓𑀼𑀮𑀸 𑀘 𑀲𑀼𑀚𑀸𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄𑀯 𑀩𑁄𑀥𑀺, 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀅𑀦𑁄𑀫𑀤𑀲𑁆𑀲𑀻, 𑀧𑀤𑀼𑀫𑁄, 𑀦𑀸𑀭𑀤𑁄𑀢𑀺. 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑁂 𑀅𑀝𑁆𑀞 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀲𑀢𑁆𑀢, 𑀢𑀢𑀺𑀬𑁂 𑀙 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀬𑀓𑁆𑀔𑀸𑀦𑀁 𑀅𑀥𑀺𑀧𑀢𑀺. 𑀲𑁄 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀘𑀦𑁆𑀤𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀲𑀯𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀬𑀲𑁄𑀥𑀭𑀸 𑀦𑀸𑀫 𑀫𑀸𑀢𑀸, 𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀅𑀚𑁆𑀚𑀼𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀧𑀤𑀼𑀫𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀢𑀻𑀡𑀺𑀲𑀢𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀫𑀳𑀸𑀯𑀦𑀲𑀡𑁆𑀟𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀢𑀣𑀸𑀕𑀢𑁂 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀲𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁𑀅𑀯𑀺𑀚𑀳𑀺𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀕𑁄𑀘𑀭𑀸𑀬 𑀅𑀧𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑁄 𑀲𑀻𑀳𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀗𑁆𑀖𑀁 𑀯𑀦𑁆𑀤𑀺𑀲𑁆𑀲𑀢𑀻’’𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀪𑀺𑀓𑁆𑀔𑀽 𑀢𑀸𑀯𑀤𑁂𑀯 𑀆𑀕𑀫𑀺𑀁𑀲𑀼. 𑀲𑀻𑀳𑁄 𑀲𑀗𑁆𑀖𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀫𑀸𑀦𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀧𑀤𑀼𑀫𑀲𑁆𑀲 𑀧𑀦 𑀪𑀕𑀯𑀢𑁄 𑀘𑀫𑁆𑀧𑀓𑀁 𑀦𑀕𑀭𑀁 𑀅𑀳𑁄𑀲𑀺 𑀅𑀲𑀫𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀫𑀸𑀢𑀸 𑀅𑀲𑀫𑀸 𑀦𑀸𑀫, 𑀲𑀸𑀮𑁄 𑀘 𑀉𑀧𑀲𑀸𑀮𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑁄𑀡𑀭𑀼𑀓𑁆𑀔𑁄 𑀦𑀸𑀫 𑀩𑁄𑀥𑀺 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀦𑁆𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀦𑀸𑀭𑀤𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼, 𑀅𑀝𑁆𑀞𑀲𑀼 𑀘 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑁂𑀦 𑀧𑀽𑀚𑀫𑀓𑀸𑀲𑀺, 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀥𑀜𑁆𑀜𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀅𑀦𑁄𑀫𑀸 𑀦𑀸𑀫 𑀫𑀸𑀢𑀸, 𑀪𑀤𑁆𑀤𑀲𑀸𑀮𑁄 𑀘 𑀚𑀺𑀢𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀸𑀲𑀺𑀝𑁆𑀞𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀉𑀢𑁆𑀢𑀭𑀸 𑀘 𑀨𑀕𑁆𑀕𑀼𑀦𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑁄𑀡𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀦𑀸𑀭𑀤𑀩𑀼𑀤𑁆𑀥𑀲𑁆𑀲 𑀧𑀦 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀯𑁂𑀪𑀸𑀭𑀧𑀩𑁆𑀩𑀢𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀚𑀝𑀺𑀮𑁄 𑀦𑀸𑀫 𑀫𑀳𑀸𑀭𑀝𑁆𑀞𑀺𑀬𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀤𑀸𑀦𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀦𑀸𑀳𑁂𑀲𑀼𑀁 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀫𑁂𑀯 𑀲𑀭𑀡𑀫𑀓𑀁𑀲𑀼.

𑀢𑀲𑁆𑀲 𑀦𑀕𑀭𑀁 𑀳𑀁𑀲𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀆𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀲𑀼𑀚𑀸𑀢𑀸 𑀦𑀸𑀫, 𑀤𑁂𑀯𑀮𑁄 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑀼𑀫𑀦𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀮𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀕𑀡𑁆𑀳𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀲𑀢𑁆𑀢𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀢𑁄 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑀢𑁆𑀣𑀓𑁂 𑀲𑀼𑀫𑁂𑀥𑁄 𑀘 𑀲𑀼𑀚𑀸𑀢𑁄 𑀘𑀸𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀼𑀫𑁂𑀥𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀼𑀤𑀲𑁆𑀲𑀦𑀦𑀕𑀭𑁂 𑀓𑁄𑀝𑀺𑀲𑀢𑀔𑀻𑀡𑀸𑀲𑀯𑀸 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀳𑀼𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁𑀬𑁂𑀯 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀫𑀸𑀢𑀸𑀧𑀺 𑀲𑀼𑀤𑀢𑁆𑀢𑀸 𑀦𑀸𑀫, 𑀲𑀭𑀡𑁄 𑀘 𑀲𑀩𑁆𑀩𑀓𑀸𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀸𑀕𑀭𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀦𑀻𑀧𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀲𑀼𑀚𑀸𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀧𑀜𑁆𑀜𑀸𑀲𑀁, 𑀢𑀢𑀺𑀬𑁂 𑀘𑀢𑁆𑀢𑀸𑀮𑀻𑀲𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀼𑀫𑀳𑀸𑀤𑀻𑀧𑀭𑀚𑁆𑀚𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀭𑀝𑁆𑀞𑀼𑀧𑁆𑀧𑀸𑀤𑀁 𑀕𑀳𑁂𑀢𑁆𑀯𑀸 𑀆𑀭𑀸𑀫𑀺𑀓𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀘𑁆𑀘𑀁 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀫𑀗𑁆𑀕𑀮𑀁 𑀦𑀸𑀫 𑀅𑀳𑁄𑀲𑀺, 𑀉𑀕𑁆𑀕𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑀼𑀤𑀲𑁆𑀲𑀦𑁄 𑀘 𑀲𑀼𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀦𑀸𑀭𑀤𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀦𑀸𑀕𑀸 𑀘 𑀦𑀸𑀕𑀲𑀫𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀯𑁂𑀴𑀼𑀭𑀼𑀓𑁆𑀔𑁄 𑀩𑁄𑀥𑀺, 𑀲𑁄 𑀓𑀺𑀭 𑀫𑀦𑁆𑀤𑀘𑁆𑀙𑀺𑀤𑁆𑀤𑁄 𑀖𑀦𑀓𑁆𑀔𑀦𑁆𑀥𑁄 𑀉𑀧𑀭𑀺𑀦𑀺𑀕𑁆𑀕𑀢𑀸𑀳𑀺 𑀫𑀳𑀸𑀲𑀸𑀔𑀸𑀳𑀺 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀧𑀺𑀬𑀤𑀲𑁆𑀲𑀻, 𑀅𑀢𑁆𑀣𑀤𑀲𑁆𑀲𑀻, 𑀥𑀫𑁆𑀫𑀤𑀲𑁆𑀲𑀻𑀢𑀺 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀧𑀺𑀬𑀤𑀲𑁆𑀲𑀺𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑁄 𑀦𑀸𑀫 𑀫𑀸𑀡𑀯𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀗𑁆𑀕𑀢𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑀺𑀦𑁆𑀦𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀘𑀦𑁆𑀤𑀸 𑀦𑀸𑀫, 𑀧𑀸𑀮𑀺𑀢𑁄 𑀘 𑀲𑀩𑁆𑀩𑀤𑀲𑁆𑀲𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀪𑀺𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀼𑀚𑀸𑀢𑀸 𑀘 𑀥𑀫𑁆𑀫𑀤𑀺𑀦𑁆𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀺𑀬𑀗𑁆𑀕𑀼𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀅𑀢𑁆𑀣𑀤𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀅𑀝𑁆𑀞𑀦𑀯𑀼𑀢𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀅𑀝𑁆𑀞𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀣𑀸 𑀢𑀢𑀺𑀬𑁂. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀼𑀲𑀻𑀫𑁄 𑀦𑀸𑀫 𑀫𑀳𑀺𑀤𑁆𑀥𑀺𑀓𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀲𑁄𑀪𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀸𑀕𑀭𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀤𑀲𑁆𑀲𑀦𑀸 𑀦𑀸𑀫 𑀫𑀸𑀢𑀸, 𑀲𑀦𑁆𑀢𑁄 𑀘 𑀉𑀧𑀲𑀦𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀪𑀬𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀥𑀫𑁆𑀫𑀸 𑀘 𑀲𑀼𑀥𑀫𑁆𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀘𑀫𑁆𑀧𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀫𑀦𑁆𑀢𑀢𑁄 𑀲𑀩𑁆𑀩𑀓𑀸𑀮𑀁 𑀬𑁄𑀚𑀦𑀫𑀢𑁆𑀢𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀦𑁆𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀥𑀫𑁆𑀫𑀤𑀲𑁆𑀲𑀻 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀘 𑀤𑀺𑀩𑁆𑀩𑀢𑀽𑀭𑀺𑀬𑁂𑀳𑀺 𑀘 𑀧𑀽𑀚𑀫𑀓𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀲𑀭𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀲𑀭𑀡𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀦𑀦𑁆𑀤𑀸 𑀦𑀸𑀫, 𑀧𑀤𑀼𑀫𑁄 𑀘 𑀨𑀼𑀲𑁆𑀲𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀔𑁂𑀫𑀸 𑀘 𑀲𑀩𑁆𑀩𑀦𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀭𑀢𑁆𑀢𑀗𑁆𑀓𑀼𑀭𑀭𑀼𑀓𑁆𑀔𑁄 𑀩𑁄𑀥𑀺, ‘‘𑀓𑀓𑀼𑀥𑀭𑀼𑀓𑁆𑀔𑁄’’𑀢𑀺𑀧𑀺 ‘‘𑀩𑀺𑀫𑁆𑀩𑀺𑀚𑀸𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁 𑀧𑀦𑀲𑁆𑀲 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀉𑀕𑁆𑀕𑀢𑁂𑀚𑁄 𑀅𑀪𑀺𑀜𑁆𑀜𑀸𑀩𑀮𑀲𑀫𑁆𑀧𑀦𑁆𑀦𑁄 𑀫𑀗𑁆𑀕𑀮𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀫𑀳𑀸𑀚𑀫𑁆𑀩𑀼𑀨𑀮𑀁 𑀆𑀳𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀯𑁂𑀪𑀸𑀭𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀨𑀲𑁆𑀲𑀸 𑀦𑀸𑀫, 𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀭𑁂𑀯𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀻𑀯𑀮𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀓𑀡𑀺𑀓𑀸𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀢𑀺𑀲𑁆𑀲𑁄 𑀨𑀼𑀲𑁆𑀲𑁄𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀺𑀲𑁆𑀲𑀲𑁆𑀲 𑀧𑀦 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑁄𑀕𑁄 𑀫𑀳𑀸𑀬𑀲𑁄 𑀲𑀼𑀚𑀸𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀺𑀤𑁆𑀥𑀺𑀓𑀪𑀸𑀯𑀁 𑀧𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀤𑀺𑀩𑁆𑀩𑀫𑀦𑁆𑀤𑀸𑀭𑀯𑀧𑀤𑀼𑀫𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀦𑀺 𑀆𑀤𑀸𑀬 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀕𑀘𑁆𑀙𑀦𑁆𑀢𑀁 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀆𑀓𑀸𑀲𑁂 𑀧𑀼𑀧𑁆𑀨𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀚𑀦𑀲𑀦𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀧𑀤𑀼𑀫𑀸 𑀦𑀸𑀫, 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀉𑀤𑀬𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑀫𑀗𑁆𑀕𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀨𑀼𑀲𑁆𑀲𑀸 𑀘 𑀲𑀼𑀤𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸 𑀅𑀲𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀨𑀼𑀲𑁆𑀲𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀧𑀡𑁆𑀡𑀸𑀲, 𑀢𑀢𑀺𑀬𑁂 𑀤𑁆𑀯𑀢𑁆𑀢𑀺𑀁𑀲. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑀻𑀮𑀧𑀸𑀭𑀫𑀺𑀜𑁆𑀘 𑀧𑀽𑀭𑁂𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀓𑀸𑀲𑀺 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀸, 𑀲𑀼𑀭𑀓𑁆𑀔𑀺𑀢𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀪𑀺𑀬𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀘𑀸𑀮𑀸 𑀘 𑀉𑀧𑀘𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀆𑀫𑀮𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀏𑀓𑀲𑀢𑀲𑀳𑀲𑁆𑀲𑀁, 𑀢𑀢𑀺𑀬𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀲𑀢𑁆𑀢𑀭𑀢𑀦𑀔𑀘𑀺𑀢𑀁 𑀲𑁄𑀯𑀡𑁆𑀡𑀫𑀬𑀁 𑀫𑀳𑀸𑀧𑀻𑀞𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸. 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀫𑀸𑀢𑀸, 𑀔𑀡𑁆𑀟𑁄 𑀘 𑀢𑀺𑀲𑁆𑀲𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀲𑁄𑀓𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀘𑀦𑁆𑀤𑀸 𑀘 𑀘𑀦𑁆𑀤𑀫𑀺𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸 𑀧𑀸𑀝𑀮𑀺𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀤𑀸 𑀲𑀢𑁆𑀢 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑁂 𑀲𑀺𑀔𑀻, 𑀯𑁂𑀲𑁆𑀲𑀪𑀽 𑀘𑀸𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀲𑀺𑀔𑀺𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸, 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀲𑀢𑁆𑀢𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑀁 𑀳𑀢𑁆𑀣𑀺𑀭𑀢𑀦𑀁 𑀤𑀢𑁆𑀯𑀸 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀇𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀭𑀼𑀡𑀯𑀸 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀔𑁂𑀫𑀗𑁆𑀓𑀭𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀔𑀺𑀮𑀸 𑀘 𑀧𑀤𑀼𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀼𑀡𑁆𑀟𑀭𑀻𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀢𑁆𑀢𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀬𑁄𑀚𑀦𑀢𑁆𑀢𑀬𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀲𑀢𑁆𑀢𑀳𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀯𑁂𑀲𑁆𑀲𑀪𑀽 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀤𑀼𑀢𑀺𑀬𑁂 𑀲𑀢𑁆𑀢𑀢𑀺, 𑀢𑀢𑀺𑀬𑁂 𑀲𑀝𑁆𑀞𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀭𑀢𑀦𑁂 𑀘𑀺𑀢𑁆𑀢𑀻𑀓𑀸𑀭𑀧𑀻𑀢𑀺𑀩𑀳𑀼𑀮𑁄 𑀅𑀳𑁄𑀲𑀺. 𑀲𑁄𑀧𑀺 𑀦𑀁 ‘‘𑀇𑀢𑁄 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀬𑀲𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀉𑀧𑀲𑀦𑁆𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄 𑀤𑀸𑀫𑀸 𑀘 𑀲𑀫𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀸 𑀓𑀓𑀼𑀲𑀦𑁆𑀥𑁄, 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀸𑀢𑀺. 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀏𑀓𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀘𑀢𑁆𑀢𑀸𑀮𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀔𑁂𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀧𑀢𑁆𑀢𑀘𑀻𑀯𑀭𑀁 𑀫𑀳𑀸𑀤𑀸𑀦𑀜𑁆𑀘 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀸𑀦𑀺 𑀘 𑀤𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀓𑀓𑀼𑀲𑀦𑁆𑀥𑀲𑁆𑀲 𑀧𑀦 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀕𑁆𑀕𑀺𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀯𑀺𑀲𑀸𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀯𑀺𑀥𑀼𑀭𑁄 𑀘 𑀲𑀜𑁆𑀚𑀻𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀩𑀼𑀤𑁆𑀥𑀺𑀚𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄 𑀲𑀸𑀫𑀸 𑀘 𑀘𑀫𑁆𑀧𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸 𑀫𑀳𑀸𑀲𑀺𑀭𑀻𑀲𑀭𑀼𑀓𑁆𑀔𑁄 𑀩𑁄𑀥𑀺 𑀲𑀭𑀻𑀭𑀁 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀓𑁄𑀡𑀸𑀕𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀏𑀓𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀢𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀢𑁆𑀢𑀼𑀡𑁆𑀡𑀘𑀻𑀦𑀧𑀝𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀤𑀼𑀓𑀼𑀮𑀸𑀦𑀺 𑀘𑁂𑀯 𑀲𑀼𑀯𑀡𑁆𑀡𑀧𑀸𑀤𑀼𑀓𑀜𑁆𑀘 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀲𑁄𑀪𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀜𑁆𑀜𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀉𑀢𑁆𑀢𑀭𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀪𑀺𑀬𑁆𑀬𑁄𑀲𑁄 𑀘 𑀉𑀢𑁆𑀢𑀭𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀢𑁆𑀣𑀺𑀚𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀫𑀼𑀤𑁆𑀤𑀸 𑀘 𑀉𑀢𑁆𑀢𑀭𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀢𑀺𑀁𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀓𑀲𑁆𑀲𑀧𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀪𑀽𑀫𑀺𑀬𑀜𑁆𑀘𑁂𑀯 𑀅𑀦𑁆𑀢𑀮𑀺𑀓𑁆𑀔𑁂 𑀘 𑀧𑀸𑀓𑀝𑁄 𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀫𑀺𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀢𑀲𑁆𑀲 𑀪𑀕𑀯𑀢𑁄 𑀚𑀸𑀢𑀦𑀕𑀭𑀁 𑀩𑀸𑀭𑀸𑀡𑀲𑀻 𑀦𑀸𑀫 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄 𑀅𑀦𑀼𑀴𑀸 𑀘 𑀉𑀭𑀼𑀯𑁂𑀴𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀩𑁄𑀥𑀺 𑀲𑀭𑀻𑀭𑀁 𑀯𑀻𑀲𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀑𑀭𑀪𑀸𑀕𑁂 𑀞𑀧𑁂𑀢𑁆𑀯𑀸 𑀇𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀩𑀼𑀤𑁆𑀥𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀤𑀻𑀧𑀗𑁆𑀓𑀭𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀬𑁂𑀦𑁂𑀦 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯);

𑀇𑀫𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 ‘‘𑀳𑀦𑁆𑀤 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄’’𑀢𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 ‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺 𑀤𑀸𑀦𑀧𑀸𑀭𑀫𑀺𑀢𑀸𑀤𑀬𑁄 𑀩𑀼𑀤𑁆𑀥𑀓𑀭𑀸 𑀥𑀫𑁆𑀫𑀸 𑀤𑀺𑀝𑁆𑀞𑀸, 𑀢𑁂 𑀧𑀽𑀭𑁂𑀦𑁆𑀢𑁄 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀸 𑀆𑀕𑀫𑀺. 𑀆𑀕𑀘𑁆𑀙𑀦𑁆𑀢𑁄 𑀘 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀆𑀦𑀺𑀲𑀁𑀲𑀸 𑀲𑀁𑀯𑀡𑁆𑀡𑀺𑀢𑀸 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺.

‘‘𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘;

𑀦𑀺𑀚𑁆𑀛𑀸𑀫𑀢𑀡𑁆𑀳𑀸 𑀔𑀼𑀧𑁆𑀧𑀺𑀧𑀸𑀲𑀸, 𑀦 𑀳𑁄𑀦𑁆𑀢𑀺 𑀓𑀸𑀮𑀓𑀜𑁆𑀚𑀺𑀓𑀸.

‘‘𑀦 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀸 𑀧𑀸𑀡𑀸, 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀤𑀼𑀕𑁆𑀕𑀢𑀺𑀁;

𑀚𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑁂𑀲𑀼, 𑀚𑀘𑁆𑀘𑀦𑁆𑀥𑀸 𑀦 𑀪𑀯𑀦𑁆𑀢𑀺 𑀢𑁂.

‘‘𑀲𑁄𑀢𑀯𑁂𑀓𑀮𑁆𑀮𑀢𑀸 𑀦𑀢𑁆𑀣𑀺, 𑀦 𑀪𑀯𑀦𑁆𑀢𑀺 𑀫𑀽𑀕𑀧𑀓𑁆𑀔𑀺𑀓𑀸;

𑀇𑀢𑁆𑀣𑀺𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸.

‘‘𑀦 𑀪𑀯𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀫𑀼𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁂𑀳𑀺, 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑀦𑁆𑀢𑀺, 𑀓𑀫𑁆𑀫𑀓𑀺𑀭𑀺𑀬𑀤𑀲𑁆𑀲𑀦𑀸;

𑀯𑀲𑀫𑀸𑀦𑀸𑀧𑀺 𑀲𑀕𑁆𑀕𑁂𑀲𑀼, 𑀅𑀲𑀜𑁆𑀜𑀁 𑀦𑀼𑀧𑀧𑀚𑁆𑀚𑀭𑁂.

‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺;

𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀸 𑀲𑀧𑁆𑀧𑀼𑀭𑀺𑀲𑀸, 𑀯𑀺𑀲𑀁𑀬𑀼𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬𑁄, 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀧𑀸𑀭𑀫𑀻’’𑀢𑀺.

𑀢𑁂 𑀆𑀦𑀺𑀲𑀁𑀲𑁂 𑀅𑀥𑀺𑀕𑀦𑁆𑀢𑁆𑀯𑀸𑀯 𑀆𑀕𑀢𑁄. 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲 𑀘 𑀢𑀲𑁆𑀲 𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀥𑀦𑀜𑁆𑀘𑀬𑀭𑀸𑀚𑀓𑀸𑀮𑁂 𑀫𑀳𑀸𑀲𑀼𑀤𑀲𑁆𑀲𑀦𑀭𑀸𑀚𑀓𑀸𑀮𑁂 𑀫𑀳𑀸𑀕𑁄𑀯𑀺𑀦𑁆𑀤𑀓𑀸𑀮𑁂 𑀦𑀺𑀫𑀺𑀫𑀳𑀸𑀭𑀸𑀚𑀓𑀸𑀮𑁂 𑀘𑀦𑁆𑀤𑀓𑀼𑀫𑀸𑀭𑀓𑀸𑀮𑁂 𑀯𑀺𑀲𑀬𑁆𑀳𑀲𑁂𑀝𑁆𑀞𑀺𑀓𑀸𑀮𑁂 𑀲𑀺𑀯𑀺𑀭𑀸𑀚𑀓𑀸𑀮𑁂 𑀯𑁂𑀲𑁆𑀲𑀦𑁆𑀢𑀭𑀭𑀸𑀚𑀓𑀸𑀮𑁂𑀢𑀺 𑀤𑀸𑀦𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑀸𑀮𑁂 𑁋

‘‘𑀪𑀺𑀓𑁆𑀔𑀸𑀬 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁧.𑁧𑁪𑁩 𑀢𑀲𑁆𑀲𑀼𑀤𑁆𑀤𑀸𑀦 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀲𑀻𑀮𑀯𑀦𑀸𑀕𑀭𑀸𑀚𑀓𑀸𑀮𑁂 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑀓𑀸𑀮𑁂 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀓𑀸𑀮𑁂 𑀚𑀬𑀤𑁆𑀤𑀺𑀲𑀭𑀸𑀚𑀧𑀼𑀢𑁆𑀢𑀓𑀸𑀮𑁂 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑀓𑀸𑀮𑁂𑀢𑀺 𑀲𑀻𑀮𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀗𑁆𑀔𑀧𑀸𑀮𑀚𑀸𑀢𑀓𑀸𑀮𑁂 𑁋

‘‘𑀲𑀽𑀮𑁂𑀳𑀺𑀧𑀺 𑀯𑀺𑀚𑁆𑀛𑀺𑀬𑀦𑁆𑀢𑁄, 𑀓𑁄𑀝𑁆𑀝𑀺𑀬𑀦𑁆𑀢𑁄𑀧𑀺 𑀲𑀢𑁆𑀢𑀺𑀳𑀺;

𑀪𑁄𑀚𑀧𑀼𑀢𑁆𑀢𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀲𑀻𑀮𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁨.𑁯𑁧) 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀲𑀻𑀮𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑀓𑀸𑀮𑁂 𑀳𑀢𑁆𑀣𑀺𑀧𑀸𑀮𑀓𑀼𑀫𑀸𑀭𑀓𑀸𑀮𑁂 𑀅𑀬𑁄𑀖𑀭𑀧𑀡𑁆𑀟𑀺𑀢𑀓𑀸𑀮𑁂𑀢𑀺 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑀸𑀮𑁂 𑁋

‘‘𑀫𑀳𑀸𑀭𑀚𑁆𑀚𑀁 𑀳𑀢𑁆𑀣𑀕𑀢𑀁, 𑀔𑁂𑀴𑀧𑀺𑀡𑁆𑀟𑀁𑀯 𑀙𑀟𑁆𑀟𑀬𑀺𑀁;

𑀘𑀚𑀢𑁄 𑀦 𑀳𑁄𑀢𑀺 𑀮𑀕𑀦𑀁, 𑀏𑀲𑀸 𑀫𑁂 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀦𑀺𑀲𑁆𑀲𑀗𑁆𑀕𑀢𑀸𑀬 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀯𑀺𑀥𑀼𑀭𑀧𑀡𑁆𑀟𑀺𑀢𑀓𑀸𑀮𑁂 𑀫𑀳𑀸𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑀓𑀸𑀮𑁂 𑀓𑀼𑀤𑀸𑀮𑀧𑀡𑁆𑀟𑀺𑀢𑀓𑀸𑀮𑁂 𑀅𑀭𑀓𑀧𑀡𑁆𑀟𑀺𑀢𑀓𑀸𑀮𑁂 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂 𑀫𑀳𑁄𑀲𑀥𑀧𑀡𑁆𑀟𑀺𑀢𑀓𑀸𑀮𑁂𑀢𑀺 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑁂 𑀲𑁂𑀦𑀓𑀧𑀡𑁆𑀟𑀺𑀢𑀓𑀸𑀮𑁂 𑁋

‘‘𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑁄𑀳𑀁, 𑀩𑁆𑀭𑀸𑀳𑁆𑀫𑀡𑀁 𑀫𑁄𑀘𑀬𑀺𑀁 𑀤𑀼𑀔𑀸;

𑀧𑀜𑁆𑀜𑀸𑀬 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀧𑀜𑁆𑀜𑀸𑀧𑀸𑀭𑀫𑀻’’𑀢𑀺. 𑁋

𑀅𑀦𑁆𑀢𑁄𑀪𑀲𑁆𑀢𑀕𑀢𑀁 𑀲𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀤𑀻𑀦𑀫𑁆𑀧𑀺 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀚𑀦𑀓𑀚𑀸𑀢𑀓𑁂 𑁋

‘‘𑀅𑀢𑀻𑀭𑀤𑀲𑁆𑀲𑀻 𑀚𑀮𑀫𑀚𑁆𑀛𑁂, 𑀳𑀢𑀸 𑀲𑀩𑁆𑀩𑁂𑀯 𑀫𑀸𑀦𑀼𑀲𑀸;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀏𑀲𑀸 𑀫𑁂 𑀯𑀻𑀭𑀺𑀬𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 𑀯𑀻𑀭𑀺𑀬𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑁂 𑁋

‘‘𑀅𑀘𑁂𑀢𑀦𑀁𑀯 𑀓𑁄𑀝𑁆𑀝𑁂𑀦𑁆𑀢𑁂, 𑀢𑀺𑀡𑁆𑀳𑁂𑀦 𑀨𑀭𑀲𑀼𑀦𑀸 𑀫𑀫𑀁;

𑀓𑀸𑀲𑀺𑀭𑀸𑀚𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀔𑀦𑁆𑀢𑀺𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀅𑀘𑁂𑀢𑀦𑀪𑀸𑀯𑁂𑀦 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀔𑀦𑁆𑀢𑀺𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀫𑁄𑀘𑁂𑀲𑀺𑀁 𑀏𑀓𑀲𑀢𑀁 𑀔𑀢𑁆𑀢𑀺𑀬𑁂, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀚𑀻𑀯𑀺𑀢𑀁 𑀘𑀯𑀺𑀢𑁆𑀯𑀸 𑀲𑀘𑁆𑀘𑀫𑀦𑀼𑀭𑀓𑁆𑀔𑀦𑁆𑀢𑀲𑁆𑀲 𑀲𑀘𑁆𑀘𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀫𑀽𑀕𑀧𑀓𑁆𑀔𑀚𑀸𑀢𑀓𑁂 𑁋

‘‘𑀫𑀸𑀢𑀸 𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀦𑀧𑀺 𑀤𑁂𑀲𑁆𑀲𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀫𑀥𑀺𑀝𑁆𑀞𑀳𑀺’’𑀦𑁆𑀢𑀺. 𑁋

𑀏𑀯𑀁 𑀚𑀻𑀯𑀺𑀢𑀁 𑀘𑀚𑀺𑀢𑁆𑀯𑀸 𑀯𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀏𑀓𑀭𑀸𑀚𑀚𑀸𑀢𑀓𑁂 𑁋

‘‘𑀦 𑀫𑀁 𑀓𑁄𑀘𑀺 𑀉𑀢𑁆𑀢𑀲𑀢𑀺, 𑀦𑀧𑀺𑀳𑀁 𑀪𑀸𑀬𑀸𑀫𑀺 𑀓𑀲𑁆𑀲𑀘𑀺;

𑀫𑁂𑀢𑁆𑀢𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀭𑀫𑀸𑀫𑀺 𑀧𑀯𑀦𑁂 𑀢𑀤𑀸’’𑀢𑀺. (𑀘𑀭𑀺𑀬𑀸. 𑁩.𑁧𑁧𑁩) 𑁋

𑀏𑀯𑀁 𑀚𑀻𑀯𑀺𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀮𑁄𑀫𑀳𑀁𑀲𑀚𑀸𑀢𑀓𑁂 𑁋

‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀳𑀁;

𑀕𑀸𑀫𑀡𑁆𑀟𑀮𑀸 𑀉𑀧𑀸𑀕𑀦𑁆𑀢𑁆𑀯𑀸, 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺 𑀦𑀧𑁆𑀧𑀓’’𑀦𑁆𑀢𑀺. 𑁋

𑀏𑀯𑀁 𑀕𑀸𑀫𑀤𑀸𑀭𑀓𑁂𑀲𑀼 𑀦𑀺𑀝𑁆𑀞𑀼𑀪𑀦𑀸𑀤𑀻𑀳𑀺 𑀘𑁂𑀯 𑀫𑀸𑀮𑀸𑀕𑀦𑁆𑀥𑀽𑀧𑀳𑀸𑀭𑀸𑀤𑀻𑀳𑀺 𑀘 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀲𑀼𑀧𑀺 𑀉𑀧𑁂𑀓𑁆𑀔𑀦𑀁 𑀅𑀦𑀢𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲 𑀅𑀢𑁆𑀣𑁄 𑀘𑀭𑀺𑀬𑀸𑀧𑀺𑀝𑀓𑀢𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀺𑀢𑁄 𑁋

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪);

𑀏𑀯𑀁 𑀫𑀳𑀸𑀧𑀣𑀯𑀻𑀓𑀫𑁆𑀧𑀦𑀸𑀦𑀺 𑀫𑀳𑀸𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁆𑀣 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀺𑀢𑁆𑀯𑀸 ‘‘𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀫𑀦𑀼𑀲𑁆𑀲𑀕𑀡𑀦𑀸𑀬 𑀇𑀤𑀸𑀦𑀺 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀆𑀬𑀼𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀸𑀬𑁂 𑀯𑁂𑀯𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦 𑀲𑀡𑁆𑀞𑀳𑀢𑀻𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀲𑀼𑀜𑁆𑀜𑀸 𑀯𑀢 𑀪𑁄 𑀲𑀕𑁆𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀚𑀸𑀢𑀸𑀳𑀺 𑀤𑁂𑀯𑀢𑀸𑀳𑀺 𑀫𑀳𑀸𑀲𑀢𑁆𑀢𑀲𑁆𑀲 𑀧𑀽𑀭𑀺𑀢𑀧𑀸𑀭𑀫𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀇𑀤𑀸𑀦𑀺 𑀅𑀜𑁆𑀜𑀁 𑀤𑁂𑀯𑀮𑁄𑀓𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀢𑁂 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀘𑀼𑀢𑀸 𑀘𑀼𑀢𑀸 𑀫𑀦𑀼𑀲𑁆𑀲𑀸 𑀤𑁂𑀯𑀮𑁄𑀓𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀬𑀢𑁄𑀳𑀁 𑀢𑀼𑀲𑀺𑀢𑁂 𑀓𑀸𑀬𑁂, 𑀲𑀦𑁆𑀢𑀼𑀲𑀺𑀢𑁄 𑀦𑀸𑀫𑀳𑀁 𑀢𑀤𑀸;

𑀤𑀲𑀲𑀳𑀲𑁆𑀲𑀻 𑀲𑀫𑀸𑀕𑀦𑁆𑀢𑁆𑀯𑀸, 𑀬𑀸𑀘𑀦𑁆𑀢𑀺 𑀧𑀜𑁆𑀚𑀮𑀻 𑀫𑀫𑀁.

‘‘𑀓𑀸𑀮𑁄 𑀤𑁂𑀯 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁬-𑁬𑁭);

𑀏𑀯𑀁 𑀩𑀼𑀤𑁆𑀥𑀪𑀸𑀯𑀢𑁆𑀣𑀸𑀬 𑀆𑀬𑀸𑀘𑀺𑀢𑁄 𑀓𑀸𑀮𑀁, 𑀤𑀻𑀧𑀁, 𑀤𑁂𑀲𑀁, 𑀓𑀼𑀮𑀁, 𑀚𑀦𑁂𑀢𑁆𑀢𑀺𑀬𑀸 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀢𑀢𑁄 𑀘𑀼𑀢𑁄 𑀲𑀓𑁆𑀬𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀳𑀭𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀪𑀤𑁆𑀭𑀬𑁄𑀩𑁆𑀩𑀦𑀁 𑀅𑀦𑀼𑀧𑀸𑀧𑀼𑀡𑀺. 𑀇𑀫𑀲𑁆𑀫𑀺𑀁 𑀅𑀦𑁆𑀢𑀭𑁂 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀦𑀦𑁆𑀤 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀻’’𑀢𑀺𑀆𑀤𑀻𑀦𑀁 (𑀫. 𑀦𑀺. 𑁩.𑁨𑁦𑁦) 𑀲𑀼𑀢𑁆𑀢𑀧𑀤𑀸𑀦𑀜𑁆𑀘𑁂𑀯 𑀢𑁂𑀲𑀁 𑀅𑀝𑁆𑀞𑀓𑀣𑀸𑀬 𑀘 𑀯𑀲𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀤𑁂𑀯𑀮𑁄𑀓𑀲𑀺𑀭𑀺𑀁 𑀯𑀺𑀬 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀫𑀸𑀦𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀕𑀫𑀦𑀲𑀫𑀬𑁂 𑀅𑀦𑀼𑀓𑁆𑀓𑀫𑁂𑀦 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀲𑀗𑁆𑀔𑀸𑀢𑁂 𑀢𑀬𑁄 𑀤𑁂𑀯𑀤𑀽𑀢𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 ‘𑀲𑀸𑀥𑀼 𑀧𑀩𑁆𑀩𑀚𑁆𑀚𑀸’𑀢𑀺 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀲𑀪𑀸𑀕𑀁 𑀔𑁂𑀧𑁂𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀻𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀓𑀧𑁆𑀧𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂𑀦 𑀯𑀺𑀲𑁆𑀲𑀓𑀫𑁆𑀫𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀁 𑀜𑀢𑁆𑀯𑀸 ‘𑀬𑀸𑀯 𑀇𑀤𑀁 𑀩𑀦𑁆𑀥𑀦𑀁 𑀦 𑀯𑀟𑁆𑀠𑀢𑀺 𑀢𑀸𑀯𑀤𑁂𑀯 𑀦𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀬𑀁 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑁋

‘‘𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀫𑀸𑀢𑀸, 𑀦𑀺𑀩𑁆𑀩𑀼𑀢𑁄 𑀦𑀽𑀦 𑀲𑁄 𑀧𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀦𑀸𑀭𑀻, 𑀬𑀲𑁆𑀲𑀸𑀬𑀁 𑀈𑀤𑀺𑀲𑁄 𑀧𑀢𑀻’’𑀢𑀺. (𑀩𑀼. 𑀯𑀁. 𑀅𑀝𑁆𑀞. 𑁨𑁭 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀥. 𑀧. 𑀅𑀝𑁆𑀞. 𑁧.𑁧𑁦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸);

𑀓𑀺𑀲𑀸𑀕𑁄𑀢𑀫𑀺𑀬𑀸 𑀦𑀸𑀫 𑀧𑀺𑀢𑀼𑀘𑁆𑀙𑀸𑀥𑀻𑀢𑀸𑀬 𑀪𑀸𑀲𑀺𑀢𑀁 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸, ‘𑀅𑀳𑀁 𑀇𑀫𑀸𑀬 𑀦𑀺𑀩𑁆𑀩𑀼𑀢𑀧𑀤𑀁 𑀲𑀸𑀯𑀺𑀢𑁄’𑀢𑀺 𑀕𑀻𑀯𑀢𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀫𑀼𑀢𑁆𑀢𑀸𑀳𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸, 𑀢𑀲𑁆𑀲𑀸 𑀧𑁂𑀲𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸, 𑀲𑀺𑀭𑀺𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀦𑀺𑀤𑁆𑀤𑀸𑀯𑀲𑁂𑀦 𑀦𑀸𑀝𑀓𑀸𑀦𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸, 𑀦𑀺𑀩𑁆𑀩𑀺𑀦𑁆𑀦𑀳𑀤𑀬𑁄 𑀙𑀦𑁆𑀦𑀁 𑀉𑀝𑁆𑀞𑀸𑀧𑁂𑀢𑁆𑀯𑀸, 𑀓𑀡𑁆𑀟𑀓𑀁 𑀆𑀳𑀭𑀸𑀧𑁂𑀢𑁆𑀯𑀸, 𑀓𑀡𑁆𑀟𑀓𑀁 𑀆𑀭𑀼𑀬𑁆𑀳, 𑀙𑀦𑁆𑀦𑀲𑀳𑀸𑀬𑁄𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀳𑀺 𑀓𑀢𑀧𑀭𑀺𑀯𑀸𑀭𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀢𑁂𑀦𑁂𑀯 𑀭𑀢𑁆𑀢𑀸𑀯𑀲𑁂𑀲𑁂𑀦 𑀢𑀻𑀡𑀺 𑀫𑀳𑀸𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀧𑀡𑁆𑀟𑀯𑀧𑀩𑁆𑀩𑀢𑀧𑀩𑁆𑀪𑀸𑀭𑁂 𑀦𑀺𑀲𑀺𑀦𑁆𑀦𑁄 𑀫𑀕𑀥𑀭𑀸𑀚𑁂𑀦 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀢𑀲𑁆𑀲 𑀯𑀺𑀚𑀺𑀢𑀁 𑀆𑀕𑀫𑀦𑀢𑁆𑀣𑀸𑀬 𑀢𑁂𑀦 𑀕𑀳𑀺𑀢𑀧𑀝𑀺𑀜𑁆𑀜𑁄, 𑀆𑀴𑀸𑀭𑀜𑁆𑀘 𑀉𑀤𑀓𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀅𑀥𑀺𑀕𑀢𑀯𑀺𑀲𑁂𑀲𑁂𑀦 𑀅𑀧𑀭𑀺𑀢𑀼𑀝𑁆𑀞𑁄 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸, 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀸𑀢𑁄𑀯 𑀲𑁂𑀦𑀸𑀦𑀺𑀕𑀫𑁂 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸, 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀯𑀸𑀳𑁂𑀢𑁆𑀯𑀸, 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀫𑀳𑀸𑀯𑀦𑀲𑀡𑁆𑀟𑁂 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀣𑀺𑀬𑁂𑀦 𑀤𑀺𑀦𑁆𑀦𑀁 𑀅𑀝𑁆𑀞𑀢𑀺𑀡𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸, 𑀓𑀸𑀴𑁂𑀦 𑀦𑀸𑀕𑀭𑀸𑀚𑁂𑀦 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸, ‘𑀦 𑀢𑀸𑀯𑀺𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸, 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀫𑀺𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀘𑀼𑀢𑀽𑀧𑀧𑀸𑀢𑀜𑀸𑀡𑀁 𑀧𑀢𑁆𑀯𑀸, 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀬𑁂𑀯 𑀇𑀫𑀁 𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀜𑁆𑀙𑀺. 𑀏𑀯𑀫𑀲𑁆𑀲 𑀅𑀥𑀺𑀕𑀫𑀦𑀺𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀅𑀥𑀺𑀕𑀢𑀸𑀪𑀺𑀥𑀫𑁆𑀫𑁄 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑀢𑁆𑀢𑀸𑀳𑀁 𑀅𑀦𑀺𑀫𑀺𑀲𑀲𑀢𑁆𑀢𑀸𑀳𑀁 𑀘𑀗𑁆𑀓𑀫𑀦𑀲𑀢𑁆𑀢𑀸𑀳𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀘𑀢𑀼𑀢𑁆𑀣𑁂 𑀲𑀢𑁆𑀢𑀸𑀳𑁂 𑀲𑀬𑀫𑁆𑀪𑀽𑀜𑀸𑀡𑀸𑀥𑀺𑀕𑀫𑁂𑀦 𑀅𑀥𑀺𑀕𑀢𑀁 𑀅𑀪𑀺𑀥𑀫𑁆𑀫𑀁 𑀯𑀺𑀘𑀺𑀦𑀺𑀢𑁆𑀯𑀸 𑀅𑀧𑀭𑀸𑀦𑀺𑀧𑀺 𑀅𑀚𑀧𑀸𑀮𑀫𑀼𑀘𑀮𑀺𑀦𑁆𑀤𑀭𑀸𑀚𑀸𑀬𑀢𑀦𑁂𑀲𑀼 𑀢𑀻𑀡𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲𑀺𑀫𑀳𑀸𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁂𑀦 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸, 𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁 𑀆𑀤𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸, 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀉𑀝𑁆𑀞𑀸𑀬𑀸𑀲𑀦𑀸 𑀓𑀸𑀲𑀺𑀧𑀼𑀭𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸, 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀤𑀺𑀯𑀲𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸,𑀢𑁂 𑀅𑀦𑀦𑀼𑀘𑁆𑀙𑀯𑀺𑀓𑁂𑀦 𑀲𑀫𑀼𑀤𑀸𑀘𑀸𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑁂 𑀲𑀜𑁆𑀜𑀸𑀧𑁂𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀧𑁆𑀧𑀫𑀼𑀔𑀸 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀸𑀬𑁂𑀲𑀺. 𑀏𑀯𑀁 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸 𑀤𑁂𑀲𑀦𑀸𑀦𑀺𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀸𑀝𑁆𑀞𑀓𑀣𑀸𑀦𑀁 𑀅𑀭𑀺𑀬𑀧𑀭𑀺𑀬𑁂𑀲𑀦(𑀫. 𑀦𑀺. 𑁧.𑁨𑁭𑁪) 𑀧𑀩𑁆𑀩𑀚𑁆𑀚𑀲𑀼𑀢𑁆𑀢𑀸𑀤𑀻𑀦𑀁 (𑀲𑀼. 𑀦𑀺. 𑁪𑁦𑁭 𑀆𑀤𑀬𑁄) 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀥𑀺𑀕𑀫𑀦𑀺𑀤𑀸𑀦𑀤𑁂𑀲𑀦𑀸𑀦𑀺𑀤𑀸𑀦𑀲𑀫𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀅𑀧𑀭𑀸𑀦𑀺𑀧𑀺 𑀤𑀽𑀭𑁂𑀦𑀺𑀤𑀸𑀦𑀁, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁, 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀦𑁆𑀢𑀺 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺. 𑀢𑀢𑁆𑀣 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀼𑀲𑀺𑀢𑀧𑀼𑀭𑀸 𑀤𑀽𑀭𑁂𑀦𑀺𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀼𑀲𑀺𑀢𑀧𑀼𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁄𑀥𑀺𑀫𑀡𑁆𑀟𑀸 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁. ‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀤𑁂𑀯𑁂𑀲𑀼 𑀯𑀺𑀳𑀭𑀢𑀺 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁, 𑀢𑀢𑁆𑀣 𑀔𑁄 𑀪𑀕𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀻’𑀢𑀺 𑀇𑀤𑀫𑀲𑁆𑀲 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁. 𑀅𑀬𑀁 𑀢𑀸𑀯 𑀦𑀺𑀤𑀸𑀦𑀓𑀣𑀸.

𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁄

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺

𑀇𑀢𑀺 𑀫𑁂 𑀪𑀸𑀲𑀫𑀸𑀦𑀲𑁆𑀲, 𑀅𑀪𑀺𑀥𑀫𑁆𑀫𑀓𑀣𑀁 𑀇𑀫𑀁;

𑀅𑀯𑀺𑀓𑁆𑀔𑀺𑀢𑁆𑀢𑀸 𑀦𑀺𑀲𑀸𑀫𑁂𑀣, 𑀤𑀼𑀮𑁆𑀮𑀪𑀸 𑀳𑀺 𑀅𑀬𑀁 𑀓𑀣𑀸𑀢𑀺.

𑀏𑀯𑀁 𑀧𑀝𑀺𑀜𑁆𑀜𑀸𑀢𑀸𑀬 𑀅𑀪𑀺𑀥𑀫𑁆𑀫𑀓𑀣𑀸𑀬 𑀓𑀣𑀦𑁄𑀓𑀸𑀲𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀻𑀦𑀺 𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀺; 𑀥𑀫𑁆𑀫𑀲𑀗𑁆𑀕𑀡𑀻𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀸𑀤𑀻𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺; 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀫𑁆𑀧𑀺 𑀫𑀸𑀢𑀺𑀓𑀸𑀧𑀤𑀪𑀸𑀚𑀦𑀻𑀬𑀯𑀲𑁂𑀦 𑀤𑀼𑀯𑀺𑀥𑀁; 𑀢𑀢𑁆𑀣 𑀫𑀸𑀢𑀺𑀓𑀸 𑀆𑀤𑀺; 𑀲𑀸𑀧𑀺 𑀢𑀺𑀓𑀫𑀸𑀢𑀺𑀓𑀸 𑀤𑀼𑀓𑀫𑀸𑀢𑀺𑀓𑀸𑀢𑀺 𑀤𑀼𑀯𑀺𑀥𑀸; 𑀢𑀢𑁆𑀣 𑀢𑀺𑀓𑀫𑀸𑀢𑀺𑀓𑀸 𑀆𑀤𑀺; 𑀢𑀺𑀓𑀫𑀸𑀢𑀺𑀓𑀸𑀬𑀧𑀺 𑀓𑀼𑀲𑀮𑀢𑁆𑀢𑀺𑀓𑀁 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀇𑀤𑀁 𑀧𑀤𑀁; 𑀢𑀲𑁆𑀫𑀸 𑁋

𑀇𑀢𑁄 𑀧𑀝𑁆𑀞𑀸𑀬 𑀕𑀫𑁆𑀪𑀻𑀭𑀁, 𑀅𑀪𑀺𑀥𑀫𑁆𑀫𑀓𑀣𑀁 𑀇𑀫𑀁;

𑀯𑀼𑀘𑁆𑀘𑀫𑀸𑀦𑀁 𑀦𑀺𑀲𑀸𑀫𑁂𑀣, 𑀏𑀓𑀕𑁆𑀕𑀸 𑀲𑀸𑀥𑀼 𑀲𑀸𑀥𑀯𑁄𑀢𑀺.

𑁧. ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀢𑀸𑀯 𑀆𑀤𑀺𑀧𑀤𑁂𑀦 𑀮𑀤𑁆𑀥𑀦𑀸𑀫𑁄 𑀓𑀼𑀲𑀮𑀢𑁆𑀢𑀺𑀓𑁄 𑀦𑀸𑀫. ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀯𑁂𑀤𑀦𑀸𑀢𑁆𑀢𑀺𑀓𑁄 𑀦𑀸𑀫. 𑀏𑀯𑀁 𑀆𑀤𑀺𑀧𑀤𑀯𑀲𑁂𑀦 𑀯𑀸 𑀲𑀩𑁆𑀩𑀧𑀤𑀯𑀲𑁂𑀦 𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀓𑀤𑀼𑀓𑀸𑀦𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀯 𑀘𑁂𑀢𑁂 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸. 𑀢𑀺𑀓𑀸𑀦𑀜𑁆𑀳𑀺 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄, 𑀤𑀼𑀓𑀸𑀦𑀁 𑀘𑀢𑀼𑀤𑁆𑀤𑀲. ‘‘𑀳𑁂𑀢𑀽 𑀥𑀫𑁆𑀫𑀸, 𑀦𑀳𑁂𑀢𑀽 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀳𑀺 𑀙 𑀤𑀼𑀓𑀸 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀓𑀡𑁆𑀡𑀺𑀓𑀸 𑀯𑀺𑀬 𑀖𑀝𑀸 𑀯𑀺𑀬 𑀳𑀼𑀢𑁆𑀯𑀸 𑀞𑀺𑀢𑀢𑁆𑀢𑀸 ‘𑀳𑁂𑀢𑀼𑀕𑁄𑀘𑁆𑀙𑀓𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀅𑀧𑀭𑁂 ‘‘𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀲𑀢𑁆𑀢 𑀤𑀼𑀓𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀩𑀦𑁆𑀥𑀸, 𑀓𑁂𑀯𑀮𑀁 𑀤𑀼𑀓𑀲𑀸𑀫𑀜𑁆𑀜𑀢𑁄 𑀉𑀘𑁆𑀘𑀺𑀦𑀺𑀢𑁆𑀯𑀸 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀕𑁄𑀘𑁆𑀙𑀓𑀦𑁆𑀢𑀭𑁂 𑀞𑀧𑀺𑀢𑀢𑁆𑀢𑀸 𑀅𑀜𑁆𑀜𑁂𑀳𑀺 𑀘 𑀫𑀳𑀦𑁆𑀢𑀭𑀤𑀼𑀓𑁂𑀳𑀺 𑀘𑀽𑀴𑀓𑀢𑁆𑀢𑀸 ‘𑀘𑀽𑀴𑀦𑁆𑀢𑀭𑀤𑀼𑀓𑀸’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀭𑀁 𑀆𑀲𑀯𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀯𑀲𑁂𑀦 ‘𑀆𑀲𑀯𑀕𑁄𑀘𑁆𑀙𑀓𑁄’; 𑀢𑀣𑀸 𑀲𑀁𑀬𑁄𑀚𑀦𑀤𑀼𑀓𑀸𑀤𑀻𑀦𑀁 𑀯𑀲𑁂𑀦 ‘𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁄’; 𑀢𑀣𑀸 𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀤𑀼𑀓𑀸𑀤𑀻𑀦𑀁 𑀯𑀲𑁂𑀦 ‘𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀕𑁄𑀘𑁆𑀙𑀓𑀸’; 𑀧𑀭𑀸𑀫𑀸𑀲𑀤𑀼𑀓𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀲𑁂𑀦 ‘𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁄’𑀢𑀺. 𑀲𑀩𑁆𑀩𑁂𑀧𑀺 𑀲𑀢𑁆𑀢 𑀕𑁄𑀘𑁆𑀙𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀭𑀁 ‘‘𑀲𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀘𑀢𑀼𑀤𑁆𑀤𑀲 𑀤𑀼𑀓𑀸 ‘𑀫𑀳𑀦𑁆𑀢𑀭𑀤𑀼𑀓𑀸’ 𑀦𑀸𑀫. 𑀢𑀢𑁄 𑀉𑀧𑀸𑀤𑀸𑀦𑀤𑀼𑀓𑀸𑀤𑀬𑁄 𑀙 𑀤𑀼𑀓𑀸 ‘𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁄’ 𑀦𑀸𑀫. 𑀢𑀢𑁄 𑀓𑀺𑀮𑁂𑀲𑀤𑀼𑀓𑀸𑀤𑀬𑁄 𑀅𑀝𑁆𑀞 𑀤𑀼𑀓𑀸 ‘𑀓𑀺𑀮𑁂𑀲𑀕𑁄𑀘𑁆𑀙𑀓𑁄’ 𑀦𑀸𑀫. 𑀢𑀢𑁄 𑀧𑀭𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀤𑀼𑀓𑀸𑀤𑀬𑁄 𑀅𑀝𑁆𑀞𑀸𑀭𑀲 𑀤𑀼𑀓𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬 𑀧𑀭𑀺𑀬𑁄𑀲𑀸𑀦𑁂 𑀞𑀧𑀺𑀢𑀢𑁆𑀢𑀸 ‘𑀧𑀺𑀝𑁆𑀞𑀺𑀤𑀼𑀓𑀸’ 𑀦𑀸𑀫. ‘‘𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀧𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀤𑀼𑀓𑀸 ‘𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸’ 𑀦𑀸𑀫. 𑀏𑀯𑀁 𑀲𑀩𑁆𑀩𑁂𑀧𑁂𑀢𑁂 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀯𑀯𑀢𑁆𑀣𑀺𑀢𑀸 𑀧𑀦𑁂𑀢𑁂 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀳𑀺 𑀦𑀯 𑀢𑀺𑀓𑀸 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀲𑀧𑁆𑀧𑀤𑁂𑀲𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀧𑁆𑀧𑀤𑁂𑀲𑀸 𑀦𑀸𑀫. 𑀅𑀯𑀲𑁂𑀲𑀸 𑀢𑁂𑀭𑀲 𑀢𑀺𑀓𑀸 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀦𑀺𑀧𑁆𑀧𑀤𑁂𑀲𑀸 𑀦𑀸𑀫. 𑀢𑀢𑁆𑀣 𑀢𑀺𑀓𑁂𑀲𑀼 𑀢𑀸𑀯 𑀯𑁂𑀤𑀦𑀸𑀢𑁆𑀢𑀺𑀓𑁄 𑀯𑀺𑀢𑀓𑁆𑀓𑀢𑁆𑀢𑀺𑀓𑁄 𑀧𑀻𑀢𑀺𑀢𑁆𑀢𑀺𑀓𑁄 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁄 𑀅𑀢𑀻𑀢𑀢𑁆𑀢𑀺𑀓𑁄 𑀘𑀢𑁆𑀢𑀸𑀭𑁄 𑀆𑀭𑀫𑁆𑀫𑀡𑀢𑁆𑀢𑀺𑀓𑀸𑀢𑀺 𑀇𑀫𑁂 𑀦𑀯 𑀢𑀺𑀓𑀸 𑀲𑀧𑁆𑀧𑀤𑁂𑀲𑀸 𑀦𑀸𑀫. 𑀤𑀼𑀓𑁂𑀲𑀼 𑀳𑁂𑀢𑀼𑀕𑁄𑀘𑁆𑀙𑀓𑀸𑀤𑀻𑀦𑀁 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀦𑀯𑀦𑁆𑀦𑀁 𑀕𑁄𑀘𑁆𑀙𑀓𑀸𑀦𑀁 𑀧𑀭𑀺𑀬𑁄𑀲𑀸𑀦𑁂 𑀢𑀬𑁄 𑀢𑀬𑁄 𑀤𑀼𑀓𑀸, 𑀓𑀺𑀮𑁂𑀲𑀕𑁄𑀘𑁆𑀙𑀓𑀧𑀭𑀺𑀬𑁄𑀲𑀸𑀦𑁂 𑀘𑀢𑁆𑀢𑀸𑀭𑁄 𑀤𑀼𑀓𑀸, ‘‘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’‘‘𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀥𑀫𑁆𑀫𑀸, 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸 𑀥𑀫𑁆𑀫𑀸’’𑀢𑀺 𑀤𑁆𑀯𑁂 𑀫𑀳𑀦𑁆𑀢𑀭𑀤𑀼𑀓𑀸, 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑁂𑀲𑀼 𑀅𑀥𑀺𑀯𑀘𑀦𑀤𑀼𑀓𑀁 𑀦𑀺𑀭𑀼𑀢𑁆𑀢𑀺𑀤𑀼𑀓𑀁 𑀧𑀜𑁆𑀜𑀢𑁆𑀢𑀺𑀤𑀼𑀓𑀁 𑀦𑀸𑀫𑀭𑀽𑀧𑀤𑀼𑀓𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀝𑁆𑀞𑀢𑀺𑀁𑀲 𑀤𑀼𑀓𑀸 𑀘𑀸𑀢𑀺 𑀏𑀢𑁂 𑀲𑀧𑁆𑀧𑀤𑁂𑀲𑀸 𑀦𑀸𑀫. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀢𑀺𑀓𑀤𑀼𑀓𑀸 𑀲𑀩𑁆𑀩𑁂𑀧𑀺 𑀦𑀺𑀧𑁆𑀧𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀦𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀅𑀬𑀫𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 ‘𑀓𑀼𑀲𑀮’-𑀲𑀤𑁆𑀤𑁄 𑀢𑀸𑀯 𑀆𑀭𑁄𑀕𑁆𑀬𑀅𑀦𑀯𑀚𑁆𑀚𑀙𑁂𑀓𑀲𑀼𑀔𑀯𑀺𑀧𑀸𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯) 𑀆𑀭𑁄𑀕𑁆𑀬𑁂 𑀤𑀺𑀲𑁆𑀲𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀫𑀸𑀘𑀸𑀭𑁄 𑀓𑀼𑀲𑀮𑁄? 𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 (𑀫. 𑀦𑀺. 𑁨.𑁩𑁬𑁧) 𑀘, ‘‘𑀅𑀧𑀭𑀁 𑀧𑀦, 𑀪𑀦𑁆𑀢𑁂, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁 𑀬𑀣𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 (𑀤𑀻. 𑀦𑀺. 𑁩.𑁧𑁪𑁫) 𑀘 𑀏𑀯𑀫𑀸𑀤𑀻𑀲𑀼 𑀅𑀦𑀯𑀚𑁆𑀚𑁂. ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁’’ (𑀫. 𑀦𑀺. 𑁨.𑁮𑁭), ‘‘𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲 𑀲𑀺𑀓𑁆𑀔𑀺𑀢𑀸 𑀘𑀸𑀢𑀼𑀭𑀺𑀢𑁆𑀣𑀺𑀬𑁄’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁯𑁪) 𑀙𑁂𑀓𑁂. ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼’’ (𑀤𑀻. 𑀦𑀺. 𑁩.𑁮𑁦), ‘‘𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁩𑁧) 𑀲𑀼𑀔𑀯𑀺𑀧𑀸𑀓𑁂. 𑀲𑁆𑀯𑀸𑀬𑀫𑀺𑀥 𑀆𑀭𑁄𑀕𑁆𑀬𑁂𑀧𑀺 𑀅𑀦𑀯𑀚𑁆𑀚𑁂𑀧𑀺 𑀲𑀼𑀔𑀯𑀺𑀧𑀸𑀓𑁂𑀧𑀺 𑀯𑀢𑁆𑀢𑀢𑀺.

𑀥𑀫𑁆𑀫𑀲𑀤𑁆𑀤𑁄 𑀧𑀦𑀸𑀬𑀁 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀕𑀼𑀡𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁨) 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀳𑁂𑀢𑀼𑀫𑁆𑀳𑀺.

‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺. (𑀣𑁂𑀭𑀕𑀸. 𑁩𑁦𑁪; 𑀚𑀸. 𑁧.𑁧𑁫.𑁩𑁮𑁬) 𑁋

𑀆𑀤𑀻𑀲𑀼 𑀕𑀼𑀡𑁂. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺’’ (𑀥. 𑀲. 𑁧𑁨𑁧), ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩) 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀁. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀫𑁂𑀯 𑀯𑀝𑁆𑀝𑀢𑀺.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀓𑀼𑀘𑁆𑀙𑀺𑀢𑁂 𑀧𑀸𑀧𑀓𑁂 𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀘𑀮𑀬𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸. 𑀢𑁂 𑀅𑀓𑀼𑀲𑀮𑀲𑀗𑁆𑀔𑀸𑀢𑁂 𑀓𑀼𑀲𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀑𑀲𑀸𑀦𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫. 𑀢𑁂𑀦 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸𑀢𑀺 𑀓𑀼𑀲𑀮𑀸; 𑀕𑀳𑁂𑀢𑀩𑁆𑀩𑀸 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀓𑀼𑀲𑀸 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑁆𑀧𑀤𑁂𑀲𑀁 𑀮𑀼𑀦𑀦𑁆𑀢𑀺, 𑀏𑀯𑀫𑀺𑀫𑁂𑀧𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀉𑀪𑀬𑀪𑀸𑀕𑀕𑀢𑀁 𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀦𑁆𑀢𑀺. 𑀢𑀲𑁆𑀫𑀸 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺𑀧𑀺 𑀓𑀼𑀲𑀮𑀸. 𑀅𑀢𑁆𑀢𑀦𑁄 𑀧𑀦 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀥𑀸𑀭𑀺𑀬𑀦𑁆𑀢𑀺 𑀯𑀸 𑀧𑀘𑁆𑀘𑀬𑁂𑀳𑀺, 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀬𑀣𑀸𑀲𑀪𑀸𑀯𑀢𑁄𑀢𑀺 𑀥𑀫𑁆𑀫𑀸. 𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸. 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬, 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀅𑀮𑁄𑀪𑀸𑀤𑀬𑁄 𑀯𑀺𑀬 𑀘, 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀩𑁆𑀬𑀸𑀓𑀢𑀸, 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀧𑀦 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀓𑀼𑀲𑀮𑀸, 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀓𑀼𑀲𑀮𑀸, 𑀅𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀁 𑀧𑀦𑁂𑀢𑀸𑀦𑀺 ‘𑀓𑀼𑀲𑀮𑀸’𑀢𑀺 𑀯𑀸 ‘𑀥𑀫𑁆𑀫𑀸’𑀢𑀺 𑀯𑀸𑀢𑀺𑀆𑀤𑀻𑀦𑀺 𑀏𑀓𑀢𑁆𑀣𑀸𑀦𑀺 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸𑀦𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣? 𑀬𑀤𑀺 𑀢𑀸𑀯 𑀏𑀓𑀢𑁆𑀣𑀸𑀦𑀺 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀇𑀤𑀁 ‘𑀓𑀼𑀲𑀮𑀸𑀓𑀼𑀲𑀮𑀸’𑀢𑀺𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀅𑀣 𑀦𑀸𑀦𑀢𑁆𑀣𑀸𑀦𑀺 𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀆𑀧𑀚𑁆𑀚𑀢𑀺 𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄.

𑀬𑀣𑀸 𑀳𑀺 ‘𑀓𑀼𑀲𑀮𑀸’ ‘𑀭𑀽𑀧𑀁’‘𑀘𑀓𑁆𑀔𑀼𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀮𑁄𑀓𑁂𑀦𑁆𑀢𑀸𑀦𑀁 𑀧𑀤𑀸𑀦𑀁 𑀦 𑀓𑁄𑀘𑀺 𑀲𑀫𑁆𑀩𑀦𑁆𑀥𑁄, 𑀏𑀯𑀫𑀺𑀥𑀸𑀧𑀺 𑀧𑀤𑀸𑀦𑀁 𑀅𑀲𑀫𑁆𑀩𑀦𑁆𑀥𑁄 𑀆𑀧𑀚𑁆𑀚𑀢𑀺. 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀭𑀳𑀺𑀢𑀸𑀦𑀺 𑀘 𑀧𑀤𑀸𑀦𑀺 𑀦𑀺𑀧𑁆𑀧𑀬𑁄𑀚𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀬𑀸𑀧𑀺 𑀘𑁂𑀲𑀸 𑀧𑀭𑀢𑁄 ‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀧𑀼𑀘𑁆𑀙𑀸, 𑀢𑀸𑀬𑀧𑀺 𑀲𑀤𑁆𑀥𑀺𑀁 𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀦𑁂𑀯 𑀳𑀺 𑀥𑀫𑁆𑀫𑀸 𑀓𑀼𑀲𑀮𑀸; 𑀅𑀣 𑀘 𑀧𑀦𑀺𑀤𑀁 𑀯𑀼𑀘𑁆𑀘𑀢𑀺 𑁋 𑀓𑀢𑀫𑁂 𑀥𑀫𑁆𑀫𑀸 ‘𑀓𑀼𑀲𑀮𑀸’𑀢𑀺. 𑀅𑀧𑀭𑁄 𑀦𑀬𑁄 𑁋 𑀬𑀤𑀺 𑀏𑀢𑀸𑀦𑀺 𑀏𑀓𑀢𑁆𑀣𑀸𑀦𑀺, 𑀢𑀺𑀡𑁆𑀡𑀁 ‘𑀥𑀫𑁆𑀫𑀸𑀦𑀁’ 𑀏𑀓𑀢𑁆𑀢𑀸 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀓𑀼𑀲𑀮𑀸𑀤𑀺𑀧𑀭𑀸𑀦𑀜𑁆𑀳𑀺 𑀢𑀺𑀡𑁆𑀡𑀫𑁆𑀧𑀺 ‘𑀥𑀫𑁆𑀫𑀸𑀦𑀁’ 𑀥𑀫𑁆𑀫𑀪𑀸𑀯𑁂𑀦 𑀏𑀓𑀢𑁆𑀢𑀁. 𑀢𑀲𑁆𑀫𑀸 𑀥𑀫𑁆𑀫𑀢𑁆𑀢𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀢𑁆𑀣𑀸𑀦𑀁 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. ‘𑀬𑀤𑁂𑀯 𑀓𑀼𑀲𑀮𑀁, 𑀢𑀁 𑀅𑀓𑀼𑀲𑀮𑀁, 𑀢𑀁 𑀅𑀩𑁆𑀬𑀸𑀓𑀢’𑀦𑁆𑀢𑀺. ‘𑀅𑀣𑀸𑀧𑀺 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀏𑀓𑀢𑁆𑀢𑀁 𑀦 𑀲𑀫𑁆𑀧𑀝𑀺𑀘𑁆𑀙𑀣, 𑀅𑀜𑁆𑀜𑁄𑀯 𑀓𑀼𑀲𑀮𑀧𑀭𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀅𑀓𑀼𑀲𑀮𑀧𑀭𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀅𑀩𑁆𑀬𑀸𑀓𑀢𑀧𑀭𑁄 𑀥𑀫𑁆𑀫𑁄𑀢𑀺 𑀯𑀤𑀣, 𑀏𑀯𑀁 𑀲𑀦𑁆𑀢𑁂 𑀥𑀫𑁆𑀫𑁄 𑀦𑀸𑀫 𑀪𑀸𑀯𑁄, 𑀪𑀸𑀯𑀢𑁄 𑀘 𑀅𑀜𑁆𑀜𑁄 𑀅𑀪𑀸𑀯𑁄𑀢𑀺 𑀓𑀼𑀲𑀮𑀧𑀭𑀸 𑀪𑀸𑀯𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀅𑀜𑁆𑀜𑁄 𑀅𑀓𑀼𑀲𑀮𑀧𑀭𑁄 𑀥𑀫𑁆𑀫𑁄 𑀅𑀪𑀸𑀯𑁄 𑀲𑀺𑀬𑀸, 𑀢𑀣𑀸 𑀅𑀩𑁆𑀬𑀸𑀓𑀢𑀧𑀭𑁄. 𑀢𑁂𑀳𑀺 𑀘 𑀅𑀜𑁆𑀜𑁄 𑀓𑀼𑀲𑀮𑀧𑀭𑁄𑀧𑀺. 𑀏𑀯𑀁 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀬𑁄𑀧𑀺 𑀅𑀪𑀸𑀯𑀸𑀬𑁂𑀯 𑀲𑀺𑀬𑀼’𑀦𑁆𑀢𑀺.

𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀬𑀣𑀸𑀦𑀼𑀫𑀢𑀺𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄𑀢𑀺. 𑀯𑁄𑀳𑀸𑀭𑁄 𑀳𑀺 𑀬𑀣𑀸 𑀬𑀣𑀸 𑀅𑀢𑁆𑀣𑁂𑀲𑀼 𑀅𑀦𑀼𑀫𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀢𑀣𑀸 𑀢𑀣𑁂𑀯 𑀲𑀺𑀤𑁆𑀥𑁄. 𑀦 𑀘𑀸𑀬𑀁 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀓𑀼𑀲𑀮𑀧𑀼𑀩𑁆𑀩𑁄 𑀥𑀫𑁆𑀫𑀸𑀪𑀺𑀮𑀸𑀧𑁄 𑀥𑀫𑁆𑀫𑀧𑀭𑁄 𑀘 𑀓𑀼𑀲𑀮𑀸𑀪𑀺𑀮𑀸𑀧𑁄, 𑀬𑀣𑀸 ‘𑀓𑀼𑀲𑀮𑀸 𑀓𑀼𑀲𑀮𑀸’𑀢𑀺 𑀏𑀯𑀁, 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀦 𑀧𑀡𑁆𑀟𑀺𑀢𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁄; 𑀦 𑀘 ‘𑀓𑀼𑀲𑀮𑀸’ ‘𑀭𑀽𑀧𑀁’𑀘𑀓𑁆𑀔𑀼𑀫𑀸𑀲𑀤𑁆𑀤𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀮𑁄𑀓𑀺𑀢𑀢𑁆𑀣𑀪𑀸𑀯𑁂𑀦. ‘𑀓𑀼𑀲𑀮’-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀚𑁄𑀢𑀓𑀪𑀸𑀯𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁄, ‘𑀅𑀓𑀼𑀲𑀮’-𑀲𑀤𑁆𑀤𑁄 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀢𑁆𑀣𑀚𑁄𑀢𑀓𑀢𑁆𑀢𑁂𑀦, ‘𑀅𑀩𑁆𑀬𑀸𑀓𑀢’-𑀲𑀤𑁆𑀤𑁄 𑀅𑀯𑀺𑀧𑀸𑀓𑀢𑁆𑀣𑀚𑁄𑀢𑀓𑀢𑁆𑀢𑁂𑀦, ‘𑀥𑀫𑁆𑀫’-𑀲𑀤𑁆𑀤𑁄 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑀚𑁄𑀢𑀓𑀢𑁆𑀢𑁂𑀦. 𑀲𑁄 𑀏𑀢𑁂𑀲𑀁 𑀅𑀜𑁆𑀜𑀢𑀭𑀸𑀦𑀦𑁆𑀢𑀭𑁂 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀲𑀸𑀫𑀜𑁆𑀜𑀁 𑀤𑀻𑀧𑁂𑀢𑀺. 𑀲𑀩𑁆𑀩𑁂𑀯 𑀳𑀺 𑀏𑀢𑁂 𑀲𑀪𑀸𑀯𑀥𑀸𑀭𑀡𑀸𑀤𑀺𑀦𑀸 𑀮𑀓𑁆𑀔𑀡𑁂𑀦 𑀥𑀫𑁆𑀫𑀸. 𑀓𑀼𑀲𑀮𑀸𑀤𑀺𑀲𑀤𑁆𑀤𑀸 𑀘𑀸𑀧𑀺 𑀥𑀫𑁆𑀫𑀲𑀤𑁆𑀤𑀲𑁆𑀲 𑀧𑀼𑀭𑀢𑁄 𑀯𑀼𑀘𑁆𑀘𑀫𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀁 𑀢𑀲𑁆𑀲 𑀤𑀻𑀧𑁂𑀦𑁆𑀢𑀺. 𑀥𑀫𑁆𑀫𑁄 𑀳𑀺 𑀓𑀼𑀲𑀮𑁄 𑀯𑀸 𑀳𑁄𑀢𑀺 𑀅𑀓𑀼𑀲𑀮𑁄 𑀯𑀸 𑀅𑀩𑁆𑀬𑀸𑀓𑀢𑁄 𑀯𑀸. 𑀏𑀯𑀫𑁂𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀼𑀘𑁆𑀘𑀫𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀫𑀢𑁆𑀢𑀤𑀻𑀧𑀓𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀸. 𑀥𑀫𑁆𑀫𑀲𑀤𑁆𑀤𑁂𑀦 𑀲𑀳 𑀯𑀼𑀘𑁆𑀘𑀫𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀲𑀸𑀫𑀜𑁆𑀜𑀁 𑀅𑀢𑁆𑀣𑀯𑀺𑀲𑁂𑀲𑀁 𑀯𑀸 𑀤𑀻𑀧𑀓𑀢𑁆𑀢𑁂𑀦 𑀮𑁄𑀓𑁂 𑀧𑀡𑁆𑀟𑀺𑀢𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸. 𑀢𑀲𑁆𑀫𑀸 𑀬𑀤𑁂𑀢𑀫𑁂𑀢𑁆𑀣 𑀏𑀓𑀢𑁆𑀣𑀦𑀸𑀦𑀸𑀢𑁆𑀣𑀢𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀤𑁄𑀲𑀸𑀭𑁄𑀧𑀦𑀓𑀸𑀭𑀡𑀁 𑀯𑀼𑀢𑁆𑀢𑀁 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀅𑀬𑀁 𑀢𑀸𑀯 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑁂𑀲𑀢𑀺𑀓𑀤𑀼𑀓𑀸𑀦𑀫𑁆𑀧𑀺 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀧𑀦 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑁨. 𑀲𑀼𑀔𑀸𑀬 𑀯𑁂𑀤𑀦𑀸𑀬𑀸𑀢𑀺𑀆𑀤𑀻𑀲𑀼 ‘𑀲𑀼𑀔’-𑀲𑀤𑁆𑀤𑁄 𑀢𑀸𑀯 𑀲𑀼𑀔𑀯𑁂𑀤𑀦𑀸𑀲𑀼𑀔𑀫𑀽𑀮𑀲𑀼𑀔𑀸𑀭𑀫𑁆𑀫𑀡𑀲𑀼𑀔𑀳𑁂𑀢𑀼𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑀅𑀩𑁆𑀬𑀸𑀩𑀚𑁆𑀛𑀦𑀺𑀩𑁆𑀩𑀸𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁨) 𑀲𑀼𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄’’ (𑀥. 𑀧. 𑁧𑁯𑁪), ‘‘𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂’’𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁧; 𑀫𑀳𑀸𑀯. 𑁫) 𑀲𑀼𑀔𑀫𑀽𑀮𑁂 ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦) 𑀲𑀼𑀔𑀸𑀭𑀫𑁆𑀫𑀡𑁂. ‘‘𑀲𑀼𑀔𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 𑀧𑀼𑀜𑁆𑀜𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁨) 𑀲𑀼𑀔𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀲𑀼𑀔𑀸 𑀲𑀕𑁆𑀕𑀸’’ (𑀫. 𑀦𑀺. 𑁩.𑁨𑁫𑁫), ‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁧) 𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑁂. ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀏𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁮𑁨) 𑀅𑀩𑁆𑀬𑀸𑀩𑀚𑁆𑀛𑁂. ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀲𑀼 (𑀥. 𑀧. 𑁨𑁦𑁩-𑁨𑁦𑁪) 𑀦𑀺𑀩𑁆𑀩𑀸𑀦𑁂. 𑀇𑀥 𑀧𑀦𑀸𑀬𑀁 𑀲𑀼𑀔𑀯𑁂𑀤𑀦𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄. ‘𑀯𑁂𑀤𑀦𑀸’-𑀲𑀤𑁆𑀤𑁄 ‘‘𑀯𑀺𑀤𑀺𑀢𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁦𑁮) 𑀯𑁂𑀤𑀬𑀺𑀢𑀲𑁆𑀫𑀺𑀁𑀬𑁂𑀯 𑀯𑀢𑁆𑀢𑀢𑀺.

‘𑀤𑀼𑀓𑁆𑀔’-𑀲𑀤𑁆𑀤𑁄 𑀤𑀼𑀓𑁆𑀔𑀯𑁂𑀤𑀦𑀸𑀤𑀼𑀓𑁆𑀔𑀯𑀢𑁆𑀣𑀼𑀤𑀼𑀓𑁆𑀔𑀸𑀭𑀫𑁆𑀫𑀡𑀤𑀼𑀓𑁆𑀔𑀧𑀘𑁆𑀘𑀬𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁮𑁭; 𑀯𑀺𑀪. 𑁧𑁯𑁦) 𑀤𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁. ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀸𑀭𑀫𑁆𑀫𑀡𑁂. ‘‘𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁧𑁭) 𑀤𑀼𑀓𑁆𑀔𑀧𑀘𑁆𑀘𑀬𑁂. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦) 𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑁂. 𑀇𑀥 𑀧𑀦𑀸𑀬𑀁 𑀤𑀼𑀓𑁆𑀔𑀯𑁂𑀤𑀦𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀲𑀼𑀔𑀬𑀢𑀻𑀢𑀺 𑀲𑀼𑀔𑀸. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸. 𑀦 𑀤𑀼𑀓𑁆𑀔𑀸 𑀦 𑀲𑀼𑀔𑀸𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸. ‘𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀩𑁆𑀩𑀸𑀧𑀺 𑀆𑀭𑀫𑁆𑀫𑀡𑀭𑀲𑀁 𑀯𑁂𑀤𑀬𑀦𑁆𑀢𑀺 𑀅𑀦𑀼𑀪𑀯𑀦𑁆𑀢𑀻𑀢𑀺 𑀯𑁂𑀤𑀦𑀸. 𑀢𑀸𑀲𑀼 𑀇𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀲𑀼𑀔𑀸, 𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀸, 𑀉𑀪𑀬𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀅𑀤𑀼𑀓𑁆𑀔𑀫𑀲𑀼𑀔𑀸. 𑀬𑁄𑀧𑀦𑀸𑀬𑀁 𑀢𑀻𑀲𑀼𑀧𑀺 𑀧𑀤𑁂𑀲𑀼 ‘𑀲𑀫𑁆𑀧𑀬𑀼𑀢𑁆𑀢’-𑀲𑀤𑁆𑀤𑁄, 𑀢𑀲𑁆𑀲𑀢𑁆𑀣𑁄 𑁋 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀭𑁂𑀳𑀺 𑀧𑀓𑀸𑀭𑁂𑀳𑀻𑀢𑀺? 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺. ‘‘𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸’’𑀢𑀺 𑀳𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 ‘‘𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸’’𑀢𑀺 (𑀓𑀣𑀸. 𑁪𑁭𑁩) 𑀏𑀯𑀁 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀧𑀬𑁄𑀕𑀢𑁆𑀣𑁄 𑀯𑀼𑀢𑁆𑀢𑁄. 𑀇𑀢𑀺 𑀇𑀫𑁂𑀳𑀺 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸.

𑁩. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀸𑀓𑀸𑀢𑀺 𑀯𑀺𑀧𑀸𑀓𑀸. 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀯𑀺𑀧𑀸𑀓𑀲𑀪𑀸𑀯𑀥𑀫𑁆𑀫𑀸. 𑀬𑀣𑀸 𑀚𑀸𑀢𑀺𑀚𑀭𑀸𑀲𑀪𑀸𑀯𑀸 𑀚𑀸𑀢𑀺𑀚𑀭𑀸𑀧𑀓𑀢𑀺𑀓𑀸 𑀲𑀢𑁆𑀢𑀸 𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀏𑀯𑀁 𑀯𑀺𑀧𑀸𑀓𑀚𑀦𑀓𑀝𑁆𑀞𑁂𑀦 𑀯𑀺𑀧𑀸𑀓𑀲𑀪𑀸𑀯𑀸 𑀯𑀺𑀧𑀸𑀓𑀧𑀓𑀢𑀺𑀓𑀸 𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀧𑀤𑀁 𑀉𑀪𑀬𑀲𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁.

𑁪. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀢𑁆𑀢𑀺𑀓𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀆𑀤𑀺𑀦𑁆𑀦𑀸, 𑀨𑀮𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀉𑀧𑀸𑀤𑀺𑀦𑁆𑀦𑀸. 𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀉𑀧𑀸𑀤𑀸𑀦𑀲𑀫𑁆𑀩𑀦𑁆𑀥𑁂𑀦 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑀸𑀢𑀺 𑀉𑀧𑀸𑀤𑀸𑀦𑀺𑀬𑀸. 𑀉𑀧𑀸𑀤𑀸𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀧𑀸𑀤𑀺𑀡𑁆𑀡𑀸 𑀘 𑀢𑁂 𑀉𑀧𑀸𑀤𑀸𑀦𑀺𑀬𑀸 𑀘𑀸𑀢𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸; 𑀲𑀸𑀲𑀯𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀧𑀝𑀺𑀲𑁂𑀥𑀲𑀳𑀺𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁫. 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀺𑀓𑁂 𑀲𑀁𑀓𑀺𑀮𑁂𑀲𑁂𑀢𑀻𑀢𑀺 𑀲𑀁𑀓𑀺𑀮𑁂𑀲𑁄, 𑀯𑀺𑀩𑀸𑀥𑀢𑀺, 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑁂𑀲𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀸. 𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁂𑀦 𑀲𑀁𑀓𑀺𑀮𑁂𑀲𑀁 𑀅𑀭𑀳𑀦𑁆𑀢𑀺, 𑀲𑀁𑀓𑀺𑀮𑁂𑀲𑁂 𑀯𑀸 𑀦𑀺𑀬𑀼𑀢𑁆𑀢𑀸, 𑀢𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄𑀢𑀺 𑀲𑀁𑀓𑀺𑀮𑁂𑀲𑀺𑀓𑀸. 𑀲𑀁𑀓𑀺𑀮𑁂𑀲𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀁𑀓𑀺𑀮𑀺𑀝𑁆𑀞𑀸 𑀘 𑀢𑁂 𑀲𑀁𑀓𑀺𑀮𑁂𑀲𑀺𑀓𑀸 𑀘𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸. 𑀲𑁂𑀲𑀧𑀤𑀤𑁆𑀯𑀬𑀫𑁆𑀧𑀺 𑀧𑀼𑀭𑀺𑀫𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁬. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀢𑁆𑀢𑀫𑀸𑀦𑁂𑀦 𑀲𑀳 𑀯𑀺𑀢𑀓𑁆𑀓𑁂𑀦 𑀲𑀯𑀺𑀢𑀓𑁆𑀓𑀸. 𑀲𑀳 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑀸. 𑀲𑀯𑀺𑀢𑀓𑁆𑀓𑀸 𑀘 𑀢𑁂 𑀲𑀯𑀺𑀘𑀸𑀭𑀸 𑀘𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸. 𑀉𑀪𑀬𑀭𑀳𑀺𑀢𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀘𑀸𑀭𑁄𑀯 𑀫𑀢𑁆𑀢𑀸, 𑀧𑀫𑀸𑀡𑀁, 𑀏𑀢𑁂𑀲𑀦𑁆𑀢𑀺 𑀯𑀺𑀘𑀸𑀭𑀫𑀢𑁆𑀢𑀸. 𑀯𑀺𑀘𑀸𑀭𑀢𑁄 𑀉𑀢𑁆𑀢𑀭𑀺 𑀯𑀺𑀢𑀓𑁆𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀢𑀓𑁆𑀓𑀸 𑀘 𑀢𑁂 𑀯𑀺𑀘𑀸𑀭𑀫𑀢𑁆𑀢𑀸 𑀘𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸.

𑁭. 𑀧𑀻𑀢𑀺𑀢𑁆𑀢𑀺𑀓𑁂 𑀧𑀻𑀢𑀺𑀬𑀸 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑀸𑀢𑀺 𑀧𑀻𑀢𑀺𑀲𑀳𑀕𑀢𑀸, 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸𑀢𑀺 𑀘𑁂𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀲𑀸 𑀳𑀺 𑀲𑀼𑀔𑀤𑀼𑀓𑁆𑀔𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀁 𑀉𑀧𑁂𑀓𑁆𑀔𑀢𑀺, 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀡𑁆𑀞𑀺𑀢𑀢𑁆𑀢𑀸 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀇𑀢𑀺 𑀯𑁂𑀤𑀦𑀸𑀢𑁆𑀢𑀺𑀓𑀢𑁄 𑀧𑀤𑀤𑁆𑀯𑀬𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀻𑀢𑀺𑀓𑀲𑁆𑀲 𑀲𑀼𑀔𑀲𑁆𑀲 𑀲𑀧𑁆𑀧𑀻𑀢𑀺𑀓𑀲𑀼𑀔𑀢𑁄 𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄.

𑁮. 𑀤𑀲𑁆𑀲𑀦𑀢𑁆𑀢𑀺𑀓𑁂 𑀤𑀲𑁆𑀲𑀦𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀲𑁄 𑀳𑀺 𑀧𑀞𑀫𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀦𑀢𑁄 𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀕𑁄𑀢𑁆𑀭𑀪𑀼 𑀧𑀦 𑀓𑀺𑀜𑁆𑀘𑀸𑀧𑀺 𑀧𑀞𑀫𑀢𑀭𑀁 𑀧𑀲𑁆𑀲𑀢𑀺, 𑀬𑀣𑀸 𑀧𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀆𑀕𑀢𑁄 𑀧𑀼𑀭𑀺𑀲𑁄 𑀤𑀽𑀭𑀢𑁄𑀯 𑀭𑀣𑀺𑀓𑀸𑀬 𑀘𑀭𑀦𑁆𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 ‘𑀤𑀺𑀝𑁆𑀞𑁄 𑀢𑁂 𑀭𑀸𑀚𑀸’𑀢𑀺 𑀧𑀼𑀝𑁆𑀞𑁄 𑀤𑀺𑀲𑁆𑀯𑀸𑀧𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 ‘𑀦 𑀧𑀲𑁆𑀲𑀸𑀫𑀻’𑀢𑀺 𑀆𑀳. 𑀏𑀯𑀫𑁂𑀯 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸𑀧𑀺 𑀓𑀢𑁆𑀢𑀩𑁆𑀩𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲𑀸𑀪𑀸𑀯𑀸 𑀦 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀜𑀸𑀡𑀁 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀪𑀸𑀯𑀦𑀸𑀬𑀸𑀢𑀺 𑀲𑁂𑀲𑀫𑀕𑁆𑀕𑀢𑁆𑀢𑀬𑁂𑀦. 𑀲𑁂𑀲𑀫𑀕𑁆𑀕𑀢𑁆𑀢𑀬𑀜𑁆𑀳𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀪𑀸𑀯𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁.

𑁯. 𑀢𑀤𑀦𑀦𑁆𑀢𑀭𑀢𑁆𑀢𑀺𑀓𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀺𑀬𑀧𑀤𑁂 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀪𑀯𑁂𑀬𑁆𑀬; 𑀳𑁂𑀢𑀼𑀬𑁂𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀺 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸. 𑀲𑀳𑁂𑀢𑀼𑀓𑁂𑀲𑀼𑀧𑀺 𑀳𑁂𑀢𑀼𑀯𑀚𑁆𑀚𑀸𑀦𑀁 𑀧𑀳𑀸𑀦𑀁 𑀆𑀧𑀚𑁆𑀚𑀢𑀺, 𑀦 𑀳𑁂𑀢𑀽𑀦𑀁; 𑀳𑁂𑀢𑀼𑀬𑁂𑀯 𑀳𑀺 𑀏𑀢𑁂𑀲𑀁 ‘𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑁄, 𑀦 𑀢𑁂 𑀥𑀫𑁆𑀫𑀸. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑁂𑀯𑀤𑀲𑁆𑀲𑀦𑁂𑀦 𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁧𑁦. 𑀆𑀘𑀬𑀕𑀸𑀫𑀺𑀢𑁆𑀢𑀺𑀓𑁂 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀆𑀘𑀺𑀬𑀢𑀻𑀢𑀺 𑀆𑀘𑀬𑁄. 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀕𑀢𑀺𑀧𑁆𑀧𑀯𑀢𑁆𑀢𑀸𑀦𑀁 𑀏𑀢𑀁 𑀦𑀸𑀫𑀁. 𑀢𑀲𑁆𑀲 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀦𑀺𑀧𑁆𑀨𑀸𑀤𑀦𑀓𑀪𑀸𑀯𑁂𑀦 𑀢𑀁 𑀆𑀘𑀬𑀁 𑀕𑀘𑁆𑀙𑀦𑁆𑀢𑀺, 𑀬𑀲𑁆𑀲 𑀯𑀸 𑀧𑀯𑀢𑁆𑀢𑀦𑁆𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀬𑀣𑀸𑀯𑀼𑀢𑁆𑀢𑀫𑁂𑀯 𑀆𑀘𑀬𑀁 𑀕𑀫𑁂𑀦𑁆𑀢𑀻𑀢𑀺𑀧𑀺 𑀆𑀘𑀬𑀕𑀸𑀫𑀺𑀦𑁄; 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁄 𑀏𑀯 𑀆𑀘𑀬𑀲𑀗𑁆𑀔𑀸𑀢𑀸 𑀘𑀬𑀸 𑀅𑀧𑁂𑀢𑀢𑁆𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀧𑁂𑀢𑀁 𑀘𑀬𑀸𑀢𑀺 𑀅𑀧𑀘𑀬𑁄. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀅𑀧𑀘𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄; 𑀅𑀭𑀺𑀬𑀫𑀕𑁆𑀕𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀺𑀘 𑀧𑀸𑀓𑀸𑀭𑀁 𑀇𑀝𑁆𑀞𑀓𑀯𑀟𑁆𑀠𑀓𑀻 𑀯𑀺𑀬 𑀧𑀯𑀢𑁆𑀢𑀁 𑀆𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀆𑀘𑀬𑀕𑀸𑀫𑀺𑀦𑁄. 𑀢𑁂𑀦 𑀘𑀺𑀢𑀁 𑀘𑀺𑀢𑀁 𑀇𑀝𑁆𑀞𑀓𑀁 𑀯𑀺𑀤𑁆𑀥𑀁𑀲𑀬𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀢𑀤𑁂𑀯 𑀧𑀯𑀢𑁆𑀢𑀁 𑀅𑀧𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁.

𑁧𑁧. 𑀲𑁂𑀓𑁆𑀔𑀢𑁆𑀢𑀺𑀓𑁂 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺 𑀲𑁂𑀓𑁆𑀔𑀸. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀏𑀢𑁂𑀢𑀺𑀧𑀺 𑀲𑁂𑀓𑁆𑀔𑀸. 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀲𑀬𑀫𑁂𑀯 𑀲𑀺𑀓𑁆𑀔𑀦𑁆𑀢𑀻𑀢𑀺𑀧𑀺 𑀲𑁂𑀓𑁆𑀔𑀸. 𑀉𑀧𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀢𑁄 𑀦 𑀲𑁂𑀓𑁆𑀔𑀸𑀢𑀺 𑀅𑀲𑁂𑀓𑁆𑀔𑀸. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀯𑀸 𑀲𑁂𑀓𑁆𑀔𑀸𑀢𑀺𑀧𑀺 𑀅𑀲𑁂𑀓𑁆𑀔𑀸. 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁.

𑁧𑁨. 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀓𑀁 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺; ‘𑀧𑀭𑀺𑀢𑁆𑀢𑀁 𑀕𑁄𑀫𑀬𑀧𑀺𑀡𑁆𑀟’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁯𑁬) 𑀯𑀺𑀬. 𑀇𑀫𑁂𑀧𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀢𑁆𑀢𑀸 𑀯𑀺𑀬𑀸𑀢𑀺 𑀧𑀭𑀺𑀢𑁆𑀢𑀸; 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬 𑀯𑀺𑀧𑀼𑀮𑀨𑀮𑀢𑀸𑀬 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀘 𑀫𑀳𑀦𑁆𑀢𑀪𑀸𑀯𑀁 𑀕𑀢𑀸, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀧𑀜𑁆𑀜𑁂𑀳𑀺 𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺𑀧𑀺 𑀫𑀳𑀕𑁆𑀕𑀢𑀸. 𑀧𑀫𑀸𑀡𑀓𑀭𑀸 𑀥𑀫𑁆𑀫𑀸 𑀭𑀸𑀕𑀸𑀤𑀬𑁄 𑀧𑀫𑀸𑀡𑀁 𑀦𑀸𑀫. 𑀆𑀭𑀫𑁆𑀫𑀡𑀢𑁄 𑀯𑀸 𑀲𑀫𑁆𑀧𑀬𑁄𑀕𑀢𑁄 𑀯𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀧𑀫𑀸𑀡𑀁, 𑀧𑀫𑀸𑀡𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸𑀢𑀺 𑀅𑀧𑁆𑀧𑀫𑀸𑀡𑀸.

𑁧𑁩. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀧𑀭𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁪. 𑀳𑀻𑀦𑀢𑁆𑀢𑀺𑀓𑁂 𑀳𑀻𑀦𑀸𑀢𑀺 𑀮𑀸𑀫𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀳𑀻𑀦𑀧𑁆𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀸𑀢𑀺 𑀫𑀚𑁆𑀛𑀺𑀫𑀸. 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀉𑀢𑁆𑀢𑀫𑀝𑁆𑀞𑁂𑀦 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀸; 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸.

𑁧𑁫. 𑀫𑀺𑀘𑁆𑀙𑀢𑁆𑀢𑀢𑁆𑀢𑀺𑀓𑁂 ‘𑀳𑀺𑀢𑀲𑀼𑀔𑀸𑀯𑀳𑀸 𑀫𑁂 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀏𑀯𑀁 𑀆𑀲𑀻𑀲𑀺𑀢𑀸𑀧𑀺 𑀢𑀣𑀸 𑀅𑀪𑀸𑀯𑀢𑁄, ‘𑀅𑀲𑀼𑀪𑀸𑀤𑀻𑀲𑀼𑀬𑁂𑀯 𑀲𑀼𑀪’𑀦𑁆𑀢𑀺𑀆𑀤𑀺 𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀢𑁄 𑀘 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀺𑀘𑁆𑀙𑀢𑁆𑀢𑀸; 𑀯𑀺𑀧𑀸𑀓𑀤𑀸𑀦𑁂 𑀲𑀢𑀺 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀫𑁂𑀯 𑀯𑀺𑀧𑀸𑀓𑀤𑀸𑀦𑀢𑁄 𑀦𑀺𑀬𑀢𑀸; 𑀫𑀺𑀘𑁆𑀙𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸. 𑀯𑀼𑀢𑁆𑀢𑀯𑀺𑀧𑀭𑀻𑀢𑁂𑀦 𑀅𑀢𑁆𑀣𑁂𑀦 𑀲𑀫𑁆𑀫𑀸𑀲𑀪𑀸𑀯𑀸𑀢𑀺 𑀲𑀫𑁆𑀫𑀢𑁆𑀢𑀸; 𑀲𑀫𑁆𑀫𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘 𑀅𑀦𑀦𑁆𑀢𑀭𑀫𑁂𑀯 𑀨𑀮𑀤𑀸𑀦𑁂𑀦𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀢𑀸. 𑀉𑀪𑀬𑀣𑀸𑀧𑀺 𑀦 𑀦𑀺𑀬𑀢𑀸𑀢𑀺 𑀅𑀦𑀺𑀬𑀢𑀸.

𑁧𑁬. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺, 𑀕𑀯𑁂𑀲𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄. 𑀫𑀕𑁆𑀕𑁄 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀫𑀕𑁆𑀕𑀸𑀭𑀫𑁆𑀫𑀡𑀸. 𑀅𑀝𑁆𑀞𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀧𑀘𑁆𑀘𑀬𑀝𑁆𑀞𑁂𑀦 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀫𑀕𑁆𑀕𑀳𑁂𑀢𑀼𑀓𑀸. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀳𑁂𑀢𑀽 𑀫𑀕𑁆𑀕𑁂 𑀯𑀸 𑀳𑁂𑀢𑀽𑀢𑀺 𑀫𑀕𑁆𑀕𑀳𑁂𑀢𑀽. 𑀢𑁂 𑀏𑀢𑁂𑀲𑀁 𑀳𑁂𑀢𑀽𑀢𑀺𑀧𑀺 𑀫𑀕𑁆𑀕𑀳𑁂𑀢𑀼𑀓𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀬𑀁 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘. 𑀇𑀢𑀺 𑀫𑀕𑁆𑀕𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺𑀧𑀺 𑀫𑀕𑁆𑀕𑀳𑁂𑀢𑀼𑀓𑀸. 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀏𑀢𑁂𑀲𑀦𑁆𑀢𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑁄.

𑁧𑁭. 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀉𑀤𑁆𑀥𑀁 𑀧𑀦𑁆𑀦𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀉𑀧𑁆𑀧𑀦𑁆𑀦𑀸. 𑀦 𑀉𑀧𑁆𑀧𑀦𑁆𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸. 𑀧𑀭𑀺𑀦𑀺𑀝𑁆𑀞𑀺𑀢𑀓𑀸𑀭𑀡𑁂𑀓𑀤𑁂𑀲𑀢𑁆𑀢𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀺𑀦𑁄.

𑁧𑁮. 𑀅𑀢𑀻𑀢𑀢𑁆𑀢𑀺𑀓𑁂 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀁 𑀯𑀸 𑀧𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀻𑀢𑀸. 𑀢𑀤𑀼𑀪𑀬𑀫𑁆𑀧𑀺 𑀦 𑀆𑀕𑀢𑀸𑀢𑀺 𑀅𑀦𑀸𑀕𑀢𑀸. 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸.

𑁧𑁯. 𑀅𑀦𑀦𑁆𑀢𑀭𑀢𑁆𑀢𑀺𑀓𑁂 𑀅𑀢𑀻𑀢𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁦. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 ‘𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀫𑀬𑀁 𑀅𑀢𑁆𑀢𑀸’𑀢𑀺 𑀕𑀳𑀡𑀁, ‘𑀕𑀫𑀺𑀲𑁆𑀲𑀸𑀫𑀸’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀢𑀺 𑀅𑀚𑁆𑀛𑀢𑁆𑀢𑀸. ‘𑀅𑀚𑁆𑀛𑀢𑁆𑀢’-𑀲𑀤𑁆𑀤𑁄 𑀧𑀦𑀸𑀬𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀬𑀓𑀚𑁆𑀛𑀢𑁆𑀢𑁂 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂 𑀯𑀺𑀲𑀬𑀚𑁆𑀛𑀢𑁆𑀢𑁂𑀢𑀺 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁’’ (𑀫. 𑀦𑀺. 𑁩.𑁧𑁮𑁮), ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁬𑁨) 𑀳𑀺 𑀅𑀬𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁’’ (𑀤𑀻. 𑀦𑀺. 𑁧.𑁨𑁨𑁮; 𑀥. 𑀲. 𑁧𑁬𑁧), ‘‘𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩) 𑀦𑀺𑀬𑀓𑀚𑁆𑀛𑀢𑁆𑀢𑁂. ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁦𑁪) 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂. ‘‘𑀅𑀬𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀺𑀳𑀸𑀭𑁄 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀬𑀤𑀺𑀤𑀁 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁮𑁭) 𑀯𑀺𑀲𑀬𑀚𑁆𑀛𑀢𑁆𑀢𑁂; 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁 𑀦𑀸𑀫. 𑀇𑀥 𑀧𑀦 𑀦𑀺𑀬𑀓𑀚𑁆𑀛𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀩𑀸𑀳𑀺𑀭𑀪𑀽𑀢𑀸 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀩𑀳𑀺𑀤𑁆𑀥𑀸 𑀦𑀸𑀫. 𑀢𑀢𑀺𑀬𑀧𑀤𑀁 𑀢𑀤𑀼𑀪𑀬𑀯𑀲𑁂𑀦 𑀯𑀼𑀢𑁆𑀢𑀁.

𑁨𑁧. 𑀅𑀦𑀦𑁆𑀢𑀭𑀢𑁆𑀢𑀺𑀓𑁄 𑀢𑁂𑀬𑁂𑀯 𑀢𑀺𑀧𑁆𑀧𑀓𑀸𑀭𑁂𑀧𑀺 𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀯𑀼𑀢𑁆𑀢𑁄.

𑁨𑁨. 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑁂 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑀸. 𑀧𑀝𑀺𑀳𑀦𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀧𑀝𑀺𑀖𑁂𑀦𑀸𑀢𑀺 𑀲𑀧𑁆𑀧𑀝𑀺𑀖𑀸. 𑀲𑀦𑀺𑀤𑀲𑁆𑀲𑀦𑀸 𑀘 𑀢𑁂 𑀲𑀧𑁆𑀧𑀝𑀺𑀖𑀸 𑀘𑀸𑀢𑀺 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀸. 𑀅𑀦𑀺𑀤𑀲𑁆𑀲𑀦𑀸 𑀘 𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀧𑁆𑀧𑀝𑀺𑀖𑀸 𑀘𑀸𑀢𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁. 𑀅𑀬𑀁 𑀢𑀸𑀯 𑀢𑀺𑀓𑀫𑀸𑀢𑀺𑀓𑀸𑀬 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧-𑁬. 𑀤𑀼𑀓𑀫𑀸𑀢𑀺𑀓𑀸𑀬𑀁 𑀧𑀦 𑀢𑀺𑀓𑁂𑀲𑀼 𑀅𑀦𑀸𑀕𑀢𑀧𑀤𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫. 𑀳𑁂𑀢𑀼𑀕𑁄𑀘𑁆𑀙𑀓𑁂 𑀢𑀸𑀯 𑀳𑁂𑀢𑀼𑀥𑀫𑁆𑀫𑀸𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼𑀲𑀗𑁆𑀔𑀸𑀢𑀸 𑀥𑀫𑁆𑀫𑀸. 𑀳𑁂𑀢𑀽 𑀥𑀫𑁆𑀫𑀸𑀢𑀺𑀧𑀺 𑀧𑀸𑀞𑁄. 𑀦 𑀳𑁂𑀢𑀽𑀢𑀺 𑀢𑁂𑀲𑀁𑀬𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀲𑀫𑁆𑀧𑀬𑁄𑀕𑀢𑁄 𑀧𑀯𑀢𑁆𑀢𑁂𑀦 𑀲𑀳 𑀳𑁂𑀢𑀼𑀦𑀸𑀢𑀺 𑀲𑀳𑁂𑀢𑀼𑀓𑀸. 𑀢𑀣𑁂𑀯 𑀧𑀯𑀢𑁆𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀅𑀳𑁂𑀢𑀼𑀓𑀸. 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑀸𑀦𑀁 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀧𑀦 𑀢𑀣𑀸 𑀩𑀼𑀚𑁆𑀛𑀦𑁆𑀢𑀸𑀦𑀁 𑀯𑀸 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀢𑁄 𑀧𑀭𑀁 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀢𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀢𑁂𑀲𑀁 ‘𑀳𑁂𑀢𑀽 𑀦 𑀳𑁂𑀢𑀽’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀢𑁄 𑀅𑀧𑀭𑁂𑀧𑀺 𑀢𑀬𑁄 𑀤𑀼𑀓𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀣𑁂𑀯 ‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘𑀸’𑀢𑀺 𑀏𑀢𑀁 𑀲𑀫𑁆𑀪𑀯𑀢𑀺, 𑀢𑀣𑀸 ‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘𑀸’𑀢𑀺 𑀇𑀤𑀫𑁆𑀧𑀺. 𑀬𑀣𑀸 𑀘 ‘𑀲𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’𑀢𑀺 𑀏𑀢𑀁 𑀲𑀫𑁆𑀪𑀯𑀢𑀺, 𑀢𑀣𑀸 ‘𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’𑀢𑀺 𑀇𑀤𑀫𑁆𑀧𑀺. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭 𑀬𑀤𑁂𑀢𑀁 ‘𑀦 𑀳𑁂𑀢𑀽 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀻’𑀢𑀺 𑀲𑀺𑀤𑁆𑀥𑁂, ‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸’𑀢𑀺 𑀅𑀢𑀺𑀭𑀺𑀢𑁆𑀢𑀁 ‘𑀔𑁄 𑀧𑀦𑀸’𑀢𑀺 𑀧𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀅𑀢𑀺𑀭𑁂𑀓𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀦 𑀓𑁂𑀯𑀮𑀁 ‘𑀦 𑀳𑁂𑀢𑀼 𑀥𑀫𑁆𑀫𑀸 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀦 𑀘 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀇𑀘𑁆𑀘𑁂𑀯, 𑀅𑀣 𑀔𑁄 𑀅𑀜𑁆𑀜𑀣𑀸𑀧𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑁂𑀯 𑀳𑀺 ‘𑀦 𑀳𑁂𑀢𑀽 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺’, 𑀏𑀯𑀁 ‘𑀳𑁂𑀢𑀽 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺’. 𑀬𑀣𑀸 𑀘 ‘𑀦 𑀳𑁂𑀢𑀽 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺’, 𑀏𑀯𑀁 ‘𑀦 𑀳𑁂𑀢𑀽 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’𑀢𑀺.

𑁭-𑁧𑁩. 𑀘𑀽𑀴𑀦𑁆𑀢𑀭𑀤𑀼𑀓𑁂𑀲𑀼 𑀅𑀢𑁆𑀢𑀦𑁄 𑀦𑀺𑀧𑁆𑀨𑀸𑀤𑀓𑁂𑀦 𑀲𑀳 𑀧𑀘𑁆𑀘𑀬𑁂𑀦𑀸𑀢𑀺 𑀲𑀧𑁆𑀧𑀘𑁆𑀘𑀬𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀧𑁆𑀧𑀸𑀤𑁂 𑀯𑀸 𑀞𑀺𑀢𑀺𑀬𑀁 𑀯𑀸 𑀧𑀘𑁆𑀘𑀬𑁄𑀢𑀺 𑀅𑀧𑁆𑀧𑀘𑁆𑀘𑀬𑀸. 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸𑀢𑀺 𑀲𑀗𑁆𑀔𑀢𑀸. 𑀦 𑀲𑀗𑁆𑀔𑀢𑀸𑀢𑀺 𑀅𑀲𑀗𑁆𑀔𑀢𑀸. 𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 𑀭𑀽𑀧𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄. 𑀢𑀣𑀸𑀯𑀺𑀥𑀁 𑀦𑀢𑁆𑀣𑀺 𑀏𑀢𑁂𑀲𑀁 𑀭𑀽𑀧𑀦𑁆𑀢𑀺 𑀅𑀭𑀽𑀧𑀺𑀦𑁄. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀯𑀸 𑀭𑀽𑀧𑀁; 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄. 𑀦 𑀭𑀽𑀧𑀺𑀦𑁄 𑀅𑀭𑀽𑀧𑀺𑀦𑁄. 𑀮𑁄𑀓𑀺𑀬𑀸 𑀥𑀫𑁆𑀫𑀸𑀢𑀺 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀯𑀝𑁆𑀝𑀁; 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑁂 𑀦𑀺𑀬𑀼𑀢𑁆𑀢𑀸𑀢𑀺 𑀮𑁄𑀓𑀺𑀬𑀸. 𑀢𑀢𑁄 𑀉𑀢𑁆𑀢𑀺𑀡𑁆𑀡𑀸𑀢𑀺 𑀉𑀢𑁆𑀢𑀭𑀸; 𑀮𑁄𑀓𑁂 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑀢𑁄 𑀉𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑁂𑀦𑀘𑀺 𑀏𑀓𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑁂𑀦𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀦 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀺.

𑁧𑁪-𑁧𑁯. 𑀆𑀲𑀯𑀕𑁄𑀘𑁆𑀙𑀓𑁂 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀸. 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼𑀁, 𑀑𑀓𑀸𑀲𑀢𑁄 𑀬𑀸𑀯 𑀪𑀯𑀕𑁆𑀕𑀁 𑀲𑀯𑀦𑁆𑀢𑀻𑀢𑀺 𑀯𑀸 𑀆𑀲𑀯𑀸. 𑀏𑀢𑁂 𑀥𑀫𑁆𑀫𑁂 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀓𑀭𑀡𑀢𑁆𑀣𑁄 𑀳𑀺 𑀅𑀬𑀁 ‘𑀆’𑀓𑀸𑀭𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀬𑁄 𑀆𑀲𑀯𑀸. 𑀆𑀲𑀯𑀸 𑀯𑀺𑀬𑀸𑀢𑀺𑀧𑀺 𑀆𑀲𑀯𑀸. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀸 𑀫𑀤𑀺𑀭𑀸𑀤𑀬𑁄 𑀆𑀲𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀘 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸, 𑀏𑀢𑁂𑀬𑁂𑀯 𑀪𑀯𑀺𑀢𑀼𑀫𑀭𑀳𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁬𑁧). 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺 𑀆𑀲𑀯𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀆𑀲𑀯𑀸 𑀦𑀸𑀫. 𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀆𑀲𑀯𑀸𑀢𑀺 𑀅𑀦𑀸𑀲𑀯𑀸. 𑀲𑁂𑀲𑀁 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 ‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀻𑀢𑀺 𑀅𑀬𑀁 𑀑𑀲𑀸𑀦𑀤𑀼𑀓𑁄 𑀧𑀞𑀫𑀤𑀼𑀓𑀲𑁆𑀲 𑀤𑀼𑀢𑀺𑀬𑀧𑀤𑀁 𑀆𑀤𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀏𑀯𑀁 𑀇𑀥 ‘𑀦𑁄 𑀆𑀲𑀯𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸𑀧𑀺 𑀅𑀦𑀸𑀲𑀯𑀸𑀧𑀻’𑀢𑀺 𑀦 𑀯𑀼𑀢𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑁄, 𑀅𑀣 𑀔𑁄 𑀅𑀬𑀜𑁆𑀘 𑀅𑀜𑁆𑀜𑁄 𑀘 𑀪𑁂𑀤𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁦-𑁨𑁫. 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀲𑀁𑀬𑁄𑀚𑀦𑀸 𑀦𑀸𑀫. 𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀲𑀁𑀬𑁄𑀚𑀦𑀲𑀫𑁆𑀩𑀦𑁆𑀥𑀦𑁂 𑀲𑀁𑀬𑁄𑀚𑀦𑀸𑀦𑀁 𑀳𑀺𑀢𑀸𑀢𑀺 𑀲𑀁𑀬𑁄𑀚𑀦𑀺𑀬𑀸. 𑀲𑀁𑀬𑁄𑀚𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀦 𑀲𑀁𑀬𑁄𑀚𑀦𑀺𑀬𑀸 𑀅𑀲𑀁𑀬𑁄𑀚𑀦𑀺𑀬𑀸. 𑀲𑁂𑀲𑀁 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁨𑁬-𑁩𑁧. 𑀕𑀦𑁆𑀣𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀕𑀦𑁆𑀣𑀸. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀦𑁆𑀣𑁂𑀳𑀺 𑀕𑀦𑁆𑀣𑀺𑀢𑀩𑁆𑀩𑀸𑀢𑀺 𑀕𑀦𑁆𑀣𑀦𑀺𑀬𑀸. 𑀲𑁂𑀲𑀁 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸 𑀘 𑀇𑀥, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁨-𑁩𑁭. 𑀑𑀖𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺 𑀢𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸. 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑀺𑀓𑁆𑀓𑀫𑀦𑀻𑀬𑀢𑁄 𑀑𑀖𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀑𑀖𑀦𑀺𑀬𑀸. 𑀑𑀖𑀸𑀦𑀁 𑀆𑀭𑀫𑁆𑀫𑀡𑀥𑀫𑁆𑀫𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸.

𑁩𑁮-𑁪𑁩. 𑀬𑁄𑀕𑀕𑁄𑀘𑁆𑀙𑀓𑁂 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀬𑁄𑀕𑀦𑀺𑀬𑀸 𑀑𑀖𑀦𑀺𑀬𑀸 𑀯𑀺𑀬 𑀯𑁂𑀤𑀺𑀢𑀩𑁆𑀩𑀸.

𑁪𑁪-𑁪𑁯. 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘𑀺𑀢𑁆𑀢𑀁 𑀦𑀻𑀯𑀭𑀦𑁆𑀢𑀺 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀦𑀻𑀯𑀭𑀡𑀺𑀬𑀸 𑀲𑀁𑀬𑁄𑀚𑀦𑀺𑀬𑀸 𑀯𑀺𑀬 𑀯𑁂𑀤𑀺𑀢𑀩𑁆𑀩𑀸.

𑁫𑁦-𑁫𑁪. 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁂 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘𑀦𑀺𑀘𑁆𑀘’𑀦𑁆𑀢𑀺 𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀧𑀭𑀸𑀫𑀸𑀲𑁂𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀭𑀸𑀫𑀝𑁆𑀞𑀢𑁆𑀢𑀸 𑀧𑀭𑀸𑀫𑀝𑁆𑀞𑀸.

𑁫𑁫-𑁬𑁮. 𑀫𑀳𑀦𑁆𑀢𑀭𑀤𑀼𑀓𑁂𑀲𑀼 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀲𑀳 𑀆𑀭𑀫𑁆𑀫𑀡𑁂𑀦𑀸𑀢𑀺 𑀲𑀸𑀭𑀫𑁆𑀫𑀡𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀆𑀭𑀫𑁆𑀫𑀡𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀸. 𑀘𑀺𑀦𑁆𑀢𑀦𑀝𑁆𑀞𑁂𑀦 𑀘𑀺𑀢𑁆𑀢𑀸, 𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀯𑀸 𑀘𑀺𑀢𑁆𑀢𑀸. 𑀅𑀯𑀺𑀧𑁆𑀧𑀬𑁄𑀕𑀯𑀲𑁂𑀦 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸𑀢𑀺 𑀘𑁂𑀢𑀲𑀺𑀓𑀸. 𑀦𑀺𑀭𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀢𑀸𑀬, 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸, 𑀘𑀺𑀢𑁆𑀢𑁂𑀦 𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀸. 𑀏𑀓𑀢𑁄 𑀯𑀢𑁆𑀢𑀫𑀸𑀦𑀸𑀧𑀺 𑀦𑀺𑀭𑀦𑁆𑀢𑀭𑀪𑀸𑀯𑀁 𑀅𑀦𑀼𑀧𑀕𑀫𑀦𑀢𑀸𑀬 𑀘𑀺𑀢𑁆𑀢𑁂𑀦 𑀯𑀺𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸. 𑀲𑀫𑀼𑀝𑁆𑀞𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀲𑀳 𑀪𑀯𑀦𑁆𑀢𑀻𑀢𑀺 𑀲𑀳𑀪𑀼𑀦𑁄. 𑀘𑀺𑀢𑁆𑀢𑁂𑀦 𑀲𑀳𑀪𑀼𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄. 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀓𑀺𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺? 𑀘𑀺𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀲𑀳𑀪𑀼𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀲𑁂𑀲𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀯𑀼𑀢𑁆𑀢𑀧𑀤𑀸𑀦𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀲𑀦𑁆𑀥𑀸𑀬 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀯𑀼𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀸. 𑀢𑀢𑁄 𑀩𑀳𑀺𑀪𑀽𑀢𑀸𑀢𑀺 𑀩𑀸𑀳𑀺𑀭𑀸. 𑀉𑀧𑀸𑀤𑀺𑀬𑀦𑁆𑀢𑁂𑀯 𑀪𑀽𑀢𑀸𑀦𑀺, 𑀦 𑀪𑀽𑀢𑀸𑀦𑀺 𑀯𑀺𑀬 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸. 𑀦 𑀉𑀧𑀸𑀤𑀺𑀬𑀦𑁆𑀢𑁂𑀯𑀸𑀢𑀺 𑀦𑁄𑀉𑀧𑀸𑀤𑀸.

𑁬𑁯-𑁭𑁪. 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂 𑀪𑀼𑀲𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸; 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂 𑀦𑁄𑀉𑀧𑀸𑀤𑀸𑀦𑀸.

𑁭𑁫-𑁮𑁨. 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁩-𑁧𑁦𑁦. 𑀧𑀺𑀝𑁆𑀞𑀺𑀤𑀼𑀓𑁂𑀲𑀼 𑀓𑀸𑀫𑁂 𑀅𑀯𑀘𑀭𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸 𑀭𑀽𑀧𑁂 𑀅𑀯𑀘𑀭𑀦𑁆𑀢𑀻𑀢𑀺 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑁂 𑀅𑀯𑀘𑀭𑀦𑁆𑀢𑀻𑀢𑀺 𑀅𑀭𑀽𑀧𑀸𑀯𑀘𑀭𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑁂𑀪𑀽𑀫𑀓𑀯𑀝𑁆𑀝𑁂 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀕𑀥𑀸𑀢𑀺 𑀧𑀭𑀺𑀬𑀸𑀧𑀦𑁆𑀦𑀸. 𑀢𑀲𑁆𑀫𑀺𑀁 𑀦 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀸. 𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀦𑁆𑀢𑀸 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀝𑁆𑀝𑀢𑁄 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀸. 𑀘𑀼𑀢𑀺𑀬𑀸 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀨𑀮𑀤𑀸𑀦𑁂 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑀸. 𑀢𑀣𑀸 𑀅𑀦𑀺𑀬𑀢𑀢𑁆𑀢𑀸 𑀅𑀦𑀺𑀬𑀢𑀸. 𑀅𑀜𑁆𑀜𑁂 𑀥𑀫𑁆𑀫𑁂 𑀉𑀢𑁆𑀢𑀭𑀦𑁆𑀢𑀺 𑀧𑀚𑀳𑀦𑁆𑀢𑀻𑀢𑀺 𑀉𑀢𑁆𑀢𑀭𑀸. 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑁂𑀳𑀺 𑀲𑀳 𑀉𑀢𑁆𑀢𑀭𑁂𑀳𑀻𑀢𑀺 𑀲𑀉𑀢𑁆𑀢𑀭𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀢𑁆𑀢𑀭𑀸𑀢𑀺 𑀅𑀦𑀼𑀢𑁆𑀢𑀭𑀸. 𑀭𑀡𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸; 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀢𑁂𑀲𑀁 𑀭𑀸𑀕𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀧𑀬𑁄𑀕𑀯𑀲𑁂𑀦 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦 𑀘 𑀲𑀳 𑀭𑀡𑁂𑀳𑀻𑀢𑀺 𑀲𑀭𑀡𑀸. 𑀢𑁂𑀦𑀸𑀓𑀸𑀭𑁂𑀦 𑀦𑀢𑁆𑀣𑀺 𑀏𑀢𑁂𑀲𑀁 𑀭𑀡𑀸𑀢𑀺 𑀅𑀭𑀡𑀸.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧𑁦𑁧-𑁧𑁦𑁮. 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑁂𑀲𑀼 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄; 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀫𑀦𑁄𑀫𑀬𑀺𑀤𑁆𑀥𑀺, 𑀙 𑀅𑀪𑀺𑀜𑁆𑀜𑀸𑀢𑀺 𑀅𑀝𑁆𑀞 𑀯𑀺𑀚𑁆𑀚𑀸. 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸 𑀯𑀺𑀚𑁆𑀚𑀸 𑀯𑀺𑀚𑁆𑀚𑀸. 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑀺. 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀲𑀫𑁆𑀧𑀬𑁄𑀕𑀯𑀲𑁂𑀦𑁂𑀯 𑀅𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀅𑀯𑀺𑀚𑁆𑀚𑀸𑀪𑀸𑀕𑁂 𑀅𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀢𑀢𑁆𑀣 𑀤𑀼𑀓𑁆𑀔𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑁄 𑀲𑀫𑀼𑀤𑀬𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀦𑁆𑀢𑀺 𑀘𑀢𑀲𑁆𑀲𑁄 𑀅𑀯𑀺𑀚𑁆𑀚𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀸 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑀺. 𑀏𑀯𑀁 𑀅𑀯𑀺𑀚𑁆𑀚𑀸𑀧𑀺 𑀅𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀯 𑀅𑀥𑀺𑀧𑁆𑀧𑁂𑀢𑀸.

𑀧𑀼𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑀪𑀸𑀯𑁂𑀦 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀯𑀺𑀚𑁆𑀚𑀼 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀯𑀺𑀚𑁆𑀚𑀽𑀧𑀫𑀸. 𑀦𑀺𑀲𑁆𑀲𑁂𑀲𑀁 𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀢𑀸𑀬 𑀯𑀚𑀺𑀭𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀯𑀚𑀺𑀭𑀽𑀧𑀫𑀸. 𑀩𑀸𑀮𑁂𑀲𑀼 𑀞𑀺𑀢𑀢𑁆𑀢𑀸 𑀬𑀢𑁆𑀣 𑀞𑀺𑀢𑀸 𑀢𑀤𑀼𑀧𑀘𑀸𑀭𑁂𑀦 𑀩𑀸𑀮𑀸. 𑀧𑀡𑁆𑀟𑀺𑀢𑁂𑀲𑀼 𑀞𑀺𑀢𑀢𑁆𑀢𑀸 𑀧𑀡𑁆𑀟𑀺𑀢𑀸. 𑀩𑀸𑀮𑀓𑀭𑀢𑁆𑀢𑀸 𑀯𑀸 𑀩𑀸𑀮𑀸, 𑀧𑀡𑁆𑀟𑀺𑀢𑀓𑀭𑀢𑁆𑀢𑀸 𑀧𑀡𑁆𑀟𑀺𑀢𑀸. 𑀓𑀡𑁆𑀳𑀸𑀢𑀺 𑀓𑀸𑀴𑀓𑀸, 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀲𑀼𑀓𑁆𑀓𑀸𑀢𑀺 𑀑𑀤𑀸𑀢𑀸, 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀓𑀡𑁆𑀳𑀸; 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀲𑀼𑀓𑁆𑀓𑀸. 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀢𑀧𑁂𑀦𑁆𑀢𑀻𑀢𑀺 𑀢𑀧𑀦𑀻𑀬𑀸. 𑀦 𑀢𑀧𑀦𑀻𑀬𑀸 𑀅𑀢𑀧𑀦𑀻𑀬𑀸.

𑀅𑀥𑀺𑀯𑀘𑀦𑀤𑀼𑀓𑀸𑀤𑀬𑁄 𑀢𑀬𑁄 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀸; 𑀩𑁆𑀬𑀜𑁆𑀚𑀦𑀫𑁂𑀯𑁂𑀢𑁆𑀣 𑀦𑀸𑀦𑀁. 𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄𑀢𑀺 𑀆𑀤𑀬𑁄 𑀳𑀺 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸 𑀦𑀸𑀫. 𑀅𑀥𑀺𑀯𑀘𑀦𑀸𑀦𑀁 𑀧𑀣𑀸 𑀅𑀥𑀺𑀯𑀘𑀦𑀧𑀣𑀸. ‘‘𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀏𑀯𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀅𑀪𑀺𑀮𑀸𑀧𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫. 𑀦𑀺𑀭𑀼𑀢𑁆𑀢𑀻𑀦𑀁 𑀧𑀣𑀸 𑀦𑀺𑀭𑀼𑀢𑁆𑀢𑀺𑀧𑀣𑀸. 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄𑀢𑀺 (𑀥. 𑀲. 𑁭) 𑀏𑀯𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀜𑁆𑀜𑀢𑁆𑀢𑀻𑀦𑀁 𑀧𑀣𑀸 𑀧𑀜𑁆𑀜𑀢𑁆𑀢𑀺𑀧𑀣𑀸. 𑀏𑀢𑁆𑀣 𑀘 𑀏𑀓𑀁 𑀤𑀼𑀓𑀁 𑀯𑀢𑁆𑀯𑀸𑀧𑀺 𑀇𑀢𑀭𑁂𑀲𑀁 𑀯𑀘𑀦𑁂 𑀧𑀬𑁄𑀚𑀦𑀁 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁯-𑁧𑁧𑁮. 𑀦𑀸𑀫𑀭𑀽𑀧𑀤𑀼𑀓𑁂 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀫𑀦𑀝𑁆𑀞𑁂𑀦 𑀦𑀸𑀫𑀦𑀝𑁆𑀞𑁂𑀦 𑀘 𑀦𑀸𑀫𑀁. 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁. 𑀪𑀯𑀢𑀡𑁆𑀳𑀸𑀢𑀺 𑀪𑀯𑀧𑀢𑁆𑀣𑀦𑀸. 𑀪𑀯𑀤𑀺𑀝𑁆𑀞𑀻𑀢𑀺 𑀪𑀯𑁄 𑀯𑀼𑀘𑁆𑀘𑀢𑀺 𑀲𑀲𑁆𑀲𑀢𑀁; 𑀲𑀲𑁆𑀲𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀤𑀺𑀝𑁆𑀞𑀺. 𑀯𑀺𑀪𑀯𑀤𑀺𑀝𑁆𑀞𑀻𑀢𑀺 𑀯𑀺𑀪𑀯𑁄 𑀯𑀼𑀘𑁆𑀘𑀢𑀺 𑀉𑀘𑁆𑀙𑁂𑀤𑀁; 𑀉𑀘𑁆𑀙𑁂𑀤𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀤𑀺𑀝𑁆𑀞𑀺. 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀅𑀦𑁆𑀢𑀯𑀸𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀅𑀦𑁆𑀢𑀯𑀸𑀤𑀺𑀝𑁆𑀞𑀺. 𑀅𑀦𑀦𑁆𑀢𑀯𑀸𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀅𑀦𑀦𑁆𑀢𑀯𑀸𑀤𑀺𑀝𑁆𑀞𑀺. 𑀧𑀼𑀩𑁆𑀩𑀦𑁆𑀢𑀁 𑀅𑀦𑀼𑀕𑀢𑀸 𑀤𑀺𑀝𑁆𑀞𑀺 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀧𑀭𑀦𑁆𑀢𑀁 𑀅𑀦𑀼𑀕𑀢𑀸 𑀤𑀺𑀝𑁆𑀞𑀺 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀳𑀺𑀭𑀺𑀓𑀦𑁆𑀢𑀺 𑀬𑀁 𑀦 𑀳𑀺𑀭𑀺𑀬𑀢𑀺 𑀳𑀺𑀭𑀺𑀬𑀺𑀢𑀩𑁆𑀩𑁂𑀦𑀸𑀢𑀺 (𑀥. 𑀲. 𑁩𑁮𑁭) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀸 𑀦𑀺𑀮𑁆𑀮𑀚𑁆𑀚𑀢𑀸. 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀬𑀁 𑀦 𑀑𑀢𑁆𑀢𑀧𑁆𑀧𑀢𑀺 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑁄 𑀅𑀪𑀸𑀬𑀦𑀓𑀆𑀓𑀸𑀭𑁄. 𑀳𑀺𑀭𑀺𑀬𑀦𑀸 𑀳𑀺𑀭𑀻, 𑀑𑀢𑁆𑀢𑀧𑁆𑀧𑀦𑀸 𑀑𑀢𑁆𑀢𑀧𑁆𑀧𑀁. 𑀤𑁄𑀯𑀘𑀲𑁆𑀲𑀢𑀸𑀤𑀻𑀲𑀼 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀓𑀽𑀮𑀕𑀸𑀳𑀺𑀫𑁆𑀳𑀺 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂 𑀅𑀦𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄. 𑀢𑀲𑁆𑀲 𑀓𑀫𑁆𑀫𑀁 𑀤𑁄𑀯𑀘𑀲𑁆𑀲𑀁. 𑀢𑀲𑁆𑀲 𑀪𑀸𑀯𑁄 𑀤𑁄𑀯𑀘𑀲𑁆𑀲𑀢𑀸. 𑀧𑀸𑀧𑀸 𑀅𑀲𑁆𑀲𑀤𑁆𑀥𑀸𑀤𑀬𑁄 𑀧𑀼𑀕𑁆𑀕𑀮𑀸 𑀏𑀢𑀲𑁆𑀲 𑀫𑀺𑀢𑁆𑀢𑀸𑀢𑀺 𑀧𑀸𑀧𑀫𑀺𑀢𑁆𑀢𑁄; 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸. 𑀲𑁄𑀯𑀘𑀲𑁆𑀲𑀢𑀸 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁧𑁧𑁯-𑁧𑁨𑁩. ‘𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄’𑀢𑀺 (𑀥. 𑀲. 𑁧𑁩𑁩𑁬) 𑀏𑀯𑀁 𑀯𑀼𑀢𑁆𑀢𑀸𑀲𑀼 𑀆𑀧𑀢𑁆𑀢𑀻𑀲𑀼 𑀓𑀼𑀲𑀮𑀪𑀸𑀯𑁄 𑀆𑀧𑀢𑁆𑀢𑀺𑀓𑀼𑀲𑀮𑀢𑀸. 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸. 𑀲𑀫𑀸𑀧𑀢𑁆𑀢𑀻𑀲𑀼 𑀓𑀼𑀲𑀮𑀪𑀸𑀯𑁄 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸. 𑀲𑀫𑀸𑀧𑀢𑁆𑀢𑀻𑀦𑀁 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀸𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸. 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀓𑀼𑀲𑀮𑀪𑀸𑀯𑁄 𑀥𑀸𑀢𑀼𑀓𑀼𑀲𑀮𑀢𑀸. 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀫𑀦𑀲𑀺𑀓𑀸𑀭𑁂 𑀓𑀼𑀲𑀮𑀪𑀸𑀯𑁄 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸. 𑀘𑀓𑁆𑀔𑀸𑀬𑀢𑀦𑀸𑀤𑀻𑀲𑀼 𑀓𑀼𑀲𑀮𑀪𑀸𑀯𑁄 𑀆𑀬𑀢𑀦𑀓𑀼𑀲𑀮𑀢𑀸. 𑀤𑁆𑀯𑀸𑀤𑀲𑀗𑁆𑀕𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀓𑀼𑀲𑀮𑀪𑀸𑀯𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀞𑀸𑀦𑀓𑀼𑀲𑀮𑀢𑀸. 𑀞𑀸𑀦𑀦𑁆𑀢𑀺 𑀓𑀸𑀭𑀡𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀁 𑀢𑀺𑀝𑁆𑀞𑀢𑀺 𑀦𑀸𑀫, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀅𑀝𑁆𑀞𑀸𑀦𑀓𑀼𑀲𑀮𑀢𑀸.

𑁧𑁨𑁪-𑁧𑁩𑁪. 𑀉𑀚𑀼𑀪𑀸𑀯𑁄 𑀅𑀚𑁆𑀚𑀯𑁄. 𑀫𑀼𑀤𑀼𑀪𑀸𑀯𑁄 𑀫𑀤𑁆𑀤𑀯𑁄. 𑀅𑀥𑀺𑀯𑀸𑀲𑀦𑀲𑀗𑁆𑀔𑀸𑀢𑁄 𑀔𑀫𑀦𑀪𑀸𑀯𑁄 𑀔𑀦𑁆𑀢𑀺. 𑀲𑀼𑀭𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁. 𑀲𑀫𑁆𑀫𑁄𑀤𑀓𑀫𑀼𑀤𑀼𑀪𑀸𑀯𑀲𑀗𑁆𑀔𑀸𑀢𑁄 𑀲𑀔𑀺𑀮𑀪𑀸𑀯𑁄 𑀲𑀸𑀔𑀮𑁆𑀬𑀁. 𑀬𑀣𑀸 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀙𑀺𑀤𑁆𑀤𑀁 𑀦 𑀳𑁄𑀢𑀺 𑀏𑀯𑀁 𑀥𑀫𑁆𑀫𑀸𑀫𑀺𑀲𑁂𑀳𑀺 𑀧𑀝𑀺𑀲𑀦𑁆𑀣𑀭𑀡𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀪𑁂𑀤𑀲𑀗𑁆𑀔𑀸𑀢𑁄 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀪𑀸𑀯𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸. 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀪𑁄𑀚𑀦𑁂 𑀫𑀢𑁆𑀢𑀁 𑀅𑀚𑀸𑀦𑀦𑀪𑀸𑀯𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸. 𑀅𑀦𑀦𑁆𑀢𑀭𑀤𑀼𑀓𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁄 𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁. 𑀅𑀲𑀫𑁆𑀧𑀚𑀸𑀦𑀪𑀸𑀯𑁄 𑀅𑀲𑀫𑁆𑀧𑀚𑀜𑁆𑀜𑀁. 𑀲𑀭𑀢𑀻𑀢𑀺 𑀲𑀢𑀺. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑀁. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀅𑀓𑀫𑁆𑀧𑀦𑀝𑁆𑀞𑁂𑀦 𑀧𑀝𑀺𑀲𑀗𑁆𑀔𑀸𑀦𑀲𑀗𑁆𑀔𑀸𑀢𑀁 𑀩𑀮𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑀁. 𑀯𑀻𑀭𑀺𑀬𑀲𑀻𑀲𑁂𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀩𑀮𑀁 𑀪𑀸𑀯𑀦𑀸𑀩𑀮𑀁. 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀫𑀣𑁄𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀫𑀣𑀲𑁆𑀲 𑀦𑀺𑀫𑀺𑀢𑁆𑀢𑀯𑀲𑁂𑀦 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀕𑁆𑀕𑀸𑀳𑁄. 𑀦 𑀯𑀺𑀓𑁆𑀔𑀺𑀧𑀢𑀻𑀢𑀺 𑀅𑀯𑀺𑀓𑁆𑀔𑁂𑀧𑁄.

𑁧𑁩𑁫-𑁧𑁪𑁨. 𑀲𑀻𑀮𑀯𑀺𑀦𑀸𑀲𑀺𑀓𑀸 𑀅𑀲𑀁𑀯𑀭𑀲𑀗𑁆𑀔𑀸𑀢𑀸 𑀲𑀻𑀮𑀲𑁆𑀲 𑀯𑀺𑀧𑀢𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀺𑀦𑀸𑀲𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀬𑀸 𑀯𑀺𑀧𑀢𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺. 𑀲𑁄𑀭𑀘𑁆𑀘𑀫𑁂𑀯 𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑀢𑁄 𑀲𑀻𑀮𑀧𑀭𑀺𑀧𑀽𑀭𑀡𑀢𑁄 𑀲𑀻𑀮𑀲𑁆𑀲 𑀲𑀫𑁆𑀧𑀤𑀸𑀢𑀺 𑀲𑀻𑀮𑀲𑀫𑁆𑀧𑀤𑀸. 𑀤𑀺𑀝𑁆𑀞𑀺𑀧𑀸𑀭𑀺𑀧𑀽𑀭𑀺𑀪𑀽𑀢𑀁 𑀜𑀸𑀡𑀁 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀤𑀸𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀤𑀸. 𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀲𑀫𑁆𑀧𑀢𑁆𑀢𑀸 𑀲𑀻𑀮𑀲𑀗𑁆𑀔𑀸𑀢𑀸 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺, 𑀲𑀻𑀮𑀯𑀺𑀲𑀼𑀤𑁆𑀥𑀺. 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀸, 𑀤𑀲𑁆𑀲𑀦𑀲𑀗𑁆𑀔𑀸𑀢𑀸, 𑀤𑀺𑀝𑁆𑀞𑀺𑀬𑀸 𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀸𑀤𑀺𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀘𑁂𑀯 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀅𑀦𑀼𑀭𑀽𑀧𑀤𑀺𑀝𑁆𑀞𑀺𑀲𑁆𑀲 𑀓𑀮𑁆𑀬𑀸𑀡𑀤𑀺𑀝𑁆𑀞𑀺𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀧𑀥𑀸𑀦𑀁. 𑀲𑀁𑀯𑁂𑀕𑁄𑀢𑀺 𑀚𑀸𑀢𑀺𑀆𑀤𑀻𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀪𑀬𑀲𑀗𑁆𑀔𑀸𑀢𑀁 𑀲𑀁𑀯𑀺𑀚𑁆𑀚𑀦𑀁. 𑀲𑀁𑀯𑁂𑀚𑀦𑀺𑀬𑀝𑁆𑀞𑀸𑀦𑀦𑁆𑀢𑀺 𑀲𑀁𑀯𑁂𑀕𑀚𑀦𑀓𑀁 𑀚𑀸𑀢𑀺𑀆𑀤𑀺𑀓𑀸𑀭𑀡𑀁. 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄𑀧𑀥𑀸𑀦𑀦𑁆𑀢𑀺 𑀏𑀯𑀁 𑀲𑀁𑀯𑁂𑀕𑀚𑀸𑀢𑀲𑁆𑀲 𑀉𑀧𑀸𑀬𑀧𑀥𑀸𑀦𑀁. 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑀥𑀫𑁆𑀫𑀧𑀽𑀭𑀡𑁂 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑁄. 𑀅𑀧𑁆𑀧𑀝𑀺𑀯𑀸𑀦𑀺𑀢𑀸 𑀘 𑀧𑀥𑀸𑀦𑀲𑁆𑀫𑀺𑀦𑁆𑀢𑀺 𑀅𑀭𑀳𑀢𑁆𑀢𑀁 𑀅𑀧𑀢𑁆𑀯𑀸 𑀧𑀥𑀸𑀦𑀲𑁆𑀫𑀺𑀁 𑀅𑀦𑀺𑀯𑀢𑁆𑀢𑀦𑀢𑀸 𑀅𑀦𑁄𑀲𑀓𑁆𑀓𑀦𑀢𑀸. 𑀯𑀺𑀚𑀸𑀦𑀦𑀢𑁄 𑀯𑀺𑀚𑁆𑀚𑀸. 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑀼𑀢𑁆𑀢𑀺. 𑀔𑀬𑁂 𑀜𑀸𑀡𑀦𑁆𑀢𑀺 𑀓𑀺𑀮𑁂𑀲𑀓𑁆𑀔𑀬𑀓𑀭𑁂 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀪𑀽𑀢𑁂 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑁂 𑀅𑀭𑀺𑀬𑀨𑀮𑁂 𑀜𑀸𑀡𑀁. 𑀅𑀬𑀁 𑀫𑀸𑀢𑀺𑀓𑀸𑀬 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑀁

𑁧. 𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀬 𑀫𑀸𑀢𑀺𑀓𑀸𑀬 𑀲𑀗𑁆𑀕𑀳𑀺𑀢𑁂 𑀥𑀫𑁆𑀫𑁂 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀇𑀤𑀁 𑀧𑀤𑀪𑀸𑀚𑀦𑀻𑀬𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀤𑁂𑀢𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀧𑀞𑀫𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀲 𑀢𑀸𑀯 𑀦𑀺𑀤𑁆𑀤𑁂𑀲𑁂 𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀸𑀭𑁄 𑀲𑀗𑁆𑀕𑀳𑀯𑀸𑀭𑁄 𑀲𑀼𑀜𑁆𑀜𑀢𑀯𑀸𑀭𑁄𑀢𑀺 𑀢𑀬𑁄 𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀸𑀭𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁆𑀯𑀺𑀥𑀸 𑀞𑀺𑀢𑁄. 𑀢𑁂𑀲𑀼 𑀉𑀤𑁆𑀤𑁂𑀲𑀯𑀸𑀭𑀲𑁆𑀲 𑀧𑀼𑀘𑁆𑀙𑀸, 𑀲𑀫𑀬𑀦𑀺𑀤𑁆𑀤𑁂𑀲𑁄, 𑀥𑀫𑁆𑀫𑀼𑀤𑁆𑀤𑁂𑀲𑁄, 𑀅𑀧𑁆𑀧𑀦𑀸𑀢𑀺 𑀘𑀢𑁆𑀢𑀸𑀭𑁄 𑀧𑀭𑀺𑀘𑁆𑀙𑁂𑀤𑀸. 𑀢𑁂𑀲𑀼 ‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀅𑀬𑀁 𑀧𑀼𑀘𑁆𑀙𑀸 𑀦𑀸𑀫. ‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀅𑀬𑀁 𑀲𑀫𑀬𑀦𑀺𑀤𑁆𑀤𑁂𑀲𑁄 𑀦𑀸𑀫. ‘𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’𑀢𑀺 𑀅𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑁄 𑀦𑀸𑀫. ‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀅𑀬𑀁 𑀅𑀧𑁆𑀧𑀦𑀸 𑀦𑀸𑀫.

𑀏𑀯𑀁 𑀘𑀢𑀽𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀞𑀺𑀢𑀲𑁆𑀲 𑀉𑀤𑁆𑀤𑁂𑀲𑀯𑀸𑀭𑀲𑁆𑀲 𑀬𑁆𑀯𑀸𑀬𑀁 𑀧𑀞𑀫𑁄 𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑁄, 𑀢𑀢𑁆𑀣 ‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀧𑀜𑁆𑀘𑀯𑀺𑀥𑀸𑀳𑀺 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸, 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺. 𑀢𑀸𑀲𑀁 𑀇𑀤𑀁 𑀦𑀸𑀦𑀢𑁆𑀢𑀁 𑁋

𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺, 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀢𑁆𑀣𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨).

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁, 𑀲𑁄 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨).

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑁄𑀢𑀺, 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘𑀏𑀯𑀁 𑀦𑀼 𑀔𑁄, 𑀦𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’𑀢𑀺. 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨).

𑀓𑀢𑀫𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸? 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’𑀢𑀺? ‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’. ‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’𑀢𑀺? ‘𑀤𑀼𑀓𑁆𑀔𑀁, 𑀪𑀦𑁆𑀢𑁂’. ‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺? ‘𑀦𑁄𑀳𑁂𑀢𑀁, 𑀪𑀦𑁆𑀢𑁂’𑀢𑀺 (𑀲𑀁. 𑀦𑀺. 𑁩.𑁭𑁯; 𑀫𑀳𑀸𑀯. 𑁨𑁧). 𑀅𑀬𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸.

𑀓𑀢𑀫𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸? 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺 (𑀤𑀻. 𑀦𑀺. 𑁨.𑁩𑁭𑁩)? 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀓𑀲𑁆𑀫𑀸? 𑀩𑀼𑀤𑁆𑀥𑀸𑀦𑀜𑁆𑀳𑀺 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀺𑀜𑁆𑀘𑀺 𑀲𑀗𑁆𑀔𑀢𑀁, 𑀅𑀤𑁆𑀥𑀸𑀯𑀺𑀫𑀼𑀢𑁆𑀢𑀁 𑀯𑀸 𑀅𑀲𑀗𑁆𑀔𑀢𑀁, 𑀅𑀤𑀺𑀝𑁆𑀞𑀁 𑀅𑀦𑀜𑁆𑀜𑀸𑀢𑀁 𑀅𑀚𑁄𑀢𑀺𑀢𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦 𑀢𑁂𑀲𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀁 𑀧𑀦 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀁, 𑀢𑀲𑁆𑀲 𑀅𑀜𑁆𑀜𑁂𑀦 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀦𑀲𑁆𑀲 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦𑁂𑀲 𑀅𑀓𑀣𑀁𑀓𑀣𑀻 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀳𑀢𑀲𑀁𑀲𑀬𑁄, 𑀢𑁂𑀦𑀲𑁆𑀲 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀇𑀢𑀭𑀸 𑀤𑁆𑀯𑁂 𑀧𑀦 𑀧𑀼𑀘𑁆𑀙𑀸 𑀪𑀕𑀯𑀢𑁄 𑀅𑀢𑁆𑀣𑀺. 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 ‘𑀓𑀢𑀫𑁂’𑀢𑀺𑀧𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀥𑀫𑁆𑀫𑁂 𑀧𑀼𑀘𑁆𑀙𑀢𑀺. ‘𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀳𑀺 𑀯𑀘𑀦𑀫𑀢𑁆𑀢𑁂𑀦 ‘𑀓𑀺𑀁 𑀓𑀢𑀸 𑀓𑀺𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺 𑀦 𑀲𑀓𑁆𑀓𑀸 𑀜𑀸𑀢𑀼𑀁. ‘𑀓𑀢𑀫𑁂’𑀢𑀺 𑀯𑀼𑀢𑁆𑀢𑁂 𑀧𑀦 𑀢𑁂𑀲𑀁 𑀧𑀼𑀝𑁆𑀞𑀪𑀸𑀯𑁄 𑀧𑀜𑁆𑀜𑀸𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀓𑀢𑀫𑁂𑀢𑀺𑀧𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀥𑀫𑁆𑀫𑁂 𑀧𑀼𑀘𑁆𑀙𑀢𑀻’𑀢𑀺. ‘𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺𑀧𑀤𑀤𑁆𑀯𑀬𑁂𑀦 𑀧𑀼𑀘𑁆𑀙𑀸𑀬 𑀧𑀼𑀝𑁆𑀞𑀥𑀫𑁆𑀫𑁂 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑀸𑀢𑀺𑀓𑀸𑀬𑀁 𑀯𑀺𑀬 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀅𑀯𑀢𑁆𑀯𑀸 ‘𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄𑀢𑀺? 𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀁 𑀤𑀻𑀧𑁂𑀢𑁆𑀯𑀸 𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀪𑀺𑀥𑀫𑁆𑀫𑁂 𑀥𑀫𑁆𑀫𑀸𑀯 𑀤𑁂𑀲𑁂𑀢𑀩𑁆𑀩𑀸. 𑀢𑁂 𑀘 𑀓𑀼𑀲𑀮𑀸𑀤𑀻𑀳𑀺 𑀧𑀪𑁂𑀤𑁂𑀳𑀺 𑀅𑀦𑁂𑀓𑀧𑁆𑀧𑀪𑁂𑀤𑀸. 𑀢𑀲𑁆𑀫𑀸 𑀥𑀫𑁆𑀫𑀸𑀬𑁂𑀯 𑀇𑀥 𑀤𑁂𑀲𑁂𑀢𑀩𑁆𑀩𑀸. 𑀦𑀸𑀬𑀁 𑀯𑁄𑀳𑀸𑀭𑀤𑁂𑀲𑀦𑀸. 𑀢𑁂 𑀘 𑀅𑀦𑁂𑀓𑀧𑁆𑀧𑀪𑁂𑀤𑀢𑁄 𑀤𑁂𑀲𑁂𑀢𑀩𑁆𑀩𑀸, 𑀦 𑀥𑀫𑁆𑀫𑀫𑀢𑁆𑀢𑀢𑁄. 𑀧𑀪𑁂𑀤𑀢𑁄 𑀳𑀺 𑀤𑁂𑀲𑀦𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀯𑀳𑀸 𑀳𑁄𑀢𑀻𑀢𑀺 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀏𑀯𑀁 𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀁 𑀤𑀻𑀧𑁂𑀢𑁆𑀯𑀸, 𑀇𑀤𑀸𑀦𑀺 𑀬𑁂 𑀢𑁂𑀦 𑀧𑀪𑁂𑀤𑁂𑀦 𑀤𑁂𑀲𑁂𑀢𑀩𑁆𑀩𑀸 𑀥𑀫𑁆𑀫𑀸 𑀢𑁂 𑀤𑀲𑁆𑀲𑁂𑀢𑀼𑀁, 𑀅𑀬𑀁 ‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀪𑁂𑀤𑀯𑀦𑁆𑀢𑁂𑀲𑀼 𑀳𑀺 𑀤𑀲𑁆𑀲𑀺𑀢𑁂𑀲𑀼 𑀧𑀪𑁂𑀤𑁄 𑀤𑀲𑁆𑀲𑀺𑀬𑀫𑀸𑀦𑁄 𑀬𑀼𑀚𑁆𑀚𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀘 𑀳𑁄𑀢𑀻𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀦𑁆𑀢𑀺. 𑀏𑀢𑁆𑀣 𑁋

𑀲𑀫𑀬𑁂 𑀦𑀺𑀤𑁆𑀤𑀺𑀲𑀺 𑀘𑀺𑀢𑁆𑀢𑀁, 𑀘𑀺𑀢𑁆𑀢𑁂𑀦 𑀲𑀫𑀬𑀁 𑀫𑀼𑀦𑀺;

𑀦𑀺𑀬𑀫𑁂𑀢𑁆𑀯𑀸𑀦 𑀤𑀻𑀧𑁂𑀢𑀼𑀁, 𑀥𑀫𑁆𑀫𑁂 𑀢𑀢𑁆𑀣 𑀧𑀪𑁂𑀤𑀢𑁄.

‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢’𑀦𑁆𑀢𑀺 𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁄 𑀪𑀕𑀯𑀸 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀤𑁆𑀤𑀺𑀲𑀺. 𑀓𑀺𑀁𑀓𑀸𑀭𑀡𑀸? 𑀢𑁂𑀦 𑀲𑀫𑀬𑀦𑀺𑀬𑀫𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀬𑁄𑀲𑀸𑀦𑁂 ‘𑀢𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀏𑀯𑀁 𑀲𑀫𑀬𑀁 𑀦𑀺𑀬𑀫𑁂𑀢𑁆𑀯𑀸𑀦, 𑀅𑀣 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀫𑀬𑀦𑀸𑀦𑀢𑁆𑀢𑁂 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀻𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀘𑀺𑀢𑁆𑀢𑀦𑀺𑀬𑀫𑀺𑀢𑁂 𑀲𑀫𑀬𑁂 𑀏𑀢𑁂 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀯𑀲𑁂𑀦 𑀤𑀼𑀭𑀦𑀼𑀩𑁄𑀥𑀧𑁆𑀧𑀪𑁂𑀤𑁂 𑀨𑀲𑁆𑀲𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑁂 𑀩𑁄𑀥𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ‘𑀬𑀲𑁆𑀫𑀺𑀁 𑀲𑀫𑀬𑁂’𑀢𑀺𑀆𑀤𑀻𑀲𑀼 𑀅𑀬𑀫𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀬𑀲𑁆𑀫𑀺𑀦𑁆𑀢𑀺 𑀅𑀦𑀺𑀬𑀫𑀢𑁄 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄. 𑀲𑀫𑀬𑁂𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀧𑀭𑀺𑀤𑀻𑀧𑀦𑀁. 𑀏𑀢𑁆𑀢𑀸𑀯𑀢𑀸 𑀅𑀦𑀺𑀬𑀫𑀢𑁄 𑀲𑀫𑀬𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼 𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭) 𑀏𑀯𑀫𑀸𑀤𑀻𑀲𑀼 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺 𑁋 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 ‘𑀪𑀤𑁆𑀤𑀸𑀮𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺. 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯) 𑁋

𑀆𑀤𑀻𑀲𑀼 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮) 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁨.𑁮) 𑀧𑀝𑀺𑀯𑁂𑀥𑁄. 𑀏𑀯𑀫𑀦𑁂𑀓𑁂𑀲𑀼 𑀲𑀫𑀬𑁂𑀲𑀼 𑁋

𑀲𑀫𑀯𑀸𑀬𑁄 𑀔𑀡𑁄 𑀓𑀸𑀮𑁄, 𑀲𑀫𑀽𑀳𑁄 𑀳𑁂𑀢𑀼𑀬𑁂𑀯 𑀘;

𑀏𑀢𑁂 𑀧𑀜𑁆𑀘𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀫𑀬𑀸 𑀇𑀥 𑀯𑀺𑀜𑁆𑀜𑀼𑀦𑀸.

‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮’𑀦𑁆𑀢𑀺 𑀇𑀫𑀲𑁆𑀫𑀺𑀜𑁆𑀳𑀺 𑀓𑀼𑀲𑀮𑀸𑀥𑀺𑀓𑀸𑀭𑁂 𑀢𑁂𑀲𑀼 𑀦𑀯𑀲𑀼 𑀲𑀫𑀬𑁂𑀲𑀼 𑀏𑀢𑁂 𑀲𑀫𑀯𑀸𑀬𑀸𑀤𑀬𑁄 𑀧𑀜𑁆𑀘 𑀲𑀫𑀬𑀸 𑀧𑀡𑁆𑀟𑀺𑀢𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀼 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀲𑀫𑀯𑀸𑀬𑁄 𑀔𑀡𑁄 𑀧𑀦;

𑀏𑀓𑁄𑀯 𑀦𑀯𑀫𑁄 𑀜𑁂𑀬𑁆𑀬𑁄, 𑀘𑀓𑁆𑀓𑀸𑀦𑀺 𑀘𑀢𑀼𑀭𑁄𑀧𑀺 𑀯𑀸.

𑀬𑀸 𑀳𑀺 𑀏𑀲𑀸 𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀲𑀡𑁆𑀞𑀺𑀢𑀸 𑀧𑀘𑁆𑀘𑀬𑀸𑀦𑀁 𑀲𑀸𑀫𑀕𑁆𑀕𑀻, 𑀲𑀸 𑀇𑀥 𑀲𑀫𑀯𑀸𑀬𑁄𑀢𑀺 𑀜𑀸𑀢𑀩𑁆𑀩𑀸. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺 (𑀅. 𑀦𑀺. 𑁮.𑁨𑁯) 𑀏𑀯𑀁 𑀯𑀼𑀢𑁆𑀢𑁄 𑀧𑀦 𑀦𑀯𑀫𑁄𑀯 𑀔𑀡𑁄 𑀏𑀓𑁄 𑀔𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀸𑀦𑀺 𑀯𑀸 𑀧𑀦𑁂𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺 𑁋 𑀏𑀢𑁆𑀣 ‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺, 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸’𑀢𑀺 (𑀅. 𑀦𑀺. 𑁪.𑁩𑁧) 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀯𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀑𑀓𑀸𑀲𑀝𑁆𑀞𑁂𑀦 𑀔𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀪𑀽𑀢𑀸𑀦𑀺.

𑀏𑀯𑀁 𑀲𑀫𑀯𑀸𑀬𑀜𑁆𑀘 𑀔𑀡𑀜𑁆𑀘 𑀜𑀢𑁆𑀯𑀸 𑀇𑀢𑀭𑁂𑀲𑀼 𑁋

𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄, 𑀓𑀸𑀮𑁄 𑀯𑁄𑀳𑀸𑀭𑀫𑀢𑁆𑀢𑀓𑁄;

𑀧𑀼𑀜𑁆𑀚𑁄 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁, 𑀲𑀫𑀽𑀳𑁄𑀢𑀺 𑀯𑀺𑀪𑀸𑀯𑀺𑀢𑁄.

‘𑀘𑀺𑀢𑁆𑀢𑀓𑀸𑀮𑁄 𑀭𑀽𑀧𑀓𑀸𑀮𑁄’𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀥𑀫𑁆𑀫𑁂 𑀯𑀸, ‘𑀅𑀢𑀻𑀢𑁄 𑀅𑀦𑀸𑀕𑀢𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀯𑀼𑀢𑁆𑀢𑀺𑀁 𑀯𑀸, ‘𑀩𑀻𑀚𑀓𑀸𑀮𑁄 𑀅𑀗𑁆𑀓𑀼𑀭𑀓𑀸𑀮𑁄’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀧𑀝𑀺𑀧𑀸𑀝𑀺𑀁 𑀯𑀸, ‘𑀉𑀧𑁆𑀧𑀸𑀤𑀓𑀸𑀮𑁄 𑀚𑀭𑀸𑀓𑀸𑀮𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀮𑀓𑁆𑀔𑀡𑀁 𑀯𑀸, ‘𑀯𑁂𑀤𑀺𑀬𑀦𑀓𑀸𑀮𑁄 𑀲𑀜𑁆𑀚𑀸𑀦𑀦𑀓𑀸𑀮𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀓𑀺𑀘𑁆𑀘𑀁 𑀯𑀸, ‘𑀦𑁆𑀳𑀸𑀦𑀓𑀸𑀮𑁄 𑀧𑀸𑀦𑀓𑀸𑀮𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑁆𑀢𑀓𑀺𑀘𑁆𑀘𑀁 𑀯𑀸, ‘𑀕𑀫𑀦𑀓𑀸𑀮𑁄 𑀞𑀸𑀦𑀓𑀸𑀮𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀭𑀺𑀬𑀸𑀧𑀣𑀁 𑀯𑀸, ‘𑀧𑀼𑀩𑁆𑀩𑀡𑁆𑀳𑁄 𑀲𑀸𑀬𑀦𑁆𑀳𑁄 𑀤𑀺𑀯𑀸 𑀭𑀢𑁆𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀺𑀧𑀭𑀺𑀯𑀢𑁆𑀢𑀦𑀁 𑀯𑀸, ‘𑀅𑀟𑁆𑀠𑀫𑀸𑀲𑁄 𑀫𑀸𑀲𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀳𑁄𑀭𑀢𑁆𑀢𑀸𑀤𑀺𑀲𑀗𑁆𑀔𑀸𑀢𑀁 𑀓𑀸𑀮𑀲𑀜𑁆𑀘𑀬𑀁 𑀯𑀸𑀢𑀺 𑁋 𑀏𑀯𑀁 𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀓𑀸𑀮𑁄 𑀦𑀸𑀫. 𑀲𑁄 𑀧𑀦𑁂𑀲 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀓𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦𑁂𑀲 𑀨𑀲𑁆𑀲𑀯𑁂𑀤𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀧𑀼𑀜𑁆𑀚𑁄, 𑀲𑁄 𑀇𑀥 𑀲𑀫𑀽𑀳𑁄𑀢𑀺 𑀯𑀺𑀪𑀸𑀯𑀺𑀢𑁄. 𑀏𑀯𑀁 𑀓𑀸𑀮𑀲𑀫𑀽𑀳𑁂𑀧𑀺 𑀜𑀢𑁆𑀯𑀸 𑀇𑀢𑀭𑁄 𑀧𑀦 𑁋

𑀳𑁂𑀢𑀽𑀢𑀺 𑀧𑀘𑁆𑀘𑀬𑁄𑀯𑁂𑀢𑁆𑀣, 𑀢𑀲𑁆𑀲 𑀤𑁆𑀯𑀸𑀭𑀯𑀲𑁂𑀦 𑀯𑀸;

𑀅𑀦𑁂𑀓𑀪𑀸𑀯𑁄 𑀯𑀺𑀜𑁆𑀜𑁂𑀬𑁆𑀬𑁄, 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀯𑀸.

𑀏𑀢𑁆𑀣 𑀳𑀺 𑀧𑀘𑁆𑀘𑀬𑁄𑀯 𑀳𑁂𑀢𑀼 𑀦𑀸𑀫, 𑀢𑀲𑁆𑀲 𑀤𑁆𑀯𑀸𑀭𑀸𑀦𑀁 𑀯𑀸 𑀧𑀘𑁆𑀘𑀬𑀸𑀦𑀁 𑀯𑀸 𑀯𑀲𑁂𑀦 𑀅𑀦𑁂𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀘𑀓𑁆𑀔𑀼𑀭𑀽𑀧𑀆𑀮𑁄𑀓𑀫𑀦𑀲𑀺𑀓𑀸𑀭𑀸𑀤𑀬𑁄 𑀧𑀘𑁆𑀘𑀬𑀸, 𑀫𑀳𑀸𑀧𑀓𑀭𑀡𑁂 𑀘 ‘‘𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀧𑀸𑀓𑀧𑀘𑁆𑀘𑀬𑀜𑁆𑀘 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀜𑁆𑀘, 𑀲𑁂𑀲𑀸 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯. 𑀢𑁂 𑀲𑀩𑁆𑀩𑁂𑀧𑀺 𑀇𑀥 𑀳𑁂𑀢𑀽𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀏𑀯𑀫𑀲𑁆𑀲 𑀇𑀫𑀺𑀦𑀸 𑀤𑁆𑀯𑀸𑀭𑀯𑀲𑁂𑀦 𑀯𑀸 𑀧𑀘𑁆𑀘𑀬𑀯𑀲𑁂𑀦 𑀯𑀸 𑀅𑀦𑁂𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀢𑁂 𑀲𑀫𑀯𑀸𑀬𑀸𑀤𑀬𑁄 𑀧𑀜𑁆𑀘 𑀅𑀢𑁆𑀣𑀸 𑀇𑀥 𑀲𑀫𑀬𑀲𑀤𑁆𑀤𑁂𑀦 𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘𑀓𑀲𑁆𑀫𑀸 𑀧𑀦 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀭𑀺𑀕𑁆𑀕𑀳𑁄 𑀓𑀢𑁄’𑀢𑀺? ‘𑀢𑁂𑀦 𑀢𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀤𑀻𑀧𑀦𑀢𑁄. 𑀏𑀢𑁂𑀲𑀼 𑀳𑀺 𑀲𑀫𑀯𑀸𑀬𑀲𑀗𑁆𑀔𑀸𑀢𑁄 𑀲𑀫𑀬𑁄 𑀅𑀦𑁂𑀓𑀳𑁂𑀢𑀼𑀢𑁄 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀢𑁂𑀦 𑀏𑀓𑀓𑀸𑀭𑀡𑀯𑀸𑀤𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺. 𑀲𑀫𑀯𑀸𑀬𑁄 𑀘 𑀦𑀸𑀫 𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀦𑁂 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑁄 𑀳𑁄𑀢𑀺. 𑀢𑀲𑁆𑀫𑀸 ‘𑀏𑀓𑁄 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻’𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀁 𑀤𑀻𑀧𑁂𑀢𑀺. 𑀲𑀪𑀸𑀯𑁂𑀦 𑀳𑀺 𑀓𑀸𑀭𑀡𑁂 𑀲𑀢𑀺 𑀓𑀸𑀭𑀡𑀦𑁆𑀢𑀭𑀸𑀧𑁂𑀓𑁆𑀔𑀸 𑀅𑀬𑀼𑀢𑁆𑀢𑀸𑀢𑀺. 𑀏𑀯𑀁 𑀏𑀓𑀲𑁆𑀲 𑀓𑀲𑁆𑀲𑀘𑀺 𑀓𑀸𑀭𑀡𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀧𑀝𑀺𑀲𑁂𑀥𑀺𑀢𑀁 𑀳𑁄𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘𑀬𑀁 𑀯𑀼𑀢𑁆𑀢𑀁 𑀅𑀦𑁂𑀓𑀳𑁂𑀢𑀼𑀢𑁄 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀻’𑀢𑀺, 𑀢𑀁 𑀦 𑀬𑀼𑀢𑁆𑀢𑀁. ‘𑀓𑀺𑀁𑀓𑀸𑀭𑀡𑀸’?‘𑀅𑀲𑀸𑀫𑀕𑁆𑀕𑀺𑀬𑀁 𑀅𑀳𑁂𑀢𑀽𑀦𑀁 𑀲𑀸𑀫𑀕𑁆𑀕𑀺𑀬𑀫𑁆𑀧𑀺 𑀅𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄’. ‘𑀦 𑀳𑀺 𑀏𑀓𑀲𑁆𑀫𑀺𑀁 𑀅𑀦𑁆𑀥𑁂 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻’𑀢𑀺. ‘𑀦𑁄 𑀦 𑀬𑀼𑀢𑁆𑀢𑀁; 𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀳𑀺 𑀞𑀺𑀢𑀪𑀸𑀯𑁄 𑀲𑀸𑀫𑀕𑁆𑀕𑀻; 𑀦 𑀅𑀦𑁂𑀓𑁂𑀲𑀁 𑀲𑀫𑁄𑀥𑀸𑀦𑀫𑀢𑁆𑀢𑀁. 𑀦 𑀘 𑀅𑀦𑁆𑀥𑀸𑀦𑀁 𑀤𑀲𑁆𑀲𑀦𑀁 𑀦𑀸𑀫 𑀲𑀸𑀥𑀸𑀭𑀡𑀨𑀮𑀁’. ‘𑀓𑀲𑁆𑀫𑀸’?‘𑀅𑀦𑁆𑀥𑀲𑀢𑁂 𑀲𑀢𑀺𑀧𑀺 𑀢𑀲𑁆𑀲 𑀅𑀪𑀸𑀯𑀢𑁄. 𑀘𑀓𑁆𑀔𑀸𑀤𑀻𑀦𑀁 𑀧𑀦 𑀢𑀁 𑀲𑀸𑀥𑀸𑀭𑀡𑀨𑀮𑀁, 𑀢𑁂𑀲𑀁 𑀪𑀸𑀯𑁂 𑀪𑀸𑀯𑀢𑁄. 𑀅𑀲𑀸𑀫𑀕𑁆𑀕𑀺𑀬𑀁 𑀅𑀳𑁂𑀢𑀽𑀦𑀫𑁆𑀧𑀺 𑀘 𑀲𑀸𑀫𑀕𑁆𑀕𑀺𑀬𑀁 𑀳𑁂𑀢𑀼𑀪𑀸𑀯𑁄 𑀲𑀺𑀤𑁆𑀥𑁄. 𑀲𑁆𑀯𑀸𑀬𑀁 𑀅𑀲𑀸𑀫𑀕𑁆𑀕𑀺𑀬𑀁 𑀨𑀮𑀸𑀪𑀸𑀯𑁂𑀦, 𑀲𑀸𑀫𑀕𑁆𑀕𑀺𑀬𑀜𑁆𑀘𑀲𑁆𑀲 𑀪𑀸𑀯𑁂𑀦, 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀸𑀤𑀻𑀦𑀜𑁆𑀳𑀺 𑀯𑁂𑀓𑀮𑁆𑀮𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀪𑀸𑀯𑁄, 𑀅𑀯𑁂𑀓𑀮𑁆𑀮𑁂 𑀘 𑀪𑀸𑀯𑁄, 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄 𑀮𑁄𑀓𑀲𑁆𑀲𑀸’𑀢𑀺. 𑀅𑀬𑀁 𑀢𑀸𑀯 𑀲𑀫𑀯𑀸𑀬𑀲𑀗𑁆𑀔𑀸𑀢𑁂𑀦 𑀲𑀫𑀬𑁂𑀦 𑀅𑀢𑁆𑀣𑁄 𑀤𑀻𑀧𑀺𑀢𑁄.

𑀬𑁄 𑀧𑀦𑁂𑀲 𑀅𑀝𑁆𑀞𑀳𑀺 𑀅𑀓𑁆𑀔𑀡𑁂𑀳𑀺 𑀧𑀭𑀺𑀯𑀚𑁆𑀚𑀺𑀢𑁄 𑀦𑀯𑀫𑁄 𑀔𑀡𑁄, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀓𑁄 𑀘 𑀘𑀢𑀼𑀘𑀓𑁆𑀓𑀲𑀗𑁆𑀔𑀸𑀢𑁄 𑀑𑀓𑀸𑀲𑀝𑁆𑀞𑁂𑀦 𑀔𑀡𑁄 𑀯𑀼𑀢𑁆𑀢𑁄, 𑀲𑁄 𑀫𑀦𑀼𑀲𑁆𑀲𑀢𑁆𑀢𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀆𑀤𑀺𑀓𑀁 𑀔𑀡𑀲𑀸𑀫𑀕𑁆𑀕𑀺𑀁 𑀯𑀺𑀦𑀸 𑀦𑀢𑁆𑀣𑀺. 𑀫𑀦𑀼𑀲𑁆𑀲𑀢𑁆𑀢𑀸𑀤𑀻𑀦𑀜𑁆𑀘 𑀓𑀸𑀡𑀓𑀘𑁆𑀙𑀧𑁄𑀧𑀫𑀸𑀤𑀻𑀳𑀺 (𑀫. 𑀦𑀺. 𑁩.𑁨𑁫𑁨) 𑀤𑀼𑀮𑁆𑀮𑀪𑀪𑀸𑀯𑁄. 𑀇𑀢𑀺 𑀔𑀡𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸 𑀲𑀼𑀝𑁆𑀞𑀼𑀢𑀭𑀁 𑀔𑀡𑀸𑀬𑀢𑁆𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀉𑀧𑀓𑀸𑀭𑀪𑀽𑀢𑀁 𑀓𑀼𑀲𑀮𑀁 𑀤𑀼𑀮𑁆𑀮𑀪𑀫𑁂𑀯. 𑀏𑀯𑀫𑁂𑀢𑁂𑀲𑀼 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀻𑀧𑁂𑀢𑀺. 𑀏𑀯𑀁 𑀤𑀻𑀧𑁂𑀦𑁆𑀢𑁂𑀦 𑀅𑀦𑁂𑀦 𑀅𑀥𑀺𑀕𑀢𑀔𑀡𑀸𑀦𑀁 𑀔𑀡𑀸𑀬𑀢𑁆𑀢𑀲𑁆𑀲𑁂𑀯 𑀢𑀲𑁆𑀲 𑀓𑀼𑀲𑀮𑀲𑁆𑀲 𑀅𑀦𑀦𑀼𑀝𑁆𑀞𑀸𑀦𑁂𑀦 𑀫𑁄𑀖𑀔𑀡𑀁 𑀓𑀼𑀭𑀼𑀫𑀸𑀦𑀸𑀦𑀁 𑀧𑀫𑀸𑀤𑀯𑀺𑀳𑀸𑀭𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺. 𑀅𑀬𑀁 𑀔𑀡𑀲𑀗𑁆𑀔𑀸𑀢𑁂𑀦 𑀲𑀫𑀬𑁂𑀦 𑀅𑀢𑁆𑀣𑁄 𑀤𑀻𑀧𑀺𑀢𑁄.

𑀬𑁄 𑀧𑀦𑁂𑀢𑀲𑁆𑀲 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁄 𑀦𑀸𑀫 𑀳𑁄𑀢𑀺, 𑀲𑁄 𑀅𑀢𑀺𑀧𑀭𑀺𑀢𑁆𑀢𑁄. 𑀲𑀸 𑀘𑀲𑁆𑀲 𑀅𑀢𑀺𑀧𑀭𑀺𑀢𑁆𑀢𑀢𑀸 ‘‘𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀬𑀣𑀸 𑀘 𑀬𑀸 𑀤𑁂𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁨𑁮) 𑁋 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭 𑀳𑀺 𑀲𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀸𑀯 𑀧𑀭𑀺𑀢𑁆𑀢𑀓𑁄 𑀓𑀸𑀮𑁄 𑀯𑀼𑀢𑁆𑀢𑁄. 𑀬𑀸𑀯 𑀧𑀝𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀢𑀺𑀝𑁆𑀞𑀢𑀺 𑀢𑀸𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺. 𑀇𑀢𑀺 𑀢𑁂𑀲𑀁 𑀓𑀸𑀮𑀧𑀭𑀺𑀢𑁆𑀢𑀢𑀸𑀬 𑀉𑀧𑀫𑀸𑀧𑀺 𑀦𑀢𑁆𑀣𑀺. 𑀢𑁂𑀦𑁂𑀯𑀸𑀳 𑁋 ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀉𑀧𑀫𑀸𑀧𑀺 𑀦 𑀲𑀼𑀓𑀭𑀸 𑀬𑀸𑀯 𑀮𑀳𑀼𑀧𑀭𑀺𑀯𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮). 𑀏𑀯𑀫𑁂𑀢𑁂𑀲𑀼 𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑀬𑁄 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑀲𑁆𑀲 𑀅𑀢𑀺𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀏𑀯𑀁 𑀤𑀻𑀧𑁂𑀦𑁆𑀢𑁂𑀦 𑀘𑀸𑀦𑁂𑀦 𑀅𑀢𑀺𑀧𑀭𑀺𑀢𑁆𑀢𑀓𑀸𑀮𑀢𑀸𑀬, 𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁂𑀦 𑀫𑀼𑀢𑁆𑀢𑀸𑀯𑀼𑀡𑀦𑀁 𑀯𑀺𑀬, 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀫𑀺𑀤𑀁 𑀘𑀺𑀢𑁆𑀢𑀁, 𑀢𑀲𑁆𑀫𑀸 𑀏𑀢𑀲𑁆𑀲 𑀧𑀝𑀺𑀯𑁂𑀥𑁂 𑀫𑀳𑀸𑀉𑀲𑁆𑀲𑀸𑀳𑁄 𑀘 𑀆𑀤𑀭𑁄 𑀘 𑀓𑀢𑁆𑀢𑀩𑁆𑀩𑁄𑀢𑀺 𑀑𑀯𑀸𑀤𑁄 𑀤𑀺𑀦𑁆𑀦𑁄 𑀳𑁄𑀢𑀺. 𑀅𑀬𑀁 𑀓𑀸𑀮𑀲𑀗𑁆𑀔𑀸𑀢𑁂𑀦 𑀲𑀫𑀬𑁂𑀦 𑀅𑀢𑁆𑀣𑁄 𑀤𑀻𑀧𑀺𑀢𑁄.

𑀲𑀫𑀽𑀳𑀲𑀗𑁆𑀔𑀸𑀢𑁄 𑀧𑀦 𑀲𑀫𑀬𑁄 𑀅𑀦𑁂𑀓𑁂𑀲𑀁 𑀲𑀳𑀼𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀧𑀼𑀜𑁆𑀚𑁄 𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀫𑀺𑀜𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀲𑀳 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀦𑁂𑀓𑁂𑀲𑀁 𑀲𑀳𑀼𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸. 𑀏𑀯𑀁 𑀤𑀻𑀧𑁂𑀦𑁆𑀢𑁂𑀦 𑀘𑀸𑀦𑁂𑀦 𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀝𑀺𑀲𑁂𑀥𑀺𑀢𑀸 𑀳𑁄𑀢𑀺. 𑀅𑀬𑀁 𑀲𑀫𑀽𑀳𑀲𑀗𑁆𑀔𑀸𑀢𑁂𑀦 𑀲𑀫𑀬𑁂𑀦 𑀅𑀢𑁆𑀣𑁄 𑀤𑀻𑀧𑀺𑀢𑁄.

𑀳𑁂𑀢𑀼𑀲𑀗𑁆𑀔𑀸𑀢𑁄 𑀧𑀦 𑀲𑀫𑀬𑁄 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁 𑀤𑀻𑀧𑁂𑀢𑀺. ‘𑀬𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀳𑀺 𑀧𑀤𑀲𑁆𑀲 𑀬𑀲𑁆𑀫𑀸 ‘𑀬𑀲𑁆𑀫𑀺𑀁 𑀳𑁂𑀢𑀼𑀫𑁆𑀳𑀺 𑀲𑀢𑀺’ 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄, 𑀢𑀲𑁆𑀫𑀸 ‘𑀳𑁂𑀢𑀼𑀫𑁆𑀳𑀺 𑀲𑀢𑀺’ 𑀧𑀯𑀢𑁆𑀢𑀺𑀢𑁄 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀤𑀻𑀧𑀺𑀢𑀸. 𑀏𑀯𑀁 𑀤𑀻𑀧𑁂𑀦𑁆𑀢𑁂𑀦 𑀘𑀸𑀦𑁂𑀦 𑀥𑀫𑁆𑀫𑀸𑀦𑀁 𑀲𑀯𑀲𑀯𑀢𑁆𑀢𑀺𑀢𑀸𑀪𑀺𑀫𑀸𑀦𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺. 𑀅𑀬𑀁 𑀳𑁂𑀢𑀼𑀲𑀗𑁆𑀔𑀸𑀢𑁂𑀦 𑀲𑀫𑀬𑁂𑀦 𑀅𑀢𑁆𑀣𑁄 𑀤𑀻𑀧𑀺𑀢𑁄.

𑀢𑀢𑁆𑀣 ‘𑀬𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀓𑀸𑀮𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲 𑀯𑀲𑁂𑀦 ‘𑀬𑀲𑁆𑀫𑀺𑀁 𑀓𑀸𑀮𑁂’𑀢𑀺 𑀅𑀢𑁆𑀣𑁄; 𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲 ‘𑀬𑀲𑁆𑀫𑀺𑀁 𑀲𑀫𑀽𑀳𑁂’𑀢𑀺. 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀸𑀦𑀁 ‘𑀬𑀲𑁆𑀫𑀺𑀁 𑀔𑀡𑁂 𑀲𑀢𑀺, 𑀬𑀸𑀬 𑀲𑀸𑀫𑀕𑁆𑀕𑀺𑀬𑀸 𑀲𑀢𑀺, 𑀬𑀫𑁆𑀳𑀺 𑀳𑁂𑀢𑀼𑀫𑁆𑀳𑀺 𑀲𑀢𑀺’ 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀲𑀢𑀺 ‘𑀨𑀲𑁆𑀲𑀸𑀤𑀬𑁄𑀧𑀻’𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑀽𑀳𑀲𑀗𑁆𑀔𑀸𑀢𑁄 𑀘 𑀲𑀫𑀬𑁄. 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀅𑀥𑀺𑀓𑀭𑀡𑀯𑀲𑁂𑀦𑁂𑀢𑁆𑀣 𑀪𑀼𑀫𑁆𑀫𑀁. 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀻𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀯𑀲𑁂𑀦𑁂𑀢𑁆𑀣 𑀪𑀼𑀫𑁆𑀫𑀁.

𑀓𑀸𑀫𑀸𑀯𑀘𑀭𑀦𑁆𑀢𑀺 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸? 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁭) 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀁. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸, 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘. 𑀢𑀢𑁆𑀣 𑀓𑀺𑀮𑁂𑀲𑀓𑀸𑀫𑁄 𑀅𑀢𑁆𑀣𑀢𑁄 𑀙𑀦𑁆𑀤𑀭𑀸𑀕𑁄𑀯 𑀯𑀢𑁆𑀣𑀼𑀓𑀸𑀫𑁄 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀓𑀺𑀮𑁂𑀲𑀓𑀸𑀫𑁄 𑀘𑁂𑀢𑁆𑀣 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄; 𑀇𑀢𑀭𑁄 𑀧𑀦 𑀓𑀸𑀫𑀺𑀬𑀢𑀻𑀢𑀺 𑀓𑀸𑀫𑁄. 𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀤𑀼𑀯𑀺𑀥𑁄𑀧𑁂𑀲𑁄 𑀓𑀸𑀫𑁄 𑀧𑀯𑀢𑁆𑀢𑀺𑀯𑀲𑁂𑀦 𑀅𑀯𑀘𑀭𑀢𑀺, 𑀲𑁄 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁, 𑀫𑀦𑀼𑀲𑁆𑀲𑀸𑀦𑀁, 𑀙𑀦𑁆𑀦𑀜𑁆𑀘 𑀤𑁂𑀯𑀮𑁄𑀓𑀸𑀦𑀁 𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁄 𑀧𑀤𑁂𑀲𑁄. 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑁄, 𑀲𑀲𑀢𑁆𑀣𑀸𑀯𑀘𑀭𑁄 𑀯𑀺𑀬. 𑀬𑀣𑀸 𑀳𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀲𑀢𑁆𑀣𑀸 𑀧𑀼𑀭𑀺𑀲𑀸 𑀅𑀯𑀘𑀭𑀦𑁆𑀢𑀺, 𑀲𑁄 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀲𑀼 𑀅𑀯𑀘𑀭𑀦𑁆𑀢𑁂𑀲𑀼, 𑀢𑁂𑀲𑀁 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 ‘𑀲𑀲𑀢𑁆𑀣𑀸𑀯𑀘𑀭𑁄’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀢𑀢𑁆𑀣 𑀅𑀯𑀘𑀭𑀦𑁆𑀢𑁂𑀲𑀼, 𑀢𑁂𑀲𑀁 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀅𑀬𑀁 𑀧𑀤𑁂𑀲𑁄 ‘𑀓𑀸𑀫𑀸𑀯𑀘𑀭𑁄’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀁 𑀬𑀣𑀸 𑀭𑀽𑀧𑀪𑀯𑁄 𑀭𑀽𑀧𑀁, 𑀏𑀯𑀁 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 ‘𑀓𑀸𑀫𑁄’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀫𑀺𑀤𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀏𑀓𑀸𑀤𑀲𑀧𑀤𑁂𑀲𑀲𑀗𑁆𑀔𑀸𑀢𑁂 𑀓𑀸𑀫𑁂 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁.

𑀓𑀺𑀜𑁆𑀘𑀸𑀧𑀺 𑀳𑀺 𑀏𑀢𑀁 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀬𑀣𑀸 𑀧𑀦 𑀲𑀗𑁆𑀕𑀸𑀫𑁂 𑀅𑀯𑀘𑀭𑀡𑀢𑁄 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺 𑀮𑀤𑁆𑀥𑀦𑀸𑀫𑀓𑁄 𑀦𑀸𑀕𑁄 𑀦𑀕𑀭𑁂 𑀘𑀭𑀦𑁆𑀢𑁄𑀧𑀺 ‘𑀲𑀗𑁆𑀕𑀸𑀫𑀸𑀯𑀘𑀭𑁄’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀣𑀮𑀚𑀮𑀘𑀭𑀸 𑀘 𑀧𑀸𑀡𑀸 𑀅𑀣𑀮𑁂 𑀅𑀚𑀮𑁂 𑀘 𑀞𑀺𑀢𑀸𑀧𑀺 ‘𑀣𑀮𑀘𑀭𑀸 𑀚𑀮𑀘𑀭𑀸’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀺𑀤𑀁 𑀅𑀜𑁆𑀜𑀢𑁆𑀣 𑀅𑀯𑀘𑀭𑀦𑁆𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀏𑀢𑁆𑀣 𑀓𑀸𑀫𑁄 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫𑀜𑁆𑀘𑁂𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀬𑀣𑀸 𑀧𑀦 𑀯𑀤𑀢𑀻𑀢𑀺 ‘𑀯𑀘𑁆𑀙𑁄’, 𑀫𑀳𑀺𑀬𑀁 𑀲𑁂𑀢𑀻𑀢𑀺 ‘𑀫𑀳𑀺𑀁𑀲𑁄’𑀢𑀺 𑀯𑀼𑀢𑁆𑀢𑁂, 𑀦 𑀲𑀢𑁆𑀢𑀸 𑀬𑀢𑁆𑀢𑀓𑀸 𑀯𑀤𑀦𑁆𑀢𑀺, 𑀫𑀳𑀺𑀬𑀁 𑀯𑀸 𑀲𑁂𑀦𑁆𑀢𑀺 𑀲𑀩𑁆𑀩𑁂𑀲𑀁 𑀢𑀁 𑀦𑀸𑀫𑀁 𑀳𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀓𑀸𑀫𑁂 𑀧𑀝𑀺𑀲𑀦𑁆𑀥𑀺𑀁 𑀅𑀯𑀘𑀸𑀭𑁂𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀁.

𑀓𑀼𑀲𑀮𑀦𑁆𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀸𑀤𑀻𑀳𑀺 𑀅𑀢𑁆𑀣𑁂𑀳𑀺 𑀓𑀼𑀲𑀮𑀁. 𑀅𑀧𑀺𑀘 𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀘 𑀓𑀼𑀲𑀮𑀁. 𑀬𑀣𑁂𑀯 𑀳𑀺 ‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮’𑀦𑁆𑀢𑀺 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯) 𑀭𑀽𑀧𑀓𑀸𑀬𑁂 𑀅𑀦𑀸𑀢𑀼𑀭𑀢𑀸𑀬 𑀅𑀕𑁂𑀮𑀜𑁆𑀜𑁂𑀦 𑀦𑀺𑀩𑁆𑀬𑀸𑀥𑀺𑀢𑀸𑀬 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀭𑀽𑀧𑀥𑀫𑁆𑀫𑁂𑀧𑀺 𑀓𑀺𑀮𑁂𑀲𑀸𑀢𑀼𑀭𑀢𑀸𑀬 𑀓𑀺𑀮𑁂𑀲𑀕𑁂𑀮𑀜𑁆𑀜𑀲𑁆𑀲 𑀘 𑀓𑀺𑀮𑁂𑀲𑀩𑁆𑀬𑀸𑀥𑀺𑀦𑁄 𑀅𑀪𑀸𑀯𑁂𑀦 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀯𑀚𑁆𑀚𑀲𑁆𑀲 𑀧𑀦 𑀓𑀺𑀮𑁂𑀲𑀤𑁄𑀲𑀲𑁆𑀲 𑀓𑀺𑀮𑁂𑀲𑀤𑀭𑀣𑀲𑁆𑀲 𑀘 𑀅𑀪𑀸𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁. 𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸; 𑀓𑁄𑀲𑀮𑁆𑀮𑀢𑁄 𑀲𑀫𑁆𑀪𑀽𑀢𑀢𑁆𑀢𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀁.

‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁’ 𑀢𑀸𑀯 𑀏𑀯𑀁 𑀳𑁄𑀢𑀼; 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀓𑀣𑀦𑁆𑀢𑀺. 𑀢𑀫𑁆𑀧𑀺 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀓𑀼𑀲𑀮𑀫𑁂𑀯. 𑀬𑀣𑀸 𑀳𑀺 𑀢𑀸𑀮𑀧𑀡𑁆𑀡𑁂𑀳𑀺 𑀅𑀓𑀢𑁆𑀯𑀸 𑀓𑀺𑀮𑀜𑁆𑀚𑀸𑀤𑀻𑀳𑀺 𑀓𑀢𑀫𑁆𑀧𑀺 𑀢𑀁𑀲𑀭𑀺𑀓𑁆𑀔𑀢𑁆𑀢𑀸 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀢𑀸𑀮𑀯𑀡𑁆𑀝𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 ‘𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢’𑀫𑁆𑀧𑀺 𑀓𑀼𑀲𑀮𑀦𑁆𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 ‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁’ 𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦𑀸𑀢𑀺 𑀢𑀺𑀯𑀺𑀥𑁂𑀦𑀧𑀺 𑀓𑀼𑀲𑀮𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀤𑀼𑀯𑀺𑀥𑁂𑀦𑁂𑀯. 𑀇𑀢𑀺 𑀬𑀜𑁆𑀘 𑀚𑀸𑀢𑀓𑀧𑀭𑀺𑀬𑀸𑀬𑁂𑀦 𑀬𑀜𑁆𑀘 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀬𑀜𑁆𑀘 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀓𑀼𑀲𑀮𑀁 𑀓𑀣𑀺𑀢𑀁 𑀲𑀩𑁆𑀩𑀁 𑀢𑀁 𑀢𑀻𑀳𑀺𑀧𑀺 𑀅𑀢𑁆𑀣𑁂𑀳𑀺 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀮𑀩𑁆𑀪𑀢𑀺.

𑀢𑀤𑁂𑀢𑀁 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀸 𑀅𑀦𑀯𑀚𑁆𑀚𑀮𑀓𑁆𑀔𑀡𑀫𑁂𑀯 𑀓𑀼𑀲𑀮𑀁, 𑀯𑁄𑀤𑀸𑀦𑀪𑀸𑀯𑀭𑀲𑀁, 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀣𑀸𑀯𑀼𑀢𑁆𑀢𑀧𑀤𑀝𑁆𑀞𑀸𑀦𑀫𑁂𑀯. 𑀮𑀓𑁆𑀔𑀡𑀸𑀤𑀻𑀲𑀼 𑀳𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀯𑀸 𑀲𑀸𑀫𑀜𑁆𑀜𑀁 𑀯𑀸 𑀮𑀓𑁆𑀔𑀡𑀁 𑀦𑀸𑀫. 𑀓𑀺𑀘𑁆𑀘𑀁 𑀯𑀸 𑀲𑀫𑁆𑀧𑀢𑁆𑀢𑀺 𑀯𑀸 𑀭𑀲𑁄 𑀦𑀸𑀫. 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀯𑀸 𑀨𑀮𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀦𑀸𑀫. 𑀆𑀲𑀦𑁆𑀦𑀓𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫. 𑀇𑀢𑀺 𑀬𑀢𑁆𑀣 𑀬𑀢𑁆𑀣 𑀮𑀓𑁆𑀔𑀡𑀸𑀤𑀻𑀦𑀺 𑀯𑀓𑁆𑀔𑀸𑀫 𑀢𑀢𑁆𑀣 𑀢𑀢𑁆𑀣 𑀇𑀫𑀺𑀦𑀸𑀯 𑀦𑀬𑁂𑀦 𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀺𑀢𑁆𑀢𑀦𑁆𑀢𑀺 𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁; 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀯𑀸 ‘𑀘𑀺𑀢𑁆𑀢’𑀦𑁆𑀢𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑁄 𑀏𑀲 𑀲𑀤𑁆𑀤𑁄, 𑀢𑀲𑁆𑀫𑀸 𑀬𑀤𑁂𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀁, 𑀢𑀁 𑀚𑀯𑀦𑀯𑀻𑀣𑀺𑀯𑀲𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺 𑀘𑀺𑀢𑁆𑀢𑀁. 𑀯𑀺𑀧𑀸𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀘𑀺𑀢𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀧𑀺𑀘 𑀲𑀩𑁆𑀩𑀫𑁆𑀧𑀺 𑀬𑀣𑀸𑀦𑀼𑀭𑀽𑀧𑀢𑁄 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁. 𑀘𑀺𑀢𑁆𑀢𑀓𑀭𑀡𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀲𑁆𑀫𑀸 𑀅𑀜𑁆𑀜𑀤𑁂𑀯 𑀲𑀭𑀸𑀕𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀲𑀤𑁄𑀲𑀁, 𑀅𑀜𑁆𑀜𑀁 𑀲𑀫𑁄𑀳𑀁; 𑀅𑀜𑁆𑀜𑀁 𑀓𑀸𑀫𑀸𑀯𑀘𑀭𑀁, 𑀅𑀜𑁆𑀜𑀁 𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑀁; 𑀅𑀜𑁆𑀜𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁; 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀘𑀸𑀧𑀺 𑀅𑀜𑁆𑀜𑀁 𑀦𑀻𑀮𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀧𑀻𑀢𑀸𑀤𑀺𑀆𑀭𑀫𑁆𑀫𑀡𑀁; 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄; 𑀲𑀩𑁆𑀩𑁂𑀲𑀼𑀧𑀺 𑀘𑁂𑀢𑁂𑀲𑀼 𑀅𑀜𑁆𑀜𑀁 𑀳𑀻𑀦𑀁 𑀅𑀜𑁆𑀜𑀁 𑀫𑀚𑁆𑀛𑀺𑀫𑀁 𑀅𑀜𑁆𑀜𑀁 𑀧𑀡𑀻𑀢𑀁; 𑀳𑀻𑀦𑀸𑀤𑀻𑀲𑀼𑀧𑀺 𑀅𑀜𑁆𑀜𑀁 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀁 𑀅𑀜𑁆𑀜𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀁, 𑀢𑀲𑁆𑀫𑀸 𑀅𑀲𑁆𑀲 𑀇𑀫𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀪𑀽𑀫𑀺𑀆𑀭𑀫𑁆𑀫𑀡𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀘𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀏𑀓𑀫𑁂𑀯 𑀏𑀯𑀁 𑀘𑀺𑀢𑁆𑀢𑀁 𑀦 𑀳𑁄𑀢𑀺, 𑀘𑀺𑀢𑁆𑀢𑀸𑀦𑀁 𑀧𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀢𑀸𑀯 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁.

𑀓𑀣𑀁 𑀘𑀺𑀢𑁆𑀢𑀓𑀭𑀡𑀢𑀸𑀬𑀸𑀢𑀺? 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀓𑀫𑁆𑀫𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀺𑀫𑁆𑀧𑀺 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀁 𑀅𑀢𑀺𑀘𑀺𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀁 𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀓𑀸𑀭𑀸𑀦𑀁 ‘𑀏𑀯𑀁𑀯𑀺𑀥𑀸𑀦𑀺 𑀏𑀢𑁆𑀣 𑀭𑀽𑀧𑀸𑀦𑀺 𑀓𑀸𑀢𑀩𑁆𑀩𑀸𑀦𑀻’𑀢𑀺 𑀘𑀺𑀢𑁆𑀢𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀸𑀬 𑀘𑀺𑀢𑁆𑀢𑀲𑀜𑁆𑀜𑀸𑀬 𑀮𑁂𑀔𑀸𑀕𑀳𑀦𑀭𑀜𑁆𑀚𑀦𑀉𑀚𑁆𑀚𑁄𑀢𑀦𑀯𑀢𑁆𑀢𑀦𑀸𑀤𑀺𑀦𑀺𑀧𑁆𑀨𑀸𑀤𑀺𑀓𑀸 𑀘𑀺𑀢𑁆𑀢𑀓𑀺𑀭𑀺𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀘𑀭𑀡𑀲𑀗𑁆𑀔𑀸𑀢𑁂 𑀘𑀺𑀢𑁆𑀢𑁂 𑀅𑀜𑁆𑀜𑀢𑀭𑀁 𑀯𑀺𑀘𑀺𑀢𑁆𑀢𑀭𑀽𑀧𑀁 𑀦𑀺𑀧𑁆𑀨𑀚𑁆𑀚𑀢𑀺. 𑀢𑀢𑁄 ‘𑀇𑀫𑀲𑁆𑀲 𑀭𑀽𑀧𑀲𑁆𑀲 𑀉𑀧𑀭𑀺 𑀇𑀤𑀁 𑀳𑁄𑀢𑀼, 𑀳𑁂𑀝𑁆𑀞𑀸 𑀇𑀤𑀁, 𑀉𑀪𑀬𑀧𑀲𑁆𑀲𑁂 𑀇𑀤’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸𑀘𑀺𑀦𑁆𑀢𑀺𑀢𑁂𑀦 𑀓𑀫𑁂𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀧𑁆𑀨𑀸𑀤𑀦𑀁 𑀳𑁄𑀢𑀺, 𑀏𑀯𑀁 𑀬𑀁𑀓𑀺𑀜𑁆𑀘𑀺 𑀮𑁄𑀓𑁂 𑀯𑀺𑀘𑀺𑀢𑁆𑀢𑀁 𑀲𑀺𑀧𑁆𑀧𑀚𑀸𑀢𑀁 𑀲𑀩𑁆𑀩𑀁 𑀢𑀁 𑀘𑀺𑀢𑁆𑀢𑁂𑀦𑁂𑀯 𑀓𑀭𑀺𑀬𑀢𑀺, 𑀏𑀯𑀁 𑀇𑀫𑀸𑀬 𑀓𑀭𑀡𑀯𑀺𑀘𑀺𑀢𑁆𑀢𑀢𑀸𑀬 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀧𑁆𑀨𑀸𑀤𑀓𑀁 𑀘𑀺𑀢𑁆𑀢𑀫𑁆𑀧𑀺 𑀢𑀣𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀘𑀺𑀦𑁆𑀢𑀺𑀢𑀲𑁆𑀲 𑀯𑀸 𑀅𑀦𑀯𑀲𑁂𑀲𑀲𑁆𑀲 𑀅𑀦𑀺𑀧𑁆𑀨𑀚𑁆𑀚𑀦𑀢𑁄 𑀢𑀢𑁄𑀧𑀺 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀝𑁆𑀞𑀁 𑀯𑁄, 𑀪𑀺𑀓𑁆𑀔𑀯𑁂, 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀦𑁆𑀢𑀺? ‘𑀏𑀯𑀁, 𑀪𑀦𑁆𑀢𑁂’. 𑀢𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦𑁂𑀯 𑀘𑀺𑀦𑁆𑀢𑀺𑀢𑀁. 𑀢𑁂𑀦𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀭𑀡𑁂𑀦 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀁𑀬𑁂𑀯 𑀘𑀺𑀢𑁆𑀢𑀢𑀭’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁦𑁦).

𑀢𑀣𑀸 𑀬𑀤𑁂𑀢𑀁 𑀤𑁂𑀯𑀫𑀦𑀼𑀲𑁆𑀲𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀪𑁂𑀤𑀸𑀲𑀼 𑀕𑀢𑀻𑀲𑀼 𑀓𑀫𑁆𑀫𑀮𑀺𑀗𑁆𑀕𑀲𑀜𑁆𑀜𑀸𑀯𑁄𑀳𑀸𑀭𑀸𑀤𑀺𑀪𑁂𑀤𑀁 𑀅𑀚𑁆𑀛𑀢𑁆𑀢𑀺𑀓𑀁 𑀘𑀺𑀢𑁆𑀢𑀁 𑀢𑀫𑁆𑀧𑀺 𑀘𑀺𑀢𑁆𑀢𑀓𑀢𑀫𑁂𑀯. 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑀜𑁆𑀳𑀺 𑀤𑀸𑀦𑀲𑀻𑀮𑀯𑀺𑀳𑀺𑀁𑀲𑀸𑀲𑀸𑀞𑁂𑀬𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀘𑀺𑀢𑁆𑀢𑀦𑀺𑀧𑁆𑀨𑀸𑀤𑀺𑀢𑀁 𑀓𑀫𑁆𑀫𑀦𑀸𑀦𑀢𑁆𑀢𑀁. 𑀓𑀫𑁆𑀫𑀦𑀸𑀦𑀢𑁆𑀢𑁂𑀦𑁂𑀯 𑀘 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀳𑀢𑁆𑀣𑀧𑀸𑀤𑀓𑀡𑁆𑀡𑀉𑀤𑀭𑀕𑀻𑀯𑀸𑀫𑀼𑀔𑀸𑀤𑀺𑀲𑀡𑁆𑀞𑀸𑀦𑀪𑀺𑀦𑁆𑀦𑀁 𑀮𑀺𑀗𑁆𑀕𑀦𑀸𑀦𑀢𑁆𑀢𑀁. 𑀮𑀺𑀗𑁆𑀕𑀦𑀸𑀦𑀢𑁆𑀢𑀢𑁄 𑀬𑀣𑀸𑀕𑀳𑀺𑀢𑀲𑀡𑁆𑀞𑀸𑀦𑀯𑀲𑁂𑀦 ‘𑀅𑀬𑀁 𑀇𑀢𑁆𑀣𑀻 𑀅𑀬𑀁 𑀧𑀼𑀭𑀺𑀲𑁄’𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀦𑀸𑀦𑀢𑁆𑀢𑀁. 𑀲𑀜𑁆𑀜𑀸𑀦𑀸𑀦𑀢𑁆𑀢𑀢𑁄 𑀲𑀜𑁆𑀜𑀸𑀦𑀼𑀭𑀽𑀧𑁂𑀦 ‘𑀇𑀢𑁆𑀣𑀻’𑀢𑀺 𑀯𑀸 ‘𑀧𑀼𑀭𑀺𑀲𑁄’𑀢𑀺 𑀯𑀸 𑀯𑁄𑀳𑀭𑀦𑁆𑀢𑀸𑀦𑀁 𑀯𑁄𑀳𑀸𑀭𑀦𑀸𑀦𑀢𑁆𑀢𑀁. 𑀯𑁄𑀳𑀸𑀭𑀦𑀸𑀦𑀢𑁆𑀢𑀯𑀲𑁂𑀦 𑀧𑀦 𑀬𑀲𑁆𑀫𑀸 ‘𑀇𑀢𑁆𑀣𑀻 𑀪𑀯𑀺𑀲𑁆𑀲𑀸𑀫𑀺 𑀧𑀼𑀭𑀺𑀲𑁄 𑀪𑀯𑀺𑀲𑁆𑀲𑀸𑀫𑀺, 𑀔𑀢𑁆𑀢𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀩𑁆𑀭𑀸𑀳𑁆𑀫𑀡𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀫𑀸 𑀯𑁄𑀳𑀸𑀭𑀦𑀸𑀦𑀢𑁆𑀢𑀢𑁄 𑀓𑀫𑁆𑀫𑀦𑀸𑀦𑀢𑁆𑀢𑀁. 𑀢𑀁 𑀧𑀦𑁂𑀢𑀁 𑀓𑀫𑁆𑀫𑀦𑀸𑀦𑀢𑁆𑀢𑀁 𑀬𑀣𑀸𑀧𑀢𑁆𑀣𑀺𑀢𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀬𑀲𑁆𑀫𑀸 𑀕𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀢𑀲𑁆𑀫𑀸 𑀓𑀫𑁆𑀫𑀦𑀸𑀦𑀢𑁆𑀢𑀢𑁄 𑀕𑀢𑀺𑀦𑀸𑀦𑀢𑁆𑀢𑀁. 𑀓𑀫𑁆𑀫𑀦𑀸𑀦𑀢𑁆𑀢𑁂𑀦𑁂𑀯 𑀘 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀲𑁆𑀲𑀸 𑀢𑀲𑁆𑀲𑀸 𑀕𑀢𑀺𑀬𑀸 𑀅𑀧𑀸𑀤𑀓𑀤𑁆𑀯𑀺𑀧𑀸𑀤𑀓𑀸𑀤𑀺𑀢𑀸, 𑀢𑀲𑁆𑀲𑀸 𑀢𑀲𑁆𑀲𑀸 𑀉𑀧𑀧𑀢𑁆𑀢𑀺𑀬𑀸 𑀉𑀘𑁆𑀘𑀦𑀻𑀘𑀸𑀤𑀺𑀢𑀸, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀢𑀸, 𑀮𑁄𑀓𑀥𑀫𑁆𑀫𑁂𑀲𑀼 𑀮𑀸𑀪𑀸𑀮𑀸𑀪𑀸𑀤𑀺𑀢𑀸 𑀘 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀤𑁂𑀯𑀫𑀦𑀼𑀲𑁆𑀲𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀪𑁂𑀤𑀸𑀲𑀼 𑀕𑀢𑀻𑀲𑀼 𑀓𑀫𑁆𑀫𑀮𑀺𑀗𑁆𑀕𑀲𑀜𑁆𑀜𑀸𑀯𑁄𑀳𑀸𑀭𑀸𑀤𑀺𑀪𑁂𑀤𑀁 𑀅𑀚𑁆𑀛𑀢𑁆𑀢𑀺𑀓𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦𑁂𑀯 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁆𑀯𑀸𑀬𑀫𑀢𑁆𑀣𑁄 𑀇𑀫𑀲𑁆𑀲 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀫𑁆𑀫𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀯𑀲𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀁 𑀪𑀯𑀢𑀺, 𑀮𑀺𑀗𑁆𑀕𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀯𑀲𑁂𑀦 𑀲𑀜𑁆𑀜𑀸𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀁 𑀪𑀯𑀢𑀺, 𑀲𑀜𑁆𑀜𑀸𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑁄𑀳𑀸𑀭𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀁 𑀪𑀯𑀢𑀺, 𑀯𑁄𑀳𑀸𑀭𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀯𑀲𑁂𑀦 𑀓𑀫𑁆𑀫𑀦𑀸𑀦𑀢𑁆𑀢𑀧𑀼𑀣𑀼𑀢𑁆𑀢𑀧𑁆𑀧𑀪𑁂𑀤𑀯𑀯𑀢𑁆𑀣𑀸𑀦𑀁 𑀪𑀯𑀢𑀺. 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀕𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 𑀅𑀧𑀤𑀸 𑀤𑁆𑀯𑀺𑀧𑀤𑀸 𑀘𑀢𑀼𑀧𑁆𑀧𑀤𑀸 𑀩𑀳𑀼𑀧𑁆𑀧𑀤𑀸, 𑀭𑀽𑀧𑀺𑀦𑁄 𑀅𑀭𑀽𑀧𑀺𑀦𑁄, 𑀲𑀜𑁆𑀜𑀺𑀦𑁄 𑀅𑀲𑀜𑁆𑀜𑀺𑀦𑁄 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄. 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀉𑀧𑀧𑀢𑁆𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 𑀉𑀘𑁆𑀘𑀦𑀻𑀘𑀢𑀸 𑀳𑀻𑀦𑀧𑀡𑀻𑀢𑀢𑀸 𑀲𑀼𑀕𑀢𑀤𑀼𑀕𑁆𑀕𑀢𑀢𑀸. 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸 𑀲𑀼𑀚𑀸𑀢𑀤𑀼𑀚𑁆𑀚𑀸𑀢𑀢𑀸 𑀲𑀼𑀲𑀡𑁆𑀞𑀺𑀢𑀤𑀼𑀲𑁆𑀲𑀡𑁆𑀞𑀺𑀢𑀢𑀸. 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀮𑁄𑀓𑀥𑀫𑁆𑀫𑁂 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 𑀮𑀸𑀪𑀸𑀮𑀸𑀪𑁂 𑀬𑀲𑀸𑀬𑀲𑁂 𑀦𑀺𑀦𑁆𑀤𑀸𑀧𑀲𑀁𑀲𑀸𑀬𑀁 𑀲𑀼𑀔𑀤𑀼𑀓𑁆𑀔𑁂’’𑀢𑀺.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

𑀓𑀫𑁆𑀫𑀢𑁄 𑀮𑀺𑀗𑁆𑀕𑀢𑁄 𑀘𑁂𑀯, 𑀮𑀺𑀗𑁆𑀕𑀲𑀜𑁆𑀜𑀸 𑀧𑀯𑀢𑁆𑀢𑀭𑁂;

𑀲𑀜𑁆𑀜𑀸𑀢𑁄 𑀪𑁂𑀤𑀁 𑀕𑀘𑁆𑀙𑀦𑁆𑀢𑀺, 𑀇𑀢𑁆𑀣𑀸𑀬𑀁 𑀧𑀼𑀭𑀺𑀲𑁄𑀢𑀺 𑀯𑀸.

‘‘𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑁂 𑀮𑁄𑀓𑁄, 𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑁂 𑀧𑀚𑀸;

𑀓𑀫𑁆𑀫𑀦𑀺𑀩𑀦𑁆𑀥𑀦𑀸 𑀲𑀢𑁆𑀢𑀸, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄’’. (𑀫. 𑀦𑀺. 𑁨.𑁪𑁬𑁦; 𑀲𑀼. 𑀦𑀺. 𑁬𑁫𑁯);

𑀓𑀫𑁆𑀫𑁂𑀦 𑀓𑀺𑀢𑁆𑀢𑀺𑀁 𑀮𑀪𑀢𑁂 𑀧𑀲𑀁𑀲𑀁,

𑀓𑀫𑁆𑀫𑁂𑀦 𑀚𑀸𑀦𑀺𑀜𑁆𑀘 𑀯𑀥𑀜𑁆𑀘 𑀩𑀦𑁆𑀥𑀁;

𑀢𑀁 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀯𑀺𑀤𑀺𑀢𑁆𑀯𑀸,

𑀓𑀲𑁆𑀫𑀸 𑀯𑀤𑁂 𑀦𑀢𑁆𑀣𑀺 𑀓𑀫𑁆𑀫𑀦𑁆𑀢𑀺 𑀮𑁄𑀓𑁂. (𑀓𑀣𑀸. 𑁭𑁮𑁫);

‘‘𑀓𑀫𑁆𑀫𑀲𑁆𑀲𑀓𑀸 𑀫𑀸𑀡𑀯 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸; 𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁮𑁯).

𑀏𑀯𑀁 𑀇𑀫𑀸𑀬 𑀓𑀭𑀡𑀘𑀺𑀢𑁆𑀢𑀢𑀸𑀬𑀧𑀺 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀸𑀦𑀺𑀧𑀺 𑀳𑀺 𑀏𑀢𑀸𑀦𑀺 𑀯𑀺𑀘𑀺𑀢𑁆𑀭𑀸𑀦𑀺 𑀘𑀺𑀢𑁆𑀢𑁂𑀦𑁂𑀯 𑀓𑀢𑀸𑀦𑀺. 𑀅𑀮𑀤𑁆𑀥𑁄𑀓𑀸𑀲𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀬𑀁 𑀯𑀸 𑀧𑀦 𑀅𑀯𑀲𑁂𑀲𑀧𑀘𑁆𑀘𑀬𑀯𑀺𑀓𑀮𑀁 𑀢𑀲𑁆𑀲 𑀏𑀓𑀘𑁆𑀘𑀘𑀺𑀢𑁆𑀢𑀓𑀭𑀡𑀸𑀪𑀸𑀯𑀢𑁄 𑀬𑀤𑁂𑀢𑀁 𑀘𑀺𑀢𑁆𑀢𑁂𑀦 𑀓𑀢𑀁 𑀅𑀚𑁆𑀛𑀢𑁆𑀢𑀺𑀓𑀁 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀢𑁄𑀧𑀺 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸… 𑀢𑁂𑀳𑀺𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀧𑀸𑀡𑁂𑀳𑀺 𑀘𑀺𑀢𑁆𑀢𑀁𑀬𑁂𑀯 𑀘𑀺𑀢𑁆𑀢𑀢𑀭’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁦𑁦).

𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑁄𑀓𑀸𑀲𑀓𑀢𑀪𑀽𑀫𑀺𑀮𑀤𑁆𑀥𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀢𑀢𑁆𑀣 𑀲𑀩𑁆𑀩𑀫𑁆𑀧𑀺 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀻𑀲𑀗𑁆𑀔𑀸𑀢𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀅𑀦𑀼𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀉𑀧𑁆𑀧𑀸𑀤𑀸𑀤𑀺𑀢𑁆𑀢𑀬𑀁 𑀅𑀦𑀼𑀧𑁆𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁, 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 (𑀫. 𑀦𑀺. 𑁩.𑁨𑁪𑁮) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀁 𑀅𑀢𑀻𑀢𑀫𑁆𑀧𑀺 𑀲𑀫𑀸𑀦𑀁, 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸, 𑀢𑀣𑀸 𑀓𑀢𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀁 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀽𑀳𑀢𑀁 𑀅𑀓𑀼𑀲𑀮𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀏𑀢𑁆𑀣 𑀘 𑀪𑀽𑀫𑀺𑀬𑀸 𑀪𑀽𑀫𑀺𑀮𑀤𑁆𑀥𑀲𑁆𑀲 𑀘 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀽𑀫𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀉𑀧𑁆𑀧𑀢𑁆𑀢𑀸𑀭𑀳𑀁 𑀓𑀺𑀮𑁂𑀲𑀚𑀸𑀢𑀁. 𑀢𑁂𑀦 𑀳𑁂𑀲𑀸 𑀪𑀽𑀫𑀺 𑀮𑀤𑁆𑀥𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀢𑁂𑀲𑀼 𑀘𑀢𑀽𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀇𑀥 ‘𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁’ 𑀅𑀥𑀺𑀧𑁆𑀧𑁂𑀢𑀁.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀉𑀧𑁆𑀧𑀸𑀤𑀸𑀤𑀺𑀅𑀪𑀺𑀫𑀼𑀔𑀁 𑀧𑀦𑁆𑀦𑀦𑁆𑀢𑀺 𑀉𑀧𑁆𑀧𑀦𑁆𑀦𑀁. ‘𑀉𑀧𑁆𑀧𑀦𑁆𑀦’-𑀲𑀤𑁆𑀤𑁄 𑀧𑀦𑁂𑀲 𑀅𑀢𑀻𑀢𑁂 𑀧𑀝𑀺𑀮𑀤𑁆𑀥𑁂 𑀲𑀫𑀼𑀝𑁆𑀞𑀺𑀢𑁂 𑀅𑀯𑀺𑀓𑁆𑀔𑀫𑁆𑀪𑀺𑀢𑁂 𑀅𑀲𑀫𑀼𑀘𑁆𑀙𑀺𑀦𑁆𑀦𑁂 𑀔𑀡𑀢𑁆𑀢𑀬𑀕𑀢𑁂𑀢𑀺 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 (𑀲𑀁. 𑀦𑀺. 𑁨.𑁧𑁪𑁩) 𑀏𑀢𑁆𑀣 𑀅𑀢𑀻𑀢𑁂 𑀆𑀕𑀢𑁄. ‘‘𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁪𑁬𑁧) 𑀏𑀢𑁆𑀣 𑀧𑀝𑀺𑀮𑀤𑁆𑀥𑁂. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀦𑁆𑀦𑀁 𑀫𑀳𑀸𑀫𑁂𑀖𑀁 𑀢𑀫𑁂𑀦𑀁 𑀫𑀳𑀸𑀯𑀸𑀢𑁄 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁫𑁭) 𑀏𑀢𑁆𑀣 𑀲𑀫𑀼𑀝𑁆𑀞𑀺𑀢𑁂. ‘‘𑀉𑀧𑁆𑀧𑀦𑁆𑀦𑀁 𑀕𑀫𑀺𑀬𑀘𑀺𑀢𑁆𑀢𑀁 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀦𑀻𑀬𑀁 (𑀅. 𑀦𑀺. 𑁫.𑁧𑁬𑁦; 𑀧𑀭𑀺. 𑁩𑁨𑁫); 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑁧𑁬𑁫) 𑀏𑀢𑁆𑀣 𑀅𑀯𑀺𑀓𑁆𑀔𑀫𑁆𑀪𑀺𑀢𑁂. ‘‘𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁫𑁬-𑁧𑁫𑁭) 𑀏𑀢𑁆𑀣 𑀅𑀲𑀫𑀼𑀘𑁆𑀙𑀺𑀦𑁆𑀦𑁂. ‘‘𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁮𑁧) 𑀏𑀢𑁆𑀣 𑀔𑀡𑀢𑁆𑀢𑀬𑀕𑀢𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀔𑀡𑀢𑁆𑀢𑀬𑀕𑀢𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 ‘𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’𑀢𑀺 𑀏𑀢𑁆𑀣 𑀔𑀡𑀢𑁆𑀢𑀬𑀕𑀢𑀁 𑀳𑁄𑀢𑀺, 𑀯𑀢𑁆𑀢𑀫𑀸𑀦𑀁 𑀳𑁄𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀘𑁂𑀢𑀁 𑀤𑁂𑀲𑀦𑀸𑀲𑀻𑀲𑀫𑁂𑀯. 𑀦 𑀧𑀦 𑀘𑀺𑀢𑁆𑀢𑀁 𑀏𑀓𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀬𑀣𑀸 𑀭𑀸𑀚𑀸 𑀆𑀕𑀢𑁄𑀢𑀺 𑀯𑀼𑀢𑁆𑀢𑁂 𑀦 𑀧𑀭𑀺𑀲𑀁 𑀧𑀳𑀸𑀬 𑀏𑀓𑀓𑁄𑀯 𑀆𑀕𑀢𑁄, 𑀭𑀸𑀚𑀧𑀭𑀺𑀲𑀸𑀬 𑀧𑀦 𑀲𑀤𑁆𑀥𑀺𑀁𑀬𑁂𑀯 𑀆𑀕𑀢𑁄𑀢𑀺 𑀧𑀜𑁆𑀜𑀸𑀬𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀦 ‘‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀮𑁄𑀓𑀺𑀬𑀥𑀫𑁆𑀫𑀜𑁆𑀳𑀺 𑀧𑀢𑁆𑀯𑀸 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀘𑀺𑀢𑁆𑀢𑀁 𑀥𑀼𑀭𑀁 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀢𑁆𑀯𑀸 𑀧𑀜𑁆𑀜𑀸 𑀚𑁂𑀝𑁆𑀞𑀺𑀓𑀸 𑀧𑀜𑁆𑀜𑀸 𑀥𑀼𑀭𑀸 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸. 𑀢𑁂𑀦𑁂𑀯 𑀪𑀕𑀯𑀸 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 ‘𑀓𑀺𑀁𑀨𑀲𑁆𑀲𑁄𑀲𑀺, 𑀓𑀺𑀁𑀯𑁂𑀤𑀦𑁄𑀲𑀺, 𑀓𑀺𑀁𑀲𑀜𑁆𑀜𑁄𑀲𑀺, 𑀓𑀺𑀁𑀘𑁂𑀢𑀦𑁄𑀲𑀻’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺 𑀘𑀺𑀢𑁆𑀢𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺. ‘‘𑀅𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀳𑀁 𑀪𑀕𑀯𑀸’’𑀢𑀺 𑀘 𑀯𑀼𑀢𑁆𑀢𑁂 ‘𑀅𑀦𑀸𑀧𑀢𑁆𑀢𑀺 𑀅𑀣𑁂𑀬𑁆𑀬𑀨𑀲𑁆𑀲𑀲𑁆𑀲𑀸’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀤𑀢𑀺.

𑀦 𑀓𑁂𑀯𑀮𑀜𑁆𑀘 𑀯𑀺𑀦𑀬𑀧𑀭𑀺𑀬𑀸𑀬𑀁, 𑀅𑀜𑁆𑀜𑀫𑁆𑀧𑀺 𑀮𑁄𑀓𑀺𑀬𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑁄 𑀘𑀺𑀢𑁆𑀢𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀬𑀣𑀸𑀳 𑁋 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺’’ (𑀅. 𑀦𑀺. 𑁧.𑁫𑁬).

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀁.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’. (𑀥. 𑀧. 𑁧,𑁨);

‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀺;

𑀘𑀺𑀢𑁆𑀢𑀲𑁆𑀲 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’. (𑀲𑀁. 𑀦𑀺. 𑁧.𑁬𑁨);

‘‘𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀺’’ (𑀲𑀁. 𑀦𑀺. 𑁩.𑁧𑁦𑁦);

‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁’’ (𑀅. 𑀦𑀺. 𑁧.𑁪𑁯);

‘‘𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀅𑀭𑀓𑁆𑀔𑀺𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺; 𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀭𑀓𑁆𑀔𑀺𑀢𑁂…𑀧𑁂… 𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀩𑁆𑀬𑀸𑀧𑀦𑁆𑀦𑁂…𑀧𑁂… 𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀅𑀩𑁆𑀬𑀸𑀧𑀦𑁆𑀦𑁂…𑀧𑁂… 𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀅𑀯𑀲𑁆𑀲𑀼𑀢𑁂…𑀧𑁂… 𑀘𑀺𑀢𑁆𑀢𑁂, 𑀕𑀳𑀧𑀢𑀺, 𑀅𑀦𑀯𑀲𑁆𑀲𑀼𑀢𑁂 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀺, 𑀫𑀦𑁄𑀓𑀫𑁆𑀫𑀫𑁆𑀧𑀺 𑀅𑀦𑀯𑀲𑁆𑀲𑀼𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁩.𑁧𑁧𑁦).

𑀏𑀯𑀁 𑀮𑁄𑀓𑀺𑀬𑀥𑀫𑁆𑀫𑀁 𑀧𑀢𑁆𑀯𑀸 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀳𑁄𑀢𑀺, 𑀘𑀺𑀢𑁆𑀢𑀁 𑀥𑀼𑀭𑀁 𑀳𑁄𑀢𑀺, 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀼 𑀧𑀦 𑀲𑀼𑀢𑁆𑀢𑁂𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀲𑀩𑁆𑀩𑀸𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀧𑀦 ‘𑀓𑀢𑀭𑀨𑀲𑁆𑀲𑀁 𑀅𑀥𑀺𑀕𑀢𑁄𑀲𑀺, 𑀓𑀢𑀭𑀯𑁂𑀤𑀦𑀁 𑀓𑀢𑀭𑀲𑀜𑁆𑀜𑀁 𑀓𑀢𑀭𑀘𑁂𑀢𑀦𑀁 𑀓𑀢𑀭𑀘𑀺𑀢𑁆𑀢’𑀦𑁆𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸, ‘𑀓𑀢𑀭𑀧𑀜𑁆𑀜𑀁 𑀢𑁆𑀯𑀁 𑀪𑀺𑀓𑁆𑀔𑀼 𑀅𑀥𑀺𑀕𑀢𑁄’𑀲𑀺, ‘𑀓𑀺𑀁 𑀧𑀞𑀫𑀁 𑀫𑀕𑁆𑀕𑀧𑀜𑁆𑀜𑀁, 𑀉𑀤𑀸𑀳𑀼 𑀤𑀼𑀢𑀺𑀬𑀁…𑀧𑁂… 𑀢𑀢𑀺𑀬𑀁…𑀧𑁂… 𑀘𑀢𑀼𑀢𑁆𑀣𑀁 𑀫𑀕𑁆𑀕𑀧𑀜𑁆𑀜𑀁 𑀅𑀥𑀺𑀕𑀢𑁄’𑀢𑀺 𑀧𑀜𑁆𑀜𑀁 𑀚𑁂𑀝𑁆𑀞𑀺𑀓𑀁 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀧𑀜𑁆𑀜𑀼𑀢𑁆𑀢𑀭𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀧𑀜𑁆𑀜𑀸 𑀧𑀦 𑀓𑀺𑀫𑀢𑁆𑀣𑀺𑀬𑀸 (𑀫. 𑀦𑀺. 𑁧.𑁪𑁫𑁧)? ‘‘𑀧𑀜𑁆𑀜𑀯𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀤𑀦𑁆𑀯𑀬𑀸 𑀲𑀤𑁆𑀥𑀸 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑀁 𑀯𑀻𑀭𑀺𑀬𑀁 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑀸 𑀲𑀢𑀺 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑁄 𑀲𑀫𑀸𑀥𑀺 𑀲𑀡𑁆𑀞𑀸𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁫) 𑀏𑀯𑀫𑀸𑀤𑀻𑀦𑀺 𑀧𑀦𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀇𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀢𑁆𑀯𑀸 𑀧𑀜𑁆𑀜𑀸 𑀚𑁂𑀝𑁆𑀞𑀺𑀓𑀸 𑀳𑁄𑀢𑀺 𑀧𑀜𑁆𑀜𑀸 𑀥𑀼𑀭𑀸 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀮𑁄𑀓𑀺𑀬𑀤𑁂𑀲𑀦𑀸. 𑀢𑀲𑁆𑀫𑀸 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀆𑀳.

𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺 𑀲𑀸𑀢𑀫𑀥𑀼𑀭𑀯𑁂𑀤𑀬𑀺𑀢𑀲𑀗𑁆𑀔𑀸𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑀁. 𑀅𑀬𑀁 𑀧𑀦 ‘𑀲𑀳𑀕𑀢’-𑀲𑀤𑁆𑀤𑁄 𑀢𑀩𑁆𑀪𑀸𑀯𑁂 𑀯𑁄𑀓𑀺𑀡𑁆𑀡𑁂 𑀦𑀺𑀲𑁆𑀲𑀬𑁂 𑀆𑀭𑀫𑁆𑀫𑀡𑁂 𑀲𑀁𑀲𑀝𑁆𑀞𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 (𑀯𑀺𑀪. 𑁨𑁦𑁩) 𑀢𑀩𑁆𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑁄; 𑀦𑀦𑁆𑀤𑀺𑀭𑀸𑀕𑀪𑀽𑀢𑀸𑀢𑀺 𑀅𑀢𑁆𑀣𑁄. ‘‘𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀓𑁄𑀲𑀚𑁆𑀚𑀲𑀳𑀕𑀢𑀸 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁫.𑁮𑁩𑁨) 𑀯𑁄𑀓𑀺𑀡𑁆𑀡𑁂 𑀯𑁂𑀤𑀺𑀢𑀩𑁆𑀩𑁄; 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑁄𑀲𑀚𑁆𑀚𑁂𑀦 𑀯𑁄𑀓𑀺𑀡𑁆𑀡𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. ‘‘𑀅𑀝𑁆𑀞𑀺𑀓𑀲𑀜𑁆𑀜𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁮) 𑀦𑀺𑀲𑁆𑀲𑀬𑁂 𑀯𑁂𑀤𑀺𑀢𑀩𑁆𑀩𑁄; 𑀅𑀝𑁆𑀞𑀺𑀓𑀲𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀺𑀓𑀲𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. ‘‘𑀮𑀸𑀪𑀻 𑀳𑁄𑀢𑀺 𑀭𑀽𑀧𑀲𑀳𑀕𑀢𑀸𑀦𑀁 𑀯𑀸 𑀲𑀫𑀸𑀧𑀢𑁆𑀢𑀻𑀦𑀁 𑀅𑀭𑀽𑀧𑀲𑀳𑀕𑀢𑀸𑀦𑀁 𑀯𑀸’’𑀢𑀺 (𑀧𑀼. 𑀧. 𑁩-𑁫) 𑀆𑀭𑀫𑁆𑀫𑀡𑁂; 𑀯𑁂𑀤𑀺𑀢𑀩𑁆𑀩𑁄 𑀭𑀽𑀧𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁮) 𑀲𑀁𑀲𑀝𑁆𑀞𑁂. 𑀇𑀫𑀲𑁆𑀫𑀺𑀫𑁆𑀧𑀺 𑀧𑀤𑁂 𑀅𑀬𑀫𑁂𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄𑀫𑀦𑀲𑁆𑀲𑀲𑀁𑀲𑀝𑁆𑀞𑀜𑁆𑀳𑀺 𑀇𑀥 𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺 𑀯𑀼𑀢𑁆𑀢𑀁.

‘𑀲𑀁𑀲𑀝𑁆𑀞’-𑀲𑀤𑁆𑀤𑁄𑀧𑀺 𑀘𑁂𑀲 𑀲𑀤𑀺𑀲𑁂 𑀅𑀯𑀲𑁆𑀲𑀼𑀢𑁂 𑀫𑀺𑀢𑁆𑀢𑀲𑀦𑁆𑀣𑀯𑁂 𑀲𑀳𑀚𑀸𑀢𑁂𑀢𑀺 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀓𑀺𑀲𑁂 𑀣𑀽𑀮𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀲𑀁𑀲𑀝𑁆𑀞𑀸 𑀬𑁄𑀚𑀺𑀢𑀸 𑀳𑀬𑀸’’𑀢𑀺 (𑀚𑀸. 𑁨.𑁨𑁨.𑁭𑁦) 𑀏𑀢𑁆𑀣 𑀲𑀤𑀺𑀲𑁂 𑀆𑀕𑀢𑁄. ‘‘𑀲𑀁𑀲𑀝𑁆𑀞𑀸𑀯 𑀢𑀼𑀫𑁆𑀳𑁂 𑀅𑀬𑁆𑀬𑁂 𑀯𑀺𑀳𑀭𑀣𑀸’’𑀢𑀺 (𑀧𑀸𑀘𑀺. 𑁭𑁨𑁭) 𑀅𑀯𑀲𑁆𑀲𑀼𑀢𑁂. ‘‘𑀕𑀺𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀻’’𑀢𑀺 (𑀲𑀁. 𑀦𑀺. 𑁩.𑁩) 𑀫𑀺𑀢𑁆𑀢𑀲𑀦𑁆𑀣𑀯𑁂. ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀲𑀳𑀚𑀸𑀢𑁂. 𑀇𑀥𑀸𑀧𑀺 𑀲𑀳𑀚𑀸𑀢𑁂 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 ‘𑀲𑀳𑀕𑀢𑀁’ 𑀅𑀲𑀳𑀚𑀸𑀢𑀁 𑀅𑀲𑀁𑀲𑀝𑁆𑀞𑀁 𑀅𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀲𑀳𑀚𑀸𑀢𑀁 𑀧𑀦 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺𑀧𑀺, 𑀦 𑀳𑁄𑀢𑀺𑀧𑀺. 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀏𑀓𑀢𑁄 𑀚𑀸𑀢𑁂𑀲𑀼 𑀭𑀽𑀧𑀁 𑀅𑀭𑀽𑀧𑁂𑀦 𑀲𑀳𑀚𑀸𑀢𑀁 𑀳𑁄𑀢𑀺, 𑀦 𑀲𑀁𑀲𑀝𑁆𑀞𑀁, 𑀦 𑀲𑀫𑁆𑀧𑀬𑀼𑀢𑁆𑀢𑀁; 𑀢𑀣𑀸 𑀅𑀭𑀽𑀧𑀁 𑀭𑀽𑀧𑁂𑀦; 𑀭𑀽𑀧𑀜𑁆𑀘 𑀭𑀽𑀧𑁂𑀦; 𑀅𑀭𑀽𑀧𑀁 𑀧𑀦 𑀅𑀭𑀽𑀧𑁂𑀦 𑀲𑀤𑁆𑀥𑀺𑀁 𑀦𑀺𑀬𑀫𑀢𑁄𑀯 𑀲𑀳𑀕𑀢𑀁 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘𑀲𑁄𑀫𑀦𑀲𑁆𑀲𑀲𑀳𑀕𑀢’𑀦𑁆𑀢𑀺.

𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀫𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀢𑀁 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬 𑀯𑁂𑀤𑀦𑀸𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀲𑁆𑀫𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦𑁂𑀢𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀘𑁂𑀲. 𑀅𑀭𑀽𑀧𑁂 𑀧𑀦 𑀯𑀺𑀦𑀸𑀧𑀺 𑀏𑀓𑀯𑀢𑁆𑀣𑀼𑀓𑀪𑀸𑀯𑀁 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀺.

𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁? 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀢𑀺𑀳𑁂𑀢𑀼𑀓𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀁 𑀓𑀣𑀺𑀢𑀁. ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀳𑀺 𑀅𑀦𑀺𑀬𑀫𑀺𑀢𑀧𑀼𑀘𑁆𑀙𑀸𑀬 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀕𑀳𑀺𑀢𑀁. ‘𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’𑀢𑀺 𑀯𑀘𑀦𑁂𑀦 𑀧𑀦 𑀢𑁂𑀪𑀽𑀫𑀓𑀁 𑀓𑀼𑀲𑀮𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸, 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁂𑀯 𑀕𑀳𑀺𑀢𑀁. ‘𑀲𑁄𑀫𑀦𑀲𑁆𑀲𑀲𑀳𑀕𑀢’𑀦𑁆𑀢𑀺 𑀯𑀘𑀦𑁂𑀦 𑀢𑀢𑁄 𑀘𑀢𑀼𑀩𑁆𑀩𑀺𑀥𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁂𑀯 𑀕𑀳𑀺𑀢𑀁. ‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢’𑀦𑁆𑀢𑀺 𑀯𑀘𑀦𑁂𑀦 𑀢𑀢𑁄 𑀤𑀼𑀯𑀺𑀥𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑁆𑀯𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀕𑀳𑀺𑀢𑀸𑀦𑀺. 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀧𑀦 𑀅𑀦𑀸𑀪𑀝𑁆𑀞𑀢𑀸𑀬𑁂𑀯 𑀦 𑀕𑀳𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀦 𑀕𑀳𑀺𑀢𑁄, 𑀧𑀭𑀢𑁄 𑀧𑀦 ‘𑀲𑀲𑀗𑁆𑀔𑀸𑀭𑁂𑀦𑀸’𑀢𑀺 𑀯𑀘𑀦𑀢𑁄 𑀇𑀥 ‘𑀅𑀲𑀗𑁆𑀔𑀸𑀭𑁂𑀦𑀸’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀆𑀤𑀺𑀢𑁄𑀯 𑀇𑀤𑀁 𑀫𑀳𑀸𑀘𑀺𑀢𑁆𑀢𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀦𑀺𑀬𑀫𑁂𑀢𑁆𑀯𑀸𑀯 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀏𑀯𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀢𑀫𑁂𑀯 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀢𑁄 𑀤𑀲𑁆𑀲𑁂𑀢𑀼𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀳𑀺 𑀅𑀭𑀽𑀧𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀯𑀢𑁆𑀣𑀼𑀦𑀸 𑀯𑀸 𑀤𑀲𑁆𑀲𑁂𑀢𑀺, 𑀆𑀭𑀫𑁆𑀫𑀡𑁂𑀦 𑀯𑀸, 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺 𑀯𑀸, 𑀲𑀭𑀲𑀪𑀸𑀯𑁂𑀦 𑀯𑀸. ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄; 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀳𑀺 𑀯𑀢𑁆𑀣𑀼𑀦𑀸 𑀅𑀭𑀽𑀧𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. ‘‘𑀭𑀽𑀧𑀲𑀜𑁆𑀜𑀸…𑀧𑁂… 𑀥𑀫𑁆𑀫𑀲𑀜𑁆𑀜𑀸, 𑀭𑀽𑀧𑀲𑀜𑁆𑀘𑁂𑀢𑀦𑀸…𑀧𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸’’𑀢𑀺𑀆𑀤𑀻𑀲𑀼 𑀆𑀭𑀫𑁆𑀫𑀡𑁂𑀦. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁬𑁦) 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧) 𑀲𑀭𑀲𑀪𑀸𑀯𑁂𑀦 𑀅𑀭𑀽𑀧𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀆𑀭𑀫𑁆𑀫𑀡𑁂𑀦 𑀤𑀲𑁆𑀲𑁂𑀦𑁆𑀢𑁄 ‘𑀭𑀽𑀧𑀸𑀭𑀫𑁆𑀫𑀡𑀁’ 𑀯𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀫𑁂𑀯 𑀭𑀽𑀧𑀸𑀭𑀫𑁆𑀫𑀡𑀁. 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀲𑀤𑁆𑀤𑁄𑀯 𑀲𑀤𑁆𑀤𑀸𑀭𑀫𑁆𑀫𑀡𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀕𑀦𑁆𑀥𑁄𑀯 𑀕𑀦𑁆𑀥𑀸𑀭𑀫𑁆𑀫𑀡𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀭𑀲𑁄𑀯 𑀭𑀲𑀸𑀭𑀫𑁆𑀫𑀡𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀨𑁄𑀝𑁆𑀞𑀩𑁆𑀩𑀫𑁂𑀯 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁. 𑀏𑀓𑀲𑀫𑀼𑀝𑁆𑀞𑀸𑀦𑀸 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸 𑀢𑀺𑀲𑀫𑀼𑀝𑁆𑀞𑀸𑀦𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸, 𑀢𑀣𑀸 𑀦𑀯𑀢𑁆𑀢𑀩𑁆𑀩𑀸 𑀘, 𑀯𑀼𑀢𑁆𑀢𑀸𑀯𑀲𑁂𑀲𑀸 𑀘𑀺𑀢𑁆𑀢𑀕𑁄𑀘𑀭𑀲𑀗𑁆𑀔𑀸𑀢𑀸 𑀥𑀫𑁆𑀫𑀸𑀬𑁂𑀯 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀬𑁂 𑀧𑀦 𑀅𑀦𑀸𑀧𑀸𑀣𑀕𑀢𑀸 𑀭𑀽𑀧𑀸𑀤𑀬𑁄𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀫𑀺𑀘𑁆𑀘𑁂𑀯 𑀯𑀤𑀦𑁆𑀢𑀺 𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀇𑀫𑁂𑀲𑀁 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀸𑀯𑀺𑀲𑀬𑀸𑀦𑀁 𑀦𑀸𑀦𑀸𑀕𑁄𑀘𑀭𑀸𑀦𑀁 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀫𑀦𑁄 𑀧𑀝𑀺𑀲𑀭𑀡𑀁 𑀫𑀦𑁄 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁫).

𑀏𑀢𑁂𑀲𑀜𑁆𑀳𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀕𑁄𑀘𑀭𑀯𑀺𑀲𑀬𑁄 𑀦𑀸𑀫. 𑀢𑀸𑀦𑀺 𑀫𑀦𑁂𑀦 𑀧𑀘𑁆𑀘𑀦𑀼𑀪𑀯𑀺𑀬𑀫𑀸𑀦𑀸𑀦𑀺𑀧𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺𑀬𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀤𑀻𑀦𑀜𑁆𑀘 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑁆𑀢𑀸𑀧𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀅𑀦𑀸𑀧𑀸𑀣𑀕𑀢𑀸𑀦𑁂𑀯 𑀳𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀺, 𑀦 𑀘 𑀢𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀭𑀽𑀧𑀸𑀭𑀫𑁆𑀫𑀡𑀜𑁆𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺; 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀳𑀺 𑀲𑀓𑀼𑀡𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀕𑁆𑀕𑁂 𑀦𑀺𑀮𑀻𑀬𑀫𑀸𑀦𑁄𑀯 𑀭𑀼𑀓𑁆𑀔𑀲𑀸𑀔𑀜𑁆𑀘 𑀖𑀝𑁆𑀝𑁂𑀢𑀺, 𑀙𑀸𑀬𑀸 𑀘𑀲𑁆𑀲 𑀧𑀣𑀯𑀺𑀬𑀁 𑀧𑀝𑀺𑀳𑀜𑁆𑀜𑀢𑀺 𑀲𑀸𑀔𑀸𑀖𑀝𑁆𑀝𑀦𑀙𑀸𑀬𑀸𑀨𑀭𑀡𑀸𑀦𑀺 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂𑀬𑁂𑀯 𑀪𑀯𑀦𑁆𑀢𑀺, 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀖𑀝𑁆𑀝𑀦𑀜𑁆𑀘 𑀪𑀯𑀗𑁆𑀕𑀘𑀮𑀦𑀲𑀫𑀢𑁆𑀣𑀢𑀸𑀬 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀕𑀫𑀦𑀜𑁆𑀘 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂𑀬𑁂𑀯 𑀳𑁄𑀢𑀺. 𑀢𑀢𑁄 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀅𑀦𑀦𑁆𑀢𑀭𑀸 𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀇𑀤𑀁 𑀫𑀳𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀧𑀦 𑀧𑀲𑀸𑀤𑀖𑀝𑁆𑀝𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀓𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀖𑀸𑀬𑀺𑀢𑀲𑀸𑀬𑀺𑀢𑀨𑀼𑀝𑁆𑀞𑀯𑀲𑁂𑀦𑁂𑀯 𑀏𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀓𑀢𑀲𑀼𑀥𑀸𑀓𑀫𑁆𑀫𑀁 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀺𑀯𑀡𑁆𑀡𑀯𑀺𑀘𑀺𑀢𑁆𑀢𑀁 𑀧𑀕𑁆𑀕𑀳𑀺𑀢𑀦𑀸𑀦𑀧𑁆𑀧𑀓𑀸𑀭𑀥𑀚𑀧𑀝𑀸𑀓𑀁 𑀫𑀸𑀮𑀸𑀤𑀸𑀫𑀯𑀺𑀦𑀤𑁆𑀥𑀁 𑀤𑀻𑀧𑀫𑀸𑀮𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀢𑀺𑀫𑀦𑁄𑀭𑀫𑀸𑀬 𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀳𑀸𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁄𑀴𑀲𑀲𑀼 𑀧𑀸𑀤𑀧𑀺𑀝𑁆𑀞𑀺𑀓𑀸𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀉𑀮𑁆𑀮𑁄𑀓𑁂𑀦𑁆𑀢𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀏𑀯𑀁 𑀘𑁂𑀢𑀺𑀬𑀁 𑀧𑀲𑁆𑀲𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀢𑀲𑁆𑀲 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀆𑀯𑀚𑁆𑀚𑀫𑀸𑀦𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀳𑀸𑀘𑁂𑀢𑀺𑀬𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑁂𑀢𑀺𑀬𑀯𑀦𑁆𑀤𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀏𑀯𑀁 𑀢𑀸𑀯 𑀤𑀺𑀝𑁆𑀞𑀯𑀲𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺.

𑀫𑀥𑀼𑀭𑁂𑀦 𑀧𑀦 𑀲𑀭𑁂𑀦 𑀥𑀫𑁆𑀫𑀓𑀣𑀺𑀓𑀲𑁆𑀲 𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲, 𑀲𑀭𑀪𑀸𑀡𑀓𑀲𑁆𑀲 𑀯𑀸 𑀲𑀭𑁂𑀦 𑀪𑀡𑀦𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀻𑀤𑀺𑀢𑁆𑀯𑀸 𑀆𑀯𑀚𑁆𑀚𑀫𑀸𑀦𑀲𑁆𑀲 𑀥𑀫𑁆𑀫𑀓𑀣𑀸 𑀯𑀸 𑀲𑀭𑀪𑀜𑁆𑀜𑀁 𑀯𑀸 𑀲𑁄𑀢𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀁 𑀯𑀺𑀬 𑀳𑁄𑀢𑀺, 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀲𑀼𑀡𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀏𑀯𑀁 𑀲𑀼𑀢𑀯𑀲𑁂𑀦 𑀲𑀤𑁆𑀤𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺.

𑀲𑀼𑀕𑀦𑁆𑀥𑀁 𑀧𑀦 𑀕𑀦𑁆𑀥𑀁 𑀯𑀸 𑀫𑀸𑀮𑀁 𑀯𑀸 𑀮𑀪𑀺𑀢𑁆𑀯𑀸 𑀆𑀲𑀦𑁂 𑀯𑀸 𑀘𑁂𑀢𑀺𑀬𑁂 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑁂𑀦 𑀘𑀺𑀢𑁆𑀢𑁂𑀦 𑀧𑀽𑀚𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀻𑀤𑀺𑀢𑁆𑀯𑀸 𑀆𑀯𑀚𑁆𑀚𑀫𑀸𑀦𑀲𑁆𑀲 𑀢𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀖𑀸𑀦𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀁 𑀯𑀺𑀬 𑀳𑁄𑀢𑀺, 𑀧𑀽𑀚𑀸𑀓𑀭𑀡𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀏𑀯𑀁 𑀖𑀸𑀬𑀺𑀢𑀯𑀲𑁂𑀦 𑀕𑀦𑁆𑀥𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺.

𑀧𑀡𑀻𑀢𑀁 𑀧𑀦 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀤𑁆𑀭𑀽𑀲𑀓𑀸𑀤𑀺𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 ‘𑀅𑀲𑀼𑀓𑀓𑀸𑀮𑁂 𑀧𑀡𑀻𑀢𑀁 𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢’𑀦𑁆𑀢𑀺 𑀆𑀯𑀚𑁆𑀚𑀫𑀸𑀦𑀲𑁆𑀲 𑀢𑀁 𑀭𑀲𑀸𑀭𑀫𑁆𑀫𑀡𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀁 𑀯𑀺𑀬 𑀳𑁄𑀢𑀺, 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀏𑀯𑀁 𑀲𑀸𑀬𑀺𑀢𑀯𑀲𑁂𑀦 𑀭𑀲𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺.

𑀫𑀼𑀤𑀼𑀓𑀁 𑀧𑀦 𑀲𑀼𑀔𑀲𑀫𑁆𑀨𑀲𑁆𑀲𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀢𑁆𑀣𑀭𑀡𑀧𑀸𑀧𑀼𑀭𑀡𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀼𑀓𑁆𑀔𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 ‘𑀅𑀲𑀼𑀓𑀓𑀸𑀮𑁂 𑀫𑁂 𑀫𑀼𑀤𑀼𑀓𑀁 𑀫𑀜𑁆𑀘𑀧𑀻𑀞𑀁 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀁 𑀧𑀭𑀺𑀪𑀼𑀢𑁆𑀢’𑀦𑁆𑀢𑀺 𑀆𑀯𑀚𑁆𑀚𑀫𑀸𑀦𑀲𑁆𑀲 𑀢𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀓𑀸𑀬𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀁 𑀯𑀺𑀬 𑀳𑁄𑀢𑀺. 𑀲𑀼𑀔𑀲𑀫𑁆𑀨𑀲𑁆𑀲𑀁 𑀯𑁂𑀤𑀬𑀺𑀢𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀏𑀯𑀁 𑀨𑀼𑀝𑁆𑀞𑀯𑀲𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀏𑀯𑀁 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀧𑀲𑀸𑀤𑀖𑀝𑁆𑀝𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀓𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀖𑀸𑀬𑀺𑀢𑀲𑀸𑀬𑀺𑀢𑀨𑀼𑀝𑁆𑀞𑀯𑀲𑁂𑀦𑁂𑀯 𑀏𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀤𑀻𑀦𑀁 𑀯𑀲𑁂𑀦 𑀆𑀧𑀸𑀣𑀕𑀫𑀦𑁂 𑀅𑀬𑀫𑀧𑀭𑁄𑀧𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑀳𑁄𑀢𑀺. 𑀤𑀺𑀝𑁆𑀞𑀁 𑀲𑀼𑀢𑀁 𑀉𑀪𑀬𑀲𑀫𑁆𑀩𑀦𑁆𑀥𑀦𑁆𑀢𑀺 𑀇𑀫𑁂 𑀢𑀸𑀯 𑀤𑀺𑀝𑁆𑀞𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 ‘𑀤𑀺𑀝𑁆𑀞𑀁’ 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀕𑀳𑀺𑀢𑀧𑀼𑀩𑁆𑀩𑀁. ‘𑀲𑀼𑀢’𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀤𑀺𑀲𑁆𑀯𑀸 𑀅𑀦𑀼𑀲𑁆𑀲𑀯𑀯𑀲𑁂𑀦 𑀕𑀳𑀺𑀢𑀸 𑀭𑀽𑀧𑀸𑀤𑀬𑁄𑀯. 𑀢𑁂𑀳𑀺 𑀤𑁆𑀯𑀻𑀳𑀺𑀧𑀺 𑀲𑀫𑁆𑀩𑀦𑁆𑀥𑀁 ‘𑀉𑀪𑀬𑀲𑀫𑁆𑀩𑀦𑁆𑀥𑀁’ 𑀦𑀸𑀫. 𑀇𑀢𑀺 𑀇𑀫𑁂𑀲𑀫𑁆𑀧𑀺 𑀤𑀺𑀝𑁆𑀞𑀸𑀤𑀻𑀦𑀁 𑀯𑀲𑁂𑀦 𑀏𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀤𑀺𑀝𑁆𑀞𑀯𑀲𑁂𑀦 𑀢𑀸𑀯 𑀆𑀧𑀸𑀣𑀕𑀫𑀦𑀁 𑀳𑁂𑀝𑁆𑀞𑀸 𑀧𑀜𑁆𑀘𑀳𑀺 𑀦𑀬𑁂𑀳𑀺 𑀯𑀼𑀢𑁆𑀢𑀫𑁂𑀯.

𑀏𑀓𑀘𑁆𑀘𑁄 𑀧𑀦 𑀲𑀼𑀡𑀸𑀢𑀺 𑁋 ‘𑀪𑀕𑀯𑀢𑁄 𑀧𑀼𑀜𑁆𑀜𑀸𑀢𑀺𑀲𑀬𑀦𑀺𑀩𑁆𑀩𑀢𑁆𑀢𑀁 𑀏𑀯𑀭𑀽𑀧𑀁 𑀦𑀸𑀫 𑀭𑀽𑀧𑀁, 𑀅𑀢𑀺𑀫𑀥𑀼𑀭𑁄 𑀲𑀤𑁆𑀤𑁄, 𑀓𑀺𑀲𑁆𑀫𑀺𑀜𑁆𑀘𑀺 𑀧𑀤𑁂𑀲𑁂 𑀓𑁂𑀲𑀜𑁆𑀘𑀺 𑀧𑀼𑀧𑁆𑀨𑀸𑀦𑀁 𑀅𑀢𑀺𑀫𑀦𑀼𑀜𑁆𑀜𑁄 𑀕𑀦𑁆𑀥𑁄, 𑀓𑁂𑀲𑀜𑁆𑀘𑀺 𑀨𑀮𑀸𑀦𑀁 𑀅𑀢𑀺𑀫𑀥𑀼𑀭𑁄 𑀭𑀲𑁄, 𑀓𑁂𑀲𑀜𑁆𑀘𑀺 𑀧𑀸𑀯𑀼𑀭𑀡𑀸𑀤𑀻𑀦𑀁 𑀅𑀢𑀺𑀲𑀼𑀔𑁄 𑀲𑀫𑁆𑀨𑀲𑁆𑀲𑁄’𑀢𑀺. 𑀢𑀲𑁆𑀲, 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀖𑀝𑁆𑀝𑀦𑀁 𑀯𑀺𑀦𑀸, 𑀲𑀼𑀢𑀫𑀢𑁆𑀢𑀸𑀦𑁂𑀯 𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀅𑀣𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀢𑀲𑁆𑀫𑀺𑀁 𑀭𑀽𑀧𑁂 𑀯𑀸 𑀲𑀤𑁆𑀤𑁂 𑀯𑀸 𑀧𑀲𑀸𑀤𑀯𑀲𑁂𑀦 𑀕𑀦𑁆𑀥𑀸𑀤𑀻𑀲𑀼 𑀅𑀭𑀺𑀬𑀸𑀦𑀁 𑀤𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀅𑀜𑁆𑀜𑁂𑀳𑀺 𑀤𑀺𑀦𑁆𑀦𑁂𑀲𑀼 𑀅𑀦𑀼𑀫𑁄𑀤𑀦𑀸𑀯𑀲𑁂𑀦 𑀯𑀸 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀼𑀢𑀯𑀲𑁂𑀦 𑀏𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺.

𑀅𑀧𑀭𑁂𑀦 𑀧𑀦 𑀬𑀣𑀸𑀯𑀼𑀢𑁆𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀤𑀺𑀝𑁆𑀞𑀸𑀦𑀺 𑀯𑀸 𑀲𑀼𑀢𑀸𑀦𑀺 𑀯𑀸 𑀳𑁄𑀦𑁆𑀢𑀺. 𑀢𑀲𑁆𑀲 ‘𑀈𑀤𑀺𑀲𑀁 𑀭𑀽𑀧𑀁 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀩𑀼𑀤𑁆𑀥𑀲𑁆𑀲𑀸𑀧𑀺 𑀪𑀯𑀺𑀲𑁆𑀲𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀖𑀝𑁆𑀝𑀦𑀁 𑀯𑀺𑀦𑀸 𑀤𑀺𑀝𑁆𑀞𑀲𑀼𑀢𑀲𑀫𑁆𑀩𑀦𑁆𑀥𑁂𑀦𑁂𑀯 𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀅𑀣𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀇𑀤𑀁 𑀫𑀳𑀸𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀉𑀪𑀬𑀲𑀫𑁆𑀩𑀦𑁆𑀥𑀯𑀲𑁂𑀦 𑀏𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺.

𑀇𑀤𑀫𑁆𑀧𑀺 𑀘 𑀫𑀼𑀔𑀫𑀢𑁆𑀢𑀫𑁂𑀯. 𑀲𑀤𑁆𑀥𑀸𑀭𑀼𑀘𑀺𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀆𑀤𑀻𑀦𑀁 𑀧𑀦 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀏𑀢𑁂𑀲𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀫𑁂𑀯. 𑀬𑀲𑁆𑀫𑀸 𑀧𑀦 𑀏𑀯𑀁 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀸𑀦𑀺 𑀪𑀽𑀢𑀸𑀦𑀺𑀧𑀺 𑀳𑁄𑀦𑁆𑀢𑀺 𑀅𑀪𑀽𑀢𑀸𑀦𑀺𑀧𑀺, 𑀢𑀲𑁆𑀫𑀸 𑀅𑀬𑀁 𑀦𑀬𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀕𑀳𑀺𑀢𑁄. 𑀏𑀯𑀁 𑀏𑀓𑁂𑀓𑀸𑀭𑀫𑁆𑀫𑀡𑀁 𑀚𑀯𑀦𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀸𑀭𑀫𑁆𑀫𑀡𑀜𑁆𑀳𑀺 𑀚𑀯𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑁂𑀧𑀺. 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑀁 𑀚𑀯𑀦𑀁 𑀤𑀸𑀦𑀫𑀬𑀁 𑀲𑀻𑀮𑀫𑀬𑀁 𑀪𑀸𑀯𑀦𑀸𑀫𑀬𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑁂𑀲𑀼 𑀏𑀓𑁂𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀫𑁂𑀯 𑀳𑁄𑀢𑀺. 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀭𑀽𑀧𑀁 𑀢𑀸𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀏𑀢𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀯𑀡𑁆𑀡𑁂𑀲𑀼 𑀧𑀼𑀧𑁆𑀨𑀯𑀢𑁆𑀣𑀥𑀸𑀢𑀽𑀲𑀼 𑀅𑀜𑁆𑀜𑀢𑀭𑀁 𑀲𑀼𑀪𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀭𑀚𑀦𑀻𑀬𑀁 𑀯𑀡𑁆𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀦𑀦𑀼 𑀘𑁂𑀢𑀁 𑀇𑀝𑁆𑀞𑀸𑀭𑀫𑁆𑀫𑀡𑀁 𑀮𑁄𑀪𑀲𑁆𑀲 𑀯𑀢𑁆𑀣𑀼? 𑀓𑀣𑀁 𑀏𑀢𑀁 𑀘𑀺𑀢𑁆𑀢𑀁 𑀓𑀼𑀲𑀮𑀁 𑀦𑀸𑀫 𑀚𑀸𑀢𑀦𑁆𑀢𑀺? 𑀦𑀺𑀬𑀫𑀺𑀢𑀯𑀲𑁂𑀦 𑀧𑀭𑀺𑀡𑀸𑀫𑀺𑀢𑀯𑀲𑁂𑀦 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀆𑀪𑀼𑀚𑀺𑀢𑀯𑀲𑁂𑀦𑀸𑀢𑀺. 𑀬𑀲𑁆𑀲 𑀳𑀺 ‘𑀓𑀼𑀲𑀮𑀫𑁂𑀯 𑀫𑀬𑀸 𑀓𑀢𑁆𑀢𑀩𑁆𑀩’𑀦𑁆𑀢𑀺 𑀓𑀼𑀲𑀮𑀓𑀭𑀡𑁂 𑀘𑀺𑀢𑁆𑀢𑀁 𑀦𑀺𑀬𑀫𑀺𑀢𑀁 𑀳𑁄𑀢𑀺, 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑀓𑀭𑀡𑁂𑀬𑁂𑀯 𑀧𑀭𑀺𑀡𑀸𑀫𑀺𑀢𑀁, 𑀅𑀪𑀺𑀡𑁆𑀳𑀓𑀭𑀡𑁂𑀦 𑀓𑀼𑀲𑀮𑀲𑀫𑀼𑀤𑀸𑀘𑀸𑀭𑁂𑀦𑁂𑀯 𑀲𑀫𑀼𑀤𑀸𑀘𑀭𑀺𑀢𑀁, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑀯𑀦𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀤𑀻𑀳𑀺 𑀘 𑀉𑀧𑀦𑀺𑀲𑁆𑀲𑀬𑁂𑀳𑀺 𑀬𑁄𑀦𑀺𑀲𑁄 𑀘 𑀆𑀪𑁄𑀕𑁄 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀦𑀺𑀬𑀫𑀺𑀢𑀯𑀲𑁂𑀦 𑀧𑀭𑀺𑀡𑀸𑀫𑀺𑀢𑀯𑀲𑁂𑀦 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀆𑀪𑀼𑀚𑀺𑀢𑀯𑀲𑁂𑀦 𑀘 𑀓𑀼𑀲𑀮𑀁 𑀦𑀸𑀫 𑀚𑀸𑀢𑀁 𑀳𑁄𑀢𑀺.

𑀆𑀭𑀫𑁆𑀫𑀡𑀯𑀲𑁂𑀦 𑀧𑀦𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀏𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀚𑀸𑀢𑀁. 𑀲𑀤𑁆𑀥𑀸𑀩𑀳𑀼𑀮𑀢𑀸𑀤𑀻𑀦𑀺𑀧𑁂𑀢𑁆𑀣 𑀓𑀸𑀭𑀡𑀸𑀦𑀺𑀬𑁂𑀯. 𑀅𑀲𑁆𑀲𑀤𑁆𑀥𑀸𑀦𑀜𑁆𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀦𑀜𑁆𑀘 𑀏𑀓𑀦𑁆𑀢𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀁 𑀢𑀣𑀸𑀕𑀢𑀭𑀽𑀧𑀫𑁆𑀧𑀺 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀬𑁂 𑀘 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀁 𑀦 𑀧𑀲𑁆𑀲𑀦𑁆𑀢𑀺 𑀢𑁂𑀲𑀁 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑀸𑀦𑀁 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀲𑁄𑀫𑀦𑀲𑁆𑀲𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀤𑁆𑀥𑀸𑀩𑀳𑀼𑀮𑀢𑀸 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀢𑀺. 𑀏𑀯𑀫𑁆𑀧𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀏𑀓𑀸𑀤𑀲𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀁 𑀧𑀦 𑀯𑀺𑀢𑁆𑀣𑀸𑀭𑁄 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 (𑀯𑀺𑀪. 𑀅𑀝𑁆𑀞. 𑁩𑁬𑁭 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸, 𑁪𑁬𑁮-𑁪𑁬𑁯) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑀫𑁆𑀫𑀢𑁄, 𑀉𑀧𑀧𑀢𑁆𑀢𑀺𑀢𑁄, 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄, 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀢𑁄𑀢𑀺 𑀇𑀫𑁂𑀳𑀺 𑀧𑀦𑁂𑀢𑁆𑀣 𑀓𑀸𑀭𑀡𑁂𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀳𑀺 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀯𑀚𑁆𑀚𑀸𑀦𑀺 𑀲𑀺𑀧𑁆𑀧𑀸𑀬𑀢𑀦𑀓𑀫𑁆𑀫𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑀺 𑀥𑀫𑁆𑀫𑀓𑀣𑀺𑀓𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑀸𑀧𑁂𑀢𑀺, ‘𑀆𑀬𑀢𑀺𑀁 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀤𑀸𑀦𑀁 𑀤𑁂𑀢𑀺, 𑀢𑀲𑁆𑀲 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀩𑁆𑀬𑀸𑀧𑀚𑁆𑀚𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸𑀧𑀺 ‘‘𑀢𑀲𑁆𑀲 𑀢𑀢𑁆𑀣 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑀺𑀮𑀯𑀦𑁆𑀢𑀺… 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄, 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁧𑁯𑁧) 𑀇𑀫𑀺𑀦𑀸 𑀦𑀬𑁂𑀦 𑀉𑀧𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀉𑀧𑀕𑀢𑀸𑀦𑀁 𑀧𑀜𑁆𑀜𑀸𑀤𑀲𑀓𑀧𑁆𑀧𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀦𑀺𑀲𑁆𑀲𑀸𑀬𑀧𑀺 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀳𑀺 𑀧𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀢𑁂𑀲𑀁 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀁 𑀦𑀺𑀲𑁆𑀲𑀸𑀬𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑁄𑀕𑀸 𑀯𑁂 𑀚𑀸𑀬𑀢𑀻 𑀪𑀽𑀭𑀺, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄’’𑀢𑀺 (𑀥. 𑀧. 𑁨𑁮𑁨).

𑀏𑀯𑀁 𑀓𑀫𑁆𑀫𑀢𑁄 𑀉𑀧𑀧𑀢𑁆𑀢𑀺𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀢𑁄𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀲𑀁 𑀧𑀦 𑀯𑀺𑀢𑁆𑀣𑀸𑀭𑁄 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 (𑀯𑀺𑀪. 𑀅𑀝𑁆𑀞. 𑁩𑁬𑁭 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀏𑀯𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀅𑀦𑀼𑀧𑀸𑀬𑀘𑀺𑀦𑁆𑀢𑀦𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀲𑀗𑁆𑀔𑀸𑀭𑀁 𑀦𑀸𑀫 𑀚𑀸𑀢𑀁. 𑀢𑀬𑀺𑀤𑀁 𑀭𑀚𑀦𑀻𑀬𑀯𑀡𑁆𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀢𑀺𑀯𑀺𑀥𑁂𑀦 𑀦𑀺𑀬𑀫𑁂𑀦 𑀉𑀧𑁆𑀧𑀚𑁆𑀚𑀢𑀺 𑁋 𑀤𑀸𑀦𑀫𑀬𑀁 𑀯𑀸 𑀳𑁄𑀢𑀺, 𑀲𑀻𑀮𑀫𑀬𑀁 𑀯𑀸, 𑀪𑀸𑀯𑀦𑀸𑀫𑀬𑀁 𑀯𑀸.

𑀓𑀣𑀁? 𑀬𑀤𑀸 𑀳𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑁂𑀲𑀼 𑀧𑀼𑀧𑁆𑀨𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘𑀯𑀡𑁆𑀡𑀤𑀸𑀦𑀁 𑀫𑀬𑁆𑀳’𑀦𑁆𑀢𑀺 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀺 𑀧𑀽𑀚𑁂𑀢𑀺, 𑀢𑀤𑀸 𑀤𑀸𑀦𑀫𑀬𑀁 𑀳𑁄𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀪𑀡𑁆𑀟𑀸𑀕𑀸𑀭𑀺𑀓𑀲𑀗𑁆𑀖𑀫𑀺𑀢𑁆𑀢𑁄 𑀓𑀺𑀭 𑀏𑀓𑀁 𑀲𑀼𑀯𑀡𑁆𑀡𑀔𑀘𑀺𑀢𑀁 𑀯𑀢𑁆𑀣𑀁 𑀮𑀪𑀺𑀢𑁆𑀯𑀸 𑀇𑀤𑀫𑁆𑀧𑀺 𑀯𑀢𑁆𑀣𑀁 𑀲𑀼𑀯𑀡𑁆𑀡𑀯𑀡𑁆𑀡𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀲𑀼𑀯𑀡𑁆𑀡𑀯𑀡𑁆𑀡𑀁 𑀯𑀢𑁆𑀣𑀁 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲𑁂𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀅𑀫𑁆𑀳𑀸𑀓𑀜𑁆𑀘 𑀯𑀡𑁆𑀡𑀤𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑀳𑀸𑀘𑁂𑀢𑀺𑀬𑁂 𑀆𑀭𑁄𑀧𑁂𑀲𑀺. 𑀏𑀯𑀭𑀽𑀧𑁂 𑀓𑀸𑀮𑁂 𑀤𑀸𑀦𑀫𑀬𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀸 𑀧𑀦 𑀢𑀣𑀸𑀭𑀽𑀧𑀫𑁂𑀯 𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 ‘𑀫𑀬𑁆𑀳𑀁 𑀓𑀼𑀮𑀯𑀁𑀲𑁄, 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑁆𑀧𑀯𑁂𑀡𑀻 𑀏𑀲𑀸, 𑀓𑀼𑀮𑀯𑀢𑁆𑀢𑀁 𑀏𑀢’𑀦𑁆𑀢𑀺 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀺 𑀧𑀽𑀚𑁂𑀢𑀺 𑀢𑀤𑀸 𑀲𑀻𑀮𑀫𑀬𑀁 𑀳𑁄𑀢𑀺. 𑀬𑀤𑀸 𑀧𑀦 𑀢𑀸𑀤𑀺𑀲𑁂𑀦𑁂𑀯 𑀯𑀢𑁆𑀣𑀼𑀦𑀸 𑀭𑀢𑀦𑀢𑁆𑀢𑀬𑀲𑁆𑀲 𑀧𑀽𑀚𑀁 𑀓𑀢𑁆𑀯𑀸 ‘𑀅𑀬𑀁 𑀯𑀡𑁆𑀡𑁄 𑀔𑀬𑀁 𑀕𑀘𑁆𑀙𑀺𑀲𑁆𑀲𑀢𑀺, 𑀯𑀬𑀁 𑀕𑀘𑁆𑀙𑀺𑀲𑁆𑀲𑀢𑀻’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑀺, 𑀢𑀤𑀸 𑀪𑀸𑀯𑀦𑀸𑀫𑀬𑀁 𑀳𑁄𑀢𑀺.

𑀤𑀸𑀦𑀫𑀬𑀁 𑀧𑀦 𑀳𑀼𑀢𑁆𑀯𑀸 𑀯𑀢𑁆𑀢𑀫𑀸𑀦𑀫𑁆𑀧𑀺 𑀬𑀤𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀲𑀳𑀢𑁆𑀣𑁂𑀦 𑀧𑀽𑀚𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀢𑁆𑀢𑀺, 𑀢𑀤𑀸 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀧𑀽𑀚𑁂𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸𑀤𑀬𑁄𑀧𑀺 𑀆𑀡𑀸𑀧𑁂𑀢𑁆𑀯𑀸 𑀧𑀽𑀚𑀸𑀧𑁂𑀢𑀺 𑀢𑀤𑀸 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀢𑀤𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀆𑀭𑀩𑁆𑀪 𑀯𑀡𑁆𑀡𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑀺 𑀢𑀤𑀸 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺. 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀳𑀺 ‘𑀤𑀲𑁆𑀲𑀸𑀫𑀺 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻𑀢𑀺 (𑀧𑀸𑀭𑀸. 𑁬𑁫𑁯) 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀤𑀸𑀦𑀁 𑀦𑀸𑀫 𑀳𑁄𑀢𑀺. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀧𑀦 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀆𑀭𑀩𑁆𑀪 ‘𑀤𑀲𑁆𑀲𑀸𑀫𑀻’𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀼𑀲𑀮𑀁 𑀳𑁄𑀢𑀺. 𑀅𑀧𑀭𑀪𑀸𑀕𑁂 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀤𑀸𑀦𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦𑁂𑀯 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 𑀧𑀦 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 𑀲𑀳𑀢𑁆𑀣𑀸 𑀭𑀢𑀦𑀢𑁆𑀢𑀬𑀁 𑀧𑀽𑀚𑁂𑀢𑀺 𑀢𑀤𑀸 𑀲𑀻𑀮𑀫𑀬𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦𑁂𑀯 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀆𑀡𑀸𑀧𑁂𑀢𑁆𑀯𑀸 𑀧𑀽𑀚𑀸𑀧𑁂𑀢𑀺 𑀢𑀤𑀸 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 ‘𑀫𑀬𑁆𑀳𑀁 𑀓𑀼𑀮𑀯𑀁𑀲𑁄, 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑁆𑀧𑀯𑁂𑀡𑀻 𑀏𑀲𑀸, 𑀓𑀼𑀮𑀯𑀢𑁆𑀢𑀫𑁂𑀢’𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀆𑀭𑀩𑁆𑀪 ‘𑀯𑀡𑁆𑀡𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑀺 𑀢𑀤𑀸 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀲𑀻𑀮𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 𑀧𑀦 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀧𑀽𑀚𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑀺 𑀢𑀤𑀸 𑀪𑀸𑀯𑀦𑀸𑀫𑀬𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀯𑀸𑀘𑀸𑀬 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺, 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀪𑀸𑀯𑀦𑀸𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀯𑀫𑁂𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀪𑁂𑀭𑀺𑀲𑀤𑁆𑀤𑀸𑀤𑀻𑀲𑀼 𑀳𑀺 𑀭𑀚𑀦𑀻𑀬𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀻𑀳𑀺 𑀦𑀺𑀬𑀫𑁂𑀳𑁂𑀢𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀲𑀤𑁆𑀤𑀁 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀉𑀧𑁆𑀧𑀸𑀝𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀁 𑀯𑀺𑀬 𑀘 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀤𑀸𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀲𑀯𑀢𑁆𑀣𑀼𑀓𑀁 𑀧𑀦 𑀓𑀢𑁆𑀯𑀸 𑀤𑁂𑀦𑁆𑀢𑁄 𑀲𑀤𑁆𑀤𑀤𑀸𑀦𑀁 𑀤𑁂𑀢𑀺 𑀦𑀸𑀫. 𑀢𑀲𑁆𑀫𑀸 𑀬𑀤𑀸 ‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀪𑁂𑀭𑀺𑀫𑀼𑀤𑀺𑀗𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑀽𑀭𑀺𑀬𑁂𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑀳𑀸𑀭𑀁 𑀓𑀭𑁄𑀢𑀺, ‘𑀲𑀤𑁆𑀤𑀤𑀸𑀦𑀁 𑀫𑁂’𑀢𑀺 𑀪𑁂𑀭𑀺𑀆𑀤𑀻𑀦𑀺 𑀞𑀧𑀸𑀧𑁂𑀢𑀺, 𑀥𑀫𑁆𑀫𑀓𑀣𑀺𑀓𑀪𑀺𑀓𑁆𑀔𑀽𑀦𑀁 𑀲𑀭𑀪𑁂𑀲𑀚𑁆𑀚𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀤𑁂𑀢𑀺, 𑀥𑀫𑁆𑀫𑀲𑀯𑀦𑀁 𑀖𑁄𑀲𑁂𑀢𑀺, 𑀲𑀭𑀪𑀜𑁆𑀜𑀁 𑀪𑀡𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀁 𑀅𑀦𑀼𑀫𑁄𑀤𑀦𑀓𑀣𑀁 𑀓𑀭𑁄𑀢𑀺, 𑀢𑀤𑀸 𑀤𑀸𑀦𑀫𑀬𑀁𑀬𑁂𑀯 𑀳𑁄𑀢𑀺. 𑀬𑀤𑀸 𑀏𑀢𑀤𑁂𑀯 𑀯𑀺𑀥𑀸𑀦𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 𑀯𑀢𑁆𑀢𑀯𑀲𑁂𑀦 𑀓𑀭𑁄𑀢𑀺 𑀢𑀤𑀸 𑀲𑀻𑀮𑀫𑀬𑀁 𑀳𑁄𑀢𑀺. 𑀬𑀤𑀸 𑀲𑀩𑁆𑀩𑀫𑁆𑀧𑁂𑀢𑀁 𑀓𑀢𑁆𑀯𑀸 𑀅𑀬𑀁 𑀏𑀢𑁆𑀢𑀓𑁄 𑀲𑀤𑁆𑀤𑁄 𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑁄𑀧𑀺 𑀳𑀼𑀢𑁆𑀯𑀸 ‘𑀔𑀬𑀁 𑀕𑀫𑀺𑀲𑁆𑀲𑀢𑀺, 𑀯𑀬𑀁 𑀕𑀫𑀺𑀲𑁆𑀲𑀢𑀻’𑀢𑀺 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀢𑀺 𑀢𑀤𑀸 𑀪𑀸𑀯𑀦𑀸𑀫𑀬𑀁 𑀳𑁄𑀢𑀺.

𑀢𑀢𑁆𑀣 𑀤𑀸𑀦𑀫𑀬𑀁 𑀢𑀸𑀯 𑀬𑀤𑀸 𑀪𑁂𑀭𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀳𑀢𑁆𑀣𑀸 𑀉𑀧𑀳𑀸𑀭𑀁 𑀓𑀭𑁄𑀢𑀺, 𑀦𑀺𑀘𑁆𑀘𑀼𑀧𑀳𑀸𑀭𑀢𑁆𑀣𑀸𑀬 𑀞𑀧𑁂𑀦𑁆𑀢𑁄𑀧𑀺 𑀲𑀳𑀢𑁆𑀣𑀸 𑀞𑀧𑁂𑀢𑀺, ‘𑀲𑀤𑁆𑀤𑀤𑀸𑀦𑀁 𑀫𑁂’𑀢𑀺 𑀥𑀫𑁆𑀫𑀲𑀯𑀦𑀁 𑀖𑁄𑀲𑁂𑀢𑀼𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀓𑀣𑀁 𑀲𑀭𑀪𑀜𑁆𑀜𑀁 𑀓𑀸𑀢𑀼𑀁 𑀯𑀸 𑀕𑀘𑁆𑀙𑀢𑀺, 𑀢𑀤𑀸 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 ‘𑀕𑀘𑁆𑀙𑀣, 𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀲𑀤𑁆𑀤𑀤𑀸𑀦𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑀳𑀸𑀭𑀁 𑀓𑀭𑁄𑀣𑀸’𑀢𑀺 𑀆𑀡𑀸𑀧𑁂𑀢𑀺, ‘𑀲𑀤𑁆𑀤𑀤𑀸𑀦𑀁 𑀫𑁂’𑀢𑀺 𑀘𑁂𑀢𑀺𑀬𑀗𑁆𑀕𑀡𑁂𑀲𑀼 ‘𑀇𑀫𑀁 𑀪𑁂𑀭𑀺𑀁, 𑀇𑀫𑀁 𑀫𑀼𑀤𑀺𑀗𑁆𑀕𑀁 𑀞𑀧𑁂𑀣𑀸’𑀢𑀺 𑀆𑀡𑀸𑀧𑁂𑀢𑀺, 𑀲𑀬𑀫𑁂𑀯 𑀥𑀫𑁆𑀫𑀲𑀯𑀦𑀁 𑀖𑁄𑀲𑁂𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀲𑀭𑀪𑀜𑁆𑀜𑀁 𑀪𑀡𑀢𑀺, 𑀢𑀤𑀸 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 ‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀫𑀦𑀲𑀸 𑀧𑀭𑀺𑀘𑁆𑀘𑀚𑀢𑀺, 𑀢𑀤𑀸 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺.

𑀲𑀻𑀮𑀫𑀬𑀫𑁆𑀧𑀺 ‘𑀲𑀤𑁆𑀤𑀤𑀸𑀦𑀁 𑀦𑀸𑀫 𑀫𑀬𑁆𑀳𑀁 𑀓𑀼𑀮𑀯𑀁𑀲𑁄 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑁆𑀧𑀯𑁂𑀡𑀻’𑀢𑀺 𑀪𑁂𑀭𑀺𑀆𑀤𑀻𑀳𑀺 𑀲𑀳𑀢𑁆𑀣𑀸 𑀉𑀧𑀳𑀸𑀭𑀁 𑀓𑀭𑁄𑀦𑁆𑀢𑀲𑁆𑀲, 𑀪𑁂𑀭𑀺𑀆𑀤𑀻𑀦𑀺 𑀲𑀳𑀢𑁆𑀣𑀸 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀞𑀧𑁂𑀦𑁆𑀢𑀲𑁆𑀲, 𑀥𑀫𑁆𑀫𑀓𑀣𑀺𑀓𑀸𑀦𑀁 𑀲𑀭𑀪𑁂𑀲𑀚𑁆𑀚𑀁 𑀲𑀳𑀢𑁆𑀣𑀸 𑀤𑀤𑀦𑁆𑀢𑀲𑁆𑀲, 𑀯𑀢𑁆𑀢𑀲𑀻𑀲𑁂𑀦 𑀥𑀫𑁆𑀫𑀲𑀯𑀦𑀖𑁄𑀲𑀦𑀥𑀫𑁆𑀫𑀓𑀣𑀸𑀓𑀣𑀦𑀲𑀭𑀪𑀜𑁆𑀜𑀪𑀡𑀦𑀢𑁆𑀣𑀸𑀬 𑀘 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. ‘𑀲𑀤𑁆𑀤𑀤𑀸𑀦𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀓𑀼𑀮𑀯𑀁𑀲𑁄 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑁆𑀧𑀯𑁂𑀡𑀻, 𑀕𑀘𑁆𑀙𑀣, 𑀢𑀸𑀢𑀸, 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀁 𑀉𑀧𑀳𑀸𑀭𑀁 𑀓𑀭𑁄𑀣𑀸’𑀢𑀺 𑀆𑀡𑀸𑀧𑁂𑀦𑁆𑀢𑀲𑁆𑀲 𑀓𑀼𑀮𑀯𑀁𑀲𑀯𑀲𑁂𑀦𑁂𑀯 𑀅𑀢𑁆𑀢𑀦𑀸 𑀥𑀫𑁆𑀫𑀓𑀣𑀁 𑀯𑀸 𑀲𑀭𑀪𑀜𑁆𑀜𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. ‘𑀲𑀤𑁆𑀤𑀤𑀸𑀦𑀁 𑀦𑀸𑀫 𑀫𑀬𑁆𑀳𑀁 𑀓𑀼𑀮𑀯𑀁𑀲𑁄 𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀧𑀭𑀺𑀘𑁆𑀘𑀚𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺.

𑀪𑀸𑀯𑀦𑀸𑀫𑀬𑀫𑁆𑀧𑀺 𑀬𑀤𑀸 𑀘𑀗𑁆𑀓𑀫𑀦𑁆𑀢𑁄 𑀲𑀤𑁆𑀤𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑀺 𑀢𑀤𑀸 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀓𑀸𑀬𑀗𑁆𑀕𑀁 𑀧𑀦 𑀅𑀘𑁄𑀧𑁂𑀢𑁆𑀯𑀸 𑀯𑀸𑀘𑀸𑀬 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 𑀲𑀤𑁆𑀤𑀸𑀬𑀢𑀦𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀫𑁆𑀧𑀺 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀫𑀽𑀮𑀕𑀦𑁆𑀥𑀸𑀤𑀻𑀲𑀼𑀧𑀺 𑀭𑀚𑀦𑀻𑀬𑀕𑀦𑁆𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀻𑀳𑀺 𑀦𑀺𑀬𑀫𑁂𑀳𑁂𑀢𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑀤𑀸 𑀫𑀽𑀮𑀕𑀦𑁆𑀥𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀕𑀦𑁆𑀥𑀁 𑀮𑀪𑀺𑀢𑁆𑀯𑀸 𑀕𑀦𑁆𑀥𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘𑀕𑀦𑁆𑀥𑀤𑀸𑀦𑀁 𑀫𑀬𑁆𑀳’𑀦𑁆𑀢𑀺 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀺 𑀧𑀽𑀚𑁂𑀢𑀺, 𑀢𑀤𑀸 𑀤𑀸𑀦𑀫𑀬𑀁 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀯𑀡𑁆𑀡𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑀦𑁆𑀥𑀸𑀭𑀫𑁆𑀫𑀡𑀫𑁆𑀧𑀺 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀫𑀽𑀮𑀭𑀲𑀸𑀤𑀻𑀲𑀼 𑀧𑀦 𑀭𑀚𑀦𑀻𑀬𑀭𑀲𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀻𑀳𑀺 𑀦𑀺𑀬𑀫𑁂𑀳𑁂𑀢𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑀤𑀸 𑀫𑀽𑀮𑀭𑀲𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀭𑀲𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀭𑀲𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘𑀭𑀲𑀤𑀸𑀦𑀁 𑀫𑀬𑁆𑀳’𑀦𑁆𑀢𑀺 𑀤𑁂𑀢𑀺 𑀧𑀭𑀺𑀘𑁆𑀘𑀚𑀢𑀺, 𑀢𑀤𑀸 𑀤𑀸𑀦𑀫𑀬𑀁 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀯𑀡𑁆𑀡𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀮𑀫𑀬𑁂 𑀧𑀦𑁂𑀢𑁆𑀣 ‘𑀲𑀗𑁆𑀖𑀲𑁆𑀲 𑀅𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀦 𑀆𑀘𑀺𑀡𑁆𑀡’𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀤𑀸𑀧𑁂𑀢𑁆𑀯𑀸 𑀲𑀸𑀤𑀼𑀭𑀲𑀁 𑀧𑀭𑀺𑀪𑀼𑀢𑁆𑀢𑀲𑁆𑀲 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀭𑀜𑁆𑀜𑁄 𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀢𑁆𑀣𑀽𑀦𑀺 𑀆𑀕𑀢𑀸𑀦𑀺. 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀁 𑀭𑀲𑀸𑀭𑀫𑁆𑀫𑀡𑀫𑁆𑀧𑀺 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂𑀧𑀺 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 𑀢𑀻𑀡𑀺 𑀫𑀳𑀸𑀪𑀽𑀢𑀸𑀦𑀺 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀢𑁂𑀲𑀁 𑀯𑀲𑁂𑀦 𑀬𑁄𑀚𑀦𑀁 𑀅𑀓𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀤𑀺𑀯𑀲𑁂𑀦 𑀓𑀸𑀢𑀩𑁆𑀩𑀸. 𑀬𑀤𑀸 𑀳𑀺 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀫𑀬𑁆𑀳’𑀦𑁆𑀢𑀺 𑀤𑁂𑀢𑀺 𑀧𑀭𑀺𑀘𑁆𑀘𑀚𑀢𑀺, 𑀢𑀤𑀸 𑀤𑀸𑀦𑀫𑀬𑀁 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀯𑀡𑁆𑀡𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀫𑁆𑀧𑀺 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀥𑀫𑁆𑀫𑀸𑀭𑀫𑁆𑀫𑀡𑁂 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺, 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀧𑀦𑁆𑀦𑀭𑀲 𑀲𑀼𑀔𑀼𑀫𑀭𑀽𑀧𑀸𑀦𑀺, 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀇𑀫𑁂 𑀥𑀫𑁆𑀫𑀸𑀬𑀢𑀦𑁂 𑀧𑀭𑀺𑀬𑀸𑀧𑀦𑁆𑀦𑀸 𑀘, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘, 𑀥𑀫𑁆𑀫𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀏𑀢𑁂𑀲𑀁 𑀯𑀲𑁂𑀦 𑀬𑁄𑀚𑀦𑀁 𑀅𑀓𑀢𑁆𑀯𑀸 𑀑𑀚𑀤𑀸𑀦𑀧𑀸𑀦𑀤𑀸𑀦𑀚𑀻𑀯𑀺𑀢𑀤𑀸𑀦𑀯𑀲𑁂𑀦 𑀓𑀸𑀢𑀩𑁆𑀩𑀸. 𑀑𑀚𑀸𑀤𑀻𑀲𑀼 𑀳𑀺 𑀭𑀚𑀦𑀻𑀬𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀻𑀳𑀺 𑀦𑀺𑀬𑀫𑁂𑀳𑁂𑀢𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀣 𑀬𑀤𑀸 ‘𑀑𑀚𑀤𑀸𑀦𑀁 𑀫𑀬𑁆𑀳’𑀦𑁆𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀤𑁂𑀢𑀺, 𑀧𑀸𑀦𑀤𑀸𑀦𑀦𑁆𑀢𑀺 𑀅𑀝𑁆𑀞 𑀧𑀸𑀦𑀸𑀦𑀺 𑀤𑁂𑀢𑀺, 𑀚𑀻𑀯𑀺𑀢𑀤𑀸𑀦𑀦𑁆𑀢𑀺 𑀲𑀮𑀸𑀓𑀪𑀢𑁆𑀢𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀺 𑀤𑁂𑀢𑀺, 𑀅𑀨𑀸𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑁂𑀲𑀚𑁆𑀚𑀁 𑀤𑁂𑀢𑀺, 𑀯𑁂𑀚𑁆𑀚𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀚𑀸𑀮𑀁 𑀨𑀸𑀮𑀸𑀧𑁂𑀢𑀺, 𑀓𑀼𑀫𑀻𑀦𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀲𑀓𑀼𑀡𑀧𑀜𑁆𑀚𑀭𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀸𑀭𑀸𑀧𑁂𑀢𑀺, 𑀫𑀸𑀖𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀢𑀺, 𑀅𑀜𑁆𑀜𑀸𑀦𑀺𑀧𑀺 𑀚𑀻𑀯𑀺𑀢𑀧𑀭𑀺𑀢𑁆𑀢𑀸𑀡𑀢𑁆𑀣𑀁 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀢𑀤𑀸 𑀤𑀸𑀦𑀫𑀬𑀁 𑀳𑁄𑀢𑀺. 𑀬𑀤𑀸 𑀧𑀦 ‘𑀑𑀚𑀤𑀸𑀦𑀧𑀸𑀦𑀤𑀸𑀦𑀚𑀻𑀯𑀺𑀢𑀤𑀸𑀦𑀸𑀦𑀺 𑀫𑀬𑁆𑀳𑀁 𑀓𑀼𑀮𑀯𑀁𑀲𑁄 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑁆𑀧𑀯𑁂𑀡𑀻’𑀢𑀺 𑀯𑀢𑁆𑀢𑀲𑀻𑀲𑁂𑀦 𑀑𑀚𑀤𑀸𑀦𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀺 𑀢𑀤𑀸 𑀲𑀻𑀮𑀫𑀬𑀁 𑀳𑁄𑀢𑀺. 𑀬𑀤𑀸 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀫𑀺𑀁 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑀺 𑀢𑀤𑀸 𑀪𑀸𑀯𑀦𑀸𑀫𑀬𑀁 𑀳𑁄𑀢𑀺.

𑀤𑀸𑀦𑀫𑀬𑀁 𑀧𑀦 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀬𑀤𑀸 𑀑𑀚𑀤𑀸𑀦𑀧𑀸𑀦𑀤𑀸𑀦𑀚𑀻𑀯𑀺𑀢𑀤𑀸𑀦𑀸𑀦𑀺 𑀲𑀳𑀢𑁆𑀣𑀸 𑀤𑁂𑀢𑀺, 𑀢𑀤𑀸 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀆𑀡𑀸𑀧𑁂𑀢𑁆𑀯𑀸 𑀤𑀸𑀧𑁂𑀢𑀺, 𑀢𑀤𑀸 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀑𑀚𑀤𑀸𑀦𑀧𑀸𑀦𑀤𑀸𑀦𑀚𑀻𑀯𑀺𑀢𑀤𑀸𑀦𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 ‘𑀤𑀲𑁆𑀲𑀸𑀫𑀻’𑀢𑀺 𑀫𑀦𑀲𑀸 𑀘𑀺𑀦𑁆𑀢𑁂𑀢𑀺, 𑀢𑀤𑀸 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺.

𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 𑀲𑀳𑀢𑁆𑀣𑀸 𑀤𑁂𑀢𑀺, 𑀢𑀤𑀸 𑀲𑀻𑀮𑀫𑀬𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦𑁂𑀯 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀆𑀡𑀸𑀧𑁂𑀢𑁆𑀯𑀸 𑀤𑀸𑀧𑁂𑀢𑀺, 𑀢𑀤𑀸 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀬𑀤𑀸 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 ‘𑀤𑀲𑁆𑀲𑀸𑀫𑀻’𑀢𑀺 𑀫𑀦𑀲𑀸𑀯 𑀘𑀺𑀦𑁆𑀢𑁂𑀢𑀺, 𑀢𑀤𑀸 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺.

𑀘𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀧𑀦 𑀪𑀸𑀯𑀦𑀸𑀫𑀬𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀓𑀸𑀬𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀯𑀸𑀘𑀸𑀬 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀪𑀸𑀯𑀦𑀸𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀯𑀫𑁂𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀓𑀼𑀲𑀮𑀁 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀳𑀺 𑀓𑀫𑁆𑀫𑀤𑁆𑀯𑀸𑀭𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀏𑀯𑀫𑀺𑀤𑀁 𑀘𑀺𑀢𑁆𑀢𑀁 𑀦𑀸𑀦𑀸𑀯𑀢𑁆𑀣𑀽𑀲𑀼 𑀦𑀸𑀦𑀸𑀭𑀫𑁆𑀫𑀡𑀯𑀲𑁂𑀦 𑀤𑀻𑀧𑀺𑀢𑀁. 𑀇𑀤𑀁 𑀧𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀦𑀸𑀦𑀸𑀭𑀫𑁆𑀫𑀡𑀯𑀲𑁂𑀦 𑀮𑀩𑁆𑀪𑀢𑀺𑀬𑁂𑀯. 𑀓𑀣𑀁? 𑀘𑀢𑀽𑀲𑀼 𑀳𑀺 𑀧𑀘𑁆𑀘𑀬𑁂𑀲𑀼 𑀘𑀻𑀯𑀭𑁂 𑀙 𑀆𑀭𑀫𑁆𑀫𑀡𑀸𑀦𑀺 𑀮𑀩𑁆𑀪𑀦𑁆𑀢𑀺 𑁋 𑀦𑀯𑀭𑀢𑁆𑀢𑀲𑁆𑀲 𑀳𑀺 𑀘𑀻𑀯𑀭𑀲𑁆𑀲 𑀯𑀡𑁆𑀡𑁄 𑀫𑀦𑀸𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄, 𑀇𑀤𑀁 𑀯𑀡𑁆𑀡𑀸𑀭𑀫𑁆𑀫𑀡𑀁. 𑀧𑀭𑀺𑀪𑁄𑀕𑀓𑀸𑀮𑁂 𑀧𑀝𑀧𑀝𑀲𑀤𑁆𑀤𑀁 𑀓𑀭𑁄𑀢𑀺, 𑀇𑀤𑀁 𑀲𑀤𑁆𑀤𑀸𑀭𑀫𑁆𑀫𑀡𑀁. 𑀬𑁄 𑀢𑀢𑁆𑀣 𑀓𑀸𑀴𑀓𑀘𑁆𑀙𑀓𑀸𑀤𑀺𑀕𑀦𑁆𑀥𑁄, 𑀇𑀤𑀁 𑀕𑀦𑁆𑀥𑀸𑀭𑀫𑁆𑀫𑀡𑀁. 𑀭𑀲𑀸𑀭𑀫𑁆𑀫𑀡𑀁 𑀧𑀦 𑀧𑀭𑀺𑀪𑁄𑀕𑀭𑀲𑀯𑀲𑁂𑀦 𑀓𑀣𑀺𑀢𑀁. 𑀬𑀸 𑀢𑀢𑁆𑀣 𑀲𑀼𑀔𑀲𑀫𑁆𑀨𑀲𑁆𑀲𑀢𑀸, 𑀇𑀤𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁. 𑀘𑀻𑀯𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸, 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀧𑀺𑀡𑁆𑀟𑀧𑀸𑀢𑁂 𑀭𑀲𑀸𑀭𑀫𑁆𑀫𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀮𑀩𑁆𑀪𑀢𑀺. 𑀏𑀯𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀦𑀸𑀦𑀸𑀭𑀫𑁆𑀫𑀡𑀯𑀲𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀤𑀸𑀦𑀫𑀬𑀸𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥𑀁, 𑀯𑀺𑀦𑀸 𑀆𑀭𑀫𑁆𑀫𑀡𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀤𑁆𑀯𑀸𑀭𑀁 𑀧𑀦 𑀅𑀦𑀺𑀩𑀤𑁆𑀥𑀁. 𑀓𑀲𑁆𑀫𑀸? 𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸. 𑀓𑀫𑁆𑀫𑀲𑁆𑀫𑀺𑀜𑁆𑀳𑀺 𑀅𑀦𑀺𑀩𑀤𑁆𑀥𑁂 𑀤𑁆𑀯𑀸𑀭𑀫𑁆𑀧𑀺 𑀅𑀦𑀺𑀩𑀤𑁆𑀥𑀫𑁂𑀯 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀤𑁆𑀯𑀸𑀭𑀓𑀣𑀸

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑀸𑀭𑀓𑀣𑀸 𑀓𑀣𑀺𑀢𑀸. 𑀢𑀢𑁆𑀣 𑀢𑀻𑀡𑀺 𑀓𑀫𑁆𑀫𑀸𑀦𑀺, 𑀢𑀻𑀡𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺, 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀺, 𑀙 𑀨𑀲𑁆𑀲𑀸, 𑀙 𑀨𑀲𑁆𑀲𑀤𑁆𑀯𑀸𑀭𑀸𑀦𑀺, 𑀅𑀝𑁆𑀞 𑀅𑀲𑀁𑀯𑀭𑀸, 𑀅𑀝𑁆𑀞 𑀅𑀲𑀁𑀯𑀭𑀤𑁆𑀯𑀸𑀭𑀸𑀦𑀺, 𑀅𑀝𑁆𑀞 𑀲𑀁𑀯𑀭𑀸, 𑀅𑀝𑁆𑀞 𑀲𑀁𑀯𑀭𑀤𑁆𑀯𑀸𑀭𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀢𑀺, 𑀇𑀤𑀁 𑀏𑀢𑁆𑀢𑀓𑀁 𑀤𑁆𑀯𑀸𑀭𑀓𑀣𑀸𑀬 𑀫𑀸𑀢𑀺𑀓𑀸𑀞𑀧𑀦𑀁 𑀦𑀸𑀫.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀆𑀤𑀺𑀢𑁄 𑀢𑀸𑀯 𑀢𑀻𑀡𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀁, 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀁, 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺.

𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑁄 𑀓𑀸𑀬𑁄 𑁋 𑀉𑀧𑀸𑀤𑀺𑀦𑁆𑀦𑀓𑁄, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑁄, 𑀉𑀢𑀼𑀲𑀫𑀼𑀝𑁆𑀞𑀸𑀦𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀢𑀺. 𑀢𑀢𑁆𑀣 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀦𑁆𑀢𑀸𑀦𑀺 𑀅𑀝𑁆𑀞 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀺𑀧𑀺, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑁂𑀯 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸𑀢𑀺 𑀅𑀝𑁆𑀞 𑀉𑀧𑀸𑀤𑀺𑀦𑁆𑀦𑀓𑀓𑀸𑀬𑁄 𑀦𑀸𑀫. 𑀢𑀸𑀦𑁂𑀯 𑀅𑀝𑁆𑀞 𑀆𑀳𑀸𑀭𑀚𑀸𑀦𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀦𑀸𑀫. 𑀅𑀝𑁆𑀞 𑀉𑀢𑀼𑀚𑀸𑀦𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀦𑀸𑀫. 𑀅𑀝𑁆𑀞 𑀘𑀺𑀢𑁆𑀢𑀚𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀦𑀸𑀫.

𑀢𑁂𑀲𑀼 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀦𑁂𑀯 𑀉𑀧𑀸𑀤𑀺𑀦𑁆𑀦𑀓𑀓𑀸𑀬𑀲𑁆𑀲 𑀦𑀸𑀫𑀁 𑀦 𑀇𑀢𑀭𑁂𑀲𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀭𑀽𑀧𑁂𑀲𑀼 𑀏𑀓𑀸 𑀯𑀺𑀜𑁆𑀜𑀢𑁆𑀢𑀺 𑀅𑀢𑁆𑀣𑀺, 𑀇𑀤𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸, 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸, 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸, 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸, 𑀆𑀮𑁄𑀓𑁂𑀦𑁆𑀢𑀲𑁆𑀲 𑀯𑀸 𑀯𑀺𑀮𑁄𑀓𑁂𑀦𑁆𑀢𑀲𑁆𑀲 𑀯𑀸, 𑀲𑀫𑀺𑀜𑁆𑀚𑁂𑀦𑁆𑀢𑀲𑁆𑀲 𑀯𑀸 𑀧𑀲𑀸𑀭𑁂𑀦𑁆𑀢𑀲𑁆𑀲 𑀯𑀸, 𑀓𑀸𑀬𑀲𑁆𑀲 𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀺𑀢𑀢𑁆𑀢𑀁, 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁, 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁭𑁨𑁦). ‘𑀅𑀪𑀺𑀓𑁆𑀓𑀫𑀺𑀲𑁆𑀲𑀸𑀫𑀺 𑀧𑀝𑀺𑀓𑁆𑀓𑀫𑀺𑀲𑁆𑀲𑀸𑀫𑀻’𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀬𑀸 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀢𑀦𑁆𑀦𑀺𑀲𑁆𑀲𑀺𑀢𑁄 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀭𑀽𑀧𑀓𑀮𑀸𑀧𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼, 𑀲𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀭𑀽𑀧𑀓𑀸𑀬𑀁 𑀲𑀦𑁆𑀣𑀫𑁆𑀪𑁂𑀢𑀺 𑀲𑀦𑁆𑀥𑀸𑀭𑁂𑀢𑀺 𑀘𑀸𑀮𑁂𑀢𑀺 𑀅𑀪𑀺𑀓𑁆𑀓𑀫𑀸𑀧𑁂𑀢𑀺 𑀧𑀝𑀺𑀓𑁆𑀓𑀫𑀸𑀧𑁂𑀢𑀺.

𑀢𑀢𑁆𑀣 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀧𑀞𑀫𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀭𑀽𑀧𑀓𑀸𑀬𑀁 𑀲𑀦𑁆𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀧𑀭𑀸𑀧𑀭𑀁 𑀧𑀦 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀫𑀘𑀺𑀢𑁆𑀢𑁂𑀦 𑀧𑀦 𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀳𑁂𑀝𑁆𑀞𑀸 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀁 𑀯𑀸𑀬𑁄𑀥𑀸𑀢𑀼𑀁 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀭𑀽𑀧𑀓𑀸𑀬𑀁 𑀲𑀦𑁆𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀘𑀸𑀮𑁂𑀢𑀼𑀁 𑀅𑀪𑀺𑀓𑁆𑀓𑀫𑀸𑀧𑁂𑀢𑀼𑀁 𑀧𑀝𑀺𑀓𑁆𑀓𑀫𑀸𑀧𑁂𑀢𑀼𑀁 𑀆𑀮𑁄𑀓𑀸𑀧𑁂𑀢𑀼𑀁 𑀯𑀺𑀮𑁄𑀓𑀸𑀧𑁂𑀢𑀼𑀁 𑀲𑀫𑁆𑀫𑀺𑀜𑁆𑀚𑀸𑀧𑁂𑀢𑀼𑀁 𑀧𑀲𑀸𑀭𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦 𑀕𑀫𑀦𑀁 𑀦𑀸𑀫 𑀚𑀸𑀬𑀢𑀺, 𑀆𑀕𑀫𑀦𑀁 𑀦𑀸𑀫 𑀚𑀸𑀬𑀢𑀺, 𑀕𑀫𑀦𑀸𑀕𑀫𑀦𑀁 𑀦𑀸𑀫 𑀚𑀸𑀬𑀢𑀺. ‘𑀬𑁄𑀚𑀦𑀁 𑀕𑀢𑁄 𑀤𑀲𑀬𑁄𑀚𑀦𑀁 𑀕𑀢𑁄’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀸𑀧𑁂𑀢𑀺.

𑀬𑀣𑀸 𑀳𑀺 𑀲𑀢𑁆𑀢𑀳𑀺 𑀬𑀼𑀕𑁂𑀳𑀺 𑀆𑀓𑀟𑁆𑀠𑀺𑀢𑀩𑁆𑀩𑁂 𑀲𑀓𑀝𑁂 𑀧𑀞𑀫𑀬𑀼𑀕𑁂 𑀬𑀼𑀢𑁆𑀢𑀕𑁄𑀡𑀸 𑀬𑀼𑀕𑀁 𑀢𑀸𑀯 𑀲𑀦𑁆𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀘𑀓𑁆𑀓𑀁 𑀧𑀦 𑀦𑀧𑀯𑀝𑁆𑀝𑁂𑀦𑁆𑀢𑀺; 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄; 𑀲𑀢𑁆𑀢𑀫𑀬𑀼𑀕𑁂 𑀧𑀦 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀬𑀤𑀸 𑀙𑁂𑀓𑁄 𑀲𑀸𑀭𑀣𑀺 𑀥𑀼𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑁄𑀢𑁆𑀢𑀸𑀦𑀺 𑀆𑀤𑀸𑀬 𑀲𑀩𑁆𑀩𑀧𑀼𑀭𑀺𑀫𑀢𑁄 𑀧𑀝𑁆𑀞𑀸𑀬 𑀧𑀢𑁄𑀤𑀮𑀝𑁆𑀞𑀺𑀬𑀸 𑀕𑁄𑀡𑁂 𑀆𑀓𑁄𑀝𑁂𑀢𑀺, 𑀢𑀤𑀸 𑀲𑀩𑁆𑀩𑁂𑀯 𑀏𑀓𑀩𑀮𑀸 𑀳𑀼𑀢𑁆𑀯𑀸 𑀥𑀼𑀭𑀜𑁆𑀘 𑀲𑀦𑁆𑀥𑀸𑀭𑁂𑀦𑁆𑀢𑀺 𑀘𑀓𑁆𑀓𑀸𑀦𑀺 𑀘 𑀧𑀯𑀝𑁆𑀝𑁂𑀦𑁆𑀢𑀺. ‘𑀲𑀓𑀝𑀁 𑀕𑀳𑁂𑀢𑁆𑀯𑀸 𑀤𑀲𑀬𑁄𑀚𑀦𑀁 𑀯𑀻𑀲𑀢𑀺𑀬𑁄𑀚𑀦𑀁 𑀕𑀢𑀸’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀸𑀤𑁂𑀦𑁆𑀢𑀺 𑁋 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀦 𑀲𑁄 𑀯𑀺𑀜𑁆𑀜𑀢𑁆𑀢𑀺, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀧𑀦 𑀯𑀸𑀬𑁄𑀥𑀸𑀢𑀼𑀬𑀸 𑀲𑀳𑀚𑀸𑀢𑀁 𑀭𑀽𑀧𑀓𑀸𑀬𑀁 𑀲𑀦𑁆𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀘𑀸𑀮𑁂𑀢𑀼𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑁄 𑀅𑀢𑁆𑀣𑀺, 𑀅𑀬𑀁 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀸 𑀅𑀝𑁆𑀞 𑀭𑀽𑀧𑀸𑀦𑀺 𑀯𑀺𑀬 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀬𑀣𑀸 𑀧𑀦 𑀅𑀦𑀺𑀘𑁆𑀘𑀸𑀤𑀺𑀪𑁂𑀤𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀢𑁆𑀢𑀸, ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁨𑁦) 𑀯𑀼𑀢𑁆𑀢𑀁, 𑀏𑀯𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀢𑀸𑀬 𑀲𑀸𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀳𑁄𑀢𑀺.

𑀯𑀺𑀜𑁆𑀜𑀸𑀧𑀦𑀢𑁆𑀢𑀸 𑀧𑀦𑁂𑀲𑀸 𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺? 𑀏𑀓𑀁 𑀓𑀸𑀬𑀺𑀓𑀓𑀭𑀡𑀁. 𑀘𑀓𑁆𑀔𑀼𑀧𑀣𑀲𑁆𑀫𑀺𑀜𑁆𑀳𑀺 𑀞𑀺𑀢𑁄 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀉𑀓𑁆𑀔𑀺𑀧𑀢𑀺, 𑀲𑀻𑀲𑀁 𑀯𑀸 𑀪𑀫𑀼𑀓𑀁 𑀯𑀸 𑀘𑀸𑀮𑁂𑀢𑀺, 𑀅𑀬𑀁 𑀳𑀢𑁆𑀣𑀸𑀤𑀻𑀦𑀁 𑀆𑀓𑀸𑀭𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. 𑀯𑀺𑀜𑁆𑀜𑀢𑁆𑀢𑀺 𑀧𑀦 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀏𑀯. 𑀘𑀓𑁆𑀔𑀼𑀦𑀸 𑀳𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀯𑀡𑁆𑀡𑀸𑀭𑀫𑁆𑀫𑀡𑀫𑁂𑀯 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀢𑁆𑀢𑀺𑀁 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’𑀢𑀺 𑀚𑀸𑀦𑀸𑀢𑀺.

𑀬𑀣𑀸 𑀳𑀺 𑀅𑀭𑀜𑁆𑀜𑁂 𑀦𑀺𑀤𑀸𑀖𑀲𑀫𑀬𑁂 𑀉𑀤𑀓𑀝𑁆𑀞𑀸𑀦𑁂 𑀫𑀦𑀼𑀲𑁆𑀲𑀸 ‘𑀇𑀫𑀸𑀬 𑀲𑀜𑁆𑀜𑀸𑀬 𑀇𑀥 𑀉𑀤𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀭𑀼𑀓𑁆𑀔𑀕𑁆𑀕𑁂 𑀢𑀸𑀮𑀧𑀡𑁆𑀡𑀸𑀤𑀻𑀦𑀺 𑀩𑀦𑁆𑀥𑀸𑀧𑁂𑀦𑁆𑀢𑀺, 𑀲𑀼𑀭𑀸𑀧𑀸𑀦𑀤𑁆𑀯𑀸𑀭𑁂 𑀥𑀚𑀁 𑀉𑀲𑁆𑀲𑀸𑀧𑁂𑀦𑁆𑀢𑀺, 𑀉𑀘𑁆𑀘𑀁 𑀯𑀸 𑀧𑀦 𑀭𑀼𑀓𑁆𑀔𑀁 𑀯𑀸𑀢𑁄 𑀧𑀳𑀭𑀺𑀢𑁆𑀯𑀸 𑀘𑀸𑀮𑁂𑀢𑀺, 𑀅𑀦𑁆𑀢𑁄𑀉𑀤𑀓𑁂 𑀫𑀘𑁆𑀙𑁂 𑀘𑀮𑀦𑁆𑀢𑁂 𑀉𑀧𑀭𑀺 𑀩𑀼𑀩𑁆𑀩𑀼𑀴𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀫𑀳𑁄𑀖𑀲𑁆𑀲 𑀕𑀢𑀫𑀕𑁆𑀕𑀧𑀭𑀺𑀬𑀦𑁆𑀢𑁂 𑀢𑀺𑀡𑀧𑀡𑁆𑀡𑀓𑀲𑀝𑀁 𑀉𑀲𑁆𑀲𑀸𑀭𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀢𑀸𑀮𑀧𑀡𑁆𑀡𑀥𑀚𑀲𑀸𑀔𑀸𑀘𑀮𑀦𑀩𑀼𑀩𑁆𑀩𑀼𑀴𑀓𑀢𑀺𑀡𑀧𑀡𑁆𑀡𑀓𑀲𑀝𑁂 𑀤𑀺𑀲𑁆𑀯𑀸 𑀬𑀣𑀸 𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑀫𑁆𑀧𑀺 ‘𑀏𑀢𑁆𑀣 𑀉𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀭𑀸 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀭𑀼𑀓𑁆𑀔𑁄 𑀯𑀸𑀢𑁂𑀦 𑀧𑀳𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀦𑁆𑀢𑁄𑀉𑀤𑀓𑁂 𑀫𑀘𑁆𑀙𑁄 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀞𑀸𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀑𑀖𑁄 𑀕𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀚𑀸𑀦𑀸𑀢𑀺, 𑀏𑀯𑀫𑁂𑀯 𑀯𑀺𑀜𑁆𑀜𑀢𑁆𑀢𑀺𑀧𑀺 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀯. 𑀘𑀓𑁆𑀔𑀼𑀦𑀸 𑀳𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀯𑀡𑁆𑀡𑀸𑀭𑀫𑁆𑀫𑀡𑀫𑁂𑀯 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀢𑁆𑀢𑀺𑀁 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’𑀢𑀺 𑀚𑀸𑀦𑀸𑀢𑀺.

𑀦 𑀓𑁂𑀯𑀮𑀜𑁆𑀘𑁂𑀲𑀸 𑀯𑀺𑀜𑁆𑀜𑀸𑀧𑀦𑀢𑁄𑀯 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀯𑀺𑀜𑁆𑀜𑁂𑀬𑁆𑀬𑀢𑁄𑀧𑀺 𑀧𑀦 𑀯𑀺𑀜𑁆𑀜𑀢𑁆𑀢𑀺𑀬𑁂𑀯 𑀦𑀸𑀫. 𑀅𑀬𑀜𑁆𑀳𑀺 𑀧𑀭𑁂𑀲𑀁 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀧𑀸𑀓𑀝𑀸 𑀳𑁄𑀢𑀺. 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀳𑀺 𑀲𑁄𑀡𑀲𑀺𑀗𑁆𑀕𑀸𑀮𑀓𑀸𑀓𑀕𑁄𑀡𑀸𑀤𑀬𑁄 𑀤𑀡𑁆𑀟𑀁 𑀯𑀸 𑀮𑁂𑀟𑁆𑀟𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀧𑀳𑀭𑀡𑀸𑀓𑀸𑀭𑁂 𑀤𑀲𑁆𑀲𑀺𑀢𑁂 ‘𑀅𑀬𑀁 𑀦𑁄 𑀧𑀳𑀭𑀺𑀢𑀼𑀓𑀸𑀫𑁄’𑀢𑀺 𑀜𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑁆𑀢𑀺. 𑀧𑀸𑀓𑀸𑀭𑀓𑀼𑀝𑁆𑀝𑀸𑀤𑀺𑀅𑀦𑁆𑀢𑀭𑀺𑀓𑀲𑁆𑀲 𑀧𑀦 𑀧𑀭𑀲𑁆𑀲 𑀅𑀧𑀸𑀓𑀝𑀓𑀸𑀮𑁄𑀧𑀺 𑀅𑀢𑁆𑀣𑀺. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀅𑀧𑀸𑀓𑀝𑀸 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀧𑀦 𑀧𑀸𑀓𑀝𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁂𑀯 𑀦𑀸𑀫 𑀳𑁄𑀢𑀺.

𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀺𑀓𑁂 𑀧𑀦 𑀓𑀸𑀬𑁂 𑀘𑀮𑀦𑁆𑀢𑁂 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑁄 𑀘𑀮𑀢𑀺 𑀦 𑀘𑀮𑀢𑀻𑀢𑀺? 𑀲𑁄𑀧𑀺 𑀢𑀣𑁂𑀯 𑀘𑀮𑀢𑀺. 𑀢𑀁𑀕𑀢𑀺𑀓𑁄 𑀢𑀤𑀦𑀼𑀯𑀢𑁆𑀢𑀓𑁄𑀯 𑀳𑁄𑀢𑀺. 𑀬𑀣𑀸 𑀳𑀺 𑀉𑀤𑀓𑁂 𑀕𑀘𑁆𑀙𑀦𑁆𑀢𑁂 𑀉𑀤𑀓𑁂 𑀧𑀢𑀺𑀢𑀸𑀦𑀺 𑀲𑀼𑀓𑁆𑀔𑀤𑀡𑁆𑀟𑀓𑀢𑀺𑀡𑀧𑀡𑁆𑀡𑀸𑀤𑀻𑀦𑀺𑀧𑀺 𑀉𑀤𑀓𑀕𑀢𑀺𑀓𑀸𑀦𑁂𑀯 𑀪𑀯𑀦𑁆𑀢𑀺, 𑀢𑀲𑁆𑀫𑀺𑀁 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑀺, 𑀢𑀺𑀝𑁆𑀞𑀦𑁆𑀢𑁂 𑀢𑀺𑀝𑁆𑀞𑀦𑁆𑀢𑀺 𑁋 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀭𑀽𑀧𑁂𑀲𑀼 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀸 𑀧𑀦 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸 𑀘𑁂𑀢𑀦𑀸 𑀬𑀸𑀬 𑀧𑀸𑀡𑀁 𑀳𑀦𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀢𑀺, 𑀇𑀤𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀏𑀯𑀁 𑀧𑀭𑀯𑀸𑀤𑀺𑀫𑁆𑀳𑀺 𑀲𑀢𑀺 𑀓𑀸𑀬𑁄 𑀤𑁆𑀯𑀸𑀭𑀁, 𑀢𑀫𑁆𑀳𑀺 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸 𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀁 ‘𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸’𑀢𑀺 𑀞𑀧𑁂𑀢𑀩𑁆𑀩𑀁. 𑀧𑀭𑀯𑀸𑀤𑀺𑀫𑁆𑀳𑀺 𑀧𑀦 𑀅𑀲𑀢𑀺 ‘𑀅𑀩𑁆𑀬𑀸𑀓𑀢𑀁 𑀯𑀸’𑀢𑀺 𑀢𑀺𑀓𑀁 𑀧𑀽𑀭𑁂𑀢𑁆𑀯𑀸𑀯 𑀞𑀧𑁂𑀢𑀩𑁆𑀩𑀁. 𑀢𑀢𑁆𑀣 𑀬𑀣𑀸 𑀦𑀕𑀭𑀤𑁆𑀯𑀸𑀭𑀁 𑀓𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀅𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀅𑀧𑀭𑀸𑀧𑀭𑀁 𑀦 𑀲𑀗𑁆𑀓𑀫𑀢𑀺, 𑀢𑁂𑀦 𑀢𑁂𑀦 𑀧𑀦 𑀤𑁆𑀯𑀸𑀭𑁂𑀦 𑀫𑀳𑀸𑀚𑀦𑁄 𑀲𑀜𑁆𑀘𑀭𑀢𑀺, 𑀏𑀯𑀫𑁂𑀯 𑀤𑁆𑀯𑀸𑀭𑁂 𑀤𑁆𑀯𑀸𑀭𑀁 𑀦 𑀲𑀜𑁆𑀘𑀭𑀢𑀺, 𑀓𑀫𑁆𑀫𑀁 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑀢𑁄 𑀘𑀭𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀦 𑀤𑁆𑀯𑀸𑀭𑀸 𑀤𑁆𑀯𑀸𑀭𑀘𑀸𑀭𑀺𑀦𑁄;

𑀢𑀲𑁆𑀫𑀸 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺.

𑀢𑀢𑁆𑀣 𑀓𑀫𑁆𑀫𑁂𑀦𑀸𑀧𑀺 𑀤𑁆𑀯𑀸𑀭𑀁 𑀦𑀸𑀫𑀁 𑀮𑀪𑀢𑀺, 𑀤𑁆𑀯𑀸𑀭𑁂𑀦𑀸𑀧𑀺 𑀓𑀫𑁆𑀫𑀁. 𑀬𑀣𑀸 𑀳𑀺 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀸𑀦𑀺 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀁 𑀨𑀲𑁆𑀲𑀤𑁆𑀯𑀸𑀭𑀁 𑀅𑀲𑀁𑀯𑀭𑀤𑁆𑀯𑀸𑀭𑀁 𑀲𑀁𑀯𑀭𑀤𑁆𑀯𑀸𑀭𑀦𑁆𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺, 𑀏𑀯𑀁 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀯𑀘𑀻𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀺𑀫𑁆𑀩𑀮𑀺𑀤𑁂𑀯𑀢𑀸 𑀧𑀮𑀸𑀲𑀤𑁂𑀯𑀢𑀸 𑀧𑀼𑀘𑀺𑀫𑀦𑁆𑀤𑀤𑁂𑀯𑀢𑀸 𑀨𑀦𑁆𑀤𑀦𑀤𑁂𑀯𑀢𑀸𑀢𑀺 𑀢𑁂𑀦 𑀢𑁂𑀦 𑀭𑀼𑀓𑁆𑀔𑁂𑀦 𑀦𑀸𑀫𑀁 𑀮𑀪𑀢𑀺, 𑀏𑀯𑀫𑁂𑀯 𑀓𑀸𑀬𑀤𑁆𑀯𑀸𑀭𑁂𑀦 𑀓𑀢𑀁 𑀓𑀫𑁆𑀫𑀫𑁆𑀧𑀺 𑀓𑀸𑀬𑀓𑀫𑁆𑀫𑀦𑁆𑀢𑀺 𑀤𑁆𑀯𑀸𑀭𑁂𑀦 𑀦𑀸𑀫𑀁 𑀮𑀪𑀢𑀺. 𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀜𑁆𑀜𑁄 𑀓𑀸𑀬𑁄, 𑀅𑀜𑁆𑀜𑀁 𑀓𑀫𑁆𑀫𑀁, 𑀓𑀸𑀬𑁂𑀦 𑀧𑀦 𑀓𑀢𑀢𑁆𑀢𑀸 𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

𑀓𑀸𑀬𑁂𑀦 𑀘𑁂 𑀓𑀢𑀁 𑀓𑀫𑁆𑀫𑀁, 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀸𑀬𑁄 𑀘 𑀓𑀸𑀬𑀓𑀫𑁆𑀫𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸.

𑀲𑀽𑀘𑀺𑀬𑀸 𑀘𑁂 𑀓𑀢𑀁 𑀓𑀫𑁆𑀫𑀁, 𑀲𑀽𑀘𑀺𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀲𑀽𑀘𑀺 𑀘 𑀲𑀽𑀘𑀺𑀓𑀫𑁆𑀫𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸.

𑀯𑀸𑀲𑀺𑀬𑀸 𑀘𑁂 𑀓𑀢𑀁 𑀓𑀫𑁆𑀫𑀁, 𑀯𑀸𑀲𑀺𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀯𑀸𑀲𑀺 𑀘 𑀯𑀸𑀲𑀺𑀓𑀫𑁆𑀫𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸.

𑀧𑀼𑀭𑀺𑀲𑁂𑀦 𑀘𑁂 𑀓𑀢𑀁 𑀓𑀫𑁆𑀫𑀁, 𑀧𑀼𑀭𑀺𑀲𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀧𑀼𑀭𑀺𑀲𑁄 𑀘 𑀧𑀼𑀭𑀺𑀲𑀓𑀫𑁆𑀫𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸.

𑀏𑀯𑀫𑁂𑀯𑀁.

𑀓𑀸𑀬𑁂𑀦 𑀘𑁂 𑀓𑀢𑀁 𑀓𑀫𑁆𑀫𑀁, 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀸𑀬𑁄 𑀘 𑀓𑀸𑀬𑀓𑀫𑁆𑀫𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺.

𑀏𑀯𑀁 𑀲𑀦𑁆𑀢𑁂 𑀦𑁂𑀯 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀬𑀼𑀚𑁆𑀚𑀢𑀺, 𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁. 𑀓𑀣𑀁? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀜𑁆𑀳𑀺 ‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻’’𑀢𑀺 𑀯𑀘𑀦𑀢𑁄 𑀯𑀘𑀻𑀓𑀫𑁆𑀫𑀫𑁆𑀧𑀺 𑀧𑀯𑀢𑁆𑀢𑀢𑀺, 𑀢𑁂𑀦𑀲𑁆𑀲𑀸 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀯𑀯𑀢𑁆𑀣𑀸𑀦𑀁 𑀦 𑀬𑀼𑀢𑁆𑀢𑀁. 𑀓𑀸𑀬𑀓𑀫𑁆𑀫𑀜𑁆𑀘 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀧𑀯𑀢𑁆𑀢𑀢𑀺, 𑀢𑁂𑀦𑀲𑁆𑀲 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀯𑀢𑁆𑀣𑀸𑀦𑀁 𑀦 𑀬𑀼𑀚𑁆𑀚𑀢𑀻’𑀢𑀺. ‘𑀦𑁄 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀢𑀸𑀬 𑀘𑁂𑀯 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀢𑀸𑀬 𑀘. 𑀓𑀸𑀬𑀓𑀫𑁆𑀫𑀫𑁂𑀯 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀧𑀯𑀢𑁆𑀢𑀢𑀺 𑀦 𑀇𑀢𑀭𑀸𑀦𑀺, 𑀢𑀲𑁆𑀫𑀸 𑀓𑀸𑀬𑀓𑀫𑁆𑀫𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀺𑀢𑁄 𑀢𑀲𑁆𑀲𑀸 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑁄 𑀲𑀺𑀤𑁆𑀥𑁄. 𑀩𑁆𑀭𑀸𑀳𑁆𑀫𑀡𑀕𑀸𑀫𑀅𑀫𑁆𑀩𑀯𑀦𑀦𑀸𑀕𑀯𑀦𑀸𑀤𑀻𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀺𑀪𑀸𑀯𑁄 𑀯𑀺𑀬𑀸𑀢𑀺 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀬𑀼𑀚𑁆𑀚𑀢𑀺. 𑀓𑀸𑀬𑀓𑀫𑁆𑀫𑀁 𑀧𑀦 𑀓𑀸𑀬𑀤𑁆𑀯𑀸𑀭𑀫𑁆𑀳𑀺𑀬𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺 𑀅𑀧𑁆𑀧𑀁 𑀯𑀘𑀻𑀤𑁆𑀯𑀸𑀭𑁂. 𑀢𑀲𑁆𑀫𑀸 𑀓𑀸𑀬𑀤𑁆𑀯𑀸𑀭𑁂 𑀩𑀳𑀼𑀮𑀁 𑀧𑀯𑀢𑁆𑀢𑀺𑀢𑁄 𑀏𑀢𑀲𑁆𑀲 𑀓𑀸𑀬𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄, 𑀯𑀦𑀘𑀭𑀓𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀤𑀺𑀕𑁄𑀘𑀭𑀸𑀦𑀁 𑀯𑀦𑀘𑀭𑀓𑀸𑀤𑀺𑀪𑀸𑀯𑁄 𑀯𑀺𑀬𑀸𑀢𑀺. 𑀏𑀯𑀁 𑀓𑀫𑁆𑀫𑀯𑀯𑀢𑁆𑀣𑀸𑀦𑀫𑁆𑀧𑀺 𑀬𑀼𑀚𑁆𑀚𑀢𑀻’𑀢𑀺.

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀬𑀁 𑀧𑀦 𑀘𑁂𑀢𑀦𑀸𑀯𑀺𑀭𑀢𑀺𑀲𑀤𑁆𑀤𑀯𑀲𑁂𑀦 𑀢𑀺𑀯𑀺𑀥𑀸 𑀯𑀸𑀘𑀸 𑀦𑀸𑀫. 𑀢𑀢𑁆𑀣 ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁧𑁩); 𑀅𑀬𑀁 𑀘𑁂𑀢𑀦𑀸𑀯𑀸𑀘𑀸 𑀦𑀸𑀫. 𑀬𑀸 ‘‘𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀯𑀸𑀘𑀸’’𑀢𑀺 (𑀯𑀺𑀪. 𑁨𑁦𑁬), 𑀅𑀬𑀁 𑀯𑀺𑀭𑀢𑀺𑀯𑀸𑀘𑀸 𑀦𑀸𑀫. ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄 𑀉𑀤𑀻𑀭𑀡𑀁 𑀖𑁄𑀲𑁄 𑀖𑁄𑀲𑀓𑀫𑁆𑀫𑀁 𑀯𑀸𑀘𑀸 𑀯𑀘𑀻𑀪𑁂𑀤𑁄’’𑀢𑀺 (𑀥. 𑀲. 𑁮𑁫𑁦), 𑀅𑀬𑀁 𑀲𑀤𑁆𑀤𑀯𑀸𑀘𑀸 𑀦𑀸𑀫. 𑀢𑀸𑀲𑀼 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀦𑁂𑀯 𑀘𑁂𑀢𑀦𑀸𑀬 𑀦𑀸𑀫𑀁 𑀦 𑀯𑀺𑀭𑀢𑀺𑀬𑀸. 𑀲𑀳𑀲𑀤𑁆𑀤𑀸 𑀧𑀦 𑀏𑀓𑀸 𑀯𑀺𑀜𑁆𑀜𑀢𑁆𑀢𑀺 𑀅𑀢𑁆𑀣𑀺, 𑀇𑀤𑀁 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄 𑀉𑀤𑀻𑀭𑀡𑀁 𑀖𑁄𑀲𑁄 𑀖𑁄𑀲𑀓𑀫𑁆𑀫𑀁 𑀯𑀸𑀘𑀸 𑀯𑀘𑀻𑀪𑁂𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀸𑀘𑀸. 𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁, 𑀇𑀤𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁬𑁩𑁬).

‘𑀇𑀤𑀁 𑀯𑀓𑁆𑀔𑀸𑀫𑀺 𑀏𑀢𑀁 𑀯𑀓𑁆𑀔𑀸𑀫𑀻’𑀢𑀺 𑀳𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑁄. 𑀆𑀕𑀫𑀝𑁆𑀞𑀓𑀣𑀸𑀲𑀼 𑀧𑀦 ‘𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤’𑀦𑁆𑀢𑀺 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀯𑀺𑀧𑁆𑀧𑀮𑀧𑀦𑁆𑀢𑀸𑀦𑀁 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑀸𑀤𑀻𑀦𑀁 𑀲𑀤𑁆𑀤𑀁; ‘𑀲𑀼𑀢𑁆𑀯𑀸’𑀢𑀺 𑀢𑀁 𑀲𑀼𑀢𑁆𑀯𑀸, 𑀬𑀁 𑀯𑀺𑀢𑀓𑁆𑀓𑀬𑀢𑁄 𑀢𑀲𑁆𑀲 𑀲𑁄 𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑁄; 𑀢𑀲𑁆𑀲 𑀯𑀲𑁂𑀦 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄’𑀢𑀺 𑀆𑀤𑀺𑀲𑀢𑀻𑀢𑀺 𑀯𑀢𑁆𑀯𑀸 𑀯𑀢𑁆𑀣𑀽𑀦𑀺𑀧𑀺 𑀓𑀣𑀺𑀢𑀸𑀦𑀺. 𑀧𑀝𑁆𑀞𑀸𑀦𑁂𑀧𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀆𑀕𑀢𑀁. 𑀢𑀲𑁆𑀫𑀸 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦𑀸𑀫 𑀦𑀢𑁆𑀣𑀺. ‘𑀇𑀤𑀁 𑀯𑀓𑁆𑀔𑀸𑀫𑀺 𑀏𑀢𑀁 𑀯𑀓𑁆𑀔𑀸𑀫𑀻’𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀦 𑀘𑀺𑀢𑁆𑀢𑀁 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸𑀢𑀺 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑀬𑀫𑀸𑀦𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀥𑀸𑀢𑀼𑀲𑀗𑁆𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄 𑀦𑀸𑀫. 𑀅𑀬𑀁 𑀦 𑀯𑀺𑀜𑁆𑀜𑀢𑁆𑀢𑀺. 𑀢𑀲𑁆𑀲𑀸 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑁄 𑀅𑀢𑁆𑀣𑀺, 𑀅𑀬𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀇𑀢𑁄 𑀧𑀭𑀁 𑀲𑀸 𑀅𑀝𑁆𑀞 𑀭𑀽𑀧𑀸𑀦𑀺 𑀯𑀺𑀬 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀥𑀸𑀧𑀺 𑀳𑀺 ‘𑀢𑀺𑀲𑁆𑀲, 𑀤𑀢𑁆𑀢, 𑀫𑀺𑀢𑁆𑀢𑀸’𑀢𑀺 𑀧𑀓𑁆𑀓𑁄𑀲𑀦𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀺𑀜𑁆𑀜𑀢𑁆𑀢𑀺𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’𑀢𑀺 𑀚𑀸𑀦𑀸𑀢𑀺. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀺𑀬 𑀘 𑀅𑀬𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀧𑀸𑀓𑀝𑀸 𑀳𑁄𑀢𑀺. ‘𑀏𑀳𑀺, 𑀬𑀸𑀳𑀻’𑀢𑀺 𑀳𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 ‘𑀇𑀤𑀁 𑀦𑀸𑀫𑁂𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’𑀢𑀺 𑀜𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺 𑀘𑁂𑀯 𑀕𑀘𑁆𑀙𑀦𑁆𑀢𑀺 𑀘. 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁 𑀘𑀸𑀮𑁂𑀢𑀺 𑀦 𑀘𑀸𑀮𑁂𑀢𑀻𑀢𑀺, 𑀅𑀬𑀁 𑀧𑀦 𑀯𑀸𑀭𑁄 𑀇𑀥 𑀦 𑀮𑀩𑁆𑀪𑀢𑀺. 𑀧𑀼𑀭𑀺𑀫𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀺. 𑀬𑀸 𑀧𑀦 𑀢𑀲𑁆𑀫𑀺𑀁 𑀯𑀘𑀻𑀤𑁆𑀯𑀸𑀭𑁂 𑀲𑀺𑀤𑁆𑀥𑀸 𑀘𑁂𑀢𑀦𑀸, 𑀬𑀸𑀬 𑀫𑀼𑀲𑀸 𑀓𑀣𑁂𑀢𑀺, 𑀧𑁂𑀲𑀼𑀜𑁆𑀜𑀁 𑀓𑀣𑁂𑀢𑀺, 𑀨𑀭𑀼𑀲𑀁 𑀓𑀣𑁂𑀢𑀺, 𑀲𑀫𑁆𑀨𑀁 𑀧𑀮𑀧𑀢𑀺, 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀢𑀺, 𑀇𑀤𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀓𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀘 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀬𑀁 𑀧𑀦 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀫𑀦𑁄 𑀫𑀦𑁄 𑀦𑀸𑀫. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁄 𑀘𑀢𑀼𑀧𑀜𑁆𑀜𑀸𑀲𑀯𑀺𑀥𑁄 𑀳𑁄𑀢𑀺, 𑀭𑀽𑀧𑀸𑀯𑀘𑀭𑁄 𑀧𑀦𑁆𑀦𑀭𑀲𑀯𑀺𑀥𑁄, 𑀅𑀭𑀽𑀧𑀸𑀯𑀘𑀭𑁄 𑀤𑁆𑀯𑀸𑀤𑀲𑀯𑀺𑀥𑁄, 𑀮𑁄𑀓𑀼𑀢𑁆𑀢𑀭𑁄 𑀅𑀝𑁆𑀞𑀯𑀺𑀥𑁄𑀢𑀺 𑀲𑀩𑁆𑀩𑁄𑀧𑀺 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀬𑀁 𑀦𑀸𑀫 𑀫𑀦𑁄 𑀫𑀦𑁄𑀤𑁆𑀯𑀸𑀭𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀣𑀸 𑀳𑀺 𑀅𑀬𑀁 𑀦𑀸𑀫 𑀘𑁂𑀢𑀦𑀸 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀅𑀦𑁆𑀢𑀫𑀲𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑀺 𑀘𑁂𑀢𑀦𑀸 𑀫𑀳𑀸𑀧𑀓𑀭𑀡𑁂 𑀓𑀫𑁆𑀫𑀦𑁆𑀢𑁆𑀯𑁂𑀯 𑀦𑀺𑀤𑁆𑀤𑀺𑀝𑁆𑀞𑀸, 𑀏𑀯𑀫𑁂𑀯 𑀅𑀬𑀁 𑀦𑀸𑀫 𑀫𑀦𑁄 𑀫𑀦𑁄𑀤𑁆𑀯𑀸𑀭𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀏𑀢𑁆𑀣𑀸𑀳 𑁋 𑀓𑀫𑁆𑀫𑀁 𑀦𑀸𑀫𑁂𑀢𑀁 𑀓𑀺𑀁 𑀓𑀭𑁄𑀢𑀻𑀢𑀺? 𑀆𑀬𑀽𑀳𑀢𑀺, 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀺𑀡𑁆𑀟𑀁 𑀓𑀭𑁄𑀢𑀺, 𑀘𑁂𑀢𑁂𑀢𑀺, 𑀓𑀧𑁆𑀧𑁂𑀢𑀺, 𑀧𑀓𑀧𑁆𑀧𑁂𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀘𑁂𑀢𑀦𑀸 𑀓𑀺𑀁 𑀆𑀬𑀽𑀳𑀢𑀺, 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀺𑀡𑁆𑀟𑀁 𑀓𑀭𑁄𑀢𑀺, 𑀘𑁂𑀢𑁂𑀢𑀺, 𑀓𑀧𑁆𑀧𑁂𑀢𑀺, 𑀧𑀓𑀧𑁆𑀧𑁂𑀢𑀻𑀢𑀺?. 𑀲𑀳𑀚𑀸𑀢𑀥𑀫𑁆𑀫𑁂. 𑀲𑀸𑀧𑀺 𑀳𑀺 𑀲𑀳𑀚𑀸𑀢𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑁂 𑀆𑀬𑀽𑀳𑀢𑀺 𑀅𑀪𑀺𑀲𑀗𑁆𑀔𑀭𑁄𑀢𑀺 𑀧𑀺𑀡𑁆𑀟𑀁 𑀓𑀭𑁄𑀢𑀺 𑀘𑁂𑀢𑁂𑀢𑀺 𑀓𑀧𑁆𑀧𑁂𑀢𑀺 𑀧𑀓𑀧𑁆𑀧𑁂𑀢𑀻𑀢𑀺. 𑀓𑀺𑀁 𑀯𑀸 𑀇𑀫𑀺𑀦𑀸 𑀯𑀸𑀤𑁂𑀦? 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑁄 𑀏𑀓𑀽𑀦𑀢𑀺𑀁𑀲𑀯𑀺𑀥𑁄 𑀫𑀦𑁄 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀬𑀸 𑀧𑀦 𑀢𑀲𑁆𑀫𑀺𑀁 𑀫𑀦𑁄𑀤𑁆𑀯𑀸𑀭𑁂 𑀲𑀺𑀤𑁆𑀥𑀸 𑀘𑁂𑀢𑀦𑀸 𑀬𑀸𑀬 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀦𑀺 𑀘𑁂𑀯 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀲𑁆𑀲𑀦𑀸𑀦𑀺 𑀘 𑀕𑀡𑁆𑀳𑀸𑀢𑀺, 𑀇𑀤𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀓𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀘 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀦𑀸𑀫.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑀣𑀸

𑀇𑀤𑀸𑀦𑀺 𑀬𑀸𑀦𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀞𑀧𑁂𑀢𑁆𑀯𑀸 𑀇𑀫𑀸𑀦𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀢𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀅𑀯𑀲𑁂𑀲𑀲𑁆𑀲 𑀤𑁆𑀯𑀸𑀭𑀓𑀣𑀸𑀬 𑀫𑀸𑀢𑀺𑀓𑀸𑀞𑀧𑀦𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀳𑁄𑀢𑀺. 𑀢𑀻𑀡𑀺 𑀳𑀺 𑀓𑀫𑁆𑀫𑀸𑀦𑀺 𑁋 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺. 𑀓𑀺𑀁 𑀧𑀦𑁂𑀢𑀁 𑀓𑀫𑁆𑀫𑀁 𑀦𑀸𑀫𑀸𑀢𑀺? 𑀘𑁂𑀢𑀦𑀸 𑀘𑁂𑀯, 𑀏𑀓𑀘𑁆𑀘𑁂 𑀘 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸. 𑀢𑀢𑁆𑀣 𑀘𑁂𑀢𑀦𑀸𑀬 𑀓𑀫𑁆𑀫𑀪𑀸𑀯𑁂 𑀇𑀫𑀸𑀦𑀺 𑀲𑀼𑀢𑁆𑀢𑀸𑀦𑀺 𑁋

‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺, 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’ (𑀅. 𑀦𑀺. 𑁬.𑁬𑁩; 𑀓𑀣𑀸. 𑁫𑁩𑁯). ‘‘𑀓𑀸𑀬𑁂 𑀯𑀸 𑀳𑀺, 𑀆𑀦𑀦𑁆𑀤, 𑀲𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁, 𑀯𑀸𑀘𑀸𑀬 𑀯𑀸, 𑀆𑀦𑀦𑁆𑀤, 𑀲𑀢𑀺 𑀯𑀘𑀻𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀫𑀦𑁂 𑀯𑀸, 𑀆𑀦𑀦𑁆𑀤, 𑀲𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁’’ (𑀲𑀁. 𑀦𑀺. 𑁨.𑁨𑁫; 𑀅. 𑀦𑀺. 𑁪.𑁧𑁭𑁧). ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀤𑀼𑀓𑁆𑀔𑀼𑀤𑁆𑀭𑀬𑀁, 𑀤𑀼𑀓𑁆𑀔𑀯𑀺𑀧𑀸𑀓𑀁; 𑀘𑀢𑀼𑀩𑁆𑀩𑀺𑀥𑀸, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀜𑁆𑀘𑁂𑀢𑀦𑀸…𑀧𑁂… 𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀁 𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀁 𑀘𑀢𑀼𑀩𑁆𑀩𑀺𑀥𑀸, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀜𑁆𑀘𑁂𑀢𑀦𑀸…𑀧𑁂… 𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀜𑁆𑀘𑁂𑀢𑀦𑀸, 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀁’’ (𑀓𑀣𑀸. 𑁫𑁩𑁯; 𑀅. 𑀦𑀺. 𑁧𑁦.𑁨𑁧𑁭 𑀣𑁄𑀓𑀁 𑀯𑀺𑀲𑀤𑀺𑀲𑀁). ‘‘𑀲𑀘𑀸𑀬𑀁, 𑀆𑀦𑀦𑁆𑀤, 𑀲𑀫𑀺𑀤𑁆𑀥𑀺 𑀫𑁄𑀖𑀧𑀼𑀭𑀺𑀲𑁄 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 𑀲𑀜𑁆𑀘𑁂𑀢𑀦𑀺𑀬𑀁, 𑀆𑀯𑀼𑀲𑁄 𑀧𑀸𑀝𑀮𑀺𑀧𑀼𑀢𑁆𑀢, 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀲𑀼𑀔𑀯𑁂𑀤𑀦𑀻𑀬𑀁 𑀲𑀼𑀔𑀁 𑀲𑁄 𑀯𑁂𑀤𑀬𑀢𑀺…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑁄 𑀯𑁂𑀤𑀬𑀢𑀻𑀢𑀺; 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀔𑁄, 𑀆𑀦𑀦𑁆𑀤, 𑀲𑀫𑀺𑀤𑁆𑀥𑀺 𑀫𑁄𑀖𑀧𑀼𑀭𑀺𑀲𑁄 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁦𑁦; 𑀓𑀣𑀸. 𑁫𑁩𑁯).

𑀇𑀫𑀸𑀦𑀺 𑀢𑀸𑀯 𑀘𑁂𑀢𑀦𑀸𑀬 𑀓𑀫𑁆𑀫𑀪𑀸𑀯𑁂 𑀲𑀼𑀢𑁆𑀢𑀸𑀦𑀺. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀦 𑀓𑀫𑁆𑀫𑀪𑀸𑀯𑁄 𑀓𑀫𑁆𑀫𑀘𑀢𑀼𑀓𑁆𑀓𑁂𑀦 𑀤𑀻𑀧𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁, 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺 (𑀅. 𑀦𑀺. 𑁪.𑁨𑁩𑁨-𑁨𑁩𑁩).… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀬𑀤𑀺𑀤𑀁 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑁋 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺 (𑀅. 𑀦𑀺. 𑁪.𑁨𑁩𑁮).… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀲𑁂𑀬𑁆𑀬𑀣𑀺𑀤𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 …𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁨𑁩𑁭).

𑀏𑀯𑀁 𑀇𑀫𑁂 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀧𑁆𑀧𑀪𑁂𑀤𑀢𑁄 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀓𑀫𑁆𑀫𑀘𑀢𑀼𑀓𑁆𑀓𑁂𑀦 𑀤𑀻𑀧𑀺𑀢𑀸. 𑀅𑀪𑀺𑀚𑁆𑀛𑀸, 𑀩𑁆𑀬𑀸𑀧𑀸𑀤𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀦𑀪𑀺𑀚𑁆𑀛𑀸, 𑀅𑀩𑁆𑀬𑀸𑀧𑀸𑀤𑁄, 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀇𑀫𑁂𑀳𑀺 𑀧𑀦 𑀙𑀳𑀺 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀪𑀚𑀸𑀧𑀺𑀬𑀫𑀸𑀦𑁄 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀪𑀚𑀢𑀺. 𑀬𑀜𑁆𑀳𑀺 𑀓𑀸𑀬𑁂𑀦 𑀤𑀼𑀲𑁆𑀲𑀻𑀮𑁆𑀬𑀁 𑀅𑀚𑁆𑀛𑀸𑀘𑀭𑀢𑀺, 𑀢𑀫𑁆𑀳𑀸 𑀲𑀁𑀯𑀭𑁄 𑀓𑀸𑀬𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀯𑀸𑀘𑀸𑀬 𑀤𑀼𑀲𑁆𑀲𑀻𑀮𑁆𑀬𑀁 𑀅𑀚𑁆𑀛𑀸𑀘𑀭𑀢𑀺, 𑀢𑀫𑁆𑀳𑀸 𑀲𑀁𑀯𑀭𑁄 𑀯𑀸𑀘𑀲𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀓𑀸𑀬𑀓𑀫𑁆𑀫𑀁, 𑀲𑀫𑁆𑀫𑀸𑀯𑀸𑀘𑀸 𑀯𑀘𑀻𑀓𑀫𑁆𑀫𑀁. 𑀏𑀢𑀲𑁆𑀫𑀺𑀁 𑀤𑁆𑀯𑀬𑁂 𑀕𑀳𑀺𑀢𑁂 𑀲𑀫𑁆𑀫𑀸𑀆𑀚𑀻𑀯𑁄 𑀢𑀧𑁆𑀧𑀓𑁆𑀔𑀺𑀓𑀢𑁆𑀢𑀸 𑀕𑀳𑀺𑀢𑁄𑀯 𑀳𑁄𑀢𑀺. 𑀬𑀁 𑀧𑀦 𑀫𑀦𑁂𑀦 𑀤𑀼𑀲𑁆𑀲𑀻𑀮𑁆𑀬𑀁 𑀅𑀚𑁆𑀛𑀸𑀘𑀭𑀢𑀺, 𑀢𑀫𑁆𑀳𑀸 𑀲𑀁𑀯𑀭𑁄 𑀫𑀸𑀦𑀲𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀪𑀚𑀸𑀧𑀺𑀬𑀫𑀸𑀦𑁄 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀪𑀚𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀸𑀭𑀲𑀁𑀲𑀦𑁆𑀤𑀦𑀁 𑀦𑀸𑀫 𑀳𑁄𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀳𑀺 𑀘𑁄𑀧𑀦𑀁 𑀧𑀢𑁆𑀯𑀸 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀫𑀦𑁄𑀤𑁆𑀯𑀸𑀭𑁂 𑀘 𑀲𑀫𑀼𑀤𑀸𑀘𑀸𑀭𑀁 𑀧𑀢𑁆𑀯𑀸 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺; 𑀢𑀁 𑀕𑀳𑁂𑀢𑁆𑀯𑀸 𑀢𑀁𑀢𑀁𑀤𑁆𑀯𑀸𑀭𑀧𑀓𑁆𑀔𑀺𑀓𑀫𑁂𑀯 𑀅𑀓𑀁𑀲𑀼.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀬𑁄 ‘𑀫𑀺𑀕𑀯𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀥𑀦𑀼𑀁 𑀲𑀚𑁆𑀚𑁂𑀢𑀺, 𑀚𑀺𑀬𑀁 𑀯𑀝𑁆𑀝𑁂𑀢𑀺, 𑀲𑀢𑁆𑀢𑀺𑀁 𑀦𑀺𑀲𑁂𑀢𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀯𑀢𑁆𑀣𑀁 𑀧𑀭𑀺𑀤𑀳𑀢𑀺, 𑀏𑀢𑁆𑀢𑀸𑀯𑀢𑀸 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀁 𑀧𑀢𑁆𑀢𑀁 𑀳𑁄𑀢𑀺. 𑀲𑁄 𑀅𑀭𑀜𑁆𑀜𑁂 𑀤𑀺𑀯𑀲𑀁 𑀘𑀭𑀺𑀢𑁆𑀯𑀸 𑀅𑀦𑁆𑀢𑀫𑀲𑁄 𑀲𑀲𑀩𑀺𑀴𑀸𑀭𑀫𑀢𑁆𑀢𑀫𑁆𑀧𑀺 𑀦 𑀮𑀪𑀢𑀺, 𑀇𑀤𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀢𑀸𑀬. 𑀓𑁂𑀯𑀮𑀁 𑀧𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀘𑁆𑀙𑀕𑁆𑀕𑀳𑀡𑀸𑀤𑀻 𑀲𑀼𑀧𑀬𑁄𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀘𑀻𑀤𑁆𑀯𑀸𑀭𑁂𑀧𑀺 ‘𑀫𑀺𑀕𑀯𑀁 𑀕𑀫𑀺𑀲𑁆𑀲𑀸𑀫𑀺’ ‘𑀯𑁂𑀕𑁂𑀦 𑀥𑀦𑀼𑀆𑀤𑀻𑀦𑀺 𑀲𑀚𑁆𑀚𑁂𑀣𑀸’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀭𑀜𑁆𑀜𑁂 𑀓𑀺𑀜𑁆𑀘𑀺 𑀅𑀮𑀪𑀦𑁆𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀯𑀘𑀻𑀤𑁆𑀯𑀸𑀭𑁂 𑀘𑁄𑀧𑀦𑀁 𑀧𑀢𑁆𑀢𑀁, 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀢𑀸𑀬 𑀧𑀦 𑀓𑀸𑀬𑀓𑀫𑁆𑀫𑀁 𑀦 𑀳𑁄𑀢𑀺. 𑀓𑁂𑀯𑀮𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀯𑀥𑀓𑀘𑁂𑀢𑀦𑀸𑀬 𑀉𑀧𑁆𑀧𑀦𑁆𑀦𑀫𑀢𑁆𑀢𑀸𑀬 𑀏𑀯 𑀓𑀫𑁆𑀫𑀧𑀣𑀪𑁂𑀤𑁄𑀯 𑀳𑁄𑀢𑀺. 𑀲𑁄 𑀘 𑀔𑁄 𑀩𑁆𑀬𑀸𑀧𑀸𑀤𑀯𑀲𑁂𑀦 𑀦 𑀧𑀸𑀡𑀸𑀢𑀺𑀧𑀸𑀢𑀯𑀲𑁂𑀦. 𑀅𑀓𑀼𑀲𑀮𑀜𑁆𑀳𑀺 𑀓𑀸𑀬𑀓𑀫𑁆𑀫𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂; 𑀢𑀣𑀸 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁. 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀧𑀦 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀺; 𑀢𑀣𑀸 𑀓𑀼𑀲𑀮𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺.

𑀓𑀣𑀁? 𑀲𑀳𑀢𑁆𑀣𑀸 𑀳𑀺 𑀧𑀸𑀡𑀁 𑀳𑀦𑀦𑁆𑀢𑀲𑁆𑀲 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀦𑁆𑀢𑀲𑁆𑀲 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯 𑀳𑁄𑀢𑀺. 𑀏𑀯𑀁 𑀢𑀸𑀯 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸. ‘𑀕𑀘𑁆𑀙 𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’𑀢𑀺 𑀆𑀡𑀸𑀧𑁂𑀦𑁆𑀢𑀲𑁆𑀲 𑀧𑀦 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀏𑀯𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸. 𑀏𑀢𑁆𑀢𑀓𑀸 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸 𑀦𑀸𑀫.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑀫𑀼𑀝𑁆𑀞𑀸𑀢𑀻’𑀢𑀺. 𑀲𑁄 ‘𑀢𑀬𑁄 𑀲𑀗𑁆𑀕𑀳𑁂 𑀆𑀭𑀼𑀴𑁆𑀳𑀁 𑀲𑀼𑀢𑁆𑀢𑀁 𑀆𑀳𑀭𑀸𑀳𑀻’𑀢𑀺 𑀯𑀼𑀢𑁆𑀢𑁄 𑀇𑀤𑀁 𑀓𑀼𑀮𑀼𑀫𑁆𑀩𑀲𑀼𑀢𑁆𑀢𑀁 𑀦𑀸𑀫 𑀆𑀳𑀭𑀺 𑁋

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀜𑁆𑀜𑀺𑀲𑁆𑀲𑀸 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀧𑀸𑀧𑀓𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀓𑁄 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀓𑀼𑀘𑁆𑀙𑀺𑀕𑀢𑁄 𑀕𑀩𑁆𑀪𑁄 𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀫𑁂𑀬𑁆𑀬𑀸’𑀢𑀺. 𑀏𑀯𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀼𑀫𑁆𑀩𑀲𑁆𑀲 𑀉𑀧𑀖𑀸𑀢𑁄 𑀳𑁄𑀢𑀻’’𑀢𑀺.

𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀆𑀳 𑁋 ‘𑀏𑀯𑀁 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀬𑁂𑀯 𑀫𑀦𑀲𑀸 𑀓𑀼𑀘𑁆𑀙𑀺𑀕𑀢𑁄 𑀕𑀩𑁆𑀪𑁄 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀻𑀬𑀢𑀺. 𑀏𑀢𑁆𑀣 𑀓𑀼𑀢𑁄 𑀓𑀸𑀬𑀗𑁆𑀕𑀘𑁄𑀧𑀦𑀁 𑀯𑀸 𑀯𑀸𑀘𑀗𑁆𑀕𑀘𑁄𑀧𑀦𑀁 𑀯𑀸? 𑀫𑀦𑁄𑀤𑁆𑀯𑀸𑀭𑀲𑁆𑀫𑀺𑀁𑀬𑁂𑀯 𑀧𑀦 𑀇𑀤𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀲𑀫𑀼𑀝𑁆𑀞𑀸𑀢𑀻’𑀢𑀺.

𑀢𑀫𑁂𑀦𑀁 ‘𑀢𑀯 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀢𑀼𑀮𑀬𑀺𑀲𑁆𑀲𑀸𑀫𑀸’𑀢𑀺 𑀯𑀢𑁆𑀯𑀸 𑀏𑀯𑀁 𑀢𑀼𑀮𑀬𑀺𑀁𑀲𑀼 𑁋 ‘𑀢𑁆𑀯𑀁 𑀇𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑀁 𑀯𑀤𑁂𑀲𑀺. 𑀇𑀤𑁆𑀥𑀺 𑀦𑀸𑀫 𑀘𑁂𑀲𑀸 𑁋 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺, 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺, 𑀫𑀦𑁄𑀫𑀬𑀺𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀺𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀺𑀤𑁆𑀥𑀺, 𑀅𑀭𑀺𑀬𑀺𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻𑀢𑀺 𑀤𑀲𑀯𑀺𑀥𑀸 (𑀧𑀝𑀺. 𑀫. 𑁩.𑁧𑁦). 𑀢𑀢𑁆𑀣 𑀓𑀢𑀭𑀁 𑀇𑀤𑁆𑀥𑀺𑀁 𑀯𑀤𑁂𑀲𑀻’𑀢𑀺? ‘𑀪𑀸𑀯𑀦𑀸𑀫𑀬’𑀦𑁆𑀢𑀺. ‘𑀓𑀺𑀁 𑀧𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻’𑀢𑀺? ‘𑀆𑀫, 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀏𑀓𑀯𑀸𑀭𑀁 𑀳𑁄𑀢𑀻’𑀢𑀺; 𑀯𑀤𑀦𑁆𑀢𑀺 𑀬𑀣𑀸 𑀳𑀺 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑁂𑀦 𑀉𑀤𑀓𑀪𑀭𑀺𑀢𑁂 𑀖𑀝𑁂 𑀔𑀺𑀢𑁆𑀢𑁂 𑀖𑀝𑁄𑀧𑀺 𑀪𑀺𑀚𑁆𑀚𑀢𑀺, 𑀉𑀤𑀓𑀫𑁆𑀧𑀺 𑀦𑀲𑁆𑀲𑀢𑀺, 𑀏𑀯𑀫𑁂𑀯 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀏𑀓𑀯𑀸𑀭𑀁 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀸 𑀦𑀲𑁆𑀲𑀢𑀻𑀢𑀺. 𑀅𑀣 𑀦𑀁 ‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀦𑁂𑀯 𑀏𑀓𑀯𑀸𑀭𑀁 𑀦 𑀤𑁆𑀯𑁂 𑀯𑀸𑀭𑁂 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻’𑀢𑀺 𑀯𑀢𑁆𑀯𑀸 𑀢𑀁 𑀲𑀜𑁆𑀜𑀢𑁆𑀢𑀺𑀁 𑀆𑀕𑀘𑁆𑀙𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀓𑀺𑀁 𑀓𑀼𑀲𑀮𑀸, 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸? 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸? 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸? 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸’𑀢𑀺?

𑀇𑀫𑀁 𑀧𑀦 𑀧𑀜𑁆𑀳𑀁 𑀬𑁄 𑀚𑀸𑀦𑀸𑀢𑀺 𑀲𑁄 𑀏𑀯𑀁 𑀯𑀓𑁆𑀔𑀢𑀺 𑁋 ‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀓𑀼𑀲𑀮𑀸 𑀯𑀸 𑀳𑁄𑀢𑀺, 𑀅𑀩𑁆𑀬𑀸𑀓𑀢𑀸 𑀯𑀸; 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀸 𑀏𑀯, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀏𑀯, 𑀭𑀽𑀧𑀸𑀯𑀘𑀭𑀸 𑀏𑀯𑀸’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀓𑀼𑀲𑀮𑀸𑀤𑀻𑀲𑀼 𑀓𑀢𑀭𑀁 𑀓𑁄𑀝𑁆𑀞𑀸𑀲𑀁 𑀪𑀚𑀢𑀻’𑀢𑀺? 𑀚𑀸𑀦𑀦𑁆𑀢𑁄 𑀯𑀓𑁆𑀔𑀢𑀺 𑁋 ‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀅𑀓𑀼𑀲𑀮𑀸 𑀏𑀯, 𑀤𑀼𑀓𑁆𑀔𑀯𑁂𑀤𑀦𑀻𑀬𑀸 𑀏𑀯, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀏𑀯 𑀓𑀸𑀫𑀸𑀯𑀘𑀭𑀸 𑀏𑀯𑀸’𑀢𑀺. ‘𑀏𑀯𑀁 𑀲𑀦𑁆𑀢𑁂 𑀢𑀯 𑀧𑀜𑁆𑀳𑁄 𑀦𑁂𑀯 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀫𑁂𑀢𑀺, 𑀦 𑀯𑁂𑀤𑀦𑀸𑀢𑁆𑀢𑀺𑀓𑁂𑀦, 𑀦 𑀯𑀺𑀢𑀓𑁆𑀓𑀢𑁆𑀢𑀺𑀓𑁂𑀦, 𑀦 𑀪𑀽𑀫𑀦𑁆𑀢𑀭𑁂𑀦𑀸’𑀢𑀺.

‘𑀓𑀺𑀁 𑀧𑀦 𑀏𑀯𑀁 𑀫𑀳𑀦𑁆𑀢𑀁 𑀲𑀼𑀢𑁆𑀢𑀁 𑀦𑀺𑀭𑀢𑁆𑀣𑀓’𑀦𑁆𑀢𑀺? ‘𑀦𑁄 𑀦𑀺𑀭𑀢𑁆𑀣𑀓𑀁; 𑀢𑁆𑀯𑀁 𑀧𑀦𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀸𑀲𑀺. ‘‘𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄’’𑀢𑀺 𑀏𑀢𑁆𑀣 𑀳𑀺 𑀦𑁂𑀯 𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸, 𑀆𑀣𑀩𑁆𑀩𑀡𑀺𑀤𑁆𑀥𑀺 𑀧𑀦 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀸 𑀮𑀩𑁆𑀪𑀢𑀺. 𑀲𑀸 𑀧𑀦 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀆𑀣𑀩𑁆𑀩𑀡𑀺𑀤𑁆𑀥𑀺𑀓𑀸 𑀳𑀺 𑀲𑀢𑁆𑀢𑀸𑀳𑀁 𑀅𑀮𑁄𑀡𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀩𑁆𑀩𑁂 𑀅𑀢𑁆𑀣𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀲𑀬𑀫𑀸𑀦𑀸 𑀢𑀧𑀁 𑀘𑀭𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀲𑀸𑀦𑀪𑀽𑀫𑀺𑀁 𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀢𑀫𑁂 𑀧𑀤𑁂 𑀞𑀢𑁆𑀯𑀸 𑀳𑀢𑁆𑀣𑀁 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀫𑀼𑀔𑁂𑀦 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀦𑁆𑀢𑀺. 𑀅𑀣 𑀦𑁂𑀲𑀁 𑀓𑀫𑁆𑀫𑀁 𑀲𑀫𑀺𑀚𑁆𑀛𑀢𑀺. 𑀏𑀯𑀁 𑀅𑀬𑀫𑁆𑀧𑀺 𑀇𑀤𑁆𑀥𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺. ‘𑀦 𑀓𑀸𑀬𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀻’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀳𑀢𑁆𑀣𑀫𑀼𑀤𑁆𑀤𑀸𑀬 𑀧𑀦 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀓𑀣𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁 𑀳𑁄𑀢𑀺. 𑀏𑀯𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸. 𑀯𑀘𑀻𑀪𑁂𑀤𑀁 𑀧𑀦 𑀓𑀢𑁆𑀯𑀸 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀓𑀣𑁂𑀦𑁆𑀢𑀲𑁆𑀲 𑀓𑀫𑁆𑀫𑀫𑁆𑀧𑀺 𑀯𑀘𑀻𑀓𑀫𑁆𑀫𑀁 𑀤𑁆𑀯𑀸𑀭𑀫𑁆𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯. 𑀏𑀯𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸. 𑀏𑀢𑁆𑀢𑀓𑀸 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸 𑀦𑀸𑀫.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑀫𑀼𑀝𑁆𑀞𑀸𑀢𑀻’𑀢𑀺. 𑀲𑁄 ‘𑀢𑀬𑁄 𑀲𑀗𑁆𑀕𑀳𑁂 𑀆𑀭𑀼𑀴𑁆𑀳𑀁 𑀲𑀼𑀢𑁆𑀢𑀁 𑀆𑀳𑀭𑀸𑀳𑀻’𑀢𑀺 𑀯𑀼𑀢𑁆𑀢𑁄 𑀇𑀤𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀢𑁄 𑀲𑀼𑀢𑁆𑀢𑀁 𑀆𑀳𑀭𑀺 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑁆𑀲𑀸𑀯𑀺𑀬𑀫𑀸𑀦𑁂 𑀲𑀭𑀫𑀸𑀦𑁄 𑀲𑀦𑁆𑀢𑀺𑀁 𑀆𑀧𑀢𑁆𑀢𑀺𑀁 𑀦𑀸𑀯𑀺𑀓𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪).

𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀆𑀳 𑁋 ‘𑀏𑀯𑀁 𑀆𑀧𑀢𑁆𑀢𑀺𑀁 𑀅𑀦𑀸𑀯𑀺𑀓𑀭𑁄𑀦𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄𑀯 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀏𑀢𑁆𑀣 𑀓𑀼𑀢𑁄 𑀓𑀸𑀬𑀗𑁆𑀕𑀘𑁄𑀧𑀦𑀁 𑀯𑀸 𑀯𑀸𑀘𑀗𑁆𑀕𑀘𑁄𑀧𑀦𑀁 𑀯𑀸? 𑀫𑀦𑁄𑀤𑁆𑀯𑀸𑀭𑀲𑁆𑀫𑀺𑀁𑀬𑁂𑀯 𑀧𑀦 𑀇𑀤𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀲𑀫𑀼𑀝𑁆𑀞𑀸𑀢𑀻’𑀢𑀺.

𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀓𑀺𑀁 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁 𑀉𑀤𑀸𑀳𑀼 𑀦𑀻𑀢𑀢𑁆𑀣’𑀦𑁆𑀢𑀺? ‘𑀦𑀻𑀢𑀢𑁆𑀣𑀫𑁂𑀯 𑀫𑀬𑁆𑀳𑀁 𑀲𑀼𑀢𑁆𑀢’𑀦𑁆𑀢𑀺. 𑀲𑁄 ‘𑀫𑀸 𑀏𑀯𑀁 𑀅𑀯𑀘, 𑀢𑀼𑀮𑀬𑀺𑀲𑁆𑀲𑀸𑀫𑀲𑁆𑀲 𑀅𑀢𑁆𑀣’𑀦𑁆𑀢𑀺 𑀯𑀢𑁆𑀯𑀸 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀓𑀺𑀁 𑀳𑁄𑀢𑀻’𑀢𑀺? 𑀚𑀸𑀦𑀦𑁆𑀢𑁄 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀤𑀼𑀓𑁆𑀓𑀝𑀁 𑀳𑁄𑀢𑀻’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 ‘𑀯𑀺𑀦𑀬𑀲𑁆𑀲 𑀤𑁆𑀯𑁂 𑀫𑀽𑀮𑀸𑀦𑀺 𑁋 𑀓𑀸𑀬𑁄 𑀘 𑀯𑀸𑀘𑀸 𑀘; 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀇𑀫𑁂𑀲𑀼𑀬𑁂𑀯 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺𑀧𑀜𑁆𑀜𑀧𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑁆𑀯𑀁 𑀅𑀢𑀺𑀯𑀺𑀬 𑀯𑀺𑀦𑀬𑁂 𑀧𑀓𑀢𑀜𑁆𑀜𑀽, 𑀬𑁄 𑀲𑀢𑁆𑀣𑀸𑀭𑀸 𑀅𑀧𑀜𑁆𑀜𑀢𑁆𑀢𑁂 𑀞𑀸𑀦𑁂 𑀆𑀧𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀩𑁆𑀪𑀸𑀘𑀺𑀓𑁆𑀔𑀲𑀺, 𑀚𑀺𑀦𑀘𑀓𑁆𑀓𑀁 𑀧𑀳𑀭𑀲𑀻’𑀢𑀺𑀆𑀤𑀺𑀯𑀘𑀦𑁂𑀳𑀺 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀢𑁆𑀢𑀭𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀉𑀤𑀸𑀳𑀼 𑀅𑀓𑀺𑀭𑀺𑀬𑀢𑁄’𑀢𑀺? 𑀚𑀸𑀦𑀦𑁆𑀢𑁄 ‘𑀓𑀺𑀭𑀺𑀬𑀢𑁄’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘𑀅𑀦𑀸𑀯𑀺𑀓𑀭𑁄𑀦𑁆𑀢𑁄 𑀓𑀢𑀭𑀁 𑀓𑀺𑀭𑀺𑀬𑀁 𑀓𑀭𑁄𑀢𑀻’𑀢𑀺? 𑀅𑀤𑁆𑀥𑀸 𑀳𑀺 𑀓𑀺𑀭𑀺𑀬𑀁 𑀅𑀧𑀲𑁆𑀲𑀦𑁆𑀢𑁄 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀢𑁄 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁂𑀦 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀳𑁄𑀢𑀻’𑀢𑀺 𑀯𑀼𑀢𑁆𑀢𑁄, 𑀲𑁄 𑀆𑀧𑀢𑁆𑀢𑀺𑀢𑁄 𑀓𑀺𑀁 𑀳𑁄𑀢𑀺? ‘𑀓𑀢𑀭𑀸𑀧𑀢𑁆𑀢𑀺 𑀳𑁄𑀢𑀻’𑀢𑀺 𑀅𑀢𑁆𑀣𑁄. ‘𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀺’. 𑀲𑀸 𑀘 𑀔𑁄 𑀦 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑁂𑀦, 𑀪𑀕𑀯𑀢𑁄 𑀧𑀦 𑀯𑀘𑀦𑁂𑀦 𑀯𑀘𑀻𑀤𑁆𑀯𑀸𑀭𑁂 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀦𑀸𑀮𑀧𑀦𑁆𑀢𑁄 𑀫𑀦𑀼𑀚𑁂𑀦 𑀓𑁂𑀦𑀘𑀺,

𑀯𑀸𑀘𑀸𑀕𑀺𑀭𑀁 𑀦𑁄 𑀘 𑀧𑀭𑁂 𑀪𑀡𑁂𑀬𑁆𑀬;

𑀆𑀧𑀚𑁆𑀚𑁂𑀬𑁆𑀬 𑀯𑀸𑀘𑀲𑀺𑀓𑀁 𑀦 𑀓𑀸𑀬𑀺𑀓𑀁,

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀝𑀺. 𑁪𑁭𑁯);

𑀏𑀯𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀦 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀬𑀤𑀸 𑀧𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀓𑀸𑀬𑀗𑁆𑀕𑀁 𑀘𑁄𑀧𑁂𑀦𑁆𑀢𑁄 𑀳𑀢𑁆𑀣𑀕𑁆𑀕𑀸𑀳𑀸𑀤𑀻𑀦𑀺 𑀓𑀭𑁄𑀢𑀺, 𑀩𑁆𑀬𑀸𑀧𑀸𑀤𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀡𑁆𑀟𑀧𑀭𑀸𑀫𑀸𑀲𑀸𑀤𑀻𑀦𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀳𑀕𑀢𑁂𑀦 𑀘𑁂𑀢𑀲𑀸 ‘𑀔𑀦𑁆𑀤𑀲𑀺𑀯𑀸𑀤𑀬𑁄 𑀲𑁂𑀝𑁆𑀞𑀸’𑀢𑀺 𑀢𑁂𑀲𑀁 𑀅𑀪𑀺𑀯𑀸𑀤𑀦𑀅𑀜𑁆𑀚𑀮𑀺𑀓𑀫𑁆𑀫𑀪𑀽𑀢𑀧𑀻𑀞𑀓𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀤𑀸 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀏𑀯𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸.

𑀬𑀤𑀸 𑀧𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀸𑀘𑀗𑁆𑀕𑀁 𑀘𑁄𑀧𑁂𑀦𑁆𑀢𑁄 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲, 𑀢𑀁 𑀫𑀫𑀲𑁆𑀲𑀸’𑀢𑀺 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀅𑀪𑀺𑀚𑁆𑀛𑀸𑀬𑀢𑀺, 𑀩𑁆𑀬𑀸𑀧𑀸𑀤𑀲𑀳𑀕𑀢𑁂𑀦 𑀘𑁂𑀢𑀲𑀸 ‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸, 𑀩𑀚𑁆𑀛𑀦𑁆𑀢𑀼 𑀯𑀸, 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸, 𑀫𑀸 𑀯𑀸 𑀅𑀳𑁂𑀲𑀼’𑀦𑁆𑀢𑀺 𑀯𑀤𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀳𑀕𑀢𑁂𑀦 𑀘𑁂𑀢𑀲𑀸 ‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀢𑀤𑀸 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀏𑀯𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸.

𑀬𑀤𑀸 𑀧𑀦 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀳𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀤𑀸 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀏𑀯𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸𑀧𑀺 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀏𑀯𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀦 𑀯𑀼𑀢𑁆𑀢𑀁 ‘𑀢𑀣𑀸 𑀓𑀼𑀲𑀮𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀻’𑀢𑀺, 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀬𑀤𑀸 𑀳𑀺 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘𑀧𑀸𑀡𑀸𑀢𑀺𑀧𑀸𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀫𑀸𑀫𑀻’𑀢𑀺 𑀇𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑁆𑀳𑀸𑀢𑀺, 𑀢𑀤𑀸 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁 𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯. 𑀏𑀯𑀁 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀕𑀢𑀸 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸.

𑀬𑀤𑀸 𑀧𑀦 𑀢𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀤𑀸 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁 𑀳𑁄𑀢𑀺. 𑀏𑀯𑀁 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀕𑀢𑀸 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸.

𑀬𑀤𑀸 𑀧𑀦 𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑀺𑀬𑁆𑀬𑀫𑀸𑀦𑁂𑀲𑀼 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 ‘𑀧𑀸𑀡𑀸𑀢𑀺𑀧𑀸𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀫𑀸𑀫𑀻’𑀢𑀺 𑀕𑀡𑁆𑀳𑀸𑀢𑀺, 𑀢𑀤𑀸 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀫𑀦𑁄𑀤𑁆𑀯𑀸𑀭𑀁 𑀳𑁄𑀢𑀺. 𑀏𑀯𑀁 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀕𑀢𑀸 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸.

‘𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻’𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀬𑀸𑀤𑀻𑀳𑀺 𑀕𑀡𑁆𑀳𑀦𑁆𑀢𑀲𑁆𑀲 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸.

𑀅𑀦𑀪𑀺𑀚𑁆𑀛𑀸𑀤𑀺𑀲𑀳𑀕𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀳𑀺 𑀓𑀸𑀬𑀗𑁆𑀕𑀁 𑀘𑁄𑀧𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀲𑀫𑁆𑀫𑀚𑁆𑀚𑀦𑀕𑀦𑁆𑀥𑀫𑀸𑀮𑀸𑀤𑀺𑀧𑀽𑀚𑀦𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀏𑀯𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 𑀯𑀸𑀘𑀗𑁆𑀕𑀁 𑀘𑁄𑀧𑁂𑀢𑁆𑀯𑀸 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀯𑀺𑀢𑁆𑀢𑀽𑀧𑀓𑀭𑀡𑀁 𑀦 𑀢𑀁 𑀫𑀫𑀲𑁆𑀲𑀸’𑀢𑀺 𑀅𑀦𑀪𑀺𑀚𑁆𑀛𑀸𑀬𑀢𑁄 𑀅𑀩𑁆𑀬𑀸𑀧𑀸𑀤𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 ‘𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀅𑀩𑁆𑀬𑀸𑀩𑀚𑁆𑀛𑀸 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺 𑀯𑀤𑀦𑁆𑀢𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 ‘𑀅𑀢𑁆𑀣𑀺 𑀤𑀺𑀦𑁆𑀦’𑀦𑁆𑀢𑀺𑀆𑀤𑀻𑀦𑀺 𑀉𑀤𑀸𑀳𑀭𑀦𑁆𑀢𑀲𑁆𑀲 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀏𑀯𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀧𑀦 𑀅𑀘𑁄𑀧𑁂𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀫𑀦𑀲𑀸𑀯 𑀅𑀦𑀪𑀺𑀚𑁆𑀛𑀸𑀤𑀺𑀲𑀳𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀏𑀯𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸𑀧𑀺 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀲𑀫𑀼𑀝𑁆𑀞𑀳𑀦𑁆𑀢𑀺.

𑀢𑀢𑁆𑀣 𑀆𑀡𑀢𑁆𑀢𑀺𑀲𑀫𑀼𑀝𑁆𑀞𑀺𑀢𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑁂𑀲𑀼 𑀓𑀫𑁆𑀫𑀫𑁆𑀧𑀺 𑀓𑀸𑀬𑀓𑀫𑁆𑀫𑀁 𑀤𑁆𑀯𑀸𑀭𑀫𑁆𑀧𑀺 𑀓𑀫𑁆𑀫𑀯𑀲𑁂𑀦𑁂𑀯 𑀓𑀸𑀬𑀤𑁆𑀯𑀸𑀭𑀦𑁆𑀢𑀺 𑀯𑀤𑀦𑁆𑀢𑁄 𑀓𑀫𑁆𑀫𑀁 𑀭𑀓𑁆𑀔𑀢𑀺, 𑀤𑁆𑀯𑀸𑀭𑀁 𑀪𑀺𑀦𑁆𑀤𑀢𑀺 𑀦𑀸𑀫. 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀫𑀼𑀝𑁆𑀞𑀺𑀢𑁂𑀲𑀼 𑀫𑀼𑀲𑀸𑀯𑀸𑀤𑀸𑀤𑀻𑀲𑀼 𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀁, 𑀓𑀫𑁆𑀫𑀫𑁆𑀧𑀺 𑀤𑁆𑀯𑀸𑀭𑀯𑀲𑁂𑀦𑁂𑀯 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀤𑀦𑁆𑀢𑁄 𑀤𑁆𑀯𑀸𑀭𑀁 𑀭𑀓𑁆𑀔𑀢𑀺 𑀓𑀫𑁆𑀫𑀁 𑀪𑀺𑀦𑁆𑀤𑀢𑀺 𑀦𑀸𑀫. 𑀢𑀲𑁆𑀫𑀸 ‘𑀓𑀫𑁆𑀫𑀁 𑀭𑀓𑁆𑀔𑀸𑀫𑀻’𑀢𑀺 𑀤𑁆𑀯𑀸𑀭𑀁 𑀦 𑀪𑀺𑀦𑁆𑀤𑀺𑀢𑀩𑁆𑀩𑀁, ‘𑀤𑁆𑀯𑀸𑀭𑀁 𑀭𑀓𑁆𑀔𑀸𑀫𑀻’𑀢𑀺 𑀓𑀫𑁆𑀫𑀁 𑀦 𑀪𑀺𑀦𑁆𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀧𑀦 𑀦𑀬𑁂𑀦 𑀓𑀫𑁆𑀫𑀜𑁆𑀘 𑀤𑁆𑀯𑀸𑀭𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀓𑀣𑁂𑀦𑁆𑀢𑁄 𑀳𑀺 𑀦𑁂𑀯 𑀓𑀫𑁆𑀫𑀁 𑀦 𑀤𑁆𑀯𑀸𑀭𑀁 𑀪𑀺𑀦𑁆𑀤𑀢𑀻𑀢𑀺.

𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 ‘𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀻’𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀓𑀸𑀬𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺 𑀦𑀸𑀫. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀁 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀺 𑀦𑀸𑀫. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀘𑁂𑀢𑀦𑀸 𑀦𑁂𑀯 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀦 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬… 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀇𑀫𑁂 𑀧𑀦 𑀙 𑀲𑀫𑁆𑀨𑀲𑁆𑀲𑀸 𑀦𑀸𑀫. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀤𑁆𑀯𑀸𑀭𑀁 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬… 𑀫𑀦𑁄𑀲𑀫𑁆𑀨𑀲𑁆𑀲𑀤𑁆𑀯𑀸𑀭𑀦𑁆𑀢𑀺 𑀇𑀫𑀸𑀦𑀺 𑀙 𑀲𑀫𑁆𑀨𑀲𑁆𑀲𑀤𑁆𑀯𑀸𑀭𑀸𑀦𑀺 𑀦𑀸𑀫.

𑀘𑀓𑁆𑀔𑀼𑀅𑀲𑀁𑀯𑀭𑁄 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀧𑀲𑀸𑀤𑀓𑀸𑀬… 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄 𑀯𑀸𑀘𑀸𑀅𑀲𑀁𑀯𑀭𑁄 𑀫𑀦𑁄𑀅𑀲𑀁𑀯𑀭𑁄𑀢𑀺 𑁋 𑀇𑀫𑁂 𑀅𑀝𑁆𑀞 𑀅𑀲𑀁𑀯𑀭𑀸 𑀦𑀸𑀫. 𑀢𑁂 𑀅𑀢𑁆𑀣𑀢𑁄 ‘𑀤𑀼𑀲𑁆𑀲𑀻𑀮𑁆𑀬𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀅𑀜𑁆𑀜𑀸𑀡𑀁 𑀅𑀓𑁆𑀔𑀦𑁆𑀢𑀺 𑀓𑁄𑀲𑀚𑁆𑀚’𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀥𑀫𑁆𑀫𑁄𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑁂𑀲𑀼 𑀘𑀺𑀢𑁆𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺, 𑀚𑀯𑀦𑀓𑁆𑀔𑀡𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀚𑀯𑀦𑁂 𑀉𑀧𑁆𑀧𑀦𑁆𑀦𑁄𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀅𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑁄 𑀳𑀺 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀢𑀁 𑀘𑀺𑀢𑁆𑀢𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀏𑀢𑁆𑀣 𑀧𑀜𑁆𑀘𑀯𑀺𑀥𑁄 𑀅𑀲𑀁𑀯𑀭𑁄 𑀦𑀢𑁆𑀣𑀺. 𑀲𑀫𑁆𑀧𑀝𑀺𑀘𑁆𑀙𑀦𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀢𑀁 𑀘𑀺𑀢𑁆𑀢𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀏𑀢𑁆𑀣𑀸𑀧𑀺 𑀅𑀲𑀁𑀯𑀭𑁄 𑀦𑀢𑁆𑀣𑀺. 𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀚𑀯𑀦𑀲𑀳𑀚𑀸𑀢𑁄 𑀧𑀦 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀢𑀁 𑀘𑀺𑀢𑁆𑀢𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀏𑀢𑁆𑀣 𑀅𑀲𑀁𑀯𑀭𑁄 𑀘𑀓𑁆𑀔𑀼𑀅𑀲𑀁𑀯𑀭𑁄 𑀦𑀸𑀫 𑀳𑁄𑀢𑀺. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀧𑀲𑀸𑀤𑀓𑀸𑀬𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑀸 𑀧𑀦 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀯𑀺𑀦𑀸 𑀯𑀘𑀻𑀤𑁆𑀯𑀸𑀭𑁂𑀦 𑀲𑀼𑀤𑁆𑀥𑀁 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀁 𑀘𑁄𑀧𑀦𑀁 𑀧𑀸𑀧𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀢𑀁 𑀧𑀦 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀘𑁄𑀧𑀦𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀏𑀢𑁆𑀣 𑀅𑀲𑀁𑀯𑀭𑁄 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄 𑀦𑀸𑀫. 𑀬𑀤𑀸 𑀢𑀸𑀤𑀺𑀲𑀁𑀬𑁂𑀯 𑀚𑀯𑀦𑀁 𑀯𑀺𑀦𑀸 𑀓𑀸𑀬𑀤𑁆𑀯𑀸𑀭𑁂𑀦 𑀲𑀼𑀤𑁆𑀥𑀁 𑀯𑀘𑀻𑀤𑁆𑀯𑀸𑀭𑀲𑀗𑁆𑀔𑀸𑀢𑀁 𑀘𑁄𑀧𑀦𑀁 𑀧𑀸𑀧𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀢𑀁 𑀧𑀦 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀘𑁄𑀧𑀦𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀏𑀢𑁆𑀣 𑀅𑀲𑀁𑀯𑀭𑁄 𑀯𑀸𑀘𑀸𑀅𑀲𑀁𑀯𑀭𑁄 𑀦𑀸𑀫. 𑀬𑀤𑀸 𑀧𑀦 𑀢𑀸𑀤𑀺𑀲𑀁 𑀚𑀯𑀦𑀘𑀺𑀢𑁆𑀢𑀁 𑀯𑀺𑀦𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀲𑀼𑀤𑁆𑀥𑀁 𑀫𑀦𑁄𑀤𑁆𑀯𑀸𑀭𑀫𑁂𑀯 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫, 𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀢𑀁 𑀧𑀦 𑀘𑀺𑀢𑁆𑀢𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀏𑀢𑁆𑀣 𑀅𑀲𑀁𑀯𑀭𑁄 𑀫𑀦𑁄𑀅𑀲𑀁𑀯𑀭𑁄 𑀦𑀸𑀫. 𑀇𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀲𑀁𑀯𑀭𑀸𑀦𑀁 𑀯𑀲𑁂𑀦 𑀘𑀓𑁆𑀔𑀼𑀅𑀲𑀁𑀯𑀭𑀤𑁆𑀯𑀸𑀭𑀁, 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀧𑀲𑀸𑀤𑀓𑀸𑀬… 𑀘𑁄𑀧𑀦𑀓𑀸𑀬… 𑀯𑀸𑀘𑀸… 𑀫𑀦𑁄𑀅𑀲𑀁𑀯𑀭𑀤𑁆𑀯𑀸𑀭𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀅𑀲𑀁𑀯𑀭𑀤𑁆𑀯𑀸𑀭𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀘𑀓𑁆𑀔𑀼𑀲𑀁𑀯𑀭𑁄 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀧𑀲𑀸𑀤𑀓𑀸𑀬… 𑀘𑁄𑀧𑀦𑀓𑀸𑀬… 𑀯𑀸𑀘𑀸… 𑀫𑀦𑁄𑀲𑀁𑀯𑀭𑁄𑀢𑀺 𑀇𑀫𑁂 𑀧𑀦 𑀅𑀝𑁆𑀞 𑀲𑀁𑀯𑀭𑀸 𑀦𑀸𑀫. 𑀢𑁂 𑀅𑀢𑁆𑀣𑀢𑁄 ‘𑀲𑀻𑀮𑀁 𑀲𑀢𑀺 𑀜𑀸𑀡𑀁 𑀔𑀦𑁆𑀢𑀺 𑀯𑀻𑀭𑀺𑀬’𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑁂𑀲𑀼𑀧𑀺 𑀏𑀓𑀥𑀫𑁆𑀫𑁄𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑁂𑀲𑀼 𑀘𑀺𑀢𑁆𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀚𑀯𑀦𑀓𑁆𑀔𑀡𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀚𑀯𑀦𑁂 𑀉𑀧𑁆𑀧𑀦𑁆𑀦𑁄𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑁄 𑀳𑀺 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺𑀆𑀤𑀺𑀦𑀸 𑀅𑀲𑀁𑀯𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀲𑀁𑀯𑀭𑀸𑀦𑀁 𑀯𑀲𑁂𑀦 𑀘𑀓𑁆𑀔𑀼𑀲𑀁𑀯𑀭𑀤𑁆𑀯𑀸𑀭𑀁…𑀧𑁂… 𑀫𑀦𑁄𑀲𑀁𑀯𑀭𑀤𑁆𑀯𑀸𑀭𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀲𑀁𑀯𑀭𑀤𑁆𑀯𑀸𑀭𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸

𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀯𑀸𑀘𑀸, 𑀨𑀭𑀼𑀲𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀪𑀺𑀚𑁆𑀛𑀸, 𑀩𑁆𑀬𑀸𑀧𑀸𑀤𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀧𑀦 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀦𑀸𑀫.

𑀢𑀢𑁆𑀣 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫; 𑀧𑀸𑀡𑀯𑀥𑁄, 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀲𑁄 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬. 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀤𑀻𑀲𑀼 𑀅𑀧𑁆𑀧𑀕𑀼𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀸𑀡𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀫𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑁋 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀣𑀸𑀯𑀭𑁄, 𑀯𑀺𑀚𑁆𑀚𑀸𑀫𑀬𑁄, 𑀇𑀤𑁆𑀥𑀺𑀫𑀬𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑀧𑀜𑁆𑀘𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀦 𑀯𑀺𑀢𑁆𑀣𑀸𑀭𑀬𑀸𑀫. 𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀁 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀯𑀺𑀦𑀬𑀝𑁆𑀞𑀓𑀣𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 ‘𑀅𑀤𑀺𑀦𑁆𑀦𑀸𑀤𑀸𑀦𑀁’; 𑀧𑀭𑀲𑁆𑀲𑀳𑀭𑀡𑀁, 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀘 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀢𑀁 𑀳𑀻𑀦𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬. 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁. 𑀢𑀁𑀢𑀁𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀳𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑁋 𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀯. 𑀢𑁂 𑀘 𑀔𑁄 𑀬𑀣𑀸𑀦𑀼𑀭𑀽𑀧𑀁 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁮) 𑀯𑀼𑀢𑁆𑀢𑁄.

‘𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑁄’𑀢𑀺 𑀏𑀢𑁆𑀣 𑀧𑀦 ‘𑀓𑀸𑀫𑁂𑀲𑀽’𑀢𑀺 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼; ‘𑀫𑀺𑀘𑁆𑀙𑀸𑀘𑀸𑀭𑁄’𑀢𑀺 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄.

𑀢𑀢𑁆𑀣 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑁋 𑀧𑀼𑀭𑀺𑀲𑀸𑀦𑀁 𑀢𑀸𑀯 𑀫𑀸𑀢𑀼𑀭𑀓𑁆𑀔𑀺𑀢𑀸, 𑀧𑀺𑀢𑀼𑀭𑀓𑁆𑀔𑀺𑀢𑀸, 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸, 𑀪𑀸𑀢𑀼𑀭𑀓𑁆𑀔𑀺𑀢𑀸, 𑀪𑀕𑀺𑀦𑀺𑀭𑀓𑁆𑀔𑀺𑀢𑀸, 𑀜𑀸𑀢𑀺𑀭𑀓𑁆𑀔𑀺𑀢𑀸, 𑀕𑁄𑀢𑁆𑀢𑀭𑀓𑁆𑀔𑀺𑀢𑀸, 𑀥𑀫𑁆𑀫𑀭𑀓𑁆𑀔𑀺𑀢𑀸, 𑀲𑀸𑀭𑀓𑁆𑀔𑀸, 𑀲𑀧𑀭𑀺𑀤𑀡𑁆𑀟𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲; 𑀥𑀦𑀓𑁆𑀓𑀻𑀢𑀸, 𑀙𑀦𑁆𑀤𑀯𑀸𑀲𑀺𑀦𑀻, 𑀪𑁄𑀕𑀯𑀸𑀲𑀺𑀦𑀻, 𑀧𑀝𑀯𑀸𑀲𑀺𑀦𑀻, 𑀑𑀤𑀧𑀢𑁆𑀢𑀓𑀺𑀦𑀻, 𑀑𑀪𑀝𑀘𑀼𑀫𑁆𑀩𑀝𑀸, 𑀤𑀸𑀲𑀻 𑀘 𑀪𑀭𑀺𑀬𑀸, 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸, 𑀥𑀚𑀸𑀳𑀝𑀸, 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀏𑀢𑀸 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁, 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸 𑀇𑀤𑀁 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫.

𑀲𑁄 𑀧𑀦𑁂𑀲 𑀫𑀺𑀘𑁆𑀙𑀸𑀘𑀸𑀭𑁄 𑀲𑀻𑀮𑀸𑀤𑀺𑀕𑀼𑀡𑀭𑀳𑀺𑀢𑁂 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁, 𑀲𑁂𑀯𑀦𑀧𑁆𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀏𑀯.

‘𑀫𑀼𑀲𑀸’𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀓𑁄 𑀯𑀘𑀻𑀧𑀬𑁄𑀕𑁄, 𑀓𑀸𑀬𑀧𑀬𑁄𑀕𑁄 𑀯𑀸. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀧𑀭𑁄 𑀦𑀬𑁄 𑁋 ‘𑀫𑀼𑀲𑀸’𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. ‘𑀯𑀸𑀤𑁄’𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 ‘𑀦𑀢𑁆𑀣𑀻’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻 𑀫𑀜𑁆𑀜𑁂 𑀲𑀦𑁆𑀤𑀢𑀻’𑀢𑀺 𑀧𑀽𑀭𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄.

𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀅𑀢𑀣𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑁋 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀘 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀭𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀬𑀲𑁆𑀫𑀸 𑀧𑀦 𑀬𑀣𑀸 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀘𑀸𑀳𑀺 𑀧𑀭𑀁 𑀯𑀺𑀲𑀁𑀯𑀸𑀤𑁂𑀢𑀺, 𑀢𑀣𑀸 𑀇𑀫𑀲𑁆𑀲 ‘𑀇𑀫𑀁 𑀪𑀡𑀸𑀳𑀻’𑀢𑀺 𑀆𑀡𑀸𑀧𑁂𑀦𑁆𑀢𑁄𑀧𑀺, 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀧𑀺, ‘𑀅𑀬𑀫𑀢𑁆𑀣𑁄 𑀏𑀯𑀁 𑀤𑀝𑁆𑀞𑀩𑁆𑀩𑁄’𑀢𑀺 𑀓𑀼𑀝𑁆𑀝𑀸𑀤𑀻𑀲𑀼 𑀮𑀺𑀔𑀺𑀢𑁆𑀯𑀸 𑀞𑀧𑁂𑀦𑁆𑀢𑁄𑀧𑀺; 𑀢𑀲𑁆𑀫𑀸 𑀏𑀢𑁆𑀣 𑀆𑀡𑀢𑁆𑀢𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀧𑀺 𑀧𑀬𑁄𑀕𑀸 𑀬𑀼𑀚𑁆𑀚𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

‘𑀧𑀺𑀲𑀼𑀡𑀯𑀸𑀘𑀸’𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀬𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸 𑀦𑁂𑀯 𑀓𑀡𑁆𑀡𑀲𑀼𑀔𑀸, 𑀦 𑀳𑀤𑀬𑀗𑁆𑀕𑀫𑀸, 𑀅𑀬𑀁 ‘𑀨𑀭𑀼𑀲𑀯𑀸𑀘𑀸’. 𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀺, 𑀦𑀺𑀭𑀢𑁆𑀣𑀓𑀁, 𑀲𑁄 ‘𑀲𑀫𑁆𑀨𑀧𑁆𑀧𑀮𑀸𑀧𑁄’. 𑀢𑁂𑀲𑀁 𑀫𑀽𑀮𑀪𑀽𑀢𑀸 𑀘𑁂𑀢𑀦𑀸𑀧𑀺 𑀧𑀺𑀲𑀼𑀡𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺. 𑀲𑀸 𑀏𑀯 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺.

𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸 𑀦𑀸𑀫. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸.

𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 ‘𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄’ 𑀇𑀢𑀺 ‘𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲’𑀦𑁆𑀢𑀺 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀸, ‘𑀇𑀢𑀺 𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄’𑀢𑀺 𑀧𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀧𑀭𑁂 𑀧𑀦 𑀅𑀪𑀺𑀦𑁆𑀦𑁂 𑀓𑀫𑁆𑀫𑀧𑀣𑀪𑁂𑀤𑁄 𑀦𑀢𑁆𑀣𑀺, 𑀪𑀺𑀦𑁆𑀦𑁂 𑀏𑀯 𑀳𑁄𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 ‘𑀨𑀭𑀼𑀲𑀯𑀸𑀘𑀸’. 𑀢𑀲𑁆𑀲𑀸 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀸𑀭𑀓𑁄 𑀫𑀸𑀢𑀼 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺. 𑀢𑀁 𑀫𑀸𑀢𑀸 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘𑀘𑀡𑁆𑀟𑀸 𑀢𑀁 𑀫𑀳𑀺𑀁𑀲𑀻 𑀅𑀦𑀼𑀩𑀦𑁆𑀥𑀢𑀽’𑀢𑀺 𑀅𑀓𑁆𑀓𑁄𑀲𑀺. 𑀅𑀣𑀲𑁆𑀲 𑀢𑀣𑁂𑀯 𑀅𑀭𑀜𑁆𑀜𑁂 𑀫𑀳𑀺𑀁𑀲𑀻 𑀉𑀝𑁆𑀞𑀸𑀲𑀺. 𑀤𑀸𑀭𑀓𑁄 ‘𑀬𑀁 𑀫𑀫 𑀫𑀸𑀢𑀸 𑀫𑀼𑀔𑁂𑀦 𑀓𑀣𑁂𑀲𑀺 𑀢𑀁 𑀫𑀸 𑀳𑁄𑀢𑀼, 𑀬𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀲𑀺 𑀢𑀁 𑀳𑁄𑀢𑀽’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀫𑀳𑀺𑀁𑀲𑀻 𑀢𑀢𑁆𑀣𑁂𑀯 𑀩𑀤𑁆𑀥𑀸 𑀯𑀺𑀬 𑀅𑀝𑁆𑀞𑀸𑀲𑀺. 𑀏𑀯𑀁 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 𑁋 ‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺, 𑀦𑀺𑀤𑁆𑀥𑀫𑀣 𑀦𑁂’𑀢𑀺; 𑀅𑀣 𑀘 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀯𑀸𑀘𑀸 𑀳𑁄𑀢𑀺. 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦𑁂𑀲𑀸 𑀨𑀭𑀼𑀲𑀯𑀸𑀘𑀸𑀯. 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑁋 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄, 𑀓𑀼𑀧𑀺𑀢𑀘𑀺𑀢𑁆𑀢𑀁, 𑀅𑀓𑁆𑀓𑁄𑀲𑀦𑀦𑁆𑀢𑀺.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 ‘𑀲𑀫𑁆𑀨𑀧𑁆𑀧𑀮𑀸𑀧𑁄’. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸𑀧𑀼𑀭𑁂𑀓𑁆𑀔𑀸𑀭𑀢𑀸, 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀜𑁆𑀘𑀸𑀢𑀺. 𑀧𑀭𑁂 𑀧𑀦 𑀢𑀁 𑀓𑀣𑀁 𑀅𑀕𑀡𑁆𑀳𑀦𑁆𑀢𑁂 𑀓𑀫𑁆𑀫𑀧𑀣𑀪𑁂𑀤𑁄 𑀦𑀢𑁆𑀣𑀺, 𑀧𑀭𑁂𑀦 𑀲𑀫𑁆𑀨𑀧𑁆𑀧𑀮𑀸𑀧𑁂 𑀕𑀳𑀺𑀢𑁂𑀬𑁂𑀯 𑀳𑁄𑀢𑀺.

𑀅𑀪𑀺𑀚𑁆𑀛𑀸𑀬𑀢𑀻𑀢𑀺 ‘𑀅𑀪𑀺𑀚𑁆𑀛𑀸’. 𑀧𑀭𑀪𑀡𑁆𑀟𑀸𑀪𑀺𑀫𑀼𑀔𑀻 𑀳𑀼𑀢𑁆𑀯𑀸 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀸 ‘𑀅𑀳𑁄 𑀢𑀯 𑀇𑀤𑀁 𑀫𑀫𑀲𑁆𑀲𑀸’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀧𑀭𑀪𑀡𑁆𑀟𑀁, 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘𑀸𑀢𑀺. 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺 𑀬𑀸𑀯 𑀦 ‘𑀅𑀳𑁄 𑀯𑀢 𑀇𑀤𑀁 𑀫𑀫𑀲𑁆𑀲𑀸’𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 ‘𑀩𑁆𑀬𑀸𑀧𑀸𑀤𑁄’. 𑀲𑁄 𑀧𑀭𑀯𑀺𑀦𑀸𑀲𑀸𑀬 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄. 𑀨𑀭𑀼𑀲𑀯𑀸𑀘𑀸 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 𑀫𑀳𑀸𑀲𑀸𑀯𑀚𑁆𑀚𑁄 𑀘. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀧𑀭𑀲𑀢𑁆𑀢𑁄 𑀘, 𑀢𑀲𑁆𑀲 𑀘 𑀯𑀺𑀦𑀸𑀲𑀘𑀺𑀦𑁆𑀢𑀸𑀢𑀺. 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺 𑀬𑀸𑀯 ‘𑀅𑀳𑁄 𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬𑀸’𑀢𑀺 𑀢𑀲𑁆𑀲 𑀯𑀺𑀦𑀸𑀲𑀦𑀁 𑀦 𑀘𑀺𑀦𑁆𑀢𑁂𑀲𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺’. 𑀲𑀸 ‘𑀦𑀢𑁆𑀣𑀺 𑀤𑀺𑀦𑁆𑀦’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀅𑀧𑀺𑀘 𑀅𑀦𑀺𑀬𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀦𑀺𑀬𑀢𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀯𑀢𑁆𑀣𑀼𑀦𑁄 𑀘 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸, 𑀬𑀣𑀸 𑀘 𑀢𑀁 𑀕𑀡𑁆𑀳𑀸𑀢𑀺 𑀢𑀣𑀸𑀪𑀸𑀯𑁂𑀦 𑀢𑀲𑁆𑀲𑀼𑀧𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀦𑀢𑁆𑀣𑀺𑀓𑀸𑀳𑁂𑀢𑀼𑀓𑀅𑀓𑀺𑀭𑀺𑀬𑀤𑀺𑀝𑁆𑀞𑀻𑀳𑀺 𑀏𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀦 𑀅𑀜𑁆𑀜𑀤𑀺𑀝𑁆𑀞𑀻𑀳𑀺.

𑀇𑀫𑁂𑀲𑀁 𑀧𑀦 𑀤𑀲𑀦𑁆𑀦𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄 𑀘𑀸𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋

𑀢𑀢𑁆𑀣 ‘𑀥𑀫𑁆𑀫𑀢𑁄’𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀥𑀫𑁆𑀫𑀸𑀯 𑀳𑁄𑀦𑁆𑀢𑀺, 𑀅𑀪𑀺𑀚𑁆𑀛𑀸𑀤𑀬𑁄 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸.

‘𑀓𑁄𑀝𑁆𑀞𑀸𑀲𑀢𑁄’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀸𑀢𑀺 𑀇𑀫𑁂 𑀅𑀝𑁆𑀞 𑀓𑀫𑁆𑀫𑀧𑀣𑀸 𑀏𑀯 𑀳𑁄𑀦𑁆𑀢𑀺; 𑀦𑁄 𑀫𑀽𑀮𑀸𑀦𑀺. 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 ‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁’ 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 ‘𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁’.

‘𑀆𑀭𑀫𑁆𑀫𑀡𑀢𑁄’𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀢𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀁 𑀯𑀸 𑀳𑁄𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸. 𑀫𑀺𑀘𑁆𑀙𑀸𑀘𑀸𑀭𑁄 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀳𑁄𑀢𑀺; 𑀲𑀢𑁆𑀢𑀸𑀭𑀫𑁆𑀫𑀡𑁄𑀢𑀺𑀧𑀺 𑀏𑀓𑁂. 𑀫𑀼𑀲𑀸𑀯𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸. 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸. 𑀨𑀭𑀼𑀲𑀯𑀸𑀘𑀸 𑀲𑀢𑁆𑀢𑀸𑀭𑀫𑁆𑀫𑀡𑀸𑀯. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸. 𑀢𑀣𑀸 𑀅𑀪𑀺𑀚𑁆𑀛𑀸. 𑀩𑁆𑀬𑀸𑀧𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄𑀯. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀯.

‘𑀯𑁂𑀤𑀦𑀸𑀢𑁄’𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑁄 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀭𑀸𑀚𑀸𑀦𑁄 𑀘𑁄𑀭𑀁 𑀤𑀺𑀲𑁆𑀯𑀸 𑀳𑀲𑀫𑀸𑀦𑀸𑀧𑀺 ‘𑀕𑀘𑁆𑀙𑀣 𑀦𑀁 𑀖𑀸𑀢𑁂𑀣𑀸’𑀢𑀺 𑀯𑀤𑀦𑁆𑀢𑀺, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀦𑁂𑀲𑀁 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀺𑀯𑁂𑀤𑀦𑀁. 𑀢𑀜𑁆𑀳𑀺 𑀧𑀭𑀪𑀡𑁆𑀟𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀲𑁆𑀲 𑀕𑀡𑁆𑀳𑀢𑁄 𑀲𑀼𑀔𑀯𑁂𑀤𑀦𑀁 𑀳𑁄𑀢𑀺, 𑀪𑀻𑀢𑀢𑀲𑀺𑀢𑀲𑁆𑀲 𑀕𑀡𑁆𑀳𑀢𑁄 𑀤𑀼𑀓𑁆𑀔𑀯𑁂𑀤𑀦𑀁. 𑀢𑀣𑀸 𑀯𑀺𑀧𑀸𑀓𑀦𑀺𑀲𑁆𑀲𑀦𑁆𑀤𑀨𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀕𑀳𑀡𑀓𑀸𑀮𑁂 𑀫𑀚𑁆𑀛𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀧𑀦 𑀕𑀡𑁆𑀳𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁 𑀳𑁄𑀢𑀻𑀢𑀺. 𑀫𑀺𑀘𑁆𑀙𑀸𑀘𑀸𑀭𑁄 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑁄. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑀺𑀢𑁆𑀢𑁂 𑀧𑀦 𑀫𑀚𑁆𑀛𑀢𑁆𑀢𑀯𑁂𑀤𑀦𑁄 𑀦 𑀳𑁄𑀢𑀺. 𑀫𑀼𑀲𑀸𑀯𑀸𑀤𑁄 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀯𑁂𑀤𑀦𑁄; 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸. 𑀨𑀭𑀼𑀲𑀯𑀸𑀘𑀸 𑀤𑀼𑀓𑁆𑀔𑀯𑁂𑀤𑀦𑀸. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀢𑀺𑀯𑁂𑀤𑀦𑁄. 𑀧𑀭𑁂𑀲𑀼 𑀳𑀺 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑁂𑀲𑀼 𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 𑀔𑀺𑀧𑀦𑁆𑀢𑁂𑀲𑀼 𑀳𑀝𑁆𑀞𑀢𑀼𑀝𑁆𑀞𑀲𑁆𑀲 𑀲𑀻𑀢𑀸𑀳𑀭𑀡𑀪𑀸𑀭𑀢𑀬𑀼𑀤𑁆𑀥𑀸𑀤𑀻𑀦𑀺 𑀓𑀣𑀦𑀓𑀸𑀮𑁂 𑀲𑁄 𑀲𑀼𑀔𑀯𑁂𑀤𑀦𑁄 𑀳𑁄𑀢𑀺. 𑀧𑀞𑀫𑀁 𑀤𑀺𑀦𑁆𑀦𑀯𑁂𑀢𑀦𑁂𑀦 𑀏𑀓𑁂𑀦 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 ‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑁂𑀳𑀻’𑀢𑀺 𑀯𑀼𑀢𑁆𑀢𑁂 ‘𑀅𑀦𑀦𑀼𑀲𑀦𑁆𑀥𑀺𑀓𑀁 𑀧𑀓𑀺𑀡𑁆𑀡𑀓𑀓𑀣𑀁 𑀓𑀣𑁂𑀲𑁆𑀲𑀸𑀫𑀺 𑀦𑀼 𑀔𑁄 𑀦𑁄’𑀢𑀺 𑀤𑁄𑀫𑀦𑀲𑁆𑀲𑀺𑀢𑀲𑁆𑀲 𑀓𑀣𑀦𑀓𑀸𑀮𑁂 𑀤𑀼𑀓𑁆𑀔𑀯𑁂𑀤𑀦𑁄 𑀳𑁄𑀢𑀺, 𑀫𑀚𑁆𑀛𑀢𑁆𑀢𑀲𑁆𑀲 𑀓𑀣𑀬𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑁄 𑀳𑁄𑀢𑀺. 𑀅𑀪𑀺𑀚𑁆𑀛𑀸 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑀸; 𑀢𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀩𑁆𑀬𑀸𑀧𑀸𑀤𑁄 𑀤𑀼𑀓𑁆𑀔𑀯𑁂𑀤𑀦𑁄.

‘𑀫𑀽𑀮𑀢𑁄’𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑁄𑀲𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀓𑁄 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸. 𑀫𑀺𑀘𑁆𑀙𑀸𑀘𑀸𑀭𑁄 𑀮𑁄𑀪𑀫𑁄𑀳𑀯𑀲𑁂𑀦. 𑀫𑀼𑀲𑀸𑀯𑀸𑀤𑁄 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸; 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀘. 𑀨𑀭𑀼𑀲𑀯𑀸𑀘𑀸 𑀤𑁄𑀲𑀫𑁄𑀳𑀯𑀲𑁂𑀦. 𑀅𑀪𑀺𑀚𑁆𑀛𑀸 𑀫𑁄𑀳𑀯𑀲𑁂𑀦 𑀏𑀓𑀫𑀽𑀮𑀸; 𑀢𑀣𑀸 𑀩𑁆𑀬𑀸𑀧𑀸𑀤𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀮𑁄𑀪𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀢𑀺.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸

𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀦 𑀯𑀺𑀭𑀢𑀺𑀬𑁄 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄 𑀘𑀸𑀢𑀺 𑀇𑀫𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀦𑀸𑀫. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀏𑀢𑀸𑀬 𑀯𑀺𑀭𑀫𑀦𑁆𑀢𑀺, 𑀲𑀬𑀁 𑀯𑀸 𑀯𑀺𑀭𑀫𑀢𑀺, 𑀯𑀺𑀭𑀫𑀡𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀯𑀺𑀭𑀢𑀺. 𑀬𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀦𑁆𑀢𑀲𑁆𑀲 ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀡𑀸𑀢𑀺𑀧𑀸𑀢𑀸 𑀆𑀭𑀢𑀺 𑀯𑀺𑀭𑀢𑀻’’𑀢𑀺 (𑀥. 𑀲. 𑁨𑁯𑁯-𑁩𑁦𑁧) 𑀏𑀯𑀁 𑀯𑀼𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺, 𑀲𑀸 𑀧𑀪𑁂𑀤𑀢𑁄 𑀢𑀺𑀯𑀺𑀥𑀸 𑀳𑁄𑀢𑀺 𑁋 𑀲𑀫𑁆𑀧𑀢𑁆𑀢𑀯𑀺𑀭𑀢𑀺, 𑀲𑀫𑀸𑀤𑀸𑀦𑀯𑀺𑀭𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺.

𑀢𑀢𑁆𑀣 𑀅𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀢𑁆𑀢𑀦𑁄 𑀚𑀸𑀢𑀺𑀯𑀬𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘𑀅𑀬𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑀁 𑀧𑀸𑀧𑀁 𑀓𑀸𑀢𑀼’𑀦𑁆𑀢𑀺 𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 ‘𑀲𑀫𑁆𑀧𑀢𑁆𑀢𑀯𑀺𑀭𑀢𑀻’𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀻𑀳𑀴𑀤𑀻𑀧𑁂 𑀘𑀓𑁆𑀓𑀦𑀉𑀧𑀸𑀲𑀓𑀲𑁆𑀲 𑀯𑀺𑀬. 𑀢𑀲𑁆𑀲 𑀓𑀺𑀭 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀼𑀬𑀸 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀯𑁂𑀚𑁆𑀚𑁂𑀦 𑀘 ‘𑀅𑀮𑁆𑀮𑀲𑀲𑀫𑀁𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀘𑀓𑁆𑀓𑀦𑀲𑁆𑀲 𑀪𑀸𑀢𑀸 ‘𑀕𑀘𑁆𑀙, 𑀢𑀸𑀢, 𑀔𑁂𑀢𑁆𑀢𑀁 𑀆𑀳𑀺𑀡𑁆𑀟𑀸𑀳𑀻’𑀢𑀺 𑀘𑀓𑁆𑀓𑀦𑀁 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀢𑁄. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀲𑀲𑁄 𑀢𑀭𑀼𑀡𑀲𑀲𑁆𑀲𑀁 𑀔𑀸𑀤𑀺𑀢𑀼𑀁 𑀆𑀕𑀢𑁄 𑀳𑁄𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀯𑁂𑀕𑁂𑀦 𑀥𑀸𑀯𑀦𑁆𑀢𑁄 𑀯𑀮𑁆𑀮𑀺𑀬𑀸 𑀩𑀤𑁆𑀥𑁄 ‘𑀓𑀺𑀭𑀺 𑀓𑀺𑀭𑀻’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀘𑀓𑁆𑀓𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘𑀫𑀸𑀢𑀼 𑀪𑁂𑀲𑀚𑁆𑀚𑀁 𑀓𑀭𑁄𑀫𑀻’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀫𑀸𑀢𑀼 𑀚𑀻𑀯𑀺𑀢𑀓𑀸𑀭𑀡𑀸 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’𑀦𑁆𑀢𑀺. 𑀅𑀣 𑀦𑀁 ‘𑀕𑀘𑁆𑀙, 𑀅𑀭𑀜𑁆𑀜𑁂 𑀲𑀲𑁂𑀳𑀺 𑀲𑀤𑁆𑀥𑀺𑀁 𑀢𑀺𑀡𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀸’𑀢𑀺 𑀫𑀼𑀜𑁆𑀘𑀺. 𑀪𑀸𑀢𑀭𑀸 𑀘 ‘𑀓𑀺𑀁 𑀢𑀸𑀢 𑀲𑀲𑁄 𑀮𑀤𑁆𑀥𑁄’𑀢𑀺 𑀧𑀼𑀘𑁆𑀙𑀺𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀢𑀢𑁄 𑀦𑀁 𑀪𑀸𑀢𑀸 𑀧𑀭𑀺𑀪𑀸𑀲𑀺. 𑀲𑁄 𑀫𑀸𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀬𑀢𑁄 𑀅𑀳𑀁 𑀚𑀸𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀸’𑀢𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀫𑀸𑀢𑀸 𑀅𑀭𑁄𑀕𑀸 𑀅𑀳𑁄𑀲𑀺.

𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀦 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑁂 𑀘 𑀢𑀢𑀼𑀢𑁆𑀢𑀭𑀺𑀜𑁆𑀘 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 ‘𑀲𑀫𑀸𑀤𑀸𑀦𑀯𑀺𑀭𑀢𑀻’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀯𑀸𑀲𑀻𑀉𑀧𑀸𑀲𑀓𑀲𑁆𑀲 𑀯𑀺𑀬. 𑀲𑁄 𑀓𑀺𑀭 𑀅𑀫𑁆𑀩𑀭𑀺𑀬𑀯𑀺𑀳𑀸𑀭𑀯𑀸𑀲𑀺𑀦𑁄 𑀧𑀺𑀗𑁆𑀕𑀮𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑀁 𑀓𑀲𑀢𑀺. 𑀅𑀣𑀲𑁆𑀲 𑀕𑁄𑀡𑁄 𑀦𑀝𑁆𑀞𑁄. 𑀲𑁄 𑀢𑀁 𑀕𑀯𑁂𑀲𑀦𑁆𑀢𑁄 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀁 𑀆𑀭𑀼𑀳𑀺. 𑀢𑀢𑁆𑀭 𑀦𑀁 𑀫𑀳𑀸𑀲𑀧𑁆𑀧𑁄 𑀅𑀕𑁆𑀕𑀳𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘𑀇𑀫𑀸𑀬𑀲𑁆𑀲 𑀢𑀺𑀔𑀺𑀡𑀯𑀸𑀲𑀺𑀬𑀸 𑀲𑀻𑀲𑀁 𑀙𑀺𑀦𑁆𑀤𑀸𑀫𑀻’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀪𑀸𑀯𑀦𑀻𑀬𑀲𑁆𑀲 𑀕𑀭𑀼𑀦𑁄 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀪𑀺𑀦𑁆𑀤𑁂𑀬𑁆𑀬’𑀦𑁆𑀢𑀺 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑀺𑀦𑁆𑀢𑁂𑀢𑁆𑀯𑀸 ‘𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀦 𑀲𑀺𑀓𑁆𑀔𑀸𑀧𑀤’𑀦𑁆𑀢𑀺 𑀅𑀁𑀲𑁂 𑀞𑀧𑀺𑀢𑀁 𑀢𑀺𑀔𑀺𑀡𑀤𑀡𑁆𑀟𑀯𑀸𑀲𑀺𑀁 𑀅𑀭𑀜𑁆𑀜𑁂 𑀙𑀟𑁆𑀟𑁂𑀲𑀺. 𑀢𑀸𑀯𑀤𑁂𑀯 𑀦𑀁 𑀫𑀳𑀸𑀯𑀸𑀴𑁄 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑀫𑀸𑀲𑀻𑀢𑀺.

𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀯𑀺𑀭𑀢𑀺 ‘𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 ‘𑀧𑀸𑀡𑀁 𑀖𑀸𑀢𑁂𑀲𑁆𑀲𑀸𑀫𑀻’𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀢𑀻𑀢𑀺.

𑀇𑀤𑀸𑀦𑀺 𑀬𑀣𑀸 𑀅𑀓𑀼𑀲𑀮𑀸𑀦𑀁 𑀏𑀯𑀁 𑀇𑀫𑁂𑀲𑀫𑁆𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋

𑀢𑀢𑁆𑀣 ‘𑀥𑀫𑁆𑀫𑀢𑁄’𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺, 𑀯𑀺𑀭𑀢𑀺𑀬𑁄𑀧𑀺; 𑀅𑀦𑁆𑀢𑁂 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯.

‘𑀓𑁄𑀝𑁆𑀞𑀸𑀲𑀢𑁄’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀏𑀯, 𑀦𑁄 𑀫𑀽𑀮𑀸𑀦𑀺. 𑀅𑀦𑁆𑀢𑁂 𑀢𑀬𑁄 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀦𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 ‘𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁’ 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁄 ‘𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁’, 𑀲𑀫𑁆𑀫𑀸𑀤𑀺𑀝𑁆𑀞𑀺 ‘𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁’.

‘𑀆𑀭𑀫𑁆𑀫𑀡𑀢𑁄’𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑁂𑀯 𑀏𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀺. 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄𑀬𑁂𑀯 𑀳𑀺 𑀯𑁂𑀭𑀫𑀡𑀻 𑀦𑀸𑀫 𑀳𑁄𑀢𑀺. 𑀬𑀣𑀸 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀏𑀯𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸𑀧𑁂𑀢𑁂 𑀓𑀫𑁆𑀫𑀧𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘𑀯𑁂𑀤𑀦𑀸𑀢𑁄’𑀢𑀺 𑀲𑀩𑁆𑀩𑁂 𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀦𑁆𑀢𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀯𑀸. 𑀓𑀼𑀲𑀮𑀁 𑀧𑀢𑁆𑀯𑀸 𑀳𑀺 𑀤𑀼𑀓𑁆𑀔𑀯𑁂𑀤𑀦𑀸 𑀦𑀸𑀫 𑀦𑀢𑁆𑀣𑀺.

‘𑀫𑀽𑀮𑀢𑁄’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀅𑀮𑁄𑀪𑀅𑀤𑁄𑀲𑀅𑀫𑁄𑀳𑀯𑀲𑁂𑀦 𑀢𑀺𑀫𑀽𑀮𑀸 𑀳𑁄𑀦𑁆𑀢𑀺; 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸. 𑀅𑀦𑀪𑀺𑀚𑁆𑀛𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸 𑀳𑁄𑀢𑀺; 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀏𑀓𑀫𑀽𑀮𑀸. 𑀅𑀮𑁄𑀪𑁄 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀫𑀽𑀮𑀁 𑀦 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀮𑁄𑀪𑀸𑀤𑁄𑀲𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀯 𑀳𑁄𑀢𑀺. 𑀇𑀫𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀦𑀸𑀫.

𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀓𑀣𑀸

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀁 𑀦𑀸𑀫 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀳𑀺 𑀉𑀧𑁆𑀧𑀦𑁆𑀦𑁄 𑀅𑀲𑀁𑀯𑀭𑁄 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀫𑀦𑁄𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀢𑀻𑀡𑀺𑀧𑀺 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺 𑁋 𑀲𑁄 𑀳𑀺 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀧𑁆𑀧𑀢𑁆𑀢𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀯𑀘𑀻𑀤𑁆𑀯𑀸𑀭𑁂 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁, 𑀉𑀪𑀬𑀢𑁆𑀣 𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑁄 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀧𑀜𑁆𑀘𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀧𑀺 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀫𑀦𑁄𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺.

𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀲𑀁𑀯𑀭𑁄𑀧𑀺 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀫𑀦𑁄𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀧𑀦 𑀅𑀬𑀫𑁆𑀧𑀺, 𑀅𑀲𑀁𑀯𑀭𑁄 𑀯𑀺𑀬, 𑀢𑀻𑀡𑀺𑀧𑀺 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀧𑀜𑁆𑀘𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀧𑀺 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀘𑁄𑀧𑀦𑀓𑀸𑀬𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀯𑀸𑀘𑀸𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀫𑀦𑁄𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀺.

𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺; 𑀫𑀦𑁄𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁. 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀧𑀦 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀢𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀧𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀳𑁄𑀢𑀺, 𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯. 𑀬𑀣𑀸 𑀘 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦, 𑀏𑀯𑀁 𑀧𑀜𑁆𑀘𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦𑀧𑀺 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀧𑀦 𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀢𑀺; 𑀫𑀦𑁄𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁆𑀧𑀺 𑀧𑀜𑁆𑀘𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺, 𑀘𑁄𑀧𑀦𑀓𑀸𑀬𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀫𑀦𑁄𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀅𑀝𑁆𑀞𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦𑀧𑀺 𑀉𑀧𑁆𑀧𑀚𑁆𑀚𑀢𑁂𑀯. 𑀓𑀼𑀲𑀮𑀓𑀸𑀬𑀓𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀫𑀦𑁄𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀣𑀸 𑀏𑀢𑀸𑀦𑀺. 𑀏𑀢𑀸𑀦𑀺 𑀧𑀦 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀡𑁆𑀳𑀦𑁆𑀢𑀲𑁆𑀲 𑀫𑀦𑁄𑀲𑀁𑀯𑀭𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀯. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀜𑁆𑀘𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺; ‘𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁, 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸’𑀢𑀺 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀅𑀝𑁆𑀞𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺, 𑀅𑀝𑁆𑀞𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀺, 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀁 𑀳𑁄𑀢𑀼, 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀯𑀸, 𑀅𑀝𑁆𑀞𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀯𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀯𑀸. ‘‘𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺.

𑀤𑁆𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸𑀢𑀺 𑀏𑀢𑁆𑀣 𑀅𑀬𑀁 𑀬𑁄𑀚𑀦𑀸 𑁋 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀆𑀭𑀩𑁆𑀪, 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀏𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁂𑀯 𑀆𑀭𑀫𑁆𑀫𑀡𑀁 𑀅𑀦𑀼𑀜𑁆𑀜𑀸𑀢𑀲𑀤𑀺𑀲𑀁 𑀳𑁄𑀢𑀺. 𑀇𑀤𑀜𑁆𑀘 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀏𑀓𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀲𑀤𑁆𑀤𑀸𑀤𑀻𑀲𑀼𑀧𑀺 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺 𑀏𑀯. 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀘𑀲𑁆𑀲 𑀏𑀓𑀲𑁆𑀫𑀺𑀁 𑀪𑀯𑁂 𑀧𑀞𑀫𑀁 𑀭𑀽𑀧𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺 𑀳𑁄𑀢𑀺, 𑀧𑀘𑁆𑀙𑀸 𑀲𑀤𑁆𑀤𑀸𑀭𑀫𑁆𑀫𑀡𑀦𑁆𑀢𑀺 𑀅𑀬𑀫𑁆𑀧𑀺 𑀓𑀫𑁄 𑀦𑀢𑁆𑀣𑀺. 𑀭𑀽𑀧𑀸𑀤𑀻𑀲𑀼 𑀘𑀸𑀧𑀺 𑀧𑀞𑀫𑀁 𑀦𑀻𑀮𑀸𑀭𑀫𑁆𑀫𑀡𑀁 𑀧𑀘𑁆𑀙𑀸 𑀧𑀻𑀢𑀸𑀭𑀫𑁆𑀫𑀡𑀦𑁆𑀢𑀺 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀇𑀢𑀺 𑀇𑀫𑀁 𑀲𑀩𑁆𑀩𑀸𑀭𑀫𑁆𑀫𑀡𑀢𑀜𑁆𑀘𑁂𑀯, 𑀓𑀫𑀸𑀪𑀸𑀯𑀜𑁆𑀘, 𑀓𑀫𑀸𑀪𑀸𑀯𑁂𑀧𑀺 𑀘 𑀦𑀻𑀮𑀧𑀻𑀢𑀸𑀤𑀻𑀲𑀼 𑀦𑀺𑀬𑀫𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸’𑀢𑀺 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂𑀲𑀼 𑀭𑀽𑀧𑀸𑀤𑀻𑀲𑀼 𑀦 𑀬𑀁𑀓𑀺𑀜𑁆𑀘𑀺 𑀏𑀓𑀫𑁂𑀯, 𑀅𑀣 𑀔𑁄 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀘 ‘𑀧𑀞𑀫𑀁 𑀭𑀽𑀧𑀸𑀭𑀫𑁆𑀫𑀡𑀁 𑀧𑀘𑁆𑀙𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀆𑀭𑀩𑁆𑀪𑀸’𑀢𑀺 𑀏𑀯𑀫𑁆𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺; ‘𑀧𑀝𑀺𑀮𑁄𑀫𑀢𑁄 𑀯𑀸 𑀅𑀦𑀼𑀮𑁄𑀫𑀢𑁄 𑀯𑀸, 𑀏𑀓𑀦𑁆𑀢𑀭𑀺𑀓𑀤𑁆𑀯𑀦𑁆𑀢𑀭𑀺𑀓𑀸𑀤𑀺𑀦𑀬𑁂𑀦 𑀯𑀸, 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀬𑀁 𑀯𑀸 𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀘 ‘𑀧𑀞𑀫𑀁 𑀦𑀻𑀮𑀸𑀭𑀫𑁆𑀫𑀡𑀁 𑀧𑀘𑁆𑀙𑀸 𑀧𑀻𑀢𑀸𑀭𑀫𑁆𑀫𑀡’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀦𑀺𑀬𑀫𑁂𑀦 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸, 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪 ‘𑀦𑀻𑀮𑀧𑀻𑀢𑀓𑀸𑀤𑀻𑀲𑀼 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀬𑀁 𑀯𑀸 𑀢𑀁 𑀯𑀸 𑀭𑀽𑀧𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀢𑀸𑀯 𑀏𑀓𑀸 𑀬𑁄𑀚𑀦𑀸.

𑀅𑀬𑀁 𑀧𑀦 𑀅𑀧𑀭𑀸 𑁋 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑀁…𑀧𑁂… 𑀥𑀫𑁆𑀫𑁄 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀇𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀧𑀼𑀦 ‘𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀏𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀁 𑀯𑀸 𑀢𑀁 𑀯𑀸 𑀧𑀦 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑁂𑀯𑀸𑀧𑀦𑀓𑁂 𑀅𑀪𑀺𑀦𑀯𑀁 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀕𑀳𑀺𑀢’𑀦𑁆𑀢𑀺 𑀯𑀢𑁆𑀯𑀸 ‘𑀭𑀽𑀧𑀁 𑀯𑀸 𑀆𑀭𑀩𑁆𑀪…𑀧𑁂… 𑀥𑀫𑁆𑀫𑀁 𑀯𑀸 𑀆𑀭𑀩𑁆𑀪, 𑀇𑀤𑀁 𑀯𑀸 𑀇𑀤𑀁 𑀯𑀸 𑀆𑀭𑀩𑁆𑀪𑀸𑀢𑀺 𑀓𑀣𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀆𑀕𑀢𑀁.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸

𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀤𑀁 𑀅𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀫𑀬𑀲𑁆𑀲 𑀦𑀺𑀬𑀫𑀢𑁄 𑀧𑀝𑀺𑀦𑀺𑀤𑁆𑀤𑁂𑀲𑀯𑀘𑀦𑀁. 𑀢𑀲𑁆𑀫𑀸 ‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀣𑁂𑀯 𑀘𑀺𑀢𑁆𑀢𑀁 𑀏𑀯𑀁 𑀨𑀲𑁆𑀲𑀸𑀤𑀻𑀲𑀼𑀧𑀺 𑀨𑀲𑁆𑀲𑁄 𑀳𑁄𑀢𑀺. 𑀓𑀺𑀁 𑀳𑁄𑀢𑀺? ‘𑀓𑀸𑀫𑀸𑀯𑀘𑀭𑁄 𑀳𑁄𑀢𑀺, 𑀓𑀼𑀲𑀮𑁄 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑁄 𑀳𑁄𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀯𑁂𑀤𑀦𑀸𑀬𑀜𑁆𑀳𑀺 ‘𑀲𑁄𑀫𑀦𑀲𑁆𑀲𑀲𑀳𑀕𑀢𑀸’𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂 𑀘 ‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢’𑀦𑁆𑀢𑀺 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦𑀸’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁; 𑀦 𑀧𑀦𑁂𑀢𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺? 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸. 𑀆𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀨𑀲𑁆𑀲𑁄 𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀞𑀫𑀁 𑀯𑀼𑀢𑁆𑀢𑁄. 𑀨𑀲𑁆𑀲𑁂𑀦 𑀧𑀦 𑀨𑀼𑀲𑀺𑀢𑁆𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺, 𑀘𑁂𑀢𑀦𑀸𑀬 𑀘𑁂𑀢𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺.

𑀅𑀧𑀺𑀘, 𑀅𑀬𑀁 𑀨𑀲𑁆𑀲𑁄 𑀦𑀸𑀫 𑀬𑀣𑀸 𑀧𑀸𑀲𑀸𑀤𑀁 𑀧𑀢𑁆𑀯𑀸 𑀣𑀫𑁆𑀪𑁄 𑀦𑀸𑀫 𑀲𑁂𑀲𑀤𑀩𑁆𑀩𑀲𑀫𑁆𑀪𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑁄, 𑀢𑀼𑀮𑀸𑀲𑀗𑁆𑀖𑀸𑀝𑀪𑀺𑀢𑁆𑀢𑀺𑀧𑀸𑀤𑀓𑀽𑀝𑀕𑁄𑀧𑀸𑀦𑀲𑀻𑀧𑀓𑁆𑀔𑀧𑀸𑀲𑀓𑀫𑀼𑀔𑀯𑀝𑁆𑀝𑀺𑀬𑁄 𑀣𑀫𑁆𑀪𑀸𑀩𑀤𑁆𑀥𑀸 𑀣𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑀸, 𑀏𑀯𑀫𑁂𑀯 𑀲𑀳𑀚𑀸𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀣𑀫𑁆𑀪𑀲𑀤𑀺𑀲𑁄 𑀳𑀺 𑀏𑀲. 𑀅𑀯𑀲𑁂𑀲𑀸 𑀤𑀩𑁆𑀩𑀲𑀫𑁆𑀪𑀸𑀭𑀲𑀤𑀺𑀲𑀸𑀢𑀺. 𑀢𑀲𑁆𑀫𑀸𑀧𑀺 𑀧𑀞𑀫𑀁 𑀯𑀼𑀢𑁆𑀢𑁄. 𑀇𑀤𑀁 𑀧𑀦 𑀅𑀓𑀸𑀭𑀡𑀁. 𑀏𑀓𑀘𑀺𑀢𑁆𑀢𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 ‘𑀅𑀬𑀁 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀅𑀬𑀁 𑀧𑀘𑁆𑀙𑀸’𑀢𑀺 𑀇𑀤𑀁 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀸. 𑀩𑀮𑀯𑀧𑀘𑁆𑀘𑀬𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀤𑁂𑀲𑀦𑀸𑀯𑀸𑀭𑁂𑀦𑁂𑀯 𑀧𑀦 𑀨𑀲𑁆𑀲𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀯𑁂𑀤𑀦𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀻𑀢𑀺 𑀆𑀳𑀭𑀺𑀢𑀼𑀫𑁆𑀧𑀺 𑀳𑀺 𑀯𑀝𑁆𑀝𑁂𑀬𑁆𑀬. 𑀤𑁂𑀲𑀦𑀸𑀯𑀸𑀭𑁂𑀦 𑀧𑀦 𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄 𑀦𑀸𑀫 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑀮𑀓𑁆𑀔𑀡𑀭𑀲𑀸𑀤𑀻𑀳𑀺 𑀧𑀦 𑀥𑀫𑁆𑀫𑀸 𑀏𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀲𑁂𑀬𑁆𑀬𑀣𑀺𑀤𑀁 𑁋 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄.

𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀨𑀼𑀲𑀦𑀮𑀓𑁆𑀔𑀡𑁄. 𑀏𑀓𑀤𑁂𑀲𑁂𑀦 𑀘 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁, 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀭𑀲𑁄. 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀢𑁄 𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦𑀧𑀺 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀘𑀢𑀼𑀪𑀽𑀫𑀓𑀨𑀲𑁆𑀲𑁄 𑀳𑀺 𑀦𑁄𑀨𑀼𑀲𑀦𑀮𑀓𑁆𑀔𑀡𑁄 𑀦𑀸𑀫 𑀦𑀢𑁆𑀣𑀺. 𑀲𑀗𑁆𑀖𑀝𑁆𑀝𑀦𑀭𑀲𑁄 𑀧𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁄𑀯 𑀳𑁄𑀢𑀺. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑁆𑀲 𑀳𑀺 𑀨𑀼𑀲𑀦𑀮𑀓𑁆𑀔𑀡𑁄𑀢𑀺𑀧𑀺 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺𑀧𑀺 𑀦𑀸𑀫𑀁; 𑀫𑀦𑁄𑀤𑁆𑀯𑀸𑀭𑀺𑀓𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑁄𑀢𑁆𑀯𑁂𑀯 𑀦𑀸𑀫𑀁, 𑀦 𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺.

𑀇𑀤𑀜𑁆𑀘 𑀯𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀪𑀢𑀁 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀫𑁂𑀡𑁆𑀟𑀸 𑀬𑀼𑀚𑁆𑀛𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀣𑀸 𑀏𑀓𑁄 𑀫𑁂𑀡𑁆𑀟𑁄 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀤𑀼𑀢𑀺𑀬𑁄 𑀫𑁂𑀡𑁆𑀟𑁄 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄’’. 𑀏𑀯𑀁 𑀨𑀼𑀲𑀦𑀮𑀓𑁆𑀔𑀡𑁄 𑀘 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄 𑀘. ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸 𑀯𑀚𑁆𑀚𑁂𑀬𑁆𑀬𑀼𑀁…𑀧𑁂… 𑀤𑁆𑀯𑁂 𑀧𑀸𑀡𑀻 𑀯𑀚𑁆𑀚𑁂𑀬𑁆𑀬𑀼𑀁, 𑀬𑀣𑀸 𑀏𑀓𑁄 𑀧𑀸𑀡𑀺 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀤𑀼𑀢𑀺𑀬𑁄 𑀧𑀸𑀡𑀺 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀨𑀼𑀲𑀦𑀮𑀓𑁆𑀔𑀡𑁄 𑀘 𑀨𑀲𑁆𑀲𑁄 𑀲𑀗𑁆𑀖𑀝𑁆𑀝𑀦𑀭𑀲𑁄 𑀘𑀸’’𑀢𑀺 (𑀫𑀺. 𑀧. 𑁨.𑁩.𑁮) 𑀯𑀺𑀢𑁆𑀣𑀸𑀭𑁄.

𑀬𑀣𑀸 𑀯𑀸 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁫𑁨, 𑁧𑁩𑁫𑁪) 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀓𑁆𑀔𑀼𑀆𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀺, 𑀏𑀯𑀫𑀺𑀥𑀸𑀧𑀺 𑀢𑀸𑀦𑀺 𑀘𑀓𑁆𑀔𑀼𑀆𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸 ‘𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩’𑀦𑁆𑀢𑀺𑀆𑀤𑀻𑀲𑀼 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀢𑁂 𑀘𑀺𑀢𑁆𑀢𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀢𑁄 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀓𑀺𑀘𑁆𑀘𑀝𑁆𑀞𑁂𑀦𑁂𑀯 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺 𑀲𑀺𑀤𑁆𑀥𑁄 𑀳𑁄𑀢𑀺.

𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀬𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 𑀏𑀯𑀁 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑁄𑀢𑀺. 𑀇𑀫𑀲𑁆𑀲 𑀘 𑀲𑀼𑀢𑁆𑀢𑀧𑀤𑀲𑁆𑀲 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄𑀢𑀺 𑀅𑀬𑀫𑀢𑁆𑀣𑁄; 𑀦 𑀲𑀗𑁆𑀕𑀢𑀺𑀫𑀢𑁆𑀢𑀫𑁂𑀯 𑀨𑀲𑁆𑀲𑁄𑀢𑀺.

𑀏𑀯𑀁 𑀧𑀯𑁂𑀤𑀺𑀢𑀢𑁆𑀢𑀸 𑀧𑀦 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀯𑀼𑀢𑁆𑀢𑁄. 𑀨𑀮𑀝𑁆𑀞𑁂𑀦 𑀧𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦𑁂𑀲 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀦𑀸𑀫 𑀳𑁄𑀢𑀺. 𑀯𑁂𑀤𑀦𑀜𑁆𑀳𑁂𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀬𑀫𑀸𑀦𑁄 𑀘 𑀬𑀣𑀸 𑀩𑀳𑀺𑀤𑁆𑀥𑀸 𑀉𑀡𑁆𑀳𑀧𑀘𑁆𑀘𑀬𑀸𑀧𑀺 𑀮𑀸𑀔𑀸𑀲𑀗𑁆𑀔𑀸𑀢𑀥𑀸𑀢𑀼𑀦𑀺𑀲𑁆𑀲𑀺𑀢𑀸 𑀉𑀲𑁆𑀫𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑁂 𑀫𑀼𑀤𑀼𑀪𑀸𑀯𑀓𑀸𑀭𑀻 𑀳𑁄𑀢𑀺, 𑀦 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀧𑀺 𑀩𑀳𑀺𑀤𑁆𑀥𑀸 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀲𑀗𑁆𑀔𑀸𑀢𑁂 𑀉𑀡𑁆𑀳𑀪𑀸𑀯𑁂, 𑀏𑀯𑀁 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀅𑀜𑁆𑀜𑀧𑀘𑁆𑀘𑀬𑁄𑀧𑀺 𑀲𑀫𑀸𑀦𑁄, 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑁂 𑀘𑀺𑀢𑁆𑀢𑁂 𑀏𑀯 𑀏𑀲 𑀯𑁂𑀤𑀦𑀼𑀧𑁆𑀧𑀸𑀤𑀓𑁄 𑀳𑁄𑀢𑀺, 𑀦 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀧𑀺 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑁂 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁂𑀦 𑀧𑀦 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀏𑀲 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀺.

𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀅𑀦𑀼𑀪𑀯𑀦𑀭𑀲𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀸 𑀯𑀸, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸.

‘𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀳𑀺 𑀦𑁄𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀅𑀦𑀼𑀪𑀯𑀦𑀭𑀲𑀢𑀸 𑀧𑀦 𑀲𑀼𑀔𑀯𑁂𑀤𑀦𑀸𑀬𑀫𑁂𑀯 𑀮𑀩𑁆𑀪𑀢𑀻’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀢𑀼, 𑀤𑀼𑀓𑁆𑀔𑀯𑁂𑀤𑀦𑀸 𑀯𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀯𑀸, 𑀲𑀩𑁆𑀩𑀸 𑀅𑀦𑀼𑀪𑀯𑀦𑀭𑀲𑀸’𑀢𑀺 𑀯𑀢𑁆𑀯𑀸 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑁋 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀓𑀤𑁂𑀲𑀫𑀢𑁆𑀢𑀓𑀫𑁂𑀯 𑀅𑀦𑀼𑀪𑀯𑀦𑁆𑀢𑀺. 𑀨𑀲𑁆𑀲𑀲𑁆𑀲 𑀳𑀺 𑀨𑀼𑀲𑀦𑀫𑀢𑁆𑀢𑀓𑀫𑁂𑀯 𑀳𑁄𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀓𑀫𑁂𑀯, 𑀘𑁂𑀢𑀦𑀸𑀬 𑀘𑁂𑀢𑀦𑀸𑀫𑀢𑁆𑀢𑀓𑀫𑁂𑀯, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀫𑀢𑁆𑀢𑀓𑀫𑁂𑀯. 𑀏𑀓𑀁𑀲𑀢𑁄 𑀧𑀦 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀯𑁂𑀤𑀦𑀸𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺.

𑀭𑀸𑀚𑀸 𑀯𑀺𑀬 𑀳𑀺 𑀯𑁂𑀤𑀦𑀸, 𑀲𑀽𑀤𑁄 𑀯𑀺𑀬 𑀲𑁂𑀲𑀥𑀫𑁆𑀫𑀸. 𑀬𑀣𑀸 𑀲𑀽𑀤𑁄 𑀦𑀸𑀦𑀸𑀭𑀲𑀪𑁄𑀚𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑁂𑀴𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀜𑁆𑀙𑀦𑀁 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀑𑀢𑀸𑀭𑁂𑀢𑁆𑀯𑀸 𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑁂𑀴𑀁 𑀯𑀺𑀯𑀭𑀺𑀢𑁆𑀯𑀸 𑀲𑀩𑁆𑀩𑀲𑀽𑀧𑀩𑁆𑀬𑀜𑁆𑀚𑀦𑁂𑀳𑀺 𑀅𑀕𑁆𑀕𑀕𑁆𑀕𑀁 𑀆𑀤𑀸𑀬 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀤𑁄𑀲𑀦𑀺𑀤𑁆𑀤𑁄𑀲𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀅𑀚𑁆𑀛𑁄𑀳𑀭𑀢𑀺, 𑀢𑀢𑁄 𑀭𑀜𑁆𑀜𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀉𑀧𑀦𑀸𑀫𑁂𑀢𑀺. 𑀭𑀸𑀚𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀻 𑀳𑀼𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀪𑀼𑀜𑁆𑀚𑀢𑀺. 𑀢𑀢𑁆𑀣 𑀳𑀺 𑀲𑀽𑀤𑀲𑁆𑀲 𑀪𑀢𑁆𑀢𑀯𑀻𑀫𑀁𑀲𑀦𑀫𑀢𑁆𑀢𑀫𑀺𑀯 𑀅𑀯𑀲𑁂𑀲𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀭𑀲𑀲𑁆𑀲 𑀏𑀓𑀤𑁂𑀲𑀸𑀦𑀼𑀪𑀯𑀦𑀁. 𑀬𑀣𑀸 𑀳𑀺 𑀲𑀽𑀤𑁄 𑀪𑀢𑁆𑀢𑁂𑀓𑀤𑁂𑀲𑀫𑀢𑁆𑀢𑀫𑁂𑀯 𑀯𑀻𑀫𑀁𑀲𑀢𑀺 𑀏𑀯𑀁 𑀲𑁂𑀲𑀥𑀫𑁆𑀫𑀸𑀧𑀺 𑀆𑀭𑀫𑁆𑀫𑀡𑀭𑀲𑁂𑀓𑀤𑁂𑀲𑀫𑁂𑀯 𑀅𑀦𑀼𑀪𑀯𑀦𑁆𑀢𑀺. 𑀬𑀣𑀸 𑀧𑀦 𑀭𑀸𑀚𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀻 𑀳𑀼𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀪𑀼𑀜𑁆𑀚𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺. 𑀢𑀲𑁆𑀫𑀸 𑀅𑀦𑀼𑀪𑀯𑀦𑀭𑀲𑀸𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀯𑁂𑀤𑀦𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀓𑀸𑀭𑀫𑁂𑀯 𑀲𑀫𑁆𑀪𑀼𑀜𑁆𑀚𑀢𑀻𑀢𑀺 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀸𑀢𑀺 𑀯𑀼𑀢𑁆𑀢𑀸. 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀢𑁄 𑀧𑀦𑁂𑀲𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀉𑀧𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 ‘‘𑀧𑀲𑁆𑀲𑀤𑁆𑀥𑀺𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺’’ 𑀢𑀲𑁆𑀫𑀸 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀻𑀮𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸. 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀸 𑀳𑀺 𑀦𑁄𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸𑀯. 𑀬𑀸 𑀧𑀦𑁂𑀢𑁆𑀣 𑀅𑀪𑀺𑀜𑁆𑀜𑀸𑀡𑁂𑀦 𑀲𑀜𑁆𑀚𑀸𑀦𑀸𑀢𑀺 𑀲𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸 𑀦𑀸𑀫 𑀳𑁄𑀢𑀺.

𑀢𑀲𑁆𑀲𑀸, 𑀯𑀟𑁆𑀠𑀓𑀺𑀲𑁆𑀲 𑀤𑀸𑀭𑀼𑀫𑁆𑀳𑀺 𑀅𑀪𑀺𑀜𑁆𑀜𑀸𑀡𑀁 𑀓𑀢𑁆𑀯𑀸 𑀧𑀼𑀦 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀢𑀁 𑀧𑀘𑁆𑀘𑀸𑀪𑀺𑀚𑀸𑀦𑀦𑀓𑀸𑀮𑁂, 𑀧𑀼𑀭𑀺𑀲𑀲𑁆𑀲 𑀓𑀸𑀴𑀢𑀺𑀮𑀓𑀸𑀤𑀺𑀅𑀪𑀺𑀜𑁆𑀜𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀅𑀲𑀼𑀓𑁄 𑀦𑀸𑀫 𑀏𑀲𑁄𑀢𑀺 𑀢𑀲𑁆𑀲 𑀧𑀘𑁆𑀘𑀸𑀪𑀺𑀚𑀸𑀦𑀦𑀓𑀸𑀮𑁂, 𑀭𑀜𑁆𑀜𑁄 𑀧𑀺𑀴𑀦𑁆𑀥𑀦𑀕𑁄𑀧𑀓𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀺𑀴𑀦𑁆𑀥𑀦𑁂 𑀦𑀸𑀫𑀧𑀡𑁆𑀡𑀓𑀁 𑀩𑀦𑁆𑀥𑀺𑀢𑁆𑀯𑀸 ‘𑀅𑀲𑀼𑀓𑀁 𑀧𑀺𑀴𑀦𑁆𑀥𑀦𑀁 𑀦𑀸𑀫 𑀆𑀳𑀭𑀸’𑀢𑀺 𑀯𑀼𑀢𑁆𑀢𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀭𑀢𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀺𑀴𑀦𑁆𑀥𑀦𑀲𑁆𑀲 𑀆𑀳𑀭𑀡𑀓𑀸𑀮𑁂 𑀘 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑁄 𑀦𑀬𑁄 𑁋 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀳𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸. 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸, 𑀤𑀸𑀭𑀼𑀆𑀤𑀻𑀲𑀼 𑀢𑀘𑁆𑀙𑀓𑀸𑀤𑀬𑁄 𑀯𑀺𑀬. 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬. 𑀆𑀭𑀫𑁆𑀫𑀡𑁂 𑀅𑀦𑁄𑀕𑀸𑀴𑁆𑀳𑀯𑀼𑀢𑁆𑀢𑀺𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀯𑀺𑀚𑁆𑀚𑀼 𑀯𑀺𑀬. 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸, 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 ‘𑀧𑀼𑀭𑀺𑀲𑀸’𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬. 𑀬𑀸 𑀧𑀦𑁂𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀢𑀺 𑀲𑀸 𑀲𑀜𑁆𑀜𑀸 𑀜𑀸𑀡𑀫𑁂𑀯 𑀅𑀦𑀼𑀯𑀢𑁆𑀢𑀢𑀺. 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀲𑁂𑀲𑀥𑀫𑁆𑀫𑀸 𑀧𑀣𑀯𑀻𑀆𑀤𑀻𑀦𑀺 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀘𑁂𑀢𑀦𑀸𑀪𑀸𑀯𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁄. 𑀆𑀬𑀽𑀳𑀦𑀭𑀲𑀸. 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸 𑀳𑀺 𑀦𑁄𑀘𑁂𑀢𑀬𑀺𑀢𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸𑀯. 𑀆𑀬𑀽𑀳𑀦𑀭𑀲𑀢𑀸 𑀧𑀦 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀯 𑀳𑁄𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀝𑁆𑀞𑀸𑀦𑀜𑁆𑀳𑀺 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑀫𑀢𑁆𑀢𑀓𑀫𑁂𑀯 𑀓𑀺𑀘𑁆𑀘𑀁 𑀳𑁄𑀢𑀺. 𑀘𑁂𑀢𑀦𑀸 𑀧𑀦 𑀅𑀢𑀺𑀭𑁂𑀓𑀉𑀲𑁆𑀲𑀸𑀳𑀸 𑀅𑀢𑀺𑀭𑁂𑀓𑀯𑀸𑀬𑀸𑀫𑀸, 𑀤𑀺𑀕𑀼𑀡𑀼𑀲𑁆𑀲𑀸𑀳𑀸 𑀤𑀺𑀕𑀼𑀡𑀯𑀸𑀬𑀸𑀫𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀣𑀸𑀯𑀭𑀺𑀬𑀲𑀪𑀸𑀯𑀲𑀡𑁆𑀞𑀺𑀢𑀸 𑀘 𑀧𑀦𑁂𑀲𑀸 𑀘𑁂𑀢𑀦𑀸’’𑀢𑀺. 𑀣𑀸𑀯𑀭𑀺𑀬𑁄𑀢𑀺 𑀔𑁂𑀢𑁆𑀢𑀲𑀸𑀫𑀻 𑀯𑀼𑀘𑁆𑀘𑀢𑀺. 𑀬𑀣𑀸 𑀔𑁂𑀢𑁆𑀢𑀲𑀸𑀫𑀻 𑀧𑀼𑀭𑀺𑀲𑁄 𑀧𑀜𑁆𑀘𑀧𑀡𑁆𑀡𑀸𑀲 𑀩𑀮𑀺𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 ‘𑀮𑀸𑀬𑀺𑀲𑁆𑀲𑀸𑀫𑀻’𑀢𑀺 𑀏𑀓𑀢𑁄 𑀔𑁂𑀢𑁆𑀢𑀁 𑀑𑀢𑀭𑀢𑀺. 𑀢𑀲𑁆𑀲 𑀅𑀢𑀺𑀭𑁂𑀓𑁄 𑀉𑀲𑁆𑀲𑀸𑀳𑁄 𑀅𑀢𑀺𑀭𑁂𑀓𑁄 𑀯𑀸𑀬𑀸𑀫𑁄, 𑀤𑀺𑀕𑀼𑀡𑁄 𑀉𑀲𑁆𑀲𑀸𑀳𑁄 𑀤𑀺𑀕𑀼𑀡𑁄 𑀯𑀸𑀬𑀸𑀫𑁄 𑀳𑁄𑀢𑀺, ‘𑀦𑀺𑀭𑀦𑁆𑀢𑀭𑀁 𑀕𑀡𑁆𑀳𑀣𑀸’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀲𑀻𑀫𑀁 𑀆𑀘𑀺𑀓𑁆𑀔𑀢𑀺, 𑀢𑁂𑀲𑀁 𑀲𑀼𑀭𑀸𑀪𑀢𑁆𑀢𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀚𑀸𑀦𑀸𑀢𑀺, 𑀫𑀕𑁆𑀕𑀁 𑀲𑀫𑀓𑀁 𑀳𑀭𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀔𑁂𑀢𑁆𑀢𑀲𑀸𑀫𑀺𑀧𑀼𑀭𑀺𑀲𑁄 𑀯𑀺𑀬 𑀳𑀺 𑀘𑁂𑀢𑀦𑀸. 𑀧𑀜𑁆𑀘𑀧𑀡𑁆𑀡𑀸𑀲 𑀩𑀮𑀺𑀧𑀼𑀭𑀺𑀲𑀸 𑀯𑀺𑀬 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀧𑀜𑁆𑀘𑀧𑀡𑁆𑀡𑀸𑀲 𑀓𑀼𑀲𑀮𑀸 𑀥𑀫𑁆𑀫𑀸. 𑀔𑁂𑀢𑁆𑀢𑀲𑀸𑀫𑀺𑀧𑀼𑀭𑀺𑀲𑀲𑁆𑀲 𑀤𑀺𑀕𑀼𑀡𑀼𑀲𑁆𑀲𑀸𑀳𑀤𑀺𑀕𑀼𑀡𑀯𑀸𑀬𑀸𑀫𑀓𑀭𑀡𑀓𑀸𑀮𑁄 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀘𑁂𑀢𑀦𑀸𑀬 𑀤𑀺𑀕𑀼𑀡𑀼𑀲𑁆𑀲𑀸𑀳𑁄 𑀤𑀺𑀕𑀼𑀡𑀯𑀸𑀬𑀸𑀫𑁄 𑀳𑁄𑀢𑀺. 𑀏𑀯𑀫𑀲𑁆𑀲𑀸 𑀆𑀬𑀽𑀳𑀦𑀭𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀸 𑀧𑀦𑁂𑀲𑀸 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀁𑀯𑀺𑀤𑀳𑀫𑀸𑀦𑀸 𑀳𑀺 𑀅𑀬𑀁 𑀉𑀧𑀝𑁆𑀞𑀸𑀢𑀺, 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸, 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀻𑀆𑀤𑀬𑁄 𑀯𑀺𑀬. 𑀬𑀣𑀸 𑀳𑀺 𑀚𑁂𑀝𑁆𑀞𑀲𑀺𑀲𑁆𑀲𑁄 𑀉𑀧𑀚𑁆𑀛𑀸𑀬𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀅𑀥𑀻𑀬𑀫𑀸𑀦𑁄 𑀇𑀢𑀭𑁂𑀧𑀺 𑀤𑀸𑀭𑀓𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀬𑀦𑀓𑀫𑁆𑀫𑁂 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀅𑀥𑀻𑀬𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀅𑀥𑀻𑀬𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀬𑀣𑀸 𑀘 𑀫𑀳𑀸𑀯𑀟𑁆𑀠𑀓𑀻 𑀲𑀬𑀁 𑀢𑀘𑁆𑀙𑀦𑁆𑀢𑁄 𑀇𑀢𑀭𑁂𑀧𑀺 𑀢𑀘𑁆𑀙𑀓𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀢𑀘𑁆𑀙𑀦𑀓𑀫𑁆𑀫𑁂 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀢𑀘𑁆𑀙𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀢𑀘𑁆𑀙𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀬𑀣𑀸 𑀘 𑀬𑁄𑀥𑀦𑀸𑀬𑀓𑁄 𑀲𑀬𑀁 𑀬𑀼𑀚𑁆𑀛𑀫𑀸𑀦𑁄 𑀇𑀢𑀭𑁂𑀧𑀺 𑀬𑁄𑀥𑁂 𑀲𑀫𑁆𑀧𑀳𑀸𑀭𑀯𑀼𑀢𑁆𑀢𑀺𑀬𑀁 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀬𑀼𑀚𑁆𑀛𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀅𑀦𑀺𑀯𑀢𑁆𑀢𑀫𑀸𑀦𑀸 𑀬𑀼𑀚𑁆𑀛𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀏𑀯𑀫𑁂𑀲𑀸𑀧𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸 𑀅𑀜𑁆𑀜𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀺. 𑀢𑀲𑁆𑀲𑀸 𑀳𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀆𑀭𑀤𑁆𑀥𑀸𑀬, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀆𑀭𑀪𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸, 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀻𑀆𑀤𑀬𑁄 𑀯𑀺𑀬𑀸’𑀢𑀺. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀘 𑀧𑀦𑀸𑀬𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀲𑁆𑀲𑀸𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻’𑀢𑀺 𑀘𑀺𑀢𑁆𑀢𑀦𑁆𑀢𑀺 𑀦𑀬𑁂𑀦 𑀘𑀺𑀢𑁆𑀢𑀲𑁆𑀲 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀲𑀦𑁆𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀜𑁆𑀳𑀺 𑀦𑁄𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀫𑁂𑀯. 𑀤𑁆𑀯𑀸𑀭𑀁 𑀧𑀦 𑀧𑀢𑁆𑀯𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀝𑁆𑀞𑀸𑀦𑁂 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀳𑁄𑀢𑀺. 𑀘𑀓𑁆𑀔𑀼𑀦𑀸 𑀳𑀺 𑀤𑀺𑀝𑁆𑀞𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀯𑀺𑀚𑀸𑀦𑀸𑀢𑀺…𑀧𑁂… 𑀫𑀦𑁂𑀦 𑀯𑀺𑀜𑁆𑀜𑀸𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀯𑀺𑀚𑀸𑀦𑀸𑀢𑀺. 𑀬𑀣𑀸 𑀳𑀺 𑀦𑀕𑀭𑀕𑀼𑀢𑁆𑀢𑀺𑀓𑁄 𑀦𑀸𑀫 𑀦𑀕𑀭𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘𑀅𑀬𑀁 𑀦𑁂𑀯𑀸𑀲𑀺𑀓𑁄 𑀅𑀬𑀁 𑀆𑀕𑀦𑁆𑀢𑀼𑀓𑁄’𑀢𑀺 𑀆𑀕𑀢𑀸𑀕𑀢𑀁 𑀚𑀦𑀁 𑀉𑀧𑀥𑀸𑀭𑁂𑀢𑀺 𑀯𑀯𑀢𑁆𑀣𑀧𑁂𑀢𑀺 𑁋 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀳𑀸𑀣𑁂𑀭𑁂𑀦 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀕𑀭𑀕𑀼𑀢𑁆𑀢𑀺𑀓𑁄 𑀦𑀸𑀫 𑀫𑀚𑁆𑀛𑁂 𑀦𑀕𑀭𑀲𑁆𑀲 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄 𑀧𑀼𑀭𑀢𑁆𑀣𑀺𑀫𑀢𑁄 𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑁂𑀬𑁆𑀬… 𑀧𑀘𑁆𑀙𑀺𑀫𑀢𑁄… 𑀤𑀓𑁆𑀔𑀺𑀡𑀢𑁄… 𑀉𑀢𑁆𑀢𑀭𑀢𑁄 𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀁 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺, 𑀬𑀁 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀻’’𑀢𑀺 (𑀫𑀺. 𑀧. 𑁨.𑁩.𑁧𑁨). 𑀏𑀯𑀁 𑀤𑁆𑀯𑀸𑀭𑀁 𑀧𑀢𑁆𑀯𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀝𑁆𑀞𑀸𑀦𑁂 𑀘𑀺𑀢𑁆𑀢𑀫𑁂𑀯 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁. 𑀢𑀲𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀭𑀲𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀤𑁂𑀢𑀁 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀲𑀦𑁆𑀤𑀳𑀦𑀫𑁂𑀯 𑀉𑀧𑀝𑁆𑀞𑀸𑀢𑀻𑀢𑀺 𑀲𑀦𑁆𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀦𑀲𑁆𑀲 𑀦𑀺𑀬𑀫𑀢𑁄 𑀦𑀸𑀫𑀭𑀽𑀧𑀁, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀸𑀫𑀫𑁂𑀯 𑀧𑀤𑀝𑁆𑀞𑀸𑀦𑀁. 𑀢𑀲𑁆𑀫𑀸 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑁂𑀢𑀁 𑀘𑀺𑀢𑁆𑀢𑀁 𑀧𑀼𑀭𑀺𑀫𑀦𑀺𑀤𑁆𑀤𑀺𑀝𑁆𑀞𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀯 𑀉𑀤𑀸𑀳𑀼 𑀅𑀜𑁆𑀜𑀦𑁆𑀢𑀺? 𑀏𑀓𑀫𑁂𑀯. 𑀅𑀣 𑀓𑀲𑁆𑀫𑀸 𑀧𑀼𑀭𑀺𑀫𑀦𑀺𑀤𑁆𑀤𑀺𑀝𑁆𑀞𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀯𑀺𑀘𑀸𑀭𑀺𑀢𑀁 𑀏𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺 𑁋 𑀬𑀣𑀸 𑀳𑀺 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀲𑀽𑀭𑀺𑀬𑀸𑀤𑀬𑁄 𑀦 𑀅𑀢𑁆𑀣𑀢𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁂 𑀳𑁄𑀦𑁆𑀢𑀺, 𑀢𑁂𑀦𑁂𑀯 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀽𑀭𑀺𑀬𑁄 𑀉𑀤𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲 𑀢𑁂𑀚𑀲𑀗𑁆𑀔𑀸𑀢𑀁 𑀭𑀽𑀧𑀫𑁆𑀧𑀻𑀢𑀺. 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀲𑀽𑀭𑀺𑀬𑁄 𑀦𑀸𑀫 𑀅𑀢𑁆𑀣𑀺. 𑀦 𑀢𑀣𑀸 𑀘𑀺𑀢𑁆𑀢𑀁; 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀢𑀺; 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀢𑁂𑀳𑀺 𑀅𑀜𑁆𑀜𑀫𑁂𑀯. 𑀢𑁂𑀦 ‘𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀏𑀓𑀁𑀲𑁂𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑀸𑀤𑀻𑀳𑀺 𑀅𑀢𑁆𑀣𑀢𑁄 𑀅𑀜𑁆𑀜𑀫𑁂𑀯 𑀢𑀁 𑀳𑁄𑀢𑀻’𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀸𑀬 𑀏𑀢𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀘 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦) 𑀧𑀦 𑀪𑀸𑀯𑁂𑀦𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑁂 𑀲𑀫𑀬𑁂 𑀬𑁄 𑀪𑀸𑀯𑁂𑀢𑀺 𑀦 𑀲𑁄 𑀅𑀢𑁆𑀣𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀢𑁂𑀦𑁂𑀯 𑀢𑀢𑁆𑀣 𑀬𑀣𑀸 ‘‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀏𑀯𑀁 ‘‘𑀬𑁄 𑀪𑀸𑀯𑁂𑀢𑀺 𑀲𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀘𑀺𑀢𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑁂 𑀲𑀫𑀬𑁂 𑀲𑀫𑀬𑀯𑀯𑀢𑁆𑀣𑀸𑀧𑀺𑀢𑀁 𑀘𑀺𑀢𑁆𑀢𑀁 𑀦 𑀢𑀣𑀸 𑀅𑀢𑁆𑀣𑀢𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀣𑁂𑀯 𑀧𑀦 𑀢𑀤𑀸 ‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀺’, 𑀢𑀣𑀸 ‘𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀻’𑀢𑀺 𑀇𑀫𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀉𑀤𑁆𑀤𑁂𑀲𑀯𑀸𑀭𑁂 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘 𑀯𑀺𑀪𑀚𑀦𑀢𑁆𑀣𑀁 𑀧𑀼𑀭𑀺𑀫𑁂𑀦 𑀳𑀺 ‘𑀘𑀺𑀢𑁆𑀢’-𑀲𑀤𑁆𑀤𑁂𑀦 𑀓𑁂𑀯𑀮𑀁 𑀲𑀫𑀬𑁄 𑀯𑀯𑀢𑁆𑀣𑀸𑀧𑀺𑀢𑁄. 𑀢𑀲𑁆𑀫𑀺𑀁 𑀧𑀦 𑀘𑀺𑀢𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑀲𑀫𑀬𑁂 𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀢𑀲𑁆𑀲𑀸𑀧𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑁂𑀢𑀁 𑀧𑀼𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀞𑀸𑀦𑁂 𑀏𑀢𑀲𑁆𑀫𑀺𑀁 𑀅𑀯𑀼𑀘𑁆𑀘𑀫𑀸𑀦𑁂 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢’’𑀦𑁆𑀢𑀺 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀺𑀢𑀼𑀁. 𑀏𑀯𑀫𑀲𑁆𑀲 𑀯𑀺𑀪𑀚𑀦𑀁𑀬𑁂𑀯 𑀧𑀭𑀺𑀳𑀸𑀬𑁂𑀣. 𑀢𑀲𑁆𑀫𑀸 𑀢𑀲𑁆𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀦𑀢𑁆𑀣𑀫𑁆𑀧𑀺 𑀏𑀢𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀯𑀸 ‘‘𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀢𑀁 𑀤𑁂𑀲𑀦𑀸𑀲𑀻𑀲𑀫𑁂𑀯, ‘𑀦 𑀧𑀦 𑀘𑀺𑀢𑁆𑀢𑀁 𑀏𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀁, 𑀢𑀲𑁆𑀫𑀸 𑀘𑀺𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀘𑀺𑀢𑁆𑀢𑀫𑀢𑁆𑀢𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀏𑀯𑀁 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 𑀇𑀥 𑀲𑀭𑀽𑀧𑁂𑀦 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀢𑀺 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀘𑀺𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑁄; 𑀯𑀺𑀢𑀓𑁆𑀓𑀦𑀁 𑀯𑀸 𑀯𑀺𑀢𑀓𑁆𑀓𑁄; 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄. 𑀲𑁄 𑀳𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑀺. 𑀬𑀣𑀸 𑀳𑀺 𑀓𑁄𑀘𑀺 𑀭𑀸𑀚𑀯𑀮𑁆𑀮𑀪𑀁 𑀜𑀸𑀢𑀺𑀁 𑀯𑀸 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀆𑀭𑁄𑀳𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀢𑀲𑁆𑀫𑀸 𑀲𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄𑀢𑀺 𑀯𑀼𑀢𑁆𑀢𑁄. 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑀧𑀦𑀸𑀳 𑁋 𑀆𑀓𑁄𑀝𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄. ‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑁂𑀭𑀻 𑀆𑀓𑁄𑀝𑀺𑀢𑀸 𑀅𑀣 𑀧𑀘𑁆𑀙𑀸 𑀅𑀦𑀼𑀭𑀯𑀢𑀺 𑀅𑀦𑀼𑀲𑀤𑁆𑀤𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀣𑀸 𑀆𑀓𑁄𑀝𑀦𑀸 𑀏𑀯𑀁 𑀯𑀺𑀢𑀓𑁆𑀓𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀘𑁆𑀙𑀸 𑀅𑀦𑀼𑀭𑀯𑀦𑀸 𑀅𑀦𑀼𑀲𑀤𑁆𑀤𑀸𑀬𑀦𑀸 𑀏𑀯𑀁 𑀯𑀺𑀘𑀸𑀭𑁄 𑀤𑀝𑁆𑀞𑀩𑁆𑀩𑁄’’𑀢𑀺 (𑀫𑀺. 𑀧. 𑁨.𑁩.𑁧𑁪 𑀣𑁄𑀓𑀁 𑀯𑀺𑀲𑀤𑀺𑀲𑀁). 𑀲𑁆𑀯𑀸𑀬𑀁 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄. 𑀢𑀣𑀸 𑀳𑀺 𑀢𑁂𑀦 𑀬𑁄𑀕𑀸𑀯𑀘𑀭𑁄 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄; 𑀯𑀺𑀘𑀭𑀡𑀁 𑀯𑀸 𑀯𑀺𑀘𑀸𑀭𑁄. 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄. 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄. 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀬𑁄𑀕𑁂 𑀑𑀴𑀸𑀭𑀺𑀓𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀘 𑀖𑀡𑁆𑀝𑀸𑀪𑀺𑀖𑀸𑀢𑁄 𑀯𑀺𑀬 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀘 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄. 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀫𑀚𑁆𑀚𑀦𑀲𑀪𑀸𑀯𑀝𑁆𑀞𑁂𑀦 𑀘 𑀖𑀡𑁆𑀝𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄, 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀧𑀭𑀺𑀧𑁆𑀨𑀦𑁆𑀤𑀪𑀽𑀢𑁄 𑀘𑀺𑀢𑁆𑀢𑀲𑁆𑀲. 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬. 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀤𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀆𑀓𑀸𑀲𑁂 𑀕𑀘𑁆𑀙𑀢𑁄 𑀫𑀳𑀸𑀲𑀓𑀼𑀡𑀲𑁆𑀲 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀲𑁄 𑀳𑀺 𑀏𑀓𑀕𑁆𑀕𑁄 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀺 𑀯𑀸𑀢𑀕𑁆𑀕𑀳𑀡𑀢𑁆𑀣𑀁 𑀧𑀓𑁆𑀔𑁂 𑀨𑀦𑁆𑀤𑀸𑀧𑀬𑀫𑀸𑀦𑀲𑁆𑀲 𑀕𑀫𑀦𑀁 𑀯𑀺𑀬. 𑀅𑀦𑀼𑀫𑀚𑁆𑀚𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄. 𑀲𑁄 𑀳𑀺 𑀆𑀭𑀫𑁆𑀫𑀡𑀁 𑀅𑀦𑀼𑀫𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑀦𑁂𑀦 𑀧𑀯𑀢𑁆𑀢𑀺𑀬𑀁 𑀅𑀢𑀺𑀯𑀺𑀬 𑀬𑀼𑀚𑁆𑀚𑀢𑀺. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀅𑀧𑀺𑀘 𑀫𑀮𑀕𑁆𑀕𑀳𑀺𑀢𑀁 𑀓𑀁𑀲𑀪𑀸𑀚𑀦𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀘𑀼𑀡𑁆𑀡𑀢𑁂𑀮𑀯𑀸𑀮𑀡𑁆𑀟𑀼𑀧𑀓𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀤𑀴𑁆𑀳𑀕𑁆𑀕𑀳𑀡𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀤𑀡𑁆𑀟𑀧𑁆𑀧𑀳𑀸𑀭𑁂𑀦 𑀘𑀓𑁆𑀓𑀁 𑀪𑀫𑀬𑀺𑀢𑁆𑀯𑀸 𑀪𑀸𑀚𑀦𑀁 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀻𑀴𑀦𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀫𑀡𑁆𑀟𑀮𑀁 𑀓𑀭𑁄𑀦𑁆𑀢𑀲𑁆𑀲 𑀫𑀚𑁆𑀛𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑁄 𑀯𑀺𑀬 𑀅𑀪𑀺𑀦𑀺𑀭𑁄𑀧𑀦𑁄 𑀯𑀺𑀢𑀓𑁆𑀓𑁄, 𑀩𑀳𑀺𑀧𑀭𑀺𑀩𑁆𑀪𑀫𑀦𑀓𑀡𑁆𑀝𑀓𑁄 𑀯𑀺𑀬 𑀅𑀦𑀼𑀫𑀚𑁆𑀚𑀫𑀸𑀦𑁄 𑀯𑀺𑀘𑀸𑀭𑁄.

𑀧𑀺𑀡𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸. 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸. 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀸 𑀧𑀦𑁂𑀲𑀸 𑀔𑀼𑀤𑁆𑀤𑀺𑀓𑀸𑀧𑀻𑀢𑀺, 𑀔𑀡𑀺𑀓𑀸𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺, 𑀉𑀩𑁆𑀩𑁂𑀕𑀸𑀧𑀻𑀢𑀺, 𑀨𑀭𑀡𑀸𑀧𑀻𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺.

𑀢𑀢𑁆𑀣 𑀔𑀼𑀤𑁆𑀤𑀺𑀓𑀸𑀧𑀻𑀢𑀺 𑀲𑀭𑀻𑀭𑁂 𑀮𑁄𑀫𑀳𑀁𑀲𑀫𑀢𑁆𑀢𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀡𑀺𑀓𑀸𑀧𑀻𑀢𑀺 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀳𑁄𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺, 𑀲𑀫𑀼𑀤𑁆𑀤𑀢𑀻𑀭𑀁 𑀯𑀻𑀘𑀺 𑀯𑀺𑀬, 𑀓𑀸𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑀸𑀧𑀻𑀢𑀺 𑀩𑀮𑀯𑀢𑀻 𑀳𑁄𑀢𑀺, 𑀓𑀸𑀬𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀧𑁆𑀧𑀢𑁆𑀢𑀸. 𑀢𑀣𑀸 𑀳𑀺 𑀧𑀼𑀡𑁆𑀡𑀯𑀮𑁆𑀮𑀺𑀓𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀸𑀬𑀁 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑀁 𑀤𑀺𑀲𑁆𑀯𑀸 𑀫𑀳𑀸𑀘𑁂𑀢𑀺𑀬𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 ‘𑀇𑀫𑀸𑀬 𑀯𑀢 𑀯𑁂𑀮𑀸𑀬 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑀻’𑀢𑀺 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀉𑀩𑁆𑀩𑁂𑀕𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀥𑀸𑀢𑀮𑁂 𑀧𑀳𑀝𑀘𑀺𑀢𑁆𑀭𑀕𑁂𑀡𑁆𑀟𑀼𑀓𑁄 𑀯𑀺𑀬 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀢𑀣𑀸 𑀕𑀺𑀭𑀺𑀓𑀡𑁆𑀟𑀓𑀯𑀺𑀳𑀸𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀯𑀢𑁆𑀢𑀓𑀸𑀮𑀓𑀕𑀸𑀫𑁂 𑀏𑀓𑀸 𑀓𑀼𑀮𑀥𑀻𑀢𑀸𑀧𑀺 𑀩𑀮𑀯𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀉𑀩𑁆𑀩𑁂𑀕𑀸𑀬 𑀧𑀻𑀢𑀺𑀬𑀸 𑀆𑀓𑀸𑀲𑁂 𑀮𑀗𑁆𑀖𑁂𑀲𑀺. 𑀢𑀲𑁆𑀲𑀸 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀲𑀸𑀬𑀁 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 ‘𑀅𑀫𑁆𑀫, 𑀢𑁆𑀯𑀁 𑀕𑀭𑀼𑀪𑀸𑀭𑀸, 𑀅𑀓𑀸𑀮𑁂 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀫𑀬𑀁 𑀢𑀼𑀬𑁆𑀳𑀁 𑀧𑀢𑁆𑀢𑀺𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’𑀢𑀺 𑀅𑀕𑀫𑀁𑀲𑀼. 𑀲𑀸 𑀕𑀦𑁆𑀢𑀼𑀓𑀸𑀫𑀸𑀧𑀺 𑀢𑁂𑀲𑀁 𑀯𑀘𑀦𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀖𑀭𑁂 𑀑𑀳𑀻𑀬𑀺𑀢𑁆𑀯𑀸 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑁂𑀦 𑀕𑀺𑀭𑀺𑀓𑀡𑁆𑀟𑀓𑁂 𑀆𑀓𑀸𑀲𑀘𑁂𑀢𑀺𑀬𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑀻 𑀘𑁂𑀢𑀺𑀬𑀲𑁆𑀲 𑀤𑀻𑀧𑀧𑀽𑀚𑀁 𑀅𑀤𑁆𑀤𑀲. 𑀘𑀢𑀲𑁆𑀲𑁄 𑀘 𑀧𑀭𑀺𑀲𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀘𑁂𑀢𑀺𑀬𑀧𑀽𑀚𑀁 𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀺𑀬𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀡𑀲𑀚𑁆𑀛𑀸𑀬𑀲𑀤𑁆𑀤𑀁 𑀅𑀲𑁆𑀲𑁄𑀲𑀺. 𑀅𑀣𑀲𑁆𑀲𑀸 ‘𑀥𑀜𑁆𑀜𑀸 𑀯𑀢𑀺𑀫𑁂 𑀫𑀦𑀼𑀲𑁆𑀲𑀸 𑀬𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀯𑀭𑀽𑀧𑁂 𑀘𑁂𑀢𑀺𑀬𑀗𑁆𑀕𑀡𑁂 𑀅𑀦𑀼𑀲𑀜𑁆𑀘𑀭𑀺𑀢𑀼𑀁 𑀏𑀯𑀭𑀽𑀧𑀜𑁆𑀘 𑀫𑀥𑀼𑀭𑀁 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀮𑀪𑀦𑁆𑀢𑀻’𑀢𑀺 𑀫𑀼𑀢𑁆𑀢𑀭𑀸𑀲𑀺𑀲𑀤𑀺𑀲𑀁 𑀘𑁂𑀢𑀺𑀬𑀁 𑀧𑀲𑁆𑀲𑀦𑁆𑀢𑀺𑀬𑀸 𑀏𑀯 𑀉𑀩𑁆𑀩𑁂𑀕𑀸𑀧𑀻𑀢𑀺 𑀉𑀤𑀧𑀸𑀤𑀺. 𑀲𑀸 𑀆𑀓𑀸𑀲𑁂 𑀮𑀗𑁆𑀖𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀭𑀺𑀫𑀢𑀭𑀁𑀬𑁂𑀯 𑀆𑀓𑀸𑀲𑀢𑁄 𑀘𑁂𑀢𑀺𑀬𑀗𑁆𑀕𑀡𑁂 𑀑𑀭𑀼𑀬𑁆𑀳 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀆𑀕𑀦𑁆𑀢𑁆𑀯𑀸 ‘𑀅𑀫𑁆𑀫, 𑀢𑁆𑀯𑀁 𑀓𑀢𑀭𑁂𑀦 𑀫𑀕𑁆𑀕𑁂𑀦 𑀆𑀕𑀢𑀸𑀲𑀻’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘𑀆𑀓𑀸𑀲𑁂𑀦 𑀆𑀕𑀢𑀸𑀫𑁆𑀳𑀺, 𑀦 𑀫𑀕𑁆𑀕𑁂𑀦𑀸’𑀢𑀺 𑀯𑀢𑁆𑀯𑀸 ‘𑀅𑀫𑁆𑀫, 𑀆𑀓𑀸𑀲𑁂𑀦 𑀦𑀸𑀫 𑀔𑀻𑀡𑀸𑀲𑀯𑀸 𑀲𑀜𑁆𑀘𑀭𑀦𑁆𑀢𑀺, 𑀢𑁆𑀯𑀁 𑀓𑀣𑀁 𑀆𑀕𑀢𑀸’𑀢𑀺 𑀧𑀼𑀝𑁆𑀞𑀸 𑀆𑀳 𑁋 ‘𑀫𑀬𑁆𑀳𑀁 𑀘𑀦𑁆𑀤𑀸𑀮𑁄𑀓𑁂𑀦 𑀘𑁂𑀢𑀺𑀬𑀁 𑀑𑀮𑁄𑀓𑁂𑀦𑁆𑀢𑀺𑀬𑀸 𑀞𑀺𑀢𑀸𑀬 𑀩𑀼𑀤𑁆𑀥𑀸𑀭𑀫𑁆𑀫𑀡𑀸 𑀩𑀮𑀯𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀣𑀸𑀳𑀁 𑀦𑁂𑀯 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀁 𑀦 𑀦𑀺𑀲𑀺𑀦𑁆𑀦𑀪𑀸𑀯𑀁 𑀅𑀜𑁆𑀜𑀸𑀲𑀺𑀁, 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯 𑀧𑀦 𑀆𑀓𑀸𑀲𑀁 𑀮𑀗𑁆𑀖𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀧𑀢𑀺𑀝𑁆𑀞𑀺𑀢𑀸𑀫𑁆𑀳𑀻’𑀢𑀺. 𑀏𑀯𑀁 𑀉𑀩𑁆𑀩𑁂𑀕𑀸𑀧𑀻𑀢𑀺 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀸 𑀳𑁄𑀢𑀺.

𑀨𑀭𑀡𑀧𑀻𑀢𑀺𑀬𑀸 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀲𑀓𑀮𑀲𑀭𑀻𑀭𑀁 𑀥𑀫𑀺𑀢𑁆𑀯𑀸 𑀧𑀽𑀭𑀺𑀢𑀯𑀢𑁆𑀣𑀺 𑀯𑀺𑀬, 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀓𑁆𑀔𑀦𑁆𑀤𑀧𑀩𑁆𑀩𑀢𑀓𑀼𑀘𑁆𑀙𑀺 𑀯𑀺𑀬 𑀘 𑀅𑀦𑀼𑀧𑀭𑀺𑀧𑁆𑀨𑀼𑀝𑀁 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀁 𑀧𑀲𑁆𑀲𑀤𑁆𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑁋 𑀓𑀸𑀬𑀧𑀲𑁆𑀲𑀤𑁆𑀥𑀺𑀜𑁆𑀘 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀜𑁆𑀘. 𑀧𑀲𑁆𑀲𑀤𑁆𑀥𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀁 𑀲𑀼𑀔𑀁 𑀧𑀭𑀺𑀧𑀽𑀭𑁂𑀢𑀺 𑁋 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘. 𑀲𑀼𑀔𑀁 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀢𑀺𑀯𑀺𑀥𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑁋 𑀔𑀡𑀺𑀓𑀲𑀫𑀸𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑁆𑀢𑀺. 𑀢𑀸𑀲𑀼 𑀞𑀧𑁂𑀢𑁆𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀧𑀽𑀭𑀺𑀓𑀁 𑀇𑀢𑀭𑀸 𑀤𑁆𑀯𑁂𑀧𑀺 𑀇𑀥 𑀬𑀼𑀚𑁆𑀚𑀦𑁆𑀢𑀺.

𑀲𑀼𑀔𑀬𑀢𑀻𑀢𑀺 𑀲𑀼𑀔𑀁; 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁. 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬𑁂𑀢𑀁 𑀦𑀸𑀫𑀁. 𑀢𑀲𑁆𑀲 𑀮𑀓𑁆𑀔𑀡𑀸𑀤𑀻𑀦𑀺 𑀯𑁂𑀤𑀦𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀧𑀭𑁄 𑀦𑀬𑁄 𑁋 𑀲𑀸𑀢𑀮𑀓𑁆𑀔𑀡𑀁 𑀲𑀼𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀅𑀦𑀼𑀕𑁆𑀕𑀳𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀢𑀺𑀧𑀺 𑀘 𑀦𑁂𑀲𑀁 𑀧𑀻𑀢𑀺𑀲𑀼𑀔𑀸𑀦𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂, 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺; 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺 𑀢𑀢𑁆𑀣 𑀲𑀼𑀔𑀁. 𑀬𑀢𑁆𑀣 𑀲𑀼𑀔𑀁 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺. 𑀯𑀦𑀘𑁆𑀙𑀸𑀬𑀸𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁.

𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀫𑀳𑀸𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀖𑀫𑁆𑀫𑀧𑀭𑁂𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄 𑀧𑀝𑀺𑀧𑀣𑁂 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘𑀓𑀢𑁆𑀣 𑀧𑀸𑀦𑀻𑀬𑀁 𑀅𑀢𑁆𑀣𑀻’𑀢𑀺 𑀧𑀼𑀘𑁆𑀙𑁂𑀬𑁆𑀬. 𑀲𑁄 ‘𑀅𑀝𑀯𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀚𑀸𑀢𑀲𑁆𑀲𑀭𑀯𑀦𑀲𑀡𑁆𑀟𑁄 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀮𑀪𑀺𑀲𑁆𑀲𑀲𑀻’𑀢𑀺 𑀯𑀤𑁂𑀬𑁆𑀬. 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀪𑀯𑁂𑀬𑁆𑀬. 𑀢𑀢𑁄 𑀕𑀘𑁆𑀙𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺 𑀉𑀧𑁆𑀧𑀮𑀤𑀮𑀦𑀸𑀮𑀧𑀢𑁆𑀢𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀳𑀝𑁆𑀞𑀧𑀳𑀝𑁆𑀞𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀮𑁆𑀮𑀯𑀢𑁆𑀣𑁂 𑀅𑀮𑁆𑀮𑀓𑁂𑀲𑁂 𑀧𑀼𑀭𑀺𑀲𑁂 𑀧𑀲𑁆𑀲𑁂𑀬𑁆𑀬, 𑀯𑀦𑀓𑀼𑀓𑁆𑀓𑀼𑀝𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬, 𑀚𑀸𑀢𑀲𑁆𑀲𑀭𑀧𑀭𑀺𑀬𑀦𑁆𑀢𑁂 𑀚𑀸𑀢𑀁 𑀫𑀡𑀺𑀚𑀸𑀮𑀲𑀤𑀺𑀲𑀁 𑀦𑀻𑀮𑀯𑀦𑀲𑀡𑁆𑀟𑀁 𑀧𑀲𑁆𑀲𑁂𑀬𑁆𑀬, 𑀲𑀭𑁂 𑀚𑀸𑀢𑀸𑀦𑀺 𑀉𑀧𑁆𑀧𑀮𑀧𑀤𑀼𑀫𑀓𑀼𑀫𑀼𑀤𑀸𑀤𑀻𑀦𑀺 𑀧𑀲𑁆𑀲𑁂𑀬𑁆𑀬, 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀉𑀤𑀓𑀁 𑀧𑀲𑁆𑀲𑁂𑀬𑁆𑀬. 𑀲𑁄 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀳𑀝𑁆𑀞𑀧𑀳𑀝𑁆𑀞𑁄 𑀳𑀼𑀢𑁆𑀯𑀸 𑀚𑀸𑀢𑀲𑁆𑀲𑀭𑀁 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀪𑀺𑀲𑀫𑀼𑀴𑀸𑀮𑀧𑁄𑀓𑁆𑀔𑀭𑀸𑀤𑀻𑀦𑀺 𑀔𑀸𑀤𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀫𑀦𑁆𑀤𑀸𑀮𑀓𑀫𑀽𑀮𑀸𑀦𑀺 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀉𑀤𑀓𑀲𑀸𑀝𑀓𑀁 𑀆𑀢𑀧𑁂 𑀓𑀢𑁆𑀯𑀸, 𑀲𑀻𑀢𑀘𑁆𑀙𑀸𑀬𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀦𑀺𑀧𑀦𑁆𑀦𑁄 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀯𑀤𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀚𑀸𑀢𑀲𑁆𑀲𑀭𑀯𑀦𑀲𑀡𑁆𑀟𑀲𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀤𑀓𑀤𑀲𑁆𑀲𑀦𑀸 𑀳𑀝𑁆𑀞𑀧𑀳𑀝𑁆𑀞𑀓𑀸𑀮𑁄 𑀯𑀺𑀬 𑀧𑀼𑀩𑁆𑀩𑀪𑀸𑀕𑀸𑀭𑀫𑁆𑀫𑀡𑁂 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀸 𑀧𑀻𑀢𑀺. 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑀻𑀢𑀘𑁆𑀙𑀸𑀬𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀧𑀳𑀭𑀦𑁆𑀢𑁂 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀯𑀤𑀢𑁄 𑀦𑀺𑀧𑀦𑁆𑀦𑀓𑀸𑀮𑁄 𑀯𑀺𑀬 𑀩𑀮𑀯𑀧𑁆𑀧𑀢𑁆𑀢𑀁 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀸𑀓𑀸𑀭𑀲𑀡𑁆𑀞𑀺𑀢𑀁 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀧𑀻𑀢𑀺 𑀲𑀼𑀔𑀫𑁆𑀧𑀺 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀫𑁂𑀯𑁂𑀢𑀁.

𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁄; 𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀮𑀓𑁆𑀔𑀡𑀸𑀤𑀻𑀲𑀼 𑀧𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀁 𑁋 ‘‘𑀧𑀸𑀫𑁄𑀓𑁆𑀔𑀮𑀓𑁆𑀔𑀡𑁄 𑀘 𑀲𑀫𑀸𑀥𑀺 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀘’’. 𑀬𑀣𑀸 𑀳𑀺 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀸 𑀲𑁂𑀲𑀤𑀩𑁆𑀩𑀲𑀫𑁆𑀪𑀸𑀭𑀸𑀦𑀁 𑀆𑀩𑀦𑁆𑀥𑀦𑀢𑁄 𑀧𑀫𑀼𑀔𑀸 𑀳𑁄𑀢𑀺 𑀏𑀯𑀫𑁂𑀯 𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑀸𑀥𑀺𑀘𑀺𑀢𑁆𑀢𑁂𑀦 𑀇𑀚𑁆𑀛𑀦𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀥𑀺 𑀧𑀸𑀫𑁄𑀓𑁆𑀔𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀽𑀝𑀸𑀕𑀸𑀭𑀲𑁆𑀲 𑀬𑀸 𑀓𑀸𑀘𑀺 𑀕𑁄𑀧𑀸𑀦𑀲𑀺𑀬𑁄 𑀲𑀩𑁆𑀩𑀸 𑀢𑀸 𑀓𑀽𑀝𑀗𑁆𑀕𑀫𑀸 𑀳𑁄𑀦𑁆𑀢𑀺, 𑀓𑀽𑀝𑀦𑀺𑀦𑁆𑀦𑀸 𑀓𑀽𑀝𑀲𑀫𑁄𑀲𑀭𑀡𑀸, 𑀓𑀽𑀝𑀁 𑀢𑀸𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀢𑁂 𑀲𑀫𑀸𑀥𑀺𑀦𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀲𑀫𑀸𑀥𑀺𑀧𑁄𑀡𑀸, 𑀲𑀫𑀸𑀥𑀺𑀧𑀩𑁆𑀪𑀸𑀭𑀸, 𑀲𑀫𑀸𑀥𑀺 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀫𑀺. 𑀧. 𑁨.𑁧.𑁧𑁪).

𑀬𑀣𑀸 𑀘 𑀲𑁂𑀦𑀗𑁆𑀕𑀁 𑀧𑀢𑁆𑀯𑀸 𑀭𑀸𑀚𑀸 𑀦𑀸𑀫 𑀬𑀢𑁆𑀣 𑀬𑀢𑁆𑀣 𑀲𑁂𑀦𑀸 𑀑𑀲𑀻𑀤𑀢𑀺 𑀢𑀁 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀲𑁂𑀦𑀸 𑀧𑀭𑀺𑀧𑀽𑀭𑀢𑀺, 𑀧𑀭𑀲𑁂𑀦𑀸 𑀪𑀺𑀚𑁆𑀚𑀺𑀢𑁆𑀯𑀸 𑀭𑀸𑀚𑀸𑀦𑀫𑁂𑀯 𑀅𑀦𑀼𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀺𑀧𑀺𑀢𑀼𑀁 𑀯𑀺𑀧𑁆𑀧𑀓𑀺𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄 𑀲𑀫𑀸𑀥𑀺 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀦𑀸𑀫 𑀳𑁄𑀢𑀻𑀢𑀺.

𑀅𑀧𑀭𑁄 𑀧𑀦 𑀦𑀬𑁄 𑁋 𑀅𑀬𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀲𑀫𑀸𑀥𑀺 𑀦𑀸𑀫 𑀅𑀯𑀺𑀲𑀸𑀭𑀮𑀓𑁆𑀔𑀡𑁄 𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸, 𑀲𑀳𑀚𑀸𑀢𑀥𑀫𑁆𑀫𑀸𑀦𑀁, 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀢𑁄 𑀲𑀼𑀔𑀧𑀤𑀝𑁆𑀞𑀸𑀦𑁄, 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀇𑀦𑁆𑀤𑁆𑀭𑀺𑀬𑀭𑀸𑀲𑀺𑀯𑀡𑁆𑀡𑀦𑀸

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸𑀯 𑀅𑀲𑁆𑀲𑀤𑁆𑀥𑀺𑀬𑀲𑁆𑀲 𑀅𑀪𑀺𑀪𑀯𑀦𑀢𑁄 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀯𑀸 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀲𑀤𑁆𑀥𑀸𑀯 𑀇𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀲𑀸 𑀧𑀦𑁂𑀲𑀸 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀘 𑀲𑀤𑁆𑀥𑀸 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀘.

𑀬𑀣𑀸 𑀳𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀉𑀤𑀓𑀧𑁆𑀧𑀲𑀸𑀤𑀓𑁄 𑀫𑀡𑀺 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀧𑀗𑁆𑀓𑀲𑁂𑀯𑀸𑀮𑀧𑀡𑀓𑀓𑀤𑁆𑀤𑀫𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀺, 𑀉𑀤𑀓𑀁 𑀅𑀘𑁆𑀙𑀁 𑀓𑀭𑁄𑀢𑀺 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀏𑀯𑀫𑁂𑀯 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀓𑀺𑀮𑁂𑀲𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀅𑀦𑀸𑀯𑀺𑀮𑀁 𑀓𑀭𑁄𑀢𑀺. 𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀬𑁄𑀕𑀸𑀯𑀘𑀭𑁄 𑀓𑀼𑀮𑀧𑀼𑀢𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀪𑀸𑀯𑀦𑀁 𑀆𑀭𑀪𑀢𑀺. 𑀏𑀯𑀁 𑀢𑀸𑀯 𑀲𑀤𑁆𑀥𑀸 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀢𑀭𑁂𑀬𑁆𑀬, 𑀢𑀁 𑀉𑀤𑀓𑀁 𑀳𑀢𑁆𑀣𑀻𑀳𑀺 𑀘 𑀅𑀲𑁆𑀲𑁂𑀳𑀺 𑀘 𑀭𑀣𑁂𑀳𑀺 𑀘 𑀧𑀢𑁆𑀢𑀻𑀳𑀺 𑀘 𑀲𑀗𑁆𑀔𑀼𑀪𑀺𑀢𑀁 𑀪𑀯𑁂𑀬𑁆𑀬 𑀆𑀯𑀺𑀮𑀁 𑀮𑀼𑀮𑀺𑀢𑀁 𑀓𑀮𑀮𑀻𑀪𑀽𑀢𑀁, 𑀉𑀢𑁆𑀢𑀺𑀡𑁆𑀡𑁄 𑀘 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀬𑁆𑀬 ‘𑀧𑀸𑀦𑀻𑀬𑀁 𑀪𑀡𑁂 𑀆𑀳𑀭𑀣, 𑀢𑀁 𑀧𑀺𑀯𑀺𑀲𑁆𑀲𑀸𑀫𑀻’𑀢𑀺. 𑀭𑀜𑁆𑀜𑁄 𑀘 𑀉𑀤𑀓𑀧𑁆𑀧𑀲𑀸𑀤𑀓𑁄 𑀫𑀡𑀺 𑀪𑀯𑁂𑀬𑁆𑀬. ‘𑀏𑀯𑀁 𑀤𑁂𑀯𑀸’𑀢𑀺 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀉𑀤𑀓𑀧𑁆𑀧𑀲𑀸𑀤𑀓𑀁 𑀫𑀡𑀺𑀁 𑀉𑀤𑀓𑁂 𑀧𑀓𑁆𑀔𑀺𑀧𑁂𑀬𑁆𑀬𑀼𑀁. 𑀢𑀲𑁆𑀫𑀺𑀁 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀗𑁆𑀓𑀲𑁂𑀯𑀸𑀮𑀧𑀡𑀓𑀁 𑀯𑀺𑀕𑀘𑁆𑀙𑁂𑀬𑁆𑀬, 𑀓𑀤𑁆𑀤𑀫𑁄 𑀘 𑀲𑀦𑁆𑀦𑀺𑀲𑀻𑀤𑁂𑀬𑁆𑀬, 𑀅𑀘𑁆𑀙𑀁 𑀪𑀯𑁂𑀬𑁆𑀬 𑀉𑀤𑀓𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀢𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀦𑀻𑀬𑀁 𑀉𑀧𑀦𑀸𑀫𑁂𑀬𑁆𑀬𑀼𑀁 𑁋 ‘𑀧𑀺𑀯𑀢𑀼 𑀤𑁂𑀯𑁄 𑀧𑀸𑀦𑀻𑀬’𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀏𑀯𑀁 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀗𑁆𑀓𑀲𑁂𑀯𑀸𑀮𑀧𑀡𑀓𑀁 𑀓𑀤𑁆𑀤𑀫𑁄 𑀘 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀉𑀤𑀓𑀧𑁆𑀧𑀲𑀸𑀤𑀓𑁄 𑀫𑀡𑀺 𑀏𑀯𑀁 𑀲𑀤𑁆𑀥𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀉𑀤𑀓𑀧𑁆𑀧𑀲𑀸𑀤𑀓𑁂 𑀫𑀡𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀗𑁆𑀓𑀲𑁂𑀯𑀸𑀮𑀧𑀡𑀓𑀁 𑀯𑀺𑀕𑀘𑁆𑀙𑀢𑀺 𑀓𑀤𑁆𑀤𑀫𑁄 𑀘 𑀲𑀦𑁆𑀦𑀺𑀲𑀻𑀤𑀢𑀺, 𑀅𑀘𑁆𑀙𑀁 𑀪𑀯𑀢𑀺 𑀉𑀤𑀓𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀯𑀺𑀦𑀻𑀯𑀭𑀡𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮’’𑀦𑁆𑀢𑀺 (𑀫𑀺. 𑀧. 𑁨.𑁧.𑁧𑁦).

𑀬𑀣𑀸 𑀧𑀦 𑀓𑀼𑀫𑁆𑀪𑀺𑀮𑀫𑀓𑀭𑀕𑀸𑀳𑀭𑀓𑁆𑀔𑀲𑀸𑀤𑀺𑀓𑀺𑀡𑁆𑀡𑀁 𑀧𑀽𑀭𑀁 𑀫𑀳𑀸𑀦𑀤𑀺𑀁 𑀆𑀕𑀫𑁆𑀫 𑀪𑀻𑀭𑀼𑀓𑀚𑀦𑁄 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀢𑀺𑀝𑁆𑀞𑀢𑀺. 𑀲𑀗𑁆𑀕𑀸𑀫𑀲𑀽𑀭𑁄 𑀧𑀦 𑀫𑀳𑀸𑀬𑁄𑀥𑁄 𑀆𑀕𑀦𑁆𑀢𑁆𑀯𑀸 ‘𑀓𑀲𑁆𑀫𑀸 𑀞𑀺𑀢𑀢𑁆𑀣𑀸’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀲𑀧𑁆𑀧𑀝𑀺𑀪𑀬𑀪𑀸𑀯𑁂𑀦 𑀑𑀢𑀭𑀺𑀢𑀼𑀁 𑀦 𑀯𑀺𑀲𑀳𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀲𑀼𑀦𑀺𑀲𑀺𑀢𑀁 𑀅𑀲𑀺𑀁 𑀕𑀳𑁂𑀢𑁆𑀯𑀸 ‘𑀫𑀫 𑀧𑀘𑁆𑀙𑀢𑁄 𑀏𑀣, 𑀫𑀸 𑀪𑀸𑀬𑀺𑀢𑁆𑀣𑀸’𑀢𑀺 𑀯𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀆𑀕𑀢𑀸𑀕𑀢𑁂 𑀓𑀼𑀫𑁆𑀪𑀺𑀮𑀸𑀤𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 𑀑𑀭𑀺𑀫𑀢𑀻𑀭𑀢𑁄 𑀫𑀦𑀼𑀲𑁆𑀲𑀸𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑁄𑀦𑁆𑀢𑁄 𑀧𑀸𑀭𑀺𑀫𑀢𑀻𑀭𑀁 𑀦𑁂𑀢𑀺. 𑀧𑀸𑀭𑀺𑀫𑀢𑀻𑀭𑀢𑁄𑀧𑀺 𑀲𑁄𑀢𑁆𑀣𑀺𑀦𑀸 𑀑𑀭𑀺𑀫𑀢𑀻𑀭𑀁 𑀆𑀦𑁂𑀢𑀺. 𑀏𑀯𑀫𑁂𑀯 𑀤𑀸𑀦𑀁 𑀤𑀤𑀢𑁄 𑀲𑀻𑀮𑀁 𑀭𑀓𑁆𑀔𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑁄 𑀪𑀸𑀯𑀦𑀁 𑀆𑀭𑀪𑀢𑁄 𑀲𑀤𑁆𑀥𑀸 𑀧𑀼𑀩𑁆𑀩𑀗𑁆𑀕𑀫𑀸 𑀧𑀼𑀭𑁂𑀘𑀸𑀭𑀺𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀘 𑀲𑀤𑁆𑀥𑀸’𑀢𑀺.

𑀅𑀧𑀭𑁄 𑀦𑀬𑁄 𑁋 𑀲𑀤𑁆𑀤𑀳𑀦𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸. 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸 𑀑𑀖𑀼𑀢𑁆𑀢𑀭𑀡𑁄 𑀯𑀺𑀬. 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸. 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸 𑀯𑀸, 𑀲𑀸 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀁, 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀁 𑀯𑀻𑀭𑀺𑀬𑀁. 𑀯𑀺𑀥𑀺𑀦𑀸 𑀯𑀸 𑀦𑀬𑁂𑀦 𑀉𑀧𑀸𑀬𑁂𑀦 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀤𑁂𑀯 𑀓𑁄𑀲𑀚𑁆𑀚𑀲𑁆𑀲 𑀅𑀪𑀺𑀪𑀯𑀦𑀢𑁄 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀧𑀕𑁆𑀕𑀳𑀡𑀮𑀓𑁆𑀔𑀡𑁂 𑀯𑀸 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀯𑀻𑀭𑀺𑀬𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀢𑀁 𑀧𑀦𑁂𑀢𑀁 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀜𑁆𑀘 𑀯𑀻𑀭𑀺𑀬𑀁 𑀧𑀕𑁆𑀕𑀳𑀡𑀮𑀓𑁆𑀔𑀡𑀜𑁆𑀘. 𑀬𑀣𑀸 𑀳𑀺 𑀚𑀺𑀡𑁆𑀡𑀖𑀭𑀁 𑀆𑀕𑀦𑁆𑀢𑀼𑀓𑁂𑀦 𑀣𑀽𑀡𑀼𑀧𑀢𑁆𑀣𑀫𑁆𑀪𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑁂𑀳𑀺 𑀦 𑀳𑀸𑀬𑀢𑀺, 𑀦 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀢𑀸𑀯𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀣𑁂𑀭𑁄 𑀦𑀸𑀕𑀲𑁂𑀦𑁄 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀕𑁂𑀳𑁂 𑀧𑀢𑀦𑁆𑀢𑁂 𑀢𑀫𑀜𑁆𑀜𑁂𑀦 𑀤𑀸𑀭𑀼𑀦𑀸 𑀉𑀧𑀢𑁆𑀣𑀫𑁆𑀪𑁂𑀬𑁆𑀬, 𑀉𑀧𑀢𑁆𑀣𑀫𑁆𑀪𑀺𑀢𑀁 𑀲𑀦𑁆𑀢𑀁 𑀏𑀯𑀁 𑀢𑀁 𑀕𑁂𑀳𑀁 𑀦 𑀧𑀢𑁂𑀬𑁆𑀬, 𑀏𑀯𑀫𑁂𑀯 𑀔𑁄 𑀫𑀳𑀸𑀭𑀸𑀚 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑀺𑀢𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀳𑀸𑀬𑀦𑁆𑀢𑀺 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 (𑀫𑀺. 𑀧. 𑁨.𑁧.𑁧𑁨).

𑀬𑀣𑀸 𑀯𑀸 𑀧𑀦 𑀔𑀼𑀤𑁆𑀤𑀺𑀓𑀸𑀬 𑀘 𑀫𑀳𑀢𑀺𑀓𑀸𑀬 𑀘 𑀲𑁂𑀦𑀸𑀬 𑀲𑀗𑁆𑀕𑀸𑀫𑁂 𑀧𑀯𑀢𑁆𑀢𑁂 𑀔𑀼𑀤𑁆𑀤𑀺𑀓𑀸 𑀲𑁂𑀦𑀸 𑀑𑀮𑀻𑀬𑁂𑀬𑁆𑀬, 𑀢𑀢𑁄 𑀭𑀜𑁆𑀜𑁄 𑀆𑀭𑁄𑀘𑁂𑀬𑁆𑀬, 𑀭𑀸𑀚𑀸 𑀩𑀮𑀯𑀸𑀳𑀦𑀁 𑀧𑁂𑀲𑁂𑀬𑁆𑀬, 𑀢𑁂𑀦 𑀧𑀕𑁆𑀕𑀳𑀺𑀢𑀸 𑀲𑀓𑀲𑁂𑀦𑀸 𑀧𑀭𑀲𑁂𑀦𑀁 𑀧𑀭𑀸𑀚𑁂𑀬𑁆𑀬, 𑀏𑀯𑀫𑁂𑀯 𑀯𑀻𑀭𑀺𑀬𑀁 𑀲𑀳𑀚𑀸𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀑𑀮𑀻𑀬𑀺𑀢𑀼𑀁 𑀑𑀲𑀓𑁆𑀓𑀺𑀢𑀼𑀁 𑀦 𑀤𑁂𑀢𑀺, 𑀉𑀓𑁆𑀔𑀺𑀧𑀢𑀺, 𑀧𑀕𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀧𑀕𑁆𑀕𑀳𑀡𑀮𑀓𑁆𑀔𑀡𑀜𑁆𑀘 𑀯𑀻𑀭𑀺𑀬’𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀉𑀲𑁆𑀲𑀸𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 (𑀅. 𑀦𑀺. 𑁪.𑁧𑁧𑁩) 𑀯𑀘𑀦𑀢𑁄 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁 𑀯𑀸. 𑀲𑀫𑁆𑀫𑀸 𑀆𑀭𑀤𑁆𑀥𑀁 𑀲𑀩𑁆𑀩𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀭𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸𑀯 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑁆𑀲 𑀅𑀪𑀺𑀪𑀯𑀦𑀢𑁄 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁, 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂 𑀯𑀸 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀲𑀢𑀺 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀲𑀸 𑀧𑀦𑁂𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀘 𑀲𑀢𑀺 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀘. 𑀬𑀣𑀸 𑀳𑀺 𑀭𑀜𑁆𑀜𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀤𑀲𑀯𑀺𑀥𑀁 𑀭𑀢𑀦𑀁 𑀕𑁄𑀧𑀬𑀦𑁆𑀢𑁄 𑀲𑀸𑀬𑀁𑀧𑀸𑀢𑀁 𑀭𑀸𑀚𑀸𑀦𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑀺 𑀲𑀸𑀭𑁂𑀢𑀺, 𑀏𑀯𑀫𑁂𑀯 𑀲𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑀺 𑀲𑀭𑀸𑀧𑁂𑀢𑀺. 𑀢𑁂𑀦𑀸𑀳 𑀣𑁂𑀭𑁄 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀲𑀸𑀬𑀁𑀧𑀸𑀢𑀁 𑀬𑀲𑀁 𑀲𑀭𑀸𑀧𑁂𑀢𑀺 𑁋 ‘𑀏𑀢𑁆𑀢𑀓𑀸, 𑀤𑁂𑀯, 𑀳𑀢𑁆𑀣𑀻, 𑀏𑀢𑁆𑀢𑀓𑀸 𑀅𑀲𑁆𑀲𑀸, 𑀏𑀢𑁆𑀢𑀓𑀸 𑀭𑀣𑀸, 𑀏𑀢𑁆𑀢𑀓𑀸 𑀧𑀢𑁆𑀢𑀻, 𑀏𑀢𑁆𑀢𑀓𑀁 𑀳𑀺𑀭𑀜𑁆𑀜𑀁, 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁, 𑀏𑀢𑁆𑀢𑀓𑀁 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁, 𑀢𑀁 𑀤𑁂𑀯𑁄 𑀲𑀭𑀢𑀽’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀧𑀺𑀮𑀸𑀧𑁂𑀢𑀺 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺, 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀅𑀬𑀁 𑀲𑀫𑀣𑁄, 𑀅𑀬𑀁 𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀯𑀺𑀚𑁆𑀚𑀸, 𑀅𑀬𑀁 𑀯𑀺𑀫𑀼𑀢𑁆𑀢𑀺, 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺 (𑀫𑀺. 𑀧. 𑁨.𑁧.𑁧𑁩).

𑀬𑀣𑀸 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀜𑁆𑀜𑁄 𑀅𑀳𑀺𑀢𑁂 𑀘 𑀳𑀺𑀢𑁂 𑀘 𑀜𑀢𑁆𑀯𑀸 𑀅𑀳𑀺𑀢𑁂 𑀅𑀧𑀬𑀸𑀧𑁂𑀢𑀺, 𑀳𑀺𑀢𑁂 𑀉𑀧𑀬𑀸𑀧𑁂𑀢𑀺, 𑀏𑀯𑀫𑁂𑀯 𑀲𑀢𑀺 𑀳𑀺𑀢𑀸𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀺𑀢𑁆𑀯𑀸 ‘𑀇𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀥𑀫𑁆𑀫𑀸 𑀅𑀳𑀺𑀢𑀸’𑀢𑀺 𑀅𑀳𑀺𑀢𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺, ‘𑀇𑀫𑁂 𑀓𑀸𑀬𑀲𑀼𑀘𑀭𑀺𑀢𑀸𑀤𑀬𑁄 𑀥𑀫𑁆𑀫𑀸 𑀳𑀺𑀢𑀸’𑀢𑀺 𑀳𑀺𑀢𑁂 𑀥𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 𑀣𑁂𑀭𑁄 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀜𑁆𑀜𑁄 𑀳𑀺𑀢𑀸𑀳𑀺𑀢𑁂 𑀚𑀸𑀦𑀸𑀢𑀺 ‘𑀇𑀫𑁂 𑀭𑀜𑁆𑀜𑁄 𑀳𑀺𑀢𑀸 𑀇𑀫𑁂 𑀅𑀳𑀺𑀢𑀸, 𑀇𑀫𑁂 𑀉𑀧𑀓𑀸𑀭𑀸 𑀇𑀫𑁂 𑀅𑀦𑀼𑀧𑀓𑀸𑀭𑀸’𑀢𑀺, 𑀢𑀢𑁄 𑀅𑀳𑀺𑀢𑁂 𑀅𑀧𑀦𑀼𑀤𑁂𑀢𑀺 𑀳𑀺𑀢𑁂 𑀉𑀧𑀕𑁆𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑀺𑀢𑀸𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀢𑀺 ‘𑀇𑀫𑁂 𑀥𑀫𑁆𑀫𑀸 𑀳𑀺𑀢𑀸 𑀇𑀫𑁂 𑀥𑀫𑁆𑀫𑀸 𑀅𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀉𑀧𑀓𑀸𑀭𑀸 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀓𑀸𑀭𑀸’𑀢𑀺, 𑀢𑀢𑁄 𑀅𑀳𑀺𑀢𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺 𑀳𑀺𑀢𑁂 𑀥𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺 (𑀫𑀺. 𑀧. 𑁨.𑁧.𑁧𑁩).

𑀅𑀧𑀭𑁄 𑀦𑀬𑁄 𑁋 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀺, 𑀅𑀲𑀫𑁆𑀫𑁄𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀺𑀲𑀬𑀸𑀪𑀺𑀫𑀼𑀔𑀻𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀯𑀸, 𑀆𑀭𑀫𑁆𑀫𑀡𑁂 𑀤𑀴𑁆𑀳𑀁 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀧𑀦 𑀏𑀲𑀺𑀓𑀸 𑀯𑀺𑀬, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀭𑀓𑁆𑀔𑀡𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸.

𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀅𑀥𑀺𑀬𑀢𑀺 𑀞𑀧𑁂𑀢𑀻𑀢𑀺 𑀲𑀫𑀸𑀥𑀺. 𑀲𑁄𑀯 𑀯𑀺𑀓𑁆𑀔𑁂𑀧𑀲𑁆𑀲 𑀅𑀪𑀺𑀪𑀯𑀦𑀢𑁄 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂 𑀯𑀸 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀲𑀫𑀸𑀥𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀓𑀺𑀁 𑀧𑀚𑀸𑀦𑀸𑀢𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘𑀧𑀜𑁆𑀜𑀸𑀧𑁂𑀢𑀻𑀢𑀺 𑀧𑀜𑁆𑀜𑀸’𑀢𑀺 𑀯𑀼𑀢𑁆𑀢𑀁. 𑀓𑀺𑀦𑁆𑀢𑀺 𑀧𑀜𑁆𑀜𑀸𑀧𑁂𑀢𑀻𑀢𑀺? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀧𑀜𑁆𑀜𑀸𑀧𑁂𑀢𑀺. 𑀲𑀸𑀯 𑀅𑀯𑀺𑀚𑁆𑀚𑀸𑀬 𑀅𑀪𑀺𑀪𑀯𑀦𑀢𑁄 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀤𑀲𑁆𑀲𑀦𑀮𑀓𑁆𑀔𑀡𑁂 𑀯𑀸 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀧𑀜𑁆𑀜𑀸𑀯 𑀇𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀲𑀸 𑀧𑀦𑁂𑀲𑀸 𑀑𑀪𑀸𑀲𑀦𑀮𑀓𑁆𑀔𑀡𑀸 𑀘 𑀧𑀜𑁆𑀜𑀸 𑀧𑀚𑀸𑀦𑀦𑀮𑀓𑁆𑀔𑀡𑀸 𑀘. 𑀬𑀣𑀸 𑀳𑀺 𑀘𑀢𑀼𑀪𑀺𑀢𑁆𑀢𑀺𑀓𑁂 𑀕𑁂𑀳𑁂 𑀭𑀢𑁆𑀢𑀺𑀪𑀸𑀕𑁂 𑀤𑀻𑀧𑁂 𑀚𑀮𑀺𑀢𑁂 𑀅𑀦𑁆𑀥𑀓𑀸𑀭𑁄 𑀦𑀺𑀭𑀼𑀚𑁆𑀛𑀢𑀺 𑀆𑀮𑁄𑀓𑁄 𑀧𑀸𑀢𑀼𑀪𑀯𑀢𑀺, 𑀏𑀯𑀫𑁂𑀯 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸. 𑀧𑀜𑁆𑀜𑁄𑀪𑀸𑀲𑀲𑀫𑁄 𑀑𑀪𑀸𑀲𑁄 𑀦𑀸𑀫 𑀦𑀢𑁆𑀣𑀺. 𑀧𑀜𑁆𑀜𑀯𑀢𑁄 𑀳𑀺 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀸𑀮𑁄𑀓𑀸 𑀳𑁄𑀢𑀺. 𑀢𑁂𑀦𑀸𑀳 𑀣𑁂𑀭𑁄 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑁂 𑀕𑁂𑀳𑁂 𑀧𑀤𑀻𑀧𑀁 𑀧𑀯𑁂𑀲𑁂𑀬𑁆𑀬, 𑀧𑀯𑀺𑀝𑁆𑀞𑁄 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀑𑀪𑀸𑀲𑀁 𑀚𑀦𑁂𑀢𑀺, 𑀆𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀧𑀸𑀓𑀝𑀸𑀦𑀺 𑀘 𑀭𑀽𑀧𑀸𑀦𑀺 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀯𑀺𑀚𑁆𑀚𑁄𑀪𑀸𑀲𑀁 𑀚𑀦𑁂𑀢𑀺, 𑀜𑀸𑀡𑀸𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀧𑀸𑀓𑀝𑀸𑀦𑀺 𑀘 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺 (𑀫𑀺. 𑀧. 𑁨.𑁧.𑁧𑁫).

𑀬𑀣𑀸 𑀧𑀦 𑀙𑁂𑀓𑁄 𑀪𑀺𑀲𑀓𑁆𑀓𑁄 𑀆𑀢𑀼𑀭𑀸𑀦𑀁 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀚𑀸𑀦𑀸𑀢𑀺, 𑀏𑀯𑀁 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀓𑀼𑀲𑀮𑁂 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑁂 𑀳𑀻𑀦𑀧𑁆𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀅𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀧𑀚𑀸𑀦𑀸𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋 ‘‘𑀧𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀧𑀚𑀸𑀦𑀸𑀢𑀺? 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁪𑁯) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀯𑀫𑀲𑁆𑀲𑀸 𑀧𑀚𑀸𑀦𑀦𑀮𑀓𑁆𑀔𑀡𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑁄 𑀦𑀬𑁄 𑁋 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸; 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬. 𑀯𑀺𑀲𑀬𑁄𑀪𑀸𑀲𑀭𑀲𑀸 𑀧𑀤𑀻𑀧𑁄 𑀯𑀺𑀬. 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬.

𑀫𑀦𑀢𑀻𑀢𑀺 𑀫𑀦𑁄; 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀳𑀼 𑁋 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑁄 𑀯𑀺𑀬, 𑀫𑀳𑀸𑀢𑀼𑀮𑀸𑀬 𑀥𑀸𑀭𑀬𑀫𑀸𑀦𑁄 𑀯𑀺𑀬 𑀘, 𑀆𑀭𑀫𑁆𑀫𑀡𑀁 𑀫𑀺𑀦𑀢𑀺 𑀧𑀚𑀸𑀦𑀸𑀢𑀻𑀢𑀺 𑀫𑀦𑁄𑀢𑀺. 𑀢𑀤𑁂𑀯 𑀫𑀦𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀫𑀦𑁄𑀯 𑀇𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀯𑁂𑀢𑀁 𑀯𑁂𑀯𑀘𑀦𑀁.

𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑁄𑀕𑀢𑁄 𑀲𑁄𑀪𑀦𑀁 𑀫𑀦𑁄 𑀅𑀲𑁆𑀲𑀸𑀢𑀺 𑀲𑀼𑀫𑀦𑁄. 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁. 𑀲𑀸𑀢𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀲𑁄𑀫𑀦𑀲𑁆𑀲𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑁂𑀤𑀦𑀸𑀬𑁂𑀯𑁂𑀢𑀁 𑀯𑁂𑀯𑀘𑀦𑀁.

𑀚𑀻𑀯𑀦𑁆𑀢𑀺 𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸𑀢𑀺 𑀚𑀻𑀯𑀺𑀢𑀁. 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀚𑀻𑀯𑀺𑀢𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀁 𑀧𑀯𑀢𑁆𑀢𑀲𑀦𑁆𑀢𑀢𑀸𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀮𑀓𑁆𑀔𑀡𑀸𑀤𑀻𑀳𑀺 𑀧𑀦 𑀅𑀢𑁆𑀢𑀦𑀸 𑀅𑀯𑀺𑀦𑀺𑀪𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀁𑀬𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀲𑀦𑁆𑀢𑁂𑀧𑀺 𑀘 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀬𑀣𑀸𑀲𑀓𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀧𑀸𑀮𑁂𑀢𑀺 𑀥𑀸𑀢𑀻 𑀯𑀺𑀬 𑀓𑀼𑀫𑀸𑀭𑀁, 𑀲𑀬𑀁𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀘 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬, 𑀦 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀬𑀢𑀺 𑀅𑀢𑁆𑀢𑀦𑁄 𑀘 𑀧𑀯𑀢𑁆𑀢𑀬𑀺𑀢𑀩𑁆𑀩𑀸𑀦𑀜𑁆𑀘 𑀅𑀪𑀸𑀯𑀸, 𑀦 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑀺 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸 𑀔𑀻𑀬𑀫𑀸𑀦𑁄 𑀯𑀺𑀬 𑀯𑀝𑁆𑀝𑀺𑀲𑀺𑀦𑁂𑀳𑁄 𑀤𑀻𑀧𑀲𑀺𑀔𑀁. 𑀦 𑀘 𑀅𑀦𑀼𑀧𑀸𑀮𑀦𑀧𑀯𑀢𑁆𑀢𑀦𑀝𑁆𑀞𑀧𑀦𑀸𑀦𑀼𑀪𑀸𑀯𑀯𑀺𑀭𑀳𑀺𑀢𑀁 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑁂 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀕𑁆𑀕𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀧𑀕𑁆𑀕𑀳𑀦𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺, 𑀅𑀯𑀺𑀓𑁆𑀔𑁂𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑀢𑁄 𑀧𑀦 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀲𑀫𑁆𑀫𑀸 𑀯𑀸 𑀢𑀸𑀬 𑀧𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀲𑀗𑁆𑀓𑀧𑁆𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸 𑀯𑀸𑀬𑀸𑀫𑁂𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀯𑀸𑀬𑀫𑀦𑁆𑀢𑀻𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀲𑀭𑀢𑀺, 𑀲𑀫𑁆𑀫𑀸 𑀯𑀸 𑀢𑀸𑀬 𑀲𑀭𑀦𑁆𑀢𑀻𑀢𑀺 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀲𑀫𑀸𑀥𑀺𑀬𑀦𑁆𑀢𑀻𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀧𑀺𑀘, 𑀧𑀲𑀢𑁆𑀣𑀸 𑀲𑀼𑀦𑁆𑀤𑀭𑀸 𑀯𑀸 𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺. 𑀇𑀫𑀺𑀦𑀸𑀧𑀺 𑀦𑀬𑁂𑀦 𑀢𑁂𑀲𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯.

𑀩𑀮𑀭𑀸𑀲𑀺𑀯𑀡𑁆𑀡𑀦𑀸

𑀲𑀤𑁆𑀥𑀸𑀩𑀮𑀸𑀤𑀻𑀲𑀼𑀧𑀺 𑀲𑀤𑁆𑀥𑀸𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀧𑀦 𑀩𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑁂𑀲𑀼 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀤𑁆𑀥𑀸𑀩𑀮𑀁. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀻𑀭𑀺𑀬𑀩𑀮𑀁. 𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀢𑀺𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀅𑀳𑀺𑀭𑀺𑀓𑁂 𑀦 𑀓𑀫𑁆𑀧𑀢𑀻𑀢𑀺 𑀳𑀺𑀭𑀺𑀩𑀮𑀁. 𑀅𑀦𑁄𑀢𑁆𑀢𑀧𑁆𑀧𑁂 𑀦 𑀓𑀫𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀩𑀮𑀦𑁆𑀢𑀺. 𑀅𑀬𑀁 𑀉𑀪𑀬𑀧𑀤𑀯𑀲𑁂𑀦 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺.

𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀳𑁂𑀝𑁆𑀞𑀸 𑀮𑀓𑁆𑀔𑀡𑀸𑀤𑀻𑀳𑀺 𑀧𑀓𑀸𑀲𑀺𑀢𑀸𑀦𑁂𑀯. 𑀧𑀘𑁆𑀙𑀺𑀫𑀤𑁆𑀯𑀬𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀺𑀬𑀢𑀻𑀢𑀺 𑀳𑀺𑀭𑀻; 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺 𑀏𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁; 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀁 𑀦𑀸𑀦𑀸𑀓𑀭𑀡𑀤𑀻𑀧𑀦𑀢𑁆𑀣𑀁 ‘𑀲𑀫𑀼𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀮𑀚𑁆𑀚𑀸 𑀪𑀬𑀮𑀓𑁆𑀔𑀡𑁂𑀦 𑀘𑀸’𑀢𑀺 𑀇𑀫𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀼𑀢𑁆𑀢𑀸.

𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀦𑀸𑀫; 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫; 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻 𑀦𑀸𑀫; 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫. 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻 𑀦𑀸𑀫; 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀓𑀣𑀁? ‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀦 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀁, 𑀳𑀻𑀦𑀚𑀘𑁆𑀘𑀸𑀦𑀁 𑀓𑁂𑀯𑀝𑁆𑀝𑀸𑀤𑀻𑀦𑀁 𑀇𑀤𑀁 𑀓𑀫𑁆𑀫𑀁. 𑀫𑀸𑀤𑀺𑀲𑀲𑁆𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’𑀦𑁆𑀢𑀺, 𑀏𑀯𑀁 𑀢𑀸𑀯 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀤𑀳𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀯𑀬𑁂 𑀞𑀺𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’𑀦𑁆𑀢𑀺, 𑀏𑀯𑀁 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀤𑀼𑀩𑁆𑀩𑀮𑀚𑀸𑀢𑀺𑀓𑀸𑀦𑀁 𑀓𑀫𑁆𑀫𑀁, 𑀦 𑀲𑀽𑀭𑀪𑀸𑀯𑀸𑀦𑀁. 𑀫𑀸𑀤𑀺𑀲𑀲𑁆𑀲 𑀲𑀽𑀭𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’𑀦𑁆𑀢𑀺, 𑀏𑀯𑀁 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀅𑀦𑁆𑀥𑀩𑀸𑀮𑀸𑀦𑀁 𑀓𑀫𑁆𑀫𑀁, 𑀦 𑀧𑀡𑁆𑀟𑀺𑀢𑀸𑀦𑀁. 𑀫𑀸𑀤𑀺𑀲𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’𑀦𑁆𑀢𑀺, 𑀏𑀯𑀁 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀳𑀺𑀭𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀦𑀸𑀫 𑀳𑁄𑀢𑀺.

𑀓𑀣𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫? 𑀲𑀘𑁂 𑀢𑁆𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀕𑀭𑀳𑀧𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀲𑀺.

𑀕𑀭𑀳𑀺𑀲𑁆𑀲𑀦𑁆𑀢𑀺 𑀢𑀁 𑀯𑀺𑀜𑁆𑀜𑀽, 𑀅𑀲𑀼𑀘𑀺𑀁 𑀦𑀸𑀕𑀭𑀺𑀓𑁄 𑀬𑀣𑀸;

𑀯𑀚𑁆𑀚𑀺𑀢𑁄 𑀲𑀻𑀮𑀯𑀦𑁆𑀢𑁂𑀳𑀺, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻𑀢𑀺.

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀳𑀺 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀺𑀢𑁂𑀦 𑀑𑀢𑁆𑀢𑀧𑁆𑀧𑁂𑀦 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀸𑀫 𑀳𑁄𑀢𑀺.

𑀓𑀣𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 ‘𑀫𑀸𑀤𑀺𑀲𑀲𑁆𑀲 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀥𑀼𑀢𑀗𑁆𑀕𑀥𑀭𑀲𑁆𑀲 𑀦 𑀬𑀼𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼’𑀦𑁆𑀢𑀺 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁩.𑁪𑁦).

𑀓𑀣𑀁 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁 𑀦𑀸𑀫? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀮𑁄𑀓𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀬𑀣𑀸𑀳 𑁋 ‘‘𑀫𑀳𑀸 𑀔𑁄 𑀧𑀦𑀸𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀫𑀳𑀦𑁆𑀢𑀲𑁆𑀫𑀺𑀁 𑀔𑁄 𑀧𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀤𑁆𑀥𑀺𑀫𑀦𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄, 𑀢𑁂 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂𑀧𑀺𑀫𑀁 𑀏𑀯𑀁 𑀚𑀸𑀦𑀺𑀲𑁆𑀲𑀦𑁆𑀢𑀺 ‘𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁, 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺. 𑀲𑀦𑁆𑀢𑀺 𑀤𑁂𑀯𑀢𑀸 𑀇𑀤𑁆𑀥𑀺𑀫𑀦𑁆𑀢𑀺𑀦𑀺𑀬𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄. 𑀢𑀸 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺, 𑀢𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀺 ‘𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁, 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺… 𑀲𑁄 𑀮𑁄𑀓𑀁𑀬𑁂𑀯 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁩.𑁧𑁪𑁬). 𑀏𑀯𑀁 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁 𑀦𑀸𑀫 𑀳𑁄𑀢𑀺.

𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀦𑁆𑀢𑀺. 𑀏𑀢𑁆𑀣 𑀧𑀦 𑀮𑀚𑁆𑀚𑀸𑀢𑀺 𑀮𑀚𑁆𑀚𑀦𑀸𑀓𑀸𑀭𑁄; 𑀢𑁂𑀦 𑀲𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀳𑀺𑀭𑀻. 𑀪𑀬𑀦𑁆𑀢𑀺 𑀅𑀧𑀸𑀬𑀪𑀬𑀁; 𑀢𑁂𑀦 𑀲𑀪𑀸𑀯𑁂𑀦 𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀢𑀤𑀼𑀪𑀬𑀫𑁆𑀧𑀺 𑀧𑀸𑀧𑀧𑀭𑀺𑀯𑀚𑁆𑀚𑀦𑁂 𑀧𑀸𑀓𑀝𑀁 𑀳𑁄𑀢𑀺. 𑀏𑀓𑀘𑁆𑀘𑁄 𑀳𑀺, 𑀬𑀣𑀸 𑀦𑀸𑀫 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀮𑀚𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀓𑀁 𑀤𑀺𑀲𑁆𑀯𑀸 𑀮𑀚𑁆𑀚𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬 𑀳𑀻𑀴𑀺𑀢𑁄, 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀁 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀓𑀘𑁆𑀘𑁄 𑀅𑀧𑀸𑀬𑀪𑀬𑀪𑀻𑀢𑁄 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀁 𑁋 𑀬𑀣𑀸 𑀳𑀺 𑀤𑁆𑀯𑀻𑀲𑀼 𑀅𑀬𑁄𑀕𑀼𑀴𑁂𑀲𑀼 𑀏𑀓𑁄 𑀲𑀻𑀢𑀮𑁄 𑀪𑀯𑁂𑀬𑁆𑀬 𑀕𑀽𑀣𑀫𑀓𑁆𑀔𑀺𑀢𑁄, 𑀏𑀓𑁄 𑀉𑀡𑁆𑀳𑁄 𑀆𑀤𑀺𑀢𑁆𑀢𑁄. 𑀢𑀢𑁆𑀣 𑀧𑀡𑁆𑀟𑀺𑀢𑁄 𑀲𑀻𑀢𑀮𑀁 𑀕𑀽𑀣𑀫𑀓𑁆𑀔𑀺𑀢𑀢𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 𑀦 𑀕𑀡𑁆𑀳𑀸𑀢𑀺, 𑀇𑀢𑀭𑀁 𑀟𑀸𑀳𑀪𑀬𑁂𑀦. 𑀢𑀢𑁆𑀣 𑀲𑀻𑀢𑀮𑀲𑁆𑀲 𑀕𑀽𑀣𑀫𑀓𑁆𑀔𑀦𑀚𑀺𑀕𑀼𑀘𑁆𑀙𑀸𑀬 𑀅𑀕𑀡𑁆𑀳𑀦𑀁 𑀯𑀺𑀬 𑀅𑀚𑁆𑀛𑀢𑁆𑀢𑀁 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀸𑀧𑀲𑁆𑀲 𑀅𑀓𑀭𑀡𑀁. 𑀉𑀡𑁆𑀳𑀲𑁆𑀲 𑀟𑀸𑀳𑀪𑀬𑁂𑀦 𑀅𑀕𑀡𑁆𑀳𑀦𑀁 𑀯𑀺𑀬 𑀅𑀧𑀸𑀬𑀪𑀬𑁂𑀦 𑀧𑀸𑀧𑀲𑁆𑀲 𑀅𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀦𑁆𑀢𑀺. 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀧𑀸𑀧𑀧𑀭𑀺𑀯𑀚𑁆𑀚𑀦𑁂 𑀏𑀯 𑀧𑀸𑀓𑀝𑀁 𑀳𑁄𑀢𑀺. 𑀏𑀓𑀘𑁆𑀘𑁄 𑀳𑀺 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀁 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀓𑀘𑁆𑀘𑁄 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀧𑀁 𑀦 𑀓𑀭𑁄𑀢𑀺. 𑀢𑀢𑁆𑀣 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀺 𑀘𑁂𑀯 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀸𑀤𑀻𑀦𑀺 𑀘 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺.

𑀫𑀽𑀮𑀭𑀸𑀲𑀺𑀯𑀡𑁆𑀡𑀦𑀸

𑀦 𑀮𑀼𑀩𑁆𑀪𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀅𑀤𑁄𑀲𑀸𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀮𑁄𑀪𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀕𑁂𑀥𑀮𑀓𑁆𑀔𑀡𑁄, 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬. 𑀅𑀧𑀭𑀺𑀕𑁆𑀕𑀳𑀡𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬. 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬. 𑀅𑀤𑁄𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬. 𑀆𑀖𑀸𑀢𑀯𑀺𑀦𑀬𑀭𑀲𑁄 𑀧𑀭𑀺𑀴𑀸𑀳𑀯𑀺𑀦𑀬𑀭𑀲𑁄 𑀯𑀸 𑀘𑀦𑁆𑀤𑀦𑀁 𑀯𑀺𑀬. 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬. 𑀅𑀫𑁄𑀳𑁄 𑀮𑀓𑁆𑀔𑀡𑀸𑀤𑀻𑀳𑀺 𑀳𑁂𑀝𑁆𑀞𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀤𑁂 𑀯𑀺𑀪𑀸𑀯𑀺𑀢𑁄 𑀏𑀯.

𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀅𑀮𑁄𑀪𑁄 𑀫𑀘𑁆𑀙𑁂𑀭𑀫𑀮𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀅𑀤𑁄𑀲𑁄 𑀤𑀼𑀲𑁆𑀲𑀻𑀮𑁆𑀬𑀫𑀮𑀲𑁆𑀲, 𑀅𑀫𑁄𑀳𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀪𑀸𑀯𑀦𑀸𑀬 𑀧𑀝𑀺𑀧𑀓𑁆𑀔𑁄. 𑀅𑀮𑁄𑀪𑁄 𑀘𑁂𑀢𑁆𑀣 𑀤𑀸𑀦𑀳𑁂𑀢𑀼, 𑀅𑀤𑁄𑀲𑁄 𑀲𑀻𑀮𑀳𑁂𑀢𑀼, 𑀅𑀫𑁄𑀳𑁄 𑀪𑀸𑀯𑀦𑀸𑀳𑁂𑀢𑀼. 𑀢𑁂𑀲𑀼 𑀘 𑀅𑀮𑁄𑀪𑁂𑀦 𑀅𑀦𑀥𑀺𑀓𑀁 𑀕𑀡𑁆𑀳𑀸𑀢𑀺, 𑀮𑀼𑀤𑁆𑀥𑀲𑁆𑀲 𑀅𑀥𑀺𑀓𑀕𑁆𑀕𑀳𑀡𑀢𑁄. 𑀅𑀤𑁄𑀲𑁂𑀦 𑀅𑀦𑀽𑀦𑀁, 𑀤𑀼𑀝𑁆𑀞𑀲𑁆𑀲 𑀊𑀦𑀕𑁆𑀕𑀳𑀡𑀢𑁄. 𑀅𑀫𑁄𑀳𑁂𑀦 𑀅𑀯𑀺𑀧𑀭𑀻𑀢𑀁, 𑀫𑀽𑀴𑁆𑀳𑀲𑁆𑀲 𑀯𑀺𑀧𑀭𑀻𑀢𑀕𑁆𑀕𑀳𑀡𑀢𑁄.

𑀅𑀮𑁄𑀪𑁂𑀦 𑀘𑁂𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀤𑁄𑀲𑀁 𑀤𑁄𑀲𑀢𑁄 𑀥𑀸𑀭𑁂𑀦𑁆𑀢𑁄 𑀤𑁄𑀲𑁂 𑀧𑀯𑀢𑁆𑀢𑀢𑀺; 𑀮𑀼𑀤𑁆𑀥𑁄 𑀳𑀺 𑀤𑁄𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀅𑀤𑁄𑀲𑁂𑀦 𑀯𑀺𑀚𑁆𑀚𑀫𑀸𑀦𑀁 𑀕𑀼𑀡𑀁 𑀕𑀼𑀡𑀢𑁄 𑀥𑀸𑀭𑁂𑀦𑁆𑀢𑁄 𑀕𑀼𑀡𑁂 𑀧𑀯𑀢𑁆𑀢𑀢𑀺; 𑀤𑀼𑀝𑁆𑀞𑁄 𑀳𑀺 𑀕𑀼𑀡𑀁 𑀫𑀓𑁆𑀔𑁂𑀢𑀺. 𑀅𑀫𑁄𑀳𑁂𑀦 𑀬𑀸𑀣𑀸𑀯𑀲𑀪𑀸𑀯𑀁 𑀬𑀸𑀣𑀸𑀯𑀲𑀪𑀸𑀯𑀢𑁄 𑀥𑀸𑀭𑁂𑀦𑁆𑀢𑁄 𑀬𑀸𑀣𑀸𑀯𑀲𑀪𑀸𑀯𑁂 𑀧𑀯𑀢𑁆𑀢𑀢𑀺. 𑀫𑀽𑀴𑁆𑀳𑁄 𑀳𑀺 ‘𑀢𑀘𑁆𑀙𑀁 𑀅𑀢𑀘𑁆𑀙𑀦𑁆𑀢𑀺 𑀅𑀢𑀘𑁆𑀙𑀁 𑀘 𑀢𑀘𑁆𑀙’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀅𑀮𑁄𑀪𑁂𑀦 𑀘 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀮𑀼𑀤𑁆𑀥𑀲𑁆𑀲 𑀧𑀺𑀬𑀲𑀪𑀸𑀯𑀢𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑀸𑀲𑀳𑀦𑀢𑁄 𑀘. 𑀅𑀤𑁄𑀲𑁂𑀦 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀤𑀼𑀝𑁆𑀞𑀲𑁆𑀲 𑀳𑀺 𑀅𑀧𑁆𑀧𑀺𑀬𑀲𑀪𑀸𑀯𑀢𑁄 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀸𑀲𑀳𑀦𑀢𑁄 𑀘. 𑀅𑀫𑁄𑀳𑁂𑀦 𑀇𑀘𑁆𑀙𑀺𑀢𑀸𑀮𑀸𑀪𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀅𑀫𑀽𑀴𑁆𑀳𑀲𑁆𑀲 𑀳𑀺 ‘𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺𑀏𑀯𑀫𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀪𑀯𑀢𑁄 (𑀤𑀻. 𑀦𑀺. 𑁩.𑁩𑁪; 𑀅. 𑀦𑀺. 𑁯.𑁩𑁦).

𑀅𑀮𑁄𑀪𑁂𑀦 𑀘𑁂𑀢𑁆𑀣 𑀚𑀸𑀢𑀺𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀅𑀮𑁄𑀪𑀲𑁆𑀲 𑀢𑀡𑁆𑀳𑀸𑀧𑀝𑀺𑀧𑀓𑁆𑀔𑀢𑁄 𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸 𑀘 𑀚𑀸𑀢𑀺𑀤𑀼𑀓𑁆𑀔𑀲𑁆𑀲. 𑀅𑀤𑁄𑀲𑁂𑀦 𑀚𑀭𑀸𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀢𑀺𑀓𑁆𑀔𑀤𑁄𑀲𑀲𑁆𑀲 𑀔𑀺𑀧𑁆𑀧𑀁 𑀚𑀭𑀸𑀲𑀫𑁆𑀪𑀯𑀢𑁄. 𑀅𑀫𑁄𑀳𑁂𑀦 𑀫𑀭𑀡𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀲𑀫𑁆𑀫𑁄𑀳𑀫𑀭𑀡𑀜𑁆𑀳𑀺 𑀤𑀼𑀓𑁆𑀔𑀁, 𑀦 𑀘𑁂𑀢𑀁 𑀅𑀫𑀽𑀴𑁆𑀳𑀲𑁆𑀲 𑀳𑁄𑀢𑀺. 𑀅𑀮𑁄𑀪𑁂𑀦 𑀘 𑀕𑀳𑀝𑁆𑀞𑀸𑀦𑀁, 𑀅𑀫𑁄𑀳𑁂𑀦 𑀧𑀩𑁆𑀩𑀚𑀺𑀢𑀸𑀦𑀁, 𑀅𑀤𑁄𑀲𑁂𑀦 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀔𑀲𑀁𑀯𑀸𑀲𑀢𑀸 𑀳𑁄𑀢𑀺.

𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀮𑁄𑀪𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑀧𑀢𑁆𑀢𑀺 𑀦 𑀳𑁄𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀢𑀡𑁆𑀳𑀸𑀬 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀢𑀡𑁆𑀳𑀸𑀬 𑀘 𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄. 𑀅𑀤𑁄𑀲𑁂𑀦 𑀦𑀺𑀭𑀬𑁂 𑀉𑀧𑀧𑀢𑁆𑀢𑀺 𑀦 𑀳𑁄𑀢𑀺. 𑀤𑁄𑀲𑁂𑀦 𑀳𑀺 𑀘𑀡𑁆𑀟𑀚𑀸𑀢𑀺𑀢𑀸𑀬 𑀤𑁄𑀲𑀲𑀤𑀺𑀲𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀤𑁄𑀲𑀲𑁆𑀲 𑀘 𑀧𑀝𑀺𑀧𑀓𑁆𑀔𑁄 𑀅𑀤𑁄𑀲𑁄. 𑀅𑀫𑁄𑀳𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀺. 𑀫𑁄𑀳𑁂𑀦 𑀳𑀺 𑀦𑀺𑀘𑁆𑀘𑀲𑀫𑁆𑀫𑀽𑀴𑁆𑀳𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀫𑁄𑀳𑀲𑁆𑀲 𑀧𑀝𑀺𑀧𑀓𑁆𑀔𑁄 𑀘 𑀅𑀫𑁄𑀳𑁄. 𑀏𑀢𑁂𑀲𑀼 𑀘 𑀅𑀮𑁄𑀪𑁄 𑀭𑀸𑀕𑀯𑀲𑁂𑀦 𑀉𑀧𑀕𑀫𑀦𑀲𑁆𑀲 𑀅𑀪𑀸𑀯𑀓𑀭𑁄, 𑀅𑀤𑁄𑀲𑁄 𑀤𑁄𑀲𑀯𑀲𑁂𑀦 𑀅𑀧𑀕𑀫𑀦𑀲𑁆𑀲, 𑀅𑀫𑁄𑀳𑁄 𑀫𑁄𑀳𑀯𑀲𑁂𑀦 𑀅𑀫𑀚𑁆𑀛𑀢𑁆𑀢𑀪𑀸𑀯𑀲𑁆𑀲.

𑀢𑀻𑀳𑀺𑀧𑀺 𑀘𑁂𑀢𑁂𑀳𑀺 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄. 𑀅𑀲𑀼𑀪𑀲𑀜𑁆𑀜𑀸 𑀅𑀧𑁆𑀧𑀫𑀸𑀡𑀲𑀜𑁆𑀜𑀸 𑀥𑀸𑀢𑀼𑀲𑀜𑁆𑀜𑀸𑀢𑀺 𑀇𑀫𑀸 𑀘 𑀢𑀺𑀲𑁆𑀲𑁄 𑀲𑀜𑁆𑀜𑀸𑀬𑁄 𑀳𑁄𑀦𑁆𑀢𑀺. 𑀅𑀮𑁄𑀪𑁂𑀦 𑀧𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀅𑀦𑁆𑀢𑀲𑁆𑀲, 𑀅𑀤𑁄𑀲𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀅𑀦𑁆𑀢𑀲𑁆𑀲 𑀧𑀭𑀺𑀯𑀚𑁆𑀚𑀦𑀁 𑀳𑁄𑀢𑀺; 𑀅𑀫𑁄𑀳𑁂𑀦 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀦𑀁. 𑀢𑀣𑀸 𑀅𑀮𑁄𑀪𑁂𑀦 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀧𑀪𑁂𑀤𑀦𑀁 𑀳𑁄𑀢𑀺, 𑀅𑀤𑁄𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲, 𑀅𑀫𑁄𑀳𑁂𑀦 𑀲𑁂𑀲𑀕𑀦𑁆𑀣𑀤𑁆𑀯𑀬𑀲𑁆𑀲. 𑀧𑀼𑀭𑀺𑀫𑀸𑀦𑀺 𑀘 𑀤𑁆𑀯𑁂 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀦𑀼𑀪𑀸𑀯𑁂𑀦, 𑀧𑀘𑁆𑀙𑀺𑀫𑀸𑀦𑀺 𑀧𑀘𑁆𑀙𑀺𑀫𑀲𑁆𑀲𑁂𑀯 𑀆𑀦𑀼𑀪𑀸𑀯𑁂𑀦 𑀇𑀚𑁆𑀛𑀦𑁆𑀢𑀺.

𑀅𑀮𑁄𑀪𑁄 𑀘𑁂𑀢𑁆𑀣 𑀆𑀭𑁄𑀕𑁆𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺; 𑀅𑀮𑀼𑀤𑁆𑀥𑁄 𑀳𑀺 𑀮𑁄𑀪𑀦𑀻𑀬𑀫𑁆𑀧𑀺 𑀅𑀲𑀧𑁆𑀧𑀸𑀬𑀁 𑀦 𑀲𑁂𑀯𑀢𑀺, 𑀢𑁂𑀦 𑀔𑁄 𑀅𑀭𑁄𑀕𑁄 𑀳𑁄𑀢𑀺. 𑀅𑀤𑁄𑀲𑁄 𑀬𑁄𑀩𑁆𑀩𑀦𑀲𑁆𑀲; 𑀅𑀤𑀼𑀝𑁆𑀞𑁄 𑀳𑀺 𑀯𑀮𑀺𑀧𑀮𑀺𑀢𑀸𑀯𑀳𑁂𑀦 𑀤𑁄𑀲𑀕𑁆𑀕𑀺𑀦𑀸 𑀅𑀟𑀬𑁆𑀳𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀬𑀼𑀯𑀸 𑀳𑁄𑀢𑀺. 𑀅𑀫𑁄𑀳𑁄 𑀤𑀻𑀖𑀸𑀬𑀼𑀓𑀢𑀸𑀬; 𑀅𑀫𑀽𑀴𑁆𑀳𑁄 𑀳𑀺 𑀳𑀺𑀢𑀸𑀳𑀺𑀢𑀁 𑀜𑀢𑁆𑀯𑀸 𑀅𑀳𑀺𑀢𑀁 𑀧𑀭𑀺𑀯𑀚𑁆𑀚𑀦𑁆𑀢𑁄 𑀳𑀺𑀢𑀜𑁆𑀘 𑀧𑀝𑀺𑀲𑁂𑀯𑀫𑀸𑀦𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺.

𑀅𑀮𑁄𑀪𑁄 𑀘𑁂𑀢𑁆𑀣 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀮𑀼𑀤𑁆𑀥𑀲𑁆𑀲 𑀳𑀺 𑀘𑀸𑀕𑁂𑀦 𑀪𑁄𑀕𑀧𑀝𑀺𑀮𑀸𑀪𑁄. 𑀅𑀤𑁄𑀲𑁄 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸, 𑀫𑁂𑀢𑁆𑀢𑀸𑀬 𑀫𑀺𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀢𑁄 𑀘𑁂𑀯 𑀅𑀧𑀭𑀺𑀳𑀸𑀦𑀢𑁄 𑀘. 𑀅𑀫𑁄𑀳𑁄 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸, 𑀅𑀫𑀽𑀴𑁆𑀳𑁄 𑀳𑀺 𑀅𑀢𑁆𑀢𑀦𑁄 𑀳𑀺𑀢𑀫𑁂𑀯 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀅𑀮𑁄𑀪𑁄 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀤𑁄𑀲𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲, 𑀅𑀫𑁄𑀳𑁄 𑀅𑀭𑀺𑀬𑀯𑀺𑀳𑀸𑀭𑀲𑁆𑀲.

𑀅𑀮𑁄𑀪𑁂𑀦 𑀘𑁂𑀢𑁆𑀣 𑀲𑀓𑀧𑀓𑁆𑀔𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀢𑁂𑀲𑀁 𑀯𑀺𑀦𑀸𑀲𑁂𑀦 𑀅𑀪𑀺𑀲𑀗𑁆𑀕𑀳𑁂𑀢𑀼𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀸; 𑀅𑀤𑁄𑀲𑁂𑀦 𑀧𑀭𑀧𑀓𑁆𑀔𑁂𑀲𑀼, 𑀅𑀤𑀼𑀝𑁆𑀞𑀲𑁆𑀲 𑀳𑀺 𑀯𑁂𑀭𑀻𑀲𑀼𑀧𑀺 𑀯𑁂𑀭𑀺𑀲𑀜𑁆𑀜𑀸𑀬 𑀅𑀪𑀸𑀯𑀢𑁄; 𑀅𑀫𑁄𑀳𑁂𑀦 𑀉𑀤𑀸𑀲𑀻𑀦𑀧𑀓𑁆𑀔𑁂𑀲𑀼, 𑀅𑀫𑀽𑀴𑁆𑀳𑀲𑁆𑀲 𑀲𑀩𑁆𑀩𑀸𑀪𑀺𑀲𑀗𑁆𑀕𑀢𑀸𑀬 𑀅𑀪𑀸𑀯𑀢𑁄.

𑀅𑀮𑁄𑀪𑁂𑀦 𑀘 𑀅𑀦𑀺𑀘𑁆𑀘𑀤𑀲𑁆𑀲𑀦𑀁 𑀳𑁄𑀢𑀺; 𑀮𑀼𑀤𑁆𑀥𑁄 𑀳𑀺 𑀉𑀧𑀪𑁄𑀕𑀸𑀲𑀸𑀬 𑀅𑀦𑀺𑀘𑁆𑀘𑁂𑀧𑀺 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀦 𑀧𑀲𑁆𑀲𑀢𑀺. 𑀅𑀤𑁄𑀲𑁂𑀦 𑀤𑀼𑀓𑁆𑀔𑀤𑀲𑁆𑀲𑀦𑀁; 𑀅𑀤𑁄𑀲𑀚𑁆𑀛𑀸𑀲𑀬𑁄 𑀳𑀺 𑀧𑀭𑀺𑀘𑁆𑀘𑀢𑁆𑀢𑀆𑀖𑀸𑀢𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑁄 𑀲𑀗𑁆𑀔𑀸𑀭𑁂𑀬𑁂𑀯 𑀤𑀼𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀅𑀫𑁄𑀳𑁂𑀦 𑀅𑀦𑀢𑁆𑀢𑀤𑀲𑁆𑀲𑀦𑀁; 𑀅𑀫𑀽𑀴𑁆𑀳𑁄 𑀳𑀺 𑀬𑀸𑀣𑀸𑀯𑀕𑀳𑀡𑀓𑀼𑀲𑀮𑁄 𑀅𑀧𑀭𑀺𑀡𑀸𑀬𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀧𑀭𑀺𑀡𑀸𑀬𑀓𑀢𑁄 𑀩𑀼𑀚𑁆𑀛𑀢𑀺. 𑀬𑀣𑀸 𑀘 𑀏𑀢𑁂𑀳𑀺 𑀅𑀦𑀺𑀘𑁆𑀘𑀤𑀲𑁆𑀲𑀦𑀸𑀤𑀻𑀦𑀺 𑀏𑀯𑀫𑁂𑀢𑁂𑀧𑀺 𑀅𑀦𑀺𑀘𑁆𑀘𑀤𑀲𑁆𑀲𑀦𑀸𑀤𑀻𑀳𑀺 𑀳𑁄𑀦𑁆𑀢𑀺. 𑀅𑀦𑀺𑀘𑁆𑀘𑀤𑀲𑁆𑀲𑀦𑁂𑀦 𑀳𑀺 𑀅𑀮𑁄𑀪𑁄 𑀳𑁄𑀢𑀺, 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀤𑁄𑀲𑁄, 𑀅𑀦𑀢𑁆𑀢𑀤𑀲𑁆𑀲𑀦𑁂𑀦 𑀅𑀫𑁄𑀳𑁄 𑀳𑁄𑀢𑀺. 𑀓𑁄 𑀳𑀺 𑀦𑀸𑀫 ‘𑀅𑀦𑀺𑀘𑁆𑀘𑀫𑀺𑀤’𑀦𑁆𑀢𑀺 𑀲𑀫𑁆𑀫𑀸 𑀜𑀢𑁆𑀯𑀸 𑀢𑀲𑁆𑀲𑀢𑁆𑀣𑀸𑀬 𑀧𑀺𑀳𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀔𑀸𑀭𑁂 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀚𑀸𑀦𑀦𑁆𑀢𑁄 𑀅𑀧𑀭𑀫𑁆𑀧𑀺 𑀅𑀘𑁆𑀘𑀦𑁆𑀢𑀢𑀺𑀔𑀺𑀡𑀁 𑀓𑁄𑀥𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀅𑀢𑁆𑀢𑀲𑀼𑀜𑁆𑀜𑀢𑀜𑁆𑀘 𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺?

𑀓𑀫𑁆𑀫𑀧𑀣𑀭𑀸𑀲𑀺𑀯𑀡𑁆𑀡𑀦𑀸

𑀦𑀸𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀦𑀪𑀺𑀚𑁆𑀛𑀸. 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀁 𑀕𑀼𑀡𑀸𑀦𑀼𑀪𑀸𑀯𑀧𑀝𑀺𑀮𑀤𑁆𑀥𑀁 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘 𑀦 𑀩𑁆𑀬𑀸𑀧𑀸𑀤𑁂𑀢𑀻𑀢𑀺 𑀅𑀩𑁆𑀬𑀸𑀧𑀸𑀤𑁄. 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀲𑁄𑀪𑀦𑀸 𑀯𑀸 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀮𑁄𑀪𑀸𑀤𑀻𑀦𑀁𑀬𑁂𑀯 𑀢𑀸𑀦𑀺 𑀦𑀸𑀫𑀸𑀦𑀺. 𑀳𑁂𑀝𑁆𑀞𑀸 𑀧𑀦𑁂𑀢𑁂 𑀥𑀫𑁆𑀫𑀸 𑀫𑀽𑀮𑀯𑀲𑁂𑀦 𑀕𑀳𑀺𑀢𑀸, 𑀇𑀥 𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀮𑁄𑀓𑀧𑀸𑀮𑀤𑀼𑀓𑀯𑀡𑁆𑀡𑀦𑀸

𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀺𑀧𑀺 𑀳𑁂𑀝𑁆𑀞𑀸 𑀩𑀮𑀯𑀲𑁂𑀦 𑀕𑀳𑀺𑀢𑀸𑀦𑀺, 𑀇𑀥 𑀮𑁄𑀓𑀧𑀸𑀮𑀯𑀲𑁂𑀦. 𑀮𑁄𑀓𑀜𑁆𑀳𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀧𑀸𑀮𑀬𑀦𑁆𑀢𑀺. 𑀬𑀣𑀸𑀳 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀦 𑀧𑀸𑀮𑁂𑀬𑁆𑀬𑀼𑀁, 𑀦𑀬𑀺𑀥 𑀧𑀜𑁆𑀜𑀸𑀬𑁂𑀣 𑀫𑀸𑀢𑀸𑀢𑀺 𑀯𑀸, 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸, 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸, 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸, 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸. 𑀲𑀫𑁆𑀪𑁂𑀤𑀁 𑀮𑁄𑀓𑁄 𑀅𑀕𑀫𑀺𑀲𑁆𑀲 𑀬𑀣𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀲𑁄𑀡𑀲𑀺𑀗𑁆𑀕𑀸𑀮𑀸. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀢𑀲𑁆𑀫𑀸 𑀧𑀜𑁆𑀜𑀸𑀬𑀢𑀺 𑀫𑀸𑀢𑀸𑀢𑀺 𑀯𑀸 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸’’𑀢𑀺 (𑀅. 𑀦𑀺. 𑁨.𑁯).

𑀧𑀲𑁆𑀲𑀤𑁆𑀥𑀸𑀤𑀺𑀬𑀼𑀕𑀮𑀯𑀡𑁆𑀡𑀦𑀸

𑀓𑀸𑀬𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀏𑀓𑀢𑁄 𑀓𑀢𑁆𑀯𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀬𑁄, 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀽𑀧𑀲𑀫𑀓𑀭𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀲𑁆𑀲 𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀫𑀼𑀤𑀼𑀪𑀸𑀯𑁄 𑀓𑀸𑀬𑀫𑀼𑀤𑀼𑀢𑀸. 𑀘𑀺𑀢𑁆𑀢𑀲𑁆𑀲 𑀫𑀼𑀤𑀼𑀪𑀸𑀯𑁄 𑀘𑀺𑀢𑁆𑀢𑀫𑀼𑀤𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀸𑀬𑀓𑀫𑁆𑀫𑀜𑁆𑀜𑀢𑀸. 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀸𑀯𑀲𑁂𑀲𑀦𑀻𑀯𑀭𑀡𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀸 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸, 𑀳𑀺𑀢𑀓𑀺𑀭𑀺𑀬𑀸𑀲𑀼 𑀯𑀺𑀦𑀺𑀬𑁄𑀕𑀓𑁆𑀔𑁂𑀫𑀪𑀸𑀯𑀸𑀯𑀳𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀧𑀸𑀕𑀼𑀜𑁆𑀜𑀪𑀸𑀯𑁄 𑀓𑀸𑀬𑀧𑀸𑀕𑀼𑀜𑁆𑀜𑀢𑀸. 𑀘𑀺𑀢𑁆𑀢𑀲𑁆𑀲 𑀧𑀸𑀕𑀼𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀕𑁂𑀮𑀜𑁆𑀜𑀓𑀭𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀉𑀚𑀼𑀓𑀪𑀸𑀯𑁄 𑀓𑀸𑀬𑀼𑀚𑀼𑀓𑀢𑀸. 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀪𑀸𑀯𑁄 𑀘𑀺𑀢𑁆𑀢𑀼𑀚𑀼𑀓𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀭𑀢𑀻𑀢𑀺 𑀲𑀢𑀺. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑀁; 𑀲𑀫𑀦𑁆𑀢𑀢𑁄 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀦𑀲𑁆𑀲 𑀯𑀲𑁂𑀦 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑀸𑀤𑀻𑀦𑀺 𑀘 𑀢𑁂𑀲𑀁 𑀲𑀢𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑁂𑀢𑀁 𑀥𑀫𑁆𑀫𑀤𑁆𑀯𑀬𑀁 𑀧𑀼𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀧𑀓𑀸𑀭𑀯𑀲𑁂𑀦 𑀕𑀳𑀺𑀢𑀁.

𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀥𑀫𑁆𑀫𑁂 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀧𑀜𑁆𑀜𑀸𑀯𑁂𑀲𑀸 𑀅𑀢𑁆𑀣𑀢𑁄. 𑀇𑀫𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀮𑀓𑁆𑀔𑀡𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀇𑀥 𑀧𑀦𑁂𑀢𑁂 𑀬𑀼𑀕𑀦𑀤𑁆𑀥𑀯𑀲𑁂𑀦 𑀕𑀳𑀺𑀢𑀸.

𑀲𑀳𑀚𑀸𑀢𑀥𑀫𑁆𑀫𑁂 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀕𑁆𑀕𑀸𑀳𑁄. 𑀉𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀯𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀦 𑀯𑀺𑀓𑁆𑀔𑁂𑀧𑁄𑀢𑀺 𑀅𑀯𑀺𑀓𑁆𑀔𑁂𑀧𑁄. 𑀏𑀢𑁂𑀲𑀫𑁆𑀧𑀺 𑀮𑀓𑁆𑀔𑀡𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀇𑀥 𑀧𑀦𑁂𑀢𑀁 𑀤𑁆𑀯𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀢𑁆𑀣𑀸𑀬 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸

𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 ‘𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’𑀢𑀺 𑀦 𑀓𑁂𑀯𑀮𑀁 𑀧𑀤𑀧𑀝𑀺𑀧𑀸𑀝𑀺𑀬𑀸 𑀉𑀤𑁆𑀤𑀺𑀝𑁆𑀞𑀸 𑀇𑀫𑁂 𑀧𑀭𑁄𑀧𑀡𑁆𑀡𑀸𑀲𑀥𑀫𑁆𑀫𑀸 𑀏𑀯, 𑀅𑀣 𑀔𑁄 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀢𑀺𑀳𑁂𑀢𑀼𑀓𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀞𑀫𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀬𑁂 𑀯𑀸 𑀧𑀦 𑀅𑀜𑁆𑀜𑁂𑀧𑀺 𑀢𑁂𑀳𑀺𑀬𑁂𑀯 𑀨𑀲𑁆𑀲𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀅𑀢𑁆𑀣𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑀸 𑀭𑀽𑀧𑀸𑀪𑀸𑀯𑁂𑀦 𑀅𑀭𑀽𑀧𑀺𑀦𑁄, 𑀲𑀪𑀸𑀯𑀢𑁄 𑀉𑀧𑀮𑀩𑁆𑀪𑀫𑀸𑀦𑀸 𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀸𑀴𑀺𑀬𑀁 𑀆𑀭𑀼𑀴𑁆𑀳𑁂 𑀧𑀭𑁄𑀧𑀡𑁆𑀡𑀸𑀲𑀥𑀫𑁆𑀫𑁂 𑀤𑀻𑀧𑁂𑀢𑁆𑀯𑀸 𑀬𑁂𑀯𑀸𑀧𑀦𑀓𑀯𑀲𑁂𑀦 𑀅𑀧𑀭𑁂𑀧𑀺 𑀦𑀯 𑀥𑀫𑁆𑀫𑁂 𑀥𑀫𑁆𑀫𑀭𑀸𑀚𑀸 𑀤𑀻𑀧𑁂𑀢𑀺. 𑀢𑁂𑀲𑀼 𑀢𑁂𑀲𑀼 𑀳𑀺 𑀲𑀼𑀢𑁆𑀢𑀧𑀤𑁂𑀲𑀼 ‘𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀻’𑀢𑀺 𑀇𑀫𑁂 𑀦𑀯 𑀥𑀫𑁆𑀫𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘𑀸𑀧𑀺 𑀫𑀳𑀸𑀘𑀺𑀢𑁆𑀢𑁂 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁄 𑀅𑀢𑁆𑀣𑀺, 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀦 𑀧𑀸𑀴𑀺𑀬𑀁 𑀦 𑀆𑀭𑀼𑀴𑁆𑀳𑁄. 𑀲𑁄 𑀇𑀥 𑀬𑁂𑀯𑀸𑀧𑀦𑀓𑀯𑀲𑁂𑀦 𑀕𑀳𑀺𑀢𑁄.

𑀅𑀥𑀺𑀫𑁄𑀓𑁆𑀔𑁄 𑀅𑀢𑁆𑀣𑀺, 𑀫𑀦𑀲𑀺𑀓𑀸𑀭𑁄 𑀅𑀢𑁆𑀣𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀅𑀢𑁆𑀣𑀺. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺; 𑀲𑁄 𑀅𑀤𑁄𑀲𑁂 𑀕𑀳𑀺𑀢𑁂 𑀕𑀳𑀺𑀢𑁄 𑀏𑀯 𑀳𑁄𑀢𑀺. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺, 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺. 𑀉𑀧𑁂𑀓𑁆𑀔𑀸𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺; 𑀲𑁄 𑀧𑀦 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀕𑀳𑀺𑀢𑀸𑀬 𑀕𑀳𑀺𑀢𑁄𑀯 𑀳𑁄𑀢𑀺. 𑀲𑀫𑁆𑀫𑀸𑀯𑀸𑀘𑀸 𑀅𑀢𑁆𑀣𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀅𑀢𑁆𑀣𑀺. 𑀲𑀫𑁆𑀫𑀸𑀆𑀚𑀻𑀯𑁄 𑀅𑀢𑁆𑀣𑀺; 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀦 𑀧𑀸𑀴𑀺𑀬𑀁 𑀦 𑀆𑀭𑀼𑀴𑁆𑀳𑁄. 𑀲𑁄𑀧𑀺 𑀇𑀥 𑀬𑁂𑀯𑀸𑀧𑀦𑀓𑀯𑀲𑁂𑀦 𑀕𑀳𑀺𑀢𑁄.

𑀇𑀫𑁂𑀲𑀼 𑀧𑀦 𑀦𑀯𑀲𑀼 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄𑀯 𑀏𑀓𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀦𑀸𑀦𑀸𑀓𑁆𑀔𑀡𑁂. 𑀬𑀤𑀸 𑀳𑀺 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀫𑀺𑀘𑁆𑀙𑀸𑀯𑀸𑀘𑀁 𑀧𑀚𑀳𑀢𑀺, 𑀯𑀺𑀭𑀢𑀺𑀯𑀲𑁂𑀦 𑀲𑀫𑁆𑀫𑀸𑀯𑀸𑀘𑀁 𑀧𑀽𑀭𑁂𑀢𑀺, 𑀢𑀤𑀸 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀲𑀫𑁆𑀫𑀸𑀯𑀸𑀘𑀸 𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀏𑀓𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺. 𑀬𑀤𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀧𑀚𑀳𑀢𑀺, 𑀯𑀺𑀭𑀢𑀺𑀯𑀲𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀧𑀽𑀭𑁂𑀢𑀺…𑀧𑁂… 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀚𑀳𑀢𑀺, 𑀯𑀺𑀭𑀢𑀺𑀯𑀲𑁂𑀦 𑀲𑀫𑁆𑀫𑀸𑀆𑀚𑀻𑀯𑀁 𑀧𑀽𑀭𑁂𑀢𑀺…𑀧𑁂… 𑀬𑀤𑀸 𑀓𑀭𑀼𑀡𑀸𑀬 𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀬𑀤𑀸 𑀫𑀼𑀤𑀺𑀢𑀸𑀬 𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀤𑀸 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄 𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀏𑀓𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺. 𑀇𑀢𑁄 𑀧𑀦 𑀫𑀼𑀜𑁆𑀘𑀺𑀢𑁆𑀯𑀸, 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀲𑀻𑀮𑀁 𑀧𑀽𑀭𑁂𑀦𑁆𑀢𑀲𑁆𑀲 𑀬𑁄𑀕𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑀺 𑀅𑀧𑀡𑁆𑀡𑀓𑀗𑁆𑀕𑀸𑀦𑁂𑀯 𑀮𑀩𑁆𑀪𑀦𑁆𑀢𑀺.

𑀏𑀯𑀫𑁂𑀢𑁂𑀲𑀼 𑀦𑀯𑀲𑀼 𑀬𑁂𑀯𑀸𑀧𑀦𑀓𑀥𑀫𑁆𑀫𑁂𑀲𑀼 ‘𑀙𑀦𑁆𑀤𑁄’𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀮𑀓𑁆𑀔𑀡𑁄 𑀙𑀦𑁆𑀤𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑁂 𑀘𑀸𑀬𑀁 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀅𑀥𑀺𑀫𑀼𑀘𑁆𑀘𑀦𑀁 ‘𑀅𑀥𑀺𑀫𑁄𑀓𑁆𑀔𑁄’. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀲𑀦𑁆𑀦𑀺𑀝𑁆𑀞𑀸𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑁄. 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀓𑀺𑀭𑀺𑀬𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 ‘𑀫𑀦𑀲𑀺𑀓𑀸𑀭𑁄’. 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺𑀧𑀺 𑀫𑀦𑀲𑀺𑀓𑀸𑀭𑁄. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀯𑀻𑀣𑀺𑀧𑀝𑀺𑀧𑀸𑀤𑀓𑁄 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀫𑀦𑀲𑁆𑀫𑀺𑀁 𑀓𑀸𑀭𑁄𑀢𑀺 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲. 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸 ‘𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸’. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸; 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀆𑀚𑀸𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

‘𑀓𑀭𑀼𑀡𑀸𑀫𑀼𑀤𑀺𑀢𑀸’ 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀤𑁆𑀤𑁂𑀲𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀓𑁂𑀯𑀮𑀜𑁆𑀳𑀺 𑀢𑀸 𑀅𑀧𑁆𑀧𑀦𑀧𑁆𑀧𑀢𑁆𑀢𑀸 𑀭𑀽𑀧𑀸𑀯𑀘𑀭𑀸, 𑀇𑀥 𑀓𑀸𑀫𑀸𑀯𑀘𑀭𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 ‘𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺’. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑀸 𑀢𑀺𑀲𑁆𑀲𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸; 𑀅𑀫𑀤𑁆𑀤𑀦𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀭𑀲𑀸, 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸. 𑀧𑀸𑀧𑀓𑀺𑀭𑀺𑀬𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀔𑀻𑀪𑀸𑀯𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀇𑀢𑀺 𑀨𑀲𑁆𑀲𑀸𑀤𑀻𑀦𑀺 𑀙𑀧𑁆𑀧𑀜𑁆𑀜𑀸𑀲 𑀬𑁂𑀯𑀸𑀧𑀦𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀦𑀯𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀧𑀜𑁆𑀘𑀲𑀝𑁆𑀞𑀺 𑀥𑀫𑁆𑀫𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀢𑁂𑀲𑀼 𑀏𑀓𑀓𑁆𑀔𑀡𑁂 𑀓𑀤𑀸𑀘𑀺 𑀏𑀓𑀲𑀝𑁆𑀞𑀺 𑀪𑀯𑀦𑁆𑀢𑀺, 𑀓𑀤𑀸𑀘𑀺 𑀲𑀫𑀲𑀝𑁆𑀞𑀺. 𑀢𑀸𑀦𑀺 𑀳𑀺 𑀲𑀫𑁆𑀫𑀸𑀯𑀸𑀘𑀸𑀧𑀽𑀭𑀡𑀸𑀤𑀺𑀯𑀲𑁂𑀦. 𑀉𑀧𑁆𑀧𑀢𑁆𑀢𑀺𑀬𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀓𑀲𑀝𑁆𑀞𑀺 𑀪𑀯𑀦𑁆𑀢𑀺. 𑀢𑁂𑀳𑀺 𑀫𑀼𑀢𑁆𑀢𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀲𑀝𑁆𑀞𑀺 𑀪𑀯𑀦𑁆𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀬𑁂𑀯𑀸𑀧𑀦𑀓𑁂 𑀧𑀸𑀴𑀺𑀬𑀁 𑀬𑀣𑀸𑀭𑀼𑀢𑀯𑀲𑁂𑀦 𑀕𑀬𑁆𑀳𑀫𑀸𑀦𑀸𑀦𑀺 𑀙𑀧𑁆𑀧𑀜𑁆𑀜𑀸𑀲𑀸𑀯 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀨𑀲𑁆𑀲𑀧𑀜𑁆𑀘𑀓𑀁, 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀦𑁆𑀢𑀺 𑀤𑁆𑀯𑁂 𑀩𑀮𑀸𑀦𑀺, 𑀅𑀮𑁄𑀪𑁄 𑀅𑀤𑁄𑀲𑁄𑀢𑀺 𑀤𑁆𑀯𑁂 𑀫𑀽𑀮𑀸𑀦𑀺, 𑀓𑀸𑀬𑀧𑀲𑁆𑀲𑀤𑁆𑀥𑀺𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸𑀢𑀺 𑀲𑀫𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺.

𑀢𑁂𑀲𑀼 𑀲𑀫𑀢𑀺𑀁𑀲𑀸𑀬 𑀥𑀫𑁆𑀫𑁂𑀲𑀼 𑀅𑀝𑁆𑀞𑀸𑀭𑀲 𑀥𑀫𑁆𑀫𑀸 𑀅𑀯𑀺𑀪𑀢𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀤𑀲 𑀲𑀯𑀺𑀪𑀢𑁆𑀢𑀺𑀓𑀸. 𑀓𑀢𑀫𑁂 𑀅𑀝𑁆𑀞𑀸𑀭𑀲? 𑀨𑀲𑁆𑀲𑁄 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀘𑀸𑀭𑁄 𑀧𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸𑀢𑀺 𑀇𑀫𑁂 𑀅𑀝𑁆𑀞𑀸𑀭𑀲 𑀅𑀯𑀺𑀪𑀢𑁆𑀢𑀺𑀓𑀸. 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀁, 𑀅𑀮𑁄𑀪𑁄 𑀅𑀤𑁄𑀲𑁄𑀢𑀺 𑀇𑀫𑁂 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀲𑀯𑀺𑀪𑀢𑁆𑀢𑀺𑀓𑀸. 𑀢𑁂𑀲𑀼 𑀲𑀢𑁆𑀢 𑀥𑀫𑁆𑀫𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸, 𑀏𑀓𑁄 𑀢𑀻𑀲𑀼, 𑀤𑁆𑀯𑁂 𑀘𑀢𑀽𑀲𑀼, 𑀏𑀓𑁄 𑀙𑀲𑀼, 𑀏𑀓𑁄 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀓𑀣𑀁? 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀲𑀤𑁆𑀥𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄𑀢𑀺 𑀇𑀫𑁂 𑀲𑀢𑁆𑀢 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸.

𑀏𑀢𑁂𑀲𑀼 𑀳𑀺 𑀘𑀺𑀢𑁆𑀢𑀁 𑀢𑀸𑀯 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀯𑀺𑀢𑀓𑁆𑀓𑁄 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀯𑀺𑀢𑀓𑁆𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺. 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀩𑀮𑀸𑀦𑀺 𑀧𑀢𑁆𑀯𑀸 𑀲𑀤𑁆𑀥𑀸𑀩𑀮𑀦𑁆𑀢𑀺. 𑀳𑀺𑀭𑀻 𑀩𑀮𑀸𑀦𑀺 𑀧𑀢𑁆𑀯𑀸 𑀳𑀺𑀭𑀺𑀩𑀮𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀮𑁄𑀓𑀧𑀸𑀮𑀤𑀼𑀓𑀁 𑀧𑀢𑁆𑀯𑀸 𑀳𑀺𑀭𑀻𑀢𑀺. 𑀑𑀢𑁆𑀢𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀮𑁄𑀪𑁄 𑀫𑀽𑀮𑀁 𑀧𑀢𑁆𑀯𑀸 𑀅𑀮𑁄𑀪𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 𑀅𑀦𑀪𑀺𑀚𑁆𑀛𑀸𑀢𑀺. 𑀅𑀤𑁄𑀲𑁄 𑀫𑀽𑀮𑀁 𑀧𑀢𑁆𑀯𑀸 𑀅𑀤𑁄𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 𑀅𑀩𑁆𑀬𑀸𑀧𑀸𑀤𑁄𑀢𑀺. 𑀇𑀫𑁂 𑀲𑀢𑁆𑀢 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸.

𑀯𑁂𑀤𑀦𑀸 𑀧𑀦 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 𑀯𑁂𑀤𑀦𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀼𑀔𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀏𑀯𑀁 𑀏𑀓𑁄 𑀥𑀫𑁆𑀫𑁄 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀯𑀻𑀭𑀺𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑁄𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 𑀯𑀻𑀭𑀺𑀬𑀩𑀮𑀦𑁆𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀧𑀕𑁆𑀕𑀸𑀳𑁄𑀢𑀺. 𑀲𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀫𑁆𑀫𑀸𑀲𑀢𑀻𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 𑀲𑀢𑀺𑀩𑀮𑀦𑁆𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀲𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸. 𑀏𑀯𑀁 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸.

𑀲𑀫𑀸𑀥𑀺 𑀧𑀦 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑀸𑀥𑀻𑀢𑀺. 𑀩𑀮𑀸𑀦𑀺 𑀧𑀢𑁆𑀯𑀸 𑀲𑀫𑀸𑀥𑀺𑀩𑀮𑀦𑁆𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀲𑀫𑀣𑁄 𑀅𑀯𑀺𑀓𑁆𑀔𑁂𑀧𑁄𑀢𑀺. 𑀏𑀯𑀫𑀬𑀁 𑀏𑀓𑁄 𑀥𑀫𑁆𑀫𑁄 𑀙𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀧𑀜𑁆𑀜𑀸 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 𑀧𑀜𑁆𑀜𑀸𑀩𑀮𑀦𑁆𑀢𑀺, 𑀫𑀽𑀮𑀸𑀦𑀺 𑀧𑀢𑁆𑀯𑀸 𑀅𑀫𑁄𑀳𑁄𑀢𑀺, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀲𑀫𑁆𑀧𑀚𑀜𑁆𑀜𑀁 𑀯𑀺𑀧𑀲𑁆𑀲𑀦𑀸𑀢𑀺. 𑀏𑀯𑀁 𑀏𑀓𑁄 𑀥𑀫𑁆𑀫𑁄 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀲𑀘𑁂 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬 𑁋 ‘𑀏𑀢𑁆𑀣 𑀅𑀧𑀼𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀤𑀁 𑀧𑀽𑀭𑀺𑀢𑀁, 𑀅𑀦𑀦𑀼𑀲𑀦𑁆𑀥𑀺𑀓𑀸 𑀓𑀣𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀘𑁄𑀭𑁂𑀳𑀺 𑀆𑀪𑀢𑀪𑀡𑁆𑀟𑀲𑀤𑀺𑀲𑀸, 𑀕𑁄𑀬𑀽𑀣𑁂𑀦 𑀕𑀢𑀫𑀕𑁆𑀕𑁂 𑀆𑀮𑀼𑀮𑀺𑀢𑀢𑀺𑀡𑀲𑀤𑀺𑀲𑀸 𑀅𑀚𑀸𑀦𑀺𑀢𑁆𑀯𑀸 𑀓𑀣𑀺𑀢𑀸’𑀢𑀺, 𑀲𑁄 ‘𑀫𑀸𑀳𑁂𑀯’𑀦𑁆𑀢𑀺 𑀧𑀝𑀺𑀲𑁂𑀥𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀅𑀦𑀦𑀼𑀲𑀦𑁆𑀥𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀲𑀸𑀦𑀼𑀲𑀦𑁆𑀥𑀺𑀓𑀸 𑀯 𑀳𑁄𑀢𑀺. 𑀅𑀚𑀸𑀦𑀺𑀢𑁆𑀯𑀸 𑀓𑀣𑀺𑀢𑀸𑀧𑀺 𑀦𑀢𑁆𑀣𑀺, 𑀲𑀩𑁆𑀩𑀸 𑀚𑀸𑀦𑀺𑀢𑁆𑀯𑀸 𑀓𑀣𑀺𑀢𑀸𑀬𑁂𑀯. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀁 𑀚𑀸𑀦𑀸𑀢𑀺, 𑀢𑀁 𑀜𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑀅𑀝𑁆𑀞𑀸𑀭𑀲 𑀥𑀫𑁆𑀫𑀸 𑀏𑀓𑁂𑀓𑀓𑀺𑀘𑁆𑀘𑀸𑀢𑀺 𑀜𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺. 𑀲𑀢𑁆𑀢 𑀥𑀫𑁆𑀫𑀸 𑀤𑁆𑀯𑁂𑀤𑁆𑀯𑁂𑀓𑀺𑀘𑁆𑀘𑀸𑀢𑀺 𑀜𑀢𑁆𑀯𑀸 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺. 𑀯𑁂𑀤𑀦𑀸 𑀢𑀺𑀓𑀺𑀘𑁆𑀘𑀸𑀢𑀺 𑀜𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺. 𑀯𑀻𑀭𑀺𑀬𑀲𑀢𑀻𑀦𑀁 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀻𑀢𑀺 𑀜𑀢𑁆𑀯𑀸 𑀘𑀢𑀽𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺. 𑀲𑀫𑀸𑀥𑀺 𑀙𑀓𑀺𑀘𑁆𑀘𑁄𑀢𑀺 𑀜𑀢𑁆𑀯𑀸 𑀙𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺. 𑀧𑀜𑁆𑀜𑀸 𑀲𑀢𑁆𑀢𑀓𑀺𑀘𑁆𑀘𑀸𑀢𑀺 𑀜𑀢𑁆𑀯𑀸 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑁂𑀲𑀺’.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀁 𑁋 𑀏𑀓𑁄 𑀓𑀺𑀭 𑀧𑀡𑁆𑀟𑀺𑀢𑁄 𑀭𑀸𑀚𑀸 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘𑀇𑀫𑀁 𑀭𑀸𑀚𑀓𑀼𑀮𑀲𑀦𑁆𑀢𑀓𑀁 𑀦 𑀬𑀣𑀸 𑀯𑀸 𑀢𑀣𑀸 𑀯𑀸 𑀔𑀸𑀤𑀺𑀢𑀩𑁆𑀩𑀁, 𑀲𑀺𑀧𑁆𑀧𑀸𑀦𑀼𑀘𑁆𑀙𑀯𑀺𑀓𑀁 𑀯𑁂𑀢𑀦𑀁 𑀯𑀟𑁆𑀠𑁂𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑀩𑁆𑀩𑁂 𑀲𑀺𑀧𑁆𑀧𑀺𑀓𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘𑀏𑀓𑁂𑀓𑀲𑀺𑀧𑁆𑀧𑀚𑀸𑀦𑀦𑀓𑁂 𑀧𑀓𑁆𑀓𑁄𑀲𑀣𑀸’𑀢𑀺 𑀆𑀳. 𑀏𑀯𑀁 𑀧𑀓𑁆𑀓𑁄𑀲𑀺𑀬𑀫𑀸𑀦𑀸 𑀅𑀝𑁆𑀞𑀸𑀭𑀲 𑀚𑀦𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀲𑀁 𑀏𑀓𑁂𑀓𑀁 𑀧𑀝𑀺𑀯𑀻𑀲𑀁 𑀤𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. ‘𑀤𑁆𑀯𑁂 𑀤𑁆𑀯𑁂 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀢𑁆𑀢 𑀚𑀦𑀸 𑀆𑀕𑀫𑀁𑀲𑀼. 𑀢𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀧𑀝𑀺𑀯𑀻𑀲𑁂 𑀤𑀸𑀧𑁂𑀲𑀺. ‘𑀢𑀻𑀡𑀺 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀏𑀓𑁄𑀯 𑀆𑀕𑀘𑁆𑀙𑀺. 𑀢𑀲𑁆𑀲 𑀢𑀬𑁄 𑀧𑀝𑀺𑀯𑀻𑀲𑁂 𑀤𑀸𑀧𑁂𑀲𑀺. ‘𑀘𑀢𑁆𑀢𑀸𑀭𑀺 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀤𑁆𑀯𑁂 𑀚𑀦𑀸 𑀆𑀕𑀫𑀁𑀲𑀼. 𑀢𑁂𑀲𑀁 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀧𑀝𑀺𑀯𑀻𑀲𑁂 𑀤𑀸𑀧𑁂𑀲𑀺. ‘𑀧𑀜𑁆𑀘 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀏𑀓𑁄𑀧𑀺 𑀦𑀸𑀕𑀘𑁆𑀙𑀺. ‘𑀙 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀏𑀓𑁄𑀯 𑀆𑀕𑀘𑁆𑀙𑀺. 𑀢𑀲𑁆𑀲 𑀙 𑀧𑀝𑀺𑀯𑀻𑀲𑁂 𑀤𑀸𑀧𑁂𑀲𑀺. ‘𑀲𑀢𑁆𑀢 𑀲𑀺𑀧𑁆𑀧𑀸𑀦𑀺 𑀚𑀸𑀦𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑁂 𑀏𑀓𑁄𑀯 𑀆𑀕𑀘𑁆𑀙𑀺. 𑀢𑀲𑁆𑀲 𑀲𑀢𑁆𑀢 𑀧𑀝𑀺𑀯𑀻𑀲𑁂 𑀤𑀸𑀧𑁂𑀲𑀺.

𑀢𑀢𑁆𑀣 𑀧𑀡𑁆𑀟𑀺𑀢𑁄 𑀭𑀸𑀚𑀸 𑀯𑀺𑀬 𑀅𑀦𑀼𑀢𑁆𑀢𑀭𑁄 𑀥𑀫𑁆𑀫𑀭𑀸𑀚𑀸. 𑀲𑀺𑀧𑁆𑀧𑀚𑀸𑀦𑀦𑀓𑀸 𑀯𑀺𑀬 𑀘𑀺𑀢𑁆𑀢𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸. 𑀲𑀺𑀧𑁆𑀧𑀸𑀦𑀼𑀘𑁆𑀙𑀯𑀺𑀓𑀯𑁂𑀢𑀦𑀯𑀟𑁆𑀠𑀦𑀁 𑀯𑀺𑀬 𑀓𑀺𑀘𑁆𑀘𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀪𑀢𑁆𑀢𑀺𑀆𑀭𑁄𑀧𑀦𑀁.

𑀲𑀩𑁆𑀩𑁂𑀧𑀺 𑀧𑀦𑁂𑀢𑁂 𑀥𑀫𑁆𑀫𑀸 𑀨𑀲𑁆𑀲𑀧𑀜𑁆𑀘𑀓𑀯𑀲𑁂𑀦 𑀛𑀸𑀦𑀗𑁆𑀕𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀫𑀕𑁆𑀕𑀯𑀲𑁂𑀦 𑀩𑀮𑀯𑀲𑁂𑀦 𑀫𑀽𑀮𑀯𑀲𑁂𑀦 𑀓𑀫𑁆𑀫𑀧𑀣𑀯𑀲𑁂𑀦 𑀮𑁄𑀓𑀧𑀸𑀮𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀮𑀳𑀼𑀢𑀸𑀯𑀲𑁂𑀦 𑀫𑀼𑀤𑀼𑀢𑀸𑀯𑀲𑁂𑀦 𑀓𑀫𑁆𑀫𑀜𑁆𑀜𑀢𑀸𑀯𑀲𑁂𑀦 𑀧𑀸𑀕𑀼𑀜𑁆𑀜𑀢𑀸𑀯𑀲𑁂𑀦 𑀉𑀚𑀼𑀓𑀢𑀸𑀯𑀲𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀕𑁆𑀕𑀸𑀳𑀸𑀯𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀲𑀢𑁆𑀢𑀭𑀲 𑀭𑀸𑀲𑀬𑁄 𑀳𑁄𑀦𑁆𑀢𑀻𑀢𑀺.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸

𑁨. 𑀇𑀤𑀸𑀦𑀺 𑀢𑀸𑀦𑁂𑀯 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀧𑀸𑀴𑀺𑀆𑀭𑀼𑀴𑁆𑀳𑀸𑀦𑀺 𑀙𑀧𑁆𑀧𑀜𑁆𑀜𑀸𑀲 𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄.

𑀢𑀢𑁆𑀣 𑀧𑀼𑀘𑁆𑀙𑀸𑀬 𑀢𑀸𑀯 𑀅𑀬𑀫𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀢𑀺𑀳𑁂𑀢𑀼𑀓𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀓𑀢𑀫𑁄 𑀲𑁄 𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑁄 𑀨𑀼𑀲𑀦𑀓𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀨𑀲𑁆𑀲𑁄, 𑀲𑁄 𑀨𑀲𑁆𑀲𑁄𑀢𑀺. 𑀇𑀤𑀁 𑀨𑀲𑁆𑀲𑀲𑁆𑀲 𑀲𑀪𑀸𑀯𑀤𑀻𑀧𑀦𑀢𑁄 𑀲𑀪𑀸𑀯𑀧𑀤𑀁 𑀦𑀸𑀫. 𑀨𑀼𑀲𑀦𑀸𑀢𑀺 𑀨𑀼𑀲𑀦𑀸𑀓𑀸𑀭𑁄. 𑀲𑀫𑁆𑀨𑀼𑀲𑀦𑀸𑀢𑀺 𑀨𑀼𑀲𑀦𑀸𑀓𑀸𑀭𑁄𑀯 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀲𑀫𑁆𑀨𑀼𑀲𑀺𑀢𑀢𑁆𑀢𑀦𑁆𑀢𑀺 𑀲𑀫𑁆𑀨𑀼𑀲𑀺𑀢𑀪𑀸𑀯𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀼𑀲𑀦𑀓𑀯𑀲𑁂𑀦 𑀨𑀲𑁆𑀲𑁄, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀼𑀲𑀦𑀸, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀨𑀼𑀲𑀦𑀸, 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀨𑀼𑀲𑀺𑀢𑀢𑁆𑀢𑀁; 𑀅𑀣 𑀯𑀸, 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀼𑀲𑀦𑀯𑀲𑁂𑀦 𑀨𑀲𑁆𑀲𑁄, 𑀅𑀜𑁆𑀜𑁂𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀫𑁆𑀨𑀼𑀲𑀺𑀢𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻𑀢𑀺. 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀦𑀺𑀤𑁆𑀤𑁂𑀲𑁂𑀲𑀼 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀁 𑀧𑀦𑁂𑀢𑁆𑀣 𑀲𑀩𑁆𑀩𑀲𑀸𑀥𑀸𑀭𑀡𑁄 𑀯𑀺𑀪𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄. 𑀬𑀸𑀦𑀺𑀫𑀸𑀦𑀺 𑀪𑀕𑀯𑀢𑀸 𑀧𑀞𑀫𑀁 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀫𑀳𑀸𑀘𑀺𑀢𑁆𑀢𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀧𑀤𑀸𑀦𑀺 𑀫𑀸𑀢𑀺𑀓𑀸𑀯𑀲𑁂𑀦 𑀞𑀧𑁂𑀢𑁆𑀯𑀸 𑀧𑀼𑀦 𑀏𑀓𑁂𑀓𑀧𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀢𑁆𑀢𑀺𑀁 𑀆𑀭𑁄𑀧𑀺𑀢𑀸𑀦𑀺, 𑀢𑀸𑀦𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀸𑀦𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺; 𑀦𑀸𑀦𑀸 𑀳𑁄𑀦𑁆𑀢𑀸𑀦𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀦𑀸 𑀪𑀯𑀦𑁆𑀢𑀺. 𑀅𑀧𑀭𑀤𑀻𑀧𑀦𑀸 𑀧𑀦𑁂𑀢𑁆𑀣 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀓𑀣𑀁? 𑀏𑀢𑀸𑀦𑀺𑀳𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀦𑁆𑀢𑀺 𑀏𑀯𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀳𑀺 𑀏𑀓𑁄𑀯 𑀓𑁄𑀥𑁄 𑀩𑁆𑀬𑀜𑁆𑀚𑀦𑀯𑀲𑁂𑀦 𑀏𑀯𑀁 𑀯𑀺𑀪𑀢𑁆𑀢𑀺𑀁 𑀕𑀢𑁄. 𑀘𑀸𑀭𑁄 𑀯𑀺𑀘𑀸𑀭𑁄 𑀅𑀦𑀼𑀯𑀺𑀘𑀸𑀭𑁄 𑀉𑀧𑀯𑀺𑀘𑀸𑀭𑁄𑀢𑀺 𑀏𑀯𑀁 𑀧𑀦 𑀉𑀧𑀲𑀕𑁆𑀕𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸𑀢𑀺 𑀏𑀯𑀁 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑁂 𑀢𑀸𑀯 𑀇𑀫𑀸 𑀢𑀺𑀲𑁆𑀲𑁄𑀧𑀺 𑀯𑀺𑀪𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺. ‘𑀨𑀲𑁆𑀲𑁄 𑀨𑀼𑀲𑀦𑀸’𑀢𑀺 𑀳𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀺𑀪𑀢𑁆𑀢𑀺𑀕𑀫𑀦𑀁 𑀳𑁄𑀢𑀺. ‘𑀲𑀫𑁆𑀨𑀼𑀲𑀦𑀸’𑀢𑀺 𑀉𑀧𑀲𑀕𑁆𑀕𑀯𑀲𑁂𑀦. ‘𑀲𑀫𑁆𑀨𑀼𑀲𑀺𑀢𑀢𑁆𑀢’𑀦𑁆𑀢𑀺 𑀅𑀢𑁆𑀣𑀯𑀲𑁂𑀦. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀯𑀺𑀪𑀢𑁆𑀢𑀺𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀦𑀸 𑀳𑁄𑀦𑁆𑀢𑀸𑀦𑀺𑀧𑀺 𑀧𑀦 𑀦𑀸𑀫𑀦𑀸𑀦𑀢𑁆𑀢𑁂𑀦 𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀦𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁄𑀲𑁄 𑀤𑀼𑀲𑁆𑀲𑀦𑀸𑀢𑀺 (𑀥. 𑀲. 𑁪𑁧𑁯) 𑀏𑀢𑁆𑀣 𑀩𑁆𑀬𑀸𑀧𑀸𑀤𑁄𑀢𑀺 𑀯𑀸, 𑀤𑁄𑀲𑁄𑀢𑀺 𑀯𑀸, 𑀤𑁆𑀯𑁂𑀧𑀺 𑀏𑀢𑁂 𑀓𑁄𑀥𑁄 𑀏𑀯, 𑀦𑀸𑀫𑁂𑀦 𑀦𑀸𑀦𑀢𑁆𑀢𑀁 𑀕𑀢𑀸𑀢𑀺. 𑀏𑀯𑀁 ‘𑀦𑀸𑀫𑀦𑀸𑀦𑀢𑁆𑀢𑁂𑀦’ 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀲𑀝𑁆𑀞𑁂𑀦 𑀘 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀏𑀓𑁄𑀯 𑀔𑀦𑁆𑀥𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀏𑀯𑀁 ‘𑀮𑀓𑁆𑀔𑀡𑀦𑀸𑀦𑀢𑁆𑀢𑁂𑀦’ 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑁋 ‘‘𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬…𑀧𑁂… 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀻’’𑀢𑀺 (𑀯𑀺𑀪. 𑁩𑁯𑁦; 𑀤𑀻. 𑀦𑀺. 𑁨.𑁪𑁦𑁨) 𑀏𑀓𑀫𑁂𑀯 𑀯𑀻𑀭𑀺𑀬𑀁 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀆𑀕𑀢𑀁. 𑀏𑀯𑀁 ‘𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦’ 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀢𑁆𑀢𑀸𑀭𑁄 𑀅𑀲𑀤𑁆𑀥𑀫𑁆𑀫𑀸 𑁋 𑀓𑁄𑀥𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀫𑀓𑁆𑀔𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀮𑀸𑀪𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸, 𑀲𑀓𑁆𑀓𑀸𑀭𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀢𑀺, 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁪𑁪) 𑀧𑀦 ‘𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦’ 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀦𑀸𑀦𑀢𑁆𑀢𑀸𑀦𑀺 𑀦 𑀨𑀲𑁆𑀲𑁂𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀲𑀩𑁆𑀩𑁂𑀲𑀼𑀧𑀺 𑀨𑀲𑁆𑀲𑀧𑀜𑁆𑀘𑀓𑀸𑀤𑀻𑀲𑀼 𑀮𑀩𑁆𑀪𑀦𑁆𑀢𑀺. 𑀨𑀲𑁆𑀲𑀲𑁆𑀲 𑀳𑀺 𑀨𑀲𑁆𑀲𑁄𑀢𑀺 𑀦𑀸𑀫𑀁…𑀧𑁂… 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺. 𑀨𑀲𑁆𑀲𑁄 𑀘 𑀨𑀼𑀲𑀦𑀮𑀓𑁆𑀔𑀡𑁄, 𑀯𑁂𑀤𑀦𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁. 𑀢𑀣𑀸 𑀨𑀲𑁆𑀲𑁄 𑀨𑀼𑀲𑀦𑀓𑀺𑀘𑁆𑀘𑁄, 𑀯𑁂𑀤𑀦𑀸 𑀅𑀦𑀼𑀪𑀯𑀦𑀓𑀺𑀘𑁆𑀘𑀸, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀸, 𑀘𑁂𑀢𑀦𑀸 𑀘𑁂𑀢𑀬𑀺𑀢𑀓𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀓𑀺𑀘𑁆𑀘𑀦𑁆𑀢𑀺. 𑀏𑀯𑀁 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑀁 𑀨𑀲𑁆𑀲𑀧𑀜𑁆𑀘𑀫𑀓𑁂 𑀦𑀢𑁆𑀣𑀺. 𑀅𑀮𑁄𑀪𑀸𑀤𑀺𑀦𑀺𑀤𑁆𑀤𑁂𑀲𑁂 𑀧𑀦 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀩𑁆𑀪𑀢𑀻𑀢𑀺 𑀏𑀯𑀁 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀩𑁆𑀩𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀮𑀩𑁆𑀪𑀫𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀤𑀻𑀧𑀦𑀸 𑀧𑀦 𑀧𑀤𑀢𑁆𑀣𑀼𑀢𑀺 𑀯𑀸 𑀳𑁄𑀢𑀺 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸𑀢𑀺 𑀏𑀯𑀁 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁂𑀦 𑀯𑀺𑀬 𑀳𑀺 𑀲𑀓𑀺𑀫𑁂𑀯 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑁂 𑀏𑀢𑀁 𑀧𑀤𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀦𑀸𑀫 𑀦 𑀳𑁄𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 ‘𑀨𑀲𑁆𑀲𑁄 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀫𑁆𑀨𑀼𑀲𑀺𑀢𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑁂 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀣𑀸 𑀳𑀺 𑀤𑀳𑀭𑀓𑀼𑀫𑀸𑀭𑀁 𑀦𑁆𑀳𑀸𑀧𑁂𑀢𑁆𑀯𑀸, 𑀫𑀦𑁄𑀭𑀫𑀁 𑀯𑀢𑁆𑀣𑀁 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀢𑁆𑀯𑀸 𑀅𑀣𑀲𑁆𑀲 𑀦𑀮𑀸𑀝𑁂 𑀏𑀓𑀫𑁂𑀯 𑀫𑀦𑁄𑀲𑀺𑀮𑀸𑀩𑀺𑀦𑁆𑀤𑀼𑀁 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀲 𑀦 𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀢𑀺𑀮𑀓𑁄 𑀦𑀸𑀫 𑀳𑁄𑀢𑀺. 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀩𑀺𑀦𑁆𑀤𑀽𑀲𑀼 𑀓𑀢𑁂𑀲𑀼 𑀘𑀺𑀢𑁆𑀢𑀢𑀺𑀮𑀓𑁄 𑀦𑀸𑀫 𑀳𑁄𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 ‘𑀧𑀤𑀢𑁆𑀣𑀼𑀢𑀺’ 𑀦𑀸𑀫.

𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 𑀘 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑀫𑁂𑀯 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫. 𑀬𑀣𑀸 𑀳𑀺 ‘𑀆𑀯𑀼𑀲𑁄’𑀢𑀺 𑀯𑀸 ‘𑀪𑀦𑁆𑀢𑁂’𑀢𑀺 𑀯𑀸 ‘𑀬𑀓𑁆𑀔𑁄’𑀢𑀺 𑀯𑀸 ‘𑀲𑀧𑁆𑀧𑁄’𑀢𑀺 𑀯𑀸 𑀯𑀼𑀢𑁆𑀢𑁂 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. ‘𑀆𑀯𑀼𑀲𑁄 𑀆𑀯𑀼𑀲𑁄’‘𑀪𑀦𑁆𑀢𑁂 𑀪𑀦𑁆𑀢𑁂’‘𑀬𑀓𑁆𑀔𑁄 𑀬𑀓𑁆𑀔𑁄’‘𑀲𑀧𑁆𑀧𑁄 𑀲𑀧𑁆𑀧𑁄’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀏𑀯𑀫𑁂𑀯 𑀲𑀓𑀺𑀤𑁂𑀯 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁂𑀦 𑀯𑀺𑀬 ‘𑀨𑀲𑁆𑀲𑁄’𑀢𑀺 𑀯𑀼𑀢𑁆𑀢𑁂 𑀧𑀤𑀁 𑀤𑀴𑁆𑀳𑀻𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 ‘𑀨𑀲𑁆𑀲𑁄 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀫𑁆𑀨𑀼𑀲𑀺𑀢𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 ‘𑀤𑀴𑁆𑀳𑀻𑀓𑀫𑁆𑀫𑀁’ 𑀦𑀸𑀫 𑀳𑁄𑀢𑀻𑀢𑀺. 𑀏𑀯𑀁 𑀅𑀧𑀭𑀤𑀻𑀧𑀦𑀸 𑀤𑁆𑀯𑁂 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀏𑀢𑀲𑁆𑀲𑀸𑀧𑀺 𑀯𑀲𑁂𑀦 𑀮𑀩𑁆𑀪𑀫𑀸𑀦𑀓𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀧𑀞𑀫𑀁 𑀓𑀸𑀫𑀸𑀯𑀘𑀭𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀬𑀁 𑀨𑀲𑁆𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑀲𑁆𑀲 𑀯𑀡𑁆𑀡𑀦𑀸. 𑀇𑀢𑁄 𑀧𑀭𑁂𑀲𑀼 𑀧𑀦 𑀯𑁂𑀤𑀦𑀸𑀤𑀻𑀦𑀁 𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁂𑀲𑀼 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑁂𑀲𑀁 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩. 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀻𑀢𑀺 𑀆𑀭𑀤𑁆𑀥𑀁, ‘𑀲𑀸𑀢𑀧𑀤𑀯𑀲𑁂𑀦 𑀧𑀦 ‘𑀬’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀦𑁆𑀢𑀺 𑀏𑀢𑁆𑀣 ‘𑀢𑀚𑁆𑀚𑀸’ 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀲𑀸𑀢𑀲𑀼𑀔𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀲𑀸𑀭𑀼𑀧𑁆𑀧𑀸. 𑀅𑀦𑀼𑀘𑁆𑀙𑀯𑀺𑀓𑀢𑁆𑀣𑁄𑀧𑀺 𑀳𑀺 𑀅𑀬𑀁 ‘𑀢𑀚𑁆𑀚𑀸’-𑀲𑀤𑁆𑀤𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀁 𑀓𑀣𑀁 𑀫𑀦𑁆𑀢𑁂𑀢𑀻’’𑀢𑀺 (𑀫. 𑀦𑀺. 𑁩.𑁨𑁪𑁬). 𑀢𑁂𑀳𑀺 𑀯𑀸 𑀭𑀽𑀧𑀸𑀤𑀻𑀳𑀺 𑀆𑀭𑀫𑁆𑀫𑀡𑁂𑀳𑀺 𑀇𑀫𑀲𑁆𑀲 𑀘 𑀲𑀼𑀔𑀲𑁆𑀲 𑀧𑀘𑁆𑀘𑀬𑁂𑀳𑀺 𑀚𑀸𑀢𑀸𑀢𑀺𑀧𑀺 𑀢𑀚𑁆𑀚𑀸. 𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀸𑀢𑀽𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀁, 𑀲𑀫𑁆𑀨𑀲𑁆𑀲𑁂 𑀯𑀸 𑀚𑀸𑀢𑀦𑁆𑀢𑀺 𑀲𑀫𑁆𑀨𑀲𑁆𑀲𑀚𑀁. 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀘𑁂𑀢𑀲𑀺𑀓𑀁. 𑀫𑀥𑀼𑀭𑀝𑁆𑀞𑁂𑀦 𑀲𑀸𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀢𑀚𑁆𑀚𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀲𑀸𑀢𑀁, 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀻𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀘𑁂𑀢𑀲𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀘𑁂𑀢𑀲𑀺𑀓𑀧𑀤𑁂𑀦 𑀓𑀸𑀬𑀺𑀓𑀲𑀼𑀔𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀼𑀔𑀧𑀤𑁂𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁. 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀦𑁆𑀢𑀺 𑀘𑀺𑀢𑁆𑀢𑀲𑀫𑁆𑀨𑀲𑁆𑀲𑁂 𑀚𑀸𑀢𑀁. 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀦𑁆𑀢𑀺 𑀲𑀸𑀢𑀁 𑀯𑁂𑀤𑀬𑀺𑀢𑀁, 𑀦 𑀅𑀲𑀸𑀢𑀁 𑀯𑁂𑀤𑀬𑀺𑀢𑀁; 𑀲𑀼𑀔𑀁 𑀯𑁂𑀤𑀬𑀺𑀢𑀁, 𑀦 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁. 𑀧𑀭𑀢𑁄 𑀢𑀻𑀡𑀺 𑀧𑀤𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀸𑀢𑀸 𑀯𑁂𑀤𑀦𑀸, 𑀦 𑀅𑀲𑀸𑀢𑀸; 𑀲𑀼𑀔𑀸 𑀯𑁂𑀤𑀦𑀸, 𑀦 𑀤𑀼𑀓𑁆𑀔𑀸𑀢𑀺. 𑀅𑀬𑀫𑁂𑀯 𑀧𑀦𑁂𑀢𑁆𑀣 𑀅𑀢𑁆𑀣𑁄.

𑁪. 𑀲𑀜𑁆𑀜𑀸𑀦𑀺𑀤𑁆𑀤𑁂𑀲𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸𑀢𑀺 𑀢𑀲𑁆𑀲𑀸𑀓𑀼𑀲𑀮𑀲𑀜𑁆𑀜𑀸𑀬 𑀅𑀦𑀼𑀘𑁆𑀙𑀯𑀺𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀨𑀲𑁆𑀲𑀫𑁆𑀳𑀺 𑀚𑀸𑀢𑀸. 𑀲𑀜𑁆𑀜𑀸𑀢𑀺 𑀲𑀪𑀸𑀯𑀦𑀸𑀫𑀁. 𑀲𑀜𑁆𑀚𑀸𑀦𑀦𑀸𑀢𑀺 𑀲𑀜𑁆𑀚𑀸𑀦𑀦𑀸𑀓𑀸𑀭𑁄. 𑀲𑀜𑁆𑀚𑀸𑀦𑀺𑀢𑀢𑁆𑀢𑀦𑁆𑀢𑀺 𑀲𑀜𑁆𑀚𑀸𑀦𑀺𑀢𑀪𑀸𑀯𑁄.

𑁫. 𑀘𑁂𑀢𑀦𑀸𑀦𑀺𑀤𑁆𑀤𑁂𑀲𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁. 𑀆𑀭𑀫𑁆𑀫𑀡𑀁 𑀫𑀺𑀦𑀫𑀸𑀦𑀁 𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀫𑀸𑀦𑀲𑀦𑁆𑀢𑀺 𑀫𑀦𑁄 𑀏𑀯. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩) 𑀳𑀺 𑀏𑀢𑁆𑀣 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑁄 ‘𑀫𑀸𑀦𑀲𑁄’𑀢𑀺 𑀯𑀼𑀢𑁆𑀢𑁄.

‘‘𑀓𑀣𑀜𑁆𑀳𑀺 𑀪𑀕𑀯𑀸 𑀢𑀼𑀬𑁆𑀳𑀁, 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄;

𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀓𑁆𑀔𑁄, 𑀓𑀸𑀮𑀁 𑀓𑀬𑀺𑀭𑀸 𑀚𑀦𑁂 𑀲𑀼𑀢𑀸’’𑀢𑀺. (𑀲𑀁. 𑀦𑀺. 𑁧.𑁧𑁫𑁯);

𑀏𑀢𑁆𑀣 𑀅𑀭𑀳𑀢𑁆𑀢𑀁 ‘𑀫𑀸𑀦𑀲’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 ‘𑀫𑀦𑁄𑀯’ 𑀫𑀸𑀦𑀲𑀁. 𑀩𑁆𑀬𑀜𑁆𑀚𑀦𑀯𑀲𑁂𑀦 𑀳𑁂𑀢𑀁 𑀧𑀤𑀁 𑀯𑀟𑁆𑀠𑀺𑀢𑀁.

𑀳𑀤𑀬𑀦𑁆𑀢𑀺 𑀘𑀺𑀢𑁆𑀢𑀁. ‘‘𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁭; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢) 𑀏𑀢𑁆𑀣 𑀉𑀭𑁄 𑀳𑀤𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬 𑀢𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁬𑁩) 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀯𑀓𑁆𑀓𑀁 𑀳𑀤𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦) 𑀏𑀢𑁆𑀣 𑀳𑀤𑀬𑀯𑀢𑁆𑀣𑀼. 𑀇𑀥 𑀧𑀦 𑀘𑀺𑀢𑁆𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 ‘𑀳𑀤𑀬’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀧𑀡𑁆𑀟𑀭𑀁. 𑀪𑀯𑀗𑁆𑀕𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀣𑀸𑀳 𑁋 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁪𑁯). 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀅𑀓𑀼𑀲𑀮𑀫𑁆𑀧𑀺, 𑀕𑀗𑁆𑀕𑀸𑀬 𑀦𑀺𑀓𑁆𑀔𑀦𑁆𑀢𑀸 𑀦𑀤𑀻 𑀕𑀗𑁆𑀕𑀸 𑀯𑀺𑀬, 𑀕𑁄𑀥𑀸𑀯𑀭𑀺𑀢𑁄 𑀦𑀺𑀓𑁆𑀔𑀦𑁆𑀢𑀸 𑀕𑁄𑀥𑀸𑀯𑀭𑀻 𑀯𑀺𑀬 𑀘, 𑀧𑀡𑁆𑀟𑀭𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁.

𑀫𑀦𑁄 𑀫𑀦𑀸𑀬𑀢𑀦𑀦𑁆𑀢𑀺 𑀇𑀥 𑀧𑀦 𑀫𑀦𑁄𑀕𑁆𑀕𑀳𑀡𑀁 𑀫𑀦𑀲𑁆𑀲𑁂𑀯 𑀆𑀬𑀢𑀦𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 ‘𑀦𑀬𑀺𑀤𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀫𑀦𑀲𑁆𑀲 𑀆𑀬𑀢𑀦𑀢𑁆𑀢𑀸 𑀫𑀦𑀸𑀬𑀢𑀦𑀁, 𑀅𑀣 𑀔𑁄 𑀫𑀦𑁄 𑀏𑀯 𑀆𑀬𑀢𑀦𑀁 𑀫𑀦𑀸𑀬𑀢𑀦’𑀦𑁆𑀢𑀺. 𑀢𑀢𑁆𑀣 𑀦𑀺𑀯𑀸𑀲𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁫𑁮) 𑀓𑀸𑀭𑀡𑀁. 𑀇𑀥 𑀧𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀲𑀫𑁄𑀲𑀭𑀡𑀞𑀸𑀦𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀢𑀺𑀥𑀸𑀧𑀺 𑀯𑀝𑁆𑀝𑀢𑀺.

𑀨𑀲𑁆𑀲𑀸𑀤𑀬𑁄 𑀳𑀺 𑀥𑀫𑁆𑀫𑀸 𑀏𑀢𑁆𑀣 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦𑀧𑀺 𑀏𑀢𑀁 𑀆𑀬𑀢𑀦𑀁. 𑀩𑀳𑀺𑀤𑁆𑀥𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀢𑁆𑀣 𑀑𑀲𑀭𑀦𑁆𑀢𑀻𑀢𑀺 𑀲𑀫𑁄𑀲𑀭𑀡𑀞𑀸𑀦𑀝𑁆𑀞𑁂𑀦𑀧𑀺 𑀆𑀬𑀢𑀦𑀁. 𑀨𑀲𑁆𑀲𑀸𑀤𑀻𑀦𑀁 𑀧𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀢𑁆𑀢𑀸 𑀓𑀸𑀭𑀡𑀝𑁆𑀞𑁂𑀦𑀧𑀺 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀫𑁂𑀯 𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀢𑀲𑁆𑀲 𑀭𑀸𑀲𑀺𑀆𑀤𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 (𑀅. 𑀦𑀺. 𑁪.𑁫𑁧). 𑀏𑀢𑁆𑀣 𑀳𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁄 𑀯𑀼𑀢𑁆𑀢𑁄. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀕𑀼𑀡𑀝𑁆𑀞𑁂𑀦. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧) 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀝𑁆𑀞𑁂𑀦. 𑀇𑀥 𑀧𑀦 𑀭𑀼𑀴𑁆𑀳𑀺𑀢𑁄 𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀭𑀸𑀲𑀝𑁆𑀞𑁂𑀦 𑀳𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑁄 𑀏𑀓𑀁 𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀏𑀓𑀤𑁂𑀲𑀁 𑀙𑀺𑀦𑁆𑀤𑀦𑁆𑀢𑁄 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑀪𑀽𑀢𑀁 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀭𑀼𑀴𑁆𑀳𑀺𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀯𑀼𑀢𑁆𑀢𑀁.

𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀤𑁂 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀫𑀺𑀦𑀦𑀝𑁆𑀞𑁂𑀦 𑀫𑀦𑁄, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁, 𑀲𑀪𑀸𑀯𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀯𑀸 𑀥𑀸𑀢𑀽𑀢𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀨𑀲𑁆𑀲𑀧𑀜𑁆𑀘𑀫𑀓𑁂 𑀨𑀲𑁆𑀲𑁄 𑀢𑀸𑀯 𑀬𑀲𑁆𑀫𑀸 𑀨𑀲𑁆𑀲𑁄 𑀏𑀯, 𑀦 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑁄, 𑀘𑀺𑀢𑁆𑀢𑀜𑁆𑀘 𑀬𑀲𑁆𑀫𑀸 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀯, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 ‘𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸’𑀢𑀺 𑀧𑀜𑁆𑀜𑀢𑁆𑀢𑀺 𑀦 𑀆𑀭𑁄𑀧𑀺𑀢𑀸. 𑀯𑀺𑀢𑀓𑁆𑀓𑀧𑀤𑀸𑀤𑀻𑀲𑀼 𑀧𑀦 𑀮𑀩𑁆𑀪𑀫𑀸𑀦𑀸𑀧𑀺 𑀇𑀥 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀦 𑀉𑀤𑁆𑀥𑀝𑀸.

𑀇𑀫𑁂𑀲𑀜𑁆𑀘 𑀧𑀦 𑀨𑀲𑁆𑀲𑀧𑀜𑁆𑀘𑀫𑀓𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀫𑀸𑀦𑁂𑀦 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢𑀁. 𑀦𑀸𑀦𑀸𑀉𑀤𑀓𑀸𑀦𑀜𑁆𑀳𑀺 𑀦𑀸𑀦𑀸𑀢𑁂𑀮𑀸𑀦𑀁 𑀯𑀸 𑀏𑀓𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀯𑀲𑀁 𑀦𑀺𑀫𑁆𑀫𑀣𑀺𑀢𑀸𑀦𑀁 𑀯𑀡𑁆𑀡 𑀕𑀦𑁆𑀥𑀭𑀲𑀸𑀦𑀁 𑀦𑀸𑀦𑀢𑀸𑀬 𑀤𑀺𑀲𑁆𑀯𑀸 𑀯𑀸 𑀖𑀸𑀬𑀺𑀢𑁆𑀯𑀸 𑀯𑀸 𑀲𑀸𑀬𑀺𑀢𑁆𑀯𑀸 𑀯𑀸 𑀦𑀸𑀦𑀸𑀓𑀭𑀡𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀜𑀸𑀢𑀼𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀤𑀼𑀓𑁆𑀓𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀫𑀸𑀦𑁂𑀦 𑀅𑀢𑀺𑀤𑀼𑀓𑁆𑀓𑀭𑀁 𑀓𑀢𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑁋

‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀦𑁆𑀢𑀺. ‘𑀓𑀺𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢’𑀦𑁆𑀢𑀺. ‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁, 𑀬𑀁 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁 𑁋 𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’𑀦𑁆𑀢𑀺. ‘𑀑𑀧𑀫𑁆𑀫𑀁, 𑀪𑀦𑁆𑀢𑁂, 𑀓𑀭𑁄𑀳𑀻’𑀢𑀺. ‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀢𑁆𑀣𑀧𑀼𑀝𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑁆𑀯𑀸 𑀚𑀸𑀦𑁂𑀬𑁆𑀬 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀧𑀼𑀭𑀺𑀲𑁄 𑁋 𑀇𑀤𑀁 𑀕𑀗𑁆𑀕𑀸𑀬 𑀉𑀤𑀓𑀁, 𑀇𑀤𑀁 𑀬𑀫𑀼𑀦𑀸𑀬 𑀉𑀤𑀓𑀁, 𑀇𑀤𑀁 𑀅𑀘𑀺𑀭𑀯𑀢𑀺𑀬𑀸 𑀉𑀤𑀓𑀁, 𑀇𑀤𑀁 𑀲𑀭𑀪𑀼𑀬𑀸 𑀉𑀤𑀓𑀁, 𑀇𑀤𑀁 𑀫𑀳𑀺𑀬𑀸 𑀉𑀤𑀓’𑀦𑁆𑀢𑀺? ‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀚𑀸𑀦𑀺𑀢𑀼’𑀦𑁆𑀢𑀺. ‘𑀢𑀢𑁄 𑀤𑀼𑀓𑁆𑀓𑀭𑀢𑀭𑀁 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁 𑀬𑀁 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀇𑀤𑀁 𑀘𑀺𑀢𑁆𑀢’’’𑀦𑁆𑀢𑀺 (𑀫𑀺. 𑀧. 𑁨.𑁭.𑁧𑁬).

𑁭. 𑀯𑀺𑀢𑀓𑁆𑀓𑀦𑀺𑀤𑁆𑀤𑁂𑀲𑁂 𑀢𑀓𑁆𑀓𑀦𑀯𑀲𑁂𑀦 𑀢𑀓𑁆𑀓𑁄. 𑀢𑀲𑁆𑀲 𑀢𑀺𑀢𑁆𑀢𑀓𑀁 𑀢𑀓𑁆𑀓𑁂𑀲𑀺 𑀓𑀼𑀫𑁆𑀪𑀁 𑀢𑀓𑁆𑀓𑁂𑀲𑀺 𑀲𑀓𑀝𑀁 𑀢𑀓𑁆𑀓𑁂𑀲𑀺 𑀬𑁄𑀚𑀦𑀁 𑀢𑀓𑁆𑀓𑁂𑀲𑀺 𑀅𑀤𑁆𑀥𑀬𑁄𑀚𑀦𑀁 𑀢𑀓𑁆𑀓𑁂𑀲𑀻𑀢𑀺 𑀏𑀯𑀁 𑀢𑀓𑁆𑀓𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀁 𑀢𑀓𑁆𑀓𑀲𑁆𑀲 𑀲𑀪𑀸𑀯𑀧𑀤𑀁. 𑀯𑀺𑀢𑀓𑁆𑀓𑀦𑀯𑀲𑁂𑀦 𑀯𑀺𑀢𑀓𑁆𑀓𑁄. 𑀩𑀮𑀯𑀢𑀭𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀼𑀝𑁆𑀞𑀼 𑀓𑀧𑁆𑀧𑀦𑀯𑀲𑁂𑀦 𑀲𑀗𑁆𑀓𑀧𑁆𑀧𑁄. 𑀏𑀓𑀕𑁆𑀕𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀅𑀧𑁆𑀧𑁂𑀢𑀻𑀢𑀺 𑀅𑀧𑁆𑀧𑀦𑀸. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀩𑀮𑀯𑀢𑀭𑀸 𑀯𑀸 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸. 𑀬𑀸𑀣𑀸𑀯𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀘 𑀓𑀼𑀲𑀮𑀪𑀸𑀯𑀧𑁆𑀧𑀢𑁆𑀢𑁄 𑀧𑀲𑀢𑁆𑀣𑁄 𑀲𑀗𑁆𑀓𑀧𑁆𑀧𑁄𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄.

𑁮. 𑀯𑀺𑀘𑀸𑀭𑀦𑀺𑀤𑁆𑀤𑁂𑀲𑁂 𑀆𑀭𑀫𑁆𑀫𑀡𑁂 𑀘𑀭𑀡𑀓𑀯𑀲𑁂𑀦 𑀘𑀸𑀭𑁄. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀯𑀺𑀘𑀭𑀡𑀯𑀲𑁂𑀦 𑀯𑀺𑀘𑀸𑀭𑁄. 𑀅𑀦𑀼𑀕𑀦𑁆𑀢𑁆𑀯𑀸 𑀯𑀺𑀘𑀭𑀡𑀯𑀲𑁂𑀦 𑀅𑀦𑀼𑀯𑀺𑀘𑀸𑀭𑁄. 𑀉𑀧𑀕𑀦𑁆𑀢𑁆𑀯𑀸 𑀯𑀺𑀘𑀭𑀡𑀯𑀲𑁂𑀦 𑀉𑀧𑀯𑀺𑀘𑀸𑀭𑁄𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀸𑀦𑀺 𑀯𑀟𑁆𑀠𑀺𑀢𑀸𑀦𑀺. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁, 𑀲𑀭𑀁 𑀯𑀺𑀬 𑀚𑀺𑀬𑀸𑀬, 𑀅𑀦𑀼𑀲𑀦𑁆𑀤𑀳𑀺𑀢𑁆𑀯𑀸 𑀞𑀧𑀦𑀢𑁄 𑀘𑀺𑀢𑁆𑀢𑀲𑁆𑀲 𑀅𑀦𑀼𑀲𑀦𑁆𑀥𑀸𑀦𑀢𑀸. 𑀆𑀭𑀫𑁆𑀫𑀡𑀁 𑀅𑀦𑀼𑀧𑁂𑀓𑁆𑀔𑀫𑀸𑀦𑁄 𑀯𑀺𑀬 𑀢𑀺𑀝𑁆𑀞𑀢𑀻𑀢𑀺 𑀅𑀦𑀼𑀧𑁂𑀓𑁆𑀔𑀦𑀢𑀸. 𑀯𑀺𑀘𑀭𑀡𑀯𑀲𑁂𑀦 𑀯𑀸 𑀉𑀧𑁂𑀓𑁆𑀔𑀦𑀢𑀸 𑀅𑀦𑀼𑀧𑁂𑀓𑁆𑀔𑀦𑀢𑀸.

𑁯. 𑀧𑀻𑀢𑀺𑀦𑀺𑀤𑁆𑀤𑁂𑀲𑁂 𑀧𑀻𑀢𑀻𑀢𑀺 𑀲𑀪𑀸𑀯𑀧𑀤𑀁. 𑀧𑀫𑀼𑀤𑀺𑀢𑀲𑁆𑀲 𑀪𑀸𑀯𑁄 𑀧𑀸𑀫𑁄𑀚𑁆𑀚𑀁. 𑀆𑀫𑁄𑀤𑀦𑀸𑀓𑀸𑀭𑁄 𑀆𑀫𑁄𑀤𑀦𑀸. 𑀧𑀫𑁄𑀤𑀦𑀸𑀓𑀸𑀭𑁄 𑀧𑀫𑁄𑀤𑀦𑀸. 𑀬𑀣𑀸 𑀯𑀸 𑀪𑁂𑀲𑀚𑁆𑀚𑀸𑀦𑀁 𑀯𑀸 𑀢𑁂𑀮𑀸𑀦𑀁 𑀯𑀸 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑀸𑀦𑀁 𑀯𑀸 𑀏𑀓𑀢𑁄𑀓𑀭𑀡𑀁 𑀫𑁄𑀤𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀬𑀫𑁆𑀧𑀺 𑀧𑀻𑀢𑀺 𑀥𑀫𑁆𑀫𑀸𑀦𑀁 𑀏𑀓𑀢𑁄𑀓𑀭𑀡𑁂𑀦 𑀫𑁄𑀤𑀦𑀸. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀦 𑀫𑀡𑁆𑀟𑁂𑀢𑁆𑀯𑀸 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸𑀢𑀺 𑀯𑀼𑀢𑁆𑀢𑀸. 𑀳𑀸𑀲𑁂𑀢𑀻𑀢𑀺 𑀳𑀸𑀲𑁄. 𑀧𑀳𑀸𑀲𑁂𑀢𑀻𑀢𑀺 𑀧𑀳𑀸𑀲𑁄. 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀢𑁆𑀢𑀻𑀢𑀺 𑀯𑀺𑀢𑁆𑀢𑀁; 𑀥𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀬𑀁 𑀧𑀦 𑀲𑁄𑀫𑀦𑀲𑁆𑀲𑀧𑀘𑁆𑀘𑀬𑀢𑁆𑀢𑀸 𑀯𑀺𑀢𑁆𑀢𑀺𑀲𑀭𑀺𑀓𑁆𑀔𑀢𑀸𑀬 𑀯𑀺𑀢𑁆𑀢𑀺. 𑀬𑀣𑀸 𑀳𑀺 𑀥𑀦𑀺𑀦𑁄 𑀥𑀦𑀁 𑀧𑀝𑀺𑀘𑁆𑀘 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀧𑀻𑀢𑀺𑀫𑀢𑁄𑀧𑀺 𑀧𑀻𑀢𑀺𑀁 𑀧𑀝𑀺𑀘𑁆𑀘 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀢𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀢𑀼𑀝𑁆𑀞𑀺𑀲𑀪𑀸𑀯𑀲𑀡𑁆𑀞𑀺𑀢𑀸𑀬 𑀧𑀻𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀧𑀻𑀢𑀺𑀫𑀸 𑀧𑀦 𑀧𑀼𑀕𑁆𑀕𑀮𑁄 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀕𑁆𑀕𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀢𑁆𑀢𑀸 𑀉𑀤𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀤𑀕𑁆𑀕𑀲𑁆𑀲 𑀪𑀸𑀯𑁄 𑀑𑀤𑀕𑁆𑀬𑀁. 𑀅𑀢𑁆𑀢𑀦𑁄 𑀫𑀦𑀢𑀸 𑀅𑀢𑁆𑀢𑀫𑀦𑀢𑀸. 𑀅𑀦𑀪𑀺𑀭𑀤𑁆𑀥𑀲𑁆𑀲 𑀳𑀺 𑀫𑀦𑁄 𑀤𑀼𑀓𑁆𑀔𑀧𑀤𑀝𑁆𑀞𑀸𑀦𑀢𑁆𑀢𑀸 𑀅𑀢𑁆𑀢𑀦𑁄 𑀫𑀦𑁄 𑀦𑀸𑀫 𑀦 𑀳𑁄𑀢𑀺, 𑀅𑀪𑀺𑀭𑀤𑁆𑀥𑀲𑁆𑀲 𑀧𑀦 𑀲𑀼𑀔𑀧𑀤𑀝𑁆𑀞𑀸𑀦𑀢𑁆𑀢𑀸 𑀅𑀢𑁆𑀢𑀦𑁄 𑀫𑀦𑁄 𑀦𑀸𑀫 𑀳𑁄𑀢𑀺. 𑀇𑀢𑀺 𑀅𑀢𑁆𑀢𑀦𑁄 𑀫𑀦𑀢𑀸 𑀅𑀢𑁆𑀢𑀫𑀦𑀢𑀸, 𑀲𑀓𑀫𑀦𑀢𑀸. 𑀲𑀓𑀫𑀦𑀲𑁆𑀲 𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀬𑀲𑁆𑀫𑀸 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀫𑀦𑀢𑀸, 𑀘𑀺𑀢𑁆𑀢𑀲𑁆𑀲𑁂𑀯 𑀧𑀦𑁂𑀲𑁄 𑀪𑀸𑀯𑁄, 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄, 𑀢𑀲𑁆𑀫𑀸 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀸.

𑁧𑁧. 𑀏𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑁂 𑀅𑀘𑀮𑀪𑀸𑀯𑁂𑀦 𑀆𑀭𑀫𑁆𑀫𑀡𑁂 𑀢𑀺𑀝𑁆𑀞𑀢𑀻𑀢𑀺 𑀞𑀺𑀢𑀺. 𑀧𑀭𑀢𑁄 𑀧𑀤𑀤𑁆𑀯𑀬𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀅𑀧𑀺𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀫𑁆𑀳𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀡𑁆𑀞𑀺𑀢𑀺. 𑀆𑀭𑀫𑁆𑀫𑀡𑀁 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀯𑀝𑁆𑀞𑀺𑀢𑀺. 𑀓𑀼𑀲𑀮𑀧𑀓𑁆𑀔𑀲𑁆𑀫𑀺𑀜𑁆𑀳𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑁋 𑀲𑀤𑁆𑀥𑀸 𑀲𑀢𑀺 𑀲𑀫𑀸𑀥𑀺 𑀧𑀜𑁆𑀜𑀸𑀢𑀺. 𑀢𑁂𑀦𑁂𑀯 𑀲𑀤𑁆𑀥𑀸 𑀑𑀓𑀧𑁆𑀧𑀦𑀸𑀢𑀺 𑀯𑀼𑀢𑁆𑀢𑀸, 𑀲𑀢𑀺 𑀅𑀧𑀺𑀮𑀸𑀧𑀦𑀢𑀸𑀢𑀺, 𑀲𑀫𑀸𑀥𑀺 𑀅𑀯𑀝𑁆𑀞𑀺𑀢𑀻𑀢𑀺, 𑀧𑀜𑁆𑀜𑀸 𑀧𑀭𑀺𑀬𑁄𑀕𑀸𑀳𑀦𑀸𑀢𑀺. 𑀅𑀓𑀼𑀲𑀮𑀧𑀓𑁆𑀔𑁂 𑀧𑀦 𑀢𑀬𑁄 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑁋 𑀢𑀡𑁆𑀳𑀸 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸𑀢𑀺. 𑀢𑁂𑀦𑁂𑀯 𑀢𑁂 𑀑𑀖𑀸𑀢𑀺 𑀯𑀼𑀢𑁆𑀢𑀸. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀦𑁂𑀢𑁆𑀣 𑀦 𑀩𑀮𑀯𑀢𑀻 𑀳𑁄𑀢𑀺. 𑀬𑀣𑀸 𑀳𑀺 𑀭𑀚𑀼𑀝𑁆𑀞𑀸𑀦𑀝𑁆𑀞𑀸𑀦𑁂 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀲𑀫𑁆𑀫𑀝𑁆𑀞𑁂 𑀣𑁄𑀓𑀫𑁂𑀯 𑀓𑀸𑀮𑀁 𑀭𑀚𑁄 𑀲𑀦𑁆𑀦𑀺𑀲𑀻𑀤𑀢𑀺, 𑀲𑀼𑀓𑁆𑀔𑀦𑁆𑀢𑁂 𑀲𑀼𑀓𑁆𑀔𑀦𑁆𑀢𑁂 𑀧𑀼𑀦 𑀧𑀓𑀢𑀺𑀪𑀸𑀯𑁂𑀦 𑀯𑀼𑀝𑁆𑀞𑀸𑀢𑀺, 𑀏𑀯𑀫𑁂𑀯 𑀅𑀓𑀼𑀲𑀮𑀧𑀓𑁆𑀔𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦 𑀩𑀮𑀯𑀢𑀻 𑀳𑁄𑀢𑀺. 𑀬𑀣𑀸 𑀧𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀖𑀝𑁂𑀳𑀺 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀓𑀼𑀤𑀸𑀮𑁂𑀦 𑀔𑀦𑀺𑀢𑁆𑀯𑀸 𑀆𑀓𑁄𑀝𑀦𑀫𑀤𑁆𑀤𑀦𑀖𑀝𑁆𑀝𑀦𑀸𑀦𑀺 𑀓𑀢𑁆𑀯𑀸 𑀉𑀧𑀮𑀺𑀢𑁆𑀢𑁂 𑀆𑀤𑀸𑀲𑁂 𑀯𑀺𑀬 𑀙𑀸𑀬𑀸 𑀧𑀜𑁆𑀜𑀸𑀬𑀢𑀺, 𑀯𑀲𑁆𑀲𑀲𑀢𑀸𑀢𑀺𑀓𑁆𑀓𑀫𑁂𑀧𑀺 𑀢𑀁𑀫𑀼𑀳𑀼𑀢𑁆𑀢𑀓𑀢𑀁 𑀯𑀺𑀬 𑀳𑁄𑀢𑀺, 𑀏𑀯𑀫𑁂𑀯 𑀓𑀼𑀲𑀮𑀧𑀓𑁆𑀔𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀩𑀮𑀯𑀢𑀻 𑀳𑁄𑀢𑀺.

𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑀺𑀲𑀸𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀲𑀸𑀳𑀸𑀭𑁄. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦𑁂𑀯 𑀕𑀘𑁆𑀙𑀦𑁆𑀢𑀁 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺 𑀦𑀸𑀫. 𑀅𑀬𑀁 𑀧𑀦 𑀢𑀣𑀸𑀯𑀺𑀥𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀻𑀢𑀺 𑀅𑀯𑀺𑀓𑁆𑀔𑁂𑀧𑁄. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦𑁂𑀯 𑀘 𑀘𑀺𑀢𑁆𑀢𑀁 𑀯𑀺𑀲𑀸𑀳𑀝𑀁 𑀦𑀸𑀫 𑀳𑁄𑀢𑀺, 𑀇𑀢𑁄 𑀘𑀺𑀢𑁄 𑀘 𑀳𑀭𑀻𑀬𑀢𑀺. 𑀅𑀬𑀁 𑀧𑀦 𑀏𑀯𑀁 𑀅𑀯𑀺𑀲𑀸𑀳𑀝𑀲𑁆𑀲 𑀫𑀸𑀦𑀲𑀲𑁆𑀲 𑀪𑀸𑀯𑁄𑀢𑀺 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸.

𑀲𑀫𑀣𑁄𑀢𑀺 𑀢𑀺𑀯𑀺𑀥𑁄 𑀲𑀫𑀣𑁄 𑁋 𑀘𑀺𑀢𑁆𑀢𑀲𑀫𑀣𑁄, 𑀅𑀥𑀺𑀓𑀭𑀡𑀲𑀫𑀣𑁄, 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺. 𑀢𑀢𑁆𑀣 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘𑀺𑀢𑁆𑀢𑀲𑀫𑀣𑁄 𑀦𑀸𑀫. 𑀢𑀜𑁆𑀳𑀺 𑀆𑀕𑀫𑁆𑀫 𑀘𑀺𑀢𑁆𑀢𑀘𑀮𑀦𑀁 𑀘𑀺𑀢𑁆𑀢𑀯𑀺𑀧𑁆𑀨𑀦𑁆𑀤𑀺𑀢𑀁 𑀲𑀫𑁆𑀫𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀸 𑀲𑁄 𑀘𑀺𑀢𑁆𑀢𑀲𑀫𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀺𑀲𑀢𑁆𑀢𑀯𑀺𑀥𑁄 𑀲𑀫𑀣𑁄 𑀅𑀥𑀺𑀓𑀭𑀡𑀲𑀫𑀣𑁄 𑀦𑀸𑀫. 𑀢𑀜𑁆𑀳𑀺 𑀆𑀕𑀫𑁆𑀫 𑀢𑀸𑀦𑀺 𑀢𑀸𑀦𑀺 𑀅𑀥𑀺𑀓𑀭𑀡𑀸𑀦𑀺 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀅𑀥𑀺𑀓𑀭𑀡𑀲𑀫𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀘𑀺𑀢𑁆𑀢𑀲𑀫𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀸𑀥𑀺𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁. 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀬𑀸𑀣𑀸𑀯𑀲𑀫𑀸𑀥𑀺 𑀦𑀺𑀬𑁆𑀬𑀸𑀦𑀺𑀓𑀲𑀫𑀸𑀥𑀺 𑀓𑀼𑀲𑀮𑀲𑀫𑀸𑀥𑀺.

𑁧𑁨. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀦𑀁 𑀲𑀤𑁆𑀤𑀳𑀦𑀯𑀲𑁂𑀦 𑀲𑀤𑁆𑀥𑀸. 𑀩𑀼𑀤𑁆𑀥𑀸𑀤𑀻𑀦𑀺 𑀯𑀸 𑀭𑀢𑀦𑀸𑀦𑀺 𑀲𑀤𑁆𑀤𑀳𑀢𑀺 𑀧𑀢𑁆𑀢𑀺𑀬𑀸𑀬𑀢𑀻𑀢𑀺 𑀲𑀤𑁆𑀥𑀸. 𑀲𑀤𑁆𑀤𑀳𑀦𑀸𑀢𑀺 𑀲𑀤𑁆𑀤𑀳𑀦𑀸𑀓𑀸𑀭𑁄. 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑁂 𑀑𑀕𑀸𑀳𑀢𑀺, 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀬 𑀅𑀦𑀼𑀧𑀯𑀺𑀲𑀢𑀻𑀢𑀺 𑀑𑀓𑀧𑁆𑀧𑀦𑀸. 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑁂𑀲𑀼 𑀏𑀢𑀸𑀬 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀧𑀲𑀻𑀤𑀦𑁆𑀢𑀺, 𑀲𑀬𑀁 𑀯𑀸 𑀅𑀪𑀺𑀧𑁆𑀧𑀲𑀻𑀤𑀢𑀻𑀢𑀺 𑀅𑀪𑀺𑀧𑁆𑀧𑀲𑀸𑀤𑁄. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀲𑀫𑀸𑀲𑀧𑀤𑀸𑀦𑀁 𑀯𑀲𑁂𑀦 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀬𑀸𑀬𑁂 𑀆𑀭𑀤𑁆𑀥𑁂 𑀆𑀤𑀺𑀧𑀤𑀁 𑀕𑀳𑁂𑀢𑁆𑀯𑀸𑀯 𑀧𑀤𑀪𑀸𑀚𑀦𑀁 𑀓𑀭𑀻𑀬𑀢𑀺 𑁋 𑀅𑀬𑀁 𑀅𑀪𑀺𑀥𑀫𑁆𑀫𑁂 𑀥𑀫𑁆𑀫𑀢𑀸 𑁋 𑀢𑀲𑁆𑀫𑀸 𑀧𑀼𑀦 𑀲𑀤𑁆𑀥𑀸𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀯𑀸 𑀇𑀢𑁆𑀣𑀺𑀬𑀸 𑀇𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀲𑀤𑁆𑀥𑀸𑀯 𑀇𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀏𑀯𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀜𑀸𑀧𑀦𑀢𑁆𑀣𑀫𑁆𑀧𑀺 𑀧𑀼𑀦 𑀲𑀤𑁆𑀥𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀧𑀤𑀦𑀺𑀤𑁆𑀤𑁂𑀲𑁂𑀲𑀼 𑀆𑀤𑀺𑀧𑀤𑀲𑁆𑀲 𑀧𑀼𑀦 𑀯𑀘𑀦𑁂 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀅𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀤𑁆𑀥𑀸𑀩𑀮𑀁.

𑁧𑁩. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀘𑁂𑀢𑀲𑀺𑀓𑁄𑀢𑀺 𑀇𑀤𑀁 𑀯𑀻𑀭𑀺𑀬𑀲𑁆𑀲 𑀦𑀺𑀬𑀫𑀢𑁄 𑀘𑁂𑀢𑀲𑀺𑀓𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀯𑀻𑀭𑀺𑀬𑀁 ‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺. 𑀇𑀢𑀺𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁩) 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 ‘𑀓𑀸𑀬𑀺𑀓’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀓𑀸𑀬𑀯𑀺𑀜𑁆𑀜𑀸𑀡𑀁 𑀯𑀺𑀬 𑀓𑀸𑀬𑀺𑀓𑀁 𑀦𑀸𑀫 𑀦𑀢𑁆𑀣𑀺, 𑀘𑁂𑀢𑀲𑀺𑀓𑀫𑁂𑀯 𑀧𑀦𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘𑀘𑁂𑀢𑀲𑀺𑀓𑁄’𑀢𑀺 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁄 𑀆𑀭𑀫𑁆𑀪𑁄. 𑀇𑀫𑀺𑀦𑀸 𑀲𑁂𑀲𑀸𑀭𑀫𑁆𑀪𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀬𑀜𑁆𑀳𑀺 ‘𑀆𑀭𑀫𑁆𑀪’-𑀲𑀤𑁆𑀤𑁄 𑀓𑀫𑁆𑀫𑁂 𑀆𑀧𑀢𑁆𑀢𑀺𑀬𑀁 𑀓𑀺𑀭𑀺𑀬𑀸𑀬𑀁 𑀯𑀻𑀭𑀺𑀬𑁂 𑀳𑀺𑀁𑀲𑀸𑀬 𑀯𑀺𑀓𑁄𑀧𑀦𑁂𑀢𑀺 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀆𑀕𑀢𑁄.

‘‘𑀬𑀁𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸;

𑀆𑀭𑀫𑁆𑀪𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄’’𑀢𑀺. (𑀲𑀼. 𑀦𑀺. 𑁭𑁪𑁯);

𑀏𑀢𑁆𑀣 𑀳𑀺 𑀓𑀫𑁆𑀫𑀁 ‘𑀆𑀭𑀫𑁆𑀪𑁄’𑀢𑀺 𑀆𑀕𑀢𑀁. ‘‘𑀆𑀭𑀫𑁆𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁨; 𑀧𑀼. 𑀧. 𑁧𑁯𑁧) 𑀏𑀢𑁆𑀣 𑀆𑀧𑀢𑁆𑀢𑀺. ‘‘𑀫𑀳𑀸𑀬𑀜𑁆𑀜𑀸 𑀫𑀳𑀸𑀭𑀫𑁆𑀪𑀸 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸’’𑀢𑀺 (𑀅. 𑀦𑀺. 𑁪.𑁩𑁯; 𑀲𑀁. 𑀦𑀺. 𑁧.𑁧𑁨𑁦) 𑀏𑀢𑁆𑀣 𑀬𑀽𑀧𑀼𑀲𑁆𑀲𑀸𑀧𑀦𑀸𑀤𑀺𑀓𑀺𑀭𑀺𑀬𑀸. ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 (𑀲𑀁. 𑀦𑀺. 𑁧.𑁧𑁮𑁫) 𑀏𑀢𑁆𑀣 𑀯𑀻𑀭𑀺𑀬𑀁. ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀪𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁫𑁧-𑁫𑁨) 𑀏𑀢𑁆𑀣 𑀳𑀺𑀁𑀲𑀸. ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦; 𑀫. 𑀦𑀺. 𑁧.𑁨𑁯𑁩) 𑀏𑀢𑁆𑀣 𑀙𑁂𑀤𑀦𑀪𑀜𑁆𑀚𑀦𑀸𑀤𑀺𑀓𑀁 𑀯𑀺𑀓𑁄𑀧𑀦𑀁. 𑀇𑀥 𑀧𑀦 𑀯𑀻𑀭𑀺𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 𑁋 ‘𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁄 𑀆𑀭𑀫𑁆𑀪𑁄’𑀢𑀺. 𑀯𑀻𑀭𑀺𑀬𑀜𑁆𑀳𑀺 𑀆𑀭𑀫𑁆𑀪𑀦𑀓𑀯𑀲𑁂𑀦 𑀆𑀭𑀫𑁆𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀦𑀯𑀲𑁂𑀦 𑀦𑀺𑀓𑁆𑀓𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀯𑀲𑁂𑀦 𑀧𑀭𑀓𑁆𑀓𑀫𑁄. 𑀉𑀕𑁆𑀕𑀦𑁆𑀢𑁆𑀯𑀸 𑀬𑀫𑀦𑀯𑀲𑁂𑀦 𑀉𑀬𑁆𑀬𑀸𑀫𑁄. 𑀩𑁆𑀬𑀸𑀬𑀫𑀦𑀯𑀲𑁂𑀦 𑀯𑀸𑀬𑀸𑀫𑁄. 𑀉𑀲𑁆𑀲𑀸𑀳𑀦𑀯𑀲𑁂𑀦 𑀉𑀲𑁆𑀲𑀸𑀳𑁄. 𑀅𑀥𑀺𑀫𑀢𑁆𑀢𑀼𑀲𑁆𑀲𑀸𑀳𑀦𑀯𑀲𑁂𑀦 𑀉𑀲𑁆𑀲𑁄𑀴𑁆𑀳𑀻. 𑀣𑀺𑀭𑀪𑀸𑀯𑀝𑁆𑀞𑁂𑀦 𑀣𑀸𑀫𑁄. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀸𑀭𑀡𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀢𑁄 𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀓𑀼𑀲𑀮𑀲𑀦𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀥𑀺𑀢𑀺.

𑀅𑀧𑀭𑁄 𑀦𑀬𑁄 𑁋 𑀦𑀺𑀓𑁆𑀓𑀫𑁄 𑀘𑁂𑀲𑁄 𑀓𑀸𑀫𑀸𑀦𑀁 𑀧𑀦𑀼𑀤𑀦𑀸𑀬, 𑀧𑀭𑀓𑁆𑀓𑀫𑁄 𑀘𑁂𑀲𑁄 𑀩𑀦𑁆𑀥𑀦𑀘𑁆𑀙𑁂𑀤𑀸𑀬, 𑀉𑀬𑁆𑀬𑀸𑀫𑁄 𑀘𑁂𑀲𑁄 𑀑𑀖𑀦𑀺𑀢𑁆𑀣𑀭𑀡𑀸𑀬, 𑀯𑀸𑀬𑀸𑀫𑁄 𑀘𑁂𑀲𑁄 𑀧𑀸𑀭𑀗𑁆𑀕𑀫𑀦𑀝𑁆𑀞𑁂𑀦, 𑀉𑀲𑁆𑀲𑀸𑀳𑁄 𑀘𑁂𑀲𑁄 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦, 𑀉𑀲𑁆𑀲𑁄𑀴𑁆𑀳𑀻 𑀘𑁂𑀲𑁄 𑀅𑀥𑀺𑀫𑀢𑁆𑀢𑀝𑁆𑀞𑁂𑀦, 𑀣𑀸𑀫𑁄 𑀘𑁂𑀲𑁄 𑀧𑀮𑀺𑀖𑀼𑀕𑁆𑀖𑀸𑀝𑀦𑀢𑀸𑀬, 𑀥𑀺𑀢𑀺 𑀘𑁂𑀲𑁄 𑀅𑀯𑀝𑁆𑀞𑀺𑀢𑀺𑀓𑀸𑀭𑀺𑀢𑀸𑀬𑀸𑀢𑀺.

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨, 𑁨𑁩𑁭; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁫𑁪) 𑀏𑀯𑀁 𑀧𑀯𑀢𑁆𑀢𑀺𑀓𑀸𑀮𑁂 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀯𑀲𑁂𑀦 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸; 𑀣𑀺𑀭𑀧𑀭𑀓𑁆𑀓𑀫𑁄, 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑀁 𑀯𑀻𑀭𑀺𑀬𑀁 𑀓𑀼𑀲𑀮𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀙𑀦𑁆𑀤𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀦 𑀑𑀢𑀸𑀭𑁂𑀢𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑀢𑀁 𑀆𑀯𑀳𑀢𑀺, 𑀢𑀲𑁆𑀫𑀸 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀧𑀦 𑀢𑀚𑁆𑀚𑀸𑀢𑀺𑀓𑁂 𑀉𑀤𑀓𑀲𑀫𑁆𑀪𑀺𑀦𑁆𑀦𑀝𑁆𑀞𑀸𑀦𑁂 𑀥𑀼𑀭𑀯𑀸𑀳𑀕𑁄𑀡𑀁 𑀕𑀡𑁆𑀳𑀣𑀸𑀢𑀺 𑀯𑀤𑀦𑁆𑀢𑀺, 𑀲𑁄 𑀚𑀡𑁆𑀡𑀼𑀦𑀸 𑀪𑀽𑀫𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸𑀧𑀺 𑀥𑀼𑀭𑀁 𑀯𑀳𑀢𑀺, 𑀪𑀽𑀫𑀺𑀬𑀁 𑀧𑀢𑀺𑀢𑀼𑀁 𑀦 𑀤𑁂𑀢𑀺, 𑀏𑀯𑀫𑁂𑀯 𑀯𑀻𑀭𑀺𑀬𑀁 𑀓𑀼𑀲𑀮𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀥𑀼𑀭𑀁 𑀉𑀓𑁆𑀔𑀺𑀧𑀢𑀺 𑀧𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄𑀢𑀺 𑀯𑀼𑀢𑁆𑀢𑀁. 𑀧𑀕𑁆𑀕𑀳𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀻𑀭𑀺𑀬𑀩𑀮𑀁. 𑀬𑀸𑀣𑀸𑀯𑀦𑀺𑀬𑁆𑀬𑀸𑀦𑀺𑀓𑀓𑀼𑀲𑀮𑀯𑀸𑀬𑀸𑀫𑀢𑀸𑀬 𑀲𑀫𑁆𑀫𑀸𑀯𑀸𑀬𑀸𑀫𑁄.

𑁧𑁪. 𑀲𑀢𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀲𑀭𑀡𑀓𑀯𑀲𑁂𑀦 𑀲𑀢𑀺. 𑀇𑀤𑀁 𑀲𑀢𑀺𑀬𑀸 𑀲𑀪𑀸𑀯𑀧𑀤𑀁. 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑀢𑁄 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀅𑀦𑀼𑀲𑁆𑀲𑀢𑀺. 𑀅𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀯𑀺𑀬 𑀲𑀭𑀡𑀢𑁄 𑀧𑀝𑀺𑀲𑀭𑀡𑀯𑀲𑁂𑀦 𑀧𑀝𑀺𑀲𑁆𑀲𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀯𑀟𑁆𑀠𑀺𑀢𑀫𑀢𑁆𑀢𑀫𑁂𑀢𑀁. 𑀲𑀭𑀡𑀸𑀓𑀸𑀭𑁄 𑀲𑀭𑀡𑀢𑀸. 𑀬𑀲𑁆𑀫𑀸 𑀧𑀦 𑀲𑀭𑀡𑀢𑀸𑀢𑀺 𑀢𑀺𑀡𑁆𑀡𑀁 𑀲𑀭𑀡𑀸𑀦𑀫𑁆𑀧𑀺 𑀦𑀸𑀫𑀁, 𑀢𑀲𑁆𑀫𑀸 𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 𑀧𑀼𑀦 𑀲𑀢𑀺𑀕𑁆𑀕𑀳𑀡𑀁 𑀓𑀢𑀁. 𑀲𑀢𑀺𑀲𑀗𑁆𑀔𑀸𑀢𑀸 𑀲𑀭𑀡𑀢𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀲𑀼𑀢𑀧𑀭𑀺𑀬𑀢𑁆𑀢𑀲𑁆𑀲 𑀥𑀸𑀭𑀡𑀪𑀸𑀯𑀢𑁄 𑀥𑀸𑀭𑀡𑀢𑀸. 𑀅𑀦𑀼𑀧𑀯𑀺𑀲𑀦𑀲𑀗𑁆𑀔𑀸𑀢𑁂𑀦 𑀑𑀕𑀸𑀳𑀦𑀝𑁆𑀞𑁂𑀦 𑀅𑀧𑀺𑀮𑀸𑀧𑀦𑀪𑀸𑀯𑁄 𑀅𑀧𑀺𑀮𑀸𑀧𑀦𑀢𑀸. 𑀬𑀣𑀸 𑀳𑀺 𑀮𑀸𑀩𑀼𑀓𑀝𑀸𑀳𑀸𑀤𑀻𑀦𑀺 𑀉𑀤𑀓𑁂 𑀧𑁆𑀮𑀯𑀦𑁆𑀢𑀺, 𑀦 𑀅𑀦𑀼𑀧𑀯𑀺𑀲𑀦𑁆𑀢𑀺, 𑀦 𑀢𑀣𑀸 𑀆𑀭𑀫𑁆𑀫𑀡𑁂 𑀲𑀢𑀺. 𑀆𑀭𑀫𑁆𑀫𑀡𑀜𑁆𑀳𑁂𑀲𑀸 𑀅𑀦𑀼𑀧𑀯𑀺𑀲𑀢𑀺, 𑀢𑀲𑁆𑀫𑀸 𑀅𑀧𑀺𑀮𑀸𑀧𑀦𑀢𑀸𑀢𑀺 𑀯𑀼𑀢𑁆𑀢𑀸. 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀅𑀲𑀫𑁆𑀫𑀼𑀲𑁆𑀲𑀦𑀪𑀸𑀯𑀢𑁄 𑀅𑀲𑀫𑁆𑀫𑀼𑀲𑁆𑀲𑀦𑀢𑀸. 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂 𑀚𑁄𑀢𑀦𑀮𑀓𑁆𑀔𑀡𑁂 𑀘 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀲𑀢𑀺𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀧𑀫𑀸𑀤𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀢𑀺𑀩𑀮𑀁. 𑀬𑀸𑀣𑀸𑀯𑀲𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀢𑀺 𑀓𑀼𑀲𑀮𑀲𑀢𑀻𑀢𑀺 𑀲𑀫𑁆𑀫𑀸𑀲𑀢𑀺.

𑁧𑁬. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀢𑁂𑀦 𑀯𑀸 𑀅𑀦𑀺𑀘𑁆𑀘𑀸𑀤𑀺𑀦𑀸 𑀧𑀓𑀸𑀭𑁂𑀦 𑀥𑀫𑁆𑀫𑁂 𑀚𑀸𑀦𑀸𑀢𑀻𑀢𑀺𑀧𑀺 𑀧𑀜𑁆𑀜𑀸. 𑀇𑀤𑀫𑀲𑁆𑀲𑀸 𑀲𑀪𑀸𑀯𑀧𑀤𑀁. 𑀧𑀚𑀸𑀦𑀦𑀸𑀓𑀸𑀭𑁄 𑀧𑀚𑀸𑀦𑀦𑀸. 𑀅𑀦𑀺𑀘𑁆𑀘𑀸𑀤𑀻𑀦𑀺 𑀯𑀺𑀘𑀺𑀦𑀸𑀢𑀻𑀢𑀺 𑀯𑀺𑀘𑀬𑁄. 𑀧𑀯𑀺𑀘𑀬𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀺𑀘𑀺𑀦𑀸𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀅𑀦𑀺𑀘𑁆𑀘𑀸𑀤𑀻𑀦𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀮𑁆𑀮𑀓𑁆𑀔𑀡𑀸. 𑀲𑀸𑀬𑁂𑀯 𑀧𑀼𑀦 𑀉𑀧𑀲𑀕𑁆𑀕𑀦𑀸𑀦𑀢𑁆𑀢𑁂𑀦 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀸. 𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀧𑀡𑁆𑀟𑀺𑀘𑁆𑀘𑀁. 𑀓𑀼𑀲𑀮𑀲𑁆𑀲 𑀪𑀸𑀯𑁄 𑀓𑁄𑀲𑀮𑁆𑀮𑀁. 𑀦𑀺𑀧𑀼𑀡𑀲𑁆𑀲 𑀪𑀸𑀯𑁄 𑀦𑁂𑀧𑀼𑀜𑁆𑀜𑀁. 𑀅𑀦𑀺𑀘𑁆𑀘𑀸𑀤𑀻𑀦𑀁 𑀯𑀺𑀪𑀸𑀯𑀦𑀯𑀲𑁂𑀦 𑀯𑁂𑀪𑀩𑁆𑀬𑀸. 𑀅𑀦𑀺𑀘𑁆𑀘𑀸𑀤𑀻𑀦𑀁 𑀘𑀺𑀦𑁆𑀢𑀦𑀓𑀯𑀲𑁂𑀦 𑀘𑀺𑀦𑁆𑀢𑀸. 𑀬𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀅𑀦𑀺𑀘𑁆𑀘𑀸𑀤𑀻𑀦𑀺 𑀘𑀺𑀦𑁆𑀢𑀸𑀧𑁂𑀢𑀻𑀢𑀺𑀧𑀺 𑀘𑀺𑀦𑁆𑀢𑀸. 𑀅𑀦𑀺𑀘𑁆𑀘𑀸𑀤𑀻𑀦𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑀉𑀧𑀧𑀭𑀺𑀓𑁆𑀔𑀸. 𑀪𑀽𑀭𑀻𑀢𑀺 𑀧𑀣𑀯𑀺𑀬𑀸 𑀦𑀸𑀫𑀁. 𑀅𑀬𑀫𑁆𑀧𑀺 𑀲𑀡𑁆𑀳𑀝𑁆𑀞𑁂𑀦 𑀯𑀺𑀢𑁆𑀣𑀝𑀝𑁆𑀞𑁂𑀦 𑀘 𑀪𑀽𑀭𑀻 𑀯𑀺𑀬𑀸𑀢𑀺 𑀪𑀽𑀭𑀻. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀽𑀭𑀻 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀢𑀸𑀬 𑀧𑀣𑀯𑀻𑀲𑀫𑀸𑀬 𑀯𑀺𑀢𑁆𑀣𑀝𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀪𑀽𑀭𑀺𑀧𑀜𑁆𑀜𑁄𑀢𑀺 (𑀫𑀳𑀸𑀦𑀺. 𑁨𑁭). 𑀅𑀧𑀺𑀘 𑀧𑀜𑁆𑀜𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁 𑀪𑀽𑀭𑀻’’𑀢𑀺. 𑀪𑀽𑀢𑁂 𑀅𑀢𑁆𑀣𑁂 𑀭𑀫𑀢𑀻𑀢𑀺𑀧𑀺 𑀪𑀽𑀭𑀻. 𑀅𑀲𑀦𑀺 𑀯𑀺𑀬 𑀲𑀺𑀮𑀼𑀘𑁆𑀘𑀬𑁂 𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸. 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀝𑁆𑀞𑁂𑀦 𑀯𑀸 𑀫𑁂𑀥𑀸. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑁂 𑀧𑀭𑀺𑀦𑁂𑀢𑀻𑀢𑀺 𑀧𑀭𑀺𑀡𑀸𑀬𑀺𑀓𑀸. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀥𑀫𑁆𑀫𑁂 𑀯𑀺𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀫𑁆𑀫𑀸 𑀧𑀓𑀸𑀭𑁂𑀳𑀺 𑀅𑀦𑀺𑀘𑁆𑀘𑀸𑀤𑀻𑀦𑀺 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑀁. 𑀉𑀧𑁆𑀧𑀣𑀧𑀝𑀺𑀧𑀦𑁆𑀦𑁂 𑀲𑀺𑀦𑁆𑀥𑀯𑁂 𑀯𑀻𑀣𑀺𑀆𑀭𑁄𑀧𑀦𑀢𑁆𑀣𑀁 𑀧𑀢𑁄𑀤𑁄 𑀯𑀺𑀬 𑀉𑀧𑁆𑀧𑀣𑁂 𑀥𑀸𑀯𑀦𑀓𑀁 𑀓𑀽𑀝𑀘𑀺𑀢𑁆𑀢𑀁 𑀯𑀻𑀣𑀺𑀆𑀭𑁄𑀧𑀦𑀢𑁆𑀣𑀁 𑀯𑀺𑀚𑁆𑀛𑀢𑀻𑀢𑀺 𑀧𑀢𑁄𑀤𑁄 𑀯𑀺𑀬 𑀧𑀢𑁄𑀤𑁄. 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀓𑀺𑀮𑁂𑀲𑀘𑁆𑀙𑁂𑀤𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀲𑀢𑁆𑀣𑀁 𑀧𑀜𑁆𑀜𑀸𑀲𑀢𑁆𑀣𑀁. 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀧𑀜𑁆𑀜𑀸𑀯 𑀧𑀸𑀲𑀸𑀤𑁄 𑀧𑀜𑁆𑀜𑀸𑀧𑀸𑀲𑀸𑀤𑁄.

𑀆𑀮𑁄𑀓𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀆𑀮𑁄𑀓𑁄 𑀧𑀜𑁆𑀜𑀸𑀆𑀮𑁄𑀓𑁄. 𑀑𑀪𑀸𑀲𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀑𑀪𑀸𑀲𑁄 𑀧𑀜𑁆𑀜𑀸𑀑𑀪𑀸𑀲𑁄. 𑀧𑀚𑁆𑀚𑁄𑀢𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀧𑀜𑁆𑀜𑀯𑀢𑁄 𑀳𑀺 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀸𑀮𑁄𑀓𑀸 𑀏𑀓𑁄𑀪𑀸𑀲𑀸 𑀏𑀓𑀧𑀚𑁆𑀚𑁄𑀢𑀸 𑀳𑁄𑀢𑀺, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀤𑁂𑀲𑀼 𑀏𑀓𑀧𑀤𑁂𑀦𑀧𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀺𑀤𑁆𑀥𑁂, 𑀬𑀸𑀦𑀺 𑀧𑀦𑁂𑀢𑀸𑀦𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀮𑁄𑀓𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀘𑀦𑁆𑀤𑀸𑀮𑁄𑀓𑁄 𑀲𑀽𑀭𑀺𑀬𑀸𑀮𑁄𑀓𑁄 𑀅𑀕𑁆𑀬𑀸𑀮𑁄𑀓𑁄 𑀧𑀜𑁆𑀜𑀸𑀮𑁄𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀮𑁄𑀓𑀸. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀮𑁄𑀓𑀸𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸𑀮𑁄𑀓𑁄’’. 𑀢𑀣𑀸 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀑𑀪𑀸𑀲𑀸…𑀧𑁂… 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀚𑁆𑀚𑁄𑀢𑀸’’𑀢𑀺 (𑀅. 𑀦𑀺. 𑁪.𑁧𑁪𑁪) 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀲𑀼𑀢𑁆𑀢𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀢𑀤𑀦𑀼𑀭𑀽𑀧𑁂𑀦𑁂𑀯 𑀇𑀥𑀸𑀧𑀺 𑀤𑁂𑀲𑀦𑀸 𑀓𑀢𑀸. 𑀅𑀢𑁆𑀣𑁄 𑀳𑀺 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀯𑀺𑀪𑀚𑁆𑀚𑀫𑀸𑀦𑁄 𑀲𑀼𑀯𑀺𑀪𑀢𑁆𑀢𑁄 𑀳𑁄𑀢𑀺. 𑀅𑀜𑁆𑀜𑀣𑀸 𑀘 𑀅𑀜𑁆𑀜𑁄 𑀩𑀼𑀚𑁆𑀛𑀢𑀺, 𑀅𑀜𑁆𑀜𑀣𑀸 𑀘 𑀅𑀜𑁆𑀜𑁄𑀢𑀺.

𑀭𑀢𑀺𑀓𑀭𑀡𑀝𑁆𑀞𑁂𑀦 𑀧𑀦 𑀭𑀢𑀺𑀤𑀸𑀬𑀓𑀝𑁆𑀞𑁂𑀦 𑀭𑀢𑀺𑀚𑀦𑀓𑀝𑁆𑀞𑁂𑀦 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀝𑁆𑀞𑁂𑀦 𑀅𑀢𑀼𑀮𑀝𑁆𑀞𑁂𑀦 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 𑀘 𑀧𑀜𑁆𑀜𑀸𑀯 𑀭𑀢𑀦𑀁 𑀧𑀜𑁆𑀜𑀸𑀭𑀢𑀦𑀁. 𑀦 𑀢𑁂𑀦 𑀲𑀢𑁆𑀢𑀸 𑀫𑀼𑀬𑁆𑀳𑀦𑁆𑀢𑀺, 𑀲𑀬𑀁 𑀯𑀸 𑀆𑀭𑀫𑁆𑀫𑀡𑁂 𑀦 𑀫𑀼𑀬𑁆𑀳𑀢𑀻𑀢𑀺 𑀅𑀫𑁄𑀳𑁄. 𑀥𑀫𑁆𑀫𑀯𑀺𑀘𑀬𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀲𑁆𑀫𑀸 𑀧𑀦𑁂𑀢𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀫𑁄𑀳𑀲𑁆𑀲 𑀫𑁄𑀳𑀧𑀝𑀺𑀧𑀓𑁆𑀔𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀬𑁆𑀯𑀸𑀬𑀁 𑀅𑀫𑁄𑀳𑁄 𑀲𑁄 𑀦 𑀓𑁂𑀯𑀮𑀁 𑀫𑁄𑀳𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄, 𑀫𑁄𑀳𑀲𑁆𑀲 𑀧𑀦 𑀧𑀝𑀺𑀧𑀓𑁆𑀔𑁄, 𑀥𑀫𑁆𑀫𑀯𑀺𑀘𑀬𑀲𑀗𑁆𑀔𑀸𑀢𑁄 𑀅𑀫𑁄𑀳𑁄 𑀦𑀸𑀫 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀬𑀸𑀣𑀸𑀯𑀦𑀺𑀬𑁆𑀬𑀸𑀦𑀺𑀓𑀓𑀼𑀲𑀮𑀤𑀺𑀝𑁆𑀞𑀺.

𑁧𑁯. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀽𑀢𑀺 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀬𑁄 𑀆𑀬𑀸𑀧𑀦𑀝𑁆𑀞𑁂𑀦 𑀆𑀬𑀼, 𑀢𑀲𑁆𑀫𑀺𑀜𑁆𑀳𑀺 𑀲𑀢𑀺 𑀅𑀭𑀽𑀧𑀥𑀫𑁆𑀫𑀸 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀆𑀬𑀽𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀬𑀲𑁆𑀫𑀸 𑀧𑀦𑁂𑀢𑁂 𑀥𑀫𑁆𑀫𑀸 𑀆𑀬𑀼𑀲𑁆𑀫𑀺𑀁𑀬𑁂𑀯 𑀲𑀢𑀺 𑀢𑀺𑀝𑁆𑀞𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑀦𑁆𑀢𑀺 𑀧𑀸𑀮𑀬𑀦𑁆𑀢𑀺, 𑀢𑀲𑁆𑀫𑀸 𑀞𑀺𑀢𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀏𑀢𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀞𑀺𑀢𑀺. 𑀬𑀧𑁂𑀦𑁆𑀢𑀻𑀢𑀺 𑀬𑀧𑀦𑀸. 𑀢𑀣𑀸 𑀬𑀸𑀧𑀦𑀸. 𑀏𑀯𑀁 𑀩𑀼𑀚𑁆𑀛𑀦𑁆𑀢𑀸𑀦𑀁 𑀧𑀦 𑀯𑀲𑁂𑀦 𑀧𑀼𑀭𑀺𑀫𑀧𑀤𑁂 𑀭𑀲𑁆𑀲𑀢𑁆𑀢𑀁 𑀓𑀢𑀁. 𑀏𑀢𑀸𑀬 𑀇𑀭𑀺𑀬𑀦𑁆𑀢𑀻𑀢𑀺 𑀇𑀭𑀺𑀬𑀦𑀸. 𑀯𑀢𑁆𑀢𑀦𑁆𑀢𑀻𑀢𑀺 𑀯𑀢𑁆𑀢𑀦𑀸. 𑀧𑀸𑀮𑀬𑀦𑁆𑀢𑀻𑀢𑀺 𑀧𑀸𑀮𑀦𑀸. 𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀚𑀻𑀯𑀺𑀢𑀁. 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑁩𑁦. 𑀳𑀺𑀭𑀺𑀩𑀮𑀦𑀺𑀤𑁆𑀤𑁂𑀲𑁂 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀯𑀸 𑀓𑀢𑁆𑀯𑀸 𑀬𑁄 𑀥𑀫𑁆𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀭𑀺𑀬𑀺𑀢𑀩𑁆𑀩𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀳𑀺𑀭𑀺𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀫𑁆𑀫𑀁 𑀳𑀺𑀭𑀺𑀬𑀢𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀇𑀤𑀫𑁆𑀧𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀁 𑀲𑀫𑀗𑁆𑀕𑀻𑀪𑀸𑀯𑀁 𑀳𑀺𑀭𑀺𑀬𑀢𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑁩𑁧. 𑀑𑀢𑁆𑀢𑀧𑁆𑀧𑀩𑀮𑀦𑀺𑀤𑁆𑀤𑁂𑀲𑁂 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸𑀢𑀺 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀦 𑀑𑀢𑁆𑀢𑀧𑁆𑀧𑀲𑁆𑀲 𑀳𑁂𑀢𑀼𑀪𑀽𑀢𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀘 𑀲𑀫𑀸𑀧𑀢𑁆𑀢𑀺𑀬𑀸 𑀑𑀢𑁆𑀢𑀧𑁆𑀧𑀲𑁆𑀲 𑀳𑁂𑀢𑀼𑀪𑀽𑀢𑀸𑀬 𑀑𑀢𑁆𑀢𑀧𑁆𑀧𑀢𑀺, 𑀪𑀸𑀬𑀢𑀻𑀢𑀺 𑀅𑀢𑁆𑀣𑁄.

𑁩𑁨. 𑀅𑀮𑁄𑀪𑀦𑀺𑀤𑁆𑀤𑁂𑀲𑁂 𑀅𑀮𑀼𑀩𑁆𑀪𑀦𑀓𑀯𑀲𑁂𑀦 𑀅𑀮𑁄𑀪𑁄. 𑀦 𑀮𑀼𑀩𑁆𑀪𑀢𑀻𑀢𑀺𑀧𑀺 𑀅𑀮𑁄𑀪𑁄. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀅𑀮𑀼𑀩𑁆𑀪𑀦𑀸𑀢𑀺 𑀅𑀮𑀼𑀩𑁆𑀪𑀦𑀸𑀓𑀸𑀭𑁄. 𑀮𑁄𑀪𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀮𑀼𑀩𑁆𑀪𑀺𑀢𑁄 𑀦𑀸𑀫. 𑀦 𑀮𑀼𑀩𑁆𑀪𑀺𑀢𑁄 𑀅𑀮𑀼𑀩𑁆𑀪𑀺𑀢𑁄. 𑀅𑀮𑀼𑀩𑁆𑀪𑀺𑀢𑀲𑁆𑀲 𑀪𑀸𑀯𑁄 𑀅𑀮𑀼𑀩𑁆𑀪𑀺𑀢𑀢𑁆𑀢𑀁. 𑀲𑀸𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀦 𑀲𑀸𑀭𑀸𑀕𑁄𑀢𑀺 𑀅𑀲𑀸𑀭𑀸𑀕𑁄. 𑀅𑀲𑀸𑀭𑀚𑁆𑀚𑀦𑀸𑀢𑀺 𑀅𑀲𑀸𑀭𑀚𑁆𑀚𑀦𑀸𑀓𑀸𑀭𑁄. 𑀅𑀲𑀸𑀭𑀚𑁆𑀚𑀺𑀢𑀲𑁆𑀲 𑀪𑀸𑀯𑁄 𑀅𑀲𑀸𑀭𑀚𑁆𑀚𑀺𑀢𑀢𑁆𑀢𑀁. 𑀦 𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀦𑀪𑀺𑀚𑁆𑀛𑀸. 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀦𑁆𑀢𑀺 𑀅𑀮𑁄𑀪𑀲𑀗𑁆𑀔𑀸𑀢𑀁 𑀓𑀼𑀲𑀮𑀫𑀽𑀮𑀁. 𑀅𑀮𑁄𑀪𑁄 𑀳𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀓𑀼𑀲𑀮𑀫𑀽𑀮𑀁. 𑀓𑀼𑀲𑀮𑀜𑁆𑀘 𑀢𑀁 𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀜𑁆𑀘𑀸𑀢𑀺𑀧𑀺 𑀓𑀼𑀲𑀮𑀫𑀽𑀮𑀁.

𑁩𑁩. 𑀅𑀤𑁄𑀲𑀦𑀺𑀤𑁆𑀤𑁂𑀲𑁂 𑀅𑀤𑀼𑀲𑁆𑀲𑀦𑀓𑀯𑀲𑁂𑀦 𑀅𑀤𑁄𑀲𑁄. 𑀦 𑀤𑀼𑀲𑁆𑀲𑀢𑀻𑀢𑀺𑀧𑀺 𑀅𑀤𑁄𑀲𑁄. 𑀇𑀤𑀫𑀲𑁆𑀲 𑀲𑀪𑀸𑀯𑀧𑀤𑀁. 𑀅𑀤𑀼𑀲𑁆𑀲𑀦𑀸𑀢𑀺 𑀅𑀤𑀼𑀲𑁆𑀲𑀦𑀸𑀓𑀸𑀭𑁄. 𑀅𑀤𑀼𑀲𑁆𑀲𑀺𑀢𑀲𑁆𑀲 𑀪𑀸𑀯𑁄 𑀅𑀤𑀼𑀲𑁆𑀲𑀺𑀢𑀢𑁆𑀢𑀁. 𑀩𑁆𑀬𑀸𑀧𑀸𑀤𑀧𑀝𑀺𑀧𑀓𑁆𑀔𑀢𑁄 𑀦 𑀩𑁆𑀬𑀸𑀧𑀸𑀤𑁄𑀢𑀺 𑀅𑀩𑁆𑀬𑀸𑀧𑀸𑀤𑁄. 𑀓𑁄𑀥𑀤𑀼𑀓𑁆𑀔𑀧𑀝𑀺𑀧𑀓𑁆𑀔𑀢𑁄 𑀦 𑀩𑁆𑀬𑀸𑀧𑀚𑁆𑀚𑁄𑀢𑀺 𑀅𑀩𑁆𑀬𑀸𑀧𑀚𑁆𑀚𑁄. 𑀅𑀤𑁄𑀲𑀲𑀗𑁆𑀔𑀸𑀢𑀁 𑀓𑀼𑀲𑀮𑀫𑀽𑀮𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁪𑁦-𑁪𑁧. 𑀓𑀸𑀬𑀧𑀲𑁆𑀲𑀤𑁆𑀥𑀺𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀬𑀲𑁆𑀫𑀸 𑀓𑀸𑀬𑁄𑀢𑀺 𑀢𑀬𑁄 𑀔𑀦𑁆𑀥𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀲𑁆𑀲𑀫𑁆𑀪𑀦𑁆𑀢𑀺 𑀏𑀢𑀸𑀬 𑀢𑁂 𑀥𑀫𑁆𑀫𑀸, 𑀯𑀺𑀕𑀢𑀤𑀭𑀣𑀸 𑀪𑀯𑀦𑁆𑀢𑀺, 𑀲𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑀸𑀢𑀺 𑀧𑀲𑁆𑀲𑀤𑁆𑀥𑀺. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀧𑀲𑁆𑀲𑀫𑁆𑀪𑀦𑀸𑀢𑀺 𑀧𑀲𑁆𑀲𑀫𑁆𑀪𑀦𑀸𑀓𑀸𑀭𑁄. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀧𑀲𑁆𑀲𑀤𑁆𑀥𑀺𑀲𑀫𑀗𑁆𑀕𑀺𑀢𑀸𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀢𑀲𑁆𑀲 𑀔𑀦𑁆𑀥𑀢𑁆𑀢𑀬𑀲𑁆𑀲 𑀪𑀸𑀯𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀢𑀢𑁆𑀢𑀁. 𑀲𑀩𑁆𑀩𑀧𑀤𑁂𑀳𑀺𑀧𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀓𑀺𑀮𑁂𑀲𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀏𑀯 𑀓𑀣𑀺𑀢𑀸. 𑀤𑀼𑀢𑀺𑀬𑀦𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀓𑀣𑀺𑀢𑀸.

𑁪𑁨-𑁪𑁩. 𑀮𑀳𑀼𑀢𑀸𑀢𑀺 𑀮𑀳𑀼𑀢𑀸𑀓𑀸𑀭𑁄. 𑀮𑀳𑀼𑀧𑀭𑀺𑀡𑀸𑀫𑀢𑀸𑀢𑀺 𑀮𑀳𑀼𑀧𑀭𑀺𑀡𑀸𑀫𑁄 𑀏𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀮𑀳𑀼𑀧𑀭𑀺𑀡𑀸𑀫𑀸; 𑀢𑁂𑀲𑀁 𑀪𑀸𑀯𑁄 𑀮𑀳𑀼𑀧𑀭𑀺𑀡𑀸𑀫𑀢𑀸; 𑀲𑀻𑀖𑀁 𑀲𑀻𑀖𑀁 𑀧𑀭𑀺𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑀦𑁆𑀥𑀦𑀢𑀸𑀢𑀺 𑀕𑀭𑀼𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁; 𑀅𑀪𑀸𑀭𑀺𑀬𑀢𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀢𑁆𑀣𑀦𑀢𑀸𑀢𑀺 𑀫𑀸𑀦𑀸𑀤𑀺𑀓𑀺𑀮𑁂𑀲𑀪𑀸𑀭𑀲𑁆𑀲 𑀅𑀪𑀸𑀯𑁂𑀦 𑀅𑀣𑀤𑁆𑀥𑀢𑀸. 𑀏𑀯𑀁 𑀧𑀞𑀫𑁂𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀮𑀳𑀼𑀢𑀸𑀓𑀸𑀭𑁄 𑀓𑀣𑀺𑀢𑁄. 𑀤𑀼𑀢𑀺𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀮𑀳𑀼𑀢𑀸𑀓𑀸𑀭𑁄 𑀓𑀣𑀺𑀢𑁄.

𑁪𑁪-𑁪𑁫. 𑀫𑀼𑀤𑀼𑀢𑀸𑀢𑀺 𑀫𑀼𑀤𑀼𑀪𑀸𑀯𑁄. 𑀫𑀤𑁆𑀤𑀯𑀢𑀸𑀢𑀺 𑀫𑀤𑁆𑀤𑀯𑀁 𑀯𑀼𑀘𑁆𑀘𑀢𑀺 𑀲𑀺𑀦𑀺𑀤𑁆𑀥𑀁, 𑀫𑀝𑁆𑀞𑀁; 𑀫𑀤𑁆𑀤𑀯𑀲𑁆𑀲 𑀪𑀸𑀯𑁄 𑀫𑀤𑁆𑀤𑀯𑀢𑀸. 𑀅𑀓𑀓𑁆𑀔𑀴𑀢𑀸𑀢𑀺 𑀅𑀓𑀓𑁆𑀔𑀴𑀪𑀸𑀯𑁄. 𑀅𑀓𑀣𑀺𑀦𑀢𑀸𑀢𑀺 𑀅𑀓𑀣𑀺𑀦𑀪𑀸𑀯𑁄. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀧𑀘𑁆𑀙𑀺𑀫𑀦𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀫𑀼𑀤𑀼𑀢𑀸𑀓𑀸𑀭𑁄𑀯 𑀓𑀣𑀺𑀢𑁄.

𑁪𑁬-𑁪𑁭. 𑀓𑀫𑁆𑀫𑀜𑁆𑀜𑀢𑀸𑀢𑀺 𑀓𑀫𑁆𑀫𑀦𑀺 𑀲𑀸𑀥𑀼𑀢𑀸; 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀺𑀦𑀺𑀬𑁄𑀕𑀓𑁆𑀔𑀫𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀳𑀺 𑀧𑀼𑀭𑀺𑀫𑀦𑀬𑁂𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀧𑀘𑁆𑀙𑀺𑀫𑀦𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀓𑀫𑁆𑀫𑀦𑀺𑀬𑀸𑀓𑀸𑀭𑁄𑀯 𑀓𑀣𑀺𑀢𑁄.

𑁪𑁮-𑁪𑁯. 𑀧𑀕𑀼𑀡𑀢𑀸𑀢𑀺 𑀧𑀕𑀼𑀡𑀪𑀸𑀯𑁄, 𑀅𑀦𑀸𑀢𑀼𑀭𑀢𑀸 𑀦𑀺𑀕𑁆𑀕𑀺𑀮𑀸𑀦𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑀁 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀧𑀘𑁆𑀙𑀺𑀫𑀦𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀦𑀺𑀕𑁆𑀕𑀺𑀮𑀸𑀦𑀸𑀓𑀸𑀭𑁄𑀯 𑀓𑀣𑀺𑀢𑁄.

𑁫𑁦-𑁫𑁧. 𑀉𑀚𑀼𑀓𑀢𑀸𑀢𑀺 𑀉𑀚𑀼𑀓𑀪𑀸𑀯𑁄, 𑀉𑀚𑀼𑀓𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑀸𑀢𑀺 𑀅𑀢𑁆𑀣𑁄. 𑀉𑀚𑀼𑀓𑀲𑁆𑀲 𑀔𑀦𑁆𑀥𑀢𑁆𑀢𑀬𑀲𑁆𑀲 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀘 𑀪𑀸𑀯𑁄 𑀉𑀚𑀼𑀓𑀢𑀸. 𑀅𑀚𑀺𑀫𑁆𑀳𑀢𑀸𑀢𑀺 𑀕𑁄𑀫𑀼𑀢𑁆𑀢𑀯𑀗𑁆𑀓𑀪𑀸𑀯𑀧𑀝𑀺𑀓𑁆𑀔𑁂𑀧𑁄. 𑀅𑀯𑀗𑁆𑀓𑀢𑀸𑀢𑀺 𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑀪𑀸𑀯𑀧𑀝𑀺𑀓𑁆𑀔𑁂𑀧𑁄. 𑀅𑀓𑀼𑀝𑀺𑀮𑀢𑀸𑀢𑀺 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀪𑀸𑀯𑀧𑀝𑀺𑀓𑁆𑀔𑁂𑀧𑁄.

𑀬𑁄 𑀳𑀺 𑀧𑀸𑀧𑀁 𑀓𑀢𑁆𑀯𑀸𑀯 ‘𑀦 𑀓𑀭𑁄𑀫𑀻’𑀢𑀺 𑀪𑀸𑀲𑀢𑀺, 𑀲𑁄 𑀕𑀦𑁆𑀢𑁆𑀯𑀸 𑀧𑀘𑁆𑀘𑁄𑀲𑀓𑁆𑀓𑀦𑀢𑀸𑀬 ‘𑀕𑁄𑀫𑀼𑀢𑁆𑀢𑀯𑀗𑁆𑀓𑁄’ 𑀦𑀸𑀫 𑀳𑁄𑀢𑀺. 𑀬𑁄 𑀧𑀸𑀧𑀁 𑀓𑀭𑁄𑀦𑁆𑀢𑁄𑀯 ‘𑀪𑀸𑀬𑀸𑀫𑀳𑀁 𑀧𑀸𑀧𑀲𑁆𑀲𑀸’𑀢𑀺 𑀪𑀸𑀲𑀢𑀺, 𑀲𑁄 𑀬𑁂𑀪𑀼𑀬𑁆𑀬𑁂𑀦 𑀓𑀼𑀝𑀺𑀮𑀢𑀸𑀬 ‘𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑁄’ 𑀦𑀸𑀫 𑀳𑁄𑀢𑀺. 𑀬𑁄 𑀧𑀸𑀧𑀁 𑀓𑀭𑁄𑀦𑁆𑀢𑁄𑀯 ‘𑀓𑁄 𑀧𑀸𑀧𑀲𑁆𑀲 𑀦 𑀪𑀸𑀬𑁂𑀬𑁆𑀬𑀸’𑀢𑀺 𑀪𑀸𑀲𑀢𑀺, 𑀲𑁄 𑀦𑀸𑀢𑀺𑀓𑀼𑀝𑀺𑀮𑀢𑀸𑀬 ‘𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑁄’ 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀯𑀸 𑀢𑀻𑀡𑀺𑀧𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀅𑀲𑀼𑀤𑁆𑀥𑀸𑀦𑀺, 𑀲𑁄 ‘𑀕𑁄𑀫𑀼𑀢𑁆𑀢𑀯𑀗𑁆𑀓𑁄’ 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀬𑀸𑀦𑀺 𑀓𑀸𑀦𑀺𑀘𑀺 𑀤𑁆𑀯𑁂, 𑀲𑁄 ‘𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑁄’ 𑀦𑀸𑀫. 𑀬𑀲𑁆𑀲 𑀬𑀁𑀓𑀺𑀜𑁆𑀘𑀺 𑀏𑀓𑀁, 𑀲𑁄 ‘𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑁄 𑀦𑀸𑀫.

𑀤𑀻𑀖𑀪𑀸𑀡𑀓𑀸 𑀧𑀦𑀸𑀳𑀼 𑁋 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀲𑀩𑁆𑀩𑀯𑀬𑁂 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀸𑀲𑀼, 𑀙𑀲𑀼 𑀘 𑀅𑀕𑁄𑀘𑀭𑁂𑀲𑀼 𑀘𑀭𑀢𑀺, 𑀅𑀬𑀁 ‘𑀕𑁄𑀫𑀼𑀢𑁆𑀢𑀯𑀗𑁆𑀓𑁄’ 𑀦𑀸𑀫. 𑀏𑀓𑁄 𑀧𑀞𑀫𑀯𑀬𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀫𑀚𑁆𑀛𑀺𑀫𑀯𑀬𑀧𑀘𑁆𑀙𑀺𑀫𑀯𑀬𑁂𑀲𑀼 𑀧𑀼𑀭𑀺𑀫𑀲𑀤𑀺𑀲𑁄, 𑀅𑀬𑀁 ‘𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑁄’ 𑀦𑀸𑀫. 𑀏𑀓𑁄 𑀧𑀞𑀫𑀯𑀬𑁂 𑀫𑀚𑁆𑀛𑀺𑀫𑀯𑀬𑁂𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀧𑀼𑀭𑀺𑀫𑀲𑀤𑀺𑀲𑁄. 𑀅𑀬𑀁 ‘𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑁄’ 𑀦𑀸𑀫.

𑀢𑀲𑁆𑀲 𑀓𑀺𑀮𑁂𑀲𑀯𑀲𑁂𑀦 𑀏𑀯𑀁 𑀯𑀗𑁆𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀚𑀺𑀫𑁆𑀳𑀢𑀸 𑀯𑀗𑁆𑀓𑀢𑀸 𑀓𑀼𑀝𑀺𑀮𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀚𑀺𑀫𑁆𑀳𑀢𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀔𑀦𑁆𑀥𑀸𑀥𑀺𑀝𑁆𑀞𑀸𑀦𑀸𑀯 𑀤𑁂𑀲𑀦𑀸 𑀓𑀢𑀸. 𑀔𑀦𑁆𑀥𑀸𑀦𑀜𑁆𑀳𑀺 𑀏𑀢𑀸 𑀅𑀚𑀺𑀫𑁆𑀳𑀢𑀸𑀤𑀺𑀓𑀸, 𑀦𑁄 𑀧𑀼𑀕𑁆𑀕𑀮𑀲𑁆𑀲𑀸𑀢𑀺. 𑀏𑀯𑀁 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀼𑀭𑀺𑀫𑀦𑀬𑁂𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀧𑀘𑁆𑀙𑀺𑀫𑀦𑀬𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀉𑀚𑀼𑀢𑀸𑀓𑀸𑀭𑁄𑀯 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀬𑁆𑀯𑀸𑀬𑀁 𑀬𑁂𑀯𑀸𑀧𑀦𑀸𑀢𑀺 𑀅𑀧𑁆𑀧𑀦𑀸𑀯𑀸𑀭𑁄 𑀯𑀼𑀢𑁆𑀢𑁄, 𑀢𑁂𑀦 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀤𑀲𑁆𑀲𑀺𑀢𑀸𑀦𑀁 ‘𑀬𑁂𑀯𑀸𑀧𑀦𑀓𑀸𑀦𑀁’𑀬𑁂𑀯 𑀲𑀗𑁆𑀔𑁂𑀧𑀢𑁄 𑀦𑀺𑀤𑁆𑀤𑁂𑀲𑁄 𑀓𑀣𑀺𑀢𑁄 𑀳𑁄𑀢𑀻𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀢𑁆𑀢𑀸𑀯𑀢𑀸 𑀧𑀼𑀘𑁆𑀙𑀸 𑀲𑀫𑀬𑀦𑀺𑀤𑁆𑀤𑁂𑀲𑁄 𑀥𑀫𑁆𑀫𑀼𑀤𑁆𑀤𑁂𑀲𑁄 𑀅𑀧𑁆𑀧𑀦𑀸𑀢𑀺 𑀉𑀤𑁆𑀤𑁂𑀲𑀯𑀸𑀭𑁂 𑀘𑀢𑀽𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺, 𑀧𑀼𑀘𑁆𑀙𑀸 𑀲𑀫𑀬𑀦𑀺𑀤𑁆𑀤𑁂𑀲𑁄 𑀥𑀫𑁆𑀫𑀼𑀤𑁆𑀤𑁂𑀲𑁄 𑀅𑀧𑁆𑀧𑀦𑀸𑀢𑀺 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘𑀢𑀽𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀻𑀢𑀺 𑀅𑀝𑁆𑀞𑀧𑀭𑀺𑀘𑁆𑀙𑁂𑀤𑀧𑀝𑀺𑀫𑀡𑁆𑀟𑀺𑀢𑁄 𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀸𑀭𑁄 𑀦𑀺𑀝𑁆𑀞𑀺𑀢𑁄𑀯 𑀳𑁄𑀢𑀺.

𑀓𑁄𑀝𑁆𑀞𑀸𑀲𑀯𑀸𑀭𑁄

𑁫𑁮-𑁧𑁨𑁦. 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀲𑀗𑁆𑀕𑀳𑀯𑀸𑀭𑁄 𑀆𑀭𑀤𑁆𑀥𑁄. 𑀲𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 ‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’𑀢𑀺 𑀏𑀯𑀫𑀸𑀤𑀺𑀓𑁄 𑀉𑀤𑁆𑀤𑁂𑀲𑁄. 𑀓𑀢𑀫𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’𑀢𑀺𑀆𑀤𑀺𑀓𑁄 𑀦𑀺𑀤𑁆𑀤𑁂𑀲𑁄. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀓𑁄 𑀧𑀝𑀺𑀦𑀺𑀤𑁆𑀤𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺𑀆𑀤𑀬𑁄 𑀢𑁂𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀧𑀞𑀫𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸, 𑀞𑀧𑁂𑀢𑁆𑀯𑀸 𑀬𑁂𑀯𑀸𑀧𑀦𑀓𑁂, 𑀧𑀸𑀴𑀺𑀆𑀭𑀼𑀴𑁆𑀳𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀬𑁆𑀳𑀫𑀸𑀦𑀸 𑀭𑀸𑀲𑀝𑁆𑀞𑁂𑀦 𑀘𑀢𑁆𑀢𑀸𑀭𑁄𑀯 𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀆𑀬𑀢𑀦𑀝𑁆𑀞𑁂𑀦 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀳𑁄𑀦𑁆𑀢𑀺. 𑀲𑀪𑀸𑀯𑀝𑁆𑀞𑁂𑀦 𑀲𑀼𑀜𑁆𑀜𑀢𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀤𑁆𑀯𑁂𑀯 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦 𑀆𑀳𑀸𑀭𑀝𑁆𑀞𑁂𑀦 𑀢𑀬𑁄𑀯𑁂𑀢𑁆𑀣 𑀥𑀫𑁆𑀫𑀸 𑀆𑀳𑀸𑀭𑀸 𑀳𑁄𑀦𑁆𑀢𑀺. 𑀅𑀯𑀲𑁂𑀲𑀸 𑀦𑁄 𑀆𑀳𑀸𑀭𑀸.

‘𑀓𑀺𑀁 𑀧𑀦𑁂𑀢𑁂 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀯𑀸 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻’𑀢𑀺? ‘𑀦𑁄 𑀦 𑀳𑁄𑀦𑁆𑀢𑀺. 𑀇𑀫𑁂 𑀧𑀦 𑀢𑀣𑀸 𑀘 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀘𑀸𑀢𑀺 𑀲𑀫𑀸𑀦𑁂𑀧𑀺 𑀧𑀘𑁆𑀘𑀬𑀢𑁆𑀢𑁂 𑀅𑀢𑀺𑀭𑁂𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀓𑀣𑀁? 𑀏𑀢𑁂𑀲𑀼 𑀳𑀺 𑀨𑀲𑁆𑀲𑀸𑀳𑀸𑀭𑁄, 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀅𑀯𑀲𑁂𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀺𑀲𑁆𑀲𑁄 𑀘 𑀯𑁂𑀤𑀦𑀸 𑀆𑀳𑀭𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑁂𑀲𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀬𑁄 𑀘 𑀪𑀯𑁂 𑀆𑀳𑀭𑀢𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀢𑁂𑀲𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀜𑁆𑀘 𑀆𑀳𑀭𑀢𑀻’𑀢𑀺. ‘𑀦𑀦𑀼 𑀘 𑀲𑁄 𑀯𑀺𑀧𑀸𑀓𑁄𑀯 𑀇𑀤𑀁 𑀧𑀦 𑀓𑀼𑀲𑀮𑀯𑀺𑀜𑁆𑀜𑀸𑀡’𑀦𑁆𑀢𑀺? ‘𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀯𑀺𑀜𑁆𑀜𑀸𑀡𑀁, 𑀢𑀁𑀲𑀭𑀺𑀓𑁆𑀔𑀢𑀸𑀬 𑀧𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀯𑀸 𑀇𑀫𑁂 𑀢𑀬𑁄 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀇𑀫𑁂 𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲, 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫).

𑀅𑀧𑀭𑁄 𑀦𑀬𑁄 𑁋 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀘 𑀇𑀫𑁂 𑀘 𑀢𑀬𑁄 𑀥𑀫𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄; 𑀦𑀸𑀫𑀓𑀸𑀬𑁂 𑀯𑁂𑀤𑀦𑀸𑀬 𑀨𑀲𑁆𑀲𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸, 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁. 𑀬𑀣𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄, 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, 𑀅𑀦𑀸𑀳𑀸𑀭𑁄 𑀦𑁄 𑀢𑀺𑀝𑁆𑀞𑀢𑀺’’ (𑀲𑀁. 𑀦𑀺. 𑁫.𑁧𑁮𑁩). 𑀢𑀣𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 (𑀲𑀁. 𑀦𑀺. 𑁨.𑁧).

𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀧𑀦 𑀅𑀝𑁆𑀞𑁂𑀯 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀯𑀲𑁂𑀲𑀸. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀧𑀜𑁆𑀘𑁂𑀯 𑀥𑀫𑁆𑀫𑀸 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀧𑀜𑁆𑀘𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀻𑀢𑀺.

𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀘 𑀳𑁂𑀢𑁆𑀯𑀝𑁆𑀞𑁂𑀦 𑀘 𑀧𑀜𑁆𑀘𑁂𑀯 𑀥𑀫𑁆𑀫𑀸 𑀫𑀕𑁆𑀕𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄, 𑀮𑁄𑀓𑀺𑀬𑀘𑀺𑀢𑁆𑀢𑁂 𑀧𑀦 𑀏𑀓𑀓𑁆𑀔𑀡𑁂 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀗𑁆𑀕𑀺𑀓𑁄𑀢𑀺 𑀯𑀼𑀢𑁆𑀢𑁄. ‘𑀦𑀦𑀼 𑀘 ‘‘𑀬𑀣𑀸𑀕𑀢𑀫𑀕𑁆𑀕𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑁆𑀲𑁂𑀢𑀁 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁫) 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘𑀬𑀣𑁂𑀯 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄, 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄𑀧𑀺 𑀢𑀣𑁂𑀯 𑀅𑀝𑁆𑀞𑀗𑁆𑀕𑀺𑀓𑁄’𑀢𑀺 𑀬𑀣𑀸𑀕𑀢𑀯𑀘𑀦𑁂𑀦 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀺𑀢𑀢𑁆𑀢𑀸, 𑀮𑁄𑀓𑀺𑀬𑀫𑀕𑁆𑀕𑁂𑀦𑀸𑀧𑀺 𑀅𑀝𑁆𑀞𑀗𑁆𑀕𑀺𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀲𑀼𑀢𑁆𑀢𑀦𑁆𑀢𑀺𑀓𑀤𑁂𑀲𑀦𑀸 𑀦𑀸𑀫 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧). 𑀅𑀬𑀁 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸. 𑀮𑁄𑀓𑀺𑀬𑀘𑀺𑀢𑁆𑀢𑀲𑁆𑀫𑀺𑀜𑁆𑀳𑀺 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀏𑀓𑀓𑁆𑀔𑀡𑁂 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 ‘𑀧𑀜𑁆𑀘𑀗𑁆𑀕𑀺𑀓𑁄’𑀯 𑀯𑀼𑀢𑁆𑀢𑁄𑀢𑀺.

𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀧𑀦 𑀲𑀢𑁆𑀢𑁂𑀯 𑀥𑀫𑁆𑀫𑀸 𑀩𑀮𑀸𑀦𑀺 𑀳𑁄𑀦𑁆𑀢𑀺. 𑀫𑀽𑀮𑀝𑁆𑀞𑁂𑀦 𑀢𑀬𑁄𑀯 𑀥𑀫𑁆𑀫𑀸 𑀳𑁂𑀢𑀽. 𑀨𑀼𑀲𑀦𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀨𑀲𑁆𑀲𑁄. 𑀯𑁂𑀤𑀬𑀺𑀢𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀯𑁂𑀤𑀦𑀸. 𑀲𑀜𑁆𑀚𑀸𑀦𑀦𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀲𑀜𑁆𑀜𑀸. 𑀘𑁂𑀢𑀬𑀦𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀘𑁂𑀢𑀦𑀸. 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀘𑀺𑀢𑁆𑀢𑀁. 𑀭𑀸𑀲𑀝𑁆𑀞𑁂𑀦 𑀘𑁂𑀯 𑀯𑁂𑀤𑀬𑀺𑀢𑀝𑁆𑀞𑁂𑀦 𑀘 𑀏𑀓𑁄𑀯 𑀥𑀫𑁆𑀫𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀭𑀸𑀲𑀝𑁆𑀞𑁂𑀦 𑀘 𑀲𑀜𑁆𑀚𑀸𑀦𑀦𑀝𑁆𑀞𑁂𑀦 𑀘 𑀏𑀓𑁄𑀯 𑀥𑀫𑁆𑀫𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀭𑀸𑀲𑀝𑁆𑀞𑁂𑀦 𑀘 𑀅𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀘 𑀏𑀓𑁄𑀯 𑀥𑀫𑁆𑀫𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀭𑀸𑀲𑀝𑁆𑀞𑁂𑀦 𑀘 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀘 𑀏𑀓𑁄𑀯 𑀥𑀫𑁆𑀫𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀯𑀺𑀚𑀸𑀦𑀦𑀝𑁆𑀞𑁂𑀦 𑀘𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀆𑀬𑀢𑀦𑀝𑁆𑀞𑁂𑀦 𑀘 𑀏𑀓𑀫𑁂𑀯 𑀫𑀦𑀸𑀬𑀢𑀦𑀁. 𑀯𑀺𑀚𑀸𑀦𑀦𑀝𑁆𑀞𑁂𑀦 𑀘 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀘 𑀏𑀓𑀫𑁂𑀯 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀯𑀺𑀚𑀸𑀦𑀦𑀝𑁆𑀞𑁂𑀦 𑀘 𑀲𑀪𑀸𑀯𑀲𑀼𑀜𑁆𑀜𑀢𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀘 𑀏𑀓𑁄𑀯 𑀥𑀫𑁆𑀫𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫 𑀳𑁄𑀢𑀺, 𑀦 𑀅𑀯𑀲𑁂𑀲𑀸. 𑀞𑀧𑁂𑀢𑁆𑀯𑀸 𑀧𑀦 𑀘𑀺𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀏𑀓𑀁 𑀥𑀫𑁆𑀫𑀸𑀬𑀢𑀦𑀫𑁂𑀯, 𑀏𑀓𑀸 𑀘 𑀥𑀫𑁆𑀫𑀥𑀸𑀢𑀼𑀬𑁂𑀯 𑀳𑁄𑀢𑀻𑀢𑀺.

𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀫𑀺𑀦𑀸 𑀧𑀦 𑀅𑀧𑁆𑀧𑀦𑀸𑀯𑀸𑀭𑁂𑀦 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀬𑁂𑀯𑀸𑀧𑀦𑀓𑀸𑀯 𑀲𑀗𑁆𑀕𑀳𑀺𑀢𑀸. 𑀬𑀣𑀸 𑀘 𑀇𑀥 𑀏𑀯𑀁 𑀲𑀩𑁆𑀩𑀢𑁆𑀣. 𑀇𑀢𑁄 𑀧𑀭𑀜𑁆𑀳𑀺 𑀏𑀢𑁆𑀢𑀓𑀫𑁆𑀧𑀺 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫. 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑁂𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀗𑁆𑀕𑀳𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀓𑁄𑀝𑁆𑀞𑀸𑀲𑀯𑀸𑀭𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑀲𑀼𑀜𑁆𑀜𑀢𑀯𑀸𑀭𑁄

𑁧𑁨𑁧-𑁧𑁪𑁫. 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀲𑀼𑀜𑁆𑀜𑀢𑀯𑀸𑀭𑁄 𑀆𑀭𑀤𑁆𑀥𑁄. 𑀲𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁆𑀯𑀺𑀥𑀸 𑀯𑀯𑀢𑁆𑀣𑀺𑀢𑁄. 𑀢𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁂 ‘𑀥𑀫𑁆𑀫𑀸 𑀳𑁄𑀦𑁆𑀢𑀻’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀘𑀢𑀼𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀘 ‘𑀘𑀢𑁆𑀢𑀸𑀭𑁄 𑀤𑁆𑀯𑁂 𑀢𑀬𑁄’𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦 𑀯𑀼𑀢𑁆𑀢𑁄. 𑀓𑀲𑁆𑀫𑀸? 𑀲𑀗𑁆𑀕𑀳𑀯𑀸𑀭𑁂 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀢𑀢𑁆𑀣 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀸𑀬𑁂𑀯 𑀳𑀺 𑀇𑀥𑀸𑀧𑀺 𑀯𑀼𑀢𑁆𑀢𑀸. 𑀦 𑀳𑁂𑀢𑁆𑀣 𑀲𑀢𑁆𑀢𑁄 𑀯𑀸 𑀪𑀸𑀯𑁄 𑀯𑀸 𑀅𑀢𑁆𑀢𑀸 𑀯𑀸 𑀉𑀧𑀮𑀩𑁆𑀪𑀢𑀺. 𑀥𑀫𑁆𑀫𑀸𑀯 𑀏𑀢𑁂 𑀥𑀫𑁆𑀫𑀫𑀢𑁆𑀢𑀸 𑀅𑀲𑀸𑀭𑀸 𑀅𑀧𑀭𑀺𑀡𑀸𑀬𑀓𑀸𑀢𑀺 𑀇𑀫𑀺𑀲𑁆𑀲𑀸 𑀲𑀼𑀜𑁆𑀜𑀢𑀸𑀬 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀧𑀞𑀫𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸 𑀲𑀪𑀸𑀯𑀝𑁆𑀞𑁂𑀦 𑀥𑀫𑁆𑀫𑀸 𑀏𑀯 𑀳𑁄𑀦𑁆𑀢𑀺. 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀪𑀸𑀯𑁄 𑀯𑀸 𑀧𑁄𑀲𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀳𑁄𑀢𑀻𑀢𑀺. 𑀢𑀣𑀸 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀸𑀯 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀛𑀸𑀦𑀢𑁄 𑀅𑀜𑁆𑀜𑀁 𑀛𑀸𑀦𑀗𑁆𑀕𑀁, 𑀫𑀕𑁆𑀕𑀢𑁄 𑀯𑀸 𑀅𑀜𑁆𑀜𑀁 𑀫𑀕𑁆𑀕𑀗𑁆𑀕𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀥 ‘𑀛𑀸𑀦𑀁 𑀳𑁄𑀢𑀺, 𑀫𑀕𑁆𑀕𑁄 𑀳𑁄𑀢𑀺’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀳𑀺 𑀛𑀸𑀦𑀫𑁂𑀯 𑀳𑁂𑀢𑁆𑀯𑀝𑁆𑀞𑁂𑀦 𑀫𑀕𑁆𑀕𑁄𑀯 𑀳𑁄𑀢𑀺. 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀪𑀸𑀯𑁄 𑀯𑀸𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀦𑀺𑀤𑁆𑀤𑁂𑀲𑀯𑀸𑀭𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯𑀸𑀢𑀺.

𑀲𑀼𑀜𑁆𑀜𑀢𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀦𑀺𑀝𑁆𑀞𑀺𑀢𑀸 𑀘 𑀢𑀻𑀳𑀺 𑀫𑀳𑀸𑀯𑀸𑀭𑁂𑀳𑀺 𑀫𑀡𑁆𑀟𑁂𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲

𑀧𑀞𑀫𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀤𑀼𑀢𑀺𑀬𑀘𑀺𑀢𑁆𑀢𑀁

𑁧𑁪𑁬. 𑀇𑀤𑀸𑀦𑀺 𑀤𑀼𑀢𑀺𑀬𑀘𑀺𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀓𑀢𑀫𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀧𑀞𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀫𑀳𑀸𑀯𑀸𑀭𑀸 𑀏𑀯, 𑀧𑀞𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑀁 𑀲𑀩𑁆𑀩𑀧𑀤𑀸𑀦𑀁 𑀅𑀢𑁆𑀣𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀫𑁆𑀧𑀺 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫. 𑀇𑀫𑀲𑁆𑀫𑀺𑀁 𑀢𑀸𑀯 𑀤𑀼𑀢𑀺𑀬𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁂 𑀲𑀲𑀗𑁆𑀔𑀸𑀭𑁂𑀦𑀸𑀢𑀺 𑀇𑀤𑀫𑁂𑀯 𑀅𑀧𑀼𑀩𑁆𑀩𑀁. 𑀢𑀲𑁆𑀲𑀢𑁆𑀣𑁄 𑁋 𑀲𑀳 𑀲𑀗𑁆𑀔𑀸𑀭𑁂𑀦𑀸𑀢𑀺 𑀲𑀲𑀗𑁆𑀔𑀸𑀭𑁄. 𑀢𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀉𑀧𑀸𑀬𑁂𑀦 𑀧𑀘𑁆𑀘𑀬𑀕𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀳𑀺 𑀆𑀭𑀫𑁆𑀫𑀡𑀸𑀤𑀺𑀦𑀸 𑀧𑀘𑁆𑀘𑀬𑀕𑀡𑁂𑀦 𑀧𑀞𑀫𑀁 𑀫𑀳𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦𑁂𑀯 𑀲𑀧𑁆𑀧𑀬𑁄𑀕𑁂𑀦 𑀲𑀉𑀧𑀸𑀬𑁂𑀦 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺.

𑀢𑀲𑁆𑀲𑁂𑀯𑀁 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀲𑀫𑀸𑀦𑁄 𑀘𑁂𑀢𑀺𑀬𑀗𑁆𑀕𑀡𑀲𑀫𑁆𑀫𑀚𑁆𑀚𑀦𑀯𑁂𑀮𑀸𑀬 𑀯𑀸 𑀣𑁂𑀭𑀼𑀧𑀝𑁆𑀞𑀸𑀦𑀯𑁂𑀮𑀸𑀬 𑀯𑀸 𑀲𑀫𑁆𑀧𑀢𑁆𑀢𑀸𑀬, 𑀥𑀫𑁆𑀫𑀲𑀯𑀦𑀤𑀺𑀯𑀲𑁂 𑀯𑀸 𑀲𑀫𑁆𑀧𑀢𑁆𑀢𑁂 ‘𑀫𑀬𑁆𑀳𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑁄 𑀅𑀢𑀺𑀤𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀦 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀢𑀺 𑁋 ‘𑀪𑀺𑀓𑁆𑀔𑀼𑀲𑁆𑀲 𑀦𑀸𑀫 𑀘𑁂𑀢𑀺𑀬𑀗𑁆𑀕𑀡𑀁 𑀯𑀸 𑀣𑁂𑀭𑀼𑀧𑀝𑁆𑀞𑀸𑀦𑀁 𑀯𑀸 𑀥𑀫𑁆𑀫𑀲𑀯𑀦𑀁 𑀯𑀸 𑀅𑀕𑀦𑁆𑀢𑀼𑀁 𑀅𑀲𑀸𑀭𑀼𑀧𑁆𑀧𑀁, 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀕𑀘𑁆𑀙𑀢𑀺. 𑀢𑀲𑁆𑀲𑁂𑀯𑀁 𑀅𑀢𑁆𑀢𑀦𑁄 𑀧𑀬𑁄𑀕𑁂𑀦 𑀯𑀸, 𑀧𑀭𑁂𑀦 𑀯𑀸 𑀯𑀢𑁆𑀢𑀸𑀤𑀻𑀦𑀁 𑀅𑀓𑀭𑀡𑁂 𑀘 𑀆𑀤𑀻𑀦𑀯𑀁 𑀓𑀭𑀡𑁂 𑀘 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀺𑀬𑀫𑀸𑀦𑀲𑁆𑀲, 𑀦𑀺𑀕𑁆𑀕𑀳𑀯𑀲𑁂𑀦𑁂𑀯 𑀯𑀸 ‘𑀏𑀳𑀺, 𑀇𑀤𑀁 𑀓𑀭𑁄𑀳𑀻’𑀢𑀺 𑀓𑀸𑀭𑀺𑀬𑀫𑀸𑀦𑀲𑁆𑀲 𑀉𑀧𑁆𑀧𑀦𑁆𑀦𑀁 𑀓𑀼𑀲𑀮𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦 𑀧𑀘𑁆𑀘𑀬𑀕𑀡𑁂𑀦 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀻𑀢𑀺.

𑀤𑀼𑀢𑀺𑀬𑀘𑀺𑀢𑁆𑀢𑀁.

𑀢𑀢𑀺𑀬𑀘𑀺𑀢𑁆𑀢𑀁

𑁧𑁪𑁭-𑁧𑁪𑁮. 𑀢𑀢𑀺𑀬𑁂 𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀳𑀺 𑀆𑀭𑀫𑁆𑀫𑀡𑁂 𑀳𑀝𑁆𑀞𑀧𑀳𑀝𑁆𑀞𑀁 𑀳𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀓𑀜𑀸𑀡𑀁 𑀧𑀦𑁂𑀢𑁆𑀣 𑀦 𑀳𑁄𑀢𑀺. 𑀢𑀲𑁆𑀫𑀸 𑀇𑀤𑀁 𑀤𑀳𑀭𑀓𑀼𑀫𑀸𑀭𑀓𑀸𑀦𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘𑀅𑀬𑀁 𑀣𑁂𑀭𑁄 𑀫𑀬𑁆𑀳’𑀦𑁆𑀢𑀺 𑀯𑀦𑁆𑀤𑀦𑀓𑀸𑀮𑁂, 𑀢𑁂𑀦𑁂𑀯 𑀦𑀬𑁂𑀦 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑀯𑀦𑀓𑀸𑀮𑀸𑀤𑀻𑀲𑀼 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸 𑀧𑀭𑀺𑀳𑀸𑀬𑀢𑀺. 𑀲𑁂𑀲𑀁 𑀧𑀸𑀓𑀢𑀺𑀓𑀫𑁂𑀯𑀸𑀢𑀺.

𑀢𑀢𑀺𑀬𑀘𑀺𑀢𑁆𑀢𑀁.

𑀘𑀢𑀼𑀢𑁆𑀣𑀘𑀺𑀢𑁆𑀢𑀁

𑁧𑁪𑁯. 𑀘𑀢𑀼𑀢𑁆𑀣𑀘𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀧𑀦 𑀲𑀲𑀗𑁆𑀔𑀸𑀭𑁂𑀦𑀸𑀢𑀺 𑀯𑀘𑀦𑀢𑁄 𑀬𑀤𑀸 𑀫𑀸𑀢𑀸𑀧𑀺𑀢𑀭𑁄 𑀤𑀳𑀭𑀓𑀼𑀫𑀸𑀭𑀓𑁂 𑀲𑀻𑀲𑁂 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀸𑀤𑀻𑀦𑀺 𑀯𑀦𑁆𑀤𑀸𑀧𑁂𑀦𑁆𑀢𑀺 𑀢𑁂 𑀘 𑀅𑀦𑀢𑁆𑀣𑀺𑀓𑀸 𑀲𑀫𑀸𑀦𑀸𑀧𑀺 𑀳𑀝𑁆𑀞𑀧𑀳𑀝𑁆𑀞𑀸𑀯 𑀯𑀦𑁆𑀤𑀦𑁆𑀢𑀺. 𑀏𑀯𑀭𑀽𑀧𑁂 𑀓𑀸𑀮𑁂 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀘𑀺𑀢𑁆𑀢𑀁.

𑀧𑀜𑁆𑀘𑀫𑀘𑀺𑀢𑁆𑀢𑀁

𑁧𑁫𑁦. 𑀧𑀜𑁆𑀘𑀫𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀆𑀭𑀫𑁆𑀫𑀡𑁂 𑀫𑀚𑁆𑀛𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀘𑁆𑀙𑀺𑀦𑁆𑀤𑀓𑀜𑀸𑀡𑀁 𑀧𑀦𑁂𑀢𑁆𑀣 𑀳𑁄𑀢𑀺𑀬𑁂𑀯. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀛𑀸𑀦𑀘𑀢𑀼𑀓𑁆𑀓𑁂 𑀉𑀧𑁂𑀓𑁆𑀔𑀸 𑀳𑁄𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀝𑁆𑀞𑀓𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑁂𑀤𑀦𑀸𑀤𑀺𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁂 𑀲𑀸𑀢𑀸𑀲𑀸𑀢𑀲𑀼𑀔𑀤𑀼𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀤𑁂𑀲𑀦𑀁 𑀓𑀢𑁆𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀓𑀣𑀺𑀢𑀸. 𑀢𑀲𑁆𑀲𑀸 𑀫𑀚𑁆𑀛𑀢𑁆𑀢𑀮𑀓𑁆𑀔𑀡𑁂 𑀇𑀦𑁆𑀤𑀢𑁆𑀢𑀓𑀭𑀡𑀯𑀲𑁂𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀝𑀺𑀧𑀸𑀝𑀺𑀬𑀸 𑀘 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀻𑀢𑀺 𑀧𑀭𑀺𑀳𑀻𑀦𑀸. 𑀢𑀲𑁆𑀫𑀸 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀸𑀴𑀺𑀆𑀭𑀼𑀴𑁆𑀳𑀸 𑀧𑀜𑁆𑀘𑀧𑀡𑁆𑀡𑀸𑀲𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀲𑀩𑁆𑀩𑀯𑀸𑀭𑁂𑀲𑀼 𑀘 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀫𑀘𑀺𑀢𑁆𑀢𑀁.

𑀙𑀝𑁆𑀞𑀘𑀺𑀢𑁆𑀢𑀸𑀤𑀺

𑁧𑁫𑁬-𑁯. 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑁂𑀯𑀮𑀜𑁆𑀳𑀺 𑀇𑀫𑁂𑀲𑀼 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀜𑁆𑀘𑁂𑀯 𑀧𑀻𑀢𑀺𑀧𑀭𑀺𑀳𑀸𑀦𑀜𑁆𑀘 𑀳𑁄𑀢𑀺. 𑀲𑁂𑀲𑀁 𑀲𑀤𑁆𑀥𑀺𑀁 𑀉𑀧𑁆𑀧𑀢𑁆𑀢𑀺𑀦𑀬𑁂𑀦 𑀢𑀸𑀤𑀺𑀲𑀫𑁂𑀯. 𑀓𑀭𑀼𑀡𑀸𑀫𑀼𑀤𑀺𑀢𑀸 𑀧𑀭𑀺𑀓𑀫𑁆𑀫𑀓𑀸𑀮𑁂𑀧𑀺 𑀳𑀺 𑀇𑀫𑁂𑀲𑀁 𑀉𑀧𑁆𑀧𑀢𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀸 𑀏𑀯. 𑀇𑀫𑀸𑀦𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀸𑀫.

𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀸𑀤𑀺𑀓𑀣𑀸

𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀤𑀲𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀤𑀻𑀧𑁂𑀢𑀩𑁆𑀩𑀸𑀦𑀺. 𑀓𑀣𑀁? 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀲𑀻𑀮𑀫𑀬𑀁… 𑀪𑀸𑀯𑀦𑀸𑀫𑀬𑀁… 𑀅𑀧𑀘𑀺𑀢𑀺𑀲𑀳𑀕𑀢𑀁… 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁… 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁… 𑀅𑀩𑁆𑀪𑀦𑀼𑀫𑁄𑀤𑀦𑀁… 𑀤𑁂𑀲𑀦𑀸𑀫𑀬𑀁… 𑀲𑀯𑀦𑀫𑀬𑀁… 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀢𑀺 𑀇𑀫𑀸𑀦𑀺 𑀤𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀦𑀸𑀫. 𑀢𑀢𑁆𑀣 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁. 𑀧𑀼𑀜𑁆𑀜𑀓𑀺𑀭𑀺𑀬𑀸 𑀘 𑀲𑀸 𑀢𑁂𑀲𑀁 𑀢𑁂𑀲𑀁 𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀼 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼, 𑀭𑀽𑀧𑀸𑀤𑀻𑀲𑀼 𑀯𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼, 𑀅𑀦𑁆𑀦𑀸𑀤𑀻𑀲𑀼 𑀯𑀸 𑀤𑀲𑀲𑀼 𑀤𑀸𑀦𑀯𑀢𑁆𑀣𑀽𑀲𑀼, 𑀢𑀁 𑀢𑀁 𑀤𑁂𑀦𑁆𑀢𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀉𑀧𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀪𑀸𑀕𑁂, 𑀧𑀭𑀺𑀘𑁆𑀘𑀸𑀕𑀓𑀸𑀮𑁂, 𑀧𑀘𑁆𑀙𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀘𑀸𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀸 𑀘𑁂𑀢𑀦𑀸 ‘𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫.

𑀧𑀜𑁆𑀘𑀲𑀻𑀮𑀁 𑀅𑀝𑁆𑀞𑀲𑀻𑀮𑀁 𑀤𑀲𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲, 𑀧𑀩𑁆𑀩𑀚𑀦𑁆𑀢𑀲𑁆𑀲, ‘𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀯𑀢’𑀫𑁆𑀳𑀺, ‘𑀲𑀸𑀥𑀼 𑀲𑀸𑀥𑀽’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲, 𑀧𑀸𑀢𑀺𑀫𑁄𑀓𑁆𑀔𑀁 𑀲𑀁𑀯𑀭𑀦𑁆𑀢𑀲𑁆𑀲, 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀆𑀧𑀸𑀣𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀲𑀁𑀯𑀭𑀦𑁆𑀢𑀲𑁆𑀲, 𑀆𑀚𑀻𑀯𑀁 𑀲𑁄𑀥𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀘𑁂𑀢𑀦𑀸 ‘𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀪𑀸𑀯𑁂𑀦𑁆𑀢𑀲𑁆𑀲…𑀧𑁂… 𑀫𑀦𑀁… 𑀭𑀽𑀧𑁂…𑀧𑁂… 𑀥𑀫𑁆𑀫𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁,… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, …𑀧𑁂… 𑀭𑀽𑀧𑀲𑀜𑁆𑀜𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀪𑀸𑀯𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀅𑀝𑁆𑀞𑀢𑀺𑀁𑀲𑀸𑀬 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸 𑀲𑀩𑁆𑀩𑀸𑀧𑀺 𑀘𑁂𑀢𑀦𑀸 ‘𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫.

𑀫𑀳𑀮𑁆𑀮𑀓𑀁 𑀧𑀦 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀅𑀪𑀺𑀯𑀸𑀤𑀦𑀫𑀕𑁆𑀕𑀲𑀫𑁆𑀧𑀤𑀸𑀦𑀸𑀤𑀺𑀯𑀲𑁂𑀦 ‘𑀅𑀧𑀘𑀺𑀢𑀺𑀲𑀳𑀕𑀢𑀁’ 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀟𑁆𑀠𑀢𑀭𑀸𑀦𑀁 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀓𑀭𑀡𑀯𑀲𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀸𑀫𑁂 𑀪𑀺𑀓𑁆𑀔𑀁 𑀲𑀫𑀸𑀤𑀧𑁂𑀢𑁆𑀯𑀸 𑀉𑀧𑀲𑀁𑀳𑀭𑀡𑀯𑀲𑁂𑀦, ‘𑀕𑀘𑁆𑀙 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀁 𑀆𑀳𑀭𑀸’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀢𑁆𑀢𑀸𑀳𑀭𑀡𑀸𑀤𑀺𑀯𑀲𑁂𑀦 𑀘 𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀓𑀸𑀮𑁂 ‘𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁’ 𑀯𑁂𑀤𑀺𑀢𑀩𑁆𑀩𑀁.

𑀤𑀸𑀦𑀁 𑀤𑀢𑁆𑀯𑀸 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 ‘𑀅𑀲𑀼𑀓𑀲𑁆𑀲 𑀦𑀸𑀫 𑀧𑀢𑁆𑀢𑀺 𑀳𑁄𑀢𑀽’𑀢𑀺 𑀯𑀸, ‘𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑁄𑀢𑀽’𑀢𑀺 𑀯𑀸 𑀧𑀢𑁆𑀢𑀺𑀁 𑀤𑀤𑀢𑁄 ‘𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁’ 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀁 𑀧𑀦𑁂𑀯𑀁 𑀧𑀢𑁆𑀢𑀺𑀁 𑀤𑀤𑀢𑁄 𑀧𑀼𑀜𑁆𑀜𑀓𑁆𑀔𑀬𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀬𑀣𑀸 𑀧𑀦 𑀏𑀓𑀁 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑀢𑁄 𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑀲𑁆𑀲 𑀧𑀞𑀫𑀤𑀻𑀧𑁄 𑀔𑀻𑀡𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄; 𑀧𑀼𑀭𑀺𑀫𑀸𑀮𑁄𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀸𑀮𑁄𑀓𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀅𑀢𑀺𑀫𑀳𑀸 𑀳𑁄𑀢𑀺. 𑀏𑀯𑀫𑁂𑀯 𑀧𑀢𑁆𑀢𑀺𑀁 𑀤𑀤𑀢𑁄 𑀧𑀭𑀺𑀳𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀯𑀼𑀟𑁆𑀠𑀺𑀬𑁂𑀯 𑀧𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀭𑁂𑀳𑀺 𑀤𑀺𑀦𑁆𑀦𑀸𑀬 𑀧𑀢𑁆𑀢𑀺𑀬𑀸 𑀯𑀸 𑀅𑀜𑁆𑀜𑀸𑀬 𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 ‘𑀲𑀸𑀥𑀼 𑀲𑀸𑀥𑀽’𑀢𑀺 𑀅𑀦𑀼𑀫𑁄𑀤𑀦𑀯𑀲𑁂𑀦 ‘𑀅𑀩𑁆𑀪𑀦𑀼𑀫𑁄𑀤𑀦𑀁’ 𑀯𑁂𑀤𑀺𑀢𑀩𑁆𑀩𑀁.

𑀏𑀓𑁄 ‘𑀏𑀯𑀁 𑀫𑀁 𑀥𑀫𑁆𑀫𑀓𑀣𑀺𑀓𑁄𑀢𑀺 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀮𑀸𑀪𑀕𑀭𑀼𑀓𑁄 𑀳𑀼𑀢𑁆𑀯𑀸 𑀤𑁂𑀲𑁂𑀢𑀺, 𑀢𑀁 𑀦 𑀫𑀳𑀧𑁆𑀨𑀮𑀁. 𑀏𑀓𑁄 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀥𑀫𑁆𑀫𑀁 𑀅𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺, 𑀇𑀤𑀁 ‘𑀤𑁂𑀲𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫.

𑀏𑀓𑁄 𑀲𑀼𑀡𑀦𑁆𑀢𑁄 ‘𑀇𑀢𑀺 𑀫𑀁 𑀲𑀤𑁆𑀥𑁄𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀲𑀼𑀡𑀸𑀢𑀺, 𑀢𑀁 𑀦 𑀫𑀳𑀧𑁆𑀨𑀮𑀁. 𑀏𑀓𑁄 ‘𑀏𑀯𑀁 𑀫𑁂 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀳𑀺𑀢𑀨𑀭𑀡𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀇𑀤𑀁 ‘𑀲𑀯𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫.

𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲 ‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫. 𑀤𑀻𑀖𑀪𑀸𑀡𑀓𑀸 𑀧𑀦𑀸𑀳𑀼 𑁋 ‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀲𑀩𑁆𑀩𑁂𑀲𑀁 𑀦𑀺𑀬𑀫𑀮𑀓𑁆𑀔𑀡𑀁, 𑀬𑀁𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀪𑀸𑀯𑁂𑀦𑁂𑀯 𑀫𑀳𑀧𑁆𑀨𑀮𑀁 𑀳𑁄𑀢𑀻’𑀢𑀺.

𑀏𑀢𑁂𑀲𑀼 𑀧𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀤𑀸𑀦𑀫𑀬𑀁 𑀢𑀸𑀯 ‘𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀤𑀸𑀦𑀁 𑀤𑀤𑀢𑁄 𑀉𑀧𑁆𑀧𑀚𑁆𑀚𑀢𑀺, ‘𑀤𑀺𑀦𑁆𑀦𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀧𑀼𑀩𑁆𑀩𑀘𑁂𑀢𑀦𑀁 𑀫𑀼𑀜𑁆𑀘𑀦𑀘𑁂𑀢𑀦𑀁 𑀅𑀧𑀭𑀘𑁂𑀢𑀦𑀦𑁆𑀢𑀺 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀏𑀓𑀢𑁄 𑀓𑀢𑁆𑀯𑀸 ‘𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫 𑀳𑁄𑀢𑀺. 𑀲𑀻𑀮𑀫𑀬𑀫𑁆𑀧𑀺 ‘𑀲𑀻𑀮𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀲𑀻𑀮𑀧𑀽𑀭𑀡𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺, ‘𑀧𑀽𑀭𑀺𑀢𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀫𑁆𑀧𑀺 ‘𑀤𑀺𑀝𑁆𑀞𑀺𑀁 𑀉𑀚𑀼𑀓𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, ‘𑀤𑀺𑀝𑁆𑀞𑀺 𑀫𑁂 𑀉𑀚𑀼𑀓𑀸 𑀓𑀢𑀸’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’ 𑀦𑀸𑀫 𑀳𑁄𑀢𑀺.

𑀲𑀼𑀢𑁆𑀢𑁂 𑀧𑀦 𑀢𑀻𑀡𑀺𑀬𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀆𑀕𑀢𑀸𑀦𑀺. 𑀢𑁂𑀲𑀼 𑀇𑀢𑀭𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀘𑀺𑀢𑀺𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀳𑀺 𑀲𑀻𑀮𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀅𑀩𑁆𑀪𑀦𑀼𑀫𑁄𑀤𑀦𑀸𑀦𑀺 𑀤𑀸𑀦𑀫𑀬𑁂. 𑀤𑁂𑀲𑀦𑀸𑀲𑀯𑀦𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀸𑀦𑀺 𑀪𑀸𑀯𑀦𑀸𑀫𑀬𑁂. 𑀬𑁂 𑀧𑀦 ‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀲𑀩𑁆𑀩𑁂𑀲𑀁 𑀦𑀺𑀬𑀫𑀮𑀓𑁆𑀔𑀡’𑀦𑁆𑀢𑀺 𑀯𑀤𑀦𑁆𑀢𑀺 𑀢𑁂𑀲𑀁 𑀢𑀁 𑀢𑀻𑀲𑀼𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀢𑀸𑀦𑀺 𑀲𑀗𑁆𑀔𑁂𑀧𑀢𑁄 𑀢𑀻𑀡𑀺 𑀳𑀼𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲 𑀳𑁄𑀦𑁆𑀢𑀺.

𑀢𑁂𑀲𑀼 ‘𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀝𑁆𑀞𑀦𑁆𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦𑁂𑀯 𑀘𑀺𑀦𑁆𑀢𑁂𑀢𑀺; 𑀤𑀤𑀫𑀸𑀦𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀤𑁂𑀢𑀺; ‘𑀤𑀸𑀦𑀁 𑀫𑁂 𑀤𑀺𑀦𑁆𑀦’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀲𑀻𑀮𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺; 𑀲𑀻𑀮𑀁 𑀧𑀽𑀭𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀽𑀭𑁂𑀢𑀺, ‘𑀲𑀻𑀮𑀁 𑀫𑁂 𑀧𑀽𑀭𑀺𑀢’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀪𑀸𑀯𑀦𑀁 𑀪𑀸𑀯𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺; 𑀪𑀸𑀯𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀪𑀸𑀯𑁂𑀢𑀺; ‘𑀪𑀸𑀯𑀦𑀸 𑀫𑁂 𑀪𑀸𑀯𑀺𑀢𑀸’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺.

‘𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺, 𑀓𑀭𑁄𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀓𑀭𑁄𑀢𑀺, ‘𑀓𑀢𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺, 𑀓𑀭𑁄𑀦𑁆𑀢𑁄𑀧𑀺, ‘𑀓𑀢𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀧𑀢𑁆𑀢𑀺𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺, 𑀤𑀤𑀦𑁆𑀢𑁄𑀧𑀺, ‘𑀤𑀺𑀦𑁆𑀦𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺, ‘𑀧𑀢𑁆𑀢𑀺𑀁 𑀯𑀸 𑀲𑁂𑀲𑀓𑀼𑀲𑀮𑀁 𑀯𑀸 𑀅𑀦𑀼𑀫𑁄𑀤𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺; 𑀅𑀦𑀼𑀫𑁄𑀤𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀅𑀦𑀼𑀫𑁄𑀤𑀢𑀺, ‘𑀅𑀦𑀼𑀫𑁄𑀤𑀺𑀢𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺, 𑀤𑁂𑀲𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀤𑁂𑀲𑁂𑀢𑀺, ‘𑀤𑁂𑀲𑀺𑀢𑁄 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺, 𑀲𑀼𑀡𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀲𑀼𑀡𑀸𑀢𑀺, ‘𑀲𑀼𑀢𑁄 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. ‘𑀤𑀺𑀝𑁆𑀞𑀺𑀁 𑀉𑀚𑀼𑀓𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑁂𑀦 𑀘𑀺𑀦𑁆𑀢𑁂𑀢𑀺, 𑀉𑀚𑀼𑀁 𑀓𑀭𑁄𑀦𑁆𑀢𑁄 𑀧𑀦 𑀘𑀢𑀼𑀦𑁆𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀭𑁄𑀢𑀺, ‘𑀤𑀺𑀝𑁆𑀞𑀺 𑀫𑁂 𑀉𑀚𑀼𑀓𑀸 𑀓𑀢𑀸’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀝𑁆𑀞𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀭𑀺 𑀅𑀦𑀦𑁆𑀢𑀸𑀦𑀺 𑀦𑀸𑀫 𑀕𑀳𑀺𑀢𑀸𑀦𑀺. 𑀘𑀢𑁆𑀢𑀸𑀭𑀺 𑀳𑀺 𑀅𑀦𑀦𑁆𑀢𑀸𑀦𑀺 𑁋 𑀆𑀓𑀸𑀲𑁄 𑀅𑀦𑀦𑁆𑀢𑁄, 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸𑀦𑀺, 𑀲𑀢𑁆𑀢𑀦𑀺𑀓𑀸𑀬𑁄 𑀅𑀦𑀦𑁆𑀢𑁄, 𑀩𑀼𑀤𑁆𑀥𑀜𑁆𑀜𑀸𑀡𑀁 𑀅𑀦𑀦𑁆𑀢𑀁. 𑀆𑀓𑀸𑀲𑀲𑁆𑀲 𑀳𑀺 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀯𑀸 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀓𑁆𑀔𑀺𑀡𑀸𑀲𑀼 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀸 𑀬𑁄𑀚𑀦𑀲𑀢𑀸𑀦𑀺 𑀏𑀢𑁆𑀢𑀓𑀸𑀦𑀺 𑀯𑀸 𑀬𑁄𑀚𑀦𑀲𑀳𑀲𑁆𑀲𑀸𑀦𑀻𑀢𑀺 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀲𑀺𑀦𑁂𑀭𑀼𑀫𑀢𑁆𑀢𑀫𑁆𑀧𑀺 𑀅𑀬𑁄𑀓𑀽𑀝𑀁 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀔𑀺𑀢𑁆𑀢𑀁 𑀪𑀲𑁆𑀲𑁂𑀣𑁂𑀯, 𑀦𑁄 𑀧𑀢𑀺𑀝𑁆𑀞𑀁 𑀮𑀪𑁂𑀣, 𑀏𑀯𑀁 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀦𑀸𑀫.

𑀘𑀓𑁆𑀓𑀯𑀸𑀴𑀸𑀦𑀫𑁆𑀧𑀺 𑀲𑀢𑁂𑀳𑀺 𑀯𑀸 𑀲𑀳𑀲𑁆𑀲𑁂𑀳𑀺 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀲𑀘𑁂𑀧𑀺 𑀳𑀺 𑀅𑀓𑀦𑀺𑀝𑁆𑀞𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀸, 𑀤𑀴𑁆𑀳𑀣𑀸𑀫𑀥𑀦𑀼𑀕𑁆𑀕𑀳𑀲𑁆𑀲 𑀮𑀳𑀼𑀓𑁂𑀦 𑀲𑀭𑁂𑀦 𑀢𑀺𑀭𑀺𑀬𑀁 𑀢𑀸𑀮𑀘𑁆𑀙𑀸𑀬𑀁 𑀅𑀢𑀺𑀓𑁆𑀓𑀫𑀦𑀫𑀢𑁆𑀢𑁂𑀦 𑀓𑀸𑀮𑁂𑀦 𑀘𑀓𑁆𑀓𑀯𑀸𑀴𑀲𑀢𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀫𑀦𑀲𑀫𑀢𑁆𑀣𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 ‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’𑀢𑀺 𑀢𑁂𑀦 𑀚𑀯𑁂𑀦 𑀥𑀸𑀯𑁂𑀬𑁆𑀬𑀼𑀁, 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀅𑀤𑀺𑀲𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀼𑀁, 𑀏𑀯𑀁 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸𑀦𑀺 𑀦𑀸𑀫.

𑀏𑀢𑁆𑀢𑀓𑁂𑀲𑀼 𑀧𑀦 𑀘𑀓𑁆𑀓𑀯𑀸𑀴𑁂𑀲𑀼 𑀉𑀤𑀓𑀝𑁆𑀞𑀓𑀣𑀮𑀝𑁆𑀞𑀓𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀏𑀯𑀁 𑀲𑀢𑁆𑀢𑀦𑀺𑀓𑀸𑀬𑁄 𑀅𑀦𑀦𑁆𑀢𑁄 𑀦𑀸𑀫. 𑀢𑀢𑁄𑀧𑀺 𑀩𑀼𑀤𑁆𑀥𑀜𑀸𑀡𑀁 𑀅𑀦𑀦𑁆𑀢𑀫𑁂𑀯.

𑀏𑀯𑀁 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀏𑀓𑀲𑁆𑀲 𑀩𑀳𑀽𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀳𑀽𑀦𑀫𑁆𑀧𑀺 𑀩𑀳𑀽𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀓𑀸𑀫𑀸𑀯𑀘𑀭𑀝𑁆𑀞𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀝𑁆𑀞𑁂𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀝𑁆𑀞𑁂𑀦 𑀅𑀲𑀗𑁆𑀔𑀸𑀭𑀺𑀓𑀝𑁆𑀞𑁂𑀦 𑀏𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀏𑀓𑀫𑁂𑀯 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀢𑀺𑀳𑁂𑀢𑀼𑀓𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀲𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀁…𑀧𑁂… 𑀢𑀣𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀤𑁆𑀯𑀺𑀳𑁂𑀢𑀼𑀓𑀁 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀸𑀢𑀼𑀮𑀸𑀬 𑀢𑀼𑀮𑀬𑀫𑀸𑀦𑁄 𑀯𑀺𑀬, 𑀢𑀼𑀫𑁆𑀩𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀦𑀫𑀸𑀦𑁄 𑀯𑀺𑀬, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘𑀅𑀝𑁆𑀞𑁂𑀯𑁂𑀢𑀸𑀦𑀻’𑀢𑀺 𑀲𑀭𑀺𑀓𑁆𑀔𑀝𑁆𑀞𑁂𑀦 𑀅𑀝𑁆𑀞𑁂𑀯 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀧𑀼𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀙𑀩𑁆𑀩𑀺𑀥𑁂𑀦 𑀧𑀼𑀜𑁆𑀜𑀸𑀬𑀽𑀳𑀦𑀁 𑀦𑀸𑀫 𑀕𑀳𑀺𑀢𑀁. 𑀧𑀼𑀜𑁆𑀜𑀜𑁆𑀳𑀺 𑀅𑀢𑁆𑀣𑀺 𑀲𑀬𑀁𑀓𑀸𑀭𑀁 𑀅𑀢𑁆𑀣𑀺 𑀧𑀭𑀁𑀓𑀸𑀭𑀁, 𑀅𑀢𑁆𑀣𑀺 𑀲𑀸𑀳𑀢𑁆𑀣𑀺𑀓𑀁 𑀅𑀢𑁆𑀣𑀺 𑀆𑀡𑀢𑁆𑀢𑀺𑀓𑀁, 𑀅𑀢𑁆𑀣𑀺 𑀲𑀫𑁆𑀧𑀚𑀸𑀦𑀓𑀢𑀁 𑀅𑀢𑁆𑀣𑀺 𑀅𑀲𑀫𑁆𑀧𑀚𑀸𑀦𑀓𑀢𑀦𑁆𑀢𑀺.

𑀢𑀢𑁆𑀣 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀢𑀁 ‘𑀲𑀬𑀁𑀓𑀸𑀭𑀁’ 𑀦𑀸𑀫. 𑀧𑀭𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀓𑀢𑀁 ‘𑀧𑀭𑀁𑀓𑀸𑀭𑀁’ 𑀦𑀸𑀫. 𑀲𑀳𑀢𑁆𑀣𑁂𑀦 𑀓𑀢𑀁 ‘𑀲𑀸𑀳𑀢𑁆𑀣𑀺𑀓𑀁’ 𑀦𑀸𑀫. 𑀆𑀡𑀸𑀧𑁂𑀢𑁆𑀯𑀸 𑀓𑀸𑀭𑀺𑀢𑀁 ‘𑀆𑀡𑀢𑁆𑀢𑀺𑀓𑀁’ 𑀦𑀸𑀫. 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀁 ‘𑀲𑀫𑁆𑀧𑀚𑀸𑀦𑀓𑀢𑀁’ 𑀦𑀸𑀫. 𑀓𑀫𑁆𑀫𑀫𑁆𑀧𑀺 𑀨𑀮𑀫𑁆𑀧𑀺 𑀅𑀚𑀸𑀦𑀺𑀢𑁆𑀯𑀸 𑀓𑀢𑀁 ‘𑀅𑀲𑀫𑁆𑀧𑀚𑀸𑀦𑀓𑀢𑀁’ 𑀦𑀸𑀫. 𑀢𑁂𑀲𑀼 𑀲𑀬𑀁𑀓𑀸𑀭𑀁 𑀓𑀭𑁄𑀦𑁆𑀢𑁄𑀧𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦𑁂𑀯 𑀓𑀭𑁄𑀢𑀺. 𑀧𑀭𑀁𑀓𑀸𑀭𑀁 𑀓𑀭𑁄𑀦𑁆𑀢𑁄𑀧𑀺, 𑀲𑀳𑀢𑁆𑀣𑁂𑀦 𑀓𑀭𑁄𑀦𑁆𑀢𑁄𑀧𑀺, 𑀆𑀡𑀸𑀧𑁂𑀢𑁆𑀯𑀸 𑀓𑀭𑁄𑀦𑁆𑀢𑁄𑀧𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦𑁂𑀯 𑀓𑀭𑁄𑀢𑀺. 𑀲𑀫𑁆𑀧𑀚𑀸𑀦𑀓𑀭𑀡𑀁 𑀧𑀦 𑀘𑀢𑀽𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀳𑁄𑀢𑀺. 𑀅𑀲𑀫𑁆𑀧𑀚𑀸𑀦𑀓𑀭𑀡𑀁 𑀘𑀢𑀽𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺.

𑀅𑀧𑀭𑀸𑀧𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀢𑀲𑁆𑀲𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑁄 𑀕𑀳𑀺𑀢𑀸 𑁋 𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑀺𑀓𑀢𑀸, 𑀘𑁂𑀢𑀦𑀸𑀫𑀳𑀢𑁆𑀢𑀁, 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺, 𑀕𑀼𑀡𑀸𑀢𑀺𑀭𑁂𑀓𑀢𑀸𑀢𑀺. 𑀢𑀢𑁆𑀣 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀸 𑀧𑀘𑁆𑀘𑀬𑀸 ‘𑀥𑀫𑁆𑀫𑀺𑀓𑀸’ 𑀦𑀸𑀫. 𑀲𑀤𑁆𑀤𑀳𑀺𑀢𑁆𑀯𑀸 𑀑𑀓𑀧𑁆𑀧𑁂𑀢𑁆𑀯𑀸 𑀤𑀤𑀢𑁄 𑀧𑀦 ‘𑀘𑁂𑀢𑀦𑀸𑀫𑀳𑀢𑁆𑀢𑀁’ 𑀦𑀸𑀫 𑀳𑁄𑀢𑀺. 𑀔𑀻𑀡𑀸𑀲𑀯𑀪𑀸𑀯𑁄 ‘𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺’ 𑀦𑀸𑀫. 𑀔𑀻𑀡𑀸𑀲𑀯𑀲𑁆𑀲𑁂𑀯 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀪𑀸𑀯𑁄 ‘𑀕𑀼𑀡𑀸𑀢𑀺𑀭𑁂𑀓𑀢𑀸’ 𑀦𑀸𑀫. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀧𑀼𑀡𑁆𑀡𑀓𑀲𑁂𑀝𑁆𑀞𑀺𑀓𑀸𑀓𑀯𑀮𑀺𑀬𑀲𑀼𑀫𑀦𑀫𑀸𑀮𑀸𑀓𑀸𑀭𑀸𑀤𑀻𑀦𑀁 (𑀥. 𑀧. 𑀅𑀝𑁆𑀞. 𑁨.𑁨𑁨𑁫 𑀧𑀼𑀡𑁆𑀡𑀤𑀸𑀲𑀻𑀯𑀢𑁆𑀣𑀼) (𑀥. 𑀧. 𑀅𑀝𑁆𑀞. 𑁧.𑁬𑁭 𑀲𑀼𑀫𑀦𑀫𑀸𑀮𑀸𑀓𑀸𑀭𑀯𑀢𑁆𑀣𑀼) 𑀯𑀺𑀬.

𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑀁 𑀲𑀩𑁆𑀩𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 ‘𑀘𑀺𑀢𑁆𑀢’𑀦𑁆𑀢𑀺 𑀓𑀭𑀺𑀢𑁆𑀯𑀸 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀏𑀓𑀫𑁂𑀯 𑀳𑁄𑀢𑀺. 𑀯𑁂𑀤𑀦𑀸𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀜𑀸𑀡𑀯𑀺𑀪𑀢𑁆𑀢𑀺𑀤𑁂𑀲𑀦𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀜𑁆𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀫𑀳𑀸𑀘𑀺𑀢𑁆𑀢𑀜𑁆𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀝𑁆𑀞𑁂𑀦 𑀅𑀲𑀗𑁆𑀔𑀸𑀭𑀺𑀓𑀝𑁆𑀞𑁂𑀦 𑀘 𑀏𑀓𑀫𑁂𑀯 𑀳𑁄𑀢𑀺. 𑀢𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑀺𑀓𑀁, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑀺𑀓𑀜𑁆𑀘𑀸𑀢𑀺. 𑀏𑀯𑀁 𑀜𑀸𑀡𑀯𑀺𑀪𑀢𑁆𑀢𑀺𑀤𑁂𑀲𑀦𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁂 𑀧𑀦𑁂𑀢𑀲𑁆𑀫𑀺𑀁 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀪𑀢𑁆𑀢𑀺𑀢𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑀸𑀭𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀲𑀗𑁆𑀔𑀸𑀭𑀺𑀓𑀸𑀦𑀻𑀢𑀺 𑀅𑀝𑁆𑀞𑁂𑀯 𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀕𑀡𑀻𑀯𑀭𑁄 𑀫𑀼𑀦𑀺𑀲𑁂𑀝𑁆𑀞𑁄 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀻𑀢𑀺.

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬

𑀓𑀸𑀫𑀸𑀯𑀘𑀭𑀓𑀼𑀲𑀮𑀦𑀺𑀤𑁆𑀤𑁂𑀲𑁄 𑀲𑀫𑀢𑁆𑀢𑁄.

𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸

𑀘𑀢𑀼𑀓𑁆𑀓𑀦𑀬𑁄 𑀧𑀞𑀫𑀚𑁆𑀛𑀸𑀦𑀁

𑁧𑁬𑁦. 𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀭𑀽𑀧𑀁 𑀯𑀼𑀘𑁆𑀘𑀢𑀺 𑀭𑀽𑀧𑀪𑀯𑁄. 𑀉𑀧𑀧𑀢𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺 𑀲𑀜𑁆𑀚𑀸𑀢𑀺. 𑀫𑀕𑁆𑀕𑁄𑀢𑀺 𑀉𑀧𑀸𑀬𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀢𑀁 𑀉𑀧𑀧𑀢𑁆𑀢𑀺𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀺 𑀚𑀦𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀫𑀕𑁆𑀕𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀫𑀕𑁆𑀕𑁂𑀦 𑀭𑀽𑀧𑀪𑀯𑁂 𑀉𑀧𑀧𑀢𑁆𑀢𑀺 𑀳𑁄𑀢𑀺 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺 𑀲𑀜𑁆𑀚𑀸𑀢𑀺, 𑀢𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺. 𑀓𑀺𑀁 𑀧𑀦𑁂𑀢𑁂𑀦 𑀦𑀺𑀬𑀫𑀢𑁄 𑀭𑀽𑀧𑀪𑀯𑁂 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺? 𑀦 𑀳𑁄𑀢𑀺. ‘‘𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁫) 𑀏𑀯𑀁 𑀯𑀼𑀢𑁆𑀢𑁂𑀦 𑀳𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂𑀦 𑀭𑀽𑀧𑀪𑀯𑀸𑀢𑀺𑀓𑁆𑀓𑀫𑁄𑀧𑀺 𑀳𑁄𑀢𑀺. 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀧𑀦 𑀇𑀢𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀢𑁂𑀦 𑀯𑀼𑀢𑁆𑀢𑀁 ‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’𑀢𑀺. 𑀅𑀢𑁆𑀣𑀢𑁄 𑀘𑀸𑀬𑀁 𑀫𑀕𑁆𑀕𑁄 𑀦𑀸𑀫 𑀘𑁂𑀢𑀦𑀸𑀧𑀺 𑀳𑁄𑀢𑀺, 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺, 𑀢𑀤𑀼𑀪𑀬𑀫𑁆𑀧𑀺. ‘‘𑀦𑀺𑀭𑀬𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀚𑀸𑀦𑀸𑀫𑀺 𑀦𑀺𑀭𑀬𑀕𑀸𑀫𑀺𑀜𑁆𑀘 𑀫𑀕𑁆𑀕’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁩) 𑀳𑀺 𑀏𑀢𑁆𑀣 𑀘𑁂𑀢𑀦𑀸 𑀫𑀕𑁆𑀕𑁄 𑀦𑀸𑀫.

‘‘𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦𑀁, 𑀥𑀫𑁆𑀫𑀸 𑀏𑀢𑁂 𑀲𑀧𑁆𑀧𑀼𑀭𑀺𑀲𑀸𑀦𑀼𑀬𑀸𑀢𑀸;

𑀏𑀢𑀜𑁆𑀳𑀺 𑀫𑀕𑁆𑀕𑀁 𑀤𑀺𑀯𑀺𑀬𑀁 𑀯𑀤𑀦𑁆𑀢𑀺, 𑀏𑀢𑁂𑀦 𑀳𑀺 𑀕𑀘𑁆𑀙𑀢𑀺 𑀤𑁂𑀯𑀮𑁄𑀓’’𑀦𑁆𑀢𑀺. (𑀅. 𑀦𑀺. 𑁮.𑁩𑁨);

𑀏𑀢𑁆𑀣 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀕𑁆𑀕𑁄 𑀦𑀸𑀫. ‘‘𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄, 𑀅𑀬𑀁 𑀧𑀝𑀺𑀧𑀤𑀸’’𑀢𑀺 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁧𑁬𑁧 𑀆𑀤𑀬𑁄) 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀫𑀕𑁆𑀕𑁄 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 ‘𑀛𑀸𑀦’𑀦𑁆𑀢𑀺 𑀯𑀘𑀦𑀢𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀲𑁆𑀫𑀸 𑀧𑀦 𑀛𑀸𑀦𑀘𑁂𑀢𑀦𑀸 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀢𑀲𑁆𑀫𑀸 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀝𑁆𑀝𑀦𑁆𑀢𑀺𑀬𑁂𑀯.

𑀪𑀸𑀯𑁂𑀢𑀻𑀢𑀺 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀺. 𑀅𑀬𑀁 𑀢𑀸𑀯 𑀇𑀥 𑀪𑀸𑀯𑀦𑀸𑀬 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣 𑀧𑀦 𑀉𑀧𑀲𑀕𑁆𑀕𑀯𑀲𑁂𑀦 𑀲𑀫𑁆𑀪𑀸𑀯𑀦𑀸 𑀧𑀭𑀺𑀪𑀸𑀯𑀦𑀸 𑀯𑀺𑀪𑀸𑀯𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 ‘‘𑀇𑀥𑀼𑀤𑀸𑀬𑀺 𑀫𑀫 𑀲𑀸𑀯𑀓𑀸 𑀅𑀥𑀺𑀲𑀻𑀮𑁂 𑀲𑀫𑁆𑀪𑀸𑀯𑁂𑀦𑁆𑀢𑀺 𑁋 𑀲𑀻𑀮𑀯𑀸 𑀲𑀫𑀡𑁄 𑀕𑁄𑀢𑀫𑁄, 𑀧𑀭𑀫𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀫. 𑀦𑀺. 𑁨.𑁨𑁪𑁩) 𑀅𑀬𑀁 𑀲𑀫𑁆𑀪𑀸𑀯𑀦𑀸 𑀦𑀸𑀫; 𑀑𑀓𑀧𑁆𑀧𑀦𑀸𑀢𑀺 𑀅𑀢𑁆𑀣𑁄. ‘‘𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄, 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸, 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁬) 𑀅𑀬𑀁 𑀧𑀭𑀺𑀪𑀸𑀯𑀦𑀸 𑀦𑀸𑀫; 𑀯𑀸𑀲𑀦𑀸𑀢𑀺 𑀅𑀢𑁆𑀣𑁄. ‘‘𑀇𑀗𑁆𑀖 𑀭𑀽𑀧𑀁 𑀯𑀺𑀪𑀸𑀯𑁂𑀳𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑁂𑀳𑀻’’𑀢𑀺 𑀅𑀬𑀁 𑀯𑀺𑀪𑀸𑀯𑀦𑀸 𑀦𑀸𑀫; 𑀅𑀦𑁆𑀢𑀭𑀥𑀸𑀧𑀦𑀸𑀢𑀺 𑀅𑀢𑁆𑀣𑁄. ‘‘𑀧𑀼𑀦 𑀘𑀧𑀭𑀁, 𑀉𑀤𑀸𑀬𑀺, 𑀅𑀓𑁆𑀔𑀸𑀢𑀸 𑀫𑀬𑀸 𑀲𑀸𑀯𑀓𑀸𑀦𑀁 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑀸 𑀫𑁂 𑀲𑀸𑀯𑀓𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁨𑁪𑁭), 𑀅𑀬𑀁 𑀧𑀦 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸 𑀦𑀸𑀫. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘𑀪𑀸𑀯𑁂𑀢𑀻𑀢𑀺 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀻’𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣, 𑀬𑀣𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀥𑀫𑁆𑀫𑀧𑀼𑀩𑁆𑀩𑀗𑁆𑀕𑀫𑀸 𑀤𑁂𑀲𑀦𑀸 𑀓𑀢𑀸 𑀢𑀣𑀸 𑀅𑀓𑀢𑁆𑀯𑀸, 𑀧𑀼𑀕𑁆𑀕𑀮𑀧𑀼𑀩𑁆𑀩𑀗𑁆𑀕𑀫𑀸 𑀓𑀢𑀸𑀢𑀺? 𑀧𑀝𑀺𑀧𑀤𑀸𑀬 𑀲𑀸𑀥𑁂𑀢𑀩𑁆𑀩𑀢𑁄. 𑀇𑀤𑀜𑁆𑀳𑀺 𑀘𑀢𑀽𑀲𑀼 𑀧𑀝𑀺𑀧𑀤𑀸𑀲𑀼 𑀅𑀜𑁆𑀜𑀢𑀭𑀸𑀬 𑀲𑀸𑀥𑁂𑀢𑀩𑁆𑀩𑀁; 𑀦 𑀓𑀸𑀫𑀸𑀯𑀘𑀭𑀁 𑀯𑀺𑀬 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀧𑀤𑀸 𑀘 𑀦𑀸𑀫𑁂𑀲𑀸 𑀧𑀝𑀺𑀧𑀦𑁆𑀦𑀓𑁂 𑀲𑀢𑀺 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀼𑀕𑁆𑀕𑀮𑀧𑀼𑀩𑁆𑀩𑀗𑁆𑀕𑀫𑀁 𑀤𑁂𑀲𑀦𑀁 𑀓𑀭𑁄𑀦𑁆𑀢𑁄 ‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’𑀢𑀺 𑀆𑀳.

𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸, 𑀯𑀺𑀦𑀸 𑀳𑀼𑀢𑁆𑀯𑀸, 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀬𑁄 𑀧𑀦𑀸𑀬𑀫𑁂𑀢𑁆𑀣 ‘𑀏𑀯’-𑀓𑀸𑀭𑁄 𑀲𑁄 𑀦𑀺𑀬𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀦𑀺𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀁, 𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑀁 𑀤𑀻𑀧𑁂𑀢𑀺. 𑀓𑀣𑀁? ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’𑀢𑀺 𑀏𑀯𑀜𑁆𑀳𑀺 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺 𑁋 𑀦𑀽𑀦𑀺𑀫𑀲𑁆𑀲 𑀓𑀸𑀫𑀸 𑀧𑀝𑀺𑀧𑀓𑁆𑀔𑀪𑀽𑀢𑀸 𑀬𑁂𑀲𑀼 𑀲𑀢𑀺 𑀇𑀤𑀁 𑀦 𑀧𑀯𑀢𑁆𑀢𑀢𑀺, 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄𑀪𑀸𑀲𑁄 𑀯𑀺𑀬? 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺 𑀑𑀭𑀺𑀫𑀢𑀻𑀭𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀫𑀢𑀻𑀭𑀲𑁆𑀲𑁂𑀯. 𑀢𑀲𑁆𑀫𑀸 𑀦𑀺𑀬𑀫𑀁 𑀓𑀭𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘𑀓𑀲𑁆𑀫𑀸 𑀧𑀦𑁂𑀲 𑀧𑀼𑀩𑁆𑀩𑀧𑀤𑁂𑀬𑁂𑀯 𑀯𑀼𑀢𑁆𑀢𑁄, 𑀦 𑀉𑀢𑁆𑀢𑀭𑀧𑀤𑁂? 𑀓𑀺𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀁𑀦𑀺𑀲𑁆𑀲𑀭𑀡𑀢𑁄 𑀳𑀺 𑀧𑀼𑀩𑁆𑀩𑀧𑀤𑁂 𑀏𑀲 𑀯𑀼𑀢𑁆𑀢𑁄. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀳𑀺 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀘 𑀇𑀤𑀁 𑀛𑀸𑀦𑀁 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀬𑀣𑀸𑀳 𑁋 ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨; 𑀤𑀻. 𑀦𑀺. 𑁩.𑁩𑁫𑁩). 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦, 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧) 𑀏𑀢𑁆𑀣 ‘𑀏𑀯’-𑀓𑀸𑀭𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁, 𑀢𑀲𑁆𑀫𑀸 ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺 𑀏𑀯𑀁 𑀧𑀤𑀤𑁆𑀯𑀬𑁂𑀧𑀺 𑀏𑀲 𑀤𑀝𑁆𑀞𑀩𑁆𑀩𑁄. 𑀧𑀤𑀤𑁆𑀯𑀬𑁂𑀧𑀺 𑀘 𑀓𑀺𑀜𑁆𑀘𑀸𑀧𑀺 𑀯𑀺𑀯𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀘𑀦𑁂𑀦 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀣𑀸𑀧𑀺 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄𑀢𑀺 𑀢𑀬𑁄 𑀏𑀯 𑀇𑀥 𑀤𑀝𑁆𑀞𑀩𑁆𑀩𑀸.

𑀓𑀸𑀫𑁂𑀳𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁂 𑀘 𑀦𑀺𑀤𑁆𑀤𑁂𑀲𑁂 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧) 𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸, 𑀬𑁂 𑀘 𑀢𑀢𑁆𑀣𑁂𑀯 𑀯𑀺𑀪𑀗𑁆𑀕𑁂 𑀘 ‘‘𑀙𑀦𑁆𑀤𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄; 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄; 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧; 𑀯𑀺𑀪. 𑁫𑁬𑁪) 𑀏𑀯𑀁 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀺𑀢𑀸𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀯𑀸 𑀯𑀺𑀯𑀺𑀘𑁆𑀘𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀏𑀯 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑀭𑀺𑀕𑁆𑀕𑀳𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀘 𑀏𑀢𑁂𑀲𑀁 𑀧𑀞𑀫𑁂𑀦 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁; 𑀧𑀞𑀫𑁂𑀦 𑀮𑁄𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀩𑀸𑀮𑀪𑀸𑀯𑀲𑁆𑀲; 𑀧𑀞𑀫𑁂𑀦 𑀘 𑀧𑀬𑁄𑀕𑀲𑀼𑀤𑁆𑀥𑀺, 𑀤𑀼𑀢𑀺𑀬𑁂𑀦 𑀆𑀲𑀬𑀧𑁄𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀏𑀲 𑀢𑀸𑀯 𑀦𑀬𑁄 ‘𑀓𑀸𑀫𑁂𑀳𑀻’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂.

𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 ‘𑀙𑀦𑁆𑀤𑁄𑀢𑀺 𑀘 𑀭𑀸𑀕𑁄’𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁄 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯 𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁪) 𑀛𑀸𑀦𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀪𑁂𑀤𑀢𑁄 𑀘𑀲𑁆𑀲 ‘𑀓𑀸𑀫𑀢𑁄’𑀢𑀺 𑀅𑀯𑀢𑁆𑀯𑀸 ‘𑀓𑀸𑀫𑁂𑀳𑀻’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 ‘‘𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀉𑀧𑀭𑀺𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺. 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑁂𑀯 𑀧𑀝𑀺𑀧𑀓𑁆𑀔𑀸𑀦𑀺, 𑀯𑀺𑀤𑁆𑀥𑀁𑀲𑀓𑀸𑀦𑀺, 𑀯𑀺𑀖𑀸𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲, 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺 𑀧𑁂𑀝𑀓𑁂 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. ‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀻𑀯𑀭𑀡𑀸𑀦𑀁. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀧𑀞𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀤𑀼𑀢𑀺𑀬𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀁; 𑀢𑀣𑀸 𑀧𑀞𑀫𑁂𑀦 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲 𑀮𑁄𑀪𑀲𑁆𑀲, 𑀤𑀼𑀢𑀺𑀬𑁂𑀦 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀁 𑀤𑁄𑀲𑀫𑁄𑀳𑀸𑀦𑀁. 𑀑𑀖𑀸𑀤𑀻𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀞𑀫𑁂𑀦 𑀓𑀸𑀫𑁄𑀖𑀓𑀸𑀫𑀬𑁄𑀕𑀓𑀸𑀫𑀸𑀲𑀯𑀓𑀸𑀫𑀼𑀧𑀸𑀤𑀸𑀦𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀦𑀁, 𑀤𑀼𑀢𑀺𑀬𑁂𑀦 𑀅𑀯𑀲𑁂𑀲𑀑𑀖𑀬𑁄𑀕𑀸𑀲𑀯𑀉𑀧𑀸𑀤𑀸𑀦𑀕𑀦𑁆𑀣𑀲𑀁𑀬𑁄𑀚𑀦𑀸𑀦𑀁. 𑀧𑀞𑀫𑁂𑀦 𑀘 𑀢𑀡𑁆𑀳𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀅𑀯𑀺𑀚𑁆𑀚𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘. 𑀅𑀧𑀺𑀘 𑀧𑀞𑀫𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀅𑀝𑁆𑀞𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁, 𑀤𑀼𑀢𑀺𑀬𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯 ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺 𑀏𑀢𑁆𑀣 𑀅𑀢𑁆𑀣𑀧𑁆𑀧𑀓𑀸𑀲𑀦𑀸.

𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑁂𑀦 𑀅𑀧𑁆𑀧𑀦𑀸𑀲𑀫𑁆𑀧𑀬𑁄𑀕𑀢𑁄 𑀭𑀽𑀧𑀸𑀯𑀘𑀭𑀪𑀸𑀯𑀧𑁆𑀧𑀢𑁆𑀢𑁂𑀦 𑀯𑀺𑀢𑀓𑁆𑀓𑁂𑀦 𑀘𑁂𑀯 𑀯𑀺𑀘𑀸𑀭𑁂𑀦 𑀘 𑀲𑀳 𑀯𑀢𑁆𑀢𑀢𑀺. 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦 𑀘 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁫) 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀺𑀯𑁂𑀓𑀚𑀦𑁆𑀢𑀺 𑁋 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄. 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀸, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂, 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑁋 𑀏𑀢𑁆𑀣 𑀧𑀻𑀢𑀺𑀲𑀼𑀔𑀸𑀦𑀺 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸𑀦𑁂𑀯. 𑀢𑁂𑀲𑀼 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀜𑁆𑀘𑀯𑀺𑀥𑀸𑀬 𑀧𑀻𑀢𑀺𑀬𑀸 𑀬𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀫𑀽𑀮𑀁 𑀳𑀼𑀢𑁆𑀯𑀸 𑀯𑀟𑁆𑀠𑀫𑀸𑀦𑀸 𑀲𑀫𑀸𑀥𑀺𑀲𑀫𑁆𑀧𑀬𑁄𑀕𑀁 𑀕𑀢𑀸 𑀨𑀭𑀡𑀸𑀧𑀻𑀢𑀺 𑁋 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀧𑀻𑀢𑀻𑀢𑀺. 𑀅𑀬𑀜𑁆𑀘 𑀧𑀻𑀢𑀺 𑀇𑀤𑀜𑁆𑀘 𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀥𑀫𑁆𑀫𑀯𑀺𑀦𑀬𑀸𑀤𑀬𑁄 𑀯𑀺𑀬. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀫𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂, 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁. 𑀬𑀣𑁂𑀯 𑀳𑀺 𑀛𑀸𑀦𑀁 𑀏𑀯𑀁 𑀧𑀻𑀢𑀺𑀲𑀼𑀔𑀫𑁆𑀧𑁂𑀢𑁆𑀣 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀺. 𑀢𑀜𑁆𑀘𑀲𑁆𑀲 𑀅𑀢𑁆𑀣𑀺. 𑀢𑀲𑁆𑀫𑀸 𑀏𑀓𑀧𑀤𑁂𑀦𑁂𑀯 ‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’𑀦𑁆𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀢𑀢𑁆𑀣𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀧𑀞𑀫𑀁 𑀛𑀸𑀦𑀦𑁆𑀢𑀺 𑁋 𑀏𑀢𑁆𑀣 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁. 𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀞𑀫𑀁. 𑀧𑀞𑀫𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺𑀧𑀺 𑀧𑀞𑀫𑀁. 𑀇𑀤𑀁 𑀧𑀦 𑀦 𑀏𑀓𑀦𑁆𑀢𑀮𑀓𑁆𑀔𑀡𑀁. 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀆𑀤𑀺𑀁 𑀧𑀸𑀧𑁂𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀓𑁆𑀓𑁄𑀢𑀺. 𑀏𑀯𑀁 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀬𑀝𑁆𑀞𑁂𑀦 𑀧𑀦 𑀧𑀞𑀫𑀁 𑀦𑀸𑀫 𑀳𑁄𑀢𑀺.

𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀛𑀸𑀦𑀁 𑁋 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀣𑀯𑀺𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀧𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑁆𑀲 𑀉𑀧𑀦𑀺𑀚𑁆𑀛𑀸𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀯𑀺𑀧𑀲𑁆𑀲𑀦𑀸𑀬 𑀓𑀢𑀓𑀺𑀘𑁆𑀘𑀲𑁆𑀲 𑀫𑀕𑁆𑀕𑁂𑀦 𑀇𑀚𑁆𑀛𑀦𑀢𑁄 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀨𑀮𑀁 𑀧𑀦 𑀦𑀺𑀭𑁄𑀥𑀲𑀘𑁆𑀘𑀁 𑀢𑀣𑀮𑀓𑁆𑀔𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫. 𑀢𑁂𑀲𑀼 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀧𑀘𑁆𑀘𑀦𑀻𑀓𑀚𑁆𑀛𑀸𑀧𑀦𑀢𑁄 𑀯𑀸 𑀛𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀉𑀧𑀕𑀦𑁆𑀢𑁆𑀯𑀸, 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸 𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀨𑀼𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸’’𑀢𑀺 (𑀯𑀺𑀪. 𑁫𑁭𑁦) 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀏𑀯𑀫𑁂𑀯𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀳𑀭𑀢𑀻𑀢𑀺 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀇𑀢𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀚𑁆𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀇𑀭𑀺𑀬𑀦𑀁 𑀯𑀼𑀢𑁆𑀢𑀺𑀁 𑀧𑀸𑀮𑀦𑀁 𑀬𑀧𑀦𑀁 𑀬𑀸𑀧𑀦𑀁 𑀘𑀸𑀭𑀁 𑀯𑀺𑀳𑀸𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑁋 ‘‘𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁧𑁨, 𑁫𑁭𑁧).

𑀧𑀣𑀯𑀺𑀓𑀲𑀺𑀡𑀦𑁆𑀢𑀺 𑀏𑀢𑁆𑀣 𑀧𑀣𑀯𑀺𑀫𑀡𑁆𑀟𑀮𑀫𑁆𑀧𑀺 𑀲𑀓𑀮𑀝𑁆𑀞𑁂𑀦 𑀧𑀣𑀯𑀺𑀓𑀲𑀺𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀮𑀤𑁆𑀥𑀁 𑀦𑀺𑀫𑀺𑀢𑁆𑀢𑀫𑁆𑀧𑀺. 𑀧𑀣𑀯𑀺𑀓𑀲𑀺𑀡𑀦𑀺𑀫𑀺𑀢𑁆𑀢𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀫𑁆𑀧𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀣𑀯𑀺𑀓𑀲𑀺𑀡𑀲𑀗𑁆𑀔𑀸𑀢𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀦 𑀧𑀣𑀯𑀺𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀓𑀺𑀁 𑀓𑀢𑁆𑀢𑀩𑁆𑀩𑀦𑁆𑀢𑀺? 𑀆𑀤𑀺𑀢𑁄 𑀢𑀸𑀯 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀻𑀮𑀸𑀦𑀺 𑀯𑀺𑀲𑁄𑀥𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦, 𑀬𑁆𑀯𑀸𑀲𑁆𑀲 𑀆𑀯𑀸𑀲𑀸𑀤𑀻𑀲𑀼 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀴𑀺𑀬𑀸 𑀆𑀕𑀢𑁂𑀲𑀼 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁂𑀦 𑀲𑀘𑀲𑁆𑀲 𑀇𑀤𑀁 𑀧𑀣𑀯𑀺𑀓𑀲𑀺𑀡𑀁 𑀅𑀦𑀼𑀓𑀽𑀮𑀁 𑀳𑁄𑀢𑀺, 𑀇𑀤𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀛𑀸𑀦𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀲𑀢𑁆𑀢𑀅𑀲𑀧𑁆𑀧𑀸𑀬𑀧𑀭𑀺𑀯𑀚𑁆𑀚𑀦𑀲𑀢𑁆𑀢𑀲𑀧𑁆𑀧𑀸𑀬𑀲𑁂𑀯𑀦𑀤𑀲𑀯𑀺𑀥𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀧𑁆𑀧𑀪𑁂𑀤𑀁 𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺. 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀸𑀦𑀜𑁆𑀳𑀺 𑀪𑀸𑀯𑀦𑀸𑀯𑀺𑀥𑀸𑀦𑀁 𑀲𑀩𑁆𑀩𑀁 𑀅𑀝𑁆𑀞𑀓𑀣𑀸𑀦𑀬𑁂𑀦 𑀕𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀓𑀺𑀁 𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀼𑀦 𑀯𑀼𑀢𑁆𑀢𑁂𑀦𑀸𑀢𑀺 𑀦 𑀦𑀁 𑀧𑀼𑀦 𑀯𑀺𑀢𑁆𑀣𑀸𑀭𑀬𑀸𑀫. 𑀧𑀸𑀴𑀺𑀬𑀸 𑀧𑀦 𑀳𑁂𑀝𑁆𑀞𑀸 𑀅𑀦𑀸𑀕𑀢𑀁 𑀅𑀢𑁆𑀣𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑀸 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑀺𑀲𑁆𑀲𑀸𑀫.

𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂. 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻𑀢𑀺 𑀇𑀫𑁂 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑀘𑀺𑀢𑁆𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀤𑀧𑀝𑀺𑀧𑀸𑀝𑀺𑀬𑀸 𑀙𑀧𑀡𑁆𑀡𑀸𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀓𑁂𑀯𑀮𑀜𑁆𑀳𑀺 𑀢𑁂 𑀓𑀸𑀫𑀸𑀯𑀘𑀭𑀸, 𑀇𑀫𑁂 𑀪𑀽𑀫𑀦𑁆𑀢𑀭𑀯𑀲𑁂𑀦 𑀫𑀳𑀕𑁆𑀕𑀢𑀸 𑀭𑀽𑀧𑀸𑀯𑀘𑀭𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀬𑁂𑀯𑀸𑀧𑀦𑀓𑀸 𑀧𑀦𑁂𑀢𑁆𑀣 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄𑀯 𑀮𑀩𑁆𑀪𑀦𑁆𑀢𑀺. 𑀓𑁄𑀝𑁆𑀞𑀸𑀲𑀯𑀸𑀭𑀲𑀼𑀜𑁆𑀜𑀢𑀯𑀸𑀭𑀸 𑀧𑀸𑀓𑀢𑀺𑀓𑀸 𑀏𑀯𑀸𑀢𑀺.

𑀧𑀞𑀫𑀁.

𑀤𑀼𑀢𑀺𑀬𑀚𑁆𑀛𑀸𑀦𑀁

𑁧𑁬𑁧-𑁧𑁬𑁨. 𑀤𑀼𑀢𑀺𑀬𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀯𑀺𑀢𑀓𑁆𑀓𑀲𑁆𑀲 𑀘 𑀯𑀺𑀘𑀸𑀭𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀽𑀧𑀲𑀫𑀸, 𑀲𑀫𑀢𑀺𑀓𑁆𑀓𑀫𑀸; 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀦 𑀲𑀦𑁆𑀢𑀺, 𑀅𑀜𑁆𑀜𑁂𑀬𑁂𑀯 𑀳𑀺 𑀧𑀞𑀫𑀚𑁆𑀛𑀸𑀦𑁂 𑀨𑀲𑁆𑀲𑀸𑀤𑀬𑁄 𑀅𑀜𑁆𑀜𑁂 𑀇𑀥, 𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑁋 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁩) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸. 𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁, 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀬𑀲𑁆𑀫𑀸 𑀯𑀸 𑀢𑀁 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀽𑀧𑀲𑀫𑀦𑁂𑀦 𑀘 𑀘𑁂𑀢𑁄 𑀲𑀫𑁆𑀧𑀲𑀸𑀤𑀬𑀢𑀺, 𑀢𑀲𑁆𑀫𑀸𑀧𑀺 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 ‘𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄’𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 ‘𑀘𑁂𑀢𑀲𑁄’𑀢𑀺 𑀏𑀢𑀁 𑀏𑀓𑁄𑀤𑀺𑀪𑀸𑀯𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀼𑀴𑁆𑀳𑀢𑁆𑀢𑀸 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀉𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀭𑀳𑀢𑁄 𑀯𑀸 𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀉𑀤𑀸𑀬𑀢𑀻𑀢𑀺 𑀉𑀤𑀺. 𑀉𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀏𑀓𑁄 𑀘 𑀲𑁄 𑀉𑀤𑀺 𑀘𑀸𑀢𑀺 𑀏𑀓𑁄𑀤𑀺. 𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀁 𑀏𑀓𑁄𑀤𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀇𑀤𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀓𑁄𑀤𑀺𑀪𑀸𑀯𑀁. 𑀲𑁄 𑀧𑀦𑀸𑀬𑀁 𑀏𑀓𑁄𑀤𑀺 𑀬𑀲𑁆𑀫𑀸 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲, 𑀦 𑀚𑀻𑀯𑀲𑁆𑀲, 𑀢𑀲𑁆𑀫𑀸 𑀏𑀢𑀁 ‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’𑀦𑁆𑀢𑀺 𑀯𑀼𑀢𑁆𑀢𑀁.

‘𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀅𑀬𑀜𑁆𑀘 𑀏𑀓𑁄𑀤𑀺𑀦𑀸𑀫𑀓𑁄 𑀲𑀫𑀸𑀥𑀺, 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀜𑁆𑀘𑀸𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 ‘𑀅𑀤𑀼𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀫𑀺𑀯 𑀚𑀮𑀁 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀬𑀸𑀧𑀺 𑀲𑀤𑁆𑀥𑀸𑀬 𑀲𑀫𑁆𑀧𑀲𑀸𑀤𑀦’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀦 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀏𑀯 𑀘𑁂𑀢𑁆𑀣 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄. 𑀢𑀲𑁆𑀫𑀸 𑀏𑀓𑁄𑀤𑀺𑀪𑀸𑀯𑀦𑁆𑀢𑀺𑀧𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦 𑀮𑀤𑁆𑀥𑁄𑀓𑀸𑀲𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀩𑀮𑀯𑀲𑀤𑁆𑀥𑀸𑀲𑀳𑀸𑀬𑀧𑀝𑀺𑀮𑀸𑀪𑁂𑀦𑁂𑀯 𑀲𑀫𑀸𑀥𑀺𑀧𑀺 𑀧𑀸𑀓𑀝𑁄. 𑀢𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄; 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 (𑀯𑀺𑀪. 𑁫𑁭𑁪-𑁫𑁭𑁫) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀦𑁂𑀢𑁂𑀦 𑀲𑀤𑁆𑀥𑀺𑀁 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀏𑀢𑀲𑁆𑀫𑀺𑀁 𑀏𑀢𑀲𑁆𑀲 𑀯𑀸 𑀯𑀺𑀢𑀓𑁆𑀓𑁄 𑀦𑀢𑁆𑀣𑀻𑀢𑀺 𑀅𑀯𑀺𑀢𑀓𑁆𑀓𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀯𑀺𑀘𑀸𑀭𑀁. 𑀯𑀺𑀪𑀗𑁆𑀕𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀇𑀢𑀺 𑀅𑀬𑀜𑁆𑀘 𑀯𑀺𑀢𑀓𑁆𑀓𑁄 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸 𑀯𑀽𑀧𑀲𑀦𑁆𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀩𑁆𑀪𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀺𑀢𑀸 𑀩𑁆𑀬𑀧𑁆𑀧𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀇𑀫𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄? 𑀅𑀣 𑀓𑀲𑁆𑀫𑀸 𑀧𑀼𑀦 ‘𑀯𑀼𑀢𑁆𑀢𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀫𑁂𑀢𑀁, 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄, 𑀦 𑀧𑀦𑁂𑀢𑀁 𑀢𑀤𑀢𑁆𑀣𑀤𑀻𑀧𑀓𑀁. 𑀦𑀦𑀼 𑀅𑀯𑁄𑀘𑀼𑀫𑁆𑀳 𑁋 ‘𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢’𑀦𑁆𑀢𑀺.

𑀅𑀧𑀺𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀲𑀫𑁆𑀧𑀲𑀸𑀤𑀦𑀁, 𑀦 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀲𑁆𑀲; 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸 𑀏𑀓𑁄𑀤𑀺𑀪𑀸𑀯𑀁, 𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀺𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸; 𑀦 𑀧𑀞𑀫𑀚𑁆𑀛𑀸𑀦𑀫𑀺𑀯 𑀘 𑀅𑀗𑁆𑀕𑀧𑀸𑀢𑀼𑀪𑀸𑀯𑀸𑀢𑀺 𑀏𑀯𑀁 𑀲𑀫𑁆𑀧𑀲𑀸𑀤𑀦𑀏𑀓𑁄𑀤𑀺𑀪𑀸𑀯𑀸𑀦𑀁 𑀳𑁂𑀢𑀼𑀧𑀭𑀺𑀤𑀻𑀧𑀓𑀫𑀺𑀤𑀁 𑀯𑀘𑀦𑀁. 𑀢𑀣𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀦 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀯𑀺𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀬 𑀘, 𑀅𑀪𑀸𑀯𑀸𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀤𑀻𑀧𑀓𑀜𑁆𑀘, 𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀫𑁂𑀯 𑀧𑀦 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀇𑀤𑀁 𑀯𑀘𑀦𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀁 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑀲𑀫𑀸𑀥𑀺𑀚𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀯𑀸 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀞𑀫𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀚𑀸𑀢𑀁, 𑀅𑀣 𑀔𑁄 𑀅𑀬𑀫𑁂𑀯 𑀲𑀫𑀸𑀥𑀺 ‘𑀲𑀫𑀸𑀥𑀻’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑁂𑀦 𑀅𑀢𑀺𑀯𑀺𑀬 𑀅𑀘𑀮𑀢𑁆𑀢𑀸 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀘. 𑀢𑀲𑁆𑀫𑀸 𑀇𑀫𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀫𑁂𑀯 𑀲𑀫𑀸𑀥𑀺𑀚𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀤𑀼𑀢𑀺𑀬𑀁. 𑀇𑀤𑀁 𑀤𑀼𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀤𑀼𑀢𑀺𑀬𑀁. 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀛𑀸𑀦𑀧𑀜𑁆𑀘𑀓𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀤𑀸𑀦𑀺 𑀫𑀕𑁆𑀕𑀧𑀜𑁆𑀘𑀓𑁂 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀤𑀁 𑀧𑀭𑀺𑀳𑀻𑀦𑀁. 𑀢𑁂𑀲𑀁 𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀧𑀤𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀝𑁆𑀞𑀸𑀲𑀯𑀸𑀭𑁂𑀧𑀺 𑀢𑀺𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺, 𑀘𑀢𑀼𑀭𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻𑀢𑀺 𑀆𑀕𑀢𑀁. 𑀲𑁂𑀲𑀁 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀁.

𑀢𑀢𑀺𑀬𑀚𑁆𑀛𑀸𑀦𑀁

𑁧𑁬𑁩. 𑀢𑀢𑀺𑀬𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸𑀢𑀺 𑀯𑀺𑀭𑀸𑀕𑁄 𑀦𑀸𑀫 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸. 𑀉𑀪𑀺𑀦𑁆𑀦𑀁 𑀧𑀦 𑀅𑀦𑁆𑀢𑀭𑀸 ‘𑀘’-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑁄 𑀯𑀽𑀧𑀲𑀫𑀁 𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀯𑀸. 𑀢𑀢𑁆𑀣 𑀬𑀤𑀸 𑀯𑀽𑀧𑀲𑀫𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑀺 𑀢𑀤𑀸 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀘, 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘𑀯𑀽𑀧𑀲𑀫𑀸’ 𑀘𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬 𑀯𑀺𑀭𑀸𑀕𑁄 𑀚𑀺𑀕𑀼𑀘𑁆𑀙𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀸 𑀘 𑀯𑀽𑀧𑀲𑀫𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺 𑀢𑀤𑀸 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬 𑀯𑀺𑀭𑀸𑀕𑁄 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀸𑀫𑀜𑁆𑀘𑁂𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀯𑀽𑀧𑀲𑀦𑁆𑀢𑀸, 𑀇𑀫𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀫𑀕𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀳𑀺 𑀯𑀼𑀢𑁆𑀢𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺 𑁋 𑀦𑀽𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑁄 𑀫𑀕𑁆𑀕𑁄 𑀇𑀫𑀲𑁆𑀲 𑀛𑀸𑀦𑀲𑁆𑀲𑀸𑀢𑀺? 𑀬𑀣𑀸 𑀘 𑀢𑀢𑀺𑀬𑁂 𑀅𑀭𑀺𑀬𑀫𑀕𑁆𑀕𑁂 𑀅𑀧𑁆𑀧𑀳𑀻𑀦𑀸𑀦𑀫𑁆𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸’’𑀢𑀺 (𑀫. 𑀦𑀺. 𑁨.𑁧𑁩𑁨) 𑀏𑀯𑀁 𑀧𑀳𑀸𑀦𑀁 𑀯𑀼𑀘𑁆𑀘𑀫𑀸𑀦𑀁 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺, 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑁆𑀓𑀸𑀦𑀁 𑀉𑀲𑁆𑀲𑀸𑀳𑀚𑀦𑀓𑀁, 𑀏𑀯𑀫𑁂𑀯 𑀇𑀥 𑀅𑀯𑀽𑀧𑀲𑀦𑁆𑀢𑀸𑀦𑀫𑁆𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺. 𑀢𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑁋 ‘𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’𑀢𑀺.

𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻𑀢𑀺 𑁋 𑀏𑀢𑁆𑀣 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀲𑀫𑀁 𑀧𑀲𑁆𑀲𑀢𑀺, 𑀅𑀧𑀓𑁆𑀔𑀧𑀢𑀺𑀢𑀸 𑀳𑀼𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀬 𑀯𑀺𑀲𑀤𑀸𑀬 𑀯𑀺𑀧𑀼𑀮𑀸𑀬 𑀣𑀸𑀫𑀕𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻 𑀉𑀧𑁂𑀓𑁆𑀔𑀓𑁄𑀢𑀺 𑀯𑀼𑀘𑁆𑀘𑀢𑀺.

𑀉𑀧𑁂𑀓𑁆𑀔𑀸 𑀧𑀦 𑀤𑀲𑀯𑀺𑀥𑀸 𑀳𑁄𑀢𑀺 𑁋 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀯𑀻𑀭𑀺𑀬𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑁂𑀤𑀦𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀛𑀸𑀦𑀼𑀧𑁂𑀓𑁆𑀔𑀸 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸𑀢𑀺.

𑀢𑀢𑁆𑀣 𑀬𑀸 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺, 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀅. 𑀦𑀺. 𑁫.𑁧; 𑀫𑀳𑀸𑀦𑀺. 𑁯𑁦; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁮; 𑀧𑀝𑀺. 𑀫. 𑁩.𑁧𑁭) 𑀏𑀯𑀫𑀸𑀕𑀢𑀸 𑀔𑀻𑀡𑀸𑀲𑀯𑀲𑁆𑀲 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 𑀧𑀦 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁧.𑁫𑁫𑁬; 𑀫. 𑀦𑀺. 𑁧.𑁭𑁭) 𑀏𑀯𑀫𑀸𑀕𑀢𑀸 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 ‘‘𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁭; 𑁩.𑁨𑁪𑁭) 𑀏𑀯𑀫𑀸𑀕𑀢𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 𑀧𑀦 ‘‘𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁩.𑁧𑁦𑁩) 𑀏𑀯𑀫𑀸𑀕𑀢𑀸 𑀅𑀦𑀘𑁆𑀘𑀸𑀭𑀤𑁆𑀥𑀦𑀸𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀯𑀻𑀭𑀺𑀬𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 ‘‘𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁫𑁭) 𑀏𑀯𑀫𑀸𑀕𑀢𑀸 𑀦𑀻𑀯𑀭𑀡𑀸𑀤𑀺𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸𑀕𑀳𑀡𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 𑀧𑀦 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺 (𑀥. 𑀲. 𑁧𑁫𑁦) 𑀏𑀯𑀫𑀸𑀕𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸 𑀅𑀬𑀁 ‘𑀯𑁂𑀤𑀦𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 ‘‘𑀬𑀤𑀢𑁆𑀣𑀺, 𑀬𑀁 𑀪𑀽𑀢𑀁, 𑀢𑀁 𑀧𑀚𑀳𑀢𑀺, 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀫. 𑀦𑀺. 𑁩.𑁭𑁧; 𑀅. 𑀦𑀺. 𑁭.𑁫𑁫) 𑀏𑀯𑀫𑀸𑀕𑀢𑀸 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 𑀧𑀦 𑀙𑀦𑁆𑀤𑀸𑀤𑀻𑀲𑀼 𑀬𑁂𑀯𑀸𑀧𑀦𑀓𑁂𑀲𑀼 𑀆𑀕𑀢𑀸 𑀲𑀳𑀚𑀸𑀢𑀸𑀦𑀁 𑀲𑀫𑀯𑀸𑀳𑀺𑀢𑀪𑀽𑀢𑀸 𑀉𑀧𑁂𑀓𑁆𑀔𑀸 𑀅𑀬𑀁, ‘𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁧𑁬𑁩; 𑀤𑀻. 𑀦𑀺. 𑁧.𑁨𑁩𑁦) 𑀏𑀯𑀫𑀸𑀕𑀢𑀸 𑀅𑀕𑁆𑀕𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀧𑀓𑁆𑀔𑀧𑀸𑀢𑀚𑀦𑀦𑀻 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀛𑀸𑀦𑀼𑀧𑁂𑀓𑁆𑀔𑀸’ 𑀦𑀸𑀫.

𑀬𑀸 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦’’𑀦𑁆𑀢𑀺 𑀏𑀯𑀫𑀸𑀕𑀢𑀸 𑀲𑀩𑁆𑀩𑀧𑀘𑁆𑀘𑀦𑀻𑀓𑀧𑀭𑀺𑀲𑀼𑀤𑁆𑀥𑀸 𑀧𑀘𑁆𑀘𑀦𑀻𑀓𑀯𑀽𑀧𑀲𑀫𑀦𑁂𑀧𑀺 𑀅𑀩𑁆𑀬𑀸𑀧𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 ‘𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸’ 𑀦𑀸𑀫.

𑀢𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀘 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀘 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘 𑀛𑀸𑀦𑀼𑀧𑁂𑀓𑁆𑀔𑀸 𑀘 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀳𑁄𑀢𑀺. 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀪𑁂𑀤𑁂𑀦 𑀧𑀦𑀲𑁆𑀲𑀸 𑀅𑀬𑀁 𑀪𑁂𑀤𑁄. 𑀏𑀓𑀲𑁆𑀲𑀸𑀧𑀺 𑀲𑀢𑁄 𑀲𑀢𑁆𑀢𑀲𑁆𑀲 𑀓𑀼𑀫𑀸𑀭𑀬𑀼𑀯𑀣𑁂𑀭 𑀲𑁂𑀦𑀸𑀧𑀢𑀺𑀭𑀸𑀚𑀸𑀤𑀺𑀯𑀲𑁂𑀦 𑀪𑁂𑀤𑁄 𑀯𑀺𑀬. 𑀢𑀲𑁆𑀫𑀸 𑀢𑀸𑀲𑀼 𑀬𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀦 𑀢𑀢𑁆𑀣 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸𑀤𑀬𑁄, 𑀬𑀢𑁆𑀣 𑀯𑀸 𑀧𑀦 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀦 𑀢𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀘𑁂𑀢𑀸𑀲𑀁 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑁄, 𑀏𑀯𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀦𑀫𑁆𑀧𑀺. 𑀧𑀜𑁆𑀜𑀸 𑀏𑀯 𑀳𑀺 𑀏𑀲𑀸 𑀓𑀺𑀘𑁆𑀘𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀲𑀸𑀬𑀁 𑀕𑁂𑀳𑀁 𑀧𑀯𑀺𑀝𑁆𑀞𑀁 𑀲𑀧𑁆𑀧𑀁 𑀅𑀚𑀧𑀤𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀫𑀸𑀦𑀲𑁆𑀲 𑀢𑀁 𑀣𑀼𑀲𑀓𑁄𑀝𑁆𑀞𑀓𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘𑀲𑀧𑁆𑀧𑁄 𑀦𑀼 𑀔𑁄 𑀦𑁄’𑀢𑀺 𑀅𑀯𑀮𑁄𑀓𑁂𑀦𑁆𑀢𑀲𑁆𑀲 𑀲𑁄𑀯𑀢𑁆𑀣𑀺𑀓𑀢𑁆𑀢𑀬𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑁂𑀫𑀢𑀺𑀓𑀲𑁆𑀲 ‘𑀲𑀧𑁆𑀧𑁄, 𑀦 𑀲𑀧𑁆𑀧𑁄’𑀢𑀺 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀢𑀸 𑀳𑁄𑀢𑀺; 𑀏𑀯𑀫𑁂𑀯 𑀬𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀮𑀓𑁆𑀔𑀡𑀢𑁆𑀢𑀬𑁂 𑀤𑀺𑀝𑁆𑀞𑁂 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀪𑀸𑀯𑀸𑀤𑀺𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 ‘𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸’. 𑀬𑀣𑀸 𑀧𑀦 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀚𑀧𑀤𑀤𑀡𑁆𑀟𑀓𑁂𑀦 𑀕𑀸𑀴𑁆𑀳𑀁 𑀲𑀧𑁆𑀧𑀁 𑀕𑀳𑁂𑀢𑁆𑀯𑀸 ‘𑀓𑀺𑀦𑁆𑀢𑀸𑀳𑀁 𑀇𑀫𑀁 𑀲𑀧𑁆𑀧𑀁 𑀅𑀯𑀺𑀳𑁂𑀞𑁂𑀦𑁆𑀢𑁄 𑀅𑀢𑁆𑀢𑀸𑀦𑀜𑁆𑀘 𑀇𑀫𑀺𑀦𑀸 𑀅𑀟𑀁𑀲𑀸𑀧𑁂𑀦𑁆𑀢𑁄 𑀫𑀼𑀜𑁆𑀘𑁂𑀬𑁆𑀬’𑀦𑁆𑀢𑀺 𑀫𑀼𑀜𑁆𑀘𑀦𑀸𑀓𑀸𑀭𑀫𑁂𑀯 𑀧𑀭𑀺𑀬𑁂𑀲𑀢𑁄 𑀕𑀳𑀡𑁂 𑀫𑀚𑁆𑀛𑀢𑁆𑀢𑀢𑀸 𑀳𑁄𑀢𑀺; 𑀏𑀯𑀫𑁂𑀯 𑀬𑀸 𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀤𑀺𑀝𑁆𑀞𑀢𑁆𑀢𑀸, 𑀆𑀤𑀺𑀢𑁆𑀢𑁂 𑀯𑀺𑀬 𑀢𑀬𑁄 𑀪𑀯𑁂 𑀧𑀲𑁆𑀲𑀢𑁄, 𑀲𑀗𑁆𑀔𑀸𑀭𑀕𑁆𑀕𑀳𑀡𑁂 𑀫𑀚𑁆𑀛𑀢𑁆𑀢𑀢𑀸, 𑀅𑀬𑀁 ‘𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸’. 𑀇𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀲𑀺𑀤𑁆𑀥𑀸𑀬 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀧𑀺 𑀲𑀺𑀤𑁆𑀥𑀸𑀯 𑀳𑁄𑀢𑀺. 𑀇𑀫𑀺𑀦𑀸 𑀧𑀦𑁂𑀲𑀸 𑀯𑀺𑀘𑀺𑀦𑀦𑀕𑁆𑀕𑀳𑀡𑁂𑀲𑀼 𑀫𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂𑀦 𑀓𑀺𑀘𑁆𑀘𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸𑀢𑀺. 𑀯𑀺𑀭𑀺𑀬𑀼𑀧𑁂𑀓𑁆𑀔𑀸 𑀧𑀦 𑀯𑁂𑀤𑀦𑀼𑀧𑁂𑀓𑁆𑀔𑀸 𑀘 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀯𑀲𑁂𑀲𑀸𑀳𑀺 𑀘 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸𑀬𑁂𑀯𑀸𑀢𑀺.

𑀇𑀫𑀸𑀲𑀼 𑀤𑀲𑀲𑀼 𑀉𑀧𑁂𑀓𑁆𑀔𑀸𑀲𑀼 ‘𑀛𑀸𑀦𑀼𑀧𑁂𑀓𑁆𑀔𑀸’ 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀫𑀚𑁆𑀛𑀢𑁆𑀢𑀮𑀓𑁆𑀔𑀡𑀸 𑀅𑀦𑀸𑀪𑁄𑀕𑀭𑀲𑀸 𑀅𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀧𑀻𑀢𑀺𑀯𑀺𑀭𑀸𑀕𑀧𑀤𑀝𑁆𑀞𑀸𑀦𑀸𑀢𑀺. 𑀏𑀢𑁆𑀣𑀸𑀳 𑁋 𑀦𑀦𑀼 𑀘𑀸𑀬𑀁 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀳𑁄𑀢𑀺? 𑀲𑀸 𑀘 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀭𑀸𑀧𑀺 ‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻’𑀢𑀺 𑀏𑀯𑀫𑀬𑀁 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀲𑀸 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺? 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁄. 𑀅𑀧𑀭𑀺𑀩𑁆𑀬𑀢𑁆𑀢𑀜𑁆𑀳𑀺 𑀢𑀲𑁆𑀲𑀸 𑀢𑀢𑁆𑀣 𑀓𑀺𑀘𑁆𑀘𑀁, 𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑁆𑀢𑀸. 𑀇𑀥 𑀧𑀦𑀸𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀲𑀺𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸 𑀚𑀸𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻𑀢𑀺 𑀏𑀢𑀲𑁆𑀲

𑀲𑀩𑁆𑀩𑀲𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀇𑀤𑀸𑀦𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀲𑀭𑀢𑀻𑀢𑀺 𑀲𑀢𑁄. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄. 𑀇𑀢𑀺 𑀧𑀼𑀕𑁆𑀕𑀮𑁂𑀦 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀭𑀡𑀮𑀓𑁆𑀔𑀡𑀸 𑀲𑀢𑀺, 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀲𑀫𑁆𑀫𑁄𑀳𑀮𑀓𑁆𑀔𑀡𑀁 𑀲𑀫𑁆𑀧𑀚𑀜𑁆𑀜𑀁, 𑀢𑀻𑀭𑀡𑀭𑀲𑀁, 𑀧𑀯𑀺𑀘𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀼𑀭𑀺𑀫𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺 𑁋 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀳𑀺 𑀅𑀲𑀫𑁆𑀧𑀚𑀸𑀦𑀲𑁆𑀲 𑀉𑀧𑀘𑀸𑀭𑀫𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀅𑀧𑁆𑀧𑀦𑀸 𑁋 𑀑𑀴𑀸𑀭𑀺𑀓𑀢𑁆𑀢𑀸 𑀧𑀦 𑀢𑁂𑀲𑀁 𑀛𑀸𑀦𑀸𑀦𑀁, 𑀪𑀽𑀫𑀺𑀬𑀁 𑀯𑀺𑀬 𑀧𑀼𑀭𑀺𑀲𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀲𑀼𑀔𑀸 𑀳𑁄𑀢𑀺, 𑀅𑀩𑁆𑀬𑀢𑁆𑀢𑀁 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀁. 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀦 𑀲𑀼𑀔𑀼𑀫𑀢𑁆𑀢𑀸 𑀇𑀫𑀲𑁆𑀲 𑀛𑀸𑀦𑀲𑁆𑀲, 𑀧𑀼𑀭𑀺𑀲𑀲𑁆𑀲 𑀔𑀼𑀭𑀥𑀸𑀭𑀸𑀬𑀁 𑀯𑀺𑀬, 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸 𑀏𑀯 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀇𑀥𑁂𑀯 𑀯𑀼𑀢𑁆𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑀣𑀸 𑀥𑁂𑀦𑀼𑀧𑀕𑁄 𑀯𑀘𑁆𑀙𑁄 𑀥𑁂𑀦𑀼𑀢𑁄 𑀅𑀧𑀦𑀻𑀢𑁄 𑀅𑀭𑀓𑁆𑀔𑀺𑀬𑀫𑀸𑀦𑁄 𑀧𑀼𑀦𑀤𑁂𑀯 𑀥𑁂𑀦𑀼𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑀺𑀤𑀁 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀧𑀻𑀢𑀺𑀢𑁄 𑀅𑀧𑀦𑀻𑀢𑀫𑁆𑀧𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀭𑀓𑁆𑀔𑁂𑀦 𑀅𑀭𑀓𑁆𑀔𑀺𑀬𑀫𑀸𑀦𑀁 𑀧𑀼𑀦𑀤𑁂𑀯 𑀧𑀻𑀢𑀺𑀁 𑀉𑀧𑀕𑀘𑁆𑀙𑁂𑀬𑁆𑀬, 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸. 𑀲𑀼𑀔𑁂 𑀯𑀸𑀧𑀺 𑀲𑀢𑁆𑀢𑀸 𑀲𑀸𑀭𑀚𑁆𑀚𑀦𑁆𑀢𑀺, 𑀇𑀤𑀜𑁆𑀘 𑀅𑀢𑀺𑀫𑀥𑀼𑀭𑀁 𑀲𑀼𑀔𑀁, 𑀢𑀢𑁄 𑀧𑀭𑀁 𑀲𑀼𑀔𑀸𑀪𑀸𑀯𑀸. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀼𑀪𑀸𑀯𑁂𑀦 𑀧𑀦𑁂𑀢𑁆𑀣 𑀲𑀼𑀔𑁂 𑀅𑀲𑀸𑀭𑀚𑁆𑀚𑀦𑀸 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀺𑀥𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸𑀪𑁄𑀕𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀬𑀁 𑀯𑀸 𑀢𑀁 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀁𑀲𑀫𑀼𑀝𑁆𑀞𑀸𑀦𑁂𑀦𑀲𑁆𑀲 𑀬𑀲𑁆𑀫𑀸 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀭𑀽𑀧𑀓𑀸𑀬𑁄 𑀨𑀼𑀝𑁄, 𑀬𑀲𑁆𑀲 𑀨𑀼𑀝𑀢𑁆𑀢𑀸 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’𑀢𑀺 𑀆𑀳.

𑀇𑀤𑀸𑀦𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀬𑀁𑀛𑀸𑀦𑀳𑁂𑀢𑀼 𑀬𑀁𑀛𑀸𑀦𑀓𑀸𑀭𑀡𑀸 𑀢𑀁 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 ‘‘𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺 𑀧𑀓𑀸𑀲𑁂’’𑀦𑁆𑀢𑀺 𑀧𑀲𑀁𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑁋 𑀓𑀺𑀦𑁆𑀢𑀺? ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑁋 𑀢𑀁 𑀢𑀢𑀺𑀬𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦 𑀢𑀁 𑀢𑁂 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺? 𑀧𑀲𑀁𑀲𑀸𑀭𑀳𑀢𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀅𑀢𑀺𑀫𑀥𑀼𑀭𑀲𑀼𑀔𑁂 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀧𑀺 𑀢𑀢𑀺𑀬𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀓𑁄, 𑀦 𑀢𑀢𑁆𑀣 𑀲𑀼𑀔𑀸𑀪𑀺𑀲𑀗𑁆𑀕𑁂𑀦 𑀆𑀓𑀟𑁆𑀠𑀻𑀬𑀢𑀺, ‘𑀬𑀣𑀸 𑀘 𑀧𑀻𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺’ 𑀏𑀯𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀲𑀢𑀺𑀫𑀸, 𑀬𑀲𑁆𑀫𑀸 𑀘 𑀅𑀭𑀺𑀬𑀓𑀦𑁆𑀢𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀫𑁂𑀯 𑀅𑀲𑀁𑀓𑀺𑀮𑀺𑀝𑁆𑀞𑀁 𑀲𑀼𑀔𑀁 𑀦𑀸𑀫𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺 𑀢𑀲𑁆𑀫𑀸 𑀧𑀲𑀁𑀲𑀸𑀭𑀳𑁄; 𑀇𑀢𑀺 𑀧𑀲𑀁𑀲𑀸𑀭𑀳𑀢𑁄 𑀦𑀁 𑀅𑀭𑀺𑀬𑀸 𑀢𑁂 𑀏𑀯𑀁 𑀧𑀲𑀁𑀲𑀸𑀳𑁂𑀢𑀼𑀪𑀽𑀢𑁂 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀸 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀢𑀢𑀺𑀬𑀁. 𑀇𑀤𑀁 𑀢𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀢𑀢𑀺𑀬𑀁. 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀛𑀸𑀦𑀧𑀜𑁆𑀘𑀓𑁂 𑀧𑀻𑀢𑀺𑀧𑀤𑀫𑁆𑀧𑀺 𑀧𑀭𑀺𑀳𑀻𑀦𑀁. 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀧𑀤𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀝𑁆𑀞𑀸𑀲𑀯𑀸𑀭𑁂𑀧𑀺 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀻𑀢𑀺 𑀆𑀕𑀢𑀁. 𑀲𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀲𑀤𑀺𑀲𑀫𑁂𑀯𑀸𑀢𑀺.

𑀢𑀢𑀺𑀬𑀁.

𑀘𑀢𑀼𑀢𑁆𑀣𑀚𑁆𑀛𑀸𑀦𑀁

𑁧𑁬𑁫. 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀓𑀸𑀬𑀺𑀓𑀲𑀼𑀔𑀲𑁆𑀲 𑀘 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸. 𑀧𑀼𑀩𑁆𑀩𑁂𑀯𑀸𑀢𑀺 𑀢𑀜𑁆𑀘 𑀔𑁄 𑀧𑀼𑀩𑁆𑀩𑁂𑀯 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑁂. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑁂𑀢𑀲𑀺𑀓𑀲𑀼𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀘𑀸𑀢𑀺 𑀇𑀫𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀩𑁆𑀩𑁂𑀯 𑀅𑀢𑁆𑀣𑀗𑁆𑀕𑀫𑀸; 𑀧𑀳𑀸𑀦𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀤𑀸 𑀧𑀦 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺? 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂. 𑀲𑁄𑀫𑀦𑀲𑁆𑀲𑀜𑁆𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀢𑀺. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂𑀲𑀼. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀓𑁆𑀓𑀫𑁂𑀦 𑀅𑀯𑀼𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑁂𑀯 𑀇𑀥𑀸𑀧𑀺 𑀯𑀼𑀢𑁆𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 𑀧𑀦𑁂𑀢𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁… 𑀲𑀼𑀔𑀺𑀦𑁆𑀤𑁆𑀭𑀺𑀬𑀁… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁦) 𑀏𑀯𑀁 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺? 𑀅𑀢𑀺𑀲𑀬𑀦𑀺𑀭𑁄𑀥𑀢𑁆𑀢𑀸. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀳𑀺 𑀢𑁂𑀲𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼, 𑀦 𑀦𑀺𑀭𑁄𑀥𑁄𑀬𑁂𑀯. 𑀦𑀺𑀭𑁄𑀥𑁄𑀬𑁂𑀯 𑀧𑀦 𑀉𑀧𑀘𑀸𑀭𑀓𑁆𑀔𑀡𑁂, 𑀦𑀸𑀢𑀺𑀲𑀬𑀦𑀺𑀭𑁄𑀥𑁄. 𑀢𑀣𑀸 𑀳𑀺 𑀦𑀸𑀦𑀸𑀯𑀚𑁆𑀚𑀦𑁂 𑀧𑀞𑀫𑀚𑁆𑀛𑀸𑀦𑀼𑀧𑀘𑀸𑀭𑁂 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀟𑀁𑀲𑀫𑀓𑀲𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸, 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁂𑀦 𑀯𑀸 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁. 𑀉𑀧𑀘𑀸𑀭𑁂 𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑁂𑀢𑀁 𑀦 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸. 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀧𑀦 𑀧𑀻𑀢𑀺𑀨𑀭𑀡𑁂𑀦 𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀲𑀼𑀔𑁄𑀓𑁆𑀓𑀦𑁆𑀢𑀓𑀸𑀬𑀲𑁆𑀲 𑀘 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀧𑀝𑀺𑀧𑀓𑁆𑀔𑁂𑀦 𑀯𑀺𑀳𑀢𑀢𑁆𑀢𑀸. 𑀦𑀸𑀦𑀸𑀯𑀚𑁆𑀚𑀦𑁂𑀬𑁂𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀬𑀲𑁆𑀫𑀸 𑀏𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂𑀧𑀺 𑀓𑀸𑀬𑀓𑀺𑀮𑀫𑀣𑁂 𑀘𑀺𑀢𑁆𑀢𑀼𑀧𑀖𑀸𑀢𑁂 𑀘 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁂 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺; 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂; 𑀅𑀧𑁆𑀧𑀳𑀻𑀦𑀸 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀯𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑁂, 𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀓𑀸𑀬𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀯𑁂𑀯 𑀢𑀢𑀺𑀬𑀚𑁆𑀛𑀸𑀦𑁂. 𑀢𑀢𑀺𑀬𑀚𑁆𑀛𑀸𑀦𑁂 𑀳𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀧𑀻𑀢𑀺 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑀸𑀢𑀺. 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀲𑀦𑁆𑀦𑀢𑁆𑀢𑀸, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀫𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀘, 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀯𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀢𑀲𑁆𑀫𑀸 𑀏𑀯 𑀘 ‘𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺.

𑀏𑀢𑁆𑀣𑀸𑀳 𑁋 ‘𑀅𑀣𑁂𑀯𑀁 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲𑀼𑀧𑀘𑀸𑀭𑁂 𑀧𑀳𑀻𑀦𑀸𑀧𑀺 𑀏𑀢𑀸 𑀯𑁂𑀤𑀦𑀸 𑀇𑀥 𑀓𑀲𑁆𑀫𑀸 𑀲𑀫𑀸𑀳𑀝𑀸’𑀢𑀺? ‘𑀲𑀼𑀔𑀕𑁆𑀕𑀳𑀡𑀢𑁆𑀣𑀁’. 𑀬𑀸 𑀳𑀺 𑀅𑀬𑀁 ‘𑀅𑀤𑀼𑀓𑁆𑀔𑀫𑀲𑀼𑀔’𑀦𑁆𑀢𑀺 𑀏𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀸 𑀲𑀼𑀔𑀼𑀫𑀸, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀕𑀳𑁂𑀢𑀼𑀁. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀤𑀼𑀝𑁆𑀞𑀲𑁆𑀲 𑀬𑀣𑀸 𑀢𑀣𑀸 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀕𑁄𑀡𑀲𑁆𑀲 𑀕𑀳𑀡𑀢𑁆𑀣𑀁 𑀕𑁄𑀧𑁄 𑀏𑀓𑀲𑁆𑀫𑀺𑀁 𑀯𑀚𑁂 𑀲𑀩𑁆𑀩𑀸 𑀕𑀸𑀯𑁄 𑀲𑀫𑀸𑀳𑀭𑀢𑀺, 𑀅𑀣𑁂𑀓𑁂𑀓𑀁 𑀦𑀻𑀳𑀭𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁 ‘𑀅𑀬𑀁 𑀲𑁄, 𑀕𑀡𑁆𑀳𑀣 𑀦’𑀦𑁆𑀢𑀺 𑀢𑀫𑁆𑀧𑀺 𑀕𑀸𑀳𑀸𑀧𑀬𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀼𑀔𑀕𑀳𑀡𑀢𑁆𑀣𑀁 𑀲𑀩𑁆𑀩𑀸𑀧𑀺 𑀏𑀢𑀸 𑀲𑀫𑀸𑀳𑀭𑀻𑀢𑀺. 𑀏𑀯𑀜𑁆𑀳𑀺 𑀲𑀫𑀸𑀳𑀝𑀸 𑀏𑀢𑀸 𑀤𑀲𑁆𑀲𑁂𑀢𑁆𑀯𑀸 𑀬𑀁 𑀦𑁂𑀯 𑀲𑀼𑀔𑀁 𑀦 𑀤𑀼𑀓𑁆𑀔𑀁, 𑀦 𑀲𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀁, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸𑀯𑁂𑀤𑀦𑀸𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀏𑀲𑀸 𑀕𑀸𑀳𑀬𑀺𑀢𑀼𑀁.

𑀅𑀧𑀺𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀧𑀺 𑀏𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀤𑀬𑁄 𑀳𑀺 𑀢𑀲𑁆𑀲𑀸 𑀧𑀘𑁆𑀘𑀬𑀸. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀥𑀸𑀯𑀼𑀲𑁄 𑀪𑀺𑀓𑁆𑀔𑀼, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 (𑀫. 𑀦𑀺. 𑁧.𑁪𑁫𑁮). 𑀬𑀣𑀸 𑀯𑀸 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄 𑀢𑀢𑀺𑀬𑀫𑀕𑁆𑀕𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀢𑀢𑁆𑀣 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸, 𑀏𑀯𑀁 𑀯𑀡𑁆𑀡𑀪𑀡𑀦𑀢𑁆𑀣𑀫𑁆𑀧𑁂𑀢𑀲𑁆𑀲 𑀛𑀸𑀦𑀲𑁆𑀲𑁂𑀢𑀸 𑀇𑀥 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀖𑀸𑀢𑁂𑀦 𑀯𑀸 𑀏𑀢𑁆𑀣 𑀭𑀸𑀕𑀤𑁄𑀲𑀸𑀦𑀁 𑀅𑀢𑀺𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑁆𑀧𑁂𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀳𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲; 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲, 𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲. 𑀲𑀼𑀔𑀸𑀤𑀺𑀖𑀸𑀢𑁂𑀦 𑀘 𑀲𑀧𑁆𑀧𑀘𑁆𑀘𑀬𑀸 𑀭𑀸𑀕𑀤𑁄𑀲𑀸 𑀳𑀢𑀸𑀢𑀺 𑀅𑀢𑀺𑀤𑀽𑀭𑁂 𑀳𑁄𑀦𑁆𑀢𑀻𑀢𑀺.

𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀤𑀼𑀓𑁆𑀔𑀸𑀪𑀸𑀯𑁂𑀦 𑀅𑀤𑀼𑀓𑁆𑀔𑀁, 𑀲𑀼𑀔𑀸𑀪𑀸𑀯𑁂𑀦 𑀅𑀲𑀼𑀔𑀁. 𑀏𑀢𑁂𑀦𑁂𑀢𑁆𑀣 𑀤𑀼𑀓𑁆𑀔𑀲𑀼𑀔𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀢𑀺𑀬𑀯𑁂𑀤𑀦𑀁 𑀤𑀻𑀧𑁂𑀢𑀺, 𑀦 𑀤𑀼𑀓𑁆𑀔𑀲𑀼𑀔𑀸𑀪𑀸𑀯𑀫𑀢𑁆𑀢𑀁. 𑀢𑀢𑀺𑀬𑀯𑁂𑀤𑀦𑀸 𑀦𑀸𑀫 𑀅𑀤𑀼𑀓𑁆𑀔𑀫𑀲𑀼𑀔𑀸. 𑀉𑀧𑁂𑀓𑁆𑀔𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸, 𑀫𑀚𑁆𑀛𑀢𑁆𑀢𑀭𑀲𑀸, 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀼𑀔𑀦𑀺𑀭𑁄𑀥𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀛𑀸𑀦𑁂 𑀲𑀼𑀧𑀭𑀺𑀲𑀼𑀤𑁆𑀥𑀸 𑀲𑀢𑀺. 𑀬𑀸 𑀘 𑀢𑀲𑁆𑀲𑀸 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺 𑀲𑀸 𑀉𑀧𑁂𑀓𑁆𑀔𑀸𑀬 𑀓𑀢𑀸, 𑀦 𑀅𑀜𑁆𑀜𑁂𑀦. 𑀢𑀲𑁆𑀫𑀸 𑀏𑀢𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀲𑀢𑀺 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀯𑀺𑀲𑀤𑀸 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 (𑀯𑀺𑀪. 𑁫𑁯𑁭). 𑀬𑀸𑀬 𑀘 𑀉𑀧𑁂𑀓𑁆𑀔𑀸𑀬 𑀏𑀢𑁆𑀣 𑀲𑀢𑀺 𑀧𑀸𑀭𑀺𑀲𑀼𑀤𑁆𑀥𑀺 𑀳𑁄𑀢𑀺 𑀲𑀸 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀸𑀬 𑀲𑀢𑀺𑀬𑁂𑀯 𑀧𑀭𑀺𑀲𑀼𑀤𑁆𑀥𑀸 𑀅𑀧𑀺𑀘 𑀔𑁄 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀲𑀢𑀺𑀲𑀻𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀼𑀢𑁆𑀢𑀸.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀉𑀧𑁂𑀓𑁆𑀔𑀸 𑀳𑁂𑀝𑁆𑀞𑀸𑀧𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀯𑀺𑀚𑁆𑀚𑀢𑀺 𑁋 𑀬𑀣𑀸 𑀧𑀦 𑀤𑀺𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸 𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀸 𑀅𑀮𑀸𑀪𑀸 𑀤𑀺𑀯𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀘𑀦𑁆𑀤𑀮𑁂𑀔𑀸 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀅𑀧𑀭𑀺𑀬𑁄𑀤𑀸𑀢𑀸 𑁋 𑀏𑀯𑀫𑀬𑀫𑁆𑀧𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀮𑀸𑀪𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀧𑀞𑀫𑀸𑀤𑀺𑀚𑁆𑀛𑀸𑀦𑀪𑁂𑀤𑁂𑀲𑀼 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺. 𑀢𑀲𑁆𑀲𑀸 𑀘 𑀅𑀧𑀭𑀺𑀲𑀼𑀤𑁆𑀥𑀸𑀬 𑀤𑀺𑀯𑀸 𑀅𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀅𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀏𑀓𑀫𑁆𑀧𑀺 ‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻’𑀢𑀺 𑀦 𑀯𑀼𑀢𑁆𑀢𑀁. 𑀇𑀥 𑀧𑀦 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸𑀪𑀸𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑀸 𑀅𑀬𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀸. 𑀢𑀲𑁆𑀲𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀧𑀭𑀺𑀲𑀼𑀤𑁆𑀥𑀸 𑀳𑁄𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀸. 𑀢𑀲𑁆𑀫𑀸 𑀇𑀤𑀫𑁂𑀯 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀘𑀢𑀼𑀢𑁆𑀣𑀁. 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀘𑀢𑀼𑀢𑁆𑀣𑀁. 𑀨𑀲𑁆𑀲𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀨𑀲𑁆𑀲𑀧𑀜𑁆𑀘𑀓𑁂 𑀢𑀸𑀯 𑀯𑁂𑀤𑀦𑀸𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀛𑀸𑀦𑀧𑀜𑁆𑀘𑀓𑀇𑀦𑁆𑀤𑁆𑀭𑀺𑀬𑀅𑀝𑁆𑀞𑀓𑁂𑀲𑀼 𑀧𑀦 𑀉𑀧𑁂𑀓𑁆𑀔𑀸 𑀳𑁄𑀢𑀺 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 (𑀥. 𑀲. 𑁧𑁬𑁫) 𑀯𑀼𑀢𑁆𑀢𑀫𑁂𑀯. 𑀲𑁂𑀲𑀸𑀦𑀺 𑀢𑀢𑀺𑀬𑁂 𑀧𑀭𑀺𑀳𑀻𑀦𑀧𑀤𑀸𑀦𑀺 𑀇𑀥𑀸𑀧𑀺 𑀧𑀭𑀺𑀳𑀻𑀦𑀸𑀦𑁂𑀯. 𑀓𑁄𑀝𑁆𑀞𑀸𑀲𑀯𑀸𑀭𑁂𑀧𑀺 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀁 𑀢𑀢𑀺𑀬𑀲𑀤𑀺𑀲𑀫𑁂𑀯𑀸𑀢𑀺.

𑀘𑀢𑀼𑀓𑁆𑀓𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀧𑀜𑁆𑀘𑀓𑀦𑀬𑁄

𑁧𑁬𑁭. 𑀇𑀤𑀸𑀦𑀺 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀧𑀜𑁆𑀘𑀓𑀦𑀬𑁄 𑀆𑀭𑀤𑁆𑀥𑁄. 𑀓𑀲𑁆𑀫𑀸𑀢𑀺 𑀘𑁂, 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀘𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘. 𑀲𑀦𑁆𑀦𑀺𑀲𑀺𑀦𑁆𑀦𑀤𑁂𑀯𑀧𑀭𑀺𑀲𑀸𑀬 𑀓𑀺𑀭 𑀏𑀓𑀘𑁆𑀘𑀸𑀦𑀁 𑀤𑁂𑀯𑀸𑀦𑀁 𑀯𑀺𑀢𑀓𑁆𑀓𑁄 𑀏𑀯 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀦𑁆𑀢𑀢𑁄. 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀲𑀢𑁆𑀣𑀸 𑀘𑀢𑀼𑀭𑀗𑁆𑀕𑀺𑀓𑀁 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀦𑀸𑀫 𑀪𑀸𑀚𑁂𑀲𑀺. 𑀏𑀓𑀘𑁆𑀘𑀸𑀦𑀁 𑀯𑀺𑀘𑀸𑀭𑁄 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀦𑁆𑀢𑀢𑁄. 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀢𑀺𑀯𑀗𑁆𑀕𑀺𑀓𑀁 𑀢𑀢𑀺𑀬𑀚𑁆𑀛𑀸𑀦𑀁 𑀦𑀸𑀫 𑀪𑀸𑀚𑁂𑀲𑀺. 𑀏𑀓𑀘𑁆𑀘𑀸𑀦𑀁 𑀧𑀻𑀢𑀺 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀦𑁆𑀢𑀢𑁄. 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀸𑀫 𑀪𑀸𑀚𑁂𑀲𑀺. 𑀏𑀓𑀘𑁆𑀘𑀸𑀦𑀁 𑀲𑀼𑀔𑀁 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀦𑁆𑀢𑀢𑁄. 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀦𑀸𑀫 𑀪𑀸𑀚𑁂𑀲𑀺. 𑀅𑀬𑀁 𑀢𑀸𑀯 ‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄’.

𑀬𑀲𑁆𑀲𑀸 𑀧𑀦 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺 𑁋 𑀲𑀸 𑀢𑀣𑀸𑀕𑀢𑀲𑁆𑀲 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀸 𑁋 𑀢𑀲𑁆𑀫𑀸 𑀜𑀸𑀡𑀫𑀳𑀢𑁆𑀢𑀢𑀸𑀬 𑀤𑁂𑀲𑀦𑀸𑀯𑀺𑀥𑀸𑀦𑁂𑀲𑀼 𑀓𑀼𑀲𑀮𑁄 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀲𑀢𑁆𑀣𑀸 𑀬𑀁 𑀬𑀁 𑀅𑀗𑁆𑀕𑀁 𑀮𑀩𑁆𑀪𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀬𑀣𑀸 𑀬𑀣𑀸 𑀇𑀘𑁆𑀙𑀢𑀺 𑀢𑀣𑀸 𑀢𑀣𑀸 𑀤𑁂𑀲𑀦𑀁 𑀦𑀺𑀬𑀸𑀫𑁂𑀢𑀻𑀢𑀺 𑀲𑁄 𑀇𑀥 𑀧𑀜𑁆𑀘𑀗𑁆𑀕𑀺𑀓𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀚𑁂𑀲𑀺, 𑀘𑀢𑀼𑀭𑀗𑁆𑀕𑀺𑀓𑀁 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀪𑀸𑀚𑁂𑀲𑀺 𑀢𑀺𑀯𑀗𑁆𑀕𑀺𑀓𑀁 𑀢𑀢𑀺𑀬𑀚𑁆𑀛𑀸𑀦𑀁, 𑀪𑀸𑀚𑁂𑀲𑀺 𑀤𑀼𑀯𑀗𑁆𑀕𑀺𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀤𑀼𑀯𑀗𑁆𑀕𑀺𑀓𑀫𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀁 𑀪𑀸𑀚𑁂𑀲𑀺. 𑀅𑀬𑀁 ‘𑀤𑁂𑀲𑀦𑀸𑀯𑀺𑀮𑀸𑀲𑁄’ 𑀦𑀸𑀫.

𑀅𑀧𑀺𑀘 𑀬𑁂 𑀪𑀕𑀯𑀢𑀸 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀲𑀼𑀢𑁆𑀢𑀦𑁆𑀢𑁂 𑀢𑀬𑁄 𑀲𑀫𑀸𑀥𑀻 𑀤𑁂𑀲𑀺𑀢𑀸, 𑀢𑁂𑀲𑀼 𑀳𑁂𑀝𑁆𑀞𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀘 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀦 𑀤𑀲𑁆𑀲𑀺𑀢𑁄. 𑀢𑀁 𑀤𑀲𑁆𑀲𑁂𑀢𑀼𑀫𑁆𑀧𑀺 𑀅𑀬𑀁 𑀧𑀜𑁆𑀘𑀓𑀦𑀬𑁄 𑀆𑀭𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀨𑀲𑁆𑀲𑀸𑀤𑀻𑀲𑀼 𑀯𑀺𑀢𑀓𑁆𑀓𑀫𑀢𑁆𑀢𑀁 𑀧𑀭𑀺𑀳𑀸𑀬𑀢𑀺, 𑀓𑁄𑀝𑁆𑀞𑀸𑀲𑀯𑀸𑀭𑁂 ‘‘𑀘𑀢𑀼𑀭𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺 𑀘𑀢𑀼𑀭𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀲𑀩𑁆𑀩𑀁 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑀫𑁂𑀯. 𑀬𑀸𑀦𑀺 𑀘 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀢𑀸𑀦𑁂𑀯 𑀇𑀥 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺. 𑀢𑁂𑀲𑀁 𑀅𑀥𑀺𑀕𑀫𑀧𑀝𑀺𑀧𑀸𑀝𑀺𑀤𑀻𑀧𑀦𑀢𑁆𑀣𑀁 𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋

𑀏𑀓𑁄 𑀓𑀺𑀭 𑀅𑀫𑀘𑁆𑀘𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀚𑀦𑀧𑀤𑀢𑁄 𑀦𑀕𑀭𑀁 𑀆𑀕𑀢𑁄. 𑀲𑁄 𑀏𑀓𑀤𑀺𑀯𑀲𑀫𑁂𑀯 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀧𑀸𑀦𑀩𑁆𑀬𑀲𑀦𑁂𑀦 𑀲𑀩𑁆𑀩𑀁 𑀯𑀺𑀪𑀯𑀚𑀸𑀢𑀁 𑀦𑀸𑀲𑁂𑀲𑀺. 𑀢𑀁 𑀏𑀓𑀤𑀺𑀯𑀲𑀁 𑀲𑀼𑀭𑀸𑀫𑀤𑀫𑀢𑁆𑀢𑀁 𑀦𑀺𑀘𑁆𑀘𑁄𑀴𑀁 𑀓𑀢𑁆𑀯𑀸 𑀚𑀺𑀡𑁆𑀡𑀓𑀝𑀲𑀸𑀭𑀓𑀫𑀢𑁆𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀸𑀦𑀸𑀕𑀸𑀭𑀢𑁄 𑀦𑀻𑀳𑀭𑀺𑀁𑀲𑀼. 𑀢𑀫𑁂𑀦𑀁 𑀲𑀗𑁆𑀓𑀸𑀭𑀓𑀽𑀝𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀁 𑀏𑀓𑁄 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄 𑀤𑀺𑀲𑁆𑀯𑀸 ‘𑀅𑀬𑀁 𑀧𑀼𑀭𑀺𑀲𑁄 𑀫𑀳𑀸𑀚𑀦𑀲𑁆𑀲 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄 𑀏𑀲𑁄’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀦𑁆𑀳𑀸𑀧𑁂𑀢𑁆𑀯𑀸 𑀣𑀽𑀮𑀲𑀸𑀝𑀓𑀬𑀼𑀕𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀧𑀼𑀦 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀼𑀔𑀼𑀫𑁂𑀦 𑀤𑀼𑀓𑀽𑀮𑀬𑀼𑀕𑀴𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ‘𑀏𑀯𑀁 𑀦𑀁 𑀧𑀭𑀺𑀘𑀸𑀭𑁂𑀬𑁆𑀬𑀸𑀣𑀸’𑀢𑀺 𑀧𑀭𑀺𑀘𑀸𑀭𑀓𑁂 𑀧𑀝𑀺𑀧𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀢𑁂 𑀲𑀬𑀦𑀁 𑀆𑀭𑁄𑀧𑁂𑀲𑀼𑀁. 𑀧𑀸𑀦𑀸𑀕𑀸𑀭𑀕𑀫𑀦𑀧𑀝𑀺𑀩𑀸𑀳𑀦𑀢𑁆𑀣𑀜𑁆𑀘 𑀦𑀁 𑀘𑀢𑁆𑀢𑀸𑀭𑁄 𑀢𑀸𑀯 𑀚𑀦𑀸 𑀘𑀢𑀽𑀲𑀼 𑀳𑀢𑁆𑀣𑀧𑀸𑀤𑁂𑀲𑀼 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀓𑁄 𑀧𑀸𑀤𑁂 𑀧𑀭𑀺𑀫𑀚𑁆𑀚𑀺. 𑀏𑀓𑁄 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀺. 𑀏𑀓𑁄 𑀯𑀻𑀡𑀁 𑀯𑀸𑀤𑀬𑀫𑀸𑀦𑁄 𑀕𑀸𑀬𑀦𑁆𑀢𑁄 𑀦𑀺𑀲𑀻𑀤𑀺.

𑀲𑁄 𑀲𑀬𑀦𑀼𑀧𑀕𑀫𑀦𑁂𑀦 𑀯𑀺𑀕𑀢𑀓𑀺𑀮𑀫𑀣𑁄 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 𑀳𑀢𑁆𑀣𑀧𑀸𑀤𑀦𑀺𑀧𑁆𑀧𑀻𑀴𑀦𑀁 𑀅𑀲𑀳𑀫𑀸𑀦𑁄 ‘𑀓𑁄 𑀫𑁂 𑀳𑀢𑁆𑀣𑀧𑀸𑀤𑁂 𑀉𑀧𑁆𑀧𑀻𑀴𑁂𑀢𑀺? 𑀅𑀧𑀕𑀘𑁆𑀙𑀣𑀸’𑀢𑀺 𑀢𑀚𑁆𑀚𑁂𑀲𑀺. 𑀢𑁂 𑀏𑀓𑀯𑀘𑀦𑁂𑀦𑁂𑀯 𑀅𑀧𑀕𑀘𑁆𑀙𑀺𑀁𑀲𑀼. 𑀢𑀢𑁄 𑀧𑀼𑀦 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 𑀧𑀸𑀤𑀧𑀭𑀺𑀫𑀚𑁆𑀚𑀦𑀁 𑀅𑀲𑀳𑀫𑀸𑀦𑁄 ‘𑀓𑁄 𑀫𑁂 𑀧𑀸𑀤𑁂 𑀧𑀭𑀺𑀫𑀚𑁆𑀚𑀢𑀺? 𑀅𑀧𑀕𑀘𑁆𑀙𑀸’𑀢𑀺 𑀆𑀳. 𑀲𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀅𑀧𑀕𑀘𑁆𑀙𑀺. 𑀧𑀼𑀦 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 𑀯𑀸𑀢𑀯𑀼𑀝𑁆𑀞𑀺 𑀯𑀺𑀬 𑀢𑀸𑀮𑀯𑀡𑁆𑀝𑀯𑀸𑀢𑀁 𑀅𑀲𑀳𑀦𑁆𑀢𑁄 ‘𑀓𑁄 𑀏𑀲? 𑀅𑀧𑀕𑀘𑁆𑀙𑀢𑀽’𑀢𑀺 𑀆𑀳. 𑀲𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀅𑀧𑀕𑀘𑁆𑀙𑀺. 𑀧𑀼𑀦 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 𑀓𑀡𑁆𑀡𑀲𑀽𑀮𑀁 𑀯𑀺𑀬 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑀁 𑀅𑀲𑀳𑀫𑀸𑀦𑁄 𑀯𑀻𑀡𑀸𑀯𑀸𑀤𑀓𑀁 𑀢𑀚𑁆𑀚𑁂𑀲𑀺. 𑀲𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀅𑀧𑀕𑀘𑁆𑀙𑀺. 𑀅𑀣𑁂𑀯𑀁 𑀅𑀦𑀼𑀓𑁆𑀓𑀫𑁂𑀦 𑀧𑀳𑀻𑀦𑀓𑀺𑀮𑀫𑀣𑀼𑀧𑁆𑀧𑀻𑀴𑀦𑀧𑀭𑀺𑀫𑀚𑁆𑀚𑀦𑀯𑀸𑀢𑀧𑁆𑀧𑀳𑀸𑀭𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑀼𑀧𑀤𑁆𑀤𑀯𑁄 𑀲𑀼𑀔𑀁 𑀲𑀬𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀫𑀤𑀸𑀲𑀺. 𑀲𑁄 𑀫𑀳𑀸𑀚𑀦𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄.

𑀢𑀢𑁆𑀣 𑀧𑀸𑀦𑀩𑁆𑀬𑀲𑀦𑁂𑀦 𑀧𑀸𑀭𑀺𑀚𑀼𑀜𑁆𑀜𑀧𑁆𑀧𑀢𑁆𑀢𑁄 𑀲𑁄 𑀅𑀫𑀘𑁆𑀘𑀧𑀼𑀢𑁆𑀢𑁄 𑀯𑀺𑀬 𑀅𑀦𑁂𑀓𑀩𑁆𑀬𑀲𑀦𑀧𑀸𑀭𑀺𑀚𑀼𑀜𑁆𑀜𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀕𑀢𑁄 𑀓𑀼𑀮𑀧𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀢𑀣𑀸𑀕𑀢𑁄. 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 ‘𑀅𑀬𑀁 𑀫𑀳𑀸𑀚𑀦𑀲𑁆𑀲 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀚𑀕𑁆𑀕𑀦𑀁 𑀅𑀭𑀳𑀢𑀻’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀺𑀬 𑀢𑀣𑀸𑀕𑀢𑀲𑁆𑀲 ‘𑀅𑀬𑀁 𑀫𑀳𑀸𑀚𑀦𑀲𑁆𑀲 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀧𑀩𑁆𑀩𑀚𑁆𑀚𑀁 𑀅𑀭𑀳𑀢𑀺 𑀓𑀼𑀮𑀧𑀼𑀢𑁆𑀢𑁄’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀓𑀭𑀡𑀁.

𑀅𑀣𑀲𑁆𑀲 𑀅𑀫𑀘𑁆𑀘𑀧𑀼𑀢𑁆𑀢𑀲𑁆𑀲 𑀫𑀢𑁆𑀢𑀺𑀓𑀸𑀫𑀢𑁆𑀢𑁂𑀦 𑀦𑁆𑀳𑀸𑀧𑀦𑀁 𑀯𑀺𑀬 𑀓𑀼𑀮𑀧𑀼𑀢𑁆𑀢𑀲𑁆𑀲𑀸𑀧𑀺 𑀧𑀩𑁆𑀩𑀚𑁆𑀚𑀸𑀧𑀝𑀺𑀮𑀸𑀪𑁄. 𑀅𑀣𑀲𑁆𑀲 𑀣𑀽𑀮𑀲𑀸𑀝𑀓𑀦𑀺𑀯𑀸𑀲𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀤𑀲𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀲𑀻𑀮𑀯𑀢𑁆𑀣𑀦𑀺𑀯𑀸𑀲𑀦𑀁. 𑀧𑀼𑀦 𑀢𑀲𑁆𑀲 𑀕𑀦𑁆𑀥𑁄𑀤𑀓𑀦𑁆𑀳𑀸𑀧𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀲𑀻𑀮𑀕𑀦𑁆𑀥𑁄𑀤𑀓𑀦𑁆𑀳𑀸𑀧𑀦𑀁. 𑀧𑀼𑀦 𑀢𑀲𑁆𑀲 𑀲𑀼𑀔𑀼𑀫𑀤𑀼𑀓𑀽𑀮𑀬𑀼𑀕𑀴𑀘𑁆𑀙𑀸𑀤𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑀻𑀮𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀤𑀸𑀲𑀗𑁆𑀔𑀸𑀢𑀤𑀼𑀓𑀽𑀮𑀘𑁆𑀙𑀸𑀤𑀦𑀁.

𑀤𑀼𑀓𑀽𑀮𑀘𑁆𑀙𑀸𑀤𑀺𑀢𑀲𑁆𑀲 𑀧𑀦𑀲𑁆𑀲 𑀧𑀸𑀲𑀸𑀤𑀸𑀭𑁄𑀧𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀤𑀼𑀓𑀽𑀮𑀘𑁆𑀙𑀸𑀤𑀺𑀢𑀲𑁆𑀲 𑀲𑀫𑀸𑀥𑀺𑀪𑀸𑀯𑀦𑀸𑀧𑀸𑀲𑀸𑀤𑀸𑀭𑁄𑀳𑀦𑀁. 𑀢𑀢𑁄 𑀢𑀲𑁆𑀲 𑀲𑀼𑀪𑁄𑀚𑀦𑀪𑀼𑀜𑁆𑀚𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀤𑀺𑀥𑀫𑁆𑀫𑀸𑀫𑀢𑀧𑀭𑀺𑀪𑀼𑀜𑁆𑀚𑀦𑀁.

𑀪𑀼𑀢𑁆𑀢𑀪𑁄𑀚𑀦𑀲𑁆𑀲 𑀧𑀦 𑀢𑀲𑁆𑀲 𑀧𑀭𑀺𑀘𑀸𑀭𑀓𑁂𑀳𑀺 𑀲𑀬𑀦𑀸𑀭𑁄𑀧𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀉𑀧𑀘𑀸𑀭𑀚𑁆𑀛𑀸𑀦𑀸𑀭𑁄𑀧𑀦𑀁. 𑀧𑀼𑀦 𑀢𑀲𑁆𑀲 𑀧𑀸𑀦𑀸𑀕𑀸𑀭𑀕𑀫𑀦𑀧𑀝𑀺𑀩𑀸𑀳𑀦𑀢𑁆𑀣𑀁 𑀳𑀢𑁆𑀣𑀧𑀸𑀤𑀼𑀧𑁆𑀧𑀻𑀴𑀦𑀓𑀧𑀼𑀭𑀺𑀲𑀘𑀢𑀼𑀓𑁆𑀓𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀓𑀸𑀫𑀲𑀜𑁆𑀜𑀸𑀪𑀺𑀫𑀼𑀔𑀕𑀫𑀦𑀧𑀝𑀺𑀩𑀸𑀳𑀦𑀢𑁆𑀣𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀼𑀧𑁆𑀧𑀻𑀴𑀦𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄. 𑀢𑀲𑁆𑀲 𑀧𑀸𑀤𑀧𑀭𑀺𑀫𑀚𑁆𑀚𑀓𑀧𑀼𑀭𑀺𑀲𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀸𑀦𑀼𑀫𑀚𑁆𑀚𑀦𑀓𑁄 𑀯𑀺𑀘𑀸𑀭𑁄. 𑀢𑀲𑁆𑀲 𑀢𑀸𑀮𑀯𑀡𑁆𑀝𑀯𑀸𑀢𑀤𑀸𑀬𑀓𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀘𑁂𑀢𑀲𑁄 𑀲𑀻𑀢𑀮𑀪𑀸𑀯𑀤𑀸𑀬𑀺𑀓𑀸 𑀧𑀻𑀢𑀺.

𑀢𑀲𑁆𑀲 𑀲𑁄𑀢𑀸𑀦𑀼𑀕𑁆𑀕𑀳𑀓𑀭𑁄 𑀕𑀦𑁆𑀥𑀩𑁆𑀩𑀧𑀼𑀭𑀺𑀲𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀘𑀺𑀢𑁆𑀢𑀸𑀦𑀼𑀕𑁆𑀕𑀸𑀳𑀓𑀁 𑀲𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀲𑀬𑀦𑀼𑀧𑀕𑀫𑀦𑁂𑀦 𑀯𑀺𑀕𑀢𑀓𑀺𑀮𑀫𑀣𑀲𑁆𑀲 𑀣𑁄𑀓𑀁 𑀦𑀺𑀤𑁆𑀤𑀼𑀧𑀕𑀫𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀉𑀧𑀘𑀸𑀭𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀕𑀢𑀦𑀻𑀯𑀭𑀡𑀓𑀺𑀮𑀫𑀣𑀲𑁆𑀲 𑀧𑀞𑀫𑀚𑁆𑀛𑀸𑀦𑀼𑀧𑀕𑀫𑀦𑀁.

𑀅𑀣𑀲𑁆𑀲 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀳𑀢𑁆𑀣𑀧𑀸𑀤𑀼𑀧𑁆𑀧𑀻𑀴𑀦𑀸𑀲𑀳𑀦𑁂𑀦 𑀳𑀢𑁆𑀣𑀧𑀸𑀤𑀼𑀧𑁆𑀧𑀻𑀴𑀓𑀸𑀦𑀁 𑀲𑀦𑁆𑀢𑀚𑁆𑀚𑀦𑀁 𑀢𑁂𑀲𑀜𑁆𑀘 𑀅𑀧𑀕𑀫𑀦𑁂𑀦 𑀧𑀼𑀦 𑀣𑁄𑀓𑀁 𑀦𑀺𑀤𑁆𑀤𑀼𑀧𑀕𑀫𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀻𑀴𑀓𑀯𑀺𑀢𑀓𑁆𑀓𑀸𑀲𑀳𑀦𑁂𑀦 𑀯𑀺𑀢𑀓𑁆𑀓𑀤𑁄𑀲𑀤𑀲𑁆𑀲𑀦𑀁, 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑀸 𑀘 𑀧𑀼𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀕𑀫𑀦𑀁.

𑀢𑀢𑁄 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑁂𑀦 𑀓𑀫𑁂𑀦 𑀧𑀸𑀤𑀧𑀭𑀺𑀫𑀚𑁆𑀚𑀦𑀸𑀤𑀻𑀦𑀁 𑀅𑀲𑀳𑀦𑁂𑀦 𑀧𑀝𑀺𑀧𑀸𑀝𑀺𑀬𑀸 𑀧𑀸𑀤𑀧𑀭𑀺𑀫𑀚𑁆𑀚𑀓𑀸𑀤𑀻𑀦𑀁 𑀲𑀦𑁆𑀢𑀚𑁆𑀚𑀦𑀁, 𑀢𑁂𑀲𑀁 𑀢𑁂𑀲𑀜𑁆𑀘 𑀅𑀧𑀕𑀫𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀣𑁄𑀓𑀁 𑀦𑀺𑀤𑁆𑀤𑀼𑀧𑀕𑀫𑀦𑀁 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀤𑀼𑀢𑀺𑀬𑀸𑀤𑀻𑀳𑀺 𑀛𑀸𑀦𑁂𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀁 𑀯𑀺𑀘𑀸𑀭𑀸𑀤𑀻𑀦𑀁 𑀅𑀲𑀳𑀦𑁂𑀦 𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀸𑀭𑀸𑀤𑀺𑀤𑁄𑀲𑀤𑀲𑁆𑀲𑀦𑀁. 𑀢𑁂𑀲𑀁 𑀢𑁂𑀲𑀜𑁆𑀘 𑀧𑀳𑀸𑀦𑀸 𑀧𑀼𑀦𑀧𑁆𑀧𑀼𑀦𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑀺𑀧𑁆𑀧𑀻𑀢𑀺𑀓 𑀧𑀳𑀻𑀦𑀲𑁄𑀫𑀦𑀲𑁆𑀲𑀚𑁆𑀛𑀸𑀦𑀼𑀧𑀕𑀫𑀦𑀁.

𑀢𑀲𑁆𑀲 𑀧𑀦 𑀲𑀬𑀦𑀸 𑀯𑀼𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑀲𑁆𑀲 𑀇𑀲𑁆𑀲𑀭𑀺𑀬𑀧𑁆𑀧𑀢𑁆𑀢𑀺 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀁 𑀉𑀧𑀕𑀢𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺.

𑀢𑀲𑁆𑀲 𑀧𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀩𑀳𑀽𑀦𑀁 𑀚𑀦𑀸𑀦𑀁 𑀅𑀯𑀲𑁆𑀲𑀬𑀪𑀸𑀯𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀩𑀳𑀽𑀦𑀁 𑀅𑀯𑀲𑁆𑀲𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀳𑀺 𑀏𑀲 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺.

𑀧𑀜𑁆𑀘𑀓𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀏𑀢𑁆𑀢𑀸𑀯𑀢𑀸 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀤𑁆𑀯𑀬𑀪𑁂𑀤𑁄 𑀲𑀼𑀤𑁆𑀥𑀺𑀓𑀦𑀯𑀓𑁄 𑀦𑀸𑀫 𑀧𑀓𑀸𑀲𑀺𑀢𑁄 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀲 𑀧𑀜𑁆𑀘𑀓𑀦𑀬𑁂 𑀘𑀢𑀼𑀓𑁆𑀓𑀦𑀬𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀛𑀸𑀦𑀧𑀜𑁆𑀘𑀓𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀁

𑁧𑁭𑁬-𑁧𑁮𑁦. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑀁 𑀛𑀸𑀦𑀁 𑀦𑀸𑀫 𑀧𑀝𑀺𑀧𑀤𑀸𑀓𑀫𑁂𑀦 𑀲𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀝𑀺𑀧𑀤𑀸𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀅𑀲𑁆𑀲𑀸𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁. 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀤𑀦𑁆𑀥𑀸𑀪𑀺𑀜𑁆𑀜𑀁. 𑀇𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀦𑁆𑀢𑀺 𑀯𑀸 𑀤𑀦𑁆𑀥𑀸𑀪𑀺𑀜𑁆𑀜𑀦𑁆𑀢𑀺 𑀯𑀸 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀯𑀸 𑀢𑀻𑀡𑀺𑀧𑀺 𑀛𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀤𑀼𑀓𑁆𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺 𑀢𑀸𑀯 𑀧𑀯𑀢𑁆𑀢𑀸 𑀛𑀸𑀦𑀪𑀸𑀯𑀦𑀸 ‘𑀧𑀝𑀺𑀧𑀤𑀸’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘𑀅𑀪𑀺𑀜𑁆𑀜𑀸’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀧𑀝𑀺𑀧𑀤𑀸 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀸 𑀳𑁄𑀢𑀺. 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑀳𑀦𑀢𑀸𑀬 𑀓𑀺𑀘𑁆𑀙𑀸 𑀅𑀲𑀼𑀔𑀲𑁂𑀯𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑀲𑁆𑀲 𑀢𑀤𑀪𑀸𑀯𑁂𑀦 𑀲𑀼𑀔𑀸. 𑀅𑀪𑀺𑀜𑁆𑀜𑀸𑀧𑀺 𑀏𑀓𑀘𑁆𑀘𑀲𑁆𑀲 𑀤𑀦𑁆𑀥𑀸 𑀳𑁄𑀢𑀺, 𑀫𑀦𑁆𑀤𑀸, 𑀅𑀲𑀻𑀖𑀧𑁆𑀧𑀯𑀢𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀔𑀺𑀧𑁆𑀧𑀸 𑀅𑀫𑀦𑁆𑀤𑀸 𑀲𑀻𑀖𑀧𑁆𑀧𑀯𑀢𑁆𑀢𑀺. 𑀢𑀲𑁆𑀫𑀸 𑀬𑁄 𑀆𑀤𑀺𑀢𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺. 𑀬𑁄 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁄 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀬𑁄 𑀔𑀺𑀧𑁆𑀧𑀁 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺 𑀢𑀲𑁆𑀲 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀬𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀼𑀔𑁂𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺.

𑀢𑀢𑁆𑀣 𑀬𑀸𑀦𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀸𑀦𑀺 𑀘 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀻𑀦𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀘 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘𑀺𑀢𑁆𑀢𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑁂𑀲𑀼 𑀬𑁄 𑀅𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸 𑀘 𑀅𑀪𑀺𑀜𑁆𑀜𑀸. 𑀬𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀅𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀲𑀧𑁆𑀧𑀸𑀬𑀲𑁂𑀯𑀻, 𑀢𑀲𑁆𑀲 𑀯𑁄𑀫𑀺𑀲𑁆𑀲𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸. 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀧𑀦 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀸.

𑀅𑀧𑀺𑀘 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀯𑀲𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀢𑀸𑀥𑀺𑀓𑀸𑀭𑀯𑀲𑁂𑀦 𑀘𑀸𑀧𑀺 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀳𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀅𑀦𑀪𑀺𑀪𑀽𑀢𑀲𑁆𑀲 𑀲𑀼𑀔𑀸. 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀲𑁆𑀲 𑀘 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀅𑀦𑀪𑀺𑀪𑀽𑀢𑀲𑁆𑀲 𑀔𑀺𑀧𑁆𑀧𑀸. 𑀬𑁄 𑀘 𑀲𑀫𑀣𑁂 𑀅𑀓𑀢𑀸𑀥𑀺𑀓𑀸𑀭𑁄 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀓𑀢𑀸𑀥𑀺𑀓𑀸𑀭𑀲𑁆𑀲 𑀲𑀼𑀔𑀸. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀅𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀓𑀢𑀸𑀥𑀺𑀓𑀸𑀭𑀲𑁆𑀲 𑀔𑀺𑀧𑁆𑀧𑀸.

𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀘𑀸𑀧𑀺 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀩𑁆𑀩𑀓𑀺𑀮𑁂𑀲𑀲𑁆𑀲 𑀳𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸. 𑀫𑀦𑁆𑀤𑀓𑀺𑀮𑁂𑀲𑀲𑁆𑀲 𑀘 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸𑀢𑀺.

𑀇𑀢𑀺 𑀇𑀫𑀸𑀲𑀼 𑀧𑀝𑀺𑀧𑀤𑀸𑀅𑀪𑀺𑀜𑁆𑀜𑀸𑀲𑀼 𑀬𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀬 𑀅𑀪𑀺𑀜𑁆𑀜𑀸𑀬 𑀛𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀢𑀁 𑀛𑀸𑀦𑀁 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 ‘𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸’𑀢𑀺 (𑀯𑀺𑀪. 𑁭𑁯𑁯) 𑀏𑀯𑀁 𑀯𑀼𑀢𑁆𑀢𑀲𑀢𑀺𑀬𑀸 𑀯𑀸 𑀢𑀁𑀢𑀁𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀯𑀸 𑀯𑀺𑀓𑁆𑀔𑀫𑁆𑀪𑀦𑁂 𑀧𑀝𑀺𑀧𑀤𑀸, 𑀢𑀁𑀢𑀁𑀛𑀸𑀦𑀼𑀧𑀘𑀸𑀭𑀧𑁆𑀧𑀢𑁆𑀢𑀲𑁆𑀲 𑀅𑀧𑁆𑀧𑀦𑀸𑀬 𑀧𑀭𑀺𑀯𑀸𑀲𑁂 𑀅𑀪𑀺𑀜𑁆𑀜𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀆𑀕𑀫𑀦𑀯𑀲𑁂𑀦𑀸𑀧𑀺 𑀘 𑀧𑀝𑀺𑀧𑀤𑀸 𑀅𑀪𑀺𑀜𑁆𑀜𑀸 𑀳𑁄𑀦𑁆𑀢𑀺𑀬𑁂𑀯. 𑀤𑀼𑀓𑁆𑀔𑀧𑀝𑀺𑀧𑀤𑀜𑁆𑀳𑀺 𑀤𑀦𑁆𑀥𑀸𑀪𑀺𑀜𑁆𑀜𑀁 𑀧𑀞𑀫𑀚𑁆𑀛𑀸𑀦𑀁 𑀧𑀢𑁆𑀯𑀸 𑀧𑀯𑀢𑁆𑀢𑀁 𑀤𑀼𑀢𑀺𑀬𑀫𑁆𑀧𑀺 𑀢𑀸𑀤𑀺𑀲𑀫𑁂𑀯 𑀳𑁄𑀢𑀺. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀘𑀢𑀼𑀓𑁆𑀓𑀦𑀬𑁂 𑀏𑀯𑀁 𑀧𑀜𑁆𑀘𑀓𑀦𑀬𑁂𑀧𑀺 𑀧𑀝𑀺𑀧𑀤𑀸𑀯𑀲𑁂𑀦 𑀘𑀢𑀼𑀥𑀸 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀧𑀝𑀺𑀧𑀤𑀸𑀯𑀲𑁂𑀦𑀧𑀺 𑀘𑀢𑁆𑀢𑀸𑀭𑁄 𑀦𑀯𑀓𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀸𑀞𑀢𑁄 𑀙𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺, 𑀅𑀢𑁆𑀣𑀢𑁄 𑀧𑀦 𑀧𑀜𑁆𑀘𑀓𑀦𑀬𑁂 𑀘𑀢𑀼𑀓𑁆𑀓𑀦𑀬𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀯𑀻𑀲𑀢𑀺𑀫𑁂𑀯 𑀪𑀯𑀦𑁆𑀢𑀻𑀢𑀺.

𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀁.

𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀁

𑁧𑁮𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑀁 𑀛𑀸𑀦𑀁 𑀦𑀸𑀫 𑀬𑀣𑀸 𑀧𑀝𑀺𑀧𑀤𑀸𑀪𑁂𑀤𑁂𑀦 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑁂𑀦𑀸𑀧𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀲𑁆𑀫𑀸𑀲𑁆𑀲 𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺𑀆𑀤𑀻𑀲𑀼 𑀬𑀁 𑀅𑀧𑁆𑀧𑀕𑀼𑀡𑀁 𑀳𑁄𑀢𑀺, 𑀉𑀧𑀭𑀺𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑀁 𑀧𑀭𑀺𑀢𑁆𑀢𑀁 𑀦𑀸𑀫. 𑀬𑀁 𑀧𑀦 𑀅𑀯𑀟𑁆𑀠𑀺𑀢𑁂 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀁, 𑀢𑀁 𑀧𑀭𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀬𑀁 𑀧𑀕𑀼𑀡𑀁 𑀲𑀼𑀪𑀸𑀯𑀺𑀢𑀁 𑀉𑀧𑀭𑀺𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀇𑀤𑀁 𑀅𑀧𑁆𑀧𑀫𑀸𑀡𑀁 𑀦𑀸𑀫. 𑀬𑀁 𑀯𑀺𑀧𑀼𑀮𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀁 𑀢𑀁 𑀯𑀼𑀟𑁆𑀠𑀺𑀧𑁆𑀧𑀫𑀸𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀯𑀼𑀢𑁆𑀢𑀮𑀓𑁆𑀔𑀡𑀯𑁄𑀫𑀺𑀲𑁆𑀲𑀓𑀢𑀸𑀬 𑀧𑀦 𑀯𑁄𑀫𑀺𑀲𑁆𑀲𑀓𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀆𑀭𑀫𑁆𑀫𑀡𑀯𑀲𑁂𑀦𑀧𑀺 𑀘𑀢𑁆𑀢𑀸𑀭𑁄 𑀦𑀯𑀓𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀕𑀡𑀦𑀸𑀧𑁂𑀢𑁆𑀣 𑀧𑀼𑀭𑀺𑀫𑀲𑀤𑀺𑀲𑀸 𑀏𑀯𑀸𑀢𑀺.

𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀁.

𑀆𑀭𑀫𑁆𑀫𑀡𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑀁

𑁧𑁮𑁬. 𑀇𑀤𑀸𑀦𑀺 𑀆𑀭𑀫𑁆𑀫𑀡𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀞𑀫𑀦𑀬𑁂 𑀯𑀼𑀢𑁆𑀢𑀚𑁆𑀛𑀸𑀦𑀁 𑀤𑀼𑀓𑁆𑀔𑀧𑀝𑀺𑀧𑀤𑀢𑁆𑀢𑀸 𑀤𑀦𑁆𑀥𑀸𑀪𑀺𑀜𑁆𑀜𑀢𑁆𑀢𑀸 𑀧𑀭𑀺𑀢𑁆𑀢𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀳𑀻𑀦𑀁, 𑀲𑁄𑀴𑀲𑀫𑀦𑀬𑁂 𑀯𑀼𑀢𑁆𑀢𑀚𑁆𑀛𑀸𑀦𑀁 𑀲𑀼𑀔𑀧𑀝𑀺𑀧𑀤𑀢𑁆𑀢𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑁆𑀢𑀸 𑀅𑀧𑁆𑀧𑀫𑀸𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀡𑀻𑀢𑀁. 𑀲𑁂𑀲𑁂𑀲𑀼 𑀘𑀼𑀤𑁆𑀤𑀲𑀲𑀼 𑀏𑀓𑁂𑀦 𑀤𑁆𑀯𑀻𑀳𑀺 𑀢𑀻𑀳𑀺 𑀘 𑀓𑀸𑀭𑀡𑁂𑀳𑀺 𑀳𑀻𑀦𑀧𑁆𑀧𑀡𑀻𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦𑀸𑀬𑀁 𑀦𑀬𑁄 𑀤𑁂𑀲𑀺𑀢𑁄𑀢𑀺? 𑀛𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀧𑀣𑀯𑀻𑀓𑀲𑀺𑀡𑁂 𑀲𑀼𑀤𑁆𑀥𑀺𑀓𑀚𑁆𑀛𑀸𑀦𑀁 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀧𑀜𑁆𑀘𑀓𑀦𑀬𑀯𑀲𑁂𑀦 𑀘 𑀤𑀲𑁆𑀲𑀺𑀢𑀁; 𑀢𑀣𑀸 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸, 𑀢𑀣𑀸 𑀲𑀼𑀤𑁆𑀥𑀺𑀓𑀸𑀭𑀫𑁆𑀫𑀡𑀁. 𑀢𑀢𑁆𑀣 𑀬𑀸 𑀤𑁂𑀯𑀢𑀸 𑀧𑀣𑀯𑀻𑀓𑀲𑀺𑀡𑁂 𑀲𑀼𑀤𑁆𑀥𑀺𑀓𑀚𑁆𑀛𑀸𑀦𑀁 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀤𑁂𑀲𑀺𑀬𑀫𑀸𑀦𑀁 𑀩𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀲𑀼𑀤𑁆𑀥𑀺𑀓𑀚𑁆𑀛𑀸𑀦𑁂 𑀘𑀢𑀼𑀓𑁆𑀓𑀦𑀬𑁄 𑀤𑁂𑀲𑀺𑀢𑁄. 𑀬𑀸 𑀧𑀜𑁆𑀘𑀓𑀦𑀬𑀯𑀲𑁂𑀦 𑀤𑁂𑀲𑀺𑀬𑀫𑀸𑀦𑀁 𑀩𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀧𑀜𑁆𑀘𑀓𑀦𑀬𑁄. 𑀬𑀸 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬, 𑀲𑀼𑀤𑁆𑀥𑀺𑀓𑀸𑀭𑀫𑁆𑀫𑀡𑁂 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀤𑁂𑀲𑀺𑀬𑀫𑀸𑀦𑀁 𑀩𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬 𑀲𑀼𑀤𑁆𑀥𑀺𑀓𑀸𑀭𑀫𑁆𑀫𑀡𑁂 𑀘𑀢𑀼𑀓𑁆𑀓𑀦𑀬𑁄 𑀤𑁂𑀲𑀺𑀢𑁄. 𑀬𑀸 𑀧𑀜𑁆𑀘𑀓𑀦𑀬𑀯𑀲𑁂𑀦 𑀤𑁂𑀲𑀺𑀬𑀫𑀸𑀦𑀁 𑀩𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀢𑀸𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀧𑀜𑁆𑀘𑀓𑀦𑀬𑁄. 𑀇𑀢𑀺 𑀳𑁂𑀝𑁆𑀞𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸.

𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀘𑁂𑀲 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀤𑀜𑀸𑀡𑁄 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀓𑀼𑀲𑀮𑀢𑀸𑀬 𑀬𑁄 𑀬𑁄 𑀦𑀬𑁄 𑀮𑀩𑁆𑀪𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀤𑁂𑀲𑀦𑀁 𑀦𑀺𑀬𑀫𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀇𑀫𑀸𑀬 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺𑀬𑀸𑀧𑀺 𑀢𑁂𑀦 𑀏𑀲𑀸 𑀧𑀣𑀯𑀻𑀓𑀲𑀺𑀡𑁂 𑀲𑀼𑀤𑁆𑀥𑀺𑀓𑀘𑀢𑀼𑀓𑁆𑀓𑀦𑀬𑀸𑀤𑀺𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸.

𑀬𑀲𑁆𑀫𑀸 𑀧𑀦 𑀬𑁂 𑀓𑁂𑀘𑀺 𑀛𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀦𑀸𑀫 𑀦 𑀢𑁂 𑀆𑀭𑀫𑁆𑀫𑀡𑀧𑀝𑀺𑀧𑀤𑀸𑀳𑀺 𑀯𑀺𑀦𑀸 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀬𑀫𑀢𑁄 𑀛𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀅𑀬𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀦𑀬𑁄 𑀓𑀣𑀺𑀢𑁄.

𑀏𑀢𑁆𑀢𑀸𑀯𑀢𑀸 𑀲𑀼𑀤𑁆𑀥𑀺𑀓𑀦𑀯𑀓𑁄, 𑀘𑀢𑁆𑀢𑀸𑀭𑁄 𑀧𑀝𑀺𑀧𑀤𑀸𑀦𑀯𑀓𑀸, 𑀘𑀢𑁆𑀢𑀸𑀭𑁄 𑀆𑀭𑀫𑁆𑀫𑀡𑀦𑀯𑀓𑀸, 𑀇𑀫𑁂 𑀘 𑀲𑁄𑀴𑀲 𑀦𑀯𑀓𑀸𑀢𑀺 𑀧𑀜𑁆𑀘𑀯𑀻𑀲𑀢𑀺 𑀦𑀯𑀓𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀦𑀯𑀓𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀦𑀬𑀸𑀢𑀺 𑀧𑀜𑁆𑀜𑀸𑀲 𑀦𑀬𑀸. 𑀢𑀢𑁆𑀣 ‘‘𑀧𑀜𑁆𑀘𑀯𑀻𑀲𑀢𑀺𑀬𑀸 𑀘𑀢𑀼𑀓𑁆𑀓𑀦𑀬𑁂𑀲𑀼 𑀲𑀢𑀁, 𑀧𑀜𑁆𑀘𑀓𑀦𑀬𑁂𑀲𑀼 𑀧𑀜𑁆𑀘𑀯𑀻𑀲𑀲𑀢’’𑀦𑁆𑀢𑀺 𑀧𑀸𑀞𑀢𑁄 𑀧𑀜𑁆𑀘𑀯𑀻𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀛𑀸𑀦𑀘𑀺𑀢𑁆𑀢𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀜𑁆𑀘𑀓𑀦𑀬𑁂 𑀧𑀦 𑀘𑀢𑀼𑀓𑁆𑀓𑀦𑀬𑀲𑁆𑀲 𑀧𑀯𑀺𑀝𑁆𑀞𑀢𑁆𑀢𑀸 𑀅𑀢𑁆𑀣𑀢𑁄 𑀧𑀜𑁆𑀘𑀯𑀻𑀲𑀸𑀥𑀺𑀓𑀫𑁂𑀯 𑀘𑀺𑀢𑁆𑀢𑀲𑀢𑀁 𑀳𑁄𑀢𑀺. 𑀬𑀸𑀦𑀺 𑀘𑁂𑀢𑀸𑀦𑀺 𑀧𑀸𑀞𑁂 𑀧𑀜𑁆𑀘𑀯𑀻𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀘𑀺𑀢𑁆𑀢𑀲𑀢𑀸𑀦𑀺 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀦𑀺𑀤𑁆𑀤𑁂𑀲𑁂 𑀥𑀫𑁆𑀫𑀯𑀯𑀢𑁆𑀣𑀸𑀦𑀸𑀤𑀬𑁄 𑀢𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀧𑀦 𑀢𑀢𑁆𑀣 𑀢𑀢𑁆𑀣 𑀦𑀬𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸𑀢𑀺.

𑀧𑀣𑀯𑀻𑀓𑀲𑀺𑀡𑀁.

𑁨𑁦𑁩. 𑀇𑀤𑀸𑀦𑀺 𑀬𑀲𑁆𑀫𑀸 𑀆𑀧𑁄𑀓𑀲𑀺𑀡𑀸𑀤𑀻𑀲𑀼𑀧𑀺 𑀏𑀢𑀸𑀦𑀺 𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀲𑀼 𑀲𑀩𑁆𑀩𑁄 𑀧𑀸𑀴𑀺𑀦𑀬𑁄 𑀘 𑀅𑀢𑁆𑀣𑀯𑀺𑀪𑀸𑀯𑀦𑀸 𑀘 𑀘𑀺𑀢𑁆𑀢𑀕𑀡𑀦𑀸 𑀘 𑀯𑀸𑀭𑀲𑀗𑁆𑀔𑁂𑀧𑁄 𑀘 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀦𑀸𑀦𑀬𑁄 𑀧𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺 𑁧.𑁯𑁧 𑀆𑀤𑀬𑁄) 𑀧𑀓𑀸𑀲𑀺𑀢𑁄𑀬𑁂𑀯. 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑁂 𑀧𑀦 𑀤𑀲𑀓𑀲𑀺𑀡𑀸𑀦𑀺 (𑀫. 𑀦𑀺. 𑁨.𑁨𑁫𑁦) 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀯𑀺𑀜𑁆𑀜𑀸𑀡𑀓𑀲𑀺𑀡𑀁 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀫𑀳𑀕𑁆𑀕𑀢𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀢𑁆𑀣 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀺 𑀳𑁄𑀢𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀆𑀭𑀼𑀧𑁆𑀧𑀤𑁂𑀲𑀦𑀫𑁂𑀯 𑀪𑀚𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀓𑀣𑀺𑀢𑀁.

𑀆𑀓𑀸𑀲𑀓𑀲𑀺𑀡𑀦𑁆𑀢𑀺 𑀧𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀫𑀸𑀓𑀸𑀲𑀫𑁆𑀧𑀺, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀓𑁆𑀔𑀦𑁆𑀥𑀸𑀧𑀺, 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀳𑁂𑀢𑀩𑁆𑀩𑀦𑀺𑀫𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑀫𑁆𑀧𑀺, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁄 𑀆𑀭𑀼𑀧𑁆𑀧𑀤𑁂𑀲𑀦𑀁 𑀪𑀚𑀢𑀺, 𑀧𑀘𑁆𑀙𑀺𑀫𑀦𑀬𑁄 𑀭𑀽𑀧𑀸𑀯𑀘𑀭𑀤𑁂𑀲𑀦𑀁. 𑀇𑀢𑀺 𑀫𑀺𑀲𑁆𑀲𑀓𑀢𑁆𑀢𑀸 𑀇𑀫𑀁 𑀭𑀽𑀧𑀸𑀯𑀘𑀭𑀤𑁂𑀲𑀦𑀁 𑀦 𑀆𑀭𑀼𑀴𑁆𑀳𑀁. 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂 𑀦𑀺𑀩𑁆𑀩𑀢𑁆𑀢𑀚𑁆𑀛𑀸𑀦𑀁 𑀧𑀦 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑁄 𑀳𑁄𑀢𑀺 𑀢𑀲𑁆𑀫𑀸 𑀢𑀁 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀧𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀭𑀽𑀧𑀚𑁆𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀓𑀲𑀺𑀡𑀼𑀕𑁆𑀖𑀸𑀝𑀦𑀲𑁆𑀲 𑀅𑀮𑀸𑀪𑀢𑁄. 𑀢𑀜𑁆𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀕𑁆𑀖𑀸𑀝𑀺𑀬𑀫𑀸𑀦𑀫𑁆𑀧𑀺 𑀆𑀓𑀸𑀲𑀫𑁂𑀯 𑀳𑁄𑀢𑀻𑀢𑀺 𑀦 𑀢𑀢𑁆𑀣 𑀓𑀲𑀺𑀡𑀼𑀕𑁆𑀖𑀸𑀝𑀦𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑀁 𑀛𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀳𑁄𑀢𑀺, 𑀦𑀺𑀭𑁄𑀥𑀧𑀸𑀤𑀓𑀁 𑀦 𑀳𑁄𑀢𑀺. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑁄 𑀧𑀦𑁂𑀢𑁆𑀣 𑀬𑀸𑀯 𑀧𑀜𑁆𑀘𑀫𑀚𑁆𑀛𑀸𑀦𑀸 𑀮𑀩𑁆𑀪𑀢𑀺 𑀯𑀝𑁆𑀝𑀧𑀸𑀤𑀓𑀁 𑀳𑁄𑀢𑀺𑀬𑁂𑀯. 𑀬𑀣𑀸 𑀘𑁂𑀢𑀁 𑀏𑀯𑀁 𑀧𑀼𑀭𑀺𑀫𑀓𑀲𑀺𑀡𑁂𑀲𑀼 𑀉𑀧𑁆𑀧𑀦𑁆𑀦𑀁 𑀛𑀸𑀦𑀫𑁆𑀧𑀺. 𑀦𑀺𑀭𑁄𑀥𑀧𑀸𑀤𑀓𑀪𑀸𑀯𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀫𑁂𑀢𑁆𑀣 𑀆𑀓𑀸𑀲𑀓𑀲𑀺𑀡𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯𑁮-𑁯𑁯) 𑀯𑀼𑀢𑁆𑀢𑀫𑁂𑀯.

‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’𑀢𑀺𑀆𑀤𑀺𑀦𑀬𑀁 (𑀤𑀻. 𑀦𑀺. 𑁧.𑁨𑁩𑁯; 𑀧𑀝𑀺. 𑀫. 𑁧.𑁧𑁦𑁨) 𑀧𑀦 𑀯𑀺𑀓𑀼𑀩𑁆𑀩𑀦𑀁 𑀇𑀘𑁆𑀙𑀦𑁆𑀢𑁂𑀦 𑀧𑀼𑀭𑀺𑀫𑁂𑀲𑀼 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑀲𑀺𑀡𑀸𑀦𑀼𑀮𑁄𑀫𑀢𑁄 𑀓𑀲𑀺𑀡𑀧𑀝𑀺𑀮𑁄𑀫𑀢𑁄, 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄; 𑀛𑀸𑀦𑀸𑀦𑀼𑀮𑁄𑀫𑀢𑁄, 𑀛𑀸𑀦𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄; 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑁄, 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄; 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀓𑀢𑁄, 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑁄, 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑁄; 𑀅𑀗𑁆𑀕𑀯𑀯𑀢𑁆𑀣𑀸𑀦𑀢𑁄, 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄𑀢𑀺 𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑀩𑁆𑀩𑀁. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁫-𑁩𑁬𑁬) 𑀯𑀼𑀢𑁆𑀢𑀸𑀬𑁂𑀯.

𑀏𑀯𑀁 𑀧𑀦 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀅𑀧𑀭𑀺𑀤𑀫𑁂𑀢𑁆𑀯𑀸, 𑀧𑀼𑀩𑁆𑀩𑁂 𑀅𑀪𑀸𑀯𑀺𑀢𑀪𑀸𑀯𑀦𑁄 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑁆𑀧𑀺 𑀪𑀸𑀭𑁄; 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀓𑀢𑀓𑀲𑀺𑀡𑀧𑀭𑀺𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀁 𑀪𑀸𑀭𑁄; 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀉𑀧𑁆𑀧𑀦𑁆𑀦𑁂 𑀦𑀺𑀫𑀺𑀢𑁆𑀢𑁂 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀧𑁆𑀧𑀦𑀸𑀥𑀺𑀕𑀫𑁄 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀅𑀥𑀺𑀕𑀢𑀧𑁆𑀧𑀦𑀲𑁆𑀲 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁 𑀪𑀸𑀭𑁄; 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀧𑀭𑀺𑀤𑀫𑀺𑀢𑀘𑀺𑀢𑁆𑀢𑀲𑁆𑀲𑀸𑀧𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀦𑀸𑀫 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀯𑀺𑀓𑀼𑀩𑁆𑀩𑀦𑀧𑁆𑀧𑀢𑁆𑀢𑀲𑁆𑀲𑀸𑀧𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁄 𑀦𑀸𑀫 𑀪𑀸𑀭𑁄; 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀳𑁄𑀢𑀺. 𑀣𑁂𑀭𑀫𑁆𑀩𑀢𑁆𑀣𑀮𑁂 𑀫𑀳𑀸𑀭𑁄𑀳𑀦𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀆𑀕𑀢𑁂𑀲𑀼 𑀢𑀺𑀁𑀲𑀫𑀢𑁆𑀢𑁂𑀲𑀼 𑀇𑀤𑁆𑀥𑀺𑀫𑀦𑁆𑀢𑀲𑀳𑀲𑁆𑀲𑁂𑀲𑀼 𑀉𑀧𑀲𑀫𑁆𑀧𑀤𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀺𑀬. 𑀲𑀩𑁆𑀩𑀁 𑀯𑀢𑁆𑀣𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁭) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑀸𑀢𑀺.

𑀓𑀲𑀺𑀡𑀓𑀣𑀸.

𑀅𑀪𑀺𑀪𑀸𑀬𑀢𑀦𑀓𑀣𑀸

𑁨𑁦𑁪. 𑀏𑀯𑀁 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸, 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀫𑀸𑀦𑁂𑀧𑀺 𑀆𑀭𑀫𑁆𑀫𑀡𑁂 𑀪𑀸𑀯𑀦𑀸𑀬 𑀅𑀲𑀫𑀸𑀦𑀁 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀅𑀜𑁆𑀜𑀫𑁆𑀧𑀺 𑀅𑀪𑀺𑀪𑀸𑀬𑀢𑀦𑀲𑀗𑁆𑀔𑀸𑀢𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀓𑀢𑀧𑀭𑀺𑀓𑀫𑁆𑀫𑀢𑀸𑀬 𑀧𑀭𑀺𑀓𑀫𑁆𑀫𑀯𑀲𑁂𑀦 𑀘𑁂𑀯 𑀅𑀧𑁆𑀧𑀦𑀸𑀯𑀲𑁂𑀦 𑀘 𑀢𑀸𑀦𑀺 𑀩𑀳𑀺𑀤𑁆𑀥𑀸 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀅𑀯𑀟𑁆𑀠𑀺𑀢𑀸𑀦𑀺. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀬𑀣𑀸 𑀦𑀸𑀫 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘𑀓𑀺𑀁 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘𑀓𑀺𑀫𑁂𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’𑀢𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀓𑀣𑀺𑀢𑁄. 𑀆𑀕𑀫𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀁 𑁋 𑀇𑀫𑀺𑀦𑀸𑀲𑁆𑀲 𑀧𑀦 𑀆𑀪𑁄𑀕𑁄 𑀓𑀣𑀺𑀢𑁄. 𑀲𑁄 𑀘 𑀔𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 (𑀅. 𑀦𑀺. 𑀅𑀝𑁆𑀞. 𑁩.𑁮.𑁬𑁫).

𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀺. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀫𑀳𑀕𑁆𑀖𑀲𑁄 𑀧𑀼𑀭𑀺𑀲𑁄 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁 𑀮𑀪𑀺𑀢𑁆𑀯𑀸 ‘𑀅𑀜𑁆𑀜𑀸𑀧𑀺 𑀳𑁄𑀢𑀼 ‘𑀓𑀺𑀫𑁂𑀲𑀸 𑀫𑀬𑁆𑀳𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀢𑀁 𑀦 𑀫𑀳𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑁆𑀜𑀸𑀡𑁄 ‘𑀓𑀺𑀫𑁂𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀇𑀤𑀁 𑀅𑀧𑁆𑀧𑀫𑀸𑀡𑀁, 𑀦 𑀫𑀬𑁆𑀳𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀇𑀥 𑀧𑀭𑀺𑀢𑁆𑀢𑀸𑀦𑀻𑀢𑀺 𑀆𑀕𑀢𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀦 𑀕𑀳𑀺𑀢𑀸, 𑀧𑀭𑀢𑁄 𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀆𑀕𑀢𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀤𑁆𑀯𑁂 𑀤𑁆𑀯𑁂𑀯 𑀕𑀳𑀺𑀢𑀸𑀦𑀺. 𑀓𑀺𑀁 𑀓𑀸𑀭𑀡𑀸? 𑀘𑀢𑀽𑀲𑀼 𑀳𑀺 𑀕𑀳𑀺𑀢𑁂𑀲𑀼 𑀤𑁂𑀲𑀦𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀸 𑀳𑁄𑀢𑀺, 𑀲𑀢𑁆𑀣𑀸𑀭𑀸 𑀘 𑀳𑁂𑀝𑁆𑀞𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀸 𑀤𑁂𑀲𑀦𑀸 𑀓𑀺𑀮𑀜𑁆𑀚𑀫𑁆𑀳𑀺 𑀢𑀺𑀮𑁂 𑀧𑀢𑁆𑀣𑀭𑀦𑁆𑀢𑁂𑀦 𑀯𑀺𑀬 𑀯𑀺𑀢𑁆𑀣𑀸𑀭𑀢𑁄 𑀓𑀣𑀺𑀢𑀸. 𑀢𑀲𑁆𑀲 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀓𑁆𑀔𑀢𑁆𑀢𑀼𑀓𑀁 𑀤𑁂𑀲𑀦𑀁 𑀓𑀸𑀢𑀼𑀁 𑀅𑀚𑁆𑀛𑀸𑀲𑀬𑁄. 𑀢𑀲𑁆𑀫𑀸 𑀤𑁆𑀯𑁂 𑀤𑁆𑀯𑁂𑀬𑁂𑀯 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀺. 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑀺 𑀦𑀻𑀮𑀸𑀤𑀻𑀦𑀺 𑀲𑀼𑀯𑀡𑁆𑀡𑀸𑀦𑀺, 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀘 𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀆𑀕𑀫𑀝𑁆𑀞𑀓𑀣𑀸𑀲𑀼 𑀧𑀦 ‘𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀇𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀤𑁂𑀲𑀺𑀢𑀸𑀦𑀻’𑀢𑀺 (𑀅. 𑀦𑀺. 𑀅𑀝𑁆𑀞. 𑁩.𑁮.𑁬𑁫) 𑀯𑀼𑀢𑁆𑀢𑀁. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀯𑀲𑁂𑀦 𑀆𑀕𑀢𑀁, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀯𑀲𑁂𑀦, 𑀲𑀼𑀯𑀡𑁆𑀡𑀁 𑀤𑁄𑀲𑀘𑀭𑀺𑀢𑀯𑀲𑁂𑀦, 𑀤𑀼𑀩𑁆𑀩𑀡𑁆𑀡𑀁 𑀭𑀸𑀕𑀘𑀭𑀺𑀢𑀯𑀲𑁂𑀦. 𑀏𑀢𑁂𑀲𑀜𑁆𑀳𑀺 𑀏𑀢𑀸𑀦𑀺 𑀲𑀧𑁆𑀧𑀸𑀬𑀸𑀦𑀺. 𑀲𑀸 𑀘 𑀢𑁂𑀲𑀁 𑀲𑀧𑁆𑀧𑀸𑀬𑀢𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁪𑁩) 𑀘𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸.

𑀓𑀲𑁆𑀫𑀸 𑀧𑀦, 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁭𑁩; 𑀫. 𑀦𑀺. 𑁨.𑁨𑁪𑁯; 𑀅. 𑀦𑀺. 𑁮.𑁬𑁫) 𑀯𑀼𑀢𑁆𑀢𑀁, 𑀏𑀯𑀁 𑀅𑀯𑀢𑁆𑀯𑀸 𑀇𑀥 𑀘𑀢𑀽𑀲𑀼𑀧𑀺 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀯 𑀯𑀼𑀢𑁆𑀢𑀸𑀢𑀺? 𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄. 𑀢𑀢𑁆𑀣 𑀯𑀸 𑀳𑀺 𑀇𑀥 𑀯𑀸 𑀩𑀳𑀺𑀤𑁆𑀥𑀸𑀭𑀽𑀧𑀸𑀦𑁂𑀯 𑀅𑀪𑀺𑀪𑀯𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀦𑀺𑀬𑀫𑀢𑁄 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀢𑀢𑁆𑀭𑀧𑀺 𑀇𑀥𑀧𑀺 𑀯𑀼𑀢𑁆𑀢𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀇𑀤𑀁 𑀧𑀦 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑀫𑀢𑁆𑀢𑀫𑁂𑀯. 𑀅𑀬𑀁 𑀢𑀸𑀯 𑀘𑀢𑀽𑀲𑀼 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀲𑀼𑀤𑁆𑀥𑀺𑀓𑀦𑀬𑀧𑀝𑀺𑀧𑀤𑀸𑀪𑁂𑀤𑁄 𑀧𑀦𑁂𑀢𑁆𑀣 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀓𑁂𑀓𑀲𑁆𑀫𑀺𑀁 𑀅𑀪𑀺𑀪𑀸𑀬𑀢𑀦𑁂 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀘𑁂𑀢𑁆𑀣 𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀁 𑀆𑀭𑀫𑁆𑀫𑀡𑀤𑀼𑀓𑀁 𑀳𑁄𑀢𑀺, 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀜𑁆𑀘 𑀅𑀝𑁆𑀞𑀓𑁆𑀔𑀢𑁆𑀢𑀼𑀓𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀏𑀯𑀫𑁂𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀅𑀪𑀺𑀪𑀸𑀬𑀢𑀦𑁂 𑀏𑀓𑁄 𑀲𑀼𑀤𑁆𑀥𑀺𑀓𑀦𑀯𑀓𑁄, 𑀘𑀢𑁆𑀢𑀸𑀭𑁄 𑀧𑀝𑀺𑀧𑀤𑀸𑀦𑀯𑀓𑀸, 𑀤𑁆𑀯𑁂 𑀆𑀭𑀫𑁆𑀫𑀡𑀦𑀯𑀓𑀸, 𑀆𑀭𑀫𑁆𑀫𑀡𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑁂 𑀅𑀝𑁆𑀞 𑀦𑀯𑀓𑀸𑀢𑀺 𑀧𑀦𑁆𑀦𑀭𑀲 𑀦𑀯𑀓𑀸𑀢𑀺 𑀘𑀢𑀽𑀲𑀼𑀧𑀺 𑀅𑀪𑀺𑀪𑀸𑀬𑀢𑀦𑁂𑀲𑀼 𑀲𑀫𑀲𑀝𑁆𑀞𑀺 𑀦𑀯𑀓𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁪𑁬. 𑀧𑀜𑁆𑀘𑀫𑀅𑀪𑀺𑀪𑀸𑀬𑀢𑀦𑀸𑀤𑀻𑀲𑀼 𑀦𑀻𑀮𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀦𑀻𑀢𑀺 𑀯𑀡𑁆𑀡𑀯𑀲𑁂𑀦, 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀯𑀭𑀸𑀦𑀺, 𑀅𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸𑀦𑀺, 𑀏𑀓𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀻𑀮𑀦𑀺𑀪𑀸𑀲𑀸𑀦𑀻𑀢𑀺 𑀇𑀤𑀁 𑀧𑀦 𑀑𑀪𑀸𑀲𑀦𑀯𑀲𑁂𑀦 𑀯𑀼𑀢𑁆𑀢𑀁; 𑀦𑀻𑀮𑁄𑀪𑀸𑀲𑀸𑀦𑀺 𑀦𑀻𑀮𑀧𑁆𑀧𑀪𑀸𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀲𑀼𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦 𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀧𑀻𑀢𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀻𑀮𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀦𑀻𑀮𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺𑀆𑀤𑀺𑀓𑀁 𑀧𑀦𑁂𑀢𑁆𑀣 𑀓𑀲𑀺𑀡𑀓𑀭𑀡𑀜𑁆𑀘 𑀧𑀭𑀺𑀓𑀫𑁆𑀫𑀜𑁆𑀘 𑀅𑀧𑁆𑀧𑀦𑀸𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯𑁩 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯. 𑀬𑀣𑀸 𑀘 𑀧𑀣𑀯𑀻𑀓𑀲𑀺𑀡𑁂 𑀏𑀯𑀫𑁂𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀅𑀪𑀺𑀪𑀸𑀬𑀢𑀦𑁂 𑀧𑀜𑁆𑀘𑀯𑀻𑀲𑀢𑀺 𑀧𑀜𑁆𑀘𑀯𑀻𑀲𑀢𑀺 𑀦𑀯𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀺𑀪𑀸𑀬𑀢𑀦𑀓𑀣𑀸.

𑀯𑀺𑀫𑁄𑀓𑁆𑀔𑀓𑀣𑀸

𑁨𑁪𑁮. 𑀇𑀤𑀸𑀦𑀺 𑀬𑀲𑁆𑀫𑀸 𑀇𑀤𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀦𑀸𑀫 𑀦 𑀓𑁂𑀯𑀮𑀁 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀸𑀦𑀁 𑀆𑀬𑀢𑀦𑀸𑀦𑀁 𑀅𑀪𑀺𑀪𑀯𑀦𑀢𑁄 𑀅𑀪𑀺𑀪𑀸𑀬𑀢𑀦𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀔𑁄 𑀯𑀺𑀫𑁄𑀓𑁆𑀔𑀯𑀲𑁂𑀦𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀓𑁂𑀦𑀝𑁆𑀞𑁂𑀦 𑀧𑀦 𑀯𑀺𑀫𑁄𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄𑀢𑀺? 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀓𑁄 𑀅𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁄, 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁄. 𑀧𑀺𑀢𑀼𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁𑀮𑀓𑁆𑀔𑀡𑀜𑁆𑀳𑀺 𑀯𑀺𑀫𑁄𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀦𑀬𑁄 𑀆𑀭𑀤𑁆𑀥𑁄.

𑀢𑀢𑁆𑀣 𑀭𑀽𑀧𑀻𑀢𑀺 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀭𑀽𑀧𑀻. 𑀅𑀚𑁆𑀛𑀢𑁆𑀢𑀜𑁆𑀳𑀺 𑀦𑀻𑀮𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑁂𑀲𑁂 𑀯𑀸 𑀧𑀺𑀢𑁆𑀢𑁂 𑀯𑀸 𑀅𑀓𑁆𑀔𑀺𑀢𑀸𑀭𑀓𑀸𑀬 𑀯𑀸 𑀓𑀭𑁄𑀢𑀺. 𑀧𑀻𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀤𑁂 𑀯𑀸 𑀙𑀯𑀺𑀬𑀸 𑀯𑀸 𑀅𑀓𑁆𑀔𑀻𑀦𑀁 𑀧𑀻𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀮𑁄𑀳𑀺𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀚𑀺𑀯𑁆𑀳𑀸𑀬 𑀯𑀸 𑀳𑀢𑁆𑀣𑀢𑀮𑀧𑀸𑀤𑀢𑀮𑁂𑀲𑀼 𑀯𑀸 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀑𑀤𑀸𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀤𑀦𑁆𑀢𑁂 𑀯𑀸 𑀦𑀔𑁂 𑀯𑀸 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀏𑀯𑀁 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀛𑀸𑀦𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻. 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀢𑀸 𑀤𑀲𑁆𑀲𑀺𑀢𑀸.

𑀲𑀼𑀪𑀦𑁆𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀅𑀧𑁆𑀧𑀦𑀸𑀬 ‘𑀲𑀼𑀪’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀬𑁄 𑀧𑀦 𑀲𑀼𑀯𑀺𑀲𑀼𑀤𑁆𑀥𑀁 𑀲𑀼𑀪𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺, 𑀲𑁄 𑀬𑀲𑁆𑀫𑀸 ‘𑀲𑀼𑀪’𑀦𑁆𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀦𑀺, 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦 ‘‘𑀓𑀣𑀁 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁…𑀧𑁂… 𑀯𑀺𑀳𑀭𑀢𑀺, 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺; 𑀓𑀭𑀼𑀡𑀸… 𑀫𑀼𑀤𑀺𑀢𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁…𑀧𑁂… 𑀯𑀺𑀳𑀭𑀢𑀺, 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀏𑀯𑀁 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀺𑀫𑁄𑀓𑁆𑀔𑁄𑀢𑀺 (𑀧𑀝𑀺. 𑀫. 𑁧.𑁨𑁧𑁨) 𑀯𑀼𑀢𑁆𑀢𑀁. 𑀇𑀥 𑀧𑀦 𑀉𑀧𑀭𑀺 𑀧𑀸𑀴𑀺𑀬𑀁𑀬𑁂𑀯 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀆𑀕𑀢𑀢𑁆𑀢𑀸 𑀢𑀁 𑀦𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀦𑀻𑀮𑀓𑀲𑀼𑀧𑀻𑀢𑀓𑀲𑀼𑀮𑁄𑀳𑀺𑀢𑀓𑀲𑀼𑀑𑀤𑀸𑀢𑀓𑀧𑀭𑀺𑀲𑀼𑀤𑁆𑀥𑀦𑀻𑀮𑀓𑀧𑀭𑀺𑀲𑀼𑀤𑁆𑀥𑀧𑀻𑀢𑀓𑀧𑀭𑀺𑀲𑀼𑀤𑁆𑀥𑀮𑁄𑀳𑀺𑀢𑀓𑀧𑀭𑀺𑀲𑀼𑀤𑁆𑀥𑀑𑀤𑀸𑀢𑀓𑀯𑀲𑁂𑀦𑁂𑀯 𑀲𑀼𑀪𑀯𑀺𑀫𑁄𑀓𑁆𑀔𑁄 𑀅𑀦𑀼𑀜𑁆𑀜𑀸𑀢𑁄. 𑀇𑀢𑀺 𑀓𑀲𑀺𑀡𑀦𑁆𑀢𑀺 𑀯𑀸 𑀅𑀪𑀺𑀪𑀸𑀬𑀢𑀦𑀦𑁆𑀢𑀺 𑀯𑀸 𑀯𑀺𑀫𑁄𑀓𑁆𑀔𑁄𑀢𑀺 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁂𑀯. 𑀢𑀜𑁆𑀳𑀺 𑀆𑀭𑀫𑁆𑀫𑀡𑀲𑁆𑀲 𑀲𑀓𑀮𑀝𑁆𑀞𑁂𑀦 𑀓𑀲𑀺𑀡𑀁 𑀦𑀸𑀫, 𑀆𑀭𑀫𑁆𑀫𑀡𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀅𑀪𑀺𑀪𑀸𑀬𑀢𑀦𑀁 𑀦𑀸𑀫, 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀲𑀺𑀡𑀤𑁂𑀲𑀦𑀸 𑀅𑀪𑀺𑀥𑀫𑁆𑀫𑀯𑀲𑁂𑀦, 𑀇𑀢𑀭𑀸 𑀧𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀏𑀓𑁂𑀓𑀲𑁆𑀫𑀺𑀁 𑀧𑀦 𑀯𑀺𑀫𑁄𑀓𑁆𑀔𑁂 𑀧𑀣𑀯𑀻𑀓𑀲𑀺𑀡𑁂 𑀯𑀺𑀬 𑀧𑀜𑁆𑀘𑀯𑀻𑀲𑀢𑀺 𑀧𑀜𑁆𑀘𑀯𑀻𑀲𑀢𑀻𑀢𑀺 𑀓𑀢𑁆𑀯𑀸 𑀧𑀜𑁆𑀘𑀲𑀢𑁆𑀢𑀢𑀺 𑀦𑀯𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀫𑁄𑀓𑁆𑀔𑀓𑀣𑀸.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸

𑁨𑁫𑁧. 𑀇𑀤𑀸𑀦𑀺 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑁂𑀢𑁆𑀢𑀸𑀲𑀳𑀕𑀢𑀦𑁆𑀢𑀺 𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀧𑀭𑀢𑁄 𑀓𑀭𑀼𑀡𑀸𑀲𑀳𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀧𑀦𑁂𑀲 𑀯𑀺𑀥𑀸𑀦𑁂𑀦 𑀧𑀝𑀺𑀧𑀦𑁆𑀦𑁄 𑀫𑁂𑀢𑁆𑀢𑀸𑀤𑀺𑀲𑀳𑀕𑀢𑀸𑀦𑀺 𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀁 𑀫𑁂𑀢𑁆𑀢𑀸𑀤𑀻𑀦𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁦) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀅𑀯𑀲𑁂𑀲𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀓𑁂𑀯𑀮𑀜𑁆𑀳𑀺 𑀧𑀣𑀯𑀻𑀓𑀲𑀺𑀡𑁂 𑀧𑀜𑁆𑀘𑀯𑀻𑀲𑀢𑀺 𑀦𑀯𑀓𑀸, 𑀇𑀥 𑀧𑀼𑀭𑀺𑀫𑀸𑀲𑀼 𑀢𑀻𑀲𑀼 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺 𑀲𑀢𑁆𑀢𑀓𑀸, 𑀉𑀧𑁂𑀓𑁆𑀔𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺 𑀏𑀓𑀓𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸𑀲𑀼 𑀘 𑀙𑀦𑁆𑀤𑀸𑀤𑀻𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀓𑀭𑀼𑀡𑀸𑀫𑀼𑀤𑀺𑀢𑀸𑀢𑀺 𑀇𑀫𑁂𑀧𑀺 𑀬𑁂𑀯𑀸𑀧𑀦𑀓𑀸 𑀮𑀩𑁆𑀪𑀦𑁆𑀢𑀺. 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀺𑀪𑀸𑀯𑁄 𑀘𑁂𑀢𑁆𑀣 𑀫𑁂𑀢𑁆𑀢𑀸𑀬 𑀢𑀸𑀯 𑀩𑁆𑀬𑀸𑀧𑀸𑀤𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀓𑀭𑀼𑀡𑀸𑀬 𑀯𑀺𑀳𑀺𑀁𑀲𑀸𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀫𑀼𑀤𑀺𑀢𑀸𑀬 𑀅𑀭𑀢𑀺𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀉𑀧𑁂𑀓𑁆𑀔𑀸𑀬 𑀭𑀸𑀕𑀧𑀝𑀺𑀖𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸 𑀧𑀦 𑀦𑀩𑀳𑀼𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦; 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀩𑀳𑀼𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀏𑀯𑀁 𑀢𑀸𑀯 𑀧𑀸𑀴𑀺𑀯𑀲𑁂𑀦𑁂𑀯 𑁋

𑀩𑁆𑀭𑀳𑁆𑀫𑀼𑀢𑁆𑀢𑀫𑁂𑀦 𑀓𑀣𑀺𑀢𑁂, 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀇𑀫𑁂 𑀇𑀢𑀺 𑀯𑀺𑀤𑀺𑀢𑁆𑀯𑀸;

𑀪𑀺𑀬𑁆𑀬𑁄 𑀏𑀢𑁂𑀲𑀼 𑀅𑀬𑀁, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀏𑀢𑀸𑀲𑀼 𑀳𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀲𑀼 𑀅𑀢𑁆𑀣𑀢𑁄 𑀢𑀸𑀯 𑀫𑁂𑀚𑁆𑀚𑀢𑀻𑀢𑀺 𑀫𑁂𑀢𑁆𑀢𑀸, 𑀲𑀺𑀦𑀺𑀬𑁆𑀳𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑁂 𑀯𑀸 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸 𑀧𑀯𑀢𑁆𑀢𑀢𑀻𑀧𑀺 𑀫𑁂𑀢𑁆𑀢𑀸. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀡𑀸𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀭𑀻𑀬𑀢𑀺 𑀯𑀸 𑀤𑀼𑀓𑁆𑀔𑀺𑀢𑁂𑀲𑀼 𑀨𑀭𑀡𑀯𑀲𑁂𑀦 𑀧𑀲𑀸𑀭𑀺𑀬𑀢𑀻𑀢𑀺 𑀓𑀭𑀼𑀡𑀸. 𑀫𑁄𑀤𑀦𑁆𑀢𑀺 𑀢𑀸𑀬 𑀢𑀁𑀲𑀫𑀗𑁆𑀕𑀺𑀦𑁄, 𑀲𑀬𑀁 𑀯𑀸 𑀫𑁄𑀤𑀢𑀺, 𑀫𑁄𑀤𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑀼𑀤𑀺𑀢𑀸. ‘𑀅𑀯𑁂𑀭𑀸 𑀳𑁄𑀦𑁆𑀢𑀽’𑀢𑀺𑀆𑀤𑀺𑀩𑁆𑀬𑀸𑀧𑀸𑀭𑀧𑁆𑀧𑀳𑀸𑀦𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑀽𑀧𑀕𑀫𑀦𑁂𑀦 𑀘 𑀉𑀧𑁂𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸.

𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑁆𑀣 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 ‘𑀫𑁂𑀢𑁆𑀢𑀸’, 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸, 𑀆𑀖𑀸𑀢𑀯𑀺𑀦𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀩𑁆𑀬𑀸𑀧𑀸𑀤𑀽𑀧𑀲𑀫𑁄 𑀏𑀢𑀺𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀲𑀺𑀦𑁂𑀳𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 ‘𑀓𑀭𑀼𑀡𑀸’, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀯𑀺𑀳𑀺𑀁𑀲𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀲𑁄𑀓𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀲𑀢𑁆𑀢𑁂𑀲𑀼 𑀧𑀫𑁄𑀤𑀦𑀮𑀓𑁆𑀔𑀡𑀸 ‘𑀫𑀼𑀤𑀺𑀢𑀸’, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀅𑀭𑀢𑀺𑀯𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀧𑀳𑀸𑀲𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 ‘𑀉𑀧𑁂𑀓𑁆𑀔𑀸’, 𑀲𑀢𑁆𑀢𑁂𑀲𑀼 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸, 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, ‘‘𑀓𑀫𑁆𑀫𑀲𑁆𑀲𑀓𑀸 𑀲𑀢𑁆𑀢𑀸, 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀤𑀼𑀓𑁆𑀔𑀢𑁄 𑀯𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀧𑀢𑁆𑀢𑀲𑀫𑁆𑀧𑀢𑁆𑀢𑀺𑀢𑁄 𑀯𑀸 𑀦 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺? 𑀏𑀯𑀁 𑀧𑀯𑀢𑁆𑀢𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀕𑁂𑀳𑀲𑁆𑀲𑀺𑀢𑀸𑀬 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬 𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺.

𑀘𑀢𑀼𑀦𑁆𑀦𑀫𑁆𑀧𑀺 𑀧𑀦𑁂𑀢𑁂𑀲𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀯𑀺𑀧𑀲𑁆𑀲𑀦𑀸𑀲𑀼𑀔𑀜𑁆𑀘𑁂𑀯 𑀪𑀯𑀲𑀫𑁆𑀧𑀢𑁆𑀢𑀺 𑀘 𑀲𑀸𑀥𑀸𑀭𑀡𑀧𑁆𑀧𑀬𑁄𑀚𑀦𑀁, 𑀩𑁆𑀬𑀸𑀧𑀸𑀤𑀸𑀤𑀺𑀧𑀝𑀺𑀖𑀸𑀢𑁄 𑀆𑀯𑁂𑀡𑀺𑀓𑀁. 𑀩𑁆𑀬𑀸𑀧𑀸𑀤𑀧𑀝𑀺𑀖𑀸𑀢𑀧𑁆𑀧𑀬𑁄𑀚𑀦𑀸 𑀳𑁂𑀢𑁆𑀣 𑀫𑁂𑀢𑁆𑀢𑀸, 𑀯𑀺𑀳𑀺𑀁𑀲𑀸𑀅𑀭𑀢𑀺𑀭𑀸𑀕𑀧𑀝𑀺𑀖𑀸𑀢𑀧𑁆𑀧𑀬𑁄𑀚𑀦𑀸 𑀇𑀢𑀭𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀩𑁆𑀬𑀸𑀧𑀸𑀤𑀲𑁆𑀲 𑀬𑀤𑀺𑀤𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀳𑁂𑀲𑀸𑀬 𑀬𑀤𑀺𑀤𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺; 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀅𑀭𑀢𑀺𑀬𑀸 𑀬𑀤𑀺𑀤𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀭𑀸𑀕𑀲𑁆𑀲 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁬; 𑀅. 𑀦𑀺. 𑁬.𑁧𑁩).

𑀏𑀓𑀫𑁂𑀓𑀲𑁆𑀲 𑀘𑁂𑀢𑁆𑀣 𑀆𑀲𑀦𑁆𑀦𑀤𑀽𑀭𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀧𑀘𑁆𑀘𑀢𑁆𑀣𑀺𑀓𑀸. 𑀫𑁂𑀢𑁆𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀳𑀺, 𑀲𑀫𑀻𑀧𑀘𑀸𑀭𑁄 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀲𑀧𑀢𑁆𑀢𑁄, 𑀕𑀼𑀡𑀤𑀲𑁆𑀲𑀦𑀲𑀪𑀸𑀕𑀢𑀸𑀬 𑀭𑀸𑀕𑁄 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑁄. 𑀲𑁄 𑀮𑀳𑀼𑀁 𑀑𑀢𑀸𑀭𑀁 𑀮𑀪𑀢𑀺. 𑀢𑀲𑁆𑀫𑀸 𑀢𑀢𑁄 𑀲𑀼𑀝𑁆𑀞𑀼 𑀫𑁂𑀢𑁆𑀢𑀸 𑀭𑀓𑁆𑀔𑀺𑀢𑀩𑁆𑀩𑀸. 𑀧𑀩𑁆𑀩𑀢𑀸𑀤𑀺𑀕𑀳𑀦𑀦𑀺𑀲𑁆𑀲𑀺𑀢𑁄 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀲𑀧𑀢𑁆𑀢𑁄 𑀲𑀪𑀸𑀯𑀯𑀺𑀲𑀪𑀸𑀕𑀢𑀸𑀬 𑀩𑁆𑀬𑀸𑀧𑀸𑀤𑁄 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑁄. 𑀢𑀲𑁆𑀫𑀸 𑀢𑀢𑁄 𑀦𑀺𑀩𑁆𑀪𑀬𑁂𑀦 𑀫𑁂𑀢𑁆𑀢𑀸𑀬𑀺𑀢𑀩𑁆𑀩𑀁. 𑀫𑁂𑀢𑁆𑀢𑀸𑀬𑀺𑀲𑁆𑀲𑀢𑀺 𑀘 𑀦𑀸𑀫 𑀓𑁄𑀧𑀜𑁆𑀘 𑀓𑀭𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁.

𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀮𑀸𑀪𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀕𑀢𑀁 𑀕𑁂𑀳𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀲𑀪𑀸𑀕𑀢𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀁. 𑀲𑀪𑀸𑀯𑀯𑀺𑀲𑀪𑀸𑀕𑀢𑀸𑀬 𑀯𑀺𑀳𑁂𑀲𑀸 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸. 𑀢𑀲𑁆𑀫𑀸 𑀢𑀢𑁄 𑀦𑀺𑀩𑁆𑀪𑀬𑁂𑀦 𑀓𑀭𑀼𑀡𑀸𑀬𑀺𑀢𑀩𑁆𑀩𑀁. 𑀓𑀭𑀼𑀡𑀜𑁆𑀘 𑀦𑀸𑀫 𑀓𑀭𑀺𑀲𑁆𑀲𑀢𑀺 𑀧𑀸𑀡𑀺𑀆𑀤𑀻𑀳𑀺 𑀘 𑀯𑀺𑀳𑁂𑀲𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁.

𑀫𑀼𑀤𑀺𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀁 𑀯𑀸 𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑁆𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁬) 𑀦𑀬𑁂𑀦 𑀆𑀕𑀢𑀁 𑀕𑁂𑀳𑀲𑁆𑀲𑀺𑀢𑀁 𑀲𑁄𑀫𑀦𑀲𑁆𑀲𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀲𑀪𑀸𑀕𑀢𑀸𑀬 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀁. 𑀲𑀪𑀸𑀯𑀯𑀺𑀲𑀪𑀸𑀕𑀢𑀸𑀬 𑀅𑀭𑀢𑀺 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸. 𑀢𑀲𑁆𑀫𑀸 𑀢𑀢𑁄 𑀦𑀺𑀩𑁆𑀪𑀬𑁂𑀦 𑀫𑀼𑀤𑀺𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀧𑀫𑀼𑀤𑀺𑀢𑁄 𑀘 𑀦𑀸𑀫 𑀪𑀯𑀺𑀲𑁆𑀲𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀘 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀉𑀓𑁆𑀓𑀡𑁆𑀞𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁.

𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀧𑀦 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑁄𑀥𑀺𑀚𑀺𑀦𑀲𑁆𑀲 𑀅𑀯𑀺𑀧𑀸𑀓𑀚𑀺𑀦𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 𑀕𑁂𑀳𑀲𑁆𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁮) 𑀦𑀬𑁂𑀦 𑀆𑀕𑀢𑀸 𑀕𑁂𑀳𑀲𑁆𑀲𑀺𑀢𑀸 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀤𑁄𑀲𑀕𑀼𑀡𑀸𑀦𑀁 𑀅𑀯𑀺𑀘𑀸𑀭𑀡𑀯𑀲𑁂𑀦 𑀲𑀪𑀸𑀕𑀢𑁆𑀢𑀸 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀸. 𑀲𑀪𑀸𑀯𑀯𑀺𑀲𑀪𑀸𑀕𑀢𑀸𑀬 𑀭𑀸𑀕𑀧𑀝𑀺𑀖𑀸 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸. 𑀢𑀲𑁆𑀫𑀸 𑀢𑀢𑁄 𑀦𑀺𑀩𑁆𑀪𑀬𑁂𑀦 𑀉𑀧𑁂𑀓𑁆𑀔𑀺𑀢𑀩𑁆𑀩𑀁. 𑀉𑀧𑁂𑀓𑁆𑀔𑀺𑀲𑁆𑀲𑀢𑀺 𑀘 𑀦𑀸𑀫 𑀭𑀚𑁆𑀚𑀺𑀲𑁆𑀲𑀢𑀺 𑀘 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀘𑀸𑀢𑀺 𑀅𑀝𑁆𑀞𑀸𑀦𑀫𑁂𑀢𑀁.

𑀲𑀩𑁆𑀩𑁂𑀲𑀫𑁆𑀧𑀺 𑀘 𑀏𑀢𑁂𑀲𑀁 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑁄 𑀆𑀤𑀺, 𑀦𑀻𑀯𑀭𑀡𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀁 𑀫𑀚𑁆𑀛𑀁, 𑀅𑀧𑁆𑀧𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀏𑀓𑁄 𑀯𑀸 𑀲𑀢𑁆𑀢𑁄 𑀅𑀦𑁂𑀓𑀸 𑀯𑀸 𑀲𑀢𑁆𑀢𑀸 𑀆𑀭𑀫𑁆𑀫𑀡𑀁, 𑀉𑀧𑀘𑀸𑀭𑁂 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀧𑀢𑁆𑀢𑀸𑀬 𑀆𑀭𑀫𑁆𑀫𑀡𑀯𑀟𑁆𑀠𑀦𑀁.

𑀢𑀢𑁆𑀭𑀸𑀬𑀁 𑀯𑀟𑁆𑀠𑀦𑀓𑁆𑀓𑀫𑁄 𑁋 𑀬𑀣𑀸 𑀳𑀺 𑀓𑀼𑀲𑀮𑁄 𑀓𑀲𑁆𑀲𑀓𑁄 𑀓𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀲𑀢𑀺, 𑀏𑀯𑀁 𑀧𑀞𑀫𑀫𑁂𑀯 𑀏𑀓𑀁 𑀆𑀯𑀸𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀲𑀢𑁆𑀢𑁂𑀲𑀼 ‘𑀇𑀫𑀲𑁆𑀫𑀺𑀁 𑀆𑀯𑀸𑀲𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀢𑀢𑁆𑀣 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀤𑁆𑀯𑁂 𑀆𑀯𑀸𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀙 𑀲𑀢𑁆𑀢 𑀅𑀝𑁆𑀞 𑀦𑀯 𑀤𑀲, 𑀏𑀓𑀸 𑀭𑀘𑁆𑀙𑀸, 𑀉𑀧𑀟𑁆𑀠𑀕𑀸𑀫𑁄, 𑀕𑀸𑀫𑁄, 𑀚𑀦𑀧𑀤𑁄, 𑀭𑀚𑁆𑀚𑀁, 𑀏𑀓𑀸 𑀤𑀺𑀲𑀸𑀢𑀺 𑀏𑀯𑀁 𑀬𑀸𑀯 𑀏𑀓𑀁 𑀘𑀓𑁆𑀓𑀯𑀸𑀴𑀁, 𑀢𑀢𑁄 𑀯𑀸 𑀧𑀦 𑀪𑀺𑀬𑁆𑀬𑁄 𑀢𑀢𑁆𑀣 𑀢𑀢𑁆𑀣 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀢𑀣𑀸 𑀓𑀭𑀼𑀡𑀸𑀤𑀬𑁄𑀢𑀺. 𑀅𑀬𑀫𑁂𑀢𑁆𑀣 𑀆𑀭𑀫𑁆𑀫𑀡𑀯𑀟𑁆𑀠𑀦𑀓𑁆𑀓𑀫𑁄.

𑀬𑀣𑀸 𑀧𑀦 𑀓𑀲𑀺𑀡𑀸𑀦𑀁 𑀦𑀺𑀲𑁆𑀲𑀦𑁆𑀤𑁄 𑀆𑀭𑀼𑀧𑁆𑀧𑀸, 𑀲𑀫𑀸𑀥𑀻𑀦𑀁 𑀦𑀺𑀲𑁆𑀲𑀦𑁆𑀤𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀯𑀺𑀧𑀲𑁆𑀲𑀦𑀸𑀦𑀁 𑀦𑀺𑀲𑁆𑀲𑀦𑁆𑀤𑁄 𑀨𑀮𑀲𑀫𑀸𑀧𑀢𑁆𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀦𑀺𑀲𑁆𑀲𑀦𑁆𑀤𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀏𑀯𑀁 𑀧𑀼𑀭𑀺𑀫𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑁆𑀢𑀬𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 𑀏𑀢𑁆𑀣 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄. 𑀬𑀣𑀸 𑀳𑀺 𑀣𑀫𑁆𑀪𑁂 𑀅𑀦𑀼𑀲𑁆𑀲𑀸𑀧𑁂𑀢𑁆𑀯𑀸 𑀢𑀼𑀮𑀸𑀲𑀗𑁆𑀖𑀸𑀝𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀆𑀓𑀸𑀲𑁂 𑀓𑀽𑀝𑀕𑁄𑀧𑀸𑀦𑀲𑀺𑀬𑁄 𑀞𑀧𑁂𑀢𑀼𑀁, 𑀏𑀯𑀁 𑀧𑀼𑀭𑀺𑀫𑁂𑀲𑀼 𑀢𑀢𑀺𑀬𑀚𑁆𑀛𑀸𑀦𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀘𑀢𑀼𑀢𑁆𑀣𑀁 𑀪𑀸𑀯𑁂𑀢𑀼𑀁. 𑀓𑀲𑀺𑀡𑁂𑀲𑀼 𑀧𑀦 𑀉𑀧𑁆𑀧𑀦𑁆𑀦𑀢𑀢𑀺𑀬𑀚𑁆𑀛𑀸𑀦𑀲𑁆𑀲𑀧𑁂𑀲𑀸 𑀦𑀼𑀧𑁆𑀧𑀚𑁆𑀚𑀢𑀺 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀢𑁆𑀢𑀸𑀢𑀺.

𑀏𑀢𑁆𑀣 𑀲𑀺𑀬𑀸 𑁋 ‘𑀓𑀲𑁆𑀫𑀸 𑀧𑀦𑁂𑀢𑀸 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺? 𑀓𑀲𑁆𑀫𑀸 𑀘, 𑀘𑀢𑀲𑁆𑀲𑁄𑀯? 𑀓𑁄 𑀘 𑀏𑀢𑀸𑀲𑀁 𑀓𑀫𑁄? 𑀯𑀺𑀪𑀗𑁆𑀕𑁂 𑀘 𑀓𑀲𑁆𑀫𑀸 𑀅𑀧𑁆𑀧𑀫𑀜𑁆𑀜𑀸𑀢𑀺 𑀯𑀼𑀢𑁆𑀢𑀸’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑁂𑀝𑁆𑀞𑀝𑁆𑀞𑁂𑀦 𑀢𑀸𑀯 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀘𑁂𑀢𑁆𑀣 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀪𑀸𑀯𑁂𑀦 𑀳𑀺 𑀲𑁂𑀝𑁆𑀞𑀸 𑀏𑀢𑁂 𑀯𑀺𑀳𑀸𑀭𑀸. 𑀬𑀣𑀸 𑀘 𑀩𑁆𑀭𑀳𑁆𑀫𑀸𑀦𑁄 𑀦𑀺𑀤𑁆𑀤𑁄𑀲𑀘𑀺𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀏𑀯𑀁 𑀏𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀬𑁄𑀕𑀺𑀦𑁄 𑀩𑁆𑀭𑀳𑁆𑀫𑀲𑀫𑀸𑀯 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀲𑁂𑀝𑁆𑀞𑀝𑁆𑀞𑁂𑀦 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀓𑀲𑁆𑀫𑀸 𑀘 𑀘𑀢𑀲𑁆𑀲𑁄𑀢𑀺𑀆𑀤𑀺𑀧𑀜𑁆𑀳𑀲𑁆𑀲 𑀧𑀦 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀯𑀲𑀸 𑀘𑀢𑀲𑁆𑀲𑁄,

𑀳𑀺𑀢𑀸𑀤𑀺𑀆𑀓𑀸𑀭𑀯𑀲𑀸 𑀧𑀦𑀸𑀲𑀁;

𑀓𑀫𑁄 𑀧𑀯𑀢𑁆𑀢𑀦𑁆𑀢𑀺 𑀘 𑀅𑀧𑁆𑀧𑀫𑀸𑀡𑁂,

𑀢𑀸 𑀕𑁄𑀘𑀭𑁂 𑀬𑁂𑀦 𑀢𑀤𑀧𑁆𑀧𑀫𑀜𑁆𑀜𑀸.

𑀏𑀢𑀸𑀲𑀼 𑀳𑀺 𑀬𑀲𑁆𑀫𑀸 𑀫𑁂𑀢𑁆𑀢𑀸 𑀩𑁆𑀬𑀸𑀧𑀸𑀤𑀩𑀳𑀼𑀮𑀲𑁆𑀲, 𑀓𑀭𑀼𑀡𑀸 𑀯𑀺𑀳𑀺𑀁𑀲𑀸𑀩𑀳𑀼𑀮𑀲𑁆𑀲, 𑀫𑀼𑀤𑀺𑀢𑀸 𑀅𑀭𑀢𑀺𑀩𑀳𑀼𑀮𑀲𑁆𑀲, 𑀉𑀧𑁂𑀓𑁆𑀔𑀸 𑀭𑀸𑀕𑀩𑀳𑀼𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄; 𑀬𑀲𑁆𑀫𑀸 𑀘 𑀳𑀺𑀢𑀽𑀧𑀲𑀁𑀳𑀸𑀭𑀅𑀳𑀺𑀢𑀸𑀧𑀦𑀬𑀦𑀲𑀫𑁆𑀧𑀢𑁆𑀢𑀺𑀫𑁄𑀤𑀦𑀅𑀦𑀸𑀪𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀬𑁂𑀯 𑀲𑀢𑁆𑀢𑁂𑀲𑀼 𑀫𑀦𑀲𑀺𑀓𑀸𑀭𑁄; 𑀬𑀲𑁆𑀫𑀸 𑀘 𑀬𑀣𑀸 𑀫𑀸𑀢𑀸 𑀤𑀳𑀭𑀕𑀺𑀮𑀸𑀦𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀲𑀓𑀺𑀘𑁆𑀘𑀧𑀲𑀼𑀢𑁂𑀲𑀼 𑀘𑀢𑀽𑀲𑀼 𑀧𑀼𑀢𑁆𑀢𑁂𑀲𑀼 𑀤𑀳𑀭𑀲𑁆𑀲 𑀅𑀪𑀺𑀯𑀼𑀟𑁆𑀠𑀺𑀓𑀸𑀫𑀸 𑀳𑁄𑀢𑀺, 𑀕𑀺𑀮𑀸𑀦𑀲𑁆𑀲 𑀕𑁂𑀮𑀜𑁆𑀜𑀸𑀧𑀦𑀬𑀦𑀓𑀸𑀫𑀸, 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀲𑁆𑀲 𑀬𑁄𑀩𑁆𑀩𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑀸, 𑀲𑀓𑀺𑀘𑁆𑀘𑀧𑀲𑀼𑀢𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀧𑀭𑀺𑀬𑀸𑀬𑁂 𑀅𑀩𑁆𑀬𑀸𑀯𑀝𑀸 𑀳𑁄𑀢𑀺, 𑀢𑀣𑀸 𑀅𑀧𑁆𑀧𑀫𑀜𑁆𑀜𑀸𑀯𑀺𑀳𑀸𑀭𑀺𑀓𑁂𑀦𑀸𑀧𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀇𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀯𑀲𑀸 𑀘𑀢𑀲𑁆𑀲𑁄𑀯 𑀅𑀧𑁆𑀧𑀫𑀜𑁆𑀜𑀸.

𑀬𑀲𑁆𑀫𑀸 𑀧𑀦 𑀘𑀢𑀲𑁆𑀲𑁄𑀧𑁂𑀢𑀸 𑀪𑀸𑀯𑁂𑀢𑀼𑀓𑀸𑀫𑁂𑀦 𑀧𑀞𑀫𑀁 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀲𑀢𑁆𑀢𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀘 𑀫𑁂𑀢𑁆𑀢𑀸; 𑀢𑀢𑁄 𑀏𑀯𑀁 𑀧𑀢𑁆𑀣𑀺𑀢𑀳𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀸𑀪𑀺𑀪𑀯𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀫𑁆𑀪𑀸𑀯𑁂𑀢𑁆𑀯𑀸 𑀯𑀸 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦, 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀘 𑀓𑀭𑀼𑀡𑀸; 𑀅𑀣𑁂𑀯𑀁 𑀧𑀢𑁆𑀣𑀺𑀢𑀳𑀺𑀢𑀸𑀦𑀁 𑀧𑀢𑁆𑀣𑀺𑀢𑀤𑀼𑀓𑁆𑀔𑀸𑀧𑀕𑀫𑀸𑀦𑀜𑁆𑀘 𑀦𑁂𑀲𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀫𑁆𑀧𑀢𑁆𑀢𑀺𑀧𑁆𑀧𑀫𑁄𑀤𑀦𑀯𑀲𑁂𑀦, 𑀧𑀫𑁄𑀤𑀦𑀮𑀓𑁆𑀔𑀡𑀸 𑀘 𑀫𑀼𑀤𑀺𑀢𑀸; 𑀢𑀢𑁄 𑀧𑀭𑀁 𑀧𑀦 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀓𑀢𑀸𑀲𑀗𑁆𑀔𑀸𑀢𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀘 𑀉𑀧𑁂𑀓𑁆𑀔𑀸; 𑀢𑀲𑁆𑀫𑀸 𑀇𑀢𑁄 𑀳𑀺𑀢𑀸𑀤𑀺𑀆𑀓𑀸𑀭𑀯𑀲𑀸 𑀧𑀦𑀸𑀲𑀁 𑀧𑀞𑀫𑀁 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸. 𑀅𑀣 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀅𑀬𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀲𑀩𑁆𑀩𑀸𑀧𑁂𑀢𑀸 𑀅𑀧𑁆𑀧𑀫𑀸𑀡𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀫𑀜𑁆𑀜𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑀫𑀸𑀡𑀸 𑀳𑀺 𑀲𑀢𑁆𑀢𑀸 𑀏𑀢𑀸𑀲𑀁 𑀕𑁄𑀘𑀭𑀪𑀽𑀢𑀸, ‘𑀏𑀓𑀲𑀢𑁆𑀢𑀲𑁆𑀲𑀸𑀧𑀺 𑀘 𑀏𑀢𑁆𑀢𑀓𑁂 𑀧𑀤𑁂𑀲𑁂 𑀫𑁂𑀢𑁆𑀢𑀸𑀤𑀬𑁄 𑀪𑀸𑀯𑁂𑀢𑀩𑁆𑀩𑀸’𑀢𑀺 𑀏𑀯𑀁 𑀧𑀫𑀸𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀓𑀮𑀨𑀭𑀡𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀯𑀲𑀸 𑀘𑀢𑀲𑁆𑀲𑁄,

𑀳𑀺𑀢𑀸𑀤𑀺𑀆𑀓𑀸𑀭𑀯𑀲𑀸 𑀧𑀦𑀸𑀲𑀁;

𑀓𑀫𑁄 𑀧𑀯𑀢𑁆𑀢𑀦𑁆𑀢𑀺 𑀘 𑀅𑀧𑁆𑀧𑀫𑀸𑀡𑁂,

𑀢𑀸 𑀕𑁄𑀘𑀭𑁂 𑀬𑁂𑀦 𑀢𑀤𑀧𑁆𑀧𑀫𑀜𑁆𑀜𑀸𑀢𑀺.

𑀏𑀯𑀁 𑀅𑀧𑁆𑀧𑀫𑀸𑀡𑀕𑁄𑀘𑀭𑀢𑀸𑀬 𑀏𑀓𑀮𑀓𑁆𑀔𑀡𑀸𑀲𑀼 𑀘𑀸𑀧𑀺 𑀏𑀢𑀸𑀲𑀼 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑁄𑀫𑀦𑀲𑁆𑀲𑀸𑀯𑀺𑀧𑁆𑀧𑀬𑁄𑀕𑀢𑁄. 𑀓𑀲𑁆𑀫𑀸 𑀧𑀦𑀸𑀲𑀁 𑀲𑁄𑀫𑀦𑀲𑁆𑀲𑁂𑀦 𑀅𑀯𑀺𑀧𑁆𑀧𑀬𑁄𑀕𑁄𑀢𑀺? 𑀤𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀸𑀦𑀁 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀦𑀺𑀲𑁆𑀲𑀭𑀡𑀢𑁆𑀢𑀸. 𑀧𑀘𑁆𑀙𑀺𑀫𑀸 𑀧𑀦 𑀅𑀯𑀲𑁂𑀲𑁂𑀓𑀚𑁆𑀛𑀸𑀦𑀺𑀓𑀸𑀯. 𑀓𑀲𑁆𑀫𑀸? 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀢𑁄. 𑀦 𑀳𑀺 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀁 𑀯𑀺𑀦𑀸 𑀯𑀢𑁆𑀢𑀢𑀻𑀢𑀺.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸.

𑀅𑀲𑀼𑀪𑀓𑀣𑀸

𑁨𑁬𑁩. 𑀇𑀤𑀸𑀦𑀺 𑀭𑀸𑀕𑀘𑀭𑀺𑀢𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀏𑀓𑁂𑀓𑀚𑁆𑀛𑀸𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺𑀆𑀤𑀻𑀲𑀼, 𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸, 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀦𑀼𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁. 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀦𑀻𑀮𑀁 𑀯𑀼𑀘𑁆𑀘𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀦𑀻𑀮𑀯𑀡𑁆𑀡𑀁. 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁. 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂𑀲𑀼 𑀭𑀢𑁆𑀢𑀯𑀡𑁆𑀡𑀲𑁆𑀲, 𑀧𑀼𑀩𑁆𑀩𑀲𑀦𑁆𑀦𑀺𑀘𑀬𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀲𑁆𑀲, 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀯𑀡𑁆𑀡𑀲𑁆𑀲, 𑀦𑀻𑀮𑀝𑁆𑀞𑀸𑀦𑁂 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀲𑁆𑀲𑁂𑀯 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀧𑀼𑀩𑁆𑀩𑀁 𑀯𑀺𑀧𑀼𑀩𑁆𑀩𑀁. 𑀯𑀺𑀧𑀼𑀩𑁆𑀩𑀫𑁂𑀯 𑀯𑀺𑀧𑀼𑀩𑁆𑀩𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀧𑀼𑀩𑁆𑀩𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀘𑁆𑀙𑀺𑀤𑁆𑀤𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀥𑀸 𑀙𑀺𑀦𑁆𑀤𑀦𑁂𑀦 𑀅𑀧𑀥𑀸𑀭𑀺𑀢𑀁, 𑀯𑀺𑀘𑁆𑀙𑀺𑀤𑁆𑀤𑀫𑁂𑀯 𑀯𑀺𑀘𑁆𑀙𑀺𑀤𑁆𑀤𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀘𑁆𑀙𑀺𑀤𑁆𑀤𑀦𑁆𑀢𑀺 𑀯𑀺𑀘𑁆𑀙𑀺𑀤𑁆𑀤𑀓𑀁. 𑀯𑁂𑀫𑀚𑁆𑀛𑁂 𑀙𑀺𑀦𑁆𑀦𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑁄 𑀘 𑀏𑀢𑁆𑀢𑁄 𑀘 𑀯𑀺𑀯𑀺𑀥𑀸𑀓𑀸𑀭𑁂𑀦 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀔𑀸𑀬𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀁. 𑀯𑀺𑀓𑁆𑀔𑀸𑀬𑀺𑀢𑀫𑁂𑀯 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀦𑁆𑀢𑀺 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀯𑀺𑀥𑀸 𑀔𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁. 𑀯𑀺𑀓𑁆𑀔𑀺𑀢𑁆𑀢𑀫𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀺𑀢𑁆𑀢𑀓𑀁. ‘𑀅𑀜𑁆𑀜𑁂𑀦 𑀳𑀢𑁆𑀣𑀁 𑀅𑀜𑁆𑀜𑁂𑀦 𑀧𑀸𑀤𑀁 𑀅𑀜𑁆𑀜𑁂𑀦 𑀲𑀻𑀲’𑀦𑁆𑀢𑀺 𑀏𑀯𑀁 𑀢𑀢𑁄 𑀢𑀢𑁄 𑀔𑀺𑀢𑁆𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀳𑀢𑀜𑁆𑀘 𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀜𑁆𑀘𑀸𑀢𑀺 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁. 𑀓𑀸𑀓𑀧𑀤𑀸𑀓𑀸𑀭𑁂𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀓𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀮𑁄𑀳𑀺𑀢𑀁 𑀓𑀺𑀭𑀢𑀺, 𑀯𑀺𑀓𑁆𑀔𑀺𑀧𑀢𑀺, 𑀇𑀢𑁄 𑀘𑀺𑀢𑁄 𑀘 𑀧𑀕𑁆𑀖𑀭𑀢𑀻𑀢𑀺 𑀮𑁄𑀳𑀺𑀢𑀓𑀁. 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀫𑀓𑁆𑀔𑀺𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀴𑀯𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀫𑀬𑁄. 𑀧𑀼𑀴𑀯𑁂 𑀯𑀺𑀓𑀺𑀭𑀢𑀻𑀢𑀺 𑀧𑀼𑀴𑀯𑀓𑀁. 𑀓𑀺𑀫𑀺𑀧𑀭𑀺𑀧𑀼𑀡𑁆𑀡𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀝𑁆𑀞𑀺𑀬𑁂𑀯 𑀅𑀝𑁆𑀞𑀺𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀅𑀝𑁆𑀞𑀻𑀢𑀺 𑀅𑀝𑁆𑀞𑀺𑀓𑀁. 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸𑀬𑀧𑀺 𑀏𑀓𑀝𑁆𑀞𑀺𑀓𑀲𑁆𑀲𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀸𑀦𑀺 𑀘 𑀧𑀦 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀦𑀺𑀫𑀺𑀢𑁆𑀢𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑁂𑀲𑀼 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀸𑀦𑀫𑁆𑀧𑀺 𑀏𑀢𑀸𑀦𑁂𑀯 𑀦𑀸𑀫𑀸𑀦𑀺.

𑀢𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑁂 𑀅𑀧𑁆𑀧𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸. 𑀢𑀸𑀬 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀬 𑀲𑀫𑁆𑀧𑀬𑁄𑀕𑀝𑁆𑀞𑁂𑀦 𑀲𑀳𑀕𑀢𑀁 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀲𑀳𑀕𑀢𑀁. 𑀯𑀺𑀦𑀻𑀮𑀓𑀲𑀜𑁆𑀜𑀸𑀲𑀳𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀧𑀦𑁂𑀢𑁆𑀣 𑀪𑀸𑀯𑀦𑀸𑀯𑀺𑀥𑀸𑀦𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁦𑁩 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯. 𑀅𑀯𑀲𑁂𑀲𑀸 𑀧𑀸𑀴𑀺𑀯𑀡𑁆𑀡𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀇𑀥, 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀯𑀺𑀬, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀏𑀓𑁂𑀓𑀲𑁆𑀫𑀺𑀁 𑀧𑀜𑁆𑀘𑀯𑀻𑀲𑀢𑀺 𑀏𑀓𑀓𑀸 𑀳𑁄𑀦𑁆𑀢𑀺. 𑀅𑀲𑀼𑀪𑀸𑀭𑀫𑁆𑀫𑀡𑀲𑁆𑀲 𑀘 𑀅𑀯𑀟𑁆𑀠𑀦𑀻𑀬𑀢𑁆𑀢𑀸, 𑀧𑀭𑀺𑀢𑁆𑀢𑁂 𑀉𑀤𑁆𑀥𑀼𑀫𑀸𑀢𑀓𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀫𑀳𑀦𑁆𑀢𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀇𑀢𑀺 𑀅𑀲𑀼𑀪𑀸𑀦𑀺 𑀲𑀼𑀪𑀕𑀼𑀡𑁄,

𑀤𑀲𑀲𑀢𑀮𑁄𑀘𑀦𑁂𑀦 𑀣𑀼𑀢𑀓𑀺𑀢𑁆𑀢𑀺;

𑀬𑀸𑀦𑀺 𑀅𑀯𑁄𑀘 𑀤𑀲𑀩𑀮𑁄,

𑀏𑀓𑁂𑀓𑀚𑁆𑀛𑀸𑀦𑀳𑁂𑀢𑀽𑀦𑀺.

𑀏𑀯𑀁 𑀧𑀸𑀴𑀺𑀦𑀬𑁂𑀦𑁂𑀯, 𑀢𑀸𑀯 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀚𑀸𑀦𑀺𑀢𑁆𑀯𑀸;

𑀢𑁂𑀲𑁆𑀯𑁂𑀯 𑀅𑀬𑀁 𑀪𑀺𑀬𑁆𑀬𑁄, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁦);

𑀏𑀢𑁂𑀲𑀼 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀥𑀺𑀕𑀢𑀚𑁆𑀛𑀸𑀦𑁄 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀢𑁆𑀢𑀸 𑀯𑀻𑀢𑀭𑀸𑀕𑁄 𑀯𑀺𑀬 𑀦𑀺𑀮𑁆𑀮𑁄𑀮𑀼𑀧𑁆𑀧𑀘𑀸𑀭𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁆𑀯𑀸𑀬𑀁 𑀅𑀲𑀼𑀪𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀭𑀸𑀕𑀘𑀭𑀺𑀢𑀪𑁂𑀤𑀯𑀲𑁂𑀦 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀙𑀯𑀲𑀭𑀻𑀭𑀜𑁆𑀳𑀺 𑀧𑀝𑀺𑀓𑀽𑀮𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑀁 𑀉𑀤𑁆𑀥𑀼𑀫𑀸𑀢𑀓𑀲𑀪𑀸𑀯𑀧𑁆𑀧𑀢𑁆𑀢𑀁 𑀯𑀸 𑀲𑀺𑀬𑀸, 𑀯𑀺𑀦𑀻𑀮𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀲𑀪𑀸𑀯𑀧𑁆𑀧𑀢𑁆𑀢𑀁. 𑀇𑀢𑀺 𑀬𑀸𑀤𑀺𑀲𑀁 𑀬𑀸𑀤𑀺𑀲𑀁 𑀲𑀓𑁆𑀓𑀸 𑀳𑁄𑀢𑀺 𑀮𑀤𑁆𑀥𑀼𑀁 𑀢𑀸𑀤𑀺𑀲𑁂 𑀢𑀸𑀤𑀺𑀲𑁂 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑀽𑀮𑀁 𑀯𑀺𑀦𑀻𑀮𑀓𑀧𑀝𑀺𑀓𑀽𑀮𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀫𑁂𑀯𑀸𑀢𑀺 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑀲𑀥𑀸 𑀅𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀁 𑀲𑀭𑀻𑀭𑀲𑀡𑁆𑀞𑀸𑀦𑀯𑀺𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑀲𑀡𑁆𑀞𑀸𑀦𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀦𑀻𑀮𑀓𑀁 𑀙𑀯𑀺𑀭𑀸𑀕𑀯𑀺𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑀯𑀡𑁆𑀡𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀧𑀼𑀩𑁆𑀩𑀓𑀁 𑀓𑀸𑀬𑀯𑀡𑀧𑀝𑀺𑀩𑀤𑁆𑀥𑀲𑁆𑀲 𑀤𑀼𑀕𑁆𑀕𑀦𑁆𑀥𑀪𑀸𑀯𑀲𑁆𑀲 𑀧𑀓𑀸𑀲𑀦𑀢𑁄 𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀲𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀲𑀭𑀻𑀭𑀕𑀦𑁆𑀥𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀘𑁆𑀙𑀺𑀤𑁆𑀤𑀓𑀁 𑀅𑀦𑁆𑀢𑁄𑀲𑀼𑀲𑀺𑀭𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑁂 𑀖𑀦𑀪𑀸𑀯𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀓𑁆𑀔𑀸𑀬𑀺𑀢𑀓𑀁 𑀫𑀁𑀲𑀽𑀧𑀘𑀬𑀲𑀫𑁆𑀧𑀢𑁆𑀢𑀺𑀯𑀺𑀦𑀸𑀲𑀧𑁆𑀧𑀓𑀸𑀲𑀦𑀢𑁄 𑀣𑀦𑀸𑀤𑀻𑀲𑀼 𑀲𑀭𑀻𑀭𑀧𑁆𑀧𑀤𑁂𑀲𑁂𑀲𑀼 𑀫𑀁𑀲𑀽𑀧𑀘𑀬𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀓𑁆𑀔𑀺𑀢𑁆𑀢𑀓𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀺𑀓𑁆𑀔𑁂𑀧𑀧𑁆𑀧𑀓𑀸𑀲𑀦𑀢𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀮𑀻𑀮𑀸𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀲𑀭𑀻𑀭𑀲𑀗𑁆𑀖𑀸𑀝𑀪𑁂𑀤𑀯𑀺𑀓𑀸𑀭𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑀲𑀗𑁆𑀖𑀸𑀝𑀲𑀫𑁆𑀧𑀢𑁆𑀢𑀺𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀧𑀝𑀺𑀓𑀽𑀮𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀅𑀮𑀗𑁆𑀓𑀸𑀭𑀚𑀦𑀺𑀢𑀲𑁄𑀪𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀧𑀼𑀴𑀯𑀓𑀁 𑀓𑀸𑀬𑀲𑁆𑀲 𑀅𑀦𑁂𑀓𑀓𑀺𑀫𑀺𑀓𑀼𑀮𑀲𑀸𑀥𑀸𑀭𑀡𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀓𑀸𑀬𑁂 𑀫𑀫𑀢𑁆𑀢𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀅𑀝𑁆𑀞𑀺𑀓𑀁 𑀲𑀭𑀻𑀭𑀝𑁆𑀞𑀻𑀦𑀁 𑀧𑀝𑀺𑀓𑀽𑀮𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀦𑁆𑀢𑀺. 𑀏𑀯𑀁 𑀭𑀸𑀕𑀘𑀭𑀺𑀢𑀯𑀲𑁂𑀦𑀸𑀧𑀺 𑀤𑀲𑀥𑀸 𑀅𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀤𑀲𑀯𑀺𑀥𑁂𑀧𑀺 𑀏𑀢𑀲𑁆𑀫𑀺𑀁 𑀅𑀲𑀼𑀪𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀧𑀭𑀺𑀲𑀡𑁆𑀞𑀺𑀢𑀚𑀮𑀸𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦𑁂𑀯 𑀦𑀸𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀅𑀭𑀺𑀢𑁆𑀢𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀏𑀯𑀫𑁂𑀯 𑀤𑀼𑀩𑁆𑀩𑀮𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀢𑁆𑀣 𑀳𑁄𑀢𑀺, 𑀦 𑀤𑀼𑀢𑀺𑀬𑀸𑀤𑀻𑀦𑀺. 𑀧𑀝𑀺𑀓𑀽𑀮𑁂𑀧𑀺 𑀘𑁂𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 ‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀫𑁆𑀳𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀘𑁂𑀯 𑀦𑀻𑀯𑀭𑀡𑀲𑀦𑁆𑀢𑀸𑀧𑀧𑁆𑀧𑀳𑀸𑀦𑁂𑀦 𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, ‘𑀩𑀳𑀼𑀁 𑀤𑀸𑀦𑀺 𑀯𑁂𑀢𑀦𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄 𑀧𑀼𑀧𑁆𑀨𑀙𑀟𑁆𑀟𑀓𑀲𑁆𑀲 𑀕𑀽𑀣𑀭𑀸𑀲𑀺𑀫𑁆𑀳𑀺 𑀯𑀺𑀬, 𑀉𑀲𑁆𑀲𑀦𑁆𑀦𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀭𑁄𑀕𑀺𑀦𑁄 𑀯𑀫𑀦𑀯𑀺𑀭𑁂𑀘𑀦𑀧𑁆𑀧𑀯𑀢𑁆𑀢𑀺𑀬𑀁 𑀯𑀺𑀬 𑀘.

𑀤𑀲𑀯𑀺𑀥𑀫𑁆𑀧𑀺 𑀘𑁂𑀢𑀁 𑀅𑀲𑀼𑀪𑀁 𑀮𑀓𑁆𑀔𑀡𑀢𑁄 𑀏𑀓𑀫𑁂𑀯 𑀳𑁄𑀢𑀺. 𑀤𑀲𑀯𑀺𑀥𑀲𑁆𑀲𑀧𑀺 𑀳𑀺 𑀏𑀢𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀪𑀸𑀯𑁄 𑀏𑀯 𑀮𑀓𑁆𑀔𑀡𑀁. 𑀢𑀤𑁂𑀢𑀁 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀓𑁂𑀯𑀮𑀁 𑀫𑀢𑀲𑀭𑀻𑀭𑁂𑀬𑁂𑀯 𑀤𑀦𑁆𑀢𑀝𑁆𑀞𑀺𑀓𑀤𑀲𑁆𑀲𑀸𑀯𑀺𑀦𑁄 𑀧𑀦 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀺𑀦𑁄 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀭𑀸𑀚𑀸𑀦𑀁 𑀉𑀮𑁆𑀮𑁄𑀓𑁂𑀦𑁆𑀢𑀲𑁆𑀲 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀼𑀧𑀝𑁆𑀞𑀸𑀓𑀲𑀸𑀫𑀡𑁂𑀭𑀲𑁆𑀲 𑀯𑀺𑀬 𑀘, 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀧𑀺 𑀉𑀧𑀝𑁆𑀞𑀸𑀢𑀺. 𑀬𑀣𑁂𑀯 𑀳𑀺 𑀫𑀢𑀲𑀭𑀻𑀭𑀁 𑀏𑀯𑀁 𑀚𑀻𑀯𑀫𑀸𑀦𑀓𑀫𑁆𑀧𑀺 𑀅𑀲𑀼𑀪𑀫𑁂𑀯. 𑀅𑀲𑀼𑀪𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀆𑀕𑀦𑁆𑀢𑀼𑀓𑁂𑀦 𑀅𑀮𑀗𑁆𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀧𑀜𑁆𑀜𑀸𑀬𑀢𑀻𑀢𑀺.

𑀅𑀲𑀼𑀪𑀓𑀣𑀸.

𑀓𑀺𑀁 𑀧𑀦 𑀧𑀣𑀯𑀻𑀓𑀲𑀺𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀝𑁆𑀞𑀺𑀓𑀲𑀜𑁆𑀜𑀸𑀧𑀭𑀺𑀬𑁄𑀲𑀸𑀦𑀸𑀯𑁂𑀲𑀸 𑀭𑀽𑀧𑀸𑀯𑀘𑀭𑀧𑁆𑀧𑀦𑀸, 𑀉𑀤𑀸𑀳𑀼 𑀅𑀜𑁆𑀜𑀸𑀧𑀺 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺; 𑀆𑀦𑀸𑀧𑀸𑀦𑀚𑁆𑀛𑀸𑀦𑀜𑁆𑀳𑀺 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸 𑀘 𑀇𑀥 𑀦 𑀓𑀣𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀦 𑀓𑀣𑀺𑀢𑀸 𑀯𑀸𑀬𑁄𑀓𑀲𑀺𑀡𑁂 𑀧𑀦 𑀕𑀳𑀺𑀢𑁂 𑀆𑀦𑀸𑀧𑀸𑀦𑀚𑁆𑀛𑀸𑀦𑀁 𑀕𑀳𑀺𑀢𑀫𑁂𑀯; 𑀯𑀡𑁆𑀡𑀓𑀲𑀺𑀡𑁂𑀲𑀼 𑀘 𑀕𑀳𑀺𑀢𑁂𑀲𑀼 𑀓𑁂𑀲𑀸𑀤𑀻𑀲𑀼 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀓𑀸𑀬𑀕𑀢𑀸𑀲𑀢𑀺, 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀕𑀳𑀺𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀚𑁆𑀛𑀸𑀦𑀯𑀲𑁂𑀦 𑀘𑁂𑀯 𑀦𑀯𑀲𑀺𑀯𑀣𑀺𑀓𑀸𑀯𑀡𑁆𑀡𑀚𑁆𑀛𑀸𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀸𑀬𑀕𑀢𑀸𑀲𑀢𑀺 𑀕𑀳𑀺𑀢𑀸𑀯𑀸𑀢𑀺. 𑀲𑀩𑁆𑀩𑀸𑀧𑀺 𑀭𑀽𑀧𑀸𑀯𑀘𑀭𑀧𑁆𑀧𑀦𑀸 𑀇𑀥 𑀓𑀣𑀺𑀢𑀸𑀯 𑀳𑁄𑀢𑀻𑀢𑀺.

𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁

𑁨𑁬𑁫. 𑀇𑀤𑀸𑀦𑀺 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸𑀢𑀺 𑀅𑀭𑀽𑀧𑀪𑀯𑁄 𑀅𑀭𑀽𑀧𑀁, 𑀅𑀭𑀽𑀧𑁂 𑀉𑀧𑀧𑀢𑁆𑀢𑀺 𑀅𑀭𑀽𑀧𑀽𑀧𑀧𑀢𑁆𑀢𑀺, 𑀢𑀲𑁆𑀲𑀸 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸. 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀉𑀧𑀸𑀬𑀁 𑀳𑁂𑀢𑀼𑀁 𑀓𑀸𑀭𑀡𑀁 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀲𑀩𑁆𑀩𑀸𑀲𑀁 𑀯𑀸 𑀅𑀦𑀯𑀲𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 ‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁪𑁮; 𑀤𑀻. 𑀦𑀺. 𑁨.𑁧𑁨𑁯). 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁪𑁪-𑁨𑁪𑁬; 𑀤𑀻. 𑀦𑀺. 𑁨.𑁧𑁭𑁩); 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀁, 𑀭𑀽𑀧𑀫𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀢𑀺𑀓𑁆𑀓𑀫𑀸𑀢𑀺 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀏𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀦𑁆𑀦𑀁 𑀛𑀸𑀦𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁, 𑀏𑀢𑁂𑀲𑀜𑁆𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦 𑀅𑀝𑁆𑀞𑀦𑁆𑀦𑀁 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁, 𑀲𑀩𑁆𑀩𑀸𑀓𑀸𑀭𑁂𑀦 𑀅𑀦𑀯𑀲𑁂𑀲𑀸𑀦𑀁 𑀯𑀸 𑀯𑀺𑀭𑀸𑀕𑀸 𑀘 𑀦𑀺𑀭𑁄𑀥𑀸 𑀘 𑀯𑀺𑀭𑀸𑀕𑀳𑁂𑀢𑀼 𑀘𑁂𑀯 𑀦𑀺𑀭𑁄𑀥𑀳𑁂𑀢𑀼 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀲𑁄 𑀅𑀦𑀢𑀺𑀓𑁆𑀓𑀦𑁆𑀢𑀭𑀽𑀧𑀲𑀜𑁆𑀜𑁂𑀦 𑀏𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀦𑁆𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀦 𑀳𑁄𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑀸𑀲𑀼 𑀘 𑀲𑀜𑁆𑀜𑀸𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀁 𑀅𑀯𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑀸 𑀭𑀽𑀧𑀲𑀜𑁆𑀜𑀸? 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀲𑀜𑁆𑀜𑀸𑀬𑁄. 𑀇𑀫𑀸 𑀭𑀽𑀧𑀲𑀜𑁆𑀜𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀯𑀻𑀢𑀺𑀓𑁆𑀓𑀦𑁆𑀢𑁄, 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺 (𑀯𑀺𑀪. 𑁬𑁦𑁨) 𑀏𑀯𑀁 𑀯𑀺𑀪𑀗𑁆𑀕𑁂 𑀲𑀜𑁆𑀜𑀸𑀦𑀁𑀬𑁂𑀯 𑀲𑀫𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀸 𑀏𑀢𑀸 𑀲𑀫𑀸𑀧𑀢𑁆𑀢𑀺𑀬𑁄, 𑀦 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬, 𑀢𑀲𑁆𑀫𑀸 𑀅𑀬𑀁 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀯𑀲𑁂𑀦𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸. 𑀭𑀽𑀧𑀲𑀜𑁆𑀜𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀧𑀝𑀺𑀖𑀲𑀜𑁆𑀜𑀸? 𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸 𑀕𑀦𑁆𑀥𑀲𑀜𑁆𑀜𑀸 𑀭𑀲𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀖𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁩). 𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀲𑀩𑁆𑀩𑀲𑁄 𑀤𑀲𑀦𑁆𑀦𑀫𑁆𑀧𑀺 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀧𑀳𑀸𑀦𑀸 𑀅𑀲𑀫𑀼𑀧𑁆𑀧𑀸𑀤𑀸 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀸𑀫𑀜𑁆𑀘𑁂𑀢𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀦 𑀲𑀦𑁆𑀢𑀺 𑁋 𑀦 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺 𑁋 𑀏𑀯𑀁 𑀲𑀦𑁆𑀢𑁂𑀧𑀺, 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀯𑀺𑀬, 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀢𑀢𑀺𑀬𑀫𑀕𑁆𑀕𑁂 𑀯𑀺𑀬 𑀘, 𑀇𑀫𑀲𑁆𑀫𑀺𑀁 𑀛𑀸𑀦𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀧𑀲𑀁𑀲𑀸𑀯𑀲𑁂𑀦 𑀏𑀢𑀸𑀲𑀁 𑀏𑀢𑁆𑀣 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀓𑀺𑀜𑁆𑀘𑀸𑀧𑀺 𑀢𑀸 𑀭𑀽𑀧𑀸𑀯𑀘𑀭𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦 𑀲𑀦𑁆𑀢𑀺, 𑀅𑀣 𑀔𑁄 𑀦 𑀧𑀳𑀻𑀦𑀢𑁆𑀢𑀸 𑀦 𑀲𑀦𑁆𑀢𑀺. 𑀦 𑀳𑀺 𑀭𑀽𑀧𑀯𑀺𑀭𑀸𑀕𑀸𑀬 𑀭𑀽𑀧𑀸𑀯𑀘𑀭𑀪𑀸𑀯𑀦𑀸 𑀲𑀁𑀯𑀢𑁆𑀢𑀢𑀺, 𑀭𑀽𑀧𑀸𑀬𑀢𑁆𑀢𑀸 𑀘 𑀏𑀢𑀸𑀲𑀁 𑀧𑀯𑀢𑁆𑀢𑀺. 𑀅𑀬𑀁 𑀧𑀦 𑀪𑀸𑀯𑀦𑀸 𑀭𑀽𑀧𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀸 𑀏𑀢𑁆𑀣 𑀧𑀳𑀻𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀜𑁆𑀘 𑀯𑀢𑁆𑀢𑀼𑀁, 𑀏𑀓𑀁𑀲𑁂𑀦𑁂𑀯 𑀏𑀯𑀁 𑀥𑀸𑀭𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀸𑀲𑀜𑁆𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀅𑀧𑁆𑀧𑀳𑀻𑀦𑀢𑁆𑀢𑀸𑀬𑁂𑀯 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 ‘‘𑀲𑀤𑁆𑀤𑁄 𑀓𑀡𑁆𑀝𑀓𑁄’’𑀢𑀺 (𑀅. 𑀦𑀺. 𑁧𑁦.𑁭𑁨) 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀇𑀥 𑀘 𑀧𑀳𑀻𑀦𑀢𑁆𑀢𑀸𑀬𑁂𑀯 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑁂𑀜𑁆𑀚𑀢𑀸 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 𑀘 𑀯𑀼𑀢𑁆𑀢𑀸. 𑀆𑀴𑀸𑀭𑁄 𑀘 𑀓𑀸𑀴𑀸𑀫𑁄 𑀆𑀭𑀼𑀧𑁆𑀧𑀲𑀫𑀸𑀧𑀦𑁆𑀦𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀅𑀤𑁆𑀤𑀲, 𑀦 𑀧𑀦 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻𑀢𑀺 (𑀤𑀻. 𑀦𑀺. 𑁨.𑁧𑁯𑁨).

𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀦𑀸𑀦𑀢𑁆𑀢𑁂 𑀕𑁄𑀘𑀭𑁂 𑀧𑀯𑀢𑁆𑀢𑀸𑀦𑀁 𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸𑀦𑀁 𑀯𑀸 𑀲𑀜𑁆𑀜𑀸𑀦𑀁. 𑀬𑀲𑁆𑀫𑀸 𑀳𑀺 𑀏𑀢𑀸 ‘‘𑀢𑀢𑁆𑀣 𑀓𑀢𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸? 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁪) 𑀏𑀯𑀁 𑀯𑀺𑀪𑀗𑁆𑀕𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸; 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀕𑀳𑀺𑀢𑀸 𑀲𑀜𑁆𑀜𑀸 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺; 𑀬𑀲𑁆𑀫𑀸 𑀘𑁂𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀜𑁆𑀜𑀸 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀢𑀸𑀲𑀁 𑀲𑀩𑁆𑀩𑀲𑁄 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀸𑀯𑀚𑁆𑀚𑀦𑀸 𑀅𑀲𑀫𑀦𑁆𑀦𑀸𑀳𑀸𑀭𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸. 𑀬𑀲𑁆𑀫𑀸 𑀢𑀸 𑀦𑀸𑀯𑀚𑁆𑀚𑀢𑀺, 𑀦 𑀫𑀦𑀲𑀺𑀓𑀭𑁄𑀢𑀺, 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀲𑁆𑀫𑀸 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀭𑀽𑀧𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸 𑀘 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂𑀧𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀢𑀲𑁆𑀫𑀺𑀁 𑀪𑀯𑁂 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀓𑀸𑀮𑁂, 𑀢𑀲𑁆𑀫𑀸 𑀢𑀸𑀲𑀁 ‘𑀲𑀫𑀢𑀺𑀓𑁆𑀓𑀫𑀸 𑀅𑀢𑁆𑀣𑀗𑁆𑀕𑀫𑀸’𑀢𑀺 𑀤𑁆𑀯𑁂𑀥𑀸𑀧𑀺 𑀅𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀼 𑀧𑀦 𑀬𑀲𑁆𑀫𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀦𑀯 𑀓𑀺𑀭𑀺𑀬𑀸𑀲𑀜𑁆𑀜𑀸, 𑀤𑀲 𑀅𑀓𑀼𑀲𑀮𑀲𑀜𑁆𑀜𑀸𑀢𑀺 𑀇𑀫𑀸 𑀲𑀢𑁆𑀢𑀯𑀻𑀲𑀢𑀺 𑀲𑀜𑁆𑀜𑀸 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀳𑀺 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑁄 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸𑀬𑁂𑀯 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀸 𑀧𑀦 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀲𑀫𑀸𑀧𑀦𑁆𑀦𑁄 𑀳𑁄𑀢𑀻𑀢𑀺. 𑀲𑀗𑁆𑀔𑁂𑀧𑀢𑁄 𑀘𑁂𑀢𑁆𑀣 ‘𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀯𑀼𑀢𑁆𑀢𑀁. ‘𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀲𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀜𑁆𑀘 𑀧𑀳𑀸𑀦𑀁 𑀅𑀫𑀦𑀲𑀺𑀓𑀸𑀭𑁄 𑀘 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀪𑀕𑀯𑀸 ‘𑀧𑀦𑁆𑀦𑀭𑀲𑀦𑁆𑀦𑀁 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦, 𑀤𑀲𑀦𑁆𑀦𑀁 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑁂𑀦, 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑁂𑀦𑀸’𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀓𑀣𑁂𑀲𑀺. 𑀓𑀺𑀁 𑀓𑀸𑀭𑀡𑀸𑀢𑀺 𑀘𑁂 𑀲𑁄𑀢𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀜𑁆𑀘𑁂𑀯 𑀧𑀮𑁄𑀪𑀦𑀢𑁆𑀣𑀜𑁆𑀘. 𑀲𑀘𑁂 𑀳𑀺 𑀓𑁂𑀘𑀺 𑀅𑀧𑀡𑁆𑀟𑀺𑀢𑀸 𑀯𑀤𑁂𑀬𑁆𑀬𑀼𑀁 ‘𑀲𑀢𑁆𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀣𑀸𑀢𑀺 𑀯𑀤𑀢𑀺, 𑀓𑁄 𑀦𑀼 𑀔𑁄 𑀏𑀢𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀸𑀬 𑀅𑀢𑁆𑀣𑁄? 𑀓𑁄 𑀆𑀦𑀺𑀲𑀁𑀲𑁄’𑀢𑀺 𑀢𑁂 𑀏𑀯𑀁 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑀜𑁆𑀳𑀺 𑀦𑁂𑀲𑀁 𑀲𑀼𑀢𑁆𑀯𑀸 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀏𑀯𑀁𑀲𑀦𑁆𑀢𑀸 𑀓𑀺𑀭 𑀅𑀬𑀁 𑀲𑀫𑀸𑀧𑀢𑁆𑀢𑀺, 𑀏𑀯𑀁𑀧𑀡𑀻𑀢𑀸, 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫 𑀦’𑀦𑁆𑀢𑀺. 𑀅𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺.

𑀧𑀮𑁄𑀪𑀦𑀢𑁆𑀣𑀜𑁆𑀘𑀸𑀧𑀺 𑀦𑁂𑀲𑀁 𑀏𑀢𑀺𑀲𑁆𑀲𑀸 𑀯𑀡𑁆𑀡𑀁 𑀓𑀣𑁂𑀲𑀺, 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀯𑀺𑀬. 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀦𑀸𑀫 𑀕𑀼𑀴𑀯𑀸𑀡𑀺𑀚𑁄 𑀯𑀼𑀘𑁆𑀘𑀢𑀺. 𑀲𑁄 𑀓𑀺𑀭 𑀕𑀼𑀴𑀨𑀸𑀡𑀺𑀢𑀔𑀡𑁆𑀟𑀲𑀓𑁆𑀓𑀭𑀸𑀤𑀻𑀦𑀺 𑀲𑀓𑀝𑁂𑀦𑀸𑀤𑀸𑀬 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 ‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣 𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 ‘𑀯𑀺𑀲𑀁 𑀦𑀸𑀫 𑀓𑀓𑁆𑀔𑀴𑀁, 𑀬𑁄 𑀦𑀁 𑀔𑀸𑀤𑀢𑀺 𑀲𑁄 𑀫𑀭𑀢𑀺, 𑀓𑀡𑁆𑀝𑀓𑁄𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀢𑀺. 𑀉𑀪𑁄𑀧𑁂𑀢𑁂 𑀓𑀓𑁆𑀔𑀴𑀸, 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄’𑀢𑀺 𑀕𑁂𑀳𑀤𑁆𑀯𑀸𑀭𑀸𑀦𑀺 𑀣𑀓𑁂𑀲𑀼𑀁, 𑀤𑀸𑀭𑀓𑁂 𑀘 𑀧𑀮𑀸𑀧𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑁄 ‘𑀅𑀯𑁄𑀳𑀸𑀭𑀓𑀼𑀲𑀮𑀸 𑀇𑀫𑁂 𑀕𑀸𑀫𑀺𑀓𑀸, 𑀳𑀦𑁆𑀤 𑀦𑁂 𑀉𑀧𑀸𑀬𑁂𑀦 𑀕𑀡𑁆𑀳𑀸𑀧𑁂𑀫𑀻’𑀢𑀺 ‘𑀅𑀢𑀺𑀫𑀥𑀼𑀭𑀁 𑀕𑀡𑁆𑀳𑀣 𑀅𑀢𑀺𑀲𑀸𑀤𑀼𑀁 𑀕𑀡𑁆𑀳𑀣, 𑀕𑀼𑀴𑀁 𑀨𑀸𑀡𑀺𑀢𑀁 𑀲𑀓𑁆𑀓𑀭𑀁 𑀲𑀫𑀕𑁆𑀖𑀁 𑀮𑀩𑁆𑀪𑀢𑀺, 𑀓𑀽𑀝𑀫𑀸𑀲𑀓𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺𑀧𑀺 𑀮𑀩𑁆𑀪𑀢𑀻’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 𑀳𑀝𑁆𑀞𑀧𑀳𑀝𑁆𑀞𑀸 𑀦𑀺𑀕𑁆𑀕𑀦𑁆𑀢𑁆𑀯𑀸 𑀩𑀳𑀼𑀫𑁆𑀧𑀺 𑀫𑀽𑀮𑀁 𑀤𑀢𑁆𑀯𑀸 𑀕𑀳𑁂𑀲𑀼𑀁.

𑀢𑀢𑁆𑀣 𑀯𑀸𑀡𑀺𑀚𑀲𑁆𑀲 ‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’𑀢𑀺 𑀉𑀕𑁆𑀖𑁄𑀲𑀦𑀁 𑀯𑀺𑀬 𑀪𑀕𑀯𑀢𑁄 ‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀣𑀸’𑀢𑀺 𑀯𑀘𑀦𑀁. ‘𑀉𑀪𑁄𑀧𑁂𑀢𑁂 𑀓𑀓𑁆𑀔𑀴𑀸, 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄’𑀢𑀺? 𑀕𑀸𑀫𑀺𑀓𑀸𑀦𑀁 𑀘𑀺𑀦𑁆𑀢𑀦𑀁 𑀯𑀺𑀬 ‘𑀪𑀕𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀣𑀸𑀢𑀺 𑀆𑀳, 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄? 𑀦𑀸𑀲𑁆𑀲 𑀕𑀼𑀡𑀁 𑀚𑀸𑀦𑀸𑀫𑀸’𑀢𑀺 𑀲𑁄𑀢𑀽𑀦𑀁 𑀘𑀺𑀦𑁆𑀢𑀦𑀁. 𑀅𑀣𑀲𑁆𑀲 𑀯𑀸𑀡𑀺𑀚𑀲𑁆𑀲 ‘𑀅𑀢𑀺𑀫𑀥𑀼𑀭𑀁 𑀕𑀡𑁆𑀳𑀣𑀸’𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 𑀪𑀕𑀯𑀢𑁄 𑀭𑀽𑀧𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀓𑀁 𑀆𑀦𑀺𑀲𑀁𑀲𑀧𑁆𑀧𑀓𑀸𑀲𑀦𑀁. 𑀇𑀤𑀜𑁆𑀳𑀺 𑀲𑀼𑀢𑁆𑀯𑀸 𑀢𑁂 𑀩𑀳𑀼𑀫𑁆𑀧𑀺 𑀫𑀽𑀮𑀁 𑀤𑀢𑁆𑀯𑀸, 𑀕𑀸𑀫𑀺𑀓𑀸 𑀯𑀺𑀬 𑀕𑀼𑀴𑀁, 𑀇𑀫𑀺𑀦𑀸 𑀆𑀦𑀺𑀲𑀁𑀲𑁂𑀦 𑀧𑀮𑁄𑀪𑀺𑀢𑀘𑀺𑀢𑁆𑀢𑀸 𑀫𑀳𑀦𑁆𑀢𑀫𑁆𑀧𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀇𑀫𑀁 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀦𑁆𑀢𑀻𑀢𑀺 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀧𑀮𑁄𑀪𑀦𑀢𑁆𑀣𑀜𑁆𑀘 𑀓𑀣𑁂𑀲𑀺.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁. 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀆𑀓𑀸𑀲𑀸𑀦𑀦𑁆𑀢𑀁. 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁. 𑀢𑀁 𑀆𑀓𑀸𑀲𑀸𑀦𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲, 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀇𑀢𑀺 𑀆𑀓𑀸𑀲𑀸𑀦𑀜𑁆𑀘𑀁 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀺𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁.

𑀬𑀣𑀸 𑀧𑀦 𑀅𑀜𑁆𑀜𑀢𑁆𑀣 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁨.𑁧𑁨𑁯) 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀅𑀦𑀦𑁆𑀢𑀦𑁆𑀢𑀺 𑀯𑀸 𑀧𑀭𑀺𑀢𑁆𑀢𑀦𑁆𑀢𑀺 𑀯𑀸 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀅𑀦𑀦𑁆𑀢𑁂 𑀳𑀺 𑀕𑀳𑀺𑀢𑁂 𑀧𑀭𑀺𑀢𑁆𑀢𑀁 𑀦 𑀕𑀬𑁆𑀳𑀢𑀺, 𑀧𑀭𑀺𑀢𑁆𑀢𑁂 𑀕𑀳𑀺𑀢𑁂 𑀅𑀦𑀦𑁆𑀢𑀁 𑀦 𑀕𑀬𑁆𑀳𑀢𑀺. 𑀏𑀯𑀁 𑀲𑀦𑁆𑀢𑁂 𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀁 𑀦 𑀧𑀽𑀭𑀢𑀺, 𑀤𑁂𑀲𑀦𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀸 𑀦 𑀳𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁂𑀲𑀦𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀁 𑀓𑀸𑀢𑀼𑀁 𑀅𑀚𑁆𑀛𑀸𑀲𑀬𑁄, 𑀢𑀲𑁆𑀫𑀸 𑀅𑀦𑀦𑁆𑀢𑀦𑁆𑀢𑀺 𑀯𑀸 𑀧𑀭𑀺𑀢𑁆𑀢𑀦𑁆𑀢𑀺 𑀯𑀸 𑀅𑀯𑀢𑁆𑀯𑀸 ‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢’𑀦𑁆𑀢𑀺 𑀆𑀳. 𑀏𑀯𑀜𑁆𑀳𑀺 𑀲𑀢𑀺 𑀉𑀪𑀬𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀁 𑀧𑀽𑀭𑀢𑀺, 𑀤𑁂𑀲𑀦𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀸 𑀲𑀫𑁆𑀧𑀚𑁆𑀚𑀢𑀺. 𑀅𑀯𑀲𑁂𑀲𑁄 𑀧𑀸𑀴𑀺𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀘𑁂𑀢𑁆𑀣 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀧𑀭𑀺𑀬𑀸𑀤𑀺𑀦𑁆𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀦 𑀧𑀯𑀢𑁆𑀢𑀁 𑀛𑀸𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀯𑀺𑀧𑀼𑀮𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀯𑀺𑀬 𑀘 𑀇𑀥𑀸𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺 𑀏𑀓𑀓𑀸 𑀳𑁄𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀧𑀦 𑀢𑁂𑀲𑀼 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁

𑁨𑁬𑁬. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺, 𑀏𑀢𑁆𑀣 𑀢𑀸𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀆𑀓𑀸𑀲𑀸𑀦𑀜𑁆𑀘𑀁 𑀆𑀬𑀢𑀦𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀛𑀸𑀦𑀫𑁆𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑀫𑁆𑀫𑀡𑀫𑁆𑀧𑀺. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺, 𑀏𑀢𑁆𑀣 𑀧𑀦 𑀅𑀦𑀦𑁆𑀢𑀦𑁆𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀯𑀲𑁂𑀦 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁. 𑀅𑀦𑀦𑁆𑀢𑀫𑁂𑀯 𑀆𑀦𑀜𑁆𑀘𑀁. 𑀯𑀺𑀜𑁆𑀜𑀸𑀡𑀁 𑀆𑀦𑀜𑁆𑀘𑀁 𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑀦𑁆𑀢𑀺 𑀅𑀯𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀭𑀽𑀴𑁆𑀳𑀻𑀲𑀤𑁆𑀤𑁄. 𑀢𑀤𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀇𑀫𑀸𑀬 𑀲𑀜𑁆𑀜𑀸𑀬 𑀆𑀬𑀢𑀦𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁. 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀧𑀭𑀺𑀬𑀸𑀤𑀺𑀦𑁆𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀭𑀫𑁆𑀫𑀡𑀁 𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁

𑁨𑁬𑁭. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀡𑀜𑁆𑀘 𑀆𑀬𑀢𑀦𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀛𑀸𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀆𑀭𑀫𑁆𑀫𑀡𑀫𑁆𑀧𑀺. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁; 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀇𑀫𑀺𑀲𑁆𑀲𑀸 𑀲𑀜𑁆𑀜𑀸𑀬 𑀆𑀬𑀢𑀦𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀢𑀲𑁆𑀫𑀺𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁. 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀧𑀭𑀺𑀬𑀸𑀤𑀺𑀦𑁆𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀅𑀧𑁆𑀧𑀦𑀸 𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀢𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀓𑀺𑀜𑁆𑀘𑀜𑁆𑀜𑀁 𑀆𑀬𑀢𑀦𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀛𑀸𑀦𑀫𑁆𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑀫𑁆𑀫𑀡𑀫𑁆𑀧𑀺. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀸𑀬 𑀲𑀜𑁆𑀜𑀸𑀬 𑀪𑀸𑀯𑀢𑁄 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲 𑀲𑀸 𑀲𑀜𑁆𑀜𑀸 𑀳𑁄𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀯𑀺𑀪𑀗𑁆𑀕𑁂 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀢𑀜𑁆𑀜𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 (𑀯𑀺𑀪. 𑁬𑁧𑁯) 𑀯𑀼𑀢𑁆𑀢𑀁. 𑀢𑀢𑁆𑀣 ‘𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀻’𑀢𑀺 ‘𑀲𑀦𑁆𑀢𑀸 𑀯𑀢𑀸𑀬𑀁 𑀲𑀫𑀸𑀧𑀢𑁆𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀦𑀢𑁆𑀣𑀺𑀪𑀸𑀯𑀫𑁆𑀧𑀺 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀞𑀲𑁆𑀲𑀢𑀻’𑀢𑀺 𑀏𑀯𑀁 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬 𑀦𑀁 ‘𑀲𑀦𑁆𑀢𑀸’𑀢𑀺 𑀫𑀦𑀲𑀺𑀓𑀭𑁄𑀢𑀺. 𑀲𑀦𑁆𑀢𑀢𑁄 𑀘𑁂 𑀫𑀦𑀲𑀺𑀓𑀭𑁄𑀢𑀺, 𑀓𑀣𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺? 𑀅𑀦𑀸𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀬. 𑀲𑁄 𑀳𑀺 𑀓𑀺𑀜𑁆𑀘𑀸𑀧𑀺 𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀅𑀣 𑀔𑁆𑀯𑀲𑁆𑀲 ‘𑀅𑀳𑀫𑁂𑀢𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺 𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀏𑀲 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀢𑀸𑀬.

𑀬𑀣𑀸 𑀳𑀺 𑀭𑀸𑀚𑀸 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀦𑀕𑀭𑀯𑀻𑀣𑀺𑀬𑀁 𑀯𑀺𑀘𑀭𑀦𑁆𑀢𑁄 𑀤𑀦𑁆𑀢𑀓𑀸𑀭𑀸𑀤𑀬𑁄 𑀲𑀺𑀧𑁆𑀧𑀺𑀓𑁂 𑀏𑀓𑀁 𑀯𑀢𑁆𑀣𑀁 𑀤𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑁂𑀦 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀤𑀦𑁆𑀢𑀘𑀼𑀡𑁆𑀡𑀸𑀤𑀻𑀳𑀺 𑀲𑀫𑁄𑀓𑀺𑀡𑁆𑀡𑀕𑀢𑁆𑀢𑁂 𑀅𑀦𑁂𑀓𑀸𑀦𑀺 𑀤𑀦𑁆𑀢𑀯𑀺𑀓𑀢𑀺𑀆𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘𑀅𑀳𑁄 𑀯𑀢 𑀭𑁂 𑀙𑁂𑀓𑀸 𑀆𑀘𑀭𑀺𑀬𑀸, 𑀈𑀤𑀺𑀲𑀸𑀦𑀺𑀧𑀺 𑀦𑀸𑀫 𑀲𑀺𑀧𑁆𑀧𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’𑀢𑀺, 𑀏𑀯𑀁 𑀢𑁂𑀲𑀁 𑀙𑁂𑀓𑀢𑀸𑀬 𑀢𑀼𑀲𑁆𑀲𑀢𑀺, 𑀦 𑀘𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀭𑀚𑁆𑀚𑀁 𑀧𑀳𑀸𑀬 𑀏𑀯𑀭𑀽𑀧𑁄 𑀲𑀺𑀧𑁆𑀧𑀺𑀓𑁄 𑀪𑀯𑁂𑀬𑁆𑀬’𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀭𑀚𑁆𑀚𑀲𑀺𑀭𑀺𑀬𑀸 𑀫𑀳𑀸𑀦𑀺𑀲𑀁𑀲𑀢𑀸𑀬. 𑀲𑁄 𑀲𑀺𑀧𑁆𑀧𑀺𑀓𑁂 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀏𑀯𑀫𑁂𑀯𑁂𑀲 𑀓𑀺𑀜𑁆𑀘𑀸𑀧𑀺 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀅𑀣 𑀔𑁆𑀯𑀲𑁆𑀲 ‘𑀅𑀳𑀫𑁂𑀢𑀁 𑀲𑀫𑀸𑀧𑀢𑁆𑀢𑀺𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺 𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀦𑁂𑀯 𑀏𑀲 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀳𑁄𑀢𑀺. 𑀲𑁄 𑀢𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀢𑀁 𑀧𑀭𑀫𑀲𑀼𑀔𑀼𑀫𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀲𑀜𑁆𑀜𑀁 𑀧𑀸𑀧𑀼𑀡𑀸𑀢𑀺, 𑀬𑀸𑀬 ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑀻’𑀢𑀺 𑀯𑀼𑀘𑁆𑀘𑀢𑀺. ‘𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀲𑀗𑁆𑀔𑀸𑀭𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁.

𑀇𑀤𑀸𑀦𑀺 𑀬𑀁 𑀢𑀁 𑀏𑀯𑀁 𑀅𑀥𑀺𑀕𑀢𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸, 𑀉𑀧𑀧𑀦𑁆𑀦𑀲𑁆𑀲 𑀯𑀸, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 (𑀯𑀺𑀪. 𑁬𑁨𑁦) 𑀯𑀼𑀢𑁆𑀢𑀁. 𑀢𑁂𑀲𑀼 𑀇𑀥 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄, 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀢𑁄, 𑀦𑁂𑀯𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀲𑀜𑁆𑀜𑀸, 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀜𑁆𑀘 𑀢𑀁 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀆𑀬𑀢𑀦𑀜𑁆𑀘𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀅𑀣 𑀯𑀸 𑀬𑀸𑀬𑀫𑁂𑀢𑁆𑀣 𑀲𑀜𑁆𑀜𑀸, 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀘 𑀲𑀸 𑀲𑁂𑀲𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁.

𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀲𑀜𑁆𑀜𑀸𑀯 𑀏𑀤𑀺𑀲𑀻, 𑀅𑀣 𑀔𑁄 𑀯𑁂𑀤𑀦𑀸𑀧𑀺 𑀦𑁂𑀯𑀯𑁂𑀤𑀦𑀸 𑀦𑀸𑀯𑁂𑀤𑀦𑀸, 𑀘𑀺𑀢𑁆𑀢𑀫𑁆𑀧𑀺 𑀦𑁂𑀯𑀘𑀺𑀢𑁆𑀢𑀁 𑀦𑀸𑀘𑀺𑀢𑁆𑀢𑀁, 𑀨𑀲𑁆𑀲𑁄𑀧𑀺 𑀦𑁂𑀯𑀨𑀲𑁆𑀲𑁄 𑀦𑀸𑀨𑀲𑁆𑀲𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼. 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑀧𑁆𑀧𑀪𑀼𑀢𑀻𑀳𑀺 𑀘 𑀉𑀧𑀫𑀸𑀳𑀺 𑀏𑀲𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋 𑀲𑀸𑀫𑀡𑁂𑀭𑁄 𑀓𑀺𑀭 𑀢𑁂𑀮𑁂𑀦 𑀧𑀢𑁆𑀢𑀁 𑀫𑀓𑁆𑀔𑁂𑀢𑁆𑀯𑀸 𑀞𑀧𑁂𑀲𑀺. 𑀢𑀁 𑀬𑀸𑀕𑀼𑀧𑀸𑀦𑀓𑀸𑀮𑁂 𑀣𑁂𑀭𑁄 ‘𑀧𑀢𑁆𑀢𑀫𑀸𑀳𑀭𑀸’𑀢𑀺 𑀆𑀳. 𑀲𑁄 ‘𑀧𑀢𑁆𑀢𑁂 𑀢𑁂𑀮𑀫𑀢𑁆𑀣𑀺, 𑀪𑀦𑁆𑀢𑁂’𑀢𑀺 𑀆𑀳. 𑀢𑀢𑁄 ‘𑀆𑀳𑀭, 𑀲𑀸𑀫𑀡𑁂𑀭, 𑀢𑁂𑀮𑀁 𑀦𑀸𑀴𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁂 ‘𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑁂𑀮’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀅𑀦𑁆𑀢𑁄𑀯𑀼𑀢𑁆𑀣𑀢𑁆𑀢𑀸 𑀬𑀸𑀕𑀼𑀬𑀸 𑀲𑀤𑁆𑀥𑀺𑀁 𑀅𑀓𑀧𑁆𑀧𑀺𑀬𑀝𑁆𑀞𑁂𑀦 𑀢𑁂𑀮𑀁 𑀅𑀢𑁆𑀣𑀻𑀢𑀺 𑀳𑁄𑀢𑀺, 𑀦𑀸𑀴𑀺𑀧𑀽𑀭𑀡𑀸𑀤𑀻𑀦𑀁 𑀅𑀪𑀸𑀯𑀯𑀲𑁂𑀦 𑀦𑀢𑁆𑀣𑀻𑀢𑀺 𑀳𑁄𑀢𑀺, 𑀏𑀯𑀁 𑀲𑀸𑀧𑀺 𑀲𑀜𑁆𑀜𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸 𑀳𑁄𑀢𑀺.

𑀓𑀺𑀫𑁆𑀧𑀦𑁂𑀢𑁆𑀣 𑀲𑀜𑁆𑀜𑀸𑀓𑀺𑀘𑁆𑀘𑀦𑁆𑀢𑀺? 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀬 𑀘 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀁. 𑀤𑀳𑀦𑀓𑀺𑀘𑁆𑀘𑀫𑀺𑀯 𑀳𑀺 𑀲𑀼𑀔𑁄𑀤𑀓𑁂 𑀢𑁂𑀚𑁄𑀥𑀸𑀢𑀼, 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀫𑁆𑀧𑁂𑀲𑀸 𑀧𑀝𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁂𑀲𑀲𑀫𑀸𑀧𑀢𑁆𑀢𑀻𑀲𑀼 𑀲𑀜𑁆𑀜𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀜𑁆𑀜𑁂𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀪𑀺𑀓𑁆𑀔𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀺𑀤𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀧𑀺𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀓𑀢𑀺𑀯𑀺𑀧𑀲𑁆𑀲𑀓𑁄 𑀧𑀦 𑀫𑀳𑀸𑀧𑀜𑁆𑀜𑁄 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑁄𑀯 𑀲𑀓𑁆𑀓𑀼𑀡𑁂𑀬𑁆𑀬. 𑀲𑁄𑀧𑀺 ‘‘𑀏𑀯𑀁 𑀓𑀺𑀭𑀺𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁯𑁫) 𑀏𑀯𑀁 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦𑁂𑀯, 𑀦𑁄 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀏𑀯𑀁 𑀲𑀼𑀔𑀼𑀫𑀢𑁆𑀢𑀁 𑀕𑀢𑀸 𑀏𑀲𑀸 𑀲𑀫𑀸𑀧𑀢𑁆𑀢𑀺.

𑀬𑀣𑀸 𑀘 𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑀽𑀧𑀫𑀸𑀬 𑀏𑀯𑀁 𑀫𑀕𑁆𑀕𑀼𑀤𑀓𑀽𑀧𑀫𑀸𑀬𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀲𑀸𑀫𑀡𑁂𑀭𑁄 𑀣𑁄𑀓𑀫𑀼𑀤𑀓𑀁 𑀤𑀺𑀲𑁆𑀯𑀸 ‘𑀉𑀤𑀓𑀁, 𑀪𑀦𑁆𑀢𑁂, 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀣𑀸’𑀢𑀺 𑀆𑀳. 𑀢𑀢𑁄 𑀣𑁂𑀭𑁂𑀦 ‘𑀲𑀘𑁂 𑀉𑀤𑀓𑀫𑀢𑁆𑀣𑀺, 𑀆𑀳𑀭 𑀦𑁆𑀳𑀸𑀦𑀲𑀸𑀝𑀓𑀁, 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁂 ‘𑀦𑀢𑁆𑀣𑀺, 𑀪𑀦𑁆𑀢𑁂’𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀉𑀧𑀸𑀳𑀦𑀢𑁂𑀫𑀦𑀫𑀢𑁆𑀢𑀝𑁆𑀞𑁂𑀦 𑀉𑀤𑀓𑀁 𑀅𑀢𑁆𑀣𑀻𑀢𑀺 𑀳𑁄𑀢𑀺, 𑀦𑁆𑀳𑀸𑀦𑀝𑁆𑀞𑁂𑀦 𑀦𑀢𑁆𑀣𑀻𑀢𑀺 𑀳𑁄𑀢𑀺, 𑀏𑀯𑀫𑁆𑀧𑀺 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑀸𑀳𑁂𑀯, 𑀅𑀜𑁆𑀜𑀸𑀳𑀺𑀧𑀺 𑀅𑀦𑀼𑀭𑀽𑀧𑀸𑀳𑀺 𑀉𑀧𑀫𑀸𑀳𑀺 𑀏𑀲 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀇𑀢𑀺 𑀇𑀫𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀢𑀸𑀬 𑀯𑀸 𑀲𑀜𑁆𑀜𑀸𑀬 𑀲𑀳𑀕𑀢𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀆𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀇𑀥 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀧𑀭𑀺𑀬𑀸𑀤𑀺𑀦𑁆𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀁 𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀲𑀤𑀺𑀲𑀭𑀽𑀧𑁄 𑀦𑀸𑀣𑁄, 𑀆𑀭𑀼𑀧𑁆𑀧𑀁 𑀬𑀁 𑀘𑀢𑀼𑀩𑁆𑀩𑀺𑀥𑀁 𑀆𑀳;

𑀢𑀁 𑀇𑀢𑀺 𑀜𑀢𑁆𑀯𑀸 𑀢𑀲𑁆𑀫𑀺𑀁, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀳𑀺 𑁋

𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄, 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸;

𑀅𑀗𑁆𑀕𑀸𑀢𑀺𑀓𑁆𑀓𑀫𑀫𑁂𑀢𑀸𑀲𑀁, 𑀦 𑀇𑀘𑁆𑀙𑀦𑁆𑀢𑀺 𑀯𑀺𑀪𑀸𑀯𑀺𑀦𑁄.

𑀏𑀢𑀸𑀲𑀼 𑀳𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀢𑀺𑀓𑁆𑀓𑀫𑀢𑁄 𑀧𑀞𑀫𑀸, 𑀆𑀓𑀸𑀲𑀸𑀢𑀺𑀓𑁆𑀓𑀫𑀢𑁄 𑀤𑀼𑀢𑀺𑀬𑀸, 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀸, 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑀕𑀫𑀸𑀢𑀺𑀓𑁆𑀓𑀫𑀢𑁄 𑀘𑀢𑀼𑀢𑁆𑀣𑀸𑀢𑀺 𑀲𑀩𑁆𑀩𑀣𑀸 ‘𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸’ 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀗𑁆𑀕𑀸𑀢𑀺𑀓𑁆𑀓𑀫𑀁 𑀧𑀦 𑀏𑀢𑀸𑀲𑀁 𑀦 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀲𑀼 𑀯𑀺𑀬 𑀏𑀢𑀸𑀲𑀼 𑀅𑀗𑁆𑀕𑀸𑀢𑀺𑀓𑁆𑀓𑀫𑁄 𑀅𑀢𑁆𑀣𑀺. 𑀲𑀩𑁆𑀩𑀸𑀲𑀼𑀧𑀺 𑀳𑀺 𑀏𑀢𑀸𑀲𑀼 𑀉𑀧𑁂𑀓𑁆𑀔𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀤𑁆𑀯𑁂 𑀏𑀯 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑁋

𑀲𑀼𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥;

𑀉𑀧𑀫𑀸 𑀢𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀸𑀲𑀸𑀤𑀢𑀮𑀲𑀸𑀝𑀺𑀓𑀸.

𑀬𑀣𑀸 𑀳𑀺 𑀘𑀢𑀼𑀪𑀽𑀫𑀓𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀺𑀩𑁆𑀩𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀲𑀼𑀭𑀪𑀺𑀕𑀦𑁆𑀥𑀫𑀸𑀮𑀸𑀲𑀸𑀤𑀼𑀭𑀲𑀧𑀸𑀦𑀪𑁄𑀚𑀦𑀲𑀬𑀦𑀘𑁆𑀙𑀸𑀤𑀦𑀸𑀤𑀺𑀯𑀲𑁂𑀦 𑀧𑀡𑀻𑀢𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀅𑀲𑁆𑀲𑀼, 𑀤𑀼𑀢𑀺𑀬𑁂 𑀢𑀢𑁄 𑀧𑀡𑀻𑀢𑀢𑀭𑀸, 𑀢𑀢𑀺𑀬𑁂 𑀢𑀢𑁄 𑀧𑀡𑀻𑀢𑀢𑀫𑀸, 𑀘𑀢𑀼𑀢𑁆𑀣𑁂 𑀲𑀩𑁆𑀩𑀧𑀡𑀻𑀢𑀸; 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀧𑀸𑀲𑀸𑀤𑀢𑀮𑀸𑀦𑁂𑀯, 𑀦𑀢𑁆𑀣𑀺 𑀦𑁂𑀲𑀁 𑀧𑀸𑀲𑀸𑀤𑀢𑀮𑀪𑀸𑀯𑁂𑀦 𑀯𑀺𑀲𑁂𑀲𑁄, 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀺𑀯𑀺𑀲𑁂𑀲𑁂𑀦 𑀧𑀦 𑀳𑁂𑀝𑁆𑀞𑀺𑀫𑀢𑁄 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑀁 𑀉𑀧𑀭𑀺𑀫𑀁 𑀧𑀡𑀻𑀢𑀢𑀭𑀁 𑀳𑁄𑀢𑀺.

𑀬𑀣𑀸 𑀘 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀓𑀦𑁆𑀢𑀺𑀢𑀣𑀽𑀮𑀲𑀡𑁆𑀳𑀲𑀡𑁆𑀳𑀢𑀭𑀲𑀡𑁆𑀳𑀢𑀫𑀲𑀼𑀢𑁆𑀢𑀸𑀦𑀁 𑀘𑀢𑀼𑀧𑀮𑀢𑀺𑀧𑀮𑀤𑁆𑀯𑀺𑀧𑀮𑀏𑀓𑀧𑀮𑀲𑀸𑀝𑀺𑀓𑀸 𑀅𑀲𑁆𑀲𑀼, 𑀆𑀬𑀸𑀫𑁂𑀦 𑀯𑀺𑀢𑁆𑀣𑀸𑀭𑁂𑀦 𑀘 𑀲𑀫𑀧𑁆𑀧𑀫𑀸𑀡𑀸; 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀸 𑀲𑀸𑀝𑀺𑀓𑀸 𑀘𑀢𑀲𑁆𑀲𑁄𑀧𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀫𑀧𑁆𑀧𑀫𑀸𑀡𑀸, 𑀦𑀢𑁆𑀣𑀺 𑀢𑀸𑀲𑀁 𑀧𑀫𑀸𑀡𑀢𑁄 𑀯𑀺𑀲𑁂𑀲𑁄, 𑀲𑀼𑀔𑀲𑀫𑁆𑀨𑀲𑁆𑀲𑀲𑀼𑀔𑀼𑀫𑀪𑀸𑀯𑀫𑀳𑀕𑁆𑀖𑀪𑀸𑀯𑁂𑀳𑀺 𑀧𑀦 𑀧𑀼𑀭𑀺𑀫𑀸𑀬 𑀧𑀼𑀭𑀺𑀫𑀸𑀬 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀓𑀺𑀜𑁆𑀘𑀸𑀧𑀺 𑀘𑀢𑀽𑀲𑀼𑀧𑀺 𑀏𑀢𑀸𑀲𑀼 𑀉𑀧𑁂𑀓𑁆𑀔𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀏𑀢𑀸𑀦𑀺 𑀤𑁆𑀯𑁂𑀬𑁂𑀯 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀢𑁂𑀲𑀁 𑀅𑀗𑁆𑀕𑀸𑀦𑀁 𑀧𑀡𑀻𑀢𑀧𑀡𑀻𑀢𑀢𑀭𑀪𑀸𑀯𑁂𑀦 𑀲𑀼𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀡𑀻𑀢𑀧𑀡𑀻𑀢𑀸 𑀘𑁂𑀢𑀸 𑁋

𑀅𑀲𑀼𑀘𑀺𑀫𑁆𑀳𑀺 𑀫𑀡𑁆𑀟𑀧𑁂 𑀮𑀕𑁆𑀕𑁄, 𑀏𑀓𑁄 𑀢𑀁 𑀦𑀺𑀲𑁆𑀲𑀺𑀢𑁄 𑀧𑀭𑁄;

𑀅𑀜𑁆𑀜𑁄 𑀩𑀳𑀺 𑀅𑀦𑀺𑀲𑁆𑀲𑀸𑀬, 𑀢𑀁 𑀢𑀁 𑀦𑀺𑀲𑁆𑀲𑀸𑀬 𑀘𑀸𑀧𑀭𑁄.

𑀞𑀺𑀢𑁄 𑀘𑀢𑀽𑀳𑀺 𑀏𑀢𑁂𑀳𑀺, 𑀧𑀼𑀭𑀺𑀲𑁂𑀳𑀺 𑀬𑀣𑀸𑀓𑁆𑀓𑀫𑀁;

𑀲𑀫𑀸𑀦𑀢𑀸𑀬 𑀜𑀸𑀢𑀩𑁆𑀩𑀸, 𑀘𑀢𑀲𑁆𑀲𑁄𑀧𑀺 𑀯𑀺𑀪𑀸𑀯𑀺𑀦𑀸. (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁧);

𑀢𑀢𑁆𑀭𑀸𑀬𑀫𑀢𑁆𑀣𑀬𑁄𑀚𑀦𑀸 𑁋 𑀅𑀲𑀼𑀘𑀺𑀫𑁆𑀳𑀺 𑀓𑀺𑀭 𑀤𑁂𑀲𑁂 𑀏𑀓𑁄 𑀫𑀡𑁆𑀟𑀧𑁄. 𑀅𑀣𑁂𑀓𑁄 𑀧𑀼𑀭𑀺𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀲𑀼𑀘𑀺𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀢𑀁 𑀫𑀡𑁆𑀟𑀧𑀁 𑀳𑀢𑁆𑀣𑁂𑀳𑀺 𑀆𑀮𑀫𑁆𑀩𑀺𑀢𑁆𑀯𑀸 𑀢𑀢𑁆𑀣 𑀮𑀕𑁆𑀕𑁄, 𑀮𑀕𑁆𑀕𑀺𑀢𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀅𑀣𑀸𑀧𑀭𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀫𑀡𑁆𑀟𑀧𑀮𑀕𑁆𑀕𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀺𑀢𑁄. 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘𑀬𑁄 𑀏𑀲 𑀫𑀡𑁆𑀟𑀧𑁂 𑀮𑀕𑁆𑀕𑁄, 𑀬𑁄 𑀘 𑀢𑀁 𑀦𑀺𑀲𑁆𑀲𑀺𑀢𑁄, 𑀉𑀪𑁄𑀧𑁂𑀢𑁂 𑀤𑀼𑀝𑁆𑀞𑀺𑀢𑀸; 𑀥𑀼𑀯𑁄 𑀘 𑀦𑁂𑀲𑀁 𑀫𑀡𑁆𑀟𑀧𑀧𑀧𑀸𑀢𑁂 𑀧𑀸𑀢𑁄, 𑀳𑀦𑁆𑀤𑀸𑀳𑀁 𑀩𑀳𑀺𑀬𑁂𑀯 𑀢𑀺𑀝𑁆𑀞𑀸𑀫𑀻’𑀢𑀺 𑀲𑁄 𑀢𑀦𑁆𑀦𑀺𑀲𑁆𑀲𑀺𑀢𑀁 𑀅𑀦𑀺𑀲𑁆𑀲𑀸𑀬 𑀩𑀳𑀺𑀬𑁂𑀯 𑀅𑀝𑁆𑀞𑀸𑀲𑀺. 𑀅𑀣𑀸𑀧𑀭𑁄 𑀆𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀮𑀕𑁆𑀕𑀲𑁆𑀲 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀅𑀔𑁂𑀫𑀪𑀸𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀞𑀺𑀢𑀜𑁆𑀘 𑀲𑀼𑀝𑁆𑀞𑀺𑀢𑁄𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀺.

𑀢𑀢𑁆𑀣 𑀅𑀲𑀼𑀘𑀺𑀫𑁆𑀳𑀺 𑀤𑁂𑀲𑁂 𑀫𑀡𑁆𑀟𑀧𑁄 𑀯𑀺𑀬 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀤𑀝𑁆𑀞𑀩𑁆𑀩𑀁. 𑀅𑀲𑀼𑀘𑀺𑀚𑀺𑀕𑀼𑀘𑁆𑀙𑀸𑀬 𑀫𑀡𑁆𑀟𑀧𑀮𑀕𑁆𑀕𑁄 𑀧𑀼𑀭𑀺𑀲𑁄 𑀯𑀺𑀬 𑀭𑀽𑀧𑀦𑀺𑀫𑀺𑀢𑁆𑀢𑀚𑀺𑀕𑀼𑀘𑁆𑀙𑀸𑀬 𑀆𑀓𑀸𑀲𑀸𑀭𑀫𑁆𑀫𑀡𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀫𑀡𑁆𑀟𑀧𑀮𑀕𑁆𑀕𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀺𑀢𑁄 𑀯𑀺𑀬 𑀆𑀓𑀸𑀲𑀸𑀭𑀫𑁆𑀫𑀡𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀔𑁂𑀫𑀪𑀸𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀺𑀲𑁆𑀲𑀸𑀬 𑀢𑀁 𑀫𑀡𑁆𑀟𑀧𑀮𑀕𑁆𑀕𑀁, 𑀩𑀳𑀺𑀞𑀺𑀢𑁄 𑀯𑀺𑀬, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀭𑀫𑁆𑀫𑀡𑀁 𑀅𑀓𑀢𑁆𑀯𑀸 𑀢𑀤𑀪𑀸𑀯𑀸𑀭𑀫𑁆𑀫𑀡𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀫𑀡𑁆𑀟𑀧𑀮𑀕𑁆𑀕𑀲𑁆𑀲 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀅𑀔𑁂𑀫𑀢𑀁 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀞𑀺𑀢𑀜𑁆𑀘 ‘𑀲𑀼𑀝𑁆𑀞𑀺𑀢𑁄’𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑀺𑀬 𑀯𑀺𑀜𑁆𑀜𑀸𑀡𑀸𑀪𑀸𑀯𑀲𑀗𑁆𑀔𑀸𑀢𑁂 𑀩𑀳𑀺𑀧𑀤𑁂𑀲𑁂 𑀞𑀺𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀜𑁆𑀘 𑁋

𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯, 𑀅𑀜𑁆𑀜𑀸𑀪𑀸𑀯𑁂𑀦 𑀢𑀁 𑀇𑀤𑀁;

𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀭𑀸𑀚𑀸𑀦𑀁, 𑀯𑀼𑀢𑁆𑀢𑀺𑀳𑁂𑀢𑀼 𑀬𑀣𑀸 𑀚𑀦𑁄. (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁨);

𑀇𑀤𑀜𑁆𑀳𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 ‘𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀻’𑀢𑀺 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀪𑀸𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯. 𑀬𑀣𑀸 𑀓𑀺𑀁? ‘𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀭𑀸𑀚𑀸𑀦𑀁 𑀯𑀼𑀢𑁆𑀢𑀺𑀳𑁂𑀢𑀼 𑀬𑀣𑀸 𑀚𑀦𑁄’. 𑀬𑀣𑀸 𑀳𑀺 𑀅𑀲𑀁𑀬𑀢𑀁 𑀨𑀭𑀼𑀲𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑀁 𑀓𑀜𑁆𑀘𑀺 𑀲𑀩𑁆𑀩𑀤𑀺𑀲𑀫𑁆𑀧𑀢𑀺𑀁 𑀭𑀸𑀚𑀸𑀦𑀁 ‘𑀨𑀭𑀼𑀲𑀲𑀫𑀸𑀘𑀸𑀭𑁄 𑀅𑀬’𑀦𑁆𑀢𑀺 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀺𑀁 𑀅𑀮𑀪𑀫𑀸𑀦𑁄 𑀚𑀦𑁄 𑀯𑀼𑀢𑁆𑀢𑀺𑀳𑁂𑀢𑀼 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀺, 𑀏𑀯𑀁 𑀤𑀺𑀝𑁆𑀞𑀤𑁄𑀲𑀫𑁆𑀧𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀅𑀮𑀪𑀫𑀸𑀦𑀫𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯. 𑀏𑀯𑀁 𑀓𑀼𑀭𑀼𑀫𑀸𑀦𑀜𑁆𑀘 𑁋

𑀆𑀭𑀼𑀴𑁆𑀳𑁄 𑀤𑀻𑀖𑀦𑀺𑀲𑁆𑀲𑁂𑀡𑀺𑀁, 𑀬𑀣𑀸 𑀦𑀺𑀲𑁆𑀲𑁂𑀡𑀺𑀩𑀸𑀳𑀼𑀓𑀁;

𑀧𑀩𑁆𑀩𑀢𑀕𑁆𑀕𑀜𑁆𑀘 𑀆𑀭𑀼𑀴𑁆𑀳𑁄, 𑀬𑀣𑀸 𑀧𑀩𑁆𑀩𑀢𑀫𑀢𑁆𑀣𑀓𑀁.

𑀬𑀣𑀸 𑀯𑀸 𑀕𑀺𑀭𑀺𑀫𑀸𑀭𑀼𑀴𑁆𑀳𑁄, 𑀅𑀢𑁆𑀢𑀦𑁄𑀬𑁂𑀯 𑀚𑀡𑁆𑀡𑀼𑀓𑀁;

𑀑𑀮𑀼𑀩𑁆𑀪𑀢𑀺 𑀢𑀣𑁂𑀯𑁂𑀢𑀁, 𑀛𑀸𑀦𑀫𑁄𑀮𑀼𑀩𑁆𑀪 𑀯𑀢𑁆𑀢𑀢𑀻𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁩);

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀪𑀽𑀫𑀓𑀓𑀼𑀲𑀮𑀯𑀡𑁆𑀡𑀦𑀸

𑁨𑁬𑁯. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀺 𑀳𑀻𑀦𑀸𑀤𑀺𑀦𑀸 𑀧𑀪𑁂𑀤𑁂𑀦 𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑀻𑀦𑀦𑁆𑀢𑀺 𑀮𑀸𑀫𑀓𑀁. 𑀢𑀁 𑀆𑀬𑀽𑀳𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀳𑀻𑀦𑀼𑀢𑁆𑀢𑀫𑀸𑀦𑀁 𑀫𑀚𑁆𑀛𑁂 𑀪𑀯𑀁 𑀫𑀚𑁆𑀛𑀺𑀫𑀁. 𑀧𑀥𑀸𑀦𑀪𑀸𑀯𑀁 𑀦𑀻𑀢𑀁 𑀧𑀡𑀻𑀢𑀁, 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀦𑀺𑀧𑀺 𑀆𑀬𑀽𑀳𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀳𑀺 𑀆𑀬𑀽𑀳𑀦𑀓𑁆𑀔𑀡𑁂 𑀙𑀦𑁆𑀤𑁄 𑀯𑀸 𑀳𑀻𑀦𑁄 𑀳𑁄𑀢𑀺, 𑀯𑀻𑀭𑀺𑀬𑀁 𑀯𑀸, 𑀘𑀺𑀢𑁆𑀢𑀁 𑀯𑀸, 𑀯𑀻𑀫𑀁𑀲𑀸 𑀯𑀸, 𑀢𑀁 𑀳𑀻𑀦𑀁 𑀦𑀸𑀫. 𑀬𑀲𑁆𑀲 𑀢𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸 𑀘𑁂𑀯 𑀧𑀡𑀻𑀢𑀸, 𑀘 𑀢𑀁 𑀫𑀚𑁆𑀛𑀺𑀫𑀜𑁆𑀘𑁂𑀯 𑀧𑀡𑀻𑀢𑀜𑁆𑀘. 𑀬𑀁 𑀧𑀦 𑀓𑀢𑁆𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀆𑀬𑀽𑀳𑀺𑀢𑀁, 𑀢𑀁 𑀙𑀦𑁆𑀤𑀸𑀥𑀺𑀧𑀢𑀺𑀢𑁄 𑀆𑀕𑀢𑀢𑁆𑀢𑀸 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁 𑀦𑀸𑀫. 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀦𑀬𑀸 𑀕𑀡𑁂𑀢𑀩𑁆𑀩𑀸. 𑀲𑀩𑁆𑀩𑀧𑀞𑀫𑀁 𑀯𑀺𑀪𑀢𑁆𑀢𑁄 𑀳𑀺 𑀏𑀓𑁄 𑀦𑀬𑁄, 𑀳𑀻𑀦𑀦𑁆𑀢𑀺 𑀏𑀓𑁄, 𑀫𑀚𑁆𑀛𑀺𑀫𑀦𑁆𑀢𑀺 𑀏𑀓𑁄, 𑀧𑀡𑀻𑀢𑀦𑁆𑀢𑀺 𑀏𑀓𑁄, 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀏𑀓𑁄. 𑀇𑀫𑁂 𑀢𑀸𑀯 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑁂 𑀧𑀜𑁆𑀘 𑀦𑀬𑀸. 𑀏𑀯𑀁 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸𑀤𑀻𑀲𑀼𑀧𑀻𑀢𑀺 𑀘𑀢𑁆𑀢𑀸𑀭𑁄 𑀧𑀜𑁆𑀘𑀓𑀸 𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀧𑀼𑀭𑀺𑀫𑁄 𑀯𑀸 𑀏𑀓𑁄 𑀲𑀼𑀤𑁆𑀥𑀺𑀓𑀦𑀬𑁄, 𑀳𑀻𑀦𑀦𑁆𑀢𑀺𑀆𑀤𑀬𑁄 𑀢𑀬𑁄, 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺𑀆𑀤𑀬𑁄 𑀘𑀢𑁆𑀢𑀸𑀭𑁄, 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁 𑀳𑀻𑀦𑀦𑁆𑀢𑀺𑀆𑀤𑀬𑁄 𑀤𑁆𑀯𑀸𑀤𑀲𑀸𑀢𑀺 𑀏𑀯𑀫𑁆𑀧𑀺 𑀯𑀻𑀲𑀢𑀺 𑀦𑀬𑀸 𑀳𑁄𑀦𑁆𑀢𑀺.

𑀇𑀫𑁂 𑀯𑀻𑀲𑀢𑀺 𑀫𑀳𑀸𑀦𑀬𑀸 𑀓𑀢𑁆𑀣 𑀯𑀺𑀪𑀢𑁆𑀢𑀸𑀢𑀺? 𑀫𑀳𑀸𑀧𑀓𑀭𑀡𑁂 (𑀧𑀝𑁆𑀞𑀸. 𑁨.𑁧𑁪.𑁧) 𑀳𑀻𑀦𑀢𑁆𑀢𑀺𑀓𑁂 𑀯𑀺𑀪𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀳𑀻𑀦𑀢𑁆𑀢𑀺𑀓𑀢𑁄 𑀫𑀚𑁆𑀛𑀺𑀫𑀭𑀸𑀲𑀺𑀁 𑀕𑀳𑁂𑀢𑁆𑀯𑀸 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀓𑀸𑀢𑀩𑁆𑀩𑀸. 𑀢𑀢𑁄𑀧𑀺 𑀫𑀚𑁆𑀛𑀺𑀫𑀭𑀸𑀲𑀺𑀁 𑀞𑀧𑁂𑀢𑁆𑀯𑀸 𑀳𑀻𑀦𑀧𑀡𑀻𑀢𑁂 𑀕𑀳𑁂𑀢𑁆𑀯𑀸 𑀦𑀯 𑀦𑀯 𑀓𑁄𑀝𑁆𑀞𑀸𑀲𑀸 𑀓𑀸𑀢𑀩𑁆𑀩𑀸. 𑀳𑀻𑀦𑀲𑁆𑀫𑀺𑀁𑀬𑁂𑀯 𑀳𑀺 𑀳𑀻𑀦𑀁 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁 𑀅𑀢𑁆𑀣𑀺 𑀧𑀡𑀻𑀢𑀁 𑀅𑀢𑁆𑀣𑀺. 𑀧𑀡𑀻𑀢𑀲𑁆𑀫𑀺𑀫𑁆𑀧𑀺 𑀳𑀻𑀦𑀁 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁 𑀅𑀢𑁆𑀣𑀺 𑀧𑀡𑀻𑀢𑀁 𑀅𑀢𑁆𑀣𑀺. 𑀢𑀣𑀸 𑀳𑀻𑀦𑀳𑀻𑀦𑀲𑁆𑀫𑀺𑀁 𑀳𑀻𑀦𑀁, 𑀳𑀻𑀦𑀳𑀻𑀦𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀳𑀻𑀦𑀳𑀻𑀦𑀲𑁆𑀫𑀺𑀁 𑀧𑀡𑀻𑀢𑀁. 𑀳𑀻𑀦𑀫𑀚𑁆𑀛𑀺𑀫𑀲𑁆𑀫𑀺𑀁 𑀳𑀻𑀦𑀁, 𑀳𑀻𑀦𑀫𑀚𑁆𑀛𑀺𑀫𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀳𑀻𑀦𑀫𑀚𑁆𑀛𑀺𑀫𑀲𑁆𑀫𑀺𑀁 𑀧𑀡𑀻𑀢𑀁. 𑀳𑀻𑀦𑀧𑀡𑀻𑀢𑀲𑁆𑀫𑀺𑀁 𑀳𑀻𑀦𑀁, 𑀳𑀻𑀦𑀧𑀡𑀻𑀢𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀳𑀻𑀦𑀧𑀡𑀻𑀢𑀲𑁆𑀫𑀺𑀁 𑀧𑀡𑀻𑀢𑀦𑁆𑀢𑀺 𑀅𑀬𑀫𑁂𑀓𑁄 𑀦𑀯𑀓𑁄. 𑀧𑀡𑀻𑀢𑀳𑀻𑀦𑀲𑁆𑀫𑀺𑀫𑁆𑀧𑀺 𑀳𑀻𑀦𑀁 𑀦𑀸𑀫 𑀅𑀢𑁆𑀣𑀺, 𑀧𑀡𑀻𑀢𑀳𑀻𑀦𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀧𑀡𑀻𑀢𑀳𑀻𑀦𑀲𑁆𑀫𑀺𑀁 𑀧𑀡𑀻𑀢𑀁. 𑀢𑀣𑀸 𑀧𑀡𑀻𑀢𑀫𑀚𑁆𑀛𑀺𑀫𑀲𑁆𑀫𑀺𑀁 𑀳𑀻𑀦𑀁, 𑀧𑀡𑀻𑀢𑀫𑀚𑁆𑀛𑀺𑀫𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀧𑀡𑀻𑀢𑀫𑀚𑁆𑀛𑀺𑀫𑀲𑁆𑀫𑀺𑀁 𑀧𑀡𑀻𑀢𑀁. 𑀧𑀡𑀻𑀢𑀧𑀡𑀻𑀢𑀲𑁆𑀫𑀺𑀁 𑀳𑀻𑀦𑀁, 𑀧𑀡𑀻𑀢𑀧𑀡𑀻𑀢𑀲𑁆𑀫𑀺𑀁 𑀫𑀚𑁆𑀛𑀺𑀫𑀁, 𑀧𑀡𑀻𑀢𑀧𑀡𑀻𑀢𑀲𑁆𑀫𑀺𑀁 𑀧𑀡𑀻𑀢𑀦𑁆𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀦𑀯𑀓𑁄𑀢𑀺 𑀤𑁆𑀯𑁂 𑀦𑀯𑀓𑀸 𑀅𑀝𑁆𑀞𑀸𑀭𑀲. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀦𑀸𑀫. 𑀇𑀫𑁂𑀳𑀺 𑀧𑀪𑀸𑀯𑀺𑀢𑀢𑁆𑀢𑀸, 𑀇𑀫𑁂𑀲𑀁 𑀯𑀲𑁂𑀦, 𑀅𑀝𑁆𑀞𑀸𑀭𑀲 𑀔𑀢𑁆𑀢𑀺𑀬𑀸, 𑀅𑀝𑁆𑀞𑀸𑀭𑀲 𑀩𑁆𑀭𑀸𑀳𑁆𑀫𑀡𑀸, 𑀅𑀝𑁆𑀞𑀸𑀭𑀲 𑀯𑁂𑀲𑁆𑀲𑀸, 𑀅𑀝𑁆𑀞𑀸𑀭𑀲 𑀲𑀼𑀤𑁆𑀤𑀸, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀕𑁄𑀢𑁆𑀢𑀘𑀭𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀫𑁂𑀲𑀼 𑀘 𑀧𑀦 𑀢𑁂𑀪𑀽𑀫𑀓𑁂𑀲𑀼 𑀓𑀼𑀲𑀮𑁂𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀢𑀺𑀳𑁂𑀢𑀼𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀫𑁆𑀧𑀺 𑀳𑁄𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀯𑀲𑁂𑀦. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀧𑀦 𑀢𑀺𑀳𑁂𑀢𑀼𑀓𑀫𑁂𑀯 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁂𑀯. 𑀓𑀸𑀫𑀸𑀯𑀘𑀭𑀫𑁆𑀧𑁂𑀢𑁆𑀣 𑀅𑀥𑀺𑀧𑀢𑀺𑀦𑀸 𑀲𑀳𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀯𑀺𑀦𑀸𑀧𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀅𑀥𑀺𑀧𑀢𑀺𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀘𑁂𑀢𑁆𑀣 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀻𑀢𑀺 𑀤𑁆𑀯𑁂𑀧𑀺 𑀅𑀥𑀺𑀧𑀢𑀬𑁄 𑀮𑀩𑁆𑀪𑀦𑁆𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀲𑀼 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀦 𑀮𑀩𑁆𑀪𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺𑀬𑁂𑀯 𑀮𑀩𑁆𑀪𑀢𑀺. 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀪𑀸𑀯𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄. 𑀤𑁆𑀯𑀺𑀦𑁆𑀦𑀁 𑀧𑀦 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀅𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀥𑀺𑀧𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀙𑀦𑁆𑀤𑀸𑀤𑀻𑀦𑀁 𑀙𑀦𑁆𑀤𑀸𑀥𑀺𑀧𑀢𑀺𑀆𑀤𑀬𑁄. 𑀓𑁂𑀘𑀺 𑀧𑀦 ‘𑀲𑀘𑁂 𑀘𑀺𑀢𑁆𑀢𑀯𑀢𑁄 𑀓𑀼𑀲𑀮𑀁 𑀳𑁄𑀢𑀺, 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀬𑀁 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀅𑀧𑀭𑀁 𑀓𑀼𑀲𑀮𑀘𑀺𑀢𑁆𑀢𑀁 𑀆𑀬𑀽𑀳𑀺𑀢𑀁, 𑀢𑀲𑁆𑀲 𑀢𑀁 𑀧𑀼𑀭𑀺𑀫𑀘𑀺𑀢𑁆𑀢𑀁 𑀘𑀺𑀢𑁆𑀢𑀸𑀥𑀺𑀧𑀢𑀺 𑀦𑀸𑀫 𑀳𑁄𑀢𑀺, 𑀢𑀢𑁄 𑀆𑀕𑀢𑀢𑁆𑀢𑀸 𑀇𑀤𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁 𑀦𑀸𑀫𑀸’𑀢𑀺 𑀏𑀯𑀁 𑀆𑀕𑀫𑀦𑀯𑀲𑁂𑀦𑀸𑀧𑀺 𑀅𑀥𑀺𑀧𑀢𑀺𑀁 𑀦𑀸𑀫 𑀇𑀘𑁆𑀙𑀦𑁆𑀢𑀺. 𑀅𑀬𑀁 𑀧𑀦 𑀦𑀬𑁄 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀧𑀢𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀘 𑀏𑀓𑀽𑀦𑀯𑀻𑀲𑀢𑀺𑀬𑀸 𑀫𑀳𑀸𑀦𑀬𑁂𑀲𑀼 𑀧𑀼𑀭𑀺𑀫𑁂 𑀲𑀼𑀤𑁆𑀥𑀺𑀓𑀦𑀬𑁂 𑀯𑀼𑀢𑁆𑀢𑀧𑀭𑀺𑀫𑀸𑀡𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀘 𑀦𑀯𑀓𑀸 𑀘 𑀧𑀸𑀞𑀯𑀸𑀭𑀸 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀧𑀭𑀺𑀫𑀸𑀡𑀢𑁄 𑀯𑀻𑀲𑀢𑀺𑀕𑀼𑀡𑁄 𑀘𑀺𑀢𑁆𑀢𑀦𑀯𑀓𑀯𑀸𑀭𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀘𑀢𑀽𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀲𑁄𑀴𑀲𑀕𑀼𑀡𑁄𑀢𑀺, 𑀅𑀬𑀁 𑀢𑁂𑀪𑀽𑀫𑀓𑀓𑀼𑀲𑀮𑁂 𑀧𑀓𑀺𑀡𑁆𑀡𑀓𑀓𑀣𑀸 𑀦𑀸𑀫𑀸𑀢𑀺.

𑀢𑁂𑀪𑀽𑀫𑀓𑀓𑀼𑀲𑀮𑀁.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀡𑁆𑀡𑀦𑀸

𑁨𑁭𑁭. 𑀏𑀯𑀁 𑀪𑀯𑀢𑁆𑀢𑀬𑀲𑀫𑁆𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀪𑀯𑀲𑀫𑀢𑀺𑀓𑁆𑀓𑀫𑀦𑀸𑀬 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀁? 𑀮𑁄𑀓𑀁 𑀢𑀭𑀢𑀻𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀁 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁; 𑀮𑁄𑀓𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁 (𑀧𑀝𑀺. 𑀫. 𑁨.𑁪𑁩). 𑀛𑀸𑀦𑀁 𑀪𑀸𑀯𑁂𑀢𑀻𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀅𑀧𑁆𑀧𑀦𑀸𑀛𑀸𑀦𑀁 𑀪𑀸𑀯𑁂𑀢𑀺 𑀚𑀦𑁂𑀢𑀺 𑀯𑀟𑁆𑀠𑁂𑀢𑀺.

𑀮𑁄𑀓𑀢𑁄 𑀦𑀺𑀬𑁆𑀬𑀸𑀢𑀺 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀁. 𑀦𑀺𑀬𑁆𑀬𑀸𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀁. 𑀢𑀁𑀲𑀫𑀗𑁆𑀕𑀻 𑀳𑀺 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀲𑀫𑀼𑀤𑀬𑀁 𑀧𑀚𑀳𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀦𑀺𑀬𑁆𑀬𑀸𑀢𑀺. 𑀬𑀣𑀸 𑀘 𑀧𑀦 𑀢𑁂𑀪𑀽𑀫𑀓𑀓𑀼𑀲𑀮𑀁 𑀯𑀝𑁆𑀝𑀲𑁆𑀫𑀺𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀆𑀘𑀺𑀦𑀸𑀢𑀺 𑀯𑀟𑁆𑀠𑁂𑀢𑀻𑀢𑀺 𑀆𑀘𑀬𑀕𑀸𑀫𑀻 𑀦𑀸𑀫 𑀳𑁄𑀢𑀺, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀬𑀣𑀸 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀧𑀸𑀓𑀸𑀭𑀁 𑀘𑀺𑀦𑀦𑁆𑀢𑁂 𑀅𑀧𑀭𑁄 𑀫𑀳𑀸𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀘𑀺𑀢𑀘𑀺𑀢𑀝𑁆𑀞𑀸𑀦𑀁 𑀅𑀧𑀘𑀺𑀦𑀦𑁆𑀢𑁄 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀏𑀯 𑀕𑀘𑁆𑀙𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀪𑀽𑀫𑀓𑀓𑀼𑀲𑀮𑁂𑀦 𑀘𑀺𑀢𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀧𑀘𑁆𑀘𑀬𑀯𑁂𑀓𑀮𑁆𑀮𑀓𑀭𑀡𑁂𑀦 𑀅𑀧𑀘𑀺𑀦𑀦𑁆𑀢𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀁 𑀕𑀘𑁆𑀙𑀢𑀻𑀢𑀺 𑀅𑀧𑀘𑀬𑀕𑀸𑀫𑀺.

𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸𑀢𑀺, 𑀏𑀢𑁆𑀣 𑀤𑀺𑀝𑁆𑀞𑀺𑀬𑁄 𑀏𑀯 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀦𑁆𑀢𑀺𑀆𑀤𑀻𑀦𑀺 (𑀅. 𑀦𑀺. 𑁯.𑁧𑁧) 𑀯𑀺𑀬. 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀸 𑀤𑀺𑀝𑁆𑀞𑀻𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀤𑀺𑀝𑁆𑀞𑀻𑀲𑀼 𑀕𑀢𑀸𑀦𑀻𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀤𑀺𑀝𑁆𑀞𑀺𑀬𑀸 𑀯𑀸 𑀕𑀢𑀁 𑀏𑀢𑁂𑀲𑀦𑁆𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀤𑀺𑀝𑁆𑀞𑀺𑀲𑀤𑀺𑀲𑀕𑀫𑀦𑀸𑀦𑀺 𑀤𑀺𑀝𑁆𑀞𑀺𑀲𑀤𑀺𑀲𑀧𑁆𑀧𑀯𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀸𑀦𑀺 𑀧𑀦 𑀢𑀸𑀦𑀻𑀢𑀺? 𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀅𑀧𑀸𑀬𑀕𑀫𑀦𑀻𑀬𑀭𑀸𑀕𑀤𑁄𑀲𑀫𑁄𑀳𑀸𑀓𑀼𑀲𑀮𑀸𑀦𑀺. 𑀢𑀸𑀦𑀺 𑀳𑀺 𑀬𑀸𑀯 𑀧𑀞𑀫𑀫𑀕𑁆𑀕𑀪𑀸𑀯𑀦𑀸 𑀢𑀸𑀯 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀤𑀺𑀝𑁆𑀞𑀺𑀲𑀤𑀺𑀲𑀕𑀫𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀢𑀺 𑀤𑀺𑀝𑁆𑀞𑀺𑀬𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑁂𑀯 𑀧𑀚𑀳𑀦𑀢𑁆𑀣𑀸𑀬. 𑀧𑀞𑀫𑀸𑀬𑀸𑀢𑀺 𑀕𑀡𑀦𑀯𑀲𑁂𑀦𑀧𑀺 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀧𑀺 𑀧𑀞𑀫𑀸𑀬. 𑀪𑀽𑀫𑀺𑀬𑀸𑀢𑀺 ‘‘𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁭; 𑀫. 𑀦𑀺. 𑁨.𑁨𑁯𑁬) 𑀢𑀸𑀯 𑀅𑀬𑀁 𑀫𑀳𑀸𑀧𑀣𑀯𑀻 𑀪𑀽𑀫𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀻𑀲𑀼 (𑀥. 𑀲. 𑁯𑁮𑁮) 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀇𑀥 𑀧𑀦 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄 𑀢𑁂 𑀥𑀫𑁆𑀫𑀸 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺. 𑀬𑀲𑁆𑀫𑀸 𑀯𑀸 𑀲𑀫𑀸𑀦𑁂𑀧𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑁂 𑀲𑀬𑀫𑁆𑀧𑀺 𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀅𑀧𑀸𑀢𑀼𑀪𑀸𑀯𑀁, 𑀢𑀲𑁆𑀫𑀸𑀧𑀺 𑀪𑀽𑀫𑀻𑀢𑀺 𑀯𑀼𑀘𑁆𑀘𑀢𑀺; 𑀢𑀲𑁆𑀲𑀸 𑀧𑀞𑀫𑀸𑀬 𑀪𑀽𑀫𑀺𑀬𑀸. 𑀧𑀢𑁆𑀢𑀺𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀗𑁆𑀔𑀸𑀢𑀲𑁆𑀲 𑀧𑀞𑀫𑀲𑁆𑀲 𑀲𑀸𑀫𑀜𑁆𑀜𑀨𑀮𑀲𑁆𑀲 𑀧𑀢𑁆𑀢𑀢𑁆𑀣𑀸𑀬 𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀯𑀺𑀘𑁆𑀘𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀯𑀲𑁂𑀦 𑀯𑀺𑀯𑀺𑀘𑁆𑀘𑀺𑀢𑁆𑀯𑀸, 𑀯𑀺𑀦𑀸 𑀳𑀼𑀢𑁆𑀯𑀸.

𑀇𑀤𑀸𑀦𑀺 𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥 𑀲𑀼𑀤𑁆𑀥𑀺𑀓𑀦𑀬𑀁 𑀧𑀳𑀸𑀬 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁𑀬𑁂𑀯 𑀕𑀭𑀼𑀁 𑀓𑀢𑁆𑀯𑀸 𑀤𑁂𑀲𑁂𑀢𑀼𑀓𑀸𑀫𑀢𑀸𑀬 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑁄 𑀆𑀤𑀺𑀢𑁄𑀯 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺; 𑀬𑁄 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢 𑀓𑀺𑀮𑁂𑀲𑁄 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺 𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸 𑀳𑁄𑀢𑀺. 𑀇𑀢𑀺 𑀬𑁄 𑀓𑁄𑀘𑀺 𑀯𑀸𑀭𑁄 𑀤𑀼𑀓𑁆𑀔𑀧𑀝𑀺𑀧𑀤𑀤𑀦𑁆𑀥𑀸𑀪𑀺𑀜𑁆𑀜𑁄 𑀦𑀸𑀫 𑀓𑀢𑁄.

𑀓𑀢𑀫𑀁 𑀧𑀦 𑀯𑀸𑀭𑀁 𑀭𑁄𑀘𑁂𑀲𑀼𑀦𑁆𑀢𑀺? 𑀬𑀢𑁆𑀣 𑀲𑀓𑀺𑀁 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀯𑀺𑀓𑁆𑀔𑀫𑁆𑀪𑀺𑀢𑀸 𑀧𑀼𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀢𑀺𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑁂 𑀧𑀦 𑀢𑀣𑀸𑀯𑀺𑀓𑁆𑀔𑀫𑁆𑀪𑀺𑀢𑁂𑀯 𑀓𑀢𑁆𑀯𑀸 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑁂𑀢𑀺, 𑀇𑀫𑀁 𑀯𑀸𑀭𑀁 𑀭𑁄𑀘𑁂𑀲𑀼𑀁. 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸𑀢𑀺 𑀦𑀸𑀫𑀁 𑀓𑀢𑀁. 𑀏𑀢𑁆𑀢𑀓𑁂𑀦 𑀧𑀦 𑀦 𑀧𑀸𑀓𑀝𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀬𑁄 𑀳𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, ‘𑀭𑀽𑀧𑀸𑀭𑀽𑀧𑀁’ 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺. 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀽𑀧𑀲𑁆𑀲 𑀧𑀦 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑁂 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀬𑁄𑀧𑀺 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘𑀦𑀸𑀫𑀭𑀽𑀧𑀁’ 𑀯𑀯𑀢𑁆𑀣𑀧𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀯𑀯𑀢𑁆𑀣𑀸𑀧𑀺𑀢𑁂 𑀘 𑀦𑀸𑀫𑀭𑀽𑀧𑁂 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲𑀸𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀦𑀸𑀫𑀭𑀽𑀧𑀫𑁆𑀧𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 ‘𑀧𑀘𑁆𑀘𑀬𑁂’ 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀧𑀘𑁆𑀘𑀬𑁂 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀧𑀘𑁆𑀘𑀬𑁂𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘𑀮𑀓𑁆𑀔𑀡𑀸𑀦𑀺’ 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀧𑀝𑀺𑀯𑀺𑀤𑁆𑀥𑀮𑀓𑁆𑀔𑀡𑁄 𑀘 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀮𑀓𑁆𑀔𑀡𑀸𑀦𑀺𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀢𑀺𑀓𑁆𑀔𑁂 𑀲𑀽𑀭𑁂 𑀧𑀲𑀦𑁆𑀦𑁂 𑀯𑀳𑀦𑁆𑀢𑁂 𑀉𑀧𑁆𑀧𑀦𑁆𑀦𑀁 ‘𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺𑀁’ 𑀧𑀭𑀺𑀬𑀸𑀤𑀺𑀬𑀫𑀸𑀦𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀦𑀺𑀓𑀦𑁆𑀢𑀺𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀇𑀫𑀁 𑀯𑀸𑀭𑀁 𑀭𑁄𑀘𑁂𑀲𑀼𑀁. 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀏𑀢𑀁 𑀦𑀸𑀫𑀁 𑀓𑀢𑀁. 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀧𑀭𑀢𑁄 𑀢𑀺𑀲𑁆𑀲𑁄 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

𑀨𑀲𑁆𑀲𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀥𑀺𑀓𑀸𑀦𑀺. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘 𑀯𑀺𑀢𑀓𑁆𑀓𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 ‘𑀫𑀕𑁆𑀕𑀗𑁆𑀕’𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀅𑀥𑀺𑀓𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀪𑀽𑀫𑀦𑁆𑀢𑀭𑀯𑀲𑁂𑀦 𑀧𑀦 𑀮𑁄𑀓𑀼𑀢𑁆𑀢𑀭𑀢𑀸𑀯 𑀇𑀥 𑀯𑀺𑀲𑁂𑀲𑁄.

𑀢𑀢𑁆𑀣 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 ‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑁂𑀯 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑀸𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀼𑀦𑁆𑀤𑀭𑀸 𑀧𑀲𑀢𑁆𑀣𑀸 𑀯𑀸 𑀯𑀸𑀘𑀸 𑀲𑀫𑁆𑀫𑀸𑀯𑀸𑀘𑀸. 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀫𑀼𑀕𑁆𑀖𑀸𑀝𑀺𑀓𑀸𑀬 𑀫𑀺𑀘𑁆𑀙𑀸𑀯𑀸𑀘𑀸𑀯𑀺𑀭𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸 𑀯𑀺𑀭𑀫𑀡𑀭𑀲𑀸 𑀫𑀺𑀘𑁆𑀙𑀸𑀯𑀸𑀘𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀼𑀦𑁆𑀤𑀭𑁄 𑀧𑀲𑀢𑁆𑀣𑁄 𑀯𑀸 𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑀫𑀼𑀘𑁆𑀙𑁂𑀤𑀺𑀓𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀲𑁄 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑁄 𑀯𑀺𑀭𑀫𑀡𑀭𑀲𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀼𑀦𑁆𑀤𑀭𑁄 𑀧𑀲𑀢𑁆𑀣𑁄 𑀯𑀸 𑀆𑀚𑀻𑀯𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀯𑁄𑀤𑀸𑀦𑀮𑀓𑁆𑀔𑀡𑁄 𑀜𑀸𑀬𑀸𑀚𑀻𑀯𑀧𑁆𑀧𑀯𑀢𑁆𑀢𑀺𑀭𑀲𑁄 𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀅𑀧𑀺𑀘 𑀳𑁂𑀝𑁆𑀞𑀸 𑀯𑀺𑀭𑀢𑀺𑀢𑁆𑀢𑀬𑁂 𑀯𑀼𑀢𑁆𑀢𑀯𑀲𑁂𑀦𑀧𑁂𑀢𑁆𑀣 𑀮𑀓𑁆𑀔𑀡𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀫𑀕𑁆𑀕𑀧𑀜𑁆𑀘𑀓𑀁 𑀇𑀥 𑀫𑀕𑁆𑀕𑀝𑁆𑀞𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀯𑀸𑀧𑀦𑀓𑁂𑀲𑀼 𑀘 𑀇𑀫𑁂𑀲𑀁 𑀅𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁. 𑀇𑀫𑁂 𑀳𑀺 𑀢𑀬𑁄 𑀥𑀫𑁆𑀫𑀸 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸𑀯 𑀬𑁂𑀯𑀸𑀧𑀦𑀓𑁂𑀲𑀼 𑀦 𑀕𑀳𑀺𑀢𑀸. 𑀓𑀭𑀼𑀡𑀸𑀫𑀼𑀤𑀺𑀢𑀸 𑀧𑀦 𑀲𑀢𑁆𑀢𑀸𑀭𑀫𑁆𑀫𑀡𑀸, 𑀇𑀫𑁂 𑀥𑀫𑁆𑀫𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀢𑀺 𑀢𑀸𑀧𑁂𑀢𑁆𑀣 𑀦 𑀕𑀳𑀺𑀢𑀸. 𑀅𑀬𑀁 𑀢𑀸𑀯 𑀉𑀤𑁆𑀤𑁂𑀲𑀯𑀸𑀭𑁂 𑀯𑀺𑀲𑁂𑀲𑀢𑁆𑀣𑁄.

𑁨𑁮𑁩. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀫𑀕𑁆𑀕𑀲𑁆𑀲 𑀅𑀗𑁆𑀕𑀦𑁆𑀢𑀺 𑀫𑀕𑁆𑀕𑀗𑁆𑀕𑀁; 𑀫𑀕𑁆𑀕𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀅𑀭𑀜𑁆𑀜𑁂 𑀧𑀭𑀺𑀬𑀸𑀧𑀦𑁆𑀦𑀁 𑀅𑀭𑀜𑁆𑀜𑀧𑀭𑀺𑀬𑀸𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀫𑀕𑁆𑀕𑁂 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁. 𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁮𑁫. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀏𑀢𑁆𑀣 𑀧𑀻𑀢𑀺 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀢𑁆𑀣 𑀩𑁄𑀥𑀺𑀬𑀸 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻 𑀬𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀩𑀼𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑁄𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑁄, 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀻𑀦𑀺 𑀯𑀺𑀬. 𑀬𑁄𑀧𑁂𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑁄𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑁄; 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀯𑀸 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁪𑁬𑁬; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁮𑁨).

𑀅𑀧𑀺𑀘 ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀧𑀝𑀺. 𑀫. 𑁨.𑁧𑁭) 𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀏𑀯𑀁 𑀧𑀻𑀢𑀺 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁯𑁬. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀯𑁂𑀥𑀁 𑀕𑀘𑁆𑀙𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀅𑀦𑀜𑁆𑀜𑀸𑀢𑀸𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀧𑀞𑀫𑀫𑀕𑁆𑀕𑁂𑀦 𑀢𑁂 𑀥𑀫𑁆𑀫𑀸 𑀜𑀸𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀬𑀣𑀸 𑀧𑀦 𑀧𑀓𑀢𑀺𑀬𑀸 𑀅𑀦𑀸𑀕𑀢𑀧𑀼𑀩𑁆𑀩𑀁 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀞𑀺𑀢𑁄𑀧𑀺 𑀧𑀼𑀕𑁆𑀕𑀮𑁄 𑀧𑀓𑀢𑀺𑀬𑀸 𑀅𑀦𑀸𑀕𑀢𑀪𑀸𑀯𑀁 𑀉𑀧𑀸𑀤𑀸𑀬 ‘𑀅𑀦𑀸𑀕𑀢𑀧𑀼𑀩𑁆𑀩𑀁 𑀞𑀸𑀦𑀁 𑀆𑀕𑀢𑁄𑀫𑁆𑀳𑀻’𑀢𑀺 𑀯𑀤𑀢𑀺, 𑀬𑀣𑀸 𑀘 𑀧𑀓𑀢𑀺𑀬𑀸 𑀅𑀧𑀺𑀴𑀦𑁆𑀥𑀧𑀼𑀩𑁆𑀩𑀁 𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸, 𑀅𑀦𑀺𑀯𑀢𑁆𑀣𑀧𑀼𑀩𑁆𑀩𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀅𑀪𑀼𑀢𑁆𑀢𑀧𑀼𑀩𑁆𑀩𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀧𑀓𑀢𑀺𑀬𑀸 𑀅𑀪𑀼𑀢𑁆𑀢𑀪𑀸𑀯𑀁 𑀉𑀧𑀸𑀤𑀸𑀬 𑀅𑀪𑀼𑀢𑁆𑀢𑀧𑀼𑀩𑁆𑀩𑀁 𑀪𑁄𑀚𑀦𑀁 𑀪𑀼𑀢𑁆𑀢𑁄𑀫𑁆𑀳𑀻𑀢𑀺 𑀯𑀤𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀲𑁆𑀫𑀸 𑀧𑀓𑀢𑀺𑀬𑀸 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀇𑀫𑁂 𑀥𑀫𑁆𑀫𑀸 𑀦 𑀜𑀸𑀢𑀧𑀼𑀩𑁆𑀩𑀸 𑀢𑀲𑁆𑀫𑀸 𑀅𑀦𑀜𑁆𑀜𑀸𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀤𑀺𑀝𑁆𑀞𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀤𑀺𑀝𑁆𑀞𑀸𑀦𑀦𑁆𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑀸𑀦𑀁. 𑀅𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀅𑀥𑀺𑀕𑀫𑀦𑀯𑀲𑁂𑀦 𑀅𑀧𑁆𑀧𑀢𑁆𑀢𑀸𑀦𑀁. 𑀅𑀯𑀺𑀤𑀺𑀢𑀸𑀦𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀓𑀢𑀸𑀦𑀁. 𑀅𑀲𑀘𑁆𑀙𑀺𑀓𑀢𑀸𑀦𑀦𑁆𑀢𑀺 𑀅𑀧𑀘𑁆𑀘𑀓𑁆𑀔𑀓𑀢𑀸𑀦𑀁. 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀁. 𑀬𑀣𑀸 𑀘 𑀇𑀫𑀺𑀦𑀸 𑀧𑀤𑁂𑀦, 𑀏𑀯𑀁 𑀲𑁂𑀲𑁂𑀳𑀺𑀧𑀺 𑀲𑀤𑁆𑀥𑀺𑀁 𑀅𑀦𑀜𑁆𑀜𑀸𑀢𑀸𑀦𑀁 𑀜𑀸𑀡𑀸𑀬, 𑀅𑀤𑀺𑀝𑁆𑀞𑀸𑀦𑀁 𑀤𑀲𑁆𑀲𑀦𑀸𑀬, 𑀅𑀧𑁆𑀧𑀢𑁆𑀢𑀸𑀦𑀁 𑀧𑀢𑁆𑀢𑀺𑀬𑀸, 𑀅𑀯𑀺𑀤𑀺𑀢𑀸𑀦𑀁 𑀯𑁂𑀤𑀸𑀬𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁨𑁯𑁯. 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀻𑀢𑀺𑀆𑀤𑀻𑀲𑀼 𑀯𑀘𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀡𑁆𑀡𑀁 𑀤𑁄𑀲𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀤𑀼𑀝𑁆𑀞𑀸𑀦𑀺 𑀘𑀭𑀺𑀢𑀸𑀦𑀻𑀢𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀯𑀘𑀻𑀢𑁄 𑀧𑀯𑀢𑁆𑀢𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺, 𑀯𑀘𑀺𑀬𑀸 𑀯𑀸 𑀦𑀺𑀧𑁆𑀨𑀸𑀤𑀺𑀢𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑁂𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺. 𑀆𑀭𑀓𑀸 𑀭𑀫𑀢𑀻𑀢𑀺 𑀆𑀭𑀢𑀺. 𑀯𑀺𑀦𑀸 𑀢𑁂𑀳𑀺 𑀭𑀫𑀢𑀻𑀢𑀺 𑀯𑀺𑀭𑀢𑀺. 𑀢𑀢𑁄 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀸𑀯 𑀳𑀼𑀢𑁆𑀯𑀸 𑀢𑁂𑀳𑀺 𑀯𑀺𑀦𑀸 𑀭𑀫𑀢𑀻𑀢𑀺 𑀧𑀝𑀺𑀯𑀺𑀭𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀲𑀩𑁆𑀩𑀫𑀺𑀤𑀁 𑀑𑀭𑀫𑀡𑀪𑀸𑀯𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀯𑁂𑀭𑀁 𑀫𑀡𑀢𑀺, 𑀯𑀺𑀦𑀸𑀲𑁂𑀢𑀻𑀢𑀺 𑀯𑁂𑀭𑀫𑀡𑀻. 𑀇𑀤𑀫𑁆𑀧𑀺 𑀑𑀭𑀫𑀡𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀪𑀸𑀲𑀫𑀸𑀦𑁄 𑀓𑀭𑁄𑀢𑀺 𑀦𑀸𑀫, 𑀅𑀬𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀯𑀺𑀭𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀓𑀺𑀭𑀺𑀬𑀁 𑀓𑀸𑀢𑀼𑀁 𑀦 𑀤𑁂𑀢𑀺, 𑀓𑀺𑀭𑀺𑀬𑀸𑀧𑀣𑀁 𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀓𑀺𑀭𑀺𑀬𑀸. 𑀢𑀣𑀸 𑀢𑀁 𑀓𑀭𑀡𑀁 𑀓𑀸𑀢𑀼𑀁 𑀦 𑀤𑁂𑀢𑀺, 𑀓𑀭𑀡𑀧𑀣𑀁 𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀓𑀭𑀡𑀁. 𑀬𑀸𑀬 𑀘 𑀘𑁂𑀢𑀦𑀸𑀬 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀪𑀸𑀲𑀫𑀸𑀦𑁄 𑀅𑀚𑁆𑀛𑀸𑀧𑀚𑁆𑀚𑀢𑀺 𑀦𑀸𑀫, 𑀅𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀣𑀸 𑀅𑀚𑁆𑀛𑀸𑀧𑀚𑁆𑀚𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀚𑁆𑀛𑀸𑀧𑀢𑁆𑀢𑀺.

𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄𑀢𑀺 𑀏𑀢𑁆𑀣 ‘‘𑀢𑀸𑀬 𑀯𑁂𑀮𑀸𑀬𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁫𑁪; 𑀫𑀳𑀸𑀯. 𑁧-𑁩; 𑀉𑀤𑀸. 𑁧 𑀆𑀤𑀬𑁄) 𑀢𑀸𑀯 𑀓𑀸𑀮𑁄 𑀯𑁂𑀮𑀸𑀢𑀺 𑀆𑀕𑀢𑁄. ‘‘𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻’’𑀢𑀺 (𑀫𑀳𑀸𑀯. 𑁧; 𑀲𑀁. 𑀦𑀺. 𑁧.𑁧𑁩𑁭) 𑀏𑀢𑁆𑀣 𑀭𑀸𑀲𑀺. ‘‘𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 (𑀘𑀽𑀴𑀯. 𑁩𑁮𑁪; 𑀅. 𑀦𑀺. 𑁮.𑁧𑁯; 𑀉𑀤𑀸. 𑁪𑁫) 𑀏𑀢𑁆𑀣 𑀲𑀻𑀫𑀸. 𑀇𑀥𑀸𑀧𑀺 𑀲𑀻𑀫𑀸𑀯. 𑀅𑀦𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀯𑁂𑀮𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀇𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀘𑀢𑁆𑀢𑀸𑀭𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀪𑀸𑀲𑀫𑀸𑀦𑁄 𑀯𑁂𑀮𑀁 𑀅𑀢𑀺𑀓𑁆𑀓𑀫𑀢𑀺 𑀦𑀸𑀫, 𑀅𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀯𑁂𑀮𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑀸. 𑀯𑁂𑀮𑀸𑀬𑀢𑀻𑀢𑀺 𑀯𑀸 𑀯𑁂𑀮𑀸, 𑀘𑀮𑀬𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑁂𑀮𑀸𑀬𑀢𑀺? 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀇𑀢𑀺 𑀯𑁂𑀮𑀸𑀬𑀦𑀢𑁄 ‘𑀯𑁂𑀮𑀸’. 𑀧𑀼𑀭𑀺𑀲𑀲𑁆𑀲 𑀧𑀦 𑀳𑀺𑀢𑀲𑀼𑀔𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 ‘𑀅𑀦𑀢𑀺𑀓𑁆𑀓𑀫𑁄’. 𑀏𑀯𑀫𑁂𑀢𑁆𑀣 𑀧𑀤𑀤𑁆𑀯𑀬𑀯𑀲𑁂𑀦𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀢𑀼𑀁 𑀳𑀦𑀢𑀻𑀢𑀺 𑀲𑁂𑀢𑀼𑀖𑀸𑀢𑁄; 𑀘𑀢𑀼𑀦𑁆𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀤𑀖𑀸𑀢𑁄 𑀧𑀘𑁆𑀘𑀬𑀖𑀸𑀢𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑁄 𑀳𑀺 𑀇𑀥 𑀲𑁂𑀢𑀽𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀭𑀸𑀕𑀸𑀤𑀺𑀓𑁄 𑀘𑀢𑀼𑀦𑁆𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀘𑁆𑀘𑀬𑁄 𑀯𑀝𑁆𑀝𑀲𑁆𑀫𑀺𑀁 𑀧𑀼𑀕𑁆𑀕𑀮𑀁 𑀲𑀺𑀦𑁄𑀢𑀺 𑀩𑀦𑁆𑀥𑀢𑀻𑀢𑀺 𑀲𑁂𑀢𑀼. 𑀲𑁂𑀢𑀼𑀲𑁆𑀲 𑀖𑀸𑀢𑁄 𑀲𑁂𑀢𑀼𑀖𑀸𑀢𑁄. 𑀯𑀘𑀻𑀤𑀼𑀘𑁆𑀘𑀭𑀺𑀢𑀧𑀘𑁆𑀘𑀬𑀲𑀫𑀼𑀕𑁆𑀖𑀸𑀝𑀺𑀓𑀸𑀬 𑀯𑀺𑀭𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀁 𑀧𑀦 𑀲𑀫𑁆𑀫𑀸𑀯𑀸𑀘𑀸𑀲𑀗𑁆𑀔𑀸𑀢𑀸 𑀯𑀺𑀭𑀢𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀫𑀼𑀲𑀸𑀯𑀸𑀤𑀸 𑀯𑀺𑀭𑀫𑀢𑀺, 𑀅𑀜𑁆𑀜𑁂𑀦 𑀧𑁂𑀲𑀼𑀜𑁆𑀜𑀸𑀤𑀻𑀳𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀮𑀩𑁆𑀪𑀢𑀺. 𑀘𑀢𑀼𑀩𑁆𑀩𑀺𑀥𑀸𑀬 𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀘𑁂𑀢𑀦𑀸𑀬 𑀧𑀤𑀧𑀘𑁆𑀙𑁂𑀤𑀁 𑀓𑀼𑀭𑀼𑀫𑀸𑀦𑀸 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺.

𑁩𑁦𑁦. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀳𑀻𑀢𑀺 𑀓𑀸𑀬𑀢𑁄 𑀧𑀯𑀢𑁆𑀢𑁂𑀳𑀺 𑀓𑀸𑀬𑁂𑀦 𑀯𑀸 𑀦𑀺𑀧𑁆𑀨𑀸𑀤𑀺𑀢𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀢𑀺, 𑀅𑀜𑁆𑀜𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀫𑀺𑀘𑁆𑀙𑀸𑀘𑀸𑀭𑁂𑀳𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀮𑀩𑁆𑀪𑀢𑀺. 𑀢𑀺𑀯𑀺𑀥𑀸𑀬 𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀘𑁂𑀢𑀦𑀸𑀬 𑀧𑀤𑀧𑀘𑁆𑀙𑁂𑀤𑀁 𑀓𑀼𑀭𑀼𑀫𑀸𑀦𑀸 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺.

𑁩𑁦𑁧. 𑀲𑀫𑁆𑀫𑀸𑀆𑀚𑀻𑀯𑀦𑀺𑀤𑁆𑀤𑁂𑀲𑁂 𑀅𑀓𑀺𑀭𑀺𑀬𑀸𑀢𑀺𑀆𑀤𑀻𑀲𑀼 𑀬𑀸𑀬 𑀘𑁂𑀢𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑀁 𑀆𑀚𑀻𑀯𑀫𑀸𑀦𑁄 𑀓𑀺𑀭𑀺𑀬𑀁 𑀓𑀭𑁄𑀢𑀺 𑀦𑀸𑀫, 𑀅𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀓𑀺𑀭𑀺𑀬𑀁 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀓𑀺𑀭𑀺𑀬𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀚𑀻𑀯𑁄 𑀘 𑀦𑀸𑀫𑁂𑀲 𑀧𑀸𑀝𑀺𑀬𑁂𑀓𑁆𑀓𑁄 𑀦𑀢𑁆𑀣𑀺, 𑀯𑀸𑀘𑀸𑀓𑀫𑁆𑀫𑀦𑁆𑀢𑁂𑀲𑀼 𑀕𑀳𑀺𑀢𑁂𑀲𑀼 𑀕𑀳𑀺𑀢𑁄𑀯 𑀳𑁄𑀢𑀺, 𑀢𑀧𑁆𑀧𑀓𑁆𑀔𑀺𑀓𑀢𑁆𑀢𑀸. 𑀥𑀼𑀯𑀧𑀝𑀺𑀲𑁂𑀯𑀦𑀯𑀲𑁂𑀦 𑀧𑀦𑀸𑀬𑀁 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀲𑀫𑁆𑀫𑀸𑀆𑀚𑀻𑀯𑁄 𑀲𑀓𑀺𑀘𑁆𑀘𑀓𑁄 𑀦 𑀳𑁄𑀢𑀺, 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸𑀆𑀚𑀻𑀯𑁄 𑀲𑀓𑀺𑀘𑁆𑀘𑀓𑁄 𑀓𑀸𑀢𑀩𑁆𑀩𑁄, 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀧𑀭𑀺𑀧𑀽𑀭𑁂𑀢𑀩𑁆𑀩𑀸𑀦𑀻𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀆𑀚𑀻𑀯𑁄 𑀦𑀸𑀫 𑀪𑀺𑀚𑁆𑀚𑀫𑀸𑀦𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼𑀬𑁂𑀯 𑀪𑀺𑀚𑁆𑀚𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀆𑀚𑀻𑀯𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀧𑀽𑀭𑀬𑀫𑀸𑀦𑁄𑀧𑀺 𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑀤𑁆𑀯𑀬𑁂 𑀧𑀽𑀭𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀆𑀚𑀻𑀯𑀧𑀽𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀦 𑀯𑀻𑀢𑀺𑀓𑁆𑀓𑀫𑁄 𑀆𑀚𑀻𑀯𑀳𑁂𑀢𑀼𑀓𑁄𑀧𑀺 𑀅𑀢𑁆𑀣𑀺 𑀦𑀆𑀚𑀻𑀯𑀳𑁂𑀢𑀼𑀓𑁄𑀧𑀺. 𑀢𑀣𑀸 𑀯𑀘𑀻𑀤𑁆𑀯𑀸𑀭𑁂.

𑀢𑀢𑁆𑀣 𑀬𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀔𑀺𑀟𑁆𑀟𑀸𑀧𑀲𑀼𑀢𑀸 𑀲𑀽𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀸 𑀫𑀺𑀕𑀯𑀥𑀁 𑀯𑀸 𑀧𑀦𑁆𑀣𑀤𑀼𑀳𑀦𑀁 𑀯𑀸 𑀧𑀭𑀤𑀸𑀭𑀯𑀻𑀢𑀺𑀓𑁆𑀓𑀫𑀁 𑀯𑀸 𑀓𑀭𑁄𑀦𑁆𑀢𑀺, 𑀇𑀤𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀢𑀢𑁄 𑀯𑀺𑀭𑀢𑀺𑀧𑀺 ‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄’ 𑀦𑀸𑀫. 𑀬𑀁 𑀧𑀦 𑀦𑀆𑀚𑀻𑀯𑀳𑁂𑀢𑀼𑀓𑀁 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀪𑀸𑀲𑀦𑁆𑀢𑀺, 𑀇𑀤𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀢𑀢𑁄 𑀯𑀺𑀭𑀢𑀺𑀧𑀺 ‘𑀲𑀫𑁆𑀫𑀸𑀯𑀸𑀘𑀸’ 𑀦𑀸𑀫.

𑀬𑀁 𑀧𑀦 𑀆𑀚𑀻𑀯𑀳𑁂𑀢𑀼 𑀦𑁂𑀲𑀸𑀤𑀫𑀘𑁆𑀙𑀩𑀦𑁆𑀥𑀸𑀤𑀬𑁄 𑀧𑀸𑀡𑀁 𑀳𑀦𑀦𑁆𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀺, 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀦𑁆𑀢𑀺, 𑀅𑀬𑀁 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫. 𑀢𑀢𑁄 𑀯𑀺𑀭𑀢𑀺 ‘𑀲𑀫𑁆𑀫𑀸𑀆𑀚𑀻𑀯𑁄’ 𑀦𑀸𑀫. 𑀬𑀫𑁆𑀧𑀺 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀫𑀼𑀲𑀸 𑀪𑀡𑀦𑁆𑀢𑀺, 𑀧𑁂𑀲𑀼𑀜𑁆𑀜𑀨𑀭𑀼𑀲𑀲𑀫𑁆𑀨𑀧𑁆𑀧𑀮𑀸𑀧𑁂 𑀧𑀯𑀢𑁆𑀢𑁂𑀦𑁆𑀢𑀺, 𑀅𑀬𑀫𑁆𑀧𑀺 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫. 𑀢𑀢𑁄 𑀯𑀺𑀭𑀢𑀺 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼𑀧𑀺 𑀯𑀻𑀢𑀺𑀓𑁆𑀓𑀫𑁄 𑀆𑀚𑀻𑀯𑀳𑁂𑀢𑀼𑀓𑁄 𑀯𑀸 𑀳𑁄𑀢𑀼 𑀦𑁄 𑀯𑀸 𑀆𑀚𑀻𑀯𑀳𑁂𑀢𑀼𑀓𑁄, 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁄 𑀯𑀺𑀭𑀢𑀺𑀧𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀯𑀸𑀘𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀻’𑀢𑀺. ‘𑀆𑀚𑀻𑀯𑁄 𑀓𑀼𑀳𑀺’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 ‘𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂𑀲𑀁 𑀧𑀭𑀺𑀪𑁄𑀕𑁄’𑀢𑀺 𑀆𑀳. 𑀅𑀬𑀁 𑀧𑀦 𑀓𑁄𑀝𑀺𑀧𑁆𑀧𑀢𑁆𑀢𑁄 𑀫𑀺𑀘𑁆𑀙𑀸𑀚𑀻𑀯𑁄. 𑀢𑀢𑁄 𑀯𑀺𑀭𑀢𑀺 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑀅𑀬𑀫𑁆𑀧𑀺 𑀲𑀫𑁆𑀫𑀸𑀆𑀚𑀻𑀯𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀢𑀺, 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀓𑀸𑀬𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀸 𑀯𑀺𑀭𑀫𑀢𑀺, 𑀅𑀜𑁆𑀜𑁂𑀦 𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀮𑀩𑁆𑀪𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀳𑀺 𑀲𑀢𑁆𑀢𑀓𑀫𑁆𑀫𑀧𑀣𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑀲𑀗𑁆𑀔𑀸𑀢𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀧𑀘𑁆𑀙𑁂𑀤𑀁 𑀓𑀼𑀭𑀼𑀫𑀸𑀦𑀸 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀬𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀲𑁂𑀲𑁄.

𑀬𑀁 𑀧𑀦𑁂𑀢𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀯𑀟𑁆𑀠𑀺𑀢𑀁, 𑀫𑀕𑁆𑀕𑀗𑁆𑀕𑁂𑀲𑀼 𑀘 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀺, 𑀢𑁂𑀲𑀁 𑀯𑀲𑁂𑀦 𑀲𑀗𑁆𑀕𑀳𑀯𑀸𑀭𑁂 ‘‘𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀜𑁆𑀜𑀢𑀯𑀸𑀭𑁄 𑀧𑀸𑀓𑀢𑀺𑀓𑁄𑀬𑁂𑀯𑀸𑀢𑀺. 𑀅𑀬𑀁 𑀢𑀸𑀯 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬 𑀯𑀺𑀲𑁂𑀲𑁄.

𑁩𑁪𑁩. 𑀇𑀢𑁄 𑀧𑀭𑀁 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸 𑀲𑀼𑀜𑁆𑀜𑀢𑀧𑀝𑀺𑀧𑀤𑀸 𑀲𑀼𑀤𑁆𑀥𑀺𑀓𑀅𑀧𑁆𑀧𑀡𑀺𑀳𑀺𑀢𑀸 𑀅𑀧𑁆𑀧𑀡𑀺𑀳𑀺𑀢𑀧𑀝𑀺𑀧𑀤𑀸𑀢𑀺 𑀅𑀬𑀁 𑀤𑁂𑀲𑀦𑀸𑀪𑁂𑀤𑁄 𑀳𑁄𑀢𑀺. 𑀢𑀢𑁆𑀣 𑀲𑀼𑀜𑁆𑀜𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀦𑀸𑀫𑀁. 𑀲𑁄 𑀳𑀺 𑀆𑀕𑀫𑀦𑀢𑁄 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀅𑀦𑀢𑁆𑀢𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀢𑁆𑀢𑀢𑁄 𑀲𑀗𑁆𑀔𑀸𑀭𑁂 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀢𑁆𑀢𑀢𑁄 𑀤𑀺𑀝𑁆𑀞𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀅𑀦𑀺𑀘𑁆𑀘𑀢𑁄𑀧𑀺 𑀤𑀼𑀓𑁆𑀔𑀢𑁄𑀧𑀺 𑀤𑀝𑁆𑀞𑀼𑀫𑁂𑀯 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’𑀢𑀺 𑀢𑀺𑀯𑀺𑀥𑀁 𑀅𑀦𑀼𑀧𑀲𑁆𑀲𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀘𑀭𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀧𑀦𑀲𑁆𑀲 𑀢𑁂𑀪𑀽𑀫𑀓𑁂𑀧𑀺 𑀲𑀗𑁆𑀔𑀸𑀭𑁂 𑀲𑀼𑀜𑁆𑀜𑀢𑁄𑀯 𑀧𑀲𑁆𑀲𑀢𑀺. 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀲𑀼𑀜𑁆𑀜𑀢𑀸 𑀦𑀸𑀫 𑀳𑁄𑀢𑀺. 𑀲𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 ‘𑀲𑀼𑀜𑁆𑀜𑀢’𑀦𑁆𑀢𑀺 𑀦𑀸𑀫𑀁 𑀤𑁂𑀢𑀺. 𑀏𑀯𑀁 𑀫𑀕𑁆𑀕𑁄 ‘𑀆𑀕𑀫𑀦𑀢𑁄’ 𑀲𑀼𑀜𑁆𑀜𑀢𑀦𑀸𑀫𑀁 𑀮𑀪𑀢𑀺. 𑀬𑀲𑁆𑀫𑀸 𑀧𑀦 𑀲𑁄 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑁄 𑀢𑀲𑁆𑀫𑀸 ‘𑀲𑀕𑀼𑀡𑁂𑀦𑁂𑀯’ 𑀲𑀼𑀜𑁆𑀜𑀢𑀦𑀸𑀫𑀁 𑀮𑀪𑀢𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀕𑁆𑀕𑁄 ‘𑀆𑀭𑀫𑁆𑀫𑀡𑀢𑁄’ 𑀲𑀼𑀜𑁆𑀜𑀢𑀦𑀸𑀫𑀁 𑀮𑀪𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀲𑀕𑀼𑀡𑀢𑁄𑀧𑀺 𑀆𑀭𑀫𑁆𑀫𑀡𑀢𑁄𑀧𑀺 𑀦𑀸𑀫𑀁 𑀮𑀪𑀢𑀺. 𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸. 𑀅𑀪𑀺𑀥𑀫𑁆𑀫𑀓𑀣𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸. 𑀢𑀲𑁆𑀫𑀸 𑀇𑀥 𑀲𑀕𑀼𑀡𑀢𑁄 𑀯𑀸 𑀆𑀭𑀫𑁆𑀫𑀡𑀢𑁄 𑀯𑀸 𑀦𑀸𑀫𑀁 𑀦 𑀮𑀪𑀢𑀺, 𑀆𑀕𑀫𑀦𑀢𑁄𑀯 𑀮𑀪𑀢𑀺. 𑀆𑀕𑀫𑀦𑀫𑁂𑀯 𑀳𑀺 𑀥𑀼𑀭𑀁. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀦𑁆𑀢𑀺. 𑀢𑀢𑁆𑀣 𑀫𑀕𑁆𑀕𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀥𑀼𑀭𑀁, 𑀨𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑀸𑀕𑀫𑀦𑀁 𑀥𑀼𑀭𑀁. 𑀇𑀥 𑀫𑀕𑁆𑀕𑀲𑁆𑀲 𑀆𑀕𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀕𑀫𑀦𑀫𑁂𑀯 𑀥𑀼𑀭𑀁 𑀚𑀸𑀢𑀁.

𑁩𑁫𑁦. 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺, 𑀏𑀢𑁆𑀣𑀸𑀧𑀺 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀫𑀕𑁆𑀕𑀲𑁆𑀲𑁂𑀯 𑀦𑀸𑀫𑀁. 𑀇𑀤𑀫𑁆𑀧𑀺 𑀦𑀸𑀫𑀁 𑀫𑀕𑁆𑀕𑁄 𑀢𑀻𑀳𑁂𑀯 𑀓𑀸𑀭𑀡𑁂𑀳𑀺 𑀮𑀪𑀢𑀺. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀆𑀤𑀺𑀢𑁄𑀯 𑀤𑀼𑀓𑁆𑀔𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑀼𑀓𑁆𑀔𑀢𑁄𑀯 𑀲𑀗𑁆𑀔𑀸𑀭𑁂 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀤𑀼𑀓𑁆𑀔𑀢𑁄 𑀤𑀺𑀝𑁆𑀞𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀅𑀦𑀺𑀘𑁆𑀘𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀤𑀝𑁆𑀞𑀼𑀫𑁂𑀯 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’𑀢𑀺 𑀢𑀺𑀯𑀺𑀥𑀁 𑀅𑀦𑀼𑀧𑀲𑁆𑀲𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀘𑀭𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀧𑀦𑀲𑁆𑀲 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀼 𑀧𑀡𑀺𑀥𑀺𑀁 𑀲𑁄𑀲𑁂𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀲𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 ‘𑀅𑀧𑁆𑀧𑀡𑀺𑀳𑀺𑀢’𑀦𑁆𑀢𑀺 𑀦𑀸𑀫𑀁 𑀤𑁂𑀢𑀺. 𑀏𑀯𑀁 𑀫𑀕𑁆𑀕𑁄 ‘𑀆𑀕𑀫𑀦𑀢𑁄’ 𑀅𑀧𑁆𑀧𑀡𑀺𑀳𑀺𑀢𑀦𑀸𑀫𑀁 𑀮𑀪𑀢𑀺. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀧𑀡𑀺𑀥𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘𑀲𑀕𑀼𑀡𑁂𑀦𑁂𑀯’ 𑀅𑀧𑁆𑀧𑀡𑀺𑀳𑀺𑀢𑀦𑀸𑀫𑀁 𑀮𑀪𑀢𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀢𑁂𑀲𑀁 𑀧𑀡𑀺𑀥𑀻𑀦𑀁 𑀅𑀪𑀸𑀯𑀸 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀕𑁆𑀕𑁄 𑀅𑀧𑁆𑀧𑀡𑀺𑀳𑀺𑀢𑀦𑀸𑀫𑀁 𑀮𑀪𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀲𑀕𑀼𑀡𑀢𑁄𑀧𑀺 𑀆𑀭𑀫𑁆𑀫𑀡𑀢𑁄𑀧𑀺 𑀦𑀸𑀫𑀁 𑀮𑀪𑀢𑀺. 𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸. 𑀅𑀪𑀺𑀥𑀫𑁆𑀫𑀓𑀣𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸. 𑀢𑀲𑁆𑀫𑀸 𑀇𑀥 𑀲𑀕𑀼𑀡𑀢𑁄 𑀯𑀸 𑀆𑀭𑀫𑁆𑀫𑀡𑀢𑁄 𑀯𑀸 𑀦𑀸𑀫𑀁 𑀦 𑀮𑀪𑀢𑀺, 𑀆𑀕𑀫𑀦𑀢𑁄𑀯 𑀮𑀪𑀢𑀺. 𑀆𑀕𑀫𑀦𑀫𑁂𑀯 𑀳𑀺 𑀥𑀼𑀭𑀁. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀦𑁆𑀢𑀺. 𑀢𑀢𑁆𑀣 𑀫𑀕𑁆𑀕𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀥𑀼𑀭𑀁, 𑀨𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑀸𑀕𑀫𑀦𑀁 𑀥𑀼𑀭𑀁. 𑀇𑀥 𑀫𑀕𑁆𑀕𑀲𑁆𑀲 𑀆𑀕𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀕𑀫𑀦𑀫𑁂𑀯 𑀥𑀼𑀭𑀁 𑀚𑀸𑀢𑀁.

𑀦𑀦𑀼 𑀘 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀢𑀻𑀡𑀺 𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀺? 𑀬𑀣𑀸𑀳 𑁋 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀺𑀫𑁄𑀓𑁆𑀔𑀸 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁦𑁯). 𑀢𑁂𑀲𑀼 𑀇𑀥 𑀤𑁆𑀯𑁂 𑀫𑀕𑁆𑀕𑁂 𑀕𑀳𑁂𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑁄 𑀓𑀲𑁆𑀫𑀸 𑀦 𑀕𑀳𑀺𑀢𑁄𑀢𑀺? 𑀆𑀕𑀫𑀦𑀸𑀪𑀸𑀯𑀢𑁄. 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸 𑀳𑀺 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁩𑁪𑁪);

𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀁 𑀓𑀣𑁂𑀲𑀺. 𑀯𑀺𑀧𑀲𑁆𑀲𑀦𑀸 𑀳𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀥𑀼𑀯𑀦𑀺𑀫𑀺𑀢𑁆𑀢𑀁 𑀲𑀼𑀔𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑀺𑀫𑀺𑀢𑁆𑀢𑀜𑁆𑀘 𑀉𑀕𑁆𑀖𑀸𑀝𑁂𑀢𑀺. 𑀢𑀲𑁆𑀫𑀸 𑀅𑀦𑀺𑀫𑀺𑀢𑁆𑀢𑀸𑀢𑀺 𑀓𑀣𑀺𑀢𑀸. 𑀲𑀸 𑀘 𑀓𑀺𑀜𑁆𑀘𑀸𑀧𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑀺, 𑀲𑀬𑀁 𑀧𑀦 𑀦𑀺𑀫𑀺𑀢𑁆𑀢𑀥𑀫𑁆𑀫𑁂𑀲𑀼 𑀘𑀭𑀢𑀻𑀢𑀺 𑀲𑀦𑀺𑀫𑀺𑀢𑁆𑀢𑀸𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀧𑀭𑁄 𑀦𑀬𑁄 𑁋 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀧𑀭𑀫𑀢𑁆𑀣𑀤𑁂𑀲𑀦𑀸. 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀘 𑀧𑀭𑀫𑀢𑁆𑀣𑀢𑁄 𑀳𑁂𑀢𑀼𑀯𑁂𑀓𑀮𑁆𑀮𑀫𑁂𑀯 𑀳𑁄𑀢𑀺. 𑀓𑀣𑀁? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀯𑀲𑁂𑀦 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄 𑀓𑀣𑀺𑀢𑁄. 𑀢𑁂𑀦 𑀘 𑀯𑀺𑀫𑁄𑀓𑁆𑀔𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀢𑀁 𑀅𑀭𑀺𑀬𑀫𑀕𑁆𑀕𑁂 𑀏𑀓𑀗𑁆𑀕𑀫𑁆𑀧𑀺 𑀦 𑀳𑁄𑀢𑀺, 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀧𑀭𑀫𑀢𑁆𑀣𑀢𑁄 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀢𑀸𑀯 𑀯𑀲𑁂𑀦 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄 𑀓𑀣𑀺𑀢𑁄. 𑀢𑁂𑀲𑀼 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀢𑀸𑀦𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀗𑁆𑀕𑀢𑁆𑀢𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀧𑀭𑀫𑀢𑁆𑀣𑀢𑁄 𑀦𑀸𑀫𑀁 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂𑀧𑀺 𑀳𑀺 𑀫𑀕𑁆𑀕𑀸𑀥𑀺𑀧𑀢𑀺𑀥𑀫𑁆𑀫𑀯𑀺𑀪𑀚𑀦𑁂 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀓𑀸𑀮𑁂 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸𑀯 𑀫𑀕𑁆𑀕𑀸𑀥𑀺𑀧𑀢𑀺𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀏𑀓𑀲𑁆𑀲 𑀆𑀘𑀭𑀺𑀬𑀲𑁆𑀲 𑀫𑀢𑀺𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀦 𑀕𑀳𑀺𑀢𑁄. 𑀓𑁂𑀘𑀺 𑀧𑀦 ‘𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀆𑀕𑀫𑀦𑀢𑁄 𑀦𑀸𑀫𑀁 𑀅𑀮𑀪𑀦𑁆𑀢𑁄𑀧𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀕𑀼𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀁 𑀮𑀪𑀢𑀻’𑀢𑀺 𑀆𑀳𑀁𑀲𑀼. 𑀢𑁂 𑀇𑀤𑀁 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑁋 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁂 𑀲𑀕𑀼𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀁 𑀮𑀪𑀦𑁆𑀢𑁂 𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀸𑀧𑀺 𑀲𑀕𑀼𑀡𑀢𑁄𑀬𑁂𑀯 𑀆𑀭𑀫𑁆𑀫𑀡𑀢𑁄𑀬𑁂𑀯 𑀘 𑀇𑀥 𑀦𑀸𑀫𑀁 𑀮𑀪𑁂𑀬𑁆𑀬𑀼𑀁. 𑀦 𑀧𑀦 𑀮𑀪𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀬𑀜𑁆𑀳𑀺 𑀫𑀕𑁆𑀕𑁄 𑀦𑀸𑀫 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺 𑁋 𑀲𑀭𑀲𑀢𑁄 𑀘 𑀧𑀘𑁆𑀘𑀦𑀻𑀓𑀢𑁄 𑀘; 𑀲𑀪𑀸𑀯𑀢𑁄 𑀘 𑀧𑀝𑀺𑀧𑀓𑁆𑀔𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀸 𑀲𑀭𑀲𑀢𑁄𑀧𑀺 𑀧𑀘𑁆𑀘𑀦𑀻𑀓𑀢𑁄𑀧𑀺 𑀦𑀸𑀫𑀁 𑀮𑀪𑀦𑁆𑀢𑀺. 𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀸 𑀳𑀺 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀸, 𑀭𑀸𑀕𑀧𑀡𑀺𑀥𑀺𑀆𑀤𑀻𑀳𑀺 𑀘 𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀏𑀯𑀁 ‘𑀲𑀭𑀲𑀢𑁄’ 𑀦𑀸𑀫𑀁 𑀮𑀪𑀦𑁆𑀢𑀺. 𑀲𑀼𑀜𑁆𑀜𑀢𑁄 𑀘 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀧𑀡𑀺𑀥𑀺𑀲𑁆𑀲𑀸𑀢𑀺 𑀏𑀯𑀁 ‘𑀧𑀘𑁆𑀘𑀦𑀻𑀓𑀢𑁄’ 𑀦𑀸𑀫𑀁 𑀮𑀪𑀦𑁆𑀢𑀺. 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀧𑀦 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀘 𑀅𑀪𑀸𑀯𑁂𑀦 𑀲𑀭𑀲𑀢𑁄𑀯 𑀦𑀸𑀫𑀁 𑀮𑀪𑀢𑀺, 𑀦𑁄 𑀧𑀘𑁆𑀘𑀦𑀻𑀓𑀢𑁄. 𑀦 𑀳𑀺 𑀲𑁄 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑁄. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀧𑀦𑀲𑁆𑀲 𑀅𑀦𑀼𑀮𑁄𑀫𑀪𑀸𑀯𑁂 𑀞𑀺𑀢𑀸𑀢𑀺. 𑀲𑀩𑁆𑀩𑀣𑀸𑀧𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀦𑁂𑀲 𑀏𑀯𑀁 𑀆𑀳𑀭𑀺𑀢𑁆𑀯𑀸 𑀤𑀻𑀧𑀺𑀢𑁄 𑁋 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀏𑀓𑀸𑀯𑀚𑁆𑀚𑀦𑁂𑀦 𑀯𑀺𑀬 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀢𑀺𑀡𑁆𑀡𑀜𑁆𑀘 𑀏𑀓𑀢𑁄 𑀆𑀧𑀸𑀣𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀯𑀺𑀪𑀽𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀆𑀤𑀺𑀢𑁄 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀼, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀬𑀁 𑀬𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀲𑁂𑀦 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀺. 𑀓𑀣𑀁? 𑀅𑀦𑀺𑀘𑁆𑀘𑀸𑀤𑀻𑀲𑀼 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀇𑀢𑀭𑀫𑁆𑀧𑀺 𑀮𑀓𑁆𑀔𑀡𑀤𑁆𑀯𑀬𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀺 𑀏𑀯. 𑀏𑀓𑀮𑀓𑁆𑀔𑀡𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀳𑀺 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑁄 𑀪𑀺𑀓𑁆𑀔𑀼 𑀦 𑀓𑁂𑀯𑀮𑀁 𑀅𑀦𑀺𑀘𑁆𑀘𑀢𑁄𑀯 𑀯𑀼𑀝𑁆𑀞𑀸𑀢𑀺, 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀯𑀼𑀝𑁆𑀞𑀸𑀢𑀺𑀬𑁂𑀯. 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀆𑀤𑀺𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀼, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀬𑀁 𑀬𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀲𑁂𑀦 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀺. 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑁄, 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀲𑀼𑀜𑁆𑀜𑀢𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀆𑀳𑀭𑀺𑀢𑁆𑀯𑀸 𑀤𑀻𑀧𑀺𑀢𑁄.

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀓𑀺𑀫𑀸𑀭𑀫𑁆𑀫𑀡𑀸𑀢𑀺? 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀧𑀜𑁆𑀜𑀢𑁆𑀢𑀺𑀕𑀢𑀺𑀓𑀁 𑀦 𑀯𑀢𑁆𑀢𑀩𑁆𑀩𑀥𑀫𑁆𑀫𑀪𑀽𑀢𑀁. 𑀬𑁄 𑀧𑀦 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀺, 𑀢𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀡𑁆𑀞𑁂 𑀩𑀤𑁆𑀥𑀓𑀼𑀡𑀧𑀁 𑀯𑀺𑀬 𑀳𑁄𑀦𑁆𑀢𑀺. 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀜𑀸𑀡𑀁 𑀲𑀗𑁆𑀔𑀸𑀭𑀢𑁄 𑀯𑀼𑀝𑁆𑀞𑀸𑀢𑀺. 𑀬𑀣𑀸 𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀧𑀢𑁆𑀢𑀁 𑀓𑀺𑀡𑀺𑀢𑀼𑀓𑀸𑀫𑁄 𑀧𑀢𑁆𑀢𑀯𑀸𑀡𑀺𑀚𑁂𑀦 𑀧𑀢𑁆𑀢𑀁 𑀆𑀪𑀢𑀁 𑀤𑀺𑀲𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀻𑀫𑀁𑀲𑀫𑀸𑀦𑁄 𑀢𑀻𑀡𑀺 𑀙𑀺𑀤𑁆𑀤𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀲𑁄 𑀦 𑀙𑀺𑀤𑁆𑀤𑁂𑀲𑀼 𑀦𑀺𑀭𑀸𑀮𑀬𑁄 𑀳𑁄𑀢𑀺, 𑀧𑀢𑁆𑀢𑁂 𑀧𑀦 𑀦𑀺𑀭𑀸𑀮𑀬𑁄 𑀳𑁄𑀢𑀺; 𑀏𑀯𑀫𑁂𑀯 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀗𑁆𑀔𑀸𑀭𑁂𑀲𑀼 𑀦𑀺𑀭𑀸𑀮𑀬𑁄 𑀳𑁄𑀢𑀺. 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁂𑀦𑁂𑀯 𑀜𑀸𑀡𑁂𑀦 𑀲𑀗𑁆𑀔𑀸𑀭𑀢𑁄 𑀯𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀲𑁆𑀲𑁄𑀧𑀫𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀇𑀢𑀺 𑀪𑀕𑀯𑀸 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀚𑁂𑀦𑁆𑀢𑁄 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬 𑀘𑀢𑀼𑀓𑁆𑀓𑀦𑀬𑀁 𑀧𑀜𑁆𑀘𑀓𑀦𑀬𑀦𑁆𑀢𑀺 𑀤𑁆𑀯𑁂𑀧𑀺 𑀦𑀬𑁂 𑀆𑀳𑀭𑀺. 𑀢𑀣𑀸 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀢𑀧𑀝𑀺𑀧𑀤𑀸𑀬 𑀲𑀼𑀤𑁆𑀥𑀺𑀓𑀅𑀧𑁆𑀧𑀡𑀺𑀳𑀺𑀢𑀸𑀬 𑀅𑀧𑁆𑀧𑀡𑀺𑀳𑀺𑀢𑀧𑀝𑀺𑀧𑀤𑀸𑀬𑀸𑀢𑀺. 𑀓𑀲𑁆𑀫𑀸 𑀏𑀯𑀁 𑀆𑀳𑀭𑀻𑀢𑀺? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀘𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘. 𑀢𑀤𑀼𑀪𑀬𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬 𑀘𑀢𑀼𑀓𑁆𑀓𑀧𑀜𑁆𑀘𑀓𑀯𑀲𑁂𑀦 𑀤𑁆𑀯𑁂 𑀦𑀬𑀸, 𑀢𑀣𑀸 𑀲𑁂𑀲𑁂𑀲𑀽𑀢𑀺 𑀲𑀩𑁆𑀩𑁂𑀲𑀼𑀧𑀺 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑀲 𑀦𑀬𑀸 𑀪𑀸𑀚𑀺𑀢𑀸.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀧𑀓𑀺𑀡𑁆𑀡𑀓𑀓𑀣𑀸

𑀢𑀢𑁆𑀭𑀺𑀤𑀁 𑀧𑀓𑀺𑀡𑁆𑀡𑀓𑀁 𑁋

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀭𑀽𑀧𑀸𑀭𑀽𑀧𑁂𑀲𑀼 𑀧𑀜𑁆𑀘𑀲𑀼;

𑀲𑀢𑁆𑀢𑀝𑁆𑀞𑀗𑁆𑀕𑀧𑀭𑀺𑀡𑀸𑀫𑀁, 𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀤𑀸𑀧𑀢𑀻𑀢𑀺.

𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑀺 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀺. 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺. 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑀼𑀝𑁆𑀞𑀸𑀢𑀺.

‘𑀲𑀢𑁆𑀢𑀝𑁆𑀞𑀗𑁆𑀕𑀧𑀭𑀺𑀡𑀸𑀫’𑀦𑁆𑀢𑀺 𑀲𑁄 𑀧𑀦𑁂𑀲 𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄𑀧𑀺 𑀳𑁄𑀢𑀺 𑀲𑀢𑁆𑀢𑀗𑁆𑀕𑀺𑀓𑁄𑀧𑀺. 𑀩𑁄𑀚𑁆𑀛𑀗𑁆𑀕𑀸𑀧𑀺 𑀲𑀢𑁆𑀢 𑀯𑀸 𑀳𑁄𑀦𑁆𑀢𑀺 𑀙 𑀯𑀸. 𑀛𑀸𑀦𑀁 𑀧𑀦 𑀧𑀜𑁆𑀘𑀗𑁆𑀕𑀺𑀓𑀁 𑀯𑀸 𑀳𑁄𑀢𑀺 𑀘𑀢𑀼𑀭𑀗𑁆𑀕𑀺𑀓𑀁 𑀯𑀸; 𑀢𑀺𑀯𑀗𑁆𑀕𑀺𑀓𑀁 𑀯𑀸 𑀤𑀼𑀯𑀗𑁆𑀕𑀺𑀓𑀁 𑀯𑀸. 𑀏𑀯𑀁 𑀲𑀢𑁆𑀢𑀅𑀝𑁆𑀞𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

‘𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀤𑀸𑀧𑀢𑀻’𑀢𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺; ‘𑀧𑀝𑀺𑀧𑀤𑀸𑀧𑀢𑀻’𑀢𑀺 𑀧𑀝𑀺𑀧𑀤𑀸𑀬 𑀘 𑀅𑀥𑀺𑀧𑀢𑀺𑀦𑁄 𑀘 𑀘𑀮𑀦𑀸𑀘𑀮𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀻𑀢𑀺𑀆𑀤𑀻𑀲𑀼 𑀢𑀸𑀯 𑀇𑀥𑁂𑀓𑀘𑁆𑀘𑁄 𑀆𑀤𑀺𑀢𑁄𑀯 𑀅𑀚𑁆𑀛𑀢𑁆𑀢𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀢𑀺, 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀢𑁂 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀲𑁆𑀲𑀢𑀺, 𑀬𑀲𑁆𑀫𑀸 𑀧𑀦 𑀦 𑀲𑀼𑀤𑁆𑀥𑀅𑀚𑁆𑀛𑀢𑁆𑀢𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀤𑀝𑁆𑀞𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀧𑀭𑀲𑁆𑀲 𑀔𑀦𑁆𑀥𑁂𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀲𑀗𑁆𑀔𑀸𑀭𑁂𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀧𑀲𑁆𑀲𑀢𑀺. 𑀲𑁄 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀲𑀫𑁆𑀫𑀲𑀢𑀺 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸𑀢𑀺. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀢𑁄 𑀅𑀚𑁆𑀛𑀢𑁆𑀢𑀁 𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀲𑀘𑁂 𑀧𑀦𑀲𑁆𑀲 𑀩𑀳𑀺𑀤𑁆𑀥𑀸 𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺, 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀏𑀲𑁂𑀯 𑀦𑀬𑁄 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀘 𑀅𑀚𑁆𑀛𑀢𑁆𑀢𑀜𑁆𑀘 𑀯𑀼𑀝𑁆𑀞𑀸𑀦𑁂𑀧𑀺.

𑀅𑀧𑀭𑁄 𑀆𑀤𑀺𑀢𑁄𑀯 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀪𑀽𑀢𑀭𑀽𑀧𑀜𑁆𑀘 𑀉𑀧𑀸𑀤𑀸𑀭𑀽𑀧𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀲𑁆𑀲𑀢𑀺, 𑀬𑀲𑁆𑀫𑀸 𑀧𑀦 𑀦 𑀲𑀼𑀤𑁆𑀥𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺 𑀅𑀭𑀽𑀧𑀫𑁆𑀧𑀺 𑀤𑀝𑁆𑀞𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀢𑀁 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀲𑀜𑁆𑀜𑀁 𑀲𑀗𑁆𑀔𑀸𑀭𑁂 𑀯𑀺𑀜𑁆𑀜𑀸𑀡𑀜𑁆𑀘 𑀇𑀤𑀁 𑀅𑀭𑀽𑀧𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀲𑁆𑀲𑀢𑀺. 𑀲𑁄 𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀢𑀺 𑀓𑀸𑀮𑁂𑀦 𑀅𑀭𑀽𑀧𑀁. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀢𑁄 𑀭𑀽𑀧𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺. 𑀏𑀯𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀲𑀘𑁂 𑀧𑀦𑀲𑁆𑀲 𑀅𑀭𑀽𑀧𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺, 𑀏𑀯𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀏𑀲 𑀦𑀬𑁄 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀘 𑀭𑀽𑀧𑀸 𑀘 𑀯𑀼𑀝𑁆𑀞𑀸𑀦𑁂𑀧𑀺.

‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀫𑀳𑀸𑀯. 𑁧𑁬; 𑀤𑀻. 𑀦𑀺. 𑁧.𑁨𑁯𑁮) 𑀏𑀯𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀏𑀯𑀫𑁂𑀯 𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀏𑀓𑀧𑁆𑀧𑀳𑀸𑀭𑁂𑀦 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑀼𑀝𑁆𑀞𑀸𑀢𑀺 𑀦𑀸𑀫𑀸𑀢𑀺. 𑀅𑀬𑀁 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀫𑀳𑀸𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸.

𑀬𑀣𑀸 𑀳𑀺 𑀙𑀸𑀢𑀚𑁆𑀛𑀢𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀚𑁆𑀛𑁂 𑀕𑀽𑀣𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀧𑀼𑀡𑁆𑀡𑀁 𑀧𑀸𑀢𑀺𑀁 𑀉𑀧𑀦𑁂𑀬𑁆𑀬𑀼𑀁, 𑀲𑁄 𑀩𑁆𑀬𑀜𑁆𑀚𑀦𑀁 𑀳𑀢𑁆𑀣𑁂𑀦 𑀯𑀺𑀬𑀽𑀳𑀦𑁆𑀢𑁄 𑀢𑀁 𑀕𑀽𑀣𑀧𑀺𑀡𑁆𑀟𑀁 𑀤𑀺𑀲𑁆𑀯𑀸 ‘𑀓𑀺𑀫𑀺𑀤’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀕𑀽𑀣𑀧𑀺𑀡𑁆𑀟𑁄𑀢𑀺 𑀯𑀼𑀢𑁆𑀢𑁂 ‘𑀥𑀺 𑀥𑀺, 𑀅𑀧𑀦𑁂𑀣𑀸’𑀢𑀺 𑀪𑀢𑁆𑀢𑁂𑀧𑀺 𑀧𑀸𑀢𑀺𑀬𑀫𑁆𑀧𑀺 𑀦𑀺𑀭𑀸𑀮𑀬𑁄 𑀳𑁄𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀪𑁄𑀚𑀦𑀧𑀸𑀢𑀺𑀤𑀲𑁆𑀲𑀦𑀲𑁆𑀫𑀺𑀜𑁆𑀳𑀺 𑀢𑀲𑁆𑀲 𑀅𑀢𑁆𑀢𑀫𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 ‘𑀅𑀳𑀁 𑀫𑀫𑀸’𑀢𑀺 𑀕𑀳𑀺𑀢𑀓𑀸𑀮𑁄. 𑀕𑀽𑀣𑀧𑀺𑀡𑁆𑀟𑀲𑁆𑀲 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀲𑀮𑁆𑀮𑀓𑁆𑀔𑀺𑀢𑀓𑀸𑀮𑁄. 𑀪𑀢𑁆𑀢𑁂𑀧𑀺 𑀧𑀸𑀢𑀺𑀬𑀫𑁆𑀧𑀺 𑀦𑀺𑀭𑀸𑀮𑀬𑀓𑀸𑀮𑁄 𑀯𑀺𑀬 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀫𑀳𑀸𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀧𑁆𑀧𑀳𑀸𑀭𑁂𑀦 𑀯𑀼𑀝𑁆𑀞𑀺𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

‘𑀲𑀢𑁆𑀢𑀝𑁆𑀞𑀗𑁆𑀕𑀧𑀭𑀺𑀡𑀸𑀫’𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀅𑀗𑁆𑀕𑀧𑀭𑀺𑀡𑀸𑀫𑁄 𑀬𑀣𑀸 𑀳𑁄𑀢𑀺 𑀢𑀣𑀸 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑁂𑀯 𑀳𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 ‘𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀯𑀺𑀲𑁂𑀲𑀁 𑀧𑀸𑀤𑀓𑀚𑁆𑀛𑀸𑀦𑀁 𑀦𑀺𑀬𑀫𑁂𑀢𑀻’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀯𑀸𑀤𑁂𑀲𑀼 𑀅𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸 𑀧𑀼𑀩𑁆𑀩𑀪𑀸𑀕𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻𑀓𑀣𑀸 𑁋 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀳𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑁄𑀧𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀛𑀸𑀦𑀁 𑀧𑀸𑀤𑀓𑀁 𑀅𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑁄𑀧𑀺 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑁄𑀯 𑀳𑁄𑀢𑀺. 𑀲𑀩𑁆𑀩𑁂𑀲𑀼 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀦𑀺 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀧𑀜𑁆𑀘 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺 𑀳𑀼𑀢𑁆𑀯𑀸 𑀯𑀼𑀝𑁆𑀞𑀸𑀦𑀓𑀸𑀮𑁂 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑀁 𑀧𑀢𑁆𑀢𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯 𑀳𑁄𑀢𑀺.

𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁂𑀲𑀼 𑀬𑀣𑀸𑀓𑁆𑀓𑀫𑁂𑀦𑁂𑀯 𑀛𑀸𑀦𑀁 𑀘𑀢𑀼𑀭𑀗𑁆𑀕𑀺𑀓𑀁 𑀢𑀺𑀯𑀗𑁆𑀕𑀺𑀓𑀁 𑀤𑀼𑀯𑀗𑁆𑀕𑀺𑀓𑀜𑁆𑀘 𑀳𑁄𑀢𑀺. 𑀲𑀩𑁆𑀩𑁂𑀲𑀼 𑀧𑀦 𑀲𑀢𑁆𑀢 𑀫𑀕𑁆𑀕𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀘𑀢𑀼𑀢𑁆𑀣𑁂 𑀙 𑀩𑁄𑀚𑁆𑀛𑀗𑁆𑀕𑀸𑀦𑀺. 𑀅𑀬𑀁 𑀯𑀺𑀲𑁂𑀲𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀘 𑀳𑁄𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺 𑀳𑁄𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯.

𑀧𑀜𑁆𑀘𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀕𑁆𑀕𑁂 𑀧𑀦 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑁆𑀯𑁂 𑀛𑀸𑀦𑀗𑁆𑀕𑀸𑀦𑀺 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀙 𑀲𑀢𑁆𑀢 𑀘𑁂𑀯. 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀉𑀪𑀬𑀦𑀺𑀬𑀫𑀯𑀲𑁂𑀦 𑀳𑁄𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸 𑀳𑁄𑀢𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯. 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀧𑀤𑁂𑀲𑁂 𑀯𑀼𑀝𑁆𑀞𑀺𑀢𑀸 𑀲𑀫𑀸𑀧𑀢𑁆𑀢𑀺 𑀅𑀢𑁆𑀢𑀦𑀸 𑀲𑀤𑀺𑀲𑀪𑀸𑀯𑀁 𑀓𑀭𑁄𑀢𑀺, 𑀪𑀽𑀫𑀺𑀯𑀡𑁆𑀡𑁄 𑀯𑀺𑀬 𑀕𑁄𑀥𑀸𑀯𑀡𑁆𑀡𑀲𑁆𑀲.

𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀧𑀦 𑀬𑀢𑁄 𑀬𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀬𑁂 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑁄𑀢𑀺 𑀢𑀁𑀢𑀁𑀲𑀫𑀸𑀧𑀢𑁆𑀢𑀺𑀲𑀤𑀺𑀲𑁄𑀯 𑀳𑁄𑀢𑀺, 𑀲𑀫𑁆𑀫𑀲𑀺𑀢𑀲𑀫𑀸𑀧𑀢𑁆𑀢𑀺𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀦 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀲𑀫𑁆𑀫𑀲𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑁄𑀯 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀢𑀺𑀬𑀢𑁆𑀣𑁂𑀭𑀯𑀸𑀤𑁂 ‘𑀅𑀳𑁄 𑀯𑀢𑀸𑀳𑀁 𑀲𑀢𑁆𑀢𑀗𑁆𑀕𑀺𑀓𑀁 𑀫𑀕𑁆𑀕𑀁 𑀧𑀸𑀧𑀼𑀡𑁂𑀬𑁆𑀬𑀁, 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀧𑀸𑀧𑀼𑀡𑁂𑀬𑁆𑀬’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀬𑀁 𑀬𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀬𑁂 𑀯𑀸 𑀬𑁂 𑀯𑀸 𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀢𑀁𑀢𑀁𑀛𑀸𑀦𑀲𑀤𑀺𑀲𑁄𑀯 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀁 𑀧𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸 𑀯𑀺𑀦𑀸, 𑀅𑀚𑁆𑀛𑀸𑀲𑀬𑀫𑀢𑁆𑀢𑁂𑀦𑁂𑀯 𑀢𑀁 𑀦 𑀇𑀚𑁆𑀛𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀦 𑀳𑁄𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 ‘𑀊𑀦𑁄 𑀦𑀼 𑀔𑁄 𑀘𑀦𑁆𑀤𑁄 𑀧𑀼𑀡𑁆𑀡𑁄 𑀦𑀼 𑀔𑁄 𑀘𑀦𑁆𑀤𑁄’𑀢𑀺, 𑀅𑀣 𑀔𑁄 𑀧𑀼𑀡𑁆𑀡𑁄 𑀘𑀦𑁆𑀤𑁄𑀢𑁆𑀯𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀦𑁆𑀤𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀢𑀫𑀦𑀸 𑀘𑁂𑀯 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀘. 𑀢𑀸𑀲𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀲𑀢𑀸𑀦𑀁 𑀬𑀸 𑀧𑀘𑁆𑀙𑀺𑀫𑀺𑀓𑀸 𑀪𑀺𑀓𑁆𑀔𑀼𑀦𑀻 𑀲𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺 (𑀫. 𑀦𑀺. 𑁩.𑁪𑁧𑁫).

𑀢𑀸𑀲𑀼 𑀳𑀺 𑀬𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄, 𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦𑁂𑀯 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀅𑀳𑁄𑀲𑀺…𑀧𑁂… 𑀬𑀲𑁆𑀲𑀸 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀲𑀸 𑀅𑀭𑀳𑀢𑁆𑀢𑁂𑀦𑁂𑀯. 𑀏𑀯𑀫𑁂𑀯 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀬𑀁 𑀬𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀬𑁂 𑀯𑀸 𑀬𑁂 𑀯𑀸 𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀢𑀁𑀢𑀁𑀛𑀸𑀦𑀲𑀤𑀺𑀲𑁄𑀯 𑀲𑁄 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀁 𑀧𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸 𑀯𑀺𑀦𑀸, 𑀅𑀚𑁆𑀛𑀸𑀲𑀬𑀫𑀢𑁆𑀢𑁂𑀦𑁂𑀯 𑀢𑀁 𑀦 𑀇𑀚𑁆𑀛𑀢𑀻𑀢𑀺. 𑀏𑀢𑁆𑀣𑀸𑀧𑀺 𑀘 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀻’𑀢𑀺 𑀏𑀯𑀁𑀯𑀸𑀤𑀺𑀁 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀳𑀁𑀲𑀼 𑁋 ‘𑀪𑀦𑁆𑀢𑁂, 𑀬𑀢𑁆𑀣 𑀢𑀸𑀯 𑀧𑀸𑀤𑀓𑀚𑁆𑀛𑀸𑀦𑀁 𑀅𑀢𑁆𑀣𑀺 𑀢𑀢𑁆𑀣 𑀢𑀁 𑀦𑀺𑀬𑀫𑁂𑀢𑀼; 𑀬𑀲𑁆𑀫𑀺𑀁 𑀧𑀦 𑀧𑀸𑀤𑀓𑀚𑁆𑀛𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀅𑀭𑀽𑀧𑀪𑀯𑁂 𑀓𑀺𑀁 𑀦𑀺𑀬𑀫𑁂𑀢𑀻’𑀢𑀺? ‘𑀆𑀯𑀼𑀲𑁄, 𑀢𑀢𑁆𑀣𑀧𑀺 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑁄, 𑀧𑀞𑀫𑀚𑁆𑀛𑀸𑀦𑀺𑀓𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀺 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀲 𑀢𑀸𑀦𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀽𑀧𑁂 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀔𑁄 𑀮𑁄𑀓𑀼𑀢𑁆𑀢𑀭𑀁 𑀦 𑀮𑁄𑀓𑀺𑀬𑀁. 𑀏𑀯𑀁 𑀢𑀢𑁆𑀣𑀸𑀧𑀺 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀺 𑀆𑀯𑀼𑀲𑁄’𑀢𑀺. ‘𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂, 𑀧𑀜𑁆𑀳𑁄’𑀢𑀺.

‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀺; 𑀬𑀁 𑀬𑀁 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺 𑀢𑀁𑀢𑀁𑀲𑀤𑀺𑀲𑁄𑀯 𑀫𑀕𑁆𑀕𑁄 𑀳𑁄𑀢𑀻’𑀢𑀺 𑀯𑀸𑀤𑀺𑀁 𑀫𑁄𑀭𑀯𑀸𑀧𑀺𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀫𑁆𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀳𑀁𑀲𑀼 ‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀤𑁄𑀲𑁄 𑀧𑀜𑁆𑀜𑀸𑀬𑀢𑀺 𑁋 𑀭𑀽𑀧𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀪𑀺𑀓𑁆𑀔𑀼𑀦𑁄 𑀳𑀺 𑀭𑀽𑀧𑀲𑀤𑀺𑀲𑁂𑀦 𑀅𑀩𑁆𑀬𑀸𑀓𑀢𑁂𑀦 𑀫𑀕𑁆𑀕𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀬𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀢𑀁𑀲𑀤𑀺𑀲𑁂𑀦𑁂𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑁂𑀦 𑀫𑀕𑁆𑀕𑁂𑀦 𑀪𑀯𑀺𑀢𑀩𑁆𑀩’𑀦𑁆𑀢𑀺. ‘𑀦, 𑀆𑀯𑀼𑀲𑁄, 𑀏𑀯𑀁 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑀺 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀽𑀧𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀕𑁆𑀕𑁄 𑀳𑁄𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲𑀧𑀺 𑀦 𑀲𑀩𑁆𑀩𑀸𑀓𑀸𑀭𑁂𑀦 𑀢𑀸𑀤𑀺𑀲𑁄 𑀳𑁄𑀢𑀺, 𑀲𑀢𑁆𑀢𑀗𑁆𑀕𑀺𑀓𑁄 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀕𑁆𑀕𑁄 𑀳𑁄𑀢𑀻’𑀢𑀺.

‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻’𑀢𑀺𑀯𑀸𑀤𑀺𑀦𑁄 𑀘𑀽𑀴𑀸𑀪𑀬𑀢𑁆𑀣𑁂𑀭𑀲𑁆𑀲𑀸𑀧𑀺 𑀯𑀸𑀤𑀁 𑀆𑀳𑀭𑀺𑀢𑁆𑀯𑀸 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲 𑀓𑀣𑀬𑀺𑀁𑀲𑀼. 𑀲𑁄 𑀆𑀳 𑁋 ‘𑀬𑀲𑁆𑀲 𑀢𑀸𑀯 𑀧𑀸𑀤𑀓𑀚𑁆𑀛𑀸𑀦𑀁 𑀅𑀢𑁆𑀣𑀺 𑀢𑀲𑁆𑀲 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀼, 𑀬𑀲𑁆𑀲 𑀢𑀁 𑀦𑀢𑁆𑀣𑀺 𑀢𑀲𑁆𑀲 𑀓𑀢𑀭𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀲𑁆𑀲𑀢𑀺 𑀦𑀺𑀤𑁆𑀥𑀦𑀲𑁆𑀲 𑀯𑀼𑀟𑁆𑀠𑀺𑀕𑀯𑁂𑀲𑀦𑀓𑀸𑀮𑁄 𑀯𑀺𑀬 𑀳𑁄𑀢𑀻’𑀢𑀺.

𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀲𑁆𑀲 𑀧𑀼𑀦 𑀓𑀣𑀬𑀺𑀁𑀲𑀼. 𑀲𑁄 ‘𑀧𑀸𑀤𑀓𑀚𑁆𑀛𑀸𑀦𑀯𑀢𑁄 𑀇𑀤𑀁 𑀓𑀣𑀺𑀢𑀁 𑀆𑀯𑀼𑀲𑁄’𑀢𑀺 𑀆𑀳. 𑀬𑀣𑀸 𑀧𑀦 𑀧𑀸𑀤𑀓𑀚𑁆𑀛𑀸𑀦𑀯𑀢𑁄, 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀯𑀢𑁄𑀧𑀺 𑀢𑀣𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀳𑀺 𑀧𑀞𑀫𑀸𑀤𑀻𑀦𑀺 𑀲𑀫𑁆𑀫𑀲𑀢𑁄 𑀉𑀧𑁆𑀧𑀦𑁆𑀦𑀫𑀕𑁆𑀕𑁄 𑀧𑀞𑀫𑀢𑁆𑀣𑁂𑀭𑀯𑀸𑀤𑁂𑀦 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁄. 𑀤𑀼𑀢𑀺𑀬𑀯𑀸𑀤𑁂𑀦 𑀧𑀞𑀫𑀸𑀤𑀺𑀚𑁆𑀛𑀸𑀦𑀺𑀓𑁄 𑀆𑀧𑀚𑁆𑀚𑀢𑀻𑀢𑀺 𑀤𑁆𑀯𑁂𑀧𑀺 𑀯𑀸𑀤𑀸 𑀯𑀺𑀭𑀼𑀚𑁆𑀛𑀦𑁆𑀢𑀺. 𑀢𑀢𑀺𑀬𑀯𑀸𑀤𑁂𑀦 𑀧𑀦𑁂𑀢𑁆𑀣 ‘𑀬𑀁 𑀇𑀘𑁆𑀙𑀢𑀺 𑀢𑀚𑁆𑀛𑀸𑀦𑀺𑀓𑁄 𑀳𑁄𑀢𑀻’𑀢𑀺 𑀢𑁂 𑀘 𑀯𑀸𑀤𑀸 𑀦 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀅𑀚𑁆𑀛𑀸𑀲𑀬𑁄 𑀘 𑀲𑀸𑀢𑁆𑀣𑀓𑁄 𑀳𑁄𑀢𑀻𑀢𑀺. 𑀏𑀯𑀁 𑀢𑀬𑁄𑀧𑀺 𑀣𑁂𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀯. 𑀢𑁂𑀦 𑀢𑁂𑀲𑀁 𑀯𑀸𑀤𑀁 𑀢𑀦𑁆𑀢𑀺𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀇𑀥 𑀧𑀦 𑀅𑀢𑁆𑀣𑀫𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀢𑀬𑁄𑀧𑁂𑀢𑁂 𑀯𑀸𑀤𑁂 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀤𑀲𑁆𑀲𑀺𑀢𑀁.

𑀇𑀤𑀸𑀦𑀺 ‘𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀤𑀸𑀧𑀢𑀻’𑀢𑀺 𑀏𑀢𑁆𑀣 𑀏𑀯𑀁 𑀅𑀗𑁆𑀕𑀧𑀭𑀺𑀡𑀸𑀫𑀯𑀢𑁄 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑁂 𑀕𑁄𑀢𑁆𑀭𑀪𑀼 𑀓𑀼𑀢𑁄 𑀯𑀼𑀝𑁆𑀞𑀸𑀢𑀺? 𑀫𑀕𑁆𑀕𑁄 𑀓𑀼𑀢𑁄𑀢𑀺? 𑀕𑁄𑀢𑁆𑀭𑀪𑀼 𑀢𑀸𑀯 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀧𑀯𑀢𑁆𑀢𑀁 𑀙𑁂𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀓𑀢𑁄𑀯𑀼𑀝𑁆𑀞𑀸𑀦𑁄 𑀳𑁂𑀲. 𑀫𑀕𑁆𑀕𑁄 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀧𑀯𑀢𑁆𑀢𑀫𑁆𑀧𑀺 𑀙𑀺𑀦𑁆𑀤𑀢𑀺 𑀉𑀪𑀢𑁄𑀯𑀼𑀝𑁆𑀞𑀸𑀦𑁄 𑀳𑁂𑀲. 𑀢𑁂𑀲𑀁 𑀅𑀬𑀁 𑀉𑀧𑁆𑀧𑀢𑁆𑀢𑀺𑀦𑀬𑁄 𑁋 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀦𑀼𑀮𑁄𑀫𑀁 𑀦𑁂𑀯 𑀏𑀓𑀁 𑀳𑁄𑀢𑀺, 𑀦 𑀧𑀜𑁆𑀘𑀫𑀁. 𑀏𑀓𑀜𑁆𑀳𑀺 𑀆𑀲𑁂𑀯𑀦𑀁 𑀦 𑀮𑀪𑀢𑀺, 𑀧𑀜𑁆𑀘𑀫𑀁 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀧𑀯𑁂𑀥𑀢𑀺. 𑀢𑀤𑀸 𑀳𑀺 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀦𑁂𑀯 𑀏𑀓𑀁 𑀳𑁄𑀢𑀺 𑀦 𑀧𑀜𑁆𑀘𑀫𑀁. 𑀫𑀳𑀸𑀧𑀜𑁆𑀜𑀲𑁆𑀲 𑀧𑀦 𑀤𑁆𑀯𑁂 𑀅𑀦𑀼𑀮𑁄𑀫𑀸𑀦𑀺 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼, 𑀘𑀢𑀼𑀢𑁆𑀣𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀢𑀻𑀡𑀺 𑀨𑀮𑀸𑀦𑀺, 𑀢𑀢𑁄 𑀪𑀯𑀗𑁆𑀕𑁄𑀢𑀭𑀡𑀁. 𑀫𑀚𑁆𑀛𑀺𑀫𑀧𑀜𑁆𑀜𑀲𑁆𑀲 𑀢𑀻𑀡𑀺 𑀅𑀦𑀼𑀮𑁄𑀫𑀸𑀦𑀺 𑀳𑁄𑀦𑁆𑀢𑀺, 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼, 𑀧𑀜𑁆𑀘𑀫𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀤𑁆𑀯𑁂 𑀨𑀮𑀸𑀦𑀺, 𑀢𑀢𑁄 𑀪𑀯𑀗𑁆𑀕𑁄𑀢𑀭𑀡𑀁. 𑀫𑀦𑁆𑀤𑀧𑀜𑁆𑀜𑀲𑁆𑀲 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀸𑀦𑀺, 𑀳𑁄𑀦𑁆𑀢𑀺 𑀧𑀜𑁆𑀘𑀫𑀁 𑀕𑁄𑀢𑁆𑀭𑀪𑀼, 𑀙𑀝𑁆𑀞𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀲𑀢𑁆𑀢𑀫𑀁 𑀨𑀮𑀁, 𑀢𑀢𑁄 𑀪𑀯𑀗𑁆𑀕𑁄𑀢𑀭𑀡𑀁. 𑀢𑀢𑁆𑀭 𑀫𑀳𑀸𑀧𑀜𑁆𑀜𑀫𑀦𑁆𑀤𑀧𑀜𑁆𑀜𑀸𑀦𑀁 𑀯𑀲𑁂𑀦 𑀅𑀓𑀣𑁂𑀢𑁆𑀯𑀸 𑀫𑀚𑁆𑀛𑀺𑀫𑀧𑀜𑁆𑀜𑀲𑁆𑀲 𑀯𑀲𑁂𑀦 𑀓𑀣𑁂𑀢𑀩𑁆𑀩𑀁.

𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀕𑁄𑀘𑀭𑁂 𑀔𑀦𑁆𑀥𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺. 𑀢𑀤𑀦𑀦𑁆𑀢𑀭𑀁 𑀢𑁂𑀦𑁂𑀯 𑀆𑀯𑀚𑁆𑀚𑀦𑁂𑀦 𑀕𑀳𑀺𑀢𑀓𑁆𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀧𑀞𑀫𑀁 𑀚𑀯𑀦𑀁 𑀅𑀦𑀼𑀮𑁄𑀫𑀜𑀸𑀡𑀁. 𑀢𑀁 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀸𑀢𑀺 𑀯𑀸 𑀤𑀼𑀓𑁆𑀔𑀸𑀢𑀺 𑀯𑀸 𑀅𑀦𑀢𑁆𑀢𑀸𑀢𑀺 𑀯𑀸 𑀧𑀯𑀢𑁆𑀢𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀑𑀴𑀸𑀭𑀺𑀓𑀁 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀸𑀓𑀝𑀸𑀦𑀺 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺 𑀤𑀼𑀢𑀺𑀬𑀸𑀦𑀼𑀮𑁄𑀫𑀁. 𑀢𑁂𑀲𑀼 𑀧𑀼𑀭𑀺𑀫𑀁 𑀅𑀦𑀸𑀲𑁂𑀯𑀦𑀁. 𑀤𑀼𑀢𑀺𑀬𑀲𑁆𑀲 𑀧𑀼𑀭𑀺𑀫𑀁 𑀆𑀲𑁂𑀯𑀦𑀁 𑀳𑁄𑀢𑀺. 𑀢𑀫𑁆𑀧𑀺 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸 𑀢𑀺𑀓𑁆𑀔𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀁 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀸𑀓𑀝𑀸𑀦𑀺 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺 𑀢𑀢𑀺𑀬𑀸𑀦𑀼𑀮𑁄𑀫𑀁. 𑀢𑀲𑁆𑀲 𑀤𑀼𑀢𑀺𑀬𑀁 𑀆𑀲𑁂𑀯𑀦𑀁 𑀳𑁄𑀢𑀺. 𑀢𑀫𑁆𑀧𑀺 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸 𑀢𑀺𑀓𑁆𑀔𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀢𑀤𑀯𑀲𑁂𑀲𑀁 𑀅𑀡𑀼𑀲𑀳𑀕𑀢𑀁 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑀁 𑀓𑀢𑁆𑀯𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀸𑀓𑀝𑀸𑀦𑀺 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀏𑀯𑀁 𑀢𑀻𑀳𑀺 𑀅𑀦𑀼𑀮𑁄𑀫𑁂𑀳𑀺 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑁂 𑀯𑀺𑀦𑁄𑀤𑀺𑀢𑁂 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀼𑀭𑀼𑀫𑀸𑀦𑀁.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀦𑀓𑁆𑀔𑀢𑁆𑀢𑀬𑁄𑀕𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀭𑀢𑁆𑀢𑀺𑀪𑀸𑀕𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀦𑁆𑀤𑀁 𑀧𑀲𑁆𑀲𑀺𑀢𑀼𑀁 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀲𑀺. 𑀢𑀲𑁆𑀲 𑀯𑀮𑀸𑀳𑀓𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀘𑀦𑁆𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣𑁂𑀓𑁄 𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀣𑀽𑀮𑀣𑀽𑀮𑁂 𑀯𑀮𑀸𑀳𑀓𑁂 𑀯𑀺𑀤𑁆𑀥𑀁𑀲𑁂𑀲𑀺. 𑀅𑀧𑀭𑁄 𑀫𑀚𑁆𑀛𑀺𑀫𑁂. 𑀅𑀧𑀭𑁄 𑀲𑀼𑀔𑀼𑀫𑁂. 𑀢𑀢𑁄 𑀲𑁄 𑀧𑀼𑀭𑀺𑀲𑁄 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀘𑀦𑁆𑀤𑀁 𑀤𑀺𑀲𑁆𑀯𑀸 𑀦𑀓𑁆𑀔𑀢𑁆𑀢𑀬𑁄𑀕𑀁 𑀅𑀜𑁆𑀜𑀸𑀲𑀺.

𑀢𑀢𑁆𑀣 𑀢𑀬𑁄 𑀯𑀮𑀸𑀳𑀓𑀸 𑀯𑀺𑀬 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀣𑀽𑀮𑀫𑀚𑁆𑀛𑀺𑀫𑀲𑀼𑀔𑀼𑀫𑀓𑀺𑀮𑁂𑀲𑀦𑁆𑀥𑀓𑀸𑀭𑀸. 𑀢𑀬𑁄 𑀯𑀸𑀢𑀸 𑀯𑀺𑀬 𑀢𑀻𑀡𑀺 𑀅𑀦𑀼𑀮𑁄𑀫𑀘𑀺𑀢𑁆𑀢𑀸𑀦𑀺. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁. 𑀘𑀦𑁆𑀤𑁄 𑀯𑀺𑀬 𑀦𑀺𑀩𑁆𑀩𑀸𑀦𑀁. 𑀏𑀓𑁂𑀓𑀲𑁆𑀲 𑀯𑀸𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀯𑀮𑀸𑀳𑀓𑀢𑁆𑀢𑀬𑀯𑀺𑀤𑁆𑀥𑀁𑀲𑀦𑀁 𑀯𑀺𑀬 𑀏𑀓𑁂𑀓𑀲𑁆𑀲 𑀅𑀦𑀼𑀮𑁄𑀫𑀘𑀺𑀢𑁆𑀢𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀯𑀺𑀦𑁄𑀤𑀦𑀁. 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀲𑀼𑀤𑁆𑀥𑀘𑀦𑁆𑀤𑀤𑀲𑁆𑀲𑀦𑀁 𑀯𑀺𑀬 𑀯𑀺𑀕𑀢𑁂 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑁂 𑀢𑀫𑁂 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀲𑁆𑀲 𑀲𑀼𑀯𑀺𑀲𑀼𑀤𑁆𑀥𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑀁.

𑀬𑀣𑁂𑀯 𑀳𑀺 𑀢𑀬𑁄 𑀯𑀸𑀢𑀸 𑀘𑀦𑁆𑀤𑀧𑀝𑀺𑀘𑁆𑀙𑀸𑀤𑀓𑁂 𑀯𑀮𑀸𑀳𑀓𑁂𑀬𑁂𑀯 𑀯𑀺𑀤𑁆𑀥𑀁𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀘𑀦𑁆𑀤𑀁 𑀤𑀝𑁆𑀞𑀼𑀁, 𑀏𑀯𑀁 𑀅𑀦𑀼𑀮𑁄𑀫𑀸𑀦𑀺 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑁂𑀬𑁂𑀯 𑀯𑀺𑀦𑁄𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀘𑀦𑁆𑀤𑀫𑁂𑀯 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺 𑀦 𑀯𑀮𑀸𑀳𑀓𑁂 𑀯𑀺𑀤𑁆𑀥𑀁𑀲𑁂𑀢𑀼𑀁, 𑀏𑀯𑀁 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦 𑀓𑀺𑀮𑁂𑀲𑀢𑀫𑀁 𑀯𑀺𑀦𑁄𑀤𑁂𑀢𑀼𑀁. 𑀏𑀯𑀁 𑀅𑀦𑀼𑀮𑁄𑀫𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀕𑁄𑀢𑁆𑀭𑀪𑀼 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁.

𑀬𑀤𑀺 𑀳𑀺 𑀕𑁄𑀢𑁆𑀭𑀪𑀼 𑀅𑀦𑀼𑀮𑁄𑀫𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁 𑀕𑀡𑁆𑀳𑁂𑀬𑁆𑀬 𑀧𑀼𑀦 𑀅𑀦𑀼𑀮𑁄𑀫𑀁 𑀢𑀁 𑀅𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀫𑀕𑁆𑀕𑀯𑀼𑀝𑁆𑀞𑀸𑀦𑀫𑁂𑀯 𑀦 𑀪𑀯𑁂𑀬𑁆𑀬. 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁 𑀧𑀦 𑀅𑀦𑀼𑀮𑁄𑀫𑀲𑁆𑀲 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀁 𑀅𑀧𑀘𑁆𑀙𑀢𑁄𑀧𑀯𑀢𑁆𑀢𑀺𑀓𑀁 𑀓𑀢𑁆𑀯𑀸 𑀲𑀬𑀁 𑀅𑀦𑀸𑀯𑀚𑁆𑀚𑀦𑀫𑁆𑀧𑀺 𑀲𑀫𑀸𑀦𑀁 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀏𑀯𑀁 𑀦𑀺𑀩𑁆𑀩𑀢𑁆𑀢𑀸𑀳𑀻𑀢𑀺 𑀫𑀕𑁆𑀕𑀲𑁆𑀲 𑀲𑀜𑁆𑀜𑀁 𑀤𑀢𑁆𑀯𑀸 𑀯𑀺𑀬 𑀦𑀺𑀭𑀼𑀚𑁆𑀛𑀢𑀺. 𑀫𑀕𑁆𑀕𑁄𑀧𑀺 𑀢𑁂𑀦 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀅𑀯𑀻𑀘𑀺𑀲𑀦𑁆𑀢𑀢𑀺𑀯𑀲𑁂𑀦 𑀢𑀁 𑀜𑀸𑀡𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀤𑁄𑀲𑀓𑁆𑀔𑀦𑁆𑀥𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀫𑀸𑀦𑁄𑀯 𑀧𑀤𑀸𑀮𑀬𑀫𑀸𑀦𑁄𑀯 𑀦𑀺𑀩𑁆𑀩𑀢𑁆𑀢𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀇𑀲𑁆𑀲𑀸𑀲𑁄 𑀥𑀦𑀼𑀲𑀢𑀫𑀢𑁆𑀣𑀓𑁂 𑀨𑀮𑀓𑀲𑀢𑀁 𑀞𑀧𑀸𑀧𑁂𑀢𑁆𑀯𑀸 𑀯𑀢𑁆𑀣𑁂𑀦 𑀫𑀼𑀔𑀁 𑀯𑁂𑀞𑁂𑀢𑁆𑀯𑀸 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀘𑀓𑁆𑀓𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀘𑀓𑁆𑀓𑀬𑀦𑁆𑀢𑀁 𑀆𑀯𑀜𑁆𑀙𑀺𑀢𑁆𑀯𑀸 𑀬𑀤𑀸 𑀇𑀲𑁆𑀲𑀸𑀲𑀲𑁆𑀲 𑀨𑀮𑀓𑀲𑀢𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺 𑀢𑀤𑀸 𑀢𑀢𑁆𑀣 𑀤𑀡𑁆𑀟𑀓𑁂𑀦 𑀲𑀜𑁆𑀜𑀁 𑀤𑁂𑀢𑀺, 𑀇𑀲𑁆𑀲𑀸𑀲𑁄 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀨𑀮𑀓𑀲𑀢𑀁 𑀦𑀺𑀩𑁆𑀩𑀺𑀚𑁆𑀛𑀢𑀺. 𑀢𑀢𑁆𑀣 𑀤𑀡𑁆𑀟𑀓𑀲𑀜𑁆𑀜𑀸 𑀯𑀺𑀬 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁. 𑀇𑀲𑁆𑀲𑀸𑀲𑁄 𑀯𑀺𑀬 𑀫𑀕𑁆𑀕𑀜𑀸𑀡𑀁. 𑀇𑀲𑁆𑀲𑀸𑀲𑀲𑁆𑀲 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀨𑀮𑀓𑀲𑀢𑀦𑀺𑀩𑁆𑀩𑀺𑀚𑁆𑀛𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀲𑁆𑀲 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑁂𑀦 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀸𑀦𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀧𑀤𑀸𑀮𑀦𑀁. 𑀪𑀽𑀫𑀺𑀮𑀤𑁆𑀥𑀯𑀝𑁆𑀝𑀲𑁂𑀢𑀼𑀲𑀫𑀼𑀕𑁆𑀖𑀸𑀢𑀓𑀭𑀡𑀦𑁆𑀢𑀺𑀧𑀺 𑀏𑀢𑀤𑁂𑀯. 𑀫𑀕𑁆𑀕𑀲𑁆𑀲 𑀳𑀺 𑀏𑀓𑀫𑁂𑀯 𑀓𑀺𑀘𑁆𑀘𑀁 𑀅𑀦𑀼𑀲𑀬𑀧𑁆𑀧𑀚𑀳𑀦𑀁. 𑀇𑀢𑀺 𑀲𑁄 𑀅𑀦𑀼𑀲𑀬𑁂 𑀧𑀚𑀳𑀦𑁆𑀢𑁄 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫, 𑀧𑀯𑀢𑁆𑀢𑀁 𑀙𑀺𑀦𑁆𑀤𑀢𑀺 𑀦𑀸𑀫. ‘𑀦𑀺𑀫𑀺𑀢𑁆𑀢’𑀦𑁆𑀢𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀁. ‘𑀧𑀯𑀢𑁆𑀢’𑀫𑁆𑀧𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀯𑀢𑁆𑀢𑀫𑁂𑀯. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀉𑀧𑀸𑀤𑀺𑀦𑁆𑀦𑀓𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀦𑁆𑀢𑀺. 𑀢𑁂𑀲𑀼 𑀫𑀕𑁆𑀕𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀦𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀻𑀢𑀺 𑀯𑀢𑁆𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀻𑀢𑀺 𑀯𑀤𑀺𑀁𑀲𑀼.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀦𑁆𑀢𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀢𑀸𑀦𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀭𑀽𑀧𑀓𑁆𑀔𑀦𑁆𑀥𑁄. 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀢𑀢𑁆𑀣 𑀲𑀘𑁂 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲 𑀢𑀸𑀦𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀸𑀧𑀼𑀡𑁂𑀬𑁆𑀬𑀼𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀧𑀦 𑀢𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀧𑁆𑀧𑀢𑁆𑀢𑀺𑀁 𑀯𑀸𑀭𑀬𑀫𑀸𑀦𑁄 𑀲𑁂𑀢𑀼𑀲𑀫𑀼𑀕𑁆𑀖𑀸𑀢𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀪𑀸𑀯𑀁 𑀓𑀼𑀭𑀼𑀫𑀸𑀦𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀻𑀢𑀺 𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀯𑀲𑁂𑀦 𑀙 𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀯𑀲𑁂𑀦 𑀢𑀸𑀦𑀺 𑀏𑀯 𑀙 𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀢𑀢𑁆𑀣 𑀲𑀘𑁂 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀢𑁂 𑀫𑀕𑁆𑀕𑀸 𑀅𑀪𑀸𑀯𑀺𑀢𑀸 𑀅𑀲𑁆𑀲𑀼, 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀸𑀧𑀼𑀡𑁂𑀬𑁆𑀬𑀼𑀁. 𑀢𑁂 𑀧𑀦 𑀢𑁂𑀲𑀁 𑀫𑀕𑁆𑀕𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀁 𑀯𑀸𑀭𑀬𑀫𑀸𑀦𑀸 𑀲𑁂𑀢𑀼𑀲𑀫𑀼𑀕𑁆𑀖𑀸𑀢𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀪𑀸𑀯𑀁 𑀓𑀼𑀭𑀼𑀫𑀸𑀦𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫.

𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀦𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀻𑀢𑀺 𑀯𑀢𑁆𑀯𑀸 𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀻𑀢𑀺𑀧𑀺 𑀯𑀤𑀺𑀁𑀲𑀼. 𑀲𑀘𑁂 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲, 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀧𑀜𑁆𑀘 𑀓𑀺𑀮𑁂𑀲𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺? 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀲𑀓𑀤𑀸𑀕𑀸𑀫𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲, 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀪𑀯𑁂 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀑𑀴𑀸𑀭𑀺𑀓𑀸𑀦𑀺 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺? 𑀏𑀯𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲, 𑀞𑀧𑁂𑀢𑁆𑀯𑀸 𑀏𑀓𑀁 𑀪𑀯𑀁 𑀤𑀼𑀢𑀺𑀬𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀅𑀡𑀼𑀲𑀳𑀕𑀢𑀸𑀦𑀺 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺 𑀅𑀡𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀅𑀦𑀸𑀕𑀸𑀫𑀺𑀲𑁆𑀲 𑀏𑀓𑀁 𑀪𑀯𑀁 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺? 𑀏𑀯𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀅𑀭𑀳𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸 𑀫𑀸𑀦𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀅𑀝𑁆𑀞 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀔𑀻𑀡𑀸𑀲𑀯𑀲𑁆𑀲 𑀧𑀼𑀦𑀩𑁆𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺? 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀘𑁂𑀢𑁆𑀣 𑀅𑀧𑀸𑀬𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀓𑀸𑀫𑀪𑀯𑁂𑀓𑀤𑁂𑀲𑀢𑁄, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀸𑀫𑀪𑀯𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀲𑀩𑁆𑀩𑀪𑀯𑁂𑀳𑀺𑀧𑀺 𑀯𑀼𑀝𑁆𑀞𑀸𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀅𑀬𑀁 𑀧𑀸𑀴𑀺 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺.

‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺.

‘𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀓𑀁 𑀪𑀯𑀁 𑀞𑀧𑁂𑀢𑁆𑀯𑀸 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺.

‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀭𑀳𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬). 𑀅𑀬𑀁 𑀢𑀸𑀯 𑀦𑀺𑀫𑀺𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄.

‘𑀧𑀝𑀺𑀧𑀤𑀸𑀧𑀢𑀻’𑀢𑀺 𑁋 𑀏𑀢𑁆𑀣 𑀧𑀦 𑀧𑀝𑀺𑀧𑀤𑀸 𑀘𑀮𑀢𑀺 𑀦 𑀘𑀮𑀢𑀻𑀢𑀺? 𑀘𑀮𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀘 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀅𑀳𑁂𑀲𑀼𑀁. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀧𑀞𑀫𑀫𑀕𑁆𑀕𑁄 𑀲𑀼𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄, 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀓𑀲𑁆𑀫𑀸? 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑁆𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀺𑀭 𑀲𑀢𑁆𑀢𑀸𑀳𑀁 𑀤𑀳𑀭𑀓𑀼𑀫𑀸𑀭𑀓𑀁 𑀯𑀺𑀬 𑀣𑁂𑀭𑀁 𑀧𑀭𑀺𑀳𑀭𑀺. 𑀣𑁂𑀭𑁄𑀧𑀺 𑀏𑀓𑀤𑀺𑀯𑀲𑀁 𑀦𑀺𑀤𑁆𑀤𑀸𑀬𑀫𑀸𑀦𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀧𑀘𑀮𑀸𑀬𑀲𑀺 𑀦𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀘𑀮𑀸𑀬𑀲𑀺 𑀦𑁄 𑀢𑁆𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺 (𑀅. 𑀦𑀺. 𑁭.𑁬𑁧). 𑀏𑀯𑀭𑀽𑀧𑀲𑁆𑀲𑀧𑀺 𑀫𑀳𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀲𑁆𑀲 𑀲𑀸𑀯𑀓𑀲𑁆𑀲 𑀧𑀝𑀺𑀧𑀤𑀸 𑀘𑀮𑀢𑀺, 𑀲𑁂𑀲𑀸𑀦𑀁 𑀓𑀺𑀁 𑀦 𑀘𑀮𑀺𑀲𑁆𑀲𑀢𑀺? 𑀏𑀓𑀘𑁆𑀘𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀏𑀓𑀘𑁆𑀘𑀲𑁆𑀲 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀏𑀓𑀘𑁆𑀘𑀲𑁆𑀲 𑀲𑀼𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀏𑀓𑀘𑁆𑀘𑀲𑁆𑀲 𑀧𑀞𑀫𑀫𑀕𑁆𑀕𑁄 𑀤𑀼𑀓𑁆𑀔𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀤𑀼𑀢𑀺𑀬𑀫𑀕𑁆𑀕𑁄 𑀤𑀼𑀓𑁆𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄, 𑀢𑀢𑀺𑀬𑀫𑀕𑁆𑀕𑁄 𑀲𑀼𑀔𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄, 𑀘𑀢𑀼𑀢𑁆𑀣𑀫𑀕𑁆𑀕𑁄 𑀲𑀼𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄𑀢𑀺.

𑀬𑀣𑀸 𑀘 𑀧𑀝𑀺𑀧𑀤𑀸 𑀏𑀯𑀁 𑀅𑀥𑀺𑀧𑀢𑀺𑀧𑀺 𑀘𑀮𑀢𑀺 𑀏𑀯. 𑀏𑀓𑀘𑁆𑀘𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸, 𑀏𑀓𑀘𑁆𑀘𑀲𑁆𑀲 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸, 𑀏𑀓𑀘𑁆𑀘𑀲𑁆𑀲 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀸. 𑀏𑀓𑀘𑁆𑀘𑀲𑁆𑀲 𑀧𑀦 𑀧𑀞𑀫𑀫𑀕𑁆𑀕𑁄 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀤𑀼𑀢𑀺𑀬𑁄 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑁄, 𑀢𑀢𑀺𑀬𑁄 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑁄, 𑀘𑀢𑀼𑀢𑁆𑀣𑁄 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑁄𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀫𑀕𑁆𑀕𑀯𑀻𑀲𑀢𑀺𑀫𑀳𑀸𑀦𑀬𑁄

𑁩𑁫𑁭. 𑀇𑀤𑀸𑀦𑀺 𑀬𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀪𑀸𑀯𑁂𑀦𑁆𑀢𑁄 𑀦 𑀓𑁂𑀯𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀛𑀸𑀦𑀁𑀬𑁂𑀯 𑀪𑀸𑀯𑁂𑀢𑀺, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀧𑀦 𑀫𑀕𑁆𑀕𑀫𑁆𑀧𑀺 𑀪𑀸𑀯𑁂𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀫𑁆𑀧𑀺, 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀫𑁆𑀧𑀺, 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀫𑁆𑀧𑀺, 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀫𑁆𑀧𑀺, 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀫𑁆𑀧𑀺, 𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀫𑁆𑀧𑀺, 𑀢𑀣𑀝𑁆𑀞𑁂𑀦 𑀲𑀘𑁆𑀘𑀫𑁆𑀧𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑀫𑁆𑀧𑀺, 𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀫𑁆𑀫𑀫𑁆𑀧𑀺, 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀫𑁆𑀧𑀺, 𑀆𑀬𑀢𑀦𑀝𑁆𑀞𑁂𑀦 𑀆𑀬𑀢𑀦𑀫𑁆𑀧𑀺, 𑀲𑀼𑀜𑁆𑀜𑀲𑀪𑀸𑀯𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀸𑀢𑀼𑀫𑁆𑀧𑀺, 𑀧𑀘𑁆𑀘𑀬𑀝𑁆𑀞𑁂𑀦 𑀆𑀳𑀸𑀭𑀫𑁆𑀧𑀺, 𑀨𑀼𑀲𑀦𑀝𑁆𑀞𑁂𑀦 𑀨𑀲𑁆𑀲𑀫𑁆𑀧𑀺, 𑀯𑁂𑀤𑀬𑀺𑀢𑀝𑁆𑀞𑁂𑀦 𑀯𑁂𑀤𑀦𑀫𑁆𑀧𑀺, 𑀲𑀜𑁆𑀚𑀸𑀦𑀦𑀝𑁆𑀞𑁂𑀦 𑀲𑀜𑁆𑀜𑀫𑁆𑀧𑀺, 𑀘𑁂𑀢𑀬𑀺𑀢𑀝𑁆𑀞𑁂𑀦 𑀘𑁂𑀢𑀦𑀫𑁆𑀧𑀺, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀫𑁆𑀧𑀺 𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀏𑀢𑁂𑀲𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀤𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 ‘𑀇𑀤𑀫𑁆𑀧𑀺 𑀪𑀸𑀯𑁂𑀢𑀺, 𑀇𑀤𑀫𑁆𑀧𑀺 𑀪𑀸𑀯𑁂𑀢𑀻’𑀢𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀘𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀯𑀻𑀲𑀢𑀺 𑀦𑀬𑀸 𑀤𑁂𑀲𑀺𑀢𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀁 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀤𑁂𑀯𑀧𑀭𑀺𑀲𑀸𑀬 𑀳𑀺 𑀬𑁂 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀁 ‘𑀛𑀸𑀦’𑀦𑁆𑀢𑀺 𑀓𑀣𑀺𑀢𑁂 𑀩𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀛𑀸𑀦𑀦𑁆𑀢𑀺 𑀓𑀣𑀺𑀢𑀁…𑀧𑁂… 𑀬𑁂 𑀯𑀺𑀚𑀸𑀦𑀦𑀝𑁆𑀞𑁂𑀦 ‘𑀘𑀺𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀘𑀺𑀢𑁆𑀢𑀦𑁆𑀢𑀺 𑀓𑀣𑀺𑀢𑀁. 𑀅𑀬𑀫𑁂𑀢𑁆𑀣 ‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄’.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀢𑀸𑀬 𑀙𑀅𑀲𑀸𑀥𑀸𑀭𑀡𑀜𑀸𑀡𑀬𑁄𑀕𑁂𑀦 𑀘 𑀤𑁂𑀲𑀦𑀁 𑀬𑀤𑀺𑀘𑁆𑀙𑀓𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀇𑀘𑁆𑀙𑀦𑁆𑀢𑁄 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀇𑀘𑁆𑀙𑀦𑁆𑀢𑁄 𑀦𑀺𑀬𑁆𑀬𑀸𑀦𑀝𑁆𑀞𑁂𑀦…𑀧𑁂… 𑀯𑀺𑀚𑀸𑀦𑀦𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺. 𑀅𑀬𑀁 ‘𑀤𑁂𑀲𑀦𑀸𑀯𑀺𑀮𑀸𑀲𑁄’ 𑀦𑀸𑀫. 𑀢𑀢𑁆𑀣 𑀬𑀣𑁂𑀯 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀤𑀲 𑀦𑀬𑀸 𑀯𑀺𑀪𑀢𑁆𑀢𑀸, 𑀏𑀯𑀁 𑀫𑀕𑁆𑀕𑀸𑀤𑀻𑀲𑀼𑀧𑀺 𑀢𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀤𑀲 𑀤𑀲 𑀓𑀢𑁆𑀯𑀸 𑀤𑁆𑀯𑁂 𑀦𑀬𑀲𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑁩𑁫𑁮. 𑀇𑀤𑀸𑀦𑀺 𑀅𑀥𑀺𑀧𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀙𑀦𑁆𑀤𑀁 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑁂 𑀤𑁆𑀯𑁂𑀦𑀬𑀲𑀢𑀸𑀦𑀺 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸𑀤𑀻𑀲𑀼𑀧𑀺 𑀤𑁆𑀯𑁂 𑀤𑁆𑀯𑁂𑀢𑀺 𑀦𑀬𑀲𑀳𑀲𑁆𑀲𑁂𑀦 𑀪𑀸𑀚𑁂𑀢𑁆𑀯𑀸 𑀧𑀞𑀫𑀫𑀕𑁆𑀕𑀁 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀧𑀞𑀫𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀤𑀼𑀢𑀺𑀬𑀫𑀕𑁆𑀕𑁄

𑁩𑁬𑁧. 𑀇𑀤𑀸𑀦𑀺 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀸𑀬𑀸𑀢𑀺 𑀏𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀢𑀦𑀼𑀪𑀸𑀯𑀢𑁆𑀣𑀸𑀬. 𑀢𑀢𑁆𑀣 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀘. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀳𑀺, 𑀯𑀝𑁆𑀝𑀸𑀦𑀼𑀲𑀸𑀭𑀺𑀫𑀳𑀸𑀚𑀦𑀲𑁆𑀲𑁂𑀯, 𑀓𑀺𑀮𑁂𑀲𑀸 𑀅𑀪𑀺𑀡𑁆𑀳𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀓𑀤𑀸𑀘𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀯𑀺𑀭𑀴𑀸𑀓𑀸𑀭𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀭𑀴𑀯𑀸𑀧𑀺𑀢𑀔𑁂𑀢𑁆𑀢𑁂 𑀅𑀗𑁆𑀓𑀼𑀭𑀸 𑀯𑀺𑀬. 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺, 𑀘 𑀯𑀝𑁆𑀝𑀸𑀦𑀼𑀲𑀸𑀭𑀺𑀫𑀳𑀸𑀚𑀦𑀲𑁆𑀲𑁂𑀯, 𑀫𑀤𑁆𑀤𑀦𑁆𑀢𑀸 𑀨𑀭𑀦𑁆𑀢𑀸 𑀙𑀸𑀤𑁂𑀦𑁆𑀢𑀸 𑀅𑀦𑁆𑀥𑀓𑀸𑀭𑀁 𑀓𑀭𑁄𑀦𑁆𑀢𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀤𑁆𑀯𑀻𑀳𑀺 𑀧𑀦 𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑀸 𑀫𑀦𑁆𑀤𑀸 𑀫𑀦𑁆𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀦𑀼𑀓𑀸𑀓𑀸𑀭𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀩𑁆𑀪𑀧𑀝𑀮𑀁 𑀯𑀺𑀬 𑀫𑀓𑁆𑀔𑀺𑀓𑀸𑀧𑀢𑁆𑀢𑀁 𑀯𑀺𑀬 𑀘.

𑀢𑀢𑁆𑀣 𑀓𑁂𑀘𑀺 𑀣𑁂𑀭𑀸 𑀯𑀤𑀦𑁆𑀢𑀺 𑁋 ‘𑀲𑀓𑀤𑀸𑀕𑀸𑀫𑀺𑀲𑁆𑀲 𑀓𑀺𑀮𑁂𑀲𑀸 𑀓𑀺𑀜𑁆𑀘𑀸𑀧𑀺 𑀘𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀩𑀳𑀮𑀸𑀯 𑀧𑀦 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀳𑀺𑀲𑁆𑀲 𑀧𑀼𑀢𑁆𑀢𑀸 𑀘 𑀥𑀻𑀢𑀭𑁄 𑀘 𑀤𑀺𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀁 𑀧𑀦 𑀅𑀧𑁆𑀧𑀫𑀸𑀡𑀁. 𑀧𑀼𑀢𑁆𑀢𑀥𑀻𑀢𑀭𑁄 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀫𑀢𑁆𑀢𑁂𑀦𑀧𑀺 𑀳𑁄𑀦𑁆𑀢𑀺. 𑀤𑁆𑀯𑀻𑀳𑀺 𑀧𑀦 𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀓𑀺𑀮𑁂𑀲𑀸𑀦𑀁 𑀩𑀳𑀮𑀢𑀸𑀢𑀺. 𑀤𑁆𑀯𑀻𑀳𑀺 𑀏𑀯 𑀓𑀸𑀭𑀡𑁂𑀳𑀺𑀲𑁆𑀲 𑀓𑀺𑀮𑁂𑀲𑀸𑀦𑀁 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀘𑀸𑀢𑀺.

𑀤𑀼𑀢𑀺𑀬𑀸𑀬𑀸𑀢𑀺 𑀕𑀡𑀦𑀯𑀲𑁂𑀦𑀸𑀧𑀺 𑀤𑀼𑀢𑀺𑀬𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀧𑀺 𑀤𑀼𑀢𑀺𑀬𑀸𑀬. 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸𑀢𑀺 𑀲𑀸𑀫𑀜𑁆𑀜𑀨𑀮𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑀫𑀢𑁆𑀢𑀁𑀬𑁂𑀯 𑀧𑀦 𑀯𑀓𑁆𑀔𑀸𑀫.

𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀚𑀸𑀦𑀦𑀓𑀁 𑀇𑀦𑁆𑀤𑁆𑀭𑀺𑀬𑀁. 𑀧𑀞𑀫𑀫𑀕𑁆𑀕𑁂𑀦 𑀜𑀸𑀢𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀢𑁂𑀦 𑀫𑀕𑁆𑀕𑁂𑀦 𑀜𑀸𑀢𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀚𑀸𑀦𑀦𑀓𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀤𑁆𑀤𑁂𑀲𑀯𑀸𑀭𑁂𑀧𑀺𑀲𑁆𑀲 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀝𑁆𑀞𑀸𑀲𑀯𑀸𑀭𑁂𑀧𑀺 𑀇𑀫𑀺𑀦𑀸𑀯 𑀲𑀤𑁆𑀥𑀺𑀁 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑀸

𑁩𑁬𑁨. 𑀢𑀢𑀺𑀬𑁂 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬𑀸𑀢𑀺 𑀢𑁂𑀲𑀁𑀬𑁂𑀯 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀪𑀽𑀢𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀦𑀺𑀲𑁆𑀲𑁂𑀲𑀧𑀚𑀳𑀦𑀢𑁆𑀣𑀸𑀬.

𑀘𑀢𑀼𑀢𑁆𑀣𑁂 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀬 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬𑀸𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀦𑀺𑀲𑁆𑀲𑁂𑀲𑀧𑀚𑀳𑀦𑀢𑁆𑀣𑀸𑀬. 𑀢𑀢𑁆𑀣 𑀭𑀽𑀧𑀭𑀸𑀕𑁄𑀢𑀺 𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑁄. 𑀅𑀭𑀽𑀧𑀭𑀸𑀕𑁄𑀢𑀺 𑀅𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑁄. 𑀫𑀸𑀦𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀓𑁄 𑀫𑀸𑀦𑁄 𑀏𑀯. 𑀢𑀣𑀸 𑀉𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸. 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀫𑀕𑁆𑀕𑁂𑀲𑀼 𑀦𑀯𑀫𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁂𑀯 𑀳𑁄𑀢𑀺.

𑀘𑀢𑀼𑀫𑀕𑁆𑀕𑀦𑀬𑀲𑀳𑀲𑁆𑀲𑀁

𑀲𑀩𑁆𑀩𑀫𑀕𑁆𑀕𑁂𑀲𑀼 𑀧𑀤𑀧𑀝𑀺𑀧𑀸𑀝𑀺𑀬𑀸 𑀲𑀫𑀲𑀝𑁆𑀞𑀺𑀧𑀤𑀸𑀦𑀺, 𑀘𑀢𑀽𑀳𑀺 𑀅𑀧𑀡𑁆𑀡𑀓𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀘𑀢𑀼𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀅𑀲𑀫𑁆𑀪𑀺𑀦𑁆𑀦𑀢𑁄 𑀧𑀦 𑀢𑁂𑀢𑁆𑀢𑀺𑀁𑀲. 𑀓𑁄𑀝𑁆𑀞𑀸𑀲𑀯𑀸𑀭𑀲𑀼𑀜𑁆𑀜𑀢𑀯𑀸𑀭𑀸 𑀧𑀸𑀓𑀢𑀺𑀓𑀸 𑀏𑀯. 𑀬𑀣𑀸 𑀘 𑀧𑀦 𑀧𑀞𑀫𑀫𑀕𑁆𑀕𑁂 𑀏𑀯𑀁 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀦𑀬𑀲𑀳𑀲𑁆𑀲𑀫𑁂𑀯𑀸𑀢𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑀢𑀽𑀳𑀺 𑀦𑀬𑀲𑀳𑀲𑁆𑀲𑁂𑀳𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀲𑀘𑁆𑀘𑀯𑀺𑀪𑀗𑁆𑀕𑁂 𑀧𑀦 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀇𑀫𑁂𑀲𑀁 𑀏𑀯 𑀯𑀲𑁂𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁂 𑀯𑀻𑀲𑀢𑀺, 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 𑀤𑁆𑀯𑀢𑁆𑀢𑀺𑀁𑀲, 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 𑀤𑁆𑀯𑀢𑁆𑀢𑀺𑀁𑀲, 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁂 𑀅𑀝𑁆𑀞𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀇𑀫𑁂𑀲𑀁 𑀏𑀯 𑀯𑀲𑁂𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀺.

𑀇𑀥 𑀧𑀦 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀘𑀢𑁆𑀢𑀸𑀭𑀺𑀬𑁂𑀯 𑀦𑀬𑀲𑀳𑀲𑁆𑀲𑀸𑀦𑀺. 𑀢𑁂𑀲𑀼 𑀧𑀞𑀫𑀚𑁆𑀛𑀸𑀦𑀺𑀓𑁂 𑀧𑀞𑀫𑀫𑀕𑁆𑀕𑁂 𑀅𑀝𑁆𑀞𑀗𑁆𑀕𑀸𑀦𑀺 𑀪𑀸𑀚𑀺𑀢𑀸𑀦𑀺; 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀢𑀢𑁆𑀣 𑀧𑀞𑀫𑀫𑀕𑁆𑀕𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀧𑀚𑀳𑀦𑀝𑁆𑀞𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂 ‘𑀧𑀞𑀫𑀫𑀕𑁆𑀕𑁂𑀦𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀻𑀦𑀢𑁆𑀢𑀸 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑁂𑀦 𑀧𑀳𑀸𑀢𑀩𑁆𑀩𑀸 𑀤𑀺𑀝𑁆𑀞𑀺 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀦𑀸𑀫𑀁 𑀓𑀣𑀁 𑀳𑁄𑀢𑀻’𑀢𑀺? ‘𑀬𑀣𑀸 𑀯𑀺𑀲𑀁 𑀅𑀢𑁆𑀣𑀺 𑀯𑀸, 𑀳𑁄𑀢𑀼 𑀫𑀸 𑀯𑀸, 𑀅𑀕𑀤𑁄 𑀅𑀕𑀤𑁄 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀢𑁆𑀣𑀺 𑀯𑀸, 𑀳𑁄𑀢𑀼 𑀫𑀸 𑀯𑀸, 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀯 𑀦𑀸𑀫’.

‘𑀬𑀤𑀺 𑀏𑀯𑀁 𑀦𑀸𑀫𑀫𑀢𑁆𑀢𑀫𑁂𑀯𑁂𑀢𑀁 𑀳𑁄𑀢𑀺, 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑁂 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀺𑀘𑁆𑀘𑀸𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀓𑀺𑀘𑁆𑀘𑀓𑀸 𑀓𑀸𑀢𑀩𑁆𑀩𑀸 𑀫𑀕𑁆𑀕𑀗𑁆𑀕𑀸𑀦𑀺 𑀧𑀽𑀭𑁂𑀢𑀩𑁆𑀩𑀸𑀦𑀻’𑀢𑀺. 𑀲𑀓𑀺𑀘𑁆𑀘𑀓𑀸 𑀘𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀣𑀸𑀮𑀸𑀪𑀦𑀺𑀬𑀫𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑁄 𑀳𑀺 𑀏𑀓𑁄 𑀫𑀸𑀦𑁄 𑀅𑀢𑁆𑀣𑀺, 𑀲𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀲𑀸 𑀢𑀁 𑀫𑀸𑀦𑀁 𑀧𑀚𑀳𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀫𑀺𑀜𑁆𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀦 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑁄 𑀫𑀸𑀦𑁄 𑀅𑀢𑁆𑀣𑀺, 𑀲𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺 𑀲𑀸 𑀢𑀁 𑀫𑀸𑀦𑀁 𑀧𑀚𑀳𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀲𑁆𑀲𑁂𑀯 𑀲𑀢𑁆𑀢𑀅𑀓𑀼𑀲𑀮𑀘𑀺𑀢𑁆𑀢𑀲𑀳𑀚𑀸𑀢𑁄 𑀲𑀗𑁆𑀓𑀧𑁆𑀧𑁄 𑀅𑀢𑁆𑀣𑀺. 𑀢𑁂𑀳𑁂𑀯 𑀘𑀺𑀢𑁆𑀢𑁂𑀳𑀺 𑀯𑀸𑀘𑀗𑁆𑀕𑀘𑁄𑀧𑀦𑀁 𑀅𑀢𑁆𑀣𑀺, 𑀓𑀸𑀬𑀗𑁆𑀕𑀘𑁄𑀧𑀦𑀁 𑀅𑀢𑁆𑀣𑀺, 𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀅𑀢𑁆𑀣𑀺, 𑀲𑀳𑀚𑀸𑀢𑀯𑀸𑀬𑀸𑀫𑁄 𑀅𑀢𑁆𑀣𑀺, 𑀅𑀲𑀢𑀺𑀪𑀸𑀯𑁄 𑀅𑀢𑁆𑀣𑀺, 𑀲𑀳𑀚𑀸𑀢𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀢𑁆𑀣𑀺. 𑀏𑀢𑁂 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀦𑀸𑀫 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄. 𑀢𑁂𑀲𑀁 𑀧𑀳𑀸𑀦𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀅𑀝𑁆𑀞𑀗𑁆𑀕𑀸𑀦𑀺 𑀲𑀓𑀺𑀘𑁆𑀘𑀓𑀸𑀦𑀺 𑀓𑀢𑁆𑀯𑀸 𑀆𑀕𑀢𑀸𑀦𑀺. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑁄 𑀫𑀸𑀦𑁄 𑀅𑀢𑁆𑀣𑀺. 𑀲𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑀲𑁆𑀲𑁂𑀯 𑀲𑀢𑁆𑀢𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀲𑀗𑁆𑀓𑀧𑁆𑀧𑀸𑀤𑀬𑁄. 𑀢𑁂𑀲𑀁 𑀧𑀳𑀸𑀦𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀓𑀺𑀘𑁆𑀘𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀸𑀕𑀸𑀫𑀺𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑁄 𑀫𑀸𑀦𑁄 𑀅𑀢𑁆𑀣𑀺. 𑀲𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀬𑀸𑀦𑀺 𑀧𑀦𑀲𑁆𑀲 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀳𑀚𑀸𑀢𑀸 𑀲𑀗𑁆𑀓𑀧𑁆𑀧𑀸𑀤𑀬𑁄. 𑀢𑁂𑀲𑀁 𑀧𑀳𑀸𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀓𑀺𑀘𑁆𑀘𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀼 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀧𑀞𑀫𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀺𑀝𑁆𑀞𑀸𑀦𑀺. ‘𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀤𑀺𑀝𑁆𑀞𑀓𑀫𑁂𑀯 𑀧𑀲𑁆𑀲𑀢𑀺, 𑀅𑀤𑀺𑀝𑁆𑀞𑀓𑀁 𑀧𑀲𑁆𑀲𑀢𑀻’𑀢𑀺 𑀤𑀺𑀝𑁆𑀞𑀓𑀫𑁂𑀯 𑀧𑀲𑁆𑀲𑀢𑀻𑀢𑀺 𑀅𑀬𑀁 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 ‘𑀅𑀤𑀺𑀝𑁆𑀞𑀁 𑀧𑀲𑁆𑀲𑀢𑀻’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀧𑀞𑀫𑀫𑀕𑁆𑀕𑁂 𑀓𑀢𑀫𑀁 𑀇𑀦𑁆𑀤𑁆𑀭𑀺𑀬𑀁 𑀪𑀸𑀚𑁂𑀲𑀻’𑀢𑀺? 𑀚𑀸𑀦𑀫𑀸𑀦𑁄 ‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬’𑀦𑁆𑀢𑀺 𑀯𑀓𑁆𑀔𑀢𑀺. ‘𑀉𑀧𑀭𑀺𑀫𑀕𑁆𑀕𑁂𑀲𑀼 𑀓𑀢𑀭’𑀦𑁆𑀢𑀺? 𑀯𑀼𑀢𑁆𑀢𑁂𑀧𑀺 ‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬’𑀦𑁆𑀢𑀺 𑀯𑀓𑁆𑀔𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀅𑀤𑀺𑀝𑁆𑀞𑀲𑀘𑁆𑀘𑀤𑀲𑁆𑀲𑀦𑁂 𑀲𑀢𑀺 𑀉𑀧𑀭𑀺𑀫𑀕𑁆𑀕𑁂𑀲𑀼𑀧𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀪𑀸𑀚𑁂𑀳𑀺. 𑀏𑀯𑀁 𑀢𑁂 𑀧𑀜𑁆𑀳𑁄 𑀲𑀫𑁂𑀲𑁆𑀲𑀢𑀻’𑀢𑀺. ‘𑀓𑀺𑀮𑁂𑀲𑁂 𑀧𑀦 𑀅𑀜𑁆𑀜𑁂 𑀅𑀜𑁆𑀜𑁄 𑀧𑀚𑀳𑀢𑀺; 𑀧𑀳𑀻𑀦𑁂 𑀏𑀯 𑀧𑀚𑀳𑀢𑀻’𑀢𑀺? ‘𑀅𑀜𑁆𑀜𑁂 𑀅𑀜𑁆𑀜𑁄 𑀧𑀚𑀳𑀢𑀻’𑀢𑀺. ‘𑀬𑀤𑀺 𑀅𑀜𑁆𑀜𑁂 𑀅𑀜𑁆𑀜𑁄, 𑀅𑀧𑁆𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀲𑀘𑁆𑀘𑀸𑀦𑀺𑀧𑀺 𑀅𑀤𑀺𑀝𑁆𑀞𑀸𑀦𑁂𑀯 𑀧𑀲𑁆𑀲𑀢𑀻’𑀢𑀺 𑀏𑀯𑀁𑀯𑀸𑀤𑀻 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀲𑀘𑁆𑀘𑀸𑀦𑀺 𑀦𑀸𑀫 𑀓𑀢𑀻’𑀢𑀺? 𑀚𑀸𑀦𑀦𑁆𑀢𑁄 ‘𑀘𑀢𑁆𑀢𑀸𑀭𑀻’𑀢𑀺 𑀯𑀓𑁆𑀔𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀢𑀯 𑀯𑀸𑀤𑁂 𑀲𑁄𑀴𑀲 𑀲𑀘𑁆𑀘𑀸𑀦𑀺 𑀆𑀧𑀚𑁆𑀚𑀦𑁆𑀢𑀺. 𑀢𑁆𑀯𑀁 𑀩𑀼𑀤𑁆𑀥𑁂𑀳𑀺𑀧𑀺 𑀅𑀤𑀺𑀝𑁆𑀞𑀁 𑀧𑀲𑁆𑀲𑀲𑀺. 𑀩𑀳𑀼𑀲𑀘𑁆𑀘𑀓𑁄 𑀦𑀸𑀫 𑀢𑁆𑀯𑀁. 𑀏𑀯𑀁 𑀫𑀸 𑀕𑀡𑁆𑀳. 𑀲𑀘𑁆𑀘𑀤𑀲𑁆𑀲𑀦𑀁 𑀦𑀸𑀫 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀓𑀺𑀮𑁂𑀲𑁂 𑀧𑀦 𑀅𑀧𑁆𑀧𑀳𑀻𑀦𑁂 𑀧𑀚𑀳𑀢𑀻’𑀢𑀺.

𑀢𑀢𑁆𑀣 𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀅𑀧𑀼𑀩𑁆𑀩𑀸𑀪𑀸𑀯𑁂 𑀧𑁂𑀴𑁄𑀧𑀫𑀁 𑀦𑀸𑀫 𑀕𑀳𑀺𑀢𑀁 𑁋 𑀏𑀓𑀲𑁆𑀲 𑀓𑀺𑀭 𑀘𑀢𑁆𑀢𑀸𑀭𑁄 𑀭𑀢𑀦𑀧𑁂𑀴𑀸 𑀲𑀸𑀭𑀕𑀩𑁆𑀪𑁂 𑀞𑀧𑀺𑀢𑀸. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀧𑁂𑀴𑀸𑀲𑀼 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸, 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸, 𑀤𑀻𑀧𑁂𑀦 𑀯𑀺𑀳𑀢𑁂 𑀅𑀦𑁆𑀥𑀓𑀸𑀭𑁂, 𑀧𑁂𑀴𑀸𑀲𑀼 𑀧𑀸𑀓𑀝𑀪𑀸𑀯𑀁 𑀕𑀢𑀸𑀲𑀼, 𑀢𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀕𑀢𑁄. 𑀧𑀼𑀦 𑀅𑀦𑁆𑀥𑀓𑀸𑀭𑀁 𑀅𑀯𑀢𑁆𑀣𑀭𑀺. 𑀤𑀼𑀢𑀺𑀬𑀯𑀸𑀭𑁂𑀧𑀺 𑀢𑀢𑀺𑀬𑀯𑀸𑀭𑁂𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀘𑀢𑀼𑀢𑁆𑀣𑀯𑀸𑀭𑁂 𑀤𑁆𑀯𑀸𑀭𑁂 𑀯𑀺𑀯𑀝𑁂 𑀅𑀦𑁆𑀥𑀓𑀸𑀭𑁂 𑀧𑁂𑀴𑀸 𑀦 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀯𑀻𑀫𑀁𑀲𑀦𑁆𑀢𑀲𑁆𑀲𑁂𑀯 𑀲𑀽𑀭𑀺𑀬𑁄 𑀉𑀕𑁆𑀕𑀜𑁆𑀙𑀺, 𑀲𑀽𑀭𑀺𑀬𑁄𑀪𑀸𑀲𑁂𑀦 𑀯𑀺𑀳𑀢𑁂 𑀅𑀦𑁆𑀥𑀓𑀸𑀭𑁂 𑀧𑁂𑀴𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀢𑁆𑀣 𑀘𑀢𑁆𑀢𑀸𑀭𑁄 𑀧𑁂𑀴𑀸 𑀯𑀺𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑀸𑀲𑀼 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀤𑁆𑀯𑀸𑀭𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁄. 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁. 𑀤𑀻𑀧𑁄 𑀪𑀸𑀲𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀪𑀸𑀲𑁄. 𑀯𑀺𑀳𑀢𑁂 𑀅𑀦𑁆𑀥𑀓𑀸𑀭𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑁂𑀴𑀸𑀦𑀁 𑀧𑀸𑀓𑀝𑀪𑀸𑀯𑁄 𑀯𑀺𑀬 𑀫𑀕𑁆𑀕𑀜𑀸𑀡𑀲𑁆𑀲 𑀲𑀘𑁆𑀘𑀸𑀦𑀁 𑀧𑀸𑀓𑀝𑀪𑀸𑀯𑁄. 𑀫𑀕𑁆𑀕𑀜𑀸𑀡𑀲𑁆𑀲 𑀧𑀸𑀓𑀝𑀸𑀦𑀺 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀸𑀦𑁂𑀯 𑀳𑁄𑀦𑁆𑀢𑀺. 𑀧𑁂𑀴𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀓𑀸𑀮𑁄. 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁.

𑀤𑀼𑀢𑀺𑀬𑀯𑀸𑀭𑁂 𑀤𑁆𑀯𑀸𑀭𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁄. 𑀤𑀻𑀧𑁄𑀪𑀸𑀲𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄𑀪𑀸𑀲𑁄. 𑀧𑁂𑀴𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀓𑀸𑀮𑁄. 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀉𑀧𑀭𑀺𑀫𑀕𑁆𑀕𑀤𑁆𑀯𑀬𑀯𑀚𑁆𑀛𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁.

𑀢𑀢𑀺𑀬𑀯𑀸𑀭𑁂 𑀤𑁆𑀯𑀸𑀭𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁄. 𑀤𑀻𑀧𑁄𑀪𑀸𑀲𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑁄𑀪𑀸𑀲𑁄. 𑀧𑁂𑀴𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀓𑀸𑀮𑁄. 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀉𑀧𑀭𑀺𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀁.

𑀘𑀢𑀼𑀢𑁆𑀣𑀯𑀸𑀭𑁂 𑀤𑁆𑀯𑀸𑀭𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁄. 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀼𑀧𑁆𑀧𑀸𑀤𑁄. 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀯𑀺𑀦𑁄𑀤𑀦𑀁. 𑀯𑀺𑀳𑀢𑁂 𑀅𑀦𑁆𑀥𑀓𑀸𑀭𑁂 𑀢𑀲𑁆𑀲 𑀧𑁂𑀴𑀸𑀦𑀁 𑀧𑀸𑀓𑀝𑀪𑀸𑀯𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀸𑀓𑀝𑀪𑀸𑀯𑁄. 𑀜𑀸𑀡𑀲𑁆𑀲 𑀧𑀸𑀓𑀝𑀸𑀦𑀺 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀸𑀦𑁂𑀯 𑀳𑁄𑀦𑁆𑀢𑀺. 𑀧𑁂𑀴𑀸𑀲𑀼 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀲𑀩𑁆𑀩𑀓𑀺𑀮𑁂𑀲𑀔𑁂𑀧𑀦𑀁. 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀆𑀮𑁄𑀓𑀲𑁆𑀲𑁂𑀯 𑀧𑀯𑀢𑁆𑀢𑀺𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀸𑀪𑀸𑀯𑁄. 𑀇𑀤𑀁 𑀢𑀸𑀯 𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀅𑀧𑀼𑀩𑁆𑀩𑀸𑀪𑀸𑀯𑁂 𑀑𑀧𑀫𑁆𑀫𑀁.

𑀤𑀺𑀝𑁆𑀞𑀓𑀫𑁂𑀯 𑀳𑀺 𑀧𑀲𑁆𑀲𑀢𑀺. ‘𑀓𑀺𑀮𑁂𑀲𑁂 𑀧𑀦 𑀅𑀜𑁆𑀜𑁂 𑀅𑀜𑁆𑀜𑁄 𑀧𑀚𑀳𑀢𑀻’𑀢𑀺 𑀏𑀢𑁆𑀣 𑀔𑀸𑀭𑁄𑀧𑀫𑀁 𑀦𑀸𑀫 𑀕𑀳𑀺𑀢𑀁. 𑀏𑀓𑁄 𑀧𑀼𑀭𑀺𑀲𑁄 𑀓𑀺𑀮𑀺𑀝𑁆𑀞𑀁 𑀯𑀢𑁆𑀣𑀁 𑀭𑀚𑀓𑀲𑁆𑀲 𑀅𑀤𑀸𑀲𑀺. 𑀭𑀚𑀓𑁄 𑀊𑀲𑀔𑀸𑀭𑀁 𑀙𑀸𑀭𑀺𑀓𑀔𑀸𑀭𑀁 𑀕𑁄𑀫𑀬𑀔𑀸𑀭𑀦𑁆𑀢𑀺 𑀢𑀬𑁄 𑀔𑀸𑀭𑁂 𑀤𑀢𑁆𑀯𑀸 𑀔𑀸𑀭𑁂𑀳𑀺 𑀔𑀸𑀤𑀺𑀢𑀪𑀸𑀯𑀁 𑀜𑀢𑁆𑀯𑀸 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀁 𑀫𑀮𑀁 𑀧𑀯𑀸𑀳𑁂𑀲𑀺. 𑀢𑀢𑁄 𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀤𑀼𑀢𑀺𑀬𑀫𑁆𑀧𑀺 𑀢𑀣𑁂𑀯 𑀔𑀸𑀭𑁂 𑀤𑀢𑁆𑀯𑀸, 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑁆𑀯𑀸, 𑀢𑀢𑁄 𑀦𑀸𑀢𑀺𑀲𑀡𑁆𑀳𑀢𑀭𑀁 𑀫𑀮𑀁 𑀧𑀯𑀸𑀳𑁂𑀲𑀺. 𑀢𑀢𑁄 𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀢𑀢𑀺𑀬𑀫𑁆𑀧𑀺 𑀢𑁂 𑀔𑀸𑀭𑁂 𑀤𑀢𑁆𑀯𑀸 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀢𑀢𑁄 𑀲𑀡𑁆𑀳𑀢𑀭𑀁 𑀫𑀮𑀁 𑀧𑀯𑀸𑀳𑁂𑀲𑀺. 𑀢𑀢𑁄 𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀫𑁆𑀧𑀺 𑀢𑁂 𑀔𑀸𑀭𑁂 𑀤𑀢𑁆𑀯𑀸, 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀅𑀁𑀲𑀼𑀅𑀩𑁆𑀪𑀦𑁆𑀢𑀭𑀕𑀢𑀫𑁆𑀧𑀺 𑀦𑀺𑀲𑁆𑀲𑁂𑀲𑀁 𑀫𑀮𑀁 𑀧𑀯𑀸𑀳𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀅𑀤𑀸𑀲𑀺. 𑀲𑁄 𑀕𑀦𑁆𑀥𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑀸𑀮𑁂 𑀧𑀭𑀺𑀤𑀳𑀢𑀺.

𑀢𑀢𑁆𑀣 𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀯𑀺𑀬 𑀓𑀺𑀮𑁂𑀲𑀸𑀦𑀼𑀕𑀢𑀁 𑀘𑀺𑀢𑁆𑀢𑀁. 𑀢𑀺𑀯𑀺𑀥𑀔𑀸𑀭𑀤𑀸𑀦𑀓𑀸𑀮𑁄 𑀯𑀺𑀬 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀦𑀓𑀸𑀮𑁄. 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀫𑀮𑀧𑁆𑀧𑀯𑀸𑀳𑀦𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀜𑁆𑀘𑀓𑀺𑀮𑁂𑀲𑀔𑁂𑀧𑀦𑀁. 𑀤𑀼𑀢𑀺𑀬𑀫𑁆𑀧𑀺 𑀢𑁂𑀲𑀁 𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀁 𑀯𑀺𑀬 ‘𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀁 𑀇𑀤𑀁 𑀘𑀺𑀢𑁆𑀢’𑀦𑁆𑀢𑀺 𑀢𑀸𑀲𑀼𑀬𑁂𑀯 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀧𑁆𑀧𑀯𑀢𑁆𑀢𑀦𑀁. 𑀢𑀢𑁄 𑀦𑀸𑀢𑀺𑀲𑀡𑁆𑀳𑀢𑀭𑀫𑀮𑀧𑁆𑀧𑀯𑀸𑀳𑀦𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀲𑀁𑀬𑁄𑀚𑀦𑀤𑁆𑀯𑀬𑀔𑁂𑀧𑀦𑀁. 𑀢𑀢𑁄 ‘𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣’𑀦𑁆𑀢𑀺 𑀧𑀼𑀦 𑀔𑀸𑀭𑀢𑁆𑀢𑀬𑀤𑀸𑀦𑀁 𑀯𑀺𑀬 ‘𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀁 𑀇𑀤𑀁 𑀘𑀺𑀢𑁆𑀢’𑀦𑁆𑀢𑀺 𑀢𑀸𑀲𑀼𑀬𑁂𑀯 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀧𑁆𑀧𑀯𑀢𑁆𑀢𑀦𑀁. 𑀢𑀢𑁄 𑀲𑀡𑁆𑀳𑀢𑀭𑀫𑀮𑀧𑁆𑀧𑀯𑀸𑀳𑀦𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀲𑀁𑀬𑁄𑀚𑀦𑀤𑁆𑀯𑀬𑀔𑁂𑀧𑀦𑀁. ‘𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣’𑀦𑁆𑀢𑀺 𑀧𑀼𑀦 𑀔𑀸𑀭𑀢𑁆𑀢𑀬𑀤𑀸𑀦𑀁 𑀯𑀺𑀬 ‘𑀦 𑀢𑀸𑀯 𑀧𑀭𑀺𑀲𑀼𑀤𑁆𑀥𑀁 𑀇𑀤𑀁 𑀘𑀺𑀢𑁆𑀢’𑀦𑁆𑀢𑀺 𑀢𑀸𑀲𑀼𑀬𑁂𑀯 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀧𑁆𑀧𑀯𑀢𑁆𑀢𑀦𑀁. 𑀢𑀢𑁄 𑀯𑀺𑀓𑁆𑀔𑀸𑀮𑀦𑁂𑀦 𑀅𑀁𑀲𑀼𑀅𑀩𑁆𑀪𑀦𑁆𑀢𑀭𑀕𑀢𑁂 𑀫𑀮𑁂 𑀧𑀯𑀸𑀳𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀲𑁆𑀲 𑀭𑀚𑀢𑀧𑀝𑁆𑀝𑀲𑀤𑀺𑀲𑀲𑁆𑀲 𑀕𑀦𑁆𑀥𑀓𑀭𑀡𑁆𑀟𑀓𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀭𑀺𑀤𑀳𑀦𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀝𑁆𑀞𑀦𑁆𑀦𑀁 𑀓𑀺𑀮𑁂𑀲𑀸𑀦𑀁 𑀔𑁂𑀧𑀺𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀲𑁆𑀲 𑀔𑀻𑀡𑀸𑀲𑀯𑀘𑀺𑀢𑁆𑀢𑀲𑁆𑀲 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀯𑀻𑀢𑀺𑀦𑀸𑀫𑀦𑀁. 𑀇𑀤𑀁 ‘𑀅𑀜𑁆𑀜𑁂 𑀅𑀜𑁆𑀜𑁄 𑀓𑀺𑀮𑁂𑀲𑁂 𑀧𑀚𑀳𑀢𑀻’𑀢𑀺 𑀏𑀢𑁆𑀣 𑀑𑀧𑀫𑁆𑀫𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀯𑀢𑁆𑀣𑀁 𑀲𑀁𑀓𑀺𑀮𑀺𑀝𑁆𑀞𑀁 𑀫𑀮𑀕𑁆𑀕𑀳𑀺𑀢𑀁, 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀭𑀚𑀓𑀲𑁆𑀲 𑀅𑀦𑀼𑀧𑀤𑀚𑁆𑀚𑁂𑀬𑁆𑀬𑀼𑀁. 𑀢𑀫𑁂𑀦𑀁 𑀭𑀚𑀓𑁄 𑀊𑀲𑁂 𑀯𑀸 𑀔𑀸𑀭𑁂 𑀯𑀸 𑀕𑁄𑀫𑀬𑁂 𑀯𑀸 𑀲𑀫𑁆𑀫𑀤𑁆𑀤𑀺𑀢𑁆𑀯𑀸 𑀅𑀘𑁆𑀙𑁂 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀢𑀁 𑀳𑁄𑀢𑀺 𑀯𑀢𑁆𑀣𑀁 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁, 𑀅𑀣 𑀔𑁆𑀯𑀲𑁆𑀲 𑀳𑁄𑀢𑀺𑀬𑁂𑀯 ‘𑀅𑀡𑀼𑀲𑀳𑀕𑀢𑁄 𑀊𑀲𑀕𑀦𑁆𑀥𑁄 𑀯𑀸 𑀔𑀸𑀭𑀕𑀦𑁆𑀥𑁄 𑀯𑀸 𑀕𑁄𑀫𑀬𑀕𑀦𑁆𑀥𑁄 𑀯𑀸 𑀅𑀲𑀫𑀽𑀳𑀢𑁄’. 𑀢𑀫𑁂𑀦𑀁 𑀭𑀚𑀓𑁄 𑀲𑀸𑀫𑀺𑀓𑀸𑀦𑀁 𑀤𑁂𑀢𑀺. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑁂 𑀓𑀭𑀡𑁆𑀟𑀓𑁂 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀬𑁄𑀧𑀺𑀲𑁆𑀲 𑀳𑁄𑀢𑀺 𑀅𑀡𑀼𑀲𑀳𑀕𑀢𑁄 𑀊𑀲𑀕𑀦𑁆𑀥𑁄 𑀯𑀸 𑀔𑀸𑀭𑀕𑀦𑁆𑀥𑁄 𑀯𑀸 𑀕𑁄𑀫𑀬𑀕𑀦𑁆𑀥𑁄 𑀯𑀸 𑀅𑀲𑀫𑀽𑀳𑀢𑁄, 𑀲𑁄𑀧𑀺 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺, 𑀅𑀣 𑀔𑁆𑀯𑀲𑁆𑀲 𑀳𑁄𑀢𑀺𑀬𑁂𑀯 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀡𑀼𑀲𑀳𑀕𑀢𑁄 ‘𑀅𑀲𑁆𑀫𑀻’𑀢𑀺 𑀫𑀸𑀦𑁄, ‘𑀅𑀲𑁆𑀫𑀻’𑀢𑀺 𑀙𑀦𑁆𑀤𑁄, ‘𑀅𑀲𑁆𑀫𑀻’𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸 𑀇𑀢𑀺 𑀲𑀜𑁆𑀜𑀸 𑀇𑀢𑀺 𑀲𑀗𑁆𑀔𑀸𑀭𑀸 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀢𑀲𑁆𑀲𑀺𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑁄𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀡𑀼𑀲𑀳𑀕𑀢𑁄 ‘𑀅𑀲𑁆𑀫𑀻’𑀢𑀺 𑀫𑀸𑀦𑁄, ‘𑀅𑀲𑁆𑀫𑀻’𑀢𑀺 𑀙𑀦𑁆𑀤𑁄, ‘𑀅𑀲𑁆𑀫𑀻’𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄, 𑀲𑁄𑀧𑀺 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁯).

𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀤𑁆𑀥𑀺𑀁 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀸𑀧𑀥𑀫𑁆𑀫𑁂𑀳𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀢𑀦𑀼𑀓𑀸𑀦𑀺 𑀪𑀯𑀦𑁆𑀢𑀺 𑀲𑀤𑁆𑀥𑀺𑀁 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀸𑀧𑀥𑀫𑁆𑀫𑁂𑀳𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀸𑀦𑀺𑀬𑁂𑀯 𑀧𑀳𑀻𑀬𑀦𑁆𑀢𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀤𑁆𑀥𑀺𑀁 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀸𑀧𑀥𑀫𑁆𑀫𑁂𑀳𑀺. 𑀇𑀫𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀼𑀦 𑀧𑀘𑁆𑀙𑀢𑁄𑀧𑀯𑀢𑁆𑀢𑀦𑀓𑀓𑀺𑀮𑁂𑀲𑁄 𑀦𑀸𑀫 𑀦 𑀳𑁄𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀁 𑁋 𑀏𑀓𑁄 𑀓𑀺𑀭 𑀫𑀳𑀸𑀭𑀸𑀚𑀸 𑀧𑀘𑁆𑀘𑀦𑁆𑀢𑁂 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀫𑀳𑀸𑀦𑀕𑀭𑁂 𑀇𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑁄 𑀯𑀲𑀢𑀺. 𑀅𑀣𑀲𑁆𑀲 𑀧𑀘𑁆𑀘𑀦𑁆𑀢𑁄 𑀓𑀼𑀧𑁆𑀧𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁆𑀯𑀸𑀤𑀲 𑀘𑁄𑀭𑀚𑁂𑀝𑁆𑀞𑀓𑀸 𑀅𑀦𑁂𑀓𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀫𑀳𑀸𑀫𑀢𑁆𑀢𑀸 ‘𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄’𑀢𑀺 𑀭𑀜𑁆𑀜𑁄 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 ‘𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀢𑁂 𑀧𑀞𑀫𑀲𑀫𑁆𑀧𑀳𑀸𑀭𑁂𑀦𑁂𑀯 𑀅𑀦𑁂𑀓𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘 𑀘𑁄𑀭𑀚𑁂𑀝𑁆𑀞𑀓𑁂 𑀖𑀸𑀢𑀬𑀺𑀁𑀲𑀼. 𑀲𑁂𑀲𑀸 𑀲𑀢𑁆𑀢 𑀚𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀁 𑀧𑀯𑀺𑀲𑀺𑀁𑀲𑀼. 𑀅𑀫𑀘𑁆𑀘𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀧𑁂𑀲𑀬𑀺𑀁𑀲𑀼.

𑀭𑀸𑀚𑀸 ‘𑀢𑀼𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀁 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀢𑁂𑀧𑀺 𑀕𑀡𑁆𑀳𑀣𑀸’𑀢𑀺 𑀥𑀦𑀁 𑀧𑀳𑀺𑀡𑀺. 𑀢𑁂 𑀤𑀼𑀢𑀺𑀬𑀲𑀫𑁆𑀧𑀳𑀸𑀭𑁂𑀦 𑀤𑁆𑀯𑁂 𑀘𑁄𑀭𑀚𑁂𑀝𑁆𑀞𑀓𑁂 𑀧𑀳𑀭𑀺𑀁𑀲𑀼, 𑀧𑀭𑀺𑀯𑀸𑀭𑁂𑀧𑀺 𑀢𑁂𑀲𑀁 𑀤𑀼𑀩𑁆𑀩𑀮𑁂 𑀅𑀓𑀁𑀲𑀼. 𑀢𑁂 𑀲𑀩𑁆𑀩𑁂𑀧𑀺 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀢𑀁 𑀧𑀯𑀺𑀲𑀺𑀁𑀲𑀼. 𑀢𑀫𑁆𑀧𑀺 𑀧𑀯𑀢𑁆𑀢𑀺𑀁 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀧𑁂𑀲𑀬𑀺𑀁𑀲𑀼.

𑀧𑀼𑀦 𑀭𑀸𑀚𑀸 ‘𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀥𑀦𑀁 𑀧𑀳𑀺𑀡𑀺. 𑀢𑁂 𑀢𑀢𑀺𑀬𑀲𑀫𑁆𑀧𑀳𑀸𑀭𑁂𑀦 𑀲𑀤𑁆𑀥𑀺𑀁 𑀲𑀳𑀸𑀬𑀧𑀼𑀭𑀺𑀲𑁂𑀳𑀺 𑀤𑁆𑀯𑁂 𑀘𑁄𑀭𑀚𑁂𑀝𑁆𑀞𑀓𑁂 𑀖𑀸𑀢𑀬𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀧𑁂𑀲𑀬𑀺𑀁𑀲𑀼.

𑀧𑀼𑀦 𑀭𑀸𑀚𑀸 ‘𑀅𑀯𑀲𑁂𑀲𑁂 𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀥𑀦𑀁 𑀧𑀳𑀺𑀡𑀺. 𑀢𑁂 𑀘𑀢𑀼𑀢𑁆𑀣𑀲𑀫𑁆𑀧𑀳𑀸𑀭𑁂𑀦 𑀲𑀧𑀭𑀺𑀯𑀸𑀭𑁂 𑀧𑀜𑁆𑀘 𑀘𑁄𑀭𑀚𑁂𑀝𑁆𑀞𑀓𑁂 𑀖𑀸𑀢𑀬𑀺𑀁𑀲𑀼. 𑀤𑁆𑀯𑀸𑀤𑀲𑀦𑁆𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀖𑀸𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑁄𑀘𑀺 𑀘𑁄𑀭𑁄 𑀦𑀸𑀫 𑀦𑀢𑁆𑀣𑀺. 𑀔𑁂𑀫𑀸 𑀚𑀦𑀧𑀤𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀫𑀜𑁆𑀜𑁂 𑀯𑀺𑀳𑀭𑀦𑁆𑀢𑀺. 𑀭𑀸𑀚𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁂𑀳𑀺 𑀬𑁄𑀥𑁂𑀳𑀺 𑀧𑀭𑀺𑀯𑀼𑀢𑁄 𑀯𑀭𑀧𑀸𑀲𑀸𑀤𑀕𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀢𑀢𑁆𑀣 𑀫𑀳𑀦𑁆𑀢𑁄 𑀭𑀸𑀚𑀸 𑀯𑀺𑀬 𑀥𑀫𑁆𑀫𑀭𑀸𑀚𑀸. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀅𑀫𑀘𑁆𑀘𑀸 𑀯𑀺𑀬 𑀬𑁄𑀕𑀸𑀯𑀘𑀭𑀸 𑀓𑀼𑀮𑀧𑀼𑀢𑁆𑀢𑀸. 𑀤𑁆𑀯𑀸𑀤𑀲 𑀘𑁄𑀭𑀚𑁂𑀝𑁆𑀞𑀓𑀸 𑀯𑀺𑀬 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀢𑁂𑀲𑀁 𑀲𑀳𑀸𑀬𑀸 𑀅𑀦𑁂𑀓𑀲𑀳𑀲𑁆𑀲𑀧𑀼𑀭𑀺𑀲𑀸 𑀯𑀺𑀬 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀧𑀸𑀧𑀥𑀫𑁆𑀫𑀸. 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄𑀢𑀺 𑀧𑀳𑀺𑀢𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑁂 𑀓𑀺𑀮𑁂𑀲𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘𑀪𑀦𑁆𑀢𑁂, 𑀓𑀺𑀮𑁂𑀲𑁄 𑀫𑁂 𑀉𑀧𑁆𑀧𑀦𑁆𑀦𑁄’𑀢𑀺 𑀲𑀢𑁆𑀣𑀼 𑀆𑀭𑁄𑀘𑀦𑀓𑀸𑀮𑁄. ‘𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀥𑀦𑀤𑀸𑀦𑀁 𑀯𑀺𑀬 ‘𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳 𑀪𑀺𑀓𑁆𑀔𑀽’𑀢𑀺 𑀥𑀫𑁆𑀫𑀭𑀜𑁆𑀜𑁄 𑀓𑀫𑁆𑀫𑀝𑁆𑀞𑀸𑀦𑀸𑀘𑀺𑀓𑁆𑀔𑀦𑀁. 𑀲𑀧𑀭𑀺𑀯𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀖𑀸𑀢𑀺𑀢𑀓𑀸𑀮𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀧𑀳𑀸𑀦𑀁.

𑀧𑀼𑀦 𑀭𑀜𑁆𑀜𑁄 𑀧𑀯𑀢𑁆𑀢𑀺𑀧𑁂𑀲𑀦𑀁 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀮𑀤𑁆𑀥𑀕𑀼𑀡𑀸𑀭𑁄𑀘𑀦𑀁. ‘𑀲𑁂𑀲𑀓𑁂 𑀘 𑀕𑀡𑁆𑀳𑀦𑁆𑀢𑀽’𑀢𑀺 𑀧𑀼𑀦 𑀥𑀦𑀤𑀸𑀦𑀁 𑀯𑀺𑀬 𑀪𑀕𑀯𑀢𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀺𑀓𑁆𑀔𑀦𑀁. 𑀤𑀼𑀢𑀺𑀬𑀲𑀫𑁆𑀧𑀳𑀸𑀭𑁂𑀦 𑀲𑀧𑀭𑀺𑀯𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀤𑀼𑀩𑁆𑀩𑀮𑀻𑀓𑀭𑀡𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀸𑀦𑀁 𑀢𑀦𑀼𑀪𑀸𑀯𑀓𑀭𑀡𑀁.

𑀧𑀼𑀦 𑀭𑀜𑁆𑀜𑁄 𑀧𑀯𑀢𑁆𑀢𑀺𑀧𑁂𑀲𑀦𑀁 𑀯𑀺𑀬 𑀲𑀢𑁆𑀣𑀼 𑀧𑀝𑀺𑀮𑀤𑁆𑀥𑀕𑀼𑀡𑀸𑀭𑁄𑀘𑀦𑀁. ‘𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀧𑀼𑀦 𑀥𑀦𑀤𑀸𑀦𑀁 𑀯𑀺𑀬 𑀪𑀕𑀯𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀺𑀓𑁆𑀔𑀦𑀁. 𑀢𑀢𑀺𑀬𑀲𑀫𑁆𑀧𑀳𑀸𑀭𑁂𑀦 𑀲𑀧𑀭𑀺𑀯𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀖𑀸𑀢𑀦𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀸𑀦𑀁 𑀧𑀳𑀸𑀦𑀁.

𑀧𑀼𑀦 𑀭𑀜𑁆𑀜𑁄 𑀧𑀯𑀢𑁆𑀢𑀺𑀧𑁂𑀲𑀦𑀁 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀧𑀝𑀺𑀮𑀤𑁆𑀥𑀕𑀼𑀡𑀸𑀭𑁄𑀘𑀦𑀁. ‘𑀯𑀺𑀲𑁆𑀲𑀝𑁆𑀞𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀧𑀼𑀦 𑀥𑀦𑀤𑀸𑀦𑀁 𑀯𑀺𑀬 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀺𑀓𑁆𑀔𑀦𑀁. 𑀘𑀢𑀼𑀢𑁆𑀣𑀲𑀫𑁆𑀧𑀳𑀸𑀭𑁂𑀦 𑀲𑀧𑀭𑀺𑀯𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀖𑀸𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀦𑀧𑀤𑀲𑁆𑀲 𑀔𑁂𑀫𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀧𑀳𑀻𑀦𑁂𑀲𑀼 𑀤𑁆𑀯𑀸𑀤𑀲𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀅𑀓𑀼𑀲𑀮𑀥𑀫𑁆𑀫𑀲𑁆𑀲 𑀅𑀪𑀸𑀯𑁄. 𑀭𑀜𑁆𑀜𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑀲𑁆𑀲 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑀲𑁆𑀲 𑀯𑀭𑀧𑀸𑀲𑀸𑀤𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀅𑀦𑀼𑀪𑀯𑀦𑀁 𑀯𑀺𑀬 𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀪𑁂𑀤𑁂𑀲𑀼 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀲𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀧𑀤𑀲𑁆𑀲 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀧𑀤𑀁

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸

𑀧𑀞𑀫𑀘𑀺𑀢𑁆𑀢𑀁

𑁩𑁬𑁫. 𑀇𑀤𑀸𑀦𑀺 𑀅𑀓𑀼𑀲𑀮𑀥𑀫𑁆𑀫𑀧𑀤𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀥𑀫𑁆𑀫𑀯𑀯𑀢𑁆𑀣𑀸𑀦𑀸𑀤𑀺𑀯𑀸𑀭𑀧𑁆𑀧𑀪𑁂𑀤𑁄 𑀘 𑀳𑁂𑀝𑁆𑀞𑀸 𑀆𑀕𑀢𑀸𑀦𑀁 𑀧𑀤𑀸𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀢𑀢𑁆𑀣 𑀧𑀦 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀫𑀬𑀯𑀯𑀢𑁆𑀣𑀸𑀦𑁂 𑀢𑀸𑀯 𑀬𑀲𑁆𑀫𑀸, 𑀓𑀼𑀲𑀮𑀲𑁆𑀲 𑀯𑀺𑀬, 𑀅𑀓𑀼𑀲𑀮𑀲𑁆𑀲 𑀪𑀽𑀫𑀺𑀪𑁂𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀦𑁆𑀢𑀁 𑀓𑀸𑀫𑀸𑀯𑀘𑀭𑀫𑁆𑀧𑀺 𑀲𑀫𑀸𑀦𑀁 𑀏𑀢𑀁 ‘𑀓𑀸𑀫𑀸𑀯𑀘𑀭’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀕𑀢𑀁 ‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’𑀦𑁆𑀢𑀺𑀆𑀤𑀻𑀦𑀺 (𑀅. 𑀦𑀺. 𑁯.𑁧𑁧) 𑀯𑀺𑀬. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀁. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁.

𑀢𑀢𑁆𑀣 𑀅𑀲𑀤𑁆𑀥𑀫𑁆𑀫𑀲𑀯𑀦𑀁, 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀻𑀦𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀇𑀫𑀲𑁆𑀲 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑀲𑁆𑀲 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀳𑀺 𑀏𑀢𑁂 𑀤𑀺𑀝𑁆𑀞𑀺𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀅𑀲𑀤𑁆𑀥𑀫𑁆𑀫𑀸 𑀢𑁂𑀲𑀁 𑀩𑀳𑀼𑀫𑀸𑀦𑀧𑀼𑀩𑁆𑀩𑀗𑁆𑀕𑀫𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀚𑁆𑀛𑀢𑁆𑀢𑁂𑀦 𑀉𑀧𑀧𑀭𑀺𑀓𑁆𑀔𑀸𑀭𑀳𑀺𑀢𑁂𑀦 𑀲𑀯𑀦𑁂𑀦, 𑀬𑁂 𑀘 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀸 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀢𑀁𑀲𑀫𑁆𑀧𑀯𑀗𑁆𑀓𑀢𑀸𑀲𑀗𑁆𑀔𑀸𑀢𑀸𑀬 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬, 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀜𑁆𑀘𑁂𑀯 𑀲𑀧𑁆𑀧𑀼𑀭𑀺𑀲𑀸𑀦𑀜𑁆𑀘 𑀅𑀤𑀲𑁆𑀲𑀦𑀓𑀸𑀫𑀢𑀸𑀬 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀅𑀓𑁄𑀯𑀺𑀤𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀢𑀺𑀲𑀁𑀯𑀭𑀜𑀸𑀡𑀲𑀁𑀯𑀭𑀧𑀳𑀸𑀦𑀲𑀁𑀯𑀭𑀧𑁆𑀧𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀘𑁂𑀯 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀘 𑀲𑀁𑀯𑀭𑀪𑁂𑀤𑀲𑀗𑁆𑀔𑀸𑀢𑁂𑀦 𑀅𑀯𑀺𑀦𑀬𑁂𑀦 𑀢𑁂𑀳𑁂𑀯 𑀓𑀸𑀭𑀡𑁂𑀳𑀺 𑀧𑀭𑀺𑀪𑀸𑀯𑀺𑀢𑁂𑀦 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀧𑀲𑀼𑀢𑀢𑀸𑀬 𑀘 𑀏𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀗𑁆𑀔𑀸𑀭𑀪𑀸𑀯𑁄 𑀧𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀨𑀲𑁆𑀲𑁄𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀅𑀓𑀼𑀲𑀮𑀫𑀢𑁆𑀢𑀫𑁂𑀯 𑀏𑀢𑁂𑀲𑀁 𑀧𑀼𑀭𑀺𑀫𑁂𑀳𑀺 𑀯𑀺𑀲𑁂𑀲𑁄.

𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼𑀧𑀺 𑀅𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑁆𑀯𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀯𑀺𑀭𑀚𑁆𑀛𑀫𑀸𑀦𑀸𑀦𑀺 𑀲𑀢𑁆𑀣𑀸𑀦𑀺 𑀧𑀸𑀡𑀲𑀭𑀻𑀭𑁂𑀲𑀼 𑀦𑀺𑀧𑀸𑀢𑁂𑀦𑁆𑀢𑀺, 𑀲𑀼𑀲𑀫𑀸𑀳𑀺𑀢𑀸 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀳𑀭𑀦𑁆𑀢𑀺, 𑀏𑀓𑀭𑀲𑁂𑀦 𑀘𑀺𑀢𑁆𑀢𑁂𑀦 𑀫𑀺𑀘𑁆𑀙𑀸𑀘𑀸𑀭𑀁 𑀆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀳𑁄𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀅𑀬𑀸𑀣𑀸𑀯𑀤𑀺𑀝𑁆𑀞𑀺, 𑀯𑀺𑀭𑀚𑁆𑀛𑀺𑀢𑁆𑀯𑀸 𑀕𑀳𑀡𑀢𑁄 𑀯𑀸 𑀯𑀺𑀢𑀣𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀧𑀡𑁆𑀟𑀺𑀢𑁂𑀳𑀺 𑀚𑀺𑀕𑀼𑀘𑁆𑀙𑀺𑀢𑀸 𑀤𑀺𑀝𑁆𑀞𑀻𑀢𑀺𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸, 𑀧𑀭𑀸𑀫𑀸𑀲𑀭𑀲𑀸, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀧𑀤𑀝𑁆𑀞𑀸𑀦𑀸; 𑀧𑀭𑀫𑀁 𑀯𑀚𑁆𑀚𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼 ‘𑀫𑀺𑀘𑁆𑀙𑀸’𑀢𑀺 𑀧𑀤𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀓𑀼𑀲𑀮𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀳𑀺𑀭𑀺𑀓𑀩𑀮𑀁 𑀅𑀦𑁄𑀢𑁆𑀢𑀧𑁆𑀧𑀩𑀮𑀦𑁆𑀢𑀺 𑀏𑀢𑁆𑀣 𑀩𑀮𑀢𑁆𑀣𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀢𑀭𑁂𑀲𑀼 𑀧𑀦 𑁋 𑀦 𑀳𑀺𑀭𑀺𑀬𑀢𑀻𑀢𑀺 𑀅𑀳𑀺𑀭𑀺𑀓𑁄. 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑀁. 𑀦 𑀑𑀢𑁆𑀢𑀧𑁆𑀧𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀢𑁂𑀲𑀼 𑀅𑀳𑀺𑀭𑀺𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀮𑀚𑁆𑀚𑀸𑀮𑀓𑁆𑀔𑀡𑀁 𑀯𑀸. 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀦𑀮𑀓𑁆𑀔𑀡𑀁 𑀅𑀦𑀼𑀢𑁆𑀢𑀸𑀲𑀦𑀮𑀓𑁆𑀔𑀡𑀁 𑀯𑀸. 𑀅𑀳𑀺𑀭𑀺𑀓𑀫𑁂𑀯 𑀩𑀮𑀁 𑀅𑀳𑀺𑀭𑀺𑀓𑀩𑀮𑀁. 𑀅𑀦𑁄𑀢𑁆𑀢𑀧𑁆𑀧𑀫𑁂𑀯 𑀩𑀮𑀁 𑀅𑀦𑁄𑀢𑁆𑀢𑀧𑁆𑀧𑀩𑀮𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀢𑁂𑀲𑀼 𑀮𑁄𑀪𑁄 𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬, 𑀅𑀪𑀺𑀲𑀗𑁆𑀕𑀭𑀲𑁄 𑀢𑀢𑁆𑀢𑀓𑀧𑀸𑀮𑁂 𑀔𑀺𑀢𑁆𑀢𑀫𑀁𑀲𑀧𑁂𑀲𑀺 𑀯𑀺𑀬, 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬, 𑀲𑀁𑀬𑁄𑀚𑀦𑀺𑀬𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄. 𑀲𑁄 𑀢𑀡𑁆𑀳𑀸𑀦𑀤𑀻𑀪𑀸𑀯𑁂𑀦 𑀯𑀟𑁆𑀠𑀫𑀸𑀦𑁄, 𑀲𑀻𑀖𑀲𑁄𑀢𑀸 𑀦𑀤𑀻 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑀁, 𑀅𑀧𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀫𑁄𑀳𑁄 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑀮𑀓𑁆𑀔𑀡𑁄 𑀅𑀜𑁆𑀜𑀸𑀡𑀮𑀓𑁆𑀔𑀡𑁄 𑀯𑀸, 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄 𑀯𑀸, 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑁄. 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀫𑀽𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀪𑀺𑀚𑁆𑀛𑀸𑀬𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀅𑀪𑀺𑀚𑁆𑀛𑀸𑀬𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀅𑀪𑀺𑀚𑁆𑀛𑀸. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀲𑀓𑀓𑀭𑀡𑀇𑀘𑁆𑀙𑀸𑀮𑀓𑁆𑀔𑀡𑀸, 𑀢𑁂𑀦𑀸𑀓𑀸𑀭𑁂𑀦 𑀏𑀲𑀦𑀪𑀸𑀯𑀭𑀲𑀸, 𑀧𑀭𑀲𑀫𑁆𑀧𑀢𑁆𑀢𑀺-𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀧𑀤𑀝𑁆𑀞𑀸𑀦𑀸. 𑀧𑀭𑀲𑀫𑁆𑀧𑀢𑁆𑀢𑀺𑀅𑀪𑀺𑀫𑀼𑀔𑀸 𑀏𑀯 𑀳𑀺 𑀲𑀸 𑀉𑀧𑀝𑁆𑀞𑀳𑀢𑀺. 𑀢𑀸𑀲𑀼 𑀘 𑀅𑀪𑀺𑀭𑀢𑀺𑀬𑀸 𑀲𑀢𑀺 𑀧𑀯𑀢𑁆𑀢𑀢𑀺, 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑁄𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀫𑀣𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀜𑁆𑀜𑁂𑀲𑀼 𑀓𑀺𑀘𑁆𑀘𑁂𑀲𑀼 𑀯𑀺𑀓𑁆𑀔𑁂𑀧𑀲𑀫𑀦𑀢𑁄 𑀲𑀫𑀣𑁄. 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀕𑁆𑀕𑀸𑀳𑁄. 𑀦 𑀯𑀺𑀓𑁆𑀔𑀺𑀧𑀢𑀻𑀢𑀺 𑀅𑀯𑀺𑀓𑁆𑀔𑁂𑀧𑁄.

𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀲𑀤𑁆𑀥𑀸, 𑀲𑀢𑀺, 𑀧𑀜𑁆𑀜𑀸, 𑀙 𑀬𑀼𑀕𑀴𑀓𑀸𑀦𑀻𑀢𑀺 𑀇𑀫𑁂 𑀥𑀫𑁆𑀫𑀸 𑀦 𑀕𑀳𑀺𑀢𑀸. 𑀓𑀲𑁆𑀫𑀸? 𑀅𑀲𑁆𑀲𑀤𑁆𑀥𑀺𑀬𑀘𑀺𑀢𑁆𑀢𑁂 𑀧𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀸𑀯 𑀲𑀤𑁆𑀥𑀸 𑀦 𑀕𑀳𑀺𑀢𑀸. 𑀓𑀺𑀁 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀦𑀁 𑀦 𑀲𑀤𑁆𑀤𑀳𑀦𑁆𑀢𑀻𑀢𑀺? 𑀲𑀤𑁆𑀤𑀳𑀦𑁆𑀢𑀺. 𑀲𑀸 𑀧𑀦 𑀲𑀤𑁆𑀥𑀸 𑀦𑀸𑀫 𑀦 𑀳𑁄𑀢𑀺, 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑀫𑁂𑀯𑁂𑀢𑀁. 𑀅𑀢𑁆𑀣𑀢𑁄 𑀅𑀦𑀼𑀧𑀧𑀭𑀺𑀓𑁆𑀔𑀸 𑀯𑀸 𑀳𑁄𑀢𑀺, 𑀤𑀺𑀝𑁆𑀞𑀺 𑀯𑀸. 𑀅𑀲𑀢𑀺𑀬𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀦𑀢𑁆𑀣𑀻𑀢𑀺 𑀦 𑀕𑀳𑀺𑀢𑀸. 𑀓𑀺𑀁 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀦 𑀲𑀭𑀦𑁆𑀢𑀻𑀢𑀺? 𑀲𑀭𑀦𑁆𑀢𑀺. 𑀲𑀸 𑀧𑀦 𑀲𑀢𑀺 𑀦𑀸𑀫 𑀦 𑀳𑁄𑀢𑀺. 𑀓𑁂𑀯𑀮𑀁 𑀢𑁂𑀦𑀸𑀓𑀸𑀭𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺. 𑀢𑀲𑁆𑀫𑀸 𑀲𑀢𑀺 𑀦 𑀕𑀳𑀺𑀢𑀸. 𑀅𑀣 𑀓𑀲𑁆𑀫𑀸 ‘‘𑀫𑀺𑀘𑁆𑀙𑀸𑀲𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁩𑁩; 𑀲𑀁. 𑀦𑀺. 𑁫.𑁧) 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑀸? 𑀲𑀸 𑀧𑀦 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀁 𑀲𑀢𑀺𑀯𑀺𑀭𑀳𑀺𑀢𑀢𑁆𑀢𑀸 𑀲𑀢𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀘 𑀫𑀺𑀘𑁆𑀙𑀸𑀫𑀕𑁆𑀕𑀫𑀺𑀘𑁆𑀙𑀢𑁆𑀢𑀸𑀦𑀁 𑀧𑀽𑀭𑀡𑀢𑁆𑀣𑀁 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦 𑀤𑁂𑀲𑀦𑀸 𑀓𑀢𑀸. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦𑁂𑀲𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀦 𑀕𑀳𑀺𑀢𑀸. 𑀅𑀦𑁆𑀥𑀩𑀸𑀮𑀘𑀺𑀢𑁆𑀢𑁂 𑀧𑀦 𑀧𑀜𑁆𑀜𑀸 𑀦𑀢𑁆𑀣𑀻𑀢𑀺 𑀦 𑀕𑀳𑀺𑀢𑀸. 𑀓𑀺𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀜𑁆𑀘𑀦𑀸𑀧𑀜𑁆𑀜𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀦 𑀧𑀦𑁂𑀲𑀸 𑀧𑀜𑁆𑀜𑀸, 𑀫𑀸𑀬𑀸 𑀦𑀸𑀫𑁂𑀲𑀸 𑀳𑁄𑀢𑀺. 𑀲𑀸 𑀅𑀢𑁆𑀣𑀢𑁄 𑀢𑀡𑁆𑀳𑀸𑀯. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀲𑀤𑀭𑀣𑀁 𑀕𑀭𑀼𑀓𑀁 𑀪𑀸𑀭𑀺𑀬𑀁 𑀓𑀓𑁆𑀔𑀴𑀁 𑀣𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀁 𑀕𑀺𑀮𑀸𑀦𑀁 𑀯𑀗𑁆𑀓𑀁 𑀓𑀼𑀝𑀺𑀮𑀁. 𑀢𑀲𑁆𑀫𑀸 𑀧𑀲𑁆𑀲𑀤𑁆𑀥𑀸𑀤𑀻𑀦𑀺 𑀙 𑀬𑀼𑀕𑀴𑀓𑀸𑀦𑀺 𑀦 𑀕𑀳𑀺𑀢𑀸𑀦𑀺.

𑀏𑀢𑁆𑀢𑀸𑀯𑀢𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀧𑀸𑀴𑀺𑀆𑀭𑀼𑀴𑁆𑀳𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀯𑀸𑀧𑀦𑀓𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑁂𑀲𑀼𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀫𑀸𑀦𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀣𑀺𑀦𑀁 𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀇𑀫𑁂 𑀤𑀲𑁂𑀯 𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺 𑀥𑀫𑁆𑀫𑀸, 𑀲𑀼𑀢𑁆𑀢𑀸𑀕𑀢𑀸, 𑀲𑀼𑀢𑁆𑀢𑀧𑀤𑁂𑀲𑀼 𑀤𑀺𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀘𑀺𑀢𑁆𑀢𑁂 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀇𑀫𑁂 𑀅𑀧𑀡𑁆𑀡𑀓𑀗𑁆𑀕𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄𑀯 𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑁂 𑀓𑀼𑀲𑀮𑀸, 𑀇𑀫𑁂 𑀅𑀓𑀼𑀲𑀮𑀸. 𑀇𑀢𑀭𑀁 𑀧𑀦 𑀉𑀤𑁆𑀥𑀢𑀲𑁆𑀲 𑀪𑀸𑀯𑁄 ‘𑀉𑀤𑁆𑀥𑀘𑁆𑀘𑀁’. 𑀢𑀁 𑀘𑁂𑀢𑀲𑁄 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀚𑀮𑀁 𑀯𑀺𑀬, 𑀅𑀦𑀯𑀝𑁆𑀞𑀸𑀦𑀭𑀲𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀥𑀚𑀧𑀝𑀸𑀓𑀸 𑀯𑀺𑀬, 𑀪𑀦𑁆𑀢𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀸𑀲𑀸𑀡𑀸𑀪𑀺𑀖𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀸 𑀯𑀺𑀬, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀨𑀲𑁆𑀲𑀸𑀤𑀻𑀦𑀺 𑀤𑁆𑀯𑀢𑁆𑀢𑀺𑀁𑀲, 𑀬𑁂𑀯𑀸𑀧𑀦𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀙𑀢𑁆𑀢𑀺𑀁𑀲 𑀥𑀫𑁆𑀫𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀅𑀧𑀡𑁆𑀡𑀓𑀗𑁆𑀕𑀸𑀦𑀺 𑀳𑀸𑀧𑁂𑀢𑁆𑀯𑀸 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀫𑁂𑀯. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀨𑀲𑁆𑀲𑀧𑀜𑁆𑀘𑀓𑀁, 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄 𑀫𑁄𑀳𑁄𑀢𑀺 𑀲𑁄𑀴𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺.

𑀢𑁂𑀲𑀼 𑀲𑁄𑀴𑀲𑀲𑀼 𑀲𑀢𑁆𑀢 𑀥𑀫𑁆𑀫𑀸 𑀅𑀯𑀺𑀪𑀢𑁆𑀢𑀺𑀓𑀸 𑀦𑀯 𑀲𑀯𑀺𑀪𑀢𑁆𑀢𑀺𑀓𑀸 𑀳𑁄𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀨𑀲𑁆𑀲𑁄 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀘𑀸𑀭𑁄 𑀧𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑁄𑀳𑁄𑀢𑀺 𑀇𑀫𑁂 𑀲𑀢𑁆𑀢 𑀅𑀯𑀺𑀪𑀢𑁆𑀢𑀺𑀓𑀸. 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄𑀢𑀺 𑀇𑀫𑁂 𑀦𑀯 𑀲𑀯𑀺𑀪𑀢𑁆𑀢𑀺𑀓𑀸.

𑀢𑁂𑀲𑀼 𑀙 𑀥𑀫𑁆𑀫𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸, 𑀏𑀓𑁄 𑀢𑀻𑀲𑀼, 𑀏𑀓𑁄 𑀘𑀢𑀽𑀲𑀼, 𑀏𑀓𑁄 𑀙𑀲𑀼. 𑀓𑀣𑀁? 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄𑀢𑀺 𑀇𑀫𑁂 𑀙 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸. 𑀢𑁂𑀲𑀼 𑀳𑀺 𑀘𑀺𑀢𑁆𑀢𑀁 𑀢𑀸𑀯 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀯𑀺𑀢𑀓𑁆𑀓𑁄 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀯𑀺𑀢𑀓𑁆𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀕𑁆𑀕𑀗𑁆𑀕𑁂𑀲𑀼𑀧𑀺 𑀓𑀫𑁆𑀫𑀧𑀣𑁂𑀲𑀼𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁂𑀯. 𑀅𑀳𑀺𑀭𑀺𑀓𑀁 𑀩𑀮𑀸𑀦𑀺 𑀧𑀢𑁆𑀯𑀸 𑀅𑀳𑀺𑀭𑀺𑀓𑀩𑀮𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀮𑁄𑀓𑀦𑀸𑀲𑀓𑀤𑀼𑀓𑀁 𑀧𑀢𑁆𑀯𑀸 𑀅𑀳𑀺𑀭𑀺𑀓𑀦𑁆𑀢𑀺. 𑀅𑀦𑁄𑀢𑁆𑀢𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑁄𑀪𑁄 𑀫𑀽𑀮𑀁 𑀧𑀢𑁆𑀯𑀸 𑀮𑁄𑀪𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄. 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 𑀅𑀪𑀺𑀚𑁆𑀛𑀸𑀢𑀺. 𑀇𑀫𑁂 𑀙 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸.

𑀯𑁂𑀤𑀦𑀸 𑀧𑀦 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 𑀯𑁂𑀤𑀦𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸, 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀲𑀼𑀔𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀏𑀯𑀁 𑀏𑀓𑁄𑀯 𑀥𑀫𑁆𑀫𑁄 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀯𑀻𑀭𑀺𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀳𑁄𑀢𑀻𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 𑀯𑀻𑀭𑀺𑀬𑀩𑀮𑀦𑁆𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀧𑀕𑁆𑀕𑀸𑀳𑁄 𑀳𑁄𑀢𑀻𑀢𑀺. 𑀏𑀯𑀁 𑀅𑀬𑀁 𑀏𑀓𑁄 𑀥𑀫𑁆𑀫𑁄 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀲𑀫𑀸𑀥𑀺 𑀧𑀦 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 𑀫𑀺𑀘𑁆𑀙𑀸𑀲𑀫𑀸𑀥𑀻𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 𑀲𑀫𑀸𑀥𑀺𑀩𑀮𑀦𑁆𑀢𑀺, 𑀧𑀺𑀝𑁆𑀞𑀺𑀤𑀼𑀓𑀁 𑀧𑀢𑁆𑀯𑀸 𑀤𑀼𑀢𑀺𑀬𑀤𑀼𑀓𑁂 𑀏𑀓𑀓𑀯𑀲𑁂𑀦𑁂𑀯 𑀲𑀫𑀣𑁄𑀢𑀺, 𑀢𑀢𑀺𑀬𑁂 𑀅𑀯𑀺𑀓𑁆𑀔𑁂𑀧𑁄𑀢𑀺. 𑀏𑀯𑀫𑀬𑀁 𑀏𑀓𑁄 𑀥𑀫𑁆𑀫𑁄 𑀙𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄.

𑀲𑀩𑁆𑀩𑁂𑀧𑀺 𑀧𑀦𑁂𑀢𑁂 𑀥𑀫𑁆𑀫𑀸 𑀨𑀲𑁆𑀲𑀧𑀜𑁆𑀘𑀓𑀯𑀲𑁂𑀦 𑀛𑀸𑀦𑀗𑁆𑀕𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀫𑀕𑁆𑀕𑀗𑁆𑀕𑀯𑀲𑁂𑀦 𑀩𑀮𑀯𑀲𑁂𑀦 𑀫𑀽𑀮𑀯𑀲𑁂𑀦 𑀓𑀫𑁆𑀫𑀧𑀣𑀯𑀲𑁂𑀦 𑀮𑁄𑀓𑀦𑀸𑀲𑀓𑀯𑀲𑁂𑀦 𑀧𑀺𑀝𑁆𑀞𑀺𑀤𑀼𑀓𑀯𑀲𑁂𑀦𑀸𑀢𑀺 𑀦𑀯 𑀭𑀸𑀲𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀧𑀞𑀫𑀓𑀼𑀲𑀮𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸

𑁩𑁭𑁫. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑁂 𑀢𑀸𑀯 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀻𑀢𑀺. 𑀇𑀤𑀁 𑀤𑁆𑀯𑀬𑀁 𑀞𑀺𑀢𑀺𑀯𑁂𑀯𑀘𑀦𑀫𑁂𑀯. 𑀬𑀁 𑀧𑀦 𑀓𑀼𑀲𑀮𑀦𑀺𑀤𑁆𑀤𑁂𑀲𑁂 ‘𑀆𑀭𑀫𑁆𑀫𑀡𑀁 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀯𑀝𑁆𑀞𑀺𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀥 𑀦 𑀮𑀩𑁆𑀪𑀢𑀺. 𑀅𑀓𑀼𑀲𑀮𑀲𑁆𑀫𑀺𑀜𑁆𑀳𑀺 𑀤𑀼𑀩𑁆𑀩𑀮𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀢𑀺 𑀳𑁂𑀝𑁆𑀞𑀸 𑀤𑀻𑀧𑀺𑀢𑀫𑁂𑀯.

𑁩𑁮𑁪. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑀺𑀲𑀸𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀲𑀸𑀳𑀸𑀭𑁄𑀢𑀺 𑀏𑀯𑀭𑀽𑀧𑁄𑀧𑀺 𑀅𑀢𑁆𑀣𑁄 𑀇𑀥 𑀦 𑀮𑀩𑁆𑀪𑀢𑀺. 𑀲𑀳𑀚𑀸𑀢𑀥𑀫𑁆𑀫𑁂 𑀧𑀦 𑀦 𑀯𑀺𑀲𑀸𑀳𑀭𑀢𑀻𑀢𑀺 𑀅𑀯𑀺𑀲𑀸𑀳𑀸𑀭𑁄. 𑀦 𑀯𑀺𑀓𑁆𑀔𑀺𑀧𑀢𑀻𑀢𑀺 𑀅𑀯𑀺𑀓𑁆𑀔𑁂𑀧𑁄. 𑀅𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦 𑀅𑀯𑀺𑀲𑀸𑀳𑀝𑀲𑁆𑀲 𑀫𑀸𑀦𑀲𑀲𑁆𑀲 𑀪𑀸𑀯𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀸𑀥𑀺𑀩𑀮𑀁. 𑀅𑀬𑀸𑀣𑀸𑀯𑀲𑀫𑀸𑀥𑀸𑀦𑀢𑁄 𑀫𑀺𑀘𑁆𑀙𑀸𑀲𑀫𑀸𑀥𑀻𑀢𑀺 𑀏𑀯𑀫𑀺𑀥 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁮𑁫. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀬𑁄 𑀳𑁂𑀝𑁆𑀞𑀸 ‘𑀦𑀺𑀓𑁆𑀓𑀫𑁄 𑀘𑁂𑀲𑁄 𑀓𑀸𑀫𑀸𑀦𑀁 𑀧𑀦𑀼𑀤𑀦𑀸𑀬𑀸’𑀢𑀺𑀆𑀤𑀺 𑀦𑀬𑁄 𑀯𑀼𑀢𑁆𑀢𑁄, 𑀲𑁄 𑀇𑀥 𑀦 𑀮𑀩𑁆𑀪𑀢𑀺. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀅𑀓𑀫𑁆𑀧𑀦𑀝𑁆𑀞𑁂𑀦𑁂𑀯 𑀯𑀻𑀭𑀺𑀬𑀩𑀮𑀁 𑀯𑁂𑀤𑀺𑀢𑀩𑁆𑀩𑀁.

𑁩𑁮𑁬. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁂 𑀅𑀬𑀸𑀣𑀸𑀯𑀤𑀲𑁆𑀲𑀦𑀝𑁆𑀞𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀤𑀺𑀝𑁆𑀞𑀻𑀲𑀼 𑀕𑀢𑀁 𑀇𑀤𑀁 𑀤𑀲𑁆𑀲𑀦𑀁, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀅𑀦𑁆𑀢𑁄𑀕𑀢𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀳𑁂𑀝𑁆𑀞𑀸𑀧𑀺𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀤𑀺𑀝𑁆𑀞𑀺𑀬𑁂𑀯 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀕𑀳𑀦𑀁, 𑀢𑀺𑀡𑀕𑀳𑀦𑀯𑀦𑀕𑀳𑀦𑀧𑀩𑁆𑀩𑀢𑀕𑀳𑀦𑀸𑀦𑀺 𑀯𑀺𑀬. 𑀤𑀺𑀝𑁆𑀞𑀺𑀬𑁂𑀯 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄, 𑀘𑁄𑀭𑀓𑀦𑁆𑀢𑀸𑀭𑀯𑀸𑀴𑀓𑀦𑁆𑀢𑀸𑀭𑀫𑀭𑀼𑀓𑀦𑁆𑀢𑀸𑀭𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀸 𑀯𑀺𑀬. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀮𑁄𑀫𑀦𑀝𑁆𑀞𑁂𑀦 𑀘 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀯𑀺𑀦𑀺𑀯𑀺𑀚𑁆𑀛𑀢𑀺 𑀘𑁂𑀯 𑀯𑀺𑀮𑁄𑀫𑁂𑀢𑀺 𑀘. 𑀓𑀤𑀸𑀘𑀺 𑀲𑀲𑁆𑀲𑀢𑀲𑁆𑀲 𑀓𑀤𑀸𑀘𑀺 𑀉𑀘𑁆𑀙𑁂𑀤𑀲𑁆𑀲 𑀕𑀳𑀡𑀢𑁄 𑀤𑀺𑀝𑁆𑀞𑀺𑀬𑀸 𑀯𑀺𑀭𑀽𑀧𑀁 𑀨𑀦𑁆𑀤𑀺𑀢𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀳𑀺 𑀏𑀓𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀤𑀸𑀘𑀺 𑀲𑀲𑁆𑀲𑀢𑀁 𑀅𑀦𑀼𑀧𑀢𑀢𑀺 𑀓𑀤𑀸𑀘𑀺 𑀉𑀘𑁆𑀙𑁂𑀤𑀁. 𑀤𑀺𑀝𑁆𑀞𑀺𑀬𑁂𑀯 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀦𑁆𑀢𑀺 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁.

𑀲𑀼𑀲𑀼𑀫𑀸𑀭𑀸𑀤𑀬𑁄 𑀯𑀺𑀬 𑀧𑀼𑀭𑀺𑀲𑀁, 𑀆𑀭𑀫𑁆𑀫𑀡𑀁 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻𑀢𑀺 𑀕𑀸𑀳𑁄. 𑀧𑀢𑀺𑀝𑁆𑀞𑀳𑀦𑀢𑁄 𑀧𑀢𑀺𑀝𑁆𑀞𑀸𑀳𑁄. 𑀅𑀬𑀜𑁆𑀳𑀺 𑀩𑀮𑀯𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀪𑀺𑀦𑀺𑀯𑁂𑀲𑁄. 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀢𑁄 𑀆𑀫𑀲𑀢𑀻𑀢𑀺 𑀧𑀭𑀸𑀫𑀸𑀲𑁄. 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄, 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀅𑀧𑀸𑀬𑀸𑀦𑀁 𑀫𑀕𑁆𑀕𑁄𑀢𑀺 𑀓𑀼𑀫𑁆𑀫𑀕𑁆𑀕𑁄. 𑀅𑀬𑀸𑀣𑀸𑀯𑀧𑀣𑀢𑁄 𑀫𑀺𑀘𑁆𑀙𑀸𑀧𑀣𑁄. 𑀬𑀣𑀸 𑀳𑀺 𑀤𑀺𑀲𑀸𑀫𑀽𑀴𑁆𑀳𑁂𑀦 𑀅𑀬𑀁 𑀅𑀲𑀼𑀓𑀕𑀸𑀫𑀲𑁆𑀲 𑀦𑀸𑀫 𑀧𑀣𑁄𑀢𑀺 𑀕𑀳𑀺𑀢𑁄𑀧𑀺 𑀢𑀁 𑀕𑀸𑀫𑀁 𑀦 𑀲𑀫𑁆𑀧𑀸𑀧𑁂𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑁂𑀦 𑀲𑀼𑀕𑀢𑀺𑀧𑀣𑁄𑀢𑀺 𑀕𑀳𑀺𑀢𑀸𑀧𑀺 𑀤𑀺𑀝𑁆𑀞𑀺 𑀲𑀼𑀕𑀢𑀺𑀁 𑀦 𑀧𑀸𑀧𑁂𑀢𑀻𑀢𑀺 𑀅𑀬𑀸𑀣𑀸𑀯𑀧𑀣𑀢𑁄, 𑀫𑀺𑀘𑁆𑀙𑀸𑀧𑀣𑁄. 𑀫𑀺𑀘𑁆𑀙𑀸𑀲𑀪𑀸𑀯𑀢𑁄 𑀫𑀺𑀘𑁆𑀙𑀢𑁆𑀢𑀁. 𑀢𑀢𑁆𑀣𑁂𑀯 𑀧𑀭𑀺𑀩𑁆𑀪𑀫𑀦𑀢𑁄 𑀢𑀭𑀦𑁆𑀢𑀺 𑀏𑀢𑁆𑀣 𑀩𑀸𑀮𑀸𑀢𑀺 𑀢𑀺𑀢𑁆𑀣𑀁. 𑀢𑀺𑀢𑁆𑀣𑀜𑁆𑀘 𑀢𑀁 𑀅𑀦𑀢𑁆𑀣𑀸𑀦𑀜𑁆𑀘 𑀆𑀬𑀢𑀦𑀦𑁆𑀢𑀺 𑀢𑀺𑀢𑁆𑀣𑀸𑀬𑀢𑀦𑀁. 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀦𑀺𑀯𑀸𑀲𑀞𑀸𑀦𑀝𑁆𑀞𑁂𑀦 𑀘 𑀆𑀬𑀢𑀦𑀦𑁆𑀢𑀺𑀧𑀺 𑀢𑀺𑀢𑁆𑀣𑀸𑀬𑀢𑀦𑀁. 𑀯𑀺𑀧𑀭𑀺𑀬𑁂𑀲𑀪𑀽𑀢𑁄 𑀕𑀸𑀳𑁄, 𑀯𑀺𑀧𑀭𑀺𑀬𑁂𑀲𑀢𑁄 𑀯𑀸 𑀕𑀸𑀳𑁄𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄; 𑀯𑀺𑀧𑀮𑁆𑀮𑀢𑁆𑀣 𑀕𑀸𑀳𑁄𑀢𑀺 𑀅𑀢𑁆𑀣𑁄.

𑁩𑁮𑁭-𑁩𑁮𑁮. 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀦𑀺𑀤𑁆𑀤𑁂𑀲𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀦𑀺𑀤𑁆𑀤𑁂𑀲𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀧𑀦 𑀅𑀓𑀫𑁆𑀧𑀦𑀝𑁆𑀞𑁂𑀦𑁂𑀯 𑀅𑀳𑀺𑀭𑀺𑀓𑀩𑀮𑀁 𑀅𑀦𑁄𑀢𑁆𑀢𑀧𑁆𑀧𑀩𑀮𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁩𑁮𑁯. 𑀮𑁄𑀪𑀫𑁄𑀳𑀦𑀺𑀤𑁆𑀤𑁂𑀲𑁂𑀲𑀼 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄. 𑀮𑀼𑀩𑁆𑀪𑀦𑀸𑀢𑀺 𑀮𑀼𑀩𑁆𑀪𑀦𑀸𑀓𑀸𑀭𑁄. 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀯𑀸 𑀮𑀼𑀩𑁆𑀪𑀺𑀢𑁄; 𑀮𑀼𑀩𑁆𑀪𑀺𑀢𑀲𑁆𑀲 𑀪𑀸𑀯𑁄 𑀮𑀼𑀩𑁆𑀪𑀺𑀢𑀢𑁆𑀢𑀁. 𑀲𑀸𑀭𑀚𑁆𑀚𑀢𑀻𑀢𑀺 𑀲𑀸𑀭𑀸𑀕𑁄. 𑀲𑀸𑀭𑀚𑁆𑀚𑀦𑀸𑀓𑀸𑀭𑁄 𑀲𑀸𑀭𑀚𑁆𑀚𑀦𑀸. 𑀲𑀸𑀭𑀚𑁆𑀚𑀺𑀢𑀲𑁆𑀲 𑀪𑀸𑀯𑁄 𑀲𑀸𑀭𑀚𑁆𑀚𑀺𑀢𑀢𑁆𑀢𑀁. 𑀅𑀪𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀅𑀪𑀺𑀚𑁆𑀛𑀸. 𑀧𑀼𑀦 ‘𑀮𑁄𑀪’-𑀯𑀘𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀅𑀓𑀼𑀲𑀮𑀜𑁆𑀘 𑀢𑀁 𑀫𑀽𑀮𑀜𑁆𑀘 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀁.

𑁩𑁯𑁦. 𑀜𑀸𑀡𑀤𑀲𑁆𑀲𑀦𑀧𑀝𑀺𑀧𑀓𑁆𑀔𑀢𑁄 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁. 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀦 𑀲𑀫𑁂𑀢𑀺, 𑀦 𑀲𑀫𑀸𑀕𑀘𑁆𑀙𑀢𑀻𑀢𑀺 𑀅𑀦𑀪𑀺𑀲𑀫𑀬𑁄. 𑀅𑀦𑀼𑀭𑀽𑀧𑀢𑁄 𑀥𑀫𑁆𑀫𑁂 𑀩𑀼𑀚𑁆𑀛𑀢𑀻𑀢𑀺 𑀅𑀦𑀼𑀩𑁄𑀥𑁄. 𑀢𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀅𑀦𑀦𑀼𑀩𑁄𑀥𑁄. 𑀅𑀦𑀺𑀘𑁆𑀘𑀸𑀤𑀻𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀦 𑀩𑀼𑀚𑁆𑀛𑀢𑀻𑀢𑀺 𑀅𑀲𑀫𑁆𑀩𑁄𑀥𑁄. 𑀅𑀲𑀦𑁆𑀢𑀁 𑀅𑀲𑀫𑀜𑁆𑀘 𑀩𑀼𑀚𑁆𑀛𑀢𑀻𑀢𑀺𑀧𑀺 𑀅𑀲𑀫𑁆𑀩𑁄𑀥𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀧𑁆𑀧𑀝𑀺𑀯𑁂𑀥𑁄. 𑀭𑀽𑀧𑀸𑀤𑀻𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀢𑁄 𑀦 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀅𑀲𑀁𑀕𑀸𑀳𑀦𑀸. 𑀢𑀫𑁂𑀯 𑀥𑀫𑁆𑀫𑀁 𑀦 𑀧𑀭𑀺𑀬𑁄𑀕𑀸𑀳𑀢𑀻𑀢𑀺 𑀅𑀧𑀭𑀺𑀬𑁄𑀕𑀸𑀳𑀦𑀸. 𑀦 𑀲𑀫𑀁 𑀧𑁂𑀓𑁆𑀔𑀢𑀻𑀢𑀺 𑀅𑀲𑀫𑀧𑁂𑀓𑁆𑀔𑀡𑀸. 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀧𑀢𑀺 𑀦 𑀅𑀧𑁂𑀓𑁆𑀔𑀢𑀻𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀡𑀸.

𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀲𑀼 𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀬𑀸 𑀲𑀪𑀸𑀯𑀕𑁆𑀕𑀳𑀡𑀸𑀪𑀸𑀯𑁂𑀦 𑀯𑀸 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀏𑀢𑀲𑁆𑀲 𑀧𑀘𑁆𑀘𑀓𑁆𑀔𑀁 𑀦𑀢𑁆𑀣𑀺, 𑀲𑀬𑀁 𑀯𑀸 𑀓𑀲𑁆𑀲𑀘𑀺 𑀓𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀁. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀫𑁂𑀚𑁆𑀛𑀁 𑀪𑀯𑁂𑀬𑁆𑀬, 𑀲𑀼𑀘𑀺, 𑀯𑁄𑀤𑀸𑀦𑀁, 𑀢𑀁 𑀤𑀼𑀝𑁆𑀞𑀁 𑀫𑁂𑀚𑁆𑀛𑀁 𑀇𑀫𑀺𑀦𑀸𑀢𑀺 𑀤𑀼𑀫𑁆𑀫𑁂𑀚𑁆𑀛𑀁. 𑀩𑀸𑀮𑀸𑀦𑀁 𑀪𑀸𑀯𑁄𑀢𑀺 𑀩𑀸𑀮𑁆𑀬𑀁. 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀩𑀮𑀯𑀢𑀭𑁄 𑀫𑁄𑀳𑁄 𑀧𑀫𑁄𑀳𑁄. 𑀲𑀫𑀦𑁆𑀢𑀢𑁄 𑀫𑀼𑀬𑁆𑀳𑀢𑀻𑀢𑀺 𑀲𑀫𑁆𑀫𑁄𑀳𑁄. 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀦 𑀯𑀺𑀚𑁆𑀚𑀸𑀢𑀺 𑀅𑀯𑀺𑀚𑁆𑀚𑀸. 𑀑𑀖𑀬𑁄𑀕𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀣𑀸𑀫𑀕𑀢𑀝𑁆𑀞𑁂𑀦 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺, 𑀅𑀪𑀺𑀪𑀯𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀳𑀺𑀢𑀕𑁆𑀕𑀳𑀡𑀸𑀪𑀸𑀯𑁂𑀦 𑀳𑀺𑀢𑀸𑀪𑀺𑀫𑀼𑀔𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀮𑀗𑁆𑀕𑀢𑀺𑀬𑁂𑀯𑀸𑀢𑀺 𑀮𑀗𑁆𑀕𑀻; 𑀔𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀭𑀼𑀕𑁆𑀖𑀸𑀝𑀦𑀝𑁆𑀞𑁂𑀦 𑀯𑀸 𑀮𑀗𑁆𑀕𑀻. 𑀬𑀣𑀸 𑀳𑀺 𑀫𑀳𑀸𑀧𑀮𑀺𑀖𑀲𑀗𑁆𑀔𑀸𑀢𑀸 𑀮𑀗𑁆𑀕𑀻 𑀤𑀼𑀭𑀼𑀕𑁆𑀖𑀸𑀝𑀸 𑀳𑁄𑀢𑀺, 𑀏𑀯𑀫𑀬𑀫𑁆𑀧𑀺 𑀮𑀗𑁆𑀕𑀻 𑀯𑀺𑀬𑀸𑀢𑀺 𑀮𑀗𑁆𑀕𑀻. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀗𑁆𑀕𑀳𑀯𑀸𑀭𑀲𑀼𑀜𑁆𑀜𑀢𑀯𑀸𑀭𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑀼𑀢𑀺𑀬𑀘𑀺𑀢𑁆𑀢𑀁

𑁩𑁯𑁯. 𑀤𑀼𑀢𑀺𑀬𑀘𑀺𑀢𑁆𑀢𑁂 𑀲𑀲𑀗𑁆𑀔𑀸𑀭𑁂𑀦𑀸𑀢𑀺 𑀧𑀤𑀁 𑀯𑀺𑀲𑁂𑀲𑀁. 𑀢𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀓𑀺𑀜𑁆𑀘𑀸𑀧𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁄𑀫𑀦𑀲𑁆𑀲𑀺𑀢𑀲𑁆𑀲 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘𑀲𑀢𑁆𑀢𑁄 𑀲𑀢𑁆𑀢𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀸𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀢𑁆𑀢𑀸 𑀲𑀧𑁆𑀧𑀬𑁄𑀕𑁂𑀦 𑀲𑀉𑀧𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑁋 𑀬𑀤𑀸 𑀓𑀼𑀮𑀧𑀼𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀓𑀼𑀮𑀲𑁆𑀲 𑀓𑀼𑀫𑀸𑀭𑀺𑀓𑀁 𑀧𑀢𑁆𑀣𑁂𑀢𑀺. 𑀢𑁂 𑀘 ‘𑀅𑀜𑁆𑀜𑀤𑀺𑀝𑁆𑀞𑀺𑀓𑀸 𑀢𑀼𑀫𑁆𑀳𑁂’𑀢𑀺 𑀓𑀼𑀫𑀸𑀭𑀺𑀓𑀁 𑀦 𑀤𑁂𑀦𑁆𑀢𑀺. 𑀅𑀣𑀜𑁆𑀜𑁂 𑀜𑀸𑀢𑀓𑀸 ‘𑀬𑀁 𑀢𑀼𑀫𑁆𑀳𑁂 𑀓𑀭𑁄𑀣 𑀢𑀫𑁂𑀯𑀸𑀬𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀤𑀸𑀧𑁂𑀦𑁆𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀺𑀢𑁆𑀣𑀺𑀬𑁂 𑀉𑀧𑀲𑀗𑁆𑀓𑀫𑀢𑀺. 𑀆𑀤𑀺𑀢𑁄𑀯 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀢𑁂𑀲𑀁 𑀓𑀺𑀭𑀺𑀬𑀸 𑀫𑀦𑀸𑀧𑀸𑀢𑀺 𑀮𑀤𑁆𑀥𑀺𑀁 𑀭𑁄𑀘𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺 𑁋 𑀏𑀯𑀭𑀽𑀧𑁂 𑀓𑀸𑀮𑁂 𑀇𑀤𑀁 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑁂𑀯𑀸𑀧𑀦𑀓𑁂𑀲𑀼 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀁 𑀅𑀥𑀺𑀓𑀁. 𑀢𑀢𑁆𑀣 𑀣𑀺𑀦𑀦𑀢𑀸 ‘𑀣𑀺𑀦𑀁’. 𑀫𑀺𑀤𑁆𑀥𑀦𑀢𑀸 ‘𑀫𑀺𑀤𑁆𑀥𑀁’; 𑀅𑀦𑀼𑀲𑁆𑀲𑀸𑀳𑀲𑀁𑀳𑀦𑀦𑀢𑀸 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀢𑀢𑁆𑀣 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀮𑀓𑁆𑀔𑀡𑀁, 𑀯𑀻𑀭𑀺𑀬𑀯𑀺𑀦𑁄𑀤𑀦𑀭𑀲𑀁, 𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀫𑀺𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀑𑀦𑀳𑀦𑀭𑀲𑀁, 𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸. 𑀉𑀪𑀬𑀫𑁆𑀧𑀺 𑀅𑀭𑀢𑀺𑀢𑀦𑁆𑀤𑀻𑀯𑀺𑀚𑀫𑁆𑀪𑀺𑀢𑀸𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀦𑁆𑀢𑀺.

𑀢𑀢𑀺𑀬𑀘𑀺𑀢𑁆𑀢𑀁

𑁪𑁦𑁦. 𑀢𑀢𑀺𑀬𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁄𑀫𑀦𑀲𑁆𑀲𑀺𑀢𑀲𑁆𑀲 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘𑀲𑀢𑁆𑀢𑁄 𑀲𑀢𑁆𑀢𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀭𑀸𑀫𑀲𑀦𑁆𑀢𑀲𑁆𑀲 𑀦𑀸𑀭𑀸𑀬𑀡𑀯𑀺𑀭𑀸𑀚𑀦𑀫𑀮𑁆𑀮𑀬𑀼𑀤𑁆𑀥𑀦𑀝𑀲𑀫𑀚𑁆𑀚𑀸𑀤𑀻𑀦𑀺 𑀧𑀲𑁆𑀲𑀢𑁄 𑀫𑀦𑀸𑀧𑀺𑀬𑀲𑀤𑁆𑀤𑀲𑀯𑀦𑀸𑀤𑀺𑀧𑀲𑀼𑀢𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀥 𑀫𑀸𑀦𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀅𑀧𑀡𑁆𑀡𑀓𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀫𑀜𑁆𑀜𑀢𑀻𑀢𑀺 ‘𑀫𑀸𑀦𑁄’. 𑀲𑁄 𑀉𑀦𑁆𑀦𑀢𑀺𑀮𑀓𑁆𑀔𑀡𑁄, 𑀲𑀫𑁆𑀧𑀕𑁆𑀕𑀳𑀭𑀲𑁄, 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄, 𑀉𑀫𑁆𑀫𑀸𑀤𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺.

𑀘𑀢𑀼𑀢𑁆𑀣𑀘𑀺𑀢𑁆𑀢𑀁

𑁪𑁦𑁨. 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀏𑀯 𑀞𑀸𑀦𑁂𑀲𑀼 𑀬𑀤𑀸 𑀲𑀻𑀲𑁂 𑀔𑁂𑀴𑀁 𑀔𑀺𑀧𑀦𑁆𑀢𑀺, 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀦𑁆𑀢𑀺, 𑀢𑀤𑀸 𑀢𑀲𑁆𑀲 𑀧𑀭𑀺𑀳𑀭𑀡𑀢𑁆𑀣𑀁 𑀲𑀉𑀲𑁆𑀲𑀸𑀳𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀭𑀸𑀚𑀦𑀸𑀝𑀓𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀢𑁂𑀦 𑀢𑁂𑀦 𑀙𑀺𑀤𑁆𑀤𑁂𑀦 𑀑𑀮𑁄𑀓𑁂𑀦𑁆𑀢𑀸𑀦𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀚𑁆𑀚𑀢𑀺. 𑀇𑀥 𑀧𑀦 𑀣𑀺𑀦𑀫𑀺𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀭𑀺𑀳𑀸𑀬𑀢𑀺. 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀥𑀫𑁆𑀫𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀜𑁆𑀘𑀫𑀘𑀺𑀢𑁆𑀢𑀁

𑁪𑁦𑁩. 𑀧𑀜𑁆𑀘𑀫𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑁂𑀤𑀦𑀸𑀯𑀲𑁂𑀦 𑀫𑀚𑁆𑀛𑀢𑁆𑀢𑀲𑁆𑀲 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘𑀲𑀢𑁆𑀢𑁄 𑀲𑀢𑁆𑀢𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀸𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀧𑀦𑁂𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀳𑁄𑀢𑀺, 𑀧𑀻𑀢𑀺𑀧𑀤𑀁 𑀧𑀭𑀺𑀳𑀸𑀬𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀧𑀞𑀫𑀘𑀺𑀢𑁆𑀢𑀲𑀤𑀺𑀲𑀫𑁂𑀯.

𑀙𑀝𑁆𑀞𑀘𑀺𑀢𑁆𑀢𑀸𑀤𑀺

𑁪𑁦𑁯-𑁪𑁧𑁨. 𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀸𑀦𑀺𑀧𑀺 𑀯𑁂𑀤𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀻𑀢𑀺𑀧𑀤𑀜𑁆𑀘 𑀳𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀻𑀢𑀺 𑀤𑁆𑀯𑁂𑀧𑀺 𑀅𑀥𑀺𑀧𑀢𑀬𑁄 𑀮𑀩𑁆𑀪𑀦𑁆𑀢𑀺.

𑀦𑀯𑀫𑀘𑀺𑀢𑁆𑀢𑀁

𑁪𑁧𑁩. 𑀦𑀯𑀫𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀤𑁄𑀫𑀦𑀲𑁆𑀲𑀺𑀢𑀲𑁆𑀲 𑀧𑀝𑀺𑀖𑀁 𑀉𑀧𑁆𑀧𑀸𑀤𑀬𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀦𑀯𑀸𑀭𑁂 𑀢𑀸𑀯 𑀤𑀼𑀝𑁆𑀞𑀼 𑀫𑀦𑁄, 𑀳𑀻𑀦𑀯𑁂𑀤𑀦𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀫𑀦𑁄𑀢𑀺 𑀤𑀼𑀫𑁆𑀫𑀦𑁄; 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀢𑁂𑀦 𑀲𑀳𑀕𑀢𑀦𑁆𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀅𑀲𑀫𑁆𑀧𑀺𑀬𑀸𑀬𑀦𑀪𑀸𑀯𑁂𑀦 𑀆𑀭𑀫𑁆𑀫𑀡𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀖𑀁. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁.

𑀥𑀫𑁆𑀫𑀼𑀤𑁆𑀤𑁂𑀲𑁂 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀯 𑀆𑀕𑀢𑀸. 𑀢𑀢𑁆𑀣 𑀯𑁂𑀤𑀦𑀸𑀧𑀤𑀁 𑀯𑀼𑀢𑁆𑀢𑀫𑁂𑀯. 𑀢𑀣𑀸 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀧𑀤𑀸𑀦𑀺 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀬𑀣𑀸𑀢𑀣𑀸 𑀯𑀸 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁.

𑀫𑀽𑀮𑀓𑀫𑁆𑀫𑀧𑀣𑁂𑀲𑀼 𑀬𑀣𑀸 𑀧𑀼𑀭𑀺𑀫𑀘𑀺𑀢𑁆𑀢𑁂𑀲𑀼 𑀮𑁄𑀪𑁄 𑀳𑁄𑀢𑀺, 𑀅𑀪𑀺𑀚𑁆𑀛𑀸 𑀳𑁄𑀢𑀻𑀢𑀺 𑀆𑀕𑀢𑀁, 𑀏𑀯𑀁 𑀤𑁄𑀲𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀝𑀸𑀲𑀺𑀯𑀺𑀲𑁄 𑀯𑀺𑀬, 𑀯𑀺𑀲𑀧𑁆𑀧𑀦𑀭𑀲𑁄 𑀯𑀺𑀲𑀦𑀺𑀧𑀸𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸 𑀤𑀸𑀯𑀕𑁆𑀕𑀺 𑀯𑀺𑀬, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀩𑁆𑀬𑀸𑀧𑀚𑁆𑀚𑀢𑀺 𑀢𑁂𑀦 𑀘𑀺𑀢𑁆𑀢𑀁, 𑀧𑀽𑀢𑀺𑀪𑀸𑀯𑀁 𑀉𑀧𑀕𑀘𑁆𑀙𑀢𑀺, 𑀩𑁆𑀬𑀸𑀧𑀸𑀤𑀬𑀢𑀺 𑀯𑀸 𑀯𑀺𑀦𑀬𑀸𑀘𑀸𑀭𑀭𑀽𑀧𑀲𑀫𑁆𑀧𑀢𑁆𑀢𑀺𑀳𑀺𑀢𑀲𑀼𑀔𑀸𑀤𑀻𑀦𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀅𑀢𑁆𑀣𑀢𑁄 𑀧𑀦𑁂𑀲 𑀤𑁄𑀲𑁄𑀬𑁂𑀯. 𑀇𑀥 𑀧𑀤𑀧𑀝𑀺𑀧𑀸𑀝𑀺𑀬𑀸 𑀏𑀓𑀽𑀦𑀢𑀺𑀁𑀲 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀼𑀤𑁆𑀤𑀲. 𑀢𑁂𑀲𑀁 𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀭𑀸𑀲𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁂𑀯𑀸𑀧𑀦𑀓𑁂𑀲𑀼 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀉𑀤𑁆𑀥𑀘𑁆𑀘𑀸𑀦𑀺 𑀦𑀺𑀬𑀢𑀸𑀦𑀺. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑁂𑀲𑀼 𑀧𑀦 𑀅𑀜𑁆𑀜𑀢𑀭𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀧𑀜𑁆𑀘 𑀳𑀼𑀢𑁆𑀯𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁂𑀧𑀺 𑀢𑀬𑁄 𑀥𑀫𑁆𑀫𑀸 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑀸 𑀦𑀸𑀫. 𑀢𑁂𑀲𑀼 𑀇𑀲𑁆𑀲𑀢𑀻𑀢𑀺 ‘𑀇𑀲𑁆𑀲𑀸’. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸, 𑀢𑀢𑁆𑀣𑁂𑀯 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸. 𑀲𑀁𑀬𑁄𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀘𑁆𑀙𑁂𑀭𑀪𑀸𑀯𑁄 ‘𑀫𑀘𑁆𑀙𑀭𑀺𑀬𑀁’. 𑀢𑀁 𑀮𑀤𑁆𑀥𑀸𑀦𑀁 𑀯𑀸 𑀮𑀪𑀺𑀢𑀩𑁆𑀩𑀸𑀦𑀁 𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑀽𑀳𑀦𑀮𑀓𑁆𑀔𑀡𑀁, 𑀢𑀸𑀲𑀁𑀬𑁂𑀯 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀓𑁆𑀔𑀫𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀓𑀝𑀼𑀓𑀜𑁆𑀘𑀼𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁. 𑀘𑁂𑀢𑀲𑁄 𑀯𑀺𑀭𑀽𑀧𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁. 𑀢𑀲𑁆𑀲 𑀪𑀸𑀯𑁄 ‘𑀓𑀼𑀓𑁆𑀓𑀼𑀘𑁆𑀘𑀁’. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁. 𑀤𑀸𑀲𑀩𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀢𑀸𑀯 𑀉𑀤𑁆𑀤𑁂𑀲𑀯𑀸𑀭𑁂 𑀯𑀺𑀲𑁂𑀲𑁄.

𑁪𑁧𑁫. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑁂𑀤𑀦𑀸𑀦𑀺𑀤𑁆𑀤𑁂𑀲𑁂 𑀅𑀲𑀸𑀢𑀁 𑀲𑀸𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁪𑁧𑁮. 𑀤𑁄𑀲𑀦𑀺𑀤𑁆𑀤𑁂𑀲𑁂 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀤𑀼𑀲𑁆𑀲𑀦𑀸𑀢𑀺 𑀤𑀼𑀲𑁆𑀲𑀦𑀸𑀓𑀸𑀭𑁄. 𑀤𑀼𑀲𑁆𑀲𑀺𑀢𑀢𑁆𑀢𑀦𑁆𑀢𑀺 𑀤𑀼𑀲𑁆𑀲𑀺𑀢𑀪𑀸𑀯𑁄. 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀝𑁆𑀞𑁂𑀦 𑀩𑁆𑀬𑀸𑀧𑀚𑁆𑀚𑀦𑀁 𑀩𑁆𑀬𑀸𑀧𑀢𑁆𑀢𑀺. 𑀩𑁆𑀬𑀸𑀧𑀚𑁆𑀚𑀦𑀸𑀢𑀺 𑀩𑁆𑀬𑀸𑀧𑀚𑁆𑀚𑀦𑀸𑀓𑀸𑀭𑁄. 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀺𑀭𑁄𑀥𑁄. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀧𑀝𑀺𑀯𑀺𑀭𑁄𑀥𑁄. 𑀯𑀺𑀭𑀼𑀤𑁆𑀥𑀸𑀓𑀸𑀭𑀧𑀝𑀺𑀯𑀺𑀭𑀼𑀤𑁆𑀥𑀸𑀓𑀸𑀭𑀯𑀲𑁂𑀦 𑀯𑀸 𑀇𑀤𑀁 𑀯𑀼𑀢𑁆𑀢𑀁. 𑀘𑀡𑁆𑀟𑀺𑀓𑁄 𑀯𑀼𑀘𑁆𑀘𑀢𑀺 𑀘𑀡𑁆𑀟𑁄, 𑀣𑀤𑁆𑀥𑀧𑀼𑀕𑁆𑀕𑀮𑁄; 𑀢𑀲𑁆𑀲 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁. 𑀦 𑀏𑀢𑁂𑀦 𑀲𑀼𑀭𑁄𑀧𑀺𑀢𑀁 𑀯𑀘𑀦𑀁 𑀳𑁄𑀢𑀺, 𑀤𑀼𑀭𑀼𑀢𑁆𑀢𑀁 𑀅𑀧𑀭𑀺𑀧𑀼𑀡𑁆𑀡𑀫𑁂𑀯 𑀳𑁄𑀢𑀻𑀢𑀺 𑀅𑀲𑀼𑀭𑁄𑀧𑁄. 𑀓𑀼𑀤𑁆𑀥𑀓𑀸𑀮𑁂 𑀳𑀺 𑀧𑀭𑀺𑀧𑀼𑀡𑁆𑀡𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀘𑁂𑀧𑀺 𑀓𑀲𑁆𑀲𑀘𑀺 𑀳𑁄𑀢𑀺 𑀢𑀁 𑀅𑀧𑁆𑀧𑀫𑀸𑀡𑀁. 𑀅𑀧𑀭𑁂 𑀧𑀦 𑀅𑀲𑁆𑀲𑀼𑀚𑀦𑀦𑀝𑁆𑀞𑁂𑀦 𑀅𑀲𑁆𑀲𑀼𑀭𑁄𑀧𑀦𑀢𑁄 𑀅𑀲𑁆𑀲𑀼𑀭𑁄𑀧𑁄𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁, 𑀲𑁄𑀫𑀦𑀲𑁆𑀲𑀲𑁆𑀲𑀸𑀧𑀺 𑀅𑀲𑁆𑀲𑀼𑀚𑀦𑀦𑀢𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀅𑀢𑁆𑀢𑀫𑀦𑀢𑀸𑀧𑀝𑀺𑀧𑀓𑁆𑀔𑀢𑁄 𑀦 𑀅𑀢𑁆𑀢𑀫𑀦𑀢𑀸𑀢𑀺 𑀅𑀦𑀢𑁆𑀢𑀫𑀦𑀢𑀸. 𑀲𑀸 𑀧𑀦 𑀬𑀲𑁆𑀫𑀸 𑀘𑀺𑀢𑁆𑀢𑀲𑁆𑀲𑁂𑀯, 𑀦 𑀲𑀢𑁆𑀢𑀲𑁆𑀲, 𑀢𑀲𑁆𑀫𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀲𑀗𑁆𑀕𑀳𑀲𑀼𑀜𑁆𑀜𑀢𑀯𑀸𑀭𑁂𑀲𑀼 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀲𑀫𑀘𑀺𑀢𑁆𑀢𑀁

𑁪𑁨𑁧. 𑀤𑀲𑀫𑀁 𑀲𑀲𑀗𑁆𑀔𑀸𑀭𑀢𑁆𑀢𑀸 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑀲𑁆𑀲 𑀯𑀸, 𑀧𑀭𑁂𑀲𑀁 𑀯𑀸 𑀅𑀧𑀭𑀸𑀥𑀁 𑀲𑀸𑀭𑀺𑀢𑀲𑁆𑀲, 𑀲𑀬𑀫𑁂𑀯 𑀯𑀸 𑀧𑀭𑁂𑀲𑀁 𑀅𑀧𑀭𑀸𑀥𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀓𑀼𑀚𑁆𑀛𑀫𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀢𑀺.

𑀇𑀥𑀸𑀧𑀺 𑀧𑀤𑀧𑀝𑀺𑀧𑀸𑀝𑀺𑀬𑀸 𑀏𑀓𑀽𑀦𑀢𑀺𑀁𑀲, 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘 𑀘𑀼𑀤𑁆𑀤𑀲𑁂𑀯 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀬𑁂𑀯𑀸𑀧𑀦𑀓𑁂𑀲𑀼 𑀧𑀦 𑀣𑀺𑀦𑀫𑀺𑀤𑁆𑀥𑀫𑁆𑀧𑀺 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀯𑀺𑀦𑀸 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑁂𑀳𑀺 𑀘𑀢𑁆𑀢𑀸𑀭𑀺 𑀅𑀧𑀡𑁆𑀡𑀓𑀗𑁆𑀕𑀸𑀦𑀺 𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀇𑀫𑁂 𑀙 𑀇𑀲𑁆𑀲𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀬𑁂𑀯𑀸𑀧𑀦𑀓𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀲𑀩𑁆𑀩𑀯𑀸𑀭𑁂𑀲𑀼 𑀦𑀯𑀫𑀲𑀤𑀺𑀲𑀫𑁂𑀯. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀸𑀥𑀺𑀧𑀢𑀺𑀬𑁂𑀯 𑀮𑀩𑁆𑀪𑀢𑀺, 𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺. 𑀦 𑀳𑀺 𑀓𑀼𑀤𑁆𑀥𑁄 𑀓𑀺𑀜𑁆𑀘𑀺 𑀕𑀭𑀼𑀁 𑀓𑀭𑁄𑀢𑀻𑀢𑀺.

𑀏𑀓𑀸𑀤𑀲𑀫𑀘𑀺𑀢𑁆𑀢𑀁

𑁪𑁨𑁨. 𑀏𑀓𑀸𑀤𑀲𑀫𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑁂𑀤𑀦𑀸𑀯𑀲𑁂𑀦 𑀫𑀚𑁆𑀛𑀢𑁆𑀢𑀲𑁆𑀲 𑀓𑀗𑁆𑀔𑀸𑀧𑀯𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀦𑁂 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀧𑀤𑀁 𑀅𑀧𑀼𑀩𑁆𑀩𑀁. 𑀢𑀲𑁆𑀲𑀢𑁆𑀣𑁄 𑁋 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁. 𑀥𑀫𑁆𑀫𑀼𑀤𑁆𑀤𑁂𑀲𑁂 ‘𑀯𑀺𑀘𑀺𑀓𑀺𑀘𑁆𑀙𑀸 𑀳𑁄𑀢𑀻’𑀢𑀺 𑀧𑀤𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀪𑀸𑀯𑀁 𑀯𑀸 𑀯𑀺𑀘𑀺𑀦𑀦𑁆𑀢𑁄 𑀏𑀢𑀸𑀬 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀦𑁂𑀓𑀁𑀲𑀕𑀸𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸. 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀇𑀥 𑀧𑀤𑀧𑀝𑀺𑀧𑀸𑀝𑀺𑀬𑀸 𑀢𑁂𑀯𑀻𑀲𑀢𑀺 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀼𑀤𑁆𑀤𑀲. 𑀢𑁂𑀲𑀁 𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀭𑀸𑀲𑀺𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀲𑀺𑀓𑀸𑀭𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀤𑁆𑀯𑁂𑀬𑁂𑀯 𑀬𑁂𑀯𑀸𑀧𑀦𑀓𑀸.

𑁪𑁨𑁪. 𑀦𑀺𑀤𑁆𑀤𑁂𑀲𑀯𑀸𑀭𑀲𑁆𑀲 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀇𑀤𑀁 𑀤𑀼𑀩𑁆𑀩𑀮𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀓𑀫𑁂𑀯𑁂𑀢𑁆𑀣 𑀳𑁄𑀢𑀺, 𑀢𑀲𑁆𑀫𑀸 ‘𑀲𑀡𑁆𑀞𑀺𑀢𑀻’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 ‘𑀞𑀺𑀢𑀻’𑀢𑀺 𑀏𑀓𑀫𑁂𑀯 𑀧𑀤𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀉𑀤𑁆𑀤𑁂𑀲𑀯𑀸𑀭𑁂𑀧𑀺 ‘𑀲𑀫𑀸𑀥𑀺𑀦𑁆𑀤𑁆𑀭𑀺𑀬’𑀦𑁆𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁.

𑁪𑁨𑁫. 𑀯𑀺𑀘𑀺𑀓𑀺𑀘𑁆𑀙𑀸𑀦𑀺𑀤𑁆𑀤𑁂𑀲𑁂 𑀓𑀗𑁆𑀔𑀦𑀯𑀲𑁂𑀦 𑀓𑀗𑁆𑀔𑀸. 𑀓𑀗𑁆𑀔𑀸𑀬 𑀆𑀬𑀦𑀸𑀢𑀺 𑀓𑀗𑁆𑀔𑀸𑀬𑀦𑀸. 𑀧𑀼𑀭𑀺𑀫𑀓𑀗𑁆𑀔𑀸 𑀳𑀺 𑀉𑀢𑁆𑀢𑀭𑀓𑀗𑁆𑀔𑀁 𑀆𑀦𑁂𑀢𑀺 𑀦𑀸𑀫. 𑀆𑀓𑀸𑀭𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀓𑀗𑁆𑀔𑀸𑀲𑀫𑀗𑁆𑀕𑀺𑀘𑀺𑀢𑁆𑀢𑀁 𑀓𑀗𑁆𑀔𑀸𑀬 𑀆𑀬𑀺𑀢𑀢𑁆𑀢𑀸 𑀓𑀗𑁆𑀔𑀸𑀬𑀺𑀢𑀁 𑀦𑀸𑀫. 𑀢𑀲𑁆𑀲 𑀪𑀸𑀯𑁄 𑀓𑀗𑁆𑀔𑀸𑀬𑀺𑀢𑀢𑁆𑀢𑀁. 𑀯𑀺𑀫𑀢𑀻𑀢𑀺 𑀦𑀫𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀓𑀫𑁆𑀧𑀦𑀝𑁆𑀞𑁂𑀦 𑀤𑁆𑀯𑀺𑀥𑀸 𑀏𑀴𑀬𑀢𑀻𑀢𑀺 𑀤𑁆𑀯𑁂𑀴𑁆𑀳𑀓𑀁. 𑀧𑀝𑀺𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀤𑁆𑀯𑀺𑀥𑀸𑀧𑀣𑁄 𑀯𑀺𑀬𑀸𑀢𑀺 𑀤𑁆𑀯𑁂𑀥𑀸𑀧𑀣𑁄. ‘𑀦𑀺𑀘𑁆𑀘𑀁 𑀦𑀼 𑀔𑁄 𑀇𑀤𑀁, 𑀅𑀦𑀺𑀘𑁆𑀘𑀁 𑀦𑀼 𑀔𑁄’𑀢𑀺𑀆𑀤𑀺𑀧𑀯𑀢𑁆𑀢𑀺𑀬𑀸 𑀏𑀓𑀲𑁆𑀫𑀺𑀁 𑀆𑀓𑀸𑀭𑁂 𑀲𑀡𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀲𑀫𑀦𑁆𑀢𑀢𑁄 𑀲𑁂𑀢𑀻𑀢𑀺 𑀲𑀁𑀲𑀬𑁄. 𑀏𑀓𑀁𑀲𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀏𑀓𑀁𑀲𑀕𑁆𑀕𑀸𑀳𑁄𑀢𑀺 𑀅𑀦𑁂𑀓𑀁𑀲𑀕𑁆𑀕𑀸𑀳𑁄. 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀆𑀭𑀫𑁆𑀫𑀡𑀢𑁄 𑀑𑀲𑀓𑁆𑀓𑀢𑀻𑀢𑀺 𑀆𑀲𑀧𑁆𑀧𑀦𑀸. 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀭𑀺𑀲𑀫𑀦𑁆𑀢𑀢𑁄 𑀲𑀧𑁆𑀧𑀢𑀻𑀢𑀺 𑀧𑀭𑀺𑀲𑀧𑁆𑀧𑀦𑀸. 𑀧𑀭𑀺𑀬𑁄𑀕𑀸𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀧𑀭𑀺𑀬𑁄𑀕𑀸𑀳𑀦𑀸. 𑀦𑀺𑀘𑁆𑀙𑀬𑀯𑀲𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀣𑀫𑁆𑀪𑀺𑀢𑀢𑁆𑀢𑀁; 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸 𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀣𑀤𑁆𑀥𑀁 𑀓𑀭𑁄𑀢𑀺. 𑀬𑀲𑁆𑀫𑀸 𑀧𑀦𑁂𑀲𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀫𑀦𑀁 𑀯𑀺𑀮𑀺𑀔𑀦𑁆𑀢𑀻 𑀯𑀺𑀬, 𑀢𑀲𑁆𑀫𑀸 𑀫𑀦𑁄𑀯𑀺𑀮𑁂𑀔𑁄𑀢𑀺 𑀯𑀼𑀢𑁆𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑁆𑀯𑀸𑀤𑀲𑀫𑀘𑀺𑀢𑁆𑀢𑀁

𑁪𑁨𑁭. 𑀤𑁆𑀯𑀸𑀤𑀲𑀫𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀦𑁂 𑀉𑀤𑁆𑀥𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑁂𑀤𑀦𑀸𑀯𑀲𑁂𑀦 𑀫𑀚𑁆𑀛𑀢𑁆𑀢𑀁 𑀳𑀼𑀢𑁆𑀯𑀸 𑀉𑀤𑁆𑀥𑀢𑀁 𑀳𑁄𑀢𑀺. 𑀇𑀥 𑀥𑀫𑁆𑀫𑀼𑀤𑁆𑀤𑁂𑀲𑁂 ‘𑀯𑀺𑀘𑀺𑀓𑀺𑀘𑁆𑀙𑀸’-𑀞𑀸𑀦𑁂 ‘𑀉𑀤𑁆𑀥𑀘𑁆𑀘𑀁 𑀳𑁄𑀢𑀻’𑀢𑀺 𑀆𑀕𑀢𑀁. 𑀧𑀤𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀯𑀻𑀲𑀢𑀺 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀼𑀤𑁆𑀤𑀲. 𑀢𑁂𑀲𑀁 𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀭𑀸𑀲𑀺𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄𑀢𑀺 𑀤𑁆𑀯𑁂𑀬𑁂𑀯 𑀬𑁂𑀯𑀸𑀧𑀦𑀓𑀸.

𑁪𑁨𑁯. 𑀦𑀺𑀤𑁆𑀤𑁂𑀲𑀯𑀸𑀭𑀲𑁆𑀲 𑀉𑀤𑁆𑀥𑀘𑁆𑀘𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀲𑁆𑀲𑀸𑀢𑀺 𑀦 𑀲𑀢𑁆𑀢𑀲𑁆𑀲, 𑀦 𑀧𑁄𑀲𑀲𑁆𑀲. 𑀉𑀤𑁆𑀥𑀘𑁆𑀘𑀦𑁆𑀢𑀺 𑀉𑀤𑁆𑀥𑀢𑀸𑀓𑀸𑀭𑁄. 𑀦 𑀯𑀽𑀧𑀲𑀫𑁄𑀢𑀺 𑀅𑀯𑀽𑀧𑀲𑀫𑁄. 𑀘𑁂𑀢𑁄 𑀯𑀺𑀓𑁆𑀔𑀺𑀧𑀢𑀻𑀢𑀺 𑀘𑁂𑀢𑀲𑁄𑀯𑀺𑀓𑁆𑀔𑁂𑀧𑁄. 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀪𑀦𑁆𑀢𑀪𑀸𑀯𑁄, 𑀪𑀦𑁆𑀢𑀬𑀸𑀦𑀪𑀦𑁆𑀢𑀕𑁄𑀡𑀸𑀤𑀻𑀦𑀺 𑀯𑀺𑀬. 𑀇𑀫𑀺𑀦𑀸 𑀏𑀓𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀯𑀺𑀧𑁆𑀨𑀦𑁆𑀤𑀦𑀁 𑀓𑀣𑀺𑀢𑀁. 𑀉𑀤𑁆𑀥𑀘𑁆𑀘𑀜𑁆𑀳𑀺 𑀏𑀓𑀸𑀭𑀫𑁆𑀫𑀡𑁂 𑀯𑀺𑀧𑁆𑀨𑀦𑁆𑀤𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀦𑀸𑀦𑀸𑀭𑀫𑁆𑀫𑀡𑁂. 𑀲𑁂𑀲𑀁 𑀲𑀩𑁆𑀩𑀯𑀸𑀭𑁂𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀤𑁆𑀯𑀬𑁂 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. ‘𑀆𑀭𑀫𑁆𑀫𑀡𑁂 𑀧𑀯𑀝𑁆𑀝𑀦𑀓𑀘𑀺𑀢𑁆𑀢𑀸𑀦𑀺 𑀦𑀸𑀫 𑀓𑀢𑀻’𑀢𑀺? 𑀳𑀺 𑀯𑀼𑀢𑁆𑀢𑁂 ‘𑀇𑀫𑀸𑀦𑁂𑀯 𑀤𑁆𑀯𑁂’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀏𑀓𑀦𑁆𑀢𑁂𑀦 𑀧𑀯𑀝𑁆𑀝𑀢𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀦 𑀮𑀤𑁆𑀥𑀸𑀥𑀺𑀫𑁄𑀓𑁆𑀔𑀢𑁆𑀢𑀸 𑀮𑀤𑁆𑀥𑀧𑀢𑀺𑀝𑁆𑀞𑀁 𑀧𑀯𑀝𑁆𑀝𑀢𑀺. 𑀬𑀣𑀸 𑀳𑀺 𑀯𑀝𑁆𑀝𑀘𑀢𑀼𑀭𑀲𑁆𑀲𑁂𑀲𑀼 𑀤𑁆𑀯𑀻𑀲𑀼 𑀫𑀡𑀻𑀲𑀼 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀧𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑁂𑀲𑀼 𑀯𑀝𑁆𑀝𑀫𑀡𑀺 𑀏𑀓𑀦𑁆𑀢𑁂𑀦𑁂𑀯 𑀧𑀯𑀝𑁆𑀝𑀢𑀺, 𑀘𑀢𑀼𑀭𑀲𑁆𑀲𑁄 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀬 𑀧𑀯𑀝𑁆𑀝𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀼𑀧𑀺 𑀳𑀻𑀦𑀸𑀤𑀺𑀪𑁂𑀤𑁄 𑀦 𑀉𑀤𑁆𑀥𑀝𑁄, 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑀳𑀻𑀦𑀢𑁆𑀢𑀸. 𑀲𑀳𑀚𑀸𑀢𑀸𑀥𑀺𑀧𑀢𑀺 𑀮𑀩𑁆𑀪𑀫𑀸𑀦𑁄𑀧𑀺 𑀦 𑀉𑀤𑁆𑀥𑀝𑁄, 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀢𑁆𑀢𑀸. 𑀜𑀸𑀡𑀸𑀪𑀸𑀯𑀢𑁄 𑀧𑀦𑁂𑀢𑁆𑀣 𑀯𑀻𑀫𑀁𑀲𑀸𑀥𑀺𑀧𑀢𑀺 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀙𑀺𑀫𑀤𑁆𑀯𑀬𑁂 𑀲𑁂𑀲𑁄𑀧𑀺 𑀦𑀢𑁆𑀣𑀺 𑀏𑀯. 𑀓𑀲𑁆𑀫𑀸? 𑀓𑀜𑁆𑀘𑀺 𑀥𑀫𑁆𑀫𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀧𑀝𑁆𑀞𑀸𑀦𑁂 𑀘 𑀧𑀝𑀺𑀲𑀺𑀤𑁆𑀥𑀢𑁄.

𑀇𑀫𑁂𑀳𑀺 𑀧𑀦 𑀤𑁆𑀯𑀸𑀤𑀲𑀳𑀺𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂, 𑀞𑀧𑁂𑀢𑁆𑀯𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀁, 𑀲𑁂𑀲𑀸𑀦𑀺 𑀏𑀓𑀸𑀤𑀲𑁂𑀯 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀦𑁆𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀅𑀮𑀤𑁆𑀥𑀸𑀥𑀺𑀫𑁄𑀓𑁆𑀔𑁂 𑀤𑀼𑀩𑁆𑀩𑀮𑁂𑀧𑀺 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀫𑀸𑀦𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀮𑀤𑁆𑀥𑀸𑀥𑀺𑀫𑁄𑀓𑁆𑀔𑀁 𑀩𑀮𑀯𑀁 𑀓𑀲𑁆𑀫𑀸 𑀦𑀸𑀓𑀟𑁆𑀠𑀢𑀻𑀢𑀺? 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀪𑀸𑀯𑀢𑁄. 𑀬𑀤𑀺 𑀳𑀺 𑀆𑀓𑀟𑁆𑀠𑁂𑀬𑁆𑀬 ‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩’-𑀧𑀤𑀯𑀺𑀪𑀗𑁆𑀕𑁂 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀫𑀸, 𑀞𑀧𑁂𑀢𑁆𑀯𑀸 𑀢𑀁, 𑀲𑁂𑀲𑀸𑀦𑀺 𑀏𑀓𑀸𑀤𑀲 𑀆𑀓𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀳𑀺 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑀸𑀬 𑀘𑁂𑀢𑀦𑀸𑀬 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀺. 𑀇𑀢𑀭𑀲𑁆𑀲𑀸𑀧𑀺 𑀏𑀢𑁆𑀣𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 ‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩’-𑀧𑀤𑀯𑀺𑀪𑀗𑁆𑀕𑁂 𑀦𑀸𑀕𑀢𑀦𑁆𑀢𑀺.

𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀧𑀤𑀲𑁆𑀲 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀧𑀤𑀁

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑁄

𑁪𑁩𑁧. 𑀇𑀤𑀸𑀦𑀺 𑀅𑀩𑁆𑀬𑀸𑀓𑀢𑀧𑀤𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀅𑀩𑁆𑀬𑀸𑀓𑀢𑀁 𑁋 𑀯𑀺𑀧𑀸𑀓𑀁 𑀓𑀺𑀭𑀺𑀬𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑁂𑀲𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂𑀧𑀺 𑀓𑀼𑀲𑀮𑀯𑀺𑀧𑀸𑀓𑀁. 𑀢𑀲𑁆𑀫𑀺𑀫𑁆𑀧𑀺 𑀧𑀭𑀺𑀢𑁆𑀢𑀯𑀺𑀧𑀸𑀓𑀁. 𑀢𑀲𑁆𑀫𑀺𑀫𑁆𑀧𑀺 𑀅𑀳𑁂𑀢𑀼𑀓𑀁. 𑀢𑀲𑁆𑀫𑀺𑀫𑁆𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀺𑀫𑁆𑀧𑀺 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀲𑁆𑀲𑀸𑀧𑀺, 𑀞𑀧𑁂𑀢𑁆𑀯𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀤𑀺𑀲𑀸𑀥𑀸𑀭𑀡𑀧𑀘𑁆𑀘𑀬𑀁, 𑀅𑀲𑀸𑀥𑀸𑀭𑀡𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦𑁂𑀯 𑀉𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀼𑀁 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀢𑁆𑀢𑀸𑀢𑀺 𑀓𑀢𑀓𑀸𑀭𑀡𑀸. 𑀉𑀧𑀘𑀺𑀢𑀢𑁆𑀢𑀸𑀢𑀺 𑀆𑀘𑀺𑀢𑀢𑁆𑀢𑀸, 𑀯𑀟𑁆𑀠𑀺𑀢𑀓𑀸𑀭𑀡𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀸𑀭𑀡𑀪𑀽𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀢𑁄 𑀯𑀸 𑀧𑀯𑀢𑁆𑀢𑀁, 𑀘𑀓𑁆𑀔𑀼𑀲𑁆𑀫𑀺𑀁 𑀯𑀸 𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀧𑀭𑀢𑁄 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀁, 𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑀧𑀤𑀝𑁆𑀞𑀸𑀦𑀁. 𑀧𑀭𑀢𑁄 𑀆𑀕𑀢𑀸𑀦𑀺 𑀲𑁄𑀢𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑁆𑀤𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸𑀦𑀺 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀲𑀤𑁆𑀤𑀸𑀤𑀺𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀸𑀦𑀺, 𑀲𑀤𑁆𑀤𑀸𑀤𑀺𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺, 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀽𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀸𑀦𑀺.

𑀇𑀥 𑀧𑀤𑀧𑀝𑀺𑀧𑀸𑀝𑀺𑀬𑀸 𑀤𑀲 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀢𑁆𑀢. 𑀢𑁂𑀲𑀼 𑀧𑀜𑁆𑀘 𑀅𑀯𑀺𑀪𑀢𑁆𑀢𑀺𑀓𑀸𑀦𑀺, 𑀤𑁆𑀯𑁂 𑀲𑀯𑀺𑀪𑀢𑁆𑀢𑀺𑀓𑀸𑀦𑀺. 𑀢𑁂𑀲𑀼 𑀘𑀺𑀢𑁆𑀢𑀁 𑀨𑀲𑁆𑀲𑀧𑀜𑁆𑀘𑀓𑀯𑀲𑁂𑀦 𑀘𑁂𑀯 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀘 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀯𑁂𑀤𑀦𑀸 𑀨𑀲𑁆𑀲𑀧𑀜𑁆𑀘𑀓𑀛𑀸𑀦𑀗𑁆𑀕𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀢𑀻𑀲𑀼𑀬𑁂𑀯. 𑀭𑀸𑀲𑀬𑁄𑀧𑀺 𑀇𑀫𑁂𑀯 𑀢𑀬𑁄 𑀳𑁄𑀦𑁆𑀢𑀺. 𑀬𑁂𑀯𑀸𑀧𑀦𑀓𑁄 𑀏𑀓𑁄 𑀫𑀦𑀲𑀺𑀓𑀸𑀭𑁄 𑀏𑀯.

𑁪𑁩𑁬. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀡𑁆𑀟𑀭𑀦𑁆𑀢𑀺 𑀯𑀢𑁆𑀣𑀼𑀢𑁄 𑀯𑀼𑀢𑁆𑀢𑀁. 𑀓𑀼𑀲𑀮𑀜𑁆𑀳𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀢𑀸𑀬 𑀧𑀡𑁆𑀟𑀭𑀁 𑀦𑀸𑀫, 𑀅𑀓𑀼𑀲𑀮𑀁 𑀪𑀯𑀗𑁆𑀕𑀦𑀺𑀲𑁆𑀲𑀦𑁆𑀤𑁂𑀦, 𑀯𑀺𑀧𑀸𑀓𑀁 𑀯𑀢𑁆𑀣𑀼𑀧𑀡𑁆𑀟𑀭𑀢𑁆𑀢𑀸.

𑁪𑁩𑁯. 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀻𑀢𑀺 𑀏𑀓𑀫𑁂𑀯 𑀧𑀤𑀁 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀳𑀺 𑀤𑀼𑀩𑁆𑀩𑀮𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀫𑁂𑀯𑁂𑀢𑁆𑀣 𑀮𑀩𑁆𑀪𑀢𑀺, ‘𑀲𑀡𑁆𑀞𑀺𑀢𑀺𑀅𑀯𑀝𑁆𑀞𑀺𑀢𑀺’-𑀪𑀸𑀯𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀗𑁆𑀕𑀳𑀯𑀸𑀭𑁂 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀦 𑀉𑀤𑁆𑀥𑀝𑀸𑀦𑀺. 𑀓𑀲𑁆𑀫𑀸? 𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀜𑁆𑀳𑀺 𑀛𑀸𑀦𑀁 𑀦𑀸𑀫, 𑀳𑁂𑀢𑀼𑀧𑀘𑁆𑀙𑀺𑀫𑀓𑁄 𑀫𑀕𑁆𑀕𑁄 𑀦𑀸𑀫. 𑀧𑀓𑀢𑀺𑀬𑀸 𑀅𑀯𑀺𑀢𑀓𑁆𑀓𑀘𑀺𑀢𑁆𑀢𑁂 𑀛𑀸𑀦𑀗𑁆𑀕𑀁 𑀦 𑀮𑀩𑁆𑀪𑀢𑀺, 𑀅𑀳𑁂𑀢𑀼𑀓𑀘𑀺𑀢𑁆𑀢𑁂 𑀘 𑀫𑀕𑁆𑀕𑀗𑁆𑀕𑀸𑀦𑀺. 𑀢𑀲𑁆𑀫𑀸 𑀇𑀥 𑀉𑀪𑀬𑀫𑁆𑀧𑀺 𑀦 𑀉𑀤𑁆𑀥𑀝𑀁. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑁂𑀢𑁆𑀣 𑀘𑀢𑀼𑀭𑀗𑁆𑀕𑀺𑀓𑁄𑀬𑁂𑀯 𑀪𑀸𑀚𑀺𑀢𑁄. 𑀲𑀼𑀜𑁆𑀜𑀢𑀯𑀸𑀭𑁄 𑀧𑀸𑀓𑀢𑀺𑀓𑁄𑀬𑁂𑀯. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀺𑀤𑁆𑀤𑁂𑀲𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀓𑁂𑀯𑀮𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 ‘𑀉𑀧𑁂𑀓𑁆𑀔𑀸’ 𑀪𑀸𑀚𑀺𑀢𑀸, 𑀓𑀸𑀬𑀯𑀺𑀜𑁆𑀜𑀸𑀡𑁂 ‘𑀲𑀼𑀔’𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁄𑀧𑀺 𑀘 𑀖𑀝𑁆𑀝𑀦𑀯𑀲𑁂𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀳𑀺 𑀘𑀢𑀽𑀲𑀼 𑀉𑀧𑀸𑀤𑀸𑀭𑀽𑀧𑀫𑁂𑀯 𑀉𑀧𑀸𑀤𑀸𑀭𑀽𑀧𑀁 𑀖𑀝𑁆𑀝𑁂𑀢𑀺, 𑀉𑀧𑀸𑀤𑀸𑀭𑀽𑀧𑁂𑀬𑁂𑀯 𑀉𑀧𑀸𑀤𑀸𑀭𑀽𑀧𑀁 𑀖𑀝𑁆𑀝𑁂𑀦𑁆𑀢𑁂 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀩𑀮𑀯𑀸 𑀦 𑀳𑁄𑀢𑀺. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀻𑀦𑀁 𑀉𑀧𑀭𑀺 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑁂 𑀞𑀧𑁂𑀢𑁆𑀯𑀸 𑀧𑀺𑀘𑀼𑀧𑀺𑀡𑁆𑀟𑁂𑀳𑁂𑀯 𑀧𑀳𑀢𑀓𑀸𑀮𑁄 𑀯𑀺𑀬 𑀨𑀼𑀝𑁆𑀞𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀯𑁂𑀤𑀦𑀸 𑀫𑀚𑁆𑀛𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀦 𑀩𑀳𑀺𑀤𑁆𑀥𑀸 𑀫𑀳𑀸𑀪𑀽𑀢𑀸𑀭𑀫𑁆𑀫𑀡𑀁 𑀅𑀚𑁆𑀛𑀢𑁆𑀢𑀺𑀓𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀧𑀲𑀸𑀤𑀧𑀘𑁆𑀘𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀺. 𑀬𑀣𑀸 𑀅𑀥𑀺𑀓𑀭𑀡𑀻𑀫𑀢𑁆𑀣𑀓𑁂 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀓𑀽𑀝𑁂𑀦 𑀧𑀳𑀭𑀦𑁆𑀢𑀲𑁆𑀲 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀽𑀝𑀁 𑀅𑀥𑀺𑀓𑀭𑀡𑀺𑀁 𑀕𑀡𑁆𑀳𑀢𑀻𑀢𑀺, 𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺, 𑀏𑀯𑀫𑁂𑀯 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺. 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑁂 𑀤𑀼𑀓𑁆𑀔𑀲𑀳𑀕𑀢𑀁.

𑀇𑀫𑁂𑀲𑀁 𑀧𑀦 𑀧𑀜𑁆𑀘𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀦𑀺𑀩𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺, 𑀯𑀢𑁆𑀣𑀸𑀤𑀺𑀲𑀗𑁆𑀓𑀫𑀦𑀁 𑀦𑀸𑀫𑁂𑀢𑁆𑀣 𑀦𑀢𑁆𑀣𑀺. 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀇𑀝𑁆𑀞𑁂 𑀘 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀭𑀫𑁆𑀫𑀡𑁂 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀞𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑁄𑀢𑀧𑀲𑀸𑀤𑀸𑀤𑀻𑀦𑀺 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀲𑀤𑁆𑀤𑀸𑀤𑀻𑀲𑀼 𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀦𑀺 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀞𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀺. 𑀲𑀤𑁆𑀤𑁄 𑀧𑀦𑁂𑀢𑁆𑀣 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑁄𑀬𑁂𑀯 𑀳𑁄𑀢𑀺.

𑁪𑁫𑁫. 𑀫𑀦𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀲𑀪𑀸𑀯𑀲𑀼𑀜𑁆𑀜𑀢𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀫𑀦𑁄𑀬𑁂𑀯 𑀥𑀸𑀢𑀼 𑀫𑀦𑁄𑀥𑀸𑀢𑀼. 𑀲𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀁 𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀭𑀽𑀧𑀸𑀤𑀻𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀅𑀧𑀕𑀫𑀧𑀤𑀝𑁆𑀞𑀸𑀦𑀸. 𑀇𑀥 𑀥𑀫𑁆𑀫𑀼𑀤𑁆𑀤𑁂𑀲𑁂 𑀤𑁆𑀯𑀸𑀤𑀲 𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀦𑀯. 𑀢𑁂𑀲𑀼 𑀲𑀢𑁆𑀢 𑀅𑀯𑀺𑀪𑀢𑁆𑀢𑀺𑀓𑀸𑀦𑀺 𑀤𑁆𑀯𑁂 𑀲𑀯𑀺𑀪𑀢𑁆𑀢𑀺𑀓𑀸𑀦𑀺. 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄𑀢𑀺 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸. 𑀯𑀺𑀢𑀓𑁆𑀓𑀦𑀺𑀤𑁆𑀤𑁂𑀲𑁄 𑀅𑀪𑀺𑀦𑀺𑀭𑁄𑀧𑀦𑀁 𑀧𑀸𑀧𑁂𑀢𑁆𑀯𑀸 𑀞𑀧𑀺𑀢𑁄. 𑀬𑀲𑁆𑀫𑀸 𑀧𑀦𑁂𑀢𑀁 𑀘𑀺𑀢𑁆𑀢𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺 𑀯𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄𑀢𑀺 𑀯𑀸 𑀦 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀯𑀸𑀭𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀛𑀸𑀦𑀗𑁆𑀕𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀧𑀢𑀺𑀢𑁆𑀯𑀸 𑀕𑀢𑀦𑁆𑀢𑀺. 𑀫𑀕𑁆𑀕𑀗𑁆𑀕𑀁 𑀧𑀦 𑀦 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀦 𑀉𑀤𑁆𑀥𑀝𑀁. 𑀲𑀼𑀜𑁆𑀜𑀢𑀯𑀸𑀭𑁄 𑀧𑀸𑀓𑀢𑀺𑀓𑁄𑀬𑁂𑀯. 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼 𑀦𑀺𑀩𑀤𑁆𑀥𑀁 𑀳𑀤𑀬𑀯𑀢𑁆𑀣𑀼𑀫𑁂𑀯 𑀳𑁄𑀢𑀺. 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀅𑀦𑀺𑀩𑀤𑁆𑀥𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀲𑀗𑁆𑀓𑀫𑀦𑁆𑀢𑀺, 𑀞𑀸𑀦𑀁 𑀧𑀦 𑀏𑀓𑀁. 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀫𑁂𑀯 𑀳𑁂𑀢𑀁 𑀳𑁄𑀢𑀺. 𑀇𑀤𑀜𑁆𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀫𑁆𑀧𑀝𑀺𑀘𑁆𑀙𑀦𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀦𑀺𑀭𑀼𑀤𑁆𑀥𑁂𑀲𑀼 𑀢𑀁𑀲𑀫𑀦𑀦𑁆𑀢𑀭𑀸 𑀢𑀸𑀦𑁂𑀯 𑀞𑀸𑀦𑀧𑁆𑀧𑀢𑁆𑀢𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀢𑀺.

𑁪𑁬𑁯. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀤𑁆𑀤𑁂𑀲𑁂𑀲𑀼 𑀧𑀞𑀫𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀁 ‘𑀧𑀻𑀢𑀺’𑀧𑀤𑀁 𑀅𑀥𑀺𑀓𑀁. 𑀯𑁂𑀤𑀦𑀸𑀧𑀺 ‘𑀲𑁄𑀫𑀦𑀲𑁆𑀲’-𑀯𑁂𑀤𑀦𑀸 𑀳𑁄𑀢𑀺. 𑀅𑀬𑀜𑁆𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀧𑀯𑀢𑁆𑀢𑀢𑀺. 𑀤𑀼𑀢𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂. 𑀢𑀲𑁆𑀫𑀸 𑀢𑀢𑁆𑀣 ‘𑀉𑀧𑁂𑀓𑁆𑀔𑀸’ 𑀯𑁂𑀤𑀦𑀸 𑀳𑁄𑀢𑀻𑀢𑀺. 𑀧𑀤𑀸𑀦𑀺 𑀫𑀦𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑀲𑀤𑀺𑀲𑀸𑀦𑁂𑀯. 𑀉𑀪𑀬𑀢𑁆𑀣𑀸𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀧𑀢𑀺𑀢𑁆𑀯𑀸 𑀕𑀢𑀢𑁆𑀢𑀸𑀬𑁂𑀯 𑀛𑀸𑀦𑀗𑁆𑀕𑀸𑀦𑀺 𑀦 𑀉𑀤𑁆𑀥𑀝𑀸𑀦𑀺. 𑀫𑀕𑁆𑀕𑀗𑁆𑀕𑀸𑀦𑀺 𑀅𑀮𑀸𑀪𑀢𑁄𑀬𑁂𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀲𑀸 𑀤𑀼𑀯𑀺𑀥𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀳𑁂𑀢𑀼𑀓𑀯𑀺𑀧𑀸𑀓𑀸, 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀲𑀦𑁆𑀢𑀻𑀭𑀡𑀸𑀤𑀺𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀧𑀞𑀫𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀲𑀸 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀅𑀦𑀦𑁆𑀢𑀭𑀁, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀢𑀁 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬, 𑀢𑀲𑁆𑀫𑀺𑀁 𑀬𑁂𑀯𑀸𑀭𑀫𑁆𑀫𑀡𑁂 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀞𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀦 𑀩𑀮𑀯𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀓𑀣𑀁? 𑀬𑀣𑀸 𑀳𑀺 𑀘𑀡𑁆𑀟𑀲𑁄𑀢𑁂, 𑀢𑀺𑀭𑀺𑀬𑀁 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀺𑀬𑀸, 𑀉𑀤𑀓𑀁 𑀙𑀺𑀚𑁆𑀚𑀺𑀢𑁆𑀯𑀸 𑀣𑁄𑀓𑀁 𑀞𑀸𑀦𑀁 𑀦𑀸𑀯𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀬𑀣𑀸𑀲𑁄𑀢𑀫𑁂𑀯 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀧𑀮𑁄𑀪𑀬𑀫𑀸𑀦𑁂 𑀆𑀧𑀸𑀣𑀕𑀢𑁂 𑀚𑀯𑀦𑀁 𑀚𑀯𑀢𑀺. 𑀢𑀲𑁆𑀫𑀺𑀁 𑀚𑀯𑀺𑀢𑁂 𑀪𑀯𑀗𑁆𑀕𑀲𑁆𑀲 𑀯𑀸𑀭𑁄. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀪𑀯𑀗𑁆𑀕𑀲𑁆𑀲 𑀯𑀸𑀭𑀁 𑀅𑀤𑀢𑁆𑀯𑀸 𑀚𑀯𑀦𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀧𑀯𑀢𑁆𑀢𑀺𑀢𑁆𑀯𑀸 𑀪𑀯𑀗𑁆𑀕𑀫𑁂𑀯 𑀑𑀢𑀭𑀢𑀺. 𑀕𑀯𑀓𑁆𑀔𑀦𑁆𑀥𑁂 𑀦𑀤𑀺𑀁 𑀢𑀭𑀦𑁆𑀢𑁂𑀧𑀺 𑀏𑀯𑀫𑁂𑀯 𑀉𑀧𑀫𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀏𑀯𑀫𑁂𑀲𑀸 𑀬𑀁 𑀚𑀯𑀦𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺.

𑀤𑀼𑀢𑀺𑀬𑀸 𑀧𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀓𑀣𑀁? 𑀫𑀦𑀼𑀲𑁆𑀲𑀮𑁄𑀓𑁂 𑀢𑀸𑀯 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀏𑀴𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀦𑀧𑀼𑀁𑀲𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀧𑀜𑁆𑀘𑀸𑀭𑀫𑁆𑀫𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀻𑀢𑀺.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁯𑁮. 𑀇𑀤𑀸𑀦𑀺 𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀸𑀴𑀺𑀬𑀁 𑀦𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀯𑀸𑀭𑀸 𑀲𑀁𑀔𑀺𑀢𑁆𑀢𑀸. 𑀢𑁂𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁 𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀬𑁄 𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼 𑀓𑀫𑁆𑀫𑀤𑁆𑀯𑀸𑀭𑀓𑀫𑁆𑀫𑀧𑀣𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀪𑁂𑀤𑁄 𑀯𑀼𑀢𑁆𑀢𑁄 𑀲𑁄 𑀇𑀥 𑀦𑀢𑁆𑀣𑀺. 𑀓𑀲𑁆𑀫𑀸? 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁄 𑀅𑀯𑀺𑀧𑀸𑀓𑀥𑀫𑁆𑀫𑀢𑁄 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘. 𑀬𑀸𑀧𑀺 𑀢𑀸 𑀬𑁂𑀯𑀸𑀧𑀦𑀓𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸 𑀯𑀼𑀢𑁆𑀢𑀸, 𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀧𑀸𑀓𑁂𑀲𑀼 𑀦 𑀲𑀦𑁆𑀢𑀺. 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀳𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀓𑀭𑀼𑀡𑀸𑀫𑀼𑀤𑀺𑀢𑀸, 𑀯𑀺𑀭𑀢𑀺𑀬𑁄𑀧𑁂𑀢𑁆𑀣 𑀦 𑀲𑀦𑁆𑀢𑀺. ‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀼𑀲𑀮𑀸𑀦𑁂𑀯𑀸’𑀢𑀺 (𑀯𑀺𑀪. 𑁭𑁧𑁫) 𑀳𑀺 𑀯𑀼𑀢𑁆𑀢𑀁.

𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀜𑁆𑀘𑁂𑀢𑁆𑀣 𑀓𑀼𑀲𑀮𑀢𑁄 𑀘𑁂𑀯 𑀧𑀘𑁆𑀘𑀬𑀪𑁂𑀤𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀗𑁆𑀔𑀸𑀭𑀺𑀓𑀲𑁆𑀲 𑀳𑀺 𑀓𑀼𑀲𑀮𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀯𑀺𑀧𑀸𑀓𑀁, 𑀲𑀲𑀗𑁆𑀔𑀸𑀭𑀺𑀓𑀲𑁆𑀲 𑀲𑀲𑀗𑁆𑀔𑀸𑀭𑀺𑀓𑀁. 𑀩𑀮𑀯𑀧𑀘𑁆𑀘𑀬𑁂𑀳𑀺 𑀘 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀇𑀢𑀭𑁂𑀳𑀺 𑀇𑀢𑀭𑀁. 𑀳𑀻𑀦𑀸𑀤𑀺𑀪𑁂𑀤𑁂𑀧𑀺 𑀇𑀫𑀸𑀦𑀺 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀅𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀸𑀦𑀺 𑀦𑀸𑀫 𑀦 𑀳𑁄𑀦𑁆𑀢𑀺. 𑀳𑀻𑀦𑀲𑁆𑀲 𑀧𑀦 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀳𑀻𑀦𑀁, 𑀫𑀚𑁆𑀛𑀺𑀫𑀲𑁆𑀲 𑀫𑀚𑁆𑀛𑀺𑀫𑀁, 𑀧𑀡𑀻𑀢𑀲𑁆𑀲 𑀧𑀡𑀻𑀢𑀁. 𑀅𑀥𑀺𑀧𑀢𑀺𑀦𑁄 𑀧𑁂𑀢𑁆𑀣 𑀦 𑀲𑀦𑁆𑀢𑀺. 𑀓𑀲𑁆𑀫𑀸? 𑀙𑀦𑁆𑀤𑀸𑀤𑀻𑀦𑀺 𑀥𑀼𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑁂𑀢𑀩𑁆𑀩𑀢𑁄. 𑀲𑁂𑀲𑀁 𑀲𑀩𑁆𑀩𑀁 𑀅𑀝𑁆𑀞𑀲𑀼 𑀓𑀼𑀲𑀮𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀇𑀤𑀸𑀦𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀦𑀺 𑀳𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺 𑁋 𑀧𑀝𑀺𑀲𑀦𑁆𑀥𑀺𑀬𑀁, 𑀪𑀯𑀗𑁆𑀕𑁂, 𑀘𑀼𑀢𑀺𑀬𑀁, 𑀢𑀤𑀸𑀭𑀫𑁆𑀫𑀡𑁂𑀢𑀺. 𑀓𑀣𑀁? 𑀫𑀦𑀼𑀲𑁆𑀲𑁂𑀲𑀼 𑀢𑀸𑀯 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 𑀧𑀯𑀢𑁆𑀢𑁂 𑀲𑀝𑁆𑀞𑀺𑀧𑀺 𑀅𑀲𑀻𑀢𑀺𑀧𑀺 𑀯𑀲𑁆𑀲𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀆𑀬𑀼𑀓𑀸𑀮𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸 𑀧𑀘𑁆𑀙𑀺𑀫𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀧𑀞𑀫𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀢𑀁 𑀧𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀲𑁆𑀲 𑀯𑀺𑀧𑀸𑀓𑀁 𑀳𑁄𑀢𑀺. 𑀢𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀆𑀬𑀼. 𑀓𑀸𑀮𑀯𑀲𑁂𑀦 𑀧𑀦 𑀧𑀭𑀺𑀡𑀫𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀩𑀮𑀯𑀢𑀭𑀁. 𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀳𑀺 𑀫𑀳𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺. 𑀤𑀺𑀩𑁆𑀩𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀺𑀮𑀸𑀯𑀺𑀦𑁄 𑀦 𑀳𑁄𑀦𑁆𑀢𑀺, 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀸𑀤𑀬𑁄 𑀯𑀺𑀬𑀸’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘𑀅𑀬𑀁 𑀣𑁂𑀭𑀲𑁆𑀲 𑀫𑀦𑁄𑀭𑀣𑁄,’‘𑀦𑀢𑁆𑀣𑀺 𑀏𑀢’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑀺𑀢𑀽𑀧𑀘𑀸𑀭𑁄 𑀩𑀮𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁.

𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸

𑀇𑀤𑀸𑀦𑀺 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀬 𑀫𑀸𑀢𑀺𑀓𑀸 𑀞𑀧𑁂𑀢𑀩𑁆𑀩𑀸 𑁋 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 𑀏𑀓𑀸𑀬 𑀓𑀼𑀲𑀮𑀘𑁂𑀢𑀦𑀸𑀬 𑀲𑁄𑀴𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁆𑀣𑁂𑀯 𑀤𑁆𑀯𑀸𑀤𑀲𑀓𑀫𑀕𑁆𑀕𑁄𑀧𑀺 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻𑀢𑀺. 𑀫𑁄𑀭𑀯𑀸𑀧𑀺𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 𑀏𑀓𑀸𑀬 𑀓𑀼𑀲𑀮𑀘𑁂𑀢𑀦𑀸𑀬 𑀤𑁆𑀯𑀸𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁆𑀣𑁂𑀯 𑀤𑀲𑀓𑀫𑀕𑁆𑀕𑁄𑀧𑀺 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻𑀢𑀺. 𑀢𑀺𑀧𑀺𑀝𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀆𑀳 𑁋 𑀏𑀓𑀸𑀬 𑀓𑀼𑀲𑀮𑀘𑁂𑀢𑀦𑀸𑀬 𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀢𑁆𑀣𑁂𑀯 𑀅𑀳𑁂𑀢𑀼𑀓𑀝𑁆𑀞𑀓𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀸𑀓𑁂𑀢𑀧𑀜𑁆𑀳𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼. 𑀲𑀸𑀓𑁂𑀢𑁂 𑀓𑀺𑀭 𑀉𑀧𑀸𑀲𑀓𑀸 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘𑀓𑀺𑀁 𑀦𑀼 𑀔𑁄 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺 𑀉𑀤𑀸𑀳𑀼 𑀦𑀸𑀦𑀸’𑀢𑀺? 𑀧𑀜𑁆𑀳𑀁 𑀦𑀸𑀫 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑀸 ‘𑀬𑀣𑀸 𑀏𑀓𑀲𑁆𑀫𑀸 𑀅𑀫𑁆𑀩𑀩𑀻𑀚𑀸 𑀏𑀓𑁄𑀯 𑀅𑀗𑁆𑀓𑀼𑀭𑁄 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀏𑀓𑀸𑀯 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’𑀢𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 ‘𑀓𑀺𑀁 𑀦𑀼 𑀔𑁄 𑀦𑀸𑀦𑀸𑀘𑁂𑀢𑀦𑀸𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀝𑀺𑀲𑀦𑁆𑀥𑀺𑀬𑁄 𑀦𑀸𑀦𑀸 𑀳𑁄𑀦𑁆𑀢𑀺 𑀉𑀤𑀸𑀳𑀼 𑀏𑀓𑀸’𑀢𑀺? 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀣𑁂𑀭𑁂 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑀸 ‘𑀬𑀣𑀸 𑀩𑀳𑀽𑀲𑀼 𑀅𑀫𑁆𑀩𑀩𑀻𑀚𑁂𑀲𑀼 𑀭𑁄𑀧𑀺𑀢𑁂𑀲𑀼 𑀩𑀳𑀽 𑀅𑀗𑁆𑀓𑀼𑀭𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀯𑀁 𑀩𑀳𑀼𑀓𑀸𑀯 𑀧𑀝𑀺𑀲𑀦𑁆𑀥𑀺𑀬𑁄 𑀳𑁄𑀦𑁆𑀢𑀻’𑀢𑀺 𑀲𑀜𑁆𑀜𑀸𑀧𑁂𑀲𑀼𑀁.

𑀅𑀧𑀭𑀫𑁆𑀧𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀲𑁆𑀲𑀤𑀓𑀺𑀢𑁆𑀢𑀦𑀁 𑀦𑀸𑀫 𑀕𑀳𑀺𑀢𑀁. 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀮𑁄𑀪𑁄𑀧𑀺 𑀉𑀲𑁆𑀲𑀦𑁆𑀦𑁄 𑀳𑁄𑀢𑀺, 𑀤𑁄𑀲𑁄𑀧𑀺 𑀫𑁄𑀳𑁄𑀧𑀺; 𑀅𑀮𑁄𑀪𑁄𑀧𑀺 𑀅𑀤𑁄𑀲𑁄𑀧𑀺 𑀅𑀫𑁄𑀳𑁄𑀧𑀺. 𑀢𑀁 𑀦𑁂𑀲𑀁 𑀉𑀲𑁆𑀲𑀦𑁆𑀦𑀪𑀸𑀯𑀁 𑀓𑁄 𑀦𑀺𑀬𑀸𑀫𑁂𑀢𑀻𑀢𑀺? 𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀸𑀫𑁂𑀢𑀺. 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀦𑀸𑀦𑀢𑁆𑀢𑀁 𑀳𑁄𑀢𑀺. 𑀓𑀣𑀁? ‘‘𑀬𑀲𑁆𑀲 𑀳𑀺 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑁄 𑀩𑀮𑀯𑀸 𑀳𑁄𑀢𑀺 𑀅𑀮𑁄𑀪𑁄 𑀫𑀦𑁆𑀤𑁄, 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸, 𑀢𑀲𑁆𑀲 𑀫𑀦𑁆𑀤𑁄 𑀅𑀮𑁄𑀪𑁄 𑀮𑁄𑀪𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀤𑁄𑀲𑀸𑀫𑁄𑀳𑀸 𑀧𑀦 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑁂 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀮𑀼𑀤𑁆𑀥𑁄 𑀳𑁄𑀢𑀺, 𑀲𑀼𑀔𑀲𑀻𑀮𑁄 𑀅𑀓𑁆𑀓𑁄𑀥𑀦𑁄, 𑀧𑀜𑁆𑀜𑀯𑀸 𑀧𑀦 𑀳𑁄𑀢𑀺 𑀯𑀚𑀺𑀭𑀽𑀧𑀫𑀜𑀸𑀡𑁄’’𑀢𑀺.

‘𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀤𑁄𑀲𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀅𑀮𑁄𑀪𑀸𑀤𑁄𑀲𑀸 𑀫𑀦𑁆𑀤𑀸, 𑀅𑀫𑁄𑀳𑁄 𑀩𑀮𑀯𑀸 𑀫𑁄𑀳𑁄 𑀫𑀦𑁆𑀤𑁄, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘, 𑀧𑀜𑁆𑀜𑀯𑀸 𑀧𑀦 𑀳𑁄𑀢𑀺 𑀯𑀚𑀺𑀭𑀽𑀧𑀫𑀜𑀸𑀡𑁄 𑀤𑀢𑁆𑀢𑀸𑀪𑀬𑀢𑁆𑀣𑁂𑀭𑁄 𑀯𑀺𑀬.

‘𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀦𑁆𑀥𑁄 𑀘, 𑀲𑀼𑀔𑀲𑀻𑀮𑀓𑁄 𑀧𑀦 𑀳𑁄𑀢𑀺 𑀅𑀓𑁆𑀓𑁄𑀥𑀦𑁄.

‘𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀅𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘.

‘𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀧𑁆𑀧𑀓𑀺𑀮𑁂𑀲𑁄 𑀳𑁄𑀢𑀺, 𑀤𑀺𑀩𑁆𑀩𑀸𑀭𑀫𑁆𑀫𑀡𑀫𑁆𑀧𑀺 𑀤𑀺𑀲𑁆𑀯𑀸 𑀦𑀺𑀘𑁆𑀘𑀮𑁄, 𑀤𑀼𑀝𑁆𑀞𑁄 𑀧𑀦 𑀳𑁄𑀢𑀺 𑀤𑀦𑁆𑀥𑀧𑀜𑁆𑀜𑁄 𑀘𑀸𑀢𑀺.

‘𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺, 𑀲𑀼𑀔𑀲𑀻𑀮𑀓𑁄 𑀘, 𑀤𑀦𑁆𑀥𑁄 𑀧𑀦 𑀳𑁄𑀢𑀺.

‘𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀧𑀜𑁆𑀜𑀯𑀸 𑀘, 𑀤𑀼𑀝𑁆𑀞𑁄 𑀘 𑀧𑀦 𑀳𑁄𑀢𑀺 𑀓𑁄𑀥𑀦𑁄.

‘𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀅𑀮𑁄𑀪𑀸𑀤𑀬𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀺𑀬 𑀅𑀮𑀼𑀤𑁆𑀥𑁄 𑀅𑀤𑀼𑀝𑁆𑀞𑁄 𑀧𑀜𑁆𑀜𑀯𑀸 𑀘 𑀳𑁄𑀢𑀻’𑀢𑀺.

𑀅𑀧𑀭𑀫𑁆𑀧𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀳𑁂𑀢𑀼𑀓𑀺𑀢𑁆𑀢𑀦𑀁 𑀦𑀸𑀫 𑀕𑀳𑀺𑀢𑀁. 𑀢𑀺𑀳𑁂𑀢𑀼𑀓𑀓𑀫𑁆𑀫𑀜𑁆𑀳𑀺 𑀢𑀺𑀳𑁂𑀢𑀼𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀫𑁆𑀧𑀺 𑀅𑀳𑁂𑀢𑀼𑀓𑀫𑁆𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺. 𑀤𑀼𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀁 𑀦 𑀤𑁂𑀢𑀺, 𑀇𑀢𑀭𑀁 𑀤𑁂𑀢𑀺. 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸𑀧𑀺 𑀳𑁄𑀢𑀺, 𑀤𑀼𑀳𑁂𑀢𑀼𑀓𑀸𑀧𑀺; 𑀅𑀳𑁂𑀢𑀼𑀓𑀸 𑀦 𑀳𑁄𑀢𑀺. 𑀤𑀼𑀳𑁂𑀢𑀼𑀓𑁂𑀦 𑀤𑀼𑀳𑁂𑀢𑀼𑀓𑀸𑀧𑀺 𑀳𑁄𑀢𑀺 𑀅𑀳𑁂𑀢𑀼𑀓𑀸𑀧𑀺; 𑀢𑀺𑀳𑁂𑀢𑀼𑀓𑀸 𑀦 𑀳𑁄𑀢𑀺. 𑀅𑀲𑀗𑁆𑀔𑀸𑀭𑀺𑀓𑀁 𑀓𑀼𑀲𑀮𑀁 𑀅𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀲𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑀲𑀗𑁆𑀔𑀸𑀭𑀺𑀓𑀁 𑀲𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀅𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺. 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸. 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀁 𑀦𑀺𑀬𑀸𑀫𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀣𑁂𑀭𑀲𑁆𑀲 𑀯𑀸𑀤𑁂 𑀲𑁄𑀴𑀲𑀫𑀕𑁆𑀕𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀤𑀺𑀲𑁂𑀦 𑀳𑀺 𑀧𑀞𑀫𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀕𑀩𑁆𑀪𑀸𑀯𑀸𑀲𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀁𑀯𑀭𑀸𑀲𑀁𑀯𑀭𑁂 𑀧𑀝𑁆𑀞𑀧𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀁 𑀉𑀧𑀕𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀁 ‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀆𑀧𑀸𑀣𑀫𑀸𑀕𑀢𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀅𑀦𑀸𑀯𑀝𑁆𑀝𑀺𑀢𑁂𑀬𑁂𑀯 𑀅𑀢𑀺𑀓𑁆𑀓𑀫𑀦𑀆𑀭𑀫𑁆𑀫𑀡𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀓𑀲𑁆𑀫𑀸 𑀏𑀯𑀁 𑀳𑁄𑀢𑀺? 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬. 𑀅𑀬𑀁 𑀢𑀸𑀯 𑀏𑀓𑁄 𑀫𑁄𑀖𑀯𑀸𑀭𑁄.

𑀲𑀘𑁂 𑀧𑀦 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂, 𑀯𑁄𑀝𑁆𑀞𑀩𑁆𑀩𑀦𑀁 𑀅𑀧𑀸𑀧𑁂𑀢𑁆𑀯𑀸𑀯 𑀅𑀦𑁆𑀢𑀭𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀸 𑀲𑀦𑁆𑀢𑀻𑀭𑀡𑁂 𑀯𑀸 𑀞𑀢𑁆𑀯𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀦 𑀞𑀢𑁆𑀯𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁄 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀼𑀦 𑀪𑀯𑀗𑁆𑀕𑀁 𑀑𑀢𑀭𑀢𑀺 𑀇𑀤𑀫𑁆𑀧𑀺 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬 𑀏𑀯 𑀳𑁄𑀢𑀺. 𑀅𑀬𑀁 𑀧𑀦 𑀯𑀸𑀭𑁄 ‘𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂’𑀢𑀺𑀆𑀤𑀻𑀦𑀺 𑀯𑀤𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀅𑀬𑀫𑁆𑀧𑀺 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄.

𑀅𑀧𑀭𑀲𑁆𑀲 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀚𑀯𑀦𑀁 𑀚𑀯𑀢𑀺. 𑀚𑀯𑀦𑀧𑀭𑀺𑀬𑁄𑀲𑀸𑀦𑁂 𑀧𑀦 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀸𑀭𑁄. 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀦𑀤𑀺𑀬𑀸 𑀆𑀯𑀭𑀡𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀸𑀫𑀸𑀢𑀺𑀓𑀸𑀪𑀺𑀫𑀼𑀔𑁂 𑀉𑀤𑀓𑁂 𑀓𑀢𑁂 𑀉𑀤𑀓𑀁 𑀕𑀦𑁆𑀢𑁆𑀯𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀓𑁂𑀤𑀸𑀭𑁂 𑀧𑀽𑀭𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀓𑀓𑁆𑀓𑀝𑀓𑀫𑀕𑁆𑀕𑀸𑀤𑀻𑀳𑀺 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀦𑀤𑀺𑀁𑀬𑁂𑀯 𑀑𑀢𑀭𑀢𑀺, 𑀏𑀯𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀳𑀺 𑀦𑀤𑀺𑀬𑀁 𑀉𑀤𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀪𑀯𑀗𑁆𑀕𑀯𑀻𑀣𑀺𑀧𑁆𑀧𑀯𑀢𑁆𑀢𑀦𑀓𑀸𑀮𑁄. 𑀆𑀯𑀭𑀡𑀩𑀦𑁆𑀥𑀦𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀦𑀓𑀸𑀮𑁄. 𑀫𑀳𑀸𑀫𑀸𑀢𑀺𑀓𑀸𑀬 𑀉𑀤𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺. 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀓𑁂𑀤𑀸𑀭𑀧𑀽𑀭𑀡𑀁 𑀯𑀺𑀬 𑀚𑀯𑀦𑀁. 𑀓𑀓𑁆𑀓𑀝𑀓𑀫𑀕𑁆𑀕𑀸𑀤𑀻𑀳𑀺 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀉𑀤𑀓𑀲𑁆𑀲 𑀦𑀤𑀻𑀑𑀢𑀭𑀡𑀁 𑀯𑀺𑀬 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑁂 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀼𑀦 𑀪𑀯𑀗𑁆𑀕𑁄𑀢𑀭𑀡𑀁. 𑀏𑀯𑀁 𑀪𑀯𑀗𑁆𑀕𑀁 𑀑𑀢𑀭𑀡𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀡𑀦𑀧𑀣𑁄 𑀦𑀢𑁆𑀣𑀺. 𑀇𑀤𑀜𑁆𑀘𑀸𑀧𑀺 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬 𑀏𑀯 𑀳𑁄𑀢𑀺. 𑀅𑀬𑀁 𑀢𑀢𑀺𑀬𑁄 𑀫𑁄𑀖𑀯𑀸𑀭𑁄.

𑀲𑀘𑁂 𑀧𑀦 𑀩𑀮𑀯𑀸𑀭𑀫𑁆𑀫𑀡𑀁 𑀆𑀧𑀸𑀣𑀕𑀢𑀁 𑀳𑁄𑀢𑀺 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀚𑀯𑀦𑀝𑁆𑀞𑀸𑀦𑁂 𑀧𑀦 𑀧𑀞𑀫𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀚𑀯𑀦𑀁 𑀳𑀼𑀢𑁆𑀯𑀸 𑀙𑀲𑀢𑁆𑀢𑀯𑀸𑀭𑁂 𑀚𑀯𑀺𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀸𑀭𑀁 𑀤𑁂𑀢𑀺. 𑀢𑀤𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀳𑀫𑀸𑀦𑀁 𑀢𑀁𑀲𑀤𑀺𑀲𑀫𑁂𑀯 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀢𑀺. 𑀇𑀤𑀁 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺 𑁋 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑀤𑀺𑀲𑀢𑁆𑀢𑀸 ‘𑀫𑀽𑀮𑀪𑀯𑀗𑁆𑀕’𑀦𑁆𑀢𑀺 𑀘, 𑀬𑀁 𑀚𑀯𑀦𑁂𑀦 𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀢𑀲𑁆𑀲 𑀕𑀳𑀺𑀢𑀢𑁆𑀢𑀸 ‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀘. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀢𑀻𑀭𑀡𑀁 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀕𑀡𑀦𑀽𑀧𑀕𑀸𑀦𑀺 𑀳𑁄𑀦𑁆𑀢𑀺.

𑀬𑀤𑀸 𑀧𑀦 𑀤𑀼𑀢𑀺𑀬𑀓𑀼𑀲𑀮𑀘𑀺𑀢𑁆𑀢𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑀁𑀲𑀤𑀺𑀲𑀁 𑀤𑀼𑀢𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀺. 𑀇𑀤𑀜𑁆𑀘 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀅𑀲𑀤𑀺𑀲𑀢𑁆𑀢𑀸 ‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕’𑀦𑁆𑀢𑀺 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 ‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀘. 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀳𑁄𑀦𑁆𑀢𑀺.

𑀬𑀤𑀸 𑀧𑀦 𑀢𑀢𑀺𑀬𑀓𑀼𑀲𑀮𑀘𑀺𑀢𑁆𑀢𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑀁𑀲𑀤𑀺𑀲𑀁 𑀢𑀢𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀺. 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 ‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁’‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀘 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀙 𑀳𑁄𑀦𑁆𑀢𑀺.

𑀬𑀤𑀸 𑀧𑀦 𑀘𑀢𑀼𑀢𑁆𑀣𑀓𑀼𑀲𑀮𑀘𑀺𑀢𑁆𑀢𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑀁𑀲𑀤𑀺𑀲𑀁 𑀘𑀢𑀼𑀢𑁆𑀣𑀯𑀺𑀧𑀸𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀺. 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 ‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁’‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀘 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀼𑀭𑀺𑀫𑀸𑀦𑀺 𑀙 𑀲𑀢𑁆𑀢 𑀳𑁄𑀦𑁆𑀢𑀺.

𑀬𑀤𑀸 𑀧𑀦 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁’ 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀫𑁄𑀖𑀯𑀸𑀭𑀸 𑀮𑀩𑁆𑀪𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀢𑀺 𑀢𑀲𑁆𑀫𑀸 𑀢𑀢𑁆𑀣 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁. 𑀘𑀢𑀼𑀦𑁆𑀦𑀜𑁆𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀳𑀸𑀓𑀼𑀲𑀮𑀚𑀯𑀦𑀸𑀦𑀁 𑀧𑀭𑀺𑀬𑁄𑀲𑀸𑀦𑁂 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑁂𑀯 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀢𑀸𑀦𑀺𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 ‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁’‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀘 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀦𑁆𑀢𑀺. ‘𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀻’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺 𑀏𑀯. 𑀇𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀧𑀼𑀭𑀺𑀫𑁂𑀳𑀺 𑀲𑀢𑁆𑀢𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀏𑀯𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑀸𑀤𑀲, 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲𑀸𑀢𑀺, 𑀲𑀫𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀏𑀯𑀁 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀲𑀫𑀲𑀝𑁆𑀞𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑀸𑀤𑀲, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀲𑁄𑀴𑀲 𑀳𑁄𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀫𑁆𑀩𑁄𑀧𑀫𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀨𑀮𑀺𑀢𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀺. 𑀅𑀣𑁂𑀓𑀁 𑀅𑀫𑁆𑀩𑀧𑀓𑁆𑀓𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀢𑀲𑁆𑀲 𑀓𑀡𑁆𑀡𑀲𑀓𑁆𑀔𑀮𑀺𑀁 𑀧𑀼𑀜𑁆𑀙𑀫𑀸𑀦𑀁 𑀯𑀺𑀬 ‘𑀣’𑀦𑁆𑀢𑀺 𑀪𑀽𑀫𑀺𑀬𑀁 𑀧𑀢𑀺. 𑀲𑁄 𑀢𑀲𑁆𑀲 𑀲𑀤𑁆𑀤𑁂𑀦 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀨𑀮𑀁 𑀕𑀳𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀉𑀧𑀲𑀺𑀗𑁆𑀖𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺.

𑀢𑀢𑁆𑀣, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀦𑀺𑀤𑁆𑀤𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀗𑁆𑀕𑀲𑀫𑀗𑁆𑀕𑀺𑀓𑀸𑀮𑁄. 𑀅𑀫𑁆𑀩𑀧𑀓𑁆𑀓𑀲𑁆𑀲 𑀯𑀡𑁆𑀝𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀓𑀡𑁆𑀡𑀲𑀓𑁆𑀔𑀮𑀺𑀁 𑀧𑀼𑀜𑁆𑀙𑀫𑀸𑀦𑀲𑁆𑀲 𑀧𑀢𑀦𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀓𑀸𑀮𑁄. 𑀢𑁂𑀦 𑀲𑀤𑁆𑀤𑁂𑀦 𑀧𑀩𑀼𑀤𑁆𑀥𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄. 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀺𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀓𑀺𑀘𑁆𑀘𑀲𑀸𑀥𑀦𑀓𑀸𑀮𑁄. 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄. 𑀕𑀳𑁂𑀢𑁆𑀯𑀸 𑀫𑀤𑁆𑀤𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀡𑀓𑀸𑀮𑁄. 𑀉𑀧𑀲𑀺𑀗𑁆𑀖𑀺𑀢𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄. 𑀧𑀭𑀺𑀪𑀼𑀢𑁆𑀢𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑀓𑀸𑀮𑁄. 𑀅𑀬𑀁 𑀉𑀧𑀫𑀸 𑀓𑀺𑀁 𑀤𑀻𑀧𑁂𑀢𑀺? 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀫𑁂𑀯 𑀓𑀺𑀘𑁆𑀘𑀁. 𑀢𑁂𑀦 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀸𑀯𑀝𑁆𑀝𑀦𑀫𑁂𑀯, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀫𑀢𑁆𑀢𑀓𑀫𑁂𑀯, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑀓𑀫𑁂𑀯, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑀦𑁆𑀢𑀻𑀭𑀡𑀫𑀢𑁆𑀢𑀓𑀫𑁂𑀯, 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀫𑀢𑁆𑀢𑀓𑀫𑁂𑀯 𑀓𑀺𑀘𑁆𑀘𑀁. 𑀏𑀓𑀦𑁆𑀢𑁂𑀦 𑀧𑀦 𑀆𑀭𑀫𑁆𑀫𑀡𑀭𑀲𑀁 𑀚𑀯𑀦𑀫𑁂𑀯 𑀅𑀦𑀼𑀪𑀯𑀢𑀻𑀢𑀺 𑀤𑀻𑀧𑁂𑀢𑀺.

𑀏𑀢𑁆𑀣 𑀘 ‘𑀢𑁆𑀯𑀁 𑀪𑀯𑀗𑁆𑀕𑀁 𑀦𑀸𑀫 𑀳𑁄𑀳𑀺, 𑀢𑁆𑀯𑀁 𑀆𑀯𑀚𑁆𑀚𑀦𑀁 𑀦𑀸𑀫, 𑀢𑁆𑀯𑀁 𑀤𑀲𑁆𑀲𑀦𑀁 𑀦𑀸𑀫, 𑀢𑁆𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀦𑀸𑀫, 𑀢𑁆𑀯𑀁 𑀲𑀦𑁆𑀢𑀻𑀭𑀡𑀁 𑀦𑀸𑀫, 𑀢𑁆𑀯𑀁 𑀯𑁄𑀝𑁆𑀞𑀩𑁆𑀩𑀦𑀁 𑀦𑀸𑀫, 𑀢𑁆𑀯𑀁 𑀚𑀯𑀦𑀁 𑀦𑀸𑀫, 𑀳𑁄𑀳𑀻’𑀢𑀺 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀧𑀜𑁆𑀘𑀯𑀺𑀥𑀁 𑀦𑀺𑀬𑀸𑀫𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼 𑁋 𑀩𑀻𑀚𑀦𑀺𑀬𑀸𑀫𑀁 𑀉𑀢𑀼𑀦𑀺𑀬𑀸𑀫𑀁 𑀓𑀫𑁆𑀫𑀦𑀺𑀬𑀸𑀫𑀁 𑀥𑀫𑁆𑀫𑀦𑀺𑀬𑀸𑀫𑀁 𑀘𑀺𑀢𑁆𑀢𑀦𑀺𑀬𑀸𑀫𑀦𑁆𑀢𑀺. 𑀢𑀢𑁆𑀣 𑀓𑀼𑀮𑀢𑁆𑀣𑀕𑀘𑁆𑀙𑀲𑁆𑀲 𑀉𑀢𑁆𑀢𑀭𑀕𑁆𑀕𑀪𑀸𑀯𑁄, 𑀤𑀓𑁆𑀔𑀺𑀡𑀯𑀮𑁆𑀮𑀺𑀬𑀸 𑀤𑀓𑁆𑀔𑀺𑀡𑀢𑁄 𑀭𑀼𑀓𑁆𑀔𑀧𑀭𑀺𑀳𑀭𑀡𑀁, 𑀲𑀽𑀭𑀺𑀬𑀸𑀯𑀝𑁆𑀝𑀧𑀼𑀧𑁆𑀨𑀸𑀦𑀁 𑀲𑀽𑀭𑀺𑀬𑀸𑀪𑀺𑀫𑀼𑀔𑀪𑀸𑀯𑁄, 𑀫𑀸𑀮𑀼𑀯𑀮𑀢𑀸𑀬 𑀭𑀼𑀓𑁆𑀔𑀸𑀪𑀺𑀫𑀼𑀔𑀕𑀫𑀦𑀫𑁂𑀯, 𑀦𑀸𑀴𑀺𑀓𑁂𑀭𑀲𑁆𑀲 𑀫𑀢𑁆𑀣𑀓𑁂 𑀙𑀺𑀤𑁆𑀤𑀲𑀩𑁆𑀪𑀸𑀯𑁄𑀢𑀺 𑀢𑁂𑀲𑀁 𑀢𑁂𑀲𑀁 𑀩𑀻𑀚𑀸𑀦𑀁 𑀢𑀁𑀢𑀁𑀲𑀤𑀺𑀲𑀨𑀮𑀤𑀸𑀦𑀁 𑀩𑀻𑀚𑀦𑀺𑀬𑀸𑀫𑁄 𑀦𑀸𑀫. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑁂𑀲𑀁 𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀕𑁆𑀕𑀳𑀡𑀁 𑀉𑀢𑀼𑀦𑀺𑀬𑀸𑀫𑁄 𑀦𑀸𑀫. 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀺𑀧𑀸𑀓𑀁 𑀤𑁂𑀢𑀺. 𑀤𑀼𑀳𑁂𑀢𑀼𑀓𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀺𑀳𑁂𑀢𑀼𑀓𑀁 𑀦 𑀤𑁂𑀢𑀻𑀢𑀺, 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀢𑀁𑀢𑀁𑀲𑀤𑀺𑀲𑀯𑀺𑀧𑀸𑀓𑀤𑀸𑀦𑀫𑁂𑀯 𑀓𑀫𑁆𑀫𑀦𑀺𑀬𑀸𑀫𑁄 𑀦𑀸𑀫.

𑀅𑀧𑀭𑁄𑀧𑀺 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀯𑀲𑁂𑀦𑁂𑀯 𑀓𑀫𑁆𑀫𑀦𑀺𑀬𑀸𑀫𑁄 𑀳𑁄𑀢𑀺. 𑀢𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼𑀁 𑀓𑀣𑁂𑀦𑁆𑀢𑀺 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀸 𑀤𑁆𑀯𑀸𑀭𑀕𑀸𑀫𑁄 𑀛𑀸𑀬𑀺. 𑀢𑀢𑁄 𑀧𑀚𑁆𑀚𑀮𑀺𑀢𑀁 𑀢𑀺𑀡𑀓𑀭𑀴𑀁 𑀉𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀢𑁄 𑀓𑀸𑀓𑀲𑁆𑀲 𑀕𑀻𑀯𑀸𑀬 𑀧𑀝𑀺𑀫𑀼𑀜𑁆𑀘𑀺. 𑀲𑁄 𑀯𑀺𑀭𑀯𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀏𑀓𑀸 𑀦𑀸𑀯𑀸 𑀦𑀺𑀘𑁆𑀘𑀮𑀸 𑀅𑀝𑁆𑀞𑀸𑀲𑀺. 𑀳𑁂𑀝𑁆𑀞𑀸 𑀓𑁂𑀦𑀘𑀺 𑀦𑀺𑀭𑀼𑀤𑁆𑀥𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑀸 𑀓𑀸𑀴𑀓𑀡𑁆𑀡𑀺𑀲𑀮𑀸𑀓𑀁 𑀯𑀺𑀘𑀸𑀭𑁂𑀲𑀼𑀁. 𑀲𑀸 𑀦𑀸𑀯𑀺𑀓𑀲𑁆𑀲𑁂𑀯 𑀉𑀧𑀸𑀲𑀺𑀓𑀸𑀬 𑀳𑀢𑁆𑀣𑁂 𑀧𑀢𑀺. 𑀢𑀢𑁄 𑀏𑀓𑀺𑀲𑁆𑀲𑀸 𑀓𑀸𑀭𑀡𑀸 𑀫𑀸 𑀲𑀩𑁆𑀩𑁂 𑀦𑀲𑁆𑀲𑀦𑁆𑀢𑀼, 𑀉𑀤𑀓𑁂 𑀦𑀁 𑀔𑀺𑀧𑀸𑀫𑀸𑀢𑀺 𑀆𑀳𑀁𑀲𑀼. 𑀦𑀸𑀯𑀺𑀓𑁄 ‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀏𑀢𑀁 𑀉𑀤𑀓𑁂 𑀉𑀧𑁆𑀧𑀺𑀮𑀯𑀫𑀸𑀦𑀁 𑀧𑀲𑁆𑀲𑀺𑀢𑀼’𑀦𑁆𑀢𑀺 𑀯𑀸𑀮𑀺𑀓𑀸𑀖𑀝𑀁 𑀕𑀻𑀯𑀸𑀬𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀔𑀺𑀧𑀸𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀦𑀸𑀯𑀸 𑀔𑀺𑀢𑁆𑀢𑀲𑀭𑁄 𑀯𑀺𑀬 𑀧𑀓𑁆𑀔𑀦𑁆𑀤𑀺. 𑀏𑀓𑁄 𑀪𑀺𑀓𑁆𑀔𑀼 𑀮𑁂𑀡𑁂 𑀯𑀲𑀢𑀺. 𑀫𑀳𑀦𑁆𑀢𑀁 𑀧𑀩𑁆𑀩𑀢𑀓𑀽𑀝𑀁 𑀧𑀢𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺. 𑀢𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀬𑀫𑁂𑀯 𑀅𑀧𑀕𑀢𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘𑀦 𑀏𑀢𑀁 𑀅𑀜𑁆𑀜𑁂𑀳𑀺 𑀓𑀢𑀁, 𑀢𑁂𑀳𑀺 𑀓𑀢𑀓𑀫𑁆𑀫𑀫𑁂𑀯 𑀢’𑀦𑁆𑀢𑀺 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑀓𑀸𑀓𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀏𑀓𑀁 𑀤𑀼𑀝𑁆𑀞𑀕𑁄𑀡𑀁 𑀤𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀻𑀯𑀸𑀬 𑀧𑀮𑀸𑀮𑀯𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀸𑀲𑀺. 𑀕𑁄𑀡𑁄 𑀢𑁂𑀦𑁂𑀯 𑀫𑀢𑁄. 𑀇𑀤𑀸𑀦𑀺 𑀢𑀁 𑀓𑀫𑁆𑀫𑀁 𑀏𑀢𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑁄𑀧𑀺 𑀦 𑀫𑀼𑀘𑁆𑀘𑀺𑀢𑀼𑀁 𑀅𑀤𑀸𑀲𑀺. 𑀲𑀸𑀧𑀺 𑀇𑀢𑁆𑀣𑀻 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀏𑀓𑀸 𑀇𑀢𑁆𑀣𑀻𑀬𑁂𑀯. 𑀏𑀓𑁄 𑀓𑀼𑀓𑁆𑀓𑀼𑀭𑁄 𑀢𑀸𑀬 𑀧𑀭𑀺𑀘𑀺𑀢𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀺𑀬𑀸 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀲𑀤𑁆𑀥𑀺𑀫𑁂𑀯𑀸𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 ‘𑀦𑀺𑀓𑁆𑀔𑀦𑁆𑀢𑁄 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀲𑀼𑀦𑀔𑀮𑀼𑀤𑁆𑀤𑀓𑁄’𑀢𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑀺. 𑀲𑀸 𑀢𑁂𑀦 𑀅𑀝𑁆𑀝𑀻𑀬𑀫𑀸𑀦𑀸 𑀓𑀼𑀓𑁆𑀓𑀼𑀭𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀸𑀮𑀺𑀓𑀸𑀖𑀝𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀔𑀺𑀧𑀺. 𑀢𑀁 𑀓𑀫𑁆𑀫𑀁 𑀢𑀲𑁆𑀲𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀫𑀼𑀘𑁆𑀘𑀺𑀢𑀼𑀁 𑀦𑀸𑀤𑀸𑀲𑀺. 𑀲𑁄𑀧𑀺 𑀪𑀺𑀓𑁆𑀔𑀼 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀕𑁄𑀧𑀸𑀮𑀓𑁄 𑀳𑀼𑀢𑁆𑀯𑀸 𑀩𑀺𑀮𑀁 𑀧𑀯𑀺𑀝𑁆𑀞𑀸𑀬 𑀕𑁄𑀥𑀸𑀬 𑀲𑀸𑀔𑀸𑀪𑀗𑁆𑀕𑀫𑀼𑀝𑁆𑀞𑀺𑀬𑀸 𑀤𑁆𑀯𑀸𑀭𑀁 𑀣𑀓𑁂𑀲𑀺. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀬𑀁 𑀆𑀕𑀦𑁆𑀢𑁆𑀯𑀸 𑀯𑀺𑀯𑀭𑀺. 𑀕𑁄𑀥𑀸 𑀓𑀫𑁆𑀧𑀫𑀸𑀦𑀸 𑀦𑀺𑀓𑁆𑀔𑀫𑀺. 𑀓𑀭𑀼𑀡𑀸𑀬 𑀢𑀁 𑀦 𑀫𑀸𑀭𑁂𑀲𑀺. 𑀢𑀁 𑀓𑀫𑁆𑀫𑀁 𑀢𑀲𑁆𑀲 𑀧𑀩𑁆𑀩𑀢𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀫𑀼𑀘𑁆𑀘𑀺𑀢𑀼𑀁 𑀦𑀸𑀤𑀸𑀲𑀻𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂,

𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑁂 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄,

𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺. (𑀥. 𑀧. 𑁧𑁨𑁭);

𑀅𑀬𑀫𑁆𑀧𑀺 𑀓𑀫𑁆𑀫𑀦𑀺𑀬𑀸𑀫𑁄𑀬𑁂𑀯 𑀦𑀸𑀫. 𑀅𑀜𑁆𑀜𑀸𑀦𑀺𑀧𑀺 𑀏𑀯𑀭𑀽𑀧𑀸𑀦𑀺 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂, 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂, 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂, 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀑𑀲𑁆𑀲𑀚𑁆𑀚𑀦𑁂, 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑀁 𑀥𑀫𑁆𑀫𑀦𑀺𑀬𑀸𑀫𑁄 𑀦𑀸𑀫.

𑀆𑀭𑀫𑁆𑀫𑀡𑁂𑀦 𑀧𑀦 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 ‘𑀢𑁆𑀯𑀁 𑀆𑀯𑀚𑁆𑀚𑀦𑀁 𑀦𑀸𑀫 𑀳𑁄𑀳𑀺…𑀧𑁂… 𑀢𑁆𑀯𑀁 𑀚𑀯𑀦𑀁 𑀦𑀸𑀫 𑀳𑁄𑀳𑀻’𑀢𑀺 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀦 𑀥𑀫𑁆𑀫𑀢𑀸𑀬 𑀏𑀯 𑀆𑀭𑀫𑁆𑀫𑀡𑁂𑀦 𑀧𑀲𑀸𑀤𑀲𑁆𑀲 𑀖𑀝𑁆𑀝𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀚𑀯𑀦𑀁 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀻𑀢𑀺 𑀅𑀬𑀁 𑀘𑀺𑀢𑁆𑀢𑀦𑀺𑀬𑀸𑀫𑁄 𑀦𑀸𑀫. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑀲𑀲𑀗𑁆𑀔𑀸𑀭𑀺𑀓𑀢𑀺𑀳𑁂𑀢𑀼𑀓𑀓𑀼𑀲𑀮𑁂𑀦𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀳𑀺 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑁂𑀳𑀺𑀧𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑀁𑀲𑀤𑀺𑀲𑀯𑀺𑀧𑀸𑀓𑀘𑀺𑀢𑁆𑀢𑁂𑀳𑀺 𑀆𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑁆𑀯𑀬𑁂 𑀧𑀦 𑀧𑀞𑀫𑀁 ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦’ 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 ‘𑀇𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦’ 𑀤𑀲𑁆𑀲𑁂𑀢𑀩𑁆𑀩𑀸.

𑀏𑀯𑀫𑁆𑀧𑀺 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲 𑀳𑀼𑀢𑁆𑀯𑀸 𑀲𑀫𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑁄𑀴𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀜𑁆𑀘𑀉𑀘𑁆𑀙𑀼𑀦𑀸𑀴𑀺𑀬𑀦𑁆𑀢𑁄𑀧𑀫𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼. 𑀉𑀘𑁆𑀙𑀼𑀧𑀻𑀴𑀦𑀲𑀫𑀬𑁂 𑀓𑀺𑀭 𑀏𑀓𑀲𑁆𑀫𑀸 𑀕𑀸𑀫𑀸 𑀏𑀓𑀸𑀤𑀲 𑀬𑀦𑁆𑀢𑀯𑀸𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀉𑀘𑁆𑀙𑀼𑀯𑀸𑀝𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀭𑀺𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀉𑀘𑁆𑀙𑀼𑀲𑀸𑀫𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀬𑀦𑁆𑀢𑀯𑀸𑀳𑀸 𑀫𑀬’𑀦𑁆𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 ‘𑀅𑀳𑀁 𑀢𑀼𑀫𑁆𑀳𑁂𑀬𑁂𑀯 𑀧𑀭𑀺𑀬𑁂𑀲𑀸𑀫𑀻’𑀢𑀺 𑀉𑀘𑁆𑀙𑀼𑀲𑀸𑀮𑀁 𑀢𑁂 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑁂 𑀢𑀢𑁆𑀣 𑀦𑀸𑀴𑀺𑀬𑀦𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 ‘𑀫𑀬𑀁 𑀏𑀓𑀸𑀤𑀲 𑀚𑀦𑀸, 𑀅𑀧𑀭𑀫𑁆𑀧𑀺 𑀏𑀓𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀯𑁂𑀢𑀦𑁂𑀦 𑀕𑀡𑁆𑀳𑀣𑀸’𑀢𑀺 𑀆𑀳𑀁𑀲𑀼. 𑀉𑀘𑁆𑀙𑀼𑀲𑀸𑀫𑀺𑀓𑁄 ‘𑀅𑀳𑀫𑁂𑀯 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀉𑀘𑁆𑀙𑀽𑀦𑀁 𑀲𑀸𑀮𑀁 𑀧𑀽𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀳𑀸𑀬𑁄 𑀅𑀳𑁄𑀲𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸, 𑀨𑀸𑀡𑀺𑀢𑀧𑀸𑀘𑀓𑁂𑀦 𑀉𑀘𑁆𑀙𑀼𑀭𑀲𑁂 𑀧𑀓𑁆𑀓𑁂, 𑀕𑀼𑀴𑀩𑀦𑁆𑀥𑀓𑁂𑀦 𑀩𑀤𑁆𑀥𑁂, 𑀉𑀘𑁆𑀙𑀼𑀲𑀸𑀫𑀺𑀓𑁂𑀦 𑀢𑀼𑀮𑀬𑀺𑀢𑁆𑀯𑀸 𑀪𑀸𑀕𑁂𑀲𑀼 𑀤𑀺𑀦𑁆𑀦𑁂𑀲𑀼, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀸𑀕𑀁 𑀆𑀤𑀸𑀬 𑀉𑀘𑁆𑀙𑀼𑀲𑀸𑀮𑀁 𑀲𑀸𑀫𑀺𑀓𑀲𑁆𑀲 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀧𑀭𑀸𑀲𑀼𑀧𑀺 𑀘𑀢𑀽𑀲𑀼 𑀲𑀸𑀮𑀸𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑀢𑁆𑀣 𑀧𑀜𑁆𑀘 𑀬𑀦𑁆𑀢𑀲𑀸𑀮𑀸 𑀯𑀺𑀬 𑀧𑀜𑁆𑀘 𑀧𑀲𑀸𑀤𑀸 𑀤𑀝𑁆𑀞𑀩𑁆𑀩𑀸. 𑀧𑀜𑁆𑀘 𑀉𑀘𑁆𑀙𑀼𑀯𑀸𑀝𑀸 𑀯𑀺𑀬 𑀧𑀜𑁆𑀘 𑀆𑀭𑀫𑁆𑀫𑀡𑀸𑀦𑀺. 𑀏𑀓𑀸𑀤𑀲 𑀯𑀺𑀘𑀭𑀡𑀓𑀬𑀦𑁆𑀢𑀯𑀸𑀳𑀸 𑀯𑀺𑀬 𑀏𑀓𑀸𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺. 𑀧𑀜𑁆𑀘 𑀉𑀘𑁆𑀙𑀼𑀲𑀸𑀮𑀸𑀲𑀸𑀫𑀺𑀦𑁄 𑀯𑀺𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺. 𑀧𑀞𑀫𑀓𑀲𑀸𑀮𑀸𑀬𑀁 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀦𑁆𑀦𑀁 𑀚𑀦𑀸𑀦𑀁 𑀏𑀓𑀢𑁄𑀯 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀸𑀦𑀁 𑀪𑀸𑀕𑀕𑁆𑀕𑀳𑀡𑀓𑀸𑀮𑁄 𑀯𑀺𑀬 𑀏𑀓𑀸𑀤𑀲𑀦𑁆𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑁂 𑀲𑀓𑀲𑀓𑀓𑀺𑀘𑁆𑀘𑀓𑀭𑀡𑀓𑀸𑀮𑁄. 𑀲𑀸𑀮𑀸𑀲𑀸𑀫𑀺𑀓𑀲𑁆𑀲 𑀲𑀸𑀮𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀅𑀓𑀭𑀡𑀁. 𑀤𑀼𑀢𑀺𑀬 𑀢𑀢𑀺𑀬 𑀘𑀢𑀼𑀢𑁆𑀣 𑀧𑀜𑁆𑀘𑀫𑀲𑀸𑀮𑀸𑀬 𑀤𑁆𑀯𑀸𑀤𑀲𑀦𑁆𑀦𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀸𑀦𑀁 𑀪𑀸𑀕𑀕𑁆𑀕𑀳𑀡𑀓𑀸𑀮𑁄 𑀯𑀺𑀬 𑀏𑀓𑀸𑀤𑀲𑀦𑁆𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑁂 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂 𑀲𑀓𑀲𑀓𑀓𑀺𑀘𑁆𑀘𑀓𑀭𑀡𑀓𑀸𑀮𑁄. 𑀲𑀸𑀮𑀸𑀲𑀸𑀫𑀺𑀓𑀲𑁆𑀲 𑀲𑀸𑀮𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀓𑀸𑀮𑁄 𑀯𑀺𑀬 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀅𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸 𑀳𑁄𑀢𑀻𑀢𑀺 𑀯𑀸𑀭𑁄 𑀓𑀣𑀺𑀢𑁄. 𑀬𑀸 𑀧𑀦 𑀢𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀲𑀸 𑀧𑀝𑀺𑀘𑁆𑀙𑀦𑁆𑀦𑀸𑀯 𑀳𑀼𑀢𑁆𑀯𑀸 𑀕𑀢𑀸.

𑀇𑀤𑀸𑀦𑀺 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀓𑀣𑁂𑀢𑀩𑁆𑀩𑁄. 𑀤𑀼𑀳𑁂𑀢𑀼𑀓𑁂𑀦 𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑀁𑀲𑀤𑀺𑀲𑁂𑀦𑁂𑀯 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀓𑁆𑀔𑀼𑀤𑁆𑀯𑀸𑀭𑁂 ‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀆𑀧𑀸𑀣𑀫𑀸𑀕𑀢𑁂 𑀢𑀬𑁄 𑀫𑁄𑀖𑀯𑀸𑀭𑀸. 𑀤𑀼𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀚𑀯𑀦𑀸𑀯𑀲𑀸𑀦𑁂 𑀢𑀁𑀲𑀤𑀺𑀲𑀫𑁂𑀯 𑀫𑀽𑀮𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀢𑀤𑀸𑀭𑀫𑁆𑀫𑀡𑀁. 𑀲𑀲𑀗𑁆𑀔𑀸𑀭𑀺𑀓𑀚𑀯𑀦𑀸𑀯𑀲𑀸𑀦𑁂 𑀢𑀁𑀲𑀤𑀺𑀲𑀫𑁂𑀯 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀢𑀤𑀸𑀭𑀫𑁆𑀫𑀡𑀁. ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ 𑀤𑁆𑀯𑀺𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀸𑀦𑀁 𑀅𑀯𑀲𑀸𑀦𑁂 𑀢𑀸𑀤𑀺𑀲𑀸𑀦𑁂𑀯 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀥 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀅𑀝𑁆𑀞 𑀅𑀝𑁆𑀞 𑀓𑀢𑁆𑀯𑀸 𑀲𑀫𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀅𑀝𑁆𑀞, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀏𑀯𑀁 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀤𑁆𑀯𑀸𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀫𑁆𑀩𑁄𑀧𑀫𑀧𑀜𑁆𑀘𑀦𑀺𑀬𑀸𑀫𑀓𑀣𑀸 𑀧𑀸𑀓𑀢𑀺𑀓𑀸 𑀏𑀯. 𑀤𑀼𑀳𑁂𑀢𑀼𑀓𑀲𑁂𑀲𑀘𑀺𑀢𑁆𑀢𑀢𑁆𑀢𑀬𑀲𑀤𑀺𑀲𑀯𑀺𑀧𑀸𑀓𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀦𑁆𑀢𑀯𑀸𑀳𑁄𑀧𑀫𑀸𑀬 𑀧𑀦𑁂𑀢𑁆𑀣 𑀲𑀢𑁆𑀢 𑀬𑀦𑁆𑀢𑀯𑀸𑀳𑀸. 𑀢𑁂𑀳𑀺 𑀢𑀢𑁆𑀣 𑀬𑀦𑁆𑀢𑁂 𑀦𑀸𑀫 𑀲𑀚𑁆𑀚𑀺𑀢𑁂 𑀲𑀸𑀮𑀸𑀲𑀸𑀫𑀺𑀓𑀁 𑀅𑀝𑁆𑀞𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀓𑀣𑀺𑀢𑁄.

𑀇𑀤𑀸𑀦𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀣𑀸 𑀳𑁄𑀢𑀺 𑁋 𑀘𑀢𑀼𑀦𑁆𑀦𑀜𑁆𑀳𑀺 𑀤𑀼𑀳𑁂𑀢𑀼𑀓𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀓𑀼𑀲𑀮𑀯𑀺𑀧𑀸𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀝𑀺𑀲𑀦𑁆𑀥𑀺 𑀓𑀫𑁆𑀫𑀲𑀤𑀺𑀲𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀫𑁆𑀫𑀜𑁆𑀳𑀺 𑀤𑀼𑀳𑁂𑀢𑀼𑀓𑀁 𑀧𑀝𑀺𑀲𑀦𑁆𑀥𑀺 𑀅𑀳𑁂𑀢𑀼𑀓𑀸. 𑀢𑀲𑁆𑀲 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ 𑀆𑀧𑀸𑀣𑀫𑀸𑀕𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀬𑁄 𑀫𑁄𑀖𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀢𑀼𑀦𑁆𑀦𑀁 𑀧𑀦 𑀤𑀼𑀳𑁂𑀢𑀼𑀓𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀚𑀯𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀅𑀳𑁂𑀢𑀼𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀢𑀁 ‘𑀫𑀽𑀮𑀪𑀯𑀗𑁆𑀕𑀁’‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀏𑀯𑀫𑁂𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯𑀸𑀢𑀺 𑀢𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀕𑀡𑀦𑀽𑀧𑀕𑀸𑀦𑀺 𑀢𑀻𑀡𑁂𑀯 𑀳𑁄𑀦𑁆𑀢𑀺.

‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀧𑀦 𑀲𑀦𑁆𑀢𑀻𑀭𑀡𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁂𑀯. 𑀢𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀳𑁄𑀦𑁆𑀢𑀺. 𑀏𑀯𑀁 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀯𑀻𑀲𑀢𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀢𑁆𑀢𑀸𑀭𑀺 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀅𑀝𑁆𑀞 𑀳𑁄𑀦𑁆𑀢𑀺. 𑀇𑀤𑀁 ‘𑀅𑀳𑁂𑀢𑀼𑀓𑀝𑁆𑀞𑀓𑀁’ 𑀦𑀸𑀫. 𑀇𑀤𑀁 𑀫𑀦𑀼𑀲𑁆𑀲𑀮𑁄𑀓𑁂𑀦 𑀕𑀳𑀺𑀢𑀁.

𑀘𑀢𑀽𑀲𑀼 𑀧𑀦 𑀅𑀧𑀸𑀬𑁂𑀲𑀼 𑀧𑀯𑀢𑁆𑀢𑁂 𑀮𑀩𑁆𑀪𑀢𑀺. 𑀬𑀤𑀸 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑀺𑀭𑀬𑁂 𑀧𑀤𑀼𑀫𑀁 𑀫𑀸𑀧𑁂𑀢𑁆𑀯𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀦𑀺𑀲𑀺𑀦𑁆𑀦𑁄 𑀦𑁂𑀭𑀬𑀺𑀓𑀸𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀢𑀤𑀸 𑀢𑁂𑀲𑀁 𑀣𑁂𑀭𑀁 𑀧𑀲𑁆𑀲𑀦𑁆𑀢𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀤𑁆𑀤𑀁 𑀲𑀼𑀡𑀦𑁆𑀢𑀸𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀘𑀦𑁆𑀤𑀦𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀕𑀢𑀲𑁆𑀲 𑀘𑀻𑀯𑀭𑀕𑀦𑁆𑀥𑀖𑀸𑀬𑀦𑀓𑀸𑀮𑁂 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀦𑀺𑀭𑀬𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀧𑀸𑀦𑀻𑀬𑀤𑀸𑀦𑀓𑀸𑀮𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀫𑀦𑁆𑀤𑀫𑀦𑁆𑀤𑀯𑀸𑀢𑀲𑀫𑀼𑀝𑁆𑀞𑀸𑀧𑀦𑀓𑀸𑀮𑁂 𑀓𑀸𑀬𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘, 𑀏𑀓𑀁 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀤𑁆𑀯𑁂 𑀲𑀦𑁆𑀢𑀻𑀭𑀡𑀸𑀦𑀻𑀢𑀺 𑀅𑀳𑁂𑀢𑀼𑀓𑀝𑁆𑀞𑀓𑀁 𑀮𑀩𑁆𑀪𑀢𑀺. 𑀦𑀸𑀕𑀲𑀼𑀧𑀡𑁆𑀡𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀫𑁆𑀧𑀺 𑀅𑀓𑀼𑀲𑀮𑁂𑀦 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀧𑀯𑀢𑁆𑀢𑁂 𑀓𑀼𑀲𑀮𑀁 𑀯𑀺𑀧𑀘𑁆𑀘𑀢𑀺. 𑀢𑀣𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀗𑁆𑀕𑀮𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁. 𑀅𑀬𑀁 𑀢𑀸𑀯 ‘𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂𑀲𑀼’ 𑀓𑀼𑀲𑀮𑀚𑀯𑀦𑀯𑀲𑁂𑀦 𑀓𑀣𑀸𑀫𑀕𑁆𑀕𑁄.

‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀧𑀦 𑀘𑀢𑀽𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀚𑀯𑀺𑀢𑁂𑀲𑀼 𑀓𑀼𑀲𑀮𑀯𑀺𑀧𑀸𑀓𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ 𑀘𑀢𑀽𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀚𑀯𑀺𑀢𑁂𑀲𑀼 𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀁 𑀧𑀦 ‘𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀁 𑀦𑀺𑀬𑀫𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀁 𑀓𑀼𑀲𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀺𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀇𑀤𑀁 𑀧𑀦 𑀚𑀯𑀦𑀁 𑀓𑀼𑀲𑀮𑀢𑁆𑀣𑀸𑀬 𑀯𑀸 𑀅𑀓𑀼𑀲𑀮𑀢𑁆𑀣𑀸𑀬 𑀯𑀸 𑀓𑁄 𑀦𑀺𑀬𑀸𑀫𑁂𑀢𑀻𑀢𑀺? 𑀆𑀯𑀚𑁆𑀚𑀦𑀜𑁆𑀘𑁂𑀯 𑀯𑁄𑀝𑁆𑀞𑀩𑁆𑀩𑀦𑀜𑁆𑀘. 𑀆𑀯𑀚𑁆𑀚𑀦𑁂𑀦 𑀳𑀺 𑀬𑁄𑀦𑀺𑀲𑁄 𑀆𑀯𑀝𑁆𑀝𑀺𑀢𑁂 𑀯𑁄𑀝𑁆𑀞𑀩𑁆𑀩𑀦𑁂𑀦 𑀬𑁄𑀦𑀺𑀲𑁄 𑀯𑀯𑀢𑁆𑀣𑀸𑀧𑀺𑀢𑁂 𑀚𑀯𑀦𑀁 𑀅𑀓𑀼𑀲𑀮𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁. 𑀆𑀯𑀚𑁆𑀚𑀦𑁂𑀦 𑀅𑀬𑁄𑀦𑀺𑀲𑁄 𑀆𑀯𑀝𑁆𑀝𑀺𑀢𑁂 𑀯𑁄𑀝𑁆𑀞𑀩𑁆𑀩𑀦𑁂𑀦 𑀅𑀬𑁄𑀦𑀺𑀲𑁄 𑀯𑀯𑀢𑁆𑀣𑀸𑀧𑀺𑀢𑁂 𑀚𑀯𑀦𑀁 𑀓𑀼𑀲𑀮𑀁 𑀪𑀯𑀺𑀲𑁆𑀲𑀢𑀻𑀢𑀺𑀧𑀺 𑀅𑀝𑁆𑀞𑀸𑀦𑀫𑁂𑀢𑀁. 𑀉𑀪𑀬𑁂𑀦 𑀧𑀦 𑀬𑁄𑀦𑀺𑀲𑁄 𑀆𑀯𑀝𑁆𑀝𑀺𑀢𑁂 𑀯𑀯𑀢𑁆𑀣𑀸𑀧𑀺𑀢𑁂 𑀘 𑀚𑀯𑀦𑀁 𑀓𑀼𑀲𑀮𑀁 𑀳𑁄𑀢𑀺, 𑀅𑀬𑁄𑀦𑀺𑀲𑁄 𑀅𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀧𑀦 𑀓𑀗𑁆𑀔𑀢𑁄 𑀉𑀤𑁆𑀥𑀢𑀲𑁆𑀲 𑀘 𑀢𑀤𑀸𑀭𑀫𑁆𑀫𑀡𑀁 𑀓𑀺𑀁 𑀳𑁄𑀢𑀻𑀢𑀺? 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀁 𑀓𑀗𑁆𑀔𑀢𑀼 𑀯𑀸 𑀫𑀸 𑀯𑀸, 𑀉𑀤𑁆𑀥𑀢𑁄 𑀯𑀸 𑀳𑁄𑀢𑀼 𑀫𑀸 𑀯𑀸, 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ ‘𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀉𑀧𑁂𑀓𑁆𑀔𑀸𑀲𑀳𑀕𑀢’𑀦𑁆𑀢𑀺, 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀤𑀻𑀧𑀦𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄 𑀦𑀸𑀫. 𑀲𑁄𑀫𑀦𑀲𑁆𑀲𑀲𑀳𑀕𑀢𑀲𑁆𑀫𑀺𑀜𑁆𑀳𑀺 𑀚𑀯𑀦𑁂 𑀚𑀯𑀺𑀢𑁂 𑀧𑀜𑁆𑀘 𑀢𑀤𑀸𑀭𑀫𑁆𑀫𑀡𑀸𑀦𑀺 𑀕𑀯𑁂𑀲𑀺𑀢𑀩𑁆𑀩𑀸𑀦𑀻𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑁆𑀫𑀺𑀁 𑀚𑀯𑀦𑁂 𑀚𑀯𑀺𑀢𑁂 𑀙 𑀕𑀯𑁂𑀲𑀺𑀢𑀩𑁆𑀩𑀸𑀦𑀻𑀢𑀺.

𑀅𑀣 𑀬𑀤𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀯𑀢𑁆𑀢𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀫𑀸𑀤𑁂𑀦 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 ‘𑀧𑀡𑀻𑀢𑀥𑀫𑁆𑀫𑁄 𑀫𑁂 𑀦𑀝𑁆𑀞𑁄’𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀓𑀺𑀁 𑀉𑀧𑁆𑀧𑀚𑁆𑀚𑀢𑀺? ‘𑀲𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀜𑁆𑀳𑀺 𑀤𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀜𑁆𑀘 𑀲𑁄𑀫𑀦𑀲𑁆𑀲𑀁’ 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀁. 𑀫𑀳𑀕𑁆𑀕𑀢𑀥𑀫𑁆𑀫𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀢𑀢𑁆𑀣𑁂𑀯 𑀧𑀝𑀺𑀲𑀺𑀤𑁆𑀥𑀦𑁆𑀢𑀺? 𑀓𑀼𑀲𑀮𑀯𑀺𑀧𑀸𑀓𑀸 𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀸 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀫𑀲𑁆𑀲𑀸 𑀆𑀯𑀚𑁆𑀚𑀦𑀦𑁆𑀢𑀺? ‘𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦𑀁 𑀯𑀺𑀬 𑀦𑀢𑁆𑀣𑀲𑁆𑀲𑀸 𑀆𑀯𑀚𑁆𑀚𑀦𑀓𑀺𑀘𑁆𑀘’𑀦𑁆𑀢𑀺. ‘𑀏𑀢𑀸𑀦𑀺 𑀢𑀸𑀯 𑀅𑀢𑁆𑀢𑀦𑁄 𑀦𑀺𑀦𑁆𑀦𑀢𑁆𑀢𑀸 𑀘 𑀘𑀺𑀡𑁆𑀡𑀢𑁆𑀢𑀸 𑀘 𑀲𑀫𑀼𑀤𑀸𑀘𑀸𑀭𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀦𑁆𑀢𑀼, 𑀅𑀬𑀁 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻’𑀢𑀺? ‘𑀬𑀣𑀸 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁, 𑀅𑀭𑀺𑀬𑀫𑀕𑁆𑀕𑀘𑀺𑀢𑁆𑀢𑀁, 𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀘𑀺𑀢𑁆𑀢𑀸𑀦𑀺, 𑀏𑀯𑀁 𑀅𑀲𑀦𑁆𑀢𑁂𑀧𑀺 𑀆𑀯𑀚𑁆𑀚𑀦𑁂, 𑀦𑀺𑀦𑁆𑀦𑀘𑀺𑀡𑁆𑀡𑀲𑀫𑀼𑀤𑀸𑀘𑀸𑀭𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀦𑀸 𑀳𑀺 𑀆𑀯𑀚𑁆𑀚𑀦𑁂𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀆𑀭𑀫𑁆𑀫𑀡𑁂𑀦 𑀧𑀦 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀢𑀻’𑀢𑀺. ‘𑀅𑀣 𑀓𑀺𑀫𑀲𑁆𑀲𑀸𑀭𑀫𑁆𑀫𑀡’𑀦𑁆𑀢𑀺? ‘𑀭𑀽𑀧𑀸𑀤𑀻𑀲𑀼 𑀧𑀭𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑀁. 𑀏𑀢𑁂𑀲𑀼 𑀳𑀺 𑀬𑀤𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀧𑀸𑀣𑀫𑀸𑀕𑀢𑀁 𑀳𑁄𑀢𑀺, 𑀢𑀁 𑀆𑀭𑀩𑁆𑀪 𑀏𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀩𑁆𑀩𑁂𑀲𑀫𑁆𑀧𑀺 𑀏𑀢𑁂𑀲𑀁 𑀘𑀺𑀢𑁆𑀢𑀸𑀦𑀁 𑀧𑀸𑀓𑀝𑀪𑀸𑀯𑀢𑁆𑀣𑀁 𑀅𑀬𑀁 𑀧𑀓𑀺𑀡𑁆𑀡𑀓𑀦𑀬𑁄 𑀯𑀼𑀢𑁆𑀢𑁄 𑁋

𑀲𑀼𑀢𑁆𑀢𑀁 𑀤𑁄𑀯𑀸𑀭𑀺𑀓𑁄 𑀘, 𑀕𑀸𑀫𑀺𑀮𑁆𑀮𑁄 𑀅𑀫𑁆𑀩𑁄 𑀓𑁄𑀮𑀺𑀬𑀓𑁂𑀦 𑀘;

𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀻 𑀘, 𑀯𑀺𑀲𑀬𑀕𑁆𑀕𑀸𑀳𑁄 𑀘 𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄𑀢𑀺.

𑀢𑀢𑁆𑀣 ‘𑀲𑀼𑀢𑁆𑀢’𑀦𑁆𑀢𑀺, 𑀏𑀓𑁄 𑀧𑀦𑁆𑀣𑀫𑀓𑁆𑀓𑀝𑀓𑁄 𑀧𑀜𑁆𑀘𑀲𑀼 𑀤𑀺𑀲𑀸𑀲𑀼 𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀚𑀸𑀮𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀦𑀺𑀧𑀚𑁆𑀚𑀢𑀺. 𑀧𑀞𑀫𑀤𑀺𑀲𑀸𑀬 𑀧𑀲𑀸𑀭𑀺𑀢𑀲𑀼𑀢𑁆𑀢𑁂 𑀧𑀸𑀡𑀓𑁂𑀦 𑀯𑀸 𑀧𑀝𑀗𑁆𑀕𑁂𑀦 𑀯𑀸 𑀫𑀓𑁆𑀔𑀺𑀓𑀸𑀬 𑀯𑀸 𑀧𑀳𑀝𑁂 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀘𑀮𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀬𑀽𑀲𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦𑀆𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀧𑀚𑁆𑀚𑀢𑀺. 𑀤𑀼𑀢𑀺𑀬𑀤𑀺𑀲𑀸𑀤𑀻𑀲𑀼 𑀧𑀳𑀝𑀓𑀸𑀮𑁂𑀧𑀺 𑀏𑀯𑀫𑁂𑀯 𑀓𑀭𑁄𑀢𑀺.

𑀢𑀢𑁆𑀣 𑀧𑀜𑁆𑀘𑀲𑀼 𑀤𑀺𑀲𑀸𑀲𑀼 𑀧𑀲𑀸𑀭𑀺𑀢𑀲𑀼𑀢𑁆𑀢𑀁 𑀯𑀺𑀬 𑀧𑀜𑁆𑀘𑀧𑀲𑀸𑀤𑀸. 𑀫𑀚𑁆𑀛𑁂 𑀦𑀺𑀧𑀦𑁆𑀦𑀫𑀓𑁆𑀓𑀝𑀓𑁄 𑀯𑀺𑀬 𑀘𑀺𑀢𑁆𑀢𑀁. 𑀧𑀸𑀡𑀓𑀸𑀤𑀻𑀳𑀺 𑀲𑀼𑀢𑁆𑀢𑀖𑀝𑁆𑀝𑀦𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑁂𑀦 𑀧𑀲𑀸𑀤𑀲𑁆𑀲 𑀖𑀝𑁆𑀝𑀺𑀢𑀓𑀸𑀮𑁄. 𑀫𑀚𑁆𑀛𑁂 𑀦𑀺𑀧𑀦𑁆𑀦𑀫𑀓𑁆𑀓𑀝𑀓𑀲𑁆𑀲 𑀘𑀮𑀦𑀁 𑀯𑀺𑀬 𑀧𑀲𑀸𑀤𑀖𑀝𑁆𑀝𑀦𑀓𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄. 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀕𑀫𑀦𑀓𑀸𑀮𑁄 𑀯𑀺𑀬 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺. 𑀲𑀻𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀬𑀽𑀲𑀧𑀺𑀯𑀦𑀁 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑁂 𑀚𑀯𑀺𑀢𑀓𑀸𑀮𑁄. 𑀧𑀼𑀦𑀆𑀕𑀦𑁆𑀢𑁆𑀯𑀸 𑀫𑀚𑁆𑀛𑁂 𑀦𑀺𑀧𑀚𑁆𑀚𑀦𑀁 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀳𑀤𑀬𑀯𑀢𑁆𑀣𑀼𑀫𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀁.

𑀇𑀤𑀁 𑀑𑀧𑀫𑁆𑀫𑀁 𑀓𑀺𑀁 𑀤𑀻𑀧𑁂𑀢𑀺? 𑀆𑀭𑀫𑁆𑀫𑀡𑁂𑀦 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀧𑀲𑀸𑀤𑀯𑀢𑁆𑀣𑀼𑀓𑀘𑀺𑀢𑁆𑀢𑀢𑁄 𑀳𑀤𑀬𑀭𑀽𑀧𑀯𑀢𑁆𑀣𑀼𑀓𑀘𑀺𑀢𑁆𑀢𑀁 𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺𑀧𑀺.

‘𑀤𑁄𑀯𑀸𑀭𑀺𑀓𑁄’𑀢𑀺, 𑀏𑀓𑁄 𑀭𑀸𑀚𑀸 𑀲𑀬𑀦𑀕𑀢𑁄 𑀦𑀺𑀤𑁆𑀤𑀸𑀬𑀢𑀺. 𑀢𑀲𑁆𑀲 𑀧𑀭𑀺𑀘𑀸𑀭𑀓𑁄 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀤𑁆𑀯𑀸𑀭𑁂 𑀞𑀺𑀢𑁄. 𑀢𑀬𑁄 𑀧𑀝𑀺𑀳𑀸𑀭𑀸 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸. 𑀅𑀣𑁂𑀓𑁄 𑀧𑀘𑁆𑀘𑀦𑁆𑀢𑀯𑀸𑀲𑀻 𑀫𑀦𑀼𑀲𑁆𑀲𑁄 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺. 𑀧𑀸𑀤𑀧𑀭𑀺𑀫𑀚𑁆𑀚𑀓𑁄 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀸𑀬 𑀲𑀜𑁆𑀜𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀺. 𑀧𑀞𑀫𑀧𑀝𑀺𑀳𑀸𑀭𑁄 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀅𑀤𑀸𑀲𑀺, 𑀤𑀼𑀢𑀺𑀬𑁄 𑀢𑀢𑀺𑀬𑀲𑁆𑀲, 𑀢𑀢𑀺𑀬𑁄 𑀭𑀜𑁆𑀜𑁄. 𑀭𑀸𑀚𑀸 𑀧𑀭𑀺𑀪𑀼𑀜𑁆𑀚𑀺.

𑀢𑀢𑁆𑀣 𑀲𑁄 𑀭𑀸𑀚𑀸 𑀯𑀺𑀬 𑀚𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀸𑀤𑀧𑀭𑀺𑀫𑀚𑁆𑀚𑀓𑁄 𑀯𑀺𑀬 𑀆𑀯𑀚𑁆𑀚𑀦𑀁. 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀬𑁄 𑀧𑀝𑀺𑀳𑀸𑀭𑀸 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀢𑀻𑀡𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀸𑀓𑁄𑀝𑀦𑀁 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀁. 𑀧𑀸𑀤𑀧𑀭𑀺𑀫𑀚𑁆𑀚𑀓𑁂𑀦 𑀲𑀜𑁆𑀜𑀸𑀬 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄. 𑀢𑁂𑀦 𑀤𑀺𑀦𑁆𑀦𑀲𑀜𑁆𑀜𑀸𑀬 𑀩𑀥𑀺𑀭𑀤𑁄𑀯𑀸𑀭𑀺𑀓𑀲𑁆𑀲 𑀤𑁆𑀯𑀸𑀭𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑁂 𑀤𑀲𑁆𑀲𑀦𑀓𑀺𑀘𑁆𑀘𑀲𑀸𑀥𑀦𑀓𑀸𑀮𑁄. 𑀧𑀞𑀫𑀧𑀝𑀺𑀳𑀸𑀭𑁂𑀦 𑀧𑀡𑁆𑀡𑀸𑀓𑀸𑀭𑀲𑁆𑀲 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄. 𑀧𑀞𑀫𑁂𑀦 𑀤𑀼𑀢𑀺𑀬𑀲𑁆𑀲 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀡𑀓𑀸𑀮𑁄. 𑀤𑀼𑀢𑀺𑀬𑁂𑀦 𑀢𑀢𑀺𑀬𑀲𑁆𑀲 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄. 𑀢𑀢𑀺𑀬𑁂𑀦 𑀭𑀜𑁆𑀜𑁄 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀯𑁄𑀝𑁆𑀞𑀩𑁆𑀩𑀦𑁂𑀦 𑀚𑀯𑀦𑀲𑁆𑀲 𑀦𑀺𑀬𑁆𑀬𑀸𑀤𑀺𑀢𑀓𑀸𑀮𑁄. 𑀭𑀜𑁆𑀜𑁄 𑀧𑀭𑀺𑀪𑁄𑀕𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀓𑀸𑀮𑁄.

𑀇𑀤𑀁 𑀑𑀧𑀫𑁆𑀫𑀁 𑀓𑀺𑀁 𑀤𑀻𑀧𑁂𑀢𑀺? 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀫𑀢𑁆𑀢𑀦𑀫𑁂𑀯 𑀓𑀺𑀘𑁆𑀘𑀁, 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀸𑀯𑀝𑁆𑀝𑀦𑀫𑀢𑁆𑀢𑀫𑁂𑀯, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀤𑀲𑁆𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑀯𑀢𑁆𑀣𑀸𑀧𑀦𑀫𑀢𑁆𑀢𑀸𑀦𑁂𑀯 𑀓𑀺𑀘𑁆𑀘𑀸𑀦𑀺. 𑀏𑀓𑀦𑁆𑀢𑁂𑀦 𑀧𑀦 𑀚𑀯𑀦𑀫𑁂𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑁄𑀢𑀻𑀢𑀺 𑀤𑀻𑀧𑁂𑀢𑀺.

‘𑀕𑀸𑀫𑀺𑀮𑁆𑀮𑁄’𑀢𑀺, 𑀲𑀫𑁆𑀩𑀳𑀼𑀮𑀸 𑀕𑀸𑀫𑀤𑀸𑀭𑀓𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀁𑀲𑀼𑀓𑀻𑀴𑀁 𑀓𑀻𑀴𑀦𑁆𑀢𑀺. 𑀢𑀢𑁆𑀣𑁂𑀓𑀲𑁆𑀲 𑀳𑀢𑁆𑀣𑁂 𑀓𑀳𑀸𑀧𑀡𑁄 𑀧𑀝𑀺𑀳𑀜𑁆𑀜𑀺. 𑀲𑁄 ‘𑀫𑀬𑁆𑀳𑀁 𑀳𑀢𑁆𑀣𑁂 𑀧𑀝𑀺𑀳𑀢𑀁, 𑀓𑀺𑀁 𑀦𑀼 𑀔𑁄 𑀏𑀢’𑀦𑁆𑀢𑀺 𑀆𑀳. 𑀅𑀣𑁂𑀓𑁄 ‘𑀧𑀡𑁆𑀟𑀭𑀁 𑀏𑀢’𑀦𑁆𑀢𑀺 𑀆𑀳. 𑀅𑀧𑀭𑁄 𑀲𑀳 𑀧𑀁𑀲𑀼𑀦𑀸 𑀕𑀸𑀴𑁆𑀳𑀁 𑀕𑀡𑁆𑀳𑀺. 𑀅𑀜𑁆𑀜𑁄 ‘𑀧𑀼𑀣𑀼𑀮𑀁 𑀘𑀢𑀼𑀭𑀲𑁆𑀲𑀁 𑀏𑀢’𑀦𑁆𑀢𑀺 𑀆𑀳. 𑀅𑀧𑀭𑁄 ‘𑀓𑀳𑀸𑀧𑀡𑁄 𑀏𑀲𑁄’𑀢𑀺 𑀆𑀳. 𑀅𑀣 𑀦𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀼 𑀅𑀤𑀸𑀲𑀺. 𑀲𑀸 𑀓𑀫𑁆𑀫𑁂 𑀉𑀧𑀦𑁂𑀲𑀺.

𑀢𑀢𑁆𑀣 𑀲𑀫𑁆𑀩𑀳𑀼𑀮𑀸𑀦𑀁 𑀤𑀸𑀭𑀓𑀸𑀦𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀓𑀻𑀴𑀦𑁆𑀢𑀸𑀦𑀁 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀪𑀯𑀗𑁆𑀕𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀳𑀸𑀧𑀡𑀲𑁆𑀲 𑀳𑀢𑁆𑀣𑁂 𑀧𑀝𑀺𑀳𑀢𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑁂𑀦 𑀧𑀲𑀸𑀤𑀲𑁆𑀲 𑀖𑀝𑁆𑀝𑀺𑀢𑀓𑀸𑀮𑁄. ‘𑀓𑀺𑀁 𑀦𑀼 𑀔𑁄 𑀏𑀢’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄. ‘𑀧𑀡𑁆𑀟𑀭𑀁 𑀏𑀢’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀲𑁆𑀲𑀦𑀓𑀺𑀘𑁆𑀘𑀲𑁆𑀲 𑀲𑀸𑀥𑀺𑀢𑀓𑀸𑀮𑁄. 𑀲𑀳 𑀧𑀁𑀲𑀼𑀦𑀸 𑀕𑀸𑀴𑁆𑀳𑀁 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄. ‘𑀧𑀼𑀣𑀼𑀮𑀁 𑀘𑀢𑀼𑀭𑀲𑁆𑀲𑀁 𑀏𑀢’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀡𑀓𑀸𑀮𑁄. ‘𑀏𑀲𑁄 𑀓𑀳𑀸𑀧𑀡𑁄’𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄. 𑀫𑀸𑀢𑀭𑀸 𑀓𑀫𑁆𑀫𑁂 𑀉𑀧𑀦𑀻𑀢𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀁 𑀑𑀧𑀫𑁆𑀫𑀁 𑀓𑀺𑀁 𑀤𑀻𑀧𑁂𑀢𑀺? 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀲𑀦𑁆𑀢𑀻𑀭𑁂𑀢𑀺, 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀯𑀯𑀢𑁆𑀣𑀸𑀧𑁂𑀢𑀺, 𑀚𑀯𑀦𑀁 𑀅𑀤𑀺𑀲𑁆𑀯𑀸𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑁄𑀢𑀺. 𑀏𑀓𑀦𑁆𑀢𑁂𑀦 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑀻𑀧𑁂𑀢𑀺.

‘𑀅𑀫𑁆𑀩𑁄 𑀓𑁄𑀮𑀺𑀬𑀓𑁂𑀦 𑀘𑀸’𑀢𑀺, 𑀇𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀫𑁆𑀩𑁄𑀧𑀫𑀜𑁆𑀘 𑀉𑀘𑁆𑀙𑀼𑀲𑀸𑀮𑀸𑀲𑀸𑀫𑀺𑀓𑁄𑀧𑀫𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀻 𑀘𑀸’𑀢𑀺, 𑀉𑀪𑁄𑀧𑀺 𑀓𑀺𑀭 𑀢𑁂 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁆𑀣 𑀧𑀻𑀞𑀲𑀧𑁆𑀧𑀻 𑀆𑀳 𑁋 ‘𑀪𑁄 𑀅𑀦𑁆𑀥𑀓, 𑀓𑀲𑁆𑀫𑀸 𑀢𑁆𑀯𑀁 𑀇𑀥 𑀲𑀼𑀲𑁆𑀲𑀫𑀸𑀦𑁄 𑀯𑀺𑀘𑀭𑀲𑀺, 𑀅𑀲𑀼𑀓𑁄 𑀧𑀤𑁂𑀲𑁄 𑀲𑀼𑀪𑀺𑀓𑁆𑀔𑁄 𑀩𑀳𑁆𑀯𑀦𑁆𑀦𑀧𑀸𑀦𑁄, 𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺? ‘𑀫𑀬𑁆𑀳𑀁 𑀢𑀸𑀯 𑀢𑀬𑀸 𑀆𑀘𑀺𑀓𑁆𑀔𑀺𑀢𑀁, 𑀢𑀼𑀬𑁆𑀳𑀁 𑀧𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀢𑀼𑀁 𑀓𑀺𑀁 𑀦 𑀯𑀝𑁆𑀝𑀢𑀻’𑀢𑀺? ‘𑀫𑀬𑁆𑀳𑀁 𑀕𑀦𑁆𑀢𑀼𑀁 𑀧𑀸𑀤𑀸 𑀦𑀢𑁆𑀣𑀻’𑀢𑀺. ‘𑀫𑀬𑁆𑀳𑀫𑁆𑀧𑀺 𑀧𑀲𑁆𑀲𑀺𑀢𑀼𑀁 𑀘𑀓𑁆𑀔𑀽𑀦𑀺 𑀦𑀢𑁆𑀣𑀻’𑀢𑀺. ‘𑀬𑀤𑀺 𑀏𑀯𑀁, 𑀢𑀯 𑀧𑀸𑀤𑀸 𑀳𑁄𑀦𑁆𑀢𑀼, 𑀫𑀫 𑀘𑀓𑁆𑀔𑀽𑀦𑀻’𑀢𑀺 𑀉𑀪𑁄𑀧𑀺 ‘𑀲𑀸𑀥𑀽’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀺𑀁 𑀔𑀦𑁆𑀥𑀁 𑀆𑀭𑁄𑀧𑁂𑀲𑀺. 𑀲𑁄 𑀢𑀲𑁆𑀲 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦𑀲𑁆𑀲 𑀲𑀻𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀽𑀮𑀁 𑀆𑀯𑀭𑀺𑀢𑁆𑀯𑀸 𑀞𑀺𑀢𑀁, 𑀇𑀫𑀲𑁆𑀫𑀺𑀁 𑀧𑀸𑀲𑀸𑀡𑁄, 𑀯𑀸𑀫𑀁 𑀫𑀼𑀜𑁆𑀘 𑀤𑀓𑁆𑀔𑀺𑀡𑀁 𑀕𑀡𑁆𑀳, 𑀤𑀓𑁆𑀔𑀺𑀡𑀁 𑀫𑀼𑀜𑁆𑀘 𑀯𑀸𑀫𑀁 𑀕𑀡𑁆𑀳𑀸’𑀢𑀺 𑀫𑀕𑁆𑀕𑀁 𑀦𑀺𑀬𑀫𑁂𑀢𑁆𑀯𑀸 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀚𑀘𑁆𑀘𑀦𑁆𑀥𑀲𑁆𑀲 𑀧𑀸𑀤𑀸 𑀧𑀻𑀞𑀲𑀧𑁆𑀧𑀺𑀲𑁆𑀲 𑀘𑀓𑁆𑀔𑀽𑀦𑀻𑀢𑀺 𑀉𑀪𑁄𑀧𑀺 𑀲𑀫𑁆𑀧𑀬𑁄𑀕𑁂𑀦 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀁𑀲𑀼.

𑀢𑀢𑁆𑀣 𑀚𑀘𑁆𑀘𑀦𑁆𑀥𑁄 𑀯𑀺𑀬 𑀭𑀽𑀧𑀓𑀸𑀬𑁄, 𑀧𑀻𑀞𑀲𑀧𑁆𑀧𑀻 𑀯𑀺𑀬 𑀅𑀭𑀽𑀧𑀓𑀸𑀬𑁄. 𑀧𑀻𑀞𑀲𑀧𑁆𑀧𑀺𑀦𑀸 𑀯𑀺𑀦𑀸 𑀚𑀘𑁆𑀘𑀦𑁆𑀥𑀲𑁆𑀲 𑀤𑀺𑀲𑀁 𑀕𑀦𑁆𑀢𑀼𑀁 𑀕𑀫𑀦𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀢𑀓𑀸𑀮𑁄 𑀯𑀺𑀬 𑀭𑀽𑀧𑀲𑁆𑀲 𑀅𑀭𑀽𑀧𑁂𑀦 𑀯𑀺𑀦𑀸 𑀆𑀤𑀸𑀦𑀕𑀳𑀡𑀘𑁄𑀧𑀦𑀁 𑀧𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸. 𑀚𑀘𑁆𑀘𑀦𑁆𑀥𑁂𑀦 𑀯𑀺𑀦𑀸 𑀧𑀻𑀞𑀲𑀧𑁆𑀧𑀺𑀲𑁆𑀲 𑀤𑀺𑀲𑀁 𑀕𑀦𑁆𑀢𑀼𑀁 𑀕𑀫𑀦𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀁 𑀯𑀺𑀬 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀁, 𑀯𑀺𑀦𑀸 𑀅𑀭𑀽𑀧𑀲𑁆𑀲 𑀅𑀧𑁆𑀧𑀯𑀢𑁆𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑁆𑀧𑀬𑁄𑀕𑁂𑀦 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀢𑀓𑀸𑀮𑁄 𑀯𑀺𑀬 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀬𑁄𑀕𑁂𑀦 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀺𑀲𑀫𑁆𑀪𑀸𑀯𑁄𑀢𑀺. 𑀅𑀬𑀁 𑀧𑀜𑁆𑀳𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀓𑀣𑀺𑀢𑁄.

‘𑀯𑀺𑀲𑀬𑀕𑁆𑀕𑀸𑀳𑁄’ 𑀘𑀸𑀢𑀺, 𑀘𑀓𑁆𑀔𑀼 𑀭𑀽𑀧𑀯𑀺𑀲𑀬𑀁 𑀕𑀡𑁆𑀳𑀸𑀢𑀺. 𑀲𑁄𑀢𑀸𑀤𑀻𑀦𑀺 𑀲𑀤𑁆𑀤𑀸𑀤𑀺𑀯𑀺𑀲𑀬𑁂.

‘𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄’𑀢𑀺, ‘𑀉𑀧𑀦𑀺𑀲𑁆𑀲𑀬𑀢𑁄’ 𑀘 ‘𑀅𑀢𑁆𑀣𑀢𑁄’ 𑀘. 𑀢𑀢𑁆𑀣 𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀲𑁆𑀲, 𑀆𑀧𑀸𑀣𑀕𑀢𑀢𑁆𑀢𑀸 𑀭𑀽𑀧𑀸𑀦𑀁, 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 𑀫𑀢𑀲𑁆𑀲𑀸𑀧𑀺 𑀘𑀓𑁆𑀔𑀼 𑀲𑀫𑁆𑀪𑀺𑀦𑁆𑀦𑀁 𑀳𑁄𑀢𑀺. 𑀚𑀻𑀯𑀢𑁄 𑀦𑀺𑀭𑀼𑀤𑁆𑀥𑀫𑁆𑀧𑀺, 𑀧𑀺𑀢𑁆𑀢𑁂𑀦 𑀯𑀸 𑀲𑁂𑀫𑁆𑀳𑁂𑀦 𑀯𑀸 𑀭𑀼𑀳𑀺𑀭𑁂𑀦 𑀯𑀸 𑀧𑀮𑀺𑀩𑀼𑀤𑁆𑀥𑀫𑁆𑀧𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 ‘𑀲𑀫𑁆𑀪𑀺𑀦𑁆𑀦𑀁’ 𑀦𑀸𑀫 𑀳𑁄𑀢𑀺. 𑀲𑀓𑁆𑀓𑁄𑀦𑁆𑀢𑀁 𑀅𑀲𑀫𑁆𑀪𑀺𑀦𑁆𑀦𑀁 𑀦𑀸𑀫. 𑀲𑁄𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀼𑀲𑁆𑀫𑀺𑀁 𑀧𑀦 𑀅𑀲𑀫𑁆𑀪𑀺𑀦𑁆𑀦𑁂𑀧𑀺 𑀩𑀳𑀺𑀤𑁆𑀥𑀸 𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀣𑀁 𑀅𑀦𑀸𑀕𑀘𑁆𑀙𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀧𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑁂𑀧𑀺 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑁂 𑀅𑀲𑀢𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀲𑀦𑁆𑀢𑁂𑀧𑀺 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀅𑀦𑀸𑀯𑀝𑁆𑀝𑀺𑀢𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀆𑀯𑀝𑁆𑀝𑀺𑀢𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 (𑀫. 𑀦𑀺. 𑁧.𑁩𑁦𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁).

𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀲𑁄𑀢𑀲𑁆𑀲, 𑀆𑀧𑀸𑀣𑀕𑀢𑀢𑁆𑀢𑀸 𑀲𑀤𑁆𑀤𑀸𑀦𑀁, 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 ‘𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀺𑀢’𑀦𑁆𑀢𑀺 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀬𑀁 𑀮𑀤𑁆𑀥𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸 𑀢𑁂𑀦. 𑀦 𑀳𑀺 𑀧𑀺𑀳𑀺𑀢𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺. 𑀯𑀺𑀲𑁂𑀲𑀫𑀢𑁆𑀢𑀁 𑀧𑀦 𑀯𑀓𑁆𑀔𑀸𑀫.

𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀖𑀸𑀦𑀲𑁆𑀲, 𑀆𑀧𑀸𑀣𑀕𑀢𑀢𑁆𑀢𑀸 𑀕𑀦𑁆𑀥𑀸𑀦𑀁, 𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 ‘𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀺𑀢’𑀦𑁆𑀢𑀺 𑀖𑀸𑀦𑀩𑀺𑀮𑀁 𑀯𑀸𑀬𑀼𑀫𑁆𑀳𑀺 𑀧𑀯𑀺𑀲𑀦𑁆𑀢𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀚𑀺𑀯𑁆𑀳𑀸𑀬, 𑀆𑀧𑀸𑀣𑀕𑀢𑀢𑁆𑀢𑀸 𑀭𑀲𑀸𑀦𑀁, 𑀆𑀧𑁄𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 ‘𑀆𑀧𑁄𑀲𑀦𑁆𑀦𑀺𑀲𑁆𑀲𑀺𑀢’𑀦𑁆𑀢𑀺 𑀚𑀺𑀯𑁆𑀳𑀸𑀢𑁂𑀫𑀦𑀁 𑀆𑀧𑀁 𑀮𑀤𑁆𑀥𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸 𑀢𑁂𑀦. 𑀲𑀼𑀓𑁆𑀔𑀚𑀺𑀯𑁆𑀳𑀸𑀦𑀜𑁆𑀳𑀺 𑀲𑀼𑀓𑁆𑀔𑀔𑀸𑀤𑀦𑀻𑀬𑁂 𑀚𑀺𑀯𑁆𑀳𑀸𑀬 𑀞𑀧𑀺𑀢𑁂𑀧𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑁂𑀯.

𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀓𑀸𑀬𑀲𑁆𑀲, 𑀆𑀧𑀸𑀣𑀕𑀢𑀢𑁆𑀢𑀸 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 ‘𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀺𑀢’𑀦𑁆𑀢𑀺 𑀓𑀸𑀬𑀧𑀲𑀸𑀤𑀧𑀘𑁆𑀘𑀬𑀁 𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀬𑀁 𑀮𑀤𑁆𑀥𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑁂𑀦 𑀯𑀺𑀦𑀸. 𑀓𑀸𑀬𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀩𑀳𑀺𑀤𑁆𑀥𑀸𑀫𑀳𑀸𑀪𑀽𑀢𑀸𑀭𑀫𑁆𑀫𑀡𑀁 𑀅𑀚𑁆𑀛𑀢𑁆𑀢𑀺𑀓𑀁 𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀧𑀲𑀸𑀤𑀧𑀘𑁆𑀘𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀺.

𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀫𑀦𑀲𑁆𑀲, 𑀆𑀧𑀸𑀣𑀕𑀢𑀢𑁆𑀢𑀸 𑀥𑀫𑁆𑀫𑀸𑀦𑀁, 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁, 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀢𑀢𑁆𑀣 ‘𑀫𑀦𑁄’𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀢𑀁 𑀦𑀺𑀭𑀼𑀤𑁆𑀥𑀫𑁆𑀧𑀺, 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀁 𑀫𑀦𑁆𑀤𑀣𑀸𑀫𑀕𑀢𑀫𑁂𑀯 𑀧𑀯𑀢𑁆𑀢𑀫𑀸𑀦𑀫𑁆𑀧𑀺, 𑀲𑀫𑁆𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀆𑀯𑀚𑁆𑀚𑀦𑀲𑁆𑀲 𑀧𑀦 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀅𑀲𑀫𑁆𑀪𑀺𑀦𑁆𑀦𑀁 𑀦𑀸𑀫. ‘𑀆𑀧𑀸𑀣𑀕𑀢𑀢𑁆𑀢𑀸 𑀥𑀫𑁆𑀫𑀸𑀦’𑀦𑁆𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂. ‘𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢’𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀁 𑀮𑀤𑁆𑀥𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑁂𑀦 𑀯𑀺𑀦𑀸. 𑀅𑀬𑀫𑁆𑀧𑀺 𑀧𑀜𑁆𑀳𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 𑀲𑀦𑁆𑀥𑀸𑀬 𑀓𑀣𑀺𑀢𑁄. ‘𑀫𑀦𑀲𑀺𑀓𑀸𑀭𑀳𑁂𑀢𑀼𑀓’𑀦𑁆𑀢𑀺 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 ‘𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄’𑀢𑀺 𑀏𑀢𑁆𑀣 𑀉𑀧𑀦𑀺𑀲𑁆𑀲𑀬𑀯𑀡𑁆𑀡𑀦𑀸.

‘𑀅𑀢𑁆𑀣𑀢𑁄’ 𑀧𑀦 𑀘𑀓𑁆𑀔𑀼 𑀤𑀲𑁆𑀲𑀦𑀢𑁆𑀣𑀁, 𑀲𑁄𑀢𑀁 𑀲𑀯𑀦𑀢𑁆𑀣𑀁, 𑀖𑀸𑀦𑀁 𑀖𑀸𑀬𑀦𑀢𑁆𑀣𑀁, 𑀚𑀺𑀯𑁆𑀳𑀸 𑀲𑀸𑀬𑀦𑀢𑁆𑀣𑀸, 𑀓𑀸𑀬𑁄 𑀨𑀼𑀲𑀦𑀢𑁆𑀣𑁄, 𑀫𑀦𑁄 𑀯𑀺𑀚𑀸𑀦𑀦𑀢𑁆𑀣𑁄. 𑀢𑀢𑁆𑀣 𑀤𑀲𑁆𑀲𑀦𑀁 𑀅𑀢𑁆𑀣𑁄 𑀅𑀲𑁆𑀲. 𑀢𑀜𑁆𑀳𑀺 𑀢𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀸𑀯𑀢𑀸 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁂 𑀲𑁄𑀴𑀲𑀓𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄, 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀓𑀫𑀕𑁆𑀕𑁂𑀦 𑀘𑁂𑀯 𑀅𑀳𑁂𑀢𑀼𑀓𑀝𑁆𑀞𑀓𑁂𑀦 𑀘𑀸𑀢𑀺.

𑀇𑀤𑀸𑀦𑀺 𑀫𑁄𑀭𑀯𑀸𑀧𑀻𑀯𑀸𑀲𑀻𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀸𑀤𑀲𑀓𑀫𑀕𑁆𑀕𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀲𑀸𑀓𑁂𑀢𑀧𑀜𑁆𑀳𑀉𑀲𑁆𑀲𑀤𑀓𑀺𑀢𑁆𑀢𑀦𑀳𑁂𑀢𑀼𑀓𑀺𑀢𑁆𑀢𑀦𑀸𑀦𑀺 𑀧𑀸𑀓𑀢𑀺𑀓𑀸𑀦𑁂𑀯. 𑀅𑀬𑀁 𑀧𑀦 𑀣𑁂𑀭𑁄 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 ‘𑀅𑀲𑀗𑁆𑀔𑀸𑀭𑀺𑀓𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀦𑁄 𑀲𑀲𑀗𑁆𑀔𑀸𑀭𑀺𑀓𑀁; 𑀲𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀲𑀲𑀗𑁆𑀔𑀸𑀭𑀺𑀓𑀫𑁂𑀯 𑀦𑁄 𑀅𑀲𑀗𑁆𑀔𑀸𑀭𑀺𑀓’𑀦𑁆𑀢𑀺 𑀆𑀳. 𑀚𑀯𑀦𑁂𑀦 𑀘𑁂𑀲 𑀘𑀺𑀢𑁆𑀢𑀦𑀺𑀬𑀸𑀫𑀁 𑀦 𑀓𑀣𑁂𑀢𑀺. 𑀆𑀭𑀫𑁆𑀫𑀡𑁂𑀦 𑀧𑀦 𑀯𑁂𑀤𑀦𑀸𑀦𑀺𑀬𑀸𑀫𑀁 𑀓𑀣𑁂𑀢𑀺. 𑀢𑁂𑀦𑀲𑁆𑀲 𑀯𑀺𑀧𑀸𑀓𑀼𑀤𑁆𑀥𑀸𑀭𑁂 𑀤𑁆𑀯𑀸𑀤𑀲𑀓𑀫𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀤𑀲𑀓𑀫𑀕𑁆𑀕𑁄𑀧𑀺, 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀺 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀁.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑀸𑀤𑀺𑀲𑁂𑀦𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 ‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀆𑀧𑀸𑀣𑀕𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀫𑁄𑀖𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀲𑁆𑀲 𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺, 𑀓𑀺𑀭𑀺𑀬𑀢𑁄 𑀧𑀜𑁆𑀘𑀸𑀢𑀺 𑀇𑀫𑁂𑀲𑀁 𑀢𑁂𑀭𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀳𑀫𑀸𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀢𑀺𑀳𑁂𑀢𑀼𑀓𑀘𑀺𑀢𑁆𑀢𑀫𑁆𑀧𑀺 𑀤𑀼𑀳𑁂𑀢𑀼𑀓𑀘𑀺𑀢𑁆𑀢𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀫𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀢𑀻𑀡𑀺, 𑀢𑀤𑀸𑀭𑀫𑁆𑀫𑀡𑀸𑀦𑀺 𑀤𑁆𑀯𑁂𑀢𑀺, 𑀧𑀜𑁆𑀘 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀆𑀭𑀫𑁆𑀫𑀡𑁂𑀦 𑀧𑀦 𑀯𑁂𑀤𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑀢𑁄 𑀘𑀢𑀼𑀦𑁆𑀦𑀁, 𑀅𑀓𑀼𑀲𑀮𑀢𑁄 𑀘𑀢𑀼𑀦𑁆𑀦𑀁, 𑀓𑀺𑀭𑀺𑀬𑀢𑁄 𑀘𑀢𑀼𑀦𑁆𑀦𑀦𑁆𑀢𑀺, 𑀤𑁆𑀯𑀸𑀤𑀲𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀸𑀯𑀲𑀸𑀦𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁, 𑀇𑀫𑀸𑀦𑀺 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺, 𑀢𑀻𑀡𑀺 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀧𑀜𑁆𑀘𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀅𑀝𑁆𑀞 𑀅𑀝𑁆𑀞𑀸𑀢𑀺 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀲𑀫𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀅𑀝𑁆𑀞, 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀢𑁆𑀢𑀸𑀭𑀻𑀢𑀺, 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑀢𑁆𑀣 ‘𑀫𑀽𑀮𑀪𑀯𑀗𑁆𑀕𑀢𑀸’‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀢𑀸’‘𑀅𑀫𑁆𑀩𑁄𑀧𑀫𑀦𑀺𑀬𑀸𑀫𑀓𑀣𑀸’ 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀲𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑀦𑁆𑀢𑁄𑀧𑀫𑀸𑀧𑀺 𑀏𑀢𑁆𑀣 𑀧𑀸𑀓𑀢𑀺𑀓𑀸 𑀏𑀯. 𑀏𑀢𑁆𑀢𑀸𑀯𑀢𑀸 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀓𑀣𑀺𑀢𑁄. 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀕𑀢𑁄.

𑀇𑀤𑀸𑀦𑀺 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀣𑀸 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀤𑀼𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑀸𑀤𑀺𑀲𑁂𑀦𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀫𑁄𑀖𑀯𑀸𑀭𑀸 𑀳𑁄𑀦𑁆𑀢𑀺. 𑀤𑀼𑀳𑁂𑀢𑀼𑀓𑀲𑁆𑀲 𑀧𑀦 𑀚𑀯𑀦𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀻𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀤𑀼𑀳𑁂𑀢𑀼𑀓𑀫𑁂𑀯 𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀫𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀢𑀻𑀡𑀺, 𑀇𑀤𑀜𑁆𑀘 𑀢𑀤𑀸𑀭𑀫𑁆𑀫𑀡𑀦𑁆𑀢𑀺, 𑀘𑀢𑁆𑀢𑀸𑀭𑀺 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ 𑀧𑀦 𑀓𑀼𑀲𑀮𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀅𑀓𑀼𑀲𑀮𑀢𑁄 𑀘𑀢𑀼𑀦𑁆𑀦𑀦𑁆𑀢𑀺, 𑀅𑀝𑁆𑀞𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀤𑀼𑀳𑁂𑀢𑀼𑀓𑀫𑁂𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀫𑀲𑁆𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁, 𑀇𑀤𑀜𑁆𑀘 𑀢𑀤𑀸𑀭𑀫𑁆𑀫𑀡𑀦𑁆𑀢𑀺, 𑀤𑁆𑀯𑁂 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀙. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀙 𑀙𑀸𑀢𑀺 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀲𑀫𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀙, 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀢𑁆𑀢𑀸𑀭𑀻𑀢𑀺 𑀤𑀲 𑀳𑁄𑀦𑁆𑀢𑀺. 𑀅𑀫𑁆𑀩𑁄𑀧𑀫𑀦𑀺𑀬𑀸𑀫𑀓𑀣𑀸 𑀧𑀸𑀓𑀢𑀺𑀓𑀸 𑀏𑀯. 𑀬𑀦𑁆𑀢𑁄𑀧𑀫𑀸 𑀇𑀥 𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁.

𑀲𑁄𑀫𑀦𑀲𑁆𑀲𑀲𑀳𑀕𑀢𑀤𑀼𑀳𑁂𑀢𑀼𑀓𑀲𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑀼𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀸𑀯𑀢𑀸 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀓𑀣𑀺𑀢𑁄.

𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀸𑀭𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀼𑀲𑀮𑀢𑁄 𑀘𑀢𑀽𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂, 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀕𑀳𑀺𑀢𑀸𑀬, 𑀓𑀫𑁆𑀫𑀲𑀤𑀺𑀲𑀸 𑀧𑀝𑀺𑀲𑀦𑁆𑀥𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀇𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀣𑁂𑀢𑁆𑀯𑀸 𑀇𑀝𑁆𑀞𑁂𑀧𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀧𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀲 𑀳𑀺 𑀣𑁂𑀭𑀲𑁆𑀲 𑀯𑀸𑀤𑁂 𑀧𑀺𑀡𑁆𑀟𑀚𑀯𑀦𑀁 𑀚𑀯𑀢𑀺. 𑀲𑁂𑀲𑀸 𑀇𑀤𑀁 𑀧𑀦 𑀚𑀯𑀦𑀁 𑀓𑀼𑀲𑀮𑀢𑁆𑀣𑀸𑀬 𑀯𑀸 𑀅𑀓𑀼𑀲𑀮𑀢𑁆𑀣𑀸𑀬 𑀯𑀸 𑀓𑁄 𑀦𑀺𑀬𑀸𑀫𑁂𑀢𑀻𑀢𑀺𑀆𑀤𑀺𑀓𑀣𑀸 𑀲𑀩𑁆𑀩𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀫𑁄𑀭𑀯𑀸𑀧𑀻𑀯𑀸𑀲𑀻𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀸𑀤𑀲𑀓𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀲𑀤𑁆𑀥𑀺𑀁 𑀤𑀲𑀓𑀫𑀕𑁆𑀕𑁂𑀦 𑀘𑁂𑀯 𑀅𑀳𑁂𑀢𑀼𑀓𑀝𑁆𑀞𑀓𑁂𑀦 𑀘.

𑀇𑀤𑀸𑀦𑀺 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁂 𑀤𑀲𑀓𑀫𑀕𑁆𑀕𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀲𑀸𑀓𑁂𑀢𑀧𑀜𑁆𑀳𑀉𑀲𑁆𑀲𑀤𑀓𑀺𑀢𑁆𑀢𑀦𑀸𑀦𑀺 𑀧𑀸𑀓𑀢𑀺𑀓𑀸𑀦𑁂𑀯. 𑀳𑁂𑀢𑀼𑀓𑀺𑀢𑁆𑀢𑀦𑁂 𑀧𑀦 𑀅𑀬𑀁 𑀯𑀺𑀲𑁂𑀲𑁄. 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀤𑁂𑀢𑀺. 𑀤𑀼𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀫𑁂𑀯 𑀦 𑀤𑁂𑀢𑀺, 𑀇𑀢𑀭𑀁 𑀤𑁂𑀢𑀺. 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸𑀯 𑀳𑁄𑀢𑀺; 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀸 𑀦 𑀳𑁄𑀢𑀺. 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀸 𑀳𑁄𑀢𑀺, 𑀢𑀺𑀳𑁂𑀢𑀼𑀓𑀸 𑀦 𑀳𑁄𑀢𑀺. 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀁 𑀯𑀺𑀧𑀸𑀓𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀤𑁂𑀢𑀺, 𑀦𑁄 𑀲𑀲𑀗𑁆𑀔𑀸𑀭𑀺𑀓𑀁. 𑀲𑀲𑀗𑁆𑀔𑀸𑀭𑀺𑀓𑀫𑁆𑀧𑀺 𑀲𑀲𑀗𑁆𑀔𑀸𑀭𑀺𑀓𑀫𑁂𑀯 𑀤𑁂𑀢𑀺, 𑀦𑁄 𑀅𑀲𑀗𑁆𑀔𑀸𑀭𑀺𑀓𑀁. 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸. 𑀚𑀯𑀦𑀁 𑀧𑀺𑀡𑁆𑀟𑀚𑀯𑀦𑀫𑁂𑀯 𑀚𑀯𑀢𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀸𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀓𑀣𑀸 𑁋 𑀏𑀓𑁄 𑀧𑀞𑀫𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑀁 𑀆𑀬𑀽𑀳𑀢𑀺, 𑀧𑀞𑀫𑀯𑀺𑀧𑀸𑀓𑀘𑀺𑀢𑁆𑀢𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀺. 𑀅𑀬𑀁 𑀓𑀫𑁆𑀫𑀲𑀤𑀺𑀲𑀸 𑀧𑀝𑀺𑀲𑀦𑁆𑀥𑀺. 𑀢𑀲𑁆𑀲 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 ‘𑀇𑀝𑁆𑀞𑀸𑀭𑀫𑁆𑀫𑀡𑁂’ 𑀆𑀧𑀸𑀣𑀕𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀫𑁄𑀖𑀯𑀸𑀭𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀢𑁂𑀭𑀲𑀦𑁆𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀧𑀞𑀫𑀯𑀺𑀧𑀸𑀓𑀘𑀺𑀢𑁆𑀢𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀁 ‘𑀫𑀽𑀮𑀪𑀯𑀗𑁆𑀕𑀁’ ‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀏𑀯𑀫𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀢𑀻𑀡𑀺, 𑀇𑀤𑀜𑁆𑀘 𑀢𑀤𑀸𑀭𑀫𑁆𑀫𑀡𑀦𑁆𑀢𑀺, 𑀘𑀢𑁆𑀢𑀸𑀭𑀺 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. ‘𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂’ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁𑀬𑁂𑀯 𑀤𑁆𑀯𑀸𑀤𑀲𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀚𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀢𑀺𑀳𑁂𑀢𑀼𑀓𑀁 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀢𑀸𑀬 𑀧𑀯𑀢𑁆𑀢𑀢𑀺. 𑀢𑀁 ‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁’‘𑀢𑀤𑀸𑀭𑀫𑁆𑀫𑀡’𑀦𑁆𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀏𑀯𑀫𑀲𑁆𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀇𑀤𑀜𑁆𑀘 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀤𑁆𑀯𑁂 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀙 𑀳𑁄𑀦𑁆𑀢𑀺. 𑀏𑀯𑀁 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀲𑀫𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀙, 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀢𑁆𑀢𑀸𑀭𑀻𑀢𑀺 𑀤𑀲 𑀳𑁄𑀦𑁆𑀢𑀺. 𑀅𑀫𑁆𑀩𑁄𑀧𑀫𑀦𑀺𑀬𑀸𑀫𑀓𑀣𑀸 𑀧𑀸𑀓𑀢𑀺𑀓𑀸𑀬𑁂𑀯.

𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀧𑀺 𑀏𑀢𑁆𑀢𑀓𑀸𑀦𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀘𑀢𑀽𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀆𑀬𑀽𑀳𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀧𑀞𑀫𑀁 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀩𑁆𑀩𑀁. 𑀧𑀘𑁆𑀙𑀸 𑀇𑀝𑁆𑀞𑀸𑀭𑀫𑁆𑀫𑀡𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸. 𑀅𑀫𑁆𑀩𑁄𑀧𑀫𑀦𑀺𑀬𑀸𑀫𑀓𑀣𑀸 𑀧𑀸𑀓𑀢𑀺𑀓𑀸 𑀏𑀯. 𑀬𑀦𑁆𑀢𑁄𑀧𑀫𑀸 𑀦 𑀮𑀩𑁆𑀪𑀢𑀺. ‘𑀓𑀼𑀲𑀮𑀢𑁄 𑀧𑀦 𑀘𑀢𑀼𑀦𑁆𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀳𑁂𑀢𑀼𑀓𑀝𑁆𑀞𑀓𑀁 𑀓𑀣𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁂 𑀤𑀲𑀓𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀲𑀤𑁆𑀥𑀺𑀁 𑀅𑀳𑁂𑀢𑀼𑀓𑀝𑁆𑀞𑀓𑁂𑀦𑀸𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀓𑀢𑀭𑀲𑁆𑀲 𑀯𑀸𑀤𑁄 𑀕𑀳𑁂𑀢𑀩𑁆𑀩𑁄𑀢𑀺? 𑀦 𑀓𑀲𑁆𑀲𑀘𑀺 𑀏𑀓𑀁𑀲𑁂𑀦. 𑀲𑀩𑁆𑀩𑁂𑀲𑀁 𑀧𑀦 𑀯𑀸𑀤𑁂𑀲𑀼 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀧𑀞𑀫𑀯𑀸𑀤𑀲𑁆𑀫𑀺𑀜𑁆𑀳𑀺 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀧𑀘𑁆𑀘𑀬𑀪𑁂𑀤𑀢𑁄 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀢𑁆𑀣, 𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀲𑁆𑀲 𑀤𑀼𑀩𑁆𑀩𑀮𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀦𑁆𑀦𑀁 𑀲𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀁, 𑀲𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀲𑁆𑀲 𑀩𑀮𑀯𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀜𑁆𑀘 𑀕𑀳𑁂𑀢𑁆𑀯𑀸, 𑀮𑀩𑁆𑀪𑀫𑀸𑀦𑀸𑀦𑀺𑀧𑀺 𑀓𑀺𑀭𑀺𑀬𑀚𑀯𑀦𑀸𑀦𑀺 𑀧𑀳𑀸𑀬, 𑀓𑀼𑀲𑀮𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑁂𑀦 𑀘 𑀯𑁂𑀤𑀦𑀁 𑀦𑀺𑀬𑀸𑀫𑁂𑀢𑁆𑀯𑀸, 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀯𑀲𑁂𑀦 𑀲𑁄𑀴𑀲𑀓𑀫𑀕𑁆𑀕𑁄 𑀓𑀣𑀺𑀢𑁄. 𑀬𑀁 𑀧𑀦𑁂𑀢𑁆𑀣 𑀅𑀓𑀼𑀲𑀮𑀚𑀯𑀦𑀸𑀯𑀲𑀸𑀦𑁂 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀤𑀲𑁆𑀲𑀺𑀢𑀁, 𑀢𑀁 𑀇𑀢𑀭𑁂𑀲𑀼 𑀦 𑀤𑀲𑁆𑀲𑀺𑀢𑀫𑁂𑀯. 𑀢𑀲𑁆𑀫𑀸 𑀢𑀁 𑀢𑀢𑁆𑀣 𑀢𑁂𑀲𑀼 𑀯𑀼𑀢𑁆𑀢𑀁 𑀲𑀳𑁂𑀢𑀼𑀓𑀯𑀺𑀧𑀸𑀓𑀜𑁆𑀘, 𑀏𑀢𑁆𑀣𑀸𑀧𑀺 𑀲𑀩𑁆𑀩𑀫𑀺𑀤𑀁 𑀮𑀩𑁆𑀪𑀢𑁂𑀯. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀬𑀤𑀸 𑀳𑀺 𑀓𑀼𑀲𑀮𑀚𑀯𑀦𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀅𑀓𑀼𑀲𑀮𑀁 𑀚𑀯𑀢𑀺, 𑀢𑀤𑀸 𑀓𑀼𑀲𑀮𑀸𑀯𑀲𑀸𑀦𑁂 𑀆𑀘𑀺𑀡𑁆𑀡𑀲𑀤𑀺𑀲𑀫𑁂𑀯, 𑀅𑀓𑀼𑀲𑀮𑀸𑀯𑀲𑀸𑀦𑁂 𑀲𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀬𑀼𑀢𑁆𑀢𑀁. 𑀬𑀤𑀸 𑀦𑀺𑀭𑀦𑁆𑀢𑀭𑀁 𑀅𑀓𑀼𑀲𑀮𑀫𑁂𑀯 𑀢𑀤𑀸 𑀅𑀳𑁂𑀢𑀼𑀓𑀁. 𑀏𑀯𑀁 𑀢𑀸𑀯 𑀧𑀞𑀫𑀯𑀸𑀤𑁂 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁.

𑀤𑀼𑀢𑀺𑀬𑀯𑀸𑀤𑁂 𑀧𑀦 𑀓𑀼𑀲𑀮𑀢𑁄 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀢𑁆𑀣 𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀯𑀺𑀧𑀸𑀓𑀁, 𑀲𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀲𑁆𑀲 𑀘 𑀲𑀲𑀗𑁆𑀔𑀸𑀭𑀺𑀓𑀫𑁂𑀯 𑀕𑀳𑁂𑀢𑁆𑀯𑀸, 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀦𑀺𑀬𑀸𑀫𑀁 𑀅𑀓𑀢𑁆𑀯𑀸, 𑀲𑀩𑁆𑀩𑁂𑀲𑀫𑁆𑀧𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀭𑀳𑁄 𑀧𑀺𑀡𑁆𑀟𑀚𑀯𑀦𑀯𑀲𑁂𑀦𑁂𑀯 𑀤𑁆𑀯𑀸𑀤𑀲𑀓𑀫𑀕𑁆𑀕𑁄 𑀓𑀣𑀺𑀢𑁄. 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀧𑀦𑁂𑀢𑁆𑀣 𑀢𑀺𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀬𑀼𑀢𑁆𑀢𑀁. 𑀤𑀼𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀤𑀼𑀳𑁂𑀢𑀼𑀓𑀁, 𑀅𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀅𑀳𑁂𑀢𑀼𑀓𑀁 𑀪𑀸𑀚𑁂𑀢𑁆𑀯𑀸 𑀧𑀦 𑀦 𑀯𑀼𑀢𑁆𑀢𑀁. 𑀏𑀯𑀁 𑀤𑀼𑀢𑀺𑀬𑀯𑀸𑀤𑁂 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁.

𑀢𑀢𑀺𑀬𑀯𑀸𑀤𑁂𑀧𑀺 𑀓𑀼𑀲𑀮𑀢𑁄𑀯 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. ‘𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑁆𑀧𑀺 𑀤𑁂𑀢𑀻’𑀢𑀺 𑀧𑀦 𑀯𑀘𑀦𑀢𑁄 𑀅𑀲𑀗𑁆𑀔𑀸𑀭𑀺𑀓𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀤𑀼𑀳𑁂𑀢𑀼𑀓𑁂𑀦𑀧𑀺 𑀢𑀤𑀸𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀳𑁂𑀢𑀼𑀲𑀤𑀺𑀲𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀤𑀲𑁆𑀲𑀺𑀢𑀁. 𑀢𑀁 𑀧𑀼𑀭𑀺𑀫𑀸𑀬 𑀳𑁂𑀢𑀼𑀓𑀺𑀢𑁆𑀢𑀦𑀮𑀤𑁆𑀥𑀺𑀬𑀸 𑀦 𑀬𑀼𑀚𑁆𑀚𑀢𑀺. 𑀓𑁂𑀯𑀮𑀁 𑀤𑀲𑀓𑀫𑀕𑁆𑀕𑀯𑀺𑀪𑀸𑀯𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀇𑀢𑀭𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀏𑀯𑀁 𑀢𑀢𑀺𑀬𑀯𑀸𑀤𑁂𑀧𑀺 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀅𑀬𑀜𑁆𑀘 𑀲𑀩𑁆𑀩𑀸𑀧𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 𑀢𑀤𑀸𑀭𑀫𑁆𑀫𑀡𑀓𑀣𑀸. ‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀯𑀘𑀦𑀢𑁄 𑀧𑀦 𑀦𑀸𑀦𑀸𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸𑀧𑀺 𑀲𑀳𑁂𑀢𑀼𑀓𑀯𑀺𑀧𑀸𑀓𑀁 𑀢𑀤𑀸𑀭𑀫𑁆𑀫𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀫𑀳𑀸𑀧𑀓𑀭𑀡𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸

𑁪𑁯𑁯. 𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀸𑀤𑀺𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀲𑁆𑀫𑀸 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀁 𑀅𑀢𑁆𑀢𑀦𑁄 𑀓𑀼𑀲𑀮𑁂𑀦 𑀲𑀤𑀺𑀲𑀫𑁆𑀧𑀺 𑀳𑁄𑀢𑀺, 𑀅𑀲𑀤𑀺𑀲𑀫𑁆𑀧𑀺, 𑀢𑀲𑁆𑀫𑀸 𑀦 𑀢𑀁 𑀓𑀼𑀲𑀮𑀸𑀦𑀼𑀕𑀢𑀺𑀓𑀁 𑀓𑀢𑁆𑀯𑀸 𑀪𑀸𑀚𑀺𑀢𑀁. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀦 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀧𑀩𑁆𑀩𑀢𑀸𑀤𑀻𑀦𑀁 𑀙𑀸𑀬𑀸 𑀳𑀢𑁆𑀣𑀺𑀆𑀤𑀺𑀲𑀤𑀺𑀲𑀸𑀯 𑀳𑁄𑀦𑁆𑀢𑀺, 𑀢𑀣𑀸 𑀅𑀢𑁆𑀢𑀦𑁄 𑀓𑀼𑀲𑀮𑀲𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀓𑀼𑀲𑀮𑀸𑀦𑀼𑀕𑀢𑀺𑀓𑀁 𑀓𑀢𑁆𑀯𑀸 𑀪𑀸𑀚𑀺𑀢𑀁. 𑀓𑀸𑀫𑀸𑀯𑀘𑀭𑀓𑀫𑁆𑀫𑀜𑁆𑀘 𑀬𑀤𑀸 𑀓𑀤𑀸𑀘𑀺 𑀯𑀺𑀧𑀸𑀓𑀁 𑀤𑁂𑀢𑀺, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀧𑀦 𑀅𑀦𑀦𑁆𑀢𑀭𑀸𑀬𑁂𑀦, 𑀤𑀼𑀢𑀺𑀬𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂, 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺𑀧𑀺 𑀓𑀼𑀲𑀮𑀸𑀦𑀼𑀕𑀢𑀺𑀓𑀫𑁂𑀯 𑀓𑀢𑁆𑀯𑀸 𑀪𑀸𑀚𑀺𑀢𑀁. 𑀲𑁂𑀲𑀁 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀝𑀺𑀧𑀤𑀸𑀤𑀺𑀪𑁂𑀤𑁄 𑀘 𑀳𑀻𑀦𑀧𑀡𑀻𑀢𑀫𑀚𑁆𑀛𑀺𑀫𑀪𑀸𑀯𑁄 𑀘 𑀏𑀢𑁂𑀲𑀼 𑀛𑀸𑀦𑀸𑀕𑀫𑀦𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀦𑁆𑀤𑀸𑀤𑀻𑀦𑀁 𑀧𑀦 𑀅𑀜𑁆𑀜𑀢𑀭𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀦𑀻𑀬𑀢𑁆𑀢𑀸 𑀦𑀺𑀭𑀥𑀺𑀧𑀢𑀺𑀓𑀸𑀦𑁂𑀯 𑀏𑀢𑀸𑀦𑀻𑀢𑀺.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸

𑁫𑁦𑁫. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀫𑁆𑀧𑀺 𑀓𑀼𑀲𑀮𑀲𑀤𑀺𑀲𑀢𑁆𑀢𑀸 𑀓𑀼𑀲𑀮𑀸𑀦𑀼𑀕𑀢𑀺𑀓𑀫𑁂𑀯 𑀓𑀢𑁆𑀯𑀸 𑀪𑀸𑀚𑀺𑀢𑀁. 𑀬𑀲𑁆𑀫𑀸 𑀧𑀦 𑀢𑁂𑀪𑀽𑀫𑀓𑀓𑀼𑀲𑀮𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀁 𑀆𑀘𑀺𑀦𑀸𑀢𑀺 𑀯𑀟𑁆𑀠𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀢𑁂𑀦 𑀆𑀘𑀺𑀢𑀫𑁆𑀧𑀺 𑀅𑀧𑀘𑀺𑀦𑀸𑀢𑀺, 𑀲𑀬𑀫𑁆𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀆𑀘𑀺𑀦𑀸𑀢𑀺, 𑀢𑁂𑀦𑁂𑀢𑁆𑀣 ‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’𑀢𑀺 𑀅𑀯𑀢𑁆𑀯𑀸 𑀓𑀢𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁.

𑀲𑀼𑀜𑁆𑀜𑀢𑀦𑁆𑀢𑀺𑀆𑀤𑀻𑀲𑀼 ‘𑀫𑀕𑁆𑀕𑁄’ 𑀢𑀸𑀯 ‘𑀆𑀕𑀫𑀦𑀢𑁄 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀻’𑀢𑀺, 𑀇𑀤𑀁 𑀳𑁂𑀝𑁆𑀞𑀸 𑀓𑀼𑀲𑀮𑀸𑀥𑀺𑀓𑀸𑀭𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀲𑀕𑀼𑀡𑀢𑁄𑀧𑀺 𑀆𑀭𑀫𑁆𑀫𑀡𑀢𑁄𑀧𑀺 𑀦𑀸𑀫𑀁 𑀮𑀪𑀢𑀺. 𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸. 𑀅𑀪𑀺𑀥𑀫𑁆𑀫𑀓𑀣𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸. 𑀢𑀲𑁆𑀫𑀸 𑀇𑀥 𑀲𑀕𑀼𑀡𑀢𑁄 𑀯𑀸 𑀆𑀭𑀫𑁆𑀫𑀡𑀢𑁄 𑀯𑀸 𑀦𑀸𑀫𑀁 𑀦 𑀮𑀪𑀢𑀺, 𑀆𑀕𑀫𑀦𑀢𑁄𑀯 𑀮𑀪𑀢𑀺. 𑀆𑀕𑀫𑀦𑀫𑁂𑀯 𑀳𑀺 𑀥𑀼𑀭𑀁. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀦𑁆𑀢𑀺.

𑀢𑀢𑁆𑀣 𑀫𑀕𑁆𑀕𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀥𑀼𑀭𑀁, 𑀨𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑀸𑀕𑀫𑀦𑀁 𑀥𑀼𑀭𑀦𑁆𑀢𑀺, 𑀇𑀤𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀢𑁂𑀲𑀼 𑀇𑀤𑀁 𑀨𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀇𑀥 𑀫𑀕𑁆𑀕𑀸𑀕𑀫𑀦𑀁 𑀥𑀼𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀧𑀦𑁂𑀲 𑀫𑀕𑁆𑀕𑁄 𑀆𑀕𑀫𑀦𑀢𑁄 ‘𑀲𑀼𑀜𑁆𑀜𑀢’𑀦𑁆𑀢𑀺 𑀦𑀸𑀫𑀁 𑀮𑀪𑀺𑀢𑁆𑀯𑀸 𑀲𑀕𑀼𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 ‘𑀅𑀦𑀺𑀫𑀺𑀢𑁆𑀢𑁄’‘𑀅𑀧𑁆𑀧𑀡𑀺𑀳𑀺𑀢𑁄’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀢𑀻𑀡𑀺 𑀦𑀸𑀫𑀸𑀦𑀺 𑀤𑁂𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀲𑀼𑀤𑁆𑀥𑀸𑀕𑀫𑀦𑀯𑀲𑁂𑀦𑁂𑀯 𑀮𑀤𑁆𑀥𑀦𑀸𑀫𑁄 ‘𑀲𑀼𑀜𑁆𑀜𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀲𑀼𑀜𑁆𑀜𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. ‘𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀅𑀦𑀺𑀫𑀺𑀢𑁆𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. ‘𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀅𑀧𑁆𑀧𑀡𑀺𑀳𑀺𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀇𑀫𑀸𑀦𑀺 𑀧𑀦 𑀢𑀻𑀡𑀺 𑀦𑀸𑀫𑀸𑀦𑀺 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑀘𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀇𑀫𑀺𑀦𑀸 𑀦𑀬𑁂𑀦 𑀮𑀩𑁆𑀪𑀦𑁆𑀢𑀺, 𑀦𑁄 𑀅𑀧𑀭𑀪𑀸𑀕𑁂 𑀯𑀴𑀜𑁆𑀚𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀸. 𑀅𑀧𑀭𑀪𑀸𑀕𑁂 𑀧𑀦 𑀅𑀦𑀺𑀘𑁆𑀘𑀢𑀸𑀤𑀻𑀳𑀺 𑀢𑀻𑀳𑀺 𑀯𑀺𑀧𑀲𑁆𑀲𑀦𑀸𑀳𑀺 𑀯𑀺𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣𑀲𑁆𑀲 𑀯𑀼𑀝𑁆𑀞𑀺𑀢𑀯𑀼𑀝𑁆𑀞𑀺𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀨𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀢𑀸𑀦𑁂𑀯 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀦𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀺 𑀜𑀸𑀡𑀸𑀦𑀺 𑀅𑀦𑀼𑀮𑁄𑀫𑀜𑀸𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀬𑁄 𑀘𑀸𑀬𑀁 𑀲𑀼𑀜𑁆𑀜𑀢𑀫𑀕𑁆𑀕𑁂 𑀯𑀼𑀢𑁆𑀢𑁄. 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑁆𑀧𑀺 𑀳𑀺 𑀲𑀼𑀤𑁆𑀥𑀸𑀕𑀫𑀦𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 ‘𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀅𑀧𑁆𑀧𑀡𑀺𑀳𑀺𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. ‘𑀅𑀧𑁆𑀧𑀡𑀺𑀳𑀺𑀢𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀅𑀦𑀺𑀫𑀺𑀢𑁆𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. ‘𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑀫𑀕𑁆𑀕𑁄’ 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀁 𑀤𑀤𑀫𑀸𑀦𑁄 ‘𑀲𑀼𑀜𑁆𑀜𑀢’𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀇𑀫𑀸𑀦𑀺𑀧𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑀘𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀇𑀫𑀺𑀦𑀸 𑀦𑀬𑁂𑀦 𑀮𑀩𑁆𑀪𑀦𑁆𑀢𑀺, 𑀦 𑀅𑀧𑀭𑀪𑀸𑀕𑁂 𑀯𑀴𑀜𑁆𑀚𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑁂 𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀢𑀺𑀕𑀼𑀡𑀸𑀦𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑀣𑀸 𑀧𑀦 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀅𑀥𑀺𑀧𑀢𑀺𑀁 𑀮𑀪𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀦 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀺. 𑀓𑀲𑁆𑀫𑀸? 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀜𑁆𑀳𑀺 𑀅𑀜𑁆𑀜𑁄 𑀆𑀬𑀽𑀳𑀦𑀓𑀸𑀮𑁄 𑀅𑀜𑁆𑀜𑁄 𑀯𑀺𑀧𑀘𑁆𑀘𑀦𑀓𑀸𑀮𑁄. 𑀢𑁂𑀦 𑀢𑀸𑀦𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀅𑀥𑀺𑀧𑀢𑀺𑀁 𑀮𑀪𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀢𑀸𑀬 𑀲𑀤𑁆𑀥𑀸𑀬, 𑀢𑀲𑁆𑀫𑀺𑀁 𑀯𑀻𑀭𑀺𑀬𑁂, 𑀢𑀸𑀬 𑀲𑀢𑀺𑀬𑀸, 𑀢𑀲𑁆𑀫𑀺𑀁 𑀲𑀫𑀸𑀥𑀺𑀫𑁆𑀳𑀺, 𑀢𑀸𑀬 𑀧𑀜𑁆𑀜𑀸𑀬 𑀅𑀯𑀽𑀧𑀲𑀦𑁆𑀢𑀸𑀬, 𑀅𑀧𑀡𑁆𑀡𑀓𑀁 𑀅𑀯𑀺𑀭𑀤𑁆𑀥𑀁 𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯 𑀯𑀺𑀧𑀸𑀓𑀁 𑀧𑀝𑀺𑀮𑀪𑀦𑁆𑀢𑀺, 𑀢𑁂𑀦 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀅𑀥𑀺𑀧𑀢𑀺𑀁 𑀮𑀪𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺.

𑀬𑀣𑀸 𑀳𑀺 𑀧𑀭𑀺𑀢𑁆𑀢𑀓𑀲𑁆𑀲 𑀅𑀕𑁆𑀕𑀺𑀦𑁄 𑀕𑀢𑀝𑁆𑀞𑀸𑀦𑁂 𑀅𑀕𑁆𑀕𑀺𑀲𑁆𑀫𑀺𑀁 𑀦𑀺𑀩𑁆𑀩𑀼𑀢𑀫𑀢𑁆𑀢𑁂𑀬𑁂𑀯 𑀉𑀡𑁆𑀳𑀸𑀓𑀸𑀭𑁄 𑀦𑀺𑀩𑁆𑀩𑀸𑀬𑀺𑀢𑁆𑀯𑀸 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀫𑀳𑀦𑁆𑀢𑀁 𑀧𑀦 𑀆𑀤𑀺𑀢𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀕𑁄𑀫𑀬𑀧𑀭𑀺𑀪𑀡𑁆𑀟𑁂 𑀓𑀢𑁂𑀧𑀺 𑀉𑀡𑁆𑀳𑀸𑀓𑀸𑀭𑁄 𑀅𑀯𑀽𑀧𑀲𑀦𑁆𑀢𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀢𑁂𑀪𑀽𑀫𑀓𑀓𑀼𑀲𑀮𑁂 𑀅𑀜𑁆𑀜𑁄 𑀓𑀫𑁆𑀫𑀓𑁆𑀔𑀡𑁄 𑀅𑀜𑁆𑀜𑁄 𑀯𑀺𑀧𑀸𑀓𑀓𑁆𑀔𑀡𑁄 𑀧𑀭𑀺𑀢𑁆𑀢𑀅𑀕𑁆𑀕𑀺𑀝𑁆𑀞𑀸𑀦𑁂 𑀉𑀡𑁆𑀳𑀪𑀸𑀯𑀦𑀺𑀩𑁆𑀩𑀼𑀢𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀅𑀥𑀺𑀧𑀢𑀺𑀁 𑀮𑀪𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀮𑁄𑀓𑀼𑀢𑁆𑀢𑀭𑁂 𑀧𑀦 𑀢𑀸𑀬 𑀲𑀤𑁆𑀥𑀸𑀬…𑀧𑁂… 𑀢𑀸𑀬 𑀧𑀜𑁆𑀜𑀸𑀬 𑀅𑀯𑀽𑀧𑀲𑀦𑁆𑀢𑀸𑀬, 𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀅𑀥𑀺𑀧𑀢𑀺𑀁 𑀮𑀪𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘𑀯𑀺𑀧𑀸𑀓𑁂 𑀅𑀥𑀺𑀧𑀢𑀺 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭’𑀦𑁆𑀢𑀺.

𑁫𑁫𑁫. 𑀘𑀢𑀼𑀢𑁆𑀣𑀨𑀮𑀦𑀺𑀤𑁆𑀤𑁂𑀲𑁂 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑀸𑀡𑀓𑀺𑀘𑁆𑀘𑀲𑁆𑀲 𑀇𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀸𑀢𑀸𑀯𑀻𑀦𑀁 𑀯𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸𑀦𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀜𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀇𑀦𑁆𑀤𑀝𑁆𑀞𑀲𑀸𑀥𑀦𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀦𑀺𑀤𑁆𑀤𑁂𑀲𑀯𑀸𑀭𑁂𑀧𑀺𑀲𑁆𑀲 𑀅𑀜𑁆𑀜𑀸𑀢𑀸𑀯𑀻𑀦𑀦𑁆𑀢𑀺 𑀆𑀚𑀸𑀦𑀺𑀢𑁆𑀯𑀸 𑀞𑀺𑀢𑀸𑀦𑀁. 𑀥𑀫𑁆𑀫𑀸𑀦𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂. 𑀅𑀜𑁆𑀜𑀸𑀢𑀺 𑀆𑀚𑀸𑀦𑀦𑀸, 𑀧𑀜𑁆𑀜𑀸 𑀧𑀚𑀸𑀦𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀨𑀮𑀫𑀕𑁆𑀕𑀲𑁆𑀲 𑀅𑀗𑁆𑀕𑀁, 𑀨𑀮𑀫𑀕𑁆𑀕𑁂 𑀘 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀺𑀘𑁂𑀢𑁆𑀣 𑀇𑀤𑀁 𑀧𑀓𑀺𑀡𑁆𑀡𑀓𑀁 𑁋 𑀏𑀓𑀁 𑀇𑀦𑁆𑀤𑁆𑀭𑀺𑀬𑀁 𑀏𑀓𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀏𑀓𑀁 𑀙 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺, 𑀏𑀓𑀁 𑀏𑀓𑀁 𑀞𑀸𑀦𑀁 𑀕𑀘𑁆𑀙𑀢𑀺. 𑀏𑀓𑀜𑁆𑀳𑀺 ‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁’ 𑀏𑀓𑀁 𑀞𑀸𑀦𑀁 𑀕𑀘𑁆𑀙𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁. 𑀏𑀓𑀁 ‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁’ 𑀳𑁂𑀝𑁆𑀞𑀸 𑀢𑀻𑀡𑀺 𑀨𑀮𑀸𑀦𑀺, 𑀉𑀧𑀭𑀺 𑀢𑀬𑁄 𑀫𑀕𑁆𑀕𑁂𑀢𑀺 𑀙 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀏𑀓𑀁 ‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁’ 𑀏𑀓𑀁 𑀞𑀸𑀦𑀁 𑀕𑀘𑁆𑀙𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀲𑀩𑁆𑀩𑁂𑀲𑀼𑀧𑀺 𑀫𑀕𑁆𑀕𑀨𑀮𑁂𑀲𑀼 𑀅𑀢𑁆𑀣𑀢𑁄 𑀅𑀝𑁆𑀞 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀘𑀢𑀼𑀲𑀝𑁆𑀞𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺. 𑀧𑀸𑀴𑀺𑀢𑁄 𑀧𑀦 𑀦𑀯 𑀦𑀯 𑀓𑀢𑁆𑀯𑀸 𑀤𑁆𑀯𑀸𑀲𑀢𑁆𑀢𑀢𑀺 𑀳𑁄𑀦𑁆𑀢𑀺. 𑀫𑀕𑁆𑀕𑁂 𑀫𑀕𑁆𑀕𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀨𑀮𑁂𑀧𑀺 𑀫𑀕𑁆𑀕𑀗𑁆𑀕𑀁. 𑀫𑀕𑁆𑀕𑁂 𑀩𑁄𑀚𑁆𑀛𑀗𑁆𑀕𑁄𑀢𑀺 𑀯𑀼𑀢𑁆𑀢𑁄 𑀨𑀮𑁂𑀧𑀺 𑀩𑁄𑀚𑁆𑀛𑀗𑁆𑀕𑁄. 𑀫𑀕𑁆𑀕𑀓𑁆𑀔𑀡𑁂 𑀆𑀭𑀢𑀺 𑀯𑀺𑀭𑀢𑀻𑀢𑀺 𑀯𑀼𑀢𑁆𑀢𑀸 𑀨𑀮𑀓𑁆𑀔𑀡𑁂𑀧𑀺 𑀆𑀭𑀢𑀺 𑀯𑀺𑀭𑀢𑀻𑀢𑀺. 𑀢𑀢𑁆𑀣 𑀫𑀕𑁆𑀕𑁄 𑀫𑀕𑁆𑀕𑀪𑀸𑀯𑁂𑀦𑁂𑀯 𑀫𑀕𑁆𑀕𑁄, 𑀨𑀮𑀁 𑀧𑀦 𑀫𑀕𑁆𑀕𑀁 𑀉𑀧𑀸𑀤𑀸𑀬 𑀫𑀕𑁆𑀕𑁄 𑀦𑀸𑀫; 𑀨𑀮𑀗𑁆𑀕𑀁 𑀨𑀮𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀕𑁆𑀕𑁂 𑀩𑀼𑀚𑁆𑀛𑀦𑀓𑀲𑁆𑀲 𑀅𑀗𑁆𑀕𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀨𑀮𑁂 𑀩𑀼𑀤𑁆𑀥𑀲𑁆𑀲 𑀅𑀗𑁆𑀕𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀫𑀕𑁆𑀕𑁂 𑀆𑀭𑀫𑀡𑀯𑀺𑀭𑀫𑀡𑀯𑀲𑁂𑀦𑁂𑀯 𑀆𑀭𑀢𑀺 𑀯𑀺𑀭𑀢𑀺. 𑀨𑀮𑁂 𑀧𑀦 𑀆𑀭𑀢𑀺𑀯𑀺𑀭𑀢𑀺𑀯𑀲𑁂𑀦𑀸𑀢𑀺.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀯𑀺𑀧𑀸𑀓𑀓𑀣𑀸

𑁫𑁫𑁬. 𑀇𑀢𑁄 𑀧𑀭𑀸𑀦𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑁋 𑀧𑀜𑁆𑀘 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀏𑀓𑀸 𑀫𑀦𑁄𑀥𑀸𑀢𑀼, 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺 𑁋 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀢𑀸𑀤𑀺𑀲𑁂𑀳𑁂𑀯 𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑁂𑀳𑀺 𑀲𑀤𑀺𑀲𑀸𑀦𑀺.

𑀓𑁂𑀯𑀮𑀜𑁆𑀳𑀺 𑀢𑀸𑀦𑀺 𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺 𑀇𑀫𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺. 𑀢𑀸𑀦𑀺 𑀘 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀢𑁆𑀢𑀦𑁆𑀢𑀺, 𑀇𑀫𑀸𑀦𑀺 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼. 𑀢𑀢𑁆𑀣 𑀘 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀇𑀥 𑀤𑀼𑀓𑁆𑀔𑀲𑀳𑀕𑀢𑀁. 𑀢𑀢𑁆𑀣 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑀼𑀲𑁆𑀲𑁂𑀲𑀼 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀇𑀥 𑀧𑀦 𑀏𑀓𑀸𑀤𑀲𑀯𑀺𑀥𑁂𑀦𑀸𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺; 𑀤𑀼𑀢𑀺𑀬𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸, 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺, 𑀏𑀯𑀁 𑀧𑀜𑁆𑀘𑀲𑀼 𑀏𑀯 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀻𑀢𑀺.

𑀅𑀓𑀼𑀲𑀮𑀯𑀺𑀧𑀸𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀯𑀡𑁆𑀡𑀦𑀸

𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁

𑁫𑁬𑁬. 𑀇𑀤𑀸𑀦𑀺 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀺𑀭𑀺𑀬𑀸𑀢𑀺 𑀓𑀭𑀡𑀫𑀢𑁆𑀢𑀁. 𑀲𑀩𑁆𑀩𑁂𑀲𑀼𑀬𑁂𑀯 𑀳𑀺 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀬𑀁 𑀚𑀯𑀦𑀪𑀸𑀯𑀁 𑀅𑀧𑁆𑀧𑀢𑁆𑀢𑀁 𑀢𑀁 𑀯𑀸𑀢𑀧𑀼𑀧𑁆𑀨𑀁 𑀯𑀺𑀬. 𑀬𑀁 𑀚𑀯𑀦𑀪𑀸𑀯𑀧𑁆𑀧𑀢𑁆𑀢𑀁 𑀢𑀁 𑀙𑀺𑀦𑁆𑀦𑀫𑀽𑀮𑀓𑀭𑀼𑀓𑁆𑀔𑀧𑀼𑀧𑁆𑀨𑀁 𑀯𑀺𑀬 𑀅𑀨𑀮𑀁 𑀳𑁄𑀢𑀺, 𑀢𑀁𑀢𑀁 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀦 𑀓𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀓𑀺𑀭𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀦𑁂𑀯𑀓𑀼𑀲𑀮𑀸𑀦𑀸𑀓𑀼𑀲𑀮𑀸𑀢𑀺𑀆𑀤𑀻𑀲𑀼 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀲𑁆𑀲 𑀓𑀼𑀲𑀮𑀳𑁂𑀢𑀼𑀦𑁄 𑀅𑀪𑀸𑀯𑀸 ‘𑀦𑁂𑀯𑀓𑀼𑀲𑀮𑀸’; 𑀅𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀲𑁆𑀲 𑀅𑀓𑀼𑀲𑀮𑀳𑁂𑀢𑀼𑀦𑁄 𑀅𑀪𑀸𑀯𑀸 ‘𑀦𑁂𑀯𑀅𑀓𑀼𑀲𑀮𑀸’; 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀸𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀧𑀘𑁆𑀘𑀬𑀸𑀦𑀁 𑀅𑀪𑀸𑀯𑀸 ‘𑀦𑁂𑀯𑀓𑀼𑀲𑀮𑀸𑀦𑀸𑀓𑀼𑀲𑀮𑀸’. 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑀲𑁆𑀲 𑀚𑀦𑀓𑀳𑁂𑀢𑀼𑀦𑁄 𑀅𑀪𑀸𑀯𑀸 𑀦𑁂𑀯𑀓𑀫𑁆𑀫𑀯𑀺𑀧𑀸𑀓𑀸.

𑀇𑀥𑀸𑀧𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀦𑀺𑀤𑁆𑀤𑁂𑀲𑁂 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀦𑁆𑀢𑀺 𑀇𑀫𑁂𑀲𑀼 𑀲𑀢𑁆𑀢𑀭𑀲𑀲𑀼 𑀘𑀺𑀢𑁆𑀢𑁂𑀲𑀼 𑀤𑀼𑀩𑁆𑀩𑀮𑀢𑁆𑀢𑀸 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺𑀆𑀤𑀻𑀦𑀺 𑀦 𑀮𑀩𑁆𑀪𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀢𑁆𑀭 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸. 𑀢𑀜𑁆𑀳𑀺 𑀘𑀺𑀢𑁆𑀢𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀯𑀴𑀜𑁆𑀚𑀦𑀓𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀲𑀩𑁆𑀩𑁂𑀲𑀁 𑀧𑀼𑀭𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑀯𑀲𑁂𑀦 𑀧𑀼𑀭𑁂𑀘𑀸𑀭𑀺𑀓𑀁 𑀳𑀼𑀢𑁆𑀯𑀸 𑀪𑀯𑀗𑁆𑀕𑀁 𑀆𑀯𑀝𑁆𑀝𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑀸𑀦𑀺

𑁫𑁬𑁮. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀢𑀺, 𑀇𑀤𑀁 𑀘𑀺𑀢𑁆𑀢𑀁 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀁. 𑀔𑀻𑀡𑀸𑀲𑀯𑀲𑁆𑀲𑁂𑀯 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁. 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀮𑀩𑁆𑀪𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀳𑀺 𑀧𑀥𑀸𑀦𑀲𑀸𑀭𑀼𑀧𑁆𑀧𑀁 𑀞𑀸𑀦𑀁 𑀤𑀺𑀲𑁆𑀯𑀸 𑀔𑀻𑀡𑀸𑀲𑀯𑁄 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀲𑁄𑀢𑀤𑁆𑀯𑀸𑀭𑁂 𑀪𑀡𑁆𑀟𑀪𑀸𑀚𑀦𑀻𑀬𑀝𑁆𑀞𑀸𑀦𑀁 𑀧𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀮𑀼𑀤𑁆𑀥𑀮𑀼𑀤𑁆𑀥𑁂𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 ‘𑀏𑀯𑀭𑀽𑀧𑀸 𑀦𑀸𑀫 𑀫𑁂 𑀮𑁄𑀮𑀼𑀧𑁆𑀧𑀢𑀡𑁆𑀳𑀸 𑀧𑀳𑀻𑀦𑀸’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀖𑀸𑀦𑀤𑁆𑀯𑀸𑀭𑁂 𑀕𑀦𑁆𑀥𑁂𑀳𑀺 𑀯𑀸 𑀧𑀼𑀧𑁆𑀨𑁂𑀳𑀺 𑀯𑀸 𑀘𑁂𑀢𑀺𑀬𑀁 𑀧𑀽𑀚𑁂𑀦𑁆𑀢𑁄 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀭𑀲𑀲𑀫𑁆𑀧𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀮𑀤𑁆𑀥𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 ‘𑀲𑀸𑀭𑀡𑀻𑀬𑀥𑀫𑁆𑀫𑁄 𑀯𑀢 𑀫𑁂 𑀧𑀽𑀭𑀺𑀢𑁄’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀸𑀬𑀤𑁆𑀯𑀸𑀭𑁂 𑀅𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 ‘𑀓𑀸𑀬𑀤𑁆𑀯𑀸𑀭𑁂 𑀫𑁂 𑀯𑀢𑁆𑀢𑀁 𑀧𑀽𑀭𑀺𑀢’𑀦𑁆𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀁 𑀢𑀸𑀯 𑀧𑀜𑁆𑀘𑀤𑁆𑀯𑀸𑀭𑁂 𑀮𑀩𑁆𑀪𑀢𑀺.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀢𑀻𑀢𑀸𑀦𑀸𑀕𑀢𑀫𑀸𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺. 𑀚𑁄𑀢𑀺𑀧𑀸𑀮𑀫𑀸𑀡𑀯(𑀫. 𑀦𑀺. 𑁨.𑁨𑁮𑁨 𑀆𑀤𑀬𑁄) 𑀫𑀕𑁆𑀖𑀤𑁂𑀯𑀭𑀸𑀚(𑀫. 𑀦𑀺. 𑁨.𑁩𑁦𑁮 𑀆𑀤𑀬𑁄) 𑀓𑀡𑁆𑀳𑀢𑀸𑀧𑀲𑀸𑀤𑀺𑀓𑀸𑀮𑀲𑁆𑀫𑀺𑀜𑁆𑀳𑀺 (𑀚𑀸. 𑁧.𑁧𑁦.𑁧𑁧 𑀆𑀤𑀬𑁄) 𑀓𑀢𑀁 𑀓𑀸𑀭𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀢𑀣𑀸𑀕𑀢𑁄 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀢𑀁 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀓𑀺𑀘𑁆𑀘𑀁. 𑀢𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀳𑀸𑀲𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀸𑀕𑀢𑁂 ‘𑀢𑀦𑁆𑀢𑀺𑀲𑁆𑀲𑀭𑁄 𑀫𑀼𑀤𑀺𑀗𑁆𑀕𑀲𑁆𑀲𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀢𑀫𑁆𑀧𑀺 𑀅𑀦𑀸𑀕𑀢𑀁𑀲𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀓𑀺𑀘𑁆𑀘𑀁. 𑀢𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀳𑀸𑀲𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑀲𑁆𑀲 𑀲𑁂𑀲𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀳𑀺 𑀩𑀮𑀯𑀢𑀭𑀢𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺𑀩𑀮𑀁 𑀧𑀸𑀧𑁂𑀢𑁆𑀯𑀸 𑀞𑀧𑀺𑀢𑀸. 𑀯𑀻𑀭𑀺𑀬𑀫𑁆𑀧𑀺 𑀯𑀻𑀭𑀺𑀬𑀩𑀮𑀁 𑀧𑀸𑀧𑁂𑀢𑁆𑀯𑀸. 𑀉𑀤𑁆𑀤𑁂𑀲𑀯𑀸𑀭𑁂 𑀧𑀦 ‘𑀲𑀫𑀸𑀥𑀺𑀩𑀮𑀁 𑀳𑁄𑀢𑀺 𑀯𑀻𑀭𑀺𑀬𑀩𑀮𑀁 𑀳𑁄𑀢𑀻’𑀢𑀺 𑀅𑀦𑀸𑀕𑀢𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑁂𑀦 𑀩𑀮𑀝𑁆𑀞𑁂𑀦𑁂𑀢𑀁 𑀤𑁆𑀯𑀬𑀁 𑀩𑀮𑀁 𑀦𑀸𑀫 𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 ‘𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁’ 𑀢𑀲𑁆𑀫𑀸 𑀩𑀮𑀦𑁆𑀢𑀺 𑀯𑀢𑁆𑀯𑀸𑀦 𑀞𑀧𑀺𑀢𑀁. 𑀬𑀲𑁆𑀫𑀸 𑀘 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀮𑀁, 𑀢𑀲𑁆𑀫𑀸 𑀲𑀗𑁆𑀕𑀳𑀯𑀸𑀭𑁂𑀧𑀺 ‘𑀤𑁆𑀯𑁂 𑀩𑀮𑀸𑀦𑀺 𑀳𑁄𑀦𑁆𑀢𑀻’𑀢𑀺 𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁫𑁭𑁪. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀇𑀤𑀁 𑀘𑀺𑀢𑁆𑀢𑀁 𑀢𑀻𑀲𑀼 𑀪𑀯𑁂𑀲𑀼 𑀲𑀩𑁆𑀩𑁂𑀲𑀁 𑀲𑀘𑀺𑀢𑁆𑀢𑀓𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀁, 𑀦 𑀓𑀲𑁆𑀲𑀘𑀺 𑀲𑀘𑀺𑀢𑁆𑀢𑀓𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀁 𑀳𑁄𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀁. 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺𑀧𑀺 𑀇𑀫𑀺𑀦𑀸 𑀕𑀳𑀺𑀢𑀸𑀭𑀫𑁆𑀫𑀡𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀫𑀳𑀸𑀕𑀚𑀁 𑀦𑀸𑀫𑁂𑀢𑀁 𑀘𑀺𑀢𑁆𑀢𑀁; 𑀇𑀫𑀲𑁆𑀲 𑀅𑀦𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. ‘𑀅𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀁 𑀦𑀸𑀫 𑀓𑀢𑀫’𑀦𑁆𑀢𑀺 𑀯𑀼𑀢𑁆𑀢𑁂 ‘𑀇𑀤’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀧𑁆𑀧𑀻𑀢𑀺𑀓𑀢𑁆𑀢𑀸 𑀦𑀯𑀗𑁆𑀕𑀺𑀓𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀪𑀢𑁆𑀢𑁄. 𑀇𑀥 𑀦𑀺𑀧𑁆𑀧𑀻𑀢𑀺𑀓𑀢𑁆𑀢𑀸 𑀅𑀝𑁆𑀞𑀗𑁆𑀕𑀺𑀓𑁄.

𑀇𑀤𑀸𑀦𑀺 𑀬𑀸𑀦𑀺 𑀓𑀼𑀲𑀮𑀢𑁄 𑀅𑀝𑁆𑀞 𑀫𑀳𑀸𑀘𑀺𑀢𑁆𑀢𑀸𑀦𑁂𑀯 𑀔𑀻𑀡𑀸𑀲𑀯𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑀸𑀬 𑀓𑀺𑀭𑀺𑀬𑀸𑀦𑀺 𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀥 𑀞𑀢𑁆𑀯𑀸 𑀳𑀲𑀦𑀓𑀘𑀺𑀢𑁆𑀢𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺. 𑀓𑀢𑀺 𑀧𑀦𑁂𑀢𑀸𑀦𑀺 𑀳𑁄𑀦𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑀢𑁂𑀭𑀲. 𑀧𑀼𑀣𑀼𑀚𑁆𑀚𑀦𑀸 𑀳𑀺 𑀓𑀼𑀲𑀮𑀢𑁄 𑀘𑀢𑀽𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺, 𑀅𑀓𑀼𑀲𑀮𑀢𑁄 𑀘𑀢𑀽𑀳𑀻𑀢𑀺, 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀲𑁂𑀓𑁆𑀔𑀸 𑀓𑀼𑀲𑀮𑀢𑁄 𑀘𑀢𑀽𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺, 𑀅𑀓𑀼𑀲𑀮𑀢𑁄 𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀻𑀢𑀺, 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀔𑀻𑀡𑀸𑀲𑀯𑀸 𑀓𑀺𑀭𑀺𑀬𑀢𑁄 𑀧𑀜𑁆𑀘𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺 𑀳𑀲𑀦𑁆𑀢𑀻𑀢𑀺.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁

𑁫𑁭𑁭. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀦𑀺𑀤𑁆𑀤𑁂𑀲𑁂𑀲𑀼 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂, 𑀲𑀼𑀔𑀯𑀺𑀳𑀸𑀭𑀫𑀢𑁆𑀢𑀁. 𑀢𑀢𑁆𑀣 𑀔𑀻𑀡𑀸𑀲𑀯𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑀸 𑀲𑀫𑀸𑀧𑀢𑁆𑀢𑀺 𑀬𑀸𑀯 𑀦 𑀦𑀁 𑀲𑀫𑀸𑀧𑀚𑁆𑀚𑀢𑀺 𑀢𑀸𑀯 𑀓𑀼𑀲𑀮𑀸𑀯 𑀲𑀫𑀸𑀧𑀦𑁆𑀦𑀓𑀸𑀮𑁂 𑀓𑀺𑀭𑀺𑀬𑀸 𑀳𑁄𑀢𑀺. 𑀔𑀻𑀡𑀸𑀲𑀯𑀓𑀸𑀮𑁂 𑀧𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀸 𑀲𑀫𑀸𑀧𑀢𑁆𑀢𑀺 𑀓𑀺𑀭𑀺𑀬𑀸𑀯 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀢𑀁𑀲𑀤𑀺𑀲𑀢𑁆𑀢𑀸 𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀅𑀝𑁆𑀞𑀓𑀣𑀸𑀬

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀧𑀤𑀁 𑀧𑀦 𑀦𑁂𑀯 𑀢𑀸𑀯 𑀦𑀺𑀝𑁆𑀞𑀺𑀢𑀦𑁆𑀢𑀺.

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀽𑀧𑀓𑀡𑁆𑀟𑁄

𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀇𑀤𑀸𑀦𑀺 𑀭𑀽𑀧𑀓𑀡𑁆𑀟𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀜𑁆𑀘𑁂𑀯 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀜𑁆𑀘 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀪𑀸𑀚𑀺𑀢𑀁, 𑀭𑀽𑀧𑀸𑀩𑁆𑀬𑀸𑀓𑀢𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑀸𑀦𑀺 𑀧𑀦 𑀅𑀓𑀣𑀺𑀢𑀸𑀦𑀺, 𑀢𑀸𑀦𑀺 𑀓𑀣𑁂𑀢𑀼𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀩𑁆𑀬𑀸𑀓𑀢𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀸𑀦𑀜𑁆𑀘𑁂𑀯 𑀅𑀓𑀼𑀲𑀮𑀸𑀦𑀜𑁆𑀘. 𑀏𑀯𑀁 𑀢𑀸𑀯 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀼𑀲𑀮𑀯𑀺𑀧𑀸𑀓𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀲𑀩𑁆𑀩𑀫𑁆𑀧𑀺 𑀓𑀸𑀫𑀸𑀯𑀘𑀭𑀁 𑀯𑀸 𑀳𑁄𑀢𑀺, 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁, 𑀢𑀲𑁆𑀫𑀸 ‘𑀓𑀸𑀫𑀸𑀯𑀘𑀭𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀤𑁂𑀯 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀪𑀽𑀫𑀦𑁆𑀢𑀭𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀳𑁄𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀧𑀺, 𑀢𑀲𑁆𑀫𑀸 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀔𑀦𑁆𑀥𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁.

𑀏𑀯𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀪𑀽𑀫𑀦𑁆𑀢𑀭𑀯𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀯𑀲𑁂𑀦𑀸𑀢𑀺 𑀢𑀻𑀳𑀺 𑀦𑀬𑁂𑀳𑀺 𑀧𑀭𑀺𑀬𑀸𑀤𑀸𑀬 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀦 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀳𑁂𑀝𑁆𑀞𑀸 𑀧𑀦 𑀕𑀳𑀺𑀢𑀫𑁂𑀯𑀸𑀢𑀺 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑀁. 𑀇𑀤𑀸𑀦𑀺 𑀅𑀯𑀺𑀪𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽𑀢𑀺 𑀆𑀳. 𑀢𑀢𑁆𑀣 ‘𑀲𑀩𑁆𑀩𑀜𑁆𑀘 𑀭𑀽𑀧’𑀦𑁆𑀢𑀺 𑀧𑀤𑁂𑀦 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀸𑀦𑀺 𑀙𑀦𑁆𑀦𑀯𑀼𑀢𑀺𑀭𑀽𑀧𑀓𑁄𑀝𑁆𑀞𑀸𑀲𑀸 𑀦𑀺𑀧𑁆𑀧𑀤𑁂𑀲𑀢𑁄 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽’𑀢𑀺 𑀧𑀤𑁂𑀦 𑀦𑀺𑀩𑁆𑀩𑀸𑀦𑀁 𑀦𑀺𑀧𑁆𑀧𑀤𑁂𑀲𑀢𑁄 𑀕𑀳𑀺𑀢𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 ‘𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’𑀢𑀺 𑀧𑀤𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀺.

𑁫𑁮𑁪. 𑀢𑀢𑁆𑀣 𑀓𑀢𑀫𑀁 𑀲𑀩𑁆𑀩𑀁 𑀭𑀽𑀧𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀕𑀳𑀺𑀢𑀁? 𑀳𑁂𑀝𑁆𑀞𑀸 𑀭𑀽𑀧𑀸𑀩𑁆𑀬𑀸𑀓𑀢𑀁 𑀲𑀗𑁆𑀔𑁂𑀧𑁂𑀦 𑀓𑀣𑀺𑀢𑀁. 𑀇𑀤𑀸𑀦𑀺 𑀢𑀁 𑀏𑀓𑀓𑀤𑀼𑀓𑀢𑀺𑀓𑀘𑀢𑀼𑀓𑁆𑀓…𑀧𑁂… 𑀏𑀓𑀸𑀤𑀲𑀓𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀕𑀳𑀺𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀯𑀼𑀢𑁆𑀢𑀁 ‘𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽’𑀢𑀺, 𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 ‘𑀓𑀢𑀫𑀁 𑀲𑀩𑁆𑀩𑀁 𑀭𑀽𑀧𑀁 𑀦𑀸𑀫’? 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀢𑁂𑀲𑀁 𑀊𑀦𑀸𑀥𑀺𑀓𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. ‘𑀘’-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 ‘𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸𑀯’ 𑀭𑀽𑀧𑀁, 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 ‘𑀉𑀧𑀸𑀤𑀸𑀭𑀽𑀧𑀁’ 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀫𑀳𑀸𑀪𑀽𑀢𑀸𑀢𑀺 𑀏𑀢𑁆𑀣 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀦𑀺 𑀳𑀺 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑁄, 𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄, 𑀫𑀳𑀸𑀧𑀭𑀺𑀳𑀸𑀭𑀢𑁄, 𑀫𑀳𑀸𑀯𑀺𑀓𑀸𑀭𑀢𑁄, 𑀫𑀳𑀦𑁆𑀢𑀪𑀽𑀢𑀢𑁆𑀢𑀸 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑁄’𑀢𑀺, 𑀏𑀢𑀸𑀦𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀫𑀳𑀦𑁆𑀢𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀺. 𑀢𑁂𑀲𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂 𑀏𑀯𑀁 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀓𑀜𑁆𑀳𑀺 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀺. 𑀧𑀭𑀺𑀓𑁆𑀔𑁂𑀧𑀢𑁄 𑁋

𑀲𑀩𑁆𑀩𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲 𑀧𑀭𑀺𑀫𑀡𑁆𑀟𑀮𑀁;

𑀤𑀲 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘. (𑀧𑀸𑀭𑀸. 𑀅𑀝𑁆𑀞. 𑁧.𑁧; 𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭);

𑀢𑀢𑁆𑀣 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸. (𑀧𑀸𑀭𑀸. 𑀅𑀝𑁆𑀞. 𑁧.𑁧; 𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭);

𑀢𑀲𑁆𑀲𑀸𑀬𑁂𑀯 𑀲𑀦𑁆𑀥𑀸𑀭𑀓𑀁 𑁋

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑁂𑀯 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀚𑀮𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀲𑁆𑀲𑀸𑀧𑀺 𑀲𑀦𑁆𑀥𑀸𑀭𑀓𑁄 𑁋

𑀦𑀯𑀲𑀢𑀲𑀳𑀲𑁆𑀲𑀸𑀦𑀺, 𑀫𑀸𑀮𑀼𑀢𑁄 𑀦𑀪𑀫𑀼𑀕𑁆𑀕𑀢𑁄;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀏𑀲𑀸 𑀮𑁄𑀓𑀲𑁆𑀲 𑀲𑀡𑁆𑀞𑀺𑀢𑀺.

𑀏𑀯𑀁 𑀲𑀡𑁆𑀞𑀺𑀢𑁂 𑀘𑁂𑀢𑁆𑀣 𑀬𑁄𑀚𑀦𑀸𑀦𑀁 𑁋

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀲𑀺𑀦𑁂𑀭𑀼 𑀧𑀩𑁆𑀩𑀢𑀼𑀢𑁆𑀢𑀫𑁄.

𑀢𑀢𑁄 𑀉𑀧𑀟𑁆𑀠𑀼𑀧𑀟𑁆𑀠𑁂𑀦, 𑀧𑀫𑀸𑀡𑁂𑀦 𑀬𑀣𑀸𑀓𑁆𑀓𑀫𑀁;

𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸 𑀤𑀺𑀩𑁆𑀩𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑀸.

𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀺 𑀩𑁆𑀭𑀳𑀸.

𑀏𑀢𑁂 𑀲𑀢𑁆𑀢 𑀫𑀳𑀸𑀲𑁂𑀮𑀸, 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸 𑀤𑁂𑀯𑀬𑀓𑁆𑀔𑀦𑀺𑀲𑁂𑀯𑀺𑀢𑀸.

𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄;

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄.

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥𑀧𑀭𑀺𑀓𑁆𑀔𑁂𑀧𑀸 𑀦𑀕𑀯𑁆𑀳𑀬𑀸;

𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥𑀲𑀸𑀔𑀸𑀬𑀸𑀫𑀸 𑀲𑀫𑀦𑁆𑀢𑀢𑁄.

𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸;

𑀚𑀫𑁆𑀩𑀽 𑀬𑀲𑁆𑀲𑀸𑀦𑀼𑀪𑀸𑀯𑁂𑀦, 𑀚𑀫𑁆𑀩𑀼𑀤𑀻𑀧𑁄 𑀧𑀓𑀸𑀲𑀺𑀢𑁄. (𑀧𑀸𑀭𑀸. 𑀅𑀝𑁆𑀞. 𑁧.𑁧; 𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭);

𑀬𑀜𑁆𑀘𑁂𑀢𑀁 𑀚𑀫𑁆𑀩𑀼𑀬𑀸 𑀧𑀫𑀸𑀡𑀁 𑀢𑀤𑁂𑀯 𑀅𑀲𑀼𑀭𑀸𑀦𑀁 𑀘𑀺𑀢𑁆𑀢𑀧𑀸𑀝𑀮𑀺𑀬𑀸, 𑀕𑀭𑀼𑀴𑀸𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀲𑁆𑀲, 𑀅𑀧𑀭𑀕𑁄𑀬𑀸𑀦𑁂 𑀓𑀤𑀫𑁆𑀩𑀭𑀼𑀓𑁆𑀔𑀲𑁆𑀲, 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺 𑀓𑀧𑁆𑀧𑀭𑀼𑀓𑁆𑀔𑀲𑁆𑀲, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀲𑀺𑀭𑀻𑀲𑀲𑁆𑀲, 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲𑀸𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑀧𑀸𑀝𑀮𑀻 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫𑀦𑁆𑀢𑀺.

𑀤𑁆𑀯𑁂𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄𑀢𑀺.

𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀫𑀘𑁆𑀙𑀓𑀘𑁆𑀙𑀧𑀤𑁂𑀯𑀤𑀸𑀦𑀯𑀸𑀤𑀺𑀲𑀭𑀻𑀭𑀯𑀲𑁂𑀦 𑀫𑀳𑀦𑁆𑀢𑀸𑀦𑁂𑀯 𑀧𑀸𑀢𑀼𑀪𑀽𑀢𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸𑀢𑀺’’𑀆𑀤𑀺.

‘𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄’𑀢𑀺 𑀏𑀢𑀸𑀦𑀺 𑀳𑀺 𑀬𑀣𑀸 𑀫𑀸𑀬𑀸𑀓𑀸𑀭𑁄 𑀅𑀫𑀡𑀺𑀁𑀬𑁂𑀯 𑀉𑀤𑀓𑀁 𑀫𑀡𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀅𑀲𑀼𑀯𑀡𑁆𑀡𑀁𑀬𑁂𑀯 𑀮𑁂𑀟𑁆𑀟𑀼𑀁 𑀲𑀼𑀯𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀬𑀣𑀸 𑀘 𑀲𑀬𑀁 𑀦𑁂𑀯 𑀬𑀓𑁆𑀔𑁄 𑀦 𑀧𑀓𑁆𑀔𑀻 𑀲𑀫𑀸𑀦𑁄 𑀬𑀓𑁆𑀔𑀪𑀸𑀯𑀫𑁆𑀧𑀺 𑀧𑀓𑁆𑀔𑀺𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀏𑀯𑀫𑁂𑀯 𑀲𑀬𑀁 𑀅𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀦𑀻𑀮𑀁 𑀉𑀧𑀸𑀤𑀸𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺, 𑀅𑀧𑀻𑀢𑀸𑀦𑀺… 𑀅𑀮𑁄𑀳𑀺𑀢𑀸𑀦𑀺… 𑀅𑀦𑁄𑀤𑀸𑀢𑀸𑀦𑁂𑀯 𑀳𑀼𑀢𑁆𑀯𑀸 𑀑𑀤𑀸𑀢𑀁 𑀉𑀧𑀸𑀤𑀸𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀫𑀸𑀬𑀸𑀓𑀸𑀭𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄 𑀫𑀳𑀸𑀪𑀽𑀢𑀸𑀦𑀺. 𑀬𑀣𑀸 𑀘 𑀬𑀓𑁆𑀔𑀸𑀤𑀻𑀦𑀺 𑀫𑀳𑀸𑀪𑀽𑀢𑀸𑀦𑀺 𑀬𑀁 𑀕𑀡𑁆𑀳𑀦𑁆𑀢𑀺 𑀦𑁂𑀯 𑀢𑁂𑀲𑀁 𑀢𑀲𑁆𑀲 𑀅𑀦𑁆𑀢𑁄 𑀦 𑀩𑀳𑀺𑀞𑀸𑀦𑀁 𑀉𑀧𑀮𑀩𑁆𑀪𑀢𑀺, 𑀦 𑀘 𑀢𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀫𑁂𑀯 𑀏𑀢𑀸𑀦𑀺𑀧𑀺 𑀦𑁂𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀦 𑀩𑀳𑀺 𑀞𑀺𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑀝𑁆𑀞𑀸𑀦𑀢𑀸𑀬 𑀬𑀓𑁆𑀔𑀸𑀤𑀺𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀧𑀺 𑀫𑀳𑀸𑀪𑀽𑀢𑀸𑀦𑀺.

𑀬𑀣𑀸 𑀘 𑀬𑀓𑁆𑀔𑀺𑀦𑀻𑀲𑀗𑁆𑀔𑀸𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀺 𑀫𑀦𑀸𑀧𑁂𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀯𑀺𑀓𑁆𑀔𑁂𑀧𑁂𑀳𑀺 𑀅𑀢𑁆𑀢𑀦𑁄 𑀪𑀬𑀸𑀦𑀓𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀢𑁆𑀢𑁂 𑀯𑀜𑁆𑀘𑁂𑀦𑁆𑀢𑀺, 𑀏𑀯𑀫𑁂𑀯 𑀏𑀢𑀸𑀦𑀺𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀲𑀭𑀻𑀭𑀸𑀤𑀻𑀲𑀼 𑀫𑀦𑀸𑀧𑁂𑀦 𑀙𑀯𑀺𑀯𑀡𑁆𑀡𑁂𑀦, 𑀫𑀦𑀸𑀧𑁂𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀡𑁆𑀞𑀸𑀦𑁂𑀦, 𑀫𑀦𑀸𑀧𑁂𑀦 𑀘 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺𑀪𑀫𑀼𑀓𑀯𑀺𑀓𑁆𑀔𑁂𑀧𑁂𑀦 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑀸𑀤𑀺𑀪𑁂𑀤𑀁 𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀩𑀸𑀮𑀚𑀦𑀁 𑀯𑀜𑁆𑀘𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀤𑀝𑁆𑀞𑀼𑀁 𑀦 𑀤𑁂𑀦𑁆𑀢𑀺. 𑀇𑀢𑀺 𑀯𑀜𑁆𑀘𑀓𑀝𑁆𑀞𑁂𑀦 𑀬𑀓𑁆𑀔𑀺𑀦𑀻𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀧𑀺 𑀫𑀳𑀸𑀪𑀽𑀢𑀸𑀦𑀺.

‘𑀫𑀳𑀸𑀧𑀭𑀺𑀳𑀸𑀭𑀢𑁄’𑀢𑀺 𑀫𑀳𑀦𑁆𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀭𑀺𑀳𑀭𑀺𑀢𑀩𑁆𑀩𑀢𑁄. 𑀏𑀢𑀸𑀦𑀺 𑀳𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀦𑁂𑀢𑀩𑁆𑀩𑀢𑁆𑀢𑀸 𑀫𑀳𑀦𑁆𑀢𑁂𑀳𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀪𑀽𑀢𑀸𑀦𑀺 𑀧𑀯𑀢𑁆𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀺. 𑀫𑀳𑀸𑀧𑀭𑀺𑀳𑀸𑀭𑀸𑀦𑀺 𑀯𑀸 𑀪𑀽𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀺.

‘𑀫𑀳𑀸𑀯𑀺𑀓𑀸𑀭𑀢𑁄’𑀢𑀺 𑀪𑀽𑀢𑀸𑀦𑀁 𑀫𑀳𑀸𑀯𑀺𑀓𑀸𑀭𑀢𑁄. 𑀏𑀢𑀸𑀦𑀺 𑀳𑀺 𑀉𑀧𑀸𑀤𑀺𑀡𑁆𑀡𑀸𑀦𑀺𑀧𑀺 𑀅𑀦𑀼𑀧𑀸𑀤𑀺𑀡𑁆𑀡𑀸𑀦𑀺𑀧𑀺 𑀫𑀳𑀸𑀯𑀺𑀓𑀸𑀭𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀦𑀼𑀧𑀸𑀤𑀺𑀡𑁆𑀡𑀸𑀦𑀁 𑀓𑀧𑁆𑀧𑀯𑀼𑀝𑁆𑀞𑀸𑀦𑁂 𑀯𑀺𑀓𑀸𑀭𑀫𑀳𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀉𑀧𑀸𑀤𑀺𑀡𑁆𑀡𑀸𑀦𑀁 𑀥𑀸𑀢𑀼𑀓𑁆𑀔𑁄𑀪𑀓𑀸𑀮𑁂. 𑀢𑀣𑀸 𑀳𑀺 𑁋

𑀪𑀽𑀫𑀺𑀢𑁄 𑀯𑀼𑀝𑁆𑀞𑀺𑀢𑀸 𑀬𑀸𑀯, 𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀥𑀸𑀯𑀢𑀺;

𑀅𑀘𑁆𑀘𑀺 𑀅𑀘𑁆𑀘𑀺𑀫𑀢𑁄 𑀮𑁄𑀓𑁂, 𑀤𑀬𑁆𑀳𑀫𑀸𑀦𑀫𑁆𑀳𑀺 𑀢𑁂𑀚𑀲𑀸.

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀓𑀁, 𑀘𑀓𑁆𑀓𑀯𑀸𑀴𑀁 𑀯𑀺𑀮𑀻𑀬𑀢𑀺;

𑀓𑀼𑀧𑀺𑀢𑁂𑀦 𑀬𑀤𑀸 𑀮𑁄𑀓𑁄, 𑀲𑀮𑀺𑀮𑁂𑀦 𑀯𑀺𑀦𑀲𑁆𑀲𑀢𑀺.

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀓𑀁, 𑀘𑀓𑁆𑀓𑀯𑀸𑀴𑀁 𑀯𑀺𑀓𑀻𑀭𑀢𑀺;

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀬𑀤𑀸 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺.

𑀧𑀢𑁆𑀣𑀤𑁆𑀥𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀓𑀝𑁆𑀞𑀫𑀼𑀔𑁂𑀦 𑀯𑀸;

𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀓𑀝𑁆𑀞𑀫𑀼𑀔𑁂𑀯 𑀲𑁄.

𑀧𑀽𑀢𑀺𑀬𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀧𑀽𑀢𑀺𑀫𑀼𑀔𑁂𑀦 𑀯𑀸;

𑀆𑀧𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀧𑀽𑀢𑀺𑀫𑀼𑀔𑁂𑀯 𑀲𑁄.

𑀲𑀦𑁆𑀢𑀢𑁆𑀢𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀅𑀕𑁆𑀕𑀺𑀫𑀼𑀔𑁂𑀦 𑀯𑀸;

𑀢𑁂𑀚𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀅𑀕𑁆𑀕𑀺𑀫𑀼𑀔𑁂𑀯 𑀲𑁄.

𑀲𑀜𑁆𑀙𑀺𑀦𑁆𑀦𑁄 𑀪𑀯𑀢𑀺 𑀓𑀸𑀬𑁄, 𑀤𑀝𑁆𑀞𑁄 𑀲𑀢𑁆𑀣𑀫𑀼𑀔𑁂𑀦 𑀯𑀸;

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀲𑀢𑁆𑀣𑀫𑀼𑀔𑁂𑀯 𑀲𑁄. (𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁨𑁩𑁮);

𑀇𑀢𑀺 𑀫𑀳𑀸𑀯𑀺𑀓𑀸𑀭𑀸𑀦𑀺 𑀪𑀽𑀢𑀸𑀦𑀻𑀢𑀺 𑀫𑀳𑀸𑀪𑀽𑀢𑀸𑀦𑀺.

‘𑀫𑀳𑀦𑁆𑀢𑀪𑀽𑀢𑀢𑁆𑀢𑀸 𑀘𑀸’𑀢𑀺 𑀏𑀢𑀸𑀦𑀺 𑀳𑀺 𑀫𑀳𑀦𑁆𑀢𑀸𑀦𑀺 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸, 𑀪𑀽𑀢𑀸𑀦𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺, 𑀫𑀳𑀦𑁆𑀢𑀪𑀽𑀢𑀢𑁆𑀢𑀸 𑀘 𑀫𑀳𑀸𑀪𑀽𑀢𑀸𑀦𑀺. 𑀏𑀯𑀁 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀸𑀦𑀺.

𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀬, 𑀦𑀺𑀲𑁆𑀲𑀸𑀬, 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀁 𑀭𑀽𑀧𑀦𑁆𑀢𑀺 𑀇𑀤𑀁 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀧𑀤𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀢𑁂𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀻𑀢𑀺, 𑀲𑀢𑁆𑀢𑀯𑀻𑀲𑀢𑀺𑀧𑁆𑀧𑀪𑁂𑀤𑀁 𑀲𑀩𑁆𑀩𑀁 𑀭𑀽𑀧𑀁 𑀦𑀸𑀫.

𑀏𑀓𑀯𑀺𑀥𑀭𑀽𑀧𑀲𑀗𑁆𑀕𑀳𑁄

𑀇𑀤𑀸𑀦𑀺 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀏𑀓𑀯𑀺𑀥𑀸𑀤𑀻𑀳𑀺 𑀏𑀓𑀸𑀤𑀲𑀳𑀺 𑀲𑀗𑁆𑀕𑀳𑁂𑀳𑀺 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀽𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ‘𑀲𑀩𑁆𑀩𑀁 𑀭𑀽𑀧’𑀦𑁆𑀢𑀺 𑀇𑀤𑀁 𑀧𑀤𑀁 ‘𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼’ ‘𑀲𑀩𑁆𑀩𑀁 𑀭𑀽𑀧𑀁 𑀅𑀳𑁂𑀢𑀼𑀓’𑀦𑁆𑀢𑀺 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 ‘𑀦 𑀳𑁂𑀢𑀽’𑀢𑀺𑀆𑀤𑀻𑀦𑀺 𑀢𑁂𑀘𑀢𑁆𑀢𑀸𑀮𑀻𑀲𑀧𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀘𑀢𑁆𑀢𑀸𑀮𑀻𑀲𑀧𑀤𑀸𑀦𑀺 𑀫𑀸𑀢𑀺𑀓𑀢𑁄 𑀕𑀳𑁂𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀅𑀯𑀲𑀸𑀦𑁂 𑀢𑀻𑀡𑀺 𑀫𑀸𑀢𑀺𑀓𑀸𑀫𑀼𑀢𑁆𑀢𑀓𑀸𑀦𑀻𑀢𑀺. 𑀏𑀯𑀁 𑀢𑀸𑀯 𑀧𑀞𑀫𑁂 𑀲𑀗𑁆𑀕𑀳𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀤𑀼𑀢𑀺𑀬𑀲𑀗𑁆𑀕𑀳𑀸𑀤𑀻𑀲𑀼.

𑀤𑀼𑀯𑀺𑀥𑀭𑀽𑀧𑀲𑀗𑁆𑀕𑀳𑁄

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀤𑀼𑀢𑀺𑀬𑀲𑀗𑁆𑀕𑀳𑁂 𑀢𑀸𑀯 𑀲𑀢𑀁 𑀘𑀢𑁆𑀢𑀸𑀭𑁄 𑀘 𑀤𑀼𑀓𑀸. 𑀢𑀢𑁆𑀣 𑀅𑀢𑁆𑀣𑀺 𑀭𑀽𑀧𑀁 𑀉𑀧𑀸𑀤𑀸, 𑀅𑀢𑁆𑀣𑀺 𑀭𑀽𑀧𑀁 𑀦𑁄𑀉𑀧𑀸𑀤𑀸𑀢𑀺𑀆𑀤𑀬𑁄 𑀆𑀤𑀺𑀫𑁆𑀳𑀺 𑀘𑀼𑀤𑁆𑀤𑀲 𑀤𑀼𑀓𑀸 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄 𑀧𑀓𑀺𑀡𑁆𑀡𑀓𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀽𑀢𑀺𑀆𑀤𑀬𑁄 𑀧𑀜𑁆𑀘𑀯𑀻𑀲𑀢𑀺 𑀤𑀼𑀓𑀸 𑀯𑀢𑁆𑀣𑀼𑀅𑀯𑀢𑁆𑀣𑀼𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀢𑁆𑀣𑀼𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺𑀆𑀤𑀬𑁄 𑀧𑀜𑁆𑀘𑀯𑀻𑀲𑀢𑀺 𑀆𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀆𑀤𑀬𑁄 𑀤𑀲 𑀆𑀬𑀢𑀦𑀸𑀦𑀸𑀬𑀢𑀦𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀆𑀬𑀢𑀦𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀥𑀸𑀢𑀽𑀢𑀺𑀆𑀤𑀬𑁄 𑀤𑀲 𑀥𑀸𑀢𑀼𑀅𑀥𑀸𑀢𑀼𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀥𑀸𑀢𑀼𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀬𑁄 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀤𑀼𑀓𑀸 𑀦𑀸𑀫. 𑀢𑀢𑁄 𑀅𑀢𑁆𑀣𑀺 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺𑀆𑀤𑀬𑁄 𑀤𑁆𑀯𑀸𑀤𑀲 𑀲𑀼𑀔𑀼𑀫𑀸𑀲𑀼𑀔𑀼𑀫𑀭𑀽𑀧𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀲𑀼𑀔𑀼𑀫𑀭𑀽𑀧𑀤𑀼𑀓𑀸 𑀦𑀸𑀫𑀸𑀢𑀺. 𑀇𑀤𑀁 𑀤𑀼𑀢𑀺𑀬𑀲𑀗𑁆𑀕𑀳𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁.

𑀢𑀺𑀯𑀺𑀥𑀭𑀽𑀧𑀲𑀗𑁆𑀕𑀳𑁄

𑁫𑁮𑁫. 𑀢𑀢𑀺𑀬𑀲𑀗𑁆𑀕𑀳𑁂 𑀲𑀢𑀁 𑀢𑀻𑀡𑀺 𑀘 𑀢𑀺𑀓𑀸𑀦𑀺. 𑀢𑀢𑁆𑀣 𑀤𑀼𑀢𑀺𑀬𑀲𑀗𑁆𑀕𑀳𑁂 𑀯𑀼𑀢𑁆𑀢𑁂𑀲𑀼 𑀘𑀼𑀤𑁆𑀤𑀲𑀲𑀼 𑀧𑀓𑀺𑀡𑁆𑀡𑀓𑀤𑀼𑀓𑁂𑀲𑀼 𑀏𑀓𑀁 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑀁 𑀲𑁂𑀲𑁂𑀳𑀺 𑀢𑁂𑀭𑀲𑀳𑀺 𑀬𑁄𑀚𑁂𑀢𑁆𑀯𑀸 𑀬𑀁 𑀢𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀁 𑀢𑀁 𑀉𑀧𑀸𑀤𑀸; 𑀬𑀁 𑀢𑀁 𑀭𑀽𑀧𑀁 𑀩𑀸𑀳𑀺𑀭𑀁 𑀢𑀁 𑀅𑀢𑁆𑀣𑀺 𑀉𑀧𑀸𑀤𑀸, 𑀅𑀢𑁆𑀣𑀺 𑀦𑁄𑀉𑀧𑀸𑀤𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀞𑀧𑀺𑀢𑀸 𑀢𑁂𑀭𑀲 𑀧𑀓𑀺𑀡𑁆𑀡𑀓𑀢𑀺𑀓𑀸 𑀦𑀸𑀫. 𑀢𑀢𑁄 𑀢𑀫𑁂𑀯 𑀤𑀼𑀓𑀁 𑀲𑁂𑀲𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀬𑀁 𑀢𑀁 𑀭𑀽𑀧𑀁 𑀩𑀸𑀳𑀺𑀭𑀁 𑀢𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀼, 𑀬𑀁 𑀢𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀁 𑀢𑀁 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀼, 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑁂𑀲𑀢𑀺𑀓𑀸 𑀞𑀧𑀺𑀢𑀸. 𑀢𑁂𑀲𑀁 𑀦𑀸𑀫𑀜𑁆𑀘 𑀕𑀡𑀦𑀸 𑀘 𑀢𑁂𑀲𑀁𑀬𑁂𑀯 𑀯𑀢𑁆𑀣𑀼𑀤𑀼𑀓𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀤𑀁 𑀢𑀢𑀺𑀬𑀲𑀗𑁆𑀕𑀳𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁.

𑀘𑀢𑀼𑀩𑁆𑀩𑀺𑀥𑀸𑀤𑀺𑀭𑀽𑀧𑀲𑀗𑁆𑀕𑀳𑀸

𑁫𑁮𑁬. 𑀘𑀢𑀼𑀢𑁆𑀣𑀲𑀗𑁆𑀕𑀳𑁂 𑀤𑁆𑀯𑀸𑀯𑀻𑀲𑀢𑀺 𑀘𑀢𑀼𑀓𑁆𑀓𑀸. 𑀢𑀢𑁆𑀣 𑀲𑀩𑁆𑀩𑀧𑀘𑁆𑀙𑀺𑀫𑁄 𑀅𑀢𑁆𑀣𑀺 𑀭𑀽𑀧𑀁 𑀉𑀧𑀸𑀤𑀸 𑀅𑀢𑁆𑀣𑀺 𑀭𑀽𑀧𑀁 𑀦𑁄𑀉𑀧𑀸𑀤𑀸𑀢𑀺 𑀏𑀯𑀁 𑀇𑀥 𑀯𑀼𑀢𑁆𑀢𑀁 𑀫𑀸𑀢𑀺𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 𑀞𑀧𑀺𑀢𑁄. 𑀇𑀢𑀭𑁂 𑀧𑀦 𑀆𑀫𑀲𑀺𑀢𑁆𑀯𑀸 𑀞𑀧𑀺𑀢𑀸. 𑀓𑀣𑀁? 𑀬𑁂 𑀢𑀸𑀯 𑀇𑀥 𑀤𑀼𑀯𑀺𑀥𑀲𑀗𑁆𑀕𑀳𑁂 𑀧𑀓𑀺𑀡𑁆𑀡𑀓𑁂𑀲𑀼 𑀆𑀤𑀺𑀢𑁄 𑀢𑀬𑁄 𑀤𑀼𑀓𑀸, 𑀢𑁂𑀲𑀼 𑀏𑀓𑁂𑀓𑀁 𑀕𑀳𑁂𑀢𑁆𑀯𑀸 𑀬𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸 𑀢𑀁 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀁, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀼𑀓𑀢𑁆𑀢𑀬𑀫𑀽𑀮𑀓𑀸 𑀆𑀤𑀺𑀫𑁆𑀳𑀺 𑀧𑀜𑁆𑀘𑀤𑀲 𑀘𑀢𑀼𑀓𑁆𑀓𑀸 𑀞𑀧𑀺𑀢𑀸.

𑀇𑀤𑀸𑀦𑀺 𑀬𑁄 𑀬𑀁 𑀘𑀢𑀼𑀓𑁆𑀓𑁄 𑀲𑀦𑀺𑀤𑀲𑁆𑀲𑀦𑀤𑀼𑀓𑁄 𑀲𑁄 𑀬𑀲𑁆𑀫𑀸 𑀬𑀁 𑀢𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀢𑀁 𑀅𑀢𑁆𑀣𑀺 𑀲𑀧𑁆𑀧𑀝𑀺𑀖𑀁, 𑀅𑀢𑁆𑀣𑀺 𑀅𑀧𑁆𑀧𑀝𑀺𑀖𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑁂𑀳𑀺 𑀯𑀸, 𑀅𑀢𑁆𑀣𑀺 𑀉𑀧𑀸𑀤𑀸 𑀅𑀢𑁆𑀣𑀺 𑀦𑁄𑀉𑀧𑀸𑀤𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀭𑀺𑀫𑁂𑀳𑀺 𑀯𑀸, 𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀣𑀸𑀪𑀸𑀯𑀢𑁄 𑀓𑀫𑀸𑀪𑀸𑀯𑀢𑁄 𑀯𑀺𑀲𑁂𑀲𑀸𑀪𑀸𑀯𑀢𑁄 𑀘 𑀬𑁄𑀕𑀁 𑀦 𑀕𑀘𑁆𑀙𑀢𑀺. 𑀲𑀦𑀺𑀤𑀲𑁆𑀲𑀦𑀜𑁆𑀳𑀺 ‘𑀅𑀧𑁆𑀧𑀝𑀺𑀖𑀁’ 𑀦𑀸𑀫, ‘𑀦𑁄 𑀉𑀧𑀸𑀤𑀸’ 𑀯𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑀸𑀪𑀸𑀯𑀢𑁄 𑀬𑁄𑀕𑀁 𑀦 𑀕𑀘𑁆𑀙𑀢𑀺. ‘𑀉𑀧𑀸𑀤𑀺𑀡𑁆𑀡𑀁 𑀧𑀦 𑀅𑀦𑀼𑀧𑀸𑀤𑀺𑀡𑁆𑀡𑀜𑁆𑀘 𑀅𑀢𑁆𑀣𑀺 𑀢𑀁 𑀓𑀫𑀸𑀪𑀸𑀯𑀸 𑀬𑁄𑀕𑀁 𑀦 𑀕𑀘𑁆𑀙𑀢𑀺. 𑀲𑀩𑁆𑀩𑀤𑀼𑀓𑀸 𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑁂𑀳𑁂𑀯 𑀲𑀤𑁆𑀥𑀺𑀁 𑀬𑁄𑀚𑀺𑀢𑀸. 𑀅𑀬𑀫𑁂𑀢𑁆𑀣 𑀓𑀫𑁄. 𑀧𑀼𑀭𑀺𑀫𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀓𑀫𑀸𑀪𑀸𑀯𑁄𑀢𑀺. ‘𑀲𑀢𑀺 𑀅𑀢𑁆𑀣𑁂 𑀓𑀫𑀸𑀪𑀸𑀯𑁄 𑀅𑀓𑀸𑀭𑀡𑀁. 𑀢𑀲𑁆𑀫𑀸 𑀉𑀧𑀸𑀤𑀺𑀡𑁆𑀡𑀧𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑁄’𑀢𑀺 𑀘𑁂 𑁋 𑀦, 𑀯𑀺𑀲𑁂𑀲𑀸𑀪𑀸𑀯𑀸; 𑀉𑀧𑀸𑀤𑀺𑀡𑁆𑀡𑀧𑀤𑀸𑀤𑀻𑀦𑀺 𑀳𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀬𑁄𑀚𑀺𑀢𑀸𑀦𑀺. 𑀢𑀢𑁆𑀣 ‘𑀉𑀧𑀸𑀤𑀺𑀡𑁆𑀡𑀁 𑀯𑀸 𑀲𑀦𑀺𑀤𑀲𑁆𑀲𑀦𑀁, 𑀲𑀦𑀺𑀤𑀲𑁆𑀲𑀦𑀁 𑀯𑀸 𑀉𑀧𑀸𑀤𑀺𑀡𑁆𑀡’𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀸𑀪𑀸𑀯𑀸𑀧𑀺 𑀬𑁄𑀕𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀢𑀁 𑀘𑀢𑀼𑀢𑁆𑀣𑀤𑀼𑀓𑀁 𑀅𑀦𑀸𑀫𑀲𑀺𑀢𑁆𑀯𑀸, 𑀢𑀢𑁄 𑀧𑀭𑁂𑀳𑀺 𑀅𑀢𑁆𑀣𑀺 𑀭𑀽𑀧𑀁 𑀲𑀧𑁆𑀧𑀝𑀺𑀖𑀦𑁆𑀢𑀺𑀆𑀤𑀻𑀳𑀺 𑀢𑀻𑀳𑀺 𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 ‘𑀬𑀁 𑀢𑀁 𑀭𑀽𑀧𑀁 𑀲𑀧𑁆𑀧𑀝𑀺𑀖𑀁 𑀢𑀁 𑀅𑀢𑁆𑀣𑀺 𑀇𑀦𑁆𑀤𑁆𑀭𑀺𑀬𑀁, 𑀅𑀢𑁆𑀣𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀬𑀁 𑀢𑀁 𑀭𑀽𑀧𑀁 𑀅𑀧𑁆𑀧𑀝𑀺𑀖𑀁 𑀢𑀁 𑀅𑀢𑁆𑀣𑀺 𑀇𑀦𑁆𑀤𑁆𑀭𑀺𑀬𑀁, 𑀅𑀢𑁆𑀣𑀺 𑀦 𑀇𑀦𑁆𑀤𑁆𑀭𑀺𑀬’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀼𑀚𑁆𑀚𑀫𑀸𑀦𑁂 𑀤𑁆𑀯𑁂 𑀤𑁆𑀯𑁂 𑀤𑀼𑀓𑁂 𑀬𑁄𑀚𑁂𑀢𑁆𑀯𑀸 𑀙 𑀘𑀢𑀼𑀓𑁆𑀓𑀸 𑀞𑀧𑀺𑀢𑀸.

𑀬𑀣𑀸 𑀘𑀸𑀬𑀁 𑀘𑀢𑀼𑀢𑁆𑀣𑀤𑀼𑀓𑁄 𑀬𑁄𑀕𑀁 𑀦 𑀕𑀘𑁆𑀙𑀢𑀺, 𑀢𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀆𑀤𑀺𑀤𑀼𑀓𑁄𑀧𑀺. 𑀓𑀲𑁆𑀫𑀸? 𑀅𑀦𑀼𑀧𑀸𑀤𑀸𑀭𑀽𑀧𑀲𑁆𑀲 𑀏𑀓𑀦𑁆𑀢𑁂𑀦 𑀅𑀦𑀺𑀤𑀲𑁆𑀲𑀦𑀢𑁆𑀢𑀸. 𑀲𑁄 𑀳𑀺 𑀬𑀁 𑀢𑀁 𑀭𑀽𑀧𑀁 𑀦𑁄𑀉𑀧𑀸𑀤𑀸 𑀢𑀁 𑀅𑀢𑁆𑀣𑀺 𑀲𑀦𑀺𑀤𑀲𑁆𑀲𑀦𑀁, 𑀅𑀢𑁆𑀣𑀺 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑁋 𑀏𑀯𑀁 𑀘𑀢𑀼𑀢𑁆𑀣𑁂𑀦 𑀤𑀼𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑀺𑀬𑀫𑀸𑀦𑁄 𑀬𑁄𑀕𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀫𑁂𑀦 𑀲𑀳 𑀬𑁄𑀚𑀺𑀢𑁄. 𑀏𑀯𑀁 𑀬𑁄 𑀬𑁂𑀦 𑀲𑀤𑁆𑀥𑀺𑀁 𑀬𑁄𑀕𑀁 𑀕𑀘𑁆𑀙𑀢𑀺, 𑀬𑁄 𑀘 𑀦 𑀕𑀘𑁆𑀙𑀢𑀺 𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀲𑀗𑁆𑀕𑀳𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁. 𑀇𑀢𑁄 𑀧𑀭𑁂 𑀧𑀦 𑀧𑀜𑁆𑀘𑀯𑀺𑀥𑀲𑀗𑁆𑀕𑀳𑀸𑀤𑀬𑁄 𑀲𑀢𑁆𑀢 𑀲𑀗𑁆𑀕𑀳𑀸 𑀅𑀲𑀫𑁆𑀫𑀺𑀲𑁆𑀲𑀸 𑀏𑀯. 𑀏𑀯𑀁 𑀲𑀓𑀮𑀸𑀬𑀧𑀺 𑀫𑀸𑀢𑀺𑀓𑀸𑀬 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀯𑀺𑀪𑀢𑁆𑀢𑀺𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁯𑁪. 𑀇𑀤𑀸𑀦𑀺 𑀢𑀲𑁆𑀲𑀸 𑀅𑀢𑁆𑀣𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼𑀫𑁂𑀯𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘𑀓𑀢𑀫𑀁 𑀢𑀁 𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀽’𑀢𑀺 𑀧𑀼𑀘𑁆𑀙𑀸 𑀦 𑀓𑀢𑀸𑀢𑀺? 𑀪𑁂𑀤𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀤𑀼𑀓𑀸𑀤𑀻𑀲𑀼 ‘𑀉𑀧𑀸𑀤𑀸𑀭𑀽𑀧’𑀫𑁆𑀧𑀺 𑀅𑀢𑁆𑀣𑀺 ‘𑀦𑁄𑀉𑀧𑀸𑀤𑀸𑀭𑀽𑀧’𑀫𑁆𑀧𑀺, 𑀏𑀯𑀫𑀺𑀥 𑀳𑁂𑀢𑀼 𑀦 𑀳𑁂𑀢𑀽𑀢𑀺𑀧𑀺 𑀲𑀳𑁂𑀢𑀼𑀓𑀫𑀳𑁂𑀢𑀼𑀓𑀦𑁆𑀢𑀺𑀧𑀺 𑀪𑁂𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑀁. 𑀢𑀢𑁆𑀣 ‘𑀲𑀩𑁆𑀩’𑀦𑁆𑀢𑀺 𑀲𑀓𑀮𑀁, 𑀦𑀺𑀭𑀯𑀲𑁂𑀲𑀁. ‘𑀭𑀽𑀧’𑀦𑁆𑀢𑀺 𑀅𑀬𑀫𑀲𑁆𑀲 𑀲𑀻𑀢𑀸𑀤𑀻𑀳𑀺 𑀭𑀼𑀧𑁆𑀧𑀦𑀪𑀸𑀯𑀤𑀻𑀧𑀦𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁄. 𑀦 𑀳𑁂𑀢𑀼𑀫𑁂𑀯𑀸𑀢𑀺 𑀲𑀸𑀥𑀸𑀭𑀡𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑀦𑀺𑀤𑁆𑀤𑁂𑀲𑁄.

𑀢𑀢𑁆𑀣 𑀳𑁂𑀢𑀼𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀼 𑀉𑀢𑁆𑀢𑀫𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀽𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁂𑀢𑀼. 𑀢𑁂𑀲𑀼 ‘𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽’𑀢𑀺 (𑀥. 𑀲. 𑁧𑁦𑁫𑁯) 𑀅𑀬𑀁 ‘𑀳𑁂𑀢𑀼𑀳𑁂𑀢𑀼’ 𑀦𑀸𑀫. ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀼, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺 (𑀫. 𑀦𑀺. 𑁩.𑁮𑁫; 𑀲𑀁. 𑀦𑀺. 𑁩.𑁮𑁨) 𑀅𑀬𑀁 ‘𑀧𑀘𑁆𑀘𑀬𑀳𑁂𑀢𑀼’ 𑀦𑀸𑀫. ‘‘𑀓𑀼𑀲𑀮𑀸𑀓𑀼𑀲𑀮𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀝𑁆𑀞𑀸𑀦𑁂, 𑀉𑀢𑁆𑀢𑀫𑀁 𑀇𑀝𑁆𑀞𑀸𑀭𑀫𑁆𑀫𑀡𑀁 𑀓𑀼𑀲𑀮𑀯𑀺𑀧𑀸𑀓𑀝𑁆𑀞𑀸𑀦𑁂, 𑀉𑀢𑁆𑀢𑀫𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀅𑀓𑀼𑀲𑀮𑀯𑀺𑀧𑀸𑀓𑀝𑁆𑀞𑀸𑀦𑁂’’𑀢𑀺 𑀅𑀬𑀁 ‘𑀉𑀢𑁆𑀢𑀫𑀳𑁂𑀢𑀼’ 𑀦𑀸𑀫. 𑀬𑀣𑀸𑀳 𑁋 ‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’𑀢𑀺 (𑀫. 𑀦𑀺. 𑁧.𑁧𑁪𑁮; 𑀯𑀺𑀪. 𑁮𑁧𑁦; 𑀧𑀸𑀝𑀺. 𑀫. 𑁨.𑁪𑁪), ‘‘𑀏𑀲𑁂𑀯 𑀳𑁂𑀢𑀼 𑀏𑀲 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀸𑀦𑀁 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸’’𑀢𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀲𑀸𑀥𑀸𑀭𑀡𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑀝𑁆𑀞𑀁 𑀨𑀭𑀢𑀻𑀢𑀺 𑀅𑀬𑀁 ‘𑀲𑀸𑀥𑀸𑀭𑀡𑀳𑁂𑀢𑀼’ 𑀦𑀸𑀫. 𑀬𑀣𑀸 𑀳𑀺 𑀧𑀣𑀯𑀻𑀭𑀲𑁄 𑀆𑀧𑁄𑀭𑀲𑁄 𑀘 𑀫𑀥𑀼𑀭𑀲𑁆𑀲𑀸𑀧𑀺 𑀅𑀫𑀥𑀼𑀭𑀲𑁆𑀲𑀸𑀧𑀺 𑀧𑀘𑁆𑀘𑀬𑁄, 𑀏𑀯𑀁 𑀅𑀯𑀺𑀚𑁆𑀚𑀸 𑀓𑀼𑀲𑀮𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀅𑀓𑀼𑀲𑀮𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘𑀳𑁂𑀢𑀼𑀳𑁂𑀢𑀼’ 𑀅𑀥𑀺𑀧𑁆𑀧𑁂𑀢𑁄. 𑀇𑀢𑀺 ‘𑀳𑁂𑀢𑀽 𑀥𑀫𑁆𑀫𑀸 𑀦 𑀳𑁂𑀢𑀽 𑀥𑀫𑁆𑀫𑀸’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧) 𑀫𑀸𑀢𑀺𑀓𑀸𑀬 𑀆𑀕𑀢𑀁 𑀳𑁂𑀢𑀼𑀪𑀸𑀯𑀁 𑀭𑀽𑀧𑀲𑁆𑀲 𑀦𑀺𑀬𑀫𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘𑀦 𑀳𑁂𑀢𑀼𑀫𑁂𑀯𑀸’𑀢𑀺 𑀆𑀳. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀧𑀝𑀺𑀓𑁆𑀔𑁂𑀧𑀦𑀺𑀤𑁆𑀤𑁂𑀲𑁄 𑀘 𑀅𑀧𑁆𑀧𑀝𑀺𑀓𑁆𑀔𑁂𑀧𑀦𑀺𑀤𑁆𑀤𑁂𑀲𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑁄 𑀧𑀦 𑀲𑀩𑁆𑀩𑀧𑀤𑀸𑀦𑀁 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯.

𑀲𑀧𑁆𑀧𑀘𑁆𑀘𑀬𑀫𑁂𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀫𑁂𑀯 𑀳𑁄𑀢𑀺, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀆𑀳𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑁂𑀯𑀸𑀢𑀺 𑀏𑀯𑀁 𑀭𑀽𑀧𑀲𑁆𑀲𑁂𑀯 𑀯𑀼𑀢𑁆𑀢𑀘𑀢𑀼𑀧𑀘𑁆𑀘𑀬𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀫𑁂𑀯𑀸𑀢𑀺 ‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’𑀢𑀺 𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀁 𑀅𑀭𑀽𑀧𑀻𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀉𑀧𑁆𑀧𑀦𑁆𑀦𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀙𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀬𑀸𑀫𑁄 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀦𑁆𑀥𑀸𑀬 𑀕𑀳𑀺𑀢𑁄. 𑀦 𑀳𑀺 𑀢𑀸𑀦𑀺 𑀅𑀢𑀻𑀢𑀸𑀦𑀸𑀕𑀢𑀁 𑀯𑀺𑀚𑀸𑀦𑀦𑁆𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀦 𑀅𑀢𑀻𑀢𑀫𑁆𑀧𑀺 𑀅𑀦𑀸𑀕𑀢𑀫𑁆𑀧𑀺 𑀯𑀺𑀚𑀸𑀦𑀸𑀢𑀺. 𑀢𑀁 𑀇𑀫𑀲𑁆𑀫𑀺𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 𑀲𑁄𑀢𑀧𑀢𑀺𑀢𑀫𑁂𑀯 𑀳𑀼𑀢𑁆𑀯𑀸 𑀕𑀢𑀁. 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀧𑀦 𑀅𑀦𑀺𑀘𑁆𑀘𑀫𑁂𑀯. 𑀚𑀭𑀸𑀬 𑀅𑀪𑀺𑀪𑀯𑀺𑀢𑀩𑁆𑀩𑀥𑀫𑁆𑀫𑀓𑀢𑁆𑀢𑀸 𑀚𑀭𑀸𑀪𑀺𑀪𑀽𑀢𑀫𑁂𑀯. 𑀬𑀲𑁆𑀫𑀸 𑀯𑀸 𑀭𑀽𑀧𑀓𑀸𑀬𑁂 𑀚𑀭𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸𑀧𑀺 ‘𑀚𑀭𑀸𑀪𑀺𑀪𑀽𑀢𑀫𑁂𑀯𑀸’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄𑀢𑀺 𑀏𑀢𑁆𑀣 ‘𑀯𑀺𑀥𑀸’-𑀲𑀤𑁆𑀤𑁄 𑀫𑀸𑀦𑀲𑀡𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁯𑁬𑁨) 𑀳𑀺 𑀫𑀸𑀦𑁄 𑀯𑀺𑀥𑀸 𑀦𑀸𑀫. ‘‘𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁫) 𑀲𑀡𑁆𑀞𑀸𑀦𑀁. ‘𑀓𑀣𑀁𑀯𑀺𑀥’𑀦𑁆𑀢𑀺 𑀳𑀺 𑀧𑀤𑀲𑁆𑀲 𑀓𑀣𑀁𑀲𑀡𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀁 𑀤𑀼𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁫𑁧-𑁭𑁫𑁨) 𑀓𑁄𑀝𑁆𑀞𑀸𑀲𑁄 𑀯𑀺𑀥𑀸 𑀦𑀸𑀫. 𑀇𑀥𑀸𑀧𑀺 𑀓𑁄𑀝𑁆𑀞𑀸𑀲𑁄𑀯 𑀅𑀥𑀺𑀧𑁆𑀧𑁂𑀢𑁄.

𑀲𑀗𑁆𑀕𑀳𑀲𑀤𑁆𑀤𑁄𑀧𑀺 𑀲𑀚𑀸𑀢𑀺𑀲𑀜𑁆𑀚𑀸𑀢𑀺𑀓𑀺𑀭𑀺𑀬𑀸𑀕𑀡𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀩𑁆𑀩𑁂 𑀔𑀢𑁆𑀢𑀺𑀬𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀸 𑀲𑀩𑁆𑀩𑁂 𑀯𑁂𑀲𑁆𑀲𑀸 𑀲𑀩𑁆𑀩𑁂 𑀲𑀼𑀤𑁆𑀤𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 ‘𑀲𑀚𑀸𑀢𑀺𑀲𑀗𑁆𑀕𑀳𑁄’ 𑀦𑀸𑀫. ‘𑀏𑀓𑀚𑀸𑀢𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀳𑀺 𑀇𑀥 𑀲𑀩𑁆𑀩𑁂 𑀚𑀸𑀢𑀺𑀬𑀸 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀲𑀩𑁆𑀩𑁂 𑀓𑁄𑀲𑀮𑀓𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀫𑀸𑀕𑀥𑀓𑀸, 𑀲𑀩𑁆𑀩𑁂 𑀪𑀸𑀭𑀼𑀓𑀘𑁆𑀙𑀓𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀅𑀬𑀁 ‘𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄’ 𑀦𑀸𑀫. 𑀏𑀓𑀝𑁆𑀞𑀸𑀦𑁂 𑀚𑀸𑀢𑀸 𑀲𑀁𑀯𑀼𑀤𑁆𑀥𑀸 𑀆𑀕𑀘𑁆𑀙𑀦𑁆𑀢𑀽𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀳𑀺 𑀇𑀥 𑀲𑀩𑁆𑀩𑁂 𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑁂𑀦 𑀦𑀺𑀯𑀼𑀢𑁆𑀣𑁄𑀓𑀸𑀲𑁂𑀦 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀲𑀩𑁆𑀩𑁂 𑀳𑀢𑁆𑀣𑀸𑀭𑁄𑀳𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀅𑀲𑁆𑀲𑀸𑀭𑁄𑀳𑀸, 𑀲𑀩𑁆𑀩𑁂 𑀭𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑁋 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 ‘𑀓𑀺𑀭𑀺𑀬𑀸𑀲𑀗𑁆𑀕𑀳𑁄’ 𑀦𑀸𑀫. 𑀲𑀩𑁆𑀩𑁂𑀯 𑀳𑁂𑀢𑁂 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀓𑀭𑀡𑁂𑀦 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀘𑀓𑁆𑀔𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺? 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺. 𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀓𑀣𑀸. 𑁪𑁭𑁧), 𑀅𑀬𑀁 ‘𑀕𑀡𑀦𑀲𑀗𑁆𑀕𑀳𑁄’ 𑀦𑀸𑀫. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀓𑁄𑀝𑁆𑀞𑀸𑀲𑁂𑀦 𑀭𑀽𑀧𑀕𑀡𑀦𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸

𑁫𑁯𑁫. 𑀇𑀤𑀸𑀦𑀺 𑀤𑀼𑀯𑀺𑀥𑀲𑀗𑁆𑀕𑀳𑀸𑀤𑀻𑀲𑀼 ‘𑀅𑀢𑁆𑀣𑀺 𑀭𑀽𑀧𑀁 𑀉𑀧𑀸𑀤𑀸, 𑀅𑀢𑁆𑀣𑀺 𑀭𑀽𑀧𑀁 𑀦𑁄𑀉𑀧𑀸𑀤𑀸’𑀢𑀺 𑀏𑀯𑀁 𑀪𑁂𑀤𑀲𑀩𑁆𑀪𑀸𑀯𑀢𑁄 𑀧𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀤𑀪𑀸𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀸𑀤𑀺𑀬𑀢𑀻𑀢𑀺 ‘𑀉𑀧𑀸𑀤𑀸’; 𑀫𑀳𑀸𑀪𑀽𑀢𑀸𑀦𑀺 𑀕𑀳𑁂𑀢𑁆𑀯𑀸, 𑀅𑀫𑀼𑀜𑁆𑀘𑀺𑀢𑁆𑀯𑀸, 𑀢𑀸𑀦𑀺 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀦𑁆𑀢𑁄 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺𑀫𑀸𑀳.

𑁫𑁯𑁬. 𑀏𑀯𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀉𑀧𑀸𑀤𑀸𑀭𑀽𑀧𑀁 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑀺𑀲𑀦𑁆𑀢𑁄 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀯𑀺𑀥𑀁 𑀘𑀓𑁆𑀔𑀼 𑁋 𑀫𑀁𑀲𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀘. 𑀏𑀢𑁂𑀲𑀼 ‘𑀩𑀼𑀤𑁆𑀥𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀼 𑀜𑀸𑀡𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀽’𑀢𑀺 𑀧𑀜𑁆𑀘𑀯𑀺𑀥𑀁 𑀧𑀜𑁆𑀜𑀸𑀘𑀓𑁆𑀔𑀼. 𑀢𑀢𑁆𑀣 ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂…𑀧𑁂… 𑀤𑀼𑀯𑀺𑀜𑁆𑀜𑀸𑀧𑀬𑁂’’𑀢𑀺 (𑀫. 𑀦𑀺. 𑁧.𑁨𑁮𑁩) 𑀇𑀤𑀁 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫. ‘‘𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺 𑀇𑀤𑀁 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫. ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫) 𑀇𑀤𑀁 𑀜𑀸𑀡𑀘𑀓𑁆𑀔𑀼 𑀦𑀸𑀫. ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸’’𑀢𑀺 (𑀫. 𑀦𑀺. 𑁧.𑁨𑁮𑁪) 𑀇𑀤𑀁 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫. ‘‘𑀢𑀲𑁆𑀫𑀺𑀁 𑀬𑁂𑀯𑀸𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 (𑀫. 𑀦𑀺. 𑁨.𑁩𑁯𑁫) 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀁 𑀜𑀸𑀡𑀁 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫.

𑀫𑀁𑀲𑀘𑀓𑁆𑀔𑀼𑀧𑀺 𑀧𑀲𑀸𑀤𑀘𑀓𑁆𑀔𑀼 𑀲𑀲𑀫𑁆𑀪𑀸𑀭𑀘𑀓𑁆𑀔𑀽𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀬𑁄𑀬𑀁 𑀅𑀓𑁆𑀔𑀺𑀓𑀽𑀧𑀓𑁂 𑀧𑀢𑀺𑀝𑁆𑀞𑀺𑀢𑁄 𑀳𑁂𑀝𑁆𑀞𑀸 𑀅𑀓𑁆𑀔𑀺𑀓𑀽𑀧𑀓𑀝𑁆𑀞𑀺𑀓𑁂𑀦, 𑀉𑀧𑀭𑀺 𑀪𑀫𑀼𑀓𑀝𑁆𑀞𑀺𑀓𑁂𑀦, 𑀉𑀪𑀢𑁄 𑀅𑀓𑁆𑀔𑀺𑀓𑀽𑀝𑁂𑀳𑀺, 𑀅𑀦𑁆𑀢𑁄 𑀫𑀢𑁆𑀣𑀮𑀼𑀗𑁆𑀕𑁂𑀦, 𑀩𑀳𑀺𑀤𑁆𑀥𑀸 𑀅𑀓𑁆𑀔𑀺𑀮𑁄𑀫𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄 𑀫𑀁𑀲𑀧𑀺𑀡𑁆𑀟𑁄. 𑀲𑀗𑁆𑀔𑁂𑀧𑀢𑁄 ‘𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸, 𑀲𑀫𑁆𑀪𑀯𑁄 𑀲𑀡𑁆𑀞𑀸𑀦𑀁, 𑀚𑀻𑀯𑀺𑀢𑀁 𑀪𑀸𑀯𑁄 𑀓𑀸𑀬𑀧𑀲𑀸𑀤𑁄 𑀘𑀓𑁆𑀔𑀼𑀧𑀲𑀸𑀤𑁄’𑀢𑀺 𑀘𑀼𑀤𑁆𑀤𑀲𑀲𑀫𑁆𑀪𑀸𑀭𑁄. 𑀯𑀺𑀢𑁆𑀣𑀸𑀭𑀢𑁄 ‘𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀢𑀁𑀲𑀦𑁆𑀦𑀺𑀲𑁆𑀲𑀺𑀢𑀯𑀡𑁆𑀡𑀕𑀦𑁆𑀥𑀭𑀲𑀑𑀚𑀸𑀲𑀡𑁆𑀞𑀸𑀦𑀲𑀫𑁆𑀪𑀯𑀸 𑀘𑀸’𑀢𑀺 𑀇𑀫𑀸𑀦𑀺 𑀤𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑁆𑀢𑀸 𑀘𑀢𑁆𑀢𑀸𑀮𑀻𑀲𑀁 𑀳𑁄𑀦𑁆𑀢𑀺. 𑀚𑀻𑀯𑀺𑀢𑀁 𑀪𑀸𑀯𑁄 𑀓𑀸𑀬𑀧𑀲𑀸𑀤𑁄 𑀘𑀓𑁆𑀔𑀼𑀧𑀲𑀸𑀤𑁄𑀢𑀺 𑀘𑀢𑁆𑀢𑀸𑀭𑀺 𑀏𑀓𑀦𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑁂𑀯𑀸𑀢𑀺 𑀇𑀫𑁂𑀲𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀭𑀽𑀧𑀸𑀦𑀁 𑀯𑀲𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀫𑁆𑀪𑀸𑀭𑁄. 𑀬𑀁 𑀮𑁄𑀓𑁄 𑀲𑁂𑀢𑀁 𑀘𑀓𑁆𑀔𑀼𑀁 𑀧𑀼𑀣𑀼𑀮𑀁 𑀯𑀺𑀲𑀝𑀁 𑀯𑀺𑀢𑁆𑀣𑀺𑀡𑁆𑀡𑀁 ‘𑀘𑀓𑁆𑀔𑀼’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑁄 𑀦 𑀘𑀓𑁆𑀔𑀼𑀁 𑀲𑀜𑁆𑀚𑀸𑀦𑀸𑀢𑀺, 𑀯𑀢𑁆𑀣𑀼𑀁 𑀘𑀓𑁆𑀔𑀼𑀢𑁄 𑀲𑀜𑁆𑀚𑀸𑀦𑀸𑀢𑀺, 𑀲𑁄 𑀫𑀁𑀲𑀧𑀺𑀡𑁆𑀟𑁄 𑀅𑀓𑁆𑀔𑀺𑀓𑀽𑀧𑁂 𑀧𑀢𑀺𑀝𑁆𑀞𑀺𑀢𑁄, 𑀦𑁆𑀳𑀸𑀭𑀼𑀲𑀼𑀢𑁆𑀢𑀓𑁂𑀦 𑀫𑀢𑁆𑀣𑀮𑀼𑀗𑁆𑀕𑁂 𑀆𑀩𑀤𑁆𑀥𑁄, 𑀬𑀢𑁆𑀣 𑀲𑁂𑀢𑀫𑁆𑀧𑀺 𑀅𑀢𑁆𑀣𑀺, 𑀓𑀡𑁆𑀳𑀫𑁆𑀧𑀺 𑀮𑁄𑀳𑀺𑀢𑀓𑀫𑁆𑀧𑀺, 𑀧𑀣𑀯𑀻𑀧𑀺 𑀆𑀧𑁄𑀧𑀺 𑀢𑁂𑀚𑁄𑀧𑀺 𑀯𑀸𑀬𑁄𑀧𑀺, 𑀬𑀁 𑀲𑁂𑀫𑁆𑀳𑀽𑀲𑁆𑀲𑀤𑀢𑁆𑀢𑀸 𑀲𑁂𑀢𑀁, 𑀧𑀺𑀢𑁆𑀢𑀼𑀲𑁆𑀲𑀤𑀢𑁆𑀢𑀸 𑀓𑀡𑁆𑀳𑀁, 𑀭𑀼𑀳𑀺𑀭𑀼𑀲𑁆𑀲𑀤𑀢𑁆𑀢𑀸 𑀮𑁄𑀳𑀺𑀢𑀓𑀁, 𑀧𑀣𑀯𑀼𑀲𑁆𑀲𑀤𑀢𑁆𑀢𑀸 𑀧𑀢𑁆𑀣𑀺𑀡𑁆𑀡𑀁 𑀳𑁄𑀢𑀺, 𑀆𑀧𑀼𑀲𑁆𑀲𑀤𑀢𑁆𑀢𑀸 𑀧𑀕𑁆𑀖𑀭𑀢𑀺, 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀧𑀭𑀺𑀤𑀬𑁆𑀳𑀢𑀺, 𑀯𑀸𑀬𑀼𑀲𑁆𑀲𑀤𑀢𑁆𑀢𑀸 𑀲𑀫𑁆𑀪𑀫𑀢𑀺, 𑀇𑀤𑀁 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀦𑀸𑀫.

𑀬𑁄 𑀧𑀦𑁂𑀢𑁆𑀣 𑀲𑀺𑀢𑁄 𑀏𑀢𑁆𑀣 𑀧𑀝𑀺𑀩𑀤𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄, 𑀇𑀤𑀁 𑀧𑀲𑀸𑀤𑀘𑀓𑁆𑀔𑀼 𑀦𑀸𑀫. 𑀢𑀤𑁂𑀢𑀁 𑀢𑀲𑁆𑀲 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁄 𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂, 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂 𑀤𑀺𑀝𑁆𑀞𑀺𑀫𑀡𑁆𑀟𑀮𑁂, 𑀲𑀢𑁆𑀢𑀲𑀼 𑀧𑀺𑀘𑀼𑀧𑀝𑀮𑁂𑀲𑀼 𑀆𑀲𑀺𑀢𑁆𑀢𑀢𑁂𑀮𑀁 𑀧𑀺𑀘𑀼𑀧𑀝𑀮𑀸𑀦𑀺 𑀯𑀺𑀬, 𑀲𑀢𑁆𑀢𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸, 𑀥𑀸𑀭𑀡𑀦𑁆𑀳𑀸𑀧𑀦𑀫𑀡𑁆𑀟𑀦𑀩𑀻𑀚𑀦𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀻𑀳𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬, 𑀲𑀦𑁆𑀥𑀸𑀭𑀡𑀆𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁, 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁, 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁, 𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀻𑀳𑀺 𑀧𑀭𑀺𑀯𑀼𑀢𑀁, 𑀧𑀫𑀸𑀡𑀢𑁄 𑀊𑀓𑀸𑀲𑀺𑀭𑀫𑀢𑁆𑀢𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀬𑁂𑀦 𑀘𑀓𑁆𑀔𑀼𑀧𑁆𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀏𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫’’𑀦𑁆𑀢𑀺.

𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁. 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄𑀢𑀺 𑀇𑀥𑀸𑀧𑀺 𑀉𑀧𑀬𑁄𑀕𑀢𑁆𑀣𑁂𑀬𑁂𑀯 𑀲𑀸𑀫𑀺𑀯𑀘𑀦𑀁; 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀺𑀬𑀺𑀢𑁆𑀯𑀸 𑀧𑀯𑀢𑁆𑀢𑀧𑁆𑀧𑀲𑀸𑀤𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀲𑀸𑀤𑀘𑀓𑁆𑀔𑀼𑀫𑁂𑀯 𑀕𑀡𑁆𑀳𑀸𑀢𑀺, 𑀲𑁂𑀲𑀘𑀓𑁆𑀔𑀼𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀲𑀼𑀢𑁆𑀢𑁂 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀧𑀣𑀯𑀻𑀥𑀸𑀢𑀼𑀬𑀸 𑀢𑀻𑀳𑀺 𑀫𑀳𑀸𑀪𑀽𑀢𑁂𑀳𑀺 𑀲𑀗𑁆𑀕𑀳𑀺𑀢𑁄 𑀆𑀧𑁄𑀥𑀸𑀢𑀼𑀬𑀸 𑀘 𑀢𑁂𑀚𑁄𑀥𑀸𑀢𑀼𑀬𑀸 𑀘 𑀯𑀸𑀬𑁄𑀥𑀸𑀢𑀼𑀬𑀸 𑀘,’’ 𑀘𑀢𑀼𑀧𑀭𑀺𑀯𑀢𑁆𑀢𑀲𑀼𑀢𑁆𑀢𑁂 ‘‘𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀧𑀣𑀯𑀻𑀥𑀸𑀢𑀼𑀬𑀸 𑀘 𑀆𑀧𑁄𑀥𑀸𑀢𑀼𑀬𑀸 𑀘 𑀤𑁆𑀯𑀻𑀳𑀺 𑀫𑀳𑀸𑀪𑀽𑀢𑁂𑀳𑀺 𑀲𑀗𑁆𑀕𑀳𑀺𑀢𑁄 𑀢𑁂𑀚𑁄𑀥𑀸𑀢𑀼𑀬𑀸 𑀘 𑀯𑀸𑀬𑁄𑀥𑀸𑀢𑀼𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀲𑀼𑀢𑁆𑀢𑀦𑁆𑀢𑀺𑀓𑀓𑀣𑀸 𑀦𑀸𑀫 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀬𑁄 𑀘 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀲𑁄 𑀢𑁂𑀲𑀼 𑀏𑀓𑁂𑀓𑀲𑁆𑀲𑀸𑀧𑀺 𑀤𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀲𑀸𑀤𑁄𑀬𑁂𑀯𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀢𑀢𑁆𑀣 𑀤𑁂𑀲𑀦𑀸 𑀆𑀕𑀢𑀸. 𑀅𑀪𑀺𑀥𑀫𑁆𑀫𑁄 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸 𑀦𑀸𑀫. 𑀢𑀲𑁆𑀫𑀸 𑀇𑀥 ‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄’𑀢𑀺 𑀯𑀼𑀢𑁆𑀢𑀁.

‘𑀅𑀬𑀁 𑀫𑁂 𑀅𑀢𑁆𑀢𑀸’𑀢𑀺 𑀩𑀸𑀮𑀚𑀦𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺 𑀲𑀭𑀻𑀭𑀫𑁆𑀧𑀺 𑀔𑀦𑁆𑀥𑀧𑀜𑁆𑀘𑀓𑀫𑁆𑀧𑀺. 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑁄 𑀢𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀦𑀺𑀤𑀲𑁆𑀲𑀦𑁄. 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀲𑀧𑁆𑀧𑀝𑀺𑀖𑁄.

𑀬𑁂𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁂𑀦 𑀓𑀭𑀡𑀪𑀽𑀢𑁂𑀦 𑀘𑀓𑁆𑀔𑀼𑀦𑀸 𑀅𑀬𑀁 𑀲𑀢𑁆𑀢𑁄 𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀭𑀽𑀧𑀁 𑀅𑀢𑀻𑀢𑁂 𑀧𑀲𑁆𑀲𑀺 𑀯𑀸, 𑀯𑀢𑁆𑀢𑀫𑀸𑀦𑁂 𑀧𑀲𑁆𑀲𑀢𑀺 𑀯𑀸, 𑀅𑀦𑀸𑀕𑀢𑁂 𑀧𑀲𑁆𑀲𑀺𑀲𑁆𑀲𑀢𑀺 𑀯𑀸, 𑀲𑀘𑀲𑁆𑀲 𑀅𑀧𑀭𑀺𑀪𑀺𑀦𑁆𑀦𑀁 𑀘𑀓𑁆𑀔𑀼 𑀪𑀯𑁂𑀬𑁆𑀬, 𑀅𑀣𑀸𑀦𑁂𑀦 𑀆𑀧𑀸𑀣𑀕𑀢𑀁 𑀭𑀽𑀧𑀁 𑀧𑀲𑁆𑀲𑁂 𑀯𑀸, 𑀅𑀢𑀻𑀢𑀁 𑀯𑀸 𑀭𑀽𑀧𑀁 𑀅𑀢𑀻𑀢𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀧𑀲𑁆𑀲𑀢𑀺, 𑀅𑀦𑀸𑀕𑀢𑀁 𑀅𑀦𑀸𑀕𑀢𑁂𑀦 𑀧𑀲𑁆𑀲𑀺𑀲𑁆𑀲𑀢𑀺, 𑀲𑀘𑁂 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑁂𑀬𑁆𑀬 𑀘𑀓𑁆𑀔𑀼𑀦𑀸 𑀢𑀁 𑀭𑀽𑀧𑀁 𑀧𑀲𑁆𑀲𑁂𑀬𑁆𑀬𑀸𑀢𑀺 𑀇𑀤𑀫𑁂𑀢𑁆𑀣 𑀧𑀭𑀺𑀓𑀧𑁆𑀧𑀯𑀘𑀦𑀁. 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀁𑀧𑁂𑀢𑀁, 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑁂𑀦 𑀘𑀓𑁆𑀔𑀸𑀬𑀢𑀦𑀁𑀧𑁂𑀢𑀁, 𑀲𑀼𑀜𑁆𑀜𑀢𑀪𑀸𑀯𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀘𑀓𑁆𑀔𑀼𑀥𑀸𑀢𑀼𑀧𑁂𑀲𑀸. 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁𑀧𑁂𑀢𑀁. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀧𑁂𑀲𑁄. 𑀯𑀴𑀜𑁆𑀚𑀦𑀝𑁆𑀞𑁂𑀦 𑀤𑁆𑀯𑀸𑀭𑀸𑀧𑁂𑀲𑀸. 𑀅𑀧𑀽𑀭𑀡𑀻𑀬𑀝𑁆𑀞𑁂𑀦 𑀲𑀫𑀼𑀤𑁆𑀤𑁄𑀧𑁂𑀲𑁄. 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀧𑀡𑁆𑀟𑀭𑀁𑀧𑁂𑀢𑀁. 𑀨𑀲𑁆𑀲𑀸𑀤𑀻𑀦𑀁 𑀅𑀪𑀺𑀚𑀸𑀬𑀦𑀝𑁆𑀞𑁂𑀦 𑀔𑁂𑀢𑁆𑀢𑀁𑀧𑁂𑀢𑀁. 𑀢𑁂𑀲𑀁𑀬𑁂𑀯 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼𑀁𑀧𑁂𑀢𑀁. 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑁂𑀢𑁆𑀢𑀁𑀧𑁂𑀢𑀁. 𑀢𑁂𑀦𑁂𑀯𑀝𑁆𑀞𑁂𑀦 𑀦𑀬𑀦𑀁𑀧𑁂𑀢𑀁. 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀝𑁆𑀞𑁂𑀦 𑀑𑀭𑀺𑀫𑀁 𑀢𑀻𑀭𑀁𑀧𑁂𑀢𑀁. 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦 𑀅𑀲𑁆𑀲𑀸𑀫𑀺𑀓𑀝𑁆𑀞𑁂𑀦 𑀘 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄𑀢𑀺.

𑀏𑀢𑁆𑀢𑀸𑀯𑀢𑀸 ‘𑀧𑀲𑁆𑀲𑀺 𑀯𑀸’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀘𑀓𑁆𑀔𑀼𑀁𑀧𑁂𑀢𑀦𑁆𑀢𑀺𑀆𑀤𑀻𑀦𑀺 𑀘𑀼𑀤𑁆𑀤𑀲 𑀦𑀸𑀫𑀸𑀦𑀺 𑀬𑁄𑀚𑁂𑀢𑁆𑀯𑀸 𑀘𑀓𑁆𑀔𑀸𑀬𑀢𑀦𑀲𑁆𑀲 𑀘𑀢𑁆𑀢𑀸𑀭𑁄 𑀯𑀯𑀢𑁆𑀣𑀸𑀧𑀦𑀦𑀬𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀏𑀢𑁆𑀣 𑀳𑀺 𑀬𑁂𑀦 𑀘𑀓𑁆𑀔𑀼𑀦𑀸 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀲𑁆𑀲𑀺 𑀯𑀸 𑀘𑀓𑁆𑀔𑀼𑀁𑀧𑁂𑀢𑀁…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄, 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀅𑀬𑀫𑁂𑀓𑁄 𑀦𑀬𑁄. 𑀏𑀯𑀁 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁯𑁭. 𑀇𑀤𑀸𑀦𑀺 𑀬𑀲𑁆𑀫𑀸 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀸𑀤𑀺𑀓𑀸𑀮𑁂𑀲𑀼 𑀅𑀦𑁄𑀮𑁄𑀓𑁂𑀢𑀼𑀓𑀸𑀫𑀲𑁆𑀲𑀸𑀧𑀺 𑀭𑀽𑀧𑀁 𑀘𑀓𑁆𑀔𑀼𑀧𑀲𑀸𑀤𑀁 𑀖𑀝𑁆𑀝𑁂𑀢𑀺, 𑀢𑀲𑁆𑀫𑀸 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑁄 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀬𑀫𑁆𑀳𑀺 𑀘𑀓𑁆𑀔𑀼𑀫𑁆𑀳𑀻𑀢𑀺 𑀬𑀫𑁆𑀳𑀺 𑀅𑀥𑀺𑀓𑀭𑀡𑀪𑀽𑀢𑁂 𑀘𑀓𑁆𑀔𑀼𑀫𑁆𑀳𑀺. 𑀭𑀽𑀧𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀧𑀝𑀺𑀳𑀜𑁆𑀜𑀺 𑀯𑀸𑀢𑀺 𑀅𑀢𑀻𑀢𑀢𑁆𑀣𑁄. 𑀧𑀝𑀺𑀳𑀜𑁆𑀜𑀢𑀺 𑀯𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑁄. 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸𑀢𑀺 𑀅𑀦𑀸𑀕𑀢𑀢𑁆𑀣𑁄. 𑀧𑀝𑀺𑀳𑀜𑁆𑀜𑁂 𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀅𑀢𑀻𑀢𑀜𑁆𑀳𑀺 𑀭𑀽𑀧𑀁 𑀅𑀢𑀻𑀢𑁂 𑀘𑀓𑁆𑀔𑀼𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀅𑀦𑀸𑀕𑀢𑀁 𑀅𑀦𑀸𑀕𑀢𑁂 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀦𑀸𑀫. 𑀲𑀘𑁂 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑁂𑀬𑁆𑀬, 𑀘𑀓𑁆𑀔𑀼𑀫𑁆𑀳𑀺 𑀧𑀝𑀺𑀳𑀜𑁆𑀜𑁂𑀬𑁆𑀬 𑀢𑀁 𑀭𑀽𑀧𑀦𑁆𑀢𑀺 𑀅𑀬𑀫𑁂𑀢𑁆𑀣 𑀧𑀭𑀺𑀓𑀧𑁆𑀧𑁄. 𑀅𑀢𑁆𑀣𑀢𑁄 𑀧𑀦 𑀧𑀲𑀸𑀤𑀁 𑀖𑀝𑁆𑀝𑀬𑀫𑀸𑀦𑀫𑁂𑀯 𑀭𑀽𑀧𑀁 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀯𑀢𑁆𑀣𑀸𑀧𑀦𑀦𑀬𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁯𑁮. 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀑𑀮𑁄𑀓𑁂𑀢𑀼𑀓𑀸𑀫𑀲𑁆𑀲 𑀭𑀽𑀧𑁂 𑀘𑀓𑁆𑀔𑀼𑀁 𑀉𑀧𑀲𑀁𑀳𑀭𑀢𑁄 𑀘𑀓𑁆𑀔𑀼 𑀭𑀽𑀧𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺, 𑀢𑀲𑁆𑀫𑀸 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑁄 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀲𑁄 𑀅𑀢𑁆𑀣𑀢𑁄 𑀧𑀸𑀓𑀝𑁄𑀬𑁂𑀯. 𑀏𑀢𑁆𑀣 𑀧𑀦 𑀘𑀓𑁆𑀔𑀼 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀫𑁂𑀯 𑀭𑀽𑀧𑀫𑁆𑀳𑀺 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀯𑀢𑁆𑀣𑀸𑀧𑀦𑀦𑀬𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁯𑁯. 𑀇𑀢𑁄 𑀧𑀭𑀁 𑀨𑀲𑁆𑀲𑀧𑀜𑁆𑀘𑀫𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀘, 𑀢𑁂𑀲𑀁𑀬𑁂𑀯 𑀆𑀭𑀫𑁆𑀫𑀡𑀧𑀝𑀺𑀩𑀤𑁆𑀥𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀘𑀸𑀢𑀺, 𑀤𑀲 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬𑀸𑀢𑀺 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬, 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀭𑀽𑀧𑀁 𑀆𑀭𑀩𑁆𑀪𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀆𑀕𑀫𑁆𑀫, 𑀲𑀦𑁆𑀥𑀸𑀬, 𑀧𑀝𑀺𑀘𑁆𑀘. 𑀇𑀫𑀺𑀦𑀸 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀭𑀽𑀧𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀇𑀢𑀭𑁂𑀲𑀼 𑀧𑀜𑁆𑀘𑀲𑀼 𑀯𑀸𑀭𑁂𑀲𑀼 𑀭𑀽𑀧𑀁 𑀆𑀭𑀫𑁆𑀫𑀡𑀫𑀲𑁆𑀲𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑁄𑀢𑀺 𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑁂𑀯 𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀬𑀣𑀸 𑀧𑀦 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼, 𑀏𑀯𑀁 𑀇𑀫𑁂𑀲𑀼𑀧𑀺 𑀤𑀲𑀲𑀼 𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀯𑀯𑀢𑁆𑀣𑀸𑀧𑀦𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀘𑀓𑁆𑀔𑀼𑀁 ‘𑀇𑀤𑀁 𑀢’𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑁂𑀢𑀼𑀁, 𑀧𑀼𑀭𑀺𑀫𑀸 𑀢𑀬𑁄, 𑀇𑀫𑁂 𑀤𑀲𑀸𑀢𑀺, 𑀢𑁂𑀭𑀲 𑀦𑀺𑀤𑁆𑀤𑁂𑀲𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀏𑀓𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀯𑀢𑁆𑀣𑀸𑀧𑀦𑀦𑀬𑀸𑀦𑀁 𑀆𑀕𑀢𑀢𑁆𑀢𑀸 𑀤𑁆𑀯𑀺𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸𑀯 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁦𑁦. 𑀇𑀢𑁄 𑀧𑀭𑁂𑀲𑀼 𑀲𑁄𑀢𑀸𑀬𑀢𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑀫𑀢𑁆𑀢𑀁 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀢𑀁 𑀲𑀲𑀫𑁆𑀪𑀸𑀭𑀲𑁄𑀢𑀩𑀺𑀮𑀲𑁆𑀲 𑀅𑀦𑁆𑀢𑁄 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁, 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁, 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁, 𑀯𑀡𑁆𑀡𑀸𑀤𑀻𑀳𑀺 𑀧𑀭𑀺𑀯𑀼𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀢𑀁 𑀲𑀲𑀫𑁆𑀪𑀸𑀭𑀖𑀸𑀦𑀩𑀺𑀮𑀲𑁆𑀲 𑀅𑀦𑁆𑀢𑁄 𑀅𑀚𑀧𑁆𑀧𑀤𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀁 𑀳𑀼𑀢𑁆𑀯𑀸 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀲𑀸𑀬𑀦𑀝𑁆𑀞𑁂𑀦 𑀚𑀺𑀯𑁆𑀳𑀸. 𑀲𑀸 𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸𑀫𑀚𑁆𑀛𑀲𑁆𑀲 𑀉𑀧𑀭𑀺 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀸 𑀳𑀼𑀢𑁆𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀢𑀺𑀝𑁆𑀞𑀢𑀺.

𑀬𑀸𑀯𑀢𑀸 𑀧𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀓𑀸𑀬𑀸𑀬𑀢𑀦𑀁, 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬, 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀫𑁂𑀯 𑀳𑀼𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑁄 𑀧𑀸𑀴𑀺𑀧𑁆𑀧𑀪𑁂𑀤𑁄 𑀘 𑀅𑀢𑁆𑀣𑁄 𑀘 𑀘𑀓𑁆𑀔𑀼𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀇𑀥 𑀘𑀓𑁆𑀔𑀼𑀧𑀤𑀲𑁆𑀲 𑀞𑀸𑀦𑁂 𑀲𑁄𑀢𑀧𑀤𑀸𑀤𑀻𑀦𑀺, 𑀭𑀽𑀧𑀧𑀤𑀲𑁆𑀲 𑀞𑀸𑀦𑁂 𑀲𑀤𑁆𑀤𑀧𑀤𑀸𑀤𑀻𑀦𑀺, 𑀧𑀲𑁆𑀲𑀻𑀢𑀺 𑀆𑀤𑀻𑀦𑀁 𑀞𑀸𑀦𑁂 𑀲𑀼𑀡𑀻𑀢𑀺𑀆𑀤𑀺𑀧𑀤𑀸𑀦𑀺 𑀘 𑀆𑀕𑀢𑀸𑀦𑀺. ‘𑀦𑁂𑀢𑁆𑀢𑀁𑀧𑁂𑀢𑀁, 𑀦𑀬𑀦𑀁𑀧𑁂𑀢’𑀦𑁆𑀢𑀺 𑀇𑀫𑀲𑁆𑀲 𑀘 𑀧𑀤𑀤𑁆𑀯𑀬𑀲𑁆𑀲 𑀅𑀪𑀸𑀯𑀸 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀬𑀸𑀯𑀢𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀓𑀸𑀬𑀸𑀬𑀢𑀦𑀁, 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬. ‘𑀏𑀯𑀁 𑀲𑀦𑁆𑀢𑁂 𑀮𑀓𑁆𑀔𑀡𑀲𑀫𑁆𑀫𑀺𑀲𑁆𑀲𑀢𑀸 𑀆𑀧𑀚𑁆𑀚𑀢𑀻’𑀢𑀺. ‘𑀦𑀸𑀧𑀚𑁆𑀚𑀢𑀻’𑀢𑀺. ‘𑀓𑀲𑁆𑀫𑀸’? ‘𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁆𑀣 𑀅𑀪𑀸𑀯𑀢𑁄’. ‘𑀬𑀤𑀺 𑀏𑀯𑀁, 𑀦 𑀲𑀩𑁆𑀩𑀢𑁆𑀣 𑀓𑀸𑀬𑀸𑀬𑀢𑀦’𑀦𑁆𑀢𑀺? ‘𑀦𑁂𑀯 𑀧𑀭𑀫𑀢𑁆𑀣𑀢𑁄 𑀲𑀩𑁆𑀩𑀢𑁆𑀣. 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀧𑀦𑀲𑁆𑀲 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀭𑀽𑀧𑀭𑀲𑀸𑀤𑀬𑁄, 𑀯𑀸𑀮𑀺𑀓𑀸𑀘𑀼𑀡𑁆𑀡𑀸𑀦𑀺 𑀯𑀺𑀬, 𑀯𑀺𑀯𑁂𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀜𑁆𑀜𑀫𑀜𑁆𑀜𑀩𑁆𑀬𑀸𑀧𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀘 𑀧𑀭𑀫𑀢𑁆𑀣𑀢𑁄 𑀭𑀽𑀧𑁂 𑀭𑀲𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸 𑀭𑀽𑀧𑀕𑁆𑀕𑀳𑀡𑁂𑀦𑁂𑀯 𑀭𑀲𑀕𑁆𑀕𑀳𑀡𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀁 𑀓𑀸𑀬𑀸𑀬𑀢𑀦𑀫𑁆𑀧𑀺 𑀧𑀭𑀫𑀢𑁆𑀣𑀢𑁄 𑀦𑁂𑀯 𑀲𑀩𑁆𑀩𑀢𑁆𑀣 𑀅𑀢𑁆𑀣𑀺, 𑀦 𑀘 𑀲𑀩𑁆𑀩𑀢𑁆𑀣 𑀦𑀢𑁆𑀣𑀺, 𑀯𑀺𑀯𑁂𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬𑀸𑀢𑀺. 𑀏𑀯𑀫𑁂𑀢𑁆𑀣 𑀦 𑀮𑀓𑁆𑀔𑀡𑀲𑀫𑁆𑀫𑀺𑀲𑁆𑀲𑀢𑀸 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’.

𑀅𑀧𑀺𑀘 𑀮𑀓𑁆𑀔𑀡𑀸𑀤𑀺𑀯𑀯𑀢𑁆𑀣𑀸𑀧𑀦𑀢𑁄𑀧𑁂𑀢𑁂𑀲𑀁 𑀅𑀲𑀫𑁆𑀫𑀺𑀲𑁆𑀲𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀢𑁂𑀲𑀼 𑀳𑀺 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀘𑀓𑁆𑀔𑀼, 𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀲𑀤𑁆𑀤𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀲𑁄𑀢𑀁, 𑀲𑀤𑁆𑀤𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀕𑀦𑁆𑀥𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀖𑀸𑀦𑀁, 𑀕𑀦𑁆𑀥𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀭𑀲𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀯𑀸 𑀚𑀺𑀯𑁆𑀳𑀸, 𑀭𑀲𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀸.

𑀨𑁄𑀝𑁆𑀞𑀩𑁆𑀩𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄 𑀯𑀸 𑀓𑀸𑀬𑁄, 𑀨𑁄𑀝𑁆𑀞𑀩𑁆𑀩𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑁄, 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑁄.

𑀓𑁂𑀘𑀺 𑀧𑀦 ‘𑀢𑁂𑀚𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀘𑀓𑁆𑀔𑀼, 𑀯𑀸𑀬𑀼𑀧𑀣𑀯𑀻𑀆𑀧𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸, 𑀓𑀸𑀬𑁄 𑀲𑀩𑁆𑀩𑁂𑀲’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘𑀢𑁂𑀚𑀸𑀥𑀺𑀓𑀸𑀦𑀁 𑀧𑀲𑀸𑀤𑁄 𑀘𑀓𑁆𑀔𑀼, 𑀯𑀺𑀯𑀭𑀯𑀸𑀬𑀼𑀆𑀧𑀧𑀣𑀯𑀸𑀥𑀺𑀓𑀸𑀦𑀁 𑀧𑀲𑀸𑀤𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸’𑀢𑀺 𑀯𑀤𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘𑀲𑀼𑀢𑁆𑀢𑀁 𑀆𑀳𑀭𑀣𑀸’𑀢𑀺. 𑀅𑀤𑁆𑀥𑀸 𑀲𑀼𑀢𑁆𑀢𑀫𑁂𑀯 𑀦 𑀤𑀓𑁆𑀔𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘𑀢𑁂𑀚𑀸𑀤𑀻𑀦𑀁 𑀕𑀼𑀡𑁂𑀳𑀺 𑀭𑀽𑀧𑀸𑀤𑀻𑀳𑀺 𑀅𑀦𑀼𑀕𑁆𑀕𑀬𑁆𑀳𑀪𑀸𑀯𑀢𑁄’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀢𑁂 𑀘 𑀯𑀢𑁆𑀢𑀩𑁆𑀩𑀸 𑁋 ‘𑀓𑁄 𑀧𑀦𑁂𑀯𑀫𑀸𑀳 𑁋 𑀭𑀽𑀧𑀸𑀤𑀬𑁄 𑀢𑁂𑀚𑀸𑀤𑀻𑀦𑀁 𑀕𑀼𑀡𑀸’𑀢𑀺? 𑀅𑀯𑀺𑀦𑀺𑀩𑁆𑀪𑁄𑀕𑁂𑀲𑀼 𑀳𑀺 𑀭𑀽𑀧𑁂𑀲𑀼 ‘𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄, 𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄’𑀢𑀺 𑀦 𑀮𑀩𑁆𑀪𑀸 𑀯𑀢𑁆𑀢𑀼𑀁. 𑀅𑀣𑀸𑀧𑀺 𑀯𑀤𑁂𑀬𑁆𑀬𑀼𑀁 𑁋 ‘𑀬𑀣𑀸 𑀢𑁂𑀲𑀼 𑀢𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀢𑀲𑁆𑀲 𑀢𑀲𑁆𑀲 𑀪𑀽𑀢𑀲𑁆𑀲 𑀅𑀥𑀺𑀓𑀢𑀸𑀬 𑀧𑀣𑀯𑀻𑀆𑀤𑀻𑀦𑀁 𑀲𑀦𑁆𑀥𑀸𑀭𑀡𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀇𑀘𑁆𑀙𑀣, 𑀏𑀯𑀁 𑀢𑁂𑀚𑀸𑀤𑀺𑀅𑀥𑀺𑀓𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀭𑀽𑀧𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑀤𑀲𑁆𑀲𑀦𑀢𑁄 𑀇𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀭𑀽𑀧𑀸𑀤𑀬𑁄 𑀢𑁂𑀲𑀁 𑀕𑀼𑀡𑀸’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀇𑀘𑁆𑀙𑁂𑀬𑁆𑀬𑀸𑀫, 𑀬𑀤𑀺 𑀆𑀧𑀸𑀥𑀺𑀓𑀲𑁆𑀲 𑀆𑀲𑀯𑀲𑁆𑀲 𑀕𑀦𑁆𑀥𑀢𑁄 𑀧𑀣𑀯𑀻𑀅𑀥𑀺𑀓𑁂 𑀓𑀧𑁆𑀧𑀸𑀲𑁂 𑀕𑀦𑁆𑀥𑁄 𑀅𑀥𑀺𑀓𑀢𑀭𑁄 𑀲𑀺𑀬𑀸, 𑀢𑁂𑀚𑀸𑀥𑀺𑀓𑀲𑁆𑀲 𑀘 𑀉𑀡𑁆𑀳𑁄𑀤𑀓𑀲𑁆𑀲 𑀯𑀡𑁆𑀡𑀢𑁄𑀧𑀺 𑀲𑀻𑀢𑀽𑀤𑀓𑀲𑁆𑀲 𑀯𑀡𑁆𑀡𑁄 𑀧𑀭𑀺𑀳𑀸𑀬𑁂𑀣. 𑀬𑀲𑁆𑀫𑀸 𑀧𑀦𑁂𑀢𑀁 𑀉𑀪𑀬𑀫𑁆𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀳𑀸𑀬𑁂𑀣𑁂𑀢𑀁 𑀏𑀢𑁂𑀲𑀁 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀯𑀺𑀲𑁂𑀲𑀓𑀧𑁆𑀧𑀦𑀁, 𑀬𑀣𑀸 𑀅𑀯𑀺𑀲𑁂𑀲𑁂𑀧𑀺 𑀏𑀓𑀓𑀮𑀸𑀧𑁂 𑀪𑀽𑀢𑀸𑀦𑀁 𑀭𑀽𑀧𑀭𑀲𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄, 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀲𑁂𑀲𑀓𑀸𑀭𑀡𑁂𑀢𑀺 𑀕𑀳𑁂𑀢𑀩𑁆𑀩𑀫𑁂𑀢𑀁.

𑀓𑀺𑀁 𑀧𑀦 𑀢𑀁 𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀸𑀥𑀸𑀭𑀡𑀁? 𑀓𑀫𑁆𑀫𑀫𑁂𑀯 𑀦𑁂𑀲𑀁 𑀯𑀺𑀲𑁂𑀲𑀓𑀸𑀭𑀡𑀁. 𑀢𑀲𑁆𑀫𑀸 𑀓𑀫𑁆𑀫𑀯𑀺𑀲𑁂𑀲𑀢𑁄 𑀏𑀢𑁂𑀲𑀁 𑀯𑀺𑀲𑁂𑀲𑁄, 𑀦 𑀪𑀽𑀢𑀯𑀺𑀲𑁂𑀲𑀢𑁄. 𑀪𑀽𑀢𑀯𑀺𑀲𑁂𑀲𑁂 𑀳𑀺 𑀲𑀢𑀺 𑀧𑀲𑀸𑀤𑁄𑀯 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀫𑀸𑀦𑀸𑀦𑀜𑁆𑀳𑀺 𑀧𑀲𑀸𑀤𑁄, 𑀦 𑀯𑀺𑀲𑀫𑀸𑀦𑀸𑀦𑀦𑁆𑀢𑀺 𑀧𑁄𑀭𑀸𑀡𑀸. 𑀏𑀯𑀁 𑀓𑀫𑁆𑀫𑁂𑀯𑀺𑀲𑀲𑀢𑁄 𑀯𑀺𑀲𑁂𑀲𑀯𑀦𑁆𑀢𑁂𑀲𑀼 𑀘 𑀏𑀢𑁂𑀲𑀼 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸𑀦𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀦𑀮𑁆𑀮𑀻𑀦𑀦𑀺𑀲𑁆𑀲𑀬𑁂 𑀏𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸, 𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯 𑀲𑀬𑀜𑁆𑀘 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀮𑁆𑀮𑀻𑀦𑁂𑀬𑁂𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀆𑀧𑀸𑀣𑀕𑀢𑀢𑁆𑀢𑀸𑀯 𑀆𑀭𑀫𑁆𑀫𑀡𑀁 𑀲𑀫𑁆𑀧𑀢𑁆𑀢𑀁 𑀦𑀸𑀫. 𑀘𑀦𑁆𑀤𑀫𑀡𑁆𑀟𑀮𑀲𑀽𑀭𑀺𑀬𑀫𑀡𑁆𑀟𑀮𑀸𑀦𑀜𑁆𑀳𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀣𑀓𑁂 𑀞𑀺𑀢𑀸𑀦𑀁 𑀯𑀡𑁆𑀡𑁄 𑀘𑀓𑁆𑀔𑀼𑀧𑀲𑀸𑀤𑀁 𑀖𑀝𑁆𑀝𑁂𑀢𑀺. 𑀲𑁄 𑀤𑀽𑀭𑁂 𑀞𑀢𑁆𑀯𑀸 𑀧𑀜𑁆𑀜𑀸𑀬𑀫𑀸𑀦𑁄𑀧𑀺 𑀲𑀫𑁆𑀧𑀢𑁆𑀢𑁄𑀬𑁂𑀯 𑀦𑀸𑀫. 𑀢𑀁𑀕𑁄𑀘𑀭𑀢𑁆𑀢𑀸 𑀘𑀓𑁆𑀔𑀼 𑀲𑀫𑁆𑀧𑀢𑁆𑀢𑀕𑁄𑀘𑀭𑀫𑁂𑀯 𑀦𑀸𑀫. 𑀤𑀽𑀭𑁂 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀸𑀦𑀫𑁆𑀧𑀺, 𑀭𑀚𑀓𑀸𑀦𑀜𑁆𑀘 𑀯𑀢𑁆𑀣𑀁 𑀥𑁄𑀯𑀦𑁆𑀢𑀸𑀦𑀁 𑀤𑀽𑀭𑀢𑁄𑀯 𑀓𑀸𑀬𑀯𑀺𑀓𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀲𑀤𑁆𑀤𑁄 𑀧𑀦 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀆𑀕𑀦𑁆𑀢𑁆𑀯𑀸 𑀲𑁄𑀢𑀁 𑀖𑀝𑁆𑀝𑁂𑀢𑁆𑀯𑀸 𑀲𑀡𑀺𑀓𑀁 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀆𑀧𑀸𑀣𑀕𑀢𑀢𑁆𑀢𑀸 𑀆𑀭𑀫𑁆𑀫𑀡𑀁 𑀲𑀫𑁆𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀦𑁆𑀤𑀫𑀡𑁆𑀟𑀮𑀸𑀤𑀺𑀯𑀡𑁆𑀡𑁄 𑀧𑀦 𑀘𑀓𑁆𑀔𑀼𑀁 𑀅𑀲𑀫𑁆𑀧𑀢𑁆𑀢𑁄 𑀤𑀽𑀭𑁂 𑀞𑀺𑀢𑁄𑀯 𑀧𑀜𑁆𑀜𑀸𑀬𑀢𑀺. 𑀲𑀤𑁆𑀤𑁄𑀧𑀺 𑀲𑀘𑁂 𑀲𑀡𑀺𑀓𑀁 𑀆𑀕𑀘𑁆𑀙𑁂𑀬𑁆𑀬, 𑀤𑀽𑀭𑁂 𑀉𑀧𑁆𑀧𑀦𑁆𑀦𑁄 𑀘𑀺𑀭𑁂𑀦 𑀲𑀼𑀬𑁆𑀬𑁂𑀬𑁆𑀬, 𑀧𑀭𑀫𑁆𑀧𑀭𑀖𑀝𑁆𑀝𑀦𑀸𑀬 𑀘 𑀆𑀕𑀦𑁆𑀢𑁆𑀯𑀸 𑀲𑁄𑀢𑀁 𑀖𑀝𑁆𑀝𑁂𑀦𑁆𑀢𑁄 𑀅𑀲𑀼𑀓𑀤𑀺𑀲𑀸𑀬 𑀦𑀸𑀫𑀸𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀸 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀸𑀦𑁂𑀯 𑀢𑀸𑀦𑀺.

𑀅𑀳𑀺𑀆𑀤𑀺𑀲𑀫𑀸𑀦𑀸𑀦𑀺 𑀘𑁂𑀢𑀸𑀦𑀺. 𑀬𑀣𑀸 𑀳𑀺 𑀅𑀳𑀺 𑀦𑀸𑀫 𑀩𑀳𑀺 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀦𑀸𑀪𑀺𑀭𑀫𑀢𑀺, 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑀺𑀡𑀧𑀡𑁆𑀡𑀕𑀳𑀦𑀯𑀫𑁆𑀫𑀺𑀓𑀸𑀦𑀺𑀬𑁂𑀯 𑀧𑀦 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑀓𑀸𑀮𑁂 𑀅𑀪𑀺𑀭𑀫𑀢𑀺, 𑀏𑀓𑀕𑁆𑀕𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀘𑀓𑁆𑀔𑀼𑀧𑁂𑀢𑀁 𑀯𑀺𑀲𑀫𑀚𑁆𑀛𑀸𑀲𑀬𑀁 𑀫𑀝𑁆𑀞𑁂𑀲𑀼 𑀲𑀼𑀯𑀡𑁆𑀡𑀪𑀺𑀢𑁆𑀢𑀺𑀆𑀤𑀻𑀲𑀼 𑀦𑀸𑀪𑀺𑀭𑀫𑀢𑀺, 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺, 𑀭𑀽𑀧𑀘𑀺𑀢𑁆𑀢𑀧𑀼𑀧𑁆𑀨𑀮𑀢𑀸𑀤𑀺𑀘𑀺𑀢𑁆𑀢𑁂𑀲𑀼𑀬𑁂𑀯 𑀧𑀦 𑀅𑀪𑀺𑀭𑀫𑀢𑀺. 𑀢𑀸𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀘𑀓𑁆𑀔𑀼𑀫𑁆𑀳𑀺 𑀅𑀧𑁆𑀧𑀳𑁄𑀦𑁆𑀢𑁂 𑀫𑀼𑀔𑀫𑁆𑀧𑀺 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺.

𑀲𑀼𑀲𑀼𑀫𑀸𑀭𑁄𑀧𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄 𑀕𑀳𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸𑀯 𑀘𑀭𑀢𑀺. 𑀬𑀤𑀸 𑀧𑀦 𑀩𑁆𑀬𑀸𑀫𑀲𑀢𑀫𑀢𑁆𑀢𑀁 𑀉𑀤𑀓𑀁 𑀑𑀕𑀸𑀳𑀺𑀢𑁆𑀯𑀸 𑀩𑀺𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺 𑀲𑀼𑀔𑀁 𑀲𑀼𑀧𑀢𑀺, 𑀏𑀯𑀫𑁂𑀯 𑀲𑁄𑀢𑀁 𑀢𑀫𑁆𑀧𑁂 𑀩𑀺𑀮𑀚𑁆𑀛𑀸𑀲𑀬𑀁 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑀽𑀧𑀓𑁂𑀬𑁂𑀯 𑀅𑀚𑁆𑀛𑀸𑀲𑀬𑀁 𑀓𑀭𑁄𑀢𑀺. 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀓𑀸𑀲𑁄𑀬𑁂𑀯 𑀢𑀲𑁆𑀲 𑀲𑀤𑁆𑀤𑀲𑀯𑀦𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀚𑀝𑀸𑀓𑀸𑀲𑁄𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀅𑀦𑁆𑀢𑁄𑀮𑁂𑀡𑀲𑁆𑀫𑀺𑀜𑁆𑀳𑀺 𑀲𑀚𑁆𑀛𑀸𑀬𑁂 𑀓𑀭𑀺𑀬𑀫𑀸𑀦𑁂 𑀦 𑀮𑁂𑀡𑀘𑁆𑀙𑀤𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑁂𑀳𑀺 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀸𑀢𑀼𑀧𑀭𑀫𑁆𑀧𑀭𑀸𑀬𑁂𑀯 𑀖𑀝𑁆𑀝𑁂𑀦𑁆𑀢𑁄 𑀕𑀦𑁆𑀢𑁆𑀯𑀸 𑀲𑁄𑀢𑀧𑀲𑀸𑀤𑀁 𑀖𑀝𑁆𑀝𑁂𑀢𑀺. 𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 ‘𑀅𑀲𑀼𑀓𑁄 𑀦𑀸𑀫 𑀲𑀚𑁆𑀛𑀸𑀬𑀢𑀻’𑀢𑀺 𑀮𑁂𑀡𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀸 𑀚𑀸𑀦𑀦𑁆𑀢𑀺.

𑀏𑀯𑀁 𑀲𑀦𑁆𑀢𑁂 𑀲𑀫𑁆𑀧𑀢𑁆𑀢𑀕𑁄𑀘𑀭𑀢𑀸 𑀳𑁄𑀢𑀺. ‘𑀓𑀺𑀁 𑀧𑀦𑁂𑀢𑀁 𑀲𑀫𑁆𑀧𑀢𑁆𑀢𑀕𑁄𑀘𑀭’𑀦𑁆𑀢𑀺? ‘𑀆𑀫, 𑀲𑀫𑁆𑀧𑀢𑁆𑀢𑀕𑁄𑀘𑀭𑀁’. ‘𑀬𑀤𑀺 𑀏𑀯𑀁, 𑀤𑀽𑀭𑁂 𑀪𑁂𑀭𑀻𑀆𑀤𑀻𑀲𑀼 𑀯𑀚𑁆𑀚𑀫𑀸𑀦𑁂𑀲𑀼 𑀤𑀽𑀭𑁂 𑀲𑀤𑁆𑀤𑁄𑀢𑀺 𑀚𑀸𑀦𑀦𑀁 𑀦 𑀪𑀯𑁂𑀬𑁆𑀬𑀸’𑀢𑀺? ‘𑀦𑁄 𑀦 𑀪𑀯𑀢𑀺. 𑀲𑁄𑀢𑀧𑀲𑀸𑀤𑀲𑁆𑀫𑀺𑀜𑁆𑀳𑀺 𑀖𑀝𑁆𑀝𑀺𑀢𑁂 𑀤𑀽𑀭𑁂 𑀲𑀤𑁆𑀤𑁄 𑀆𑀲𑀦𑁆𑀦𑁂 𑀲𑀤𑁆𑀤𑁄, 𑀧𑀭𑀢𑀻𑀭𑁂 𑀑𑀭𑀺𑀫𑀢𑀻𑀭𑁂𑀢𑀺 𑀢𑀣𑀸 𑀢𑀣𑀸 𑀚𑀸𑀦𑀦𑀸𑀓𑀸𑀭𑁄 𑀳𑁄𑀢𑀺. 𑀥𑀫𑁆𑀫𑀢𑀸 𑀏𑀲𑀸’𑀢𑀺. ‘𑀓𑀺𑀁 𑀏𑀢𑀸𑀬 𑀥𑀫𑁆𑀫𑀢𑀸𑀬? 𑀬𑀢𑁄 𑀬𑀢𑁄 𑀙𑀺𑀤𑁆𑀤𑀁 𑀢𑀢𑁄 𑀢𑀢𑁄 𑀲𑀯𑀦𑀁 𑀳𑁄𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀦𑀁 𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀫𑁂𑀯𑁂𑀢𑀁’.

𑀧𑀓𑁆𑀔𑀻𑀧𑀺 𑀭𑀼𑀓𑁆𑀔𑁂 𑀯𑀸 𑀪𑀽𑀫𑀺𑀬𑀁 𑀯𑀸 𑀦 𑀭𑀫𑀢𑀺. 𑀬𑀤𑀸 𑀧𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑁄 𑀳𑁄𑀢𑀺, 𑀢𑀤𑀸 𑀏𑀓𑀕𑁆𑀕𑀘𑀺𑀢𑁆𑀢𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀖𑀸𑀦𑀫𑁆𑀧𑀺 𑀆𑀓𑀸𑀲𑀚𑁆𑀛𑀸𑀲𑀬𑀁 𑀯𑀸𑀢𑀽𑀧𑀦𑀺𑀲𑁆𑀲𑀬𑀕𑀦𑁆𑀥𑀕𑁄𑀘𑀭𑀁. 𑀢𑀣𑀸 𑀳𑀺 𑀕𑀸𑀯𑁄 𑀦𑀯𑀯𑀼𑀝𑁆𑀞𑁂 𑀤𑁂𑀯𑁂 𑀪𑀽𑀫𑀺𑀬𑀁 𑀖𑀸𑀬𑀺𑀢𑁆𑀯𑀸 𑀖𑀸𑀬𑀺𑀢𑁆𑀯𑀸 𑀆𑀓𑀸𑀲𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀯𑀸𑀢𑀁 𑀆𑀓𑀟𑁆𑀠𑀦𑁆𑀢𑀺. 𑀅𑀗𑁆𑀕𑀼𑀮𑀻𑀳𑀺 𑀕𑀦𑁆𑀥𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸𑀧𑀺 𑀘 𑀉𑀧𑀲𑀺𑀗𑁆𑀖𑀦𑀓𑀸𑀮𑁂 𑀯𑀸𑀢𑀁 𑀅𑀦𑀸𑀓𑀟𑁆𑀠𑀦𑁆𑀢𑁄 𑀦𑁂𑀯 𑀢𑀲𑁆𑀲 𑀕𑀦𑁆𑀥𑀁 𑀚𑀸𑀦𑀸𑀢𑀺.

𑀓𑀼𑀓𑁆𑀓𑀼𑀭𑁄𑀧𑀺 𑀩𑀳𑀺 𑀯𑀺𑀘𑀭𑀦𑁆𑀢𑁄 𑀔𑁂𑀫𑀝𑁆𑀞𑀸𑀦𑀁 𑀦 𑀧𑀲𑁆𑀲𑀢𑀺 𑀮𑁂𑀟𑁆𑀟𑀼𑀧𑀳𑀸𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀳𑁄𑀢𑀺. 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀉𑀤𑁆𑀥𑀦𑀝𑁆𑀞𑀸𑀦𑁂 𑀙𑀸𑀭𑀺𑀓𑀁 𑀩𑁆𑀬𑀽𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲 𑀧𑀦 𑀨𑀸𑀲𑀼𑀓𑀁 𑀳𑁄𑀢𑀺, 𑀏𑀯𑀫𑁂𑀯 𑀚𑀺𑀯𑁆𑀳𑀸𑀧𑀺 𑀕𑀸𑀫𑀚𑁆𑀛𑀸𑀲𑀬𑀸 𑀆𑀧𑁄𑀲𑀦𑁆𑀦𑀺𑀲𑁆𑀲𑀺𑀢𑀭𑀲𑀸𑀭𑀫𑁆𑀫𑀡𑀸. 𑀢𑀣𑀸 𑀳𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸𑀧𑀺 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄 𑀳𑁄𑀢𑀺. 𑀲𑀼𑀓𑁆𑀔𑀔𑀸𑀤𑀦𑀻𑀬𑀲𑁆𑀲 𑀘 𑀦 𑀲𑀓𑁆𑀓𑀸 𑀔𑁂𑀴𑁂𑀦 𑀅𑀢𑁂𑀫𑀺𑀢𑀲𑁆𑀲 𑀭𑀲𑀁 𑀚𑀸𑀦𑀺𑀢𑀼𑀁.

𑀲𑀺𑀗𑁆𑀕𑀸𑀮𑁄𑀧𑀺 𑀩𑀳𑀺 𑀘𑀭𑀦𑁆𑀢𑁄 𑀭𑀢𑀺𑀁 𑀦 𑀯𑀺𑀦𑁆𑀤𑀢𑀺, 𑀆𑀫𑀓𑀲𑀼𑀲𑀸𑀦𑁂 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀧𑀦𑀲𑁆𑀲 𑀨𑀸𑀲𑀼𑀓𑀁 𑀳𑁄𑀢𑀺, 𑀏𑀯𑀫𑁂𑀯 𑀓𑀸𑀬𑁄𑀧𑀺 𑀉𑀧𑀸𑀤𑀺𑀡𑁆𑀡𑀓𑀚𑁆𑀛𑀸𑀲𑀬𑁄 𑀧𑀣𑀯𑀻𑀦𑀺𑀲𑁆𑀲𑀺𑀢𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁄. 𑀢𑀣𑀸 𑀳𑀺 𑀅𑀜𑁆𑀜𑀁 𑀉𑀧𑀸𑀤𑀺𑀡𑁆𑀡𑀓𑀁 𑀅𑀮𑀪𑀫𑀸𑀦𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄𑀯 𑀳𑀢𑁆𑀣𑀢𑀮𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀘𑀲𑁆𑀲 𑀧𑀣𑀯𑀻 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀼𑀲𑀦𑁆𑀣𑀢𑀲𑁆𑀲𑀧𑀺 𑀳𑀺 𑀲𑀬𑀦𑀲𑁆𑀲, 𑀳𑀢𑁆𑀣𑁂 𑀞𑀧𑀺𑀢𑀸𑀦𑀫𑁆𑀧𑀺 𑀯𑀸 𑀨𑀮𑀸𑀦𑀁, 𑀦 𑀲𑀓𑁆𑀓𑀸 𑀅𑀦𑀺𑀲𑀻𑀤𑀦𑁆𑀢𑁂𑀦 𑀯𑀸 𑀅𑀦𑀺𑀧𑁆𑀧𑀻𑀴𑁂𑀦𑁆𑀢𑁂𑀦 𑀯𑀸 𑀣𑀤𑁆𑀥𑀫𑀼𑀤𑀼𑀪𑀸𑀯𑁄 𑀚𑀸𑀦𑀺𑀢𑀼𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀧𑀣𑀯𑀻 𑀏𑀢𑀲𑁆𑀲 𑀓𑀸𑀬𑀧𑀲𑀸𑀤𑀲𑁆𑀲 𑀨𑁄𑀝𑁆𑀞𑀩𑁆𑀩𑀚𑀸𑀦𑀦𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀮𑀓𑁆𑀔𑀡𑀸𑀤𑀺𑀯𑀯𑀢𑁆𑀣𑀸𑀦𑀢𑁄𑀧𑁂𑀢𑁂𑀲𑀁 𑀅𑀲𑀫𑁆𑀫𑀺𑀲𑁆𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑁂𑀬𑁂𑀯 𑀳𑀺 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀕𑁄𑀘𑀭𑀚𑁆𑀛𑀸𑀲𑀬𑀦𑀺𑀲𑁆𑀲𑀬𑀸 𑀅𑀜𑁆𑀜𑁂 𑀲𑁄𑀢𑀧𑀲𑀸𑀤𑀸𑀤𑀻𑀦𑀦𑁆𑀢𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺.

𑀅𑀧𑀺𑀘 𑀦𑁂𑀲𑀁 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀅𑀬𑀁 𑀉𑀧𑀫𑀸𑀧𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑀸 𑀳𑀺 𑀧𑀜𑁆𑀘𑀯𑀡𑁆𑀡𑀸𑀦𑀁 𑀥𑀚𑀸𑀦𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀓𑀺𑀜𑁆𑀘𑀸𑀧𑀺 𑀙𑀸𑀬𑀸 𑀏𑀓𑀸𑀩𑀤𑁆𑀥𑀸 𑀯𑀺𑀬 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀫𑀺𑀲𑁆𑀲𑀸𑀯 𑀬𑀣𑀸 𑀘 𑀧𑀜𑁆𑀘𑀯𑀡𑁆𑀡𑁂𑀦 𑀓𑀧𑁆𑀧𑀸𑀲𑁂𑀦 𑀯𑀝𑁆𑀝𑀺𑀁 𑀓𑀢𑁆𑀯𑀸 𑀤𑀻𑀧𑁂 𑀚𑀸𑀮𑀺𑀢𑁂 𑀓𑀺𑀜𑁆𑀘𑀸𑀧𑀺 𑀚𑀸𑀮𑀸 𑀏𑀓𑀸𑀩𑀤𑁆𑀥𑀸 𑀯𑀺𑀬 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀦 𑀅𑀁𑀲𑀼𑀦𑁄 𑀧𑀸𑀝𑀺𑀬𑁂𑀓𑁆𑀓𑀸 𑀧𑀸𑀝𑀺𑀬𑁂𑀓𑁆𑀓𑀸 𑀚𑀸𑀮𑀸 𑀅𑀲𑀫𑁆𑀫𑀺𑀲𑁆𑀲𑀸 𑀏𑀯, 𑀏𑀯𑀫𑁂𑀯 𑀓𑀺𑀜𑁆𑀘𑀸𑀧𑀺 𑀇𑀫𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀫𑁄𑀲𑀝𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯. 𑀦 𑀓𑁂𑀯𑀮𑀜𑁆𑀘 𑀇𑀫𑀸𑀦𑁂𑀯 𑀧𑀜𑁆𑀘, 𑀲𑁂𑀲𑀭𑀽𑀧𑀸𑀦𑀺𑀧𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀭𑀻𑀭𑁂 𑀳𑁂𑀝𑁆𑀞𑀺𑀫𑀓𑀸𑀬𑁄 𑀫𑀚𑁆𑀛𑀺𑀫𑀓𑀸𑀬𑁄 𑀉𑀧𑀭𑀺𑀫𑀓𑀸𑀬𑁄𑀢𑀺 𑀢𑀬𑁄 𑀓𑁄𑀝𑁆𑀞𑀸𑀲𑀸. 𑀢𑀢𑁆𑀣 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀳𑁂𑀝𑁆𑀞𑀺𑀫𑀓𑀸𑀬𑁄 𑀦𑀸𑀫. 𑀢𑀲𑁆𑀫𑀺𑀁 𑀓𑀸𑀬𑀤𑀲𑀓𑀁, 𑀪𑀸𑀯𑀤𑀲𑀓𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀝𑁆𑀞, 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀝𑁆𑀞, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀝𑁆𑀞𑀸𑀢𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀺. 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀬𑀸𑀯 𑀕𑀮𑀯𑀸𑀝𑀓𑀸 𑀫𑀚𑁆𑀛𑀺𑀫𑀓𑀸𑀬𑁄 𑀦𑀸𑀫. 𑀢𑀢𑁆𑀣 𑀘 𑀓𑀸𑀬𑀤𑀲𑀓𑀁, 𑀪𑀸𑀯𑀤𑀲𑀓𑀁, 𑀯𑀢𑁆𑀣𑀼𑀤𑀲𑀓𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀢𑀻𑀡𑀺 𑀅𑀝𑁆𑀞𑀓𑀸𑀦𑀻𑀢𑀺 𑀘𑀢𑀼𑀧𑀜𑁆𑀜𑀸𑀲 𑀭𑀽𑀧𑀸𑀦𑀺. 𑀕𑀮𑀯𑀸𑀝𑀓𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀓𑀸𑀬𑁄 𑀦𑀸𑀫. 𑀢𑀢𑁆𑀣 𑀘𑀓𑁆𑀔𑀼𑀤𑀲𑀓𑀁, 𑀲𑁄𑀢𑀤𑀲𑀓𑀁, 𑀖𑀸𑀦𑀤𑀲𑀓𑀁, 𑀚𑀺𑀯𑁆𑀳𑀸𑀤𑀲𑀓𑀁, 𑀓𑀸𑀬𑀤𑀲𑀓𑀁, 𑀪𑀸𑀯𑀤𑀲𑀓𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀢𑀻𑀡𑀺 𑀅𑀝𑁆𑀞𑀓𑀸𑀦𑀻𑀢𑀺 𑀘𑀢𑀼𑀭𑀸𑀲𑀻𑀢𑀺 𑀭𑀽𑀧𑀸𑀦𑀺.

𑀢𑀢𑁆𑀣 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀧𑀘𑁆𑀘𑀬𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀧𑀲𑀸𑀤𑁄𑀢𑀺 𑀇𑀤𑀁 𑀏𑀓𑀦𑁆𑀢𑀢𑁄 𑀅𑀯𑀺𑀦𑀺𑀪𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀯𑀲𑁂𑀦 𑀘𑀓𑁆𑀔𑀼𑀤𑀲𑀓𑀁 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀳𑁂𑀝𑁆𑀞𑀺𑀫𑀓𑀸𑀬𑁂 𑀭𑀽𑀧𑀁 𑀫𑀚𑁆𑀛𑀺𑀫𑀓𑀸𑀬𑀉𑀧𑀭𑀺𑀫𑀓𑀸𑀬𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀫𑀺𑀲𑁆𑀲𑀁. 𑀲𑁂𑀲𑀓𑀸𑀬𑀤𑁆𑀯𑀬𑁂𑀧𑀺 𑀭𑀽𑀧𑀁 𑀇𑀢𑀭𑁂𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀫𑀺𑀲𑁆𑀲𑀫𑁂𑀯. 𑀬𑀣𑀸 𑀳𑀺 𑀲𑀸𑀬𑀦𑁆𑀳𑀲𑀫𑀬𑁂 𑀧𑀩𑁆𑀩𑀢𑀘𑁆𑀙𑀸𑀬𑀸 𑀘 𑀭𑀼𑀓𑁆𑀔𑀘𑁆𑀙𑀸𑀬𑀸 𑀘 𑀓𑀺𑀜𑁆𑀘𑀸𑀧𑀺 𑀏𑀓𑀸𑀩𑀤𑁆𑀥𑀸 𑀯𑀺𑀬 𑀳𑁄𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀅𑀲𑀫𑁆𑀫𑀺𑀲𑁆𑀲𑀸𑀯 𑀏𑀯𑀁 𑀇𑀫𑁂𑀲𑀼𑀧𑀺 𑀓𑀸𑀬𑁂𑀲𑀼 𑀘𑀢𑀼𑀘𑀢𑁆𑀢𑀸𑀮𑀻𑀲 𑀘𑀢𑀼𑀧𑀜𑁆𑀜𑀸𑀲 𑀘𑀢𑀼𑀭𑀸𑀲𑀻𑀢𑀺 𑀭𑀽𑀧𑀸𑀦𑀺 𑀘 𑀓𑀺𑀜𑁆𑀘𑀸𑀧𑀺 𑀏𑀓𑀸𑀩𑀤𑁆𑀥𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯𑀸𑀢𑀺.

𑁬𑁧𑁬. 𑀭𑀽𑀧𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀡𑁆𑀡𑁄𑀯 𑀯𑀡𑁆𑀡𑀦𑀺𑀪𑀸; 𑀦𑀺𑀪𑀸𑀢𑀻𑀢𑀺 𑀯𑀸 𑀦𑀺𑀪𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁄𑀯 𑀦𑀺𑀪𑀸 𑀯𑀡𑁆𑀡𑀦𑀺𑀪𑀸. 𑀲𑀤𑁆𑀥𑀺𑀁 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀁 𑀧𑀝𑀺𑀖𑁂𑀦 𑀲𑀧𑁆𑀧𑀝𑀺𑀖𑀁, 𑀧𑀝𑀺𑀖𑀝𑁆𑀝𑀦𑀦𑀺𑀖𑀁𑀲𑀚𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀻𑀮𑀸𑀤𑀻𑀲𑀼 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀁 𑀦𑀻𑀮𑀁, 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁 𑀧𑀻𑀢𑀓𑀁, 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀫𑀸𑀦𑀁 𑀮𑁄𑀳𑀺𑀢𑀓𑀁, 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀁 𑀑𑀤𑀸𑀢𑀁. 𑀛𑀸𑀫𑀗𑁆𑀕𑀸𑀭𑀲𑀫𑀸𑀦𑀁 𑀓𑀸𑀴𑀓𑀁, 𑀫𑀦𑁆𑀤𑀭𑀢𑁆𑀢𑀁 𑀲𑀺𑀦𑁆𑀤𑀼𑀯𑀸𑀭𑀓𑀭𑀯𑀻𑀭𑀫𑀓𑀼𑀴𑀲𑀫𑀸𑀦𑀁 𑀫𑀜𑁆𑀚𑀺𑀝𑁆𑀞𑀓𑀁. ‘‘𑀳𑀭𑀺𑀢𑁆𑀢𑀘𑀳𑁂𑀫𑀯𑀡𑁆𑀡𑀓𑀸𑀫𑀁𑀲𑀼𑀫𑀼𑀔𑀧𑀓𑁆𑀓𑀫𑀸’’𑀢𑀺 (𑀚𑀸. 𑁧.𑁧𑁫.𑁧𑁩𑁩) 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 ‘𑀳𑀭𑀻’𑀢𑀺 𑀲𑀼𑀯𑀡𑁆𑀡𑀁 𑀯𑀼𑀢𑁆𑀢𑀁, 𑀧𑀭𑀢𑁄 𑀧𑀦𑀲𑁆𑀲 𑀚𑀸𑀢𑀭𑀽𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀇𑀥 𑀲𑀸𑀫𑀁 𑀳𑀭𑀺 𑀦𑀸𑀫. 𑀇𑀫𑀸𑀦𑀺 𑀲𑀢𑁆𑀢 𑀯𑀢𑁆𑀣𑀼𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀪𑀸𑀯𑁂𑀦𑁂𑀯 𑀤𑀲𑁆𑀲𑀺𑀢𑀸𑀦𑀺.

𑀳𑀭𑀺𑀯𑀡𑁆𑀡𑀦𑁆𑀢𑀺 𑀳𑀭𑀺𑀢𑀲𑀤𑁆𑀤𑀮𑀯𑀡𑁆𑀡𑀁. 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀦𑁆𑀢𑀺 𑀅𑀫𑁆𑀩𑀗𑁆𑀓𑀼𑀭𑁂𑀦 𑀲𑀫𑀸𑀦𑀯𑀡𑁆𑀡𑀁. 𑀇𑀫𑀸𑀦𑀺 𑀤𑁆𑀯𑁂 𑀯𑀢𑁆𑀣𑀼𑀁 𑀆𑀫𑀲𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀤𑀻𑀖𑀸𑀤𑀻𑀦𑀺 𑀤𑁆𑀯𑀸𑀤𑀲 𑀯𑁄𑀳𑀸𑀭𑀢𑁄 𑀤𑀲𑁆𑀲𑀺𑀢𑀸𑀦𑀺. 𑀲𑁄 𑀘 𑀦𑁂𑀲𑀁 𑀯𑁄𑀳𑀸𑀭𑁄 𑀉𑀧𑀦𑀺𑀥𑀸𑀬𑀲𑀺𑀤𑁆𑀥𑁄 𑀘𑁂𑀯 𑀲𑀦𑁆𑀦𑀺𑀯𑁂𑀲𑀲𑀺𑀤𑁆𑀥𑁄 𑀘. 𑀤𑀻𑀖𑀸𑀤𑀻𑀦𑀺 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀥𑀸𑀬𑀲𑀺𑀤𑁆𑀥𑀸𑀦𑀺, 𑀯𑀝𑁆𑀝𑀸𑀤𑀻𑀦𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑁂𑀦. 𑀢𑀢𑁆𑀣 𑀭𑀲𑁆𑀲𑀁 𑀉𑀧𑀦𑀺𑀥𑀸𑀬 𑀢𑀢𑁄 𑀉𑀘𑁆𑀘𑀢𑀭𑀁 𑀤𑀻𑀖𑀁, 𑀢𑀁 𑀉𑀧𑀦𑀺𑀥𑀸𑀬 𑀢𑀢𑁄 𑀦𑀻𑀘𑀢𑀭𑀁 𑀭𑀲𑁆𑀲𑀁. 𑀣𑀽𑀮𑀁 𑀉𑀧𑀦𑀺𑀥𑀸𑀬 𑀢𑀢𑁄 𑀔𑀼𑀤𑁆𑀤𑀓𑀢𑀭𑀁 𑀅𑀡𑀼𑀁, 𑀢𑀁 𑀉𑀧𑀦𑀺𑀥𑀸𑀬 𑀢𑀢𑁄 𑀫𑀳𑀦𑁆𑀢𑀢𑀭𑀁 𑀣𑀽𑀮𑀁. 𑀘𑀓𑁆𑀓𑀲𑀡𑁆𑀞𑀸𑀦𑀁 𑀯𑀝𑁆𑀝𑀁, 𑀓𑀼𑀓𑁆𑀓𑀼𑀝𑀡𑁆𑀟𑀲𑀡𑁆𑀞𑀸𑀦𑀁 𑀧𑀭𑀺𑀫𑀡𑁆𑀟𑀮𑀁. 𑀘𑀢𑀽𑀳𑀺 𑀅𑀁𑀲𑁂𑀳𑀺 𑀬𑀼𑀢𑁆𑀢𑀁 𑀘𑀢𑀼𑀭𑀁𑀲𑀁. 𑀙𑀴𑀁𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀦𑁆𑀦𑀦𑁆𑀢𑀺 𑀑𑀦𑀢𑀁, 𑀣𑀮𑀦𑁆𑀢𑀺 𑀉𑀦𑁆𑀦𑀢𑀁.

𑀢𑀢𑁆𑀣 𑀬𑀲𑁆𑀫𑀸 𑀤𑀻𑀖𑀸𑀤𑀻𑀦𑀺 𑀨𑀼𑀲𑀺𑀢𑁆𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀦𑀻𑀮𑀸𑀤𑀻𑀦𑀺 𑀧𑀦𑁂𑀯𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀻𑀖𑀁 𑀭𑀽𑀧𑀸𑀬𑀢𑀦𑀁; 𑀢𑀣𑀸 𑀭𑀲𑁆𑀲𑀸𑀤𑀻𑀦𑀺. 𑀢𑀁 𑀢𑀁 𑀦𑀺𑀲𑁆𑀲𑀸𑀬 𑀧𑀦 𑀢𑀣𑀸 𑀢𑀣𑀸 𑀞𑀺𑀢𑀁 𑀤𑀻𑀖𑀁 𑀭𑀲𑁆𑀲𑀦𑁆𑀢𑀺 𑀢𑁂𑀦 𑀢𑁂𑀦 𑀯𑁄𑀳𑀸𑀭𑁂𑀦 𑀭𑀽𑀧𑀸𑀬𑀢𑀦𑀫𑁂𑀯𑁂𑀢𑁆𑀣 𑀪𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀙𑀸𑀬𑀸 𑀆𑀢𑀧𑁄𑀢𑀺 𑀇𑀤𑀁 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑀁; 𑀢𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀘. 𑀅𑀩𑁆𑀪𑀸 𑀫𑀳𑀺𑀓𑀸𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀢𑁆𑀣𑀼𑀦𑀸𑀯 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 ‘𑀅𑀩𑁆𑀪𑀸’𑀢𑀺 𑀯𑀮𑀸𑀳𑀓𑁄. ‘𑀫𑀳𑀺𑀓𑀸’𑀢𑀺 𑀳𑀺𑀫𑀁. 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀩𑁆𑀪𑀸𑀤𑀻𑀦𑀁 𑀯𑀡𑁆𑀡𑀸 𑀤𑀲𑁆𑀲𑀺𑀢𑀸. 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸𑀢𑀺𑀆𑀤𑀻𑀳𑀺 𑀢𑁂𑀲𑀁 𑀢𑁂𑀲𑀁 𑀧𑀪𑀸𑀯𑀡𑁆𑀡𑀸 𑀤𑀲𑁆𑀲𑀺𑀢𑀸.

𑀢𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀏𑀯𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀫𑀡𑀺𑀫𑀬𑀁 𑀭𑀚𑀢𑀧𑀝𑀺𑀘𑁆𑀙𑀦𑁆𑀦𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀘𑀦𑁆𑀤𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀦𑀸𑀫. 𑀲𑁄𑀯𑀡𑁆𑀡𑀫𑀬𑀁 𑀨𑀮𑀺𑀓𑀧𑀝𑀺𑀘𑁆𑀙𑀦𑁆𑀦𑀁 𑀲𑀫𑀧𑀡𑁆𑀡𑀸𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀲𑀽𑀭𑀺𑀬𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀫𑀸𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀦𑀸𑀫. 𑀲𑀢𑁆𑀢𑀭𑀢𑀦𑀫𑀬𑀸𑀦𑀺 𑀲𑀢𑁆𑀢𑀝𑁆𑀞𑀤𑀲𑀤𑁆𑀯𑀸𑀤𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀯𑀺𑀫𑀸𑀦𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀦𑀸𑀫.

𑀢𑀢𑁆𑀣 𑀳𑁂𑀝𑁆𑀞𑀸 𑀘𑀦𑁆𑀤𑁄, 𑀲𑀽𑀭𑀺𑀬𑁄 𑀉𑀧𑀭𑀺, 𑀉𑀪𑀺𑀦𑁆𑀦𑀫𑀦𑁆𑀢𑀭𑀁 𑀬𑁄𑀚𑀦𑀁 𑀳𑁄𑀢𑀺. 𑀘𑀦𑁆𑀤𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀽𑀭𑀺𑀬𑀲𑁆𑀲 𑀉𑀧𑀭𑀺𑀫𑀦𑁆𑀢𑁄 𑀬𑁄𑀚𑀦𑀲𑀢𑀁 𑀳𑁄𑀢𑀺. 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀦𑀓𑁆𑀔𑀢𑁆𑀢𑀢𑀸𑀭𑀓𑀸 𑀕𑀘𑁆𑀙𑀦𑁆𑀢𑀺. 𑀏𑀢𑁂𑀲𑀼 𑀧𑀦 𑀢𑀻𑀲𑀼 𑀘𑀦𑁆𑀤𑁄 𑀤𑀦𑁆𑀥𑀕𑀫𑀦𑁄, 𑀲𑀽𑀭𑀺𑀬𑁄 𑀲𑀻𑀖𑀕𑀫𑀦𑁄, 𑀦𑀓𑁆𑀔𑀢𑁆𑀢𑀢𑀸𑀭𑀓𑀸 𑀲𑀩𑁆𑀩𑀲𑀻𑀖𑀕𑀫𑀦𑀸. 𑀓𑀸𑀮𑁂𑀦 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀼𑀭𑀢𑁄 𑀳𑁄𑀦𑁆𑀢𑀺 𑀓𑀸𑀮𑁂𑀦 𑀧𑀘𑁆𑀙𑀸.

𑀆𑀤𑀸𑀲𑀫𑀡𑁆𑀟𑀮𑀦𑁆𑀢𑀺 𑀓𑀁𑀲𑀫𑀬𑀁. 𑀫𑀡𑀻𑀢𑀺 𑀞𑀧𑁂𑀢𑁆𑀯𑀸 𑀯𑁂𑀴𑀼𑀭𑀺𑀬𑀁 𑀲𑁂𑀲𑁄 𑀚𑁄𑀢𑀺𑀭𑀲𑀸𑀤𑀺𑀅𑀦𑁂𑀓𑀧𑁆𑀧𑀪𑁂𑀤𑁄. 𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑁄; 𑀫𑀼𑀢𑁆𑀢𑀸 𑀲𑀸𑀫𑀼𑀤𑁆𑀤𑀺𑀓𑀸𑀧𑀺, 𑀲𑁂𑀲𑀸𑀧𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀯𑁂𑀴𑀼𑀯𑀡𑁆𑀡𑀫𑀡𑀺. 𑀚𑀸𑀢𑀭𑀽𑀧𑀁 𑀯𑀼𑀘𑁆𑀘𑀢𑀺 𑀲𑀢𑁆𑀣𑀼𑀯𑀡𑁆𑀡𑁄. 𑀲𑀢𑁆𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀲𑀼𑀯𑀡𑁆𑀡𑀫𑁆𑀧𑀺 𑀲𑀢𑁆𑀣𑀼𑀯𑀡𑁆𑀡𑀁. 𑀭𑀚𑀢𑀁 𑀯𑀼𑀘𑁆𑀘𑀢𑀺 𑀓𑀳𑀸𑀧𑀡𑁄 𑁋 𑀮𑁄𑀳𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄, 𑀬𑁂 ‘𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’𑀢𑀺 (𑀧𑀸𑀭𑀸. 𑁫𑁮𑁪) 𑀯𑀼𑀢𑁆𑀢𑀁 𑀢𑀁 𑀲𑀩𑁆𑀩𑀫𑁆𑀧𑀺 𑀇𑀥 𑀕𑀳𑀺𑀢𑀁.

𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺 𑀇𑀫𑀺𑀦𑀸 𑀧𑀸𑀴𑀺𑀆𑀕𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀢𑀝𑁆𑀝𑀺𑀓𑀧𑀺𑀮𑁄𑀢𑀺𑀓𑀓𑀡𑁆𑀡𑀺𑀓𑀯𑀡𑁆𑀡𑀸𑀤𑀺𑀪𑁂𑀤𑀁 𑀭𑀽𑀧𑀁 𑀕𑀳𑀺𑀢𑀁. 𑀢𑀜𑁆𑀳𑀺 𑀲𑀩𑁆𑀩𑀁 𑀬𑁂𑀯𑀸𑀧𑀦𑀓𑁂𑀲𑀼 𑀧𑀯𑀺𑀝𑁆𑀞𑀁.

𑀏𑀯𑀫𑁂𑀢𑀁 𑀦𑀻𑀮𑀸𑀤𑀺𑀦𑀸 𑀪𑁂𑀤𑁂𑀦 𑀪𑀺𑀦𑁆𑀦𑀫𑁆𑀧𑀺 𑀭𑀽𑀧𑀁 𑀲𑀩𑁆𑀩𑀁 𑀮𑀓𑁆𑀔𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑀫𑁂𑀯. 𑀲𑀩𑁆𑀩𑀜𑁆𑀳𑁂𑀢𑀁 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑀁, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀢𑀼𑀫𑀳𑀸𑀪𑀽𑀢𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀘𑁂𑀢𑀁 𑀢𑀣𑀸 𑀲𑀩𑁆𑀩𑀸𑀦𑀺𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀺. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀅𑀢𑁆𑀣𑀺 𑀢𑀢𑁆𑀣 𑀯𑀓𑁆𑀔𑀸𑀫. 𑀲𑁂𑀲𑀫𑁂𑀢𑁆𑀣 𑀘𑀓𑁆𑀔𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀘𑀓𑁆𑀔𑀼𑀧𑀼𑀩𑁆𑀩𑀗𑁆𑀕𑀫𑁄 𑀦𑀺𑀤𑁆𑀤𑁂𑀲𑁄 𑀇𑀥 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑁄. 𑀢𑀢𑁆𑀣 ‘𑀘𑀓𑁆𑀔𑀼𑀁 𑀧𑁂𑀢’𑀦𑁆𑀢𑀺𑀆𑀤𑀻𑀦𑀺 𑀘𑀼𑀤𑁆𑀤𑀲 𑀦𑀸𑀫𑀸𑀦𑀺, 𑀇𑀥 ‘𑀭𑀽𑀧𑀁𑀧𑁂𑀢’𑀦𑁆𑀢𑀺𑀆𑀤𑀻𑀦𑀺 𑀢𑀻𑀡𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀬𑀣𑀸 𑀳𑀺 𑀘𑀢𑀽𑀳𑀺 𑀘𑀢𑀽𑀳𑀺 𑀦𑀬𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀘𑀓𑁆𑀔𑀼𑀁 𑀯𑀯𑀢𑁆𑀣𑀸𑀧𑁂𑀢𑀼𑀁 𑀢𑁂𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸, 𑀇𑀥𑀸𑀧𑀺 𑀢𑁂 𑀢𑀣𑁂𑀯 𑀯𑀼𑀢𑁆𑀢𑀸𑀢𑀺.

𑁬𑁨𑁦. 𑀲𑀤𑁆𑀤𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀪𑁂𑀭𑀺𑀲𑀤𑁆𑀤𑁄𑀢𑀺 𑀫𑀳𑀸𑀪𑁂𑀭𑀻𑀧𑀳𑀝𑀪𑁂𑀭𑀻𑀦𑀁 𑀲𑀤𑁆𑀤𑁄. 𑀫𑀼𑀤𑀺𑀗𑁆𑀕𑀲𑀗𑁆𑀔𑀧𑀡𑀯𑀲𑀤𑁆𑀤𑀸𑀧𑀺 𑀫𑀼𑀤𑀺𑀗𑁆𑀕𑀸𑀤𑀺𑀧𑀘𑁆𑀘𑀬𑀸 𑀲𑀤𑁆𑀤𑀸. 𑀕𑀻𑀢𑀲𑀗𑁆𑀔𑀸𑀢𑁄 𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄. 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀯𑀻𑀡𑀸𑀤𑀻𑀦𑀁 𑀢𑀦𑁆𑀢𑀺𑀩𑀤𑁆𑀥𑀸𑀦𑀁 𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄. 𑀲𑀫𑁆𑀫𑀲𑀤𑁆𑀤𑁄𑀢𑀺 𑀓𑀁𑀲𑀢𑀸𑀮𑀓𑀝𑁆𑀞𑀢𑀸𑀮𑀲𑀤𑁆𑀤𑁄. 𑀧𑀸𑀡𑀺𑀲𑀤𑁆𑀤𑁄𑀢𑀺 𑀧𑀸𑀡𑀺𑀧𑁆𑀧𑀳𑀸𑀭𑀲𑀤𑁆𑀤𑁄. 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄𑀢𑀺 𑀩𑀳𑀽𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀧𑀜𑁆𑀜𑀸𑀬𑀫𑀸𑀦𑀧𑀤𑀩𑁆𑀬𑀜𑁆𑀚𑀦𑀦𑀺𑀕𑁆𑀖𑁄𑀲𑀲𑀤𑁆𑀤𑁄. 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄𑀢𑀺 𑀭𑀼𑀓𑁆𑀔𑀸𑀦𑀁 𑀅𑀜𑁆𑀜𑀫𑀜𑁆𑀜𑀦𑀺𑀖𑀁𑀲𑀦𑀖𑀡𑁆𑀝𑀺𑀓𑀸𑀓𑁄𑀝𑀦𑀸𑀤𑀺𑀲𑀤𑁆𑀤𑁄. 𑀯𑀸𑀢𑀲𑁆𑀲 𑀯𑀸𑀬𑀢𑁄 𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄. 𑀉𑀤𑀓𑀲𑁆𑀲 𑀲𑀦𑁆𑀤𑀫𑀸𑀦𑀲𑁆𑀲 𑀯𑀸 𑀧𑀝𑀺𑀳𑀢𑀲𑁆𑀲 𑀯𑀸 𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄. 𑀫𑀦𑀼𑀲𑁆𑀲𑀸𑀦𑀁 𑀲𑀮𑁆𑀮𑀸𑀧𑀸𑀤𑀺𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄. 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑁄 𑀲𑀩𑁆𑀩𑁄𑀧𑀺 𑀅𑀫𑀦𑀼𑀲𑁆𑀲𑀲𑀤𑁆𑀤𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀲𑀩𑁆𑀩𑁄𑀧𑀺 𑀲𑀤𑁆𑀤𑁄 𑀧𑀭𑀺𑀬𑀸𑀤𑀺𑀦𑁆𑀦𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀁𑀲𑀨𑀸𑀮𑀦𑀧𑀺𑀮𑁄𑀢𑀺𑀓𑀨𑀸𑀮𑀦𑀸𑀤𑀻𑀲𑀼 𑀧𑀯𑀢𑁆𑀢𑁄 𑀧𑀸𑀴𑀺𑀬𑀁 𑀅𑀦𑀸𑀕𑀢𑀲𑀤𑁆𑀤𑁄 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑀬𑀁 𑀪𑁂𑀭𑀻𑀲𑀤𑁆𑀤𑀸𑀤𑀺𑀦𑀸 𑀪𑁂𑀤𑁂𑀦 𑀪𑀺𑀦𑁆𑀦𑁄𑀧𑀺 𑀲𑀤𑁆𑀤𑁄 𑀮𑀓𑁆𑀔𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑁄𑀬𑁂𑀯. 𑀲𑀩𑁆𑀩𑁄𑀧𑀺 𑀳𑁂𑀲 𑀲𑁄𑀢𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀲𑀤𑁆𑀤𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁂𑀲𑀁 𑀘𑀓𑁆𑀔𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀳𑀺 𑀘𑀢𑀽𑀳𑀺 𑀘𑀢𑀽𑀳𑀺 𑀦𑀬𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑁂𑀲𑀁 𑀅𑀢𑁆𑀣𑁄 𑀲𑀓𑁆𑀓𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑁄.

𑁬𑁨𑁪. 𑀕𑀦𑁆𑀥𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀫𑀽𑀮𑀕𑀦𑁆𑀥𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀽𑀮𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑁄 𑀕𑀦𑁆𑀥𑁄. 𑀲𑀸𑀭𑀕𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀺𑀤𑁆𑀥𑀤𑀼𑀲𑀺𑀤𑁆𑀥𑀸𑀦𑀁 𑀟𑀸𑀓𑀸𑀤𑀻𑀦𑀁 𑀕𑀦𑁆𑀥𑁄 𑀆𑀫𑀓𑀕𑀦𑁆𑀥𑁄. 𑀫𑀘𑁆𑀙𑀲𑀓𑀮𑀺𑀓𑀸𑀧𑀽𑀢𑀺𑀫𑀁𑀲𑀲𑀁𑀓𑀺𑀮𑀺𑀝𑁆𑀞𑀲𑀧𑁆𑀧𑀺𑀆𑀤𑀻𑀦𑀁 𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄. 𑀲𑀼𑀕𑀦𑁆𑀥𑁄𑀢𑀺 𑀇𑀝𑁆𑀞𑀕𑀦𑁆𑀥𑁄. 𑀤𑀼𑀕𑁆𑀕𑀦𑁆𑀥𑁄𑀢𑀺 𑀅𑀦𑀺𑀝𑁆𑀞𑀕𑀦𑁆𑀥𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀲𑀩𑁆𑀩𑁄𑀧𑀺 𑀕𑀦𑁆𑀥𑁄 𑀧𑀭𑀺𑀬𑀸𑀤𑀺𑀦𑁆𑀦𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀡𑁆𑀡𑀓𑀕𑀦𑁆𑀥𑀧𑀺𑀮𑁄𑀢𑀺𑀓𑀕𑀦𑁆𑀥𑀸𑀤𑀬𑁄 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸 𑀲𑀩𑁆𑀩𑁂𑀧𑀺 𑀕𑀦𑁆𑀥𑀸 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀫𑀬𑀁 𑀫𑀽𑀮𑀕𑀦𑁆𑀥𑀸𑀤𑀺𑀦𑀸 𑀪𑁂𑀤𑁂𑀦 𑀪𑀺𑀦𑁆𑀦𑁄𑀧𑀺 𑀕𑀦𑁆𑀥𑁄 𑀮𑀓𑁆𑀔𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑁄𑀬𑁂𑀯. 𑀲𑀩𑁆𑀩𑁄𑀧𑀺 𑀳𑁂𑀲 𑀖𑀸𑀦𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀕𑀦𑁆𑀥𑁄, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁂𑀲𑀁 𑀘𑀓𑁆𑀔𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀳𑀺 𑀢𑀣𑁂𑀯 𑀤𑁆𑀯𑀺𑀧𑀜𑁆𑀜𑀸𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑁂 𑀅𑀢𑁆𑀣𑀢𑁄 𑀧𑀸𑀓𑀝𑀸𑀬𑁂𑀯.

𑁬𑁨𑁮. 𑀭𑀲𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀫𑀽𑀮𑀭𑀲𑁄𑀢𑀺 𑀬𑀁𑀓𑀺𑀜𑁆𑀘𑀺 𑀫𑀽𑀮𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀭𑀲𑁄. 𑀔𑀦𑁆𑀥𑀭𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀫𑁆𑀩𑀺𑀮𑀦𑁆𑀢𑀺 𑀢𑀓𑁆𑀓𑀫𑁆𑀩𑀺𑀮𑀸𑀤𑀺. 𑀫𑀥𑀼𑀭𑀦𑁆𑀢𑀺 𑀏𑀓𑀦𑁆𑀢𑀢𑁄 𑀕𑁄𑀲𑀧𑁆𑀧𑀺𑀆𑀤𑀺. 𑀫𑀥𑀼 𑀧𑀦 𑀓𑀲𑀸𑀯𑀬𑀼𑀢𑁆𑀢𑀁 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀓𑀲𑀸𑀯𑀁 𑀳𑁄𑀢𑀺. 𑀨𑀸𑀡𑀺𑀢𑀁 𑀔𑀸𑀭𑀺𑀬𑀼𑀢𑁆𑀢𑀁 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀔𑀸𑀭𑀺𑀬𑀁 𑀳𑁄𑀢𑀺. 𑀲𑀧𑁆𑀧𑀺 𑀧𑀦 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁 𑀯𑀡𑁆𑀡𑀕𑀦𑁆𑀥𑁂 𑀚𑀳𑀦𑁆𑀢𑀫𑁆𑀧𑀺 𑀭𑀲𑀁 𑀦 𑀚𑀳𑀢𑀻𑀢𑀺 𑀢𑀤𑁂𑀯 𑀏𑀓𑀦𑁆𑀢𑀫𑀥𑀼𑀭𑀁. 𑀢𑀺𑀢𑁆𑀢𑀓𑀦𑁆𑀢𑀺 𑀦𑀺𑀫𑁆𑀩𑀧𑀡𑁆𑀡𑀸𑀤𑀺. 𑀓𑀝𑀼𑀓𑀦𑁆𑀢𑀺 𑀲𑀺𑀗𑁆𑀕𑀺𑀯𑁂𑀭𑀫𑀭𑀺𑀘𑀸𑀤𑀺. 𑀮𑁄𑀡𑀺𑀓𑀦𑁆𑀢𑀺 𑀲𑀸𑀫𑀼𑀤𑁆𑀤𑀺𑀓𑀮𑁄𑀡𑀸𑀤𑀺. 𑀔𑀸𑀭𑀺𑀓𑀦𑁆𑀢𑀺 𑀯𑀸𑀢𑀺𑀗𑁆𑀕𑀡𑀓𑀴𑀻𑀭𑀸𑀤𑀺. 𑀮𑀫𑁆𑀩𑀺𑀮𑀦𑁆𑀢𑀺 𑀩𑀤𑀭𑀸𑀫𑀮𑀓𑀓𑀧𑀺𑀝𑁆𑀞𑀲𑀸𑀮𑀯𑀸𑀤𑀺. 𑀓𑀲𑀸𑀯𑀦𑁆𑀢𑀺 𑀳𑀭𑀺𑀢𑀓𑀸𑀤𑀺. 𑀇𑀫𑁂 𑀲𑀩𑁆𑀩𑁂𑀧𑀺 𑀭𑀲𑀸 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀁𑀢𑀁𑀯𑀢𑁆𑀣𑀼𑀢𑁄 𑀧𑀦𑁂𑀢𑁆𑀣 𑀭𑀲𑁄𑀯 𑀅𑀫𑁆𑀩𑀺𑀮𑀸𑀤𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀤𑀽𑀢𑀺 𑀇𑀝𑁆𑀞𑀭𑀲𑁄, 𑀅𑀲𑀸𑀤𑀽𑀢𑀺 𑀅𑀦𑀺𑀝𑁆𑀞𑀭𑀲𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀲𑀩𑁆𑀩𑁄𑀧𑀺 𑀭𑀲𑁄 𑀧𑀭𑀺𑀬𑀸𑀤𑀺𑀦𑁆𑀦𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀮𑁂𑀟𑁆𑀟𑀼𑀭𑀲𑀪𑀺𑀢𑁆𑀢𑀺𑀭𑀲𑀧𑀺𑀮𑁄𑀢𑀺𑀓𑀭𑀲𑀸𑀤𑀬𑁄 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸 𑀲𑀩𑁆𑀩𑁂𑀧𑀺 𑀭𑀲𑀸 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀫𑀬𑀁 𑀫𑀽𑀮𑀭𑀲𑀸𑀤𑀺𑀦𑀸𑀪𑁂𑀤𑁂𑀦 𑀪𑀺𑀦𑁆𑀦𑁄𑀧𑀺 𑀭𑀲𑁄 𑀮𑀓𑁆𑀔𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑁄𑀬𑁂𑀯. 𑀲𑀩𑁆𑀩𑁄𑀧𑀺 𑀳𑁂𑀲 𑀚𑀺𑀯𑁆𑀳𑀸𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀭𑀲𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁂𑀲𑀁 𑀘𑀓𑁆𑀔𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀳𑀺 𑀢𑀣𑁂𑀯 𑀤𑁆𑀯𑀺𑀧𑀜𑁆𑀜𑀸𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸.

𑁬𑁩𑁨. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀬𑀦𑁆𑀢𑀺 𑀓𑀭𑀡𑀯𑀘𑀦𑀁. 𑀬𑁂𑀦 𑀓𑀸𑀭𑀡𑁂𑀦 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀳𑁄𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀢𑁆𑀣 ‘𑀮𑀺𑀗𑁆𑀕’𑀦𑁆𑀢𑀺 𑀲𑀡𑁆𑀞𑀸𑀦𑀁. 𑀇𑀢𑁆𑀣𑀺𑀬𑀸 𑀳𑀺 𑀳𑀢𑁆𑀣𑀧𑀸𑀤𑀕𑀻𑀯𑀸𑀉𑀭𑀸𑀤𑀻𑀦𑀁 𑀲𑀡𑁆𑀞𑀸𑀦𑀁 𑀦 𑀧𑀼𑀭𑀺𑀲𑀲𑁆𑀲 𑀯𑀺𑀬 𑀳𑁄𑀢𑀺. 𑀇𑀢𑁆𑀣𑀻𑀦𑀜𑁆𑀳𑀺 𑀳𑁂𑀝𑁆𑀞𑀺𑀫𑀓𑀸𑀬𑁄 𑀯𑀺𑀲𑀤𑁄 𑀳𑁄𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀅𑀯𑀺𑀲𑀤𑁄. 𑀳𑀢𑁆𑀣𑀧𑀸𑀤𑀸 𑀔𑀼𑀤𑁆𑀤𑀓𑀸, 𑀫𑀼𑀔𑀁 𑀔𑀼𑀤𑁆𑀤𑀓𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀜𑁆𑀚𑀸𑀦𑀦𑀁. 𑀇𑀢𑁆𑀣𑀻𑀦𑀜𑁆𑀳𑀺 𑀉𑀭𑀫𑀁𑀲𑀁 𑀅𑀯𑀺𑀲𑀤𑀁 𑀳𑁄𑀢𑀺, 𑀫𑀼𑀔𑀁 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑀁. 𑀓𑁂𑀲𑀩𑀦𑁆𑀥𑀯𑀢𑁆𑀣𑀕𑁆𑀕𑀳𑀡𑀫𑁆𑀧𑀺 𑀦 𑀧𑀼𑀭𑀺𑀲𑀸𑀦𑀁 𑀯𑀺𑀬 𑀳𑁄𑀢𑀺. 𑀓𑀼𑀢𑁆𑀢𑀦𑁆𑀢𑀺 𑀓𑀺𑀭𑀺𑀬𑀸. 𑀇𑀢𑁆𑀣𑀺𑀬𑁄 𑀳𑀺 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀓𑀫𑀼𑀲𑀮𑀓𑁂𑀳𑀺 𑀓𑀻𑀴𑀦𑁆𑀢𑀺, 𑀘𑀺𑀢𑁆𑀢𑀥𑀻𑀢𑀮𑀺𑀓𑀸𑀬 𑀓𑀻𑀴𑀦𑁆𑀢𑀺, 𑀫𑀢𑁆𑀢𑀺𑀓𑀯𑀸𑀓𑁂𑀦 𑀲𑀼𑀢𑁆𑀢𑀓𑀁 𑀦𑀸𑀫 𑀓𑀦𑁆𑀢𑀦𑁆𑀢𑀺. 𑀆𑀓𑀧𑁆𑀧𑁄𑀢𑀺 𑀕𑀫𑀦𑀸𑀤𑀺𑀆𑀓𑀸𑀭𑁄. 𑀇𑀢𑁆𑀣𑀺𑀬𑁄 𑀳𑀺 𑀕𑀘𑁆𑀙𑀫𑀸𑀦𑀸 𑀅𑀯𑀺𑀲𑀤𑀸 𑀕𑀘𑁆𑀙𑀦𑁆𑀢𑀺, 𑀢𑀺𑀝𑁆𑀞𑀫𑀸𑀦𑀸 𑀦𑀺𑀧𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀫𑀸𑀦𑀸 𑀔𑀸𑀤𑀫𑀸𑀦𑀸 𑀪𑀼𑀜𑁆𑀚𑀫𑀸𑀦𑀸 𑀅𑀯𑀺𑀲𑀤𑀸 𑀪𑀼𑀜𑁆𑀚𑀦𑁆𑀢𑀺. 𑀧𑀼𑀭𑀺𑀲𑀫𑁆𑀧𑀺 𑀳𑀺 𑀅𑀯𑀺𑀲𑀤𑀁 𑀤𑀺𑀲𑁆𑀯𑀸 𑀫𑀸𑀢𑀼𑀕𑀸𑀫𑁄 𑀯𑀺𑀬 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀧𑀚𑁆𑀚𑀢𑀺 𑀦𑀺𑀲𑀻𑀤𑀢𑀺 𑀔𑀸𑀤𑀢𑀺 𑀪𑀼𑀜𑁆𑀚𑀢𑀻𑀢𑀺 𑀯𑀤𑀦𑁆𑀢𑀺.

𑀇𑀢𑁆𑀣𑀢𑁆𑀢𑀁 𑀇𑀢𑁆𑀣𑀺𑀪𑀸𑀯𑁄𑀢𑀺 𑀉𑀪𑀬𑀫𑁆𑀧𑀺 𑀏𑀓𑀢𑁆𑀣𑀁; 𑀇𑀢𑁆𑀣𑀺𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀓𑀫𑁆𑀫𑀚𑁄 𑀧𑀝𑀺𑀲𑀦𑁆𑀥𑀺𑀲𑀫𑀼𑀝𑁆𑀞𑀺𑀢𑁄. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀧𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀺𑀢𑀸𑀦𑀺. 𑀬𑀣𑀸 𑀳𑀺 𑀩𑀻𑀚𑁂 𑀲𑀢𑀺, 𑀩𑀻𑀚𑀁 𑀧𑀝𑀺𑀘𑁆𑀘, 𑀩𑀻𑀚𑀧𑀘𑁆𑀘𑀬𑀸 𑀭𑀼𑀓𑁆𑀔𑁄 𑀯𑀟𑁆𑀠𑀺𑀢𑁆𑀯𑀸 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀆𑀓𑀸𑀲𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀇𑀢𑁆𑀣𑀺𑀪𑀸𑀯𑀲𑀗𑁆𑀔𑀸𑀢𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂 𑀲𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀩𑀻𑀚𑀁 𑀯𑀺𑀬 𑀳𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀩𑀻𑀚𑀁 𑀧𑀝𑀺𑀘𑁆𑀘 𑀯𑀟𑁆𑀠𑀺𑀢𑁆𑀯𑀸 𑀆𑀓𑀸𑀲𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀭𑀼𑀓𑁆𑀔𑁄 𑀯𑀺𑀬 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀦𑀺𑀧𑀺.

𑀇𑀤𑀁 𑀢𑀁 𑀭𑀽𑀧𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀤𑀁 𑀢𑀁 𑀭𑀽𑀧𑀁, 𑀬𑀣𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀼𑀭𑀺𑀲𑀲𑁆𑀲𑀸𑀧𑀺 𑀳𑁄𑀦𑁆𑀢𑀺, 𑀦 𑀏𑀯𑀁; 𑀦𑀺𑀬𑀫𑀢𑁄 𑀧𑀦 𑀇𑀢𑁆𑀣𑀺𑀬𑀸 𑀏𑀯 𑀇𑀦𑁆𑀤𑁆𑀭𑀺𑀬𑀁 ‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁’.

𑁬𑁩𑁩. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀺 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀼𑀭𑀺𑀲𑀲𑁆𑀲 𑀳𑀺 𑀳𑀢𑁆𑀣𑀧𑀸𑀤𑀕𑀻𑀯𑀸𑀉𑀭𑀸𑀤𑀻𑀦𑀁 𑀲𑀡𑁆𑀞𑀸𑀦𑀁 𑀦 𑀇𑀢𑁆𑀣𑀺𑀬𑀸 𑀯𑀺𑀬 𑀳𑁄𑀢𑀺. 𑀧𑀼𑀭𑀺𑀲𑀸𑀦𑀜𑁆𑀳𑀺 𑀉𑀧𑀭𑀺𑀫𑀓𑀸𑀬𑁄 𑀯𑀺𑀲𑀤𑁄 𑀳𑁄𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑁄 𑀅𑀯𑀺𑀲𑀤𑁄, 𑀳𑀢𑁆𑀣𑀧𑀸𑀤𑀸 𑀫𑀳𑀦𑁆𑀢𑀸, 𑀫𑀼𑀔𑀁 𑀫𑀳𑀦𑁆𑀢𑀁, 𑀉𑀭𑀫𑀁𑀲𑀁 𑀯𑀺𑀲𑀤𑀁, 𑀫𑀲𑁆𑀲𑀼𑀤𑀸𑀞𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑁂𑀲𑀩𑀦𑁆𑀥𑀦𑀯𑀢𑁆𑀣𑀕𑁆𑀕𑀳𑀡𑀁 𑀦 𑀇𑀢𑁆𑀣𑀻𑀦𑀁 𑀯𑀺𑀬 𑀳𑁄𑀢𑀺. 𑀤𑀳𑀭𑀓𑀸𑀮𑁂 𑀭𑀣𑀦𑀗𑁆𑀕𑀮𑀸𑀤𑀻𑀳𑀺 𑀓𑀻𑀴𑀦𑁆𑀢𑀺, 𑀯𑀸𑀮𑀺𑀓𑀧𑀸𑀴𑀺𑀁 𑀓𑀢𑁆𑀯𑀸 𑀯𑀸𑀧𑀺𑀁 𑀦𑀸𑀫 𑀔𑀦𑀦𑁆𑀢𑀺, 𑀕𑀫𑀦𑀸𑀤𑀻𑀦𑀺 𑀯𑀺𑀲𑀤𑀸𑀦𑀺 𑀳𑁄𑀦𑁆𑀢𑀺. 𑀇𑀢𑁆𑀣𑀺𑀫𑁆𑀧𑀺 𑀕𑀫𑀦𑀸𑀤𑀻𑀦𑀺 𑀯𑀺𑀲𑀤𑀸𑀦𑀺 𑀓𑀼𑀭𑀼𑀫𑀸𑀦𑀁 𑀤𑀺𑀲𑁆𑀯𑀸 ‘𑀧𑀼𑀭𑀺𑀲𑁄 𑀯𑀺𑀬 𑀕𑀘𑁆𑀙𑀢𑀻’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀲𑁂𑀲𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀢𑀢𑁆𑀣 𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀻𑀢𑀺 𑀧𑀓𑀸𑀲𑀦𑀭𑀲𑀁, 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀼𑀭𑀺𑀲𑀪𑀸𑀯𑀮𑀓𑁆𑀔𑀡𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑁄𑀢𑀺 𑀧𑀓𑀸𑀲𑀦𑀭𑀲𑀁, 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀉𑀪𑀬𑀫𑁆𑀧𑁂𑀢𑀁 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀸𑀢𑀺. 𑀅𑀧𑀭𑀪𑀸𑀕𑁂 𑀧𑀝𑀺𑀲𑀦𑁆𑀥𑀺𑀬𑀁. 𑀧𑀝𑀺𑀲𑀦𑁆𑀥𑀺𑀲𑀫𑀼𑀝𑁆𑀞𑀺𑀢𑀫𑁆𑀧𑀺 𑀧𑀯𑀢𑁆𑀢𑁂 𑀘𑀮𑀢𑀺 𑀧𑀭𑀺𑀯𑀢𑁆𑀢𑀢𑀺.

𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁬𑁯).

𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀢𑁆𑀢𑀫𑀁, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀳𑀻𑀦𑀁. 𑀢𑀲𑁆𑀫𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀤𑀼𑀩𑁆𑀩𑀮𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀁 𑀉𑀪𑀬𑀫𑁆𑀧𑀺 𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀦 𑀓𑀺𑀁 𑀏𑀓𑀁 𑀇𑀦𑁆𑀤𑁆𑀭𑀺𑀬𑀁 𑀉𑀤𑀸𑀳𑀼 𑀤𑁆𑀯𑁂𑀢𑀺? 𑀏𑀓𑀁. 𑀢𑀜𑁆𑀘 𑀔𑁄 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁. ‘𑀏𑀯𑀁 𑀲𑀦𑁆𑀢𑁂 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀲𑁆𑀲 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀇𑀦𑁆𑀤𑁆𑀭𑀺𑀬𑀜𑁆𑀳𑀺 𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀜𑁆𑀘𑀲𑁆𑀲 𑀦𑀢𑁆𑀣𑀻’𑀢𑀺? ‘𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀁’. ‘𑀓𑀲𑁆𑀫𑀸’? ‘𑀲𑀤𑀸 𑀅𑀪𑀸𑀯𑀢𑁄. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀳𑀺 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸𑀯 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀕𑀼𑀴𑁆𑀳𑀁 𑀳𑁄𑀢𑀺. 𑀢𑀣𑀸 𑀇𑀢𑀭𑀲𑁆𑀲 𑀇𑀢𑀭𑀁.

𑀬𑀤𑀺 𑀘 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀪𑀯𑁂𑀬𑁆𑀬, 𑀲𑀤𑀸𑀧𑀺 𑀩𑁆𑀬𑀜𑁆𑀚𑀦𑀤𑁆𑀯𑀬𑀁 𑀢𑀺𑀝𑁆𑀞𑁂𑀬𑁆𑀬. 𑀦 𑀧𑀦 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑀦 𑀢𑀲𑁆𑀲 𑀢𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀁. 𑀓𑀫𑁆𑀫𑀲𑀳𑀸𑀬𑀁 𑀧𑀦 𑀭𑀸𑀕𑀘𑀺𑀢𑁆𑀢𑀫𑁂𑀯𑁂𑀢𑁆𑀣 𑀓𑀸𑀭𑀡𑀁. 𑀬𑀲𑁆𑀫𑀸 𑀘𑀲𑁆𑀲 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀫𑁆𑀧𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀫𑁆𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀭𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺, 𑀲𑀬𑀁 𑀧𑀦 𑀦 𑀕𑀡𑁆𑀳𑀸𑀢𑀻𑀢𑀺.

𑁬𑁩𑁪. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀳𑁂𑀝𑁆𑀞𑀸 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀯𑀼𑀢𑁆𑀢𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀬𑁄 𑀢𑁂𑀲𑀁 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦𑀲𑁆𑀲 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀲𑀳𑀚𑀸𑀢𑀭𑀽𑀧𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀁 𑀬𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀪𑀽𑀢𑀧𑀤𑀝𑁆𑀞𑀸𑀦𑀦𑁆𑀢𑀺.

𑁬𑁩𑁫. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀢𑀸𑀯 𑀓𑀸𑀬𑁂𑀦 𑀅𑀢𑁆𑀢𑀦𑁄 𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑁂𑀳𑀺𑀧𑀺 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑁂𑀳𑀺 𑀯𑀸 𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀓𑀸𑀬𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀏𑀢𑀸𑀬 𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 ‘𑀯𑀺𑀜𑁆𑀜𑀢𑁆𑀢𑀺’. 𑀲𑀬𑀁 𑀓𑀸𑀬𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺𑀧𑀺 ‘𑀯𑀺𑀜𑁆𑀜𑀢𑁆𑀢𑀺’. ‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀽’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁬𑁧) 𑀆𑀕𑀢𑁄 𑀘𑁄𑀧𑀦𑀲𑀗𑁆𑀔𑀸𑀢𑁄 𑀓𑀸𑀬𑁄𑀯 𑀯𑀺𑀜𑁆𑀜𑀢𑁆𑀢𑀺 ‘𑀓𑀸𑀬𑀯𑀺𑀜𑁆𑀜𑀢𑁆𑀢𑀺’. 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸, 𑀲𑀬𑀜𑁆𑀘 𑀢𑀣𑀸 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀺 ‘𑀓𑀸𑀬𑀯𑀺𑀜𑁆𑀜𑀢𑁆𑀢𑀺’.

𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸𑀢𑀺𑀆𑀤𑀻𑀲𑀼 𑀅𑀝𑁆𑀞𑀳𑀺 𑀓𑀸𑀫𑀸𑀯𑀘𑀭𑁂𑀳𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀘𑀸𑀢𑀺 𑀦𑀯𑀳𑀺 𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸, 𑀤𑁆𑀯𑀸𑀤𑀲𑀳𑀺𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸, 𑀅𑀝𑁆𑀞𑀳𑀺 𑀫𑀳𑀸𑀓𑀺𑀭𑀺𑀬𑁂𑀳𑀺 𑀤𑁆𑀯𑀻𑀳𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑁂𑀳𑀺 𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑁂𑀦 𑀏𑀓𑁂𑀦 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑁂𑀦𑀸𑀢𑀺 𑀏𑀓𑀸𑀤𑀲𑀳𑀺 𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸. 𑀇𑀢𑁄 𑀅𑀜𑁆𑀜𑀸𑀦𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀁 𑀦 𑀚𑀦𑁂𑀦𑁆𑀢𑀺. 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀏𑀢𑁆𑀢𑀓𑁂𑀳𑁂𑀯 𑀘𑀺𑀢𑁆𑀢𑁂𑀳𑀺 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀻𑀢𑀺 𑀏𑀢𑁂𑀲𑀁 𑀓𑀼𑀲𑀮𑀸𑀤𑀻𑀦𑀁 𑀯𑀲𑁂𑀦 𑀢𑀻𑀳𑀺 𑀧𑀤𑁂𑀳𑀺 ‘𑀳𑁂𑀢𑀼𑀢𑁄’ 𑀤𑀲𑁆𑀲𑀺𑀢𑀸.

𑀇𑀤𑀸𑀦𑀺 𑀙𑀳𑀺 𑀧𑀤𑁂𑀳𑀺 ‘𑀨𑀮𑀢𑁄’ 𑀤𑀲𑁆𑀲𑁂𑀢𑀼𑀁 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀫𑀸𑀤𑀬𑁄 𑀳𑀺 𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀨𑀮𑀁 𑀦𑀸𑀫. 𑀢𑀢𑁆𑀣 ‘𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲𑀸’𑀢𑀺 𑀧𑀼𑀭𑀢𑁄 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑀲𑁆𑀲. 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀙𑀢𑁄 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲. 𑀆𑀮𑁄𑀓𑁂𑀦𑁆𑀢𑀲𑁆𑀲𑀸𑀢𑀺 𑀉𑀚𑀼𑀓𑀁 𑀧𑁂𑀓𑁆𑀔𑀦𑁆𑀢𑀲𑁆𑀲. 𑀯𑀺𑀮𑁄𑀓𑁂𑀦𑁆𑀢𑀲𑁆𑀲𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑁂𑀓𑁆𑀔𑀦𑁆𑀢𑀲𑁆𑀲. 𑀲𑀫𑀺𑀜𑁆𑀚𑁂𑀦𑁆𑀢𑀲𑁆𑀲𑀸𑀢𑀺 𑀲𑀦𑁆𑀥𑀬𑁄 𑀲𑀗𑁆𑀓𑁄𑀘𑁂𑀦𑁆𑀢𑀲𑁆𑀲. 𑀧𑀲𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀲𑀦𑁆𑀥𑀬𑁄 𑀧𑀝𑀺𑀧𑀡𑀸𑀫𑁂𑀦𑁆𑀢𑀲𑁆𑀲.

𑀇𑀤𑀸𑀦𑀺 𑀙𑀳𑀺 𑀧𑀤𑁂𑀳𑀺 ‘𑀲𑀪𑀸𑀯𑀢𑁄’ 𑀤𑀲𑁆𑀲𑁂𑀢𑀼𑀁 𑀓𑀸𑀬𑀲𑁆𑀲 𑀣𑀫𑁆𑀪𑀦𑀸𑀢𑀺 𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘𑀓𑀸𑀬𑀲𑁆𑀲𑀸’𑀢𑀺 𑀲𑀭𑀻𑀭𑀲𑁆𑀲. 𑀓𑀸𑀬𑀁 𑀣𑀫𑁆𑀪𑁂𑀢𑁆𑀯𑀸 𑀣𑀤𑁆𑀥𑀁 𑀓𑀭𑁄𑀢𑀻𑀢𑀺 𑀣𑀫𑁆𑀪𑀦𑀸. 𑀢𑀫𑁂𑀯 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑁂𑀢𑁆𑀯𑀸 𑀲𑀦𑁆𑀣𑀫𑁆𑀪𑀦𑀸𑀢𑀺 𑀆𑀳. 𑀩𑀮𑀯𑀢𑀭𑀸 𑀯𑀸 𑀣𑀫𑁆𑀪𑀦𑀸 ‘𑀲𑀦𑁆𑀣𑀫𑁆𑀪𑀦𑀸’. 𑀲𑀦𑁆𑀣𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀲𑀦𑁆𑀣𑀫𑁆𑀪𑀺𑀢𑀪𑀸𑀯𑁄. 𑀯𑀺𑀜𑁆𑀜𑀸𑀧𑀦𑀯𑀲𑁂𑀦 𑀯𑀺𑀜𑁆𑀜𑀢𑁆𑀢𑀺. 𑀯𑀺𑀜𑁆𑀜𑀸𑀧𑀦𑀸𑀢𑀺 𑀯𑀺𑀜𑁆𑀜𑀸𑀧𑀦𑀸𑀓𑀸𑀭𑁄. 𑀯𑀺𑀜𑁆𑀜𑀸𑀧𑀺𑀢𑀪𑀸𑀯𑁄 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀳𑁂𑀝𑁆𑀞𑀸 𑀤𑁆𑀯𑀸𑀭𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀢𑀣𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀁.

𑁬𑁩𑁬. 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀤𑀲𑁆𑀲 𑀧𑀦 𑀦𑀺𑀤𑁆𑀤𑁂𑀲𑀧𑀤𑀸𑀦𑀜𑁆𑀘 𑀅𑀢𑁆𑀣𑁄 𑀢𑀢𑁆𑀣 𑀦 𑀯𑀼𑀢𑁆𑀢𑁄, 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀯𑀸𑀘𑀸𑀬 𑀅𑀢𑁆𑀢𑀦𑁄 𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑁂𑀳𑀺𑀧𑀺 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑁂𑀳𑀺 𑀯𑀸 𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺, 𑀯𑀘𑀻𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀏𑀢𑀸𑀬 𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀲𑀬𑀜𑁆𑀘 𑀯𑀘𑀻𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺𑀧𑀺 𑀯𑀺𑀜𑁆𑀜𑀢𑁆𑀢𑀺. ‘‘𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁬𑁧) 𑀆𑀕𑀢𑀸 𑀘𑁄𑀧𑀦𑀲𑀗𑁆𑀔𑀸𑀢𑀸 𑀯𑀘𑀻 𑀏𑀯 𑀯𑀺𑀜𑁆𑀜𑀢𑁆𑀢𑀺 ‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺’. 𑀯𑀘𑀻𑀖𑁄𑀲𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸 𑀲𑀬𑀜𑁆𑀘 𑀢𑀣𑀸𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀺 ‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺’. 𑀯𑀸𑀘𑀸 𑀕𑀺𑀭𑀸𑀢𑀺𑀆𑀤𑀻𑀲𑀼 𑀯𑀼𑀘𑁆𑀘𑀢𑀻𑀢𑀺 ‘𑀯𑀸𑀘𑀸’. 𑀕𑀺𑀭𑀺𑀬𑀢𑀻𑀢𑀺 ‘𑀕𑀺𑀭𑀸’. 𑀩𑁆𑀬𑀧𑁆𑀧𑀣𑁄𑀢𑀺 𑀯𑀸𑀓𑁆𑀬𑀪𑁂𑀤𑁄. 𑀯𑀸𑀓𑁆𑀬𑀜𑁆𑀘 𑀢𑀁 𑀧𑀣𑁄 𑀘 𑀅𑀢𑁆𑀣𑀁 𑀜𑀸𑀢𑀼𑀓𑀸𑀫𑀸𑀦𑀁 𑀜𑀸𑀧𑁂𑀢𑀼𑀓𑀸𑀫𑀸𑀦𑀜𑁆𑀘𑀸𑀢𑀺𑀧𑀺 ‘𑀩𑁆𑀬𑀧𑁆𑀧𑀣𑁄’. 𑀉𑀤𑀻𑀭𑀺𑀬𑀢𑀻𑀢𑀺 𑀉𑀤𑀻𑀭𑀡𑀁. 𑀖𑀼𑀲𑁆𑀲𑀢𑀻𑀢𑀺 𑀖𑁄𑀲𑁄. 𑀓𑀭𑀺𑀬𑀢𑀻𑀢𑀺 𑀓𑀫𑁆𑀫𑀁. 𑀖𑁄𑀲𑁄𑀯 𑀓𑀫𑁆𑀫𑀁 𑀖𑁄𑀲𑀓𑀫𑁆𑀫𑀁. 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀢𑁄 𑀖𑁄𑀲𑁄𑀢𑀺 𑀅𑀢𑁆𑀣𑁄. 𑀯𑀘𑀺𑀬𑀸 𑀪𑁂𑀤𑁄 𑀯𑀘𑀻𑀪𑁂𑀤𑁄. 𑀲𑁄 𑀧𑀦 ‘𑀦 𑀪𑀗𑁆𑀕𑁄, 𑀧𑀪𑁂𑀤𑀕𑀢𑀸 𑀯𑀸𑀘𑀸 𑀏𑀯𑀸’𑀢𑀺 𑀜𑀸𑀧𑀦𑀢𑁆𑀣𑀁 𑀯𑀸𑀘𑀸 𑀯𑀘𑀻𑀪𑁂𑀤𑁄𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 ‘𑀲𑀤𑁆𑀤𑀯𑀸𑀘𑀸𑀯’ 𑀤𑀲𑁆𑀲𑀺𑀢𑀸. 𑀇𑀤𑀸𑀦𑀺 𑀢𑀸𑀬 𑀯𑀸𑀘𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀲𑀪𑀸𑀯𑀢𑁄 𑀢𑀁 𑀤𑀲𑁆𑀲𑁂𑀢𑀼𑀁 𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀤𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀤𑁆𑀯𑀢𑁆𑀢𑀺𑀁𑀲 𑀙𑀩𑁆𑀩𑀻𑀲 𑀏𑀓𑀽𑀦𑀯𑀻𑀲𑀢𑀺 𑀲𑁄𑀴𑀲 𑀧𑀘𑁆𑀙𑀺𑀫𑀸𑀦𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀤𑁆𑀯𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀳𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀭𑀺𑀬𑀸𑀧𑀣𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺, 𑀤𑀼𑀯𑀺𑀥𑀫𑁆𑀧𑀺 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀦𑁆𑀢𑀺. 𑀙𑀩𑁆𑀩𑀻𑀲𑀢𑀺 𑀯𑀺𑀜𑁆𑀜𑀢𑁆𑀢𑀺𑀫𑁂𑀯 𑀦 𑀚𑀦𑁂𑀦𑁆𑀢𑀺, 𑀇𑀢𑀭𑀤𑁆𑀯𑀬𑀁 𑀓𑀭𑁄𑀦𑁆𑀢𑀺. 𑀏𑀓𑀽𑀦𑀯𑀻𑀲𑀢𑀺 𑀭𑀽𑀧𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀢𑀭𑀤𑁆𑀯𑀬𑀁 𑀦 𑀓𑀭𑁄𑀦𑁆𑀢𑀺. 𑀲𑁄𑀴𑀲 𑀇𑀫𑁂𑀲𑀼 𑀢𑀻𑀲𑀼 𑀏𑀓𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺.

𑀢𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯 𑀓𑀸𑀫𑀸𑀯𑀘𑀭𑀢𑁄 𑀅𑀝𑁆𑀞 𑀓𑀼𑀲𑀮𑀸𑀦𑀺, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺, 𑀓𑀺𑀭𑀺𑀬𑀢𑁄 𑀤𑀲 𑀘𑀺𑀢𑁆𑀢𑀸𑀦𑀺, 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁, 𑀔𑀻𑀡𑀸𑀲𑀯𑀸𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀦𑁆𑀢𑀺. 𑀙𑀩𑁆𑀩𑀻𑀲𑀸𑀢𑀺 𑀭𑀽𑀧𑀸𑀯𑀘𑀭𑀢𑁄 𑀧𑀜𑁆𑀘 𑀓𑀼𑀲𑀮𑀸𑀦𑀺, 𑀧𑀜𑁆𑀘 𑀓𑀺𑀭𑀺𑀬𑀸𑀦𑀺, 𑀅𑀭𑀽𑀧𑀸𑀯𑀘𑀭𑀢𑁄 𑀘𑀢𑁆𑀢𑀸𑀭𑀺 𑀓𑀼𑀲𑀮𑀸𑀦𑀺, 𑀘𑀢𑁆𑀢𑀸𑀭𑀺 𑀓𑀺𑀭𑀺𑀬𑀸𑀦𑀺, 𑀘𑀢𑁆𑀢𑀸𑀭𑀺 𑀫𑀕𑁆𑀕𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀨𑀮𑀘𑀺𑀢𑁆𑀢𑀸𑀦𑀻𑀢𑀺. 𑀏𑀓𑀽𑀦𑀯𑀻𑀲𑀢𑀻𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀢𑁄 𑀏𑀓𑀸𑀤𑀲, 𑀅𑀓𑀼𑀲𑀮𑀯𑀺𑀧𑀸𑀓𑀢𑁄 𑀤𑁆𑀯𑁂, 𑀓𑀺𑀭𑀺𑀬𑀢𑁄 𑀓𑀺𑀭𑀺𑀬𑀫𑀦𑁄𑀥𑀸𑀢𑀼, 𑀭𑀽𑀧𑀸𑀯𑀘𑀭𑀢𑁄 𑀧𑀜𑁆𑀘 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀻𑀢𑀺. 𑀲𑁄𑀴𑀲𑀸𑀢𑀺 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀁, 𑀅𑀭𑀽𑀧𑁂 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀻𑀢𑀺. 𑀇𑀫𑀸𑀦𑀺 𑀲𑁄𑀴𑀲 𑀭𑀽𑀧𑀺𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀻𑀲𑀼 𑀏𑀓𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀅𑀭𑀽𑀧𑁂 𑀉𑀧𑁆𑀧𑀦𑁆𑀦𑀸𑀦𑀺 𑀅𑀦𑁄𑀓𑀸𑀲𑀕𑀢𑀢𑁆𑀢𑀸 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀦 𑀢𑀸𑀦𑁂𑀯, 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄𑀧𑀺.

𑁬𑁩𑁭. 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀦 𑀓𑀲𑁆𑀲𑀢𑀺, 𑀦 𑀦𑀺𑀓𑀲𑁆𑀲𑀢𑀺, 𑀓𑀲𑀺𑀢𑀼𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀸 𑀪𑀺𑀦𑁆𑀤𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸𑀢𑀺 𑀆𑀓𑀸𑀲𑁄. 𑀆𑀓𑀸𑀲𑁄𑀯 𑀆𑀓𑀸𑀲𑀕𑀢𑀁, 𑀔𑁂𑀴𑀕𑀢𑀸𑀤𑀺 𑀯𑀺𑀬. 𑀆𑀓𑀸𑀲𑁄𑀢𑀺 𑀯𑀸 𑀕𑀢𑀦𑁆𑀢𑀺 ‘𑀆𑀓𑀸𑀲𑀕𑀢𑀁’. 𑀦 𑀳𑀜𑁆𑀜𑀢𑀻𑀢𑀺 𑀅𑀖𑀁, 𑀅𑀖𑀝𑁆𑀝𑀦𑀻𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀖𑀫𑁂𑀯 𑀅𑀖𑀕𑀢𑀁. 𑀙𑀺𑀤𑁆𑀤𑀝𑁆𑀞𑁂𑀦 𑀯𑀺𑀯𑀭𑁄. 𑀯𑀺𑀯𑀭𑁄𑀯 𑀯𑀺𑀯𑀭𑀕𑀢𑀁. 𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻𑀢𑀺 𑀏𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀁 𑀦𑀺𑀚𑁆𑀚𑀝𑀸𑀓𑀸𑀲𑀁𑀯 𑀓𑀣𑀺𑀢𑀁. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀸 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀧𑀭𑀺𑀬𑀦𑁆𑀢𑀧𑁆𑀧𑀓𑀸𑀲𑀦𑀭𑀲𑀸, 𑀭𑀽𑀧𑀫𑀭𑀺𑀬𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑀸, 𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀽𑀧𑁂𑀲𑀼 ‘𑀇𑀤𑀫𑀺𑀢𑁄 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬’𑀦𑁆𑀢𑀺 𑀘 𑀳𑁄𑀢𑀺.

𑁬𑁩𑁮. 𑀇𑀢𑁄 𑀧𑀭𑁂 𑀭𑀽𑀧𑀲𑁆𑀲𑀮𑀳𑀼𑀢𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑀸 𑀘𑀺𑀢𑁆𑀢𑀲𑁆𑀲𑀮𑀳𑀼𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑁆𑀣 𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀸𑀦𑀁 𑀕𑀭𑀼𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀅𑀣𑀤𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀸𑀦𑀁 𑀣𑀤𑁆𑀥𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀼𑀤𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸, 𑀅𑀓𑀫𑁆𑀫𑀜𑁆𑀜𑀢𑀸𑀯𑀺𑀦𑁄𑀤𑀦𑀭𑀲𑀸, 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀜𑁆𑀜𑀭𑀽𑀧𑀧𑀤𑀝𑁆𑀞𑀸𑀦𑀸.

𑀏𑀢𑀸 𑀧𑀦 𑀢𑀺𑀲𑁆𑀲𑁄 𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑀳𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁄 𑀅𑀭𑁄𑀕𑀺𑀦𑁄 𑀯𑀺𑀬 𑀭𑀽𑀧𑀸𑀦𑀁 𑀮𑀳𑀼𑀪𑀸𑀯𑁄, 𑀅𑀤𑀦𑁆𑀥𑀢𑀸𑀮𑀳𑀼𑀧𑀭𑀺𑀯𑀢𑁆𑀢𑀺𑀧𑁆𑀧𑀓𑀸𑀭𑁄, 𑀭𑀽𑀧𑀤𑀦𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 ‘𑀭𑀽𑀧𑀲𑁆𑀲𑀮𑀳𑀼𑀢𑀸’. 𑀬𑁄 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑁆𑀲𑁂𑀯 𑀭𑀽𑀧𑀸𑀦𑀁 𑀫𑀼𑀤𑀼𑀪𑀸𑀯𑁄 𑀲𑀩𑁆𑀩𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀲𑀼 𑀲𑀭𑀲𑀯𑀢𑁆𑀢𑀦𑀪𑀸𑀯𑁄 𑀯𑀲𑀯𑀢𑁆𑀢𑀦𑀪𑀸𑀯𑀫𑀤𑁆𑀤𑀯𑀧𑁆𑀧𑀓𑀸𑀭𑁄 𑀭𑀽𑀧𑀣𑀤𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 ‘𑀭𑀽𑀧𑀲𑁆𑀲 𑀫𑀼𑀤𑀼𑀢𑀸’. 𑀬𑁄 𑀧𑀦 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲𑁂𑀯 𑀭𑀽𑀧𑀸𑀦𑀁 𑀓𑀫𑁆𑀫𑀜𑁆𑀜𑀪𑀸𑀯𑁄 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀪𑀸𑀯𑀧𑁆𑀧𑀓𑀸𑀭𑁄 𑀲𑀭𑀻𑀭𑀓𑀺𑀭𑀺𑀬𑀸𑀦𑀁 𑀅𑀦𑀦𑀼𑀓𑀽𑀮𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 ‘𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸’𑀢𑀺. 𑀏𑀯𑀫𑁂𑀢𑀸𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀆𑀳𑀸𑀭𑀸𑀤𑀬𑁄𑀯 𑀓𑀭𑁄𑀦𑁆𑀢𑀺. 𑀢𑀣𑀸 𑀳𑀺 𑀬𑁄𑀕𑀺𑀦𑁄 ‘𑀅𑀚𑁆𑀚 𑀅𑀫𑁆𑀳𑁂𑀳𑀺 𑀪𑁄𑀚𑀦𑀲𑀧𑁆𑀧𑀸𑀬𑀁 𑀮𑀤𑁆𑀥𑀁, 𑀓𑀸𑀬𑁄 𑀦𑁄 𑀮𑀳𑀼 𑀫𑀼𑀤𑀼 𑀓𑀫𑁆𑀫𑀜𑁆𑀜𑁄’𑀢𑀺 𑀯𑀤𑀦𑁆𑀢𑀺. ‘𑀅𑀚𑁆𑀚 𑀉𑀢𑀼𑀲𑀧𑁆𑀧𑀸𑀬𑀁 𑀮𑀤𑁆𑀥𑀁, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁, 𑀓𑀸𑀬𑁄 𑀦𑁄 𑀮𑀳𑀼 𑀫𑀼𑀤𑀼 𑀓𑀫𑁆𑀫𑀜𑁆𑀜𑁄’𑀢𑀺 𑀯𑀤𑀦𑁆𑀢𑀻𑀢𑀺.

𑁬𑁪𑁧. 𑀉𑀧𑀘𑀬𑀲𑀦𑁆𑀢𑀢𑀺𑀦𑀺𑀤𑁆𑀤𑁂𑀲𑁂𑀲𑀼 𑀆𑀬𑀢𑀦𑀸𑀦𑀦𑁆𑀢𑀺 𑀅𑀟𑁆𑀠𑁂𑀓𑀸𑀤𑀲𑀦𑁆𑀦𑀁 𑀭𑀽𑀧𑀸𑀬𑀢𑀦𑀸𑀦𑀁. 𑀆𑀘𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄𑀢𑀺 𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁, 𑀲𑁄𑀯 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀦𑀸𑀫 𑀳𑁄𑀢𑀺; 𑀯𑀟𑁆𑀠𑀻𑀢𑀺 𑀅𑀢𑁆𑀣𑁄. 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻𑀢𑀺 𑀬𑀸 𑀏𑀯𑀁 𑀉𑀧𑀘𑀺𑀢𑀸𑀦𑀁 𑀭𑀽𑀧𑀸𑀦𑀁 𑀯𑀟𑁆𑀠𑀺, 𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀧𑀯𑀢𑁆𑀢𑀺𑀓𑀸𑀮𑁂 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀦𑀸𑀫 𑀳𑁄𑀢𑀺; 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀤𑀺𑀢𑀻𑀭𑁂 𑀔𑀢𑀓𑀽𑀧𑀲𑁆𑀫𑀺𑀜𑁆𑀳𑀺 𑀉𑀤𑀓𑀼𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀆𑀘𑀬𑁄, 𑀦𑀺𑀩𑁆𑀩𑀢𑁆𑀢𑀺; 𑀧𑀭𑀺𑀧𑀼𑀡𑁆𑀡𑀓𑀸𑀮𑁄 𑀯𑀺𑀬 𑀉𑀧𑀘𑀬𑁄, 𑀯𑀟𑁆𑀠𑀺; 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁄 𑀯𑀺𑀬 𑀲𑀦𑁆𑀢𑀢𑀺, 𑀧𑀯𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺? 𑀆𑀬𑀢𑀦𑁂𑀦 𑀳𑀺 𑀆𑀘𑀬𑁄 𑀓𑀣𑀺𑀢𑁄, 𑀆𑀘𑀬𑁂𑀦 𑀆𑀬𑀢𑀦𑀁 𑀓𑀣𑀺𑀢𑀁. 𑀆𑀘𑀬𑁄𑀯 𑀓𑀣𑀺𑀢𑁄 𑀆𑀬𑀢𑀦𑀫𑁂𑀯 𑀓𑀣𑀺𑀢𑀁. 𑀏𑀯𑀫𑁆𑀧𑀺 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺? 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀸𑀦𑀁 𑀆𑀘𑀬𑁄 𑀉𑀧𑀘𑀬𑁄 𑀦𑀺𑀩𑁆𑀩𑀢𑁆𑀢𑀺 𑀯𑀟𑁆𑀠𑀺 𑀓𑀣𑀺𑀢𑀸. 𑀅𑀢𑁆𑀣𑀢𑁄 𑀳𑀺 𑀉𑀪𑀬𑀫𑁆𑀧𑁂𑀢𑀁 𑀚𑀸𑀢𑀺𑀭𑀽𑀧𑀲𑁆𑀲𑁂𑀯 𑀅𑀥𑀺𑀯𑀘𑀦𑀁. 𑀆𑀓𑀸𑀭𑀦𑀸𑀦𑀢𑁆𑀢𑁂𑀦 𑀧𑀦 𑀯𑁂𑀦𑁂𑀬𑁆𑀬𑀯𑀲𑁂𑀦 𑀘 𑀉𑀧𑀘𑀬𑁄 𑀲𑀦𑁆𑀢𑀢𑀻𑀢𑀺 𑀉𑀤𑁆𑀤𑁂𑀲𑀤𑁂𑀲𑀦𑀁 𑀓𑀢𑁆𑀯𑀸 𑀬𑀲𑁆𑀫𑀸 𑀏𑀢𑁆𑀣 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀺𑀤𑁆𑀤𑁂𑀲𑁂 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀘 𑀉𑀪𑀬𑀫𑁆𑀧𑁂𑀢𑀁 𑀚𑀸𑀢𑀺𑀭𑀽𑀧𑀲𑁆𑀲𑁂𑀯 𑀅𑀥𑀺𑀯𑀘𑀦𑀁 𑀢𑀲𑁆𑀫𑀸 𑀏𑀢𑁆𑀣 𑀆𑀘𑀬𑀮𑀓𑁆𑀔𑀡𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀧𑀼𑀩𑁆𑀩𑀦𑁆𑀢𑀢𑁄 𑀭𑀽𑀧𑀸𑀦𑀁 𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄, 𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄. 𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀅𑀦𑀼𑀧𑁆𑀧𑀩𑀦𑁆𑀥𑀭𑀲𑀸, 𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑀼𑀧𑁆𑀧𑀩𑀦𑁆𑀥𑀭𑀽𑀧𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁪𑁩. 𑀚𑀭𑀢𑀸𑀦𑀺𑀤𑁆𑀤𑁂𑀲𑁂 𑀚𑀻𑀭𑀡𑀓𑀯𑀲𑁂𑀦 𑀚𑀭𑀸; 𑀅𑀬𑀫𑁂𑀢𑁆𑀣 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀸𑀓𑀸𑀭𑁄 𑀚𑀻𑀭𑀡𑀢𑀸. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸. 𑀅𑀬𑀜𑁆𑀳𑀺 ‘𑀚𑀭𑀸’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀪𑀸𑀯𑀢𑁄 𑀤𑀻𑀧𑀺𑀢𑀸; 𑀢𑁂𑀦𑀲𑁆𑀲𑀸𑀬𑀁 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. ‘𑀚𑀻𑀭𑀡𑀢𑀸’𑀢𑀺 𑀇𑀫𑀺𑀦𑀸 𑀆𑀓𑀸𑀭𑀢𑁄; 𑀢𑁂𑀦𑀲𑁆𑀲𑀸𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀤𑀦𑁆𑀢𑀦𑀔𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀧𑀸𑀮𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀮𑁄𑀫𑀸𑀦𑀁 𑀧𑀮𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀯𑀮𑀺𑀢𑁆𑀢𑀘𑀢𑀸𑀢𑀺 𑀇𑀫𑀺𑀦𑀸 𑀫𑀁𑀲𑀁 𑀫𑀺𑀮𑀸𑀧𑁂𑀢𑁆𑀯𑀸 𑀢𑀘𑁂 𑀯𑀮𑀺𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀸 𑀇𑀫𑁂 ‘𑀔𑀡𑁆𑀟𑀺𑀘𑁆𑀘’𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀢𑁂𑀳𑀺 𑀇𑀫𑁂𑀲𑀁 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸. 𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀁𑀪𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺, 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸. 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺.

𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄𑀢𑀺 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀬𑁂𑀯 𑀅𑀪𑀺𑀩𑁆𑀬𑀢𑁆𑀢𑀸𑀬 𑀆𑀬𑀼𑀓𑁆𑀔𑀬𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀲𑀜𑁆𑀜𑀺𑀢𑀸𑀬 𑀧𑀓𑀢𑀺𑀬𑀸 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀺𑀫𑁂 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀢𑀲𑁆𑀫𑀸 𑀚𑀭𑀸 ‘𑀆𑀬𑀼𑀦𑁄 𑀲𑀁𑀳𑀸𑀦𑀻’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀘 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺, 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀴𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺, 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’𑀢𑀺𑀧𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸.

𑀲𑀸 𑀧𑀦𑀸𑀬𑀁 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀚𑀭𑀸 𑀧𑀸𑀓𑀝𑀸 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀪𑀸𑀯𑀸𑀤𑀺𑀤𑀲𑁆𑀲𑀦𑀢𑁄 𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 𑀧𑀸𑀓𑀝𑀚𑀭𑀸 𑀦𑀸𑀫. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀚𑀭𑀸 𑀢𑀸𑀤𑀺𑀲𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫. 𑀧𑀼𑀦 𑀅𑀯𑀻𑀘𑀺 𑀲𑀯𑀻𑀘𑀻𑀢𑀺 𑀏𑀯𑀫𑁆𑀧𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀫𑀡𑀺𑀓𑀦𑀓𑀭𑀚𑀢𑀧𑀯𑀸𑀴𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀦𑀁 𑀯𑀺𑀬, 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀸𑀡𑀻𑀦𑀁 𑀯𑀺𑀬 𑀘, 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀘 𑀅𑀧𑀸𑀡𑀻𑀦𑀁 𑀯𑀺𑀬, 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀅𑀯𑀻𑀘𑀺𑀚𑀭𑀸 𑀦𑀸𑀫; 𑀦𑀺𑀭𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀲𑀯𑀻𑀘𑀺𑀚𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀮𑀓𑁆𑀔𑀡𑀸𑀤𑀺𑀢𑁄𑀧𑀺 𑀭𑀽𑀧𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀚𑀭𑀢𑀸, 𑀉𑀧𑀦𑀬𑀦𑀭𑀲𑀸, 𑀲𑀪𑀸𑀯𑀸𑀦𑀧𑀕𑀫𑁂𑀧𑀺 𑀦𑀯𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬 𑀧𑀭𑀺𑀧𑀘𑁆𑀘𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁪𑁪. 𑀅𑀦𑀺𑀘𑁆𑀘𑀢𑀸𑀦𑀺𑀤𑁆𑀤𑁂𑀲𑁂 𑀔𑀬𑀕𑀫𑀦𑀯𑀲𑁂𑀦 𑀔𑀬𑁄, 𑀯𑀬𑀕𑀫𑀦𑀯𑀲𑁂𑀦 𑀯𑀬𑁄, 𑀪𑀺𑀚𑁆𑀚𑀦𑀯𑀲𑁂𑀦 𑀪𑁂𑀤𑁄. 𑀅𑀣 𑀯𑀸, 𑀬𑀲𑁆𑀫𑀸 𑀢𑀁 𑀧𑀢𑁆𑀯𑀸 𑀭𑀽𑀧𑀁 𑀔𑀻𑀬𑀢𑀺, 𑀯𑁂𑀢𑀺, 𑀪𑀺𑀚𑁆𑀚𑀢𑀺 𑀘, 𑀢𑀲𑁆𑀫𑀸 𑀔𑀻𑀬𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 ‘𑀔𑀬𑁄’, 𑀯𑁂𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 ‘𑀯𑀬𑁄’, 𑀪𑀺𑀚𑁆𑀚𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 ‘𑀪𑁂𑀤𑁄’. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀪𑁂𑀤𑁄𑀯 𑀧𑀭𑀺𑀪𑁂𑀤𑁄. 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦, 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁. 𑀢𑀲𑁆𑀲 𑀪𑀸𑀯𑁄 𑀅𑀦𑀺𑀘𑁆𑀘𑀢𑀸. 𑀅𑀦𑁆𑀢𑀭𑀥𑀸𑀬𑀢𑀺 𑀏𑀢𑁆𑀣𑀸𑀢𑀺 𑀅𑀦𑁆𑀢𑀭𑀥𑀸𑀦𑀁. 𑀫𑀭𑀡𑀜𑁆𑀳𑀺 𑀧𑀢𑁆𑀯𑀸 𑀭𑀽𑀧𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀤𑀲𑁆𑀲𑀦𑀁 𑀕𑀘𑁆𑀙𑀢𑀺. 𑀦 𑀓𑁂𑀯𑀮𑀜𑁆𑀘 𑀭𑀽𑀧𑀫𑁂𑀯, 𑀲𑀩𑁆𑀩𑁂𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀢𑀲𑁆𑀫𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀅𑀦𑀺𑀘𑁆𑀘𑀢𑀸𑀬 𑀇𑀤𑀫𑁂𑀯 𑀮𑀓𑁆𑀔𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀧𑀭𑀺𑀪𑁂𑀤𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀲𑀁𑀲𑀻𑀤𑀦𑀭𑀲𑀸, 𑀔𑀬𑀯𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀺𑀪𑀺𑀚𑁆𑀚𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀳𑁂𑀝𑁆𑀞𑀸 𑀚𑀸𑀢𑀺 𑀕𑀳𑀺𑀢𑀸 𑀚𑀭𑀸 𑀕𑀳𑀺𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀭𑀡𑀁 𑀕𑀳𑀺𑀢𑀁. 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀤𑀺𑀲𑀸. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀢𑀬𑁄 𑀧𑀘𑁆𑀘𑀸𑀫𑀺𑀢𑁆𑀢𑀸 𑀑𑀢𑀸𑀭𑀁 𑀕𑀯𑁂𑀲𑀫𑀸𑀦𑀸 𑀯𑀺𑀘𑀭𑁂𑀬𑁆𑀬𑀼𑀁. 𑀢𑁂𑀲𑀼 𑀏𑀓𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀝𑀯𑀺𑀧𑀯𑁂𑀲𑀦𑀁 𑀫𑀬𑁆𑀳𑀁 𑀪𑀸𑀭𑁄 𑀳𑁄𑀢𑀽’𑀢𑀺. 𑀤𑀼𑀢𑀺𑀬𑁄 ‘𑀅𑀝𑀯𑀺𑀕𑀢𑀓𑀸𑀮𑁂 𑀧𑁄𑀣𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑀦𑀁 𑀫𑀬𑁆𑀳𑀁 𑀪𑀸𑀭𑁄’𑀢𑀺. 𑀢𑀢𑀺𑀬𑁄 ‘𑀧𑀣𑀯𑀺𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀦𑀁 𑀫𑀬𑁆𑀳𑀁 𑀪𑀸𑀭𑁄’𑀢𑀺. 𑀏𑀯𑀭𑀽𑀧𑀸 𑀇𑀫𑁂 𑀚𑀸𑀢𑀺 𑀆𑀤𑀬𑁄. 𑀦𑀻𑀳𑀭𑀺𑀢𑁆𑀯𑀸 𑀅𑀝𑀯𑀺𑀧𑀯𑁂𑀲𑀦𑀧𑀘𑁆𑀘𑀸𑀫𑀺𑀢𑁆𑀢𑀲𑀤𑀺𑀲𑀸 𑀳𑁂𑀢𑁆𑀣 𑀚𑀸𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄. 𑀅𑀝𑀯𑀺𑀕𑀢𑀁 𑀧𑁄𑀣𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑀦𑀧𑀘𑁆𑀘𑀸𑀫𑀺𑀢𑁆𑀢𑀲𑀤𑀺𑀲𑀸 𑀚𑀭𑀸, 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸𑀦𑀁 𑀤𑀼𑀩𑁆𑀩𑀮𑀧𑀭𑀸𑀥𑀻𑀦𑀫𑀜𑁆𑀘𑀧𑀭𑀸𑀬𑀡𑀪𑀸𑀯𑀓𑀭𑀡𑀢𑁄. 𑀧𑀣𑀯𑀺𑀕𑀢𑀲𑁆𑀲 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀤𑀺𑀲𑀁 𑀫𑀭𑀡𑀁, 𑀚𑀭𑀸𑀧𑁆𑀧𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀧𑀸𑀧𑀦𑀢𑁄𑀢𑀺.

𑁬𑁪𑁫. 𑀓𑀩𑀴𑀻𑀓𑀸𑀭𑀸𑀳𑀸𑀭𑀦𑀺𑀤𑁆𑀤𑁂𑀲𑁂 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄. 𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄. 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀁 𑀯𑀸 𑀆𑀳𑀭𑀢𑀻𑀢𑀺𑀧𑀺 ‘𑀆𑀳𑀸𑀭𑁄’. 𑀏𑀯𑀁 𑀯𑀢𑁆𑀣𑀼𑀯𑀲𑁂𑀦 𑀦𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀯𑀢𑁆𑀣𑀼𑀯𑀲𑁂𑀦𑁂𑀯𑁂𑀢𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀤𑀦𑀸𑀤𑀻𑀦𑀺 𑀳𑀺 𑀨𑀸𑀡𑀺𑀢𑀧𑀭𑀺𑀬𑀦𑁆𑀢𑀸𑀦𑀺 𑀤𑁆𑀯𑀸𑀤𑀲 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀢𑁆𑀣𑀽𑀦𑀺. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺 𑀫𑀽𑀮𑀨𑀮𑀸𑀤𑀻𑀦𑀺 𑀬𑁂𑀯𑀸𑀧𑀦𑀓𑀁 𑀧𑀯𑀺𑀝𑁆𑀞𑀸𑀦𑀺.

𑀇𑀤𑀸𑀦𑀺 𑀢𑀸𑀦𑀺 𑀫𑀽𑀮𑀨𑀮𑀸𑀤𑀻𑀦𑀺 𑀓𑀢𑁆𑀢𑀩𑁆𑀩𑀢𑁄 𑀤𑀲𑁆𑀲𑁂𑀢𑀼𑀁 𑀬𑀫𑁆𑀳𑀺 𑀬𑀫𑁆𑀳𑀺 𑀚𑀦𑀧𑀤𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀼𑀔𑁂𑀦 𑀅𑀲𑀺𑀢𑀩𑁆𑀩𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀫𑀼𑀔𑀸𑀲𑀺𑀬𑀁. 𑀤𑀦𑁆𑀢𑁂𑀳𑀺 𑀯𑀺𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀤𑀦𑁆𑀢𑀯𑀺𑀔𑀸𑀤𑀦𑀁. 𑀕𑀮𑁂𑀦 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀦𑁆𑀢𑀺 𑀕𑀮𑀚𑁆𑀛𑁄𑀳𑀭𑀡𑀻𑀬𑀁. 𑀇𑀤𑀸𑀦𑀺 𑀢𑀁 𑀓𑀺𑀘𑁆𑀘𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀓𑀼𑀘𑁆𑀙𑀺𑀯𑀺𑀢𑁆𑀣𑀫𑁆𑀪𑀦𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀫𑀽𑀮𑀨𑀮𑀸𑀤𑀺 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺 𑀯𑀸 𑀅𑀚𑁆𑀛𑁄𑀳𑀝𑀁 𑀓𑀼𑀘𑁆𑀙𑀺𑀁 𑀯𑀺𑀢𑁆𑀣𑀫𑁆𑀪𑁂𑀢𑀺. 𑀇𑀤𑀫𑀲𑁆𑀲 𑀓𑀺𑀘𑁆𑀘𑀁. 𑀬𑀸𑀬 𑀑𑀚𑀸𑀬 𑀲𑀢𑁆𑀢𑀸 𑀬𑀸𑀧𑁂𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀲𑀩𑁆𑀩𑀧𑀤𑁂𑀳𑀺 𑀲𑀯𑀢𑁆𑀣𑀼𑀓𑀁 𑀆𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀝𑁆𑀝𑀺𑀢𑀑𑀚𑀫𑁂𑀯 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑁂𑀢𑁆𑀣 𑀯𑀢𑁆𑀣𑀼𑀲𑁆𑀲 𑀓𑀺𑀘𑁆𑀘𑀁? 𑀓𑀺𑀁 𑀑𑀚𑀸𑀬? 𑀧𑀭𑀺𑀲𑁆𑀲𑀬𑀳𑀭𑀡𑀧𑀸𑀮𑀦𑀸𑀦𑀺. 𑀯𑀢𑁆𑀣𑀼𑀳𑀺 𑀧𑀭𑀺𑀲𑁆𑀲𑀬𑀁 𑀳𑀭𑀢𑀺 𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀑𑀚𑀸 𑀧𑀸𑀮𑁂𑀢𑀺 𑀧𑀭𑀺𑀲𑁆𑀲𑀬𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑁆𑀯𑁂𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀸𑀮𑁂𑀢𑀼𑀫𑁆𑀧𑀺 𑀲𑀓𑁆𑀓𑁄𑀦𑁆𑀢𑀺 𑀧𑀭𑀺𑀲𑁆𑀲𑀬𑀫𑁆𑀧𑀺 𑀳𑀭𑀺𑀢𑀼𑀁. 𑀓𑁄 𑀧𑀦𑁂𑀲 𑀧𑀭𑀺𑀲𑁆𑀲𑀬𑁄 𑀦𑀸𑀫? 𑀓𑀫𑁆𑀫𑀚𑀢𑁂𑀚𑁄. 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀜𑁆𑀳𑀺 𑀑𑀤𑀦𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀢𑀺, 𑀓𑀫𑁆𑀫𑀚𑀢𑁂𑀚𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀤𑀭𑀧𑀝𑀮𑀁 𑀕𑀡𑁆𑀳𑀸𑀢𑀺, ‘𑀙𑀸𑀢𑁄𑀫𑁆𑀳𑀺, 𑀆𑀳𑀸𑀭𑀁 𑀫𑁂 𑀤𑁂𑀣𑀸’𑀢𑀺 𑀯𑀤𑀸𑀧𑁂𑀢𑀺. 𑀪𑀼𑀢𑁆𑀢𑀓𑀸𑀮𑁂 𑀉𑀤𑀭𑀧𑀝𑀮𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀺. 𑀅𑀣 𑀲𑀢𑁆𑀢𑁄 𑀏𑀓𑀕𑁆𑀕𑁄 𑀳𑁄𑀢𑀺.

𑀬𑀣𑀸 𑀳𑀺 𑀙𑀸𑀬𑀸𑀭𑀓𑁆𑀔𑀲𑁄 𑀙𑀸𑀬𑀁 𑀧𑀯𑀺𑀝𑁆𑀞𑀁 𑀕𑀳𑁂𑀢𑁆𑀯𑀸 𑀤𑁂𑀯𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑁂 𑀫𑁄𑀤𑀦𑁆𑀢𑁄 𑀙𑀸𑀢𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀲𑀻𑀲𑁂 𑀟𑀁𑀲𑀢𑀺. 𑀲𑁄 𑀟𑀝𑁆𑀞𑀢𑁆𑀢𑀸 𑀯𑀺𑀭𑀯𑀢𑀺. 𑀢𑀁 𑀯𑀺𑀭𑀯𑀁 𑀲𑀼𑀢𑁆𑀯𑀸 ‘𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀏𑀢𑁆𑀣 𑀅𑀢𑁆𑀣𑀻’𑀢𑀺 𑀢𑀢𑁄 𑀢𑀢𑁄 𑀫𑀦𑀼𑀲𑁆𑀲𑀸 𑀆𑀕𑀘𑁆𑀙𑀦𑁆𑀢𑀺. 𑀲𑁄 𑀆𑀕𑀢𑀸𑀕𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀪𑀯𑀦𑁂 𑀫𑁄𑀤𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀙𑀸𑀬𑀸𑀭𑀓𑁆𑀔𑀲𑁄 𑀯𑀺𑀬 𑀳𑀺 𑀓𑀫𑁆𑀫𑀚𑀢𑁂𑀚𑁄, 𑀤𑁂𑀯𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀲𑀢𑁆𑀢𑁄 𑀯𑀺𑀬 𑀉𑀤𑀭𑀧𑀝𑀮𑀁, 𑀧𑀼𑀦 𑀆𑀕𑀢𑀫𑀦𑀼𑀲𑁆𑀲𑀸 𑀯𑀺𑀬 𑀑𑀤𑀦𑀸𑀤𑀺𑀯𑀢𑁆𑀣𑀼, 𑀑𑀢𑀭𑀺𑀢𑁆𑀯𑀸 𑀲𑀻𑀲𑁂 𑀟𑀁𑀲𑀦𑀁 𑀯𑀺𑀬 𑀓𑀫𑁆𑀫𑀚𑀢𑁂𑀚𑀲𑁆𑀲 𑀯𑀢𑁆𑀣𑀼𑀢𑁄 𑀫𑀼𑀢𑁆𑀢𑀲𑁆𑀲 𑀉𑀤𑀭𑀧𑀝𑀮𑀕𑁆𑀕𑀳𑀡𑀁, 𑀟𑀝𑁆𑀞𑀲𑁆𑀲 𑀯𑀺𑀭𑀯𑀦𑀓𑀸𑀮𑁄 𑀯𑀺𑀬 ‘𑀆𑀳𑀸𑀭𑀁 𑀤𑁂𑀣𑀸’𑀢𑀺 𑀯𑀘𑀦𑀓𑀸𑀮𑁄, 𑀢𑀸𑀬 𑀲𑀜𑁆𑀜𑀸𑀬 𑀆𑀕𑀢𑀸𑀕𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀪𑀯𑀦𑁂 𑀫𑁄𑀤𑀦𑀓𑀸𑀮𑁄 𑀯𑀺𑀬 𑀓𑀫𑁆𑀫𑀚𑀢𑁂𑀚𑁂𑀦 𑀉𑀤𑀭𑀧𑀝𑀮𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀕𑀳𑀺𑀢𑁂 𑀏𑀓𑀕𑁆𑀕𑀘𑀺𑀢𑁆𑀢𑀢𑀸.

𑀢𑀢𑁆𑀣 𑀑𑀴𑀸𑀭𑀺𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀑𑀚𑀸 𑀫𑀦𑁆𑀤𑀸 𑀳𑁄𑀢𑀺. 𑀲𑀼𑀔𑀼𑀫𑁂 𑀩𑀮𑀯𑀢𑀻. 𑀓𑀼𑀤𑁆𑀭𑀽𑀲𑀓𑀪𑀢𑁆𑀢𑀸𑀤𑀻𑀦𑀺 𑀳𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀙𑀸𑀢𑁄 𑀳𑁄𑀢𑀺. 𑀲𑀧𑁆𑀧𑀺𑀆𑀤𑀻𑀦𑀺 𑀧𑀺𑀯𑀺𑀢𑁆𑀯𑀸 𑀞𑀺𑀢𑀲𑁆𑀲 𑀤𑀺𑀯𑀲𑀫𑁆𑀧𑀺 𑀪𑀢𑁆𑀢𑀁 𑀦 𑀭𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀫𑁆𑀪𑀻𑀮𑀸𑀦𑀜𑁆𑀳𑀺 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀫𑁄𑀭𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀓𑀼𑀫𑁆𑀪𑀻𑀮𑀸 𑀓𑀺𑀭 𑀧𑀸𑀲𑀸𑀡𑁂 𑀕𑀺𑀮𑀦𑁆𑀢𑀺. 𑀢𑁂 𑀘 𑀦𑁂𑀲𑀁 𑀓𑀼𑀘𑁆𑀙𑀺𑀧𑁆𑀧𑀢𑁆𑀢𑀸 𑀯𑀺𑀮𑀻𑀬𑀦𑁆𑀢𑀺. 𑀫𑁄𑀭𑀸 𑀲𑀧𑁆𑀧𑀯𑀺𑀘𑁆𑀙𑀺𑀓𑀸𑀤𑀺𑀧𑀸𑀡𑁂 𑀔𑀸𑀤𑀦𑁆𑀢𑀺. 𑀫𑁄𑀭𑀸𑀦𑀁 𑀧𑀦 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀢𑀭𑀘𑁆𑀙𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀢𑀺𑀯𑀲𑁆𑀲𑀙𑀟𑁆𑀟𑀺𑀢𑀸𑀦𑀺 𑀯𑀺𑀲𑀸𑀡𑀸𑀦𑀺 𑀘𑁂𑀯 𑀅𑀝𑁆𑀞𑀻𑀦𑀺 𑀘 𑀔𑀸𑀤𑀦𑁆𑀢𑀺. 𑀢𑀸𑀦𑀺 𑀘 𑀦𑁂𑀲𑀁 𑀔𑁂𑀴𑁂𑀦 𑀢𑁂𑀫𑀺𑀢𑀫𑀢𑁆𑀢𑀸𑀦𑁂𑀯 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀫𑀼𑀤𑀼𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀭𑀘𑁆𑀙𑀸𑀦𑀫𑁆𑀧𑀺 𑀆𑀳𑀸𑀭𑀫𑀼𑀧𑀸𑀤𑀸𑀬 𑀳𑀢𑁆𑀣𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀳𑀺 𑀦𑀸𑀦𑀸𑀭𑀼𑀓𑁆𑀔𑀲𑀸𑀔𑀸𑀤𑀬𑁄 𑀔𑀸𑀤𑀦𑁆𑀢𑀺. 𑀳𑀢𑁆𑀣𑀻𑀦𑀁 𑀆𑀳𑀸𑀭𑀢𑁄 𑀕𑀯𑀬𑀕𑁄𑀓𑀡𑁆𑀡𑀫𑀺𑀕𑀸𑀤𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀦𑀺𑀲𑁆𑀲𑀸𑀭𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀧𑀡𑁆𑀡𑀸𑀤𑀻𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀕𑀼𑀦𑁆𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀅𑀮𑁆𑀮𑀲𑀼𑀓𑁆𑀔𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀲𑀲𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀲𑀸𑀦𑀁 𑀆𑀳𑀸𑀭𑀢𑁄 𑀲𑀓𑀼𑀡𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀓𑀼𑀡𑀸𑀦𑀁 𑀆𑀳𑀸𑀭𑀢𑁄 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑀢𑁄 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑀢𑁄 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑀢𑁄 𑀪𑀼𑀫𑁆𑀫𑀤𑁂𑀯𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀪𑀼𑀫𑁆𑀫𑀤𑁂𑀯𑀸𑀦𑀁 𑀆𑀳𑀸𑀭𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀏𑀯𑀁 𑀬𑀸𑀯 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀆𑀳𑀸𑀭𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑁂𑀲𑀁 𑀧𑀦𑀸𑀳𑀸𑀭𑁄 𑀲𑀼𑀔𑀼𑀫𑁄𑀢𑁆𑀯𑁂𑀯 𑀦𑀺𑀝𑁆𑀞𑀁 𑀧𑀢𑁆𑀢𑁄.

𑀮𑀓𑁆𑀔𑀡𑀸𑀤𑀺𑀢𑁄𑀧𑀺 𑀑𑀚𑀸𑀮𑀓𑁆𑀔𑀡𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀸𑀳𑀭𑀡𑀭𑀲𑁄, 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀓𑀩𑀴𑀁 𑀓𑀢𑁆𑀯𑀸 𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁬𑁪𑁬. 𑀦𑁄𑀉𑀧𑀸𑀤𑀸𑀦𑀺𑀤𑁆𑀤𑁂𑀲𑁂 𑀬𑀣𑀸 𑀉𑀧𑀸𑀤𑀸𑀭𑀽𑀧𑀁 𑀉𑀧𑀸𑀤𑀺𑀬𑀢𑁂𑀯, 𑀦 𑀅𑀜𑁆𑀜𑁂𑀦 𑀉𑀧𑀸𑀤𑀺𑀬𑀢𑀺, 𑀏𑀯𑀫𑁂𑀢𑀁 𑀦 𑀉𑀧𑀸𑀤𑀺𑀬𑀢𑁂𑀯𑀸𑀢𑀺 𑀦𑁄𑀉𑀧𑀸𑀤𑀸.

𑁬𑁪𑁭. 𑀨𑀼𑀲𑀺𑀢𑀩𑁆𑀩𑀦𑁆𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀨𑀼𑀲𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀨𑁄𑀝𑁆𑀞𑀩𑁆𑀩𑀜𑁆𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁. 𑀆𑀧𑁄 𑀘 𑀢𑀁 𑀦𑀺𑀲𑁆𑀲𑀢𑁆𑀢𑀲𑀼𑀜𑁆𑀜𑀢𑀲𑀪𑀸𑀯𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀆𑀧𑁄𑀥𑀸𑀢𑀼. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀻𑀡𑀺 𑀭𑀽𑀧𑀸𑀦𑀺 𑀨𑀼𑀲𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸𑀦𑀺 𑀢𑀲𑁆𑀫𑀸 𑀢𑀸𑀦𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼, 𑀧𑀢𑀺𑀝𑁆𑀞𑀸𑀦𑀭𑀲𑀸, 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑁂𑀚𑁄𑀥𑀸𑀢𑀼 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸, 𑀧𑀭𑀺𑀧𑀸𑀘𑀦𑀭𑀲𑀸, 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀸𑀬𑁄𑀥𑀸𑀢𑀼 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸, 𑀲𑀫𑀼𑀤𑀻𑀭𑀡𑀭𑀲𑀸, 𑀅𑀪𑀺𑀦𑀻𑀳𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀼𑀭𑀺𑀫𑀸 𑀧𑀦 ‘𑀆𑀧𑁄𑀥𑀸𑀢𑀼’ 𑀧𑀕𑁆𑀖𑀭𑀡𑀮𑀓𑁆𑀔𑀡𑀸, 𑀩𑁆𑀭𑀽𑀳𑀦𑀭𑀲𑀸, 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀓𑁂𑀓𑀸 𑀘𑁂𑀢𑁆𑀣 𑀲𑁂𑀲𑀢𑁆𑀢𑀬𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀫𑀼𑀤𑀼𑀓𑀦𑁆𑀢𑀺 𑀅𑀣𑀤𑁆𑀥𑀁. 𑀲𑀡𑁆𑀳𑀦𑁆𑀢𑀺 𑀫𑀝𑁆𑀞𑀁. 𑀨𑀭𑀼𑀲𑀦𑁆𑀢𑀺 𑀔𑀭𑀁. 𑀲𑀼𑀔𑀲𑀫𑁆𑀨𑀲𑁆𑀲𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀧𑀘𑁆𑀘𑀬𑀁 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀁. 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀧𑀘𑁆𑀘𑀬𑀁 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀁. 𑀕𑀭𑀼𑀓𑀦𑁆𑀢𑀺 𑀪𑀸𑀭𑀺𑀬𑀁. 𑀮𑀳𑀼𑀓𑀦𑁆𑀢𑀺 𑀅𑀪𑀸𑀭𑀺𑀬𑀁, 𑀲𑀮𑁆𑀮𑀳𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀕𑀭𑀼𑀓𑀁 𑀮𑀳𑀼𑀓’𑀦𑁆𑀢𑀺 𑀧𑀤𑁂𑀳𑀺 𑀧𑀣𑀯𑀻𑀥𑀸𑀢𑀼 𑀏𑀯 𑀪𑀸𑀚𑀺𑀢𑀸. ‘‘𑀬𑀤𑀸𑀬𑀁 𑀓𑀸𑀬𑁄 𑀆𑀬𑀼𑀲𑀳𑀕𑀢𑁄 𑀘 𑀳𑁄𑀢𑀺 𑀉𑀲𑁆𑀫𑀸𑀲𑀳𑀕𑀢𑁄 𑀘 𑀯𑀺𑀜𑁆𑀜𑀸𑀡𑀲𑀳𑀕𑀢𑁄 𑀘 𑀢𑀤𑀸 𑀮𑀳𑀼𑀢𑀭𑁄 𑀘 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀜𑁆𑀜𑀢𑀭𑁄 𑀘𑀸’’𑀢𑀺 (𑀤𑀻. 𑀦𑀺. 𑁨.𑁪𑁨𑁪) 𑀲𑀼𑀢𑁆𑀢𑁂𑀧𑀺 𑀮𑀳𑀼𑀫𑀼𑀤𑀼𑀪𑀽𑀢𑀁 𑀧𑀣𑀯𑀻𑀥𑀸𑀢𑀼𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀧𑀦 𑀢𑀻𑀡𑀺𑀧𑀺 𑀫𑀳𑀸𑀪𑀽𑀢𑀸𑀦𑀺 𑀪𑀸𑀚𑀺𑀢𑀸𑀦𑀺. 𑀧𑀣𑀯𑀻𑀥𑀸𑀢𑀼 𑀳𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀧𑀺 𑀅𑀢𑁆𑀣𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀸𑀧𑀺. 𑀢𑀣𑀸 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀬𑁄. 𑀢𑀢𑁆𑀣 𑀲𑀼𑀔𑀲𑀫𑁆𑀨𑀲𑁆𑀲𑀸 𑀧𑀣𑀯𑀻𑀥𑀸𑀢𑀼 𑀫𑀼𑀤𑀼𑀢𑀮𑀼𑀡𑀳𑀢𑁆𑀣𑁂 𑀤𑀳𑀭𑁂 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑁂 𑀅𑀲𑁆𑀲𑀸𑀤𑁂𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 ‘𑀲𑀫𑁆𑀩𑀸𑀳 𑀢𑀸𑀢, 𑀲𑀫𑁆𑀩𑀸𑀳 𑀢𑀸𑀢𑀸’𑀢𑀺 𑀯𑀤𑀸𑀧𑀦𑀸𑀓𑀸𑀭𑀁 𑀓𑀭𑁄𑀢𑀺. 𑀲𑀼𑀔𑀲𑀫𑁆𑀨𑀲𑁆𑀲𑀸 𑀢𑁂𑀚𑁄𑀥𑀸𑀢𑀼 𑀲𑀻𑀢𑀲𑀫𑀬𑁂 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀆𑀳𑀭𑀺𑀢𑁆𑀯𑀸 𑀕𑀢𑁆𑀢𑀁 𑀲𑁂𑀤𑁂𑀦𑁆𑀢𑁂 𑀅𑀲𑁆𑀲𑀸𑀤𑁂𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 ‘𑀲𑁂𑀤𑁂𑀳𑀺 𑀢𑀸𑀢, 𑀲𑁂𑀤𑁂𑀳𑀺 𑀢𑀸𑀢𑀸’𑀢𑀺 𑀯𑀤𑀸𑀧𑀦𑀸𑀓𑀸𑀭𑀁 𑀓𑀭𑁄𑀢𑀺. 𑀲𑀼𑀔𑀲𑀫𑁆𑀨𑀲𑁆𑀲𑀸 𑀯𑀸𑀬𑁄𑀥𑀸𑀢𑀼 𑀉𑀡𑁆𑀳𑀲𑀫𑀬𑁂 𑀯𑀢𑁆𑀢𑀲𑀫𑁆𑀧𑀦𑁆𑀦𑁂 𑀤𑀳𑀭𑁂 𑀩𑀻𑀚𑀦𑁂𑀦 𑀩𑀻𑀚𑀦𑁆𑀢𑁂 𑀅𑀲𑁆𑀲𑀸𑀤𑁂𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 ‘𑀩𑀻𑀚 𑀢𑀸𑀢, 𑀩𑀻𑀚 𑀢𑀸𑀢𑀸’𑀢𑀺 𑀯𑀤𑀸𑀧𑀦𑀸𑀓𑀸𑀭𑀁 𑀓𑀭𑁄𑀢𑀺. 𑀣𑀤𑁆𑀥𑀳𑀢𑁆𑀣𑁂 𑀧𑀦 𑀤𑀳𑀭𑁂 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑁂 𑀅𑀝𑁆𑀞𑀻𑀦𑀁 𑀪𑀺𑀚𑁆𑀚𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀲𑁄𑀧𑀺 ‘𑀅𑀧𑁂𑀳𑀻’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀉𑀡𑁆𑀳𑀲𑀫𑀬𑁂 𑀅𑀗𑁆𑀕𑀸𑀭𑀓𑀧𑀮𑁆𑀮𑁂 𑀆𑀪𑀢𑁂 ‘𑀅𑀧𑀦𑁂𑀳𑀺 𑀦’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀲𑀻𑀢𑀲𑀫𑀬𑁂 𑀩𑀻𑀚𑀦𑁂𑀦 𑀩𑀻𑀚𑀦𑁆𑀢𑁂 ‘𑀅𑀧𑁂𑀳𑀺, 𑀫𑀸 𑀩𑀻𑀚𑀸’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀫𑁂𑀢𑀸𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀢𑀸 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀧𑀦 𑀘𑀢𑀽𑀳𑀺 𑀘𑀢𑀽𑀳𑀺 𑀦𑀬𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀭𑀲 𑀯𑀸𑀭𑀸 𑀳𑁂𑀝𑁆𑀞𑀸 𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 𑀧𑀦𑁂𑀢𑀸𑀦𑀺 𑀢𑀻𑀡𑀺 𑀫𑀳𑀸𑀪𑀽𑀢𑀸𑀦𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀉𑀤𑀸𑀳𑀼 𑀦𑁄𑀢𑀺? 𑀆𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀆𑀕𑀢𑀸𑀦𑀺 𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀦𑁆𑀢𑀺 𑀦 𑀖𑀝𑁆𑀝𑁂𑀦𑁆𑀢𑀻𑀢𑀺? 𑀖𑀝𑁆𑀝𑁂𑀦𑁆𑀢𑀺. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀸𑀦𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀦𑀼𑀧𑁆𑀧𑀚𑁆𑀚𑀢𑀺. 𑀆𑀪𑀼𑀚𑀺𑀢𑀯𑀲𑁂𑀦 𑀯𑀸 𑀳𑀺 𑀉𑀲𑁆𑀲𑀤𑀯𑀲𑁂𑀦 𑀯𑀸 𑀆𑀭𑀫𑁆𑀫𑀡𑀓𑀭𑀡𑀁 𑀳𑁄𑀢𑀺.

𑀢𑀢𑁆𑀣 𑀆𑀪𑀼𑀚𑀺𑀢𑀯𑀲𑁂𑀦 𑀢𑀸𑀯, 𑀧𑀢𑁆𑀢𑀲𑁆𑀫𑀺𑀜𑁆𑀳𑀺 𑀑𑀤𑀦𑁂𑀦 𑀧𑀽𑀭𑁂𑀢𑁆𑀯𑀸 𑀆𑀪𑀢𑁂 𑀏𑀓𑀁 𑀲𑀺𑀢𑁆𑀣𑀁 𑀕𑀳𑁂𑀢𑁆𑀯𑀸 𑀣𑀤𑁆𑀥𑀁 𑀯𑀸 𑀫𑀼𑀤𑀼𑀓𑀁 𑀯𑀸𑀢𑀺 𑀯𑀻𑀫𑀁𑀲𑀦𑁆𑀢𑁄 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀢𑁂𑀚𑁄𑀧𑀺 𑀅𑀢𑁆𑀣𑀺 𑀯𑀸𑀬𑁄𑀧𑀺 𑀅𑀢𑁆𑀣𑀺, 𑀧𑀣𑀯𑀻𑀥𑀸𑀢𑀼𑀫𑁂𑀯 𑀧𑀦 𑀆𑀪𑀼𑀚𑀢𑀺. 𑀉𑀡𑁆𑀳𑁄𑀤𑀓𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀯𑀻𑀫𑀁𑀲𑀦𑁆𑀢𑁄 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀧𑀣𑀯𑀻𑀧𑀺 𑀅𑀢𑁆𑀣𑀺 𑀯𑀸𑀬𑁄𑀧𑀺 𑀅𑀢𑁆𑀣𑀺, 𑀢𑁂𑀚𑁄𑀥𑀸𑀢𑀼𑀫𑁂𑀯 𑀧𑀦 𑀆𑀪𑀼𑀚𑀢𑀺. 𑀉𑀡𑁆𑀳𑀲𑀫𑀬𑁂 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸𑀢𑁂𑀦 𑀲𑀭𑀻𑀭𑀁 𑀧𑀳𑀭𑀸𑀧𑁂𑀦𑁆𑀢𑁄 𑀞𑀺𑀢𑁄 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀧𑀣𑀯𑀻𑀧𑀺 𑀅𑀢𑁆𑀣𑀺 𑀢𑁂𑀚𑁄𑀧𑀺 𑀅𑀢𑁆𑀣𑀺, 𑀯𑀸𑀬𑁄𑀥𑀸𑀢𑀼𑀫𑁂𑀯 𑀧𑀦 𑀆𑀪𑀼𑀚𑀢𑀺. 𑀏𑀯𑀁 𑀆𑀪𑀼𑀚𑀺𑀢𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺 𑀦𑀸𑀫.

𑀬𑁄 𑀧𑀦 𑀉𑀧𑀓𑁆𑀔𑀮𑀢𑀺 𑀯𑀸 𑀲𑀻𑀲𑁂𑀦 𑀯𑀸 𑀭𑀼𑀓𑁆𑀔𑀁 𑀧𑀳𑀭𑀢𑀺 𑀪𑀼𑀜𑁆𑀚𑀦𑁆𑀢𑁄 𑀯𑀸 𑀲𑀓𑁆𑀔𑀭𑀁 𑀟𑀁𑀲𑀢𑀺, 𑀲𑁄 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀢𑁂𑀚𑁄𑀧𑀺 𑀅𑀢𑁆𑀣𑀺 𑀯𑀸𑀬𑁄𑀧𑀺 𑀅𑀢𑁆𑀣𑀺, 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀧𑀣𑀯𑀻𑀥𑀸𑀢𑀼𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀅𑀕𑁆𑀕𑀺𑀁 𑀅𑀓𑁆𑀓𑀫𑀦𑁆𑀢𑁄𑀧𑀺 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀧𑀣𑀯𑀻𑀧𑀺 𑀅𑀢𑁆𑀣𑀺 𑀯𑀸𑀬𑁄𑀧𑀺 𑀅𑀢𑁆𑀣𑀺, 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀢𑁂𑀚𑁄𑀥𑀸𑀢𑀼𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀩𑀮𑀯𑀯𑀸𑀢𑁂 𑀓𑀡𑁆𑀡𑀲𑀓𑁆𑀔𑀮𑀺𑀁 𑀧𑀳𑀭𑀺𑀢𑁆𑀯𑀸 𑀩𑀥𑀺𑀭𑀪𑀸𑀯𑀁 𑀓𑀭𑁄𑀦𑁆𑀢𑁂. 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀧𑀣𑀯𑀻𑀧𑀺 𑀅𑀢𑁆𑀣𑀺 𑀢𑁂𑀚𑁄𑀧𑀺 𑀅𑀢𑁆𑀣𑀺, 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀯𑀸𑀬𑁄𑀥𑀸𑀢𑀼𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺.

𑀬𑀁𑀓𑀺𑀜𑁆𑀘𑀺 𑀥𑀸𑀢𑀼𑀁 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀫𑁆𑀧𑀺 𑀏𑀓𑀧𑁆𑀧𑀳𑀸𑀭𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀽𑀘𑀺𑀓𑀮𑀸𑀧𑁂𑀦 𑀯𑀺𑀤𑁆𑀥𑀲𑁆𑀲 𑀏𑀓𑀧𑁆𑀧𑀳𑀸𑀭𑁂𑀦 𑀓𑀸𑀬𑁄 𑀖𑀝𑁆𑀝𑀺𑀬𑀢𑀺. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀸𑀬𑀧𑀲𑀸𑀤𑁄 𑀉𑀲𑁆𑀲𑀦𑁆𑀦𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀬𑀢𑁆𑀣𑀸𑀧𑀺 𑀧𑀝𑀺𑀖𑀝𑁆𑀝𑀦𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀓𑁆𑀓𑀼𑀝𑀧𑀢𑁆𑀢𑁂𑀦 𑀯𑀡𑁂 𑀥𑁄𑀯𑀺𑀬𑀫𑀸𑀦𑁂 𑀅𑀁𑀲𑀼𑀅𑀁𑀲𑀼 𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀢𑀺. 𑀬𑀢𑁆𑀣 𑀬𑀢𑁆𑀣 𑀧𑀦 𑀧𑀲𑀸𑀤𑁄 𑀉𑀲𑁆𑀲𑀦𑁆𑀦𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀲𑁆𑀲𑀤𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀉𑀲𑁆𑀲𑀤𑀯𑀲𑁂𑀦𑁂𑀯 𑀘 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀓𑀣𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀢𑁄 𑀲𑀗𑁆𑀓𑀦𑁆𑀢𑀺 𑀳𑁄𑀢𑀻𑀢𑀺? 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀳𑁄𑀢𑀺 𑁋 𑀅𑀚𑁆𑀛𑀸𑀲𑀬𑀢𑁄 𑀯𑀸 𑀯𑀺𑀲𑀬𑀸𑀥𑀺𑀫𑀢𑁆𑀢𑀢𑁄 𑀯𑀸. 𑀯𑀺𑀳𑀸𑀭𑀧𑀽𑀚𑀸𑀤𑀻𑀲𑀼 𑀳𑀺 ‘𑀢𑀸𑀦𑀺 𑀢𑀸𑀦𑀺 𑀘𑁂𑀢𑀺𑀬𑀸𑀦𑀺 𑀘𑁂𑀯 𑀧𑀝𑀺𑀫𑀸𑀬𑁄 𑀘 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀧𑁄𑀢𑁆𑀣𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀘 𑀑𑀮𑁄𑀓𑁂𑀲𑁆𑀲𑀸𑀫𑀻’𑀢𑀺 𑀅𑀚𑁆𑀛𑀸𑀲𑀬𑁂𑀦 𑀕𑀢𑁄 𑀏𑀓𑀁 𑀯𑀦𑁆𑀤𑀺𑀢𑁆𑀯𑀸 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀇𑀢𑀭𑀲𑁆𑀲 𑀯𑀦𑁆𑀤𑀦𑀢𑁆𑀣𑀸𑀬 𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀯𑀸 𑀫𑀦𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑀼𑀫𑁆𑀧𑀺 𑀧𑀲𑁆𑀲𑀺𑀢𑀼𑀫𑁆𑀧𑀺 𑀕𑀘𑁆𑀙𑀢𑀺𑀬𑁂𑀯, 𑀏𑀯𑀁 𑀅𑀚𑁆𑀛𑀸𑀲𑀬𑀢𑁄 𑀲𑀗𑁆𑀓𑀫𑀢𑀺 𑀦𑀸𑀫.

𑀓𑁂𑀮𑀸𑀲𑀓𑀽𑀝𑀧𑀝𑀺𑀪𑀸𑀕𑀁 𑀧𑀦 𑀫𑀳𑀸𑀘𑁂𑀢𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀞𑀺𑀢𑁄𑀧𑀺 𑀅𑀧𑀭𑀪𑀸𑀕𑁂 𑀲𑀩𑁆𑀩𑀢𑀽𑀭𑀺𑀬𑁂𑀲𑀼 𑀧𑀕𑁆𑀕𑀳𑀺𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑀗𑁆𑀓𑀫𑀢𑀺. 𑀫𑀦𑀼𑀜𑁆𑀜𑀕𑀦𑁆𑀥𑁂𑀲𑀼 𑀧𑀼𑀧𑁆𑀨𑁂𑀲𑀼 𑀯𑀸 𑀕𑀦𑁆𑀥𑁂𑀲𑀼 𑀯𑀸 𑀆𑀪𑀢𑁂𑀲𑀼 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀲𑀗𑁆𑀓𑀫𑀢𑀺. 𑀏𑀯𑀁 𑀯𑀺𑀲𑀬𑀸𑀥𑀺𑀫𑀢𑁆𑀢𑀢𑁄 𑀲𑀗𑁆𑀓𑀫𑀢𑀺 𑀦𑀸𑀫.

𑁬𑁫𑁧. 𑀆𑀧𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀆𑀧𑁄𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀆𑀧𑁄𑀯 𑀆𑀧𑁄𑀕𑀢𑀁. 𑀲𑀺𑀦𑁂𑀳𑀯𑀲𑁂𑀦 𑀲𑀺𑀦𑁂𑀳𑁄, 𑀲𑀺𑀦𑁂𑀳𑁄𑀯 𑀲𑀺𑀦𑁂𑀳𑀕𑀢𑀁. 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲𑀸𑀢𑀺 𑀧𑀣𑀯𑀻𑀥𑀸𑀢𑀼𑀆𑀤𑀺𑀓𑀲𑁆𑀲 𑀪𑀽𑀢𑀭𑀽𑀧𑀲𑁆𑀲 𑀩𑀦𑁆𑀥𑀦𑀪𑀸𑀯𑁄. 𑀅𑀬𑁄𑀧𑀺𑀡𑁆𑀟𑀺𑀆𑀤𑀻𑀦𑀺 𑀳𑀺 𑀆𑀧𑁄𑀥𑀸𑀢𑀼 𑀆𑀩𑀦𑁆𑀥𑀺𑀢𑁆𑀯𑀸 𑀩𑀤𑁆𑀥𑀸𑀦𑀺 𑀓𑀭𑁄𑀢𑀺. 𑀢𑀸𑀬 𑀆𑀩𑀤𑁆𑀥𑀢𑁆𑀢𑀸 𑀢𑀸𑀦𑀺 𑀩𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀧𑀸𑀲𑀸𑀡𑀧𑀩𑁆𑀩𑀢𑀢𑀸𑀮𑀝𑁆𑀞𑀺𑀳𑀢𑁆𑀣𑀺𑀤𑀦𑁆𑀢𑀕𑁄𑀲𑀺𑀗𑁆𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀦𑀺 𑀳𑁂𑀢𑀸𑀦𑀺 𑀆𑀧𑁄𑀥𑀸𑀢𑀼 𑀏𑀯 𑀆𑀩𑀦𑁆𑀥𑀺𑀢𑁆𑀯𑀸 𑀩𑀤𑁆𑀥𑀸𑀦𑀺 𑀓𑀭𑁄𑀢𑀺. 𑀆𑀧𑁄𑀥𑀸𑀢𑀼𑀬𑀸 𑀆𑀩𑀤𑁆𑀥𑀢𑁆𑀢𑀸𑀯 𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺.

𑀓𑀺𑀁 𑀧𑀦 𑀧𑀣𑀯𑀻𑀥𑀸𑀢𑀼 𑀲𑁂𑀲𑀥𑀸𑀢𑀽𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺 𑀦 𑀳𑁄𑀢𑀻𑀢𑀺 𑀳𑁄𑀢𑀺 𑀨𑀼𑀲𑀺𑀢𑁆𑀯𑀸 𑀳𑁄𑀢𑀺 𑀉𑀤𑀸𑀳𑀼 𑀅𑀨𑀼𑀲𑀺𑀢𑁆𑀯𑀸? 𑀆𑀧𑁄𑀥𑀸𑀢𑀼 𑀯𑀸 𑀲𑁂𑀲𑀸 𑀆𑀩𑀦𑁆𑀥𑀫𑀸𑀦𑀸 𑀨𑀼𑀲𑀺𑀢𑁆𑀯𑀸 𑀆𑀩𑀦𑁆𑀥𑀢𑀺 𑀉𑀤𑀸𑀳𑀼 𑀅𑀨𑀼𑀲𑀺𑀢𑁆𑀯𑀸𑀢𑀺? 𑀧𑀣𑀯𑀻𑀥𑀸𑀢𑀼 𑀢𑀸𑀯 𑀆𑀧𑁄𑀥𑀸𑀢𑀼𑀬𑀸 𑀅𑀨𑀼𑀲𑀺𑀢𑁆𑀯𑀸𑀯 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑁂𑀚𑁄𑀥𑀸𑀢𑀼𑀬𑀸 𑀘 𑀯𑀸𑀬𑁄𑀥𑀸𑀢𑀼𑀬𑀸 𑀘 𑀨𑀼𑀲𑀺𑀢𑁆𑀯𑀸. 𑀆𑀧𑁄𑀥𑀸𑀢𑀼 𑀧𑀦 𑀧𑀣𑀯𑀻𑀥𑀸𑀢𑀼𑀫𑁆𑀧𑀺 𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄𑀧𑀺 𑀅𑀨𑀼𑀲𑀺𑀢𑁆𑀯𑀸𑀯 𑀆𑀩𑀦𑁆𑀥𑀢𑀺. 𑀬𑀤𑀺 𑀨𑀼𑀲𑀺𑀢𑁆𑀯𑀸 𑀆𑀩𑀦𑁆𑀥𑁂𑀬𑁆𑀬 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀦𑀸𑀫 𑀪𑀯𑁂𑀬𑁆𑀬.

𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀽𑀦𑀫𑁆𑀧𑀺 𑀲𑁂𑀲𑀥𑀸𑀢𑀽𑀲𑀼 𑀲𑀓𑀲𑀓𑀓𑀺𑀘𑁆𑀘𑀓𑀭𑀡𑁂 𑀏𑀲𑁂𑀯 𑀦𑀬𑁄. 𑀢𑁂𑀚𑁄𑀥𑀸𑀢𑀼 𑀳𑀺 𑀧𑀣𑀯𑀻𑀥𑀸𑀢𑀼𑀁 𑀨𑀼𑀲𑀺𑀢𑁆𑀯𑀸 𑀛𑀸𑀧𑁂𑀢𑀺. 𑀲𑀸 𑀧𑀦 𑀦 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀛𑀸𑀬𑀢𑀺. 𑀬𑀤𑀺 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀛𑀸𑀬𑁂𑀬𑁆𑀬 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀦𑀸𑀫 𑀪𑀯𑁂𑀬𑁆𑀬. 𑀆𑀧𑁄𑀥𑀸𑀢𑀼𑀁 𑀧𑀦 𑀅𑀨𑀼𑀲𑀺𑀢𑁆𑀯𑀸𑀯 𑀢𑀸𑀧𑁂𑀢𑀺. 𑀲𑀸𑀧𑀺 𑀢𑀧𑀫𑀸𑀦𑀸 𑀦 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀢𑀧𑀢𑀺. 𑀬𑀤𑀺 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀢𑀧𑁂𑀬𑁆𑀬 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀦𑀸𑀫 𑀪𑀯𑁂𑀬𑁆𑀬. 𑀯𑀸𑀬𑁄𑀥𑀸𑀢𑀼𑀁 𑀧𑀦 𑀨𑀼𑀲𑀺𑀢𑁆𑀯𑀸𑀯 𑀢𑀸𑀧𑁂𑀢𑀺. 𑀲𑀸𑀧𑀺 𑀢𑀧𑀫𑀸𑀦𑀸 𑀦 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀢𑀧𑀢𑀺. 𑀬𑀤𑀺 𑀉𑀡𑁆𑀳𑀸 𑀳𑀼𑀢𑁆𑀯𑀸 𑀢𑀧𑁂𑀬𑁆𑀬 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀦𑀸𑀫 𑀪𑀯𑁂𑀬𑁆𑀬. 𑀯𑀸𑀬𑁄𑀥𑀸𑀢𑀼 𑀧𑀣𑀯𑀻𑀥𑀸𑀢𑀼𑀁 𑀨𑀼𑀲𑀺𑀢𑁆𑀯𑀸 𑀯𑀺𑀢𑁆𑀣𑀫𑁆𑀪𑁂𑀢𑀺, 𑀢𑀣𑀸 𑀢𑁂𑀚𑁄𑀥𑀸𑀢𑀼𑀁 𑀆𑀧𑁄𑀥𑀸𑀢𑀼𑀁 𑀧𑀦 𑀅𑀨𑀼𑀲𑀺𑀢𑁆𑀯𑀸𑀯 𑀯𑀺𑀢𑁆𑀣𑀫𑁆𑀪𑁂𑀢𑀺.

𑀉𑀘𑁆𑀙𑀼𑀭𑀲𑀁 𑀧𑀘𑀺𑀢𑁆𑀯𑀸 𑀨𑀸𑀡𑀺𑀢𑀧𑀺𑀡𑁆𑀟𑁂 𑀓𑀭𑀺𑀬𑀫𑀸𑀦𑁂 𑀆𑀧𑁄𑀥𑀸𑀢𑀼 𑀣𑀤𑁆𑀥𑀸 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀲𑀸 𑀳𑀺 𑀧𑀕𑁆𑀖𑀭𑀡𑀮𑀓𑁆𑀔𑀡𑀸. 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸. 𑀑𑀫𑀢𑁆𑀢𑀁 𑀧𑀦 𑀆𑀧𑁄 𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑀁 𑀚𑀸𑀢𑀁. 𑀲𑀸 𑀳𑀺 𑀭𑀲𑀸𑀓𑀸𑀭𑁂𑀦 𑀞𑀺𑀢𑀪𑀸𑀯𑀁 𑀯𑀺𑀚𑀳𑀢𑀺, 𑀮𑀓𑁆𑀔𑀡𑀁 𑀦 𑀯𑀺𑀚𑀳𑀢𑀺. 𑀨𑀸𑀡𑀺𑀢𑀧𑀺𑀡𑁆𑀟𑁂 𑀯𑀺𑀮𑀻𑀬𑀫𑀸𑀦𑁂𑀧𑀺 𑀧𑀣𑀯𑀻𑀥𑀸𑀢𑀼 𑀦 𑀯𑀺𑀮𑀻𑀬𑀢𑀺. 𑀓𑀓𑁆𑀔𑀴𑀮𑀓𑁆𑀔𑀡𑀸 𑀳𑀺 𑀧𑀣𑀯𑀻𑀥𑀸𑀢𑀼 𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀼. 𑀑𑀫𑀢𑁆𑀢𑀸 𑀧𑀦 𑀧𑀣𑀯𑀻 𑀅𑀥𑀺𑀫𑀢𑁆𑀢𑀆𑀧𑀕𑀢𑀺𑀓𑀸 𑀳𑁄𑀢𑀺. 𑀲𑀸 𑀧𑀺𑀡𑁆𑀟𑀸𑀓𑀸𑀭𑁂𑀦 𑀞𑀺𑀢𑀪𑀸𑀯𑀁 𑀯𑀺𑀚𑀳𑀢𑀺, 𑀮𑀓𑁆𑀔𑀡𑀁 𑀦 𑀯𑀺𑀚𑀳𑀢𑀺. 𑀘𑀢𑀼𑀦𑁆𑀦𑀜𑁆𑀳𑀺 𑀫𑀳𑀸𑀪𑀽𑀢𑀸𑀦𑀁 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀳𑁄𑀢𑀺, 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀅𑀪𑀸𑀯𑁄 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀲𑀼𑀢𑁆𑀢𑁂𑀦 𑀤𑀻𑀧𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀺𑀬𑀸, 𑀆𑀦𑀦𑁆𑀤, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁, 𑀧𑀣𑀯𑀻𑀥𑀸𑀢𑀼𑀬𑀸…𑀧𑁂… 𑀯𑀸𑀬𑁄𑀥𑀸𑀢𑀼𑀬𑀸; 𑀦 𑀢𑁆𑀯𑁂𑀯 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁩.𑁭𑁬).

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀆𑀦𑀦𑁆𑀤, 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀼 𑀦𑀸𑀫 𑀪𑀯𑁂𑀬𑁆𑀬, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀦 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀏𑀯𑀫𑁂𑀢𑁆𑀣 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑁄 𑀆𑀕𑀢𑁄.

𑁬𑁫𑁨. 𑀇𑀢𑁄 𑀧𑀭𑁂𑀲𑀼 𑀉𑀧𑀸𑀤𑀺𑀡𑁆𑀡𑀭𑀽𑀧𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀉𑀧𑀸𑀤𑀺𑀡𑁆𑀡𑀧𑀤𑀸𑀤𑀻𑀦𑀁 𑀅𑀢𑁆𑀣𑁄 𑀫𑀸𑀢𑀺𑀓𑀸𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀢𑀢𑁆𑀣 𑀢𑀢𑁆𑀣 𑀧𑀦 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑀉𑀧𑀸𑀤𑀺𑀡𑁆𑀡𑀦𑀺𑀤𑁆𑀤𑁂𑀲𑁂 𑀢𑀸𑀯 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀏𑀓𑀦𑁆𑀢𑀉𑀧𑀸𑀤𑀺𑀡𑁆𑀡𑀢𑁆𑀢𑀸 𑀯𑀼𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀧𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀉𑀧𑀸𑀤𑀺𑀡𑁆𑀡𑀸𑀦𑀺𑀧𑀺 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀸𑀦𑀺𑀧𑀺, 𑀢𑀲𑁆𑀫𑀸 𑀢𑀸𑀦𑀺 𑀬𑀁 𑀯𑀸 𑀧𑀦𑀸𑀢𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀬𑁂𑀯𑀸𑀧𑀦𑀓𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀲𑁆𑀫𑀸 𑀧𑀦 ‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’𑀢𑀺 𑀘 ‘𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’𑀢𑀺 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀤𑁆𑀤𑁂𑀲𑁂 ‘𑀚𑀭𑀢𑀸 𑀘 𑀅𑀦𑀺𑀘𑁆𑀘𑀢𑀸 𑀘’ 𑀦 𑀕𑀳𑀺𑀢𑀸, 𑀅𑀦𑀼𑀧𑀸𑀤𑀺𑀡𑁆𑀡𑀸𑀤𑀻𑀦𑀁𑀬𑁂𑀯 𑀦𑀺𑀤𑁆𑀤𑁂𑀲𑁂𑀲𑀼 𑀕𑀳𑀺𑀢𑀸𑀢𑀺? 𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸𑀢𑀺 𑀏𑀢𑁆𑀣 𑀢𑀸𑀯 𑀓𑀫𑁆𑀫𑀢𑁄 𑀅𑀜𑁆𑀜𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁 𑀲𑀗𑁆𑀕𑀳𑀺𑀢𑀁. ‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’𑀢𑀺 𑀏𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯. 𑀇𑀫𑀸𑀦𑀺 𑀘 𑀤𑁆𑀯𑁂 𑀭𑀽𑀧𑀸𑀦𑀺 𑀦𑁂𑀯 𑀓𑀫𑁆𑀫𑀢𑁄 𑀦 𑀅𑀜𑁆𑀜𑀲𑁆𑀫𑀸 𑀭𑀽𑀧𑀚𑀦𑀓𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀸𑀦𑀺. 𑀲𑀸 𑀘 𑀦𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀦𑀼𑀧𑀸𑀤𑀺𑀡𑁆𑀡𑀦𑁆𑀢𑀺𑀆𑀤𑀻𑀲𑀼 𑀧𑀦 𑀓𑁂𑀯𑀮𑀁 𑀅𑀦𑀼𑀧𑀸𑀤𑀺𑀡𑁆𑀡𑀸𑀤𑀺𑀕𑁆𑀕𑀳𑀡𑁂𑀦 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀦𑀅𑀜𑁆𑀜𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬𑁬𑁬. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀇𑀤𑀁 𑀤𑁆𑀯𑀬𑀁 𑀬𑀲𑁆𑀫𑀸 𑀏𑀓𑀦𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀪𑀽𑀢𑀸𑀦𑀺 𑀉𑀧𑀸𑀤𑀸𑀬 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀧𑀭𑀫𑀢𑁆𑀣𑀢𑁄 𑀧𑀦 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀪𑀽𑀢𑀸𑀦𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺, 𑀢𑀁𑀦𑀺𑀲𑁆𑀲𑀺𑀢𑀢𑁆𑀢𑀸. 𑀬𑀣𑀸 𑀅𑀦𑀺𑀘𑁆𑀘𑀲𑁆𑀲 𑀭𑀽𑀧𑀲𑁆𑀲 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁 𑀦𑀸𑀫 𑀳𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀚𑀸𑀢𑀁.

𑁬𑁬𑁮. 𑀘𑀺𑀢𑁆𑀢𑀲𑀳𑀪𑀼𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀯 𑀘𑀺𑀢𑁆𑀢𑀁 𑀢𑀸𑀯 𑀧𑀜𑁆𑀜𑀸𑀬𑀦𑀢𑁄 𑀇𑀤𑀫𑁂𑀯 𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀦 𑀧𑀦𑁂𑀢𑀁 𑀘𑀺𑀢𑁆𑀢𑁂𑀦 𑀲𑀳 𑀪𑀽𑀢𑀸𑀦𑀺 𑀯𑀺𑀬, 𑀘𑁂𑀢𑀦𑀸𑀤𑀬𑁄 𑀯𑀺𑀬 𑀘 𑀉𑀧𑁆𑀧𑀚𑁆𑀚𑀢𑀺.

𑁬𑁭𑁦. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀯 𑀘𑀺𑀢𑁆𑀢𑀁 𑀢𑀸𑀯 𑀧𑀜𑁆𑀜𑀸𑀬𑀦𑀢𑁄 𑀏𑀯 𑀳𑁂𑀢𑀁 𑀤𑁆𑀯𑀬𑀁 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁.

𑁬𑁭𑁪. 𑀑𑀴𑀸𑀭𑀺𑀓𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀪𑀽𑀢𑀢𑁆𑀢𑀸 𑀲𑀁𑀗𑁆𑀖𑀝𑁆𑀝𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀣𑀽𑀮𑀁. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀢𑁄 𑀲𑀼𑀔𑀼𑀫𑀁 𑀯𑁂𑀤𑀺𑀢𑀩𑁆𑀩𑀁.

𑁬𑁭𑁬. 𑀤𑀽𑀭𑁂𑀢𑀺 𑀖𑀝𑁆𑀝𑀦𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀲𑀫𑀻𑀧𑁂 𑀞𑀺𑀢𑀫𑁆𑀧𑀺 𑀤𑀽𑀭𑁂. 𑀇𑀢𑀭𑀁 𑀧𑀦 𑀖𑀝𑁆𑀝𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀲𑀦𑁆𑀢𑀺𑀓𑁂. 𑀘𑀓𑁆𑀔𑀸𑀬𑀢𑀦𑀸𑀤𑀺𑀦𑀺𑀤𑁆𑀤𑁂𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀁 𑀢𑀸𑀯 𑀤𑀼𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁂 𑀯𑀺𑀲𑁂𑀲𑀫𑀢𑁆𑀢𑀁. 𑀢𑀺𑀯𑀺𑀥𑀲𑀗𑁆𑀕𑀳𑁄 𑀉𑀢𑁆𑀢𑀸𑀦𑀢𑁆𑀣𑁄𑀯.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁬. 𑀘𑀢𑀼𑀩𑁆𑀩𑀺𑀥𑀲𑀗𑁆𑀕𑀳𑀸𑀯𑀲𑀸𑀦𑁂 𑀤𑀺𑀝𑁆𑀞𑀸𑀤𑀻𑀦𑀁 𑀧𑀘𑁆𑀙𑀺𑀫𑀧𑀤𑀲𑁆𑀲 𑀪𑁂𑀤𑀸𑀪𑀸𑀯𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸𑀯 𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀤𑀓𑁆𑀔𑀺𑀢𑀼𑀁 𑀲𑀓𑁆𑀓𑀸𑀢𑀺 ‘𑀤𑀺𑀝𑁆𑀞𑀁’ 𑀦𑀸𑀫 𑀚𑀸𑀢𑀁. 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑁂𑀦 𑀲𑀼𑀢𑁆𑀯𑀸 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 ‘𑀲𑀼𑀢𑀁’ 𑀦𑀸𑀫 𑀚𑀸𑀢𑀁. 𑀕𑀦𑁆𑀥𑀸𑀬𑀢𑀦𑀸𑀤𑀺𑀢𑁆𑀢𑀬𑀁 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑁂𑀳𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀫𑀼𑀦𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀝𑁆𑀞𑁂𑀦 𑀫𑀼𑀢𑀁 𑀦𑀸𑀫 𑀚𑀸𑀢𑀁. 𑀨𑀼𑀲𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁄 ‘𑀫𑀼𑀢𑀁’ 𑀦𑀸𑀫𑀸𑀢𑀺𑀧𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁂𑀯 𑀧𑀦 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀫𑀦𑀲𑀸 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀚𑀸𑀢𑀁.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁭. 𑀧𑀜𑁆𑀘𑀯𑀺𑀥𑀲𑀗𑁆𑀕𑀳𑀦𑀺𑀤𑁆𑀤𑁂𑀲𑁂 𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀔𑀭𑀫𑁂𑀯 𑀔𑀭𑀕𑀢𑀁, 𑀨𑀭𑀼𑀲𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀭𑁂 𑀤𑁆𑀯𑁂𑀧𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑀸 𑀏𑀯. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁. 𑀩𑀳𑀺𑀤𑁆𑀥𑀸𑀢𑀺 𑀩𑀸𑀳𑀺𑀭𑀁. 𑀉𑀧𑀸𑀤𑀺𑀡𑁆𑀡𑀦𑁆𑀢𑀺 𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯. 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀭𑀻𑀭𑀝𑁆𑀞𑀓𑀲𑁆𑀲𑁂𑀢𑀁 𑀕𑀳𑀡𑀁. 𑀲𑀭𑀻𑀭𑀝𑁆𑀞𑀓𑀜𑁆𑀳𑀺 𑀉𑀧𑀸𑀤𑀺𑀡𑁆𑀡𑀁 𑀯𑀸 𑀳𑁄𑀢𑀼 𑀅𑀦𑀼𑀧𑀸𑀤𑀺𑀡𑁆𑀡𑀁 𑀯𑀸, 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 𑀲𑀩𑁆𑀩𑀁 𑀉𑀧𑀸𑀤𑀺𑀡𑁆𑀡𑀫𑁂𑀯 𑀦𑀸𑀫.

𑁯𑁬𑁯. 𑀢𑁂𑀚𑁄𑀕𑀢𑀦𑁆𑀢𑀺 𑀲𑀩𑁆𑀩𑀢𑁂𑀚𑁂𑀲𑀼 𑀕𑀢𑀁 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁, 𑀢𑁂𑀚𑁄 𑀏𑀯 𑀯𑀸 𑀢𑁂𑀚𑁄𑀪𑀸𑀯𑀁 𑀕𑀢𑀦𑁆𑀢𑀺 ‘𑀢𑁂𑀚𑁄𑀕𑀢𑀁’. 𑀉𑀲𑁆𑀫𑀸𑀢𑀺 𑀉𑀲𑁆𑀫𑀸𑀓𑀸𑀭𑁄. 𑀉𑀲𑁆𑀫𑀸𑀕𑀢𑀦𑁆𑀢𑀺 𑀉𑀲𑁆𑀫𑀸𑀪𑀸𑀯𑀁 𑀕𑀢𑀁. 𑀉𑀲𑁆𑀫𑀸𑀓𑀸𑀭𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀉𑀲𑀼𑀫𑀦𑁆𑀢𑀺 𑀩𑀮𑀯𑀉𑀲𑁆𑀫𑀸. 𑀉𑀲𑀼𑀫𑀫𑁂𑀯 𑀉𑀲𑀼𑀫𑀪𑀸𑀯𑀁 𑀕𑀢𑀦𑁆𑀢𑀺 𑀉𑀲𑀼𑀫𑀕𑀢𑀁.

𑁯𑁭𑁦. 𑀯𑀸𑀬𑀦𑀓𑀯𑀲𑁂𑀦 𑀯𑀸𑀬𑁄. 𑀯𑀸𑀬𑁄𑀯 𑀯𑀸𑀬𑁄𑀪𑀸𑀯𑀁 𑀕𑀢𑀢𑁆𑀢𑀸 𑀯𑀸𑀬𑁄𑀕𑀢𑀁. 𑀣𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀉𑀧𑁆𑀧𑀮𑀦𑀸𑀴𑀢𑀘𑀸𑀤𑀻𑀦𑀁 𑀯𑀺𑀬 𑀯𑀸𑀢𑀧𑀼𑀡𑁆𑀡𑀸𑀦𑀁 𑀣𑀫𑁆𑀪𑀺𑀢𑀪𑀸𑀯𑁄 𑀭𑀽𑀧𑀲𑁆𑀲.

𑀙𑀓𑁆𑀓𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁨-𑁪. 𑀙𑀩𑁆𑀩𑀺𑀥𑀸𑀤𑀺𑀲𑀗𑁆𑀕𑀳𑀸𑀦𑀁 𑀢𑀺𑀡𑁆𑀡𑀁 𑀑𑀲𑀸𑀦𑀧𑀤𑀲𑁆𑀲 𑀪𑁂𑀤𑀸𑀪𑀸𑀯𑀢𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁. 𑀢𑀺𑀯𑀺𑀥𑀸𑀬 𑀫𑀦𑁄𑀥𑀸𑀢𑀼𑀬𑀸 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀫𑀦𑁄𑀥𑀸𑀢𑀼𑀯𑀺𑀜𑁆𑀜𑁂𑀬𑁆𑀬𑀁 𑀲𑀩𑁆𑀩𑀁 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀏𑀓𑀁 𑀭𑀽𑀧𑀫𑁆𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘𑀲𑀩𑁆𑀩𑀁 𑀭𑀽𑀧’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀦𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑀬𑁄 𑀅𑀓𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀤𑀜𑁆𑀘 𑀏𑀓𑀭𑀽𑀧𑀲𑁆𑀲𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀚𑀸𑀦𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑁂𑀦 𑀦𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫, 𑀢𑀲𑁆𑀫𑀸 𑀦𑀬𑀁 𑀓𑀭𑁄𑀦𑁆𑀢𑁄 ‘𑀲𑀩𑁆𑀩𑀁 𑀭𑀽𑀧’𑀦𑁆𑀢𑀺 𑀆𑀳.

𑁯𑁭𑁪. 𑀲𑀼𑀔𑀲𑀫𑁆𑀨𑀲𑁆𑀲𑁄𑀢𑀺 𑀲𑀼𑀔𑀯𑁂𑀤𑀦𑀸𑀧𑀝𑀺𑀮𑀸𑀪𑀧𑀘𑁆𑀘𑀬𑁄. 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀧𑀝𑀺𑀮𑀸𑀪𑀧𑀘𑁆𑀘𑀬𑁄. 𑀇𑀥𑀸𑀧𑀺 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀲𑁆𑀲 𑀲𑀼𑀔𑀤𑀼𑀓𑁆𑀔𑀲𑁆𑀲 𑀲𑀩𑁆𑀪𑀸𑀯𑀢𑁄 𑀅𑀬𑀁 𑀦𑀬𑁄 𑀤𑀺𑀦𑁆𑀦𑁄.

𑀦𑀯𑀓𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁫. 𑀦𑀯𑀓𑁂 𑀧𑀦 𑀇𑀦𑁆𑀤𑁆𑀭𑀺𑀬𑀭𑀽𑀧𑀲𑁆𑀲 𑀦𑀸𑀫 𑀅𑀢𑁆𑀣𑀺𑀢𑀸𑀬 𑀦𑀬𑁄 𑀤𑀺𑀦𑁆𑀦𑁄. 𑀢𑀲𑁆𑀲𑁂𑀯 𑀲𑀧𑁆𑀧𑀝𑀺𑀖𑀅𑀧𑁆𑀧𑀝𑀺𑀖𑀢𑀸𑀬 𑀤𑀲𑀓𑁂 𑀦𑀬𑁄 𑀤𑀺𑀦𑁆𑀦𑁄. 𑀏𑀓𑀸𑀤𑀲𑀓𑁂 𑀅𑀟𑁆𑀠𑁂𑀓𑀸𑀤𑀲 𑀆𑀬𑀢𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑁂𑀲𑀁 𑀦𑀺𑀤𑁆𑀤𑁂𑀲𑀯𑀸𑀭𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀓𑀺𑀡𑁆𑀡𑀓𑀓𑀣𑀸

𑀇𑀫𑁂𑀲𑀼 𑀧𑀦 𑀭𑀽𑀧𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀫𑁄𑀥𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀜𑁆𑀘 𑀲𑀗𑁆𑀔𑀢𑀦𑁆𑀢𑀺 𑀇𑀤𑀁 ‘𑀧𑀓𑀺𑀡𑁆𑀡𑀓𑀁’ 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘𑀲𑀫𑁄𑀥𑀸𑀦’𑀦𑁆𑀢𑀺 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀭𑀽𑀧𑀁 𑀲𑀫𑁄𑀥𑀸𑀦𑀢𑁄 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀧𑁄𑀥𑀸𑀢𑀽𑀢𑀺 𑀧𑀜𑁆𑀘𑀯𑀻𑀲𑀢𑀺𑀲𑀗𑁆𑀔𑁆𑀬𑀁 𑀳𑁄𑀢𑀺. 𑀢𑀁 𑀯𑀢𑁆𑀣𑀼𑀭𑀽𑀧𑁂𑀦 𑀲𑀤𑁆𑀥𑀺𑀁 𑀙𑀩𑁆𑀩𑀻𑀲𑀢𑀺𑀲𑀗𑁆𑀔𑁆𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘𑀫𑀺𑀤𑁆𑀥𑀭𑀽𑀧𑀁 𑀦𑀸𑀫 𑀅𑀢𑁆𑀣𑀻’𑀢𑀺 𑀯𑀤𑀦𑁆𑀢𑀺. 𑀢𑁂 ‘‘𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺𑀆𑀤𑀻𑀦𑀺 (𑀲𑀼. 𑀦𑀺. 𑁫𑁪𑁬) 𑀯𑀢𑁆𑀯𑀸 𑀫𑀺𑀤𑁆𑀥𑀭𑀽𑀧𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀅𑀧𑀭𑁂 𑀩𑀮𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀯𑀻𑀲𑀢𑀺, 𑀲𑀫𑁆𑀪𑀯𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀯𑀻𑀲𑀢𑀺, 𑀚𑀸𑀢𑀺𑀭𑀽𑀧𑁂𑀦 𑀲𑀤𑁆𑀥𑀺𑀁 𑀏𑀓𑀽𑀦𑀢𑀺𑀁𑀲𑀢𑀺, 𑀭𑁄𑀕𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑀢𑀺𑀁𑀲𑀢𑀺 𑀭𑀽𑀧𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀧𑀺 𑀢𑁂𑀲𑀁 𑀯𑀺𑀲𑀼𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀯𑀸𑀬𑁄𑀥𑀸𑀢𑀼𑀬𑀸 𑀳𑀺 𑀕𑀳𑀺𑀢𑀸𑀬 𑀩𑀮𑀭𑀽𑀧𑀁 𑀕𑀳𑀺𑀢𑀫𑁂𑀯, 𑀅𑀜𑁆𑀜𑀁 𑀩𑀮𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀆𑀧𑁄𑀥𑀸𑀢𑀼𑀬𑀸 𑀲𑀫𑁆𑀪𑀯𑀭𑀽𑀧𑀁, 𑀉𑀧𑀘𑀬𑀲𑀦𑁆𑀢𑀢𑀻𑀳𑀺 𑀚𑀸𑀢𑀺𑀭𑀽𑀧𑀁, 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀳𑀺 𑀕𑀳𑀺𑀢𑀸𑀳𑀺 𑀭𑁄𑀕𑀭𑀽𑀧𑀁 𑀕𑀳𑀺𑀢𑀫𑁂𑀯. 𑀅𑀜𑁆𑀜𑀁 𑀭𑁄𑀕𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀬𑁄𑀧𑀺 𑀓𑀡𑁆𑀡𑀭𑁄𑀕𑀸𑀤𑀺 𑀆𑀩𑀸𑀥𑁄 𑀲𑁄 𑀯𑀺𑀲𑀫𑀧𑀘𑁆𑀘𑀬𑀲𑀫𑀼𑀝𑁆𑀞𑀺𑀢𑀥𑀸𑀢𑀼𑀫𑀢𑁆𑀢𑀫𑁂𑀯. 𑀦 𑀅𑀜𑁆𑀜𑁄 𑀢𑀢𑁆𑀣 𑀭𑁄𑀕𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀫𑁄𑀥𑀸𑀦𑀢𑁄 𑀙𑀩𑁆𑀩𑀻𑀲𑀢𑀺𑀫𑁂𑀯 𑀭𑀽𑀧𑀸𑀦𑀺.

‘𑀲𑀫𑀼𑀝𑁆𑀞𑀸𑀦’𑀦𑁆𑀢𑀺 𑀓𑀢𑀺 𑀭𑀽𑀧𑀸𑀦𑀺 𑀓𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺? 𑀤𑀲 𑀏𑀓𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀓𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁, 𑀢𑀻𑀡𑀺 𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺, 𑀦𑀯 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀺, 𑀤𑁆𑀯𑁂 𑀦 𑀓𑁂𑀦𑀘𑀺 𑀲𑀫𑀼𑀝𑁆𑀞𑀳𑀦𑁆𑀢𑀺.

𑀢𑀢𑁆𑀣 𑀘𑀓𑁆𑀔𑀼𑀧𑀲𑀸𑀤𑁄…𑀧𑁂… 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀏𑀓𑀦𑁆𑀢𑀁 𑀓𑀫𑁆𑀫𑀢𑁄𑀯 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀏𑀓𑀦𑁆𑀢𑁂𑀦 𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀤𑀲 ‘𑀏𑀓𑀲𑀫𑀼𑀝𑁆𑀞𑀸𑀦𑀸𑀦𑀺’ 𑀦𑀸𑀫. 𑀲𑀤𑁆𑀤𑁄 𑀉𑀢𑀼𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻𑀢𑀺 𑀏𑀓𑁄 ‘𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑁄’ 𑀦𑀸𑀫. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀉𑀢𑀼𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀘𑀺𑀢𑁆𑀢𑀢𑁄. 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀧𑀦 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀢𑀻𑀡𑀺 ‘𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺’ 𑀦𑀸𑀫. 𑀅𑀯𑀲𑁂𑀲𑀸𑀦𑀺 𑀦𑀯 𑀭𑀽𑀧𑀸𑀦𑀺 𑀢𑁂𑀳𑀺 𑀓𑀫𑁆𑀫𑁂𑀦 𑀘𑀸𑀢𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀦𑀯 ‘𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀺’ 𑀦𑀸𑀫. 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀧𑀦 𑀏𑀢𑁂𑀲𑀼 𑀏𑀓𑀢𑁄𑀧𑀺 𑀦 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀤𑁆𑀯𑁂 ‘𑀦 𑀓𑁂𑀦𑀘𑀺 𑀲𑀫𑀼𑀝𑁆𑀞𑀳𑀦𑁆𑀢𑀺’ 𑀦𑀸𑀫. 𑀓𑀲𑁆𑀫𑀸? 𑀅𑀚𑀸𑀬𑀦𑀢𑁄. 𑀦 𑀳𑀺 𑀏𑀢𑀸𑀦𑀺 𑀚𑀸𑀬𑀦𑁆𑀢𑀺. 𑀓𑀲𑁆𑀫𑀸? 𑀚𑀸𑀢𑀲𑁆𑀲 𑀧𑀸𑀓𑀪𑁂𑀤𑀢𑁆𑀢𑀸. 𑀉𑀧𑁆𑀧𑀦𑁆𑀦𑀜𑁆𑀳𑀺 𑀭𑀽𑀧𑀁 𑀚𑀻𑀭𑀢𑀺 𑀪𑀺𑀚𑁆𑀚𑀢𑀻𑀢𑀺 𑀅𑀯𑀲𑁆𑀲𑀁 𑀧𑀦𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀦 𑀳𑀺 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀭𑀽𑀧𑀁 𑀯𑀸 𑀅𑀓𑁆𑀔𑀬𑀁 𑀦𑀸𑀫 𑀤𑀺𑀲𑁆𑀲𑀢𑀺. 𑀬𑀸𑀯 𑀧𑀦 𑀦 𑀪𑀺𑀚𑁆𑀚𑀢𑀺 𑀢𑀸𑀯𑀲𑁆𑀲 𑀧𑀭𑀺𑀧𑀸𑀓𑁄𑀢𑀺 𑀲𑀺𑀤𑁆𑀥𑀫𑁂𑀢𑀁. ‘𑀚𑀸𑀢𑀲𑁆𑀲 𑀧𑀸𑀓𑀪𑁂𑀤𑀢𑁆𑀢𑀸’𑀢𑀺 𑀬𑀤𑀺 𑀘 𑀢𑀸𑀦𑀺 𑀚𑀸𑀬𑁂𑀬𑁆𑀬𑀼𑀁 𑀢𑁂𑀲𑀫𑁆𑀧𑀺 𑀧𑀸𑀓𑀪𑁂𑀤𑀸 𑀪𑀯𑁂𑀬𑁆𑀬𑀼𑀁. 𑀦 𑀘 𑀧𑀸𑀓𑁄 𑀧𑀘𑁆𑀘𑀢𑀺, 𑀪𑁂𑀤𑁄 𑀯𑀸 𑀪𑀺𑀚𑁆𑀚𑀢𑀻𑀢𑀺 𑀚𑀸𑀢𑀲𑁆𑀲 𑀧𑀸𑀓𑀪𑁂𑀤𑀢𑁆𑀢𑀸 𑀦𑁂𑀢𑀁 𑀤𑁆𑀯𑀬𑀁 𑀚𑀸𑀬𑀢𑀺.

𑀢𑀢𑁆𑀣 𑀲𑀺𑀬𑀸 𑁋 𑀬𑀣𑀸 ‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’𑀢𑀺 𑀆𑀤𑀺𑀦𑀺𑀤𑁆𑀤𑁂𑀲𑁂𑀲𑀼 ‘𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’𑀢𑀺 𑀯𑀘𑀦𑁂𑀦 ‘𑀚𑀸𑀢𑀺’ 𑀚𑀸𑀬𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀳𑁄𑀢𑀺, 𑀏𑀯𑀁 ‘𑀧𑀸𑀓𑁄’𑀧𑀺 𑀧𑀘𑁆𑀘𑀢𑀼 ‘𑀪𑁂𑀤𑁄’𑀧𑀺 𑀪𑀺𑀚𑁆𑀚𑀢𑀽𑀢𑀺. ‘‘𑀦 𑀢𑀢𑁆𑀣 ‘𑀚𑀸𑀢𑀺 𑀚𑀸𑀬𑀢𑀻’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀁. 𑀬𑁂 𑀧𑀦 𑀥𑀫𑁆𑀫𑀸 𑀓𑀫𑁆𑀫𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑁂𑀲𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀚𑀸𑀢𑀺𑀬𑀸 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑁄 𑀅𑀦𑀼𑀫𑀢𑁄. 𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀚𑀸𑀢𑀺 𑀚𑀸𑀬𑀢𑀺. 𑀚𑀸𑀬𑀫𑀸𑀦𑀲𑁆𑀲 𑀳𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀁 𑀚𑀸𑀢𑀻’’𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘𑀬𑀣𑁂𑀯 𑀚𑀸𑀢𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑁄𑀳𑀸𑀭𑀜𑁆𑀘 𑀮𑀪𑀢𑀺, 𑀢𑀣𑀸 𑀧𑀸𑀓𑀪𑁂𑀤𑀸𑀧𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀸𑀓𑀪𑁂𑀤𑀸 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑁄𑀳𑀸𑀭𑀜𑁆𑀘 𑀮𑀪𑀦𑁆𑀢𑀼. 𑀏𑀯𑀁 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’𑀢𑀺. ‘𑀦 𑀧𑀸𑀓𑀪𑁂𑀤𑀸 𑀢𑀁 𑀯𑁄𑀳𑀸𑀭𑀁 𑀮𑀪𑀦𑁆𑀢𑀺. 𑀓𑀲𑁆𑀫𑀸? 𑀚𑀦𑀓𑀧𑀘𑁆𑀘𑀬𑀸𑀦𑀼𑀪𑀸𑀯𑀓𑁆𑀔𑀡𑁂 𑀅𑀪𑀸𑀯𑀢𑁄. 𑀚𑀦𑀓𑀧𑀘𑁆𑀘𑀬𑀸𑀦𑀜𑁆𑀳𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀆𑀦𑀼𑀪𑀸𑀯𑁄, 𑀦 𑀢𑀢𑁄 𑀉𑀢𑁆𑀢𑀭𑀺. 𑀢𑁂𑀳𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀥𑀫𑁆𑀫𑀓𑁆𑀔𑀡𑀲𑁆𑀫𑀺𑀜𑁆𑀘 𑀚𑀸𑀢𑀺 𑀧𑀜𑁆𑀜𑀸𑀬𑀫𑀸𑀦𑀸 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑁄𑀳𑀸𑀭𑀜𑁆𑀘 𑀮𑀪𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑀩𑁆𑀪𑀸𑀯𑀢𑁄; 𑀦 𑀇𑀢𑀭𑀤𑁆𑀯𑀬𑀁, 𑀢𑀲𑁆𑀫𑀺𑀁 𑀔𑀡𑁂 𑀅𑀪𑀸𑀯𑀢𑁄𑀢𑀺 𑀦𑁂𑀯𑁂𑀢𑀁 𑀚𑀸𑀬𑀢𑀻’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀢𑁆𑀢𑀸 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀚𑀸𑀬𑀢𑀻𑀢𑀺 𑀘𑁂 𑁋 ‘𑀦, 𑀧𑀭𑀺𑀬𑀸𑀬𑀤𑁂𑀲𑀺𑀢𑀢𑁆𑀢𑀸. 𑀢𑀢𑁆𑀣 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’𑀦𑁆𑀢𑀺 𑀯𑀼𑀢𑁆𑀢𑀁.

‘𑀬𑀤𑀺 𑀏𑀯𑀁, 𑀢𑀬𑀫𑁆𑀧𑁂𑀢𑀁 𑀅𑀚𑀸𑀢𑀢𑁆𑀢𑀸 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀦𑀢𑁆𑀣𑀺; 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀯𑀸 𑀦𑀺𑀘𑁆𑀘’𑀦𑁆𑀢𑀺 𑀘𑁂 𑁋 𑀦, 𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁄; 𑀧𑀣𑀯𑀻𑀆𑀤𑀻𑀦𑀜𑁆𑀳𑀺 𑀦𑀺𑀲𑁆𑀲𑀬𑀸𑀦𑀁 𑀪𑀸𑀯𑁂 𑀚𑀸𑀢𑀺𑀆𑀤𑀺𑀢𑁆𑀢𑀬𑀁 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀦𑀢𑁆𑀣𑀺. 𑀢𑁂𑀲𑀜𑁆𑀘 𑀅𑀪𑀸𑀯𑁂 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀦𑀺𑀘𑁆𑀘𑀁. 𑀏𑀢𑀫𑁆𑀧𑀺 𑀘 𑀅𑀪𑀺𑀦𑀺𑀯𑁂𑀲𑀁 𑀧𑀝𑀺𑀲𑁂𑀥𑁂𑀢𑀼𑀁 𑀏𑀯 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦). 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀢𑀸𑀦𑀺 𑀤𑁆𑀯𑁂 𑀭𑀽𑀧𑀸𑀦𑀺 𑀦 𑀓𑁂𑀳𑀺𑀘𑀺 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 ‘𑀲𑀫𑀼𑀝𑁆𑀞𑀸𑀦’𑀦𑁆𑀢𑀺 𑀏𑀢𑁆𑀣 𑀅𑀬𑀫𑀜𑁆𑀜𑁄𑀧𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀬𑀁 𑀫𑀸𑀢𑀺𑀓𑀸 𑁋 ‘𑀓𑀫𑁆𑀫𑀚𑀁 𑀓𑀫𑁆𑀫𑀧𑀘𑁆𑀘𑀬𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑀁 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀉𑀢𑀼𑀧𑀘𑁆𑀘𑀬𑀁 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀧𑀘𑁆𑀘𑀬𑀁 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦’𑀦𑁆𑀢𑀺.

𑀢𑀢𑁆𑀣 𑀘𑀓𑁆𑀔𑀼𑀧𑀲𑀸𑀤𑀸𑀤𑀺 𑀅𑀝𑁆𑀞𑀯𑀺𑀥𑀁 𑀭𑀽𑀧𑀁 𑀲𑀤𑁆𑀥𑀺𑀁 𑀳𑀤𑀬𑀯𑀢𑁆𑀣𑀼𑀦𑀸 ‘𑀓𑀫𑁆𑀫𑀚𑀁’ 𑀦𑀸𑀫. 𑀓𑁂𑀲𑀫𑀲𑁆𑀲𑀼 𑀳𑀢𑁆𑀣𑀺𑀤𑀦𑁆𑀢𑀸 𑀅𑀲𑁆𑀲𑀯𑀸𑀮𑀸 𑀘𑀫𑀭𑀯𑀸𑀮𑀸𑀢𑀺 𑀏𑀯𑀫𑀸𑀤𑀺 ‘𑀓𑀫𑁆𑀫𑀧𑀘𑁆𑀘𑀬𑀁’ 𑀦𑀸𑀫. 𑀘𑀓𑁆𑀓𑀭𑀢𑀦𑀁 𑀤𑁂𑀯𑀢𑀸𑀦𑀁 𑀉𑀬𑁆𑀬𑀸𑀦𑀯𑀺𑀫𑀸𑀦𑀸𑀤𑀻𑀦𑀻𑀢𑀺 𑀏𑀯𑀫𑀸𑀤𑀺 ‘𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫.

𑀆𑀳𑀸𑀭𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀁 ‘𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀽𑀧𑀲𑀦𑁆𑀢𑀢𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀘 𑀉𑀧𑀸𑀤𑀺𑀦𑁆𑀦𑀲𑁆𑀲 𑀘. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀚𑀦𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀓𑀫𑁆𑀫𑀚𑀲𑁆𑀲 𑀅𑀦𑀼𑀧𑀸𑀮𑀓𑁄 𑀳𑀼𑀢𑁆𑀯𑀸𑀢𑀺 𑀇𑀤𑀁 𑀆𑀳𑀸𑀭𑀸𑀦𑀼𑀧𑀸𑀮𑀺𑀢𑀁 𑀓𑀫𑁆𑀫𑀚𑀭𑀽𑀧𑀁 ‘𑀆𑀳𑀸𑀭𑀧𑀘𑁆𑀘𑀬𑀁’ 𑀦𑀸𑀫. 𑀯𑀺𑀲𑀪𑀸𑀕𑀸𑀳𑀸𑀭𑀁 𑀲𑁂𑀯𑀺𑀢𑁆𑀯𑀸 𑀆𑀢𑀧𑁂 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀮𑀓𑀓𑀸𑀴𑀓𑀼𑀝𑁆𑀞𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀤𑀁 ‘𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫.

𑀉𑀢𑀼𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀁 ‘𑀉𑀢𑀼𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫. 𑀢𑀲𑁆𑀫𑀺𑀁 𑀉𑀢𑀼 𑀅𑀜𑁆𑀜𑀁 𑀅𑀝𑁆𑀞𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀤𑀁 ‘𑀉𑀢𑀼𑀧𑀘𑁆𑀘𑀬𑀁’ 𑀦𑀸𑀫. 𑀢𑀲𑁆𑀫𑀺𑀫𑁆𑀧𑀺 𑀉𑀢𑀼 𑀅𑀜𑁆𑀜𑀁 𑀅𑀝𑁆𑀞𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀤𑀁 ‘𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫. 𑀏𑀯𑀁 𑀢𑀺𑀲𑁆𑀲𑁄𑀬𑁂𑀯 𑀲𑀦𑁆𑀢𑀢𑀺𑀬𑁄 𑀖𑀝𑁆𑀝𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀢𑀢𑁄 𑀧𑀭𑀁. 𑀇𑀫𑀫𑀢𑁆𑀣𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀦𑀸𑀫 𑀯𑀮𑀸𑀳𑀓𑁄. 𑀉𑀢𑀼𑀧𑀘𑁆𑀘𑀬𑀸 𑀦𑀸𑀫 𑀯𑀼𑀝𑁆𑀞𑀺𑀥𑀸𑀭𑀸. 𑀤𑁂𑀯𑁂 𑀧𑀦 𑀯𑀼𑀝𑁆𑀞𑁂 𑀩𑀻𑀚𑀸𑀦𑀺 𑀯𑀺𑀭𑀽𑀳𑀦𑁆𑀢𑀺, 𑀧𑀣𑀯𑀻 𑀕𑀦𑁆𑀥𑀁 𑀫𑀼𑀜𑁆𑀘𑀢𑀺, 𑀧𑀩𑁆𑀩𑀢𑀸 𑀦𑀻𑀮𑀸 𑀔𑀸𑀬𑀦𑁆𑀢𑀺, 𑀲𑀫𑀼𑀤𑁆𑀤𑁄 𑀯𑀟𑁆𑀠𑀢𑀺, 𑀏𑀢𑀁 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫.

𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀁 ‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫. ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧) 𑀇𑀤𑀁 ‘𑀘𑀺𑀢𑁆𑀢𑀧𑀘𑁆𑀘𑀬𑀁’ 𑀦𑀸𑀫. 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀅𑀲𑁆𑀲𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀭𑀣𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀺𑀢𑀻 (𑀧𑀝𑀺. 𑀫. 𑁩.𑁧𑁮) 𑀇𑀤𑀁 ‘𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁’ 𑀦𑀸𑀫.

‘𑀧𑀭𑀺𑀦𑀺𑀧𑁆𑀨𑀦𑁆𑀦’𑀦𑁆𑀢𑀺 𑀧𑀦𑁆𑀦𑀭𑀲 𑀭𑀽𑀧𑀸𑀦𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫, 𑀤𑀲 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. ‘𑀬𑀤𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀅𑀲𑀗𑁆𑀔𑀢𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁’. ‘‘𑀢𑁂𑀲𑀁𑀬𑁂𑀯 𑀧𑀦 𑀭𑀽𑀧𑀸𑀦𑀁 𑀓𑀸𑀬𑀯𑀺𑀓𑀸𑀭𑁄 ‘𑀓𑀸𑀬𑀯𑀺𑀜𑁆𑀜𑀢𑁆𑀢𑀺’ 𑀦𑀸𑀫, 𑀯𑀘𑀻𑀯𑀺𑀓𑀸𑀭𑁄 ‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺’ 𑀦𑀸𑀫, 𑀙𑀺𑀤𑁆𑀤𑀁 𑀯𑀺𑀯𑀭𑀁 ‘𑀆𑀓𑀸𑀲𑀥𑀸𑀢𑀼’ 𑀦𑀸𑀫, 𑀮𑀳𑀼𑀪𑀸𑀯𑁄 ‘𑀮𑀳𑀼𑀢𑀸’ 𑀦𑀸𑀫, 𑀫𑀼𑀤𑀼𑀪𑀸𑀯𑁄 ‘𑀫𑀼𑀤𑀼𑀢𑀸’ 𑀦𑀸𑀫, 𑀓𑀫𑁆𑀫𑀜𑁆𑀜𑀪𑀸𑀯𑁄 ‘𑀓𑀫𑁆𑀫𑀜𑁆𑀜𑀢𑀸’ 𑀦𑀸𑀫, 𑀦𑀺𑀩𑁆𑀩𑀢𑁆𑀢𑀺 ‘𑀉𑀧𑀘𑀬𑁄’ 𑀦𑀸𑀫, 𑀧𑀯𑀢𑁆𑀢𑀺 ‘𑀲𑀦𑁆𑀢𑀢𑀺’ 𑀦𑀸𑀫, 𑀚𑀻𑀭𑀡𑀸𑀓𑀸𑀭𑁄 ‘𑀚𑀭𑀢𑀸’ 𑀦𑀸𑀫, 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄 ‘𑀅𑀦𑀺𑀘𑁆𑀘𑀢𑀸’ 𑀦𑀸𑀫𑀸𑀢𑀺. 𑀲𑀩𑁆𑀩𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀲𑀗𑁆𑀔𑀢𑀫𑁂𑀯 𑀳𑁄𑀢𑀻’’𑀢𑀺.

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀅𑀝𑁆𑀞𑀓𑀣𑀸𑀬

𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀓𑁆𑀔𑁂𑀧𑀓𑀡𑁆𑀟𑁄

𑀢𑀺𑀓𑀦𑀺𑀓𑁆𑀔𑁂𑀧𑀓𑀣𑀸

𑁯𑁮𑁫. 𑀏𑀢𑁆𑀢𑀸𑀯𑀢𑀸 𑀓𑀼𑀲𑀮𑀢𑁆𑀢𑀺𑀓𑁄 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀧𑀤𑀪𑀸𑀚𑀦𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀬𑁆𑀯𑀸𑀬𑀁 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀯𑀺𑀪𑀚𑀦𑀦𑀬𑁄 𑀯𑀼𑀢𑁆𑀢𑁄, 𑀲𑁂𑀲𑀢𑀺𑀓𑀤𑀼𑀓𑀸𑀦𑀫𑁆𑀧𑀺 𑀏𑀲𑁂𑀯 𑀯𑀺𑀪𑀚𑀦𑀦𑀬𑁄 𑀳𑁄𑀢𑀺 𑁋 𑀬𑀣𑀸 𑀳𑀺 𑀏𑀢𑁆𑀣, 𑀏𑀯𑀁 ‘𑀓𑀢𑀫𑁂 𑀥𑀫𑁆𑀫𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀔𑀦𑁆𑀥𑀁, 𑀇𑀫𑁂 𑀥𑀫𑁆𑀫𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀢𑀺𑀓𑀤𑀼𑀓𑁂𑀲𑀼 𑀲𑀓𑁆𑀓𑀸 𑀧𑀡𑁆𑀟𑀺𑀢𑁂𑀳𑀺 𑀯𑀺𑀪𑀸𑀚𑀦𑀦𑀬𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑁋 𑀢𑀲𑁆𑀫𑀸 𑀢𑀁 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀅𑀜𑁆𑀜𑁂𑀦 𑀦𑀸𑀢𑀺𑀲𑀗𑁆𑀔𑁂𑀧𑀦𑀸𑀢𑀺𑀯𑀺𑀢𑁆𑀣𑀸𑀭𑀦𑀬𑁂𑀦 𑀲𑀩𑁆𑀩𑀢𑀺𑀓𑀤𑀼𑀓𑀥𑀫𑁆𑀫𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑀁 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀜𑁆𑀳𑀺 𑀯𑀺𑀢𑁆𑀣𑀸𑀭𑀤𑁂𑀲𑀦𑀸, 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀲𑀗𑁆𑀔𑁂𑀧𑀤𑁂𑀲𑀦𑀸. 𑀇𑀤𑀁 𑀧𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁 𑀉𑀧𑀸𑀤𑀸𑀬 𑀲𑀗𑁆𑀔𑁂𑀧𑁄, 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀉𑀧𑀸𑀤𑀸𑀬 𑀯𑀺𑀢𑁆𑀣𑀸𑀭𑁄𑀢𑀺 𑀲𑀗𑁆𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑀥𑀸𑀢𑀼𑀓𑀁 𑀳𑁄𑀢𑀺. 𑀢𑀬𑀺𑀤𑀁, 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸𑀧𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀓𑀸𑀭𑀡𑀯𑀲𑁂𑀦𑀸𑀧𑀺, 𑀦𑀺𑀓𑁆𑀔𑁂𑀧𑀓𑀡𑁆𑀟𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

𑀫𑀽𑀮𑀢𑁄 𑀔𑀦𑁆𑀥𑀢𑁄 𑀘𑀸𑀧𑀺, 𑀤𑁆𑀯𑀸𑀭𑀢𑁄 𑀘𑀸𑀧𑀺 𑀪𑀽𑀫𑀺𑀢𑁄;

𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀘𑀸𑀧𑀺, 𑀦𑀸𑀫𑀢𑁄 𑀘𑀸𑀧𑀺 𑀮𑀺𑀗𑁆𑀕𑀢𑁄;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸, 𑀦𑀺𑀓𑁆𑀔𑁂𑀧𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀇𑀤𑀜𑁆𑀳𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀽𑀮𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀔𑀦𑁆𑀥𑀢𑁄. 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀤𑁆𑀯𑀸𑀭𑀢𑁄. 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀜𑁆𑀳𑀺 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀔𑀪𑀽𑀫𑀺𑀬𑀁, 𑀓𑀸𑀫𑀸𑀯𑀘𑀭𑁂𑀢𑀺 𑀪𑀽𑀫𑀺𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀁. 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑀥𑀫𑁆𑀫𑀦𑀸𑀫𑀮𑀺𑀗𑁆𑀕𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀅𑀢𑁆𑀣𑀸𑀤𑀻𑀳𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀓𑀼𑀲𑀮𑀧𑀤𑀦𑀺𑀤𑁆𑀤𑁂𑀲𑁂 𑀢𑀸𑀯 𑀢𑀻𑀡𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀓𑀼𑀲𑀮𑀸𑀦𑀺 𑀘 𑀢𑀸𑀦𑀺 𑀫𑀽𑀮𑀸𑀦𑀺 𑀘, 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀧𑀪𑀯𑀚𑀦𑀓𑀲𑀫𑀼𑀝𑁆𑀞𑀸𑀦𑀦𑀺𑀩𑁆𑀩𑀢𑁆𑀢𑀓𑀝𑁆𑀞𑁂𑀦 𑀫𑀽𑀮𑀸𑀦𑀻𑀢𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀏𑀯𑀁 𑀅𑀢𑁆𑀣𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀸𑀫𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀆𑀳. 𑀏𑀢𑁆𑀢𑀸𑀯𑀢𑀸 𑀬𑀲𑁆𑀫𑀸 𑀫𑀽𑀮𑁂𑀦 𑀫𑀼𑀢𑁆𑀢𑀁 𑀓𑀼𑀲𑀮𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀢𑀻𑀳𑀺 𑀫𑀽𑀮𑁂𑀳𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀢𑀢𑁆𑀣 𑀅𑀮𑁄𑀪𑁂𑀦 𑀲𑀫𑁆𑀧𑀬𑀼𑀢𑁆𑀢𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂, 𑀅𑀤𑁄𑀲𑀸𑀫𑁄𑀳𑀸𑀧𑀺 𑀅𑀮𑁄𑀪𑁂𑀦 𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀕𑀡𑀦𑀁𑀬𑁂𑀯 𑀕𑀘𑁆𑀙𑀦𑁆𑀢𑀺. 𑀲𑁂𑀲𑀤𑁆𑀯𑀬𑀯𑀲𑁂𑀦 𑀲𑀫𑁆𑀧𑀬𑁄𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀧𑀼𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀘𑀢𑀼𑀓𑁆𑀔𑀦𑁆𑀥𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀢𑀁𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀢𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀲𑀫𑀼𑀝𑁆𑀞𑀺𑀢𑀁. 𑀇𑀫𑀺𑀦𑀸𑀧𑀺 𑀦𑀬𑁂𑀦 𑀢𑀤𑁂𑀯 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀁 𑀢𑀺𑀡𑁆𑀡𑀁 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀏𑀯𑀁 𑀢𑀸𑀯 𑀓𑀼𑀲𑀮𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁.

𑁯𑁮𑁬. 𑀅𑀓𑀼𑀲𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀸𑀤𑀲𑀦𑁆𑀦𑀜𑁆𑀳𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀏𑀓𑀫𑁆𑀧𑀺 𑀫𑀽𑀮𑁂𑀦 𑀫𑀼𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀫𑀽𑀮𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀔𑀦𑁆𑀥𑀢𑁄 𑀘 𑀉𑀤𑁆𑀥𑀁 𑀅𑀓𑀼𑀲𑀮𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀢𑀸𑀦𑁂𑀯 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑀢𑀼𑀓𑁆𑀔𑀦𑁆𑀥𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀥𑀫𑁆𑀫𑀭𑀸𑀚𑀸 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀦 𑀦𑁂𑀲𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀬𑀁 𑀧𑀦𑁂𑀢𑁆𑀣 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀧𑀼𑀕𑁆𑀕𑀮𑁂 𑀯𑀸 𑀞𑀺𑀢𑀦𑁆𑀢𑀺 ‘𑀏𑀓𑀝𑁆𑀞𑀁’. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀞𑀺𑀢𑀁 𑀲𑀳𑀚𑁂𑀓𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀞𑀺𑀢𑀁 𑀧𑀳𑀸𑀦𑁂𑀓𑀝𑁆𑀞𑀁 𑀦𑀸𑀫. 𑀢𑁂𑀦 𑀮𑁄𑀪𑀸𑀤𑀺𑀦𑀸 𑀅𑀜𑁆𑀜𑁂𑀦 𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑁂𑀦 𑀲𑀳 𑀏𑀓𑀲𑁆𑀫𑀺𑀁 𑀞𑀺𑀢𑀦𑁆𑀢𑀺 𑀢𑀤𑁂𑀓𑀝𑁆𑀞𑀁. 𑀢𑀢𑁆𑀣 ‘𑀓𑀢𑀫𑁂 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑁂; ‘𑀓𑀢𑀫𑁂 𑀥𑀫𑁆𑀫𑀸 𑀳𑀻𑀦𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺 𑀳𑀻𑀦𑀢𑁆𑀢𑀺𑀓𑁂 ‘𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺 𑀇𑀫𑀲𑁆𑀫𑀺𑀁 𑀓𑀼𑀲𑀮𑀢𑁆𑀢𑀺𑀓𑁂; ‘𑀓𑀢𑀫𑁂 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 ‘𑀓𑀢𑀫𑁂 𑀥𑀫𑁆𑀫𑀸 𑀲𑀭𑀡𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸𑀢𑀺 𑀲𑀭𑀡𑀤𑀼𑀓𑁂’𑀢𑀺 𑁋 𑀇𑀫𑁂𑀲𑀼 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 ‘𑀲𑀳𑀚𑁂𑀓𑀝𑁆𑀞𑀁’ 𑀆𑀕𑀢𑀁.

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂 𑀧𑀦 ‘𑀇𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀢𑁆𑀢𑀺𑀓𑁂𑀧𑀺 ‘𑀇𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’𑀢𑀺, 𑀧𑀼𑀦 𑀢𑀢𑁆𑀣𑁂𑀯 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸; 𑀢𑀤𑁂𑀓𑀝𑁆𑀞𑁄 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀽; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺; 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁂 ‘‘𑀢𑀢𑁆𑀣 𑀓𑀢𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺 (𑀯𑀺𑀪. 𑁩𑁯𑁧) 𑁋 𑀇𑀫𑁂𑀲𑀼 𑀧𑀦 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 ‘𑀧𑀳𑀸𑀦𑁂𑀓𑀝𑁆𑀞𑀁’ 𑀆𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁮𑁭. 𑀅𑀩𑁆𑀬𑀸𑀓𑀢𑀧𑀤𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀅𑀚𑀝𑀸𑀓𑀸𑀲𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀆𑀭𑀫𑁆𑀫𑀡𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘 𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁.

𑁯𑁮𑁮. 𑀯𑁂𑀤𑀦𑀸𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀲𑀼𑀔𑀪𑀽𑀫𑀺𑀬𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀢𑀫𑁆𑀩𑀪𑀽𑀫𑀺 𑀓𑀡𑁆𑀳𑀪𑀽𑀫𑀻𑀢𑀺 𑀢𑀫𑁆𑀩𑀓𑀡𑁆𑀳𑀪𑀽𑀫𑀺𑀬𑁄𑀯 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀼𑀔𑀫𑁆𑀧𑀺 𑀲𑀼𑀔𑀪𑀽𑀫𑀺 𑀦𑀸𑀫. 𑀬𑀣𑀸 𑀉𑀘𑁆𑀙𑀼𑀪𑀽𑀫𑀺 𑀲𑀸𑀮𑀺𑀪𑀽𑀫𑀻𑀢𑀺 𑀉𑀘𑁆𑀙𑀼𑀲𑀸𑀮𑀻𑀦𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀼𑀔𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀲𑀼𑀔𑀪𑀽𑀫𑀺 𑀦𑀸𑀫. 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀬𑀲𑁆𑀫𑀸 𑀧𑀦 𑀲𑀸 𑀓𑀸𑀫𑀸𑀯𑀘𑀭𑁂 𑀯𑀸 𑀳𑁄𑀢𑀺, 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀯𑀸, 𑀢𑀲𑁆𑀫𑀸𑀲𑁆𑀲𑀸 𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀓𑀸𑀫𑀸𑀯𑀘𑀭𑁂𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀔𑀯𑁂𑀤𑀦𑀁 𑀞𑀧𑁂𑀢𑁆𑀯𑀸𑀢𑀺 𑀬𑀸 𑀲𑀸 𑀲𑀼𑀔𑀪𑀽𑀫𑀺𑀬𑀁 𑀲𑀼𑀔𑀯𑁂𑀤𑀦𑀸, 𑀢𑀁 𑀞𑀧𑁂𑀢𑁆𑀯𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑀸𑀬 𑀞𑀧𑀺𑀢𑀸𑀬 𑀲𑀼𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀇𑀫𑀲𑁆𑀫𑀺𑀁 𑀢𑀺𑀓𑁂 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀲𑀩𑁆𑀩𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀤𑀫𑁆𑀧𑀺 𑀦 𑀮𑀩𑁆𑀪𑀢𑀺. 𑀅𑀬𑀜𑁆𑀳𑀺 𑀢𑀺𑀓𑁄 𑀓𑀼𑀲𑀮𑀢𑁆𑀢𑀺𑀓𑁂 𑀘 𑀅𑀮𑀩𑁆𑀪𑀫𑀸𑀦𑁂𑀳𑀺 𑀇𑀫𑁂𑀳𑀺 𑀘 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀫𑀼𑀢𑁆𑀢𑀓𑁄 𑀦𑀸𑀫. 𑀇𑀢𑁄 𑀧𑀭𑁂𑀲𑀼 𑀧𑀦 𑀢𑀺𑀓𑀤𑀼𑀓𑁂𑀲𑀼 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀢𑀁 𑀲𑀩𑁆𑀩𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀫𑀸𑀢𑀺𑀓𑀸𑀓𑀣𑀸𑀬𑀜𑁆𑀘𑁂𑀯 𑀓𑀼𑀲𑀮𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁂 𑀘 𑀯𑀼𑀢𑁆𑀢𑀫𑁂𑀯. 𑀬𑀁 𑀧𑀦 𑀬𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁 𑀢𑀤𑁂𑀯 𑀯𑀓𑁆𑀔𑀸𑀫.

𑁯𑁯𑁧. 𑀢𑀢𑁆𑀣 𑀯𑀺𑀧𑀸𑀓𑀢𑁆𑀢𑀺𑀓𑁂 𑀢𑀸𑀯 𑀓𑀺𑀜𑁆𑀘𑀸𑀧𑀺 𑀅𑀭𑀽𑀧𑀥𑀫𑁆𑀫𑀸 𑀯𑀺𑀬 𑀭𑀽𑀧𑀥𑀫𑁆𑀫𑀸𑀧𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀅𑀢𑁆𑀣𑀺, 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀢𑁂 𑀓𑀫𑁆𑀫𑀲𑀭𑀺𑀓𑁆𑀔𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀲𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸𑀯 𑀓𑀫𑁆𑀫𑀲𑀭𑀺𑀓𑁆𑀔𑀓𑀢𑁆𑀢𑀸 𑀯𑀺𑀧𑀸𑀓𑀸𑀢𑀺 𑀯𑀼𑀢𑁆𑀢𑀸, 𑀩𑀻𑀚𑀲𑀭𑀺𑀓𑁆𑀔𑀓𑀁 𑀨𑀮𑀁 𑀯𑀺𑀬. 𑀲𑀸𑀮𑀺𑀩𑀻𑀚𑀲𑁆𑀫𑀺𑀜𑁆𑀳𑀺 𑀯𑀧𑀺𑀢𑁂 𑀅𑀗𑁆𑀓𑀼𑀭𑀧𑀢𑁆𑀢𑀸𑀤𑀻𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼𑀧𑀺 𑀲𑀸𑀮𑀺𑀨𑀮𑀦𑁆𑀢𑀺 𑀦 𑀯𑀼𑀘𑁆𑀘𑀢𑀺. 𑀬𑀤𑀸 𑀧𑀦 𑀲𑀸𑀮𑀺𑀲𑀻𑀲𑀁 𑀧𑀓𑁆𑀓𑀁 𑀳𑁄𑀢𑀺 𑀧𑀭𑀺𑀡𑀢𑀁, 𑀢𑀤𑀸 𑀩𑀻𑀚𑀲𑀭𑀺𑀓𑁆𑀔𑀓𑁄 𑀲𑀸𑀮𑀺 𑀏𑀯 𑀲𑀸𑀮𑀺𑀨𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀗𑁆𑀓𑀼𑀭𑀧𑀢𑁆𑀢𑀸𑀤𑀻𑀦𑀺 𑀧𑀦 𑀩𑀻𑀚𑀚𑀸𑀢𑀸𑀦𑀺 𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀯 𑀭𑀽𑀧𑀫𑁆𑀧𑀺 𑀓𑀫𑁆𑀫𑀚𑀦𑁆𑀢𑀺 𑀯𑀸 𑀉𑀧𑀸𑀤𑀺𑀡𑁆𑀡𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁯𑁯𑁪. 𑀉𑀧𑀸𑀤𑀺𑀡𑁆𑀡𑀢𑁆𑀢𑀺𑀓𑁂 𑀓𑀺𑀜𑁆𑀘𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀔𑀦𑁆𑀥𑀸 ‘𑀅𑀫𑁆𑀳𑀸𑀓𑀁 𑀫𑀸𑀢𑀼𑀮𑀢𑁆𑀣𑁂𑀭𑁄 𑀅𑀫𑁆𑀳𑀸𑀓𑀁 𑀘𑀽𑀴𑀧𑀺𑀢𑀼𑀢𑁆𑀣𑁂𑀭𑁄’𑀢𑀺 𑀯𑀤𑀦𑁆𑀢𑀸𑀦𑀁 𑀧𑀭𑁂𑀲𑀁 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀅𑀕𑁆𑀕𑀳𑀺𑀢𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀅𑀦𑀼𑀧𑀸𑀤𑀺𑀡𑁆𑀡𑀸𑀦𑁂𑀯. 𑀢𑀸𑀦𑀺 𑀳𑀺, 𑀬𑀣𑀸 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁄 𑀅𑀬𑁄𑀕𑀼𑀴𑁄 𑀫𑀓𑁆𑀔𑀺𑀓𑀸𑀦𑀁 𑀅𑀪𑀺𑀦𑀺𑀲𑀻𑀤𑀦𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀯𑀫𑁂𑀯 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀡𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸𑀢𑀺.

𑁯𑁯𑁮. 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁦𑁦. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀯𑀺𑀢𑀓𑁆𑀓𑀲𑀳𑀚𑀸𑀢𑁂𑀦 𑀯𑀺𑀘𑀸𑀭𑁂𑀦 𑀲𑀤𑁆𑀥𑀺𑀁 𑀓𑀼𑀲𑀮𑀢𑁆𑀢𑀺𑀓𑁂 𑀅𑀮𑀩𑁆𑀪𑀫𑀸𑀦𑀸𑀯 𑀦 𑀮𑀩𑁆𑀪𑀦𑁆𑀢𑀺.

𑁧𑁦𑁦𑁩. 𑀧𑀻𑀢𑀺𑀲𑀳𑀕𑀢𑀢𑁆𑀢𑀺𑀓𑁂 𑀧𑀻𑀢𑀺𑀆𑀤𑀬𑁄 𑀅𑀢𑁆𑀢𑀦𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀻𑀢𑀺𑀲𑀳𑀕𑀢𑀸𑀤𑀺𑀪𑀸𑀯𑀁 𑀤𑀢𑁆𑀯𑀸 𑀲𑀬𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀸 𑀚𑀸𑀢𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀢𑀺𑀓𑁂 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀇𑀤𑀫𑁆𑀧𑀺 𑀦 𑀮𑀩𑁆𑀪𑀢𑀺. 𑀅𑀬𑀜𑁆𑀳𑀺 𑀢𑀺𑀓𑁄 𑀓𑀼𑀲𑀮𑀢𑁆𑀢𑀺𑀓𑁂 𑀘 𑀅𑀮𑀩𑁆𑀪𑀫𑀸𑀦𑁂𑀳𑀺 𑀇𑀫𑁂𑀳𑀺 𑀘 𑀧𑀜𑁆𑀘𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀫𑀼𑀢𑁆𑀢𑀓𑁄 𑀦𑀸𑀫.

𑁧𑁦𑁦𑁬. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂 𑀲𑀜𑁆𑀜𑁄𑀚𑀦𑀸𑀦𑀻𑀢𑀺 𑀩𑀦𑁆𑀥𑀦𑀸𑀦𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺 𑀯𑀺𑀚𑁆𑀚𑀫𑀸𑀦𑀝𑁆𑀞𑁂𑀦 𑀲𑀢𑀺 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂; 𑀲𑀬𑀁 𑀯𑀸 𑀲𑀢𑀻 𑀢𑀲𑁆𑀫𑀺𑀁 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺 ‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺’. 𑀲𑀻𑀮𑁂𑀦 𑀲𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑀸, 𑀯𑀢𑁂𑀦 𑀲𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑀸, 𑀲𑀻𑀮𑀯𑀢𑁂𑀳𑀺 𑀲𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑀸𑀢𑀺 𑀕𑀳𑀺𑀢𑀲𑀫𑀸𑀤𑀸𑀦𑀁 𑀧𑀦 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀦𑀸𑀫.

𑁧𑁦𑁦𑁭. 𑀇𑀥𑀸𑀢𑀺 𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄. 𑀲𑁆𑀯𑀸𑀬𑀁 𑀓𑀢𑁆𑀣𑀘𑀺 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁮𑁯). 𑀓𑀢𑁆𑀣𑀘𑀺 𑀲𑀸𑀲𑀦𑀁. 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧). 𑀓𑀢𑁆𑀣𑀘𑀺 𑀑𑀓𑀸𑀲𑀁. 𑀬𑀣𑀸𑀳 𑁋

‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺. (𑀤𑀻. 𑀦𑀺. 𑁨.𑁩𑁬𑁯);

𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯. 𑀬𑀣𑀸𑀳 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺 (𑀫. 𑀦𑀺. 𑁧.𑁩𑁦). 𑀇𑀥 𑀧𑀦 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀏𑀢𑁆𑀣 𑀧𑀦 ‘𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺’. 𑀬𑀲𑁆𑀲 𑀳𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀭𑀳𑀺𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑀝𑀺𑀲𑁂𑀥𑀓𑁄 𑀦𑁂𑀯 ‘𑀆𑀕𑀫𑁄’, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀦𑁂𑀯 ‘𑀅𑀥𑀺𑀕𑀫𑁄’ 𑀅𑀢𑁆𑀣𑀺, 𑀲𑁄 ‘𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺’. 𑀲𑁆𑀯𑀸𑀬𑀁 𑁋

𑀧𑀼𑀣𑀽𑀦𑀁 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦; 𑀘𑀽𑀴𑀦𑀺. 𑀅𑀝𑁆𑀞. 𑁮𑁮; 𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁬);

𑀲𑁄 𑀳𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀬𑀣𑀸𑀳 𑁋 ‘‘𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑁆𑀧𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸’’𑀢𑀺 (𑀫𑀳𑀸𑀦𑀺. 𑁯𑁪). 𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀯𑀸 𑀅𑀬𑀁 𑁋 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑁋 𑀚𑀦𑁄𑀢𑀺𑀧𑀺 𑀧𑀼𑀣𑀼𑀚𑁆𑀚𑀦𑁄. 𑀏𑀯𑀫𑁂𑀢𑁂𑀳𑀺 ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑁂 𑀢𑁂 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦; 𑀘𑀽𑀴𑀦𑀺. 𑀅𑀝𑁆𑀞. 𑁮𑁮);

𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀲𑀼 𑀅𑀭𑀺𑀬𑀸𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀇𑀭𑀺𑀬𑀦𑀢𑁄, 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀘 𑀅𑀭𑀡𑀻𑀬𑀢𑁄 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀼𑀘𑁆𑀘𑀦𑁆𑀢𑀺. 𑀩𑀼𑀤𑁆𑀥𑀸 𑀏𑀯 𑀯𑀸 𑀇𑀥 𑀅𑀭𑀺𑀬𑀸. 𑀬𑀣𑀸𑀳 𑁋 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮).

𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀬𑁄𑀕𑁂𑀦 𑀲𑁄𑀪𑀦𑀸 𑀧𑀼𑀭𑀺𑀲𑀸𑀢𑀺 𑀲𑀧𑁆𑀧𑀼𑀭𑀺𑀲𑀸. 𑀲𑀩𑁆𑀩𑁂𑀯 𑀯𑀸 𑀏𑀢𑁂 𑀤𑁆𑀯𑁂𑀥𑀸𑀧𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀧𑀺 𑀳𑀺 𑀅𑀭𑀺𑀬𑀸 𑀘 𑀲𑀧𑁆𑀧𑀼𑀭𑀺𑀲𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸𑀧𑀺. 𑀬𑀣𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁,

𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄. 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀢𑀺. 𑀇𑀤𑀸𑀦𑀺 𑀬𑁄 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑁄, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀻, 𑀲𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻𑀢𑀺 𑀤𑀼𑀯𑀺𑀥𑁄. 𑀢𑁂𑀲𑀼 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀫𑀁𑀲𑀘𑀓𑁆𑀔𑀼𑀦𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀭𑀺𑀬𑀸 𑀤𑀺𑀝𑁆𑀞𑀸𑀧𑀺 𑀅𑀤𑀺𑀝𑁆𑀞𑀸𑀯 𑀳𑁄𑀦𑁆𑀢𑀺, 𑀢𑁂𑀲𑀁 𑀘𑀓𑁆𑀔𑀽𑀦𑀁 𑀯𑀡𑁆𑀡𑀫𑀢𑁆𑀢𑀕𑁆𑀕𑀳𑀡𑀢𑁄, 𑀦 𑀅𑀭𑀺𑀬𑀪𑀸𑀯𑀕𑁄𑀘𑀭𑀢𑁄. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀘𑀓𑁆𑀔𑀼𑀦𑀸 𑀅𑀭𑀺𑀬𑁂 𑀧𑀲𑁆𑀲𑀦𑁆𑀢𑀺, 𑀦 𑀘 𑀢𑁂 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀺𑀦𑁄.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘𑀅𑀭𑀺𑀬𑀸 𑀦𑀸𑀫 𑀪𑀦𑁆𑀢𑁂 𑀓𑀻𑀤𑀺𑀲𑀸’𑀢𑀺? 𑀣𑁂𑀭𑁄 𑀆𑀳 𑁋 ‘𑀇𑀥𑁂𑀓𑀘𑁆𑀘𑁄 𑀫𑀳𑀮𑁆𑀮𑀓𑁄 𑀅𑀭𑀺𑀬𑀸𑀦𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀳 𑀘𑀭𑀦𑁆𑀢𑁄𑀧𑀺 𑀦𑁂𑀯 𑀅𑀭𑀺𑀬𑁂 𑀚𑀸𑀦𑀸𑀢𑀺, 𑀏𑀯𑀁𑀤𑀼𑀚𑁆𑀚𑀸𑀦𑀸𑀯𑀼𑀲𑁄, 𑀅𑀭𑀺𑀬𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦𑁂𑀯 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑀦 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀁 ‘𑀤𑀲𑁆𑀲𑀦𑀁’, 𑀜𑀸𑀡𑀤𑀲𑁆𑀲𑀦𑀫𑁂𑀯 ‘𑀤𑀲𑁆𑀲𑀦𑀁’. 𑀬𑀣𑀸𑀳 𑁋 ‘‘𑀓𑀺𑀁 𑀢𑁂 𑀯𑀓𑁆𑀓𑀮𑀺 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭). 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄𑀧𑀺, 𑀜𑀸𑀡𑁂𑀦 𑀅𑀭𑀺𑀬𑁂𑀳𑀺 𑀤𑀺𑀝𑁆𑀞𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀅𑀧𑀲𑁆𑀲𑀦𑁆𑀢𑁄, 𑀅𑀭𑀺𑀬𑀸𑀥𑀺𑀕𑀢𑀜𑁆𑀘 𑀥𑀫𑁆𑀫𑀁 𑀅𑀦𑀥𑀺𑀕𑀘𑁆𑀙𑀦𑁆𑀢𑁄, 𑀅𑀭𑀺𑀬𑀓𑀭𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀅𑀤𑀺𑀝𑁆𑀞𑀢𑁆𑀢𑀸, ‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀅𑀓𑀼𑀲𑀮𑁄. 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺, 𑀏𑀢𑁆𑀣 𑀧𑀦

𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫, 𑀏𑀓𑀫𑁂𑀓𑁂𑀢𑁆𑀣 𑀧𑀜𑁆𑀘𑀥𑀸;

𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁, 𑀅𑀯𑀺𑀦𑀻𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀅𑀬𑀜𑁆𑀳𑀺 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑁄𑀢𑀺 𑀤𑀼𑀯𑀺𑀥𑁄 𑀯𑀺𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑁂𑀧𑀺 𑀯𑀺𑀦𑀬𑁂 𑀏𑀓𑀫𑁂𑀓𑁄 𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀲𑀁𑀯𑀭𑀯𑀺𑀦𑀬𑁄𑀧𑀺 𑀳𑀺 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀧𑀳𑀸𑀦𑀯𑀺𑀦𑀬𑁄𑀧𑀺 𑀢𑀤𑀗𑁆𑀕𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑁄.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀅𑀬𑀁 𑀲𑀻𑀮𑀲𑀁𑀯𑀭𑁄. ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀅𑀬𑀁 𑀲𑀢𑀺𑀲𑀁𑀯𑀭𑁄.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺,

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧) 𑁋

𑀅𑀬𑀁 𑀜𑀸𑀡𑀲𑀁𑀯𑀭𑁄 𑀦𑀸𑀫. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁪; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀔𑀦𑁆𑀢𑀺𑀲𑀁𑀯𑀭𑁄. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀯𑀻𑀭𑀺𑀬𑀲𑀁𑀯𑀭𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 ‘𑀲𑀁𑀯𑀭𑀯𑀺𑀦𑀬𑁄’ 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲, 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀧𑀳𑀸𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀺𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘𑀅𑀳𑀁 𑀫𑀫𑀸’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀭𑀢𑀺𑀲𑀜𑁆𑀜𑀸𑀬, 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀬, 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀲𑁆𑀲, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀧𑀳𑀸𑀦𑀁, 𑀏𑀢𑀁 ‘𑀢𑀤𑀗𑁆𑀕𑀧𑀳𑀸𑀦𑀁’ 𑀦𑀸𑀫.

𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁄, 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀉𑀤𑀓𑀧𑀺𑀝𑁆𑀞𑁂 𑀲𑁂𑀯𑀸𑀮𑀲𑁆𑀲, 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀏𑀢𑀁 ‘𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀁’ 𑀦𑀸𑀫. ‘‘𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀳𑀸𑀦𑀁, 𑀇𑀤𑀁 ‘𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁’ 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁, 𑀏𑀢𑀁 ‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀁’ 𑀦𑀸𑀫. 𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀢𑀁 ‘𑀦𑀺𑀲𑁆𑀲𑀭𑀡𑀧𑀳𑀸𑀦𑀁’ 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘𑀧𑀳𑀸𑀦𑀯𑀺𑀦𑀬𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀢𑀁𑀧𑀳𑀸𑀦𑀯𑀢𑁄 𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀪𑀯𑀢𑁄𑀧𑁂𑀢𑀁 𑀧𑀳𑀸𑀦𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀦𑀬𑁄𑀧𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑀬𑀁 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄, 𑀪𑁂𑀤𑀢𑁄 𑀘 𑀤𑀲𑀯𑀺𑀥𑁄 𑀯𑀺𑀦𑀬𑁄, 𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸, 𑀧𑀳𑀸𑀢𑀩𑁆𑀩𑀲𑁆𑀲 𑀘 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀬𑀲𑁆𑀫𑀸 𑀏𑀢𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁄 𑀢𑀲𑁆𑀲, 𑀅𑀬𑀁 ‘𑀅𑀯𑀺𑀦𑀻𑀢𑁄’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀲 𑀦𑀬𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣𑀸𑀧𑀺. 𑀦𑀺𑀦𑁆𑀦𑀸𑀦𑀸𑀓𑀭𑀡𑀜𑁆𑀳𑁂𑀢𑀁 𑀅𑀢𑁆𑀣𑀢𑁄. 𑀬𑀣𑀸𑀳 𑁋 ‘‘𑀬𑁂𑀯 𑀢𑁂 𑀅𑀭𑀺𑀬𑀸 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸, 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸 𑀢𑁂𑀯 𑀢𑁂 𑀅𑀭𑀺𑀬𑀸. 𑀬𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄 𑀲𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄, 𑀬𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄 𑀲𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄. 𑀬𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸, 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸 𑀢𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸. 𑀅𑀭𑀺𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑁂𑀢𑀺 𑀯𑀸, 𑀅𑀭𑀺𑀬𑀥𑀫𑁆𑀫𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀢𑀺 𑀯𑀸, 𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸, 𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸’’𑀢𑀺.

𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘𑀬𑀁 𑀭𑀽𑀧𑀁 𑀲𑁄 𑀅𑀳𑀁, 𑀬𑁄 𑀅𑀳𑀁 𑀢𑀁 𑀭𑀽𑀧’𑀦𑁆𑀢𑀺 𑀭𑀽𑀧𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻𑀢𑀺 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺,’’ 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 ‘𑀅𑀭𑀽𑀧𑀁 𑀅𑀢𑁆𑀢𑀸’𑀢𑀺 𑀕𑀳𑁂𑀢𑁆𑀯𑀸, 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬, 𑀢𑀁 𑀭𑀽𑀧𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 ‘𑀅𑀭𑀽𑀧𑀫𑁂𑀯 𑀅𑀢𑁆𑀢𑀸’𑀢𑀺 𑀕𑀳𑁂𑀢𑁆𑀯𑀸, 𑀧𑀼𑀧𑁆𑀨𑀫𑁆𑀳𑀺 𑀕𑀦𑁆𑀥𑀁 𑀯𑀺𑀬, 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 ‘𑀅𑀭𑀽𑀧𑀫𑁂𑀯 𑀅𑀢𑁆𑀢𑀸’𑀢𑀺 𑀕𑀳𑁂𑀢𑁆𑀯𑀸, 𑀓𑀭𑀡𑁆𑀟𑀓𑁂 𑀫𑀡𑀺𑀁 𑀯𑀺𑀬, 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 ‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’𑀢𑀺 𑀲𑀼𑀤𑁆𑀥𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. ‘𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 ‘𑀅𑀭𑀽𑀧𑀁 𑀅𑀢𑁆𑀢𑀸’𑀢𑀺 𑀓𑀣𑀺𑀢𑀁. 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 ‘𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸’ 𑀓𑀣𑀺𑀢𑁄. 𑀢𑀢𑁆𑀣 ‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸. 𑀅𑀯𑀲𑁂𑀲𑁂𑀲𑀼 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀏𑀯𑀫𑁂𑀢𑁆𑀣 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀫𑀕𑁆𑀕𑀸𑀯𑀭𑀡𑀸, 𑀦 𑀲𑀕𑁆𑀕𑀸𑀯𑀭𑀡𑀸, 𑀧𑀞𑀫𑀫𑀕𑁆𑀕𑀯𑀚𑁆𑀛𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁦𑁦𑁮. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀻𑀢𑀺 𑀲𑀢𑁆𑀣𑀼 𑀲𑀭𑀻𑀭𑁂 𑀯𑀸 𑀕𑀼𑀡𑁂 𑀯𑀸 𑀉𑀪𑀬𑀢𑁆𑀣 𑀯𑀸 𑀓𑀗𑁆𑀔𑀢𑀺. 𑀲𑀭𑀻𑀭𑁂 𑀓𑀗𑁆𑀔𑀫𑀸𑀦𑁄 ‘𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀦𑀸𑀫 𑀲𑀭𑀻𑀭𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀕𑀼𑀡𑁂 𑀓𑀗𑁆𑀔𑀫𑀸𑀦𑁄 ‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀉𑀪𑀬𑀢𑁆𑀣 𑀓𑀗𑁆𑀔𑀫𑀸𑀦𑁄 ‘𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀸𑀬 𑀲𑀭𑀻𑀭𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀜𑁂𑀬𑁆𑀬𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄 𑀮𑁄𑀓𑀢𑀸𑀭𑀓𑁄 𑀩𑀼𑀤𑁆𑀥𑁄 𑀦𑀸𑀫 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀅𑀬𑀜𑁆𑀳𑀺𑀲𑁆𑀲 𑀅𑀢𑁆𑀢𑀪𑀸𑀯𑁂 𑀕𑀼𑀡𑁂 𑀯𑀸 𑀓𑀗𑁆𑀔𑀦𑀢𑁄 𑀉𑀪𑀬𑀢𑁆𑀣 𑀓𑀗𑁆𑀔𑀢𑀺 𑀦𑀸𑀫. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀺. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀢𑀢𑁆𑀣𑁂𑀯 𑀅𑀥𑀺𑀫𑁄𑀓𑁆𑀔𑀁 𑀦 𑀮𑀪𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀘𑀺𑀢𑁆𑀢𑀁 𑀅𑀦𑀸𑀯𑀺𑀮𑀁 𑀓𑀢𑁆𑀯𑀸 𑀧𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀕𑀼𑀡𑁂𑀲𑀼 𑀦𑀧𑁆𑀧𑀲𑀻𑀤𑀢𑀺.

𑀥𑀫𑁆𑀫𑁂 𑀓𑀗𑁆𑀔𑀢𑀻𑀢𑀺𑀆𑀤𑀻𑀲𑀼 𑀧𑀦 ‘𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀫𑀕𑁆𑀕𑀨𑀮𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺 ‘𑀅𑀬𑀁 𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀼 𑀔𑁄 𑀅𑀦𑀺𑀬𑁆𑀬𑀸𑀦𑀺𑀓𑁄’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺 𑀥𑀫𑁆𑀫𑁂 𑀓𑀗𑁆𑀔𑀢𑀺 𑀦𑀸𑀫. ‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀓𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀓𑀸𑀢𑀺 𑀇𑀤𑀁 𑀲𑀗𑁆𑀖𑀭𑀢𑀦𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺, ‘𑀅𑀬𑀁 𑀲𑀗𑁆𑀖𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀦𑀼 𑀔𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑁄’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺, ‘𑀏𑀢𑀲𑁆𑀫𑀺𑀁 𑀲𑀗𑁆𑀖𑀭𑀢𑀦𑁂 𑀤𑀺𑀦𑁆𑀦𑀲𑁆𑀲 𑀯𑀺𑀧𑀸𑀓𑀨𑀮𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺 𑀲𑀗𑁆𑀖𑁂 𑀓𑀗𑁆𑀔𑀢𑀺 𑀦𑀸𑀫. ‘𑀢𑀺𑀲𑁆𑀲𑁄 𑀧𑀦 𑀲𑀺𑀓𑁆𑀔𑀸 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺, ‘𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑀧𑀘𑁆𑀘𑀬𑁂𑀦 𑀆𑀦𑀺𑀲𑀁𑀲𑁄 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄𑀧𑀺 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀦𑀸𑀫.

𑀧𑀼𑀩𑁆𑀩𑀦𑁆𑀢𑁄 𑀯𑀼𑀘𑁆𑀘𑀢𑀺 𑀅𑀢𑀻𑀢𑀸𑀦𑀺 𑀔𑀦𑁆𑀥𑀥𑀸𑀢𑀸𑀬𑀢𑀦𑀸𑀦𑀺. 𑀅𑀧𑀭𑀦𑁆𑀢𑁄 𑀅𑀦𑀸𑀕𑀢𑀸𑀦𑀺. 𑀢𑀢𑁆𑀣 𑀅𑀢𑀻𑀢𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 ‘𑀅𑀢𑀻𑀢𑀸𑀦𑀺 𑀦𑀼 𑀔𑁄, 𑀦 𑀦𑀼 𑀔𑁄’𑀢𑀺 𑀓𑀗𑁆𑀔𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. 𑀅𑀦𑀸𑀕𑀢𑁂𑀲𑀼 ‘𑀅𑀦𑀸𑀕𑀢𑀸𑀦𑀺 𑀦𑀼 𑀔𑁄, 𑀦 𑀦𑀼 𑀔𑁄’𑀢𑀺 𑀓𑀗𑁆𑀔𑀦𑁆𑀢𑁄 𑀅𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. 𑀉𑀪𑀬𑀢𑁆𑀣 𑀓𑀗𑁆𑀔𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. ‘𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀯𑀝𑁆𑀝𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀦𑁆𑀢𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀺 𑀦𑀸𑀫. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀇𑀫𑁂𑀲𑀁 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀸 ‘𑀇𑀤𑀧𑁆𑀧𑀘𑁆𑀘𑀬𑀸’. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀪𑀸𑀯𑁄 ‘𑀇𑀤𑀧𑁆𑀧𑀘𑁆𑀘𑀬𑀢𑀸’. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀯𑀸 ‘𑀇𑀤𑀧𑁆𑀧𑀘𑁆𑀘𑀬𑀢𑀸’; 𑀚𑀸𑀢𑀺𑀆𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀸𑀢𑀺𑀆𑀤𑀻𑀲𑀼 𑀢𑀁 𑀢𑀁 𑀧𑀝𑀺𑀘𑁆𑀘 𑀆𑀕𑀫𑁆𑀫 𑀲𑀫𑀼𑀧𑁆𑀧𑀦𑁆𑀦𑀸𑀢𑀺 ‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸’. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀻𑀢𑀺.

𑁧𑁦𑁦𑁯. 𑀲𑀻𑀮𑁂𑀦𑀸𑀢𑀺 𑀕𑁄𑀲𑀻𑀮𑀸𑀤𑀺𑀦𑀸. 𑀯𑀢𑁂𑀦𑀸𑀢𑀺 𑀕𑁄𑀯𑀢𑀸𑀤𑀺𑀦𑀸𑀯. 𑀲𑀻𑀮𑀩𑁆𑀩𑀢𑁂𑀦𑀸𑀢𑀺 𑀢𑀤𑀼𑀪𑀬𑁂𑀦. 𑀲𑀼𑀤𑁆𑀥𑀻𑀢𑀺 𑀓𑀺𑀮𑁂𑀲𑀲𑀼𑀤𑁆𑀥𑀺; 𑀧𑀭𑀫𑀢𑁆𑀣𑀲𑀼𑀤𑁆𑀥𑀺𑀪𑀽𑀢𑀁 𑀯𑀸 𑀦𑀺𑀩𑁆𑀩𑀸𑀦𑀫𑁂𑀯. 𑀢𑀤𑁂𑀓𑀝𑁆𑀞𑀸𑀢𑀺 𑀇𑀥 𑀧𑀳𑀸𑀦𑁂𑀓𑀝𑁆𑀞𑀁 𑀥𑀼𑀭𑀁. 𑀇𑀫𑀺𑀲𑁆𑀲𑀸 𑀘 𑀧𑀸𑀴𑀺𑀬𑀸 𑀤𑀺𑀝𑁆𑀞𑀺𑀓𑀺𑀮𑁂𑀲𑁄 𑀯𑀺𑀘𑀺𑀓𑀺𑀘𑁆𑀙𑀸𑀓𑀺𑀮𑁂𑀲𑁄𑀢𑀺 𑀤𑁆𑀯𑁂𑀬𑁂𑀯 𑀆𑀕𑀢𑀸. 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀧𑀦 𑀅𑀝𑁆𑀞 𑀅𑀦𑀸𑀕𑀢𑀸. 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸. 𑀏𑀢𑁆𑀣 𑀳𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀼 𑀧𑀳𑀻𑀬𑀫𑀸𑀦𑀸𑀲𑀼 𑀅𑀧𑀸𑀬𑀕𑀫𑀦𑀻𑀬𑁄 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀲𑀩𑁆𑀩𑁂𑀧𑀺𑀫𑁂 𑀧𑀳𑀸𑀦𑁂𑀓𑀝𑁆𑀞𑀸 𑀳𑀼𑀢𑁆𑀯𑀸 𑀧𑀳𑀻𑀬𑀦𑁆𑀢𑀺. 𑀲𑀳𑀚𑁂𑀓𑀝𑁆𑀞𑀁 𑀧𑀦 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀲𑀳𑀕𑀢𑀸𑀦𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀢𑀢𑁆𑀣 𑀤𑁆𑀯𑀻𑀲𑀼 𑀅𑀲𑀗𑁆𑀔𑀸𑀭𑀺𑀓𑀤𑀺𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀧𑀳𑀻𑀬𑀦𑁆𑀢𑁂𑀲𑀼 𑀢𑁂𑀳𑀺 𑀲𑀳𑀚𑀸𑀢𑁄 𑀮𑁄𑀪𑁄 𑀫𑁄𑀳𑁄 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀲𑁂𑀲𑀤𑀺𑀝𑁆𑀞𑀺𑀓𑀺𑀮𑁂𑀲𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸𑀓𑀺𑀮𑁂𑀲𑁄 𑀘 𑀧𑀳𑀸𑀦𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀲𑀼𑀧𑀺 𑀧𑀳𑀻𑀬𑀦𑁆𑀢𑁂𑀲𑀼 𑀢𑁂𑀳𑀺 𑀲𑀳𑀚𑀸𑀢𑁄 𑀮𑁄𑀪𑁄 𑀫𑁄𑀳𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀲𑀳𑀚𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀲𑁂𑀲𑀤𑀺𑀝𑁆𑀞𑀺𑀓𑀺𑀮𑁂𑀲𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸𑀓𑀺𑀮𑁂𑀲𑁄 𑀘 𑀧𑀳𑀸𑀦𑁂𑀓𑀝𑁆𑀞𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀏𑀯𑀁 𑀧𑀳𑀸𑀦𑁂𑀓𑀝𑁆𑀞𑀲𑁆𑀫𑀺𑀁𑀬𑁂𑀯 𑀲𑀳𑀚𑁂𑀓𑀝𑁆𑀞𑀁 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀲𑀳𑀚𑁂𑀓𑀝𑁆𑀞𑀁 𑀆𑀳𑀭𑀺𑀢𑁆𑀯𑀸 𑀤𑀻𑀧𑀬𑀺𑀁𑀲𑀼.

𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑁂𑀳𑀺 𑀢𑀤𑁂𑀓𑀝𑁆𑀞𑁂𑀳𑀺 𑀅𑀝𑁆𑀞𑀳𑀺 𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀯𑀺𑀦𑀺𑀩𑁆𑀪𑁄𑀕𑀁 𑀯𑀸 𑀓𑀢𑁆𑀯𑀸 𑀢𑁂𑀦 𑀮𑁄𑀪𑁂𑀦 𑀢𑁂𑀦 𑀤𑁄𑀲𑁂𑀦𑀸𑀢𑀺 𑀏𑀯𑀁 𑀏𑀓𑁂𑀓𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀻𑀧𑁂𑀢𑀩𑁆𑀩𑀸. 𑀢𑀢𑁆𑀣 𑀮𑁄𑀪𑁂 𑀕𑀳𑀺𑀢𑁂, 𑀫𑁄𑀳𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀓𑀺𑀮𑁂𑀲𑀕𑀡𑁄 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫. 𑀤𑁄𑀲𑁂 𑀕𑀳𑀺𑀢𑁂, 𑀫𑁄𑀳𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀬𑀁 𑀓𑀺𑀮𑁂𑀲𑀕𑀡𑁄 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫. 𑀫𑁄𑀳𑁂 𑀕𑀳𑀺𑀢𑁂, 𑀮𑁄𑀪𑁄 𑀤𑁄𑀲𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀬𑀁 𑀓𑀺𑀮𑁂𑀲𑀕𑀡𑁄 𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫. 𑀫𑀸𑀦𑁂 𑀕𑀳𑀺𑀢𑁂, 𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑁄 𑀮𑁄𑀪𑁄 𑀫𑁄𑀳𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀬𑀁 𑀓𑀺𑀮𑁂𑀲𑀕𑀡𑁄 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀢𑁂𑀦 𑀣𑀺𑀦𑁂𑀦 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀢𑁂𑀦 𑀅𑀳𑀺𑀭𑀺𑀓𑁂𑀦 𑀢𑁂𑀦 𑀅𑀦𑁄𑀢𑁆𑀢𑀧𑁆𑀧𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀁𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀢𑁂𑀦 𑀮𑁄𑀪𑁂𑀦…𑀧𑁂… 𑀢𑁂𑀦 𑀅𑀦𑁄𑀢𑁆𑀢𑀧𑁆𑀧𑁂𑀦 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀤𑀲𑁆𑀲𑀦𑀁 𑀦𑀸𑀫 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄; 𑀢𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘𑀓𑀲𑁆𑀫𑀸 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀲𑁆𑀲𑀦𑀁 𑀦𑀸𑀫 𑀚𑀸𑀢𑁄’𑀢𑀺? ‘𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄’. ‘𑀦𑀦𑀼 𑀕𑁄𑀢𑁆𑀭𑀪𑀼 𑀧𑀞𑀫𑀢𑀭𑀁 𑀧𑀲𑁆𑀲𑀢𑀻’𑀢𑀺? ‘𑀦𑁄 𑀦 𑀧𑀲𑁆𑀲𑀢𑀺; 𑀤𑀺𑀲𑁆𑀯𑀸𑀧𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀧𑀦 𑀦 𑀓𑀭𑁄𑀢𑀺, 𑀲𑀁𑀬𑁄𑀚𑀦𑀸𑀦𑀁 𑀅𑀧𑁆𑀧𑀳𑀸𑀦𑀢𑁄. 𑀢𑀲𑁆𑀫𑀸 𑀧𑀲𑁆𑀲𑀢𑀻’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀤𑀺𑀝𑁆𑀞𑀢𑁆𑀢𑀸 ‘𑀅𑀚𑁆𑀚𑀸𑀧𑀺 𑀭𑀸𑀚𑀸𑀦𑀁 𑀦 𑀧𑀲𑁆𑀲𑀸𑀫𑀻’𑀢𑀺 𑀯𑀤𑀦𑁆𑀢𑁄 𑀘𑁂𑀢𑁆𑀣 𑀚𑀸𑀦𑀧𑀤𑀧𑀼𑀭𑀺𑀲𑁄 𑀦𑀺𑀤𑀲𑁆𑀲𑀦𑀁.

𑁧𑁦𑁧𑁧. 𑀅𑀯𑀲𑁂𑀲𑁄 𑀮𑁄𑀪𑁄𑀢𑀺 𑀤𑀲𑁆𑀲𑀦𑁂𑀦 𑀧𑀳𑀻𑀦𑀸𑀯𑀲𑁂𑀲𑁄. 𑀮𑁄𑀪𑁄 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀲𑁆𑀲𑀦𑁂𑀦 𑀳𑀺 𑀅𑀧𑀸𑀬𑀕𑀫𑀦𑀻𑀬𑀸𑀯 𑀧𑀳𑀻𑀦𑀸. 𑀢𑁂𑀳𑀺 𑀧𑀦 𑀅𑀜𑁆𑀜𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. ‘𑀢𑀤𑁂𑀓𑀝𑁆𑀞𑀸’𑀢𑀺 𑀢𑁂𑀳𑀺 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀢𑀻𑀳𑀺 𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑁄𑀕𑀢𑁄𑀧𑀺 𑀧𑀳𑀸𑀦𑀢𑁄𑀧𑀺 𑀏𑀓𑀝𑁆𑀞𑀸 𑀧𑀜𑁆𑀘 𑀓𑀺𑀮𑁂𑀲𑀸. 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬𑀸𑀢𑀺 𑀇𑀤𑀁 𑀲𑀁𑀬𑁄𑀚𑀦𑀸𑀤𑀻𑀦𑀁 𑀯𑀺𑀬 𑀢𑁂𑀳𑀺 𑀫𑀕𑁆𑀕𑁂𑀳𑀺 𑀅𑀧𑁆𑀧𑀳𑀸𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀳𑀸𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀢𑁂𑀲𑀁 𑀫𑀕𑁆𑀕𑀸𑀦𑀁 𑀅𑀪𑀸𑀯𑀺𑀢𑀢𑁆𑀢𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀳𑀻𑀦𑀸𑀢𑀺 𑀇𑀫𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁧𑁩. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀢𑁆𑀢𑀺𑀓𑁂 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀦𑀺𑀝𑁆𑀞𑀧𑁂𑀢𑁆𑀯𑀸, 𑀧𑀼𑀦 ‘𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀻’𑀢𑀺𑀆𑀤𑀺 𑀧𑀳𑀸𑀢𑀩𑁆𑀩𑁂 𑀤𑀲𑁆𑀲𑁂𑀢𑁆𑀯𑀸, 𑀢𑀤𑁂𑀓𑀝𑁆𑀞𑀪𑀸𑀯𑁂𑀦 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑁂 𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 ‘𑀓𑀺𑀜𑁆𑀘𑀸𑀧𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀳𑁂𑀢𑀽𑀲𑀼 𑀮𑁄𑀪𑀲𑀳𑀕𑀢𑁄 𑀫𑁄𑀳𑁄 𑀮𑁄𑀪𑁂𑀦 𑀲𑀳𑁂𑀢𑀼𑀓𑁄 𑀳𑁄𑀢𑀺, 𑀤𑁄𑀲𑀲𑀳𑀕𑀢𑁄 𑀫𑁄𑀳𑁄 𑀤𑁄𑀲𑁂𑀦, 𑀮𑁄𑀪𑀤𑁄𑀲𑀸 𑀘 𑀫𑁄𑀳𑁂𑀦𑀸𑀢𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑁂𑀧𑁂𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀧𑀦 𑀫𑁄𑀳𑁄 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀦𑁄 𑀅𑀪𑀸𑀯𑁂𑀦 𑀳𑁂𑀢𑀼𑀬𑁂𑀯, 𑀦 𑀲𑀳𑁂𑀢𑀼𑀓𑁄𑀢𑀺 𑀢𑀲𑁆𑀲 𑀧𑀳𑀸𑀦𑀁 𑀤𑀲𑁆𑀲𑁂𑀢𑀼𑀁 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀽’𑀢𑀺 𑀯𑀼𑀢𑁆𑀢𑀁.

𑁧𑁦𑁧𑁮. 𑀤𑀼𑀢𑀺𑀬𑀧𑀤𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀁 𑀤𑀲𑁆𑀲𑁂𑀢𑀼𑀁 𑀇𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀽𑀢𑀺 𑀯𑀼𑀢𑁆𑀢𑀁. 𑀲𑁄 𑀳𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀳𑁂𑀢𑀼𑀓𑁂 𑀓𑀢𑁆𑀯𑀸 𑀧𑀺𑀝𑁆𑀞𑀺𑀯𑀝𑁆𑀝𑀓𑁄 𑀚𑀸𑀢𑁄, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀯𑀺𑀬 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀦𑁄 𑀅𑀪𑀸𑀯𑀸 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀁 𑀦 𑀪𑀚𑀢𑀺. 𑀢𑀢𑀺𑀬𑀧𑀤𑁂 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸𑀢𑀺 𑀧𑀼𑀦 𑀅𑀓𑀼𑀲𑀮𑀕𑁆𑀕𑀳𑀡𑀁 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀸𑀦𑀁 𑀫𑁄𑀳𑀸𑀦𑀁 𑀲𑀗𑁆𑀕𑀳𑀢𑁆𑀣𑀁 𑀓𑀢𑀁. 𑀢𑁂 𑀳𑀺 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀦𑁄 𑀅𑀪𑀸𑀯𑀸 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀦𑀸𑀫 𑀦 𑀳𑁄𑀦𑁆𑀢𑀺.

𑁧𑁦𑁨𑁯. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀆𑀭𑀩𑁆𑀪𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀲𑀬𑀜𑁆𑀳𑀺 𑀧𑀭𑀺𑀢𑁆𑀢𑀸 𑀯𑀸 𑀳𑁄𑀦𑁆𑀢𑀼 𑀫𑀳𑀕𑁆𑀕𑀢𑀸 𑀯𑀸, 𑀧𑀭𑀺𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀫𑀳𑀕𑁆𑀕𑀢𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀅𑀧𑁆𑀧𑀫𑀸𑀡𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀢𑁂 𑀧𑀦 𑀧𑀭𑀺𑀢𑁆𑀢𑀸𑀧𑀺 𑀳𑁄𑀦𑁆𑀢𑀺 𑀫𑀳𑀕𑁆𑀕𑀢𑀸𑀧𑀺 𑀅𑀧𑁆𑀧𑀫𑀸𑀡𑀸𑀧𑀺.

𑁧𑁦𑁩𑁫. 𑀫𑀺𑀘𑁆𑀙𑀢𑁆𑀢𑀢𑁆𑀢𑀺𑀓𑁂 𑀆𑀦𑀦𑁆𑀢𑀭𑀺𑀓𑀸𑀦𑀻𑀢𑀺 𑀅𑀦𑀦𑁆𑀢𑀭𑀸𑀬𑁂𑀦 𑀨𑀮𑀤𑀸𑀬𑀓𑀸𑀦𑀺; 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀼 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀓𑀫𑁆𑀫𑁂 𑀓𑀢𑁂 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁂𑀧𑀺 𑀳𑀺 𑀲𑀼𑀯𑀡𑁆𑀡𑀣𑀽𑀧𑁂 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀢𑁆𑀢𑀁 𑀯𑀸 𑀭𑀢𑀦𑀫𑀬𑀧𑀸𑀓𑀸𑀭𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀤𑀢𑁄𑀧𑀺 𑀢𑀁 𑀓𑀫𑁆𑀫𑀁 𑀏𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀏𑀯. 𑀬𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀬𑀢𑀸𑀢𑀺 𑀅𑀳𑁂𑀢𑀼𑀓𑀯𑀸𑀤𑀅𑀓𑀺𑀭𑀺𑀬𑀯𑀸𑀤𑀦𑀢𑁆𑀣𑀺𑀓𑀯𑀸𑀤𑁂𑀲𑀼 𑀅𑀜𑁆𑀜𑀢𑀭𑀸. 𑀢𑀜𑁆𑀳𑀺 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀲𑀢𑀫𑁆𑀧𑀺 𑀩𑀼𑀤𑁆𑀥𑀲𑀳𑀲𑁆𑀲𑀫𑁆𑀧𑀺 𑀩𑁄𑀥𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑁧𑁦𑁩𑁮. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀅𑀭𑀺𑀬𑀫𑀕𑁆𑀕𑀁 𑀆𑀭𑀩𑁆𑀪𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀢𑁂 𑀧𑀦 𑀧𑀭𑀺𑀢𑁆𑀢𑀸𑀧𑀺 𑀳𑁄𑀦𑁆𑀢𑀺 𑀫𑀳𑀕𑁆𑀕𑀢𑀸𑀧𑀺.

𑁧𑁦𑁩𑁯. 𑀫𑀕𑁆𑀕𑀳𑁂𑀢𑀼𑀓𑀦𑀺𑀤𑁆𑀤𑁂𑀲𑁂 𑀧𑀞𑀫𑀦𑀬𑁂𑀦 𑀧𑀘𑁆𑀘𑀬𑀝𑁆𑀞𑁂𑀦 𑀳𑁂𑀢𑀼𑀦𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀲𑀳𑁂𑀢𑀼𑀓𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀤𑀼𑀢𑀺𑀬𑀦𑀬𑁂𑀦 𑀫𑀕𑁆𑀕𑀪𑀽𑀢𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀳𑁂𑀢𑀼𑀦𑀸 𑀲𑁂𑀲𑀫𑀕𑁆𑀕𑀗𑁆𑀕𑀸𑀦𑀁 𑀲𑀳𑁂𑀢𑀼𑀓𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀢𑀢𑀺𑀬𑀦𑀬𑁂𑀦 𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑀳𑁂𑀢𑀽𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀳𑁂𑀢𑀼𑀓𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁪𑁦. 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀁 𑀓𑀢𑁆𑀯𑀸. 𑀢𑁂 𑀘 𑀔𑁄 𑀧𑀭𑀺𑀢𑁆𑀢𑀥𑀫𑁆𑀫𑀸𑀯 𑀳𑁄𑀦𑁆𑀢𑀺. 𑀅𑀭𑀺𑀬𑀲𑀸𑀯𑀓𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑀩𑁆𑀪𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀲𑁆𑀲 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀕𑀭𑀼𑀁 𑀓𑀭𑁄𑀦𑁆𑀢𑁄𑀧𑀺 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀁 𑀯𑀺𑀬 𑀕𑀭𑀼𑀁 𑀦 𑀓𑀭𑁄𑀢𑀺. ‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀕𑁆𑀕𑀁 𑀕𑀭𑀼𑀁 𑀓𑀭𑁄𑀢𑀺 𑀦 𑀓𑀭𑁄𑀢𑀻’𑀢𑀺? 𑀓𑀭𑁄𑀢𑀺, 𑀦 𑀧𑀦 𑀅𑀢𑁆𑀢𑀦𑁄 𑀫𑀕𑁆𑀕𑀁 𑀯𑀺𑀬. 𑀅𑀭𑀳𑀸 𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀢𑀺 𑀞𑀧𑁂𑀢𑁆𑀯𑀸 𑀫𑀕𑁆𑀕𑀁 𑀨𑀮𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀏𑀢𑁆𑀣𑀸𑀧𑀺 𑀅𑀬𑀫𑁂𑀯𑀢𑁆𑀣𑁄. 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀇𑀤𑀁 𑀲𑀳𑀚𑀸𑀢𑀸𑀥𑀺𑀧𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀙𑀦𑁆𑀤𑀜𑁆𑀳𑀺 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀙𑀦𑁆𑀤𑁄 𑀅𑀥𑀺𑀧𑀢𑀺 𑀦𑀸𑀫 𑀳𑁄𑀢𑀺, 𑀦 𑀫𑀕𑁆𑀕𑁄. 𑀲𑁂𑀲𑀥𑀫𑁆𑀫𑀸𑀧𑀺 𑀙𑀦𑁆𑀤𑀸𑀥𑀺𑀧𑀢𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺, 𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄. 𑀘𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀻𑀫𑀁𑀲𑀁 𑀧𑀦 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀯𑀻𑀫𑀁𑀲𑀸𑀥𑀺𑀧𑀢𑀺 𑀘𑁂𑀯 𑀳𑁄𑀢𑀺 𑀫𑀕𑁆𑀕𑁄 𑀘𑀸𑀢𑀺. 𑀲𑁂𑀲𑀥𑀫𑁆𑀫𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺. 𑀯𑀻𑀭𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁪𑁧. 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀚𑀸𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀸, 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀸. 𑀪𑀽𑀢𑀸𑀢𑀺𑀆𑀤𑀻𑀦𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀸𑀦𑀺. 𑀚𑀸𑀢𑀸 𑀏𑀯 𑀳𑀺 𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀪𑀽𑀢𑀸. 𑀧𑀘𑁆𑀘𑀬𑀲𑀁𑀬𑁄𑀕𑁂 𑀚𑀸𑀢𑀢𑁆𑀢𑀸 𑀲𑀜𑁆𑀚𑀸𑀢𑀸. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀸. 𑀉𑀧𑀲𑀕𑁆𑀕𑁂𑀦 𑀧𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀧𑀸𑀓𑀝𑀻𑀪𑀽𑀢𑀸𑀢𑀺 𑀧𑀸𑀢𑀼𑀪𑀽𑀢𑀸. 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀧𑀦𑁆𑀦𑀸𑀢𑀺 𑀉𑀧𑁆𑀧𑀦𑁆𑀦𑀸. 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀸. 𑀦𑀺𑀩𑁆𑀩𑀢𑁆𑀢𑀝𑁆𑀞𑁂𑀦𑁂𑀯 𑀉𑀤𑁆𑀥𑀁 𑀞𑀺𑀢𑀸𑀢𑀺 𑀉𑀝𑁆𑀞𑀺𑀢𑀸. 𑀧𑀘𑁆𑀘𑀬𑀲𑀁𑀬𑁄𑀕𑁂 𑀉𑀝𑁆𑀞𑀺𑀢𑀸𑀢𑀺 𑀲𑀫𑀼𑀝𑁆𑀞𑀺𑀢𑀸. 𑀧𑀼𑀦 𑀉𑀧𑁆𑀧𑀦𑁆𑀦𑀸𑀢𑀺𑀯𑀘𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀉𑀧𑁆𑀧𑀦𑁆𑀦𑀁𑀲𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀉𑀧𑁆𑀧𑀦𑁆𑀦𑀓𑁄𑀝𑁆𑀞𑀸𑀲𑁂𑀦 𑀕𑀡𑀦𑀁 𑀕𑀢𑀸. 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀤𑀁 𑀦𑁂𑀲𑀁 𑀲𑀪𑀸𑀯𑀤𑀲𑁆𑀲𑀦𑀁. 𑀤𑀼𑀢𑀺𑀬𑀧𑀤𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀧𑀝𑀺𑀲𑁂𑀥𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑀺𑀬𑀧𑀤𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀅𑀬𑀁 𑀧𑀦 𑀢𑀺𑀓𑁄 𑀤𑁆𑀯𑀺𑀦𑁆𑀦𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀮𑀤𑁆𑀥𑁄𑀓𑀸𑀲𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀤𑀼𑀯𑀺𑀥𑁄 𑁋 𑀔𑀡𑀧𑁆𑀧𑀢𑁆𑀢𑁄, 𑀘 𑀅𑀧𑁆𑀧𑀢𑁆𑀢𑁄 𑀘. 𑀢𑀢𑁆𑀣 ‘𑀔𑀡𑀧𑁆𑀧𑀢𑁆𑀢𑁄’ 𑀉𑀧𑁆𑀧𑀦𑁆𑀦𑁄 𑀦𑀸𑀫. ‘𑀅𑀧𑁆𑀧𑀢𑁆𑀢𑁄’ 𑀘𑀺𑀢𑁆𑀢𑀸𑀦𑀦𑁆𑀢𑀭𑁂 𑀯𑀸 𑀉𑀧𑁆𑀧𑀚𑁆𑀚𑀢𑀼, 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂 𑀯𑀸. 𑀥𑀼𑀯𑀧𑀘𑁆𑀘𑀬𑀝𑁆𑀞𑁂𑀦 𑀦𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀺, 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸 𑀦𑀸𑀫 𑀚𑀸𑀢𑁄. 𑀬𑀣𑀸 𑀳𑀺 𑁋 ‘‘𑀢𑀺𑀝𑁆𑀞𑀢𑁂𑀯 𑀲𑀸𑀬𑀁, 𑀧𑁄𑀝𑁆𑀞𑀧𑀸𑀤, 𑀅𑀭𑀽𑀧𑀻 𑀅𑀢𑁆𑀢𑀸 𑀲𑀜𑁆𑀜𑀸𑀫𑀬𑁄. 𑀅𑀣 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁧𑁯). 𑀏𑀢𑁆𑀣 𑀆𑀭𑀼𑀧𑁆𑀧𑁂 𑀓𑀸𑀫𑀸𑀯𑀘𑀭𑀲𑀜𑁆𑀜𑀸𑀧𑀯𑀢𑁆𑀢𑀺𑀓𑀸𑀮𑁂 𑀓𑀺𑀜𑁆𑀘𑀸𑀧𑀺 𑀫𑀽𑀮𑀪𑀯𑀗𑁆𑀕𑀲𑀜𑁆𑀜𑀸 𑀦𑀺𑀭𑀼𑀤𑁆𑀥𑀸 𑀓𑀸𑀫𑀸𑀯𑀘𑀭𑀲𑀜𑁆𑀜𑀸𑀬 𑀧𑀦 𑀦𑀺𑀭𑀼𑀤𑁆𑀥𑀓𑀸𑀮𑁂 𑀅𑀯𑀲𑁆𑀲𑀁 𑀲𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀭𑀽𑀧𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 𑀦𑀢𑁆𑀣𑀻𑀢𑀺 𑀲𑀗𑁆𑀔𑁆𑀬𑀁 𑀅𑀕𑀦𑁆𑀢𑁆𑀯𑀸 ‘𑀢𑀺𑀝𑁆𑀞𑀢𑁂𑀯’ 𑀦𑀸𑀫𑀸𑀢𑀺 𑀚𑀸𑀢𑁄. 𑀏𑀯𑀫𑁂𑀯 𑀮𑀤𑁆𑀥𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀤𑀼𑀯𑀺𑀥𑁄…𑀧𑁂… 𑀥𑀼𑀯𑀧𑀘𑁆𑀘𑀬𑀝𑁆𑀞𑁂𑀦 𑀦𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀺, 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸 𑀦𑀸𑀫 𑀚𑀸𑀢𑁄.

𑀬𑀤𑀺 𑀧𑀦 𑀆𑀬𑀽𑀳𑀺𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀲𑀩𑁆𑀩𑀁 𑀯𑀺𑀧𑀸𑀓𑀁 𑀤𑀤𑁂𑀬𑁆𑀬, 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬. 𑀢𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀥𑀼𑀯𑀯𑀺𑀧𑀸𑀓𑀁, 𑀅𑀥𑀼𑀯𑀯𑀺𑀧𑀸𑀓𑀜𑁆𑀘. 𑀢𑀢𑁆𑀣 𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺, 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸𑀢𑀺 𑀏𑀢𑀁 ‘𑀥𑀼𑀯𑀯𑀺𑀧𑀸𑀓𑀁’ 𑀦𑀸𑀫. 𑀢𑀁 𑀧𑀦 𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑁆𑀧𑀢𑁆𑀢𑀫𑁆𑀧𑀺. 𑀢𑀢𑁆𑀣 ‘𑀔𑀡𑀧𑁆𑀧𑀢𑁆𑀢𑀁’ 𑀉𑀧𑁆𑀧𑀦𑁆𑀦𑀁 𑀦𑀸𑀫. ‘𑀅𑀧𑁆𑀧𑀢𑁆𑀢𑀁’ 𑀅𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀲𑁆𑀲 𑀯𑀺𑀧𑀸𑀓𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑁂 𑀯𑀸 𑀉𑀧𑁆𑀧𑀚𑁆𑀚𑀢𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂 𑀯𑀸. 𑀥𑀼𑀯𑀧𑀘𑁆𑀘𑀬𑀝𑁆𑀞𑁂𑀦 𑀅𑀦𑀼𑀧𑁆𑀧𑀦𑁆𑀦𑀁 𑀦𑀸𑀫 𑀦 𑀳𑁄𑀢𑀺, 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸 𑀦𑀸𑀫 𑀚𑀸𑀢𑀁. 𑀫𑁂𑀢𑁆𑀢𑁂𑀬𑁆𑀬𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀕𑁆𑀕𑁄 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫, 𑀨𑀮𑀁 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸𑀬𑁂𑀯 𑀦𑀸𑀫 𑀚𑀸𑀢𑀁.

𑁧𑁦𑁪𑁪. 𑀅𑀢𑀻𑀢𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀅𑀢𑀻𑀢𑀸𑀢𑀺 𑀔𑀡𑀢𑁆𑀢𑀬𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀦𑀺𑀭𑀼𑀤𑁆𑀥𑀸𑀢𑀺 𑀦𑀺𑀭𑁄𑀥𑀧𑁆𑀧𑀢𑁆𑀢𑀸. 𑀯𑀺𑀕𑀢𑀸𑀢𑀺 𑀯𑀺𑀪𑀯𑀁 𑀕𑀢𑀸, 𑀯𑀺𑀕𑀘𑁆𑀙𑀺𑀢𑀸 𑀯𑀸. 𑀯𑀺𑀧𑀭𑀺𑀡𑀢𑀸𑀢𑀺 𑀧𑀓𑀢𑀺𑀯𑀺𑀚𑀳𑀦𑁂𑀦 𑀯𑀺𑀧𑀭𑀺𑀡𑀸𑀫𑀁 𑀕𑀢𑀸. 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀕𑀢𑀸𑀢𑀺 𑀅𑀢𑁆𑀣𑀗𑁆𑀕𑀢𑀸. 𑀅𑀩𑁆𑀪𑀢𑁆𑀣𑀗𑁆𑀕𑀢𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀕𑀘𑁆𑀙𑀺𑀢𑀸. 𑀧𑀼𑀦 𑀅𑀢𑀻𑀢𑀯𑀘𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀧𑀭𑀢𑁄 𑀅𑀦𑀸𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑀻𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂𑀦 𑀕𑀡𑀦𑀁 𑀕𑀢𑀸. 𑀓𑀢𑀫𑁂 𑀢𑁂𑀢𑀺? 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀧𑀭𑀢𑁄 𑀅𑀦𑀸𑀕𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁪𑁭. 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀅𑀢𑀻𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪𑀸𑀢𑀺𑀆𑀤𑀻𑀲𑀼 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀯 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀅𑀢𑀻𑀢𑀸𑀤𑀻𑀦𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁧𑁦𑁫𑁦. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀢𑀺. 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀉𑀪𑀬𑀁 𑀦𑀺𑀬𑀓𑀚𑁆𑀛𑀢𑁆𑀢𑀸𑀥𑀺𑀯𑀘𑀦𑀁. 𑀦𑀺𑀬𑀢𑀸𑀢𑀺 𑀅𑀢𑁆𑀢𑀦𑀺 𑀚𑀸𑀢𑀸. 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑀲𑁆𑀲 𑀧𑀸𑀝𑀺𑀬𑁂𑀓𑁆𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀓𑀸. 𑀉𑀧𑀸𑀤𑀺𑀡𑁆𑀡𑀸𑀢𑀺 𑀲𑀭𑀻𑀭𑀝𑁆𑀞𑀓𑀸. 𑀢𑁂 𑀳𑀺 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸, 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 𑀧𑀦 𑀇𑀥 𑀉𑀧𑀸𑀤𑀺𑀡𑁆𑀡𑀸𑀢𑀺 𑀯𑀼𑀢𑁆𑀢𑀸.

𑁧𑁦𑁫𑁧. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀢𑀤𑀼𑀪𑀬𑀦𑁆𑀢𑀺 𑀢𑀁 𑀉𑀪𑀬𑀁.

𑁧𑁦𑁫𑁩. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀲𑁆𑀲 𑀧𑀞𑀫𑀧𑀤𑁂 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀢𑀺𑀬𑁂 𑀅𑀧𑁆𑀧𑀫𑀸𑀡𑀸𑀧𑀺. 𑀢𑀢𑀺𑀬𑁂 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀯. 𑀅𑀧𑁆𑀧𑀫𑀸𑀡𑀸 𑀧𑀦 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺. 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑁄𑀬𑁂𑀯𑀸𑀢𑀺.

𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸

𑁧𑁦𑁬𑁨. 𑀤𑀼𑀓𑁂𑀲𑀼 𑀅𑀤𑁄𑀲𑀦𑀺𑀤𑁆𑀤𑁂𑀲𑁂 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀫𑁂𑀢𑁆𑀢𑀺. 𑀫𑁂𑀢𑁆𑀢𑀸𑀓𑀸𑀭𑁄 𑀫𑁂𑀢𑁆𑀢𑀸𑀬𑀦𑀸. 𑀫𑁂𑀢𑁆𑀢𑀸𑀬 𑀅𑀬𑀺𑀢𑀲𑁆𑀲 𑀫𑁂𑀢𑁆𑀢𑀸𑀲𑀫𑀗𑁆𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁. 𑀅𑀦𑀼𑀤𑀬𑀢𑀻𑀢𑀺 𑀅𑀦𑀼𑀤𑁆𑀤𑀸, 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀤𑁆𑀤𑀸𑀓𑀸𑀭𑁄 𑀅𑀦𑀼𑀤𑁆𑀤𑀸𑀬𑀦𑀸. 𑀅𑀦𑀼𑀤𑁆𑀤𑀸𑀬𑀺𑀢𑀲𑁆𑀲 𑀪𑀸𑀯𑁄 𑀅𑀦𑀼𑀤𑁆𑀤𑀸𑀬𑀺𑀢𑀢𑁆𑀢𑀁. 𑀳𑀺𑀢𑀲𑁆𑀲 𑀏𑀲𑀦𑀯𑀲𑁂𑀦 𑀳𑀺𑀢𑁂𑀲𑀺𑀢𑀸. 𑀅𑀦𑀼𑀓𑀫𑁆𑀧𑀦𑀯𑀲𑁂𑀦 𑀅𑀦𑀼𑀓𑀫𑁆𑀧𑀸. 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀫𑁂𑀢𑁆𑀢𑀸𑀯 𑀯𑀼𑀢𑁆𑀢𑀸. 𑀲𑁂𑀲𑀧𑀤𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀅𑀤𑁄𑀲𑁄 𑀓𑀣𑀺𑀢𑁄.

𑁧𑁦𑁬𑁩. 𑀅𑀫𑁄𑀳𑀦𑀺𑀤𑁆𑀤𑁂𑀲𑁂 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑁂 𑀧𑀜𑁆𑀜𑀸. 𑀤𑀼𑀓𑁆𑀔𑀲𑀫𑀼𑀤𑀬𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀤𑀼𑀓𑁆𑀔𑁂 𑀜𑀸𑀡𑀁 𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀯𑀢𑁆𑀢𑀢𑀺. 𑀢𑀣𑀸 𑀤𑀼𑀓𑁆𑀔𑀲𑀫𑀼𑀤𑀬𑁂. 𑀦𑀺𑀭𑁄𑀥𑁂 𑀧𑀦 𑀲𑀯𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀏𑀯. 𑀢𑀣𑀸 𑀧𑀝𑀺𑀧𑀤𑀸𑀬. 𑀧𑀼𑀩𑁆𑀩𑀦𑁆𑀢𑁂𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂. 𑀅𑀧𑀭𑀦𑁆𑀢𑁂𑀢𑀺 𑀅𑀦𑀸𑀕𑀢𑀓𑁄𑀝𑁆𑀞𑀸𑀲𑁂. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀢𑀺 𑀢𑀤𑀼𑀪𑀬𑁂. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀦𑁆𑀢𑀺 𑀅𑀬𑀁 𑀧𑀘𑁆𑀘𑀬𑁄, 𑀇𑀤𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀇𑀤𑀁 𑀧𑀝𑀺𑀘𑁆𑀘 𑀇𑀤𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀯𑀁 𑀧𑀘𑁆𑀘𑀬𑁂𑀲𑀼 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀘 𑀜𑀸𑀡𑀁.

𑁧𑁦𑁬𑁫. 𑀮𑁄𑀪𑀦𑀺𑀤𑁆𑀤𑁂𑀲𑁂𑀧𑀺 𑀳𑁂𑀝𑁆𑀞𑀸 𑀅𑀦𑀸𑀕𑀢𑀸𑀦𑀁 𑀧𑀤𑀸𑀦𑀁 𑀅𑀬𑀫𑀢𑁆𑀣𑁄 𑁋 𑀭𑀜𑁆𑀚𑀦𑀯𑀲𑁂𑀦 𑀭𑀸𑀕𑁄. 𑀩𑀮𑀯𑀭𑀜𑁆𑀚𑀦𑀝𑁆𑀞𑁂𑀦 𑀲𑀸𑀭𑀸𑀕𑁄. 𑀯𑀺𑀲𑀬𑁂𑀲𑀼 𑀲𑀢𑁆𑀢𑀸𑀦𑀁 𑀅𑀦𑀼𑀦𑀬𑀦𑀢𑁄 𑀅𑀦𑀼𑀦𑀬𑁄. 𑀅𑀦𑀼𑀭𑀼𑀚𑁆𑀛𑀢𑀻𑀢𑀺 𑀅𑀦𑀼𑀭𑁄𑀥𑁄, 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀯𑁂 𑀲𑀢𑁆𑀢𑀸 𑀏𑀢𑀸𑀬 𑀦𑀦𑁆𑀤𑀦𑁆𑀢𑀺, 𑀲𑀬𑀁 𑀯𑀸 𑀦𑀦𑁆𑀤𑀢𑀻𑀢𑀺 𑀦𑀦𑁆𑀤𑀻. 𑀦𑀦𑁆𑀤𑀻 𑀘 𑀲𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄 𑀘𑀸𑀢𑀺 𑀦𑀦𑁆𑀤𑀻𑀭𑀸𑀕𑁄. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸 ‘𑀦𑀦𑁆𑀤𑀻’. 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 ‘𑀦𑀦𑁆𑀤𑀻𑀭𑀸𑀕𑁄’𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄𑀢𑀺 𑀬𑁄 𑀳𑁂𑀝𑁆𑀞𑀸 𑀩𑀮𑀯𑀭𑀜𑁆𑀚𑀦𑀝𑁆𑀞𑁂𑀦 𑀲𑀸𑀭𑀸𑀕𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀦 𑀲𑀢𑁆𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲𑁂𑀯 𑀲𑀸𑀭𑀸𑀕𑁄𑀢𑀺 𑀅𑀢𑁆𑀣𑁄.

𑀇𑀘𑁆𑀙𑀦𑁆𑀢𑀺 𑀏𑀢𑀸𑀬 𑀆𑀭𑀫𑁆𑀫𑀡𑀸𑀦𑀻𑀢𑀺 𑀇𑀘𑁆𑀙𑀸. 𑀩𑀳𑀮𑀓𑀺𑀮𑁂𑀲𑀪𑀸𑀯𑁂𑀦 𑀫𑀼𑀘𑁆𑀙𑀦𑁆𑀢𑀺 𑀏𑀢𑀸𑀬 𑀧𑀸𑀡𑀺𑀦𑁄𑀢𑀺 𑀫𑀼𑀘𑁆𑀙𑀸. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀅𑀚𑁆𑀛𑁄𑀲𑀸𑀦𑀁. 𑀇𑀫𑀺𑀦𑀸 𑀲𑀢𑁆𑀢𑀸 𑀕𑀺𑀚𑁆𑀛𑀦𑁆𑀢𑀺, 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀕𑁂𑀥𑁄; 𑀩𑀳𑀮𑀝𑁆𑀞𑁂𑀦 𑀯𑀸 𑀕𑁂𑀥𑁄. ‘‘𑀕𑁂𑀥𑀁 𑀯𑀸 𑀧𑀯𑀦𑀲𑀡𑁆𑀟’’𑀦𑁆𑀢𑀺 𑀳𑀺 𑀩𑀳𑀮𑀝𑁆𑀞𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀯𑀸 𑀕𑁂𑀥𑁄𑀢𑀺 𑀧𑀮𑀺𑀕𑁂𑀥𑁄. 𑀲𑀜𑁆𑀚𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀗𑁆𑀕𑁄; 𑀮𑀕𑁆𑀕𑀦𑀝𑁆𑀞𑁂𑀦 𑀯𑀸 𑀲𑀗𑁆𑀕𑁄. 𑀑𑀲𑀻𑀤𑀦𑀝𑁆𑀞𑁂𑀦 𑀧𑀗𑁆𑀓𑁄. 𑀆𑀓𑀟𑁆𑀠𑀦𑀯𑀲𑁂𑀦 𑀏𑀚𑀸. ‘‘𑀏𑀚𑀸 𑀇𑀫𑀁 𑀧𑀼𑀭𑀺𑀲𑀁 𑀧𑀭𑀺𑀓𑀟𑁆𑀠𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀜𑁆𑀘𑀦𑀝𑁆𑀞𑁂𑀦 𑀫𑀸𑀬𑀸. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑀸𑀦𑀁 𑀚𑀦𑀦𑀝𑁆𑀞𑁂𑀦 𑀚𑀦𑀺𑀓𑀸. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫-𑁫𑁭) 𑀳𑀺 𑀯𑀼𑀢𑁆𑀢𑀁. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀬𑀫𑀸𑀦𑀸 𑀚𑀦𑁂𑀢𑀻𑀢𑀺 𑀲𑀜𑁆𑀚𑀦𑀦𑀻. 𑀖𑀝𑀦𑀝𑁆𑀞𑁂𑀦 𑀲𑀺𑀩𑁆𑀩𑀺𑀦𑀻. 𑀅𑀬𑀜𑁆𑀳𑀺 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀺𑀩𑁆𑀩𑀢𑀺 𑀖𑀝𑁂𑀢𑀺, 𑀢𑀼𑀦𑁆𑀦𑀓𑀸𑀭𑁄 𑀯𑀺𑀬 𑀧𑀺𑀮𑁄𑀢𑀺𑀓𑀸𑀬 𑀧𑀺𑀮𑁄𑀢𑀺𑀓𑀁; 𑀢𑀲𑁆𑀫𑀸 𑀖𑀝𑀦𑀝𑁆𑀞𑁂𑀦 𑀲𑀺𑀩𑁆𑀩𑀺𑀦𑀻𑀢𑀺 𑀯𑀼𑀢𑁆𑀢𑀸. 𑀅𑀦𑁂𑀓𑀧𑁆𑀧𑀓𑀸𑀭𑀁 𑀯𑀺𑀲𑀬𑀚𑀸𑀮𑀁 𑀢𑀡𑁆𑀳𑀸𑀯𑀺𑀧𑁆𑀨𑀦𑁆𑀤𑀺𑀢𑀦𑀺𑀯𑁂𑀲𑀲𑀗𑁆𑀔𑀸𑀢𑀁 𑀯𑀸 𑀚𑀸𑀮𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀚𑀸𑀮𑀺𑀦𑀻.

𑀆𑀓𑀟𑁆𑀠𑀦𑀝𑁆𑀞𑁂𑀦 𑀲𑀻𑀖𑀲𑁄𑀢𑀸 𑀲𑀭𑀺𑀢𑀸 𑀯𑀺𑀬𑀸𑀢𑀺 𑀲𑀭𑀺𑀢𑀸. 𑀅𑀮𑁆𑀮𑀝𑁆𑀞𑁂𑀦 𑀯𑀸 𑀲𑀭𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺 𑀚𑀦𑁆𑀢𑀼𑀦𑁄’’𑀢𑀺 (𑀥. 𑀧. 𑁩𑁪𑁧). 𑀅𑀮𑁆𑀮𑀸𑀦𑀺 𑀘𑁂𑀯 𑀲𑀺𑀦𑀺𑀤𑁆𑀥𑀸𑀦𑀺 𑀘𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀢𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂 𑀓𑀼𑀮𑁂 𑀕𑀡𑁂 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸 (𑀫𑀳𑀸𑀦𑀺. 𑁩). 𑀅𑀦𑀬𑀩𑁆𑀬𑀲𑀦𑀧𑀸𑀧𑀦𑀝𑁆𑀞𑁂𑀦 𑀓𑀼𑀫𑁆𑀫𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀓𑀁 𑀯𑀺𑀬𑀸𑀢𑀺 𑀲𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀼𑀢𑁆𑀢𑀓𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁯). 𑀭𑀽𑀧𑀸𑀤𑀻𑀲𑀼 𑀯𑀺𑀢𑁆𑀣𑀢𑀝𑁆𑀞𑁂𑀦 𑀯𑀺𑀲𑀝𑀸. 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬 𑀲𑀢𑁆𑀢𑁂 𑀆𑀬𑀽𑀳𑀸𑀧𑁂𑀢𑀻𑀢𑀺 𑀆𑀬𑀽𑀳𑀺𑀦𑀻. 𑀉𑀓𑁆𑀓𑀡𑁆𑀞𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄 𑀲𑀳𑀸𑀬𑀝𑁆𑀞𑁂𑀦 𑀤𑀼𑀢𑀺𑀬𑀸. 𑀅𑀬𑀜𑁆𑀳𑀺 𑀲𑀢𑁆𑀢𑀸𑀦𑀁 𑀯𑀝𑁆𑀝𑀲𑁆𑀫𑀺𑀁 𑀉𑀓𑁆𑀓𑀡𑁆𑀞𑀺𑀢𑀼𑀁 𑀦 𑀤𑁂𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀧𑀺𑀬𑀲𑀳𑀸𑀬𑁄 𑀯𑀺𑀬 𑀅𑀪𑀺𑀭𑀫𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺. (𑀅. 𑀦𑀺. 𑁪.𑁯; 𑀇𑀢𑀺𑀯𑀼. 𑁧𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭);

𑀧𑀡𑀺𑀥𑀸𑀦𑀓𑀯𑀲𑁂𑀦 𑀧𑀡𑀺𑀥𑀺. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼. 𑀏𑀢𑀸𑀬 𑀳𑀺 𑀲𑀢𑁆𑀢𑀸, 𑀭𑀚𑁆𑀚𑀼𑀬𑀸 𑀕𑀻𑀯𑀸𑀬 𑀩𑀤𑁆𑀥𑀸 𑀕𑁄𑀡𑀸 𑀯𑀺𑀬, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀺𑀬𑁆𑀬𑀦𑁆𑀢𑀺. 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀯𑀦𑀢𑀺 𑀪𑀚𑀢𑀺 𑀅𑀮𑁆𑀮𑀻𑀬𑀢𑀻𑀢𑀺 𑀯𑀦𑀁. 𑀯𑀦𑀢𑀺 𑀬𑀸𑀘𑀢𑀻𑀢𑀺 𑀯𑀸 𑀯𑀦𑀁. 𑀯𑀦𑀣𑁄𑀢𑀺 𑀩𑁆𑀬𑀜𑁆𑀚𑀦𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀦𑀢𑁆𑀣𑀤𑀼𑀓𑁆𑀔𑀸𑀦𑀁 𑀯𑀸 𑀲𑀫𑀼𑀝𑁆𑀞𑀸𑀧𑀦𑀝𑁆𑀞𑁂𑀦 𑀕𑀳𑀦𑀝𑁆𑀞𑁂𑀦 𑀘 𑀯𑀦𑀁 𑀯𑀺𑀬𑀸𑀢𑀺 ‘𑀯𑀦𑀁’; 𑀩𑀮𑀯𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁. 𑀕𑀳𑀦𑀢𑀭𑀝𑁆𑀞𑁂𑀦 𑀧𑀦 𑀢𑀢𑁄 𑀩𑀮𑀯𑀢𑀭𑁄 ‘𑀯𑀦𑀣𑁄’ 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀯𑀦𑀁 𑀙𑀺𑀦𑁆𑀤𑀣 𑀫𑀸 𑀭𑀼𑀓𑁆𑀔𑀁, 𑀯𑀦𑀢𑁄 𑀚𑀸𑀬𑀢𑁂 𑀪𑀬𑀁;

𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺. (𑀥. 𑀧. 𑁨𑁮𑁩);

𑀲𑀦𑁆𑀣𑀯𑀦𑀯𑀲𑁂𑀦 𑀲𑀦𑁆𑀣𑀯𑁄; 𑀲𑀁𑀲𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀲𑁄 𑀤𑀼𑀯𑀺𑀥𑁄 𑁋 𑀢𑀡𑁆𑀳𑀸𑀲𑀦𑁆𑀣𑀯𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀘. 𑀢𑁂𑀲𑀼 𑀇𑀥 𑀢𑀡𑁆𑀳𑀸𑀲𑀦𑁆𑀣𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀺𑀦𑁂𑀳𑀯𑀲𑁂𑀦 𑀲𑀺𑀦𑁂𑀳𑁄. 𑀆𑀮𑀬𑀓𑀭𑀡𑀯𑀲𑁂𑀦 𑀅𑀧𑁂𑀓𑁆𑀔𑀢𑀻𑀢𑀺 𑀅𑀧𑁂𑀓𑁆𑀔𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀇𑀫𑀸𑀦𑀺 𑀢𑁂 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻𑀧𑀫𑀼𑀔𑀸𑀦𑀺. 𑀏𑀢𑁆𑀣 𑀤𑁂𑀯 𑀙𑀦𑁆𑀤𑀁 𑀚𑀦𑁂𑀳𑀺, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁬𑁬). 𑀆𑀮𑀬𑀁 𑀓𑀭𑁄𑀳𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀧𑀸𑀝𑀺𑀬𑁂𑀓𑁆𑀓𑁂 𑀧𑀸𑀝𑀺𑀬𑁂𑀓𑁆𑀓𑁂 𑀆𑀭𑀫𑁆𑀫𑀡𑁂 𑀩𑀦𑁆𑀥𑀢𑀻𑀢𑀺 𑀧𑀝𑀺𑀩𑀦𑁆𑀥𑀼. 𑀜𑀸𑀢𑀓𑀝𑁆𑀞𑁂𑀦 𑀯𑀸 𑀧𑀸𑀝𑀺𑀬𑁂𑀓𑁆𑀓𑁄 𑀩𑀦𑁆𑀥𑀽𑀢𑀺𑀧𑀺 𑀧𑀝𑀺𑀩𑀦𑁆𑀥𑀼. 𑀦𑀺𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀝𑁆𑀞𑁂𑀦 𑀳𑀺 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀫𑁄 𑀩𑀦𑁆𑀥𑀼 𑀦𑀸𑀫 𑀦𑀢𑁆𑀣𑀺.

𑀆𑀭𑀫𑁆𑀫𑀡𑀸𑀦𑀁 𑀅𑀲𑀦𑀢𑁄 𑀆𑀲𑀸. 𑀅𑀚𑁆𑀛𑁄𑀢𑁆𑀣𑀭𑀡𑀢𑁄 𑀘𑁂𑀯 𑀢𑀺𑀢𑁆𑀢𑀺𑀁 𑀅𑀦𑀼𑀧𑀕𑀦𑁆𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀦𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀆𑀲𑀺𑀲𑀦𑀯𑀲𑁂𑀦 𑀆𑀲𑀺𑀲𑀦𑀸. 𑀆𑀲𑀺𑀲𑀺𑀢𑀲𑁆𑀲 𑀪𑀸𑀯𑁄 𑀆𑀲𑀺𑀲𑀺𑀢𑀢𑁆𑀢𑀁. 𑀇𑀤𑀸𑀦𑀺 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀭𑀽𑀧𑀸𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀲𑀺𑀲𑀦𑀯𑀲𑁂𑀦 𑀆𑀲𑀸𑀢𑀺 𑀆𑀲𑀸𑀬 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀭𑀽𑀧𑁂 𑀆𑀲𑀸 𑀭𑀽𑀧𑀸𑀲𑀸𑀢𑀺 𑀏𑀯𑀁 𑀦𑀯𑀧𑀺 𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀧𑀭𑀺𑀓𑁆𑀔𑀸𑀭𑀮𑁄𑀪𑀯𑀲𑁂𑀦 𑀙𑀝𑁆𑀞𑀁. 𑀢𑀁 𑀯𑀺𑀲𑁂𑀲𑀢𑁄 𑀧𑀩𑁆𑀩𑀚𑀺𑀢𑀸𑀦𑀁. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀅𑀢𑀺𑀢𑁆𑀢𑀺𑀬𑀯𑀢𑁆𑀣𑀼𑀯𑀲𑁂𑀦 𑀕𑀳𑀝𑁆𑀞𑀸𑀦𑀁. 𑀦 𑀳𑀺 𑀢𑁂𑀲𑀁 𑀥𑀦𑀧𑀼𑀢𑁆𑀢𑀚𑀻𑀯𑀺𑀢𑁂𑀳𑀺 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀅𑀢𑁆𑀣𑀺. ‘𑀏𑀢𑀁 𑀫𑀬𑁆𑀳𑀁 𑀏𑀢𑀁 𑀫𑀬𑁆𑀳’𑀦𑁆𑀢𑀺 𑀯𑀸 ‘𑀅𑀲𑀼𑀓𑁂𑀦 𑀫𑁂 𑀇𑀤𑀁 𑀤𑀺𑀦𑁆𑀦𑀁 𑀇𑀤𑀁 𑀤𑀺𑀦𑁆𑀦’𑀦𑁆𑀢𑀺 𑀯𑀸 𑀏𑀯𑀁 𑀲𑀢𑁆𑀢𑁂 𑀚𑀧𑁆𑀧𑀸𑀧𑁂𑀢𑀻𑀢𑀺 𑀚𑀧𑁆𑀧𑀸. 𑀧𑀭𑀢𑁄 𑀤𑁆𑀯𑁂 𑀧𑀤𑀸𑀦𑀺 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀢𑀢𑁄 𑀧𑀭𑀁 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀪𑀚𑀺𑀢𑀼𑀁 𑀆𑀭𑀤𑁆𑀥𑀢𑁆𑀢𑀸 𑀧𑀼𑀦 𑀚𑀧𑁆𑀧𑀸𑀢𑀺 𑀯𑀼𑀢𑁆𑀢𑀁. 𑀚𑀧𑁆𑀧𑀦𑀸𑀓𑀸𑀭𑁄 𑀚𑀧𑁆𑀧𑀦𑀸. 𑀚𑀧𑁆𑀧𑀺𑀢𑀲𑁆𑀲 𑀪𑀸𑀯𑁄 𑀚𑀧𑁆𑀧𑀺𑀢𑀢𑁆𑀢𑀁. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀬𑁂 𑀮𑀼𑀫𑁆𑀧𑀢𑀺 𑀆𑀓𑀟𑁆𑀠𑀢𑀻𑀢𑀺 𑀮𑁄𑀮𑀼𑀧𑁄. 𑀮𑁄𑀮𑀼𑀧𑀲𑁆𑀲 𑀪𑀸𑀯𑁄 𑀮𑁄𑀮𑀼𑀧𑁆𑀧𑀁. 𑀮𑁄𑀮𑀼𑀧𑁆𑀧𑀸𑀓𑀸𑀭𑁄 𑀮𑁄𑀮𑀼𑀧𑁆𑀧𑀸𑀬𑀦𑀸. 𑀮𑁄𑀮𑀼𑀧𑁆𑀧𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁.

𑀧𑀼𑀘𑁆𑀙𑀜𑁆𑀚𑀺𑀓𑀢𑀸𑀢𑀺 𑀬𑀸𑀬 𑀢𑀡𑁆𑀳𑀸𑀬 𑀮𑀸𑀪𑀝𑁆𑀞𑀸𑀦𑁂𑀲𑀼, 𑀧𑀼𑀘𑁆𑀙𑀁 𑀘𑀸𑀮𑀬𑀫𑀸𑀦𑀸 𑀲𑀼𑀦𑀔𑀸 𑀯𑀺𑀬, 𑀓𑀫𑁆𑀧𑀫𑀸𑀦𑀸 𑀯𑀺𑀘𑀭𑀦𑁆𑀢𑀺, 𑀢𑀁 𑀢𑀲𑁆𑀲𑀸 𑀓𑀫𑁆𑀧𑀦𑀢𑀡𑁆𑀳𑀸𑀬 𑀦𑀸𑀫𑀁. 𑀲𑀸𑀥𑀼 𑀫𑀦𑀸𑀧𑀫𑀦𑀸𑀧𑁂 𑀯𑀺𑀲𑀬𑁂 𑀓𑀸𑀫𑁂𑀢𑀻𑀢𑀺 𑀲𑀸𑀥𑀼𑀓𑀸𑀫𑁄. 𑀢𑀲𑁆𑀲 𑀪𑀸𑀯𑁄 𑀲𑀸𑀥𑀼𑀓𑀫𑁆𑀬𑀢𑀸. 𑀫𑀸𑀢𑀸 𑀫𑀸𑀢𑀼𑀘𑁆𑀙𑀸𑀢𑀺𑀆𑀤𑀺𑀓𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀭𑀸𑀕𑁄𑀢𑀺 𑀅𑀥𑀫𑁆𑀫𑀭𑀸𑀕𑁄. 𑀬𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀩𑀮𑀯𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀮𑁄𑀪𑁄 𑀯𑀺𑀲𑀫𑀮𑁄𑀪𑁄. ‘‘𑀭𑀸𑀕𑁄 𑀯𑀺𑀲𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁯𑁨𑁪) 𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀸 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀸 𑀉𑀧𑁆𑀧𑀦𑁆𑀦𑁄 𑀙𑀦𑁆𑀤𑀭𑀸𑀕𑁄 𑀅𑀥𑀫𑁆𑀫𑀝𑁆𑀞𑁂𑀦 ‘𑀅𑀥𑀫𑁆𑀫𑀭𑀸𑀕𑁄’, 𑀯𑀺𑀲𑀫𑀝𑁆𑀞𑁂𑀦 ‘𑀯𑀺𑀲𑀫𑀮𑁄𑀪𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀆𑀭𑀫𑁆𑀫𑀡𑀸𑀦𑀁 𑀦𑀺𑀓𑀸𑀫𑀦𑀯𑀲𑁂𑀦 𑀦𑀺𑀓𑀦𑁆𑀢𑀺. 𑀦𑀺𑀓𑀸𑀫𑀦𑀸𑀓𑀸𑀭𑁄 𑀦𑀺𑀓𑀸𑀫𑀦𑀸. 𑀧𑀢𑁆𑀣𑀦𑀸𑀯𑀲𑁂𑀦 𑀧𑀢𑁆𑀣𑀦𑀸. 𑀧𑀺𑀳𑀸𑀬𑀦𑀯𑀲𑁂𑀦 𑀧𑀺𑀳𑀦𑀸. 𑀲𑀼𑀝𑁆𑀞𑀼 𑀧𑀢𑁆𑀣𑀦𑀸 𑀲𑀫𑁆𑀧𑀢𑁆𑀣𑀦𑀸. 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸. 𑀭𑀽𑀧𑀸𑀭𑀽𑀧𑀪𑀯𑁂 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸. 𑀉𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀯𑀺𑀪𑀯𑁂 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸. 𑀲𑀼𑀤𑁆𑀥𑁂 𑀭𑀽𑀧𑀪𑀯𑀲𑁆𑀫𑀺𑀁𑀬𑁂𑀯 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸. 𑀅𑀭𑀽𑀧𑀪𑀯𑁂 𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀤𑀺𑀝𑁆𑀞𑀺𑀭𑀸𑀕𑁄. 𑀦𑀺𑀭𑁄𑀥𑁂 𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸. 𑀭𑀽𑀧𑁂 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸. 𑀲𑀤𑁆𑀤𑁂 𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸. 𑀕𑀦𑁆𑀥𑀢𑀡𑁆𑀳𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀑𑀖𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸𑀯.

𑀓𑀼𑀲𑀮𑀥𑀫𑁆𑀫𑁂 𑀆𑀯𑀭𑀢𑀻𑀢𑀺 𑀆𑀯𑀭𑀡𑀁. 𑀙𑀸𑀤𑀦𑀯𑀲𑁂𑀦 𑀙𑀸𑀤𑀦𑀁. 𑀲𑀢𑁆𑀢𑁂 𑀯𑀝𑁆𑀝𑀲𑁆𑀫𑀺𑀁 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀦𑀁. 𑀘𑀺𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀓𑀺𑀮𑀺𑀲𑁆𑀲𑀢𑀺 𑀲𑀁𑀓𑀺𑀮𑀺𑀝𑁆𑀞𑀁 𑀓𑀭𑁄𑀢𑀻𑀢𑀺 𑀉𑀧𑀓𑁆𑀓𑀺𑀮𑁂𑀲𑁄. 𑀣𑀸𑀫𑀕𑀢𑀝𑁆𑀞𑁂𑀦 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁; 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀓𑀼𑀲𑀮𑀘𑀸𑀭𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀘𑁄𑀭𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀼 𑀥𑀼𑀢𑁆𑀢𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀽’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁩𑁦) 𑀳𑀺 𑀫𑀕𑁆𑀕𑀁 𑀕𑀡𑁆𑀳𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀯𑀫𑀺𑀥𑀸𑀧𑀺 𑀕𑀳𑀡𑀝𑁆𑀞𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀮𑀢𑀸 𑀯𑀺𑀬𑀸𑀢𑀺 𑀮𑀢𑀸. ‘‘𑀮𑀢𑀸 𑀉𑀩𑁆𑀪𑀺𑀚𑁆𑀚 𑀢𑀺𑀝𑁆𑀞𑀢𑀻’’𑀢𑀺 (𑀥. 𑀧. 𑁩𑁪𑁦) 𑀆𑀕𑀢𑀝𑁆𑀞𑀸𑀦𑁂𑀧𑀺 𑀅𑀬𑀁 𑀢𑀡𑁆𑀳𑀸 𑀮𑀢𑀸𑀢𑀺 𑀯𑀼𑀢𑁆𑀢𑀸. 𑀯𑀺𑀯𑀺𑀥𑀸𑀦𑀺 𑀯𑀢𑁆𑀣𑀽𑀦𑀺 𑀇𑀘𑁆𑀙𑀢𑀻𑀢𑀺 𑀯𑁂𑀯𑀺𑀘𑁆𑀙𑀁. 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀤𑀼𑀓𑁆𑀔𑀫𑀽𑀮𑀁. 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀦𑁆𑀢𑀺 𑀤𑀼𑀓𑁆𑀔𑀦𑀺𑀤𑀸𑀦𑀁. 𑀢𑀁 𑀤𑀼𑀓𑁆𑀔𑀁 𑀇𑀢𑁄 𑀧𑀪𑀯𑀢𑀻𑀢𑀺 𑀤𑀼𑀓𑁆𑀔𑀧𑁆𑀧𑀪𑀯𑁄. 𑀩𑀦𑁆𑀥𑀦𑀝𑁆𑀞𑁂𑀦 𑀧𑀸𑀲𑁄 𑀯𑀺𑀬𑀸𑀢𑀺 𑀧𑀸𑀲𑁄. 𑀫𑀸𑀭𑀲𑁆𑀲 𑀧𑀸𑀲𑁄 𑀫𑀸𑀭𑀧𑀸𑀲𑁄. 𑀤𑀼𑀭𑀼𑀕𑁆𑀕𑀺𑀮𑀦𑀝𑁆𑀞𑁂𑀦 𑀩𑀴𑀺𑀲𑀁 𑀯𑀺𑀬𑀸𑀢𑀺 𑀩𑀴𑀺𑀲𑀁. 𑀫𑀸𑀭𑀲𑁆𑀲 𑀩𑀴𑀺𑀲𑀁 𑀫𑀸𑀭𑀩𑀴𑀺𑀲𑀁. 𑀢𑀡𑁆𑀳𑀸𑀪𑀺𑀪𑀽𑀢𑀸 𑀫𑀸𑀭𑀲𑁆𑀲 𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀉𑀧𑀭𑀺 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀫𑀸𑀭𑀲𑁆𑀲 𑀯𑀺𑀲𑀬𑁄𑀢𑀺 𑀫𑀸𑀭𑀯𑀺𑀲𑀬𑁄. 𑀲𑀦𑁆𑀤𑀦𑀝𑁆𑀞𑁂𑀦 𑀢𑀡𑁆𑀳𑀸𑀯 𑀦𑀤𑀻 𑀢𑀡𑁆𑀳𑀸𑀦𑀤𑀻. 𑀅𑀚𑁆𑀛𑁄𑀢𑁆𑀣𑀭𑀡𑀝𑁆𑀞𑁂𑀦 𑀢𑀡𑁆𑀳𑀸𑀯 𑀚𑀸𑀮𑀁 𑀢𑀡𑁆𑀳𑀸𑀚𑀸𑀮𑀁. 𑀬𑀣𑀸 𑀲𑀼𑀦𑀔𑀸 𑀕𑀤𑁆𑀤𑀼𑀮𑀩𑀤𑁆𑀥𑀸 𑀬𑀤𑀺𑀘𑁆𑀙𑀓𑀁 𑀦𑀻𑀬𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀩𑀤𑁆𑀥𑀸 𑀲𑀢𑁆𑀢𑀸𑀧𑀻𑀢𑀺 𑀤𑀴𑁆𑀳𑀩𑀦𑁆𑀥𑀦𑀝𑁆𑀞𑁂𑀦 𑀕𑀤𑁆𑀤𑀼𑀮𑀁 𑀯𑀺𑀬𑀸𑀢𑀺 𑀕𑀤𑁆𑀤𑀼𑀮𑀁. 𑀢𑀡𑁆𑀳𑀸𑀯 𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁. 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀢𑀡𑁆𑀳𑀸𑀯 𑀲𑀫𑀼𑀤𑁆𑀤𑁄 𑀢𑀡𑁆𑀳𑀸𑀲𑀫𑀼𑀤𑁆𑀤𑁄.

𑁧𑁦𑁬𑁬. 𑀤𑁄𑀲𑀦𑀺𑀤𑁆𑀤𑁂𑀲𑁂 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀅𑀯𑀼𑀟𑁆𑀠𑀺𑀁 𑀫𑁂 𑀅𑀓𑀸𑀲𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄𑀢𑀺 𑀅𑀓𑀸𑀭𑀡𑁂 𑀓𑁄𑀧𑁄 𑁋 𑀏𑀓𑀘𑁆𑀘𑁄 𑀳𑀺 ‘𑀤𑁂𑀯𑁄 𑀅𑀢𑀺𑀯𑀲𑁆𑀲𑀢𑀻’𑀢𑀺 𑀓𑀼𑀧𑁆𑀧𑀢𑀺, ‘𑀦 𑀯𑀲𑁆𑀲𑀢𑀻’𑀢𑀺 𑀓𑀼𑀧𑁆𑀧𑀢𑀺, ‘𑀲𑀽𑀭𑀺𑀬𑁄 𑀢𑀧𑁆𑀧𑀢𑀻’𑀢𑀺 𑀓𑀼𑀧𑁆𑀧𑀢𑀺, ‘𑀦 𑀢𑀧𑁆𑀧𑀢𑀻’𑀢𑀺 𑀓𑀼𑀧𑁆𑀧𑀢𑀺, 𑀯𑀸𑀢𑁂 𑀯𑀸𑀬𑀦𑁆𑀢𑁂𑀧𑀺 𑀓𑀼𑀧𑁆𑀧𑀢𑀺, 𑀅𑀯𑀸𑀬𑀦𑁆𑀢𑁂𑀧𑀺 𑀓𑀼𑀧𑁆𑀧𑀢𑀺, 𑀲𑀫𑁆𑀫𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑁄𑀥𑀺𑀧𑀡𑁆𑀡𑀸𑀦𑀁 𑀓𑀼𑀧𑁆𑀧𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀸𑀢𑀲𑁆𑀲 𑀓𑀼𑀧𑁆𑀧𑀢𑀺, 𑀉𑀧𑀓𑁆𑀔𑀮𑀺𑀢𑁆𑀯𑀸 𑀔𑀸𑀡𑀼𑀓𑀲𑁆𑀲 𑀓𑀼𑀧𑁆𑀧𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀻𑀢𑀺. 𑀢𑀢𑁆𑀣 𑀳𑁂𑀝𑁆𑀞𑀸 𑀦𑀯𑀲𑀼 𑀞𑀸𑀦𑁂𑀲𑀼 𑀲𑀢𑁆𑀢𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺. 𑀅𑀝𑁆𑀞𑀸𑀦𑀸𑀖𑀸𑀢𑁄 𑀧𑀦 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀫𑁆𑀫𑀧𑀣𑀪𑁂𑀤𑀁 𑀦 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀆𑀖𑀸𑀢𑁂𑀦𑁆𑀢𑁄 𑀉𑀧𑁆𑀧𑀦𑁆𑀦𑁄𑀢𑀺 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄. 𑀢𑀢𑁄 𑀩𑀮𑀯𑀢𑀭𑁄 𑀧𑀝𑀺𑀖𑀸𑀢𑁄. 𑀧𑀝𑀺𑀳𑀜𑁆𑀜𑀦𑀯𑀲𑁂𑀦 𑀧𑀝𑀺𑀖𑀁. 𑀧𑀝𑀺𑀯𑀺𑀭𑀼𑀚𑁆𑀛𑀢𑀻𑀢𑀺 𑀧𑀝𑀺𑀯𑀺𑀭𑁄𑀥𑁄. 𑀓𑀼𑀧𑁆𑀧𑀦𑀯𑀲𑁂𑀦 𑀓𑁄𑀧𑁄. 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀤𑀼𑀲𑁆𑀲𑀦𑀯𑀲𑁂𑀦 𑀤𑁄𑀲𑁄. 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀧𑀦𑁆𑀦𑀢𑀸, 𑀯𑀺𑀧𑀭𑀺𑀯𑀢𑁆𑀢𑀦𑀸𑀓𑀸𑀭𑁄. 𑀫𑀦𑀁 𑀧𑀤𑀽𑀲𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀦𑁄𑀧𑀤𑁄𑀲𑁄. 𑀓𑀼𑀚𑁆𑀛𑀦𑀯𑀲𑁂𑀦 𑀓𑁄𑀥𑁄. 𑀓𑀼𑀚𑁆𑀛𑀦𑀸𑀓𑀸𑀭𑁄 𑀓𑀼𑀚𑁆𑀛𑀦𑀸. 𑀓𑀼𑀚𑁆𑀛𑀺𑀢𑀲𑁆𑀲 𑀪𑀸𑀯𑁄 𑀓𑀼𑀚𑁆𑀛𑀺𑀢𑀢𑁆𑀢𑀁.

𑀇𑀤𑀸𑀦𑀺 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄…𑀧𑁂… 𑀓𑀼𑀚𑁆𑀛𑀺𑀢𑀢𑁆𑀢’’𑀦𑁆𑀢𑀺 𑀘 𑀇𑀥 𑀯𑀼𑀢𑁆𑀢𑁄, ‘‘𑀤𑁄𑀲𑁄 𑀤𑀼𑀲𑁆𑀲𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄𑀢𑀺. 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺. 𑀫𑁄𑀳𑀦𑀺𑀤𑁆𑀤𑁂𑀲𑁄 𑀅𑀫𑁄𑀳𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦𑁂𑀲 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁧𑁦𑁭𑁯. 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀢𑀺 𑀢𑁂𑀳𑀺 𑀳𑁂𑀢𑀼𑀥𑀫𑁆𑀫𑁂𑀳𑀺 𑀬𑁂 𑀅𑀜𑁆𑀜𑁂 𑀳𑁂𑀢𑀼𑀥𑀫𑁆𑀫𑀸 𑀯𑀸 𑀦𑀳𑁂𑀢𑀼𑀥𑀫𑁆𑀫𑀸 𑀯𑀸 𑀢𑁂 𑀲𑀳𑁂𑀢𑀼𑀓𑀸. 𑀅𑀳𑁂𑀢𑀼𑀓𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀳𑁂𑀢𑀼 𑀳𑁂𑀢𑀼𑀬𑁂𑀯 𑀘 𑀳𑁄𑀢𑀺, 𑀢𑀺𑀡𑁆𑀡𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀬𑀁 𑀲𑀳𑁂𑀢𑀼𑀓𑁄 𑀘. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑁄 𑀧𑀦 𑀫𑁄𑀳𑁄 𑀳𑁂𑀢𑀼 𑀅𑀳𑁂𑀢𑀼𑀓𑁄. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁯𑁧. 𑀲𑀗𑁆𑀔𑀢𑀤𑀼𑀓𑀦𑀺𑀤𑁆𑀤𑁂𑀲𑁂 𑀧𑀼𑀭𑀺𑀫𑀤𑀼𑀓𑁂 𑀯𑀼𑀢𑁆𑀢𑀁 𑀅𑀲𑀗𑁆𑀔𑀢𑀥𑀸𑀢𑀼𑀁 𑀲𑀦𑁆𑀥𑀸𑀬 𑀬𑁄 𑀏𑀯 𑀲𑁄 𑀥𑀫𑁆𑀫𑁄𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀼𑀭𑀺𑀫𑀤𑀼𑀓𑁂 𑀧𑀦 𑀩𑀳𑀼𑀯𑀘𑀦𑀯𑀲𑁂𑀦 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀢𑁆𑀢𑀸 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀬𑁂𑀦 𑀩𑀳𑀼𑀯𑀘𑀦𑀁 𑀓𑀢𑀁. 𑀇𑀫𑁂 𑀥𑀫𑁆𑀫𑀸 𑀲𑀦𑀺𑀤𑀲𑁆𑀲𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁧𑁦𑁧. 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑁂𑀦𑀘𑀺 𑀏𑀓𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑁂𑀦𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀦 𑀯𑀺𑀚𑀸𑀦𑀺𑀢𑀩𑁆𑀩𑀸. ‘𑀏𑀯𑀁 𑀲𑀦𑁆𑀢𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀻’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 ‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’𑀢𑀺 𑀅𑀬𑀁 𑀤𑀼𑀓𑁄 𑀦 𑀳𑁄𑀢𑀺. 𑀭𑀽𑀧𑀁 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀲𑀤𑁆𑀤𑁄 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 ‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸’𑀢𑀺 𑀅𑀬𑀫𑁂𑀓𑁄 𑀤𑀼𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀏𑀓𑁂𑀓𑀇𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀯𑀻𑀲𑀢𑀺 𑀤𑀼𑀓𑀸 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 𑀧𑀦 ‘𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸’ 𑀦𑀢𑁆𑀣𑀺? 𑀢𑁂𑀦𑁂𑀢𑁆𑀣 𑀤𑀼𑀓𑀸 𑀦 𑀯𑀼𑀢𑁆𑀢𑀸𑀢𑀺? 𑀦𑁄 𑀦𑀢𑁆𑀣𑀺, 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀧𑀦 𑀦 𑀯𑀼𑀢𑁆𑀢𑀸. 𑀦 𑀳𑀺, 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀸 𑀏𑀯𑀸𑀢𑀺 𑀯𑀯𑀢𑁆𑀣𑀸𑀦𑀁 𑀅𑀢𑁆𑀣𑀺, 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀧𑀻𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀏𑀢𑁆𑀣 𑀤𑀼𑀓𑀸 𑀦 𑀯𑀼𑀢𑁆𑀢𑀸. 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀧𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀘𑁂𑀯 𑀅𑀯𑀺𑀜𑁆𑀜𑁂𑀬𑁆𑀬𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀺. 𑀢𑀲𑁆𑀫𑀸 𑀲𑁄 𑀅𑀯𑀼𑀢𑁆𑀢𑁄𑀧𑀺 𑀬𑀣𑀸𑀮𑀸𑀪𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀳𑀺 𑀲𑀗𑁆𑀔𑁆𑀬𑀁 𑀕𑀢𑁂𑀳𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀳𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀏𑀯 𑀢𑀸𑀯 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀢𑁂𑀳𑀺𑀬𑁂𑀯 𑀭𑀽𑀧𑀸𑀯𑀘𑀭𑀸𑀤𑀺𑀥𑀫𑁆𑀫𑀸𑀧𑀺 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀭𑀽𑀧𑀸𑀯𑀘𑀭𑁂𑀳𑀺𑀧𑀺 𑀓𑀸𑀫𑀸𑀯𑀘𑀭𑀸 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀢𑁂𑀳𑁂𑀯 𑀭𑀽𑀧𑀸𑀯𑀘𑀭𑀸𑀤𑀬𑁄𑀧𑀺 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀅𑀭𑀽𑀧𑀸𑀯𑀘𑀭𑁂𑀳𑀺 𑀧𑀦 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘 𑀦𑁂𑀯 𑀯𑀺𑀜𑁆𑀜𑁂𑀬𑁆𑀬𑀸. 𑀅𑀭𑀽𑀧𑀸𑀯𑀘𑀭𑀸 𑀧𑀦 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀢𑁂𑀧𑀺 𑀘 𑀓𑁂𑀘𑀺𑀤𑁂𑀯 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀅𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀓𑀸𑀫𑀸𑀯𑀘𑀭𑀸𑀤𑀬𑁄 𑀦𑁂𑀯 𑀯𑀺𑀜𑁆𑀜𑁂𑀬𑁆𑀬𑀸. 𑀅𑀧𑀭𑀺𑀬𑀸𑀧𑀦𑁆𑀦𑀸 𑀧𑀦 𑀦𑀺𑀩𑁆𑀩𑀸𑀦𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑁂𑀳𑀺𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀳𑀺𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸. 𑀢𑁂𑀧𑀺 𑀘 𑀫𑀕𑁆𑀕𑀨𑀮𑀸𑀦𑀁 𑀅𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑁂𑀘𑀺𑀤𑁂𑀯 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀘𑀺 𑀅𑀯𑀺𑀜𑁆𑀜𑁂𑀬𑁆𑀬𑀸𑀢𑀺.

𑁧𑁧𑁦𑁨. 𑀆𑀲𑀯𑀦𑀺𑀤𑁆𑀤𑁂𑀲𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦𑀸𑀫. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀪𑀯𑀯𑀲𑁂𑀦 𑀧𑀢𑁆𑀣𑀦𑀸 𑀪𑀯𑀸𑀲𑀯𑁄 𑀦𑀸𑀫. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀲𑀯𑁄 𑀦𑀸𑀫. 𑀢𑀢𑁆𑀣 𑀢𑀢𑁆𑀣 𑀆𑀕𑀢𑁂𑀲𑀼 𑀧𑀦 𑀆𑀲𑀯𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀏𑀓𑀯𑀺𑀥𑀸𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄 𑀳𑁂𑀢𑁂 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸𑀢𑀺 𑀏𑀯𑀁 𑀏𑀓𑀯𑀺𑀥𑀸𑀯 𑀳𑁄𑀦𑁆𑀢𑀺. 𑀯𑀺𑀦𑀬𑁂 𑀧𑀦 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯) 𑀤𑀼𑀯𑀺𑀥𑁂𑀦 𑀆𑀕𑀢𑀸. 𑀲𑀼𑀢𑁆𑀢𑀦𑁆𑀢𑁂 𑀲𑀴𑀸𑀬𑀢𑀦𑁂 𑀢𑀸𑀯 ‘‘𑀢𑀬𑁄𑀫𑁂, 𑀆𑀯𑀼𑀲𑁄, 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀲𑀁. 𑀦𑀺. 𑁪.𑁩𑁨𑁧) 𑀢𑀺𑀯𑀺𑀥𑁂𑀦 𑀆𑀕𑀢𑀸. 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁂 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦𑀺𑀭𑀬𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀫𑀦𑀼𑀲𑁆𑀲𑀮𑁄𑀓𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀤𑁂𑀯𑀮𑁄𑀓𑀕𑀫𑀦𑀻𑀬𑀸’’𑀢𑀺 (𑀅. 𑀦𑀺. 𑁬.𑁬𑁩) 𑀧𑀜𑁆𑀘𑀯𑀺𑀥𑁂𑀦 𑀆𑀕𑀢𑀸. 𑀙𑀓𑁆𑀓𑀦𑀺𑀧𑀸𑀢𑁂 𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑁂 𑁋 ‘‘𑀅𑀢𑁆𑀣𑀺 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸’’𑀢𑀺 (𑀅. 𑀦𑀺. 𑁬.𑁫𑁮) 𑀙𑀩𑁆𑀩𑀺𑀥𑁂𑀦 𑀆𑀕𑀢𑀸. 𑀲𑀩𑁆𑀩𑀸𑀲𑀯𑀧𑀭𑀺𑀬𑀸𑀬𑁂 (𑀫. 𑀦𑀺. 𑁧.𑁧𑁪 𑀆𑀤𑀬𑁄) ‘𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑁂𑀳𑀺’ 𑀲𑀤𑁆𑀥𑀺𑀁 𑀲𑀢𑁆𑀢𑀯𑀺𑀥𑁂𑀦 𑀆𑀕𑀢𑀸. 𑀇𑀥 𑀧𑀦𑁂𑀢𑁂 𑀓𑀸𑀫𑀸𑀲𑀯𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁂𑀦 𑀆𑀕𑀢𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂 𑀓𑀸𑀫𑁂 𑀆𑀲𑀯𑁄 ‘𑀓𑀸𑀫𑀸𑀲𑀯𑁄’. 𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑁂 𑀓𑀫𑁆𑀫𑀢𑁄 𑀘 𑀉𑀧𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀆𑀲𑀯𑁄 ‘𑀪𑀯𑀸𑀲𑀯𑁄’. 𑀤𑀺𑀝𑁆𑀞𑀺 𑀏𑀯 𑀆𑀲𑀯𑁄 ‘𑀤𑀺𑀝𑁆𑀞𑀸𑀲𑀯𑁄’. 𑀅𑀯𑀺𑀚𑁆𑀚𑀸𑀯 𑀆𑀲𑀯𑁄 ‘𑀅𑀯𑀺𑀚𑁆𑀚𑀸𑀲𑀯𑁄’.

𑁧𑁧𑁦𑁩. 𑀓𑀸𑀫𑁂𑀲𑀽𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀓𑀸𑀫𑀲𑀗𑁆𑀔𑀸𑀢𑁄 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄, 𑀦 𑀥𑀫𑁆𑀫𑀘𑁆𑀙𑀦𑁆𑀤𑁄. 𑀓𑀸𑀫𑀦𑀯𑀲𑁂𑀦 𑀭𑀚𑁆𑀚𑀦𑀯𑀲𑁂𑀦 𑀘 𑀓𑀸𑀫𑁄𑀬𑁂𑀯 𑀭𑀸𑀕𑁄 𑀓𑀸𑀫𑀭𑀸𑀕𑁄. 𑀓𑀸𑀫𑀦𑀯𑀲𑁂𑀦 𑀦𑀦𑁆𑀤𑀦𑀯𑀲𑁂𑀦 𑀘 𑀓𑀸𑀫𑁄𑀯 𑀦𑀦𑁆𑀤𑀻𑀢𑀺 𑀓𑀸𑀫𑀦𑀦𑁆𑀤𑀻. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀸𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀓𑀸𑀫𑀢𑀡𑁆𑀳𑀸, 𑀲𑀺𑀦𑁂𑀳𑀦𑀝𑁆𑀞𑁂𑀦 𑀓𑀸𑀫𑀲𑀺𑀦𑁂𑀳𑁄, 𑀧𑀭𑀺𑀟𑀬𑁆𑀳𑀦𑀝𑁆𑀞𑁂𑀦 𑀓𑀸𑀫𑀧𑀭𑀺𑀴𑀸𑀳𑁄, 𑀫𑀼𑀘𑁆𑀙𑀦𑀝𑁆𑀞𑁂𑀦 𑀓𑀸𑀫𑀫𑀼𑀘𑁆𑀙𑀸, 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀝𑁆𑀞𑁂𑀦 𑀓𑀸𑀫𑀚𑁆𑀛𑁄𑀲𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀯𑀺𑀪𑀢𑁆𑀢𑁄 𑀓𑀸𑀫𑀸𑀲𑀯𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑁧𑁧𑁦𑁪. 𑀪𑀯𑁂𑀲𑀼 𑀪𑀯𑀙𑀦𑁆𑀤𑁄𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀪𑀯𑀧𑀢𑁆𑀣𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀙𑀦𑁆𑀤𑁄 ‘𑀪𑀯𑀙𑀦𑁆𑀤𑁄’. 𑀲𑁂𑀲𑀧𑀤𑀸𑀦𑀺𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁧𑁦𑁫. 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸𑀢𑀺𑀆𑀤𑀻𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀤𑀺𑀝𑁆𑀞𑀺𑀧𑁆𑀧𑀪𑁂𑀤𑁄𑀯 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀏𑀢𑁆𑀣 𑀔𑀦𑁆𑀥𑀧𑀜𑁆𑀘𑀓𑀁 𑀮𑁄𑀓𑁄𑀢𑀺 𑀕𑀳𑁂𑀢𑁆𑀯𑀸 ‘𑀅𑀬𑀁 𑀮𑁄𑀓𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀩𑁆𑀩𑀓𑀸𑀮𑀺𑀓𑁄’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 ‘𑀲𑀲𑁆𑀲𑀢’𑀦𑁆𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀅𑀲𑀲𑁆𑀲𑀢𑁄𑀢𑀺 𑀢𑀫𑁂𑀯 𑀮𑁄𑀓𑀁 ‘𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀉𑀘𑁆𑀙𑁂𑀤𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀯𑀸𑀢𑀺 𑀧𑀭𑀺𑀢𑁆𑀢𑀓𑀲𑀺𑀡𑀮𑀸𑀪𑀺𑀦𑁄 ‘𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸’ 𑀓𑀲𑀺𑀡𑁂 𑀲𑀫𑀸𑀧𑀦𑁆𑀦𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀮𑁄𑀓𑁄𑀢𑀺 𑀘 𑀓𑀲𑀺𑀡𑀧𑀭𑀺𑀘𑁆𑀙𑁂𑀤𑀦𑁆𑀢𑁂𑀦 𑀘 ‘𑀅𑀦𑁆𑀢𑀯𑀸’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀧𑀺 𑀳𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑀺. 𑀯𑀺𑀧𑀼𑀮𑀓𑀲𑀺𑀡𑀮𑀸𑀪𑀺𑀦𑁄 𑀧𑀦 𑀢𑀲𑁆𑀫𑀺𑀁 𑀓𑀲𑀺𑀡𑁂 𑀲𑀫𑀸𑀧𑀦𑁆𑀦𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀮𑁄𑀓𑁄𑀢𑀺 𑀘 𑀓𑀲𑀺𑀡𑀧𑀭𑀺𑀘𑁆𑀙𑁂𑀤𑀦𑁆𑀢𑁂𑀦 𑀘 ‘𑀅𑀦𑀦𑁆𑀢𑁄’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀧𑀺 𑀳𑁄𑀢𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑀺.

𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀪𑁂𑀤𑀦𑀥𑀫𑁆𑀫𑀲𑁆𑀲 𑀲𑀭𑀻𑀭𑀲𑁆𑀲𑁂𑀯 ‘𑀚𑀻𑀯’𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀲𑀭𑀻𑀭𑁂 𑀉𑀘𑁆𑀙𑀺𑀚𑁆𑀚𑀫𑀸𑀦𑁂 ‘𑀚𑀻𑀯𑀫𑁆𑀧𑀺 𑀉𑀘𑁆𑀙𑀺𑀚𑁆𑀚𑀢𑀻’𑀢𑀺 𑀉𑀘𑁆𑀙𑁂𑀤𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀤𑀼𑀢𑀺𑀬𑀧𑀤𑁂 𑀲𑀭𑀻𑀭𑀢𑁄 𑀅𑀜𑁆𑀜𑀲𑁆𑀲 𑀚𑀻𑀯𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀭𑀻𑀭𑁂 𑀉𑀘𑁆𑀙𑀺𑀚𑁆𑀚𑀫𑀸𑀦𑁂𑀧𑀺 ‘𑀚𑀻𑀯𑀁 𑀦 𑀉𑀘𑁆𑀙𑀺𑀚𑁆𑀚𑀢𑀻’𑀢𑀺 𑀲𑀲𑁆𑀲𑀢𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀆𑀤𑀻𑀲𑀼 𑀲𑀢𑁆𑀢𑁄 𑀢𑀣𑀸𑀕𑀢𑁄 𑀦𑀸𑀫. 𑀲𑁄 𑀧𑀭𑀁 𑀫𑀭𑀡𑀸 𑀳𑁄𑀢𑀻𑀢𑀺 𑀕𑀡𑁆𑀳𑀢𑁄 𑀧𑀞𑀫𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀦 𑀳𑁄𑀢𑀻𑀢𑀺 𑀕𑀡𑁆𑀳𑀢𑁄 𑀤𑀼𑀢𑀺𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑀕𑀡𑁆𑀳𑀢𑁄 𑀢𑀢𑀺𑀬𑀸 𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺. 𑀦𑁂𑀯 𑀳𑁄𑀢𑀺 𑀦 𑀦𑀳𑁄𑀢𑀻𑀢𑀺 𑀕𑀡𑁆𑀳𑀢𑁄 𑀘𑀢𑀼𑀢𑁆𑀣𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺. 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀸𑀢𑀺 𑀇𑀫𑁂 𑀓𑀸𑀫𑀸𑀲𑀯𑀜𑁆𑀘 𑀪𑀯𑀸𑀲𑀯𑀜𑁆𑀘 𑀭𑀸𑀕𑀯𑀲𑁂𑀦 𑀏𑀓𑀢𑁄 𑀓𑀢𑁆𑀯𑀸, 𑀲𑀗𑁆𑀔𑁂𑀧𑀢𑁄 𑀢𑀬𑁄, 𑀯𑀺𑀢𑁆𑀣𑀸𑀭𑀢𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀆𑀲𑀯𑀸 𑀦𑀸𑀫.

𑀬𑁄 𑀧𑀦 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀆𑀪𑀭𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀓𑀸𑀫𑀸𑀲𑀯𑁄 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀲𑁆𑀲 𑀭𑀸𑀕𑀲𑁆𑀲 𑀇𑀥𑁂𑀯 𑀧𑀳𑀻𑀦𑀢𑁆𑀢𑀸. 𑀳𑁂𑀢𑀼𑀕𑁄𑀘𑁆𑀙𑀓𑀁 𑀧𑀦 𑀧𑀢𑁆𑀯𑀸 𑀮𑁄𑀪𑁄 𑀳𑁂𑀢𑀼 𑀦𑀸𑀫 𑀳𑁄𑀢𑀺. 𑀕𑀦𑁆𑀣𑀕𑁄𑀘𑁆𑀙𑀓𑀁 𑀧𑀢𑁆𑀯𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀦𑀸𑀫. 𑀓𑀺𑀮𑁂𑀲𑀕𑁄𑀘𑁆𑀙𑀓𑀁 𑀧𑀢𑁆𑀯𑀸 𑀮𑁄𑀪𑁄 𑀓𑀺𑀮𑁂𑀲𑁄 𑀦𑀸𑀫 𑀳𑁄𑀢𑀺. 𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀧𑀦 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺; 𑀤𑀺𑀝𑁆𑀞𑀺𑀭𑀸𑀕𑁄 𑀦𑀸𑀫 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑁂 𑀧𑀼𑀭𑀺𑀲𑀧𑀼𑀕𑁆𑀕𑀮𑁂 𑀤𑀺𑀦𑁆𑀦𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀦 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁨𑁯).

𑀇𑀫𑁂 𑀧𑀦 𑀆𑀲𑀯𑁂 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀓𑀸𑀫𑀸𑀲𑀯𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀪𑀯𑀸𑀲𑀯𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀤𑀺𑀝𑁆𑀞𑀸𑀲𑀯𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀅𑀯𑀺𑀚𑁆𑀚𑀸𑀲𑀯𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀸𑀲𑀯𑁄 𑀧𑀳𑀻𑀬𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑀸𑀲𑀯𑁄, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘𑀸𑀢𑀺.

𑁧𑁧𑁨𑁧. 𑀲𑀁𑀬𑁄𑀚𑀦𑁂𑀲𑀼 𑀫𑀸𑀦𑀦𑀺𑀤𑁆𑀤𑁂𑀲𑁂 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀢𑀺 𑀉𑀢𑁆𑀢𑀫𑀝𑁆𑀞𑁂𑀦 ‘𑀅𑀳𑀁 𑀲𑁂𑀬𑁆𑀬𑁄’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀢𑀺 𑀲𑀫𑀲𑀫𑀝𑁆𑀞𑁂𑀦 ‘𑀅𑀳𑀁 𑀲𑀤𑀺𑀲𑁄’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀢𑀺 𑀮𑀸𑀫𑀓𑀝𑁆𑀞𑁂𑀦 ‘𑀅𑀳𑀁 𑀳𑀻𑀦𑁄’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀏𑀯𑀁 𑀲𑁂𑀬𑁆𑀬𑀫𑀸𑀦𑁄 𑀲𑀤𑀺𑀲𑀫𑀸𑀦𑁄 𑀳𑀻𑀦𑀫𑀸𑀦𑁄𑀢𑀺 𑀇𑀫𑁂 𑀢𑀬𑁄 𑀫𑀸𑀦𑀸 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁂𑀬𑁆𑀬𑀲𑁆𑀲𑀸𑀧𑀺 𑀳𑀺 ‘𑀅𑀳𑀁 𑀲𑁂𑀬𑁆𑀬𑁄 𑀲𑀤𑀺𑀲𑁄 𑀳𑀻𑀦𑁄’𑀢𑀺 𑀢𑀬𑁄 𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀤𑀺𑀲𑀲𑁆𑀲𑀸𑀧𑀺, 𑀳𑀻𑀦𑀲𑁆𑀲𑀸𑀧𑀺. 𑀢𑀢𑁆𑀣 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀲𑀤𑀺𑀲𑀲𑁆𑀲 𑀲𑀤𑀺𑀲𑀫𑀸𑀦𑁄𑀯…𑀧𑁂… 𑀳𑀻𑀦𑀲𑁆𑀲 𑀳𑀻𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀏𑀓𑀲𑁆𑀲 𑀢𑀬𑁄 𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀣𑀺𑀢𑀁. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁂 𑀧𑀦 𑀧𑀞𑀫𑀓𑀫𑀸𑀦𑀪𑀸𑀚𑀦𑀻𑀬𑁂 𑀏𑀓𑁄 𑀫𑀸𑀦𑁄 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀣𑀺𑀢𑁄.

𑀫𑀸𑀦𑀓𑀭𑀡𑀯𑀲𑁂𑀦 𑀫𑀸𑀦𑁄. 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀦𑁆𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀉𑀲𑁆𑀲𑀺𑀢𑀝𑁆𑀞𑁂𑀦 𑀉𑀦𑁆𑀦𑀢𑀺. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀉𑀦𑁆𑀦𑀸𑀫𑁂𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑀻𑀢𑀺 𑀉𑀦𑁆𑀦𑀫𑁄. 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦 𑀥𑀚𑁄. 𑀉𑀓𑁆𑀔𑀺𑀧𑀦𑀝𑁆𑀞𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀧𑀕𑁆𑀕𑀸𑀳𑁄. 𑀓𑁂𑀢𑀼 𑀯𑀼𑀘𑁆𑀘𑀢𑀺 𑀩𑀳𑀽𑀲𑀼 𑀥𑀚𑁂𑀲𑀼 𑀅𑀘𑁆𑀘𑀼𑀕𑁆𑀕𑀢𑀥𑀚𑁄. 𑀫𑀸𑀦𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑀭𑀸𑀧𑀭𑁂 𑀉𑀧𑀸𑀤𑀸𑀬 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀓𑁂𑀢𑀼 𑀯𑀺𑀬𑀸𑀢𑀺 ‘𑀓𑁂𑀢𑀼’. 𑀓𑁂𑀢𑀼𑀁 𑀇𑀘𑁆𑀙𑀢𑀻𑀢𑀺 𑀓𑁂𑀢𑀼𑀓𑀫𑁆𑀬𑀁, 𑀢𑀲𑁆𑀲 𑀪𑀸𑀯𑁄 𑀓𑁂𑀢𑀼𑀓𑀫𑁆𑀬𑀢𑀸. 𑀲𑀸 𑀧𑀦 𑀘𑀺𑀢𑁆𑀢𑀲𑁆𑀲, 𑀦 𑀅𑀢𑁆𑀢𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸’𑀢𑀺. 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁 𑀓𑁂𑀢𑀼𑀁 𑀇𑀘𑁆𑀙𑀢𑀺. 𑀢𑀲𑁆𑀲 𑀘 𑀪𑀸𑀯𑁄 𑀓𑁂𑀢𑀼𑀓𑀫𑁆𑀬𑀢𑀸; 𑀓𑁂𑀢𑀼𑀲𑀗𑁆𑀔𑀸𑀢𑁄 𑀫𑀸𑀦𑁄𑀢𑀺.

𑁧𑁧𑁨𑁬. 𑀇𑀲𑁆𑀲𑀸𑀦𑀺𑀤𑁆𑀤𑁂𑀲𑁂 𑀬𑀸 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀸𑀢𑀺 𑀬𑀸 𑀏𑀢𑁂𑀲𑀼 𑀧𑀭𑁂𑀲𑀁 𑀮𑀸𑀪𑀸𑀤𑀻𑀲𑀼 ‘𑀓𑀺𑀁 𑀇𑀫𑀺𑀦𑀸 𑀇𑀫𑁂𑀲’𑀦𑁆𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀔𑀺𑀬𑁆𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸. 𑀢𑀢𑁆𑀣 𑀮𑀸𑀪𑁄𑀢𑀺 𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀧𑀝𑀺𑀮𑀸𑀪𑁄. 𑀇𑀲𑁆𑀲𑀼𑀓𑀻 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀲𑁆𑀲 𑀢𑀁 𑀮𑀸𑀪𑀁 𑀔𑀺𑀬𑁆𑀬𑀢𑀺, ‘𑀓𑀺𑀁 𑀇𑀫𑀲𑁆𑀲 𑀇𑀫𑀺𑀦𑀸’𑀢𑀺 𑀦 𑀇𑀘𑁆𑀙𑀢𑀺. 𑀲𑀓𑁆𑀓𑀸𑀭𑁄𑀢𑀺 𑀢𑁂𑀲𑀁𑀬𑁂𑀯 𑀧𑀘𑁆𑀘𑀬𑀸𑀦𑀁 𑀲𑀼𑀓𑀢𑀸𑀦𑀁 𑀲𑀼𑀦𑁆𑀤𑀭𑀸𑀦𑀁 𑀧𑀝𑀺𑀮𑀸𑀪𑁄. 𑀕𑀭𑀼𑀓𑀸𑀭𑁄𑀢𑀺 𑀕𑀭𑀼𑀓𑀺𑀭𑀺𑀬𑀸, 𑀪𑀸𑀭𑀺𑀬𑀓𑀭𑀡𑀁. 𑀫𑀸𑀦𑀦𑀦𑁆𑀢𑀺 𑀫𑀦𑁂𑀦 𑀧𑀺𑀬𑀓𑀭𑀡𑀁. 𑀯𑀦𑁆𑀤𑀦𑀦𑁆𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀦𑀁. 𑀧𑀽𑀚𑀦𑀸𑀢𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀦𑀸. 𑀇𑀲𑁆𑀲𑀸𑀬𑀦𑀯𑀲𑁂𑀦 𑀇𑀲𑁆𑀲𑀸. 𑀇𑀲𑁆𑀲𑀸𑀓𑀸𑀭𑁄 𑀇𑀲𑁆𑀲𑀸𑀬𑀦𑀸. 𑀇𑀲𑁆𑀲𑀸𑀬𑀺𑀢𑀪𑀸𑀯𑁄 𑀇𑀲𑁆𑀲𑀸𑀬𑀺𑀢𑀢𑁆𑀢𑀁. 𑀉𑀲𑀽𑀬𑀸𑀤𑀻𑀦𑀺 𑀇𑀲𑁆𑀲𑀸𑀤𑀺𑀯𑁂𑀯𑀘𑀦𑀸𑀦𑀺.

𑀇𑀫𑀺𑀲𑁆𑀲𑀸 𑀧𑀦 𑀇𑀲𑁆𑀲𑀸𑀬 𑀔𑀺𑀬𑁆𑀬𑀦𑀮𑀓𑁆𑀔𑀡𑀁 𑀆𑀕𑀸𑀭𑀺𑀓𑁂𑀦𑀸𑀧𑀺 𑀅𑀦𑀸𑀕𑀸𑀭𑀺𑀓𑁂𑀦𑀸𑀧𑀺 𑀤𑀻𑀧𑁂𑀢𑀩𑁆𑀩𑀁. 𑀆𑀕𑀸𑀭𑀺𑀓𑁄 𑀳𑀺 𑀏𑀓𑀘𑁆𑀘𑁄 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀆𑀚𑀻𑀯𑁂𑀦 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑀁 𑀦𑀺𑀲𑁆𑀲𑀸𑀬 𑀪𑀤𑁆𑀤𑀓𑀁 𑀬𑀸𑀦𑀁 𑀯𑀸 𑀯𑀸𑀳𑀦𑀁 𑀯𑀸 𑀭𑀢𑀦𑀁 𑀯𑀸 𑀮𑀪𑀢𑀺. 𑀅𑀧𑀭𑁄 𑀢𑀲𑁆𑀲 𑀅𑀮𑀸𑀪𑀢𑁆𑀣𑀺𑀓𑁄 𑀢𑁂𑀦 𑀮𑀸𑀪𑁂𑀦 𑀦 𑀢𑀼𑀲𑁆𑀲𑀢𑀺. ‘𑀓𑀤𑀸 𑀦𑀼 𑀔𑁄 𑀏𑀲 𑀇𑀫𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀓𑀧𑀡𑁄 𑀳𑀼𑀢𑁆𑀯𑀸 𑀘𑀭𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑁂𑀦 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀳𑀻𑀦𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀅𑀦𑀸𑀕𑀸𑀭𑀺𑀓𑁄𑀧𑀺 𑀏𑀓𑁄 𑀇𑀲𑁆𑀲𑀸𑀫𑀦𑀓𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀲𑀼𑀢𑀧𑀭𑀺𑀬𑀢𑁆𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀮𑀸𑀪𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘𑀓𑀤𑀸 𑀦𑀼 𑀔𑁄 𑀏𑀲𑁄 𑀇𑀫𑁂𑀳𑀺 𑀮𑀸𑀪𑀸𑀤𑀻𑀳𑀺 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀬𑀤𑀸 𑀢𑀁 𑀏𑀓𑁂𑀦 𑀓𑀸𑀭𑀡𑁂𑀦 𑀧𑀭𑀺𑀳𑀻𑀦𑀁 𑀧𑀲𑁆𑀲𑀢𑀺, 𑀢𑀤𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀏𑀯𑀁 𑀧𑀭𑀲𑀫𑁆𑀧𑀢𑁆𑀢𑀺𑀔𑀺𑀬𑁆𑀬𑀦𑀮𑀓𑁆𑀔𑀡𑀸 ‘𑀇𑀲𑁆𑀲𑀸’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁧𑁨𑁭. 𑀫𑀘𑁆𑀙𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀢𑁆𑀣𑀼𑀢𑁄 𑀫𑀘𑁆𑀙𑀭𑀺𑀬𑀤𑀲𑁆𑀲𑀦𑀢𑁆𑀣𑀁 ‘𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑀆𑀯𑀸𑀲𑀫𑀘𑁆𑀙𑀭𑀺𑀬’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀯𑀸𑀲𑁂 𑀫𑀘𑁆𑀙𑀭𑀺𑀬𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀯𑀸𑀲𑁄 𑀦𑀸𑀫 𑀲𑀓𑀮𑀸𑀭𑀸𑀫𑁄𑀧𑀺 𑀧𑀭𑀺𑀯𑁂𑀡𑀫𑁆𑀧𑀺 𑀏𑀓𑁄𑀯𑀭𑀓𑁄𑀧𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺𑀧𑀺. 𑀢𑁂𑀲𑀼 𑀯𑀲𑀦𑁆𑀢𑀸 𑀲𑀼𑀔𑀁 𑀯𑀲𑀦𑁆𑀢𑀺 𑀧𑀘𑁆𑀘𑀬𑁂 𑀮𑀪𑀦𑁆𑀢𑀺. 𑀏𑀓𑁄 𑀪𑀺𑀓𑁆𑀔𑀼 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑁂𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣 𑀆𑀕𑀫𑀦𑀁 𑀦 𑀇𑀘𑁆𑀙𑀢𑀺. 𑀆𑀕𑀢𑁄𑀧𑀺 ‘𑀔𑀺𑀧𑁆𑀧𑀁 𑀕𑀘𑁆𑀙𑀢𑀽’𑀢𑀺 𑀘𑀺𑀦𑁆𑀢𑁂𑀢𑀺. 𑀇𑀤𑀁 ‘𑀆𑀯𑀸𑀲𑀫𑀘𑁆𑀙𑀭𑀺𑀬𑀁’ 𑀦𑀸𑀫. 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀦𑀁 𑀧𑀦 𑀢𑀢𑁆𑀣 𑀯𑀸𑀲𑀁 𑀅𑀦𑀺𑀘𑁆𑀙𑀢𑁄 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀳𑁄𑀢𑀺.

𑀓𑀼𑀮𑀦𑁆𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑀫𑁆𑀧𑀺 𑀜𑀸𑀢𑀺𑀓𑀼𑀮𑀫𑁆𑀧𑀺. 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄 𑀓𑀼𑀮𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀧𑀦 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀦𑁆𑀢𑁄𑀧𑀺 𑀫𑀘𑁆𑀙𑀭𑀻 𑀦𑀸𑀫 𑀦 𑀳𑁄𑀢𑀺. 𑀲𑁄 𑀳𑀺 𑀢𑁂𑀲𑀁 𑀧𑀲𑀸𑀤𑀪𑁂𑀤𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀧𑀲𑀸𑀤𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀧𑀦 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑀫𑀘𑁆𑀙𑀭𑀻 𑀦𑀸𑀫 𑀳𑁄𑀢𑀺.

𑀮𑀸𑀪𑁄𑀢𑀺 𑀘𑀢𑀼𑀧𑀘𑁆𑀘𑀬𑀮𑀸𑀪𑁄𑀯. 𑀢𑀁 𑀅𑀜𑁆𑀜𑀲𑁆𑀫𑀺𑀁 𑀲𑀻𑀮𑀯𑀦𑁆𑀢𑁂𑀬𑁂𑀯 𑀮𑀪𑀦𑁆𑀢𑁂 ‘𑀫𑀸 𑀮𑀪𑀢𑀽’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀮𑀸𑀪𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀬𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀅𑀧𑀭𑀺𑀪𑁄𑀕𑀤𑀼𑀧𑁆𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀯𑀺𑀦𑀸𑀲𑁂𑀢𑀺, 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀫𑁆𑀧𑀺 𑀅𑀜𑁆𑀜𑀲𑁆𑀲 𑀦 𑀤𑁂𑀢𑀺, 𑀢𑀁 𑀤𑀺𑀲𑁆𑀯𑀸 ‘𑀲𑀘𑁂 𑀇𑀫𑀁 𑀏𑀲 𑀦 𑀮𑀪𑁂𑀬𑁆𑀬, 𑀅𑀜𑁆𑀜𑁄 𑀲𑀻𑀮𑀯𑀸 𑀮𑀪𑁂𑀬𑁆𑀬, 𑀧𑀭𑀺𑀪𑁄𑀕𑀁 𑀕𑀘𑁆𑀙𑁂𑀬𑁆𑀬𑀸’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀯𑀡𑁆𑀡𑁄 𑀦𑀸𑀫 𑀲𑀭𑀻𑀭𑀯𑀡𑁆𑀡𑁄𑀧𑀺 𑀕𑀼𑀡𑀯𑀡𑁆𑀡𑁄𑀧𑀺. 𑀢𑀢𑁆𑀣 𑀲𑀭𑀻𑀭𑀯𑀡𑁆𑀡𑁂 𑀫𑀘𑁆𑀙𑀭𑀺𑀧𑀼𑀕𑁆𑀕𑀮𑁄 ‘𑀧𑀭𑁄 𑀧𑀸𑀲𑀸𑀤𑀺𑀓𑁄 𑀭𑀽𑀧𑀯𑀸’𑀢𑀺 𑀯𑀼𑀢𑁆𑀢𑁂 𑀢𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀕𑀼𑀡𑀯𑀡𑁆𑀡𑀫𑀘𑁆𑀙𑀭𑀻 𑀲𑀻𑀮𑁂𑀦 𑀥𑀼𑀢𑀗𑁆𑀕𑁂𑀦 𑀧𑀝𑀺𑀧𑀤𑀸𑀬 𑀆𑀘𑀸𑀭𑁂𑀦 𑀯𑀡𑁆𑀡𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺.

𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀘 𑀧𑀝𑀺𑀯𑁂𑀥𑀥𑀫𑁆𑀫𑁄 𑀘. 𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑀸 𑀧𑀝𑀺𑀯𑁂𑀥𑀥𑀫𑁆𑀫𑀁 𑀦 𑀫𑀘𑁆𑀙𑀭𑀸𑀬𑀦𑁆𑀢𑀺, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀝𑀺𑀯𑁂𑀥𑀁 𑀇𑀘𑁆𑀙𑀦𑁆𑀢𑀺. 𑀢𑀁 𑀧𑀦 𑀧𑀝𑀺𑀯𑁂𑀥𑀁 ‘𑀧𑀭𑁂 𑀚𑀸𑀦𑀦𑁆𑀢𑀽’𑀢𑀺 𑀇𑀘𑁆𑀙𑀦𑁆𑀢𑀺. 𑀢𑀦𑁆𑀢𑀺𑀥𑀫𑁆𑀫𑁂𑀬𑁂𑀯 𑀧𑀦 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀁 𑀕𑀼𑀴𑁆𑀳𑀁 𑀕𑀦𑁆𑀣𑀁 𑀯𑀸 𑀓𑀣𑀸𑀫𑀕𑁆𑀕𑀁 𑀯𑀸 𑀚𑀸𑀦𑀸𑀢𑀺 𑀢𑀁 𑀅𑀜𑁆𑀜𑀁 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀬𑁄 𑀧𑀦 𑀧𑀼𑀕𑁆𑀕𑀮𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦, 𑀥𑀫𑁆𑀫𑀁 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀫𑀘𑁆𑀙𑀭𑀻 𑀦𑀸𑀫 𑀦 𑀳𑁄𑀢𑀺.

𑀢𑀢𑁆𑀣 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀺, 𑀓𑀸𑀮𑁂𑀦 𑀲𑀫𑀡𑁄 𑀳𑁄𑀢𑀺, 𑀓𑀸𑀮𑁂𑀦 𑀩𑁆𑀭𑀸𑀳𑁆𑀫𑀡𑁄, 𑀓𑀸𑀮𑁂𑀦 𑀦𑀺𑀕𑀡𑁆𑀞𑁄. 𑀬𑁄 𑀳𑀺 𑀪𑀺𑀓𑁆𑀔𑀼 ‘𑀅𑀬𑀁 𑀧𑀼𑀕𑁆𑀕𑀮𑁄 𑀧𑀯𑁂𑀡𑀺𑀆𑀕𑀢𑀁 𑀢𑀦𑁆𑀢𑀺𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀮𑀼𑀴𑀺𑀲𑁆𑀲𑀢𑀻’𑀢𑀺 𑀦 𑀤𑁂𑀢𑀺, 𑀅𑀬𑀁 𑀧𑀼𑀕𑁆𑀕𑀮𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺 𑀦𑀸𑀫. 𑀬𑁄 𑀧𑀦 ‘𑀅𑀬𑀁 𑀥𑀫𑁆𑀫𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄, 𑀲𑀘𑀸𑀬𑀁 𑀧𑀼𑀕𑁆𑀕𑀮𑁄 𑀕𑀡𑁆𑀳𑀺𑀲𑁆𑀲𑀢𑀺 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸 𑀦𑀲𑁆𑀲𑀺𑀲𑁆𑀲𑀢𑀻’𑀢𑀺 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀦 𑀤𑁂𑀢𑀺 𑀦𑀸𑀫. 𑀬𑁄 𑀧𑀦 ‘𑀲𑀘𑀸𑀬𑀁 𑀇𑀫𑀁 𑀥𑀫𑁆𑀫𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀫𑀬𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀦 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀫𑀘𑁆𑀙𑀭𑀻 𑀦𑀸𑀫 𑀳𑁄𑀢𑀺.

𑀇𑀫𑁂𑀲𑀼 𑀧𑀜𑁆𑀘𑀲𑀼 𑀫𑀘𑁆𑀙𑀭𑀺𑀬𑁂𑀲𑀼 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀢𑀸𑀯 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀆𑀯𑀸𑀲𑀲𑁆𑀲 𑀲𑀗𑁆𑀓𑀸𑀭𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀅𑀜𑁆𑀜𑁂𑀲𑀁 𑀤𑀸𑀦𑀫𑀸𑀦𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘𑀪𑀺𑀦𑁆𑀦𑀁 𑀯𑀢𑀺𑀤𑀁 𑀓𑀼𑀮𑀁 𑀫𑀫𑀸’𑀢𑀺 𑀘𑀺𑀦𑁆𑀢𑀬𑀢𑁄 𑀮𑁄𑀳𑀺𑀢𑀫𑁆𑀧𑀺 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀢𑀺, 𑀓𑀼𑀘𑁆𑀙𑀺𑀯𑀺𑀭𑁂𑀘𑀦𑀫𑁆𑀧𑀺 𑀳𑁄𑀢𑀺, 𑀅𑀦𑁆𑀢𑀸𑀦𑀺𑀧𑀺 𑀔𑀡𑁆𑀟𑀸𑀔𑀡𑁆𑀟𑀸𑀦𑀺 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀓𑁂 𑀮𑀸𑀪𑁂 𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀫𑀳𑀸𑀅𑀚𑀕𑀭𑁄 𑀯𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀭𑀻𑀭𑀯𑀡𑁆𑀡𑀕𑀼𑀡𑀯𑀡𑁆𑀡𑀫𑀘𑁆𑀙𑀭𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀘 𑀅𑀢𑁆𑀢𑀦𑁄𑀯 𑀯𑀡𑁆𑀡𑀁 𑀯𑀡𑁆𑀡𑁂𑀢𑀺, 𑀧𑀭𑁂𑀲𑀁 𑀯𑀡𑁆𑀡𑁂 ‘𑀓𑀺𑀁 𑀯𑀡𑁆𑀡𑁄 𑀏𑀲𑁄’𑀢𑀺 𑀢𑀁 𑀢𑀁 𑀤𑁄𑀲𑀁 𑀯𑀤𑀦𑁆𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀘 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑁂𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁄 𑀘𑁂𑀯 𑀏𑀴𑀫𑀽𑀕𑁄 𑀘 𑀳𑁄𑀢𑀺.

𑀅𑀧𑀺𑀘 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀮𑁄𑀳𑀕𑁂𑀳𑁂 𑀧𑀘𑁆𑀘𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀅𑀧𑁆𑀧𑀮𑀸𑀪𑁄 𑀳𑁄𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀕𑀽𑀣𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀪𑀯𑁂 𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀦 𑀳𑁄𑀢𑀺. 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀫𑀘𑁆𑀙𑀭𑀸𑀬𑀦𑀯𑀲𑁂𑀦 𑀫𑀘𑁆𑀙𑁂𑀭𑀁. 𑀫𑀘𑁆𑀙𑀭𑀸𑀬𑀦𑀸𑀓𑀸𑀭𑁄 𑀫𑀘𑁆𑀙𑀭𑀸𑀬𑀦𑀸. 𑀫𑀘𑁆𑀙𑀭𑁂𑀦 𑀅𑀬𑀺𑀢𑀲𑁆𑀲 𑀫𑀘𑁆𑀙𑁂𑀭𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁. ‘𑀫𑀬𑁆𑀳𑀫𑁂𑀯 𑀳𑁄𑀦𑁆𑀢𑀼 𑀫𑀸 𑀅𑀜𑁆𑀜𑀲𑁆𑀲𑀸’𑀢𑀺 𑀲𑀩𑁆𑀩𑀸𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑁄 𑀩𑁆𑀬𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀻𑀢𑀺 𑀯𑀺𑀯𑀺𑀘𑁆𑀙𑁄. 𑀯𑀺𑀯𑀺𑀘𑁆𑀙𑀲𑁆𑀲 𑀪𑀸𑀯𑁄 𑀯𑁂𑀯𑀺𑀘𑁆𑀙𑀁, 𑀫𑀼𑀤𑀼𑀫𑀘𑁆𑀙𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀓𑀤𑀭𑀺𑀬𑁄 𑀯𑀼𑀘𑁆𑀘𑀢𑀺 𑀅𑀦𑀸𑀤𑀭𑁄. 𑀢𑀲𑁆𑀲 𑀪𑀸𑀯𑁄 𑀓𑀤𑀭𑀺𑀬𑀁. 𑀣𑀤𑁆𑀥𑀫𑀘𑁆𑀙𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀧𑀭𑀫𑁆𑀧𑀺 𑀧𑀭𑁂𑀲𑀁 𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

𑀓𑀤𑀭𑀺𑀬𑁄 𑀧𑀸𑀧𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀦𑀸𑀤𑀭𑁄;

𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁩𑁨);

𑀬𑀸𑀘𑀓𑁂 𑀤𑀺𑀲𑁆𑀯𑀸 𑀓𑀝𑀼𑀓𑀪𑀸𑀯𑁂𑀦 𑀘𑀺𑀢𑁆𑀢𑀁 𑀅𑀜𑁆𑀘𑀢𑀺 𑀲𑀗𑁆𑀓𑁄𑀘𑁂𑀢𑀻𑀢𑀺 𑀓𑀝𑀼𑀓𑀜𑁆𑀘𑀼𑀓𑁄. 𑀢𑀲𑁆𑀲 𑀪𑀸𑀯𑁄 𑀓𑀝𑀼𑀓𑀜𑁆𑀘𑀼𑀓𑀢𑀸. 𑀅𑀧𑀭𑁄 𑀦𑀬𑁄 𑁋 𑀓𑀝𑀼𑀓𑀜𑁆𑀘𑀼𑀓𑀢𑀸 𑀯𑀼𑀘𑁆𑀘𑀢𑀺 𑀓𑀝𑀘𑁆𑀙𑀼𑀕𑁆𑀕𑀸𑀳𑁄. 𑀲𑀫𑀢𑀺𑀢𑁆𑀢𑀺𑀓𑀧𑀼𑀡𑁆𑀡𑀸𑀬 𑀳𑀺 𑀉𑀓𑁆𑀔𑀮𑀺𑀬𑀸 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑀗𑁆𑀓𑀼𑀝𑀺𑀢𑁂𑀦 𑀅𑀕𑁆𑀕𑀓𑀝𑀘𑁆𑀙𑀼𑀦𑀸 𑀕𑀡𑁆𑀳𑀸𑀢𑀺, 𑀧𑀽𑀭𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀏𑀯𑀁 𑀫𑀘𑁆𑀙𑀭𑀺𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀲𑀗𑁆𑀓𑀼𑀘𑀢𑀺. 𑀢𑀲𑁆𑀫𑀺𑀁 𑀲𑀗𑁆𑀓𑀼𑀘𑀺𑀢𑁂 𑀓𑀸𑀬𑁄𑀧𑀺 𑀢𑀣𑁂𑀯 𑀲𑀗𑁆𑀓𑀼𑀘𑀢𑀺, 𑀧𑀝𑀺𑀓𑀼𑀝𑀢𑀺, 𑀧𑀝𑀺𑀦𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀻𑀢𑀺 𑀫𑀘𑁆𑀙𑁂𑀭𑀁 ‘𑀓𑀝𑀼𑀓𑀜𑁆𑀘𑀼𑀓𑀢𑀸’𑀢𑀺 𑀯𑀼𑀢𑁆𑀢𑀁.

𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸𑀢𑀺 𑀧𑀭𑁂𑀲𑀁 𑀉𑀧𑀓𑀸𑀭𑀓𑀭𑀡𑁂 𑀤𑀸𑀦𑀸𑀤𑀺𑀦𑀸 𑀆𑀓𑀸𑀭𑁂𑀦 𑀬𑀣𑀸 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀏𑀯𑀁 𑀆𑀯𑀭𑀺𑀢𑁆𑀯𑀸 𑀕𑀳𑀺𑀢𑀪𑀸𑀯𑁄 𑀘𑀺𑀢𑁆𑀢𑀲𑁆𑀲. 𑀬𑀲𑁆𑀫𑀸 𑀧𑀦 𑀫𑀘𑁆𑀙𑀭𑀺𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑁂𑀲𑀁 𑀅𑀤𑀸𑀢𑀼𑀓𑀸𑀫𑁄 𑀳𑁄𑀢𑀺 𑀧𑀭𑀲𑀦𑁆𑀢𑀓𑀁 𑀕𑀡𑁆𑀳𑀺𑀢𑀼𑀓𑀸𑀫𑁄, 𑀢𑀲𑁆𑀫𑀸 ‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲𑀸’𑀢𑀺 𑀧𑀯𑀢𑁆𑀢𑀺𑀯𑀲𑁂𑀦𑀲𑁆𑀲 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀢𑀸 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀮𑀓𑁆𑀔𑀡𑀢𑀸 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀇𑀫𑀲𑁆𑀫𑀺𑀁 𑀕𑁄𑀘𑁆𑀙𑀓𑁂 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀫𑀸𑀦𑀺 𑀧𑀦 𑀲𑀁𑀬𑁄𑀚𑀦𑀸𑀦𑀺 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀫𑀸𑀦𑀲𑀁𑀬𑁄𑀚𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀓𑀸𑀫𑀭𑀸𑀕𑀧𑀝𑀺𑀖𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀫𑀸𑀦𑀪𑀯𑀭𑀸𑀕𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺.

𑁧𑁧𑁪𑁦. 𑀕𑀦𑁆𑀣𑀕𑁄𑀘𑁆𑀙𑀓𑁂 𑀦𑀸𑀫𑀓𑀸𑀬𑀁 𑀕𑀦𑁆𑀣𑁂𑀢𑀺, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀖𑀝𑁂𑀢𑀻𑀢𑀺 𑀓𑀸𑀬𑀕𑀦𑁆𑀣𑁄. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀲𑁆𑀲𑀢𑁄 𑀮𑁄𑀓𑁄 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀬𑀲𑁆𑀫𑀸 𑀧𑀦 𑀅𑀪𑀺𑀚𑁆𑀛𑀸𑀓𑀸𑀫𑀭𑀸𑀕𑀸𑀦𑀁 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄’’𑀢𑀺 𑀅𑀯𑀢𑁆𑀯𑀸 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀺, 𑀕𑀦𑁆𑀣𑀕𑁄𑀘𑁆𑀙𑀓𑀁 𑀧𑀢𑁆𑀯𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀳𑁄𑀢𑀻’𑀢𑀺 𑀢𑀁 𑀲𑀼𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀢𑁄 𑀓𑀺𑀮𑁂𑀲𑀕𑁄𑀘𑁆𑀙𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀞𑀧𑁂𑀢𑁆𑀯𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 ‘𑀇𑀤𑀫𑁂𑀯 𑀲𑀘𑁆𑀘’𑀦𑁆𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀦𑀸𑀪𑀺𑀦𑀺𑀯𑀺𑀲𑀢𑀺, ‘𑀲𑀻𑀮𑁂𑀦 𑀲𑀼𑀤𑁆𑀥𑀻’𑀢𑀺𑀆𑀤𑀺𑀦𑀸 𑀏𑀯 𑀧𑀦 𑀅𑀪𑀺𑀦𑀺𑀯𑀺𑀲𑀢𑀺, 𑀢𑀲𑁆𑀫𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀽𑀢𑀫𑁆𑀧𑀺 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘𑀞𑀧𑁂𑀢𑁆𑀯𑀸’𑀢𑀺 𑀆𑀳.

𑁧𑁧𑁬𑁨. 𑀦𑀻𑀯𑀭𑀡𑀕𑁄𑀘𑁆𑀙𑀓𑀲𑁆𑀲 𑀣𑀺𑀦𑀫𑀺𑀤𑁆𑀥𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀪𑀸𑀯𑁄. 𑀕𑀺𑀮𑀸𑀦𑁄 𑀳𑀺 𑀅𑀓𑀮𑁆𑀮𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀬𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀓𑀮𑁆𑀮𑀓𑁄’’𑀢𑀺 (𑀧𑀸𑀭𑀸. 𑁧𑁫𑁧). 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁄𑀯 𑀅𑀓𑀫𑁆𑀫𑀜𑁆𑀜𑀢𑀸𑀓𑀸𑀭𑁄. 𑀑𑀮𑀻𑀬𑀦𑀸𑀢𑀺 𑀑𑀮𑀻𑀬𑀦𑀸𑀓𑀸𑀭𑁄. 𑀇𑀭𑀺𑀬𑀸𑀧𑀣𑀺𑀓𑀘𑀺𑀢𑁆𑀢𑀜𑁆𑀳𑀺 𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁, 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺 𑀯𑀺𑀬, 𑀔𑀻𑀮𑁂 𑀮𑀕𑁆𑀕𑀺𑀢𑀨𑀸𑀡𑀺𑀢𑀯𑀸𑀭𑀓𑁄 𑀯𑀺𑀬 𑀘, 𑀑𑀮𑀻𑀬𑀢𑀺. 𑀢𑀲𑁆𑀲 𑀢𑀁 𑀆𑀓𑀸𑀭𑀁 𑀲𑀦𑁆𑀥𑀸𑀬 𑀑𑀮𑀻𑀬𑀦𑀸𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀮𑀻𑀦𑀦𑁆𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀧𑀝𑀺𑀓𑀼𑀝𑀺𑀢𑀁. 𑀇𑀢𑀭𑁂 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀖𑀦𑀪𑀸𑀯𑁂𑀦 𑀞𑀺𑀢𑀁. 𑀣𑀺𑀬𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀣𑀺𑀬𑀺𑀢𑀪𑀸𑀯𑁄 𑀣𑀺𑀬𑀺𑀢𑀢𑁆𑀢𑀁, 𑀅𑀯𑀺𑀧𑁆𑀨𑀸𑀭𑀯𑀲𑁂𑀦𑁂𑀯 𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄.

𑁧𑁧𑁬𑁩. 𑀓𑀸𑀬𑀲𑁆𑀲𑀸𑀢𑀺 𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀦𑀸𑀫𑀓𑀸𑀬𑀲𑁆𑀲. 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀫𑁂𑀖𑁄 𑀯𑀺𑀬 𑀆𑀓𑀸𑀲𑀁 𑀓𑀸𑀬𑀁 𑀑𑀦𑀬𑁆𑀳𑀢𑀻𑀢𑀺 𑀑𑀦𑀸𑀳𑁄. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄. 𑀅𑀩𑁆𑀪𑀦𑁆𑀢𑀭𑁂 𑀲𑀫𑁄𑀭𑀼𑀦𑁆𑀥𑀢𑀻𑀢𑀺 𑀅𑀦𑁆𑀢𑁄𑀲𑀫𑁄𑀭𑁄𑀥𑁄. 𑀬𑀣𑀸 𑀳𑀺 𑀦𑀕𑀭𑁂 𑀭𑀼𑀦𑁆𑀥𑀺𑀢𑁆𑀯𑀸 𑀕𑀳𑀺𑀢𑁂 𑀫𑀦𑀼𑀲𑁆𑀲𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀮𑀪𑀦𑁆𑀢𑀺, 𑀏𑀯𑀫𑁆𑀧𑀺 𑀫𑀺𑀤𑁆𑀥𑁂𑀦 𑀲𑀫𑁄𑀭𑀼𑀤𑁆𑀥𑀸 𑀥𑀫𑁆𑀫𑀸 𑀯𑀺𑀧𑁆𑀨𑀸𑀭𑀯𑀲𑁂𑀦 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀅𑀦𑁆𑀢𑁄𑀲𑀫𑁄𑀭𑁄𑀥𑁄𑀢𑀺 𑀯𑀼𑀢𑁆𑀢𑀁. 𑀫𑁂𑀥𑀢𑀻𑀢𑀺 𑀫𑀺𑀤𑁆𑀥𑀁; 𑀅𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀺𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀧𑀦𑁆𑀢𑀺 𑀢𑁂𑀦𑀸𑀢𑀺 𑀲𑁄𑀧𑁆𑀧𑀁. 𑀅𑀓𑁆𑀔𑀺𑀤𑀮𑀸𑀤𑀻𑀦𑀁 𑀧𑀘𑀮𑀪𑀸𑀯𑀁 𑀓𑀭𑁄𑀢𑀻𑀢𑀺 𑀧𑀘𑀮𑀸𑀬𑀺𑀓𑀸. 𑀲𑀼𑀧𑀦𑀸 𑀲𑀼𑀧𑀺𑀢𑀢𑁆𑀢𑀦𑁆𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀬𑀁 𑀧𑀦 𑀢𑁂𑀲𑀁 𑀧𑀼𑀭𑀢𑁄 𑀲𑁄𑀧𑁆𑀧𑀧𑀤𑀁 𑀢𑀲𑁆𑀲 𑀧𑀼𑀦𑀯𑀘𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀇𑀤𑀁 𑀯𑀼𑀘𑁆𑀘𑀢𑀺 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀦𑁆𑀢𑀺 𑀇𑀤𑀁 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀆𑀯𑀭𑀡𑀝𑁆𑀞𑁂𑀦 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀬𑁂𑀪𑀼𑀬𑁆𑀬𑁂𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀤𑁆𑀤𑀸𑀬 𑀧𑀼𑀩𑁆𑀩𑀪𑀸𑀕𑀅𑀧𑀭𑀪𑀸𑀕𑁂𑀲𑀼 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀚𑁆𑀚𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀧𑀦 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂𑀦 𑀪𑀯𑀗𑁆𑀕𑁄𑀢𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀫𑁆𑀫𑀺𑀲𑁆𑀲𑁂 𑀯𑀢𑁆𑀢𑀫𑀸𑀦𑁂 𑀢𑁂 𑀲𑀼𑀧𑀦𑁆𑀢𑀺, 𑀲𑀸 𑀦𑁂𑀲𑀁 𑀦𑀺𑀤𑁆𑀤𑀸 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭). 𑀏𑀯𑀭𑀽𑀧𑁄 𑀧𑀦𑀸𑀬𑀁 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁄 𑀦 𑀫𑀕𑁆𑀕𑀯𑀚𑁆𑀛𑁄, 𑀉𑀧𑀸𑀤𑀺𑀦𑁆𑀦𑀓𑁂𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀧𑀺 𑀮𑀩𑁆𑀪𑀢𑀺. 𑀉𑀧𑀸𑀤𑀺𑀦𑁆𑀦𑀓𑁂 𑀮𑀩𑁆𑀪𑀫𑀸𑀦𑁄 𑀬𑀤𑀸 𑀔𑀻𑀡𑀸𑀲𑀯𑁄 𑀤𑀻𑀖𑀫𑀕𑁆𑀕𑀁 𑀕𑀢𑁄 𑀳𑁄𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀺𑀮𑀦𑁆𑀢𑁄, 𑀏𑀯𑀭𑀽𑀧𑁂 𑀓𑀸𑀮𑁂 𑀮𑀩𑁆𑀪𑀢𑀺. 𑀅𑀦𑀼𑀧𑀸𑀤𑀺𑀦𑁆𑀦𑀓𑁂 𑀮𑀩𑁆𑀪𑀫𑀸𑀦𑁄 𑀧𑀡𑁆𑀡𑀧𑀼𑀧𑁆𑀨𑁂𑀲𑀼 𑀮𑀩𑁆𑀪𑀢𑀺. 𑀏𑀓𑀘𑁆𑀘𑀸𑀦𑀜𑁆𑀳𑀺 𑀭𑀼𑀓𑁆𑀔𑀸𑀦𑀁 𑀧𑀡𑁆𑀡𑀸𑀦𑀺 𑀲𑀽𑀭𑀺𑀬𑀸𑀢𑀧𑁂𑀦 𑀧𑀲𑀸𑀭𑀺𑀬𑀦𑁆𑀢𑀺 𑀭𑀢𑁆𑀢𑀺𑀁 𑀧𑀝𑀺𑀓𑀼𑀝𑀦𑁆𑀢𑀺, 𑀧𑀤𑀼𑀫𑀧𑀼𑀧𑁆𑀨𑀸𑀤𑀻𑀦𑀺 𑀲𑀽𑀭𑀺𑀬𑀸𑀢𑀧𑁂𑀦 𑀧𑀼𑀧𑁆𑀨𑀦𑁆𑀢𑀺, 𑀭𑀢𑁆𑀢𑀺𑀁 𑀧𑀼𑀦 𑀧𑀝𑀺𑀓𑀼𑀝𑀦𑁆𑀢𑀺. 𑀇𑀤𑀁 𑀧𑀦 𑀫𑀺𑀤𑁆𑀥𑀁 𑀅𑀓𑀼𑀲𑀮𑀢𑁆𑀢𑀸 𑀔𑀻𑀡𑀸𑀲𑀯𑀸𑀦𑀁 𑀦 𑀳𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘‘𑀦 𑀫𑀺𑀤𑁆𑀥𑀁 𑀅𑀓𑀼𑀲𑀮𑀁. 𑀓𑀲𑁆𑀫𑀸? 𑀭𑀽𑀧𑀢𑁆𑀢𑀸. 𑀭𑀽𑀧𑀜𑁆𑀳𑀺 𑀅𑀩𑁆𑀬𑀸𑀓𑀢𑀁. 𑀇𑀤𑀜𑁆𑀘 𑀭𑀽𑀧𑀁. 𑀢𑁂𑀦𑁂𑀯𑁂𑀢𑁆𑀣 ‘𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’𑀢𑀺 𑀓𑀸𑀬𑀕𑁆𑀕𑀳𑀡𑀁 𑀓𑀢’’𑀦𑁆𑀢𑀺. 𑀬𑀤𑀺 ‘𑀓𑀸𑀬𑀲𑁆𑀲𑀸’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦𑁂𑀯𑁂𑀢𑀁 𑀭𑀽𑀧𑀁, 𑀓𑀸𑀬𑀧𑀲𑁆𑀲𑀤𑁆𑀥𑀸𑀤𑀬𑁄𑀧𑀺 𑀥𑀫𑁆𑀫𑀸 𑀭𑀽𑀧𑀫𑁂𑀯 𑀪𑀯𑁂𑀬𑁆𑀬𑀼𑀁. ‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺’ (𑀥. 𑀲. 𑁧𑁬𑁩; 𑀤𑀻. 𑀦𑀺. 𑁧.𑁨𑁩𑁦) ‘𑀓𑀸𑀬𑁂𑀦 𑀘𑁂𑀯 𑀧𑀭𑀫𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀻’𑀢𑀺 (𑀫. 𑀦𑀺. 𑁨.𑁧𑁮𑁩; 𑀅. 𑀦𑀺. 𑁪.𑁧𑁧𑁩) 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀧𑀭𑀫𑀢𑁆𑀣𑀲𑀘𑁆𑀘𑀲𑀘𑁆𑀙𑀺𑀓𑀭𑀡𑀸𑀦𑀺𑀧𑀺 𑀭𑀽𑀧𑀓𑀸𑀬𑁂𑀦𑁂𑀯 𑀲𑀺𑀬𑀼𑀁. 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀫𑁂𑀢𑀁 ‘𑀭𑀽𑀧𑀁 𑀫𑀺𑀤𑁆𑀥’𑀦𑁆𑀢𑀺. 𑀦𑀸𑀫𑀓𑀸𑀬𑁄 𑀳𑁂𑀢𑁆𑀣 𑀓𑀸𑀬𑁄 𑀦𑀸𑀫. 𑀬𑀤𑀺 𑀦𑀸𑀫𑀓𑀸𑀬𑁄, 𑀅𑀣 𑀓𑀲𑁆𑀫𑀸 ‘𑀲𑁄𑀧𑁆𑀧𑀁 𑀧𑀘𑀮𑀸𑀬𑀺𑀓𑀸’𑀢𑀺 𑀯𑀼𑀢𑁆𑀢𑀁? 𑀦 𑀳𑀺 𑀦𑀸𑀫𑀓𑀸𑀬𑁄 𑀲𑀼𑀧𑀢𑀺, 𑀦 𑀘 𑀧𑀘𑀮𑀸𑀬𑀢𑀻𑀢𑀺. ‘𑀮𑀺𑀗𑁆𑀕𑀸𑀤𑀻𑀦𑀺 𑀯𑀺𑀬 𑀇𑀦𑁆𑀤𑁆𑀭𑀺𑀬𑀲𑁆𑀲, 𑀢𑀲𑁆𑀲 𑀨𑀮𑀢𑁆𑀢𑀸. 𑀬𑀣𑀸 𑀳𑀺 ‘𑀇𑀢𑁆𑀣𑀺𑀮𑀺𑀗𑁆𑀕𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑁄’𑀢𑀺 𑀇𑀫𑀸𑀦𑀺 𑀮𑀺𑀗𑁆𑀕𑀸𑀤𑀻𑀦𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀨𑀮𑀢𑁆𑀢𑀸 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀇𑀫𑀲𑁆𑀲𑀸𑀧𑀺 𑀦𑀸𑀫𑀓𑀸𑀬𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀫𑀺𑀤𑁆𑀥𑀲𑁆𑀲 𑀨𑀮𑀢𑁆𑀢𑀸 𑀲𑁄𑀧𑁆𑀧𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀺𑀤𑁆𑀥𑁂 𑀳𑀺 𑀲𑀢𑀺 𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀨𑀮𑀽𑀧𑀘𑀸𑀭𑁂𑀦, 𑀫𑀺𑀤𑁆𑀥𑀁 𑀅𑀭𑀽𑀧𑀫𑁆𑀧𑀺 𑀲𑀫𑀸𑀦𑀁 ‘𑀲𑁄𑀧𑁆𑀧𑀁 𑀧𑀘𑀮𑀸𑀬𑀺𑀓𑀸 𑀲𑀼𑀧𑀦𑀸 𑀲𑀼𑀧𑀺𑀢𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁.

‘𑀅𑀓𑁆𑀔𑀺𑀤𑀮𑀸𑀤𑀻𑀦𑀁 𑀧𑀘𑀮𑀪𑀸𑀯𑀁 𑀓𑀭𑁄𑀢𑀻𑀢𑀺 𑀧𑀘𑀮𑀸𑀬𑀺𑀓𑀸’𑀢𑀺 𑀯𑀘𑀦𑀢𑁆𑀣𑁂𑀦𑀸𑀧𑀺 𑀘𑀸𑀬𑀫𑀢𑁆𑀣𑁄 𑀲𑀸𑀥𑀺𑀢𑁄𑀬𑁂𑀯𑀸𑀢𑀺 𑀦 𑀭𑀽𑀧𑀁 𑀫𑀺𑀤𑁆𑀥𑀁. 𑀑𑀦𑀸𑀳𑀸𑀤𑀻𑀳𑀺𑀧𑀺 𑀘𑀲𑁆𑀲 𑀅𑀭𑀽𑀧𑀪𑀸𑀯𑁄 𑀤𑀻𑀧𑀺𑀢𑁄𑀬𑁂𑀯. 𑀦 𑀳𑀺 𑀭𑀽𑀧𑀁 𑀦𑀸𑀫𑀓𑀸𑀬𑀲𑁆𑀲 ‘𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄 𑀅𑀦𑁆𑀢𑁄𑀲𑀫𑁄𑀭𑁄𑀥𑁄’ 𑀳𑁄𑀢𑀻𑀢𑀺. ‘𑀦𑀦𑀼 𑀘 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦𑁂𑀢𑀁 𑀭𑀽𑀧𑀁? 𑀦 𑀳𑀺 𑀅𑀭𑀽𑀧𑀁 𑀓𑀲𑁆𑀲𑀘𑀺 𑀑𑀦𑀸𑀳𑁄, 𑀦 𑀧𑀭𑀺𑀬𑁄𑀦𑀸𑀳𑁄, 𑀦 𑀅𑀦𑁆𑀢𑁄𑀲𑀫𑁄𑀭𑁄𑀥𑁄 𑀳𑁄𑀢𑀻’𑀢𑀺. 𑀬𑀤𑀺 𑀏𑀯𑀁, 𑀆𑀯𑀭𑀡𑀫𑁆𑀧𑀺 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸. 𑀬𑀣𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀆𑀯𑀭𑀡𑀝𑁆𑀞𑁂𑀦 𑀦𑀻𑀯𑀭𑀡𑀸, 𑀏𑀯𑀁 𑀇𑀫𑀲𑁆𑀲𑀸𑀧𑀺 𑀑𑀦𑀸𑀳𑀦𑀸𑀤𑀺𑀅𑀢𑁆𑀣𑁂𑀦 𑀑𑀦𑀸𑀳𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 ‘‘𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂’’𑀢𑀺 (𑀤𑀻. 𑀦𑀺. 𑁨.𑁧𑁪𑁬; 𑀲𑀁. 𑀦𑀺. 𑁫.𑁨𑁩𑁩) 𑀯𑀘𑀦𑀢𑁄𑀧𑁂𑀢𑀁 𑀅𑀭𑀽𑀧𑀁. 𑀦 𑀳𑀺 𑀭𑀽𑀧𑀁 𑀘𑀺𑀢𑁆𑀢𑀼𑀧𑀓𑁆𑀓𑀺𑀮𑁂𑀲𑁄, 𑀦 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁 𑀳𑁄𑀢𑀻𑀢𑀺.

𑀓𑀲𑁆𑀫𑀸 𑀦 𑀳𑁄𑀢𑀺? 𑀦𑀦𑀼 𑀯𑀼𑀢𑁆𑀢𑀁 𑁋

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀭𑀁 𑀧𑀺𑀯𑀦𑁆𑀢𑀺 𑀫𑁂𑀭𑀬𑀁, 𑀲𑀼𑀭𑀸𑀫𑁂𑀭𑀬𑀧𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 (𑀅. 𑀦𑀺. 𑁪.𑁫𑁦).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂 𑁋 𑀲𑀦𑁆𑀤𑀺𑀝𑁆𑀞𑀺𑀓𑀸 𑀥𑀦𑀚𑀸𑀦𑀺, 𑀓𑀮𑀳𑀧𑁆𑀧𑀯𑀟𑁆𑀠𑀦𑀻, 𑀭𑁄𑀕𑀸𑀦𑀁 𑀆𑀬𑀢𑀦𑀁, 𑀅𑀓𑀺𑀢𑁆𑀢𑀺𑀲𑀜𑁆𑀚𑀦𑀦𑀻, 𑀓𑁄𑀧𑀻𑀦𑀦𑀺𑀤𑀁𑀲𑀦𑀻, 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀻𑀢𑁆𑀯𑁂𑀯 𑀙𑀝𑁆𑀞𑀁 𑀧𑀤𑀁 𑀪𑀯𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁪𑁮). 𑀧𑀘𑁆𑀘𑀓𑁆𑀔𑀢𑁄𑀧𑀺 𑀘𑁂𑀢𑀁 𑀲𑀺𑀤𑁆𑀥𑀫𑁂𑀯. 𑀬𑀣𑀸 𑀫𑀚𑁆𑀚𑁂 𑀉𑀤𑀭𑀕𑀢𑁂, 𑀘𑀺𑀢𑁆𑀢𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀧𑀜𑁆𑀜𑀸 𑀤𑀼𑀩𑁆𑀩𑀮𑀸 𑀳𑁄𑀢𑀺, 𑀢𑀲𑁆𑀫𑀸 𑀫𑀚𑁆𑀚𑀁 𑀯𑀺𑀬 𑀫𑀺𑀤𑁆𑀥𑀫𑁆𑀧𑀺 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑁄 𑀘𑁂𑀯 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀜𑁆𑀘 𑀲𑀺𑀬𑀸𑀢𑀺. 𑀦, 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄. 𑀬𑀤𑀺 𑀳𑀺 𑀫𑀚𑁆𑀚𑀁 𑀲𑀁𑀓𑀺𑀮𑁂𑀲𑁄 𑀪𑀯𑁂𑀬𑁆𑀬, 𑀲𑁄 ‘‘𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂’’𑀢𑀺 (𑀫. 𑀦𑀺. 𑁧.𑁨𑁯𑁭) 𑀯𑀸, ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺, 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁, 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 (𑀲𑀁. 𑀦𑀺. 𑁫.𑁨𑁧𑁪) 𑀯𑀸, ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸? 𑀅𑀪𑀺𑀚𑁆𑀛𑀸 𑀯𑀺𑀲𑀫𑀮𑁄𑀪𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 (𑀫. 𑀦𑀺. 𑁧.𑁭𑁧) 𑀯𑀸 𑁋 𑀏𑀯𑀫𑀸𑀤𑀻𑀲𑀼 𑀉𑀧𑀓𑁆𑀓𑀺𑀮𑁂𑀲𑀦𑀺𑀤𑁆𑀤𑁂𑀲𑁂𑀲𑀼 𑀦𑀺𑀤𑁆𑀤𑁂𑀲𑀁 𑀆𑀕𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀧𑀻𑀢𑁂 𑀉𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸 𑀘𑁂𑀯 𑀧𑀜𑁆𑀜𑀸𑀬 𑀘 𑀤𑀼𑀩𑁆𑀩𑀮𑀻𑀓𑀭𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀧𑀘𑁆𑀘𑀬𑀢𑁆𑀢𑀸 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀫𑀺𑀤𑁆𑀥𑀁 𑀧𑀦 𑀲𑀬𑀫𑁂𑀯 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑁄 𑀘𑁂𑀯 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀜𑁆𑀘𑀸𑀢𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀁.

𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀲𑀫𑁆𑀧𑀬𑁄𑀕𑀯𑀘𑀦𑀢𑁄. ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺 (𑀥. 𑀲. 𑁧𑁧𑁭𑁬) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀫𑁆𑀧𑀬𑁄𑀕𑀯𑀘𑀦𑀢𑁄 𑀦𑀬𑀺𑀤𑀁 𑀭𑀽𑀧𑀁. 𑀦 𑀳𑀺 𑀭𑀽𑀧𑀁 𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑁆𑀬𑀁 𑀮𑀪𑀢𑀻𑀢𑀺. 𑀅𑀣𑀸𑀧𑀺 𑀲𑀺𑀬𑀸 𑁋 ‘𑀬𑀣𑀸𑀮𑀸𑀪𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 ‘‘𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀫𑁆𑀧𑀺 𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑀺 (𑀤𑀻. 𑀦𑀺. 𑁧.𑁨𑁪𑁯; 𑀫. 𑀦𑀺. 𑁧.𑁪𑁩𑁩) 𑀏𑀯𑀁 𑀏𑀓𑀢𑁄 𑀓𑀢𑁆𑀯𑀸 𑀬𑀣𑀸𑀮𑀸𑀪𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀓𑁆𑀔𑀭𑀓𑀣𑀮𑀜𑁆𑀳𑀺 𑀢𑀺𑀝𑁆𑀞𑀢𑀺 𑀬𑁂𑀯 𑀦 𑀘𑀭𑀢𑀺, 𑀇𑀢𑀭𑀤𑁆𑀯𑀬𑀁 𑀢𑀺𑀝𑁆𑀞𑀢𑀺𑀧𑀺 𑀘𑀭𑀢𑀺𑀧𑀺. 𑀏𑀯𑀫𑀺𑀥𑀸𑀧𑀺 𑀫𑀺𑀤𑁆𑀥𑀁 𑀦𑀻𑀯𑀭𑀡𑀫𑁂𑀯, 𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀣𑀺𑀦𑀁 𑀦𑀻𑀯𑀭𑀡𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀻𑀢𑀺 𑀲𑀩𑁆𑀩𑀁 𑀏𑀓𑀢𑁄 𑀓𑀢𑁆𑀯𑀸 𑀬𑀣𑀸𑀮𑀸𑀪𑀯𑀲𑁂𑀦 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀫𑀺𑀤𑁆𑀥𑀁 𑀧𑀦 𑀬𑀣𑀸 𑀲𑀓𑁆𑀔𑀭𑀓𑀣𑀮𑀁 𑀢𑀺𑀝𑁆𑀞𑀢𑁂𑀯 𑀦 𑀘𑀭𑀢𑀺, 𑀏𑀯𑀁 𑀦𑀻𑀯𑀭𑀡𑀫𑁂𑀯, 𑀦 𑀲𑀫𑁆𑀧𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺. 𑀦, 𑀭𑀽𑀧𑀪𑀸𑀯𑀸𑀲𑀺𑀤𑁆𑀥𑀺𑀢𑁄. 𑀲𑀓𑁆𑀔𑀭𑀓𑀣𑀮𑀜𑁆𑀳𑀺 𑀦 𑀘𑀭𑀢𑀻𑀢𑀺 𑀯𑀺𑀦𑀸𑀧𑀺 𑀲𑀼𑀢𑁆𑀢𑁂𑀦 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀢𑀢𑁆𑀣 𑀬𑀣𑀸𑀮𑀸𑀪𑀯𑀲𑁂𑀦𑀢𑁆𑀣𑁄 𑀳𑁄𑀢𑀼. 𑀫𑀺𑀤𑁆𑀥𑀁 𑀧𑀦 𑀭𑀽𑀧𑀦𑁆𑀢𑀺 𑀅𑀲𑀺𑀤𑁆𑀥𑀫𑁂𑀢𑀁. 𑀦 𑀲𑀓𑁆𑀓𑀸 𑀢𑀲𑁆𑀲 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀭𑀽𑀧𑀪𑀸𑀯𑁄 𑀲𑀸𑀥𑁂𑀢𑀼𑀦𑁆𑀢𑀺 𑀫𑀺𑀤𑁆𑀥𑀲𑁆𑀲 𑀭𑀽𑀧𑀪𑀸𑀯𑀸𑀲𑀺𑀤𑁆𑀥𑀺𑀢𑁄 𑀦 𑀇𑀤𑀁 𑀬𑀣𑀸𑀮𑀸𑀪𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀁.

𑀓𑀺𑀜𑁆𑀘 𑀪𑀺𑀬𑁆𑀬𑁄? ‘𑀘𑀢𑁆𑀢𑀢𑁆𑀢𑀸’𑀢𑀺𑀆𑀤𑀺𑀯𑀘𑀦𑀢𑁄. 𑀯𑀺𑀪𑀗𑁆𑀕𑀲𑁆𑀫𑀺𑀜𑁆𑀳𑀺 ‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄𑀢𑀺 𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀘𑀢𑁆𑀢𑀢𑁆𑀢𑀸 𑀯𑀦𑁆𑀢𑀢𑁆𑀢𑀸 𑀫𑀼𑀢𑁆𑀢𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄’’𑀢𑀺 (𑀯𑀺𑀪. 𑁫𑁪𑁭) 𑀘, ‘‘𑀇𑀤𑀁 𑀘𑀺𑀢𑁆𑀢𑀁 𑀇𑀫𑀫𑁆𑀳𑀸 𑀣𑀺𑀦𑀫𑀺𑀤𑁆𑀥𑀸 𑀲𑁄𑀥𑁂𑀢𑀺 𑀯𑀺𑀲𑁄𑀥𑁂𑀢𑀺 𑀧𑀭𑀺𑀲𑁄𑀥𑁂𑀢𑀺 𑀫𑁄𑀘𑁂𑀢𑀺 𑀯𑀺𑀫𑁄𑀘𑁂𑀢𑀺 𑀧𑀭𑀺𑀫𑁄𑀘𑁂𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺’’ 𑀘𑀸𑀢𑀺 (𑀯𑀺𑀪. 𑁫𑁫𑁧) 𑁋 𑀏𑀯𑀁 ‘𑀘𑀢𑁆𑀢𑀢𑁆𑀢𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀘 ‘𑀭𑀽𑀧𑀁’ 𑀏𑀯𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸𑀧𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺. 𑀦, 𑀘𑀺𑀢𑁆𑀢𑀚𑀲𑁆𑀲𑀸𑀲𑀫𑁆𑀪𑀯𑀯𑀘𑀦𑀢𑁄. 𑀢𑀺𑀯𑀺𑀥𑀜𑁆𑀳𑀺 𑀫𑀺𑀤𑁆𑀥𑀁 𑁋 𑀘𑀺𑀢𑁆𑀢𑀚𑀁 𑀉𑀢𑀼𑀚𑀁 𑀆𑀳𑀸𑀭𑀚𑀜𑁆𑀘. 𑀢𑀲𑁆𑀫𑀸 𑀬𑀁 𑀢𑀢𑁆𑀣 𑀘𑀺𑀢𑁆𑀢𑀚𑀁 𑀢𑀲𑁆𑀲 𑀯𑀺𑀪𑀗𑁆𑀕𑁂 𑀛𑀸𑀦𑀘𑀺𑀢𑁆𑀢𑁂𑀳𑀺 𑀅𑀲𑀫𑁆𑀪𑀯𑁄 𑀯𑀼𑀢𑁆𑀢𑁄, 𑀦 𑀅𑀭𑀽𑀧𑀪𑀸𑀯𑁄 𑀲𑀸𑀥𑀺𑀢𑁄𑀢𑀺 𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺. 𑀦, 𑀭𑀽𑀧𑀪𑀸𑀯𑀸𑀲𑀺𑀤𑁆𑀥𑀺𑀢𑁄𑀯. 𑀫𑀺𑀤𑁆𑀥𑀲𑁆𑀲 𑀳𑀺 𑀭𑀽𑀧𑀪𑀸𑀯𑁂 𑀲𑀺𑀤𑁆𑀥𑁂 𑀲𑀓𑁆𑀓𑀸 𑀏𑀢𑀁 𑀮𑀤𑁆𑀥𑀼𑀁. 𑀢𑀢𑁆𑀣 𑀘𑀺𑀢𑁆𑀢𑀚𑀲𑁆𑀲𑀸𑀲𑀫𑁆𑀪𑀯𑁄 𑀯𑀼𑀢𑁆𑀢𑁄. 𑀲𑁄 𑀏𑀯 𑀘 𑀦 𑀲𑀺𑀚𑁆𑀛𑀢𑀻𑀢𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀁.

𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀧𑀳𑀸𑀦𑀯𑀘𑀦𑀢𑁄. 𑀪𑀕𑀯𑀢𑀸 𑀳𑀺 ‘‘𑀙, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁; 𑀓𑀢𑀫𑁂 𑀙? 𑀓𑀸𑀫𑀘𑁆𑀙𑀦𑁆𑀤𑀁, 𑀩𑁆𑀬𑀸𑀧𑀸𑀤𑀁, 𑀣𑀺𑀦𑀫𑀺𑀤𑁆𑀥𑀁, 𑀉𑀤𑁆𑀥𑀘𑁆𑀘𑀁, 𑀓𑀓𑁆𑀓𑀼𑀘𑁆𑀘𑀁, 𑀯𑀺𑀘𑀺𑀓𑀺𑀘𑁆𑀙𑀁; 𑀓𑀸𑀫𑁂𑀲𑀼 𑀔𑁄 𑀧𑀦𑀲𑁆𑀲 𑀆𑀤𑀻𑀦𑀯𑁄 𑀲𑀫𑁆𑀫𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁬.𑁭𑁩) 𑀘, ‘‘𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀅𑀢𑁆𑀢𑀢𑁆𑀣𑀁 𑀯𑀸 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁫.𑁫𑁧) 𑀘 𑀆𑀤𑀻𑀲𑀼 𑀫𑀺𑀤𑁆𑀥𑀲𑁆𑀲𑀸𑀧𑀺 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀦 𑀘 𑀭𑀽𑀧𑀁 𑀧𑀳𑀸𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄, 𑀧𑀭𑀺𑀜𑁆𑀜𑁂𑀬𑁆𑀬𑁄, 𑀦 𑀧𑀳𑀸𑀢𑀩𑁆𑀩𑁄, 𑀦 𑀪𑀸𑀯𑁂𑀢𑀩𑁆𑀩𑁄 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺 (𑀯𑀺𑀪. 𑁧𑁦𑁩𑁧) 𑀇𑀫𑀲𑁆𑀲𑀸𑀧𑀺 𑀧𑀳𑀸𑀦𑀯𑀘𑀦𑀢𑁄 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺. 𑀦, 𑀭𑀽𑀧𑀲𑁆𑀲𑀸𑀧𑀺 𑀧𑀳𑀸𑀦𑀯𑀘𑀦𑀢𑁄. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸’’𑀢𑀺 (𑀫. 𑀦𑀺. 𑁧.𑁨𑁪𑁭; 𑀲𑀁. 𑀦𑀺. 𑁩.𑁩𑁩). 𑀏𑀢𑁆𑀣 𑀳𑀺 𑀭𑀽𑀧𑀲𑁆𑀲𑀸𑀧𑀺 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀫𑀸 𑀅𑀓𑀸𑀭𑀡𑀫𑁂𑀢𑀦𑁆𑀢𑀺. 𑀦, 𑀅𑀜𑁆𑀜𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑁂 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀢𑀁 𑀢𑀢𑁆𑀣 𑀧𑀳𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁨𑁫) 𑀏𑀯𑀁 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀯𑀲𑁂𑀦 𑀭𑀽𑀧𑀲𑁆𑀲 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀦 𑀬𑀣𑀸 ‘‘𑀙 𑀥𑀫𑁆𑀫𑁂 𑀧𑀳𑀸𑀬 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬𑀸’’𑀢𑀺 𑀏𑀯𑀁 𑀧𑀳𑀸𑀢𑀩𑁆𑀩𑀫𑁂𑀯 𑀯𑀼𑀢𑁆𑀢𑀦𑁆𑀢𑀺, 𑀅𑀜𑁆𑀜𑀣𑀸 𑀯𑀼𑀢𑁆𑀢𑀢𑁆𑀢𑀸, 𑀦 𑀭𑀽𑀧𑀁 𑀫𑀺𑀤𑁆𑀥𑀁. 𑀢𑀲𑁆𑀫𑀸 𑀬𑀸𑀦𑁂𑀢𑀸𑀦𑀺 ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂’’𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑁂𑀳𑀺 𑀘𑁂𑀯 𑀅𑀜𑁆𑀜𑁂𑀳𑀺 𑀘 𑀲𑀼𑀢𑁆𑀢𑁂𑀳𑀺 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄…𑀧𑁂… 𑀣𑀺𑀦𑀫𑀺𑀤𑁆𑀥𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡’’𑀦𑁆𑀢𑀺 (𑀲𑀁. 𑀦𑀺. 𑁫.𑁨𑁨𑁦) 𑀘, ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺 (𑀲𑀁. 𑀦𑀺. 𑁫.𑁨𑁨𑁧) 𑀘, ‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁬) 𑀘, ‘‘𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁧𑁬) 𑀘, ‘‘𑀓𑁂𑀯𑀮𑁄𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀭𑀸𑀲𑀺 𑀬𑀤𑀺𑀤𑀁 𑀧𑀜𑁆𑀘 𑀦𑀻𑀯𑀭𑀡𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁧) 𑀘 𑁋

𑀏𑀯𑀫𑀸𑀤𑀻𑀦𑀺 𑀘 𑀅𑀦𑁂𑀓𑀸𑀦𑀺 𑀏𑀢𑀲𑁆𑀲 𑀅𑀭𑀽𑀧𑀪𑀸𑀯𑀚𑁄𑀢𑀓𑀸𑀦𑁂𑀯 𑀲𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀘𑁂𑀢𑀁 𑀅𑀭𑀽𑀧𑀁 𑀢𑀲𑁆𑀫𑀸 𑀆𑀭𑀼𑀧𑁆𑀧𑁂𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀧𑀓𑀭𑀡𑁂 𑀧𑀝𑁆𑀞𑀸𑀦𑁂 𑁋 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀁… 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺.

𑁧𑁧𑁬𑁬. 𑀓𑀼𑀓𑁆𑀓𑀼𑀘𑁆𑀘𑀦𑀺𑀤𑁆𑀤𑁂𑀲𑁂 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀢𑀺𑀆𑀤𑀻𑀦𑀺 𑀫𑀽𑀮𑀢𑁄 𑀓𑀼𑀓𑁆𑀓𑀼𑀘𑁆𑀘𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀏𑀯𑀁𑀲𑀜𑁆𑀜𑀺𑀢𑀸𑀬 𑀳𑀺 𑀓𑀢𑁂 𑀯𑀻𑀢𑀺𑀓𑀫𑁆𑀫𑁂, 𑀦𑀺𑀝𑁆𑀞𑀺𑀢𑁂 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁂, 𑀧𑀼𑀦 𑀲𑀜𑁆𑀚𑀸𑀢𑀲𑀢𑀺𑀦𑁄𑀧𑀺 ‘𑀤𑀼𑀝𑁆𑀞𑀼 𑀫𑀬𑀸 𑀓𑀢’𑀦𑁆𑀢𑀺 𑀏𑀯𑀁 𑀅𑀦𑀼𑀢𑀧𑁆𑀧𑀫𑀸𑀦𑀲𑁆𑀲 𑀧𑀘𑁆𑀙𑀸𑀦𑀼𑀢𑀸𑀧𑀯𑀲𑁂𑀦𑁂𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀢𑀁 𑀫𑀽𑀮𑀢𑁄 𑀤𑀲𑁆𑀲𑁂𑀢𑀼𑀁 ‘𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀓𑀧𑁆𑀧𑀺𑀬𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀓𑀧𑁆𑀧𑀺𑀬𑀫𑀁𑀲𑀁 𑀓𑀧𑁆𑀧𑀺𑀬𑀫𑀁𑀲𑀲𑀜𑁆𑀜𑀻 𑀳𑀼𑀢𑁆𑀯𑀸, 𑀅𑀘𑁆𑀙𑀫𑀁𑀲𑀁 𑀲𑀽𑀓𑀭𑀫𑀁𑀲𑀦𑁆𑀢𑀺, 𑀤𑀻𑀧𑀺𑀫𑀁𑀲𑀁 𑀯𑀸 𑀫𑀺𑀕𑀫𑀁𑀲𑀦𑁆𑀢𑀺 𑀔𑀸𑀤𑀢𑀺; 𑀓𑀸𑀮𑁂 𑀯𑀻𑀢𑀺𑀯𑀢𑁆𑀢𑁂 𑀓𑀸𑀮𑀲𑀜𑁆𑀜𑀸𑀬, 𑀧𑀯𑀸𑀭𑁂𑀢𑁆𑀯𑀸 𑀅𑀧𑁆𑀧𑀯𑀸𑀭𑀺𑀢𑀲𑀜𑁆𑀜𑀸𑀬, 𑀧𑀢𑁆𑀢𑀲𑁆𑀫𑀺𑀁 𑀭𑀚𑁂 𑀧𑀢𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀲𑀜𑁆𑀜𑀸𑀬 𑀪𑀼𑀜𑁆𑀚𑀢𑀺 𑁋 𑀏𑀯𑀁 ‘𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀸𑀬’ 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺 𑀦𑀸𑀫. 𑀲𑀽𑀓𑀭𑀫𑀁𑀲𑀁 𑀧𑀦 𑀅𑀘𑁆𑀙𑀫𑀁𑀲𑀲𑀜𑁆𑀜𑀸𑀬 𑀔𑀸𑀤𑀫𑀸𑀦𑁄, 𑀓𑀸𑀮𑁂 𑀘 𑀯𑀺𑀓𑀸𑀮𑀲𑀜𑁆𑀜𑀸𑀬 𑀪𑀼𑀜𑁆𑀚𑀫𑀸𑀦𑁄 ‘𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬’ 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺 𑀦𑀸𑀫. 𑀅𑀦𑀯𑀚𑁆𑀚𑀁 𑀧𑀦 𑀓𑀺𑀜𑁆𑀘𑀺𑀤𑁂𑀯 𑀯𑀚𑁆𑀚𑀲𑀜𑁆𑀜𑀺𑀢𑀸𑀬, 𑀯𑀚𑁆𑀚𑀜𑁆𑀘 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀓𑀭𑁄𑀦𑁆𑀢𑁄 ‘𑀅𑀦𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀸𑀬 𑀯𑀚𑁆𑀚𑁂 𑀘 𑀅𑀦𑀯𑀚𑁆𑀚𑀲𑀜𑁆𑀜𑀸𑀬’ 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺 𑀦𑀸𑀫. 𑀬𑀲𑁆𑀫𑀸 𑀧𑀦𑁂𑀢𑀁 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁, 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺 𑀏𑀯𑀁 𑀅𑀦𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸𑀬𑀧𑀺 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸𑀲𑁆𑀲 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀅𑀦𑀼𑀚𑀸𑀦𑀦𑁆𑀢𑁄 𑀬𑀁 𑀏𑀯𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸𑀓𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸. 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀬𑀺𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀁. 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀏𑀢𑁆𑀣 𑀓𑀢𑀸𑀓𑀢𑀲𑁆𑀲 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁆𑀲 𑀯𑀸 𑀅𑀪𑀺𑀫𑀼𑀔𑀕𑀫𑀦𑀁 ‘𑀯𑀺𑀧𑁆𑀧𑀝𑀺𑀲𑀸𑀭𑁄’ 𑀦𑀸𑀫. 𑀬𑀲𑁆𑀫𑀸 𑀧𑀦 𑀲𑁄 𑀓𑀢𑀁 𑀯𑀸 𑀧𑀸𑀧𑀁 𑀅𑀓𑀢𑀁 𑀦 𑀓𑀭𑁄𑀢𑀺, 𑀅𑀓𑀢𑀁 𑀯𑀸 𑀓𑀮𑁆𑀬𑀸𑀡𑀁 𑀓𑀢𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀯𑀺𑀭𑀽𑀧𑁄 𑀓𑀼𑀘𑁆𑀙𑀺𑀢𑁄 𑀯𑀸 𑀧𑀝𑀺𑀲𑀸𑀭𑁄𑀢𑀺 ‘𑀯𑀺𑀧𑁆𑀧𑀝𑀺𑀲𑀸𑀭𑁄’. 𑀲𑁄 𑀧𑀦 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀜𑀸𑀧𑀦𑀢𑁆𑀣𑀁 ‘𑀘𑁂𑀢𑀲𑁄’ 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀲𑁆𑀲 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁 𑀆𑀭𑀕𑁆𑀕𑀫𑀺𑀯 𑀓𑀁𑀲𑀧𑀢𑁆𑀢𑀁 𑀫𑀦𑀁 𑀯𑀺𑀮𑀺𑀔𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀦𑁄𑀯𑀺𑀮𑁂𑀔𑁄𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀲𑁆𑀲 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀬𑀁 𑀧𑀦 𑀯𑀺𑀦𑀬𑁂 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀯𑀲𑀺𑀢𑁆𑀯𑀸 𑀅𑀦𑀼𑀯𑀲𑀺𑀢𑁆𑀯𑀸 𑀆𑀯𑀲𑀣𑀧𑀺𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 (𑀧𑀸𑀘𑀺. 𑁨𑁦𑁪) 𑀓𑀼𑀓𑁆𑀓𑀼𑀘𑁆𑀘𑀁 𑀆𑀕𑀢𑀁, 𑀦 𑀢𑀁 𑀦𑀻𑀯𑀭𑀡𑀁. 𑀦 𑀳𑀺 𑀅𑀭𑀳𑀢𑁄 ‘𑀤𑀼𑀝𑁆𑀞𑀼 𑀫𑀬𑀸 𑀇𑀤𑀁 𑀓𑀢’𑀦𑁆𑀢𑀺 𑀏𑀯𑀁 𑀅𑀦𑀼𑀢𑀸𑀧𑁄 𑀅𑀢𑁆𑀣𑀺. 𑀦𑀻𑀯𑀭𑀡𑀧𑀢𑀺𑀭𑀽𑀧𑀓𑀁 𑀧𑀦𑁂𑀢𑀁 ‘𑀓𑀧𑁆𑀧𑀢𑀺 𑀦 𑀓𑀧𑁆𑀧𑀢𑀻’𑀢𑀺 𑀯𑀻𑀫𑀁𑀲𑀦𑀲𑀗𑁆𑀔𑀸𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫.

𑁧𑁧𑁭𑁬. ‘‘𑀓𑀢𑀫𑁂 𑀥𑀫𑁆𑀫𑀸 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀣𑀺𑀦𑀫𑀺𑀤𑁆𑀥𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀚𑀳𑀢𑀺, 𑀢𑀲𑁆𑀫𑀸 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸𑀢𑀺 𑀅𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀉𑀤𑁆𑀥𑀘𑁆𑀘𑁂 𑀲𑀢𑀺𑀧𑀺 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀪𑀸𑀯𑀸 𑀓𑀼𑀓𑁆𑀓𑀼𑀘𑁆𑀘𑁂𑀦 𑀯𑀺𑀦𑀸𑀧𑀺 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀜𑁆𑀘 𑀬𑁂𑀦 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀢𑀺, 𑀢𑀁 𑀦 𑀬𑁄𑀚𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑁂 𑀧𑀦 𑀦𑀻𑀯𑀭𑀡𑁂 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀣𑀺𑀦𑀫𑀺𑀤𑁆𑀥𑀼𑀤𑁆𑀥𑀘𑁆𑀘𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀣𑀺𑀦𑀫𑀺𑀤𑁆𑀥𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀢𑀺.

𑁧𑁧𑁮𑁨. 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁂 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀩𑀳𑀼𑀯𑀘𑀦𑀁 𑀓𑀢𑀁.

𑁧𑁨𑁧𑁯. 𑀉𑀧𑀸𑀤𑀸𑀦𑀦𑀺𑀤𑁆𑀤𑁂𑀲𑁂 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀦𑁆𑀢𑀺 𑀤𑀴𑁆𑀳𑀕𑁆𑀕𑀳𑀡𑀁. 𑀤𑀴𑁆𑀳𑀢𑁆𑀣𑁄 𑀳𑀺 𑀏𑀢𑁆𑀣 𑀉𑀧𑀲𑀤𑁆𑀤𑁄 𑀉𑀧𑀸𑀬𑀸𑀲𑀉𑀧𑀓𑀝𑁆𑀞𑀸𑀤𑀻𑀲𑀼 𑀯𑀺𑀬. 𑀢𑀣𑀸 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁧) 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀳𑀺. 𑀢𑀣𑀸 𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 ‘𑀏𑀯𑀁 𑀲𑀼𑀤𑁆𑀥𑀻’𑀢𑀺 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀺. 𑀢𑀣𑀸, 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 ‘𑀯𑀸𑀤𑁄’; 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 ‘𑀉𑀧𑀸𑀤𑀸𑀦𑀁’. 𑀓𑀺𑀁 𑀯𑀤𑀦𑁆𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁; ‘𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸’𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

𑁧𑁨𑁨𑁦. 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀣𑀼𑀓𑀸𑀫𑀸𑀯 𑀅𑀦𑀯𑀲𑁂𑀲𑀢𑁄 𑀓𑀸𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀇𑀥 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀢𑀁 𑀲𑀺𑀤𑁆𑀥𑀁 𑀳𑁄𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀯𑀢𑁆𑀣𑀼𑀓𑁄 𑀧𑀦𑀲𑁆𑀲 𑀓𑀸𑀫𑀭𑀸𑀕𑁄𑀯 𑀦𑀢𑁆𑀣𑀻𑀢𑀺.

𑁧𑁨𑁨𑁧. 𑀤𑀺𑀝𑁆𑀞𑀼𑀧𑀸𑀤𑀸𑀦𑀦𑀺𑀤𑁆𑀤𑁂𑀲𑁂 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺. 𑀤𑀺𑀦𑁆𑀦𑀁 𑀦𑀸𑀫 𑀅𑀢𑁆𑀣𑀺, 𑀲𑀓𑁆𑀓𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀤𑀸𑀢𑀼𑀦𑁆𑀢𑀺 𑀚𑀸𑀦𑀸𑀢𑀺; 𑀤𑀺𑀦𑁆𑀦𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀬𑀺𑀝𑁆𑀞𑀦𑁆𑀢𑀺. 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑀸𑀕𑁄. 𑀢𑀁 𑀬𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀚𑀸𑀦𑀸𑀢𑀺; 𑀬𑀺𑀝𑁆𑀞𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀫𑀗𑁆𑀕𑀮𑀓𑀺𑀭𑀺𑀬𑀸. 𑀢𑀁 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀚𑀸𑀦𑀸𑀢𑀺; 𑀢𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺, 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀏𑀢𑁆𑀣 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀲𑀼𑀓𑀢𑀓𑀫𑁆𑀫𑀸𑀦𑀺 𑀦𑀸𑀫. 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀼𑀓𑁆𑀓𑀝𑀓𑀫𑁆𑀫𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀢𑀺 𑀨𑀮𑀁 𑀯𑀺𑀧𑀸𑀓𑁄 𑀧𑀦 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀧𑀭𑀮𑁄𑀓𑁄𑀢𑀺 𑀇𑀥 𑀮𑁄𑀓𑁂 𑀞𑀺𑀢𑁄 𑀧𑀭𑀮𑁄𑀓𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀢𑀺, 𑀢𑁂𑀲𑀼 𑀓𑀢𑀧𑀘𑁆𑀘𑀬𑁂𑀦 𑀓𑁄𑀘𑀺 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀸 𑀲𑀢𑁆𑀢𑀸 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀢𑀺 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀅𑀢𑁆𑀢𑀦𑀸𑀯 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸 𑀧𑀯𑁂𑀤𑀦𑀲𑀫𑀢𑁆𑀣𑁄 𑀲𑀩𑁆𑀩𑀜𑁆𑀜𑀽 𑀩𑀼𑀤𑁆𑀥𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺.

𑀇𑀫𑀸𑀦𑀺 𑀧𑀦 𑀉𑀧𑀸𑀤𑀸𑀦𑀸𑀦𑀺 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀓𑀸𑀫𑀼𑀧𑀸𑀤𑀸𑀦𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀳𑀻𑀬𑀢𑀺, 𑀲𑁂𑀲𑀸𑀦𑀺 𑀢𑀻𑀡𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀧𑀳𑀻𑀬𑀦𑁆𑀢𑀺, 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺.

𑁧𑁨𑁩𑁫. 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀯𑀲𑀦𑁆𑀢𑀺 𑀯𑀸 𑀏𑀢𑁆𑀣 𑀅𑀔𑀻𑀡𑀸𑀲𑀯𑀸 𑀲𑀢𑁆𑀢𑀸 𑀮𑁄𑀪𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑀢𑁆𑀢𑀸𑀢𑀺 ‘𑀯𑀢𑁆𑀣𑀽𑀦𑀺’. 𑀓𑀺𑀮𑁂𑀲𑀸 𑀘 𑀢𑁂 𑀢𑀧𑁆𑀧𑀢𑀺𑀝𑁆𑀞𑀸𑀦𑀁 𑀲𑀢𑁆𑀢𑀸𑀦𑀁 𑀯𑀢𑁆𑀣𑀽𑀦𑀺 𑀘𑀸𑀢𑀺 ‘𑀓𑀺𑀮𑁂𑀲𑀯𑀢𑁆𑀣𑀽𑀦𑀺’. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀺𑀮𑁂𑀲𑀸𑀧𑀺 𑀯𑀲𑀦𑁆𑀢𑀺 𑀏𑀯 𑀦𑀸𑀫, 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀽𑀦𑀻𑀢𑀺𑀧𑀺 ‘𑀓𑀺𑀮𑁂𑀲𑀯𑀢𑁆𑀣𑀽𑀦𑀺’.

𑁧𑁨𑁩𑁬. 𑀢𑀢𑁆𑀣 𑀓𑀢𑀫𑁄 𑀮𑁄𑀪𑁄? 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄𑀢𑀺 𑀅𑀬𑀁 𑀧𑀦 𑀮𑁄𑀪𑁄 𑀳𑁂𑀢𑀼𑀕𑁄𑀘𑁆𑀙𑀓𑁂 𑀕𑀦𑁆𑀣𑀕𑁄𑀘𑁆𑀙𑀓𑁂 𑀇𑀫𑀲𑁆𑀫𑀺𑀁 𑀓𑀺𑀮𑁂𑀲𑀕𑁄𑀘𑁆𑀙𑀓𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀢𑀺𑀭𑁂𑀓𑀧𑀤𑀲𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀆𑀲𑀯𑀲𑀁𑀬𑁄𑀚𑀦𑀑𑀖𑀬𑁄𑀕𑀦𑀻𑀯𑀭𑀡𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀲𑀼 𑀅𑀝𑁆𑀞𑀳𑀺 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑁆𑀯𑀸𑀬𑀁 𑀅𑀢𑀺𑀭𑁂𑀓𑀧𑀤𑀲𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀝𑁆𑀞𑀸𑀦𑁂𑀧𑀺 𑀅𑀝𑁆𑀞𑀳𑀺 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀝𑁆𑀞𑀸𑀦𑁂𑀧𑀺 𑀦𑀺𑀧𑁆𑀧𑀤𑁂𑀲𑀢𑁄𑀯 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼 𑀳𑁂𑀢𑀼𑀕𑀦𑁆𑀣𑀦𑀻𑀯𑀭𑀡𑀉𑀧𑀸𑀤𑀸𑀦𑀓𑀺𑀮𑁂𑀲𑀕𑁄𑀘𑁆𑀙𑀓𑁂𑀲𑀼 𑀘𑀢𑀼𑀫𑀕𑁆𑀕𑀯𑀚𑁆𑀛𑀸 𑀢𑀡𑁆𑀳𑀸 𑀏𑀓𑁂𑀦𑁂𑀯 𑀓𑁄𑀝𑁆𑀞𑀸𑀲𑁂𑀦 𑀞𑀺𑀢𑀸. 𑀆𑀲𑀯𑀲𑀁𑀬𑁄𑀚𑀦𑀑𑀖𑀬𑁄𑀕𑁂𑀲𑀼 𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀧𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀞𑀺𑀢𑀸. 𑀓𑀣𑀁? 𑀆𑀲𑀯𑁂𑀲𑀼 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄𑀢𑀺, 𑀲𑀁𑀬𑁄𑀚𑀦𑁂𑀲𑀼 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀪𑀯𑀭𑀸𑀕𑀲𑀁𑀬𑁄𑀚𑀦𑀦𑁆𑀢𑀺, 𑀑𑀖𑁂𑀲𑀼 𑀓𑀸𑀫𑁄𑀖𑁄 𑀪𑀯𑁄𑀖𑁄𑀢𑀺, 𑀬𑁄𑀕𑁂𑀲𑀼 𑀓𑀸𑀫𑀬𑁄𑀕𑁄 𑀪𑀯𑀬𑁄𑀕𑁄𑀢𑀺.

𑀇𑀫𑀸𑀦𑀺 𑀧𑀦 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀮𑁄𑀪𑁄 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀳𑀻𑀬𑀢𑀺, 𑀤𑁄𑀲𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀫𑁄𑀳𑀫𑀸𑀦𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀣𑀺𑀦𑀸𑀤𑀻𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑁄𑀲𑁄, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑁂𑀲𑀸 𑀲𑀢𑁆𑀢𑀸𑀢𑀺.

𑁧𑁨𑁮𑁭. 𑀓𑀸𑀫𑀸𑀯𑀘𑀭𑀦𑀺𑀤𑁆𑀤𑁂𑀲𑁂 𑀳𑁂𑀝𑁆𑀞𑀢𑁄𑀢𑀺 𑀳𑁂𑀝𑁆𑀞𑀸𑀪𑀸𑀕𑁂𑀦. 𑀅𑀯𑀻𑀘𑀺𑀦𑀺𑀭𑀬𑀦𑁆𑀢𑀺 𑀯𑀸 𑀅𑀕𑁆𑀕𑀺𑀚𑀸𑀮𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀯𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀯𑀻𑀘𑀺, 𑀅𑀦𑁆𑀢𑀭𑀁, 𑀙𑀺𑀤𑁆𑀤𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀅𑀯𑀻𑀘𑀺. 𑀲𑀼𑀔𑀲𑀗𑁆𑀔𑀸𑀢𑁄 𑀅𑀬𑁄 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀭𑀬𑁄. 𑀦𑀺𑀭𑀢𑀺𑀅𑀢𑁆𑀣𑁂𑀦𑀧𑀺 𑀦𑀺𑀭𑀲𑁆𑀲𑀸𑀤𑀢𑁆𑀣𑁂𑀦𑀧𑀺 𑀦𑀺𑀭𑀬𑁄. 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸𑀢𑀺 𑀢𑀁 𑀅𑀯𑀻𑀘𑀺𑀲𑀗𑁆𑀔𑀸𑀢𑀁 𑀦𑀺𑀭𑀬𑀁 𑀅𑀦𑁆𑀢𑀁 𑀓𑀢𑁆𑀯𑀸. 𑀉𑀧𑀭𑀺𑀢𑁄𑀢𑀺 𑀉𑀧𑀭𑀺𑀪𑀸𑀕𑁂𑀦. 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂𑀢𑀺 𑀧𑀭𑀦𑀺𑀫𑁆𑀫𑀺𑀢𑁂𑀲𑀼 𑀓𑀸𑀫𑁂𑀲𑀼 𑀯𑀲𑀁 𑀯𑀢𑁆𑀢𑀦𑀢𑁄 𑀏𑀯𑀁𑀮𑀤𑁆𑀥𑀯𑁄𑀳𑀸𑀭𑁂 𑀤𑁂𑀯𑁂. 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸𑀢𑀺 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀬𑁂 𑀏𑀢𑀲𑁆𑀫𑀺𑀁 𑀑𑀓𑀸𑀲𑁂. 𑀏𑀢𑁆𑀣𑀸𑀯𑀘𑀭𑀸𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀜𑁆𑀜𑁂𑀧𑀺 𑀘𑀭𑀦𑁆𑀢𑀺 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀅𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘𑀅𑀯𑀘𑀭𑀸’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑁂 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀑𑀕𑀸𑀴𑁆𑀳𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺 𑀲𑀩𑁆𑀩𑀢𑁆𑀣 𑀲𑀤𑀸 𑀘 𑀲𑀫𑁆𑀪𑀯𑀢𑁄, 𑀅𑀥𑁄𑀪𑀸𑀕𑁂 𑀘𑀭𑀦𑁆𑀢𑀺 𑀅𑀯𑀻𑀘𑀺𑀦𑀺𑀭𑀬𑀲𑁆𑀲 𑀳𑁂𑀝𑁆𑀞𑀸 𑀪𑀽𑀢𑀼𑀧𑀸𑀤𑀸𑀬𑀧𑀯𑀢𑁆𑀢𑀺𑀪𑀸𑀯𑁂𑀦, 𑀢𑁂𑀲𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀢𑁂 𑀳𑀺 𑀅𑀯𑀕𑀸𑀴𑁆𑀳𑀸𑀯 𑀘𑀭𑀦𑁆𑀢𑀺, 𑀅𑀥𑁄𑀪𑀸𑀕𑁂𑀯 𑀘𑀭𑀦𑁆𑀢𑀻𑀢𑀺 𑀅𑀯𑀘𑀭𑀸. 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀇𑀫𑀺𑀦𑀸 𑀧𑀦 𑀬𑀲𑁆𑀫𑀸 𑀏𑀢𑁂 𑀏𑀢𑁆𑀣𑀸𑀯𑀘𑀭𑀸 𑀅𑀜𑁆𑀜𑀢𑁆𑀣𑀸𑀧𑀺 𑀅𑀯𑀘𑀭𑀦𑁆𑀢𑀺, 𑀦 𑀧𑀦 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀜𑁆𑀜𑀢𑁆𑀣𑀸𑀧𑀺 𑀅𑀯𑀘𑀭𑀦𑁆𑀢𑀸𑀦𑀁 𑀧𑀭𑀺𑀕𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀇𑀤𑀸𑀦𑀺 𑀢𑁂 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑁂 𑀭𑀸𑀲𑀺𑀲𑀼𑀜𑁆𑀜𑀢𑀧𑀘𑁆𑀘𑀬𑀪𑀸𑀯𑀢𑁄 𑀘𑁂𑀯 𑀲𑀪𑀸𑀯𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 𑀔𑀦𑁆𑀥𑀸𑀢𑀺𑀆𑀤𑀺𑀫𑀸𑀳.

𑁧𑁨𑁮𑁯. 𑀭𑀽𑀧𑀸𑀯𑀘𑀭𑀦𑀺𑀤𑁆𑀤𑁂𑀲𑁂 𑀩𑁆𑀭𑀳𑁆𑀫𑀮𑁄𑀓𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀝𑁆𑀞𑀸𑀦𑀁. 𑀲𑁂𑀲𑀫𑁂𑀢𑁆𑀣 𑀓𑀸𑀫𑀸𑀯𑀘𑀭𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀢𑀺𑀆𑀤𑀻𑀲𑀼 𑀧𑀞𑀫𑀧𑀤𑁂𑀦 𑀓𑀼𑀲𑀮𑀚𑁆𑀛𑀸𑀦𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑁂𑀦 𑀯𑀺𑀧𑀸𑀓𑀚𑁆𑀛𑀸𑀦𑀁, 𑀯𑀼𑀢𑁆𑀢𑀁 𑀢𑀢𑀺𑀬𑁂𑀦 𑀓𑀺𑀭𑀺𑀬𑀚𑁆𑀛𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁨𑁯𑁧. 𑀅𑀭𑀽𑀧𑀸𑀯𑀘𑀭𑀦𑀺𑀤𑁆𑀤𑁂𑀲𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑁂𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀗𑁆𑀔𑀸𑀢𑀁 𑀪𑀯𑀁 𑀉𑀧𑀕𑀢𑁂. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁦𑁧. 𑀲𑀭𑀡𑀤𑀼𑀓𑀦𑀺𑀤𑁆𑀤𑁂𑀲𑁂 𑀬𑁆𑀯𑀸𑀬𑀁 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀫𑁄𑀳𑁄, 𑀲𑁄 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑁄 𑀘 𑀮𑁄𑀪𑁂𑀦 𑀲𑀭𑀡𑁄, 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑁄 𑀘 𑀤𑁄𑀲𑁂𑀦 𑀲𑀭𑀡𑁄. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁄 𑀧𑀦 𑀫𑁄𑀳𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀘𑁂𑀯 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑁂𑀦 𑀘 𑀭𑀸𑀕𑀭𑀡𑁂𑀦 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀢𑁄 𑀲𑀭𑀡𑁄 𑀲𑀭𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸

𑁧𑁩𑁦𑁩. 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑁂𑀲𑀼 𑀫𑀸𑀢𑀺𑀓𑀸𑀓𑀣𑀸𑀬𑀁 𑀅𑀢𑁆𑀣𑀢𑁄 𑀯𑀺𑀯𑁂𑀘𑀺𑀢𑀢𑁆𑀢𑀸 𑀬𑀸𑀦𑀺 𑀘 𑀦𑁂𑀲𑀁 𑀦𑀺𑀤𑁆𑀤𑁂𑀲𑀧𑀤𑀸𑀦𑀺 𑀢𑁂𑀲𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀏𑀯. 𑀇𑀤𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁 𑁋 𑀯𑀺𑀚𑁆𑀚𑀽𑀧𑀫𑀤𑀼𑀓𑁂 𑀢𑀸𑀯 𑀘𑀓𑁆𑀔𑀼𑀫𑀸 𑀓𑀺𑀭 𑀧𑀼𑀭𑀺𑀲𑁄 𑀫𑁂𑀖𑀦𑁆𑀥𑀓𑀸𑀭𑁂 𑀭𑀢𑁆𑀢𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀲 𑀅𑀦𑁆𑀥𑀓𑀸𑀭𑀢𑀸𑀬 𑀫𑀕𑁆𑀕𑁄 𑀦 𑀧𑀜𑁆𑀜𑀸𑀬𑀺. 𑀯𑀺𑀚𑁆𑀚𑀼 𑀦𑀺𑀘𑁆𑀙𑀭𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀲𑀺. 𑀅𑀣𑀲𑁆𑀲 𑀅𑀦𑁆𑀥𑀓𑀸𑀭𑀯𑀺𑀕𑀫𑀸 𑀫𑀕𑁆𑀕𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀤𑀼𑀢𑀺𑀬𑀫𑁆𑀧𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀤𑀼𑀢𑀺𑀬𑀫𑁆𑀧𑀺 𑀅𑀦𑁆𑀥𑀓𑀸𑀭𑁄 𑀑𑀢𑁆𑀣𑀭𑀺. 𑀫𑀕𑁆𑀕𑁄 𑀦 𑀧𑀜𑁆𑀜𑀸𑀬𑀺. 𑀯𑀺𑀚𑁆𑀚𑀼 𑀦𑀺𑀘𑁆𑀙𑀭𑀺𑀢𑁆𑀯𑀸 𑀢𑀁 𑀯𑀺𑀤𑁆𑀥𑀁𑀲𑁂𑀲𑀺. 𑀯𑀺𑀕𑀢𑁂 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀅𑀦𑁆𑀥𑀓𑀸𑀭𑁄 𑀑𑀢𑁆𑀣𑀭𑀺. 𑀫𑀕𑁆𑀕𑁄 𑀦 𑀧𑀜𑁆𑀜𑀸𑀬𑀺. 𑀯𑀺𑀚𑁆𑀚𑀼 𑀦𑀺𑀘𑁆𑀙𑀭𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀲𑀺.

𑀢𑀢𑁆𑀣 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀧𑀝𑀺𑀧𑀚𑁆𑀚𑀦𑀁 𑀯𑀺𑀬 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄. 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀅𑀧𑀜𑁆𑀜𑀸𑀬𑀦𑀓𑀸𑀮𑁄 𑀯𑀺𑀬 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀁. 𑀯𑀺𑀚𑁆𑀚𑀼𑀬𑀸 𑀦𑀺𑀘𑁆𑀙𑀭𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀓𑀸𑀮𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀪𑀸𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀲𑁆𑀲 𑀯𑀺𑀦𑁄𑀤𑀺𑀢𑀓𑀸𑀮𑁄. 𑀯𑀺𑀕𑀢𑁂 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀸𑀓𑀝𑀓𑀸𑀮𑁄. 𑀫𑀕𑁆𑀕𑀲𑁆𑀲 𑀧𑀸𑀓𑀝𑀁 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀫𑁂𑀯. 𑀤𑀼𑀢𑀺𑀬𑀕𑀫𑀦𑀸𑀪𑀺𑀦𑀻𑀳𑀸𑀭𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄. 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀅𑀧𑀜𑁆𑀜𑀸𑀬𑀦𑀓𑀸𑀮𑁄 𑀯𑀺𑀬 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀁. 𑀤𑀼𑀢𑀺𑀬𑀁 𑀯𑀺𑀚𑁆𑀚𑀼𑀬𑀸 𑀦𑀺𑀘𑁆𑀙𑀭𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀓𑀸𑀮𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄𑀪𑀸𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀲𑁆𑀲 𑀯𑀺𑀦𑁄𑀤𑀺𑀢𑀓𑀸𑀮𑁄. 𑀯𑀺𑀕𑀢𑁂 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀸𑀓𑀝𑀓𑀸𑀮𑁄. 𑀫𑀕𑁆𑀕𑀲𑁆𑀲 𑀧𑀸𑀓𑀝𑀁 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀫𑁂𑀯. 𑀢𑀢𑀺𑀬𑀕𑀫𑀦𑀸𑀪𑀺𑀦𑀻𑀳𑀸𑀭𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄. 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀅𑀧𑀜𑁆𑀜𑀸𑀬𑀦𑀓𑀸𑀮𑁄 𑀯𑀺𑀬 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀁. 𑀢𑀢𑀺𑀬𑀁 𑀯𑀺𑀚𑁆𑀚𑀼𑀬𑀸 𑀦𑀺𑀘𑁆𑀙𑀭𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀓𑀸𑀮𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑁄𑀪𑀸𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀲𑁆𑀲 𑀯𑀺𑀦𑁄𑀤𑀺𑀢𑀓𑀸𑀮𑁄. 𑀯𑀺𑀕𑀢𑁂 𑀅𑀦𑁆𑀥𑀓𑀸𑀭𑁂 𑀫𑀕𑁆𑀕𑀲𑁆𑀲 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀸𑀓𑀝𑀓𑀸𑀮𑁄. 𑀫𑀕𑁆𑀕𑀲𑁆𑀲 𑀧𑀸𑀓𑀝𑀁 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀫𑁂𑀯.

𑀯𑀚𑀺𑀭𑀲𑁆𑀲 𑀧𑀦 𑀧𑀸𑀲𑀸𑀡𑁄 𑀯𑀸 𑀫𑀡𑀺 𑀯𑀸 𑀅𑀪𑁂𑀚𑁆𑀚𑁄 𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀣 𑀧𑀢𑀢𑀺 𑀢𑀁 𑀯𑀺𑀦𑀺𑀯𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀯𑀚𑀺𑀭𑀁 𑀔𑁂𑀧𑁂𑀦𑁆𑀢𑀁 𑀅𑀲𑁂𑀲𑁂𑀢𑁆𑀯𑀸 𑀔𑁂𑀧𑁂𑀢𑀺. 𑀯𑀚𑀺𑀭𑁂𑀦 𑀕𑀢𑀫𑀕𑁆𑀕𑁄 𑀦𑀸𑀫 𑀧𑀼𑀦 𑀧𑀸𑀓𑀢𑀺𑀓𑁄 𑀦 𑀳𑁄𑀢𑀺. 𑀏𑀯𑀫𑁂𑀯 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀅𑀯𑀚𑁆𑀛𑀓𑀺𑀮𑁂𑀲𑁄 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀓𑀺𑀮𑁂𑀲𑁂 𑀯𑀺𑀦𑀺𑀯𑀺𑀚𑁆𑀛𑀢𑀺 𑀯𑀚𑀺𑀭𑀁 𑀯𑀺𑀬. 𑀅𑀭𑀳𑀢𑁆𑀢𑀫𑀕𑁆𑀕𑁄𑀧𑀺 𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑁄 𑀅𑀲𑁂𑀲𑁂𑀢𑁆𑀯𑀸 𑀔𑁂𑀧𑁂𑀢𑀺. 𑀯𑀚𑀺𑀭𑁂𑀦 𑀕𑀢𑀫𑀕𑁆𑀕𑀲𑁆𑀲 𑀧𑀼𑀦 𑀧𑀸𑀓𑀢𑀺𑀓𑀢𑁆𑀢𑀸𑀪𑀸𑀯𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀧𑀘𑁆𑀘𑀼𑀤𑀸𑀯𑀢𑁆𑀢𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑁧𑁩𑁦𑁭. 𑀩𑀸𑀮𑀤𑀼𑀓𑀦𑀺𑀤𑁆𑀤𑁂𑀲𑁂 𑀩𑀸𑀮𑁂𑀲𑀼 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀦𑀺 𑀧𑀸𑀓𑀝𑀸𑀦𑀺, 𑀫𑀽𑀮𑀸𑀦𑀺 𑀘 𑀲𑁂𑀲𑀸𑀦𑀁 𑀩𑀸𑀮𑀥𑀫𑁆𑀫𑀸𑀦𑀁. 𑀅𑀳𑀺𑀭𑀺𑀓𑁄 𑀳𑀺 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀦 𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀦 𑀓𑀭𑁄𑀢𑀺 𑀦𑀸𑀫𑀸𑀢𑀺. 𑀏𑀢𑀸𑀦𑀺 𑀤𑁆𑀯𑁂 𑀧𑀞𑀫𑀁𑀬𑁂𑀯 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀅𑀬𑀫𑁂𑀯 𑀦𑀬𑁄. 𑀢𑀣𑀸 𑀓𑀡𑁆𑀳𑀤𑀼𑀓𑁂.

𑁧𑁩𑁧𑁧. 𑀢𑀧𑀦𑀻𑀬𑀤𑀼𑀓𑀦𑀺𑀤𑁆𑀤𑁂𑀲𑁂 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀢𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀳𑀺 𑀓𑀢𑀢𑁆𑀢𑀸 𑀢𑀧𑀦𑁆𑀢𑀺, 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀅𑀓𑀢𑀢𑁆𑀢𑀸. 𑀢𑀣𑀸 𑀳𑀺 𑀧𑀼𑀕𑁆𑀕𑀮𑁄 ‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢’𑀦𑁆𑀢𑀺 𑀢𑀧𑁆𑀧𑀢𑀺, ‘𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’𑀦𑁆𑀢𑀺 𑀢𑀧𑁆𑀧𑀢𑀺. ‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢’𑀦𑁆𑀢𑀺 𑀢𑀧𑁆𑀧𑀢𑀺…𑀧𑁂… ‘𑀅𑀓𑀢𑀁 𑀫𑁂 𑀫𑀦𑁄𑀲𑀼𑀘𑀭𑀺𑀢’𑀦𑁆𑀢𑀺 𑀢𑀧𑁆𑀧𑀢𑀺. 𑀅𑀢𑀧𑀦𑀻𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀮𑁆𑀬𑀸𑀡𑀓𑀸𑀭𑀻 𑀳𑀺 𑀧𑀼𑀕𑁆𑀕𑀮𑁄 ‘𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’𑀦𑁆𑀢𑀺 𑀦 𑀢𑀧𑁆𑀧𑀢𑀺, ‘𑀅𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢’𑀦𑁆𑀢𑀺 𑀦 𑀢𑀧𑁆𑀧𑀢𑀺…𑀧𑁂… ‘𑀅𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢’𑀦𑁆𑀢𑀺 𑀦 𑀢𑀧𑁆𑀧𑀢𑀻𑀢𑀺 (𑀅. 𑀦𑀺. 𑁨.𑁩).

𑁧𑁩𑁧𑁩. 𑀅𑀥𑀺𑀯𑀘𑀦𑀤𑀼𑀓𑀦𑀺𑀤𑁆𑀤𑁂𑀲𑁂 𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑀥𑀫𑁆𑀫𑀕𑁆𑀕𑀳𑀡𑀁. 𑀲𑀗𑁆𑀔𑀸𑀬𑀢𑀻𑀢𑀺 𑀲𑀗𑁆𑀔𑀸, 𑀲𑀁𑀓𑀣𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀲𑀁𑀓𑀣𑀺𑀬𑀢𑀺? 𑀅𑀳𑀦𑁆𑀢𑀺 𑀫𑀫𑀦𑁆𑀢𑀺 𑀧𑀭𑁄𑀢𑀺 𑀧𑀭𑀲𑁆𑀲𑀸𑀢𑀺 𑀲𑀢𑁆𑀢𑁄𑀢𑀺 𑀪𑀸𑀯𑁄𑀢𑀺 𑀧𑁄𑀲𑁄𑀢𑀺 𑀧𑀼𑀕𑁆𑀕𑀮𑁄𑀢𑀺 𑀦𑀭𑁄𑀢𑀺 𑀫𑀸𑀡𑀯𑁄𑀢𑀺 𑀢𑀺𑀲𑁆𑀲𑁄𑀢𑀺 𑀤𑀢𑁆𑀢𑁄𑀢𑀺, ‘𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦𑀁’ ‘𑀯𑀺𑀳𑀸𑀭𑁄 𑀧𑀭𑀺𑀯𑁂𑀡𑀁 𑀤𑁆𑀯𑀸𑀭𑀁 𑀯𑀸𑀢𑀧𑀸𑀦’𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀲𑀁𑀓𑀣𑀺𑀬𑀢𑀻𑀢𑀺 ‘𑀲𑀗𑁆𑀔𑀸’. 𑀲𑀫𑀜𑁆𑀜𑀸𑀬𑀢𑀻𑀢𑀺 𑀲𑀫𑀜𑁆𑀜𑀸. 𑀓𑀺𑀦𑁆𑀢𑀺 𑀲𑀫𑀜𑁆𑀜𑀸𑀬𑀢𑀺? ‘𑀅𑀳𑀦𑁆𑀢𑀺…𑀧𑁂… 𑀯𑀸𑀢𑀧𑀸𑀦’𑀦𑁆𑀢𑀺 𑀲𑀫𑀜𑁆𑀜𑀸𑀬𑀢𑀻𑀢𑀺 ‘𑀲𑀫𑀜𑁆𑀜𑀸’. 𑀧𑀜𑁆𑀜𑀸𑀧𑀺𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀺. 𑀯𑁄𑀳𑀭𑀺𑀬𑀢𑀻𑀢𑀺 𑀯𑁄𑀳𑀸𑀭𑁄. 𑀓𑀺𑀦𑁆𑀢𑀺 𑀯𑁄𑀳𑀭𑀺𑀬𑀢𑀺? ‘𑀅𑀳’𑀦𑁆𑀢𑀺…𑀧𑁂… ‘𑀯𑀸𑀢𑀧𑀸𑀦’𑀦𑁆𑀢𑀺 𑀯𑁄𑀳𑀭𑀺𑀬𑀢𑀻𑀢𑀺 𑀯𑁄𑀳𑀸𑀭𑁄.

𑀦𑀸𑀫𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀦𑀸𑀫𑀁 𑁋 𑀲𑀸𑀫𑀜𑁆𑀜𑀦𑀸𑀫𑀁 𑀕𑀼𑀡𑀦𑀸𑀫𑀁 𑀓𑀺𑀢𑁆𑀢𑀺𑀫𑀦𑀸𑀫𑀁 𑀑𑀧𑀧𑀸𑀢𑀺𑀓𑀦𑀸𑀫𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀫𑀳𑀸𑀚𑀦𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀫𑀳𑀸𑀲𑀫𑁆𑀫𑀢𑁄𑀢𑀺 𑀭𑀜𑁆𑀜𑁄 𑀦𑀸𑀫𑀁 ‘𑀲𑀸𑀫𑀜𑁆𑀜𑀦𑀸𑀫𑀁’ 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀫𑀳𑀸𑀚𑀦𑀲𑀫𑁆𑀫𑀢𑁄𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀫𑀳𑀸𑀲𑀫𑁆𑀫𑀢𑁄 𑀢𑁆𑀯𑁂𑀯 𑀧𑀞𑀫𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁩𑁧). 𑀥𑀫𑁆𑀫𑀓𑀣𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀦𑀬𑀥𑀭𑁄 𑀢𑁂𑀧𑀺𑀝𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄𑀢𑀺 𑀏𑀯𑀭𑀽𑀧𑀁 𑀕𑀼𑀡𑀢𑁄 𑀆𑀕𑀢𑀦𑀸𑀫𑀁 ‘𑀕𑀼𑀡𑀦𑀸𑀫𑀁’ 𑀦𑀸𑀫. 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀦𑀺𑀧𑀺 𑀢𑀣𑀸𑀕𑀢𑀲𑁆𑀲 𑀅𑀦𑁂𑀓𑀸𑀦𑀺 𑀦𑀸𑀫𑀲𑀢𑀸𑀦𑀺 𑀕𑀼𑀡𑀦𑀸𑀫𑀸𑀦𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺.

𑀬𑀁 𑀧𑀦 𑀚𑀸𑀢𑀲𑁆𑀲 𑀓𑀼𑀫𑀸𑀭𑀓𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀸 𑀜𑀸𑀢𑀓𑀸 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 ‘𑀅𑀬𑀁 𑀅𑀲𑀼𑀓𑁄𑀦𑀸𑀫𑀸’𑀢𑀺 𑀦𑀸𑀫𑀁 𑀓𑀭𑁄𑀦𑁆𑀢𑀺, 𑀇𑀤𑀁 ‘𑀓𑀺𑀢𑁆𑀢𑀺𑀫𑀦𑀸𑀫’ 𑀦𑀸𑀫. 𑀬𑀸 𑀧𑀦 𑀧𑀼𑀭𑀺𑀫𑀧𑀜𑁆𑀜𑀢𑁆𑀢𑀺 𑀧𑀘𑁆𑀙𑀺𑀫𑀧𑀜𑁆𑀜𑀢𑁆𑀢𑀺𑀬𑀁 𑀧𑀢𑀢𑀺, 𑀧𑀼𑀭𑀺𑀫𑀯𑁄𑀳𑀸𑀭𑁄 𑀧𑀘𑁆𑀙𑀺𑀫𑀯𑁄𑀳𑀸𑀭𑁂 𑀧𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀼𑀭𑀺𑀫𑀓𑀧𑁆𑀧𑁂𑀧𑀺 𑀘𑀦𑁆𑀤𑁄 𑀘𑀦𑁆𑀤𑁄𑀬𑁂𑀯 𑀦𑀸𑀫, 𑀏𑀢𑀭𑀳𑀺𑀧𑀺 𑀘𑀦𑁆𑀤𑁄𑀯. 𑀅𑀢𑀻𑀢𑁂 𑀲𑀽𑀭𑀺𑀬𑁄… 𑀲𑀫𑀼𑀤𑁆𑀤𑁄… 𑀧𑀣𑀯𑀻… 𑀧𑀩𑁆𑀩𑀢𑁄 𑀧𑀩𑁆𑀩𑀢𑁄𑀬𑁂𑀯, 𑀦𑀸𑀫, 𑀏𑀢𑀭𑀳𑀺𑀧𑀺 𑀧𑀩𑁆𑀩𑀢𑁄𑀬𑁂𑀯𑀸𑀢𑀺 𑀇𑀤𑀁 ‘𑀑𑀧𑀧𑀸𑀢𑀺𑀓𑀦𑀸𑀫𑀁’ 𑀦𑀸𑀫. 𑀇𑀤𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀸𑀫𑀁 𑀏𑀢𑁆𑀣 𑀦𑀸𑀫𑀫𑁂𑀯 𑀳𑁄𑀢𑀺.

𑀦𑀸𑀫𑀓𑀫𑁆𑀫𑀦𑁆𑀢𑀺 𑀦𑀸𑀫𑀓𑀭𑀡𑀁. 𑀦𑀸𑀫𑀥𑁂𑀬𑁆𑀬𑀦𑁆𑀢𑀺 𑀦𑀸𑀫𑀝𑁆𑀞𑀧𑀦𑀁. 𑀦𑀺𑀭𑀼𑀢𑁆𑀢𑀻𑀢𑀺 𑀦𑀸𑀫𑀦𑀺𑀭𑀼𑀢𑁆𑀢𑀺. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀸𑀫𑀩𑁆𑀬𑀜𑁆𑀚𑀦𑀁. 𑀬𑀲𑁆𑀫𑀸 𑀧𑀦𑁂𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀺 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀅𑀪𑀺𑀮𑀸𑀧𑁄𑀢𑀺 𑀦𑀸𑀫𑀸𑀪𑀺𑀮𑀸𑀧𑁄𑀯. 𑀲𑀩𑁆𑀩𑁂𑀯 𑀥𑀫𑁆𑀫𑀸 𑀅𑀥𑀺𑀯𑀘𑀦𑀧𑀣𑀸𑀢𑀺 𑀅𑀥𑀺𑀯𑀘𑀦𑀲𑁆𑀲 𑀦𑁄𑀧𑀣𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀏𑀓𑀥𑀫𑁆𑀫𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀦𑀺𑀧𑀢𑀢𑀺, 𑀲𑀩𑁆𑀩𑀥𑀫𑁆𑀫𑀸 𑀏𑀓𑀥𑀫𑁆𑀫𑀲𑁆𑀫𑀺𑀁 𑀦𑀺𑀧𑀢𑀦𑁆𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺 𑀏𑀓𑀥𑀫𑁆𑀫𑁄, 𑀲𑁄 𑀲𑀩𑁆𑀩𑁂𑀲𑀼 𑀘𑀢𑀼𑀪𑀽𑀫𑀓𑀥𑀫𑁆𑀫𑁂𑀲𑀼 𑀦𑀺𑀧𑀢𑀢𑀺. 𑀲𑀢𑁆𑀢𑁄𑀧𑀺 𑀲𑀗𑁆𑀔𑀸𑀭𑁄𑀧𑀺 𑀦𑀸𑀫𑀢𑁄 𑀫𑀼𑀢𑁆𑀢𑀓𑁄 𑀦𑀸𑀫 𑀦𑀢𑁆𑀣𑀺.

𑀅𑀝𑀯𑀻𑀧𑀩𑁆𑀩𑀢𑀸𑀤𑀻𑀲𑀼 𑀭𑀼𑀓𑁆𑀔𑁄𑀧𑀺 𑀚𑀸𑀦𑀧𑀤𑀸𑀦𑀁 𑀪𑀸𑀭𑁄. 𑀢𑁂 𑀳𑀺 ‘𑀅𑀬𑀁 𑀓𑀺𑀁 𑀭𑀼𑀓𑁆𑀔𑁄 𑀦𑀸𑀫𑀸’𑀢𑀺 𑀧𑀼𑀝𑁆𑀞𑀸 ‘𑀔𑀤𑀺𑀭𑁄’ ‘𑀧𑀮𑀸𑀲𑁄’𑀢𑀺 𑀅𑀢𑁆𑀢𑀦𑀸 𑀚𑀸𑀦𑀦𑀓𑀦𑀸𑀫𑀁 𑀓𑀣𑁂𑀦𑁆𑀢𑀺. 𑀬𑀲𑁆𑀲 𑀦𑀸𑀫𑀁 𑀦 𑀚𑀸𑀦𑀦𑁆𑀢𑀺 𑀢𑀫𑁆𑀧𑀺 ‘𑀅𑀦𑀸𑀫𑀓𑁄’ 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀢𑀫𑁆𑀧𑀺 𑀢𑀲𑁆𑀲 𑀦𑀸𑀫𑀥𑁂𑀬𑁆𑀬𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀫𑀼𑀤𑁆𑀤𑁂 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀭𑁂 𑀤𑁆𑀯𑁂 𑀤𑀼𑀓𑀸 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀸 𑀏𑀯.

𑁧𑁩𑁧𑁬. 𑀦𑀸𑀫𑀭𑀽𑀧𑀤𑀼𑀓𑁂 𑀦𑀸𑀫𑀓𑀭𑀡𑀝𑁆𑀞𑁂𑀦 𑀘 𑀦𑀫𑀦𑀝𑁆𑀞𑁂𑀦 𑀘 𑀦𑀸𑀫𑀦𑀝𑁆𑀞𑁂𑀦 𑀘 𑀦𑀸𑀫𑀁. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀢𑀸𑀯 𑀦𑀸𑀫𑀓𑀭𑀡𑀝𑁆𑀞𑁂𑀦 ‘𑀦𑀸𑀫𑀁’. 𑀬𑀣𑀸 𑀳𑀺 𑀫𑀳𑀸𑀚𑀦𑀲𑀫𑁆𑀫𑀢𑀢𑁆𑀢𑀸 𑀫𑀳𑀸𑀲𑀫𑁆𑀫𑀢𑀲𑁆𑀲 𑀫𑀳𑀸𑀲𑀫𑁆𑀫𑀢𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀬𑀣𑀸 𑀯𑀸 𑀫𑀸𑀢𑀸𑀧𑀺𑀢𑀭𑁄 ‘𑀅𑀬𑀁 𑀢𑀺𑀲𑁆𑀲𑁄 𑀦𑀸𑀫 𑀳𑁄𑀢𑀼, 𑀨𑀼𑀲𑁆𑀲𑁄 𑀦𑀸𑀫 𑀳𑁄𑀢𑀽’𑀢𑀺 𑀏𑀯𑀁 𑀧𑀼𑀢𑁆𑀢𑀲𑁆𑀲 𑀓𑀺𑀢𑁆𑀢𑀺𑀫𑀦𑀸𑀫𑀁 𑀓𑀭𑁄𑀦𑁆𑀢𑀺, 𑀬𑀣𑀸 𑀯𑀸 ‘𑀥𑀫𑁆𑀫𑀓𑀣𑀺𑀓𑁄’ ‘𑀯𑀺𑀦𑀬𑀥𑀭𑁄’𑀢𑀺 𑀕𑀼𑀡𑀢𑁄 𑀦𑀸𑀫𑀁 𑀆𑀕𑀘𑁆𑀙𑀢𑀺, 𑀦 𑀏𑀯𑀁 𑀯𑁂𑀤𑀦𑀸𑀤𑀻𑀦𑀁. 𑀯𑁂𑀤𑀦𑀸𑀤𑀬𑁄 𑀳𑀺 𑀫𑀳𑀸𑀧𑀣𑀯𑀻𑀆𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀦𑀸𑀫𑀁 𑀓𑀭𑁄𑀦𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑁂𑀲𑀁 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀦 𑀳𑀺 𑀯𑁂𑀤𑀦𑀁 𑀉𑀧𑁆𑀧𑀦𑁆𑀦𑀁 ‘𑀢𑁆𑀯𑀁 𑀯𑁂𑀤𑀦𑀸 𑀦𑀸𑀫 𑀳𑁄𑀳𑀻’𑀢𑀺 𑀓𑁄𑀘𑀺 𑀪𑀡𑀢𑀺. 𑀦 𑀘 𑀢𑀲𑁆𑀲𑀸 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀣𑀸 𑀧𑀣𑀯𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 ‘𑀢𑁆𑀯𑀁 𑀧𑀣𑀯𑀻 𑀦𑀸𑀫 𑀳𑁄𑀳𑀻’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘𑀢𑁆𑀯𑀁 𑀘𑀓𑁆𑀓𑀯𑀸𑀴𑀁 𑀦𑀸𑀫 𑀳𑁄𑀳𑀺 𑀢𑁆𑀯𑀁 𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀳𑀻’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀑𑀧𑀧𑀸𑀢𑀺𑀓𑀧𑀜𑁆𑀜𑀢𑁆𑀢𑀺𑀬𑀁 𑀦𑀺𑀧𑀢𑀢𑀺, 𑀏𑀯𑀁 𑀯𑁂𑀤𑀦𑀸𑀬 𑀉𑀧𑁆𑀧𑀦𑁆𑀦𑀸𑀬 ‘𑀢𑁆𑀯𑀁 𑀯𑁂𑀤𑀦𑀸 𑀦𑀸𑀫 𑀳𑁄𑀳𑀻’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀸𑀬 𑀉𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀢𑀺 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀑𑀧𑀧𑀸𑀢𑀺𑀓𑀧𑀜𑁆𑀜𑀢𑁆𑀢𑀺𑀬𑀁 𑀦𑀺𑀧𑀢𑀢𑀺. 𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑀻𑀢𑁂𑀧𑀺 𑀳𑀺 𑀯𑁂𑀤𑀦𑀸 𑀯𑁂𑀤𑀦𑀸𑀬𑁂𑀯, 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀫𑁂𑀯. 𑀅𑀦𑀸𑀕𑀢𑁂𑀧𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺. 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀤𑀸𑀧𑀺 𑀦𑀺𑀩𑁆𑀩𑀸𑀦𑀫𑁂𑀯𑀸𑀢𑀺. ‘𑀦𑀸𑀫𑀓𑀭𑀡𑀝𑁆𑀞𑁂𑀦’ 𑀦𑀸𑀫𑀁.

‘𑀦𑀫𑀦𑀝𑁆𑀞𑁂𑀦𑀸’𑀧𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫𑀁. 𑀢𑁂 𑀳𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀸 𑀦𑀫𑀦𑁆𑀢𑀺. ‘𑀦𑀸𑀫𑀦𑀝𑁆𑀞𑁂𑀦’ 𑀲𑀩𑁆𑀩𑀫𑁆𑀧𑀺 𑀦𑀸𑀫𑀁. 𑀘𑀢𑁆𑀢𑀸𑀭𑁄 𑀳𑀺 𑀔𑀦𑁆𑀥𑀸 𑀆𑀭𑀫𑁆𑀫𑀡𑁂 𑀅𑀜𑁆𑀜𑀫𑀜𑁆𑀜𑀁 𑀦𑀸𑀫𑁂𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬 𑀅𑀢𑁆𑀢𑀦𑀺 𑀅𑀦𑀯𑀚𑁆𑀚𑀥𑀫𑁆𑀫𑁂 𑀦𑀸𑀫𑁂𑀢𑀺.

𑁧𑁩𑁧𑁮. 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀸.

𑁧𑁩𑁨𑁦. 𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀕𑀳𑁂𑀢𑁆𑀯𑀸 ‘𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀕𑀳𑀡𑀸𑀓𑀸𑀭𑁂𑀦 𑀦𑀺𑀯𑀺𑀝𑁆𑀞𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀤𑀼𑀢𑀺𑀬𑀸 ‘𑀦 𑀪𑀯𑀺𑀲𑁆𑀲𑀢𑀻’𑀢𑀺 𑀆𑀓𑀸𑀭𑁂𑀦 𑀦𑀺𑀯𑀺𑀝𑁆𑀞𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺.

𑁧𑁩𑁨𑁬. 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪𑀸𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸. 𑀇𑀫𑀺𑀦𑀸 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀸 𑀅𑀝𑁆𑀞𑀸𑀭𑀲 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸. 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪𑀸𑀢𑀺 𑀅𑀦𑀸𑀕𑀢𑀓𑁄𑀝𑁆𑀞𑀸𑀲𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸. 𑀇𑀫𑀺𑀦𑀸 𑀢𑀢𑁆𑀣𑁂𑀯 𑀆𑀕𑀢𑀸 𑀘𑀢𑀼𑀘𑀢𑁆𑀢𑀸𑀮𑀻𑀲 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸.

𑁧𑁩𑁩𑁨. 𑀤𑁄𑀯𑀘𑀲𑁆𑀲𑀢𑀸𑀦𑀺𑀤𑁆𑀤𑁂𑀲𑁂 𑀲𑀳𑀥𑀫𑁆𑀫𑀺𑀓𑁂 𑀯𑀼𑀘𑁆𑀘𑀫𑀸𑀦𑁂𑀢𑀺 𑀲𑀳𑀥𑀫𑁆𑀫𑀺𑀓𑀁 𑀦𑀸𑀫 𑀬𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 ‘𑀇𑀤𑀁 𑀦𑀸𑀫 𑀢𑁆𑀯𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀇𑀗𑁆𑀖 𑀤𑁂𑀲𑁂𑀳𑀺 𑀯𑀼𑀝𑁆𑀞𑀸𑀳𑀺 𑀧𑀝𑀺𑀓𑀭𑁄𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁂. 𑀤𑁄𑀯𑀘𑀲𑁆𑀲𑀸𑀬𑀦𑁆𑀢𑀺𑀆𑀤𑀻𑀲𑀼 𑀏𑀯𑀁 𑀘𑁄𑀤𑀺𑀬𑀫𑀸𑀦𑀲𑁆𑀲 𑀧𑀝𑀺𑀘𑁄𑀤𑀦𑀸𑀬 𑀯𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑀸𑀳𑀺𑀢𑀸𑀬 𑀯𑀸 𑀤𑀼𑀩𑁆𑀩𑀘𑀲𑁆𑀲 𑀓𑀫𑁆𑀫𑀁 𑀤𑁄𑀯𑀘𑀲𑁆𑀲𑀸𑀬𑀁. 𑀢𑀤𑁂𑀯 𑀤𑁄𑀯𑀘𑀲𑁆𑀲𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀪𑀸𑀯𑁄 𑀤𑁄𑀯𑀘𑀲𑁆𑀲𑀺𑀬𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀺𑀧𑁆𑀧𑀝𑀺𑀓𑀽𑀮𑀕𑀸𑀳𑀺𑀢𑀸𑀢𑀺 𑀯𑀺𑀮𑁄𑀫𑀕𑀸𑀳𑀺𑀢𑀸. 𑀯𑀺𑀮𑁄𑀫𑀕𑀳𑀡𑀲𑀗𑁆𑀔𑀸𑀢𑁂𑀦 𑀯𑀺𑀧𑀘𑁆𑀘𑀦𑀻𑀓𑁂𑀦 𑀲𑀸𑀢𑀁 𑀅𑀲𑁆𑀲𑀸𑀢𑀺 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁄. ‘𑀧𑀝𑀸𑀡𑀺𑀓𑀕𑀳𑀡𑀁 𑀕𑀳𑁂𑀢𑁆𑀯𑀸 𑀏𑀓𑀧𑀤𑁂𑀦𑁂𑀯 𑀢𑀁 𑀦𑀺𑀲𑁆𑀲𑀤𑁆𑀤𑀫𑀓𑀸𑀲𑀺’𑀦𑁆𑀢𑀺 𑀲𑀼𑀔𑀁 𑀧𑀝𑀺𑀮𑀪𑀦𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀲 𑀪𑀸𑀯𑁄 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑀢𑀸. 𑀑𑀯𑀸𑀤𑀁 𑀅𑀦𑀸𑀤𑀺𑀬𑀦𑀯𑀲𑁂𑀦 𑀅𑀦𑀸𑀤𑀭𑀲𑁆𑀲 𑀪𑀸𑀯𑁄 𑀅𑀦𑀸𑀤𑀭𑀺𑀬𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀸𑀤𑀺𑀬𑀦𑀸𑀓𑀸𑀭𑁄 𑀯𑀸 𑀅𑀦𑀸𑀤𑀭𑀢𑀸. 𑀕𑀭𑀼𑀯𑀸𑀲𑀁 𑀅𑀯𑀲𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀕𑀸𑀭𑀯𑀪𑀸𑀯𑁄 𑀅𑀕𑀸𑀭𑀯𑀢𑀸. 𑀲𑀚𑁂𑀝𑁆𑀞𑀓𑀯𑀸𑀲𑀁 𑀅𑀯𑀲𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀧𑁆𑀧𑀝𑀺𑀲𑁆𑀲𑀯𑀪𑀸𑀯𑁄 𑀅𑀧𑁆𑀧𑀝𑀺𑀲𑁆𑀲𑀯𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀤𑁄𑀯𑀘𑀲𑁆𑀲𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀲𑀸 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀬𑁂𑀯 𑀯𑀸𑀢𑀺. 𑀧𑀸𑀧𑀫𑀺𑀢𑁆𑀢𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁄𑀯𑀘𑀲𑁆𑀲𑀢𑀸 𑀧𑀸𑀧𑀫𑀺𑀢𑁆𑀢𑀢𑀸𑀤𑀬𑁄 𑀳𑀺 𑀯𑀺𑀲𑀼𑀁 𑀘𑁂𑀢𑀲𑀺𑀓𑀥𑀫𑁆𑀫𑀸 𑀦𑀸𑀫 𑀦𑀢𑁆𑀣𑀺.

𑁧𑁩𑁩𑁩. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀤𑁆𑀥𑀸𑀢𑀺 𑀅𑀲𑁆𑀲𑀤𑁆𑀥𑀸; 𑀩𑀼𑀤𑁆𑀥𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀦 𑀲𑀤𑁆𑀤𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀻𑀮𑀸𑀢𑀺 𑀲𑀻𑀮𑀲𑁆𑀲 𑀤𑀼𑀦𑁆𑀦𑀸𑀫𑀁 𑀦𑀢𑁆𑀣𑀺, 𑀦𑀺𑀲𑁆𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀲𑁆𑀲𑀼𑀢𑀸𑀢𑀺 𑀲𑀼𑀢𑀭𑀳𑀺𑀢𑀸. 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀘𑁆𑀙𑀭𑀺𑀦𑁄. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀲𑁂𑀯𑀦𑀓𑀯𑀲𑁂𑀦 𑀲𑁂𑀯𑀦𑀸. 𑀩𑀮𑀯𑀲𑁂𑀯𑀦𑀸 𑀦𑀺𑀲𑁂𑀯𑀦𑀸. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑁂𑀯𑀦𑀸 𑀲𑀁𑀲𑁂𑀯𑀦𑀸. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀢𑀻𑀳𑀺𑀧𑀺 𑀲𑁂𑀯𑀦𑀸𑀯 𑀓𑀣𑀺𑀢𑀸. 𑀪𑀚𑀦𑀸𑀢𑀺 𑀉𑀧𑀲𑀗𑁆𑀓𑀫𑀦𑀸. 𑀲𑀫𑁆𑀪𑀚𑀦𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀪𑀚𑀦𑀸. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀪𑀢𑁆𑀢𑀻𑀢𑀺 𑀤𑀴𑁆𑀳𑀪𑀢𑁆𑀢𑀺. 𑀲𑀫𑁆𑀪𑀢𑁆𑀢𑀻𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀪𑀢𑁆𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀤𑁆𑀯𑀻𑀳𑀺𑀧𑀺 𑀤𑀴𑁆𑀳𑀪𑀢𑁆𑀢𑀺 𑀏𑀯 𑀓𑀣𑀺𑀢𑀸. 𑀢𑀁𑀲𑀫𑁆𑀧𑀯𑀗𑁆𑀓𑀢𑀸𑀢𑀺 𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀲𑀫𑁆𑀧𑀯𑀗𑁆𑀓𑀪𑀸𑀯𑁄; 𑀢𑀦𑁆𑀦𑀺𑀦𑁆𑀦𑀢𑀸 𑀢𑀧𑁆𑀧𑁄𑀡𑀢𑀸 𑀢𑀧𑁆𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄.

𑁧𑁩𑁩𑁪. 𑀲𑁄𑀯𑀘𑀲𑁆𑀲𑀢𑀸𑀤𑀼𑀓𑀦𑀺𑀤𑁆𑀤𑁂𑀲𑁄𑀧𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁩𑁬. 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀫𑀸𑀢𑀺𑀓𑀸𑀦𑀺𑀤𑁆𑀤𑁂𑀲𑁂𑀦 ‘𑀧𑀸𑀭𑀸𑀚𑀺𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝’𑀦𑁆𑀢𑀺 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀯𑀺𑀦𑀬𑀦𑀺𑀤𑁆𑀤𑁂𑀲𑁂𑀦 ‘𑀧𑀸𑀭𑀸𑀚𑀺𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢’𑀦𑁆𑀢𑀺 𑀇𑀫𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀲𑀳 𑀯𑀢𑁆𑀣𑀼𑀦𑀸 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸 𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀦𑀸𑀫. 𑀲𑀳 𑀓𑀫𑁆𑀫𑀯𑀸𑀘𑀸𑀬 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸 𑀧𑀦 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀦𑀸𑀫.

𑁧𑁩𑁩𑁮. 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀲𑀫𑀸𑀧𑀢𑁆𑀢𑀺. 𑀲𑀳 𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸 𑀧𑀦 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸 𑀦𑀸𑀫. ‘𑀘𑀦𑁆𑀤𑁂 𑀯𑀸 𑀲𑀽𑀭𑀺𑀬𑁂 𑀯𑀸 𑀦𑀓𑁆𑀔𑀢𑁆𑀢𑁂 𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀯𑀼𑀝𑁆𑀞𑀸𑀦𑀓𑀧𑀜𑁆𑀜𑀸𑀬 𑀅𑀢𑁆𑀣𑀺𑀢𑀸𑀬 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀦𑀸𑀫.

𑁧𑁩𑁪𑁦. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀲𑀯𑀦𑀥𑀸𑀭𑀡𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸 𑀥𑀸𑀢𑀼𑀓𑀼𑀲𑀮𑀢𑀸 𑀦𑀸𑀫. 𑀢𑀸𑀲𑀁𑀬𑁂𑀯 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀚𑀸𑀦𑀦𑀓𑀧𑀜𑁆𑀜𑀸 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸 𑀦𑀸𑀫.

𑁧𑁩𑁪𑁨. 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀲𑀯𑀦𑀥𑀸𑀭𑀡𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸 𑀮𑀢𑀸 𑀦𑀸𑀫. 𑀢𑀻𑀲𑀼𑀧𑀺 𑀯𑀸 𑀏𑀢𑀸𑀲𑀼 𑀓𑀼𑀲𑀮𑀢𑀸𑀲𑀼 𑀉𑀕𑁆𑀕𑀳𑁄 𑀫𑀦𑀲𑀺𑀓𑀸𑀭𑁄 𑀲𑀯𑀦𑀁 𑀲𑀫𑁆𑀫𑀲𑀦𑀁 𑀧𑀝𑀺𑀯𑁂𑀥𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀲𑀯𑀦𑀉𑀕𑁆𑀕𑀳𑀧𑀘𑁆𑀘𑀯𑁂𑀓𑁆𑀔𑀡𑀸 𑀮𑁄𑀓𑀺𑀬𑀸, 𑀧𑀝𑀺𑀯𑁂𑀥𑁄 𑀮𑁄𑀓𑀼𑀢𑁆𑀢𑀭𑁄. 𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸. ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’𑀢𑀺𑀆𑀤𑀻𑀦𑀺 (𑀯𑀺𑀪. 𑀅𑀝𑁆𑀞. 𑁨𑁨𑁫) 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀆𑀯𑀺𑀪𑀯𑀺𑀲𑁆𑀲𑀦𑁆𑀢𑀺. ‘𑀇𑀫𑀺𑀦𑀸 𑀧𑀦 𑀧𑀘𑁆𑀘𑀬𑁂𑀦 𑀇𑀤𑀁 𑀳𑁄𑀢𑀻’𑀢𑀺 𑀚𑀸𑀦𑀦𑀓𑀧𑀜𑁆𑀜𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸 𑀦𑀸𑀫.

𑁧𑁩𑁪𑁪. 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀢𑀸𑀤𑀼𑀓𑀦𑀺𑀤𑁆𑀤𑁂𑀲𑁂 𑀳𑁂𑀢𑀽 𑀧𑀘𑁆𑀘𑀬𑀸𑀢𑀺 𑀉𑀪𑀬𑀫𑁆𑀧𑁂𑀢𑀁 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀁. 𑀘𑀓𑁆𑀔𑀼𑀧𑀲𑀸𑀤𑁄 𑀳𑀺 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀢𑀣𑀸 𑀲𑁄𑀢𑀧𑀲𑀸𑀤𑀸𑀤𑀬𑁄 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁, 𑀅𑀫𑁆𑀩𑀩𑀻𑀚𑀸𑀤𑀻𑀦𑀺 𑀘 𑀅𑀫𑁆𑀩𑀨𑀮𑀸𑀤𑀻𑀦𑀁. 𑀤𑀼𑀢𑀺𑀬𑀦𑀬𑁂 𑀬𑁂 𑀬𑁂 𑀥𑀫𑁆𑀫𑀸𑀢𑀺 𑀯𑀺𑀲𑀪𑀸𑀕𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀦𑀺𑀤𑀲𑁆𑀲𑀦𑀁. 𑀬𑁂𑀲𑀁 𑀬𑁂𑀲𑀦𑁆𑀢𑀺 𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸𑀢𑀺 𑀘𑀓𑁆𑀔𑀼𑀧𑀲𑀸𑀤𑁄 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁂𑀢𑀼 𑀦 𑀧𑀘𑁆𑀘𑀬𑁄. 𑀢𑀣𑀸 𑀲𑁄𑀢𑀧𑀲𑀸𑀤𑀸𑀤𑀬𑁄 𑀅𑀯𑀲𑁂𑀲𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀅𑀫𑁆𑀩𑀸𑀤𑀬𑁄 𑀘 𑀢𑀸𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁪𑁬. 𑀅𑀚𑁆𑀚𑀯𑀫𑀤𑁆𑀤𑀯𑀦𑀺𑀤𑁆𑀤𑁂𑀲𑁂 𑀦𑀻𑀘𑀘𑀺𑀢𑁆𑀢𑀢𑀸𑀢𑀺 𑀧𑀤𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀲𑁆𑀲𑀢𑁆𑀣𑁄 𑁋 𑀫𑀸𑀦𑀸𑀪𑀸𑀯𑁂𑀦 𑀦𑀻𑀘𑀁 𑀘𑀺𑀢𑁆𑀢𑀁 𑀅𑀲𑁆𑀲𑀸𑀢𑀺 𑀦𑀻𑀘𑀘𑀺𑀢𑁆𑀢𑁄. 𑀦𑀻𑀘𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀦𑀻𑀘𑀘𑀺𑀢𑁆𑀢𑀢𑀸. 𑀲𑁂𑀲𑀁 𑀘𑀺𑀢𑁆𑀢𑀼𑀚𑀼𑀓𑀢𑀸𑀘𑀺𑀢𑁆𑀢𑀫𑀼𑀤𑀼𑀢𑀸𑀦𑀁 𑀧𑀤𑀪𑀸𑀚𑀦𑀻𑀬𑁂 𑀆𑀕𑀢𑀫𑁂𑀯.

𑁧𑁩𑁪𑁮. 𑀔𑀦𑁆𑀢𑀺𑀦𑀺𑀤𑁆𑀤𑁂𑀲𑁂 𑀔𑀫𑀦𑀓𑀯𑀲𑁂𑀦 𑀔𑀦𑁆𑀢𑀺. 𑀔𑀫𑀦𑀸𑀓𑀸𑀭𑁄 𑀔𑀫𑀦𑀢𑀸. 𑀅𑀥𑀺𑀯𑀸𑀲𑁂𑀦𑁆𑀢𑀺 𑀏𑀢𑀸𑀬, 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀦𑁆𑀢𑀺, 𑀦 𑀧𑀝𑀺𑀩𑀸𑀳𑀦𑁆𑀢𑀺, 𑀦 𑀧𑀘𑁆𑀘𑀦𑀻𑀓𑀢𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀢𑀸. 𑀅𑀘𑀡𑁆𑀟𑀺𑀓𑀲𑁆𑀲 𑀪𑀸𑀯𑁄 𑀅𑀘𑀡𑁆𑀟𑀺𑀓𑁆𑀓𑀁. 𑀅𑀦𑀲𑀼𑀭𑁄𑀧𑁄𑀢𑀺 𑀅𑀲𑀼𑀭𑁄𑀧𑁄 𑀯𑀼𑀘𑁆𑀘𑀢𑀺 𑀦 𑀲𑀫𑁆𑀫𑀸𑀭𑁄𑀧𑀺𑀢𑀢𑁆𑀢𑀸 𑀤𑀼𑀭𑀼𑀢𑁆𑀢𑀯𑀘𑀦𑀁. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀲𑀼𑀭𑁄𑀧𑁄 𑀲𑀼𑀭𑀼𑀢𑁆𑀢𑀯𑀸𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀲𑀓𑀫𑀦𑀢𑀸, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀪𑀸𑀯𑁄𑀬𑁂𑀯, 𑀦 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀢𑀸𑀢𑀺 𑀅𑀢𑁆𑀣𑁄.

𑁧𑁩𑁪𑁯. 𑀲𑁄𑀭𑀘𑁆𑀘𑀦𑀺𑀤𑁆𑀤𑁂𑀲𑁂 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁. 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁. 𑀓𑀸𑀬𑀺𑀓𑀯𑀸𑀘𑀲𑀺𑀓𑁄𑀢𑀺 𑀇𑀫𑀺𑀦𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀲𑀫𑀼𑀝𑁆𑀞𑀺𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀭𑀘𑁆𑀘𑀦𑁆𑀢𑀺 𑀇𑀤𑀁 𑀧𑀸𑀧𑀢𑁄 𑀲𑀼𑀝𑁆𑀞𑀼 𑀑𑀭𑀢𑀢𑁆𑀢𑀸 𑀲𑁄𑀭𑀘𑁆𑀘𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄𑀢𑀺 𑀇𑀤𑀁 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀓𑀸𑀬𑀯𑀸𑀘𑀸𑀳𑁂𑀯 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺 𑀫𑀦𑀲𑀸𑀧𑀺 𑀆𑀘𑀭𑀢𑀺 𑀏𑀯, 𑀢𑀲𑁆𑀫𑀸 𑀫𑀸𑀦𑀲𑀺𑀓𑀲𑀻𑀮𑀁 𑀧𑀭𑀺𑀬𑀸𑀤𑀸𑀬 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁧𑁩𑁫𑁦. 𑀲𑀸𑀔𑀮𑁆𑀬𑀦𑀺𑀤𑁆𑀤𑁂𑀲𑁂 𑀅𑀡𑁆𑀟𑀓𑀸𑀢𑀺 𑀬𑀣𑀸 𑀲𑀤𑁄𑀲𑁂 𑀭𑀼𑀓𑁆𑀔𑁂 𑀅𑀡𑁆𑀟𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀏𑀯𑀁 𑀲𑀤𑁄𑀲𑀢𑀸𑀬 𑀔𑀼𑀁𑀲𑀦𑀯𑀫𑁆𑀪𑀦𑀸𑀤𑀺𑀯𑀘𑀦𑁂𑀳𑀺 𑀅𑀡𑁆𑀟𑀓𑀸 𑀚𑀸𑀢𑀸. 𑀓𑀓𑁆𑀓𑀲𑀸𑀢𑀺 𑀧𑀽𑀢𑀺𑀓𑀸 𑀲𑀸 𑀬𑀣𑀸 𑀦𑀸𑀫 𑀧𑀽𑀢𑀺𑀭𑀼𑀓𑁆𑀔𑁄 𑀓𑀓𑁆𑀓𑀲𑁄 𑀳𑁄𑀢𑀺 𑀧𑀕𑁆𑀖𑀭𑀺𑀢𑀘𑀼𑀡𑁆𑀡𑁄 𑀏𑀯𑀁 𑀓𑀓𑁆𑀓𑀲𑀸 𑀳𑁄𑀢𑀺. 𑀲𑁄𑀢𑀁 𑀖𑀁𑀲𑀬𑀫𑀸𑀦𑀸 𑀯𑀺𑀬 𑀧𑀯𑀺𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀓𑀓𑁆𑀓𑀲𑀸’𑀢𑀺. 𑀧𑀭𑀓𑀝𑀼𑀓𑀸𑀢𑀺 𑀧𑀭𑁂𑀲𑀁 𑀓𑀝𑀼𑀓𑀸 𑀅𑀫𑀦𑀸𑀧𑀸 𑀤𑁄𑀲𑀚𑀦𑀦𑀻. 𑀧𑀭𑀸𑀪𑀺𑀲𑀚𑁆𑀚𑀦𑀻𑀢𑀺 𑀓𑀼𑀝𑀺𑀮𑀓𑀡𑁆𑀝𑀓𑀲𑀸𑀔𑀸 𑀯𑀺𑀬 𑀘𑀫𑁆𑀫𑁂𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀲𑀚𑁆𑀚𑀦𑀻, 𑀕𑀦𑁆𑀢𑀼𑀓𑀸𑀫𑀸𑀦𑀫𑁆𑀧𑀺 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀮𑀕𑁆𑀕𑀦𑀓𑀸𑀭𑀻. 𑀓𑁄𑀥𑀲𑀸𑀫𑀦𑁆𑀢𑀸𑀢𑀺 𑀓𑁄𑀥𑀲𑁆𑀲 𑀆𑀲𑀦𑁆𑀦𑀸. 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀲𑁆𑀲 𑀯𑀸 𑀅𑀲𑀁𑀯𑀢𑁆𑀢𑀦𑀺𑀓𑀸. 𑀇𑀢𑀺 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀲𑀤𑁄𑀲𑀯𑀸𑀘𑀸𑀬 𑀯𑁂𑀯𑀘𑀦𑀸𑀦𑀺. 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀧𑀳𑀸𑀬𑀸𑀢𑀺 𑀇𑀤𑀁 𑀨𑀭𑀼𑀲𑀯𑀸𑀘𑀁 𑀅𑀧𑁆𑀧𑀚𑀳𑀺𑀢𑁆𑀯𑀸 𑀞𑀺𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑁂 𑀧𑀯𑀢𑁆𑀢𑀸𑀧𑀺 𑀲𑀡𑁆𑀳𑀯𑀸𑀘𑀸 𑀅𑀲𑀡𑁆𑀳𑀯𑀸𑀘𑀸 𑀏𑀯 𑀦𑀸𑀫𑀸𑀢𑀺 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀦𑁂𑀴𑀸𑀢𑀺 𑀏𑀴𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄. 𑀦𑀸𑀲𑁆𑀲𑀸 𑀏𑀴𑀦𑁆𑀢𑀺 𑀦𑁂𑀴𑀸; 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. ‘‘𑀦𑁂𑀴𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 (𑀉𑀤𑀸. 𑁬𑁫; 𑀲𑀁. 𑀦𑀺. 𑁪.𑁩𑁪𑁭; 𑀧𑁂𑀝𑀓𑁄. 𑁨𑁫) 𑀏𑀢𑁆𑀣 𑀯𑀼𑀢𑁆𑀢𑀦𑁂𑀴𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺, 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻; 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺. 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸. 𑀬𑀸 𑀢𑀢𑁆𑀣𑀸𑀢𑀺 𑀬𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀲𑀡𑁆𑀳𑀯𑀸𑀘𑀢𑀸𑀢𑀺 𑀫𑀝𑁆𑀞𑀯𑀸𑀘𑀢𑀸. 𑀲𑀔𑀺𑀮𑀯𑀸𑀘𑀢𑀸𑀢𑀺 𑀫𑀼𑀤𑀼𑀯𑀸𑀘𑀢𑀸. 𑀅𑀨𑀭𑀼𑀲𑀯𑀸𑀘𑀢𑀸𑀢𑀺 𑀅𑀓𑀓𑁆𑀔𑀴𑀯𑀸𑀘𑀢𑀸.

𑁧𑁩𑁫𑁧. 𑀧𑀝𑀺𑀲𑀦𑁆𑀣𑀸𑀭𑀦𑀺𑀤𑁆𑀤𑁂𑀲𑁂 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀆𑀫𑀺𑀲𑀅𑀮𑀸𑀪𑁂𑀦 𑀅𑀢𑁆𑀢𑀦𑀸 𑀲𑀳 𑀧𑀭𑁂𑀲𑀁 𑀙𑀺𑀤𑁆𑀤𑀁 𑀬𑀣𑀸 𑀧𑀺𑀳𑀺𑀢𑀁 𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀏𑀯𑀁 𑀆𑀫𑀺𑀲𑁂𑀦 𑀧𑀝𑀺𑀲𑀦𑁆𑀣𑀭𑀡𑀁. 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀥𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀮𑀸𑀪𑁂𑀦 𑀅𑀢𑁆𑀢𑀦𑀸 𑀲𑀳 𑀧𑀭𑁂𑀲𑀁 𑀙𑀺𑀤𑁆𑀤𑀁 𑀬𑀣𑀸 𑀧𑀺𑀳𑀺𑀢𑀁 𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀏𑀯𑀁 𑀥𑀫𑁆𑀫𑁂𑀦 𑀧𑀝𑀺𑀲𑀦𑁆𑀣𑀭𑀡𑀁. 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀻𑀢𑀺 𑀤𑁆𑀯𑁂𑀬𑁂𑀯 𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑀲𑁆𑀲 𑀙𑀺𑀤𑁆𑀤𑀸𑀦𑀺, 𑀢𑁂𑀲𑀁 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺. 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁂𑀦 𑀯𑀸 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁂𑀦 𑀯𑀸𑀢𑀺 𑀇𑀫𑀺𑀦𑀸 𑀤𑀼𑀯𑀺𑀥𑁂𑀦 𑀧𑀝𑀺𑀲𑀦𑁆𑀣𑀸𑀭𑁂𑀦 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺, 𑀧𑀝𑀺𑀲𑀦𑁆𑀣𑀭𑀢𑀺, 𑀦𑀺𑀭𑀦𑁆𑀢𑀭𑀁 𑀓𑀭𑁄𑀢𑀺.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑀸 𑁋 𑀧𑀝𑀺𑀲𑀦𑁆𑀣𑀸𑀭𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁, 𑀆𑀲𑀦𑀁 𑀤𑀸𑀢𑀩𑁆𑀩𑀁, 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀺𑀢𑀩𑁆𑀩𑀁, 𑀧𑀸𑀤𑀸 𑀥𑁄𑀯𑀺𑀢𑁆𑀯𑀸 𑀫𑀓𑁆𑀔𑁂𑀢𑀩𑁆𑀩𑀸, 𑀲𑀧𑁆𑀧𑀺𑀨𑀸𑀡𑀺𑀢𑁂 𑀲𑀢𑀺 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁, 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀆𑀯𑀸𑀲𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄. 𑀏𑀯𑀁 𑀏𑀓𑀤𑁂𑀲𑁂𑀦 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀓𑀢𑁄 𑀦𑀸𑀫 𑀳𑁄𑀢𑀺.

𑀲𑀸𑀬𑀁 𑀧𑀦 𑀦𑀯𑀓𑀢𑀭𑁂𑀧𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀅𑀦𑀸𑀕𑀢𑁂𑀬𑁂𑀯, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀅𑀯𑀺𑀲𑀬𑁂 𑀅𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀬𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. ‘𑀢𑀼𑀫𑁆𑀳𑁂 𑀓𑀢𑀭𑀪𑀸𑀡𑀓𑀸’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 ‘𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀓𑀢𑀭𑀁 𑀕𑀦𑁆𑀣𑀁 𑀯𑀴𑀜𑁆𑀚𑁂𑀦𑁆𑀢𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀳𑁄𑀦𑀓𑀝𑁆𑀞𑀸𑀦𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀲𑀓𑁆𑀓𑁄𑀢𑀺 𑀲𑀬𑀁 𑀓𑀣𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀏𑀯𑀁 𑀏𑀓𑀤𑁂𑀲𑁂𑀦 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀓𑀢𑁄 𑀦𑀸𑀫 𑀳𑁄𑀢𑀺.

𑀲𑀘𑁂 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑀢𑀺 𑀢𑀁 𑀆𑀤𑀸𑀬 𑀦𑀺𑀩𑀤𑁆𑀥𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀲𑀘𑁂 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺 𑀧𑀼𑀦𑀤𑀺𑀯𑀲𑁂 𑀕𑀫𑀦𑀲𑀪𑀸𑀕𑁂𑀦 𑀢𑀁 𑀆𑀤𑀸𑀬 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑁄. 𑀲𑀘𑁂 𑀅𑀜𑁆𑀜𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀇𑀘𑁆𑀙𑀫𑀸𑀦𑀁 𑀆𑀤𑀸𑀬 𑀕𑀦𑁆𑀢𑀩𑁆𑀩𑀁. ‘𑀦 𑀫𑀬𑁆𑀳𑀁 𑀏𑀲𑀸 𑀤𑀺𑀲𑀸 𑀲𑀪𑀸𑀕𑀸’𑀢𑀺 𑀕𑀦𑁆𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁂 𑀲𑁂𑀲𑀪𑀺𑀓𑁆𑀔𑀽 𑀧𑁂𑀲𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀅𑀢𑁆𑀢𑀦𑀸 𑀮𑀤𑁆𑀥𑀸𑀫𑀺𑀲𑀁 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀯𑀁 ‘𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄’ 𑀓𑀢𑁄 𑀦𑀸𑀫 𑀳𑁄𑀢𑀺.

𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀓𑁂𑀦 𑀧𑀦 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀓𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺? 𑀆𑀕𑀦𑁆𑀢𑀼𑀓𑀲𑁆𑀲 𑀢𑀸𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀕𑀺𑀮𑀸𑀦𑁄 𑀯𑀸 𑀅𑀯𑀲𑁆𑀲𑀺𑀓𑁄 𑀯𑀸 𑀅𑀢𑁆𑀣𑀺, 𑀢𑁂𑀲𑀫𑁆𑀧𑀺 𑀤𑀸𑀢𑀩𑁆𑀩𑀁. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀸𑀢𑀩𑁆𑀩𑀁. 𑀪𑀡𑁆𑀟𑀕𑀸𑀳𑀓𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀸𑀭𑀸𑀡𑀻𑀬𑀥𑀫𑁆𑀫𑀧𑀽𑀭𑀓𑁂𑀦 𑀧𑀦 𑀲𑀢𑀯𑀸𑀭𑀫𑁆𑀧𑀺 𑀲𑀳𑀲𑁆𑀲𑀯𑀸𑀭𑀫𑁆𑀧𑀺 𑀆𑀕𑀢𑀸𑀕𑀢𑀸𑀦𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀧𑀝𑀺𑀲𑀦𑁆𑀣𑀸𑀭𑀓𑁂𑀦 𑀧𑀦 𑀬𑁂𑀦 𑀬𑁂𑀦 𑀦 𑀮𑀤𑁆𑀥𑀁, 𑀢𑀲𑁆𑀲 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀩𑀳𑀺𑀕𑀸𑀫𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑀺𑀡𑁆𑀡𑀓𑀁 𑀯𑀸 𑀅𑀦𑀸𑀣𑀁 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀤𑀺𑀲𑁆𑀯𑀸 𑀢𑁂𑀲𑀫𑁆𑀧𑀺 𑀤𑀸𑀢𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀘𑁄𑀭𑁂𑀳𑀺 𑀓𑀺𑀭 𑀕𑀼𑀢𑁆𑀢𑀲𑀸𑀮𑀕𑀸𑀫𑁂 𑀧𑀳𑀢𑁂 𑀢𑀗𑁆𑀔𑀡𑀜𑁆𑀜𑁂𑀯 𑀏𑀓𑀸 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀸 𑀔𑀻𑀡𑀸𑀲𑀯𑀢𑁆𑀣𑁂𑀭𑀻 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑀸 𑀪𑀡𑁆𑀟𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀦𑀓𑀼𑀮𑀦𑀕𑀭𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀦𑀓𑀼𑀮𑀦𑀕𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀣𑁂𑀭𑀺𑀁 𑀤𑀺𑀲𑁆𑀯𑀸 𑀪𑀢𑁆𑀢𑁂𑀦 𑀆𑀧𑀼𑀘𑁆𑀙𑀺. 𑀲𑀸 ‘𑀧𑀢𑁆𑀢𑁄 𑀫𑁂 𑀦𑀢𑁆𑀣𑀻’𑀢𑀺 𑀆𑀳. 𑀣𑁂𑀭𑁄 ‘𑀇𑀫𑀺𑀦𑀸𑀯 𑀪𑀼𑀜𑁆𑀚𑀣𑀸’𑀢𑀺 𑀲𑀳 𑀧𑀢𑁆𑀢𑁂𑀦 𑀅𑀤𑀸𑀲𑀺. 𑀣𑁂𑀭𑀻 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀆𑀳 𑁋 ‘𑀅𑀚𑁆𑀚 𑀢𑀸𑀯 𑀪𑀺𑀓𑁆𑀔𑀸𑀘𑀸𑀭𑁂𑀦 𑀓𑀺𑀮𑀫𑀺𑀲𑁆𑀲𑀣, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀯𑁄 𑀪𑀺𑀓𑁆𑀔𑀸𑀘𑀸𑀭𑀧𑀭𑀺𑀢𑁆𑀢𑀸𑀲𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀢𑀸𑀢𑀸’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑀲𑁆𑀲 𑀊𑀦𑀓𑀳𑀸𑀧𑀡𑀕𑁆𑀖𑀦𑀓𑁄 𑀧𑀺𑀡𑁆𑀟𑀧𑀸𑀢𑁄 𑀦𑀸𑀫 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄. 𑀅𑀬𑀁 ‘𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄’ 𑀦𑀸𑀫.

𑀇𑀫𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀕𑀳𑀧𑀓𑁆𑀔𑁂 𑀞𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁, 𑀥𑀫𑁆𑀫𑁄 𑀯𑀸𑀘𑁂𑀢𑀩𑁆𑀩𑁄, 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 𑀓𑀭𑀡𑀻𑀬𑀁 𑀓𑀸𑀢𑀩𑁆𑀩𑀁, 𑀅𑀩𑁆𑀪𑀸𑀦𑀯𑀼𑀝𑁆𑀞𑀸𑀦𑀫𑀸𑀦𑀢𑁆𑀢𑀧𑀭𑀺𑀯𑀸𑀲𑀸 𑀤𑀸𑀢𑀩𑁆𑀩𑀸. 𑀧𑀩𑁆𑀩𑀚𑁆𑀚𑀸𑀭𑀳𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 𑀉𑀧𑀲𑀫𑁆𑀧𑀤𑀸𑀭𑀳𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀁 𑀆𑀓𑀗𑁆𑀔𑀫𑀸𑀦𑀸𑀬 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀬𑀁 ‘𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄’ 𑀦𑀸𑀫.

𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀝𑀺𑀲𑀦𑁆𑀣𑀸𑀭𑁂𑀳𑀺 𑀧𑀝𑀺𑀲𑀦𑁆𑀣𑀸𑀭𑀓𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀲𑀪𑀬𑀝𑁆𑀞𑀸𑀦𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺 𑀘𑁄𑀭𑀦𑀸𑀕𑀭𑀜𑁆𑀜𑁄 𑀧𑀢𑁆𑀢𑀕𑁆𑀕𑀳𑀡𑀳𑀢𑁆𑀣𑁂𑀦𑁂𑀯 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑁂𑀦𑁂𑀯 𑀪𑀢𑁆𑀢𑀁 𑀆𑀓𑀺𑀭𑀦𑁆𑀢𑁄 𑀣𑁂𑀭𑁄 𑀯𑀺𑀬. 𑀅𑀮𑀤𑁆𑀥𑀮𑀸𑀪𑀼𑀧𑁆𑀧𑀸𑀤𑀦𑁂 𑀧𑀦 𑀇𑀢𑁄 𑀧𑀮𑀸𑀬𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀢𑁂𑀦 𑀫𑀳𑀸𑀦𑀸𑀕𑀭𑀜𑁆𑀜𑀸 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀗𑁆𑀕𑀳𑀁 𑀮𑀪𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂𑀦 𑀲𑁂𑀢𑀫𑁆𑀩𑀗𑁆𑀕𑀡𑁂 𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑀺𑀢𑀁 𑀫𑀳𑀸𑀪𑁂𑀲𑀚𑁆𑀚𑀤𑀸𑀦𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀉𑀧𑁆𑀧𑀦𑁆𑀦𑀮𑀸𑀪𑀣𑀸𑀯𑀭𑀓𑀭𑀡𑁂 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀝𑀺𑀲𑀦𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑁂 𑀘𑁄𑀭𑁂𑀳𑀺 𑀪𑀡𑁆𑀟𑀓𑀲𑁆𑀲 𑀅𑀯𑀺𑀮𑀼𑀢𑁆𑀢𑀪𑀸𑀯𑁂 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁.

𑁧𑁩𑁫𑁨. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 ‘‘𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀅𑀘𑀺𑀢𑁆𑀢𑀓𑀢𑁆𑀢𑀸; 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺, 𑀅𑀘𑀓𑁆𑀔𑀼𑀓𑀢𑁆𑀢𑀸; 𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑁂𑀦 𑀧𑀦 𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑀻 𑀧𑀦𑁂𑀲𑀸 ‘𑀥𑀦𑀼𑀦𑀸 𑀯𑀺𑀚𑁆𑀚𑀢𑀻’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄𑀢𑀺. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀦 𑀲𑀡𑁆𑀞𑀸𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀳𑀢𑁆𑀣𑀧𑀸𑀤𑀲𑀺𑀢𑀳𑀲𑀺𑀢𑀓𑀣𑀺𑀢𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑀁 𑀆𑀓𑀸𑀭𑀁 𑀕𑀡𑁆𑀳𑀸𑀢𑀺. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀬𑀁𑀓𑀸𑀭𑀡𑀸 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼, 𑀏𑀢𑀁 𑀧𑀼𑀕𑁆𑀕𑀮𑀁 𑀲𑀢𑀺𑀓𑀯𑀸𑀝𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀅𑀧𑀺𑀳𑀺𑀢𑀘𑀓𑁆𑀔𑀼𑀤𑁆𑀯𑀸𑀭𑀁 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀏𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀅𑀦𑀼𑀩𑀦𑁆𑀥𑁂𑀬𑁆𑀬𑀼𑀁 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀁𑀪𑀽𑀢𑁄𑀬𑁂𑀯 𑀘 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀢𑁆𑀣𑀺, 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀧𑀺𑀘 𑀬𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺 𑀢𑀤𑀸 𑀪𑀯𑀗𑁆𑀕𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁, 𑀢𑀢𑁄 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁, 𑀢𑀢𑁄 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀢𑀢𑁄 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀤𑀦𑀦𑁆𑀢𑀭𑀁 𑀚𑀯𑀦𑀁 𑀚𑀯𑀢𑀺. 𑀢𑀢𑁆𑀭𑀸𑀧𑀺 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂 𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀅𑀢𑁆𑀣𑀺. 𑀚𑀯𑀦𑀓𑁆𑀔𑀡𑁂 𑀧𑀦 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀯𑀸 𑀓𑁄𑀲𑀚𑁆𑀚𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀁𑀯𑀭𑁄 𑀳𑁄𑀢𑀺.

𑀏𑀯𑀁 𑀳𑁄𑀦𑁆𑀢𑁄 𑀧𑀦 𑀲𑁄 ‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄’𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺, 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀕𑀩𑁆𑀪𑀸𑀤𑀬𑁄 𑀲𑀼𑀲𑀁𑀯𑀼𑀢𑀸, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀅𑀭𑀓𑁆𑀔𑀺𑀢𑀁 𑀅𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀬𑀤𑀺𑀘𑁆𑀙𑀓𑀁 𑀓𑀭𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺, 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀻𑀢𑀺.

𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸 𑀇𑀫𑁂𑀲𑀦𑁆𑀢𑀺 𑀏𑀯𑀁 𑀲𑀁𑀯𑀭𑀁 𑀅𑀦𑀸𑀧𑀚𑁆𑀚𑀦𑁆𑀢𑀲𑁆𑀲 𑀇𑀫𑁂𑀲𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀬𑀸 𑀅𑀕𑀼𑀢𑁆𑀢𑀺 𑀬𑀸 𑀅𑀕𑁄𑀧𑀦𑀸 𑀬𑁄 𑀅𑀦𑀸𑀭𑀓𑁆𑀔𑁄 𑀬𑁄 𑀅𑀲𑀁𑀯𑀭𑁄, 𑀅𑀣𑀓𑀦𑀁, 𑀅𑀧𑀺𑀤𑀳𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁫𑁩. 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀦𑀺𑀤𑁆𑀤𑁂𑀲𑁂 𑀇𑀥𑁂𑀓𑀘𑁆𑀘𑁄𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀏𑀓𑀘𑁆𑀘𑁄. 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀧𑀜𑁆𑀜𑀸𑀬 𑀅𑀚𑀸𑀦𑀺𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸. 𑀅𑀬𑁄𑀦𑀺𑀲𑁄𑀢𑀺 𑀅𑀦𑀼𑀧𑀸𑀬𑁂𑀦. 𑀆𑀳𑀸𑀭𑀦𑁆𑀢𑀺 𑀅𑀲𑀺𑀢𑀧𑀻𑀢𑀸𑀤𑀺𑀅𑀚𑁆𑀛𑁄𑀳𑀭𑀡𑀻𑀬𑀁. 𑀆𑀳𑀸𑀭𑁂𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀺 𑀅𑀚𑁆𑀛𑁄𑀳𑀭𑀢𑀺. 𑀤𑀯𑀸𑀬𑀸𑀢𑀺𑀆𑀤𑀺 𑀅𑀦𑀼𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀦𑀼𑀧𑀸𑀬𑁂𑀦 𑀳𑀺 𑀆𑀳𑀸𑀭𑁂𑀦𑁆𑀢𑁄 𑀤𑀯𑀢𑁆𑀣𑀸𑀬 𑀫𑀤𑀢𑁆𑀣𑀸𑀬 𑀫𑀡𑁆𑀟𑀦𑀢𑁆𑀣𑀸𑀬 𑀯𑀺𑀪𑀽𑀲𑀦𑀢𑁆𑀣𑀸𑀬 𑀯𑀸 𑀆𑀳𑀸𑀭𑁂𑀢𑀺, 𑀦𑁄 𑀇𑀤𑀫𑀢𑁆𑀣𑀺𑀢𑀁 𑀧𑀝𑀺𑀘𑁆𑀘. 𑀬𑀸 𑀢𑀢𑁆𑀣 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀢𑀺 𑀬𑀸 𑀢𑀲𑁆𑀫𑀺𑀁 𑀅𑀬𑁄𑀦𑀺𑀲𑁄 𑀆𑀳𑀸𑀭𑀧𑀭𑀺𑀪𑁄𑀕𑁂 𑀅𑀲𑀦𑁆𑀢𑀼𑀲𑁆𑀲𑀦𑀸 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑁄. 𑀅𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀅𑀫𑀢𑁆𑀢𑀜𑁆𑀜𑀼𑀪𑀸𑀯𑁄, 𑀧𑀫𑀸𑀡𑀲𑀗𑁆𑀔𑀸𑀢𑀸𑀬 𑀫𑀢𑁆𑀢𑀸𑀬 𑀅𑀚𑀸𑀦𑀦𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀯𑀲𑁂𑀦 𑀧𑀯𑀢𑁆𑀢𑀸 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺.

𑁧𑁩𑁫𑁪. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑁂𑀲𑀧𑀤𑀸𑀦𑀺𑀧𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀳𑁂𑀝𑁆𑀞𑀸 ‘𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺, 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺, 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀻’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀢𑀲𑁆𑀫𑀺𑀁 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺, 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂𑀲𑀼 𑀲𑀼𑀲𑀁𑀯𑀼𑀢𑁂𑀲𑀼, 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀸𑀤𑀬𑁄 𑀅𑀲𑀁𑀯𑀼𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺 𑁋 𑀦𑀕𑀭𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀘𑁄𑀭𑀸𑀦𑀁 𑀧𑀯𑁂𑀲𑁄 𑀦𑀢𑁆𑀣𑀺 𑁋 𑀏𑀯𑀫𑁂𑀯 𑀚𑀯𑀦𑁂 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀫𑁆𑀧𑀺, 𑀆𑀯𑀚𑁆𑀚𑀦𑀸𑀤𑀻𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 ‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄’𑀢𑀺 𑀯𑀼𑀢𑁆𑀢𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁩𑁫𑁫. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀦𑀺𑀤𑁆𑀤𑁂𑀲𑁂 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀉𑀧𑀸𑀬𑁂𑀦 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀤𑀸𑀦𑀺 𑀢𑀁 𑀉𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 ‘𑀦𑁂𑀯 𑀤𑀯𑀸𑀬𑀸’𑀢𑀺 𑀤𑀯𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀦𑀝𑀮𑀗𑁆𑀖𑀓𑀸𑀤𑀬𑁄 𑀤𑀯𑀢𑁆𑀣𑀸𑀬 𑀆𑀳𑀸𑀭𑁂𑀦𑁆𑀢𑀺 𑀦𑀸𑀫. 𑀬𑀜𑁆𑀳𑀺 𑀪𑁄𑀚𑀦𑀁 𑀪𑀼𑀢𑁆𑀢𑀲𑁆𑀲 𑀦𑀘𑁆𑀘𑀕𑀻𑀢𑀓𑀩𑁆𑀬𑀲𑀺𑀮𑁄𑀓𑀲𑀗𑁆𑀔𑀸𑀢𑁄 𑀤𑀯𑁄 𑀅𑀢𑀺𑀭𑁂𑀓𑀢𑀭𑁂𑀦 𑀧𑀝𑀺𑀪𑀸𑀢𑀺, 𑀢𑀁 𑀪𑁄𑀚𑀦𑀁 𑀅𑀥𑀫𑁆𑀫𑁂𑀦 𑀯𑀺𑀲𑀫𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀢𑁂 𑀆𑀳𑀸𑀭𑁂𑀦𑁆𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀦 𑀆𑀳𑀸𑀭𑁂𑀢𑀺.

𑀦 𑀫𑀤𑀸𑀬𑀸𑀢𑀺 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀦𑀁 𑀯𑀟𑁆𑀠𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀫𑀤𑀢𑁆𑀣𑀸𑀬 𑀆𑀳𑀸𑀭𑁂𑀦𑁆𑀢𑀺 𑀦𑀸𑀫. 𑀢𑁂 𑀳𑀺 𑀅𑀢𑁆𑀢𑀦𑁄 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀦𑀁 𑀯𑀟𑁆𑀠𑀦𑀢𑁆𑀣𑀸𑀬 𑀧𑀺𑀡𑁆𑀟𑀭𑀲𑀪𑁄𑀚𑀦𑀸𑀤𑀻𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀦 𑀆𑀳𑀸𑀭𑁂𑀢𑀺.

𑀦 𑀫𑀡𑁆𑀟𑀦𑀸𑀬𑀸𑀢𑀺 𑀲𑀭𑀻𑀭𑀫𑀡𑁆𑀟𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄 𑀫𑀸𑀢𑀼𑀕𑀸𑀫𑀸 𑀅𑀦𑁆𑀢𑁂𑀧𑀼𑀭𑀺𑀓𑀸𑀤𑀬𑁄 𑀘 𑀲𑀧𑁆𑀧𑀺𑀨𑀸𑀡𑀺𑀢𑀁 𑀦𑀸𑀫 𑀧𑀺𑀯𑀦𑁆𑀢𑀺, 𑀢𑁂 𑀳𑀺 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼𑀁 𑀫𑀦𑁆𑀤𑀁 𑀪𑁄𑀚𑀦𑀁 𑀆𑀳𑀸𑀭𑁂𑀦𑁆𑀢𑀺 ‘𑀏𑀯𑀁 𑀦𑁄 𑀅𑀗𑁆𑀕𑀮𑀝𑁆𑀞𑀺 𑀲𑀼𑀲𑀡𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀲𑀭𑀻𑀭𑁂 𑀙𑀯𑀺𑀯𑀡𑁆𑀡𑁄 𑀧𑀲𑀦𑁆𑀦𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀦 𑀆𑀳𑀸𑀭𑁂𑀢𑀺.

𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀲𑀭𑀻𑀭𑁂 𑀫𑀁𑀲𑀯𑀺𑀪𑀽𑀲𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺. 𑀢𑀢𑁆𑀣 𑀦𑀺𑀩𑁆𑀩𑀼𑀤𑁆𑀥𑀫𑀮𑁆𑀮𑀫𑀼𑀝𑁆𑀞𑀺𑀓𑀫𑀮𑁆𑀮𑀸𑀤𑀬𑁄 𑀲𑀼𑀲𑀺𑀦𑀺𑀤𑁆𑀥𑁂𑀳𑀺 𑀫𑀘𑁆𑀙𑀫𑀁𑀲𑀸𑀤𑀻𑀳𑀺 𑀲𑀭𑀻𑀭𑀫𑀁𑀲𑀁 𑀧𑀻𑀡𑁂𑀦𑁆𑀢𑀺 ‘𑀏𑀯𑀁 𑀦𑁄 𑀫𑀁𑀲𑀁 𑀉𑀲𑁆𑀲𑀤𑀁 𑀪𑀯𑀺𑀲𑁆𑀲𑀢𑀺 𑀧𑀳𑀸𑀭𑀲𑀳𑀦𑀢𑁆𑀣𑀸𑀬𑀸’𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀲𑀭𑀻𑀭𑁂 𑀫𑀁𑀲𑀯𑀺𑀪𑀽𑀲𑀦𑀢𑁆𑀣𑀸𑀬 𑀦 𑀆𑀳𑀸𑀭𑁂𑀢𑀺.

𑀬𑀸𑀯𑀤𑁂𑀯𑀸𑀢𑀺 𑀆𑀳𑀸𑀭𑀸𑀳𑀭𑀡𑁂 𑀧𑀬𑁄𑀚𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀤𑀲𑁆𑀲𑀦𑀁. 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸𑀢𑀺 𑀇𑀫𑀲𑁆𑀲 𑀘𑀢𑀼𑀫𑀳𑀸𑀪𑀽𑀢𑀺𑀓𑀓𑀭𑀚𑀓𑀸𑀬𑀲𑁆𑀲 𑀞𑀧𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺. 𑀇𑀤𑀫𑀲𑁆𑀲 𑀆𑀳𑀸𑀭𑀸𑀳𑀭𑀡𑁂 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀸𑀧𑀦𑀸𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺. 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀯𑀺𑀳𑀺𑀁𑀲𑀸 𑀦𑀸𑀫 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀸 𑀔𑀼𑀤𑁆𑀤𑀸. 𑀢𑀲𑁆𑀲𑀸 𑀉𑀧𑀭𑀢𑀺𑀬𑀸 𑀯𑀽𑀧𑀲𑀫𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀲𑀓𑀮𑀁 𑀲𑀸𑀲𑀦𑀁, 𑀢𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀸𑀬 𑀆𑀳𑀸𑀭𑁂𑀢𑀺.

𑀇𑀢𑀻𑀢𑀺 𑀉𑀧𑀸𑀬𑀦𑀺𑀤𑀲𑁆𑀲𑀦𑀁; 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀧𑀼𑀭𑀸𑀡𑀯𑁂𑀤𑀦𑀸 𑀦𑀸𑀫 𑀅𑀪𑀼𑀢𑁆𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸. 𑀢𑀁 𑀧𑀝𑀺𑀳𑀦𑀺𑀲𑁆𑀲𑀸𑀫𑀻𑀢𑀺 𑀆𑀳𑀸𑀭𑁂𑀢𑀺. 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀦𑀯𑀯𑁂𑀤𑀦𑀸 𑀦𑀸𑀫 𑀅𑀢𑀺𑀪𑀼𑀢𑁆𑀢𑀧𑁆𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸. 𑀢𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀆𑀳𑀸𑀭𑁂𑀢𑀺. 𑀅𑀣 𑀯𑀸, ‘𑀦𑀯𑀯𑁂𑀤𑀦𑀸’ 𑀦𑀸𑀫 𑀪𑀼𑀢𑁆𑀢𑀧𑁆𑀧𑀘𑁆𑀘𑀬𑀸 𑀦𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸. 𑀢𑀲𑁆𑀲𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀫𑁂𑀯 𑀆𑀳𑀸𑀭𑁂𑀢𑀺. 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀸𑀧𑀦𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺. 𑀅𑀦𑀯𑀚𑁆𑀚𑀢𑀸 𑀘𑀸𑀢𑀺 𑀏𑀢𑁆𑀣 𑀅𑀢𑁆𑀣𑀺 𑀲𑀸𑀯𑀚𑁆𑀚𑀁 𑀅𑀢𑁆𑀣𑀺 𑀅𑀦𑀯𑀚𑁆𑀚𑀁. 𑀢𑀢𑁆𑀣 𑀅𑀥𑀫𑁆𑀫𑀺𑀓𑀧𑀭𑀺𑀬𑁂𑀲𑀦𑀸 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀡𑀁 𑀅𑀥𑀫𑁆𑀫𑁂𑀦 𑀧𑀭𑀺𑀪𑁄𑀕𑁄𑀢𑀺 𑀇𑀤𑀁 ‘𑀲𑀸𑀯𑀚𑁆𑀚𑀁’ 𑀦𑀸𑀫. 𑀥𑀫𑁆𑀫𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀥𑀫𑁆𑀫𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 ‘𑀅𑀦𑀯𑀚𑁆𑀚𑀁’ 𑀦𑀸𑀫. 𑀏𑀓𑀘𑁆𑀘𑁄 𑀅𑀦𑀯𑀚𑁆𑀚𑁂𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺, ‘𑀮𑀤𑁆𑀥𑀁 𑀫𑁂’𑀢𑀺 𑀓𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀪𑀼𑀜𑁆𑀚𑀢𑀺. 𑀢𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀓𑀺𑀮𑀫𑀢𑀺. 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀪𑁂𑀲𑀚𑁆𑀚𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺. ‘𑀓𑀺𑀁 𑀇𑀤’𑀦𑁆𑀢𑀺 𑀯𑀼𑀢𑁆𑀢𑁂 ‘𑀅𑀲𑀼𑀓𑀲𑁆𑀲 𑀦𑀸𑀫 𑀉𑀤𑀭𑀁 𑀉𑀤𑁆𑀥𑀼𑀫𑀸𑀢’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. ‘𑀏𑀲 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀏𑀯𑀁𑀧𑀓𑀢𑀺𑀓𑁄𑀬𑁂𑀯, 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀧𑀫𑀸𑀡𑀁 𑀦𑀸𑀫 𑀦 𑀚𑀸𑀦𑀸𑀢𑀻’𑀢𑀺 𑀦𑀺𑀦𑁆𑀤𑀦𑁆𑀢𑀺 𑀕𑀭𑀳𑀦𑁆𑀢𑀺. 𑀅𑀬𑀁 𑀅𑀦𑀯𑀚𑁆𑀚𑁂𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 ‘𑀅𑀦𑀯𑀚𑁆𑀚𑀢𑀸 𑀘 𑀪𑀯𑀺𑀲𑁆𑀲𑀢𑀻’𑀢𑀺 𑀆𑀳𑀸𑀭𑁂𑀢𑀺.

𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀺 𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀢𑀢𑁆𑀣 ‘𑀆𑀳𑀭𑀳𑀢𑁆𑀣𑀓𑁄 𑀅𑀮𑀁𑀲𑀸𑀝𑀓𑁄 𑀢𑀢𑁆𑀣𑀯𑀝𑁆𑀝𑀓𑁄 𑀓𑀸𑀓𑀫𑀸𑀲𑀓𑁄 𑀪𑀼𑀢𑁆𑀢𑀯𑀫𑀺𑀢𑀓𑁄’𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀚𑀦𑀁 𑀦 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫. 𑀏𑀢𑁂𑀲𑀼 𑀳𑀺 ‘𑀆𑀳𑀭𑀳𑀢𑁆𑀣𑀓𑁄’ 𑀦𑀸𑀫 𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘𑀆𑀳𑀭 𑀳𑀢𑁆𑀣’𑀦𑁆𑀢𑀺 𑀯𑀤𑀢𑀺. ‘𑀅𑀮𑀁𑀲𑀸𑀝𑀓𑁄’ 𑀦𑀸𑀫 𑀅𑀘𑁆𑀘𑀼𑀤𑁆𑀥𑀼𑀫𑀸𑀢𑀓𑀼𑀘𑁆𑀙𑀺𑀢𑀸𑀬 𑀉𑀝𑁆𑀞𑀺𑀢𑁄𑀧𑀺 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘𑀢𑀢𑁆𑀣𑀯𑀝𑁆𑀝𑀓𑁄’ 𑀦𑀸𑀫 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀧𑀭𑀺𑀯𑀝𑁆𑀝𑀢𑀺. ‘𑀓𑀸𑀓𑀫𑀸𑀲𑀓𑁄’ 𑀦𑀸𑀫 𑀬𑀣𑀸 𑀓𑀸𑀓𑁂𑀳𑀺 𑀆𑀫𑀲𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀆𑀳𑀸𑀭𑁂𑀢𑀺. ‘𑀪𑀼𑀢𑁆𑀢𑀯𑀫𑀺𑀢𑀓𑁄’ 𑀦𑀸𑀫 𑀫𑀼𑀔𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀯𑀫𑀢𑀺. 𑀏𑀯𑀁 𑀅𑀓𑀢𑁆𑀯𑀸 ‘𑀨𑀸𑀲𑀼𑀯𑀺𑀳𑀸𑀭𑁄 𑀘 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀆𑀳𑀸𑀭𑁂𑀢𑀺. 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀆𑀮𑁄𑀧𑁂𑀳𑀺 𑀊𑀦𑀽𑀤𑀭𑀢𑀸. 𑀏𑀢𑁆𑀢𑀓𑀜𑁆𑀳𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀢𑁄 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑀸 𑀲𑀼𑀔𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀏𑀯𑀫𑀸𑀳 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺. ‘𑀦𑁂𑀯 𑀤𑀯𑀸𑀬𑀸’𑀢𑀺𑀳𑀺 𑀏𑀓𑀁 𑀅𑀗𑁆𑀕𑀁, ‘𑀦 𑀫𑀤𑀸𑀬𑀸’𑀢𑀺 𑀏𑀓𑀁, ‘𑀦 𑀫𑀡𑁆𑀟𑀦𑀸𑀬𑀸’𑀢𑀺 𑀏𑀓𑀁, ‘𑀦 𑀯𑀺𑀪𑀽𑀲𑀦𑀸𑀬𑀸’𑀢𑀺 𑀏𑀓𑀁, ‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸’𑀢𑀺 𑀏𑀓𑀁, ‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’𑀢𑀺 𑀏𑀓𑀁, ‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’𑀢𑀺 𑀏𑀓𑀁, ‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀏𑀓𑀁 𑀅𑀗𑁆𑀕𑀁. 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀪𑁄𑀚𑀦𑀸𑀦𑀺𑀲𑀁𑀲𑁄. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫. 𑀉𑀧𑀭𑀺 𑀧𑀦 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀻𑀢𑀺 𑁋 𑀢𑀢𑁆𑀣 ‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’𑀢𑀺 𑀏𑀓𑀁 𑀅𑀗𑁆𑀕𑀁, ‘𑀬𑀸𑀧𑀦𑀸𑀬𑀸’𑀢𑀺 𑀏𑀓𑀁, ‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺’ 𑀏𑀓𑀁, ‘𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’𑀢𑀺 𑀏𑀓𑀁, ‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻’𑀢𑀺 𑀏𑀓𑀁, ‘𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’𑀢𑀺 𑀏𑀓𑀁, ‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀏𑀓𑀁, ‘𑀅𑀦𑀯𑀚𑁆𑀚𑀢𑀸’ 𑀘𑀸𑀢𑀺 𑀏𑀓𑀁. 𑀨𑀸𑀲𑀼𑀯𑀺𑀳𑀸𑀭𑁄 𑀧𑀦 𑀪𑁄𑀚𑀦𑀸𑀦𑀺𑀲𑀁𑀲𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀦𑀸𑀫 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀬𑀼𑀢𑁆𑀢𑀧𑁆𑀧𑀫𑀸𑀡𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺.

𑁧𑁩𑁫𑁬. 𑀫𑀼𑀝𑁆𑀞𑀲𑁆𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀅𑀲𑀢𑀻𑀢𑀺 𑀲𑀢𑀺𑀯𑀺𑀭𑀳𑀺𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀅𑀦𑀦𑀼𑀲𑁆𑀲𑀢𑀺 𑀅𑀧𑁆𑀧𑀝𑀺𑀲𑁆𑀲𑀢𑀻𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀲𑀭𑀡𑀢𑀸𑀢𑀺 𑀅𑀲𑀭𑀡𑀸𑀓𑀸𑀭𑁄. 𑀅𑀥𑀸𑀭𑀡𑀢𑀸𑀢𑀺 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑀢𑀸. 𑀢𑀸𑀬 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀆𑀥𑀸𑀦𑀧𑁆𑀧𑀢𑁆𑀢𑁄 𑀦𑀺𑀥𑀸𑀦𑀓𑁆𑀔𑀫𑁄 𑀦 𑀳𑁄𑀢𑀺. 𑀉𑀤𑀓𑁂 𑀅𑀮𑀸𑀩𑀼𑀓𑀝𑀸𑀳𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀧𑀺𑀮𑀯𑀢𑀻𑀢𑀺 𑀧𑀺𑀮𑀸𑀧𑀦𑀢𑀸. 𑀲𑀁𑀫𑀼𑀲𑀦𑀢𑀸𑀢𑀺 𑀦𑀝𑁆𑀞𑀫𑀼𑀝𑁆𑀞𑀲𑁆𑀲𑀢𑀺𑀢𑀸. 𑀢𑀸𑀬 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀦𑀺𑀓𑁆𑀔𑀺𑀢𑁆𑀢𑀪𑀢𑁆𑀢𑁄 𑀯𑀺𑀬 𑀓𑀸𑀓𑁄, 𑀦𑀺𑀓𑁆𑀔𑀺𑀢𑁆𑀢𑀫𑀁𑀲𑁄 𑀯𑀺𑀬 𑀘 𑀲𑀺𑀗𑁆𑀕𑀸𑀮𑁄 𑀳𑁄𑀢𑀺.

𑁧𑁩𑁬𑁧. 𑀪𑀸𑀯𑀦𑀸𑀩𑀮𑀦𑀺𑀤𑁆𑀤𑁂𑀲𑁂 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸𑀢𑀺 𑀆𑀤𑀺𑀲𑁂𑀯𑀦𑀸. 𑀪𑀸𑀯𑀦𑀸𑀢𑀺 𑀯𑀟𑁆𑀠𑀦𑀸. 𑀩𑀳𑀼𑀮𑀻𑀓𑀫𑁆𑀫𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁.

𑁧𑁩𑁬𑁮. 𑀲𑀻𑀮𑀯𑀺𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀲𑀻𑀮𑀲𑀫𑁆𑀧𑀤𑀸𑀦𑀺𑀤𑁆𑀤𑁂𑀲𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀘 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀦𑀺𑀤𑁆𑀤𑁂𑀲𑀧𑀝𑀺𑀧𑀓𑁆𑀔𑀢𑁄 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀦𑀺𑀤𑁆𑀤𑁂𑀲𑁄 𑀘 𑀤𑀺𑀝𑁆𑀞𑀼𑀧𑀸𑀤𑀸𑀦𑀦𑀺𑀤𑁆𑀤𑁂𑀲𑀧𑀝𑀺𑀧𑀓𑁆𑀔𑀢𑁄. 𑀲𑀻𑀮𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀓𑀺𑀜𑁆𑀘𑀸𑀧𑀺 𑀲𑀻𑀮𑀲𑀫𑁆𑀧𑀤𑀸𑀦𑀺𑀤𑁆𑀤𑁂𑀲𑁂𑀦 𑀲𑀫𑀸𑀦𑁄, 𑀢𑀢𑁆𑀣 𑀧𑀦 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀓𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀲𑀻𑀮𑀁. 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀧𑀝𑀺𑀲𑀗𑁆𑀔𑀸𑀦𑀩𑀮𑀜𑁆𑀘 𑀪𑀸𑀯𑀦𑀸𑀩𑀮𑀜𑁆𑀘, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀲𑀫𑀣𑀦𑀺𑀫𑀺𑀢𑁆𑀢𑀜𑁆𑀘 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀜𑁆𑀘, 𑀧𑀕𑁆𑀕𑀸𑀳𑁄 𑀘 𑀅𑀯𑀺𑀓𑁆𑀔𑁂𑀧𑁄 𑀘, 𑀲𑀻𑀮𑀲𑀫𑁆𑀧𑀤𑀸 𑀘 𑀤𑀺𑀝𑁆𑀞𑀺𑀲𑀫𑁆𑀧𑀤𑀸 𑀘𑀸𑀢𑀺 𑀇𑀫𑁂𑀳𑀺 𑀧𑀦 𑀙𑀳𑀺 𑀤𑀼𑀓𑁂𑀳𑀺 𑀘𑀢𑀼𑀪𑀽𑀫𑀓𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀯 𑀓𑀣𑀺𑀢𑀸.

𑁧𑁩𑁭𑁩. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀦𑁆𑀢𑀺 ‘𑀇𑀤𑀁 𑀓𑀫𑁆𑀫𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’𑀦𑁆𑀢𑀺 𑀚𑀸𑀦𑀦𑀧𑀜𑁆𑀜𑀸. 𑀢𑀢𑁆𑀣 𑀅𑀢𑁆𑀢𑀦𑀸 𑀯𑀸 𑀓𑀢𑀁 𑀳𑁄𑀢𑀼 𑀧𑀭𑁂𑀦 𑀯𑀸 𑀲𑀩𑁆𑀩𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑀁 𑀦𑁄 𑀲𑀓𑀁. 𑀓𑀲𑁆𑀫𑀸? 𑀅𑀢𑁆𑀣𑀪𑀜𑁆𑀚𑀦𑀢𑁄 𑀅𑀦𑀢𑁆𑀣𑀚𑀦𑀦𑀢𑁄 𑀘. 𑀓𑀼𑀲𑀮𑀓𑀫𑁆𑀫𑀁 𑀧𑀦 𑀅𑀦𑀢𑁆𑀣𑀪𑀜𑁆𑀚𑀦𑀢𑁄 𑀅𑀢𑁆𑀣𑀚𑀦𑀦𑀢𑁄 𑀘 ‘𑀲𑀓𑀁’ 𑀦𑀸𑀫. 𑀢𑀢𑁆𑀣 𑀬𑀣𑀸 𑀦𑀸𑀫 𑀲𑀥𑀦𑁄 𑀲𑀪𑁄𑀕𑁄 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀦𑀓𑁆𑀔𑀢𑁆𑀢𑁂 𑀲𑀗𑁆𑀖𑀼𑀝𑁆𑀞𑁂 ‘𑀅𑀳𑀁 𑀆𑀕𑀦𑁆𑀢𑀼𑀓𑁄, 𑀓𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀦𑀓𑁆𑀔𑀢𑁆𑀢𑀁 𑀓𑀻𑀴𑁂𑀬𑁆𑀬’𑀦𑁆𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀬𑀣𑀸 𑀇𑀘𑁆𑀙𑀢𑀺 𑀢𑁂𑀦 𑀢𑁂𑀦 𑀦𑀻𑀳𑀸𑀭𑁂𑀦 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑁄 𑀲𑀼𑀔𑁂𑀦 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀫𑀺𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑁂 𑀞𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀩𑀳𑀼𑀁 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀁 𑀆𑀬𑀽𑀳𑀺𑀢𑁆𑀯𑀸 𑀲𑀼𑀔𑁂𑀦 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀮𑁄𑀫𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀨𑀮𑀜𑀸𑀡𑀸𑀦𑀺𑀬𑁂𑀯.

𑁧𑁩𑁭𑁪. ‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦𑀸’𑀢𑀺𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀸𑀤𑀻𑀦𑁂𑀯 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀯𑀺𑀪𑀢𑁆𑀢𑀸𑀦𑀺.

𑁧𑁩𑁭𑁫. ‘𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦’𑀦𑁆𑀢𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁 𑀯𑀻𑀭𑀺𑀬𑀁 𑀧𑀜𑁆𑀜𑀸𑀕𑀢𑀺𑀓𑀫𑁂𑀯; 𑀧𑀜𑁆𑀜𑀸𑀬 𑀳𑀺 𑀮𑁄𑀓𑀺𑀬𑀝𑁆𑀞𑀸𑀦𑁂 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀝𑁆𑀞𑀸𑀦𑁂 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁭𑁬. 𑀲𑀁𑀯𑁂𑀕𑀤𑀼𑀓𑀦𑀺𑀤𑁆𑀤𑁂𑀲𑁂 𑀚𑀸𑀢𑀺𑀪𑀬𑀦𑁆𑀢𑀺 𑀚𑀸𑀢𑀺𑀁 𑀪𑀬𑀢𑁄 𑀤𑀺𑀲𑁆𑀯𑀸 𑀞𑀺𑀢𑀜𑀸𑀡𑀁. 𑀚𑀭𑀸𑀫𑀭𑀡𑀪𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁩𑁭𑁭. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺𑀆𑀤𑀻𑀳𑀺 𑀚𑀸𑀢𑀺𑀆𑀤𑀻𑀦𑀺 𑀪𑀬𑀢𑁄 𑀤𑀺𑀲𑁆𑀯𑀸 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑀲𑁆𑀲 𑀉𑀧𑀸𑀬𑀧𑀥𑀸𑀦𑀁 𑀓𑀣𑀺𑀢𑀁. 𑀧𑀤𑀪𑀸𑀚𑀦𑀻𑀬𑀲𑁆𑀲 𑀧𑀦𑀢𑁆𑀣𑁄 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁩𑁬𑁭 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁧𑁩𑁭𑁮. ‘𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’𑀢𑀺 𑀧𑀤𑀦𑀺𑀤𑁆𑀤𑁂𑀲𑁂 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀢𑀺 𑀯𑀺𑀲𑁂𑀲𑀓𑀸𑀫𑀢𑀸. 𑀇𑀥𑁂𑀓𑀘𑁆𑀘𑁄 𑀳𑀺 𑀆𑀤𑀺𑀢𑁄𑀯 𑀧𑀓𑁆𑀔𑀺𑀓𑀪𑀢𑁆𑀢𑀁 𑀯𑀸 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀉𑀧𑁄𑀲𑀣𑀺𑀓𑀁 𑀯𑀸 𑀧𑀸𑀝𑀺𑀧𑀤𑀺𑀓𑀁 𑀯𑀸 𑀤𑁂𑀢𑀺, 𑀲𑁄 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀧𑀼𑀦 𑀥𑀼𑀭𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀆𑀯𑀸𑀲𑀁 𑀓𑀸𑀭𑁂𑀢𑀺, 𑀘𑀢𑁆𑀢𑀸𑀭𑁄𑀧𑀺 𑀧𑀘𑁆𑀘𑀬𑁂 𑀤𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀲𑀭𑀡𑀸𑀦𑀺 𑀕𑀡𑁆𑀳𑀸𑀢𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺. 𑀢𑀢𑁆𑀭𑀸𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀢𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀁 𑀦𑀺𑀓𑀸𑀬𑀁 𑀤𑁆𑀯𑁂 𑀦𑀺𑀓𑀸𑀬𑁂𑀢𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀕𑀡𑁆𑀳𑀸𑀢𑀺, 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀪𑀸𑀯𑁂𑀢𑀺, 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀦𑁆𑀢𑀼𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀯𑀺𑀲𑁂𑀲𑀓𑀸𑀫𑀢𑀸 ‘𑀪𑀺𑀬𑁆𑀬𑁄𑀓𑀫𑁆𑀬𑀢𑀸’ 𑀦𑀸𑀫.

𑁧𑁩𑁭𑁯. ‘𑀅𑀧𑁆𑀧𑀝𑀺𑀯𑀸𑀦𑀺𑀢𑀸 𑀘 𑀧𑀥𑀸𑀦𑀲𑁆𑀫𑀺’𑀦𑁆𑀢𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀅𑀥𑀺𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀉𑀓𑁆𑀓𑀡𑁆𑀞𑀫𑀸𑀦𑁄 𑀧𑀥𑀸𑀦𑀁 𑀧𑀝𑀺𑀯𑀸𑀲𑁂𑀢𑀺 𑀦𑀸𑀫, 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀦𑁄 𑀧𑀝𑀺𑀯𑀸𑀲𑁂𑀢𑀺 𑀦𑀸𑀫, 𑀢𑀲𑁆𑀫𑀸 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀓𑀼𑀲𑀮𑀸𑀦𑀁 𑀓𑀭𑀡𑁂 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸. 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀲𑀢𑀢𑀫𑁂𑀯 𑀓𑀭𑀡𑀁. 𑀅𑀝𑁆𑀞𑀺𑀢𑀓𑀺𑀭𑀺𑀬𑀢𑀸𑀢𑀺 𑀔𑀡𑁆𑀟𑀁 𑀅𑀓𑀢𑁆𑀯𑀸 𑀅𑀝𑁆𑀞𑀧𑁂𑀢𑁆𑀯𑀸 𑀓𑀭𑀡𑀁. 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀢𑀸𑀢𑀺 𑀅𑀮𑀻𑀦𑀚𑀻𑀯𑀺𑀢𑀸, 𑀅𑀮𑀻𑀦𑀧𑀯𑀢𑁆𑀢𑀺𑀢𑀸 𑀯𑀸. 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸𑀢𑀺 𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀅𑀦𑀺𑀓𑁆𑀔𑀺𑀧𑀦𑀁. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀢𑀺 𑀓𑀼𑀲𑀮𑀓𑀭𑀡𑁂 𑀯𑀻𑀭𑀺𑀬𑀥𑀼𑀭𑀲𑁆𑀲 𑀅𑀦𑀺𑀓𑁆𑀔𑀺𑀧𑀦𑀁.

𑁧𑁩𑁮𑁦. ‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀯𑀺𑀚𑁆𑀚𑀸’𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑁄𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸 𑀘 𑀔𑀦𑁆𑀥𑀧𑀝𑀺𑀩𑀤𑁆𑀥𑀜𑁆𑀘. 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁. 𑀢𑀬𑀺𑀤𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑀁 𑀯𑀺𑀚𑁆𑀛𑀢𑀻𑀢𑀺 𑀯𑀺𑀚𑁆𑀚𑀸. 𑀢𑀁 𑀢𑀫𑀁 𑀯𑀺𑀚𑁆𑀛𑀺𑀢𑁆𑀯𑀸 𑀢𑁂 𑀔𑀦𑁆𑀥𑁂 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀭𑁄𑀢𑀻𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸𑀧𑀺 𑀯𑀺𑀚𑁆𑀚𑀸.

𑀘𑀼𑀢𑀽𑀧𑀧𑀸𑀢𑁂 𑀜𑀸𑀡𑀦𑁆𑀢𑀺 𑀘𑀼𑀢𑀺𑀬𑀜𑁆𑀘 𑀉𑀧𑀧𑀸𑀢𑁂 𑀘 𑀜𑀸𑀡𑀁. 𑀇𑀤𑀫𑁆𑀧𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀘𑁆𑀙𑀸𑀤𑀓𑀁 𑀢𑀫𑀁 𑀯𑀺𑀚𑁆𑀛𑀢𑀻𑀢𑀺 𑀯𑀺𑀚𑁆𑀚𑀸. 𑀢𑀁 𑀢𑀫𑀁 𑀯𑀺𑀚𑁆𑀛𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀯𑀺𑀤𑀺𑀢𑀸 𑀧𑀸𑀓𑀝𑀸 𑀓𑀭𑁄𑀢𑀻𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸𑀧𑀺 𑀯𑀺𑀚𑁆𑀚𑀸. 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀔𑀬𑀲𑀫𑀬𑁂 𑀜𑀸𑀡𑀁. 𑀢𑀬𑀺𑀤𑀁 𑀘𑀢𑀼𑀲𑀘𑁆𑀘𑀘𑁆𑀙𑀸𑀤𑀓𑀢𑀫𑀁 𑀯𑀺𑀚𑁆𑀛𑀢𑀻𑀢𑀺 𑀯𑀺𑀚𑁆𑀚𑀸. 𑀢𑀁 𑀢𑀫𑀁 𑀯𑀺𑀚𑁆𑀛𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀤𑀺𑀢𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀻𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸𑀧𑀺 𑀯𑀺𑀚𑁆𑀚𑀸.

𑁧𑁩𑁮𑁧. ‘𑀘𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑀸’𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦, 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼𑀫𑀼𑀢𑁆𑀢𑀝𑁆𑀞𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫. 𑀇𑀢𑀭𑀁 𑀧𑀦 ‘𑀦𑀢𑁆𑀣𑀺 𑀏𑀢𑁆𑀣 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀯𑀸𑀦𑀁’, ‘𑀦𑀺𑀕𑁆𑀕𑀢𑀁 𑀯𑀸 𑀢𑀲𑁆𑀫𑀸 𑀯𑀸𑀦𑀸’𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸, 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀘𑁆𑀘𑀦𑁆𑀢𑀁 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀻𑀢𑀺.

𑁧𑁩𑁮𑁨. 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺. 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀨𑀮𑀜𑀸𑀡𑀸𑀦𑀺. 𑀢𑀢𑁆𑀣 𑀧𑀞𑀫𑀫𑀕𑁆𑀕𑀜𑀸𑀡𑀁 𑀧𑀜𑁆𑀘 𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑀁 𑀦𑀺𑀭𑁄𑀥𑁂𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀔𑀬𑁂 𑀜𑀸𑀡𑀁 𑀦𑀸𑀫 𑀚𑀸𑀢𑀁. 𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀁 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂. 𑀢𑀣𑀸 𑀢𑀢𑀺𑀬𑀫𑀕𑁆𑀕𑀜𑀸𑀡𑀁. 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀁 𑀧𑀦 𑀅𑀝𑁆𑀞 𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑀁 𑀦𑀺𑀭𑁄𑀥𑁂𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 ‘𑀔𑀬𑁂 𑀜𑀸𑀡𑀁’ 𑀦𑀸𑀫 𑀚𑀸𑀢𑀁. 𑀢𑀁 𑀢𑀁 𑀫𑀕𑁆𑀕𑀨𑀮𑀜𑀸𑀡𑀁 𑀧𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀔𑀻𑀡𑀦𑁆𑀢𑁂 𑀦𑀺𑀭𑀼𑀤𑁆𑀥𑀦𑁆𑀢𑁂 𑀯𑀽𑀧𑀲𑀫𑀦𑁆𑀢𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑁂 𑀅𑀦𑀼𑀧𑁆𑀧𑀸𑀤𑀦𑁆𑀢𑁂 𑀅𑀧𑁆𑀧𑀯𑀢𑁆𑀢𑀦𑁆𑀢𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀦𑀸𑀫 𑀚𑀸𑀢𑀦𑁆𑀢𑀺.

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀅𑀝𑁆𑀞𑀓𑀣𑀸𑀬

𑀦𑀺𑀓𑁆𑀔𑁂𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀝𑁆𑀞𑀓𑀣𑀸𑀓𑀡𑁆𑀟𑁄

𑀢𑀺𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁩𑁮𑁪. 𑀇𑀤𑀸𑀦𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑀸𑀦𑀦𑁆𑀢𑀭𑀁 𑀞𑀧𑀺𑀢𑀲𑁆𑀲 𑀅𑀝𑁆𑀞𑀓𑀣𑀸𑀓𑀡𑁆𑀟𑀲𑁆𑀲 𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀓𑀲𑁆𑀫𑀸 𑀧𑀦𑁂𑀢𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀦𑀸𑀫 𑀚𑀸𑀢𑀦𑁆𑀢𑀺? 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸. 𑀢𑀻𑀲𑀼𑀧𑀺 𑀳𑀺 𑀧𑀺𑀝𑀓𑁂𑀲𑀼 𑀥𑀫𑁆𑀫𑀦𑁆𑀢𑀭𑀁 𑀆𑀕𑀢𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑀓𑀮𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀦𑀬𑀫𑀕𑁆𑀕𑀁 𑀫𑀳𑀸𑀧𑀓𑀭𑀡𑁂 𑀧𑀜𑁆𑀳𑀼𑀤𑁆𑀥𑀸𑀭𑀁 𑀕𑀡𑀦𑀘𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀸𑀧𑀺 𑀅𑀝𑁆𑀞𑀓𑀣𑀸𑀓𑀡𑁆𑀟𑀢𑁄𑀬𑁂𑀯 𑀲𑀫𑀸𑀦𑁂𑀢𑀼𑀁 𑀯𑀝𑁆𑀝𑀢𑀺.

𑀓𑀼𑀢𑁄 𑀧𑀪𑀯𑀁 𑀧𑀦 𑀏𑀢𑀦𑁆𑀢𑀺? 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀪𑀯𑀁. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀳𑀺 𑀏𑀓𑀲𑁆𑀲 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀅𑀢𑁆𑀣𑀼𑀤𑁆𑀥𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀓𑀣𑁂𑀢𑁆𑀯𑀸 𑀅𑀤𑀸𑀲𑀺. 𑀇𑀤𑀁 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀦 𑀲𑀸𑀯𑀓𑀯𑀺𑀲𑀬𑁄, 𑀦 𑀲𑀸𑀯𑀓𑀕𑁄𑀘𑀭𑁄; 𑀩𑀼𑀤𑁆𑀥𑀯𑀺𑀲𑀬𑁄 𑀏𑀲, 𑀩𑀼𑀤𑁆𑀥𑀕𑁄𑀘𑀭𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀧𑀼𑀘𑁆𑀙𑀺𑀢𑁄 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀣𑁂𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀝𑁆𑀞𑀓𑀣𑀸𑀓𑀡𑁆𑀟𑀁 𑀓𑀣𑁂𑀢𑁆𑀯𑀸 𑀅𑀤𑀸𑀲𑀺. 𑀓𑀣𑀁? 𑀪𑀕𑀯𑀸 𑀳𑀺 ‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀧𑀼𑀘𑁆𑀙𑀺. ‘𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫 𑀓𑀢𑀫𑁂’𑀢𑀺 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 ‘𑀦𑀦𑀼 𑀬𑀁 𑀫𑀬𑀸 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀽𑀫𑀺𑀪𑁂𑀤𑀢𑁄 𑀓𑀼𑀲𑀮𑀁 𑀤𑀲𑁆𑀲𑀺𑀢𑀁, 𑀲𑀩𑁆𑀩𑀫𑁆𑀧𑀺 𑀢𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀓𑀡𑁆𑀡𑀺𑀓𑀁 𑀓𑀡𑁆𑀡𑀺𑀓𑀁 𑀖𑀝𑀁 𑀖𑀝𑀁 𑀕𑁄𑀘𑁆𑀙𑀓𑀁 𑀕𑁄𑀘𑁆𑀙𑀓𑀁 𑀓𑀢𑁆𑀯𑀸 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀓𑀣𑁂𑀢𑁆𑀯𑀸 𑀅𑀤𑀸𑀲𑀺.

𑀢𑀢𑁆𑀣 𑀘𑀢𑀽𑀲𑀽𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀅𑀧𑀭𑀺𑀬𑀸𑀧𑀦𑁆𑀦𑀸𑀲𑀼. 𑀓𑀼𑀲𑀮𑀦𑁆𑀢𑀺 𑀨𑀲𑁆𑀲𑀸𑀤𑀺𑀪𑁂𑀤𑀁 𑀓𑀼𑀲𑀮𑀁. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀓𑀼𑀲𑀮𑀸 𑀦𑀸𑀫.

𑁧𑁩𑁮𑁫. 𑀅𑀓𑀼𑀲𑀮𑀸𑀦𑀁 𑀧𑀦 𑀪𑀽𑀫𑀺𑀯𑀲𑁂𑀦 𑀪𑁂𑀤𑀸𑀪𑀸𑀯𑀢𑁄 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀆𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑁄. 𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀸𑀤𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁. 𑀬𑀣𑀸 𑀧𑀦 ‘𑀭𑀸𑀚𑀸 𑀆𑀕𑀢𑁄’𑀢𑀺 𑀯𑀼𑀢𑁆𑀢𑁂 𑀅𑀫𑀘𑁆𑀘𑀸𑀤𑀻𑀦𑀫𑁆𑀧𑀺 𑀆𑀕𑀫𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀁 ‘𑀘𑀺𑀢𑁆𑀢𑀼𑀧𑁆𑀧𑀸𑀤𑀸’𑀢𑀺 𑀯𑀼𑀢𑁆𑀢𑁂 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺. 𑀲𑀩𑁆𑀩𑀢𑁆𑀣 𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑁆𑀕𑀳𑀡𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀘𑀺𑀢𑁆𑀢𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁄 𑀧𑀭𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄𑀢𑀺𑀆𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀓𑀤𑀼𑀓𑀪𑀸𑀚𑀦𑀻𑀬𑀧𑀤𑀸𑀦𑀁 𑀅𑀢𑁆𑀣𑁄, 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼 𑀘 𑀲𑀼𑀔𑀸𑀤𑀻𑀦𑀁 𑀦𑀯𑀢𑁆𑀢𑀩𑁆𑀩𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀬𑀢𑁆𑀣𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀧𑀦 𑀯𑀓𑁆𑀔𑀸𑀫.

𑁧𑁪𑁨𑁦. 𑀢𑀢𑁆𑀣 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀢𑀸𑀯 𑀲𑀩𑁆𑀩𑁄 𑀓𑀸𑀫𑀸𑀯𑀘𑀭𑀲𑁆𑀲 𑀯𑀺𑀧𑀸𑀓𑁄𑀢𑀺 𑀏𑀢𑁆𑀣 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀦𑀺𑀲𑁆𑀲𑀸𑀬 𑀦𑀺𑀬𑀫𑁂𑀦𑁂𑀯 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀪𑁂𑀤𑁂 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀧𑀦 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 𑀦𑀺𑀬𑀫𑀢𑁄 𑀭𑀽𑀧𑀸𑀤𑀻𑀦𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀯𑀲𑁂𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀦𑀺𑀬𑀫𑀢𑁄 𑀭𑀽𑀧𑀸𑀤𑀻𑀦𑀺 𑀙 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀯𑀲𑁂𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀦𑀺𑀬𑀫𑀢𑁄 𑀭𑀽𑀧𑀸𑀤𑀻𑀦𑀺 𑀙 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀧𑀭𑀺𑀢𑁆𑀢𑀁 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀧𑀯𑀢𑁆𑀢𑀺𑀬𑀁 𑀪𑀯𑀗𑁆𑀕𑀯𑀲𑁂𑀦, 𑀧𑀭𑀺𑀬𑁄𑀲𑀸𑀦𑁂 𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀅𑀝𑁆𑀞 𑀧𑀦 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀘 𑀧𑀭𑀺𑀢𑁆𑀢𑀥𑀫𑁆𑀫𑁂𑀬𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀧𑀜𑁆𑀘𑀤𑁆𑀯𑀸𑀭𑁂 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀦𑀸𑀕𑀢𑁂𑀧𑀺 𑀧𑀭𑀺𑀢𑁆𑀢𑁂 𑀭𑀽𑀧𑀸𑀤𑀺𑀥𑀫𑁆𑀫𑁂𑀬𑁂𑀯 𑀆𑀭𑀩𑁆𑀪 𑀔𑀻𑀡𑀸𑀲𑀯𑀸𑀦𑀁 𑀧𑀳𑀝𑁆𑀞𑀸𑀓𑀸𑀭𑀁 𑀓𑀼𑀭𑀼𑀫𑀸𑀦𑀸 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀏𑀯𑀫𑀺𑀫𑁂 𑀧𑀜𑁆𑀘𑀯𑀻𑀲𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀓𑀦𑁆𑀢𑁂𑀦𑁂𑀯 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁨𑁧. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀫𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀳𑁂𑀝𑁆𑀞𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀏𑀯 𑀫𑀕𑁆𑀕𑀨𑀮𑀥𑀫𑁆𑀫𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸.

𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀅𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑀯𑀦𑀸𑀤𑀻𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀅𑀢𑀺𑀧𑀕𑀼𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀜𑁆𑀘𑀧𑀡𑁆𑀡𑀸𑀲𑀸𑀬 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 ‘𑀲𑀢𑁆𑀢𑁄 𑀲𑀢𑁆𑀢𑁄’𑀢𑀺 𑀧𑀭𑀸𑀫𑀲𑀦𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀢𑁂𑀦𑁂𑀯𑀸𑀓𑀸𑀭𑁂𑀦 𑀲𑀢𑁆𑀢𑀯𑀻𑀲𑀢𑀺 𑀫𑀳𑀕𑁆𑀕𑀢𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀸𑀮𑁂 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀬𑁂𑀯 𑀥𑀫𑁆𑀫𑁂 𑀆𑀭𑀩𑁆𑀪 𑀓𑁂𑀯𑀮𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀯𑀲𑁂𑀦, 𑀧𑀯𑀢𑁆𑀢𑀺𑀬𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀤𑁄𑀫𑀦𑀲𑁆𑀲𑀯𑀲𑁂𑀦, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀦𑀺𑀝𑁆𑀞𑀗𑁆𑀕𑀢𑀯𑀲𑁂𑀦, 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀯𑀺𑀓𑁆𑀔𑁂𑀧𑀯𑀲𑁂𑀦 𑀅𑀯𑀽𑀧𑀲𑀫𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀼 𑀧𑀦 𑀏𑀓𑀥𑀫𑁆𑀫𑁄𑀧𑀺 𑀅𑀧𑁆𑀧𑀫𑀸𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸.

𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑀯𑀦𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀕𑁄𑀢𑁆𑀭𑀪𑀼𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀘 𑀦𑁂𑀲𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦𑁂𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀢𑀁 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁 𑀆𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀁 𑀆𑀮𑁄𑀓𑀓𑀲𑀺𑀡𑀘𑀢𑀼𑀢𑁆𑀣𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀢𑁆𑀣𑀁 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀁 𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁 𑀤𑀺𑀩𑁆𑀩𑀲𑁄𑀢𑀘𑀢𑀼𑀢𑁆𑀣𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀘𑀢𑀼𑀢𑁆𑀣𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀦𑁆𑀢𑀺 𑀓𑀼𑀲𑀮𑀢𑁄𑀧𑀺 𑀓𑀺𑀭𑀺𑀬𑀢𑁄𑀧𑀺 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺.

𑀢𑀢𑁆𑀣 ‘𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁’ 𑀦𑀸𑀫 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀢𑀜𑁆𑀳𑀺 𑀯𑀺𑀧𑀲𑁆𑀲𑀦𑀸𑀬𑀧𑀺 𑀧𑀸𑀤𑀓𑀁 𑀳𑁄𑀢𑀺, 𑀅𑀪𑀺𑀜𑁆𑀜𑀸𑀦𑀫𑁆𑀧𑀺, 𑀦𑀺𑀭𑁄𑀥𑀲𑁆𑀲𑀸𑀧𑀺, 𑀯𑀝𑁆𑀝𑀲𑁆𑀲𑀸𑀧𑀺 𑀧𑀸𑀤𑀓𑀁 𑀳𑁄𑀢𑀺𑀬𑁂𑀯𑀸𑀢𑀺 𑀲𑀩𑁆𑀩𑀢𑁆𑀣𑀧𑀸𑀤𑀓𑀦𑁆𑀢𑀺 𑀯𑀼𑀢𑁆𑀢𑀁. ‘𑀆𑀓𑀸𑀲𑀓𑀲𑀺𑀡𑀆𑀮𑁄𑀓𑀓𑀲𑀺𑀡𑀘𑀢𑀼𑀢𑁆𑀣𑀸𑀦𑀺’ 𑀧𑀦 𑀯𑀺𑀧𑀲𑁆𑀲𑀦𑀸𑀬𑀧𑀺 𑀅𑀪𑀺𑀜𑁆𑀜𑀸𑀦𑀫𑁆𑀧𑀺 𑀯𑀝𑁆𑀝𑀲𑁆𑀲𑀸𑀧𑀺 𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀭𑁄𑀥𑀧𑀸𑀤𑀓𑀸𑀦𑁂𑀯 𑀦 𑀳𑁄𑀦𑁆𑀢𑀺. ‘𑀩𑁆𑀭𑀳𑁆𑀫𑀯𑀺𑀳𑀸𑀭𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀸𑀦𑀺’ 𑀯𑀺𑀧𑀲𑁆𑀲𑀦𑀸𑀬 𑀘𑁂𑀯 𑀯𑀝𑁆𑀝𑀲𑁆𑀲 𑀘 𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺, 𑀅𑀪𑀺𑀜𑁆𑀜𑀸𑀦𑀁 𑀧𑀦 𑀦𑀺𑀭𑁄𑀥𑀲𑁆𑀲 𑀘 𑀧𑀸𑀤𑀓𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑀢𑁆𑀣 𑀤𑀲𑀯𑀺𑀥𑀫𑁆𑀧𑀺 𑀓𑀲𑀺𑀡𑀚𑁆𑀛𑀸𑀦𑀁 𑀓𑀲𑀺𑀡𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀢𑁆𑀣𑀁 𑀲𑀢𑁆𑀢𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸, 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀁 𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀧𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀦𑀸𑀫 𑀳𑁄𑀢𑀺.

‘𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁’ 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀣𑀁? 𑀢𑀜𑁆𑀳𑀺 𑀬𑀤𑀸 𑀓𑀸𑀬𑀁 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀺, 𑀫𑀳𑀕𑁆𑀕𑀢𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺, 𑀲𑀫𑀸𑀭𑁄𑀧𑁂𑀢𑀺, 𑀢𑀤𑀸 𑀉𑀧𑀬𑁄𑀕𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀭𑀽𑀧𑀓𑀸𑀬𑀸𑀭𑀫𑁆𑀫𑀡𑀢𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀤𑀸 𑀘𑀺𑀢𑁆𑀢𑀁 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺, 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀭𑀽𑀧𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀲𑀫𑀸𑀭𑁄𑀧𑁂𑀢𑀺, 𑀢𑀤𑀸 𑀉𑀧𑀬𑁄𑀕𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺.

‘𑀤𑀺𑀩𑁆𑀩𑀲𑁄𑀢𑀘𑀢𑀼𑀢𑁆𑀣𑀁’ 𑀲𑀤𑁆𑀤𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯. ‘𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁’ 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀣𑀁? 𑀢𑀜𑁆𑀳𑀺 𑀧𑀭𑁂𑀲𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀫𑀕𑁆𑀕𑀨𑀮𑀚𑀸𑀦𑀦𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀢𑁆𑀣 𑀘 𑀧𑀼𑀣𑀼𑀚𑁆𑀚𑀦𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀯𑀸 𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀢𑀺 𑀏𑀯𑀁 𑀬𑀸𑀯 𑀅𑀭𑀳𑀢𑁄 𑀦𑁂𑀢𑀩𑁆𑀩𑀁. 𑀅𑀭𑀳𑀸 𑀧𑀦 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀅𑀜𑁆𑀜𑁄𑀧𑀺 𑀘 𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀲𑁆𑀲𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. ‘𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀘𑀢𑀼𑀢𑁆𑀣𑀁’ 𑀓𑀸𑀫𑀸𑀯𑀘𑀭𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁.

‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁’ 𑀭𑀽𑀧𑀸𑀭𑀫𑁆𑀫𑀡𑀢𑁆𑀢𑀸 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯. ‘𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁’ 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀣𑀁? 𑀢𑀜𑁆𑀳𑀺 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. 𑀅𑀢𑀻𑀢𑁂 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀳𑀺 𑀯𑀸 𑀪𑀸𑀯𑀺𑀢𑀫𑀕𑁆𑀕𑀁 𑀲𑀘𑁆𑀙𑀺𑀓𑀢𑀨𑀮𑀜𑁆𑀘 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀅𑀢𑀻𑀢𑁂 𑀩𑀼𑀤𑁆𑀥𑀸 𑀫𑀕𑁆𑀕𑀁 𑀪𑀸𑀯𑀬𑀺𑀁𑀲𑀼, 𑀨𑀮𑀁 𑀲𑀘𑁆𑀙𑀸𑀓𑀁𑀲𑀼, 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀽𑀢𑀺 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀧𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀅𑀢𑀻𑀢𑁂 ‘𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸’ 𑀅𑀳𑁄𑀲𑀺. 𑀢𑀲𑁆𑀲 ‘𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀫𑀸𑀢𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀕𑁄𑀢𑁆𑀢𑀧𑀣𑀯𑀻𑀦𑀺𑀫𑀺𑀢𑁆𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀳𑁄𑀢𑀺.

‘𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑁂’𑀧𑀺 𑀏𑀲𑁂𑀯 𑀦𑀬𑁄. 𑀢𑀫𑁆𑀧𑀺 𑀅𑀬𑀁 𑀅𑀦𑀸𑀕𑀢𑁂 ‘𑀓𑀸𑀫𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. ‘𑀭𑀽𑀧𑀸𑀯𑀘𑀭𑁂 𑀯𑀸 𑀅𑀭𑀽𑀧𑀸𑀯𑀘𑀭𑁂 𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. ‘𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺’ ‘𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺 𑀚𑀸𑀦𑀦𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀅𑀦𑀸𑀕𑀢𑁂 ‘‘𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀲𑀼𑀩𑁆𑀭𑀳𑁆𑀫𑀸 𑀦𑀸𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀩𑁆𑀭𑀳𑁆𑀫𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀕𑁄𑀢𑁆𑀢𑀚𑀸𑀦𑀦𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀅𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀁 𑀧𑀦 𑀆𑀲𑀯𑀸𑀦𑀁 𑀔𑀬𑀘𑀢𑀼𑀢𑁆𑀣𑀜𑁆𑀘 𑀧𑀸𑀴𑀺𑀬𑀁 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀓𑀣𑁂𑀲𑁆𑀲𑀸𑀫𑀺. 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀏𑀢𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀸. 𑀢𑀲𑁆𑀲𑀸 𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑀫𑁆𑀫𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀘𑀤𑁆𑀯𑀸𑀭𑁂 𑀧𑀦 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀯 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀤𑀻𑀦𑀺 𑀧𑀭𑀺𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀥𑀫𑁆𑀫𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀺. 𑀏𑀢𑁆𑀣 𑀳𑀺 𑀭𑀽𑀧𑀸𑀯𑀘𑀭𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀕𑁆𑀖𑀸𑀝𑀺𑀫𑀸𑀓𑀸𑀲𑁂, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀸𑀧𑀕𑀫𑁂𑀢𑀺.

𑁧𑁪𑁨𑁯. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸 𑀅𑀝𑁆𑀞 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀫𑀕𑁆𑀕𑁂𑀦 𑀧𑀦 𑀅𑀲𑀳𑀚𑀸𑀢𑀢𑁆𑀢𑀸 𑀦 𑀫𑀕𑁆𑀕𑀳𑁂𑀢𑀼𑀓𑀸, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀅𑀜𑁆𑀜𑀥𑀫𑁆𑀫𑀸𑀭𑀫𑁆𑀫𑀡𑀓𑀸𑀮𑁂 𑀦 𑀯𑀢𑁆𑀢𑀩𑁆𑀩𑀸 𑀫𑀕𑁆𑀕𑀸𑀭𑀫𑁆𑀫𑀡𑀸𑀢𑀺𑀧𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑁄𑀢𑀺𑀧𑀺. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀸 𑀳𑁂𑀢𑀼𑀦𑁄 𑀅𑀢𑁆𑀣𑀺𑀢𑀸𑀬 𑀏𑀓𑀦𑁆𑀢𑀢𑁄 𑀫𑀕𑁆𑀕𑀳𑁂𑀢𑀼𑀓𑀸𑀯. 𑀯𑀻𑀭𑀺𑀬𑀁 𑀧𑀦 𑀯𑀻𑀫𑀁𑀲𑀁 𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑀸 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀚𑁂𑀝𑁆𑀞𑀓𑀓𑀸𑀮𑁂 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄𑀢𑀺.

𑀤𑁆𑀯𑀸𑀤𑀲𑀯𑀺𑀥𑁂 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀸𑀤𑀻𑀦𑀺 𑀦𑀯 𑀛𑀸𑀦𑀸𑀦𑀺 𑀦𑁂𑀯 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺 𑀦 𑀫𑀕𑁆𑀕𑀳𑁂𑀢𑀼𑀓𑀸𑀦𑀺 𑀦 𑀫𑀕𑁆𑀕𑀸𑀥𑀺𑀧𑀢𑀻𑀦𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀸𑀦𑀺 𑀧𑀦 𑀅𑀭𑀺𑀬𑀸𑀦𑀁 𑀫𑀕𑁆𑀕𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀫𑀕𑁆𑀕𑁂𑀦 𑀧𑀦 𑀅𑀲𑀳𑀚𑀸𑀢𑀢𑁆𑀢𑀸 𑀦 𑀫𑀕𑁆𑀕𑀳𑁂𑀢𑀼𑀓𑀸𑀦𑀺, 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀦 𑀫𑀕𑁆𑀕𑀸𑀥𑀺𑀧𑀢𑀻𑀦𑀺. 𑀓𑀲𑁆𑀫𑀸 𑀧𑀦𑁂𑀢𑀸𑀦𑀺 𑀦 𑀫𑀕𑁆𑀕𑀁 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺? 𑀅𑀢𑁆𑀢𑀦𑁄 𑀫𑀳𑀕𑁆𑀕𑀢𑀢𑀸𑀬. 𑀬𑀣𑀸 𑀳𑀺 𑀭𑀸𑀚𑀸𑀦𑀁 𑀲𑀩𑁆𑀩𑁄 𑀮𑁄𑀓𑁄 𑀕𑀭𑀼𑀁 𑀓𑀭𑁄𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀦 𑀓𑀭𑁄𑀦𑁆𑀢𑀺. 𑀦 𑀳𑀺 𑀢𑁂 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀤𑀳𑀭𑀓𑀸𑀮𑁂 𑀯𑁄𑀳𑀭𑀺𑀢𑀦𑀬𑁂𑀦𑁂𑀯 𑀯𑁄𑀳𑀭𑀦𑁆𑀢𑀺. 𑀏𑀯𑀫𑁂𑀢𑀸𑀦𑀺𑀧𑀺 𑀅𑀢𑁆𑀢𑀦𑁄 𑀫𑀳𑀕𑁆𑀕𑀢𑀢𑀸𑀬 𑀦 𑀫𑀕𑁆𑀕𑀁 𑀕𑀭𑀼𑀁 𑀓𑀭𑁄𑀦𑁆𑀢𑀺.

𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀺 𑀅𑀭𑀺𑀬𑀸𑀦𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀧𑀘𑁆𑀘𑀯𑁂𑀓𑁆𑀔𑀡𑀧𑀼𑀭𑁂𑀘𑀸𑀭𑀺𑀓𑀢𑁆𑀢𑀸 𑀫𑀕𑁆𑀕𑀸𑀭𑀫𑁆𑀫𑀡𑀸 𑀳𑁄𑀢𑀺, 𑀫𑀕𑁆𑀕𑁂𑀦 𑀅𑀲𑀳𑀚𑀸𑀢𑀢𑁆𑀢𑀸 𑀧𑀦 𑀦 𑀫𑀕𑁆𑀕𑀳𑁂𑀢𑀼𑀓𑀸, 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀦 𑀫𑀕𑁆𑀕𑀸𑀥𑀺𑀧𑀢𑀺. 𑀓𑀲𑁆𑀫𑀸 𑀕𑀭𑀼𑀁 𑀦 𑀓𑀭𑁄𑀢𑀻𑀢𑀺? 𑀅𑀢𑁆𑀢𑀦𑁄 𑀅𑀳𑁂𑀢𑀼𑀓𑀢𑀸𑀬 𑀳𑀻𑀦𑀢𑀸𑀬 𑀚𑀴𑀢𑀸𑀬. 𑀬𑀣𑀸 𑀳𑀺 𑀭𑀸𑀚𑀸𑀦𑀁 𑀲𑀩𑁆𑀩𑁄 𑀮𑁄𑀓𑁄 𑀕𑀭𑀼𑀁 𑀓𑀭𑁄𑀢𑀺, 𑀅𑀢𑁆𑀢𑀦𑁄 𑀧𑀭𑀺𑀚𑀦𑀸 𑀧𑀦 𑀔𑀼𑀚𑁆𑀚𑀯𑀸𑀫𑀦𑀓𑀘𑁂𑀝𑀓𑀸𑀤𑀬𑁄 𑀅𑀢𑁆𑀢𑀦𑁄 𑀅𑀜𑁆𑀜𑀸𑀡𑀢𑀸𑀬 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀯𑀺𑀬 𑀦𑀸𑀢𑀺𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀇𑀤𑀫𑁆𑀧𑀺 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀅𑀳𑁂𑀢𑀼𑀓𑀢𑀸𑀬 𑀳𑀻𑀦𑀢𑀸𑀬 𑀚𑀴𑀢𑀸𑀬 𑀫𑀕𑁆𑀕𑀁 𑀕𑀭𑀼𑀁 𑀦 𑀓𑀭𑁄𑀢𑀺.

𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀤𑀻𑀦𑀺 𑀜𑀸𑀡𑀸𑀪𑀸𑀯𑁂𑀦 𑀘𑁂𑀯 𑀮𑁄𑀓𑀺𑀬𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀘 𑀫𑀕𑁆𑀕𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑀁 𑀦 𑀮𑀪𑀦𑁆𑀢𑀺, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑁧𑁪𑁩𑁨. 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀫𑁆𑀫𑀸 𑀳𑁂𑀝𑁆𑀞𑀸 𑀅𑀢𑀻𑀢𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑀸 𑀏𑀓𑀦𑁆𑀢𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀸𑀯.

𑁧𑁪𑁩𑁩. 𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻𑀢𑀺 𑀦𑀺𑀬𑀫𑁂𑀦 𑀧𑀸𑀝𑀺𑀬𑁂𑀓𑁆𑀓𑀁 𑀘𑀺𑀢𑁆𑀢𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. 𑀦𑀦𑀼 𑀘 𑀅𑀦𑀸𑀕𑀢𑀁𑀲𑀜𑀸𑀡𑀁 𑀏𑀓𑀦𑁆𑀢𑁂𑀦 𑀅𑀦𑀸𑀕𑀢𑀸𑀭𑀫𑁆𑀫𑀡𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺? 𑀦𑁄 𑀦 𑀧𑀯𑀢𑁆𑀢𑀢𑀺. 𑀧𑀸𑀝𑀺𑀬𑁂𑀓𑁆𑀓𑀁 𑀧𑀦 𑀏𑀢𑀁 𑀏𑀓𑀁 𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀜𑁆𑀜𑁂𑀳𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀳𑀺 𑀫𑀺𑀲𑁆𑀲𑀓𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻’𑀢𑀺.

𑁧𑁪𑁩𑁪. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀦𑀸𑀫. 𑀤𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣 𑀅𑀝𑁆𑀞 𑀢𑀸𑀯 𑀲𑀳𑁂𑀢𑀼𑀓𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸. 𑀪𑀯𑀗𑁆𑀕𑀘𑀼𑀢𑀺𑀓𑀸𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀧𑀦 𑀆𑀭𑀩𑁆𑀪 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀓𑀸𑀮𑁂 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀢𑀣𑀸 𑀧𑀜𑁆𑀘𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. ‘𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬’𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀲𑀸 𑀫𑀦𑀼𑀲𑁆𑀲𑁂𑀲𑀼 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀲𑀦𑁆𑀢𑀻𑀭𑀡𑀯𑀲𑁂𑀦𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. ‘𑀲𑁄𑀫𑀦𑀲𑁆𑀲𑀲𑀳𑀕𑀢𑀸’ 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀲𑀳𑁂𑀢𑀼𑀓𑀯𑀺𑀧𑀸𑀓𑀸 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼’ 𑀧𑀦 𑀓𑀼𑀲𑀮𑀯𑀺𑀧𑀸𑀓𑀸𑀬 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀸𑀬 𑀲𑀫𑀸𑀦𑀕𑀢𑀺𑀓𑀸 𑀏𑀯. 𑀓𑁂𑀯𑀮𑀜𑁆𑀳𑀺 𑀲𑀸 𑀆𑀧𑀸𑀬𑀺𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. ‘𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼’ 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀘𑀤𑁆𑀯𑀸𑀭𑁂 𑀧𑀳𑀝𑁆𑀞𑀸𑀓𑀸𑀭𑀁 𑀓𑀼𑀭𑀼𑀫𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀳𑀲𑀺𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀦𑁆𑀢𑀺𑀆𑀤𑀻𑀲𑀼 𑀓𑀼𑀲𑀮𑀢𑁄 𑀢𑀸𑀯 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀢𑀻𑀢𑀸𑀤𑀺𑀪𑁂𑀤𑀸𑀦𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀲𑀫𑁆𑀫𑀲𑀦𑁆𑀢𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑁂𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺. 𑀅𑀬𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄.

𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑀻𑀢𑀸𑀤𑀺𑀪𑁂𑀤𑀸𑀦𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀸𑀲𑀓𑀸𑀮𑁂 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 ‘𑀲𑀢𑁆𑀢𑁄 𑀲𑀢𑁆𑀢𑁄’𑀢𑀺 𑀧𑀭𑀸𑀫𑀲𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑁂𑀳𑀺 𑀧𑀭𑀸𑀫𑀸𑀲𑀕𑁆𑀕𑀳𑀡𑀁 𑀦𑀢𑁆𑀣𑀺. 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑀻𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀤𑁄𑀫𑀦𑀲𑁆𑀲𑀺𑀢𑀸𑀦𑀁 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀸, 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀤𑁄𑀫𑀦𑀲𑁆𑀲𑀺𑀢𑀸𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑀢𑁂𑀲𑀼 𑀏𑀯 𑀥𑀫𑁆𑀫𑁂𑀲𑀼 𑀅𑀦𑀺𑀝𑁆𑀞𑀗𑁆𑀕𑀢𑀪𑀸𑀯𑁂𑀦 𑀘𑁂𑀯 𑀉𑀤𑁆𑀥𑀢𑀪𑀸𑀯𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀓𑀺𑀭𑀺𑀬𑀢𑁄 𑀅𑀝𑁆𑀞 𑀲𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀺𑀓𑀸 𑀏𑀯. 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯. 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀜𑁆𑀘𑁂𑀯 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀜𑁆𑀘 𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸.

𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁 𑀆𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀁 𑀆𑀮𑁄𑀓𑀓𑀲𑀺𑀡𑀘𑀢𑀼𑀢𑁆𑀣𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀢𑁆𑀣𑀁 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑁂𑀯. ‘𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁’ 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀅𑀢𑀻𑀢𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀅𑀢𑀻𑀢𑀸𑀭𑀫𑁆𑀫𑀡𑀁. 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀅𑀦𑀸𑀕𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑀁 𑀓𑀭𑁄𑀦𑁆𑀢𑁄 𑀅𑀦𑀸𑀕𑀢𑁂 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺 𑀇𑀫𑁂 𑀕𑀦𑁆𑀥𑀸 𑀫𑀸 𑀲𑀼𑀲𑁆𑀲𑀺𑀁𑀲𑀼, 𑀧𑀼𑀧𑁆𑀨𑀸𑀦𑀺 𑀫𑀸 𑀫𑀺𑀮𑀸𑀬𑀺𑀁𑀲𑀼, 𑀤𑀻𑀧𑀸 𑀫𑀸 𑀦𑀺𑀩𑁆𑀩𑀸𑀬𑀺𑀁𑀲𑀽𑀢𑀺 𑀅𑀥𑀺𑀝𑁆𑀞𑀳𑀺. 𑀲𑀩𑁆𑀩𑀁 𑀢𑀣𑁂𑀯 𑀅𑀳𑁄𑀲𑀺. 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑁄 𑀯𑀢𑁆𑀢𑀦𑀺𑀬𑀲𑁂𑀦𑀸𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀼𑀓𑁆𑀔𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀁 𑀤𑀺𑀲𑁆𑀯𑀸 ‘𑀉𑀤𑀓𑀲𑁄𑀡𑁆𑀟𑀺 𑀤𑀺𑀯𑀲𑁂 𑀤𑀺𑀯𑀲𑁂, 𑀧𑀼𑀭𑁂𑀪𑀢𑁆𑀢𑀁 𑀤𑀥𑀺𑀭𑀲𑀸 𑀳𑁄𑀢𑀽’𑀢𑀺 𑀅𑀥𑀺𑀝𑁆𑀞𑀳𑀺. 𑀧𑀼𑀭𑁂𑀪𑀢𑁆𑀢𑀁 𑀕𑀳𑀺𑀢𑀁 𑀤𑀥𑀺𑀭𑀲𑀁 𑀳𑁄𑀢𑀺 𑀧𑀘𑁆𑀙𑀸𑀪𑀢𑁆𑀢𑁂 𑀧𑀸𑀓𑀢𑀺𑀓𑀫𑁂𑀯. 𑀓𑀸𑀬𑀁 𑀧𑀦 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀫𑀦𑀓𑀸𑀮𑁂, 𑀅𑀜𑁆𑀜𑀲𑁆𑀲 𑀯𑀸 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀓𑀭𑀡𑀓𑀸𑀮𑁂, 𑀓𑀸𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺.

‘𑀤𑀺𑀩𑁆𑀩𑀲𑁄𑀢𑀘𑀢𑀼𑀢𑁆𑀣𑀁’ 𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀫𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀲𑁆𑀲 𑀅𑀢𑀻𑀢𑀸𑀭𑀫𑁆𑀫𑀡𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀜𑁆𑀘 𑀳𑁄𑀢𑀺. 𑀲𑀢𑁆𑀢𑀤𑀺𑀯𑀲𑀸𑀢𑀺𑀓𑁆𑀓𑀫𑁂 𑀧𑀦 𑀢𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀢𑀻𑀢𑀸𑀦𑀸𑀕𑀢𑀁𑀲𑀜𑀸𑀡𑀸𑀦𑀜𑁆𑀳𑀺 𑀏𑀲 𑀯𑀺𑀲𑀬𑁄. 𑀦 𑀏𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀓𑀸𑀮𑁂 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀦𑀸𑀫𑁂𑀢𑀁 𑀢𑀺𑀯𑀺𑀥𑀁 𑁋 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘. 𑀢𑀢𑁆𑀣 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀧𑁆𑀧𑀢𑁆𑀢𑀁 ‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁’. 𑀏𑀓𑀤𑁆𑀯𑀺𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀁 ‘𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁’. 𑀢𑀢𑁆𑀣 𑀅𑀦𑁆𑀥𑀓𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀮𑁄𑀓𑀝𑁆𑀞𑀸𑀦𑀁 𑀕𑀢𑀲𑁆𑀲 𑀦 𑀢𑀸𑀯 𑀆𑀭𑀫𑁆𑀫𑀡𑀁 𑀧𑀸𑀓𑀝𑀁 𑀳𑁄𑀢𑀺; 𑀬𑀸𑀯 𑀧𑀦 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑀺𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀮𑁄𑀓𑀝𑁆𑀞𑀸𑀦𑁂 𑀯𑀺𑀘𑀭𑀺𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲𑀸𑀧𑀺 𑀦 𑀢𑀸𑀯 𑀲𑀳𑀲𑀸 𑀭𑀽𑀧𑀁 𑀧𑀸𑀓𑀝𑀁 𑀳𑁄𑀢𑀺; 𑀬𑀸𑀯 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑀺𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀽𑀭𑁂 𑀞𑀢𑁆𑀯𑀸 𑀧𑀦 𑀭𑀚𑀓𑀸𑀦𑀁 𑀳𑀢𑁆𑀣𑀯𑀺𑀓𑀸𑀭𑀁 𑀖𑀡𑁆𑀟𑀺𑀪𑁂𑀭𑀻𑀆𑀤𑀺𑀆𑀓𑁄𑀝𑀦𑀯𑀺𑀓𑀸𑀭𑀜𑁆𑀘 𑀤𑀺𑀲𑁆𑀯𑀸𑀧𑀺 𑀦 𑀢𑀸𑀯 𑀲𑀤𑁆𑀤𑀁 𑀲𑀼𑀡𑀸𑀢𑀺; 𑀬𑀸𑀯 𑀧𑀦 𑀢𑀁 𑀲𑀼𑀡𑀸𑀢𑀺, 𑀏𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑀤𑁆𑀯𑀺𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯 𑀫𑀚𑁆𑀛𑀺𑀫𑀪𑀸𑀡𑀓𑀸. 𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀧𑀦 ‘𑀭𑀽𑀧𑀲𑀦𑁆𑀢𑀢𑀺 𑀅𑀭𑀽𑀧𑀲𑀦𑁆𑀢𑀢𑀻’𑀢𑀺 𑀤𑁆𑀯𑁂 𑀲𑀦𑁆𑀢𑀢𑀺𑀬𑁄 𑀯𑀢𑁆𑀯𑀸, ‘𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀕𑀢𑀲𑁆𑀲 𑀬𑀸𑀯 𑀢𑀻𑀭𑁂 𑀅𑀓𑁆𑀓𑀦𑁆𑀢𑀉𑀤𑀓𑀮𑁂𑀔𑀸 𑀦 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀤𑁆𑀥𑀸𑀦𑀢𑁄 𑀆𑀕𑀢𑀲𑁆𑀲 𑀬𑀸𑀯 𑀓𑀸𑀬𑁂 𑀉𑀲𑀼𑀫𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀆𑀢𑀧𑀸 𑀆𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀲𑁆𑀲 𑀬𑀸𑀯 𑀅𑀦𑁆𑀥𑀓𑀸𑀭𑀪𑀸𑀯𑁄 𑀦 𑀯𑀺𑀕𑀘𑁆𑀙𑀢𑀺, 𑀅𑀦𑁆𑀢𑁄𑀕𑀩𑁆𑀪𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀤𑀺𑀯𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀬𑀸𑀯 𑀅𑀓𑁆𑀔𑀻𑀦𑀁 𑀨𑀦𑁆𑀤𑀦𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀭𑀽𑀧𑀲𑀦𑁆𑀢𑀢𑀺 𑀦𑀸𑀫; 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀅𑀭𑀽𑀧𑀲𑀦𑁆𑀢𑀢𑀺 𑀦𑀸𑀫𑀸’𑀢𑀺 𑀯𑀢𑁆𑀯𑀸 ‘𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫𑀸’𑀢𑀺 𑀯𑀤𑀦𑁆𑀢𑀺.

𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑁂 ‘‘𑀬𑁄 𑀘𑀸𑀯𑀼𑀲𑁄, 𑀫𑀦𑁄 𑀬𑁂 𑀘 𑀥𑀫𑁆𑀫𑀸 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻’’𑀢𑀺 (𑀫. 𑀦𑀺. 𑁩.𑁨𑁮𑁪) 𑀯𑀼𑀢𑁆𑀢𑀁. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀁. 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀼𑀢𑁆𑀢𑁂.

𑀢𑀢𑁆𑀣 𑀓𑁂𑀘𑀺 ‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻’𑀢𑀺 𑀯𑀤𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀬𑀲𑁆𑀫𑀸 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀇𑀤𑀜𑁆𑀘 𑀦𑁂𑀲𑀁 𑀑𑀧𑀫𑁆𑀫𑀁 𑁋 𑀬𑀣𑀸 𑀆𑀓𑀸𑀲𑁂 𑀔𑀺𑀢𑁆𑀢𑁂 𑀧𑀼𑀧𑁆𑀨𑀫𑀼𑀝𑁆𑀞𑀺𑀫𑁆𑀳𑀺 𑀅𑀯𑀲𑁆𑀲𑀁 𑀏𑀓𑀁 𑀧𑀼𑀧𑁆𑀨𑀁 𑀏𑀓𑀲𑁆𑀲 𑀯𑀡𑁆𑀝𑀁 𑀧𑀝𑀺𑀯𑀺𑀚𑁆𑀛𑀢𑀺 𑀯𑀡𑁆𑀝𑁂𑀦 𑀯𑀡𑁆𑀝𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀯𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀭𑀸𑀲𑀺𑀯𑀲𑁂𑀦 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂 𑀅𑀯𑀲𑁆𑀲𑀁 𑀏𑀓𑀲𑁆𑀲 𑀘𑀺𑀢𑁆𑀢𑀁 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀸 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻𑀢𑀺. 𑀢𑀁 𑀧𑀦 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀆𑀯𑀚𑁆𑀚𑀦𑁆𑀢𑁄 𑀬𑁂𑀦 𑀘𑀺𑀢𑁆𑀢𑁂𑀦 𑀆𑀯𑀚𑁆𑀚𑁂𑀢𑀺, 𑀬𑁂𑀦 𑀘 𑀚𑀸𑀦𑀸𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀳𑀝𑁆𑀞𑀸𑀦𑀸𑀪𑀸𑀯𑀢𑁄 𑀆𑀯𑀚𑁆𑀚𑀦𑀚𑀯𑀦𑀸𑀦𑀜𑁆𑀘 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀧𑁆𑀧𑀢𑁆𑀢𑀺𑀤𑁄𑀲𑀢𑁄 𑀅𑀬𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑀁 𑀯𑀢𑁆𑀢𑀫𑀸𑀦𑀚𑀯𑀦𑀯𑀻𑀣𑀺𑀢𑁄 𑀅𑀢𑀻𑀢𑀸𑀦𑀸𑀕𑀢𑀯𑀲𑁂𑀦 𑀤𑁆𑀯𑀺𑀢𑀺𑀚𑀯𑀦𑀯𑀻𑀣𑀺𑀧𑀭𑀺𑀫𑀸𑀡𑀓𑀸𑀮𑁂 𑀧𑀭𑀲𑁆𑀲 𑀘𑀺𑀢𑁆𑀢𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀚𑀯𑀦𑀯𑀸𑀭𑁂𑀦 𑀤𑀻𑀧𑁂𑀢𑀩𑁆𑀩𑀦𑁆𑀢𑀺 𑀬𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀢𑀁 𑀲𑀼𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀤𑀻𑀧𑀦𑀸 𑁋 𑀇𑀤𑁆𑀥𑀺𑀫𑀸 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀆𑀯𑀚𑁆𑀚𑁂𑀢𑀺. 𑀆𑀯𑀚𑁆𑀚𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀚𑀯𑀦𑀸𑀦𑀺 𑀬𑁂𑀲𑀁 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺. 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀦 𑀘 𑀢𑀸𑀦𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀏𑀓𑀸𑀭𑀫𑁆𑀫𑀡𑀸𑀦𑀺. 𑀏𑀓𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀘 𑀇𑀤𑁆𑀥𑀺𑀘𑀺𑀢𑁆𑀢𑀫𑁂𑀯 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺, 𑀦 𑀇𑀢𑀭𑀸𑀦𑀺; 𑀬𑀣𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀇𑀢𑀭𑀸𑀦𑀻𑀢𑀺. 𑀇𑀢𑀺 𑀇𑀤𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑁂𑀯 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀢𑀢𑀺, 𑀢𑀲𑁆𑀫𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁’ 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑁂 𑀦𑀺𑀩𑁆𑀩𑀸𑀦𑀦𑀺𑀫𑀺𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂 𑀘 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁, 𑀲𑁂𑀲𑀓𑀸𑀮𑁂 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀘𑀢𑀼𑀢𑁆𑀣𑀫𑁆𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀺𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀢𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀅𑀢𑀻𑀢𑀓𑁆𑀔𑀦𑁆𑀥𑀸 𑀔𑀦𑁆𑀥𑀧𑀝𑀺𑀩𑀤𑁆𑀥𑀜𑁆𑀘 𑀓𑀺𑀜𑁆𑀘𑀺 𑀅𑀦𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀜𑁆𑀳𑀺 𑀅𑀢𑀻𑀢𑀓𑁆𑀔𑀦𑁆𑀥𑀔𑀦𑁆𑀥𑀧𑀝𑀺𑀩𑀤𑁆𑀥𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑀕𑀢𑀺𑀓𑀁 𑀳𑁄𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀘 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑀸𑀢𑀻𑀢𑀁 𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀢𑀜𑁆𑀳𑀺 𑀅𑀜𑁆𑀜𑀁 𑀔𑀦𑁆𑀥𑀁 𑀯𑀸 𑀔𑀦𑁆𑀥𑀧𑀝𑀺𑀩𑀤𑁆𑀥𑀁 𑀯𑀸 𑀦 𑀚𑀸𑀦𑀸𑀢𑀺, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀭𑀺𑀬𑀸𑀬𑀢𑁄 𑀫𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀘 𑀅𑀢𑀻𑀢𑀘𑁂𑀢𑀦𑀸𑀫𑀢𑁆𑀢𑀫𑁂𑀯𑀸𑀭𑀫𑁆𑀫𑀡𑀦𑁆𑀢𑀺. 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀦𑀬𑁄. 𑀬𑀲𑁆𑀫𑀸 𑀧𑀦 ‘‘𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁪) 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄𑀧𑀺 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺. 𑀢𑀢𑁆𑀭𑀸𑀧𑀺 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀸 𑀏𑀯𑀸𑀢𑀺.

‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁’ 𑀯𑀺𑀚𑁆𑀚𑀫𑀸𑀦𑀯𑀡𑁆𑀡𑀸𑀭𑀫𑁆𑀫𑀡𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀫𑁂𑀯. 𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀫𑁂𑀯. 𑀢𑀜𑁆𑀳𑀺 𑀅𑀦𑀸𑀕𑀢𑀓𑁆𑀔𑀦𑁆𑀥𑀔𑀦𑁆𑀥𑀧𑀝𑀺𑀩𑀤𑁆𑀥𑁂𑀲𑀼 𑀥𑀫𑁆𑀫𑁂𑀲𑀼 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑀕𑀢𑀺𑀓𑀁 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀧𑀦 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀇𑀤𑀁 𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀫𑁆𑀧𑀺 𑀔𑀦𑁆𑀥𑁂𑀧𑀺 𑀔𑀦𑁆𑀥𑀧𑀝𑀺𑀩𑀤𑁆𑀥𑀫𑁆𑀧𑀺. 𑀭𑀽𑀧𑀸𑀯𑀘𑀭𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀆𑀭𑀩𑁆𑀪 𑀅𑀧𑁆𑀧𑀯𑀢𑁆𑀢𑀺𑀢𑁄 𑀏𑀓𑀦𑁆𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁪𑁩𑁫. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀩𑀳𑀺𑀤𑁆𑀥𑀸𑀢𑀺 𑀇𑀤𑀁 𑀬𑀣𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀧𑀭𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑁂 𑀩𑀳𑀺𑀤𑁆𑀥𑀸𑀢𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀦𑀺𑀬𑀓𑀚𑁆𑀛𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀚𑁆𑀛𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀧𑀭𑀺𑀬𑀸𑀬𑀲𑁆𑀲 𑀅𑀪𑀸𑀯𑁂𑀦 𑀩𑀳𑀺𑀤𑁆𑀥𑀸𑀢𑀺 𑀯𑀼𑀢𑁆𑀢𑀁, 𑀦 𑀦𑀺𑀬𑀓𑀚𑁆𑀛𑀢𑁆𑀢𑀫𑀢𑁆𑀢𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀺𑀬𑀓𑀚𑁆𑀛𑀢𑁆𑀢𑀫𑀢𑁆𑀢𑀲𑁆𑀲 𑀧𑀦 𑀅𑀲𑀫𑁆𑀪𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀧𑀕𑀫𑀫𑀢𑁆𑀢𑀢𑁄𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀲𑁆𑀲 𑀅𑀚𑁆𑀛𑀢𑁆𑀢𑀪𑀸𑀯𑀫𑁆𑀧𑀺 𑀩𑀳𑀺𑀤𑁆𑀥𑀸𑀪𑀸𑀯𑀫𑁆𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑀸𑀯𑀫𑁆𑀧𑀺 𑀅𑀦𑀦𑀼𑀚𑀸𑀦𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺𑀧𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀦 𑀓𑁂𑀯𑀮𑀁 𑀢𑀤𑁂𑀯 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁, 𑀢𑀲𑁆𑀲 𑀧𑀦 𑀆𑀯𑀚𑁆𑀚𑀦𑀫𑁆𑀧𑀺, 𑀉𑀧𑀘𑀸𑀭𑀘𑀺𑀢𑁆𑀢𑀸𑀦𑀺𑀧𑀺, 𑀢𑀲𑁆𑀲𑀸𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺𑀧𑀺, 𑀢𑀲𑁆𑀲𑁂𑀯 𑀅𑀲𑁆𑀲𑀸𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺𑀧𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑁂𑀯𑀸𑀢𑀺. 𑀢𑀸𑀦𑀺 𑀧𑀦 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀺. 𑀓𑀣𑀁 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺? 𑀏𑀢𑀜𑁆𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀬𑀜𑁆𑀘 𑀢𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀁 𑀆𑀯𑀚𑁆𑀚𑀦𑀉𑀧𑀘𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀢𑁂𑀦 𑀲𑀳 𑀏𑀓𑀸𑀭𑀫𑁆𑀫𑀡𑀁 𑀪𑀯𑁂𑀬𑁆𑀬. 𑀢𑀁 𑀲𑀩𑁆𑀩𑀁 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 ‘𑀓𑀸𑀫𑀸𑀯𑀘𑀭𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀓𑀺𑀭𑀺𑀬𑀢𑁄 𑀦𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀏𑀢𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 ‘𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀢𑀺𑀧𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀘 ‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀇𑀫𑁂 𑀥𑀫𑁆𑀫𑀸 𑀦 𑀯𑀢𑁆𑀢𑀩𑁆𑀩𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀢𑀺𑀧𑀻’𑀢𑀺 𑀏𑀯𑀁 𑀏𑀓𑀦𑁆𑀢𑁂𑀦 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀯𑀘𑀦𑀢𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀏𑀓𑀫𑁆𑀧𑀺 𑀯𑀼𑀘𑁆𑀘𑀫𑀸𑀦𑀁 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀢𑁂𑀦 𑀲𑀳 𑀏𑀓𑀸𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀲𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀇𑀥𑀸𑀧𑀺 𑀢𑁂𑀲𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑀁 𑀤𑀻𑀧𑁂𑀢𑀺. 𑀓𑁄 𑀳𑀺 𑀢𑁂𑀦 𑀲𑀳 𑀏𑀓𑀸𑀭𑀫𑁆𑀫𑀡𑀸𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑁂 𑀅𑀦𑁆𑀢𑀭𑀸𑀬𑁄𑀢𑀺? 𑀏𑀯𑀁 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 ‘𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀧𑀸𑀴𑀺𑀢𑁄 𑀉𑀢𑁆𑀢𑀸𑀦𑀫𑁂𑀯.

𑀆𑀭𑀫𑁆𑀫𑀡𑀯𑀺𑀪𑀸𑀕𑁂 𑀧𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂𑀲𑀁 𑀢𑀸𑀯 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀙𑀦𑁆𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑀫𑁆𑀩𑀦𑁆𑀥𑀁 𑀳𑁂𑀝𑁆𑀞𑀺𑀫𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 𑀓𑀺𑀭𑀺𑀬𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀇𑀢𑀭𑀲𑁆𑀲. 𑀓𑀲𑁆𑀫𑀸? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀲𑀫𑀗𑁆𑀕𑀺𑀦𑁄 𑀓𑀼𑀲𑀮𑀲𑁆𑀲 𑀯𑀸 𑀯𑀺𑀧𑀸𑀓𑀲𑁆𑀲 𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀅𑀪𑀸𑀯𑀢𑁄. 𑀓𑀼𑀲𑀮𑀁 𑀧𑀦 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀲𑁆𑀫𑀸? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀞𑀺𑀢𑀲𑁆𑀲 𑀢𑀢𑁄 𑀉𑀤𑁆𑀥𑀁 𑀢𑀺𑀯𑀺𑀥𑀲𑁆𑀲𑀧𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄. 𑀯𑀺𑀧𑀸𑀓𑀁 𑀧𑀦 𑀦 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀲𑁆𑀫𑀸? 𑀯𑀺𑀧𑀸𑀓𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑀸𑀲𑀫𑁆𑀪𑀯𑀢𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀭𑀽𑀧𑀸𑀯𑀘𑀭𑀢𑁆𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀺𑀬𑀓𑀚𑁆𑀛𑀢𑁆𑀢𑀢𑁄 𑀩𑀳𑀺𑀤𑁆𑀥𑀸𑀪𑀸𑀯𑁂𑀦 𑀩𑀳𑀺𑀤𑁆𑀥𑀸𑀪𑀽𑀢𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀩𑁆𑀩𑁂𑀯 𑀓𑀸𑀫𑀸𑀯𑀘𑀭𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀭𑀽𑀧𑀸𑀯𑀘𑀭𑀁 𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀢𑁄 𑀢𑀸𑀯 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸. 𑀧𑀭𑁂𑀲𑀁 𑀔𑀦𑁆𑀥𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑁂 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂 𑀘 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀢𑁆𑀣𑀺. 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀸𑀲𑀕𑀳𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀔𑀦𑁆𑀥𑀸𑀤𑀻𑀲𑀼 𑀘𑁂𑀯 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀓𑀲𑀺𑀡𑀸𑀤𑀻𑀲𑀼 𑀘 𑀢𑀣𑁂𑀯 𑀧𑀯𑀢𑁆𑀢𑀺𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀧𑀭𑀸𑀫𑀸𑀲𑀕𑀳𑀡𑀁 𑀦𑀢𑁆𑀣𑀺. 𑀤𑁆𑀯𑁂𑀧𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀲𑀼 𑀤𑁄𑀫𑀦𑀲𑁆𑀲𑀺𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀔𑀦𑁆𑀥𑀸𑀤𑀻𑀲𑀼 𑀘𑁂𑀯 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀧𑀡𑁆𑀡𑀢𑁆𑀢𑀻𑀲𑀼 𑀘 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀯𑀼𑀢𑁆𑀢𑀧𑀓𑀸𑀭𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀦𑀨𑀦𑁆𑀤𑀦𑀪𑀸𑀯𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀺𑀲𑁆𑀲𑁄 𑀘 𑀫𑀦𑁄𑀥𑀸𑀢𑀼𑀬𑁄𑀢𑀺, 𑀇𑀫𑁂 𑀢𑁂𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀢𑁆𑀢𑀦𑁄 𑀧𑀜𑁆𑀘 𑀭𑀽𑀧𑀸𑀤𑀺𑀥𑀫𑁆𑀫𑁂, 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑁂𑀯 𑀅𑀜𑁆𑀜𑁂𑀧𑀺 𑀅𑀚𑁆𑀛𑀢𑁆𑀢𑀺𑀓𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑁂𑀲𑀁 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀁 𑀧𑀦𑁂𑀢𑀸 𑀲𑀼𑀕𑀢𑀺𑀬𑀁 𑀤𑀼𑀕𑁆𑀕𑀢𑀺𑀬𑀜𑁆𑀘 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀧𑀯𑀢𑁆𑀢𑀦𑁆𑀢𑀺.

𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺𑀧𑀺 𑀢𑀸𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀕𑀢𑀺𑀓𑀸𑀦𑀺. 𑀓𑁂𑀯𑀮𑀁 𑀧𑀦𑁂𑀢𑀸𑀦𑀺 𑀲𑀦𑁆𑀢𑀻𑀭𑀡𑀯𑀲𑁂𑀦 𑀦 𑀧𑀯𑀢𑁆𑀢𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦𑁂𑀯 𑀏𑀢𑀸𑀦𑀺 𑀲𑀼𑀕𑀢𑀺𑀬𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀸 𑀧𑀜𑁆𑀘𑀤𑁆𑀯𑀸𑀭𑁂 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀳𑀝𑁆𑀞𑀸𑀓𑀸𑀭𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀫𑀦𑁄𑀤𑁆𑀯𑀸𑀭𑁂 𑀢𑀣𑀸𑀕𑀢𑀲𑁆𑀲 𑀚𑁄𑀢𑀺𑀧𑀸𑀮𑀫𑀸𑀡𑀯𑀫𑀖𑀤𑁂𑀯𑀭𑀸𑀚𑀓𑀡𑁆𑀳𑀢𑀸𑀧𑀲𑀸𑀤𑀺𑀓𑀸𑀮𑁂𑀲𑀼 𑀅𑀢𑁆𑀢𑀦𑀸 𑀓𑀢𑀓𑀺𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀳𑀲𑀺𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸.

𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀲𑁆𑀲 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑁆𑀲𑀸𑀢𑀺 𑀏𑀯𑀫𑀸𑀤𑀻𑀦𑀁 𑀓𑀺𑀭𑀺𑀬𑀸𑀓𑀭𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀘 𑀆𑀯𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸. 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸 𑀓𑀼𑀲𑀮𑀘𑀺𑀢𑁆𑀢𑀕𑀢𑀺𑀓𑀸 𑀏𑀯. 𑀓𑁂𑀯𑀮𑀜𑁆𑀳𑀺 𑀢𑀸 𑀔𑀻𑀡𑀸𑀲𑀯𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀸𑀦𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀦𑁆𑀢𑀺 𑀏𑀢𑁆𑀢𑀓𑀫𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁.

𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀸𑀤𑀻𑀦𑀺 𑀧𑀜𑁆𑀘 𑀛𑀸𑀦𑀸𑀦𑀺 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀏𑀢𑀸𑀦𑀺 𑀳𑀺 𑀓𑀲𑀺𑀡𑀧𑀡𑁆𑀡𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺.

‘𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁’ 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀯𑀲𑁂𑀦 𑀯𑀸 𑀓𑀸𑀬𑀁 𑀧𑀭𑀺𑀡𑀸𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀓𑀼𑀫𑀸𑀭𑀓𑀯𑀡𑁆𑀡𑀸𑀤𑀺𑀦𑀺𑀫𑁆𑀫𑀸𑀦𑀓𑀸𑀮𑁂 𑀘 𑀲𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀢𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀤𑀲𑁆𑀲𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸, 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

‘𑀤𑀺𑀩𑁆𑀩𑀲𑁄𑀢𑀘𑀢𑀼𑀢𑁆𑀣𑀁’ 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀲𑀤𑁆𑀤𑀲𑀯𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑁂𑀲𑀁 𑀲𑀤𑁆𑀤𑀲𑀯𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. ‘𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁’ 𑀧𑀭𑁂𑀲𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁂𑀯. 𑀅𑀢𑁆𑀢𑀦𑁄 𑀘𑀺𑀢𑁆𑀢𑀚𑀸𑀦𑀦𑁂 𑀧𑀦 𑀢𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺. ‘𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑀢𑀼𑀢𑁆𑀣𑀁’ 𑀅𑀢𑁆𑀢𑀦𑁄 𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀔𑀦𑁆𑀥𑁂, 𑀅𑀦𑀺𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁, 𑀢𑀺𑀲𑁆𑀲𑁄 𑀘 𑀧𑀡𑁆𑀡𑀢𑁆𑀢𑀺𑀬𑁄 𑀅𑀦𑀼𑀲𑁆𑀲𑀭𑀡𑀢𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

‘𑀤𑀺𑀩𑁆𑀩𑀘𑀓𑁆𑀔𑀼𑀘𑀢𑀼𑀢𑁆𑀣𑀁’ 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀕𑀢𑀸𑀤𑀺𑀭𑀽𑀧𑀤𑀲𑁆𑀲𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀅𑀯𑀲𑁂𑀲𑀭𑀽𑀧𑀤𑀲𑁆𑀲𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. ‘𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁’ 𑀅𑀢𑁆𑀢𑀦𑁄 𑀅𑀦𑀸𑀕𑀢𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀅𑀦𑀸𑀕𑀢𑀓𑁆𑀔𑀦𑁆𑀥𑀸𑀦𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀯𑀸 𑀭𑀽𑀧𑀲𑁆𑀲 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸𑀬 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀤𑀼𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁪𑁪𑁧. 𑀳𑁂𑀢𑀼𑀕𑁄𑀘𑁆𑀙𑀓𑀦𑀺𑀤𑁆𑀤𑁂𑀲𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑁂𑀢𑀽 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑁂𑀬𑁂𑀯 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀤𑀲𑁆𑀲𑁂𑀢𑀼𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑁂𑀲𑀕𑁄𑀘𑁆𑀙𑀓𑁂𑀲𑀼𑀧𑀺 𑀤𑁂𑀲𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁪𑁭𑁩. 𑀬𑀢𑁆𑀣 𑀤𑁆𑀯𑁂 𑀢𑀬𑁄 𑀆𑀲𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀢𑀺𑀯𑀺𑀥𑁂𑀦 𑀆𑀲𑀯𑀸𑀦𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀅𑀯𑀺𑀚𑁆𑀚𑀸𑀲𑀯𑁂𑀦, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑀺𑀝𑁆𑀞𑀸𑀲𑀯𑀅𑀯𑀺𑀚𑁆𑀚𑀸𑀲𑀯𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀓𑀸𑀫𑀸𑀲𑀯𑁄 𑀤𑀼𑀯𑀺𑀥𑁂𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀅𑀯𑀺𑀚𑁆𑀚𑀸𑀲𑀯𑁂𑀦 𑀲𑀤𑁆𑀥𑀺𑀦𑁆𑀢𑀺 𑀏𑀓𑀥𑀸𑀯 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀬𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀲𑀁𑀬𑁄𑀚𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀏𑀓𑀢𑁄 𑀤𑀲𑀥𑀸 𑀪𑀯𑁂. 𑀢𑀢𑁆𑀣 𑀓𑀸𑀫𑀭𑀸𑀕𑁄 𑀘𑀢𑀼𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀖𑁄 𑀢𑀺𑀥𑀸, 𑀫𑀸𑀦𑁄 𑀏𑀓𑀥𑀸. 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸 𑀘𑁂𑀯 𑀪𑀯𑀭𑀸𑀕𑁄 𑀘. 𑀓𑀣𑀁? 𑀓𑀸𑀫𑀭𑀸𑀕𑁄 𑀢𑀸𑀯 𑀫𑀸𑀦𑀲𑀁𑀬𑁄𑀚𑀦𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘𑁂𑀯, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀫𑀢𑁆𑀢𑁂𑀦𑁂𑀯 𑀘 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀘𑀢𑀼𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀖𑁄 𑀧𑀦 𑀇𑀲𑁆𑀲𑀸𑀲𑀁𑀬𑁄𑀚𑀦𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘𑁂𑀯, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀫𑀢𑁆𑀢𑁂𑀦𑁂𑀯 𑀘 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀢𑀺𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀫𑀸𑀦𑁄 𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀲𑀤𑁆𑀥𑀺𑀁 𑀏𑀓𑀥𑀸𑀯 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀳𑀺 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀦 𑀲𑀤𑁆𑀥𑀺𑀁 𑀏𑀓𑀥𑀸 𑀉𑀧𑁆𑀧𑀚𑁆𑀚𑀢𑀺. 𑀪𑀯𑀭𑀸𑀕𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀏𑀯𑀫𑁂𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁧𑁫𑁧𑁧. 𑀬𑀁 𑀧𑀦𑁂𑀢𑀁 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀬𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀦𑀻𑀯𑀭𑀡𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀝𑁆𑀞𑀥𑀸 𑀦𑀻𑀯𑀭𑀡𑀸𑀦𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀼 𑀳𑀺 𑀓𑀸𑀫𑀘𑁆𑀙𑀦𑁆𑀤𑁄 𑀤𑀼𑀯𑀺𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀩𑁆𑀬𑀸𑀧𑀸𑀤𑁄 𑀘𑀢𑀼𑀥𑀸, 𑀉𑀤𑁆𑀥𑀘𑁆𑀘𑀁 𑀏𑀓𑀥𑀸. 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀓𑀣𑀁? 𑀓𑀸𑀫𑀘𑁆𑀙𑀦𑁆𑀤𑁄 𑀢𑀸𑀯 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀲𑀼 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺 𑀲𑀤𑁆𑀥𑀺𑀁 𑀤𑀼𑀯𑀺𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀧𑀦𑁂𑀢𑀁 𑀤𑁆𑀯𑁂 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀘𑀢𑀼𑀦𑁆𑀦𑀫𑁆𑀧𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀘𑀦𑀁 𑀬𑀼𑀚𑁆𑀚𑀢𑀺 𑀏𑀯. 𑀩𑁆𑀬𑀸𑀧𑀸𑀤𑁄 𑀧𑀦 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂 𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺, 𑀅𑀲𑀗𑁆𑀔𑀸𑀭𑀺𑀓𑁂𑀬𑁂𑀯 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂𑀬𑁂𑀯 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀘𑀢𑀼𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀉𑀤𑁆𑀥𑀘𑁆𑀘𑀁 𑀧𑀦 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀫𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀥𑀸𑀯 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀥𑀸𑀯 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺.

𑁧𑁫𑁭𑁭. 𑀬𑀫𑁆𑀧𑀺𑀤𑀁 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀬𑀢𑁆𑀣 𑀤𑁆𑀯𑁂 𑀢𑀬𑁄 𑀓𑀺𑀮𑁂𑀲𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 ‘𑀤𑁆𑀯𑁂 𑀓𑀺𑀮𑁂𑀲𑀸 𑀅𑀜𑁆𑀜𑁂𑀳𑀺, 𑀢𑀬𑁄 𑀯𑀸 𑀓𑀺𑀮𑁂𑀲𑀸 𑀅𑀜𑁆𑀜𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑁆𑀢𑀻’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁𑀬𑁂𑀯 𑀯𑀸 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄.

𑀢𑀢𑁆𑀣 𑀤𑀲𑀥𑀸 𑀓𑀺𑀮𑁂𑀲𑀸𑀦𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀢𑁆𑀣 𑀳𑀺 𑀮𑁄𑀪𑁄 𑀙𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀖𑁄 𑀤𑁆𑀯𑀺𑀥𑀸. 𑀢𑀣𑀸 𑀫𑁄𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀮𑁄𑀪𑁄 𑀢𑀸𑀯 𑀅𑀲𑀗𑁆𑀔𑀸𑀭𑀺𑀓𑁂 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂 𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀅𑀲𑀗𑁆𑀔𑀸𑀭𑀺𑀓𑁂𑀬𑁂𑀯 𑀫𑁄𑀳𑀫𑀸𑀦𑀼𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂𑀬𑁂𑀯 𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀅𑀲𑀗𑁆𑀔𑀸𑀭𑀺𑀓𑁂 𑀫𑁄𑀳𑀉𑀤𑁆𑀥𑀘𑁆𑀘𑀤𑀺𑀝𑁆𑀞𑀺𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂 𑀫𑁄𑀳𑀤𑀺𑀝𑁆𑀞𑀺𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀙𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺.

𑀧𑀝𑀺𑀖𑁄 𑀧𑀦 𑀅𑀲𑀗𑁆𑀔𑀸𑀭𑀺𑀓𑁂 𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁂 𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀫𑁄𑀳𑁄 𑀧𑀦 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂 𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀅𑀝𑁆𑀞𑀓𑀣𑀸𑀬

𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀘𑀺𑀢𑁆𑀢𑀁 𑀭𑀽𑀧𑀜𑁆𑀘 𑀦𑀺𑀓𑁆𑀔𑁂𑀧𑀁, 𑀅𑀢𑁆𑀣𑀼𑀤𑁆𑀥𑀸𑀭𑀁 𑀫𑀦𑁄𑀭𑀫𑀁;

𑀬𑀁 𑀮𑁄𑀓𑀦𑀸𑀣𑁄 𑀪𑀸𑀚𑁂𑀦𑁆𑀢𑁄, 𑀤𑁂𑀲𑁂𑀲𑀺 𑀥𑀫𑁆𑀫𑀲𑀗𑁆𑀕𑀡𑀺𑀁.

𑀅𑀪𑀺𑀥𑀫𑁆𑀫𑀲𑁆𑀲 𑀲𑀗𑁆𑀕𑀬𑁆𑀳, 𑀥𑀫𑁆𑀫𑁂 𑀅𑀦𑀯𑀲𑁂𑀲𑀢𑁄;

𑀞𑀺𑀢𑀸𑀬 𑀢𑀲𑁆𑀲𑀸 𑀆𑀭𑀤𑁆𑀥𑀸, 𑀬𑀸 𑀫𑀬𑀸 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀦𑀸𑀓𑀼𑀮𑀸𑀦𑀫𑀢𑁆𑀣𑀸𑀦𑀁, 𑀲𑀫𑁆𑀪𑀯𑀸 𑀅𑀝𑁆𑀞𑀲𑀸𑀮𑀺𑀦𑀻;

𑀇𑀢𑀺 𑀦𑀸𑀫𑁂𑀦 𑀲𑀸 𑀏𑀲𑀸, 𑀲𑀦𑁆𑀦𑀺𑀝𑁆𑀞𑀸𑀦𑀫𑀼𑀧𑀸𑀕𑀢𑀸.

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄;

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀦𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀢𑀁 𑀫𑀬𑀸.

𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀢𑀲𑁆𑀲, 𑀆𑀦𑀼𑀪𑀸𑀯𑁂𑀦 𑀧𑀸𑀡𑀺𑀦𑁄;

𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀭𑀸𑀚𑀲𑁆𑀲, 𑀜𑀢𑁆𑀯𑀸 𑀥𑀫𑁆𑀫𑀁 𑀲𑀼𑀔𑀸𑀯𑀳𑀁.

𑀧𑀸𑀧𑀼𑀡𑀦𑁆𑀢𑀼 𑀯𑀺𑀲𑀼𑀤𑁆𑀥𑀸𑀬, 𑀲𑀼𑀔𑀸𑀬 𑀧𑀝𑀺𑀧𑀢𑁆𑀢𑀺𑀬𑀸;

𑀅𑀲𑁄𑀓𑀫𑀦𑀼𑀧𑀸𑀬𑀸𑀲𑀁, 𑀦𑀺𑀩𑁆𑀩𑀸𑀦𑀲𑀼𑀔𑀫𑀼𑀢𑁆𑀢𑀫𑀁.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀲𑀤𑁆𑀥𑀫𑁆𑀫𑁄, 𑀥𑀫𑁆𑀫𑁂 𑀳𑁄𑀦𑁆𑀢𑀼 𑀲𑀕𑀸𑀭𑀯𑀸;

𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀓𑀸𑀮𑁂𑀦, 𑀲𑀫𑁆𑀫𑀸 𑀤𑁂𑀯𑁄 𑀧𑀯𑀲𑁆𑀲𑀢𑀼.

𑀬𑀣𑀸 𑀭𑀓𑁆𑀔𑀺𑀁𑀲𑀼 𑀧𑁄𑀭𑀸𑀡𑀸, 𑀲𑀼𑀭𑀸𑀚𑀸𑀦𑁄 𑀢𑀣𑁂𑀯𑀺𑀫𑀁;

𑀭𑀸𑀚𑀸 𑀭𑀓𑁆𑀔𑀢𑀼 𑀥𑀫𑁆𑀫𑁂𑀦, 𑀅𑀢𑁆𑀢𑀦𑁄𑀯 𑀧𑀚𑀁 𑀧𑀚𑀦𑁆𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀅𑀝𑁆𑀞𑀲𑀸𑀮𑀺𑀦𑀻 𑀦𑀸𑀫 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸.

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 ‘𑀩𑀼𑀤𑁆𑀥𑁄’𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀅𑀝𑁆𑀞𑀲𑀸𑀮𑀺𑀦𑀻 𑀦𑀸𑀫

𑀥𑀫𑁆𑀫𑀲𑀗𑁆𑀕𑀳-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.