📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻 𑀦𑀸𑀫

𑀯𑀺𑀪𑀗𑁆𑀕-𑀅𑀝𑁆𑀞𑀓𑀣𑀸

𑁧. 𑀔𑀦𑁆𑀥𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀘𑀢𑀼𑀲𑀘𑁆𑀘𑀤𑀲𑁄 ¶ ¶ ¶ 𑀦𑀸𑀣𑁄, 𑀘𑀢𑀼𑀥𑀸 𑀥𑀫𑁆𑀫𑀲𑀗𑁆𑀕𑀡𑀺𑀁;

𑀧𑀓𑀸𑀲𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀲𑁂𑀯 𑀲𑀫𑀦𑀦𑁆𑀢𑀭𑀁.

𑀉𑀧𑁂𑀢𑁄 𑀩𑀼𑀤𑁆𑀥𑀥𑀫𑁆𑀫𑁂𑀳𑀺, 𑀅𑀝𑁆𑀞𑀸𑀭𑀲𑀳𑀺 𑀦𑀸𑀬𑀓𑁄;

𑀅𑀝𑁆𑀞𑀸𑀭𑀲𑀦𑁆𑀦𑀁 𑀔𑀦𑁆𑀥𑀸𑀤𑀺-𑀯𑀺𑀪𑀗𑁆𑀕𑀸𑀦𑀁 𑀯𑀲𑁂𑀦 𑀬𑀁.

𑀯𑀺𑀪𑀗𑁆𑀕𑀁 ¶ 𑀤𑁂𑀲𑀬𑀻 𑀲𑀢𑁆𑀣𑀸, 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄;

𑀇𑀤𑀸𑀦𑀺 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀲𑁆𑀲𑀢𑁆𑀣𑀯𑀡𑁆𑀡𑀦𑀁.

𑀓𑀭𑀺𑀲𑁆𑀲𑀸𑀫𑀺 𑀯𑀺𑀕𑀸𑀳𑁂𑀢𑁆𑀯𑀸, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀲𑀤𑁆𑀥𑀫𑁆𑀫𑁂 𑀕𑀸𑀭𑀯𑀁 𑀓𑀢𑁆𑀯𑀸, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑁧. 𑀧𑀜𑁆𑀘𑀓𑁆𑀔𑀦𑁆𑀥𑀸 𑁋 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀇𑀤𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀲𑁆𑀲 𑀆𑀤𑀺𑀪𑀽𑀢𑁂 𑀔𑀦𑁆𑀥𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀸𑀫. 𑀢𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸 𑀦 𑀉𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀢𑁆𑀭𑀸𑀬𑀁 𑀔𑀦𑁆𑀥-𑀲𑀤𑁆𑀤𑁄 𑀲𑀫𑁆𑀩𑀳𑀼𑀮𑁂𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺 𑁋 𑀭𑀸𑀲𑀺𑀫𑁆𑀳𑀺, 𑀕𑀼𑀡𑁂, 𑀧𑀡𑁆𑀡𑀢𑁆𑀢𑀺𑀬𑀁, 𑀭𑀼𑀴𑁆𑀳𑀺𑀬𑀦𑁆𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀼𑀓𑀭𑀁 𑀉𑀤𑀓𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 ¶ 𑀲𑀗𑁆𑀔𑁆𑀬𑀁 ¶ 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫𑁧; 𑁬.𑁩𑁭) 𑀳𑀺 𑀭𑀸𑀲𑀺𑀢𑁄 𑀔𑀦𑁆𑀥𑁄 𑀦𑀸𑀫. 𑀦𑀳𑀺 𑀧𑀭𑀺𑀢𑁆𑀢𑀓𑀁 𑀉𑀤𑀓𑀁 𑀉𑀤𑀓𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀓𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀣𑀸 𑀦 𑀧𑀭𑀺𑀢𑁆𑀢𑀓𑁄 𑀭𑀚𑁄 𑀭𑀚𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀸 𑀕𑀸𑀯𑁄 𑀕𑀯𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀁 𑀩𑀮𑀁 𑀩𑀮𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀁 𑀧𑀼𑀜𑁆𑀜𑀁 𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀩𑀳𑀼𑀓𑀫𑁂𑀯 𑀳𑀺 𑀭𑀚𑁄 𑀭𑀚𑀓𑁆𑀔𑀦𑁆𑀥𑁄, 𑀩𑀳𑀼𑀓𑀸𑀯 𑀕𑀯𑀸𑀤𑀬𑁄 𑀕𑀯𑀓𑁆𑀔𑀦𑁆𑀥𑁄, 𑀩𑀮𑀓𑁆𑀔𑀦𑁆𑀥𑁄, 𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀧𑀦 𑀕𑀼𑀡𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧). 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁬𑁩, 𑁬𑁫) 𑀭𑀼𑀴𑁆𑀳𑀺𑀢𑁄 𑀔𑀦𑁆𑀥𑁄 𑀦𑀸𑀫. 𑀲𑁆𑀯𑀸𑀬𑀫𑀺𑀥 𑀭𑀸𑀲𑀺𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀳𑀺 𑀔𑀦𑁆𑀥𑀝𑁆𑀞𑁄 𑀦𑀸𑀫 𑀧𑀺𑀡𑁆𑀟𑀝𑁆𑀞𑁄 𑀧𑀽𑀕𑀝𑁆𑀞𑁄 𑀖𑀝𑀝𑁆𑀞𑁄 𑀭𑀸𑀲𑀝𑁆𑀞𑁄. 𑀢𑀲𑁆𑀫𑀸 ‘𑀭𑀸𑀲𑀺𑀮𑀓𑁆𑀔𑀡𑀸 𑀔𑀦𑁆𑀥𑀸’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁄𑀝𑁆𑀞𑀸𑀲𑀝𑁆𑀞𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺; 𑀮𑁄𑀓𑀲𑁆𑀫𑀺𑀜𑁆𑀳𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀘𑁄𑀤𑀺𑀬𑀫𑀸𑀦𑀸 ‘𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫𑀸’𑀢𑀺 𑀯𑀤𑀦𑁆𑀢𑀺. 𑀇𑀢𑀺 ‘𑀓𑁄𑀝𑁆𑀞𑀸𑀲𑀮𑀓𑁆𑀔𑀡𑀸 𑀔𑀦𑁆𑀥𑀸’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀭𑀽𑀧𑀭𑀸𑀲𑀺 𑀭𑀽𑀧𑀓𑁄𑀝𑁆𑀞𑀸𑀲𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀦𑀸𑀭𑀸𑀲𑀺 𑀯𑁂𑀤𑀦𑀸𑀓𑁄𑀝𑁆𑀞𑀸𑀲𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀬𑁆𑀯𑀸𑀬𑀁 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 ‘𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸’𑀢𑀺 𑀘 ‘𑀙𑀦𑁆𑀦𑀯𑀼𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸’𑀢𑀺 𑀘 𑀏𑀯𑀁𑀧𑀪𑁂𑀤𑁄 𑀭𑀽𑀧𑀭𑀸𑀲𑀺, 𑀢𑀁 𑀲𑀩𑁆𑀩𑀁 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀲𑀺. 𑀬𑁄 𑀧𑀦𑀸𑀬𑀁 ‘‘𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺 𑀢𑁂𑀲𑀼𑀬𑁂𑀯 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸𑀭𑀸𑀲𑀺, 𑀢𑀁 𑀲𑀩𑁆𑀩𑀁 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀲𑀺. 𑀬𑁄 𑀧𑀦𑀸𑀬𑀁 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸’’𑀢𑀺 𑀢𑁂𑀲𑀼𑀬𑁂𑀯 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀸𑀭𑀸𑀲𑀺 ¶ , 𑀢𑀁 𑀲𑀩𑁆𑀩𑀁 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀲𑀺. 𑀬𑁄 𑀧𑀦𑀸𑀬𑀁 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺 𑀢𑁂𑀲𑀼𑀬𑁂𑀯 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸𑀭𑀸𑀲𑀺, 𑀢𑀁 𑀲𑀩𑁆𑀩𑀁 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀲𑀺. 𑀬𑁄 ¶ 𑀧𑀦𑀸𑀬𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀢𑁂𑀲𑀼𑀬𑁂𑀯 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀯𑀺𑀪𑀢𑁆𑀢𑁄 𑀘𑀢𑀼𑀪𑀽𑀫𑀺𑀓𑀘𑀺𑀢𑁆𑀢𑀭𑀸𑀲𑀺, 𑀢𑀁 𑀲𑀩𑁆𑀩𑀁 𑀧𑀭𑀺𑀧𑀺𑀡𑁆𑀟𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀲𑀺.

𑀅𑀧𑀺𑀘𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀓𑀸𑀫𑀸𑀯𑀘𑀭𑀅𑀝𑁆𑀞𑀓𑀼𑀲𑀮𑀘𑀺𑀢𑁆𑀢𑀸𑀤𑀻𑀳𑀺 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀏𑀯𑀫𑁆𑀧𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁧. 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁨. 𑀇𑀤𑀸𑀦𑀺 𑀢𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼. 𑀓𑀢𑀫𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀺𑀢𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀇𑀤𑀸𑀦𑀺 𑀢𑀁 𑀯𑀺𑀪𑀚𑀦𑁆𑀢𑁄 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀭𑀽𑀧𑀦𑁆𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀦𑀁. 𑀏𑀯𑀁 𑀧𑀤𑀤𑁆𑀯𑀬𑁂𑀦𑀸𑀧𑀺 𑀭𑀽𑀧𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀕𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀭𑀽𑀧𑀦𑁆𑀢𑀺? 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀺𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣? 𑀭𑀼𑀧𑁆𑀧𑀢𑀻𑀢𑀺 ¶ 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀺𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 𑀭𑀼𑀧𑁆𑀧𑀢𑀺. 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯).

𑀢𑀢𑁆𑀣 𑀓𑀺𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸; 𑀓𑁂𑀦 𑀓𑀸𑀭𑀡𑁂𑀦 𑀭𑀽𑀧𑀁 𑀯𑀤𑁂𑀣, 𑀓𑁂𑀦 𑀓𑀸𑀭𑀡𑁂𑀦 𑀢𑀁 𑀭𑀽𑀧𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀭𑀼𑀧𑁆𑀧𑀢𑀻𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀓𑀸𑀭𑀡𑀼𑀤𑁆𑀤𑁂𑀲𑁄. 𑀬𑀲𑁆𑀫𑀸 𑀭𑀼𑀧𑁆𑀧𑀢𑀺 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀭𑀼𑀧𑁆𑀧𑀢𑀻𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀺𑀬𑀢𑀺 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁 𑀯𑀼𑀢𑁆𑀢𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀭𑀽𑀧𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀭𑀼𑀧𑁆𑀧𑀦𑀮𑀓𑁆𑀔𑀡𑀜𑁆𑀳𑁂𑀢𑀁.

𑀲𑀻𑀢𑁂𑀦𑀧𑀺 ¶ 𑀭𑀼𑀧𑁆𑀧𑀢𑀻𑀢𑀺𑀆𑀤𑀻𑀲𑀼 𑀧𑀦 𑀲𑀻𑀢𑁂𑀦 𑀢𑀸𑀯 𑀭𑀼𑀧𑁆𑀧𑀦𑀁 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂 𑀧𑀸𑀓𑀝𑀁. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀜𑁆𑀳𑀺 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀦𑀸𑀫 𑀳𑁄𑀢𑀺 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁄, 𑀬𑀲𑁆𑀲 𑀦𑁂𑀯 𑀳𑁂𑀝𑁆𑀞𑀸 𑀧𑀣𑀯𑀻 𑀅𑀢𑁆𑀣𑀺, 𑀦 𑀉𑀧𑀭𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑀻𑀧𑀫𑀡𑀺𑀆𑀮𑁄𑀓𑁄, 𑀦𑀺𑀘𑁆𑀘𑀦𑁆𑀥𑀓𑀸𑀭𑁄. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀢𑀺𑀕𑀸𑀯𑀼𑀢𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀢𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀧𑀩𑁆𑀩𑀢𑀧𑀸𑀤𑁂 𑀤𑀻𑀖𑀧𑀼𑀣𑀼𑀮𑁂𑀳𑀺 𑀦𑀔𑁂𑀳𑀺 𑀮𑀕𑁆𑀕𑀺𑀢𑁆𑀯𑀸 𑀅𑀯𑀁𑀲𑀺𑀭𑀸 𑀑𑀮𑀫𑁆𑀩𑀦𑁆𑀢𑀺. 𑀬𑀤𑀸 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀕𑀢𑀸 𑀳𑁄𑀦𑁆𑀢𑀺 𑀅𑀣 ‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀩𑁆𑀬𑀸𑀯𑀝𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑁂 𑀉𑀤𑀓𑁂 𑀧𑀢𑀦𑁆𑀢𑀺, 𑀲𑀻𑀢𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀧𑀓𑁆𑀓𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺. 𑀧𑀢𑀺𑀢𑀫𑀢𑁆𑀢𑀸𑀯 𑀅𑀘𑁆𑀘𑀦𑁆𑀢𑀔𑀸𑀭𑁂𑀦 𑀲𑀻𑀢𑁄𑀤𑀓𑁂𑀦 𑀙𑀺𑀦𑁆𑀦𑀘𑀫𑁆𑀫𑀦𑁆𑀳𑀸𑀭𑀼𑀫𑀁𑀲𑀅𑀝𑁆𑀞𑀻𑀳𑀺 𑀪𑀺𑀚𑁆𑀚𑀫𑀸𑀦𑁂𑀳𑀺 𑀢𑀢𑁆𑀢𑀢𑁂𑀮𑁂 𑀧𑀢𑀺𑀢𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀧𑀝𑀧𑀝𑀸𑀬𑀫𑀸𑀦𑀸 𑀯𑀺𑀮𑀻𑀬𑀦𑁆𑀢𑀺. 𑀏𑀯𑀁 𑀲𑀻𑀢𑁂𑀦 𑀭𑀼𑀧𑁆𑀧𑀦𑀁 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂 𑀧𑀸𑀓𑀝𑀁. 𑀫𑀳𑀺𑀁𑀲𑀓𑀭𑀝𑁆𑀞𑀸𑀤𑀻𑀲𑀼𑀧𑀺 𑀳𑀺𑀫𑀧𑀸𑀢𑀲𑀻𑀢𑀮𑁂𑀲𑀼 𑀧𑀤𑁂𑀲𑁂𑀲𑀼 𑀏𑀢𑀁 𑀧𑀸𑀓𑀝𑀫𑁂𑀯. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀲𑀻𑀢𑁂𑀦 𑀪𑀺𑀦𑁆𑀦𑀘𑁆𑀙𑀺𑀦𑁆𑀦𑀲𑀭𑀻𑀭𑀸 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺.

𑀉𑀡𑁆𑀳𑁂𑀦 𑀭𑀼𑀧𑁆𑀧𑀦𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀧𑀸𑀓𑀝𑀁. 𑀢𑀢𑁆𑀣 𑀳𑀺 𑀢𑀢𑁆𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀓𑀭𑀡𑀓𑀸𑀮𑁂 𑀲𑀢𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺.

𑀚𑀺𑀖𑀘𑁆𑀙𑀸𑀬 𑀭𑀼𑀧𑁆𑀧𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀘𑁂𑀯 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀘 ¶ 𑀧𑀸𑀓𑀝𑀁. 𑀧𑁂𑀢𑁆𑀢𑀺𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸 𑀤𑁆𑀯𑁂 𑀢𑀻𑀡𑀺 𑀩𑀼𑀤𑁆𑀥𑀦𑁆𑀢𑀭𑀸𑀦𑀺 𑀓𑀺𑀜𑁆𑀘𑀺𑀤𑁂𑀯 𑀆𑀫𑀺𑀲𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺 ¶ . 𑀅𑀦𑁆𑀢𑁄𑀉𑀤𑀭𑀁 𑀆𑀤𑀺𑀢𑁆𑀢𑀲𑀼𑀲𑀺𑀭𑀭𑀼𑀓𑁆𑀔𑁄 𑀯𑀺𑀬 𑀳𑁄𑀢𑀺. 𑀤𑀼𑀩𑁆𑀪𑀺𑀓𑁆𑀔𑁂 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀫𑀭𑀡𑀧𑁆𑀧𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺.

𑀧𑀺𑀧𑀸𑀲𑀸𑀬 𑀭𑀼𑀧𑁆𑀧𑀦𑀁 𑀓𑀸𑀮𑀓𑀜𑁆𑀚𑀺𑀓𑀸𑀤𑀻𑀲𑀼 𑀧𑀸𑀓𑀝𑀁. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀤𑁆𑀯𑁂 𑀢𑀻𑀡𑀺 𑀩𑀼𑀤𑁆𑀥𑀦𑁆𑀢𑀭𑀸𑀦𑀺 𑀳𑀤𑀬𑀢𑁂𑀫𑀦𑀫𑀢𑁆𑀢𑀁 𑀯𑀸 𑀚𑀺𑀯𑁆𑀳𑀸𑀢𑁂𑀫𑀦𑀫𑀢𑁆𑀢𑀁 𑀯𑀸 𑀉𑀤𑀓𑀩𑀺𑀦𑁆𑀤𑀼𑀁 𑀮𑀤𑁆𑀥𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. ‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸’𑀢𑀺 𑀦𑀤𑀺𑀁 𑀕𑀢𑀸𑀦𑀫𑁆𑀧𑀺 𑀦𑀤𑀻 𑀯𑀸𑀮𑀺𑀓𑀸𑀢𑀮𑀁 𑀲𑀫𑁆𑀧𑀚𑁆𑀚𑀢𑀺. 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀢𑀸𑀦𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀳𑁄𑀢𑀺. 𑀢𑁂 𑀲𑀼𑀲𑁆𑀲𑀦𑁆𑀢𑀸 𑀩𑀮𑀯𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀘𑀭𑀦𑁆𑀢𑀺.

𑀏𑀓𑁄 ¶ 𑀓𑀺𑀭 𑀓𑀸𑀮𑀓𑀜𑁆𑀚𑀺𑀓𑀅𑀲𑀼𑀭𑁄 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀬𑁄𑀚𑀦𑀕𑀫𑁆𑀪𑀻𑀭𑀯𑀺𑀢𑁆𑀣𑀸𑀭𑀁 𑀫𑀳𑀸𑀕𑀗𑁆𑀕𑀁 𑀑𑀢𑀭𑀺. 𑀢𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀉𑀤𑀓𑀁 𑀙𑀺𑀚𑁆𑀚𑀢𑀺, 𑀥𑀽𑀫𑁄 𑀉𑀕𑁆𑀕𑀘𑁆𑀙𑀢𑀺, 𑀢𑀢𑁆𑀢𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀘𑀗𑁆𑀓𑀫𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀲 𑀉𑀤𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀺 𑀯𑀺𑀪𑀸𑀬𑀺. 𑀅𑀣 𑀦𑀁 𑀧𑀸𑀢𑁄𑀯 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸 𑀢𑀺𑀁𑀲𑀫𑀢𑁆𑀢𑀸 𑀧𑀺𑀡𑁆𑀟𑀘𑀸𑀭𑀺𑀓𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑁋 ‘‘𑀓𑁄 𑀦𑀸𑀫 𑀢𑁆𑀯𑀁, 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀧𑁂𑀢𑁄𑀳𑀫𑀲𑁆𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀭𑀺𑀬𑁂𑀲𑀲𑀻’’𑀢𑀺? ‘‘𑀧𑀸𑀦𑀻𑀬𑀁, 𑀪𑀦𑁆𑀢𑁂’’𑀢𑀺. ‘‘𑀅𑀬𑀁 𑀕𑀗𑁆𑀕𑀸 𑀧𑀭𑀺𑀧𑀼𑀡𑁆𑀡𑀸, 𑀓𑀺𑀁 𑀢𑁆𑀯𑀁 𑀦 𑀧𑀲𑁆𑀲𑀲𑀻’’𑀢𑀺? ‘‘𑀦 𑀉𑀧𑀓𑀧𑁆𑀧𑀢𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀕𑀗𑁆𑀕𑀸𑀧𑀺𑀝𑁆𑀞𑁂 𑀦𑀺𑀧𑀚𑁆𑀚, 𑀫𑀼𑀔𑁂 𑀢𑁂 𑀧𑀸𑀦𑀻𑀬𑀁 𑀆𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀯𑀸𑀮𑀺𑀓𑀸𑀧𑀼𑀴𑀺𑀦𑁂 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺. 𑀪𑀺𑀓𑁆𑀔𑀽 𑀢𑀺𑀁𑀲𑀫𑀢𑁆𑀢𑁂 𑀧𑀢𑁆𑀢𑁂 𑀦𑀻𑀳𑀭𑀺𑀢𑁆𑀯𑀸 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀫𑀼𑀔𑁂 𑀆𑀲𑀺𑀜𑁆𑀘𑀺𑀁𑀲𑀼. 𑀢𑁂𑀲𑀁 𑀢𑀣𑀸 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀯𑁂𑀮𑀸 𑀉𑀧𑀓𑀝𑁆𑀞𑀸 𑀚𑀸𑀢𑀸. 𑀢𑀢𑁄 ‘‘𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁄 𑀅𑀫𑁆𑀳𑀸𑀓𑀁, 𑀲𑀧𑁆𑀧𑀼𑀭𑀺𑀲; 𑀓𑀘𑁆𑀘𑀺 𑀢𑁂 𑀅𑀲𑁆𑀲𑀸𑀤𑀫𑀢𑁆𑀢𑀸 𑀮𑀤𑁆𑀥𑀸’’𑀢𑀺 𑀆𑀳𑀁𑀲𑀼. 𑀧𑁂𑀢𑁄 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸𑀦𑀁 𑀅𑀬𑁆𑀬𑀸𑀦𑀁 𑀢𑀺𑀁𑀲𑀫𑀢𑁆𑀢𑁂𑀳𑀺 𑀧𑀢𑁆𑀢𑁂𑀳𑀺 𑀆𑀲𑀺𑀢𑁆𑀢𑀉𑀤𑀓𑀢𑁄 𑀅𑀟𑁆𑀠𑀧𑀲𑀢𑀫𑀢𑁆𑀢𑀫𑁆𑀧𑀺 𑀧𑀭𑀕𑀮𑀕𑀢𑀁, 𑀧𑁂𑀢𑀢𑁆𑀢𑀪𑀸𑀯𑀢𑁄 𑀫𑁄𑀓𑁆𑀔𑁄 𑀫𑀸 𑀳𑁄𑀢𑀽’’𑀢𑀺 𑀆𑀳. 𑀏𑀯𑀁 𑀧𑀺𑀧𑀸𑀲𑀸𑀬 𑀭𑀼𑀧𑁆𑀧𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀧𑀸𑀓𑀝𑀁.

𑀟𑀁𑀲𑀸𑀤𑀻𑀳𑀺 𑀭𑀼𑀧𑁆𑀧𑀦𑀁 𑀟𑀁𑀲𑀫𑀓𑁆𑀔𑀺𑀓𑀸𑀤𑀺𑀲𑀫𑁆𑀩𑀩𑀳𑀼𑀮𑁂𑀲𑀼 𑀧𑀤𑁂𑀲𑁂𑀲𑀼 𑀧𑀸𑀓𑀝𑀁. 𑀏𑀢𑁆𑀣 𑀘 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸, 𑀫𑀓𑀲𑀸𑀢𑀺 𑀫𑀓𑀲𑀸𑀯 𑀯𑀸𑀢𑀸𑀢𑀺 𑀓𑀼𑀘𑁆𑀙𑀺𑀯𑀸𑀢𑀧𑀺𑀝𑁆𑀞𑀺𑀯𑀸𑀢𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀭𑀻𑀭𑀲𑁆𑀫𑀺𑀜𑁆𑀳𑀺 ¶ 𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀆𑀤𑀻𑀦𑀺 𑀪𑀺𑀦𑁆𑀤𑀢𑀺, 𑀓𑀸𑀡𑀁 𑀓𑀭𑁄𑀢𑀺, 𑀔𑀼𑀚𑁆𑀚𑀁 𑀓𑀭𑁄𑀢𑀺, 𑀧𑀻𑀞𑀲𑀧𑁆𑀧𑀺𑀁 𑀓𑀭𑁄𑀢𑀺. 𑀆𑀢𑀧𑁄𑀢𑀺 𑀲𑀽𑀭𑀺𑀬𑀸𑀢𑀧𑁄. 𑀢𑁂𑀦 𑀭𑀼𑀧𑁆𑀧𑀦𑀁 𑀫𑀭𑀼𑀓𑀦𑁆𑀢𑀸𑀭𑀸𑀤𑀻𑀲𑀼 𑀧𑀸𑀓𑀝𑀁. 𑀏𑀓𑀸 𑀓𑀺𑀭 𑀇𑀢𑁆𑀣𑀻 𑀫𑀭𑀼𑀓𑀦𑁆𑀢𑀸𑀭𑁂 𑀭𑀢𑁆𑀢𑀺𑀁 𑀲𑀢𑁆𑀣𑀢𑁄 𑀑𑀳𑀻𑀦𑀸 𑀤𑀺𑀯𑀸 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀯𑀸𑀮𑀺𑀓𑀸𑀬 𑀢𑀧𑁆𑀧𑀫𑀸𑀦𑀸𑀬 𑀧𑀸𑀤𑁂 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀻𑀲𑀢𑁄 𑀧𑀘𑁆𑀙𑀺𑀁 𑀑𑀢𑀸𑀭𑁂𑀢𑁆𑀯𑀸 𑀅𑀓𑁆𑀓𑀫𑀺. 𑀓𑀫𑁂𑀦 𑀧𑀘𑁆𑀙𑀺𑀬𑀸 𑀉𑀡𑁆𑀳𑀸𑀪𑀺𑀢𑀢𑁆𑀢𑀸𑀬 ¶ 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀲𑁆𑀲𑀸 𑀉𑀧𑀭𑀺 𑀲𑀸𑀝𑀓𑀁 𑀞𑀧𑁂𑀢𑁆𑀯𑀸 𑀅𑀓𑁆𑀓𑀫𑀺. 𑀢𑀲𑁆𑀫𑀺𑀫𑁆𑀧𑀺 𑀲𑀦𑁆𑀢𑀢𑁆𑀢𑁂 𑀅𑀗𑁆𑀓𑁂𑀦 𑀕𑀳𑀺𑀢𑀁 𑀧𑀼𑀢𑁆𑀢𑀓𑀁 𑀅𑀥𑁄𑀫𑀼𑀔𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀁 𑀓𑀦𑁆𑀤𑀦𑁆𑀢𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀥𑀺𑀁 𑀢𑁂𑀦 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀓𑀸𑀮𑀫𑀓𑀸𑀲𑀺.

𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀤𑀻𑀖𑀚𑀸𑀢𑀺𑀓𑀸 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀫𑁆𑀨𑀲𑁆𑀲𑁂𑀦 𑀭𑀼𑀧𑁆𑀧𑀦𑀁 𑀆𑀲𑀻𑀯𑀺𑀲𑀤𑀝𑁆𑀞𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ¶ ‘𑀬𑀁 𑀓𑀺𑀜𑁆𑀘𑀺 𑀭𑀽𑀧’𑀦𑁆𑀢𑀺 𑀧𑀤𑁂𑀦 𑀲𑀁𑀕𑀳𑀺𑀢𑀁 𑀧𑀜𑁆𑀘𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑀙𑀦𑁆𑀦𑀯𑀼𑀢𑀺𑀓𑁄𑀝𑁆𑀞𑀸𑀲𑀧𑁆𑀧𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀅𑀢𑀻𑀢𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀆𑀳. 𑀢𑀢𑁄 𑀧𑀭𑀁 𑀢𑀤𑁂𑀯 𑀅𑀚𑁆𑀛𑀢𑁆𑀢𑀤𑀼𑀓𑀸𑀤𑀻𑀲𑀼 𑀘𑀢𑀽𑀲𑀼 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀲𑀩𑁆𑀩𑀫𑁆𑀧𑁂𑀢𑀁 𑀏𑀓𑀸𑀤𑀲𑀲𑀼 𑀧𑀤𑁂𑀲𑁂𑀲𑀼 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀭𑀽𑀧𑀁 𑀏𑀓𑀢𑁄 𑀧𑀺𑀡𑁆𑀟𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀤𑁂𑀓𑀚𑁆𑀛𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀢𑀤𑁂𑀓𑀚𑁆𑀛𑀦𑁆𑀢𑀺 𑀢𑀁 𑀏𑀓𑀚𑁆𑀛𑀁; 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸𑀢𑀺 𑀅𑀪𑀺𑀲𑀁𑀳𑀭𑀺𑀢𑁆𑀯𑀸; 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀗𑁆𑀔𑁂𑀧𑀁 𑀓𑀢𑁆𑀯𑀸; 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀩𑁆𑀩𑀫𑁆𑀧𑁂𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀲𑀗𑁆𑀔𑀸𑀢𑁂 𑀏𑀓𑀯𑀺𑀥𑀪𑀸𑀯𑁂 𑀧𑀜𑁆𑀜𑀸𑀬 𑀭𑀸𑀲𑀺𑀁 𑀓𑀢𑁆𑀯𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀢𑁂𑀦 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑁂 𑀭𑀸𑀲𑀺𑀪𑀸𑀯𑀽𑀧𑀕𑀫𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀦 𑀳𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫 𑀅𑀢𑁆𑀣𑀺. 𑀬𑀣𑀸 𑀘 𑀭𑀽𑀧𑀁, 𑀏𑀯𑀁 𑀯𑁂𑀤𑀦𑀸𑀤𑀬𑁄𑀧𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀸𑀤𑀻𑀲𑀼 𑀭𑀸𑀲𑀺𑀪𑀸𑀯𑀽𑀧𑀕𑀫𑀦𑁂𑀦. 𑀦 𑀳𑀺 𑀯𑁂𑀤𑀦𑀸𑀤𑀻𑀳𑀺 𑀅𑀜𑁆𑀜𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀦𑀸𑀫 𑀅𑀢𑁆𑀣𑀺.

𑁩. 𑀇𑀤𑀸𑀦𑀺 𑀏𑀓𑁂𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀓𑁆𑀔𑀺𑀢𑁆𑀢𑀁 𑀭𑀽𑀧𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁 𑀅𑀢𑀻𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀫𑀸𑀢𑀺𑀓𑀸𑀬 𑀪𑀼𑀫𑁆𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀞𑀧𑀺𑀢𑀸𑀬 𑀫𑀸𑀢𑀺𑀓𑀸𑀬 𑀬𑀁 𑀅𑀢𑀻𑀢𑀁 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀢𑀫𑀦𑁆𑀢𑀺? 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑀲𑁆𑀲 𑀅𑀢𑀻𑀢𑀢𑁆𑀢𑀺𑀓𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁦𑁪𑁪) 𑀯𑀼𑀢𑁆𑀢𑀸𑀦𑁂𑀯. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸𑀢𑀺 𑀇𑀤𑀁 𑀅𑀢𑀻𑀢𑀦𑁆𑀢𑀺 𑀯𑀼𑀢𑁆𑀢𑀭𑀽𑀧𑀲𑁆𑀲 𑀲𑀪𑀸𑀯𑀤𑀲𑁆𑀲𑀦𑀁. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀅𑀢𑀻𑀢𑀭𑀽𑀧𑀫𑁆𑀧𑀺 𑀪𑀽𑀢𑀸𑀦𑀺 𑀘𑁂𑀯 𑀪𑀽𑀢𑀸𑀦𑀺 𑀉𑀧𑀸𑀤𑀸𑀬 𑀦𑀺𑀩𑁆𑀩𑀢𑁆𑀢𑀭𑀽𑀧𑀜𑁆𑀘, 𑀅𑀦𑀸𑀕𑀢𑀫𑁆𑀧𑀺…𑀧𑁂… 𑀤𑀽𑀭𑀲𑀦𑁆𑀢𑀺𑀓𑀫𑁆𑀧𑀺 ¶ . 𑀦 𑀳𑀺 𑀪𑀽𑀢𑁂𑀳𑀺 𑀘𑁂𑀯 𑀪𑀽𑀢𑀸𑀦𑀺 𑀉𑀧𑀸𑀤𑀸𑀬 𑀧𑀯𑀢𑁆𑀢𑀭𑀽𑀧𑀢𑁄 𑀘 𑀅𑀜𑁆𑀜𑀁 𑀭𑀽𑀧𑀁 𑀦𑀸𑀫 𑀅𑀢𑁆𑀣𑀻𑀢𑀺.

𑀅𑀧𑀭𑁄 𑀦𑀬𑁄 𑁋 𑀅𑀢𑀻𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂𑀦𑁂𑀯 𑀲𑀗𑁆𑀕𑀳𑀺𑀢𑀁, 𑀏𑀢𑁆𑀣𑁂𑀯 𑀕𑀡𑀦𑀁 𑀕𑀢𑀁. 𑀓𑀺𑀦𑁆𑀢𑀺? 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 ¶ 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀤𑁆𑀤𑁂𑀲𑀧𑀤𑀸𑀦𑀺𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀇𑀤𑀁 𑀧𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑀢𑁄 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑀢𑁄𑀢𑀺 𑀤𑀼𑀯𑀺𑀥𑀁. 𑀢𑀁 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀧𑀝𑀺𑀲𑀦𑁆𑀥𑀺𑀢𑁄 𑀳𑀺 𑀧𑀝𑁆𑀞𑀸𑀬 𑀅𑀢𑀻𑀢𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀁 𑀭𑀽𑀧𑀁, 𑀅𑀦𑀦𑁆𑀢𑀭𑀪𑀯𑁂 𑀯𑀸 𑀦𑀺𑀩𑁆𑀩𑀢𑁆𑀢𑀁 𑀳𑁄𑀢𑀼 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑀁 𑀅𑀢𑀻𑀢𑀫𑁂𑀯 𑀦𑀸𑀫. 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀅𑀦𑀸𑀕𑀢𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀓𑀭𑀽𑀧𑀁, 𑀅𑀦𑀦𑁆𑀢𑀭𑀪𑀯𑁂 𑀯𑀸 𑀦𑀺𑀩𑁆𑀩𑀢𑁆𑀢𑀁 𑀳𑁄𑀢𑀼 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑀁 𑀅𑀦𑀸𑀕𑀢𑀫𑁂𑀯 𑀦𑀸𑀫. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀅𑀦𑀦𑁆𑀢𑀭𑁂 𑀧𑀯𑀢𑁆𑀢𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑁂 𑀧𑀦 𑀔𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀬𑁄 𑀳𑀺 𑀭𑀽𑀧𑀲𑁆𑀲 𑀔𑀡𑀸 𑁋 𑀉𑀧𑁆𑀧𑀸𑀤𑁄, 𑀞𑀺𑀢𑀺, 𑀪𑀗𑁆𑀕𑁄𑀢𑀺. 𑀇𑀫𑁂 𑀢𑀬𑁄 𑀔𑀡𑁂 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀭𑀽𑀧𑀁, 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀁 𑀯𑀸 𑀳𑁄𑀢𑀼 𑀅𑀢𑀻𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑀁 𑀅𑀢𑀻𑀢𑀫𑁂𑀯 𑀦𑀸𑀫. 𑀢𑀬𑁄 𑀔𑀡𑁂 𑀅𑀲𑀫𑁆𑀧𑀢𑁆𑀢𑀁 𑀭𑀽𑀧𑀁, 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑁂𑀦 𑀯𑀸 𑀅𑀲𑀫𑁆𑀧𑀢𑁆𑀢𑀁 𑀳𑁄𑀢𑀼 𑀅𑀦𑀸𑀕𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀯𑀸, 𑀲𑀩𑁆𑀩𑀁 𑀅𑀦𑀸𑀕𑀢𑀫𑁂𑀯 𑀦𑀸𑀫. 𑀇𑀫𑁂 𑀢𑀬𑁄 𑀔𑀡𑁂 𑀲𑀫𑁆𑀧𑀢𑁆𑀢𑀁 𑀭𑀽𑀧𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑁂𑀦𑁂𑀯 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀇𑀤𑀜𑁆𑀳𑀺 𑀭𑀽𑀧𑀁 𑀅𑀤𑁆𑀥𑀸𑀲𑀦𑁆𑀢𑀢𑀺𑀲𑀫𑀬𑀔𑀡𑀯𑀲𑁂𑀦 𑀘𑀢𑀼𑀥𑀸 𑀅𑀢𑀻𑀢𑀁 𑀦𑀸𑀫 𑀳𑁄𑀢𑀺. 𑀢𑀣𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀅𑀤𑁆𑀥𑀸𑀯𑀲𑁂𑀦 𑀢𑀸𑀯 𑀏𑀓𑀲𑁆𑀲 𑀏𑀓𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀦𑀸𑀕𑀢𑀁, 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀲𑀦𑁆𑀢𑀢𑀺𑀯𑀲𑁂𑀦 𑀲𑀪𑀸𑀕𑀏𑀓𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀏𑀓𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀢𑁄 𑀧𑀼𑀩𑁆𑀩𑁂 𑀯𑀺𑀲𑀪𑀸𑀕𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀘𑀺𑀢𑁆𑀢𑀚𑀁 𑀏𑀓𑀯𑀻𑀣𑀺𑀏𑀓𑀚𑀯𑀦𑀏𑀓𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀸𑀝𑀺𑀬𑁂𑀓𑁆𑀓𑀁 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑁂𑀤𑁄 𑀦𑀢𑁆𑀣𑀺. 𑀢𑁂𑀲𑀜𑁆𑀜𑁂𑀯 𑀧𑀦 𑀉𑀢𑀼𑀆𑀳𑀸𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀢𑀲𑁆𑀲 𑀅𑀢𑀻𑀢𑀸𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀬𑀯𑀲𑁂𑀦 𑀏𑀓𑀫𑀼𑀳𑀼𑀢𑁆𑀢𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀭𑀢𑁆𑀢𑀺𑀤𑀺𑀯𑀸𑀤𑀻𑀲𑀼 𑀲𑀫𑀬𑁂𑀲𑀼 𑀲𑀦𑁆𑀢𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀫𑀸𑀦𑀁 𑀢𑀁 𑀢𑀁 𑀲𑀫𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀔𑀡𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀁 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁.

𑀅𑀧𑀺𑀘 𑀅𑀢𑀺𑀓𑁆𑀓𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀁 𑀅𑀢𑀻𑀢𑀁. 𑀦𑀺𑀝𑁆𑀞𑀺𑀢𑀳𑁂𑀢𑀼𑀓𑀺𑀘𑁆𑀘𑀁 𑀅𑀦𑀺𑀝𑁆𑀞𑀺𑀢𑀧𑀘𑁆𑀘𑀬𑀓𑀺𑀘𑁆𑀘𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀪𑀬𑀓𑀺𑀘𑁆𑀘𑀫𑀲𑀫𑁆𑀧𑀢𑁆𑀢𑀁 𑀅𑀦𑀸𑀕𑀢𑀁. 𑀲𑀓𑀺𑀘𑁆𑀘𑀓𑁆𑀔𑀡𑁂 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀏𑀢𑁆𑀣 𑀘 𑀔𑀡𑀸𑀤𑀺𑀓𑀣𑀸𑀯 𑀦𑀺𑀧𑁆𑀧𑀭𑀺𑀬𑀸𑀬𑀸, 𑀲𑁂𑀲𑀸 𑀲𑀧𑀭𑀺𑀬𑀸𑀬𑀸. 𑀢𑀸𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀅𑀚𑁆𑀛𑀢𑁆𑀢𑀤𑀼𑀓𑀲𑁆𑀲𑀸𑀧𑀺 𑀦𑀺𑀤𑁆𑀤𑁂𑀲𑀧𑀤𑀸𑀦𑀺 𑀳𑁂𑀝𑁆𑀞𑀸 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 (𑀥. 𑀲. 𑀅𑀝𑁆𑀞. 𑁧𑁦𑁫𑁦) 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀑𑀴𑀸𑀭𑀺𑀓𑀸𑀤𑀻𑀦𑀺 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁬𑁭𑁪) 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁬. 𑀳𑀻𑀦𑀤𑀼𑀓𑀦𑀺𑀤𑁆𑀤𑁂𑀲𑁂 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀩𑀳𑀽𑀲𑀼 𑀲𑀢𑁆𑀢𑁂𑀲𑀼 𑀲𑀸𑀫𑀺𑀯𑀘𑀦𑀁. 𑀅𑀧𑀭𑀲𑁆𑀲𑀸𑀧𑀺 𑀅𑀧𑀭𑀲𑁆𑀲𑀸𑀧𑀻𑀢𑀺 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀤𑀺𑀯𑀲𑀫𑁆𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀯𑀤𑀦𑁆𑀢𑁄 𑀏𑀢𑁆𑀢𑀓𑀫𑁂𑀯 𑀯𑀤𑁂𑀬𑁆𑀬. 𑀇𑀢𑀺 𑀲𑀢𑁆𑀣𑀸 𑀤𑁆𑀯𑀻𑀳𑁂𑀯 𑀧𑀤𑁂𑀳𑀺 𑀅𑀦𑀯𑀲𑁂𑀲𑁂 𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀦𑁆𑀢𑁄 ‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’𑀦𑁆𑀢𑀺 𑀆𑀳. 𑀏𑀢𑁆𑀢𑀓𑁂𑀦 𑀳𑀺 𑀲𑀩𑁆𑀩𑀫𑁆𑀧𑀺 𑀅𑀧𑀭𑀤𑀻𑀧𑀦𑀁 ¶ 𑀲𑀺𑀤𑁆𑀥𑀁 𑀳𑁄𑀢𑀺. 𑀉𑀜𑁆𑀜𑀸𑀢𑀦𑁆𑀢𑀺 𑀅𑀯𑀫𑀢𑀁. 𑀅𑀯𑀜𑁆𑀜𑀸𑀢𑀦𑁆𑀢𑀺 𑀯𑀫𑁆𑀪𑁂𑀢𑁆𑀯𑀸 𑀜𑀸𑀢𑀁. 𑀭𑀽𑀧𑀦𑁆𑀢𑀺𑀧𑀺 𑀦 𑀯𑀺𑀤𑀺𑀢𑀁. 𑀳𑀻𑀴𑀺𑀢𑀦𑁆𑀢𑀺 𑀅𑀕𑀳𑁂𑀢𑀩𑁆𑀩𑀝𑁆𑀞𑁂𑀦 𑀔𑀺𑀢𑁆𑀢𑀁 𑀙𑀟𑁆𑀟𑀺𑀢𑀁, 𑀚𑀺𑀕𑀼𑀘𑁆𑀙𑀺𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀭𑀺𑀪𑀽𑀢𑀦𑁆𑀢𑀺 𑀓𑀺𑀫𑁂𑀢𑁂𑀦𑀸𑀢𑀺 𑀯𑀸𑀘𑀸𑀬 𑀧𑀭𑀺𑀪𑀯𑀺𑀢𑀁. 𑀅𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀦 𑀕𑀭𑀼𑀓𑀢𑀁. 𑀳𑀻𑀦𑀦𑁆𑀢𑀺 𑀮𑀸𑀫𑀓𑀁. 𑀳𑀻𑀦𑀫𑀢𑀦𑁆𑀢𑀺 𑀳𑀻𑀦𑀦𑁆𑀢𑀺 𑀫𑀢𑀁, 𑀮𑀸𑀫𑀓𑀁 𑀓𑀢𑁆𑀯𑀸 𑀜𑀸𑀢𑀁. 𑀳𑀻𑀦𑀲𑀫𑁆𑀫𑀢𑀦𑁆𑀢𑀺 𑀳𑀻𑀦𑀦𑁆𑀢𑀺 𑀮𑁄𑀓𑁂 𑀲𑀫𑁆𑀫𑀢𑀁, 𑀳𑀻𑀦𑁂𑀳𑀺 𑀯𑀸 𑀲𑀫𑁆𑀫𑀢𑀁, 𑀕𑀽𑀣𑀪𑀓𑁆𑀔𑁂𑀳𑀺 𑀕𑀽𑀣𑁄 𑀯𑀺𑀬. 𑀅𑀦𑀺𑀝𑁆𑀞𑀦𑁆𑀢𑀺 𑀅𑀧𑁆𑀧𑀺𑀬𑀁, 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀸 𑀅𑀧𑀭𑀺𑀬𑁂𑀲𑀺𑀢𑀁. 𑀲𑀘𑁂𑀧𑀺 𑀦𑀁 𑀓𑁄𑀘𑀺 𑀧𑀭𑀺𑀬𑁂𑀲𑁂𑀬𑁆𑀬, 𑀧𑀭𑀺𑀬𑁂𑀲𑀢𑀼. 𑀏𑀢𑀲𑁆𑀲 𑀧𑀦 𑀆𑀭𑀫𑁆𑀫𑀡𑀲𑁆𑀲 𑀏𑀢𑀤𑁂𑀯 𑀦𑀸𑀫𑀁. 𑀅𑀓𑀦𑁆𑀢𑀦𑁆𑀢𑀺 𑀅𑀓𑀸𑀫𑀺𑀢𑀁, 𑀦𑀺𑀲𑁆𑀲𑀺𑀭𑀺𑀓𑀁 𑀯𑀸. 𑀅𑀫𑀦𑀸𑀧𑀦𑁆𑀢𑀺 𑀫𑀦𑀲𑁆𑀫𑀺𑀁 𑀦 𑀅𑀧𑁆𑀧𑀺𑀢𑀁. 𑀢𑀸𑀤𑀺𑀲𑀜𑁆𑀳𑀺 𑀆𑀭𑀫𑁆𑀫𑀡𑀁 𑀫𑀦𑀲𑁆𑀫𑀺𑀁 𑀦 𑀅𑀧𑁆𑀧𑀻𑀬𑀢𑀺. 𑀅𑀣 𑀯𑀸 𑀫𑀦𑀁 𑀅𑀧𑁆𑀧𑀸𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀁, 𑀦 𑀫𑀦𑀸𑀧𑀁 𑀅𑀫𑀦𑀸𑀧𑀁.

𑀅𑀧𑀭𑁄 𑀦𑀬𑁄 𑁋 𑀅𑀦𑀺𑀝𑁆𑀞𑀁 𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑀢𑁄. 𑀢𑀁 𑀏𑀓𑀦𑁆𑀢𑁂𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂𑀲𑀼 𑀅𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁. 𑀅𑀓𑀦𑁆𑀢𑀁 𑀲𑀼𑀔𑀲𑁆𑀲 𑀅𑀳𑁂𑀢𑀼𑀪𑀸𑀯𑀢𑁄. 𑀅𑀫𑀦𑀸𑀧𑀁 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑀢𑁄. 𑀭𑀽𑀧𑀸 𑀲𑀤𑁆𑀤𑀸𑀢𑀺 𑀇𑀤𑀫𑀲𑁆𑀲 𑀲𑀪𑀸𑀯𑀤𑀻𑀧𑀦𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀤𑁂 𑀅𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦 𑀅𑀦𑀺𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀺𑀪𑀢𑁆𑀢𑀸. 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀇𑀝𑁆𑀞𑀫𑁂𑀯.

𑀧𑀡𑀻𑀢𑀧𑀤𑀦𑀺𑀤𑁆𑀤𑁂𑀲𑁄 ¶ 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦 𑀇𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀺𑀪𑀢𑁆𑀢𑀸. 𑀓𑀼𑀲𑀮𑀓𑀫𑁆𑀫𑀚𑀜𑁆𑀳𑀺 𑀅𑀦𑀺𑀝𑁆𑀞𑀁 𑀦𑀸𑀫 ¶ 𑀦𑀢𑁆𑀣𑀺, 𑀲𑀩𑁆𑀩𑀁 𑀇𑀝𑁆𑀞𑀫𑁂𑀯. 𑀬𑀣𑀸 𑀘 𑀓𑀫𑁆𑀫𑀚𑁂𑀲𑀼 𑀏𑀯𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀅𑀢𑁆𑀣𑀺 𑀏𑀯𑀸𑀢𑀺 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀢𑁆𑀣𑀺, 𑀢𑁂𑀲𑀁 𑀢𑁂𑀲𑀁 𑀭𑀼𑀘𑀺𑀯𑀲𑁂𑀦 𑀓𑀣𑀺𑀢𑀁.

𑀬𑀣𑀸𑀳 𑁋

‘‘𑀫𑀦𑀸𑀧𑀧𑀭𑀺𑀬𑀦𑁆𑀢𑀁 𑀔𑁆𑀯𑀸𑀳𑀁, 𑀫𑀳𑀸𑀭𑀸𑀚, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀕𑁆𑀕𑀦𑁆𑀢𑀺 𑀯𑀤𑀸𑀫𑀺. 𑀢𑁂𑀯, 𑀫𑀳𑀸𑀭𑀸𑀚, 𑀭𑀽𑀧𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀢𑁂𑀯, 𑀫𑀳𑀸𑀭𑀸𑀚, 𑀲𑀤𑁆𑀤𑀸, 𑀕𑀦𑁆𑀥𑀸, 𑀭𑀲𑀸, 𑀨𑁄𑀝𑁆𑀞𑀩𑁆𑀩𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀻’’𑀢𑀺 ¶ (𑀲𑀁. 𑀦𑀺. 𑁧.𑁧𑁨𑁩).

𑀏𑀯𑀁 𑀬𑀲𑁆𑀫𑀸 𑀢𑁂𑀬𑁂𑀯 𑀭𑀽𑀧𑀸𑀤𑀬𑁄 𑀏𑀓𑁄 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀢𑁆𑀣 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀓𑁄 𑀓𑀼𑀚𑁆𑀛𑀢𑀺 𑀧𑀝𑀺𑀳𑀜𑁆𑀜𑀢𑀺, 𑀢𑀢𑁆𑀣 𑀤𑁄𑀲𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀓𑀲𑁆𑀲 𑀇𑀝𑁆𑀞𑀸 𑀳𑁄𑀦𑁆𑀢𑀺 𑀓𑀦𑁆𑀢𑀸 𑀫𑀦𑀸𑀧𑀸, 𑀏𑀓𑀲𑁆𑀲 𑀅𑀦𑀺𑀝𑁆𑀞𑀸 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸. 𑀏𑀓𑁄 𑀘𑁂𑀢𑁂 ‘𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸’𑀢𑀺 𑀤𑀓𑁆𑀔𑀺𑀡𑀢𑁄 𑀕𑀡𑁆𑀳𑀸𑀢𑀺, 𑀏𑀓𑁄 ‘𑀅𑀦𑀺𑀝𑁆𑀞𑀸 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸’𑀢𑀺 𑀯𑀸𑀫𑀢𑁄. 𑀢𑀲𑁆𑀫𑀸 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀜𑁆𑀳𑀺 𑀕𑀡𑁆𑀟𑀼𑀧𑁆𑀧𑀸𑀤𑀸𑀧𑀺 𑀇𑀝𑁆𑀞𑀸 𑀳𑁄𑀦𑁆𑀢𑀺 𑀓𑀦𑁆𑀢𑀸 𑀫𑀦𑀸𑀧𑀸, 𑀫𑀚𑁆𑀛𑀺𑀫𑀤𑁂𑀲𑀯𑀸𑀲𑀻𑀦𑀁 𑀅𑀢𑀺𑀚𑁂𑀕𑀼𑀘𑁆𑀙𑀸. 𑀢𑁂𑀲𑀜𑁆𑀘 𑀫𑁄𑀭𑀫𑀁𑀲𑀸𑀤𑀻𑀦𑀺 𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀇𑀢𑀭𑁂𑀲𑀁 𑀢𑀸𑀦𑀺 𑀅𑀢𑀺𑀚𑁂𑀕𑀼𑀘𑁆𑀙𑀸𑀦𑀻𑀢𑀺.

𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀧𑀦 𑀢𑁆𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑁂𑀲𑀻’’𑀢𑀺? ‘‘𑀆𑀫 𑀦𑀢𑁆𑀣𑀻’’𑀢𑀺 𑀯𑀤𑀸𑀫𑀺. 𑀧𑀼𑀦 𑀢𑀣𑁂𑀯 𑀬𑀸𑀯𑀢𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀦𑀺𑀩𑁆𑀩𑀸𑀦𑀁 𑀦𑀸𑀫 𑀇𑀝𑁆𑀞𑀁 𑀉𑀤𑀸𑀳𑀼 𑀅𑀦𑀺𑀝𑁆𑀞’’𑀦𑁆𑀢𑀺? 𑀚𑀸𑀦𑀫𑀸𑀦𑁄 ‘‘𑀇𑀝𑁆𑀞’’𑀦𑁆𑀢𑀺 𑀯𑀓𑁆𑀔𑀢𑀺. 𑀲𑀘𑁂𑀧𑀺 𑀦 𑀯𑀤𑁂𑀬𑁆𑀬, 𑀫𑀸 𑀯𑀤𑀢𑀼. 𑀦𑀺𑀩𑁆𑀩𑀸𑀦𑀁 𑀧𑀦 𑀏𑀓𑀦𑁆𑀢𑀇𑀝𑁆𑀞𑀫𑁂𑀯. ‘‘𑀦𑀦𑀼 𑀏𑀓𑁄 𑀦𑀺𑀩𑁆𑀩𑀸𑀦𑀲𑁆𑀲 𑀯𑀡𑁆𑀡𑁂 𑀓𑀣𑀺𑀬𑀫𑀸𑀦𑁂 𑀓𑀼𑀚𑁆𑀛𑀺𑀢𑁆𑀯𑀸 𑁋 ‘𑀢𑁆𑀯𑀁 𑀦𑀺𑀩𑁆𑀩𑀸𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀓𑀺𑀁 𑀢𑀢𑁆𑀣 𑀅𑀦𑁆𑀦𑀧𑀸𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑀬𑀦𑀘𑁆𑀙𑀸𑀤𑀦𑀲𑀫𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀢𑁆𑀣𑀻’𑀢𑀺 𑀯𑀢𑁆𑀯𑀸 ‘𑀦𑀢𑁆𑀣𑀻’𑀢𑀺 𑀯𑀼𑀢𑁆𑀢𑁂 ‘𑀅𑀮𑀁 𑀢𑀯 𑀦𑀺𑀩𑁆𑀩𑀸𑀦𑁂𑀦𑀸’𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀯𑀡𑁆𑀡𑁂 𑀓𑀣𑀺𑀬𑀫𑀸𑀦𑁂 𑀓𑀼𑀚𑁆𑀛𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀣𑀓𑁂𑀢𑀻𑀢𑀺 𑀇𑀝𑁆𑀞𑁂𑀢𑀁. 𑀏𑀢𑀲𑁆𑀲 𑀧𑀦 ¶ 𑀯𑀲𑁂𑀦 𑀢𑀯 𑀯𑀸𑀤𑁂 𑀦𑀺𑀩𑁆𑀩𑀸𑀦𑀁 𑀅𑀦𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺 ¶ . 𑀦 𑀧𑀦𑁂𑀢𑀁 𑀏𑀯𑀁 𑀕𑀳𑁂𑀢𑀩𑁆𑀩𑀁. 𑀏𑀲𑁄 𑀳𑀺 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀓𑀣𑁂𑀢𑀺. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀘 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀏𑀓𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺, 𑀏𑀓𑀲𑁆𑀲 𑀅𑀦𑀺𑀝𑁆𑀞𑀁’’.

𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀦 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀪𑀢𑁆𑀢𑀁 𑀅𑀢𑁆𑀣𑀻𑀢𑀺. 𑀓𑀲𑁆𑀲 𑀯𑀲𑁂𑀦 𑀯𑀺𑀪𑀢𑁆𑀢𑀦𑁆𑀢𑀺? 𑀫𑀚𑁆𑀛𑀺𑀫𑀓𑀲𑀢𑁆𑀢𑀲𑁆𑀲. 𑀇𑀤𑀜𑁆𑀳𑀺 𑀦 𑀅𑀢𑀺𑀇𑀲𑁆𑀲𑀭𑀸𑀦𑀁 𑀫𑀳𑀸𑀲𑀫𑁆𑀫𑀢𑀫𑀳𑀸𑀲𑀼𑀤𑀲𑁆𑀲𑀦𑀥𑀫𑁆𑀫𑀸𑀲𑁄𑀓𑀸𑀤𑀻𑀦𑀁 𑀯𑀲𑁂𑀦 𑀯𑀺𑀪𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀤𑀺𑀩𑁆𑀩𑀓𑀧𑁆𑀧𑀫𑁆𑀧𑀺 𑀆𑀭𑀫𑁆𑀫𑀡𑀁 𑀅𑀫𑀦𑀸𑀧𑀁 𑀉𑀧𑀝𑁆𑀞𑀸𑀢𑀺. 𑀦 𑀅𑀢𑀺𑀤𑀼𑀕𑁆𑀕𑀢𑀸𑀦𑀁 𑀤𑀼𑀮𑁆𑀮𑀪𑀦𑁆𑀦𑀧𑀸𑀦𑀸𑀦𑀁 𑀯𑀲𑁂𑀦 𑀯𑀺𑀪𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀓𑀡𑀸𑀚𑀓𑀪𑀢𑁆𑀢𑀲𑀺𑀢𑁆𑀣𑀸𑀦𑀺𑀧𑀺 𑀧𑀽𑀢𑀺𑀫𑀁𑀲𑀭𑀲𑁄𑀧𑀺 𑀅𑀢𑀺𑀫𑀥𑀼𑀭𑁄 𑀅𑀫𑀢𑀲𑀤𑀺𑀲𑁄 𑀘 𑀳𑁄𑀢𑀺. 𑀫𑀚𑁆𑀛𑀺𑀫𑀓𑀸𑀦𑀁 𑀧𑀦 ¶ 𑀕𑀡𑀓𑀫𑀳𑀸𑀫𑀢𑁆𑀢𑀲𑁂𑀝𑁆𑀞𑀺𑀓𑀼𑀝𑀼𑀫𑁆𑀩𑀺𑀓𑀯𑀸𑀡𑀺𑀚𑀸𑀤𑀻𑀦𑀁 𑀓𑀸𑀮𑁂𑀦 𑀇𑀝𑁆𑀞𑀁 𑀓𑀸𑀮𑁂𑀦 𑀅𑀦𑀺𑀝𑁆𑀞𑀁 𑀮𑀪𑀫𑀸𑀦𑀸𑀦𑀁 𑀯𑀲𑁂𑀦 𑀯𑀺𑀪𑀢𑁆𑀢𑀁. 𑀏𑀯𑀭𑀽𑀧𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺.

𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀯𑀺𑀧𑀸𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀦 𑀚𑀯𑀦𑀯𑀲𑁂𑀦. 𑀚𑀯𑀦𑀁 𑀧𑀦 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀇𑀝𑁆𑀞𑀲𑁆𑀫𑀺𑀁𑀬𑁂𑀯 𑀭𑀚𑁆𑀚𑀢𑀺, 𑀇𑀝𑁆𑀞𑀲𑁆𑀫𑀺𑀁𑀬𑁂𑀯 𑀤𑀼𑀲𑁆𑀲𑀢𑀺; 𑀅𑀦𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀭𑀚𑁆𑀚𑀢𑀺, 𑀅𑀦𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀤𑀼𑀲𑁆𑀲𑀢𑀻’’𑀢𑀺. 𑀯𑀺𑀧𑀸𑀓𑀯𑀲𑁂𑀦𑁂𑀯 𑀧𑀦𑁂𑀢𑀁 𑀏𑀓𑀦𑁆𑀢𑀢𑁄 𑀧𑀭𑀺𑀘𑁆𑀙𑀺𑀚𑁆𑀚𑀢𑀺. 𑀦 𑀳𑀺 𑀲𑀓𑁆𑀓𑀸 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑀜𑁆𑀘𑁂𑀢𑀼𑀁. 𑀲𑀘𑁂 𑀆𑀭𑀫𑁆𑀫𑀡𑀁 𑀇𑀝𑁆𑀞𑀁 𑀳𑁄𑀢𑀺, 𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀘𑁂 𑀅𑀦𑀺𑀝𑁆𑀞𑀁, 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀩𑀼𑀤𑁆𑀥𑀁 𑀯𑀸 𑀲𑀗𑁆𑀖𑀁 𑀯𑀸 𑀫𑀳𑀸𑀘𑁂𑀢𑀺𑀬𑀸𑀤𑀻𑀦𑀺 𑀯𑀸 𑀉𑀴𑀸𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀤𑀺𑀲𑁆𑀯𑀸 𑀅𑀓𑁆𑀔𑀻𑀦𑀺 𑀧𑀺𑀤𑀳𑀦𑁆𑀢𑀺, 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀥𑀫𑁆𑀫𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀡𑁆𑀡𑁂 𑀣𑀓𑁂𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺 𑀧𑀦 𑀦𑁂𑀲𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑁂𑀯 𑀳𑁄𑀦𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀕𑀽𑀣𑀲𑀽𑀓𑀭𑀸𑀤𑀬𑁄 𑀕𑀽𑀣𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘𑀔𑀸𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀦𑁆𑀢𑀺, 𑀕𑀽𑀣𑀤𑀲𑁆𑀲𑀦𑁂 𑀧𑀦 𑀢𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀕𑀦𑁆𑀥𑀖𑀸𑀬𑀦𑁂 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀭𑀲𑀲𑀸𑀬𑀦𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀜𑁆𑀘 𑀅𑀓𑀼𑀲𑀮𑀯𑀺𑀧𑀸𑀓𑀫𑁂𑀯 𑀳𑁄𑀢𑀺. 𑀩𑀦𑁆𑀥𑀺𑀢𑁆𑀯𑀸 𑀯𑀭𑀲𑀬𑀦𑁂 𑀲𑀬𑀸𑀧𑀺𑀢𑀲𑀽𑀓𑀭𑁄 𑀘 𑀓𑀺𑀜𑁆𑀘𑀸𑀧𑀺 𑀯𑀺𑀭𑀯𑀢𑀺, 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀧𑀦𑀲𑁆𑀲 𑀚𑀯𑀦𑀲𑁆𑀫𑀺𑀁𑀬𑁂𑀯 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀯𑀺𑀧𑀸𑀓𑀫𑁂𑀯. 𑀓𑀲𑁆𑀫𑀸? 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀢𑀸𑀬.

𑀅𑀧𑀺𑀘 𑀤𑁆𑀯𑀸𑀭𑀯𑀲𑁂𑀦𑀸𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀳𑀺 𑀕𑀽𑀣𑀓𑀮𑀮𑀁 𑀘𑀓𑁆𑀔𑀼𑀤𑁆𑀯𑀸𑀭𑀖𑀸𑀦𑀤𑁆𑀯𑀸𑀭𑁂𑀲𑀼 ¶ 𑀅𑀦𑀺𑀝𑁆𑀞𑀁, 𑀓𑀸𑀬𑀤𑁆𑀯𑀸𑀭𑁂 𑀇𑀝𑁆𑀞𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑁂𑀦 ¶ 𑀧𑁄𑀣𑀺𑀬𑀫𑀸𑀦𑀲𑁆𑀲, 𑀲𑀼𑀯𑀡𑁆𑀡𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑀲𑁆𑀲 𑀘 𑀫𑀡𑀺𑀭𑀢𑀦𑀲𑀼𑀯𑀡𑁆𑀡𑀲𑀽𑀮𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀓𑀸𑀬𑀤𑁆𑀯𑀸𑀭𑁂 𑀅𑀦𑀺𑀝𑁆𑀞𑀸𑀦𑀺. 𑀓𑀲𑁆𑀫𑀸? 𑀫𑀳𑀸𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀸𑀤𑀦𑀢𑁄. 𑀏𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀏𑀓𑀦𑁆𑀢𑀢𑁄 𑀯𑀺𑀧𑀸𑀓𑁂𑀦𑁂𑀯 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀁 𑀢𑀁 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀦 𑀳𑁂𑀝𑁆𑀞𑀺𑀫𑀦𑀬𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀦 𑀳𑀺 𑀪𑀕𑀯𑀸 𑀲𑀫𑁆𑀫𑀼𑀢𑀺𑀫𑀦𑀸𑀧𑀁 𑀪𑀺𑀦𑁆𑀤𑀢𑀺, 𑀧𑀼𑀕𑁆𑀕𑀮𑀫𑀦𑀸𑀧𑀁 𑀧𑀦 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀢𑀁𑀢𑀁𑀯𑀸𑀧𑀦𑀯𑀲𑁂𑀦𑁂𑀯 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀧𑁆𑀧𑀡𑀻𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑁂𑀭𑀬𑀺𑀓𑀸𑀦𑀜𑁆𑀳𑀺 𑀭𑀽𑀧𑀁 ¶ 𑀓𑁄𑀝𑀺𑀧𑁆𑀧𑀢𑁆𑀢𑀁 𑀳𑀻𑀦𑀁 𑀦𑀸𑀫; 𑀢𑀁 𑀉𑀧𑀸𑀤𑀸𑀬 𑀢𑀺𑀭𑀘𑁆𑀙𑀸𑀦𑁂𑀲𑀼 𑀦𑀸𑀕𑀲𑀼𑀧𑀡𑁆𑀡𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀁 𑀭𑀽𑀧𑀁 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀧𑁂𑀢𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀚𑀸𑀦𑀧𑀤𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀕𑀸𑀫𑀪𑁄𑀚𑀓𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀚𑀦𑀧𑀤𑀲𑀸𑀫𑀺𑀓𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀧𑀤𑁂𑀲𑀭𑀸𑀚𑀽𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑀲𑁆𑀲𑀸𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀪𑀼𑀫𑁆𑀫𑀤𑁂𑀯𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫. 𑀢𑁂𑀲𑀫𑁆𑀧𑀺 𑀳𑀻𑀦𑀁; 𑀢𑀁 𑀉𑀧𑀸𑀤𑀸𑀬 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫…𑀧𑁂… 𑀅𑀓𑀦𑀺𑀝𑁆𑀞𑀤𑁂𑀯𑀸𑀦𑀁 𑀧𑀦 𑀭𑀽𑀧𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀧𑀡𑀻𑀢𑀁 𑀦𑀸𑀫.

𑁭. 𑀤𑀽𑀭𑀤𑀼𑀓𑀦𑀺𑀤𑁆𑀤𑁂𑀲𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀺𑀪𑀢𑁆𑀢𑀸𑀦𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀤𑀼𑀓𑁂 𑀤𑀼𑀧𑁆𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀮𑀓𑁆𑀔𑀡𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬 𑀲𑀼𑀔𑀼𑀫𑀭𑀽𑀧𑀁 𑀤𑀽𑀭𑁂𑀢𑀺 𑀓𑀣𑀺𑀢𑀁. 𑀲𑀼𑀔𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀮𑀓𑁆𑀔𑀡𑀲𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬 𑀑𑀴𑀸𑀭𑀺𑀓𑀭𑀽𑀧𑀁 𑀲𑀦𑁆𑀢𑀺𑀓𑁂𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀬𑁄𑀲𑀸𑀦𑁂 𑀘 𑀦𑀺𑀬𑁆𑀬𑀸𑀢𑀦𑀝𑁆𑀞𑀸𑀦𑁂𑀧𑀺 ‘𑀇𑀤𑀁 𑀯𑀼𑀘𑁆𑀘𑀢𑀺 𑀭𑀽𑀧𑀁 𑀤𑀽𑀭𑁂’𑀢𑀺 𑀦 𑀦𑀻𑀬𑁆𑀬𑀸𑀢𑀺𑀢𑀁. 𑀓𑀲𑁆𑀫𑀸? 𑀤𑀼𑀯𑀺𑀥𑀜𑁆𑀳𑀺 𑀤𑀽𑀭𑁂 𑀦𑀸𑀫 𑁋 𑀮𑀓𑁆𑀔𑀡𑀢𑁄 𑀘 𑀑𑀓𑀸𑀲𑀢𑁄 𑀘𑀸𑀢𑀺. 𑀢𑀢𑁆𑀣 𑀮𑀓𑁆𑀔𑀡𑀢𑁄 𑀤𑀽𑀭𑁂𑀢𑀺 𑀦 𑀓𑀣𑀺𑀢𑀁, 𑀢𑀁 𑀑𑀓𑀸𑀲𑀢𑁄 𑀓𑀣𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀤𑀽𑀭𑁂𑀢𑀺 𑀅𑀓𑀣𑀺𑀢𑀁. 𑀑𑀴𑀸𑀭𑀺𑀓𑀭𑀽𑀧𑀁 𑀑𑀓𑀸𑀲𑀢𑁄 𑀤𑀽𑀭𑁂𑀢𑀺 𑀤𑀲𑁆𑀲𑁂𑀢𑀼𑀁 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀯 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺𑀆𑀤𑀺𑀫𑀸𑀳. 𑀲𑀦𑁆𑀢𑀺𑀓𑀧𑀤𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀦𑀸𑀲𑀦𑁆𑀦𑁂𑀢𑀺 𑀦 𑀆𑀲𑀦𑁆𑀦𑁂, 𑀅𑀦𑀼𑀧𑀓𑀝𑁆𑀞𑁂𑀢𑀺 𑀦𑀺𑀲𑁆𑀲𑀝𑁂, 𑀤𑀽𑀭𑁂𑀢𑀺 𑀤𑀽𑀭𑀫𑁆𑀳𑀺, 𑀅𑀲𑀦𑁆𑀢𑀺𑀓𑁂𑀢𑀺 𑀦 𑀲𑀦𑁆𑀢𑀺𑀓𑁂. 𑀇𑀤𑀁 𑀯𑀼𑀘𑁆𑀘𑀢𑀺 𑀭𑀽𑀧𑀁 𑀤𑀽𑀭𑁂𑀢𑀺 𑀇𑀤𑀁 𑀧𑀡𑁆𑀡𑀭𑀲𑀯𑀺𑀥𑀁 𑀲𑀼𑀔𑀼𑀫𑀭𑀽𑀧𑀁 𑀮𑀓𑁆𑀔𑀡𑀢𑁄 𑀤𑀽𑀭𑁂, 𑀤𑀲𑀯𑀺𑀥𑀁 𑀧𑀦 𑀑𑀴𑀸𑀭𑀺𑀓𑀭𑀽𑀧𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀑𑀓𑀸𑀲𑀢𑁄 𑀤𑀽𑀭𑁂𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀢𑀺𑀓𑀧𑀤𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀇𑀤𑀁 ¶ ¶ 𑀯𑀼𑀘𑁆𑀘𑀢𑀺 𑀭𑀽𑀧𑀁 𑀲𑀦𑁆𑀢𑀺𑀓𑁂𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀑𑀴𑀸𑀭𑀺𑀓𑀭𑀽𑀧𑀁 𑀮𑀓𑁆𑀔𑀡𑀢𑁄 𑀲𑀦𑁆𑀢𑀺𑀓𑁂, 𑀧𑀜𑁆𑀘𑀤𑀲𑀯𑀺𑀥𑀁 𑀧𑀦 𑀲𑀼𑀔𑀼𑀫𑀭𑀽𑀧𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀑𑀓𑀸𑀲𑀢𑁄 𑀲𑀦𑁆𑀢𑀺𑀓𑁂𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀓𑀢𑁄 ¶ 𑀧𑀝𑁆𑀞𑀸𑀬 𑀧𑀦 𑀭𑀽𑀧𑀁 𑀑𑀓𑀸𑀲𑀯𑀲𑁂𑀦 𑀲𑀦𑁆𑀢𑀺𑀓𑁂 𑀦𑀸𑀫? 𑀓𑀺𑀢𑁆𑀢𑀓𑀢𑁄 𑀧𑀝𑁆𑀞𑀸𑀬 𑀤𑀽𑀭𑁂 𑀦𑀸𑀫𑀸𑀢𑀺? 𑀧𑀓𑀢𑀺𑀓𑀣𑀸𑀬 𑀓𑀣𑁂𑀦𑁆𑀢𑀸𑀦𑀁 𑀤𑁆𑀯𑀸𑀤𑀲𑀳𑀢𑁆𑀣𑁄 𑀲𑀯𑀦𑀽𑀧𑀘𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀑𑀭𑀢𑁄 𑀭𑀽𑀧𑀁 𑀲𑀦𑁆𑀢𑀺𑀓𑁂, 𑀧𑀭𑀢𑁄 𑀤𑀽𑀭𑁂. 𑀢𑀢𑁆𑀣 𑀲𑀼𑀔𑀼𑀫𑀭𑀽𑀧𑀁 𑀤𑀽𑀭𑁂 𑀳𑁄𑀦𑁆𑀢𑀁 𑀮𑀓𑁆𑀔𑀡𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀤𑀽𑀭𑁂 𑀳𑁄𑀢𑀺; 𑀲𑀦𑁆𑀢𑀺𑀓𑁂 𑀳𑁄𑀦𑁆𑀢𑀁 𑀧𑀦 𑀑𑀓𑀸𑀲𑀢𑁄𑀯 𑀲𑀦𑁆𑀢𑀺𑀓𑁂 𑀳𑁄𑀢𑀺, 𑀦 𑀮𑀓𑁆𑀔𑀡𑀢𑁄. 𑀑𑀴𑀸𑀭𑀺𑀓𑀭𑀽𑀧𑀁 𑀲𑀦𑁆𑀢𑀺𑀓𑁂 𑀳𑁄𑀦𑁆𑀢𑀁 𑀮𑀓𑁆𑀔𑀡𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀲𑀦𑁆𑀢𑀺𑀓𑁂 𑀳𑁄𑀢𑀺; 𑀤𑀽𑀭𑁂 𑀳𑁄𑀦𑁆𑀢𑀁 𑀑𑀓𑀸𑀲𑀢𑁄𑀯 𑀤𑀽𑀭𑁂 𑀳𑁄𑀢𑀺, 𑀦 𑀮𑀓𑁆𑀔𑀡𑀢𑁄.

𑀢𑀁 𑀢𑀁 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀦 𑀳𑁂𑀝𑁆𑀞𑀺𑀫𑀦𑀬𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀳𑁂𑀝𑁆𑀞𑀸 𑀳𑀺 𑀪𑀺𑀦𑁆𑀤𑀫𑀸𑀦𑁄 𑀕𑀢𑁄. 𑀇𑀥 𑀧𑀦 𑀦 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀪𑀺𑀦𑁆𑀤𑀢𑀺, 𑀑𑀓𑀸𑀲𑀢𑁄 𑀤𑀽𑀭𑀫𑁂𑀯 𑀪𑀺𑀦𑁆𑀤𑀢𑀺. 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀜𑁆𑀳𑀺 𑀏𑀢𑁆𑀣 𑀤𑀲𑁆𑀲𑀺𑀢𑀁. 𑀅𑀢𑁆𑀢𑀦𑁄 𑀳𑀺 𑀭𑀽𑀧𑀁 𑀲𑀦𑁆𑀢𑀺𑀓𑁂 𑀦𑀸𑀫; 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀧𑀺 𑀧𑀭𑀲𑁆𑀲 𑀤𑀽𑀭𑁂. 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀲𑁆𑀲 𑀲𑀦𑁆𑀢𑀺𑀓𑁂; 𑀩𑀳𑀺𑀞𑀺𑀢𑀲𑁆𑀲 𑀤𑀽𑀭𑁂. 𑀏𑀓𑀫𑀜𑁆𑀘𑁂 𑀲𑀬𑀺𑀢𑀲𑁆𑀲 𑀲𑀦𑁆𑀢𑀺𑀓𑁂; 𑀩𑀳𑀺𑀧𑀫𑀼𑀔𑁂 𑀞𑀺𑀢𑀲𑁆𑀲 𑀤𑀽𑀭𑁂. 𑀅𑀦𑁆𑀢𑁄𑀧𑀭𑀺𑀯𑁂𑀡𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀧𑀭𑀺𑀯𑁂𑀡𑁂 𑀤𑀽𑀭𑁂. 𑀅𑀦𑁆𑀢𑁄𑀲𑀗𑁆𑀖𑀸𑀭𑀸𑀫𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀲𑀗𑁆𑀖𑀸𑀭𑀸𑀫𑁂 𑀤𑀽𑀭𑁂. 𑀅𑀦𑁆𑀢𑁄𑀲𑀻𑀫𑀸𑀬 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀲𑀻𑀫𑀸𑀬 𑀤𑀽𑀭𑁂. 𑀅𑀦𑁆𑀢𑁄𑀕𑀸𑀫𑀔𑁂𑀢𑁆𑀢𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀕𑀸𑀫𑀓𑁆𑀔𑁂𑀢𑁆𑀢𑁂 𑀤𑀽𑀭𑁂. 𑀅𑀦𑁆𑀢𑁄𑀚𑀦𑀧𑀤𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀚𑀦𑀧𑀤𑁂 𑀤𑀽𑀭𑁂. 𑀅𑀦𑁆𑀢𑁄𑀭𑀚𑁆𑀚𑀲𑀻𑀫𑀸𑀬 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀭𑀚𑁆𑀚𑀲𑀻𑀫𑀸𑀬 𑀤𑀽𑀭𑁂. 𑀅𑀦𑁆𑀢𑁄𑀲𑀫𑀼𑀤𑁆𑀤𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀲𑀫𑀼𑀤𑁆𑀤𑁂𑀭𑀽𑀧𑀁 𑀤𑀽𑀭𑁂. 𑀅𑀦𑁆𑀢𑁄𑀘𑀓𑁆𑀓𑀯𑀸𑀴𑁂 𑀭𑀽𑀧𑀁 𑀲𑀦𑁆𑀢𑀺𑀓𑁂; 𑀩𑀳𑀺𑀘𑀓𑁆𑀓𑀯𑀸𑀴𑁂 𑀤𑀽𑀭𑁂𑀢𑀺.

𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑁨. 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁮. 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀁 𑀧𑀳𑀸𑀬 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀸 𑀓𑀸𑀘𑀺 𑀯𑁂𑀤𑀦𑀸𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀲𑀼𑀔𑀸 𑀯𑁂𑀤𑀦𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀯𑁂𑀤𑀦𑀁 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀼𑀁 ¶ 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀲𑀼𑀔𑀸 𑀯𑁂𑀤𑀦𑀸 𑀅𑀢𑁆𑀣𑀺 𑀓𑀸𑀬𑀺𑀓𑀸, 𑀅𑀢𑁆𑀣𑀺 𑀘𑁂𑀢𑀲𑀺𑀓𑀸 ¶ . 𑀢𑀣𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀧𑀦 𑀘𑀓𑁆𑀔𑀸𑀤𑀬𑁄 𑀧𑀲𑀸𑀤𑀓𑀸𑀬𑁂 𑀲𑀦𑁆𑀥𑀸𑀬 𑀧𑀭𑀺𑀬𑀸𑀬𑁂𑀦 ‘𑀅𑀢𑁆𑀣𑀺 𑀓𑀸𑀬𑀺𑀓𑀸, 𑀅𑀢𑁆𑀣𑀺 𑀘𑁂𑀢𑀲𑀺𑀓𑀸’. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀓𑀸𑀬𑀺𑀓𑀸 𑀓𑀸𑀫𑀸𑀯𑀘𑀭𑀸. 𑀢𑀣𑀸 𑀘𑁂𑀢𑀲𑀺𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 ¶ . 𑀘𑁂𑀢𑀲𑀺𑀓𑀸 𑀲𑀼𑀔𑀸 𑀧𑀦 𑀢𑁂𑀪𑀽𑀫𑀺𑀓𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘𑀢𑀼𑀪𑀽𑀫𑀺𑀓𑀸. 𑀢𑀲𑁆𑀲𑀸 𑀲𑀩𑁆𑀩𑀧𑁆𑀧𑀓𑀸𑀭𑀸𑀬𑀧𑀺 𑀲𑀦𑁆𑀢𑀢𑀺𑀯𑀲𑁂𑀦, 𑀔𑀡𑀸𑀤𑀺𑀯𑀲𑁂𑀦 𑀘 𑀅𑀢𑀻𑀢𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀯𑀻𑀣𑀺𑀏𑀓𑀚𑀯𑀦𑀏𑀓𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀸, 𑀏𑀓𑀯𑀺𑀥𑀯𑀺𑀲𑀬𑀲𑀫𑀸𑀬𑁄𑀕𑀧𑁆𑀧𑀯𑀢𑁆𑀢𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀔𑀡𑀸𑀤𑀺𑀯𑀲𑁂𑀦 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀕𑀢𑀸 𑀲𑀓𑀺𑀘𑁆𑀘𑀜𑁆𑀘 𑀓𑀼𑀭𑀼𑀫𑀸𑀦𑀸 𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀢𑀢𑁆𑀣 𑀔𑀡𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑀁 𑀲𑀦𑁆𑀥𑀸𑀬 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁧. 𑀑𑀴𑀸𑀭𑀺𑀓𑀲𑀼𑀔𑀼𑀫𑀦𑀺𑀤𑁆𑀤𑁂𑀲𑁂 𑀅𑀓𑀼𑀲𑀮𑀸 𑀯𑁂𑀤𑀦𑀸𑀢𑀺𑀆𑀤𑀻𑀦𑀺 𑀚𑀸𑀢𑀺𑀢𑁄 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸𑀢𑀺𑀆𑀤𑀻𑀦𑀺 𑀲𑀪𑀸𑀯𑀢𑁄. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸𑀢𑀺𑀆𑀤𑀻𑀦𑀺 𑀧𑀼𑀕𑁆𑀕𑀮𑀢𑁄. 𑀲𑀸𑀲𑀯𑀸𑀢𑀺𑀆𑀤𑀻𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀅𑀓𑀼𑀲𑀮𑀸 𑀢𑀸𑀯 𑀲𑀤𑀭𑀣𑀝𑁆𑀞𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁂𑀦 𑀘 𑀑𑀴𑀸𑀭𑀺𑀓𑀸. 𑀓𑀼𑀲𑀮𑀸 𑀦𑀺𑀤𑁆𑀤𑀭𑀣𑀝𑁆𑀞𑁂𑀦 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦 𑀘 𑀲𑀼𑀔𑀼𑀫𑀸. 𑀅𑀩𑁆𑀬𑀸𑀓𑀢𑀸 𑀦𑀺𑀭𑀼𑀲𑁆𑀲𑀸𑀳𑀝𑁆𑀞𑁂𑀦 𑀅𑀯𑀺𑀧𑀸𑀓𑀝𑁆𑀞𑁂𑀦 𑀘 𑀲𑀼𑀔𑀼𑀫𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀉𑀲𑁆𑀲𑀸𑀳𑀝𑁆𑀞𑁂𑀦 𑀲𑀯𑀺𑀧𑀸𑀓𑀝𑁆𑀞𑁂𑀦 𑀘 𑀑𑀴𑀸𑀭𑀺𑀓𑀸. 𑀅𑀩𑁆𑀬𑀸𑀓𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀔𑀼𑀫𑀸.

𑀤𑀼𑀓𑁆𑀔𑀸 𑀅𑀲𑀸𑀢𑀝𑁆𑀞𑁂𑀦 𑀤𑀼𑀓𑁆𑀔𑀝𑁆𑀞𑁂𑀦 𑀘 𑀑𑀴𑀸𑀭𑀺𑀓𑀸. 𑀲𑀼𑀔𑀸 𑀲𑀸𑀢𑀝𑁆𑀞𑁂𑀦 𑀲𑀼𑀔𑀝𑁆𑀞𑁂𑀦 𑀘 𑀲𑀼𑀔𑀼𑀫𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀲𑀦𑁆𑀢𑀝𑁆𑀞𑁂𑀦 𑀧𑀡𑀻𑀢𑀝𑁆𑀞𑁂𑀦 𑀘 𑀲𑀼𑀔𑀼𑀫𑀸. 𑀲𑀼𑀔𑀤𑀼𑀓𑁆𑀔𑀸 𑀔𑁄𑀪𑀦𑀝𑁆𑀞𑁂𑀦 𑀨𑀭𑀡𑀝𑁆𑀞𑁂𑀦 𑀘 𑀑𑀴𑀸𑀭𑀺𑀓𑀸. 𑀲𑀼𑀔𑀯𑁂𑀤𑀦𑀸𑀧𑀺 𑀳𑀺 𑀔𑁄𑀪𑁂𑀢𑀺 𑀨𑀭𑀢𑀺. 𑀢𑀣𑀸 𑀤𑀼𑀓𑁆𑀔𑀯𑁂𑀤𑀦𑀸𑀧𑀺. 𑀲𑀼𑀔𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀆𑀮𑀼𑀴𑁂𑀦𑁆𑀢𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀫𑀤𑁆𑀤𑀬𑀫𑀸𑀦𑀁 𑀙𑀸𑀤𑀬𑀫𑀸𑀦𑀁 𑀲𑀻𑀢𑁄𑀤𑀓𑀖𑀝𑁂𑀦 𑀆𑀲𑀺𑀜𑁆𑀘𑀬𑀫𑀸𑀦𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀢𑁆𑀢𑀨𑀸𑀮𑀁 𑀅𑀦𑁆𑀢𑁄 𑀧𑀯𑁂𑀲𑀦𑁆𑀢𑀁 𑀯𑀺𑀬 𑀢𑀺𑀡𑀼𑀓𑁆𑀓𑀸𑀬 𑀩𑀳𑀺 𑀛𑀸𑀧𑀬𑀫𑀸𑀦𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀔𑀼𑀫𑀸. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀢𑁄 𑀑𑀴𑀸𑀭𑀺𑀓𑀸 ¶ . 𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸 𑀏𑀓𑀢𑁆𑀢𑀦𑀺𑀫𑀺𑀢𑁆𑀢𑁂𑀬𑁂𑀯 𑀘𑀭𑀢𑀻𑀢𑀺 𑀲𑀼𑀔𑀼𑀫𑀸. 𑀲𑀸𑀲𑀯𑀸 𑀆𑀲𑀯𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀑𑀴𑀸𑀭𑀺𑀓𑀸. 𑀆𑀲𑀯𑀘𑀸𑀭𑁄 ¶ 𑀦𑀸𑀫 𑀏𑀓𑀦𑁆𑀢𑀑𑀴𑀸𑀭𑀺𑀓𑁄. 𑀅𑀦𑀸𑀲𑀯𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀼𑀫𑀸.

𑀢𑀢𑁆𑀣 ¶ 𑀏𑀓𑁄 𑀦𑁂𑀯 𑀓𑀼𑀲𑀮𑀢𑁆𑀢𑀺𑀓𑁂 𑀓𑁄𑀯𑀺𑀤𑁄 𑀳𑁄𑀢𑀺, 𑀦 𑀯𑁂𑀤𑀦𑀸𑀢𑁆𑀢𑀺𑀓𑁂. 𑀲𑁄 ‘𑀓𑀼𑀲𑀮𑀢𑁆𑀢𑀺𑀓𑀁 𑀭𑀓𑁆𑀔𑀸𑀫𑀻’𑀢𑀺 𑀯𑁂𑀤𑀦𑀸𑀢𑁆𑀢𑀺𑀓𑀁 𑀪𑀺𑀦𑁆𑀤𑀢𑀺; ‘𑀯𑁂𑀤𑀦𑀸𑀢𑁆𑀢𑀺𑀓𑀁 𑀭𑀓𑁆𑀔𑀸𑀫𑀻’𑀢𑀺 𑀓𑀼𑀲𑀮𑀢𑁆𑀢𑀺𑀓𑀁 𑀪𑀺𑀦𑁆𑀤𑀢𑀺. 𑀏𑀓𑁄 ‘𑀢𑀺𑀓𑀁 𑀭𑀓𑁆𑀔𑀸𑀫𑀻’𑀢𑀺 𑀪𑀽𑀫𑀦𑁆𑀢𑀭𑀁 𑀪𑀺𑀦𑁆𑀤𑀢𑀺. 𑀏𑀓𑁄 𑀦 𑀪𑀺𑀦𑁆𑀤𑀢𑀺. 𑀓𑀣𑀁? ‘‘𑀲𑀼𑀔𑀤𑀼𑀓𑁆𑀔𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺 𑀳𑀺 𑀯𑁂𑀤𑀦𑀸𑀢𑁆𑀢𑀺𑀓𑁂 𑀯𑀼𑀢𑁆𑀢𑀁. 𑀢𑀁 𑀏𑀓𑁄 𑀧𑀝𑀺𑀓𑁆𑀔𑀺𑀧𑀢𑀺 𑁋 𑀦 𑀲𑀩𑁆𑀩𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀲𑀼𑀔𑀼𑀫𑀸. 𑀲𑀸 𑀳𑀺 𑀓𑀼𑀲𑀮𑀸𑀧𑀺 𑀅𑀢𑁆𑀣𑀺 𑀅𑀓𑀼𑀲𑀮𑀸𑀧𑀺 𑀅𑀩𑁆𑀬𑀸𑀓𑀢𑀸𑀧𑀺. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀲𑀼𑀔𑀼𑀫𑀸. 𑀓𑀲𑁆𑀫𑀸? 𑀓𑀼𑀲𑀮𑀢𑁆𑀢𑀺𑀓𑁂 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸𑀢𑀺. 𑀏𑀯𑀁 𑀓𑀼𑀲𑀮𑀢𑁆𑀢𑀺𑀓𑁄 𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀯𑁂𑀤𑀦𑀸𑀢𑁆𑀢𑀺𑀓𑁄 𑀧𑀦 𑀪𑀺𑀦𑁆𑀦𑁄.

𑀓𑀼𑀲𑀮𑀸𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺 𑀬𑀁 𑀧𑀦 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀁, 𑀢𑀁 𑀏𑀓𑁄 𑀧𑀝𑀺𑀓𑁆𑀔𑀺𑀧𑀢𑀺 𑁋 𑀦 𑀲𑀩𑁆𑀩𑀸 𑀅𑀩𑁆𑀬𑀸𑀓𑀢𑀸 𑀲𑀼𑀔𑀼𑀫𑀸. 𑀲𑀸 𑀳𑀺 𑀲𑀼𑀔𑀸𑀧𑀺 𑀅𑀢𑁆𑀣𑀺 𑀤𑀼𑀓𑁆𑀔𑀸𑀧𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺. 𑀢𑀢𑁆𑀣 𑀲𑀼𑀔𑀤𑀼𑀓𑁆𑀔𑀸 𑀑𑀴𑀸𑀭𑀺𑀓𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀲𑀼𑀔𑀼𑀫𑀸. 𑀓𑀲𑁆𑀫𑀸? 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸𑀢𑀺. 𑀏𑀯𑀁 𑀯𑁂𑀤𑀦𑀸𑀢𑁆𑀢𑀺𑀓𑁄 𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀓𑀼𑀲𑀮𑀢𑁆𑀢𑀺𑀓𑁄 𑀧𑀦 𑀪𑀺𑀦𑁆𑀦𑁄. 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀧𑀦 𑀆𑀕𑀢𑀝𑁆𑀞𑀸𑀦𑁂 𑀯𑁂𑀤𑀦𑀸𑀢𑁆𑀢𑀺𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀯𑁂𑀤𑀦𑀸𑀢𑁆𑀢𑀺𑀓𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀢𑁆𑀢𑀺𑀓𑀮𑀓𑁆𑀔𑀡𑁂𑀦, 𑀲𑀼𑀔𑀸𑀤𑀻𑀦𑀁 𑀯𑁂𑀤𑀦𑀸𑀢𑁆𑀢𑀺𑀓𑀮𑀓𑁆𑀔𑀡𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀁 𑀓𑀣𑁂𑀦𑁆𑀢𑁄 𑀦 𑀪𑀺𑀦𑁆𑀤𑀢𑀺 𑀦𑀸𑀫.

𑀬𑀫𑁆𑀧𑀺 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀁, 𑀢𑀢𑁆𑀣𑁂𑀓𑁄 ‘𑀓𑀼𑀲𑀮𑀸 𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀸𑀧𑀺 𑀲𑀫𑀸𑀦𑀸 𑀑𑀴𑀸𑀭𑀺𑀓𑀸 𑀦𑀸𑀫, 𑀯𑀺𑀧𑀸𑀓𑀸 𑀅𑀦𑁆𑀢𑀫𑀲𑁄 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀸𑀧𑀺 𑀲𑀫𑀸𑀦𑀸 𑀲𑀼𑀔𑀼𑀫𑀸 𑀦𑀸𑀫 𑀳𑁄𑀢𑀻’𑀢𑀺 𑀯𑀤𑀢𑀺. 𑀲𑁄 𑀏𑀯𑀭𑀽𑀧𑀁 𑀲𑀦𑁆𑀢𑀁 𑀧𑀡𑀻𑀢𑀁 𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀁 𑀑𑀴𑀸𑀭𑀺𑀓𑀁 𑀦𑀸𑀫 𑀓𑀭𑁄𑀦𑁆𑀢𑁄, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀳𑁂𑀢𑀼𑀓𑀁 𑀳𑀻𑀦𑀁 𑀚𑀴𑀁 𑀯𑁂𑀤𑀦𑀁 𑀲𑀼𑀔𑀼𑀫𑀁 𑀦𑀸𑀫 𑀓𑀭𑁄𑀦𑁆𑀢𑁄 ‘𑀢𑀺𑀓𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀪𑀽𑀫𑀦𑁆𑀢𑀭𑀁 𑀪𑀺𑀦𑁆𑀤𑀢𑀺 𑀦𑀸𑀫. 𑀢𑀢𑁆𑀣 𑀢𑀢𑁆𑀣 𑀪𑀽𑀫𑀺𑀬𑀁 𑀓𑀼𑀲𑀮𑀁 𑀧𑀦 𑀢𑀁𑀢𑀁𑀪𑀽𑀫𑀺𑀯𑀺𑀧𑀸𑀓𑁂𑀦𑁂𑀯 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀦 𑀪𑀺𑀦𑁆𑀤𑀢𑀺 𑀦𑀸𑀫. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀓𑀸𑀫𑀸𑀯𑀘𑀭𑀓𑀼𑀲𑀮𑀸 𑀳𑀺 𑀑𑀴𑀸𑀭𑀺𑀓𑀸; 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀲𑀼𑀔𑀼𑀫𑀸 ¶ . 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸 ¶ 𑀑𑀴𑀸𑀭𑀺𑀓𑀸; 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀲𑀼𑀔𑀼𑀫𑀸𑀢𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑀣𑁂𑀦𑁆𑀢𑁄 𑀦 𑀪𑀺𑀦𑁆𑀤𑀢𑀺 𑀦𑀸𑀫.

𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀅𑀓𑀼𑀲𑀮𑁂 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀦𑀸𑀫 𑀦 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀢𑀜𑁆𑀳𑀺 𑀏𑀓𑀦𑁆𑀢𑀑𑀴𑀸𑀭𑀺𑀓𑀫𑁂𑀯. 𑀮𑁄𑀓𑀼𑀢𑁆𑀢𑀭𑁂𑀧𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀦 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀢𑀜𑁆𑀳𑀺 𑀏𑀓𑀦𑁆𑀢𑀲𑀼𑀔𑀼𑀫’’𑀦𑁆𑀢𑀺 ¶ . 𑀇𑀫𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀲𑁆𑀲 𑀓𑀣𑀬𑀺𑀁𑀲𑀼 𑁋 𑀏𑀯𑀁 𑀣𑁂𑀭𑁂𑀦 𑀓𑀣𑀺𑀢𑀦𑁆𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀆𑀳 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀏𑀓𑀧𑀤𑀲𑁆𑀲𑀸𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀆𑀕𑀢𑀝𑁆𑀞𑀸𑀦𑁂 𑀦𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑀬𑁄 𑀅𑀤𑀺𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺, 𑀦𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑀬𑁄 𑀅𑀓𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀥 𑀧𑀦𑁂𑀓𑀘𑁆𑀘𑁄 ‘𑀆𑀘𑀭𑀺𑀬𑁄 𑀅𑀲𑁆𑀫𑀻’𑀢𑀺 𑀯𑀺𑀘𑀭𑀦𑁆𑀢𑁄 𑀅𑀓𑀼𑀲𑀮𑁂 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀁 𑀉𑀤𑁆𑀥𑀭𑀫𑀸𑀦𑁄 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀮𑁄𑀓𑀼𑀢𑁆𑀢𑀭𑁂𑀧𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀉𑀤𑁆𑀥𑀭𑀺𑀢𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺 𑁋 ‘‘𑀢𑀢𑁆𑀭, 𑀪𑀦𑁆𑀢𑁂, 𑀬𑀸𑀬𑀁 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀅𑀬𑀁, 𑀪𑀦𑁆𑀢𑁂, 𑀧𑀝𑀺𑀧𑀤𑀸 𑀉𑀪𑀬𑁂𑀦𑁂𑀯 𑀳𑀻𑀦𑀸 𑀅𑀓𑁆𑀔𑀸𑀬𑀢𑀺 𑁋 𑀤𑀼𑀓𑁆𑀔𑀢𑁆𑀢𑀸 𑀤𑀦𑁆𑀥𑀢𑁆𑀢𑀸 𑀘𑀸’’𑀢𑀺 (𑀤𑀻. 𑀦𑀺. 𑁩.𑁧𑁫𑁨). 𑀏𑀢𑁆𑀣 𑀳𑀺 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑀢𑀁 𑀢𑀁 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀦 𑀳𑁂𑀝𑁆𑀞𑀺𑀫𑀦𑀬𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀢𑀁𑀢𑀁𑀯𑀸𑀧𑀦𑀯𑀲𑁂𑀦𑁂𑀯 𑀓𑀣𑁂𑀢𑀩𑁆𑀩𑀁. 𑀤𑀼𑀯𑀺𑀥𑀸 𑀳𑀺 𑀅𑀓𑀼𑀲𑀮𑀸 𑁋 𑀮𑁄𑀪𑀲𑀳𑀕𑀢𑀸 𑀤𑁄𑀲𑀲𑀳𑀕𑀢𑀸 𑀘. 𑀢𑀢𑁆𑀣 𑀤𑁄𑀲𑀲𑀳𑀕𑀢𑀸 𑀑𑀴𑀸𑀭𑀺𑀓𑀸, 𑀮𑁄𑀪𑀲𑀳𑀕𑀢𑀸 𑀲𑀼𑀔𑀼𑀫𑀸. 𑀤𑁄𑀲𑀲𑀳𑀕𑀢𑀸𑀧𑀺 𑀤𑀼𑀯𑀺𑀥𑀸 𑁋 𑀦𑀺𑀬𑀢𑀸 𑀅𑀦𑀺𑀬𑀢𑀸 𑀘. 𑀢𑀢𑁆𑀣 𑀦𑀺𑀬𑀢𑀸 𑀑𑀴𑀸𑀭𑀺𑀓𑀸, 𑀅𑀦𑀺𑀬𑀢𑀸 𑀲𑀼𑀔𑀼𑀫𑀸. 𑀦𑀺𑀬𑀢𑀸𑀧𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑀸 𑀑𑀴𑀸𑀭𑀺𑀓𑀸, 𑀦𑁄𑀓𑀧𑁆𑀧𑀝𑁆𑀞𑀺𑀢𑀺𑀓𑀸 𑀲𑀼𑀔𑀼𑀫𑀸. 𑀓𑀧𑁆𑀧𑀝𑁆𑀞𑀺𑀢𑀺𑀓𑀸𑀧𑀺 𑀅𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀲𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸. 𑀮𑁄𑀪𑀲𑀳𑀕𑀢𑀸𑀧𑀺 𑀤𑁆𑀯𑀺𑀥𑀸 𑁋 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀘. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀑𑀴𑀸𑀭𑀺𑀓𑀸, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀼𑀔𑀼𑀫𑀸. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀦𑀺𑀬𑀢𑀸 𑀑𑀴𑀸𑀭𑀺𑀓𑀸, 𑀅𑀦𑀺𑀬𑀢𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀅𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀲𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸.

𑀲𑀗𑁆𑀔𑁂𑀧𑀢𑁄 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀬𑀸 𑀯𑀺𑀧𑀸𑀓𑀁 𑀩𑀳𑀼𑀁 𑀤𑁂𑀢𑀺 𑀲𑀸 𑀑𑀴𑀸𑀭𑀺𑀓𑀸, 𑀬𑀸 𑀅𑀧𑁆𑀧𑀁 𑀲𑀸 𑀲𑀼𑀔𑀼𑀫𑀸. 𑀓𑀼𑀲𑀮𑀁 𑀧𑀢𑁆𑀯𑀸 𑀧𑀦 𑀅𑀧𑁆𑀧𑀯𑀺𑀧𑀸𑀓𑀸 𑀑𑀴𑀸𑀭𑀺𑀓𑀸, 𑀩𑀳𑀼𑀯𑀺𑀧𑀸𑀓𑀸 ¶ 𑀲𑀼𑀔𑀼𑀫𑀸. 𑀘𑀢𑀼𑀩𑁆𑀩𑀺𑀥𑁂 𑀓𑀼𑀲𑀮𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀸 𑀑𑀴𑀸𑀭𑀺𑀓𑀸, 𑀭𑀽𑀧𑀸𑀯𑀘𑀭𑀓𑀼𑀲𑀮𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀸 𑀲𑀼𑀔𑀼𑀫𑀸 ¶ . 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸 𑀲𑀼𑀔𑀼𑀫𑀸. 𑀅𑀬𑀁 𑀢𑀸𑀯 𑀪𑀽𑀫𑀻𑀲𑀼 𑀅𑀪𑁂𑀤𑀢𑁄 𑀦𑀬𑁄.

𑀪𑁂𑀤𑀢𑁄 𑀧𑀦 𑀓𑀸𑀫𑀸𑀯𑀘𑀭𑀸 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀬𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀤𑀸𑀦𑀫𑀬𑀸 𑀑𑀴𑀸𑀭𑀺𑀓𑀸, 𑀲𑀻𑀮𑀫𑀬𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀪𑀸𑀯𑀦𑀸𑀫𑀬𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀤𑀼𑀳𑁂𑀢𑀼𑀓𑀸 𑀢𑀺𑀳𑁂𑀢𑀼𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀤𑀼𑀳𑁂𑀢𑀼𑀓𑀸 𑀑𑀴𑀸𑀭𑀺𑀓𑀸, 𑀢𑀺𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀢𑀺𑀳𑁂𑀢𑀼𑀓𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀅𑀲𑀗𑁆𑀔𑀸𑀭𑀺𑀓𑀪𑁂𑀤𑀢𑁄 ¶ 𑀤𑀼𑀯𑀺𑀥𑀸. 𑀢𑀢𑁆𑀣 𑀲𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀅𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸. 𑀭𑀽𑀧𑀸𑀯𑀘𑀭𑁂 𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀤𑀼𑀢𑀺𑀬𑀚𑁆𑀛𑀸𑀦𑀓𑀼𑀲𑀮𑀯𑁂𑀤𑀦𑀸 𑀲𑀼𑀔𑀼𑀫𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀼𑀲𑀮𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑁂𑀤𑀦𑀸 𑀲𑀼𑀔𑀼𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑁂𑀤𑀦𑀸 𑀑𑀴𑀸𑀭𑀺𑀓𑀸…𑀧𑁂…. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀯𑀺𑀧𑀲𑁆𑀲𑀦𑀸𑀲𑀳𑀚𑀸𑀢𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀳𑀚𑀸𑀢𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀲𑀳𑀚𑀸𑀢𑀸 𑀲𑀼𑀔𑀼𑀫𑀸.

𑀘𑀢𑀼𑀩𑁆𑀩𑀺𑀥𑁂 𑀯𑀺𑀧𑀸𑀓𑁂 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸…𑀧𑁂… 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀏𑀯𑀁 𑀢𑀸𑀯 𑀅𑀪𑁂𑀤𑀢𑁄.

𑀪𑁂𑀤𑀢𑁄 𑀧𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀅𑀢𑁆𑀣𑀺 𑀅𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀲𑀳𑁂𑀢𑀼𑀓𑀸. 𑀲𑀳𑁂𑀢𑀼𑀓𑀸𑀧𑀺 𑀅𑀢𑁆𑀣𑀺 𑀤𑀼𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀢𑀺𑀳𑁂𑀢𑀼𑀓𑀸. 𑀢𑀢𑁆𑀣 𑀅𑀳𑁂𑀢𑀼𑀓𑀸 𑀑𑀴𑀸𑀭𑀺𑀓𑀸, 𑀲𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀤𑀼𑀳𑁂𑀢𑀼𑀓𑀸 𑀑𑀴𑀸𑀭𑀺𑀓𑀸, 𑀢𑀺𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀢𑀢𑁆𑀣𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀅𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸. 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀸 𑀑𑀴𑀸𑀭𑀺𑀓𑀸, 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀸 𑀲𑀼𑀔𑀼𑀫𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀲𑀓𑀤𑀸𑀕𑀸𑀫𑀺…𑀧𑁂… 𑀅𑀭𑀳𑀢𑁆𑀢𑀨𑀮𑀯𑁂𑀤𑀦𑀸 𑀲𑀼𑀔𑀼𑀫𑀸.

𑀢𑀻𑀲𑀼 ¶ 𑀓𑀺𑀭𑀺𑀬𑀸𑀲𑀼 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀏𑀯𑀁 𑀢𑀸𑀯 𑀅𑀪𑁂𑀤𑀢𑁄. 𑀪𑁂𑀤𑀢𑁄 𑀧𑀦 𑀅𑀳𑁂𑀢𑀼𑀓𑀸𑀤𑀺𑀯𑀲𑁂𑀦 𑀪𑀺𑀦𑁆𑀦𑀸𑀬 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀬 𑀅𑀳𑁂𑀢𑀼𑀓𑀓𑀺𑀭𑀺𑀬𑀯𑁂𑀤𑀦𑀸 ¶ 𑀑𑀴𑀸𑀭𑀺𑀓𑀸, 𑀲𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀤𑀼𑀳𑁂𑀢𑀼𑀓𑀸 𑀑𑀴𑀸𑀭𑀺𑀓𑀸, 𑀢𑀺𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀢𑀢𑁆𑀣𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀅𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸. 𑀧𑀞𑀫𑀚𑁆𑀛𑀸𑀦𑁂 𑀓𑀺𑀭𑀺𑀬𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀢𑀢𑀺𑀬𑁂…𑀧𑁂… 𑀘𑀢𑀼𑀢𑁆𑀣𑁂 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀑𑀴𑀸𑀭𑀺𑀓𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀬𑀸 𑀑𑀴𑀸𑀭𑀺𑀓𑀸 𑀲𑀸 𑀳𑀻𑀦𑀸. 𑀬𑀸 𑀲𑀼𑀔𑀼𑀫𑀸 𑀲𑀸 𑀧𑀡𑀻𑀢𑀸.

𑁧𑁩. 𑀤𑀽𑀭𑀤𑀼𑀓𑀦𑀺𑀤𑁆𑀤𑁂𑀲𑁂 ¶ 𑀅𑀓𑀼𑀲𑀮𑀯𑁂𑀤𑀦𑀸 𑀯𑀺𑀲𑀪𑀸𑀕𑀝𑁆𑀞𑁂𑀦 𑀯𑀺𑀲𑀁𑀲𑀝𑁆𑀞𑁂𑀦 𑀘 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀤𑀽𑀭𑁂. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀤𑀽𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂𑀧𑀺 𑀳𑀺 𑀅𑀓𑀼𑀲𑀮𑀸𑀤𑀺𑀯𑁂𑀤𑀦𑀸𑀲𑀫𑀗𑁆𑀕𑀺𑀦𑁄 𑀤𑀼𑀓𑁆𑀔𑀸𑀤𑀺𑀯𑁂𑀤𑀦𑀸𑀲𑀫𑀗𑁆𑀕𑀺𑀦𑁄 𑀘 𑀢𑀬𑁄 𑀢𑀬𑁄 𑀚𑀦𑀸 𑀏𑀓𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀸 𑀯𑁂𑀤𑀦𑀸 𑀯𑀺𑀲𑀪𑀸𑀕𑀝𑁆𑀞𑁂𑀦 𑀯𑀺𑀲𑀁𑀲𑀝𑁆𑀞𑁂𑀦 𑀘 𑀤𑀽𑀭𑁂𑀬𑁂𑀯 𑀦𑀸𑀫. 𑀲𑀫𑀸𑀧𑀦𑁆𑀦𑀯𑁂𑀤𑀦𑀸𑀤𑀺𑀲𑀫𑀗𑁆𑀕𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀼𑀲𑀮𑀸 𑀧𑀦 𑀅𑀓𑀼𑀲𑀮𑀸𑀬 𑀲𑀪𑀸𑀕𑀝𑁆𑀞𑁂𑀦 𑀲𑀭𑀺𑀓𑁆𑀔𑀝𑁆𑀞𑁂𑀦 𑀘 𑀲𑀦𑁆𑀢𑀺𑀓𑁂 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀲𑀦𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂𑀧𑀺 𑀳𑀺 𑀅𑀓𑀼𑀲𑀮𑀸𑀤𑀺𑀯𑁂𑀤𑀦𑀸𑀲𑀫𑀗𑁆𑀕𑀻𑀲𑀼 𑀢𑀻𑀲𑀼 𑀚𑀦𑁂𑀲𑀼 𑀏𑀓𑁄 𑀓𑀸𑀫𑀪𑀯𑁂, 𑀏𑀓𑁄 𑀭𑀽𑀧𑀪𑀯𑁂, 𑀏𑀓𑁄 𑀅𑀭𑀽𑀧𑀪𑀯𑁂, 𑀢𑁂𑀲𑀫𑁆𑀧𑀺 𑀢𑀸 𑀯𑁂𑀤𑀦𑀸 𑀲𑀪𑀸𑀕𑀝𑁆𑀞𑁂𑀦 𑀲𑀭𑀺𑀓𑁆𑀔𑀝𑁆𑀞𑁂𑀦 𑀘 𑀲𑀦𑁆𑀢𑀺𑀓𑁂𑀬𑁂𑀯 𑀦𑀸𑀫. 𑀓𑀼𑀲𑀮𑀸𑀤𑀺𑀯𑁂𑀤𑀦𑀸𑀲𑀫𑀗𑁆𑀕𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀁 𑀢𑀁 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀳𑁂𑀝𑁆𑀞𑀺𑀫𑀦𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀁 𑀢𑀁 𑀯𑀸𑀧𑀦𑀯𑀲𑁂𑀦𑁂𑀯 𑀓𑀣𑁂𑀢𑀩𑁆𑀩𑀁. 𑀓𑀣𑁂𑀦𑁆𑀢𑁂𑀦 𑀘 𑀦 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀲𑀦𑁆𑀢𑀺𑀓𑀢𑁄 𑀧𑀦 𑀤𑀽𑀭𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀤𑀼𑀯𑀺𑀥𑀸 𑀳𑀺 𑀅𑀓𑀼𑀲𑀮𑀸 𑁋 𑀮𑁄𑀪𑀲𑀳𑀕𑀢𑀸 𑀤𑁄𑀲𑀲𑀳𑀕𑀢𑀸 𑀘. 𑀢𑀢𑁆𑀣 𑀮𑁄𑀪𑀲𑀳𑀕𑀢𑀸 𑀮𑁄𑀪𑀲𑀳𑀕𑀢𑀸𑀬 𑀲𑀦𑁆𑀢𑀺𑀓𑁂 𑀦𑀸𑀫, 𑀤𑁄𑀲𑀲𑀳𑀕𑀢𑀸𑀬 𑀤𑀽𑀭𑁂 𑀦𑀸𑀫. 𑀤𑁄𑀲𑀲𑀳𑀕𑀢𑀸 𑀤𑁄𑀲𑀲𑀳𑀕𑀢𑀸𑀬 𑀲𑀦𑁆𑀢𑀺𑀓𑁂 𑀦𑀸𑀫, 𑀮𑁄𑀪𑀲𑀳𑀕𑀢𑀸𑀬 𑀤𑀽𑀭𑁂 𑀦𑀸𑀫. 𑀤𑁄𑀲𑀲𑀳𑀕𑀢𑀸𑀧𑀺 𑀦𑀺𑀬𑀢𑀸 𑀦𑀺𑀬𑀢𑀸𑀬 𑀲𑀦𑁆𑀢𑀺𑀓𑁂 𑀦𑀸𑀫𑀸𑀢𑀺. 𑀏𑀯𑀁 𑀅𑀦𑀺𑀬𑀢𑀸. 𑀓𑀧𑁆𑀧𑀝𑁆𑀞𑀺𑀢𑀺𑀓𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀪𑁂𑀤𑀁 𑀮𑁄𑀪𑀲𑀳𑀕𑀢𑀸𑀤𑀻𑀲𑀼 𑀘 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀑𑀴𑀸𑀭𑀺𑀓𑀤𑀼𑀓𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀯𑀲𑁂𑀦 𑀅𑀦𑀼𑀕𑀦𑁆𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑁂𑀤𑀦𑀸 ¶ ¶ 𑀢𑀁𑀢𑀁𑀓𑁄𑀝𑁆𑀞𑀸𑀲𑀯𑁂𑀤𑀦𑀸𑀬 𑀏𑀯 𑀲𑀦𑁆𑀢𑀺𑀓𑁂, 𑀇𑀢𑀭𑀸 𑀇𑀢𑀭𑀸𑀬 𑀤𑀽𑀭𑁂𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑁩. 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁧𑁪. 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀬𑀸 𑀓𑀸𑀘𑀺 𑀲𑀜𑁆𑀜𑀸𑀢𑀺 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑀜𑁆𑀜𑀁 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀫𑀺𑀁 𑀯𑀸 𑀚𑀸𑀢𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀦𑀸𑀫. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄 ¶ . 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀧𑀜𑁆𑀘 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀯. 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀳𑀤𑀬𑀯𑀢𑁆𑀣𑀼𑀓𑀸𑀧𑀺 𑀅𑀯𑀢𑁆𑀣𑀼𑀓𑀸𑀧𑀺. 𑀲𑀩𑁆𑀩𑀸 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀸.

𑁧𑁭. 𑀑𑀴𑀸𑀭𑀺𑀓𑀤𑀼𑀓𑀦𑀺𑀤𑁆𑀤𑁂𑀲𑁂 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸𑀢𑀺 𑀲𑀧𑁆𑀧𑀝𑀺𑀖𑁂 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀲𑀧𑁆𑀧𑀝𑀺𑀖𑁂 𑀭𑀽𑀧𑀸𑀤𑀬𑁄 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀨𑀲𑁆𑀲𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀦𑀸𑀫. 𑀢𑀢𑁄 𑀢𑀲𑁆𑀫𑀺𑀁 𑀯𑀸 𑀚𑀸𑀢𑀸 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸 𑀦𑀸𑀫. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀯𑀢𑁆𑀣𑀼𑀢𑁄 𑀦𑀸𑀫𑀁. 𑀭𑀽𑀧𑀲𑀜𑁆𑀜𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀆𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀇𑀤𑀁 𑀧𑀦 𑀯𑀢𑁆𑀣𑀸𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀲𑀧𑁆𑀧𑀝𑀺𑀖𑀸𑀦𑀺 𑀳𑀺 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬, 𑀲𑀧𑁆𑀧𑀝𑀺𑀖𑀸𑀦𑀺 𑀘 𑀆𑀭𑀫𑁆𑀫𑀡𑀸𑀦𑀺 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺𑀢𑁄 𑀏𑀲𑀸 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀫𑀦𑁄𑀲𑀫𑁆𑀨𑀲𑁆𑀲𑀚𑀸𑀢𑀺𑀧𑀺 𑀧𑀭𑀺𑀬𑀸𑀬𑁂𑀦 𑀏𑀢𑀺𑀲𑁆𑀲𑀸 𑀦𑀸𑀫𑀁 𑀳𑁄𑀢𑀺𑀬𑁂𑀯. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀫𑀦𑁄 𑀦𑀸𑀫. 𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫. 𑀢𑀲𑁆𑀫𑀺𑀁 𑀫𑀦𑁄𑀲𑀫𑁆𑀨𑀲𑁆𑀲𑁂, 𑀢𑀲𑁆𑀫𑀸 𑀯𑀸 𑀫𑀦𑁄𑀲𑀫𑁆𑀨𑀲𑁆𑀲𑀸 𑀚𑀸𑀢𑀸𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀸. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁 𑀫𑀦𑁄 𑀦𑀸𑀫. 𑀢𑁂𑀦 𑀲𑀳𑀚𑀸𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦𑀸𑀫. 𑀢𑀲𑁆𑀫𑀺𑀁 𑀫𑀦𑁄𑀲𑀫𑁆𑀨𑀲𑁆𑀲𑁂, 𑀢𑀲𑁆𑀫𑀸 𑀯𑀸 𑀫𑀦𑁄𑀲𑀫𑁆𑀨𑀲𑁆𑀲𑀸 𑀚𑀸𑀢𑀸𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀸.

𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺𑀧𑀺 𑀧𑀭𑀺𑀬𑀸𑀬𑁂𑀦 𑀏𑀢𑀺𑀲𑁆𑀲𑀸 𑀦𑀸𑀫𑀁 𑀳𑁄𑀢𑀺𑀬𑁂𑀯. 𑀢𑀬𑁄 𑀳𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀲𑀬𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀬 𑀲𑀜𑁆𑀜𑀸𑀬 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺𑀧𑀺 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸 ¶ , 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀦𑀸𑀫 𑀫𑀦𑁄𑀤𑁆𑀯𑀸𑀭𑀺𑀓𑀲𑀜𑁆𑀜𑀸. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸 𑀑𑀮𑁄𑀓𑁂𑀢𑁆𑀯𑀸𑀧𑀺 ¶ 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀑𑀴𑀸𑀭𑀺𑀓𑀸. 𑀭𑀚𑁆𑀚𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀜𑁆𑀳𑀺 ‘𑀭𑀚𑁆𑀚𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀢𑀻’𑀢𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀁 ‘𑀓𑀼𑀚𑁆𑀛𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀢𑀻’𑀢𑀺 𑀑𑀮𑁄𑀓𑁂𑀢𑁆𑀯𑀸𑀯 𑀚𑀸𑀦𑀦𑁆𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀤𑁆𑀯𑁂 𑀓𑀺𑀭 𑀇𑀢𑁆𑀣𑀺𑀬𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺. 𑀤𑁆𑀯𑀻𑀲𑀼 𑀤𑀳𑀭𑁂𑀲𑀼 𑀕𑀸𑀫𑁂 𑀘𑀭𑀦𑁆𑀢𑁂𑀲𑀼 𑀏𑀓𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀲𑀺. 𑀇𑀢𑀭𑀸 𑀢𑀁 𑀧𑀼𑀘𑁆𑀙𑀺 ‘𑀓𑀲𑁆𑀫𑀸 𑀦𑀼 𑀔𑁄 𑀢𑀁 𑀏𑀲𑁄 𑀑𑀮𑁄𑀓𑁂𑀲𑀻’𑀢𑀺? ‘𑀦 𑀏𑀲𑁄 𑀪𑀺𑀓𑁆𑀔𑀼 𑀫𑀁 𑀯𑀺𑀲𑀪𑀸𑀕𑀘𑀺𑀢𑁆𑀢𑁂𑀦 𑀑𑀮𑁄𑀓𑁂𑀲𑀺, 𑀓𑀦𑀺𑀝𑁆𑀞𑀪𑀕𑀺𑀦𑀻𑀲𑀜𑁆𑀜𑀸𑀬 𑀧𑀦 𑀑𑀮𑁄𑀓𑁂𑀲𑀻’𑀢𑀺. 𑀢𑁂𑀲𑀼𑀧𑀺 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀇𑀢𑀭𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺 𑁋 ‘𑀢𑀬𑀸 𑀲𑀸 𑀇𑀢𑁆𑀣𑀻 𑀑𑀮𑁄𑀓𑀺𑀢𑀸’𑀢𑀺? ‘𑀆𑀫 𑀑𑀮𑁄𑀓𑀺𑀢𑀸’. ‘𑀓𑀺𑀫𑀢𑁆𑀣𑀸𑀬𑀸’𑀢𑀺? ‘𑀫𑀬𑁆𑀳𑀁 𑀪𑀕𑀺𑀦𑀻𑀲𑀭𑀺𑀓𑁆𑀔𑀢𑁆𑀢𑀸 𑀢𑀁 𑀑𑀮𑁄𑀓𑁂𑀲𑀺’𑀦𑁆𑀢𑀺 𑀆𑀳. 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸 𑀑𑀮𑁄𑀓𑁂𑀢𑁆𑀯𑀸𑀧𑀺 ¶ 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀧𑀲𑀸𑀤𑀯𑀢𑁆𑀣𑀼𑀓𑀸 𑀏𑀯. 𑀓𑁂𑀘𑀺 𑀧𑀦 𑀚𑀯𑀦𑀧𑁆𑀧𑀯𑀢𑁆𑀢𑀸𑀢𑀺 𑀤𑀻𑀧𑁂𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑀺𑀓𑀲𑀜𑁆𑀜𑀸 𑀧𑀦 𑀏𑀓𑀫𑀜𑁆𑀘𑁂 𑀯𑀸 𑀏𑀓𑀧𑀻𑀞𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀁 𑀯𑀺𑀢𑀓𑁆𑀓𑁂𑀦𑁆𑀢𑀜𑁆𑀘 ‘𑀓𑀺𑀁 𑀘𑀺𑀦𑁆𑀢𑁂𑀲𑀺, 𑀓𑀺𑀁 𑀯𑀺𑀢𑀓𑁆𑀓𑁂𑀲𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑀯𑀲𑁂𑀦𑁂𑀯 𑀚𑀸𑀦𑀺𑀢𑀩𑁆𑀩𑀢𑁄 𑀲𑀼𑀔𑀼𑀫𑀸. 𑀲𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑁪. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁨𑁦. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸𑀢𑀺 𑀘𑀢𑀼𑀪𑀽𑀫𑀺𑀓𑀲𑀗𑁆𑀔𑀸𑀭𑁂 𑀧𑀭𑀺𑀬𑀸𑀤𑀺𑀬𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑀗𑁆𑀔𑀸𑀭𑁂 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀘𑁂𑀢𑀦𑀸𑀢𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀥𑀸𑀦𑀲𑀗𑁆𑀔𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀳𑀺 𑀅𑀦𑁆𑀢𑀫𑀲𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀸𑀴𑀺𑀬𑀁 𑀆𑀕𑀢𑀸 𑀘𑀢𑁆𑀢𑀸𑀭𑁄 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀘𑁂𑀢𑀦𑀸 𑀧𑀥𑀸𑀦𑀸 𑀆𑀬𑀽𑀳𑀦𑀝𑁆𑀞𑁂𑀦 𑀧𑀸𑀓𑀝𑀢𑁆𑀢𑀸. 𑀢𑀲𑁆𑀫𑀸 𑀅𑀬𑀫𑁂𑀯 𑀕𑀳𑀺𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀸 𑀧𑀦 𑀢𑀸𑀬 𑀕𑀳𑀺𑀢𑀸𑀬 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀇𑀥𑀸𑀧𑀺 𑀧𑀼𑀭𑀺𑀫𑀸 𑀧𑀜𑁆𑀘 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀯. 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀳𑀤𑀬𑀯𑀢𑁆𑀣𑀼𑀓𑀸𑀧𑀺 𑀅𑀯𑀢𑁆𑀣𑀼𑀓𑀸𑀧𑀺. 𑀲𑀩𑁆𑀩𑀸 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸. 𑀲𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑁫. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁨𑁬. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 ¶ ¶ 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀢𑀼𑀪𑀽𑀫𑀓𑀯𑀺𑀜𑁆𑀜𑀸𑀡𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀯𑀺𑀜𑁆𑀜𑀸𑀡𑀁 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 ¶ 𑀧𑀜𑁆𑀘 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑁂𑀯, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀳𑀤𑀬𑀯𑀢𑁆𑀣𑀼𑀓𑀫𑁆𑀧𑀺 𑀅𑀯𑀢𑁆𑀣𑀼𑀓𑀫𑁆𑀧𑀺. 𑀲𑀩𑁆𑀩𑀁 𑀘𑀢𑀼𑀪𑀽𑀫𑀓𑀯𑀺𑀜𑁆𑀜𑀸𑀡𑀁. 𑀲𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑀧𑀓𑀺𑀡𑁆𑀡𑀓𑀓𑀣𑀸

𑀇𑀤𑀸𑀦𑀺 𑀧𑀜𑁆𑀘𑀲𑀼𑀧𑀺 𑀔𑀦𑁆𑀥𑁂𑀲𑀼 𑀲𑀫𑀼𑀕𑁆𑀕𑀫𑀢𑁄, 𑀧𑀼𑀩𑁆𑀩𑀸𑀧𑀭𑀢𑁄, 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄, 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄, 𑀦𑀸𑀦𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑁄, 𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑁄, 𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁄, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀢𑁄, 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑁄, 𑀳𑀻𑀦𑀧𑀡𑀻𑀢𑀢𑁄, 𑀤𑀽𑀭𑀲𑀦𑁆𑀢𑀺𑀓𑀢𑁄, 𑀧𑀘𑁆𑀘𑀬𑀢𑁄, 𑀲𑀫𑀼𑀝𑁆𑀞𑀸𑀦𑀢𑁄, 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑁄, 𑀲𑀗𑁆𑀔𑀢𑀢𑁄𑀢𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀤𑀼𑀯𑀺𑀥𑁄 𑀲𑀫𑀼𑀕𑁆𑀕𑀫𑁄 𑁋 𑀕𑀩𑁆𑀪𑀲𑁂𑀬𑁆𑀬𑀓𑀲𑀫𑀼𑀕𑁆𑀕𑀫𑁄, 𑀑𑀧𑀧𑀸𑀢𑀺𑀓𑀲𑀫𑀼𑀕𑁆𑀕𑀫𑁄𑀢𑀺. 𑀢𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀲𑀫𑀼𑀕𑁆𑀕𑀫𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀧𑀘𑁆𑀙𑀸𑀅𑀧𑀼𑀭𑁂 𑀏𑀓𑀢𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑀸𑀢𑀼𑀪𑀽𑀢𑀸 𑀓𑀮𑀮𑀲𑀗𑁆𑀔𑀸𑀢𑀸 𑀭𑀽𑀧𑀲𑀦𑁆𑀢𑀢𑀺 𑀧𑀭𑀺𑀢𑁆𑀢𑀸 𑀳𑁄𑀢𑀺. 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀏𑀓𑀯𑀸𑀬𑀸𑀫𑁂𑀦 𑀧𑀸𑀢𑀩𑁆𑀩𑀫𑀢𑁆𑀢𑀸𑀢𑀺 𑀯𑀢𑁆𑀯𑀸 𑀧𑀼𑀦 ‘𑀅𑀢𑀺𑀩𑀳𑀼𑀁 𑀏𑀢𑀁, 𑀲𑀡𑁆𑀳𑀲𑀽𑀘𑀺𑀬𑀸 𑀢𑁂𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀸𑀬 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀏𑀓𑀓𑁂𑀲𑁂 𑀢𑁂𑀮𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑁂 𑀢𑀲𑁆𑀲 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑁂 𑀅𑀝𑁆𑀞𑀥𑀸 𑀨𑀸𑀮𑀺𑀢𑁂 𑀢𑀢𑁄 𑀏𑀓𑀓𑁄𑀝𑁆𑀞𑀸𑀲𑀧𑁆𑀧𑀫𑀸𑀡𑁄 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀓𑁂𑀲𑁄; 𑀢𑀲𑁆𑀲 𑀧𑀲𑀦𑁆𑀦𑀢𑀺𑀮𑀢𑁂𑀮𑀢𑁄 𑀉𑀤𑁆𑀥𑀝𑀲𑁆𑀲 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀏𑀢𑀁 𑀩𑀳𑀼, 𑀚𑀸𑀢𑀺𑀉𑀡𑁆𑀡𑀸 𑀦𑀸𑀫 𑀲𑀼𑀔𑀼𑀫𑀸; 𑀢𑀲𑁆𑀲𑀸 𑀏𑀓𑀅𑀁𑀲𑀼𑀦𑁄 𑀧𑀲𑀦𑁆𑀦𑀢𑀺𑀮𑀢𑁂𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑁆𑀲 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦𑁂𑀢𑀁 ¶ 𑀅𑀘𑁆𑀙𑀁 𑀳𑁄𑀢𑀺 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁 𑀧𑀭𑀺𑀲𑀼𑀤𑁆𑀥𑀁 𑀧𑀲𑀦𑁆𑀦𑀢𑀺𑀮𑀢𑁂𑀮𑀩𑀺𑀦𑁆𑀤𑀼𑀲𑀫𑀸𑀦𑀯𑀡𑁆𑀡𑀁 ¶ . 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

𑀢𑀺𑀮𑀢𑁂𑀮𑀲𑁆𑀲 ¶ 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁 𑀯𑀡𑁆𑀡𑀧𑀝𑀺𑀪𑀸𑀕𑀁, 𑀓𑀮𑀮𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀧𑀭𑀺𑀢𑁆𑀢𑀸𑀬 𑀭𑀽𑀧𑀲𑀦𑁆𑀢𑀢𑀺𑀬𑀸 𑀢𑀻𑀡𑀺 𑀲𑀦𑁆𑀢𑀢𑀺𑀲𑀻𑀲𑀸𑀦𑀺 𑀳𑁄𑀦𑁆𑀢𑀺 𑁋 𑀯𑀢𑁆𑀣𑀼𑀤𑀲𑀓𑀁, 𑀓𑀸𑀬𑀤𑀲𑀓𑀁, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀪𑀸𑀯𑀤𑀲𑀓𑀦𑁆𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀭𑀽𑀧𑀁, 𑀢𑀲𑁆𑀲 𑀦𑀺𑀲𑁆𑀲𑀬𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀢𑀁𑀦𑀺𑀲𑁆𑀲𑀺𑀢𑀸 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸, 𑀚𑀻𑀯𑀺𑀢𑀦𑁆𑀢𑀺 𑁋 𑀇𑀤𑀁 𑀯𑀢𑁆𑀣𑀼𑀤𑀲𑀓𑀁 𑀦𑀸𑀫. 𑀓𑀸𑀬𑀧𑀲𑀸𑀤𑁄, 𑀢𑀲𑁆𑀲 𑀦𑀺𑀲𑁆𑀲𑀬𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀢𑀦𑁆𑀦𑀺𑀲𑁆𑀲𑀺𑀢𑀸 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸, 𑀚𑀻𑀯𑀺𑀢𑀦𑁆𑀢𑀺 𑁋 𑀇𑀤𑀁 𑀓𑀸𑀬𑀤𑀲𑀓𑀁 𑀦𑀸𑀫. 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀪𑀸𑀯𑁄, 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀢𑀲𑁆𑀲 𑀦𑀺𑀲𑁆𑀲𑀬𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀢𑀦𑁆𑀦𑀺𑀲𑁆𑀲𑀺𑀢𑀸 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸, 𑀚𑀻𑀯𑀺𑀢𑀦𑁆𑀢𑀺 𑁋 𑀇𑀤𑀁 𑀪𑀸𑀯𑀤𑀲𑀓𑀁 𑀦𑀸𑀫.

𑀏𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀲𑀫𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀧𑀦 𑀲𑀳𑀚𑀸𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀏𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺. 𑀲𑀘𑁂 𑀧𑀦 𑀦𑀧𑀼𑀁𑀲𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀪𑀸𑀯𑀤𑀲𑀓𑀁 𑀳𑀸𑀬𑀢𑀺. 𑀤𑁆𑀯𑀺𑀦𑁆𑀦𑀁 𑀤𑀲𑀓𑀸𑀦𑀁 𑀯𑀲𑁂𑀦 𑀲𑀫𑀯𑀻𑀲𑀢𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫 𑀳𑁄𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯𑀸𑀢𑀺. 𑀏𑀯𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀧𑁆𑀧𑀯𑁂𑀡𑀻 𑀓𑀣𑁂𑀢𑀩𑁆𑀩𑀸 𑀪𑀯𑁂𑀬𑁆𑀬. 𑀢𑀁 𑀧𑀦 𑀅𑀓𑀣𑁂𑀢𑁆𑀯𑀸 ‘𑀑𑀧𑀧𑀸𑀢𑀺𑀓𑀲𑀫𑀼𑀕𑁆𑀕𑀫𑁄’ 𑀦𑀸𑀫 𑀤𑀲𑁆𑀲𑀺𑀢𑁄. 𑀑𑀧𑀧𑀸𑀢𑀺𑀓𑀸𑀦𑀜𑁆𑀳𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀺 𑀢𑀻𑀡𑀺, 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀤𑀲𑀓𑀸𑀦𑀺 𑀘𑀸𑀢𑀺 𑀲𑀢𑁆𑀢 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀤𑀲𑀓𑀸𑀤𑀻𑀦𑀺 𑀓𑀸𑀬𑀤𑀲𑀓𑀲𑀤𑀺𑀲𑀸𑀦𑁂𑀯. 𑀦𑀧𑀼𑀁𑀲𑀓𑀲𑁆𑀲 𑀧𑀦 𑀪𑀸𑀯𑀤𑀲𑀓𑀁 𑀦𑀢𑁆𑀣𑀺. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀑𑀧𑀧𑀸𑀢𑀺𑀓𑀸𑀦𑀁 𑀲𑀫𑀲𑀢𑁆𑀢𑀢𑀺 𑀘𑁂𑀯 ¶ 𑀲𑀫𑀲𑀝𑁆𑀞𑀺 𑀘 𑀓𑀫𑁆𑀫𑀚𑀭𑀽𑀧𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯𑀸𑀢𑀺. 𑀏𑀯𑀁 𑀑𑀧𑀧𑀸𑀢𑀺𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺. 𑀅𑀬𑀁 ‘𑀑𑀧𑀧𑀸𑀢𑀺𑀓𑀲𑀫𑀼𑀕𑁆𑀕𑀫𑁄’ 𑀦𑀸𑀫. 𑀏𑀯𑀁 𑀢𑀸𑀯 𑀧𑀜𑁆𑀘𑀓𑁆𑀔𑀦𑁆𑀥𑀸 ‘𑀲𑀫𑀼𑀕𑁆𑀕𑀫𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀧𑀼𑀩𑁆𑀩𑀸𑀧𑀭𑀢𑁄’𑀢𑀺 ¶ 𑀏𑀯𑀁 𑀧𑀦 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀧𑀘𑁆𑀙𑀸𑀅𑀧𑀼𑀭𑁂 𑀉𑀧𑁆𑀧𑀦𑁆𑀦𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀓𑀺𑀁 𑀭𑀽𑀧𑀁 ¶ 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀉𑀤𑀸𑀳𑀼 𑀅𑀭𑀽𑀧𑀦𑁆𑀢𑀺? 𑀭𑀽𑀧𑀁 𑀭𑀽𑀧𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀦 𑀅𑀭𑀽𑀧𑀁. 𑀓𑀲𑁆𑀫𑀸? 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀦 𑀭𑀽𑀧𑀚𑀦𑀓𑀢𑁆𑀢𑀸. 𑀲𑀩𑁆𑀩𑀲𑀢𑁆𑀢𑀸𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀔𑀻𑀡𑀸𑀲𑀯𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀁, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑁆𑀧𑀯𑀺𑀧𑀸𑀓𑀸𑀦𑀻𑀢𑀺 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀢𑀸𑀯 𑀯𑀢𑁆𑀣𑀼𑀦𑁄 𑀤𑀼𑀩𑁆𑀩𑀮𑀢𑀸𑀬 𑀅𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑀸𑀬 𑀆𑀕𑀦𑁆𑀢𑀼𑀓𑀢𑀸𑀬 𑀘 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀳𑀺 𑀲𑀳𑀚𑀸𑀢𑀁 𑀯𑀢𑁆𑀣𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀤𑀼𑀩𑁆𑀩𑀮𑀁 𑀳𑁄𑀢𑀻𑀢𑀺 𑀯𑀢𑁆𑀣𑀼𑀦𑁄 𑀤𑀼𑀩𑁆𑀩𑀮𑀢𑀸𑀬 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀘 𑀧𑀧𑀸𑀢𑁂 𑀧𑀢𑀦𑁆𑀢𑁄 𑀧𑀼𑀭𑀺𑀲𑁄 𑀅𑀜𑁆𑀜𑀲𑁆𑀲 𑀦𑀺𑀲𑁆𑀲𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀏𑀢𑀫𑁆𑀧𑀺 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀧𑀸𑀢𑁂 𑀧𑀢𑀫𑀸𑀦𑀁 𑀯𑀺𑀬 𑀅𑀧𑁆𑀧𑀢𑀺𑀝𑁆𑀞𑀺𑀢𑀁. 𑀇𑀢𑀺 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬𑀧𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀅𑀧𑀘𑁆𑀙𑀸𑀅𑀧𑀼𑀭𑁂 𑀉𑀧𑁆𑀧𑀦𑁆𑀦𑀁. 𑀢𑀲𑁆𑀲 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀘𑁂 𑀲𑀓𑁆𑀓𑀼𑀡𑁂𑀬𑁆𑀬, 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬. 𑀬𑀢𑁆𑀭𑀸𑀧𑀺 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀧𑀯𑁂𑀡𑀻 𑀖𑀝𑀺𑀬𑀢𑀺, 𑀢𑀢𑁆𑀭𑀸𑀧𑀺 𑀘𑀺𑀢𑁆𑀢𑀁 𑀅𑀗𑁆𑀕𑀢𑁄 𑀅𑀧𑀭𑀺𑀳𑀻𑀦𑀁𑀬𑁂𑀯 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀬𑀤𑀺 𑀳𑀺 𑀘𑀺𑀢𑁆𑀢𑀁 𑀞𑀸𑀦𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁆𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬. 𑀦 𑀧𑀦 𑀘𑀺𑀢𑁆𑀢𑀁 𑀢𑀲𑁆𑀫𑀺𑀁 𑀔𑀡𑀤𑁆𑀯𑀬𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀮𑀁 𑀧𑀣𑀯𑀺𑀢𑁄 𑀉𑀝𑁆𑀞𑀳𑀦𑁆𑀢𑀁 𑀧𑀁𑀲𑀼𑀘𑀼𑀡𑁆𑀡𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺, 𑀏𑀯𑀁 𑀘𑀺𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀝𑁆𑀞 𑀭𑀽𑀧𑀸𑀦𑀺 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑀸𑀬𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀬𑀣𑀸 𑀘 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑁄 𑀅𑀕𑀢𑀧𑀼𑀩𑁆𑀩𑀁 𑀧𑀤𑁂𑀲𑀁 𑀕𑀢𑁄 𑀅𑀜𑁆𑀜𑁂𑀲𑀁 ¶ 𑁋 ‘𑀏𑀣 𑀪𑁄, 𑀅𑀦𑁆𑀢𑁄𑀕𑀸𑀫𑁂 𑀯𑁄 𑀅𑀦𑁆𑀦𑀧𑀸𑀦𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀤𑀲𑁆𑀲𑀸𑀫𑀻’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀢𑁆𑀢𑀦𑁄 𑀅𑀯𑀺𑀲𑀬𑀢𑀸𑀬 𑀅𑀧𑁆𑀧𑀳𑀼𑀢𑀢𑀸𑀬, 𑀏𑀯𑀫𑁂𑀯 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀆𑀕𑀦𑁆𑀢𑀼𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀕𑀦𑁆𑀢𑀼𑀓𑀢𑀸𑀬𑀧𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀅𑀧𑀺𑀘 𑀲𑀫𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀞𑀸𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸𑀦𑀻𑀢𑀺𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀔𑀻𑀡𑀸𑀲𑀯𑀲𑁆𑀲 𑀧𑀦 𑀘𑀼𑀢𑀺𑀘𑀺𑀢𑁆𑀢𑀁 𑀯𑀝𑁆𑀝𑀫𑀽𑀮𑀲𑁆𑀲 𑀯𑀽𑀧𑀲𑀦𑁆𑀢𑀢𑁆𑀢𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀩𑁆𑀩𑀪𑀯𑁂𑀲𑀼 𑀯𑀝𑁆𑀝𑀫𑀽𑀮𑀁 𑀯𑀽𑀧𑀲𑀦𑁆𑀢𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀧𑀼𑀦𑀩𑁆𑀪𑀯𑁂 𑀧𑀯𑁂𑀡𑀻 𑀦𑀸𑀫 ¶ 𑀦𑀢𑁆𑀣𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀝𑁆𑀞𑀫𑁂𑀯 𑀯𑀝𑁆𑀝𑀫𑀽𑀮𑀁 𑀯𑀽𑀧𑀲𑀦𑁆𑀢𑀁. 𑀢𑀲𑁆𑀫𑀸 𑀢𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀁 𑀲𑀢𑁆𑀢𑀲𑀼 𑀪𑀯𑁂𑀲𑀼 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ¶ , 𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑀻𑀲𑀼, 𑀅𑀦𑀸𑀕𑀸𑀫𑀺𑀦𑁄 𑀏𑀓𑀲𑁆𑀫𑀺𑀁. 𑀔𑀻𑀡𑀸𑀲𑀯𑀲𑁆𑀲 𑀲𑀩𑁆𑀩𑀪𑀯𑁂𑀲𑀼 𑀯𑀝𑁆𑀝𑀫𑀽𑀮𑀲𑁆𑀲 𑀯𑀽𑀧𑀲𑀦𑁆𑀢𑀢𑁆𑀢𑀸 𑀦𑁂𑀯 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀧𑀦 𑀛𑀸𑀦𑀗𑁆𑀕𑀁 𑀦𑀢𑁆𑀣𑀺, 𑀫𑀕𑁆𑀕𑀗𑁆𑀕𑀁 𑀦𑀢𑁆𑀣𑀺, 𑀳𑁂𑀢𑀼 𑀦𑀢𑁆𑀣𑀻𑀢𑀺 𑀘𑀺𑀢𑁆𑀢𑀗𑁆𑀕𑀁 𑀤𑀼𑀩𑁆𑀩𑀮𑀁 𑀳𑁄𑀢𑀻𑀢𑀺 𑀘𑀺𑀢𑁆𑀢𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀢𑀸𑀦𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀅𑀭𑀽𑀧𑀯𑀺𑀧𑀸𑀓𑀸𑀦𑀺 𑀢𑀲𑁆𑀫𑀺𑀁 𑀪𑀯𑁂 𑀭𑀽𑀧𑀲𑁆𑀲 𑀦𑀢𑁆𑀣𑀺𑀢𑀸𑀬 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀸𑀦𑁂𑀯, 𑀬𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀢𑀲𑁆𑀫𑀺𑀁 𑀪𑀯𑁂 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺, 𑀤𑀲 𑀅𑀓𑀼𑀲𑀮𑀸𑀦𑀺, 𑀦𑀯 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀆𑀭𑀼𑀧𑁆𑀧𑀓𑀼𑀲𑀮𑀸𑀦𑀺, 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀓𑀺𑀭𑀺𑀬𑀸, 𑀢𑀻𑀡𑀺 𑀫𑀕𑁆𑀕𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀨𑀮𑀘𑀺𑀢𑁆𑀢𑀸𑀦𑀻𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺𑀧𑀺 𑀢𑀢𑁆𑀣 𑀭𑀽𑀧𑀲𑁆𑀲 𑀦𑀢𑁆𑀣𑀺𑀢𑀸𑀬 𑀏𑀯 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀉𑀢𑀼 𑀧𑀦 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑁄 𑀏𑀲 𑀉𑀢𑀼 𑀦𑀸𑀫𑀸𑀢𑀺? 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀸𑀦𑀁 𑀅𑀩𑁆𑀪𑀦𑁆𑀢𑀭𑀸 𑀢𑁂𑀚𑁄𑀥𑀸𑀢𑀼. 𑀲𑀸 𑀞𑀸𑀦𑀁 𑀧𑀢𑁆𑀯𑀸 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀉𑀢𑀼 𑀦𑀸𑀫 𑀘𑁂𑀲 𑀤𑀦𑁆𑀥𑀦𑀺𑀭𑁄𑀥𑁄; 𑀘𑀺𑀢𑁆𑀢𑀁 𑀔𑀺𑀧𑁆𑀧𑀦𑀺𑀭𑁄𑀥𑀁. 𑀢𑀲𑁆𑀫𑀺𑀁 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂𑀲𑀼 𑀧𑀝𑀺𑀲𑀦𑁆𑀥𑀺𑀅𑀦𑀦𑁆𑀢𑀭𑀁 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀬𑀤𑀸 𑀧𑀦 𑀲𑀤𑁆𑀤𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀉𑀢𑀼𑀘𑀺𑀢𑁆𑀢𑀸𑀦𑀺 𑀲𑀤𑁆𑀤𑀦𑀯𑀓𑀁 𑀦𑀸𑀫 𑀲𑀫𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀧𑀺 𑀞𑀸𑀦𑀁 𑀧𑀢𑁆𑀯𑀸 ¶ 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀼𑀢𑁄 𑀧𑀦𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀢𑀺? 𑀫𑀸𑀢𑀺𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁫);

𑀏𑀯𑀁 𑀓𑀼𑀘𑁆𑀙𑀺𑀕𑀢𑁄 𑀤𑀸𑀭𑀓𑁄 𑀫𑀸𑀢𑀭𑀸 𑀅𑀚𑁆𑀛𑁄𑀳𑀝𑀅𑀦𑁆𑀦𑀧𑀸𑀦𑀑𑀚𑀸𑀬 𑀬𑀸𑀧𑁂𑀢𑀺. 𑀲𑀸𑀯 𑀞𑀸𑀦𑀧𑁆𑀧𑀢𑁆𑀢𑀸 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀦𑀦𑀼 𑀘 𑀲𑀸 𑀑𑀚𑀸 𑀔𑀭𑀸? 𑀯𑀢𑁆𑀣𑀼 𑀲𑀼𑀔𑀼𑀫𑀁? 𑀓𑀣𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀻𑀢𑀺? 𑀧𑀞𑀫𑀁 𑀢𑀸𑀯 𑀦 𑀧𑀢𑀺𑀝𑁆𑀞𑀸𑀢𑀺; 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀢𑁆𑀢𑀸𑀳𑀸𑀦𑀁 𑀕𑀢𑀓𑀸𑀮𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁄 𑀧𑀦 𑀧𑀼𑀭𑁂 𑀯𑀸 𑀧𑀢𑀺𑀝𑁆𑀞𑀸𑀢𑀼 𑀧𑀘𑁆𑀙𑀸 𑀯𑀸; 𑀬𑀤𑀸 𑀫𑀸𑀢𑀭𑀸 𑀅𑀚𑁆𑀛𑁄𑀳𑀝𑀅𑀦𑁆𑀦𑀧𑀸𑀦𑀑𑀚𑀸 𑀤𑀸𑀭𑀓𑀲𑁆𑀲 𑀲𑀭𑀻𑀭𑁂 𑀧𑀢𑀺𑀝𑁆𑀞𑀸𑀢𑀺, 𑀢𑀤𑀸 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀑𑀧𑀧𑀸𑀢𑀺𑀓𑀲𑁆𑀲𑀸𑀧𑀺 ¶ ¶ 𑀧𑀓𑀢𑀺𑀧𑀝𑀺𑀬𑀢𑁆𑀢𑀸𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀁 𑀅𑀢𑁆𑀣𑀺𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀢𑁄 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀓𑁄 𑀅𑀦𑁆𑀦𑀧𑀸𑀦𑀭𑀳𑀺𑀢𑁂 𑀅𑀭𑀜𑁆𑀜𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀫𑀳𑀸𑀙𑀸𑀢𑀓𑁄 𑀳𑁄𑀢𑀺, 𑀅𑀢𑁆𑀢𑀦𑁄𑀯 𑀚𑀺𑀯𑁆𑀳𑀸𑀬 𑀔𑁂𑀴𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀺𑀮𑀢𑀺. 𑀢𑀢𑁆𑀭𑀸𑀧𑀺𑀲𑁆𑀲 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀏𑀯𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂𑀯 𑀭𑀽𑀧𑀸𑀦𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑁋 𑀢𑁂𑀚𑁄𑀥𑀸𑀢𑀼 𑀘 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀘. 𑀅𑀭𑀽𑀧𑁂𑀧𑀺 𑀤𑁆𑀯𑁂𑀬𑁂𑀯 𑀥𑀫𑁆𑀫𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑁋 𑀘𑀺𑀢𑁆𑀢𑀜𑁆𑀘𑁂𑀯 𑀓𑀫𑁆𑀫𑀘𑁂𑀢𑀦𑀸 𑀘. 𑀢𑀢𑁆𑀣 𑀭𑀽𑀧𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀪𑀗𑁆𑀕𑀓𑁆𑀔𑀡𑁂 𑀘 𑀤𑀼𑀩𑁆𑀩𑀮𑀁, 𑀞𑀸𑀦𑀓𑁆𑀔𑀡𑁂 𑀩𑀮𑀯𑀦𑁆𑀢𑀺 𑀞𑀸𑀦𑀓𑁆𑀔𑀡𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀘𑀺𑀢𑁆𑀢𑀁 𑀞𑀸𑀦𑀓𑁆𑀔𑀡𑁂 𑀘 𑀪𑀗𑁆𑀕𑀓𑁆𑀔𑀡𑁂 𑀘 𑀤𑀼𑀩𑁆𑀩𑀮𑀁, 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀩𑀮𑀯𑀦𑁆𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀫𑁆𑀫𑀘𑁂𑀢𑀦𑀸 𑀦𑀺𑀭𑀼𑀤𑁆𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀢𑀻𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂𑀧𑀺 𑀳𑀺 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁 𑀏𑀢𑀭𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀬𑁄𑀲𑀸𑀦𑁂𑀧𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀁 ‘𑀧𑀼𑀩𑁆𑀩𑀸𑀧𑀭𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄’𑀢𑀺 𑀭𑀽𑀧𑀁 𑀓𑀺𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺? 𑀅𑀭𑀽𑀧𑀁 𑀓𑀺𑀢𑁆𑀢𑀓𑀦𑁆𑀢𑀺? 𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥𑀁. 𑀅𑀭𑀽𑀧𑀁 𑀮𑀳𑀼𑀧𑀭𑀺𑀡𑀸𑀫𑀁 𑀔𑀺𑀧𑁆𑀧𑀦𑀺𑀭𑁄𑀥𑀁. 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀁 ¶ 𑀧𑀦 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 ‘𑀨𑀮𑀁 𑀧𑀸𑀢𑁂𑀲𑁆𑀲𑀸𑀫𑀻’𑀢𑀺 𑀫𑀼𑀕𑁆𑀕𑀭𑁂𑀦 𑀭𑀼𑀓𑁆𑀔𑀲𑀸𑀔𑀁 𑀧𑀳𑀭𑁂𑀬𑁆𑀬, 𑀨𑀮𑀸𑀦𑀺 𑀘 𑀧𑀢𑁆𑀢𑀸𑀦𑀺 𑀘 𑀏𑀓𑀓𑁆𑀔𑀡𑁂𑀬𑁂𑀯 𑀯𑀡𑁆𑀝𑀢𑁄 𑀫𑀼𑀘𑁆𑀘𑁂𑀬𑁆𑀬𑀼𑀁. 𑀢𑀢𑁆𑀣 𑀨𑀮𑀸𑀦𑀺 𑀅𑀢𑁆𑀢𑀦𑁄 𑀪𑀸𑀭𑀺𑀓𑀢𑀸𑀬 𑀧𑀞𑀫𑀢𑀭𑀁 𑀧𑀣𑀯𑀺𑀬𑀁 𑀧𑀢𑀦𑁆𑀢𑀺, 𑀧𑀢𑁆𑀢𑀸𑀦𑀺 𑀮𑀳𑀼𑀓𑀢𑀸𑀬 𑀧𑀘𑁆𑀙𑀸. 𑀏𑀯𑀫𑁂𑀯 𑀫𑀼𑀕𑁆𑀕𑀭𑀧𑁆𑀧𑀳𑀸𑀭𑁂𑀦 𑀧𑀢𑁆𑀢𑀸𑀦𑀜𑁆𑀘 𑀨𑀮𑀸𑀦𑀜𑁆𑀘 𑀏𑀓𑀓𑁆𑀔𑀡𑁂 𑀯𑀡𑁆𑀝𑀢𑁄 𑀫𑀼𑀢𑁆𑀢𑀓𑀸𑀮𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀧𑀸𑀢𑀼𑀪𑀸𑀯𑁄; 𑀨𑀮𑀸𑀦𑀁 𑀪𑀸𑀭𑀺𑀓𑀢𑀸𑀬 𑀧𑀞𑀫𑀢𑀭𑀁 𑀧𑀣𑀯𑀺𑀬𑀁 𑀧𑀢𑀦𑀁 𑀯𑀺𑀬 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀁; 𑀧𑀢𑁆𑀢𑀸𑀦𑀁 𑀮𑀳𑀼𑀓𑀢𑀸𑀬 𑀧𑀘𑁆𑀙𑀸 𑀧𑀣𑀯𑀺𑀬𑀁 𑀧𑀢𑀦𑀁 𑀯𑀺𑀬 𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀭𑀽𑀧𑀁 𑀤𑀦𑁆𑀥𑀦𑀺𑀭𑁄𑀥𑀁 𑀕𑀭𑀼𑀧𑀭𑀺𑀡𑀸𑀫𑀁, 𑀘𑀺𑀢𑁆𑀢𑀁 𑀔𑀺𑀧𑁆𑀧𑀦𑀺𑀭𑁄𑀥𑀁 𑀮𑀳𑀼𑀧𑀭𑀺𑀡𑀸𑀫𑀁, 𑀭𑀽𑀧𑀁 𑀧𑀦 𑀅𑀭𑀽𑀧𑀁 𑀅𑀭𑀽𑀧𑀁 𑀯𑀸 𑀭𑀽𑀧𑀁 𑀑𑀳𑀸𑀬 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀧𑁆𑀧𑀫𑀸𑀡𑀸𑀯 𑀧𑀯𑀢𑁆𑀢𑀺. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀧𑀼𑀭𑀺𑀲𑁄 𑀮𑀓𑀼𑀡𑁆𑀝𑀓𑀧𑀸𑀤𑁄, 𑀏𑀓𑁄 𑀤𑀻𑀖𑀧𑀸𑀤𑁄. 𑀢𑁂𑀲𑀼 𑀏𑀓𑀢𑁄 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀲𑀼 𑀬𑀸𑀯 𑀤𑀻𑀖𑀧𑀸𑀤𑁄 ¶ 𑀏𑀓𑀧𑀤𑀯𑀸𑀭𑀁 𑀅𑀓𑁆𑀓𑀫𑀢𑀺, 𑀢𑀸𑀯 𑀇𑀢𑀭𑁄 𑀧𑀤𑁂 𑀧𑀤𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑁄𑀴𑀲𑀧𑀤𑀯𑀸𑀭𑁂𑀦 𑀕𑀘𑁆𑀙𑀢𑀺. 𑀤𑀻𑀖𑀧𑀸𑀤𑁄 𑀮𑀓𑀼𑀡𑁆𑀝𑀓𑀧𑀸𑀤𑀲𑁆𑀲 𑀲𑁄𑀴𑀲 𑀧𑀤𑀯𑀸𑀭𑁂 𑀅𑀢𑁆𑀢𑀦𑁄 𑀧𑀸𑀤𑀁 𑀅𑀜𑁆𑀙𑀺𑀢𑁆𑀯𑀸 ¶ 𑀆𑀓𑀟𑁆𑀠𑀺𑀢𑁆𑀯𑀸 𑀏𑀓𑀫𑁂𑀯 𑀧𑀤𑀯𑀸𑀭𑀁 𑀓𑀭𑁄𑀢𑀺. 𑀇𑀢𑀺 𑀏𑀓𑁄𑀧𑀺 𑀏𑀓𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀫𑀦𑀁 𑀏𑀓𑀧𑁆𑀧𑀫𑀸𑀡𑀫𑁂𑀯 𑀳𑁄𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀮𑀓𑀼𑀡𑁆𑀝𑀓𑀧𑀸𑀤𑀧𑀼𑀭𑀺𑀲𑁄 𑀯𑀺𑀬 𑀅𑀭𑀽𑀧𑀁; 𑀤𑀻𑀖𑀧𑀸𑀤𑀧𑀼𑀭𑀺𑀲𑁄 𑀯𑀺𑀬 𑀭𑀽𑀧𑀁; 𑀤𑀻𑀖𑀧𑀸𑀤𑀲𑁆𑀲 𑀏𑀓𑀁 𑀧𑀤𑀯𑀸𑀭𑀁 𑀅𑀓𑁆𑀓𑀫𑀡𑀓𑀸𑀮𑁂 𑀇𑀢𑀭𑀲𑁆𑀲 𑀲𑁄𑀴𑀲𑀧𑀤𑀯𑀸𑀭𑀅𑀓𑁆𑀓𑀫𑀦𑀁 𑀯𑀺𑀬 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀅𑀭𑀽𑀧𑀥𑀫𑁆𑀫𑁂𑀲𑀼 𑀲𑁄𑀴𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀁; 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀮𑀓𑀼𑀡𑁆𑀝𑀓𑀧𑀸𑀤𑀧𑀼𑀭𑀺𑀲𑀲𑁆𑀲 𑀲𑁄𑀴𑀲 𑀧𑀤𑀯𑀸𑀭𑁂 𑀇𑀢𑀭𑀲𑁆𑀲 𑀅𑀢𑁆𑀢𑀦𑁄 𑀧𑀸𑀤𑀁 𑀅𑀜𑁆𑀙𑀺𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀏𑀓𑀧𑀤𑀯𑀸𑀭𑀓𑀭𑀡𑀁 𑀯𑀺𑀬 𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀁; 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀳𑀸𑀬 𑀏𑀓𑀧𑁆𑀧𑀫𑀸𑀡𑁂𑀦𑁂𑀯 𑀕𑀫𑀦𑀁 𑀯𑀺𑀬 𑀅𑀭𑀽𑀧𑀲𑁆𑀲 𑀭𑀽𑀧𑀁 𑀭𑀽𑀧𑀲𑁆𑀲 𑀅𑀭𑀽𑀧𑀁 𑀅𑀦𑁄𑀳𑀸𑀬 𑀏𑀓𑀧𑁆𑀧𑀫𑀸𑀡𑁂𑀦𑁂𑀯 𑀧𑀯𑀢𑁆𑀢𑀦𑀦𑁆𑀢𑀺. 𑀏𑀯𑀁 ‘𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄’𑀢𑀺 𑀇𑀤𑀁 𑀧𑀘𑁆𑀙𑀺𑀫𑀓𑀫𑁆𑀫𑀚𑀁 𑀞𑀧𑁂𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀧𑀞𑀫𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀤𑀼𑀢𑀺𑀬𑀁 ¶ 𑀪𑀯𑀗𑁆𑀕𑀁, 𑀢𑀢𑀺𑀬𑀁 𑀪𑀯𑀗𑁆𑀕𑀁…𑀧𑁂… 𑀲𑁄𑀴𑀲𑀫𑀁 𑀪𑀯𑀗𑁆𑀕𑀁. 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀯𑀲𑁂𑀦 𑀢𑀬𑁄 𑀢𑀬𑁄 𑀔𑀡𑀸. 𑀢𑀢𑁆𑀣 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼 𑀲𑀫𑀢𑀺𑀁𑀲 𑀲𑀫𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀓𑀫𑁆𑀫𑀚𑀭𑀽𑀧𑀁 𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺; 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀞𑀺𑀢𑀺𑀓𑁆𑀔𑀡𑁂𑀬𑁂𑀯; 𑀪𑀗𑁆𑀕𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀪𑀗𑁆𑀕𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀏𑀯𑀁 𑀤𑀼𑀢𑀺𑀬𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀦𑀬𑁄 𑀦𑁂𑀢𑀩𑁆𑀩𑁄. 𑀇𑀢𑀺 𑀲𑁄𑀴𑀲 𑀢𑀺𑀓𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀅𑀬𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀚𑀭𑀽𑀧𑀧𑀯𑁂𑀡𑀻 𑀦𑀸𑀫. 𑀲𑀸 𑀧𑀦𑁂𑀲𑀸 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀲𑀼𑀢𑁆𑀢𑀸𑀦𑀫𑁆𑀧𑀺 𑀧𑀫𑀢𑁆𑀢𑀸𑀦𑀫𑁆𑀧𑀺 𑀦𑀤𑀻𑀲𑁄𑀢𑁄 𑀯𑀺𑀬 𑀏𑀓𑀦𑁆𑀢𑀁 𑀧𑀯𑀢𑁆𑀢𑀢𑀺 𑀬𑁂𑀯𑀸𑀢𑀺. 𑀏𑀯𑀁 ‘𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀦𑀸𑀦𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑀸’ 𑀧𑀘𑁆𑀙𑀺𑀫𑀓𑀫𑁆𑀫𑀚𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀢𑀢𑁆𑀣 𑀆𑀬𑀼𑀲𑀁𑀔𑀸𑀭𑀧𑀭𑀺𑀬𑁄𑀲𑀸𑀦𑁂 𑀲𑁄𑀴𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀯𑀸𑀭𑁂 𑀲𑀢𑀺 𑀳𑁂𑀝𑁆𑀞𑀸𑀲𑁄𑀴𑀲𑀓𑀁 𑀉𑀧𑀭𑀺𑀲𑁄𑀴𑀲𑀓𑀦𑁆𑀢𑀺 𑀤𑁆𑀯𑁂 𑀏𑀓𑀢𑁄 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀳𑁂𑀝𑁆𑀞𑀸𑀲𑁄𑀴𑀲𑀓𑀲𑁆𑀫𑀺𑀜𑁆𑀳𑀺 𑀧𑀞𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀁 𑀉𑀧𑀭𑀺𑀲𑁄𑀴𑀲𑀓𑀲𑁆𑀫𑀺𑀁 𑀧𑀞𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺; 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂𑀬𑁂𑀯 ¶ 𑀪𑀗𑁆𑀕𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀳𑁂𑀝𑁆𑀞𑀺𑀫𑀲𑁄𑀴𑀲𑀓𑀲𑁆𑀫𑀺𑀁 𑀧𑀦 𑀤𑀼𑀢𑀺𑀬𑀘𑀺𑀢𑁆𑀢𑀲𑁆𑀲…𑀧𑁂… 𑀲𑁄𑀴𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺; 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂𑀬𑁂𑀯; 𑀪𑀗𑁆𑀕𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀚𑀭𑀽𑀧𑀧𑀯𑁂𑀡𑀻 ¶ 𑀦 𑀧𑀯𑀢𑁆𑀢𑀢𑀺. 𑀬𑀤𑀺 𑀧𑀯𑀢𑁆𑀢𑁂𑀬𑁆𑀬, 𑀲𑀢𑁆𑀢𑀸 𑀅𑀓𑁆𑀔𑀬𑀸 𑀅𑀯𑀬𑀸 𑀅𑀚𑀭𑀸 𑀅𑀫𑀭𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁.

𑀏𑀢𑁆𑀣 𑀧𑀦 𑀬𑀤𑁂𑀢𑀁 ‘𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 ‘𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀁 ‘‘𑀬𑀲𑁆𑀲 ¶ 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺? ‘‘𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁭𑁯) 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀓𑀣𑀁? 𑀓𑀸𑀬𑀲𑀗𑁆𑀔𑀸𑀭𑁄 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀅𑀜𑁆𑀜𑀸𑀦𑀺 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀸𑀯 𑀢𑀺𑀝𑁆𑀞𑀢𑀺. 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀇𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺; 𑀦 𑀓𑀲𑁆𑀲𑀘𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀸 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀦𑀸𑀧𑀺 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀥𑀫𑁆𑀫𑀢𑀸𑀢𑀺 𑀦𑀺𑀬𑀫𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀬𑁄 𑀘𑀸𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀔𑀡𑀦𑀺𑀬𑀫𑁄 𑀯𑀼𑀢𑁆𑀢𑁄 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀅𑀬𑀫𑁂𑀯 𑀔𑀡𑀦𑀺𑀬𑀫𑁄. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀚𑀭𑀽𑀧𑀁 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀝𑁆𑀞𑀸𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀝𑁆𑀞𑀸𑀭𑀲𑀫𑀲𑁆𑀲 𑀞𑀸𑀦𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁄 𑀧𑀭𑀁 𑀧𑀦 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀧𑀯𑁂𑀡𑀻𑀬𑁂𑀯 𑀢𑀺𑀝𑁆𑀞𑀢𑀺. ‘𑀦𑀻𑀳𑀭𑀺𑀢𑁆𑀯𑀸 𑀛𑀸𑀧𑁂𑀣𑀸’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀁 ‘𑀦𑀸𑀦𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑁄’𑀢𑀺 𑀭𑀽𑀧𑀁 𑀧𑀦 𑀭𑀽𑀧𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀁 𑀏𑀓𑀦𑀺𑀭𑁄𑀥𑀁. 𑀅𑀭𑀽𑀧𑀁 𑀅𑀭𑀽𑀧𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀁 𑀏𑀓𑀦𑀺𑀭𑁄𑀥𑀁. 𑀏𑀯𑀁 ‘𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀢𑁄’ 𑀯𑁂𑀤𑀺𑀢𑀩𑁆𑀩𑀸.

‘𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑀸’ ¶ 𑀧𑀦 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀇𑀫𑀲𑁆𑀲 𑀳𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀲𑁆𑀲 𑀲𑀭𑀻𑀭𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀁 𑀖𑀦𑀧𑀼𑀜𑁆𑀚𑀪𑀸𑀯𑁂𑀦 𑀯𑀢𑁆𑀢𑀢𑀺. 𑀏𑀯𑀁 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺𑀲𑁆𑀲 𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀬𑀣𑀸 𑀧𑀦 𑀉𑀧𑀘𑀺𑀓𑀭𑀸𑀚𑀺 𑀯𑀸 𑀓𑀺𑀧𑀺𑀮𑁆𑀮𑀺𑀓𑀭𑀸𑀚𑀺 𑀯𑀸 𑀑𑀮𑁄𑀓𑀺𑀬𑀫𑀸𑀦𑀸 𑀏𑀓𑀸𑀩𑀤𑁆𑀥𑀸 𑀯𑀺𑀬 𑀳𑁄𑀢𑀺, 𑀦 𑀧𑀦 𑀏𑀓𑀸𑀩𑀤𑁆𑀥𑀸. 𑀅𑀜𑁆𑀜𑀺𑀲𑁆𑀲𑀸 𑀳𑀺 ¶ 𑀲𑀻𑀲𑀲𑀦𑁆𑀢𑀺𑀓𑁂 𑀅𑀜𑁆𑀜𑀺𑀲𑁆𑀲𑀸 𑀲𑀻𑀲𑀫𑁆𑀧𑀺 𑀉𑀤𑀭𑀫𑁆𑀧𑀺 𑀧𑀸𑀤𑀸𑀧𑀺, 𑀅𑀜𑁆𑀜𑀺𑀲𑁆𑀲𑀸 𑀉𑀤𑀭𑀲𑀦𑁆𑀢𑀺𑀓𑁂 𑀅𑀜𑁆𑀜𑀺𑀲𑁆𑀲𑀸 𑀲𑀻𑀲𑀫𑁆𑀧𑀺 𑀉𑀤𑀭𑀫𑁆𑀧𑀺 𑀧𑀸𑀤𑀸𑀧𑀺, 𑀅𑀜𑁆𑀜𑀺𑀲𑁆𑀲𑀸 𑀧𑀸𑀤𑀲𑀦𑁆𑀢𑀺𑀓𑁂 𑀅𑀜𑁆𑀜𑀺𑀲𑁆𑀲𑀸 𑀲𑀻𑀲𑀫𑁆𑀧𑀺 𑀉𑀤𑀭𑀫𑁆𑀧𑀺 𑀧𑀸𑀤𑀸𑀧𑀺 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀸𑀦𑀫𑁆𑀧𑀺 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 ¶ 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀳𑁄𑀢𑀺 𑀞𑀺𑀢𑀺𑀧𑀺 𑀪𑀗𑁆𑀕𑁄𑀧𑀺, 𑀅𑀜𑁆𑀜𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀳𑁄𑀢𑀺 𑀞𑀺𑀢𑀺𑀧𑀺 𑀪𑀗𑁆𑀕𑁄𑀧𑀺, 𑀅𑀜𑁆𑀜𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀳𑁄𑀢𑀺 𑀞𑀺𑀢𑀺𑀧𑀺 𑀪𑀗𑁆𑀕𑁄𑀧𑀺. 𑀏𑀯𑀫𑁂𑀢𑁆𑀣 ‘𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑀸’ 𑀯𑁂𑀤𑀺𑀢𑀩𑁆𑀩𑀸.

‘𑀅𑀢𑀻𑀢𑀸𑀤𑀻𑀦𑀺’ 𑀧𑀦 𑀤𑀽𑀭𑀤𑀼𑀓𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑁂𑀯. ‘𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸𑀦𑀺’𑀧𑀺 ‘‘𑀓𑀫𑁆𑀫𑀚𑀁, 𑀓𑀫𑁆𑀫𑀧𑀘𑁆𑀘𑀬𑀁, 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑁯𑁭𑁫) 𑀦𑀬𑁂𑀦 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀺𑀬𑁂𑀯. 𑀧𑀜𑁆𑀘𑀧𑀺 𑀧𑀦 𑀔𑀦𑁆𑀥𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀦𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸; 𑀲𑀗𑁆𑀔𑀢𑀸𑀯 𑀦𑁄 𑀅𑀲𑀗𑁆𑀔𑀢𑀸; 𑀅𑀧𑀺𑀘 𑀦𑀺𑀧𑁆𑀨𑀦𑁆𑀦𑀸𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀲𑀪𑀸𑀯𑀥𑀫𑁆𑀫𑁂𑀲𑀼 𑀳𑀺 𑀦𑀺𑀩𑁆𑀩𑀸𑀦𑀫𑁂𑀯𑁂𑀓𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀅𑀦𑀺𑀧𑁆𑀨𑀦𑁆𑀦𑀜𑁆𑀘. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀧𑀦 𑀦𑀸𑀫𑀧𑀜𑁆𑀜𑀢𑁆𑀢𑀺 𑀘 𑀓𑀣𑀦𑁆𑀢𑀺? 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀢𑀺 𑀯𑀸 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀢𑀺 𑀯𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀦𑀺𑀧𑁆𑀨𑀦𑁆𑀦𑀸 𑀧𑀦 𑀳𑁄𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄. 𑀢𑀣𑀸 𑀦𑀸𑀫𑀧𑀜𑁆𑀜𑀢𑁆𑀢𑀺. 𑀲𑀸𑀧𑀺 𑀳𑀺 𑀮𑁄𑀓𑀺𑀬𑀸𑀤𑀺𑀪𑁂𑀤𑀁 𑀦 𑀮𑀪𑀢𑀺; 𑀦𑀺𑀧𑁆𑀨𑀦𑁆𑀦𑀸 𑀧𑀦 𑀳𑁄𑀢𑀺 𑀦𑁄 𑀅𑀦𑀺𑀧𑁆𑀨𑀦𑁆𑀦𑀸; 𑀦𑀸𑀫𑀕𑁆𑀕𑀳𑀡𑀜𑁆𑀳𑀺 𑀕𑀡𑁆𑀳𑀦𑁆𑀢𑁄𑀯 𑀕𑀡𑁆𑀳𑀸𑀢𑀻𑀢𑀺.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑀏𑀯𑀁 𑀧𑀓𑀺𑀡𑁆𑀡𑀓𑀢𑁄 𑀔𑀦𑁆𑀥𑁂 𑀯𑀺𑀤𑀺𑀢𑁆𑀯𑀸 𑀧𑀼𑀦 𑀏𑀢𑁂𑀲𑀼𑀬𑁂𑀯 𑁋

𑀔𑀦𑁆𑀥𑁂𑀲𑀼 𑀜𑀸𑀡𑀪𑁂𑀤𑀢𑁆𑀣𑀁, 𑀓𑀫𑀢𑁄𑀣 𑀯𑀺𑀲𑁂𑀲𑀢𑁄;

𑀅𑀦𑀽𑀦𑀸𑀥𑀺𑀓𑀢𑁄 𑀘𑁂𑀯, 𑀉𑀧𑀫𑀸𑀢𑁄 𑀢𑀣𑁂𑀯 𑀘.

𑀤𑀝𑁆𑀞𑀩𑁆𑀩𑀢𑁄 𑀤𑁆𑀯𑀺𑀥𑀸 𑀏𑀯𑀁, 𑀧𑀲𑁆𑀲𑀦𑁆𑀢𑀲𑁆𑀲𑀢𑁆𑀣𑀲𑀺𑀤𑁆𑀥𑀺𑀢𑁄;

𑀯𑀺𑀦𑀺𑀘𑁆𑀙𑀬𑀦𑀬𑁄 𑀲𑀫𑁆𑀫𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑀢𑀢𑁆𑀣 ¶ ¶ ‘𑀓𑀫𑀢𑁄’𑀢𑀺 𑀇𑀥 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄, 𑀧𑀳𑀸𑀦𑀓𑁆𑀓𑀫𑁄, 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄, 𑀪𑀽𑀫𑀺𑀓𑁆𑀓𑀫𑁄, 𑀤𑁂𑀲𑀦𑀸𑀓𑁆𑀓𑀫𑁄𑀢𑀺 𑀩𑀳𑀼𑀯𑀺𑀥𑁄 𑀓𑀫𑁄.

𑀢𑀢𑁆𑀣 ‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀺, 𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩𑁫) 𑀏𑀯𑀫𑀸𑀤𑀺 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄. ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁮) 𑀏𑀯𑀫𑀸𑀤𑀺 𑀧𑀳𑀸𑀦𑀓𑁆𑀓𑀫𑁄. ‘‘𑀲𑀻𑀮𑀯𑀺𑀲𑀼𑀤𑁆𑀥𑀺, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻’’𑀢𑀺 (𑀫. 𑀦𑀺. 𑁧.𑁨𑁫𑁯; 𑀧𑀝𑀺. 𑀫. 𑁩.𑁪𑁧) 𑀏𑀯𑀫𑀸𑀤𑀺 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄. ‘‘𑀓𑀸𑀫𑀸𑀯𑀘𑀭𑀸 ¶ , 𑀭𑀽𑀧𑀸𑀯𑀘𑀭𑀸’’𑀢𑀺 𑀏𑀯𑀫𑀸𑀤𑀺 𑀪𑀽𑀫𑀺𑀓𑁆𑀓𑀫𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 (𑀤𑀻. 𑀦𑀺. 𑁩.𑁧𑁪𑁫) 𑀯𑀸 ‘‘𑀤𑀸𑀦𑀓𑀣𑀁 𑀲𑀻𑀮𑀓𑀣’’𑀦𑁆𑀢𑀺 (𑀫. 𑀦𑀺. 𑁨.𑁬𑁯; 𑀤𑀻. 𑀦𑀺. 𑁧.𑁨𑁯𑁮) 𑀯𑀸 𑀏𑀯𑀫𑀸𑀤𑀺 𑀤𑁂𑀲𑀦𑀸𑀓𑁆𑀓𑀫𑁄. 𑀢𑁂𑀲𑀼 𑀇𑀥 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀓𑀮𑀮𑀸𑀤𑀻𑀦𑀁 𑀯𑀺𑀬 𑀔𑀦𑁆𑀥𑀸𑀦𑀁 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄; 𑀦 𑀧𑀳𑀸𑀦𑀓𑁆𑀓𑀫𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄; 𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀅𑀓𑀼𑀲𑀮𑀸𑀦𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄; 𑀦 𑀪𑀽𑀫𑀺𑀓𑁆𑀓𑀫𑁄 𑀯𑁂𑀤𑀦𑀸𑀤𑀻𑀦𑀁 𑀘𑀢𑀼𑀪𑀽𑀫𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸.

𑀤𑁂𑀲𑀦𑀸𑀓𑁆𑀓𑀫𑁄 𑀧𑀦 𑀬𑀼𑀚𑁆𑀚𑀢𑀺. 𑀅𑀪𑁂𑀤𑁂𑀦 𑀳𑀺 𑀬𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑀧𑀢𑀺𑀢𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀽𑀳𑀖𑀦𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑁂𑀦 𑀅𑀢𑁆𑀢𑀕𑁆𑀕𑀸𑀳𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀪𑀕𑀯𑀸 𑀳𑀺𑀢𑀓𑀸𑀫𑁄 𑀢𑀲𑁆𑀲 𑀚𑀦𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀘𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀯𑀺𑀲𑀬𑀪𑀽𑀢𑀁 𑀑𑀴𑀸𑀭𑀺𑀓𑀁 𑀧𑀞𑀫𑀁 𑀭𑀽𑀧𑀓𑁆𑀔𑀦𑁆𑀥𑀁 𑀤𑁂𑀲𑁂𑀲𑀺. 𑀢𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀭𑀽𑀧𑀲𑀁𑀯𑁂𑀤𑀺𑀢𑀁 𑀯𑁂𑀤𑀦𑀁, 𑀬𑀁 𑀯𑁂𑀤𑀬𑀢𑀺 𑀢𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀏𑀯𑀁 𑀯𑁂𑀤𑀦𑀸𑀯𑀺𑀲𑀬𑀲𑁆𑀲 𑀆𑀓𑀸𑀭𑀕𑁆𑀕𑀸𑀳𑀺𑀓𑀁 𑀲𑀜𑁆𑀜𑀁, 𑀲𑀜𑁆𑀜𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀸𑀭𑀓𑁂 𑀲𑀗𑁆𑀔𑀸𑀭𑁂, 𑀢𑁂𑀲𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀲𑁆𑀲𑀬𑀁 𑀅𑀥𑀺𑀧𑀢𑀺𑀪𑀽𑀢𑀜𑁆𑀘 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀢𑀸𑀯 ‘𑀓𑀫𑀢𑁄’ 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

‘𑀯𑀺𑀲𑁂𑀲𑀢𑁄’𑀢𑀺 𑀔𑀦𑁆𑀥𑀸𑀦𑀜𑁆𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀜𑁆𑀘 𑀯𑀺𑀲𑁂𑀲𑀢𑁄. 𑀓𑁄 𑀧𑀦 𑀢𑁂𑀲𑀁 𑀯𑀺𑀲𑁂𑀲𑁄? 𑀔𑀦𑁆𑀥𑀸 𑀢𑀸𑀯 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀸, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀲𑀯𑀉𑀧𑀸𑀤𑀸𑀦𑀻𑀬𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸. 𑀬𑀣𑀸𑀳 𑁋

‘‘𑀧𑀜𑁆𑀘, 𑀪𑀺𑀓𑁆𑀔𑀯𑁂, 𑀔𑀦𑁆𑀥𑁂 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀘, 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀓𑁆𑀔𑀦𑁆𑀥𑀸? 𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀽𑀧𑀓𑁆𑀔𑀦𑁆𑀥𑁄. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 ¶ …𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸? 𑀬𑀁 ¶ 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀽𑀧𑀽𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬𑀁 𑁋 𑀅𑀬𑀁 ¶ 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁪𑁮).

𑀏𑀢𑁆𑀣 𑀘 𑀬𑀣𑀸 𑀯𑁂𑀤𑀦𑀸𑀤𑀬𑁄 𑀅𑀦𑀸𑀲𑀯𑀸𑀧𑀺 𑀲𑀸𑀲𑀯𑀸𑀧𑀺 𑀅𑀢𑁆𑀣𑀺, 𑀦 𑀏𑀯𑀁 𑀭𑀽𑀧𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀪𑀸𑀯𑁄 𑀬𑀼𑀚𑁆𑀚𑀢𑀺 𑀢𑀲𑁆𑀫𑀸 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀭𑀸𑀲𑀝𑁆𑀞𑁂𑀦 𑀘 𑀲𑀸𑀲𑀯𑀝𑁆𑀞𑁂𑀦 𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑀸𑀯𑁄 𑀬𑀼𑀚𑁆𑀚𑀢𑀺 𑀢𑀲𑁆𑀫𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀤𑀬𑁄 𑀧𑀦 𑀅𑀦𑀸𑀲𑀯𑀸𑀯 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀸, 𑀲𑀸𑀲𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. ‘𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸’𑀢𑀺 𑀏𑀢𑁆𑀣 𑀘 𑀉𑀧𑀸𑀤𑀸𑀦𑀕𑁄𑀘𑀭𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀥 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀔𑀦𑁆𑀥𑀸𑀢𑀺 𑀅𑀥𑀺𑀧𑁆𑀧𑁂𑀢𑀸.

‘𑀅𑀦𑀽𑀦𑀸𑀥𑀺𑀓𑀢𑁄’𑀢𑀺 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄, 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑁆𑀧𑀭𑀫𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀯𑀭𑁄𑀥𑀢𑁄. 𑀅𑀦𑁂𑀓𑀧𑁆𑀧𑀪𑁂𑀤𑁂𑀲𑀼 𑀳𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀲𑀪𑀸𑀕𑀯𑀲𑁂𑀦 𑀲𑀗𑁆𑀕𑀬𑁆𑀳𑀫𑀸𑀦𑁂𑀲𑀼 𑀭𑀽𑀧𑀁 𑀭𑀽𑀧𑀲𑀪𑀸𑀕𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺, 𑀯𑁂𑀤𑀦𑀸 𑀯𑁂𑀤𑀦𑀸𑀲𑀪𑀸𑀕𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀜𑁆𑀜𑀸𑀤𑀻𑀲𑀼𑀧𑀺. 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑀲𑀗𑁆𑀕𑀳𑀢𑁄 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀏𑀢𑀧𑀭𑀫𑀜𑁆𑀘𑁂𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼 𑀬𑀤𑀺𑀤𑀁 𑀭𑀽𑀧𑀸𑀤𑀬𑁄 𑀧𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺 𑀭𑀽𑀧𑀁 𑀉𑀧𑀸𑀤𑀸𑀬 𑀭𑀽𑀧𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 (𑀲𑀁. 𑀦𑀺. 𑁩.𑁨𑁦𑁭). 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼…. 𑀯𑀺𑀜𑁆𑀜𑀸𑀡𑁂 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀬𑁂𑀧𑀺 𑀘𑀜𑁆𑀜𑁂 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀢𑁆𑀣𑁂𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀢𑀤𑀯𑀭𑁄𑀥𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸𑀢𑀺. 𑀏𑀯𑀁 ‘𑀅𑀦𑀽𑀦𑀸𑀥𑀺𑀓𑀢𑁄’ 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

‘𑀉𑀧𑀫𑀸𑀢𑁄’𑀢𑀺 𑀏𑀢𑁆𑀣 𑀳𑀺 𑀕𑀺𑀮𑀸𑀦𑀲𑀸𑀮𑀽𑀧𑀫𑁄 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 ¶ 𑀕𑀺𑀮𑀸𑀦𑀽𑀧𑀫𑀲𑁆𑀲 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲 ¶ 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁄, 𑀕𑁂𑀮𑀜𑁆𑀜𑀽𑀧𑀫𑁄 ¶ 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀆𑀩𑀸𑀥𑀓𑀢𑁆𑀢𑀸, 𑀕𑁂𑀮𑀜𑁆𑀜𑀲𑀫𑀼𑀝𑁆𑀞𑀸𑀦𑀽𑀧𑀫𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀓𑀸𑀫𑀲𑀜𑁆𑀜𑀸𑀤𑀺𑀯𑀲𑁂𑀦 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀲𑀫𑁆𑀪𑀯𑀸, 𑀅𑀲𑀧𑁆𑀧𑀸𑀬𑀲𑁂𑀯𑀦𑀽𑀧𑀫𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀕𑁂𑀮𑀜𑁆𑀜𑀲𑁆𑀲 𑀦𑀺𑀤𑀸𑀦𑀢𑁆𑀢𑀸. ‘‘𑀯𑁂𑀤𑀦𑀁 𑀯𑁂𑀤𑀦𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀳𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀤𑀼𑀓𑁆𑀔𑀲𑀳𑀕𑀢’’𑀦𑁆𑀢𑀺 (𑀥. 𑀲. 𑁫𑁫𑁬). 𑀕𑀺𑀮𑀸𑀦𑀽𑀧𑀫𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀕𑁂𑀮𑀜𑁆𑀜𑁂𑀦 𑀅𑀧𑀭𑀺𑀫𑀼𑀢𑁆𑀢𑀢𑁆𑀢𑀸. 𑀅𑀧𑀺𑀘 𑀘𑀸𑀭𑀓𑀓𑀸𑀭𑀡𑀅𑀧𑀭𑀸𑀥𑀓𑀸𑀭𑀡𑀓𑀸𑀭𑀓𑀅𑀧𑀭𑀸𑀥𑀺𑀓𑀽𑀧𑀫𑀸 𑀏𑀢𑁂 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀧𑀭𑀺𑀯𑁂𑀲𑀓𑀪𑀼𑀜𑁆𑀚𑀓𑀽𑀧𑀫𑀸 𑀘𑀸𑀢𑀺, 𑀏𑀯𑀁 ‘𑀉𑀧𑀫𑀸𑀢𑁄’ 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

‘𑀤𑀝𑁆𑀞𑀩𑁆𑀩𑀢𑁄 𑀤𑁆𑀯𑀺𑀥𑀸’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀤𑀝𑁆𑀞𑀩𑁆𑀩𑀢𑁄 𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀳𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀆𑀲𑀺𑀯𑀺𑀲𑀽𑀧𑀫𑁂 (𑀲𑀁. 𑀦𑀺. 𑁪.𑁨𑁩𑁮) 𑀯𑀼𑀢𑁆𑀢𑀦𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀢𑁄, 𑀪𑀸𑀭𑀲𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁨𑁨) 𑀪𑀸𑀭𑀢𑁄, 𑀔𑀚𑁆𑀚𑀦𑀻𑀬𑀧𑀭𑀺𑀬𑀸𑀬𑀯𑀲𑁂𑀦 (𑀲𑀁. 𑀦𑀺. 𑁩.𑁭𑁯) 𑀔𑀸𑀤𑀓𑀢𑁄, 𑀬𑀫𑀓𑀲𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁮𑁫) 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀗𑁆𑀔𑀢𑀯𑀥𑀓𑀢𑁄 𑀤𑀝𑁆𑀞𑀩𑁆𑀩𑀸.

𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀉𑀤𑀓𑀧𑀼𑀩𑁆𑀩𑀼𑀴𑁄 𑀯𑀺𑀬 𑀯𑁂𑀤𑀦𑀸, 𑀫𑀭𑀻𑀘𑀺𑀓𑀸 𑀯𑀺𑀬 𑀲𑀜𑁆𑀜𑀸, 𑀓𑀤𑀮𑀺𑀓𑁆𑀔𑀦𑁆𑀥𑁄 𑀯𑀺𑀬 𑀲𑀗𑁆𑀔𑀸𑀭𑀸, 𑀫𑀸𑀬𑀸 𑀯𑀺𑀬 𑀯𑀺𑀜𑁆𑀜𑀸𑀡𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀭𑀽𑀧𑀁, 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀽𑀧𑀫𑀸;

𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀓𑀤𑀮𑀽𑀧𑀫𑀸;

𑀫𑀸𑀬𑀽𑀧𑀫𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸’’𑀢𑀺. (𑀲𑀁. 𑀦𑀺. 𑁩.𑁯𑁫);

𑀢𑀢𑁆𑀣 𑀭𑀽𑀧𑀸𑀤𑀻𑀦𑀁 𑀨𑁂𑀡𑀧𑀺𑀡𑁆𑀟𑀸𑀤𑀻𑀳𑀺 𑀏𑀯𑀁 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑀸 𑀳𑀺 𑀨𑁂𑀡𑀧𑀺𑀡𑁆𑀟𑁄 𑀦𑀺𑀲𑁆𑀲𑀸𑀭𑁄𑀯 𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀘𑁆𑀘𑀲𑀸𑀭𑀥𑀼𑀯𑀲𑀸𑀭𑀅𑀢𑁆𑀢𑀲𑀸𑀭𑀯𑀺𑀭𑀳𑁂𑀦 𑀦𑀺𑀲𑁆𑀲𑀸𑀭𑀫𑁂𑀯. 𑀬𑀣𑀸 𑀘 𑀲𑁄 ‘𑀇𑀫𑀺𑀦𑀸 𑀧𑀢𑁆𑀢𑀁 𑀯𑀸 𑀣𑀸𑀮𑀓𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀕𑀳𑀺𑀢𑁄𑀧𑀺 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀪𑀺𑀚𑁆𑀚𑀢𑁂𑀯; 𑀏𑀯𑀁 𑀭𑀽𑀧𑀫𑁆𑀧𑀺 ¶ ‘𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀥𑀼𑀯’𑀦𑁆𑀢𑀺 𑀯𑀸 ‘𑀅𑀳’𑀦𑁆𑀢𑀺 𑀯𑀸 ‘𑀫𑀫’𑀦𑁆𑀢𑀺 𑀯𑀸 𑀕𑀳𑁂𑀢𑀼𑀁 𑀦 ¶ 𑀲𑀓𑁆𑀓𑀸, 𑀕𑀳𑀺𑀢𑀫𑁆𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀅𑀲𑀼𑀪𑀜𑁆𑀜𑁂𑀯 𑀳𑁄𑀢𑀻𑀢𑀺. 𑀏𑀯𑀁 ‘𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀫𑁂𑀯’ 𑀳𑁄𑀢𑀺.

𑀬𑀣𑀸 ¶ 𑀯𑀸 𑀧𑀦 𑀨𑁂𑀡𑀧𑀺𑀡𑁆𑀟𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑁄 𑀩𑀳𑀽𑀦𑁆𑀦𑀁 𑀉𑀤𑀓𑀲𑀧𑁆𑀧𑀸𑀤𑀻𑀦𑀁 𑀧𑀸𑀡𑀸𑀦𑀁 𑀆𑀯𑀸𑀲𑁄, 𑀏𑀯𑀁 𑀭𑀽𑀧𑀫𑁆𑀧𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑀁. 𑀓𑀼𑀮𑀯𑀲𑁂𑀦 𑀘𑁂𑀢𑁆𑀣 𑀅𑀲𑀻𑀢𑀺 𑀓𑀺𑀫𑀺𑀓𑀼𑀮𑀸𑀦𑀺 𑀯𑀲𑀦𑁆𑀢𑀺. 𑀢𑀤𑁂𑀯 𑀢𑁂𑀲𑀁 𑀲𑀽𑀢𑀺𑀖𑀭𑀫𑁆𑀧𑀺 𑀯𑀘𑁆𑀘𑀓𑀼𑀝𑀺𑀧𑀺 𑀕𑀺𑀮𑀸𑀦𑀲𑀸𑀮𑀸𑀧𑀺 𑀲𑀼𑀲𑀸𑀦𑀫𑁆𑀧𑀺. 𑀦 𑀢𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁. 𑀬𑀣𑀸 𑀘 𑀨𑁂𑀡𑀧𑀺𑀡𑁆𑀟𑁄 𑀆𑀤𑀺𑀢𑁄𑀯 𑀩𑀤𑀭𑀧𑀓𑁆𑀓𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀩𑁆𑀩𑀢𑀓𑀽𑀝𑀫𑀢𑁆𑀢𑁄𑀧𑀺 𑀳𑁄𑀢𑀺, 𑀏𑀯𑀁 𑀭𑀽𑀧𑀫𑁆𑀧𑀺 𑀆𑀤𑀺𑀢𑁄 𑀓𑀮𑀮𑀫𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀬𑀸𑀫𑀫𑀢𑁆𑀢𑀫𑁆𑀧𑀺 𑀕𑁄𑀫𑀳𑀺𑀁𑀲𑀳𑀢𑁆𑀣𑀺𑀆𑀤𑀻𑀦𑀁 𑀯𑀲𑁂𑀦 𑀧𑀩𑁆𑀩𑀢𑀓𑀽𑀝𑀫𑀢𑁆𑀢𑀫𑁆𑀧𑀺 𑀳𑁄𑀢𑀺, 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀦𑀁 𑀯𑀲𑁂𑀦 𑀅𑀦𑁂𑀓𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀫𑁆𑀧𑀺. 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁. 𑀬𑀣𑀸 𑀘 𑀨𑁂𑀡𑀧𑀺𑀡𑁆𑀟𑁄 𑀉𑀝𑁆𑀞𑀺𑀢𑀫𑀢𑁆𑀢𑁄𑀧𑀺 𑀪𑀺𑀚𑁆𑀚𑀢𑀺, 𑀣𑁄𑀓𑀁 𑀕𑀦𑁆𑀢𑁆𑀯𑀸𑀧𑀺, 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀧𑀦 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺; 𑀏𑀯𑀫𑁂𑀯 𑀭𑀽𑀧𑀫𑁆𑀧𑀺 𑀓𑀮𑀮𑀪𑀸𑀯𑁂𑀧𑀺 𑀪𑀺𑀚𑁆𑀚𑀢𑀺, 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑁂, 𑀅𑀦𑁆𑀢𑀭𑀸 𑀧𑀦 𑀅𑀪𑁂𑀚𑁆𑀚𑀫𑀸𑀦𑀫𑁆𑀧𑀺 𑀯𑀲𑁆𑀲𑀲𑀢𑀸𑀬𑀼𑀓𑀸𑀦𑀁 𑀯𑀲𑁆𑀲𑀲𑀢𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺, 𑀫𑀭𑀡𑀫𑀼𑀔𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁.

𑀬𑀣𑀸 𑀧𑀦 𑀧𑀼𑀩𑁆𑀩𑀼𑀴𑁄 𑀅𑀲𑀸𑀭𑁄, 𑀏𑀯𑀁 𑀯𑁂𑀤𑀦𑀸𑀧𑀺. 𑀬𑀣𑀸 𑀘 𑀲𑁄 𑀅𑀩𑀮𑁄, 𑀅𑀕𑀬𑁆𑀳𑀼𑀧𑀕𑁄, 𑀦 𑀲𑀓𑁆𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀁 𑀯𑀸 𑀆𑀲𑀦𑀁 𑀯𑀸 𑀓𑀸𑀢𑀼𑀁, 𑀕𑀳𑀺𑀢𑀕𑁆𑀕𑀳𑀺𑀢𑁄𑀧𑀺 𑀪𑀺𑀚𑁆𑀚𑀢𑁂𑀯; 𑀏𑀯𑀁 𑀯𑁂𑀤𑀦𑀸𑀧𑀺 𑀅𑀩𑀮𑀸, 𑀅𑀕𑀬𑁆𑀳𑀼𑀧𑀕𑀸, 𑀦 𑀲𑀓𑁆𑀓𑀸 ‘𑀦𑀺𑀘𑁆𑀘𑀸’𑀢𑀺 𑀯𑀸 ‘𑀥𑀼𑀯𑀸’𑀢𑀺 𑀯𑀸 𑀕𑀳𑁂𑀢𑀼𑀁, 𑀕𑀳𑀺𑀢𑀸𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀅𑀕𑀬𑁆𑀳𑀼𑀧𑀕𑀢𑀸𑀬𑀧𑀺 𑀯𑁂𑀤𑀦𑀸 ‘𑀧𑀼𑀩𑁆𑀩𑀼𑀴𑀲𑀤𑀺𑀲𑀸’. 𑀬𑀣𑀸 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀤𑀓𑀩𑀺𑀦𑁆𑀤𑀼𑀫𑁆𑀳𑀺 𑀧𑀼𑀩𑁆𑀩𑀼𑀴𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺; 𑀏𑀯𑀁 𑀯𑁂𑀤𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺, 𑀏𑀓𑀘𑁆𑀙𑀭𑀓𑁆𑀔𑀡𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀬𑀣𑀸 𑀘 𑀧𑀼𑀩𑁆𑀩𑀼𑀴𑁄 𑀉𑀤𑀓𑀢𑀮𑀁, 𑀉𑀤𑀓𑀩𑀺𑀦𑁆𑀤𑀼𑀁 ¶ , 𑀉𑀤𑀓𑀚𑀮𑁆𑀮𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀕𑀳𑀡𑀯𑀸𑀢𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺; 𑀏𑀯𑀁 𑀯𑁂𑀤𑀦𑀸𑀧𑀺 𑀯𑀢𑁆𑀣𑀼𑀁, 𑀆𑀭𑀫𑁆𑀫𑀡𑀁, 𑀓𑀺𑀮𑁂𑀲𑀚𑀸𑀮𑀁, 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀲𑀤𑀺𑀲𑀸.

𑀲𑀜𑁆𑀜𑀸𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 ‘𑀫𑀭𑀻𑀘𑀺𑀲𑀤𑀺𑀲𑀸’. 𑀢𑀣𑀸 𑀅𑀕𑀬𑁆𑀳𑀼𑀧𑀕𑀝𑁆𑀞𑁂𑀦; 𑀦 𑀳𑀺 𑀲𑀓𑁆𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀧𑀺𑀯𑀺𑀢𑀼𑀁 𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀪𑀸𑀚𑀦𑀁 𑀯𑀸 𑀧𑀽𑀭𑁂𑀢𑀼𑀁. 𑀅𑀧𑀺𑀘 𑀬𑀣𑀸 𑀫𑀭𑀻𑀘𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀲𑀜𑁆𑀚𑀸𑀢𑀽𑀫𑀺𑀯𑁂𑀕𑁄 ¶ 𑀯𑀺𑀬 𑀔𑀸𑀬𑀢𑀺; 𑀏𑀯𑀁 𑀦𑀻𑀮𑀲𑀜𑁆𑀜𑀸𑀤𑀺𑀪𑁂𑀤𑀸 𑀲𑀜𑁆𑀜𑀸𑀧𑀺 𑀦𑀻𑀮𑀸𑀤𑀺𑀅𑀦𑀼𑀪𑀯𑀦𑀢𑁆𑀣𑀸𑀬 𑀨𑀦𑁆𑀤𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀬𑀣𑀸 𑀘 𑀫𑀭𑀻𑀘𑀺 𑀫𑀳𑀸𑀚𑀦𑀁 𑀯𑀺𑀧𑁆𑀧𑀮𑀫𑁆𑀪𑁂𑀢𑀺 ¶ , ‘𑀧𑀭𑀺𑀧𑀼𑀡𑁆𑀡𑀯𑀸𑀧𑀻 𑀯𑀺𑀬 𑀧𑀭𑀺𑀧𑀼𑀡𑁆𑀡𑀦𑀤𑀻 𑀯𑀺𑀬 𑀤𑀺𑀲𑁆𑀲𑀢𑀻’𑀢𑀺 𑀯𑀤𑀸𑀧𑁂𑀢𑀺; 𑀏𑀯𑀁 𑀲𑀜𑁆𑀜𑀸𑀧𑀺 𑀯𑀺𑀧𑁆𑀧𑀮𑀫𑁆𑀪𑁂𑀢𑀺, ‘𑀇𑀤𑀁 𑀦𑀻𑀮𑀓𑀁 𑀲𑀼𑀪𑀁 𑀲𑀼𑀔𑀁 𑀦𑀺𑀘𑁆𑀘’𑀦𑁆𑀢𑀺 𑀯𑀤𑀸𑀧𑁂𑀢𑀺. 𑀧𑀻𑀢𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀯𑀺𑀧𑁆𑀧𑀮𑀫𑁆𑀪𑀦𑁂𑀦𑀸𑀧𑀺 𑀫𑀭𑀻𑀘𑀺𑀲𑀤𑀺𑀲𑀸.

𑀲𑀗𑁆𑀔𑀸𑀭𑀸𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 ‘𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑀸’. 𑀢𑀣𑀸 𑀅𑀕𑀬𑁆𑀳𑀼𑀧𑀕𑀝𑁆𑀞𑁂𑀦. 𑀬𑀣𑁂𑀯 𑀳𑀺 𑀓𑀤𑀮𑀺𑀓𑁆𑀔𑀦𑁆𑀥𑀢𑁄 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀕𑁄𑀧𑀸𑀦𑀲𑀻𑀆𑀤𑀻𑀦𑀫𑀢𑁆𑀣𑀸𑀬 𑀉𑀧𑀦𑁂𑀢𑀼𑀁, 𑀉𑀧𑀦𑀻𑀢𑀫𑁆𑀧𑀺 𑀦 𑀢𑀣𑀸 𑀳𑁄𑀢𑀺; 𑀏𑀯𑀁 𑀲𑀗𑁆𑀔𑀸𑀭𑀸𑀧𑀺 𑀦 𑀲𑀓𑁆𑀓𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑁂𑀢𑀼𑀁, 𑀕𑀳𑀺𑀢𑀸𑀧𑀺 𑀦 𑀢𑀣𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀓𑀤𑀮𑀺𑀓𑁆𑀔𑀦𑁆𑀥𑁄 𑀩𑀳𑀼𑀯𑀝𑁆𑀝𑀺𑀲𑀫𑁄𑀥𑀸𑀦𑁄 𑀳𑁄𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑁄. 𑀬𑀣𑀸 𑀘 𑀓𑀤𑀮𑀺𑀓𑁆𑀔𑀦𑁆𑀥𑁄 𑀦𑀸𑀦𑀸𑀮𑀓𑁆𑀔𑀡𑁄, 𑀅𑀜𑁆𑀜𑁄𑀬𑁂𑀯 𑀳𑀺 𑀩𑀸𑀳𑀺𑀭𑀸𑀬 𑀧𑀢𑁆𑀢𑀯𑀝𑁆𑀝𑀺𑀬𑀸 𑀯𑀡𑁆𑀡𑁄, 𑀅𑀜𑁆𑀜𑁄 𑀢𑀢𑁄 𑀅𑀩𑁆𑀪𑀦𑁆𑀢𑀭𑀩𑁆𑀪𑀦𑁆𑀢𑀭𑀸𑀦𑀁; 𑀏𑀯𑀫𑁂𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 𑀅𑀜𑁆𑀜𑀤𑁂𑀯 𑀨𑀲𑁆𑀲𑀲𑁆𑀲 𑀮𑀓𑁆𑀔𑀡𑀁, 𑀅𑀜𑁆𑀜𑀁 𑀘𑁂𑀢𑀦𑀸𑀤𑀻𑀦𑀁. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀫𑁆𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑁄.

𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 ‘𑀫𑀸𑀬𑀸𑀲𑀤𑀺𑀲𑀁’. 𑀢𑀣𑀸 𑀅𑀕𑀬𑁆𑀳𑀼𑀧𑀕𑀝𑁆𑀞𑁂𑀦. 𑀬𑀣𑀸 𑀘 𑀫𑀸𑀬𑀸 𑀇𑀢𑁆𑀢𑀭𑀸 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀏𑀯𑀁 𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀢𑀢𑁄𑀧𑀺 𑀇𑀢𑁆𑀢𑀭𑀢𑀭𑀜𑁆𑀘𑁂𑀯 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀭𑀜𑁆𑀘. 𑀢𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀧𑀼𑀭𑀺𑀲𑁄 𑀆𑀕𑀢𑁄 𑀯𑀺𑀬, 𑀕𑀢𑁄 𑀯𑀺𑀬, 𑀞𑀺𑀢𑁄 𑀯𑀺𑀬, 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀅𑀜𑁆𑀜𑀤𑁂𑀯 𑀘𑀸𑀕𑀫𑀦𑀓𑀸𑀮𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀕𑀫𑀦𑀓𑀸𑀮𑀸𑀤𑀻𑀲𑀼. 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸𑀲𑀤𑀺𑀲𑀁. 𑀫𑀸𑀬𑀸 𑀘 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀬𑀁 𑀓𑀺𑀜𑁆𑀘𑀺𑀤𑁂𑀯 ‘𑀇𑀤𑀁 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀫𑀼𑀢𑁆𑀢𑀸’𑀢𑀺𑀧𑀺 𑀕𑀳𑀸𑀧𑁂𑀢𑀺. 𑀯𑀺𑀜𑁆𑀜𑀸𑀡𑀫𑁆𑀧𑀺 ¶ 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀆𑀕𑀘𑁆𑀙𑀦𑁆𑀢𑀁 𑀯𑀺𑀬, 𑀕𑀘𑁆𑀙𑀦𑁆𑀢𑀁 𑀯𑀺𑀬, 𑀞𑀺𑀢𑀁 𑀯𑀺𑀬, 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑀺. 𑀅𑀜𑁆𑀜𑀤𑁂𑀯 𑀘 𑀆𑀕𑀫𑀦𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀕𑀫𑀦𑀸𑀤𑀻𑀲𑀼. 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸𑀲𑀤𑀺𑀲𑀁. 𑀯𑀺𑀲𑁂𑀲𑀢𑁄 𑀘 𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺 𑀑𑀴𑀸𑀭𑀺𑀓𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀅𑀲𑀼𑀪𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀅𑀯𑀺𑀦𑀺𑀫𑀼𑀢𑁆𑀢𑀢𑁄 𑀤𑀼𑀓𑁆𑀔𑀸𑀢𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀅𑀯𑀺𑀥𑁂𑀬𑁆𑀬𑀢𑁄 𑀅𑀦𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀡𑀁 𑀉𑀤𑀬𑀩𑁆𑀩𑀬𑀥𑀫𑁆𑀫𑀢𑁄 𑀅𑀦𑀺𑀘𑁆𑀘𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲𑀢𑁆𑀣𑀲𑀺𑀤𑁆𑀥𑀺𑀢𑁄’𑀢𑀺 𑀏𑀯𑀜𑁆𑀘 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑁆𑀯𑀺𑀥𑀸 𑀧𑀲𑁆𑀲𑀢𑁄 𑀬𑀸 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀢𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀪𑀸𑀯𑁂𑀦 𑀧𑀲𑁆𑀲𑀦𑁆𑀢𑁄 𑀔𑀦𑁆𑀥𑁂𑀳𑀺 𑀦 𑀯𑀺𑀳𑀜𑁆𑀜𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀭𑀽𑀧𑀸𑀤𑀻𑀦𑀺 𑀨𑁂𑀡𑀧𑀺𑀡𑁆𑀟𑀸𑀤𑀺𑀲𑀤𑀺𑀲𑀪𑀸𑀯𑁂𑀦 𑀧𑀲𑁆𑀲𑀦𑁆𑀢𑁄 𑀦 𑀅𑀲𑀸𑀭𑁂𑀲𑀼 𑀲𑀸𑀭𑀤𑀲𑁆𑀲𑀻 𑀳𑁄𑀢𑀺. 𑀯𑀺𑀲𑁂𑀲𑀢𑁄 𑀘 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 ¶ 𑀅𑀲𑀼𑀪𑀢𑁄 𑀧𑀲𑁆𑀲𑀦𑁆𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺 ¶ , 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀓𑀸𑀫𑁄𑀖𑀁 𑀉𑀢𑁆𑀢𑀭𑀢𑀺, 𑀓𑀸𑀫𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀓𑀸𑀫𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀓𑀸𑀫𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺. 𑀯𑁂𑀤𑀦𑀁 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀨𑀲𑁆𑀲𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀪𑀯𑁄𑀖𑀁 𑀉𑀢𑁆𑀢𑀭𑀢𑀺, 𑀪𑀯𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀪𑀯𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺. 𑀲𑀜𑁆𑀜𑀁 𑀲𑀗𑁆𑀔𑀸𑀭𑁂 𑀘 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀤𑀺𑀝𑁆𑀞𑁄𑀖𑀁 𑀉𑀢𑁆𑀢𑀭𑀢𑀺, 𑀤𑀺𑀝𑁆𑀞𑀺𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀤𑀺𑀝𑁆𑀞𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀇𑀤𑀁 𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺. 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀅𑀯𑀺𑀚𑁆𑀚𑁄𑀖𑀁 𑀉𑀢𑁆𑀢𑀭𑀢𑀺, 𑀅𑀯𑀺𑀚𑁆𑀚𑀸𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀅𑀯𑀺𑀚𑁆𑀚𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀏𑀯𑀁 𑀫𑀳𑀸𑀦𑀺𑀲𑀁𑀲𑀁, 𑀯𑀥𑀓𑀸𑀤𑀺𑀯𑀲𑁂𑀦 𑀤𑀲𑁆𑀲𑀦𑀁 𑀬𑀲𑁆𑀫𑀸;

𑀢𑀲𑁆𑀫𑀸 𑀔𑀦𑁆𑀥𑁂 𑀥𑀻𑀭𑁄, 𑀯𑀥𑀓𑀸𑀤𑀺𑀯𑀲𑁂𑀦 𑀧𑀲𑁆𑀲𑁂𑀬𑁆𑀬𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁨. 𑀇𑀤𑀸𑀦𑀺 ¶ 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄 𑀳𑁂𑀝𑁆𑀞𑀸 𑀭𑀽𑀧𑀓𑀡𑁆𑀟𑁂 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁪. 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀏𑀓𑀯𑀺𑀥𑁂𑀦𑀸𑀢𑀺 𑀏𑀓𑀓𑁄𑀝𑁆𑀞𑀸𑀲𑁂𑀦. 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑁄. 𑀲𑀩𑁆𑀩𑀸𑀧𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸. 𑀲𑀳𑁂𑀢𑀼𑀓𑀤𑀼𑀓𑁂 𑀲𑀳𑁂𑀢𑀼𑀓𑀸 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸, 𑀅𑀳𑁂𑀢𑀼𑀓𑀸 𑀓𑀸𑀫𑀸𑀯𑀘𑀭𑀸𑀯. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀼𑀲𑀮𑀧𑀤𑀸𑀤𑀻𑀳𑀺 𑀯𑀼𑀢𑁆𑀢𑀸 𑀯𑁂𑀤𑀦𑀸 𑀚𑀸𑀦𑀺𑀢𑀩𑁆𑀩𑀸. 𑀅𑀧𑀺𑀘𑀸𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀏𑀓𑀯𑀺𑀥𑁂𑀦 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀢𑁄 𑀤𑀲𑁆𑀲𑀺𑀢𑁄, 𑀤𑀼𑀯𑀺𑀥𑁂𑀦 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀢𑁄, 𑀢𑀺𑀯𑀺𑀥𑁂𑀦 𑀚𑀸𑀢𑀺𑀢𑁄 ¶ , 𑀘𑀢𑀼𑀩𑁆𑀩𑀺𑀥𑁂𑀦 𑀪𑀽𑀫𑀦𑁆𑀢𑀭𑀢𑁄, 𑀧𑀜𑁆𑀘𑀯𑀺𑀥𑁂𑀦 𑀇𑀦𑁆𑀤𑁆𑀭𑀺𑀬𑀢𑁄. 𑀢𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀸𑀬𑀧𑁆𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀙𑀝𑁆𑀞𑀯𑀢𑁆𑀣𑀼𑀓𑀁 𑀯𑀸 𑀅𑀯𑀢𑁆𑀣𑀼𑀓𑀁 𑀯𑀸 𑀢𑁂𑀪𑀽𑀫𑀓𑀁 ¶ . 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀙𑀝𑁆𑀞𑀯𑀢𑁆𑀣𑀼𑀓𑀁 𑀓𑀸𑀫𑀸𑀯𑀘𑀭𑀁. 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀸𑀤𑀺𑀘𑀢𑀼𑀧𑁆𑀧𑀲𑀸𑀤𑀯𑀢𑁆𑀣𑀼𑀓𑀁 𑀙𑀝𑁆𑀞𑀯𑀢𑁆𑀣𑀼𑀓𑀁 𑀅𑀯𑀢𑁆𑀣𑀼𑀓𑀜𑁆𑀘 𑀘𑀢𑀼𑀪𑀽𑀫𑀓𑀁. 𑀙𑀩𑁆𑀩𑀺𑀥𑁂𑀦 𑀯𑀢𑁆𑀣𑀼𑀢𑁄 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀧𑀜𑁆𑀘 𑀯𑁂𑀤𑀦𑀸 𑀧𑀜𑁆𑀘𑀧𑁆𑀧𑀲𑀸𑀤𑀯𑀢𑁆𑀣𑀼𑀓𑀸 𑀓𑀸𑀫𑀸𑀯𑀘𑀭𑀸𑀯 𑀙𑀝𑁆𑀞𑀸 𑀅𑀯𑀢𑁆𑀣𑀼𑀓𑀸 𑀯𑀸 𑀲𑀯𑀢𑁆𑀣𑀼𑀓𑀸 𑀯𑀸 𑀘𑀢𑀼𑀪𑀽𑀫𑀺𑀓𑀸.

𑀲𑀢𑁆𑀢𑀯𑀺𑀥𑁂𑀦 𑀢𑀢𑁆𑀣 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀪𑁂𑀤𑀢𑁄 𑀤𑀲𑁆𑀲𑀺𑀢𑀸, 𑀅𑀝𑁆𑀞𑀯𑀺𑀥𑁂𑀦 𑀢𑀢𑁆𑀣 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀪𑁂𑀤𑀢𑁄, 𑀦𑀯𑀯𑀺𑀥𑁂𑀦 𑀲𑀢𑁆𑀢𑀯𑀺𑀥𑀪𑁂𑀤𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀪𑁂𑀤𑀢𑁄, 𑀤𑀲𑀯𑀺𑀥𑁂𑀦 𑀅𑀝𑁆𑀞𑀯𑀺𑀥𑀪𑁂𑀤𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀪𑁂𑀤𑀢𑁄. 𑀏𑀢𑁂𑀲𑀼 𑀳𑀺 𑀲𑀢𑁆𑀢𑀯𑀺𑀥𑀪𑁂𑀤𑁂 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸. 𑀅𑀝𑁆𑀞𑀯𑀺𑀥𑀪𑁂𑀤𑁂 𑀢𑀸𑀬 𑀲𑀤𑁆𑀥𑀺𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸𑀧𑀺 𑀲𑀼𑀔𑀸 𑀤𑀼𑀓𑁆𑀔𑀸𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸. 𑀦𑀯𑀯𑀺𑀥𑀪𑁂𑀤𑁂 𑀲𑀢𑁆𑀢𑀯𑀺𑀥𑁂 𑀯𑀼𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀓𑀼𑀲𑀮𑀸𑀤𑀺𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀦𑀸. 𑀤𑀲𑀯𑀺𑀥𑀪𑁂𑀤𑁂 𑀅𑀝𑁆𑀞𑀯𑀺𑀥𑁂 𑀯𑀼𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀓𑀼𑀲𑀮𑀸𑀤𑀺𑀯𑀲𑁂𑀦𑁂𑀯 𑀢𑀺𑀥𑀸 𑀪𑀺𑀦𑁆𑀦𑀸.

𑀓𑀼𑀲𑀮𑀢𑁆𑀢𑀺𑀓𑁄 𑀘𑁂𑀢𑁆𑀣 𑀓𑁂𑀯𑀮𑀁 𑀧𑀽𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑁄. 𑀲𑀢𑁆𑀢𑀯𑀺𑀥𑀅𑀝𑁆𑀞𑀯𑀺𑀥𑀦𑀯𑀯𑀺𑀥𑀪𑁂𑀤𑁂𑀲𑀼 𑀧𑀦 𑀦𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ¶ 𑀦𑀬𑁄 𑀤𑀺𑀦𑁆𑀦𑁄. 𑀅𑀪𑀺𑀥𑀫𑁆𑀫𑀜𑁆𑀳𑀺 𑀧𑀢𑁆𑀯𑀸 𑀢𑀣𑀸𑀕𑀢𑁂𑀦 𑀦𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑀬𑁄 𑀅𑀤𑀺𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀢𑀸𑀯 𑀤𑀼𑀓𑀫𑀽𑀮𑀓𑁂 𑀏𑀓𑁄 𑀯𑀸𑀭𑁄.

𑀲𑀢𑁆𑀣𑀸 𑀳𑀺 𑀇𑀫𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀪𑀸𑀚𑁂𑀦𑁆𑀢𑁄 𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺, 𑀤𑀼𑀓𑁂 𑀕𑀳𑁂𑀢𑁆𑀯𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺, 𑀢𑀺𑀓𑁂 𑀘 𑀤𑀼𑀓𑁂 𑀘 𑀉𑀪𑀢𑁄𑀯𑀟𑁆𑀠𑀦𑀦𑀻𑀳𑀸𑀭𑁂𑀦 𑀆𑀳𑀭𑀺; 𑀲𑀢𑁆𑀢𑀯𑀺𑀥𑁂𑀦, 𑀘𑀢𑀼𑀯𑀻𑀲𑀢𑀺𑀯𑀺𑀥𑁂𑀦, 𑀢𑀺𑀁𑀲𑀯𑀺𑀥𑁂𑀦, 𑀩𑀳𑀼𑀯𑀺𑀥𑁂𑀦𑀸𑀢𑀺 𑀲𑀩𑁆𑀩𑀣𑀸𑀧𑀺 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀲𑀺. 𑀓𑀲𑁆𑀫𑀸? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀘𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘. 𑀥𑀫𑁆𑀫𑀁 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀤𑁂𑀯𑀧𑀭𑀺𑀲𑀸𑀬 𑀳𑀺 𑀬𑁂 𑀤𑁂𑀯𑀧𑀼𑀢𑁆𑀢𑀸 𑀢𑀺𑀓𑁂 𑀆𑀤𑀸𑀬 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑀺𑀬𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀁 𑀲𑀧𑁆𑀧𑀸𑀬𑀯𑀲𑁂𑀦 𑀢𑀣𑀸 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀬𑁂 𑀇𑀢𑀭𑁂𑀳𑀺 𑀆𑀓𑀸𑀭𑁂𑀳𑀺 𑀓𑀣𑀺𑀬𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀁 𑀢𑁂𑀳𑀸𑀓𑀸𑀭𑁂𑀳𑀺 𑀤𑁂𑀲𑁂𑀲𑀻𑀢𑀺. 𑀅𑀬𑀫𑁂𑀢𑁆𑀣 ‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄’. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀫𑀳𑀸𑀯𑀺𑀲𑀬𑀢𑀸𑀬 𑀢𑀺𑀓𑁂 𑀯𑀸 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸, 𑀤𑀼𑀓𑁂 𑀯𑀸 𑀢𑀺𑀓𑁂𑀲𑀼 𑀉𑀪𑀢𑁄𑀯𑀟𑁆𑀠𑀦𑁂𑀦 𑀯𑀸, 𑀲𑀢𑁆𑀢𑀯𑀺𑀥𑀸𑀤𑀺𑀦𑀬𑁂𑀦 𑀯𑀸, 𑀬𑀣𑀸 ¶ 𑀬𑀣𑀸 𑀇𑀘𑁆𑀙𑀢𑀺 𑀢𑀣𑀸 𑀢𑀣𑀸 𑀤𑁂𑀲𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸𑀧𑀺 𑀇𑀫𑁂𑀳𑀸𑀓𑀸𑀭𑁂𑀳𑀺 𑀤𑁂𑀲𑁂𑀲𑀻𑀢𑀺 𑀅𑀬𑀫𑀲𑁆𑀲 ‘𑀤𑁂𑀲𑀦𑀸𑀯𑀺𑀮𑀸𑀲𑁄’.

𑀢𑀢𑁆𑀣 ¶ 𑀢𑀺𑀓𑁂 𑀆𑀤𑀸𑀬 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀭𑁄 𑀤𑀼𑀓𑀫𑀽𑀮𑀓𑁄 𑀦𑀸𑀫. 𑀤𑀼𑀓𑁂 𑀆𑀤𑀸𑀬 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀭𑁄 𑀢𑀺𑀓𑀫𑀽𑀮𑀓𑁄 𑀦𑀸𑀫. 𑀢𑀺𑀓𑁂 𑀘 𑀤𑀼𑀓𑁂 𑀘 𑀉𑀪𑀢𑁄 𑀯𑀟𑁆𑀠𑁂𑀢𑁆𑀯𑀸 𑀤𑁂𑀲𑀺𑀢𑀯𑀸𑀭𑁄 𑀉𑀪𑀢𑁄𑀯𑀟𑁆𑀠𑀺𑀢𑀓𑁄 𑀦𑀸𑀫. 𑀅𑀯𑀲𑀸𑀦𑁂 𑀲𑀢𑁆𑀢𑀯𑀺𑀥𑁂𑀦𑀸𑀢𑀺𑀆𑀤𑀺𑀯𑀸𑀭𑁄 𑀩𑀳𑀼𑀯𑀺𑀥𑀯𑀸𑀭𑁄 𑀦𑀸𑀫𑀸𑀢𑀺 𑀇𑀫𑁂 𑀢𑀸𑀯 𑀘𑀢𑁆𑀢𑀸𑀭𑁄 𑀫𑀳𑀸𑀯𑀸𑀭𑀸.

𑀢𑀢𑁆𑀣 𑀤𑀼𑀓𑀫𑀽𑀮𑀓𑁂 𑀤𑀼𑀓𑁂𑀲𑀼 𑀮𑀩𑁆𑀪𑀫𑀸𑀦𑁂𑀦 𑀏𑀓𑁂𑀓𑁂𑀦 𑀤𑀼𑀓𑁂𑀦 𑀲𑀤𑁆𑀥𑀺𑀁 𑀢𑀺𑀓𑁂𑀲𑀼 𑀅𑀮𑀩𑁆𑀪𑀫𑀸𑀦𑁂 𑀯𑁂𑀤𑀦𑀸𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑁂 𑀅𑀧𑀦𑁂𑀢𑁆𑀯𑀸, 𑀲𑁂𑀲𑁂 𑀮𑀩𑁆𑀪𑀫𑀸𑀦𑀓𑁂 𑀏𑀓𑀽𑀦𑀯𑀻𑀲𑀢𑀺 𑀢𑀺𑀓𑁂 𑀬𑁄𑀚𑁂𑀢𑁆𑀯𑀸, 𑀤𑀼𑀢𑀺𑀬𑀤𑀼𑀓𑀧𑀞𑀫𑀢𑁆𑀢𑀺𑀓𑀬𑁄𑀚𑀦𑀯𑀸𑀭𑀸𑀤𑀻𑀦𑀺 𑀦𑀯𑀯𑀸𑀭𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀧𑀸𑀴𑀺𑀬𑀁 𑀲𑀁𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀢𑀺𑀓𑀫𑀽𑀮𑀓𑁂𑀧𑀺 𑀢𑀺𑀓𑁂𑀲𑀼 𑀮𑀩𑁆𑀪𑀫𑀸𑀦𑁂𑀦 𑀏𑀓𑁂𑀓𑁂𑀦 𑀢𑀺𑀓𑁂𑀦 𑀲𑀤𑁆𑀥𑀺𑀁 𑀤𑀼𑀓𑁂𑀲𑀼 𑀅𑀮𑀩𑁆𑀪𑀫𑀸𑀦𑁂 𑀧𑀞𑀫𑀤𑀼𑀓𑀸𑀤𑀬𑁄 𑀤𑀼𑀓𑁂 𑀅𑀧𑀦𑁂𑀢𑁆𑀯𑀸, 𑀲𑁂𑀲𑁂 𑀮𑀩𑁆𑀪𑀫𑀸𑀦𑀓𑁂 𑀲𑀳𑁂𑀢𑀼𑀓𑀤𑀼𑀓𑀸𑀤𑀬𑁄 𑀧𑀜𑁆𑀜𑀸𑀲 𑀤𑀼𑀓𑁂 𑀬𑁄𑀚𑁂𑀢𑁆𑀯𑀸, 𑀧𑀞𑀫𑀢𑁆𑀢𑀺𑀓𑀤𑀼𑀢𑀺𑀬𑀤𑀼𑀓𑀬𑁄𑀚𑀦𑀯𑀸𑀭𑀸𑀤𑀻𑀦𑀺 𑀦𑀯𑀯𑀸𑀭𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 ¶ 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀧𑀺 𑀲𑀩𑁆𑀩𑁂 𑀧𑀸𑀴𑀺𑀬𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀉𑀪𑀢𑁄𑀯𑀟𑁆𑀠𑀺𑀢𑀓𑁂 𑀤𑀼𑀯𑀺𑀥𑀪𑁂𑀤𑁂 𑀤𑀼𑀢𑀺𑀬𑀤𑀼𑀓𑀁 𑀢𑀺𑀯𑀺𑀥𑀪𑁂𑀤𑁂 𑀘 𑀧𑀞𑀫𑀢𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑀩𑁆𑀪𑀫𑀸𑀦𑁂𑀳𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀤𑀼𑀓𑁂𑀳𑀺 𑀮𑀩𑁆𑀪𑀫𑀸𑀦𑁂 𑀏𑀓𑀽𑀦𑀯𑀻𑀲𑀢𑀺𑀢𑀺𑀓𑁂 𑀬𑁄𑀚𑁂𑀢𑁆𑀯𑀸 𑀤𑀼𑀢𑀺𑀬𑀤𑀼𑀓𑀧𑀞𑀫𑀢𑀺𑀓𑀬𑁄𑀚𑀦𑀯𑀸𑀭𑀸𑀤𑀬𑁄 𑀏𑀓𑀽𑀦𑀯𑀻𑀲𑀢𑀺𑀯𑀸𑀭𑀸 𑀯𑀼𑀢𑁆𑀢𑀸. 𑀏𑀲 𑀤𑀼𑀓𑀢𑀺𑀓𑀸𑀦𑀁 𑀯𑀲𑁂𑀦 𑀉𑀪𑀢𑁄𑀯𑀟𑁆𑀠𑀺𑀢𑀢𑁆𑀢𑀸 𑀉𑀪𑀢𑁄𑀯𑀟𑁆𑀠𑀺𑀢𑀓𑁄 𑀦𑀸𑀫 𑀢𑀢𑀺𑀬𑁄 𑀫𑀳𑀸𑀯𑀸𑀭𑁄.

𑀩𑀳𑀼𑀯𑀺𑀥𑀯𑀸𑀭𑀲𑁆𑀲 𑀲𑀢𑁆𑀢𑀯𑀺𑀥𑀦𑀺𑀤𑁆𑀤𑁂𑀲𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀮𑀩𑁆𑀪𑀫𑀸𑀦𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀬𑁄𑀚𑁂𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺 𑀲𑀢𑁆𑀢𑀯𑀺𑀥𑀯𑀸𑀭𑀸 𑀯𑀼𑀢𑁆𑀢𑀸. 𑀘𑀢𑀼𑀯𑀻𑀲𑀢𑀺𑀯𑀺𑀥𑀦𑀺𑀤𑁆𑀤𑁂𑀲𑁂𑀧𑀺 𑀢𑁂𑀲𑀁𑀬𑁂𑀯 𑀢𑀺𑀓𑀸𑀦𑀁 𑀯𑀲𑁂𑀦 𑀏𑀓𑀽𑀦𑀯𑀻𑀲𑀢𑀺𑀯𑀸𑀭𑀸 𑀯𑀼𑀢𑁆𑀢𑀸. 𑀢𑀣𑀸 𑀩𑀳𑀼𑀯𑀺𑀥𑀯𑀸𑀭𑁂 𑀘𑀸𑀢𑀺 ¶ . 𑀢𑀺𑀁𑀲𑀯𑀺𑀥𑀯𑀸𑀭𑁄 𑀏𑀓𑁄𑀬𑁂𑀯𑀸𑀢𑀺 𑀲𑀩𑁆𑀩𑁂𑀧𑀺 𑀅𑀝𑁆𑀞𑀧𑀜𑁆𑀜𑀸𑀲 𑀯𑀸𑀭𑀸 𑀳𑁄𑀦𑁆𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀸𑀭𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀸𑀴𑀺𑀯𑀡𑁆𑀡𑀦𑀸.

𑀇𑀤𑀸𑀦𑀺 ¶ 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀲𑀢𑁆𑀢𑀯𑀺𑀥𑀦𑀺𑀤𑁆𑀤𑁂𑀲𑁄 𑀢𑀸𑀯 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. 𑀘𑀢𑀼𑀯𑀻𑀲𑀢𑀺𑀯𑀺𑀥𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀢𑁆𑀣𑀺 𑀓𑀼𑀲𑀮𑁄𑀢𑀺 𑀓𑀸𑀫𑀸𑀯𑀘𑀭𑀅𑀝𑁆𑀞𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀺 𑀅𑀓𑀼𑀲𑀮𑁄𑀢𑀺 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑁄𑀢𑀺 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸𑀦𑀺, 𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀝𑁆𑀞 𑀓𑀼𑀲𑀮𑀸𑀦𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺 𑀘 𑀚𑀯𑀦𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀤𑁆𑀯𑁂 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑁄 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦, 𑀢𑀺𑀲𑁆𑀲𑁄 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦, 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦, 𑀦𑀯 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀚𑀯𑀦𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀢𑁆𑀣𑀺 𑀓𑀼𑀲𑀮𑁄𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀯𑀲𑁂𑀦 𑀓𑀣𑀺𑀢𑀁, 𑀅𑀢𑁆𑀣𑀺 𑀅𑀓𑀼𑀲𑀮𑁄𑀢𑀺 𑀤𑁆𑀯𑀸𑀤𑀲𑀅𑀓𑀼𑀲𑀮𑀯𑀲𑁂𑀦. 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑁄𑀢𑀺 𑀏𑀓𑀸𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁, 𑀤𑀲𑀦𑁆𑀦𑀁 𑀓𑀺𑀭𑀺𑀬𑀸𑀦𑀁 ¶ , 𑀦𑀯𑀦𑁆𑀦𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀸𑀫𑀜𑁆𑀜𑀨𑀮𑀸𑀦𑀦𑁆𑀢𑀺 𑀘𑀢𑀼𑀢𑁆𑀢𑀺𑀁𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀓𑀣𑀺𑀢𑀁. 𑀢𑀢𑁆𑀣 𑀘𑀢𑀼𑀪𑀽𑀫𑀓𑀓𑀼𑀲𑀮𑀜𑁆𑀘𑁂𑀯 𑀅𑀓𑀼𑀲𑀮𑀜𑁆𑀘 𑀚𑀯𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀓𑀺𑀭𑀺𑀬𑀢𑁄 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀆𑀯𑀚𑁆𑀚𑀦𑀯𑀲𑁂𑀦, 𑀏𑀓𑀸𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦, 𑀢𑁂𑀪𑀽𑀫𑀓𑀓𑀺𑀭𑀺𑀬𑀸 𑀘𑁂𑀯 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀚𑀯𑀦𑀯𑀲𑁂𑀦𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀸𑀦𑀺 𑀲𑀢𑁆𑀢𑀯𑀺𑀥𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀢𑀺𑀁𑀲𑀯𑀺𑀥𑁂 𑀧𑀦 𑀞𑀢𑁆𑀯𑀸 𑀤𑀻𑀧𑀺𑀬𑀫𑀸𑀦𑀸𑀦𑀺 𑀲𑀼𑀔𑀤𑀻𑀧𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀺𑀁𑀲𑀯𑀺𑀥𑀲𑁆𑀫𑀺𑀁𑀬𑁂𑀯 𑀞𑀢𑁆𑀯𑀸 𑀤𑀻𑀧𑀬𑀺𑀁𑀲𑀼.

𑀏𑀢𑀸𑀦𑀺 𑀳𑀺 𑀲𑀩𑁆𑀩𑀸𑀦𑀺𑀧𑀺 𑀘𑀺𑀢𑁆𑀢𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀲𑀫𑀢𑀺𑀓𑁆𑀓𑀫𑀯𑀲𑁂𑀦, 𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀢𑀻𑀳𑀸𑀓𑀸𑀭𑁂𑀳𑀺 𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀲𑁄𑀢𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼𑀧𑀺. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂𑀲𑀼 𑀧𑀦 𑀲𑀫𑀢𑀺𑀓𑁆𑀓𑀫𑀯𑀲𑁂𑀦, 𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀤𑁆𑀯𑀻𑀳𑁂𑀯𑀸𑀓𑀸𑀭𑁂𑀳𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀓𑀲𑀺𑀡𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 ‘𑀓𑀺𑀁 𑀦𑀸𑀫𑁂𑀢’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ¶ ‘𑀓𑀲𑀺𑀡𑀫𑀡𑁆𑀟𑀮’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀼𑀦 ‘𑀓𑀺𑀁 𑀇𑀫𑀺𑀦𑀸 𑀓𑀭𑁄𑀦𑁆𑀢𑀻’𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀏𑀯𑀁 𑀪𑀸𑀯𑁂𑀢𑁆𑀯𑀸 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻’𑀢𑀺. 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 ‘𑀪𑀸𑀭𑀺𑀬𑀁 𑀏𑀢’𑀦𑁆𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘𑀫𑀬𑀸𑀧𑀺 𑀏𑀲 𑀕𑀼𑀡𑁄 ¶ 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀏𑀲 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀆𑀤𑀺𑀢𑁄𑀯 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀲𑀻𑀮𑀁 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀻𑀮𑀁 𑀲𑁄𑀥𑁂𑀢𑀺. 𑀢𑀢𑁄 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑀲 𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀢𑀺𑀘𑀻𑀯𑀭𑀧𑀭𑀫𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 𑀢𑀸𑀯 ‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀘𑀓𑁆𑀔𑀼𑀤𑁆𑀯𑀸𑀭𑁂 ¶ 𑀧𑀦 𑀭𑀽𑀧𑁂 𑀆𑀧𑀸𑀣𑀕𑀢𑁂 ‘𑀇𑀝𑁆𑀞𑁂 𑀫𑁂 𑀆𑀭𑀫𑁆𑀫𑀡𑁂 𑀭𑀸𑀕𑁄 𑀉𑀧𑁆𑀧𑀦𑁆𑀦𑁄, 𑀅𑀦𑀺𑀝𑁆𑀞𑁂 𑀧𑀝𑀺𑀖𑁄, 𑀅𑀲𑀫𑀧𑁂𑀓𑁆𑀔𑀦𑀸𑀬 𑀫𑁄𑀳𑁄, 𑀯𑀺𑀦𑀺𑀩𑀦𑁆𑀥𑀲𑁆𑀲 𑀧𑀦 𑀫𑁂 𑀫𑀸𑀦𑁄 𑀉𑀧𑁆𑀧𑀦𑁆𑀦𑁄, 𑀧𑀭𑀸𑀫𑀝𑁆𑀞𑀲𑁆𑀲 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀕𑀢𑀲𑁆𑀲 𑀉𑀤𑁆𑀥𑀘𑁆𑀘𑀁, 𑀅𑀲𑀦𑁆𑀦𑀺𑀝𑁆𑀞𑀸𑀕𑀢𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸, 𑀣𑀸𑀫𑀕𑀢𑀲𑁆𑀲 𑀅𑀦𑀼𑀲𑀬𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀧𑀭𑀺𑀕𑁆𑀕𑀳𑁂 𑀞𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 ‘𑀇𑀫𑁂 𑀫𑁂 𑀓𑀺𑀮𑁂𑀲𑀸 𑀯𑀟𑁆𑀠𑀫𑀸𑀦𑀸 𑀅𑀦𑀬𑀩𑁆𑀬𑀲𑀦𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀳𑀦𑁆𑀤 𑀦𑁂 𑀦𑀺𑀕𑁆𑀕𑀡𑁆𑀳𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘𑀦 𑀔𑁄 𑀧𑀦 𑀲𑀓𑁆𑀓𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀦 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀁; 𑀆𑀤𑀺𑀢𑁄𑀯 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀲𑀻𑀮𑀁 𑀲𑁄𑀥𑁂𑀢𑀼’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑀸𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀲𑀫𑀢𑀺𑀓𑁆𑀓𑀫𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀭𑀽𑀧𑁂 𑀆𑀧𑀸𑀣𑀕𑀢𑁂 𑀏𑀓𑁄 𑀏𑀯𑀁 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀢𑀺 𑁋 ‘𑀇𑀤𑀁 𑀭𑀽𑀧𑀁 𑀓𑀺𑀁 𑀦𑀺𑀲𑁆𑀲𑀺𑀢’𑀦𑁆𑀢𑀺? 𑀢𑀢𑁄 𑀦𑀁 ‘𑀪𑀽𑀢𑀦𑀺𑀲𑁆𑀲𑀺𑀢’𑀦𑁆𑀢𑀺 𑀜𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀭𑀽𑀧𑀜𑁆𑀘 𑀭𑀽𑀧𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀢𑀤𑀸𑀭𑀫𑁆𑀫𑀡𑁂 𑀥𑀫𑁆𑀫𑁂 𑀅𑀭𑀽𑀧𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀢𑁄 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑀡𑁆𑀳𑀺𑀢𑁆𑀯𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 ¶ 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀸𑀢𑀺 𑀅𑀬𑀁 𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀪𑀸𑀯𑀦𑀸𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀅𑀧𑀭𑁄 ¶ 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀺𑀭 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻’𑀢𑀺. 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 ‘𑀪𑀸𑀭𑀺𑀬𑀁 𑀏𑀢’𑀦𑁆𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘𑀫𑀬𑀸𑀧𑀺 𑀏𑀲 𑀕𑀼𑀡𑁄 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 ¶ 𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 𑀢𑀸𑀯 ‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀲𑁄𑀢𑀤𑁆𑀯𑀸𑀭𑁂 𑀧𑀦 𑀲𑀤𑁆𑀤𑁂 𑀆𑀧𑀸𑀣𑀕𑀢𑁂𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑀸𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀲𑀫𑀢𑀺𑀓𑁆𑀓𑀫𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀲𑁄𑀢𑀤𑁆𑀯𑀸𑀭𑁂 𑀧𑀦 𑀲𑀤𑁆𑀤𑁂 𑀆𑀧𑀸𑀣𑀕𑀢𑁂 𑀏𑀓𑁄 𑀏𑀯𑀁 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀢𑀺 𑁋 𑀅𑀬𑀁 𑀲𑀤𑁆𑀤𑁄 𑀓𑀺𑀁 𑀦𑀺𑀲𑁆𑀲𑀺𑀢𑁄𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀸𑀢𑀺 𑀅𑀬𑀁 𑀯𑁂𑀤𑀦𑀸 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀪𑀸𑀯𑀦𑀸𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂𑀲𑀼 𑀧𑀦 𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀲𑀼 𑀆𑀧𑀸𑀣𑀕𑀢𑁂𑀲𑀼 ‘𑀇𑀝𑁆𑀞𑁂 𑀫𑁂 𑀆𑀭𑀫𑁆𑀫𑀡𑁂 𑀭𑀸𑀕𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑀸𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 ‘𑀲𑀫𑀢𑀺𑀓𑁆𑀓𑀫𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀖𑀸𑀦𑀤𑁆𑀯𑀸𑀭𑀸𑀤𑀻𑀲𑀼 𑀧𑀦 𑀕𑀦𑁆𑀥𑀸𑀤𑀻𑀲𑀼 𑀆𑀧𑀸𑀣𑀕𑀢𑁂𑀲𑀼 𑀏𑀓𑁄 𑀏𑀯𑀁 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀢𑀺 𑁋 ‘𑀅𑀬𑀁 𑀕𑀦𑁆𑀥𑁄, 𑀅𑀬𑀁 𑀭𑀲𑁄, 𑀇𑀤𑀁 𑀨𑁄𑀝𑁆𑀞𑀩𑁆𑀩𑀁 𑀓𑀺𑀁 𑀦𑀺𑀲𑁆𑀲𑀺𑀢’𑀦𑁆𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀦𑀺 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀸𑀢𑀺 ¶ 𑀅𑀬𑀁 𑀯𑁂𑀤𑀦𑀸 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀪𑀸𑀯𑀦𑀸𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀢𑀻𑀳𑀺𑀧𑀺 𑀆𑀓𑀸𑀭𑁂𑀳𑀺 𑀮𑀩𑁆𑀪𑀦𑁆𑀢𑀺. 𑀏𑀓𑀘𑁆𑀘𑁄 𑀳𑀺 𑀚𑀸𑀢𑀺𑀁 𑀪𑀬𑀢𑁄 𑀧𑀲𑁆𑀲𑀢𑀺, 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀪𑀬𑀢𑁄 𑀧𑀲𑁆𑀲𑀢𑀺, 𑀪𑀬𑀢𑁄 𑀤𑀺𑀲𑁆𑀯𑀸 ‘𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑁂𑀳𑀺 𑀫𑀼𑀘𑁆𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀔𑁄 ¶ 𑀧𑀦 𑀲𑀓𑁆𑀓𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀦 𑀚𑀸𑀢𑀺𑀆𑀤𑀻𑀳𑀺 𑀫𑀼𑀘𑁆𑀘𑀺𑀢𑀼𑀁, 𑀆𑀤𑀺𑀢𑁄𑀯 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀲𑀻𑀮𑀁 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ¶ 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 𑀢𑀸𑀯 ‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀥𑀫𑁆𑀫𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀥𑀫𑁆𑀫𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑀸𑀢𑀺 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀲𑀫𑀢𑀺𑀓𑁆𑀓𑀫𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀥𑀫𑁆𑀫𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀏𑀓𑁄 𑀏𑀯𑀁 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀢𑀺 𑁋 ‘𑀏𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀓𑀺𑀁 𑀦𑀺𑀲𑁆𑀲𑀺𑀢’𑀦𑁆𑀢𑀺? ‘𑀯𑀢𑁆𑀣𑀼𑀦𑀺𑀲𑁆𑀲𑀺𑀢’𑀦𑁆𑀢𑀺. ‘𑀯𑀢𑁆𑀣𑀼 𑀓𑀺𑀁 𑀦𑀺𑀲𑁆𑀲𑀺𑀢’𑀦𑁆𑀢𑀺? ‘𑀫𑀳𑀸𑀪𑀽𑀢𑀸𑀦𑀺 𑀦𑀺𑀲𑁆𑀲𑀺𑀢’𑀦𑁆𑀢𑀺. 𑀲𑁄 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀭𑀽𑀧𑀜𑁆𑀘 𑀭𑀽𑀧𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀢𑀤𑀸𑀭𑀫𑁆𑀫𑀡𑁂 𑀥𑀫𑁆𑀫𑁂 𑀅𑀭𑀽𑀧𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀢𑁄 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀭𑀺𑀓𑀫𑁆𑀫𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑀯𑁂𑀤𑀦𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀸𑀢𑀺 𑀅𑀬𑀁 𑀯𑁂𑀤𑀦𑀸 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸. 𑀏𑀯𑀁 ‘𑀪𑀸𑀯𑀦𑀸𑀯𑀲𑁂𑀦’ 𑀮𑀩𑁆𑀪𑀦𑁆𑀢𑀺. 𑀬𑀸 𑀧𑀦𑁂𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀘𑀢𑀼𑀯𑀻𑀲𑀢𑀺𑀯𑀺𑀥𑀸𑀤𑀻𑀦𑀁 𑀯𑀸𑀭𑀸𑀦𑀁 𑀧𑀭𑀺𑀬𑁄𑀲𑀸𑀦𑁂𑀲𑀼 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺 𑀙 𑀙 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀢𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀸𑀢𑀺.

𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄.

𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺 ¶ 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀢𑀺𑀓𑁂𑀲𑀼 𑀯𑁂𑀤𑀦𑀸𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀸𑀧𑀺 𑀮𑀩𑁆𑀪𑀦𑁆𑀢𑀺, 𑀤𑀼𑀓𑁂𑀲𑀼 𑀘 𑀲𑀼𑀔𑀲𑀳𑀕𑀢𑀤𑀼𑀓𑀸𑀤𑀬𑁄𑀧𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀨𑀲𑁆𑀲𑀲𑁆𑀲𑀸𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁂𑀲𑀼 𑀘𑁂𑀢𑁆𑀣 𑀳𑁂𑀢𑀼𑀤𑀼𑀓𑀸𑀤𑀬𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀢𑀺𑀓𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀤𑀺𑀲𑀸 𑀏𑀯 ¶ . 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀪𑀸𑀯𑀁 𑀅𑀯𑀢𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀡𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀼𑀁. 𑀲𑁂𑀲𑀫𑁂𑀢𑁆𑀣 𑀲𑀜𑁆𑀜𑀸𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀔𑀦𑁆𑀥𑀸𑀦𑀁 𑀦𑀺𑀤𑁆𑀤𑁂𑀲𑁂𑀬𑁂𑀯 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀢𑁄 𑀅𑀢𑀺𑀭𑁂𑀓𑀢𑀺𑀓𑀤𑀼𑀓𑀸 𑀮𑀤𑁆𑀥𑀸. 𑀢𑁂𑀲𑀁 𑀯𑀲𑁂𑀦 𑀯𑀸𑀭𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁫𑁦. 𑀇𑀤𑀸𑀦𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑀁 𑀳𑁄𑀢𑀺. 𑀢𑀢𑁆𑀣 𑀧𑀜𑁆𑀳𑀸𑀧𑀼𑀘𑁆𑀙𑀦𑁂 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 ‘‘𑀓𑀢𑀺𑀓𑀼𑀲𑀮𑀸? 𑀓𑀢𑀺𑀅𑀓𑀼𑀲𑀮𑀸? 𑀓𑀢𑀺𑀅𑀩𑁆𑀬𑀸𑀓𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀁 𑀮𑀩𑁆𑀪𑀢𑀺, 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀩𑁆𑀬𑀸𑀓𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀁 𑀮𑀩𑁆𑀪𑀢𑀺 𑀢𑀤𑁂𑀯 𑀉𑀤𑁆𑀥𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀬𑀢𑁆𑀣 𑀘 ‘𑀏𑀓𑁄 𑀔𑀦𑁆𑀥𑁄’𑀢𑀺 𑀯𑀸 ‘𑀤𑁆𑀯𑁂 𑀔𑀦𑁆𑀥𑀸’𑀢𑀺 𑀯𑀸 𑀧𑀭𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 ‘‘𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀦𑁆𑀢𑀺 𑀞𑀧𑀺𑀢𑀸, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀘𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑁄 𑀢𑁂𑀲𑀁 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁯𑁮𑁫) 𑀯𑀼𑀢𑁆𑀢𑁄𑀬𑁂𑀯.

𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀜𑁆𑀘𑀧𑀡𑁆𑀡𑀸𑀲 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑀲𑁆𑀲 𑀫𑀼𑀬𑁆𑀳𑀦𑁆𑀢𑀲𑁆𑀲 𑀲𑀁𑀯𑀭𑀦𑁆𑀢𑀲𑁆𑀲 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀘 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑀲𑁆𑀲 𑀫𑀼𑀬𑁆𑀳𑀦𑁆𑀢𑀲𑁆𑀲 𑀲𑀁𑀯𑀭𑀦𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀧𑀜𑁆𑀜𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺.

𑀢𑁂𑀬𑁂𑀯 ¶ 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀓𑀸𑀮𑁂 𑀲𑀳𑀚𑀸𑀢𑀳𑁂𑀢𑀼𑀦𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 ¶ , 𑀯𑀻𑀭𑀺𑀬𑀚𑁂𑀝𑁆𑀞𑀓𑀁 𑀯𑀸 𑀯𑀻𑀫𑀁𑀲𑀚𑁂𑀝𑁆𑀞𑀓𑀁 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀙𑀦𑁆𑀤𑀚𑁂𑀝𑁆𑀞𑀓𑀁 𑀧𑀦 𑀘𑀺𑀢𑁆𑀢𑀚𑁂𑀝𑁆𑀞𑀓𑀁 𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀦𑀸𑀫 𑀳𑁄𑀦𑁆𑀢𑀺.

𑀅𑀢𑀻𑀢𑀸𑀦𑀺 𑀧𑀦 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑀲𑁆𑀲 𑀫𑀼𑀬𑁆𑀳𑀦𑁆𑀢𑀲𑁆𑀲 𑀲𑀁𑀯𑀭𑀦𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀅𑀢𑀻𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀅𑀦𑀸𑀕𑀢𑀸𑀦𑀺 𑀆𑀭𑀩𑁆𑀪 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 ¶ 𑀳𑁄𑀦𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀆𑀭𑀩𑁆𑀪 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀧𑀜𑁆𑀜𑀢𑁆𑀢𑀺𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺.

𑀢𑀣𑀸 𑀅𑀢𑁆𑀢𑀦𑁄 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑀲𑁆𑀲 𑀫𑀼𑀬𑁆𑀳𑀦𑁆𑀢𑀲𑁆𑀲 𑀲𑀁𑀯𑀭𑀦𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀧𑀭𑁂𑀲𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀆𑀭𑀩𑁆𑀪 𑀏𑀯𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂𑀧𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬𑁂𑀯, 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀏𑀯𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀪𑀕𑀯𑀸 𑀇𑀫𑀁 𑀔𑀦𑁆𑀥𑀯𑀺𑀪𑀗𑁆𑀕𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀺𑀯𑀲𑁂𑀦 𑀢𑀬𑁄 𑀧𑀭𑀺𑀯𑀝𑁆𑀝𑁂 𑀦𑀻𑀳𑀭𑀺𑀢𑁆𑀯𑀸 𑀪𑀸𑀚𑁂𑀦𑁆𑀢𑁄 𑀤𑀲𑁆𑀲𑁂𑀲𑀺. 𑀢𑀻𑀲𑀼𑀧𑀺 𑀳𑀺 𑀧𑀭𑀺𑀯𑀝𑁆𑀝𑁂𑀲𑀼 𑀏𑀓𑁄𑀯 𑀧𑀭𑀺𑀘𑁆𑀙𑁂𑀤𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀳𑀺 𑀲𑀩𑁆𑀩𑀢𑁆𑀣 𑀓𑀸𑀫𑀸𑀯𑀘𑀭𑁄𑀬𑁂𑀯. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀘𑀢𑀼𑀪𑀽𑀫𑀓𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀔𑀦𑁆𑀥𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀬𑀢𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁪. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀆𑀬𑀢𑀦𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑁂𑀦 𑀢𑀸𑀯 𑀦𑀬𑁂𑀦 𑁋

𑀅𑀢𑁆𑀣𑀮𑀓𑁆𑀔𑀡𑀢𑀸𑀯𑀢𑁆𑀯, 𑀓𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸;

𑀢𑀣𑀸 𑀤𑀝𑁆𑀞𑀩𑁆𑀩𑀢𑁄 𑀘𑁂𑀯, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀯𑀺𑀲𑁂𑀲𑀢𑁄 𑀢𑀸𑀯 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼; 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺, 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁; 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄; 𑀉𑀤𑀸𑀳𑀭𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄; 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀲𑁄; 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀫𑀦𑀢𑀻𑀢𑀺 𑀫𑀦𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑀬𑀦𑁆𑀢𑀻𑀢𑀺 𑀥𑀫𑁆𑀫𑀸.

𑀅𑀯𑀺𑀲𑁂𑀲𑀢𑁄 𑀧𑀦 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑁆𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀧𑀦 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀬𑀸𑀯 𑀦 𑀦𑀺𑀯𑀢𑁆𑀢𑀢𑀺 𑀢𑀸𑀯 𑀦𑀬𑀦𑁆𑀢𑁂𑀯, 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 ¶ 𑀲𑀩𑁆𑀩𑁂𑀧𑀺 𑀫𑁂 𑀥𑀫𑁆𑀫𑀸 𑀆𑀬𑀢𑀦𑀢𑁄 𑀆𑀬𑀸𑀦𑀁 𑀢𑀦𑀦𑀢𑁄 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 ‘𑀆𑀬𑀢𑀦𑀁 𑀆𑀬𑀢𑀦’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 ¶ , 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺 ¶ . ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁨𑁩) 𑀓𑀸𑀭𑀡𑀁.

𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀘𑀸𑀧𑀺 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀺𑀯𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑀓𑁆𑀔𑀸𑀤𑀬𑁄 𑀦𑁂𑀲𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀁. 𑀘𑀓𑁆𑀔𑀸𑀤𑀻𑀲𑀼 𑀘 𑀢𑁂 𑀆𑀓𑀺𑀡𑁆𑀡𑀸 𑀢𑀁 𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀢𑁆𑀢𑀸 𑀘𑀸𑀢𑀺 𑀘𑀓𑁆𑀔𑀸𑀤𑀬𑁄 𑀦𑁂𑀲𑀁 𑀆𑀓𑀭𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁, 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀲𑀫𑁄𑀲𑀭𑀡𑀢𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄; 𑀢𑀁 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀸𑀯𑁂𑀦 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀓𑀸𑀭𑀡𑀁, 𑀢𑁂𑀲𑀁 𑀅𑀪𑀸𑀯𑁂 𑀅𑀪𑀸𑀯𑀢𑁄𑀢𑀺. 𑀇𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀢𑁂 𑀥𑀫𑁆𑀫𑀸 ‘𑀆𑀬𑀢𑀦𑀁 𑀆𑀬𑀢𑀦’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸𑀢𑀺 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 ‘𑀅𑀢𑁆𑀣𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀮𑀓𑁆𑀔𑀡𑀢𑁄’𑀢𑀺 𑀘𑀓𑁆𑀔𑀸𑀤𑀻𑀦𑀁 𑀮𑀓𑁆𑀔𑀡𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀸𑀦𑀺 𑀘 𑀧𑀦 𑀦𑁂𑀲𑀁 𑀮𑀓𑁆𑀔𑀡𑀸𑀦𑀺 𑀳𑁂𑀝𑁆𑀞𑀸 𑀭𑀽𑀧𑀓𑀡𑁆𑀟𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

‘𑀢𑀸𑀯𑀢𑁆𑀯𑀢𑁄’𑀢𑀺 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀓𑁆𑀔𑀸𑀤𑀬𑁄𑀧𑀺 𑀳𑀺 𑀥𑀫𑁆𑀫𑀸 𑀏𑀯. 𑀏𑀯𑀁 𑀲𑀢𑀺 𑀥𑀫𑁆𑀫𑀸𑀬𑀢𑀦𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀙 𑀯𑀺𑀜𑁆𑀜𑀸𑀡𑀓𑀸𑀬𑀼𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄. 𑀇𑀥 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘 𑀯𑀯𑀢𑁆𑀣𑀸𑀦𑀢𑁄 𑀅𑀬𑀫𑁂𑀯 𑀢𑁂𑀲𑀁 𑀪𑁂𑀤𑁄 𑀳𑁄𑀢𑀻𑀢𑀺 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀭𑀽𑀧𑀸𑀬𑀢𑀦𑀫𑁂𑀯 𑀘𑀸𑀭𑀫𑁆𑀫𑀡𑀁 ¶ ¶ . 𑀢𑀣𑀸 𑀇𑀢𑀭𑀸𑀦𑀺 𑀇𑀢𑀭𑁂𑀲𑀁. 𑀙𑀝𑁆𑀞𑀲𑁆𑀲 𑀧𑀦 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄 𑀫𑀦𑀸𑀬𑀢𑀦𑁂𑀓𑀤𑁂𑀲𑁄𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀅𑀲𑀸𑀥𑀸𑀭𑀡𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀆𑀭𑀫𑁆𑀫𑀡𑀦𑁆𑀢𑀺 ¶ . 𑀇𑀢𑀺 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 ‘𑀢𑀸𑀯𑀢𑁆𑀯𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀓𑀫𑀢𑁄’𑀢𑀺 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀺 𑀆𑀬𑀢𑀦𑁂𑀲𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀢𑁆𑀢𑀸 𑀘𑀓𑁆𑀔𑀸𑀬𑀢𑀦𑀁 𑀧𑀸𑀓𑀝𑀦𑁆𑀢𑀺 𑀧𑀞𑀫𑀁 𑀤𑁂𑀲𑀺𑀢𑀁. 𑀢𑀢𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀸𑀦𑀺 𑀲𑁄𑀢𑀸𑀬𑀢𑀦𑀸𑀤𑀻𑀦𑀺. 𑀅𑀣 𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑁂𑀦 𑀩𑀳𑀽𑀧𑀓𑀸𑀭𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀘𑀓𑁆𑀔𑀸𑀬𑀢𑀦𑀲𑁄𑀢𑀸𑀬𑀢𑀦𑀸𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺. 𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀺 𑀢𑀻𑀡𑀺. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑁄𑀘𑀭𑀯𑀺𑀲𑀬𑀢𑁆𑀢𑀸 𑀅𑀦𑁆𑀢𑁂 𑀫𑀦𑀸𑀬𑀢𑀦𑀁. 𑀘𑀓𑁆𑀔𑀸𑀤𑀻𑀦𑀁 𑀧𑀦 𑀕𑁄𑀘𑀭𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀸𑀦𑀺 𑀩𑀸𑀳𑀺𑀭𑁂𑀲𑀼 𑀭𑀽𑀧𑀸𑀬𑀢𑀦𑀸𑀤𑀻𑀦𑀺. 𑀅𑀧𑀺𑀘 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀧𑀺 𑀅𑀬𑀫𑁂𑀯 𑀢𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁪𑁨𑁧) 𑀏𑀯𑀁 ‘𑀓𑀫𑀢𑁄’𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸’𑀢𑀺 𑀲𑀗𑁆𑀔𑁂𑀧𑀢𑁄 𑀳𑀺 𑀫𑀦𑀸𑀬𑀢𑀦𑀲𑁆𑀲 𑀘𑁂𑀯 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀲𑁆𑀲 𑀘 𑀦𑀸𑀫𑁂𑀦, 𑀢𑀤𑀯𑀲𑁂𑀲𑀸𑀦𑀜𑁆𑀘 𑀆𑀬𑀢𑀦𑀸𑀦𑀁 𑀭𑀽𑀧𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀸𑀧𑀺 𑀆𑀬𑀢𑀦𑀸𑀦𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀳𑁄𑀦𑁆𑀢𑀺.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀢𑀸𑀯 𑀘𑀓𑁆𑀔𑀸𑀬𑀢𑀦𑀁 𑀚𑀸𑀢𑀺𑀯𑀲𑁂𑀦 𑀘𑀓𑁆𑀔𑀼𑀧𑀲𑀸𑀤𑀫𑀢𑁆𑀢𑀫𑁂𑀯, 𑀧𑀘𑁆𑀘𑀬𑀕𑀢𑀺𑀦𑀺𑀓𑀸𑀬𑀧𑀼𑀕𑁆𑀕𑀮𑀪𑁂𑀤𑀢𑁄 𑀧𑀦 𑀅𑀦𑀦𑁆𑀢𑀧𑁆𑀧𑀪𑁂𑀤𑀁. 𑀢𑀣𑀸 𑀲𑁄𑀢𑀸𑀬𑀢𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀫𑀦𑀸𑀬𑀢𑀦𑀁 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀪𑁂𑀤𑁂𑀦 𑀏𑀓𑀸𑀲𑀻𑀢𑀺𑀧𑁆𑀧𑀪𑁂𑀤𑀁, 𑀯𑀢𑁆𑀣𑀼𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀧𑀦 𑀅𑀦𑀦𑁆𑀢𑀧𑁆𑀧𑀪𑁂𑀤𑀁. 𑀭𑀽𑀧𑀕𑀦𑁆𑀥𑀭𑀲𑀸𑀬𑀢𑀦𑀸𑀦𑀺 𑀲𑀫𑀼𑀝𑁆𑀞𑀸𑀦𑀪𑁂𑀤𑀢𑁄 𑀘𑀢𑀼𑀧𑁆𑀧𑀪𑁂𑀤𑀸𑀦𑀺, 𑀲𑀤𑁆𑀤𑀸𑀬𑀢𑀦𑀁 𑀤𑁆𑀯𑀺𑀧𑁆𑀧𑀪𑁂𑀤𑀁. 𑀲𑀪𑀸𑀕𑀯𑀺𑀲𑀪𑀸𑀕𑀪𑁂𑀤𑀢𑁄 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀅𑀦𑀦𑁆𑀢𑀧𑁆𑀧𑀪𑁂𑀤𑀸𑀦𑀺. 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑀣𑀯𑀻𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀯𑀲𑁂𑀦 𑀢𑀺𑀧𑁆𑀧𑀪𑁂𑀤𑀁, 𑀲𑀫𑀼𑀝𑁆𑀞𑀸𑀦𑀢𑁄 𑀘𑀢𑀼𑀧𑁆𑀧𑀪𑁂𑀤𑀁, 𑀲𑀪𑀸𑀕𑀯𑀺𑀲𑀪𑀸𑀕𑀢𑁄 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀥𑀫𑁆𑀫𑀸𑀬𑀢𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑀦𑁆𑀢𑀺. 𑀏𑀯𑀁 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀤𑀝𑁆𑀞𑀩𑁆𑀩𑀢𑁄’𑀢𑀺 ¶ 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀆𑀬𑀢𑀦𑀸𑀦𑀺 𑀅𑀦𑀸𑀕𑀫𑀦𑀢𑁄 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀳𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀉𑀤𑀬𑀸 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦𑀸𑀧𑀺 𑀉𑀤𑁆𑀥𑀁 𑀯𑀬𑀸 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺; 𑀅𑀣 𑀔𑁄 𑀧𑀼𑀩𑁆𑀩𑁂 𑀉𑀤𑀬𑀸 𑀅𑀧𑁆𑀧𑀝𑀺𑀮𑀤𑁆𑀥𑀲𑀪𑀸𑀯𑀸𑀦𑀺, 𑀉𑀤𑁆𑀥𑀁 ¶ 𑀯𑀬𑀸 𑀧𑀭𑀺𑀪𑀺𑀦𑁆𑀦𑀲𑀪𑀸𑀯𑀸𑀦𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑁂𑀫𑀚𑁆𑀛𑁂 ¶ 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀯𑀲𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀅𑀦𑀸𑀕𑀫𑀦𑀢𑁄 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀣𑀸 𑀦𑀺𑀭𑀻𑀳𑀢𑁄 𑀅𑀩𑁆𑀬𑀸𑀧𑀸𑀭𑀢𑁄 𑀘. 𑀦 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀲𑀸𑀫𑀕𑁆𑀕𑀺𑀬𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺, 𑀦 𑀘 𑀢𑀸𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀭𑀪𑀸𑀯𑁂𑀦 𑀯𑀢𑁆𑀣𑀼𑀪𑀸𑀯𑁂𑀦 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀈𑀳𑀦𑁆𑀢𑀺, 𑀦 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀦𑁆𑀢𑀺; 𑀅𑀣 𑀔𑁄 𑀥𑀫𑁆𑀫𑀢𑀸𑀯𑁂𑀲𑀸 𑀬𑀁 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀲𑀸𑀫𑀕𑁆𑀕𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀦𑀺𑀭𑀻𑀳𑀢𑁄 𑀅𑀩𑁆𑀬𑀸𑀧𑀸𑀭𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁆𑀢𑀸, 𑀩𑀸𑀳𑀺𑀭𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀅𑀪𑀺𑀖𑀸𑀢𑀓𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀳𑀺 𑀭𑀽𑀧𑁂𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀧𑀸𑀡𑀓𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺, 𑀩𑀸𑀳𑀺𑀭𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸 𑀯𑀺𑀬𑀸𑀢𑀺. 𑀏𑀯𑀫𑁆𑀧𑁂𑀢𑁆𑀣 ‘𑀤𑀝𑁆𑀞𑀩𑁆𑀩𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀇𑀤𑀸𑀦𑀺 𑀢𑁂𑀲𑀁 𑀯𑀺𑀧𑀲𑁆𑀲𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘𑀓𑁆𑀔𑀼 𑀢𑀸𑀯 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀁 𑁋 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑁄, 𑀯𑀺𑀧𑀭𑀺𑀡𑀸𑀫𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄𑀢𑀺.

𑀢𑀤𑁂𑀯 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁. 𑀬𑀲𑁆𑀫𑀸 𑀯𑀸 𑀏𑀢𑀁 𑀉𑀧𑁆𑀧𑀦𑁆𑀦𑀁 𑀞𑀺𑀢𑀺𑀁 𑀧𑀸𑀧𑀼𑀡𑀸𑀢𑀺, 𑀞𑀺𑀢𑀺𑀬𑀁 𑀚𑀭𑀸𑀬 𑀓𑀺𑀮𑀫𑀢𑀺, 𑀚𑀭𑀁 𑀧𑀢𑁆𑀯𑀸 𑀅𑀯𑀲𑁆𑀲𑀁 𑀪𑀺𑀚𑁆𑀚𑀢𑀺; 𑀢𑀲𑁆𑀫𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄, 𑀤𑀼𑀓𑁆𑀔𑀫𑀢𑁄, 𑀤𑀼𑀓𑁆𑀔𑀯𑀢𑁆𑀣𑀼𑀢𑁄, 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀁.

𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀧𑀦 𑀅𑀦𑀢𑁆𑀢𑀸. 𑀬𑀲𑁆𑀫𑀸 𑀯𑀸 𑀏𑀢𑀁 𑀉𑀧𑁆𑀧𑀦𑁆𑀦𑀁 𑀞𑀺𑀢𑀺𑀁 𑀫𑀸 𑀧𑀸𑀧𑀼𑀡𑀸𑀢𑀼, 𑀞𑀸𑀦𑀧𑁆𑀧𑀢𑁆𑀢𑀁 𑀫𑀸 𑀚𑀺𑀭𑀢𑀼, 𑀚𑀭𑀧𑁆𑀧𑀢𑀁 𑀫𑀸 𑀪𑀺𑀚𑁆𑀚𑀢𑀽𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀓𑀲𑁆𑀲𑀘𑀺 𑀯𑀲𑀯𑀢𑁆𑀢𑀺𑀪𑀸𑀯𑁄 𑀦𑀢𑁆𑀣𑀺, 𑀲𑀼𑀜𑁆𑀜𑀁 𑀢𑁂𑀦 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦; 𑀢𑀲𑁆𑀫𑀸 𑀲𑀼𑀜𑁆𑀜𑀢𑁄, 𑀅𑀲𑁆𑀲𑀸𑀫𑀺𑀓𑀢𑁄, 𑀅𑀓𑀸𑀫𑀓𑀸𑀭𑀺𑀬𑀢𑁄, 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀢𑁆𑀢𑀸.

𑀯𑀺𑀪𑀯𑀕𑀢𑀺𑀓𑀢𑁄 ¶ , 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀪𑀯𑀲𑀗𑁆𑀓𑀦𑁆𑀢𑀺𑀕𑀫𑀦𑀢𑁄, 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀢𑁄 𑀘 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀇𑀤𑀁 𑀅𑀦𑀺𑀘𑁆𑀘𑀯𑁂𑀯𑀘𑀦𑀫𑁂𑀯. 𑀭𑀽𑀧𑀸 𑀅𑀦𑀺𑀘𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘𑁂𑀢𑁆𑀣 𑀞𑀧𑁂𑀢𑁆𑀯𑀸 𑀘𑀓𑁆𑀔𑀼𑀁 𑀢𑁂𑀪𑀽𑀫𑀓𑀥𑀫𑁆𑀫𑀸 𑀅𑀦𑀺𑀘𑁆𑀘𑀸, 𑀦𑁄 𑀘𑀓𑁆𑀔𑀼. 𑀘𑀓𑁆𑀔𑀼 𑀧𑀦 𑀘𑀓𑁆𑀔𑀼 𑀘𑁂𑀯 𑀅𑀦𑀺𑀘𑁆𑀘𑀜𑁆𑀘. 𑀢𑀣𑀸 ¶ 𑀲𑁂𑀲𑀥𑀫𑁆𑀫𑀸 𑀤𑀼𑀓𑁆𑀔𑀸, 𑀦𑁄 𑀘𑀓𑁆𑀔𑀼. 𑀘𑀓𑁆𑀔𑀼 ¶ 𑀧𑀦 𑀘𑀓𑁆𑀔𑀼 𑀘𑁂𑀯 𑀤𑀼𑀓𑁆𑀔𑀜𑁆𑀘. 𑀲𑁂𑀲𑀥𑀫𑁆𑀫𑀸 𑀅𑀦𑀢𑁆𑀢𑀸, 𑀦𑁄 𑀘𑀓𑁆𑀔𑀼. 𑀘𑀓𑁆𑀔𑀼 𑀧𑀦 𑀘𑀓𑁆𑀔𑀼 𑀘𑁂𑀯 𑀅𑀦𑀢𑁆𑀢𑀸 𑀘𑀸𑀢𑀺. 𑀭𑀽𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀣𑀸𑀕𑀢𑁂𑀦 𑀓𑀺𑀁 𑀤𑀲𑁆𑀲𑀺𑀢𑀦𑁆𑀢𑀺? 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀘𑁆𑀘𑁂𑀦 𑀯𑀸 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑁂𑀦 𑀯𑀸, 𑀅𑀦𑀺𑀘𑁆𑀘𑀤𑀼𑀓𑁆𑀔𑁂𑀳𑀺 𑀯𑀸. 𑀢𑀢𑁆𑀣 ‘‘𑀘𑀓𑁆𑀔𑀼, 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀦 𑀉𑀧𑀧𑀚𑁆𑀚𑀢𑀺. 𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀯𑀬𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀔𑁄 𑀧𑀦 𑀉𑀧𑁆𑀧𑀸𑀤𑁄𑀧𑀺 𑀯𑀬𑁄𑀧𑀺 𑀧𑀜𑁆𑀜𑀸𑀬𑀢𑀺 ‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀚𑁆𑀚𑀢𑀺 𑀘 𑀯𑁂𑀢𑀺 𑀘𑀸’𑀢𑀺 𑀇𑀘𑁆𑀘𑀲𑁆𑀲 𑀏𑀯𑀫𑀸𑀕𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀦 𑀉𑀧𑀧𑀚𑁆𑀚𑀢𑀺 𑁋 𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬 𑀇𑀢𑀺 𑀘𑀓𑁆𑀔𑀼 𑀅𑀦𑀢𑁆𑀢𑀸’’𑀢𑀺 (𑀫. 𑀦𑀺. 𑁩.𑁪𑁨𑁨). 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀺𑀘𑁆𑀘𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀲𑀺. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸. 𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦 𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬; 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑁋 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 𑁋 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺 (𑀲𑀁. 𑀦𑀺. 𑁩.𑁫𑁯; 𑀫𑀳𑀸𑀯. 𑁨𑁦) 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀼𑀓𑁆𑀔𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀲𑀺. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸, 𑀬𑀤𑀦𑀢𑁆𑀢𑀸 𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁫) 𑀅𑀦𑀺𑀘𑁆𑀘𑀤𑀼𑀓𑁆𑀔𑁂𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀲𑀺. 𑀓𑀲𑁆𑀫𑀸? 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀁 𑀧𑀸𑀓𑀝𑀢𑁆𑀢𑀸.

𑀳𑀢𑁆𑀣𑀢𑁄 𑀳𑀺 𑀢𑀝𑁆𑀝𑀓𑁂 𑀯𑀸 𑀲𑀭𑀓𑁂 𑀯𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀸 𑀧𑀢𑀺𑀢𑁆𑀯𑀸 𑀪𑀺𑀦𑁆𑀦𑁂 ‘𑀅𑀳𑁄 𑀅𑀦𑀺𑀘𑁆𑀘’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀁 𑀧𑀸𑀓𑀝𑀁 𑀦𑀸𑀫. 𑀅𑀢𑁆𑀢𑀪𑀸𑀯𑀲𑁆𑀫𑀺𑀁 𑀧𑀦 𑀕𑀡𑁆𑀟𑀧𑀺𑀴𑀓𑀸𑀤𑀻𑀲𑀼 𑀯𑀸 𑀉𑀝𑁆𑀞𑀺𑀢𑀸𑀲𑀼 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀯𑀸 𑀯𑀺𑀤𑁆𑀥𑀸𑀲𑀼 ‘𑀅𑀳𑁄 𑀤𑀼𑀓𑁆𑀔’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀤𑀼𑀓𑁆𑀔𑀁 𑀧𑀸𑀓𑀝𑀁 𑀦𑀸𑀫. 𑀅𑀦𑀢𑁆𑀢𑀮𑀓𑁆𑀔𑀡𑀁 𑀅𑀧𑀸𑀓𑀝𑀁 𑀅𑀦𑁆𑀥𑀓𑀸𑀭𑀁 𑀅𑀯𑀺𑀪𑀽𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀤𑀼𑀤𑁆𑀤𑀻𑀧𑀦𑀁 𑀤𑀼𑀧𑁆𑀧𑀜𑁆𑀜𑀸𑀧𑀦𑀁 ¶ . 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀸𑀦𑀺 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀦 𑀧𑀜𑁆𑀜𑀸𑀬𑀢𑀺, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀜𑁆𑀜𑀸𑀬𑀢𑀺. 𑀫𑀳𑀺𑀤𑁆𑀥𑀺𑀓𑀸 𑀳𑀺 𑀫𑀳𑀸𑀦𑀼𑀪𑀸𑀯𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀸𑀤𑀬𑁄𑀧𑀺 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’𑀦𑁆𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, ‘𑀅𑀦𑀢𑁆𑀢𑀸’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀘𑁂 𑀳𑀺 𑀢𑁂 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀢𑁆𑀢𑀸𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀪𑀯𑁂𑀬𑁆𑀬. 𑀅𑀦𑀢𑁆𑀢𑀮𑀓𑁆𑀔𑀡𑀧𑀜𑁆𑀜𑀸𑀧𑀦𑀜𑁆𑀳𑀺 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀲𑀬𑁄, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑁄. 𑀏𑀯𑀫𑁂𑀢𑀁 𑀅𑀦𑀢𑁆𑀢𑀮𑀓𑁆𑀔𑀡𑀁 𑀅𑀧𑀸𑀓𑀝𑀁. 𑀢𑀲𑁆𑀫𑀸 𑀲𑀢𑁆𑀣𑀸 ¶ 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ¶ 𑀅𑀦𑀺𑀘𑁆𑀘𑁂𑀦 𑀯𑀸 𑀤𑀲𑁆𑀲𑁂𑀲𑀺, 𑀤𑀼𑀓𑁆𑀔𑁂𑀦 𑀯𑀸, 𑀅𑀦𑀺𑀘𑁆𑀘𑀤𑀼𑀓𑁆𑀔𑁂𑀳𑀺 𑀯𑀸. 𑀇𑀥 𑀧𑀦 𑀢𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑁂𑀳𑀺 𑀤𑀲𑁆𑀲𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀸𑀦𑀺 𑀧𑀦 𑀮𑀓𑁆𑀔𑀡𑀸𑀦𑀺 𑀓𑀺𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀦 𑀉𑀧𑀝𑁆𑀞𑀳𑀦𑁆𑀢𑀺? 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀢𑀸𑀯 𑀉𑀤𑀬𑀩𑁆𑀩𑀬𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀲𑀦𑁆𑀢𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀦 𑀉𑀧𑀝𑁆𑀞𑀸𑀢𑀺. 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀦 𑀉𑀧𑀝𑁆𑀞𑀸𑀢𑀺. 𑀅𑀦𑀢𑁆𑀢𑀮𑀓𑁆𑀔𑀡𑀁 𑀦𑀸𑀦𑀸𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀖𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀦 𑀉𑀧𑀝𑁆𑀞𑀸𑀢𑀺. 𑀉𑀤𑀬𑀩𑁆𑀩𑀬𑀁 𑀧𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀦𑁆𑀢𑀢𑀺𑀬𑀸 𑀯𑀺𑀓𑁄𑀧𑀺𑀢𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀁 𑀫𑀦𑀲𑀺𑀓𑀢𑁆𑀯𑀸 𑀇𑀭𑀺𑀬𑀸𑀧𑀣𑁂 𑀉𑀕𑁆𑀖𑀸𑀝𑀺𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀦𑀸𑀦𑀸𑀥𑀸𑀢𑀼𑀬𑁄 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺.

𑀏𑀢𑁆𑀣 𑀘 𑀅𑀦𑀺𑀘𑁆𑀘𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀤𑀼𑀓𑁆𑀔𑀁 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀅𑀦𑀢𑁆𑀢𑀸 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀯𑀸; 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀳𑀼𑀢𑁆𑀯𑀸 𑀅𑀪𑀸𑀯𑀲𑀗𑁆𑀔𑀸𑀢𑁄 𑀆𑀓𑀸𑀭𑀯𑀺𑀓𑀸𑀭𑁄 𑀯𑀸. ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀦𑀢𑁄 𑀧𑀦 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁. 𑀓𑀲𑁆𑀫𑀸? 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄; 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀓𑀸𑀭𑁄 𑀤𑀼𑀓𑁆𑀔𑀮𑀓𑁆𑀔𑀡𑀁. ‘‘𑀬𑀁 ¶ 𑀤𑀼𑀓𑁆𑀔𑀁 𑀢𑀁 𑀅𑀦𑀢𑁆𑀢𑀸’’𑀢𑀺 𑀧𑀦 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀢𑁆𑀢𑀸. 𑀓𑀲𑁆𑀫𑀸? 𑀅𑀯𑀲𑀯𑀢𑁆𑀢𑀦𑀢𑁄; 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀇𑀢𑀺 𑀅𑀜𑁆𑀜𑀤𑁂𑀯 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀅𑀜𑁆𑀜𑀸𑀦𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺. 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀢𑀺 𑀇𑀤𑀜𑁆𑀳𑀺 𑀲𑀩𑁆𑀩𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀦𑀸𑀫. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀓𑀸𑀭𑀯𑀺𑀓𑀸𑀭𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀻𑀢𑀺.

𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀤𑀲𑀸𑀬𑀢𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀤𑁆𑀯𑁂 𑀢𑁂𑀪𑀽𑀫𑀓𑀸𑀦𑀺. 𑀲𑀩𑁆𑀩𑁂𑀲𑀼𑀧𑀺 𑀲𑀫𑁆𑀫𑀲𑀦𑀘𑀸𑀭𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁫. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ¶ ¶ 𑀬𑀣𑀸 𑀳𑁂𑀝𑁆𑀞𑀸 𑀯𑀺𑀧𑀲𑁆𑀲𑀓𑀸𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 ‘‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀸𑀬𑀢𑀦’’𑀦𑁆𑀢𑀺 𑀬𑀼𑀕𑀮𑀢𑁄 𑀆𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀣𑀸 𑀅𑀯𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀲𑀩𑁆𑀩𑀸𑀓𑀸𑀭𑀢𑁄 𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦’’𑀦𑁆𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀯𑀢𑁆𑀣𑀸𑀦𑀦𑀬𑁂𑀦 𑀯𑀼𑀢𑁆𑀢𑀸𑀦𑀺.

𑁧𑁫𑁬. 𑀢𑁂𑀲𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀢𑀢𑁆𑀣 𑀓𑀢𑀫𑀁 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁬𑁭. 𑀬𑀁 𑀧𑀦𑁂𑀢𑀁 𑀥𑀫𑁆𑀫𑀸𑀬𑀢𑀦𑀦𑀺𑀤𑁆𑀤𑁂𑀲𑁂 ‘‘𑀢𑀢𑁆𑀣 𑀓𑀢𑀫𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼? 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀅𑀲𑀗𑁆𑀔𑀢𑀲𑀪𑀸𑀯𑀁 𑀦𑀺𑀩𑁆𑀩𑀸𑀦𑀁. 𑀬𑀲𑁆𑀫𑀸 𑀧𑀦𑁂𑀢𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀓𑀺𑀮𑁂𑀲𑀓𑁆𑀔𑀬𑁄𑀯 𑀦𑀺𑀩𑁆𑀩𑀸𑀦’𑀦𑁆𑀢𑀺. ‘𑀲𑀼𑀢𑁆𑀢𑀁 𑀆𑀳𑀭𑀸’𑀢𑀺 𑀘 𑀯𑀼𑀢𑁆𑀢𑁂 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺? 𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀢𑀁 𑀚𑀫𑁆𑀩𑀼𑀔𑀸𑀤𑀓𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀓𑀺𑀮𑁂𑀲𑀓𑁆𑀔𑀬𑁄𑀯 𑀦𑀺𑀩𑁆𑀩𑀸𑀦’𑀦𑁆𑀢𑀺 𑀆𑀳. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘𑀓𑀺𑀁 𑀧𑀦 𑀬𑀣𑀸 𑀘𑁂𑀢𑀁 𑀲𑀼𑀢𑁆𑀢𑀁 𑀢𑀣𑀸 𑀅𑀢𑁆𑀣𑁄’𑀢𑀺? 𑀅𑀤𑁆𑀥𑀸 𑀯𑀓𑁆𑀔𑀢𑀺 𑁋 ‘𑀆𑀫 ¶ , 𑀦𑀢𑁆𑀣𑀺 𑀲𑀼𑀢𑁆𑀢𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑁄’𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘𑀇𑀤𑀁 𑀢𑀸𑀯 𑀢𑁂 𑀲𑀼𑀢𑁆𑀢𑀁 𑀆𑀪𑀢𑀁; 𑀅𑀦𑀦𑁆𑀢𑀭𑀲𑀼𑀢𑁆𑀢𑀁 𑀆𑀳𑀭𑀸’𑀢𑀺. 𑀅𑀦𑀦𑁆𑀢𑀭𑀲𑀼𑀢𑁆𑀢𑀁 𑀦𑀸𑀫 𑁋 ‘‘𑀅𑀭𑀳𑀢𑁆𑀢𑀁 𑀅𑀭𑀳𑀢𑁆𑀢𑀦𑁆𑀢𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀅𑀭𑀳𑀢𑁆𑀢𑀦𑁆𑀢𑀺? 𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁧𑁫) 𑀇𑀤𑀁 𑀢𑀲𑁆𑀲𑁂𑀯𑀸𑀦𑀦𑁆𑀢𑀭𑀁 𑀆𑀪𑀢𑀲𑀼𑀢𑁆𑀢𑀁.

𑀇𑀫𑀲𑁆𑀫𑀺𑀁 𑀧𑀦 𑀦𑀁 𑀆𑀪𑀢𑁂 𑀆𑀳𑀁𑀲𑀼 𑁋 ‘𑀦𑀺𑀩𑁆𑀩𑀸𑀦𑀁 𑀦𑀸𑀫 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑁄 𑀥𑀫𑁆𑀫𑁄, 𑀅𑀭𑀳𑀢𑁆𑀢𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 ¶ 𑀦𑀺𑀩𑁆𑀩𑀸𑀦𑀁 𑀧𑀼𑀘𑁆𑀙𑀺𑀢𑁄𑀧𑀺 𑀅𑀭𑀳𑀢𑁆𑀢𑀁 𑀧𑀼𑀘𑁆𑀙𑀺𑀢𑁄𑀧𑀺 𑀓𑀺𑀮𑁂𑀲𑀓𑁆𑀔𑀬𑀫𑁂𑀯 𑀆𑀳. 𑀓𑀺𑀁 𑀧𑀦 𑀦𑀺𑀩𑁆𑀩𑀸𑀦𑀜𑁆𑀘 𑀅𑀭𑀳𑀢𑁆𑀢𑀜𑁆𑀘 𑀏𑀓𑀁 𑀉𑀤𑀸𑀳𑀼 𑀦𑀸𑀦’𑀦𑁆𑀢𑀺? ‘𑀏𑀓𑀁 ¶ 𑀯𑀸 𑀳𑁄𑀢𑀼 𑀦𑀸𑀦𑀁 𑀯𑀸. 𑀓𑁄 𑀏𑀢𑁆𑀣 𑀢𑀬𑀸 𑀅𑀢𑀺𑀩𑀳𑀼𑀁 𑀘𑀼𑀡𑁆𑀡𑀻𑀓𑀭𑀡𑀁 𑀓𑀭𑁄𑀦𑁆𑀢𑁂𑀦 𑀅𑀢𑁆𑀣𑁄’? ‘𑀦 𑀢𑁆𑀯𑀁 𑀏𑀓𑀁 𑀦𑀸𑀦𑀁 𑀚𑀸𑀦𑀸𑀲𑀻𑀢𑀺. 𑀦𑀦𑀼 𑀜𑀸𑀢𑁂 𑀲𑀸𑀥𑀼 𑀳𑁄𑀢𑀻’𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀺𑀢𑁄 𑀯𑀜𑁆𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀳 𑁋 ‘𑀭𑀸𑀕𑀸𑀤𑀻𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀭𑀳𑀢𑁆𑀢𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 𑁋 ‘𑀫𑀳𑀸𑀓𑀫𑁆𑀫𑀁 𑀢𑁂 𑀓𑀢𑀁. 𑀮𑀜𑁆𑀚𑀁 𑀤𑀢𑁆𑀯𑀸𑀧𑀺 𑀢𑀁 𑀯𑀤𑀸𑀧𑁂𑀦𑁆𑀢𑁄 𑀏𑀢𑀤𑁂𑀯 𑀯𑀤𑀸𑀧𑁂𑀬𑁆𑀬. 𑀬𑀣𑁂𑀯 𑀘 𑀢𑁂 𑀏𑀢𑀁 𑀯𑀺𑀪𑀚𑀺𑀢𑁆𑀯𑀸 𑀓𑀣𑀺𑀢𑀁, 𑀏𑀯𑀁 𑀇𑀤𑀫𑁆𑀧𑀺 𑀲𑀮𑁆𑀮𑀓𑁆𑀔𑁂𑀳𑀺 𑁋 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀡𑀸𑀢𑀺 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑀁. 𑀢𑀻𑀡𑀺𑀧𑀺 𑀳𑀺 𑀏𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀸𑀦𑀻’𑀢𑀺.

𑀲𑀘𑁂 𑀏𑀯𑀁 𑀯𑀼𑀢𑁆𑀢𑁂 𑀲𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂, 𑀩𑀳𑀼𑀦𑀺𑀩𑁆𑀩𑀸𑀦𑀢𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀓𑀣𑀁? 𑀏𑀯𑀁 𑀢𑀸𑀯 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀭𑀸𑀕𑀓𑁆𑀔𑀬𑁄 𑀦𑀸𑀫 𑀭𑀸𑀕𑀲𑁆𑀲𑁂𑀯 𑀔𑀬𑁄 𑀉𑀤𑀸𑀳𑀼 𑀤𑁄𑀲𑀫𑁄𑀳𑀸𑀦𑀫𑁆𑀧𑀺? 𑀤𑁄𑀲𑀓𑁆𑀔𑀬𑁄 𑀦𑀸𑀫 𑀤𑁄𑀲𑀲𑁆𑀲𑁂𑀯 𑀔𑀬𑁄 𑀉𑀤𑀸𑀳𑀼 𑀭𑀸𑀕𑀫𑁄𑀳𑀸𑀦𑀫𑁆𑀧𑀺? 𑀫𑁄𑀳𑀓𑁆𑀔𑀬𑁄 𑀦𑀸𑀫 𑀫𑁄𑀳𑀲𑁆𑀲𑁂𑀯 𑀔𑀬𑁄 𑀉𑀤𑀸𑀳𑀼 𑀭𑀸𑀕𑀤𑁄𑀲𑀸𑀦𑀫𑁆𑀧𑀻’𑀢𑀺? 𑀅𑀤𑁆𑀥𑀸 𑀯𑀓𑁆𑀔𑀢𑀺 𑁋 ‘𑀭𑀸𑀕𑀓𑁆𑀔𑀬𑁄 𑀦𑀸𑀫 𑀭𑀸𑀕𑀲𑁆𑀲𑁂𑀯 𑀔𑀬𑁄, 𑀤𑁄𑀲𑀓𑁆𑀔𑀬𑁄 𑀦𑀸𑀫 𑀤𑁄𑀲𑀲𑁆𑀲𑁂𑀯 𑀔𑀬𑁄, 𑀫𑁄𑀳𑀓𑁆𑀔𑀬𑁄 𑀦𑀸𑀫 𑀫𑁄𑀳𑀲𑁆𑀲𑁂𑀯 𑀔𑀬𑁄’𑀢𑀺.

𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘𑀢𑀯 𑀯𑀸𑀤𑁂 𑀭𑀸𑀕𑀓𑁆𑀔𑀬𑁄 𑀏𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺, 𑀤𑁄𑀲𑀓𑁆𑀔𑀬𑁄 𑀏𑀓𑀁, 𑀫𑁄𑀳𑀓𑁆𑀔𑀬𑁄 𑀏𑀓𑀁; 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀔𑀬𑁂 𑀢𑀻𑀡𑀺 𑀦𑀺𑀩𑁆𑀩𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀔𑀬𑁂 𑀘𑀢𑁆𑀢𑀸𑀭𑀺, 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀔𑀬𑁂 𑀧𑀜𑁆𑀘, 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀁 𑀔𑀬𑁂 𑀙, 𑀲𑀢𑁆𑀢𑀦𑁆𑀦𑀁 𑀅𑀦𑀼𑀲𑀬𑀸𑀦𑀁 𑀔𑀬𑁂 𑀲𑀢𑁆𑀢, 𑀅𑀝𑁆𑀞𑀦𑁆𑀦𑀁 𑀫𑀺𑀘𑁆𑀙𑀢𑁆𑀢𑀸𑀦𑀁 𑀔𑀬𑁂 𑀅𑀝𑁆𑀞, 𑀦𑀯𑀦𑁆𑀦𑀁 𑀢𑀡𑁆𑀳𑀸𑀫𑀽𑀮𑀓𑀥𑀫𑁆𑀫𑀸𑀦𑀁 ¶ 𑀔𑀬𑁂 𑀦𑀯, 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑁂 𑀤𑀲, 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀲𑁆𑀲 𑀔𑀬𑁂 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀦𑀢𑁆𑀣𑀺 𑀧𑀦 𑀢𑁂 𑀦𑀺𑀩𑁆𑀩𑀸𑀦𑀸𑀦𑀁 𑀧𑀫𑀸𑀡𑀦𑁆𑀢𑀺. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀡𑀸𑀢𑀺 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀻𑀡𑀺𑀧𑀺 𑀳𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀸𑀦𑀻𑀢𑀺 𑀕𑀡𑁆𑀳’.

𑀲𑀘𑁂 ¶ 𑀧𑀦 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀑𑀴𑀸𑀭𑀺𑀓𑀢𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀓𑀣𑀁? ‘𑀅𑀦𑁆𑀥𑀩𑀸𑀮𑀸 𑀳𑀺 𑀅𑀘𑁆𑀙𑀤𑀻𑀧𑀺𑀫𑀺𑀕𑀫𑀓𑁆𑀓𑀝𑀸𑀤𑀬𑁄𑀧𑀺 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀺𑀢𑀸 𑀯𑀢𑁆𑀣𑀼𑀁 𑀧𑀝𑀺𑀲𑁂𑀯𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀝𑀺𑀲𑁂𑀯𑀦𑀧𑀭𑀺𑀬𑀦𑁆𑀢𑁂 𑀓𑀺𑀮𑁂𑀲𑁄 𑀯𑀽𑀧𑀲𑀫𑁆𑀫𑀢𑀺. 𑀢𑀯 𑀯𑀸𑀤𑁂 𑀅𑀘𑁆𑀙𑀤𑀻𑀧𑀺𑀫𑀺𑀕𑀫𑀓𑁆𑀓𑀝𑀸𑀤𑀬𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀑𑀴𑀸𑀭𑀺𑀓𑀁 𑀯𑀢 𑀢𑁂 𑀦𑀺𑀩𑁆𑀩𑀸𑀦𑀁 𑀣𑀽𑀮𑀁, 𑀓𑀡𑁆𑀡𑁂𑀳𑀺 𑀧𑀺𑀴𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀏𑀯𑀁 𑀧𑀦 ¶ 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀡𑀸𑀢𑀺 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀻𑀡𑀺𑀧𑀺 𑀳𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀸𑀦𑀻𑀢𑀺 𑀕𑀡𑁆𑀳’.

𑀲𑀘𑁂 𑀧𑀦 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀕𑁄𑀢𑁆𑀭𑀪𑀼𑀦𑀸𑀧𑀺 𑀓𑀸𑀭𑁂𑀢𑀩𑁆𑀩𑁄. 𑀓𑀣𑀁? 𑀏𑀯𑀁 𑀢𑀸𑀯 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀢𑁆𑀯𑀁 𑀕𑁄𑀢𑁆𑀭𑀪𑀼 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀤𑁂𑀲𑀻’𑀢𑀺? ‘𑀆𑀫 𑀯𑀤𑀸𑀫𑀻’𑀢𑀺. ‘𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀸 𑀔𑀻𑀡𑀸, 𑀔𑀻𑀬𑀦𑁆𑀢𑀺, 𑀔𑀻𑀬𑀺𑀲𑁆𑀲𑀦𑁆𑀢𑀻’𑀢𑀺? 𑀦 𑀔𑀻𑀡𑀸, 𑀦 𑀔𑀻𑀬𑀦𑁆𑀢𑀺; 𑀅𑀧𑀺𑀘 𑀔𑁄 𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺. ‘𑀕𑁄𑀢𑁆𑀭𑀪𑀼 𑀧𑀦 𑀓𑀺𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻’𑀢𑀺? ‘𑀦𑀺𑀩𑁆𑀩𑀸𑀦𑀁’. ‘𑀢𑀯 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀸 𑀦 𑀔𑀻𑀡𑀸, 𑀦 𑀔𑀻𑀬𑀦𑁆𑀢𑀺; 𑀅𑀣 𑀔𑁄 𑀔𑀻𑀬𑀺𑀲𑁆𑀲𑀦𑁆𑀢𑀺. 𑀢𑁆𑀯𑀁 𑀅𑀔𑀻𑀡𑁂𑀲𑀼𑀬𑁂𑀯 𑀓𑀺𑀮𑁂𑀲𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀲𑀺, 𑀅𑀧𑁆𑀧𑀳𑀻𑀦𑁂𑀲𑀼 𑀅𑀦𑀼𑀲𑀬𑁂𑀲𑀼 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀲𑀺. 𑀢𑀁 𑀢𑁂 𑀦 𑀲𑀫𑁂𑀢𑀺. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀡𑀸𑀢𑀺 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀻𑀡𑀺𑀧𑀺 𑀳𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀸𑀦𑀻𑀢𑀺 𑀕𑀡𑁆𑀳’.

𑀲𑀘𑁂 𑀧𑀦 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀫𑀕𑁆𑀕𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀓𑀣𑀁? 𑀏𑀯𑀁 𑀢𑀸𑀯 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀢𑁆𑀯𑀁 𑀫𑀕𑁆𑀕𑀁 𑀦𑀸𑀫 𑀯𑀤𑁂𑀲𑀻’𑀢𑀺? ‘𑀆𑀫 𑀯𑀤𑁂𑀫𑀻’𑀢𑀺. ‘𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀸 𑀔𑀻𑀡𑀸, 𑀔𑀻𑀬𑀦𑁆𑀢𑀺, 𑀔𑀺𑀬𑀺𑀲𑁆𑀲𑀦𑁆𑀢𑀻’𑀢𑀺? 𑀚𑀸𑀦𑀫𑀸𑀦𑁄 𑀯𑀓𑁆𑀔𑀢𑀺 𑁋 ‘𑀔𑀻𑀡𑀸𑀢𑀺 𑀯𑀸 𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀯𑀸 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀔𑀻𑀬𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 ¶ 𑀯𑀝𑁆𑀝𑀢𑀻’𑀢𑀺. ‘𑀬𑀤𑀺 𑀏𑀯𑀁, 𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀓𑀢𑀫𑀁? 𑀫𑀕𑁆𑀕𑁂𑀦 𑀔𑀻𑀬𑀦𑀓𑀓𑀺𑀮𑁂𑀲𑀸 𑀓𑀢𑀫𑁂? 𑀫𑀕𑁆𑀕𑁄 𑀓𑀢𑀫𑀁 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀢𑀫𑁂 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺? 𑀢𑀲𑁆𑀫𑀸 𑀫𑀸 𑀏𑀯𑀁 𑀕𑀡𑁆𑀳. 𑀦𑀺𑀩𑁆𑀩𑀸𑀦𑀁 𑀧𑀦 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀡𑀸𑀢𑀺 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀻𑀡𑀺𑀧𑀺 𑀳𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀸𑀦𑀻’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀏𑀯𑀫𑀸𑀳 𑁋 ‘𑀢𑁆𑀯𑀁 𑀆𑀕𑀫𑁆𑀫 𑀆𑀕𑀫𑁆𑀫𑀸𑀢𑀺 𑀯𑀤𑁂𑀲𑀻’𑀢𑀺? ‘𑀆𑀫 𑀯𑀤𑁂𑀫𑀻’𑀢𑀺. ‘𑀆𑀕𑀫𑁆𑀫 𑀦𑀸𑀫𑀸𑀢𑀺 𑀇𑀤𑀁 𑀢𑁂 𑀓𑀼𑀢𑁄 𑀮𑀤𑁆𑀥’𑀦𑁆𑀢𑀺? ‘𑀲𑀼𑀢𑁆𑀢𑀢𑁄 𑀮𑀤𑁆𑀥’𑀦𑁆𑀢𑀺 ¶ . ‘𑀆𑀳𑀭 𑀲𑀼𑀢𑁆𑀢’𑀦𑁆𑀢𑀺. ‘‘𑀏𑀯𑀁 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘 𑀢𑀁 𑀆𑀕𑀫𑁆𑀫, 𑀢𑀫𑁆𑀳𑀺 𑀔𑀻𑀡𑀸, 𑀢𑀫𑁆𑀳𑀺 𑀪𑀕𑁆𑀕𑀸, 𑀦 𑀘 𑀓𑀺𑀜𑁆𑀘𑀺 𑀓𑀤𑀸𑀘𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀭𑀯𑀸𑀤𑀻 𑀢𑀼𑀡𑁆𑀳𑀻𑀪𑀸𑀯𑀁 𑀆𑀧𑀦𑁆𑀦𑁄𑀢𑀺.

𑀇𑀥𑀸𑀧𑀺 𑀤𑀲𑀸𑀬𑀢𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀤𑁆𑀯𑁂 𑀧𑀦 𑀘𑀢𑀼𑀪𑀽𑀫𑀓𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁬𑁮. 𑀇𑀥𑀸𑀧𑀺 ¶ 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀬𑀁 𑀮𑀩𑁆𑀪𑀢𑀺 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀯𑀲𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀁; 𑀦 𑀓𑁂𑀯𑀮𑀜𑁆𑀘 𑀇𑀥, 𑀲𑀩𑁆𑀩𑁂𑀲𑀼𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀭𑀽𑀧𑀪𑀸𑀯𑁂𑀦 𑀅𑀩𑁆𑀬𑀸𑀓𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀺𑀬 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀧𑁆𑀧𑀘𑁆𑀘𑀬𑀸𑀯 𑀲𑀗𑁆𑀔𑀢𑀸𑀯 𑀥𑀫𑁆𑀫𑀸𑀬𑀢𑀦𑀁 𑀧𑀦 ‘‘𑀲𑀺𑀬𑀸 𑀅𑀧𑁆𑀧𑀘𑁆𑀘𑀬𑀁, 𑀲𑀺𑀬𑀸 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀁. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀘 𑀅𑀦𑀸𑀭𑀫𑁆𑀫𑀡𑀁 𑀲𑀼𑀔𑀼𑀫𑀭𑀽𑀧𑀲𑀗𑁆𑀔𑀸𑀢𑀁 𑀥𑀫𑁆𑀫𑀸𑀬𑀢𑀦𑀁 𑀦-𑀯𑀢𑁆𑀢𑀩𑁆𑀩𑀓𑁄𑀝𑁆𑀞𑀸𑀲𑀁 𑀪𑀚𑀢𑀺. 𑀢𑀜𑁆𑀘 𑀔𑁄 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀦 𑀧𑀭𑀺𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀯𑀺𑀬 𑀤𑁆𑀯𑀸𑀬𑀢𑀦𑀸 𑀧𑀜𑁆𑀘𑀧𑀡𑁆𑀡𑀸𑀲 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀭𑀚𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑀲𑁆𑀲 𑀫𑀼𑀬𑁆𑀳𑀦𑁆𑀢𑀲𑁆𑀲 𑀲𑀁𑀯𑀭𑀦𑁆𑀢𑀲𑁆𑀲 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀘 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀲𑀩𑁆𑀩𑀁 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀆𑀬𑀢𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀸𑀢𑀼𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀥𑀸𑀢𑀼𑀯𑀺𑀪𑀗𑁆𑀕𑁂 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀙𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑀻𑀳𑀺 𑀙𑀓𑁆𑀓𑁂𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑁄 𑀙 𑀥𑀸𑀢𑀼𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀥𑀸𑀢𑀼𑀬𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀧𑀣𑀯𑀻𑀥𑀸𑀢𑀽𑀢𑀺𑀆𑀤𑀻𑀲𑀼 𑀥𑀸𑀢𑁆𑀯𑀝𑁆𑀞𑁄 𑀦𑀸𑀫 𑀲𑀪𑀸𑀯𑀝𑁆𑀞𑁄, 𑀲𑀪𑀸𑀯𑀝𑁆𑀞𑁄 𑀦𑀸𑀫 𑀲𑀼𑀜𑁆𑀜𑀢𑀝𑁆𑀞𑁄, 𑀲𑀼𑀜𑁆𑀜𑀢𑀝𑁆𑀞𑁄 𑀦𑀸𑀫 𑀦𑀺𑀲𑁆𑀲𑀢𑁆𑀢𑀝𑁆𑀞𑁄𑀢𑀺 𑀏𑀯𑀁 𑀲𑀪𑀸𑀯𑀲𑀼𑀜𑁆𑀜𑀢𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀧𑀣𑀯𑀻𑀬𑁂𑀯 𑀥𑀸𑀢𑀼 𑀧𑀣𑀯𑀻𑀥𑀸𑀢𑀼. 𑀆𑀧𑁄𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀧𑀤𑀲𑀫𑀸𑀲𑀁 𑀯𑀺𑀤𑀺𑀢𑁆𑀯𑀸 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀣𑀯𑀻𑀥𑀸𑀢𑀽𑀢𑀺 𑀧𑀢𑀺𑀝𑁆𑀞𑀸𑀦𑀥𑀸𑀢𑀼. 𑀆𑀧𑁄𑀥𑀸𑀢𑀽𑀢𑀺 𑀆𑀩𑀦𑁆𑀥𑀦𑀥𑀸𑀢𑀼. 𑀢𑁂𑀚𑁄𑀥𑀸𑀢𑀽𑀢𑀺 𑀧𑀭𑀺𑀧𑀸𑀘𑀦𑀥𑀸𑀢𑀼. 𑀯𑀸𑀬𑁄𑀥𑀸𑀢𑀽𑀢𑀺 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀼. 𑀆𑀓𑀸𑀲𑀥𑀸𑀢𑀽𑀢𑀺 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀼. 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑀺𑀚𑀸𑀦𑀦𑀥𑀸𑀢𑀼.

𑁧𑁭𑁩. 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀦𑁆𑀢𑀺 𑀧𑀣𑀯𑀻𑀥𑀸𑀢𑀼 𑀤𑁆𑀯𑁂 𑀅𑀬𑀁. 𑀅𑀬𑀁 𑀧𑀣𑀯𑀻𑀥𑀸𑀢𑀼 𑀦𑀸𑀫 𑀦 𑀏𑀓𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑁂𑀦 𑀧𑀦 𑀤𑁆𑀯𑁂 𑀥𑀸𑀢𑀼𑀬𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀺𑀓𑀸 𑀅𑀢𑁆𑀣𑀺 𑀩𑀸𑀳𑀺𑀭𑀸’’𑀢𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀦𑀺𑀬𑀓𑀚𑁆𑀛𑀢𑁆𑀢𑀸. 𑀩𑀸𑀳𑀺𑀭𑀸𑀢𑀺 𑀲𑀗𑁆𑀔𑀸𑀭𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸. 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀦𑀺𑀬𑀓𑀚𑁆𑀛𑀢𑁆𑀢𑀸𑀥𑀺𑀯𑀘𑀦𑀫𑁂𑀯. 𑀇𑀤𑀸𑀦𑀺 𑀢𑀁 𑀲𑀪𑀸𑀯𑀸𑀓𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀓𑀓𑁆𑀔𑀴𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀔𑀭𑀺𑀕𑀢𑀦𑁆𑀢𑀺 𑀨𑀭𑀼𑀲𑀁. 𑀓𑀓𑁆𑀔𑀴𑀢𑁆𑀢𑀦𑁆𑀢𑀺 𑀓𑀓𑁆𑀔𑀴𑀪𑀸𑀯𑁄. 𑀓𑀓𑁆𑀔𑀴𑀪𑀸𑀯𑁄𑀢𑀺 𑀓𑀓𑁆𑀔𑀴𑀲𑀪𑀸𑀯𑁄. 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀁 𑀉𑀧𑀸𑀤𑀺𑀦𑁆𑀦𑀁. 𑀉𑀧𑀸𑀤𑀺𑀦𑁆𑀦𑀁 𑀦𑀸𑀫 𑀲𑀭𑀻𑀭𑀝𑁆𑀞𑀓𑀁. 𑀲𑀭𑀻𑀭𑀝𑁆𑀞𑀓𑀜𑁆𑀳𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀯𑀸 𑀳𑁄𑀢𑀼 𑀫𑀸 𑀯𑀸, 𑀢𑀁 𑀲𑀦𑁆𑀥𑀸𑀬 𑀉𑀧𑀸𑀤𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀦𑁆𑀦𑀫𑁆𑀧𑀺; 𑀆𑀤𑀺𑀦𑁆𑀦𑀕𑁆𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 ¶ 𑀧𑀦 ¶ 𑀲𑀩𑁆𑀩𑀫𑁆𑀧𑁂𑀢𑀁 𑀉𑀧𑀸𑀤𑀺𑀦𑁆𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺 𑀆𑀳.

𑀇𑀤𑀸𑀦𑀺 𑀢𑀫𑁂𑀯 𑀧𑀣𑀯𑀻𑀥𑀸𑀢𑀼𑀁 𑀯𑀢𑁆𑀣𑀼𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀲𑁂𑀬𑁆𑀬𑀣𑀺𑀤𑀁 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀲𑀸 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀲𑀸 𑀓𑀢𑀫𑀸? 𑀬𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀓𑀓𑁆𑀔𑀴𑀁 𑀦𑀸𑀫 𑀢𑀁 𑀓𑀢𑀫𑀦𑁆𑀢𑀺? 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺 𑀢𑀲𑁆𑀲𑀸 𑀅𑀚𑁆𑀛𑀢𑁆𑀢𑀺𑀓𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀢𑁆𑀣𑀼𑀯𑀲𑁂𑀦 𑀧𑀪𑁂𑀤𑀤𑀲𑁆𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁂𑀲𑀸 𑀦𑀸𑀫 𑀅𑀚𑁆𑀛𑀢𑁆𑀢𑀸 𑀉𑀧𑀸𑀤𑀺𑀦𑁆𑀦𑀸 𑀲𑀭𑀻𑀭𑀝𑁆𑀞𑀓𑀸 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 ¶ 𑀓𑁄𑀝𑁆𑀞𑀸𑀲𑁄. 𑀮𑁄𑀫𑀸 𑀦𑀸𑀫…𑀧𑁂… 𑀓𑀭𑀻𑀲𑀁 𑀦𑀸𑀫. 𑀇𑀥 𑀧𑀦 𑀅𑀯𑀼𑀢𑁆𑀢𑀫𑁆𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪) 𑀧𑀸𑀴𑀺𑀆𑀭𑀼𑀴𑁆𑀳𑀁 𑀫𑀢𑁆𑀣𑀮𑀼𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑀁 𑀦𑀸𑀫 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀁 𑀲𑀭𑀻𑀭𑀝𑁆𑀞𑀓𑀁 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄. 𑀧𑀭𑀢𑁄 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀦𑀺𑀤𑁆𑀤𑁂𑀲𑁂 𑀧𑀺𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺? 𑀥𑀸𑀢𑀼𑀫𑀦𑀲𑀺𑀓𑀸𑀭𑁄. 𑀇𑀫𑀲𑁆𑀫𑀺𑀁 𑀧𑀦 𑀥𑀸𑀢𑀼𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀓𑀸𑀫𑁂𑀦 𑀓𑀺𑀁 𑀓𑀢𑁆𑀢𑀩𑁆𑀩𑀁? 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑁄𑀥𑁂𑀢𑀩𑁆𑀩𑀁. 𑀲𑀻𑀮𑀯𑀢𑁄 𑀳𑀺 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀇𑀚𑁆𑀛𑀢𑀺. 𑀢𑀲𑁆𑀲 𑀲𑁄𑀥𑀦𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑀼𑀤𑁆𑀥𑀲𑀻𑀮𑁂𑀦 𑀧𑀦 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑀲 𑀧𑀼𑀩𑁆𑀩𑀧𑀮𑀺𑀩𑁄𑀥𑀸 𑀙𑀺𑀦𑁆𑀤𑀺𑀢𑀩𑁆𑀩𑀸. 𑀢𑁂𑀲𑀫𑁆𑀧𑀺 𑀙𑀺𑀦𑁆𑀤𑀦𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀥𑀸𑀢𑀼𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑀩𑁆𑀩𑀁. 𑀆𑀘𑀭𑀺𑀬𑁂𑀦𑀸𑀧𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁂𑀦 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀤𑀲𑀯𑀺𑀥𑀜𑁆𑀘 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑁂𑀦𑀸𑀧𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀩𑀳𑀼𑀯𑀸𑀭𑁂 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀦𑀺𑀚𑁆𑀚𑀝𑀁 𑀧𑀕𑀼𑀡𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀆𑀤𑀺𑀓𑀫𑁆𑀫𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀚𑀭𑀸𑀫𑀭𑀡𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁂𑀦 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀤𑀲𑀳𑀸𑀓𑀸𑀭𑁂𑀳𑀺 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺.

𑀢𑀢𑁆𑀣 𑀯𑀘𑀲𑀸, 𑀫𑀦𑀲𑀸, 𑀯𑀡𑁆𑀡𑀢𑁄, 𑀲𑀡𑁆𑀞𑀸𑀦𑀢𑁄, 𑀤𑀺𑀲𑀢𑁄, 𑀑𑀓𑀸𑀲𑀢𑁄, 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀇𑀫𑀲𑁆𑀫𑀺𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑁂 ‘𑀉𑀕𑁆𑀕𑀳𑀓𑁄𑀲𑀮𑁆𑀮𑀁’ 𑀇𑀘𑁆𑀙𑀺𑀢𑀩𑁆𑀩𑀁. 𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄 ¶ , 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀢𑁄, 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄, 𑀮𑀓𑁆𑀔𑀡𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀇𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 ‘𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁’ 𑀇𑀘𑁆𑀙𑀺𑀢𑀩𑁆𑀩𑀁. 𑀢𑀤𑀼𑀪𑀬𑀫𑁆𑀧𑀺 𑀧𑀭𑀢𑁄 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀏𑀯𑀁 ¶ 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑁂𑀦 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁂 𑀅𑀝𑁆𑀞𑀸𑀭𑀲 𑀲𑁂𑀦𑀸𑀲𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁂𑀦 𑀅𑀢𑁆𑀢𑀦𑀸𑀧𑀺 𑀧𑀜𑁆𑀘𑀳𑀺 𑀧𑀥𑀸𑀦𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀯𑀺𑀯𑀺𑀢𑁆𑀢𑁄𑀓𑀸𑀲𑀕𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀘 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 ¶ 𑀓𑁂𑀲𑀸𑀤𑀻𑀲𑀼 𑀏𑀓𑁂𑀓𑀓𑁄𑀝𑁆𑀞𑀸𑀲𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀯𑀲𑀸𑀦𑁂 𑀏𑀯𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄 𑁋 𑀇𑀫𑁂 𑀓𑁂𑀲𑀸 𑀦𑀸𑀫 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑁂𑀲𑀼 𑀓𑀼𑀡𑁆𑀞𑀢𑀺𑀡𑁂𑀲𑀼 𑀦 𑀯𑀫𑁆𑀫𑀺𑀓𑀫𑀢𑁆𑀣𑀓𑁄 𑀚𑀸𑀦𑀸𑀢𑀺 ‘𑀫𑀬𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀢𑀸𑀦𑀻’𑀢𑀺, 𑀦𑀸𑀧𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀸𑀦𑀻’𑀢𑀺, 𑀏𑀯𑀫𑁂𑀯 𑀦 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑀁 𑀚𑀸𑀦𑀸𑀢𑀺 ‘𑀫𑀬𑀺 𑀓𑁂𑀲𑀸 𑀚𑀸𑀢𑀸’𑀢𑀺, 𑀦𑀸𑀧𑀺 𑀓𑁂𑀲𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑁂𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀮𑁄𑀫𑀸 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑁂𑀲𑀼 𑀤𑀩𑁆𑀩𑀢𑀺𑀡𑁂𑀲𑀼 𑀦 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑀁 𑀚𑀸𑀦𑀸𑀢𑀺 ‘𑀫𑀬𑀺 𑀤𑀩𑁆𑀩𑀢𑀺𑀡𑀸𑀦𑀺 𑀚𑀸𑀢𑀸𑀦𑀻’𑀢𑀺, 𑀦𑀸𑀧𑀺 𑀤𑀩𑁆𑀩𑀢𑀺𑀡𑀸𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀲𑀼𑀜𑁆𑀜𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑀸𑀦𑀻’𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑀁 𑀚𑀸𑀦𑀸𑀢𑀺 ‘𑀫𑀬𑀺 𑀮𑁄𑀫𑀸 𑀚𑀸𑀢𑀸’𑀢𑀺, 𑀦𑀸𑀧𑀺 𑀮𑁄𑀫𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑁄𑀫𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀦𑀔𑀸 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀓𑀼𑀫𑀸𑀭𑀓𑁂𑀲𑀼 𑀤𑀡𑁆𑀟𑀓𑁂𑀳𑀺 𑀫𑀥𑀼𑀓𑀝𑁆𑀞𑀺𑀓𑁂 𑀯𑀺𑀚𑁆𑀛𑀺𑀢𑁆𑀯𑀸 𑀓𑀻𑀴𑀦𑁆𑀢𑁂𑀲𑀼 𑀦 𑀤𑀡𑁆𑀟𑀓𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀫𑀥𑀼𑀓𑀝𑁆𑀞𑀺𑀓𑀸 𑀞𑀧𑀺𑀢𑀸’𑀢𑀺, 𑀦𑀸𑀧𑀺 𑀫𑀥𑀼𑀓𑀝𑁆𑀞𑀺𑀓𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀤𑀡𑁆𑀟𑀓𑁂𑀲𑀼 𑀞𑀧𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀅𑀗𑁆𑀕𑀼𑀮𑀺𑀬𑁄 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑀸𑀓𑀁 𑀅𑀕𑁆𑀕𑁂𑀲𑀼 𑀦𑀔𑀸 𑀚𑀸𑀢𑀸’𑀢𑀺, 𑀦𑀸𑀧𑀺 𑀦𑀔𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 ¶ 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀦𑀔𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀤𑀦𑁆𑀢𑀸 𑀳𑀦𑀼𑀓𑀝𑁆𑀞𑀺𑀓𑁂𑀲𑀼 𑀚𑀸𑀢𑀸. 𑀢𑀢𑁆𑀣 𑀬𑀣𑀸 𑀯𑀟𑁆𑀠𑀓𑀻𑀳𑀺 𑀧𑀸𑀲𑀸𑀡𑀉𑀤𑀼𑀓𑁆𑀔𑀮𑁂𑀲𑀼 𑀓𑁂𑀦𑀘𑀺𑀤𑁂𑀯 𑀲𑀺𑀮𑁂𑀲𑀚𑀸𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀣𑀫𑁆𑀪𑁂𑀲𑀼 𑀦 𑀉𑀤𑀼𑀓𑁆𑀔𑀮𑀸𑀦𑀺 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀣𑀫𑁆𑀪𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀣𑀫𑁆𑀪𑀸 ¶ 𑀚𑀸𑀦𑀦𑁆𑀢𑀺 ‘𑀫𑀬𑀁 𑀉𑀤𑀼𑀓𑁆𑀔𑀮𑁂𑀲𑀼 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀳𑀦𑀼𑀓𑀝𑁆𑀞𑀺𑀓𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀤𑀦𑁆𑀢𑀸 𑀚𑀸𑀢𑀸’𑀢𑀺 ¶ , 𑀦𑀸𑀧𑀺 𑀤𑀦𑁆𑀢𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀳𑀦𑀼𑀓𑀝𑁆𑀞𑀺𑀓𑁂𑀲𑀼 𑀚𑀸𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀤𑀦𑁆𑀢𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀢𑀘𑁄 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑁄. 𑀢𑀢𑁆𑀣 𑀬𑀣𑀸 𑀅𑀮𑁆𑀮𑀕𑁄𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀸𑀬 𑀫𑀳𑀸𑀯𑀻𑀡𑀸𑀬 𑀦 𑀫𑀳𑀸𑀯𑀻𑀡𑀸 𑀚𑀸𑀦𑀸𑀢𑀺 ‘𑀅𑀳𑀁 𑀅𑀮𑁆𑀮𑀕𑁄𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑀸’𑀢𑀺, 𑀦𑀸𑀧𑀺 𑀅𑀮𑁆𑀮𑀕𑁄𑀘𑀫𑁆𑀫𑀁 𑀚𑀸𑀦𑀸𑀢𑀺 ‘𑀫𑀬𑀸 𑀫𑀳𑀸𑀯𑀻𑀡𑀸 𑀧𑀭𑀺𑀬𑁄𑀤𑁆𑀥𑀸’𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀁 𑀚𑀸𑀦𑀸𑀢𑀺 ‘𑀅𑀳𑀁 𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥’𑀦𑁆𑀢𑀺, 𑀦𑀸𑀧𑀺 𑀢𑀘𑁄 𑀚𑀸𑀦𑀸𑀢𑀺 ‘𑀫𑀬𑀸 𑀲𑀭𑀻𑀭𑀁 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀢𑀘𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀫𑀁𑀲𑀁 𑀅𑀝𑁆𑀞𑀺𑀲𑀗𑁆𑀖𑀸𑀝𑀁 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀫𑀳𑀸𑀫𑀢𑁆𑀢𑀺𑀓𑀸𑀬 𑀮𑀺𑀢𑁆𑀢𑀸𑀬 𑀪𑀺𑀢𑁆𑀢𑀺𑀬𑀸 𑀦 𑀪𑀺𑀢𑁆𑀢𑀺 𑀚𑀸𑀦𑀸𑀢𑀺 ‘𑀅𑀳𑀁 𑀫𑀳𑀸𑀫𑀢𑁆𑀢𑀺𑀓𑀸𑀬 𑀮𑀺𑀢𑁆𑀢𑀸’𑀢𑀺, 𑀦𑀸𑀧𑀺 𑀫𑀳𑀸𑀫𑀢𑁆𑀢𑀺𑀓𑀸 𑀚𑀸𑀦𑀸𑀢𑀺 ‘𑀫𑀬𑀸 𑀫𑀳𑀸𑀪𑀺𑀢𑁆𑀢𑀺 𑀮𑀺𑀢𑁆𑀢𑀸’𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀚𑀸𑀦𑀸𑀢𑀺 ‘𑀅𑀳𑀁 𑀦𑀯𑀫𑀁𑀲𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑁂𑀦 𑀫𑀁𑀲𑁂𑀦 𑀮𑀺𑀢𑁆𑀢𑁄’𑀢𑀺, 𑀦𑀸𑀧𑀺 𑀫𑀁𑀲𑀁 𑀚𑀸𑀦𑀸𑀢𑀺 ‘𑀫𑀬𑀸 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀮𑀺𑀢𑁆𑀢𑁄’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀁𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀦𑁆𑀳𑀸𑀭𑀼 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀝𑁆𑀞𑀻𑀦𑀺 𑀆𑀩𑀦𑁆𑀥𑀫𑀸𑀦𑀸 𑀞𑀺𑀢𑀸. 𑀢𑀢𑁆𑀣 𑀬𑀣𑀸 𑀯𑀮𑁆𑀮𑀻𑀳𑀺 𑀯𑀺𑀦𑀤𑁆𑀥𑁂𑀲𑀼 𑀓𑀼𑀝𑁆𑀝𑀤𑀸𑀭𑀽𑀲𑀼 𑀦 𑀓𑀼𑀝𑁆𑀝𑀤𑀸𑀭𑀽𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀯𑀮𑁆𑀮𑀻𑀳𑀺 𑀯𑀺𑀦𑀤𑁆𑀥𑀸𑀦𑀻’𑀢𑀺, 𑀦𑀸𑀧𑀺 𑀯𑀮𑁆𑀮𑀺𑀬𑁄 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀳𑀺 𑀓𑀼𑀝𑁆𑀝𑀤𑀸𑀭𑀽𑀦𑀺 𑀯𑀺𑀦𑀤𑁆𑀥𑀸𑀦𑀻’𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀻𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀦𑁆𑀳𑀸𑀭𑀽𑀳𑀺 𑀆𑀩𑀤𑁆𑀥𑀸𑀦𑀻’𑀢𑀺, 𑀦𑀸𑀧𑀺 𑀦𑁆𑀳𑀸𑀭𑀽 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀳𑀺 𑀅𑀝𑁆𑀞𑀻𑀦𑀺 𑀆𑀩𑀤𑁆𑀥𑀸𑀦𑀻’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 ¶ 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀦𑁆𑀳𑀸𑀭𑀼 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀅𑀝𑁆𑀞𑀻𑀲𑀼 𑀧𑀡𑁆𑀳𑀺𑀓𑀝𑁆𑀞𑀺 𑀕𑁄𑀧𑁆𑀨𑀓𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀕𑁄𑀧𑁆𑀨𑀓𑀝𑁆𑀞𑀺 𑀚𑀗𑁆𑀖𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀚𑀗𑁆𑀖𑀝𑁆𑀞𑀺 𑀊𑀭𑀼𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀊𑀭𑀼𑀝𑁆𑀞𑀺 𑀓𑀝𑀺𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁 ¶ . 𑀓𑀝𑀺𑀝𑁆𑀞𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 ¶ 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀕𑀻𑀯𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄. 𑀕𑀻𑀯𑀝𑁆𑀞𑀺 𑀲𑀻𑀲𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀲𑀻𑀲𑀝𑁆𑀞𑀺 𑀕𑀻𑀯𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀕𑀻𑀯𑀝𑁆𑀞𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀓𑀝𑀺𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄. 𑀓𑀝𑀺𑀝𑁆𑀞𑀺 𑀊𑀭𑀼𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀊𑀭𑀼𑀝𑁆𑀞𑀺 𑀚𑀗𑁆𑀖𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀚𑀗𑁆𑀖𑀝𑁆𑀞𑀺 𑀕𑁄𑀧𑁆𑀨𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀕𑁄𑀧𑁆𑀨𑀓𑀝𑁆𑀞𑀺 𑀧𑀡𑁆𑀳𑀺𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀢𑁆𑀣 𑀬𑀣𑀸 𑀇𑀝𑁆𑀞𑀓𑀤𑀸𑀭𑀼𑀕𑁄𑀫𑀬𑀸𑀤𑀺𑀲𑀜𑁆𑀘𑀬𑁂𑀲𑀼 𑀦 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀉𑀧𑀭𑀺𑀫𑁂 𑀉𑀧𑀭𑀺𑀫𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀉𑀧𑀭𑀺𑀫𑀸 𑀉𑀧𑀭𑀺𑀫𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀳𑁂𑀝𑁆𑀞𑀺𑀫𑁂𑀲𑀼 𑀳𑁂𑀝𑁆𑀞𑀺𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀧𑀡𑁆𑀳𑀺𑀓𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀕𑁄𑀧𑁆𑀨𑀓𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀕𑁄𑀧𑁆𑀨𑀓𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀚𑀗𑁆𑀖𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀚𑀗𑁆𑀖𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀊𑀭𑀼𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀊𑀭𑀼𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀓𑀝𑀺𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀓𑀝𑀺𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀚𑀸𑀦𑀸𑀢𑀺 ‘𑀅𑀳𑀁 𑀕𑀻𑀯𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄’𑀢𑀺, 𑀦 𑀕𑀻𑀯𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀲𑀻𑀲𑀝𑁆𑀞𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦 𑀲𑀻𑀲𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀕𑀻𑀯𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺, 𑀦 𑀕𑀻𑀯𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺, 𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀚𑀸𑀦𑀸𑀢𑀺 ‘𑀅𑀳𑀁 𑀓𑀝𑀺𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄’𑀢𑀺, 𑀦 𑀓𑀝𑀺𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀊𑀭𑀼𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺, 𑀦 𑀊𑀭𑀼𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀚𑀗𑁆𑀖𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺, 𑀦 𑀚𑀗𑁆𑀖𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀕𑁄𑀧𑁆𑀨𑀓𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺, 𑀦 𑀕𑁄𑀧𑁆𑀨𑀓𑀝𑁆𑀞𑀺 𑀚𑀸𑀦𑀸𑀢𑀺 ‘𑀅𑀳𑀁 𑀧𑀡𑁆𑀳𑀺𑀓𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀝𑁆𑀞𑀺 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀅𑀝𑁆𑀞𑀺𑀫𑀺𑀜𑁆𑀚𑀁 𑀢𑁂𑀲𑀁 𑀢𑁂𑀲𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑁂𑀴𑀼𑀧𑀩𑁆𑀩𑀸𑀤𑀻𑀦𑀁 𑀅𑀦𑁆𑀢𑁄 𑀧𑀓𑁆𑀔𑀺𑀢𑁆𑀢𑁂𑀲𑀼 𑀲𑀺𑀦𑁆𑀦𑀯𑁂𑀢𑁆𑀢𑀕𑁆𑀕𑀸𑀤𑀻𑀲𑀼 ¶ 𑀦 𑀯𑁂𑀴𑀼𑀧𑀩𑁆𑀩𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀯𑁂𑀢𑁆𑀢𑀕𑁆𑀕𑀸𑀤𑀻𑀦𑀺 𑀧𑀓𑁆𑀔𑀺𑀢𑁆𑀢𑀸𑀦𑀻’𑀢𑀺, 𑀦𑀸𑀧𑀺 𑀯𑁂𑀢𑁆𑀢𑀕𑁆𑀕𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀯𑁂𑀴𑀼𑀧𑀩𑁆𑀩𑀸𑀤𑀻𑀲𑀼 𑀞𑀺𑀢𑀸𑀦𑀻𑀢𑀺, 𑀏𑀯𑀫𑁂𑀯 𑀦 𑀅𑀝𑁆𑀞𑀻𑀦𑀺 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑀸𑀓𑀁 𑀅𑀦𑁆𑀢𑁄 𑀅𑀝𑁆𑀞𑀺𑀫𑀺𑀜𑁆𑀚𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀚𑀸𑀦𑀸𑀢𑀺 ‘𑀅𑀳𑀁 𑀅𑀝𑁆𑀞𑀻𑀦𑀁 𑀅𑀦𑁆𑀢𑁄 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀯𑀓𑁆𑀓𑀁 ¶ 𑀕𑀮𑀯𑀸𑀝𑀓𑀢𑁄 𑀦𑀺𑀓𑁆𑀔𑀦𑁆𑀢𑁂𑀦 𑀏𑀓𑀫𑀽𑀮𑁂𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂𑀦 𑀣𑀽𑀮𑀦𑁆𑀳𑀸𑀭𑀼𑀦𑀸 𑀯𑀺𑀦𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀳𑀤𑀬𑀫𑀁𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑀡𑁆𑀝𑀼𑀧𑀦𑀺𑀩𑀤𑁆𑀥𑁂 ¶ 𑀅𑀫𑁆𑀩𑀨𑀮𑀤𑁆𑀯𑀬𑁂 𑀦 𑀯𑀡𑁆𑀝𑀁 𑀚𑀸𑀦𑀸𑀢𑀺 ‘𑀫𑀬𑀸 𑀅𑀫𑁆𑀩𑀨𑀮𑀤𑁆𑀯𑀬𑀁 𑀉𑀧𑀦𑀺𑀩𑀤𑁆𑀥’𑀦𑁆𑀢𑀺, 𑀦𑀸𑀧𑀺 𑀅𑀫𑁆𑀩𑀨𑀮𑀤𑁆𑀯𑀬𑀁 𑀚𑀸𑀦𑀸𑀢𑀺 ‘𑀅𑀳𑀁 𑀯𑀡𑁆𑀝𑁂𑀦 𑀉𑀧𑀦𑀺𑀩𑀤𑁆𑀥’𑀦𑁆𑀢𑀺, 𑀏𑀯𑀫𑁂𑀯 𑀦 𑀣𑀽𑀮𑀦𑁆𑀳𑀸𑀭𑀼 𑀚𑀸𑀦𑀸𑀢𑀺 ‘𑀫𑀬𑀸 𑀯𑀓𑁆𑀓𑀁 𑀉𑀧𑀦𑀺𑀩𑀤𑁆𑀥’𑀦𑁆𑀢𑀺, 𑀦𑀸𑀧𑀺 𑀯𑀓𑁆𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀣𑀽𑀮𑀦𑁆𑀳𑀸𑀭𑀼𑀦𑀸 𑀉𑀧𑀦𑀺𑀩𑀤𑁆𑀥’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀯𑀓𑁆𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀳𑀤𑀬𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀉𑀭𑀝𑁆𑀞𑀺𑀧𑀜𑁆𑀚𑀭𑀫𑀚𑁆𑀛𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀸𑀬 𑀫𑀁𑀲𑀧𑁂𑀲𑀺𑀬𑀸 𑀦 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀁 𑀦𑀺𑀲𑁆𑀲𑀸𑀬 𑀫𑀁𑀲𑀧𑁂𑀲𑀺 𑀞𑀧𑀺𑀢𑀸’𑀢𑀺, 𑀦𑀸𑀧𑀺 𑀫𑀁𑀲𑀧𑁂𑀲𑀺 𑀚𑀸𑀦𑀸𑀢𑀺 ‘𑀅𑀳𑀁 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀉𑀭𑀝𑁆𑀞𑀺𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀁 𑀦𑀺𑀲𑁆𑀲𑀸𑀬 𑀳𑀤𑀬𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀳𑀤𑀬𑀁 𑀚𑀸𑀦𑀸𑀢𑀺 ‘𑀅𑀳𑀁 𑀉𑀭𑀝𑁆𑀞𑀺𑀧𑀜𑁆𑀚𑀭𑀩𑁆𑀪𑀦𑁆𑀢𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀳𑀤𑀬𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀬𑀓𑀦𑀁 𑀅𑀦𑁆𑀢𑁄𑀲𑀭𑀻𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑀫𑁆𑀳𑀺 𑀮𑀕𑁆𑀕𑁂 𑀬𑀫𑀓𑀫𑀁𑀲𑀧𑀺𑀡𑁆𑀟𑁂 𑀦 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑀁 𑀚𑀸𑀦𑀸𑀢𑀺 ‘𑀫𑀬𑀺 𑀬𑀫𑀓𑀫𑀁𑀲𑀧𑀺𑀡𑁆𑀟𑁄 𑀮𑀕𑁆𑀕𑁄’𑀢𑀺, 𑀦𑀸𑀧𑀺 𑀬𑀫𑀓𑀫𑀁𑀲𑀧𑀺𑀡𑁆𑀟𑁄 ¶ 𑀚𑀸𑀦𑀸𑀢𑀺 ‘𑀅𑀳𑀁 𑀉𑀓𑁆𑀔𑀮𑀺𑀓𑀧𑀸𑀮𑀧𑀲𑁆𑀲𑁂 𑀮𑀕𑁆𑀕𑁄’𑀢𑀺, 𑀏𑀯𑀫𑁂𑀯 𑀦 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀚𑀸𑀦𑀸𑀢𑀺 ‘𑀫𑀁 𑀦𑀺𑀲𑁆𑀲𑀸𑀬 𑀬𑀓𑀦𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀬𑀓𑀦𑀁 𑀚𑀸𑀦𑀸𑀢𑀺 ‘𑀅𑀳𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀬𑀓𑀦𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀓𑀺𑀮𑁄𑀫𑀓𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀳𑀤𑀬𑀜𑁆𑀘 𑀯𑀓𑁆𑀓𑀜𑁆𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁, 𑀅𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀲𑀓𑀮𑀲𑀭𑀻𑀭𑁂 𑀘𑀫𑁆𑀫𑀲𑁆𑀲 𑀳𑁂𑀝𑁆𑀞𑀢𑁄 𑀫𑀁𑀲𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀺𑀮𑁄𑀢𑀺𑀓𑀧𑀮𑀺𑀯𑁂𑀞𑀺𑀢𑁂 𑀫𑀁𑀲𑁂 𑀦 𑀫𑀁𑀲𑀁 𑀚𑀸𑀦𑀸𑀢𑀺 ‘𑀅𑀳𑀁 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀧𑀺𑀮𑁄𑀢𑀺𑀓𑀸 𑀚𑀸𑀦𑀸𑀢𑀺 ‘𑀫𑀬𑀸 𑀫𑀁𑀲𑀁 𑀧𑀮𑀺𑀯𑁂𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀯𑀓𑁆𑀓𑀳𑀤𑀬𑀸𑀦𑀺 𑀲𑀓𑀮𑀲𑀭𑀻𑀭𑁂 𑀫𑀁𑀲𑀜𑁆𑀘 ¶ 𑀚𑀸𑀦𑀸𑀢𑀺 ‘𑀅𑀳𑀁 𑀓𑀺𑀮𑁄𑀫𑀓𑁂𑀦 𑀧𑀝𑀺𑀘𑁆𑀙𑀦𑁆𑀦’𑀦𑁆𑀢𑀺, 𑀦𑀸𑀧𑀺 𑀓𑀺𑀮𑁄𑀫𑀓𑀁 𑀚𑀸𑀦𑀸𑀢𑀺 ‘𑀫𑀬𑀸 𑀯𑀓𑁆𑀓𑀳𑀤𑀬𑀸𑀦𑀺 𑀲𑀓𑀮𑀲𑀭𑀻𑀭𑁂 𑀫𑀁𑀲𑀜𑁆𑀘 𑀧𑀝𑀺𑀘𑁆𑀙𑀦𑁆𑀦’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 ¶ 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑀺𑀮𑁄𑀫𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀧𑀺𑀳𑀓𑀁 𑀳𑀤𑀬𑀲𑁆𑀲 𑀯𑀸𑀫𑀧𑀲𑁆𑀲𑁂 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀕𑁄𑀫𑀬𑀧𑀺𑀡𑁆𑀟𑀺𑀬𑀸 𑀦 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 ‘𑀕𑁄𑀫𑀬𑀧𑀺𑀡𑁆𑀟𑀺 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’𑀢𑀺, 𑀦𑀸𑀧𑀺 𑀕𑁄𑀫𑀬𑀧𑀺𑀡𑁆𑀟𑀺 𑀚𑀸𑀦𑀸𑀢𑀺 ‘𑀅𑀳𑀁 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 ‘𑀧𑀺𑀳𑀓𑀁 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀧𑀺𑀳𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀺𑀳𑀓𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀧𑀧𑁆𑀨𑀸𑀲𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀳𑀤𑀬𑀜𑁆𑀘 𑀬𑀓𑀦𑀜𑁆𑀘 𑀉𑀧𑀭𑀺𑀙𑀸𑀤𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀁 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀑𑀮𑀫𑁆𑀩𑀫𑀸𑀦𑁂 𑀲𑀓𑀼𑀡𑀓𑀼𑀮𑀸𑀯𑀓𑁂 𑀦 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀬𑀺 𑀲𑀓𑀼𑀡𑀓𑀼𑀮𑀸𑀯𑀓𑁄 𑀑𑀮𑀫𑁆𑀩𑀫𑀸𑀦𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀲𑀓𑀼𑀡𑀓𑀼𑀮𑀸𑀯𑀓𑁄 𑀚𑀸𑀦𑀸𑀢𑀺 ‘𑀅𑀳𑀁 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀑𑀮𑀫𑁆𑀩𑀫𑀸𑀦𑁄 𑀞𑀺𑀢𑁄’𑀢𑀺 ¶ , 𑀏𑀯𑀫𑁂𑀯 𑀦 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀬𑀺 𑀧𑀧𑁆𑀨𑀸𑀲𑀁 𑀑𑀮𑀫𑁆𑀩𑀫𑀸𑀦𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀧𑀧𑁆𑀨𑀸𑀲𑀁 𑀚𑀸𑀦𑀸𑀢𑀺 ‘𑀅𑀳𑀁 𑀏𑀯𑀭𑀽𑀧𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀑𑀮𑀫𑁆𑀩𑀫𑀸𑀦𑀁 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀧𑁆𑀨𑀸𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀅𑀦𑁆𑀢𑀁 𑀕𑀮𑀯𑀸𑀝𑀓𑀢𑁄 𑀓𑀭𑀻𑀲𑀫𑀕𑁆𑀕𑀧𑀭𑀺𑀬𑀦𑁆𑀢𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀮𑁄𑀳𑀺𑀢𑀤𑁄𑀡𑀺𑀓𑀸𑀬 𑀑𑀪𑀼𑀚𑀺𑀢𑁆𑀯𑀸 𑀞𑀧𑀺𑀢𑁂 𑀙𑀺𑀦𑁆𑀦𑀲𑀻𑀲𑀥𑀫𑀦𑀺𑀓𑀴𑁂𑀯𑀭𑁂 𑀦 𑀮𑁄𑀳𑀺𑀢𑀤𑁄𑀡𑀺 𑀚𑀸𑀦𑀸𑀢𑀺 ‘𑀫𑀬𑀺 𑀥𑀫𑀦𑀺𑀓𑀴𑁂𑀯𑀭𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀥𑀫𑀦𑀺𑀓𑀴𑁂𑀯𑀭𑀁 𑀚𑀸𑀦𑀸𑀢𑀺 ‘𑀅𑀳𑀁 𑀮𑁄𑀳𑀺𑀢𑀤𑁄𑀡𑀺𑀓𑀸𑀬𑀁 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀬𑀺 𑀅𑀦𑁆𑀢𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀅𑀦𑁆𑀢𑀁 𑀚𑀸𑀦𑀸𑀢𑀺 ‘𑀅𑀳𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀦𑁆𑀢𑀁 𑀦𑀸𑀫 ¶ 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀅𑀦𑁆𑀢𑀕𑀼𑀡𑀁 ¶ 𑀅𑀦𑁆𑀢𑀦𑁆𑀢𑀭𑁂 𑀏𑀓𑀯𑀻𑀲𑀢𑀺 𑀅𑀦𑁆𑀢𑀪𑁄𑀕𑁂 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑁂𑀲𑀼 𑀭𑀚𑁆𑀚𑀼𑀓𑁂𑀲𑀼 𑀦 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀚𑀸𑀦𑀸𑀢𑀺 ‘𑀭𑀚𑁆𑀚𑀼𑀓𑀸 𑀫𑀁 𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀭𑀚𑁆𑀚𑀼𑀓𑀸 𑀚𑀸𑀦𑀦𑁆𑀢𑀺 ‘𑀫𑀬𑀁 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀅𑀦𑁆𑀢𑀁 𑀚𑀸𑀦𑀸𑀢𑀺 ‘𑀅𑀦𑁆𑀢𑀕𑀼𑀡𑀁 𑀫𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀅𑀦𑁆𑀢𑀕𑀼𑀡𑀁 𑀚𑀸𑀦𑀸𑀢𑀺 ‘𑀅𑀳𑀁 𑀅𑀦𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀦𑁆𑀢𑀕𑀼𑀡𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀉𑀤𑀭𑀺𑀬𑀁 𑀉𑀤𑀭𑁂 𑀞𑀺𑀢𑀁 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁. 𑀢𑀢𑁆𑀣 𑀬𑀣𑀸 𑀲𑀼𑀯𑀸𑀦𑀤𑁄𑀡𑀺𑀬𑀁 𑀞𑀺𑀢𑁂 𑀲𑀼𑀯𑀸𑀦𑀯𑀫𑀣𑀼𑀫𑁆𑀳𑀺 𑀦 𑀲𑀼𑀯𑀸𑀦𑀤𑁄𑀡𑀺 𑀚𑀸𑀦𑀸𑀢𑀺 ‘𑀫𑀬𑀺 𑀲𑀼𑀯𑀸𑀦𑀯𑀫𑀣𑀼 𑀞𑀺𑀢𑁄’𑀢𑀺, 𑀦𑀸𑀧𑀺 𑀲𑀼𑀯𑀸𑀦𑀯𑀫𑀣𑀼 𑀚𑀸𑀦𑀸𑀢𑀺 ‘𑀅𑀳𑀁 𑀲𑀼𑀯𑀸𑀦𑀤𑁄𑀡𑀺𑀬𑀁 𑀞𑀺𑀢𑁄’𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀁 𑀚𑀸𑀦𑀸𑀢𑀺 ‘𑀫𑀬𑀺 𑀉𑀤𑀭𑀺𑀬𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀉𑀤𑀭𑀺𑀬𑀁 𑀚𑀸𑀦𑀸𑀢𑀺 ‘𑀅𑀳𑀁 𑀉𑀤𑀭𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀉𑀤𑀭𑀺𑀬𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀓𑀭𑀻𑀲𑀁 ¶ 𑀧𑀓𑁆𑀓𑀸𑀲𑀬𑀲𑀗𑁆𑀔𑀸𑀢𑁂 𑀅𑀝𑁆𑀞𑀗𑁆𑀕𑀼𑀮𑀯𑁂𑀴𑀼𑀧𑀩𑁆𑀩𑀲𑀤𑀺𑀲𑁂 𑀅𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀯𑁂𑀴𑀼𑀧𑀩𑁆𑀩𑁂 𑀑𑀫𑀤𑁆𑀤𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸𑀬 𑀲𑀡𑁆𑀳𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬 𑀦 𑀯𑁂𑀴𑀼𑀧𑀩𑁆𑀩𑀁 𑀚𑀸𑀦𑀸𑀢𑀺 ‘𑀫𑀬𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀚𑀸𑀦𑀸𑀢𑀺 ‘𑀅𑀳𑀁 𑀯𑁂𑀴𑀼𑀧𑀩𑁆𑀩𑁂 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀧𑀓𑁆𑀓𑀸𑀲𑀬𑁄 𑀚𑀸𑀦𑀸𑀢𑀺 ‘𑀫𑀬𑀺 𑀓𑀭𑀻𑀲𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀓𑀭𑀻𑀲𑀁 𑀚𑀸𑀦𑀸𑀢𑀺 ‘𑀅𑀳𑀁 𑀧𑀓𑁆𑀓𑀸𑀲𑀬𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀓𑀭𑀻𑀲𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀫𑀢𑁆𑀣𑀮𑀼𑀗𑁆𑀕𑀁 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀼𑀭𑀸𑀡𑀮𑀸𑀩𑀼𑀓𑀝𑀸𑀳𑁂 𑀧𑀓𑁆𑀔𑀺𑀢𑁆𑀢𑀸𑀬 𑀧𑀺𑀝𑁆𑀞𑀧𑀺𑀡𑁆𑀟𑀺𑀬𑀸 𑀦 𑀮𑀸𑀩𑀼𑀓𑀝𑀸𑀳𑀁 𑀚𑀸𑀦𑀸𑀢𑀺 ‘𑀫𑀬𑀺 𑀧𑀺𑀝𑁆𑀞𑀧𑀺𑀡𑁆𑀟𑀺 𑀞𑀺𑀢𑀸’𑀢𑀺, 𑀦𑀸𑀧𑀺 𑀧𑀺𑀝𑁆𑀞𑀧𑀺𑀡𑁆𑀟𑀺 𑀚𑀸𑀦𑀸𑀢𑀺 ‘𑀅𑀳𑀁 𑀮𑀸𑀩𑀼𑀓𑀝𑀸𑀳𑁂 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘𑀫𑀬𑀺 𑀫𑀢𑁆𑀣𑀮𑀼𑀗𑁆𑀕𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀫𑀢𑁆𑀣𑀮𑀼𑀗𑁆𑀕𑀁 𑀚𑀸𑀦𑀸𑀢𑀺 ¶ ‘𑀅𑀳𑀁 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀢𑁆𑀣𑀮𑀼𑀗𑁆𑀕𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽𑀢𑀺.

𑀬𑀁 ¶ 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺 𑀇𑀫𑀺𑀦𑀸 𑀆𑀧𑁄𑀓𑁄𑀝𑁆𑀞𑀸𑀲𑀸𑀤𑀻𑀲𑀼 𑀢𑀻𑀲𑀼 𑀅𑀦𑀼𑀕𑀢𑀁 𑀧𑀣𑀯𑀻𑀥𑀸𑀢𑀼𑀁 𑀮𑀓𑁆𑀔𑀡𑀯𑀲𑁂𑀦 𑀬𑁂𑀯𑀸𑀧𑀦𑀓𑀁 𑀧𑀣𑀯𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀅𑀬𑁄𑀢𑀺 𑀓𑀸𑀴𑀮𑁄𑀳𑀁. 𑀮𑁄𑀳𑀦𑁆𑀢𑀺 𑀚𑀸𑀢𑀺𑀮𑁄𑀳𑀁, 𑀯𑀺𑀚𑀸𑀢𑀺𑀮𑁄𑀳𑀁, 𑀓𑀺𑀢𑁆𑀢𑀺𑀫𑀮𑁄𑀳𑀁, 𑀧𑀺𑀲𑀸𑀘𑀮𑁄𑀳𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀅𑀬𑁄, 𑀲𑀚𑁆𑀛𑀼, 𑀲𑀼𑀯𑀡𑁆𑀡𑀁, 𑀢𑀺𑀧𑀼, 𑀲𑀻𑀲𑀁, 𑀢𑀫𑁆𑀩𑀮𑁄𑀳𑀁, 𑀯𑁂𑀓𑀦𑁆𑀢𑀓𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀚𑀸𑀢𑀺𑀮𑁄𑀳𑀸𑀦𑀺 𑀦𑀸𑀫. 𑀦𑀸𑀕𑀦𑀸𑀲𑀺𑀓𑀮𑁄𑀳𑀁 𑀯𑀺𑀚𑀸𑀢𑀺𑀮𑁄𑀳𑀁 𑀦𑀸𑀫. 𑀓𑀁𑀲𑀮𑁄𑀳𑀁, 𑀯𑀝𑁆𑀝𑀮𑁄𑀳𑀁, 𑀆𑀭𑀓𑀽𑀝𑀦𑁆𑀢𑀺 𑀢𑀻𑀡𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺 𑀦𑀸𑀫. 𑀫𑁄𑀭𑀓𑁆𑀔𑀓𑀁, 𑀧𑀼𑀣𑀼𑀓𑀁, 𑀫𑀮𑀺𑀦𑀓𑀁, 𑀘𑀧𑀮𑀓𑀁, 𑀲𑁂𑀮𑀓𑀁, 𑀆𑀝𑀓𑀁, 𑀪𑀮𑁆𑀮𑀓𑀁, 𑀤𑀽𑀲𑀺𑀮𑁄𑀳𑀦𑁆𑀢𑀺 𑀅𑀝𑁆𑀞 𑀧𑀺𑀲𑀸𑀘𑀮𑁄𑀳𑀸𑀦𑀺 𑀦𑀸𑀫. 𑀢𑁂𑀲𑀼 𑀧𑀜𑁆𑀘 𑀚𑀸𑀢𑀺𑀮𑁄𑀳𑀸𑀦𑀺 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑁂𑀯. 𑀢𑀫𑁆𑀩𑀮𑁄𑀳𑀁, 𑀯𑁂𑀓𑀦𑁆𑀢𑀓𑀮𑁄𑀳𑀦𑁆𑀢𑀺 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀚𑀸𑀢𑀺𑀮𑁄𑀳𑁂𑀳𑀺 𑀲𑀤𑁆𑀥𑀺𑀁 𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀇𑀥 𑀮𑁄𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀧𑀽𑀢𑀺 𑀲𑁂𑀢𑀢𑀺𑀧𑀼. 𑀲𑀻𑀲𑀦𑁆𑀢𑀺 𑀓𑀸𑀴𑀢𑀺𑀧𑀼. 𑀲𑀚𑁆𑀛𑀽𑀢𑀺 ¶ 𑀭𑀚𑀢𑀁. 𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸. 𑀫𑀡𑀻𑀢𑀺 𑀞𑀧𑁂𑀢𑁆𑀯𑀸 𑀧𑀸𑀴𑀺𑀆𑀕𑀢𑁂 𑀯𑁂𑀴𑀼𑀭𑀺𑀬𑀸𑀤𑀬𑁄 𑀲𑁂𑀲𑁄 𑀚𑁄𑀢𑀺𑀭𑀲𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀯𑀁𑀲𑀯𑀡𑁆𑀡𑀫𑀡𑀺. 𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸, 𑀧𑀡𑁆𑀟𑀼𑀲𑀺𑀮𑀸, 𑀲𑁂𑀢𑀲𑀺𑀮𑀸𑀢𑀺𑀆𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀲𑀺𑀮𑀸. 𑀧𑀯𑀸𑀴𑀦𑁆𑀢𑀺 𑀧𑀯𑀸𑀴𑀫𑁂𑀯. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑁄. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀮𑁄𑀳𑀺𑀢𑀗𑁆𑀓𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀫𑀡𑀺. 𑀢𑀺𑀡𑀸𑀤𑀻𑀲𑀼 𑀩𑀳𑀺𑀲𑀸𑀭𑀸 𑀅𑀦𑁆𑀢𑀫𑀲𑁄 𑀦𑀸𑀴𑀺𑀓𑁂𑀭𑀸𑀤𑀬𑁄𑀧𑀺 𑀢𑀺𑀡𑀁 𑀦𑀸𑀫. 𑀅𑀦𑁆𑀢𑁄𑀲𑀸𑀭𑀁 𑀅𑀦𑁆𑀢𑀫𑀲𑁄 𑀤𑀸𑀭𑀼𑀔𑀡𑁆𑀟𑀫𑁆𑀧𑀺 𑀓𑀝𑁆𑀞𑀁 𑀦𑀸𑀫. 𑀲𑀓𑁆𑀔𑀭𑀸𑀢𑀺 𑀫𑀼𑀕𑁆𑀕𑀫𑀢𑁆𑀢𑀢𑁄 𑀬𑀸𑀯 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀫𑀭𑀼𑀫𑁆𑀩𑀸 𑀲𑀓𑁆𑀔𑀭𑀸 𑀦𑀸𑀫. 𑀫𑀼𑀕𑁆𑀕𑀫𑀢𑁆𑀢𑀢𑁄 𑀧𑀦 𑀳𑁂𑀝𑁆𑀞𑀸 𑀯𑀸𑀮𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀞𑀮𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀧𑀸𑀮𑀁. 𑀪𑀽𑀫𑀻𑀢𑀺 𑀧𑀣𑀯𑀻. 𑀧𑀸𑀲𑀸𑀡𑁄𑀢𑀺 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀅𑀲𑀡𑁆𑀞𑀳𑀦𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀅𑀲𑀫𑁆𑀧𑀢𑁆𑀢𑁄 𑀧𑀸𑀲𑀸𑀡𑁄 𑀦𑀸𑀫. 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑀭𑀺 𑀧𑀩𑁆𑀩𑀢𑁄 ¶ 𑀦𑀸𑀫. 𑀬𑀁 𑀯𑀸 𑀧𑀦𑀸𑀢𑀺 𑀇𑀫𑀺𑀦𑀸 𑀢𑀸𑀮𑀝𑁆𑀞𑀺-𑀦𑀸𑀴𑀺𑀓𑁂𑀭-𑀨𑀮𑀸𑀤𑀺𑀪𑁂𑀤𑀁 𑀲𑁂𑀲𑀧𑀣𑀯𑀺𑀁 𑀕𑀡𑁆𑀳𑀸𑀢𑀺. 𑀬𑀸 𑀘 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀬𑀸 𑀘 𑀩𑀸𑀳𑀺𑀭𑀸𑀢𑀺 𑀇𑀫𑀺𑀦𑀸 𑀤𑁆𑀯𑁂𑀧𑀺 𑀧𑀣𑀯𑀻𑀥𑀸𑀢𑀼𑀬𑁄 𑀓𑀓𑁆𑀔𑀴𑀝𑁆𑀞𑁂𑀦 𑀮𑀓𑁆𑀔𑀡𑀢𑁄 𑀏𑀓𑀸 𑀧𑀣𑀯𑀻𑀥𑀸𑀢𑀼 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁭𑁪. 𑀆𑀧𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀆𑀧𑁄 𑀆𑀧𑁄𑀕𑀢𑀦𑁆𑀢𑀺𑀆𑀤𑀻𑀲𑀼 𑀆𑀩𑀦𑁆𑀥𑀦𑀯𑀲𑁂𑀦 𑀆𑀧𑁄. 𑀢𑀤𑁂𑀯 𑀆𑀧𑁄𑀲𑀪𑀸𑀯𑀁 𑀕𑀢𑀢𑁆𑀢𑀸 𑀆𑀧𑁄𑀕𑀢𑀁 𑀦𑀸𑀫. 𑀲𑁆𑀦𑁂𑀳𑀯𑀲𑁂𑀦 𑀲𑁆𑀦𑁂𑀳𑁄. 𑀲𑁄𑀬𑁂𑀯 𑀲𑁆𑀦𑁂𑀳𑀲𑀪𑀸𑀯𑀁 𑀕𑀢𑀢𑁆𑀢𑀸 𑀲𑁆𑀦𑁂𑀳𑀕𑀢𑀁 𑀦𑀸𑀫. 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲𑀸𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀲𑁆𑀲 𑀩𑀦𑁆𑀥𑀦𑀪𑀸𑀯𑁄. 𑀧𑀺𑀢𑁆𑀢𑀁 𑀲𑁂𑀫𑁆𑀳𑀦𑁆𑀢𑀺𑀆𑀤𑀻𑀦𑀺𑀧𑀺 ¶ 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 ¶ 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀥𑀸𑀢𑀼𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀧𑀺𑀢𑁆𑀢𑁂𑀲𑀼 𑀳𑀺 𑀅𑀩𑀤𑁆𑀥𑀧𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁, 𑀩𑀤𑁆𑀥𑀧𑀺𑀢𑁆𑀢𑀁 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀧𑀽𑀯𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑁂 𑀢𑁂𑀮𑁂 𑀦 𑀧𑀽𑀯𑀁 𑀚𑀸𑀦𑀸𑀢𑀺 ‘𑀢𑁂𑀮𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 ‘𑀅𑀳𑀁 𑀧𑀽𑀯𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀁 𑀚𑀸𑀦𑀸𑀢𑀺 ‘𑀅𑀩𑀤𑁆𑀥𑀧𑀺𑀢𑁆𑀢𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀅𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 ‘𑀅𑀳𑀁 𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’𑀦𑁆𑀢𑀺. 𑀬𑀣𑀸 𑀘 𑀯𑀲𑁆𑀲𑁄𑀤𑀓𑁂𑀦 𑀧𑀼𑀡𑁆𑀡𑁂 𑀓𑁄𑀲𑀸𑀢𑀓𑀻𑀓𑁄𑀲𑀓𑁂 𑀦 𑀓𑁄𑀲𑀸𑀢𑀓𑀻𑀓𑁄𑀲𑀓𑁄 𑀚𑀸𑀦𑀸𑀢𑀺 ‘𑀫𑀬𑀺 𑀯𑀲𑁆𑀲𑁄𑀤𑀓𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀯𑀲𑁆𑀲𑁄𑀤𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀓𑁄𑀲𑀸𑀢𑀓𑀻𑀓𑁄𑀲𑀓𑁂 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀧𑀺𑀢𑁆𑀢𑀓𑁄𑀲𑀓𑁄 𑀚𑀸𑀦𑀸𑀢𑀺 𑀫𑀬𑀺 𑀩𑀤𑁆𑀥𑀧𑀺𑀢𑁆𑀢𑀁 𑀞𑀺𑀢𑀦𑁆𑀢𑀺, 𑀦𑀸𑀧𑀺 𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 ‘𑀅𑀳𑀁 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀺𑀢𑁆𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀲𑁂𑀫𑁆𑀳𑀁 𑀏𑀓𑀧𑀢𑁆𑀣𑀧𑀽𑀭𑀧𑁆𑀧𑀫𑀸𑀡𑀁 𑀉𑀤𑀭𑀧𑀝𑀮𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀉𑀧𑀭𑀺 𑀲𑀜𑁆𑀚𑀸𑀢𑀨𑁂𑀡𑀧𑀝𑀮𑀸𑀬 𑀘𑀦𑁆𑀤𑀦𑀺𑀓𑀸𑀬 𑀦 𑀘𑀦𑁆𑀤𑀦𑀺𑀓𑀸 𑀚𑀸𑀦𑀸𑀢𑀺 ‘𑀫𑀬𑀺 𑀨𑁂𑀡𑀧𑀝𑀮𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀨𑁂𑀡𑀧𑀝𑀮𑀁 𑀚𑀸𑀦𑀸𑀢𑀺 ‘𑀅𑀳𑀁 𑀘𑀦𑁆𑀤𑀦𑀺𑀓𑀸𑀬 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀉𑀤𑀭𑀧𑀝𑀮𑀁 𑀚𑀸𑀦𑀸𑀢𑀺 ‘𑀫𑀬𑀺 𑀲𑁂𑀫𑁆𑀳𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀲𑁂𑀫𑁆𑀳𑀁 𑀚𑀸𑀦𑀸𑀢𑀺 ‘𑀅𑀳𑀁 𑀉𑀤𑀭𑀧𑀝𑀮𑁂 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑁂𑀫𑁆𑀳𑀁 ¶ 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀧𑀼𑀩𑁆𑀩𑁄 𑀅𑀦𑀺𑀩𑀤𑁆𑀥𑁄𑀓𑀸𑀲𑁄, 𑀬𑀢𑁆𑀣 𑀬𑀢𑁆𑀣𑁂𑀯 𑀔𑀸𑀡𑀼𑀓𑀡𑁆𑀝𑀓𑀧𑁆𑀧𑀳𑀭𑀡𑀅𑀕𑁆𑀕𑀺𑀚𑀸𑀮𑀸𑀤𑀻𑀳𑀺 𑀅𑀪𑀺𑀳𑀝𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀮𑁄𑀳𑀺𑀢𑀁 𑀲𑀡𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀢𑀺, 𑀕𑀡𑁆𑀟𑀧𑀻𑀴𑀓𑀸𑀤𑀬𑁄 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀬𑀣𑀸 𑀨𑀭𑀲𑀼𑀧𑁆𑀧𑀳𑀸𑀭𑀸𑀤𑀺𑀯𑀲𑁂𑀦 𑀧𑀕𑁆𑀖𑀭𑀺𑀢𑀦𑀺𑀬𑀸𑀲𑁂 𑀭𑀼𑀓𑁆𑀔𑁂 𑀦 𑀭𑀼𑀓𑁆𑀔𑀲𑁆𑀲 𑀨𑀭𑀲𑀼𑀧𑁆𑀧𑀳𑀸𑀭𑀸𑀤𑀺𑀧𑁆𑀧𑀤𑁂𑀲𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀦𑀺𑀬𑁆𑀬𑀸𑀲𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀦𑀺𑀬𑁆𑀬𑀸𑀲𑁄 𑀚𑀸𑀦𑀸𑀢𑀺 ‘𑀅𑀳𑀁 𑀭𑀼𑀓𑁆𑀔𑀲𑁆𑀲 𑀨𑀭𑀲𑀼𑀧𑁆𑀧𑀳𑀸𑀭𑀸𑀤𑀺𑀧𑁆𑀧𑀤𑁂𑀲𑁂𑀲𑀼 𑀞𑀺𑀢𑁄’𑀢𑀺, 𑀏𑀯𑀫𑁂𑀯 𑀦 𑀲𑀭𑀻𑀭𑀲𑁆𑀲 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀅𑀪𑀺𑀳𑀝𑀧𑁆𑀧𑀤𑁂𑀲𑀸 𑀚𑀸𑀦𑀦𑁆𑀢𑀺 ¶ ‘𑀅𑀫𑁆𑀳𑁂𑀲𑀼 𑀧𑀼𑀩𑁆𑀩𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 ‘𑀅𑀳𑀁 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀞𑀺𑀢𑁄’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀧𑀼𑀩𑁆𑀩𑁄 𑀦𑀸𑀫 𑀇𑀫𑀲𑁆𑀫𑀺𑀁 ¶ 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀮𑁄𑀳𑀺𑀢𑁂𑀲𑀼 𑀲𑀁𑀲𑀭𑀡𑀮𑁄𑀳𑀺𑀢𑀁 𑀅𑀩𑀤𑁆𑀥𑀧𑀺𑀢𑁆𑀢𑀁 𑀯𑀺𑀬 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁. 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀬𑀓𑀦𑀝𑁆𑀞𑀸𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀏𑀓𑀧𑀢𑁆𑀢𑀧𑀽𑀭𑀡𑀧𑁆𑀧𑀫𑀸𑀡𑀁 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑀸𑀦𑀺 𑀢𑁂𑀫𑁂𑀦𑁆𑀢𑀁 𑀞𑀺𑀢𑀁. 𑀢𑀢𑁆𑀣 𑀲𑀁𑀲𑀭𑀡𑀮𑁄𑀳𑀺𑀢𑁂 𑀅𑀩𑀤𑁆𑀥𑀧𑀺𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀇𑀢𑀭𑀁 𑀧𑀦 𑀬𑀣𑀸 𑀚𑀚𑁆𑀚𑀭𑀓𑀧𑀸𑀮𑀝𑁆𑀞𑁂 𑀉𑀤𑀓𑁂 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀦𑀺 𑀢𑁂𑀫𑀬𑀫𑀸𑀦𑁂 𑀦 𑀮𑁂𑀟𑁆𑀟𑀼𑀔𑀡𑁆𑀟𑀸𑀦𑀺 𑀚𑀸𑀦𑀦𑁆𑀢𑀺 ‘𑀫𑀬𑀁 𑀉𑀤𑀓𑁂𑀦 𑀢𑁂𑀫𑀺𑀬𑀫𑀸𑀦𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀮𑁂𑀟𑁆𑀟𑀼𑀔𑀡𑁆𑀟𑀸𑀦𑀺 𑀢𑁂𑀫𑁂𑀫𑀻’𑀢𑀺, 𑀏𑀯𑀫𑁂𑀯 𑀦 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀝𑁆𑀞𑀸𑀦𑀁 𑀯𑀓𑁆𑀓𑀸𑀤𑀻𑀦𑀺 𑀯𑀸 𑀚𑀸𑀦𑀦𑁆𑀢𑀺 ‘𑀫𑀬𑀺 𑀮𑁄𑀳𑀺𑀢𑀁 𑀞𑀺𑀢𑀁, 𑀅𑀫𑁆𑀳𑁂 𑀯𑀸 𑀢𑁂𑀫𑀬𑀫𑀸𑀦𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀮𑁄𑀳𑀺𑀢𑀁 𑀚𑀸𑀦𑀸𑀢𑀺 ‘𑀅𑀳𑀁 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀯𑀓𑁆𑀓𑀸𑀤𑀻𑀦𑀺 𑀢𑁂𑀫𑀬𑀫𑀸𑀦𑀁 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑁄𑀳𑀺𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀲𑁂𑀤𑁄 ¶ 𑀅𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀓𑀸𑀮𑁂𑀲𑀼 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂𑀯 𑀧𑀕𑁆𑀖𑀭𑀢𑀺 𑀘. 𑀢𑀢𑁆𑀣 𑀬𑀣𑀸 𑀉𑀤𑀓𑀸 𑀅𑀩𑁆𑀩𑀽𑀴𑁆𑀳𑀫𑀢𑁆𑀢𑁂𑀲𑀼 𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀴𑀓𑀮𑀸𑀧𑁂𑀲𑀼 𑀦 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑀸𑀦𑀺 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀳𑀺 𑀉𑀤𑀓𑀁 𑀧𑀕𑁆𑀖𑀭𑀢𑀻’𑀢𑀺, 𑀦𑀸𑀧𑀺 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀦𑁆𑀢𑀁 𑀉𑀤𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀪𑀺𑀲𑀸𑀤𑀺𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻’𑀢𑀺, 𑀏𑀯𑀫𑁂𑀯 𑀦 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀺 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀳𑀺 𑀲𑁂𑀤𑁄 𑀧𑀕𑁆𑀖𑀭𑀢𑀻’𑀢𑀺, 𑀦𑀸𑀧𑀺 𑀲𑁂𑀤𑁄 𑀚𑀸𑀦𑀸𑀢𑀺 ‘𑀅𑀳𑀁 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑁂𑀤𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀫𑁂𑀤𑁄 𑀣𑀽𑀮𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀓𑀺𑀲𑀲𑁆𑀲 𑀚𑀗𑁆𑀖𑀫𑀁𑀲𑀸𑀤𑀻𑀦𑀺 ¶ 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀢𑁆𑀣𑀺𑀦𑁆𑀦𑀲𑁆𑀦𑁂𑀳𑁄. 𑀢𑀢𑁆𑀣 𑀬𑀣𑀸 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀧𑀝𑀺𑀘𑁆𑀙𑀦𑁆𑀦𑁂 𑀫𑀁𑀲𑀧𑀼𑀜𑁆𑀚𑁂 𑀦 𑀫𑀁𑀲𑀧𑀼𑀜𑁆𑀚𑁄 𑀚𑀸𑀦𑀸𑀢𑀺 ‘𑀫𑀁 𑀦𑀺𑀲𑁆𑀲𑀸𑀬 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸 𑀚𑀸𑀦𑀸𑀢𑀺 ‘𑀅𑀳𑀁 𑀫𑀁𑀲𑀧𑀼𑀜𑁆𑀚𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’𑀢𑀺, 𑀏𑀯𑀫𑁂𑀯 𑀦 𑀲𑀓𑀮𑀲𑀭𑀻𑀭𑁂 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 𑀚𑀸𑀦𑀸𑀢𑀺 ‘𑀫𑀁 𑀦𑀺𑀲𑁆𑀲𑀸𑀬 𑀫𑁂𑀤𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀫𑁂𑀤𑁄 𑀚𑀸𑀦𑀸𑀢𑀺 ‘𑀅𑀳𑀁 𑀲𑀓𑀮𑀲𑀭𑀻𑀭𑁂 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑁂𑀤𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 ¶ 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀢𑁆𑀣𑀺𑀦𑁆𑀦𑀲𑁆𑀦𑁂𑀳𑁄 𑀧𑀢𑁆𑀣𑀺𑀦𑁆𑀦𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀅𑀲𑁆𑀲𑀼 𑀬𑀤𑀸 𑀲𑀜𑁆𑀚𑀸𑀬𑀢𑀺 𑀢𑀤𑀸 𑀅𑀓𑁆𑀔𑀺𑀓𑀽𑀧𑀓𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀢𑀢𑁆𑀣 𑀬𑀣𑀸 𑀉𑀤𑀓𑀧𑀼𑀡𑁆𑀡𑁂𑀲𑀼 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀦 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀉𑀤𑀓𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀅𑀓𑁆𑀔𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀅𑀲𑁆𑀲𑀼 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀅𑀲𑁆𑀲𑀼 𑀚𑀸𑀦𑀸𑀢𑀺 ‘𑀅𑀳𑀁 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀅𑀲𑁆𑀲𑀼 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀯𑀲𑀸 𑀅𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀓𑀸𑀮𑁂 𑀳𑀢𑁆𑀣𑀢𑀮𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀢𑀮𑀧𑀸𑀤𑀧𑀺𑀝𑁆𑀞𑀺𑀦𑀸𑀲𑀧𑀼𑀝𑀦𑀮𑀸𑀝𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀯𑀺𑀮𑀻𑀦𑀲𑁆𑀦𑁂𑀳𑁄. 𑀢𑀢𑁆𑀣 𑀬𑀣𑀸 𑀧𑀓𑁆𑀔𑀺𑀢𑁆𑀢𑀢𑁂𑀮𑁂 𑀆𑀘𑀸𑀫𑁂 ¶ 𑀦 𑀆𑀘𑀸𑀫𑁄 𑀚𑀸𑀦𑀸𑀢𑀺 ‘𑀫𑀁 𑀢𑁂𑀮𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 ‘𑀅𑀳𑀁 𑀆𑀘𑀸𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀳𑀢𑁆𑀣𑀢𑀮𑀸𑀤𑀺𑀧𑁆𑀧𑀤𑁂𑀲𑁄 𑀚𑀸𑀦𑀸𑀢𑀺 ‘𑀫𑀁 𑀯𑀲𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀯𑀲𑀸 𑀚𑀸𑀦𑀸𑀢𑀺 ‘𑀅𑀳𑀁 𑀳𑀢𑁆𑀣𑀢𑀮𑀸𑀤𑀺𑀧𑁆𑀧𑀤𑁂𑀲𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀯𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀔𑁂𑀴𑁄 𑀢𑀣𑀸𑀭𑀽𑀧𑁂 𑀔𑁂𑀴𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑁂 𑀲𑀢𑀺 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀬 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀬𑀣𑀸 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀉𑀤𑀓𑀦𑀺𑀲𑁆𑀲𑀦𑁆𑀤𑁂 𑀦𑀤𑀻𑀢𑀻𑀭𑀓𑀽𑀧𑀓𑁂 𑀦 𑀓𑀽𑀧𑀢𑀮𑀁 𑀚𑀸𑀦𑀸𑀢𑀺 ‘𑀫𑀬𑀺 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀻’𑀢𑀺, 𑀦𑀸𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 ‘𑀅𑀳𑀁 𑀓𑀽𑀧𑀢𑀮𑁂 𑀲𑀦𑁆𑀢𑀺𑀝𑁆𑀞𑀸𑀫𑀻’𑀢𑀺 ¶ , 𑀏𑀯𑀫𑁂𑀯 𑀦 𑀚𑀺𑀯𑁆𑀳𑀸𑀢𑀮𑀁 𑀚𑀸𑀦𑀸𑀢𑀺 ‘𑀫𑀬𑀺 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀔𑁂𑀴𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀔𑁂𑀴𑁄 𑀚𑀸𑀦𑀸𑀢𑀺 ‘𑀅𑀳𑀁 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀢𑀮𑁂 𑀞𑀺𑀢𑁄’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀔𑁂𑀴𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀲𑀺𑀗𑁆𑀖𑀸𑀡𑀺𑀓𑀸 𑀬𑀤𑀸 𑀲𑀜𑁆𑀚𑀸𑀬𑀢𑀺 𑀢𑀤𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀢𑀢𑁆𑀣 𑀬𑀣𑀸 ¶ 𑀧𑀽𑀢𑀺𑀤𑀥𑀺𑀪𑀭𑀺𑀢𑀸𑀬 𑀲𑀺𑀧𑁆𑀧𑀺𑀓𑀸𑀬 𑀦 𑀲𑀺𑀧𑁆𑀧𑀺𑀓𑀸 𑀚𑀸𑀦𑀸𑀢𑀺 ‘𑀫𑀬𑀺 𑀧𑀽𑀢𑀺𑀤𑀥𑀺 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀧𑀽𑀢𑀺𑀤𑀥𑀺 𑀚𑀸𑀦𑀸𑀢𑀺 ‘𑀅𑀳𑀁 𑀲𑀺𑀧𑁆𑀧𑀺𑀓𑀸𑀬 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀦𑀸𑀲𑀸𑀧𑀼𑀝𑀸 𑀚𑀸𑀦𑀦𑁆𑀢𑀺 ‘𑀅𑀫𑁆𑀳𑁂𑀲𑀼 𑀲𑀺𑀗𑁆𑀖𑀸𑀡𑀺𑀓𑀸 𑀞𑀺𑀢𑀸’𑀢𑀺, 𑀦𑀸𑀧𑀺 𑀲𑀺𑀗𑁆𑀖𑀸𑀡𑀺𑀓𑀸 𑀚𑀸𑀦𑀸𑀢𑀺 ‘𑀅𑀳𑀁 𑀦𑀸𑀲𑀸𑀧𑀼𑀝𑁂𑀲𑀼 𑀞𑀺𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀲𑀺𑀗𑁆𑀖𑀸𑀡𑀺𑀓𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀮𑀲𑀺𑀓𑀸 𑀅𑀝𑁆𑀞𑀺𑀓𑀲𑀦𑁆𑀥𑀻𑀦𑀁 𑀅𑀩𑁆𑀪𑀜𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀲𑀻𑀢𑀺𑀲𑀢𑀲𑀦𑁆𑀥𑀻𑀲𑀼 𑀞𑀺𑀢𑀸. 𑀢𑀢𑁆𑀣 𑀬𑀣𑀸 𑀢𑁂𑀮𑀩𑁆𑀪𑀜𑁆𑀚𑀺𑀢𑁂 𑀅𑀓𑁆𑀔𑁂 𑀦 𑀅𑀓𑁆𑀔𑁄 𑀚𑀸𑀦𑀸𑀢𑀺 ‘𑀫𑀁 𑀢𑁂𑀮𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀢𑁂𑀮𑀁 𑀚𑀸𑀦𑀸𑀢𑀺 ‘𑀅𑀳𑀁 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺, 𑀏𑀯𑀫𑁂𑀯 𑀦 𑀅𑀲𑀻𑀢𑀺𑀲𑀢𑀲𑀦𑁆𑀥𑀬𑁄 𑀚𑀸𑀦𑀦𑁆𑀢𑀺 ‘𑀮𑀲𑀺𑀓𑀸 𑀅𑀫𑁆𑀳𑁂 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 ¶ 𑀞𑀺𑀢𑀸’𑀢𑀺, 𑀦𑀸𑀧𑀺 𑀮𑀲𑀺𑀓𑀸 𑀚𑀸𑀦𑀸𑀢𑀺 ‘𑀅𑀳𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀬𑁄 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀸’𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀮𑀲𑀺𑀓𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺.

𑀫𑀼𑀢𑁆𑀢𑀁 𑀯𑀢𑁆𑀣𑀺𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀢𑀢𑁆𑀣 𑀬𑀣𑀸 𑀘𑀦𑁆𑀤𑀦𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑁂 𑀅𑀥𑁄𑀫𑀼𑀔𑁂 𑀭𑀯𑀡𑀖𑀝𑁂 𑀦 𑀭𑀯𑀡𑀖𑀝𑁄 𑀚𑀸𑀦𑀸𑀢𑀺 ‘𑀫𑀬𑀺 𑀘𑀦𑁆𑀤𑀦𑀺𑀓𑀸𑀭𑀲𑁄 𑀞𑀺𑀢𑁄’𑀢𑀺, 𑀦𑀸𑀧𑀺 𑀘𑀦𑁆𑀤𑀦𑀺𑀓𑀸𑀭𑀲𑁄 𑀚𑀸𑀦𑀸𑀢𑀺 ‘𑀅𑀳𑀁 𑀭𑀯𑀡𑀖𑀝𑁂 𑀞𑀺𑀢𑁄’𑀢𑀺, 𑀏𑀯𑀫𑁂𑀯 𑀦 𑀯𑀢𑁆𑀣𑀺 𑀚𑀸𑀦𑀸𑀢𑀺 ‘𑀫𑀬𑀺 𑀫𑀼𑀢𑁆𑀢𑀁 𑀞𑀺𑀢’𑀦𑁆𑀢𑀺, 𑀦𑀸𑀧𑀺 𑀫𑀼𑀢𑁆𑀢𑀁 𑀚𑀸𑀦𑀸𑀢𑀺 ‘𑀅𑀳𑀁 𑀯𑀢𑁆𑀣𑀺𑀫𑁆𑀳𑀺 𑀞𑀺𑀢’𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 𑀫𑀼𑀢𑁆𑀢𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀬𑀽𑀲𑀪𑀽𑀢𑁄 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄𑀥𑀸𑀢𑀽𑀢𑀺. 𑀬𑀁 𑀯𑀸 𑀧𑀦𑀸𑀢𑀺 𑀅𑀯𑀲𑁂𑀲𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀆𑀧𑁄𑀥𑀸𑀢𑀼𑀁 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁.

𑀩𑀸𑀳𑀺𑀭𑀆𑀧𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀫𑀽𑀮𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑁄 𑀭𑀲𑁄 𑀫𑀽𑀮𑀭𑀲𑁄 𑀦𑀸𑀫. 𑀔𑀦𑁆𑀥𑀭𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀔𑀻𑀭𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯. 𑀬𑀣𑀸 𑀧𑀦 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂 𑀏𑀯𑀫𑀺𑀥 𑀦𑀺𑀬𑀫𑁄 𑀦𑀢𑁆𑀣𑀺. 𑀬𑀁 𑀓𑀺𑀜𑁆𑀘𑀺 𑀔𑀻𑀭𑀁 𑀔𑀻𑀭𑀫𑁂𑀯. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀼𑀫𑁆𑀫𑀸𑀦𑀻𑀢𑀺 𑀆𑀯𑀸𑀝𑀸𑀤𑀻𑀲𑀼 𑀞𑀺𑀢𑀉𑀤𑀓𑀸𑀦𑀺. 𑀅𑀦𑁆𑀢𑀮𑀺𑀓𑁆𑀔𑀸𑀦𑀻𑀢𑀺 𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀸𑀦𑀺 𑀯𑀲𑁆𑀲𑁄𑀤𑀓𑀸𑀦𑀺. 𑀬𑀁 𑀯𑀸 𑀧𑀦𑀸𑀢𑀺 𑀳𑀺𑀫𑁄𑀤𑀓𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀸𑀤𑀻𑀦𑀺 𑀇𑀥 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸𑀦𑀺.

𑁧𑁭𑁫. 𑀢𑁂𑀚𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ¶ 𑀢𑁂𑀚𑀦𑀯𑀲𑁂𑀦 𑀢𑁂𑀚𑁄. 𑀢𑁂𑀚𑁄𑀯 𑀢𑁂𑀚𑁄𑀪𑀸𑀯𑀁 𑀕𑀢𑀢𑁆𑀢𑀸 𑀢𑁂𑀚𑁄𑀕𑀢𑀁. 𑀉𑀲𑁆𑀫𑀸𑀢𑀺 𑀉𑀡𑁆𑀳𑀸𑀓𑀸𑀭𑁄. 𑀉𑀲𑁆𑀫𑀸𑀯 𑀉𑀲𑁆𑀫𑀸𑀪𑀸𑀯𑀁 𑀕𑀢𑀢𑁆𑀢𑀸 𑀉𑀲𑁆𑀫𑀸𑀕𑀢𑀁. 𑀉𑀲𑀼𑀫𑀦𑁆𑀢𑀺 𑀘𑀡𑁆𑀟𑀉𑀲𑀼𑀫𑀁. 𑀢𑀤𑁂𑀯 𑀉𑀲𑀼𑀫𑀪𑀸𑀯𑀁 𑀕𑀢𑀢𑁆𑀢𑀸 𑀉𑀲𑀼𑀫𑀕𑀢𑀁. 𑀬𑁂𑀦 𑀘𑀸𑀢𑀺 𑀬𑁂𑀦 𑀢𑁂𑀚𑁄𑀕𑀢𑁂𑀦 𑀓𑀼𑀧𑁆𑀧𑀺𑀢𑁂𑀦. 𑀲𑀦𑁆𑀢𑀧𑁆𑀧𑀢𑀻𑀢𑀺 𑀅𑀬𑀁 𑀓𑀸𑀬𑁄 𑀲𑀦𑁆𑀢𑀧𑁆𑀧𑀢𑀺, 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦 𑀉𑀲𑀼𑀫𑀚𑀸𑀢𑁄 𑀳𑁄𑀢𑀺. 𑀬𑁂𑀦 𑀘 𑀚𑀻𑀭𑀻𑀬𑀢𑀻𑀢𑀺 𑀬𑁂𑀦 𑀅𑀬𑀁 𑀓𑀸𑀬𑁄 𑀚𑀻𑀭𑀻𑀬𑀢𑀺, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑀁 𑀩𑀮𑀧𑀭𑀺𑀓𑁆𑀔𑀬𑀁 𑀯𑀮𑀺𑀧𑀮𑀺𑀢𑀸𑀤𑀺𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀻𑀢𑀺 𑀬𑁂𑀦 𑀓𑀼𑀧𑁆𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀟𑀬𑁆𑀳𑀢𑀺, 𑀲𑁄 𑀘 ¶ 𑀧𑀼𑀕𑁆𑀕𑀮𑁄 ‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’𑀢𑀺 𑀓𑀦𑁆𑀤𑀦𑁆𑀢𑁄 𑀲𑀢𑀥𑁄𑀢𑀲𑀧𑁆𑀧𑀺𑀕𑁄𑀲𑀻𑀢𑀘𑀦𑁆𑀤𑀦𑀸𑀤𑀺𑀮𑁂𑀧𑀦𑀜𑁆𑀘𑁂𑀯 𑀢𑀸𑀮𑀯𑀡𑁆𑀝𑀯𑀸𑀢𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺. 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀬𑁂𑀦𑁂𑀢𑀁 𑀅𑀲𑀺𑀢𑀁 𑀯𑀸 𑀑𑀤𑀦𑀸𑀤𑀺, 𑀧𑀻𑀢𑀁 𑀯𑀸 𑀧𑀸𑀦𑀓𑀸𑀤𑀺, 𑀔𑀸𑀬𑀺𑀢𑀁 𑀯𑀸 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺, 𑀲𑀸𑀬𑀺𑀢𑀁 𑀯𑀸 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀭𑀲𑀸𑀤𑀺𑀪𑀸𑀯𑁂𑀦 𑀯𑀺𑀯𑁂𑀓𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀢𑀬𑁄 𑀢𑁂𑀚𑁄𑀥𑀸𑀢𑀽 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀧𑀘𑁆𑀙𑀺𑀫𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀲𑀁𑀯𑀡𑁆𑀡𑀦𑀸.

𑀇𑀤𑀁 𑀧𑀦 𑀫𑀦𑀲𑀺𑀓𑀸𑀭𑀯𑀺𑀥𑀸𑀦𑀁 𑁋 𑀇𑀥 𑀪𑀺𑀓𑁆𑀔𑀼 ‘𑀬𑁂𑀦 𑀲𑀦𑁆𑀢𑀧𑁆𑀧𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀭𑀺𑀧𑀸𑀘𑀦𑀸𑀓𑀸𑀭𑁄 𑀢𑁂𑀚𑁄𑀥𑀸𑀢𑀽’𑀢𑀺 𑀫𑀦𑀲𑀺 𑀓𑀭𑁄𑀢𑀺; ‘𑀬𑁂𑀦 𑀚𑀻𑀭𑀻𑀬𑀢𑀺, 𑀬𑁂𑀦 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 ¶ 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀧𑀭𑀺𑀧𑀸𑀘𑀦𑀸𑀓𑀸𑀭𑁄 𑀢𑁂𑀚𑁄𑀥𑀸𑀢𑀽’𑀢𑀺 𑀫𑀦𑀲𑀺 𑀓𑀭𑁄𑀢𑀺. 𑀬𑀁 𑀯𑀸 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀓𑀢𑀺𑀓𑁄 𑀏𑀓𑁄 𑀉𑀢𑀼 𑀅𑀢𑁆𑀣𑀺, 𑀲𑁄 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑁄.

𑀩𑀸𑀳𑀺𑀭𑀢𑁂𑀚𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀓𑀝𑁆𑀞𑀁 𑀧𑀝𑀺𑀘𑁆𑀘 𑀧𑀚𑁆𑀚𑀮𑀺𑀢𑁄 𑀓𑀝𑁆𑀞𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀓𑀝𑁆𑀞𑀕𑁆𑀕𑀺 𑀦𑀸𑀫. 𑀲𑀓𑀮𑀺𑀓𑀕𑁆𑀕𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀓𑀸𑀭𑀕𑁆𑀕𑀻𑀢𑀺 𑀓𑀘𑀯𑀭𑀁 𑀲𑀁𑀓𑀟𑁆𑀠𑀺𑀢𑁆𑀯𑀸 𑀚𑀸𑀮𑀸𑀧𑀺𑀢𑁄 𑀓𑀘𑀯𑀭𑀕𑁆𑀕𑀺. 𑀇𑀦𑁆𑀤𑀕𑁆𑀕𑀻𑀢𑀺 𑀅𑀲𑀦𑀺𑀅𑀕𑁆𑀕𑀺. 𑀅𑀕𑁆𑀕𑀺𑀲𑀦𑁆𑀢𑀸𑀧𑁄𑀢𑀺 𑀚𑀸𑀮𑀸𑀬 𑀯𑀸 𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑀸𑀦𑀁 𑀯𑀸 𑀲𑀦𑁆𑀢𑀸𑀧𑁄. 𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀢𑀺 𑀆𑀢𑀧𑁄. 𑀓𑀝𑁆𑀞𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄𑀢𑀺 𑀓𑀝𑁆𑀞𑀭𑀸𑀲𑀺𑀝𑁆𑀞𑀸𑀦𑁂 𑀲𑀦𑁆𑀢𑀸𑀧𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀯𑀸 𑀧𑀦𑀸𑀢𑀺 𑀧𑁂𑀢𑀕𑁆𑀕𑀺 𑀓𑀧𑁆𑀧𑀯𑀺𑀦𑀸𑀲𑀕𑁆𑀕𑀺 𑀦𑀺𑀭𑀬𑀕𑁆𑀕𑀺𑀆𑀤𑀬𑁄 𑀇𑀥 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸.

𑁧𑁭𑁬. 𑀯𑀸𑀬𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀯𑀸𑀬𑀦𑀯𑀲𑁂𑀦 𑀯𑀸𑀬𑁄. 𑀯𑀸𑀬𑁄𑀯 𑀯𑀸𑀬𑁄𑀪𑀸𑀯𑀁 𑀕𑀢𑀢𑁆𑀢𑀸 𑀯𑀸𑀬𑁄𑀕𑀢𑀁. 𑀣𑀫𑁆𑀪𑀺𑀢𑀢𑁆𑀢𑀁 𑀭𑀽𑀧𑀲𑁆𑀲𑀸𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀲𑁆𑀲 𑀣𑀫𑁆𑀪𑀺𑀢𑀪𑀸𑀯𑁄. 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀢𑀺 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀤𑀺 𑀧𑀯𑀢𑁆𑀢𑀓𑀸 𑀉𑀤𑁆𑀥𑀁 𑀆𑀭𑁄𑀳𑀦𑀯𑀸𑀢𑀸 ¶ . 𑀅𑀥𑁄𑀕𑀫𑀸 𑀯𑀸𑀢𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀦𑀻𑀳𑀭𑀡𑀓𑀸 𑀅𑀥𑁄 𑀑𑀭𑁄𑀳𑀦𑀯𑀸𑀢𑀸. 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸. 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄𑀯𑀸𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸𑀢𑀺 𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀝𑀸 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀸 ¶ 𑀯𑀸𑀢𑀸. 𑀲𑀢𑁆𑀣𑀓𑀯𑀸𑀢𑀸𑀢𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺 𑀓𑀢𑁆𑀢𑀭𑀺𑀬𑀸 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀯𑀸𑀢𑀸. 𑀔𑀼𑀭𑀓𑀯𑀸𑀢𑀸𑀢𑀺 𑀔𑀼𑀭𑁂𑀦 𑀯𑀺𑀬 𑀳𑀤𑀬𑀁 𑀨𑀸𑀮𑀦𑀯𑀸𑀢𑀸. 𑀉𑀧𑁆𑀧𑀮𑀓𑀯𑀸𑀢𑀸𑀢𑀺 𑀳𑀤𑀬𑀫𑀁𑀲𑀫𑁂𑀯 𑀉𑀧𑁆𑀧𑀸𑀝𑀦𑀓𑀯𑀸𑀢𑀸. 𑀅𑀲𑁆𑀲𑀸𑀲𑁄𑀢𑀺 ¶ 𑀅𑀦𑁆𑀢𑁄𑀧𑀯𑀺𑀲𑀦𑀦𑀸𑀲𑀺𑀓𑀸𑀯𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀸𑀯𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀲𑀩𑁆𑀩𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯. 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀇𑀤𑀁 𑀧𑀦 𑀫𑀦𑀲𑀺𑀓𑀸𑀭𑀯𑀺𑀥𑀸𑀦𑀁 𑁋 𑀇𑀥 𑀪𑀺𑀓𑁆𑀔𑀼 𑀉𑀤𑁆𑀥𑀗𑁆𑀕𑀫𑀸𑀤𑀺𑀪𑁂𑀤𑁂 𑀯𑀸𑀢𑁂 𑀉𑀤𑁆𑀥𑀗𑁆𑀕𑀫𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀯𑀺𑀢𑁆𑀣𑀫𑁆𑀪𑀦𑀸𑀓𑀸𑀭𑁄 𑀯𑀸𑀬𑁄𑀥𑀸𑀢𑀽’𑀢𑀺 𑀫𑀦𑀲𑀺 𑀓𑀭𑁄𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀯𑀸 𑀧𑀦𑀸𑀢𑀺 𑀲𑁂𑀲𑁂 𑀯𑀸𑀬𑁄𑀓𑁄𑀝𑁆𑀞𑀸𑀲𑁂 𑀅𑀦𑀼𑀕𑀢𑀸 𑀯𑀸𑀢𑀸 𑀇𑀥 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸.

𑀩𑀸𑀳𑀺𑀭𑀯𑀸𑀬𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀆𑀕𑀢𑀸 𑀯𑀸𑀢𑀸. 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀭𑀚𑀸 𑀯𑀸𑀢𑀸𑀢𑀺 𑀲𑀳 𑀭𑀚𑁂𑀦 𑀲𑀭𑀚𑀸. 𑀅𑀭𑀚𑀸 𑀯𑀸𑀢𑀸𑀢𑀺 𑀭𑀚𑀯𑀺𑀭𑀳𑀺𑀢𑀸 𑀲𑀼𑀤𑁆𑀥𑀸 𑀅𑀭𑀚𑀸 𑀦𑀸𑀫. 𑀲𑀻𑀢𑀸𑀢𑀺 𑀲𑀻𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀲𑀻𑀢𑀯𑀮𑀸𑀳𑀓𑀦𑁆𑀢𑀭𑁂 𑀲𑀫𑀼𑀝𑁆𑀞𑀺𑀢𑀸. 𑀉𑀡𑁆𑀳𑀸𑀢𑀺 𑀉𑀡𑁆𑀳𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀉𑀡𑁆𑀳𑀯𑀮𑀸𑀳𑀓𑀦𑁆𑀢𑀭𑁂 𑀲𑀫𑀼𑀝𑁆𑀞𑀺𑀢𑀸. 𑀧𑀭𑀺𑀢𑁆𑀢𑀸𑀢𑀺 𑀫𑀦𑁆𑀤𑀸 𑀢𑀦𑀼𑀓𑀯𑀸𑀢𑀸. 𑀅𑀥𑀺𑀫𑀢𑁆𑀢𑀸𑀢𑀺 𑀩𑀮𑀯𑀯𑀸𑀢𑀸. 𑀓𑀸𑀴𑀸𑀢𑀺 𑀓𑀸𑀴𑀯𑀮𑀸𑀳𑀓𑀦𑁆𑀢𑀭𑁂 𑀲𑀫𑀼𑀝𑁆𑀞𑀺𑀢𑀸, 𑀬𑁂𑀳𑀺 𑀅𑀩𑁆𑀪𑀸𑀳𑀢𑁄 𑀙𑀯𑀺𑀯𑀡𑁆𑀡𑁄 𑀓𑀸𑀴𑀓𑁄 𑀳𑁄𑀢𑀺. 𑀢𑁂𑀲𑀁 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺𑀧𑀺 𑀏𑀓𑁂. 𑀯𑁂𑀭𑀫𑁆𑀪𑀯𑀸𑀢𑀸𑀢𑀺 𑀬𑁄𑀚𑀦𑀢𑁄 𑀉𑀧𑀭𑀺 𑀯𑀸𑀬𑀦𑀯𑀸𑀢𑀸. 𑀧𑀓𑁆𑀔𑀯𑀸𑀢𑀸𑀢𑀺 𑀅𑀦𑁆𑀢𑀫𑀲𑁄 𑀫𑀓𑁆𑀔𑀺𑀓𑀸𑀬𑀧𑀺 𑀧𑀓𑁆𑀔𑀸𑀬𑀽𑀳𑀦𑀲𑀫𑀼𑀝𑁆𑀞𑀺𑀢𑀸 𑀯𑀸𑀢𑀸. 𑀲𑀼𑀧𑀡𑁆𑀡𑀯𑀸𑀢𑀸𑀢𑀺 𑀕𑀭𑀼𑀴𑀯𑀸𑀢𑀸. 𑀓𑀸𑀫𑀜𑁆𑀘 𑀇𑀫𑁂𑀧𑀺 𑀧𑀓𑁆𑀔𑀯𑀸𑀢𑀸𑀯 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀯𑀺𑀲𑀼𑀁 𑀕𑀳𑀺𑀢𑀸. 𑀢𑀸𑀮𑀯𑀡𑁆𑀝𑀯𑀸𑀢𑀸𑀢𑀺 𑀢𑀸𑀮𑀧𑀡𑁆𑀡𑁂𑀳𑀺 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀸 𑀯𑀸𑀢𑀸. 𑀯𑀺𑀥𑀽𑀧𑀦𑀯𑀸𑀢𑀸𑀢𑀺 𑀩𑀻𑀚𑀦𑀧𑀢𑁆𑀢𑀓𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀸 𑀯𑀸𑀢𑀸. 𑀇𑀫𑀸𑀦𑀺 𑀘 𑀢𑀸𑀮𑀯𑀡𑁆𑀝𑀯𑀺𑀥𑀽𑀧𑀦𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀯𑀸𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀫𑁆𑀧𑀺 𑀧𑀭𑀺𑀯𑀢𑁆𑀢𑁂𑀦𑁆𑀢𑀺. 𑀬𑀁 𑀯𑀸 𑀧𑀦𑀸𑀢𑀺 𑀇𑀥 𑀧𑀸𑀴𑀺𑀆𑀕𑀢𑁂 𑀞𑀧𑁂𑀢𑁆𑀯𑀸 𑀲𑁂𑀲𑀯𑀸𑀢𑀸 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸.

𑁧𑁭𑁭. 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ¶ 𑀅𑀧𑁆𑀧𑀝𑀺𑀖𑀝𑁆𑀝𑀦𑀝𑁆𑀞𑁂𑀦 𑀦 𑀓𑀲𑁆𑀲𑀢𑀻𑀢𑀺 𑀆𑀓𑀸𑀲𑁄. 𑀆𑀓𑀸𑀲𑁄𑀯 𑀆𑀓𑀸𑀲𑀪𑀸𑀯𑀁 𑀕𑀢𑀢𑁆𑀢𑀸 𑀆𑀓𑀸𑀲𑀕𑀢𑀁. 𑀅𑀖𑀝𑁆𑀝𑀦𑀻𑀬𑀢𑀸𑀬 ¶ 𑀅𑀖𑀁. 𑀅𑀖𑀫𑁂𑀯 𑀅𑀖𑀪𑀸𑀯𑀁 𑀕𑀢𑀢𑁆𑀢𑀸 𑀅𑀖𑀕𑀢𑀁 ¶ . 𑀯𑀺𑀯𑀭𑁄𑀢𑀺 𑀅𑀦𑁆𑀢𑀭𑀁. 𑀢𑀤𑁂𑀯 𑀯𑀺𑀯𑀭𑀪𑀸𑀯𑀁 𑀕𑀢𑀢𑁆𑀢𑀸 𑀯𑀺𑀯𑀭𑀕𑀢𑀁. 𑀅𑀲𑀫𑁆𑀨𑀼𑀝𑁆𑀞𑀁 𑀫𑀁𑀲𑀮𑁄𑀳𑀺𑀢𑁂𑀳𑀻𑀢𑀺 𑀫𑀁𑀲𑀮𑁄𑀳𑀺𑀢𑁂𑀳𑀺 𑀦𑀺𑀲𑁆𑀲𑀝𑀁. 𑀓𑀡𑁆𑀡𑀘𑁆𑀙𑀺𑀤𑁆𑀤𑀦𑁆𑀢𑀺𑀆𑀤𑀺 𑀧𑀦 𑀢𑀲𑁆𑀲𑁂𑀯 𑀧𑀪𑁂𑀤𑀤𑀲𑁆𑀲𑀦𑀁. 𑀢𑀢𑁆𑀣 𑀓𑀡𑁆𑀡𑀘𑁆𑀙𑀺𑀤𑁆𑀤𑀦𑁆𑀢𑀺 𑀓𑀡𑁆𑀡𑀲𑁆𑀫𑀺𑀁 𑀙𑀺𑀤𑁆𑀤𑀁 𑀯𑀺𑀯𑀭𑀁 𑀫𑀁𑀲𑀮𑁄𑀳𑀺𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑁄𑀓𑀸𑀲𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦𑀸𑀢𑀺 𑀬𑁂𑀦 𑀯𑀺𑀯𑀭𑁂𑀦 𑀏𑀢𑀁 𑀅𑀲𑀺𑀢𑀸𑀤𑀺𑀪𑁂𑀤𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀅𑀚𑁆𑀛𑁄𑀳𑀭𑀢𑀺, 𑀅𑀦𑁆𑀢𑁄 𑀧𑀯𑁂𑀲𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀅𑀦𑁆𑀢𑁄𑀉𑀤𑀭𑀧𑀝𑀮𑀲𑀗𑁆𑀔𑀸𑀢𑁂 𑀑𑀓𑀸𑀲𑁂 𑀏𑀢𑀤𑁂𑀯 𑀘𑀢𑀼𑀩𑁆𑀩𑀺𑀥𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀢𑀺𑀝𑁆𑀞𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀯𑀺𑀯𑀭𑁂𑀦 𑀲𑀩𑁆𑀩𑀫𑁆𑀧𑁂𑀢𑀁 𑀯𑀺𑀧𑀓𑁆𑀓𑀁 𑀓𑀲𑀝𑀪𑀸𑀯𑀁 𑀆𑀧𑀦𑁆𑀦𑀁 𑀦𑀺𑀓𑁆𑀔𑀫𑀢𑀺, 𑀢𑀁 𑀉𑀤𑀭𑀧𑀝𑀮𑀢𑁄 𑀬𑀸𑀯 𑀓𑀭𑀻𑀲𑀫𑀕𑁆𑀕𑀸 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀙𑀺𑀤𑁆𑀤𑀁 𑀫𑀁𑀲𑀮𑁄𑀳𑀺𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀁 𑀦𑀺𑀲𑁆𑀲𑀝𑀁 𑀆𑀓𑀸𑀲𑀥𑀸𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀘𑀫𑁆𑀫𑀦𑁆𑀢𑀭𑀁 𑀫𑀁𑀲𑀦𑁆𑀢𑀭𑀁 𑀦𑁆𑀳𑀸𑀭𑀼𑀦𑁆𑀢𑀭𑀁 𑀅𑀝𑁆𑀞𑀺𑀦𑁆𑀢𑀭𑀁 𑀮𑁄𑀫𑀦𑁆𑀢𑀭𑀦𑁆𑀢𑀺 𑀇𑀤𑀁 𑀲𑀩𑁆𑀩𑀁 𑀬𑁂𑀯𑀸𑀧𑀦𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀁.

𑀩𑀸𑀳𑀺𑀭𑀓𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻𑀢𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀲𑁆𑀲𑀝𑀁 𑀪𑀺𑀢𑁆𑀢𑀺𑀙𑀺𑀤𑁆𑀤𑀓𑀯𑀸𑀝𑀙𑀺𑀤𑁆𑀤𑀸𑀤𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀬𑀲𑁆𑀫𑀺𑀁 𑀆𑀓𑀸𑀲𑁂 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀁 𑀓𑀣𑀺𑀢𑀁.

𑁧𑁭𑁮. 𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀇𑀫𑀸𑀲𑀼 𑀙𑀲𑀼 𑀥𑀸𑀢𑀽𑀲𑀼 𑀧𑀭𑀺𑀕𑁆𑀕𑀳𑀺𑀢𑀸𑀲𑀼 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀓𑀣𑀁? 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀸𑀯 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀕𑀳𑀺𑀢𑀸𑀯 𑀳𑁄𑀢𑀺, 𑀆𑀧𑁄𑀥𑀸𑀢𑀼𑀆𑀓𑀸𑀲𑀥𑀸𑀢𑀼𑀕𑁆𑀕𑀳𑀡𑁂𑀦 𑀥𑀫𑁆𑀫𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀲𑁆𑀲𑀸 𑀧𑀼𑀭𑁂𑀘𑀸𑀭𑀺𑀓𑀧𑀘𑁆𑀙𑀸𑀘𑀸𑀭𑀺𑀓𑀢𑁆𑀢𑀸 𑀫𑀦𑁄𑀥𑀸𑀢𑀼 𑀕𑀳𑀺𑀢𑀸𑀯 𑀳𑁄𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀬𑁄 𑀲𑀼𑀢𑁆𑀢𑁂 𑀆𑀕𑀢𑀸 𑀏𑀯. 𑀲𑁂𑀲𑀸 𑀦𑀯 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸 ¶ . 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀳𑀺 𑀢𑀲𑁆𑀲𑀸 𑀦𑀺𑀲𑁆𑀲𑀬𑀪𑀽𑀢𑀸 𑀘𑀓𑁆𑀔𑀼𑀥𑀸𑀢𑀼, 𑀆𑀭𑀫𑁆𑀫𑀡𑀪𑀽𑀢𑀸 𑀭𑀽𑀧𑀥𑀸𑀢𑀼 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀺𑀕𑁆𑀕𑀳𑀡𑁂𑀦 𑀲𑁄𑀢𑀥𑀸𑀢𑀼𑀆𑀤𑀬𑁄𑀢𑀺 𑀅𑀝𑁆𑀞𑀸𑀭𑀲𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀸𑀲𑀼 𑀤𑀲𑀳𑀺 𑀥𑀸𑀢𑀽𑀳𑀺 𑀭𑀽𑀧𑀧𑀭𑀺𑀕𑁆𑀕𑀳𑁄 𑀓𑀣𑀺𑀢𑁄 𑀳𑁄𑀢𑀺. 𑀲𑀢𑁆𑀢𑀳𑀺 𑀅𑀭𑀽𑀧𑀧𑀭𑀺𑀕𑁆𑀕𑀳𑁄. 𑀥𑀫𑁆𑀫𑀥𑀸𑀢𑀼𑀬𑀸 𑀲𑀺𑀬𑀸 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀲𑀺𑀬𑀸 𑀅𑀭𑀽𑀧𑀧𑀭𑀺𑀕𑁆𑀕𑀳𑁄. 𑀇𑀢𑀺 𑀅𑀟𑁆𑀠𑁂𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀅𑀟𑁆𑀠𑀝𑁆𑀞𑀥𑀸𑀢𑀽𑀳𑀺 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄 𑀓𑀣𑀺𑀢𑁄 𑀳𑁄𑀢𑀺. 𑀭𑀽𑀧𑀸𑀭𑀽𑀧𑀁 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀢𑀁 𑀳𑁄𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁 ¶ . 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀢𑀁𑀧𑀚𑀸𑀦𑀦𑁄 𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀇𑀤𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀅𑀝𑁆𑀞𑀸𑀭𑀲𑀥𑀸𑀢𑀼𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀦𑀺𑀕𑀫𑀦𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁭𑁯. 𑀇𑀤𑀸𑀦𑀺 ¶ 𑀤𑀼𑀢𑀺𑀬𑀙𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑀸𑀧𑀺 𑀙 𑀥𑀸𑀢𑀼𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀔𑀥𑀸𑀢𑀼 𑀤𑀼𑀓𑁆𑀔𑀥𑀸𑀢𑀽𑀢𑀺 𑀓𑀸𑀬𑀧𑁆𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀲𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀬𑀼𑀕𑀴𑀓𑀢𑁄 𑀤𑀲𑁆𑀲𑀺𑀢𑀸𑀦𑀺. 𑀲𑀼𑀔𑀜𑁆𑀳𑀺 𑀤𑀼𑀓𑁆𑀔𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀤𑀼𑀓𑁆𑀔𑀁 𑀲𑀼𑀔𑀲𑁆𑀲. 𑀬𑀢𑁆𑀢𑀓𑀁 𑀲𑀼𑀔𑁂𑀦 𑀨𑀭𑀺𑀢𑀝𑁆𑀞𑀸𑀦𑀁 𑀢𑀢𑁆𑀢𑀓𑀁 𑀤𑀼𑀓𑁆𑀔𑀁 𑀨𑀭𑀢𑀺. 𑀬𑀢𑁆𑀢𑀓𑀁 𑀤𑀼𑀓𑁆𑀔𑁂𑀦 𑀨𑀭𑀺𑀢𑀝𑁆𑀞𑀸𑀦𑀁 𑀢𑀢𑁆𑀢𑀓𑀁 𑀲𑀼𑀔𑀁 𑀨𑀭𑀢𑀺. 𑀲𑁄𑀫𑀦𑀲𑁆𑀲𑀥𑀸𑀢𑀼 𑀤𑁄𑀫𑀦𑀲𑁆𑀲𑀥𑀸𑀢𑀽𑀢𑀺 𑀇𑀤𑀫𑁆𑀧𑀺 𑀢𑀣𑁂𑀯 𑀬𑀼𑀕𑀴𑀓𑀁 𑀓𑀢𑀁. 𑀲𑁄𑀫𑀦𑀲𑁆𑀲𑀜𑁆𑀳𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀤𑁄𑀫𑀦𑀲𑁆𑀲𑀁 𑀲𑁄𑀫𑀦𑀲𑁆𑀲𑀲𑁆𑀲. 𑀬𑀢𑁆𑀢𑀓𑀁 𑀲𑁄𑀫𑀦𑀲𑁆𑀲𑁂𑀦 𑀨𑀭𑀺𑀢𑀝𑁆𑀞𑀸𑀦𑀁 𑀢𑀢𑁆𑀢𑀓𑀁 𑀤𑁄𑀫𑀦𑀲𑁆𑀲𑀁 𑀨𑀭𑀢𑀺. 𑀬𑀢𑁆𑀢𑀓𑀁 𑀤𑁄𑀫𑀦𑀲𑁆𑀲𑁂𑀦 𑀨𑀭𑀺𑀢𑀝𑁆𑀞𑀸𑀦𑀁 𑀢𑀢𑁆𑀢𑀓𑀁 𑀲𑁄𑀫𑀦𑀲𑁆𑀲𑀁 𑀨𑀭𑀢𑀺.

𑀉𑀧𑁂𑀓𑁆𑀔𑀸𑀥𑀸𑀢𑀼 𑀅𑀯𑀺𑀚𑁆𑀚𑀸𑀥𑀸𑀢𑀽𑀢𑀺 𑀇𑀤𑀁 𑀧𑀦 𑀤𑁆𑀯𑀬𑀁 𑀲𑀭𑀺𑀓𑁆𑀔𑀓𑀯𑀲𑁂𑀦 𑀬𑀼𑀕𑀴𑀓𑀁 𑀓𑀢𑀁. 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀅𑀯𑀺𑀪𑀽𑀢𑀢𑁆𑀢𑀸 𑀲𑀭𑀺𑀓𑁆𑀔𑀓𑀁 𑀳𑁄𑀢𑀺. 𑀢𑀢𑁆𑀣 𑀲𑀼𑀔𑀤𑀼𑀓𑁆𑀔𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀯𑀢𑁆𑀣𑀼𑀪𑀽𑀢𑀸 𑀓𑀸𑀬𑀥𑀸𑀢𑀼, 𑀆𑀭𑀫𑁆𑀫𑀡𑀪𑀽𑀢𑀸 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀕𑀳𑀺𑀢𑀸 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀥𑀸𑀢𑀼𑀕𑁆𑀕𑀳𑀡𑁂𑀦 𑀥𑀫𑁆𑀫𑀥𑀸𑀢𑀼 𑀕𑀳𑀺𑀢𑀸. 𑀉𑀧𑁂𑀓𑁆𑀔𑀸𑀥𑀸𑀢𑀼𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀼𑀬𑁄 ¶ , 𑀢𑀸𑀲𑀁𑀬𑁂𑀯 𑀯𑀢𑁆𑀣𑀸𑀭𑀫𑁆𑀫𑀡𑀪𑀽𑀢𑀸 𑀘𑀓𑁆𑀔𑀼𑀥𑀸𑀢𑀼𑀭𑀽𑀧𑀥𑀸𑀢𑀼𑀆𑀤𑀬𑁄 𑀘 𑀕𑀳𑀺𑀢𑀸𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲𑀧𑀺 𑀥𑀸𑀢𑀼𑀬𑁄 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀇𑀤𑀸𑀦𑀺 𑀢𑀸𑀲𑀼 𑀤𑀲𑀳𑀺 𑀥𑀸𑀢𑀽𑀳𑀺 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀦𑀺𑀕𑀫𑀦𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑀸 𑀲𑀼𑀔𑀥𑀸𑀢𑀼 𑀬𑀁 𑀓𑀸𑀬𑀺𑀓𑀁 𑀲𑀸𑀢𑀦𑁆𑀢𑀺 𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁧𑁮𑁧. 𑀢𑀢𑀺𑀬𑀙𑀓𑁆𑀓𑁂 𑀓𑀸𑀫𑁄𑀢𑀺 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘. 𑀢𑀢𑁆𑀣 𑀓𑀺𑀮𑁂𑀲𑀓𑀸𑀫𑀁 𑀲𑀦𑁆𑀥𑀸𑀬 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀓𑀸𑀫𑀥𑀸𑀢𑀼, 𑀓𑀸𑀫𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀢𑁆𑀣𑀼𑀓𑀸𑀫𑀁 𑀲𑀦𑁆𑀥𑀸𑀬 𑀓𑀸𑀫𑁄𑀬𑁂𑀯 𑀥𑀸𑀢𑀼 𑀓𑀸𑀫𑀥𑀸𑀢𑀼, 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀫𑁂𑀢𑀁 𑀦𑀸𑀫𑀁. 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀩𑁆𑀬𑀸𑀧𑀸𑀤𑁄𑀯 𑀥𑀸𑀢𑀼 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀤𑀲𑀆𑀖𑀸𑀢𑀯𑀢𑁆𑀣𑀼𑀓𑀲𑁆𑀲 ¶ 𑀧𑀝𑀺𑀖𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀺𑀳𑀺𑀁𑀲𑀸 𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀺𑀳𑀺𑀁𑀲𑀸𑀬𑁂𑀯 𑀥𑀸𑀢𑀼 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀧𑀭𑀲𑀢𑁆𑀢𑀯𑀺𑀳𑁂𑀲𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀬𑀁 𑀧𑀦 𑀳𑁂𑀝𑁆𑀞𑀸 𑀅𑀦𑀸𑀕𑀢𑀢𑁆𑀢𑀸 𑀏𑀯𑀁 𑀅𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀯𑁂𑀤𑀺𑀢𑀩𑁆𑀩𑀸 𑁋 𑀯𑀺𑀳𑀺𑀁𑀲𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑁂, 𑀯𑀺𑀳𑀺𑀁𑀲𑀦𑀁 𑀯𑀸 𑀏𑀢𑀁 𑀲𑀢𑁆𑀢𑀸𑀦𑀦𑁆𑀢𑀺 𑀯𑀺𑀳𑀺𑀁𑀲𑀸. 𑀲𑀸 𑀯𑀺𑀳𑁂𑀞𑀦𑀮𑀓𑁆𑀔𑀡𑀸, 𑀓𑀭𑀼𑀡𑀸𑀧𑀝𑀺𑀧𑀓𑁆𑀔𑀮𑀓𑁆𑀔𑀡𑀸 𑀯𑀸; 𑀧𑀭𑀲𑀦𑁆𑀢𑀸𑀦𑁂 𑀉𑀩𑁆𑀩𑁂𑀕𑀚𑀦𑀦𑀭𑀲𑀸, 𑀲𑀓𑀲𑀦𑁆𑀢𑀸𑀦𑁂 𑀓𑀭𑀼𑀡𑀸𑀯𑀺𑀤𑁆𑀥𑀁𑀲𑀦𑀭𑀲𑀸 𑀯𑀸; 𑀤𑀼𑀓𑁆𑀔𑀸𑀬𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸; 𑀧𑀝𑀺𑀖𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑁂𑀓𑁆𑀔𑀫𑁆𑀫𑀁 ¶ 𑀯𑀼𑀘𑁆𑀘𑀢𑀺 𑀮𑁄𑀪𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀅𑀮𑁄𑀪𑁄, 𑀦𑀻𑀯𑀭𑀡𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀁, 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀩𑁆𑀩𑀓𑀼𑀲𑀮𑀁. 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀦𑁂𑀓𑁆𑀔𑀫𑁆𑀫𑀫𑁂𑀯 𑀥𑀸𑀢𑀼 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀲𑀩𑁆𑀩𑀲𑁆𑀲𑀸𑀧𑀺 𑀓𑀼𑀲𑀮𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀩𑁆𑀬𑀸𑀧𑀸𑀤𑁄𑀯 𑀥𑀸𑀢𑀼 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀫𑁂𑀢𑁆𑀢𑀸𑀬𑁂𑀢𑀁 𑀦𑀸𑀫𑀁. 𑀅𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀸𑀢𑀼 𑀅𑀯𑀺𑀳𑀺𑀁𑀲𑀸𑀥𑀸𑀢𑀼, 𑀅𑀯𑀺𑀳𑀺𑀁𑀲𑀸 𑀯𑀺𑀢𑀓𑁆𑀓𑀲𑁆𑀲𑁂𑀢𑀁 ¶ 𑀦𑀸𑀫𑀁. 𑀅𑀯𑀺𑀳𑀺𑀁𑀲𑀸𑀯 𑀥𑀸𑀢𑀼 𑀅𑀯𑀺𑀳𑀺𑀁𑀲𑀸𑀥𑀸𑀢𑀼, 𑀓𑀭𑀼𑀡𑀸𑀬𑁂𑀢𑀁 𑀦𑀸𑀫𑀁.

𑁧𑁮𑁨. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀽𑀢𑀺 𑀧𑀤𑀪𑀸𑀚𑀦𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀲𑀁𑀧𑀬𑁄𑀕𑀯𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀯𑀺𑀳𑁂𑀞𑁂𑀢𑀻𑀢𑀺 𑀩𑀸𑀥𑁂𑀢𑀺, 𑀤𑀼𑀓𑁆𑀔𑀸𑀧𑁂𑀢𑀺. 𑀳𑁂𑀞𑀦𑀸𑀢𑀺 𑀧𑀸𑀡𑀺𑀧𑁆𑀧𑀳𑀸𑀭𑀸𑀤𑀻𑀳𑀺 𑀩𑀸𑀥𑀦𑀸, 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀸. 𑀩𑀮𑀯𑀳𑁂𑀞𑀦𑀸 𑀯𑀺𑀳𑁂𑀞𑀦𑀸. 𑀳𑀺𑀁𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀳𑀺𑀁𑀲𑀦𑀸. 𑀩𑀮𑀯𑀳𑀺𑀁𑀲𑀦𑀸 𑀯𑀺𑀳𑀺𑀁𑀲𑀦𑀸. 𑀭𑁄𑀲𑀦𑀸𑀢𑀺 𑀖𑀝𑁆𑀝𑀦𑀸. 𑀯𑀺𑀭𑁄𑀲𑀦𑀸𑀢𑀺 𑀩𑀮𑀯𑀖𑀝𑁆𑀝𑀦𑀸. 𑀲𑀩𑁆𑀩𑀢𑁆𑀣 𑀯𑀸 ‘𑀯𑀺’ 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀉𑀧𑀳𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀖𑀸𑀢𑁄, 𑀧𑀭𑁂𑀲𑀁 𑀉𑀧𑀖𑀸𑀢𑁄 𑀧𑀭𑀽𑀧𑀖𑀸𑀢𑁄.

𑀫𑁂𑀢𑁆𑀢𑀸𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑁂𑀢𑁆𑀢𑀺. 𑀫𑁂𑀢𑁆𑀢𑀸𑀬𑀦𑀸𑀓𑀸𑀭𑁄 𑀫𑁂𑀢𑁆𑀢𑀸𑀬𑀦𑀸. 𑀫𑁂𑀢𑁆𑀢𑀸𑀬 𑀅𑀬𑀺𑀢𑀲𑁆𑀲 𑀫𑁂𑀢𑁆𑀢𑀸𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁. 𑀩𑁆𑀬𑀸𑀧𑀸𑀤𑁂𑀦 𑀯𑀺𑀫𑀼𑀢𑁆𑀢𑀲𑁆𑀲 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑁂𑀳𑀺 𑀢𑀻𑀳𑀺 𑀉𑀧𑀘𑀸𑀭𑀧𑁆𑀧𑀢𑁆𑀢𑀸𑀧𑀺 𑀅𑀧𑁆𑀧𑀦𑀸𑀧𑀢𑀸𑀧𑀺 𑀫𑁂𑀢𑁆𑀢𑀸 𑀓𑀣𑀺𑀢𑀸, 𑀧𑀘𑁆𑀙𑀺𑀫𑁂𑀦 𑀅𑀧𑁆𑀧𑀦𑀸𑀧𑀢𑁆𑀢𑀸𑀯.

𑀓𑀭𑀼𑀡𑀸𑀬𑀦𑁆𑀢𑀺 ¶ 𑀏𑀢𑀸𑀬𑀸𑀢𑀺 𑀓𑀭𑀼𑀡𑀸. 𑀓𑀭𑀼𑀡𑀸𑀬𑀦𑀸𑀓𑀸𑀭𑁄 𑀓𑀭𑀼𑀡𑀸𑀬𑀦𑀸. 𑀓𑀭𑀼𑀡𑀸𑀬 𑀅𑀬𑀺𑀢𑀲𑁆𑀲 𑀓𑀭𑀼𑀡𑀸𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀓𑀭𑀼𑀡𑀸𑀬𑀺𑀢𑀢𑁆𑀢𑀁. 𑀯𑀺𑀳𑀺𑀁𑀲𑀸𑀬 𑀯𑀺𑀫𑀼𑀢𑁆𑀢𑀲𑁆𑀲 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀪𑀬𑀢𑁆𑀣𑀸𑀧𑀺 𑀘 𑀧𑀭𑀺𑀬𑁄𑀲𑀸𑀦𑀧𑀤𑁂 𑀫𑁂𑀢𑁆𑀢𑀸𑀓𑀭𑀼𑀡𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀯𑀺𑀲𑁂𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀓𑀸𑀫𑀯𑀺𑀢𑀓𑁆𑀓𑁄 𑀲𑀢𑁆𑀢𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀢𑀺 𑀲𑀗𑁆𑀔𑀸𑀭𑁂𑀲𑀼𑀧𑀺. 𑀉𑀪𑀬𑀢𑁆𑀣 𑀉𑀧𑁆𑀧𑀦𑁆𑀦𑁄𑀧𑀺 𑀓𑀫𑁆𑀫𑀧𑀣𑀪𑁂𑀤𑁄𑀯. 𑀩𑁆𑀬𑀸𑀧𑀸𑀤𑁄 𑀧𑀦 𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄𑀬𑁂𑀯 𑀓𑀫𑁆𑀫𑀧𑀣𑀁 𑀪𑀺𑀦𑁆𑀤𑀢𑀺, 𑀦 𑀇𑀢𑀭𑁄. 𑀯𑀺𑀳𑀺𑀁𑀲𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑀸 𑀓𑀣𑀸 𑁋 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀘𑁂𑀯 𑀅𑀲𑀫𑁆𑀪𑀺𑀦𑁆𑀦𑀸 𑀘. 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑁂𑀦 𑀳𑀺 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄𑀧𑀺 𑀕𑀳𑀺𑀢𑀸. 𑀓𑀸𑀫𑀥𑀸𑀢𑀼𑀬𑀸𑀬𑁂𑀯 𑀧𑀦 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀏𑀢𑀸 𑀤𑀲𑁆𑀲𑀺𑀢𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀣𑀸 ¶ . 𑀞𑀧𑁂𑀢𑁆𑀯𑀸 𑀧𑀦 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀲𑁂𑀲𑀸 𑀲𑀩𑁆𑀩𑀸𑀧𑀺 ¶ 𑀓𑀸𑀫𑀥𑀸𑀢𑀼 𑀏𑀯𑀸𑀢𑀺. 𑀅𑀬𑀁 𑀅𑀲𑀫𑁆𑀪𑀺𑀦𑁆𑀦𑀓𑀣𑀸 𑀦𑀸𑀫. 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀕𑁆𑀕𑀳𑀡𑁂𑀦𑀸𑀧𑀺 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀕𑀳𑀺𑀢𑀸𑀬𑁂𑀯. 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀢𑁄 𑀧𑀦 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀢𑀤𑀼𑀪𑀬𑀫𑁆𑀧𑀺 𑀤𑀲𑁆𑀲𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣𑀸𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀣𑀸. 𑀞𑀧𑁂𑀢𑁆𑀯𑀸 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀅𑀯𑀲𑁂𑀲𑀸 𑀦𑁂𑀓𑁆𑀔𑀫𑁆𑀫𑀥𑀸𑀢𑀽𑀢𑀺 𑀅𑀬𑀁 𑀅𑀲𑀫𑁆𑀪𑀺𑀦𑁆𑀦𑀓𑀣𑀸 𑀦𑀸𑀫.

𑀇𑀫𑀸𑀳𑀺 𑀘 𑀙𑀳𑀺 𑀥𑀸𑀢𑀽𑀳𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑀩𑁆𑀩𑀸𑀧𑀺 𑀳𑀺 𑀢𑀸 𑀓𑀸𑀫𑀥𑀸𑀢𑀼𑀢𑁄𑀯 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀮𑀪𑀸𑀧𑁂𑀢𑀩𑁆𑀩𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀯 𑀳𑁄𑀦𑁆𑀢𑀻𑀢𑀺 𑀢𑀺𑀡𑁆𑀡𑀁 𑀙𑀓𑁆𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀙𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀸𑀭𑀲 𑀅𑀝𑁆𑀞𑀸𑀭𑀲 𑀓𑀢𑁆𑀯𑀸 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀅𑀝𑁆𑀞𑀸𑀭𑀲𑀓𑀸𑀦𑀺 𑀏𑀓𑀚𑁆𑀛𑀁 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀢𑁂𑀪𑀽𑀫𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀫𑀲𑀦𑀘𑀸𑀭𑁄𑀯 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁮𑁩. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ¶ 𑀲𑀭𑀽𑀧𑁂𑀦𑁂𑀯 𑀲𑀩𑁆𑀩𑀸𑀧𑀺 𑀥𑀸𑀢𑀼𑀬𑁄 𑀤𑀲𑁆𑀲𑁂𑀦𑁆𑀢𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑁋 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁂 𑀢𑀸𑀯 𑁋

𑀅𑀢𑁆𑀣𑀢𑁄 𑀮𑀓𑁆𑀔𑀡𑀸𑀤𑀺𑀢𑁄, 𑀓𑀫𑀢𑀸𑀯𑀢𑁆𑀯𑀲𑀗𑁆𑀔𑀢𑁄;

𑀧𑀘𑁆𑀘𑀬𑀸 𑀅𑀣 𑀤𑀝𑁆𑀞𑀩𑁆𑀩𑀸, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ‘𑀅𑀢𑁆𑀣𑀢𑁄’𑀢𑀺 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀘𑀓𑁆𑀔𑀼𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀢𑀸𑀯 𑀦𑀬𑁂𑀦 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀤𑀳𑀢𑀺, 𑀥𑀻𑀬𑀢𑁂, 𑀯𑀺𑀥𑀸𑀦𑀁, 𑀯𑀺𑀥𑀻𑀬𑀢𑁂 𑀏𑀢𑀸𑀬, 𑀏𑀢𑁆𑀣 𑀯𑀸 𑀥𑀻𑀬𑀢𑀻𑀢𑀺 𑀥𑀸𑀢𑀼. 𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀬 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀁 ¶ 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺 ¶ ; 𑀪𑀸𑀭𑀳𑀸𑀭𑁂𑀳𑀺 𑀘 𑀪𑀸𑀭𑁄 𑀯𑀺𑀬 𑀲𑀢𑁆𑀢𑁂𑀳𑀺 𑀥𑀻𑀬𑀦𑁆𑀢𑁂 𑀥𑀸𑀭𑀻𑀬𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀢𑀸 𑀅𑀯𑀲𑀯𑀢𑁆𑀢𑀦𑀢𑁄. 𑀏𑀢𑀸𑀳𑀺 𑀘 𑀓𑀭𑀡𑀪𑀽𑀢𑀸𑀳𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺; 𑀢𑀣𑀸𑀯𑀺𑀳𑀺𑀢𑀜𑁆𑀘𑁂𑀢𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀘𑀓𑁆𑀔𑀸𑀤𑀻𑀲𑀼 𑀏𑀓𑁂𑀓𑁄 𑀥𑀫𑁆𑀫𑁄 𑀬𑀣𑀸𑀲𑀫𑁆𑀪𑀯𑀁 𑀯𑀺𑀤𑀳𑀢𑀺 𑀥𑀻𑀬𑀢𑁂𑀢𑀺𑀆𑀤𑀺𑀅𑀢𑁆𑀣𑀯𑀲𑁂𑀦 𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀬𑀣𑀸 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀦𑀸𑀫 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀦 𑀏𑀯𑀫𑁂𑀢𑀸. 𑀏𑀢𑀸 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀬𑀣𑀸 𑀘 𑀮𑁄𑀓𑁂 𑀯𑀺𑀘𑀺𑀢𑁆𑀢𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀬𑁄 𑀲𑀺𑀮𑀸𑀯𑀬𑀯𑀸 𑀥𑀸𑀢𑀼𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀢𑀸𑀧𑀺 𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄. 𑀯𑀺𑀘𑀺𑀢𑁆𑀢𑀸 𑀳𑁂𑀢𑀸 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀸𑀢𑀺. 𑀬𑀣𑀸 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑁂𑀲𑀼 𑀭𑀲𑀲𑁄𑀡𑀺𑀢𑀸𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸, 𑀏𑀯𑀫𑁂𑀢𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀯𑀬𑀯𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁂𑀢𑁂 𑀘𑀓𑁆𑀔𑀸𑀤𑀬𑁄𑀢𑀺. 𑀅𑀧𑀺𑀘 𑀥𑀸𑀢𑀽𑀢𑀺 𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀣𑀸 𑀳𑀺 𑀪𑀕𑀯𑀸 𑁋 ‘‘𑀙 𑀥𑀸𑀢𑀼𑀭𑁄 𑀅𑀬𑀁, 𑀪𑀺𑀓𑁆𑀔𑀼, 𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁪𑁩-𑁩𑁪𑁪) 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀢𑁆𑀣𑀁 𑀥𑀸𑀢𑀼𑀤𑁂𑀲𑀦𑀁 𑀅𑀓𑀸𑀲𑀻𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀥𑀸𑀢𑀼 𑀘𑀸𑀢𑀺 𑀘𑀓𑁆𑀔𑀼𑀥𑀸𑀢𑀼 ¶ …𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘 𑀢𑀁 𑀥𑀸𑀢𑀼 𑀘𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀮𑀓𑁆𑀔𑀡𑀸𑀤𑀺𑀢𑁄’𑀢𑀺 𑀘𑀓𑁆𑀔𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀺𑀢𑁄 𑀧𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀸𑀦𑀺 𑀘 𑀧𑀦 𑀢𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

‘𑀓𑀫𑀢𑁄’𑀢𑀺 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀲𑁄 𑀘 𑀧𑀦𑀸𑀬𑀁 𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀳𑁂𑀢𑀼. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀨𑀮𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀫𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀢𑀸𑀯𑀢𑁆𑀯𑀢𑁄’𑀢𑀺 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀲𑀼 𑀢𑁂𑀲𑀼 𑀳𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼 𑀆𑀪𑀸𑀥𑀸𑀢𑀼, 𑀲𑀼𑀪𑀥𑀸𑀢𑀼, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀥𑀸𑀢𑀼, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀥𑀸𑀢𑀼, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀥𑀸𑀢𑀼 ¶ , 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀸𑀢𑀼, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀥𑀸𑀢𑀼, 𑀓𑀸𑀫𑀥𑀸𑀢𑀼, 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀅𑀯𑀺𑀳𑀺𑀁𑀲𑀸𑀥𑀸𑀢𑀼, 𑀲𑀼𑀔𑀥𑀸𑀢𑀼, 𑀤𑀼𑀓𑁆𑀔𑀥𑀸𑀢𑀼, 𑀲𑁄𑀫𑀦𑀲𑁆𑀲𑀥𑀸𑀢𑀼, 𑀤𑁄𑀫𑀦𑀲𑁆𑀲𑀥𑀸𑀢𑀼, 𑀉𑀧𑁂𑀓𑁆𑀔𑀸𑀥𑀸𑀢𑀼 ¶ , 𑀅𑀯𑀺𑀚𑁆𑀚𑀸𑀥𑀸𑀢𑀼, 𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼, 𑀳𑀻𑀦𑀥𑀸𑀢𑀼, 𑀫𑀚𑁆𑀛𑀺𑀫𑀥𑀸𑀢𑀼, 𑀧𑀡𑀻𑀢𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼, 𑀆𑀓𑀸𑀲𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑀗𑁆𑀔𑀢𑀥𑀸𑀢𑀼, 𑀅𑀲𑀗𑁆𑀔𑀢𑀥𑀸𑀢𑀼, 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄𑀢𑀺 𑀏𑀯𑀫𑀸𑀤𑀬𑁄 𑀅𑀜𑁆𑀜𑀸𑀧𑀺 𑀥𑀸𑀢𑀼𑀬𑁄 𑀤𑀺𑀲𑁆𑀲𑀦𑁆𑀢𑀺.

𑀏𑀯𑀁 𑀲𑀢𑀺 𑀲𑀩𑁆𑀩𑀸𑀲𑀁 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀅𑀝𑁆𑀞𑀸𑀭𑀲𑀸𑀢𑀺 𑀅𑀬𑀫𑁂𑀯 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄𑀢𑀺 𑀘𑁂? 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑀥𑀸𑀢𑀽𑀦𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀭𑀽𑀧𑀥𑀸𑀢𑀼𑀬𑁂𑀯 𑀳𑀺 𑀆𑀪𑀸𑀥𑀸𑀢𑀼. 𑀲𑀼𑀪𑀥𑀸𑀢𑀼 𑀧𑀦 𑀭𑀽𑀧𑀸𑀤𑀺𑀧𑁆𑀧𑀝𑀺𑀩𑀤𑁆𑀥𑀸. 𑀓𑀲𑁆𑀫𑀸? 𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀢𑀸. 𑀲𑀼𑀪𑀦𑀺𑀫𑀺𑀢𑁆𑀢𑀜𑁆𑀳𑀺 𑀲𑀼𑀪𑀥𑀸𑀢𑀼. 𑀢𑀜𑁆𑀘 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀦 𑀯𑀺𑀚𑁆𑀚𑀢𑀺, 𑀓𑀼𑀲𑀮𑀯𑀺𑀧𑀸𑀓𑀸𑀭𑀫𑁆𑀫𑀡𑀸 𑀯𑀸 𑀭𑀽𑀧𑀸𑀤𑀬𑁄 𑀏𑀯 𑀲𑀼𑀪𑀥𑀸𑀢𑀽𑀢𑀺 𑀭𑀽𑀧𑀸𑀤𑀺𑀫𑀢𑁆𑀢𑀫𑁂𑀯𑁂𑀲𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀥𑀸𑀢𑀼𑀆𑀤𑀻𑀲𑀼 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑁂𑀲𑀸 𑀥𑀫𑁆𑀫𑀸 𑀥𑀫𑁆𑀫𑀥𑀸𑀢𑀼. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀥𑀸𑀢𑀼 𑀧𑀦 𑀲𑀪𑀸𑀯𑀢𑁄 𑀦𑀢𑁆𑀣𑀺; 𑀥𑀸𑀢𑀼𑀤𑁆𑀯𑀬𑀦𑀺𑀭𑁄𑀥𑀫𑀢𑁆𑀢𑀫𑁂𑀯 𑀳𑀺 𑀲𑀸. 𑀓𑀸𑀫𑀥𑀸𑀢𑀼 𑀥𑀫𑁆𑀫𑀥𑀸𑀢𑀼𑀫𑀢𑁆𑀢𑀁 𑀯𑀸 𑀳𑁄𑀢𑀺, 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼? 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 …𑀧𑁂… 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄’’𑀢𑀺; 𑀅𑀝𑁆𑀞𑀸𑀭𑀲𑀧𑀺 𑀥𑀸𑀢𑀼𑀬𑁄 ¶ 𑀯𑀸, 𑀬𑀣𑀸𑀳 ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸, 𑀭𑀽𑀧𑀸, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀽’’𑀢𑀺. 𑀦𑁂𑀓𑁆𑀔𑀫𑁆𑀫𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀏𑀯; ‘‘𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀦𑁂𑀓𑁆𑀔𑀫𑁆𑀫𑀥𑀸𑀢𑀽’’𑀢𑀺 𑀯𑀸 𑀯𑀘𑀦𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀺 𑀳𑁄𑀢𑀺𑀬𑁂𑀯. 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀅𑀯𑀺𑀚𑁆𑀚𑀸𑀆𑀭𑀫𑁆𑀪𑀦𑀺𑀓𑁆𑀓𑀫𑀧𑀭𑀓𑁆𑀓𑀫𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀬𑁂𑀯.

𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀥𑀸𑀢𑀼𑀬𑁄 𑀅𑀝𑁆𑀞𑀸𑀭𑀲𑀥𑀸𑀢𑀼𑀫𑀢𑁆𑀢𑀫𑁂𑀯. 𑀳𑀻𑀦𑀸 𑀳𑀺 𑀘𑀓𑁆𑀔𑀸𑀤𑀬𑁄 𑀳𑀻𑀦𑀥𑀸𑀢𑀼. 𑀫𑀚𑁆𑀛𑀺𑀫𑀧𑀡𑀻𑀢𑀸 𑀘𑀓𑁆𑀔𑀸𑀤𑀬𑁄 𑀫𑀚𑁆𑀛𑀺𑀫𑀸 𑀘𑁂𑀯 𑀧𑀡𑀻𑀢𑀸 𑀘 𑀥𑀸𑀢𑀽. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀅𑀓𑀼𑀲𑀮𑀸 ¶ 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀳𑀻𑀦𑀥𑀸𑀢𑀼. 𑀮𑁄𑀓𑀺𑀬𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀉𑀪𑁄𑀧𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀘 𑀫𑀚𑁆𑀛𑀺𑀫𑀥𑀸𑀢𑀼. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀡𑀻𑀢𑀥𑀸𑀢𑀼. 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀬𑁂𑀯. 𑀆𑀧𑁄𑀥𑀸𑀢𑀼 𑀆𑀓𑀸𑀲𑀥𑀸𑀢𑀼 𑀘 𑀥𑀫𑁆𑀫𑀥𑀸𑀢𑀼𑀬𑁂𑀯. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑁂𑀧𑁄𑀬𑁂𑀯. 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄 𑀘 𑀲𑀗𑁆𑀔𑀢𑀥𑀸𑀢𑀼. 𑀅𑀲𑀗𑁆𑀔𑀢𑀥𑀸𑀢𑀼 𑀧𑀦 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄𑀯. 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄 𑀧𑀦 𑀅𑀝𑁆𑀞𑀸𑀭𑀲𑀥𑀸𑀢𑀼𑀧𑁆𑀧𑀪𑁂𑀤𑀫𑀢𑁆𑀢𑀫𑁂𑀯𑀸𑀢𑀺. 𑀇𑀢𑀺 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑀥𑀸𑀢𑀽𑀦𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺.

𑀅𑀧𑀺𑀘 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀻𑀦𑀁 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀢𑁆𑀣𑀫𑁆𑀧𑀺 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸 ¶ . 𑀲𑀦𑁆𑀢𑀺 𑀳𑀺 𑀲𑀢𑁆𑀢𑀸 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀺𑀦𑁄. 𑀢𑁂𑀲𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦 𑀢𑀲𑁆𑀲𑀸 𑀅𑀦𑁂𑀓𑀢𑁆𑀢𑀁, 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁 𑀚𑀻𑀯𑀲𑀜𑁆𑀜𑀁 𑀲𑀫𑀽𑀳𑀦𑀺𑀢𑀼𑀓𑀸𑀫𑁂𑀦 𑀪𑀕𑀯𑀢𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀓𑀸𑀲𑀺𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀢𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦; 𑀬𑁂 𑀘 𑀇𑀫𑀸𑀬 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀬 𑀤𑁂𑀲𑀦𑀸𑀬 𑀯𑁂𑀦𑁂𑀬𑁆𑀬𑀸 𑀲𑀢𑁆𑀢𑀸, 𑀢𑀤𑀚𑁆𑀛𑀸𑀲𑀬𑀯𑀲𑁂𑀦 𑀘 𑀅𑀝𑁆𑀞𑀸𑀭𑀲𑁂𑀯 𑀧𑀓𑀸𑀲𑀺𑀢𑀸.

𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 ¶ 𑀢𑀣𑀸 𑀢𑀣𑀸 𑀳𑀺,

𑀥𑀫𑁆𑀫𑀁 𑀧𑀓𑀸𑀲𑀬𑀢𑀺 𑀏𑀲 𑀬𑀣𑀸 𑀬𑀣𑀸𑀲𑁆𑀲;

𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦,

𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄 𑀧𑀬𑀸𑀢𑀻𑀢𑀺.

𑀏𑀯𑀫𑁂𑀢𑁆𑀣 ‘𑀢𑀸𑀯𑀢𑁆𑀯𑀢𑁄’ 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀗𑁆𑀔𑀢𑁄’𑀢𑀺 𑀘𑀓𑁆𑀔𑀼𑀥𑀸𑀢𑀼 𑀢𑀸𑀯 𑀚𑀸𑀢𑀺𑀢𑁄 𑀏𑀓𑁄 𑀥𑀫𑁆𑀫𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀘𑀓𑁆𑀔𑀼𑀧𑀲𑀸𑀤𑀯𑀲𑁂𑀦. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀥𑀸𑀢𑀼𑀬𑁄 𑀲𑁄𑀢𑀧𑀲𑀸𑀤𑀸𑀤𑀺𑀯𑀲𑁂𑀦. 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑀦 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀯𑀲𑁂𑀦 𑀢𑀬𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀢𑀣𑀸 ¶ 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀫𑀦𑁄𑀥𑀸𑀢𑀼 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀢𑀬𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀥𑀫𑁆𑀫𑀥𑀸𑀢𑀼 𑀢𑀺𑀡𑁆𑀡𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁, 𑀲𑁄𑀴𑀲𑀦𑁆𑀦𑀁 𑀲𑀼𑀔𑀼𑀫𑀭𑀽𑀧𑀸𑀦𑀁, 𑀅𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀯𑀻𑀲𑀢𑀺𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁂𑀲𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀺𑀜𑁆𑀜𑀸𑀡𑀯𑀲𑁂𑀦 𑀙𑀲𑀢𑁆𑀢𑀢𑀺𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀏𑀯𑀫𑁂𑀢𑁆𑀣 ‘𑀲𑀗𑁆𑀔𑀢𑁄’ 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀧𑀘𑁆𑀘𑀬𑀸’𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀲𑀼 𑀧𑀘𑁆𑀘𑀬𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀲𑁄 𑀧𑀦𑁂𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

‘𑀤𑀝𑁆𑀞𑀩𑁆𑀩𑀸’𑀢𑀺 𑀤𑀝𑁆𑀞𑀩𑁆𑀩𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸 𑀏𑀯 𑀳𑀺 𑀲𑀗𑁆𑀔𑀢𑀸 𑀥𑀸𑀢𑀼𑀬𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄, 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀼𑀜𑁆𑀜𑀢𑁄, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀤𑀡𑁆𑀟𑁄 𑀯𑀺𑀬 𑀭𑀽𑀧𑀥𑀸𑀢𑀼, 𑀲𑀤𑁆𑀤𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 ¶ . 𑀢𑀣𑀸 𑀆𑀤𑀸𑀲𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀫𑀼𑀔𑀁 𑀯𑀺𑀬 𑀭𑀽𑀧𑀥𑀸𑀢𑀼, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀅𑀣 𑀯𑀸 𑀉𑀘𑁆𑀙𑀼𑀢𑀺𑀮𑀸𑀦𑀺 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀬𑀦𑁆𑀢𑀘𑀓𑁆𑀓𑀬𑀝𑁆𑀞𑀺 𑀯𑀺𑀬 𑀭𑀽𑀧𑀥𑀸𑀢𑀼, 𑀉𑀘𑁆𑀙𑀼𑀭𑀲𑀢𑁂𑀮𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀅𑀥𑀭𑀸𑀭𑀡𑀻 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀭𑀽𑀧𑀥𑀸𑀢𑀼, 𑀅𑀕𑁆𑀕𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀲 𑀦𑀬𑁄 𑀲𑁄𑀢𑀥𑀸𑀢𑀼𑀆𑀤𑀻𑀲𑀼𑀧𑀺.

𑀫𑀦𑁄𑀥𑀸𑀢𑀼 𑀧𑀦 𑀬𑀣𑀸𑀲𑀫𑁆𑀪𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑀥𑀸𑀢𑀼𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀮𑁆𑀮𑀫𑀺𑀯 𑀲𑀽𑀮𑀫𑀺𑀯 𑀘 𑀤𑀝𑁆𑀞𑀩𑁆𑀩𑁄 ¶ ; 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀯𑁂𑀤𑀦𑀸𑀲𑀮𑁆𑀮𑀲𑀽𑀮𑀬𑁄𑀕𑀸 𑀆𑀢𑀼𑀭𑀸 𑀯𑀺𑀬; 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀸 𑀲𑀜𑁆𑀜𑀸 𑀆𑀲𑀸𑀤𑀼𑀓𑁆𑀔𑀚𑀦𑀦𑀢𑁄 𑀭𑀺𑀢𑁆𑀢𑀫𑀼𑀝𑁆𑀞𑀺 𑀯𑀺𑀬, 𑀅𑀬𑀣𑀸𑀪𑀼𑀘𑁆𑀘𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀓𑀢𑁄 𑀯𑀦𑀫𑀺𑀕𑁄 𑀯𑀺𑀬; 𑀲𑀗𑁆𑀔𑀸𑀭𑀸 𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀢𑁄 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀔𑀺𑀧𑀦𑀓𑀧𑀼𑀭𑀺𑀲𑁄 𑀯𑀺𑀬, 𑀚𑀸𑀢𑀺𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀦𑀢𑁄 𑀭𑀸𑀚𑀧𑀼𑀭𑀺𑀲𑀸𑀦𑀼𑀩𑀦𑁆𑀥𑀘𑁄𑀭𑀸 𑀯𑀺𑀬, 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀳𑁂𑀢𑀼𑀢𑁄 𑀯𑀺𑀲𑀭𑀼𑀓𑁆𑀔𑀩𑀻𑀚𑀸𑀦𑀺 𑀯𑀺𑀬; 𑀭𑀽𑀧𑀁 𑀦𑀸𑀦𑀸𑀯𑀺𑀥𑀽𑀧𑀤𑁆𑀤𑀯𑀦𑀺𑀫𑀺𑀢𑁆𑀢𑀢𑁄 𑀔𑀼𑀭𑀘𑀓𑁆𑀓𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁.

𑀅𑀲𑀗𑁆𑀔𑀢𑀸 𑀧𑀦 𑀥𑀸𑀢𑀼 𑀅𑀫𑀢𑀢𑁄 𑀲𑀦𑁆𑀢𑀢𑁄 𑀔𑁂𑀫𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸? 𑀲𑀩𑁆𑀩𑀸𑀦𑀢𑁆𑀣𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀕𑀳𑀺𑀢𑀸𑀭𑀫𑁆𑀫𑀡𑀁 ¶ 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸𑀯 𑀧𑀯𑀢𑀦𑀢𑁄 𑀯𑀦𑀫𑀓𑁆𑀓𑀝𑁄 𑀯𑀺𑀬, 𑀤𑀼𑀤𑁆𑀤𑀫𑀦𑀢𑁄 𑀅𑀲𑁆𑀲𑀔𑀴𑀼𑀗𑁆𑀓𑁄 𑀯𑀺𑀬, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀢𑁄 𑀯𑁂𑀳𑀸𑀲𑀁 𑀔𑀺𑀢𑁆𑀢𑀤𑀡𑁆𑀟𑁄 𑀯𑀺𑀬, 𑀮𑁄𑀪𑀤𑁄𑀲𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀺𑀮𑁂𑀲𑀬𑁄𑀕𑀢𑁄 𑀭𑀗𑁆𑀕𑀦𑀝𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺.

𑁧𑁮𑁪. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘𑀸𑀢𑀺 𑀇𑀤𑀜𑁆𑀘 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀅𑀜𑁆𑀜𑀜𑁆𑀘 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀜𑁆𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑀢𑁆𑀢𑀬𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀳𑀺 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀯𑀺𑀕𑀢𑀧𑀘𑁆𑀘𑀬𑁄, 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀏𑀲𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸𑀢𑀺 𑀦𑀺𑀭𑀼𑀤𑁆𑀥𑀸𑀬 𑀲𑀫𑀦𑀦𑁆𑀢𑀭𑀸. 𑀢𑀚𑁆𑀚𑀸 𑀫𑀦𑁄𑀥𑀸𑀢𑀽𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀚𑀸𑀢𑀸 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀢𑁄 𑀤𑀼𑀯𑀺𑀥𑀸 𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀸. 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀏𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 ¶ 𑀯𑀸 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀓𑀺𑀘𑁆𑀘𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁆𑀣 𑀧𑀺-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼𑀬𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀬𑀸 𑀘 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀬𑀸 𑀘 𑀢𑀲𑁆𑀲𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀸 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀬𑀸 𑀘 𑀢𑀲𑁆𑀲𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 ¶ 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀚𑀯𑀦𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀢𑀸 𑀲𑀩𑁆𑀩𑀸𑀧𑀺 𑀓𑀣𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀦𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀪𑀯𑀗𑁆𑀕𑀫𑀦𑀁. 𑀥𑀫𑁆𑀫𑁂 𑀘𑀸𑀢𑀺 𑀘𑀢𑀼𑀪𑀽𑀫𑀺𑀓𑀥𑀫𑁆𑀫𑀸𑀭𑀫𑁆𑀫𑀡𑀁. 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀳𑀸𑀯𑀚𑁆𑀚𑀦𑀓𑀁 𑀚𑀯𑀦𑀁 𑀦𑀺𑀩𑁆𑀩𑀢𑁆𑀢𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀳𑀢𑁆𑀣𑁂 𑀕𑀳𑀺𑀢𑀧𑀜𑁆𑀳𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼. 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀤𑀻𑀖𑀪𑀸𑀡𑀓𑀸𑀪𑀬𑀢𑁆𑀣𑁂𑀭𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀳 𑁋 ‘𑀧𑀝𑀺𑀘𑁆𑀘𑀸𑀢𑀺 𑀦𑀸𑀫 𑀆𑀕𑀢𑀝𑁆𑀞𑀸𑀦𑁂 ¶ 𑀆𑀯𑀚𑁆𑀚𑀦𑀁 𑀯𑀺𑀲𑀼𑀁 𑀦 𑀓𑀸𑀢𑀩𑁆𑀩𑀁, 𑀪𑀯𑀗𑁆𑀕𑀦𑀺𑀲𑁆𑀲𑀺𑀢𑀓𑀫𑁂𑀯 𑀓𑀸𑀢𑀩𑁆𑀩’𑀦𑁆𑀢𑀺. 𑀢𑀲𑁆𑀫𑀸 𑀇𑀥 𑀫𑀦𑁄𑀢𑀺 𑀲𑀳𑀸𑀯𑀚𑁆𑀚𑀦𑀓𑀁 𑀪𑀯𑀗𑁆𑀕𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀁. 𑀇𑀫𑀲𑁆𑀫𑀺𑀁 𑀧𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀺𑀓𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁮𑁫. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀙 𑀥𑀸𑀢𑀼𑀬𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀇𑀤𑀁 𑀧𑀦 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀏𑀓𑀦𑁆𑀢𑁂𑀦 𑀧𑀜𑁆𑀘𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺 𑀯𑀼𑀢𑁆𑀢𑀸𑀦𑀁 𑀧𑀦 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀢𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀺𑀓𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀏𑀯𑀫𑀬𑀁 𑀥𑀸𑀢𑀼𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑁂𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀥𑀸𑀢𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀘𑁆𑀘𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁮𑁯. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀲𑀘𑁆𑀘𑀯𑀺𑀪𑀗𑁆𑀕𑁂 𑀘𑀢𑁆𑀢𑀸𑀭𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺𑀆𑀤𑀺𑀫𑁆𑀳𑀺 𑀧𑀦 𑀉𑀤𑁆𑀤𑁂𑀲𑀯𑀸𑀭𑁂 𑁋

𑀯𑀺𑀪𑀸𑀕𑀢𑁄 𑀦𑀺𑀩𑁆𑀩𑀘𑀦-𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄;

𑀅𑀢𑁆𑀣𑀢𑁆𑀣𑀼𑀤𑁆𑀥𑀸𑀭𑀢𑁄 𑀘𑁂𑀯, 𑀅𑀦𑀽𑀦𑀸𑀥𑀺𑀓𑀢𑁄 𑀢𑀣𑀸.

𑀓𑀫𑀢𑁄 𑀅𑀭𑀺𑀬𑀲𑀘𑁆𑀘𑁂𑀲𑀼, 𑀬𑀁 𑀜𑀸𑀡𑀁 𑀢𑀲𑁆𑀲 𑀓𑀺𑀘𑁆𑀘𑀢𑁄;

𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑁄, 𑀉𑀧𑀫𑀸𑀢𑁄 𑀘𑀢𑀼𑀓𑁆𑀓𑀢𑁄.

𑀲𑀼𑀜𑁆𑀜𑀢𑁂𑀓𑀯𑀺𑀥𑀸𑀤𑀻𑀳𑀺, 𑀲𑀪𑀸𑀕𑀯𑀺𑀲𑀪𑀸𑀕𑀢𑁄;

𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀜𑁆𑀜𑀼𑀦𑀸 𑀲𑀸𑀲𑀦𑀓𑁆𑀓𑀫𑁂.

𑀢𑀢𑁆𑀣 ‘𑀯𑀺𑀪𑀸𑀕𑀢𑁄’𑀢𑀺 𑀤𑀼𑀓𑁆𑀔𑀸𑀤𑀻𑀦𑀜𑁆𑀳𑀺 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀺𑀪𑀢𑁆𑀢𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀬𑁂 𑀤𑀼𑀓𑁆𑀔𑀸𑀤𑀻𑀦𑀺 𑀅𑀪𑀺𑀲𑀫𑁂𑀦𑁆𑀢𑁂𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀸. 𑀬𑀣𑀸𑀳, ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄, 𑀧𑀮𑀺𑀩𑁄𑀥𑀝𑁆𑀞𑁄…𑀧𑁂… 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄, 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄…𑀧𑁂… 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑁆𑀯𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸’’𑀢𑀺 (𑀧𑀝𑀺. 𑀫. 𑁨.𑁮). 𑀢𑀣𑀸 ¶ ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀦𑀸𑀫𑀝𑁆𑀞𑁄, 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁨.𑁧𑁧) 𑀏𑀯𑀫𑀸𑀤𑀺. 𑀇𑀢𑀺 𑀏𑀯𑀁 𑀯𑀺𑀪𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀺𑀪𑀸𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀦𑀺𑀩𑁆𑀩𑀘𑀦𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄’𑀢𑀺 ¶ 𑀏𑀢𑁆𑀣 𑀧𑀦 ‘𑀦𑀺𑀩𑁆𑀩𑀘𑀦𑀢𑁄’ 𑀢𑀸𑀯 𑀇𑀥 ‘𑀤𑀼’𑀇𑀢𑀺 𑀅𑀬𑀁 𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑁂 𑀤𑀺𑀲𑁆𑀲𑀢𑀺; 𑀓𑀼𑀘𑁆𑀙𑀺𑀢𑀜𑁆𑀳𑀺 𑀧𑀼𑀢𑁆𑀢𑀁 𑀤𑀼𑀧𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. ‘𑀔𑀁’𑀲𑀤𑁆𑀤𑁄 𑀧𑀦 𑀢𑀼𑀘𑁆𑀙𑁂; 𑀢𑀼𑀘𑁆𑀙𑀜𑁆𑀳𑀺 𑀆𑀓𑀸𑀲𑀁 𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀧𑀞𑀫𑀲𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀅𑀦𑁂𑀓𑀉𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑁄, 𑀢𑀼𑀘𑁆𑀙𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁄. 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀢𑁆𑀢𑀸 𑀢𑀼𑀘𑁆𑀙𑀢𑁆𑀢𑀸 𑀘 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. ‘𑀲𑀁’𑀇𑀢𑀺 𑀘 𑀅𑀬𑀁 ¶ 𑀲𑀤𑁆𑀤𑁄 ‘‘𑀲𑀫𑀸𑀕𑀫𑁄 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁯𑁯; 𑀤𑀻. 𑀦𑀺. 𑁨.𑁩𑁯𑁬) 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺; ‘𑀉’𑀇𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁭𑁨; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁪𑁧) 𑀉𑀧𑁆𑀧𑀢𑁆𑀢𑀺𑀁. ‘𑀅𑀬’𑀲𑀤𑁆𑀤𑁄 𑀧𑀦 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀇𑀤𑀜𑁆𑀘𑀸𑀧𑀺 𑀤𑀼𑀢𑀺𑀬𑀲𑀘𑁆𑀘𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀇𑀢𑀺 𑀤𑀼𑀓𑁆𑀔𑀲𑁆𑀲 𑀲𑀁𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀲𑀫𑀼𑀤𑀬𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑀺𑀬𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 ‘𑀦𑀺’𑀲𑀤𑁆𑀤𑁄 𑀅𑀪𑀸𑀯𑀁 ‘𑀭𑁄𑀥’𑀲𑀤𑁆𑀤𑁄 𑀘 𑀘𑀸𑀭𑀓𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀪𑀸𑀯𑁄 𑀏𑀢𑁆𑀣 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸, 𑀲𑀫𑀥𑀺𑀕𑀢𑁂 𑀯𑀸 𑀢𑀲𑁆𑀫𑀺𑀁 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸𑀢𑀺𑀧𑀺 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺. 𑀘𑀢𑀼𑀢𑁆𑀣𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀏𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀻𑀪𑀽𑀢𑀢𑁆𑀢𑀸, 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺 (𑀲𑀁. 𑀦𑀺. 𑁫.𑁧𑁦𑁯𑁭). 𑀓𑀢𑀫𑀸𑀦𑀺…𑀧𑁂… 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀭𑀺𑀬𑀸 𑀇𑀫𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀅𑀧𑀺𑀘 𑀅𑀭𑀺𑀬𑀲𑁆𑀲 𑀲𑀘𑁆𑀘𑀸𑀦𑀻𑀢𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀭𑀺𑀬𑁄, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀅𑀣 𑀯𑀸 𑀏𑀢𑁂𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 ¶ 𑀬𑀣𑀸𑀪𑀽𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀅𑀭𑀺𑀬𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀅𑀧𑀺𑀘 𑀔𑁄 𑀧𑀦 𑀅𑀭𑀺𑀬𑀸𑀦𑀺 ¶ 𑀲𑀘𑁆𑀘𑀸𑀦𑀻𑀢𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺; 𑀅𑀭𑀺𑀬𑀸𑀦𑀻𑀢𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀯𑀺𑀲𑀁𑀯𑀸𑀤𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀏𑀯𑀫𑁂𑀢𑁆𑀣 𑀦𑀺𑀩𑁆𑀩𑀘𑀦𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 ‘𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄’? 𑀏𑀢𑁆𑀣 𑀳𑀺 𑀩𑀸𑀥𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀦𑁆𑀢𑀸𑀧𑀦𑀭𑀲𑀁, 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀮𑀓𑁆𑀔𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀁, 𑀧𑀮𑀺𑀩𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀦𑁆𑀢𑀺𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁 ¶ . 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀭𑀡𑀭𑀲𑀁, 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀧𑀺𑀘 𑀧𑀯𑀢𑁆𑀢𑀺𑀧𑀯𑀢𑁆𑀢𑀓𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀓𑀮𑀓𑁆𑀔𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸. 𑀢𑀣𑀸 𑀲𑀗𑁆𑀔𑀢𑀢𑀡𑁆𑀳𑀸𑀅𑀲𑀗𑁆𑀔𑀢𑀤𑀲𑁆𑀲𑀦𑀮𑀓𑁆𑀔𑀡𑀸𑀦𑀺 𑀘𑀸𑀢𑀺 𑀏𑀯𑀫𑁂𑀢𑁆𑀣 ‘𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀅𑀢𑁆𑀣𑀢𑁆𑀣𑀼𑀤𑁆𑀥𑀸𑀭𑀢𑁄 𑀘𑁂𑀯𑀸’𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑀓𑁄 𑀲𑀘𑁆𑀘𑀝𑁆𑀞𑁄𑀢𑀺 𑀘𑁂? 𑀬𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀫𑀸𑀬𑀸𑀯 𑀯𑀺𑀧𑀭𑀻𑀢𑀓𑁄, 𑀫𑀭𑀻𑀘𑀻𑀯 𑀯𑀺𑀲𑀁𑀯𑀸𑀤𑀓𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸𑀯 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑁄 𑀘 𑀦 𑀳𑁄𑀢𑀺; 𑀅𑀣 𑀔𑁄 𑀩𑀸𑀥𑀦𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀧𑁆𑀧𑀓𑀸𑀭𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀦 𑀅𑀭𑀺𑀬𑀜𑀸𑀡𑀲𑁆𑀲 𑀕𑁄𑀘𑀭𑁄 𑀳𑁄𑀢𑀺𑀬𑁂𑀯; 𑀏𑀲 𑀅𑀕𑁆𑀕𑀺𑀮𑀓𑁆𑀔𑀡𑀁 𑀯𑀺𑀬, 𑀮𑁄𑀓𑀧𑀓𑀢𑀺 𑀯𑀺𑀬 𑀘 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄 𑀲𑀘𑁆𑀘𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀅𑀧𑀺𑀘 𑁋

𑀦𑀸𑀩𑀸𑀥𑀓𑀁 𑀬𑀢𑁄 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀸 𑀅𑀜𑁆𑀜𑀁 𑀦 𑀩𑀸𑀥𑀓𑀁;

𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦, 𑀢𑀢𑁄 𑀲𑀘𑁆𑀘𑀫𑀺𑀤𑀁 𑀫𑀢𑀁.

𑀢𑀁 𑀯𑀺𑀦𑀸 𑀦𑀸𑀜𑁆𑀜𑀢𑁄 𑀤𑀼𑀓𑁆𑀔𑀁, 𑀦 𑀳𑁄𑀢𑀺 𑀦 𑀘 𑀢𑀁 𑀢𑀢𑁄;

𑀤𑀼𑀓𑁆𑀔𑀳𑁂𑀢𑀼𑀦𑀺𑀬𑀸𑀫𑁂𑀦, 𑀇𑀢𑀺 𑀲𑀘𑁆𑀘𑀁 𑀯𑀺𑀲𑀢𑁆𑀢𑀺𑀓𑀸.

𑀦𑀸𑀜𑁆𑀜𑀸 𑀦𑀺𑀩𑁆𑀩𑀸𑀦𑀢𑁄 𑀲𑀦𑁆𑀢𑀺, 𑀲𑀦𑁆𑀢𑀁 𑀦 𑀘 𑀦 𑀢𑀁 𑀬𑀢𑁄;

𑀲𑀦𑁆𑀢𑀪𑀸𑀯𑀦𑀺𑀬𑀸𑀫𑁂𑀦, 𑀢𑀢𑁄 𑀲𑀘𑁆𑀘𑀫𑀺𑀤𑀁 𑀫𑀢𑀁.

𑀫𑀕𑁆𑀕𑀸 ¶ 𑀅𑀜𑁆𑀜𑀁 𑀦 𑀦𑀺𑀬𑁆𑀬𑀸𑀦𑀁, 𑀅𑀦𑀺𑀬𑁆𑀬𑀸𑀦𑁄 𑀦 𑀘𑀸𑀧𑀺 𑀲𑁄;

𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸, 𑀇𑀢𑀺 𑀲𑁄 𑀲𑀘𑁆𑀘𑀲𑀫𑁆𑀫𑀢𑁄.

𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲-𑀪𑀽𑀢𑀪𑀸𑀯𑀁 𑀘𑀢𑀽𑀲𑀼𑀧𑀺;

𑀤𑀼𑀓𑁆𑀔𑀸𑀤𑀻𑀲𑁆𑀯𑀯𑀺𑀲𑁂𑀲𑁂𑀦, 𑀲𑀘𑁆𑀘𑀝𑁆𑀞𑀁 𑀆𑀳𑀼 𑀧𑀡𑁆𑀟𑀺𑀢𑀸𑀢𑀺.

𑀏𑀯𑀁 ¶ ‘𑀅𑀢𑁆𑀣𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 ‘𑀅𑀢𑁆𑀣𑀼𑀤𑁆𑀥𑀸𑀭𑀢𑁄’? 𑀇𑀥𑀸𑀬𑀁 ‘𑀲𑀘𑁆𑀘’𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂, 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 ¶ 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦) 𑀧𑀭𑀫𑀢𑁆𑀣𑀲𑀘𑁆𑀘𑁂 𑀦𑀺𑀩𑁆𑀩𑀸𑀦𑁂 𑀘𑁂𑀯 𑀫𑀕𑁆𑀕𑁂 𑀘. ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀅𑀭𑀺𑀬𑀲𑀘𑁆𑀘𑁂 𑀯𑀢𑁆𑀢𑀢𑀻𑀢𑀺 𑀏𑀯𑀫𑁂𑀢𑁆𑀣 ‘𑀅𑀢𑁆𑀣𑀼𑀤𑁆𑀥𑀸𑀭𑀢𑁄’𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀅𑀦𑀽𑀦𑀸𑀥𑀺𑀓𑀢𑁄’𑀢𑀺 𑀓𑀲𑁆𑀫𑀸 𑀧𑀦 𑀘𑀢𑁆𑀢𑀸𑀭𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀻𑀢𑀺 𑀘𑁂? 𑀅𑀜𑁆𑀜𑀲𑁆𑀲𑀸𑀲𑀫𑁆𑀪𑀯𑀢𑁄, 𑀅𑀜𑁆𑀜𑀢𑀭𑀲𑁆𑀲 𑀘 𑀅𑀦𑀧𑀦𑁂𑀬𑁆𑀬𑀪𑀸𑀯𑀢𑁄; 𑀦 𑀳𑀺 𑀏𑀢𑁂𑀳𑀺 𑀅𑀜𑁆𑀜𑀁 𑀅𑀥𑀺𑀓𑀁 𑀯𑀸 𑀏𑀢𑁂𑀲𑀁 𑀯𑀸 𑀏𑀓𑀫𑁆𑀧𑀺 𑀅𑀧𑀦𑁂𑀢𑀩𑁆𑀩𑀁 𑀲𑀫𑁆𑀪𑁄𑀢𑀺. 𑀬𑀣𑀸𑀳 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑁂𑀬𑁆𑀬 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 ‘𑀦𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀬𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀤𑁂𑀲𑀺𑀢𑀁. 𑀅𑀳𑀫𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺. 𑀬𑀣𑀸 𑀘𑀸𑀳 𑁋 ‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀦𑁂𑀢𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁, 𑀬𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀤𑁂𑀲𑀺𑀢𑀁. 𑀅𑀳𑀫𑁂𑀢𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁 𑀧𑀘𑁆𑀘𑀓𑁆𑀔𑀸𑀬 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁦𑁮𑁬).

𑀅𑀧𑀺𑀘 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀦𑁆𑀢𑁄 𑀪𑀕𑀯𑀸 𑀲𑀳𑁂𑀢𑀼𑀓𑀁 𑀆𑀘𑀺𑀓𑁆𑀔𑀺, 𑀦𑀺𑀯𑀢𑁆𑀢𑀺𑀜𑁆𑀘 𑀲𑀉𑀧𑀸𑀬𑀁. 𑀇𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀽𑀦𑀁 ¶ 𑀏𑀢𑀧𑁆𑀧𑀭𑀫𑀢𑁄 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀣𑀸 𑀧𑀭𑀺𑀜𑁆𑀜𑁂𑀬𑁆𑀬 𑀧𑀳𑀸𑀢𑀩𑁆𑀩 𑀲𑀘𑁆𑀙𑀺𑀓𑀸𑀢𑀩𑁆𑀩 𑀪𑀸𑀯𑁂𑀢𑀩𑁆𑀩𑀸𑀦𑀁, 𑀢𑀡𑁆𑀳𑀸𑀯𑀢𑁆𑀣𑀼𑀢𑀡𑁆𑀳𑀸𑀢𑀡𑁆𑀳𑀸𑀦𑀺𑀭𑁄𑀥𑀢𑀡𑁆𑀳𑀸𑀦𑀺𑀭𑁄𑀥𑀼𑀧𑀸𑀬𑀸𑀦𑀁, 𑀆𑀮𑀬𑀸𑀮𑀬𑀭𑀸𑀫𑀢𑀸𑀆𑀮𑀬𑀲𑀫𑀼𑀕𑁆𑀖𑀸𑀢𑀆𑀮𑀬𑀲𑀫𑀼𑀕𑁆𑀖𑀸𑀢𑀽𑀧𑀸𑀬𑀸𑀦𑀜𑁆𑀘 𑀯𑀲𑁂𑀦𑀸𑀧𑀺 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 ‘𑀅𑀦𑀽𑀦𑀸𑀥𑀺𑀓𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀓𑀫𑀢𑁄’𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀏𑀢𑁆𑀣 𑀘 𑀑𑀴𑀸𑀭𑀺𑀓𑀢𑁆𑀢𑀸 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀧𑀞𑀫𑀁 ¶ 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀳𑁂𑀢𑀼𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑁄𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀢𑀤𑀥𑀺𑀕𑀫𑀼𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀫𑀕𑁆𑀕𑀲𑀘𑁆𑀘𑀁. 𑀪𑀯𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀧𑀞𑀫𑀁 𑀤𑀼𑀓𑁆𑀔𑀫𑀸𑀳. 𑀢𑀁 𑀦𑁂𑀯 𑀅𑀓𑀢𑀁 𑀆𑀕𑀘𑁆𑀙𑀢𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀢𑁄 𑀳𑁄𑀢𑀺, 𑀇𑀢𑁄 𑀧𑀦 𑀳𑁄𑀢𑀻𑀢𑀺 ¶ 𑀜𑀸𑀧𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑀼𑀤𑀬𑀁. 𑀢𑀢𑁄 𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀦𑀁 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀕𑀯𑁂𑀲𑀻𑀦𑀁 𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀦𑀺𑀭𑁄𑀥𑀁. 𑀢𑀢𑁄 𑀦𑀺𑀭𑁄𑀥𑀸𑀥𑀺𑀕𑀫𑀢𑁆𑀣𑀁 𑀦𑀺𑀭𑁄𑀥𑀲𑀫𑁆𑀧𑀸𑀧𑀓𑀁 𑀫𑀕𑁆𑀕𑀦𑁆𑀢𑀺 𑀏𑀯𑀫𑁂𑀢𑁆𑀣 ‘𑀓𑀫𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀁 𑀜𑀸𑀡𑀁 𑀢𑀲𑁆𑀲 𑀓𑀺𑀘𑁆𑀘𑀢𑁄’𑀢𑀺 𑀲𑀘𑁆𑀘𑀜𑀸𑀡𑀓𑀺𑀘𑁆𑀘𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀤𑀼𑀯𑀺𑀥𑀜𑁆𑀳𑀺 𑀲𑀘𑁆𑀘𑀜𑀸𑀡𑀁 𑁋 𑀅𑀦𑀼𑀩𑁄𑀥𑀜𑀸𑀡𑀜𑁆𑀘 𑀧𑀝𑀺𑀯𑁂𑀥𑀜𑀸𑀡𑀜𑁆𑀘. 𑀢𑀢𑁆𑀣 𑀅𑀦𑀼𑀩𑁄𑀥𑀜𑀸𑀡𑀁 𑀮𑁄𑀓𑀺𑀬𑀁 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀦𑀺𑀭𑁄𑀥𑁂 𑀫𑀕𑁆𑀕𑁂 𑀘 𑀧𑀯𑀢𑁆𑀢𑀢𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁 𑀦𑀺𑀭𑁄𑀥𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀢𑁄 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀬𑀣𑀸𑀳 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀫𑁆𑀧𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦𑁂𑀢𑀁 𑀮𑁄𑀓𑀺𑀬𑀁, 𑀢𑀢𑁆𑀣 𑀤𑀼𑀓𑁆𑀔𑀜𑀸𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺, 𑀲𑀫𑀼𑀤𑀬𑀜𑀸𑀡𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁, 𑀫𑀕𑁆𑀕𑀜𑀸𑀡𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁; 𑀤𑀼𑀓𑁆𑀔𑀜𑀸𑀡𑀁 𑀯𑀸 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀭𑀳𑀺𑀢𑁂𑀲𑀼 𑀔𑀦𑁆𑀥𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀜𑁆𑀜𑀸𑀲𑀗𑁆𑀔𑀸𑀢𑀁 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀲𑀫𑀼𑀤𑀬𑀜𑀸𑀡𑀁 𑀇𑀲𑁆𑀲𑀭𑀧𑁆𑀧𑀥𑀸𑀦𑀓𑀸𑀮𑀲𑀪𑀸𑀯𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀅𑀓𑀸𑀭𑀡𑁂 𑀓𑀸𑀭𑀡𑀸𑀪𑀺𑀫𑀸𑀦𑀧𑁆𑀧𑀯𑀢𑁆𑀢𑀁 𑀳𑁂𑀢𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀅𑀭𑀽𑀧𑀮𑁄𑀓𑀮𑁄𑀓𑀣𑀽𑀧𑀺𑀓𑀸𑀤𑀻𑀲𑀼 𑀅𑀧𑀯𑀕𑁆𑀕𑀕𑁆𑀕𑀸𑀳𑀪𑀽𑀢𑀁 𑀦𑀺𑀭𑁄𑀥𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀫𑀕𑁆𑀕𑀜𑀸𑀡𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑁂 ¶ 𑀅𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀕𑁆𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀁 𑀉𑀧𑀸𑀬𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀮𑁄𑀓𑁂 ¶ 𑀮𑁄𑀓𑀧𑁆𑀧𑀪𑀯𑁂, 𑀮𑁄𑀓𑀢𑁆𑀣𑀕𑀫𑁂 𑀲𑀺𑀯𑁂 𑀘 𑀢𑀤𑀼𑀧𑀸𑀬𑁂;

𑀲𑀫𑁆𑀫𑀼𑀬𑁆𑀳𑀢𑀺 𑀢𑀸𑀯 𑀦𑀭𑁄, 𑀦 𑀯𑀺𑀚𑀸𑀦𑀸𑀢𑀺 𑀬𑀸𑀯 𑀲𑀘𑁆𑀘𑀸𑀦𑀻𑀢𑀺.

𑀏𑀯𑀫𑁂𑀢𑁆𑀣 ‘𑀜𑀸𑀡𑀓𑀺𑀘𑁆𑀘𑀢𑁄’𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀸’𑀢𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀫𑀺𑀜𑁆𑀳𑀺, 𑀞𑀧𑁂𑀢𑁆𑀯𑀸 𑀢𑀡𑁆𑀳𑀜𑁆𑀘𑁂𑀯 𑀅𑀦𑀸𑀲𑀯𑀥𑀫𑁆𑀫𑁂 𑀘, 𑀲𑁂𑀲𑀸 𑀲𑀩𑁆𑀩𑀥𑀫𑁆𑀫𑀸 𑀅𑀦𑁆𑀢𑁄𑀕𑀥𑀸; 𑀲𑀫𑀼𑀤𑀬𑀲𑀘𑁆𑀘𑁂 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺; 𑀦𑀺𑀭𑁄𑀥𑀲𑀘𑁆𑀘𑀁 𑀅𑀲𑀫𑁆𑀫𑀺𑀲𑁆𑀲𑀁; 𑀫𑀕𑁆𑀕𑀲𑀘𑁆𑀘𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀼𑀔𑁂𑀦 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀸𑀩𑀮𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀧𑀤𑁂𑀲𑁂𑀦 𑀢𑀬𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄, 𑀲𑀫𑁆𑀫𑀸𑀯𑀸𑀘𑀸𑀧𑀤𑁂𑀲𑁂𑀦 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀧𑀤𑁂𑀲𑁂𑀦 𑀢𑀻𑀡𑀺 𑀓𑀸𑀬𑀲𑀼𑀘𑀭𑀺𑀢𑀸𑀦𑀺, 𑀲𑀫𑁆𑀫𑀸𑀆𑀚𑀻𑀯𑀫𑀼𑀔𑁂𑀦 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 ¶ 𑀘, 𑀲𑀩𑁆𑀩𑁂𑀲𑀁𑀬𑁂𑀯 𑀯𑀸 𑀏𑀢𑁂𑀲𑀁 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀅𑀭𑀺𑀬𑀓𑀦𑁆𑀢𑀲𑀻𑀮𑀢𑁆𑀢𑀸 𑀲𑀻𑀮𑀲𑁆𑀲 𑀘 𑀲𑀤𑁆𑀥𑀸𑀳𑀢𑁆𑀣𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀅𑀢𑁆𑀣𑀺𑀢𑀸𑀬 𑀘 𑀅𑀢𑁆𑀣𑀺𑀪𑀸𑀯𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸, 𑀲𑀫𑁆𑀫𑀸𑀯𑀸𑀬𑀸𑀫𑀸𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀻𑀭𑀺𑀬𑀩𑀮𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺, 𑀲𑀫𑁆𑀫𑀸𑀲𑀢𑀺𑀅𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀢𑀺𑀧𑀝𑁆𑀞𑀸𑀦𑀲𑀢𑀺𑀦𑁆𑀤𑁆𑀭𑀺𑀬𑀲𑀢𑀺𑀩𑀮𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺, 𑀲𑀫𑁆𑀫𑀸𑀲𑀫𑀸𑀥𑀺𑀅𑀧𑀤𑁂𑀲𑁂𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀬𑁄 𑀢𑀬𑁄 𑀢𑀬𑁄 𑀲𑀫𑀸𑀥𑀻, 𑀘𑀺𑀢𑁆𑀢𑀲𑀫𑀸𑀥𑀺𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀩𑀮𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺 𑀅𑀦𑁆𑀢𑁄𑀕𑀥𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 ‘𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀸’𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀉𑀧𑀫𑀸𑀢𑁄’𑀢𑀺 𑀪𑀸𑀭𑁄 𑀯𑀺𑀬 𑀳𑀺 𑀤𑀼𑀓𑁆𑀔𑀲𑀘𑁆𑀘𑀁 𑀤𑀝𑁆𑀞𑀩𑁆𑀩𑀁, 𑀪𑀸𑀭𑀸𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀽𑀧𑀸𑀬𑁄 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁; 𑀭𑁄𑀕𑁄 𑀯𑀺𑀬 𑀘 𑀤𑀼𑀓𑁆𑀔𑀲𑀘𑁆𑀘𑀁, 𑀭𑁄𑀕𑀦𑀺𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀭𑁄𑀕𑀯𑀽𑀧𑀲𑀫𑁄 𑀯𑀺𑀬 𑀦𑀺𑀭𑁄𑀥𑀲𑀘𑁆𑀘𑀁, 𑀪𑁂𑀲𑀚𑁆𑀚𑀫𑀺𑀯 𑀫𑀕𑁆𑀕𑀲𑀘𑁆𑀘𑀁; 𑀤𑀼𑀩𑁆𑀪𑀺𑀓𑁆𑀔𑀫𑀺𑀯 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀤𑀼𑀩𑁆𑀩𑀼𑀝𑁆𑀞𑀺 𑀯𑀺𑀬 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀼𑀪𑀺𑀓𑁆𑀔𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁 ¶ , 𑀲𑀼𑀯𑀼𑀝𑁆𑀞𑀺 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁. 𑀅𑀧𑀺𑀘 𑀯𑁂𑀭𑀻𑀯𑁂𑀭𑀫𑀽𑀮𑀯𑁂𑀭𑀲𑀫𑀼𑀕𑁆𑀖𑀸𑀢𑀯𑁂𑀭𑀲𑀫𑀼𑀕𑁆𑀖𑀸𑀢𑀼𑀧𑀸𑀬𑁂𑀳𑀺, 𑀯𑀺𑀲𑀭𑀼𑀓𑁆𑀔𑀭𑀼𑀓𑁆𑀔𑀫𑀽𑀮𑀫𑀽𑀮𑀼𑀧𑀘𑁆𑀙𑁂𑀤𑀢𑀤𑀼𑀧𑀘𑁆𑀙𑁂𑀤𑀼𑀧𑀸𑀬𑁂𑀳𑀺, 𑀪𑀬𑀪𑀬𑀫𑀽𑀮𑀦𑀺𑀩𑁆𑀪𑀬𑀢𑀤𑀥𑀺𑀕𑀫𑀼𑀧𑀸𑀬𑁂𑀳𑀺, 𑀑𑀭𑀺𑀫𑀢𑀻𑀭𑀫𑀳𑁄𑀖𑀧𑀸𑀭𑀺𑀫𑀢𑀻𑀭𑀢𑀁𑀲𑀫𑁆𑀧𑀸𑀧𑀓𑀯𑀸𑀬𑀸𑀫𑁂𑀳𑀺 𑀘 𑀬𑁄𑀚𑁂𑀢𑁆𑀯𑀸𑀧𑁂𑀢𑀸𑀦𑀺 𑀉𑀧𑀫𑀸𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 ‘𑀉𑀧𑀫𑀸𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀘𑀢𑀼𑀓𑁆𑀓𑀢𑁄’𑀢𑀺 𑀅𑀢𑁆𑀣𑀺 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁, 𑀅𑀢𑁆𑀣𑀺 𑀅𑀭𑀺𑀬𑀲𑀘𑁆𑀘𑀁 𑀦 𑀤𑀼𑀓𑁆𑀔𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀜𑁆𑀘𑁂𑀯 ¶ 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀅𑀢𑁆𑀣𑀺 𑀦𑁂𑀯 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁. 𑀏𑀲 𑀦𑀬𑁄 𑀲𑀫𑀼𑀤𑀬𑀸𑀤𑀻𑀲𑀼. 𑀢𑀢𑁆𑀣 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁. 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁 𑀦 𑀤𑀼𑀓𑁆𑀔𑀁. 𑀇𑀢𑀭𑀁 𑀧𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀢𑁄, 𑀦 𑀧𑀦 𑀬𑀲𑁆𑀲 𑀧𑀭𑀺𑀜𑁆𑀜𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀜𑁆𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘 𑀅𑀜𑁆𑀜𑀢𑁆𑀭 𑀢𑀡𑁆𑀳𑀸𑀬. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀧𑀭𑀺𑀜𑁆𑀜𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀣𑁂𑀦 𑀦𑁂𑀯 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁. 𑀏𑀯𑀁 𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 ‘𑀘𑀢𑀼𑀓𑁆𑀓𑀢𑁄’𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀲𑀼𑀜𑁆𑀜𑀢𑁂𑀓𑀯𑀺𑀥𑀸𑀤𑀻𑀳𑀻’𑀢𑀺 ¶ 𑀏𑀢𑁆𑀣 𑀲𑀼𑀜𑁆𑀜𑀢𑁄 𑀢𑀸𑀯 𑀧𑀭𑀫𑀢𑁆𑀣𑁂𑀦 𑀳𑀺 𑀲𑀩𑁆𑀩𑀸𑀦𑁂𑀯 𑀲𑀘𑁆𑀘𑀸𑀦𑀺 𑀯𑁂𑀤𑀓𑀓𑀸𑀭𑀓𑀦𑀺𑀩𑁆𑀩𑀼𑀢𑀕𑀫𑀓𑀸𑀪𑀸𑀯𑀢𑁄 𑀲𑀼𑀜𑁆𑀜𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀤𑀼𑀓𑁆𑀔𑀫𑁂𑀯 𑀳𑀺 𑀦 𑀓𑁄𑀘𑀺 𑀤𑀼𑀓𑁆𑀔𑀺𑀢𑁄, 𑀓𑀸𑀭𑀓𑁄 𑀦 𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀺;

𑀅𑀢𑁆𑀣𑀺 𑀦𑀺𑀩𑁆𑀩𑀼𑀢𑀺 𑀦 𑀦𑀺𑀩𑁆𑀩𑀼𑀢𑁄 𑀧𑀼𑀫𑀸, 𑀫𑀕𑁆𑀕𑀫𑀢𑁆𑀣𑀺 𑀕𑀫𑀓𑁄 𑀦 𑀯𑀺𑀚𑁆𑀚𑀢𑀻𑀢𑀺.

𑀅𑀣 𑀯𑀸 𑁋

𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀲𑀼𑀜𑁆𑀜𑀁, 𑀧𑀼𑀭𑀺𑀫𑀤𑁆𑀯𑀬𑀫𑀢𑁆𑀢𑀲𑀼𑀜𑁆𑀜𑀫𑀫𑀢𑀧𑀤𑀁;

𑀥𑀼𑀯𑀲𑀼𑀔𑀅𑀢𑁆𑀢𑀯𑀺𑀭𑀳𑀺𑀢𑁄, 𑀫𑀕𑁆𑀕𑁄 𑀇𑀢𑀺 𑀲𑀼𑀜𑁆𑀜𑀢𑁄 𑀢𑁂𑀲𑀼.

𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 ¶ 𑀯𑀸 𑀢𑀻𑀡𑀺, 𑀦𑀺𑀭𑁄𑀥𑁄 𑀘 𑀲𑁂𑀲𑀢𑁆𑀢𑀬𑀲𑀼𑀜𑁆𑀜𑁄. 𑀨𑀮𑀲𑀼𑀜𑁆𑀜𑁄 𑀯𑀸 𑀏𑀢𑁆𑀣 𑀳𑁂𑀢𑀼 𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄 𑀫𑀕𑁆𑀕𑁂 𑀘 𑀦𑀺𑀭𑁄𑀥𑀲𑁆𑀲, 𑀦 𑀨𑀮𑁂𑀦 𑀲𑀕𑀩𑁆𑀪𑁄 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬. 𑀳𑁂𑀢𑀼𑀲𑀼𑀜𑁆𑀜𑀜𑁆𑀘 𑀨𑀮𑀁 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸, 𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮𑀁 𑀳𑁂𑀢𑀼𑀨𑀮𑀲𑀫𑀯𑀸𑀬𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀸𑀤𑀻𑀦𑀺 𑀯𑀺𑀬. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀢𑀬𑀫𑀺𑀥 𑀦𑀺𑀭𑁄𑀥𑀲𑀼𑀜𑁆𑀜𑀁, 𑀢𑀬𑁂𑀦 𑀢𑁂𑀦𑀸𑀧𑀺 𑀦𑀺𑀩𑁆𑀩𑀼𑀢𑀺 𑀲𑀼𑀜𑁆𑀜𑀸;

𑀲𑀼𑀜𑁆𑀜𑁄 𑀨𑀮𑁂𑀦 𑀳𑁂𑀢𑀼, 𑀨𑀮𑀫𑁆𑀧𑀺 𑀢𑀁 𑀳𑁂𑀢𑀼𑀦𑀸 𑀲𑀼𑀜𑁆𑀜𑀦𑁆𑀢𑀺.

𑀏𑀯𑀁 ¶ 𑀢𑀸𑀯 ‘𑀲𑀼𑀜𑁆𑀜𑀢𑁄’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀏𑀓𑀯𑀺𑀥𑀸𑀤𑀻𑀳𑀻’𑀢𑀺 𑀲𑀩𑁆𑀩𑀫𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀏𑀓𑀯𑀺𑀥𑀁 𑀧𑀯𑀢𑁆𑀢𑀺𑀪𑀸𑀯𑀢𑁄, 𑀤𑀼𑀯𑀺𑀥𑀁 𑀦𑀸𑀫𑀭𑀽𑀧𑀢𑁄, 𑀢𑀺𑀯𑀺𑀥𑀁 𑀓𑀸𑀫𑀭𑀽𑀧𑀸𑀭𑀽𑀧𑀽𑀧𑀧𑀢𑀺𑀪𑀯𑀪𑁂𑀤𑀢𑁄, 𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀆𑀳𑀸𑀭𑀪𑁂𑀤𑀢𑁄, 𑀧𑀜𑁆𑀘𑀯𑀺𑀥𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑁂𑀤𑀢𑁄. 𑀲𑀫𑀼𑀤𑀬𑁄𑀧𑀺 𑀏𑀓𑀯𑀺𑀥𑁄 𑀧𑀯𑀢𑁆𑀢𑀓𑀪𑀸𑀯𑀢𑁄, 𑀤𑀼𑀯𑀺𑀥𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀲𑀫𑁆𑀧𑀬𑀼𑀢𑁆𑀢𑀢𑁄, 𑀢𑀺𑀯𑀺𑀥𑁄 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀪𑁂𑀤𑀢𑁄, 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀫𑀕𑁆𑀕𑀧𑁆𑀧𑀳𑁂𑀬𑁆𑀬𑀢𑁄, 𑀧𑀜𑁆𑀘𑀯𑀺𑀥𑁄 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑁂𑀤𑀢𑁄, 𑀙𑀩𑁆𑀩𑀺𑀥𑁄 𑀙𑀢𑀡𑁆𑀳𑀸𑀓𑀸𑀬𑀪𑁂𑀤𑀢𑁄. 𑀦𑀺𑀭𑁄𑀥𑁄𑀧𑀺 𑀏𑀓𑀯𑀺𑀥𑁄 𑀅𑀲𑀗𑁆𑀔𑀢𑀥𑀸𑀢𑀼𑀪𑀸𑀯𑀢𑁄, 𑀧𑀭𑀺𑀬𑀸𑀬𑁂𑀦 𑀧𑀦 𑀤𑀼𑀯𑀺𑀥𑁄 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀢𑁄, 𑀢𑀺𑀯𑀺𑀥𑁄 𑀪𑀯𑀢𑁆𑀢𑀬𑀯𑀽𑀧𑀲𑀫𑀢𑁄, 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀫𑀕𑁆𑀕𑀸𑀥𑀺𑀕𑀫𑀦𑀻𑀬𑀢𑁄, 𑀧𑀜𑁆𑀘𑀯𑀺𑀥𑁄 𑀧𑀜𑁆𑀘𑀸𑀪𑀺𑀦𑀦𑁆𑀤𑀦𑀯𑀽𑀧𑀲𑀫𑀢𑁄, 𑀙𑀩𑁆𑀩𑀺𑀥𑁄 𑀙𑀢𑀡𑁆𑀳𑀸𑀓𑀸𑀬𑀓𑁆𑀔𑀬𑀪𑁂𑀤𑀢𑁄. 𑀫𑀕𑁆𑀕𑁄𑀧𑀺 𑀏𑀓𑀯𑀺𑀥𑁄 𑀪𑀸𑀯𑁂𑀢𑀩𑁆𑀩𑀢𑁄, 𑀤𑀼𑀯𑀺𑀥𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑁂𑀤𑀢𑁄 𑀤𑀲𑁆𑀲𑀦𑀪𑀸𑀯𑀦𑀸𑀪𑁂𑀤𑀢𑁄 𑀯𑀸 ¶ , 𑀢𑀺𑀯𑀺𑀥𑁄 𑀔𑀦𑁆𑀥𑀢𑁆𑀢𑀬𑀪𑁂𑀤𑀢𑁄. 𑀅𑀬𑀜𑁆𑀳𑀺 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦 𑀦𑀺𑀧𑁆𑀧𑀤𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀬𑀣𑀸𑀳 𑁋

‘‘𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀢𑀬𑁄 𑀔𑀦𑁆𑀥𑀸 𑀲𑀗𑁆𑀕𑀳𑀺𑀢𑀸. 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄. 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸; 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸; 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑁋 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 ¶ 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨).

𑀏𑀢𑁆𑀣 𑀳𑀺 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀲𑀻𑀮𑀫𑁂𑀯. 𑀢𑀲𑁆𑀫𑀸 𑀢𑁂 𑀲𑀚𑀸𑀢𑀺𑀢𑁄 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀸𑀴𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑁂𑀢𑀺 𑀪𑀼𑀫𑁆𑀫𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀢𑁆𑀣𑁄 𑀧𑀦 𑀓𑀭𑀡𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀲𑀫𑀸𑀥𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀻𑀭𑀺𑀬𑁂 𑀧𑀦 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑁄 𑀳𑀼𑀢𑁆𑀯𑀸 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁂𑀲𑀼 𑀢𑀻𑀲𑀼 𑀲𑀳𑀸𑀬𑁂𑀲𑀼 𑀏𑀓𑁄 𑀲𑀼𑀧𑀼𑀧𑁆𑀨𑀺𑀢𑀁 𑀘𑀫𑁆𑀧𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀤𑀼𑀢𑀺𑀬𑁄 ¶ 𑀑𑀦𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀤𑀤𑁂𑀬𑁆𑀬. 𑀲𑁄 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸𑀧𑀺 𑀓𑀫𑁆𑀧𑀫𑀸𑀦𑁄 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀇𑀢𑀭𑁄 𑀅𑀁𑀲𑀓𑀽𑀝𑀁 𑀉𑀧𑀦𑀸𑀫𑁂𑀬𑁆𑀬. 𑀲𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀏𑀓𑀢𑁄 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀸 𑀢𑀬𑁄 𑀲𑀳𑀸𑀬𑀸 𑀯𑀺𑀬 𑀳𑀺 𑀏𑀓𑀢𑁄 𑀚𑀸𑀢𑀸 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸, 𑀲𑀼𑀧𑀼𑀧𑁆𑀨𑀺𑀢𑀘𑀫𑁆𑀧𑀓𑀭𑀼𑀓𑁆𑀔𑁄 𑀯𑀺𑀬 𑀆𑀭𑀫𑁆𑀫𑀡𑀁, 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺, 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄, 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 ¶ 𑀯𑀺𑀬 𑀲𑀢𑀺. 𑀬𑀣𑀸 𑀢𑁂𑀲𑀼 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀇𑀢𑀭𑁄 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀯𑀻𑀭𑀺𑀬𑁂 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑁄 𑀲𑀫𑀸𑀥𑀺 𑀲𑀓𑁆𑀓𑁄𑀢𑀺 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁. 𑀢𑀲𑁆𑀫𑀸 𑀲𑀫𑀸𑀥𑀺𑀬𑁂𑀯𑁂𑀢𑁆𑀣 𑀲𑀚𑀸𑀢𑀺𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄. 𑀯𑀸𑀬𑀸𑀫𑀲𑀢𑀺𑀬𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀲𑀼𑀧𑀺 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀢𑀓𑁆𑀓𑁂 𑀧𑀦 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀤𑁂𑀦𑁆𑀢𑁂 𑀲𑀓𑁆𑀓𑁄𑀢𑀺. 𑀓𑀣𑀁? 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀓𑀳𑀸𑀧𑀡𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀲𑀼 ¶ 𑀑𑀮𑁄𑀓𑁂𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀘𑀓𑁆𑀔𑀼𑀢𑀮𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀳𑀺 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑁄𑀢𑀺; 𑀏𑀯𑀫𑁂𑀯 𑀦 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁂𑀦 𑀧𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁂𑀦 𑀯𑀺𑀢𑀓𑁆𑀓𑁂𑀦 𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬 𑀆𑀤𑀸𑀬 𑀤𑀺𑀦𑁆𑀦𑀫𑁂𑀯 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯 𑀲𑀚𑀸𑀢𑀺𑀢𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀫𑀕𑁆𑀕𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀺𑀯𑀺𑀥𑁄 𑀔𑀦𑁆𑀥𑀢𑁆𑀢𑀬𑀪𑁂𑀤𑀢𑁄’’𑀢𑀺. 𑀘𑀢𑀼𑀩𑁆𑀩𑀺𑀥𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀯𑀲𑁂𑀦.

𑀅𑀧𑀺𑀘 𑀲𑀩𑁆𑀩𑀸𑀦𑁂𑀯 𑀲𑀘𑁆𑀘𑀸𑀦𑀺 𑀏𑀓𑀯𑀺𑀥𑀸𑀦𑀺 𑀅𑀯𑀺𑀢𑀣𑀢𑁆𑀢𑀸 𑀅𑀪𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀸, 𑀤𑀼𑀯𑀺𑀥𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄 𑀲𑀗𑁆𑀔𑀢𑀸𑀲𑀗𑁆𑀔𑀢𑀢𑁄 𑀘, 𑀢𑀺𑀯𑀺𑀥𑀸𑀦𑀺 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀢𑁄 𑀅𑀧𑁆𑀧𑀳𑀸𑀢𑀩𑁆𑀩𑀢𑁄 𑀦𑁂𑀯𑀧𑀳𑀸𑀢𑀩𑁆𑀩𑀦𑀸𑀧𑀳𑀸𑀢𑀩𑁆𑀩𑀢𑁄 ¶ 𑀘, 𑀘𑀢𑀼𑀩𑁆𑀩𑀺𑀥𑀸𑀦𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑀢𑁄𑀢𑀺. 𑀏𑀯𑀫𑁂𑀢𑁆𑀣 ‘𑀏𑀓𑀯𑀺𑀥𑀸𑀤𑀻𑀳𑀺’ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

‘𑀲𑀪𑀸𑀕𑀯𑀺𑀲𑀪𑀸𑀕𑀢𑁄’𑀢𑀺 𑀲𑀩𑁆𑀩𑀸𑀦𑁂𑀯 𑀘 𑀲𑀘𑁆𑀘𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀸𑀦𑀺 𑀅𑀯𑀺𑀢𑀣𑀢𑁄 𑀅𑀢𑁆𑀢𑀲𑀼𑀜𑁆𑀜𑀢𑁄 𑀤𑀼𑀓𑁆𑀓𑀭𑀧𑀝𑀺𑀯𑁂𑀥𑀢𑁄 𑀘. 𑀬𑀣𑀸𑀳 𑁋

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀦𑀦𑁆𑀤, 𑀓𑀢𑀫𑀁 𑀦𑀼 𑀔𑁄 𑀤𑀼𑀓𑁆𑀓𑀭𑀢𑀭𑀁 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀸 𑁋 𑀬𑁄 𑀤𑀽𑀭𑀢𑁄𑀯 𑀲𑀼𑀔𑀼𑀫𑁂𑀦 𑀢𑀸𑀮𑀘𑁆𑀙𑀺𑀕𑁆𑀕𑀴𑁂𑀦 𑀅𑀲𑀦𑀁 𑀅𑀢𑀺𑀧𑀸𑀢𑁂𑀬𑁆𑀬 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀅𑀯𑀺𑀭𑀸𑀥𑀺𑀢𑀁, 𑀬𑁄 𑀯𑀸 𑀲𑀢𑁆𑀢𑀥𑀸 ¶ 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀤𑀼𑀓𑁆𑀓𑀭𑀢𑀭𑀜𑁆𑀘𑁂𑀯 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀜𑁆𑀘 𑁋 𑀬𑁄 𑀲𑀢𑁆𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸’’𑀢𑀺. ‘‘𑀢𑀢𑁄 𑀔𑁄 𑀢𑁂, 𑀆𑀦𑀦𑁆𑀤, 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀭𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀬𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁧𑁫).

𑀯𑀺𑀲𑀪𑀸𑀕𑀸𑀦𑀺 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀢𑁄. 𑀧𑀼𑀭𑀺𑀫𑀸𑀦𑀺 𑀘 𑀤𑁆𑀯𑁂 𑀲𑀪𑀸𑀕𑀸𑀦𑀺 𑀤𑀼𑀭𑀯𑀕𑀸𑀳𑀢𑁆𑀣𑁂𑀦 𑀕𑀫𑁆𑀪𑀻𑀭𑀢𑁆𑀢𑀸 𑀮𑁄𑀓𑀺𑀬𑀢𑁆𑀢𑀸 𑀲𑀸𑀲𑀯𑀢𑁆𑀢𑀸 𑀘, 𑀯𑀺𑀲𑀪𑀸𑀕𑀸𑀦𑀺 𑀨𑀮𑀳𑁂𑀢𑀼𑀪𑁂𑀤𑀢𑁄 ¶ 𑀧𑀭𑀺𑀜𑁆𑀜𑁂𑀬𑁆𑀬𑀧𑁆𑀧𑀳𑀸𑀢𑀩𑁆𑀩𑀢𑁄 𑀘. 𑀧𑀘𑁆𑀙𑀺𑀫𑀸𑀦𑀺𑀧𑀺 𑀤𑁆𑀯𑁂 𑀲𑀪𑀸𑀕𑀸𑀦𑀺 𑀕𑀫𑁆𑀪𑀻𑀭𑀢𑁆𑀣𑁂𑀦 𑀤𑀼𑀭𑀯𑀕𑀸𑀳𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀢𑁆𑀢𑀸 𑀅𑀦𑀸𑀲𑀯𑀢𑁆𑀢𑀸 𑀘, 𑀯𑀺𑀲𑀪𑀸𑀕𑀸𑀦𑀺 𑀯𑀺𑀲𑀬𑀯𑀺𑀲𑀬𑀻𑀪𑁂𑀤𑀢𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀢𑁄 𑀘. 𑀧𑀞𑀫𑀢𑀢𑀺𑀬𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀨𑀮𑀸𑀧𑀤𑁂𑀲𑀢𑁄, 𑀯𑀺𑀲𑀪𑀸𑀕𑀸𑀦𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀢𑁄. 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀳𑁂𑀢𑀼𑀅𑀧𑀤𑁂𑀲𑀢𑁄, 𑀯𑀺𑀲𑀪𑀸𑀕𑀸𑀦𑀺 𑀏𑀓𑀦𑁆𑀢𑀓𑀼𑀲𑀮𑀸𑀓𑀼𑀲𑀮𑀢𑁄. 𑀧𑀞𑀫𑀘𑀢𑀼𑀢𑁆𑀣𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀲𑀗𑁆𑀔𑀢𑀢𑁄, 𑀯𑀺𑀲𑀪𑀸𑀕𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀪𑀸𑀯𑀢𑁄, 𑀯𑀺𑀲𑀪𑀸𑀕𑀸𑀦𑀺 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀢𑁄.

𑀇𑀢𑀺 𑀏𑀯𑀁 𑀧𑀓𑀸𑀭𑁂𑀳𑀺, 𑀦𑀬𑁂𑀳𑀺 𑀘 𑀯𑀺𑀘𑀓𑁆𑀔𑀡𑁄;

𑀯𑀺𑀚𑀜𑁆𑀜𑀸 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀲𑀪𑀸𑀕𑀯𑀺𑀲𑀪𑀸𑀕𑀢𑀦𑁆𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀚𑀸𑀢𑀺𑀦𑀺𑀤𑁆𑀤𑁂𑀲𑁄

𑁧𑁯𑁦. 𑀇𑀤𑀸𑀦𑀺 ¶ 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀺 𑀤𑀼𑀓𑁆𑀔𑀸𑀤𑀻𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀚𑀸𑀢𑀺𑀬𑀸 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄; 𑀚𑀭𑀸, 𑀫𑀭𑀡𑀁, 𑀲𑁄𑀓𑁄 ¶ , 𑀧𑀭𑀺𑀤𑁂𑀯𑁄, 𑀤𑀼𑀓𑁆𑀔𑀁, 𑀤𑁄𑀫𑀦𑀲𑁆𑀲𑀁, 𑀉𑀧𑀸𑀬𑀸𑀲𑁄, 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄, 𑀧𑀺𑀬𑀯𑀺𑀧𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄; 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀲𑁆𑀲 𑀧𑀺𑀬𑀯𑀺𑀧𑁆𑀧𑀬𑁄𑀕𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄; 𑀇𑀘𑁆𑀙𑀸 𑀯𑁂𑀤𑀺𑀢𑀩𑁆𑀩𑀸, 𑀇𑀘𑁆𑀙𑀸𑀬 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄; 𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸, 𑀔𑀦𑁆𑀥𑀸𑀦𑀁 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀓𑀣𑀦𑀢𑁆𑀣𑀸𑀬 𑀅𑀬𑀁 𑀫𑀸𑀢𑀺𑀓𑀸 𑁋 𑀇𑀤𑀜𑁆𑀳𑀺 𑀤𑀼𑀓𑁆𑀔𑀁 𑀦𑀸𑀫 𑀅𑀦𑁂𑀓𑀁 𑀦𑀸𑀦𑀧𑁆𑀧𑀓𑀸𑀭𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀼𑀓𑁆𑀔𑀤𑀼𑀓𑁆𑀔𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑀁, 𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁, 𑀧𑀭𑀺𑀬𑀸𑀬𑀤𑀼𑀓𑁆𑀔𑀁, 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺.

𑀢𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑀸 𑀤𑀼𑀓𑁆𑀔𑀯𑁂𑀤𑀦𑀸 𑀲𑀪𑀸𑀯𑀢𑁄 𑀘 𑀦𑀸𑀫𑀢𑁄 𑀘 𑀤𑀼𑀓𑁆𑀔𑀢𑁆𑀢𑀸 ‘𑀤𑀼𑀓𑁆𑀔𑀤𑀼𑀓𑁆𑀔𑀁’ 𑀦𑀸𑀫. 𑀲𑀼𑀔𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑁂𑀦 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 ‘𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁’ 𑀦𑀸𑀫. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀘𑁂𑀯 𑀅𑀯𑀲𑁂𑀲𑀸 𑀘 𑀢𑁂𑀪𑀽𑀫𑀓𑀸 𑀲𑀗𑁆𑀔𑀸𑀭𑀸 𑀉𑀤𑀬𑀩𑁆𑀩𑀬𑀧𑀻𑀴𑀺𑀢𑀢𑁆𑀢𑀸 ‘𑀲𑀗𑁆𑀔𑀸𑀭𑀤𑀼𑀓𑁆𑀔𑀁’ 𑀦𑀸𑀫. 𑀢𑀣𑀸 𑀧𑀻𑀴𑀦𑀁 𑀧𑀦 𑀫𑀕𑁆𑀕𑀨𑀮𑀸𑀦𑀫𑁆𑀧𑀺 𑀅𑀢𑁆𑀣𑀺. 𑀢𑀲𑁆𑀫𑀸 𑀏𑀢𑁂 𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀡𑁆𑀡𑀲𑀽𑀮𑀤𑀦𑁆𑀢𑀲𑀽𑀮𑀭𑀸𑀕𑀚𑀧𑀭𑀺𑀴𑀸𑀳𑀤𑁄𑀲𑀚𑀧𑀭𑀺𑀴𑀸𑀳𑀸𑀤𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀆𑀩𑀸𑀥𑁄 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀢𑁄 ¶ 𑀉𑀧𑀓𑁆𑀓𑀫𑀲𑁆𑀲 𑀘 𑀅𑀧𑀸𑀓𑀝𑀪𑀸𑀯𑀢𑁄 ‘𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁’ 𑀦𑀸𑀫, 𑀅𑀧𑀸𑀓𑀝𑀤𑀼𑀓𑁆𑀔𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀸𑀤𑀺𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀸𑀦𑀺𑀢𑀩𑁆𑀩𑀢𑁄 𑀉𑀧𑀓𑁆𑀓𑀫𑀲𑁆𑀲 𑀘 𑀧𑀸𑀓𑀝𑀪𑀸𑀯𑀢𑁄 ‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁’ 𑀦𑀸𑀫, 𑀧𑀸𑀓𑀝𑀤𑀼𑀓𑁆𑀔𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀁 𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀯𑀺𑀪𑀗𑁆𑀕𑁂 𑀆𑀕𑀢𑀁 𑀚𑀸𑀢𑀺𑀆𑀤𑀺 𑀲𑀩𑁆𑀩𑀫𑁆𑀧𑀺 𑀢𑀲𑁆𑀲 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 ‘𑀧𑀭𑀺𑀬𑀸𑀬𑀤𑀼𑀓𑁆𑀔𑀁’ 𑀦𑀸𑀫. 𑀤𑀼𑀓𑁆𑀔𑀤𑀼𑀓𑁆𑀔𑀁 ‘𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀁’ 𑀦𑀸𑀫.

𑀢𑀢𑁆𑀣 𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀞𑀢𑁆𑀯𑀸 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀓𑀣𑁂𑀢𑀩𑁆𑀩𑀁. 𑀅𑀭𑀺𑀬𑀲𑀘𑁆𑀘𑀜𑁆𑀘 𑀦𑀸𑀫𑁂𑀢𑀁 𑀧𑀸𑀴𑀺𑀬𑀁 𑀲𑀗𑁆𑀔𑁂𑀧𑀢𑁄𑀧𑀺 𑀆𑀕𑀘𑁆𑀙𑀢𑀺 𑀯𑀺𑀢𑁆𑀣𑀸𑀭𑀢𑁄𑀧𑀺. 𑀲𑀗𑁆𑀔𑁂𑀧𑀢𑁄 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑁂𑀧𑁂𑀦𑀧𑀺 𑀯𑀺𑀢𑁆𑀣𑀸𑀭𑁂𑀦𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 ¶ . 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀝𑁆𑀞𑀸𑀦𑁂 𑀧𑀦 𑀯𑀺𑀢𑁆𑀣𑀸𑀭𑁂𑀦𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀲𑀗𑁆𑀔𑁂𑀧𑁂𑀦. 𑀢𑀁 𑀇𑀤𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀢𑁆𑀣𑀸𑀭𑁂𑀦 𑀆𑀕𑀢𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁂𑀯 𑀓𑀣𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀬𑀁 𑀢𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 ‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀚𑀸𑀢𑀺𑀬𑀸 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀆𑀤𑀻𑀦𑀺 𑀢𑀸𑀯 ‘‘𑀢𑀢𑁆𑀣 𑀓𑀢𑀫𑀸 𑀚𑀸𑀢𑀺? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀻’’𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀪𑀸𑀚𑀦𑀻𑀬𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁯𑁧. 𑀢𑀢𑁆𑀭𑀸𑀬𑀁 ¶ 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. 𑀬𑀸 𑀤𑁂𑀯𑀤𑀢𑁆𑀢𑀲𑁆𑀲 𑀚𑀸𑀢𑀺, 𑀬𑀸 𑀲𑁄𑀫𑀤𑀢𑁆𑀢𑀲𑁆𑀲 𑀚𑀸𑀢𑀻𑀢𑀺 𑀏𑀯𑀜𑁆𑀳𑀺 𑀤𑀺𑀯𑀲𑀫𑁆𑀧𑀺 𑀓𑀣𑀺𑀬𑀫𑀸𑀦𑁂 𑀦𑁂𑀯 𑀲𑀢𑁆𑀢𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀦 𑀲𑀩𑁆𑀩𑀁 𑀅𑀧𑀭𑀢𑁆𑀣𑀤𑀻𑀧𑀦𑀁 𑀲𑀺𑀚𑁆𑀛𑀢𑀺. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦 𑀓𑁄𑀘𑀺 𑀲𑀢𑁆𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑁄 𑀳𑁄𑀢𑀺, 𑀦 𑀓𑀺𑀜𑁆𑀘𑀺 𑀅𑀧𑀭𑀢𑁆𑀣𑀤𑀻𑀧𑀦𑀁 𑀦 𑀲𑀺𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’’𑀦𑁆𑀢𑀺. 𑀢𑀫𑁆𑀳𑀺 𑀢𑀫𑁆𑀳𑀻𑀢𑀺 𑀅𑀬𑀁 𑀚𑀸𑀢𑀺𑀕𑀢𑀺𑀯𑀲𑁂𑀦 𑀅𑀦𑁂𑀓𑁂𑀲𑀁 𑀲𑀢𑁆𑀢𑀦𑀺𑀓𑀸𑀬𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀲𑀢𑁆𑀢𑀸𑀦𑀁 𑀦𑀺𑀓𑀸𑀬𑁂, 𑀲𑀢𑁆𑀢𑀖𑀝𑀸𑀬𑀁 𑀲𑀢𑁆𑀢𑀲𑀫𑀽𑀳𑁂𑀢𑀺 𑀅𑀢𑁆𑀣𑁄.

𑀚𑀸𑀢𑀻𑀢𑀺 𑀅𑀬𑀁 𑀚𑀸𑀢𑀺𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑁂𑀲 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁, 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 (𑀧𑀸𑀭𑀸. 𑁧𑁨; 𑀫. 𑀦𑀺. 𑁨.𑁨𑁫𑁭) 𑀏𑀢𑁆𑀣 𑀪𑀯𑁂 𑀆𑀕𑀢𑁄. ‘‘𑀅𑀢𑁆𑀣𑀺 𑀯𑀺𑀲𑀸𑀔𑁂 ¶ , 𑀦𑀺𑀕𑀡𑁆𑀞𑀸 𑀦𑀸𑀫 𑀲𑀫𑀡𑀚𑀸𑀢𑀺𑀓𑀸’’𑀢𑀺 (𑀅. 𑀦𑀺. 𑁩.𑁭𑁧) 𑀏𑀢𑁆𑀣 𑀦𑀺𑀓𑀸𑀬𑁂. ‘‘𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀺 𑀦𑀸𑀪𑀺𑀬𑀸 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀻’’𑀢𑀺 (𑀅. 𑀦𑀺. 𑁫.𑁧𑁯𑁬) 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁭𑁧) 𑀏𑀢𑁆𑀣 𑀲𑀗𑁆𑀔𑀢𑀮𑀓𑁆𑀔𑀡𑁂. ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀻’’𑀢𑀺 (𑀫𑀳𑀸𑀯. 𑁧𑁨𑁪) 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁. ‘‘𑀲𑀫𑁆𑀧𑀢𑀺𑀚𑀸𑀢𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄’’𑀢𑀺 (𑀫. 𑀦𑀺. 𑁩.𑁨𑁦𑁭) 𑀏𑀢𑁆𑀣 𑀧𑀲𑀽𑀢𑀺𑀬𑀁. ‘‘𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁩𑁩𑁧) 𑀏𑀢𑁆𑀣 𑀓𑀼𑀮𑁂. ‘‘𑀬𑀢𑁄𑀳𑀁, 𑀪𑀕𑀺𑀦𑀺, 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄’’𑀢𑀺 (𑀫. 𑀦𑀺. 𑁨.𑁩𑁫𑁧) 𑀏𑀢𑁆𑀣 𑀅𑀭𑀺𑀬𑀲𑀻𑀮𑁂. 𑀇𑀥 𑀧𑀦𑀸𑀬𑀁 𑀲𑀯𑀺𑀓𑀸𑀭𑁂𑀲𑀼 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀼 𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀚𑀸𑀬𑀫𑀸𑀦𑀓𑀯𑀲𑁂𑀦 𑀚𑀸𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀲𑀜𑁆𑀚𑀸𑀬𑀦𑀯𑀲𑁂𑀦 𑀲𑀜𑁆𑀚𑀸𑀢𑀻𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀑𑀓𑁆𑀓𑀫𑀦𑀯𑀲𑁂𑀦 𑀑𑀓𑁆𑀓𑀦𑁆𑀢𑀺. 𑀚𑀸𑀬𑀦𑀝𑁆𑀞𑁂𑀦 𑀯𑀸 𑀚𑀸𑀢𑀺, 𑀲𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀲𑀜𑁆𑀚𑀸𑀬𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺, 𑀲𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀺, 𑀲𑀸 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀅𑀡𑁆𑀟𑀓𑁄𑀲𑀜𑁆𑀘 𑀯𑀢𑁆𑀣𑀺𑀓𑁄𑀲𑀜𑁆𑀘 ¶ 𑀑𑀓𑁆𑀓𑀫𑀦𑁆𑀢𑀺, 𑀑𑀓𑁆𑀓𑀫𑀦𑁆𑀢𑀸𑀧𑀺 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀧𑀸𑀓𑀝𑀸 𑀏𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀬𑀁 𑀢𑀸𑀯 𑀲𑀫𑁆𑀫𑀼𑀢𑀺𑀓𑀣𑀸.

𑀇𑀤𑀸𑀦𑀺 ¶ 𑀧𑀭𑀫𑀢𑁆𑀣𑀓𑀣𑀸 𑀳𑁄𑀢𑀺. 𑀔𑀦𑁆𑀥𑀸 𑀏𑀯 𑀳𑀺 𑀧𑀭𑀫𑀢𑁆𑀣𑀢𑁄 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀲𑀢𑁆𑀢𑀸. 𑀢𑀢𑁆𑀣 𑀘 𑀔𑀦𑁆𑀥𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀏𑀓𑀲𑁆𑀲, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀦𑁆𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺. 𑀆𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀢𑀢𑁆𑀭 𑀢𑀢𑁆𑀭 𑀉𑀧𑁆𑀧𑀚𑁆𑀚𑀫𑀸𑀦𑀸𑀬𑀢𑀦𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀮𑀸𑀪𑁄𑀢𑀺 𑀲𑀦𑁆𑀢𑀢𑀺𑀬𑀁 𑀧𑀸𑀢𑀼𑀪𑀸𑀯𑁄𑀬𑁂𑀯; 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯 𑀳𑀺 𑀢𑀸𑀦𑀺 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀸𑀢𑀻𑀢𑀺 𑀅𑀬𑀁 𑀚𑀸𑀢𑀺 𑀦𑀸𑀫 𑀓𑀣𑀺𑀬𑀢𑀺. 𑀲𑀸 𑀧𑀦𑁂𑀲𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸, 𑀦𑀻𑀬𑁆𑀬𑀸𑀢𑀦𑀭𑀲𑀸, 𑀅𑀢𑀻𑀢𑀪𑀯𑀢𑁄 𑀇𑀥 𑀉𑀫𑁆𑀫𑀼𑀚𑁆𑀚𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀨𑀮𑀯𑀲𑁂𑀦 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸.

𑀇𑀤𑀸𑀦𑀺 ‘𑀚𑀸𑀢𑀺𑀬𑀸 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀅𑀬𑀜𑁆𑀳𑀺 𑀚𑀸𑀢𑀺 𑀲𑀬𑀁 𑀦 𑀤𑀼𑀓𑁆𑀔𑀸, 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀦 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀸𑀢𑀺 ¶ 𑀯𑀼𑀢𑁆𑀢𑀸. 𑀓𑀢𑀭𑀤𑀼𑀓𑁆𑀔𑀲𑁆𑀲 𑀧𑀦𑀸𑀬𑀁 𑀯𑀢𑁆𑀣𑀽𑀢𑀺? 𑀬𑀁 𑀢𑀁 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁪𑁬 𑀆𑀤𑀬𑁄) 𑀪𑀕𑀯𑀢𑀸𑀧𑀺 𑀉𑀧𑀫𑀸𑀯𑀲𑁂𑀦 𑀧𑀓𑀸𑀲𑀺𑀢𑀁 𑀆𑀧𑀸𑀬𑀺𑀓𑀁𑀤𑀼𑀓𑁆𑀔𑀁, 𑀬𑀜𑁆𑀘 𑀲𑀼𑀕𑀢𑀺𑀬𑀁 𑀫𑀦𑀼𑀲𑁆𑀲𑀮𑁄𑀓𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀏𑀲𑀸 𑀯𑀢𑁆𑀣𑀼. 𑀢𑀢𑁆𑀭𑀺𑀤𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀁 𑁋 𑀅𑀬𑀜𑁆𑀳𑀺 𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀦 𑀉𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀣 𑀔𑁄 𑀳𑁂𑀝𑁆𑀞𑀸 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀧𑀓𑁆𑀓𑀸𑀲𑀬𑀲𑁆𑀲 𑀉𑀤𑀭𑀧𑀝𑀮𑀧𑀺𑀝𑁆𑀞𑀺𑀓𑀡𑁆𑀟𑀓𑀸𑀦𑀁 𑀯𑁂𑀫𑀚𑁆𑀛𑁂 𑀧𑀭𑀫𑀲𑀫𑁆𑀩𑀸𑀥𑁂 𑀢𑀺𑀩𑁆𑀩𑀦𑁆𑀥𑀓𑀸𑀭𑁂 𑀦𑀸𑀦𑀸𑀓𑀼𑀡𑀧𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑁂 𑀅𑀲𑀼𑀘𑀺𑀧𑀭𑀫𑀤𑀼𑀕𑁆𑀕𑀦𑁆𑀥𑀧𑀯𑀦𑀯𑀺𑀘𑀭𑀺𑀢𑁂 𑀅𑀥𑀺𑀫𑀢𑁆𑀢𑀚𑁂𑀕𑀼𑀘𑁆𑀙𑁂 𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁂 𑀧𑀽𑀢𑀺𑀫𑀘𑁆𑀙𑀧𑀽𑀢𑀺𑀓𑀼𑀫𑁆𑀫𑀸𑀲𑀘𑀦𑁆𑀤𑀦𑀺𑀓𑀸𑀤𑀻𑀲𑀼 𑀓𑀺𑀫𑀺 𑀯𑀺𑀬 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄 𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀉𑀲𑁆𑀫𑀦𑀸 𑀧𑀼𑀝𑀧𑀸𑀓𑀁 𑀯𑀺𑀬 𑀧𑀘𑁆𑀘𑀫𑀸𑀦𑁄 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀲𑁂𑀤𑀺𑀬𑀫𑀸𑀦𑁄 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀭𑀳𑀺𑀢𑁄 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺. 𑀇𑀤𑀁 𑀢𑀸𑀯 ‘𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁’ 𑀤𑀼𑀓𑁆𑀔𑀁.

𑀬𑀁 𑀧𑀦 𑀲𑁄 𑀫𑀸𑀢𑀼 𑀲𑀳𑀲𑀸 𑀉𑀧𑀓𑁆𑀔𑀮𑀦𑀕𑀫𑀦𑀦𑀺𑀲𑀻𑀤𑀦𑀉𑀝𑁆𑀞𑀸𑀦𑀧𑀭𑀺𑀯𑀢𑁆𑀢𑀦𑀸𑀤𑀻𑀲𑀼 𑀲𑀼𑀭𑀸𑀥𑀼𑀢𑁆𑀢𑀳𑀢𑁆𑀣𑀕𑀢𑁄 𑀏𑀴𑀓𑁄 𑀯𑀺𑀬 𑀅𑀳𑀺𑀕𑀼𑀡𑁆𑀞𑀺𑀓𑀳𑀢𑁆𑀣𑀕𑀢𑁄 𑀲𑀧𑁆𑀧𑀧𑁄𑀢𑀓𑁄 𑀯𑀺𑀬 𑀘 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀑𑀥𑀼𑀦𑀦𑀦𑀺𑀤𑁆𑀥𑀼𑀦𑀦𑀸𑀤𑀺𑀦𑀸 𑀉𑀧𑀓𑁆𑀓𑀫𑁂𑀦 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀢𑀺, 𑀬𑀜𑁆𑀘 𑀫𑀸𑀢𑀼 𑀲𑀻𑀢𑀼𑀤𑀓𑀧𑀸𑀦𑀓𑀸𑀮𑁂 𑀲𑀻𑀢𑀦𑀭𑀓𑀽𑀧𑀧𑀦𑁆𑀦𑁄 ¶ 𑀯𑀺𑀬, 𑀉𑀡𑁆𑀳𑀬𑀸𑀕𑀼𑀪𑀢𑁆𑀢𑀸𑀤𑀺𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀅𑀗𑁆𑀕𑀸𑀭𑀯𑀼𑀝𑁆𑀞𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑁄 𑀯𑀺𑀬, 𑀮𑁄𑀡𑀫𑁆𑀩𑀺𑀮𑀸𑀤𑀺𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀔𑀸𑀭𑀸𑀧𑀝𑀺𑀘𑁆𑀙𑀓𑀸𑀤𑀺𑀓𑀫𑁆𑀫𑀓𑀸𑀭𑀡𑀧𑁆𑀧𑀢𑁆𑀢𑁄 𑀯𑀺𑀬 𑀢𑀺𑀩𑁆𑀩𑀁 𑀤𑀼𑀓𑁆𑀔𑀫𑀦𑀼𑀪𑁄𑀢𑀺 𑁋 𑀇𑀤𑀁 ‘𑀕𑀩𑁆𑀪𑀧𑀭𑀺𑀳𑀭𑀡𑀫𑀽𑀮𑀓𑀁’ 𑀤𑀼𑀓𑁆𑀔𑀁.

𑀬𑀁 ¶ 𑀧𑀦𑀲𑁆𑀲 𑀫𑀽𑀴𑁆𑀳𑀕𑀩𑁆𑀪𑀸𑀬 𑀫𑀸𑀢𑀼𑀬𑀸 𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀳𑀚𑁆𑀚𑀸𑀤𑀻𑀳𑀺𑀧𑀺 𑀅𑀤𑀲𑁆𑀲𑀦𑀸𑀭𑀳𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀙𑁂𑀤𑀦𑀨𑀸𑀮𑀦𑀸𑀤𑀻𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀤𑀁 ‘𑀕𑀩𑁆𑀪𑀯𑀺𑀧𑀢𑁆𑀢𑀺𑀫𑀽𑀮𑀓𑀁’ 𑀤𑀼𑀓𑁆𑀔𑀁. 𑀬𑀁 𑀯𑀺𑀚𑀸𑀬𑀫𑀸𑀦𑀸𑀬 𑀫𑀸𑀢𑀼𑀬𑀸 𑀓𑀫𑁆𑀫𑀚𑁂𑀳𑀺 𑀯𑀸𑀢𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀭𑀓𑀧𑀧𑀸𑀢𑀁 𑀯𑀺𑀬 𑀅𑀢𑀺𑀪𑀬𑀸𑀦𑀓𑀁 𑀬𑁄𑀦𑀺𑀫𑀕𑁆𑀕𑀁 𑀧𑀝𑀺𑀧𑀸𑀢𑀺𑀬𑀫𑀸𑀦𑀲𑁆𑀲 ¶ 𑀧𑀭𑀫𑀲𑀫𑁆𑀩𑀸𑀥𑁂𑀦 𑀬𑁄𑀦𑀺𑀫𑀼𑀔𑁂𑀦 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀯𑀺𑀬 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀲𑁆𑀲 𑀫𑀳𑀸𑀦𑀸𑀕𑀲𑁆𑀲 𑀦𑀭𑀓𑀲𑀢𑁆𑀢𑀲𑁆𑀲 𑀯𑀺𑀬 𑀘 𑀲𑀗𑁆𑀖𑀸𑀝𑀧𑀩𑁆𑀩𑀢𑁂𑀳𑀺 𑀯𑀺𑀘𑀼𑀡𑁆𑀡𑀺𑀬𑀫𑀸𑀦𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀤𑀁 ‘𑀯𑀺𑀚𑀸𑀬𑀦𑀫𑀽𑀮𑀓𑀁’ 𑀤𑀼𑀓𑁆𑀔𑀁. 𑀬𑀁 𑀧𑀦 𑀚𑀸𑀢𑀲𑁆𑀲 𑀢𑀭𑀼𑀡𑀯𑀡𑀲𑀤𑀺𑀲𑀲𑁆𑀲 𑀲𑀼𑀓𑀼𑀫𑀸𑀭𑀲𑀭𑀻𑀭𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀦𑁆𑀳𑀸𑀧𑀦𑀥𑁄𑀯𑀦𑀘𑁄𑀴𑀧𑀭𑀺𑀫𑀚𑁆𑀚𑀦𑀸𑀤𑀺𑀓𑀸𑀮𑁂 𑀲𑀽𑀘𑀺𑀫𑀼𑀔𑀔𑀼𑀭𑀥𑀸𑀭𑀯𑀺𑀚𑁆𑀛𑀦𑀨𑀸𑀮𑀦𑀲𑀤𑀺𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀤𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 ‘𑀩𑀳𑀺 𑀦𑀺𑀓𑁆𑀔𑀫𑀦𑀫𑀽𑀮𑀓𑀁’ 𑀤𑀼𑀓𑁆𑀔𑀁. 𑀬𑀁 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀯𑀥𑀦𑁆𑀢𑀲𑁆𑀲, 𑀅𑀘𑁂𑀮𑀓𑀯𑀢𑀸𑀤𑀺𑀯𑀲𑁂𑀦 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑁆𑀲, 𑀓𑁄𑀥𑀯𑀲𑁂𑀦 𑀅𑀪𑀼𑀜𑁆𑀚𑀦𑁆𑀢𑀲𑁆𑀲, 𑀉𑀩𑁆𑀩𑀦𑁆𑀥𑀦𑁆𑀢𑀲𑁆𑀲 𑀘 𑀤𑀼𑀓𑁆𑀔𑀁 𑀳𑁄𑀢𑀺 𑁋 𑀇𑀤𑀁 ‘𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁’ 𑀤𑀼𑀓𑁆𑀔𑀁.

𑀬𑀁 𑀧𑀦 𑀧𑀭𑀢𑁄 𑀯𑀥𑀩𑀦𑁆𑀥𑀦𑀸𑀤𑀻𑀦𑀺 𑀅𑀦𑀼𑀪𑀯𑀦𑁆𑀢𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀤𑀁 ‘𑀧𑀭𑀽𑀧𑀓𑁆𑀓𑀫𑀫𑀽𑀮𑀓𑀁’ 𑀤𑀼𑀓𑁆𑀔𑀦𑁆𑀢𑀺. 𑀇𑀢𑀺 𑀇𑀫𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀅𑀬𑀁 𑀚𑀸𑀢𑀺 𑀯𑀢𑁆𑀣𑀼𑀫𑁂𑀯 𑀳𑁄𑀢𑀻𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀚𑀸𑀬𑁂𑀣 𑀦𑁄 𑀘𑁂 𑀦𑀭𑀓𑁂𑀲𑀼 𑀲𑀢𑁆𑀢𑁄,

𑀢𑀢𑁆𑀣𑀕𑁆𑀕𑀺𑀤𑀸𑀳𑀸𑀤𑀺𑀓𑀫𑀧𑁆𑀧𑀲𑀬𑁆𑀳𑀁;

𑀮𑀪𑁂𑀣 𑀤𑀼𑀓𑁆𑀔𑀁 𑀦𑀼 𑀓𑀼𑀳𑀺𑀁 𑀧𑀢𑀺𑀝𑁆𑀞𑀁,

𑀇𑀘𑁆𑀘𑀸𑀳 𑀤𑀼𑀓𑁆𑀔𑀸𑀢𑀺 𑀫𑀼𑀦𑀻𑀥 𑀚𑀸𑀢𑀺.

𑀤𑀼𑀓𑁆𑀔𑀁 𑀢𑀺𑀭𑀘𑁆𑀙𑁂𑀲𑀼 𑀓𑀲𑀸𑀧𑀢𑁄𑀤-

𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺𑀪𑀯𑀁 𑀅𑀦𑁂𑀓𑀁;

𑀬𑀁 ¶ 𑀢𑀁 𑀓𑀣𑀁 𑀢𑀢𑁆𑀣 𑀪𑀯𑁂𑀬𑁆𑀬 𑀚𑀸𑀢𑀺𑀁,

𑀯𑀺𑀦𑀸 𑀢𑀳𑀺𑀁 𑀚𑀸𑀢𑀺 𑀢𑀢𑁄𑀧𑀺 𑀤𑀼𑀓𑁆𑀔𑀸.

𑀧𑁂𑀢𑁂𑀲𑀼 𑀤𑀼𑀓𑁆𑀔𑀁 𑀧𑀦 𑀔𑀼𑀧𑁆𑀧𑀺𑀧𑀸𑀲𑀸-

𑀯𑀸𑀢𑀸𑀢𑀧𑀸𑀤𑀺𑀧𑁆𑀧𑀪𑀯𑀁 𑀯𑀺𑀘𑀺𑀢𑁆𑀢𑀁;

𑀬𑀲𑁆𑀫𑀸 𑀅𑀚𑀸𑀢𑀲𑁆𑀲 𑀦 𑀢𑀢𑁆𑀣 𑀅𑀢𑁆𑀣𑀺,

𑀢𑀲𑁆𑀫𑀸𑀧𑀺 𑀤𑀼𑀓𑁆𑀔𑀁 𑀫𑀼𑀦𑀺 𑀚𑀸𑀢𑀺𑀫𑀸𑀳.

𑀢𑀺𑀩𑁆𑀩𑀦𑁆𑀥𑀓𑀸𑀭𑁂 ¶ 𑀘 𑀅𑀲𑀬𑁆𑀳𑀲𑀻𑀢𑁂,

𑀮𑁄𑀓𑀦𑁆𑀢𑀭𑁂 𑀬𑀁 𑀅𑀲𑀼𑀭𑁂𑀲𑀼 𑀤𑀼𑀓𑁆𑀔𑀁;

𑀦 𑀢𑀁 𑀪𑀯𑁂 𑀢𑀢𑁆𑀣 𑀦 𑀘𑀲𑁆𑀲 𑀚𑀸𑀢𑀺,

𑀬𑀢𑁄 𑀅𑀬𑀁 𑀚𑀸𑀢𑀺 𑀢𑀢𑁄𑀧𑀺 𑀤𑀼𑀓𑁆𑀔𑀸.

𑀬𑀜𑁆𑀘𑀸𑀧𑀺 ¶ 𑀕𑀽𑀣𑀦𑀭𑀓𑁂 𑀯𑀺𑀬 𑀫𑀸𑀢𑀼𑀕𑀩𑁆𑀪𑁂,

𑀲𑀢𑁆𑀢𑁄 𑀯𑀲𑀁 𑀘𑀺𑀭𑀫𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑀜𑁆𑀘;

𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀫𑀢𑀺𑀖𑁄𑀭𑀫𑀺𑀤𑀫𑁆𑀧𑀺 𑀦𑀢𑁆𑀣𑀺,

𑀚𑀸𑀢𑀺𑀁 𑀯𑀺𑀦𑀸 𑀇𑀢𑀺𑀧𑀺 𑀚𑀸𑀢𑀺𑀭𑀬𑀜𑁆𑀳𑀺 𑀤𑀼𑀓𑁆𑀔𑀸.

𑀓𑀺𑀁 𑀪𑀸𑀲𑀺𑀢𑁂𑀦 𑀩𑀳𑀼𑀦𑀸 𑀦𑀦𑀼 𑀬𑀁 𑀓𑀼𑀳𑀺𑀜𑁆𑀘𑀺,

𑀅𑀢𑁆𑀣𑀻𑀥 𑀓𑀺𑀜𑁆𑀘𑀺𑀤𑀧𑀺 𑀤𑀼𑀓𑁆𑀔𑀫𑀺𑀤𑀁 𑀓𑀤𑀸𑀘𑀺;

𑀦𑁂𑀯𑀢𑁆𑀣𑀺 𑀚𑀸𑀢𑀺𑀯𑀺𑀭𑀳𑁂 𑀬𑀤𑀢𑁄 𑀫𑀳𑁂𑀲𑀻,

𑀤𑀼𑀓𑁆𑀔𑀸𑀢𑀺 𑀲𑀩𑁆𑀩𑀧𑀞𑀫𑀁 𑀇𑀫𑀫𑀸𑀳 𑀚𑀸𑀢𑀺𑀦𑁆𑀢𑀺.

𑀚𑀭𑀸𑀦𑀺𑀤𑁆𑀤𑁂𑀲𑁄

𑁧𑁯𑁨. 𑀚𑀭𑀸𑀦𑀺𑀤𑁆𑀤𑁂𑀲𑁂 𑀚𑀭𑀸𑀢𑀺 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀚𑀻𑀭𑀡𑀢𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸. 𑀅𑀬𑀜𑁆𑀳𑀺 𑀚𑀭𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀪𑀸𑀯𑀢𑁄 𑀤𑀻𑀧𑀺𑀢𑀸, 𑀢𑁂𑀦𑀲𑁆𑀲𑀸 𑀇𑀤𑀁 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀚𑀻𑀭𑀡𑀢𑀸𑀢𑀺 𑀇𑀫𑀺𑀦𑀸 𑀆𑀓𑀸𑀭𑀢𑁄 ¶ , 𑀢𑁂𑀦𑀲𑁆𑀲𑀸𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀤𑀦𑁆𑀢𑀦𑀔𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀧𑀸𑀮𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀮𑁄𑀫𑀸𑀦𑀁 𑀧𑀮𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀯𑀮𑀺𑀢𑁆𑀢𑀘𑀢𑀸𑀢𑀺 𑀇𑀫𑀺𑀦𑀸 𑀫𑀁𑀲𑀁 𑀫𑀺𑀮𑀸𑀧𑁂𑀢𑁆𑀯𑀸 𑀢𑀘𑁂 𑀯𑀮𑀺𑀢𑁆𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀸 𑀇𑀫𑁂 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀢𑁂𑀳𑀺 𑀇𑀫𑁂𑀲𑀁 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸𑀢𑀺 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸. 𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀯𑀸𑀢𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀁𑀲𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺. 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸; 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺.

𑀆𑀬𑀼𑀦𑁄 ¶ 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄𑀢𑀺 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀬𑁂𑀯 𑀅𑀪𑀺𑀩𑁆𑀬𑀢𑁆𑀢𑀸𑀬 𑀆𑀬𑀼𑀓𑁆𑀔𑀬𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀲𑀗𑁆𑀔𑀸𑀢𑀸𑀬 𑀧𑀓𑀢𑀺𑀬𑀸 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀺𑀫𑁂 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺 𑀢𑀲𑁆𑀫𑀸 𑀚𑀭𑀸 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺 𑀲𑀼𑀔𑀼𑀫𑀫𑁆𑀧𑀺 ¶ 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀴𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’’𑀢𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸.

𑀲𑀸 𑀧𑀦𑁂𑀲𑀸 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀚𑀭𑀸 𑀧𑀸𑀓𑀝𑀸 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁄 𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 ‘𑀧𑀸𑀓𑀝𑀚𑀭𑀸’ 𑀦𑀸𑀫. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀚𑀭𑀸 𑀢𑀸𑀤𑀺𑀲𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄 ‘𑀧𑀝𑀺𑀘𑁆𑀙𑀦𑁆𑀦𑀚𑀭𑀸’ 𑀦𑀸𑀫. 𑀢𑀢𑁆𑀣 𑀬𑁆𑀯𑀸𑀬𑀁 𑀔𑀡𑁆𑀟𑀸𑀤𑀺𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀲𑁄 𑀢𑀸𑀤𑀺𑀲𑀸𑀦𑀁 𑀤𑀦𑁆𑀢𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀡𑁆𑀡𑁄𑀬𑁂𑀯. 𑀢𑀁 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑁂 𑀤𑀦𑁆𑀢𑀸 𑀚𑀭𑀸𑀬 𑀧𑀳𑀝𑀸’’𑀢𑀺 𑀚𑀭𑀁 𑀚𑀸𑀦𑀸𑀢𑀺, 𑀉𑀤𑀓𑀝𑁆𑀞𑀸𑀦𑁂 𑀩𑀤𑁆𑀥𑀸𑀦𑀺 𑀕𑁄𑀲𑀺𑀗𑁆𑀕𑀸𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀦𑀁 𑀯𑀺𑀬. 𑀧𑀼𑀦 𑀅𑀯𑀻𑀘𑀺 𑀲𑀯𑀻𑀘𑀻𑀢𑀺 𑀏𑀯𑀫𑁆𑀧𑀺 𑀅𑀬𑀁 𑀚𑀭𑀸 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀫𑀡𑀺𑀓𑀦𑀓𑀭𑀚𑀢𑀧𑀯𑀸𑀴𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀸𑀡𑀻𑀦𑀁 𑀯𑀺𑀬 𑀘 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀅𑀧𑀸𑀡𑀻𑀦𑀁 𑀯𑀺𑀬 𑀘 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 ‘𑀅𑀯𑀻𑀘𑀺𑀚𑀭𑀸’ 𑀦𑀸𑀫, 𑀦𑀺𑀭𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 ‘𑀲𑀯𑀻𑀘𑀺𑀚𑀭𑀸’ 𑀦𑀸𑀫.

𑀢𑀢𑁆𑀣 ¶ 𑀲𑀯𑀻𑀘𑀺𑀚𑀭𑀸 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀓𑀯𑀲𑁂𑀦 𑀏𑀯𑀁 𑀤𑀻𑀧𑁂𑀢𑀩𑁆𑀩𑀸 𑁋 𑀤𑀳𑀭𑀓𑀼𑀫𑀸𑀭𑀓𑀸𑀦𑀜𑁆𑀳𑀺 𑀧𑀞𑀫𑀫𑁂𑀯 𑀔𑀻𑀭𑀤𑀦𑁆𑀢𑀸 𑀦𑀸𑀫 𑀉𑀝𑁆𑀞𑀳𑀦𑁆𑀢𑀺, 𑀦 𑀢𑁂 𑀣𑀺𑀭𑀸. 𑀢𑁂𑀲𑀼 𑀧𑀦 𑀧𑀢𑀺𑀢𑁂𑀲𑀼 𑀧𑀼𑀦 𑀤𑀦𑁆𑀢𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂 𑀧𑀞𑀫𑀫𑁂𑀯 𑀲𑁂𑀢𑀸 𑀳𑁄𑀦𑁆𑀢𑀺, 𑀚𑀭𑀸𑀯𑀸𑀢𑁂𑀦 𑀧𑀦 𑀧𑀳𑀝𑀓𑀸𑀮𑁂 𑀓𑀸𑀴𑀓𑀸 𑀳𑁄𑀦𑁆𑀢𑀺. 𑀓𑁂𑀲𑀸 𑀧𑀦 𑀧𑀞𑀫𑀫𑁂𑀯 𑀢𑀫𑁆𑀩𑀸𑀧𑀺 𑀳𑁄𑀦𑁆𑀢𑀺 𑀓𑀸𑀴𑀓𑀸𑀧𑀺 𑀲𑁂𑀢𑀸𑀧𑀺. 𑀙𑀯𑀺 𑀧𑀦 𑀲𑀮𑁄𑀳𑀺𑀢𑀺𑀓𑀸 𑀳𑁄𑀢𑀺. 𑀯𑀟𑁆𑀠𑀦𑁆𑀢𑀸𑀦𑀁 𑀯𑀟𑁆𑀠𑀦𑁆𑀢𑀸𑀦𑀁 𑀑𑀤𑀸𑀢𑀸𑀦𑀁 𑀑𑀤𑀸𑀢𑀪𑀸𑀯𑁄, 𑀓𑀸𑀴𑀓𑀸𑀦𑀁 𑀓𑀸𑀴𑀓𑀪𑀸𑀯𑁄 𑀧𑀜𑁆𑀜𑀸𑀬𑀢𑀺, 𑀚𑀭𑀸𑀯𑀸𑀢𑁂𑀦 𑀧𑀦 𑀧𑀳𑀝𑀓𑀸𑀮𑁂 𑀯𑀴𑀺𑀁 𑀕𑀡𑁆𑀳𑀸𑀢𑀺. 𑀲𑀩𑁆𑀩𑀫𑁆𑀧𑀺 𑀲𑀲𑁆𑀲𑀁 𑀯𑀧𑀺𑀢𑀓𑀸𑀮𑁂 𑀲𑁂𑀢𑀁 𑀳𑁄𑀢𑀺, 𑀧𑀘𑁆𑀙𑀸 𑀦𑀻𑀮𑀁, 𑀚𑀭𑀸𑀯𑀸𑀢𑁂𑀦 𑀧𑀦 𑀧𑀳𑀝𑀓𑀸𑀮𑁂 𑀧𑀡𑁆𑀟𑀼𑀓𑀁 𑀳𑁄𑀢𑀺. 𑀅𑀫𑁆𑀩𑀗𑁆𑀓𑀼𑀭𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀭𑀸𑀢𑀺 𑀅𑀬𑀁 ¶ 𑀚𑀭𑀸 𑀦𑀸𑀫 𑀓𑀣𑀺𑀬𑀢𑀺. 𑀲𑀸 𑀧𑀦𑁂𑀲𑀸 ¶ 𑀔𑀦𑁆𑀥𑀧𑀭𑀺𑀧𑀸𑀓𑀮𑀓𑁆𑀔𑀡𑀸, 𑀫𑀭𑀡𑀽𑀧𑀦𑀬𑀦𑀭𑀲𑀸, 𑀬𑁄𑀩𑁆𑀩𑀦𑀯𑀺𑀦𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

‘𑀚𑀭𑀸𑀬 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀅𑀬𑀫𑁆𑀧𑀺 𑀲𑀬𑀁 𑀦 𑀤𑀼𑀓𑁆𑀔𑀸, 𑀤𑀼𑀓𑁆𑀔𑀲𑁆𑀲 𑀧𑀦 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸. 𑀓𑀢𑀭𑀲𑁆𑀲 𑀤𑀼𑀓𑁆𑀔𑀲𑁆𑀲? 𑀓𑀸𑀬𑀤𑀼𑀓𑁆𑀔𑀲𑁆𑀲 𑀘𑁂𑀯 𑀤𑁄𑀫𑀦𑀲𑁆𑀲𑀤𑀼𑀓𑁆𑀔𑀲𑁆𑀲 𑀘. 𑀚𑀺𑀡𑁆𑀡𑀲𑁆𑀲 𑀳𑀺 𑀅𑀢𑁆𑀢𑀪𑀸𑀯𑁄 𑀚𑀭𑀲𑀓𑀝𑀁 𑀯𑀺𑀬 𑀤𑀼𑀩𑁆𑀩𑀮𑁄 𑀳𑁄𑀢𑀺, 𑀞𑀸𑀢𑀼𑀁 𑀯𑀸 𑀕𑀦𑁆𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀯𑀸𑀬𑀫𑀦𑁆𑀢𑀲𑁆𑀲 𑀩𑀮𑀯𑀁 𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺; 𑀧𑀼𑀢𑁆𑀢𑀤𑀸𑀭𑁂 𑀬𑀣𑀸𑀧𑀼𑀭𑁂 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁂 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑁋

𑀅𑀗𑁆𑀕𑀸𑀦𑀁 𑀲𑀺𑀣𑀺𑀮𑀪𑀸𑀯𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀓𑀸𑀭𑀢𑁄;

𑀬𑁄𑀩𑁆𑀩𑀦𑀲𑁆𑀲 𑀯𑀺𑀦𑀸𑀲𑁂𑀦, 𑀩𑀮𑀲𑁆𑀲 𑀉𑀧𑀖𑀸𑀢𑀢𑁄.

𑀯𑀺𑀧𑁆𑀧𑀯𑀸𑀲𑀸 𑀲𑀢𑀸𑀤𑀻𑀦𑀁, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀅𑀢𑁆𑀢𑀦𑁄;

𑀅𑀧𑀲𑀸𑀤𑀦𑀻𑀬𑀢𑁄 𑀘𑁂𑀯, 𑀪𑀻𑀬𑁆𑀬𑁄 𑀩𑀸𑀮𑀢𑁆𑀢𑀧𑀢𑁆𑀢𑀺𑀬𑀸.

𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀁 𑀬𑀁 𑀫𑀘𑁆𑀘𑁄, 𑀓𑀸𑀬𑀺𑀓𑀁 𑀫𑀸𑀦𑀲𑀁 𑀢𑀣𑀸;

𑀲𑀩𑁆𑀩𑀫𑁂𑀢𑀁 𑀚𑀭𑀸𑀳𑁂𑀢𑀼, 𑀬𑀲𑁆𑀫𑀸 𑀢𑀲𑁆𑀫𑀸 𑀚𑀭𑀸 𑀤𑀼𑀔𑀸𑀢𑀺.

𑀫𑀭𑀡𑀦𑀺𑀤𑁆𑀤𑁂𑀲𑁄

𑁧𑁯𑁩. 𑀫𑀭𑀡𑀦𑀺𑀤𑁆𑀤𑁂𑀲𑁂 𑀘𑀯𑀦𑀓𑀯𑀲𑁂𑀦 𑀘𑀼𑀢𑀺; 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀘𑀼𑀢𑀺𑀬𑀸 𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀁. 𑀘𑀯𑀦𑀢𑀸𑀢𑀺 𑀪𑀸𑀯𑀯𑀘𑀦𑁂𑀦 𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀁. 𑀪𑁂𑀤𑁄𑀢𑀺 𑀘𑀼𑀢𑀺𑀔𑀦𑁆𑀥𑀸𑀦𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁 ¶ . 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀖𑀝𑀲𑁆𑀲 𑀯𑀺𑀬 𑀪𑀺𑀦𑁆𑀦𑀲𑁆𑀲 𑀪𑀺𑀦𑁆𑀦𑀸𑀦𑀁 𑀘𑀼𑀢𑀺𑀔𑀦𑁆𑀥𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀞𑀸𑀦𑀸𑀪𑀸𑀯𑀧𑀭𑀺𑀤𑀻𑀧𑀦𑀁. 𑀫𑀘𑁆𑀘𑀼 𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀫𑀭𑀡𑀁. 𑀓𑀸𑀮𑁄 𑀦𑀸𑀫 𑀅𑀦𑁆𑀢𑀓𑁄, 𑀢𑀲𑁆𑀲 𑀓𑀺𑀭𑀺𑀬𑀸 𑀓𑀸𑀮𑀓𑀺𑀭𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀼𑀢𑀺𑀬𑀸 𑀫𑀭𑀡𑀁 𑀤𑀻𑀧𑀺𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀧𑀭𑀫𑀢𑁆𑀣𑁂𑀦 𑀤𑀻𑀧𑁂𑀢𑀼𑀁 𑀔𑀦𑁆𑀥𑀸𑀦𑀁 𑀪𑁂𑀤𑁄𑀢𑀺𑀆𑀤𑀺𑀫𑀸𑀳. 𑀧𑀭𑀫𑀢𑁆𑀣𑁂𑀦 𑀳𑀺 𑀔𑀦𑁆𑀥𑀸𑀬𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀲𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀫𑀭𑀢𑀺. 𑀔𑀦𑁆𑀥𑁂𑀲𑀼 𑀧𑀦 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑀢𑁆𑀢𑁄 𑀫𑀭𑀢𑀺 𑀪𑀺𑀦𑁆𑀦𑁂𑀲𑀼 𑀫𑀢𑁄𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀏𑀢𑁆𑀣 𑀘 𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀏𑀓𑀯𑁄𑀓𑀸𑀭𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄; 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀯𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀲𑁂𑀲𑀤𑁆𑀯𑀬𑀯𑀲𑁂𑀦 ¶ 𑀓𑀴𑁂𑀯𑀭𑀲𑁆𑀲 ¶ 𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀪𑀯𑀤𑁆𑀯𑀬𑁂𑀧𑀺 𑀭𑀽𑀧𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀓𑀴𑁂𑀯𑀭𑀲𑁆𑀲 𑀲𑀫𑁆𑀪𑀯𑀢𑁄. 𑀬𑀲𑁆𑀫𑀸 𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑁂𑀯, 𑀦 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄. 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀏𑀢𑁆𑀣 𑀘 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀓𑀭𑀡𑀢𑁄 𑀫𑀭𑀡𑀁 ‘‘𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀁.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲𑁂𑀯 𑀫𑀭𑀡𑀁 𑀦𑀸𑀫 𑀳𑁄𑀢𑀺, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀫𑀭𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘𑀲𑀲𑁆𑀲𑀁 𑀫𑀢𑀁, 𑀭𑀼𑀓𑁆𑀔𑁄 𑀫𑀢𑁄’𑀢𑀺 𑀇𑀤𑀁 𑀧𑀦 𑀯𑁄𑀳𑀸𑀭𑀫𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀧𑀦 𑀏𑀯𑀭𑀽𑀧𑀸𑀦𑀺 𑀯𑀘𑀦𑀸𑀦𑀺 𑀲𑀲𑁆𑀲𑀸𑀤𑀻𑀦𑀁 𑀔𑀬𑀯𑀬𑀪𑀸𑀯𑀫𑁂𑀯 𑀤𑀻𑀧𑁂𑀦𑁆𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀦𑁆𑀢𑀺 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀫𑀭𑀡𑀁 𑀦𑀸𑀫 𑀓𑀣𑀺𑀬𑀢𑀺.

𑀅𑀧𑀺𑀘𑁂𑀢𑁆𑀣 𑀔𑀡𑀺𑀓𑀫𑀭𑀡𑀁, 𑀲𑀫𑁆𑀫𑀼𑀢𑀺𑀫𑀭𑀡𑀁, 𑀲𑀫𑀼𑀘𑁆𑀙𑁂𑀤𑀫𑀭𑀡𑀦𑁆𑀢𑀺 𑀅𑀬𑀫𑁆𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘𑀔𑀡𑀺𑀓𑀫𑀭𑀡𑀁’ 𑀦𑀸𑀫 𑀧𑀯𑀢𑁆𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀪𑁂𑀤𑁄. ‘𑀢𑀺𑀲𑁆𑀲𑁄 𑀫𑀢𑁄, 𑀨𑀼𑀲𑁆𑀲𑁄 𑀫𑀢𑁄’𑀢𑀺 𑀇𑀤𑀁 ‘𑀲𑀫𑁆𑀫𑀼𑀢𑀺𑀫𑀭𑀡𑀁’ 𑀦𑀸𑀫. 𑀔𑀻𑀡𑀸𑀲𑀯𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀓𑀸𑀮𑀓𑀺𑀭𑀺𑀬𑀸 ‘𑀲𑀫𑀼𑀘𑁆𑀙𑁂𑀤𑀫𑀭𑀡𑀁’ 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀫𑁆𑀫𑀼𑀢𑀺𑀫𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀚𑀸𑀢𑀺𑀓𑁆𑀔𑀬𑀫𑀭𑀡𑀁, 𑀉𑀧𑀓𑁆𑀓𑀫𑀫𑀭𑀡𑀁, 𑀲𑀭𑀲𑀫𑀭𑀡𑀁, 𑀆𑀬𑀼𑀓𑁆𑀔𑀬𑀫𑀭𑀡𑀁, 𑀧𑀼𑀜𑁆𑀜𑀓𑁆𑀔𑀬𑀫𑀭𑀡𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀬𑀺𑀤𑀁 𑀘𑀼𑀢𑀺𑀮𑀓𑁆𑀔𑀡𑀁, 𑀯𑀺𑀬𑁄𑀕𑀭𑀲𑀁, 𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

‘𑀫𑀭𑀡𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀇𑀤𑀫𑁆𑀧𑀺 𑀲𑀬𑀁 𑀦 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑁆𑀲 𑀧𑀦 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀭𑀡𑀦𑁆𑀢𑀺𑀓𑀸𑀧𑀺 𑀳𑀺 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸, 𑀧𑀝𑀺𑀯𑀸𑀢𑁂 𑀕𑀳𑀺𑀢𑀸 𑀆𑀤𑀺𑀢𑁆𑀢𑀢𑀺𑀡𑀼𑀓𑁆𑀓𑀸 ¶ 𑀯𑀺𑀬, 𑀲𑀭𑀻𑀭𑀁 𑀦𑀺𑀤𑀳𑀦𑁆𑀢𑀺. 𑀦𑀭𑀓𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀓𑀸𑀮𑁂 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺 𑀘 𑁋

𑀧𑀸𑀧𑀲𑁆𑀲 𑀧𑀸𑀧𑀓𑀫𑁆𑀫𑀸𑀤𑀺, 𑀦𑀺𑀫𑀺𑀢𑁆𑀢𑀫𑀦𑀼𑀧𑀲𑁆𑀲𑀢𑁄;

𑀪𑀤𑁆𑀤𑀲𑁆𑀲𑀸𑀧𑀲𑀳𑀦𑁆𑀢𑀲𑁆𑀲, 𑀯𑀺𑀬𑁄𑀕𑀁 𑀧𑀺𑀬𑀯𑀢𑁆𑀣𑀼𑀓𑀁.

𑀫𑀻𑀬𑀫𑀸𑀦𑀲𑁆𑀲 ¶ 𑀬𑀁 𑀤𑀼𑀓𑁆𑀔𑀁, 𑀫𑀸𑀦𑀲𑀁 𑀅𑀯𑀺𑀲𑁂𑀲𑀢𑁄;

𑀲𑀩𑁆𑀩𑁂𑀲𑀜𑁆𑀘𑀸𑀧𑀺 𑀬𑀁 𑀲𑀦𑁆𑀥𑀺-𑀩𑀦𑁆𑀥𑀦𑀘𑁆𑀙𑁂𑀤𑀦𑀸𑀤𑀺𑀓𑀁.

𑀯𑀺𑀢𑀼𑀚𑁆𑀚𑀫𑀸𑀦𑀫𑀫𑁆𑀫𑀸𑀦𑀁, 𑀳𑁄𑀢𑀺 𑀤𑀼𑀓𑁆𑀔𑀁 𑀲𑀭𑀻𑀭𑀚𑀁;

𑀅𑀲𑀬𑁆𑀳𑀫𑀧𑁆𑀧𑀝𑀺𑀓𑀸𑀭𑀁, 𑀤𑀼𑀓𑁆𑀔𑀲𑁆𑀲𑁂𑀢𑀲𑁆𑀲𑀺𑀤𑀁 𑀬𑀢𑁄;

𑀫𑀭𑀡𑀁 𑀯𑀢𑁆𑀣𑀼 𑀢𑁂𑀦𑁂𑀢𑀁, 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀦𑁆𑀢𑀺.

𑀅𑀧𑀺𑀘 ¶ 𑀇𑀫𑀸𑀦𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦𑀸𑀫 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀯𑀥𑀓𑀧𑀘𑁆𑀘𑀸𑀫𑀺𑀢𑁆𑀢𑀸 𑀯𑀺𑀬 𑀑𑀢𑀸𑀭𑀁 𑀕𑀯𑁂𑀲𑀦𑁆𑀢𑀸𑀦𑀺 𑀯𑀺𑀘𑀭𑀦𑁆𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀢𑀻𑀲𑀼 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀼 𑀑𑀢𑀸𑀭𑀸𑀧𑁂𑀓𑁆𑀔𑁂𑀲𑀼 𑀯𑀺𑀘𑀭𑀦𑁆𑀢𑁂𑀲𑀼 𑀏𑀓𑁄 𑀯𑀤𑁂𑀬𑁆𑀬 𑁋 ‘‘𑀅𑀳𑀁 𑀅𑀲𑀼𑀓𑀅𑀭𑀜𑁆𑀜𑀲𑁆𑀲 𑀦𑀸𑀫 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀏𑀢𑀁 𑀆𑀤𑀸𑀬 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑀬𑁆𑀳𑀁 𑀤𑀼𑀓𑁆𑀓𑀭𑀁 𑀦𑀢𑁆𑀣𑀻’’𑀢𑀺. 𑀤𑀼𑀢𑀺𑀬𑁄 𑀯𑀤𑁂𑀬𑁆𑀬 ‘‘𑀅𑀳𑀁 𑀢𑀯 𑀏𑀢𑀁 𑀕𑀳𑁂𑀢𑁆𑀯𑀸 𑀕𑀢𑀓𑀸𑀮𑁂 𑀧𑁄𑀣𑁂𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑀬𑁆𑀳𑀁 𑀤𑀼𑀓𑁆𑀓𑀭𑀁 𑀦𑀢𑁆𑀣𑀻’’𑀢𑀺. 𑀢𑀢𑀺𑀬𑁄 𑀯𑀤𑁂𑀬𑁆𑀬 𑁋 ‘‘𑀢𑀬𑀸 𑀏𑀢𑀲𑁆𑀫𑀺𑀁 𑀧𑁄𑀣𑁂𑀢𑁆𑀯𑀸 𑀤𑀼𑀩𑁆𑀩𑀮𑁂 𑀓𑀢𑁂 𑀢𑀺𑀡𑁆𑀳𑁂𑀦 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀦𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄 𑀳𑁄𑀢𑀽’’𑀢𑀺. 𑀢𑁂 𑀏𑀯𑀁 𑀯𑀢𑁆𑀯𑀸 𑀢𑀣𑀸 𑀓𑀭𑁂𑀬𑁆𑀬𑀼𑀁.

𑀢𑀢𑁆𑀣 𑀧𑀞𑀫𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀅𑀭𑀜𑁆𑀜𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀢𑀢𑁆𑀣 𑀕𑀢𑀓𑀸𑀮𑁄 𑀯𑀺𑀬 𑀲𑀼𑀳𑀚𑁆𑀚𑀜𑀸𑀢𑀺𑀫𑀡𑁆𑀟𑀮𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀸𑀧𑀦𑀁 𑀦𑀸𑀫 𑀚𑀸𑀢𑀺𑀬𑀸 𑀓𑀺𑀘𑁆𑀘𑀁. 𑀤𑀼𑀢𑀺𑀬𑀲𑁆𑀲 𑀧𑁄𑀣𑁂𑀢𑁆𑀯𑀸 𑀤𑀼𑀩𑁆𑀩𑀮𑀓𑀭𑀡𑀁 𑀯𑀺𑀬 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀧𑀭𑀸𑀥𑀻𑀦𑀫𑀜𑁆𑀘𑀧𑀭𑀸𑀬𑀡𑀪𑀸𑀯𑀓𑀭𑀡𑀁 𑀚𑀭𑀸𑀬 𑀓𑀺𑀘𑁆𑀘𑀁. 𑀢𑀢𑀺𑀬𑀲𑁆𑀲 𑀢𑀺𑀡𑁆𑀳𑁂𑀦 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀦𑀁 𑀯𑀺𑀬 𑀚𑀻𑀯𑀺𑀢𑀓𑁆𑀔𑀬𑀧𑀸𑀧𑀦𑀁 𑀫𑀭𑀡𑀲𑁆𑀲 𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘𑁂𑀢𑁆𑀣 𑀚𑀸𑀢𑀺𑀤𑀼𑀓𑁆𑀔𑀁 𑀲𑀸𑀤𑀻𑀦𑀯𑀫𑀳𑀸𑀓𑀦𑁆𑀢𑀸𑀭𑀧𑁆𑀧𑀯𑁂𑀲𑁄 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀚𑀭𑀸𑀤𑀼𑀓𑁆𑀔𑀁 𑀢𑀢𑁆𑀣 𑀅𑀦𑁆𑀦𑀧𑀸𑀦𑀭𑀳𑀺𑀢𑀲𑁆𑀲 ¶ 𑀤𑀼𑀩𑁆𑀩𑀮𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀫𑀭𑀡𑀤𑀼𑀓𑁆𑀔𑀁 𑀤𑀼𑀩𑁆𑀩𑀮𑀲𑁆𑀲 𑀇𑀭𑀺𑀬𑀸𑀧𑀣𑀧𑀯𑀢𑁆𑀢𑀦𑁂 𑀯𑀺𑀳𑀢𑀧𑀭𑀓𑁆𑀓𑀫𑀲𑁆𑀲 𑀯𑀸𑀴𑀸𑀤𑀻𑀳𑀺 𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀲𑁄𑀓𑀦𑀺𑀤𑁆𑀤𑁂𑀲𑁄

𑁧𑁯𑁪. 𑀲𑁄𑀓𑀦𑀺𑀤𑁆𑀤𑁂𑀲𑁂 𑀩𑁆𑀬𑀲𑀢𑀻𑀢𑀺 𑀩𑁆𑀬𑀲𑀦𑀁; 𑀳𑀺𑀢𑀲𑀼𑀔𑀁 𑀔𑀺𑀧𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁; 𑀘𑁄𑀭𑀭𑁄𑀕𑀪𑀬𑀸𑀤𑀻𑀳𑀺 𑀜𑀸𑀢𑀺𑀓𑁆𑀔𑀬𑁄 𑀜𑀸𑀢𑀺𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀜𑀸𑀢𑀺𑀩𑁆𑀬𑀲𑀦𑁂𑀦 𑀨𑀼𑀝𑁆𑀞𑀲𑁆𑀲𑀸𑀢𑀺 ¶ 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀅𑀪𑀺𑀪𑀽𑀢𑀲𑁆𑀲 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀪𑁄𑀕𑀩𑁆𑀬𑀲𑀦𑀁; 𑀭𑀸𑀚𑀘𑁄𑀭𑀸𑀤𑀺𑀯𑀲𑁂𑀦 𑀪𑁄𑀕𑀓𑁆𑀔𑀬𑁄 𑀪𑁄𑀕𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀭𑁄𑀕𑁄𑀬𑁂𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁; 𑀭𑁄𑀕𑁄 𑀳𑀺 𑀆𑀭𑁄𑀕𑁆𑀬𑀁 𑀩𑁆𑀬𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀲𑀻𑀮𑀲𑁆𑀲 𑀩𑁆𑀬𑀲𑀦𑀁 𑀲𑀻𑀮𑀩𑁆𑀬𑀲𑀦𑀁; 𑀤𑀼𑀲𑁆𑀲𑀻𑀮𑁆𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸𑀲𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁂𑀯 𑀩𑁆𑀬𑀲𑀦𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀁. 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀅𑀦𑀺𑀧𑁆𑀨𑀦𑁆𑀦𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀦𑀺𑀧𑁆𑀨𑀦𑁆𑀦𑀸𑀦𑀺 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀸𑀦𑀺. 𑀧𑀼𑀭𑀺𑀫𑀸𑀦𑀺 𑀘 𑀢𑀻𑀡𑀺 𑀦𑁂𑀯 𑀓𑀼𑀲𑀮𑀸𑀦𑀺 𑀦 𑀅𑀓𑀼𑀲𑀮𑀸𑀦𑀺. 𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑀤𑁆𑀯𑀬𑀁 𑀅𑀓𑀼𑀲𑀮𑀁.

𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦𑀸𑀢𑀺 ¶ 𑀕𑀳𑀺𑀢𑁂𑀲𑀼 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀕𑁆𑀕𑀳𑀺𑀢𑁂𑀲𑀼 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀩𑁆𑀬𑀲𑀦𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺. 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀲𑀫𑀦𑀼𑀩𑀦𑁆𑀥𑀲𑁆𑀲 𑀅𑀧𑀭𑀺𑀫𑀼𑀘𑁆𑀘𑀫𑀸𑀦𑀲𑁆𑀲. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀲𑁄𑀓𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀦𑀸. 𑀲𑁄𑀓𑁄𑀢𑀺 𑀲𑁄𑀘𑀦𑀓𑀯𑀲𑁂𑀦 𑀲𑁄𑀓𑁄; 𑀇𑀤𑀁 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀉𑀧𑀚𑁆𑀚𑀦𑀓𑀲𑁄𑀓𑀲𑁆𑀲 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀲𑁄𑀘𑀦𑀸𑀢𑀺 𑀲𑁄𑀘𑀦𑀸𑀓𑀭𑁄. 𑀲𑁄𑀘𑀺𑀢𑀢𑁆𑀢𑀦𑁆𑀢𑀺 𑀲𑁄𑀘𑀺𑀢𑀪𑀸𑀯𑁄. 𑀅𑀦𑁆𑀢𑁄𑀲𑁄𑀓𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑁄𑀓𑁄. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀲𑁄 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀲𑀼𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀬 𑀧𑀭𑀺𑀲𑀼𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀛𑀸𑀬𑀦𑀸𑀓𑀸𑀭𑁄. 𑀲𑁄𑀓𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀘𑀺𑀢𑁆𑀢𑀁 𑀛𑀸𑀧𑁂𑀢𑀺 𑀧𑀭𑀺𑀤𑀳𑀢𑀺, ‘‘𑀘𑀺𑀢𑁆𑀢𑀁 𑀫𑁂 𑀛𑀸𑀫𑀁, 𑀦 𑀫𑁂 𑀓𑀺𑀜𑁆𑀘𑀺 𑀧𑀝𑀺𑀪𑀸𑀢𑀻’’𑀢𑀺 𑀯𑀤𑀸𑀧𑁂𑀢𑀺. 𑀤𑀼𑀓𑁆𑀔𑀺𑀢𑁄 𑀫𑀦𑁄 𑀤𑀼𑀫𑁆𑀫𑀦𑁄, 𑀢𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑁄𑀓𑁄𑀯 𑀲𑀮𑁆𑀮𑀦𑁆𑀢𑀺 𑀲𑁄𑀓𑀲𑀮𑁆𑀮𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑁄𑀓𑁄𑀢𑀺 𑀅𑀬𑀁 𑀲𑁄𑀓𑁄 𑀦𑀸𑀫 𑀓𑀣𑀺𑀬𑀢𑀺. 𑀲𑁄 𑀧𑀦𑀸𑀬𑀁 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀯 ¶ 𑀳𑁄𑀢𑀺, 𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁄, 𑀘𑁂𑀢𑀲𑁄 𑀧𑀭𑀺𑀦𑀺𑀚𑁆𑀛𑀸𑀬𑀦𑀭𑀲𑁄, 𑀅𑀦𑀼𑀲𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

‘𑀲𑁄𑀓𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀲𑀪𑀸𑀯𑀤𑀼𑀓𑁆𑀔𑀢𑁆𑀢𑀸 𑀘𑁂𑀯 𑀤𑀼𑀓𑁆𑀔𑀲𑁆𑀲 𑀘 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀓𑀢𑀭𑀤𑀼𑀓𑁆𑀔𑀲𑁆𑀲𑀸𑀢𑀺? 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘𑁂𑀯 𑀚𑀯𑀦𑀓𑁆𑀔𑀡𑁂 𑀘 𑀤𑁄𑀫𑀦𑀲𑁆𑀲𑀤𑀼𑀓𑁆𑀔𑀲𑁆𑀲. 𑀲𑁄𑀓𑀯𑁂𑀕𑁂𑀦 𑀳𑀺 𑀳𑀤𑀬𑁂 𑀫𑀳𑀸𑀕𑀡𑁆𑀟𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀧𑀘𑁆𑀘𑀺𑀢𑁆𑀯𑀸 𑀪𑀺𑀚𑁆𑀚𑀢𑀺, 𑀫𑀼𑀔𑀢𑁄 𑀯𑀸 𑀓𑀸𑀴𑀮𑁄𑀳𑀺𑀢𑀁 𑀦𑀺𑀓𑁆𑀔𑀫𑀢𑀺, 𑀩𑀮𑀯𑀁 𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀏𑀢𑁆𑀢𑀓𑀸 𑀫𑁂 𑀜𑀸𑀢𑀬𑁄 𑀔𑀬𑀁 𑀕𑀢𑀸, 𑀏𑀢𑁆𑀢𑀓𑀸 𑀫𑁂 𑀪𑁄𑀕𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀘 𑀩𑀮𑀯𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦𑀧𑁂𑀲 𑀤𑀼𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑁋

𑀲𑀢𑁆𑀢𑀸𑀦𑀁 𑀳𑀤𑀬𑀁 𑀲𑁄𑀓𑁄, 𑀲𑀮𑁆𑀮𑀁 𑀯𑀺𑀬 𑀯𑀺𑀢𑀼𑀚𑁆𑀚𑀢𑀺;

𑀅𑀕𑁆𑀕𑀺𑀢𑀢𑁆𑀢𑁄𑀯 𑀦𑀸𑀭𑀸𑀘𑁄, 𑀪𑀼𑀲𑀜𑁆𑀘 𑀟𑀳𑀢𑁂 𑀧𑀼𑀦.

𑀲𑀫𑀸𑀯𑀳𑀢𑀺 𑀘 𑀩𑁆𑀬𑀸𑀥𑀺-𑀚𑀭𑀸𑀫𑀭𑀡𑀪𑁂𑀤𑀦𑀁;

𑀤𑀼𑀓𑁆𑀔𑀫𑁆𑀧𑀺 𑀯𑀺𑀯𑀺𑀥𑀁 𑀬𑀲𑁆𑀫𑀸, 𑀢𑀲𑁆𑀫𑀸 𑀤𑀼𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑁄

𑁧𑁯𑁫. 𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑁂 ¶ ‘𑀫𑀬𑁆𑀳𑀁 𑀥𑀻𑀢𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄’𑀢𑀺 𑀏𑀯𑀁 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀤𑁂𑀯𑀦𑁆𑀢𑀺 𑀭𑁄𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑁂𑀯𑁄. 𑀢𑀁 𑀢𑀁 𑀯𑀡𑁆𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀤𑁂𑀯𑁄. 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀧𑀼𑀭𑀺𑀫𑀤𑁆𑀯𑀬𑀲𑁆𑀲𑁂𑀯 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀯𑀸𑀘𑀸𑀢𑀺 𑀯𑀘𑀦𑀁. 𑀧𑀮𑀸𑀧𑁄𑀢𑀺 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀯𑀘𑀦𑀁. 𑀉𑀧𑀟𑁆𑀠𑀪𑀡𑀺𑀢𑀅𑀜𑁆𑀜𑀪𑀡𑀺𑀢𑀸𑀤𑀺𑀯𑀲𑁂𑀦 𑀯𑀺𑀭𑀽𑀧𑁄 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄. 𑀮𑀸𑀮𑀧𑁆𑀧𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀮𑀧𑀦𑀁. 𑀮𑀸𑀮𑀧𑁆𑀧𑀦𑀸𑀓𑀸𑀭𑁄 𑀮𑀸𑀮𑀧𑁆𑀧𑀦𑀸. 𑀮𑀸𑀮𑀧𑁆𑀧𑀺𑀢𑀲𑁆𑀲 𑀪𑀸𑀯𑁄 𑀮𑀸𑀮𑀧𑁆𑀧𑀺𑀢𑀢𑁆𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀭𑀺𑀤𑁂𑀯𑁄𑀢𑀺 𑀅𑀬𑀁 𑀧𑀭𑀺𑀤𑁂𑀯𑁄 𑀦𑀸𑀫 𑀓𑀣𑀺𑀬𑀢𑀺. 𑀲𑁄 𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄, 𑀕𑀼𑀡𑀤𑁄𑀲𑀧𑀭𑀺𑀓𑀺𑀢𑁆𑀢𑀦𑀭𑀲𑁄, 𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

‘𑀧𑀭𑀺𑀤𑁂𑀯𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀅𑀬𑀫𑁆𑀧𑀺 𑀲𑀬𑀁 𑀦 𑀤𑀼𑀓𑁆𑀔𑁄, 𑀓𑀸𑀬𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀤𑀼𑀓𑁆𑀔𑀸𑀦𑀁 𑀧𑀦 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀤𑁂𑀯𑀦𑁆𑀢𑁄 𑀳𑀺 𑀅𑀢𑁆𑀢𑀦𑁄 𑀔𑀦𑁆𑀥𑀁 𑀫𑀼𑀝𑁆𑀞𑀻𑀳𑀺 ¶ 𑀧𑁄𑀣𑁂𑀢𑀺, 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀭𑀁 𑀧𑀳𑀭𑀢𑀺 ¶ 𑀧𑀺𑀁𑀲𑀢𑀺, 𑀲𑀻𑀲𑁂𑀦 𑀪𑀺𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀢𑀺. 𑀢𑁂𑀦𑀲𑁆𑀲 𑀩𑀮𑀯𑀁 𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. ‘𑀏𑀢𑁆𑀢𑀓𑀸 𑀫𑁂 𑀜𑀸𑀢𑀬𑁄 𑀔𑀬𑀁 𑀯𑀬𑀁 𑀅𑀩𑁆𑀪𑀢𑁆𑀣𑀁 𑀕𑀢𑀸’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑀺. 𑀢𑁂𑀦𑀲𑁆𑀲 𑀩𑀮𑀯𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑁋

𑀬𑀁 𑀲𑁄𑀓𑀲𑀮𑁆𑀮𑀯𑀺𑀳𑀢𑁄 𑀧𑀭𑀺𑀤𑁂𑀯𑀫𑀸𑀦𑁄,

𑀓𑀡𑁆𑀞𑁄𑀝𑁆𑀞𑀢𑀸𑀮𑀼𑀢𑀮𑀲𑁄𑀲𑀚𑀫𑀧𑁆𑀧𑀲𑀬𑁆𑀳𑀁;

𑀪𑀺𑀬𑁆𑀬𑁄𑀥𑀺𑀫𑀢𑁆𑀢𑀫𑀥𑀺𑀕𑀘𑁆𑀙𑀢𑀺𑀬𑁂𑀯 𑀤𑀼𑀓𑁆𑀔𑀁,

𑀤𑀼𑀓𑁆𑀔𑁄𑀢𑀺 𑀢𑁂𑀦 𑀪𑀕𑀯𑀸 𑀧𑀭𑀺𑀤𑁂𑀯𑀫𑀸𑀳𑀸𑀢𑀺.

𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑁄

𑁧𑁯𑁬-𑁭. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑀸 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀡𑁆𑀡𑀺𑀢𑀢𑁆𑀢𑀸 𑀧𑀸𑀓𑀝𑀸 𑀏𑀯. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦 𑀢𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀸𑀦𑁂𑀯.

‘𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄, 𑀤𑁄𑀫𑀦𑀲𑁆𑀲𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀲𑀬𑀜𑁆𑀘 𑀤𑀼𑀓𑁆𑀔𑀢𑁆𑀢𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀦𑀜𑁆𑀘 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀤𑀸𑀦𑀜𑁆𑀳𑀺 𑀓𑀡𑁆𑀡𑀦𑀸𑀲𑀺𑀓𑀸𑀦𑀜𑁆𑀘 𑀙𑁂𑀤𑀦𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀲𑁆𑀲 ¶ , 𑀅𑀦𑀸𑀣𑀲𑀸𑀮𑀸𑀬𑀁 𑀉𑀘𑁆𑀙𑀺𑀝𑁆𑀞𑀓𑀧𑀸𑀮𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲, 𑀯𑀡𑀫𑀼𑀔𑁂𑀳𑀺 𑀧𑀼𑀴𑀼𑀯𑀓𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀩𑀮𑀯𑀁 𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺; 𑀦𑀸𑀦𑀸𑀭𑀗𑁆𑀕𑀭𑀢𑁆𑀢𑀯𑀢𑁆𑀣𑀫𑀦𑀼𑀜𑁆𑀜𑀸𑀮𑀗𑁆𑀓𑀸𑀭𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀢𑀸𑀯 𑀤𑀼𑀓𑁆𑀔𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑁋

𑀧𑀻𑀴𑁂𑀢𑀺 𑀓𑀸𑀬𑀺𑀓𑀫𑀺𑀤𑀁, 𑀤𑀼𑀓𑁆𑀔𑀁 𑀤𑀼𑀓𑁆𑀔𑀜𑁆𑀘 𑀫𑀸𑀦𑀲𑀁 𑀪𑀺𑀬𑁆𑀬𑁄;

𑀚𑀦𑀬𑀢𑀺 𑀬𑀲𑁆𑀫𑀸 𑀢𑀲𑁆𑀫𑀸, 𑀤𑀼𑀓𑁆𑀔𑀦𑁆𑀢𑀺 𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀦𑁆𑀢𑀺.

𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸 𑀧𑀦 𑀓𑁂𑀲𑁂 𑀧𑀓𑀺𑀭𑀺𑀬 𑀉𑀭𑀸𑀦𑀺 𑀧𑀢𑀺𑀧𑀺𑀲𑁂𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺, 𑀙𑀺𑀦𑁆𑀦𑀧𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀲𑀢𑁆𑀣𑀁 𑀆𑀳𑀭𑀦𑁆𑀢𑀺, 𑀯𑀺𑀲𑀁 𑀔𑀸𑀤𑀦𑁆𑀢𑀺, 𑀭𑀚𑁆𑀚𑀼𑀬𑀸 𑀉𑀩𑁆𑀩𑀦𑁆𑀥𑀦𑁆𑀢𑀺, 𑀅𑀕𑁆𑀕𑀺𑀁 𑀧𑀯𑀺𑀲𑀦𑁆𑀢𑀺 ¶ . 𑀢𑀁 𑀢𑀁 𑀯𑀺𑀧𑀭𑀻𑀢𑀁 𑀯𑀢𑁆𑀣𑀼𑀁 𑀢𑀣𑀸 𑀢𑀣𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀭𑀺𑀟𑀬𑁆𑀳𑀫𑀸𑀦𑀘𑀺𑀢𑁆𑀢𑀸 𑀘𑀺𑀦𑁆𑀢𑁂𑀦𑁆𑀢𑀺. 𑀏𑀯𑀁 𑀤𑁄𑀫𑀦𑀲𑁆𑀲𑀲𑁆𑀲 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑁋

𑀧𑀻𑀴𑁂𑀢𑀺 𑀬𑀢𑁄 𑀘𑀺𑀢𑁆𑀢𑀁, 𑀓𑀸𑀬𑀲𑁆𑀲 𑀘 𑀧𑀻𑀴𑀦𑀁 𑀲𑀫𑀸𑀯𑀳𑀢𑀺;

𑀤𑀼𑀓𑁆𑀔𑀦𑁆𑀢𑀺 𑀤𑁄𑀫𑀦𑀲𑁆𑀲𑀫𑁆𑀧𑀺, 𑀤𑁄𑀫𑀦𑀲𑁆𑀲𑀁 𑀢𑀢𑁄 𑀅𑀳𑀽𑀢𑀺.

𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑁄

𑁧𑁯𑁮. 𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑁂 ¶ 𑀆𑀬𑀸𑀲𑀦𑀝𑁆𑀞𑁂𑀦 𑀆𑀬𑀸𑀲𑁄; 𑀲𑀁𑀲𑀻𑀤𑀦𑀯𑀺𑀲𑀻𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀓𑀺𑀮𑀫𑀣𑀲𑁆𑀲𑁂𑀢𑀁 𑀦𑀸𑀫𑀁. 𑀩𑀮𑀯𑀁 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀆𑀬𑀸𑀲𑀺𑀢𑀪𑀸𑀯𑁄 𑀆𑀬𑀸𑀲𑀺𑀢𑀢𑁆𑀢𑀁. 𑀉𑀧𑀸𑀬𑀸𑀲𑀺𑀢𑀪𑀸𑀯𑁄 𑀉𑀧𑀸𑀬𑀸𑀲𑀺𑀢𑀢𑁆𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀸𑀬𑀸𑀲𑁄𑀢𑀺 𑀅𑀬𑀁 𑀉𑀧𑀸𑀬𑀸𑀲𑁄 𑀦𑀸𑀫 𑀓𑀣𑀺𑀬𑀢𑀺. 𑀲𑁄 𑀧𑀦𑁂𑀲 𑀩𑁆𑀬𑀸𑀲𑀢𑁆𑀢𑀺𑀮𑀓𑁆𑀔𑀡𑁄, 𑀦𑀺𑀢𑁆𑀣𑀼𑀦𑀦𑀭𑀲𑁄, 𑀯𑀺𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

‘𑀉𑀧𑀸𑀬𑀸𑀲𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑀅𑀬𑀫𑁆𑀧𑀺 𑀲𑀬𑀁 𑀦 𑀤𑀼𑀓𑁆𑀔𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀓𑀼𑀧𑀺𑀢𑁂𑀦 𑀳𑀺 𑀭𑀜𑁆𑀜𑀸 𑀇𑀲𑁆𑀲𑀭𑀺𑀬𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀢𑀧𑀼𑀢𑁆𑀢𑀪𑀸𑀢𑀺𑀓𑀸𑀦𑀁 𑀆𑀡𑀢𑁆𑀢𑀯𑀥𑀸𑀦𑀁 𑀪𑀬𑁂𑀦 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀦𑀸𑀦𑀁 𑀫𑀳𑀸𑀯𑀺𑀲𑀸𑀤𑀧𑁆𑀧𑀢𑁆𑀢𑀸𑀦𑀁 𑀤𑀼𑀓𑁆𑀔𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀤𑀼𑀓𑁆𑀔𑀦𑀺𑀲𑀚𑁆𑀚𑀸𑀬 𑀩𑀮𑀯𑀁 𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. ‘𑀏𑀢𑁆𑀢𑀓𑀸 𑀦𑁄 𑀜𑀸𑀢𑀓𑀸, 𑀏𑀢𑁆𑀢𑀓𑀸 𑀪𑁄𑀕𑀸 𑀦𑀝𑁆𑀞𑀸’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀅𑀧𑀺𑀘 𑁋

𑀘𑀺𑀢𑁆𑀢𑀲𑁆𑀲 ¶ 𑀧𑀭𑀺𑀤𑀳𑀦𑀸, 𑀓𑀸𑀬𑀲𑁆𑀲 𑀯𑀺𑀲𑀸𑀤𑀦𑀸 𑀘 𑀅𑀥𑀺𑀫𑀢𑁆𑀢𑀁;

𑀬𑀁 𑀤𑀼𑀓𑁆𑀔𑀫𑀼𑀧𑀸𑀬𑀸𑀲𑁄, 𑀚𑀦𑁂𑀢𑀺 𑀤𑀼𑀓𑁆𑀔𑁄 𑀢𑀢𑁄 𑀯𑀼𑀢𑁆𑀢𑁄.

𑀏𑀢𑁆𑀣 𑀘 𑀫𑀦𑁆𑀤𑀕𑁆𑀕𑀺𑀦𑀸 𑀅𑀦𑁆𑀢𑁄𑀪𑀸𑀚𑀦𑁂𑀬𑁂𑀯 𑀢𑁂𑀮𑀸𑀤𑀻𑀦𑀁 𑀧𑀸𑀓𑁄 𑀯𑀺𑀬 𑀲𑁄𑀓𑁄. 𑀢𑀺𑀓𑁆𑀔𑀕𑁆𑀕𑀺𑀦𑀸 𑀧𑀘𑁆𑀘𑀫𑀸𑀦𑀲𑁆𑀲 𑀪𑀸𑀚𑀦𑀢𑁄 𑀩𑀳𑀺𑀦𑀺𑀓𑁆𑀔𑀫𑀦𑀁 𑀯𑀺𑀬 𑀧𑀭𑀺𑀤𑁂𑀯𑁄. 𑀩𑀳𑀺𑀦𑀺𑀓𑁆𑀔𑀦𑁆𑀢𑀸𑀯𑀲𑁂𑀲𑀲𑁆𑀲 𑀦𑀺𑀓𑁆𑀔𑀫𑀺𑀢𑀼𑀫𑁆𑀧𑀺 𑀅𑀧𑁆𑀧𑀳𑁄𑀦𑁆𑀢𑀲𑁆𑀲 𑀅𑀦𑁆𑀢𑁄𑀪𑀸𑀚𑀦𑁂𑀬𑁂𑀯 𑀬𑀸𑀯 𑀧𑀭𑀺𑀓𑁆𑀔𑀬𑀸 𑀧𑀸𑀓𑁄 𑀯𑀺𑀬 𑀉𑀧𑀸𑀬𑀸𑀲𑁄 𑀤𑀝𑁆𑀞𑀩𑁆𑀩𑁄.

𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑁄

𑁧𑁯𑁯. 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑁂 ¶ 𑀬𑀲𑁆𑀲𑀸𑀢𑀺 𑀬𑁂 𑀅𑀲𑁆𑀲. 𑀅𑀦𑀺𑀝𑁆𑀞𑀸𑀢𑀺 𑀅𑀧𑀭𑀺𑀬𑁂𑀲𑀺𑀢𑀸. 𑀧𑀭𑀺𑀬𑁂𑀲𑀺𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀧𑀭𑀺𑀬𑁂𑀲𑀺𑀢𑀸 𑀯𑀸, 𑀦𑀸𑀫𑀫𑁂𑀯𑁂𑀢𑀁 𑀅𑀫𑀦𑀸𑀧𑀸𑀭𑀫𑁆𑀫𑀡𑀸𑀦𑀁. 𑀫𑀦𑀲𑁆𑀫𑀺𑀁 𑀦 𑀓𑀫𑀦𑁆𑀢𑀺, 𑀦 𑀧𑀯𑀺𑀲𑀦𑁆𑀢𑀻𑀢𑀺 𑀅𑀓𑀦𑁆𑀢𑀸. 𑀫𑀦𑀲𑁆𑀫𑀺𑀁 𑀦 𑀅𑀧𑁆𑀧𑀺𑀬𑀦𑁆𑀢𑀺, 𑀦 𑀯𑀸 𑀫𑀦𑀁 𑀯𑀟𑁆𑀠𑁂𑀦𑁆𑀢𑀻𑀢𑀺 𑀅𑀫𑀦𑀸𑀧𑀸. 𑀭𑀽𑀧𑀸𑀢𑀺𑀆𑀤𑀺 𑀢𑁂𑀲𑀁 𑀲𑀪𑀸𑀯𑀦𑀺𑀤𑀲𑁆𑀲𑀦𑀁. 𑀅𑀦𑀢𑁆𑀣𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀦𑀢𑁆𑀣𑀓𑀸𑀫𑀸. 𑀅𑀳𑀺𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀳𑀺𑀢𑀓𑀸𑀫𑀸. 𑀅𑀨𑀸𑀲𑀼𑀓𑀁 𑀤𑀼𑀓𑁆𑀔𑀯𑀺𑀳𑀸𑀭𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀨𑀸𑀲𑀼𑀓𑀓𑀸𑀫𑀸. 𑀘𑀢𑀽𑀳𑀺 ¶ 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀯𑀺𑀯𑀝𑁆𑀝𑀁 𑀦 𑀇𑀘𑁆𑀙𑀦𑁆𑀢𑀺, 𑀲𑀪𑀬𑀁 𑀯𑀝𑁆𑀝𑀫𑁂𑀯 𑀦𑁂𑀲𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀆𑀬𑁄𑀕𑀓𑁆𑀔𑁂𑀫𑀓𑀸𑀫𑀸.

𑀅𑀧𑀺𑀘 𑀲𑀤𑁆𑀥𑀸𑀤𑀻𑀦𑀁 𑀯𑀼𑀤𑁆𑀥𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀓𑀸𑀫𑀦𑀢𑁄 𑀢𑁂𑀲𑀁𑀬𑁂𑀯 𑀳𑀸𑀦𑀺𑀲𑀗𑁆𑀔𑀸𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀘 𑀓𑀸𑀫𑀦𑀢𑁄 𑀅𑀦𑀢𑁆𑀣𑀓𑀸𑀫𑀸. 𑀲𑀤𑁆𑀥𑀸𑀤𑀻𑀦𑀁𑀬𑁂𑀯 𑀉𑀧𑀸𑀬𑀪𑀽𑀢𑀲𑁆𑀲 𑀳𑀺𑀢𑀲𑁆𑀲 𑀅𑀓𑀸𑀫𑀦𑀢𑁄 𑀲𑀤𑁆𑀥𑀸𑀳𑀸𑀦𑀺𑀆𑀤𑀻𑀦𑀁 𑀉𑀧𑀸𑀬𑀪𑀽𑀢𑀲𑁆𑀲 𑀅𑀳𑀺𑀢𑀲𑁆𑀲 𑀘 𑀓𑀸𑀫𑀦𑀢𑁄 𑀅𑀳𑀺𑀢𑀓𑀸𑀫𑀸. 𑀨𑀸𑀲𑀼𑀓𑀯𑀺𑀳𑀸𑀭𑀲𑁆𑀲 𑀅𑀓𑀸𑀫𑀦𑀢𑁄 𑀅𑀨𑀸𑀲𑀼𑀓𑀯𑀺𑀳𑀸𑀭𑀲𑁆𑀲 𑀘 𑀓𑀸𑀫𑀦𑀢𑁄 𑀅𑀨𑀸𑀲𑀼𑀓𑀓𑀸𑀫𑀸. 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀩𑁆𑀪𑀬𑀲𑁆𑀲 𑀅𑀓𑀸𑀫𑀦𑀢𑁄 𑀪𑀬𑀲𑁆𑀲 𑀘 𑀓𑀸𑀫𑀦𑀢𑁄 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀗𑁆𑀕𑀢𑀻𑀢𑀺 𑀕𑀦𑁆𑀢𑁆𑀯𑀸 𑀲𑀁𑀬𑁄𑀕𑁄. 𑀲𑀫𑀸𑀕𑀫𑁄𑀢𑀺 𑀆𑀕𑀢𑁂𑀳𑀺 𑀲𑀁𑀬𑁄𑀕𑁄. 𑀲𑀫𑁄𑀥𑀸𑀦𑀦𑁆𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀳𑀪𑀸𑀯𑁄. 𑀫𑀺𑀲𑁆𑀲𑀻𑀪𑀸𑀯𑁄𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀁 𑀲𑀳𑀓𑀭𑀡𑀁. 𑀅𑀬𑀁 𑀲𑀢𑁆𑀢𑀯𑀲𑁂𑀦 𑀬𑁄𑀚𑀦𑀸. 𑀲𑀗𑁆𑀔𑀸𑀭𑀯𑀲𑁂𑀦 𑀧𑀦 𑀬𑀁 𑀮𑀩𑁆𑀪𑀢𑀺 𑀢𑀁 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀦𑀸𑀫 𑀓𑀣𑀺𑀬𑀢𑀺. 𑀲𑁄 𑀅𑀦𑀺𑀝𑁆𑀞𑀲𑀫𑁄𑀥𑀸𑀦𑀮𑀓𑁆𑀔𑀡𑁄, 𑀘𑀺𑀢𑁆𑀢𑀯𑀺𑀖𑀸𑀢𑀓𑀭𑀡𑀭𑀲𑁄, 𑀅𑀦𑀢𑁆𑀣𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀲𑁄 ¶ 𑀅𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀓𑁂𑀯𑀮𑀁 𑀅𑀧𑁆𑀧𑀺𑀬𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀤𑀼𑀯𑀺𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀅𑀦𑀺𑀝𑁆𑀞𑀸𑀦𑀺 𑀳𑀺 𑀯𑀢𑁆𑀣𑀽𑀦𑀺 𑀲𑀫𑁄𑀥𑀸𑀦𑀕𑀢𑀸𑀦𑀺 𑀯𑀺𑀚𑁆𑀛𑀦𑀙𑁂𑀤𑀦𑀨𑀸𑀮𑀦𑀸𑀤𑀻𑀳𑀺 𑀓𑀸𑀬𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀩𑁆𑀩𑁂𑀕𑀚𑀦𑀦𑀢𑁄 𑀫𑀸𑀦𑀲𑀫𑁆𑀧𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀤𑀺𑀲𑁆𑀯𑀸𑀯 𑀅𑀧𑁆𑀧𑀺𑀬𑁂 𑀤𑀼𑀓𑁆𑀔𑀁, 𑀧𑀞𑀫𑀁 𑀳𑁄𑀢𑀺 𑀘𑁂𑀢𑀲𑀺;

𑀢𑀤𑀼𑀧𑀓𑁆𑀓𑀫𑀲𑀫𑁆𑀪𑀽𑀢-𑀫𑀣 𑀓𑀸𑀬𑁂 𑀬𑀢𑁄 𑀇𑀥.

𑀢𑀢𑁄 ¶ 𑀤𑀼𑀓𑁆𑀔𑀤𑁆𑀯𑀬𑀲𑁆𑀲𑀸𑀧𑀺, 𑀯𑀢𑁆𑀣𑀼𑀢𑁄 𑀲𑁄 𑀫𑀳𑁂𑀲𑀺𑀦𑀸;

𑀤𑀼𑀓𑁆𑀔𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀧𑁆𑀧𑀺𑀬𑁂𑀳𑀺 𑀲𑀫𑀸𑀕𑀫𑁄𑀢𑀺.

𑀧𑀺𑀬𑀯𑀺𑀧𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑁄

𑁨𑁦𑁦. 𑀧𑀺𑀬𑀯𑀺𑀧𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀢𑀸 𑀯𑀸𑀢𑀺𑀆𑀤𑀺 𑀧𑀦𑁂𑀢𑁆𑀣 𑀅𑀢𑁆𑀣𑀓𑀸𑀫𑁂 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀫𑀸𑀬𑀢𑀻𑀢𑀺 𑀫𑀸𑀢𑀸. 𑀧𑀺𑀬𑀸𑀬𑀢𑀻𑀢𑀺 ¶ 𑀧𑀺𑀢𑀸. 𑀪𑀚𑀢𑀻𑀢𑀺 𑀪𑀸𑀢𑀸. 𑀢𑀣𑀸 𑀪𑀕𑀺𑀦𑀻. 𑀫𑁂𑀢𑁆𑀢𑀸𑀬𑀦𑁆𑀢𑀻𑀢𑀺 𑀫𑀺𑀢𑁆𑀢𑀸, 𑀫𑀺𑀦𑀦𑁆𑀢𑀻𑀢𑀺 𑀯𑀸 𑀫𑀺𑀢𑁆𑀢𑀸; 𑀲𑀩𑁆𑀩𑀕𑀼𑀬𑁆𑀳𑁂𑀲𑀼 𑀅𑀦𑁆𑀢𑁄 𑀧𑀓𑁆𑀔𑀺𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀲𑀳𑀪𑀸𑀯𑀝𑁆𑀞𑁂𑀦 𑀅𑀫𑀸 𑀳𑁄𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. 𑀅𑀬𑀁 𑀅𑀫𑁆𑀳𑀸𑀓𑀁 𑀅𑀚𑁆𑀛𑀢𑁆𑀢𑀺𑀓𑁄𑀢𑀺 𑀏𑀯𑀁 𑀚𑀸𑀦𑀦𑁆𑀢𑀺 𑀜𑀸𑀬𑀦𑁆𑀢𑀻𑀢𑀺 𑀯𑀸 𑀜𑀸𑀢𑀻. 𑀮𑁄𑀳𑀺𑀢𑁂𑀦 𑀲𑀫𑁆𑀩𑀦𑁆𑀥𑀸𑀢𑀺 𑀲𑀸𑀮𑁄𑀳𑀺𑀢𑀸. 𑀏𑀯𑀫𑁂𑀢𑀸𑀦𑀺 𑀧𑀤𑀸𑀦𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀦𑀸𑀫 𑀓𑀣𑀺𑀬𑀢𑀺. 𑀲𑁄 𑀇𑀝𑁆𑀞𑀯𑀢𑁆𑀣𑀼𑀯𑀺𑀬𑁄𑀕𑀮𑀓𑁆𑀔𑀡𑁄, 𑀲𑁄𑀓𑀼𑀧𑁆𑀧𑀸𑀤𑀦𑀭𑀲𑁄, 𑀩𑁆𑀬𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀲𑁄 𑀅𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀓𑁂𑀯𑀮𑀁 𑀧𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀤𑀼𑀯𑀺𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀇𑀝𑁆𑀞𑀸𑀦𑀺 𑀳𑀺 𑀯𑀢𑁆𑀣𑀽𑀦𑀺 𑀯𑀺𑀬𑀼𑀚𑁆𑀚𑀫𑀸𑀦𑀸𑀦𑀺 𑀲𑀭𑀻𑀭𑀲𑁆𑀲 𑀲𑁄𑀲𑀦𑀫𑀺𑀮𑀸𑀧𑀦𑀸𑀤𑀺𑀪𑀸𑀯𑁂𑀦 𑀓𑀸𑀬𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, ‘𑀬𑀫𑁆𑀧𑀺 𑀦𑁄 𑀅𑀳𑁄𑀲𑀺, 𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻’𑀢𑀺 𑀅𑀦𑀼𑀲𑁄𑀘𑀸𑀧𑀦𑀢𑁄 𑀫𑀸𑀦𑀲𑀫𑁆𑀧𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀜𑀸𑀢𑀺𑀥𑀦𑀸𑀤𑀺𑀯𑀺𑀬𑁄𑀕𑀸, 𑀲𑁄𑀓𑀲𑀭𑀲𑀫𑀧𑁆𑀧𑀺𑀢𑀸 𑀯𑀺𑀢𑀼𑀚𑁆𑀚𑀦𑁆𑀢𑀺;

𑀩𑀸𑀮𑀸 𑀬𑀢𑁄 𑀢𑀢𑁄 𑀬𑀁, 𑀤𑀼𑀓𑁆𑀔𑁄𑀢𑀺 𑀫𑀢𑁄 𑀧𑀺𑀬𑀯𑀺𑀬𑁄𑀕𑁄𑀢𑀺.

𑀇𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁨𑁦𑁧. 𑀇𑀘𑁆𑀙𑀸𑀦𑀺𑀤𑁆𑀤𑁂𑀲𑁂 𑀚𑀸𑀢𑀺𑀥𑀫𑁆𑀫𑀸𑀦𑀦𑁆𑀢𑀺 𑀚𑀸𑀢𑀺𑀲𑀪𑀸𑀯𑀸𑀦𑀁 𑀚𑀸𑀢𑀺𑀧𑀓𑀢𑀺𑀓𑀸𑀦𑀁. 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀳𑁄 𑀯𑀢𑀸𑀢𑀺 𑀧𑀢𑁆𑀣𑀦𑀸. 𑀦 ¶ 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀁 𑀏𑀢𑀁 ‘‘𑀅𑀳𑁄 𑀯𑀢 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀸𑀢𑀺 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀳𑀻𑀦𑀲𑀫𑀼𑀤𑀬𑁂𑀲𑀼 𑀲𑀸𑀥𑀽𑀲𑀼 𑀯𑀺𑀚𑁆𑀚𑀫𑀸𑀦𑀁 𑀅𑀚𑀸𑀢𑀺𑀥𑀫𑁆𑀫𑀢𑁆𑀢𑀁, 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀘 𑀯𑀺𑀚𑁆𑀚𑀫𑀸𑀦𑀁 𑀚𑀸𑀢𑀺𑀬𑀸 𑀅𑀦𑀸𑀕𑀫𑀦𑀁 𑀇𑀘𑁆𑀙𑀺𑀢𑀁, 𑀢𑀁 𑀇𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀫𑀕𑁆𑀕𑀪𑀸𑀯𑀦𑀸𑀬 𑀯𑀺𑀦𑀸 𑀅𑀧𑀢𑁆𑀢𑀩𑁆𑀩𑀢𑁄 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀘 𑀪𑀸𑀯𑀦𑀸𑀬 𑀧𑀢𑁆𑀢𑀩𑁆𑀩𑀢𑁄 𑀦 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁 𑀦𑀸𑀫 𑀳𑁄𑀢𑀺. 𑀇𑀤𑀫𑁆𑀧𑀻𑀢𑀺 𑀏𑀢𑀫𑁆𑀧𑀺; 𑀉𑀧𑀭𑀺 𑀲𑁂𑀲𑀸𑀦𑀺 𑀉𑀧𑀸𑀤𑀸𑀬 ¶ 𑀧𑀺𑀓𑀸𑀭𑁄. 𑀬𑀫𑁆𑀧𑀺𑀘𑁆𑀙𑀦𑁆𑀢𑀺 𑀬𑁂𑀦𑀧𑀺 𑀥𑀫𑁆𑀫𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀁 𑀯𑀢𑁆𑀣𑀼𑀁 𑀇𑀘𑁆𑀙𑀦𑁆𑀢𑁄 𑀦 𑀮𑀪𑀢𑀺, 𑀢𑀁 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀇𑀘𑁆𑀙𑀦𑀁 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀭𑀸𑀥𑀫𑁆𑀫𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀽𑀲𑀼 𑀇𑀘𑁆𑀙𑀸𑀯 ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀸 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀇𑀘𑁆𑀙𑀦𑀮𑀓𑁆𑀔𑀡𑀸, 𑀢𑀧𑁆𑀧𑀭𑀺𑀬𑁂𑀲𑀦𑀭𑀲𑀸, 𑀢𑁂𑀲𑀁 𑀅𑀧𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀤𑁆𑀯𑀺𑀦𑁆𑀦𑀁 𑀧𑀦 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸. 𑀏𑀓𑀘𑁆𑀘𑁄 𑀳𑀺 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀪𑀸𑀯𑀺𑀢𑁄 𑀳𑁄𑀢𑀺. 𑀲𑁄 𑀙𑀺𑀦𑁆𑀦𑀪𑀺𑀦𑁆𑀦𑀕𑀡𑁂𑀦 𑀧𑀭𑀺𑀯𑀸𑀭𑀺𑀢𑁄 𑀧𑀩𑁆𑀩𑀢𑀯𑀺𑀲𑀫𑀁 𑀯𑀸 𑀯𑀦𑀕𑀳𑀦𑀁 𑀯𑀸 𑀧𑀯𑀺𑀲𑀢𑀺. 𑀅𑀣 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀩𑀮𑀓𑀸𑀬𑀁 𑀧𑁂𑀲𑁂𑀢𑀺. 𑀲𑁄 𑀭𑀸𑀚𑀧𑀼𑀭𑀺𑀲𑁂𑀳𑀺 𑀦𑀺𑀳𑀢𑀧𑀭𑀺𑀯𑀸𑀭𑁄 𑀲𑀬𑀫𑁆𑀧𑀺 𑀮𑀤𑁆𑀥𑀧𑁆𑀧𑀳𑀸𑀭𑁄 𑀧𑀮𑀸𑀬𑀫𑀸𑀦𑁄 𑀭𑀼𑀓𑁆𑀔𑀦𑁆𑀢𑀭𑀁 𑀯𑀸 𑀧𑀸𑀲𑀸𑀡𑀦𑁆𑀢𑀭𑀁 𑀯𑀸 𑀧𑀯𑀺𑀲𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀢𑀺, 𑀢𑀺𑀩𑁆𑀩𑀦𑁆𑀥𑀓𑀸𑀭𑀸 𑀓𑀸𑀴𑀯𑀤𑁆𑀤𑀮𑀺𑀓𑀸 𑀳𑁄𑀢𑀺. 𑀅𑀣 𑀦𑀁 𑀲𑀫𑀦𑁆𑀢𑀢𑁄 𑀓𑀸𑀴𑀓𑀺𑀧𑀺𑀮𑁆𑀮𑀺𑀓𑀸𑀤𑀬𑁄 𑀧𑀸𑀡𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀢𑁂𑀦𑀲𑁆𑀲 𑀩𑀮𑀯𑀓𑀸𑀬𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. ‘𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀸 𑀜𑀸𑀢𑀻 𑀘 𑀪𑁄𑀕𑀸 𑀘 𑀯𑀺𑀦𑀝𑁆𑀞𑀸’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀅𑀬𑀁 𑀇𑀘𑁆𑀙𑀸 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑁋

𑀢𑀁 𑀢𑀁 𑀧𑀢𑁆𑀣𑀬𑀫𑀸𑀦𑀸𑀦𑀁, 𑀢𑀲𑁆𑀲 𑀢𑀲𑁆𑀲 𑀅𑀮𑀸𑀪𑀢𑁄;

𑀬𑀁 𑀯𑀺𑀖𑀸𑀢𑀫𑀬𑀁 𑀤𑀼𑀓𑁆𑀔𑀁, 𑀲𑀢𑁆𑀢𑀸𑀦𑀁 𑀇𑀥 𑀚𑀸𑀬𑀢𑀺.

𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀽𑀦𑀁, 𑀧𑀢𑁆𑀣𑀦𑀸 𑀢𑀲𑁆𑀲 𑀓𑀸𑀭𑀡𑀁;

𑀬𑀲𑁆𑀫𑀸 𑀢𑀲𑁆𑀫𑀸 𑀚𑀺𑀦𑁄 𑀤𑀼𑀓𑁆𑀔𑀁, 𑀇𑀘𑁆𑀙𑀺𑀢𑀸𑀮𑀸𑀪𑀫𑀩𑁆𑀭𑀯𑀻𑀢𑀺.

𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑁨𑁦𑁨. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀲𑀁𑀔𑀺𑀢𑁆𑀢𑁂𑀦𑀸𑀢𑀺 𑀤𑁂𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀜𑁆𑀳𑀺 𑀏𑀢𑁆𑀢𑀓𑀸𑀦𑀺 𑀤𑀼𑀓𑁆𑀔𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀤𑀼𑀓𑁆𑀔𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀤𑀼𑀓𑁆𑀔𑀲𑀢𑀲𑀳𑀲𑁆𑀲𑀸𑀦𑀻𑀢𑀺 ¶ 𑀯𑀸 𑀲𑀁𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸, 𑀤𑁂𑀲𑀦𑀸 𑀧𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀁 𑀦𑀸𑀫 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀤𑁂𑀲𑀦𑀁 𑀲𑀗𑁆𑀔𑀺𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄; 𑀢𑀲𑁆𑀲 𑀢𑁂 𑀓𑀢𑀫𑁂𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀭𑀽𑀧𑀽𑀧𑀸𑀤𑀸𑀦𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀔𑀦𑁆𑀥𑀯𑀺𑀪𑀗𑁆𑀕𑁂 𑀯𑀡𑁆𑀡𑀺𑀢𑁄𑀬𑁂𑀯.

‘𑀔𑀦𑁆𑀥𑀸𑀦𑀁 ¶ 𑀤𑀼𑀓𑁆𑀔𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀏𑀢𑁆𑀣 𑀧𑀦 𑁋

𑀚𑀸𑀢𑀺𑀧𑁆𑀧𑀪𑀼𑀢𑀺𑀓𑀁 ¶ 𑀤𑀼𑀓𑁆𑀔𑀁, 𑀬𑀁 𑀯𑀼𑀢𑁆𑀢𑀁 𑀇𑀥 𑀢𑀸𑀤𑀺𑀦𑀸;

𑀅𑀯𑀼𑀢𑁆𑀢𑀁 𑀬𑀜𑁆𑀘 𑀢𑀁 𑀲𑀩𑁆𑀩𑀁, 𑀯𑀺𑀦𑀸 𑀏𑀢𑁂 𑀦 𑀯𑀺𑀚𑁆𑀚𑀢𑀺.

𑀬𑀲𑁆𑀫𑀸 𑀢𑀲𑁆𑀫𑀸 𑀉𑀧𑀸𑀤𑀸𑀦-𑀓𑁆𑀔𑀦𑁆𑀥𑀸 𑀲𑀗𑁆𑀔𑁂𑀧𑀢𑁄 𑀇𑀫𑁂;

𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸 𑀤𑀼𑀓𑁆𑀔𑀦𑁆𑀢-𑀤𑁂𑀲𑀓𑁂𑀦 𑀫𑀳𑁂𑀲𑀺𑀦𑀸.

𑀢𑀣𑀸 𑀳𑀺 𑀇𑀦𑁆𑀥𑀦𑀫𑀺𑀯 𑀧𑀸𑀯𑀓𑁄, 𑀮𑀓𑁆𑀔𑀫𑀺𑀯 𑀧𑀳𑀭𑀡𑀸𑀦𑀺, 𑀕𑁄𑀭𑀽𑀧𑀫𑀺𑀯 𑀟𑀁𑀲𑀫𑀓𑀲𑀸𑀤𑀬𑁄, 𑀔𑁂𑀢𑁆𑀢𑀫𑀺𑀯 𑀮𑀸𑀯𑀓𑀸, 𑀕𑀸𑀫𑀁 𑀯𑀺𑀬 𑀕𑀸𑀫𑀖𑀸𑀢𑀓𑀸, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀚𑀸𑀢𑀺𑀆𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀩𑀸𑀥𑀬𑀫𑀸𑀦𑀸, 𑀢𑀺𑀡𑀮𑀢𑀸𑀤𑀻𑀦𑀺 𑀯𑀺𑀬 𑀪𑀽𑀫𑀺𑀬𑀁, 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀦𑀺 𑀯𑀺𑀬 𑀭𑀼𑀓𑁆𑀔𑁂𑀲𑀼, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀜𑁆𑀘 𑀆𑀤𑀺𑀤𑀼𑀓𑁆𑀔𑀁 𑀚𑀸𑀢𑀺, 𑀫𑀚𑁆𑀛𑁂𑀤𑀼𑀓𑁆𑀔𑀁 𑀚𑀭𑀸, 𑀧𑀭𑀺𑀬𑁄𑀲𑀸𑀦𑀤𑀼𑀓𑁆𑀔𑀁 𑀫𑀭𑀡𑀁. 𑀫𑀸𑀭𑀡𑀦𑁆𑀢𑀺𑀓𑀤𑀼𑀓𑁆𑀔𑀸𑀪𑀺𑀖𑀸𑀢𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑀤𑀼𑀓𑁆𑀔𑀁 𑀲𑁄𑀓𑁄, 𑀢𑀤𑀲𑀳𑀦𑀢𑁄 𑀮𑀸𑀮𑀧𑁆𑀧𑀦𑀤𑀼𑀓𑁆𑀔𑀁 𑀧𑀭𑀺𑀤𑁂𑀯𑁄. 𑀢𑀢𑁄 𑀥𑀸𑀢𑀼𑀓𑁆𑀔𑁄𑀪𑀲𑀗𑁆𑀔𑀸𑀢𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀲𑀫𑀸𑀬𑁄𑀕𑀢𑁄 𑀓𑀸𑀬𑀲𑁆𑀲 𑀆𑀩𑀸𑀥𑀦𑀤𑀼𑀓𑁆𑀔𑀁 𑀤𑀼𑀓𑁆𑀔𑀁. 𑀢𑁂𑀦 𑀩𑀸𑀥𑀺𑀬𑀫𑀸𑀦𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀢𑀢𑁆𑀣 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀢𑁄 𑀘𑁂𑀢𑁄𑀩𑀸𑀥𑀦𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁. 𑀲𑁄𑀓𑀸𑀤𑀺𑀯𑀼𑀟𑁆𑀠𑀺𑀬𑀸 𑀚𑀦𑀺𑀢𑀯𑀺𑀲𑀸𑀤𑀸𑀦𑀁 𑀅𑀦𑀼𑀢𑁆𑀣𑀼𑀦𑀦𑀤𑀼𑀓𑁆𑀔𑀁 𑀉𑀧𑀸𑀬𑀸𑀲𑁄. 𑀫𑀦𑁄𑀭𑀣𑀯𑀺𑀖𑀸𑀢𑀧𑁆𑀧𑀢𑁆𑀢𑀸𑀦𑀁 𑀇𑀘𑁆𑀙𑀸𑀯𑀺𑀖𑀸𑀢𑀤𑀼𑀓𑁆𑀔𑀁 𑀇𑀘𑁆𑀙𑀺𑀢𑀸𑀮𑀸𑀪𑁄𑀢𑀺 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀯 𑀤𑀼𑀓𑁆𑀔𑀸𑀢𑀺 𑀬𑀤𑁂𑀢𑀁 𑀏𑀓𑀫𑁂𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀁 𑀅𑀦𑁂𑀓𑁂𑀳𑀺 𑀓𑀧𑁆𑀧𑁂𑀳𑀺 𑀦 𑀲𑀓𑁆𑀓𑀸 𑀅𑀲𑁂𑀲𑀢𑁄 𑀯𑀢𑁆𑀢𑀼𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀏𑀓𑀚𑀮𑀩𑀺𑀦𑁆𑀤𑀼𑀫𑁆𑀳𑀺 𑀲𑀓𑀮𑀲𑀫𑀼𑀤𑁆𑀤𑀚𑀮𑀭𑀲𑀁 𑀯𑀺𑀬 𑀬𑁂𑀲𑀼 𑀓𑁂𑀲𑀼𑀘𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘𑀸𑀢𑀺.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁂 ¶ 𑀬𑀸𑀬𑀁 𑀢𑀡𑁆𑀳𑀸𑀢𑀺 𑀬𑀸 𑀅𑀬𑀁 𑀢𑀡𑁆𑀳𑀸. 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀁 ¶ 𑀧𑀼𑀦𑁄𑀩𑁆𑀪𑀯𑁄, 𑀧𑀼𑀦𑁄𑀩𑁆𑀪𑀯𑁄 𑀲𑀻𑀮𑀫𑀲𑁆𑀲𑀸𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸. 𑀅𑀧𑀺𑀘 𑀧𑀼𑀦𑀩𑁆𑀪𑀯𑀁 ¶ 𑀤𑁂𑀢𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸. 𑀲𑀸 𑀧𑀦𑁂𑀲𑀸 𑀧𑀼𑀦𑀩𑁆𑀪𑀯𑀲𑁆𑀲 𑀤𑀸𑀬𑀺𑀓𑀸𑀧𑀺 𑀅𑀢𑁆𑀣𑀺 𑀅𑀤𑀸𑀬𑀺𑀓𑀸𑀧𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀦𑀺𑀓𑀸𑀧𑀺 𑀅𑀢𑁆𑀣𑀺 𑀅𑀲𑀁𑀯𑀢𑁆𑀢𑀦𑀺𑀓𑀸𑀧𑀺, 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀫𑀢𑁆𑀢𑀸𑀧𑀺. 𑀲𑀸 𑀧𑀼𑀦𑀩𑁆𑀪𑀯𑀁 𑀤𑀤𑀫𑀸𑀦𑀸𑀧𑀺 𑀅𑀤𑀤𑀫𑀸𑀦𑀸𑀧𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀫𑀸𑀦𑀸𑀧𑀺 𑀅𑀲𑀁𑀯𑀢𑁆𑀢𑀫𑀸𑀦𑀸𑀧𑀺, 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀫𑀢𑁆𑀢𑀸𑀧𑀺 𑀧𑁄𑀦𑁄𑀩𑁆𑀪𑀯𑀺𑀓𑀸 𑀏𑀯𑀸𑀢𑀺 𑀦𑀸𑀫𑀁 𑀮𑀪𑀢𑀺. 𑀅𑀪𑀺𑀦𑀦𑁆𑀤𑀦𑀲𑀗𑁆𑀔𑀸𑀢𑁂𑀦 𑀦𑀦𑁆𑀤𑀺𑀭𑀸𑀕𑁂𑀦 𑀲𑀳𑀕𑀢𑀸𑀢𑀺 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸, 𑀦𑀦𑁆𑀤𑀺𑀭𑀸𑀕𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀫𑁂𑀯 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀬𑀢𑁆𑀭 𑀬𑀢𑁆𑀭 𑀅𑀢𑁆𑀢𑀪𑀸𑀯𑁄 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀭𑀽𑀧𑀸𑀤𑀻𑀲𑀼 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻; 𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑀻 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄; 𑀢𑀲𑁆𑀲 𑀲𑀸 𑀓𑀢𑀫𑀸𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀓𑀸𑀫𑀢𑀡𑁆𑀳𑀸𑀢𑀺 𑀓𑀸𑀫𑁂 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸; 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀯𑁂 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸; 𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑀲𑁆𑀲 𑀘 𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀪𑀯𑁂 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸; 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀲𑁆𑀲 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀇𑀤𑀸𑀦𑀺 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀲𑀸 𑀔𑁄 𑀧𑀦𑁂𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀚𑀸𑀬𑀢𑀺. 𑀦𑀺𑀯𑀺𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀳𑀢𑀺. 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀬𑀁 𑀮𑁄𑀓𑀲𑁆𑀫𑀺𑀁 𑀧𑀺𑀬𑀲𑀪𑀸𑀯𑀜𑁆𑀘𑁂𑀯 𑀫𑀥𑀼𑀭𑀲𑀪𑀸𑀯𑀜𑁆𑀘. 𑀘𑀓𑁆𑀔𑀼𑀁 𑀮𑁄𑀓𑁂𑀢𑀺𑀆𑀤𑀻𑀲𑀼 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀓𑁆𑀔𑀸𑀤𑀻𑀲𑀼 𑀫𑀫𑀢𑁆𑀢𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀸 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀸 𑀅𑀢𑁆𑀢𑀦𑁄 𑀘𑀓𑁆𑀔𑀼𑀁 𑀆𑀤𑀸𑀲𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀧𑁆𑀧𑀲𑀦𑁆𑀦𑀧𑀜𑁆𑀘𑀧𑀲𑀸𑀤𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀲𑁄𑀢𑀁 𑀭𑀚𑀢𑀧𑀦𑀸𑀴𑀺𑀓𑀁 𑀯𑀺𑀬 𑀧𑀸𑀫𑀗𑁆𑀕𑀲𑀼𑀢𑁆𑀢𑀓𑀁 𑀯𑀺𑀬 𑀘 ¶ 𑀫𑀜𑁆𑀜𑀦𑁆𑀢𑀺, 𑀢𑀼𑀗𑁆𑀕𑀦𑀸𑀲𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀖𑀸𑀦𑀁 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀺𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀚𑀺𑀯𑁆𑀳𑀁 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑀁 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀫𑀥𑀼𑀭𑀭𑀲𑀤𑀁 𑀫𑀜𑁆𑀜𑀦𑁆𑀢𑀺, 𑀓𑀸𑀬𑀁 𑀲𑀸𑀮𑀮𑀝𑁆𑀞𑀺𑀁 𑀯𑀺𑀬 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀘 𑀫𑀜𑁆𑀜𑀦𑁆𑀢𑀺, 𑀫𑀦𑀁 𑀅𑀜𑁆𑀜𑁂𑀲𑀁 𑀫𑀦𑁂𑀦 𑀅𑀲𑀤𑀺𑀲𑀁 𑀉𑀴𑀸𑀭𑀁 𑀫𑀜𑁆𑀜𑀦𑁆𑀢𑀺, 𑀭𑀽𑀧𑀁 𑀲𑀼𑀯𑀡𑁆𑀡𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀯𑀡𑁆𑀡𑀁 𑀯𑀺𑀬 ¶ , 𑀲𑀤𑁆𑀤𑀁 𑀫𑀢𑁆𑀢𑀓𑀭𑀯𑀻𑀓𑀓𑁄𑀓𑀺𑀮𑀫𑀦𑁆𑀤𑀥𑀫𑀺𑀢𑀫𑀡𑀺𑀯𑀁𑀲𑀦𑀺𑀕𑁆𑀖𑁄𑀲𑀁 𑀯𑀺𑀬, 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸𑀦𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀦𑀺 ‘𑀓𑀲𑁆𑀲 𑀅𑀜𑁆𑀜𑀲𑁆𑀲 𑀏𑀯𑀭𑀽𑀧𑀸𑀦𑀺 𑀅𑀢𑁆𑀣𑀻’𑀢𑀺 𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀫𑀜𑁆𑀜𑀫𑀸𑀦𑀸𑀦𑀁 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀧𑀺𑀬𑀭𑀽𑀧𑀸𑀦𑀺 𑀘𑁂𑀯 𑀳𑁄𑀦𑁆𑀢𑀺 𑀲𑀸𑀢𑀭𑀽𑀧𑀸𑀦𑀺 𑀘. 𑀅𑀣 𑀦𑁂𑀲𑀁 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀯𑀺𑀲𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑁋 ‘‘𑀘𑀓𑁆𑀔𑀼𑀁 𑀮𑁄𑀓𑁂 ¶ 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀬𑀤𑀸 𑀉𑀧𑁆𑀧𑀚𑁆𑀚𑀢𑀺 𑀢𑀤𑀸 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀧𑀻𑀢𑀺.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁪. 𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬𑀸𑀢𑀺 𑀏𑀢𑁆𑀣 ‘𑀬𑁄 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲𑀸’𑀢𑀺 𑀯𑀢𑁆𑀢𑀩𑁆𑀩𑁂 𑀬𑀲𑁆𑀫𑀸 𑀲𑀫𑀼𑀤𑀬𑀦𑀺𑀭𑁄𑀥𑁂𑀦𑁂𑀯 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺 𑀦𑁄 𑀅𑀜𑁆𑀜𑀣𑀸, 𑀬𑀣𑀸𑀳 𑁋

‘‘𑀬𑀣𑀸𑀧𑀺 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂,

𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀭𑁂𑀯 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂,

𑀦𑀺𑀩𑁆𑀩𑀢𑁆𑀢𑀢𑀺 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. (𑀥. 𑀧. 𑁩𑁩𑁮);

𑀢𑀲𑁆𑀫𑀸 𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 𑀲𑀫𑀼𑀤𑀬𑀦𑀺𑀭𑁄𑀥𑁂𑀦 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳. 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄 𑀳𑀺 𑀢𑀣𑀸𑀕𑀢𑀸. 𑀢𑁂 𑀤𑀼𑀓𑁆𑀔𑀁 𑀦𑀺𑀭𑁄𑀥𑁂𑀦𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀜𑁆𑀘 𑀤𑀲𑁆𑀲𑁂𑀦𑁆𑀢𑀸 𑀳𑁂𑀢𑀼𑀫𑁆𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦 𑀨𑀮𑁂. 𑀲𑀼𑀯𑀸𑀦𑀯𑀼𑀢𑁆𑀢𑀺𑀦𑁄 𑀧𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀢𑁂 𑀤𑀼𑀓𑁆𑀔𑀁 𑀦𑀺𑀭𑁄𑀥𑁂𑀦𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀜𑁆𑀘 𑀤𑀲𑁆𑀲𑁂𑀦𑁆𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁂𑀦 ¶ 𑀘𑁂𑀯 𑀢𑀲𑁆𑀲𑁂𑀯 𑀘 𑀤𑁂𑀲𑀦𑀸𑀬 𑀨𑀮𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦 𑀳𑁂𑀢𑀼𑀫𑁆𑀳𑀻𑀢𑀺. 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀲𑀢𑁆𑀣𑀸 𑀳𑁂𑀢𑀼𑀫𑁆𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑁄 𑀬𑁄 𑀢𑀲𑁆𑀲𑀸𑀬𑁂𑀯𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀢𑀲𑁆𑀲𑀸𑀬𑁂𑀯𑀸𑀢𑀺 𑀬𑀸 𑀲𑀸 𑀉𑀧𑁆𑀧𑀢𑁆𑀢𑀺 𑀦𑀺𑀯𑁂𑀲𑀯𑀲𑁂𑀦 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸 𑀢𑀲𑁆𑀲𑀸𑀬𑁂𑀯. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑁂𑀯 ¶ . 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀅𑀲𑁂𑀲𑀸 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀢𑀁 ‘‘𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 𑀆𑀕𑀫𑁆𑀫 𑀢𑀡𑁆𑀳𑀸 𑀘𑀚𑀺𑀬𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀬𑀢𑀺, 𑀫𑀼𑀘𑁆𑀘𑀢𑀺, 𑀦 𑀅𑀮𑁆𑀮𑀺𑀬𑀢𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 ‘‘𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀫𑁂𑀯 𑀳𑀺 ¶ 𑀦𑀺𑀩𑁆𑀩𑀸𑀦𑀁. 𑀦𑀸𑀫𑀸𑀦𑀺 𑀧𑀦𑀲𑁆𑀲 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀦𑀸𑀫𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑁂𑀓𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑁂𑀯 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄, 𑀘𑀸𑀕𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑁄, 𑀫𑀼𑀢𑁆𑀢𑀺, 𑀅𑀦𑀸𑀮𑀬𑁄, 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄, 𑀢𑀡𑁆𑀳𑀸𑀓𑁆𑀔𑀬𑁄, 𑀅𑀦𑀼𑀧𑁆𑀧𑀸𑀤𑁄, 𑀅𑀧𑁆𑀧𑀯𑀢𑁆𑀢𑀁, 𑀅𑀦𑀺𑀫𑀺𑀢𑁆𑀢𑀁, 𑀅𑀧𑁆𑀧𑀡𑀺𑀳𑀺𑀢𑀁, 𑀅𑀦𑀸𑀬𑀽𑀳𑀦𑀁, 𑀅𑀧𑁆𑀧𑀝𑀺𑀲𑀦𑁆𑀥𑀺, 𑀅𑀦𑀼𑀧𑀧𑀢𑁆𑀢𑀺, 𑀅𑀕𑀢𑀺, 𑀅𑀚𑀸𑀢𑀁, 𑀅𑀚𑀭𑀁, 𑀅𑀩𑁆𑀬𑀸𑀥𑀺, 𑀅𑀫𑀢𑀁, 𑀅𑀲𑁄𑀓𑀁, 𑀅𑀧𑀭𑀺𑀤𑁂𑀯𑀁, 𑀅𑀦𑀼𑀧𑀸𑀬𑀸𑀲𑀁, 𑀅𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺𑀆𑀤𑀻𑀦𑀺.

𑀇𑀤𑀸𑀦𑀺 𑀫𑀕𑁆𑀕𑁂𑀦 𑀙𑀺𑀦𑁆𑀦𑀸𑀬 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀅𑀧𑁆𑀧𑀯𑀢𑁆𑀢𑀺𑀧𑀢𑁆𑀢𑀸𑀬𑀧𑀺 𑀘 𑀢𑀡𑁆𑀳𑀸𑀬 𑀬𑁂𑀲𑀼 𑀯𑀢𑁆𑀣𑀽𑀲𑀼 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀢𑁆𑀣𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑀸 𑀔𑁄 𑀧𑀦𑁂𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀚𑀸𑀢𑀁 𑀢𑀺𑀢𑁆𑀢𑀅𑀮𑀸𑀩𑀼𑀯𑀮𑁆𑀮𑀺𑀁 𑀤𑀺𑀲𑁆𑀯𑀸 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀫𑀽𑀮𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀙𑀺𑀦𑁆𑀤𑁂𑀬𑁆𑀬, 𑀲𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀺𑀮𑀸𑀬𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑁂𑀬𑁆𑀬. 𑀢𑀢𑁄 𑀢𑀲𑁆𑀫𑀺𑀁 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀦𑀺𑀭𑀼𑀤𑁆𑀥𑀸 𑀧𑀳𑀻𑀦𑀸𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀏𑀯𑀫𑁂𑀯 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀯𑀺𑀬 𑀘𑀓𑁆𑀔𑀸𑀤𑀻𑀲𑀼 𑀢𑀡𑁆𑀳𑀸. 𑀲𑀸 𑀅𑀭𑀺𑀬𑀫𑀕𑁆𑀕𑁂𑀦 𑀫𑀽𑀮𑀘𑁆𑀙𑀺𑀦𑁆𑀦𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀕𑀢𑀸 𑀧𑀦 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀯𑀺𑀬 𑀦 𑀧𑀜𑁆𑀜𑀸𑀬𑀢𑀺. 𑀬𑀣𑀸 𑀘 𑀅𑀝𑀯𑀺𑀢𑁄 𑀘𑁄𑀭𑁂 𑀆𑀦𑁂𑀢𑁆𑀯𑀸 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀖𑀸𑀢𑁂𑀬𑁆𑀬𑀼𑀁, 𑀢𑀢𑁄 𑀅𑀝𑀯𑀺𑀬𑀁 𑀘𑁄𑀭𑀸 𑀫𑀢𑀸𑀢𑀺 𑀯𑀸 𑀫𑀸𑀭𑀺𑀢𑀸𑀢𑀺 𑀯𑀸 𑀯𑀼𑀘𑁆𑀘𑁂𑀬𑁆𑀬𑀼𑀁; 𑀏𑀯𑀫𑁂𑀯 𑀅𑀝𑀯𑀺𑀬𑀁 𑀘𑁄𑀭𑀸 𑀯𑀺𑀬 𑀬𑀸 𑀘𑀓𑁆𑀔𑀸𑀤𑀻𑀲𑀼 𑀢𑀡𑁆𑀳𑀸, 𑀲𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀘𑁄𑀭𑀸 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀢𑁆𑀢𑀸 𑀦𑀺𑀩𑁆𑀩𑀸𑀦𑁂 𑀦𑀺𑀭𑀼𑀤𑁆𑀥𑀸. 𑀏𑀯𑀁 𑀦𑀺𑀭𑀼𑀤𑁆𑀥𑀸 𑀧𑀦 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀅𑀝𑀯𑀺𑀬𑀁 ¶ 𑀘𑁄𑀭𑀸 𑀯𑀺𑀬 𑀦 𑀧𑀜𑁆𑀜𑀸𑀬𑀢𑀺. 𑀢𑁂𑀦𑀲𑁆𑀲𑀸 𑀢𑀢𑁆𑀣𑁂𑀯 𑀦𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁫. 𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑁂 ¶ 𑀅𑀬𑀫𑁂𑀯𑀸𑀢𑀺 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁 𑀦𑀺𑀬𑀫𑀦𑀁. 𑀅𑀭𑀺𑀬𑁄𑀢𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀅𑀭𑀺𑀬𑀨𑀮𑀧𑀝𑀺𑀮𑀸𑀪𑀓𑀭𑀢𑁆𑀢𑀸 𑀘 𑀅𑀭𑀺𑀬𑁄. 𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑁄. 𑀲𑁆𑀯𑀸𑀬𑀁 𑀘𑀢𑀼𑀭𑀗𑁆𑀕𑀺𑀓𑀸 𑀯𑀺𑀬 𑀲𑁂𑀦𑀸, 𑀧𑀜𑁆𑀘𑀗𑁆𑀕𑀺𑀓𑀁 𑀯𑀺𑀬 𑀢𑀽𑀭𑀺𑀬𑀁 𑀅𑀗𑁆𑀕𑀫𑀢𑁆𑀢𑀫𑁂𑀯 ¶ 𑀳𑁄𑀢𑀺, 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀺. 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀫𑀕𑁆𑀕𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀲𑁄 𑀓𑀢𑀫𑁄𑀢𑀺 𑀘𑁂𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀗𑁆𑀕𑀫𑀢𑁆𑀢𑀫𑁂𑀯 𑀫𑀕𑁆𑀕𑁄 𑀳𑁄𑀢𑀺, 𑀅𑀗𑁆𑀕𑀯𑀺𑀦𑀺𑀫𑁆𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀆𑀳. 𑀢𑀢𑁆𑀣 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸 𑀲𑀫𑁆𑀫𑀸𑀯𑀸𑀘𑀸. 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀫𑀸 𑀯𑁄𑀤𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀲𑀫𑁆𑀫𑀸 𑀧𑀕𑁆𑀕𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀢𑁂𑀲𑀼 𑀘 𑀏𑀓𑁂𑀓𑀲𑁆𑀲 𑀢𑀻𑀡𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀸𑀯 𑀅𑀜𑁆𑀜𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀲𑁆𑀲𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀯𑀺𑀥𑀫𑀦𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀢𑀣𑁂𑀯 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀺 𑀘 𑀧𑀚𑀳𑀦𑁆𑀢𑀺, 𑀦𑀺𑀭𑁄𑀥𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀳𑀚𑀸𑀢𑀥𑀫𑁆𑀫𑁂 ¶ 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸 𑀉𑀧𑀝𑁆𑀞𑀸𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑁆𑀫𑀸 𑀧𑀤𑀳𑀢𑀺.

𑀅𑀧𑀺𑀘𑁂𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸, 𑀓𑀺𑀘𑁆𑀘𑀢𑁄 𑀧𑀦 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀢𑁂𑀲𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀓𑀺𑀘𑁆𑀘𑀢𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄𑀢𑀺𑀆𑀤𑀻𑀦𑀺 𑀢𑀻𑀡𑀺 ¶ 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯. 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀻𑀢𑀺 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀓𑀺𑀘𑁆𑀘𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯.

𑀇𑀢𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀪𑀕𑀯𑀢𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀩𑀳𑀽𑀧𑀓𑀸𑀭𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑁂𑀲𑀺𑀢𑀸. 𑀅𑀬𑀜𑁆𑀳𑀺 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀲𑀢𑁆𑀣’’𑀦𑁆𑀢𑀺 (𑀥. 𑀲. 𑁧𑁬, 𑁨𑁦, 𑁨𑁯, 𑁩𑁪) 𑀘 ¶ 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄 𑀔𑁂𑀫𑁂𑀦 𑀬𑁄𑀕𑀸𑀯𑀘𑀭𑁄 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀩𑀳𑀽𑀧𑀓𑀸𑀭𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑁂𑀲𑀺𑀢𑀸’’𑀢𑀺.

𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀢𑀲𑁆𑀲𑀸 𑀩𑀳𑀽𑀧𑀓𑀸𑀭𑁄, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀳𑀢𑁆𑀣𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑀓𑁆𑀔𑀼𑀦𑀸 𑀓𑀳𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄 ‘𑀅𑀬𑀁 𑀓𑀽𑀝𑁄, 𑀅𑀬𑀁 𑀙𑁂𑀓𑁄’𑀢𑀺 𑀚𑀸𑀦𑀸𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀑𑀮𑁄𑀓𑀬𑀫𑀸𑀦𑁄 ‘𑀇𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸𑀤𑀬𑁄’𑀢𑀺 𑀚𑀸𑀦𑀸𑀢𑀺. 𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁂𑀦 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀫𑀳𑀸𑀭𑀼𑀓𑁆𑀔𑀁 𑀢𑀘𑁆𑀙𑀓𑁄 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑀢𑁆𑀯𑀸 𑀤𑀺𑀦𑁆𑀦𑀥𑀫𑁆𑀫𑁂 𑀬𑁄𑀕𑀸𑀯𑀘𑀭𑁄 𑀧𑀜𑁆𑀜𑀸𑀬 ‘𑀇𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑁂 𑀉𑀧𑀦𑁂𑀢𑀺. 𑀢𑁂𑀦 ¶ 𑀯𑀼𑀢𑁆𑀢𑀁 ‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀢𑀲𑁆𑀲𑀸 𑀩𑀳𑀽𑀧𑀓𑀸𑀭𑁄, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀯𑀼𑀢𑁆𑀢𑁄’’𑀢𑀺.

𑀲𑁆𑀯𑀸𑀬𑀁 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀏𑀯𑀁 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄. 𑀬𑀣𑀸𑀳 𑁋 ‘‘𑀧𑀼𑀩𑁆𑀩𑁂 𑀔𑁄, 𑀕𑀳𑀧𑀢𑀺, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁩). 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀘𑀸 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀧𑀦 ‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀧𑀞𑀫𑀁 𑀯𑀸𑀘𑀸𑀬 𑀲𑀁𑀯𑀺𑀤𑀳𑀺𑀢𑁆𑀯𑀸 𑀮𑁄𑀓𑁂 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀸𑀘𑀸 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑀓𑀸𑀭𑀺𑀓𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀬 𑀅𑀦𑀦𑁆𑀢𑀭𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀯𑀼𑀢𑁆𑀢𑁄.

𑀘𑀢𑀼𑀩𑁆𑀩𑀺𑀥𑀁 ¶ 𑀧𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀉𑀪𑀬𑀁 𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲𑁂𑀯 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀽𑀭𑀢𑀺, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 𑀢𑀤𑀼𑀪𑀬𑀸𑀦𑀦𑁆𑀢𑀭𑀁 𑀲𑀫𑁆𑀫𑀸𑀆𑀚𑀻𑀯𑁄 𑀯𑀼𑀢𑁆𑀢𑁄.

𑀏𑀯𑀁 𑀲𑀼𑀤𑁆𑀥𑀸𑀚𑀻𑀯𑁂𑀦 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄’𑀢𑀺 𑀏𑀢𑁆𑀢𑀸𑀯𑀢𑀸 𑀧𑀭𑀺𑀢𑁄𑀲𑀁 𑀅𑀓𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀅𑀣 𑀔𑁄 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀇𑀤𑀁 𑀯𑀻𑀭𑀺𑀬𑀫𑀸𑀭𑀪𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀬𑀸𑀫𑁄 𑀯𑀼𑀢𑁆𑀢𑁄.

𑀢𑀢𑁄 ¶ 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀧𑀺 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀲𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀲𑀢𑀺 𑀤𑁂𑀲𑀺𑀢𑀸.

𑀬𑀲𑁆𑀫𑀸 𑀧𑀦 𑀏𑀯𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀲𑀢𑀺 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀺𑀢𑁆𑀯𑀸 𑀧𑀳𑁄𑀢𑀺 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀸𑀥𑀸𑀢𑀼𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀢𑀺𑀅𑀦𑀦𑁆𑀢𑀭𑀁 𑀲𑀫𑁆𑀫𑀸𑀲𑀫𑀸𑀥𑀺 𑀤𑁂𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁂 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁, 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁. 𑀢𑁂𑀲𑀼 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀯𑀺𑀯𑀝𑁆𑀝𑁂 𑀦𑀢𑁆𑀣𑀺 𑀅𑀪𑀺𑀦𑀺𑀯𑁂𑀲𑁄. 𑀧𑀼𑀭𑀺𑀫𑀸𑀦𑀺 𑀳𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁, 𑀢𑀡𑁆𑀳𑀸 𑀲𑀫𑀼𑀤𑀬𑁄’’𑀢𑀺 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀘 ‘‘𑀓𑀢𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸? 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀦 𑀘 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀘𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀓𑀫𑁆𑀫𑀁 𑀓𑀭𑁄𑀢𑀺; 𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 ‘‘𑀦𑀺𑀭𑁄𑀥𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁, 𑀫𑀕𑁆𑀕𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧’’𑀦𑁆𑀢𑀺 𑀏𑀯𑀁 𑀲𑀯𑀦𑁂𑀦𑁂𑀯 𑀓𑀫𑁆𑀫𑀁 𑀓𑀭𑁄𑀢𑀺. 𑀲𑁄 𑀏𑀯𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑁂𑀦 𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺; 𑀤𑀼𑀓𑁆𑀔𑀁 ¶ 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺; 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦…𑀧𑁂… 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺.

𑀏𑀯𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀤𑁆𑀯𑀻𑀲𑀼 𑀲𑀯𑀦𑀧𑀝𑀺𑀯𑁂𑀥𑁄𑀬𑁂𑀯; 𑀅𑀧𑀭𑀪𑀸𑀕𑁂 𑀢𑀻𑀲𑀼 𑀓𑀺𑀘𑁆𑀘𑀢𑁄 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀦𑀺𑀭𑁄𑀥𑁂 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄. 𑀢𑀢𑁆𑀣 𑀲𑀩𑁆𑀩𑀫𑁆𑀧𑀺 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀜𑀸𑀡𑀁 𑀮𑁄𑀓𑀺𑀬𑀁 𑀓𑀸𑀫𑀸𑀯𑀘𑀭𑀁, 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀦 𑀧𑀢𑁆𑀢𑀲𑀘𑁆𑀘𑀲𑁆𑀲 𑀳𑁄𑀢𑀺. 𑀅𑀬𑀜𑁆𑀘 𑀆𑀤𑀺𑀓𑀫𑁆𑀫𑀺𑀓𑁄. 𑀢𑀲𑁆𑀫𑀸 𑀲𑀸 𑀇𑀥 𑀦 𑀯𑀼𑀢𑁆𑀢𑀸. 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀧𑀭𑀺𑀕𑁆𑀕𑀳𑀢𑁄 ‘𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀫𑀺 ¶ , 𑀲𑀫𑀼𑀤𑀬𑀁 𑀧𑀚𑀳𑀸𑀫𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀫𑀺, 𑀫𑀕𑁆𑀕𑀁 𑀪𑀸𑀯𑁂𑀫𑀻’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺, 𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺; 𑀅𑀧𑀭𑀪𑀸𑀕𑁂 𑀧𑀦 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢𑀫𑁂𑀯 𑀳𑁄𑀢𑀺…𑀧𑁂… 𑀫𑀕𑁆𑀕𑁄 𑀪𑀸𑀯𑀺𑀢𑁄𑀯 𑀳𑁄𑀢𑀺.

𑀢𑀢𑁆𑀣 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺, 𑀤𑁆𑀯𑁂 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀜𑁆𑀳𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁; 𑀔𑀸𑀡𑀼𑀓𑀡𑁆𑀝𑀓𑀧𑁆𑀧𑀳𑀸𑀭𑀸𑀤𑀻𑀲𑀼 ‘𑀅𑀳𑁄 𑀤𑀼𑀓𑁆𑀔’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀫𑁆𑀧𑀺 𑀆𑀧𑀚𑁆𑀚𑀢𑀺. 𑀲𑀫𑀼𑀤𑀬𑀫𑁆𑀧𑀺 ¶ 𑀔𑀸𑀤𑀺𑀢𑀼𑀓𑀸𑀫𑀢𑀸𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁. 𑀮𑀓𑁆𑀔𑀡𑀧𑀝𑀺𑀯𑁂𑀥𑀢𑁄 𑀧𑀦 𑀉𑀪𑀬𑀫𑁆𑀧𑀺 𑀕𑀫𑁆𑀪𑀻𑀭𑀁. 𑀇𑀢𑀺 𑀢𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺. 𑀇𑀢𑀭𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀧𑀬𑁄𑀕𑁄 𑀪𑀯𑀕𑁆𑀕𑀕𑀳𑀡𑀢𑁆𑀣𑀁 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀅𑀯𑀻𑀘𑀺𑀨𑀼𑀲𑀦𑀢𑁆𑀣𑀁 𑀧𑀸𑀤𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀲𑀢𑀥𑀸 𑀪𑀺𑀦𑁆𑀦𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑀦𑀁 𑀯𑀺𑀬 𑀘 𑀳𑁄𑀢𑀺. 𑀇𑀢𑀺 𑀢𑀸𑀦𑀺 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀏𑀯𑀁 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑁂𑀲𑀼 𑀕𑀫𑁆𑀪𑀻𑀭𑀢𑁆𑀢𑀸 𑀘 𑀤𑀼𑀤𑁆𑀤𑀲𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀇𑀤𑀁 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀯𑁂𑀥𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀜𑀸𑀡𑀁 𑀳𑁄𑀢𑀺.

𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀦𑀺𑀤𑁆𑀤𑁂𑀲𑁂 𑀓𑀸𑀫𑀢𑁄 𑀦𑀺𑀲𑁆𑀲𑀝𑁄𑀢𑀺 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄. 𑀩𑁆𑀬𑀸𑀧𑀸𑀤𑀢𑁄 𑀦𑀺𑀲𑁆𑀲𑀝𑁄𑀢𑀺 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄. 𑀯𑀺𑀳𑀺𑀁𑀲𑀸𑀬 𑀦𑀺𑀲𑁆𑀲𑀝𑁄𑀢𑀺 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀤𑀖𑀸𑀢𑀁 𑀧𑀤𑀘𑁆𑀙𑁂𑀤𑀁 𑀓𑀭𑁄𑀦𑁆𑀢𑁄 ¶ 𑀉𑀧𑁆𑀧𑀚𑁆𑀚𑀢𑀺, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲. 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀘 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸𑀦𑀁.

𑀢𑀢𑁆𑀣 𑀬𑁄𑀕𑀸𑀯𑀘𑀭𑁄 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀤𑀖𑀸𑀢𑀦𑀢𑁆𑀣𑀁 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀲𑀫𑁆𑀫𑀲𑀢𑀺 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀲𑀗𑁆𑀔𑀸𑀭𑀁. 𑀅𑀣𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀢𑀤𑀗𑁆𑀕𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀤𑀖𑀸𑀢𑀁 𑀧𑀤𑀘𑁆𑀙𑁂𑀤𑀁 𑀓𑀭𑁄𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀁 𑀧𑀸𑀧𑁂𑀢𑀺. 𑀅𑀣𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀤𑀖𑀸𑀢𑀁 𑀧𑀤𑀘𑁆𑀙𑁂𑀤𑀁 𑀓𑀭𑁄𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺; 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲𑀸𑀧𑀺 𑀧𑀤𑀖𑀸𑀢𑀦𑀢𑁆𑀣𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀲𑀗𑁆𑀔𑀸𑀭𑀁 𑀲𑀫𑁆𑀫𑀲𑀢𑀺; 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲 𑀧𑀤𑀖𑀸𑀢𑀦𑀢𑁆𑀣𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀲𑀗𑁆𑀔𑀸𑀭𑀁 𑀲𑀫𑁆𑀫𑀲𑀢𑀺. 𑀅𑀣𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 ¶ 𑀧𑀦 𑀢𑀺𑀡𑁆𑀡𑀁 𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑁂𑀲𑀼 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀏𑀓𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀅𑀧𑀘𑁆𑀘𑀦𑀻𑀓𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑀢𑁄 𑀧𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀢𑀸𑀯 𑀅𑀲𑀼𑀪𑁂𑀲𑀼 𑀧𑀞𑀫𑀚𑁆𑀛𑀸𑀦𑀫𑁂𑀯 𑀧𑀘𑁆𑀘𑀦𑀻𑀓𑀁, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲 𑀫𑁂𑀢𑁆𑀢𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀺, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲 𑀓𑀭𑀼𑀡𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀺. 𑀢𑀲𑁆𑀫𑀸 𑀅𑀲𑀼𑀪𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀢𑀤𑀗𑁆𑀕𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀁 𑀧𑀸𑀧𑁂𑀦𑁆𑀢𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 ¶ 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑁂𑀢𑁆𑀢𑀸𑀬 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀭𑀼𑀡𑀸𑀬 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀉𑀧𑁆𑀧𑀦𑁆𑀦𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀢𑁂 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀯𑀺𑀧𑀲𑁆𑀲𑀦𑀸𑀛𑀸𑀦𑀯𑀲𑁂𑀦 𑀉𑀧𑁆𑀧𑀢𑁆𑀢𑀻𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀲𑁆𑀲 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀏𑀓𑁄𑀯 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦𑀸𑀫.

𑀲𑀫𑁆𑀫𑀸𑀯𑀸𑀘𑀸𑀦𑀺𑀤𑁆𑀤𑁂𑀲𑁂𑀧𑀺 𑀬𑀲𑁆𑀫𑀸 𑀅𑀜𑁆𑀜𑁂𑀦𑁂𑀯 𑀘𑀺𑀢𑁆𑀢𑁂𑀦 𑀫𑀼𑀲𑀸𑀯𑀸𑀤𑀸 𑀯𑀺𑀭𑀫𑀢𑀺, 𑀅𑀜𑁆𑀜𑁂𑀦𑀜𑁆𑀜𑁂𑀦 𑀧𑀺𑀲𑀼𑀡𑀯𑀸𑀘𑀸𑀤𑀻𑀳𑀺, 𑀢𑀲𑁆𑀫𑀸 𑀘𑀢𑀲𑁆𑀲𑁄𑀧𑁂𑀢𑀸 𑀯𑁂𑀭𑀫𑀡𑀺𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀫𑀺𑀘𑁆𑀙𑀸𑀯𑀸𑀘𑀸𑀲𑀗𑁆𑀔𑀸𑀢𑀸𑀬 𑀘𑀢𑀼𑀩𑁆𑀩𑀺𑀥𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀲𑀫𑁆𑀫𑀸𑀯𑀸𑀘𑀸𑀲𑀗𑁆𑀔𑀸𑀢𑀸 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀯𑀸𑀘𑀸 𑀦𑀸𑀫.

𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀦𑀺𑀤𑁆𑀤𑁂𑀲𑁂𑀧𑀺 𑀬𑀲𑁆𑀫𑀸 𑀅𑀜𑁆𑀜𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀢𑀺, 𑀅𑀜𑁆𑀜𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀅𑀜𑁆𑀜𑁂𑀦 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑁂𑀢𑀸 𑀯𑁂𑀭𑀫𑀡𑀺𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸𑀬 𑀢𑀺𑀯𑀺𑀥𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀅𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀸𑀫.

𑀲𑀫𑁆𑀫𑀸𑀆𑀚𑀻𑀯𑀦𑀺𑀤𑁆𑀤𑁂𑀲𑁂 ¶ 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀅𑀭𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄. 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀳𑀸𑀬𑀸𑀢𑀺 𑀧𑀸𑀧𑀓𑀁 𑀆𑀚𑀻𑀯𑀁 𑀧𑀚𑀳𑀺𑀢𑁆𑀯𑀸. 𑀲𑀫𑁆𑀫𑀸𑀆𑀚𑀻𑀯𑁂𑀦𑀸𑀢𑀺 𑀩𑀼𑀤𑁆𑀥𑀧𑀲𑀢𑁆𑀣𑁂𑀦 𑀓𑀼𑀲𑀮𑀆𑀚𑀻𑀯𑁂𑀦. 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻𑀢𑀺 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀁 𑀧𑀯𑀢𑁆𑀢𑁂𑀢𑀺. 𑀇𑀥𑀸𑀧𑀺 𑀬𑀲𑁆𑀫𑀸 𑀅𑀜𑁆𑀜𑁂𑀦𑁂𑀯 𑀘𑀺𑀢𑁆𑀢𑁂𑀦 𑀓𑀸𑀬𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀸 𑀯𑀺𑀭𑀫𑀢𑀺; 𑀅𑀜𑁆𑀜𑁂𑀦 𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀸, 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑁂𑀲𑀼 𑀉𑀧𑁆𑀧𑀚𑁆𑀚𑀢𑀺; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀧𑀣𑀸𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀬 𑀫𑀺𑀘𑁆𑀙𑀸𑀆𑀚𑀻𑀯𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀲𑀫𑁆𑀫𑀸𑀆𑀚𑀻𑀯𑀲𑀗𑁆𑀔𑀸𑀢𑀸 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑀲𑀫𑁆𑀫𑀸𑀯𑀸𑀬𑀸𑀫𑀦𑀺𑀤𑁆𑀤𑁂𑀲𑁄 ¶ 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁂 𑀅𑀦𑀼𑀧𑀤𑀯𑀡𑁆𑀡𑀦𑀸𑀯𑀲𑁂𑀦 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀪𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 ¶ 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀯𑀸𑀬𑀸𑀫𑀁 𑀓𑀭𑁄𑀢𑀺, 𑀅𑀜𑁆𑀜𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀧𑀳𑀸𑀦𑀸𑀬; 𑀅𑀜𑁆𑀜𑁂𑀦𑁂𑀯 𑀘 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬, 𑀅𑀜𑁆𑀜𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀺𑀬𑀸; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀢𑀺. 𑀏𑀓𑀫𑁂𑀯 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀩𑁆𑀪𑀢𑀺.

𑀲𑀫𑁆𑀫𑀸𑀲𑀢𑀺𑀦𑀺𑀤𑁆𑀤𑁂𑀲𑁄𑀧𑀺 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀅𑀦𑀼𑀧𑀤𑀯𑀡𑁆𑀡𑀦𑀸𑀯𑀲𑁂𑀦 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀬𑀫𑁆𑀧𑀺 𑀘 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀜𑁆𑀜𑁂𑀦𑀜𑁆𑀜𑁂𑀦 𑀯𑁂𑀤𑀦𑀸𑀤𑀻𑀦𑀺; 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀢𑀺. 𑀏𑀓𑀸𑀬𑁂𑀯 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺.

𑀲𑀫𑁆𑀫𑀸𑀲𑀫𑀸𑀥𑀺𑀦𑀺𑀤𑁆𑀤𑁂𑀲𑁂 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂𑀧𑀺. 𑀧𑀼𑀩𑁆𑀩𑀪𑀸𑀕𑁂 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀦𑀸𑀦𑀸𑀫𑀕𑁆𑀕𑀯𑀲𑁂𑀦. 𑀏𑀓𑀲𑁆𑀲 𑀳𑀺 𑀧𑀞𑀫𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑀸, 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀸 𑀯𑀸. 𑀏𑀓𑀲𑁆𑀲 𑀧𑀞𑀫𑀫𑀕𑁆𑀕𑁄 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀸𑀤𑀬𑁄𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀸 𑀯𑀸 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸. 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀛𑀸𑀦𑀯𑀲𑁂𑀦 𑀲𑀤𑀺𑀲𑀸 𑀯𑀸 𑀅𑀲𑀤𑀺𑀲𑀸 𑀯𑀸 𑀏𑀓𑀘𑁆𑀘𑀲𑀤𑀺𑀲𑀸 𑀯𑀸 𑀳𑁄𑀦𑁆𑀢𑀺.

𑀅𑀬𑀁 𑀧𑀦𑀲𑁆𑀲 𑀯𑀺𑀲𑁂𑀲𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑁂𑀦 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑁂𑀦 𑀢𑀸𑀯 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑁄 ¶ 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺; 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀧𑀭𑀺𑀧𑀼𑀡𑁆𑀡𑀸𑀦𑁂𑀯 𑀳𑁄𑀦𑁆𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁄 𑀳𑁄𑀢𑀺; 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢 𑀳𑁄𑀦𑁆𑀢𑀺. 𑀢𑀢𑀺𑀬𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀢𑀢𑀺𑀬𑀚𑁆𑀛𑀸𑀦𑀺𑀓𑁄 𑀳𑁄𑀢𑀺; 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢, 𑀩𑁄𑀚𑁆𑀛𑀗𑁆𑀕𑀸𑀦𑀺 𑀙 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸.

𑀆𑀭𑀼𑀧𑁆𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀜𑁆𑀘 𑀔𑁄 𑀮𑁄𑀓𑀼𑀢𑁆𑀢𑀭𑀁 𑀦𑁄 𑀮𑁄𑀓𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀢𑁄 𑀉𑀝𑁆𑀞𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑁆𑀯𑀸 𑀬𑁄 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑁄, 𑀢𑀁𑀛𑀸𑀦𑀺𑀓𑀸𑀯 𑀢𑀲𑁆𑀲 𑀢𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ . 𑀏𑀯𑀁 ¶ 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀸𑀫𑁂𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 ‘‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀸𑀫𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀸𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀦𑀺𑀬𑀸𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀯𑀺𑀦𑀺𑀘𑁆𑀙𑀬𑁄 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀮𑁄𑀓𑀼𑀢𑁆𑀢𑀭𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁩𑁫𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸, 𑀅𑀬𑀁 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄, 𑀅𑀧𑀭𑀪𑀸𑀕𑁂 𑀮𑁄𑀓𑀼𑀢𑁆𑀢𑀭𑁄 𑀲𑀫𑁆𑀫𑀸𑀲𑀫𑀸𑀥𑀺 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀪𑀕𑀯𑀸 𑀫𑀕𑁆𑀕𑀲𑀘𑁆𑀘𑀁 𑀤𑁂𑀲𑁂𑀲𑀺.

𑀢𑀢𑁆𑀣 𑀮𑁄𑀓𑀺𑀬𑀫𑀕𑁆𑀕𑁂 𑀲𑀩𑁆𑀩𑀸𑀦𑁂𑀯 𑀫𑀕𑁆𑀕𑀗𑁆𑀕𑀸𑀦𑀺 𑀬𑀣𑀸𑀦𑀼𑀭𑀽𑀧𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂 𑀧𑀦 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀧𑀯𑀢𑁆𑀢𑀲𑁆𑀲 𑀅𑀭𑀺𑀬𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀓𑀁 𑀧𑀜𑁆𑀜𑀸𑀘𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀣𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀢𑀺𑀯𑀺𑀥𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑀫𑀼𑀕𑁆𑀖𑀸𑀢𑀓𑀁 𑀘𑁂𑀢𑀲𑁄 𑀦𑀺𑀩𑁆𑀩𑀸𑀦𑀧𑀤𑀸𑀪𑀺𑀦𑀺𑀭𑁄𑀧𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀢𑀣𑀸 𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀫𑀼𑀕𑁆𑀖𑀸𑀢𑀺𑀓𑀸𑀬 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀭𑀢𑀺 𑀲𑀫𑁆𑀫𑀸𑀯𑀸𑀘𑀸. 𑀢𑀣𑀸 𑀯𑀺𑀭𑀫𑀦𑁆𑀢𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑀫𑀼𑀘𑁆𑀙𑁂𑀤𑀺𑀓𑀸 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀢𑁂𑀲𑀁𑀬𑁂𑀯 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀦𑀁 𑀯𑁄𑀤𑀸𑀦𑀪𑀽𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀓𑀼𑀳𑀦𑀸𑀤𑀺𑀲𑀫𑀼𑀘𑁆𑀙𑁂𑀤𑀺𑀓𑀸 𑀫𑀺𑀘𑁆𑀙𑀸𑀆𑀚𑀻𑀯𑀯𑀺𑀭𑀢𑀺 𑀲𑀫𑁆𑀫𑀸𑀆𑀚𑀻𑀯𑁄. 𑀇𑀫𑀺𑀲𑁆𑀲𑀸 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀲𑀁𑀔𑀸𑀢𑀸𑀬 𑀲𑀻𑀮𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀫𑀸𑀦𑀲𑁆𑀲 𑀢𑀤𑀦𑀼𑀭𑀽𑀧𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀯 𑀓𑁄𑀲𑀚𑁆𑀚𑀲𑀫𑀼𑀘𑁆𑀙𑁂𑀤𑀓𑁄 ¶ 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀧𑀳𑀸𑀦𑀼𑀧𑁆𑀧𑀸𑀤𑀝𑁆𑀞𑀺𑀢𑀺𑀲𑀸𑀥𑀓𑁄 𑀘 𑀯𑀻𑀭𑀺𑀬𑀸𑀭𑀫𑁆𑀪𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀏𑀯𑀁 𑀯𑀸𑀬𑀫𑀦𑁆𑀢𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀯 𑀫𑀺𑀘𑁆𑀙𑀸𑀲𑀢𑀺𑀯𑀺𑀦𑀺𑀤𑁆𑀥𑀼𑀦𑀦𑀓𑁄 𑀓𑀸𑀬𑀸𑀤𑀻𑀲𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀸𑀥𑀓𑁄 𑀘 𑀘𑁂𑀢𑀲𑁄 𑀅𑀲𑀫𑁆𑀫𑁄𑀲𑁄 𑀲𑀫𑁆𑀫𑀸𑀲𑀢𑀺. 𑀇𑀢𑀺 𑀅𑀦𑀼𑀢𑁆𑀢𑀭𑀸𑀬 𑀲𑀢𑀺𑀬𑀸 𑀲𑀼𑀯𑀺𑀳𑀺𑀢𑀘𑀺𑀢𑁆𑀢𑀸𑀭𑀓𑁆𑀔𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑀫𑀼𑀕𑁆𑀖𑀸𑀢𑀺𑀓𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑁆𑀫𑀸𑀲𑀫𑀸𑀥𑀻𑀢𑀺. 𑀏𑀲 ¶ 𑀮𑁄𑀓𑀼𑀢𑁆𑀢𑀭𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀬𑁄 𑀲𑀳 𑀮𑁄𑀓𑀺𑀬𑁂𑀦 𑀫𑀕𑁆𑀕𑁂𑀦 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀗𑁆𑀔𑀁 𑀕𑀢𑁄.

𑀲𑁄 𑀔𑁄 𑀧𑀦𑁂𑀲 𑀫𑀕𑁆𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸𑀦𑀁 𑀯𑀺𑀚𑁆𑀚𑀸𑀬, 𑀲𑁂𑀲𑀥𑀫𑁆𑀫𑀸𑀦𑀁 𑀘𑀭𑀡𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀚𑁆𑀚𑀸 𑀘𑁂𑀯 𑀘𑀭𑀡𑀜𑁆𑀘. 𑀢𑀣𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀬𑀸𑀦𑁂𑀦, 𑀇𑀢𑀭𑁂𑀲𑀁 𑀲𑀫𑀣𑀬𑀸𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀫𑀣𑁄 𑀘𑁂𑀯 𑀯𑀺𑀧𑀲𑁆𑀲𑀦𑀸 𑀘. 𑀢𑁂𑀲𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀢𑀤𑀦𑀦𑁆𑀢𑀭𑀸𑀦𑀁 𑀢𑀺𑀡𑁆𑀡𑀁 𑀲𑀻𑀮𑀓𑁆𑀔𑀦𑁆𑀥𑁂𑀦, 𑀅𑀯𑀲𑁂𑀲𑀸𑀦𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀅𑀥𑀺𑀧𑀜𑁆𑀜𑀸𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀳𑀺 𑀘 𑀲𑀗𑁆𑀕𑀳𑀺𑀢𑀢𑁆𑀢𑀸 𑀔𑀦𑁆𑀥𑀢𑁆𑀢𑀬𑀜𑁆𑀘𑁂𑀯 𑀲𑀺𑀓𑁆𑀔𑀸𑀢𑁆𑀢𑀬𑀜𑁆𑀘 𑀳𑁄𑀢𑀺; 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀤𑀲𑁆𑀲𑀦𑀲𑀫𑀢𑁆𑀣𑁂𑀳𑀺 𑀘𑀓𑁆𑀔𑀽𑀳𑀺 𑀕𑀫𑀦𑀲𑀫𑀢𑁆𑀣𑁂𑀳𑀺 𑀘 ¶ 𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀤𑁆𑀥𑀺𑀓𑁄 𑀯𑀺𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬𑀸𑀦𑁂𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁, 𑀲𑀫𑀣𑀬𑀸𑀦𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀦𑁆𑀢𑀺 𑀅𑀦𑁆𑀢𑀤𑁆𑀯𑀬𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀺𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀫𑁄𑀳𑀓𑁆𑀔𑀦𑁆𑀥𑀁, 𑀲𑀻𑀮𑀓𑁆𑀔𑀦𑁆𑀥𑁂𑀦 𑀤𑁄𑀲𑀓𑁆𑀔𑀦𑁆𑀥𑀁, 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀘 𑀮𑁄𑀪𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀦𑁆𑀢𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀲𑀫𑁆𑀧𑀤𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀻𑀮𑀲𑀫𑁆𑀧𑀤𑀁, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀲𑀫𑀸𑀥𑀺𑀲𑀫𑁆𑀧𑀤𑀦𑁆𑀢𑀺 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀯𑀸 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀭𑀢𑀦𑀯𑀺𑀘𑀺𑀢𑁆𑀢𑀁 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀅𑀭𑀺𑀬𑀪𑀽𑀫𑀺𑀜𑁆𑀘 𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁦𑁬-𑁨𑁧𑁪. 𑀇𑀤𑀸𑀦𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀳𑁄𑀢𑀺. 𑀢𑀢𑁆𑀣 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀦𑀺𑀧𑁆𑀧𑀤𑁂𑀲𑀢𑁄 𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁 ¶ . 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀳𑀺 𑀯𑀼𑀢𑁆𑀢𑁂 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀦 𑀘 𑀓𑁂𑀯𑀮𑀁 𑀢𑀡𑁆𑀳𑀸𑀯 𑀤𑀼𑀓𑁆𑀔𑀁 𑀲𑀫𑀼𑀤𑀸𑀦𑁂𑀢𑀺, 𑀇𑀫𑁂𑀧𑀺 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸𑀤𑀬𑁄 𑀧𑀘𑁆𑀘𑀬𑀸 𑀲𑀫𑀼𑀤𑀸𑀦𑁂𑀦𑁆𑀢𑀺𑀬𑁂𑀯. 𑀇𑀢𑀺 𑀇𑀫𑁂𑀧𑀺 𑀧𑀘𑁆𑀘𑀬𑀸 𑀤𑀼𑀓𑁆𑀔𑀁 𑀲𑀫𑀼𑀤𑀸𑀦𑁂𑀦𑁆𑀢𑀺𑀬𑁂𑀯𑀸𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀅𑀯𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀦𑀺𑀤𑁆𑀤𑁂𑀲𑀯𑀸𑀭𑁂 ¶ 𑀘 𑀦𑁂𑀲𑀁 𑀧𑀞𑀫𑀁 𑀤𑀼𑀓𑁆𑀔𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀲𑀼𑀔𑀦𑀺𑀤𑁆𑀤𑁂𑀲𑀢𑁆𑀣𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀫𑀺𑀜𑁆𑀳𑀺 𑀦𑀺𑀤𑁆𑀤𑀺𑀝𑁆𑀞𑁂 ‘‘𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀲𑀼𑀔𑀦𑀺𑀤𑁆𑀤𑁂𑀲𑀁 𑀳𑁄𑀢𑀺. 𑀦𑀺𑀭𑁄𑀥𑀲𑀘𑁆𑀘𑀫𑁆𑀧𑁂𑀢𑁆𑀣 𑀢𑀡𑁆𑀳𑀸𑀬 𑀧𑀳𑀸𑀦𑀁 ‘‘𑀢𑀡𑁆𑀳𑀸𑀬 𑀘 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦’’𑀦𑁆𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀯𑀲𑁂𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀫𑀕𑁆𑀕𑀲𑀘𑁆𑀘𑀁 𑀧𑀦𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑀺𑀓𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀺𑀪𑀢𑁆𑀢𑀲𑁆𑀲 𑀤𑁂𑀲𑀦𑀸𑀦𑀬𑀲𑁆𑀲 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀦𑀬𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀉𑀧𑀭𑀺 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀬𑀲𑁆𑀫𑀸 ¶ 𑀧𑀦 𑀦 𑀓𑁂𑀯𑀮𑀁 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀯 𑀧𑀝𑀺𑀧𑀤𑀸 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁩) 𑀯𑀘𑀦𑀢𑁄 𑀧𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀧𑀝𑀺𑀧𑀤𑀸 𑀏𑀯𑀸𑀢𑀺 𑀤𑁂𑀲𑀺𑀢𑁄, 𑀢𑀲𑁆𑀫𑀸 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁄𑀧𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀅𑀝𑁆𑀞𑀗𑁆𑀕𑀺𑀓𑀧𑀜𑁆𑀘𑀗𑁆𑀕𑀺𑀓𑀫𑀕𑁆𑀕𑀸𑀯 𑀧𑀝𑀺𑀧𑀤𑀸, 𑀲𑀫𑁆𑀧𑀬𑀼𑀢𑁆𑀢𑀓𑀸 𑀧𑀦 𑀅𑀢𑀺𑀭𑁂𑀓𑀧𑀜𑁆𑀜𑀸𑀲𑀥𑀫𑁆𑀫𑀸𑀧𑀺 𑀧𑀝𑀺𑀧𑀤𑀸 𑀏𑀯, 𑀢𑀲𑁆𑀫𑀸 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄𑀧𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 ‘‘𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀇𑀤𑀁 𑀧𑀭𑀺𑀳𑀸𑀬𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀤𑀺𑀲𑀫𑁂𑀯.

𑀢𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑀯𑀸𑀭𑀲𑁆𑀲 ‘‘𑀢𑀡𑁆𑀳𑀸𑀬 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀞𑀫𑀓𑁄𑀝𑁆𑀞𑀸𑀲𑁂 𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀛𑀸𑀦𑀸𑀪𑀺𑀦𑀺𑀯𑁂𑀲𑁂 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸, 𑀲𑀼𑀜𑁆𑀜𑀢𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀅𑀧𑁆𑀧𑀡𑀺𑀳𑀺𑀢𑀁, 𑀅𑀧𑁆𑀧𑀡𑀺𑀳𑀺𑀢𑀧𑀝𑀺𑀧𑀤𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀸𑀭𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀸𑀦𑀁 𑀯𑀲𑁂𑀦 𑀤𑀲 𑀦𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀯𑀻𑀲𑀢𑀺𑀬𑀸 𑀅𑀪𑀺𑀦𑀺𑀯𑁂𑀲𑁂𑀲𑀼 𑀤𑁆𑀯𑁂 𑀦𑀬𑀲𑀢𑀸𑀦𑀺. 𑀢𑀸𑀦𑀺 𑀘𑀢𑀽𑀳𑀺 𑀅𑀥𑀺𑀧𑀢𑀻𑀳𑀺 𑀘𑀢𑀼𑀕𑁆𑀕𑀼𑀡𑀺𑀢𑀸𑀦𑀺 𑀅𑀝𑁆𑀞 ¶ . 𑀇𑀢𑀺 𑀲𑀼𑀤𑁆𑀥𑀺𑀓𑀸𑀦𑀺 𑀤𑁆𑀯𑁂 𑀲𑀸𑀥𑀺𑀧𑀢𑀻 𑀅𑀝𑁆𑀞𑀸𑀢𑀺 𑀲𑀩𑁆𑀩𑀫𑁆𑀧𑀺 𑀦𑀬𑀲𑀳𑀲𑁆𑀲𑀁 𑀳𑁄𑀢𑀺. 𑀬𑀣𑀸 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂, 𑀏𑀯𑀁 𑀲𑁂𑀲𑀫𑀕𑁆𑀕𑁂𑀲𑀼𑀧𑀻𑀢𑀺 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀧𑀞𑀫𑀓𑁄𑀝𑁆𑀞𑀸𑀲𑁂 𑀘𑀢𑁆𑀢𑀸𑀭𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑀯𑀸𑀭𑁂 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁂 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁂 𑀘𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀲𑀝𑁆𑀞𑀺 ¶ 𑀦𑀬𑀲𑀳𑀲𑁆𑀲𑀸𑀦𑀺 𑀲𑀢𑁆𑀣𑀸𑀭𑀸 𑀯𑀺𑀪𑀢𑁆𑀢𑀸𑀦𑀺. 𑀧𑀸𑀴𑀺 𑀧𑀦 𑀲𑀗𑁆𑀔𑁂𑀧𑁂𑀦 𑀆𑀕𑀢𑀸. 𑀏𑀯𑀫𑀺𑀤𑀁 𑀢𑀺𑀯𑀺𑀥𑀫𑀳𑀸𑀯𑀸𑀭𑀁 𑀧𑀜𑁆𑀘𑀤𑀲𑀓𑁄𑀝𑁆𑀞𑀸𑀲𑀁 𑀲𑀝𑁆𑀞𑀺𑀦𑀬𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁨𑁧𑁫. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀘𑀢𑀼𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀫𑀳𑀕𑁆𑀕𑀢𑀥𑀫𑁆𑀫𑁂 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀧𑀜𑁆𑀜𑀢𑁆𑀢𑀺𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀤𑀼𑀓𑁆𑀔𑀲𑀘𑁆𑀘𑀁 ¶ 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀧𑀡𑁆𑀡𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀫𑀕𑁆𑀕𑀲𑀘𑁆𑀘𑀁 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀲𑀩𑁆𑀩𑀤𑀸𑀧𑀺 𑀫𑀕𑁆𑀕𑀳𑁂𑀢𑀼𑀓𑀁 𑀯𑀻𑀭𑀺𑀬𑀁 𑀯𑀸 𑀯𑀻𑀫𑀁𑀲𑀁 𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀺, 𑀙𑀦𑁆𑀤𑀘𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀸𑀥𑀺𑀧𑀢𑀺𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀁 𑀦𑀸𑀫 𑀳𑁄𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀅𑀭𑀺𑀬𑀸𑀦𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀁, 𑀢𑁂𑀲𑀁𑀬𑁂𑀯 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀺, 𑀲𑁂𑀲𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀁 𑀳𑁄𑀢𑀺.

𑀤𑁆𑀯𑁂 𑀲𑀘𑁆𑀘𑀸𑀦𑀻𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀸𑀦𑀺. 𑀏𑀢𑀸𑀦𑀺 𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀲𑀫𑀼𑀤𑀬𑀲𑀘𑁆𑀘𑀁 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀓𑁆𑀔𑀲𑀘𑁆𑀘𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀮𑁄𑀓𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀮𑁄𑀓𑀼𑀢𑁆𑀢𑀭𑀸𑀦𑀺. 𑀬𑀣𑀸 ¶ 𑀘 𑀇𑀫𑀲𑁆𑀫𑀺𑀁, 𑀏𑀯𑀁 𑀧𑀼𑀭𑀺𑀫𑁂𑀲𑀼𑀧𑀺 𑀤𑁆𑀯𑀻𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀢𑀻𑀲𑀼𑀧𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀻𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺. 𑀏𑀯𑀫𑀬𑀁 𑀲𑀘𑁆𑀘𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀲𑀘𑁆𑀘𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁧𑁯. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀩𑀸𑀯𑀻𑀲𑀢𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀇𑀤𑀸𑀦𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀯𑀺𑀚𑀸𑀦𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀇𑀢𑁆𑀣𑀺𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁. 𑀧𑀼𑀭𑀺𑀲𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁. 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑀼𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁. 𑀤𑀼𑀓𑁆𑀔𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲 𑀉𑀧𑁂𑀓𑁆𑀔𑀸𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀧𑀕𑁆𑀕𑀳𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑁂 𑀚𑀸𑀦𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀜𑀸𑀢𑀸𑀦𑀁𑀬𑁂𑀯 𑀥𑀫𑁆𑀫𑀸𑀦𑀁 𑀧𑀼𑀦 𑀆𑀚𑀸𑀦𑀦𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀸𑀢𑀸𑀯𑀻𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀇𑀥 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀸𑀫 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀲𑀼𑀢𑁆𑀢𑀦𑁆𑀢𑁂 𑀇𑀫𑀸𑀬 𑀧𑀝𑀺𑀧𑀸𑀝𑀺𑀬𑀸 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀜𑁆𑀳𑀺 𑀓𑀢𑁆𑀣𑀘𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀧𑀜𑁆𑀘. 𑀏𑀯𑀁 𑀧𑀦 𑀦𑀺𑀭𑀦𑁆𑀢𑀭𑀁 𑀤𑁆𑀯𑀸𑀯𑀻𑀲𑀢𑀺 𑀆𑀕𑀢𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀦𑀬𑁄. 𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄 𑁋 𑀏𑀢𑁂𑀲𑀼 𑀳𑀺

𑀅𑀢𑁆𑀣𑀢𑁄 ¶ 𑀮𑀓𑁆𑀔𑀡𑀸𑀤𑀻𑀳𑀺, 𑀓𑀫𑀢𑁄 𑀘 𑀯𑀺𑀚𑀸𑀦𑀺𑀬𑀸;

𑀪𑁂𑀤𑀸𑀪𑁂𑀤𑀸 𑀢𑀣𑀸 𑀓𑀺𑀘𑁆𑀘𑀸, 𑀪𑀽𑀫𑀺𑀢𑁄 𑀘 𑀯𑀺𑀦𑀺𑀘𑁆𑀙𑀬𑀁.

𑀢𑀢𑁆𑀣 ¶ 𑀘𑀓𑁆𑀔𑀸𑀤𑀻𑀦𑀁 𑀢𑀸𑀯 ‘‘𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀧𑀘𑁆𑀙𑀺𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀞𑀫𑀁 ‘𑀧𑀼𑀩𑁆𑀩𑀪𑀸𑀕𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁 𑀆𑀚𑀸𑀦𑀦𑀢𑁄 𑀘 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀢𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑀸𑀡𑀓𑀺𑀘𑁆𑀘𑀲𑁆𑀲 ¶ 𑀔𑀻𑀡𑀸𑀲𑀯𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀓𑁄 𑀧𑀦𑁂𑀲 𑀇𑀦𑁆𑀤𑁆𑀭𑀺𑀬𑀝𑁆𑀞𑁄 𑀦𑀸𑀫𑀸𑀢𑀺? 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄, 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄, 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄, 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄, 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀲𑁄 𑀲𑀩𑁆𑀩𑁄𑀧𑀺 𑀇𑀥 𑀬𑀣𑀸𑀬𑁄𑀕𑀁 𑀬𑀼𑀚𑁆𑀚𑀢𑀺. 𑀪𑀕𑀯𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀢𑁄 𑀇𑀦𑁆𑀤𑁄. 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀓𑀫𑁆𑀫𑀁 𑀓𑀫𑁆𑀫𑁂𑀲𑀼 𑀓𑀲𑁆𑀲𑀘𑀺 𑀇𑀲𑁆𑀲𑀭𑀺𑀬𑀸𑀪𑀸𑀯𑀢𑁄. 𑀢𑁂𑀦𑁂𑀯𑁂𑀢𑁆𑀣 𑀓𑀫𑁆𑀫𑀲𑀜𑁆𑀚𑀦𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺. 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁂𑀦 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀩𑁆𑀩𑀸𑀦𑁂𑀯 𑀧𑀦𑁂𑀢𑀸𑀦𑀺 𑀪𑀕𑀯𑀢𑀸 𑀬𑀣𑀸𑀪𑀽𑀢𑀢𑁄 𑀧𑀓𑀸𑀲𑀺𑀢𑀸𑀦𑀺 𑀘 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀦𑀺 𑀘𑀸𑀢𑀺 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁂𑀦 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀦𑁂𑀯 𑀪𑀕𑀯𑀢𑀸 𑀫𑀼𑀦𑀺𑀦𑁆𑀤𑁂𑀦 𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬, 𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑀸𑀦𑀻𑀢𑀺 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁂𑀦𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀧𑀺𑀘 𑀆𑀥𑀺𑀧𑀘𑁆𑀘𑀲𑀗𑁆𑀔𑀸𑀢𑁂𑀦 𑀇𑀲𑁆𑀲𑀭𑀺𑀬𑀝𑁆𑀞𑁂𑀦𑀸𑀧𑀺 𑀏𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀘𑀓𑁆𑀔𑀸𑀤𑀻𑀦𑀁 𑀲𑀺𑀤𑁆𑀥𑀫𑀸𑀥𑀺𑀧𑀘𑁆𑀘𑀁; 𑀢𑀲𑁆𑀫𑀺𑀁 𑀢𑀺𑀓𑁆𑀔𑁂 𑀢𑀺𑀓𑁆𑀔𑀢𑁆𑀢𑀸 𑀫𑀦𑁆𑀤𑁂 𑀘 𑀫𑀦𑁆𑀤𑀢𑁆𑀢𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 ‘𑀅𑀢𑁆𑀣𑀢𑁄’ 𑀯𑀺𑀦𑀺𑀘𑁆𑀙𑀬𑁄.

‘𑀮𑀓𑁆𑀔𑀡𑀸𑀤𑀻𑀳𑀻’𑀢𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑁂𑀳𑀺𑀧𑀺 𑀘𑀓𑁆𑀔𑀸𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀦𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀅𑀢𑁆𑀣𑀢𑁄 𑀅𑀫𑁄𑀳𑁄𑀬𑁂𑀯. 𑀲𑁂𑀲𑀸𑀦𑀺 𑀢𑀢𑁆𑀣 𑀲𑀭𑀽𑀧𑁂𑀦𑁂𑀯𑀸𑀕𑀢𑀸𑀦𑀺.

‘𑀓𑀫𑀢𑁄’𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀳𑁄𑀢𑀻𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺. 𑀲𑁄 𑀧𑀦𑀢𑁆𑀢𑀪𑀸𑀯𑁄 𑀬𑀁 𑀥𑀫𑁆𑀫𑀁 𑀉𑀧𑀸𑀤𑀸𑀬 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 ¶ 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀅𑀬𑀁 𑀲𑁄𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑁆𑀘 ¶ . 𑀲𑁄 𑀤𑀼𑀯𑀺𑀥𑁄𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀬𑀸𑀯 𑀢𑀲𑁆𑀲 𑀧𑀯𑀢𑁆𑀢𑀺 𑀢𑀸𑀯 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀲𑀩𑁆𑀩𑀁 𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀁𑀦𑀺𑀭𑁄𑀥𑀢𑁆𑀣𑀁 𑀧𑀦 𑀏𑀢𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀲𑀤𑁆𑀥𑀸𑀤𑀻𑀦𑀺. 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀏𑀲 𑀥𑀫𑁆𑀫𑁄 𑀧𑀞𑀫𑀁 𑀅𑀢𑁆𑀢𑀦𑀺 𑀧𑀸𑀢𑀼𑀪𑀯𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲𑁂𑀯 𑀨𑀮𑀢𑁆𑀢𑀸 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸 𑀘 𑀢𑀢𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀢𑁄 𑀧𑀭𑀁 𑀪𑀸𑀯𑀦𑀸𑀬 𑀇𑀫𑀲𑁆𑀲 𑀅𑀥𑀺𑀕𑀫𑁄, 𑀅𑀥𑀺𑀕𑀢𑁂 𑀘 𑀧𑀦𑀺𑀫𑀲𑁆𑀫𑀺𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 ¶ 𑀓𑀭𑀡𑀻𑀬𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀅𑀦𑁆𑀢𑁂 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀓𑀫𑁄.

‘𑀪𑁂𑀤𑀸𑀪𑁂𑀤𑀸’𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀘𑁂𑀢𑁆𑀣 𑀪𑁂𑀤𑁄. 𑀢𑀜𑁆𑀳𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀲𑁂𑀲𑀸𑀦𑀁 𑀅𑀪𑁂𑀤𑁄𑀢𑀺 𑀏𑀯𑀫𑁂𑀢𑁆𑀣 𑀪𑁂𑀤𑀸𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸.

‘𑀓𑀺𑀘𑁆𑀘𑀸’𑀢𑀺 𑀓𑀺𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀘𑁆𑀘𑀦𑁆𑀢𑀺 𑀘𑁂? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀢𑀸𑀯 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀢𑁄 𑀬𑀁 𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀁 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀪𑀸𑀯𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀢𑁆𑀢𑀸𑀧𑀦𑀁 𑀇𑀤𑀁 ‘𑀓𑀺𑀘𑁆𑀘𑀁’. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀯𑀲𑀯𑀢𑁆𑀢𑀸𑀧𑀦𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀳𑀚𑀸𑀢𑀥𑀫𑁆𑀫𑀸𑀦𑀼𑀧𑀸𑀮𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀓𑀸𑀭𑀸𑀦𑀼𑀯𑀺𑀥𑀸𑀦𑀁, 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀬𑀣𑀸𑀲𑀓𑀁 𑀑𑀴𑀸𑀭𑀺𑀓𑀸𑀓𑀸𑀭𑀸𑀦𑀼𑀧𑀸𑀧𑀦𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀦𑁆𑀢𑀧𑀡𑀻𑀢𑀫𑀚𑁆𑀛𑀢𑁆𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁, 𑀲𑀤𑁆𑀥𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀧𑀲𑀦𑁆𑀦𑀸𑀓𑀸𑀭𑀸𑀤𑀺𑀪𑀸𑀯𑀲𑀫𑁆𑀧𑀸𑀧𑀦𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀁𑀬𑁄𑀚𑀦𑀢𑁆𑀢𑀬𑀧𑁆𑀧𑀳𑀸𑀦𑀜𑁆𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 ¶ 𑀢𑀧𑁆𑀧𑀳𑀸𑀦𑀸𑀪𑀺𑀫𑀼𑀔𑀪𑀸𑀯𑀓𑀭𑀡𑀁, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀺𑀢𑀦𑀼𑀓𑀭𑀡𑀧𑀳𑀸𑀦𑀜𑁆𑀘𑁂𑀯 𑀲𑀳𑀚𑀸𑀢𑀸𑀦𑀜𑁆𑀘 𑀅𑀢𑁆𑀢𑀦𑁄 𑀯𑀲𑀸𑀦𑀼𑀯𑀢𑁆𑀢𑀸𑀧𑀦𑀁, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑁆𑀓𑀧𑁆𑀧𑀳𑀸𑀦𑀜𑁆𑀘𑁂𑀯 𑀅𑀫𑀢𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀬𑀢𑀸 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀓𑀺𑀘𑁆𑀘𑀢𑁄 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸.

‘𑀪𑀽𑀫𑀺𑀢𑁄’𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀇𑀢𑁆𑀣𑀺𑀧𑀼𑀭𑀺𑀲𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀢𑁆𑀣 𑀓𑀸𑀫𑀸𑀯𑀘𑀭𑀸𑀦𑁂𑀯 ¶ . 𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀘 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀓𑀸𑀫𑀸𑀯𑀘𑀭-𑀭𑀽𑀧𑀸𑀯𑀘𑀭-𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀁. 𑀅𑀯𑀲𑀸𑀦𑁂 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀸𑀦𑁂𑀯𑀸𑀢𑀺 𑀏𑀯𑀁 𑀪𑀽𑀫𑀺𑀢𑁄 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸. 𑀏𑀯𑀜𑁆𑀳𑀺 𑀯𑀺𑀚𑀸𑀦𑀦𑁆𑀢𑁄 𑁋

𑀲𑀁𑀯𑁂𑀕𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀞𑀺𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂;

𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀜𑁆𑀜𑀸𑀬, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀦𑀺𑀕𑀘𑁆𑀙𑀢𑀻𑀢𑀺.

𑁨𑁨𑁦. 𑀦𑀺𑀤𑁆𑀤𑁂𑀲𑀯𑀸𑀭𑁂 ¶ ‘‘𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀧𑀤𑀪𑀸𑀚𑀦𑁂 (𑀥. 𑀲. 𑀅𑀝𑁆𑀞. 𑁫𑁯𑁫 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀲𑀫𑀸𑀥𑀻𑀢𑀺𑀆𑀤𑀻𑀦𑀺 𑀦 𑀯𑀼𑀢𑁆𑀢𑀸𑀦𑀺. 𑀓𑀲𑁆𑀫𑀸? 𑀲𑀩𑁆𑀩𑀲𑀗𑁆𑀕𑀸𑀳𑀓𑀢𑁆𑀢𑀸. 𑀲𑀩𑁆𑀩𑀲𑀗𑁆𑀕𑀸𑀳𑀓𑀸𑀦𑀺 𑀳𑀺 𑀇𑀥 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺. 𑀏𑀯𑀁 𑀲𑀦𑁆𑀢𑁂𑀧𑁂𑀢𑁆𑀣 𑀤𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀺𑀬𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯, 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀦𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀻𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁨𑁨𑁧. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀲𑀩𑁆𑀩𑁂𑀲𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑁄 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁨𑁩. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦 𑀅𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀇𑀥 𑀅𑀦𑀸𑀪𑀝𑁆𑀞𑀁. 𑀤𑁆𑀯𑀺𑀦𑁆𑀤𑁆𑀭𑀺𑀬𑀸𑀢𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸; 𑀲𑀼𑀔𑀤𑀼𑀓𑁆𑀔𑀤𑁆𑀯𑀬𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀦𑁆𑀢𑀺 ¶ 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺 ¶ , 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂 𑀧𑀦 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀦𑀯𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀯 𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀜𑁆𑀘 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀅𑀦𑀸𑀭𑀫𑁆𑀫𑀡𑁂𑀲𑀼 𑀭𑀽𑀧𑀥𑀫𑁆𑀫𑁂𑀲𑀼 𑀲𑀗𑁆𑀕𑀳𑀺𑀢𑀫𑁆𑀧𑀺 𑀅𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀲𑀺𑀬𑀸𑀧𑀓𑁆𑀔𑁂 𑀲𑀗𑁆𑀕𑀳𑀺𑀢𑀁.

𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀸𑀦𑀺. 𑀢𑀸𑀦𑀺 𑀳𑀺 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦 𑀪𑀚𑀦𑁆𑀢𑀺. 𑀫𑀕𑁆𑀕𑀳𑁂𑀢𑀼𑀓𑀦𑁆𑀢𑀺 𑀲𑀳𑀚𑀸𑀢𑀳𑁂𑀢𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀯𑀻𑀫𑀁𑀲𑀸𑀚𑁂𑀝𑁆𑀞𑀓𑀓𑀸𑀮𑁂 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺, 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀓𑀓𑀸𑀮𑁂 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸.

𑀤𑀲𑀺𑀦𑁆𑀤𑁆𑀭𑀺𑀬𑀸 ¶ 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄𑀢𑀺 𑀲𑀢𑁆𑀢 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀡𑀺 𑀘 𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀢𑀢𑁆𑀣 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁, 𑀲𑁂𑀲𑀸𑀦𑀺 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂𑀧𑀺. 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀻𑀢𑀺 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀺. 𑀘𑀢𑁆𑀢𑀸𑀭𑀻𑀢𑀺 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀺. 𑀢𑀸𑀦𑀺 𑀳𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀧𑀺 𑀩𑀳𑀺𑀤𑁆𑀥𑀸𑀥𑀫𑁆𑀫𑁂𑀧𑀺 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺. 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀯 𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀜𑁆𑀘. 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀦𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺. 𑀅𑀬𑀫𑁆𑀧𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀘𑁆𑀙𑁂𑀤𑁄𑀯 𑀳𑁄𑀢𑀺. 𑀅𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁄 𑀤𑁆𑀯𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁨𑁫. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀬𑀸 ‘‘𑀅𑀬𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀦𑁆𑀢𑀺 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀲𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁 𑀑𑀢𑀭𑀺𑀢𑁆𑀯𑀸 𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦 𑀲𑀓𑀲𑀫𑀬𑀁 𑀅𑀯𑁄𑀓𑁆𑀓𑀫𑀦𑁆𑀢𑁂𑀦 𑀧𑀭𑀲𑀫𑀬𑀁 𑀅𑀦𑀸𑀬𑀽𑀳𑀦𑁆𑀢𑁂𑀦 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦 𑀯𑀺𑀦𑀬𑀁 𑀅𑀦𑀼𑀮𑁄𑀫𑁂𑀦𑁆𑀢𑁂𑀦 𑀫𑀳𑀸𑀧𑀤𑁂𑀲𑁂 𑀑𑀮𑁄𑀓𑁂𑀦𑁆𑀢𑁂𑀦 𑀥𑀫𑁆𑀫𑀁 𑀤𑀻𑀧𑁂𑀦𑁆𑀢𑁂𑀦 𑀅𑀢𑁆𑀣𑀁 𑀲𑀗𑁆𑀕𑀳𑀦𑁆𑀢𑁂𑀦 𑀢𑀫𑁂𑀯𑀢𑁆𑀣𑀁 𑀧𑀼𑀦 𑀆𑀯𑀢𑁆𑀢𑁂𑀢𑁆𑀯𑀸 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀘 𑀬𑀲𑁆𑀫𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀺, 𑀧𑀓𑀢𑀺𑀬𑀸𑀧𑀺 𑀘 𑀤𑀼𑀓𑁆𑀓𑀭𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸, 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀘𑁆𑀘𑀁 𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺, 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘;

𑀤𑀼𑀤𑁆𑀤𑀲𑀸 𑀘𑀢𑀼𑀭𑁄 𑀥𑀫𑁆𑀫𑀸, 𑀤𑁂𑀲𑁂𑀢𑀼𑀜𑁆𑀘 𑀲𑀼𑀤𑀼𑀓𑁆𑀓𑀭𑀸’’𑀢𑀺.

𑀢𑀲𑁆𑀫𑀸 ‘‘𑀅𑀜𑁆𑀜𑀢𑁆𑀭 𑀆𑀕𑀫𑀸𑀥𑀺𑀕𑀫𑀧𑁆𑀧𑀢𑁆𑀢𑁂𑀳𑀺 𑀦 𑀲𑀼𑀓𑀭𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸’’𑀢𑀺 𑀧𑀭𑀺𑀢𑀼𑀮𑀬𑀺𑀢𑁆𑀯𑀸 𑁋

𑀯𑀢𑁆𑀢𑀼𑀓𑀸𑀫𑁄 𑀅𑀳𑀁 𑀅𑀚𑁆𑀚, 𑀧𑀘𑁆𑀘𑀬𑀸𑀓𑀸𑀭𑀯𑀡𑁆𑀡𑀦𑀁;

𑀧𑀢𑀺𑀝𑁆𑀞𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄𑀯 𑀲𑀸𑀕𑀭𑀁.

𑀲𑀸𑀲𑀦𑀁 ¶ 𑀧𑀦𑀺𑀤𑀁 𑀦𑀸𑀦𑀸-𑀤𑁂𑀲𑀦𑀸𑀦𑀬𑀫𑀡𑁆𑀟𑀺𑀢𑀁;

𑀧𑀼𑀩𑁆𑀩𑀸𑀘𑀭𑀺𑀬𑀫𑀕𑁆𑀕𑁄 𑀘, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀧𑀯𑀢𑁆𑀢𑀢𑀺.

𑀬𑀲𑁆𑀫𑀸 𑀢𑀲𑁆𑀫𑀸 𑀢𑀤𑀼𑀪𑀬𑀁, 𑀲𑀦𑁆𑀦𑀺𑀲𑁆𑀲𑀸𑀬𑀢𑁆𑀣𑀯𑀡𑁆𑀡𑀦𑀁;

𑀆𑀭𑀪𑀺𑀲𑁆𑀲𑀸𑀫𑀺 𑀏𑀢𑀲𑁆𑀲, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑁋

‘‘𑀬𑁄 𑀓𑁄𑀘𑀺𑀫𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀲𑀼𑀡𑁂𑀬𑁆𑀬,

𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁;

𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁,

𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’𑀢𑀺.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ ¶ 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀳𑀺 𑀆𑀤𑀺𑀢𑁄𑀬𑁂𑀯 𑀢𑀸𑀯 𑁋

𑀤𑁂𑀲𑀦𑀸𑀪𑁂𑀤𑀢𑁄 𑀅𑀢𑁆𑀣-𑀮𑀓𑁆𑀔𑀡𑁂𑀓𑀯𑀺𑀥𑀸𑀤𑀺𑀢𑁄;

𑀅𑀗𑁆𑀕𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ‘𑀤𑁂𑀲𑀦𑀸𑀪𑁂𑀤𑀢𑁄’𑀢𑀺 𑀪𑀕𑀯𑀢𑁄 𑀳𑀺 𑀯𑀮𑁆𑀮𑀺𑀳𑀸𑀭𑀓𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀯𑀮𑁆𑀮𑀺𑀕𑁆𑀕𑀳𑀡𑀁 𑀯𑀺𑀬 𑀆𑀤𑀺𑀢𑁄 𑀯𑀸 𑀫𑀚𑁆𑀛𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀁, 𑀢𑀣𑀸 𑀧𑀭𑀺𑀬𑁄𑀲𑀸𑀦𑀢𑁄 𑀯𑀸 𑀫𑀚𑁆𑀛𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀻𑀢𑀺 𑀘𑀢𑀼𑀩𑁆𑀩𑀺𑀥𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸. 𑀬𑀣𑀸 𑀳𑀺 𑀯𑀮𑁆𑀮𑀺𑀳𑀸𑀭𑀓𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀽𑀮𑀫𑁂𑀯 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀫𑀽𑀮𑁂 𑀙𑁂𑀢𑁆𑀯𑀸 𑀲𑀩𑁆𑀩𑀁 𑀆𑀓𑀟𑁆𑀠𑀺𑀢𑁆𑀯𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀆𑀤𑀺𑀢𑁄 (𑀫. 𑀦𑀺. 𑁧.𑁪𑁦𑁨) 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀢𑀺.

𑀬𑀣𑀸 𑀧𑀦 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀚𑁆𑀛𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀺𑀪𑀸𑀕𑀁𑀬𑁂𑀯 𑀆𑀓𑀟𑁆𑀠𑀺𑀢𑁆𑀯𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑁄 ¶ 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻; 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻, 𑀢𑀤𑀼𑀧𑀸𑀤𑀸𑀦𑀁, 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁯; 𑀲𑀁. 𑀦𑀺. 𑁩.𑁫) 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸𑀧𑀺 𑀤𑁂𑀲𑁂𑀢𑀺.

𑀬𑀣𑀸 𑀘 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀅𑀕𑁆𑀕𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀅𑀕𑁆𑀕𑀸𑀦𑀼𑀲𑀸𑀭𑁂𑀦 𑀬𑀸𑀯 𑀫𑀽𑀮𑀸 𑀲𑀩𑁆𑀩𑀁 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀚𑀸𑀢𑀺𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁 𑀦𑁄 𑀯𑀸 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀚𑀸𑀢𑀺𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺. ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀦𑁄 𑀯𑀸 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺𑀢𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀢𑀺.

𑀬𑀣𑀸 𑀧𑀦 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀚𑁆𑀛𑀫𑁂𑀯 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀑𑀢𑀭𑀦𑁆𑀢𑁄 𑀬𑀸𑀯 𑀫𑀽𑀮𑀸 ¶ 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺 ¶ , 𑀏𑀯𑀁 𑀪𑀕𑀯𑀸 ‘‘𑀇𑀫𑁂, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁 𑀦𑀺𑀤𑀸𑀦𑀸, 𑀓𑀺𑀁 𑀲𑀫𑀼𑀤𑀬𑀸, 𑀓𑀺𑀁 𑀚𑀸𑀢𑀺𑀓𑀸, 𑀓𑀺𑀁 𑀧𑀪𑀯𑀸? 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸, 𑀢𑀡𑁆𑀳𑀸𑀲𑀫𑀼𑀤𑀬𑀸, 𑀢𑀡𑁆𑀳𑀸𑀚𑀸𑀢𑀺𑀓𑀸, 𑀢𑀡𑁆𑀳𑀸𑀧𑀪𑀯𑀸. 𑀢𑀡𑁆𑀳𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁 𑀦𑀺𑀤𑀸𑀦𑀸? 𑀯𑁂𑀤𑀦𑀸, 𑀨𑀲𑁆𑀲𑁄, 𑀲𑀴𑀸𑀬𑀢𑀦𑀁, 𑀦𑀸𑀫𑀭𑀽𑀧𑀁, 𑀯𑀺𑀜𑁆𑀜𑀸𑀡𑀁. 𑀲𑀗𑁆𑀔𑀸𑀭𑀸 𑀓𑀺𑀁 𑀦𑀺𑀤𑀸𑀦𑀸…𑀧𑁂… 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀦𑀺𑀤𑀸𑀦𑀸, 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸, 𑀅𑀯𑀺𑀚𑁆𑀚𑀸𑀚𑀸𑀢𑀺𑀓𑀸, 𑀅𑀯𑀺𑀚𑁆𑀚𑀸𑀧𑀪𑀯𑀸’’𑀢𑀺 (𑀲𑀁. 𑀦𑀺. 𑁨.𑁧𑁧) 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺𑀢𑁄 𑀤𑁂𑀲𑁂𑀢𑀺.

𑀓𑀲𑁆𑀫𑀸 𑀧𑀦𑁂𑀯𑀁 𑀤𑁂𑀲𑁂𑀢𑀻𑀢𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸, 𑀲𑀬𑀜𑁆𑀘 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀢𑁆𑀢𑀸. 𑀲𑀫𑀦𑁆𑀢𑀪𑀤𑁆𑀤𑀓𑁄 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀢𑀢𑁄 𑀢𑀢𑁄 𑀜𑀸𑀬𑀧𑁆𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺𑀬𑁂𑀯. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀘 𑀪𑀕𑀯𑀸 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀬𑁄𑀕𑁂𑀦 𑀘𑀢𑀼𑀩𑁆𑀩𑀺𑀥𑀕𑀫𑁆𑀪𑀻𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘. 𑀲𑁄 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀢𑁆𑀢𑀸 𑀦𑀸𑀦𑀸𑀦𑀬𑁂𑀳𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀯𑀺𑀲𑁂𑀲𑀢𑁄 𑀧𑀦𑀲𑁆𑀲 𑀬𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸, 𑀲𑀸 𑀧𑀯𑀢𑁆𑀢𑀺𑀓𑀸𑀭𑀡𑀯𑀺𑀪𑀸𑀕𑀲𑀫𑁆𑀫𑀽𑀴𑁆𑀳𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀦𑀼𑀧𑀲𑁆𑀲𑀢𑁄 𑀬𑀣𑀸𑀲𑀓𑁂𑀳𑀺 𑀓𑀸𑀭𑀡𑁂𑀳𑀺 𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀯𑀢𑁆𑀢𑀺𑀢𑀸𑀢𑀺 𑀜𑀸𑀢𑀩𑁆𑀩𑀸.

𑀬𑀸 ¶ 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸, 𑀲𑀸 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘𑀸’’𑀢𑀺 (𑀤𑀻. 𑀦𑀺. 𑁨.𑁫𑁭) 𑀆𑀤𑀺𑀦𑀸 𑀦𑀬𑁂𑀦 𑀓𑀺𑀘𑁆𑀙𑀸𑀧𑀦𑁆𑀦𑀁 𑀮𑁄𑀓𑀫𑀦𑀼𑀯𑀺𑀮𑁄𑀓𑀬𑀢𑁄 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀯𑁂𑀥𑀸𑀦𑀼𑀲𑀸𑀭𑁂𑀦 𑀢𑀲𑁆𑀲 𑀢𑀲𑁆𑀲 𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀢𑁆𑀢𑀦𑀸𑀥𑀺𑀕𑀢𑀓𑀸𑀭𑀡𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀬𑀸 𑀧𑀦 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺, 𑀲𑀸 𑀆𑀳𑀸𑀭𑀦𑀺𑀤𑀸𑀦𑀯𑀯𑀢𑁆𑀣𑀸𑀧𑀦𑀸𑀦𑀼𑀲𑀸𑀭𑁂𑀦 𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀅𑀢𑀻𑀢𑀤𑁆𑀥𑀢𑁄 𑀧𑀪𑀼𑀢𑀺 𑀳𑁂𑀢𑀼𑀨𑀮𑀧𑀝𑀺𑀧𑀸𑀝𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀬𑀸 𑀧𑀦 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀧𑀯𑀢𑁆𑀢𑀸, 𑀲𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀤𑁆𑀥𑀸𑀦𑁂 𑀅𑀦𑀸𑀕𑀢𑀤𑁆𑀥𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀅𑀦𑀸𑀕𑀢𑀤𑁆𑀥𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀢𑀸𑀲𑀼 𑀬𑀸 𑀲𑀸 𑀧𑀯𑀢𑁆𑀢𑀺𑀓𑀸𑀭𑀡𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑁂𑀦𑁂𑀬𑁆𑀬𑀚𑀦𑀲𑁆𑀲 𑀬𑀣𑀸𑀲𑀓𑁂𑀳𑀺 𑀓𑀸𑀭𑀡𑁂𑀳𑀺 𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸 𑀯𑀼𑀢𑁆𑀢𑀸, 𑀲𑀸 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸? 𑀓𑀺𑀁 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬 𑀅𑀯𑀺𑀚𑁆𑀚𑀸𑀧𑀺 𑀅𑀓𑀸𑀭𑀡𑀁 𑀫𑀽𑀮𑀓𑀸𑀭𑀡𑀁 𑀮𑁄𑀓𑀲𑁆𑀲𑀸𑀢𑀺? 𑀦 𑀅𑀓𑀸𑀭𑀡𑀁. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 𑀳𑀺 𑀅𑀯𑀺𑀚𑁆𑀚𑀸𑀬 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀺 ¶ 𑀧𑀦 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀽𑀮𑀓𑀸𑀭𑀡𑀁 𑀲𑀺𑀬𑀸. 𑀓𑁄 𑀧𑀦 𑀲𑁄𑀢𑀺? 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀸𑀯𑁄. 𑀪𑀕𑀯𑀸 𑀳𑀺 𑀯𑀝𑁆𑀝𑀓𑀣𑀁 𑀓𑀣𑁂𑀦𑁆𑀢𑁄 𑀤𑁆𑀯𑁂 𑀥𑀫𑁆𑀫𑁂 𑀲𑀻𑀲𑀁 𑀓𑀢𑁆𑀯𑀸 𑀓𑀣𑁂𑀲𑀺 𑁋 𑀅𑀯𑀺𑀚𑁆𑀚𑀁 𑀯𑀸 𑀪𑀯𑀢𑀡𑁆𑀳𑀁 𑀯𑀸. 𑀬𑀣𑀸𑀳 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 ‘𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 ‘𑀇𑀤𑀧𑁆𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 (𑀅. 𑀦𑀺. 𑁧𑁦.𑁬𑁧); 𑀪𑀯𑀢𑀡𑁆𑀳𑀁 𑀯𑀸, 𑀬𑀣𑀸𑀳 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬 ‘𑀇𑀢𑁄 𑀧𑀼𑀩𑁆𑀩𑁂 𑀪𑀯𑀢𑀡𑁆𑀳𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 ‘𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑀢𑀡𑁆𑀳𑀸’’𑀢𑀺 (𑀅. 𑀦𑀺. 𑁧𑁦.𑁬𑁨).

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀯𑀝𑁆𑀝𑀓𑀣𑀁 𑀓𑀣𑁂𑀦𑁆𑀢𑁄 𑀇𑀫𑁂 𑀤𑁆𑀯𑁂𑀯 𑀥𑀫𑁆𑀫𑁂 𑀲𑀻𑀲𑀁 𑀓𑀢𑁆𑀯𑀸 𑀓𑀣𑁂𑀲𑀻𑀢𑀺? 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀽𑀢𑀢𑁆𑀢𑀸. 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼 𑀅𑀯𑀺𑀚𑁆𑀚𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄, 𑀅𑀕𑁆𑀕𑀺𑀲𑀦𑁆𑀢𑀸𑀧𑀮𑀕𑀼𑀴𑀸𑀪𑀺𑀖𑀸𑀢𑀧𑀭𑀺𑀲𑁆𑀲𑀫𑀸𑀪𑀺𑀪𑀽𑀢𑀸 𑀯𑀚𑁆𑀛𑀕𑀸𑀯𑀻 𑀢𑀸𑀬 𑀧𑀭𑀺𑀲𑁆𑀲𑀫𑀸𑀢𑀼𑀭𑀢𑀸𑀬 𑀦𑀺𑀭𑀲𑁆𑀲𑀸𑀤𑀫𑁆𑀧𑀺 𑀅𑀢𑁆𑀢𑀦𑁄 𑀅𑀦𑀢𑁆𑀣𑀸𑀯𑀳𑀫𑁆𑀧𑀺 𑀘 𑀉𑀡𑁆𑀳𑁄𑀤𑀓𑀧𑀸𑀦𑀁 𑀯𑀺𑀬, 𑀓𑀺𑀮𑁂𑀲𑀲𑀦𑁆𑀢𑀸𑀧𑀢𑁄 𑀦𑀺𑀭𑀲𑁆𑀲𑀸𑀤𑀫𑁆𑀧𑀺 𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀢𑁄 𑀘 𑀅𑀢𑁆𑀢𑀦𑁄 𑀅𑀦𑀢𑁆𑀣𑀸𑀯𑀳𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀫𑀦𑁂𑀓𑀧𑁆𑀧𑀓𑀸𑀭𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺. 𑀲𑀼𑀕𑀢𑀺𑀕𑀸𑀫𑀺𑀦𑁄 𑀧𑀦 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼 𑀪𑀯𑀢𑀡𑁆𑀳𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀪𑀯𑀢𑀡𑁆𑀳𑀸𑀪𑀺𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄, 𑀬𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀕𑀸𑀯𑀻 ¶ 𑀲𑀻𑀢𑀼𑀤𑀓𑀢𑀡𑁆𑀳𑀸𑀬 𑀲𑀅𑀲𑁆𑀲𑀸𑀤𑀁 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀜𑁆𑀘 𑀲𑀻𑀢𑀼𑀤𑀓𑀧𑀸𑀦𑀁 𑀯𑀺𑀬, 𑀓𑀺𑀮𑁂𑀲𑀲𑀦𑁆𑀢𑀸𑀧𑀯𑀺𑀭𑀳𑀢𑁄 𑀲𑀅𑀲𑁆𑀲𑀸𑀤𑀁 𑀲𑀼𑀕𑀢𑀺𑀲𑀫𑁆𑀧𑀸𑀧𑀦𑁂𑀦 𑀅𑀢𑁆𑀢𑀦𑁄 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻𑀆𑀤𑀺𑀫𑀦𑁂𑀓𑀧𑁆𑀧𑀓𑀸𑀭𑀁 𑀲𑀼𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺.

𑀏𑀢𑁂𑀲𑀼 𑀧𑀦 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑁆𑀣𑀘𑀺 𑀪𑀕𑀯𑀸 ¶ 𑀏𑀓𑀥𑀫𑁆𑀫𑀫𑀽𑀮𑀺𑀓𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀽𑀧𑀦𑀺𑀲𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀽𑀧𑀦𑀺𑀲𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁨𑁩). 𑀢𑀣𑀸 ‘‘𑀉𑀧𑀸𑀤𑀸𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁫𑁨). 𑀓𑀢𑁆𑀣𑀘𑀺 𑀉𑀪𑀬𑀫𑀽𑀮𑀺𑀓𑀫𑁆𑀧𑀺, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀏𑀯𑀫𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄. 𑀇𑀢𑀺 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀁 𑀇𑀢𑁆𑀣𑁂𑀢𑀁 ¶ 𑀤𑁆𑀯𑀬𑀁, 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄, 𑀲𑀴𑁂𑀯𑀸𑀬𑀢𑀦𑀸𑀦𑀺 𑀬𑁂𑀳𑀺 𑀨𑀼𑀝𑁆𑀞𑁄 𑀩𑀸𑀮𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁯). 𑀢𑀸𑀲𑀼 𑀢𑀸𑀲𑀼 𑀤𑁂𑀲𑀦𑀸𑀲𑀼 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸𑀯𑀲𑁂𑀦 𑀏𑀓𑀥𑀫𑁆𑀫𑀫𑀽𑀮𑀺𑀓𑀸 𑀤𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯𑁂𑀢𑁆𑀣 𑀤𑁂𑀲𑀦𑀸𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀅𑀢𑁆𑀣𑀢𑁄’𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀢𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀽𑀭𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀯𑀺𑀦𑁆𑀤𑀺𑀬𑀁 𑀦𑀸𑀫; 𑀅𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀯𑀺𑀦𑁆𑀤𑀺𑀬𑀁 𑀦𑀸𑀫. 𑀢𑀁 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸. 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀩𑁆𑀩𑀬𑁄𑀦𑀺𑀕𑀢𑀺𑀪𑀯𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀔𑀦𑁆𑀥𑀸𑀤𑀻𑀲𑀼 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀅𑀧𑀺𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀙𑀸𑀤𑀦𑀢𑁄𑀧𑀺 𑀅𑀯𑀺𑀚𑁆𑀚𑀸.

𑀬𑀁 𑀧𑀝𑀺𑀘𑁆𑀘 𑀨𑀮𑀫𑁂𑀢𑀺 𑀲𑁄 𑀧𑀘𑁆𑀘𑀬𑁄. 𑀧𑀝𑀺𑀘𑁆𑀘𑀸𑀢𑀺 𑀦 𑀯𑀺𑀦𑀸 𑀢𑁂𑀦; 𑀢𑀁 𑀅𑀧𑀘𑁆𑀘𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑀺 𑀘 𑀉𑀧𑀓𑀸𑀭𑀓𑀝𑁆𑀞𑁄 𑀧𑀘𑁆𑀘𑀬𑀝𑁆𑀞𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸.

𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 ¶ 𑀲𑀗𑁆𑀔𑀸𑀭𑀸. 𑀅𑀧𑀺𑀘 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸 𑀘𑀸𑀢𑀺 𑀤𑀼𑀯𑀺𑀥𑀸 𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀢𑀬𑁄, 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀢𑀬𑁄𑀢𑀺 𑀇𑀫𑁂 𑀙 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 ¶ . 𑀢𑁂 𑀲𑀩𑁆𑀩𑁂𑀧𑀺 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀫𑀢𑁆𑀢𑀫𑁂𑀯 𑀳𑁄𑀦𑁆𑀢𑀺.

𑀲𑀗𑁆𑀔𑀢𑀲𑀗𑁆𑀔𑀸𑀭𑁄, 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑁄, 𑀅𑀪𑀺𑀲𑀗𑁆𑀔𑀭𑀡𑀲𑀗𑁆𑀔𑀸𑀭𑁄, 𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸. 𑀢𑀢𑁆𑀣 ¶ ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬; 𑁨.𑁧𑁪𑁩) 𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 ‘𑀲𑀗𑁆𑀔𑀢𑀲𑀗𑁆𑀔𑀸𑀭𑀸’ 𑀦𑀸𑀫. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀢𑁂𑀪𑀽𑀫𑀓𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 ‘𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀸’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸. 𑀢𑁂𑀧𑀺 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀯𑀺𑀲𑀼𑀁 𑀧𑀦 𑀦𑁂𑀲𑀁 𑀆𑀕𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀧𑀦 ‘𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 ‘‘𑀅𑀯𑀺𑀚𑁆𑀚𑀸𑀕𑀢𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀜𑁆𑀘𑁂 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁧) 𑀆𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀧𑀦 𑀯𑀻𑀭𑀺𑀬𑀁 ‘𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑁄’𑀢𑀺 𑀯𑀼𑀘𑁆𑀘𑀢𑀺. 𑀲𑁄 ‘‘𑀬𑀸𑀯𑀢𑀺𑀓𑀸 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀢𑀺, 𑀢𑀸𑀯𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁫) 𑀆𑀕𑀢𑁄.

𑀦 𑀓𑁂𑀯𑀮𑀜𑁆𑀘 𑀏𑀢𑁂𑀬𑁂𑀯, 𑀅𑀜𑁆𑀜𑁂𑀧𑀺 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼𑀦𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄, 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁪) 𑀦𑀬𑁂𑀦 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀸 𑀅𑀦𑁂𑀓𑀲𑀗𑁆𑀔𑀸𑀭𑀸. 𑀢𑁂𑀲𑀼 𑀦𑀢𑁆𑀣𑀺 𑀲𑁄 𑀲𑀗𑁆𑀔𑀸𑀭𑁄, 𑀬𑁄 𑀲𑀗𑁆𑀔𑀢𑀲𑀗𑁆𑀔𑀸𑀭𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑁂𑀬𑁆𑀬. 𑀇𑀢𑁄 𑀧𑀭𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀼𑀢𑁆𑀢𑀁 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀯𑀼𑀢𑁆𑀢𑁂 𑀧𑀦 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀦𑀫𑀢𑀻𑀢𑀺 𑀦𑀸𑀫𑀁. 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁. 𑀆𑀬𑁂 𑀢𑀦𑁄𑀢𑀺, 𑀆𑀬𑀢𑀜𑁆𑀘 𑀦𑀬𑀢𑀻𑀢𑀺 𑀆𑀬𑀢𑀦𑀁. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀁. 𑀪𑀯𑀢𑀺 𑀪𑀸𑀯𑀬𑀢𑀺 𑀘𑀸𑀢𑀺 𑀪𑀯𑁄. 𑀚𑀦𑀦𑀁 𑀚𑀸𑀢𑀺. 𑀚𑀻𑀭𑀡𑀁 𑀚𑀭𑀸. 𑀫𑀭𑀦𑁆𑀢𑀺 ¶ 𑀏𑀢𑁂𑀦𑀸𑀢𑀺 𑀫𑀭𑀡𑀁. 𑀲𑁄𑀘𑀦𑀁 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁; 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀯𑀲𑁂𑀦 𑀯𑀸 𑀤𑁆𑀯𑁂𑀥𑀸 𑀔𑀡𑀢𑀻𑀢𑀺 𑀤𑀼𑀓𑁆𑀔𑀁. 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄.

𑀲𑀫𑁆𑀪𑀯𑀦𑁆𑀢𑀻𑀢𑀺 ¶ 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀸𑀤𑀻𑀳𑁂𑀯, 𑀅𑀣 𑀔𑁄 𑀲𑀩𑁆𑀩𑀧𑀤𑁂𑀳𑀺 ‘𑀲𑀫𑁆𑀪𑀯𑀦𑁆𑀢𑀻’𑀢𑀺 𑀲𑀤𑁆𑀤𑀲𑁆𑀲 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀭𑀣𑀸 𑀳𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀓𑀭𑁄𑀦𑁆𑀢𑀻𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬𑀼𑀁. ‘‘𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀧𑀦 𑀬𑁄𑀚𑀦𑀸𑀬 𑀲𑀢𑀺 ‘‘𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄; 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀏𑀯𑀦𑁆𑀢𑀺 ¶ 𑀦𑀺𑀤𑁆𑀤𑀺𑀝𑁆𑀞𑀦𑀬𑀦𑀺𑀤𑀲𑁆𑀲𑀦𑀁. 𑀢𑁂𑀦 𑀅𑀯𑀺𑀚𑁆𑀚𑀸𑀤𑀻𑀳𑁂𑀯 𑀓𑀸𑀭𑀡𑁂𑀳𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲 𑀲𑀓𑀮𑀲𑁆𑀲 𑀯𑀸. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑀽𑀳𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀦 𑀲𑀼𑀔𑀲𑀼𑀪𑀸𑀤𑀻𑀦𑀁. 𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀳𑁄𑀢𑀻𑀢𑀺 𑀲𑀫𑁆𑀪𑀯𑀢𑀺. 𑀏𑀯𑀫𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀮𑀓𑁆𑀔𑀡𑀸𑀤𑀺𑀢𑁄’𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀺𑀢𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀜𑁆𑀜𑀸𑀡𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀲𑀫𑁆𑀫𑁄𑀳𑀦𑀭𑀲𑀸, 𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀆𑀲𑀯𑀧𑀤𑀝𑁆𑀞𑀸𑀦𑀸. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀆𑀬𑀽𑀳𑀦𑀭𑀲𑀸, 𑀘𑁂𑀢𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀚𑁆𑀚𑀸𑀧𑀤𑀝𑁆𑀞𑀸𑀦𑀸. 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀧𑀤𑀝𑁆𑀞𑀸𑀦𑀁, 𑀯𑀢𑁆𑀣𑀸𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑀁 𑀯𑀸. 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀲𑀫𑁆𑀧𑀬𑁄𑀕𑀭𑀲𑀁, 𑀅𑀯𑀺𑀦𑀺𑀩𑁆𑀪𑁄𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀯𑀺𑀓𑀺𑀭𑀡𑀭𑀲𑀁, 𑀅𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀆𑀬𑀢𑀦𑀮𑀓𑁆𑀔𑀡𑀁 𑀲𑀴𑀸𑀬𑀢𑀦𑀁, 𑀤𑀲𑁆𑀲𑀦𑀸𑀤𑀺𑀭𑀲𑀁, 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 ¶ , 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀗𑁆𑀕𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀴𑀸𑀬𑀢𑀦𑀧𑀤𑀝𑁆𑀞𑀸𑀦𑁄. 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀯𑀺𑀲𑀬𑀭𑀲𑀲𑀫𑁆𑀪𑁄𑀕𑀭𑀲𑀸, 𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀨𑀲𑁆𑀲𑀧𑀤𑀝𑁆𑀞𑀸𑀦𑀸. 𑀳𑁂𑀢𑀼𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀅𑀪𑀺𑀦𑀦𑁆𑀤𑀦𑀭𑀲𑀸, 𑀅𑀢𑀺𑀢𑁆𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑁂𑀤𑀦𑀸𑀧𑀤𑀝𑁆𑀞𑀸𑀦𑀸. 𑀕𑀳𑀡𑀮𑀓𑁆𑀔𑀡𑀁 𑀉𑀧𑀸𑀤𑀸𑀦𑀁, 𑀅𑀫𑀼𑀜𑁆𑀘𑀦𑀭𑀲𑀁, 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀤𑀺𑀝𑁆𑀞𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀓𑀫𑁆𑀫𑀨𑀮𑀮𑀓𑁆𑀔𑀡𑁄 𑀪𑀯𑁄, 𑀪𑀸𑀯𑀦𑀪𑀯𑀦𑀭𑀲𑁄, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀉𑀧𑀸𑀤𑀸𑀦𑀧𑀤𑀝𑁆𑀞𑀸𑀦𑁄. 𑀚𑀸𑀢𑀺𑀆𑀤𑀻𑀦𑀁 𑀮𑀓𑁆𑀔𑀡𑀸𑀤𑀻𑀦𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀸𑀤𑀺𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀏𑀓𑀯𑀺𑀥𑀸𑀤𑀺𑀢𑁄’𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸 𑀅𑀜𑁆𑀜𑀸𑀡𑀸𑀤𑀲𑁆𑀲𑀦𑀫𑁄𑀳𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀸, 𑀅𑀧𑁆𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀸 𑀢𑀣𑀸 𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀢𑁄, 𑀯𑁂𑀤𑀦𑀸𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄 𑀢𑀺𑀯𑀺𑀥𑀸, 𑀘𑀢𑀼𑀲𑀘𑁆𑀘𑀅𑀧𑁆𑀧𑀝𑀺𑀯𑁂𑀥𑀢𑁄 ¶ 𑀘𑀢𑀼𑀩𑁆𑀩𑀺𑀥𑀸, 𑀕𑀢𑀺𑀧𑀜𑁆𑀘𑀓𑀸𑀤𑀻𑀦𑀯𑀘𑁆𑀙𑀸𑀤𑀦𑀢𑁄 𑀧𑀜𑁆𑀘𑀯𑀺𑀥𑀸, 𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀅𑀭𑀽𑀧𑀥𑀫𑁆𑀫𑁂𑀲𑀼 𑀙𑀩𑁆𑀩𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀔𑀸𑀭𑀸 𑀲𑀸𑀲𑀯𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀸, 𑀓𑀼𑀲𑀮𑀸𑀓𑀼𑀲𑀮𑀢𑁄 𑀤𑀼𑀯𑀺𑀥𑀸 𑀢𑀣𑀸 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀳𑀻𑀦𑀫𑀚𑁆𑀛𑀺𑀫𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺𑀬𑀢𑀢𑁄, 𑀢𑀺𑀯𑀺𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀪𑀸𑀯𑀢𑁄, 𑀘𑀢𑀼𑀩𑁆𑀩𑀺𑀥𑀸 𑀘𑀢𑀼𑀬𑁄𑀦𑀺𑀲𑀁𑀯𑀢𑁆𑀢𑀦𑀢𑁄, 𑀧𑀜𑁆𑀘𑀯𑀺𑀥𑀸 𑀧𑀜𑁆𑀘𑀕𑀢𑀺𑀕𑀸𑀫𑀺𑀢𑁄.

𑀯𑀺𑀜𑁆𑀜𑀸𑀡𑀁 ¶ 𑀮𑁄𑀓𑀺𑀬𑀯𑀺𑀧𑀸𑀓𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀁, 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀢𑁄 𑀤𑀼𑀯𑀺𑀥𑀁, 𑀪𑀯𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑁄 𑀯𑁂𑀤𑀦𑀸𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀢𑁄 𑀘 𑀢𑀺𑀯𑀺𑀥𑀁, 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀧𑀜𑁆𑀘𑀯𑀺𑀥𑀜𑁆𑀘.

𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀢𑁄 𑀓𑀫𑁆𑀫𑀧𑀘𑁆𑀘𑀬𑀢𑁄 𑀘 𑀏𑀓𑀯𑀺𑀥𑀁, 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀢𑁄 𑀤𑀼𑀯𑀺𑀥𑀁, 𑀅𑀢𑀻𑀢𑀸𑀤𑀺𑀢𑁄 𑀢𑀺𑀯𑀺𑀥𑀁, 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀧𑀜𑁆𑀘𑀯𑀺𑀥𑀜𑁆𑀘.

𑀲𑀴𑀸𑀬𑀢𑀦𑀁 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁄 𑀏𑀓𑀯𑀺𑀥𑀁, 𑀪𑀽𑀢𑀧𑁆𑀧𑀲𑀸𑀤𑀯𑀺𑀜𑁆𑀜𑀸𑀡𑀸𑀤𑀺𑀢𑁄 𑀤𑀼𑀯𑀺𑀥𑀁, 𑀲𑀫𑁆𑀧𑀢𑁆𑀢𑀸𑀲𑀫𑁆𑀧𑀢𑁆𑀢𑀦𑁄𑀪𑀬𑀕𑁄𑀘𑀭𑀢𑁄 𑀢𑀺𑀯𑀺𑀥𑀁, 𑀬𑁄𑀦𑀺𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁄 𑀘𑀢𑀼𑀩𑁆𑀩𑀺𑀥𑀁 𑀧𑀜𑁆𑀘𑀯𑀺𑀥𑀜𑁆𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀏𑀓𑀯𑀺𑀥𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀏𑀯𑀫𑁂𑀢𑁆𑀣 𑀏𑀓𑀯𑀺𑀥𑀸𑀤𑀺𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀅𑀗𑁆𑀕𑀸𑀦𑀜𑁆𑀘 ¶ 𑀯𑀯𑀢𑁆𑀣𑀸𑀦𑀸’𑀢𑀺 𑀲𑁄𑀓𑀸𑀤𑀬𑁄 𑀘𑁂𑀢𑁆𑀣 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀺. 𑀬𑀣𑀸𑀳 𑁋 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁨). 𑀬𑀸𑀯 𑀘 𑀢𑁂𑀲𑀁 𑀧𑀯𑀢𑁆𑀢𑀺 𑀢𑀸𑀯 𑀅𑀯𑀺𑀚𑁆𑀚𑀸𑀬𑀸𑀢𑀺 𑀧𑀼𑀦𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑀫𑁂𑀯 𑀳𑁄𑀢𑀺 𑀪𑀯𑀘𑀓𑁆𑀓𑀁. 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀚𑀭𑀸𑀫𑀭𑀡𑁂𑀦𑁂𑀯 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀬𑀁 𑀢𑀸𑀯𑁂𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑀯𑀲𑁂𑀦 𑀲𑀗𑁆𑀔𑁂𑀧𑀓𑀣𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑁄

𑁨𑁨𑁬. 𑀇𑀤𑀸𑀦𑀺 ¶ 𑀦𑀺𑀤𑁆𑀤𑁂𑀲𑀯𑀸𑀭𑀯𑀲𑁂𑀦 𑀯𑀺𑀢𑁆𑀣𑀸𑀭𑀓𑀣𑀸 𑀳𑁄𑀢𑀺. ‘‘𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀤𑀲𑁆𑀲𑁂𑀢𑀩𑁆𑀩𑁂𑀲𑀼 𑀬𑀲𑁆𑀫𑀸 𑀧𑀼𑀢𑁆𑀢𑁂 𑀓𑀣𑁂𑀢𑀩𑁆𑀩𑁂 𑀧𑀞𑀫𑀁 𑀧𑀺𑀢𑀸 𑀓𑀣𑀻𑀬𑀢𑀺. 𑀏𑀯𑀜𑁆𑀳𑀺 𑀲𑀢𑀺 ‘𑀫𑀺𑀢𑁆𑀢𑀲𑁆𑀲 ¶ 𑀧𑀼𑀢𑁆𑀢𑁄, 𑀤𑀢𑁆𑀢𑀲𑁆𑀲 𑀧𑀼𑀢𑁆𑀢𑁄’𑀢𑀺 𑀧𑀼𑀢𑁆𑀢𑁄 𑀲𑀼𑀓𑀣𑀺𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀤𑁂𑀲𑀦𑀸𑀓𑀼𑀲𑀮𑁄 𑀲𑀢𑁆𑀣𑀸 𑀲𑀗𑁆𑀔𑀸𑀭𑀸𑀦𑀁 𑀚𑀦𑀓𑀢𑁆𑀣𑁂𑀦 𑀧𑀺𑀢𑀼𑀲𑀤𑀺𑀲𑀁 𑀅𑀯𑀺𑀚𑁆𑀚𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀲𑁆𑀫𑀸 𑀅𑀬𑀁 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀬𑀲𑁆𑀫𑀸 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀢𑀺 𑀓𑀣𑀺𑀢𑀁.

𑀦𑀺𑀓𑁆𑀔𑁂𑀧𑀓𑀡𑁆𑀟𑁂 (𑀥. 𑀲. 𑁧𑁦𑁬𑁭) 𑀧𑀦 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 ‘‘𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡’’𑀦𑁆𑀢𑀺 𑀅𑀧𑀭𑁂𑀲𑀼𑀧𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁 𑀕𑀳𑀺𑀢𑀁. 𑀢𑀢𑁆𑀣 ¶ 𑀧𑀼𑀩𑁆𑀩𑀦𑁆𑀢𑁂𑀢𑀺 𑀅𑀢𑀻𑀢𑁄 𑀅𑀤𑁆𑀥𑀸, 𑀅𑀢𑀻𑀢𑀸𑀦𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺. 𑀅𑀧𑀭𑀦𑁆𑀢𑁂𑀢𑀺 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀅𑀦𑀸𑀕𑀢𑀸𑀦𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀢𑀺 𑀢𑀤𑀼𑀪𑀬𑀁. 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀓𑀸𑀭𑀡𑀸𑀦𑀺 𑀅𑀯𑀺𑀚𑁆𑀚𑀸𑀤𑀻𑀦𑀺 𑀅𑀗𑁆𑀕𑀸𑀦𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀢𑀺 𑀅𑀯𑀺𑀚𑁆𑀚𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸 𑀲𑀗𑁆𑀔𑀸𑀭𑀸𑀤𑀬𑁄 𑀥𑀫𑁆𑀫𑀸. 𑀢𑀢𑁆𑀭𑀸𑀬𑀁 𑀅𑀯𑀺𑀚𑁆𑀚𑀸 𑀬𑀲𑁆𑀫𑀸 𑀅𑀢𑀻𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀬𑀲𑁆𑀫𑀸 𑀅𑀦𑀸𑀕𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁, 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀘𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀜𑁆𑀘 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀢𑀺 𑀓𑀣𑀺𑀢𑀁.

𑀏𑀯𑀁 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀓𑀺𑀘𑁆𑀘𑀢𑁄 𑀘𑁂𑀯 𑀚𑀸𑀢𑀺𑀢𑁄 𑀘 𑀅𑀯𑀺𑀚𑁆𑀚𑀸 𑀓𑀣𑀺𑀢𑀸 𑀦𑀸𑀫 𑀳𑁄𑀢𑀺. 𑀓𑀣𑀁 ¶ ? 𑀅𑀬𑀜𑁆𑀳𑀺 𑀅𑀯𑀺𑀚𑁆𑀚𑀸 𑀇𑀫𑀸𑀦𑀺 𑀅𑀝𑁆𑀞 𑀞𑀸𑀦𑀸𑀦𑀺 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀓𑀺𑀘𑁆𑀘𑀢𑁄 𑀓𑀣𑀺𑀢𑀸; 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀚𑀸𑀢𑀺𑀢𑁄𑀧𑀺 𑀓𑀣𑀺𑀢𑀸. 𑀏𑀯𑀁 𑀓𑀣𑁂𑀢𑁆𑀯𑀸 𑀧𑀼𑀦 ‘‘𑀬𑀁 ¶ 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑀯𑀻𑀲𑀢𑀺 𑀧𑀤𑀸𑀦𑀺 𑀅𑀯𑀺𑀚𑁆𑀚𑀸𑀬 𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀕𑀳𑀺𑀢𑀸𑀦𑀺.

𑀢𑀢𑁆𑀣 𑀬𑀲𑁆𑀫𑀸 𑀅𑀬𑀁 𑀅𑀯𑀺𑀚𑁆𑀚𑀸 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀓𑀣𑀺𑀢𑀸𑀧𑀺 𑀧𑀼𑀦 𑀧𑀜𑁆𑀘𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀮𑀓𑁆𑀔𑀡𑁂 𑀅𑀓𑀣𑀺𑀢𑁂 𑀲𑀼𑀓𑀣𑀺𑀢𑀸 𑀦𑀸𑀫 𑀦 𑀳𑁄𑀢𑀺, 𑀮𑀓𑁆𑀔𑀡𑁂 𑀧𑀦 𑀓𑀣𑀺𑀢𑁂𑀬𑁂𑀯 𑀲𑀼𑀓𑀣𑀺𑀢𑀸 𑀦𑀸𑀫 𑀳𑁄𑀢𑀺. 𑀬𑀣𑀸 𑀧𑀼𑀭𑀺𑀲𑁄 𑀦𑀝𑁆𑀞𑀁 𑀕𑁄𑀡𑀁 𑀧𑀭𑀺𑀬𑁂𑀲𑀫𑀸𑀦𑁄 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑁂𑀬𑁆𑀬 𑁋 ‘‘𑀅𑀧𑀺, 𑀅𑀬𑁆𑀬𑀸, 𑀲𑁂𑀢𑀁 𑀕𑁄𑀡𑀁 𑀧𑀲𑁆𑀲𑀣, 𑀭𑀢𑁆𑀢𑀁 𑀕𑁄𑀡𑀁 𑀧𑀲𑁆𑀲𑀣𑀸’’𑀢𑀺? 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀇𑀫𑀲𑁆𑀫𑀺𑀁 𑀭𑀝𑁆𑀞𑁂 𑀲𑁂𑀢𑀭𑀢𑁆𑀢𑀸𑀦𑀁 𑀕𑁄𑀡𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀓𑀺𑀁 𑀢𑁂 𑀕𑁄𑀡𑀲𑁆𑀲 𑀮𑀓𑁆𑀔𑀡’’𑀦𑁆𑀢𑀺? 𑀅𑀣 𑀢𑁂𑀦 ‘𑀲𑀗𑁆𑀖𑀸𑀝𑀺’ 𑀯𑀸 ‘𑀦𑀗𑁆𑀕𑀮𑀁’ 𑀯𑀸𑀢𑀺 𑀯𑀼𑀢𑁆𑀢𑁂 𑀕𑁄𑀡𑁄 𑀲𑀼𑀓𑀣𑀺𑀢𑁄 𑀦𑀸𑀫 𑀪𑀯𑁂𑀬𑁆𑀬; 𑀏𑀯𑀫𑁂𑀯 𑀬𑀲𑁆𑀫𑀸 𑀅𑀬𑀁 𑀅𑀯𑀺𑀚𑁆𑀚𑀸 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀓𑀣𑀺𑀢𑀸𑀧𑀺 𑀧𑀼𑀦 𑀧𑀜𑁆𑀘𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀮𑀓𑁆𑀔𑀡𑁂 𑀅𑀓𑀣𑀺𑀢𑁂 𑀲𑀼𑀓𑀣𑀺𑀢𑀸 ¶ 𑀦𑀸𑀫 𑀦 𑀳𑁄𑀢𑀺, 𑀮𑀓𑁆𑀔𑀡𑁂 𑀧𑀦 𑀓𑀣𑀺𑀢𑁂𑀬𑁂𑀯 𑀲𑀼𑀓𑀣𑀺𑀢𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀬𑀸𑀦𑀲𑁆𑀲𑀸 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀧𑀜𑁆𑀘𑀯𑀻𑀲𑀢𑀺 𑀧𑀤𑀸𑀦𑀺 𑀓𑀣𑀺𑀢𑀸𑀦𑀺, 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀬𑁆𑀬𑀣𑀺𑀤𑀁 𑁋 𑀜𑀸𑀡𑀁 𑀦𑀸𑀫 𑀧𑀜𑁆𑀜𑀸. 𑀲𑀸 𑀅𑀢𑁆𑀣𑀢𑁆𑀣𑀁 𑀓𑀸𑀭𑀡𑀓𑀸𑀭𑀡𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀅𑀬𑀁 𑀧𑀦 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀜𑀸𑀡𑀧𑀘𑁆𑀘𑀦𑀻𑀓𑀢𑁄 𑀅𑀜𑁆𑀜𑀸𑀡𑀁. 𑀤𑀲𑁆𑀲𑀦𑀦𑁆𑀢𑀺𑀧𑀺 𑀧𑀜𑁆𑀜𑀸. 𑀲𑀸𑀧𑀺 𑀢𑀁 𑀆𑀓𑀸𑀭𑀁 𑀧𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀧𑀲𑁆𑀲𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀤𑀲𑁆𑀲𑀦𑀁. 𑀅𑀪𑀺𑀲𑀫𑀬𑁄𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀢𑀁 𑀆𑀓𑀸𑀭𑀁 𑀅𑀪𑀺𑀲𑀫𑁂𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀅𑀪𑀺𑀲𑀫𑁂𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀪𑀺𑀲𑀫𑀬𑁄. 𑀅𑀦𑀼𑀩𑁄𑀥𑁄 𑀲𑀫𑁆𑀩𑁄𑀥𑁄 𑀧𑀝𑀺𑀯𑁂𑀥𑁄𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀢𑀁 𑀆𑀓𑀸𑀭𑀁 𑀅𑀦𑀼𑀩𑀼𑀚𑁆𑀛𑀢𑀺 𑀲𑀫𑁆𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀅𑀦𑀼𑀩𑀼𑀚𑁆𑀛𑀺𑀢𑀼𑀁 𑀲𑀁𑀩𑀼𑀚𑁆𑀛𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄. 𑀲𑀗𑁆𑀕𑀸𑀳𑀦𑀸𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀖𑀁𑀲𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀖𑀁𑀲𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀲𑀗𑁆𑀕𑀸𑀳𑀦𑀸. 𑀧𑀭𑀺𑀬𑁄𑀕𑀸𑀳𑀦𑀸𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀢𑀁 𑀆𑀓𑀸𑀭𑀁 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀧𑀭𑀺𑀬𑁄𑀕𑀸𑀳𑀦𑀸. 𑀲𑀫𑀧𑁂𑀓𑁆𑀔𑀦𑀸𑀢𑀺𑀧𑀺 𑀧𑀜𑁆𑀜𑀸 ¶ . 𑀲𑀸 𑀢𑀁 𑀆𑀓𑀸𑀭𑀁 𑀲𑀫𑀁 𑀲𑀫𑁆𑀫𑀸 𑀘 𑀧𑁂𑀓𑁆𑀔𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀲𑀫𑀁 𑀲𑀫𑁆𑀫𑀸 𑀘 𑀧𑁂𑀓𑁆𑀔𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀲𑀫𑀧𑁂𑀓𑁆𑀔𑀦𑀸. 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀢𑀁 𑀆𑀓𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀡𑀸. 𑀦𑀸𑀲𑁆𑀲𑀸 ¶ 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀁 𑀅𑀢𑁆𑀣𑀺, 𑀲𑀬𑀜𑁆𑀘 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀢𑀁 𑀓𑀫𑁆𑀫𑀦𑁆𑀢𑀺 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁. 𑀤𑀼𑀫𑁆𑀫𑁂𑀥𑀪𑀸𑀯𑀢𑀸𑀬 𑀤𑀼𑀫𑁆𑀫𑁂𑀚𑁆𑀛𑀁. 𑀩𑀸𑀮𑀪𑀸𑀯𑀢𑀸𑀬 𑀩𑀸𑀮𑁆𑀬𑀁.

𑀲𑀫𑁆𑀧𑀚𑀜𑁆𑀜𑀦𑁆𑀢𑀺𑀧𑀺 𑀧𑀜𑁆𑀜𑀸. 𑀲𑀸 𑀅𑀢𑁆𑀣𑀢𑁆𑀣𑀁 𑀓𑀸𑀭𑀡𑀓𑀸𑀭𑀡𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀆𑀓𑀸𑀭𑀁 𑀧𑀚𑀸𑀦𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀲𑀫𑁆𑀧𑀚𑀜𑁆𑀜𑀁. 𑀫𑁄𑀳𑀦𑀯𑀲𑁂𑀦 𑀫𑁄𑀳𑁄. 𑀧𑀫𑁄𑀳𑀦𑀯𑀲𑁂𑀦 𑀧𑀫𑁄𑀳𑁄. 𑀲𑀫𑁆𑀫𑁄𑀳𑀦𑀯𑀲𑁂𑀦 𑀲𑀫𑁆𑀫𑁄𑀳𑁄. 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺𑀆𑀤𑀺𑀯𑀲𑁂𑀦 𑀅𑀯𑀺𑀚𑁆𑀚𑀸. 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀢𑀺 𑀑𑀲𑀻𑀤𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑁄𑀖𑁄. 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀢𑀻𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑁄. 𑀅𑀧𑁆𑀧𑀳𑀻𑀦𑀯𑀲𑁂𑀦 ¶ 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀘 𑀅𑀯𑀺𑀚𑁆𑀚𑀸𑀦𑀼𑀲𑀬𑁄. 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀢𑀘𑁄𑀭𑀸 𑀅𑀤𑁆𑀥𑀺𑀓𑁂 𑀯𑀺𑀬 𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺 𑀕𑀡𑁆𑀳𑀸𑀢𑀺 𑀯𑀺𑀮𑀼𑀫𑁆𑀧𑀢𑀻𑀢𑀺 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁. 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂 𑀧𑀮𑀺𑀖𑀲𑀗𑁆𑀔𑀸𑀢𑀸𑀬 𑀮𑀗𑁆𑀕𑀺𑀬𑀸 𑀧𑀢𑀺𑀢𑀸𑀬 𑀅𑀦𑁆𑀢𑁄𑀦𑀕𑀭𑁂 𑀫𑀦𑀼𑀲𑁆𑀲𑀸𑀦𑀁 𑀩𑀳𑀺𑀦𑀕𑀭𑀕𑀫𑀦𑀫𑁆𑀧𑀺 𑀩𑀳𑀺𑀦𑀕𑀭𑁂 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑁄𑀦𑀕𑀭𑀧𑀯𑁂𑀲𑀦𑀫𑁆𑀧𑀺 𑀧𑀘𑁆𑀙𑀺𑀚𑁆𑀚𑀢𑀺, 𑀏𑀯𑀫𑁂𑀯 𑀬𑀲𑁆𑀲 𑀲𑀓𑁆𑀓𑀸𑀬𑀦𑀕𑀭𑁂 𑀅𑀬𑀁 𑀧𑀢𑀺𑀢𑀸 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀁 𑀜𑀸𑀡𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀻𑀢𑀺 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀦𑀸𑀫 𑀳𑁄𑀢𑀺. 𑀅𑀓𑀼𑀲𑀮𑀜𑁆𑀘 𑀢𑀁 𑀫𑀽𑀮𑀜𑁆𑀘, 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀁. 𑀢𑀁 𑀧𑀦 𑀦 𑀅𑀜𑁆𑀜𑀁, 𑀇𑀥𑀸𑀥𑀺𑀧𑁆𑀧𑁂𑀢𑁄 𑀫𑁄𑀳𑁄𑀢𑀺 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀢𑀺 𑀅𑀬𑀁 𑀏𑀯𑀁𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀜𑁆𑀘𑀯𑀻𑀲𑀢𑀺𑀧𑀤𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁𑀮𑀓𑁆𑀔𑀡𑀸 𑀧𑀦𑀸𑀬𑀁 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀸𑀧𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀏𑀓𑀤𑁂𑀲𑁄 𑀳𑁄𑀢𑀺, 𑀲𑀳𑀚𑀸𑀢𑀸 𑀳𑁄𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀙𑀸𑀤𑁂𑀢𑀺; 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀦 𑀏𑀓𑀤𑁂𑀲𑁄 𑀳𑁄𑀢𑀺, 𑀲𑀳𑀚𑀸𑀢𑀸 𑀳𑁄𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀙𑀸𑀤𑁂𑀢𑀺; 𑀦𑀺𑀭𑁄𑀥𑀲𑀘𑁆𑀘𑀲𑁆𑀲 𑀦𑁂𑀯 𑀏𑀓𑀤𑁂𑀲𑁄 𑀳𑁄𑀢𑀺, 𑀦 𑀲𑀳𑀚𑀸𑀢𑀸, 𑀦 𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑁂𑀯𑀮𑀁 𑀙𑀸𑀤𑁂𑀢𑀺; 𑀫𑀕𑁆𑀕𑀲𑀘𑁆𑀘𑀲𑁆𑀲𑀸𑀧𑀺 𑀦 𑀏𑀓𑀤𑁂𑀲𑁄, 𑀦 𑀲𑀳𑀚𑀸𑀢𑀸, 𑀦 𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑁂𑀯𑀮𑀁 𑀙𑀸𑀤𑁂𑀢𑀺. 𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀙𑀸𑀤𑁂𑀢𑀺. 𑀲𑀫𑀼𑀤𑀬𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀙𑀸𑀤𑁂𑀢𑀺. 𑀦𑀺𑀭𑁄𑀥𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀙𑀸𑀤𑁂𑀢𑀺. 𑀫𑀕𑁆𑀕𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀦𑀽𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀙𑀸𑀤𑁂𑀢𑀺.

𑀤𑁆𑀯𑁂 𑀲𑀘𑁆𑀘𑀸 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸. 𑀤𑁆𑀯𑁂 𑀲𑀘𑁆𑀘𑀸 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸. 𑀅𑀧𑀺𑀘 𑀔𑁄 𑀧𑀦 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀕𑀫𑁆𑀪𑀻𑀭𑀜𑁆𑀘𑁂𑀯 𑀤𑀼𑀤𑁆𑀤𑀲𑀜𑁆𑀘. 𑀢𑀢𑁆𑀣 𑀤𑀼𑀓𑁆𑀔𑀁 𑀦𑀸𑀫 𑀧𑀸𑀓𑀝𑀁, 𑀮𑀓𑁆𑀔𑀡𑀲𑁆𑀲 𑀧𑀦 𑀤𑀼𑀤𑁆𑀤𑀲𑀢𑁆𑀢𑀸 ¶ 𑀕𑀫𑁆𑀪𑀻𑀭𑀁 𑀦𑀸𑀫 𑀚𑀸𑀢𑀁. 𑀲𑀫𑀼𑀤𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀫𑀳𑀸𑀲𑀫𑀼𑀤𑁆𑀤𑀁 𑀫𑀦𑁆𑀣𑁂𑀢𑁆𑀯𑀸 𑀑𑀚𑀸𑀬 𑀦𑀻𑀳𑀭𑀡𑀁 𑀦𑀸𑀫 𑀪𑀸𑀭𑁄, 𑀲𑀺𑀦𑁂𑀭𑀼𑀧𑀸𑀤𑀢𑁄 ¶ 𑀯𑀸𑀮𑀺𑀓𑀸𑀬 𑀉𑀤𑁆𑀥𑀭𑀡𑀁 𑀦𑀸𑀫 𑀪𑀸𑀭𑁄, 𑀧𑀩𑁆𑀩𑀢𑀁 𑀧𑀻𑀴𑁂𑀢𑁆𑀯𑀸 𑀭𑀲𑀲𑁆𑀲 𑀦𑀻𑀳𑀭𑀡𑀁 𑀦𑀸𑀫 𑀪𑀸𑀭𑁄; 𑀏𑀯𑀫𑁂𑀯 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀕𑀫𑁆𑀪𑀻𑀭𑀢𑀸𑀬 𑀏𑀯 𑀤𑀼𑀤𑁆𑀤𑀲𑀸𑀦𑀺, 𑀦𑀺𑀭𑁄𑀥𑀲𑀘𑁆𑀘𑀁 𑀧𑀦 𑀅𑀢𑀺𑀕𑀫𑁆𑀪𑀻𑀭𑀜𑁆𑀘 𑀅𑀢𑀺𑀤𑀼𑀤𑁆𑀤𑀲𑀜𑁆𑀘𑀸𑀢𑀺. 𑀏𑀯𑀁 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀁 𑀕𑀫𑁆𑀪𑀻𑀭𑀢𑁆𑀢𑀸 𑀘 𑀤𑀼𑀤𑁆𑀤𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀘𑁆𑀙𑀸𑀤𑀓𑀁 𑀫𑁄𑀳𑀦𑁆𑀥𑀓𑀸𑀭𑀁 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀢𑀺.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑁄.

𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑁄

𑀲𑀗𑁆𑀔𑀸𑀭𑀧𑀤𑁂 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑁂 𑀅𑀦𑀸𑀫𑀲𑀺𑀢𑁆𑀯𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁂𑀬𑁂𑀯 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀓𑀢𑀫𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁, 𑀧𑀽𑀭𑁂𑀢𑀺 𑀘𑀲𑁆𑀲 𑀅𑀚𑁆𑀛𑀸𑀲𑀬𑀁, 𑀧𑀼𑀚𑁆𑀚𑀜𑁆𑀘 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀜𑁆𑀜𑁄. 𑀅𑀪𑀺𑀲𑀗𑁆𑀔𑀭𑁄𑀢𑀺 𑀯𑀺𑀧𑀸𑀓𑀁 𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑁄. 𑀧𑀼𑀜𑁆𑀜𑁄𑀯 𑀅𑀪𑀺𑀲𑀗𑁆𑀔𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀧𑀼𑀜𑁆𑀜𑀧𑀝𑀺𑀧𑀓𑁆𑀔𑀢𑁄 𑀅𑀧𑀼𑀜𑁆𑀜𑁄. 𑀅𑀧𑀼𑀜𑁆𑀜𑁄𑀯 𑀅𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀆𑀦𑁂𑀜𑁆𑀚𑀫𑁂𑀯 𑀅𑀪𑀺𑀲𑀗𑁆𑀔𑀸𑀭𑁄, 𑀆𑀦𑁂𑀜𑁆𑀚𑀜𑁆𑀘 𑀪𑀯𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀓𑀸𑀬𑁂𑀦 𑀧𑀯𑀢𑁆𑀢𑀺𑀢𑁄, 𑀓𑀸𑀬𑀢𑁄 𑀯𑀸 𑀧𑀯𑀢𑁆𑀢𑁄, 𑀓𑀸𑀬𑀲𑁆𑀲 𑀯𑀸 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀘𑀻𑀲𑀗𑁆𑀔𑀸𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑁄 𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑀯𑀲𑁂𑀦 𑀕𑀳𑀺𑀢𑁄. 𑀢𑀢𑁆𑀣 𑀳𑀺 ‘‘𑀧𑀼𑀜𑁆𑀜𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀅𑀧𑀼𑀜𑁆𑀜𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀧𑀼𑀜𑁆𑀜𑀼𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀆𑀦𑁂𑀜𑁆𑀚𑀜𑁆𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀆𑀦𑁂𑀜𑁆𑀚𑀼𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁫𑁧) 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑁆𑀢𑀺𑀓𑁄 𑀢𑀤𑀦𑀦𑁆𑀢𑀭𑀲𑁆𑀲 𑀯𑀺𑀪𑀗𑁆𑀕𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀕𑀳𑀺𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 (𑀫. 𑀦𑀺. 𑁧.𑁧𑁦𑁨) 𑀕𑀳𑀺𑀢𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀳𑀺 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 (𑀲𑀁. 𑀦𑀺. 𑁨.𑁨) 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁂𑀲𑀁 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀢𑁂 𑀕𑀳𑀺𑀢𑀸𑀢𑀺? 𑀅𑀬𑀁 𑀅𑀪𑀺𑀥𑀫𑁆𑀫𑁄 𑀦𑀸𑀫 ¶ 𑀦 𑀅𑀥𑀼𑀦𑀸𑀓𑀢𑁄, 𑀦𑀸𑀧𑀺 𑀩𑀸𑀳𑀺𑀭𑀓𑀇𑀲𑀻𑀳𑀺 𑀯𑀸 𑀲𑀸𑀯𑀓𑁂𑀳𑀺 𑀯𑀸 𑀤𑁂𑀯𑀢𑀸𑀳𑀺 ¶ 𑀯𑀸 𑀪𑀸𑀲𑀺𑀢𑁄. 𑀲𑀩𑁆𑀩𑀜𑁆𑀜𑀼𑀚𑀺𑀦𑀪𑀸𑀲𑀺𑀢𑁄 𑀧𑀦 𑀅𑀬𑀁. 𑀅𑀪𑀺𑀥𑀫𑁆𑀫𑁂𑀧𑀺 𑀳𑀺 𑀲𑀼𑀢𑁆𑀢𑁂𑀧𑀺 𑀏𑀓𑀲𑀤𑀺𑀲𑀸𑀯 𑀢𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁.

𑀇𑀤𑀸𑀦𑀺 𑀢𑁂 𑀲𑀗𑁆𑀔𑀸𑀭𑁂 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀲𑀮𑀸 𑀘𑁂𑀢𑀦𑀸𑀢𑀺 𑀅𑀦𑀺𑀬𑀫𑀢𑁄 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸𑀧𑀺 𑀯𑀼𑀢𑁆𑀢𑀸. 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 𑀧𑀦 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 ¶ 𑀦𑀸𑀫. 𑀤𑀸𑀦𑀫𑀬𑀸𑀢𑀺𑀆𑀤𑀻𑀳𑀺 𑀢𑀸𑀲𑀁𑀬𑁂𑀯 𑀘𑁂𑀢𑀦𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀅𑀝𑁆𑀞 𑀓𑀸𑀫𑀸𑀯𑀘𑀭𑀸𑀯 𑀤𑀸𑀦𑀲𑀻𑀮𑀫𑀬𑀸 𑀳𑁄𑀦𑁆𑀢𑀺. 𑀪𑀸𑀯𑀦𑀸𑀫𑀬𑀸 𑀧𑀦 𑀢𑁂𑀭𑀲𑀧𑀺. 𑀬𑀣𑀸 𑀳𑀺 𑀧𑀕𑀼𑀡𑀁 𑀥𑀫𑁆𑀫𑀁 𑀲𑀚𑁆𑀛𑀸𑀬𑀫𑀸𑀦𑁄 𑀏𑀓𑀁 𑀤𑁆𑀯𑁂 𑀅𑀦𑀼𑀲𑀦𑁆𑀥𑀺𑀕𑀢𑁂𑀧𑀺 𑀦 𑀚𑀸𑀦𑀸𑀢𑀺, 𑀧𑀘𑁆𑀙𑀸 𑀆𑀯𑀚𑁆𑀚𑀦𑁆𑀢𑁄 𑀚𑀸𑀦𑀸𑀢𑀺; 𑀏𑀯𑀫𑁂𑀯 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀧𑀕𑀼𑀡𑀚𑁆𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺 𑀪𑀸𑀯𑀦𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀸𑀯𑀦𑀸𑀫𑀬𑀸 𑀧𑀦 𑀢𑁂𑀭𑀲𑀧𑀻’’𑀢𑀺.

𑀢𑀢𑁆𑀣 𑀤𑀸𑀦𑀫𑀬𑀸𑀤𑀻𑀲𑀼 ‘‘𑀤𑀸𑀦𑀁 𑀆𑀭𑀩𑁆𑀪 𑀤𑀸𑀦𑀫𑀥𑀺𑀓𑀺𑀘𑁆𑀘 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀸𑀦𑀫𑀬𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀲𑀻𑀮𑀁 𑀆𑀭𑀩𑁆𑀪…𑀧𑁂… 𑀪𑀸𑀯𑀦𑀁 𑀆𑀭𑀩𑁆𑀪 𑀪𑀸𑀯𑀦𑀫𑀥𑀺𑀓𑀺𑀘𑁆𑀘 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀸𑀯𑀦𑀸𑀫𑀬𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄’’𑀢𑀺 (𑀯𑀺𑀪. 𑁭𑁬𑁯) 𑀅𑀬𑀁 𑀲𑀗𑁆𑀔𑁂𑀧𑀤𑁂𑀲𑀦𑀸.

𑀘𑀻𑀯𑀭𑀸𑀤𑀻𑀲𑀼 𑀧𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀯𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀦𑁆𑀦𑀸𑀤𑀻𑀲𑀼 𑀯𑀸 𑀤𑀲𑀲𑀼 𑀤𑀸𑀦𑀯𑀢𑁆𑀣𑀽𑀲𑀼 𑀢𑀁 𑀢𑀁 𑀤𑁂𑀦𑁆𑀢𑀲𑁆𑀲 𑀢𑁂𑀲𑀁 𑀉𑀧𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀘𑁆𑀘𑀸𑀕𑀓𑀸𑀮𑁂 𑀧𑀘𑁆𑀙𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑁂 𑀘𑀸𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀤𑀸𑀦𑀫𑀬𑀸 𑀦𑀸𑀫. 𑀲𑀻𑀮𑀁 𑀧𑀭𑀺𑀧𑀽𑀭𑀡𑀢𑁆𑀣𑀸𑀬 𑀧𑀦 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀩𑁆𑀩𑀚𑀦𑁆𑀢𑀲𑁆𑀲 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 ‘𑀧𑀩𑁆𑀩𑀚𑀺𑀢𑁄 𑀯𑀢𑀫𑁆𑀳𑀺, 𑀲𑀸𑀥𑀼 𑀲𑀼𑀝𑁆𑀞𑀽’𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀲𑀁𑀯𑀭𑀦𑁆𑀢𑀲𑁆𑀲 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀆𑀧𑀸𑀣𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀲𑀁𑀯𑀭𑀦𑁆𑀢𑀲𑁆𑀲 𑀆𑀚𑀻𑀯𑀁 𑀲𑁄𑀥𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀲𑀻𑀮𑀫𑀬𑀸 𑀦𑀸𑀫. 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 ¶ 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀪𑀸𑀯𑁂𑀦𑁆𑀢𑀲𑁆𑀲 𑀭𑀽𑀧𑁂…𑀧𑁂… 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, 𑀭𑀽𑀧𑀲𑀜𑁆𑀜𑀁 ¶ …𑀧𑁂… 𑀥𑀫𑁆𑀫𑀲𑀜𑁆𑀜𑀁 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀪𑀸𑀯𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀪𑀸𑀯𑀦𑀸𑀫𑀬𑀸 𑀦𑀸𑀫𑀸𑀢𑀺 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀦𑀺𑀤𑁆𑀤𑁂𑀲𑁂 𑀅𑀓𑀼𑀲𑀮𑀸 𑀘𑁂𑀢𑀦𑀸𑀢𑀺 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸. 𑀓𑀸𑀫𑀸𑀯𑀘𑀭𑀸𑀢𑀺 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 ¶ 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑁂𑀢𑀦𑀸 𑀲𑁂𑀲𑀸 𑀭𑀽𑀧𑀸𑀭𑀽𑀧𑀪𑀯𑁂𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀧𑀦 𑀧𑀝𑀺𑀲𑀦𑁆𑀥𑀺𑀁 𑀦 𑀆𑀓𑀟𑁆𑀠𑀦𑁆𑀢𑀺, 𑀓𑀸𑀫𑀸𑀯𑀘𑀭𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀸𑀓𑀁 𑀅𑀯𑀘𑀸𑀭𑁂𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸𑀢𑁆𑀯𑁂𑀯 𑀯𑀼𑀢𑁆𑀢𑀸.

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀦𑀺𑀤𑁆𑀤𑁂𑀲𑁂 𑀓𑀼𑀲𑀮𑀸 𑀘𑁂𑀢𑀦𑀸 𑀅𑀭𑀽𑀧𑀸𑀯𑀘𑀭𑀸𑀢𑀺 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸. 𑀏𑀢𑀸 𑀳𑀺 𑀘𑀢𑀲𑁆𑀲𑁄 𑀅𑀦𑀺𑀜𑁆𑀚𑀦𑀝𑁆𑀞𑁂𑀦 𑀅𑀦𑀺𑀜𑁆𑀚𑀦𑀲𑁆𑀲 𑀘 𑀅𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀳𑀺 𑀢𑀺𑀲𑁆𑀲𑁄 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀘𑁂𑀢𑀦𑀸 𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀘𑁂𑀢𑀦𑀸𑀢𑀺 𑀧𑀜𑁆𑀘𑀤𑀲 𑀥𑀫𑁆𑀫𑀸 𑀅𑀦𑀺𑀘𑁆𑀘𑀮𑀝𑁆𑀞𑁂𑀦 𑀅𑀨𑀦𑁆𑀤𑀦𑀝𑁆𑀞𑁂𑀦 𑀆𑀦𑁂𑀜𑁆𑀚𑀸 𑀦𑀸𑀫. 𑀢𑀢𑁆𑀣 𑀭𑀽𑀧𑀸𑀯𑀘𑀭𑀸 𑀓𑀼𑀲𑀮𑀸 𑀘𑁂𑀢𑀦𑀸 𑀅𑀦𑀺𑀜𑁆𑀚𑀸 𑀲𑀫𑀸𑀦𑀸𑀧𑀺 𑀅𑀢𑁆𑀢𑀦𑀸 𑀲𑀭𑀺𑀓𑁆𑀔𑀓𑀫𑁆𑀧𑀺 𑀅𑀲𑀭𑀺𑀓𑁆𑀔𑀓𑀫𑁆𑀧𑀺 𑀲𑀇𑀜𑁆𑀚𑀦𑀫𑁆𑀧𑀺 𑀅𑀦𑀺𑀜𑁆𑀚𑀦𑀫𑁆𑀧𑀺 𑀭𑀽𑀧𑀸𑀭𑀽𑀧𑀁 𑀚𑀦𑁂𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫 𑀦 𑀳𑁄𑀢𑀺. 𑀯𑀺𑀧𑀸𑀓𑀓𑀺𑀭𑀺𑀬𑀘𑁂𑀢𑀦𑀸 𑀧𑀦 𑀅𑀯𑀺𑀧𑀸𑀓𑀢𑁆𑀢𑀸 𑀯𑀺𑀧𑀸𑀓𑀁 𑀦 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀢𑀣𑀸 𑀅𑀭𑀽𑀧𑀸𑀯𑀘𑀭𑀸 𑀯𑀺𑀧𑀸𑀓𑀓𑀺𑀭𑀺𑀬𑀘𑁂𑀢𑀦𑀸𑀧𑀻𑀢𑀺 𑀏𑀓𑀸𑀤𑀲𑀸𑀧𑀺 𑀏𑀢𑀸 𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀯 𑀦 𑀅𑀪𑀺𑀲𑀗𑁆𑀔𑀸𑀭𑀸. 𑀘𑀢𑀼𑀩𑁆𑀩𑀺𑀥𑀸 𑀧𑀦 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀲𑀤𑀺𑀲𑀸𑀯 𑀙𑀸𑀬𑀸 𑀳𑁄𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀦𑀺𑀘𑁆𑀘𑀮𑀁 𑀅𑀭𑀽𑀧𑀫𑁂𑀯 𑀚𑀦𑁂𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀧𑀼𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀢𑁂𑀭𑀲, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀤𑁆𑀯𑀸𑀤𑀲, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄𑀢𑀺 𑀲𑀩𑁆𑀩𑀸𑀧𑁂𑀢𑀸 𑀧𑀭𑀺𑀧𑀺𑀡𑁆𑀟𑀺𑀢𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀳𑁄𑀦𑁆𑀢𑀺. 𑀇𑀢𑀺 𑀪𑀕𑀯𑀸 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀫𑀳𑀸𑀢𑀼𑀮𑀸𑀬 𑀥𑀸𑀭𑀬𑀫𑀸𑀦𑁄 𑀯𑀺𑀬, 𑀦𑀸𑀴𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀦𑀫𑀸𑀦𑁄 𑀯𑀺𑀬 𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑀫𑁂𑀯 𑀤𑀲𑁆𑀲𑁂𑀲𑀺.

𑀇𑀤𑀸𑀦𑀺 ¶ 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸 𑀲𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀆𑀬𑀽𑀳𑀫𑀸𑀦𑀸 𑀬𑁂𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑁆𑀢𑀺, 𑀢𑀸𑀦𑀺 𑀢𑀻𑀡𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀓𑀢𑀫𑁄 𑀓𑀸𑀬𑀲𑀗𑁆𑀔𑀸𑀭𑁄? 𑀓𑀸𑀬𑀲𑀜𑁆𑀘𑁂𑀢𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬𑀲𑀜𑁆𑀘𑁂𑀢𑀦𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 ¶ 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸𑀢𑀺 𑀲𑀫𑀯𑀻𑀲𑀢𑀺 𑀘𑁂𑀢𑀦𑀸; 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀕𑁆𑀕𑀳𑀡𑀘𑁄𑀧𑀦𑀁 𑀧𑀸𑀧𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀯𑀻𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀯𑀘𑀻𑀲𑀜𑁆𑀘𑁂𑀢𑀦𑀸𑀢𑀺 ¶ 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 𑀢𑀸𑀬𑁂𑀯 𑀯𑀻𑀲𑀢𑀺 𑀘𑁂𑀢𑀦𑀸; 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀜𑁆𑀘𑁄𑀧𑀦𑀁 𑀯𑀸𑀓𑁆𑀬𑀪𑁂𑀤𑀁 𑀧𑀸𑀧𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀯𑀻𑀲𑀢𑀺 𑀘𑁂𑀢𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀧𑀦𑁂𑀢𑁆𑀣 𑀧𑀭𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀸. 𑀬𑀣𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀺. 𑀢𑀲𑁆𑀫𑀸 𑀲𑀸𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦 𑀲𑀩𑁆𑀩𑀸𑀧𑁂𑀢𑀸 𑀳𑁄𑀦𑁆𑀢𑀺.

𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀉𑀪𑁄𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸 𑀲𑀩𑁆𑀩𑀸𑀧𑀺 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸. 𑀇𑀢𑀺 𑀪𑀕𑀯𑀸 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸 𑀲𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀆𑀬𑀽𑀳𑀫𑀸𑀦𑀸 𑀇𑀫𑁂𑀳𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑁆𑀢𑀻𑀢𑀺 𑀆𑀬𑀽𑀳𑀦𑀓𑀫𑁆𑀫𑀤𑁆𑀯𑀸𑀭𑀁 𑀤𑀲𑁆𑀲𑁂𑀲𑀺.

𑀇𑀫𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀺𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸 𑀯𑀺𑀭𑀫𑀦𑁆𑀢𑀲𑁆𑀲 𑀲𑀺𑀬𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸 𑀯𑀺𑀭𑀫𑀦𑁆𑀢𑀲𑁆𑀲 𑀲𑀺𑀬𑀸 𑀯𑀘𑀻𑀲𑀗𑁆𑀔𑀸𑀭𑁄. 𑀏𑀯𑀁 𑀅𑀝𑁆𑀞 𑀓𑀼𑀲𑀮𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀳𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀯𑀘𑀻𑀲𑀗𑁆𑀔𑀸𑀭𑁄 𑀘. 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸 𑀧𑀦 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀳𑁄𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀤𑁆𑀯𑁂 𑀤𑁆𑀯𑀸𑀭𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺. 𑀏𑀯𑀁 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄𑀧𑀺 𑀳𑁄𑀢𑀺 𑀯𑀘𑀻𑀲𑀗𑁆𑀔𑀸𑀭𑁄𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀧𑀺.

𑀓𑀸𑀬𑀲𑀗𑁆𑀔𑀸𑀭𑁄 𑀧𑀦 𑀲𑀺𑀬𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀲𑀺𑀬𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀦 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀢𑀣𑀸 𑀯𑀘𑀻𑀲𑀗𑁆𑀔𑀸𑀭𑁄. 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀧𑀦 𑀲𑀺𑀬𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 ¶ , 𑀲𑀺𑀬𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀲𑀺𑀬𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀇𑀫𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀦𑀸𑀫.

𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺? 𑀅𑀯𑀺𑀚𑁆𑀚𑀸𑀪𑀸𑀯𑁂 𑀪𑀸𑀯𑀢𑁄. 𑀬𑀲𑁆𑀲 𑀳𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀳𑁂𑀢𑀼𑀪𑀽𑀢𑁂 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺 ¶ , 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁂𑀧𑀺 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂 𑀲𑀗𑁆𑀔𑀸𑀭𑁂 𑀲𑀼𑀔𑀳𑁂𑀢𑀼𑀢𑁄 𑀫𑀜𑁆𑀜𑀫𑀸𑀦𑁄 𑀆𑀭𑀪𑀢𑀺, 𑀦𑀺𑀭𑁄𑀥𑁂 𑀧𑀦 𑀫𑀕𑁆𑀕𑁂 𑀘 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑀺𑀭𑁄𑀥𑀪𑀽𑀢𑁂𑀧𑀺 𑀕𑀢𑀺𑀯𑀺𑀲𑁂𑀲𑁂 𑀤𑀼𑀓𑁆𑀔𑀦𑀺𑀭𑁄𑀥𑀲𑀜𑁆𑀜𑀻 ¶ 𑀳𑀼𑀢𑁆𑀯𑀸 𑀦𑀺𑀭𑁄𑀥𑀲𑁆𑀲 𑀘 𑀅𑀫𑀕𑁆𑀕𑀪𑀽𑀢𑁂𑀲𑀼𑀧𑀺 𑀬𑀜𑁆𑀜𑀸𑀫𑀭𑀢𑀧𑀸𑀤𑀻𑀲𑀼 𑀦𑀺𑀭𑁄𑀥𑀫𑀕𑁆𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀧𑀢𑁆𑀣𑀬𑀫𑀸𑀦𑁄 𑀬𑀜𑁆𑀜𑀸𑀫𑀭𑀢𑀧𑀸𑀤𑀺𑀫𑀼𑀔𑁂𑀦 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺.

𑀅𑀧𑀺𑀘 𑀲𑁄 𑀢𑀸𑀬 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑀢𑀸𑀬 𑀯𑀺𑀲𑁂𑀲𑀢𑁄 𑀚𑀸𑀢𑀺𑀚𑀭𑀸𑀭𑁄𑀕𑀫𑀭𑀡𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀯𑁄𑀓𑀺𑀡𑁆𑀡𑀁 𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀤𑁂𑀯𑀘𑁆𑀙𑀭𑀓𑀸𑀫𑀓𑁄 𑀯𑀺𑀬 𑀫𑀭𑀼𑀧𑀧𑀸𑀢𑀁; 𑀲𑀼𑀔𑀲𑀫𑁆𑀫𑀢𑀲𑁆𑀲𑀸𑀧𑀺 𑀘 𑀢𑀲𑁆𑀲 𑀧𑀼𑀜𑁆𑀜𑀨𑀮𑀲𑁆𑀲 𑀅𑀦𑁆𑀢𑁂 𑀫𑀳𑀸𑀧𑀭𑀺𑀴𑀸𑀳𑀚𑀦𑀓𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀧𑁆𑀧𑀲𑁆𑀲𑀸𑀤𑀢𑀜𑁆𑀘 𑀅𑀧𑀲𑁆𑀲𑀦𑁆𑀢𑁄𑀧𑀺 𑀢𑀧𑁆𑀧𑀘𑁆𑀘𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀲𑀮𑀪𑁄 𑀯𑀺𑀬 𑀤𑀻𑀧𑀲𑀺𑀔𑀸𑀪𑀺𑀦𑀺𑀧𑀸𑀢𑀁, 𑀫𑀥𑀼𑀩𑀺𑀦𑁆𑀤𑀼𑀕𑀺𑀤𑁆𑀥𑁄 𑀯𑀺𑀬 𑀘 𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀮𑁂𑀳𑀦𑀁.

𑀓𑀸𑀫𑀽𑀧𑀲𑁂𑀯𑀦𑀸𑀤𑀻𑀲𑀼 𑀘 𑀲𑀯𑀺𑀧𑀸𑀓𑁂𑀲𑀼 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀸𑀬 𑀘𑁂𑀯 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀘 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀫𑁆𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀩𑀸𑀮𑁄 𑀯𑀺𑀬 𑀕𑀽𑀣𑀓𑀻𑀴𑀦𑀁, 𑀫𑀭𑀺𑀢𑀼𑀓𑀸𑀫𑁄 𑀯𑀺𑀬 𑀘 𑀯𑀺𑀲𑀔𑀸𑀤𑀦𑀁. 𑀆𑀭𑀼𑀧𑁆𑀧𑀯𑀺𑀧𑀸𑀓𑁂𑀲𑀼 𑀘𑀸𑀧𑀺 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀲𑀲𑁆𑀲𑀢𑀸𑀤𑀺𑀯𑀺𑀧𑀮𑁆𑀮𑀸𑀲𑁂𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑀽𑀢𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀤𑀺𑀲𑀸𑀫𑀽𑀴𑁆𑀳𑁄 𑀯𑀺𑀬 𑀧𑀺𑀲𑀸𑀘𑀦𑀕𑀭𑀸𑀪𑀺𑀫𑀼𑀔𑀫𑀕𑁆𑀕𑀕𑀫𑀦𑀁.

𑀏𑀯𑀁 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀯𑀢𑁄𑀯 𑀲𑀗𑁆𑀔𑀸𑀭𑀪𑀸𑀯𑁄, 𑀦 𑀅𑀪𑀸𑀯𑀢𑁄; 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀬𑀢𑁄 ¶ 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀲𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀦𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺.

𑀏𑀢𑁆𑀣𑀸𑀳 𑁋 𑀕𑀡𑁆𑀳𑀸𑀫 𑀢𑀸𑀯 𑀏𑀢𑀁 ‘𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄’𑀢𑀺. 𑀇𑀤𑀁 𑀧𑀦 𑀯𑀢𑁆𑀢𑀩𑁆𑀩𑀁 𑁋 ‘𑀓𑀢𑀫𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻’𑀢𑀺? 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀧𑀘𑁆𑀘𑀬𑁄 ¶ 𑀳𑁄𑀢𑀺 𑀧𑀼𑀜𑁆𑀜𑀸𑀦𑀁, 𑀤𑀼𑀯𑀺𑀥𑀸𑀦𑁂𑀓𑀥𑀸 𑀧𑀦;

𑀧𑀭𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀲𑀸, 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸.

𑀢𑀢𑁆𑀣 ¶ ‘𑀧𑀼𑀜𑁆𑀜𑀸𑀦𑀁 𑀤𑀼𑀯𑀺𑀥𑀸’𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀳𑀺 𑀅𑀯𑀺𑀚𑁆𑀚𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑀓𑀸𑀮𑁂 𑀓𑀸𑀫𑀸𑀯𑀘𑀭𑀸𑀦𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀲𑀫𑁄𑀳𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀭𑀽𑀧𑀸𑀯𑀘𑀭𑀸𑀦𑀁, 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀧𑀦 𑀤𑀸𑀦𑀸𑀤𑀻𑀦𑀺 𑀘𑁂𑀯 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀧𑀽𑀭𑁂𑀦𑁆𑀢𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀘 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺; 𑀢𑀣𑀸 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑁆𑀢𑀸 𑀓𑀸𑀫𑀪𑀯𑀭𑀽𑀧𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑁂𑀢𑁆𑀯𑀸 𑀢𑀸𑀦𑁂𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀲𑁆𑀲.

‘𑀅𑀦𑁂𑀓𑀥𑀸 𑀧𑀦 𑀧𑀭𑁂𑀲’𑀦𑁆𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀣𑀁? 𑀏𑀲𑀸 𑀳𑀺 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦, 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀳𑀺, 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦, 𑀤𑀼𑀢𑀺𑀬𑀚𑀯𑀦𑀸𑀤𑀻𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺, 𑀬𑀁 𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀻𑀢𑀺 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

‘𑀧𑀘𑁆𑀙𑀺𑀫𑀸𑀦𑀁 𑀲𑀸 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸’𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸. 𑀲𑁄 𑀧𑀦𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀏𑀢𑁆𑀣𑀸𑀳 𑁋 ‘𑀓𑀺𑀁 𑀧𑀦𑀸𑀬𑀫𑁂𑀓𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀏𑀓𑀸𑀯 𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀺. 𑀅𑀣 ‘𑀅𑀜𑁆𑀜𑁂𑀧𑀺 𑀲𑀦𑁆𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’𑀢𑀺 𑀏𑀓𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀦𑀼𑀧𑀧𑀚𑁆𑀚𑀢𑀻𑀢𑀺? 𑀦 𑀦𑀼𑀧𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑁋

𑀏𑀓𑀁 ¶ 𑀦 𑀏𑀓𑀢𑁄 𑀇𑀥, 𑀦𑀸𑀦𑁂𑀓𑀫𑀦𑁂𑀓𑀢𑁄𑀧𑀺 𑀦𑁄 𑀏𑀓𑀁;

𑀨𑀮𑀫𑀢𑁆𑀣𑀺 𑀅𑀢𑁆𑀣𑀺 𑀧𑀦 𑀏𑀓-𑀳𑁂𑀢𑀼𑀨𑀮𑀤𑀻𑀧𑀦𑁂 𑀅𑀢𑁆𑀣𑁄.

𑀏𑀓𑀢𑁄 ¶ 𑀳𑀺 𑀓𑀸𑀭𑀡𑀢𑁄 𑀦 𑀇𑀥 𑀓𑀺𑀜𑁆𑀘𑀺 𑀏𑀓𑀁 𑀨𑀮𑀫𑀢𑁆𑀣𑀺, 𑀦 𑀅𑀦𑁂𑀓𑀁. 𑀦𑀸𑀧𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀏𑀓𑀁. 𑀅𑀦𑁂𑀓𑁂𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀅𑀦𑁂𑀓𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀦𑁂𑀓𑁂𑀳𑀺 𑀉𑀢𑀼𑀧𑀣𑀯𑀻𑀩𑀻𑀚𑀲𑀮𑀺𑀮𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀅𑀦𑁂𑀓𑀫𑁂𑀯 𑀭𑀽𑀧𑀕𑀦𑁆𑀥𑀭𑀲𑀸𑀤𑀺𑀅𑀗𑁆𑀓𑀼𑀭𑀲𑀗𑁆𑀔𑀸𑀢𑀁 𑀨𑀮𑀫𑀼𑀧𑁆𑀧𑀚𑁆𑀚𑀫𑀸𑀦𑀁 𑀤𑀺𑀲𑁆𑀲𑀢𑀺. 𑀬𑀁 𑀧𑀦𑁂𑀢𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀁 𑀓𑀢𑀁, 𑀢𑀢𑁆𑀣 𑀅𑀢𑁆𑀣𑁄 𑀅𑀢𑁆𑀣𑀺, 𑀧𑀬𑁄𑀚𑀦𑀁 𑀯𑀺𑀚𑁆𑀚𑀢𑀺.

𑀪𑀕𑀯𑀸 𑀳𑀺 𑀓𑀢𑁆𑀣𑀘𑀺 𑀧𑀥𑀸𑀦𑀢𑁆𑀢𑀸, 𑀓𑀢𑁆𑀣𑀘𑀺 𑀧𑀸𑀓𑀝𑀢𑁆𑀢𑀸, 𑀓𑀢𑁆𑀣𑀘𑀺 𑀅𑀲𑀸𑀥𑀸𑀭𑀡𑀢𑁆𑀢𑀸, 𑀤𑁂𑀲𑀦𑀸𑀯𑀺𑀮𑀸𑀲𑀲𑁆𑀲 𑀘 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀅𑀦𑀼𑀭𑀽𑀧𑀢𑁄 𑀏𑀓𑀫𑁂𑀯𑀳𑁂𑀢𑀼𑀁 𑀯𑀸 𑀨𑀮𑀁 𑀯𑀸 𑀤𑀻𑀧𑁂𑀢𑀺; ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 (𑀤𑀻. 𑀦𑀺. 𑁨.𑁯𑁭) 𑀳𑀺 𑀏𑀓𑀫𑁂𑀯 𑀳𑁂𑀢𑀼𑀁 𑀨𑀮𑀜𑁆𑀘𑀸𑀳. 𑀨𑀲𑁆𑀲𑁄 𑀳𑀺 𑀯𑁂𑀤𑀦𑀸𑀬 𑀧𑀥𑀸𑀦𑀳𑁂𑀢𑀼 𑀬𑀣𑀸𑀨𑀲𑁆𑀲𑀁 𑀯𑁂𑀤𑀦𑀸𑀯𑀯𑀢𑁆𑀣𑀸𑀦𑀢𑁄. 𑀯𑁂𑀤𑀦𑀸 𑀘 𑀨𑀲𑁆𑀲𑀲𑁆𑀲 𑀧𑀥𑀸𑀦𑀨𑀮𑀁 𑀬𑀣𑀸𑀯𑁂𑀤𑀦𑀁 𑀨𑀲𑁆𑀲𑀯𑀯𑀢𑁆𑀣𑀸𑀦𑀢𑁄.

‘‘𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸’’𑀢𑀺 (𑀫𑀳𑀸𑀦𑀺. 𑁫) 𑀧𑀸𑀓𑀝𑀢𑁆𑀢𑀸 𑀏𑀓𑀁 𑀳𑁂𑀢𑀼𑀫𑀸𑀳. 𑀧𑀸𑀓𑀝𑁄 𑀳𑁂𑀢𑁆𑀣 𑀲𑁂𑀫𑁆𑀳𑁄, 𑀦 𑀓𑀫𑁆𑀫𑀸𑀤𑀬𑁄. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸’’𑀢𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀏𑀓𑀁 𑀳𑁂𑀢𑀼𑀫𑀸𑀳; 𑀅𑀲𑀸𑀥𑀸𑀭𑀡𑁄 𑀳𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀓𑀼𑀲𑀮𑀸𑀦𑀁, 𑀲𑀸𑀥𑀸𑀭𑀡𑀸𑀦𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀻𑀢𑀺.

𑀢𑀲𑁆𑀫𑀸 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀥𑀫𑁆𑀫𑀸𑀤𑀻𑀲𑀼 𑀲𑀗𑁆𑀔𑀸𑀭𑀓𑀸𑀭𑀡𑁂𑀲𑀼 ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨) 𑀘 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀆𑀲𑀯𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁪) 𑀘 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀢𑀡𑁆𑀳𑀸𑀤𑀻𑀦𑀁 𑀲𑀗𑁆𑀔𑀸𑀭𑀳𑁂𑀢𑀽𑀦𑀁 𑀳𑁂𑀢𑀽𑀢𑀺 𑀧𑀥𑀸𑀦𑀢𑁆𑀢𑀸, ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀧𑀸𑀓𑀝𑀢𑁆𑀢𑀸 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦𑁂𑀯 𑀘 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀧𑀭𑀺𑀳𑀸𑀭𑀯𑀘𑀦𑁂𑀦 𑀲𑀩𑁆𑀩𑀢𑁆𑀣 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑁂 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀏𑀢𑁆𑀣𑀸𑀳 ¶ 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸𑀬 𑀲𑀸𑀯𑀚𑁆𑀚𑀸𑀬 𑀅𑀯𑀺𑀚𑁆𑀚𑀸𑀬 𑀓𑀣𑀁 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁆𑀢𑀁 𑀬𑀼𑀚𑁆𑀚𑀢𑀺? 𑀦 𑀳𑀺 𑀦𑀺𑀫𑁆𑀩𑀩𑀻𑀚𑀢𑁄 𑀉𑀘𑁆𑀙𑀼 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀓𑀣𑀁 𑀦 𑀬𑀼𑀚𑁆𑀚𑀺𑀲𑁆𑀲𑀢𑀺? 𑀮𑁄𑀓𑀲𑁆𑀫𑀺𑀜𑁆𑀳𑀺 𑁋

𑀯𑀺𑀭𑀼𑀤𑁆𑀥𑁄 ¶ 𑀘𑀸𑀯𑀺𑀭𑀼𑀤𑁆𑀥𑁄 𑀘, 𑀲𑀤𑀺𑀲𑀸𑀲𑀤𑀺𑀲𑁄 𑀢𑀣𑀸;

𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀲𑀺𑀤𑁆𑀥𑁄, 𑀯𑀺𑀧𑀸𑀓𑀸 𑀏𑀯 𑀢𑁂 𑀘 𑀦.

𑀥𑀫𑁆𑀫𑀸𑀦𑀜𑁆𑀳𑀺 𑀞𑀸𑀦𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀯𑀺𑀭𑀼𑀤𑁆𑀥𑁄 𑀘 𑀅𑀯𑀺𑀭𑀼𑀤𑁆𑀥𑁄 𑀘 𑀧𑀘𑁆𑀘𑀬𑁄 𑀮𑁄𑀓𑁂 𑀲𑀺𑀤𑁆𑀥𑁄. 𑀧𑀼𑀭𑀺𑀫𑀘𑀺𑀢𑁆𑀢𑀜𑁆𑀳𑀺 𑀅𑀧𑀭𑀘𑀺𑀢𑁆𑀢𑀲𑁆𑀲 𑀞𑀸𑀦𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄, 𑀧𑀼𑀭𑀺𑀫𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸 𑀘 𑀧𑀘𑁆𑀙𑀸𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀺𑀧𑁆𑀧𑀸𑀤𑀺𑀓𑀺𑀭𑀺𑀬𑀸𑀦𑀁. 𑀓𑀫𑁆𑀫𑀁 𑀭𑀽𑀧𑀲𑁆𑀲 𑀲𑀪𑀸𑀯𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄, 𑀔𑀻𑀭𑀸𑀤𑀻𑀦𑀺 𑀘 𑀤𑀥𑀺𑀆𑀤𑀻𑀦𑀁. 𑀆𑀮𑁄𑀓𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀓𑀺𑀘𑁆𑀘𑀯𑀺𑀭𑀼𑀤𑁆𑀥𑁄, 𑀕𑀼𑀴𑀸𑀤𑀬𑁄 𑀘 𑀆𑀲𑀯𑀸𑀤𑀻𑀦𑀁. 𑀘𑀓𑁆𑀔𑀼𑀭𑀽𑀧𑀸𑀤𑀬𑁄 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀞𑀸𑀦𑀸𑀯𑀺𑀭𑀼𑀤𑁆𑀥𑀸 𑀧𑀘𑁆𑀘𑀬𑀸 ¶ . 𑀧𑀼𑀭𑀺𑀫𑀚𑀯𑀦𑀸𑀤𑀬𑁄 𑀧𑀘𑁆𑀙𑀺𑀫𑀚𑀯𑀦𑀸𑀤𑀻𑀦𑀁 𑀲𑀪𑀸𑀯𑀸𑀯𑀺𑀭𑀼𑀤𑁆𑀥𑀸 𑀓𑀺𑀘𑁆𑀘𑀸𑀯𑀺𑀭𑀼𑀤𑁆𑀥𑀸 𑀘.

𑀬𑀣𑀸 𑀘 𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀸 𑀧𑀘𑁆𑀘𑀬𑀸 𑀲𑀺𑀤𑁆𑀥𑀸, 𑀏𑀯𑀁 𑀲𑀤𑀺𑀲𑀸𑀲𑀤𑀺𑀲𑀸𑀧𑀺. 𑀲𑀤𑀺𑀲𑀫𑁂𑀯 𑀳𑀺 𑀉𑀢𑀼𑀆𑀳𑀸𑀭𑀲𑀗𑁆𑀔𑀸𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀘 𑀲𑀸𑀮𑀺𑀨𑀮𑀸𑀤𑀻𑀦𑀁. 𑀅𑀲𑀤𑀺𑀲𑀫𑁆𑀧𑀺 𑀭𑀽𑀧𑀁 𑀅𑀭𑀽𑀧𑀲𑁆𑀲, 𑀅𑀭𑀽𑀧𑀜𑁆𑀘 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺; 𑀕𑁄𑀮𑁄𑀫𑀸𑀯𑀺𑀮𑁄𑀫𑀯𑀺𑀲𑀸𑀡𑀤𑀥𑀺𑀢𑀺𑀮𑀧𑀺𑀝𑁆𑀞𑀸𑀤𑀻𑀦𑀺 𑀘 𑀤𑀩𑁆𑀩𑀪𑀽𑀢𑀺𑀡𑀓𑀸𑀤𑀻𑀦𑀁. 𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀬𑁂 𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀸 𑀲𑀤𑀺𑀲𑀸𑀲𑀤𑀺𑀲𑀸 𑀧𑀘𑁆𑀘𑀬𑀸, 𑀦 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸𑀬𑁂𑀯. 𑀇𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸 𑀯𑀺𑀧𑀸𑀓𑀯𑀲𑁂𑀦 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀲𑀪𑀸𑀯𑀯𑀲𑁂𑀦 𑀘 𑀲𑀸𑀯𑀚𑁆𑀚𑀸𑀧𑀺 𑀲𑀫𑀸𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀏𑀢𑁂𑀲𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀬𑀣𑀸𑀦𑀼𑀭𑀽𑀧𑀁 𑀞𑀸𑀦𑀓𑀺𑀘𑁆𑀘𑀲𑀪𑀸𑀯𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀯𑀲𑁂𑀦 𑀲𑀤𑀺𑀲𑀸𑀲𑀤𑀺𑀲𑀧𑀘𑁆𑀘𑀬𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑁄 𑀘𑀲𑁆𑀲𑀸 𑀧𑀘𑁆𑀘𑀬𑀪𑀸𑀯𑁄 ‘‘𑀬𑀲𑁆𑀲 𑀳𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀳𑁂𑀢𑀼𑀪𑀽𑀢𑁂 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀏𑀯.

𑀅𑀧𑀺𑀘 𑀅𑀬𑀁 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑁋

𑀘𑀼𑀢𑀽𑀧𑀧𑀸𑀢𑁂 𑀲𑀁𑀲𑀸𑀭𑁂, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀮𑀓𑁆𑀔𑀡𑁂;

𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦-𑀥𑀫𑁆𑀫𑁂𑀲𑀼 𑀘 𑀯𑀺𑀫𑀼𑀬𑁆𑀳𑀢𑀺.

𑀅𑀪𑀺𑀲𑀗𑁆𑀔𑀭𑁄𑀢𑀺 ¶ 𑀲𑁄 𑀏𑀢𑁂, 𑀲𑀗𑁆𑀔𑀸𑀭𑁂 𑀢𑀺𑀯𑀺𑀥𑁂 𑀬𑀢𑁄;

𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀢𑁂𑀲𑀁, 𑀢𑀺𑀯𑀺𑀥𑀸𑀦𑀫𑁆𑀧𑀺 𑀬𑀁 𑀢𑀢𑁄𑀢𑀺.

𑀓𑀣𑀁 ¶ 𑀧𑀦 𑀬𑁄 𑀏𑀢𑁂𑀲𑀼 𑀯𑀺𑀫𑀼𑀬𑁆𑀳𑀢𑀺, 𑀲𑁄 𑀢𑀺𑀯𑀺𑀥𑁂𑀧𑁂𑀢𑁂 𑀲𑀗𑁆𑀔𑀸𑀭𑁂 𑀓𑀭𑁄𑀢𑀻𑀢𑀺 𑀘𑁂? 𑀘𑀼𑀢𑀺𑀬𑀸 𑀢𑀸𑀯 𑀯𑀺𑀫𑀽𑀴𑁆𑀳𑁄 𑀲𑀩𑁆𑀩𑀢𑁆𑀣 ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄 𑀫𑀭𑀡’’𑀦𑁆𑀢𑀺 𑀘𑀼𑀢𑀺𑀁 𑀅𑀕𑀡𑁆𑀳𑀦𑁆𑀢𑁄 ‘𑀲𑀢𑁆𑀢𑁄 𑀫𑀭𑀢𑀺, 𑀲𑀢𑁆𑀢𑀲𑁆𑀲 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦’𑀦𑁆𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺. 𑀉𑀧𑀧𑀸𑀢𑁂 𑀯𑀺𑀫𑀽𑀴𑁆𑀳𑁄 𑀲𑀩𑁆𑀩𑀢𑁆𑀣 ‘‘𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀚𑀸𑀢𑀻’’𑀢𑀺 𑀉𑀧𑀧𑀸𑀢𑀁 𑀅𑀕𑀡𑁆𑀳𑀦𑁆𑀢𑁄 ‘𑀲𑀢𑁆𑀢𑁄 𑀉𑀧𑀧𑀚𑁆𑀚𑀢𑀺, 𑀲𑀢𑁆𑀢𑀲𑁆𑀲 𑀦𑀯𑀲𑀭𑀻𑀭𑀧𑀸𑀢𑀼𑀪𑀸𑀯𑁄’𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺. 𑀲𑀁𑀲𑀸𑀭𑁂 𑀯𑀺𑀫𑀽𑀴𑁆𑀳𑁄 𑀬𑁄 𑀏𑀲 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀏𑀯𑀁 ¶ 𑀯𑀡𑁆𑀡𑀺𑀢𑁄 𑀲𑀁𑀲𑀸𑀭𑁄. 𑀢𑀁 𑀏𑀯𑀁 𑀅𑀕𑀡𑁆𑀳𑀦𑁆𑀢𑁄 ‘𑀅𑀬𑀁 𑀲𑀢𑁆𑀢𑁄 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀢𑀺, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀻’𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀮𑀓𑁆𑀔𑀡𑁂 𑀯𑀺𑀫𑀽𑀴𑁆𑀳𑁄 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘 𑀅𑀕𑀡𑁆𑀳𑀦𑁆𑀢𑁄 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀅𑀢𑁆𑀢𑀦𑀺𑀬𑀢𑁄 𑀥𑀼𑀯𑀢𑁄 𑀲𑀼𑀪𑀢𑁄 𑀲𑀼𑀔𑀢𑁄 𑀘 𑀯𑀺𑀓𑀧𑁆𑀧𑁂𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀯𑀺𑀫𑀽𑀴𑁆𑀳𑁄 𑀅𑀯𑀺𑀚𑁆𑀚𑀸𑀤𑀻𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀯𑀢𑁆𑀢𑀺𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀅𑀢𑁆𑀢𑀸 𑀚𑀸𑀦𑀸𑀢𑀺 𑀯𑀸 𑀦 𑀚𑀸𑀦𑀸𑀢𑀺 𑀯𑀸, 𑀲𑁄 𑀏𑀯 𑀓𑀭𑁄𑀢𑀺 𑀘 𑀓𑀸𑀭𑁂𑀢𑀺 𑀘 𑀲𑁄 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀡𑀼𑀇𑀲𑁆𑀲𑀭𑀸𑀤𑀬𑁄 𑀓𑀮𑀮𑀸𑀤𑀺𑀪𑀸𑀯𑁂𑀦 𑀲𑀭𑀻𑀭𑀁 𑀲𑀡𑁆𑀞𑀧𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀲𑁄 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄 𑀨𑀼𑀲𑀢𑀺 𑀯𑁂𑀤𑀺𑀬𑀢𑀺 𑀢𑀡𑁆𑀳𑀺𑀬𑀢𑀺 𑀉𑀧𑀸𑀤𑀺𑀬𑀢𑀺 𑀖𑀝𑀺𑀬𑀢𑀺, 𑀲𑁄 𑀧𑀼𑀦 𑀪𑀯𑀦𑁆𑀢𑀭𑁂 𑀪𑀯𑀢𑀻’’𑀢𑀺 𑀯𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀯𑀸 𑀯𑀺𑀓𑀧𑁆𑀧𑁂𑀢𑀺. 𑀲𑁄 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑁄 𑀏𑀯𑀁 𑀯𑀺𑀓𑀧𑁆𑀧𑁂𑀦𑁆𑀢𑁄 𑀬𑀣𑀸 𑀦𑀸𑀫 𑀅𑀦𑁆𑀥𑁄 𑀧𑀣𑀯𑀺𑀬𑀁 𑀯𑀺𑀘𑀭𑀦𑁆𑀢𑁄 𑀫𑀕𑁆𑀕𑀫𑁆𑀧𑀺 𑀅𑀫𑀕𑁆𑀕𑀫𑁆𑀧𑀺 𑀣𑀮𑀫𑁆𑀧𑀺 𑀦𑀺𑀦𑁆𑀦𑀫𑁆𑀧𑀺 𑀲𑀫𑀫𑁆𑀧𑀺 𑀯𑀺𑀲𑀫𑀫𑁆𑀧𑀺 𑀧𑀝𑀺𑀧𑀚𑁆𑀚𑀢𑀺, 𑀏𑀯𑀁 𑀧𑀼𑀜𑁆𑀜𑀫𑁆𑀧𑀺 𑀅𑀧𑀼𑀜𑁆𑀜𑀫𑁆𑀧𑀺 𑀆𑀦𑁂𑀜𑁆𑀚𑀫𑁆𑀧𑀺 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀬𑀣𑀸𑀧𑀺 𑀦𑀸𑀫 𑀚𑀘𑁆𑀘𑀦𑁆𑀥𑁄, 𑀦𑀭𑁄 𑀅𑀧𑀭𑀺𑀦𑀸𑀬𑀓𑁄;

𑀏𑀓𑀤𑀸 𑀬𑀸𑀢𑀺 𑀫𑀕𑁆𑀕𑁂𑀦, 𑀓𑀼𑀫𑁆𑀫𑀕𑁆𑀕𑁂𑀦𑀸𑀧𑀺 𑀏𑀓𑀤𑀸.

𑀲𑀁𑀲𑀸𑀭𑁂 ¶ 𑀲𑀁𑀲𑀭𑀁 𑀩𑀸𑀮𑁄, 𑀢𑀣𑀸 𑀅𑀧𑀭𑀺𑀦𑀸𑀬𑀓𑁄;

𑀓𑀭𑁄𑀢𑀺 𑀏𑀓𑀤𑀸 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀫𑀧𑀺 𑀏𑀓𑀤𑀸.

𑀬𑀤𑀸 ¶ 𑀜𑀢𑁆𑀯𑀸 𑀘 𑀲𑁄 𑀥𑀫𑁆𑀫𑀁, 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀲𑁆𑀲𑀢𑀺;

𑀢𑀤𑀸 𑀅𑀯𑀺𑀚𑁆𑀚𑀽𑀧𑀲𑀫𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻𑀢𑀺.

𑀅𑀬𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑁄.

𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑁄

𑁨𑁨𑁭. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀲𑀳𑁂𑀢𑀼𑀓𑀸𑀦𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀸𑀦𑀻𑀢𑀺 𑀩𑀸𑀯𑀻𑀲𑀢𑀺𑀯𑀺𑀥𑀁 ¶ 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀲𑀩𑁆𑀩𑀸𑀦𑀺𑀧𑀺 𑀩𑀸𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀯𑀝𑁆𑀝𑀓𑀣𑀸𑀬𑀁 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀳𑁄𑀢𑀻’𑀢𑀺? 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀯𑀺𑀧𑀸𑀓𑀜𑁆𑀳𑁂𑀢𑀁, 𑀯𑀺𑀧𑀸𑀓𑀜𑁆𑀘 𑀦 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁; 𑀦 𑀘 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 𑁋 ‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’𑀢𑀺.

𑀓𑀢𑀭𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀓𑀢𑀭𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑁂? 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀢𑀸𑀯 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 ¶ 𑀧𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀫𑀦𑁄𑀯𑀺𑀜𑁆𑀜𑀸𑀡𑁂 𑀏𑀓𑀸 𑀫𑀦𑁄𑀥𑀸𑀢𑀼, 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀓𑀸𑀫𑀸𑀯𑀘𑀭𑀫𑀳𑀸𑀯𑀺𑀧𑀸𑀓𑀸𑀦𑀻𑀢𑀺 𑀲𑁄𑀴𑀲. 𑀬𑀣𑀸𑀳 𑁋

‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 ¶ 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦𑀸’’𑀢𑀺 (𑀥. 𑀲. 𑁪𑁩𑁧, 𑁪𑁯𑁮).

𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀦 𑀧𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀺. 𑀬𑀣𑀸𑀳 𑁋

‘‘𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁪𑁯𑁯).

𑀏𑀯𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀏𑀓𑀯𑀻𑀲𑀢𑀺𑀯𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺.

𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀏𑀓𑀸 𑀫𑀦𑁄𑀥𑀸𑀢𑀼, 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀯𑀁 𑀲𑀢𑁆𑀢𑀯𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁 ¶ , 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼, 𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀻’’𑀢𑀺 (𑀥. 𑀲. 𑁫𑁫𑁬).

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀧𑀦 𑀘𑀢𑁆𑀢𑀸𑀭𑀺 𑀅𑀭𑀽𑀧𑀯𑀺𑀧𑀸𑀓𑀸𑀦𑀻𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺. 𑀬𑀣𑀸𑀳 𑁋

‘‘𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁫𑁦𑁧).

𑀏𑀯𑀁 𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀢𑀁 𑀜𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀏𑀯𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀩𑁆𑀩𑀫𑁂𑀯 𑀳𑀺 𑀇𑀤𑀁 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑀺𑀥𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀣 ¶ 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑀸𑀦𑀺 𑀢𑁂𑀭𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀺𑀬𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀲𑁂𑀲𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺.

𑀓𑀣𑀁? 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀢𑀸𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑁂𑀦 𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑁂𑀦 𑀯𑀸 𑀦𑀺𑀩𑁆𑀩𑀢𑁆𑀢𑀲𑁆𑀲 𑀬𑀣𑀸𑀓𑁆𑀓𑀫𑀁 𑀧𑀭𑀺𑀧𑀸𑀓𑀫𑀼𑀧𑀕𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀓𑁆𑀔𑀸𑀤𑀻𑀦𑀁 𑀆𑀧𑀸𑀣𑀕𑀢𑀁 𑀇𑀝𑁆𑀞𑀁 𑀯𑀸 𑀇𑀝𑁆𑀞𑀫𑀚𑁆𑀛𑀢𑁆𑀢𑀁 𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀘𑀓𑁆𑀔𑀸𑀤𑀺𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀅𑀦𑀺𑀝𑁆𑀞𑀁 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀁 𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀤𑀲𑀸𑀧𑀺 𑀘𑁂𑀢𑀸𑀦𑀺 𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀢𑁆𑀣𑀼𑀝𑁆𑀞𑀸𑀦𑀸𑀦𑀺 𑀦𑀺𑀬𑀢𑀓𑀺𑀘𑁆𑀘𑀸𑀦𑁂𑀯 𑀘 𑀪𑀯𑀦𑁆𑀢𑀺.

𑀢𑀢𑁄 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀁 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀢𑁂𑀲𑀜𑁆𑀜𑁂𑀯 𑀆𑀭𑀫𑁆𑀫𑀡𑀫𑀸𑀭𑀩𑁆𑀪 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀅𑀦𑀦𑁆𑀢𑀭𑀁 𑀅𑀓𑀼𑀲𑀮𑀯𑀺𑀧𑀸𑀓𑀸 ¶ . 𑀇𑀤𑀜𑁆𑀘 𑀧𑀦 𑀤𑁆𑀯𑀬𑀁 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀦𑀺𑀬𑀢𑀯𑀢𑁆𑀣𑀼𑀝𑁆𑀞𑀸𑀦𑀁 𑀦𑀺𑀬𑀢𑀓𑀺𑀘𑁆𑀘𑀜𑁆𑀘 𑀳𑁄𑀢𑀺.

𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀧𑀦 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀢𑀲𑁆𑀲𑀸 𑀏𑀯 ¶ 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀘 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀯𑀻𑀣𑀺𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀯𑀦𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀧𑀯𑀢𑁆𑀢𑀢𑀺. 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀧𑀦 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑁂 𑀤𑁆𑀯𑁂 𑀏𑀯 𑀘𑀺𑀢𑁆𑀢𑀯𑀸𑀭𑀸 𑀆𑀕𑀢𑀸. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀘 𑀧𑀺𑀝𑁆𑀞𑀺𑀪𑀯𑀗𑁆𑀕𑀦𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺, 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀦𑀺𑀬𑀢𑀯𑀢𑁆𑀣𑀼𑀓𑀁 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀜𑁆𑀘 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯 𑀢𑁂𑀭𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀺𑀬𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀦 𑀧𑀯𑀢𑁆𑀢𑀢𑀺.

𑀧𑀯𑀢𑁆𑀢𑀺𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀢𑀸𑀯 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀜𑁆𑀘𑀤𑁆𑀯𑀸𑀭𑁂 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀽𑀦𑀁 𑀅𑀦𑀦𑁆𑀢𑀭𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 ¶ , 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁, 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸 𑀦𑀺𑀬𑀢𑀯𑀢𑁆𑀣𑀼𑀓𑀸 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺.

𑀅𑀝𑁆𑀞 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁, 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀦𑀺 𑀦𑀺𑀬𑀢𑀯𑀢𑁆𑀣𑀼𑀓𑀸𑀦𑀺 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺.

𑀧𑀜𑁆𑀘 𑀭𑀽𑀧𑀸𑀯𑀘𑀭𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀅𑀭𑀽𑀧𑀸𑀯𑀘𑀭𑀸𑀦𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀓𑀺𑀘𑁆𑀘𑀤𑁆𑀯𑀬𑀁 𑀲𑀸𑀥𑀬𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀭𑀽𑀧𑀸𑀯𑀘𑀭𑀸𑀦𑀺 𑀦𑀺𑀬𑀢𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺, 𑀇𑀢𑀭𑀸𑀦𑀺 𑀅𑀯𑀢𑁆𑀣𑀼𑀓𑀸𑀦𑀺 𑀦𑀺𑀬𑀢𑀸𑀭𑀫𑁆𑀫𑀡𑀸𑀦𑀺 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺 ¶ 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 𑀢𑀸𑀯 𑀩𑀸𑀢𑁆𑀢𑀺𑀁𑀲𑀯𑀺𑀥𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀺𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀭𑀲𑁆𑀲 𑀢𑁂 𑀢𑁂 𑀲𑀗𑁆𑀔𑀸𑀭𑀸 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀬𑀸𑀦𑁂𑀢𑀸𑀦𑀺 𑀏𑀓𑀸𑀤𑀲 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀼 𑀏𑀓𑀫𑁆𑀧𑀺 𑀭𑀽𑀧𑀸𑀭𑀽𑀧𑀪𑀯𑁂 𑀢𑀤𑀸𑀭𑀫𑁆𑀫𑀡𑀁 ¶ 𑀳𑀼𑀢𑁆𑀯𑀸 𑀦 𑀧𑀯𑀢𑁆𑀢𑀢𑀺. 𑀓𑀲𑁆𑀫𑀸? 𑀩𑀻𑀚𑀸𑀪𑀸𑀯𑀸. 𑀢𑀢𑁆𑀣 𑀳𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀧𑀝𑀺𑀲𑀦𑁆𑀥𑀺𑀩𑀻𑀚𑀁 𑀦𑀢𑁆𑀣𑀺, 𑀬𑀁 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀬𑀁 𑀢𑀲𑁆𑀲 𑀚𑀦𑀓𑀁 𑀪𑀯𑁂𑀬𑁆𑀬. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑁆𑀧𑀺 𑀭𑀽𑀧𑀪𑀯𑁂 𑀅𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦; 𑀇𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀤𑁆𑀯𑀸𑀭𑀯𑀻𑀣𑀺𑀪𑁂𑀤𑁂 𑀘𑀺𑀢𑁆𑀢𑀦𑀺𑀬𑀫𑀢𑁄 𑀘.

𑀬𑀣𑀸 𑀘𑁂𑀢𑀁 𑀢𑀤𑀸𑀭𑀫𑁆𑀫𑀡𑀁 𑀏𑀓𑀦𑁆𑀢𑁂𑀦 𑀭𑀽𑀧𑀸𑀭𑀽𑀧𑀪𑀯𑁂 𑀦𑀧𑁆𑀧𑀯𑀢𑁆𑀢𑀢𑀺 𑀢𑀣𑀸 𑀲𑀩𑁆𑀩𑁂𑀧𑀺 𑀅𑀓𑀸𑀫𑀸𑀯𑀘𑀭𑁂 𑀥𑀫𑁆𑀫𑁂 𑀦𑀸𑀦𑀼𑀩𑀦𑁆𑀥𑀢𑀺. 𑀓𑀲𑁆𑀫𑀸? 𑀅𑀚𑀦𑀓𑀢𑁆𑀢𑀸 𑀘𑁂𑀯 𑀚𑀦𑀓𑀲𑁆𑀲 𑀘 𑀅𑀲𑀤𑀺𑀲𑀢𑁆𑀢𑀸. 𑀢𑀜𑁆𑀳𑀺 𑀬𑀣𑀸 𑀦𑀸𑀫 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀕𑀦𑁆𑀢𑀼𑀓𑀸𑀫𑁄 𑀢𑀭𑀼𑀡𑀤𑀸𑀭𑀓𑁄 𑀅𑀢𑁆𑀢𑀦𑁄 𑀚𑀦𑀓𑀁 𑀧𑀺𑀢𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀺𑀢𑀼𑀲𑀤𑀺𑀲𑀁 𑀳𑀺𑀢𑀓𑀸𑀫𑀁 𑀜𑀸𑀢𑀺𑀁 𑀅𑀗𑁆𑀕𑀼𑀮𑀺𑀬𑀁 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀜𑁆𑀜𑀁 𑀭𑀸𑀚𑀧𑀼𑀭𑀺𑀲𑀸𑀤𑀺𑀁, 𑀢𑀣𑀸 𑀏𑀢𑀫𑁆𑀧𑀺 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀁 𑀲𑀪𑀸𑀕𑀢𑀸𑀬 𑀅𑀢𑁆𑀢𑀦𑁄 𑀚𑀦𑀓𑀁 𑀧𑀺𑀢𑀭𑀁 𑀯𑀸 𑀧𑀺𑀢𑀼𑀲𑀤𑀺𑀲𑀁 𑀯𑀸 𑀓𑀸𑀫𑀸𑀯𑀘𑀭𑀚𑀯𑀦𑀫𑁂𑀯 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀜𑁆𑀜𑀁 𑀫𑀳𑀕𑁆𑀕𑀢𑀁 𑀅𑀦𑀼𑀢𑁆𑀢𑀭𑀁 𑀯𑀸.

𑀬𑀣𑀸 ¶ 𑀘𑁂𑀢𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑁂 𑀥𑀫𑁆𑀫𑁂 𑀦𑀸𑀦𑀼𑀩𑀦𑁆𑀥𑀢𑀺, 𑀢𑀣𑀸 𑀬𑀤𑀸 𑀏𑀢𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺 𑀢𑀤𑀸 𑀢𑁂𑀧𑀺 𑀦𑀸𑀦𑀼𑀩𑀦𑁆𑀥𑀢𑀺. 𑀓𑀲𑁆𑀫𑀸? 𑀅𑀧𑀭𑀺𑀘𑀺𑀢𑀤𑁂𑀲𑀢𑁆𑀢𑀸 𑀅𑀘𑁆𑀘𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘. 𑀢𑀜𑁆𑀳𑀺 𑀬𑀣𑀸 𑀧𑀺𑀢𑀭𑀁 𑀯𑀸 𑀧𑀺𑀢𑀼𑀲𑀤𑀺𑀲𑀁 𑀯𑀸 𑀜𑀸𑀢𑀺𑀁 𑀅𑀦𑀼𑀩𑀦𑁆𑀥𑀦𑁆𑀢𑁄𑀧𑀺 𑀢𑀭𑀼𑀡𑀤𑀸𑀭𑀓𑁄 𑀖𑀭𑀤𑁆𑀯𑀸𑀭𑀅𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀺𑀫𑁆𑀳𑀺 𑀧𑀭𑀺𑀘𑀺𑀢𑁂𑀬𑁂𑀯 𑀤𑁂𑀲𑁂 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀭𑀜𑁆𑀜𑀁 𑀯𑀸 𑀬𑀼𑀤𑁆𑀥𑀪𑀽𑀫𑀺𑀁 𑀯𑀸 𑀕𑀘𑁆𑀙𑀦𑁆𑀢𑀁; 𑀏𑀯𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀅𑀦𑀼𑀩𑀦𑁆𑀥𑀦𑁆𑀢𑀫𑁆𑀧𑀺 𑀅𑀫𑀳𑀕𑁆𑀕𑀢𑀸𑀤𑀺𑀫𑁆𑀳𑀺 𑀧𑀭𑀺𑀘𑀺𑀢𑁂𑀬𑁂𑀯 𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑁂 𑀥𑀫𑁆𑀫𑁂 𑀅𑀦𑀼𑀩𑀦𑁆𑀥𑀢𑀺, 𑀦 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂𑀢𑀺.

𑀬𑀲𑁆𑀫𑀸 𑀘𑀲𑁆𑀲 ‘‘𑀲𑀩𑁆𑀩𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀓𑀺𑀭𑀺𑀬𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀏𑀯𑀁 𑀅𑀘𑁆𑀘𑀦𑁆𑀢𑀧𑀭𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸𑀧𑁂𑀢𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀭𑀫𑁆𑀫𑀡𑁂 ¶ 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀧𑀺 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀺𑀁 𑀯𑀸 𑀇𑀫𑀸𑀬 𑀬𑀼𑀢𑁆𑀢𑀺𑀓𑀣𑀸𑀬? 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀏𑀓𑀦𑁆𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 𑀏𑀓𑀸𑀤𑀲 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀦𑀸𑀫𑀕𑁄𑀢𑁆𑀢𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀢𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀥𑀫𑁆𑀫𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑁂𑀲𑀼 ¶ 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀅𑀪𑀺𑀜𑁆𑀜𑀸𑀜𑀸𑀡𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺. 𑀓𑀸𑀫𑀸𑀯𑀘𑀭𑁂 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀺, 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀬𑁂𑀯 𑀮𑀩𑁆𑀪𑀢𑀺, 𑀮𑀩𑁆𑀪𑀫𑀸𑀦𑀜𑁆𑀘 𑀓𑀸𑀫𑀸𑀯𑀘𑀭𑁂𑀬𑁂𑀯 𑀮𑀩𑁆𑀪𑀢𑀺. 𑀭𑀽𑀧𑀸𑀭𑀽𑀧𑀪𑀯𑁂 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑁂𑀲𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀦 𑀧𑀯𑀢𑁆𑀢𑀢𑀻’’𑀢𑀺, 𑀢𑀁 𑀅𑀢𑀺𑀲𑀁𑀔𑀺𑀢𑁆𑀢𑀢𑁆𑀢𑀸 𑀤𑀼𑀩𑁆𑀩𑀺𑀚𑀸𑀦𑀁. 𑀢𑁂𑀦𑀲𑁆𑀲 𑀯𑀺𑀢𑁆𑀣𑀸𑀭𑀦𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀘𑁆𑀘𑀢𑀺 𑁋 ‘‘𑀓𑀢𑀺 𑀧𑀝𑀺𑀲𑀦𑁆𑀥𑀺𑀬𑁄? 𑀓𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺? 𑀓𑁂𑀦 𑀓𑀢𑁆𑀣 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺? 𑀓𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡’’𑀦𑁆𑀢𑀺?

𑀅𑀲𑀜𑁆𑀜𑀧𑀝𑀺𑀲𑀦𑁆𑀥𑀺𑀬𑀸 ¶ 𑀲𑀤𑁆𑀥𑀺𑀁 𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀬𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑁂𑀯 𑀏𑀓𑀽𑀦𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺. 𑀢𑀢𑁆𑀣 𑀅𑀓𑀼𑀲𑀮𑀯𑀺𑀧𑀸𑀓𑀸𑀬 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀓𑀼𑀲𑀮𑀯𑀺𑀧𑀸𑀓𑀸𑀬 𑀫𑀦𑀼𑀲𑁆𑀲𑀮𑁄𑀓𑁂 𑀚𑀘𑁆𑀘𑀦𑁆𑀥𑀚𑀸𑀢𑀺𑀩𑀥𑀺𑀭𑀚𑀸𑀢𑀺𑀉𑀫𑁆𑀫𑀢𑁆𑀢𑀓𑀏𑀴𑀫𑀽𑀕𑀦𑀧𑀼𑀁𑀲𑀓𑀸𑀤𑀻𑀦𑀁. 𑀅𑀝𑁆𑀞𑀳𑀺 𑀲𑀳𑁂𑀢𑀼𑀓𑀫𑀳𑀸𑀯𑀺𑀧𑀸𑀓𑁂𑀳𑀺 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀧𑀜𑁆𑀘𑀳𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂, 𑀘𑀢𑀽𑀳𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀅𑀭𑀽𑀧𑀮𑁄𑀓𑁂𑀢𑀺. 𑀬𑁂𑀦 𑀘 𑀬𑀢𑁆𑀣 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀲𑀸 𑀏𑀯 𑀢𑀲𑁆𑀲𑀸 𑀅𑀦𑀼𑀭𑀽𑀧𑀧𑀝𑀺𑀲𑀦𑁆𑀥𑀺 𑀦𑀸𑀫.

𑀲𑀗𑁆𑀔𑁂𑀧𑀢𑁄 𑀧𑀝𑀺𑀲𑀦𑁆𑀥𑀺𑀬𑀸 𑀢𑀻𑀡𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺 𑁋 𑀓𑀫𑁆𑀫𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 ¶ , 𑀕𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀁 𑀦𑀸𑀫 𑀆𑀬𑀽𑀳𑀺𑀢𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀦𑀸𑀫 𑀬𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀫𑁆𑀫𑀁 𑀆𑀬𑀽𑀳𑀢𑀺. 𑀢𑀢𑁆𑀣 𑀅𑀢𑀻𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑀲𑁆𑀫𑀺𑀫𑁆𑀧𑀺 𑀓𑀫𑁆𑀫𑁂 𑀓𑀢𑁂 𑀢𑀲𑁆𑀫𑀺𑀁 𑀔𑀡𑁂 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀢𑀢𑁆𑀭𑀺𑀤𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑁂 𑀯𑀢𑁆𑀣𑀼 𑁋 𑀕𑁄𑀧𑀓𑀲𑀻𑀯𑀮𑀻 𑀓𑀺𑀭 𑀦𑀸𑀫 𑀢𑀸𑀮𑀧𑀺𑀝𑁆𑀞𑀺𑀓𑀯𑀺𑀳𑀸𑀭𑁂 𑀘𑁂𑀢𑀺𑀬𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀘𑁂𑀢𑀺𑀬𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀓𑀸𑀮𑀁𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀜𑁆𑀜𑀸 𑀲𑀫𑁆𑀫𑀽𑀴𑁆𑀳𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀳𑁄𑀢𑀺. 𑀧𑀭𑀫𑁆𑀫𑀼𑀔𑀁 𑀕𑀘𑁆𑀙𑀦𑁆𑀢𑀲𑁆𑀲 𑀳𑀺 𑀧𑀘𑁆𑀙𑀢𑁄 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀺 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀉𑀤𑀓𑁂 𑀑𑀲𑀻𑀤𑀸𑀧𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀏𑀯𑀭𑀽𑀧𑁂𑀧𑀺 𑀓𑀸𑀮𑁂 𑀅𑀜𑁆𑀜𑀢𑀭𑀁 ¶ 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀉𑀧𑀝𑁆𑀞𑀸𑀢𑀺. 𑀅𑀜𑁆𑀜𑀁 𑀮𑀳𑀼𑀓𑀫𑀭𑀡𑀁 𑀦𑀸𑀫 𑀅𑀢𑁆𑀣𑀺. 𑀦𑀺𑀔𑀸𑀤𑀦𑀤𑀡𑁆𑀟𑀓𑀫𑀢𑁆𑀣𑀓𑀲𑁆𑀫𑀺𑀜𑁆𑀳𑀺 𑀦𑀺𑀮𑀻𑀦𑀫𑀓𑁆𑀔𑀺𑀓𑀁 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀧𑀺𑀲𑀦𑁆𑀢𑀺. 𑀏𑀯𑀭𑀽𑀧𑁂𑀧𑀺 𑀓𑀸𑀮𑁂 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀧𑀺𑀲𑀺𑀬𑀫𑀸𑀦𑀸𑀬 𑀧𑀦 𑀫𑀓𑁆𑀔𑀺𑀓𑀸𑀬 𑀧𑀞𑀫𑀁 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀦𑀸𑀯𑀝𑁆𑀝𑁂𑀢𑀺, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑁂𑀯 𑀆𑀯𑀝𑁆𑀝𑁂𑀢𑀺. 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺. 𑀢𑀢𑁄 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑀦𑁆𑀢𑀻𑀭𑀡𑀁, 𑀯𑁄𑀝𑁆𑀞𑀧𑀦𑀦𑁆𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺. 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀇𑀤𑀁 𑀓𑀺𑀫𑀢𑁆𑀣𑀁 𑀆𑀪𑀢𑀁? 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑀬𑁄 𑀦𑀸𑀫 𑀏𑀯𑀁 𑀮𑀳𑀼𑀓𑁄𑀢𑀺 𑀤𑀻𑀧𑀦𑀢𑁆𑀣𑀁.

𑀕𑀢𑀺𑀦𑀺𑀫𑀺𑀢𑁆𑀢𑀁 ¶ 𑀦𑀸𑀫 𑀦𑀺𑀩𑁆𑀩𑀢𑁆𑀢𑀦𑀓𑀑𑀓𑀸𑀲𑁂 𑀏𑀓𑁄 𑀯𑀡𑁆𑀡𑁄 𑀉𑀧𑀝𑁆𑀞𑀸𑀢𑀺. 𑀢𑀢𑁆𑀣 𑀦𑀺𑀭𑀬𑁂 𑀉𑀧𑀝𑁆𑀞𑀳𑀦𑁆𑀢𑁂 𑀮𑁄𑀳𑀓𑀼𑀫𑁆𑀪𑀺𑀲𑀤𑀺𑀲𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑀝𑁆𑀞𑀳𑀦𑁆𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀓𑀫𑁆𑀩𑀮𑀬𑀸𑀦𑀲𑀤𑀺𑀲𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀤𑁂𑀯𑀮𑁄𑀓𑁂 𑀉𑀧𑀝𑁆𑀞𑀳𑀦𑁆𑀢𑁂 𑀓𑀧𑁆𑀧𑀭𑀼𑀓𑁆𑀔𑀯𑀺𑀫𑀸𑀦𑀲𑀬𑀦𑀸𑀤𑀻𑀦𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀯𑀁 𑀓𑀫𑁆𑀫𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀕𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀧𑀝𑀺𑀲𑀦𑁆𑀥𑀺𑀬𑀸 𑀢𑀻𑀡𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀧𑀝𑀺𑀲𑀦𑁆𑀥𑀺𑀬𑀸 𑀢𑀻𑀡𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺? 𑀅𑀢𑀻𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 ¶ , 𑀦𑀯𑀢𑁆𑀢𑀩𑁆𑀩𑀜𑁆𑀘. 𑀅𑀲𑀜𑁆𑀜𑀻𑀧𑀝𑀺𑀲𑀦𑁆𑀥𑀺 𑀅𑀦𑀸𑀭𑀫𑁆𑀫𑀡𑀸𑀢𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀧𑀝𑀺𑀲𑀦𑁆𑀥𑀻𑀦𑀁 𑀅𑀢𑀻𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀅𑀢𑀻𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸. 𑀲𑁂𑀲𑀸𑀦𑀁 𑀦𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀢𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀧𑀦 𑀧𑀝𑀺𑀲𑀦𑁆𑀥𑀺 𑀬𑀲𑁆𑀫𑀸 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀯𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀲𑁆𑀲 𑀯𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀫𑁂𑀯 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀧𑀦 𑀘𑀼𑀢𑁆𑀢𑀺𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀁 𑀢𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀢𑀸𑀯 𑀞𑀺𑀢𑀲𑁆𑀲 𑀧𑀸𑀧𑀓𑀫𑁆𑀫𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 ‘‘𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁩.𑁨𑁪𑁮) 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀬𑀣𑀽𑀧𑀘𑀺𑀢𑀁 𑀧𑀸𑀧𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀬 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀬 𑀲𑀼𑀤𑁆𑀥𑀸𑀬 𑀯𑀸 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯 𑀆𑀧𑀸𑀣𑀕𑀢𑀁 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢𑀁 ¶ 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀫𑁆𑀫𑀯𑀲𑁂𑀦 𑀦𑀭𑀓𑀸𑀤𑀻𑀲𑀼 𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓𑀁 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀏𑀓𑀁 𑀆𑀯𑀚𑁆𑀚𑀦𑀁, 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺 𑀢𑀻𑀡𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 ¶ 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀅𑀣𑀸𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁆𑀯𑀸𑀭𑁂 ¶ 𑀭𑀸𑀕𑀸𑀤𑀺𑀳𑁂𑀢𑀼𑀪𑀽𑀢𑀁 𑀳𑀻𑀦𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀯𑁄𑀝𑁆𑀞𑀩𑁆𑀩𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺, 𑀆𑀯𑀚𑁆𑀚𑀦𑀁, 𑀤𑀲𑁆𑀲𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑀦𑁆𑀢𑀻𑀭𑀡𑀁, 𑀯𑁄𑀝𑁆𑀞𑀩𑁆𑀩𑀦𑀁, 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺, 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀅𑀣𑀸𑀯𑀲𑁂𑀲𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀁 𑀬𑁂𑀯 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺. 𑀏𑀲 𑀢𑀸𑀯 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑀤𑀼𑀕𑁆𑀕𑀢𑀺𑀬𑀁 𑀞𑀺𑀢𑀲𑁆𑀲 𑀧𑀦 𑀉𑀧𑀘𑀺𑀢𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀓𑀡𑁆𑀳𑀧𑀓𑁆𑀔𑁂 𑀲𑀼𑀓𑁆𑀓𑀧𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑀲𑀼𑀕𑀢𑀺𑀬𑀁 𑀞𑀺𑀢𑀲𑁆𑀲 𑀧𑀦 𑀉𑀧𑀘𑀺𑀢𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲 ‘‘𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀬𑀣𑀽𑀧𑀘𑀺𑀢𑀁 𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀜𑁆𑀘 𑀔𑁄 𑀉𑀧𑀘𑀺𑀢𑀓𑀸𑀫𑀸𑀯𑀘𑀭𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲𑁂𑀯. 𑀉𑀧𑀘𑀺𑀢𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 ¶ 𑀧𑀦 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀬 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀬 𑀲𑀼𑀤𑁆𑀥𑀸𑀬 𑀯𑀸 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯 𑀆𑀧𑀸𑀣𑀕𑀢𑀁 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢𑀁 𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀯𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 ¶ 𑀫𑀭𑀡𑀲𑀫𑀬𑁂 𑀓𑀸𑀫𑀸𑀯𑀘𑀭𑀸𑀦𑀯𑀚𑁆𑀚𑀓𑀫𑁆𑀫𑀯𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀲𑀗𑁆𑀔𑀸𑀢𑀁 𑀯𑀸 𑀤𑁂𑀯𑀮𑁄𑀓𑁂 𑀉𑀬𑁆𑀬𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀯𑀡𑁆𑀡𑀲𑀗𑁆𑀔𑀸𑀢𑀁 𑀯𑀸 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 ¶ 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀲𑁆𑀲 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑁂 𑀤𑀲𑁆𑀲𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀘𑀼𑀢𑀺𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀜𑀸𑀢𑀓𑀸 ‘𑀅𑀬𑀁, 𑀢𑀸𑀢, 𑀢𑀯𑀢𑁆𑀣𑀸𑀬 𑀩𑀼𑀤𑁆𑀥𑀧𑀽𑀚𑀸 𑀓𑀭𑀻𑀬𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’𑀢𑀺 𑀯𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀥𑀚𑀧𑀝𑀸𑀓𑀸𑀤𑀺𑀯𑀲𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑀽𑀭𑀺𑀬𑀧𑀽𑀚𑀸𑀤𑀺𑀯𑀲𑁂𑀦 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀥𑀽𑀫𑀯𑀸𑀲𑀕𑀦𑁆𑀥𑀸𑀤𑀺𑀯𑀲𑁂𑀦 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 ‘𑀇𑀤𑀁, 𑀢𑀸𑀢, 𑀲𑀸𑀬𑀲𑁆𑀲𑀼, 𑀢𑀯𑀢𑁆𑀣𑀸𑀬 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫’𑀦𑁆𑀢𑀺 𑀯𑀢𑁆𑀯𑀸 𑀫𑀥𑀼𑀨𑀸𑀡𑀺𑀢𑀸𑀤𑀺𑀯𑀲𑁂𑀦 𑀭𑀲𑀸𑀭𑀫𑁆𑀫𑀡𑀁 𑀯𑀸 ‘𑀇𑀤𑀁, 𑀢𑀸𑀢, 𑀨𑀼𑀲𑀲𑁆𑀲𑀼, 𑀢𑀯𑀢𑁆𑀣𑀸𑀬 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫’𑀦𑁆𑀢𑀺 𑀯𑀢𑁆𑀯𑀸 𑀘𑀻𑀦𑀧𑀝𑀲𑁄𑀫𑀸𑀭𑀧𑀝𑀸𑀤𑀺𑀯𑀲𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑀲𑀁𑀳𑀭𑀦𑁆𑀢𑀺. 𑀢𑀲𑁆𑀲 𑀢𑀲𑁆𑀫𑀺𑀁 𑀆𑀧𑀸𑀣𑀕𑀢𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀯𑁄𑀝𑁆𑀞𑀧𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁, 𑀢𑀤𑀯𑀲𑀸𑀦𑁂 𑀢𑀲𑁆𑀫𑀺𑀜𑁆𑀜𑁂𑀯 𑀏𑀓𑀘𑀺𑀢𑁆𑀢𑀓𑁆𑀔𑀡𑀝𑁆𑀞𑀺𑀢𑀺𑀓𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀧𑀦 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀫𑀳𑀕𑁆𑀕𑀢𑀲𑁆𑀲 𑀲𑀼𑀕𑀢𑀺𑀬𑀁 𑀞𑀺𑀢𑀲𑁆𑀲 𑀫𑀭𑀡𑀲𑀫𑀬𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀫𑁆𑀫-𑀓𑀫𑁆𑀫𑀦𑀺𑀫𑀺𑀢𑁆𑀢-𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀫𑀳𑀕𑁆𑀕𑀢𑀘𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀧𑀡𑀻𑀢𑀫𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀯𑁄𑀝𑁆𑀞𑀩𑁆𑀩𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀳𑀕𑁆𑀕𑀢𑀕𑀢𑀺𑀓𑀸𑀦𑀁 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀚𑀯𑀦𑀸𑀦𑀦𑁆𑀢𑀭𑀁𑀬𑁂𑀯 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 ¶ . 𑀢𑀲𑁆𑀲𑀸𑀯𑀲𑀸𑀦𑁂 𑀓𑀸𑀫𑀸𑀯𑀘𑀭𑀫𑀳𑀕𑁆𑀕𑀢𑀲𑀼𑀕𑀢𑀻𑀦𑀁 𑀅𑀜𑁆𑀜𑀢𑀭𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀬𑀣𑀽𑀧𑀝𑁆𑀞𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 ¶ 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀦𑀁 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀆𑀭𑀼𑀧𑁆𑀧𑀘𑀼𑀢𑀺𑀬𑀸𑀧𑀺 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑀤𑀼𑀕𑁆𑀕𑀢𑀺𑀬𑀁 ¶ 𑀞𑀺𑀢𑀲𑁆𑀲 𑀧𑀦 𑀧𑀸𑀧𑀓𑀫𑁆𑀫𑀺𑀦𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂, 𑀧𑀜𑁆𑀘𑀤𑁆𑀯𑀸𑀭𑁂 𑀧𑀦 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀘𑀼𑀢𑀺𑀘𑀺𑀢𑁆𑀢𑀸𑀯𑀲𑀸𑀦𑁂 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀲𑁆𑀲𑀸𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺.

𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀏𑀯𑀁 𑁋

𑀧𑀯𑀢𑁆𑀢𑀫𑀸𑀦𑀁 𑀲𑀦𑁆𑀥𑀺𑀫𑁆𑀳𑀺, 𑀤𑁆𑀯𑀺𑀥𑀸 𑀓𑀫𑁆𑀫𑁂𑀦 𑀯𑀢𑁆𑀢𑀢𑀺;

𑀫𑀺𑀲𑁆𑀲𑀸𑀤𑀻𑀳𑀺 𑀘 𑀪𑁂𑀤𑁂𑀳𑀺, 𑀪𑁂𑀤𑀲𑁆𑀲 𑀤𑀼𑀯𑀺𑀥𑀸𑀤𑀺𑀓𑁄.

𑀇𑀤𑀜𑁆𑀳𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀫𑁆𑀳𑀺 𑀧𑀯𑀢𑁆𑀢𑀫𑀸𑀦𑀁 𑀤𑁆𑀯𑀺𑀥𑀸 𑀓𑀫𑁆𑀫𑁂𑀦 𑀯𑀢𑁆𑀢𑀢𑀺. 𑀬𑀣𑀸𑀲𑀓𑀜𑁆𑀳𑀺 𑀏𑀢𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑁆𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩). 𑀏𑀯𑀁 𑀯𑀢𑁆𑀢𑀫𑀸𑀦𑀲𑁆𑀲 𑀧𑀦𑀲𑁆𑀲 𑀫𑀺𑀲𑁆𑀲𑀸𑀤𑀻𑀳𑀺 𑀪𑁂𑀤𑁂𑀳𑀺 𑀤𑀼𑀯𑀺𑀥𑀸𑀤𑀺𑀓𑁄𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀤𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀓𑀥𑀸 𑀯𑀢𑁆𑀢𑀫𑀸𑀦𑀫𑁆𑀧𑀺 𑀭𑀽𑀧𑁂𑀦 𑀲𑀳 𑀫𑀺𑀲𑁆𑀲𑀸𑀫𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀕𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀁, 𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑁋

𑀫𑀺𑀲𑁆𑀲𑀁 ¶ 𑀤𑁆𑀯𑀺𑀥𑀸 𑀪𑀸𑀯𑀪𑁂𑀤𑀸, 𑀲𑀪𑀸𑀯𑀁 𑀢𑀢𑁆𑀣 𑀘 𑀤𑁆𑀯𑀺𑀥𑀸;

𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸, 𑀑𑀫𑀢𑁄 𑀆𑀤𑀺𑀦𑀸 𑀲𑀳.

‘𑀫𑀺𑀲𑁆𑀲𑀁 ¶ 𑀤𑁆𑀯𑀺𑀥𑀸 𑀪𑀸𑀯𑀪𑁂𑀤𑀸’𑀢𑀺 𑀬𑀜𑁆𑀳𑁂𑀢𑀫𑁂𑀢𑁆𑀣 𑀅𑀜𑁆𑀜𑀢𑁆𑀭 𑀅𑀭𑀽𑀧𑀪𑀯𑀸 𑀭𑀽𑀧𑀫𑀺𑀲𑁆𑀲𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀭𑀽𑀧𑀪𑀯𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑁂𑀦 𑀪𑀸𑀯𑁂𑀦 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺𑀢𑁄 𑀓𑀸𑀫𑀪𑀯𑁂 𑀅𑀜𑁆𑀜𑀢𑁆𑀭 𑀚𑀸𑀢𑀺𑀧𑀡𑁆𑀟𑀓𑀧𑀝𑀺𑀲𑀦𑁆𑀥𑀺𑀬𑀸 𑀪𑀸𑀯𑁂𑀦 𑀲𑀳 𑀉𑀧𑁆𑀧𑀢𑁆𑀢𑀺𑀢𑁄 𑀲𑀪𑀸𑀯𑀁 𑀅𑀪𑀸𑀯𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺.

‘𑀲𑀪𑀸𑀯𑀁 𑀢𑀢𑁆𑀣 𑀘 𑀤𑁆𑀯𑀺𑀥𑀸’𑀢𑀺 𑀢𑀢𑁆𑀣𑀸𑀧𑀺 𑀘 𑀬𑀁 𑀲𑀪𑀸𑀯𑀁 𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀳 𑀉𑀧𑁆𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀫𑁂𑀯 𑀳𑁄𑀢𑀺.

‘𑀤𑁆𑀯𑁂 ¶ 𑀯𑀸 𑀢𑀬𑁄 𑀯𑀸 𑀤𑀲𑀓𑀸, 𑀑𑀫𑀢𑁄 𑀆𑀤𑀺𑀦𑀸 𑀲𑀳𑀸’𑀢𑀺 𑀬𑀜𑁆𑀳𑁂𑀢𑀫𑁂𑀢𑁆𑀣 𑀫𑀺𑀲𑁆𑀲𑀁 𑀅𑀫𑀺𑀲𑁆𑀲𑀦𑁆𑀢𑀺 𑀤𑁆𑀯𑀬𑁂 𑀆𑀤𑀺𑀪𑀽𑀢𑀁 𑀭𑀽𑀧𑀫𑀺𑀲𑁆𑀲𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀲𑀳 𑀯𑀢𑁆𑀣𑀼𑀓𑀸𑀬𑀤𑀲𑀓𑀯𑀲𑁂𑀦 𑀤𑁆𑀯𑁂 𑀯𑀸 𑀯𑀢𑁆𑀣𑀼𑀓𑀸𑀬𑀪𑀸𑀯𑀤𑀲𑀓𑀯𑀲𑁂𑀦 𑀢𑀬𑁄 𑀯𑀸 𑀤𑀲𑀓𑀸 𑀑𑀫𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀢𑁆𑀣𑀺 𑀇𑀢𑁄 𑀧𑀭𑀁 𑀭𑀽𑀧𑀧𑀭𑀺𑀳𑀸𑀦𑀻𑀢𑀺. 𑀢𑀁 𑀧𑀦𑁂𑀢𑀁 𑀏𑀯𑀁 𑀑𑀫𑀓𑀧𑀭𑀺𑀫𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀡𑁆𑀟𑀚𑀚𑀮𑀸𑀩𑀼𑀚𑀦𑀸𑀫𑀺𑀓𑀸𑀲𑀼 𑀤𑁆𑀯𑀻𑀲𑀼 𑀬𑁄𑀦𑀻𑀲𑀼 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑁂𑀦 𑀅𑀁𑀲𑀼𑀦𑀸 𑀉𑀤𑁆𑀥𑀢𑀢𑁂𑀮𑀲𑀧𑁆𑀧𑀺𑀫𑀡𑁆𑀟𑀧𑁆𑀧𑀫𑀸𑀡𑀁 𑀓𑀮𑀮𑀦𑁆𑀢𑀺 𑀮𑀤𑁆𑀥𑀲𑀗𑁆𑀔𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑁄𑀦𑀻𑀦𑀁 𑀕𑀢𑀺𑀯𑀲𑁂𑀦 𑀲𑀫𑁆𑀪𑀯𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀸𑀲𑀼 𑀳𑀺 𑁋

𑀦𑀺𑀭𑀬𑁂 𑀪𑀼𑀫𑁆𑀫𑀯𑀚𑁆𑀚𑁂𑀲𑀼, 𑀤𑁂𑀯𑁂𑀲𑀼 𑀘 𑀦 𑀬𑁄𑀦𑀺𑀬𑁄;

𑀢𑀺𑀲𑁆𑀲𑁄 𑀧𑀼𑀭𑀺𑀫𑀺𑀓𑀸 𑀳𑁄𑀦𑁆𑀢𑀺, 𑀘𑀢𑀲𑁆𑀲𑁄𑀧𑀺 𑀕𑀢𑀺𑀢𑁆𑀢𑀬𑁂.

𑀢𑀢𑁆𑀣 𑀤𑁂𑀯𑁂𑀲𑀼 𑀘𑀸𑀢𑀺 𑀘𑀲𑀤𑁆𑀤𑁂𑀦 𑀬𑀣𑀸 𑀦𑀺𑀭𑀬𑁂 𑀘 𑀪𑀼𑀫𑁆𑀫𑀯𑀚𑁆𑀚𑁂𑀲𑀼 𑀘 𑀤𑁂𑀯𑁂𑀲𑀼, 𑀏𑀯𑀁 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑁂𑀲𑀼 𑀘 𑀧𑀼𑀭𑀺𑀫𑀺𑀓𑀸 𑀢𑀺𑀲𑁆𑀲𑁄 𑀬𑁄𑀦𑀺𑀬𑁄 𑀦 𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀑𑀧𑀧𑀸𑀢𑀺𑀓𑀸 𑀏𑀯 𑀳𑀺 𑀢𑁂 𑀳𑁄𑀦𑁆𑀢𑀺. 𑀲𑁂𑀲𑁂 𑀧𑀦 𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑁂 𑀕𑀢𑀺𑀢𑁆𑀢𑀬𑁂 𑀧𑀼𑀩𑁆𑀩𑁂 𑀯𑀚𑁆𑀚𑀺𑀢𑀪𑀼𑀫𑁆𑀫𑀤𑁂𑀯𑁂𑀲𑀼 𑀘 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑁋

𑀢𑀺𑀁𑀲 𑀦𑀯 𑀘𑁂𑀯 𑀭𑀽𑀧𑀻𑀲𑀼, 𑀲𑀢𑁆𑀢𑀢𑀺 𑀉𑀓𑁆𑀓𑀁𑀲𑀢𑁄𑀯 𑀭𑀽𑀧𑀸𑀦𑀺;

𑀲𑀁𑀲𑁂𑀤𑀚𑁄𑀧𑀧𑀸𑀢𑀻𑀲𑀼, 𑀅𑀣 𑀯𑀸 𑀅𑀯𑀓𑀁𑀲𑀢𑁄 𑀢𑀺𑀁𑀲.

𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀼 ¶ 𑀢𑀸𑀯 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀼 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁 𑀚𑀻𑀯𑀺𑀢𑀦𑀯𑀓𑀲𑁆𑀲 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀓𑀮𑀸𑀧𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀘 𑀦𑀯 𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀽𑀧𑀻𑀩𑁆𑀭𑀳𑁆𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑁂𑀲𑀼 𑀉𑀓𑁆𑀓𑀁𑀲𑀢𑁄 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯𑀯𑀢𑁆𑀣𑀼𑀤𑀲𑀓𑀸𑀦𑀁 ¶ 𑀯𑀲𑁂𑀦 𑀲𑀢𑁆𑀢𑀢𑀺. 𑀢𑀸𑀦𑀺 𑀘 𑀦𑀺𑀘𑁆𑀘𑀁 𑀤𑁂𑀯𑁂𑀲𑀼. 𑀢𑀢𑁆𑀣 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸 𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄 𑀘𑀓𑁆𑀔𑀼𑀧𑀲𑀸𑀤𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀬𑀁 𑀤𑀲𑀭𑀽𑀧𑀧𑀭𑀺𑀫𑀸𑀡𑁄 𑀭𑀽𑀧𑀧𑀼𑀜𑁆𑀚𑁄 𑀘𑀓𑁆𑀔𑀼𑀤𑀲𑀓𑁄 𑀦𑀸𑀫. 𑀏𑀯𑀁 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀓𑀁𑀲𑀢𑁄 𑀧𑀦 𑀚𑀘𑁆𑀘𑀦𑁆𑀥𑀩𑀥𑀺𑀭𑀅𑀖𑀸𑀦𑀓𑀦𑀧𑀼𑀁𑀲𑀓𑀲𑁆𑀲 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀓𑁆𑀓𑀁𑀲𑀸𑀯𑀓𑀁𑀲𑀸𑀦𑀁 𑀧𑀦 𑀅𑀦𑁆𑀢𑀭𑁂 𑀅𑀦𑀼𑀭𑀽𑀧𑀢𑁄 𑀯𑀺𑀓𑀧𑁆𑀧𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀯𑀺𑀤𑀺𑀢𑁆𑀯𑀸 𑀧𑀼𑀦 𑁋

𑀔𑀦𑁆𑀥𑀸𑀭𑀫𑁆𑀫𑀡𑀕𑀢𑀺𑀳𑁂𑀢𑀼-𑀯𑁂𑀤𑀦𑀸𑀧𑀻𑀢𑀺𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺;

𑀪𑁂𑀤𑀸𑀪𑁂𑀤𑀯𑀺𑀲𑁂𑀲𑁄, 𑀘𑀼𑀢𑀺𑀲𑀦𑁆𑀥𑀻𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑁄.

𑀬𑀸𑀳𑁂𑀲𑀸 ¶ 𑀫𑀺𑀲𑁆𑀲𑀸𑀫𑀺𑀲𑁆𑀲𑀢𑁄 𑀤𑀼𑀯𑀺𑀥𑀸 𑀧𑀝𑀺𑀲𑀦𑁆𑀥𑀺, 𑀬𑀸 𑀘𑀲𑁆𑀲𑀸 𑀅𑀢𑀻𑀢𑀸𑀦𑀦𑁆𑀢𑀭𑀸 𑀘𑀼𑀢𑀺, 𑀢𑀸𑀲𑀁 𑀇𑀫𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀪𑁂𑀤𑀸𑀪𑁂𑀤𑀯𑀺𑀲𑁂𑀲𑁄 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀓𑀣𑀁? 𑀓𑀤𑀸𑀘𑀺 𑀘𑀢𑀼𑀓𑁆𑀔𑀦𑁆𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀘𑀢𑀼𑀓𑁆𑀔𑀦𑁆𑀥𑀸𑀯 𑀆𑀭𑀫𑁆𑀫𑀡𑀢𑁄𑀧𑀺 𑀅𑀪𑀺𑀦𑁆𑀦𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀓𑀤𑀸𑀘𑀺 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸. 𑀅𑀬𑀁 𑀢𑀸𑀯 𑀅𑀭𑀽𑀧𑀪𑀽𑀫𑀻𑀲𑀼𑀬𑁂𑀯 𑀦𑀬𑁄. 𑀓𑀤𑀸𑀘𑀺 𑀧𑀦 𑀘𑀢𑀼𑀓𑁆𑀔𑀦𑁆𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀸 𑀧𑀝𑀺𑀲𑀦𑁆𑀥𑀺. 𑀓𑀤𑀸𑀘𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀘𑀼𑀢𑀺𑀬𑀸 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀯𑀸 𑀅𑀦𑀦𑁆𑀢𑀭𑀸 𑀘𑀢𑀼𑀓𑁆𑀔𑀦𑁆𑀥𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺. 𑀏𑀯𑀁 𑀅𑀢𑀻𑀢𑀸𑀭𑀫𑁆𑀫𑀡𑀘𑀼𑀢𑀺𑀬𑀸 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺, 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺, 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺, 𑀤𑀼𑀳𑁂𑀢𑀼𑀓𑀘𑀼𑀢𑀺𑀬𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀼𑀢𑀺𑀬𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀧𑀝𑀺𑀲𑀦𑁆𑀥𑀺, 𑀅𑀧𑁆𑀧𑀻𑀢𑀺𑀓𑀘𑀼𑀢𑀺𑀬𑀸 𑀲𑀧𑁆𑀧𑀻𑀢𑀺𑀓𑀧𑀝𑀺𑀲𑀦𑁆𑀥𑀺, 𑀅𑀯𑀺𑀢𑀓𑁆𑀓𑀘𑀼𑀢𑀺𑀬𑀸 𑀲𑀯𑀺𑀢𑀓𑁆𑀓𑀧𑀝𑀺𑀲𑀦𑁆𑀥𑀺, 𑀅𑀯𑀺𑀘𑀸𑀭𑀘𑀼𑀢𑀺𑀬𑀸 𑀲𑀯𑀺𑀘𑀸𑀭𑀧𑀝𑀺𑀲𑀦𑁆𑀥𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀘𑀼𑀢𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀧𑀝𑀺𑀲𑀦𑁆𑀥𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀭𑀻𑀢𑀢𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁.

𑀮𑀤𑁆𑀥𑀧𑁆𑀧𑀘𑁆𑀘𑀬𑀫𑀺𑀢𑀺𑀥𑀫𑁆𑀫-𑀫𑀢𑁆𑀢𑀫𑁂𑀢𑀁 ¶ 𑀪𑀯𑀦𑁆𑀢𑀭𑀫𑀼𑀧𑁂𑀢𑀺;

𑀦𑀸𑀲𑁆𑀲 𑀢𑀢𑁄 𑀲𑀗𑁆𑀓𑀦𑁆𑀢𑀺, 𑀦 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀳𑁄𑀢𑀺.

𑀇𑀢𑀺 ¶ 𑀳𑁂𑀢𑀁 𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀪𑀯𑀦𑁆𑀢𑀭𑀁 𑀉𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀲𑀢𑁆𑀢𑁄, 𑀦 𑀚𑀻𑀯𑁄. 𑀢𑀲𑁆𑀲 𑀦𑀸𑀧𑀺 𑀅𑀢𑀻𑀢𑀪𑀯𑀢𑁄 𑀇𑀥 𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀇𑀥 𑀧𑀸𑀢𑀼𑀪𑀸𑀯𑁄. 𑀢𑀬𑀺𑀤𑀁 𑀧𑀸𑀓𑀝𑁂𑀦 𑀫𑀦𑀼𑀲𑁆𑀲𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦 𑀧𑀓𑀸𑀲𑀬𑀺𑀲𑁆𑀲𑀸𑀫 𑁋

𑀅𑀢𑀻𑀢𑀪𑀯𑀲𑁆𑀫𑀺𑀜𑁆𑀳𑀺 𑀲𑀭𑀲𑁂𑀦 𑀉𑀧𑀓𑁆𑀓𑀫𑁂𑀦 𑀯𑀸 𑀲𑀫𑀸𑀲𑀦𑁆𑀦𑀫𑀭𑀡𑀲𑁆𑀲 𑀅𑀲𑀬𑁆𑀳𑀸𑀦𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀓𑀸𑀦𑀁 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀸𑀲𑀢𑁆𑀢𑀸𑀦𑀁 𑀲𑀦𑁆𑀦𑀺𑀧𑀸𑀢𑀁 𑀅𑀲𑀳𑀦𑁆𑀢𑀲𑁆𑀲 𑀆𑀢𑀧𑁂 𑀧𑀓𑁆𑀔𑀺𑀢𑁆𑀢𑀳𑀭𑀺𑀢𑀢𑀸𑀮𑀧𑀡𑁆𑀡𑀫𑀺𑀯 𑀓𑀫𑁂𑀦 𑀉𑀧𑀲𑀼𑀲𑁆𑀲𑀫𑀸𑀦𑁂 𑀲𑀭𑀻𑀭𑁂 𑀦𑀺𑀭𑀼𑀤𑁆𑀥𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁂𑀲𑀼 𑀓𑀸𑀬𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀲𑀼 𑀢𑀗𑁆𑀔𑀡𑀸𑀯𑀲𑁂𑀲𑀁 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀕𑀭𑀼𑀲𑀫𑀸𑀲𑁂𑀯𑀺𑀢𑀸𑀲𑀦𑁆𑀦𑀧𑀼𑀩𑁆𑀩𑀓𑀢𑀸𑀦𑀁 𑀅𑀜𑁆𑀜𑀢𑀭𑀁 𑀮𑀤𑁆𑀥𑀸𑀯𑀲𑁂𑀲𑀧𑀘𑁆𑀘𑀬𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀁 𑀯𑀸 𑀢𑀤𑀼𑀧𑀝𑁆𑀞𑀸𑀧𑀺𑀢𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀯𑀺𑀲𑀬𑀫𑀸𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀢𑀤𑁂𑀯𑀁 𑀧𑀯𑀢𑁆𑀢𑀫𑀸𑀦𑀁 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀢𑀡𑁆𑀳𑀸 𑀦𑀸𑀫𑁂𑀢𑀺 ¶ , 𑀲𑀳𑀚𑀸𑀢𑀲𑀗𑁆𑀔𑀸𑀭𑀸 𑀔𑀺𑀧𑀦𑁆𑀢𑀺. 𑀢𑀁 𑀲𑀦𑁆𑀢𑀢𑀺𑀯𑀲𑁂𑀦 𑀢𑀡𑁆𑀳𑀸𑀬 𑀦𑀸𑀫𑀺𑀬𑀫𑀸𑀦𑀁 𑀲𑀗𑁆𑀔𑀸𑀭𑁂𑀳𑀺 𑀔𑀺𑀧𑁆𑀧𑀫𑀸𑀦𑀁 𑀑𑀭𑀺𑀫𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀭𑀚𑁆𑀚𑀼𑀫𑀸𑀮𑀫𑁆𑀩𑀺𑀢𑁆𑀯𑀸 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑀓𑁄 𑀯𑀺𑀬 𑀧𑀼𑀭𑀺𑀫𑀜𑁆𑀘 𑀦𑀺𑀲𑁆𑀲𑀬𑀁 𑀚𑀳𑀢𑀺, 𑀅𑀧𑀭𑀜𑁆𑀘 𑀓𑀫𑁆𑀫𑀲𑀫𑀼𑀝𑁆𑀞𑀸𑀧𑀺𑀢𑀁 𑀦𑀺𑀲𑁆𑀲𑀬𑀁 𑀅𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀸𑀤𑀻𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀺.

𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀘𑀯𑀦𑀢𑁄 𑀘𑀼𑀢𑀺, 𑀧𑀘𑁆𑀙𑀺𑀫𑀁 𑀪𑀯𑀦𑁆𑀢𑀭𑀸𑀤𑀺𑀧𑀝𑀺𑀲𑀦𑁆𑀥𑀸𑀦𑀢𑁄 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀦𑀸𑀧𑀺 𑀧𑀼𑀭𑀺𑀫𑀪𑀯𑀸 𑀇𑀥 𑀆𑀕𑀢𑀁, 𑀦𑀸𑀧𑀺 𑀢𑀢𑁄 𑀓𑀫𑁆𑀫𑀲𑀗𑁆𑀔𑀸𑀭𑀦𑀢𑀺𑀯𑀺𑀲𑀬𑀸𑀤𑀺𑀳𑁂𑀢𑀼𑀁 𑀯𑀺𑀦𑀸 𑀧𑀸𑀢𑀼𑀪𑀽𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀺𑀬𑀼𑀁 𑀦𑀺𑀤𑀲𑁆𑀲𑀦𑀸𑀦𑁂𑀢𑁆𑀣, 𑀧𑀝𑀺𑀖𑁄𑀲𑀸𑀤𑀺𑀓𑀸 𑀅𑀣;

𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺, 𑀏𑀓𑀢𑀸 𑀦𑀸𑀧𑀺 𑀦𑀸𑀦𑀢𑀸.

𑀏𑀢𑁆𑀣 ¶ 𑀘𑁂𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑀺𑀫𑀪𑀯𑀢𑁄 𑀇𑀥 𑀅𑀦𑀸𑀕𑀫𑀦𑁂 𑀅𑀢𑀻𑀢𑀪𑀯𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽𑀳𑀺 𑀘 𑀉𑀧𑁆𑀧𑀸𑀤𑁂 𑀧𑀝𑀺𑀖𑁄𑀲𑀧𑀤𑀻𑀧𑀫𑀼𑀤𑁆𑀤𑀸𑀧𑀝𑀺𑀩𑀺𑀫𑁆𑀩𑀧𑁆𑀧𑀓𑀸𑀭𑀸 𑀥𑀫𑁆𑀫𑀸 𑀦𑀺𑀤𑀲𑁆𑀲𑀦𑀸𑀦𑀺 𑀲𑀺𑀬𑀼𑀁. 𑀬𑀣𑀸 𑀳𑀺 𑀧𑀝𑀺𑀖𑁄𑀲𑀧𑀤𑀻𑀧𑀫𑀼𑀤𑁆𑀤𑀘𑁆𑀙𑀸𑀬𑀸 ¶ 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀇𑀤𑀁 𑀘𑀺𑀢𑁆𑀢𑀁. 𑀏𑀢𑁆𑀣 𑀘 ‘𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺 𑀏𑀓𑀢𑀸 𑀦𑀸𑀧𑀺 𑀦𑀸𑀦𑀢𑀸’. 𑀬𑀤𑀺 𑀳𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀏𑀓𑀦𑁆𑀢𑀫𑁂𑀓𑀢𑀸 𑀪𑀯𑁂𑀬𑁆𑀬, 𑀦 𑀔𑀻𑀭𑀢𑁄 𑀤𑀥𑀺 𑀲𑀫𑁆𑀪𑀽𑀢𑀁 𑀲𑀺𑀬𑀸. 𑀅𑀣𑀸𑀧𑀺 𑀏𑀓𑀦𑁆𑀢𑀦𑀸𑀦𑀢𑀸 𑀪𑀯𑁂𑀬𑁆𑀬, 𑀦 𑀔𑀻𑀭𑀲𑁆𑀲𑀸𑀥𑀻𑀦𑁄 𑀤𑀥𑀺 𑀲𑀺𑀬𑀸. 𑀏𑀲 𑀦𑀬𑁄 𑀲𑀩𑁆𑀩𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼. 𑀏𑀯𑀜𑁆𑀘 𑀲𑀢𑀺 𑀲𑀩𑁆𑀩𑀮𑁄𑀓𑀯𑁄𑀳𑀸𑀭𑀮𑁄𑀧𑁄 𑀲𑀺𑀬𑀸. 𑀲𑁄 𑀘 𑀅𑀦𑀺𑀝𑁆𑀞𑁄. 𑀢𑀲𑁆𑀫𑀸 𑀏𑀢𑁆𑀣 𑀦 𑀏𑀓𑀦𑁆𑀢𑀫𑁂𑀓𑀢𑀸 𑀯𑀸 𑀦𑀸𑀦𑀢𑀸 𑀯𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀏𑀯𑀁 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀲𑀢𑀺 𑀬𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀔𑀦𑁆𑀥𑀸, 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀨𑀮𑀧𑀘𑁆𑀘𑀬𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀢𑀢𑁆𑀣 𑀅𑀕𑀫𑀦𑀢𑁄 𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁄 𑀘 𑀢𑀁 𑀨𑀮𑀁 𑀲𑀺𑀬𑀸? 𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸? 𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀫𑀺𑀤𑀁 𑀯𑀺𑀥𑀸𑀦𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁 𑀏𑀢𑀁, 𑀦𑀸𑀜𑁆𑀜𑀲𑁆𑀲 𑀦 𑀘 𑀅𑀜𑁆𑀜𑀢𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄.

𑀏𑀓𑀲𑀦𑁆𑀢𑀸𑀦𑀲𑁆𑀫𑀺𑀜𑁆𑀳𑀺 𑀨𑀮𑀫𑀼𑀧𑁆𑀧𑀚𑁆𑀚𑀫𑀸𑀦𑀁 𑀢𑀢𑁆𑀣 𑀏𑀓𑀦𑁆𑀢𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀸𑀦𑀁 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀅𑀜𑁆𑀜𑀲𑁆𑀲𑀸𑀢𑀺 𑀯𑀸 𑀅𑀜𑁆𑀜𑀢𑁄𑀢𑀺 𑀯𑀸 𑀦 𑀳𑁄𑀢𑀺. 𑀏𑀢𑀲𑁆𑀲 𑀘 𑀧𑀦𑀢𑁆𑀣𑀲𑁆𑀲 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀲𑀸𑀥𑀓𑁄. 𑀅𑀫𑁆𑀩𑀩𑀻𑀚𑀸𑀤𑀻𑀦𑀜𑁆𑀳𑀺 𑀅𑀪𑀺𑀲𑀗𑁆𑀔𑀸𑀭𑁂𑀲𑀼 𑀓𑀢𑁂𑀲𑀼 𑀢𑀲𑁆𑀲 𑀩𑀻𑀚𑀲𑁆𑀲 𑀲𑀦𑁆𑀢𑀸𑀦𑁂 𑀮𑀤𑁆𑀥𑀧𑀘𑁆𑀘𑀬𑁄 𑀓𑀸𑀮𑀦𑁆𑀢𑀭𑁂 𑀨𑀮𑀯𑀺𑀲𑁂𑀲𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦 𑀅𑀜𑁆𑀜𑀩𑀻𑀚𑀸𑀦𑀁 𑀦𑀸𑀧𑀺 𑀅𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀢𑀸𑀦𑀺 𑀩𑀻𑀚𑀸𑀦𑀺 ¶ 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀸 𑀨𑀮𑀝𑁆𑀞𑀸𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸𑀤𑀻𑀳𑀺 𑀘𑀸𑀧𑀺 𑀩𑀸𑀮𑀲𑀭𑀻𑀭𑁂 𑀉𑀧𑀬𑀼𑀢𑁆𑀢𑁂𑀳𑀺 𑀓𑀸𑀮𑀦𑁆𑀢𑀭𑁂 𑀯𑀼𑀟𑁆𑀠𑀲𑀭𑀻𑀭𑀸𑀤𑀻𑀲𑀼 𑀨𑀮𑀤𑁂𑀳𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀫𑁆𑀧𑀺 𑀯𑀼𑀢𑁆𑀢𑀁 ‘𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸’𑀢𑀺? 𑀢𑀢𑁆𑀣 𑁋

𑀨𑀮𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀏𑀯, 𑀲𑀺𑀤𑁆𑀥𑀸 𑀪𑀼𑀜𑁆𑀚𑀓𑀲𑀫𑁆𑀫𑀼𑀢𑀺;

𑀨𑀮𑀼𑀧𑁆𑀧𑀸𑀤𑁂𑀦 𑀭𑀼𑀓𑁆𑀔𑀲𑁆𑀲, 𑀬𑀣𑀸 𑀨𑀮𑀢𑀺 𑀲𑀫𑁆𑀫𑀼𑀢𑀺.

𑀬𑀣𑀸 ¶ 𑀳𑀺 𑀭𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑀪𑀽𑀢𑀲𑁆𑀲 𑀭𑀼𑀓𑁆𑀔𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀭𑀼𑀓𑁆𑀔𑁄 𑀨𑀮𑀢𑀻𑀢𑀺 ¶ 𑀯𑀸 𑀨𑀮𑀺𑀢𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀤𑁂𑀯𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑀪𑀽𑀢𑀲𑁆𑀲 𑀉𑀧𑀪𑁄𑀕𑀲𑀗𑁆𑀔𑀸𑀢𑀲𑁆𑀲 𑀲𑀼𑀔𑀤𑀼𑀓𑁆𑀔𑀨𑀮𑀲𑁆𑀲 𑀉𑀧𑁆𑀧𑀸𑀤𑁂𑀦𑁂𑀯 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀉𑀧𑀪𑀼𑀜𑁆𑀚𑀢𑀻𑀢𑀺 𑀯𑀸 𑀲𑀼𑀔𑀺𑀢𑁄𑀢𑀺 𑀯𑀸 𑀤𑀼𑀓𑁆𑀔𑀺𑀢𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦 𑀏𑀢𑁆𑀣 𑀅𑀜𑁆𑀜𑁂𑀦 𑀉𑀧𑀪𑀼𑀜𑁆𑀚𑀓𑁂𑀦 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺.

𑀬𑁄𑀧𑀺 𑀯𑀤𑁂𑀬𑁆𑀬 𑁋 ‘𑀏𑀯𑀁 𑀲𑀦𑁆𑀢𑁂𑀧𑀺 𑀏𑀢𑁂 𑀲𑀗𑁆𑀔𑀸𑀭𑀸 𑀯𑀺𑀚𑁆𑀚𑀫𑀸𑀦𑀸 𑀯𑀸 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀅𑀯𑀺𑀚𑁆𑀚𑀫𑀸𑀦𑀸 𑀯𑀸. 𑀬𑀤𑀺 𑀘 𑀯𑀺𑀚𑁆𑀚𑀫𑀸𑀦𑀸 𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀦𑁂𑀲𑀁 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀣 𑀅𑀯𑀺𑀚𑁆𑀚𑀫𑀸𑀦𑀸, 𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀘 𑀧𑀘𑁆𑀙𑀸 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸 𑀲𑀺𑀬𑀼’𑀦𑁆𑀢𑀺. 𑀲𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋

𑀓𑀢𑀢𑁆𑀢𑀸 𑀧𑀘𑁆𑀘𑀬𑀸 𑀏𑀢𑁂, 𑀦 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸;

𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀢𑀢𑁆𑀣, 𑀯𑁂𑀤𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦𑀁.

𑀓𑀢𑀢𑁆𑀢𑀸 𑀏𑀯 𑀳𑀺 𑀲𑀗𑁆𑀔𑀸𑀭𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸. 𑀬𑀣𑀸𑀳 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺 (𑀥. 𑀲. 𑁪𑁩𑁧). 𑀬𑀣𑀸𑀭𑀳𑀲𑁆𑀲 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀘 𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀦 𑀧𑀼𑀦 𑀨𑀮𑀸𑀯𑀳𑀸 𑀳𑁄𑀦𑁆𑀢𑀺 𑀯𑀺𑀧𑀓𑁆𑀓𑀯𑀺𑀧𑀸𑀓𑀢𑁆𑀢𑀸. 𑀏𑀢𑀲𑁆𑀲 𑀘𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑁂 𑀇𑀤𑀁 𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀦𑀺𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀳𑀺 𑀮𑁄𑀓𑁂 𑀬𑁄 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀦𑀺𑀬𑁆𑀬𑀸𑀢𑀦𑀢𑁆𑀣𑀁 𑀧𑀸𑀝𑀺𑀪𑁄𑀕𑁄 𑀳𑁄𑀢𑀺, 𑀪𑀡𑁆𑀟𑀁 𑀯𑀸 𑀓𑀺𑀡𑀸𑀢𑀺, 𑀇𑀡𑀁 𑀯𑀸 𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀸𑀓𑀭𑀡𑀫𑀢𑁆𑀢𑀫𑁂𑀯 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑀸𑀤𑀺𑀫𑁆𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀓𑀺𑀭𑀺𑀬𑀸𑀬 𑀯𑀺𑀚𑁆𑀚𑀫𑀸𑀦𑀢𑀸 𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀸. 𑀦 𑀘 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑀸𑀤𑀺𑀢𑁄 𑀧𑀭𑀫𑁆𑀧𑀺 𑀥𑀸𑀭𑀓𑁄𑀯 ¶ 𑀳𑁄𑀢𑀺. 𑀓𑀲𑁆𑀫𑀸? 𑀦𑀺𑀬𑁆𑀬𑀸𑀢𑀦𑀸𑀤𑀻𑀦𑀁 𑀓𑀢𑀢𑁆𑀢𑀸. 𑀏𑀯𑀁 𑀓𑀢𑀢𑁆𑀢𑀸𑀯 𑀲𑀗𑁆𑀔𑀸𑀭𑀸𑀧𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀘 𑀬𑀣𑀸𑀭𑀳𑀁 𑀨𑀮𑀤𑀸𑀦𑀢𑁄 𑀧𑀭𑀫𑁆𑀧𑀺 𑀨𑀮𑀸𑀯𑀳𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀫𑀺𑀲𑁆𑀲𑀸𑀫𑀺𑀲𑁆𑀲𑀯𑀲𑁂𑀦 𑀤𑁆𑀯𑀺𑀥𑀸𑀧𑀺 𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺.

𑀇𑀤𑀸𑀦𑀺 𑀲𑀩𑁆𑀩𑁂𑀲𑁆𑀯𑁂𑀢𑁂𑀲𑀼 𑀩𑀢𑁆𑀢𑀺𑀁𑀲𑀯𑀺𑀜𑁆𑀜𑀸𑀡𑁂𑀲𑀼 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁆𑀣𑀁 𑁋

𑀧𑀝𑀺𑀲𑀦𑁆𑀥𑀺𑀧𑁆𑀧𑀯𑀢𑁆𑀢𑀻𑀦𑀁 ¶ , 𑀯𑀲𑁂𑀦𑁂𑀢𑁂 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸.

𑀢𑀢𑁆𑀣 ¶ 𑀢𑀬𑁄 𑀪𑀯𑀸, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀲𑀢𑁆𑀢𑀸𑀯𑀸𑀲𑀸𑀢𑀺 𑀏𑀢𑁂 𑀪𑀯𑀸𑀤𑀬𑁄 𑀦𑀸𑀫. 𑀏𑀢𑁂𑀲𑀼 𑀪𑀯𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀏𑀢𑁂 𑀬𑁂𑀲𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑀸 𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀢𑀣𑀸 𑀯𑀺𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑁋 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀢𑀸𑀯 𑀓𑀸𑀫𑀸𑀯𑀘𑀭𑀅𑀝𑁆𑀞𑀘𑁂𑀢𑀦𑀸𑀪𑁂𑀤𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀯𑀺𑀲𑁂𑀲𑁂𑀦 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀦𑀯𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄. 𑀭𑀽𑀧𑀸𑀯𑀘𑀭𑀧𑀜𑁆𑀘𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀭𑀽𑀧𑀪𑀯𑁂 𑀧𑀝𑀺𑀲𑀦𑁆𑀥𑀺𑀬𑀁 𑀏𑀯 𑀧𑀜𑁆𑀘𑀦𑁆𑀦𑀁. 𑀯𑀼𑀢𑁆𑀢𑀧𑁆𑀧𑀪𑁂𑀤𑀓𑀸𑀫𑀸𑀯𑀘𑀭𑁄 𑀧𑀦 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀭𑀺𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑁆𑀯𑁂𑀯 𑀭𑀽𑀧𑀪𑀯𑁂 𑀧𑀜𑁆𑀘𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀓𑀸𑀫𑀪𑀯𑁂 𑀧𑀦 𑀤𑀼𑀕𑁆𑀕𑀢𑀺𑀬𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀭𑀺𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁.

𑀢𑀢𑁆𑀣 𑀦𑀺𑀭𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀦𑀭𑀓𑀘𑀸𑀭𑀺𑀓𑀸𑀤𑀻𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁂 𑀲𑁄 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑁂𑀲𑀼 𑀧𑀦 𑀦𑀸𑀕𑀲𑀼𑀧𑀡𑁆𑀡𑀧𑁂𑀢𑀫𑀳𑀺𑀤𑁆𑀥𑀺𑀓𑁂𑀲𑀼 𑀘 𑀇𑀝𑁆𑀞𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀺𑀬𑁂𑀯. 𑀲𑁆𑀯𑁂𑀯 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀲𑁄𑀴𑀲𑀦𑁆𑀦𑀫𑁆𑀧𑀺 𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘. 𑀅𑀯𑀺𑀲𑁂𑀲𑁂𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀭𑀽𑀧𑀪𑀯𑁂 𑀤𑀲𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘.

𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀸𑀫𑀪𑀯𑁂 𑀤𑀼𑀕𑁆𑀕𑀢𑀺𑀬𑀁 𑀏𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂; 𑀙𑀦𑁆𑀦𑀁 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁; 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 ¶ . 𑀓𑀸𑀫𑀪𑀯𑁂 𑀧𑀦 𑀲𑀼𑀕𑀢𑀺𑀬𑀁 𑀢𑁂𑀲𑀁𑀬𑁂𑀯 𑀲𑀢𑁆𑀢𑀦𑁆𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁; 𑀭𑀽𑀧𑀪𑀯𑁂 𑀘𑀢𑀼𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑁄 𑀘 𑀔𑁄 𑀓𑀸𑀫𑀸𑀯𑀘𑀭𑁂 𑀅𑀦𑀺𑀝𑁆𑀞𑀭𑀽𑀧𑀤𑀲𑁆𑀲𑀦𑀲𑀤𑁆𑀤𑀲𑀯𑀦𑀯𑀲𑁂𑀦 ¶ . 𑀩𑁆𑀭𑀳𑁆𑀫𑀮𑁄𑀓𑁂 𑀧𑀦 𑀅𑀦𑀺𑀝𑁆𑀞𑀸 𑀭𑀽𑀧𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀧𑀺.

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 ¶ 𑀅𑀭𑀽𑀧𑀪𑀯𑁂 𑀘𑀢𑀼𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘.

𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀢𑁄 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁂𑀦 𑀯𑀻𑀲𑀢𑀺𑀘𑁂𑀢𑀦𑀸𑀪𑁂𑀤𑁄𑀧𑀺 𑀓𑀸𑀬𑀲𑀗𑁆𑀔𑀸𑀭𑁄 𑀓𑀸𑀫𑀪𑀯𑁂 𑀤𑀲𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄. 𑀲𑁆𑀯𑁂𑀯 𑀓𑀸𑀫𑀪𑀯𑁂 𑀢𑁂𑀭𑀲𑀦𑁆𑀦𑀁, 𑀭𑀽𑀧𑀪𑀯𑁂 𑀦𑀯𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑁆𑀯𑁂𑀯 𑀓𑀸𑀫𑀪𑀯𑁂 𑀢𑁂𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘. 𑀯𑀘𑀻𑀲𑀗𑁆𑀔𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀝𑁆𑀞𑀯𑀻𑀲𑀢𑀺𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀪𑁂𑀤𑁄𑀧𑀺 𑀧𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀢𑀻𑀲𑀼 𑀪𑀯𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂. 𑀲𑁆𑀯𑁂𑀯 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀳𑁂𑀝𑁆𑀞𑀸𑀯𑀼𑀢𑁆𑀢𑀸𑀦𑀁 𑀢𑁂𑀭𑀲𑀦𑁆𑀦𑀜𑁆𑀘 𑀦𑀯𑀦𑁆𑀦𑀜𑁆𑀘𑀸𑀢𑀺 𑀤𑁆𑀯𑀸𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀻𑀲𑀼 𑀧𑀦 𑀪𑀯𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀸𑀬𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀜𑁆𑀘. 𑀏𑀯𑀁 𑀢𑀸𑀯 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 𑀯𑀲𑁂𑀦 𑀢𑁂 𑀲𑀗𑁆𑀔𑀸𑀭𑀸 𑀬𑁂𑀲𑀁 𑀧𑀘𑁆𑀘𑀬𑀸, 𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀢𑀣𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀬𑁄𑀦𑀺𑀆𑀤𑀻𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀺𑀤𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀁 𑁋 𑀇𑀫𑁂𑀲𑀼 𑀳𑀺 𑀲𑀗𑁆𑀔𑀸𑀭𑁂𑀲𑀼 𑀬𑀲𑁆𑀫𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀢𑀸𑀯 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀢𑀣𑀸 𑀅𑀡𑁆𑀟𑀚𑀸𑀤𑀻𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀤𑁂𑀯𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀲𑀼 𑀤𑁆𑀯𑀻𑀲𑀼 𑀕𑀢𑀻𑀲𑀼, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑀸𑀲𑀼 𑀫𑀦𑀼𑀲𑁆𑀲𑀸𑀦𑀜𑁆𑀘𑁂𑀯 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀻𑀦𑀜𑁆𑀘 𑀯𑀲𑁂𑀦 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼. 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁂 𑀧𑀦𑁂𑀲 𑀭𑀽𑀧𑀫𑀢𑁆𑀢𑀫𑁂𑀯𑀸𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀘𑀢𑀽𑀲𑀼𑀬𑁂𑀯 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀢𑀲𑁆𑀫𑀸 𑀏𑀲 ¶ 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀪𑀯𑁂𑀲𑀼, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀤𑁆𑀯𑀻𑀲𑀼 𑀕𑀢𑀻𑀲𑀼, 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀘𑀢𑀽𑀲𑀼 ¶ 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘 𑀏𑀓𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀬𑀣𑀸𑀲𑀫𑁆𑀪𑀯𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘.

𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀦 𑀬𑀲𑁆𑀫𑀸 𑀏𑀓𑀲𑁆𑀫𑀺𑀜𑁆𑀜𑁂𑀯 𑀓𑀸𑀫𑀪𑀯𑁂, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀅𑀯𑀲𑁂𑀲𑀸𑀲𑀼 𑀢𑀻𑀲𑀼 𑀕𑀢𑀻𑀲𑀼, 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑀸𑀬 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸, 𑀢𑀸𑀤𑀺𑀲𑁂𑀬𑁂𑀯 𑀘 𑀏𑀓𑀲𑁆𑀫𑀺𑀁 ¶ 𑀲𑀢𑁆𑀢𑀸𑀯𑀸𑀲𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀲 𑀏𑀓𑀲𑁆𑀫𑀺𑀁 𑀪𑀯𑁂 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀢𑀻𑀲𑀼 𑀕𑀢𑀻𑀲𑀼, 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸, 𑀏𑀓𑀫𑁆𑀳𑀺 𑀘 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘.

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀧𑀦 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁 𑀅𑀭𑀽𑀧𑀪𑀯𑁂, 𑀏𑀓𑀺𑀲𑁆𑀲𑀸 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸, 𑀏𑀓𑀺𑀲𑁆𑀲𑀸 𑀤𑁂𑀯𑀕𑀢𑀺𑀬𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀘 𑀘𑀢𑀽𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀲 𑀏𑀓𑀲𑁆𑀫𑀺𑀁𑀬𑁂𑀯 𑀪𑀯𑁂, 𑀏𑀓𑀺𑀲𑁆𑀲𑀸 𑀬𑁄𑀦𑀺𑀬𑀸, 𑀏𑀓𑀺𑀲𑁆𑀲𑀸 𑀤𑁂𑀯𑀕𑀢𑀺𑀬𑀸, 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀘𑀢𑀽𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼, 𑀘𑀢𑀼𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘.

𑀓𑀸𑀬𑀲𑀗𑁆𑀔𑀸𑀭𑁄𑀧𑀺 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁 𑀓𑀸𑀫𑀪𑀯𑁂, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀤𑁆𑀯𑀻𑀲𑀼 𑀘 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀏𑀲 𑀏𑀓𑀲𑁆𑀫𑀺𑀁 𑀪𑀯𑁂, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀤𑁆𑀯𑀻𑀲𑀼 𑀘 𑀲𑀢𑁆𑀢𑀸𑀯𑀸𑀲𑁂𑀲𑀼 𑀢𑁂𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘. 𑀯𑀘𑀻𑀲𑀗𑁆𑀔𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀧𑀦 𑀬𑀲𑁆𑀫𑀸 𑀏𑀓𑀁 𑀲𑀢𑁆𑀢𑀸𑀯𑀸𑀲𑀁 𑀞𑀧𑁂𑀢𑁆𑀯𑀸 𑀦 𑀓𑀢𑁆𑀣𑀘𑀺 𑀦 𑀯𑀺𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀲 𑀢𑀻𑀲𑀼 𑀪𑀯𑁂𑀲𑀼, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀅𑀝𑁆𑀞𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀬𑀣𑀸𑀬𑁄𑀕𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘. 𑀅𑀯𑀺𑀜𑁆𑀜𑀸𑀡𑀓𑁂 𑀧𑀦 𑀲𑀢𑁆𑀢𑀸𑀯𑀸𑀲𑁂 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀺.

𑀅𑀧𑀺𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀏𑀯𑀁 𑁋

𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 ¶ , 𑀯𑀲𑁂𑀦𑁂𑀢𑁂 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸𑀢𑀺.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑁄.

𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑁄

𑁨𑁨𑁮. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 ¶ ¶ 𑀦𑀸𑀫𑀭𑀽𑀧𑀦𑀺𑀤𑁆𑀤𑁂𑀲𑁂 𑁋

𑀤𑁂𑀲𑀦𑀸𑀪𑁂𑀤𑀢𑁄 𑀲𑀩𑁆𑀩-𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄;

𑀲𑀗𑁆𑀕𑀳𑀸 𑀧𑀘𑁆𑀘𑀬𑀦𑀬𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀤𑁂𑀲𑀦𑀸𑀪𑁂𑀤𑀢𑁄’𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁? 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧’’𑀦𑁆𑀢𑀺 (𑀲𑀁. 𑀦𑀺. 𑁨.𑁨; 𑀫. 𑀦𑀺. 𑁧.𑁧𑁦𑁦) 𑀏𑀯𑀁 𑀢𑀸𑀯 𑀲𑀼𑀢𑁆𑀢𑀦𑁆𑀢𑁂 𑀘 𑀇𑀥 𑀭𑀽𑀧𑀧𑀤𑀲𑁆𑀲 𑀅𑀪𑁂𑀤𑀢𑁄 𑀏𑀓𑀲𑀤𑀺𑀲𑀸 𑀤𑁂𑀲𑀦𑀸 𑀓𑀢𑀸; 𑀦𑀸𑀫𑀧𑀤𑀲𑁆𑀲 𑀧𑀦 𑀪𑁂𑀤𑀢𑁄.

𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀜𑁆𑀳𑀺 ‘‘𑀢𑀢𑁆𑀣 𑀓𑀢𑀫𑀁 𑀦𑀸𑀫𑀁? 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀇𑀥 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺. 𑀢𑀢𑁆𑀣 𑀳𑀺 𑀬𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀽𑀢𑀺 𑀏𑀯𑀁 𑀅𑀜𑁆𑀜𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀬𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀢𑁄 𑀧𑀸𑀓𑀝𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀘𑁂𑀢𑀦𑀸𑀨𑀲𑁆𑀲𑀫𑀦𑀲𑀺𑀓𑀸𑀭𑀯𑀲𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀤𑁆𑀥𑀺𑀁 𑀤𑁂𑀲𑁂𑀲𑀺. 𑀇𑀥 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀜𑁆𑀘 𑀅𑀯𑀼𑀢𑁆𑀢𑀜𑁆𑀘 𑀲𑀩𑁆𑀩𑀁 𑀦𑀸𑀫𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀢𑀬𑁄 𑀔𑀦𑁆𑀥𑀸 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀆𑀳.

𑀓𑀺𑀁 𑀧𑀦 𑀇𑀫𑁂 𑀢𑀬𑁄 𑀔𑀦𑁆𑀥𑀸𑀯 𑀦𑀸𑀫𑀁, 𑀯𑀺𑀜𑁆𑀜𑀸𑀡𑀁 𑀦𑀸𑀫𑀁 𑀦𑀸𑀫 𑀦 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀜𑁆𑀜𑀸𑀡𑁂 𑀕𑀬𑁆𑀳𑀫𑀸𑀦𑁂 𑀦𑀸𑀫𑀯𑀺𑀜𑁆𑀜𑀸𑀡𑀲𑁆𑀲 𑀘 𑀧𑀘𑁆𑀘𑀬𑀯𑀺𑀜𑁆𑀜𑀸𑀡𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀳𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀦𑀸𑀫𑀁 𑀤𑀲𑁆𑀲𑁂𑀢𑀼𑀁 𑀢𑀬𑁄𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀢𑀸𑀯 ‘𑀤𑁂𑀲𑀦𑀸𑀪𑁂𑀤𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀩𑁆𑀩𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄’𑀢𑀺 𑀏𑀢𑁆𑀣 𑀧𑀦 𑀦𑀸𑀫𑀁 𑀏𑀓𑀁 𑀲𑀢𑁆𑀢𑀸𑀯𑀸𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑁂𑀲𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀯𑀢𑁆𑀢𑀢𑀺. 𑀭𑀽𑀧𑀁 ¶ 𑀤𑁆𑀯𑀻𑀲𑀼 𑀪𑀯𑁂𑀲𑀼, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀧𑀼𑀭𑀺𑀫𑀸𑀲𑀼 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀧𑀜𑁆𑀘𑀲𑀼 𑀘 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀯𑀢𑁆𑀢𑀢𑀺. 𑀏𑀯𑀁 𑀧𑀯𑀢𑁆𑀢𑀫𑀸𑀦𑁂 𑀘𑁂𑀢𑀲𑁆𑀫𑀺𑀁 𑀦𑀸𑀫𑀭𑀽𑀧𑁂 𑀬𑀲𑁆𑀫𑀸 𑀅𑀪𑀸𑀯𑀓𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀡𑁆𑀟𑀚𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀓𑀸𑀬𑀯𑀲𑁂𑀦 𑀭𑀽𑀧𑀢𑁄 𑀤𑁆𑀯𑁂 𑀲𑀦𑁆𑀢𑀢𑀺𑀲𑀻𑀲𑀸𑀦𑀺 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 ¶ 𑀭𑀽𑀧𑀭𑀽𑀧𑀢𑁄 𑀯𑀻𑀲𑀢𑀺 𑀥𑀫𑁆𑀫𑀸 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 ¶ 𑀏𑀢𑁂 𑀢𑁂𑀯𑀻𑀲𑀢𑀺 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀏𑀓𑀲𑀦𑁆𑀢𑀢𑀺𑀲𑀻𑀲𑀢𑁄 𑀦𑀯 𑀭𑀽𑀧𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀘𑀼𑀤𑁆𑀤𑀲, 𑀲𑀪𑀸𑀯𑀓𑀸𑀦𑀁 𑀪𑀸𑀯𑀤𑀲𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀢𑁆𑀢𑀺𑀁𑀲. 𑀢𑁂𑀲𑀫𑁆𑀧𑀺 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀦𑁆𑀢𑀢𑀺𑀲𑀻𑀲𑀤𑁆𑀯𑀬𑀢𑁄 𑀅𑀝𑁆𑀞𑀸𑀭𑀲 𑀭𑀽𑀧𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀧𑀦𑁆𑀦𑀭𑀲.

𑀬𑀲𑁆𑀫𑀸 𑀘 𑀑𑀧𑀧𑀸𑀢𑀺𑀓𑀲𑀢𑁆𑀢𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀲𑁆𑀲 𑀘 𑀯𑀲𑁂𑀦 𑀭𑀽𑀧𑀭𑀽𑀧𑀢𑁄 𑀘𑀢𑁆𑀢𑀸𑀭𑀺 𑀲𑀦𑁆𑀢𑀢𑀺𑀲𑀻𑀲𑀸𑀦𑀺 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀭𑀽𑀧𑀭𑀽𑀧𑀢𑁄 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀲𑀦𑁆𑀢𑀢𑀺𑀲𑀻𑀲𑀢𑁆𑀢𑀬𑀢𑁄 𑀲𑀢𑁆𑀢𑀯𑀻𑀲𑀢𑀺 𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀧𑀦𑁆𑀦𑀭𑀲.

𑀓𑀸𑀫𑀪𑀯𑁂 𑀧𑀦 𑀬𑀲𑁆𑀫𑀸 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀁 𑀯𑀸 𑀲𑀁𑀲𑁂𑀤𑀚𑀸𑀦𑀁 𑀯𑀸 𑀲𑀪𑀸𑀯𑀓𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀭𑀽𑀧𑀢𑁄 𑀲𑀢𑁆𑀢 𑀲𑀦𑁆𑀢𑀢𑀺𑀲𑀻𑀲𑀸𑀦𑀺 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀭𑀽𑀧𑀭𑀽𑀧𑀢𑁄 𑀲𑀢𑁆𑀢𑀢𑀺 𑀥𑀫𑁆𑀫𑀸 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀢𑁂𑀲𑀢𑁆𑀢𑀢𑀺 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀲𑀦𑁆𑀢𑀢𑀺𑀲𑀻𑀲𑀙𑀓𑁆𑀓𑀢𑁄 𑀘𑀢𑀼𑀧𑀜𑁆𑀜𑀸𑀲 𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺. 𑀏𑀲 𑀉𑀓𑁆𑀓𑀁𑀲𑀢𑁄. 𑀅𑀯𑀓𑀁𑀲𑁂𑀦 𑀧𑀦 𑀢𑀁𑀢𑀁𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀯𑀺𑀓𑀮𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀳𑀸𑀧𑁂𑀢𑁆𑀯𑀸 𑀳𑀸𑀧𑁂𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀲𑀗𑁆𑀔𑀸𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀽𑀧𑀻𑀦𑀁 𑀧𑀦 𑀢𑀬𑁄𑀯 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀅𑀲𑀜𑁆𑀜𑀻𑀦𑀁 𑀭𑀽𑀧𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀫𑁂𑀯𑀸𑀢𑀺. 𑀏𑀲 𑀢𑀸𑀯 𑀧𑀝𑀺𑀲𑀦𑁆𑀥𑀺𑀬𑀁 𑀦𑀬𑁄.

𑀧𑀯𑀢𑁆𑀢𑁂 𑀧𑀦 𑀲𑀩𑁆𑀩𑀢𑁆𑀣 𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑁂𑀲𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀧𑀯𑀢𑁆𑀢𑀉𑀢𑀼𑀢𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀁 𑀧𑀸𑀢𑀼𑀪𑀯𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀦 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀜𑁆𑀳𑀺 𑀬𑀣𑀸 𑀧𑀧𑀸𑀢𑁂 𑀧𑀢𑀺𑀢𑀧𑀼𑀭𑀺𑀲𑁄 𑀧𑀭𑀲𑁆𑀲 ¶ 𑀧𑀘𑁆𑀘𑀬𑁄 𑀳𑁄𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬 𑀤𑀼𑀩𑁆𑀩𑀮𑀢𑁆𑀢𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀧𑀦 𑀉𑀤𑁆𑀥𑀁 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀁 ¶ 𑀲𑀼𑀤𑁆𑀥𑀝𑁆𑀞𑀓𑀁. 𑀲𑀤𑁆𑀤𑀧𑀸𑀢𑀼𑀪𑀸𑀯𑀓𑀸𑀮𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀉𑀢𑀼𑀢𑁄 𑀘𑁂𑀯 𑀘𑀺𑀢𑁆𑀢𑀢𑁄 𑀘 𑀲𑀤𑁆𑀤𑀦𑀯𑀓𑀁. 𑀬𑁂 𑀧𑀦 𑀓𑀩𑀴𑀺𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀺𑀦𑁄 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸 𑀢𑁂𑀲𑀁 𑁋

‘‘𑀬𑀜𑁆𑀘𑀲𑁆𑀲 ¶ 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁫);

𑀯𑀘𑀦𑀢𑁄 𑀫𑀸𑀢𑀭𑀸 𑀅𑀚𑁆𑀛𑁄𑀳𑀭𑀺𑀢𑀸𑀳𑀸𑀭𑁂𑀦 𑀅𑀦𑀼𑀕𑀢𑁂 𑀲𑀭𑀻𑀭𑁂, 𑀑𑀧𑀧𑀸𑀢𑀺𑀓𑀸𑀦𑀁 𑀲𑀩𑁆𑀩𑀧𑀞𑀫𑀁 𑀅𑀢𑁆𑀢𑀦𑁄 𑀫𑀼𑀔𑀕𑀢𑀁 𑀔𑁂𑀴𑀁 𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀦𑁆𑀢𑀺 𑀇𑀤𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀼𑀤𑁆𑀥𑀝𑁆𑀞𑀓𑀲𑁆𑀲 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀉𑀓𑁆𑀓𑀁𑀲𑀢𑁄 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦𑀁 𑀯𑀲𑁂𑀦 𑀙𑀩𑁆𑀩𑀻𑀲𑀢𑀺𑀯𑀺𑀥𑀁, 𑀧𑀼𑀩𑁆𑀩𑁂 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀼𑀢𑁆𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀲𑀢𑁆𑀢𑀢𑀺𑀯𑀺𑀥𑀦𑁆𑀢𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀁 𑀭𑀽𑀧𑀁 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀲𑀫𑀸𑀲𑀢𑁄 𑀦𑀯𑀦𑀯𑀼𑀢𑀺 𑀥𑀫𑁆𑀫𑀸. 𑀬𑀲𑁆𑀫𑀸 𑀯𑀸𑀲𑀤𑁆𑀤𑁄 𑀅𑀦𑀺𑀬𑀢𑁄 𑀓𑀤𑀸𑀘𑀺𑀤𑁂𑀯 𑀧𑀸𑀢𑀼𑀪𑀸𑀯𑀢𑁄, 𑀢𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀇𑀫𑁂 𑀲𑀢𑁆𑀢𑀦𑀯𑀼𑀢𑀺 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀜𑁆𑀳𑀺 𑀲𑀼𑀢𑁆𑀢𑀸𑀦𑀫𑁆𑀧𑀺 𑀧𑀫𑀢𑁆𑀢𑀸𑀦𑀫𑁆𑀧𑀺 𑀘𑀭𑀦𑁆𑀢𑀸𑀦𑀫𑁆𑀧𑀺 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀧𑀺𑀯𑀦𑁆𑀢𑀸𑀦𑀫𑁆𑀧𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀏𑀢𑁂 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀜𑁆𑀘 𑀢𑁂𑀲𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀬𑀁 𑀧𑀦𑁂𑀢𑀫𑁂𑀢𑁆𑀣 𑀓𑀫𑁆𑀫𑀚𑀭𑀽𑀧𑀁 𑀢𑀁 𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀩𑁆𑀩𑀧𑀞𑀫𑀁 𑀧𑀢𑀺𑀝𑁆𑀞𑀳𑀦𑁆𑀢𑀫𑁆𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂𑀦 𑀅𑀦𑀼𑀧𑀢𑁆𑀣𑀤𑁆𑀥𑀁 𑀦 𑀲𑀓𑁆𑀓𑁄𑀢𑀺 𑀲𑀡𑁆𑀞𑀸𑀢𑀼𑀁, 𑀦𑀸𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀁 𑀢𑁂𑀦 𑀅𑀦𑀼𑀧𑀢𑁆𑀣𑀤𑁆𑀥𑀁. 𑀅𑀣 𑀔𑁄 𑀯𑀸𑀢𑀩𑁆𑀪𑀸𑀳𑀢𑀸𑀧𑀺 𑀘𑀢𑀼𑀤𑁆𑀤𑀺𑀲𑀯𑀯𑀢𑁆𑀣𑀸𑀧𑀺𑀢𑀸 𑀦𑀴𑀓𑀮𑀸𑀧𑀺𑀬𑁄 𑀯𑀺𑀬, 𑀊𑀫𑀺𑀯𑁂𑀕𑀩𑁆𑀪𑀸𑀳𑀢𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀓𑀢𑁆𑀣𑀘𑀺 𑀮𑀤𑁆𑀥𑀧𑀢𑀺𑀝𑁆𑀞𑀸 𑀪𑀺𑀦𑁆𑀦𑀯𑀸𑀳𑀦𑀺𑀓𑀸 𑀯𑀺𑀬 𑀘 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀤𑁆𑀥𑀸𑀦𑁂𑀯𑁂𑀢𑀸𑀦𑀺 𑀅𑀧𑀢𑀫𑀸𑀦𑀸𑀦𑀺 𑀲𑀡𑁆𑀞𑀳𑀺𑀢𑁆𑀯𑀸 𑀏𑀓𑀫𑁆𑀧𑀺 𑀯𑀲𑁆𑀲𑀁 𑀤𑁆𑀯𑁂𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀯𑀲𑁆𑀲𑀲𑀢𑀫𑁆𑀧𑀺 𑀬𑀸𑀯 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀓𑁆𑀔𑀬𑁄 𑀯𑀸 𑀧𑀼𑀜𑁆𑀜𑀓𑁆𑀔𑀬𑁄 𑀯𑀸 𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 ‘𑀲𑀩𑁆𑀩𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄’𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀗𑁆𑀕𑀳𑀸’𑀢𑀺 ¶ ¶ 𑀏𑀢𑁆𑀣 𑀘 𑀬𑀁 𑀆𑀭𑀼𑀧𑁆𑀧𑁂 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀫𑁂𑀯, 𑀬𑀜𑁆𑀘 𑀅𑀲𑀜𑁆𑀜𑀻𑀲𑀼 𑀲𑀩𑁆𑀩𑀢𑁆𑀣 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀭𑀽𑀧𑀫𑁂𑀯, 𑀬𑀜𑁆𑀘 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀩𑁆𑀩𑀢𑁆𑀣 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀢𑀁 𑀲𑀩𑁆𑀩𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀯𑀁 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀜𑁆𑀜𑀻𑀲𑀼 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂 𑀦𑀸𑀬𑀼𑀢𑁆𑀢𑀁. 𑀇𑀤𑀜𑁆𑀳𑀺 𑁋

𑀦𑀸𑀫𑀭𑀽𑀧𑀲𑁆𑀲 ¶ 𑀬𑀁 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀢𑀁 𑀤𑁆𑀯𑀺𑀥𑀸 𑀫𑀢𑀁;

𑀯𑀺𑀧𑀸𑀓𑀫𑀯𑀺𑀧𑀸𑀓𑀜𑁆𑀘, 𑀬𑀼𑀢𑁆𑀢𑀫𑁂𑀯 𑀬𑀢𑁄 𑀇𑀤𑀁.

𑀬𑀜𑁆𑀳𑀺 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼 𑀯𑀺𑀜𑁆𑀜𑀸𑀡𑀁 𑀢𑀁 𑀯𑀺𑀧𑀸𑀓𑀸𑀯𑀺𑀧𑀸𑀓𑀪𑁂𑀤𑀢𑁄 𑀤𑁆𑀯𑀺𑀥𑀸 𑀫𑀢𑀁. 𑀇𑀤𑀜𑁆𑀘 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀭𑀽𑀧𑀁, 𑀢𑀣𑀸 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀬𑀼𑀢𑁆𑀢𑀫𑁂𑀯 𑀇𑀤𑀁. 𑀏𑀯𑀁 ‘𑀲𑀗𑁆𑀕𑀳𑀢𑁄’𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀧𑀘𑁆𑀘𑀬𑀦𑀬𑀸’𑀢𑀺 𑀏𑀢𑁆𑀣 𑀳𑀺 𑁋

𑀦𑀸𑀫𑀲𑁆𑀲 𑀧𑀸𑀓𑀯𑀺𑀜𑁆𑀜𑀸𑀡𑀁, 𑀦𑀯𑀥𑀸 𑀳𑁄𑀢𑀺 𑀧𑀘𑁆𑀘𑀬𑁄;

𑀯𑀢𑁆𑀣𑀼𑀭𑀽𑀧𑀲𑁆𑀲 𑀦𑀯𑀥𑀸, 𑀲𑁂𑀲𑀭𑀽𑀧𑀲𑁆𑀲 𑀅𑀝𑁆𑀞𑀥𑀸.

𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀳𑁄𑀢𑀺 𑀭𑀽𑀧𑀲𑁆𑀲 𑀏𑀓𑀥𑀸;

𑀢𑀤𑀜𑁆𑀜𑀁 𑀧𑀦 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀢𑀲𑁆𑀲 𑀬𑀣𑀸𑀭𑀳𑀁.

𑀬𑀜𑁆𑀳𑁂𑀢𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀬𑀁 𑀯𑀸 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀦𑀸𑀫𑀁, 𑀢𑀲𑁆𑀲 𑀭𑀽𑀧𑀫𑀺𑀲𑁆𑀲𑀲𑁆𑀲 𑀯𑀸 𑀭𑀽𑀧𑀅𑀫𑀺𑀲𑁆𑀲𑀲𑁆𑀲 𑀯𑀸 𑀧𑀝𑀺𑀲𑀦𑁆𑀥𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀢𑁆𑀣𑀼𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀯𑀢𑁆𑀣𑀼𑀭𑀽𑀧𑀁 𑀲𑁂𑀲𑀭𑀽𑀧𑀲𑁆𑀲 𑀇𑀫𑁂𑀲𑀼 𑀦𑀯𑀲𑀼 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂𑀳𑀺 𑀅𑀝𑁆𑀞𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀦 𑀅𑀲𑀜𑁆𑀜𑀲𑀢𑁆𑀢𑀭𑀽𑀧𑀲𑁆𑀲 𑀯𑀸 𑀧𑀜𑁆𑀘𑀯𑁄𑀓𑀸𑀭𑁂 𑀯𑀸 𑀓𑀫𑁆𑀫𑀚𑀲𑁆𑀲 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 ¶ 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀲𑁂𑀲𑀁 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 ¶ 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑀲𑁆𑀲 𑀧𑀘𑁆𑀘𑀬𑀦𑀬𑁂 𑀤𑀲𑁆𑀲𑀺𑀬𑀫𑀸𑀦𑁂 𑀲𑀩𑁆𑀩𑀸𑀧𑀺 𑀧𑀝𑁆𑀞𑀸𑀦𑀓𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸 𑀳𑁄𑀢𑀻𑀢𑀺 𑀦 𑀢𑀁 𑀆𑀭𑀪𑀸𑀫.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀲𑀼𑀢𑁆𑀢𑀢𑁄 ¶ 𑀬𑀼𑀢𑁆𑀢𑀺𑀢𑁄 𑀘. 𑀲𑀼𑀢𑁆𑀢𑁂 𑀳𑀺 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁬𑁨) 𑀦𑀬𑁂𑀦 𑀩𑀳𑀼𑀥𑀸 𑀯𑁂𑀤𑀦𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀲𑀺𑀤𑁆𑀥𑀸. 𑀬𑀼𑀢𑁆𑀢𑀺𑀢𑁄 𑀧𑀦 𑁋

𑀘𑀺𑀢𑁆𑀢𑀚𑁂𑀦 𑀳𑀺 𑀭𑀽𑀧𑁂𑀦, 𑀇𑀥 𑀤𑀺𑀝𑁆𑀞𑁂𑀦 𑀲𑀺𑀚𑁆𑀛𑀢𑀺;

𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀭𑀽𑀧𑀲𑁆𑀲, 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀇𑀢𑀺.

𑀘𑀺𑀢𑁆𑀢𑁂 𑀳𑀺 𑀧𑀲𑀦𑁆𑀦𑁂 𑀅𑀧𑁆𑀧𑀲𑀦𑁆𑀦𑁂 𑀯𑀸 𑀢𑀤𑀦𑀼𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀤𑀺𑀝𑁆𑀞𑀸𑀦𑀺. 𑀤𑀺𑀝𑁆𑀞𑁂𑀦 𑀘 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀇𑀥 𑀤𑀺𑀝𑁆𑀞𑁂𑀦 𑀘𑀺𑀢𑁆𑀢𑀚𑀭𑀽𑀧𑁂𑀦 𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀳𑀺 𑀢𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁧.𑁫𑁩, 𑁪𑁧𑁯) 𑀆𑀕𑀢𑀸𑀢𑀺. 𑀏𑀯𑀁 𑀧𑀘𑁆𑀘𑀬𑀦𑀬𑀢𑁄 𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀢𑁆𑀣 𑀘 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀪𑀸𑀲𑀫𑀸𑀦𑁂𑀦 𑀪𑀕𑀯𑀢𑀸 𑀬𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀧𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀲𑀢𑀺, 𑀦 𑀲𑀢𑁆𑀢𑁄, 𑀦 𑀧𑁄𑀲𑁄; 𑀢𑀲𑁆𑀫𑀸 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀳𑁄𑀢𑀻𑀢𑀺.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑁄.

𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑁄

𑁨𑁨𑁯. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑁋

𑀦𑀸𑀫𑀁 𑀔𑀦𑁆𑀥𑀢𑁆𑀢𑀬𑀁 𑀭𑀽𑀧𑀁, 𑀪𑀽𑀢𑀯𑀢𑁆𑀣𑀸𑀤𑀺𑀓𑀁 𑀫𑀢𑀁;

𑀓𑀢𑁂𑀓𑀲𑁂𑀲𑀁 𑀢𑀁 𑀢𑀲𑁆𑀲, 𑀢𑀸𑀤𑀺𑀲𑀲𑁆𑀲𑁂𑀯 𑀧𑀘𑁆𑀘𑀬𑁄.

𑀬𑀜𑁆𑀳𑁂𑀢𑀁 ¶ ¶ 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀦𑀸𑀫𑀭𑀽𑀧𑀁, 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁, 𑀭𑀽𑀧𑀁 𑀧𑀦 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀦𑀺𑀬𑀫𑀢𑁄 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀙 𑀯𑀢𑁆𑀣𑀽𑀦𑀺 ¶ 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀁 𑀪𑀽𑀢𑀯𑀢𑁆𑀣𑀸𑀤𑀺𑀓𑀁 𑀫𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀁 ‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦’’𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀲𑁆𑀲𑁂𑀯 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀭𑀼𑀧𑁆𑀧𑁂 𑀦𑀸𑀫𑀫𑁂𑀯 𑀧𑀘𑁆𑀘𑀬𑁄. 𑀢𑀜𑁆𑀘 𑀙𑀝𑁆𑀞𑀸𑀬𑀢𑀦𑀲𑁆𑀲𑁂𑀯, 𑀦 𑀅𑀜𑁆𑀜𑀲𑁆𑀲. ‘‘𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 𑀳𑀺 𑀅𑀩𑁆𑀬𑀸𑀓𑀢𑀯𑀸𑀭𑁂 𑀯𑀓𑁆𑀔𑀢𑀺. 𑀇𑀥 𑀲𑀗𑁆𑀕𑀳𑀺𑀢𑀫𑁂𑀯 𑀳𑀺 𑀢𑀢𑁆𑀣 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄’’𑀢𑀺? 𑀦𑀸𑀫𑀭𑀽𑀧𑀪𑀸𑀯𑁂 𑀪𑀸𑀯𑀢𑁄. 𑀢𑀲𑁆𑀲 𑀢𑀲𑁆𑀲 𑀳𑀺 𑀦𑀸𑀫𑀲𑁆𑀲 𑀭𑀽𑀧𑀲𑁆𑀲 𑀘 𑀪𑀸𑀯𑁂 𑀢𑀁 𑀢𑀁 𑀆𑀬𑀢𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀲𑀸 𑀧𑀦𑀲𑁆𑀲 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑀢𑀸 𑀧𑀘𑁆𑀘𑀬𑀦𑀬𑀲𑁆𑀫𑀺𑀜𑁆𑀜𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑁋

𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀯𑀸, 𑀳𑁄𑀢𑀺 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄;

𑀬𑀣𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀦𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀤𑀻𑀧𑀦𑀸 𑁋

𑀦𑀸𑀫𑀫𑁂𑀯 𑀳𑀺 𑀆𑀭𑀼𑀧𑁆𑀧𑁂, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼;

𑀧𑀘𑁆𑀘𑀬𑁄 𑀲𑀢𑁆𑀢𑀥𑀸 𑀙𑀝𑁆𑀞𑀸, 𑀳𑁄𑀢𑀺 𑀢𑀁 𑀅𑀯𑀓𑀁𑀲𑀢𑁄.

𑀓𑀣𑀁? ‘𑀧𑀝𑀺𑀲𑀦𑁆𑀥𑀺𑀬𑀁’ 𑀢𑀸𑀯 𑀅𑀯𑀓𑀁𑀲𑀢𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀲𑀢𑁆𑀢𑀥𑀸 𑀦𑀸𑀫𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

‘𑀧𑀯𑀢𑁆𑀢𑁂’𑀧𑀺 𑀯𑀺𑀧𑀸𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀭𑀁 𑀧𑀦 𑀅𑀯𑀓𑀁𑀲𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀧𑀘𑁆𑀘𑀬𑁂𑀲𑀼 𑀯𑀺𑀧𑀸𑀓𑀧𑀘𑁆𑀘𑀬𑀯𑀚𑁆𑀚𑁂𑀳𑀺 𑀙𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀲𑁆𑀫𑀺𑀫𑁆𑀧𑀺 ¶ 𑀪𑀯𑁂 𑀦𑀸𑀫𑀁, 𑀢𑀣𑁂𑀯 𑀧𑀝𑀺𑀲𑀦𑁆𑀥𑀺𑀬𑀁;

𑀙𑀝𑁆𑀞𑀲𑁆𑀲 𑀇𑀢𑀭𑁂𑀲𑀁 𑀢𑀁, 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑁄.

𑀆𑀭𑀼𑀧𑁆𑀧𑀢𑁄 ¶ 𑀳𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀁 𑀯𑀺𑀧𑀸𑀓𑀦𑀸𑀫𑀁 𑀳𑀤𑀬𑀯𑀢𑁆𑀣𑀼𑀦𑁄 𑀲𑀳𑀸𑀬𑀁 𑀳𑀼𑀢𑁆𑀯𑀸 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 ¶ 𑀬𑀣𑀸 𑀆𑀭𑀼𑀧𑁆𑀧𑁂 𑀯𑀼𑀢𑁆𑀢𑀁 𑀢𑀣𑁂𑀯 𑀅𑀯𑀓𑀁𑀲𑀢𑁄 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀭𑁂𑀲𑀁 𑀧𑀦𑁂𑀢𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀘𑀢𑀼𑀫𑀳𑀸𑀪𑀽𑀢𑀲𑀳𑀸𑀬𑀁 𑀳𑀼𑀢𑁆𑀯𑀸 𑀲𑀳𑀚𑀸𑀢 𑀦𑀺𑀲𑁆𑀲𑀬𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑁂𑀧𑀺 𑀢𑀣𑀸 𑀳𑁄𑀢𑀺, 𑀧𑀸𑀓𑀁 𑀧𑀸𑀓𑀲𑁆𑀲 𑀧𑀘𑁆𑀘𑀬𑁄;

𑀅𑀧𑀸𑀓𑀁 𑀅𑀯𑀺𑀧𑀸𑀓𑀲𑁆𑀲, 𑀙𑀥𑀸 𑀙𑀝𑁆𑀞𑀲𑁆𑀲 𑀧𑀘𑁆𑀘𑀬𑁄.

𑀧𑀯𑀢𑁆𑀢𑁂𑀧𑀺 𑀳𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀬𑀣𑀸 𑀧𑀝𑀺𑀲𑀦𑁆𑀥𑀺𑀬𑀁, 𑀢𑀣𑁂𑀯 𑀯𑀺𑀧𑀸𑀓𑀦𑀸𑀫𑀁 𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀸𑀬𑀢𑀦𑀲𑁆𑀲 𑀅𑀯𑀓𑀁𑀲𑀢𑁄 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀧𑀸𑀓𑀁 𑀧𑀦 𑀅𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀲𑁆𑀲 𑀅𑀯𑀓𑀁𑀲𑀢𑁄𑀯 𑀢𑀢𑁄 𑀯𑀺𑀧𑀸𑀓𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀙𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀦𑁂𑀢𑁆𑀣 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣𑁂𑀯 𑀲𑁂𑀲𑀧𑀜𑁆𑀘𑀦𑁆𑀦𑀁, 𑀯𑀺𑀧𑀸𑀓𑀁 𑀧𑀘𑁆𑀘𑀬𑁄 𑀪𑀯𑁂;

𑀘𑀢𑀼𑀥𑀸 𑀅𑀯𑀺𑀧𑀸𑀓𑀫𑁆𑀧𑀺, 𑀏𑀯𑀫𑁂𑀯 𑀧𑀓𑀸𑀲𑀺𑀢𑀁.

𑀢𑀢𑁆𑀣𑁂𑀯 𑀳𑀺 𑀧𑀯𑀢𑁆𑀢𑁂 𑀲𑁂𑀲𑀸𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀼𑀧𑁆𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀫𑁆𑀧𑀺 𑀇𑀢𑀭𑀫𑁆𑀧𑀺 𑀯𑀺𑀧𑀸𑀓𑀦𑀸𑀫𑀁 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀘 𑀯𑀺𑀧𑀸𑀓𑀁, 𑀅𑀯𑀺𑀧𑀸𑀓𑀫𑁆𑀧𑀺 𑀏𑀯𑀫𑁂𑀯 𑀧𑀓𑀸𑀲𑀺𑀢𑀁. 𑀢𑀲𑁆𑀫𑀸 𑀓𑀼𑀲𑀮𑀸𑀤𑀺𑀪𑁂𑀤𑀫𑁆𑀧𑀺 𑀢𑁂𑀲𑀁 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀢𑀸𑀯 𑀦𑀸𑀫𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀯𑀸 𑀬𑀲𑁆𑀲 𑀬𑀲𑁆𑀲 𑀆𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀣𑀸 𑀘 𑀳𑁄𑀢𑀺, 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀁 𑀧𑀦𑁂𑀢𑁆𑀣 𑀆𑀭𑀼𑀧𑁆𑀧-𑀪𑀯𑁂 𑀪𑀯𑀢𑀺 𑀧𑀘𑁆𑀘𑀬𑁄;

𑀦 𑀏𑀓𑀸𑀬𑀢𑀦𑀲𑁆𑀲𑀸𑀧𑀺, 𑀧𑀜𑁆𑀘𑀓𑁆𑀔𑀦𑁆𑀥𑀪𑀯𑁂 𑀧𑀦.

𑀭𑀽𑀧𑀢𑁄 ¶ 𑀲𑀦𑁆𑀥𑀺𑀬𑀁 𑀯𑀢𑁆𑀣𑀼, 𑀙𑀥𑀸 𑀙𑀝𑁆𑀞𑀲𑁆𑀲 𑀧𑀘𑁆𑀘𑀬𑁄;

𑀪𑀽𑀢𑀸𑀦𑀺 𑀘𑀢𑀼𑀥𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀦𑁆𑀦𑀁 𑀅𑀯𑀺𑀲𑁂𑀲𑀢𑁄.

𑀭𑀽𑀧𑀢𑁄 𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀁 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀧𑀦 𑀪𑀽𑀢𑀸𑀦𑀺 𑀅𑀯𑀺𑀲𑁂𑀲𑀢𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀬𑀁 𑀬𑀁 𑀆𑀬𑀢𑀦𑀁 ¶ 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀧𑀜𑁆𑀘𑀦𑁆𑀦𑀫𑁆𑀧𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 ¶ 𑀘𑀢𑀼𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀢𑀺𑀥𑀸 𑀚𑀻𑀯𑀺𑀢𑀫𑁂𑀢𑁂𑀲𑀁, 𑀆𑀳𑀸𑀭𑁄 𑀘 𑀧𑀯𑀢𑁆𑀢𑀺𑀬𑀁;

𑀢𑀸𑀦𑁂𑀯 𑀙𑀥𑀸 𑀙𑀝𑁆𑀞𑀲𑁆𑀲, 𑀯𑀢𑁆𑀣𑀼 𑀢𑀲𑁆𑀲𑁂𑀯 𑀧𑀜𑁆𑀘𑀥𑀸.

𑀏𑀢𑁂𑀲𑀁 𑀧𑀦 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀅𑀢𑁆𑀣𑀺𑀅𑀯𑀺𑀕𑀢𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀭𑀽𑀧𑀚𑀻𑀯𑀺𑀢𑀁 𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

‘𑀆𑀳𑀸𑀭𑁄 𑀘𑀸’𑀢𑀺 𑀆𑀳𑀸𑀭𑁄 𑀘 𑀅𑀢𑁆𑀣𑀺𑀅𑀯𑀺𑀕𑀢𑀆𑀳𑀸𑀭𑀯𑀲𑁂𑀦 𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄 𑀘 𑀔𑁄 𑀬𑁂 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀆𑀳𑀸𑀭𑀸𑀦𑀼𑀕𑀢𑁂 𑀓𑀸𑀬𑁂 𑀧𑀯𑀢𑁆𑀢𑀺𑀬𑀁𑀬𑁂𑀯, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀸𑀦𑀺 𑀧𑀦 𑀧𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀙𑀝𑁆𑀞𑀲𑁆𑀲 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀞𑀧𑁂𑀢𑁆𑀯𑀸 𑀧𑀦 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺 𑀢𑀲𑁆𑀲𑁂𑀯 𑀅𑀯𑀲𑁂𑀲𑀫𑀦𑀸𑀬𑀢𑀦𑀲𑁆𑀲 𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀏𑀯𑀁 𑀭𑀽𑀧𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀯𑀸 𑀬𑀲𑁆𑀲 𑀬𑀲𑁆𑀲 𑀆𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀬𑀣𑀸 𑀘 𑀳𑁄𑀢𑀺 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀫𑀭𑀽𑀧𑀁 𑀧𑀦𑀼𑀪𑀬𑀁, 𑀳𑁄𑀢𑀺 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄;

𑀬𑀣𑀸 𑀘 𑀢𑀫𑁆𑀧𑀺 𑀲𑀩𑁆𑀩𑀢𑁆𑀣, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑀲𑁂𑀬𑁆𑀬𑀣𑀺𑀤𑀁 𑁋 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀔𑀦𑁆𑀥𑀢𑁆𑀢𑀬𑀯𑀢𑁆𑀣𑀼𑀭𑀽𑀧𑀲𑀗𑁆𑀔𑀸𑀢𑀁 𑀦𑀸𑀫𑀭𑀽𑀧𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀤𑀻𑀳𑀺 𑀧𑀘𑁆𑀘𑀬𑁄 ¶ 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀫𑀼𑀔𑀫𑀢𑁆𑀢𑀁. 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀧𑀦 𑀲𑀓𑁆𑀓𑀸 𑀲𑀩𑁆𑀩𑀁 𑀬𑁄𑀚𑁂𑀢𑀼𑀦𑁆𑀢𑀺 𑀦 𑀏𑀢𑁆𑀣 𑀯𑀺𑀢𑁆𑀣𑀸𑀭𑁄 𑀤𑀲𑁆𑀲𑀺𑀢𑁄𑀢𑀺.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑁄.

𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁦. 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 ¶ 𑀨𑀲𑁆𑀲𑀦𑀺𑀤𑁆𑀤𑁂𑀲𑁂 𑁋

𑀙𑀴𑁂𑀯 𑀨𑀲𑁆𑀲𑀸 𑀲𑀗𑁆𑀔𑁂𑀧𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀆𑀤𑀬𑁄;

𑀯𑀺𑀜𑁆𑀜𑀸𑀡𑀫𑀺𑀯 𑀩𑀢𑁆𑀢𑀺𑀁𑀲, 𑀯𑀺𑀢𑁆𑀣𑀸𑀭𑁂𑀦 𑀪𑀯𑀦𑁆𑀢𑀺 𑀢𑁂.

‘𑀲𑀗𑁆𑀔𑁂𑀧𑀢𑁄’ ¶ 𑀳𑀺 𑀧𑀸𑀴𑀺𑀬𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀆𑀤𑀬𑁄 𑀙𑀴𑁂𑀯 𑀨𑀲𑁆𑀲𑀸 𑀆𑀕𑀢𑀸. 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑀸 𑀧𑀜𑁆𑀘 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀤𑀲, 𑀲𑁂𑀲𑀸 𑀩𑀸𑀯𑀻𑀲𑀢𑀺 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀩𑀸𑀯𑀻𑀲𑀢𑀻𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀫𑀺𑀯 𑀩𑀸𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀬𑀁 𑀧𑀦𑁂𑀢𑀲𑁆𑀲 𑀩𑀸𑀢𑁆𑀢𑀺𑀁𑀲𑀯𑀺𑀥𑀲𑁆𑀲𑀸𑀧𑀺 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀲𑀴𑀸𑀬𑀢𑀦𑀁. 𑀢𑀢𑁆𑀣 𑁋

𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁, 𑀘𑀓𑁆𑀔𑀸𑀤𑀺𑀁 𑀩𑀸𑀳𑀺𑀭𑁂𑀳𑀺𑀧𑀺;

𑀲𑀴𑀸𑀬𑀢𑀦𑀫𑀺𑀘𑁆𑀙𑀦𑁆𑀢𑀺, 𑀙𑀳𑀺 𑀲𑀤𑁆𑀥𑀺𑀁 𑀯𑀺𑀘𑀓𑁆𑀔𑀡𑀸.

𑀢𑀢𑁆𑀣 𑀬𑁂 𑀢𑀸𑀯 ‘‘𑀉𑀧𑀸𑀤𑀺𑀦𑁆𑀦𑀓𑀧𑀯𑀢𑁆𑀢𑀺𑀓𑀣𑀸 𑀅𑀬’’𑀦𑁆𑀢𑀺 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀧𑀘𑁆𑀘𑀬𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀤𑀻𑀧𑁂𑀦𑁆𑀢𑀺, 𑀢𑁂 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀧𑀸𑀴𑀺𑀅𑀦𑀼𑀲𑀸𑀭𑀢𑁄 𑀆𑀭𑀼𑀧𑁆𑀧𑁂 𑀙𑀝𑁆𑀞𑀸𑀬𑀢𑀦𑀜𑁆𑀘 𑀅𑀜𑁆𑀜𑀢𑁆𑀣 𑀲𑀩𑁆𑀩𑀲𑀗𑁆𑀕𑀳𑀢𑁄 𑀲𑀴𑀸𑀬𑀢𑀦𑀜𑁆𑀘 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁 𑀘𑀓𑁆𑀔𑀸𑀤𑀺𑀁 𑀲𑀴𑀸𑀬𑀢𑀦𑀦𑁆𑀢𑀺 𑀇𑀘𑁆𑀙𑀦𑁆𑀢𑀺. 𑀢𑀜𑁆𑀳𑀺 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑁆𑀯𑁂𑀯 𑀲𑀗𑁆𑀖𑀁 𑀕𑀘𑁆𑀙𑀢𑀺. 𑀬𑁂 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁂𑀯 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀤𑀻𑀧𑁂𑀦𑁆𑀢𑀺, 𑀧𑀘𑁆𑀘𑀬𑀁 𑀧𑀦 𑀪𑀺𑀦𑁆𑀦𑀲𑀦𑁆𑀢𑀸𑀦𑀫𑁆𑀧𑀺, 𑀢𑁂 𑀬𑀁 𑀬𑀁 𑀆𑀬𑀢𑀦𑀁 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀁 𑀲𑀩𑁆𑀩𑀁 𑀤𑀻𑀧𑁂𑀦𑁆𑀢𑀸 ¶ 𑀩𑀸𑀳𑀺𑀭𑀫𑁆𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑁂𑀯 𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁 𑀩𑀸𑀳𑀺𑀭𑁂𑀳𑀺𑀧𑀺 𑀭𑀽𑀧𑀸𑀬𑀢𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀴𑀸𑀬𑀢𑀦𑀦𑁆𑀢𑀺 𑀇𑀘𑁆𑀙𑀦𑁆𑀢𑀺. 𑀢𑀫𑁆𑀧𑀺 𑀳𑀺 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀢𑁂𑀲𑀁 𑀏𑀓𑀲𑁂𑀲𑁂 𑀓𑀢𑁂 𑀲𑀴𑀸𑀬𑀢𑀦𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀏𑀢𑁆𑀣𑀸𑀳 𑁋 𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀺, 𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸, 𑀅𑀬𑀜𑁆𑀘 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀏𑀓𑁄𑀯 𑀯𑀼𑀢𑁆𑀢𑁄, 𑀲𑁄 𑀓𑀲𑁆𑀫𑀸𑀢𑀺? 𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋 𑀲𑀘𑁆𑀘𑀫𑁂𑀢𑀁. 𑀲𑀩𑁆𑀩𑁂𑀳𑀺 𑀏𑀓𑁄 𑀏𑀓𑀫𑁆𑀳𑀸 𑀯𑀸 𑀲𑀩𑁆𑀩𑁂 𑀦 𑀲𑀫𑁆𑀪𑁄𑀦𑁆𑀢𑀺, 𑀲𑀫𑁆𑀪𑁄𑀢𑀺 𑀧𑀦 𑀅𑀦𑁂𑀓𑁂𑀳𑀺 𑀏𑀓𑁄; 𑀬𑀣𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀘𑀓𑁆𑀔𑀸𑀬𑀢𑀦𑀸 𑀭𑀽𑀧𑀸𑀬𑀢𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀫𑀦𑀸𑀬𑀢𑀦𑀸 𑀅𑀯𑀲𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬𑀢𑀦𑀸 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀯 𑀳𑀺 𑁋

𑀏𑀓𑁄 ¶ 𑀧𑀦𑁂𑀓𑀸𑀬𑀢𑀦-𑀧𑁆𑀧𑀪𑀯𑁄 𑀇𑀢𑀺 𑀤𑀻𑀧𑀺𑀢𑁄;

𑀨𑀲𑁆𑀲𑁄𑀬𑀁 𑀏𑀓𑀯𑀘𑀦-𑀦𑀺𑀤𑁆𑀤𑁂𑀲𑁂𑀦𑀺𑀥 𑀢𑀸𑀤𑀺𑀦𑀸.

‘𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁂𑀦𑀸’𑀢𑀺 ¶ 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀳𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀅𑀦𑁂𑀓𑁂𑀳𑀺 𑀆𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀻𑀢𑀺 𑀢𑀸𑀤𑀺𑀦𑀸 𑀤𑀻𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀬𑀢𑀦𑁂𑀲𑀼 𑀧𑀦 𑁋

𑀙𑀥𑀸 𑀧𑀜𑁆𑀘 𑀢𑀢𑁄 𑀏𑀓𑀁, 𑀦𑀯𑀥𑀸 𑀩𑀸𑀳𑀺𑀭𑀸𑀦𑀺 𑀙;

𑀬𑀣𑀸𑀲𑀫𑁆𑀪𑀯𑀫𑁂𑀢𑀲𑁆𑀲, 𑀧𑀘𑁆𑀘𑀬𑀢𑁆𑀢𑁂 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀯𑀺𑀪𑀸𑀯𑀦𑀸 𑁋 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀢𑀸𑀯 𑀧𑀜𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀁 𑀏𑀓𑀁 𑀯𑀺𑀧𑀸𑀓𑀫𑀦𑀸𑀬𑀢𑀦𑀁 𑀅𑀦𑁂𑀓𑀪𑁂𑀤𑀲𑁆𑀲 𑀯𑀺𑀧𑀸𑀓𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀩𑀸𑀳𑀺𑀭𑁂𑀲𑀼 𑀧𑀦 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀲𑀤𑁆𑀤𑀸𑀬𑀢𑀦𑀸𑀤𑀻𑀦𑀺 𑀲𑁄𑀢𑀲𑀫𑁆𑀨𑀲𑁆𑀲𑀸𑀤𑀻𑀦𑀁. 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀧𑀦 𑀢𑀸𑀦𑀺 𑀥𑀫𑁆𑀫𑀸𑀬𑀢𑀦𑀜𑁆𑀘 𑀢𑀣𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑁂𑀯 𑀘𑀸𑀢𑀺 𑀏𑀯𑀁 𑀩𑀸𑀳𑀺𑀭𑀸𑀦𑀺 𑀙 𑀬𑀣𑀸𑀲𑀫𑁆𑀪𑀯𑀫𑁂𑀢𑀲𑁆𑀲 𑀧𑀘𑁆𑀘𑀬𑀢𑁆𑀢𑁂 𑀯𑀺𑀪𑀸𑀯𑀬𑁂𑀢𑀺.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑁄.

𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁧. 𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸𑀦𑀺𑀤𑁆𑀤𑁂𑀲𑁂 𑁋

𑀤𑁆𑀯𑀸𑀭𑀢𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸;

𑀙𑀴𑁂𑀯 𑀢𑀸 𑀧𑀪𑁂𑀤𑁂𑀦, 𑀏𑀓𑀽𑀦𑀦𑀯𑀼𑀢𑀻 𑀫𑀢𑀸.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀯𑁂𑀤𑀦𑀸𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀧𑀸𑀴𑀺𑀬𑀁 𑀇𑀫𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸 𑀤𑁆𑀯𑀸𑀭𑀢𑁄 𑀙𑀴𑁂𑀯 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀢𑀸 𑀧𑀦 𑀧𑀪𑁂𑀤𑁂𑀦 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀏𑀓𑀽𑀦𑀦𑀯𑀼𑀢𑀻𑀢𑀺 𑀫𑀢𑀸.

𑀯𑁂𑀤𑀦𑀸𑀲𑀼 𑀧𑀦𑁂𑀢𑀸𑀲𑀼, 𑀇𑀥 𑀩𑀸𑀢𑁆𑀢𑀺𑀁𑀲 𑀯𑁂𑀤𑀦𑀸;

𑀯𑀺𑀧𑀸𑀓𑀘𑀺𑀢𑁆𑀢𑀬𑀼𑀢𑁆𑀢𑀸𑀯, 𑀅𑀥𑀺𑀧𑁆𑀧𑁂𑀢𑀸𑀢𑀺 𑀪𑀸𑀲𑀺𑀢𑀸.

𑀅𑀝𑁆𑀞𑀥𑀸 ¶ 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀤𑁆𑀯𑀸𑀭𑀫𑁆𑀳𑀺 𑀧𑀘𑁆𑀘𑀬𑁄;

𑀲𑁂𑀲𑀸𑀦𑀁 𑀏𑀓𑀥𑀸 𑀨𑀲𑁆𑀲𑁄, 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑁄 𑀢𑀣𑀸.

𑀢𑀢𑁆𑀣 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑁂𑀤𑀦𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 ¶ 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀸𑀦𑀁 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺.

‘𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑁄 𑀢𑀣𑀸’𑀢𑀺 𑀫𑀦𑁄𑀤𑁆𑀯𑀸𑀭𑁂𑀧𑀺 𑀳𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀲𑁄 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀗𑁆𑀔𑀸𑀢𑁄 𑀨𑀲𑁆𑀲𑁄 𑀢𑀣𑁂𑀯 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀘 𑀧𑀯𑀢𑁆𑀢𑀸𑀦𑀁 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀫𑁆𑀧𑀺. 𑀬𑀸 𑀧𑀦𑁂𑀢𑀸 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀸𑀯𑀘𑀭𑀯𑁂𑀤𑀦𑀸, 𑀢𑀸𑀲𑀁 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀲𑀫𑁆𑀧𑀬𑀼𑀢𑁆𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑁄.

𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁨. 𑀯𑁂𑀤𑀦𑀸𑀧𑀘𑁆𑀘𑀬𑀸 ¶ 𑀢𑀡𑁆𑀳𑀸𑀦𑀺𑀤𑁆𑀤𑁂𑀲𑁂 𑁋

𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑁂𑀦, 𑀙 𑀢𑀡𑁆𑀳𑀸 𑀇𑀥 𑀤𑀻𑀧𑀺𑀢𑀸;

𑀏𑀓𑁂𑀓𑀸 𑀢𑀺𑀯𑀺𑀥𑀸 𑀢𑀢𑁆𑀣, 𑀧𑀯𑀢𑁆𑀢𑀸𑀓𑀸𑀭𑀢𑁄 𑀫𑀢𑀸.

𑀇𑀫𑀲𑁆𑀫𑀺𑀜𑁆𑀳𑀺 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀦𑀺𑀤𑁆𑀤𑁂𑀲𑁂 ‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄’𑀢𑀺 𑀧𑀺𑀢𑀺𑀢𑁄 𑀦𑀸𑀫𑀯𑀲𑁂𑀦 𑀧𑀼𑀢𑁆𑀢𑁄 𑀯𑀺𑀬 𑀇𑀫𑀸 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸𑀢𑀺 𑀆𑀭𑀫𑁆𑀫𑀡𑀢𑁄 𑀦𑀸𑀫𑀯𑀲𑁂𑀦 𑀙 𑀢𑀡𑁆𑀳𑀸 𑀤𑀻𑀧𑀺𑀢𑀸 𑀧𑀓𑀸𑀲𑀺𑀢𑀸 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀭𑀽𑀧𑁂 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀸𑀲𑀼 𑀘 𑀧𑀦 𑀢𑀡𑁆𑀳𑀸𑀲𑀼 𑀏𑀓𑁂𑀓𑀸 𑀢𑀡𑁆𑀳𑀸 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸𑀢𑀺 𑀏𑀯𑀁 𑀢𑀺𑀯𑀺𑀥𑀸 𑀫𑀢𑀸. 𑀭𑀽𑀧𑀢𑀡𑁆𑀳𑀸 𑀏𑀯 𑀳𑀺 𑀬𑀤𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀕𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀅𑀲𑁆𑀲𑀸𑀤𑀬𑀫𑀸𑀦𑀸 ¶ 𑀧𑀯𑀢𑁆𑀢𑀢𑀺, 𑀢𑀤𑀸 𑀓𑀸𑀫𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀬𑀤𑀸 𑀢𑀤𑁂𑀯𑀸𑀭𑀫𑁆𑀫𑀡𑀁 𑀥𑀼𑀯𑀁 𑀲𑀲𑁆𑀲𑀢𑀦𑁆𑀢𑀺 𑀧𑀯𑀢𑁆𑀢𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀪𑀯𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀳𑀺 𑀭𑀸𑀕𑁄 𑀪𑀯𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸 𑀧𑀦 𑀢𑀤𑁂𑀯𑀸𑀭𑀫𑁆𑀫𑀡𑀁 ‘‘𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀯𑀺𑀪𑀯𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀳𑀺 ¶ 𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀲𑁂𑀯 𑀦𑀬𑁄 𑀲𑀤𑁆𑀤𑀢𑀡𑁆𑀳𑀸𑀤𑀻𑀲𑀼𑀧𑀻𑀢𑀺 𑀏𑀢𑀸 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸 𑀳𑁄𑀦𑁆𑀢𑀺.

𑀢𑀸 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲. 𑀇𑀢𑀺 𑀅𑀢𑀻𑀢𑀸 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸 𑀳𑁄𑀦𑁆𑀢𑀺. 𑀢𑀸 𑀧𑀦 𑀲𑀁𑀗𑁆𑀔𑀺𑀧𑁆𑀧𑀫𑀸𑀦𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀙, 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀯𑀸 𑀢𑀺𑀲𑁆𑀲𑁄𑀯 𑀢𑀡𑁆𑀳𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦𑀺𑀫𑁂 𑀲𑀢𑁆𑀢𑀸 𑀧𑀼𑀢𑁆𑀢𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀢𑁆𑀢𑁂 𑀫𑀫𑀢𑁆𑀢𑁂𑀦 𑀥𑀸𑀢𑀺𑀬𑀸 𑀯𑀺𑀬 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑁂𑀤𑀦𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀯𑁂𑀤𑀦𑀸𑀬 𑀫𑀫𑀢𑁆𑀢𑁂𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀓𑀸𑀭𑀕𑀦𑁆𑀥𑀩𑁆𑀩𑀕𑀦𑁆𑀥𑀺𑀓𑀲𑀽𑀤𑀢𑀦𑁆𑀢𑀯𑀸𑀬𑀭𑀲𑀸𑀬𑀦𑀯𑀺𑀥𑀸𑀬𑀓𑀯𑁂𑀚𑁆𑀚𑀸𑀤𑀻𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀧𑁂𑀲𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀘𑁂𑀢𑁆𑀣 ¶ 𑀅𑀥𑀺𑀧𑁆𑀧𑁂𑀢𑀸, 𑀯𑀺𑀧𑀸𑀓𑀲𑀼𑀔𑀯𑁂𑀤𑀦𑀸;

𑀏𑀓𑀸𑀯 𑀏𑀓𑀥𑀸 𑀘𑁂𑀲𑀸, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄.

‘𑀏𑀓𑀥𑀸’𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑁋

𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀺, 𑀲𑀼𑀔𑀻 𑀪𑀺𑀬𑁆𑀬𑁄𑀧𑀺 𑀇𑀘𑁆𑀙𑀢𑀺;

𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸.

𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀢𑀲𑁆𑀫𑀸, 𑀳𑁄𑀦𑁆𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸;

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀇𑀢𑀺 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸.

𑀯𑁂𑀤𑀦𑀸 𑀧𑀘𑁆𑀘𑀬𑀸 𑀘𑀸𑀧𑀺, 𑀬𑀲𑁆𑀫𑀸 𑀦𑀸𑀦𑀼𑀲𑀬𑀁 𑀯𑀺𑀦𑀸;

𑀳𑁄𑀢𑀺 𑀢𑀲𑁆𑀫𑀸 𑀦 𑀲𑀸 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄𑀢𑀺.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑁄.

𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁩. 𑀢𑀡𑁆𑀳𑀸𑀧𑀘𑁆𑀘𑀬𑀸 ¶ 𑀉𑀧𑀸𑀤𑀸𑀦𑀦𑀺𑀤𑁆𑀤𑁂𑀲𑁂 𑁋

𑀉𑀧𑀸𑀤𑀸𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀸𑀦𑀺 𑀅𑀢𑁆𑀣𑀯𑀺𑀪𑀸𑀕𑀢𑁄;

𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸, 𑀓𑀫𑀢𑁄 𑀘 𑀯𑀺𑀪𑀸𑀯𑀬𑁂.

𑀧𑀸𑀴𑀺𑀬𑀜𑁆𑀳𑀺 𑀉𑀧𑀸𑀤𑀸𑀦𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁…𑀧𑁂… 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀆𑀕𑀢𑀸𑀦𑀺. 𑀢𑁂𑀲𑀁 𑀅𑀬𑀁 𑀅𑀢𑁆𑀣𑀯𑀺𑀪𑀸𑀕𑁄 𑁋 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀦𑁆𑀢𑀺 ¶ 𑀤𑀴𑁆𑀳𑀕𑁆𑀕𑀳𑀡𑀁. 𑀤𑀴𑁆𑀳𑀢𑁆𑀣𑁄 𑀳𑁂𑀢𑁆𑀣 𑀉𑀧𑀲𑀤𑁆𑀤𑁄 𑀉𑀧𑀸𑀬𑀸𑀲-𑀉𑀧𑀓𑀝𑁆𑀞𑀸𑀤𑀻𑀲𑀼 𑀯𑀺𑀬. 𑀢𑀣𑀸 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀻𑀢𑀺 𑀯𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 ¶ . 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺𑀆𑀤𑀻𑀲𑀼 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀺. 𑀢𑀣𑀸 𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 𑀏𑀯𑀁 𑀲𑀼𑀤𑁆𑀥𑀻𑀢𑀺 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀻𑀢𑀺. 𑀢𑀣𑀸 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀤𑀸𑀦𑀁. 𑀓𑀺𑀁 𑀯𑀤𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀬𑀁 𑀢𑀸𑀯 𑀢𑁂𑀲𑀁 𑀅𑀢𑁆𑀣𑀯𑀺𑀪𑀸𑀕𑁄.

‘𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂’ 𑀧𑀦 𑀓𑀸𑀫𑀼𑀧𑀸𑀤𑀸𑀦𑀁 𑀢𑀸𑀯 ‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀲𑀗𑁆𑀔𑁂𑀧𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀦𑀸𑀫 𑀧𑀼𑀭𑀺𑀫𑀢𑀡𑁆𑀳𑀸𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀤𑀴𑁆𑀳𑀲𑀫𑁆𑀪𑀽𑀢𑀸 𑀉𑀢𑁆𑀢𑀭𑀢𑀡𑁆𑀳𑀸 𑀏𑀯. 𑀓𑁂𑀘𑀺 𑀧𑀦𑀸𑀳𑀼 𑁋 𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 𑀢𑀡𑁆𑀳𑀸, 𑀅𑀦𑁆𑀥𑀓𑀸𑀭𑁂 𑀘𑁄𑀭𑀲𑁆𑀲 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬. 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁, 𑀢𑀲𑁆𑀲𑁂𑀯 𑀪𑀡𑁆𑀟𑀕𑁆𑀕𑀳𑀡𑀁 𑀯𑀺𑀬. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀧𑀝𑀺𑀧𑀓𑁆𑀔𑀸 𑀘 𑀢𑁂 𑀥𑀫𑁆𑀫𑀸. 𑀢𑀣𑀸 𑀧𑀭𑀺𑀬𑁂𑀲𑀦𑀸𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀸𑀢𑀺. 𑀲𑁂𑀲𑀼𑀧𑀸𑀤𑀸𑀦𑀢𑁆𑀢𑀬𑀁 𑀧𑀦 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀼𑀩𑁆𑀩𑁂 𑀭𑀽𑀧𑀸𑀤𑀻𑀲𑀼 𑀯𑀼𑀢𑁆𑀢𑀸𑀬 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸𑀬𑀧𑀺 𑀢𑀡𑁆𑀳𑀸𑀬 𑀤𑀴𑁆𑀳𑀪𑀸𑀯𑁄 𑀓𑀸𑀫𑀼𑀧𑀸𑀤𑀸𑀦𑀁. 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁? 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑀬𑀸 ¶ 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀲𑀻𑀮𑀯𑀢𑁂𑀳𑀺 𑀲𑀼𑀤𑁆𑀥𑀺𑀧𑀭𑀸𑀫𑀲𑀦𑀁 𑀧𑀦 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 ¶ 𑀓𑀢𑀫𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁? 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀺, 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻𑀢𑀺 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁨; 𑀯𑀺𑀪. 𑁯𑁩𑁮). 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁩; 𑀯𑀺𑀪. 𑁯𑁩𑁮). 𑀅𑀬𑀫𑁂𑀢𑁆𑀣 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁄.

‘𑀓𑀫𑀢𑁄’𑀢𑀺 ¶ 𑀏𑀢𑁆𑀣 𑀧𑀦 𑀢𑀺𑀯𑀺𑀥𑁄 𑀓𑀫𑁄 𑁋 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄, 𑀧𑀳𑀸𑀦𑀓𑁆𑀓𑀫𑁄, 𑀤𑁂𑀲𑀦𑀸𑀓𑁆𑀓𑀫𑁄 𑀘. 𑀢𑀢𑁆𑀣 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀇𑀫𑀲𑁆𑀲 𑀧𑀞𑀫𑀁 𑀉𑀧𑁆𑀧𑀢𑁆𑀢𑀻𑀢𑀺 𑀅𑀪𑀸𑀯𑀢𑁄 𑀓𑀺𑀮𑁂𑀲𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀦 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀬𑁂𑀦 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀏𑀓𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀕𑁆𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑁄. 𑀢𑀢𑁄 ‘‘𑀲𑀲𑁆𑀲𑀢𑁄 𑀅𑀬𑀁 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀢𑁄 𑀅𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀕𑀡𑁆𑀳𑀢𑁄 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀏𑀯𑀁 𑀧𑀞𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀢𑀢𑁄 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀓𑀸𑀫𑀼𑀧𑀸𑀤𑀸𑀦𑀸𑀦𑀻𑀢𑀺 𑀅𑀬𑀫𑁂𑀢𑁂𑀲𑀁 𑀏𑀓𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄.

𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑁂𑀢𑁆𑀣 𑀧𑀞𑀫𑀁 𑀧𑀳𑀻𑀬𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀢𑁆𑀢𑀸. 𑀓𑀸𑀫𑀼𑀧𑀸𑀤𑀸𑀦𑀁 𑀧𑀘𑁆𑀙𑀸 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑁆𑀢𑀸𑀢𑀺. 𑀅𑀬𑀫𑁂𑀢𑁂𑀲𑀁 𑀧𑀳𑀸𑀦𑀓𑁆𑀓𑀫𑁄.

𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀦 𑀧𑀸𑀓𑀝𑀢𑁆𑀢𑀸 𑀘 𑀏𑀢𑁂𑀲𑀼 𑀓𑀸𑀫𑀼𑀧𑀸𑀤𑀸𑀦𑀁 𑀧𑀞𑀫𑀁 𑀤𑁂𑀲𑀺𑀢𑀁. 𑀫𑀳𑀸𑀯𑀺𑀲𑀬𑀜𑁆𑀳𑀺 𑀢𑀁 𑀅𑀝𑁆𑀞𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀸. 𑀅𑀧𑁆𑀧𑀯𑀺𑀲𑀬𑀸𑀦𑀺 𑀇𑀢𑀭𑀸𑀦𑀺 𑀘𑀢𑀼𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀸. 𑀬𑁂𑀪𑀼𑀬𑁆𑀬𑁂𑀦 𑀘 𑀆𑀮𑀬𑀭𑀸𑀫𑀢𑀸𑀬 𑀧𑀚𑀸𑀬 𑀧𑀸𑀓𑀝𑀁 𑀓𑀸𑀫𑀼𑀧𑀸𑀤𑀸𑀦𑀁, 𑀦 𑀇𑀢𑀭𑀸𑀦𑀺. 𑀓𑀸𑀫𑀼𑀧𑀸𑀤𑀸𑀦𑀯𑀸 𑀯𑀢𑁆𑀣𑀼𑀓𑀸𑀫𑀸𑀦𑀁 𑀲𑀫𑀥𑀺𑀕𑀫𑀢𑁆𑀣𑀁 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀩𑀳𑀼𑀮𑁄 𑀳𑁄𑀢𑀺, 𑀦 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺 𑀢𑀤𑀦𑀦𑁆𑀢𑀭𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀢𑀁 𑀧𑀪𑀺𑀚𑁆𑀚𑀫𑀸𑀦𑀁 𑀲𑀻𑀮𑀩𑁆𑀩𑀢𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀕𑁄𑀓𑀺𑀭𑀺𑀬𑀁 𑀯𑀸 𑀓𑀼𑀓𑁆𑀓𑀼𑀭𑀓𑀺𑀭𑀺𑀬𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀯𑁂𑀤𑀺𑀢𑀩𑁆𑀩𑀢𑁄 𑀑𑀴𑀸𑀭𑀺𑀓𑀦𑁆𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀧𑀞𑀫𑀁 𑀤𑁂𑀲𑀺𑀢𑀁, 𑀲𑀼𑀔𑀼𑀫𑀢𑁆𑀢𑀸 𑀅𑀦𑁆𑀢𑁂 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄.

𑀢𑀡𑁆𑀳𑀸 ¶ 𑀘 𑀧𑀼𑀭𑀺𑀫𑀲𑁆𑀲𑁂𑀢𑁆𑀣, 𑀏𑀓𑀥𑀸 𑀳𑁄𑀢𑀺 𑀧𑀘𑁆𑀘𑀬𑁄;

𑀲𑀢𑁆𑀢𑀥𑀸 𑀅𑀝𑁆𑀞𑀥𑀸 𑀯𑀸𑀧𑀺, 𑀳𑁄𑀢𑀺 𑀲𑁂𑀲𑀢𑁆𑀢𑀬𑀲𑁆𑀲 𑀲𑀸.

𑀏𑀢𑁆𑀣 ¶ 𑀘 𑀏𑀯𑀁 𑀤𑁂𑀲𑀺𑀢𑁂 𑀉𑀧𑀸𑀤𑀸𑀦𑀘𑀢𑀼𑀓𑁆𑀓𑁂 𑀧𑀼𑀭𑀺𑀫𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀓𑀸𑀫𑀢𑀡𑁆𑀳𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀡𑁆𑀳𑀸𑀪𑀺𑀦𑀦𑁆𑀤𑀺𑀢𑁂𑀲𑀼 𑀯𑀺𑀲𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀢𑁄. 𑀲𑁂𑀲𑀢𑁆𑀢𑀬𑀲𑁆𑀲 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀯𑀲𑁂𑀦 𑀲𑀢𑁆𑀢𑀥𑀸 𑀯𑀸 𑀉𑀧𑀦𑀺𑀲𑁆𑀲𑀬𑁂𑀦 𑀲𑀳 𑀅𑀝𑁆𑀞𑀥𑀸 𑀯𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀤𑀸 𑀘 𑀲𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀤𑀸 𑀅𑀲𑀳𑀚𑀸𑀢𑀸𑀯 𑀳𑁄𑀢𑀻𑀢𑀺.

𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑁄.

𑀪𑀯𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁪. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀪𑀯𑀦𑀺𑀤𑁆𑀤𑁂𑀲𑁂 𑁋

𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀘𑁂𑀯, 𑀲𑀸𑀢𑁆𑀣𑀢𑁄 𑀪𑁂𑀤𑀲𑀗𑁆𑀕𑀳𑀸;

𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀘𑁂𑀯, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀪𑀯𑀢𑀻𑀢𑀺 𑀪𑀯𑁄. 𑀤𑀼𑀯𑀺𑀥𑁂𑀦𑀸𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀤𑀼𑀯𑀺𑀥𑁂𑀦𑀸𑀢𑀺 𑀧𑀘𑁆𑀘𑀢𑁂 𑀓𑀭𑀡𑀯𑀘𑀦𑀁, 𑀤𑀼𑀯𑀺𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀢𑀺. 𑀓𑀫𑁆𑀫𑀫𑁂𑀯 𑀪𑀯𑁄 𑀓𑀫𑁆𑀫𑀪𑀯𑁄. 𑀉𑀧𑀧𑀢𑁆𑀢𑀺𑀬𑁂𑀯 𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀢𑁆𑀣 𑀘 𑀉𑀧𑀧𑀢𑁆𑀢𑀺 𑀪𑀯𑀢𑀻𑀢𑀺 𑀪𑀯𑁄. 𑀓𑀫𑁆𑀫𑀁 𑀧𑀦 𑀬𑀣𑀸 𑀲𑀼𑀔𑀓𑀸𑀭𑀡𑀢𑁆𑀢𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄’’𑀢𑀺 (𑀥. 𑀧. 𑁧𑁯𑁪) 𑀯𑀼𑀢𑁆𑀢𑁄, 𑀏𑀯𑀁 𑀪𑀯𑀓𑀸𑀭𑀡𑀢𑁆𑀢𑀸 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑁄 𑀓𑀫𑁆𑀫𑀪𑀯𑁄𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀬𑁄 𑀓𑀫𑁆𑀫𑀪𑀯𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀢𑀫𑁄𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀲𑀩𑁆𑀩𑀦𑁆𑀢𑀺 𑀅𑀦𑀯𑀲𑁂𑀲𑀁. 𑀪𑀯𑀁 𑀕𑀘𑁆𑀙𑀢𑀺 𑀕𑀫𑁂𑀢𑀺 𑀘𑀸𑀢𑀺 𑀪𑀯𑀕𑀸𑀫𑀺. 𑀇𑀫𑀺𑀦𑀸 𑀮𑁄𑀓𑀼𑀢𑁆𑀢𑀭𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀬𑀜𑁆𑀳𑀺 𑀯𑀝𑁆𑀝𑀓𑀣𑀸, 𑀢𑀜𑁆𑀘 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀦𑁆𑀢𑀺. 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁.

𑀓𑀸𑀫𑀪𑀯𑀸𑀤𑀻𑀲𑀼 𑀓𑀸𑀫𑀲𑀗𑁆𑀔𑀸𑀢𑁄 𑀪𑀯𑁄 𑀓𑀸𑀫𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀲𑀜𑁆𑀜𑀸𑀯𑀢𑀁 𑀪𑀯𑁄, 𑀲𑀜𑁆𑀜𑀸 𑀯𑀸 𑀏𑀢𑁆𑀣 𑀪𑀯𑁂 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀪𑀯𑁄. 𑀯𑀺𑀧𑀭𑀺𑀬𑀸𑀬𑁂𑀦 ¶ 𑀅𑀲𑀜𑁆𑀜𑀸𑀪𑀯𑁄. 𑀑𑀴𑀸𑀭𑀺𑀓𑀲𑀜𑁆𑀜𑀸𑀬 𑀅𑀪𑀸𑀯𑀸 ¶ 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀸 𑀦𑁂𑀯 𑀲𑀜𑁆𑀜𑀸 𑀦𑀸𑀲𑀜𑁆𑀜𑀸 𑀅𑀲𑁆𑀫𑀺𑀁 𑀪𑀯𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄. 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁄𑀓𑀺𑀡𑁆𑀡𑁄 𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄. 𑀏𑀓𑁄 𑀯𑀸 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁄. 𑀏𑀲𑁂𑀯 𑀦𑀬𑁄 𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀏𑀲 𑀦𑀯𑀯𑀺𑀥𑁄𑀧𑀺 𑀉𑀧𑀧𑀢𑁆𑀢𑀺𑀪𑀯𑁄 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 ‘𑀅𑀢𑁆𑀣𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀥𑀫𑁆𑀫𑀢𑁄’ 𑀧𑀦 𑀏𑀢𑁆𑀣 𑀳𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀥𑀫𑁆𑀫𑀢𑁄 𑀢𑁂𑀭𑀲 𑀘𑁂𑀢𑀦𑀸, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀤𑁆𑀯𑀸𑀤𑀲, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘𑀢𑀲𑁆𑀲𑁄. ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫’’𑀦𑁆𑀢𑀺 𑀏𑀢𑁂𑀦 𑀲𑀩𑁆𑀩𑁂𑀧𑁂𑀢𑁂 𑀥𑀫𑁆𑀫𑀸 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀓𑀫𑁆𑀫𑀲𑀗𑁆𑀔𑀸𑀢𑀸 𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸. 𑀓𑀸𑀫𑀪𑀯𑁄 𑀧𑀜𑁆𑀘 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸, 𑀢𑀣𑀸 𑀭𑀽𑀧𑀪𑀯𑁄, 𑀅𑀭𑀽𑀧𑀪𑀯𑁄 𑀘𑀢𑁆𑀢𑀸𑀭𑁄, 𑀲𑀜𑁆𑀜𑀸𑀪𑀯𑁄 𑀘𑀢𑀼𑀧𑀜𑁆𑀘, 𑀅𑀲𑀜𑁆𑀜𑀸𑀪𑀯𑁄 𑀏𑀓𑁄 ¶ 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑁄, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄 𑀘𑀢𑁆𑀢𑀸𑀭𑁄. 𑀏𑀓𑀯𑁄𑀓𑀸𑀭𑀪𑀯𑀸𑀤𑀬𑁄 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑁂𑀳𑀻𑀢𑀺 𑀏𑀯𑀫𑁂𑀢𑁆𑀣 ‘𑀥𑀫𑁆𑀫𑀢𑁄’𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀸𑀢𑁆𑀣𑀢𑁄’𑀢𑀺 𑀬𑀣𑀸 𑀘 𑀪𑀯𑀦𑀺𑀤𑁆𑀤𑁂𑀲𑁂 𑀢𑀣𑁂𑀯 𑀓𑀸𑀫𑀜𑁆𑀘 𑀲𑀗𑁆𑀔𑀸𑀭𑀦𑀺𑀤𑁆𑀤𑁂𑀲𑁂𑀧𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀯 𑀯𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑀺𑀫𑀸 𑀅𑀢𑀻𑀢𑀓𑀫𑁆𑀫𑀯𑀲𑁂𑀦 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀢𑁆𑀢𑀸 𑀯𑀼𑀢𑁆𑀢𑀸. 𑀇𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀯𑀲𑁂𑀦 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀢𑁆𑀢𑀸𑀢𑀺 𑀧𑀼𑀦𑀯𑀘𑀦𑀁 𑀲𑀸𑀢𑁆𑀣𑀓𑀫𑁂𑀯. 𑀧𑀼𑀩𑁆𑀩𑁂 𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀇𑀥 𑀧𑀦 ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫’’𑀦𑁆𑀢𑀺 𑀯𑀘𑀦𑀢𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀺. 𑀧𑀼𑀩𑁆𑀩𑁂 𑀘 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀫𑁂𑀯 𑀓𑀫𑁆𑀫𑀁 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀅𑀲𑀜𑁆𑀜𑀸𑀪𑀯𑀦𑀺𑀩𑁆𑀩𑀢𑁆𑀢𑀓𑀫𑁆𑀧𑀺. 𑀓𑀺𑀁 𑀯𑀸 𑀩𑀳𑀼𑀦𑀸? ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀯 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸 𑀯𑀼𑀢𑁆𑀢𑀸. ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀪𑀯𑀲𑁆𑀲𑀸𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 ¶ 𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦𑀦𑁆𑀢𑀺. 𑀏𑀯𑀫𑁂𑀢𑁆𑀣 ‘𑀲𑀸𑀢𑁆𑀣𑀢𑁄’𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀪𑁂𑀤𑀲𑀗𑁆𑀕𑀳𑀸’𑀢𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑀲𑁆𑀲 𑀪𑁂𑀤𑀢𑁄 𑀘𑁂𑀯 𑀲𑀗𑁆𑀕𑀳𑀢𑁄 𑀘. 𑀬𑀜𑁆𑀳𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀫𑀪𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀓𑀭𑀺𑀬𑀢𑀺, 𑀲𑁄 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀏𑀯𑀁 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀤𑁆𑀯𑁂 𑀓𑀸𑀫𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸𑀯 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸; 𑀤𑁆𑀯𑁂 𑀭𑀽𑀧𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸𑀯 𑀲𑀜𑁆𑀜𑀸𑀪𑀯𑀅𑀲𑀜𑁆𑀜𑀸𑀪𑀯𑀏𑀓𑀯𑁄𑀓𑀸𑀭𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸; 𑀤𑁆𑀯𑁂 𑀅𑀭𑀽𑀧𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸𑀯 𑀲𑀜𑁆𑀜𑀸𑀪𑀯𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀘𑀢𑀼𑀯𑁄𑀓𑀸𑀭𑀪𑀯𑀸𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀙 𑀪𑀯𑀸. 𑀬𑀣𑀸 𑀘 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀙 𑀪𑀯𑀸 𑀢𑀣𑀸 𑀲𑁂𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀻𑀢𑀺 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑁂𑀤𑀢𑁄 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀘𑀢𑀼𑀯𑀻𑀲𑀢𑀺 𑀪𑀯𑀸.

𑀲𑀗𑁆𑀕𑀳𑀢𑁄 𑀧𑀦 𑀓𑀫𑁆𑀫𑀪𑀯𑀁 𑀉𑀧𑀧𑀢𑁆𑀢𑀺𑀪𑀯𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀏𑀓𑁄 𑀓𑀸𑀫𑀪𑀯𑁄, 𑀢𑀣𑀸 𑀭𑀽𑀧𑀸𑀭𑀽𑀧𑀪𑀯𑀸𑀢𑀺 𑀢𑀬𑁄 𑀪𑀯𑀸. 𑀢𑀣𑀸 𑀲𑁂𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀻𑀢𑀺 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀗𑁆𑀕𑀳𑀢𑁄 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀤𑁆𑀯𑀸𑀤𑀲 𑀪𑀯𑀸. 𑀅𑀧𑀺𑀘 𑀅𑀯𑀺𑀲𑁂𑀲𑁂𑀦 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀤𑁆𑀯𑁂 𑀓𑀸𑀫𑀪𑀯𑀸, 𑀤𑁆𑀯𑁂 𑀭𑀽𑀧𑀪𑀯𑀸, 𑀤𑁆𑀯𑁂 ¶ 𑀅𑀭𑀽𑀧𑀪𑀯𑀸𑀢𑀺 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀕𑀳𑀢𑁄 𑀙 𑀪𑀯𑀸. 𑀓𑀫𑁆𑀫𑀪𑀯𑀉𑀧𑀧𑀢𑁆𑀢𑀺𑀪𑀯𑀪𑁂𑀤𑀁 𑀯𑀸 𑀅𑀦𑀼𑀧𑀕𑀫𑁆𑀫 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀓𑀸𑀫𑀪𑀯𑀸𑀤𑀺𑀯𑀲𑁂𑀦 𑀢𑀬𑁄 𑀪𑀯𑀸 𑀳𑁄𑀦𑁆𑀢𑀺. 𑀓𑀸𑀫𑀪𑀯𑀸𑀤𑀺𑀪𑁂𑀤𑀜𑁆𑀘𑀸𑀧𑀺 𑀅𑀦𑀼𑀧𑀕𑀫𑁆𑀫 𑀓𑀫𑁆𑀫𑀪𑀯𑀉𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀤𑁆𑀯𑁂 𑀪𑀯𑀸 𑀳𑁄𑀦𑁆𑀢𑀺. 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑁂𑀤𑀜𑁆𑀘 𑀅𑀦𑀼𑀧𑀕𑀫𑁆𑀫 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀪𑀯𑀯𑀲𑁂𑀦 𑀏𑀓𑁄 𑀪𑀯𑁄 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀉𑀧𑀸𑀤𑀸𑀦𑀧𑀘𑁆𑀘𑀬𑀲𑁆𑀲 𑀪𑀯𑀲𑁆𑀲 𑀪𑁂𑀤𑀲𑀗𑁆𑀕𑀳𑀸𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀘𑁂𑀯𑀸’𑀢𑀺 𑀬𑀜𑁆𑀘𑁂𑀢𑁆𑀣 𑀉𑀧𑀸𑀤𑀸𑀦𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦𑁂𑀢𑁆𑀣 𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺? 𑀬𑀁 𑀓𑀺𑀜𑁆𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑁄 ¶ 𑀳𑁄𑀢𑀺𑀬𑁂𑀯. 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀲𑁄 ‘𑀇𑀤𑀁 𑀬𑀼𑀢𑁆𑀢𑀁, 𑀇𑀤𑀁 𑀅𑀬𑀼𑀢𑁆𑀢’𑀦𑁆𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀧𑀸𑀤𑀸𑀦𑀲𑁆𑀲 𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀪𑀯𑀁 𑀧𑀢𑁆𑀣𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀤𑁂𑀓𑀘𑁆𑀘𑁂 ‘‘𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑁂𑀦 𑀭𑀽𑀧𑀸𑀭𑀽𑀧𑀪𑀯𑀸 𑀦 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑁂𑀦 𑀧𑀦 𑀲𑀩𑁆𑀩𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀅𑀦𑀼𑀲𑁆𑀲𑀯𑀯𑀲𑁂𑀦 𑀯𑀸 𑀤𑀺𑀝𑁆𑀞𑀸𑀦𑀼𑀲𑀸𑀭𑁂𑀦 𑀯𑀸 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀫𑀦𑀼𑀲𑁆𑀲𑀮𑁄𑀓𑁂 𑀘𑁂𑀯 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀤𑀻𑀲𑀼 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀘 𑀲𑀫𑀺𑀤𑁆𑀥𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀅𑀥𑀺𑀕𑀫𑀢𑁆𑀣𑀁 𑀅𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀻𑀳𑀺 𑀯𑀜𑁆𑀘𑀺𑀢𑁄 ‘𑀇𑀫𑀺𑀦𑀸 𑀓𑀫𑁆𑀫𑁂𑀦 𑀓𑀸𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀻’𑀢𑀺 𑀫𑀜𑁆𑀜𑀫𑀸𑀦𑁄 ¶ 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺𑀧𑀺 𑀓𑀭𑁄𑀢𑀺. 𑀲𑁄 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑁆𑀧𑀚𑁆𑀚𑀢𑀺; 𑀲𑀦𑁆𑀤𑀺𑀝𑁆𑀞𑀺𑀓𑁂 𑀯𑀸 𑀧𑀦 𑀓𑀸𑀫𑁂 𑀧𑀢𑁆𑀣𑀬𑀫𑀸𑀦𑁄 𑀧𑀝𑀺𑀮𑀤𑁆𑀥𑁂 𑀯𑀸 𑀕𑁄𑀧𑀬𑀫𑀸𑀦𑁄 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺𑀧𑀺 𑀓𑀭𑁄𑀢𑀺. 𑀲𑁄 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯.

𑀅𑀧𑀭𑁄 𑀧𑀦 𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀻𑀳𑀺 𑀉𑀧𑀩𑁆𑀭𑀽𑀳𑀺𑀢𑀜𑀸𑀡𑁄 ‘‘𑀇𑀫𑀺𑀦𑀸 𑀓𑀫𑁆𑀫𑁂𑀦 𑀓𑀸𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀢𑀺. 𑀲𑁄 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀤𑁂𑀯𑁂𑀲𑀼 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀲𑁆𑀲 𑀲𑀸𑀦𑁆𑀢𑁄𑀕𑀥𑀲𑁆𑀲 𑀓𑀸𑀫𑀪𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀢𑀢𑁄 𑀲𑀫𑀺𑀤𑁆𑀥𑀢𑀭𑀸 𑀓𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀯𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦𑁂𑀯 ¶ 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀭𑀽𑀧𑀸𑀭𑀽𑀧𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀅𑀲𑀜𑁆𑀜𑀸 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀸𑀦𑀫𑁆𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺 ¶ .

𑀅𑀧𑀭𑁄 ‘‘𑀅𑀬𑀁 𑀅𑀢𑁆𑀢𑀸 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀘𑁆𑀙𑀺𑀦𑁆𑀦𑁄 𑀲𑀼𑀉𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀸𑀬 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀅𑀬𑀁 𑀅𑀢𑁆𑀢𑀸 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀼𑀔𑀻 𑀳𑁄𑀢𑀺, 𑀯𑀺𑀕𑀢𑀧𑀭𑀺𑀴𑀸𑀳𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯 ¶ . 𑀇𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀇𑀤𑀁 𑀲𑀻𑀮𑀩𑁆𑀩𑀢𑀁 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀲𑀼𑀔𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀯𑀲𑁂𑀦 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀫𑁆𑀧𑀺 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀺𑀁 𑀧𑀦𑁂𑀢𑁆𑀣 𑀓𑀲𑁆𑀲 𑀪𑀯𑀲𑁆𑀲 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑁂?

𑀭𑀽𑀧𑀸𑀭𑀽𑀧𑀪𑀯𑀸𑀦𑀁, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀸𑀤𑀸𑀦𑀁;

𑀲𑀳𑀚𑀸𑀢𑀸𑀤𑀻𑀳𑀺𑀧𑀺 𑀢𑀁, 𑀓𑀸𑀫𑀪𑀯𑀲𑁆𑀲𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀁.

𑀭𑀽𑀧𑀸𑀭𑀽𑀧𑀪𑀯𑀸𑀦𑀜𑁆𑀳𑀺 𑀓𑀸𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀪𑀯𑁂 𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀘𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀏𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀅𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 ¶ 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑁂𑀳𑀺 𑀲𑀳𑀚𑀸𑀢𑀸𑀤𑀻𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯𑀸𑀢𑀺.

𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑀧𑀤𑀦𑀺𑀤𑁆𑀤𑁂𑀲𑁄.

𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀺𑀧𑀤𑀦𑀺𑀤𑁆𑀤𑁂𑀲𑁄

𑁨𑁩𑁫. 𑀪𑀯𑀧𑀘𑁆𑀘𑀬𑀸 ¶ 𑀚𑀸𑀢𑀺𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀚𑀸𑀢𑀺𑀆𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀪𑀯𑁄𑀢𑀺 𑀧𑀦𑁂𑀢𑁆𑀣 𑀓𑀫𑁆𑀫𑀪𑀯𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀦 𑀉𑀧𑀧𑀢𑁆𑀢𑀺𑀪𑀯𑁄. 𑀲𑁄 𑀧𑀦 𑀓𑀫𑁆𑀫𑀧𑀘𑁆𑀘𑀬𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀤𑁆𑀯𑀺𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺 𑀘𑁂? 𑀩𑀸𑀳𑀺𑀭𑀧𑀘𑁆𑀘𑀬𑀲𑀫𑀢𑁆𑀢𑁂𑀧𑀺 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁄. 𑀩𑀸𑀳𑀺𑀭𑀸𑀦𑀜𑁆𑀳𑀺 𑀚𑀦𑀓𑀚𑀦𑁂𑀢𑁆𑀢𑀺𑀲𑀼𑀓𑁆𑀓𑀲𑁄𑀡𑀺𑀢𑀸𑀳𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀲𑀫𑀢𑁆𑀢𑁂𑀧𑀺 𑀲𑀢𑁆𑀢𑀸𑀦𑀁 𑀬𑀫𑀓𑀸𑀦𑀫𑁆𑀧𑀺 𑀲𑀢𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀲𑁄 𑀘 𑀦 𑀅𑀳𑁂𑀢𑀼𑀓𑁄 ¶ , 𑀲𑀩𑁆𑀩𑀤𑀸 𑀘 𑀲𑀩𑁆𑀩𑁂𑀲𑀜𑁆𑀘 𑀅𑀪𑀸𑀯𑀢𑁄; 𑀦 𑀓𑀫𑁆𑀫𑀪𑀯𑀢𑁄 𑀅𑀜𑁆𑀜𑀳𑁂𑀢𑀼𑀓𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑀸𑀦𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄𑀢𑀺 𑀓𑀫𑁆𑀫𑀪𑀯𑀳𑁂𑀢𑀼𑀓𑁄𑀯. 𑀓𑀫𑁆𑀫𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀻𑀦𑀧𑀡𑀻𑀢𑀸𑀤𑀺𑀯𑀺𑀲𑁂𑀲𑀳𑁂𑀢𑀼. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁮𑁯). 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 𑁋 ‘‘𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺.

𑀬𑀲𑁆𑀫𑀸 𑀘 𑀅𑀲𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀁 𑀦𑀸𑀫 𑀦 𑀳𑁄𑀢𑀺, 𑀲𑁄𑀓𑀸𑀤𑀬𑁄 𑀘 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺, 𑀚𑀸𑀢𑀺𑀬𑀸 𑀧𑀦 𑀲𑀢𑀺 𑀚𑀭𑀸𑀫𑀭𑀡𑀜𑁆𑀘𑁂𑀯 𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀤𑀼𑀓𑁆𑀔𑀥𑀫𑁆𑀫𑀨𑀼𑀝𑁆𑀞𑀲𑁆𑀲 𑀘 𑀩𑀸𑀮𑀲𑁆𑀲 𑀚𑀭𑀸𑀫𑀭𑀡𑀸𑀪𑀺𑀲𑀫𑁆𑀩𑀦𑁆𑀥𑀸 𑀯𑀸 𑀢𑁂𑀦 𑀢𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀅𑀦𑀪𑀺𑀲𑀫𑁆𑀩𑀦𑁆𑀥𑀸 𑀯𑀸 𑀲𑁄𑀓𑀸𑀤𑀬𑁄 𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀁 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀘𑁂𑀯 𑀲𑁄𑀓𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀪𑀯𑀧𑀘𑁆𑀘𑀬𑀸 𑀚𑀸𑀢𑀺𑀆𑀤𑀺𑀧𑀤𑀦𑀺𑀤𑁆𑀤𑁂𑀲𑁄.

𑁨𑁪𑁨. 𑀏𑀯𑀫𑁂𑀢𑀲𑁆𑀲𑀸𑀢𑀺𑀆𑀤𑀻𑀦𑀁 ¶ 𑀅𑀢𑁆𑀣𑁄 𑀉𑀤𑁆𑀤𑁂𑀲𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀕𑀢𑀺𑀆𑀤𑀻𑀦𑀺 𑀲𑀫𑀼𑀤𑀬𑀯𑁂𑀯𑀘𑀦𑀸𑀦𑁂𑀯.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑁄𑀓𑀸𑀤𑀬𑁄 𑀅𑀯𑀲𑀸𑀦𑁂 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀬𑀸 𑀲𑀸 𑀅𑀯𑀺𑀚𑁆𑀚𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ 𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀫𑁂𑀢𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸, 𑀲𑀸 𑁋

𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸, 𑀲𑀺𑀤𑁆𑀥𑀸 𑀪𑀯𑀘𑀓𑁆𑀓𑀫𑀯𑀺𑀤𑀺𑀢𑀸𑀤𑀺𑀫𑀺𑀤𑀁;

𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀁, 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀁.

𑀲𑀢𑀢𑀁 𑀲𑀫𑀺𑀢𑀁 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁 𑀧𑀦𑁂𑀢𑁆𑀣 𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸? 𑀓𑀣𑀫𑀺𑀤𑀁 𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀺? 𑀓𑀣𑀁 𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀁? 𑀓𑀣𑀁 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀦𑁆𑀢𑀺 𑀘𑁂? 𑀏𑀢𑁆𑀣 𑀳𑀺 𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀅𑀯𑀺𑀚𑁆𑀚𑀸𑀬 𑀅𑀯𑀺𑀬𑁄𑀕𑀺𑀦𑁄, 𑀧𑀭𑀺𑀤𑁂𑀯𑁄 𑀘 𑀦𑀸𑀫 𑀫𑀽𑀴𑁆𑀳𑀲𑁆𑀲𑀸𑀢𑀺 𑀢𑁂𑀲𑀼 𑀢𑀸𑀯 𑀲𑀺𑀤𑁆𑀥𑁂𑀲𑀼 𑀲𑀺𑀤𑁆𑀥𑀸𑀯 𑀳𑁄𑀢𑀺 𑀅𑀯𑀺𑀚𑁆𑀚𑀸. 𑀅𑀧𑀺𑀘 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀆𑀲𑀯𑀲𑀫𑀼𑀤𑀬𑀸 𑀘𑁂𑀢𑁂 𑀲𑁄𑀓𑀸𑀤𑀬𑁄 𑀳𑁄𑀦𑁆𑀢𑀺. 𑀓𑀣𑀁? 𑀯𑀢𑁆𑀣𑀼𑀓𑀸𑀫𑀯𑀺𑀬𑁄𑀕𑁂 𑀢𑀸𑀯 𑀲𑁄𑀓𑁄 𑀓𑀸𑀫𑀸𑀲𑀯𑀲𑀫𑀼𑀤𑀬𑁄 𑀳𑁄𑀢𑀺? 𑀬𑀣𑀸𑀳 𑁋

‘‘𑀢𑀲𑁆𑀲 ¶ 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁩);

𑀬𑀣𑀸 𑀘𑀸𑀳 𑁋 ‘‘𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄’’𑀢𑀺 (𑀥. 𑀧. 𑁨𑁧𑁫). 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀤𑀺𑀝𑁆𑀞𑀸𑀲𑀯𑀲𑀫𑀼𑀤𑀬𑀸 𑀳𑁄𑀦𑁆𑀢𑀺, 𑀬𑀣𑀸𑀳 𑁋 ‘‘𑀢𑀲𑁆𑀲 𑀅𑀳𑀁 𑀭𑀽𑀧𑀁, 𑀫𑀫 𑀭𑀽𑀧𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄 𑀢𑀁 𑀭𑀽𑀧𑀁 𑀯𑀺𑀧𑀭𑀺𑀡𑀫𑀢𑀺 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 (𑀲𑀁. 𑀦𑀺. 𑁩.𑁧). 𑀬𑀣𑀸 𑀘 𑀤𑀺𑀝𑁆𑀞𑀸𑀲𑀯𑀲𑀫𑀼𑀤𑀬𑀸 𑀏𑀯𑀁 𑀪𑀯𑀸𑀲𑀯𑀲𑀫𑀼𑀤𑀬𑀸𑀧𑀺, 𑀬𑀣𑀸𑀳 𑁋 ‘‘𑀬𑁂𑀧𑀺 𑀢𑁂 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸 𑀉𑀘𑁆𑀘𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀓𑀸 𑀢𑁂𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚’’𑀦𑁆𑀢𑀺 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁪.𑁩𑁩) 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀫𑀭𑀡𑀪𑀬𑁂𑀦 𑀲𑀦𑁆𑀢𑀚𑁆𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀯𑀺𑀬𑀸𑀢𑀺. 𑀬𑀣𑀸 𑀘 𑀪𑀯𑀸𑀲𑀯𑀲𑀫𑀼𑀤𑀬𑀸 𑀏𑀯𑀁 𑀅𑀯𑀺𑀚𑁆𑀚𑀸𑀲𑀯𑀲𑀫𑀼𑀤𑀬𑀸𑀧𑀺 ¶ , 𑀬𑀣𑀸𑀳 𑁋 ‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀢𑀺𑀯𑀺𑀥𑀁 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 (𑀫. 𑀦𑀺. 𑁩.𑁨𑁪𑁬).

𑀇𑀢𑀺 𑀬𑀲𑁆𑀫𑀸 𑀆𑀲𑀯𑀲𑀫𑀼𑀤𑀬𑀸 𑀏𑀢𑁂 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂 𑀲𑀺𑀚𑁆𑀛𑀫𑀸𑀦𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼𑀪𑀽𑀢𑁂 𑀆𑀲𑀯𑁂 𑀲𑀸𑀥𑁂𑀦𑁆𑀢𑀺. 𑀆𑀲𑀯𑁂𑀲𑀼 𑀘 𑀲𑀺𑀤𑁆𑀥𑁂𑀲𑀼 𑀧𑀘𑁆𑀘𑀬𑀪𑀸𑀯𑁂 𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀧𑀺 𑀲𑀺𑀤𑁆𑀥𑀸𑀯 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 ‘𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸’ 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦 𑀏𑀯𑀁 𑀧𑀘𑁆𑀘𑀬𑀪𑀸𑀯𑁂 𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀸𑀬 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 ¶ 𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀁 𑀤𑁆𑀯𑀸𑀤𑀲𑀗𑁆𑀕𑀁 ‘𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀻’𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀏𑀯𑀁 𑀲𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀇𑀤𑀁 𑀆𑀤𑀺𑀫𑀢𑁆𑀢𑀓𑀣𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦𑀬𑀺𑀤𑀁 𑀆𑀤𑀺𑀫𑀢𑁆𑀢𑀓𑀣𑀦𑀁, 𑀧𑀥𑀸𑀦𑀥𑀫𑁆𑀫𑀓𑀣𑀦𑀁 𑀧𑀦𑁂𑀢𑀁. 𑀢𑀺𑀡𑁆𑀡𑀜𑁆𑀳𑀺 𑀯𑀝𑁆𑀝𑀸𑀦𑀁 𑀅𑀯𑀺𑀚𑁆𑀚𑀸 𑀧𑀥𑀸𑀦𑀸. 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀳𑀺 𑀅𑀯𑀲𑁂𑀲𑀁 𑀓𑀺𑀮𑁂𑀲𑀯𑀝𑁆𑀝𑀜𑁆𑀘 𑀓𑀫𑁆𑀫𑀸𑀤𑀻𑀦𑀺 𑀘 𑀩𑀸𑀮𑀁 𑀧𑀮𑀺𑀯𑁂𑀞𑁂𑀦𑁆𑀢𑀺, 𑀲𑀧𑁆𑀧𑀲𑀺𑀭𑀕𑁆𑀕𑀳𑀡𑁂𑀦 𑀲𑁂𑀲𑀁 𑀲𑀧𑁆𑀧𑀲𑀭𑀻𑀭𑀁 𑀯𑀺𑀬 𑀩𑀸𑀳𑀁. 𑀅𑀯𑀺𑀚𑁆𑀚𑀸𑀲𑀫𑀼𑀘𑁆𑀙𑁂𑀤𑁂 𑀧𑀦 𑀓𑀢𑁂 𑀢𑁂𑀳𑀺 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺, 𑀲𑀧𑁆𑀧𑀲𑀺𑀭𑀘𑁆𑀙𑁂𑀤𑁂 𑀓𑀢𑁂 𑀧𑀮𑀺𑀯𑁂𑀞𑀺𑀢𑀩𑀸𑀳𑀸𑀯𑀺𑀫𑁄𑀓𑁆𑀔𑁄 𑀯𑀺𑀬. 𑀬𑀣𑀸𑀳 𑁋 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 ¶ 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧; 𑀫𑀳𑀸𑀯. 𑁧). 𑀇𑀢𑀺 𑀬𑀁 𑀕𑀡𑁆𑀳𑀢𑁄 𑀩𑀦𑁆𑀥𑁄 𑀫𑀼𑀜𑁆𑀘𑀢𑁄 𑀘 𑀫𑁄𑀓𑁆𑀔𑁄 𑀳𑁄𑀢𑀺, 𑀢𑀲𑁆𑀲 𑀧𑀥𑀸𑀦𑀥𑀫𑁆𑀫𑀲𑁆𑀲 𑀓𑀣𑀦𑀫𑀺𑀤𑀁, 𑀦 𑀆𑀤𑀺𑀫𑀢𑁆𑀢𑀓𑀣𑀦𑀦𑁆𑀢𑀺 𑀏𑀯𑀫𑀺𑀤𑀁 𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀬𑀺𑀤𑀁 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀯𑀢𑁆𑀢𑀺, 𑀢𑀲𑁆𑀫𑀸 𑀢𑀢𑁄 𑀅𑀜𑁆𑀜𑁂𑀦 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑁂𑀦 𑀩𑁆𑀭𑀳𑁆𑀫𑀸𑀤𑀺𑀦𑀸 𑀯𑀸 𑀲𑀁𑀲𑀸𑀭𑀲𑁆𑀲 𑀓𑀸𑀭𑀓𑁂𑀦 ‘‘𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀯𑀤𑁄 𑀯𑁂𑀤𑁂𑀬𑁆𑀬𑁄’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀦𑀸 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑁂𑀤𑀓𑁂𑀦 𑀭𑀳𑀺𑀢𑀁. 𑀇𑀢𑀺 ‘𑀓𑀸𑀭𑀓𑀯𑁂𑀤𑀓𑀭𑀳𑀺𑀢’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀉𑀤𑀬𑀩𑁆𑀩𑀬𑀥𑀫𑁆𑀫𑀓𑀢𑁆𑀢𑀸 𑀥𑀼𑀯𑀪𑀸𑀯𑁂𑀦, 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀸 𑀘 𑀲𑀼𑀪𑀪𑀸𑀯𑁂𑀦, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀲𑀼𑀔𑀪𑀸𑀯𑁂𑀦, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁆𑀢𑀸 𑀯𑀲𑀯𑀢𑁆𑀢𑀦𑀪𑀽𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀘 𑀲𑀼𑀜𑁆𑀜𑀸, 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀺𑀧𑀺 𑀅𑀗𑁆𑀕𑀸𑀦𑀺; 𑀬𑀲𑁆𑀫𑀸 𑀯𑀸 𑀅𑀯𑀺𑀚𑁆𑀚𑀸 𑀦 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑁄 ¶ , 𑀦 𑀅𑀢𑁆𑀢𑀦𑀺, 𑀦 𑀅𑀢𑁆𑀢𑀯𑀢𑀻, 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀺𑀧𑀺 𑀅𑀗𑁆𑀕𑀸𑀦𑀺; 𑀢𑀲𑁆𑀫𑀸 ‘𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀫𑀺𑀤𑀁’ 𑀪𑀯𑀘𑀓𑁆𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀜𑁆𑀘 𑀯𑀺𑀤𑀺𑀢𑁆𑀯𑀸 𑀧𑀼𑀦 𑁋

𑀢𑀲𑁆𑀲 𑀅𑀯𑀺𑀚𑁆𑀚𑀸𑀢𑀡𑁆𑀳𑀸, 𑀫𑀽𑀮𑀫𑀢𑀻𑀢𑀸𑀤𑀬𑁄 𑀢𑀬𑁄 𑀓𑀸𑀮𑀸;

𑀤𑁆𑀯𑁂 𑀅𑀝𑁆𑀞 𑀤𑁆𑀯𑁂 𑀏𑀯 𑀘, 𑀲𑀭𑀽𑀧𑀢𑁄 𑀢𑁂𑀲𑀼 𑀅𑀗𑁆𑀕𑀸𑀦𑀺.

𑀢𑀲𑁆𑀲 ¶ 𑀔𑁄 𑀧𑀦𑁂𑀢𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀘𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀤𑁂𑀢𑀁 𑀧𑀼𑀩𑁆𑀩𑀦𑁆𑀢𑀸𑀳𑀭𑀡𑀢𑁄 𑀅𑀯𑀺𑀚𑁆𑀚𑀸𑀫𑀽𑀮𑀁 𑀯𑁂𑀤𑀦𑀸𑀯𑀲𑀸𑀦𑀁, 𑀅𑀧𑀭𑀦𑁆𑀢𑀲𑀦𑁆𑀢𑀸𑀦𑀢𑁄 𑀢𑀡𑁆𑀳𑀸𑀫𑀽𑀮𑀁 𑀚𑀭𑀸𑀫𑀭𑀡𑀸𑀯𑀲𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀁 𑀤𑀺𑀝𑁆𑀞𑀺𑀘𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀘𑁆𑀙𑀺𑀫𑀁 𑀢𑀡𑁆𑀳𑀸𑀘𑀭𑀺𑀢𑀯𑀲𑁂𑀦. 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀜𑁆𑀳𑀺 𑀅𑀯𑀺𑀚𑁆𑀚𑀸, 𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀢𑀡𑁆𑀳𑀸 𑀲𑀁𑀲𑀸𑀭𑀦𑀸𑀬𑀺𑀓𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀸𑀬 𑀯𑀸 𑀧𑀞𑀫𑀁, 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀧𑀓𑀸𑀲𑀦𑀢𑁄; 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀸𑀬 𑀤𑀼𑀢𑀺𑀬𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀚𑀭𑀸𑀫𑀭𑀡𑀧𑀓𑀸𑀲𑀦𑀢𑁄; 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀯𑀸 𑀧𑀼𑀭𑀺𑀫𑀁, 𑀅𑀦𑀼𑀧𑀼𑀩𑁆𑀩𑀧𑀯𑀢𑁆𑀢𑀺𑀤𑀻𑀧𑀦𑀢𑁄; 𑀑𑀧𑀧𑀸𑀢𑀺𑀓𑀯𑀲𑁂𑀦 𑀧𑀘𑁆𑀙𑀺𑀫𑀁 𑀲𑀳𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄.

𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀸 𑀘𑀲𑁆𑀲 𑀢𑀬𑁄 𑀓𑀸𑀮𑀸. 𑀢𑁂𑀲𑀼 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀯𑀲𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀘𑀸𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀅𑀢𑀻𑀢𑀓𑀸𑀮𑀸𑀦𑀺 ¶ , 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀪𑀯𑀸𑀯𑀲𑀸𑀦𑀸𑀦𑀺 𑀅𑀝𑁆𑀞 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀸𑀦𑀺, 𑀚𑀸𑀢𑀺 𑀘𑁂𑀯 𑀚𑀭𑀸𑀫𑀭𑀡𑀜𑁆𑀘 𑀤𑁆𑀯𑁂 𑀅𑀦𑀸𑀕𑀢𑀓𑀸𑀮𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀼𑀦 𑁋

𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓-𑀢𑀺𑀲𑀦𑁆𑀥𑀺𑀘𑀢𑀼𑀪𑁂𑀤𑀲𑀗𑁆𑀕𑀳𑀜𑁆𑀘𑁂𑀢𑀁;

𑀯𑀻𑀲𑀢𑀺𑀆𑀓𑀸𑀭𑀸𑀭𑀁, 𑀢𑀺𑀯𑀝𑁆𑀝𑀫𑀦𑀯𑀝𑁆𑀞𑀺𑀢𑀁 𑀪𑀫𑀢𑀺.

𑀇𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺 𑀦𑀸𑀫. 𑀯𑁂𑀤𑀦𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀦𑁆𑀢𑀭𑀸 𑀏𑀓𑁄 𑀨𑀮𑀳𑁂𑀢𑀼𑀲𑀦𑁆𑀥𑀺 𑀦𑀸𑀫. 𑀪𑀯𑀲𑁆𑀲 𑀘 𑀚𑀸𑀢𑀺𑀬𑀸 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀻𑀢𑀺. 𑀏𑀯𑀫𑀺𑀤𑀁 𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓𑀢𑀺𑀲𑀦𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀦𑁆𑀥𑀻𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀯𑀯𑀢𑁆𑀣𑀺𑀢𑀸 𑀧𑀦𑀲𑁆𑀲 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀏𑀓𑁄 ¶ 𑀲𑀗𑁆𑀕𑀳𑁄, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀤𑀼𑀢𑀺𑀬𑁄, 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀢𑀢𑀺𑀬𑁄, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀘𑀢𑀼𑀢𑁆𑀣𑁄𑀢𑀺. 𑀏𑀯𑀫𑀺𑀤𑀁 𑀘𑀢𑀼𑀪𑁂𑀤𑀲𑀗𑁆𑀕𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁;

𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘, 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺.

𑀏𑀢𑁂𑀳𑀺 𑀧𑀦 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀭𑁂𑀳𑀺 𑀯𑀻𑀲𑀢𑀺𑀆𑀓𑀸𑀭𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘𑀸’𑀢𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀘𑀸𑀢𑀺 𑀇𑀫𑁂 𑀢𑀸𑀯 𑀤𑁆𑀯𑁂 𑀯𑀼𑀢𑁆𑀢𑀸 ¶ 𑀏𑀯. 𑀬𑀲𑁆𑀫𑀸 𑀧𑀦 𑀅𑀯𑀺𑀤𑁆𑀯𑀸 𑀧𑀭𑀺𑀢𑀲𑁆𑀲𑀢𑀺, 𑀧𑀭𑀺𑀢𑀲𑀺𑀢𑁄 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀲 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀢𑀲𑁆𑀫𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄, 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭).

𑀢𑀢𑁆𑀣 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑁂 𑀓𑀫𑁆𑀫𑀪𑀯𑁂, 𑀅𑀢𑀻𑀢𑀚𑀸𑀢𑀺𑀬𑀁 𑀓𑀫𑁆𑀫𑀪𑀯𑁂 𑀓𑀭𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀫𑁄𑀳𑁄 𑀅𑀯𑀺𑀚𑁆𑀚𑀸𑀢𑀺 𑀬𑁄 𑀢𑀤𑀸 𑀤𑀼𑀓𑁆𑀔𑀸𑀤𑀻𑀲𑀼 𑀫𑁄𑀳𑁄, 𑀬𑁂𑀦 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸. 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸𑀢𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀢𑁄 𑀧𑀼𑀭𑀺𑀫𑀘𑁂𑀢𑀦𑀸𑀬𑁄, 𑀬𑀣𑀸 ‘𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀲𑀫𑁆𑀧𑀺 𑀲𑀁𑀯𑀘𑁆𑀙𑀭𑀫𑁆𑀧𑀺 𑀤𑀸𑀦𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀦 𑀳𑀢𑁆𑀣𑁂 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑀬𑀢𑁄 𑀘𑁂𑀢𑀦𑀸 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸𑀯𑀚𑁆𑀚𑀦𑁂𑀲𑀼 𑀯𑀸 𑀙𑀲𑀼 𑀚𑀯𑀦𑁂𑀲𑀼 𑀘𑁂𑀢𑀦𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸 𑀦𑀸𑀫. 𑀲𑀢𑁆𑀢𑀫𑀸 𑀘𑁂𑀢𑀦𑀸 𑀪𑀯𑁄. 𑀬𑀸 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 ¶ 𑀪𑀯𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸 𑀦𑀸𑀫. 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀢𑀺 𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀲𑁆𑀲 𑀨𑀮𑁂 𑀉𑀧𑁆𑀧𑀢𑁆𑀢𑀺𑀪𑀯𑁂 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀲𑀸 𑀢𑀡𑁆𑀳𑀸 𑀦𑀸𑀫. 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀦𑁆𑀢𑀺 𑀬𑀁 𑀓𑀫𑁆𑀫𑀁 𑀪𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑀁; ‘𑀇𑀤𑀁 𑀓𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀸𑀫𑁂 𑀲𑁂𑀯𑀺𑀲𑁆𑀲𑀸𑀫𑀺 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀉𑀧𑀕𑀫𑀦𑀁 𑀕𑀳𑀡𑀁 𑀧𑀭𑀸𑀫𑀲𑀦𑀁 𑁋 𑀇𑀤𑀁 𑀉𑀧𑀸𑀤𑀸𑀦𑀁 𑀦𑀸𑀫. 𑀘𑁂𑀢𑀦𑀸 𑀪𑀯𑁄𑀢𑀺 𑀆𑀬𑀽𑀳𑀦𑀸𑀯𑀲𑀸𑀦𑁂 𑀯𑀼𑀢𑁆𑀢𑀘𑁂𑀢𑀦𑀸 𑀪𑀯𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘𑀇𑀤𑀸𑀦𑀺 𑀨𑀮𑀧𑀜𑁆𑀘𑀓’𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀺 𑀯𑁂𑀤𑀦𑀸𑀯𑀲𑀸𑀦𑀁 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀬𑀣𑀸𑀳 ‘‘𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀽𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭). 𑀢𑀢𑁆𑀣 ¶ 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀜𑁆𑀜𑀸𑀡𑀁. 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 𑀬𑀸 𑀕𑀩𑁆𑀪𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀑𑀓𑁆𑀓𑀦𑁆𑀢𑀺, 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑀁 𑀯𑀺𑀬 𑁋 𑀇𑀤𑀁 𑀦𑀸𑀫𑀭𑀽𑀧𑀁. 𑀧𑀲𑀸𑀤𑁄 𑀆𑀬𑀢𑀦𑀦𑁆𑀢𑀺 𑀇𑀤𑀁 𑀘𑀓𑁆𑀔𑀸𑀤𑀺𑀧𑀜𑁆𑀘𑀸𑀬𑀢𑀦𑀯𑀲𑁂𑀦 ¶ 𑀯𑀼𑀢𑁆𑀢𑀁. 𑀨𑀼𑀝𑁆𑀞𑁄 𑀨𑀲𑁆𑀲𑁄𑀢𑀺 𑀬𑁄 𑀆𑀭𑀫𑁆𑀫𑀡𑀁 𑀨𑀼𑀝𑁆𑀞𑁄 𑀨𑀼𑀲𑀦𑁆𑀢𑁄 𑀉𑀧𑁆𑀧𑀦𑁆𑀦𑁄 𑁋 𑀅𑀬𑀁 𑀨𑀲𑁆𑀲𑁄. 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸𑀢𑀺 𑀬𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑀴𑀸𑀬𑀢𑀦𑀧𑀘𑁆𑀘𑀬𑁂𑀦 𑀯𑀸 𑀨𑀲𑁆𑀲𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀯𑁂𑀤𑀬𑀺𑀢𑀁, 𑀲𑀸 𑀯𑁂𑀤𑀦𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘𑀸’𑀢𑀺 𑀢𑀡𑁆𑀳𑀸𑀤𑀬𑁄 𑀧𑀸𑀴𑀺𑀬𑀁 𑀆𑀕𑀢𑀸𑀯 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸. 𑀪𑀯𑁂 𑀧𑀦 𑀕𑀳𑀺𑀢𑁂 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀢𑀡𑁆𑀳𑀼𑀧𑀸𑀤𑀸𑀦𑀕𑁆𑀕𑀳𑀡𑁂𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀬𑀸𑀬 𑀯𑀸 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑀸 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺 𑀏𑀯𑀁 𑀧𑀜𑁆𑀘. 𑀢𑁂𑀦𑀸𑀳 ‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭). 𑀢𑀢𑁆𑀣 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀦𑁆𑀢𑀺 𑀧𑀭𑀺𑀧𑀓𑁆𑀓𑀸𑀬𑀢𑀦𑀲𑁆𑀲 𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀫𑁆𑀫𑁄𑀳𑁄 𑀤𑀲𑁆𑀲𑀺𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

‘𑀆𑀬𑀢𑀺𑀁 𑀨𑀮𑀧𑀜𑁆𑀘𑀓’𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘. 𑀢𑀸𑀦𑀺 𑀚𑀸𑀢𑀺𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀸𑀦𑀺. 𑀚𑀭𑀸𑀫𑀭𑀡𑀁 𑀧𑀦 𑀢𑁂𑀲𑀁𑀬𑁂𑀯 𑀚𑀭𑀸𑀫𑀭𑀡𑀁. 𑀢𑁂𑀦𑀸𑀳 ‘‘𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 ¶ 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀇𑀥 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭). 𑀏𑀯𑀫𑀺𑀤𑀁 𑀯𑀻𑀲𑀢𑀺𑀆𑀓𑀸𑀭𑀸𑀭𑀁 𑀳𑁄𑀢𑀺.

𑀢𑀢𑁆𑀣 𑀧𑀼𑀭𑀺𑀫𑀪𑀯𑀲𑁆𑀫𑀺𑀁 𑀧𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀏𑀢𑀭𑀳𑀺 𑀧𑀜𑁆𑀘 𑀯𑀺𑀧𑀸𑀓𑀲𑀫𑁆𑀪𑀸𑀭𑀸, 𑀏𑀢𑀭𑀳𑀺 𑀧𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀅𑀦𑀸𑀕𑀢𑁂 𑀧𑀜𑁆𑀘 𑀯𑀺𑀧𑀸𑀓𑀥𑀫𑁆𑀫𑀸𑀢𑀺 𑀤𑀲 𑀥𑀫𑁆𑀫𑀸 𑀓𑀫𑁆𑀫𑀁, 𑀤𑀲 𑀯𑀺𑀧𑀸𑀓𑁄𑀢𑀺. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀁 𑀦𑀸𑀫, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑁄 𑀦𑀸𑀫𑀸𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀪𑀯𑀘𑀓𑁆𑀓𑀁 𑀧𑀘𑁆𑀘𑀬𑀸𑀓𑀸𑀭𑀯𑀝𑁆𑀝𑀁 𑀓𑀫𑁆𑀫𑀜𑁆𑀘𑁂𑀯 𑀓𑀫𑁆𑀫𑀯𑀺𑀧𑀸𑀓𑁄 𑀘. 𑀢𑀣𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀲𑀗𑁆𑀔𑁂𑀧𑁄, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀲𑀗𑁆𑀔𑁂𑀧𑁄𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀓𑀫𑁆𑀫𑀲𑀗𑁆𑀔𑁂𑀧𑁄 𑀘𑁂𑀯 𑀯𑀺𑀧𑀸𑀓𑀲𑀗𑁆𑀔𑁂𑀧𑁄 𑀘. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑀁, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀓𑀫𑁆𑀫𑀯𑀝𑁆𑀝𑀜𑁆𑀘𑁂𑀯 𑀯𑀺𑀧𑀸𑀓𑀯𑀝𑁆𑀝𑀜𑁆𑀘. 𑀢𑀣𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀪𑀯𑁄𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 ¶ 𑀓𑀫𑁆𑀫𑀪𑀯𑁄 𑀘𑁂𑀯 𑀯𑀺𑀧𑀸𑀓𑀪𑀯𑁄 𑀘. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀧𑀯𑀢𑁆𑀢𑀁 ¶ , 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀧𑀯𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀓𑀫𑁆𑀫𑀧𑀯𑀢𑁆𑀢𑀜𑁆𑀘𑁂𑀯 𑀯𑀺𑀧𑀸𑀓𑀧𑀯𑀢𑁆𑀢𑀜𑁆𑀘. 𑀢𑀣𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀲𑀦𑁆𑀢𑀢𑀺, 𑀤𑁆𑀯𑀻𑀲𑀼 𑀯𑀺𑀧𑀸𑀓𑁄 𑀯𑀺𑀧𑀸𑀓𑀲𑀦𑁆𑀢𑀢𑀻𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀓𑀫𑁆𑀫𑀲𑀦𑁆𑀢𑀢𑀺 𑀘𑁂𑀯 𑀯𑀺𑀧𑀸𑀓𑀲𑀦𑁆𑀢𑀢𑀺 𑀘. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀺𑀭𑀺𑀬𑀸 𑀦𑀸𑀫, 𑀤𑁆𑀯𑀻𑀲𑀼 𑀯𑀺𑀧𑀸𑀓𑁄 𑀓𑀺𑀭𑀺𑀬𑀸𑀨𑀮𑀁 𑀦𑀸𑀫𑀸𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀓𑀺𑀭𑀺𑀬𑀸 𑀘𑁂𑀯 𑀓𑀺𑀭𑀺𑀬𑀸𑀨𑀮𑀜𑁆𑀘𑀸𑀢𑀺.

𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀫𑀺𑀤𑀁 𑀲𑀳𑁂𑀢𑀼𑀓𑀁,

𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀁 𑀘𑀮𑀫𑀺𑀢𑁆𑀢𑀭𑀤𑁆𑀥𑀼𑀯𑀁;

𑀥𑀫𑁆𑀫𑁂𑀳𑀺 𑀥𑀫𑁆𑀫𑀸 𑀧𑀪𑀯𑀦𑁆𑀢𑀺 𑀳𑁂𑀢𑀼𑀲𑁄,

𑀦 𑀳𑁂𑀢𑁆𑀣 𑀅𑀢𑁆𑀢𑀸𑀯 𑀧𑀭𑁄𑀯 𑀯𑀺𑀚𑁆𑀚𑀢𑀺.

𑀥𑀫𑁆𑀫𑀸 𑀥𑀫𑁆𑀫𑁂 𑀲𑀜𑁆𑀚𑀦𑁂𑀦𑁆𑀢𑀺, 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸;

𑀳𑁂𑀢𑀽𑀦𑀜𑁆𑀘 𑀦𑀺𑀭𑁄𑀥𑀸𑀬, 𑀥𑀫𑁆𑀫𑁄 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄;

𑀳𑁂𑀢𑀽𑀲𑀼 𑀉𑀧𑀭𑀼𑀤𑁆𑀥𑁂𑀲𑀼, 𑀙𑀺𑀦𑁆𑀦𑀁 𑀯𑀝𑁆𑀝𑀁 𑀦 𑀯𑀝𑁆𑀝𑀢𑀺.

𑀏𑀯𑀁 𑀤𑀼𑀓𑁆𑀔𑀦𑁆𑀢𑀓𑀺𑀭𑀺𑀬𑀸𑀬, 𑀩𑁆𑀭𑀳𑁆𑀫𑀘𑀭𑀺𑀬𑀻𑀥 𑀯𑀺𑀚𑁆𑀚𑀢𑀺;

𑀲𑀢𑁆𑀢𑁂 𑀘 𑀦𑀽𑀧𑀮𑀩𑁆𑀪𑀦𑁆𑀢𑁂, 𑀦𑁂𑀯𑀼𑀘𑁆𑀙𑁂𑀤𑁄 𑀦 𑀲𑀲𑁆𑀲𑀢𑀁.

𑀢𑀺𑀯𑀝𑁆𑀝𑀫𑀦𑀯𑀝𑁆𑀞𑀺𑀢𑀁 𑀪𑀫𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀗𑁆𑀔𑀸𑀭𑀪𑀯𑀸 𑀓𑀫𑁆𑀫𑀯𑀝𑁆𑀝𑀁, 𑀅𑀯𑀺𑀚𑁆𑀚𑀸𑀢𑀡𑁆𑀳𑀽𑀧𑀸𑀤𑀸𑀦𑀸𑀦𑀺 𑀓𑀺𑀮𑁂𑀲𑀯𑀝𑁆𑀝𑀁, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀝𑁆𑀝𑁂𑀳𑀺 𑀢𑀺𑀯𑀝𑁆𑀝𑀫𑀺𑀤𑀁 𑀪𑀯𑀘𑀓𑁆𑀓𑀁 𑀬𑀸𑀯 𑀓𑀺𑀮𑁂𑀲𑀯𑀝𑁆𑀝𑀁 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺 ¶ 𑀢𑀸𑀯 𑀅𑀦𑀼𑀧𑀘𑁆𑀙𑀺𑀦𑁆𑀦𑀧𑀘𑁆𑀘𑀬𑀢𑁆𑀢𑀸 𑀅𑀦𑀯𑀝𑁆𑀞𑀺𑀢𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀝𑁆𑀝𑀦𑀢𑁄 𑀪𑀫𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀬𑀺𑀤𑀫𑁂𑀯𑀁 𑀪𑀫𑀫𑀸𑀦𑀁 𑁋

𑀲𑀘𑁆𑀘𑀧𑁆𑀧𑀪𑀯𑀢𑁄 𑀓𑀺𑀘𑁆𑀘𑀸, 𑀯𑀸𑀭𑀡𑀸 𑀉𑀧𑀫𑀸𑀳𑀺 𑀘;

𑀕𑀫𑁆𑀪𑀻𑀭𑀦𑀬𑀪𑁂𑀤𑀸 𑀘, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀢𑀢𑁆𑀣 ¶ 𑀬𑀲𑁆𑀫𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀅𑀯𑀺𑀲𑁂𑀲𑁂𑀦 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁, 𑀲𑀗𑁆𑀔𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀁 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁, 𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀦𑀸𑀫𑀭𑀽𑀧𑀸𑀤𑀻𑀦𑀺 𑀯𑀺𑀧𑀸𑀓𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁, 𑀯𑁂𑀤𑀦𑀸𑀬 𑀢𑀡𑁆𑀳𑀸 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁, 𑀢𑀡𑁆𑀳𑀸𑀬 𑀉𑀧𑀸𑀤𑀸𑀦𑀁 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁, 𑀉𑀧𑀸𑀤𑀸𑀦𑀢𑁄 𑀪𑀯𑁄 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀤𑀼𑀢𑀺𑀬𑀲𑀘𑁆𑀘𑀤𑁆𑀯𑀬𑀁, 𑀪𑀯𑀢𑁄 𑀚𑀸𑀢𑀺 ¶ 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁, 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀁 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀦𑁆𑀢𑀺. 𑀏𑀯𑀁 𑀢𑀸𑀯𑀺𑀤𑀁 ‘𑀲𑀘𑁆𑀘𑀧𑁆𑀧𑀪𑀯𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀯𑀢𑁆𑀣𑀽𑀲𑀼 𑀘 𑀲𑀢𑁆𑀢𑁂 𑀲𑀫𑁆𑀫𑁄𑀳𑁂𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀸𑀢𑀼𑀪𑀸𑀯𑀸𑀬, 𑀢𑀣𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀢𑀜𑁆𑀘 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀧𑀘𑁆𑀘𑀬𑀸 𑀘 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀯𑀢𑁆𑀣𑀼𑀜𑁆𑀘 𑀧𑀝𑀺𑀚𑀸𑀦𑀸𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀦𑀸𑀫𑀭𑀽𑀧𑀲𑁆𑀲, 𑀦𑀸𑀫𑀭𑀽𑀧𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀜𑁆𑀘 𑀉𑀧𑀢𑁆𑀣𑀫𑁆𑀪𑁂𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀲𑀴𑀸𑀬𑀢𑀦𑀲𑁆𑀲, 𑀲𑀴𑀸𑀬𑀢𑀦𑀫𑁆𑀧𑀺 𑀲𑀯𑀺𑀲𑀬𑁂 𑀘 𑀯𑀢𑁆𑀢𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀨𑀲𑁆𑀲𑀲𑁆𑀲, 𑀨𑀲𑁆𑀲𑁄𑀧𑀺 𑀆𑀭𑀫𑁆𑀫𑀡𑀜𑁆𑀘 𑀨𑀼𑀲𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀯𑁂𑀤𑀦𑀸𑀬, 𑀯𑁂𑀤𑀦𑀸𑀧𑀺 𑀆𑀭𑀫𑁆𑀫𑀡𑀭𑀲𑀜𑁆𑀘 𑀅𑀦𑀼𑀪𑀯𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀢𑀡𑁆𑀳𑀸𑀬, 𑀢𑀡𑁆𑀳𑀸𑀧𑀺 𑀭𑀚𑁆𑀚𑀦𑀻𑀬𑁂 𑀘 𑀥𑀫𑁆𑀫𑁂 𑀭𑀚𑁆𑀚𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀉𑀧𑀸𑀤𑀸𑀦𑀲𑁆𑀲, 𑀉𑀧𑀸𑀤𑀸𑀦𑀫𑁆𑀧𑀺 𑀉𑀧𑀸𑀤𑀸𑀦𑀻𑀬𑁂 𑀘 𑀥𑀫𑁆𑀫𑁂 𑀉𑀧𑀸𑀤𑀺𑀬𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀲𑁆𑀲, 𑀪𑀯𑁄𑀧𑀺 𑀦𑀸𑀦𑀸𑀕𑀢𑀻𑀲𑀼 𑀘 𑀯𑀺𑀓𑁆𑀔𑀺𑀧𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀚𑀸𑀢𑀺𑀬𑀸, 𑀚𑀸𑀢𑀺𑀧𑀺 𑀔𑀦𑁆𑀥𑁂 𑀘 𑀚𑀦𑁂𑀢𑀺 𑀢𑁂𑀲𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀢𑀸 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀚𑀭𑀸𑀫𑀭𑀡𑀫𑁆𑀧𑀺 𑀔𑀦𑁆𑀥𑀸𑀦𑀁 𑀧𑀸𑀓𑀪𑁂𑀤𑀪𑀸𑀯𑀜𑁆𑀘 𑀅𑀥𑀺𑀢𑀺𑀝𑁆𑀞𑀢𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬 𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀧𑀤𑁂𑀲𑀼 𑀤𑁆𑀯𑀺𑀥𑀸 𑀧𑀯𑀢𑁆𑀢‘𑀓𑀺𑀘𑁆𑀘𑀢𑁄’𑀧𑀺 𑀇𑀤𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀬𑀲𑁆𑀫𑀸 ¶ 𑀘𑁂𑀢𑁆𑀣 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀇𑀤𑀁 𑀓𑀸𑀭𑀓𑀤𑀲𑁆𑀲𑀦𑀦𑀺𑀯𑀸𑀭𑀡𑀁, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀅𑀢𑁆𑀢𑀲𑀗𑁆𑀓𑀦𑁆𑀢𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀁, ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀅𑀢𑁆𑀢𑀸𑀢𑀺𑀧𑀭𑀺𑀓𑀧𑁆𑀧𑀺𑀢𑀯𑀢𑁆𑀣𑀼𑀪𑁂𑀤𑀤𑀲𑁆𑀲𑀦𑀢𑁄 𑀖𑀦𑀲𑀜𑁆𑀜𑀸𑀦𑀺𑀯𑀸𑀭𑀡𑀁, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 ‘‘𑀅𑀢𑁆𑀢𑀸 𑀧𑀲𑁆𑀲𑀢𑀺…𑀧𑁂… 𑀯𑀺𑀚𑀸𑀦𑀸𑀢𑀺 𑀨𑀼𑀲𑀢𑀺 𑀯𑁂𑀤𑀬𑀢𑀺 𑀢𑀡𑁆𑀳𑀺𑀬𑀢𑀺 𑀉𑀧𑀸𑀤𑀺𑀬𑀢𑀺 𑀪𑀯𑀢𑀺 𑀚𑀸𑀬𑀢𑀺 𑀚𑀻𑀬𑀢𑀺 𑀫𑀻𑀬𑀢𑀻’’𑀢𑀺 𑀏𑀯𑀫𑀸𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀁, 𑀢𑀲𑁆𑀫𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑀺𑀯𑀸𑀭𑀡𑀢𑁄𑀧𑁂𑀢𑀁 𑀪𑀯𑀘𑀓𑁆𑀓𑀁 ‘𑀦𑀺𑀯𑀸𑀭𑀡𑀢𑁄’ 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀤𑀲𑁆𑀲𑀦𑀢𑁄 𑀅𑀦𑁆𑀥𑁄 𑀯𑀺𑀬 𑀅𑀯𑀺𑀚𑁆𑀚𑀸 ¶ , 𑀅𑀦𑁆𑀥𑀲𑁆𑀲 𑀉𑀧𑀓𑁆𑀔𑀮𑀦𑀁 𑀯𑀺𑀬 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀉𑀧𑀓𑁆𑀔𑀮𑀺𑀢𑀲𑁆𑀲 𑀧𑀢𑀦𑀁 ¶ 𑀯𑀺𑀬 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀧𑀢𑀺𑀢𑀲𑁆𑀲 𑀕𑀡𑁆𑀟𑀧𑀸𑀢𑀼𑀪𑀸𑀯𑁄 𑀯𑀺𑀬 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀕𑀡𑁆𑀟𑀪𑁂𑀤𑀧𑀻𑀴𑀓𑀸 𑀯𑀺𑀬 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀕𑀡𑁆𑀟𑀧𑀻𑀴𑀓𑀸𑀖𑀝𑁆𑀝𑀦𑀁 𑀯𑀺𑀬 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀖𑀝𑁆𑀝𑀦𑀤𑀼𑀓𑁆𑀔𑀁 𑀯𑀺𑀬 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁄 𑀯𑀺𑀬 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁂𑀦 𑀅𑀲𑀧𑁆𑀧𑀸𑀬𑀕𑁆𑀕𑀳𑀡𑀁 𑀯𑀺𑀬 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀺𑀦𑁆𑀦𑀅𑀲𑀧𑁆𑀧𑀸𑀬𑀸𑀮𑁂𑀧𑀦𑀁 𑀯𑀺𑀬 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀅𑀲𑀧𑁆𑀧𑀸𑀬𑀸𑀮𑁂𑀧𑀦𑁂𑀦 𑀕𑀡𑁆𑀟𑀯𑀺𑀓𑀸𑀭𑀧𑀸𑀢𑀼𑀪𑀸𑀯𑁄 𑀯𑀺𑀬 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀕𑀡𑁆𑀟𑀯𑀺𑀓𑀸𑀭𑀢𑁄 𑀕𑀡𑁆𑀟𑀪𑁂𑀤𑁄 𑀯𑀺𑀬 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁.

𑀬𑀲𑁆𑀫𑀸 𑀯𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀅𑀧𑁆𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀪𑀸𑀯𑁂𑀦 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀧𑀝𑀮𑀁 𑀯𑀺𑀬 𑀅𑀓𑁆𑀔𑀻𑀦𑀺, 𑀢𑀤𑀪𑀺𑀪𑀽𑀢𑁄 𑀘 𑀩𑀸𑀮𑁄 𑀧𑁄𑀦𑁄𑀩𑁆𑀪𑀯𑀺𑀓𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀅𑀢𑁆𑀢𑀸𑀦𑀁 𑀯𑁂𑀞𑁂𑀢𑀺 𑀓𑁄𑀲𑀓𑀸𑀭𑀓𑀺𑀫𑀺 𑀯𑀺𑀬 𑀓𑁄𑀲𑀧𑁆𑀧𑀤𑁂𑀲𑁂𑀳𑀺, 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀁 𑀕𑀢𑀻𑀲𑀼 𑀧𑀢𑀺𑀝𑁆𑀞𑀁 𑀮𑀪𑀢𑀺 𑀧𑀭𑀺𑀡𑀸𑀬𑀓𑀧𑀭𑀺𑀕𑁆𑀕𑀳𑀺𑀢𑁄 𑀯𑀺𑀬 𑀭𑀸𑀚𑀓𑀼𑀫𑀸𑀭𑁄 𑀭𑀚𑁆𑀚𑁂, 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀧𑀭𑀺𑀓𑀧𑁆𑀧𑀦𑀢𑁄 𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀬𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀸𑀫𑀭𑀽𑀧𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀫𑀸𑀬𑀸𑀓𑀸𑀭𑁄 𑀯𑀺𑀬 𑀫𑀸𑀬𑀁, 𑀦𑀸𑀫𑀭𑀽𑀧𑁂 𑀧𑀢𑀺𑀝𑁆𑀞𑀺𑀢𑀁 𑀲𑀴𑀸𑀬𑀢𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀲𑀼𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀯𑀦𑀧𑁆𑀧𑀕𑀼𑀫𑁆𑀩𑁄 𑀯𑀺𑀬, 𑀆𑀬𑀢𑀦𑀖𑀝𑁆𑀝𑀦𑀢𑁄 𑀨𑀲𑁆𑀲𑁄 𑀚𑀸𑀬𑀢𑀺 𑀅𑀭𑀡𑀻𑀲𑀳𑀺𑀢𑀸𑀪𑀺𑀫𑀤𑁆𑀤𑀦𑀢𑁄 𑀅𑀕𑁆𑀕𑀺 𑀯𑀺𑀬, 𑀨𑀲𑁆𑀲𑁂𑀦 𑀨𑀼𑀝𑁆𑀞𑀲𑁆𑀲 𑀯𑁂𑀤𑀦𑀸 𑀧𑀸𑀢𑀼𑀪𑀯𑀢𑀺 𑀅𑀕𑁆𑀕𑀺𑀦𑀸 𑀨𑀼𑀝𑁆𑀞𑀲𑁆𑀲 𑀟𑀸𑀳𑁄 𑀯𑀺𑀬, 𑀯𑁂𑀤𑀬𑀫𑀸𑀦𑀲𑁆𑀲 𑀢𑀡𑁆𑀳𑀸 𑀯𑀟𑁆𑀠𑀢𑀺 𑀮𑁄𑀡𑀽𑀤𑀓𑀁 𑀧𑀺𑀯𑀢𑁄 𑀧𑀺𑀧𑀸𑀲𑀸 𑀯𑀺𑀬, 𑀢𑀲𑀺𑀢𑁄 𑀪𑀯𑁂𑀲𑀼 𑀅𑀪𑀺𑀮𑀸𑀲𑀁 𑀓𑀭𑁄𑀢𑀺 𑀧𑀺𑀧𑀸𑀲𑀺𑀢𑁄 𑀯𑀺𑀬 𑀧𑀸𑀦𑀻𑀬𑁂, 𑀢𑀤𑀲𑁆𑀲𑀼𑀧𑀸𑀤𑀸𑀦𑀁 𑀉𑀧𑀸𑀤𑀸𑀦𑁂𑀦 𑀪𑀯𑀁 𑀉𑀧𑀸𑀤𑀺𑀬𑀢𑀺 𑀆𑀫𑀺𑀲𑀮𑁄𑀪𑁂𑀦 𑀫𑀘𑁆𑀙𑁄 𑀩𑀴𑀺𑀲𑀁 𑀯𑀺𑀬, 𑀪𑀯𑁂 𑀲𑀢𑀺 𑀚𑀸𑀢𑀺 𑀳𑁄𑀢𑀺 𑀩𑀻𑀚𑁂 𑀲𑀢𑀺 𑀅𑀗𑁆𑀓𑀼𑀭𑁄 𑀯𑀺𑀬, 𑀚𑀸𑀢𑀲𑁆𑀲 𑀅𑀯𑀲𑁆𑀲𑀁 𑀚𑀭𑀸𑀫𑀭𑀡𑀁 𑀉𑀧𑁆𑀧𑀦𑁆𑀦𑀲𑁆𑀲 ¶ 𑀭𑀼𑀓𑁆𑀔𑀲𑁆𑀲 𑀧𑀢𑀦𑀁 𑀯𑀺𑀬, 𑀢𑀲𑁆𑀫𑀸 𑀏𑀯𑀁 ‘𑀉𑀧𑀫𑀸𑀳𑀺’ 𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀬𑀲𑁆𑀫𑀸 𑀘 𑀪𑀕𑀯𑀢𑀸 𑀅𑀢𑁆𑀣𑀢𑁄𑀧𑀺 𑀥𑀫𑁆𑀫𑀢𑁄𑀧𑀺 𑀤𑁂𑀲𑀦𑀸𑀢𑁄𑀧𑀺 𑀧𑀝𑀺𑀯𑁂𑀥𑀢𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦) 𑀯𑀼𑀢𑁆𑀢𑀁, 𑀢𑀲𑁆𑀫𑀸 ¶ ‘𑀕𑀫𑁆𑀪𑀻𑀭𑀪𑁂𑀤𑀢𑁄’𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀢𑀢𑁆𑀣 𑀬𑀲𑁆𑀫𑀸 𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀺, 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀏𑀯𑀁 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑀲𑁆𑀲 𑀤𑀼𑀭𑀯𑀩𑁄𑀥𑀦𑀻𑀬𑀢𑁄 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀢𑀣𑀸 𑀚𑀸𑀢𑀺𑀬𑀸 𑀪𑀯𑀧𑀘𑁆𑀘𑀬…𑀧𑁂… 𑀲𑀗𑁆𑀔𑀸𑀭𑀸𑀦𑀁 ¶ 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀅𑀢𑁆𑀣𑀕𑀫𑁆𑀪𑀻𑀭𑀦𑁆𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 ‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸’ 𑀳𑁂𑀢𑀼𑀨𑀮𑀜𑁆𑀳𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸𑀳 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦).

𑀬𑀲𑁆𑀫𑀸 𑀧𑀦 𑀬𑁂𑀦𑀸𑀓𑀸𑀭𑁂𑀦 𑀬𑀤𑀯𑀢𑁆𑀣𑀸 𑀘 𑀅𑀯𑀺𑀚𑁆𑀚𑀸 𑀢𑁂𑀲𑀁 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀤𑀼𑀭𑀯𑀩𑁄𑀥𑀦𑀻𑀬𑀢𑁄 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀢𑀣𑀸 𑀲𑀗𑁆𑀔𑀸𑀭𑀸𑀦𑀁…𑀧𑁂… 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀥𑀫𑁆𑀫𑀕𑀫𑁆𑀪𑀻𑀭𑀦𑁆𑀢𑀺 𑀅𑀬𑀫𑁂𑀢𑁆𑀣 ‘𑀥𑀫𑁆𑀫𑀕𑀫𑁆𑀪𑀻𑀭𑀢𑀸’ 𑀳𑁂𑀢𑀼𑀦𑁄 𑀳𑀺 𑀥𑀫𑁆𑀫𑁄𑀢𑀺 𑀦𑀸𑀫𑀁, 𑀬𑀣𑀸𑀳 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺.

𑀬𑀲𑁆𑀫𑀸 𑀘𑀲𑁆𑀲 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸 𑀢𑀣𑀸 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸 𑀤𑁂𑀲𑀦𑀸𑀧𑀺 𑀕𑀫𑁆𑀪𑀻𑀭𑀸, 𑀦 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀢𑁄 𑀅𑀜𑁆𑀜𑀁 𑀜𑀸𑀡𑀁 𑀧𑀢𑀺𑀝𑁆𑀞𑀁 𑀮𑀪𑀢𑀺, 𑀢𑀣𑀸 𑀳𑁂𑀢𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀅𑀦𑀼𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀧𑀝𑀺𑀮𑁄𑀫𑀢𑁄; 𑀓𑀢𑁆𑀣𑀘𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀢𑁄 𑀯𑀸 𑀧𑀝𑀺𑀮𑁄𑀫𑀢𑁄 𑀯𑀸, 𑀓𑀢𑁆𑀣𑀘𑀺 𑀢𑀺𑀲𑀦𑁆𑀥𑀺𑀘𑀢𑀼𑀲𑀗𑁆𑀔𑁂𑀧𑀁, 𑀓𑀢𑁆𑀣𑀘𑀺 𑀤𑁆𑀯𑀺𑀲𑀦𑁆𑀥𑀺𑀢𑀺𑀲𑀗𑁆𑀔𑁂𑀧𑀁, 𑀓𑀢𑁆𑀣𑀘𑀺 𑀏𑀓𑀲𑀦𑁆𑀥𑀺𑀤𑁆𑀯𑀺𑀲𑀗𑁆𑀔𑁂𑀧𑀁 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀦𑁆𑀢𑀺 𑀅𑀬𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀬𑁄 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄, 𑀬𑁂𑀦 𑀧𑀝𑀺𑀯𑀺𑀤𑁆𑀥𑁂𑀦 𑀅𑀯𑀺𑀚𑁆𑀚𑀸𑀤𑀬𑁄 𑀥𑀫𑁆𑀫𑀸 𑀲𑀮𑀓𑁆𑀔𑀡𑀢𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁. 𑀢𑀣𑀸 𑀳𑁂𑀢𑁆𑀣 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀸𑀤𑀲𑁆𑀲𑀦𑀲𑀘𑁆𑀘𑀸𑀲𑀫𑁆𑀧𑀝𑀺𑀯𑁂𑀥𑀝𑁆𑀞𑁄 ¶ 𑀕𑀫𑁆𑀪𑀻𑀭𑁄, 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀸𑀬𑀽𑀳𑀦𑀲𑀭𑀸𑀕𑀯𑀺𑀭𑀸𑀕𑀝𑁆𑀞𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀅𑀩𑁆𑀬𑀸𑀧𑀸𑀭𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑁄 ¶ , 𑀦𑀸𑀫𑀭𑀽𑀧𑀲𑁆𑀲 𑀏𑀓𑀼𑀧𑁆𑀧𑀸𑀤𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀦𑀫𑀦𑀭𑀼𑀧𑁆𑀧𑀦𑀝𑁆𑀞𑁄, 𑀲𑀴𑀸𑀬𑀢𑀦𑀲𑁆𑀲 𑀅𑀥𑀺𑀧𑀢𑀺𑀮𑁄𑀓𑀤𑁆𑀯𑀸𑀭𑀔𑁂𑀢𑁆𑀢𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀝𑁆𑀞𑁄, 𑀨𑀲𑁆𑀲𑀲𑁆𑀲 𑀨𑀼𑀲𑀦𑀲𑀗𑁆𑀖𑀝𑁆𑀝𑀦𑀲𑀗𑁆𑀕𑀢𑀺𑀲𑀦𑁆𑀦𑀺𑀧𑀸𑀢𑀝𑁆𑀞𑁄, 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀲𑀼𑀔𑀤𑀼𑀓𑁆𑀔𑀫𑀚𑁆𑀛𑀢𑁆𑀢𑀪𑀸𑀯𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄, 𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀺𑀢𑀚𑁆𑀛𑁄𑀲𑀸𑀦𑀲𑀭𑀺𑀢𑀸𑀮𑀢𑀸𑀦𑀤𑀻𑀢𑀡𑁆𑀳𑀸𑀲𑀫𑀼𑀤𑁆𑀤𑀤𑀼𑀧𑁆𑀧𑀽𑀭𑀡𑀝𑁆𑀞𑁄, 𑀉𑀧𑀸𑀤𑀸𑀦𑀲𑁆𑀲 𑀆𑀤𑀸𑀦𑀕𑁆𑀕𑀳𑀡𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁄, 𑀪𑀯𑀲𑁆𑀲 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀔𑀺𑀧𑀦𑀝𑁆𑀞𑁄, 𑀚𑀸𑀢𑀺𑀬𑀸 𑀚𑀸𑀢𑀺𑀲𑀜𑁆𑀚𑀸𑀢𑀺𑀑𑀓𑁆𑀓𑀦𑁆𑀢𑀺𑀦𑀺𑀩𑁆𑀩𑀢𑁆𑀢𑀺𑀧𑀸𑀢𑀼𑀪𑀸𑀯𑀝𑁆𑀞𑁄, 𑀚𑀭𑀸𑀫𑀭𑀡𑀲𑁆𑀲 𑀔𑀬𑀯𑀬𑀪𑁂𑀤𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀫𑁂𑀢𑁆𑀣 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀏𑀓𑀢𑁆𑀢𑀦𑀬𑁄, 𑀦𑀸𑀦𑀢𑁆𑀢𑀦𑀬𑁄, 𑀅𑀩𑁆𑀬𑀸𑀧𑀸𑀭𑀦𑀬𑁄, 𑀏𑀯𑀁𑀥𑀫𑁆𑀫𑀢𑀸𑀦𑀬𑁄𑀢𑀺 𑀘𑀢𑁆𑀢𑀸𑀭𑁄 𑀅𑀢𑁆𑀣𑀦𑀬𑀸 𑀳𑁄𑀦𑁆𑀢𑀺 ¶ , 𑀢𑀲𑁆𑀫𑀸 ‘𑀦𑀬𑀪𑁂𑀤𑀢𑁄’𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁. 𑀢𑀢𑁆𑀣 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀪𑀸𑀯𑁂𑀦 𑀭𑀼𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺 𑀯𑀺𑀬 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 ‘𑀏𑀓𑀢𑁆𑀢𑀦𑀬𑁄’ 𑀦𑀸𑀫; 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀸𑀯𑀩𑁄𑀥𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀏𑀓𑀢𑁆𑀢𑀕𑁆𑀕𑀳𑀡𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀦 𑀬𑀣𑀸𑀲𑀓𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁 ‘𑀦𑀸𑀦𑀢𑁆𑀢𑀦𑀬𑁄’ 𑀦𑀸𑀫; 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀦𑀯𑀦𑀯𑀸𑀦𑀁 𑀉𑀧𑁆𑀧𑀸𑀤𑀤𑀲𑁆𑀲𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀏𑀓𑀲𑀦𑁆𑀢𑀸𑀦𑀧𑀢𑀺𑀢𑀲𑁆𑀲 𑀪𑀺𑀦𑁆𑀦𑀲𑀦𑁆𑀢𑀸𑀦𑀲𑁆𑀲𑁂𑀯 𑀦𑀸𑀦𑀢𑁆𑀢𑀕𑁆𑀕𑀳𑀡𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀬 ‘𑀲𑀗𑁆𑀔𑀸𑀭𑀸 𑀫𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸’, 𑀲𑀗𑁆𑀔𑀸𑀭𑀸𑀦𑀁 𑀯𑀸 ‘𑀯𑀺𑀜𑁆𑀜𑀸𑀡𑀁 𑀅𑀫𑁆𑀳𑁂𑀳𑀻’𑀢𑀺 𑀏𑀯𑀫𑀸𑀤𑀺𑀩𑁆𑀬𑀸𑀧𑀸𑀭𑀸𑀪𑀸𑀯𑁄 ‘𑀅𑀩𑁆𑀬𑀸𑀧𑀸𑀭𑀦𑀬𑁄’ 𑀦𑀸𑀫; 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀓𑀸𑀭𑀓𑀲𑁆𑀲 𑀅𑀪𑀸𑀯𑀸𑀯𑀩𑁄𑀥𑀢𑁄 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀬𑁄 𑀅𑀲𑀢𑀺𑀧𑀺 𑀩𑁆𑀬𑀸𑀧𑀸𑀭𑁂 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑀦𑀺𑀬𑀫𑀲𑀺𑀤𑁆𑀥𑁄 𑀳𑁂𑀢𑀼𑀪𑀸𑀯𑁄 𑀢𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁𑀬𑁂𑀯 𑀲𑀫𑁆𑀪𑀯𑁄 𑀔𑀻𑀭𑀸𑀤𑀻𑀳𑀺 ¶ 𑀤𑀥𑀺𑀆𑀤𑀻𑀦𑀁 𑀯𑀺𑀬, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀅𑀬𑀁 ‘𑀏𑀯𑀁𑀥𑀫𑁆𑀫𑀢𑀸𑀦𑀬𑁄’ 𑀦𑀸𑀫; 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 ¶ 𑀧𑀘𑁆𑀘𑀬𑀸𑀦𑀼𑀭𑀽𑀧𑀢𑁄 𑀨𑀮𑀸𑀯𑀩𑁄𑀥𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀜𑁆𑀘 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀜𑁆𑀘 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀁 𑀨𑀮𑀧𑁆𑀧𑀯𑀢𑁆𑀢𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀢𑁄 𑀓𑀼𑀢𑁄𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀲𑀫𑁆𑀪𑀯𑀕𑁆𑀕𑀳𑀡𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀜𑁆𑀘𑁂𑀯 𑀦𑀺𑀬𑀢𑀯𑀸𑀤𑀜𑁆𑀘 𑀉𑀧𑀸𑀤𑀺𑀬𑀢𑀻𑀢𑀺 𑀏𑀯𑀫𑀺𑀤𑀁 𑀪𑀯𑀘𑀓𑁆𑀓𑀁 𑁋

𑀲𑀘𑁆𑀘𑀧𑁆𑀧𑀪𑀯𑀢𑁄 𑀓𑀺𑀘𑁆𑀘𑀸, 𑀯𑀸𑀭𑀡𑀸 𑀉𑀧𑀫𑀸𑀳𑀺 𑀘;

𑀕𑀫𑁆𑀪𑀻𑀭𑀦𑀬𑀪𑁂𑀤𑀸 𑀘, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀇𑀤𑀜𑁆𑀳𑀺 𑀕𑀫𑁆𑀪𑀻𑀭𑀢𑁄 𑀅𑀕𑀸𑀥𑀁 𑀦𑀸𑀦𑀸𑀦𑀬𑀕𑁆𑀕𑀳𑀡𑀢𑁄 𑀤𑀼𑀭𑀪𑀺𑀬𑀸𑀦𑀁 𑀜𑀸𑀡𑀸𑀲𑀺𑀦𑀸 𑀲𑀫𑀸𑀥𑀺𑀧𑀯𑀭𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑁂𑀦 𑁋

𑀪𑀯𑀘𑀓𑁆𑀓𑀫𑀧𑀤𑀸𑀮𑁂𑀢𑁆𑀯𑀸 ¶ ,

𑀅𑀲𑀦𑀺𑀯𑀺𑀘𑀓𑁆𑀓𑀫𑀺𑀯 𑀦𑀺𑀘𑁆𑀘𑀦𑀺𑀫𑁆𑀫𑀣𑀦𑀁;

𑀲𑀁𑀲𑀸𑀭𑀪𑀬𑀫𑀢𑀻𑀢𑁄,

𑀦 𑀓𑁄𑀘𑀺 𑀲𑀼𑀧𑀺𑀦𑀦𑁆𑀢𑀭𑁂𑀧𑁆𑀬𑀢𑁆𑀣𑀺.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀏𑀢𑀲𑁆𑀲, 𑀆𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀬𑀁 𑀧𑀚𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀕𑀡𑁆𑀞𑀺𑀓𑀚𑀸𑀢𑀸 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦). 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀝𑀺𑀧𑀦𑁆𑀦𑁄 𑀅𑀯𑀲𑁂𑀲𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑁋

𑀕𑀫𑁆𑀪𑀻𑀭𑁂 𑀧𑀘𑁆𑀘𑀬𑀸𑀓𑀸𑀭-𑀧𑁆𑀧𑀪𑁂𑀤𑁂 𑀇𑀥 𑀧𑀡𑁆𑀟𑀺𑀢𑁄;

𑀬𑀣𑀸 𑀕𑀸𑀥𑀁 𑀮𑀪𑁂𑀣𑁂𑀯-𑀫𑀦𑀼𑀬𑀼𑀜𑁆𑀚𑁂 𑀲𑀤𑀸 𑀲𑀢𑁄𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁪𑁩. 𑀏𑀯𑀁 𑀫𑀳𑀸𑀧𑀣𑀯𑀺𑀁 𑀧𑀢𑁆𑀣𑀭𑀦𑁆𑀢𑁄 𑀯𑀺𑀬 𑀆𑀓𑀸𑀲𑀁 𑀯𑀺𑀢𑁆𑀣𑀸𑀭𑀬𑀦𑁆𑀢𑁄 𑀯𑀺𑀬 𑀘 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀲𑀢𑁆𑀣𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀦𑀺𑀕𑁆𑀕𑀡𑁆𑀞𑀺𑀁 𑀦𑀺𑀚𑁆𑀚𑀝𑀁 𑀧𑀘𑁆𑀘𑀬𑀸𑀓𑀸𑀭𑀁 𑀦𑀸𑀦𑀸𑀘𑀺𑀢𑁆𑀢𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀅𑀬𑀁 𑀧𑀘𑁆𑀘𑀬𑀸𑀓𑀸𑀭𑁄 𑀦𑀸𑀦𑀸𑀘𑀺𑀢𑁆𑀢𑁂𑀲𑀼𑀬𑁂𑀯 ¶ 𑀳𑁄𑀢𑀺, 𑀏𑀓𑀘𑀺𑀢𑁆𑀢𑁂𑀧𑀺 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 ¶ 𑀤𑀲𑁆𑀲𑁂𑀢𑀼𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀢𑀸𑀯 𑀞𑀧𑁂𑀲𑀺. 𑀏𑀯𑀁 𑀞𑀧𑀺𑀢𑀸𑀬 𑀧𑀦 𑀫𑀸𑀢𑀺𑀓𑀸𑀬 𑁋

𑀅𑀯𑀺𑀚𑁆𑀚𑀸𑀤𑀻𑀳𑀺 ¶ 𑀫𑀽𑀮𑁂𑀳𑀺, 𑀦𑀯 𑀫𑀽𑀮𑀧𑀤𑀸 𑀦𑀯;

𑀦𑀬𑀸 𑀢𑀢𑁆𑀣 𑀘𑀢𑀼𑀓𑁆𑀓𑀸𑀦𑀺, 𑀯𑀸𑀭𑀪𑁂𑀤𑀜𑁆𑀘 𑀤𑀻𑀧𑀬𑁂.

𑀢𑀢𑁆𑀭𑀸𑀬𑀁 𑀤𑀻𑀧𑀦𑀸 𑁋 𑀏𑀢𑁆𑀣 𑀳𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀸𑀫𑀙𑀝𑁆𑀞𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀢𑀡𑁆𑀳𑀸𑀉𑀧𑀸𑀤𑀸𑀦𑀧𑁆𑀧𑀪𑁂𑀤𑁂𑀳𑀺 𑀅𑀯𑀺𑀚𑁆𑀚𑀸𑀤𑀻𑀳𑀺 𑀦𑀯𑀳𑀺 𑀫𑀽𑀮𑀧𑀤𑁂𑀳𑀺 𑀅𑀯𑀺𑀚𑁆𑀚𑀸𑀤𑀺𑀓𑁄, 𑀲𑀗𑁆𑀔𑀸𑀭𑀸𑀤𑀺𑀓𑁄, 𑀯𑀺𑀜𑁆𑀜𑀸𑀡𑀸𑀤𑀺𑀓𑁄, 𑀦𑀸𑀫𑀸𑀤𑀺𑀓𑁄, 𑀙𑀝𑁆𑀞𑀸𑀬𑀢𑀦𑀸𑀤𑀺𑀓𑁄, 𑀨𑀲𑁆𑀲𑀸𑀤𑀺𑀓𑁄, 𑀯𑁂𑀤𑀦𑀸𑀤𑀺𑀓𑁄, 𑀢𑀡𑁆𑀳𑀸𑀤𑀺𑀓𑁄, 𑀉𑀧𑀸𑀤𑀸𑀦𑀸𑀤𑀺𑀓𑁄𑀢𑀺 𑀇𑀫𑁂 𑀦𑀯 𑀫𑀽𑀮𑀧𑀤𑀸 𑀦𑀯 𑀦𑀬𑀸 𑀳𑁄𑀦𑁆𑀢𑀺.

𑀢𑁂𑀲𑀼 𑀬𑁄 𑀢𑀸𑀯 𑀅𑀬𑀁 𑀅𑀯𑀺𑀚𑁆𑀚𑀸𑀤𑀺𑀓𑁄 𑀦𑀬𑁄, 𑀢𑀢𑁆𑀣 𑀧𑀘𑁆𑀘𑀬𑀘𑀢𑀼𑀓𑁆𑀓𑀁, 𑀳𑁂𑀢𑀼𑀘𑀢𑀼𑀓𑁆𑀓𑀁, 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀓𑀁, 𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑀦𑁆𑀢𑀺 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺. 𑀢𑀢𑁆𑀣 𑀏𑀓𑁂𑀓𑁂𑀦 𑀘𑀢𑀼𑀓𑁆𑀓𑁂𑀦 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀘𑀢𑀼𑀦𑁆𑀦𑀫𑁆𑀧𑀺 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂 𑀲𑁄𑀴𑀲 𑀲𑁄𑀴𑀲 𑀯𑀸𑀭𑀸𑀢𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀁 𑀯𑀸𑀭𑀲𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧. 𑀧𑀘𑁆𑀘𑀬𑀘𑀢𑀼𑀓𑁆𑀓𑀁

𑀢𑀢𑁆𑀣 𑀬𑀤𑁂𑀢𑀁 𑀲𑀩𑁆𑀩𑀧𑀞𑀫𑁂 𑀅𑀯𑀺𑀚𑁆𑀚𑀸𑀫𑀽𑀮𑀓𑁂 𑀦𑀬𑁂 𑀧𑀘𑁆𑀘𑀬𑀘𑀢𑀼𑀓𑁆𑀓𑀁, 𑀢𑀲𑁆𑀫𑀺𑀁 𑀧𑀞𑀫𑁄 𑀦𑀸𑀫𑀭𑀽𑀧𑀝𑁆𑀞𑀸𑀦𑁂 𑀦𑀸𑀫𑀲𑁆𑀲, 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀙𑀝𑁆𑀞𑀸𑀬𑀢𑀦𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑀤𑁆𑀯𑀬𑀬𑀼𑀢𑁆𑀢𑁄 𑀤𑁆𑀯𑀸𑀤𑀲𑀗𑁆𑀕𑀺𑀓𑀯𑀸𑀭𑁄 𑀦𑀸𑀫. 𑀤𑀼𑀢𑀺𑀬𑁄 𑀦𑀸𑀫𑀭𑀽𑀧𑀝𑁆𑀞𑀸𑀦𑁂 𑀦𑀸𑀫𑀲𑁆𑀲𑁂𑀯, 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀘 𑀦 𑀓𑀲𑁆𑀲𑀘𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀏𑀓𑀗𑁆𑀕𑀬𑀼𑀢𑁆𑀢𑁄 𑀏𑀓𑀸𑀤𑀲𑀗𑁆𑀕𑀺𑀓𑀯𑀸𑀭𑁄 𑀦𑀸𑀫. 𑀢𑀢𑀺𑀬𑁄 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀙𑀝𑁆𑀞𑀸𑀬𑀢𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀏𑀓𑀗𑁆𑀕𑀬𑀼𑀢𑁆𑀢𑁄 𑀤𑁆𑀯𑀸𑀤𑀲𑀗𑁆𑀕𑀺𑀓𑀯𑀸𑀭𑁄 𑀦𑀸𑀫. 𑀘𑀢𑀼𑀢𑁆𑀣𑁄 𑀧𑀦 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀗𑁆𑀕𑀺𑀓𑁄𑀬𑁂𑀯.

𑀢𑀢𑁆𑀣 𑀲𑀺𑀬𑀸 𑁋 𑀅𑀬𑀫𑁆𑀧𑀺 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑁂𑀓𑀗𑁆𑀕𑀬𑀼𑀢𑁆𑀢𑁄𑀬𑁂𑀯𑀸𑀢𑀺? 𑀦, 𑀢𑀲𑁆𑀲 𑀅𑀦𑀗𑁆𑀕𑀢𑁆𑀢𑀸. 𑀨𑀲𑁆𑀲𑁄𑀬𑁂𑀯 𑀳𑁂𑀢𑁆𑀣 𑀅𑀗𑁆𑀕𑀁, 𑀦 𑀙𑀝𑁆𑀞𑀸𑀬𑀢𑀦𑀁. 𑀢𑀲𑁆𑀫𑀸 𑀢𑀲𑁆𑀲 𑀅𑀦𑀗𑁆𑀕𑀢𑁆𑀢𑀸 𑀦𑀸𑀬𑀁 𑀅𑀧𑀭𑀺𑀧𑀼𑀡𑁆𑀡𑁂𑀓𑀗𑁆𑀕𑀬𑀼𑀢𑁆𑀢𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀧𑀞𑀫𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀝𑁆𑀞𑁂𑀦 ¶ , 𑀤𑀼𑀢𑀺𑀬𑁄 𑀧𑀘𑁆𑀘𑀬𑀯𑀺𑀲𑁂𑀲𑀝𑁆𑀞𑁂𑀦, 𑀢𑀢𑀺𑀬𑁄 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸𑀦𑀁 𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀑𑀧𑀧𑀸𑀢𑀺𑀓𑀲𑀢𑁆𑀢𑀸𑀦𑀁 ¶ 𑀯𑀲𑁂𑀦 𑀕𑀳𑀺𑀢𑁄. 𑀢𑀣𑀸 𑀧𑀞𑀫𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀝𑁆𑀞𑁂𑀦, 𑀤𑀼𑀢𑀺𑀬𑁄 𑀧𑀘𑁆𑀘𑀬𑀯𑀺𑀲𑁂𑀲𑀝𑁆𑀞𑁂𑀦, 𑀢𑀢𑀺𑀬𑁄 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀕𑀳𑀺𑀢𑁄. 𑀢𑀣𑀸 𑀧𑀞𑀫𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀝𑁆𑀞𑁂𑀦, 𑀤𑀼𑀢𑀺𑀬𑁄 ¶ 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑀯𑀲𑁂𑀦 (𑀤𑀻. 𑀦𑀺. 𑁨.𑁯𑁫 𑀆𑀤𑀬𑁄), 𑀢𑀢𑀺𑀬𑁄 𑀭𑀽𑀧𑀪𑀯𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀓𑀸𑀫𑀪𑀯𑀯𑀲𑁂𑀦 𑀕𑀳𑀺𑀢𑁄’’𑀢𑀺.

𑀢𑀢𑁆𑀣 𑀧𑀞𑀫𑁄 𑀇𑀫𑁂𑀲𑀼 𑀤𑀼𑀢𑀺𑀬𑀸𑀤𑀻𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀦 𑀓𑀢𑁆𑀣𑀘𑀺 𑀦 𑀧𑀯𑀺𑀲𑀢𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁄𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀸𑀦𑀁 𑀯𑀺𑀲𑁂𑀲𑁄 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀁 𑁋

𑀬𑀁 𑀬𑀢𑁆𑀣 𑀅𑀜𑁆𑀜𑀣𑀸 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀬𑀁 𑀬𑀣𑀸 𑀧𑀘𑁆𑀘𑀬𑁄 𑀬𑀲𑁆𑀲, 𑀢𑀁 𑀲𑀩𑁆𑀩𑀫𑀼𑀧𑀮𑀓𑁆𑀔𑀬𑁂.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀅𑀯𑀺𑀲𑁂𑀲𑁂𑀦 𑀢𑀸𑀯 𑀘𑀢𑀽𑀲𑀼𑀧𑀺 𑀏𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁂 𑀯𑀺𑀬 𑀲𑀗𑁆𑀔𑀸𑀭𑀸𑀢𑀺 𑀅𑀯𑀢𑁆𑀯𑀸 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀲𑁆𑀫𑀸𑀢𑀺? 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸. 𑀢𑀢𑁆𑀭 𑀳𑀺 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄 𑀯𑀺𑀪𑀢𑁆𑀢𑁄. 𑀇𑀥 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀆𑀭𑀤𑁆𑀥𑁄. 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀘 𑀩𑀳𑀽 𑀘𑁂𑀢𑀦𑀸 𑀦 𑀲𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀢𑀺 𑀅𑀯𑀢𑁆𑀯𑀸 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑀁.

𑀧𑀞𑀫𑀯𑀸𑀭𑁂 𑀧𑀦𑁂𑀢𑁆𑀣 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀲𑀗𑁆𑀕𑀳𑀡𑀢𑁄 𑀲𑀩𑁆𑀩𑀝𑁆𑀞𑀸𑀦𑀲𑀸𑀥𑀸𑀭𑀡𑀢𑁄 𑀘 𑀭𑀽𑀧𑀁 𑀙𑀟𑁆𑀟𑁂𑀢𑁆𑀯𑀸 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀝𑁆𑀞𑀸𑀦𑀲𑀸𑀥𑀸𑀭𑀡𑀜𑁆𑀘, 𑀦 𑀓𑀢𑁆𑀣𑀘𑀺 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀦 𑀧𑀯𑀢𑁆𑀢𑀢𑀺. 𑀬𑀲𑁆𑀫𑀸 𑀘 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄𑀯𑁂𑀢𑁆𑀣 𑀨𑀲𑁆𑀲𑁄, 𑀢𑀲𑁆𑀫𑀸 𑀢𑀲𑁆𑀲𑀸𑀦𑀼𑀭𑀽𑀧𑀁 𑀧𑀘𑁆𑀘𑀬𑀪𑀽𑀢𑀁 𑀆𑀬𑀢𑀦𑀁 𑀕𑀡𑁆𑀳𑀦𑁆𑀢𑁄 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 ‘‘𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 𑀏𑀓𑀁 𑀫𑀦𑀸𑀬𑀢𑀦𑀁𑀬𑁂𑀯 𑀆𑀳. 𑀢𑀜𑁆𑀳𑀺 𑀏𑀓𑀲𑁆𑀲 𑀅𑀓𑀼𑀲𑀮𑀨𑀲𑁆𑀲𑀲𑁆𑀲 𑀅𑀦𑀼𑀭𑀽𑀧𑀁 𑀧𑀘𑁆𑀘𑀬𑀪𑀽𑀢𑀁. 𑀓𑀸𑀫𑀜𑁆𑀘𑁂𑀢𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀁, 𑀳𑁂𑀢𑀼𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀧𑀦 𑀅𑀗𑁆𑀕𑀧𑀼𑀡𑁆𑀡𑀢𑁆𑀣𑀜𑁆𑀘 𑀧𑀼𑀦 𑀇𑀥 𑀕𑀳𑀺𑀢𑀁. 𑀢𑀢𑁆𑀭 𑀳𑀺 𑀏𑀢𑀲𑁆𑀲 𑀯𑀺𑀲𑁂𑀲𑁂𑀦 𑀲𑀗𑁆𑀔𑀸𑀭𑁄 𑀳𑁂𑀢𑀼, 𑀅𑀯𑀺𑀲𑁂𑀲𑁂𑀦 𑀦𑀸𑀫𑀁 𑀨𑀮𑀁. 𑀇𑀥 𑀧𑀦𑀲𑁆𑀲 𑀅𑀯𑀺𑀲𑁂𑀲𑁂𑀦 𑀦𑀸𑀫𑀁 𑀳𑁂𑀢𑀼, 𑀯𑀺𑀲𑁂𑀲𑁂𑀦 𑀨𑀲𑁆𑀲𑁄 𑀨𑀮𑀦𑁆𑀢𑀺. 𑀲𑁄𑀓𑀸𑀤𑀬𑁄 𑀧𑀦 𑀬𑀲𑁆𑀫𑀸 𑀲𑀩𑁆𑀩𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀦 𑀲𑀫𑁆𑀪𑀯𑀦𑁆𑀢𑀺, 𑀲𑀩𑁆𑀩𑀲𑁆𑀫𑀺𑀜𑁆𑀘 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀘𑁂𑀯 𑀘𑀺𑀢𑁆𑀢𑁂 𑀘 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀸. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 ¶ 𑀧𑀦 𑀅𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀸𑀦𑀺𑀧𑀺 𑀲𑀫𑀸𑀦𑀸𑀦𑀺 𑀘𑀺𑀢𑁆𑀢𑀓𑁆𑀔𑀡𑁂 𑀅𑀦𑁆𑀢𑁄𑀕𑀥𑀢𑁆𑀢𑀸 𑀅𑀗𑁆𑀕𑀧𑀭𑀺𑀧𑀽𑀭𑀡𑀢𑁆𑀣𑀁 ¶ 𑀕𑀳𑀺𑀢𑀸𑀦𑀺. 𑀏𑀯𑀁 𑀢𑀸𑀯𑁂𑀢𑁆𑀣 ‘𑀬𑀁 𑀅𑀜𑁆𑀜𑀣𑀸 𑀯𑀼𑀢𑁆𑀢𑀁. 𑀬𑀜𑁆𑀘 𑀅𑀯𑀼𑀢𑁆𑀢𑀁’ 𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀁 ¶ 𑀧𑀦𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀯𑀸𑀭𑁂𑀲𑀼 𑀯𑀼𑀢𑁆𑀢𑀁, 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀦 𑀯𑀸𑀭𑁂 𑀬𑁄 𑀬𑁄 𑀯𑀺𑀲𑁂𑀲𑁄 𑀆𑀕𑀢𑁄, 𑀢𑀁 𑀢𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫.

‘𑀬𑀁 𑀬𑀣𑀸 𑀧𑀘𑁆𑀘𑀬𑁄 𑀬𑀲𑁆𑀲𑀸’𑀢𑀺 𑀏𑀢𑁆𑀣 𑀧𑀦 𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀸𑀥𑀸𑀭𑀡𑁂𑀳𑀺 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀙𑀳𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀘𑀸𑀢𑀺 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄. 𑀢𑀢𑁆𑀣 𑀬𑀲𑁆𑀫𑀸 𑀧𑀭𑀢𑁄 𑀳𑁂𑀢𑀼𑀘𑀢𑀼𑀓𑁆𑀓𑀸𑀤𑀻𑀦𑀺 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺 𑀅𑀯𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀇𑀥 𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀲𑁆𑀲 𑀘𑀢𑀼𑀥𑀸 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀔𑀸𑀭𑁄 𑀯𑀺𑀜𑁆𑀜𑀸𑀡𑀲𑁆𑀲 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺, 𑀓𑀫𑁆𑀫𑀸𑀳𑀸𑀭𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄. 𑀇𑀥 𑀧𑀦 𑀢𑁂𑀬𑁂𑀯 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀧𑀜𑁆𑀘𑀥𑀸. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀲𑁆𑀲 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺, 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀥𑀺𑀧𑀢𑀻𑀳𑀺 𑀘𑀸𑀢𑀺 𑀦𑀯𑀥𑀸. 𑀇𑀥 𑀧𑀦 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀙𑀥𑀸. 𑀦𑀸𑀫𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑀸𑀤𑀻𑀳𑀻𑀢𑀺 𑀅𑀦𑁂𑀓𑀥𑀸. 𑀇𑀥 𑀧𑀦 𑀢𑁂𑀬𑁂𑀯 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀢𑀺𑀥𑀸 𑀘𑀢𑀼𑀥𑀸 𑀧𑀜𑁆𑀘𑀥𑀸 𑀯𑀸. 𑀙𑀝𑁆𑀞𑀸𑀬𑀢𑀦𑀁 𑀨𑀲𑁆𑀲𑀲𑁆𑀲 𑀬𑀣𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫𑀲𑁆𑀲. 𑀏𑀯𑀁 𑀨𑀲𑁆𑀲𑁄 𑀯𑁂𑀤𑀦𑀸𑀬 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺 𑀆𑀳𑀸𑀭𑀧𑀘𑁆𑀘𑀬𑁂𑀦 𑀘𑀸𑀢𑀺 𑀲𑀢𑁆𑀢𑀥𑀸. 𑀇𑀥 𑀧𑀦 𑀢𑁂𑀬𑁂𑀯 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀘𑀢𑀼𑀥𑀸. 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺 𑀛𑀸𑀦𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀅𑀝𑁆𑀞𑀥𑀸. 𑀇𑀥 𑀧𑀦 𑀢𑁂𑀬𑁂𑀯 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀧𑀜𑁆𑀘𑀥𑀸. 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲, 𑀬𑀣𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀲𑁆𑀲. 𑀏𑀯𑀁 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲 𑀲𑀸𑀥𑀸𑀭𑀡𑁂𑀳𑀺 𑀙𑀳𑀺 𑀫𑀕𑁆𑀕𑀧𑀘𑁆𑀘𑀬𑁂𑀦 𑀘𑀸𑀢𑀺 𑀲𑀢𑁆𑀢𑀥𑀸. 𑀇𑀥 𑀧𑀦 𑀢𑁂𑀬𑁂𑀯 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀘𑀢𑀼𑀥𑀸. 𑀪𑀯𑁄 𑀚𑀸𑀢𑀺𑀬𑀸, 𑀬𑀲𑁆𑀫𑀸 𑀚𑀸𑀢𑀻𑀢𑀺 𑀇𑀥 𑀲𑀗𑁆𑀔𑀢𑀮𑀓𑁆𑀔𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄. 𑀢𑀣𑀸 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲𑀸𑀢𑀺.

𑀬𑁂 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀳𑀺 𑀧𑀞𑀫𑀯𑀸𑀭𑁄 𑀆𑀭𑀤𑁆𑀥𑁄’’𑀢𑀺, 𑀢𑁂 𑀪𑀯𑀸𑀤𑀻𑀦𑀁 𑀢𑀣𑀸 𑀅𑀪𑀸𑀯𑀁 𑀲𑁂𑀲𑀧𑀘𑁆𑀘𑀬𑀸𑀦𑀜𑁆𑀘 𑀲𑀫𑁆𑀪𑀯𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀦 𑀳𑀺 𑀪𑀯𑁄 𑀚𑀸𑀢𑀺𑀬𑀸 𑀲𑀳𑀚𑀸𑀢𑀧𑀘𑁆𑀘𑀬𑁄 ¶ 𑀳𑁄𑀢𑀺, 𑀦 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲. 𑀬𑁂 𑀘𑁂𑀢𑁂𑀲𑀁 𑀲𑀗𑁆𑀔𑀭𑀸𑀤𑀻𑀦𑀁 𑀅𑀯𑀲𑁂𑀲𑀸 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀲𑀫𑁆𑀪𑀯𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀙𑀟𑁆𑀟𑁂𑀢𑀼𑀦𑁆𑀢𑀺. 𑀏𑀯𑀁 𑀢𑀸𑀯 𑀧𑀞𑀫𑀯𑀸𑀭𑁂 𑀬𑀁 𑀬𑀢𑁆𑀣 𑀅𑀜𑁆𑀜𑀣𑀸 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁, 𑀬𑀜𑁆𑀘 𑀬𑀣𑀸 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 ¶ 𑀧𑀦 𑀯𑀺𑀲𑁂𑀲𑁄 𑁋 𑀤𑀼𑀢𑀺𑀬𑀯𑀸𑀭𑁂 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀢𑁆𑀯𑀸 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁, 𑀢𑀁 𑀓𑀺𑀫𑀢𑁆𑀣𑀦𑁆𑀢𑀺? 𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀫𑀳𑀸𑀦𑀺𑀤𑀸𑀦𑀤𑁂𑀲𑀦𑀸𑀲𑀗𑁆𑀕𑀳𑀢𑁆𑀣𑀜𑁆𑀘. 𑀨𑀲𑁆𑀲𑀲𑁆𑀲 𑀳𑀺 𑀦 𑀓𑁂𑀯𑀮𑀜𑁆𑀘 𑀙𑀝𑁆𑀞𑀸𑀬𑀢𑀦𑀫𑁂𑀯 𑀧𑀘𑁆𑀘𑀬𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀧𑀦 𑀢𑀬𑁄 𑀔𑀦𑁆𑀥𑀸𑀧𑀺 𑀧𑀘𑁆𑀘𑀬𑀸𑀬𑁂𑀯. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑁂 𑀘𑀲𑁆𑀲 ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀁 𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺? 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁯𑁬). 𑀏𑀯𑀁 𑀲𑀴𑀸𑀬𑀢𑀦𑀁 𑀙𑀟𑁆𑀟𑁂𑀢𑁆𑀯𑀸 𑀏𑀓𑀸𑀤𑀲𑀗𑁆𑀕𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀇𑀫𑀲𑁆𑀲 𑀧𑀘𑁆𑀘𑀬𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀇𑀫𑀺𑀲𑁆𑀲𑀸 𑀘 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀧𑀭𑀺𑀕𑁆𑀕𑀳𑀢𑁆𑀣𑀁 𑀤𑀼𑀢𑀺𑀬𑀯𑀸𑀭𑁂 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀢𑁆𑀯𑀸 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀲 𑀢𑀸𑀯 𑀤𑀼𑀢𑀺𑀬𑀯𑀸𑀭𑁂 𑀯𑀺𑀲𑁂𑀲𑁄.

𑀢𑀢𑀺𑀬𑀯𑀸𑀭𑁂 𑀧𑀦 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀆𑀕𑀢𑀫𑁂𑀯 𑀘𑀢𑀼𑀢𑁆𑀣𑀫𑀗𑁆𑀕𑀁 𑀯𑀼𑀢𑁆𑀢𑀁, 𑀢𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀇𑀥 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀁 𑀦𑀸𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀲𑀓𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑀢𑁄. 𑀲𑀘𑁂𑀧𑀺 𑀳𑀺 𑀢𑀢𑁆𑀣 𑀭𑀽𑀧𑀁 𑀘𑀺𑀢𑁆𑀢𑀓𑁆𑀔𑀡𑀢𑁄 𑀉𑀤𑁆𑀥𑀁 𑀢𑀺𑀝𑁆𑀞𑀢𑀺, 𑀢𑀣𑀸𑀧𑀺𑀲𑁆𑀲 𑀢𑀁 𑀯𑀺𑀜𑁆𑀜𑀸𑀡𑀁 𑀲𑀓𑀓𑁆𑀔𑀡𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀣𑀁? 𑀧𑀼𑀭𑁂𑀚𑀸𑀢𑀲𑁆𑀲 𑀢𑀸𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀜𑁆𑀜𑀲𑁆𑀲 𑀯𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧). 𑀲𑀳𑀚𑀸𑀢𑀲𑁆𑀲 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀣𑀸𑀳 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁮).

𑀬𑀤𑀺 ¶ 𑀏𑀯𑀁, 𑀧𑀼𑀭𑀺𑀫𑀯𑀸𑀭𑁂𑀲𑀼 𑀓𑀲𑁆𑀫𑀸 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 ¶ ? 𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑁂𑀲𑀁 𑀲𑀦𑁆𑀥𑀸𑀬 𑀤𑁂𑀲𑀺𑀢𑀢𑁆𑀢𑀸. 𑀅𑀬𑀜𑁆𑀳𑀺 𑀧𑀘𑁆𑀘𑀬𑀸𑀓𑀸𑀭𑁄 𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑁂𑀲𑁂 𑀓𑀸𑀫𑀪𑀯𑁂 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀘𑁂𑀯 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀑𑀧𑀧𑀸𑀢𑀺𑀓𑀸𑀦𑀜𑁆𑀘 𑀭𑀽𑀧𑀸𑀯𑀘𑀭𑀤𑁂𑀯𑀸𑀦𑀜𑁆𑀘 𑀯𑀲𑁂𑀦 𑀤𑁂𑀲𑀺𑀢𑁄. 𑀢𑁂𑀦𑁂𑀯𑁂𑀢𑁆𑀣 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀭𑀽𑀧𑀁 𑀧𑀦 𑀳𑀤𑀬𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀲𑁆𑀲 𑀙𑀝𑁆𑀞𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀲 𑀢𑀢𑀺𑀬𑀯𑀸𑀭𑁂 𑀯𑀺𑀲𑁂𑀲𑁄.

𑀘𑀢𑀼𑀢𑁆𑀣𑀯𑀸𑀭𑁄 𑀧𑀦 𑀬𑁄𑀦𑀺𑀯𑀲𑁂𑀦 𑀑𑀧𑀧𑀸𑀢𑀺𑀓𑀸𑀦𑀁, 𑀆𑀬𑀢𑀦𑀯𑀲𑁂𑀦 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁, 𑀪𑀯𑀯𑀲𑁂𑀦 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄. 𑀢𑁂𑀦𑁂𑀯𑁂𑀢𑁆𑀣 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 ¶ 𑀲𑀳𑀚𑀸𑀢𑀸𑀤𑀻𑀳𑀺, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦. 𑀭𑀽𑀧𑁂 𑀳𑀤𑀬𑀭𑀽𑀧𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀳𑀺, 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑁂𑀳𑀺. 𑀬𑀲𑁆𑀫𑀸 𑀧𑀦𑁂𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀫𑀸 𑀏𑀢𑁆𑀣 𑀲𑀴𑀸𑀬𑀢𑀦𑀧𑀘𑁆𑀘𑀬𑀸𑀢𑀺 𑀅𑀯𑀢𑁆𑀯𑀸 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀅𑀬𑀁 𑀘𑀢𑀼𑀢𑁆𑀣𑀯𑀸𑀭𑁂 𑀯𑀺𑀲𑁂𑀲𑁄.

𑀏𑀯𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁 𑀜𑀢𑁆𑀯𑀸 𑀧𑀼𑀦 𑀲𑀩𑁆𑀩𑁂𑀲𑁆𑀯𑁂𑀯 𑀢𑁂𑀲𑀼 𑀯𑀺𑀲𑁂𑀲𑁂𑀦 𑀧𑀞𑀫𑀓𑀸 𑀤𑁆𑀯𑁂 𑀯𑀸𑀭𑀸 𑀅𑀭𑀽𑀧𑀪𑀯𑁂 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀽𑀧𑀪𑀯𑀲𑁆𑀫𑀺𑀜𑁆𑀳𑀺 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀸𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀢𑀺𑀬𑁄 𑀭𑀽𑀧𑀪𑀯𑁂 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀭𑀽𑀧𑀪𑀯𑀲𑁆𑀫𑀺𑀜𑁆𑀳𑀺 𑀲𑀢𑀺𑀧𑀺 𑀭𑀽𑀧𑀲𑀫𑁆𑀫𑀺𑀲𑁆𑀲𑀢𑁆𑀢𑁂 𑀲𑀴𑀸𑀬𑀢𑀦𑀁 𑀦 𑀧𑀯𑀢𑁆𑀢𑀢𑀺. 𑀘𑀢𑀼𑀢𑁆𑀣𑁄 𑀓𑀸𑀫𑀪𑀯𑁂 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀓𑀸𑀫𑀪𑀯𑀲𑁆𑀫𑀺𑀜𑁆𑀳𑀺 𑀲𑀓𑀮𑀁 𑀲𑀴𑀸𑀬𑀢𑀦𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑁄 𑀯𑀸 𑀭𑀽𑀧𑀪𑀯𑁂 𑀘𑁂𑀯 𑀓𑀸𑀫𑀪𑀯𑁂 𑀘 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀘𑀢𑀼𑀢𑁆𑀣𑁄 𑀯𑀸 𑀓𑀸𑀫𑀪𑀯𑁂 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁. 𑀧𑀞𑀫𑁄 𑀯𑀸 𑀲𑀩𑁆𑀩𑀢𑁆𑀣𑀕𑀸𑀫𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀲𑁄 𑀳𑀺 𑀦 𑀓𑀢𑁆𑀣𑀘𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀤𑁂𑀲𑁂 𑀦 𑀧𑀯𑀢𑁆𑀢𑀢𑀺. 𑀤𑀼𑀢𑀺𑀬𑁄 𑀧𑀘𑁆𑀘𑀬𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀏𑀓𑀸𑀤𑀲𑀗𑁆𑀕𑀺𑀓𑀢𑁆𑀢𑀜𑁆𑀳𑁂𑀢𑁆𑀣 𑀨𑀲𑁆𑀲𑀲𑁆𑀲 𑀘 𑀦𑀸𑀫𑀧𑀘𑁆𑀘𑀬𑀢𑁆𑀢𑀁 𑀧𑀘𑁆𑀘𑀬𑀯𑀺𑀲𑁂𑀲𑁄. 𑀢𑀢𑀺𑀬𑁄 𑀧𑀼𑀭𑀺𑀫𑀬𑁄𑀦𑀺𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀧𑀼𑀭𑀺𑀫𑀸𑀲𑀼 𑀳𑀺 𑀤𑁆𑀯𑀻𑀲𑀼 𑀬𑁄𑀦𑀻𑀲𑀼 ¶ 𑀲𑁄 𑀲𑀫𑁆𑀪𑀯𑀢𑀺, 𑀢𑀢𑁆𑀣 𑀲𑀤𑀸 𑀲𑀴𑀸𑀬𑀢𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀘𑀢𑀼𑀢𑁆𑀣𑁄 𑀧𑀘𑁆𑀙𑀺𑀫𑀬𑁄𑀦𑀺𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀧𑀘𑁆𑀙𑀺𑀫𑀸𑀲𑀼 𑀳𑀺 𑀲𑁄 𑀤𑁆𑀯𑀻𑀲𑀼 𑀬𑁄𑀦𑀻𑀲𑀼 𑀲𑀫𑁆𑀪𑀯𑀢𑀺, 𑀢𑀢𑁆𑀣 𑀲𑀤𑀸 𑀲𑀴𑀸𑀬𑀢𑀦𑀲𑁆𑀲 𑀲𑀫𑁆𑀪𑀯𑀢𑁄𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑀬𑀁 𑀯𑀼𑀢𑁆𑀢𑀁 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑁋

𑀬𑀁 𑀬𑀢𑁆𑀣 𑀅𑀜𑁆𑀜𑀣𑀸 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀬𑀁 𑀬𑀣𑀸 𑀧𑀘𑁆𑀘𑀬𑁄 𑀬𑀲𑁆𑀲, 𑀢𑀁 𑀲𑀩𑁆𑀩𑀫𑀼𑀧𑀮𑀓𑁆𑀔𑀬𑁂𑀢𑀺.

𑀕𑀸𑀣𑀸𑀬 𑀅𑀢𑁆𑀣𑀤𑀻𑀧𑀦𑀸 𑀓𑀢𑀸 𑀳𑁄𑀢𑀺.

𑀏𑀢𑁂𑀦𑁂𑀯𑀸𑀦𑀼𑀲𑀸𑀭𑁂𑀦, 𑀲𑀩𑁆𑀩𑀫𑁂𑀢𑀁 𑀦𑀬𑀁 𑀇𑀢𑁄;

𑀯𑀺𑀲𑁂𑀲𑁄 𑀬𑁄 𑀘 𑀢𑀁 𑀚𑀜𑁆𑀜𑀸, 𑀘𑀢𑀼𑀓𑁆𑀓𑁂𑀲𑀼 𑀧𑀭𑁂𑀲𑀼𑀧𑀺.

𑁨. 𑀳𑁂𑀢𑀼𑀘𑀢𑀼𑀓𑁆𑀓𑀁

𑁨𑁪𑁪. 𑀢𑀢𑁆𑀣 ¶ 𑀬𑁄 𑀢𑀸𑀯 𑀇𑀥 𑀯𑀼𑀢𑁆𑀢𑁄 𑀦𑀬𑁄, 𑀲𑁄 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄𑀬𑁂𑀯. 𑀯𑀺𑀲𑁂𑀲𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀳𑁂𑀢𑀼𑀘𑀢𑀼𑀓𑁆𑀓𑁂 𑀢𑀸𑀯 𑀅𑀯𑀺𑀚𑁆𑀚𑀸 𑀳𑁂𑀢𑀼 𑀅𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑁄. 𑀅𑀯𑀺𑀚𑁆𑀚𑀸 𑀅𑀲𑁆𑀲 𑀲𑀳𑀯𑀢𑁆𑀢𑀦𑀢𑁄 𑀬𑀸𑀯𑀪𑀗𑁆𑀕𑀸 𑀧𑀯𑀢𑁆𑀢𑀺𑀓𑀸 𑀕𑀫𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺 𑀘 𑀏𑀢𑁆𑀢𑀸𑀯𑀢𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀸𑀥𑀸𑀭𑀡𑀢𑁄 𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑁄’’𑀢𑀺 𑀏𑀢𑁂𑀦𑁂𑀯 𑀯𑀺𑀲𑁂𑀲𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀳𑁂𑀢𑀼𑀓𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀲𑁆𑀫𑀸 𑀧𑀦 𑀪𑀯𑀸𑀤𑀻𑀲𑀼 𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺? 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑀢𑁄 𑀅𑀪𑀸𑀯𑀢𑁄 𑀘 𑀅𑀯𑀺𑀕𑀢𑀧𑀘𑁆𑀘𑀬𑀲𑁆𑀲. ‘‘𑀢𑀢𑁆𑀣 𑀓𑀢𑀫𑁄 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄? 𑀞𑀧𑁂𑀢𑁆𑀯𑀸 𑀉𑀧𑀸𑀤𑀸𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀯𑀘𑀦𑀢𑁄 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀇𑀥 𑀪𑀯𑁄𑀢𑀺 𑀦𑀸𑀫𑀁. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀘 ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀥𑀸𑀢𑀼. 𑁭𑁧) 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀅𑀦𑁆𑀢𑁄𑀕𑀥𑀸𑀦𑀺.

𑀢𑀢𑁆𑀣 𑀬𑀸𑀯 𑀉𑀧𑀸𑀤𑀸𑀦𑀁 𑀢𑀸𑀯 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀅𑀦𑀼𑀧𑀮𑀩𑁆𑀪𑀦𑀢𑁄 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲 𑀦 𑀦𑀺𑀬𑀫𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑁄 𑀳𑁄𑀢𑀺. ‘‘𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀚𑀸𑀢𑀻’’𑀢𑀺 𑀆𑀤𑀺𑀯𑀘𑀦𑀢𑁄 𑀲𑀗𑁆𑀔𑀢𑀮𑀓𑁆𑀔𑀡𑁂𑀲𑀼 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀲𑁆𑀲 𑀪𑀯𑀲𑁆𑀲 𑀚𑀸𑀢𑀺𑀓𑁆𑀔𑀡𑀫𑀢𑁆𑀢𑁂𑀬𑁂𑀯 𑀅𑀪𑀸𑀯𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑁄 𑀦 𑀲𑀫𑁆𑀪𑀯𑀢𑀺. 𑀢𑀣𑀸 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀓𑁆𑀔𑀡𑁂 𑀅𑀪𑀸𑀯𑀢𑁄 ¶ . 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀧𑀦 𑀪𑀯𑁄 𑀚𑀸𑀢𑀺𑀬𑀸. 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄𑀢𑀺 𑀲𑀩𑁆𑀩𑀣𑀸𑀧𑀺 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑀢𑁄 𑀅𑀪𑀸𑀯𑀢𑁄 𑀘 𑀅𑀯𑀺𑀕𑀢𑀧𑀘𑁆𑀘𑀬𑀲𑁆𑀲 𑀪𑀯𑀸𑀤𑀻𑀲𑀼 𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀘𑀺 ¶ 𑀧𑀦𑀸𑀳𑀼 𑁋 ‘‘𑀪𑀯𑁄 𑀤𑀼𑀯𑀺𑀥𑁂𑀦𑀸’’𑀢𑀺 𑀯𑀘𑀦𑀢𑁄 𑀉𑀧𑀧𑀢𑁆𑀢𑀺𑀫𑀺𑀲𑁆𑀲𑀓𑁄 𑀪𑀯𑁄, 𑀦 𑀘 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀉𑀧𑀸𑀤𑀸𑀦𑀁 𑀅𑀯𑀺𑀕𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄 𑀉𑀧𑀸𑀤𑀸𑀦𑀳𑁂𑀢𑀼𑀓𑁄’’𑀢𑀺 𑀅𑀯𑀢𑁆𑀯𑀸 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀯𑀼𑀢𑁆𑀢𑁄. 𑀇𑀥 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀢𑁄𑀧𑀺 𑀦 𑀯𑀼𑀢𑁆𑀢𑀦𑁆𑀢𑀺. 𑀢𑀁 𑀇𑀥 𑀉𑀧𑀧𑀢𑁆𑀢𑀺𑀫𑀺𑀲𑁆𑀲𑀓𑀲𑁆𑀲 𑀪𑀯𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀬𑀼𑀢𑁆𑀢𑀁. 𑀅𑀭𑀽𑀧𑀓𑁆𑀔𑀦𑁆𑀥𑀸 𑀳𑀺 𑀇𑀥 𑀪𑀯𑁄𑀢𑀺 𑀆𑀕𑀢𑀸.

𑀪𑀯𑀧𑀘𑁆𑀘𑀬𑀸 ¶ 𑀚𑀸𑀢𑀻𑀢𑀺 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀅𑀯𑀲𑁂𑀲𑁄 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀚𑀸𑀢𑀺𑀆𑀤𑀻𑀦𑀁 𑀚𑀸𑀢𑀺𑀬𑀸 𑀅𑀧𑁆𑀧𑀘𑁆𑀘𑀬𑀢𑁆𑀢𑀸. 𑀬𑀤𑀺 𑀏𑀯𑀁, 𑀞𑀧𑁂𑀢𑁆𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀯𑀢𑁆𑀢𑀩𑁆𑀩𑁄𑀢𑀺? 𑀆𑀫 𑀯𑀢𑁆𑀢𑀩𑁆𑀩𑁄, 𑀯𑀢𑁆𑀢𑀩𑁆𑀩𑀧𑀤𑁂𑀲𑀸𑀪𑀸𑀯𑀢𑁄 𑀧𑀦 𑀦 𑀯𑀼𑀢𑁆𑀢𑁄. 𑀤𑀲𑀫𑀗𑁆𑀕𑀦𑀺𑀤𑁆𑀤𑁂𑀲𑁂 𑀳𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀲𑀫𑁆𑀪𑀽𑀢𑁄 𑀪𑀯𑁄 𑀯𑀢𑁆𑀢𑀩𑁆𑀩𑁄. 𑀏𑀓𑀸𑀤𑀲𑀫𑀗𑁆𑀕𑀦𑀺𑀤𑁆𑀤𑁂𑀲𑁂 𑀚𑀸𑀢𑀺 𑀯𑀢𑁆𑀢𑀩𑁆𑀩𑀸. 𑀬𑁄 𑀧𑀦 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀢𑀲𑁆𑀲 𑀯𑀢𑁆𑀢𑀩𑁆𑀩𑀧𑀤𑁂𑀲𑁄 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀧𑀤𑁂𑀲𑀸𑀪𑀸𑀯𑀢𑁄 𑀦 𑀯𑀼𑀢𑁆𑀢𑁄. 𑀅𑀯𑀼𑀢𑁆𑀢𑁄𑀧𑀺 𑀧𑀦 𑀬𑀼𑀢𑁆𑀢𑀺𑀢𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀘 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑀲𑀫𑁆𑀪𑀯𑀢𑁄 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀸𑀤𑀺𑀯𑀘𑀦𑀁 𑀓𑀢𑀦𑁆𑀢𑀺 𑀏𑀲 𑀳𑁂𑀢𑀼𑀘𑀢𑀼𑀓𑁆𑀓𑁂 𑀯𑀺𑀲𑁂𑀲𑁄.

𑁩. 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀓𑀁

𑁨𑁪𑁫. 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀓𑁂𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀧𑀦 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀭𑀽𑀧𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑀧𑀤𑁂𑀲𑀼 ‘‘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀁 𑀮𑀩𑁆𑀪𑀢𑀺, 𑀢𑀤𑁂𑀯 𑀕𑀳𑀺𑀢𑀦𑁆𑀢𑀺 𑀏𑀲 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀓𑁂 𑀯𑀺𑀲𑁂𑀲𑁄.

𑁪. 𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑀁

𑁨𑁪𑁬. 𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑁂𑀧𑀺 ¶ 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀧𑀦 𑀪𑀯𑁄 𑀦𑀺𑀧𑁆𑀧𑀤𑁂𑀲𑁄, 𑀉𑀧𑀸𑀤𑀸𑀦𑀁 𑀲𑀧𑁆𑀧𑀤𑁂𑀲𑀁, 𑀲𑀧𑁆𑀧𑀤𑁂𑀲𑀥𑀫𑁆𑀫𑁄 𑀘 𑀦𑀺𑀧𑁆𑀧𑀤𑁂𑀲𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀦𑀺𑀧𑁆𑀧𑀤𑁂𑀲𑀥𑀫𑁆𑀫𑁄 𑀲𑀧𑁆𑀧𑀤𑁂𑀲𑀥𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀏𑀢𑁆𑀣 ‘‘𑀪𑀯𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦’’𑀦𑁆𑀢𑀺 𑀦 𑀯𑀼𑀢𑁆𑀢𑀁; 𑀳𑁂𑀝𑁆𑀞𑀸 𑀯𑀸 𑀤𑁂𑀲𑀦𑀸𑀬 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀏𑀯𑀁 𑀦 𑀯𑀼𑀢𑁆𑀢𑀁 ¶ . 𑀬𑀲𑁆𑀫𑀸 𑀘 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁 𑀅𑀢𑁆𑀣𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀦𑀢𑁆𑀣𑀺, 𑀬𑀲𑁆𑀲 𑀲𑀴𑀸𑀬𑀢𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑀬𑀁 𑀮𑀩𑁆𑀪𑀢𑀺 𑀢𑀤𑁂𑀯 𑀕𑀳𑀺𑀢𑀦𑁆𑀢𑀺 𑀏𑀲 𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑁂 𑀯𑀺𑀲𑁂𑀲𑁄.

𑀅𑀯𑀺𑀚𑁆𑀚𑀸𑀫𑀽𑀮𑀓𑀦𑀬𑀫𑀸𑀢𑀺𑀓𑀸.

𑀲𑀗𑁆𑀔𑀸𑀭𑀸𑀤𑀺𑀫𑀽𑀮𑀓𑀦𑀬𑀫𑀸𑀢𑀺𑀓𑀸

𑁨𑁪𑁭. 𑀇𑀤𑀸𑀦𑀺 ¶ 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀢𑀺 𑀲𑀗𑁆𑀔𑀸𑀭𑀫𑀽𑀮𑀓𑀦𑀬𑁄 𑀆𑀭𑀤𑁆𑀥𑁄. 𑀢𑀢𑁆𑀣𑀸𑀧𑀺 𑀬𑀣𑀸 𑀅𑀯𑀺𑀚𑁆𑀚𑀸𑀫𑀽𑀮𑀓𑁂 𑀏𑀯𑀁 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀲𑁄𑀴𑀲 𑀘 𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀘𑀢𑀼𑀓𑁆𑀓𑁂 𑀧𑀦 𑀧𑀞𑀫𑀯𑀸𑀭𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀲𑀁𑀔𑀺𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀯𑀺𑀜𑁆𑀜𑀸𑀡𑀫𑀽𑀮𑀓𑀸𑀤𑀻𑀲𑀼𑀧𑀺. 𑀢𑀢𑁆𑀣 𑀲𑀩𑁆𑀩𑁂𑀲𑁆𑀯𑁂𑀯 𑀢𑁂𑀲𑀼 𑀲𑀗𑁆𑀔𑀸𑀭𑀫𑀽𑀮𑀓𑀸𑀤𑀻𑀲𑀼 𑀅𑀝𑁆𑀞𑀲𑀼 𑀦𑀬𑁂𑀲𑀼 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀧𑀺 𑀧𑀘𑁆𑀘𑀬𑀸𑀓𑀸𑀭𑀘𑀓𑁆𑀓𑀲𑁆𑀲 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸.

𑀓𑀲𑁆𑀫𑀸 𑀧𑀦 𑀪𑀯𑀫𑀽𑀮𑀓𑀸 𑀚𑀸𑀢𑀺𑀚𑀭𑀸𑀫𑀭𑀡𑀫𑀽𑀮𑀓𑀸 𑀯𑀸 𑀦𑀬𑀸 𑀦 𑀯𑀼𑀢𑁆𑀢𑀸? 𑀓𑀺𑀁 𑀪𑀯𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸 𑀦 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀦 𑀯𑀼𑀘𑁆𑀘𑀫𑀸𑀦𑁂𑀲𑀼 𑀦 𑀓𑁄𑀘𑀺 𑀪𑀯𑀧𑀭𑀺𑀬𑀸𑀧𑀦𑁆𑀦𑁄 𑀥𑀫𑁆𑀫𑁄 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄 𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀅𑀧𑀼𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀪𑀯𑀫𑀽𑀮𑀓𑁄 𑀦𑀬𑁄 𑀦 𑀯𑀼𑀢𑁆𑀢𑁄. 𑀪𑀯𑀕𑁆𑀕𑀳𑀡𑁂𑀦 𑀘 𑀅𑀯𑀺𑀚𑁆𑀚𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 ‘‘𑀪𑀯𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺𑀧𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀦 𑀘 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬 ¶ 𑀧𑀘𑁆𑀘𑀬𑁄 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀦𑁆𑀦𑀢𑁆𑀢𑀸𑀯 𑀚𑀸𑀢𑀺𑀚𑀭𑀸𑀫𑀭𑀡𑀫𑀽𑀮𑀓𑀸𑀧𑀺 𑀦𑀬𑀸 𑀦 𑀕𑀳𑀺𑀢𑀸. 𑀅𑀧𑀺𑀘 𑀪𑀯𑁂 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺𑀧𑀺 𑀅𑀦𑁆𑀢𑁄𑀕𑀥𑀸𑀦𑀺. 𑀦 𑀘𑁂𑀢𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀪𑀯𑀫𑀽𑀮𑀓𑀸 𑀚𑀸𑀢𑀺𑀚𑀭𑀸𑀫𑀭𑀡𑀫𑀽𑀮𑀓𑀸 𑀯𑀸 𑀦𑀬𑀸 𑀦 𑀯𑀼𑀢𑁆𑀢𑀸𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸.

𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁪𑁮-𑁨𑁪𑁯. 𑀇𑀤𑀸𑀦𑀺 𑀬𑀣𑀸 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀓𑀼𑀲𑀮𑀢𑁆𑀢𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀫𑀸𑀢𑀺𑀓𑀸𑀬 𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀓𑀼𑀲𑀮𑀁 𑀪𑀸𑀚𑀺𑀢𑀁, 𑀢𑀣𑀸 𑀇𑀥 𑀫𑀸𑀢𑀺𑀓𑀸𑀬 𑀅𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀞𑀫𑀁 𑀓𑀼𑀲𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺 𑀅𑀓𑀼𑀲𑀮𑀥𑀫𑁆𑀫𑀯𑀲𑁂𑀦 𑀫𑀸𑀢𑀺𑀓𑀸𑀬 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀦𑀺𑀓𑁆𑀔𑁂𑀧𑀧𑀝𑀺𑀧𑀸𑀝𑀺𑀬𑀸𑀯 𑀅𑀯𑀺𑀚𑁆𑀚𑀸𑀤𑀻𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 ¶ 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 ¶ 𑀅𑀓𑀼𑀲𑀮𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑀅𑀝𑁆𑀞. 𑁩𑁬𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀢𑀡𑁆𑀳𑀸𑀬 𑀘 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀘 𑀲𑀫𑁆𑀪𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀁 𑀏𑀢𑁆𑀣 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁 𑀮𑀩𑁆𑀪𑀢𑀺, 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀯𑀦𑀺𑀤𑁆𑀤𑁂𑀲𑁂 𑀘 𑀬𑀲𑁆𑀫𑀸 𑀉𑀧𑀸𑀤𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀞𑀧𑁂𑀢𑁆𑀯𑀸 𑀉𑀧𑀸𑀤𑀸𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀯𑀼𑀘𑁆𑀘𑀫𑀸𑀦𑁂 𑀉𑀧𑀸𑀤𑀸𑀦𑀲𑁆𑀲 𑀉𑀧𑀸𑀤𑀸𑀦𑀧𑀘𑁆𑀘𑀬𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀦 𑀘 𑀢𑀤𑁂𑀯 𑀢𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀚𑀸𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀬𑀲𑁆𑀫𑀸 𑀏𑀢𑁂 𑀅𑀭𑀽𑀧𑀥𑀫𑁆𑀫𑀸𑀦𑀁 𑀚𑀸𑀢𑀺𑀆𑀤𑀬𑁄, 𑀢𑀲𑁆𑀫𑀸 ‘‘𑀔𑀡𑁆𑀟𑀺𑀘𑁆𑀘𑀁, 𑀧𑀸𑀮𑀺𑀘𑁆𑀘𑀁, 𑀯𑀮𑀺𑀢𑁆𑀢𑀘𑀢𑀸, 𑀘𑀼𑀢𑀺, 𑀘𑀯𑀦𑀢𑀸’’𑀢𑀺 𑀦 𑀯𑀼𑀢𑁆𑀢𑀁.

𑁨𑁫𑁦. 𑀏𑀯𑀁 𑀧𑀞𑀫𑀯𑀸𑀭𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀯𑀸𑀭𑁂 𑀬𑀲𑁆𑀫𑀺𑀁 𑀲𑀫𑀬𑁂 𑀧𑀞𑀫𑀯𑀸𑀭𑁂𑀦 𑀧𑀘𑁆𑀘𑀬𑀸𑀓𑀸𑀭𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀅𑀧𑀭𑁂𑀦𑀧𑀺 𑀦𑀬𑁂𑀦 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀲𑀫𑀬𑀯𑀯𑀢𑁆𑀣𑀸𑀦𑀯𑀸𑀭𑀁 𑀅𑀯𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄𑀢𑀺𑀆𑀤𑀺𑀦𑀸𑀯 𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀨𑀲𑁆𑀲𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀨𑀲𑁆𑀲𑁄𑀧𑀺 𑀦𑀸𑀫𑀧𑀭𑀺𑀬𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀨𑀲𑁆𑀲𑀲𑁆𑀲 𑀦𑀸𑀫𑀢𑁄 𑀦𑀻𑀳𑀭𑀡𑀢𑁆𑀣𑀁 𑀯𑀼𑀢𑁆𑀢𑀁.

𑁨𑁫𑁨. 𑀢𑀢𑀺𑀬𑀯𑀸𑀭𑁂 ¶ 𑀬𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄, 𑀢𑀲𑁆𑀫𑀺𑀁 𑀧𑀯𑀢𑁆𑀢𑀫𑀸𑀦𑁂 𑀬𑀲𑁆𑀫𑀸 𑀢𑁂𑀦𑀼𑀧𑀢𑁆𑀣𑀤𑁆𑀥𑀸𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀉𑀧𑀘𑀺𑀢𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀘𑀓𑁆𑀔𑀸𑀬𑀢𑀦𑀲𑁆𑀲 𑀉𑀧𑀘𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀓𑀫𑁆𑀫𑀚𑀭𑀽𑀧𑀲𑁆𑀲𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀢𑁆𑀢𑀫𑀸𑀦𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀚𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀤𑁆𑀯𑁂𑀯 𑀲𑀦𑁆𑀢𑀢𑀺𑀬𑁄 𑀕𑀳𑀺𑀢𑀸, 𑀇𑀢𑀭𑀸𑀧𑀺 𑀧𑀦 𑀤𑁆𑀯𑁂 𑀲𑀦𑁆𑀢𑀢𑀺𑀬𑁄 𑀕𑀳𑁂𑀢𑀩𑁆𑀩𑀸. 𑀢𑀸𑀲𑀫𑁆𑀧𑀺 𑀳𑀺 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯.

𑁨𑁫𑁪. 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 𑀬𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀧𑀺 𑀫𑀳𑀸𑀪𑀽𑀢𑀭𑀽𑀧𑀧𑀘𑁆𑀘𑀬𑀸 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺, 𑀳𑀤𑀬𑀭𑀽𑀧𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀦𑀸𑀫𑀧𑀘𑁆𑀘𑀬𑀸 𑀘 𑀧𑀘𑁆𑀙𑀸𑀚𑀸𑀢𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁 𑀲𑀩𑁆𑀩𑀸𑀦𑀺𑀧𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀢𑀫𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁? 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁫𑁬. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 ¶ ¶ 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑁨𑁬𑁪. 𑀢𑀢𑀺𑀬𑀘𑀢𑀼𑀓𑁆𑀓𑁂 𑀬𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄 𑀦 𑀳𑁄𑀢𑀺, 𑀬𑀲𑁆𑀲 𑀘 𑀳𑁄𑀢𑀺, 𑀢𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁭𑁨. 𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫𑀦𑀺𑀤𑁆𑀤𑁂𑀲𑁂 𑀓𑀺𑀜𑁆𑀘𑀸𑀧𑀺 ‘‘𑀞𑀧𑁂𑀢𑁆𑀯𑀸 𑀨𑀲𑁆𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫’’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀦𑀦𑁆𑀢𑀭𑀸𑀢𑀻𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀞𑀧𑁂𑀢𑁆𑀯𑀸 𑀨𑀲𑁆𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀼𑀢𑁆𑀢𑀫𑁆𑀧𑀺 𑀢𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀤𑁂𑀯 𑀳𑀺 𑀦𑀸𑀫𑀁 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀨𑀲𑁆𑀲𑁄𑀧𑀺 𑀢𑀲𑁆𑀲𑁂𑀯 𑀧𑀘𑁆𑀘𑀬𑁄𑀢𑀺.

𑀬𑀣𑀸 𑀘𑀸𑀬𑀁 𑀘𑀢𑀼𑀘𑀢𑀼𑀓𑁆𑀓𑁄 𑀲𑁄𑀴𑀲𑀯𑀸𑀭𑀧𑁆𑀧𑀪𑁂𑀤𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀧𑀞𑀫𑀦𑀬𑁄 𑀏𑀢𑀲𑁆𑀫𑀺𑀁 𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑁂 𑀧𑀓𑀸𑀲𑀺𑀢𑁄, 𑀏𑀯𑀁 𑀲𑀗𑁆𑀔𑀸𑀭𑀫𑀽𑀮𑀓𑀸𑀤𑀬𑁄 𑀅𑀝𑁆𑀞 𑀦𑀬𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺 𑀧𑀦 𑀲𑀁𑀔𑀺𑀢𑁆𑀢𑀸. 𑀏𑀯𑀫𑁂𑀯 𑀢𑀲𑁆𑀫𑀺𑀁 𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑁂𑀬𑁂𑀯 𑀦𑀯 𑀦𑀬𑀸, 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀜𑁆𑀘 𑀯𑀸𑀭𑀲𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁮𑁦. 𑀇𑀤𑀸𑀦𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀲𑁂𑀲𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼𑀧𑀺 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀲𑁆𑀫𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀉𑀧𑀸𑀤𑀸𑀦𑀁 𑀯𑀺𑀬 ¶ 𑀤𑀴𑁆𑀳𑀦𑀺𑀧𑀸𑀢𑀺𑀦𑀸 𑀅𑀥𑀺𑀫𑁄𑀓𑁆𑀔𑁂𑀦 𑀧𑀤𑀁 𑀧𑀽𑀭𑀺𑀢𑀁. 𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀘 𑀬𑀲𑁆𑀫𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀝𑁆𑀞𑀸𑀦𑁂 𑀢𑀡𑁆𑀳𑀸 𑀯𑀺𑀬 𑀩𑀮𑀯𑀓𑀺𑀮𑁂𑀲𑁂𑀦 𑀧𑀝𑀺𑀖𑁂𑀦 𑀧𑀤𑀁 𑀧𑀽𑀭𑀺𑀢𑀁. 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀅𑀥𑀺𑀫𑁄𑀓𑁆𑀔𑁂𑀦𑁂𑀯. 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑀢𑁄 𑀅𑀥𑀺𑀫𑁄𑀓𑁆𑀔𑁄𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀝𑁆𑀞𑀸𑀦𑁂 𑀩𑀮𑀯𑀓𑀺𑀮𑁂𑀲𑀪𑀽𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀤𑀁 𑀧𑀽𑀭𑀺𑀢𑀁. 𑀉𑀧𑀸𑀤𑀸𑀦𑀝𑁆𑀞𑀸𑀦𑀁 𑀧𑀭𑀺𑀳𑀻𑀦𑀫𑁂𑀯. 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀅𑀥𑀺𑀫𑁄𑀓𑁆𑀔𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀝𑁆𑀞𑀸𑀦𑁂 𑀩𑀮𑀯𑀓𑀺𑀮𑁂𑀲𑁂𑀦 𑀉𑀤𑁆𑀥𑀘𑁆𑀘𑁂𑀦 𑀧𑀤𑀁 𑀧𑀽𑀭𑀺𑀢𑀁. 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀅𑀥𑀺𑀫𑁄𑀓𑁆𑀔𑁂𑀦𑁂𑀯. 𑀲𑀩𑁆𑀩𑀢𑁆𑀣𑁂𑀯 𑀘 𑀯𑀺𑀲𑁂𑀲𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀸𑀴𑀺 𑀲𑀁𑀔𑀺𑀢𑁆𑀢𑀸. 𑀬𑁄 ¶ 𑀘𑀸𑀬𑀁 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄, 𑀢𑀢𑁆𑀣 𑀓𑁂𑀯𑀮𑀁 𑀅𑀥𑀺𑀫𑁄𑀓𑁆𑀔𑀦𑀺𑀤𑁆𑀤𑁂𑀲𑁄𑀯 𑀅𑀧𑀼𑀩𑁆𑀩𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀆𑀕𑀢𑀫𑁂𑀯.

𑀅𑀥𑀺𑀫𑁄𑀓𑁆𑀔𑀦𑀺𑀤𑁆𑀤𑁂𑀲𑁂 𑀧𑀦 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀅𑀥𑀺𑀫𑁄𑀓𑁆𑀔𑁄. 𑀅𑀥𑀺𑀫𑀼𑀘𑁆𑀘𑀢𑀺 𑀯𑀸 𑀢𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 ¶ 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀢𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀫𑁄𑀓𑁆𑀔𑁄. 𑀅𑀥𑀺𑀫𑀼𑀘𑁆𑀘𑀦𑀸𑀓𑀸𑀭𑁄 𑀅𑀥𑀺𑀫𑀼𑀘𑁆𑀘𑀦𑀸. 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀢𑀲𑁆𑀫𑀺𑀁 𑀯𑀸 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀢𑁆𑀢𑀢𑁆𑀢𑀸𑀢𑀺 𑀢𑀤𑀥𑀺𑀫𑀼𑀢𑁆𑀢𑀢𑀸. 𑀲𑀩𑁆𑀩𑀘𑀺𑀢𑁆𑀢𑁂𑀲𑀼 𑀘 𑀧𑀞𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀬𑀘𑀢𑀼𑀓𑁆𑀓𑀯𑀸𑀭𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀉𑀧𑀸𑀤𑀸𑀦𑀫𑀽𑀮𑀓𑀲𑁆𑀲 𑀦𑀬𑀲𑁆𑀲 𑀅𑀪𑀸𑀯𑀸 𑀅𑀝𑁆𑀞 𑀦𑀬𑀸, 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺, 𑀅𑀝𑁆𑀞𑀯𑀻𑀲𑀸𑀥𑀺𑀓𑀜𑁆𑀘 𑀯𑀸𑀭𑀲𑀢𑀁 𑀳𑁄𑀢𑀻𑀢𑀺.

𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁯𑁨. 𑀇𑀤𑀸𑀦𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀓𑀼𑀲𑀮𑀘𑀺𑀢𑁆𑀢𑀸𑀤𑀻𑀲𑀼𑀧𑀺 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀬𑀣𑀸 𑀧𑀦 𑀅𑀓𑀼𑀲𑀮𑁂 𑀧𑀞𑀫𑀁 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦 𑀢𑀣𑀸 𑀇𑀥. 𑀓𑀲𑁆𑀫𑀸? 𑀅𑀧𑁆𑀧𑀦𑀸𑀯𑀸𑀭𑁂 𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄. 𑀮𑁄𑀓𑀺𑀬𑀓𑀼𑀲𑀮𑀸𑀤𑀻𑀲𑀼 𑀳𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸’’𑀢𑀺 𑀅𑀧𑁆𑀧𑀦𑀸 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀤𑀻𑀲𑀼 ‘‘𑀏𑀯𑀫𑁂𑀢𑁂𑀲𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀲𑀸𑀥𑀸𑀭𑀡𑀢𑁄 𑀫𑀸𑀢𑀺𑀓𑀁 𑀞𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀢𑁂𑀲𑀁 𑀢𑁂𑀲𑀁 𑀓𑀼𑀲𑀮𑀸𑀤𑀻𑀦𑀁 𑀫𑀸𑀢𑀺𑀓𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀯 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀓𑀼𑀲𑀮𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁 𑀅𑀯𑀺𑀚𑁆𑀚𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸, 𑀅𑀯𑀺𑀚𑁆𑀚𑀸 𑀯𑀺𑀬 𑀅𑀓𑀼𑀲𑀮𑀸𑀦𑀁, 𑀓𑀼𑀲𑀮𑀸𑀦𑀁 𑀫𑀽𑀮𑀢𑁄 𑀓𑀼𑀲𑀮𑀫𑀽𑀮𑀁, 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀜𑁆𑀘 ¶ 𑀅𑀪𑀸𑀯𑀢𑁄 𑀢𑀡𑁆𑀳𑀸𑀝𑁆𑀞𑀸𑀦𑁂 𑀢𑀡𑁆𑀳𑀸 𑀯𑀺𑀬 𑀆𑀭𑀫𑁆𑀫𑀡𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀧𑀲𑀸𑀤𑁄, 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀉𑀧𑀸𑀤𑀸𑀦𑀁 𑀯𑀺𑀬 𑀤𑀴𑁆𑀳𑀦𑀺𑀧𑀸𑀢𑀻 𑀦𑀸𑀫 𑀅𑀥𑀺𑀫𑁄𑀓𑁆𑀔𑁄 𑀯𑀼𑀢𑁆𑀢𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀅𑀩𑁆𑀬𑀸𑀓𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦𑁬. 𑀅𑀩𑁆𑀬𑀸𑀓𑀢𑀁 ¶ 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀆𑀕𑀢𑀧𑀝𑀺𑀧𑀸𑀝𑀺𑀬𑀸𑀯 𑀯𑀺𑀪𑀢𑁆𑀢𑀁. 𑀲𑀩𑁆𑀩𑀯𑀸𑀭𑁂𑀲𑀼 𑀘 𑀅𑀯𑀺𑀚𑁆𑀚𑀸𑀫𑀽𑀮𑀓𑀸 𑀦𑀬𑀸 𑀧𑀭𑀺𑀳𑀻𑀦𑀸. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀸𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀓𑀼𑀲𑀮𑀘𑀺𑀢𑁆𑀢𑁂𑀲𑀼 ¶ 𑀳𑀺 𑀅𑀯𑀺𑀚𑁆𑀚𑀸𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀁 𑀓𑀼𑀲𑀮𑀫𑀽𑀮𑀁 𑀅𑀢𑁆𑀣𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀦𑀢𑁆𑀣𑀺. 𑀲𑀳𑁂𑀢𑀼𑀓𑁂𑀲𑀼 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁆𑀣 𑀦 𑀕𑀳𑀺𑀢𑀁. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀲𑁄𑀢𑀧𑀢𑀺𑀢𑀸𑀯 𑀳𑀼𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀢𑀡𑁆𑀳𑀸𑀝𑁆𑀞𑀸𑀦𑀁 𑀉𑀧𑀸𑀤𑀸𑀦𑀝𑁆𑀞𑀸𑀦𑀜𑁆𑀘 𑀧𑀭𑀺𑀳𑀻𑀦𑀁. 𑀓𑀲𑁆𑀫𑀸? 𑀢𑀡𑁆𑀳𑀸𑀝𑁆𑀞𑀸𑀦𑀸𑀭𑀳𑀲𑁆𑀲 𑀩𑀮𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀸 𑀅𑀥𑀺𑀫𑁄𑀓𑁆𑀔𑀭𑀳𑀺𑀢𑀢𑁆𑀢𑀸 𑀘. 𑀲𑁂𑀲𑀸𑀳𑁂𑀢𑀼𑀓𑁂𑀲𑀼 𑀢𑀡𑁆𑀳𑀸𑀝𑁆𑀞𑀸𑀦𑀫𑁂𑀯 𑀧𑀭𑀺𑀳𑀻𑀦𑀁. 𑀲𑀳𑁂𑀢𑀼𑀓𑁂𑀲𑀼 𑀧𑀲𑀸𑀤𑀲𑀩𑁆𑀪𑀸𑀯𑀢𑁄 𑀢𑀡𑁆𑀳𑀸𑀝𑁆𑀞𑀸𑀦𑁂 𑀧𑀲𑀸𑀤𑁂𑀦 𑀧𑀤𑀁 𑀧𑀽𑀭𑀺𑀢𑀁. 𑀏𑀯𑀫𑁂𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀸𑀫𑀙𑀝𑁆𑀞𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀫𑀽𑀮𑀓𑀸 𑀙 𑀙, 𑀲𑁂𑀲𑀸𑀳𑁂𑀢𑀼𑀓𑁂𑀲𑀼 𑀅𑀥𑀺𑀫𑁄𑀓𑁆𑀔𑀫𑀽𑀮𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀲𑀢𑁆𑀢, 𑀲𑀳𑁂𑀢𑀼𑀓𑁂𑀲𑀼 𑀧𑀲𑀸𑀤𑀫𑀽𑀮𑀓𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞 𑀅𑀝𑁆𑀞 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀘𑀢𑀼𑀦𑁆𑀦𑀫𑁆𑀧𑀺 𑀘𑀢𑀼𑀓𑁆𑀓𑀸𑀦𑀁 𑀆𑀤𑀺𑀯𑀸𑀭𑁄𑀯 𑀯𑀼𑀢𑁆𑀢𑁄. 𑀤𑀼𑀢𑀺𑀬𑀯𑀸𑀭𑁄 𑀧𑀘𑁆𑀘𑀬𑀯𑀺𑀲𑁂𑀲𑀝𑁆𑀞𑁂𑀦 𑀮𑀩𑁆𑀪𑀫𑀸𑀦𑁄𑀧𑀺 𑀦 𑀯𑀼𑀢𑁆𑀢𑁄. 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑀸 𑀅𑀲𑀫𑁆𑀪𑀯𑀢𑁄𑀬𑁂𑀯. 𑀭𑀽𑀧𑀫𑀺𑀲𑁆𑀲𑀓𑀸 𑀳𑀺 𑀢𑁂, 𑀦 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀬𑀣𑀸 𑀘 𑀧𑀞𑀫𑀘𑀢𑀼𑀓𑁆𑀓𑁂 𑀤𑁆𑀯𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀲𑁂𑀲𑀘𑀢𑀼𑀓𑁆𑀓𑁂𑀲𑀼𑀧𑀺. 𑀢𑀲𑁆𑀫𑀸 𑀧𑀞𑀫𑀘𑀢𑀼𑀓𑁆𑀓𑁂 𑀤𑀼𑀢𑀺𑀬𑀯𑀸𑀭𑁄, 𑀲𑁂𑀲𑀘𑀢𑀼𑀓𑁆𑀓𑁂𑀲𑀼 𑀘 𑀤𑁆𑀯𑁂 𑀤𑁆𑀯𑁂 𑀯𑀸𑀭𑀸 𑀅𑀯𑀼𑀢𑁆𑀢𑀸𑀧𑀺 𑀯𑀼𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀸𑀳𑁂𑀢𑀼𑀓𑀸𑀩𑁆𑀬𑀸𑀓𑀢𑁂 𑀲𑀩𑁆𑀩𑀘𑀢𑀼𑀓𑁆𑀓𑁂𑀲𑀼 𑀲𑀩𑁆𑀩𑁂𑀧𑀺 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺. 𑀇𑀥 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀦 𑀧𑀭𑀢𑁄 𑀦 𑀕𑀳𑀺𑀢𑀸. 𑀲𑁄𑀢𑀧𑀢𑀺𑀢𑀸𑀯 𑀳𑀼𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸𑀢𑀺. 𑀲𑁂𑀲𑀲𑀳𑁂𑀢𑀼𑀓𑀯𑀺𑀧𑀸𑀓𑁂𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄 𑀅𑀜𑁆𑀜𑀢𑁆𑀭 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀫𑀺𑀜𑁆𑀳𑀺 𑀯𑀸𑀭𑀤𑁆𑀯𑀬𑀫𑁂𑀯 𑀮𑀩𑁆𑀪𑀢𑀻𑀢𑀺.

𑀅𑀩𑁆𑀬𑀸𑀓𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀅𑀯𑀺𑀚𑁆𑀚𑀸𑀫𑀽𑀮𑀓𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁩𑁪. 𑀇𑀤𑀸𑀦𑀺 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀢𑀫𑁂 𑀥𑀫𑁆𑀫𑀸 ¶ 𑀓𑀼𑀲𑀮𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀦𑀺𑀤𑁆𑀤𑁂𑀲𑀯𑀸𑀭𑁂 ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸’’𑀢𑀺 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺 𑀯𑀺𑀪𑀢𑁆𑀢𑀁. 𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑁄 ¶ 𑀳𑀺 𑀲𑀗𑁆𑀔𑀸𑀭𑁄𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄 𑀳𑁄𑀢𑀺, 𑀦 𑀅𑀯𑀺𑀚𑁆𑀚𑀸.

𑀢𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀲𑁆𑀲 𑀳𑁂𑀝𑁆𑀞𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑁄 𑀅𑀯𑀺𑀚𑁆𑀚𑀸𑀬 𑀧𑀳𑀸𑀦𑀢𑁆𑀣𑀁 𑀮𑁄𑀓𑀼𑀢𑁆𑀢𑀭𑀁 𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸𑀧𑀺 𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀯𑀢𑁄𑀬𑁂𑀯 𑀳𑀺 𑀓𑀼𑀲𑀮𑀸𑀬𑀽𑀳𑀦𑀁 𑀳𑁄𑀢𑀺, 𑀦 𑀇𑀢𑀭𑀲𑁆𑀲. 𑀢𑀢𑁆𑀣 𑀢𑁂𑀪𑀽𑀫𑀓𑀓𑀼𑀲𑀮𑁂 𑀲𑀫𑁆𑀫𑁄𑀳𑀯𑀲𑁂𑀦𑀧𑀺 𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀲𑁂𑀦𑀧𑀺 𑀆𑀬𑀽𑀳𑀦𑀁 𑀮𑀩𑁆𑀪𑀢𑀺; 𑀮𑁄𑀓𑀼𑀢𑁆𑀢𑀭𑁂 𑀲𑀫𑀼𑀘𑁆𑀙𑁂𑀤𑀪𑀸𑀯𑀦𑀸𑀯𑀲𑁂𑀦𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀳𑁂𑀝𑁆𑀞𑀸 𑀏𑀓𑁂𑀓𑀓𑀼𑀲𑀮𑁂 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀦𑀯 𑀲𑁄𑀴𑀲𑀓𑀸 𑀮𑀤𑁆𑀥𑀸, 𑀢𑀣𑀸 𑀇𑀥 𑀦 𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀸𑀬 𑀅𑀯𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀪𑀸𑀯𑀢𑁄. 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀦𑁂𑀢𑁆𑀣 𑀧𑀞𑀫𑀘𑀢𑀼𑀓𑁆𑀓𑀫𑁂𑀯 𑀮𑀩𑁆𑀪𑀢𑀺. 𑀢𑀫𑁆𑀧𑀺 𑀧𑀞𑀫𑀯𑀸𑀭𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀁. 𑀦𑀻𑀳𑀭𑀺𑀢𑁆𑀯𑀸 𑀧𑀦 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺.

𑀅𑀯𑀺𑀚𑁆𑀚𑀸𑀫𑀽𑀮𑀓𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀓𑀼𑀲𑀮𑀫𑀽𑀮𑀓𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁪𑁩. 𑀇𑀤𑀸𑀦𑀺 𑀅𑀩𑁆𑀬𑀸𑀓𑀢𑁂𑀲𑀼𑀧𑀺 𑀅𑀧𑀭𑁂𑀦𑁂𑀯 𑀦𑀬𑁂𑀦 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀢𑀺 𑀇𑀤𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀳𑀺 𑀓𑀼𑀲𑀮𑀫𑀽𑀮𑀁 ¶ , 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘 𑀅𑀓𑀼𑀲𑀮𑀫𑀽𑀮𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺; 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑁂𑀯 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀦𑁂𑀯 𑀦𑀺𑀤𑁆𑀤𑁂𑀲𑀯𑀸𑀭𑁂 ‘‘𑀢𑀢𑁆𑀣 ¶ 𑀓𑀢𑀫𑀁 𑀓𑀼𑀲𑀮𑀫𑀽𑀮’’𑀦𑁆𑀢𑀺 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺 𑀯𑀺𑀪𑀢𑁆𑀢𑀁. 𑀅𑀓𑀼𑀲𑀮𑀯𑀺𑀧𑀸𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀯𑀺𑀚𑁆𑀚𑀸𑀫𑀽𑀮𑀓𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀯𑀺𑀬 𑀘 𑀇𑀫𑀲𑁆𑀫𑀺𑀫𑁆𑀧𑀺 𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑁂 𑀧𑀞𑀫𑀁 𑀧𑀘𑁆𑀘𑀬𑀘𑀢𑀼𑀓𑁆𑀓𑀫𑁂𑀯 𑀮𑀩𑁆𑀪𑀢𑀺. 𑀢𑀫𑁆𑀧𑀺 𑀧𑀞𑀫𑀯𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀁. 𑀢𑀲𑁆𑀫𑀸 𑀏𑀓𑁂𑀓𑀲𑁆𑀫𑀺𑀁 𑀯𑀺𑀧𑀸𑀓𑀘𑀺𑀢𑁆𑀢𑁂 𑀏𑀓𑀫𑁂𑀓𑀲𑁆𑀲𑁂𑀯 𑀘𑀢𑀼𑀓𑁆𑀓𑀲𑁆𑀲 𑀯𑀲𑁂𑀦 𑀓𑀼𑀲𑀮𑀫𑀽𑀮𑀫𑀽𑀮𑀓𑁂 𑀅𑀓𑀼𑀲𑀮𑀫𑀽𑀮𑀫𑀽𑀮𑀓𑁂 𑀘 𑀦𑀬𑁂 𑀯𑀸𑀭𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀭𑀺𑀬𑀸𑀥𑀫𑁆𑀫𑀸𑀦𑀁 𑀧𑀦 𑀬𑀲𑁆𑀫𑀸 𑀦𑁂𑀯 𑀅𑀯𑀺𑀚𑁆𑀚𑀸 𑀦 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀯𑀲𑁂𑀦 𑀧𑀘𑁆𑀘𑀬𑀸𑀓𑀸𑀭𑁄 𑀦 𑀯𑀼𑀢𑁆𑀢𑁄𑀢𑀺.

𑀏𑀯𑀫𑁂𑀲 ¶ 𑁋

𑀅𑀓𑀼𑀲𑀮𑀓𑀼𑀲𑀮𑀸𑀩𑁆𑀬𑀸𑀓𑀢-𑀥𑀫𑁆𑀫𑁂𑀲𑀼 𑀅𑀦𑁂𑀓𑀪𑁂𑀤𑀢𑁄 𑀯𑀢𑁆𑀯𑀸;

𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦, 𑀯𑀺𑀧𑀸𑀓𑁂 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦.

𑀧𑀼𑀦 𑀏𑀓𑀥𑀸𑀯 𑀯𑀼𑀢𑁆𑀢𑁄, 𑀯𑀸𑀤𑀺𑀧𑁆𑀧𑀯𑀭𑁂𑀦 𑀧𑀘𑁆𑀘𑀬𑀸𑀓𑀸𑀭𑁄;

𑀥𑀫𑁆𑀫𑀧𑁆𑀧𑀘𑁆𑀘𑀬𑀪𑁂𑀤𑁂, 𑀜𑀸𑀡𑀲𑁆𑀲 𑀧𑀪𑁂𑀤𑀚𑀦𑀦𑀢𑁆𑀣𑀁.

𑀧𑀭𑀺𑀬𑀢𑁆𑀢𑀺𑀲𑀯𑀦𑀘𑀺𑀦𑁆𑀢𑀦-𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀯𑀺𑀯𑀚𑁆𑀚𑀺𑀢𑀸𑀦𑀜𑁆𑀘;

𑀬𑀲𑁆𑀫𑀸 𑀜𑀸𑀡𑀧𑀪𑁂𑀤𑁄, 𑀦 𑀓𑀤𑀸𑀘𑀺𑀧𑀺 𑀳𑁄𑀢𑀺 𑀏𑀢𑀲𑁆𑀫𑀺𑀁.

𑀧𑀭𑀺𑀬𑀢𑁆𑀢𑀺𑀲𑀯𑀦𑀘𑀺𑀦𑁆𑀢𑀦-𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀢𑁄 𑀲𑀤𑀸 𑀥𑀻𑀭𑁄;

𑀢𑀢𑁆𑀣 𑀓𑀬𑀺𑀭𑀸 𑀦 𑀳𑀜𑁆𑀜𑀁, 𑀓𑀭𑀡𑀻𑀬𑀢𑀭𑀁 𑀢𑀢𑁄 𑀅𑀢𑁆𑀣𑀻𑀢𑀺.

𑀅𑀬𑀁 𑀧𑀦 𑀧𑀘𑁆𑀘𑀬𑀸𑀓𑀸𑀭𑁄 𑀲𑀼𑀢𑁆𑀢𑀦𑁆𑀢𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀤𑁆𑀯𑁂𑀧𑀭𑀺𑀯𑀝𑁆𑀝𑀫𑁂𑀯 𑀦𑀻𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁩𑁫𑁫. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸 𑀦 𑀉𑀤𑁆𑀥𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀻𑀧𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑁋 𑀲𑀢𑀺𑀕𑁄𑀘𑀭𑁄𑀧𑀺, 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀥𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸𑀧𑀺, 𑀲𑀢𑀺𑀧𑀺. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣…𑀧𑁂… 𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄? 𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁦𑁮) 𑀳𑀺 𑀲𑀢𑀺𑀕𑁄𑀘𑀭𑁄 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁩.𑁩𑁫). 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀺 𑀅𑀲𑁆𑀫𑀺𑀦𑁆𑀢𑀺 𑀧𑀝𑁆𑀞𑀸𑀦𑀁. 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀧𑀥𑀸𑀦𑀁 𑀞𑀸𑀦𑀦𑁆𑀢𑀺 𑀯𑀸 𑀧𑀝𑁆𑀞𑀸𑀦𑀁; 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁 𑀳𑀢𑁆𑀣𑀺𑀝𑁆𑀞𑀸𑀦𑀅𑀲𑁆𑀲𑀝𑁆𑀞𑀸𑀦𑀸𑀤𑀻𑀦𑀺 𑀯𑀺𑀬.

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀁 𑀅𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁪, 𑁩𑁧𑁧) 𑀏𑀢𑁆𑀣 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑁆𑀞𑀧𑁂𑀢𑀩𑁆𑀩𑀢𑁄 𑀧𑀝𑁆𑀞𑀸𑀦𑀁, 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀦 𑀧𑀝𑁆𑀞𑀧𑁂𑀢𑀩𑁆𑀩𑀢𑁄𑀢𑀺? 𑀲𑀢𑀺𑀬𑀸; 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁪𑁭) 𑀧𑀦 𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀢𑀺 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄; 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀁; 𑀅𑀣𑀯𑀸 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 ¶ 𑀧𑀝𑁆𑀞𑀸𑀦𑀁. 𑀇𑀢𑀺 𑀲𑀢𑀺 𑀘 𑀲𑀸 𑀧𑀝𑁆𑀞𑀸𑀦𑀜𑁆𑀘𑀸𑀢𑀺𑀧𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀤𑀫𑀺𑀥 ¶ 𑀅𑀥𑀺𑀧𑁆𑀧𑁂𑀢𑀁. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺? 𑀲𑀢𑀺𑀬𑀸 𑀩𑀳𑀼𑀢𑁆𑀢𑀸; 𑀆𑀭𑀫𑁆𑀫𑀡𑀪𑁂𑀤𑁂𑀦 𑀳𑀺 𑀩𑀳𑀼𑀓𑀸 𑀢𑀸 𑀲𑀢𑀺𑀬𑁄𑀢𑀺.

𑀓𑀲𑁆𑀫𑀸 ¶ 𑀧𑀦 𑀪𑀕𑀯𑀢𑀸 𑀘𑀢𑁆𑀢𑀸𑀭𑁄𑀯 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀯𑁂𑀦𑁂𑀬𑁆𑀬𑀳𑀺𑀢𑀢𑁆𑀢𑀸. 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀲𑀫𑀣𑀬𑀸𑀦𑀺𑀓𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁂𑀲𑀼 𑀳𑀺 𑀫𑀦𑁆𑀤𑀢𑀺𑀓𑁆𑀔𑀯𑀲𑁂𑀦 𑀤𑁆𑀯𑀺𑀥𑀸 𑀧𑀯𑀢𑁆𑀢𑁂𑀲𑀼 𑀫𑀦𑁆𑀤𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀑𑀴𑀸𑀭𑀺𑀓𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀲𑀼𑀔𑀼𑀫𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲𑀧𑀺 𑀫𑀦𑁆𑀤𑀲𑁆𑀲 𑀦𑀸𑀢𑀺𑀧𑁆𑀧𑀪𑁂𑀤𑀕𑀢𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀅𑀢𑀺𑀧𑁆𑀧𑀪𑁂𑀤𑀕𑀢𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀘 𑀫𑀦𑁆𑀤𑀲𑁆𑀲 𑀅𑀓𑀺𑀘𑁆𑀙𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄 𑀤𑀼𑀢𑀺𑀬𑀁. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲𑀸𑀧𑀺 𑀫𑀦𑁆𑀤𑀲𑁆𑀲 𑀦𑀸𑀢𑀺𑀧𑁆𑀧𑀪𑁂𑀤𑀕𑀢𑀸𑀭𑀫𑁆𑀫𑀡𑀁 𑀢𑀢𑀺𑀬𑀁, 𑀢𑀺𑀓𑁆𑀔𑀲𑁆𑀲 𑀅𑀢𑀺𑀧𑁆𑀧𑀪𑁂𑀤𑀕𑀢𑀸𑀭𑀫𑁆𑀫𑀡𑀁 𑀘𑀢𑀼𑀢𑁆𑀣𑀁. 𑀇𑀢𑀺 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺.

𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀁 𑀯𑀸. 𑀓𑀸𑀬𑁄 𑀳𑀺 𑀅𑀲𑀼𑀪𑁄. 𑀢𑀢𑁆𑀣 𑀲𑀼𑀪𑀯𑀺𑀧𑀮𑁆𑀮𑀸𑀲𑀯𑀺𑀧𑀮𑁆𑀮𑀢𑁆𑀣𑀸 𑀲𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀅𑀲𑀼𑀪𑀪𑀸𑀯𑀤𑀲𑁆𑀲𑀦𑁂𑀦 𑀢𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀳𑀸𑀦𑀢𑁆𑀣𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀲𑀼𑀔𑀁, 𑀦𑀺𑀘𑁆𑀘𑀁, 𑀅𑀢𑁆𑀢𑀸𑀢𑀺 𑀕𑀳𑀺𑀢𑁂𑀲𑀼𑀧𑀺 𑀘 𑀯𑁂𑀤𑀦𑀸𑀤𑀻𑀲𑀼 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀘𑀺𑀢𑁆𑀢𑀁 𑀅𑀦𑀺𑀘𑁆𑀘𑀁, 𑀥𑀫𑁆𑀫𑀸 𑀅𑀦𑀢𑁆𑀢𑀸. 𑀏𑀢𑁂𑀲𑀼 𑀘 𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀯𑀺𑀧𑀮𑁆𑀮𑀢𑁆𑀣𑀸 𑀲𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀤𑀼𑀓𑁆𑀔𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦 𑀢𑁂𑀲𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀳𑀸𑀦𑀢𑁆𑀣𑀁 𑀲𑁂𑀲𑀸𑀦𑀺 𑀢𑀻𑀡𑀺 𑀯𑀼𑀢𑁆𑀢𑀸𑀦𑀻𑀢𑀺. 𑀏𑀯𑀁 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀁 𑀯𑀸 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀯𑀺𑀧𑀮𑁆𑀮𑀸𑀲𑀧𑀳𑀸𑀦𑀢𑁆𑀣𑀫𑁂𑀯, 𑀅𑀣 𑀔𑁄 𑀘𑀢𑀼𑀭𑁄𑀖𑀬𑁄𑀕𑀸𑀲𑀯𑀕𑀦𑁆𑀣𑀉𑀧𑀸𑀤𑀸𑀦𑀅𑀕𑀢𑀺𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣𑀜𑁆𑀘 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀧𑀓𑀭𑀡𑀦𑀬𑁄.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀭𑀡𑀯𑀲𑁂𑀦 𑀘𑁂𑀯 𑀏𑀓𑀢𑁆𑀢𑀲𑀫𑁄𑀲𑀭𑀡𑀯𑀲𑁂𑀦 𑀘 𑀏𑀓𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀏𑀢𑀤𑁂𑀯 𑀯𑀼𑀢𑁆𑀢𑀁. 𑀬𑀣𑀸 ¶ 𑀳𑀺 𑀘𑀢𑀼𑀤𑁆𑀯𑀸𑀭𑁂 𑀦𑀕𑀭𑁂 𑀧𑀸𑀘𑀻𑀦𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀸𑀘𑀻𑀦𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀤𑀓𑁆𑀔𑀺𑀡𑀢𑁄, 𑀧𑀘𑁆𑀙𑀺𑀫𑀢𑁄, 𑀉𑀢𑁆𑀢𑀭𑀢𑁄 𑀆𑀕𑀘𑁆𑀙𑀦𑁆𑀢𑀸 𑀉𑀢𑁆𑀢𑀭𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀕𑀭𑀁 𑀯𑀺𑀬 𑀳𑀺 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁, 𑀤𑁆𑀯𑀸𑀭𑀁 𑀯𑀺𑀬 𑀅𑀝𑁆𑀞𑀗𑁆𑀕𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀧𑀸𑀘𑀻𑀦𑀤𑀺𑀲𑀸𑀤𑀬𑁄 𑀯𑀺𑀬 𑀓𑀸𑀬𑀸𑀤𑀬𑁄.

𑀬𑀣𑀸 ¶ 𑀧𑀸𑀘𑀻𑀦𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀸𑀘𑀻𑀦𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 ¶ 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀤𑀓𑁆𑀔𑀺𑀡𑀢𑁄 𑀆𑀕𑀘𑁆𑀙𑀦𑁆𑀢𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀧𑀘𑁆𑀙𑀺𑀫𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀘𑁆𑀙𑀺𑀫𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀉𑀢𑁆𑀢𑀭𑀢𑁄 𑀆𑀕𑀘𑁆𑀙𑀦𑁆𑀢𑀸 𑀉𑀢𑁆𑀢𑀭𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀻𑀢𑀺. 𑀏𑀯𑀁 𑀲𑀭𑀡𑀯𑀲𑁂𑀦 𑀘𑁂𑀯 𑀏𑀓𑀢𑁆𑀢𑀲𑀫𑁄𑀲𑀭𑀡𑀯𑀲𑁂𑀦 𑀘 𑀏𑀓𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀥 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑀸 𑀤𑁂𑀯𑀮𑁄𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀬𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄 𑀓𑀣𑀺𑀢𑁄, 𑀏𑀓𑀪𑀺𑀓𑁆𑀔𑀼𑀧𑀺 𑀢𑀢𑁆𑀣 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀓𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀺𑀓𑁆𑀔𑀽 𑀪𑀸𑀯𑁂𑀦𑁆𑀢𑀺, 𑀪𑀺𑀓𑁆𑀔𑀼𑀕𑁄𑀘𑀭𑀸 𑀳𑀺 𑀏𑀢𑁂, 𑀢𑀲𑁆𑀫𑀸 𑀇𑀥 𑀪𑀺𑀓𑁆𑀔𑀽𑀢𑀺 𑀆𑀮𑀧𑀢𑀺. 𑀓𑀺𑀁 𑀧𑀦𑁂𑀢𑁂 𑀲𑀢𑀺𑀧𑀝𑁆𑀞𑀸𑀦𑁂 𑀪𑀺𑀓𑁆𑀔𑀽𑀬𑁂𑀯 𑀪𑀸𑀯𑁂𑀦𑁆𑀢𑀺, 𑀦 𑀪𑀺𑀓𑁆𑀔𑀼𑀦𑀻𑀆𑀤𑀬𑁄𑀢𑀺? 𑀪𑀺𑀓𑁆𑀔𑀼𑀦𑀻𑀆𑀤𑀬𑁄𑀧𑀺 ¶ 𑀪𑀸𑀯𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀦 𑀅𑀕𑁆𑀕𑀧𑀭𑀺𑀲𑀸. 𑀇𑀢𑀺 𑀅𑀕𑁆𑀕𑀧𑀭𑀺𑀲𑀢𑁆𑀢𑀸 𑀇𑀥 𑀪𑀺𑀓𑁆𑀔𑀽𑀢𑀺 𑀆𑀮𑀧𑀢𑀺. 𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄 𑀏𑀯𑀫𑀸𑀳. 𑀬𑁄 𑀳𑀺 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀺. 𑀧𑀝𑀺𑀧𑀦𑁆𑀦𑀓𑁄 𑀳𑀺 𑀤𑁂𑀯𑁄 𑀯𑀸 𑀳𑁄𑀢𑀼 𑀫𑀦𑀼𑀲𑁆𑀲𑁄 𑀯𑀸, 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺𑀬𑁂𑀯. 𑀬𑀣𑀸𑀳 𑁋

‘‘𑀅𑀮𑀗𑁆𑀓𑀢𑁄 𑀘𑁂𑀧𑀺 𑀲𑀫𑀜𑁆𑀘𑀭𑁂𑀬𑁆𑀬,

𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻;

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀽’’𑀢𑀺. (𑀥. 𑀧. 𑁧𑁪𑁨);

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀅𑀚𑁆𑀛𑀢𑁆𑀢𑀦𑁆𑀢𑀺 ¶ ¶ 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀭𑀽𑀧𑀓𑀸𑀬𑁄 𑀳𑀺 𑀇𑀥 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀲𑀫𑀽𑀳𑀝𑁆𑀞𑁂𑀦, 𑀳𑀢𑁆𑀣𑀺𑀓𑀸𑀬𑀅𑀲𑁆𑀲𑀓𑀸𑀬𑀭𑀣𑀓𑀸𑀬𑀸𑀤𑀬𑁄 𑀯𑀺𑀬, 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀘 𑀲𑀫𑀽𑀳𑀝𑁆𑀞𑁂𑀦 𑀏𑀯𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀝𑁆𑀞𑁂𑀦. 𑀓𑀼𑀘𑁆𑀙𑀺𑀢𑀸𑀦𑀜𑁆𑀳𑀺 𑀧𑀭𑀫𑀚𑁂𑀕𑀼𑀘𑁆𑀙𑀸𑀦𑀁 𑀲𑁄 𑀆𑀬𑁄𑀢𑀺𑀧𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄. 𑀓𑁂 𑀆𑀬𑀦𑁆𑀢𑀺? 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄. 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄.

𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑁄, 𑀓𑀸𑀬𑀁 𑀯𑀸 𑀅𑀦𑀼𑀧𑀲𑁆𑀲𑀫𑀸𑀦𑁄 𑀓𑀸𑀬𑁂𑀢𑀺 𑀘 𑀯𑀢𑁆𑀯𑀸𑀧𑀺 𑀧𑀼𑀦 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀤𑀼𑀢𑀺𑀬𑀁 𑀓𑀸𑀬𑀕𑁆𑀕𑀳𑀡𑀁 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀦 𑀓𑀸𑀬𑁂 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸; 𑀅𑀣 𑀔𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀬𑁂𑀯𑀸𑀢𑀺 𑀓𑀸𑀬𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀻. 𑀬𑁄𑀧𑀺 𑀘𑁂𑀢𑁆𑀣 𑀓𑁂𑀲𑀮𑁄𑀫𑀸𑀤𑀺𑀓𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀸𑀬𑁄, 𑀢𑀢𑁆𑀣𑀸𑀧𑀺 𑀦 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻; 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀦𑀕𑀭𑀸𑀯𑀬𑀯𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀓𑀤𑀮𑀺𑀓𑁆𑀔𑀦𑁆𑀥𑀧𑀢𑁆𑀢𑀯𑀝𑁆𑀝𑀺𑀯𑀺𑀦𑀺𑀪𑀼𑀜𑁆𑀚𑀓𑁄 𑀯𑀺𑀬 𑀭𑀺𑀢𑁆𑀢𑀫𑀼𑀝𑁆𑀞𑀺𑀯𑀺𑀦𑀺𑀯𑁂𑀞𑀓𑁄 ¶ 𑀯𑀺𑀬 𑀘 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑀽𑀳𑀯𑀲𑁂𑀦 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀦 𑀳𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀤𑀺𑀲𑁆𑀲𑀢𑀺. 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂𑀬𑁂𑀯 𑀧𑀦 𑀢𑀣𑀸 𑀢𑀣𑀸 𑀲𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀤𑀺𑀝𑁆𑀞𑀁, 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀁 𑀩𑀚𑁆𑀛𑀢𑁂 𑀫𑀽𑀴𑁆𑀳𑁄, 𑀩𑀚𑁆𑀛𑀫𑀸𑀦𑁄 𑀦 𑀫𑀼𑀘𑁆𑀘𑀢𑀻’’𑀢𑀺.

𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀬𑀜𑁆𑀳𑀺 𑀏𑀢𑀲𑁆𑀫𑀺𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀬𑁂𑀯, 𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀅𑀦𑀼𑀤𑀓𑀪𑀽𑀢𑀸𑀬𑀧𑀺 𑀫𑀭𑀻𑀘𑀺𑀬𑀸 𑀉𑀤𑀓𑀸𑀦𑀼𑀧𑀲𑁆𑀲𑀺𑀦𑁄 𑀳𑁄𑀦𑁆𑀢𑀺, 𑀦 𑀏𑀯𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀅𑀲𑀼𑀪𑀪𑀽𑀢𑁂𑀬𑁂𑀯 𑀇𑀫𑀲𑁆𑀫𑀺𑀁 ¶ 𑀓𑀸𑀬𑁂 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀲𑀼𑀪𑀪𑀸𑀯𑀸𑀦𑀼𑀧𑀲𑁆𑀲𑀻; 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀅𑀲𑀼𑀪𑀸𑀓𑀸𑀭𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑁆𑀯𑀸𑀬𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸…𑀧𑁂… 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭) 𑀦𑀬𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀘𑀼𑀡𑁆𑀡𑀓𑀚𑀸𑀢𑀅𑀝𑁆𑀞𑀺𑀓𑀧𑀭𑀺𑀬𑁄𑀲𑀸𑀦𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀬𑁄 𑀘 ‘‘𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀢𑀣𑀸 𑀆𑀧𑁄𑀓𑀸𑀬𑀁, 𑀢𑁂𑀚𑁄𑀓𑀸𑀬𑀁, 𑀯𑀸𑀬𑁄𑀓𑀸𑀬𑀁, 𑀓𑁂𑀲𑀓𑀸𑀬𑀁, 𑀮𑁄𑀫𑀓𑀸𑀬𑀁, 𑀙𑀯𑀺𑀓𑀸𑀬𑀁, 𑀘𑀫𑁆𑀫𑀓𑀸𑀬𑀁, 𑀫𑀁𑀲𑀓𑀸𑀬𑀁, 𑀭𑀼𑀥𑀺𑀭𑀓𑀸𑀬𑀁, 𑀦𑁆𑀳𑀸𑀭𑀼𑀓𑀸𑀬𑀁, 𑀅𑀝𑁆𑀞𑀺𑀓𑀸𑀬𑀁, 𑀅𑀝𑁆𑀞𑀺𑀫𑀺𑀜𑁆𑀚𑀓𑀸𑀬’’𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀣 𑀯𑀸 𑀓𑀸𑀬𑁂 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀏𑀯𑀁 𑀕𑀳𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀅𑀦𑀦𑀼𑀧𑀲𑁆𑀲𑀦𑀢𑁄, 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀦 𑀓𑁂𑀲𑀮𑁄𑀫𑀸𑀤𑀺𑀓𑀲𑁆𑀲 𑀦𑀸𑀦𑀸𑀥𑀫𑁆𑀫𑀲𑀫𑀽𑀳𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑁂𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀲𑀗𑁆𑀔𑀸𑀢𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀺𑀘 ‘‘𑀇𑀫𑀲𑁆𑀫𑀺𑀁 𑀓𑀸𑀬𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁫) 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀕𑀢𑀦𑀬𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀦𑁄 𑀆𑀓𑀸𑀭𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲 ¶ 𑀅𑀦𑀼𑀧𑀲𑁆𑀲𑀦𑀢𑁄𑀧𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀣𑀸 𑀳𑀺 𑀅𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀇𑀫𑀁 𑀓𑀸𑀬𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀲𑀼𑀔𑀢𑁄, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀅𑀢𑁆𑀢𑀢𑁄, 𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺 𑀦𑁄 𑀭𑀚𑁆𑀚𑀢𑀺, 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀺. 𑀲𑁄 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺 ¶ , 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺 (𑀧𑀝𑀺. 𑀫. 𑁩.𑁩𑁫) 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑀭𑀢𑀻𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀫𑁂𑀢𑀁, 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀧𑀭𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀢𑀫𑀸𑀦𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄.

𑀩𑀳𑀺𑀤𑁆𑀥𑀸 ¶ 𑀓𑀸𑀬𑁂𑀢𑀺 𑀧𑀭𑀲𑁆𑀲 𑀓𑀸𑀬𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀬𑁂𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀬𑁂, 𑀓𑀸𑀮𑁂𑀦 𑀧𑀭𑀲𑁆𑀲 𑀓𑀸𑀬𑁂. 𑀧𑀞𑀫𑀦𑀬𑁂𑀦 𑀳𑀺 𑀅𑀢𑁆𑀢𑀦𑁄 𑀓𑀸𑀬𑁂 𑀓𑀸𑀬𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑀦𑀬𑁂𑀦 𑀧𑀭𑀲𑁆𑀲 𑀓𑀸𑀬𑁂, 𑀢𑀢𑀺𑀬𑀦𑀬𑁂𑀦 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀮𑁂𑀦 𑀧𑀭𑀲𑁆𑀲 𑀓𑀸𑀬𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀧𑀦 𑀖𑀝𑀺𑀢𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. 𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀸𑀮𑁄 𑀏𑀢𑁆𑀣 𑀓𑀣𑀺𑀢𑁄. 𑀆𑀢𑀸𑀧𑀻𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑀯𑀻𑀭𑀺𑀬𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀫𑁂𑀢𑀁. 𑀲𑁄 𑀳𑀺 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀁 𑀢𑀁 𑀯𑀻𑀭𑀺𑀬𑀁 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀢𑁄 𑀆𑀢𑀸𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀢𑀸𑀧𑀻𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀧𑀚𑀸𑀦𑁄𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀺𑀫𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀦 𑀳𑀺 𑀲𑀢𑀺𑀯𑀺𑀭𑀳𑀺𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀅𑀢𑁆𑀣𑀺, 𑀢𑁂𑀦𑁂𑀯𑀸𑀳 𑁋 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪), 𑀢𑀲𑁆𑀫𑀸 𑀏𑀢𑁆𑀣 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀓𑀫𑁆𑀫𑀝𑁆𑀞𑀸𑀦𑀁 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀲𑁆𑀫𑀸 𑀅𑀦𑀸𑀢𑀸𑀧𑀺𑀦𑁄 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀉𑀧𑀸𑀬𑀧𑀭𑀺𑀕𑁆𑀕𑀳𑁂 𑀅𑀦𑀼𑀧𑀸𑀬𑀧𑀭𑀺𑀯𑀚𑁆𑀚𑀦𑁂 𑀘 𑀲𑀫𑁆𑀫𑀼𑀬𑁆𑀳𑀢𑀺, 𑀫𑀼𑀝𑁆𑀞𑀲𑁆𑀲𑀢𑀻 𑀉𑀧𑀸𑀬𑀸𑀧𑀭𑀺𑀘𑁆𑀘𑀸𑀕𑁂 𑀅𑀦𑀼𑀧𑀸𑀬𑀸𑀧𑀭𑀺𑀕𑁆𑀕𑀳𑁂 𑀘 𑀅𑀲𑀫𑀢𑁆𑀣𑁄𑀯 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺; 𑀢𑀲𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀫𑁆𑀧𑀚𑁆𑀚𑀢𑀺 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸 𑀯𑀺𑀦𑀬𑀺𑀢𑁆𑀯𑀸. 𑀮𑁄𑀓𑁂𑀢𑀺 𑀏𑀢𑁆𑀣 𑀬𑁆𑀯𑀸𑀬𑀁 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁄 𑀓𑀸𑀬𑁄 𑀧𑀭𑀺𑀕𑁆𑀕𑀳𑀺𑀢𑁄 𑀲𑁆𑀯𑁂𑀯 𑀇𑀥 𑀮𑁄𑀓𑁄 𑀦𑀸𑀫. 𑀢𑀲𑁆𑀫𑀺𑀁 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀯𑀺𑀦𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀪𑀺𑀚𑁆𑀛𑀸𑀕𑀳𑀡𑁂𑀦 𑀓𑀸𑀫𑀘𑁆𑀙𑀦𑁆𑀤𑁄, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀩𑁆𑀬𑀸𑀧𑀸𑀤𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦𑀻𑀯𑀭𑀡𑀧𑀭𑀺𑀬𑀸𑀧𑀦𑁆𑀦𑀩𑀮𑀯𑀥𑀫𑁆𑀫𑀤𑁆𑀯𑀬𑀤𑀲𑁆𑀲𑀦𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑁂𑀲𑁂𑀦 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀅𑀦𑀼𑀭𑁄𑀥𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀯𑀺𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀯𑀺𑀭𑁄𑀥𑀲𑁆𑀲, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀘 𑀓𑀸𑀬𑁂 𑀅𑀪𑀺𑀭𑀢𑀺𑀬𑀸, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀪𑀸𑀯𑀦𑀸𑀬 𑀅𑀦𑀪𑀺𑀭𑀢𑀺𑀬𑀸, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑁂 𑀅𑀪𑀽𑀢𑀸𑀦𑀁 𑀲𑀼𑀪𑀲𑀼𑀔𑀪𑀸𑀯𑀸𑀤𑀻𑀦𑀁 𑀧𑀓𑁆𑀔𑁂𑀧𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 ¶ 𑀓𑀸𑀬𑁂 𑀪𑀽𑀢𑀸𑀦𑀁 𑀅𑀲𑀼𑀪𑀸𑀲𑀼𑀔𑀪𑀸𑀯𑀸𑀤𑀻𑀦𑀁 𑀅𑀧𑀦𑀬𑀦𑀲𑁆𑀲 𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀦 𑀬𑁄𑀕𑀸𑀯𑀘𑀭𑀲𑁆𑀲 𑀬𑁄𑀕𑀸𑀦𑀼𑀪𑀸𑀯𑁄 𑀬𑁄𑀕𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀬𑁄𑀕𑀸𑀦𑀼𑀪𑀸𑀯𑁄 𑀳𑀺 𑀏𑀲 𑀬𑀤𑀺𑀤𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀭𑀢𑀺𑀭𑀢𑀺𑀲𑀳𑁄, 𑀅𑀪𑀽𑀢𑀧𑀓𑁆𑀔𑁂𑀧𑀪𑀽𑀢𑀸𑀧𑀦𑀬𑀦𑀯𑀺𑀭𑀳𑀺𑀢𑁄 𑀘 𑀳𑁄𑀢𑀺. 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄 𑀘𑁂𑀲 𑀅𑀭𑀢𑀺𑀭𑀢𑀺𑀲𑀳𑁄 𑀅𑀪𑀽𑀢𑀁 𑀅𑀧𑀓𑁆𑀔𑀺𑀧𑀦𑁆𑀢𑁄 𑀪𑀽𑀢𑀜𑁆𑀘 𑀅𑀦𑀧𑀦𑁂𑀦𑁆𑀢𑁄 𑀬𑁄𑀕𑀲𑀫𑀢𑁆𑀣𑁄 𑀳𑁄𑀢𑀻𑀢𑀺.

𑀅𑀧𑀭𑁄 𑀦𑀬𑁄 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀏𑀢𑁆𑀣 𑀅𑀦𑀼𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀳𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀓𑀸𑀬𑀧𑀭𑀺𑀳𑀭𑀡𑀁. 𑀆𑀢𑀸𑀧𑀻𑀢𑀺𑀆𑀤𑀻𑀲𑀼 𑀆𑀢𑀸𑀧𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀁, 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀳𑀭𑀡𑀽𑀧𑀸𑀬𑁄 𑀯𑀸; 𑀲𑀢𑀺𑀬𑀸 𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀲𑀫𑀣𑁄, 𑀲𑀫𑁆𑀧𑀚𑀜𑁆𑀜𑁂𑀦 𑀯𑀺𑀧𑀲𑁆𑀲𑀦𑀸 ¶ , 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀪𑀸𑀯𑀦𑀸𑀨𑀮𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀼𑀤𑁆𑀤𑁂𑀲𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀼𑀤𑁆𑀤𑁂𑀲𑀸𑀤𑀻𑀲𑀼𑀧𑀺 𑀅𑀚𑁆𑀛𑀢𑁆𑀢𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁂𑀲𑀼𑀧𑀺 𑀳𑀺 𑀅𑀢𑁆𑀢𑀦𑁄 𑀯𑁂𑀤𑀦𑀸𑀤𑀻𑀲𑀼, 𑀧𑀭𑀲𑁆𑀲 𑀯𑁂𑀤𑀦𑀸𑀤𑀻𑀲𑀼, 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀮𑁂𑀦 𑀧𑀭𑀲𑁆𑀲 𑀯𑁂𑀤𑀦𑀸𑀤𑀻𑀲𑀽𑀢𑀺 𑀢𑀺𑀯𑀺𑀥𑁄 𑀧𑀭𑀺𑀕𑁆𑀕𑀳𑁄 ¶ 𑀯𑀼𑀢𑁆𑀢𑁄. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀻𑀲𑀼 𑀘 𑀯𑁂𑀤𑀦𑀸𑀤𑀻𑀦𑀁 𑀧𑀼𑀦𑀯𑀘𑀦𑁂 𑀧𑀬𑁄𑀚𑀦𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀦 𑀯𑁂𑀤𑀦𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀢𑀸 𑀘 𑀮𑁄𑀓𑀺𑀬𑀸 𑀏𑀯; 𑀘𑀺𑀢𑁆𑀢𑀫𑁆𑀧𑀺 𑀮𑁄𑀓𑀺𑀬𑀁, 𑀢𑀣𑀸 𑀥𑀫𑁆𑀫𑀸. 𑀢𑁂𑀲𑀁 𑀯𑀺𑀪𑀸𑀕𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀓𑁂𑀯𑀮𑀁 𑀧𑀦𑀺𑀥 𑀬𑀣𑀸 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀢𑀣𑀸 𑀅𑀦𑀼𑀧𑀲𑁆𑀲𑀦𑁆𑀢𑁄 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀘𑀺𑀢𑁆𑀢𑀥𑀫𑁆𑀫𑁂𑀲𑀼. 𑀓𑀣𑀜𑁆𑀘 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺? 𑀲𑀼𑀔𑀸 𑀢𑀸𑀯 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄, 𑀤𑀼𑀓𑁆𑀔𑀸 𑀲𑀮𑁆𑀮𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀅𑀦𑀺𑀘𑁆𑀘𑀢𑁄. 𑀬𑀣𑀸𑀳 𑁋

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄;

𑀲 𑀯𑁂 𑀲𑀫𑁆𑀫𑀤𑀲𑁄 𑀪𑀺𑀓𑁆𑀔𑀼, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺. (𑀲𑀁. 𑀦𑀺. 𑁪.𑁨𑁫𑁩);

𑀲𑀩𑁆𑀩𑀸 ¶ 𑀏𑀯 𑀘𑁂𑀢𑀸 𑀤𑀼𑀓𑁆𑀔𑀸𑀢𑀺𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯). 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀬𑀣𑀸𑀳 𑁋 ‘‘𑀲𑀼𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀧𑀺𑀘 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀧𑀺 (𑀧𑀝𑀺. 𑀫. 𑁩.𑁩𑁫) 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀦𑀺𑀤𑁆𑀤𑁂𑀲𑀯𑀸𑀭𑁂𑀬𑁂𑀯 𑀧𑀸𑀓𑀝𑀁 𑀪𑀯𑀺𑀲𑁆𑀲𑀢𑀺.

𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀘𑀺𑀢𑁆𑀢𑀁 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀪𑀽𑀫𑀺𑀓𑀫𑁆𑀫𑀯𑀺𑀧𑀸𑀓𑀓𑀺𑀭𑀺𑀬𑀸𑀤𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀦𑀼𑀧𑀲𑁆𑀲𑀦𑀸𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀕𑀢𑀲𑀭𑀸𑀕𑀸𑀤𑀺𑀪𑁂𑀤𑀸𑀦𑀜𑁆𑀘 𑀯𑀲𑁂𑀦 ¶ 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁. 𑀥𑀫𑁆𑀫𑀸 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀁 𑀲𑀼𑀜𑁆𑀜𑀢𑀸𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀕𑀢𑀲𑀦𑁆𑀢𑀸𑀲𑀦𑁆𑀢𑀸𑀤𑀺𑀪𑁂𑀤𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀸𑀫𑀜𑁆𑀘𑁂𑀢𑁆𑀣 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀢𑁂 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀧𑀳𑀻𑀦𑀁, 𑀢𑀲𑁆𑀲 𑀯𑁂𑀤𑀦𑀸𑀤𑀺𑀮𑁄𑀓𑁂𑀲𑀼𑀧𑀺 𑀢𑀁 𑀧𑀳𑀻𑀦𑀫𑁂𑀯. 𑀦𑀸𑀦𑀸𑀧𑀼𑀕𑁆𑀕𑀮𑀯𑀲𑁂𑀦 𑀧𑀦 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀘 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀁. 𑀬𑀢𑁄 𑀯𑀸 𑀏𑀓𑀢𑁆𑀣 𑀧𑀳𑀻𑀦𑀁, 𑀲𑁂𑀲𑁂𑀲𑀼𑀧𑀺 𑀧𑀳𑀻𑀦𑀁 𑀳𑁄𑀢𑀺. 𑀢𑁂𑀦𑁂𑀯𑀲𑁆𑀲 𑀢𑀢𑁆𑀣 𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁫𑁬. 𑀇𑀤𑀸𑀦𑀺 ¶ 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀙𑁂𑀓𑁄 𑀯𑀺𑀮𑀻𑀯𑀓𑀸𑀭𑀓𑁄 𑀣𑀽𑀮𑀓𑀺𑀮𑀜𑁆𑀚𑀲𑀡𑁆𑀳𑀓𑀺𑀮𑀜𑁆𑀚𑀘𑀗𑁆𑀓𑁄𑀝𑀓𑀧𑁂𑀴𑀸𑀧𑀼𑀝𑀸𑀤𑀻𑀦𑀺 𑀉𑀧𑀓𑀭𑀡𑀸𑀦𑀺 𑀓𑀢𑁆𑀢𑀼𑀓𑀸𑀫𑁄 𑀏𑀓𑀁 𑀫𑀳𑀸𑀯𑁂𑀴𑀼𑀁 𑀮𑀪𑀺𑀢𑁆𑀯𑀸 𑀘𑀢𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀯𑁂𑀴𑀼𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀢𑀁 𑀢𑀁 𑀉𑀧𑀓𑀭𑀡𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀸 𑀧𑀦 𑀙𑁂𑀓𑁄 𑀲𑀼𑀯𑀡𑁆𑀡𑀓𑀸𑀭𑁄 𑀦𑀸𑀦𑀸𑀯𑀺𑀳𑀺𑀢𑀁 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀁 𑀓𑀢𑁆𑀢𑀼𑀓𑀸𑀫𑁄 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀼𑀯𑀡𑁆𑀡𑀖𑀝𑀺𑀓𑀁 𑀮𑀪𑀺𑀢𑁆𑀯𑀸 𑀘𑀢𑀼𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀢𑀁 𑀢𑀁 𑀧𑀺𑀴𑀦𑁆𑀥𑀦𑀁 𑀓𑀭𑁂𑀬𑁆𑀬, 𑀏𑀯𑀫𑁂𑀯 𑀪𑀕𑀯𑀸 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀬 𑀲𑀢𑁆𑀢𑀸𑀦𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀓𑀢𑁆𑀢𑀼𑀓𑀸𑀫𑁄 𑀏𑀓𑀫𑁂𑀯 𑀲𑀫𑁆𑀫𑀸𑀲𑀢𑀺𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 ¶ 𑀘𑀢𑀼𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀲𑀢𑀺𑀧𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀪𑀚𑀦𑁆𑀢𑁄 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄.

𑀢𑀢𑁆𑀣 𑀓𑀣𑀜𑁆𑀘𑀸𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀓𑁂𑀦 𑀘 𑀆𑀓𑀸𑀭𑁂𑀦 𑀓𑁂𑀦 𑀧𑀓𑀸𑀭𑁂𑀦 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀲𑁂𑀲𑀧𑀼𑀘𑁆𑀙𑀸𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀅𑀬𑀜𑁆𑀳𑁂𑀢𑁆𑀣 𑀇𑀥-𑀲𑀤𑁆𑀤𑁄 𑀅𑀚𑁆𑀛𑀢𑁆𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄 𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 ¶ 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧). 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀽’’𑀢𑀺.

𑀅𑀚𑁆𑀛𑀢𑁆𑀢𑀁 𑀓𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀬𑀁. 𑀉𑀤𑁆𑀥𑀁 𑀧𑀸𑀤𑀢𑀮𑀸𑀢𑀺 𑀧𑀸𑀤𑀢𑀮𑀢𑁄 𑀉𑀧𑀭𑀺. 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸𑀢𑀺 𑀓𑁂𑀲𑀕𑁆𑀕𑀢𑁄 𑀳𑁂𑀝𑁆𑀞𑀸. 𑀢𑀘𑀧𑀭𑀺𑀬𑀦𑁆𑀢𑀦𑁆𑀢𑀺 𑀢𑀺𑀭𑀺𑀬𑀁 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀁. 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀓𑁂𑀲𑀸𑀤𑀺𑀅𑀲𑀼𑀘𑀺𑀪𑀭𑀺𑀢𑁄 𑀅𑀬𑀁 𑀓𑀸𑀬𑁄𑀢𑀺 𑀧𑀲𑁆𑀲𑀢𑀺. 𑀓𑀣𑀁? 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸…𑀧𑁂… 𑀫𑀼𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀇𑀫𑀲𑁆𑀫𑀺𑀦𑁆𑀢𑀺 𑀬𑁆𑀯𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀺𑀭𑀺𑀬𑀁 𑀢𑀘𑀧𑀭𑀺𑀬𑀦𑁆𑀢𑁄 𑀧𑀽𑀭𑁄 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄𑀢𑀺 𑀯𑀼𑀘𑁆𑀘𑀢𑀺 𑀢𑀲𑁆𑀫𑀺𑀁. 𑀓𑀸𑀬𑁂𑀢𑀺 𑀲𑀭𑀻𑀭𑁂. 𑀲𑀭𑀻𑀭𑀜𑁆𑀳𑀺 ¶ 𑀅𑀲𑀼𑀘𑀺𑀲𑀜𑁆𑀘𑀬𑀢𑁄 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘𑁂𑀯 𑀘𑀓𑁆𑀔𑀼𑀭𑁄𑀕𑀸𑀤𑀻𑀦𑀜𑁆𑀘 𑀭𑁄𑀕𑀲𑀢𑀸𑀦𑀁 𑀆𑀬𑀪𑀽𑀢𑀢𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺.

𑀓𑁂𑀲𑀸 𑀮𑁄𑀫𑀸𑀢𑀺 𑀏𑀢𑁂 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸. 𑀢𑀢𑁆𑀣 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸, 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀮𑁄𑀫𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺, 𑀓𑁂𑀲𑀫𑀢𑁆𑀣𑀓𑀸 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀢𑀘𑀢𑁄 𑀧𑀝𑁆𑀞𑀸𑀬 𑀢𑀺𑀭𑀺𑀬𑀦𑁆𑀢𑀢𑁄𑀢𑀺 𑀏𑀢𑁆𑀢𑀓𑁂 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀽𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀺𑀁 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀅𑀲𑁆𑀲𑀺𑀭𑀻𑀓𑀤𑀲𑁆𑀲𑀦𑀁 𑀦𑀸𑀦𑀧𑁆𑀧𑀓𑀸𑀭𑀁 𑀓𑁂𑀲𑀮𑁄𑀫𑀸𑀤𑀺𑀪𑁂𑀤𑀁 𑀅𑀲𑀼𑀘𑀺𑀁𑀬𑁂𑀯 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂… 𑀫𑀼𑀢𑁆𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀢𑁄 𑀯𑀡𑁆𑀡𑀦𑀸.

𑀇𑀫𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀆𑀤𑀺𑀢𑁄𑀯 𑀘𑀢𑀼𑀩𑁆𑀩𑀺𑀥𑀁 𑀲𑀻𑀮𑀁 ¶ 𑀲𑁄𑀥𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦, 𑀬𑁆𑀯𑀸𑀬𑀁 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺 𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀅𑀭𑀳𑀢𑁆𑀢𑀁 𑀅𑀦𑀸𑀕𑀸𑀫𑀺𑀨𑀮𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀧𑀢𑁆𑀢𑀲𑁆𑀲 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀲𑀸𑀝𑁆𑀞𑀓𑀣𑀸𑀬 𑀧𑀸𑀴𑀺𑀬𑀸 𑀓𑀢𑀧𑀭𑀺𑀘𑀬𑀲𑁆𑀲 𑀢𑀦𑁆𑀢𑀺𑀆𑀘𑀭𑀺𑀬𑀲𑁆𑀲𑀸𑀧𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀯𑀺𑀲𑀼𑀤𑁆𑀥𑀁 𑀢𑀣𑀸𑀭𑀽𑀧𑀁 ¶ 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀏𑀓𑀯𑀺𑀳𑀸𑀭𑁂 𑀅𑀮𑀪𑀦𑁆𑀢𑁂𑀦 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑀻𑀮𑀯𑀺𑀲𑁄𑀥𑀦𑀜𑁆𑀘𑁂𑀯 (𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑀧𑀮𑀺𑀩𑁄𑀥𑁄 (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑀘 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀘 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀓𑀣𑀺𑀢𑀁. 𑀢𑀲𑁆𑀫𑀸 𑀢𑀁 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀘𑀭𑀺𑀬𑁂𑀦 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀢𑀺𑀯𑀺𑀥𑁂𑀦 𑀓𑀣𑁂𑀢𑀩𑁆𑀩𑀁. 𑀏𑀓𑁄 𑀪𑀺𑀓𑁆𑀔𑀼 𑀧𑀓𑀢𑀺𑀬𑀸 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀏𑀓𑀁 𑀤𑁆𑀯𑁂 𑀦𑀺𑀲𑀚𑁆𑀚𑀯𑀸𑀭𑁂 𑀲𑀚𑁆𑀛𑀸𑀬𑀁 𑀓𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀏𑀓𑁄 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀢𑀲𑁆𑀲 𑀆𑀕𑀢𑀸𑀕𑀢𑀯𑁂𑀮𑀸𑀬 𑀓𑀣𑁂𑀢𑀩𑁆𑀩𑀁. 𑀏𑀓𑁄 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀢𑀲𑁆𑀲 𑀦𑀸𑀢𑀺𑀧𑀧𑀜𑁆𑀘𑀁 𑀦𑀸𑀢𑀺𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 ¶ 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁. 𑀓𑀣𑁂𑀦𑁆𑀢𑁂𑀦 𑀓𑀺𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺? 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀤𑀲𑀥𑀸 𑀘 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁.

𑀢𑀢𑁆𑀣 𑀯𑀘𑀲𑀸 𑀫𑀦𑀲𑀸 𑀯𑀡𑁆𑀡𑀢𑁄 𑀲𑀡𑁆𑀞𑀸𑀦𑀢𑁄 𑀤𑀺𑀲𑀢𑁄 𑀑𑀓𑀸𑀲𑀢𑁄 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀏𑀯𑀁 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑁂 𑀬𑁄𑀧𑀺 𑀢𑀺𑀧𑀺𑀝𑀓𑁄 𑀳𑁄𑀢𑀺, 𑀢𑁂𑀦𑀧𑀺 𑀫𑀦𑀲𑀺𑀓𑀸𑀭𑀓𑀸𑀮𑁂 𑀧𑀞𑀫𑀁 𑀯𑀸𑀘𑀸𑀬 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀫𑀮𑀬𑀯𑀸𑀲𑀻𑀫𑀳𑀸𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀯𑀺𑀬. 𑀣𑁂𑀭𑁄 𑀓𑀺𑀭 𑀢𑁂𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀺𑀢𑁄 ‘𑀘𑀢𑁆𑀢𑀸𑀭𑁄 𑀫𑀸𑀲𑁂 𑀇𑀫𑀁 𑀏𑀯𑀁 𑀲𑀚𑁆𑀛𑀸𑀬𑀁 𑀓𑀭𑁄𑀣𑀸’𑀢𑀺 𑀤𑁆𑀯𑀢𑁆𑀢𑀺𑀲𑀸𑀓𑀸𑀭𑀧𑀸𑀴𑀺𑀁 𑀅𑀤𑀸𑀲𑀺. 𑀢𑁂, 𑀓𑀺𑀜𑁆𑀘𑀸𑀧𑀺 𑀢𑁂𑀲𑀁 𑀤𑁆𑀯𑁂 𑀢𑀬𑁄 𑀦𑀺𑀓𑀸𑀬𑀸 𑀧𑀕𑀼𑀡𑀸, 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀬 𑀧𑀦 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑀸𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀢𑁆𑀢𑀩𑁆𑀩𑁄 𑁋 ‘𑀧𑀞𑀫𑀁 𑀢𑀸𑀯 𑀯𑀸𑀘𑀸𑀬 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺. 𑀓𑀭𑁄𑀦𑁆𑀢𑁂𑀦 𑀘 𑀢𑀘𑀧𑀜𑁆𑀘𑀓𑀸𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. ‘‘𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄’’𑀢𑀺 𑀳𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀤𑀦𑀦𑁆𑀢𑀭𑀁 𑀯𑀓𑁆𑀓𑀧𑀜𑁆𑀘𑀓𑁂 ‘‘𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 ¶ 𑀯𑀓𑁆𑀓’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀯𑀓𑁆𑀓𑀁 ¶ 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁄 𑀧𑀧𑁆𑀨𑀸𑀲𑀧𑀜𑁆𑀘𑀓𑁂 ‘‘𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀇𑀫𑀁 𑀢𑀦𑁆𑀢𑀺𑀁 𑀅𑀦𑀸𑀭𑀼𑀴𑁆𑀳𑀫𑁆𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪) 𑀆𑀕𑀢𑀁 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀸𑀯𑀲𑀸𑀦𑁂 𑀢𑀦𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀫𑀢𑁆𑀣𑀮𑀼𑀗𑁆𑀕𑀧𑀜𑁆𑀘𑀓𑁂 ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 ¶ 𑀫𑁂𑀤𑀙𑀓𑁆𑀓𑁂 ‘‘𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀫𑁂𑀤𑁄 𑀲𑁂𑀤𑁄 𑀮𑁄𑀳𑀺𑀢𑀁 𑀧𑀼𑀩𑁆𑀩𑁄 𑀲𑁂𑀫𑁆𑀳𑀁 𑀧𑀺𑀢𑁆𑀢𑀁 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀫𑀼𑀢𑁆𑀢𑀙𑀓𑁆𑀓𑁂 ‘‘𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀮𑁄𑀫𑀢𑁄 ‘‘𑀫𑀼𑀢𑁆𑀢𑀁 𑀮𑀲𑀺𑀓𑀸 𑀲𑀺𑀗𑁆𑀖𑀸𑀡𑀺𑀓𑀸 𑀔𑁂𑀴𑁄 𑀯𑀲𑀸 𑀅𑀲𑁆𑀲𑀼 𑀫𑁂𑀤𑁄 𑀲𑁂𑀤𑁄 𑀮𑁄𑀳𑀺𑀢𑀁 𑀧𑀼𑀩𑁆𑀩𑁄 𑀲𑁂𑀫𑁆𑀳𑀁 𑀧𑀺𑀢𑁆𑀢𑀁 𑀫𑀢𑁆𑀣𑀮𑀼𑀗𑁆𑀕𑀁 𑀓𑀭𑀻𑀲𑀁 𑀉𑀤𑀭𑀺𑀬𑀁 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀁 𑀧𑀧𑁆𑀨𑀸𑀲𑀁 𑀧𑀺𑀳𑀓𑀁 𑀓𑀺𑀮𑁄𑀫𑀓𑀁 𑀬𑀓𑀦𑀁 𑀳𑀤𑀬𑀁 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲𑀁 𑀢𑀘𑁄 𑀤𑀦𑁆𑀢𑀸 𑀦𑀔𑀸 𑀮𑁄𑀫𑀸 𑀓𑁂𑀲𑀸’’𑀢𑀺 𑀏𑀯𑀁 𑀓𑀸𑀮𑀲𑀢𑀫𑁆𑀧𑀺 𑀓𑀸𑀮𑀲𑀳𑀲𑁆𑀲𑀫𑁆𑀧𑀺 𑀓𑀸𑀮𑀲𑀢𑀲𑀳𑀲𑁆𑀲𑀫𑁆𑀧𑀺 𑀯𑀸𑀘𑀸𑀬 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀯𑀘𑀲𑀸 𑀲𑀚𑁆𑀛𑀸𑀬𑁂𑀦 𑀳𑀺 𑀓𑀫𑁆𑀫𑀝𑁆𑀞𑀸𑀦𑀢𑀦𑁆𑀢𑀺 𑀧𑀕𑀼𑀡𑀸 𑀳𑁄𑀢𑀺; 𑀦 𑀇𑀢𑁄 𑀘𑀺𑀢𑁄 𑀘 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺; 𑀓𑁄𑀝𑁆𑀞𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀲𑀗𑁆𑀔𑀮𑀺𑀓𑀸 𑀯𑀺𑀬 𑀔𑀸𑀬𑀦𑁆𑀢𑀺, 𑀯𑀢𑀺𑀧𑀸𑀤𑀧𑀦𑁆𑀢𑀺 𑀯𑀺𑀬 𑀘 𑀔𑀸𑀬𑀦𑁆𑀢𑀺. 𑀬𑀣𑀸 𑀘 𑀧𑀦 𑀯𑀘𑀲𑀸, 𑀢𑀣𑁂𑀯 𑀫𑀦𑀲𑀸𑀧𑀺 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀯𑀘𑀲𑀸 𑀲𑀚𑁆𑀛𑀸𑀬𑁄 𑀳𑀺 𑀫𑀦𑀲𑀸 𑀲𑀚𑁆𑀛𑀸𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀦𑀲𑀸 𑀲𑀚𑁆𑀛𑀸𑀬𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀮𑀓𑁆𑀔𑀡𑀧𑀝𑀺𑀯𑁂𑀥𑁄 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

‘𑀯𑀡𑁆𑀡𑀢𑁄’𑀢𑀺 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. ‘𑀲𑀡𑁆𑀞𑀸𑀦𑀢𑁄’𑀢𑀺 𑀢𑁂𑀲𑀁𑀬𑁂𑀯 𑀲𑀡𑁆𑀞𑀸𑀦𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁 ¶ . ‘𑀤𑀺𑀲𑀢𑁄’𑀢𑀺 ¶ 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀸 𑀤𑀺𑀲𑀸, 𑀅𑀥𑁄 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸. 𑀢𑀲𑁆𑀫𑀸 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀺𑀲𑁆𑀲𑀸 𑀦𑀸𑀫 𑀤𑀺𑀲𑀸𑀬𑀸’’𑀢𑀺 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. ‘𑀑𑀓𑀸𑀲𑀢𑁄’𑀢𑀺 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀑𑀓𑀸𑀲𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. ‘𑀧𑀭𑀺𑀘𑁆𑀙𑁂𑀤𑀢𑁄’𑀢𑀺 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄𑀢𑀺 𑀤𑁆𑀯𑁂 𑀧𑀭𑀺𑀘𑁆𑀙𑁂𑀤𑀸. 𑀢𑀢𑁆𑀣 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀢𑀺𑀭𑀺𑀬𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺 𑀏𑀯𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸𑀧𑀺 𑀦 𑀓𑁂𑀲𑀸’’𑀢𑀺 𑀏𑀯𑀁 𑀅𑀫𑀺𑀲𑁆𑀲𑀻𑀓𑀢𑀯𑀲𑁂𑀦 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀦𑁆𑀢𑁂𑀦 𑀧𑀦 ‘‘𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀲𑀼𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀓𑀣𑀺𑀢𑀁, 𑀅𑀲𑀼𑀓𑀲𑁆𑀫𑀺𑀁 𑀥𑀸𑀢𑀼𑀯𑀲𑁂𑀦𑀸’’𑀢𑀺 𑀜𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁨; 𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑁂𑀯 𑀓𑀣𑀺𑀢𑀁, 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫 (𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄) -𑀫𑀳𑀸𑀭𑀸𑀳𑀼𑀮𑁄𑀯𑀸𑀤 (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) -𑀥𑀸𑀢𑀼𑀯𑀺𑀪𑀗𑁆𑀕𑁂𑀲𑀼 (𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄) 𑀥𑀸𑀢𑀼𑀯𑀲𑁂𑀦 𑀓𑀣𑀺𑀢𑀁. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁩 𑀆𑀤𑀬𑁄) 𑀧𑀦 𑀬𑀲𑁆𑀲 𑀯𑀡𑁆𑀡𑀢𑁄 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀥𑀸𑀢𑀼𑀯𑀲𑁂𑀦 𑀓𑀣𑀺𑀢𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺, 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀓𑀣𑀺𑀢𑀁 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁. 𑀢𑀤𑁂𑀢𑀁 𑀇𑀥 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀓𑀣𑀺𑀢𑀦𑁆𑀢𑀺 𑀯𑀤𑀦𑁆𑀢𑀺𑀬𑁂𑀯𑀸𑀢𑀺.

𑀏𑀯𑀁 𑀲𑀢𑁆𑀢𑀥𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄, 𑀅𑀧𑁆𑀧𑀦𑀸𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀏𑀯𑀁 𑀤𑀲𑀥𑀸 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑀢𑁆𑀣 ‘𑀅𑀦𑀼𑀧𑀼𑀩𑁆𑀩𑀢𑁄’𑀢𑀺 𑀇𑀤𑀜𑁆𑀳𑀺 𑀲𑀚𑁆𑀛𑀸𑀬𑀓𑀭𑀡𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀦 𑀏𑀓𑀦𑁆𑀢𑀭𑀺𑀓𑀸𑀬. 𑀏𑀓𑀦𑁆𑀢𑀭𑀺𑀓𑀸𑀬 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀬𑀣𑀸 𑀦𑀸𑀫 𑀅𑀓𑀼𑀲𑀮𑁄 𑀧𑀼𑀭𑀺𑀲𑁄 𑀤𑁆𑀯𑀢𑁆𑀢𑀺𑀁𑀲𑀧𑀤𑀁 𑀦𑀺𑀲𑁆𑀲𑁂𑀡𑀺𑀁 𑀏𑀓𑀦𑁆𑀢𑀭𑀺𑀓𑀸𑀬 𑀆𑀭𑁄𑀳𑀦𑁆𑀢𑁄 𑀓𑀺𑀮𑀦𑁆𑀢𑀓𑀸𑀬𑁄 𑀧𑀢𑀢𑀺, 𑀦 𑀆𑀭𑁄𑀳𑀦𑀁 𑀲𑀫𑁆𑀧𑀸𑀤𑁂𑀢𑀺; 𑀏𑀯𑀫𑁂𑀯 𑀪𑀸𑀯𑀦𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀲𑁆𑀲𑀸𑀤𑀲𑁆𑀲 𑀅𑀦𑀥𑀺𑀕𑀫𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑁄 𑀧𑀢𑀢𑀺, 𑀦 𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺.

𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑀸𑀧𑀺 𑀘 ‘𑀦𑀸𑀢𑀺𑀲𑀻𑀖𑀢𑁄’ 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 ¶ 𑀬𑀣𑀸 𑀦𑀸𑀫 𑀢𑀺𑀬𑁄𑀚𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀑𑀓𑁆𑀓𑀫𑀦𑀯𑀺𑀲𑁆𑀲𑀚𑁆𑀚𑀦𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ¶ 𑀲𑀻𑀖𑁂𑀦 𑀚𑀯𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀕𑀫𑀦𑀸𑀕𑀫𑀦𑀁 𑀓𑀭𑁄𑀢𑁄 𑀧𑀼𑀭𑀺𑀲𑀲𑁆𑀲 𑀓𑀺𑀜𑁆𑀘𑀸𑀧𑀺 𑀅𑀤𑁆𑀥𑀸𑀦𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀣 𑀔𑁄 𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺; 𑀏𑀯𑀫𑁂𑀯 𑀓𑁂𑀯𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀯𑀺𑀪𑀽𑀢𑀁 𑀧𑀦 𑀳𑁄𑀢𑀺, 𑀦 𑀯𑀺𑀲𑁂𑀲𑀁 𑀆𑀯𑀳𑀢𑀺. 𑀢𑀲𑁆𑀫𑀸 𑀦𑀸𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀬𑀣𑀸 𑀘 𑀦𑀸𑀢𑀺𑀲𑀻𑀖𑀢𑁄 𑀏𑀯𑀁 ‘𑀦𑀸𑀢𑀺𑀲𑀡𑀺𑀓𑀢𑁄’𑀧𑀺. 𑀅𑀢𑀺𑀲𑀡𑀺𑀓𑀢𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀬𑀣𑀸 𑀦𑀸𑀫 𑀢𑀤𑀳𑁂𑀯 𑀢𑀺𑀬𑁄𑀚𑀦𑀁 𑀫𑀕𑁆𑀕𑀁 𑀕𑀦𑁆𑀢𑀼𑀓𑀸𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 ¶ 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀼𑀓𑁆𑀔𑀧𑀩𑁆𑀩𑀢𑀕𑀳𑀦𑀸𑀤𑀻𑀲𑀼 𑀯𑀺𑀮𑀫𑁆𑀩𑀫𑀸𑀦𑀲𑁆𑀲 𑀫𑀕𑁆𑀕𑁄 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀢𑀺, 𑀤𑁆𑀯𑀻𑀳𑀢𑀻𑀳𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀩𑁆𑀩𑁄 𑀳𑁄𑀢𑀺; 𑀏𑀯𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀺, 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺.

‘𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. 𑀅𑀧𑁆𑀧𑀝𑀺𑀩𑀸𑀳𑀢𑁄 𑀳𑀺 𑀬𑀣𑀸 𑀦𑀸𑀫 𑀏𑀓𑀧𑀤𑀺𑀓𑀁 𑀧𑀧𑀸𑀢𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀓𑁆𑀓𑀫𑀦𑀧𑀤𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑀬𑀢𑁄 𑀧𑀤𑀯𑀸𑀭𑁄 𑀯𑀺𑀭𑀚𑁆𑀛𑀢𑀺, 𑀢𑀢𑁄 𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀧𑀢𑀺𑀢𑀩𑁆𑀩𑀁 𑀳𑁄𑀢𑀺; 𑀏𑀯𑀫𑁂𑀯 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑁂 𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀳𑀸𑀬𑀢𑀺, 𑀧𑀭𑀺𑀥𑀁𑀲𑀢𑀺. 𑀢𑀲𑁆𑀫𑀸 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁.

‘𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄’𑀢𑀺 𑀬𑀸 𑀅𑀬𑀁 ‘‘𑀓𑁂𑀲𑀸 𑀮𑁄𑀫𑀸’’𑀢𑀺 𑀆𑀤𑀺𑀓𑀸 𑀧𑀡𑁆𑀡𑀢𑁆𑀢𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀉𑀤𑀓𑀤𑀼𑀮𑁆𑀮𑀪𑀓𑀸𑀮𑁂 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑁂 𑀉𑀤𑀧𑀸𑀦𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀢𑀸𑀮𑀧𑀡𑁆𑀡𑀸𑀤𑀺𑀓𑀁 𑀓𑀺𑀜𑁆𑀘𑀺𑀤𑁂𑀯 𑀲𑀜𑁆𑀜𑀸𑀡𑀁 𑀩𑀦𑁆𑀥𑀺𑀢𑁆𑀯𑀸 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀆𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺 𑀘𑁂𑀯 𑀧𑀺𑀯𑀦𑁆𑀢𑀺 𑀘, 𑀬𑀤𑀸 𑀧𑀦 𑀢𑁂𑀲𑀁 𑀅𑀪𑀺𑀡𑁆𑀳𑀲𑀜𑁆𑀘𑀸𑀭𑁂𑀦 𑀆𑀕𑀢𑀸𑀕𑀢𑀧𑀤𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀤𑀸 𑀲𑀜𑁆𑀜𑀸𑀡𑁂𑀦 𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺 𑀘𑁂𑀯 𑀧𑀺𑀯𑀦𑁆𑀢𑀺 𑀘; 𑀏𑀯𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 ‘𑀓𑁂𑀲𑀸 𑀮𑁄𑀫𑀸’𑀢𑀺 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀅𑀣 ‘𑀓𑁂𑀲𑀸 𑀮𑁄𑀫𑀸’𑀢𑀺 𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁.

‘𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄’𑀢𑀺 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀦 𑀉𑀧𑀝𑁆𑀞𑀸𑀢𑀺, 𑀢𑀁 𑀢𑀁 𑀫𑀼𑀜𑁆𑀘𑀦𑁆𑀢𑁂𑀦 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 ‘𑀓𑁂𑀲𑀸’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 ‘𑀫𑀼𑀢𑁆𑀢’𑀦𑁆𑀢𑀺 ¶ 𑀇𑀫𑀁 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. ‘𑀫𑀼𑀢𑁆𑀢’𑀦𑁆𑀢𑀺 𑀘 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 ‘𑀓𑁂𑀲𑀸’𑀢𑀺 𑀇𑀫𑀁 𑀆𑀤𑀺𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀓𑁂𑀘𑀺 ¶ 𑀓𑁄𑀝𑁆𑀞𑀸𑀲𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀬𑁂 𑀬𑁂 𑀉𑀧𑀝𑁆𑀞𑀳𑀦𑁆𑀢𑀺 𑀢𑁂𑀲𑀼 𑀢𑁂𑀲𑀼 𑀢𑀸𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀬𑀸𑀯 𑀤𑁆𑀯𑀻𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 𑀢𑁂𑀲𑀫𑁆𑀧𑀺 𑀏𑀓𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀳𑀢𑀺. 𑀏𑀯𑀁 𑀉𑀧𑀝𑁆𑀞𑀺𑀢𑀁 𑀧𑀦 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀅𑀧𑁆𑀧𑀦𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑁂 𑀢𑀸𑀮𑀯𑀦𑁂 𑀯𑀲𑀦𑁆𑀢𑀁 𑀫𑀓𑁆𑀓𑀝𑀁 𑀕𑀳𑁂𑀢𑀼𑀓𑀸𑀫𑁄 𑀮𑀼𑀤𑁆𑀤𑁄 𑀆𑀤𑀺𑀫𑁆𑀳𑀺 𑀞𑀺𑀢𑀢𑀸𑀮𑀲𑁆𑀲 𑀧𑀡𑁆𑀡𑀁 𑀲𑀭𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁂𑀬𑁆𑀬; 𑀅𑀣 𑀲𑁄 𑀫𑀓𑁆𑀓𑀝𑁄 𑀧𑀝𑀺𑀧𑀸𑀝𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀸𑀮𑁂 ¶ 𑀧𑀢𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀫𑁂𑀯 𑀕𑀘𑁆𑀙𑁂𑀬𑁆𑀬; 𑀢𑀢𑁆𑀣𑀧𑀺 𑀕𑀦𑁆𑀢𑁆𑀯𑀸 𑀮𑀼𑀤𑁆𑀤𑁂𑀦 𑀢𑀣𑁂𑀯 𑀓𑀢𑁂 𑀧𑀼𑀦 𑀢𑁂𑀦𑁂𑀯 𑀦𑀬𑁂𑀦 𑀆𑀤𑀺𑀢𑀸𑀮𑀁 𑀆𑀕𑀘𑁆𑀙𑁂𑀬𑁆𑀬; 𑀲𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀧𑀸𑀝𑀺𑀬𑀸 𑀕𑀘𑁆𑀙𑀦𑁆𑀢𑁄 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂𑀬𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 𑀏𑀓𑀲𑁆𑀫𑀺𑀁 𑀢𑀸𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀲𑁆𑀲 𑀯𑁂𑀫𑀚𑁆𑀛𑁂 𑀫𑀓𑀼𑀴𑀢𑀸𑀮𑀧𑀡𑁆𑀡𑀲𑀽𑀘𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑀺𑀚𑁆𑀛𑀺𑀬𑀫𑀸𑀦𑁄𑀧𑀺 𑀦 𑀉𑀝𑁆𑀞𑀳𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀳𑀺 𑀢𑀸𑀮𑀯𑀦𑁂 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀸, 𑀏𑀯𑀁 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸; 𑀫𑀓𑁆𑀓𑀝𑁄 𑀯𑀺𑀬 𑀘𑀺𑀢𑁆𑀢𑀁; 𑀮𑀼𑀤𑁆𑀤𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄; 𑀫𑀓𑁆𑀓𑀝𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑁂 𑀢𑀸𑀮𑀯𑀦𑁂 𑀦𑀺𑀯𑀸𑀲𑁄 𑀯𑀺𑀬 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀓𑁂 𑀓𑀸𑀬𑁂 𑀆𑀭𑀫𑁆𑀫𑀡𑀯𑀲𑁂𑀦 𑀅𑀦𑀼𑀲𑀁𑀘𑀭𑀡𑀁; 𑀮𑀼𑀤𑁆𑀤𑁂𑀦 𑀆𑀤𑀺𑀫𑁆𑀳𑀺 𑀞𑀺𑀢𑀢𑀸𑀮𑀲𑁆𑀲 𑀧𑀡𑁆𑀡𑀁 𑀲𑀭𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀢𑀸𑀬 𑀫𑀓𑁆𑀓𑀝𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀸𑀮𑁂 𑀧𑀢𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀕𑀫𑀦𑀁 𑀯𑀺𑀬 𑀬𑁄𑀕𑀺𑀦𑁄 ‘𑀓𑁂𑀲𑀸’𑀢𑀺 𑀫𑀦𑀲𑀺𑀓𑀸𑀭𑁂 𑀆𑀭𑀤𑁆𑀥𑁂 𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑁂 𑀏𑀯 𑀘𑀺𑀢𑁆𑀢𑀲𑁆𑀲 𑀲𑀡𑁆𑀞𑀸𑀦𑀁; 𑀧𑀼𑀦 𑀧𑀘𑁆𑀘𑀸𑀕𑀫𑀦𑁂𑀧𑀺 𑀏𑀲𑁂𑀯 𑀦𑀬𑁄; 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀧𑀸𑀝𑀺𑀬𑀸 𑀕𑀘𑁆𑀙𑀫𑀸𑀦𑀲𑁆𑀲 𑀫𑀓𑁆𑀓𑀝𑀲𑁆𑀲 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂 𑀉𑀝𑁆𑀞𑀸𑀦𑀁 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀓𑁂𑀲𑀼𑀘𑀺 𑀓𑁂𑀲𑀼𑀘𑀺 𑀉𑀧𑀝𑁆𑀞𑀺𑀢𑁂𑀲𑀼 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀝𑁆𑀞𑀺𑀢𑁂𑀲𑀼 𑀧𑀭𑀺𑀓𑀫𑁆𑀫𑀓𑀭𑀡𑀁; 𑀅𑀦𑀼𑀓𑁆𑀓𑀫𑁂𑀦 𑀏𑀓𑀲𑁆𑀫𑀺𑀁 𑀢𑀸𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀲𑁆𑀲 𑀯𑁂𑀫𑀚𑁆𑀛𑁂 𑀫𑀓𑀼𑀴𑀢𑀸𑀮𑀧𑀡𑁆𑀡𑀲𑀽𑀘𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑀺𑀚𑁆𑀛𑀺𑀬𑀫𑀸𑀦𑀲𑁆𑀲𑀸𑀧𑀺 ¶ 𑀅𑀦𑀼𑀝𑁆𑀞𑀸𑀦𑀁 𑀯𑀺𑀬 𑀅𑀯𑀲𑀸𑀦𑁂 𑀤𑁆𑀯𑀻𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 𑀬𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀸𑀢𑀺 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀧𑁆𑀧𑀦𑀸𑀬 𑀉𑀧𑁆𑀧𑀸𑀤𑀦𑀁.

𑀅𑀧𑀭𑀸𑀧𑀺 𑀉𑀧𑀫𑀸 𑁋 𑀬𑀣𑀸 𑀦𑀸𑀫 𑀧𑀺𑀡𑁆𑀟𑀧𑀸𑀢𑀺𑀓𑁄 𑀪𑀺𑀓𑁆𑀔𑀼 𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀧𑀞𑀫𑀕𑁂𑀳𑁂 𑀏𑀯 𑀤𑁆𑀯𑁂 𑀪𑀺𑀓𑁆𑀔𑀸 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀏𑀓𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬; 𑀧𑀼𑀦𑀤𑀺𑀯𑀲𑁂 𑀢𑀺𑀲𑁆𑀲𑁄 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑁂𑀬𑁆𑀬; 𑀢𑀢𑀺𑀬𑀤𑀺𑀯𑀲𑁂 𑀆𑀤𑀺𑀫𑁆𑀳𑀺𑀬𑁂𑀯 𑀧𑀢𑁆𑀢𑀧𑀽𑀭𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀕𑀸𑀫𑁄 𑀯𑀺𑀬 𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄; 𑀧𑀺𑀡𑁆𑀟𑀧𑀸𑀢𑀺𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄; 𑀢𑀲𑁆𑀲 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀸𑀲𑁄 𑀯𑀺𑀬 𑀬𑁄𑀕𑀺𑀦𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀧𑀭𑀺𑀓𑀫𑁆𑀫𑀓𑀭𑀡𑀁; 𑀧𑀞𑀫𑀕𑁂𑀳𑁂 ¶ 𑀤𑁆𑀯𑁂 𑀪𑀺𑀓𑁆𑀔𑀸 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀏𑀓𑀺𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀤𑀼𑀢𑀺𑀬𑀤𑀺𑀯𑀲𑁂 𑀢𑀺𑀲𑁆𑀲𑁄 𑀮𑀪𑀺𑀢𑁆𑀯𑀸 𑀧𑀭𑀢𑁄 𑀤𑁆𑀯𑀺𑀦𑁆𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀘 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀝𑁆𑀞𑀺𑀢𑁂𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 ¶ 𑀬𑀸𑀯 𑀓𑁄𑀝𑁆𑀞𑀸𑀲𑀤𑁆𑀯𑀬𑁂 𑀧𑀭𑀺𑀓𑀫𑁆𑀫𑀓𑀭𑀡𑀁; 𑀢𑀢𑀺𑀬𑀤𑀺𑀯𑀲𑁂 𑀆𑀤𑀺𑀫𑁆𑀳𑀺𑀬𑁂𑀯 𑀧𑀢𑁆𑀢𑀧𑀽𑀭𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬 𑀤𑁆𑀯𑀻𑀲𑀼 𑀬𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀳𑀢𑀺 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀧𑁆𑀧𑀦𑀸𑀬 𑀉𑀧𑁆𑀧𑀸𑀤𑀦𑀁.

‘𑀅𑀧𑁆𑀧𑀦𑀸𑀢𑁄’𑀢𑀺 𑀅𑀧𑁆𑀧𑀦𑀸𑀓𑁄𑀝𑁆𑀞𑀸𑀲𑀢𑁄. 𑀓𑁂𑀲𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

‘𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸’𑀢𑀺 𑀅𑀥𑀺𑀘𑀺𑀢𑁆𑀢𑀁, 𑀲𑀻𑀢𑀺𑀪𑀸𑀯𑁄, 𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀦𑁆𑀢𑀺 𑀇𑀫𑁂 𑀢𑀬𑁄 𑀲𑀼𑀢𑁆𑀢𑀦𑁆𑀢𑀸 𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑁋

‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺𑀓𑀸𑀢𑀩𑁆𑀩𑀸𑀦𑀺…𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀬𑁆𑀬 ¶ 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁, 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑀺, 𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼 𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀉𑀓𑁆𑀓𑀁 𑀩𑀦𑁆𑀥𑀢𑀺, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀢𑀺, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀢𑁆𑀯𑀸 𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 ¶ . 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 ¶ 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀪𑀺𑀥𑀫𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀟𑀳𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑁂𑀬𑁆𑀬.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀫𑀼𑀤𑀼 𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬; 𑀬𑀲𑁆𑀲𑀸 𑀬𑀲𑁆𑀲𑀸 𑀘 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀬𑀸 𑀆𑀓𑀗𑁆𑀔𑀢𑀺 𑁋 𑀬𑀤𑀺 𑀧𑀝𑁆𑀝𑀺𑀓𑀸𑀬 𑀬𑀤𑀺 𑀓𑀼𑀡𑁆𑀟𑀮𑀸𑀬 𑀬𑀤𑀺 𑀕𑀻𑀯𑁂𑀬𑁆𑀬𑀓𑀸𑀬 𑀬𑀤𑀺 𑀲𑀼𑀯𑀡𑁆𑀡𑀫𑀸𑀮𑀸𑀬, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦…𑀧𑁂… 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬; 𑀬𑀲𑁆𑀲 𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺 (𑀅. 𑀦𑀺. 𑁩.𑁧𑁦𑁩) 𑀇𑀤𑀁 𑀲𑀼𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 ¶ 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁄 𑀘 𑀳𑁄𑀢𑀺 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺 (𑀅. 𑀦𑀺. 𑁬.𑁮𑁫) 𑀇𑀤𑀁 𑀲𑀼𑀢𑁆𑀢𑀁 𑀲𑀻𑀢𑀺𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀁 ¶ 𑀧𑀦 ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 ¶ 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪) 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 𑀆𑀕𑀢𑀫𑁂𑀯.

𑀇𑀢𑀺 𑀇𑀤𑀁 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀇𑀫𑀜𑁆𑀘 𑀤𑀲𑀯𑀺𑀥𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀦 𑀬𑁄𑀕𑀺𑀦𑀸 𑀉𑀪𑀬𑀓𑁄𑀲𑀮𑁆𑀮𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦𑀲𑁆𑀲 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂𑀬𑁂𑀯 𑀨𑀸𑀲𑀼 𑀳𑁄𑀢𑀺, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀓𑀣𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁂𑀦 𑀯𑀺𑀲𑁂𑀲𑀁 𑀮𑀪𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀓𑀣𑀸𑀧𑁂𑀢𑀩𑁆𑀩𑀁. 𑀅𑀜𑁆𑀜𑀢𑁆𑀣 𑀯𑀲𑀺𑀢𑀼𑀓𑀸𑀫𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑀸𑀧𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀕𑀡𑁆𑀞𑀺𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀧𑀳𑀸𑀬 𑀫𑀳𑀸𑀯𑀸𑀲𑀢𑀸𑀤𑀺𑀅𑀝𑁆𑀞𑀸𑀭𑀲𑀤𑁄𑀲𑀯𑀚𑁆𑀚𑀺𑀢𑁂 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀬𑁄 𑀢𑀸𑀯 𑀭𑀸𑀕𑀘𑀭𑀺𑀢𑁄 𑀳𑁄𑀢𑀺, 𑀢𑁂𑀦 𑀬𑀲𑁆𑀫𑀸 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀢𑀲𑁆𑀫𑀸 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑁂 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀓𑀭𑁄𑀦𑁆𑀢𑁂𑀦 𑀧𑀦 𑀓𑁂𑀲𑁂𑀲𑀼 𑀢𑀸𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀓𑀣𑀁? 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁂𑀲𑁂 𑀮𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀞𑀧𑁂𑀢𑁆𑀯𑀸 𑀯𑀡𑁆𑀡𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀙𑀺𑀦𑁆𑀦𑀝𑁆𑀞𑀸𑀦𑁂𑀧𑀺 𑀓𑁂𑀲𑁂 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺; 𑀉𑀤𑀓𑀧𑀢𑁆𑀢𑁂 𑀯𑀸 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀓𑀸𑀴𑀓𑀓𑀸𑀮𑁂 𑀤𑀺𑀲𑁆𑀯𑀸 𑀓𑀸𑀴𑀓𑀸𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀸; 𑀲𑁂𑀢𑀓𑀸𑀮𑁂 𑀲𑁂𑀢𑀸𑀢𑀺. 𑀫𑀺𑀲𑁆𑀲𑀓𑀓𑀸𑀮𑁂 𑀧𑀦 𑀉𑀲𑁆𑀲𑀤𑀯𑀲𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀓𑁂𑀲𑁂𑀲𑀼, 𑀏𑀯𑀁 𑀲𑀓𑀮𑁂𑀧𑀺 𑀢𑀘𑀧𑀜𑁆𑀘𑀓𑁂 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀆𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 ¶ 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀅𑀦𑀼𑀧𑀼𑀩𑁆𑀩𑀓𑀣𑀸 𑁋 𑀓𑁂𑀲𑀸 𑀢𑀸𑀯 𑀧𑀓𑀢𑀺𑀯𑀡𑁆𑀡𑁂𑀦 𑀓𑀸𑀴𑀓𑀸 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸, 𑀲𑀡𑁆𑀞𑀸𑀦𑀢𑁄 𑀤𑀻𑀖𑀯𑀝𑁆𑀝𑀮𑀺𑀓𑀸 𑀢𑀼𑀮𑀸𑀤𑀡𑁆𑀟𑀲𑀡𑁆𑀞𑀸𑀦𑀸, 𑀤𑀺𑀲𑀢𑁄 𑀉𑀧𑀭𑀺𑀫𑀤𑀺𑀲𑀸𑀬 𑀚𑀸𑀢𑀸, 𑀑𑀓𑀸𑀲𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺, 𑀧𑀼𑀭𑀢𑁄 𑀦𑀮𑀸𑀝𑀦𑁆𑀢𑁂𑀦, 𑀧𑀘𑁆𑀙𑀢𑁄 𑀕𑀮𑀯𑀸𑀝𑀓𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀲𑀻𑀲𑀓𑀝𑀸𑀳𑀯𑁂𑀞𑀦𑀁 𑀅𑀮𑁆𑀮𑀘𑀫𑁆𑀫𑀁 𑀓𑁂𑀲𑀸𑀦𑀁 𑀑𑀓𑀸𑀲𑁄. 𑀧𑀭𑀺𑀘𑁆𑀙𑁂𑀤𑀢𑁄 𑀓𑁂𑀲𑀸 𑀲𑀻𑀲𑀯𑁂𑀞𑀦𑀘𑀫𑁆𑀫𑁂 𑀯𑀻𑀳𑀕𑁆𑀕𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀳𑁂𑀝𑁆𑀞𑀸 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁆𑀯𑁂 𑀓𑁂𑀲𑀸 𑀏𑀓𑀢𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄.

‘𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸 𑀦 𑀓𑁂𑀲𑀸’𑀢𑀺 𑀏𑀯𑀁 𑀅𑀯𑀲𑁂𑀲𑁂𑀳𑀺 𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀸 ¶ 𑀓𑁂𑀲𑀸 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀅𑀬𑀁 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀇𑀤𑀁 𑀓𑁂𑀲𑀸𑀦𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀸𑀧𑀦𑀁.

𑀇𑀤𑀁 𑀧𑀦 𑀢𑁂𑀲𑀁 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑁄 𑀯𑀯𑀢𑁆𑀣𑀸𑀧𑀦𑀁 𑁋 𑀓𑁂𑀲𑀸 𑀘 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸, 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀫𑀦𑀼𑀜𑁆𑀜𑁂𑀧𑀺 𑀳𑀺 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀪𑀢𑁆𑀢𑀧𑀢𑁆𑀢𑁂 𑀯𑀸 𑀓𑁂𑀲𑀯𑀡𑁆𑀡𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 ‘𑀓𑁂𑀲𑀫𑀺𑀲𑁆𑀲𑀓𑀫𑀺𑀤𑀁, 𑀳𑀭𑀣 𑀦’𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀓𑁂𑀲𑀸 𑀯𑀡𑁆𑀡𑀢𑁄 𑀧𑀝𑀺𑀓𑁆𑀓𑀽𑀮𑀸. 𑀭𑀢𑁆𑀢𑀺𑀁 𑀪𑀼𑀜𑁆𑀚𑀦𑁆𑀢𑀸𑀧𑀺 𑀓𑁂𑀲𑀲𑀡𑁆𑀞𑀸𑀦𑀁 𑀅𑀓𑁆𑀓𑀯𑀸𑀓𑀁 𑀯𑀸 𑀫𑀓𑀘𑀺𑀯𑀸𑀓𑀁 𑀯𑀸 𑀙𑀼𑀧𑀺𑀢𑁆𑀯𑀸𑀧𑀺 𑀢𑀣𑁂𑀯 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀲𑀡𑁆𑀞𑀸𑀦𑀢𑁄 𑀧𑀝𑀺𑀓𑁆𑀓𑀽𑀮𑀸.

𑀢𑁂𑀮𑀫𑀓𑁆𑀔𑀦𑀧𑀼𑀧𑁆𑀨𑀥𑀽𑀫𑀸𑀤𑀺𑀲𑀗𑁆𑀔𑀸𑀭𑀯𑀺𑀭𑀳𑀺𑀢𑀸𑀦𑀜𑁆𑀘 𑀓𑁂𑀲𑀸𑀦𑀁 𑀕𑀦𑁆𑀥𑁄 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺, 𑀢𑀢𑁄 𑀚𑁂𑀕𑀼𑀘𑁆𑀙𑀢𑀭𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸𑀦𑀁. 𑀓𑁂𑀲𑀸 𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀸𑀧𑀺 𑀲𑀺𑀬𑀼𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀸𑀬𑁂𑀯. 𑀬𑀣𑀸 𑀳𑀺 𑀤𑀳𑀭𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀘𑁆𑀘𑀁 𑀯𑀡𑁆𑀡𑀢𑁄 𑀳𑀴𑀺𑀤𑁆𑀤𑀺𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄𑀧𑀺 𑀳𑀮𑀺𑀤𑁆𑀤𑀺𑀧𑀺𑀡𑁆𑀟𑀲𑀡𑁆𑀞𑀸𑀦𑀁; 𑀲𑀗𑁆𑀔𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀜𑁆𑀘 𑀉𑀤𑁆𑀥𑀼𑀫𑀸𑀢𑀓𑀓𑀸𑀴𑀲𑀼𑀦𑀔𑀲𑀭𑀻𑀭𑀁 𑀯𑀡𑁆𑀡𑀢𑁄 𑀢𑀸𑀮𑀧𑀓𑁆𑀓𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀁, 𑀤𑀸𑀞𑀸𑀧𑀺𑀲𑁆𑀲 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸𑀢𑀺 ¶ 𑀉𑀪𑀬𑀫𑁆𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀲𑀺𑀬𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀫𑁂𑀯; 𑀏𑀯𑀁 𑀓𑁂𑀲𑀸𑀧𑀺 𑀲𑀺𑀬𑀼𑀁 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀸, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑁆𑀓𑀽𑀮𑀸 𑀏𑀯𑀸𑀢𑀺.

𑀬𑀣𑀸 𑀧𑀦 𑀅𑀲𑀼𑀘𑀺𑀝𑁆𑀞𑀸𑀦𑁂 𑀕𑀸𑀫𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀸𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀦𑀺 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸𑀦𑀁 𑀚𑁂𑀕𑀼𑀘𑁆𑀙𑀸𑀦𑀺 𑀳𑁄𑀦𑁆𑀢𑀺 𑀅𑀧𑀭𑀺𑀪𑁄𑀕𑀸𑀦𑀺, 𑀏𑀯𑀁 𑀓𑁂𑀲𑀸𑀧𑀺 𑀧𑀼𑀩𑁆𑀩𑀮𑁄𑀳𑀺𑀢𑀫𑀼𑀢𑁆𑀢𑀓𑀭𑀻𑀲𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀢𑁆𑀢𑀸 𑀅𑀢𑀺𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀦𑁂𑀲𑀁 ‘𑀆𑀲𑀬𑀢𑁄’ 𑀧𑀸𑀝𑀺𑀓𑀼𑀮𑁆𑀬𑀁. 𑀇𑀫𑁂 𑀘 𑀓𑁂𑀲𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀉𑀝𑁆𑀞𑀺𑀢𑀓𑀡𑁆𑀡𑀺𑀓𑀁 ¶ 𑀯𑀺𑀬 𑀏𑀓𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀚𑀸𑀢𑀸. 𑀢𑁂 𑀲𑀼𑀲𑀸𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀤𑀻𑀲𑀼 𑀚𑀸𑀢𑀲𑀸𑀓𑀁 𑀯𑀺𑀬, 𑀧𑀭𑀺𑀔𑀸𑀤𑀻𑀲𑀼 𑀚𑀸𑀢𑀓𑀫𑀮𑀓𑀼𑀯𑀮𑀬𑀸𑀤𑀺𑀧𑀼𑀧𑁆𑀨𑀁 𑀯𑀺𑀬 𑀘 𑀅𑀲𑀼𑀘𑀺𑀝𑁆𑀞𑀸𑀦𑁂 𑀚𑀸𑀢𑀢𑁆𑀢𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀢𑁂𑀲𑀁 ‘𑀑𑀓𑀸𑀲𑀢𑁄’ 𑀧𑀸𑀝𑀺𑀓𑁆𑀓𑀽𑀮𑁆𑀬𑀁.

𑀬𑀣𑀸 𑀘 𑀓𑁂𑀲𑀸𑀦𑀁, 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀣 ¶ 𑀮𑁄𑀫𑀸 𑀢𑀸𑀯 𑀧𑀓𑀢𑀺𑀯𑀡𑁆𑀡𑀢𑁄 𑀦 𑀓𑁂𑀲𑀸 𑀯𑀺𑀬 𑀅𑀲𑀫𑁆𑀪𑀺𑀦𑁆𑀦𑀓𑀸𑀴𑀓𑀸, 𑀓𑀸𑀴𑀧𑀺𑀗𑁆𑀕𑀮𑀸 𑀧𑀦 𑀳𑁄𑀦𑁆𑀢𑀺; 𑀲𑀡𑁆𑀞𑀸𑀦𑀢𑁄 𑀑𑀦𑀢𑀕𑁆𑀕𑀢𑀸𑀮𑀫𑀽𑀮𑀲𑀡𑁆𑀞𑀸𑀦𑀸; 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸; 𑀑𑀓𑀸𑀲𑀢𑁄 𑀞𑀧𑁂𑀢𑁆𑀯𑀸 𑀓𑁂𑀲𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀜𑁆𑀘 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀘 𑀬𑁂𑀪𑀼𑀬𑁆𑀬𑁂𑀦 𑀅𑀯𑀲𑁂𑀲𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸; 𑀧𑀭𑀺𑀘𑁆𑀙𑁂𑀤𑀢𑁄 𑀲𑀭𑀻𑀭𑀯𑁂𑀞𑀦𑀘𑀫𑁆𑀫𑁂 𑀮𑀺𑀓𑁆𑀔𑀸𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀳𑁂𑀝𑁆𑀞𑀸 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁆𑀯𑁂 𑀮𑁄𑀫𑀸 𑀏𑀓𑀢𑁄 𑀦𑀢𑁆𑀣𑀺. 𑀅𑀬𑀁 𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀬𑁂𑀯.

𑀦𑀔𑀸𑀢𑀺 𑀯𑀻𑀲𑀢𑀺𑀬𑀸 𑀦𑀔𑀧𑀝𑁆𑀝𑀸𑀦𑀁 𑀦𑀸𑀫𑀁. 𑀢𑁂 𑀲𑀩𑁆𑀩𑁂𑀧𑀺 𑀯𑀡𑁆𑀡𑀢𑁄 𑀲𑁂𑀢𑀸; 𑀲𑀡𑁆𑀞𑀸𑀦𑀢𑁄 𑀫𑀘𑁆𑀙𑀲𑀓𑀮𑀺𑀓𑀲𑀡𑁆𑀞𑀸𑀦𑀸; 𑀤𑀺𑀲𑀢𑁄 𑀧𑀸𑀤𑀦𑀔𑀸 𑀳𑁂𑀝𑁆𑀞𑀺𑀫𑀤𑀺𑀲𑀸𑀬 𑀚𑀸𑀢𑀸, 𑀳𑀢𑁆𑀣𑀦𑀔𑀸 𑀉𑀧𑀭𑀺𑀫𑀤𑀺𑀲𑀸𑀬𑀸𑀢𑀺 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸; 𑀑𑀓𑀸𑀲𑀢𑁄 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑀧𑀺𑀝𑁆𑀞𑁂𑀲𑀼 𑀧𑀢𑀺𑀝𑁆𑀞𑀺𑀢𑀸; 𑀧𑀭𑀺𑀘𑁆𑀙𑁂𑀤𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀅𑀗𑁆𑀕𑀼𑀮𑀺𑀓𑁄𑀝𑀺𑀫𑀁𑀲𑁂𑀳𑀺, 𑀅𑀦𑁆𑀢𑁄 𑀅𑀗𑁆𑀕𑀼𑀮𑀺𑀧𑀺𑀝𑁆𑀞𑀺𑀫𑀁𑀲𑁂𑀦, 𑀩𑀳𑀺 𑀘𑁂𑀯 𑀅𑀕𑁆𑀕𑁂 𑀘 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁆𑀯𑁂 𑀦𑀔𑀸 𑀏𑀓𑀢𑁄 𑀦𑀢𑁆𑀣𑀺. 𑀅𑀬𑀁 ¶ 𑀦𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀬𑁂𑀯.

𑀤𑀦𑁆𑀢𑀸𑀢𑀺 𑀧𑀭𑀺𑀧𑀼𑀡𑁆𑀡𑀤𑀦𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀝𑁆𑀞𑀺𑀓𑀸𑀦𑀺. 𑀢𑁂𑀧𑀺 𑀯𑀡𑁆𑀡𑀢𑁄 𑀲𑁂𑀢𑀸; 𑀲𑀡𑁆𑀞𑀸𑀦𑀢𑁄 𑀅𑀦𑁂𑀓𑀲𑀡𑁆𑀞𑀸𑀦𑀸. 𑀢𑁂𑀲𑀜𑁆𑀳𑀺 𑀳𑁂𑀝𑁆𑀞𑀺𑀫𑀸𑀬 𑀢𑀸𑀯 𑀤𑀦𑁆𑀢𑀧𑀸𑀴𑀺𑀬𑀸 𑀫𑀚𑁆𑀛𑁂 𑀘𑀢𑁆𑀢𑀸𑀭𑁄 𑀤𑀦𑁆𑀢𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀅𑀮𑀸𑀩𑀼𑀩𑀻𑀚𑀲𑀡𑁆𑀞𑀸𑀦𑀸. 𑀢𑁂𑀲𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑁄 𑀏𑀓𑀫𑀽𑀮𑀓𑁄 𑀏𑀓𑀓𑁄𑀝𑀺𑀓𑁄 𑀫𑀮𑁆𑀮𑀺𑀓𑀫𑀓𑀼𑀴𑀲𑀡𑁆𑀞𑀸𑀦𑁄. 𑀢𑀢𑁄 𑀏𑀓𑁂𑀓𑁄 𑀤𑁆𑀯𑀺𑀫𑀽𑀮𑀓𑁄 𑀤𑁆𑀯𑀺𑀓𑁄𑀝𑀺𑀓𑁄 𑀬𑀸𑀦𑀓𑀉𑀧𑀢𑁆𑀣𑀫𑁆𑀪𑀦𑀺𑀓𑀲𑀡𑁆𑀞𑀸𑀦𑁄. 𑀢𑀢𑁄 𑀤𑁆𑀯𑁂 𑀤𑁆𑀯𑁂 𑀢𑀺𑀫𑀽𑀮𑀸 𑀢𑀺𑀓𑁄𑀝𑀺𑀓𑀸. 𑀢𑀢𑁄 𑀤𑁆𑀯𑁂 𑀤𑁆𑀯𑁂 𑀘𑀢𑀼𑀫𑀽𑀮𑀸 𑀘𑀢𑀼𑀓𑁄𑀝𑀺𑀓𑀸𑀢𑀺. 𑀉𑀧𑀭𑀺𑀫𑀧𑀸𑀴𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄 ¶ . 𑀤𑀺𑀲𑀢𑁄 𑀉𑀧𑀭𑀺𑀫𑀤𑀺𑀲𑀸𑀬 𑀚𑀸𑀢𑀸. 𑀑𑀓𑀸𑀲𑀢𑁄 𑀤𑁆𑀯𑀻𑀲𑀼 𑀳𑀦𑀼𑀓𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀸. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀳𑀦𑀼𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑁂𑀦 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁆𑀯𑁂 𑀤𑀦𑁆𑀢𑀸 𑀏𑀓𑀢𑁄 𑀦𑀢𑁆𑀣𑀺. 𑀅𑀬𑀁 𑀦𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀬𑁂𑀯.

𑀢𑀘𑁄𑀢𑀺 𑀲𑀓𑀮𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀞𑀺𑀢𑀘𑀫𑁆𑀫𑀁. 𑀢𑀲𑁆𑀲 𑀉𑀧𑀭𑀺 𑀓𑀸𑀴𑀲𑀸𑀫𑀧𑀻𑀢𑀸𑀤𑀺𑀯𑀡𑁆𑀡𑀸 𑀙𑀯𑀺 𑀦𑀸𑀫, 𑀬𑀸 𑀲𑀓𑀮𑀲𑀭𑀻𑀭𑀢𑁄𑀧𑀺 𑀲𑀗𑁆𑀓𑀟𑁆𑀠𑀺𑀬𑀫𑀸𑀦𑀸 𑀩𑀤𑀭𑀝𑁆𑀞𑀺𑀫𑀢𑁆𑀢𑀸 𑀳𑁄𑀢𑀺. 𑀢𑀘𑁄 𑀧𑀦 𑀯𑀡𑁆𑀡𑀢𑁄 𑀲𑁂𑀢𑁄𑀬𑁂𑀯. 𑀲𑁄 𑀘𑀲𑁆𑀲 𑀲𑁂𑀢𑀪𑀸𑀯𑁄 𑀅𑀕𑁆𑀕𑀺𑀚𑀸𑀮𑀸𑀪𑀺𑀖𑀸𑀢𑀧𑀳𑀭𑀡𑀧𑀳𑀸𑀭𑀸𑀤𑀻𑀳𑀺 𑀯𑀺𑀤𑁆𑀥𑀁𑀲𑀺𑀢𑀸𑀬 𑀙𑀯𑀺𑀬𑀸 𑀧𑀸𑀓𑀝𑁄 𑀳𑁄𑀢𑀺. 𑀲𑀡𑁆𑀞𑀸𑀦𑀢𑁄 𑀲𑀭𑀻𑀭𑀲𑀡𑁆𑀞𑀸𑀦𑁄𑀯 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀯𑀺𑀢𑁆𑀣𑀸𑀭𑀢𑁄 ¶ 𑀧𑀦 𑀧𑀸𑀤𑀗𑁆𑀕𑀼𑀮𑀺𑀢𑁆𑀢𑀘𑁄 𑀓𑁄𑀲𑀓𑀸𑀭𑀓𑀓𑁄𑀲𑀲𑀡𑁆𑀞𑀸𑀦𑁄. 𑀧𑀺𑀝𑁆𑀞𑀺𑀧𑀸𑀤𑀢𑁆𑀢𑀘𑁄 𑀧𑀼𑀝𑀩𑀦𑁆𑀥𑀉𑀧𑀸𑀳𑀦𑀲𑀡𑁆𑀞𑀸𑀦𑁄. 𑀚𑀗𑁆𑀖𑀢𑁆𑀢𑀘𑁄 𑀪𑀢𑁆𑀢𑀧𑀼𑀝𑀓𑀢𑀸𑀮𑀧𑀡𑁆𑀡𑀲𑀡𑁆𑀞𑀸𑀦𑁄. 𑀊𑀭𑀼𑀢𑁆𑀢𑀘𑁄 𑀢𑀡𑁆𑀟𑀼𑀮𑀪𑀭𑀺𑀢𑀤𑀻𑀖𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄. 𑀆𑀦𑀺𑀲𑀤𑀢𑁆𑀢𑀘𑁄 𑀉𑀤𑀓𑀧𑀽𑀭𑀺𑀢𑀧𑀝𑀧𑀭𑀺𑀲𑁆𑀲𑀸𑀯𑀦𑀲𑀡𑁆𑀞𑀸𑀦𑁄. 𑀧𑀺𑀝𑁆𑀞𑀺𑀢𑁆𑀢𑀘𑁄 𑀨𑀮𑀓𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄. 𑀓𑀼𑀘𑁆𑀙𑀺𑀢𑁆𑀢𑀘𑁄 𑀯𑀻𑀡𑀸𑀤𑁄𑀡𑀺𑀓𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄. 𑀉𑀭𑀢𑁆𑀢𑀘𑁄 𑀬𑁂𑀪𑀼𑀬𑁆𑀬𑁂𑀦 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑁄. 𑀉𑀪𑀬𑀩𑀸𑀳𑀼𑀢𑁆𑀢𑀘𑁄 𑀢𑀽𑀡𑀻𑀭𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄. 𑀧𑀺𑀝𑁆𑀞𑀺𑀳𑀢𑁆𑀣𑀢𑁆𑀢𑀘𑁄 𑀔𑀼𑀭𑀓𑁄𑀲𑀓𑀲𑀡𑁆𑀞𑀸𑀦𑁄, 𑀨𑀡𑀓𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄 𑀯𑀸. 𑀳𑀢𑁆𑀣𑀗𑁆𑀕𑀼𑀮𑀺𑀢𑁆𑀢𑀘𑁄 𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑀲𑀡𑁆𑀞𑀸𑀦𑁄. 𑀕𑀻𑀯𑀢𑁆𑀢𑀘𑁄 𑀕𑀮𑀓𑀜𑁆𑀘𑀼𑀓𑀲𑀡𑁆𑀞𑀸𑀦𑁄. 𑀫𑀼𑀔𑀢𑁆𑀢𑀘𑁄 𑀙𑀺𑀤𑁆𑀤𑀸𑀯𑀘𑁆𑀙𑀺𑀤𑁆𑀤𑁄 𑀓𑀻𑀝𑀓𑀼𑀮𑀸𑀯𑀓𑀲𑀡𑁆𑀞𑀸𑀦𑁄. 𑀲𑀻𑀲𑀢𑁆𑀢𑀘𑁄 𑀧𑀢𑁆𑀢𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄𑀢𑀺.

𑀢𑀘𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀉𑀢𑁆𑀢𑀭𑁄𑀝𑁆𑀞𑀢𑁄 𑀧𑀝𑁆𑀞𑀸𑀬 ¶ 𑀉𑀧𑀭𑀺 𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀫𑀼𑀔𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀘𑀫𑁆𑀫𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁄 𑀦𑀮𑀸𑀝𑀝𑁆𑀞𑀺𑀘𑀫𑁆𑀫𑀁. 𑀢𑀢𑁄 𑀣𑀯𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑀧𑀢𑁆𑀢𑀲𑁆𑀲 𑀘 𑀣𑀯𑀺𑀓𑀸𑀬 𑀘 𑀅𑀦𑁆𑀢𑀭𑁂𑀦 𑀳𑀢𑁆𑀣𑀫𑀺𑀯 𑀲𑀻𑀲𑀝𑁆𑀞𑀺𑀓𑀲𑁆𑀲 𑀘 𑀲𑀻𑀲𑀘𑀫𑁆𑀫𑀲𑁆𑀲 𑀘 𑀅𑀦𑁆𑀢𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀝𑁆𑀞𑀺𑀓𑁂𑀦 𑀲𑀤𑁆𑀥𑀺𑀁 𑀘𑀫𑁆𑀫𑀲𑁆𑀲 𑀏𑀓𑀸𑀩𑀤𑁆𑀥𑀪𑀸𑀯𑀁 𑀯𑀺𑀬𑁄𑀚𑁂𑀦𑁆𑀢𑁂𑀦 𑀲𑀻𑀲𑀘𑀫𑁆𑀫𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀢𑀢𑁄 𑀔𑀦𑁆𑀥𑀘𑀫𑁆𑀫𑀁. 𑀢𑀢𑁄 𑀅𑀦𑀼𑀮𑁄𑀫𑁂𑀦 𑀧𑀝𑀺𑀮𑁄𑀫𑁂𑀦 𑀘 𑀤𑀓𑁆𑀔𑀺𑀡𑀳𑀢𑁆𑀣𑀘𑀫𑁆𑀫𑀁. 𑀅𑀣 𑀢𑁂𑀦𑁂𑀯 𑀦𑀬𑁂𑀦 𑀯𑀸𑀫𑀳𑀢𑁆𑀣𑀘𑀫𑁆𑀫𑀁. 𑀢𑀢𑁄 𑀧𑀺𑀝𑁆𑀞𑀺𑀘𑀫𑁆𑀫𑀁. 𑀢𑀁 𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀦𑀼𑀮𑁄𑀫𑁂𑀦 𑀘 𑀧𑀝𑀺𑀮𑁄𑀫𑁂𑀦 𑀘 𑀤𑀓𑁆𑀔𑀺𑀡𑀧𑀸𑀤𑀘𑀫𑁆𑀫𑀁. 𑀅𑀣 𑀢𑁂𑀦𑁂𑀯 ¶ 𑀦𑀬𑁂𑀦 𑀯𑀸𑀫𑀧𑀸𑀤𑀘𑀫𑁆𑀫𑀁. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦𑁂𑀯 𑀯𑀢𑁆𑀣𑀺𑀉𑀤𑀭𑀳𑀤𑀬𑀕𑀻𑀯𑀘𑀫𑁆𑀫𑀸𑀦𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀦𑀺. 𑀅𑀣 𑀕𑀻𑀯𑀸𑀘𑀫𑁆𑀫𑀸𑀦𑀦𑁆𑀢𑀭𑀁 𑀳𑁂𑀝𑁆𑀞𑀺𑀫𑀳𑀦𑀼𑀘𑀫𑁆𑀫𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀥𑀭𑁄𑀝𑁆𑀞𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑀩𑁆𑀩𑀁. 𑀏𑀯𑀁 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀼𑀔𑀼𑀫𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺.

𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑁄. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀬𑁂𑀯.

𑀫𑀁𑀲𑀦𑁆𑀢𑀺 𑀦𑀯 𑀫𑀁𑀲𑀧𑁂𑀲𑀺𑀲𑀢𑀸𑀦𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀓𑀺𑀁𑀲𑀼𑀓𑀧𑀼𑀧𑁆𑀨𑀲𑀤𑀺𑀲𑀁; 𑀲𑀡𑁆𑀞𑀸𑀦𑀢𑁄 𑀚𑀗𑁆𑀖𑀧𑀺𑀡𑁆𑀟𑀺𑀓𑀫𑀁𑀲𑀁 𑀢𑀸𑀮𑀧𑀡𑁆𑀡𑀧𑀼𑀝𑀪𑀢𑁆𑀢𑀲𑀡𑁆𑀞𑀸𑀦𑀁, 𑀊𑀭𑀼𑀫𑀁𑀲𑀁 𑀦𑀺𑀲𑀤𑀧𑁄𑀢𑀓𑀲𑀡𑁆𑀞𑀸𑀦𑀁, 𑀆𑀦𑀺𑀲𑀤𑀫𑀁𑀲𑀁 𑀉𑀤𑁆𑀥𑀦𑀓𑁄𑀝𑀺𑀲𑀡𑁆𑀞𑀸𑀦𑀁, 𑀧𑀺𑀝𑁆𑀞𑀺𑀫𑀁𑀲𑀁 𑀢𑀸𑀮𑀕𑀼𑀴𑀧𑀝𑀮𑀲𑀡𑁆𑀞𑀸𑀦𑀁, 𑀨𑀸𑀲𑀼𑀓𑀤𑁆𑀯𑀬𑀫𑀁𑀲𑀁 𑀧𑁄𑀢𑁆𑀣𑀮𑀺𑀓𑀸𑀬 𑀓𑀼𑀘𑁆𑀙𑀺𑀬𑀁 𑀢𑀦𑀼𑀫𑀢𑁆𑀢𑀺𑀓𑀸𑀮𑁂𑀧𑀦𑀲𑀡𑁆𑀞𑀸𑀦𑀁, 𑀣𑀦𑀫𑀁𑀲𑀁 𑀯𑀝𑁆𑀝𑁂𑀢𑁆𑀯𑀸 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑀡𑁆𑀞𑀸𑀦𑀁, 𑀩𑀸𑀳𑀼𑀤𑁆𑀯𑀬𑀫𑀁𑀲𑀁 ¶ 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀞𑀧𑀺𑀢𑀦𑀺𑀘𑁆𑀘𑀫𑁆𑀫𑀫𑀳𑀸𑀫𑀽𑀲𑀺𑀓𑀲𑀡𑁆𑀞𑀸𑀦𑀁. 𑀏𑀯𑀁 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀁 𑀫𑀁𑀲𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀼𑀔𑀼𑀫𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀅𑀦𑀼𑀮𑀺𑀫𑁆𑀧𑁂𑀢𑁆𑀯𑀸 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀅𑀝𑁆𑀞𑀺𑀲𑀗𑁆𑀖𑀸𑀢𑁂 𑀧𑀢𑀺𑀝𑁆𑀞𑀺𑀢𑀢𑀮𑁂𑀦, 𑀉𑀧𑀭𑀺 𑀢𑀘𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

‘𑀦𑁆𑀳𑀸𑀭𑀽’𑀢𑀺 𑀦𑀯 𑀦𑁆𑀳𑀸𑀭𑀼𑀲𑀢𑀸𑀦𑀺. 𑀯𑀡𑁆𑀡𑀢𑁄 𑀲𑀩𑁆𑀩𑁂𑀧𑀺 𑀦𑁆𑀳𑀸𑀭𑀽 𑀲𑁂𑀢𑀸; 𑀲𑀡𑁆𑀞𑀸𑀦𑀢𑁄 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀢𑁂𑀲𑀼 𑀳𑀺 𑀕𑀻𑀯𑀸𑀬 𑀉𑀧𑀭𑀺𑀪𑀸𑀕𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀫𑀳𑀸𑀦𑁆𑀳𑀸𑀭𑀽 𑀲𑀭𑀻𑀭𑀁 𑀯𑀺𑀦𑀤𑁆𑀥𑀫𑀸𑀦𑀸 𑀳𑀤𑀬𑀲𑁆𑀲 𑀧𑀼𑀭𑀺𑀫𑀧𑀲𑁆𑀲𑁂𑀦 𑀑𑀢𑀺𑀡𑁆𑀡𑀸, 𑀧𑀜𑁆𑀘 𑀧𑀘𑁆𑀙𑀺𑀫𑀧𑀲𑁆𑀲𑁂𑀦, 𑀧𑀜𑁆𑀘 𑀤𑀓𑁆𑀔𑀺𑀡𑀧𑀲𑁆𑀲𑁂𑀦, 𑀧𑀜𑁆𑀘 𑀯𑀸𑀫𑀧𑀲𑁆𑀲𑁂𑀦, 𑀤𑀓𑁆𑀔𑀺𑀡𑀳𑀢𑁆𑀣𑀁 𑀯𑀺𑀦𑀤𑁆𑀥𑀫𑀸𑀦𑀸𑀧𑀺 𑀳𑀢𑁆𑀣𑀲𑁆𑀲 𑀧𑀼𑀭𑀺𑀫𑀧𑀲𑁆𑀲𑁂𑀦 𑀧𑀜𑁆𑀘, 𑀧𑀘𑁆𑀙𑀺𑀫𑀧𑀲𑁆𑀲𑁂𑀦 𑀧𑀜𑁆𑀘, 𑀢𑀣𑀸 𑀯𑀸𑀫𑀳𑀢𑁆𑀣𑀁 𑀯𑀺𑀦𑀤𑁆𑀥𑀫𑀸𑀦𑀸𑀧𑀺. 𑀤𑀓𑁆𑀔𑀺𑀡𑀧𑀸𑀤𑀁 𑀯𑀺𑀦𑀤𑁆𑀥𑀫𑀸𑀦𑀸𑀧𑀺 𑀧𑀸𑀤𑀲𑁆𑀲 𑀧𑀼𑀭𑀺𑀫𑀧𑀲𑁆𑀲𑁂𑀦 𑀧𑀜𑁆𑀘, 𑀧𑀘𑁆𑀙𑀺𑀫𑀧𑀲𑁆𑀲𑁂𑀦 𑀧𑀜𑁆𑀘, 𑀢𑀣𑀸 𑀯𑀸𑀫𑀧𑀸𑀤𑀁 𑀯𑀺𑀦𑀤𑁆𑀥𑀫𑀸𑀦𑀸𑀧𑀻𑀢𑀺. 𑀏𑀯𑀁 𑀲𑀭𑀻𑀭𑀥𑀸𑀭𑀓𑀸 𑀦𑀸𑀫 𑀲𑀝𑁆𑀞𑀺 𑀫𑀳𑀸𑀦𑁆𑀳𑀸𑀭𑀽 𑀓𑀸𑀬𑀁 𑀯𑀺𑀦𑀤𑁆𑀥𑀫𑀸𑀦𑀸 𑀑𑀢𑀺𑀡𑁆𑀡𑀸, 𑀬𑁂 𑀓𑀡𑁆𑀟𑀭𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀓𑀦𑁆𑀤𑀮𑀫𑀓𑀼𑀴𑀲𑀡𑁆𑀞𑀸𑀦𑀸.

𑀅𑀜𑁆𑀜𑁂 ¶ 𑀧𑀦 𑀢𑀁 𑀢𑀁 𑀧𑀤𑁂𑀲𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸 𑀢𑀢𑁄 𑀲𑀼𑀔𑀼𑀫𑀢𑀭𑀸 𑀲𑀼𑀢𑁆𑀢𑀭𑀚𑁆𑀚𑀼𑀓𑀲𑀡𑁆𑀞𑀸𑀦𑀸. 𑀅𑀜𑁆𑀜𑁂 𑀢𑀢𑁄 𑀲𑀼𑀔𑀼𑀫𑀢𑀭𑀸 𑀧𑀽𑀢𑀺𑀮𑀢𑀸𑀲𑀡𑁆𑀞𑀸𑀦𑀸. 𑀅𑀜𑁆𑀜𑁂 𑀢𑀢𑁄 𑀲𑀼𑀔𑀼𑀫𑀢𑀭𑀸 𑀫𑀳𑀸𑀯𑀻𑀡𑀸𑀢𑀦𑁆𑀢𑀺𑀲𑀡𑁆𑀞𑀸𑀦𑀸. 𑀅𑀜𑁆𑀜𑁂 𑀣𑀽𑀮𑀲𑀼𑀢𑁆𑀢𑀓𑀲𑀡𑁆𑀞𑀸𑀦𑀸. 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑀁 𑀦𑁆𑀳𑀸𑀭𑀽 𑀲𑀓𑀼𑀡𑀧𑀸𑀤𑀲𑀡𑁆𑀞𑀸𑀦𑀸. 𑀲𑀻𑀲𑀦𑁆𑀳𑀸𑀭𑀽 𑀤𑀸𑀭𑀓𑀸𑀦𑀁 𑀲𑀻𑀲𑀚𑀸𑀮𑀓𑀲𑀡𑁆𑀞𑀸𑀦𑀸. 𑀧𑀺𑀝𑁆𑀞𑀺𑀦𑁆𑀳𑀸𑀭𑀽 𑀆𑀢𑀧𑁂 𑀧𑀲𑀸𑀭𑀺𑀢𑀅𑀮𑁆𑀮𑀚𑀸𑀮𑀲𑀡𑁆𑀞𑀸𑀦𑀸. 𑀅𑀯𑀲𑁂𑀲𑀸 𑀢𑀁𑀢𑀁𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀼𑀕𑀢𑀸 𑀦𑁆𑀳𑀸𑀭𑀽 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑀚𑀸𑀮𑀓𑀜𑁆𑀘𑀼𑀓𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀑𑀓𑀸𑀲𑀢𑁄 𑀲𑀓𑀮𑀲𑀭𑀻𑀭𑁂 𑀅𑀝𑁆𑀞𑀻𑀦𑀺 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀸. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀢𑀺𑀡𑁆𑀡𑀁 𑀅𑀝𑁆𑀞𑀺𑀲𑀢𑀸𑀦𑀁 𑀉𑀧𑀭𑀺 𑀧𑀢𑀺𑀝𑁆𑀞𑀺𑀢𑀢𑀮𑁂𑀳𑀺, 𑀉𑀧𑀭𑀺 𑀫𑀁𑀲𑀘𑀫𑁆𑀫𑀸𑀦𑀺 𑀆𑀳𑀘𑁆𑀘 𑀞𑀺𑀢𑀧𑀤𑁂𑀲𑁂𑀳𑀺, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀅𑀬𑀁 𑀦𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀬𑁂𑀯.

𑀅𑀝𑁆𑀞𑀻𑀢𑀺 𑀞𑀧𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀝𑁆𑀞𑀻𑀦𑀺 𑀅𑀯𑀲𑁂𑀲𑀸𑀦𑀺 𑀘𑀢𑀼𑀲𑀝𑁆𑀞𑀺 𑀳𑀢𑁆𑀣𑀝𑁆𑀞𑀻𑀦𑀺, 𑀘𑀢𑀼𑀲𑀝𑁆𑀞𑀺 𑀧𑀸𑀤𑀝𑁆𑀞𑀻𑀦𑀺, 𑀘𑀢𑀼𑀲𑀝𑁆𑀞𑀺 𑀫𑀁𑀲𑀦𑀺𑀲𑁆𑀲𑀺𑀢𑀸𑀦𑀺 𑀫𑀼𑀤𑀼𑀅𑀝𑁆𑀞𑀻𑀦𑀺, 𑀤𑁆𑀯𑁂 𑀧𑀡𑁆𑀳𑀺𑀓𑀝𑁆𑀞𑀻𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑁂 𑀕𑁄𑀧𑁆𑀨𑀓𑀝𑁆𑀞𑀻𑀦𑀺, 𑀤𑁆𑀯𑁂 𑀚𑀗𑁆𑀖𑀝𑁆𑀞𑀻𑀦𑀺, 𑀤𑁆𑀯𑁂 𑀚𑀡𑁆𑀡𑀼𑀓𑀝𑁆𑀞𑀻𑀦𑀺, 𑀤𑁆𑀯𑁂 ¶ 𑀊𑀭𑀼𑀝𑁆𑀞𑀻𑀦𑀺, 𑀤𑁆𑀯𑁂 𑀓𑀝𑀺𑀝𑁆𑀞𑀻𑀦𑀺, 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺, 𑀘𑀢𑀼𑀯𑀻𑀲𑀢𑀺 ¶ 𑀨𑀸𑀲𑀼𑀓𑀝𑁆𑀞𑀻𑀦𑀺, 𑀘𑀼𑀤𑁆𑀤𑀲 𑀉𑀭𑀝𑁆𑀞𑀻𑀦𑀺, 𑀏𑀓𑀁 𑀳𑀤𑀬𑀝𑁆𑀞𑀺, 𑀤𑁆𑀯𑁂 𑀅𑀓𑁆𑀔𑀓𑀝𑁆𑀞𑀻𑀦𑀺, 𑀤𑁆𑀯𑁂 𑀓𑁄𑀝𑁆𑀞𑀝𑁆𑀞𑀻𑀦𑀺, 𑀤𑁆𑀯𑁂 𑀩𑀸𑀳𑀝𑁆𑀞𑀻𑀦𑀺, 𑀤𑁆𑀯𑁂 𑀤𑁆𑀯𑁂 𑀅𑀕𑁆𑀕𑀩𑀸𑀳𑀝𑁆𑀞𑀻𑀦𑀺, 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺, 𑀤𑁆𑀯𑁂 𑀳𑀦𑀼𑀓𑀝𑁆𑀞𑀻𑀦𑀺, 𑀏𑀓𑀁 𑀦𑀸𑀲𑀺𑀓𑀝𑁆𑀞𑀺, 𑀤𑁆𑀯𑁂 𑀅𑀓𑁆𑀔𑀺𑀝𑁆𑀞𑀻𑀦𑀺, 𑀤𑁆𑀯𑁂 𑀓𑀡𑁆𑀡𑀝𑁆𑀞𑀻𑀦𑀺, 𑀏𑀓𑀁 𑀦𑀮𑀸𑀝𑀝𑁆𑀞𑀺, 𑀏𑀓𑀁 𑀫𑀼𑀤𑁆𑀥𑀝𑁆𑀞𑀺, 𑀦𑀯 𑀲𑀻𑀲𑀓𑀧𑀸𑀮𑀝𑁆𑀞𑀻𑀦𑀻𑀢𑀺 𑀏𑀯𑀁 𑀢𑀺𑀫𑀢𑁆𑀢𑀸𑀦𑀺 𑀅𑀝𑁆𑀞𑀺𑀲𑀢𑀸𑀦𑀺.

𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀯𑀡𑁆𑀡𑀢𑁄 𑀲𑁂𑀢𑀸𑀦𑀺, 𑀲𑀡𑁆𑀞𑀸𑀦𑀢𑁄 𑀦𑀸𑀦𑀸𑀲𑀡𑁆𑀞𑀸𑀦𑀸𑀦𑀺. 𑀢𑀢𑁆𑀣 𑀳𑀺 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀺𑀝𑁆𑀞𑀻𑀦𑀺 𑀓𑀢𑀓𑀩𑀻𑀚𑀲𑀡𑁆𑀞𑀸𑀦𑀸𑀦𑀺. 𑀢𑀤𑀦𑀦𑁆𑀢𑀭𑀸𑀦𑀺 𑀫𑀚𑁆𑀛𑀧𑀩𑁆𑀩𑀝𑁆𑀞𑀻𑀦𑀺 𑀧𑀦𑀲𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺. 𑀫𑀽𑀮𑀧𑀩𑁆𑀩𑀝𑁆𑀞𑀻𑀦𑀺 𑀧𑀡𑀯𑀲𑀡𑁆𑀞𑀸𑀦𑀸𑀦𑀺. 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀻𑀦𑀺 𑀓𑁄𑀝𑁆𑀞𑀺𑀢𑀓𑀦𑁆𑀤𑀮𑀓𑀦𑁆𑀤𑀭𑀸𑀲𑀺𑀲𑀡𑁆𑀞𑀸𑀦𑀸𑀦𑀺. 𑀧𑀡𑁆𑀳𑀺𑀓𑀝𑁆𑀞𑀺 𑀏𑀓𑀝𑁆𑀞𑀺𑀢𑀸𑀮𑀨𑀮𑀩𑀻𑀚𑀲𑀡𑁆𑀞𑀸𑀦𑀁. 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀩𑀦𑁆𑀥𑀓𑀻𑀴𑀸𑀕𑁄𑀴𑀓𑀲𑀡𑁆𑀞𑀸𑀦𑀸𑀦𑀺. 𑀚𑀗𑁆𑀖𑀝𑁆𑀞𑀻𑀦𑀁 𑀕𑁄𑀧𑁆𑀨𑀓𑀝𑁆𑀞𑀻𑀲𑀼 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀦𑀧𑀦𑀻𑀢𑀢𑀘𑀲𑀺𑀦𑁆𑀤𑀺𑀓𑀴𑀻𑀭𑀲𑀡𑁆𑀞𑀸𑀦𑀁. 𑀔𑀼𑀤𑁆𑀤𑀓𑀚𑀗𑁆𑀖𑀝𑁆𑀞𑀺𑀓𑀁 𑀥𑀦𑀼𑀓𑀤𑀡𑁆𑀟𑀲𑀡𑁆𑀞𑀸𑀦𑀁, 𑀫𑀳𑀦𑁆𑀢𑀁 𑀫𑀺𑀮𑀸𑀢𑀲𑀧𑁆𑀧𑀧𑀺𑀝𑁆𑀞𑀺𑀲𑀡𑁆𑀞𑀸𑀦𑀁. 𑀚𑀡𑁆𑀡𑀼𑀓𑀝𑁆𑀞𑀺 𑀏𑀓𑀢𑁄 𑀧𑀭𑀺𑀓𑁆𑀔𑀻𑀡𑀨𑁂𑀡𑀓𑀲𑀡𑁆𑀞𑀸𑀦𑀁.

𑀢𑀢𑁆𑀣 𑀚𑀗𑁆𑀖𑀝𑁆𑀞𑀺𑀓𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀔𑀺𑀡𑀕𑁆𑀕𑀕𑁄𑀲𑀺𑀗𑁆𑀕𑀲𑀡𑁆𑀞𑀸𑀦𑀁. 𑀊𑀭𑀼𑀝𑁆𑀞𑀺 𑀤𑀼𑀢𑁆𑀢𑀘𑁆𑀙𑀺𑀢𑀯𑀸𑀲𑀺𑀨𑀭𑀲𑀼𑀤𑀡𑁆𑀟𑀓𑀲𑀡𑁆𑀞𑀸𑀦𑀁. 𑀢𑀲𑁆𑀲 𑀓𑀝𑀺𑀝𑁆𑀞𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀓𑀻𑀴𑀸𑀕𑁄𑀴𑀓𑀲𑀡𑁆𑀞𑀸𑀦𑀁. 𑀢𑁂𑀦 𑀓𑀝𑀺𑀝𑁆𑀞𑀺𑀦𑁄 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀕𑁆𑀕𑀘𑁆𑀙𑀺𑀦𑁆𑀦𑀫𑀳𑀸𑀧𑀼𑀦𑁆𑀦𑀸𑀕𑀨𑀮𑀲𑀡𑁆𑀞𑀸𑀦𑀁. 𑀓𑀝𑀺𑀝𑁆𑀞𑀻𑀦𑀺 𑀤𑁆𑀯𑁂𑀧𑀺 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀓𑀉𑀤𑁆𑀥𑀦𑀲𑀡𑁆𑀞𑀸𑀦𑀸𑀦𑀺, 𑀧𑀸𑀝𑀺𑀬𑁂𑀓𑁆𑀓𑀁 𑀓𑀫𑁆𑀫𑀸𑀭𑀓𑀽𑀝𑀬𑁄𑀢𑁆𑀢𑀓𑀲𑀡𑁆𑀞𑀸𑀦𑀸𑀦𑀺. 𑀓𑁄𑀝𑀺𑀬𑀁 𑀞𑀺𑀢𑀆𑀦𑀺𑀲𑀤𑀝𑁆𑀞𑀺 ¶ 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀕𑀳𑀺𑀢𑀲𑀧𑁆𑀧𑀨𑀡𑀲𑀡𑁆𑀞𑀸𑀦𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁. 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺 ¶ 𑀅𑀩𑁆𑀪𑀦𑁆𑀢𑀭𑀢𑁄 𑀉𑀧𑀭𑀽𑀧𑀭𑀺 𑀞𑀧𑀺𑀢𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀲𑀡𑁆𑀞𑀸𑀦𑀸𑀦𑀺, 𑀩𑀸𑀳𑀺𑀭𑀢𑁄 𑀯𑀝𑁆𑀝𑀦𑀸𑀯𑀴𑀺𑀲𑀡𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀓𑀘𑀤𑀦𑁆𑀢𑀲𑀤𑀺𑀲𑀸 𑀤𑁆𑀯𑁂 𑀢𑀬𑁄 𑀓𑀡𑁆𑀝𑀓𑀸 𑀳𑁄𑀦𑁆𑀢𑀺. 𑀘𑀢𑀼𑀯𑀻𑀲𑀢𑀺𑀬𑀸 𑀨𑀸𑀲𑀼𑀓𑀝𑁆𑀞𑀻𑀲𑀼 𑀅𑀧𑀭𑀺𑀧𑀼𑀡𑁆𑀡𑀸𑀦𑀺 𑀅𑀧𑀭𑀺𑀧𑀼𑀡𑁆𑀡𑀸𑀲𑀺𑀢𑀲𑀡𑁆𑀞𑀸𑀦𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀲𑀺𑀢𑀲𑀡𑁆𑀞𑀸𑀦𑀸𑀦𑀺. 𑀲𑀩𑁆𑀩𑀸𑀦𑀺𑀧𑀺 𑀑𑀤𑀸𑀢𑀓𑀼𑀓𑁆𑀓𑀼𑀝𑀲𑁆𑀲 𑀧𑀲𑀸𑀭𑀺𑀢𑀧𑀓𑁆𑀔𑀲𑀡𑁆𑀞𑀸𑀦𑀸𑀦𑀺.

𑀘𑀼𑀤𑁆𑀤𑀲 𑀉𑀭𑀝𑁆𑀞𑀻𑀦𑀺 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀧𑀜𑁆𑀚𑀭𑀲𑀡𑁆𑀞𑀸𑀦𑀸𑀦𑀺. 𑀳𑀤𑀬𑀝𑁆𑀞𑀺 𑀤𑀩𑁆𑀩𑀺𑀨𑀡𑀲𑀡𑁆𑀞𑀸𑀦𑀁. 𑀅𑀓𑁆𑀔𑀓𑀝𑁆𑀞𑀻𑀦𑀺 𑀔𑀼𑀤𑁆𑀤𑀓𑀮𑁄𑀳𑀯𑀸𑀲𑀺𑀤𑀡𑁆𑀟𑀲𑀡𑁆𑀞𑀸𑀦𑀸𑀦𑀺. 𑀓𑁄𑀝𑁆𑀞𑀝𑁆𑀞𑀻𑀦𑀺 𑀏𑀓𑀢𑁄 𑀧𑀭𑀺𑀓𑁆𑀔𑀻𑀡𑀲𑀻𑀳𑀴𑀓𑀼𑀤𑀸𑀮𑀲𑀡𑁆𑀞𑀸𑀦𑀸𑀦𑀺. 𑀩𑀸𑀳𑀼𑀝𑁆𑀞𑀻𑀦𑀺 𑀆𑀤𑀸𑀲𑀤𑀡𑁆𑀟𑀓𑀲𑀡𑁆𑀞𑀸𑀦𑀸𑀦𑀺. 𑀅𑀕𑁆𑀕𑀩𑀸𑀳𑀼𑀝𑁆𑀞𑀻𑀦𑀺 𑀬𑀫𑀓𑀢𑀸𑀮𑀓𑀦𑁆𑀤𑀲𑀡𑁆𑀞𑀸𑀦𑀸𑀦𑀺. 𑀫𑀡𑀺𑀩𑀦𑁆𑀥𑀝𑁆𑀞𑀻𑀦𑀺 𑀏𑀓𑀢𑁄 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸 𑀞𑀧𑀺𑀢𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀲𑀡𑁆𑀞𑀸𑀦𑀸𑀦𑀺. 𑀧𑀺𑀝𑁆𑀞𑀺𑀳𑀢𑁆𑀣𑀝𑁆𑀞𑀻𑀦𑀺 𑀓𑁄𑀝𑁆𑀝𑀺𑀢𑀓𑀦𑁆𑀤𑀮𑀓𑀦𑁆𑀤𑀭𑀸𑀲𑀺𑀲𑀡𑁆𑀞𑀸𑀦𑀸𑀦𑀺. 𑀳𑀢𑁆𑀣𑀗𑁆𑀕𑀼𑀮𑀻𑀲𑀼 𑀫𑀽𑀮𑀧𑀩𑁆𑀩𑀝𑁆𑀞𑀻𑀦𑀺 𑀧𑀡𑀯𑀲𑀡𑁆𑀞𑀸𑀦𑀸𑀦𑀺; 𑀫𑀚𑁆𑀛𑀧𑀩𑁆𑀩𑀝𑁆𑀞𑀻𑀦𑀺 𑀅𑀧𑀭𑀺𑀧𑀼𑀡𑁆𑀡𑀧𑀦𑀲𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺; 𑀅𑀕𑁆𑀕𑀧𑀩𑁆𑀩𑀝𑁆𑀞𑀻𑀦𑀺 𑀓𑀢𑀓𑀩𑀻𑀚𑀲𑀡𑁆𑀞𑀸𑀦𑀸𑀦𑀺. 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺 ¶ 𑀤𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀯𑀁𑀲𑀓𑀴𑀻𑀭𑀘𑀓𑁆𑀓𑀮𑀺𑀓𑀲𑀡𑁆𑀞𑀸𑀦𑀸𑀦𑀺. 𑀳𑁂𑀝𑁆𑀞𑀺𑀫𑀳𑀦𑀼𑀓𑀝𑁆𑀞𑀺 𑀓𑀫𑁆𑀫𑀸𑀭𑀸𑀦𑀁 𑀅𑀬𑁄𑀓𑀽𑀝𑀬𑁄𑀢𑁆𑀢𑀓𑀲𑀡𑁆𑀞𑀸𑀦𑀁, 𑀉𑀧𑀭𑀺𑀫𑀁 𑀅𑀯𑀮𑁂𑀔𑀦𑀲𑀢𑁆𑀣𑀓𑀲𑀡𑁆𑀞𑀸𑀦𑀁.

𑀅𑀓𑁆𑀔𑀺𑀓𑀽𑀧𑀦𑀸𑀲𑀸𑀓𑀽𑀧𑀝𑁆𑀞𑀻𑀦𑀺 𑀅𑀧𑀦𑀻𑀢𑀫𑀺𑀜𑁆𑀚𑀢𑀭𑀼𑀡𑀢𑀸𑀮𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺. 𑀦𑀮𑀸𑀝𑀝𑁆𑀞𑀺 𑀅𑀥𑁄𑀫𑀼𑀔𑀞𑀧𑀺𑀢𑀲𑀗𑁆𑀔𑀣𑀸𑀮𑀓𑀓𑀧𑀸𑀮𑀲𑀡𑁆𑀞𑀸𑀦𑀁. 𑀓𑀡𑁆𑀡𑀘𑀽𑀴𑀺𑀓𑀝𑁆𑀞𑀻𑀦𑀺 𑀦𑁆𑀳𑀸𑀧𑀺𑀢𑀔𑀼𑀭𑀓𑁄𑀲𑀓𑀲𑀡𑁆𑀞𑀸𑀦𑀸𑀦𑀺. 𑀦𑀮𑀸𑀝𑀓𑀡𑁆𑀡𑀘𑀽𑀴𑀺𑀓𑀸𑀦𑀁 𑀉𑀧𑀭𑀺 𑀧𑀝𑁆𑀝𑀩𑀦𑁆𑀥𑀦𑁄𑀓𑀸𑀲𑁂 𑀅𑀝𑁆𑀞𑀺 𑀲𑀗𑁆𑀓𑀼𑀝𑀺𑀢𑀖𑀝𑀧𑀼𑀡𑁆𑀡𑀧𑀝𑀮𑀔𑀡𑁆𑀟𑀲𑀡𑁆𑀞𑀸𑀦𑀁. 𑀫𑀼𑀤𑁆𑀥𑀝𑁆𑀞𑀺 𑀫𑀼𑀔𑀘𑁆𑀙𑀺𑀦𑁆𑀦𑀯𑀗𑁆𑀓𑀦𑀸𑀴𑀺𑀓𑁂𑀭𑀲𑀡𑁆𑀞𑀸𑀦𑀁. 𑀲𑀻𑀲𑀝𑁆𑀞𑀻𑀦𑀺 𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀚𑀚𑁆𑀚𑀭𑀮𑀸𑀩𑀼𑀓𑀝𑀸𑀳𑀲𑀡𑁆𑀞𑀸𑀦𑀸𑀦𑀺.

𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸𑀦𑀺. 𑀑𑀓𑀸𑀲𑀢𑁄 𑀅𑀯𑀺𑀲𑁂𑀲𑁂𑀦 𑀲𑀓𑀮𑀲𑀭𑀻𑀭𑁂 ¶ 𑀞𑀺𑀢𑀸𑀦𑀺. 𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀲𑀻𑀲𑀝𑁆𑀞𑀻𑀦𑀺 𑀕𑀻𑀯𑀝𑁆𑀞𑀻𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀕𑀻𑀯𑀝𑁆𑀞𑀻𑀦𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀲𑀼, 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺 𑀓𑀝𑀺𑀝𑁆𑀞𑀻𑀲𑀼, 𑀓𑀝𑀺𑀝𑁆𑀞𑀻𑀦𑀺 𑀊𑀭𑀼𑀝𑁆𑀞𑀻𑀲𑀼, 𑀊𑀭𑀼𑀝𑁆𑀞𑀻𑀦𑀺 𑀚𑀡𑁆𑀡𑀼𑀓𑀝𑁆𑀞𑀻𑀲𑀼, 𑀚𑀡𑁆𑀡𑀼𑀓𑀝𑁆𑀞𑀻𑀦𑀺 𑀚𑀗𑁆𑀖𑀝𑁆𑀞𑀻𑀲𑀼, 𑀚𑀗𑁆𑀖𑀝𑁆𑀞𑀻𑀦𑀺 𑀕𑁄𑀧𑁆𑀨𑀓𑀝𑁆𑀞𑀻𑀲𑀼, 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀻𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑁄 𑀅𑀝𑁆𑀞𑀺𑀫𑀺𑀜𑁆𑀚𑁂𑀦, 𑀉𑀧𑀭𑀺 𑀫𑀁𑀲𑁂𑀦, 𑀅𑀕𑁆𑀕𑁂 𑀫𑀽𑀮𑁂 𑀘 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺. 𑀅𑀬𑀁 𑀦𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀅𑀝𑁆𑀞𑀺𑀫𑀺𑀜𑁆𑀚𑀦𑁆𑀢𑀺 ¶ 𑀢𑁂𑀲𑀁 𑀢𑁂𑀲𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀁 𑀫𑀺𑀜𑁆𑀚𑀁. 𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁. 𑀲𑀡𑁆𑀞𑀸𑀦𑀢𑁄 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀁 𑀯𑁂𑀴𑀼𑀦𑀸𑀴𑀺𑀬𑀁 𑀧𑀓𑁆𑀔𑀺𑀢𑁆𑀢𑀲𑁂𑀤𑀺𑀢𑀫𑀳𑀸𑀯𑁂𑀢𑁆𑀢𑀕𑁆𑀕𑀲𑀡𑁆𑀞𑀸𑀦𑀁, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀁 𑀯𑁂𑀴𑀼𑀬𑀝𑁆𑀞𑀺𑀧𑀩𑁆𑀩𑁂𑀲𑀼 𑀧𑀓𑁆𑀔𑀺𑀢𑁆𑀢𑀲𑁂𑀤𑀺𑀢𑀢𑀦𑀼𑀯𑁂𑀢𑁆𑀢𑀕𑁆𑀕𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀢𑀺𑀝𑁆𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀢𑀮𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀯𑀓𑁆𑀓𑀦𑁆𑀢𑀺 𑀏𑀓𑀩𑀦𑁆𑀥𑀦𑀸 𑀤𑁆𑀯𑁂 𑀫𑀁𑀲𑀧𑀺𑀡𑁆𑀟𑀸. 𑀢𑀁 𑀯𑀡𑁆𑀡𑀢𑁄 𑀫𑀦𑁆𑀤𑀭𑀢𑁆𑀢𑀁 𑀧𑀸𑀴𑀺𑀪𑀤𑁆𑀤𑀓𑀝𑁆𑀞𑀺𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀤𑀸𑀭𑀓𑀸𑀦𑀁 𑀬𑀫𑀓𑀓𑀻𑀴𑀸𑀕𑁄𑀴𑀓𑀲𑀡𑁆𑀞𑀸𑀦𑀁, 𑀏𑀓𑀯𑀡𑁆𑀝𑀧𑀝𑀺𑀩𑀤𑁆𑀥𑀅𑀫𑁆𑀩𑀨𑀮𑀤𑁆𑀯𑀬𑀲𑀡𑁆𑀞𑀸𑀦𑀁 𑀯𑀸. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀕𑀮𑀯𑀸𑀝𑀓𑀸 𑀦𑀺𑀓𑁆𑀔𑀦𑁆𑀢𑁂𑀦 𑀏𑀓𑀫𑀽𑀮𑁂𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂𑀦 𑀣𑀽𑀮𑀦𑁆𑀳𑀸𑀭𑀼𑀦𑀸 𑀯𑀺𑀦𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀳𑀤𑀬𑀫𑀁𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀓𑁆𑀓𑀁 𑀯𑀓𑁆𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀳𑀤𑀬𑀦𑁆𑀢𑀺 𑀳𑀤𑀬𑀫𑀁𑀲𑀁. 𑀢𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀧𑀤𑀼𑀫𑀧𑀢𑁆𑀢𑀧𑀺𑀝𑁆𑀞𑀺𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀩𑀸𑀳𑀺𑀭𑀧𑀢𑁆𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 ¶ 𑀅𑀥𑁄𑀫𑀼𑀔𑀞𑀧𑀺𑀢𑀧𑀤𑀼𑀫𑀫𑀓𑀼𑀴𑀲𑀡𑁆𑀞𑀸𑀦𑀁. 𑀩𑀳𑀺 𑀫𑀝𑁆𑀞𑀁; 𑀅𑀦𑁆𑀢𑁄 𑀓𑁄𑀲𑀸𑀢𑀓𑀻𑀨𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀤𑀺𑀲𑀁. 𑀧𑀜𑁆𑀜𑀯𑀦𑁆𑀢𑀸𑀦𑀁 𑀣𑁄𑀓𑀁 𑀯𑀺𑀓𑀲𑀺𑀢𑀁, 𑀫𑀦𑁆𑀤𑀧𑀜𑁆𑀜𑀸𑀦𑀁 𑀫𑀓𑀼𑀴𑀺𑀢𑀫𑁂𑀯. 𑀅𑀦𑁆𑀢𑁄 𑀘𑀲𑁆𑀲 𑀧𑀼𑀦𑁆𑀦𑀸𑀕𑀝𑁆𑀞𑀺𑀧𑀢𑀺𑀝𑁆𑀞𑀸𑀦𑀫𑀢𑁆𑀢𑁄 𑀆𑀯𑀸𑀝𑀓𑁄 𑀳𑁄𑀢𑀺, 𑀬𑀢𑁆𑀣 𑀅𑀟𑁆𑀠𑀧𑀲𑀢𑀫𑀢𑁆𑀢𑀁 𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺; 𑀬𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺. 𑀢𑀁 𑀧𑀦𑁂𑀢𑀁 𑀭𑀸𑀕𑀘𑀭𑀺𑀢𑀲𑁆𑀲 ¶ 𑀭𑀢𑁆𑀢𑀁 𑀳𑁄𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀓𑀸𑀴𑀓𑀁, 𑀫𑁄𑀳𑀘𑀭𑀺𑀢𑀲𑁆𑀲 𑀫𑀁𑀲𑀥𑁄𑀯𑀦𑀼𑀤𑀓𑀲𑀤𑀺𑀲𑀁, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀓𑀼𑀮𑀢𑁆𑀣𑀬𑀽𑀲𑀯𑀡𑁆𑀡𑀁, 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁, 𑀧𑀜𑁆𑀜𑀸𑀘𑀭𑀺𑀢𑀲𑁆𑀲 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁 𑀧𑀡𑁆𑀟𑀭𑀁 𑀧𑀭𑀺𑀲𑀼𑀤𑁆𑀥𑀁 𑀦𑀺𑀤𑁆𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬 𑀚𑀼𑀢𑀺𑀫𑀦𑁆𑀢𑀁 𑀔𑀸𑀬𑀢𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀫𑀚𑁆𑀛𑁂 𑀧𑀢𑀺𑀝𑁆𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀳𑀤𑀬𑀁 𑀳𑀤𑀬𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀬𑀓𑀦𑀦𑁆𑀢𑀺 𑀬𑀫𑀓𑀫𑀁𑀲𑀧𑀝𑀮𑀁. 𑀢𑀁 𑀯𑀡𑁆𑀡𑀢𑁄 𑀭𑀢𑁆𑀢𑀧𑀡𑁆𑀟𑀼𑀓𑀥𑀸𑀢𑀼𑀓𑀁, 𑀦𑀸𑀢𑀺𑀭𑀢𑁆𑀢𑀓𑀼𑀫𑀼𑀤𑀲𑁆𑀲 𑀧𑀢𑁆𑀢𑀧𑀺𑀝𑁆𑀞𑀺𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀫𑀽𑀮𑁂 𑀏𑀓𑀁, 𑀅𑀕𑁆𑀕𑁂 𑀬𑀫𑀓𑀁 𑀓𑁄𑀯𑀺𑀴𑀸𑀭𑀧𑀢𑁆𑀢𑀲𑀡𑁆𑀞𑀸𑀦𑀁 ¶ . 𑀢𑀜𑁆𑀘 𑀤𑀦𑁆𑀥𑀸𑀦𑀁 𑀏𑀓𑀫𑁂𑀯 𑀳𑁄𑀢𑀺 𑀫𑀳𑀦𑁆𑀢𑀁, 𑀧𑀜𑁆𑀜𑀯𑀦𑁆𑀢𑀸𑀦𑀁 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀔𑀼𑀤𑁆𑀤𑀓𑀸𑀦𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀬𑀓𑀦𑀁 𑀬𑀓𑀦𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀓𑀺𑀮𑁄𑀫𑀓𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀪𑁂𑀤𑀢𑁄 𑀤𑀼𑀯𑀺𑀥𑀁 𑀧𑀭𑀺𑀬𑁄𑀦𑀳𑀦𑀫𑀁𑀲𑀁. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀯𑀡𑁆𑀡𑀢𑁄 𑀲𑁂𑀢𑀁, 𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀅𑀢𑁆𑀢𑀦𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀇𑀢𑀭𑀁 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀳𑀤𑀬𑀜𑁆𑀘 𑀯𑀓𑁆𑀓𑀜𑁆𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁. 𑀅𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀲𑀓𑀮𑀲𑀭𑀻𑀭𑁂 𑀘𑀫𑁆𑀫𑀲𑁆𑀲 𑀳𑁂𑀝𑁆𑀞𑀢𑁄 𑀫𑀁𑀲𑀁 𑀧𑀭𑀺𑀬𑁄𑀦𑀤𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀫𑀁𑀲𑁂𑀦, 𑀉𑀧𑀭𑀺 𑀘𑀫𑁆𑀫𑁂𑀦, 𑀢𑀺𑀭𑀺𑀬𑀁 𑀓𑀺𑀮𑁄𑀫𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀧𑀺𑀳𑀓𑀦𑁆𑀢𑀺 𑀉𑀤𑀭𑀚𑀺𑀯𑁆𑀳𑀸𑀫𑀁𑀲𑀁. 𑀢𑀁 𑀯𑀡𑁆𑀡𑀢𑁄 𑀦𑀻𑀮𑀁 𑀦𑀺𑀕𑁆𑀕𑀼𑀡𑁆𑀟𑀺𑀓𑀧𑀼𑀧𑁆𑀨𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀲𑀢𑁆𑀢𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀅𑀩𑀦𑁆𑀥𑀦𑀁 𑀓𑀸𑀴𑀯𑀘𑁆𑀙𑀓𑀚𑀺𑀯𑁆𑀳𑀸𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀳𑀤𑀬𑀲𑁆𑀲 𑀯𑀸𑀫𑀧𑀲𑁆𑀲𑁂 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁, 𑀬𑀲𑁆𑀫𑀺𑀁 𑀧𑀳𑀭𑀡𑀧𑁆𑀧𑀳𑀸𑀭𑁂𑀦 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑁄 𑀳𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 ¶ 𑀧𑀺𑀳𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀧𑀧𑁆𑀨𑀸𑀲𑀦𑁆𑀢𑀺 ¶ 𑀤𑁆𑀯𑀢𑁆𑀢𑀺𑀁𑀲𑀫𑀁𑀲𑀔𑀡𑁆𑀟𑀧𑁆𑀧𑀪𑁂𑀤𑀁 𑀧𑀧𑁆𑀨𑀸𑀲𑀫𑀁𑀲𑀁. 𑀢𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀦𑀸𑀢𑀺𑀧𑀓𑁆𑀓𑀉𑀤𑀼𑀫𑁆𑀩𑀭𑀨𑀮𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀯𑀺𑀲𑀫𑀘𑁆𑀙𑀺𑀦𑁆𑀦𑀩𑀳𑀮𑀧𑀽𑀯𑀔𑀡𑁆𑀟𑀲𑀡𑁆𑀞𑀸𑀦𑀁. 𑀅𑀩𑁆𑀪𑀦𑁆𑀢𑀭𑁂 𑀅𑀲𑀺𑀢𑀧𑀻𑀢𑀸𑀦𑀁 𑀅𑀪𑀸𑀯𑁂 𑀉𑀕𑁆𑀕𑀢𑁂𑀦 𑀓𑀫𑁆𑀫𑀚𑀢𑁂𑀚𑀼𑀲𑁆𑀫𑀦𑀸 𑀅𑀩𑁆𑀪𑀸𑀳𑀢𑀢𑁆𑀢𑀸 𑀲𑀗𑁆𑀔𑀸𑀤𑀺𑀢𑀧𑀮𑀸𑀮𑀧𑀺𑀡𑁆𑀟𑀫𑀺𑀯 𑀦𑀺𑀭𑀲𑀁 𑀦𑀺𑀭𑁄𑀚𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀫𑀦𑁆𑀢𑀭𑁂 𑀳𑀤𑀬𑀜𑁆𑀘 𑀬𑀓𑀦𑀜𑁆𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀁 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀨𑀧𑁆𑀨𑀸𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀅𑀦𑁆𑀢𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀳𑀢𑁆𑀣𑀸, 𑀇𑀢𑁆𑀣𑀺𑀬𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀸 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀑𑀪𑀕𑁆𑀕𑀸 𑀅𑀦𑁆𑀢𑀯𑀝𑁆𑀝𑀺. 𑀢𑀤𑁂𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡𑀁 ¶ . 𑀲𑀡𑁆𑀞𑀸𑀦𑀢𑁄 𑀮𑁄𑀳𑀺𑀢𑀤𑁄𑀡𑀺𑀬𑀁 𑀆𑀪𑀼𑀚𑀺𑀢𑁆𑀯𑀸 𑀞𑀧𑀺𑀢𑀲𑀻𑀲𑀘𑁆𑀙𑀺𑀦𑁆𑀦𑀲𑀧𑁆𑀧𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀧𑀭𑀺 𑀕𑀮𑀯𑀸𑀝𑀓𑁂 𑀳𑁂𑀝𑁆𑀞𑀸 𑀘 𑀓𑀭𑀻𑀲𑀫𑀕𑁆𑀕𑁂 𑀯𑀺𑀦𑀺𑀩𑀦𑁆𑀥𑀢𑁆𑀢𑀸 𑀕𑀮𑀯𑀸𑀝𑀓𑀓𑀭𑀻𑀲𑀫𑀕𑁆𑀕𑀧𑀭𑀺𑀬𑀦𑁆𑀢𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀅𑀦𑁆𑀢𑀕𑀼𑀡𑀦𑁆𑀢𑀺 𑀅𑀦𑁆𑀢𑀪𑁄𑀕𑀝𑁆𑀞𑀸𑀦𑁂𑀲𑀼 𑀩𑀦𑁆𑀥𑀦𑀁. 𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀤𑀓𑀲𑀻𑀢𑀮𑀺𑀓𑀫𑀽𑀮𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀤𑀓𑀲𑀻𑀢𑀮𑀺𑀓𑀫𑀽𑀮𑀲𑀡𑁆𑀞𑀸𑀦𑀫𑁂𑀯. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀓𑀼𑀤𑀸𑀴𑀨𑀭𑀲𑀼𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀁 𑀬𑀦𑁆𑀢𑀸𑀓𑀟𑁆𑀠𑀦𑀓𑀸𑀮𑁂 𑀬𑀦𑁆𑀢𑀲𑀼𑀢𑁆𑀢𑀫𑀺𑀯, 𑀬𑀦𑁆𑀢𑀨𑀮𑀓𑀸𑀦𑀺 𑀅𑀦𑁆𑀢𑀪𑁄𑀕𑁂 𑀏𑀓𑀢𑁄 𑀅𑀕𑀴𑀦𑁆𑀢𑁂 𑀆𑀩𑀦𑁆𑀥𑀺𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀲𑁆𑀲 𑀅𑀦𑁆𑀢𑀭𑀸 𑀢𑀁 𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀭𑀚𑁆𑀚𑀼𑀓𑀸 𑀯𑀺𑀬 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀦𑁆𑀢𑀪𑁄𑀕𑀸𑀦𑀁 𑀅𑀦𑁆𑀢𑀭𑀸 𑀞𑀺𑀢𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑀕𑀼𑀡𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀉𑀤𑀭𑀺𑀬𑀦𑁆𑀢𑀺 𑀉𑀤𑀭𑁂 𑀪𑀯𑀁 𑀅𑀲𑀺𑀢𑀧𑀺𑀢𑀔𑀸𑀬𑀺𑀢𑀲𑀸𑀬𑀺𑀢𑀁. 𑀢𑀁 𑀯𑀡𑁆𑀡𑀢𑁄 𑀅𑀚𑁆𑀛𑁄𑀳𑀝𑀸𑀳𑀸𑀭𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀧𑀭𑀺𑀲𑁆𑀲𑀸𑀯𑀦𑁂 𑀲𑀺𑀣𑀺𑀮𑀩𑀦𑁆𑀥𑀢𑀡𑁆𑀟𑀼𑀮𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀤𑀭𑁂 𑀞𑀺𑀢𑀁. 𑀉𑀤𑀭𑀁 𑀦𑀸𑀫 𑀉𑀪𑀢𑁄 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀲𑁆𑀲 ¶ 𑀅𑀮𑁆𑀮𑀲𑀸𑀝𑀓𑀲𑁆𑀲 𑀫𑀚𑁆𑀛𑁂 𑀲𑀜𑁆𑀚𑀸𑀢𑀨𑁄𑀝𑀓𑀲𑀤𑀺𑀲𑀁 𑀅𑀦𑁆𑀢𑀧𑀝𑀮𑀁; 𑀩𑀳𑀺 𑀫𑀝𑁆𑀞𑀁, 𑀅𑀦𑁆𑀢𑁄 𑀫𑀁𑀲𑀓𑀲𑀫𑁆𑀩𑀼𑀓𑀧𑀮𑀺𑀯𑁂𑀞𑀦𑀓𑀺𑀮𑀺𑀝𑁆𑀞𑀧𑀸𑀯𑀸𑀭𑀓𑀧𑀼𑀧𑁆𑀨𑀓𑀲𑀤𑀺𑀲𑀁, 𑀓𑀼𑀣𑀺𑀢𑀧𑀦𑀲𑀢𑀘𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀤𑀺𑀲𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺; 𑀬𑀢𑁆𑀣 𑀢𑀓𑁆𑀓𑁄𑀝𑀓𑀸, 𑀕𑀡𑁆𑀟𑀼𑀧𑁆𑀧𑀸𑀤𑀓𑀸, 𑀢𑀸𑀮𑀳𑀻𑀭𑀓𑀸, 𑀲𑀽𑀘𑀺𑀫𑀼𑀔𑀓𑀸, 𑀧𑀝𑀢𑀦𑁆𑀢𑀲𑀼𑀢𑁆𑀢𑀓𑀸 𑀇𑀘𑁆𑀘𑁂𑀯𑀫𑀸𑀤𑀺𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀧𑁆𑀧𑀪𑁂𑀤𑀸 𑀓𑀺𑀫𑀬𑁄 𑀆𑀓𑀼𑀮𑀩𑁆𑀬𑀸𑀓𑀼𑀮𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑁄 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀺; 𑀬𑁂 𑀧𑀸𑀦𑀪𑁄𑀚𑀦𑀸𑀤𑀺𑀫𑁆𑀳𑀺 𑀅𑀯𑀺𑀚𑁆𑀚𑀫𑀸𑀦𑁂 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀯𑀺𑀭𑀯𑀦𑁆𑀢𑀸 𑀳𑀤𑀬𑀫𑀁𑀲𑀁 𑀅𑀪𑀺𑀳𑀦𑀦𑁆𑀢𑀺, 𑀧𑀸𑀦𑀪𑁄𑀚𑀦𑀸𑀤𑀺𑀅𑀚𑁆𑀛𑁄𑀳𑀭𑀡𑀯𑁂𑀮𑀸𑀬 𑀘 𑀉𑀤𑁆𑀥𑀁𑀫𑀼𑀔𑀸 𑀳𑀼𑀢𑁆𑀯𑀸 𑀧𑀞𑀫𑀚𑁆𑀛𑁄𑀳𑀝𑁂 𑀤𑁆𑀯𑁂 𑀢𑀬𑁄 ¶ 𑀆𑀮𑁄𑀧𑁂 𑀢𑀼𑀭𑀺𑀢𑀢𑀼𑀭𑀺𑀢𑀸 𑀯𑀺𑀮𑀼𑀫𑁆𑀧𑀦𑁆𑀢𑀺; 𑀬𑀁 𑀢𑁂𑀲𑀁 𑀓𑀺𑀫𑀻𑀦𑀁 𑀲𑀽𑀢𑀺𑀖𑀭𑀁, 𑀯𑀘𑁆𑀘𑀓𑀼𑀝𑀺, 𑀕𑀺𑀮𑀸𑀦𑀲𑀸𑀮𑀸, 𑀲𑀼𑀲𑀸𑀦𑀜𑁆𑀘 𑀳𑁄𑀢𑀺.

𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑁂 𑀘𑀦𑁆𑀤𑀦𑀺𑀓𑀸𑀬 𑀦𑀺𑀤𑀸𑀖𑀲𑀫𑀬𑁂 𑀣𑀽𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀁 𑀫𑀼𑀢𑁆𑀢𑀓𑀭𑀻𑀲𑀘𑀫𑁆𑀫𑀅𑀝𑁆𑀞𑀺𑀦𑁆𑀳𑀸𑀭𑀼𑀔𑀡𑁆𑀟𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀮𑁄𑀳𑀺𑀢𑀧𑁆𑀧𑀪𑀼𑀢𑀺 𑀦𑀸𑀦𑀸𑀓𑀼𑀡𑀧𑀚𑀸𑀢𑀁 𑀦𑀺𑀧𑀢𑀺𑀢𑁆𑀯𑀸 𑀓𑀤𑁆𑀤𑀫𑁄𑀤𑀓𑀸𑀮𑀼𑀴𑀺𑀢𑀁 ¶ 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀲𑀜𑁆𑀚𑀸𑀢𑀓𑀺𑀫𑀺𑀓𑀼𑀮𑀁 𑀲𑀽𑀭𑀺𑀬𑀸𑀢𑀧𑀯𑁂𑀕𑀲𑀦𑁆𑀢𑀸𑀧𑀓𑀼𑀣𑀺𑀢𑀁 𑀉𑀧𑀭𑀺 𑀨𑁂𑀡𑀧𑀼𑀩𑁆𑀩𑀼𑀮𑀓𑁂 𑀫𑀼𑀜𑁆𑀘𑀦𑁆𑀢𑀁 𑀅𑀪𑀺𑀦𑀻𑀮𑀯𑀡𑁆𑀡𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀦𑁂𑀯 𑀉𑀧𑀕𑀦𑁆𑀢𑀼𑀁 𑀦 𑀤𑀝𑁆𑀞𑀼𑀁 𑀅𑀭𑀳𑀭𑀽𑀧𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀖𑀸𑀬𑀺𑀢𑀼𑀁 𑀯𑀸 𑀲𑀸𑀬𑀺𑀢𑀼𑀁 𑀯𑀸; 𑀏𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀧𑀸𑀦𑀪𑁄𑀚𑀦𑀸𑀤𑀺𑀤𑀦𑁆𑀢𑀫𑀼𑀲𑀮𑀲𑀜𑁆𑀘𑀼𑀡𑁆𑀡𑀺𑀢𑀁 𑀚𑀺𑀯𑁆𑀳𑀸𑀳𑀢𑁆𑀣𑀧𑀭𑀺𑀯𑀢𑁆𑀢𑀺𑀢𑀔𑁂𑀴𑀮𑀸𑀮𑀸𑀧𑀮𑀺𑀩𑀼𑀤𑁆𑀥𑀁 𑀢𑀗𑁆𑀔𑀡𑀯𑀺𑀕𑀢𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀺𑀲𑀫𑁆𑀧𑀤𑀁 𑀢𑀦𑁆𑀢𑀯𑀸𑀬𑀔𑀮𑀺𑀲𑀼𑀯𑀸𑀦𑀯𑀫𑀣𑀼𑀲𑀤𑀺𑀲𑀁 𑀦𑀺𑀧𑀢𑀺𑀢𑁆𑀯𑀸 𑀧𑀺𑀢𑁆𑀢𑀲𑁂𑀫𑁆𑀳𑀯𑀸𑀢𑀧𑀮𑀺𑀯𑁂𑀞𑀺𑀢𑀁 𑀳𑀼𑀢𑁆𑀯𑀸 𑀉𑀤𑀭𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀓𑀼𑀣𑀺𑀢𑀁 𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀉𑀧𑀭𑀽𑀧𑀭𑀺 𑀨𑁂𑀡𑀧𑀼𑀩𑁆𑀩𑀼𑀮𑀓𑀸𑀦𑀺 𑀫𑀼𑀜𑁆𑀘𑀦𑁆𑀢𑀁 𑀧𑀭𑀫𑀓𑀲𑀫𑁆𑀩𑀼𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀬𑀁 𑀲𑀼𑀢𑁆𑀯𑀸𑀧𑀺 𑀧𑀸𑀦𑀪𑁄𑀚𑀦𑀸𑀤𑀻𑀲𑀼 𑀅𑀫𑀦𑀼𑀜𑁆𑀜𑀢𑀸 𑀲𑀡𑁆𑀞𑀸𑀢𑀺, 𑀧𑀕𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀯𑀮𑁄𑀓𑁂𑀢𑁆𑀯𑀸, 𑀬𑀢𑁆𑀣 𑀘 𑀧𑀢𑀺𑀢𑀁 𑀧𑀸𑀦𑀪𑁄𑀚𑀦𑀸𑀤𑀺 𑀧𑀜𑁆𑀘𑀥𑀸 𑀯𑀺𑀪𑀸𑀕𑀁 𑀕𑀘𑁆𑀙𑀢𑀺 𑁋 𑀏𑀓𑀁 𑀪𑀸𑀕𑀁 𑀧𑀸𑀡𑀓𑀸 𑀔𑀸𑀤𑀦𑁆𑀢𑀺, 𑀏𑀓𑀁 𑀪𑀸𑀕𑀁 𑀉𑀤𑀭𑀕𑁆𑀕𑀺 𑀛𑀸𑀧𑁂𑀢𑀺, 𑀏𑀓𑁄 𑀪𑀸𑀕𑁄 𑀫𑀼𑀢𑁆𑀢𑀁 𑀳𑁄𑀢𑀺, 𑀏𑀓𑁄 𑀓𑀭𑀻𑀲𑀁, 𑀏𑀓𑁄 𑀭𑀲𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑁄𑀡𑀺𑀢𑀫𑀁𑀲𑀸𑀤𑀻𑀦𑀺 𑀉𑀧𑀩𑁆𑀭𑀽𑀳𑀬𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀉𑀤𑀭𑀧𑀝𑀮𑁂𑀦 ¶ 𑀘𑁂𑀯 𑀉𑀤𑀭𑀺𑀬𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀓𑀭𑀻𑀲𑀦𑁆𑀢𑀺 𑀯𑀘𑁆𑀘𑀁. 𑀢𑀁 𑀯𑀡𑁆𑀡𑀢𑁄 𑀬𑁂𑀪𑀼𑀬𑁆𑀬𑁂𑀦 𑀅𑀚𑁆𑀛𑁄𑀳𑀝𑀸𑀳𑀸𑀭𑀯𑀡𑁆𑀡𑀫𑁂𑀯 𑀳𑁄𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀧𑀓𑁆𑀓𑀸𑀲𑀬𑁂 𑀞𑀺𑀢𑀁. 𑀧𑀓𑁆𑀓𑀸𑀲𑀬𑁄 𑀦𑀸𑀫 𑀳𑁂𑀝𑁆𑀞𑀸 𑀦𑀸𑀪𑀺𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀽𑀮𑀸𑀦𑀫𑀦𑁆𑀢𑀭𑁂 𑀅𑀦𑁆𑀢𑀸𑀯𑀲𑀸𑀦𑁂 𑀉𑀩𑁆𑀩𑁂𑀥𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄 𑀯𑁂𑀴𑀼𑀦𑀸𑀴𑀺𑀓𑀲𑀤𑀺𑀲𑁄, 𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑀭𑀽𑀧𑀭𑀺 𑀪𑀽𑀫𑀺𑀪𑀸𑀕𑁂 𑀧𑀢𑀺𑀢𑀁 𑀯𑀲𑁆𑀲𑁄𑀤𑀓𑀁 𑀑𑀕𑀴𑀺𑀢𑁆𑀯𑀸 𑀳𑁂𑀝𑁆𑀞𑀸 𑀪𑀽𑀫𑀺𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀏𑀯𑀫𑁂𑀯 𑀬𑀁 𑀓𑀺𑀜𑁆𑀘𑀺 𑀆𑀫𑀸𑀲𑀬𑁂 𑀧𑀢𑀺𑀢𑀁 𑀧𑀸𑀦𑀪𑁄𑀚𑀦𑀸𑀤𑀺𑀓𑀁 𑀉𑀤𑀭𑀕𑁆𑀕𑀺𑀦𑀸 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀓𑁆𑀓𑀁 𑀧𑀓𑁆𑀓𑀁 𑀦𑀺𑀲𑀤𑀸𑀬 𑀧𑀺𑀲𑀺𑀢𑀫𑀺𑀯 𑀲𑀡𑁆𑀳𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀩𑀺𑀮𑁂𑀦 𑀑𑀕𑀴𑀺𑀢𑁆𑀯𑀸 𑀑𑀕𑀴𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀯𑁂𑀴𑀼𑀧𑀩𑁆𑀩𑁂 𑀧𑀓𑁆𑀔𑀺𑀧𑀫𑀸𑀦𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀯𑀺𑀬 𑀲𑀦𑁆𑀦𑀺𑀘𑀺𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀓𑁆𑀓𑀸𑀲𑀬𑀧𑀝𑀮𑁂𑀦 𑀘𑁂𑀯 𑀓𑀭𑀻𑀲𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 ¶ 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢𑀫𑀺𑀜𑁆𑀚𑀭𑀸𑀲𑀺. 𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀅𑀳𑀺𑀘𑁆𑀙𑀢𑁆𑀢𑀓𑀧𑀺𑀡𑁆𑀟𑀺𑀓𑀯𑀡𑁆𑀡𑀁, 𑀤𑀥𑀺𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀤𑀼𑀝𑁆𑀞𑀔𑀻𑀭𑀯𑀡𑁆𑀡𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 ¶ 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀘𑀢𑁆𑀢𑀸𑀭𑁄 𑀲𑀺𑀩𑁆𑀩𑀺𑀦𑀺𑀫𑀕𑁆𑀕𑁂 𑀦𑀺𑀲𑁆𑀲𑀸𑀬 𑀲𑀫𑁄𑀥𑀸𑀦𑁂𑀢𑁆𑀯𑀸 𑀞𑀧𑀺𑀢𑀸 𑀘𑀢𑁆𑀢𑀸𑀭𑁄 𑀧𑀺𑀝𑁆𑀞𑀧𑀺𑀡𑁆𑀟𑀸 𑀯𑀺𑀬 𑀲𑀫𑁄𑀳𑀺𑀢𑀁 𑀢𑀺𑀝𑁆𑀞𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀲𑀻𑀲𑀓𑀝𑀸𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑀢𑀮𑁂𑀳𑀺 𑀘𑁂𑀯 𑀫𑀢𑁆𑀣𑀮𑀼𑀗𑁆𑀕𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀧𑀺𑀢𑁆𑀢𑀦𑁆𑀢𑀺 𑀤𑁆𑀯𑁂 𑀧𑀺𑀢𑁆𑀢𑀸𑀦𑀺 𑁋 𑀩𑀤𑁆𑀥𑀧𑀺𑀢𑁆𑀢𑀜𑁆𑀘 𑀅𑀩𑀤𑁆𑀥𑀧𑀺𑀢𑁆𑀢𑀜𑁆𑀘. 𑀢𑀢𑁆𑀣 𑀩𑀤𑁆𑀥𑀧𑀺𑀢𑁆𑀢𑀁 𑀯𑀡𑁆𑀡𑀢𑁄 𑀩𑀳𑀮𑀫𑀥𑀼𑀓𑀢𑁂𑀮𑀯𑀡𑁆𑀡𑀁, 𑀅𑀩𑀤𑁆𑀥𑀧𑀺𑀢𑁆𑀢𑀁 𑀫𑀺𑀮𑀸𑀢𑀆𑀓𑀼𑀮𑀺𑀢𑀧𑀼𑀧𑁆𑀨𑀯𑀡𑁆𑀡𑀁. 𑀢𑀁 𑀲𑀡𑁆𑀞𑀸𑀦𑀢𑁄 𑀉𑀪𑀬𑀫𑁆𑀧𑀺 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀩𑀤𑁆𑀥𑀧𑀺𑀢𑁆𑀢𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁, 𑀇𑀢𑀭𑀁 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀩𑀤𑁆𑀥𑀧𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀓𑁂𑀲𑀮𑁄𑀫𑀤𑀦𑁆𑀢𑀦𑀔𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘𑁂𑀯 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀉𑀤𑀓𑀫𑀺𑀯 𑀢𑁂𑀮𑀩𑀺𑀦𑁆𑀤𑀼𑀁 𑀅𑀯𑀲𑁂𑀲𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁, 𑀬𑀫𑁆𑀳𑀺 𑀓𑀼𑀧𑀺𑀢𑁂 𑀅𑀓𑁆𑀔𑀻𑀦𑀺 𑀧𑀻𑀢𑀓𑀸𑀦𑀺 𑀳𑁄𑀦𑁆𑀢𑀺 𑀪𑀫𑀦𑁆𑀢𑀺, 𑀕𑀢𑁆𑀢𑀁 𑀓𑀫𑁆𑀧𑀢𑀺 𑀓𑀡𑁆𑀟𑀼𑀬𑀢𑀺. 𑀩𑀤𑁆𑀥𑀧𑀺𑀢𑁆𑀢𑀁 𑀳𑀤𑀬𑀧𑀧𑁆𑀨𑀸𑀲𑀸𑀦𑀫𑀦𑁆𑀢𑀭𑁂 𑀬𑀓𑀦𑀫𑀁𑀲𑀁 ¶ 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀺𑀢𑁂 𑀫𑀳𑀸𑀓𑁄𑀲𑀸𑀢𑀓𑀻𑀓𑁄𑀲𑀓𑀲𑀤𑀺𑀲𑁂 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀁, 𑀬𑀫𑁆𑀳𑀺 𑀓𑀼𑀧𑀺𑀢𑁂 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀙𑀟𑁆𑀟𑁂𑀢𑁆𑀯𑀸 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀺, 𑀅𑀪𑀸𑀲𑀺𑀢𑀩𑁆𑀩𑀁 𑀪𑀸𑀲𑀦𑁆𑀢𑀺, 𑀅𑀘𑀺𑀦𑁆𑀢𑁂𑀢𑀩𑁆𑀩𑀁 𑀘𑀺𑀦𑁆𑀢𑁂𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀺𑀢𑁆𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀲𑁂𑀫𑁆𑀳𑀦𑁆𑀢𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀏𑀓𑀧𑀢𑁆𑀢𑀧𑀽𑀭𑀧𑁆𑀧𑀫𑀸𑀡𑀁 𑀲𑁂𑀫𑁆𑀳𑀁. 𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀦𑀸𑀕𑀩𑀮𑀧𑀡𑁆𑀡𑀭𑀲𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀤𑀭𑀧𑀝𑀮𑁂 𑀞𑀺𑀢𑀁, 𑀬𑀁 𑀧𑀸𑀦𑀪𑁄𑀚𑀦𑀸𑀤𑀻𑀦𑀺 𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀤𑀓𑁂 𑀲𑁂𑀯𑀸𑀮𑀧𑀡𑀓𑀁 𑀓𑀝𑁆𑀞𑁂 𑀯𑀸 𑀓𑀧𑀸𑀮𑁂 𑀯𑀸 𑀧𑀢𑀦𑁆𑀢𑁂 𑀙𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀧𑀸𑀦𑀪𑁄𑀚𑀦𑀸𑀤𑀺𑀫𑁆𑀳𑀺 𑀦𑀺𑀧𑀢𑀦𑁆𑀢𑁂 𑀙𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀬𑀫𑁆𑀳𑀺 𑀘 𑀫𑀦𑁆𑀤𑀻𑀪𑀽𑀢𑁂 𑀧𑀓𑁆𑀓𑀕𑀡𑁆𑀟𑁄 𑀯𑀺𑀬 𑀧𑀽𑀢𑀺𑀓𑀼𑀓𑁆𑀓𑀼𑀝𑀡𑁆𑀟𑀫𑀺𑀯 𑀘 𑀉𑀤𑀭𑀁 𑀧𑀭𑀫𑀚𑁂𑀕𑀼𑀘𑁆𑀙𑀁 𑀓𑀼𑀡𑀧𑀕𑀦𑁆𑀥𑀁 𑀳𑁄𑀢𑀺; 𑀢𑀢𑁄 𑀉𑀕𑁆𑀕𑀢𑁂𑀦 𑀘 𑀕𑀦𑁆𑀥𑁂𑀦 𑀉𑀤𑁆𑀤𑁂𑀓𑁄𑀧𑀺 𑀫𑀼𑀔𑀫𑁆𑀧𑀺 𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀼𑀡𑀧𑀲𑀤𑀺𑀲𑀁 𑀳𑁄𑀢𑀺; 𑀲𑁄 𑀘 𑀧𑀼𑀭𑀺𑀲𑁄 ‘𑀅𑀧𑁂𑀳𑀺, 𑀤𑀼𑀕𑁆𑀕𑀦𑁆𑀥𑀁 𑀯𑀸𑀬𑀲𑀻’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺; 𑀬𑀜𑁆𑀘 𑀯𑀟𑁆𑀠𑀺𑀢𑁆𑀯𑀸 𑀩𑀳𑀮𑀢𑁆𑀢𑀫𑀸𑀧𑀦𑁆𑀦𑀁 𑀧𑀺𑀥𑀸𑀦𑀨𑀮𑀓𑀫𑀺𑀯 𑀯𑀘𑁆𑀘𑀓𑀼𑀝𑀺𑀬𑀸 𑀉𑀤𑀭𑀧𑀝𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀓𑀼𑀡𑀧𑀕𑀦𑁆𑀥𑀁 𑀲𑀦𑁆𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 ¶ 𑀲𑁂𑀫𑁆𑀳𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀧𑀼𑀩𑁆𑀩𑁄𑀢𑀺 ¶ 𑀧𑀽𑀢𑀺𑀮𑁄𑀳𑀺𑀢𑀯𑀲𑁂𑀦 𑀧𑀯𑀢𑁆𑀢𑀧𑀼𑀩𑁆𑀩𑁄. 𑀲𑁄 𑀯𑀡𑁆𑀡𑀢𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑁄, 𑀫𑀢𑀓𑀲𑀭𑀻𑀭𑁂 𑀧𑀦 𑀧𑀽𑀢𑀺𑀩𑀳𑀮𑀸𑀘𑀸𑀫𑀯𑀡𑁆𑀡𑁄 𑀳𑁄𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀧𑀦 𑀧𑀼𑀩𑁆𑀩𑀲𑁆𑀲 𑀑𑀓𑀸𑀲𑁄 𑀦𑀸𑀫 𑀦𑀺𑀩𑀤𑁆𑀥𑁄 𑀦𑀢𑁆𑀣𑀺 𑀬𑀢𑁆𑀣 𑀲𑁄 𑀲𑀦𑁆𑀦𑀺𑀘𑀺𑀢𑁄 𑀢𑀺𑀝𑁆𑀞𑁂𑀬𑁆𑀬; 𑀬𑀢𑁆𑀭 𑀬𑀢𑁆𑀭 𑀧𑀦 𑀔𑀸𑀡𑀼𑀓𑀡𑁆𑀝𑀓𑀧𑁆𑀧𑀳𑀭𑀡𑀕𑁆𑀕𑀺𑀚𑀸𑀮𑀸𑀤𑀻𑀳𑀺 𑀅𑀪𑀺𑀳𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀮𑁄𑀳𑀺𑀢𑀁 𑀲𑀡𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀢𑀺, 𑀕𑀡𑁆𑀟𑀧𑀺𑀴𑀓𑀸𑀤𑀬𑁄 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀢𑀺𑀝𑁆𑀞𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 ¶ . 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀮𑁄𑀳𑀺𑀢𑀦𑁆𑀢𑀺 𑀤𑁆𑀯𑁂 𑀮𑁄𑀳𑀺𑀢𑀸𑀦𑀺 𑁋 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀜𑁆𑀘 𑀲𑀁𑀲𑀭𑀡𑀮𑁄𑀳𑀺𑀢𑀜𑁆𑀘. 𑀢𑀢𑁆𑀣 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀯𑀡𑁆𑀡𑀢𑁄 𑀦𑀺𑀧𑀓𑁆𑀓𑀩𑀳𑀮𑀮𑀸𑀔𑀸𑀭𑀲𑀯𑀡𑁆𑀡𑀁, 𑀲𑀁𑀲𑀭𑀡𑀮𑁄𑀳𑀺𑀢𑀁 𑀅𑀘𑁆𑀙𑀮𑀸𑀔𑀸𑀭𑀲𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀉𑀪𑀬𑀫𑁆𑀧𑀺 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁, 𑀇𑀢𑀭𑀁 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀁𑀲𑀭𑀡𑀮𑁄𑀳𑀺𑀢𑀁, 𑀞𑀧𑁂𑀢𑁆𑀯𑀸 𑀓𑁂𑀲𑀮𑁄𑀫𑀤𑀦𑁆𑀢𑀦𑀔𑀸𑀦𑀁 𑀫𑀁𑀲𑀯𑀺𑀦𑀺𑀫𑁆𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘𑁂𑀯 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘, 𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀁 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁; 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀬𑀓𑀦𑀝𑁆𑀞𑀸𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀏𑀓𑀧𑀢𑁆𑀢𑀧𑀽𑀭𑀫𑀢𑁆𑀢𑀁 𑀳𑀤𑀬𑀯𑀓𑁆𑀓𑀧𑀧𑁆𑀨𑀸𑀲𑀸𑀦𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀧𑀕𑁆𑀖𑀭𑀦𑁆𑀢𑀁 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑁂 𑀢𑁂𑀫𑀬𑀫𑀸𑀦𑀁 𑀞𑀺𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀯𑀓𑁆𑀓𑀳𑀤𑀬𑀸𑀤𑀻𑀦𑀺 𑀅𑀢𑁂𑀫𑁂𑀦𑁆𑀢𑁂 𑀲𑀢𑁆𑀢𑀸 𑀧𑀺𑀧𑀸𑀲𑀺𑀢𑀸 𑀳𑁄𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀮𑁄𑀳𑀺𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀲𑁂𑀤𑁄𑀢𑀺 𑀮𑁄𑀫𑀓𑀽𑀧𑀸𑀤𑀻𑀳𑀺 𑀧𑀕𑁆𑀖𑀭𑀡𑀓𑀆𑀧𑁄𑀥𑀸𑀢𑀼. 𑀲𑁄 𑀯𑀡𑁆𑀡𑀢𑁄 𑀯𑀺𑀧𑁆𑀧𑀲𑀦𑁆𑀦𑀢𑀺𑀮𑀢𑁂𑀮𑀯𑀡𑁆𑀡𑁄. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀲𑁂𑀤𑀲𑁆𑀲𑁄𑀓𑀸𑀲𑁄 𑀦𑀸𑀫 𑀦𑀺𑀩𑀤𑁆𑀥𑁄 𑀦𑀢𑁆𑀣𑀺, 𑀬𑀢𑁆𑀣 𑀲𑁄 𑀮𑁄𑀳𑀺𑀢𑀁 𑀯𑀺𑀬 𑀲𑀤𑀸 𑀢𑀺𑀝𑁆𑀞𑁂𑀬𑁆𑀬; 𑀬𑀤𑀸 𑀧𑀦 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑀽𑀭𑀺𑀬𑀲𑀦𑁆𑀢𑀸𑀧𑀉𑀢𑀼𑀯𑀺𑀓𑀸𑀭𑀸𑀤𑀻𑀳𑀺 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑀢𑀺 𑀢𑀤𑀸 𑀉𑀤𑀓𑀢𑁄 𑀅𑀩𑁆𑀩𑀼𑀴𑁆𑀳𑀫𑀢𑁆𑀢𑀯𑀺𑀲𑀫𑀘𑁆𑀙𑀺𑀦𑁆𑀦𑀪𑀺𑀲𑀫𑀽𑀴𑀸𑀮𑀓𑀼𑀫𑀼𑀤𑀦𑀸𑀴𑀓𑀮𑀸𑀧𑁄 𑀯𑀺𑀬 𑀲𑀩𑁆𑀩𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀲𑀡𑁆𑀞𑀸𑀦𑀫𑁆𑀧𑀺 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀁𑀬𑁂𑀯 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀤𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀺𑀦𑀸 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑀲𑁂𑀦𑁂𑀯 𑀲𑁂𑀤𑁄 𑀫𑀦𑀲𑀺𑀓𑀸𑀢𑀩𑁆𑀩𑁄. 𑀧𑀭𑀺𑀘𑁆𑀙𑁂𑀤𑀢𑁄 𑀲𑁂𑀤𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀫𑁂𑀤𑁄𑀢𑀺 ¶ ¶ 𑀣𑀺𑀦𑀲𑀺𑀦𑁂𑀳𑁄. 𑀲𑁄 𑀯𑀡𑁆𑀡𑀢𑁄 𑀨𑀸𑀮𑀺𑀢𑀳𑀮𑀺𑀤𑁆𑀤𑀺𑀯𑀡𑁆𑀡𑁄. 𑀲𑀡𑁆𑀞𑀸𑀦𑀢𑁄 𑀣𑀽𑀮𑀲𑀭𑀻𑀭𑀲𑁆𑀲 𑀢𑀸𑀯 𑀘𑀫𑁆𑀫𑀫𑀁𑀲𑀦𑁆𑀢𑀭𑁂 𑀞𑀧𑀺𑀢𑀳𑀮𑀺𑀤𑁆𑀤𑀺𑀯𑀡𑁆𑀡𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀲𑀡𑁆𑀞𑀸𑀦𑁄 𑀳𑁄𑀢𑀺, 𑀓𑀺𑀲𑀲𑀭𑀻𑀭𑀲𑁆𑀲 𑀚𑀗𑁆𑀖𑀫𑀁𑀲𑀁 𑀊𑀭𑀼𑀫𑀁𑀲𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀦𑀺𑀲𑁆𑀲𑀺𑀢𑀁 𑀧𑀺𑀝𑁆𑀞𑀫𑀁𑀲𑀁 𑀉𑀤𑀭𑀯𑀝𑁆𑀝𑀺𑀫𑀁𑀲𑀦𑁆𑀢𑀺 𑀏𑀢𑀸𑀦𑀺 𑀦𑀺𑀲𑁆𑀲𑀸𑀬 𑀤𑀺𑀕𑀼𑀡𑀁 𑀢𑀺𑀕𑀼𑀡𑀁 𑀓𑀢𑁆𑀯𑀸 𑀞𑀧𑀺𑀢𑀳𑀮𑀺𑀤𑁆𑀤𑀺𑀯𑀡𑁆𑀡𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 ¶ 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀣𑀽𑀮𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸, 𑀓𑀺𑀲𑀲𑁆𑀲 𑀚𑀗𑁆𑀖𑀫𑀁𑀲𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀞𑀺𑀢𑁄, 𑀬𑀁 𑀲𑀺𑀦𑁂𑀳𑀲𑀗𑁆𑀔𑀁 𑀕𑀢𑀫𑁆𑀧𑀺 𑀧𑀭𑀫𑀚𑁂𑀕𑀼𑀘𑁆𑀙𑀢𑁆𑀢𑀸 𑀦𑁂𑀯 𑀫𑀼𑀤𑁆𑀥𑀦𑀺 𑀢𑁂𑀮𑀢𑁆𑀣𑀸𑀬, 𑀦 𑀦𑀸𑀲𑀸𑀢𑁂𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀫𑀁𑀲𑁂𑀦, 𑀉𑀧𑀭𑀺 𑀘𑀫𑁆𑀫𑁂𑀦, 𑀢𑀺𑀭𑀺𑀬𑀁 𑀫𑁂𑀤𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀅𑀲𑁆𑀲𑀽𑀢𑀺 𑀅𑀓𑁆𑀔𑀻𑀳𑀺 𑀧𑀕𑁆𑀥𑀭𑀡𑀓𑀆𑀧𑁄𑀥𑀸𑀢𑀼. 𑀢𑀁 𑀯𑀡𑁆𑀡𑀢𑁄 𑀯𑀺𑀧𑁆𑀧𑀲𑀦𑁆𑀦𑀢𑀺𑀮𑀢𑁂𑀮𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀞𑀺𑀢𑀁. 𑀦 𑀘𑁂𑀢𑀁 𑀧𑀺𑀢𑁆𑀢𑀓𑁄𑀲𑀓𑁂 𑀧𑀺𑀢𑁆𑀢𑀫𑀺𑀯 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀲𑀤𑀸 𑀲𑀦𑁆𑀦𑀺𑀘𑀺𑀢𑀁 𑀢𑀺𑀝𑁆𑀞𑀢𑀺; 𑀬𑀤𑀸 𑀧𑀦 𑀲𑀢𑁆𑀢𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺, 𑀤𑁄𑀫𑀦𑀲𑁆𑀲𑀚𑀸𑀢𑀸 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀢𑀣𑀸𑀭𑀽𑀧𑀁 𑀯𑀺𑀲𑀪𑀸𑀕𑀸𑀳𑀸𑀭𑀁 𑀆𑀳𑀭𑀦𑁆𑀢𑀺, 𑀬𑀤𑀸 𑀘 𑀦𑁂𑀲𑀁 𑀅𑀓𑁆𑀔𑀻𑀦𑀺 𑀥𑀽𑀫𑀭𑀚𑀧𑀁𑀲𑀼𑀓𑀸𑀤𑀻𑀳𑀺 𑀅𑀪𑀺𑀳𑀜𑁆𑀜𑀦𑁆𑀢𑀺, 𑀢𑀤𑀸 𑀏𑀢𑁂𑀳𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀯𑀺𑀲𑀪𑀸𑀕𑀸𑀳𑀸𑀭𑀉𑀢𑀽𑀳𑀺 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀓𑁆𑀔𑀺𑀓𑀽𑀧𑀓𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀅𑀲𑁆𑀲𑀼𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀧𑀦 𑀬𑁄𑀕𑀺𑀦𑀸 𑀅𑀓𑁆𑀔𑀺𑀓𑀽𑀧𑀓𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑀲𑁂𑀦𑁂𑀯 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀲𑁆𑀲𑀼𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀯𑀲𑀸𑀢𑀺 𑀯𑀺𑀮𑀻𑀦𑀲𑁆𑀦𑁂𑀳𑁄. 𑀲𑀸 𑀯𑀡𑁆𑀡𑀢𑁄 𑀦𑀸𑀴𑀺𑀓𑁂𑀭𑀢𑁂𑀮𑀯𑀡𑁆𑀡𑀸, 𑀆𑀘𑀸𑀫𑁂 𑀆𑀲𑀺𑀢𑁆𑀢𑀢𑁂𑀮𑀯𑀡𑁆𑀡𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀡𑁆𑀞𑀸𑀦𑀢𑁄 𑀦𑁆𑀳𑀸𑀦𑀓𑀸𑀮𑁂 𑀧𑀲𑀦𑁆𑀦𑀉𑀤𑀓𑀲𑁆𑀲 𑀉𑀧𑀭𑀺 𑀧𑀭𑀺𑀩𑁆𑀪𑀫𑀦𑁆𑀢𑀲𑀺𑀦𑁂𑀳𑀩𑀺𑀦𑁆𑀤𑀼𑀯𑀺𑀲𑀝𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀑𑀓𑀸𑀲𑀢𑁄 𑀬𑁂𑀪𑀼𑀬𑁆𑀬𑁂𑀦 𑀳𑀢𑁆𑀣𑀢𑀮𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀢𑀮𑀧𑀸𑀤𑀧𑀺𑀝𑁆𑀞𑀺𑀦𑀸𑀲𑀸𑀧𑀼𑀝𑀦𑀮𑀸𑀝𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀸. 𑀦 𑀘𑁂𑀲𑀸 𑀏𑀢𑁂𑀲𑀼 𑀑𑀓𑀸𑀲𑁂𑀲𑀼 𑀲𑀤𑀸 𑀯𑀺𑀮𑀻𑀦𑀸𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀬𑀤𑀸 𑀧𑀦 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑀽𑀭𑀺𑀬𑀲𑀦𑁆𑀢𑀸𑀧𑀉𑀢𑀼𑀯𑀺𑀲𑀪𑀸𑀕𑀥𑀸𑀢𑀼𑀯𑀺𑀲𑀪𑀸𑀕𑁂𑀳𑀺 𑀢𑁂 𑀧𑀤𑁂𑀲𑀸 𑀉𑀲𑁆𑀫𑀸 𑀚𑀸𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑀢𑁆𑀣 𑀦𑁆𑀳𑀸𑀦𑀓𑀸𑀮𑁂 𑀧𑀲𑀦𑁆𑀦𑀉𑀤𑀓𑀽𑀧𑀭𑀺 𑀲𑀺𑀦𑁂𑀳𑀩𑀺𑀦𑁆𑀤𑀼𑀯𑀺𑀲𑀝𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀭𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀲𑀸𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 ¶ . 𑀅𑀬𑀫𑀲𑁆𑀲𑀸 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀔𑁂𑀴𑁄𑀢𑀺 ¶ 𑀅𑀦𑁆𑀢𑁄𑀫𑀼𑀔𑁂 𑀨𑁂𑀡𑀫𑀺𑀲𑁆𑀲𑀸 𑀆𑀧𑁄𑀥𑀸𑀢𑀼. 𑀲𑁄 𑀯𑀡𑁆𑀡𑀢𑁄 𑀲𑁂𑀢𑁄 𑀨𑁂𑀡𑀯𑀡𑁆𑀡𑁄. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄, 𑀨𑁂𑀡𑀲𑀡𑁆𑀞𑀸𑀦𑀢𑁄𑀢𑀺𑀧𑀺 ¶ 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑁄. 𑀑𑀓𑀸𑀲𑀢𑁄 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑀼𑀬𑁆𑀳 𑀚𑀺𑀯𑁆𑀳𑀸𑀬 𑀞𑀺𑀢𑁄. 𑀦 𑀘𑁂𑀲 𑀏𑀢𑁆𑀣 𑀲𑀤𑀸 𑀲𑀦𑁆𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀤𑀸 𑀧𑀦 𑀲𑀢𑁆𑀢𑀸 𑀢𑀣𑀸𑀭𑀽𑀧𑀁 𑀆𑀳𑀸𑀭𑀁 𑀧𑀲𑁆𑀲𑀦𑁆𑀢𑀺 𑀯𑀸 𑀲𑀭𑀦𑁆𑀢𑀺 𑀯𑀸 𑀉𑀡𑁆𑀳𑀢𑀺𑀢𑁆𑀢𑀓𑀝𑀼𑀓𑀮𑁄𑀡𑀫𑁆𑀩𑀺𑀮𑀸𑀦𑀁 𑀯𑀸 𑀓𑀺𑀜𑁆𑀘𑀺 𑀫𑀼𑀔𑁂 𑀞𑀧𑁂𑀦𑁆𑀢𑀺, 𑀬𑀤𑀸 𑀯𑀸 𑀦𑁂𑀲𑀁 𑀳𑀤𑀬𑀁 𑀆𑀓𑀺𑀮𑀸𑀬𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀸 𑀚𑀺𑀕𑀼𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀔𑁂𑀴𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑀼𑀬𑁆𑀳 𑀚𑀺𑀯𑁆𑀳𑀸𑀬 𑀲𑀡𑁆𑀞𑀸𑀢𑀺. 𑀅𑀕𑁆𑀕𑀚𑀺𑀯𑁆𑀳𑀸𑀬 𑀘𑁂𑀲 𑀢𑀦𑀼𑀓𑁄 𑀳𑁄𑀢𑀺, 𑀫𑀽𑀮𑀚𑀺𑀯𑁆𑀳𑀸𑀬 𑀩𑀳𑀮𑁄; 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀜𑁆𑀘 𑀧𑀼𑀣𑀼𑀓𑀁 𑀯𑀸 𑀢𑀡𑁆𑀟𑀼𑀮𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁, 𑀦𑀤𑀻𑀧𑀼𑀴𑀺𑀦𑁂 𑀔𑀢𑀓𑀽𑀧𑀓𑀲𑀮𑀺𑀮𑀁 𑀯𑀺𑀬, 𑀧𑀭𑀺𑀓𑁆𑀔𑀬𑀁 𑀅𑀕𑀘𑁆𑀙𑀦𑁆𑀢𑁄𑀯 𑀢𑁂𑀫𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀔𑁂𑀴𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀫𑀢𑁆𑀣𑀮𑀼𑀗𑁆𑀕𑀢𑁄 𑀧𑀕𑁆𑀖𑀭𑀡𑀓𑀅𑀲𑀼𑀘𑀺. 𑀲𑀸 𑀯𑀡𑁆𑀡𑀢𑁄 𑀢𑀭𑀼𑀡𑀢𑀸𑀮𑀝𑁆𑀞𑀺𑀫𑀺𑀜𑁆𑀚𑀯𑀡𑁆𑀡𑀸. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀸. 𑀑𑀓𑀸𑀲𑀢𑁄 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸. 𑀦 𑀘𑁂𑀲𑀸 𑀏𑀢𑁆𑀣 𑀲𑀤𑀸 𑀲𑀦𑁆𑀦𑀺𑀘𑀺𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀅𑀣 𑀔𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀧𑀤𑀼𑀫𑀺𑀦𑀻𑀧𑀢𑁆𑀢𑁂𑀦 𑀤𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀳𑁂𑀝𑁆𑀞𑀸 𑀓𑀡𑁆𑀝𑀓𑁂𑀦 𑀯𑀺𑀚𑁆𑀛𑁂𑀬𑁆𑀬, 𑀅𑀣 𑀢𑁂𑀦 𑀙𑀺𑀤𑁆𑀤𑁂𑀦 𑀤𑀥𑀺𑀫𑀢𑁆𑀣𑀼 𑀕𑀴𑀺𑀢𑁆𑀯𑀸 𑀩𑀳𑀺 𑀧𑀢𑁂𑀬𑁆𑀬, 𑀏𑀯𑀫𑁂𑀯 𑀬𑀤𑀸 𑀲𑀢𑁆𑀢𑀸 𑀭𑁄𑀤𑀦𑁆𑀢𑀺 𑀯𑀸 𑀯𑀺𑀲𑀪𑀸𑀕𑀸𑀳𑀸𑀭𑀉𑀢𑀼𑀯𑀲𑁂𑀦 𑀯𑀸 𑀲𑀜𑁆𑀚𑀸𑀢𑀥𑀸𑀢𑀼𑀓𑁆𑀔𑁄𑀪𑀸 𑀳𑁄𑀦𑁆𑀢𑀺, 𑀢𑀤𑀸 𑀅𑀦𑁆𑀢𑁄𑀲𑀻𑀲𑀢𑁄 𑀧𑀽𑀢𑀺𑀲𑁂𑀫𑁆𑀳𑀪𑀸𑀯𑀁 𑀆𑀧𑀦𑁆𑀦𑀁 𑀫𑀢𑁆𑀣𑀮𑀼𑀗𑁆𑀕𑀁 𑀕𑀴𑀺𑀢𑁆𑀯𑀸 𑀢𑀸𑀮𑀼𑀫𑀢𑁆𑀣𑀓𑀯𑀺𑀯𑀭𑁂𑀦 𑀑𑀢𑀭𑀺𑀢𑁆𑀯𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀧𑀕𑁆𑀖𑀭𑀢𑀺 𑀯𑀸. 𑀲𑀺𑀗𑁆𑀖𑀸𑀡𑀺𑀓𑀸 𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀧𑀦 𑀬𑁄𑀕𑀺𑀦𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑀲𑁂𑀦𑁂𑀯 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸. 𑀧𑀭𑀺𑀘𑁆𑀙𑁂𑀤𑀢𑁄 𑀲𑀺𑀗𑁆𑀖𑀸𑀡𑀺𑀓𑀸𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀮𑀲𑀺𑀓𑀸𑀢𑀺 𑀲𑀭𑀻𑀭𑀲𑀦𑁆𑀥𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀺𑀘𑁆𑀙𑀺𑀮𑀓𑀼𑀡𑀧𑀁. 𑀲𑀸 𑀯𑀡𑁆𑀡𑀢𑁄 𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑀯𑀡𑁆𑀡𑀸. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀑𑀓𑀸𑀲𑀢𑁄 𑀅𑀝𑁆𑀞𑀺𑀲𑀦𑁆𑀥𑀻𑀦𑀁 𑀅𑀩𑁆𑀪𑀜𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀲𑀻𑀢𑀺𑀲𑀢𑀲𑀦𑁆𑀥𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀸. 𑀬𑀲𑁆𑀲 𑀘𑁂𑀲𑀸 𑀫𑀦𑁆𑀤𑀸 𑀳𑁄𑀢𑀺, 𑀢𑀲𑁆𑀲 𑀉𑀝𑁆𑀞𑀳𑀦𑁆𑀢𑀲𑁆𑀲 ¶ 𑀦𑀺𑀲𑀻𑀤𑀦𑁆𑀢𑀲𑁆𑀲 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀲𑀫𑁆𑀫𑀺𑀜𑁆𑀚𑀦𑁆𑀢𑀲𑁆𑀲 𑀧𑀲𑀸𑀭𑁂𑀦𑁆𑀢𑀲𑁆𑀲 𑀅𑀝𑁆𑀞𑀺𑀓𑀸𑀦𑀺 𑀓𑀝𑀓𑀝𑀸𑀬𑀦𑁆𑀢𑀺, 𑀅𑀘𑁆𑀙𑀭𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀯𑀺𑀘𑀭𑀢𑀺, 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 ¶ 𑀯𑀸𑀬𑁄𑀥𑀸𑀢𑀼 𑀓𑀼𑀧𑁆𑀧𑀢𑀺, 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀺. 𑀬𑀲𑁆𑀲 𑀧𑀦 𑀩𑀳𑀼𑀓𑀸 𑀳𑁄𑀢𑀺 𑀢𑀲𑁆𑀲 𑀉𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀦 𑀅𑀝𑁆𑀞𑀻𑀦𑀺 𑀓𑀝𑀓𑀝𑀸𑀬𑀦𑁆𑀢𑀺, 𑀤𑀻𑀖𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 ¶ 𑀦 𑀯𑀸𑀬𑁄𑀥𑀸𑀢𑀼 𑀓𑀼𑀧𑁆𑀧𑀢𑀺, 𑀦 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀮𑀲𑀺𑀓𑀸𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀫𑀼𑀢𑁆𑀢𑀦𑁆𑀢𑀺 𑀯𑀡𑁆𑀡𑀢𑁄 𑀫𑀸𑀲𑀔𑀸𑀭𑁄𑀤𑀓𑀯𑀡𑁆𑀡𑀁. 𑀲𑀡𑁆𑀞𑀸𑀦𑀢𑁄 𑀅𑀥𑁄𑀫𑀼𑀔𑀞𑀧𑀺𑀢𑀉𑀤𑀓𑀓𑀼𑀫𑁆𑀪𑀦𑁆𑀢𑀭𑀕𑀢𑀉𑀤𑀓𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀯𑀢𑁆𑀣𑀺𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁. 𑀯𑀢𑁆𑀣𑀺 𑀦𑀸𑀫 𑀯𑀢𑁆𑀣𑀺𑀧𑀼𑀝𑁄 𑀯𑀼𑀘𑁆𑀘𑀢𑀺, 𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀦𑁆𑀤𑀦𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑁂 𑀅𑀫𑀼𑀔𑁂 𑀭𑀯𑀡𑀖𑀝𑁂 𑀘𑀦𑁆𑀤𑀦𑀺𑀓𑀭𑀲𑁄 𑀧𑀯𑀺𑀲𑀢𑀺, 𑀦 𑀘𑀲𑁆𑀲 𑀧𑀯𑀺𑀲𑀦𑀫𑀕𑁆𑀕𑁄 𑀧𑀜𑁆𑀜𑀸𑀬𑀢𑀺; 𑀏𑀯𑀫𑁂𑀯 𑀲𑀭𑀻𑀭𑀢𑁄 𑀫𑀼𑀢𑁆𑀢𑀁 𑀧𑀯𑀺𑀲𑀢𑀺, 𑀦 𑀘𑀲𑁆𑀲 𑀧𑀯𑀺𑀲𑀦𑀫𑀕𑁆𑀕𑁄 𑀧𑀜𑁆𑀜𑀸𑀬𑀢𑀺, 𑀦𑀺𑀓𑁆𑀔𑀫𑀦𑀫𑀕𑁆𑀕𑁄 𑀧𑀦 𑀧𑀸𑀓𑀝𑁄 𑀳𑁄𑀢𑀺; 𑀬𑀫𑁆𑀳𑀺 𑀘 𑀫𑀼𑀢𑁆𑀢𑀲𑁆𑀲 𑀪𑀭𑀺𑀢𑁂 ‘𑀧𑀲𑁆𑀲𑀸𑀯𑀁 𑀓𑀭𑁄𑀫𑀸’𑀢𑀺 𑀲𑀢𑁆𑀢𑀸𑀦𑀁 𑀆𑀬𑀽𑀳𑀦𑀁 𑀳𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀢𑁆𑀣𑀺𑀅𑀩𑁆𑀪𑀦𑁆𑀢𑀭𑁂𑀦 𑀘𑁂𑀯 𑀫𑀼𑀢𑁆𑀢𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀬𑀫𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄𑀯.

𑀏𑀯𑀜𑁆𑀳𑀺 𑀓𑁂𑀲𑀸𑀤𑀺𑀓𑁂 𑀓𑁄𑀝𑁆𑀞𑀸𑀲𑁂 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀢𑁄 𑀦𑀸𑀢𑀺𑀲𑀻𑀖𑀢𑁄 𑀦𑀸𑀢𑀺𑀲𑀡𑀺𑀓𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 ‘𑀧𑀝𑀺𑀓𑁆𑀓𑀽𑀮𑀸 𑀧𑀝𑀺𑀓𑁆𑀓𑀽𑀮𑀸’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀯𑀲𑁂𑀦, 𑀲𑁂𑀬𑁆𑀬𑀣𑀸𑀧𑀺 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀯𑀡𑁆𑀡𑀸𑀦𑀁 𑀓𑀼𑀲𑀼𑀫𑀸𑀦𑀁 𑀏𑀓𑀲𑀼𑀢𑁆𑀢𑀕𑀡𑁆𑀞𑀺𑀢𑀁 𑀫𑀸𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀧𑀼𑀩𑁆𑀩𑀸𑀧𑀭𑀺𑀬𑀫𑀺𑀯 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀫𑁂𑀯 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺 𑀇𑀫𑀁 𑀓𑀸𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀧𑀼𑀩𑁆𑀩𑀸𑀧𑀭𑀺𑀬𑀫𑀺𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀓𑀣𑀸𑀬𑀁 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 ‘𑀓𑁂𑀲𑀸’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 ‘𑀫𑀼𑀢𑁆𑀢’𑀦𑁆𑀢𑀺 𑀇𑀫𑀁 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

𑀲𑀘𑁂 𑀧𑀦 𑀩𑀳𑀺𑀤𑁆𑀥𑀸𑀧𑀺 𑀫𑀦𑀲𑀺𑀓𑀸𑀭𑀁 𑀉𑀧𑀲𑀁𑀳𑀭𑀢𑀺, 𑀅𑀣𑀲𑁆𑀲 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀧𑀸𑀓𑀝𑀻𑀪𑀽𑀢𑁂𑀲𑀼 𑀆𑀳𑀺𑀡𑁆𑀟𑀦𑁆𑀢𑀸 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀬𑁄 𑀲𑀢𑁆𑀢𑀸𑀓𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀓𑁄𑀝𑁆𑀞𑀸𑀲𑀭𑀸𑀲𑀺𑀯𑀲𑁂𑀦𑁂𑀯 𑀉𑀧𑀝𑁆𑀞𑀳𑀦𑁆𑀢𑀺; 𑀢𑁂𑀳𑀺 𑀘 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑀁 𑀧𑀸𑀦𑀪𑁄𑀚𑀦𑀸𑀤𑀺 𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀬𑀫𑀸𑀦𑀫𑀺𑀯 𑀉𑀧𑀝𑁆𑀞𑀸𑀢𑀺. 𑀅𑀣𑀲𑁆𑀲 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀸𑀤𑀺𑀯𑀲𑁂𑀦 ¶ ¶ ‘𑀧𑀝𑀺𑀓𑀽𑀮𑀸 𑀧𑀝𑀺𑀓𑀽𑀮𑀸’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀣 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁, 𑀲𑀩𑁆𑀩𑀸𑀓𑀸𑀭𑀢𑁄 𑀧𑀝𑀺𑀓𑀽𑀮𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 ¶ 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀸 𑀧𑀯𑀢𑁆𑀢𑀢𑀺. 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀘𑀺𑀢𑁆𑀢𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀺 𑀲𑀧𑁆𑀧𑀻𑀢𑀺𑀓𑀸𑀦𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀧𑀝𑀺𑀓𑀽𑀮𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺; 𑀅𑀧𑁆𑀧𑀦𑀸𑀧𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀲𑀧𑁆𑀧𑀻𑀢𑀺𑀓𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯. 𑀪𑀽𑀫𑀦𑁆𑀢𑀭𑁂𑀦 𑀧𑀦 𑀫𑀳𑀕𑁆𑀕𑀢𑀸 𑀭𑀽𑀧𑀸𑀯𑀘𑀭𑀸 𑀳𑁄𑀦𑁆𑀢𑀺. 𑀧𑀝𑀺𑀓𑁆𑀓𑀽𑀮𑁂𑀧𑀺 𑀘 𑀏𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀓𑀢𑁆𑀢𑀸𑀭𑀫𑁆𑀫𑀡𑀩𑀮𑁂𑀦𑁂𑀯 𑀯𑀸 𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀧𑀦𑁂𑀢𑁆𑀣 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀓𑀲𑁆𑀫𑀸? 𑀑𑀴𑀸𑀭𑀺𑀓𑀢𑁆𑀢𑀸. 𑀇𑀤𑀜𑁆𑀳𑀺 𑀆𑀭𑀫𑁆𑀫𑀡𑀁 𑀑𑀴𑀸𑀭𑀺𑀓𑀁. 𑀯𑀺𑀢𑀓𑁆𑀓𑀩𑀮𑁂𑀦𑁂𑀯𑁂𑀢𑁆𑀣 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀚𑀸𑀬𑀢𑀺, 𑀦 𑀯𑀺𑀢𑀓𑁆𑀓𑀲𑀫𑀢𑀺𑀓𑁆𑀓𑀫𑁂𑀦𑀸𑀢𑀺. 𑀅𑀬𑀁 𑀢𑀸𑀯 𑀲𑀫𑀣𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀓𑀣𑀸.

𑀅𑀯𑀺𑀲𑁂𑀲𑀢𑁄 𑀧𑀦 𑀲𑀸𑀥𑀸𑀭𑀡𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀤𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀓𑀸𑀮𑁂 𑀏𑀯 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑀤𑀺𑀲𑀸𑀦𑀺𑀫𑀺𑀢𑁆𑀢𑀑𑀓𑀸𑀲𑀦𑀺𑀫𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀸𑀦𑀺 𑀯𑀸𑀘𑀸𑀬 𑀧𑁄𑀣𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑁂 ‘𑀅𑀬𑀁 𑀏𑀢𑀁𑀲𑀭𑀺𑀓𑁆𑀔𑀓𑁄’𑀢𑀺 𑀢𑀺𑀯𑀺𑀥𑁂𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀓𑀣𑀁? 𑀢𑀘𑀧𑀜𑁆𑀘𑀓𑁂 𑀢𑀸𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀦𑁆𑀢𑀺 𑀅𑀤𑁆𑀥𑀫𑀸𑀲𑀁 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀢𑀢𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀓𑁆𑀓𑀧𑀜𑁆𑀘𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀣𑁂𑀯 𑀅𑀤𑁆𑀥𑀫𑀸𑀲𑀁 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀢𑀢𑁄 𑀢𑁂 𑀤𑀲𑀧𑀺 𑀓𑁄𑀝𑁆𑀞𑀸𑀲𑁂 𑀏𑀓𑀢𑁄 𑀓𑀢𑁆𑀯𑀸 𑀅𑀤𑁆𑀥𑀫𑀸𑀲𑀁. 𑀧𑀼𑀦 𑀧𑀧𑁆𑀨𑀸𑀲𑀧𑀜𑁆𑀘𑀓𑀸𑀤𑀻𑀲𑀼𑀧𑀺 𑀏𑀓𑁂𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀤𑁆𑀥𑀫𑀸𑀲𑀁. 𑀢𑀢𑁄 𑀢𑁂 𑀧𑀜𑁆𑀘𑀤𑀲𑀧𑀺 𑀓𑁄𑀝𑁆𑀞𑀸𑀲𑁂 𑀅𑀤𑁆𑀥𑀫𑀸𑀲𑀁. 𑀫𑀢𑁆𑀣𑀮𑀼𑀗𑁆𑀕𑀧𑀜𑁆𑀘𑀓𑀁 𑀅𑀤𑁆𑀥𑀫𑀸𑀲𑀁. 𑀢𑀢𑁄 𑀢𑁂𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀅𑀤𑁆𑀥𑀫𑀸𑀲𑀁. 𑀫𑁂𑀤𑀙𑀓𑁆𑀓𑀁 𑀅𑀤𑁆𑀥𑀫𑀸𑀲𑀁. 𑀢𑀢𑁄 𑀢𑁂 𑀙𑀩𑁆𑀩𑀻𑀲𑀢𑀺𑀧𑀺 𑀓𑁄𑀝𑁆𑀞𑀸𑀲𑁂 𑀏𑀓𑀢𑁄 𑀓𑀢𑁆𑀯𑀸 𑀅𑀤𑁆𑀥𑀫𑀸𑀲𑀁. 𑀫𑀼𑀢𑁆𑀢𑀙𑀓𑁆𑀓𑀁 𑀅𑀤𑁆𑀥𑀫𑀸𑀲𑀁. 𑀢𑀢𑁄 𑀲𑀩𑁆𑀩𑁂𑀧𑀺 ¶ 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑁂 𑀏𑀓𑀢𑁄 𑀓𑀢𑁆𑀯𑀸 𑀅𑀤𑁆𑀥𑀫𑀸𑀲𑀦𑁆𑀢𑀺 𑀏𑀯𑀁 𑀙 𑀫𑀸𑀲𑁂 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄.

𑀢𑀢𑁆𑀣 𑁋 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀲𑀧𑁆𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀓𑁄𑀝𑁆𑀞𑀸𑀲𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 ‘𑀦 𑀉𑀧𑀝𑁆𑀞𑀳𑀦𑁆𑀢𑀻’𑀢𑀺 𑀯𑀻𑀭𑀺𑀬𑀁 ¶ 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀢𑁆𑀢𑀓𑀸 𑀓𑁄𑀝𑁆𑀞𑀸𑀲𑀸 𑀉𑀧𑀝𑁆𑀞𑀳𑀦𑁆𑀢𑀺 𑀢𑀢𑁆𑀢𑀓𑁂 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀧𑀦 𑀦𑁂𑀯 𑀧𑀜𑁆𑀜𑀯𑀢𑁄 𑀦 𑀫𑀦𑁆𑀤𑀧𑀜𑁆𑀜𑀲𑁆𑀲 𑀯𑀲𑁂𑀦 𑀓𑀣𑁂𑀢𑀩𑁆𑀩𑀁, 𑀫𑀚𑁆𑀛𑀺𑀫𑀧𑀜𑁆𑀜𑀲𑁆𑀲 𑀯𑀲𑁂𑀦 𑀓𑀣𑁂𑀢𑀩𑁆𑀩𑀁. 𑀫𑀚𑁆𑀛𑀺𑀫𑀧𑀜𑁆𑀜𑀲𑁆𑀲 𑀳𑀺 𑀯𑀲𑁂𑀦 𑀆𑀘𑀭𑀺𑀬𑀸 𑀙𑀳𑀺 𑀫𑀸𑀲𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀦𑁆𑀢𑀺𑀁 𑀞𑀧𑀬𑀺𑀁𑀲𑀼. 𑀬𑀲𑁆𑀲 𑀧𑀦 𑀏𑀢𑁆𑀢𑀸𑀯𑀢𑀸𑀧𑀺 𑀓𑁄𑀝𑁆𑀞𑀸𑀲𑀸 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀺, 𑀢𑁂𑀦 𑀢𑀢𑁄 𑀧𑀭𑀫𑁆𑀧𑀺 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄 𑀏𑀯; 𑀦𑁄 𑀘 𑀔𑁄 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀙 𑀙 𑀫𑀸𑀲𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑁄.

𑀲𑀚𑁆𑀛𑀸𑀬𑀁 ¶ 𑀓𑀭𑁄𑀦𑁆𑀢𑁂𑀦 𑀯𑀡𑁆𑀡𑁄 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀮𑀓𑁆𑀔𑀡𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀓𑁄𑀝𑁆𑀞𑀸𑀲𑀯𑀲𑁂𑀦𑁂𑀯 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀆𑀘𑀭𑀺𑀬𑁂𑀦𑀸𑀧𑀺 ‘𑀯𑀡𑁆𑀡𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀦 𑀓𑀣𑁂𑀢𑀩𑁆𑀩𑀁. 𑀦𑀺𑀬𑀫𑁂𑀢𑁆𑀯𑀸 𑀓𑀣𑀺𑀢𑁂 𑀓𑁄 𑀤𑁄𑀲𑁄𑀢𑀺? 𑀲𑀫𑁆𑀧𑀢𑁆𑀢𑀺𑀬𑀫𑁆𑀧𑀺 𑀯𑀺𑀧𑀢𑁆𑀢𑀺𑀲𑀜𑁆𑀜𑀸𑀆𑀧𑀚𑁆𑀚𑀦𑀁. 𑀲𑀘𑁂 𑀳𑀺 𑀆𑀘𑀭𑀺𑀬𑁂𑀦 ‘𑀯𑀡𑁆𑀡𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀼𑀢𑁆𑀢𑁂 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀯𑀡𑁆𑀡𑀢𑁄 𑀦 𑀉𑀧𑀝𑁆𑀞𑀸𑀢𑀺, 𑀧𑀝𑀺𑀓𑀽𑀮𑀯𑀲𑁂𑀦 𑀯𑀸 𑀥𑀸𑀢𑀼𑀯𑀲𑁂𑀦 𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀣𑁂𑀲 ‘𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀮𑀓𑁆𑀔𑀡’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀓𑀣𑀺𑀢𑀫𑁂𑀯 𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. ‘𑀧𑀝𑀺𑀓𑀽𑀮𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀘𑁂 𑀢𑀲𑁆𑀲 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀽𑀮𑀢𑁄 𑀦 𑀉𑀧𑀝𑁆𑀞𑀸𑀢𑀺, 𑀯𑀡𑁆𑀡𑀯𑀲𑁂𑀦 𑀯𑀸 𑀥𑀸𑀢𑀼𑀯𑀲𑁂𑀦 𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀣𑁂𑀲 ‘𑀦𑀬𑀺𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀮𑀓𑁆𑀔𑀡’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀓𑀣𑀺𑀢𑀫𑁂𑀯 𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. ‘𑀥𑀸𑀢𑀼𑀯𑀲𑁂𑀦 𑀢𑀁 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀘𑁂 𑀢𑀲𑁆𑀲 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀥𑀸𑀢𑀼𑀢𑁄 𑀦 𑀉𑀧𑀝𑁆𑀞𑀸𑀢𑀺, 𑀯𑀡𑁆𑀡𑀯𑀲𑁂𑀦 𑀯𑀸 𑀧𑀝𑀺𑀓𑀽𑀮𑀯𑀲𑁂𑀦 𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀣𑁂𑀲 ‘𑀦𑀬𑀺𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀮𑀓𑁆𑀔𑀡’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀓𑀣𑀺𑀢𑀫𑁂𑀯 𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀬𑀁 𑀆𑀘𑀭𑀺𑀬𑁂𑀦 𑀦𑀺𑀬𑀫𑁂𑀢𑁆𑀯𑀸 𑀓𑀣𑀺𑀢𑁂 𑀤𑁄𑀲𑁄.

𑀓𑀺𑀦𑁆𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄 𑀳𑁄𑀢𑀻𑀢𑀺? ‘𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀓𑀣𑀁? ‘𑀓𑁂𑀲𑀓𑁄𑀝𑁆𑀞𑀸𑀲𑁄 𑀮𑁄𑀫𑀓𑁄𑀝𑁆𑀞𑀸𑀲𑁄𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀯𑀡𑁆𑀡𑀢𑁄 ¶ 𑀉𑀧𑀝𑁆𑀞𑀸𑀢𑀺, 𑀅𑀣𑀸𑀦𑁂𑀦 𑀑𑀯𑀸𑀤𑀸𑀘𑀭𑀺𑀬𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀫𑀺; 𑀫𑀬𑁆𑀳𑀁 𑀧𑀦 𑀯𑀡𑁆𑀡𑀢𑁄 𑀉𑀧𑀝𑁆𑀞𑀸𑀢𑀻’𑀢𑀺. 𑀆𑀘𑀭𑀺𑀬𑁂𑀦 ‘𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀅𑀓𑀫𑁆𑀫𑀝𑁆𑀞𑀸𑀦𑀁, 𑀯𑀺𑀮𑀓𑁆𑀔𑀡𑀁 𑀏𑀢’𑀦𑁆𑀢𑀺 𑀦 𑀯𑀺𑀲𑀁𑀯𑀸𑀤𑁂𑀢𑀩𑁆𑀩𑀁. ‘𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀧𑀼𑀩𑁆𑀩𑁂 𑀢𑀬𑀸 𑀯𑀡𑁆𑀡𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑀧𑀼𑀩𑁆𑀩𑀁 𑀪𑀯𑀺𑀲𑁆𑀲𑀢𑀺. 𑀏𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀢𑀼𑀬𑁆𑀳𑀁 𑀲𑀧𑁆𑀧𑀸𑀬𑀁. 𑀯𑀡𑁆𑀡𑀯𑀲𑁂𑀦𑁂𑀯 ¶ 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀧𑀺 𑀯𑀡𑁆𑀡𑀯𑀲𑁂𑀦𑁂𑀯 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄.

𑀲𑁄 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀚𑁆𑀛𑀢𑁆𑀢𑀁 𑀦𑀻𑀮𑀓𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀓𑀦𑁆𑀢𑀺 𑀘𑀢𑁆𑀢𑀸𑀭𑀺 𑀯𑀡𑁆𑀡𑀓𑀲𑀺𑀡𑀸𑀦𑀺 𑀮𑀪𑀢𑀺. 𑀓𑀣𑀁? 𑀢𑀲𑁆𑀲 𑀳𑀺 𑀓𑁂𑀲𑀮𑁄𑀫𑀧𑀺𑀢𑁆𑀢𑁂𑀲𑀼 𑀘𑁂𑀯 𑀅𑀓𑁆𑀔𑀻𑀦𑀜𑁆𑀘 𑀓𑀸𑀴𑀓𑀝𑁆𑀞𑀸𑀦𑁂 𑀯𑀡𑁆𑀡𑀁 ‘𑀦𑀻𑀮𑀁 𑀦𑀻𑀮’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀫𑁂𑀤𑀲𑁆𑀫𑀺𑀁 𑀧𑀦 𑀅𑀓𑁆𑀔𑀻𑀦𑀜𑁆𑀘 𑀧𑀻𑀢𑀓𑀝𑁆𑀞𑀸𑀦𑁂 𑀯𑀡𑁆𑀡𑀁 ‘𑀧𑀻𑀢𑀓𑀁 𑀧𑀻𑀢𑀓’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀫𑀁𑀲𑀮𑁄𑀳𑀺𑀢𑁂𑀲𑀼 𑀧𑀦 𑀅𑀓𑁆𑀔𑀻𑀦𑀜𑁆𑀘 𑀭𑀢𑁆𑀢𑀝𑁆𑀞𑀸𑀦𑁂 𑀯𑀡𑁆𑀡𑀁 ‘𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 ¶ 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑀔𑀤𑀦𑁆𑀢𑀘𑀫𑁆𑀫𑀅𑀝𑁆𑀞𑀻𑀲𑀼 𑀧𑀦 𑀅𑀓𑁆𑀔𑀻𑀦𑀜𑁆𑀘 𑀧𑀡𑁆𑀟𑀭𑀝𑁆𑀞𑀸𑀦𑁂 𑀯𑀡𑁆𑀡𑀁 ‘𑀑𑀤𑀸𑀢𑀁 𑀑𑀤𑀸𑀢’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀇𑀤𑀁 𑀯𑀡𑁆𑀡𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀕𑀫𑀦𑀁.

𑀅𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀧𑀝𑀺𑀓𑀽𑀮𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀣𑀸𑀦𑁂𑀦 𑀑𑀯𑀸𑀤𑀸𑀘𑀭𑀺𑀬𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀘𑀭𑀺𑀬𑁂𑀦 ‘𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀅𑀓𑀫𑁆𑀫𑀝𑁆𑀞𑀸𑀦𑀁, 𑀯𑀺𑀮𑀓𑁆𑀔𑀡𑀁 𑀏𑀢’𑀦𑁆𑀢𑀺 𑀦 𑀯𑀺𑀲𑀁𑀯𑀸𑀤𑁂𑀢𑀩𑁆𑀩𑀁. ‘𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀧𑀼𑀩𑁆𑀩𑁂 𑀢𑀬𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂 𑀬𑁄𑀕𑁄 𑀓𑀢𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀢𑀼𑀬𑁆𑀳𑀁 𑀲𑀧𑁆𑀧𑀸𑀬𑀁. 𑀧𑀝𑀺𑀓𑀽𑀮𑀯𑀲𑁂𑀦𑁂𑀯 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀧𑀺 𑀧𑀝𑀺𑀓𑀽𑀮𑀯𑀲𑁂𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀢𑀲𑁆𑀲 𑀓𑁂𑀲𑀸 𑀦𑀸𑀫 ‘𑀅𑀚𑀜𑁆𑀜𑀸 𑀤𑀼𑀕𑁆𑀕𑀦𑁆𑀥𑀸 𑀚𑁂𑀕𑀼𑀘𑁆𑀙𑀸 𑀧𑀝𑀺𑀓𑀽𑀮𑀸’𑀢𑀺 𑀏𑀯𑀁 𑀧𑀝𑀺𑀓𑀽𑀮𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑁂 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀇𑀤𑀁 ¶ 𑀧𑀝𑀺𑀓𑀽𑀮𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀕𑀫𑀦𑀁.

𑀅𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀥𑀸𑀢𑀼𑀢𑁄 𑀉𑀧𑀝𑁆𑀞𑀸𑀢𑀺. 𑀥𑀸𑀢𑀼𑀢𑁄 𑀉𑀧𑀝𑁆𑀞𑀳𑀦𑁆𑀢𑀁 𑀓𑀻𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺? 𑀓𑁂𑀲𑀸 𑀢𑀸𑀯 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀓𑀼𑀦𑁆𑀣𑀢𑀺𑀡𑀓𑀸𑀦𑀺 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀮𑁄𑀫𑀸 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑀤𑀩𑁆𑀩𑀢𑀺𑀡𑀓𑀸𑀦𑀺 𑀯𑀺𑀬. 𑀦𑀔𑀸 𑀤𑀡𑁆𑀟𑀓𑁂𑀲𑀼 𑀞𑀧𑀺𑀢𑀫𑀥𑀼𑀓𑀨𑀮𑀝𑁆𑀞𑀺𑀓𑁄𑀲𑀓𑀸 𑀯𑀺𑀬. 𑀤𑀦𑁆𑀢𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂 𑀧𑀯𑁂𑀲𑁂𑀢𑁆𑀯𑀸 𑀞𑀧𑀺𑀢𑀅𑀮𑀸𑀩𑀼𑀩𑀻𑀚𑀸𑀦𑀺 𑀯𑀺𑀬. 𑀢𑀘𑁄 𑀯𑀻𑀡𑀸𑀧𑀩𑁆𑀩𑀓𑁂 𑀧𑀭𑀺𑀬𑁄𑀦𑀤𑁆𑀥𑀅𑀮𑁆𑀮𑀕𑁄𑀘𑀫𑁆𑀫𑀁 𑀯𑀺𑀬, 𑀫𑀁𑀲𑀁 𑀪𑀺𑀢𑁆𑀢𑀺𑀬𑀁 𑀅𑀦𑀼𑀮𑀺𑀢𑁆𑀢𑀫𑀢𑁆𑀢𑀺𑀓𑀸 ¶ 𑀯𑀺𑀬. 𑀦𑁆𑀳𑀸𑀭𑀼 𑀤𑀩𑁆𑀩𑀲𑀫𑁆𑀪𑀸𑀭𑀩𑀤𑁆𑀥𑀯𑀮𑁆𑀮𑀻 𑀯𑀺𑀬. 𑀅𑀝𑁆𑀞𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀪𑀺𑀢𑁆𑀢𑀺𑀤𑀩𑁆𑀩𑀲𑀫𑁆𑀪𑀸𑀭𑁄 𑀯𑀺𑀬. 𑀅𑀝𑁆𑀞𑀺𑀫𑀺𑀜𑁆𑀚𑀁 𑀫𑀳𑀸𑀯𑁂𑀴𑀼𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀲𑁂𑀤𑀺𑀢𑀯𑁂𑀢𑁆𑀢𑀕𑁆𑀕𑀁 𑀯𑀺𑀬. 𑀯𑀓𑁆𑀓𑀁, 𑀳𑀤𑀬𑀁, 𑀬𑀓𑀦𑀁, 𑀓𑀺𑀮𑁄𑀫𑀓𑀁, 𑀧𑀺𑀳𑀓𑀁, 𑀧𑀧𑁆𑀨𑀸𑀲𑀦𑁆𑀢𑀺 𑀇𑀫𑁂 𑀙 𑀓𑁄𑀝𑁆𑀞𑀸𑀲𑀸 𑀲𑀽𑀦𑀓𑀸𑀭𑀖𑀭𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀤𑁆𑀯𑀢𑁆𑀢𑀺𑀁𑀲𑀳𑀢𑁆𑀣𑀁 𑀅𑀦𑁆𑀢𑀁 𑀮𑁄𑀳𑀺𑀢𑀤𑁄𑀡𑀺𑀬𑀁 𑀲𑀁𑀯𑁂𑀮𑁆𑀮𑀺𑀢𑁆𑀯𑀸 𑀞𑀧𑀺𑀢𑀖𑀭𑀲𑀧𑁆𑀧𑁄 𑀯𑀺𑀬. 𑀅𑀦𑁆𑀢𑀕𑀼𑀡𑀁 𑀧𑀸𑀤𑀧𑀼𑀜𑁆𑀙𑀦𑀓𑁂 𑀲𑀺𑀩𑁆𑀩𑀺𑀢𑀭𑀚𑁆𑀚𑀼𑀓𑀸 𑀯𑀺𑀬. 𑀉𑀤𑀭𑀺𑀬𑀁 𑀧𑀭𑀺𑀲𑁆𑀲𑀸𑀯𑀦𑁂 𑀲𑀺𑀣𑀺𑀮𑀩𑀦𑁆𑀥𑀢𑀡𑁆𑀟𑀼𑀮𑀁 𑀯𑀺𑀬. 𑀓𑀭𑀻𑀲𑀁 𑀯𑁂𑀡𑀼𑀧𑀩𑁆𑀩𑁂 𑀧𑀓𑁆𑀔𑀺𑀢𑁆𑀢𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀯𑀺𑀬. 𑀫𑀢𑁆𑀣𑀮𑀼𑀗𑁆𑀕𑀁 𑀑𑀫𑀤𑁆𑀤𑀺𑀢𑁆𑀯𑀸 𑀞𑀧𑀺𑀢𑀸 𑀘𑀢𑁆𑀢𑀸𑀭𑁄 𑀢𑀡𑁆𑀟𑀼𑀮𑀧𑀺𑀝𑁆𑀞𑀧𑀺𑀡𑁆𑀟𑀸 𑀯𑀺𑀬. 𑀤𑁆𑀯𑀸𑀤𑀲𑀯𑀺𑀥𑀸 𑀆𑀧𑁄𑀥𑀸𑀢𑀼 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀉𑀤𑀓𑀲𑀭𑀸𑀯𑀓𑁂𑀲𑀼 𑀧𑀽𑀭𑀺𑀢𑀉𑀤𑀓𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀅𑀣𑀸𑀦𑁂𑀦 𑀑𑀯𑀸𑀤𑀸𑀘𑀭𑀺𑀬𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀘𑀭𑀺𑀬𑁂𑀦 ‘𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀅𑀓𑀫𑁆𑀫𑀝𑁆𑀞𑀸𑀦𑀁, 𑀯𑀺𑀮𑀓𑁆𑀔𑀡𑀁 ¶ 𑀏𑀢’𑀦𑁆𑀢𑀺 𑀦 𑀯𑀺𑀲𑀁𑀯𑀸𑀤𑁂𑀢𑀩𑁆𑀩𑀁. ‘𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀧𑀼𑀩𑁆𑀩𑁂 𑀢𑀬𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑁂 𑀬𑁄𑀕𑁄 𑀓𑀢𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀢𑀼𑀬𑁆𑀳𑀁 𑀲𑀧𑁆𑀧𑀸𑀬𑀁. 𑀥𑀸𑀢𑀼𑀯𑀲𑁂𑀦𑁂𑀯 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀧𑀺 𑀥𑀸𑀢𑀼𑀯𑀲𑁂𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀫𑀦𑀲𑀺𑀓𑀸𑀭𑀫𑀼𑀔𑁂𑀦𑁂𑀯 𑀲𑀚𑁆𑀛𑀸𑀬𑀯𑀺𑀥𑀸𑀦𑀁 𑁋 𑀇𑀥 𑀪𑀺𑀓𑁆𑀔𑀼 ‘𑀓𑁂𑀲𑀸 𑀲𑀻𑀲𑀁 𑀧𑀭𑀺𑀬𑁄𑀦𑀤𑁆𑀥𑀺𑀢𑁆𑀯𑀸 𑀞𑀺𑀢𑀘𑀫𑁆𑀫𑁂 𑀚𑀸𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘𑀫𑀬𑀁 𑀲𑀻𑀲𑀁 𑀧𑀭𑀺𑀬𑁄𑀦𑀤𑁆𑀥𑀺𑀢𑁆𑀯𑀸 𑀞𑀺𑀢𑀘𑀫𑁆𑀫𑁂 𑀚𑀸𑀢𑀸’𑀢𑀺; 𑀲𑀻𑀲𑀁 𑀧𑀭𑀺𑀬𑁄𑀦𑀤𑁆𑀥𑀺𑀢𑁆𑀯𑀸 𑀞𑀺𑀢𑀘𑀫𑁆𑀫𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀓𑁂𑀲𑀸 𑀫𑀬𑀺 𑀚𑀸𑀢𑀸’𑀢𑀺; 𑀅𑀘𑁂𑀢𑀦𑀸 𑀏𑀢𑁂 𑀅𑀩𑁆𑀬𑀸𑀓𑀢𑀸 𑀲𑀼𑀜𑁆𑀜𑀸 𑀣𑀤𑁆𑀥𑀸 𑀧𑀢𑁆𑀣𑀺𑀦𑁆𑀦𑀸 𑀧𑀣𑀯𑀻𑀥𑀸𑀢𑀼 𑀏𑀲𑀸’𑀢𑀺 𑀫𑀦𑀲𑀺𑀓𑀭𑁄𑀢𑀺. ‘𑀮𑁄𑀫𑀸 𑀲𑀭𑀻𑀭𑀁 𑀧𑀭𑀺𑀬𑁄𑀦𑀳𑀦𑀘𑀫𑁆𑀫𑁂 𑀚𑀸𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘𑀫𑀬𑀁 𑀲𑀭𑀻𑀭𑀁 𑀧𑀭𑀺𑀬𑁄𑀦𑀳𑀦𑀘𑀫𑁆𑀫𑁂 ¶ 𑀚𑀸𑀢𑀸’𑀢𑀺. 𑀲𑀭𑀻𑀭𑀁 𑀧𑀭𑀺𑀬𑁄𑀦𑀳𑀦𑀘𑀫𑁆𑀫𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀮𑁄𑀫𑀸 𑀫𑀬𑀺 𑀚𑀸𑀢𑀸’𑀢𑀺 𑀏𑀢𑁂𑀧𑀺 𑀅𑀘𑁂𑀢𑀦𑀸. 𑀦𑀔𑀸 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘𑀫𑀬𑀁 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀚𑀸𑀢𑀸’𑀢𑀺. 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑀸𑀦𑀺𑀧𑀺 𑀦 𑀚𑀸𑀦𑀦𑁆𑀢𑀺 ‘𑀦𑀔𑀸 𑀅𑀫𑁆𑀳𑁂𑀲𑀼 𑀚𑀸𑀢𑀸’𑀢𑀺. 𑀏𑀢𑁂𑀧𑀺 𑀅𑀘𑁂𑀢𑀦𑀸. 𑀤𑀦𑁆𑀢𑀸 𑀳𑀦𑀼𑀓𑀝𑁆𑀞𑀺𑀓𑁂 𑀚𑀸𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘𑀫𑀬𑀁 𑀳𑀦𑀼𑀓𑀝𑁆𑀞𑀺𑀓𑁂 𑀚𑀸𑀢𑀸’𑀢𑀺. 𑀳𑀦𑀼𑀓𑀝𑁆𑀞𑀺𑀓𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀤𑀦𑁆𑀢𑀸 𑀫𑀬𑀺 𑀚𑀸𑀢𑀸’𑀢𑀺. 𑀏𑀢𑁂𑀧𑀺 𑀅𑀘𑁂𑀢𑀦𑀸. 𑀢𑀘𑁄 𑀦 𑀚𑀸𑀦𑀸𑀢𑀺 ‘𑀲𑀭𑀻𑀭𑀁 𑀫𑀬𑀸 𑀧𑀭𑀺𑀬𑁄𑀦𑀤𑁆𑀥’𑀦𑁆𑀢𑀺. 𑀲𑀭𑀻𑀭𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥’𑀦𑁆𑀢𑀺. 𑀅𑀬𑀫𑁆𑀧𑀺 𑀅𑀘𑁂𑀢𑀦𑁄. 𑀫𑀁𑀲𑀁 𑀦 𑀚𑀸𑀦𑀸𑀢𑀺 ‘𑀫𑀬𑀸 𑀲𑀭𑀻𑀭𑀁 𑀅𑀦𑀼𑀮𑀺𑀢𑁆𑀢’𑀦𑁆𑀢𑀺. 𑀲𑀭𑀻𑀭𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀫𑀁𑀲𑁂𑀦 𑀅𑀦𑀼𑀮𑀺𑀢𑁆𑀢’𑀦𑁆𑀢𑀺. 𑀇𑀤𑀫𑁆𑀧𑀺 𑀅𑀘𑁂𑀢𑀦𑀁. 𑀦𑁆𑀳𑀸𑀭𑀼 𑀦 𑀚𑀸𑀦𑀸𑀢𑀺 ‘𑀅𑀳𑀁 ¶ 𑀅𑀝𑁆𑀞𑀺𑀧𑀼𑀜𑁆𑀚𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺. 𑀅𑀝𑁆𑀞𑀺𑀧𑀼𑀜𑁆𑀚𑁄𑀧𑀺 𑀦 𑀚𑀸𑀦𑀸𑀢𑀺 ‘𑀦𑁆𑀳𑀸𑀭𑀼𑀚𑀸𑀮𑁂𑀦𑀸𑀳𑀁 𑀆𑀩𑀤𑁆𑀥𑁄’𑀢𑀺. 𑀇𑀤𑀫𑁆𑀧𑀺 𑀅𑀘𑁂𑀢𑀦𑀁.

𑀲𑀻𑀲𑀝𑁆𑀞𑀺 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀕𑀻𑀯𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺. 𑀕𑀻𑀯𑀝𑁆𑀞𑀺𑀓𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀫𑀬𑀺 𑀲𑀻𑀲𑀝𑁆𑀞𑀺𑀓𑀁 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺. 𑀕𑀻𑀯𑀝𑁆𑀞𑀺 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀞𑀺𑀢’𑀦𑁆𑀢𑀺. 𑀧𑀺𑀝𑁆𑀞𑀺𑀓𑀡𑁆𑀝𑀝𑁆𑀞𑀺𑀓𑁄𑀧𑀺 𑀓𑀝𑀺𑀝𑁆𑀞𑀺𑀓𑀁 𑀊𑀭𑀼𑀝𑁆𑀞𑀺𑀓𑀁 𑀚𑀗𑁆𑀖𑀝𑁆𑀞𑀺𑀓𑀁 𑀕𑁄𑀧𑁆𑀨𑀓𑀝𑁆𑀞𑀺𑀓𑀁 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀧𑀡𑁆𑀳𑀺𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺. 𑀧𑀡𑁆𑀳𑀺𑀓𑀝𑁆𑀞𑀺𑀓𑀫𑁆𑀧𑀺 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀕𑁄𑀧𑁆𑀨𑀓𑀝𑁆𑀞𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺…𑀧𑁂… 𑀕𑀻𑀯𑀝𑁆𑀞𑀺𑀓𑀁 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀲𑀻𑀲𑀝𑁆𑀞𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺.

𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀻𑀦𑀺 𑀞𑀺𑀢𑀸𑀦𑀺 𑀓𑁄𑀝𑀺𑀬𑀸,

𑀅𑀦𑁂𑀓𑀲𑀦𑁆𑀥𑀺𑀬𑀫𑀺𑀢𑁄 𑀦 𑀓𑁂𑀳𑀺𑀘𑀺;

𑀩𑀤𑁆𑀥𑁄 ¶ 𑀦𑀳𑀸𑀭𑀽𑀳𑀺 𑀚𑀭𑀸𑀬 𑀘𑁄𑀤𑀺𑀢𑁄,

𑀅𑀘𑁂𑀢𑀦𑁄 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄.

‘𑀇𑀤𑀫𑁆𑀧𑀺 𑀅𑀘𑁂𑀢𑀦𑀁. 𑀅𑀝𑁆𑀞𑀺𑀫𑀺𑀜𑁆𑀚𑀁; 𑀯𑀓𑁆𑀓𑀁…𑀧𑁂… 𑀫𑀢𑁆𑀣𑀮𑀼𑀗𑁆𑀕𑀁 𑀅𑀘𑁂𑀢𑀦𑀁 𑀅𑀩𑁆𑀬𑀸𑀓𑀢𑀁 𑀲𑀼𑀜𑁆𑀜𑀁 𑀣𑀤𑁆𑀥𑀁 𑀧𑀢𑁆𑀣𑀺𑀦𑁆𑀦𑀁 𑀧𑀣𑀯𑀻𑀥𑀸𑀢𑀽’𑀢𑀺 𑀫𑀦𑀲𑀺𑀓𑀭𑁄𑀢𑀺. ‘𑀧𑀺𑀢𑁆𑀢𑀁 𑀲𑁂𑀫𑁆𑀳𑀁…𑀧𑁂… 𑀫𑀼𑀢𑁆𑀢𑀁 𑀅𑀘𑁂𑀢𑀦𑀁 𑀅𑀩𑁆𑀬𑀸𑀓𑀢𑀁 𑀲𑀼𑀜𑁆𑀜𑀁 𑀬𑀽𑀲𑀕𑀢𑀁 𑀆𑀧𑁄𑀥𑀸𑀢𑀽’𑀢𑀺 𑀫𑀦𑀲𑀺𑀓𑀭𑁄𑀢𑀺.

𑀇𑀫𑁂 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀤𑀭𑁂 𑀉𑀲𑁆𑀲𑀤𑀸 𑀢𑁂𑀚𑁄𑀥𑀸𑀢𑀼 𑀧𑀸𑀓𑀝𑀸 𑀳𑁄𑀢𑀺, 𑀦𑀸𑀲𑀸𑀬 𑀉𑀲𑁆𑀲𑀤𑀸 𑀯𑀸𑀬𑁄𑀥𑀸𑀢𑀼 𑀧𑀸𑀓𑀝𑀸 𑀳𑁄𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑀸𑀤𑀸𑀭𑀽𑀧𑀁 𑀧𑀸𑀓𑀝𑀁 𑀳𑁄𑀢𑀺. 𑀫𑀳𑀸𑀪𑀽𑀢𑀁 𑀦𑀸𑀫 𑀉𑀧𑀸𑀤𑀸𑀭𑀽𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀉𑀧𑀸𑀤𑀸𑀭𑀽𑀧𑀁 𑀫𑀳𑀸𑀪𑀽𑀢𑁂𑀦. 𑀬𑀣𑀸 𑀆𑀢𑀧𑁄 𑀦𑀸𑀫 𑀙𑀸𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀙𑀸𑀬𑀸 𑀆𑀢𑀧𑁂𑀦; 𑀏𑀯𑀫𑁂𑀯 𑀫𑀳𑀸𑀪𑀽𑀢𑀁 𑀉𑀧𑀸𑀤𑀸𑀭𑀽𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 ¶ , 𑀉𑀧𑀸𑀤𑀸𑀭𑀽𑀧𑀁 𑀫𑀳𑀸𑀪𑀽𑀢𑁂𑀦. 𑀅𑀣𑀲𑁆𑀲 𑀏𑀯𑀁 ‘‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀢𑁂𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀆𑀬𑀢𑀦𑀤𑁆𑀯𑀸𑀭𑀯𑀲𑁂𑀦 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀇𑀢𑀺 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀳𑁄𑀦𑁆𑀢𑀻𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀯𑀲𑁂𑀦 𑀬𑀫𑀓𑀢𑀸𑀮𑀓𑀦𑁆𑀥𑀁 𑀨𑀸𑀮𑁂𑀦𑁆𑀢𑁄 𑀯𑀺𑀬 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑀲𑁄 ‘‘𑀇𑀤𑀁 𑀦𑀸𑀫𑀭𑀽𑀧𑀁 𑀦 𑀅𑀳𑁂𑀢𑀼 𑀦 𑀅𑀧𑁆𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀁, 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀁. 𑀓𑁄 𑀧𑀦𑀲𑁆𑀲 𑀳𑁂𑀢𑀼? 𑀓𑁄 𑀧𑀦 𑀧𑀘𑁆𑀘𑀬𑁄’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ 𑀢𑀡𑁆𑀳𑀸𑀧𑀘𑁆𑀘𑀬𑀸 𑀓𑀫𑁆𑀫𑀧𑀘𑁆𑀘𑀬𑀸 𑀆𑀳𑀸𑀭𑀧𑀘𑁆𑀘𑀬𑀸 𑀘𑀸’’𑀢𑀺 𑀢𑀲𑁆𑀲 𑀧𑀘𑁆𑀘𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀅𑀢𑀻𑀢𑁂𑀧𑀺 𑀧𑀘𑁆𑀘𑀬𑀸 𑀘𑁂𑀯 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘 𑀅𑀦𑀸𑀕𑀢𑁂𑀧𑀺 𑀏𑀢𑀭𑀳𑀺𑀧𑀺 𑀧𑀘𑁆𑀘𑀬𑀸 𑀘𑁂𑀯 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘, 𑀢𑀢𑁄 𑀉𑀤𑁆𑀥𑀁 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺, 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄 𑀏𑀯𑀸’’𑀢𑀺 𑁋 𑀏𑀯𑀁 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀅𑀬𑀁 𑀧𑀦 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀭𑀲𑀮𑁆𑀮𑀓𑁆𑀔𑀡𑀸 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫.

𑀏𑀯𑀁 𑀲𑀗𑁆𑀔𑀸𑀭𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀺𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑁆𑀲 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀫𑀽𑀮𑀁 𑀑𑀢𑀺𑀡𑁆𑀡𑀁 𑀦𑀸𑀫 𑀳𑁄𑀢𑀺, 𑀧𑀢𑀺𑀝𑁆𑀞𑀸 𑀮𑀤𑁆𑀥𑀸 𑀦𑀸𑀫, 𑀘𑀽𑀴𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺 𑀦𑀺𑀬𑀢𑀕𑀢𑀺𑀓𑁄. 𑀢𑀣𑀸𑀭𑀽𑀧𑀁 𑀧𑀦 𑀉𑀢𑀼𑀲𑀧𑁆𑀧𑀸𑀬𑀁, 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁, 𑀪𑁄𑀚𑀦𑀲𑀧𑁆𑀧𑀸𑀬𑀁, 𑀥𑀫𑁆𑀫𑀲𑀯𑀡𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀏𑀓𑀸𑀲𑀦𑁂 𑀏𑀓𑀧𑀮𑁆𑀮𑀗𑁆𑀓𑀯𑀭𑀕𑀢𑁄 ¶ 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀇𑀤𑀁 𑀥𑀸𑀢𑀼𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀕𑀫𑀦𑀁.

𑀬𑀲𑁆𑀲 𑀧𑀦 𑀦𑁂𑀯 𑀯𑀡𑁆𑀡𑀢𑁄 𑀉𑀧𑀝𑁆𑀞𑀸𑀢𑀺 𑀦 𑀧𑀝𑀺𑀓𑀽𑀮𑀢𑁄 𑀦 𑀲𑀼𑀜𑁆𑀜𑀢𑁄 𑀢𑁂𑀦 ‘𑀦 𑀫𑁂 𑀉𑀧𑀝𑁆𑀞𑀸𑀢𑀻’𑀢𑀺 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀓𑁄𑀝𑁆𑀞𑀸𑀲𑀫𑀦𑀲𑀺𑀓𑀸𑀭𑁂𑀬𑁂𑀯 𑀧𑀦 𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀓𑀺𑀭 ‘𑀓𑁄𑀝𑁆𑀞𑀸𑀲𑀫𑀦𑀲𑀺𑀓𑀸𑀭𑁄𑀯 𑀧𑀫𑀸𑀡’𑀦𑁆𑀢𑀺 𑀆𑀳𑀁𑀲𑀼. 𑀇𑀘𑁆𑀘𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀓𑁄𑀝𑁆𑀞𑀸𑀲𑀸 𑀧𑀕𑀼𑀡𑀸 𑀳𑁄𑀦𑁆𑀢𑀺. 𑀓𑀤𑀸 𑀧𑀦 𑀧𑀕𑀼𑀡𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺? 𑀬𑀤𑀸 ‘𑀓𑁂𑀲𑀸’𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀫𑀦𑀲𑀺𑀓𑀸𑀭𑁄 𑀕𑀦𑁆𑀢𑁆𑀯𑀸 ‘𑀫𑀢𑁆𑀣𑀮𑀼𑀗𑁆𑀕’𑀦𑁆𑀢𑀺 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑁂 𑀧𑀢𑀺𑀝𑁆𑀞𑀸𑀢𑀺, ‘𑀫𑀢𑁆𑀣𑀮𑀼𑀗𑁆𑀕’𑀦𑁆𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀫𑀦𑀲𑀺𑀓𑀸𑀭𑁄 𑀆𑀕𑀦𑁆𑀢𑁆𑀯𑀸 ‘𑀓𑁂𑀲𑀸’𑀢𑀺 𑀆𑀤𑀺𑀓𑁄𑀝𑁆𑀞𑀸𑀲𑁂 𑀧𑀢𑀺𑀝𑁆𑀞𑀸𑀢𑀺.

𑀅𑀣𑀲𑁆𑀲 𑀬𑀣𑀸 𑀦𑀸𑀫 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀯𑀡𑁆𑀡𑀸𑀦𑀁 ¶ 𑀧𑀼𑀧𑁆𑀨𑀸𑀦𑀁 𑀏𑀓𑀲𑀼𑀢𑁆𑀢𑀕𑀦𑁆𑀣𑀺𑀢𑀁 𑀫𑀸𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀦 𑀦𑀺𑀔𑀸𑀢𑁂 𑀤𑁆𑀯𑀢𑁆𑀢𑀺𑀁𑀲𑀯𑀢𑀺𑀧𑀸𑀤𑁂 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀝𑀺𑀧𑀸𑀝𑀺𑀬𑀸𑀯 𑀤𑁆𑀯𑀢𑁆𑀢𑀺𑀁𑀲𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀢𑀺𑀧𑀸𑀤𑀸 𑀯𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀘𑀭𑀦𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀲𑀢𑁆𑀢𑀸𑀢𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁄𑀝𑁆𑀞𑀸𑀲𑀸𑀢𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀓𑁄𑀝𑁆𑀞𑀸𑀲𑀦𑁆𑀢𑀭𑁂 𑀧𑀓𑁆𑀔𑀺𑀧𑁆𑀧𑀫𑀸𑀦𑀁 𑀯𑀺𑀬 𑀳𑁄𑀢𑀺.

𑀓𑁄𑀝𑁆𑀞𑀸𑀲𑀸𑀦𑀁 𑀧𑀕𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀻𑀲𑀼 𑀫𑀼𑀔𑁂𑀲𑀼 𑀏𑀓𑁂𑀦 𑀫𑀼𑀔𑁂𑀦 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀯𑀡𑁆𑀡𑀢𑁄 𑀯𑀸 𑀧𑀝𑀺𑀓𑀽𑀮𑀢𑁄 𑀯𑀸 𑀲𑀼𑀜𑁆𑀜𑀢𑁄 𑀯𑀸 𑀉𑀧𑀝𑁆𑀞𑀸𑀢𑀺 ¶ . 𑀬𑀣𑀸 𑀦𑀸𑀫 𑀧𑀽𑀯𑁂 𑀧𑀘𑀺𑀢𑀼𑀓𑀸𑀫𑀸 𑀇𑀢𑁆𑀣𑀻 𑀫𑀤𑁆𑀤𑀺𑀢𑁆𑀯𑀸 𑀞𑀧𑀺𑀢𑀧𑀺𑀝𑁆𑀞𑀢𑁄 𑀬𑀁 𑀬𑀁 𑀇𑀘𑁆𑀙𑀢𑀺 𑀢𑀁 𑀢𑀁 𑀧𑀘𑀢𑀺, 𑀬𑀣𑀸 𑀯𑀸 𑀧𑀦 𑀲𑀫𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀞𑀧𑀺𑀢𑀁 𑀉𑀤𑀓𑀧𑀽𑀭𑀁 𑀓𑀼𑀫𑁆𑀪𑀁 𑀬𑀢𑁄 𑀬𑀢𑁄 𑀆𑀯𑀺𑀚𑁆𑀛𑀦𑁆𑀢𑀺 𑀢𑀢𑁄 𑀢𑀢𑁄𑀯 𑀉𑀤𑀓𑀁 𑀦𑀺𑀓𑁆𑀔𑀫𑀢𑀺; 𑀏𑀯𑀫𑁂𑀯 𑀓𑁄𑀝𑁆𑀞𑀸𑀲𑀸𑀦𑀁 𑀧𑀕𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀻𑀲𑀼 𑀫𑀼𑀔𑁂𑀲𑀼 𑀏𑀓𑁂𑀦 𑀫𑀼𑀔𑁂𑀦 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀺. 𑀆𑀓𑀗𑁆𑀔𑀫𑀸𑀦𑀲𑁆𑀲 𑀯𑀡𑁆𑀡𑀢𑁄, 𑀆𑀓𑀗𑁆𑀔𑀫𑀸𑀦𑀲𑁆𑀲 𑀧𑀝𑀺𑀓𑀽𑀮𑀢𑁄, 𑀆𑀓𑀗𑁆𑀔𑀫𑀸𑀦𑀲𑁆𑀲 𑀲𑀼𑀜𑁆𑀜𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺𑀬𑁂𑀯. 𑀅𑀬𑀁 𑀏𑀢𑁆𑀢𑀓𑁄 𑀉𑀕𑁆𑀕𑀳𑀲𑀦𑁆𑀥𑀺 𑀦𑀸𑀫. 𑀇𑀫𑀲𑁆𑀫𑀺𑀁 𑀉𑀕𑁆𑀕𑀳𑀲𑀦𑁆𑀥𑀺𑀲𑁆𑀫𑀺𑀁 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀪𑀺𑀓𑁆𑀔𑀼 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸.

𑀬𑀲𑁆𑀲 𑀧𑀦 𑀉𑀕𑁆𑀕𑀳𑀲𑀦𑁆𑀥𑀺𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀲𑀘𑁂 𑀬𑀢𑁆𑀣 𑀆𑀘𑀭𑀺𑀬𑁄 𑀯𑀲𑀢𑀺, 𑀲𑁄 𑀆𑀯𑀸𑀲𑁄 𑀲𑀧𑁆𑀧𑀸𑀬𑁄 𑀳𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂, 𑀲𑀧𑁆𑀧𑀸𑀬𑀝𑁆𑀞𑀸𑀦𑁂 𑀯𑀲𑀺𑀢𑀩𑁆𑀩𑀁. 𑀯𑀲𑀦𑁆𑀢𑁂𑀦 𑀅𑀝𑁆𑀞𑀸𑀭𑀲 𑀯𑀺𑀳𑀸𑀭𑀤𑁄𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑁂𑀦𑀸𑀲𑀦𑁂 ¶ 𑀯𑀲𑀺𑀢𑀩𑁆𑀩𑀁, 𑀲𑀬𑀫𑁆𑀧𑀺 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀢𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀭𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀓𑀣𑀁? 𑀆𑀤𑀺𑀢𑁄 𑀢𑀸𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀦 𑀏𑀓𑀦𑁆𑀢𑀭𑀺𑀓𑀸. 𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀳𑀺 𑀤𑁆𑀯𑀢𑁆𑀢𑀺𑀁𑀲𑀧𑀤𑀁 𑀦𑀺𑀲𑁆𑀲𑁂𑀡𑀺𑀁 𑀧𑀤𑀧𑀝𑀺𑀧𑀸𑀝𑀺𑀬𑀸 𑀅𑀓𑁆𑀓𑀫𑀦𑁆𑀢𑁄 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀧𑀸𑀲𑀸𑀤𑀸𑀦𑀺𑀲𑀁𑀲𑀁 𑀅𑀦𑀼𑀪𑀯𑀦𑀓𑀧𑀼𑀭𑀺𑀲𑁄 𑀯𑀺𑀬 ‘𑀓𑁂𑀲𑀸 𑀮𑁄𑀫𑀸’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀢𑁄 𑀘 𑀦 𑀧𑀭𑀺𑀳𑀸𑀬𑀢𑀺, 𑀧𑀸𑀲𑀸𑀤𑀸𑀦𑀺𑀲𑀁𑀲𑀲𑀤𑀺𑀲𑁂 𑀘 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀅𑀦𑀼𑀪𑀯𑀢𑀺. 𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑀸𑀧𑀺 𑀘 𑀦𑀸𑀢𑀺𑀲𑀻𑀖𑀢𑁄 𑀦𑀸𑀢𑀺𑀲𑀡𑀺𑀓𑀢𑁄 ¶ 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀢𑀺𑀲𑀻𑀖𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀳𑀺 𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀕𑀼𑀡𑀁 𑀳𑁄𑀢𑀺, 𑀅𑀯𑀺𑀪𑀽𑀢𑀁 𑀧𑀦 𑀳𑁄𑀢𑀺. 𑀢𑀢𑁆𑀣 𑀑𑀧𑀫𑁆𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀅𑀢𑀺𑀲𑀡𑀺𑀓𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀯 𑀑𑀲𑀓𑁆𑀓𑀺𑀢𑀩𑁆𑀩𑀁 𑀳𑁄𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀢𑀺𑀬𑁄𑀚𑀦𑀁 𑀫𑀕𑁆𑀕𑀁 𑀲𑀸𑀬𑀁 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀧𑀝𑀺𑀧𑀦𑁆𑀦𑁄 𑀦𑀺𑀓𑁆𑀔𑀦𑁆𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀻𑀢𑀮𑀘𑁆𑀙𑀸𑀬𑀁 𑀤𑀺𑀲𑁆𑀯𑀸 𑀯𑀺𑀲𑁆𑀲𑀫𑀢𑀺, 𑀭𑀫𑀡𑀻𑀬𑀁 𑀯𑀸𑀮𑀺𑀓𑀢𑀮𑀁 𑀤𑀺𑀲𑁆𑀯𑀸 𑀧𑀺𑀝𑁆𑀞𑀺𑀁 𑀧𑀲𑀸𑀭𑁂𑀢𑀺, 𑀯𑀦𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀢𑀺 𑀦𑁆𑀳𑀸𑀬𑀢𑀺, 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 𑀆𑀭𑀼𑀬𑁆𑀳 𑀧𑀩𑁆𑀩𑀢𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺, 𑀢𑀁 𑀅𑀦𑁆𑀢𑀭𑀸𑀬𑁂𑀯 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀤𑀻𑀧𑀺 𑀯𑀸 𑀳𑀦𑀢𑀺, 𑀘𑁄𑀭𑀸 𑀯𑀸 𑀧𑀦 ¶ 𑀯𑀺𑀮𑀼𑀧𑁆𑀧𑀦𑁆𑀢𑀺 𑀘𑁂𑀯 𑀳𑀦𑀦𑁆𑀢𑀺 𑀘; 𑀏𑀯𑀫𑁂𑀯 𑀅𑀢𑀺𑀲𑀡𑀺𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀯 𑀑𑀲𑀓𑁆𑀓𑀺𑀢𑀩𑁆𑀩𑀁 𑀳𑁄𑀢𑀺.

𑀢𑀲𑁆𑀫𑀸 𑀦𑀸𑀢𑀺𑀲𑀻𑀖𑀁 𑀦𑀸𑀢𑀺𑀲𑀡𑀺𑀓𑀁 𑀏𑀓𑀤𑀺𑀯𑀲𑀁 𑀢𑀺𑀁𑀲𑀯𑀸𑀭𑁂 𑀫𑀦𑀲𑀺𑀓𑀸𑀢𑀩𑁆𑀩𑀁; 𑀧𑀸𑀢𑁄𑀯 𑀤𑀲 𑀯𑀸𑀭𑁂, 𑀫𑀚𑁆𑀛𑀦𑁆𑀳𑀺𑀓𑁂 𑀤𑀲𑀯𑀸𑀭𑁂, 𑀲𑀸𑀬𑀦𑁆𑀳𑁂 𑀤𑀲 𑀯𑀸𑀭𑁂 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄, 𑀦𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀣𑀸 𑀳𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀫𑀼𑀔𑀁 𑀦𑁄 𑀥𑁄𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀦𑁄 𑀔𑀸𑀤𑀺𑀢𑀼𑀁 𑀦𑁄 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺; 𑀏𑀢𑀁 𑀧𑀦 𑀯𑀝𑁆𑀝𑁂𑀬𑁆𑀬; 𑀇𑀤𑀫𑁂𑀯 𑀏𑀓𑀦𑁆𑀢𑁂𑀦 𑀦𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺; 𑀓𑀭𑁄𑀦𑁆𑀢𑁄 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀣𑀸 𑀳𑀺 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀻𑀡𑀺 𑀔𑁂𑀢𑁆𑀢𑀸𑀦𑀺; 𑀏𑀓𑀁 𑀔𑁂𑀢𑁆𑀢𑀁 𑀅𑀝𑁆𑀞𑀓𑀼𑀫𑁆𑀪𑀁 𑀤𑁂𑀢𑀺, 𑀏𑀓𑀁 𑀲𑁄𑀴𑀲, 𑀏𑀓𑀁 𑀤𑁆𑀯𑀢𑁆𑀢𑀺𑀁𑀲; 𑀢𑁂𑀦 𑀢𑀻𑀡𑀺𑀧𑀺 𑀔𑁂𑀢𑁆𑀢𑀸𑀦𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀤𑁆𑀯𑁂 𑀙𑀟𑁆𑀟𑁂𑀢𑁆𑀯𑀸 𑀏𑀓𑀁 𑀤𑁆𑀯𑀢𑁆𑀢𑀺𑀁𑀲𑀓𑀼𑀫𑁆𑀪𑀤𑀸𑀬𑀓𑀫𑁂𑀯 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁; 𑀢𑀢𑁆𑀣𑁂𑀯 𑀓𑀲𑀦𑀯𑀧𑀦𑀦𑀺𑀤𑁆𑀤𑀸𑀦𑀸𑀤𑀻𑀦𑀺 𑀓𑀸𑀢𑀩𑁆𑀩𑀸𑀦𑀺; 𑀢𑀤𑁂𑀯𑀲𑁆𑀲 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀉𑀝𑁆𑀞𑀸𑀦𑀓𑀤𑀸𑀬𑀁 𑀤𑀲𑁆𑀲𑀢𑀺; 𑀏𑀯𑀫𑁂𑀯 𑀲𑁂𑀲𑀁 𑀫𑀼𑀔𑀥𑁄𑀯𑀦𑀸𑀤𑀺𑀓𑀫𑁆𑀫𑀁 𑀙𑀟𑁆𑀟𑁂𑀢𑁆𑀯𑀸𑀧𑀺 𑀏𑀢𑁆𑀣𑁂𑀯 ¶ 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀭𑁄𑀦𑁆𑀢𑁄 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀕𑀡𑁆𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀦𑀸𑀫 𑀓𑀣𑀺𑀢𑀸.

𑀏𑀯𑀁 𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀯𑀺𑀓𑁆𑀔𑁂𑀧𑁄 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. 𑀓𑀫𑁆𑀫𑀝𑁆𑀞𑀸𑀦𑀜𑁆𑀳𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑁂 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀢𑁄 𑀧𑀭𑀺𑀳𑀸𑀬𑀢𑀺, 𑀯𑀝𑁆𑀝𑀪𑀬𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀣𑀸 𑀳𑀺 𑀏𑀓𑁄 𑀧𑀼𑀭𑀺𑀲𑁄 𑀲𑀳𑀲𑁆𑀲𑀼𑀤𑁆𑀥𑀸𑀭𑀁 𑀲𑀸𑀥𑁂𑀢𑁆𑀯𑀸 𑀯𑀟𑁆𑀠𑀺𑀁 𑀮𑀪𑀺𑀢𑁆𑀯𑀸 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀼𑀫𑁆𑀪𑀻𑀮𑀫𑀓𑀭𑀕𑀸𑀳𑀭𑀓𑁆𑀔𑀲𑀲𑀫𑀼𑀝𑁆𑀞𑀺𑀢𑀸𑀬 ¶ 𑀕𑀫𑁆𑀪𑀻𑀭𑀕𑀺𑀭𑀺𑀓𑀦𑁆𑀤𑀭𑀸𑀬 𑀉𑀧𑀭𑀺 𑀅𑀢𑁆𑀣𑀢𑀁 𑀏𑀓𑀧𑀤𑀺𑀓𑀁 𑀤𑀡𑁆𑀟𑀓𑀲𑁂𑀢𑀼𑀁 𑀆𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑁄 𑀅𑀓𑁆𑀓𑀫𑀦𑀧𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀧𑀢𑀺𑀢𑁆𑀯𑀸 𑀓𑀼𑀫𑁆𑀪𑀻𑀮𑀸𑀤𑀺𑀪𑀢𑁆𑀢𑀁 𑀳𑁄𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀘𑀺𑀢𑁆𑀢𑁂 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀢𑁄 𑀧𑀭𑀺𑀳𑀸𑀬𑀢𑀺, 𑀯𑀝𑁆𑀝𑀪𑀬𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀧𑀼𑀭𑀺𑀲𑀲𑁆𑀲 𑀲𑀳𑀲𑁆𑀲𑀼𑀤𑁆𑀥𑀸𑀭𑀁 𑀲𑀸𑀥𑁂𑀢𑁆𑀯𑀸 𑀯𑀟𑁆𑀠𑀺𑀁 𑀮𑀤𑁆𑀥𑀓𑀸𑀮𑁄 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀳𑀺𑀢𑀓𑀸𑀮𑁄; 𑀅𑀦𑁆𑀢𑀭𑀸 𑀕𑀫𑁆𑀪𑀻𑀭𑀕𑀺𑀭𑀺𑀓𑀦𑁆𑀤𑀭𑀸 𑀯𑀺𑀬 𑀲𑀁𑀲𑀸𑀭𑁄; 𑀢𑀲𑁆𑀲 𑀓𑀼𑀫𑁆𑀪𑀻𑀮𑀸𑀤𑀻𑀳𑀺 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀯𑀝𑁆𑀝𑀫𑀽𑀮𑀓𑀸𑀦𑀺 𑀫𑀳𑀸𑀤𑀼𑀓𑁆𑀔𑀸𑀦𑀺; 𑀏𑀓𑀧𑀤𑀺𑀓𑀤𑀡𑁆𑀟𑀓𑀲𑁂𑀢𑀼 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀚𑁆𑀛𑀸𑀬𑀯𑀻𑀣𑀺; 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀓𑀧𑀤𑀺𑀓𑀁 ¶ 𑀤𑀡𑁆𑀟𑀓𑀲𑁂𑀢𑀼𑀁 𑀆𑀭𑀼𑀬𑁆𑀳 𑀅𑀓𑁆𑀓𑀫𑀦𑀧𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀭𑀺𑀧𑀢𑀺𑀢𑁆𑀯𑀸 𑀓𑀼𑀫𑁆𑀪𑀻𑀮𑀸𑀤𑀻𑀦𑀁 𑀪𑀢𑁆𑀢𑀪𑀸𑀯𑀁 𑀆𑀧𑀦𑁆𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀝𑁆𑀝𑀪𑀬𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀫𑀸 𑀓𑁂𑀲𑀸 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀓𑁂𑀲𑁂 𑀫𑀦𑀲𑀺𑀓𑀭𑀺𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 ‘𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄’𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀏𑀯𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀢𑁄 𑀦 𑀧𑀭𑀺𑀳𑀸𑀬𑀢𑀺, 𑀯𑀝𑁆𑀝𑀪𑀬𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀑𑀧𑀫𑁆𑀫𑀁 𑀧𑀦𑁂𑀢𑁆𑀣 𑀢𑀤𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀲𑀳𑀲𑁆𑀲𑀼𑀤𑁆𑀥𑀸𑀭𑀁 𑀲𑀸𑀥𑁂𑀢𑁆𑀯𑀸 𑀯𑀟𑁆𑀠𑀺𑀁 𑀮𑀪𑀺𑀢𑁆𑀯𑀸 𑀙𑁂𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀡𑁆𑀟𑀓𑀲𑁂𑀢𑀼𑀁 𑀆𑀭𑀼𑀬𑁆𑀳 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀁𑀯𑀺𑀥𑀸𑀬 𑀥𑀸𑀢𑀼𑀧𑀢𑁆𑀣𑀤𑁆𑀥𑀓𑀸𑀬𑀁 𑀓𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀧𑀭𑀢𑀻𑀭𑀕𑀫𑀦𑀁 𑀯𑀺𑀬 𑀙𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁂𑀲𑁂 𑀫𑀦𑀲𑀺𑀓𑀭𑀺𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 ‘𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄’𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀝𑁆𑀝𑀪𑀬𑀁 𑀲𑀫𑀢𑀺𑀓𑁆𑀓𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 ¶ 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀦𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁. ‘𑀓𑁂𑀲𑀸 𑀮𑁄𑀫𑀸’𑀢𑀺 𑀧𑀡𑁆𑀡𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘𑀧𑀝𑀺𑀓𑀽𑀮𑀁 𑀧𑀝𑀺𑀓𑀽𑀮’𑀦𑁆𑀢𑀺 𑀲𑀢𑀺 𑀞𑀧𑁂𑀢𑀩𑁆𑀩𑀸. 𑀧𑀞𑀫𑀁𑀬𑁂𑀯 𑀧𑀦 𑀧𑀝𑀺𑀓𑀽𑀮𑀢𑁄 𑀦 𑀉𑀧𑀝𑁆𑀞𑀸𑀢𑀺 ¶ . 𑀬𑀸𑀯 𑀦 𑀉𑀧𑀝𑁆𑀞𑀸𑀢𑀺 𑀢𑀸𑀯 𑀧𑀡𑁆𑀡𑀢𑁆𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸. 𑀬𑀤𑀸 𑀉𑀧𑀝𑁆𑀞𑀸𑀢𑀺 𑀢𑀤𑀸 𑀧𑀡𑁆𑀡𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘𑀧𑀝𑀺𑀓𑀽𑀮’𑀦𑁆𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀓𑀭𑁄𑀦𑁆𑀢𑁂𑀦 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑀽𑀮𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀢𑀘𑀧𑀜𑁆𑀘𑀓𑀲𑁆𑀫𑀺𑀜𑁆𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦𑁂𑀯 𑀧𑀜𑁆𑀘𑀯𑀺𑀥𑀫𑁆𑀧𑀺 𑀧𑀸𑀝𑀺𑀓𑀽𑀮𑁆𑀬𑀁 𑀮𑀩𑁆𑀪𑀢𑀺. 𑀲𑁂𑀲𑁂𑀲𑀼𑀧𑀺 𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑀢𑀢𑁆𑀣 𑀓𑁂𑀲𑀸𑀤𑀬𑁄 𑀧𑀜𑁆𑀘 𑀓𑁄𑀝𑁆𑀞𑀸𑀲𑀸 𑀲𑀼𑀪𑀦𑀺𑀫𑀺𑀢𑁆𑀢𑀁 𑀭𑀸𑀕𑀝𑁆𑀞𑀸𑀦𑀺𑀬𑀁 𑀇𑀝𑁆𑀞𑀸𑀭𑀫𑁆𑀫𑀡𑀦𑁆𑀢𑀺 𑀲𑀗𑁆𑀔𑀁 𑀕𑀢𑀸. 𑀬𑁂 𑀓𑁂𑀘𑀺 𑀭𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀭𑀚𑁆𑀚𑀦𑁆𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀫𑀳𑀸𑀚𑀦𑀲𑁆𑀲 𑀭𑀚𑁆𑀚𑀦𑀝𑁆𑀞𑀸𑀦𑁂 ‘𑀧𑀝𑀺𑀓𑀽𑀮’𑀦𑁆𑀢𑀺 𑀅𑀧𑁆𑀧𑀦𑀁 𑀧𑀸𑀧𑁂𑀢𑀺. 𑀢𑀢𑁆𑀣 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀭𑀢𑁄 𑀅𑀓𑀺𑀮𑀫𑀦𑁆𑀢𑁄𑀯 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀁 𑁋 𑀬𑀣𑀸 𑀳𑀺 𑀙𑁂𑀓𑁄 𑀥𑀦𑀼𑀕𑁆𑀕𑀳𑁄 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀕𑀸𑀫𑀯𑀭𑀁 𑀮𑀪𑀺𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 ¶ 𑀤𑁆𑀯𑀢𑁆𑀢𑀺𑀁𑀲 𑀘𑁄𑀭𑁂 𑀤𑀺𑀲𑁆𑀯𑀸 𑀢𑁂𑀲𑀼 𑀧𑀜𑁆𑀘𑀘𑁄𑀭𑀚𑁂𑀝𑁆𑀞𑀓𑁂 𑀖𑀸𑀢𑁂𑀬𑁆𑀬; 𑀢𑁂𑀲𑀁 𑀖𑀸𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂𑀲𑀼 𑀤𑁆𑀯𑁂 𑀏𑀓𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀸𑀫 𑀦 𑀳𑁄𑀦𑁆𑀢𑀺; 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀥𑀦𑀼𑀕𑁆𑀕𑀳𑀲𑁆𑀲 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀕𑀸𑀫𑀯𑀭𑀁 𑀮𑀤𑁆𑀥𑀓𑀸𑀮𑁄 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀓𑀸𑀮𑁄; 𑀤𑁆𑀯𑀢𑁆𑀢𑀺𑀁𑀲 𑀘𑁄𑀭𑀸 𑀯𑀺𑀬 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸; 𑀧𑀜𑁆𑀘 𑀘𑁄𑀭𑀚𑁂𑀝𑁆𑀞𑀓𑀸 𑀯𑀺𑀬 𑀓𑁂𑀲𑀸𑀤𑀬𑁄 𑀧𑀜𑁆𑀘; 𑀘𑁄𑀭𑀚𑁂𑀝𑁆𑀞𑀓𑀸𑀦𑀁 𑀖𑀸𑀢𑀺𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀭𑀚𑁆𑀚𑀦𑀝𑁆𑀞𑀸𑀦𑁂 𑀢𑀘𑀧𑀜𑁆𑀘𑀓𑁂 ‘𑀧𑀝𑀺𑀓𑀽𑀮’𑀦𑁆𑀢𑀺 𑀅𑀧𑁆𑀧𑀦𑀸𑀬 𑀧𑀸𑀧𑀺𑀢𑀓𑀸𑀮𑁄; 𑀲𑁂𑀲𑀘𑁄𑀭𑀸𑀦𑀁 𑀧𑀸𑀡𑀺𑀧𑁆𑀧𑀳𑀸𑀭𑁂𑀦𑁂𑀯 𑀧𑀮𑀸𑀬𑀺𑀢𑀓𑀸𑀮𑁄 𑀯𑀺𑀬 𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼 𑀅𑀓𑀺𑀮𑀫𑀦𑁆𑀢𑀲𑁆𑀲𑁂𑀯 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀦𑁆𑀢𑁂𑀦 𑀘 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄 𑁋 𑀓𑁂𑀲𑁂 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑁂𑀯 𑀓𑁂𑀲𑁂𑀲𑀼 𑀲𑀸𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 𑀮𑁄𑀫𑁂𑀲𑀼 𑀲𑀢𑀺 𑀧𑁂𑀲𑁂𑀢𑀩𑁆𑀩𑀸. 𑀬𑀸𑀯 𑀮𑁄𑀫𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺 𑀢𑀸𑀯 ‘𑀓𑁂𑀲𑀸 𑀓𑁂𑀲𑀸’𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀬𑀤𑀸 𑀧𑀦 𑀮𑁄𑀫𑀸 𑀉𑀧𑀝𑁆𑀞𑀳𑀦𑁆𑀢𑀺 𑀢𑀤𑀸 𑀓𑁂𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀮𑁄𑀫𑁂𑀲𑀼 𑀲𑀢𑀺 𑀉𑀧𑀝𑁆𑀞𑀧𑁂𑀢𑀩𑁆𑀩𑀸. 𑀏𑀯𑀁 𑀦𑀔𑀸𑀤𑀻𑀲𑀼𑀧𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 ¶ 𑀑𑀧𑀫𑁆𑀫𑀁 𑁋 𑀬𑀣𑀸 𑀳𑀺 𑀚𑀮𑀽𑀓𑀸 𑀕𑀘𑁆𑀙𑀫𑀸𑀦𑀸 𑀬𑀸𑀯 𑀧𑀼𑀭𑀢𑁄 ¶ 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀺 𑀢𑀸𑀯 𑀧𑀘𑁆𑀙𑀢𑁄 𑀦𑀗𑁆𑀕𑀼𑀝𑁆𑀞𑁂𑀦 𑀕𑀳𑀺𑀢𑀝𑁆𑀞𑀸𑀦𑀁 𑀦 𑀫𑀼𑀜𑁆𑀘𑀢𑀺; 𑀬𑀤𑀸 𑀧𑀦 𑀧𑀼𑀭𑀢𑁄 𑀧𑀢𑀺𑀝𑁆𑀞𑀁 𑀮𑀪𑀢𑀺 𑀢𑀤𑀸 𑀦𑀗𑁆𑀕𑀼𑀝𑁆𑀞𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑁂𑀦 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑀺; 𑀏𑀯𑀫𑁂𑀯 𑀓𑁂𑀲𑁂 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑁂𑀯 𑀓𑁂𑀲𑁂𑀲𑀼 𑀲𑀸𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 𑀮𑁄𑀫𑁂𑀲𑀼 𑀲𑀢𑀺 𑀧𑁂𑀲𑁂𑀢𑀩𑁆𑀩𑀸. 𑀬𑀸𑀯 𑀮𑁄𑀫𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺 𑀢𑀸𑀯 ‘𑀓𑁂𑀲𑀸 𑀓𑁂𑀲𑀸’𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀬𑀤𑀸 𑀮𑁄𑀫𑀸 𑀉𑀧𑀝𑁆𑀞𑀳𑀦𑁆𑀢𑀺 𑀢𑀤𑀸 𑀓𑁂𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀮𑁄𑀫𑁂𑀲𑀼 𑀲𑀢𑀺 𑀉𑀧𑀝𑁆𑀞𑀧𑁂𑀢𑀩𑁆𑀩𑀸. 𑀏𑀯𑀁 𑀦𑀔𑀸𑀤𑀻𑀲𑀼𑀧𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑀏𑀯𑀁 𑀧𑀯𑀢𑁆𑀢𑁂𑀦𑁆𑀢𑁂𑀦 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀓𑀣𑀁? 𑀇𑀤𑀜𑁆𑀳𑀺 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺; 𑀧𑀞𑀫𑀁𑀬𑁂𑀯 𑀢𑀸𑀯 𑀦 𑀉𑀧𑀝𑁆𑀞𑀸𑀢𑀺; 𑀅𑀦𑀫𑀢𑀕𑁆𑀕𑀲𑁆𑀫𑀺𑀜𑁆𑀳𑀺 𑀲𑀁𑀲𑀸𑀭𑀯𑀝𑁆𑀝𑁂 𑀘 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀟𑁆𑀠𑀺𑀢𑀁 𑀘𑀺𑀢𑁆𑀢𑀁 ‘𑀓𑁂𑀲𑀸’𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀲𑀚𑁆𑀛𑀸𑀬𑀲𑁄𑀢𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑁂 𑀧𑀢𑀺𑀝𑁆𑀞𑀸𑀢𑀺. ‘𑀫𑀢𑁆𑀣𑀮𑀼𑀗𑁆𑀕’𑀦𑁆𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀲𑀚𑁆𑀛𑀸𑀬𑀲𑁄𑀢𑀸𑀦𑀼𑀲𑀸𑀭𑁂𑀦 𑀆𑀕𑀦𑁆𑀢𑁆𑀯𑀸 𑀓𑁂𑀲𑁂𑀲𑀼 𑀧𑀢𑀺𑀝𑁆𑀞𑀸𑀢𑀺. 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀦 𑀲𑁄 𑀲𑁄 𑀓𑁄𑀝𑁆𑀞𑀸𑀲𑁄 𑀉𑀧𑀝𑁆𑀞𑀸𑀢𑀺. 𑀲𑀢𑀺 ¶ 𑀲𑀫𑀸𑀥𑀺𑀦𑀸𑀧𑀺 𑀢𑀺𑀝𑁆𑀞𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀢𑁂𑀦 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀅𑀥𑀺𑀓𑀢𑀭𑀁 𑀉𑀧𑀝𑁆𑀞𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀺𑀕𑀼𑀡𑁂𑀦 𑀬𑁄𑀕𑀁 𑀓𑀢𑁆𑀯𑀸 𑀅𑀧𑁆𑀧𑀦𑀸 𑀧𑀸𑀧𑁂𑀢𑀩𑁆𑀩𑀸. 𑀏𑀯𑀁 𑀅𑀧𑁆𑀧𑀦𑀸𑀬 𑀧𑀸𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼 𑀅𑀓𑀺𑀮𑀫𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑁂𑀢𑀺. 𑀢𑀢𑁆𑀣 𑀢𑀸𑀮𑀯𑀦𑀫𑀓𑁆𑀓𑀝𑁄𑀯 𑀑𑀧𑀫𑁆𑀫𑀁.

𑀅𑀧𑀺𑀘𑁂𑀢𑁆𑀣 𑀏𑀯𑀫𑁆𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑀲𑁆𑀫𑀺𑀜𑁆𑀳𑀺 𑀢𑀸𑀮𑀯𑀦𑁂 𑀫𑀓𑁆𑀓𑀝𑁄 𑀧𑀝𑀺𑀯𑀲𑀢𑀺. 𑀢𑀁 𑀕𑀳𑁂𑀢𑀼𑀓𑀸𑀫𑁄 𑀮𑀼𑀤𑁆𑀤𑁄 𑀓𑁄𑀝𑀺𑀬𑀁 𑀞𑀺𑀢𑀢𑀸𑀮𑀫𑀽𑀮𑁂 𑀞𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀫𑀓𑀸𑀲𑀺. 𑀫𑀸𑀦𑀚𑀸𑀢𑀺𑀓𑁄 𑀫𑀓𑁆𑀓𑀝𑁄 𑀢𑀁 𑀢𑀁 𑀢𑀸𑀮𑀁 𑀮𑀗𑁆𑀖𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑁂 𑀅𑀝𑁆𑀞𑀸𑀲𑀺. 𑀮𑀼𑀤𑁆𑀤𑁄 𑀢𑀢𑁆𑀣𑀧𑀺 𑀕𑀦𑁆𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀫𑀓𑀸𑀲𑀺. 𑀫𑀓𑁆𑀓𑀝𑁄 𑀧𑀼𑀦 𑀢𑀣𑁂𑀯 𑀧𑀼𑀭𑀺𑀫𑀢𑀸𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀅𑀧𑀭𑀸𑀧𑀭𑀁 𑀅𑀦𑀼𑀩𑀦𑁆𑀥𑀺𑀬𑀫𑀸𑀦𑁄 𑀓𑀺𑀮𑀫𑀦𑁆𑀢𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀢𑀸𑀮𑀲𑁆𑀲 𑀫𑀽𑀮𑁂 𑀞𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀓𑀸𑀮𑁂 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀅𑀢𑀺𑀓𑀺𑀮𑀫𑀦𑁆𑀢𑁄 𑀏𑀓𑀲𑁆𑀲 𑀢𑀸𑀮𑀲𑁆𑀲 𑀫𑀓𑀼𑀴𑀧𑀡𑁆𑀡𑀲𑀽𑀘𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑁄𑀝𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄𑀧𑀺 𑀦 𑀧𑀮𑀸𑀬𑀢𑀺.

𑀢𑀢𑁆𑀣 𑀤𑁆𑀯𑀢𑁆𑀢𑀺𑀁𑀲 𑀢𑀸𑀮𑀸 𑀯𑀺𑀬 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸; 𑀫𑀓𑁆𑀓𑀝𑁄 𑀯𑀺𑀬 𑀘𑀺𑀢𑁆𑀢𑀁; 𑀮𑀼𑀤𑁆𑀤𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄; 𑀮𑀼𑀤𑁆𑀤𑁂𑀦 𑀢𑀸𑀮𑀫𑀽𑀮𑁂 𑀞𑀢𑁆𑀯𑀸 ¶ 𑀉𑀓𑁆𑀓𑀼𑀝𑁆𑀞𑀺𑀓𑀸𑀮𑁂 𑀫𑀸𑀦𑀚𑀸𑀢𑀺𑀓𑀲𑁆𑀲 𑀫𑀓𑁆𑀓𑀝𑀲𑁆𑀲 𑀧𑀮𑀸𑀬𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁 𑀞𑀺𑀢𑀓𑀸𑀮𑁄 𑀯𑀺𑀬 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀘 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀟𑁆𑀠𑀺𑀢𑀘𑀺𑀢𑁆𑀢𑀲𑁆𑀲 ‘𑀓𑁂𑀲𑀸’𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀲𑀚𑁆𑀛𑀸𑀬𑀲𑁄𑀢𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑁂 𑀧𑀢𑀺𑀝𑁆𑀞𑀸𑀦𑀁; 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁 𑀞𑀢𑁆𑀯𑀸 ¶ 𑀉𑀓𑁆𑀓𑀼𑀝𑁆𑀞𑁂 𑀑𑀭𑀺𑀫𑀓𑁄𑀝𑀺𑀁 𑀆𑀕𑀫𑀦𑀓𑀸𑀮𑁄 𑀯𑀺𑀬 ‘𑀫𑀢𑁆𑀣𑀮𑀼𑀗𑁆𑀕’𑀦𑁆𑀢𑀺 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀲𑀚𑁆𑀛𑀸𑀬𑀲𑁄𑀢𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀓𑁂𑀲𑁂𑀲𑀼 𑀧𑀢𑀺𑀝𑁆𑀞𑀸𑀦𑀁; 𑀅𑀧𑀭𑀸𑀧𑀭𑀁 𑀅𑀦𑀼𑀩𑀦𑁆𑀥𑀺𑀬𑀫𑀸𑀦𑀲𑁆𑀲 𑀓𑀺𑀮𑀫𑀦𑁆𑀢𑀲𑁆𑀲 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂 𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀉𑀧𑀝𑁆𑀞𑀳𑀦𑁆𑀢𑁂 𑀲𑀢𑀺𑀬𑀸 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀬 𑀕𑀫𑀦𑀁; 𑀥𑀦𑀼𑀓𑁄𑀝𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀧𑀮𑀸𑀬𑀦𑀓𑀸𑀮𑁄 𑀯𑀺𑀬 𑀬𑁄 𑀓𑁄𑀝𑁆𑀞𑀸𑀲𑁄 𑀅𑀥𑀺𑀓𑀢𑀭𑀁 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀺𑀁 𑀤𑁆𑀯𑀺𑀕𑀼𑀡𑀁 𑀫𑀦𑀲𑀺𑀓𑀸𑀭𑀁 𑀓𑀢𑁆𑀯𑀸 𑀅𑀧𑁆𑀧𑀦𑀸𑀬 𑀧𑀸𑀧𑀦𑀁.

𑀢𑀢𑁆𑀣 𑀅𑀧𑁆𑀧𑀦𑀸𑀬 𑀧𑀸𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼 𑀅𑀓𑀺𑀮𑀫𑀦𑁆𑀢𑁄𑀯 𑀅𑀧𑁆𑀧𑀦𑀁 𑀧𑀸𑀧𑁂𑀲𑁆𑀲𑀢𑀺. 𑀢𑀲𑁆𑀫𑀸 ‘𑀧𑀝𑀺𑀓𑀽𑀮𑀁 𑀧𑀝𑀺𑀓𑀽𑀮’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀁, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀸𑀢𑀩𑁆𑀩𑀁. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀲𑀗𑁆𑀔𑀸𑀢𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀏𑀓𑀁 𑀧𑀦 𑀓𑁄𑀝𑁆𑀞𑀸𑀲𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀏𑀓𑀫𑁂𑀯 ¶ 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀸𑀝𑀺𑀬𑁂𑀓𑁆𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀧𑀞𑀫𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀳𑀢𑁆𑀣𑁂 𑀕𑀳𑀺𑀢𑀧𑀜𑁆𑀳𑀸𑀯𑀢𑁆𑀣𑀼 𑀧𑀸𑀓𑀢𑀺𑀓𑀫𑁂𑀯.

𑀲𑁄 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑁄 𑀪𑀺𑀓𑁆𑀔𑀼 𑀢𑀁 𑀓𑀫𑁆𑀫𑀝𑁆𑀞𑀸𑀦𑀦𑀺𑀫𑀺𑀢𑁆𑀢𑀁. 𑀆𑀲𑁂𑀯𑀢𑀻𑀢𑀺 𑀲𑁂𑀯𑀢𑀺 𑀪𑀚𑀢𑀺. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀢𑀺. 𑀲𑁆𑀯𑀸𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 𑀲𑀼𑀯𑀯𑀢𑁆𑀣𑀺𑀢𑀁 𑀓𑀭𑁄𑀢𑀺. 𑀩𑀳𑀺𑀤𑁆𑀥𑀸 𑀓𑀸𑀬𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀏𑀯𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀭𑀲𑁆𑀲 𑀓𑀸𑀬𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺 𑀞𑀧𑁂𑀢𑀺 𑀧𑁂𑀲𑁂𑀢𑀺.

𑀅𑀢𑁆𑀣𑀺𑀲𑁆𑀲 𑀓𑀸𑀬𑁂𑀢𑀺 𑀅𑀢𑁆𑀣𑀺 𑀅𑀲𑁆𑀲 𑀓𑀸𑀬𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀓𑀸𑀬𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀮𑁂𑀦 𑀧𑀭𑁂𑀲𑀁 𑀓𑀸𑀬𑁂 𑀘𑀺𑀢𑁆𑀢𑀁 𑀉𑀧𑀦𑀸𑀫𑁂𑀢𑀺. 𑀅𑀢𑁆𑀣𑀺 ¶ 𑀓𑀸𑀬𑁂𑀢𑀺 𑀇𑀤𑀁 𑀬𑀲𑁆𑀫𑀸 𑀦 𑀏𑀓𑀦𑁆𑀢𑁂𑀦 𑀅𑀢𑁆𑀢𑀦𑁄 𑀓𑀸𑀬𑁄 𑀦𑀸𑀧𑀺 𑀧𑀭𑀲𑁆𑀲𑁂𑀯 𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀅𑀢𑁆𑀢𑀦𑁄 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 ‘𑀧𑀝𑀺𑀓𑀽𑀮’𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑀫𑁆𑀧𑀺 𑀚𑀸𑀬𑀢𑀺. 𑀧𑀭𑀲𑁆𑀲 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 ‘𑀧𑀝𑀺𑀓𑀽𑀮’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀅𑀧𑁆𑀧𑀦𑀸 𑀚𑀸𑀬𑀢𑀺, 𑀦 𑀉𑀧𑀘𑀸𑀭𑀁. 𑀦𑀦𑀼 𑀘 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀉𑀪𑀬𑀫𑁆𑀧𑁂𑀢𑀁 𑀚𑀸𑀬𑀢𑀻𑀢𑀺? 𑀆𑀫, 𑀚𑀸𑀬𑀢𑀺. 𑀢𑀸𑀦𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀧𑀓𑁆𑀔𑁂 𑀞𑀺𑀢𑀸𑀦𑀺. 𑀢𑀲𑁆𑀫𑀸 𑀢𑀢𑁆𑀣 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑀫𑁆𑀧𑀺 𑀚𑀸𑀬𑀢𑀺. 𑀇𑀤𑀁 𑀧𑀦 𑀉𑀧𑀸𑀤𑀺𑀦𑁆𑀦𑀓𑀧𑀓𑁆𑀔𑁂 𑀞𑀺𑀢𑀁. 𑀢𑁂𑀦𑁂𑀯𑁂𑀢𑁆𑀣 𑀉𑀪𑀬𑀫𑁆𑀧𑁂𑀢𑀁 𑀦 𑀚𑀸𑀬𑀢𑀺. 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀧𑀩𑁆𑀩𑁂 𑀓𑀺𑀁 𑀓𑀣𑀺𑀢𑀦𑁆𑀢𑀺? 𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑀇𑀤𑀸𑀦𑁂𑀢𑁆𑀣 ¶ 𑀏𑀯𑀁 𑀲𑀩𑁆𑀩𑀁 𑀫𑀦𑀲𑀺𑀓𑀸𑀭𑀲𑀸𑀥𑀸𑀭𑀡𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀜𑁆𑀳𑀺 𑁋

𑀦𑀺𑀫𑀺𑀢𑁆𑀢𑀢𑁄 𑀮𑀓𑁆𑀔𑀡𑀢𑁄, 𑀥𑀸𑀢𑀼𑀢𑁄 𑀅𑀣 𑀲𑀼𑀜𑁆𑀜𑀢𑁄;

𑀔𑀦𑁆𑀥𑀸𑀤𑀺𑀢𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄, 𑀓𑁂𑀲𑀸𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ‘𑀦𑀺𑀫𑀺𑀢𑁆𑀢𑀢𑁄’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀝𑁆𑀞𑀺𑀲𑀢𑀁 𑀦𑀺𑀫𑀺𑀢𑁆𑀢𑀸𑀦𑀺, 𑀬𑁂𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀓𑁄𑀝𑁆𑀞𑀸𑀲𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀲𑁆𑀲 𑀯𑀡𑁆𑀡𑀦𑀺𑀫𑀺𑀢𑁆𑀢𑀁, 𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑀁, 𑀤𑀺𑀲𑀸𑀦𑀺𑀫𑀺𑀢𑁆𑀢𑀁, 𑀑𑀓𑀸𑀲𑀦𑀺𑀫𑀺𑀢𑁆𑀢𑀁, 𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘𑀮𑀓𑁆𑀔𑀡𑀢𑁄’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀝𑁆𑀞𑀯𑀻𑀲𑀢𑀺𑀲𑀢𑀁 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀮𑀓𑁆𑀔𑀡𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀲𑁂𑀬𑁆𑀬𑀣𑀺𑀤𑀁 ¶ 𑁋 𑀓𑁂𑀲𑁂 𑀣𑀤𑁆𑀥𑀢𑁆𑀢𑀮𑀓𑁆𑀔𑀡𑀁, 𑀆𑀩𑀦𑁆𑀥𑀢𑁆𑀢𑀮𑀓𑁆𑀔𑀡𑀁, 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁, 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘𑀥𑀸𑀢𑀼𑀢𑁄’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 ‘‘𑀘𑀢𑀼𑀥𑀸𑀢𑀼𑀭𑁄 𑀅𑀬𑀁, 𑀪𑀺𑀓𑁆𑀔𑀼, 𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑀸𑀲𑀼 𑀥𑀸𑀢𑀽𑀲𑀼 𑀅𑀝𑁆𑀞𑀯𑀻𑀲𑀢𑀺𑀲𑀢𑀁 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀬𑀸𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀥𑀸𑀢𑀼𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑁂 𑀓𑀓𑁆𑀔𑀴𑀢𑀸 𑀧𑀣𑀯𑀻𑀥𑀸𑀢𑀼, 𑀆𑀩𑀦𑁆𑀥𑀦𑀢𑀸 𑀆𑀧𑁄𑀥𑀸𑀢𑀼, 𑀉𑀡𑁆𑀳𑀢𑀸 𑀢𑁂𑀚𑁄𑀥𑀸𑀢𑀼, 𑀯𑀺𑀢𑁆𑀣𑀫𑁆𑀪𑀦𑀢𑀸 𑀯𑀸𑀬𑁄𑀥𑀸𑀢𑀽𑀢𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀮𑁄𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘𑀲𑀼𑀜𑁆𑀜𑀢𑁄’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀙𑀦𑁆𑀦𑀯𑀼𑀢𑀺 𑀲𑀼𑀜𑁆𑀜𑀢𑀸 𑀳𑁄𑀦𑁆𑀢𑀺, 𑀬𑀸𑀲𑀁 𑀯𑀲𑁂𑀦 ¶ 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀼𑀜𑁆𑀜𑀢𑁄 𑀯𑀺𑀧𑀲𑁆𑀲𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀸 𑀲𑀼𑀜𑁆𑀜𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸𑀢𑀺. 𑀓𑁂𑀲𑁂 𑀢𑀸𑀯 𑀅𑀢𑁆𑀢𑀲𑀼𑀜𑁆𑀜𑀢𑀸, 𑀅𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀸, 𑀦𑀺𑀘𑁆𑀘𑀪𑀸𑀯𑀲𑀼𑀜𑁆𑀜𑀢𑀸𑀢𑀺 𑀢𑀺𑀲𑁆𑀲𑁄 𑀲𑀼𑀜𑁆𑀜𑀢𑀸 𑀳𑁄𑀦𑁆𑀢𑀺. 𑀮𑁄𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘𑀔𑀦𑁆𑀥𑀸𑀤𑀺𑀢𑁄’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀓𑁂𑀲𑀸𑀤𑀻𑀲𑀼 𑀔𑀦𑁆𑀥𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂𑀲𑀼 𑀓𑁂𑀲𑀸 𑀓𑀢𑀺 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀓𑀢𑀺 𑀆𑀬𑀢𑀦𑀸𑀦𑀺, 𑀓𑀢𑀺 𑀥𑀸𑀢𑀼𑀬𑁄, 𑀓𑀢𑀺 𑀲𑀘𑁆𑀘𑀸𑀦𑀺, 𑀓𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

𑁩𑁫𑁭. 𑀏𑀯𑀁 ¶ 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑀢𑁄 𑀢𑀺𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀦𑀼𑀧𑀲𑁆𑀲𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀓𑀸𑀬𑀸𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑀸 𑀅𑀦𑀼𑀧𑀲𑁆𑀲𑀦𑀸? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀢𑀸𑀧𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀧𑀜𑁆𑀜𑀸 𑀧𑀚𑀸𑀦𑀦𑀸𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀧𑁂𑀢𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀧𑀺𑀘 𑀆𑀲𑁂𑀯𑀦𑀯𑀲𑁂𑀦 𑀉𑀧𑁂𑀢𑁄, 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼 𑀉𑀧𑁂𑀢𑁄𑀢𑀺 𑀲𑀫𑀼𑀧𑁂𑀢𑁄 ¶ . 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄, 𑀉𑀧𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑁄𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀤𑀼𑀓𑁂𑀲𑀼 𑀅𑀬𑀫𑁂𑀯 𑀦𑀬𑁄. 𑀩𑀳𑀼𑀮𑀻𑀓𑀸𑀭𑀯𑀲𑁂𑀦 𑀧𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸 𑀆𑀢𑀸𑀧𑁂𑀦 𑀉𑀧𑁂𑀢𑁄𑀢𑀺 𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀳𑀭𑀢𑀻𑀢𑀺 𑀧𑀤𑁂 ‘𑀢𑀢𑁆𑀣 𑀓𑀢𑀫𑁄 𑀯𑀺𑀳𑀸𑀭𑁄’𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀤𑁂𑀲𑁂𑀦𑁆𑀢𑁄 𑀇𑀭𑀺𑀬𑀢𑀻𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀅𑀜𑁆𑀜𑀢𑀭𑀲𑀫𑀗𑁆𑀕𑀻𑀪𑀸𑀯𑀢𑁄 𑀇𑀭𑀺𑀬𑀢𑀺. 𑀢𑁂𑀳𑀺 𑀇𑀭𑀺𑀬𑀸𑀧𑀣𑀘𑀢𑀼𑀓𑁆𑀓𑁂𑀳𑀺 𑀓𑀸𑀬𑀲𑀓𑀝𑀯𑀢𑁆𑀢𑀦𑁂𑀦 𑀯𑀢𑁆𑀢𑀢𑀺. 𑀏𑀓𑀁 𑀇𑀭𑀺𑀬𑀸𑀧𑀣𑀤𑀼𑀓𑁆𑀔𑀁 𑀅𑀧𑀭𑁂𑀦 𑀇𑀭𑀺𑀬𑀸𑀧𑀣𑁂𑀦 𑀩𑀸𑀥𑀺𑀢𑁆𑀯𑀸 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑁂𑀦 𑀲𑀭𑀻𑀭𑀓𑁆𑀔𑀦𑀢𑁄 𑀧𑀸𑀮𑁂𑀢𑀺. 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀅𑀲𑀡𑁆𑀞𑀳𑀺𑀢𑁆𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑀯𑀢𑀦𑀢𑁄 𑀬𑀧𑁂𑀢𑀺. 𑀢𑁂𑀦 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀢𑀣𑀸 𑀢𑀣𑀸 𑀓𑀸𑀬𑀲𑁆𑀲 𑀬𑀸𑀧𑀦𑀢𑁄 𑀬𑀸𑀧𑁂𑀢𑀺. 𑀘𑀺𑀭𑀓𑀸𑀮𑀯𑀢𑁆𑀢𑀸𑀧𑀦𑀢𑁄 𑀘𑀭𑀢𑀺. 𑀇𑀭𑀺𑀬𑀸𑀧𑀣𑁂𑀦 𑀇𑀭𑀺𑀬𑀸𑀧𑀣𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀳𑀭𑀡𑀢𑁄 𑀯𑀺𑀳𑀭𑀢𑀺.

𑁩𑁬𑁨. 𑀲𑁆𑀯𑁂𑀯 𑀓𑀸𑀬𑁄 𑀮𑁄𑀓𑁄𑀢𑀺 𑀬𑀲𑁆𑀫𑀺𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑁆𑀯𑁂𑀯 𑀓𑀸𑀬𑁄 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀓𑀸𑀬𑁂 𑀧𑀳𑀻𑀬𑀫𑀸𑀦𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀯𑁂𑀤𑀦𑀸𑀤𑀻𑀲𑀼𑀧𑀺 𑀧𑀳𑀻𑀬𑀢𑀺 𑀏𑀯, 𑀢𑀲𑁆𑀫𑀸 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄𑀢𑀺 𑀯𑀼𑀢𑁆𑀢𑀁.

𑀲𑀦𑁆𑀢𑀸𑀢𑀺𑀆𑀤𑀻𑀲𑀼𑀧𑀺 ¶ 𑀦𑀺𑀭𑁄𑀥𑀯𑀲𑁂𑀦 𑀲𑀦𑁆𑀢𑀢𑀸𑀬 𑀲𑀦𑁆𑀢𑀸. 𑀪𑀸𑀯𑀦𑀸𑀬 𑀲𑀫𑀺𑀢𑀢𑁆𑀢𑀸 𑀲𑀫𑀺𑀢𑀸. 𑀯𑀢𑁆𑀣𑀼𑀧𑀭𑀺𑀜𑁆𑀜𑀸𑀬 𑀅𑀧𑁆𑀧𑀯𑀢𑁆𑀢𑀺𑀯𑀽𑀧𑀲𑀫𑀯𑀲𑁂𑀦 𑀯𑀽𑀧𑀲𑀦𑁆𑀢𑀸. 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀕𑀢𑀸𑀢𑀺 𑀅𑀢𑁆𑀣𑀗𑁆𑀕𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀢𑀺𑀯𑀺𑀬 𑀅𑀢𑁆𑀣𑀁 𑀕𑀢𑀸𑀢𑀺 𑀅𑀩𑁆𑀪𑀢𑁆𑀣𑀗𑁆𑀕𑀢𑀸. 𑀅𑀧𑁆𑀧𑀺𑀢𑀸𑀢𑀺 𑀯𑀺𑀦𑀸𑀲𑀺𑀢𑀸, 𑀅𑀧𑁆𑀧𑀯𑀢𑁆𑀢𑀺𑀬𑀁 𑀞𑀧𑀺𑀢𑀸𑀢𑀺𑀧𑀺 𑀅𑀢𑁆𑀣𑁄. 𑀩𑁆𑀬𑀧𑁆𑀧𑀺𑀢𑀸𑀢𑀺 𑀲𑀼𑀯𑀺𑀦𑀸𑀲𑀺𑀢𑀸, 𑀅𑀢𑀺𑀯𑀺𑀬 𑀅𑀧𑁆𑀧𑀯𑀢𑁆𑀢𑀺𑀬𑀁 𑀞𑀧𑀺𑀢𑀸𑀢𑀺𑀧𑀺 𑀅𑀢𑁆𑀣𑁄. 𑀬𑀣𑀸 𑀧𑀼𑀦 𑀦 𑀅𑀦𑁆𑀯𑀲𑁆𑀲𑀯𑀦𑁆𑀢𑀺 𑀏𑀯𑀁 𑀲𑁄𑀲𑀺𑀢𑀢𑁆𑀢𑀸 𑀲𑁄𑀲𑀺𑀢𑀸. 𑀲𑀼𑀝𑁆𑀞𑀼 𑀲𑁄𑀲𑀺𑀢𑀸𑀢𑀺 𑀯𑀺𑀲𑁄𑀲𑀺𑀢𑀸 ¶ , 𑀲𑀼𑀓𑁆𑀔𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀦𑁆𑀢𑀸 𑀓𑀢𑀸𑀢𑀺 𑀩𑁆𑀬𑀦𑁆𑀢𑀻 𑀓𑀢𑀸. 𑀏𑀢𑁆𑀣 𑀘 𑀅𑀦𑀼𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀯𑀺𑀳𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀓𑀸𑀬𑀧𑀭𑀺𑀳𑀭𑀡𑀁, 𑀆𑀢𑀸𑀧𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀳𑀭𑀡𑀽𑀧𑀸𑀬𑁄; 𑀲𑀢𑀺𑀬𑀸 𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑁄 𑀲𑀫𑀣𑁄, 𑀲𑀫𑁆𑀧𑀚𑀜𑁆𑀜𑁂𑀦 𑀯𑀺𑀧𑀲𑁆𑀲𑀦𑀸, 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀪𑀸𑀯𑀦𑀸𑀨𑀮𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁩. 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑁂𑀧𑀺 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄𑀢𑀺𑀆𑀤𑀻𑀲𑀼 𑀧𑀦 𑀲𑀼𑀔𑀁 𑀯𑁂𑀤𑀦𑀦𑁆𑀢𑀺 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀅𑀳𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀫𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀧𑀺 𑀤𑀸𑀭𑀓𑀸 𑀣𑀜𑁆𑀜𑀧𑀺𑀯𑀦𑀸𑀤𑀺𑀓𑀸𑀮𑁂 𑀲𑀼𑀔𑀁 𑀯𑁂𑀤𑀬𑀫𑀸𑀦𑀸 ‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀸’𑀢𑀺 𑀧𑀚𑀸𑀦𑀦𑁆𑀢𑀺, 𑀦 𑀧𑀦𑁂𑀢𑀁 𑀏𑀯𑀭𑀽𑀧𑀁 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀜𑁆𑀳𑀺 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀦𑀧𑁆𑀧𑀚𑀳𑀢𑀺, 𑀲𑀢𑁆𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀺. 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀧𑀚𑀳𑀢𑀺, 𑀲𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀘 𑀳𑁄𑀢𑀺. ‘𑀇𑀤𑀜𑁆𑀳𑀺 𑀓𑁄 𑀯𑁂𑀤𑀬𑀢𑀺, 𑀓𑀲𑁆𑀲 𑀯𑁂𑀤𑀦𑀸, 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸’𑀢𑀺 𑀏𑀯𑀁 𑀲𑀫𑁆𑀧𑀚𑀸𑀦𑀯𑁂𑀤𑀺𑀬𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑁄 𑀯𑁂𑀤𑀬𑀢𑀻𑀢𑀺? 𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀯𑁂𑀤𑀬𑀢𑀺. 𑀓𑀲𑁆𑀲 𑀯𑁂𑀤𑀦𑀸𑀢𑀺? 𑀦 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀯𑁂𑀤𑀦𑀸. 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸𑀢𑀺? 𑀯𑀢𑁆𑀣𑀼𑀆𑀭𑀫𑁆𑀫𑀡𑀸 𑀘 𑀧𑀦𑁂𑀲𑀸 𑀯𑁂𑀤𑀦𑀸. 𑀢𑀲𑁆𑀫𑀸 𑀏𑀲 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀢𑀁 𑀢𑀁 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀺; 𑀢𑀁 𑀧𑀦 𑀯𑁂𑀤𑀦𑀸𑀧𑀯𑀢𑁆𑀢𑀺𑀁 ¶ 𑀉𑀧𑀸𑀤𑀸𑀬 ‘𑀅𑀳𑀁 𑀯𑁂𑀤𑀬𑀸𑀫𑀻’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻’𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘𑀏𑀲 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀅𑀜𑁆𑀜𑀢𑀭𑁄 𑀣𑁂𑀭𑁄 𑀯𑀺𑀬.

𑀣𑁂𑀭𑁄 𑀓𑀺𑀭 𑀅𑀨𑀸𑀲𑀼𑀓𑀓𑀸𑀮𑁂 𑀩𑀮𑀯𑀯𑁂𑀤𑀦𑀸𑀬 𑀦𑀺𑀢𑁆𑀣𑀼𑀦𑀦𑁆𑀢𑁄 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀺. 𑀢𑀫𑁂𑀓𑁄 𑀤𑀳𑀭𑁄 𑀆𑀳 ¶ 𑁋 ‘‘𑀓𑀢𑀭𑀁 𑀯𑁄, 𑀪𑀦𑁆𑀢𑁂, 𑀞𑀸𑀦𑀁 𑀭𑀼𑀚𑀢𑀻’’𑀢𑀺? ‘‘𑀆𑀯𑀼𑀲𑁄, 𑀧𑀸𑀝𑀺𑀬𑁂𑀓𑁆𑀓𑀁 𑀭𑀼𑀚𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺; 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀻’’𑀢𑀺. ‘‘𑀏𑀯𑀁 𑀚𑀸𑀦𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺 𑀦𑁄, 𑀪𑀦𑁆𑀢𑁂’’𑀢𑀺. ‘‘𑀅𑀥𑀺𑀯𑀸𑀲𑁂𑀫𑀺, 𑀆𑀯𑀼𑀲𑁄’’𑀢𑀺. ‘‘𑀅𑀥𑀺𑀯𑀸𑀲𑀦𑀸, 𑀪𑀦𑁆𑀢𑁂, 𑀲𑁂𑀬𑁆𑀬𑁄’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀯𑀸𑀢𑁄 𑀬𑀸𑀯 𑀳𑀤𑀬𑀸 𑀨𑀸𑀮𑁂𑀲𑀺. 𑀫𑀜𑁆𑀘𑀓𑁂 𑀅𑀦𑁆𑀢𑀸𑀦𑀺 𑀭𑀸𑀲𑀻𑀓𑀢𑀸𑀦𑀺 𑀅𑀳𑁂𑀲𑀼𑀁. 𑀣𑁂𑀭𑁄 𑀤𑀳𑀭𑀲𑁆𑀲 𑀤𑀲𑁆𑀲𑁂𑀲𑀺 𑁋 ‘‘𑀯𑀝𑁆𑀝𑀢𑀸𑀯𑀼𑀲𑁄, 𑀏𑀢𑁆𑀢𑀓𑀸 𑀅𑀥𑀺𑀯𑀸𑀲𑀦𑀸’’𑀢𑀺? 𑀤𑀳𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀣𑁂𑀭𑁄 𑀯𑀻𑀭𑀺𑀬𑀲𑀫𑀸𑀥𑀺𑀁 𑀬𑁄𑀚𑁂𑀢𑁆𑀯𑀸 𑀲𑀳𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀬𑀣𑀸 ¶ 𑀘 𑀲𑀼𑀔𑀁, 𑀏𑀯𑀁 𑀤𑀼𑀓𑁆𑀔𑀁…𑀧𑁂… 𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀪𑀕𑀯𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀯𑁂𑀤𑀦𑀸𑀯𑀲𑁂𑀦 𑀓𑀣𑁂𑀲𑀺. 𑀤𑀼𑀯𑀺𑀥𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑁋 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀜𑁆𑀘; 𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺𑀧𑀺 𑀏𑀢𑀤𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀪𑀕𑀯𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀓𑀣𑁂𑀲𑀺. 𑀢𑀤𑀼𑀪𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀩𑁆𑀩𑀸𑀓𑀸𑀭𑀢𑁄 𑀤𑀲𑁆𑀲𑀺𑀢𑀫𑁂𑀯.

𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀓𑀣𑁂𑀦𑁆𑀢𑁄 𑀬𑁂𑀪𑀼𑀬𑁆𑀬𑁂𑀦 𑀯𑁂𑀤𑀦𑀸𑀯𑀲𑁂𑀦 𑀓𑀣𑁂𑀲𑀺. 𑀢𑀺𑀯𑀺𑀥𑁄 𑀳𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂 𑀅𑀪𑀺𑀦𑀺𑀯𑁂𑀲𑁄 𑁋 𑀨𑀲𑁆𑀲𑀯𑀲𑁂𑀦, 𑀯𑁂𑀤𑀦𑀸𑀯𑀲𑁂𑀦, 𑀘𑀺𑀢𑁆𑀢𑀯𑀲𑁂𑀦𑀸𑀢𑀺. 𑀓𑀣𑀁? 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀭𑀺𑀕𑁆𑀕𑀳𑀺𑀢𑁂 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺. 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀚𑀸𑀦𑀦𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺.

𑀢𑀢𑁆𑀣 ¶ 𑀬𑀲𑁆𑀲 𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀲𑁄𑀧𑀺 ‘𑀦 𑀓𑁂𑀯𑀮𑀁 𑀨𑀲𑁆𑀲𑁄𑀯 𑀉𑀧𑁆𑀧𑀚𑁆𑀚𑀢𑀺; 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀲𑁄𑀧𑀺 ‘𑀦 𑀓𑁂𑀯𑀮𑀁 𑀯𑁂𑀤𑀦𑀸𑀯 𑀉𑀧𑁆𑀧𑀚𑁆𑀚𑀢𑀺; 𑀢𑀸𑀬 𑀲𑀤𑁆𑀥𑀺𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀲𑁄𑀧𑀺 ‘𑀦 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑀫𑁂𑀯 𑀉𑀧𑁆𑀧𑀚𑁆𑀚𑀢𑀺; 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 ¶ 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺, 𑀲𑀜𑁆𑀚𑀸𑀦𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀲𑁄 ‘𑀇𑀫𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸 𑀓𑀺𑀁𑀦𑀺𑀲𑁆𑀲𑀺𑀢𑀸’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄; 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣𑀲𑀺𑀢𑀁, 𑀏𑀢𑁆𑀣𑀧𑀝𑀺𑀩𑀤𑁆𑀥’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁩𑁫). 𑀲𑁄 𑀅𑀢𑁆𑀣𑀢𑁄 𑀪𑀽𑀢𑀸𑀦𑀺 ¶ 𑀘𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘. 𑀏𑀯𑀫𑁂𑀢𑁆𑀣 𑀯𑀢𑁆𑀣𑀼 𑀭𑀽𑀧𑀁, 𑀨𑀲𑁆𑀲𑀧𑀜𑁆𑀘𑀫𑀓𑀸 𑀦𑀸𑀫𑀦𑁆𑀢𑀺 𑀦𑀸𑀫𑀭𑀽𑀧𑀫𑁂𑀯 𑀧𑀲𑁆𑀲𑀢𑀺. 𑀭𑀽𑀧𑀜𑁆𑀘𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄, 𑀦𑀸𑀫𑀁 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀫𑀢𑁆𑀢𑀁 𑀳𑁄𑀢𑀺. 𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀸 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀦𑀸𑀫𑀭𑀽𑀧𑀁 𑀦𑀢𑁆𑀣𑀺.

𑀲𑁄 ‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀺𑀁𑀳𑁂𑀢𑀼𑀓𑀸’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀓𑀸’𑀢𑀺 𑀧𑀲𑁆𑀲𑀢𑀺; 𑀢𑀢𑁄 𑀧𑀘𑁆𑀘𑀬𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀇𑀤𑀁; 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺; 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀫𑁂𑀯𑀸𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀲𑁂𑀦𑀯 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀲𑀫𑁆𑀫𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 ‘𑀅𑀚𑁆𑀚 𑀅𑀚𑁆𑀚𑀸’𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀫𑀸𑀦𑁄 𑀢𑀣𑀸𑀭𑀽𑀧𑁂 𑀤𑀺𑀯𑀲𑁂 𑀉𑀢𑀼𑀲𑀧𑁆𑀧𑀸𑀬𑀁, 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁, 𑀪𑁄𑀚𑀦𑀲𑀧𑁆𑀧𑀸𑀬𑀁, 𑀥𑀫𑁆𑀫𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀁 𑀇𑀫𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀚𑀦𑀸𑀦𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺.

𑀇𑀥 𑀧𑀦 𑀪𑀕𑀯𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀯𑁂𑀤𑀦𑀸𑀯𑀲𑁂𑀦 ¶ 𑀓𑀣𑁂𑀲𑀺. 𑀨𑀲𑁆𑀲𑀯𑀲𑁂𑀦 𑀯𑀸 𑀳𑀺 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸 𑀓𑀣𑀺𑀬𑀫𑀸𑀦𑀁 𑀦 𑀧𑀸𑀓𑀝𑀁 𑀳𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀔𑀸𑀬𑀢𑀺. 𑀯𑁂𑀤𑀦𑀸𑀯𑀲𑁂𑀦 𑀧𑀦 𑀧𑀸𑀓𑀝𑀁 𑀳𑁄𑀢𑀺. 𑀓𑀲𑁆𑀫𑀸? 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀸𑀓𑀝𑀢𑀸𑀬. 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀜𑁆𑀳𑀺 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸. 𑀬𑀤𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀲𑀢𑀥𑁄𑀢𑀲𑀧𑁆𑀧𑀺𑀁 𑀔𑀸𑀤𑀸𑀧𑀬𑀦𑁆𑀢𑀁 𑀯𑀺𑀬, 𑀲𑀢𑀧𑀸𑀓𑀢𑁂𑀮𑀁 𑀫𑀓𑁆𑀔𑀸𑀧𑀬𑀫𑀸𑀦𑀁 𑀯𑀺𑀬, 𑀉𑀤𑀓𑀖𑀝𑀲𑀳𑀲𑁆𑀲𑁂𑀦 𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑀬𑀫𑀸𑀦𑀁 𑀯𑀺𑀬, ‘𑀅𑀳𑁄 𑀲𑀼𑀔𑀁! 𑀅𑀳𑁄 𑀲𑀼𑀔𑀦𑁆𑀢𑀺’! 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀢𑀢𑁆𑀢𑀨𑀸𑀮𑀁 𑀧𑀯𑁂𑀲𑁂𑀦𑁆𑀢𑀁 𑀯𑀺𑀬, 𑀯𑀺𑀮𑀻𑀦𑀢𑀫𑁆𑀩𑀮𑁄𑀳𑁂𑀦 𑀆𑀲𑀺𑀜𑁆𑀘𑀦𑁆𑀢𑀁 𑀯𑀺𑀬, 𑀲𑀼𑀓𑁆𑀔𑀢𑀺𑀡𑀯𑀦𑀧𑁆𑀧𑀢𑀺𑀫𑁆𑀳𑀺 𑀅𑀭𑀜𑁆𑀜𑁂 𑀤𑀸𑀭𑀼𑀉𑀓𑁆𑀓𑀸𑀓𑀮𑀸𑀧𑀁 𑀧𑀓𑁆𑀔𑀺𑀧𑀫𑀸𑀦𑀁 𑀯𑀺𑀬 ‘𑀅𑀳𑁄 𑀤𑀼𑀓𑁆𑀔𑀁! 𑀅𑀳𑁄 𑀤𑀼𑀓𑁆𑀔𑀦𑁆𑀢𑀺!’ 𑀯𑀺𑀧𑁆𑀧𑀮𑀸𑀧𑀬𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺.

𑀅𑀤𑀼𑀓𑁆𑀔𑀫𑀲𑀼𑀔𑀸 ¶ 𑀧𑀦 𑀤𑀼𑀤𑁆𑀤𑀻𑀧𑀦𑀸 𑀅𑀦𑁆𑀥𑀓𑀸𑀭𑀸 𑀅𑀯𑀺𑀪𑀽𑀢𑀸. 𑀲𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀧𑀕𑀫𑁂 𑀲𑀸𑀢𑀸𑀲𑀸𑀢𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸𑀢𑀺 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀓𑀝𑀸 𑀳𑁄𑀢𑀺. 𑀬𑀣𑀸 𑀓𑀺𑀁? 𑀅𑀦𑁆𑀢𑀭𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀆𑀭𑀼𑀳𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀲𑁆𑀲 𑀫𑀺𑀕𑀲𑁆𑀲 𑀅𑀦𑀼𑀧𑀣𑀁 𑀕𑀘𑁆𑀙𑀦𑁆𑀢𑁄 𑀫𑀺𑀕𑀮𑀼𑀤𑁆𑀤𑀓𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀑𑀭𑀪𑀸𑀕𑁂 𑀅𑀧𑀭𑀪𑀸𑀕𑁂𑀧𑀺 𑀧𑀤𑀁 𑀤𑀺𑀲𑁆𑀯𑀸 𑀫𑀚𑁆𑀛𑁂 𑀅𑀧𑀲𑁆𑀲𑀦𑁆𑀢𑁄𑀧𑀺 ¶ ‘𑀇𑀢𑁄 𑀆𑀭𑀼𑀴𑁆𑀳𑁄, 𑀇𑀢𑁄 𑀑𑀭𑀼𑀴𑁆𑀳𑁄, 𑀫𑀚𑁆𑀛𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀇𑀫𑀺𑀦𑀸 𑀧𑀤𑁂𑀲𑁂𑀦 𑀕𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀦𑀬𑀢𑁄 𑀚𑀸𑀦𑀸𑀢𑀺. 𑀏𑀯𑀁 𑀆𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀤𑀁 𑀯𑀺𑀬 𑀳𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺; 𑀑𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀤𑀁 𑀯𑀺𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺. ‘𑀇𑀢𑁄 𑀆𑀭𑀼𑀴𑁆𑀳𑁄, 𑀇𑀢𑁄 𑀑𑀭𑀼𑀴𑁆𑀳𑁄, 𑀫𑀚𑁆𑀛𑁂 𑀏𑀯𑀁 𑀕𑀢𑁄’𑀢𑀺 𑀦𑀬𑀢𑁄 𑀕𑀳𑀡𑀁 𑀯𑀺𑀬 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀧𑀕𑀫𑁂 𑀲𑀸𑀢𑀸𑀲𑀸𑀢𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸𑀢𑀺 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀓𑀝𑀸 𑀳𑁄𑀢𑀺.

𑀏𑀯𑀁 𑀪𑀕𑀯𑀸 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀯𑁂𑀤𑀦𑀸𑀯𑀲𑁂𑀦 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺; 𑀦 𑀓𑁂𑀯𑀮𑀜𑁆𑀘 𑀇𑀥𑁂𑀯 𑀏𑀯𑀁 𑀤𑀲𑁆𑀲𑁂𑀢𑀺, 𑀤𑀻𑀖𑀦𑀺𑀓𑀸𑀬𑀫𑁆𑀳𑀺 𑀫𑀳𑀸𑀦𑀺𑀤𑀸𑀦𑁂, 𑀲𑀓𑁆𑀓𑀧𑀜𑁆𑀳𑁂, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 ¶ , 𑀫𑀚𑁆𑀛𑀺𑀫𑀦𑀺𑀓𑀸𑀬𑀫𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑁂 𑀘 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑁂, 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑁂, 𑀘𑀽𑀴𑀯𑁂𑀤𑀮𑁆𑀮𑁂, 𑀫𑀳𑀸𑀯𑁂𑀤𑀮𑁆𑀮𑁂, 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂, 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑁂, 𑀥𑀸𑀢𑀼𑀯𑀺𑀪𑀗𑁆𑀕𑁂, 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑁂, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀫𑁆𑀳𑀺 𑀘𑀽𑀴𑀦𑀺𑀤𑀸𑀦𑀲𑀼𑀢𑁆𑀢𑁂, 𑀭𑀼𑀓𑁆𑀔𑁄𑀧𑀫𑁂, 𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑁂, 𑀲𑀓𑀮𑁂 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑁂𑀢𑀺 𑀏𑀯𑀁 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑁂𑀲𑀼 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀬𑀣𑀸 𑀘 𑀢𑁂𑀲𑀼 𑀢𑁂𑀲𑀼, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀢𑀢𑁆𑀣 𑀲𑀼𑀔𑀁 𑀯𑁂𑀤𑀦𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀅𑀧𑀭𑁄𑀧𑀺 𑀧𑀚𑀸𑀦𑀦𑀧𑀭𑀺𑀬𑀸𑀬𑁄 𑁋 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀸𑀓𑁆𑀔𑀡𑁂 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀪𑀽𑀢𑀧𑀼𑀩𑁆𑀩𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀢𑀲𑁆𑀲𑀸 𑀇𑀤𑀸𑀦𑀺 𑀅𑀪𑀸𑀯𑀢𑁄 𑀇𑀫𑀺𑀲𑁆𑀲𑀸 𑀘 𑀲𑀼𑀔𑀸𑀬 𑀇𑀢𑁄 𑀧𑀞𑀫𑀁 𑀅𑀪𑀸𑀯𑀢𑁄 𑀯𑁂𑀤𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁 ¶ , 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂 𑀤𑀼𑀓𑁆𑀔𑀁…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀲𑀼𑀔𑀸𑀧𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦 ¶ , 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀤𑀼𑀓𑁆𑀔𑀸𑀧𑀺 𑀔𑁄…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸…𑀧𑁂… 𑀦𑀺𑀭𑁄𑀥𑀥𑀫𑁆𑀫𑀸. 𑀏𑀯𑀁 𑀧𑀲𑁆𑀲𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀤𑀼𑀓𑁆𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺; ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁨.𑁨𑁦𑁫).

𑀲𑀸𑀫𑀺𑀲𑀁 ¶ 𑀯𑀸 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀲𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀦𑀺𑀲𑁆𑀲𑀺𑀢𑀸 𑀙 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸; 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸; 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙 𑀕𑁂𑀳𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀯𑁂𑀤𑀦𑀸; 𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀯𑁂𑀤𑀦𑀸; 𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀙 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸𑀯𑁂𑀤𑀦𑀸; 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀢𑀸𑀲𑀁 𑀯𑀺𑀪𑀸𑀕𑁄 𑀉𑀧𑀭𑀺𑀧𑀡𑁆𑀡𑀸𑀲𑁂 𑀧𑀸𑀴𑀺𑀬𑀁 (𑀫. 𑀦𑀺. 𑁩.𑁩𑁦𑁪 𑀆𑀤𑀬𑁄) 𑀆𑀕𑀢𑁄𑀬𑁂𑀯. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑁄 𑀢𑀁 𑀯𑁂𑀤𑀦𑀸𑀦𑀺𑀫𑀺𑀢𑁆𑀢𑀁. 𑀩𑀳𑀺𑀤𑁆𑀥𑀸 𑀯𑁂𑀤𑀦𑀸𑀲𑀽𑀢𑀺 𑀧𑀭𑀧𑀼𑀕𑁆𑀕𑀮𑀲𑁆𑀲 𑀯𑁂𑀤𑀦𑀸𑀲𑀼. 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑀦𑁆𑀢𑀺 𑀧𑀭𑀧𑀼𑀕𑁆𑀕𑀮𑀁 𑀲𑀼𑀔𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑀁. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀓𑀸𑀮𑁂𑀦 𑀧𑀭𑀲𑁆𑀲 𑀯𑁂𑀤𑀦𑀸𑀲𑀼 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺. 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀬𑀲𑁆𑀫𑀸 𑀦𑁂𑀯 𑀅𑀢𑁆𑀢𑀸, 𑀦 𑀧𑀭𑁄 𑀦𑀺𑀬𑀫𑀺𑀢𑁄; 𑀢𑀲𑁆𑀫𑀸 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀪𑀺𑀓𑁆𑀔𑀼 𑀲𑀼𑀔𑀁 𑀯𑁂𑀤𑀦𑀁 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀧𑀩𑁆𑀩𑁂 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁫. 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑁂𑀧𑀺 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀲𑀭𑀸𑀕𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀮𑁄𑀪𑀲𑀳𑀕𑀢𑀁. 𑀯𑀻𑀢𑀭𑀸𑀕𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀇𑀤𑀁 𑀧𑀦 𑀬𑀲𑁆𑀫𑀸 𑀲𑀫𑁆𑀫𑀲𑀦𑀁 𑀦 ¶ 𑀥𑀫𑁆𑀫𑀲𑀫𑁄𑀥𑀸𑀦𑀁, 𑀢𑀲𑁆𑀫𑀸 𑀇𑀥 𑀏𑀓𑀧𑀤𑁂𑀧𑀺 𑀮𑁄𑀓𑀼𑀢𑁆𑀢𑀭𑀁 𑀦 𑀮𑀩𑁆𑀪𑀢𑀺. 𑀬𑀲𑁆𑀫𑀸 𑀧𑀳𑀸𑀦𑁂𑀓𑀝𑁆𑀞𑀯𑀲𑁂𑀦 𑀭𑀸𑀕𑀸𑀤𑀻𑀳𑀺 𑀲𑀳 𑀯𑀢𑁆𑀢𑀦𑁆𑀢𑀺 𑀧𑀳𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀤𑁄𑀲𑀦𑁆𑀢𑀺 𑀤𑀼𑀯𑀺𑀥𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀯𑀻𑀢𑀤𑁄𑀲𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀫𑁄𑀳𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀬𑀲𑁆𑀫𑀸 𑀧𑀦 𑀫𑁄𑀳𑁄 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 ¶ 𑀲𑁂𑀲𑀸𑀦𑀺𑀧𑀺 𑀇𑀥 𑀯𑀝𑁆𑀝𑀦𑁆𑀢𑀺 𑀏𑀯. 𑀇𑀫𑀲𑁆𑀫𑀺𑀁 𑀬𑁂𑀯 𑀳𑀺 𑀤𑀼𑀓𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀭𑀺𑀬𑀸𑀤𑀺𑀡𑁆𑀡𑀸𑀦𑀻𑀢𑀺. 𑀯𑀻𑀢𑀫𑁄𑀳𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀲𑀁𑀔𑀺𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀸𑀦𑀼𑀧𑀢𑀺𑀢𑀁. 𑀏𑀢𑀜𑁆𑀳𑀺 𑀲𑀗𑁆𑀓𑀼𑀝𑀺𑀢𑀘𑀺𑀢𑁆𑀢𑀁 𑀦𑀸𑀫. 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁. 𑀏𑀢𑀜𑁆𑀳𑀺 𑀧𑀲𑀝𑀘𑀺𑀢𑁆𑀢𑀁 𑀦𑀸𑀫.

𑀫𑀳𑀕𑁆𑀕𑀢𑀦𑁆𑀢𑀺 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀅𑀫𑀳𑀕𑁆𑀕𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀲𑀉𑀢𑁆𑀢𑀭𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀭𑀽𑀧𑀸𑀯𑀘𑀭𑀜𑁆𑀘 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀢𑀢𑁆𑀭𑀸𑀧𑀺 𑀲𑀉𑀢𑁆𑀢𑀭𑀁 𑀭𑀽𑀧𑀸𑀯𑀘𑀭𑀁, 𑀅𑀦𑀼𑀢𑁆𑀢𑀭𑀁 𑀅𑀭𑀽𑀧𑀸𑀯𑀘𑀭𑀫𑁂𑀯. 𑀲𑀫𑀸𑀳𑀺𑀢𑀦𑁆𑀢𑀺 𑀬𑀲𑁆𑀲 𑀅𑀧𑁆𑀧𑀦𑀸𑀲𑀫𑀸𑀥𑀺 𑀉𑀧𑀘𑀸𑀭𑀲𑀫𑀸𑀥𑀺 𑀯𑀸 𑀅𑀢𑁆𑀣𑀺. 𑀅𑀲𑀫𑀸𑀳𑀺𑀢𑀦𑁆𑀢𑀺 𑀉𑀪𑀬𑀲𑀫𑀸𑀥𑀺𑀯𑀺𑀭𑀳𑀺𑀢𑀁. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀦𑀺𑀫𑀼𑀢𑁆𑀢𑀁. 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀉𑀪𑀬𑀯𑀺𑀫𑀼𑀢𑁆𑀢𑀺𑀭𑀳𑀺𑀢𑀁; 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀦𑀁 𑀧𑀦 𑀇𑀥 𑀑𑀓𑀸𑀲𑁄𑀯 𑀦𑀢𑁆𑀣𑀺. 𑀲𑀭𑀸𑀕𑀫𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀲𑀭𑀸𑀕𑀁 𑀅𑀲𑁆𑀲 𑀘𑀺𑀢𑁆𑀢𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑀲𑁆𑀫𑀺𑀫𑁆𑀧𑀺 𑀧𑀩𑁆𑀩𑁂 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁩𑁬𑁭. 𑀏𑀢𑁆𑀢𑀸𑀯𑀢𑀸 ¶ 𑀬𑀲𑁆𑀫𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯 𑀓𑀣𑀺𑀢𑁄, 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀬 𑀯𑁂𑀤𑀦𑀸𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯 𑀢𑀲𑁆𑀫𑀸 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀻𑀲𑁂𑀦 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀣𑁂𑀢𑀼𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑀣𑀜𑁆𑀘 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀢𑀦𑁆𑀢𑀺 𑀅𑀪𑀺𑀡𑁆𑀳𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀲𑀁𑀯𑀺𑀚𑁆𑀚𑀫𑀸𑀦𑀁. 𑀅𑀲𑀦𑁆𑀢𑀦𑁆𑀢𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 ¶ 𑀯𑀸 𑀧𑀳𑀻𑀦𑀢𑁆𑀢𑀸 𑀯𑀸 𑀅𑀯𑀺𑀚𑁆𑀚𑀫𑀸𑀦𑀁. 𑀬𑀣𑀸 𑀘𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀢𑀜𑁆𑀘 𑀓𑀸𑀭𑀡𑀁 𑀧𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 ¶ 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀼𑀪𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄, 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀯𑀸 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀯𑀸 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀲𑀼𑀪𑀫𑁆𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀅𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄 𑀧𑀣𑀫𑀦𑀲𑀺𑀓𑀸𑀭𑁄, 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀤𑀼𑀓𑁆𑀔𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀅𑀦𑀢𑁆𑀢𑀦𑀺 𑀅𑀦𑀢𑁆𑀢𑀸𑀢𑀺 𑀯𑀸 𑀅𑀲𑀼𑀪𑁂 𑀅𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀦𑀸𑀳𑀸𑀭𑁄 ¶ 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺; 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀲𑁆𑀲𑀸𑀧𑀺 ¶ ; 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀺 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄𑀧𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀅𑀲𑀼𑀪𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺; 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑀲𑀅𑀲𑀼𑀪𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 ¶ 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀝𑀺𑀖𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀦 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀧𑀝𑀺𑀖𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 𑀦𑀸𑀫; 𑀧𑀝𑀺𑀖𑀸𑀭𑀫𑁆𑀫𑀡𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀩𑁆𑀩𑀢𑁆𑀣 𑀏𑀓𑀮𑀓𑁆𑀔𑀡𑁄𑀯. 𑀢𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀫𑁂𑀢𑁆𑀢𑀸𑀬 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀫𑁂𑀢𑁆𑀢𑀸𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺; 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀧𑁆𑀧𑀦𑀸𑀯. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀯. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺 ¶ , 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨 𑀣𑁄𑀓𑀁 𑀯𑀺𑀲𑀤𑀺𑀲𑀁).

𑀅𑀧𑀺𑀘 𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀻𑀓𑀢𑀸 ¶ , 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺. 𑀑𑀥𑀺𑀲𑁄 𑀅𑀦𑁄𑀥𑀺𑀲𑁄 𑀤𑀺𑀲𑀸𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺. ‘𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀓𑀺𑀫𑀲𑁆𑀲 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺? 𑀦𑀦𑀼 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀲𑀺? 𑀧𑀭𑀲𑁆𑀲 𑀓𑀼𑀚𑁆𑀛𑀦𑀁 𑀦𑀸𑀫 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀢𑀢𑁆𑀢𑀅𑀬𑁄𑀲𑀮𑀸𑀓𑀕𑀽𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀧𑀳𑀭𑀺𑀢𑀼𑀓𑀸𑀫𑀢𑀸𑀲𑀤𑀺𑀲𑀁 𑀳𑁄𑀢𑀺. 𑀏𑀲𑁄𑀧𑀺 𑀢𑀯 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀓𑀺𑀁 𑀢𑁂 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺? 𑀏𑀲 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀢𑀺; 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬 𑀧𑀝𑀺𑀯𑀸𑀢𑀔𑀺𑀢𑁆𑀢𑀭𑀚𑁄𑀫𑀼𑀝𑁆𑀞𑀺 𑀯𑀺𑀬 ¶ 𑀘 𑀏𑀢𑀲𑁆𑀲𑁂𑀯𑁂𑀲 𑀓𑁄𑀥𑁄 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’𑀢𑀺. 𑀏𑀯𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺, 𑀉𑀪𑀬𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀸𑀧𑀺, 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺; 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀫𑁂𑀢𑁆𑀢𑀸𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀭𑀢𑀻𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀭𑀢𑀺 𑀦𑀸𑀫 𑀉𑀓𑁆𑀓𑀡𑁆𑀞𑀺𑀢𑀢𑀸. 𑀢𑀦𑁆𑀤𑀻 𑀦𑀸𑀫 𑀓𑀸𑀬𑀸𑀮𑀲𑀺𑀬𑀢𑀸. 𑀯𑀺𑀚𑀫𑁆𑀪𑀺𑀓𑀸 𑀦𑀸𑀫 𑀓𑀸𑀬𑀯𑀺𑀦𑀸𑀫𑀦𑀸. 𑀪𑀢𑁆𑀢𑀲𑀫𑁆𑀫𑀤𑁄 𑀦𑀸𑀫 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀧𑀭𑀺𑀴𑀸𑀳𑁄. 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀮𑀻𑀦𑀸𑀓𑀸𑀭𑁄. 𑀇𑀫𑁂𑀲𑀼 𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀭𑀢𑀺 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀓𑀸 𑀪𑀢𑁆𑀢𑀲𑀫𑁆𑀫𑀤𑁄 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬 ¶ , 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀲𑀼 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀆𑀭𑀫𑁆𑀪𑀥𑀸𑀢𑀼 𑀦𑀸𑀫 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬𑀁. 𑀦𑀺𑀓𑁆𑀓𑀫𑀥𑀸𑀢𑀼 𑀦𑀸𑀫 𑀓𑁄𑀲𑀚𑁆𑀚𑀢𑁄 ¶ 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀼 𑀦𑀸𑀫 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀇𑀫𑀲𑁆𑀫𑀺𑀁 𑀢𑀺𑀧𑁆𑀧𑀪𑁂𑀤𑁂 𑀯𑀻𑀭𑀺𑀬𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀢𑀺𑀪𑁄𑀚𑀦𑁂 ¶ 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀆𑀳𑀭𑀳𑀢𑁆𑀣𑀓 𑀪𑀼𑀢𑁆𑀢𑀯𑀫𑀺𑀢𑀓 𑀢𑀢𑁆𑀭𑀯𑀝𑁆𑀝𑀓 𑀅𑀮𑀁𑀲𑀸𑀝𑀓 𑀓𑀸𑀓𑀫𑀸𑀲𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀣𑀺𑀦𑀫𑀺𑀤𑁆𑀥𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀑𑀢𑁆𑀣𑀭𑀦𑁆𑀢𑀁 𑀆𑀕𑀘𑁆𑀙𑀢𑀺. 𑀘𑀢𑀼𑀧𑀜𑁆𑀘𑀆𑀮𑁄𑀧𑀑𑀓𑀸𑀲𑀁 𑀧𑀦 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀦 𑀳𑁄𑀢𑀻𑀢𑀺 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀧𑀺, 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀤𑀻𑀧𑀸𑀮𑁄𑀓𑀉𑀓𑁆𑀓𑀸𑀮𑁄𑀓𑁂 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀧𑀺, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀦𑁆𑀢𑀲𑁆𑀲𑀸𑀧𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑀺𑀲𑁂 𑀧𑀳𑀻𑀦𑀣𑀺𑀦𑀫𑀺𑀤𑁆𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺; 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀯𑀽𑀧𑀲𑀫𑁄 𑀦𑀸𑀫 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄; 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯𑁂𑀢𑀁 𑀅𑀢𑁆𑀣𑀢𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺 ¶ , 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 ¶ 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀲𑀫𑀸𑀥𑀺𑀲𑀗𑁆𑀔𑀸𑀢𑁂 𑀧𑀦 𑀘𑁂𑀢𑀲𑁄 𑀯𑀽𑀧𑀲𑀫𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀯𑀽𑀧𑀲𑀫𑁄. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀟𑁆𑀠𑀲𑁂𑀯𑀺𑀢𑀸 ¶ , 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀢𑀸𑀬 𑀧𑀓𑀢𑀜𑁆𑀜𑀼𑀦𑁄𑀧𑀺, 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀦𑀬𑀥𑀭𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺; 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀸𑀭𑀡𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀯. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 ¶ 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀓𑀼𑀲𑀮𑀸𑀤𑀺𑀥𑀫𑁆𑀫𑁂𑀲𑀼 ¶ 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀦𑀲𑁆𑀲𑀸 𑀧𑀳𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸, 𑀳𑀻𑀦𑀧𑁆𑀧𑀡𑀻𑀢𑀸 𑀥𑀫𑁆𑀫𑀸, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸…𑀧𑁂… 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺. 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀸𑀧𑀺, 𑀢𑀻𑀲𑀼 𑀭𑀢𑀦𑁂𑀲𑀼 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀧𑀺 ¶ , 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺. 𑀞𑀸𑀦𑀦𑀺𑀲𑁆𑀲𑀚𑁆𑀚𑀸𑀤𑀻𑀲𑀼 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑁂 𑀲𑀦𑁆𑀢𑀦𑁆𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀁. 𑀅𑀲𑀦𑁆𑀢𑀦𑁆𑀢𑀺 𑀅𑀧𑁆𑀧𑀝𑀺𑀮𑀸𑀪𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀢𑀸𑀯 𑁋

‘‘𑀅𑀢𑁆𑀣𑀺 ¶ , 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ¶ 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁮𑁩) 𑁋 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀲𑀢𑀺𑀬𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀬𑁂𑀯. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀺𑀘 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀳𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦, 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀲𑀤𑀺𑀲𑁂 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁂𑀦, 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀅𑀪𑀬𑀢𑁆𑀣𑁂𑀭𑀲𑀤𑀺𑀲𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀲𑁂𑀯𑀦𑁂𑀦, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀬 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀦 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸…𑀧𑁂… 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀧𑀺𑀘 ¶ 𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀢𑀸. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸𑀦𑀺 𑀤𑀻𑀖𑀸𑀦𑀺 𑀳𑁄𑀦𑁆𑀢𑀺, 𑀲𑀭𑀻𑀭𑀁 ¶ 𑀯𑀸 𑀉𑀲𑁆𑀲𑀦𑁆𑀦𑀤𑁄𑀲𑀜𑁆𑀘𑁂𑀯 𑀲𑁂𑀤𑀫𑀮𑀫𑀓𑁆𑀔𑀺𑀢𑀜𑁆𑀘, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 ¶ 𑀧𑀦 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁, 𑀢𑀤𑀸 𑀩𑀸𑀳𑀺𑀭𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀢𑀲𑁆𑀫𑀸 𑀓𑁂𑀲𑀸𑀤𑀺𑀙𑁂𑀤𑀦𑁂𑀦 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀲𑀭𑀻𑀭𑀲𑀮𑁆𑀮𑀳𑀼𑀓𑀪𑀸𑀯𑀓𑀭𑀡𑁂𑀦, 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀲𑀽𑀘𑀺𑀓𑀫𑁆𑀫𑀥𑁄𑀯𑀦𑀭𑀚𑀦𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀳𑀺 𑀩𑀸𑀳𑀺𑀭𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁; 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 ¶ 𑀩𑀮𑀯𑀁 𑀳𑁄𑀢𑀺, 𑀅𑀣 𑀦𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁. 𑀢𑀲𑁆𑀫𑀸 𑀢𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀲𑁄𑀡𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺 ‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀓𑀼𑀲𑀮𑀁 𑀳𑁄𑀢𑀻’𑀢𑀺 𑀅𑀢𑀺𑀥𑀸𑀯𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀅𑀓𑀭𑁄𑀦𑁆𑀢𑁄 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁, 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸, 𑀓𑁄𑀲𑀚𑁆𑀚𑀁 𑀅𑀥𑀺𑀪𑀯𑀢𑀺. 𑀩𑀮𑀯𑀯𑀻𑀭𑀺𑀬𑀁 𑀫𑀦𑁆𑀤𑀲𑀫𑀸𑀥𑀺𑀁, 𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸, 𑀉𑀤𑁆𑀥𑀘𑁆𑀘𑀁 𑀅𑀥𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀲𑀫𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺 ¶ ¶ . 𑀅𑀧𑀺𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀁 𑀲𑁄 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺.

𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄, 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀲𑀸, 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼, 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑀺 𑀘 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀜𑁆𑀳𑀺 𑀲𑀢𑀺𑀧𑀝𑀺𑀲𑀭𑀡𑀁, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 ¶ 𑀘 𑀲𑀢𑀺; 𑀦 𑀯𑀺𑀦𑀸 𑀲𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁄 𑀳𑁄𑀢𑀻’’𑀢𑀺.

𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀦𑀸𑀫 𑀔𑀦𑁆𑀥𑀸𑀤𑀺𑀪𑁂𑀤𑁂 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀁 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀲𑀫𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀉𑀤𑀬𑀩𑁆𑀩𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀧𑀼𑀕𑁆𑀕𑀮𑀲𑁂𑀯𑀦𑀸. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀧𑀺𑀘 ¶ 𑀏𑀓𑀸𑀤𑀲 𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸, 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀢𑀸 ¶ , 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀢𑀢𑁆𑀣 𑀦𑀺𑀭𑀬𑁂𑀲𑀼 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑀓𑀸𑀮𑁂𑀧𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀚𑀸𑀮𑀓𑁆𑀔𑀺𑀧𑀓𑀼𑀫𑀻𑀦𑀸𑀤𑀻𑀳𑀺 𑀕𑀳𑀺𑀢𑀓𑀸𑀮𑁂𑀧𑀺, 𑀧𑀸𑀘𑀦𑀓𑀡𑁆𑀝𑀓𑀸𑀤𑀺𑀧𑁆𑀧𑀳𑀸𑀭𑀸𑀯𑀺𑀢𑀼𑀦𑁆𑀦𑀲𑁆𑀲 𑀧𑀦 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀆𑀢𑀼𑀭𑀻𑀪𑀽𑀢𑀓𑀸𑀮𑁂𑀧𑀺, 𑀓𑀸𑀮𑀓𑀜𑁆𑀚𑀺𑀓𑀅𑀲𑀼𑀭𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 ¶ 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁂𑀧𑀺 𑀦 𑀲𑀓𑁆𑀓𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. ‘𑀅𑀬𑀫𑁂𑀯 𑀢𑁂, 𑀪𑀺𑀓𑁆𑀔𑀼, 𑀓𑀸𑀮𑁄 𑀯𑀻𑀭𑀺𑀬𑀓𑀭𑀡𑀸𑀬𑀸’𑀢𑀺 𑀏𑀯𑀁 𑀅𑀧𑀸𑀬𑀪𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. ‘𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀮𑀤𑁆𑀥𑀼𑀁; 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑁂𑀯 𑀲𑀓𑁆𑀓𑀸; 𑀅𑀬𑀫𑀸𑀦𑀺𑀲𑀁𑀲𑁄 𑀯𑀻𑀭𑀺𑀬𑀲𑁆𑀲𑀸’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. ‘𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀸𑀲𑀸𑀯𑀓𑁂𑀳𑁂𑀯 𑀢𑁂 𑀕𑀢𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄; 𑀲𑁄 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼’𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. ‘𑀬𑁂 𑀢𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑁂 𑀢𑁂 𑀫𑀦𑀼𑀲𑁆𑀲𑀸 𑀦𑁂𑀯 𑀜𑀸𑀢𑀓𑀸, 𑀦 𑀤𑀸𑀲𑀓𑀫𑁆𑀫𑀓𑀭𑀸, 𑀦𑀸𑀧𑀺 𑀢𑀁 𑀦𑀺𑀲𑁆𑀲𑀸𑀬 ‘𑀚𑀻𑀯𑀺𑀲𑁆𑀲𑀸𑀫𑀸’𑀢𑀺 𑀢𑁂 𑀧𑀡𑀻𑀢𑀸𑀦𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀺 𑀤𑁂𑀦𑁆𑀢𑀺; 𑀅𑀣 𑀔𑁄 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀺𑀁𑀲𑀫𑀸𑀦𑀸 𑀤𑁂𑀦𑁆𑀢𑀺. 𑀲𑀢𑁆𑀣𑀸𑀭𑀸𑀧𑀺 ‘𑀅𑀬𑀁 𑀇𑀫𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀢𑀻’𑀢𑀺 𑀦 𑀏𑀯𑀜𑁆𑀘 𑀲𑀫𑁆𑀧𑀲𑁆𑀲𑀢𑀸 𑀢𑀼𑀬𑁆𑀳𑀁 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀢𑀸; 𑀅𑀣 𑀔𑁄 ‘𑀅𑀬𑀁 𑀇𑀫𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺 𑀢𑁂 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸. 𑀲𑁄 𑀤𑀸𑀦𑀺 𑀢𑁆𑀯𑀁 𑀓𑀼𑀲𑀻𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀧𑀘𑀸𑀬𑀺𑀲𑁆𑀲𑀲𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑁂𑀯 𑀳𑀺 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀦𑀸𑀫 𑀳𑁄𑀢𑀻’𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀫𑀳𑀸𑀫𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬.

𑀣𑁂𑀭𑁄 𑀓𑀺𑀭 𑀓𑀲𑁆𑀲𑀓𑀮𑁂𑀡𑁂 𑀦𑀸𑀫 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀘 𑀕𑁄𑀘𑀭𑀕𑀸𑀫𑁂 𑀏𑀓𑀸 𑀫𑀳𑀸𑀉𑀧𑀸𑀲𑀺𑀓𑀸 𑀣𑁂𑀭𑀁 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀻 𑀥𑀻𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀸𑀡𑀢𑀡𑁆𑀟𑀼𑀮𑀸, 𑀅𑀲𑀼𑀓𑀲𑁆𑀫𑀺𑀁 𑀔𑀻𑀭𑀁, 𑀅𑀲𑀼𑀓𑀲𑁆𑀫𑀺𑀁 𑀲𑀧𑁆𑀧𑀺, 𑀅𑀲𑀼𑀓𑀲𑁆𑀫𑀺𑀁 𑀨𑀸𑀡𑀺𑀢𑀁. 𑀢𑀯 ¶ 𑀪𑀸𑀢𑀺𑀓𑀲𑁆𑀲 𑀅𑀬𑁆𑀬𑀫𑀺𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀔𑀻𑀭𑀲𑀧𑁆𑀧𑀺𑀨𑀸𑀡𑀺𑀢𑁂𑀳𑀺 𑀲𑀤𑁆𑀥𑀺𑀁 𑀤𑁂𑀳𑀺 ¶ , 𑀢𑁆𑀯𑀜𑁆𑀘 𑀪𑀼𑀜𑁆𑀚𑁂𑀬𑁆𑀬𑀸𑀲𑀻’’𑀢𑀺. ‘‘𑀢𑁆𑀯𑀁 𑀧𑀦 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺? ‘‘𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀧𑀓𑁆𑀓𑀁 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀓𑀜𑁆𑀚𑀺𑀬𑁂𑀦 𑀪𑀼𑀢𑁆𑀢𑀫𑁆𑀳𑀻’’𑀢𑀺. ‘‘𑀤𑀺𑀯𑀸 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺? ‘‘𑀲𑀸𑀓𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀡𑀢𑀡𑁆𑀟𑀼𑀮𑁂𑀳𑀺 𑀅𑀫𑁆𑀩𑀺𑀮𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀞𑀧𑁂𑀳𑀺, 𑀅𑀫𑁆𑀫𑀸’’𑀢𑀺.

𑀣𑁂𑀭𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀦𑁆𑀢𑁄𑀯 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘𑀫𑀳𑀸𑀉𑀧𑀸𑀲𑀺𑀓𑀸 𑀓𑀺𑀭 𑀓𑀜𑁆𑀚𑀺𑀬𑁂𑀦 ¶ 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺; 𑀤𑀺𑀯𑀸𑀧𑀺 𑀓𑀡𑀧𑀡𑁆𑀡𑀫𑁆𑀩𑀺𑀮𑀬𑀸𑀕𑀼𑀁 𑀪𑀼𑀜𑁆𑀚𑀺𑀲𑁆𑀲𑀢𑀺; 𑀢𑀼𑀬𑁆𑀳𑀁 𑀅𑀢𑁆𑀣𑀸𑀬 𑀧𑀦 𑀧𑀼𑀭𑀸𑀡𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀘𑀺𑀓𑁆𑀔𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀔𑁄 𑀧𑀦𑁂𑀲𑀸 𑀦𑁂𑀯 𑀔𑁂𑀢𑁆𑀢𑀁, 𑀦 𑀯𑀢𑁆𑀣𑀼𑀁, 𑀦 𑀪𑀢𑁆𑀢𑀁, 𑀦 𑀯𑀢𑁆𑀣𑀁 𑀧𑀘𑁆𑀘𑀸𑀲𑀻𑀲𑀢𑀺; 𑀢𑀺𑀲𑁆𑀲𑁄 𑀧𑀦 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑀬𑀫𑀸𑀦𑀸 𑀤𑁂𑀢𑀺. 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺? 𑀅𑀬𑀁 𑀔𑁄 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀢𑀬𑀸 𑀲𑀭𑀸𑀕𑁂𑀦 𑀲𑀤𑁄𑀲𑁂𑀦 𑀲𑀫𑁄𑀳𑁂𑀦 𑀦 𑀲𑀓𑁆𑀓𑀸 𑀪𑀼𑀜𑁆𑀚𑀺𑀢𑀼’𑀦𑁆𑀢𑀺 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀓𑀮𑁂𑀡𑀫𑁂𑀯 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀳𑁂𑀝𑁆𑀞𑀸𑀫𑀜𑁆𑀘𑁂 𑀘𑀻𑀯𑀭𑀁 𑀘𑀻𑀯𑀭𑀯𑀁𑀲𑁂 𑀞𑀧𑁂𑀢𑁆𑀯𑀸 ‘𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’𑀢𑀺 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀯𑀼𑀢𑁆𑀣𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀓𑀲𑀫𑀸𑀦𑀫𑀺𑀯 𑀧𑀤𑀼𑀫𑀁 𑀫𑀳𑀸𑀔𑀻𑀡𑀸𑀲𑀯𑁄 𑀲𑀺𑀢𑀁 𑀓𑀭𑁄𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀮𑁂𑀡𑀤𑁆𑀯𑀸𑀭𑁂 𑀭𑀼𑀓𑁆𑀔𑀫𑁆𑀳𑀺 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲𑀸’’𑀢𑀺.

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑁋 ‘𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’𑀢𑀺 𑀆𑀳.

𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 ‘𑀧𑀸𑀢𑁄𑀬𑁂𑀯𑀸’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺. 𑀤𑀸𑀭𑀺𑀓𑀸𑀧𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 ‘𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀻𑀢𑀺 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺. 𑀲𑀸, 𑀣𑁂𑀭𑁂 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀬𑁄𑀚𑀺𑀢𑀲𑁆𑀲 𑀔𑀻𑀭𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀣𑁂𑀭𑁄 ‘𑀲𑀼𑀔𑀁 𑀳𑁄𑀢𑀽’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀢𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺.

𑀣𑁂𑀭𑀲𑁆𑀲 ¶ ¶ 𑀳𑀺 𑀢𑀤𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀫𑀼𑀔𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀫𑀳𑀸𑀉𑀧𑀸𑀲𑀺𑀓𑀸 𑀅𑀭𑀜𑁆𑀜𑀸 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀺𑀁, 𑀅𑀫𑁆𑀫, 𑀪𑀸𑀢𑀺𑀓𑁄 𑀢𑁂 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀉𑀧𑀸𑀲𑀺𑀓𑀸 ‘𑀅𑀚𑁆𑀚 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’𑀦𑁆𑀢𑀺 𑀜𑀢𑁆𑀯𑀸 ‘‘𑀅𑀪𑀺𑀭𑀫𑀢𑀺 𑀢𑁂, 𑀅𑀫𑁆𑀫, 𑀪𑀸𑀢𑀸 𑀩𑀼𑀤𑁆𑀥𑀲𑀸𑀲𑀦𑁂, 𑀦 𑀉𑀓𑁆𑀓𑀡𑁆𑀞𑀢𑀻’’𑀢𑀺 𑀆𑀳.

𑀫𑀳𑀦𑁆𑀢𑀁 𑀔𑁄 𑀧𑀦𑁂𑀢𑀁 𑀲𑀢𑁆𑀣𑀼 𑀤𑀸𑀬𑀚𑁆𑀚𑀁 𑀬𑀤𑀺𑀤𑀁 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺 𑀦𑀸𑀫. 𑀢𑀁 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼𑀁. 𑀬𑀣𑀸 𑀳𑀺 ¶ 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀧𑀼𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 ‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀧𑀼𑀢𑁆𑀢𑁄’𑀢𑀺 𑀧𑀭𑀺𑀩𑀸𑀳𑀺𑀭𑀁 𑀓𑀭𑁄𑀦𑁆𑀢𑀺; 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺; 𑀏𑀯𑀁 𑀓𑀼𑀲𑀻𑀢𑁄𑀧𑀺 𑀇𑀤𑀁 𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀻𑀢𑀺 𑀤𑀸𑀬𑀚𑁆𑀚𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. ‘𑀫𑀳𑀸 𑀔𑁄 𑀧𑀦 𑀢𑁂 𑀲𑀢𑁆𑀣𑀸. 𑀲𑀢𑁆𑀣𑀼𑀦𑁄 𑀳𑀺 𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑀡𑁆𑀳𑀦𑀓𑀸𑀮𑁂𑀧𑀺 𑀅𑀪𑀺𑀦𑀺𑀓𑁆𑀔𑀫𑀦𑁂𑀧𑀺 𑀅𑀪𑀺𑀲𑀫𑁆𑀩𑁄𑀥𑀺𑀬𑀫𑁆𑀧𑀺 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀦𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀬𑀼𑀢𑁆𑀢𑀁 𑀦𑀼 𑀢𑁂 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀲𑀻𑀢𑁂𑀦 𑀪𑀯𑀺𑀢𑀼’𑀦𑁆𑀢𑀺 𑀏𑀯𑀁 𑀲𑀢𑁆𑀣𑀼𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘𑀚𑀸𑀢𑀺𑀬𑀸𑀧𑀺 𑀢𑁆𑀯𑀁 𑀇𑀤𑀸𑀦𑀺 𑀦 𑀮𑀸𑀫𑀓𑀚𑀸𑀢𑀺𑀓𑁄𑀲𑀺; 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀆𑀕𑀢𑁂 𑀑𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄; 𑀲𑀺𑀭𑀺𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀘 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀘 𑀦𑀢𑁆𑀢𑀸; 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀓𑀦𑀺𑀝𑁆𑀞𑁄. 𑀢𑀬𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀚𑀺𑀦𑀧𑀼𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀬𑀼𑀢𑁆𑀢𑀁 𑀓𑀼𑀲𑀻𑀢𑁂𑀦 𑀯𑀺𑀳𑀭𑀺𑀢𑀼’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. ‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀘𑁂𑀯 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀘 𑀯𑀻𑀭𑀺𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀢𑁆𑀯𑀁 𑀏𑀢𑁂𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀲𑀺, 𑀦𑀧𑁆𑀧𑀝𑀺𑀧𑀚𑁆𑀚𑀲𑀻’𑀢𑀺 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀅𑀚𑀕𑀭𑀲𑀤𑀺𑀲𑁂 𑀯𑀺𑀲𑁆𑀲𑀝𑁆𑀞𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀓𑀼𑀲𑀻𑀢𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀺𑀭𑀺𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ¶ 𑁋

‘‘𑀅𑀢𑁆𑀣𑀺 ¶ , 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀧𑀻𑀢𑀺𑀬𑁂𑀯 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫. 𑀢𑀲𑁆𑀲𑀸 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄 ¶ 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫.

𑀅𑀧𑀺𑀘 𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀳𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺; 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺, 𑀤𑀻𑀖𑀭𑀢𑁆𑀢𑀁 𑀅𑀓𑁆𑀔𑀡𑁆𑀟𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄 𑀤𑀲𑀲𑀻𑀮𑀁 𑀧𑀜𑁆𑀘𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀼 𑀧𑀡𑀻𑀢𑀁 𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸 ‘𑀏𑀯𑀁 𑀦𑀸𑀫 𑀅𑀤𑀫𑁆𑀳𑀸’𑀢𑀺 𑀘𑀸𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄𑀧𑀺 𑀏𑀯𑀭𑀽𑀧𑁂 𑀓𑀸𑀮𑁂 𑀲𑀻𑀮𑀯𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀬𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀢𑀸 𑀤𑁂𑀯𑀢𑁆𑀢𑀁 𑀧𑀢𑁆𑀢𑀸 𑀢𑀣𑀸𑀭𑀽𑀧𑀸𑀦𑀁 𑀕𑀼𑀡𑀸𑀦𑀁 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀯𑀲𑁆𑀲𑀸𑀦𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑁂𑀲𑀼 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀕𑀤𑁆𑀭𑀪𑀧𑀺𑀝𑁆𑀞𑁂 𑀭𑀚𑀲𑀤𑀺𑀲𑁂 𑀮𑀽𑀔𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀩𑀳𑀼𑀮𑁂 𑀫𑀼𑀤𑀼𑀘𑀺𑀢𑁆𑀢𑁂 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀓𑁂 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀻𑀢𑀺𑀉𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ¶ 𑁋

‘‘𑀅𑀢𑁆𑀣𑀺 ¶ , 𑀪𑀺𑀓𑁆𑀔𑀯𑁂, 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸 ¶ , 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀺𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀧𑀡𑀻𑀢𑀜𑁆𑀳𑀺 𑀲𑀺𑀦𑀺𑀤𑁆𑀥𑀁 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀻𑀢𑀼𑀡𑁆𑀳𑁂𑀲𑀼 𑀉𑀢𑀽𑀲𑀼 𑀞𑀸𑀦𑀸𑀤𑀻𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀲𑀧𑁆𑀧𑀸𑀬𑀁 𑀉𑀢𑀼𑀜𑁆𑀘 𑀇𑀭𑀺𑀬𑀸𑀧𑀣𑀜𑁆𑀘 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑁄 𑀲𑀩𑁆𑀩𑀉𑀢𑀼𑀇𑀭𑀺𑀬𑀸𑀧𑀣𑀓𑁆𑀔𑀫𑁄𑀯 𑀳𑁄𑀢𑀺, 𑀦 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀯𑀺𑀲𑀪𑀸𑀕𑁂 𑀉𑀢𑀼𑀇𑀭𑀺𑀬𑀸𑀧𑀣𑁂 𑀯𑀚𑁆𑀚𑁂𑀢𑁆𑀯𑀸 𑀲𑀪𑀸𑀕𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀫𑀚𑁆𑀛𑀢𑁆𑀢𑀧𑀬𑁄𑀕𑁄 𑀯𑀼𑀘𑁆𑀘𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑀸; 𑀇𑀫𑀺𑀦𑀸 𑀫𑀚𑁆𑀛𑀢𑁆𑀢𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀭𑀁 𑀯𑀺𑀳𑁂𑀞𑀬𑀫𑀸𑀦𑁄𑀯 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀁 𑀲𑀸𑀭𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀁𑀬𑀢𑀧𑀸𑀤𑀧𑀸𑀡𑀺𑀁 𑀧𑀲𑁆𑀲𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀲𑁆𑀲𑀤𑁆𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑀣𑁄𑀯 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘 ¶ 𑀏𑀓𑀸𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 ¶ , 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀡𑀦𑀢𑀸, 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸, 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀡𑀢𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 𑀘 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑀼𑀲𑀮𑀢𑀸. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀡𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 ¶ 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀡𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀝𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺. 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺.

𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀦𑀸𑀫 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀮𑀻𑀦𑀁 𑀅𑀦𑀼𑀤𑁆𑀥𑀝𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀬𑀁 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺 𑀲𑀸𑀭𑀣𑀻 𑀯𑀺𑀬 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸𑀢𑀺. 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀦𑀸𑀫 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀅𑀧𑁆𑀧𑀢𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀦𑀸𑀫 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀁 𑀲𑁂𑀯𑀦𑀸 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀫𑀸𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀁𑀬𑁂𑀯 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄 𑀏𑀲 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 ¶ 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 ¶ 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ¶ 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑁋

𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀉𑀧𑁂𑀓𑁆𑀔𑀸𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫. 𑀅𑀧𑀺𑀘 𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 ‘𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀲𑀺. 𑀏𑀲𑁄𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀢𑀺. 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’𑀢𑀺 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘 ‘𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄𑀬𑁂𑀯 𑀦𑀢𑁆𑀣𑀺. 𑀲𑁄 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’𑀢𑀺 𑀏𑀯𑀁 𑀦𑀺𑀲𑁆𑀲𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘. 𑀤𑁆𑀯𑀻𑀳𑁂𑀯𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 ‘𑀇𑀤𑀁 𑀘𑀻𑀯𑀭𑀁 𑀅𑀦𑀼𑀧𑀼𑀩𑁆𑀩𑁂𑀦 𑀯𑀡𑁆𑀡𑀯𑀺𑀓𑀸𑀭𑀜𑁆𑀘𑁂𑀯 𑀚𑀺𑀡𑁆𑀡𑀪𑀸𑀯𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀬𑀸 𑀙𑀟𑁆𑀟𑀦𑀻𑀬𑀁 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦𑀲𑁆𑀲 𑀲𑀸𑀫𑀺𑀓𑁄 𑀪𑀯𑁂𑀬𑁆𑀬, 𑀦𑀸𑀲𑁆𑀲 𑀏𑀯𑀁 𑀯𑀺𑀦𑀲𑁆𑀲𑀺𑀢𑀼𑀁 𑀤𑀤𑁂𑀬𑁆𑀬𑀸’𑀢𑀺 𑀏𑀯𑀁 𑀅𑀲𑁆𑀲𑀸𑀫𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘. ‘𑀅𑀦𑀤𑁆𑀥𑀦𑀺𑀬𑀁 𑀇𑀤𑀁 𑀢𑀸𑀯𑀓𑀸𑀮𑀺𑀓’𑀦𑁆𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘. 𑀬𑀣𑀸 𑀘 𑀘𑀻𑀯𑀭𑁂, 𑀏𑀯𑀁 𑀧𑀢𑁆𑀢𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸𑀢𑀺 𑀏𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀕𑀺𑀳𑀻 𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀸𑀤𑀺𑀓𑁂, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀓𑁂 𑀫𑀫𑀸𑀬𑀢𑀺, 𑀲𑀳𑀢𑁆𑀣𑁂𑀦𑁂𑀯 𑀦𑁂𑀲𑀁 𑀓𑁂𑀲𑀘𑁆𑀙𑁂𑀤𑀦𑀲𑀽𑀘𑀺𑀓𑀫𑁆𑀫𑀘𑀻𑀯𑀭𑀥𑁄𑀯𑀦𑀭𑀚𑀦𑀧𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 ‘𑀅𑀲𑀼𑀓𑁄 𑀲𑀸𑀫𑀡𑁂𑀭𑁄 𑀓𑀼𑀳𑀺𑀁? 𑀅𑀲𑀼𑀓𑁄 𑀤𑀳𑀭𑁄 𑀓𑀼𑀳𑀺’𑀦𑁆𑀢𑀺? 𑀪𑀦𑁆𑀢𑀫𑀺𑀕𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀆𑀮𑁄𑀓𑁂𑀢𑀺; 𑀅𑀜𑁆𑀜𑁂𑀦 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 ‘𑀫𑀼𑀳𑀼𑀢𑁆𑀢𑀁 𑀢𑀸𑀯 𑀅𑀲𑀼𑀓𑀁 𑀧𑁂𑀲𑁂𑀣𑀸’𑀢𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 ‘𑀅𑀫𑁆𑀳𑁂𑀧𑀺 𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀸𑀭𑁂𑀫, 𑀢𑀼𑀫𑁆𑀳𑁂 𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑁂𑀲𑁆𑀲𑀣𑀸’𑀢𑀺 𑀦 𑀤𑁂𑀢𑀺 𑁋 𑀅𑀬𑀁 𑀲𑀢𑁆𑀢𑀓𑁂𑀮𑀸𑀬𑀦𑁄 𑀦𑀸𑀫.

𑀬𑁄 ¶ 𑀧𑀦 𑀘𑀻𑀯𑀭𑀧𑀢𑁆𑀢𑀣𑀸𑀮𑀓𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 ¶ 𑀫𑀫𑀸𑀬𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑁄𑀧𑀺 ‘𑀫𑀬𑀫𑁆𑀧𑀺 𑀇𑀫𑀁 𑀫𑀫𑀸𑀬𑀦𑁆𑀢𑀸 𑀦 𑀧𑀭𑀺𑀪𑀼𑀜𑁆𑀚𑀸𑀫, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀸’𑀢𑀺 𑀯𑀤𑀢𑀺 𑁋 𑀅𑀬𑀁 𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑁄 𑀦𑀸𑀫. 𑀬𑁄 𑀧𑀦 𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀯𑀢𑁆𑀣𑀽𑀲𑀼 𑀫𑀚𑁆𑀛𑀢𑁆𑀢𑁄 𑀉𑀤𑀸𑀲𑀻𑀦𑁄 𑁋 𑀅𑀬𑀁 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑁄 𑀦𑀸𑀫. 𑀇𑀢𑀺 𑀅𑀬𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀯𑀭𑀽𑀧𑁂 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑁂 ¶ 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀤𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸.

𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀧𑀩𑁆𑀩𑁂𑀲𑀼 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸. 𑀇𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀜𑁆𑀜𑁂𑀦 𑀯𑁂𑀤𑀦𑀁, 𑀅𑀜𑁆𑀜𑁂𑀦 𑀘𑀺𑀢𑁆𑀢𑀁, 𑀅𑀜𑁆𑀜𑁂𑀦 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺; 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀆𑀤𑀺𑀢𑁄 𑀳𑀺 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀢𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀸𑀬𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸…. 𑀘𑀺𑀢𑁆𑀢𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸…. 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀢𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀏𑀯𑀁 𑀢𑀸𑀯 𑀤𑁂𑀲𑀦𑀸 𑀧𑀼𑀕𑁆𑀕𑀮𑁂 𑀢𑀺𑀝𑁆𑀞𑀢𑀺. 𑀓𑀸𑀬𑁂 𑀧𑀦 ‘𑀲𑀼𑀪’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀯𑁂𑀤𑀦𑀸𑀬 ‘𑀲𑀼𑀔’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀯𑁂𑀤𑀦𑀸𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀘𑀺𑀢𑁆𑀢𑁂 ‘𑀦𑀺𑀘𑁆𑀘’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀘𑀺𑀢𑁆𑀢𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀥𑀫𑁆𑀫𑁂𑀲𑀼 ‘𑀅𑀢𑁆𑀢𑀸’𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀸 𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀺𑀓𑀸 ¶ 𑀲𑀢𑀺 𑀫𑀕𑁆𑀕𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀇𑀢𑀺 𑀏𑀓𑀸𑀯 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 ¶ 𑀦𑀸𑀫𑀸𑀦𑀺 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀦𑁆𑀢𑀻’𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁭𑁪. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ¶ 𑀮𑁄𑀓𑀼𑀢𑁆𑀢𑀭𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀬𑀣𑀸 𑀓𑀸𑀬𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀢𑀦𑁆𑀢𑀺 𑀞𑀧𑀺𑀢𑀸, 𑀏𑀯𑀁 𑀅𑀝𑁆𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀦𑀺𑀧𑀺 𑀓𑀸𑀬𑀸𑀦𑀼𑀧𑀲𑁆𑀲𑀸𑀤𑀻𑀦𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 (𑀥. 𑀲. 𑁩𑁫𑁫 𑀆𑀤𑀬𑁄) 𑀯𑀺𑀪𑀢𑁆𑀢𑀲𑁆𑀲 𑀤𑁂𑀲𑀦𑀸𑀦𑀬𑀲𑁆𑀲 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀢𑀢𑁆𑀣 𑀦𑀬𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀛𑀸𑀦𑀸𑀪𑀺𑀦𑀺𑀯𑁂𑀲𑁂 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸, 𑀲𑀼𑀜𑁆𑀜𑀢𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀅𑀧𑁆𑀧𑀡𑀺𑀳𑀺𑀢𑀁, 𑀅𑀧𑁆𑀧𑀡𑀺𑀳𑀺𑀢𑀧𑀝𑀺𑀧𑀤𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀸𑀦𑀁 𑀯𑀲𑁂𑀦 𑀤𑀲 𑀦𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀯𑀻𑀲𑀢𑀺𑀬𑀸 𑀅𑀪𑀺𑀦𑀺𑀯𑁂𑀲𑁂𑀲𑀼 𑀤𑁆𑀯𑁂 𑀦𑀬𑀲𑀢𑀸𑀦𑀺. 𑀢𑀸𑀦𑀺 𑀘𑀢𑀽𑀳𑀺 𑀅𑀥𑀺𑀧𑀢𑀻𑀳𑀺 𑀘𑀢𑀼𑀕𑀼𑀡𑀺𑀢𑀸𑀦𑀺 𑀅𑀝𑁆𑀞. 𑀇𑀢𑀺 𑀲𑀼𑀤𑁆𑀥𑀺𑀓𑀸𑀦𑀺 𑀤𑁆𑀯𑁂 𑀲𑀸𑀥𑀺𑀧𑀢𑀻𑀦𑀺 𑀅𑀝𑁆𑀞𑀸𑀢𑀺 𑀲𑀩𑁆𑀩𑀫𑁆𑀧𑀺 𑀦𑀬𑀲𑀳𑀲𑁆𑀲𑀁 𑀳𑁄𑀢𑀺. 𑀢𑀣𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀲𑀼𑀤𑁆𑀥𑀺𑀓𑀲𑀢𑀺𑀧𑀝𑁆𑀞𑀸𑀦𑁂 𑀘𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀘 𑀦𑀬𑀲𑀳𑀲𑁆𑀲𑀸𑀦𑀺. 𑀬𑀣𑀸 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂, 𑀏𑀯𑀁 𑀲𑁂𑀲𑀫𑀕𑁆𑀕𑁂𑀲𑀼𑀧𑀻𑀢𑀺 𑀓𑀼𑀲𑀮𑁂 𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺; 𑀲𑀼𑀜𑁆𑀜𑀢𑀸𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀸𑀤𑀺𑀪𑁂𑀤𑁂𑀲𑀼 𑀧𑀦 𑀢𑀢𑁄 𑀢𑀺𑀕𑀼𑀡𑁂 𑀯𑀺𑀧𑀸𑀓𑁂 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀻𑀢𑀺. 𑀏𑀯𑀫𑁂𑀯 𑀲𑀓𑀺𑀘𑁆𑀘𑀲𑀸𑀥𑀓𑀸𑀦𑀜𑁆𑀘𑁂𑀯 𑀲𑀁𑀲𑀺𑀤𑁆𑀥𑀺𑀓𑀓𑀺𑀘𑁆𑀘𑀸𑀦𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀼𑀯𑀺𑀥𑁄 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀘 𑀲𑀼𑀤𑁆𑀥𑀺𑀓𑀯𑀲𑁂𑀦 𑀘 𑀓𑀼𑀲𑀮𑁂 𑀧𑀜𑁆𑀘𑀦𑁆𑀦𑀁 𑀯𑀺𑀧𑀸𑀓𑁂 𑀧𑀜𑁆𑀘𑀦𑁆𑀦𑀦𑁆𑀢𑀺 𑀤𑀲𑀦𑁆𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑀸𑀦𑀁 𑀯𑀲𑁂𑀦 𑀤𑀲𑀧𑁆𑀧𑀪𑁂𑀤𑁄 𑀅𑀲𑀻𑀢𑀺𑀦𑀬𑀲𑀳𑀲𑁆𑀲𑀧𑀢𑀺𑀫𑀡𑁆𑀟𑀺𑀢𑁄 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀺𑀤𑁆𑀤𑁂𑀲𑁄.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁩𑁮𑁬. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀁 ¶ 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀦𑁂𑀯, 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺; 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦 𑀫𑀕𑁆𑀕𑀳𑁂𑀢𑀼𑀓𑀸𑀦𑀺; 𑀯𑀻𑀭𑀺𑀬𑀁 𑀯𑀸 𑀯𑀻𑀫𑀁𑀲𑀁 𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀻𑀦𑀺; 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀓𑀸𑀬 ¶ 𑀫𑀕𑁆𑀕𑀪𑀸𑀯𑀦𑀸𑀬 𑀦𑀯𑀢𑁆𑀢𑀩𑁆𑀩𑀸𑀦𑀺 𑀫𑀕𑁆𑀕𑀸𑀥𑀺𑀧𑀢𑀻𑀦𑀻𑀢𑀺 𑀨𑀮𑀓𑀸𑀮𑁂𑀧𑀺 𑀦𑀯𑀢𑁆𑀢𑀩𑁆𑀩𑀸𑀦𑁂𑀯; 𑀅𑀢𑀻𑀢𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀦𑀧𑀺 𑀦𑀯𑀢𑁆𑀢𑀩𑁆𑀩𑀸𑀦𑀺; 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀫𑀺𑀁𑀬𑁂𑀯 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸; 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀸𑀬𑁂𑀯𑀸𑀢𑀺. 𑀏𑀯𑀫𑀬𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁯𑁦. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁂 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸 𑀦 𑀉𑀤𑁆𑀥𑀦𑁆𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀻𑀧𑁂𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀓𑀸𑀭𑀡𑀧𑁆𑀧𑀥𑀸𑀦𑀸 𑀉𑀧𑀸𑀬𑀧𑁆𑀧𑀥𑀸𑀦𑀸 𑀬𑁄𑀦𑀺𑀲𑁄𑀧𑀥𑀸𑀦𑀸. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀝𑀺𑀧𑀦𑁆𑀦𑀓𑁄 𑀪𑀺𑀓𑁆𑀔𑀼. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀦 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑁆𑀙𑀦𑁆𑀤𑀁 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑁂𑀦𑁂𑀯 𑀲𑀳𑀚𑀸𑀢𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀧𑀝𑀺𑀧𑀸𑀝𑀺𑀬𑀸 𑀧𑀦𑁂𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀧𑀤𑀸𑀦𑀺 𑀆𑀲𑁂𑀯𑀦𑀸𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀸𑀬. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀉𑀧𑁆𑀧𑀸𑀤𑀸𑀬𑀸𑀢𑀺 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀸𑀬. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀦𑀲𑁆𑀲𑀦𑀢𑁆𑀣𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 ¶ 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀯𑀟𑁆𑀠𑀺𑀬𑀸. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀧𑀽𑀭𑀡𑀢𑁆𑀣𑀸𑀬. 𑀅𑀬𑀁 𑀢𑀸𑀯 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀉𑀤𑁆𑀤𑁂𑀲𑀯𑀸𑀭𑀯𑀲𑁂𑀦 𑀏𑀓𑀧𑀤𑀺𑀓𑁄 𑀅𑀢𑁆𑀣𑀼𑀤𑁆𑀥𑀸𑀭𑁄.

𑁩𑁯𑁧. 𑀇𑀤𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀢𑀸𑀦𑀺 𑀧𑀤𑀸𑀦𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀬𑀁 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑁂 𑀆𑀕𑀢𑀲𑀤𑀺𑀲𑀁, 𑀢𑀁 𑀢𑀲𑁆𑀲 𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀢𑀲𑁆𑀫𑀺𑀁 𑀅𑀦𑀸𑀕𑀢𑀁, 𑀢𑀢𑁆𑀣 𑀙𑀦𑁆𑀤𑀦𑀺𑀤𑁆𑀤𑁂𑀲𑁂 𑀢𑀸𑀯 𑀬𑁄 𑀙𑀦𑁆𑀤𑁄𑀢𑀺 𑀬𑁄 𑀙𑀦𑁆𑀤𑀦𑀺𑀬𑀯𑀲𑁂𑀦 𑀙𑀦𑁆𑀤𑁄. 𑀙𑀦𑁆𑀤𑀺𑀓𑀢𑀸𑀢𑀺 𑀙𑀦𑁆𑀤𑀺𑀓𑀪𑀸𑀯𑁄, 𑀙𑀦𑁆𑀤𑀓𑀭𑀡𑀸𑀓𑀸𑀭𑁄 𑀯𑀸. 𑀓𑀢𑁆𑀢𑀼𑀓𑀫𑁆𑀬𑀢𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸. 𑀓𑀼𑀲𑀮𑁄𑀢𑀺 𑀙𑁂𑀓𑁄. 𑀥𑀫𑁆𑀫𑀘𑁆𑀙𑀦𑁆𑀤𑁄𑀢𑀺 𑀲𑀪𑀸𑀯𑀘𑁆𑀙𑀦𑁆𑀤𑁄. 𑀅𑀬𑀜𑁆𑀳𑀺 𑀙𑀦𑁆𑀤𑁄 𑀦𑀸𑀫 𑀢𑀡𑁆𑀳𑀸𑀙𑀦𑁆𑀤𑁄, 𑀤𑀺𑀝𑁆𑀞𑀺𑀙𑀦𑁆𑀤𑁄, 𑀯𑀻𑀭𑀺𑀬𑀙𑀦𑁆𑀤𑁄, 𑀥𑀫𑁆𑀫𑀘𑁆𑀙𑀦𑁆𑀤𑁄𑀢𑀺 𑀩𑀳𑀼𑀯𑀺𑀥𑁄 𑀦𑀸𑀦𑀧𑁆𑀧𑀓𑀸𑀭𑀓𑁄. 𑀢𑁂𑀲𑀼 ¶ 𑀥𑀫𑁆𑀫𑀘𑁆𑀙𑀦𑁆𑀤𑁄𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁄 𑀅𑀥𑀺𑀧𑁆𑀧𑁂𑀢𑁄.

𑀇𑀫𑀁 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀙𑀦𑁆𑀤𑀁 𑀓𑀼𑀭𑀼𑀫𑀸𑀦𑁄𑀯 𑀙𑀦𑁆𑀤𑀁 𑀚𑀦𑁂𑀢𑀺 𑀦𑀸𑀫. 𑀲𑀜𑁆𑀚𑀦𑁂𑀢𑀻𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀉𑀝𑁆𑀞𑀧𑁂𑀢𑀻𑀢𑀺 𑀙𑀦𑁆𑀤𑀁 𑀓𑀼𑀭𑀼𑀫𑀸𑀦𑁄𑀯 𑀢𑀁 𑀉𑀝𑁆𑀞𑀧𑁂𑀢𑀺 𑀦𑀸𑀫. 𑀲𑀫𑀼𑀝𑁆𑀞𑀧𑁂𑀢𑀻𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀙𑀦𑁆𑀤𑀁 𑀓𑀼𑀭𑀼𑀫𑀸𑀦𑁄𑀯 𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀫. 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀧𑀺𑀘 𑀙𑀦𑁆𑀤𑀁 𑀓𑀭𑁄𑀦𑁆𑀢𑁄𑀯 𑀙𑀦𑁆𑀤𑀁 𑀚𑀦𑁂𑀢𑀺 𑀦𑀸𑀫. 𑀢𑀫𑁂𑀯 𑀲𑀢𑀢𑀁 𑀓𑀭𑁄𑀦𑁆𑀢𑁄 𑀲𑀜𑁆𑀚𑀦𑁂𑀢𑀺 𑀦𑀸𑀫. 𑀓𑁂𑀦𑀘𑀺𑀤𑁂𑀯 𑀅𑀦𑁆𑀢𑀭𑀸𑀬𑁂𑀦 𑀧𑀢𑀺𑀢𑀁 𑀧𑀼𑀦 𑀉𑀓𑁆𑀔𑀺𑀧𑀦𑁆𑀢𑁄 𑀉𑀝𑁆𑀞𑀧𑁂𑀢𑀺 𑀦𑀸𑀫. 𑀧𑀩𑀦𑁆𑀥𑀝𑁆𑀞𑀺𑀢𑀺𑀁 𑀧𑀸𑀧𑁂𑀦𑁆𑀢𑁄 𑀲𑀫𑀼𑀝𑁆𑀞𑀧𑁂𑀢𑀺 𑀦𑀸𑀫. 𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀫. 𑀅𑀦𑁄𑀲𑀓𑁆𑀓𑀦𑀢𑀸𑀬 𑀅𑀮𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀪𑀺𑀫𑀼𑀔𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀫.

𑁩𑁯𑁪. 𑀯𑀻𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄𑀯 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀦𑀸𑀫. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀁. 𑀯𑀻𑀭𑀺𑀬𑀁 ¶ 𑀓𑀭𑁄𑀦𑁆𑀢𑁄𑀬𑁂𑀯 𑀘 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀦𑀸𑀫. 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁄 𑀯𑀳𑀼𑀮𑀻𑀓𑀭𑁄𑀢𑀺. 𑀆𑀤𑀺𑀢𑁄𑀯 𑀓𑀭𑁄𑀦𑁆𑀢𑁄 𑀆𑀭𑀪𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁄 𑀲𑀫𑀸𑀭𑀪𑀢𑀺. 𑀪𑀸𑀯𑀦𑀸𑀯𑀲𑁂𑀦 𑀪𑀚𑀦𑁆𑀢𑁄 𑀆𑀲𑁂𑀯𑀢𑀺. 𑀯𑀟𑁆𑀠𑁂𑀦𑁆𑀢𑁄 𑀪𑀸𑀯𑁂𑀢𑀺. 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀢𑀤𑁂𑀯 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁯𑁫. 𑀘𑀺𑀢𑁆𑀢𑀧𑀕𑁆𑀕𑀳𑀦𑀺𑀤𑁆𑀤𑁂𑀲𑁂 𑀯𑀻𑀭𑀺𑀬𑀧𑀕𑁆𑀕𑀳𑁂𑀦 𑀬𑁄𑀚𑁂𑀦𑁆𑀢𑁄 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀉𑀓𑁆𑀔𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀦𑀧𑁆𑀧𑀼𑀦𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀫𑁆𑀧𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀫𑁆𑀧𑀕𑁆𑀕𑀳𑀺𑀢𑀁 𑀬𑀣𑀸 𑀦 𑀧𑀢𑀢𑀺 𑀢𑀣𑀸 𑀦𑀁 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑁂𑀦 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀉𑀧𑀢𑁆𑀣𑀫𑁆𑀪𑀺𑀢𑀫𑁆𑀧𑀺 𑀣𑀺𑀭𑀪𑀸𑀯𑀢𑁆𑀣𑀸𑀬 𑀧𑀼𑀦𑀧𑁆𑀧𑀼𑀦𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀧𑀘𑁆𑀘𑀼𑀧𑀢𑁆𑀣𑀫𑁆𑀪𑁂𑀢𑀺 𑀦𑀸𑀫.

𑁪𑁦𑁬. 𑀞𑀺𑀢𑀺𑀬𑀸𑀢𑀺𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑁂𑀲𑀫𑁆𑀧𑀺 𑀅𑀲𑀫𑁆𑀫𑁄𑀲𑀸𑀤𑀻𑀦𑀁 𑀞𑀺𑀢𑀺𑀯𑁂𑀯𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀬𑀸 𑀞𑀺𑀢𑀺 𑀲𑁄 𑀅𑀲𑀫𑁆𑀫𑁄𑀲𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀧𑀤𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀲𑁆𑀲 ¶ 𑀅𑀢𑁆𑀣𑁄, 𑀉𑀧𑀭𑀺𑀫𑀁 𑀉𑀧𑀭𑀺𑀫𑀁 𑀧𑀤𑀁 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀅𑀢𑁆𑀣𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀅𑀬𑀜𑁆𑀳𑀺 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸 𑀦𑀸𑀫 𑀤𑀼𑀯𑀺𑀥𑀸 𑁋 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘. 𑀢𑀢𑁆𑀣 𑀮𑁄𑀓𑀺𑀬𑀸 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂 𑀳𑁄𑀢𑀺. 𑀲𑀸 ¶ 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀘𑀢𑁆𑀢𑀸𑀭𑁄 𑀫𑁂, 𑀆𑀯𑀼𑀲𑁄, 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄?

𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺; ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺; ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. ‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁫).

𑀏𑀢𑁆𑀣 𑀘 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘𑁂𑀯 𑀫𑀕𑁆𑀕𑁄 𑀘. 𑀉𑀧𑁆𑀧𑀦𑁆𑀦𑀸 ¶ 𑀓𑀼𑀲𑀮𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. 𑀫𑀕𑁆𑀕𑁄 𑀧𑀦 𑀲𑀓𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀓𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀳𑀺 𑀨𑀮𑀲𑁆𑀲 𑀧𑀘𑁆𑀘𑀬𑀁 𑀤𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀼𑀭𑀺𑀫𑀲𑁆𑀫𑀺𑀁 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀬𑀼𑀢𑁆𑀢𑀁.

𑀢𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 ‘𑀫𑀳𑀸𑀘𑁂𑀢𑀺𑀬𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀪𑀡𑁆𑀟𑀕𑀸𑀳𑀓𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀚𑀦𑀧𑀤𑀢𑁄 𑀫𑀳𑀸𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀧𑀭𑀺𑀯𑁂𑀡𑀁 𑀧𑀸𑀯𑀺𑀲𑀺; 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑁂𑀢𑀺𑀬𑀁 𑀯𑀦𑁆𑀤𑀫𑀸𑀦𑁂 𑀘𑁂𑀢𑀺𑀬𑀁 𑀯𑀦𑁆𑀤𑀦𑀢𑁆𑀣𑀸𑀬 𑀦 𑀦𑀺𑀓𑁆𑀔𑀫𑀺. 𑀓𑀲𑁆𑀫𑀸? 𑀔𑀻𑀡𑀸𑀲𑀯𑀸𑀦𑀜𑁆𑀳𑀺 𑀢𑀻𑀲𑀼 𑀭𑀢𑀦𑁂𑀲𑀼 𑀫𑀳𑀦𑁆𑀢𑀁 𑀕𑀸𑀭𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀲𑀸𑀬𑀫𑀸𑀲𑀪𑀼𑀢𑁆𑀢𑀯𑁂𑀮𑀸𑀬 𑀲𑀸𑀫𑀡𑁂𑀭𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 ‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺. 𑀲𑀸𑀫𑀡𑁂𑀭𑁄 ‘𑀓𑀺𑀁 𑀦𑀼 𑀔𑁄 𑀣𑁂𑀭𑁄 𑀅𑀯𑁂𑀮𑀸𑀬 𑀏𑀓𑀓𑁄𑀯 𑀕𑀘𑁆𑀙𑀢𑀺, 𑀚𑀸𑀦𑀺𑀲𑁆𑀲𑀸𑀫𑀻’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄𑀯 𑀦𑀺𑀓𑁆𑀔𑀫𑀺. 𑀣𑁂𑀭𑁄 𑀅𑀦𑀸𑀯𑀚𑁆𑀚𑀦𑁂𑀦 𑀢𑀲𑁆𑀲 𑀆𑀕𑀫𑀦𑀁 ¶ 𑀅𑀚𑀸𑀦𑀦𑁆𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀴𑁆𑀳𑁄. 𑀲𑀸𑀫𑀡𑁂𑀭𑁄𑀧𑀺 𑀅𑀦𑀼𑀧𑀤𑀁𑀬𑁂𑀯 𑀆𑀭𑀼𑀴𑁆𑀳𑁄.

𑀫𑀳𑀸𑀣𑁂𑀭𑁄 ¶ 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀢𑀺. 𑀲𑀸𑀫𑀡𑁂𑀭𑁄 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 ‘𑀉𑀧𑀚𑁆𑀛𑀸𑀬𑁄 𑀫𑁂 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀢𑀺; 𑀓𑀺𑀁 𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑀁 𑀓𑀭𑁂𑀬𑁆𑀬𑀸’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀞𑀺𑀢𑁂 𑀲𑀸𑀫𑀡𑁂𑀭𑁄 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀣𑁂𑀭𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀁 𑀯𑀦𑁆𑀤𑀦𑀓𑀸𑀮𑁂, 𑀪𑀦𑁆𑀢𑁂; 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀣; 𑀓𑀺𑀦𑁆𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑁂𑀬𑁆𑀬𑀸𑀣𑀸’’𑀢𑀺? ‘‘𑀆𑀫, 𑀲𑀸𑀫𑀡𑁂𑀭, 𑀇𑀫𑀲𑁆𑀫𑀺𑀁 𑀘𑁂𑀢𑀺𑀬𑁂 𑀯𑀺𑀬 𑀅𑀜𑁆𑀜𑀢𑁆𑀭 𑀏𑀢𑁆𑀢𑀓𑀁 𑀥𑀸𑀢𑀼𑀦𑀺𑀥𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀭𑀽𑀧𑀁 𑀅𑀲𑀤𑀺𑀲𑀁 𑀫𑀳𑀸𑀣𑀽𑀧𑀁 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀓𑁄 𑀦 𑀧𑀽𑀚𑁂𑀬𑁆𑀬𑀸’’𑀢𑀺? ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀥𑀺𑀯𑀸𑀲𑁂𑀣, 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀯𑀤𑁂𑀯 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀦𑀁 𑀧𑀽𑀭𑁂𑀢𑁆𑀯𑀸 𑀫𑀳𑀸𑀣𑁂𑀭𑁂 ¶ 𑀤𑀓𑁆𑀔𑀺𑀡𑀫𑀼𑀔𑀢𑁄 𑀧𑀘𑁆𑀙𑀺𑀫𑀫𑀼𑀔𑁂 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀭𑀺𑀲𑁆𑀲𑀸𑀯𑀦𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀧𑀽𑀚𑁂𑀣 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 ‘‘𑀅𑀢𑀺𑀫𑀦𑁆𑀤𑀸𑀦𑀺 𑀦𑁄, 𑀲𑀸𑀫𑀡𑁂𑀭, 𑀧𑀼𑀧𑁆𑀨𑀸𑀦𑀻’’𑀢𑀺 𑀆𑀳. ‘‘𑀕𑀘𑁆𑀙𑀣, 𑀪𑀦𑁆𑀢𑁂, 𑀪𑀕𑀯𑀢𑁄 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀧𑀽𑀚𑁂𑀣𑀸’’𑀢𑀺.

𑀣𑁂𑀭𑁄 𑀧𑀘𑁆𑀙𑀺𑀫𑀫𑀼𑀔𑀦𑀺𑀲𑁆𑀲𑀺𑀢𑁂𑀦 𑀲𑁄𑀧𑀸𑀦𑁂𑀦 𑀆𑀭𑀼𑀬𑁆𑀳 𑀓𑀼𑀘𑁆𑀙𑀺𑀯𑁂𑀤𑀺𑀓𑀸𑀪𑀽𑀫𑀺𑀬𑀁 𑀧𑀼𑀧𑁆𑀨𑀧𑀽𑀚𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄. 𑀯𑁂𑀤𑀺𑀓𑀸𑀪𑀽𑀫𑀺 𑀧𑀭𑀺𑀧𑀼𑀡𑁆𑀡𑀸; 𑀧𑀼𑀧𑁆𑀨𑀸𑀦𑀺 𑀧𑀢𑀺𑀢𑁆𑀯𑀸 𑀤𑀼𑀢𑀺𑀬𑀪𑀽𑀫𑀺𑀬𑀁 𑀚𑀡𑁆𑀡𑀼𑀧𑁆𑀧𑀫𑀸𑀡𑁂𑀦 𑀑𑀥𑀺𑀦𑀸 𑀧𑀽𑀭𑀬𑀺𑀁𑀲𑀼. 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀓𑀧𑀦𑁆𑀢𑀺𑀁 𑀧𑀽𑀚𑁂𑀲𑀺; 𑀲𑀸𑀧𑀺 𑀧𑀭𑀺𑀧𑀽𑀭𑀺; 𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 𑀳𑁂𑀝𑁆𑀞𑀺𑀫𑀢𑀮𑁂 𑀯𑀺𑀓𑀺𑀭𑀦𑁆𑀢𑁄 𑀅𑀕𑀫𑀸𑀲𑀺; 𑀲𑀩𑁆𑀩𑀁 𑀘𑁂𑀢𑀺𑀬𑀗𑁆𑀕𑀡𑀁 𑀧𑀭𑀺𑀧𑀽𑀭𑀺; 𑀢𑀲𑁆𑀫𑀺𑀁 𑀧𑀭𑀺𑀧𑀼𑀡𑁆𑀡𑁂 ‘‘𑀲𑀸𑀫𑀡𑁂𑀭, 𑀧𑀼𑀧𑁆𑀨𑀸𑀦𑀺 𑀦 𑀔𑀻𑀬𑀦𑁆𑀢𑀻’’𑀢𑀺 𑀆𑀳. ‘‘𑀧𑀭𑀺𑀲𑁆𑀲𑀸𑀯𑀦𑀁, 𑀪𑀦𑁆𑀢𑁂, 𑀅𑀥𑁄𑀫𑀼𑀔𑀁 𑀓𑀭𑁄𑀣𑀸’’𑀢𑀺. 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀘𑀸𑀮𑁂𑀲𑀺. 𑀢𑀤𑀸 𑀧𑀼𑀧𑁆𑀨𑀸𑀦𑀺 𑀔𑀻𑀡𑀸𑀦𑀺. 𑀣𑁂𑀭𑁄 𑀧𑀭𑀺𑀲𑁆𑀲𑀸𑀯𑀦𑀁 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸 𑀲𑀤𑁆𑀥𑀺𑀁 𑀳𑀢𑁆𑀣𑀺𑀧𑀸𑀓𑀸𑀭𑁂𑀦 𑀘𑁂𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘𑀬𑀸𑀯 𑀫𑀳𑀺𑀤𑁆𑀥𑀺𑀓𑁄 𑀯𑀢𑀸𑀬𑀁 𑀲𑀸𑀫𑀡𑁂𑀭𑁄; 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀭𑀓𑁆𑀔𑀺𑀢𑀼𑀦𑁆𑀢𑀺? 𑀢𑀢𑁄 ‘𑀦 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀁 𑀆𑀳 𑁋 ‘‘𑀲𑀸𑀫𑀡𑁂𑀭, 𑀢𑁆𑀯𑀁 𑀇𑀤𑀸𑀦𑀺 𑀫𑀳𑀺𑀤𑁆𑀥𑀺𑀓𑁄; 𑀏𑀯𑀭𑀽𑀧𑀁 𑀧𑀦 𑀇𑀤𑁆𑀥𑀺𑀁 𑀦𑀸𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑀓𑀸𑀮𑁂 ¶ 𑀓𑀸𑀡𑀧𑁂𑀲𑀓𑀸𑀭𑀺𑀬𑀸 𑀳𑀢𑁆𑀣𑁂𑀦 𑀫𑀤𑁆𑀤𑀺𑀢𑀁𑀓𑀜𑁆𑀚𑀺𑀬𑀁 𑀧𑀺𑀯𑀺𑀲𑁆𑀲𑀲𑀻’’𑀢𑀺. 𑀤𑀳𑀭𑀓𑀪𑀸𑀯𑀲𑁆𑀲 𑀦𑀸𑀫𑁂𑀲 𑀤𑁄𑀲𑁄 𑀬𑀁 𑀲𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀣𑀸𑀬 𑀲𑀁𑀯𑁂𑀚𑁂𑀢𑁆𑀯𑀸 ‘𑀓𑀫𑁆𑀫𑀝𑁆𑀞𑀸𑀦𑀁 ¶ 𑀫𑁂, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸’𑀢𑀺 𑀦 𑀬𑀸𑀘𑀺; ‘𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀓𑀺𑀁 𑀯𑀤𑀢𑀻’𑀢𑀺 𑀢𑀁 𑀧𑀦 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀅𑀕𑀫𑀸𑀲𑀺.

𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀼𑀝𑁂𑀴𑀺𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀦 𑀕𑀘𑁆𑀙𑀢𑀺. ‘‘𑀓𑀢𑀭𑀁 𑀕𑀸𑀫𑀁 𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀦 ‘𑀇𑀤𑀸𑀦𑀺 𑀫𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀉𑀧𑀚𑁆𑀛𑀸𑀬𑀲𑁆𑀲 𑀘 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ¶ 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀣𑁂𑀭𑁄 𑀲𑀩𑁆𑀩𑀓𑀸𑀮𑀁 𑀑𑀯𑀤𑀢𑀺 𑁋 ‘‘𑀲𑀸𑀫𑀡𑁂𑀭, 𑀫𑀸 𑀏𑀯𑀫𑀓𑀸𑀲𑀺; 𑀧𑀼𑀣𑀼𑀚𑁆𑀚𑀦𑀺𑀤𑁆𑀥𑀺 𑀦𑀸𑀫 𑀘𑀮𑀸 𑀅𑀦𑀺𑀩𑀤𑁆𑀥𑀸; 𑀅𑀲𑀧𑁆𑀧𑀸𑀬𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀪𑀺𑀚𑁆𑀚𑀢𑀺; 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀳𑀻𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀲𑀸𑀫𑀡𑁂𑀭𑁄 ‘𑀓𑀺𑀁 𑀓𑀣𑁂𑀢𑀺 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑁄’𑀢𑀺 𑀲𑁄𑀢𑀼𑀁 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀓𑀭𑁄𑀢𑀺. 𑀣𑁂𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑁂𑀢𑀺𑀬𑀯𑀦𑁆𑀤𑀦𑀁 𑀓𑀭𑁄𑀦𑁆𑀢𑁄 𑀓𑀫𑁆𑀫𑀼𑀧𑁂𑀦𑁆𑀤𑀯𑀺𑀳𑀸𑀭𑀁 𑀦𑀸𑀫 𑀕𑀢𑁄. 𑀢𑀢𑁆𑀣 𑀯𑀲𑀦𑁆𑀢𑁂𑀧𑀺 𑀣𑁂𑀭𑁂 𑀲𑀸𑀫𑀡𑁂𑀭𑁄 𑀢𑀣𑁂𑀯 𑀓𑀭𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑀸 𑀧𑁂𑀲𑀓𑀸𑀭𑀥𑀻𑀢𑀸 𑀅𑀪𑀺𑀭𑀽𑀧𑀸 𑀧𑀞𑀫𑀯𑀬𑁂 𑀞𑀺𑀢𑀸 𑀓𑀫𑁆𑀫𑀼𑀧𑁂𑀦𑁆𑀤𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀤𑀼𑀫𑀲𑁆𑀲𑀭𑀁 𑀑𑀭𑀼𑀬𑁆𑀳 𑀕𑀸𑀬𑀫𑀸𑀦𑀸 𑀧𑀼𑀧𑁆𑀨𑀸𑀦𑀺 𑀪𑀜𑁆𑀚𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸𑀫𑀡𑁂𑀭𑁄 𑀧𑀤𑀼𑀫𑀲𑁆𑀲𑀭𑀫𑀢𑁆𑀣𑀓𑁂𑀦 𑀕𑀘𑁆𑀙𑀢𑀺 𑀕𑀘𑁆𑀙𑀦𑁆𑀢𑁄 𑀧𑀦, 𑀲𑀓𑁆𑀓𑀭𑀮𑀲𑀺𑀓𑀸𑀬 𑀓𑀸𑀡𑀫𑀓𑁆𑀔𑀺𑀓𑀸 𑀯𑀺𑀬, 𑀢𑀲𑁆𑀲𑀸 𑀕𑀻𑀢𑀲𑀤𑁆𑀤𑁂 𑀩𑀚𑁆𑀛𑀺; 𑀢𑀸𑀯𑀤𑁂𑀯 𑀇𑀤𑁆𑀥𑀺 𑀅𑀦𑁆𑀢𑀭𑀳𑀺𑀢𑀸, 𑀙𑀺𑀦𑁆𑀦𑀧𑀓𑁆𑀔𑁄 𑀓𑀸𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀧𑀦 𑀢𑀢𑁆𑀣𑁂𑀯 𑀉𑀤𑀓𑀧𑀺𑀝𑁆𑀞𑁂 𑀅𑀧𑀢𑀺𑀢𑁆𑀯𑀸 𑀲𑀺𑀫𑁆𑀩𑀮𑀺𑀢𑀽𑀮𑀁 𑀯𑀺𑀬 𑀧𑀢𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀤𑀼𑀫𑀲𑁆𑀲𑀭𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀫𑀳𑀸𑀣𑁂𑀭𑁄 ‘𑀧𑀕𑁂𑀯𑁂𑀢𑀁 𑀫𑀬𑀸 𑀤𑀺𑀝𑁆𑀞𑀁, 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀦 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’𑀢𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀲𑀸𑀫𑀡𑁂𑀭𑁄 𑀕𑀦𑁆𑀢𑁆𑀯𑀸 𑀧𑀤𑀼𑀫𑀲𑁆𑀲𑀭𑀢𑀻𑀭𑁂 𑀅𑀝𑁆𑀞𑀸𑀲𑀺 𑀢𑀲𑁆𑀲𑀸 𑀧𑀘𑁆𑀘𑀼𑀢𑁆𑀢𑀭𑀡𑀁 𑀆𑀕𑀫𑀬𑀫𑀸𑀦𑁄. 𑀲𑀸𑀧𑀺 𑀲𑀸𑀫𑀡𑁂𑀭𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀜𑁆𑀘 𑀧𑀼𑀦𑀸𑀕𑀦𑁆𑀢𑁆𑀯𑀸 𑀞𑀺𑀢𑀜𑁆𑀘 𑀤𑀺𑀲𑁆𑀯𑀸 ‘𑀅𑀤𑁆𑀥𑀸 ¶ 𑀏𑀲 𑀫𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁄’𑀢𑀺 𑀜𑀢𑁆𑀯𑀸 ‘𑀧𑀝𑀺𑀓𑁆𑀓𑀫 𑀲𑀸𑀫𑀡𑁂𑀭𑀸’𑀢𑀺 𑀆𑀳. 𑀲𑁄𑀧𑀺 𑀧𑀝𑀺𑀧𑀓𑁆𑀓𑀫𑀺. 𑀇𑀢𑀭𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀓𑀺𑀁, 𑀪𑀦𑁆𑀢𑁂’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀸 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀆𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀫𑀸𑀦𑀸𑀧𑀺 ¶ 𑀢𑀲𑁆𑀲 𑀉𑀓𑁆𑀓𑀡𑁆𑀞𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘𑀅𑀬𑀁 𑀫𑀫 𑀓𑀸𑀭𑀡𑀸 𑀏𑀯𑀭𑀽𑀧𑀸𑀬 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄; 𑀦 𑀤𑀸𑀦𑀺 𑀬𑀼𑀢𑁆𑀢𑀁 𑀧𑀭𑀺𑀘𑁆𑀘𑀚𑀺𑀢𑀼’𑀦𑁆𑀢𑀺. ‘𑀇𑀥𑁂𑀯 𑀢𑀺𑀝𑁆𑀞𑀸’𑀢𑀺 𑀯𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂𑀧𑀺 𑀆𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀑𑀯𑀤𑀫𑀸𑀦𑀸 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑀁 𑀆𑀳𑀁𑀲𑀼 𑁋 ‘‘𑀢𑁆𑀯𑀁 𑀅𑀫𑁆𑀳𑁂 𑀉𑀘𑁆𑀘𑀸𑀓𑀼𑀮𑀸𑀢𑀺 𑀫𑀸 𑀲𑀮𑁆𑀮𑀓𑁆𑀔𑁂𑀲𑀺. 𑀫𑀬𑀁 𑀧𑁂𑀲𑀓𑀸𑀭𑀸. 𑀲𑀓𑁆𑀔𑀺𑀲𑁆𑀲𑀲𑀺 𑀧𑁂𑀲𑀓𑀸𑀭𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺? 𑀲𑀸𑀫𑀡𑁂𑀭𑁄 𑀆𑀳 𑁋 ‘‘𑀉𑀧𑀸𑀲𑀓, 𑀕𑀺𑀳𑀻𑀪𑀽𑀢𑁄 𑀦𑀸𑀫 𑀧𑁂𑀲𑀓𑀸𑀭𑀓𑀫𑁆𑀫𑀁 𑀯𑀸 𑀓𑀭𑁂𑀬𑁆𑀬 𑀦𑀴𑀓𑀸𑀭𑀓𑀫𑁆𑀫𑀁 𑀯𑀸, 𑀓𑀺𑀁 𑀇𑀫𑀺𑀦𑀸, 𑀫𑀸 𑀲𑀸𑀝𑀓𑀫𑀢𑁆𑀢𑁂 𑀮𑁄𑀪𑀁 𑀓𑀭𑁄𑀣𑀸’’𑀢𑀺 ¶ . 𑀧𑁂𑀲𑀓𑀸𑀭𑀓𑁄 𑀉𑀤𑀭𑁂 𑀩𑀤𑁆𑀥𑀲𑀸𑀝𑀓𑀁 𑀤𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺.

𑀲𑁄 𑀧𑁂𑀲𑀓𑀸𑀭𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑁂𑀲𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀸𑀮𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀜𑁆𑀜𑁂𑀲𑀁 𑀇𑀢𑁆𑀣𑀺𑀬𑁄 𑀧𑀸𑀢𑁄𑀯 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀳𑀭𑀺𑀁𑀲𑀼. 𑀢𑀲𑁆𑀲 𑀪𑀭𑀺𑀬𑀸 𑀦 𑀢𑀸𑀯 𑀆𑀕𑀘𑁆𑀙𑀢𑀺. 𑀲𑁄 𑀇𑀢𑀭𑁂𑀲𑀼 𑀓𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑁂𑀲𑀼 𑀢𑀲𑀭𑀁 𑀯𑀝𑁆𑀝𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀸 𑀧𑀘𑁆𑀙𑀸 𑀆𑀕𑀫𑀸𑀲𑀺. 𑀅𑀣 𑀦𑀁 𑀲𑁄 ‘𑀅𑀢𑀺𑀘𑀺𑀭𑁂𑀦 𑀆𑀕𑀢𑀸𑀲𑀻’𑀢𑀺 𑀢𑀚𑁆𑀚𑁂𑀲𑀺. 𑀫𑀸𑀢𑀼𑀕𑀸𑀫𑁄 𑀘 𑀦𑀸𑀫 𑀅𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑀁 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀜𑀢𑁆𑀯𑀸 𑀤𑀸𑀲𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀢𑀺. 𑀢𑀲𑁆𑀫𑀸 𑀲𑀸 𑀏𑀯𑀫𑀸𑀳 𑁋 ‘‘𑀅𑀜𑁆𑀜𑁂𑀲𑀁 𑀖𑀭𑁂 𑀤𑀸𑀭𑀼𑀧𑀡𑁆𑀡𑀮𑁄𑀡𑀸𑀤𑀻𑀦𑀺 𑀲𑀦𑁆𑀦𑀺𑀳𑀺𑀢𑀸𑀦𑀺; 𑀩𑀸𑀳𑀺𑀭𑀢𑁄 𑀆𑀳𑀭𑀺𑀢𑁆𑀯𑀸 𑀤𑀸𑀬𑀓𑀸 𑀧𑁂𑀲𑀓𑀸𑀭𑀓𑀸𑀧𑀺 𑀅𑀢𑁆𑀣𑀺. 𑀅𑀳𑀁 𑀧𑀦 𑀏𑀓𑀺𑀓𑀸; 𑀢𑁆𑀯𑀫𑁆𑀧𑀺 ‘𑀫𑀬𑁆𑀳𑀁 𑀖𑀭𑁂 𑀇𑀤𑀁 𑀅𑀢𑁆𑀣𑀺, 𑀇𑀤𑀁 𑀦𑀢𑁆𑀣𑀻’𑀢𑀺 𑀦 𑀚𑀸𑀦𑀸𑀲𑀺. 𑀲𑀘𑁂 𑀇𑀘𑁆𑀙𑀲𑀺 𑀪𑀼𑀜𑁆𑀚, 𑀦𑁄 𑀘𑁂 𑀇𑀘𑁆𑀙𑀲𑀺 𑀫𑀸 𑀪𑀼𑀜𑁆𑀚𑀸’’𑀢𑀺. 𑀲𑁄 ‘𑀦 𑀓𑁂𑀯𑀮𑀁 𑀉𑀲𑁆𑀲𑀽𑀭𑁂 𑀪𑀢𑁆𑀢𑀁 𑀆𑀳𑀭𑀲𑀺, 𑀯𑀸𑀘𑀸𑀬𑀧𑀺 𑀫𑀁 𑀖𑀝𑁆𑀝𑁂𑀲𑀻’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀁 𑀧𑀳𑀭𑀡𑀁 𑀅𑀧𑀲𑁆𑀲𑀦𑁆𑀢𑁄 𑀢𑀫𑁂𑀯 𑀢𑀲𑀭𑀤𑀡𑁆𑀟𑀓𑀁 𑀢𑀲𑀭𑀢𑁄 𑀮𑀼𑀜𑁆𑀘𑀺𑀢𑁆𑀯𑀸 𑀔𑀺𑀧𑀺. 𑀲𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀈𑀲𑀓𑀁 𑀧𑀭𑀺𑀯𑀢𑁆𑀢𑀺. 𑀢𑀲𑀭𑀤𑀡𑁆𑀟𑀓𑀲𑁆𑀲 𑀘 𑀓𑁄𑀝𑀺 𑀦𑀸𑀫 𑀢𑀺𑀔𑀺𑀡𑀸 𑀳𑁄𑀢𑀺. 𑀲𑀸 𑀢𑀲𑁆𑀲𑀸 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀅𑀓𑁆𑀔𑀺𑀓𑁄𑀝𑀺𑀬𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀯𑁂𑀕𑁂𑀦 𑀅𑀓𑁆𑀔𑀺𑀁 𑀅𑀕𑁆𑀕𑀳𑁂𑀲𑀺. 𑀪𑀺𑀦𑁆𑀦𑀝𑁆𑀞𑀸𑀦𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺.

𑀲𑁄 ¶ 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑀚𑁆𑀛𑀸𑀬𑀲𑁆𑀲 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺 ‘𑀇𑀤𑀁 𑀲𑀦𑁆𑀥𑀸𑀬 𑀫𑀁 𑀉𑀧𑀚𑁆𑀛𑀸𑀬𑁄 ‘‘𑀅𑀦𑀸𑀕𑀢𑁂 𑀓𑀸𑀮𑁂 𑀓𑀸𑀡𑀧𑁂𑀲𑀓𑀸𑀭𑀺𑀬𑀸 𑀳𑀢𑁆𑀣𑁂𑀦 𑀫𑀤𑁆𑀤𑀺𑀢𑀁 𑀓𑀜𑁆𑀚𑀺𑀬𑀁 𑀧𑀺𑀯𑀺𑀲𑁆𑀲𑀲𑀻’’𑀢𑀺 𑀆𑀳. 𑀇𑀤𑀁 𑀣𑁂𑀭𑁂𑀦 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺. 𑀅𑀳𑁄 𑀤𑀻𑀖𑀤𑀲𑁆𑀲𑀻 𑀅𑀬𑁆𑀬𑁄’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀢𑀫𑁂𑀦𑀁 𑀅𑀜𑁆𑀜𑁂 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀭𑁄𑀤𑀺; 𑀅𑀓𑁆𑀔𑀺 𑀦𑀸𑀫 𑀪𑀺𑀦𑁆𑀦𑀁 𑀦 𑀲𑀓𑁆𑀓𑀸 𑀭𑁄𑀤𑀦𑁂𑀦 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀲𑁄 ‘‘𑀦𑀸𑀳𑀁 𑀏𑀢𑀫𑀢𑁆𑀣𑀁 𑀭𑁄𑀤𑀸𑀫𑀺; 𑀅𑀧𑀺𑀘 𑀔𑁄 𑀇𑀤𑀁 𑀲𑀦𑁆𑀥𑀸𑀬 𑀭𑁄𑀤𑀸𑀫𑀻’’𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀧𑀝𑀺𑀧𑀸𑀝𑀺𑀬𑀸 𑀓𑀣𑁂𑀲𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑀅𑀧𑀭𑀫𑁆𑀧𑀺 ¶ 𑀯𑀢𑁆𑀣𑀼 𑁋 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀓𑀮𑁆𑀬𑀸𑀡𑀺𑀬𑀁 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑀯𑀺𑀫𑀕𑁆𑀕𑁂𑀦 𑀫𑀳𑀸𑀫𑀕𑁆𑀕𑀁 𑀑𑀢𑀭𑀫𑀸𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀛𑀸𑀫𑀓𑁆𑀔𑁂𑀢𑁆𑀢𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀏𑀓𑀁 𑀫𑀦𑀼𑀲𑁆𑀲𑀁 𑀅𑀤𑁆𑀤𑀲𑀁𑀲𑀼. 𑀢𑀲𑁆𑀲 𑀲𑀭𑀻𑀭𑀁 𑀫𑀲𑀺𑀫𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀲𑀺𑀫𑀓𑁆𑀔𑀺𑀢𑀫𑁂𑀯 𑀘 𑀏𑀓𑀁 𑀓𑀸𑀲𑀸𑀯𑀁 𑀓𑀘𑁆𑀙𑀁 𑀧𑀻𑀴𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀑𑀮𑁄𑀓𑀺𑀬𑀫𑀸𑀦𑁄 𑀛𑀸𑀫𑀔𑀸𑀡𑀼𑀓𑁄 𑀯𑀺𑀬 𑀔𑀸𑀬𑀢𑀺. 𑀲𑁄 𑀤𑀺𑀯𑀲𑀪𑀸𑀕𑁂 ¶ 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀟𑁆𑀠𑀛𑀸𑀬𑀫𑀸𑀦𑀸𑀦𑀁 𑀤𑀸𑀭𑀽𑀦𑀁 𑀓𑀮𑀸𑀧𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀯𑀺𑀧𑁆𑀧𑀓𑀺𑀡𑁆𑀡𑁂𑀳𑀺 𑀓𑁂𑀲𑁂𑀳𑀺 𑀓𑀼𑀫𑁆𑀫𑀕𑁆𑀕𑁂𑀦 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀲𑀸𑀫𑀡𑁂𑀭𑀸 𑀤𑀺𑀲𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑀬𑀫𑀸𑀦𑀸 ‘‘𑀆𑀯𑀼𑀲𑁄, 𑀢𑀼𑀬𑁆𑀳𑀁 𑀧𑀺𑀢𑀸, 𑀢𑀼𑀬𑁆𑀳𑀁 𑀫𑀳𑀸𑀧𑀺𑀢𑀸, 𑀢𑀼𑀬𑁆𑀳𑀁 𑀫𑀸𑀢𑀼𑀮𑁄’’𑀢𑀺 𑀳𑀲𑀫𑀸𑀦𑀸 𑀕𑀦𑁆𑀢𑁆𑀯𑀸 ‘‘𑀓𑁄 𑀦𑀸𑀫𑁄𑀲𑀺 𑀢𑁆𑀯𑀁, 𑀉𑀧𑀸𑀲𑀓𑀸’’𑀢𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀦𑀸𑀫𑀁 𑀧𑀼𑀘𑁆𑀙𑀺𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀤𑀸𑀭𑀼𑀓𑀮𑀸𑀧𑀁 𑀙𑀟𑁆𑀟𑁂𑀢𑁆𑀯𑀸 𑀯𑀢𑁆𑀣𑀁 𑀲𑀁𑀯𑀺𑀥𑀸𑀬 𑀦𑀺𑀯𑀸𑀲𑁂𑀢𑁆𑀯𑀸 𑀫𑀳𑀸𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 ‘‘𑀢𑀺𑀝𑁆𑀞𑀣 𑀢𑀸𑀯, 𑀪𑀦𑁆𑀢𑁂’’𑀢𑀺 𑀆𑀳. 𑀫𑀳𑀸𑀣𑁂𑀭𑀸 𑀅𑀝𑁆𑀞𑀁𑀲𑀼.

𑀤𑀳𑀭𑀲𑀸𑀫𑀡𑁂𑀭𑀸 𑀆𑀕𑀦𑁆𑀢𑁆𑀯𑀸 𑀫𑀳𑀸𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸𑀧𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀉𑀧𑀸𑀲𑀓𑁄 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀁 𑀧𑀲𑁆𑀲𑀺𑀢𑁆𑀯𑀸 𑀧𑀭𑀺𑀳𑀲𑀣; 𑀏𑀢𑁆𑀢𑀓𑁂𑀦𑁂𑀯 𑀫𑀢𑁆𑀣𑀓𑀁 𑀧𑀢𑁆𑀢𑀫𑁆𑀳𑀸𑀢𑀺 𑀲𑀮𑁆𑀮𑀓𑁆𑀔𑁂𑀣. 𑀅𑀳𑀫𑁆𑀧𑀺 𑀧𑀼𑀩𑁆𑀩𑁂 𑀢𑀼𑀫𑁆𑀳𑀸𑀤𑀺𑀲𑁄𑀯 𑀲𑀫𑀡𑁄 𑀅𑀳𑁄𑀲𑀺𑀁. 𑀢𑀼𑀫𑁆𑀳𑀸𑀓𑀁 𑀧𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀅𑀳𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀳𑁄𑀲𑀺𑀁; 𑀆𑀓𑀸𑀲𑀁 𑀕𑀳𑁂𑀢𑁆𑀯𑀸 𑀧𑀣𑀯𑀺𑀁 𑀓𑀭𑁄𑀫𑀺, 𑀧𑀣𑀯𑀺𑀁 𑀆𑀓𑀸𑀲𑀁; 𑀤𑀽𑀭𑀁 𑀕𑀡𑁆𑀳𑀺𑀢𑁆𑀯𑀸 𑀲𑀦𑁆𑀢𑀺𑀓𑀁 𑀓𑀭𑁄𑀫𑀺, 𑀲𑀦𑁆𑀢𑀺𑀓𑀁 𑀤𑀽𑀭𑀁; 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀁 𑀔𑀡𑁂𑀦 𑀯𑀺𑀦𑀺𑀯𑀺𑀚𑁆𑀛𑀸𑀫𑀺. 𑀳𑀢𑁆𑀣𑁂 𑀫𑁂 𑀧𑀲𑁆𑀲𑀣; 𑀇𑀤𑀸𑀦𑀺 𑀧𑀦 𑀫𑀓𑁆𑀓𑀝𑀳𑀢𑁆𑀣𑀲𑀤𑀺𑀲𑀸. 𑀅𑀳𑀁 𑀇𑀫𑁂𑀳𑁂𑀯 𑀳𑀢𑁆𑀣𑁂𑀳𑀺 𑀇𑀥 𑀦𑀺𑀲𑀺𑀦𑁆𑀦𑁄𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀭𑀸𑀫𑀲𑀺𑀁. 𑀇𑀫𑁂𑀲𑀁𑀬𑁂𑀯 𑀧𑀸𑀤𑀸𑀦𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀤𑀓𑀣𑀮𑀺𑀓𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀁. 𑀏𑀯𑀭𑀽𑀧𑀸 𑀫𑁂 𑀇𑀤𑁆𑀥𑀺 𑀧𑀫𑀸𑀤𑁂𑀦 𑀅𑀦𑁆𑀢𑀭𑀳𑀺𑀢𑀸. 𑀢𑀼𑀫𑁆𑀳𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣. 𑀧𑀫𑀸𑀤𑁂𑀦 𑀳𑀺 𑀏𑀯𑀭𑀽𑀧𑀁 ¶ 𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀫𑀜𑁆𑀜𑁂𑀯 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣, 𑀪𑀦𑁆𑀢𑁂’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀑𑀯𑀸𑀤𑀫𑀤𑀸𑀲𑀺. 𑀢𑁂 𑀢𑀲𑁆𑀲 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀫𑀸𑀦𑀸 𑀢𑀺𑀁𑀲 𑀚𑀦𑀸 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀏𑀯𑀫𑁆𑀧𑀺 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀮𑁄𑀓𑀺𑀬𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸𑀬 𑀯𑀺𑀦𑀺𑀘𑁆𑀙𑀬𑁄.

𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦𑁂𑀢𑀁 𑀏𑀓𑀫𑁂𑀯 𑀯𑀻𑀭𑀺𑀬𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸 𑀅𑀦𑀼𑀧𑁆𑀧𑀦𑁆𑀦𑀸𑀦𑀁; 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫 𑀦𑀢𑁆𑀣𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀏𑀢𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ , 𑀧𑀳𑀻𑀬𑀫𑀸𑀦𑀸𑀧𑀺 𑀏𑀢𑁂𑀬𑁂𑀯 𑀧𑀳𑀻𑀬𑀦𑁆𑀢𑀺.

𑀢𑀢𑁆𑀣 ¶ 𑀏𑀓𑀘𑁆𑀘𑀲𑁆𑀲 𑀯𑀢𑁆𑀢𑀯𑀲𑁂𑀦 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀕𑀦𑁆𑀣𑀥𑀼𑀢𑀗𑁆𑀕𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀦𑀯𑀓𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦. 𑀓𑀣𑀁? 𑀏𑀓𑀘𑁆𑀘𑁄 𑀳𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀤𑁆𑀯𑀸𑀲𑀻𑀢𑀺𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀺 (𑀘𑀽𑀴𑀯. 𑁨𑁪𑁩 𑀆𑀤𑀬𑁄), 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 (𑀘𑀽𑀴𑀯. 𑁩𑁫𑁬 𑀆𑀤𑀬𑁄), 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀧𑀸𑀦𑀻𑀬𑀫𑀸𑀴𑀉𑀧𑁄𑀲𑀣𑀸𑀕𑀸𑀭𑀆𑀕𑀦𑁆𑀢𑀼𑀓𑀕𑀫𑀺𑀓𑀯𑀢𑁆𑀢𑀸𑀦𑀺 𑀘 𑀓𑀭𑁄𑀦𑁆𑀢𑀲𑁆𑀲𑁂𑀯 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀺𑀦𑁆𑀦𑀯𑀢𑁆𑀢𑀲𑁆𑀲 𑀯𑀺𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀜𑁆𑀘𑁂𑀯 𑀲𑀢𑀺𑀯𑁄𑀲𑁆𑀲𑀕𑁆𑀕𑀜𑁆𑀘 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀕𑀦𑁆𑀣𑀬𑀼𑀢𑁆𑀢𑁄 𑀳𑁄𑀢𑀺; 𑀏𑀓𑀫𑁆𑀧𑀺 𑀦𑀺𑀓𑀸𑀬𑀁 𑀕𑀡𑁆𑀳𑀸𑀢𑀺, 𑀤𑁆𑀯𑁂𑀧𑀺, 𑀢𑀬𑁄𑀧𑀺, 𑀘𑀢𑁆𑀢𑀸𑀭𑁄𑀧𑀺, 𑀧𑀜𑁆𑀘𑀧𑀺. 𑀢𑀲𑁆𑀲𑁂𑀯 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀅𑀢𑁆𑀣𑀯𑀲𑁂𑀦 𑀧𑀸𑀴𑀺𑀯𑀲𑁂𑀦 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀯𑀸𑀘𑁂𑀦𑁆𑀢𑀲𑁆𑀲 𑀤𑁂𑀲𑁂𑀦𑁆𑀢𑀲𑁆𑀲 𑀧𑀓𑀸𑀲𑁂𑀦𑁆𑀢𑀲𑁆𑀲 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀕𑀦𑁆𑀣𑀓𑀫𑁆𑀫𑀁 𑀧𑀳𑀸𑀬 𑀓𑀼𑀲𑀻𑀢𑀲𑁆𑀲 𑀯𑀺𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀥𑀼𑀢𑀗𑁆𑀕𑀥𑀭𑁄 𑀳𑁄𑀢𑀺, 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀢𑀲𑁆𑀲 𑀥𑀼𑀢𑀗𑁆𑀕𑀕𑀼𑀡𑁂 𑀧𑀭𑀺𑀳𑀭𑀦𑁆𑀢𑀲𑁆𑀲 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 ¶ 𑀧𑀦𑀲𑁆𑀲 𑀥𑀼𑀢𑀗𑁆𑀕𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀸𑀳𑀼𑀮𑁆𑀮𑀸𑀬 𑀆𑀯𑀝𑁆𑀝𑀲𑁆𑀲 𑀯𑀺𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻 𑀳𑁄𑀢𑀺. 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀆𑀯𑀚𑁆𑀚𑀦𑀯𑀲𑀻𑀆𑀤𑀻𑀦𑀁 𑀯𑀲𑁂𑀦 𑀯𑀺𑀳𑀭𑀦𑁆𑀢𑀲𑁆𑀲 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀯𑀸 𑀯𑀺𑀲𑁆𑀲𑀝𑁆𑀞𑀚𑁆𑀛𑀸𑀦𑀲𑁆𑀲 𑀯𑀸 𑀪𑀲𑁆𑀲𑀸𑀤𑀻𑀲𑀼 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀯𑀺𑀧𑀲𑁆𑀲𑀓𑁄 𑀳𑁄𑀢𑀺; 𑀲𑀢𑁆𑀢𑀲𑀼 𑀯𑀸 𑀯𑀺𑀧𑀲𑁆𑀲𑀦𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 ¶ 𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲𑁂𑀯𑀁 𑀯𑀺𑀳𑀭𑀢𑁄 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀁 𑀧𑀳𑀸𑀬 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀲𑁆𑀲 𑀯𑀺𑀳𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 ¶ 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀦𑀯𑀓𑀫𑁆𑀫𑀺𑀓𑁄 𑀳𑁄𑀢𑀺, 𑀉𑀧𑁄𑀲𑀣𑀸𑀕𑀸𑀭𑀪𑁄𑀚𑀦𑀲𑀸𑀮𑀸𑀤𑀻𑀦𑀺 𑀓𑀭𑁄𑀢𑀺. 𑀢𑀲𑁆𑀲 𑀢𑁂𑀲𑀁 𑀉𑀧𑀓𑀭𑀡𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀦𑀯𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂 𑀯𑀸 𑀯𑀺𑀲𑁆𑀲𑀝𑁆𑀞𑁂 𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀩𑁆𑀭𑀳𑁆𑀫𑀮𑁄𑀓𑀸 𑀆𑀕𑀢𑁄 𑀲𑀼𑀤𑁆𑀥𑀲𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀲 𑀅𑀦𑀸𑀲𑁂𑀯𑀦𑀸𑀬 𑀓𑀺𑀮𑁂𑀲𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺; 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀮𑀤𑁆𑀥𑀸𑀲𑁂𑀯𑀦𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫. 𑀏𑀯𑀁 𑀢𑀸𑀯 𑀅𑀲𑀫𑀼𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦? 𑀇𑀥𑁂𑀓𑀘𑁆𑀘𑁄 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀫𑀦𑀸𑀧𑀺𑀬𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀮𑀪𑀢𑀺. 𑀢𑀲𑁆𑀲 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 ¶ 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀯𑀻𑀭𑀺𑀬𑀁.

𑀬𑁂 𑀘 𑀏𑀯𑀁 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂 𑀬𑀣𑀸 𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀦𑁂𑀲𑀁 𑀅𑀦𑀼𑀧𑁆𑀧𑀸𑀤𑀓𑀺𑀘𑁆𑀘𑀁 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀳𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀢𑀲𑁆𑀫𑀸 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑁋 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁, 𑀪𑀼𑀢𑁆𑀯𑀸 𑀯𑀺𑀕𑀢𑀼𑀧𑁆𑀧𑀦𑁆𑀦𑀁, 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁, 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀬𑁂 𑀓𑀺𑀮𑁂𑀲𑀸 𑀯𑀺𑀚𑁆𑀚𑀫𑀸𑀦𑀸 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀦𑁄 𑁋 𑀇𑀤𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀓𑀫𑁆𑀫𑁂 𑀧𑀦 𑀚𑀯𑀺𑀢𑁂 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀯𑀺𑀧𑀸𑀓𑁄 𑀪𑀼𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫. 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀼𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀪𑀼𑀢𑁆𑀯𑀸 𑀯𑀺𑀕𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 ¶ 𑀓𑀢𑁂 𑀑𑀓𑀸𑀲𑁂 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀑𑀓𑀸𑀲𑀓𑀭𑀡𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫.

𑀧𑀜𑁆𑀘𑀓𑁆𑀔𑀦𑁆𑀥𑀸 ¶ 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺 𑀦𑀸𑀫. 𑀢𑁂 𑀅𑀢𑀻𑀢𑀸𑀤𑀺𑀪𑁂𑀤𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀸 𑀧𑀦 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀳𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺. 𑀅𑀦𑀸𑀕𑀢𑀓𑁆𑀔𑀦𑁆𑀥𑁂𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺. 𑀇𑀤𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀼𑀕𑁆𑀖𑀸𑀢𑀺𑀢𑀸 𑀓𑀺𑀮𑁂𑀲𑀸 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀻’’𑀢𑀺.

𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑁋 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁, 𑀆𑀭𑀫𑁆𑀫𑀡𑀸𑀥𑀺𑀕𑀳𑀺𑀢𑀼𑀧𑁆𑀧𑀦𑁆𑀦𑀁, 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁, 𑀅𑀲𑀫𑀼𑀕𑁆𑀥𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯 ‘𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁’ 𑀦𑀸𑀫. 𑀲𑀓𑀺𑀁 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀆𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑁂 𑀕𑀳𑀺𑀢𑁂 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀓𑀺𑀮𑁂𑀲𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀔𑀻𑀭𑀭𑀼𑀓𑁆𑀔𑀲𑁆𑀲 𑀓𑀼𑀞𑀸𑀭𑀺𑀬𑀸 𑀆𑀳𑀢𑀸𑀳𑀢𑀝𑁆𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 ‘𑀆𑀭𑀫𑁆𑀫𑀡𑀸𑀥𑀺𑀕𑀳𑀺𑀢𑀼𑀧𑁆𑀧𑀦𑁆𑀦𑀁’ 𑀦𑀸𑀫. 𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀧𑀦 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀲𑀘𑁂 𑀔𑀻𑀭𑀭𑀼𑀓𑁆𑀔𑀁 𑀓𑀼𑀞𑀸𑀭𑀺𑀬𑀸 𑀆𑀳𑀦𑁂𑀬𑁆𑀬𑀼𑀁, ‘𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬𑀸’𑀢𑀺 ¶ 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 ‘𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁’ 𑀦𑀸𑀫. 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀓𑀺𑀮𑁂𑀲𑀸 𑀧𑀦 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀧𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀤𑀁 ‘𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀁’ 𑀦𑀸𑀫.

𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁, 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁, 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁, 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀦 𑀫𑀕𑁆𑀕𑀯𑀚𑁆𑀛𑀁; 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁, 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁, 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁, 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀯𑀚𑁆𑀛𑀁. 𑀫𑀕𑁆𑀕𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀲𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀳𑀜𑁆𑀘𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀔𑀻𑀡𑀁 𑀔𑁂𑀧𑁂𑀢𑀺, 𑀦𑀺𑀭𑀼𑀤𑁆𑀥𑀁 ¶ 𑀦𑀺𑀭𑁄𑀥𑁂𑀢𑀺, 𑀯𑀺𑀕𑀢𑀁 𑀯𑀺𑀕𑀫𑁂𑀢𑀺, 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀁 𑀕𑀫𑁂𑀢𑀺, 𑀅𑀢𑀻𑀢𑀁 𑀬𑀁 𑀦𑀢𑁆𑀣𑀺 𑀢𑀁 𑀧𑀚𑀳𑀢𑀺. 𑀳𑀜𑁆𑀘𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀅𑀚𑀸𑀢𑀁 𑀧𑀚𑀳𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁 𑀅𑀦𑀼𑀧𑁆𑀧𑀦𑁆𑀦𑀁 𑀅𑀧𑀸𑀢𑀼𑀪𑀽𑀢𑀁 𑀧𑀚𑀳𑀢𑀺, 𑀅𑀦𑀸𑀕𑀢𑀁 𑀬𑀁 𑀦𑀢𑁆𑀣𑀺 𑀢𑀁 𑀧𑀚𑀳𑀢𑀺. 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁, 𑀫𑀽𑀴𑁆𑀳𑁄 𑀫𑁄𑀳𑀁, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀁, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀁, 𑀯𑀺𑀓𑁆𑀔𑁂𑀧𑀕𑀢𑁄 ¶ 𑀉𑀤𑁆𑀥𑀘𑁆𑀘𑀁, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀁, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀺; 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸 𑀬𑀼𑀕𑀦𑀤𑁆𑀥𑀸 𑀲𑀫𑀫𑁂𑀯 𑀯𑀢𑁆𑀢𑀦𑁆𑀢𑀺; 𑀲𑀁𑀓𑀺𑀮𑁂𑀲𑀺𑀓𑀸 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀺…𑀧𑁂… 𑀢𑁂𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀦𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄’𑀢𑀺. ‘𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸…𑀧𑁂… 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄’𑀢𑀺. 𑀬𑀣𑀸 𑀓𑀣𑀁 𑀯𑀺𑀬? 𑀲𑁂𑀬𑁆𑀬𑀣𑀸𑀧𑀺 𑀢𑀭𑀼𑀡𑁄 𑀭𑀼𑀓𑁆𑀔𑁄…𑀧𑁂… 𑀅𑀧𑀸𑀢𑀼𑀪𑀽𑀢𑀸𑀦𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺’’𑀢𑀺 (𑀧𑀝𑀺. 𑀫. 𑁩.𑁨𑁧).

𑀇𑀢𑀺 𑀧𑀸𑀴𑀺𑀬𑀁 𑀅𑀚𑀸𑀢𑀨𑀮𑀭𑀼𑀓𑁆𑀔𑁄 𑀆𑀕𑀢𑁄; 𑀚𑀸𑀢𑀨𑀮𑀭𑀼𑀓𑁆𑀔𑁂𑀦 𑀧𑀦 𑀤𑀻𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑀨𑀮𑁄 𑀢𑀭𑀼𑀡𑀅𑀫𑁆𑀩𑀭𑀼𑀓𑁆𑀔𑁄. 𑀢𑀲𑁆𑀲 𑀨𑀮𑀸𑀦𑀺 𑀫𑀦𑀼𑀲𑁆𑀲𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀁, 𑀲𑁂𑀲𑀸𑀦𑀺 𑀧𑀸𑀢𑁂𑀢𑁆𑀯𑀸 𑀧𑀘𑁆𑀙𑀺𑀬𑁄 𑀧𑀽𑀭𑁂𑀬𑁆𑀬𑀼𑀁. 𑀅𑀣𑀜𑁆𑀜𑁄 𑀧𑀼𑀭𑀺𑀲𑁄 𑀢𑀁 𑀨𑀭𑀲𑀼𑀦𑀸 𑀙𑀺𑀦𑁆𑀤𑁂𑀬𑁆𑀬. 𑀢𑁂𑀦𑀲𑁆𑀲 𑀦𑁂𑀯 𑀅𑀢𑀻𑀢𑀸𑀦𑀺 𑀨𑀮𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀘 𑀦𑀸𑀲𑀺𑀢𑀸𑀦𑀺; 𑀅𑀢𑀻𑀢𑀸𑀦𑀺 𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀪𑀼𑀢𑁆𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀺 𑀦 𑀲𑀓𑁆𑀓𑀸 𑀦𑀸𑀲𑁂𑀢𑀼𑀁 ¶ . 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀲𑁄 𑀙𑀺𑀦𑁆𑀦𑁄 𑀢𑀤𑀸 𑀨𑀮𑀸𑀦𑀺𑀬𑁂𑀯 𑀦𑀢𑁆𑀣𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺𑀧𑀺 𑀅𑀦𑀸𑀲𑀺𑀢𑀸𑀦𑀺. 𑀲𑀘𑁂 𑀧𑀦 𑀭𑀼𑀓𑁆𑀔𑁄 𑀅𑀘𑁆𑀙𑀺𑀦𑁆𑀦𑁄 𑀅𑀲𑁆𑀲, 𑀅𑀣𑀲𑁆𑀲 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀆𑀕𑀫𑁆𑀫 𑀬𑀸𑀦𑀺 𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀅𑀚𑀸𑀢𑀸𑀦𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀦𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀦𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀫𑀕𑁆𑀕𑁄 𑀦𑀸𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦𑀸𑀧𑀺 𑀦 𑀧𑀚𑀳𑀢𑀺. 𑀬𑁂𑀲𑀜𑁆𑀳𑀺 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀔𑀦𑁆𑀥𑁂𑀲𑀼 𑀅𑀧𑀭𑀺𑀜𑁆𑀜𑀸𑀢𑁂𑀲𑀼 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀫𑀕𑁆𑀕𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀢𑁂 𑀓𑀺𑀮𑁂𑀲𑀸 𑀅𑀚𑀸𑀢𑀸𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀭𑀼𑀡𑀧𑀼𑀢𑁆𑀢𑀸𑀬 𑀇𑀢𑁆𑀣𑀺𑀬𑀸 𑀧𑀼𑀦 𑀅𑀯𑀺𑀚𑀸𑀬𑀦𑀢𑁆𑀣𑀁 𑀩𑁆𑀬𑀸𑀥𑀺𑀢𑀸𑀦𑀁 ¶ 𑀭𑁄𑀕𑀯𑀽𑀧𑀲𑀫𑀢𑁆𑀣𑀁 𑀧𑀻𑀢𑀪𑁂𑀲𑀚𑁆𑀚𑁂𑀳𑀺 𑀘𑀸𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀏𑀯𑀁 𑀫𑀕𑁆𑀕𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀦 𑀧𑀚𑀳𑀢𑀺. 𑀬𑁂 𑀧𑀦 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀲𑀦𑁆𑀥𑀸𑀬 ‘𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦 𑀓𑁂𑀯𑀮𑀜𑁆𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂𑀬𑁂𑀯 𑀧𑀚𑀳𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸, 𑀢𑁂𑀧𑀺 𑀧𑀚𑀳𑀢𑀺𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬) 𑀯𑀺𑀢𑁆𑀣𑀸𑀭𑁄. 𑀇𑀢𑀺 𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀢𑁄 𑀅𑀦𑀼𑀧𑀸𑀤𑀺𑀦𑁆𑀦𑀢𑁄 𑀘 𑀯𑀼𑀝𑁆𑀞𑀸𑀢𑀺. 𑀪𑀯𑀯𑀲𑁂𑀦 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀧𑀸𑀬𑀪𑀯𑀢𑁄 𑀯𑀼𑀝𑁆𑀞𑀸𑀢𑀺 ¶ . 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀪𑀯𑁂𑀓𑀤𑁂𑀲𑀢𑁄; 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀓𑀸𑀫𑀪𑀯𑀢𑁄; 𑀯𑀼𑀝𑁆𑀞𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀲𑀩𑁆𑀩𑀪𑀯𑁂𑀳𑀺 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀅𑀣 𑀫𑀕𑁆𑀕𑀓𑁆𑀔𑀡𑁂 𑀓𑀣𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬 𑀪𑀸𑀯𑀦𑀸 𑀳𑁄𑀢𑀺? 𑀓𑀣𑀁 𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀺𑀬𑀸𑀢𑀺? 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀏𑀯. 𑀫𑀕𑁆𑀕𑁄 𑀳𑀺 𑀧𑀯𑀢𑁆𑀢𑀫𑀸𑀦𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀦𑀸𑀕𑀢𑀧𑀼𑀩𑁆𑀩𑀜𑁆𑀳𑀺 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑁆𑀯𑀸 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺 𑁋 ‘𑀅𑀦𑀸𑀕𑀢𑀝𑁆𑀞𑀸𑀦𑀁 𑀆𑀕𑀢𑀫𑁆𑀳, 𑀅𑀦𑀦𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀸𑀫𑀸’𑀢𑀺. 𑀬𑀸 𑀘𑀲𑁆𑀲 𑀧𑀯𑀢𑁆𑀢𑀺, 𑀅𑀬𑀫𑁂𑀯 𑀞𑀺𑀢𑀺 𑀦𑀸𑀫𑀸𑀢𑀺 𑀞𑀺𑀢𑀺𑀬𑀸 𑀪𑀸𑀯𑁂𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀤𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀯𑀻𑀭𑀺𑀬𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀦𑀺 ¶ 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀅𑀬𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸. 𑀏𑀯𑀫𑁂𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀫𑁆𑀫𑀧𑁆𑀧𑀥𑀸𑀦𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁦𑁮. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀲𑀩𑁆𑀩𑀸𑀦𑀺𑀧𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀺𑀪𑀢𑁆𑀢𑀲𑁆𑀲 𑀤𑁂𑀲𑀦𑀸𑀦𑀬𑀲𑁆𑀲 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀢𑀢𑁆𑀣 𑀦𑀬𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀧𑀞𑀫𑀲𑀫𑁆𑀫𑀧𑁆𑀧𑀥𑀸𑀦𑁂 ¶ 𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀛𑀸𑀦𑀸𑀪𑀺𑀦𑀺𑀯𑁂𑀲𑁂 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸, 𑀲𑀼𑀜𑁆𑀜𑀢𑀧𑀝𑀺𑀧𑀤𑀸, 𑀲𑀼𑀤𑁆𑀥𑀺𑀓𑀅𑀧𑁆𑀧𑀡𑀺𑀳𑀺𑀢𑀸, 𑀅𑀧𑁆𑀧𑀡𑀺𑀳𑀺𑀢𑀧𑀝𑀺𑀧𑀤𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀸𑀦𑀁 𑀯𑀲𑁂𑀦 𑀤𑀲 𑀦𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀯𑀻𑀲𑀢𑀺𑀬𑀸 𑀅𑀪𑀺𑀦𑀺𑀯𑁂𑀲𑁂𑀲𑀼 𑀤𑁆𑀯𑁂 𑀦𑀬𑀲𑀢𑀸𑀦𑀺. 𑀢𑀸𑀦𑀺 𑀘𑀢𑀽𑀳𑀺 𑀅𑀥𑀺𑀧𑀢𑀻𑀳𑀺 𑀘𑀢𑀼𑀕𑁆𑀕𑀼𑀡𑀺𑀢𑀸𑀦𑀺 𑀅𑀝𑁆𑀞. 𑀇𑀢𑀺 𑀲𑀼𑀤𑁆𑀥𑀺𑀓𑀸𑀦𑀺 𑀤𑁆𑀯𑁂 𑀲𑀸𑀥𑀺𑀧𑀢𑀻𑀦𑀺 𑀅𑀝𑁆𑀞𑀸𑀢𑀺 𑀲𑀩𑁆𑀩𑀫𑁆𑀧𑀺 𑀦𑀬𑀲𑀳𑀲𑁆𑀲𑀁 𑀳𑁄𑀢𑀺. 𑀢𑀣𑀸𑀤𑀼𑀢𑀺𑀬𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀼 𑀲𑀼𑀤𑁆𑀥𑀺𑀓𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀘𑀦𑀬𑀲𑀳𑀲𑁆𑀲𑀸𑀦𑀺. 𑀬𑀣𑀸 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂, 𑀏𑀯𑀁 𑀲𑁂𑀲𑀫𑀕𑁆𑀕𑁂𑀲𑀼𑀧𑀻𑀢𑀺 𑀓𑀼𑀲𑀮𑀯𑀲𑁂𑀦𑁂𑀯 𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺. 𑀯𑀺𑀧𑀸𑀓𑁂 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 ¶ 𑀦𑀢𑁆𑀣𑀻𑀢𑀺 𑀯𑀺𑀧𑀸𑀓𑀯𑀸𑀭𑁄 𑀦 𑀕𑀳𑀺𑀢𑁄𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀧𑀦𑁂𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁪𑁨𑁭. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀦𑁂𑀯, 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺; 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦 𑀫𑀕𑁆𑀕𑀳𑁂𑀢𑀼𑀓𑀸𑀦𑀺; 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 ¶ 𑀫𑀕𑁆𑀕𑀸𑀥𑀺𑀧𑀢𑀻𑀦𑀺; 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀺𑀓𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀫𑀕𑁆𑀕𑀸𑀥𑀺𑀧𑀢𑀻𑀦𑀻𑀢𑀺; 𑀯𑀻𑀭𑀺𑀬𑀚𑁂𑀝𑁆𑀞𑀺𑀓𑀸𑀬 𑀧𑀦 𑀅𑀜𑁆𑀜𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀪𑀸𑀯𑀸 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀫𑀕𑁆𑀕𑀸𑀥𑀺𑀧𑀢𑀻𑀦𑀻𑀢𑀺 𑀯𑀸 𑀦 𑀫𑀕𑁆𑀕𑀸𑀥𑀺𑀧𑀢𑀻𑀦𑀻𑀢𑀺 𑀯𑀸; 𑀅𑀢𑀻𑀢𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀦𑀧𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺; 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀫𑀺𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀫𑁆𑀫𑀧𑁆𑀧𑀥𑀸𑀦𑀸 𑀓𑀣𑀺𑀢𑀸; 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀸𑀬𑁂𑀯𑀸𑀢𑀺. 𑀏𑀯𑀫𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁩𑁧. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀤𑁆𑀥𑀺𑀧𑀸𑀤𑀸𑀢𑀺 𑀏𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺𑀧𑀺 𑀇𑀤𑁆𑀥𑀺. 𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄; 𑀧𑀸𑀤𑁄𑀢𑀺 𑀧𑀢𑀺𑀝𑁆𑀞𑀸, 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑀲𑁆𑀫𑀸 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀢𑁂 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀇𑀥 𑀪𑀺𑀓𑁆𑀔𑀽𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀏𑀢𑁆𑀣 𑀙𑀦𑁆𑀤𑀳𑁂𑀢𑀼𑀓𑁄 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘 𑀉𑀧𑁂𑀢𑀁. 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀯𑀸 𑀇𑀚𑁆𑀛𑀦𑀓𑀝𑁆𑀞𑁂𑀦 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀻𑀢𑀺 𑀲𑀗𑁆𑀔𑀁 𑀕𑀢𑀸𑀦𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑀁 𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀧𑀭𑀢𑁄 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀬𑀼𑀚𑁆𑀚𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑁂𑀯 𑀳𑀺 𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 ¶ 𑀙𑀦𑁆𑀤𑀲𑀫𑀸𑀥𑀻𑀢𑀺 ¶ 𑀯𑀼𑀢𑁆𑀢𑁄, 𑀏𑀯𑀁 𑀯𑀻𑀭𑀺𑀬𑀁…𑀧𑁂… 𑀘𑀺𑀢𑁆𑀢𑀁. 𑀯𑀻𑀫𑀁𑀲𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀯𑀻𑀫𑀁𑀲𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺 𑀙𑀦𑁆𑀤𑀲𑀫𑀸𑀥𑀺𑀆𑀤𑀻𑀦𑀺 𑀧𑀤𑀸𑀦𑀺 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀣𑀜𑁆𑀘 𑀪𑀺𑀓𑁆𑀔𑀽𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀙𑀦𑁆𑀤𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸𑀢𑀺 𑀬𑀤𑀺 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀲𑀫𑀸𑀥𑀺𑀁 𑀧𑀝𑀺𑀮𑀪𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀏𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑁄 𑀅𑀬𑀁 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀯𑀻𑀭𑀺𑀬𑀜𑁆𑀘𑁂𑀢𑀺𑀆𑀤𑀻𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀥𑀸𑀦𑀲𑀗𑁆𑀔𑀸𑀭𑀸𑀢𑀺 𑀏𑀢𑁆𑀢𑀸𑀯𑀢𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀁 𑀪𑀸𑀯𑀬𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀥𑀸𑀦𑀸𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀁 𑀯𑀻𑀭𑀺𑀬𑀁 𑀓𑀣𑀺𑀢𑀁. 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸𑀢𑀺 𑀢𑀁 𑀲𑀩𑁆𑀩𑀁 𑀏𑀓𑀢𑁄 𑀭𑀸𑀲𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀏𑀢𑀁 𑀯𑁄𑀳𑀸𑀭𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁪𑁩𑁩. 𑀇𑀤𑀸𑀦𑀺 ‘‘𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀲𑀫𑀽𑀳𑁂 𑀙𑀦𑁆𑀤𑀸𑀤𑀺𑀥𑀫𑁆𑀫𑁂 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀉𑀧𑁂𑀢𑁄 𑀳𑁄𑀢𑀻𑀢𑀺 𑀇𑀤𑁆𑀥𑀺𑀧𑀸𑀤𑀲𑀗𑁆𑀔𑀸𑀢𑁄 𑀥𑀫𑁆𑀫𑀭𑀸𑀲𑀺 𑀉𑀧𑁂𑀢𑁄 𑀳𑁄𑀢𑀺. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀸𑀤𑀺𑀥𑀫𑁆𑀫𑀸𑀦𑀁. 𑀇𑀤𑁆𑀥𑀺 𑀲𑀫𑀺𑀤𑁆𑀥𑀻𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀦𑀺𑀧𑁆𑀨𑀢𑁆𑀢𑀺𑀯𑁂𑀯𑀘𑀦𑀸𑀦𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀚𑁆𑀛𑀦𑀓𑀝𑁆𑀞𑁂𑀦 𑀇𑀤𑁆𑀥𑀺. 𑀲𑀫𑁆𑀧𑀼𑀡𑁆𑀡𑀸 𑀇𑀤𑁆𑀥𑀺 𑀲𑀫𑀺𑀤𑁆𑀥𑀺; 𑀉𑀧𑀲𑀕𑁆𑀕𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀇𑀚𑁆𑀛𑀦𑀸𑀓𑀸𑀭𑁄 𑀇𑀚𑁆𑀛𑀦𑀸. 𑀲𑀫𑀺𑀚𑁆𑀛𑀦𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀸𑀢𑀼𑀪𑀸𑀯𑀯𑀲𑁂𑀦 𑀮𑀪𑀦𑀁 𑀮𑀸𑀪𑁄. 𑀧𑀭𑀺𑀳𑀻𑀦𑀸𑀦𑀫𑁆𑀧𑀺 𑀯𑀻𑀭𑀺𑀬𑀸𑀭𑀫𑁆𑀪𑀯𑀲𑁂𑀦 𑀧𑀼𑀦 𑀮𑀸𑀪𑁄 𑀧𑀝𑀺𑀮𑀸𑀪𑁄; 𑀉𑀧𑀲𑀕𑁆𑀕𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁. 𑀧𑀢𑁆𑀢𑀻𑀢𑀺 𑀅𑀥𑀺𑀕𑀫𑁄. 𑀅𑀧𑀭𑀺𑀳𑀸𑀦𑀯𑀲𑁂𑀦 𑀲𑀫𑁆𑀫𑀸 𑀧𑀢𑁆𑀢𑀻𑀢𑀺 𑀲𑀫𑁆𑀧𑀢𑁆𑀢𑀺. 𑀨𑀼𑀲𑀦𑀸𑀢𑀺 𑀧𑀝𑀺𑀮𑀸𑀪𑀨𑀼𑀲𑀦𑀸. 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 ¶ 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸𑀯. 𑀉𑀧𑀲𑀫𑁆𑀧𑀤𑀸𑀢𑀺 𑀧𑀝𑀺𑀮𑀸𑀪𑀉𑀧𑀲𑀫𑁆𑀧𑀤𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀬𑀸𑀪𑀽𑀢𑀲𑁆𑀲𑀸𑀢𑀺 𑀢𑁂𑀦 𑀆𑀓𑀸𑀭𑁂𑀦 𑀪𑀽𑀢𑀲𑁆𑀲; 𑀢𑁂 𑀙𑀦𑁆𑀤𑀸𑀤𑀺𑀥𑀫𑁆𑀫𑁂 𑀧𑀝𑀺𑀮𑀪𑀺𑀢𑁆𑀯𑀸 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀳𑀺 𑀙𑀦𑁆𑀤𑀸𑀤𑀬𑁄 𑀅𑀦𑁆𑀢𑁄 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀔𑀦𑁆𑀥𑀸 𑀓𑀣𑀺𑀢𑀸. 𑀢𑁂 𑀥𑀫𑁆𑀫𑁂𑀢𑀺 𑀢𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂; 𑀙𑀦𑁆𑀤𑀸𑀤𑀬𑁄 𑀯𑀸 𑀢𑀬𑁄 𑀥𑀫𑁆𑀫𑁂𑀢𑀺𑀧𑀺 𑀯𑀼𑀢𑁆𑀢𑀁. 𑀆𑀲𑁂𑀯𑀢𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑁂𑀲𑀇𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 ¶ 𑀓𑀺𑀁 𑀓𑀣𑀺𑀢𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁. 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀅𑀯𑀲𑁆𑀲𑀬𑀢𑀺; 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁂𑀦 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀁 𑀲𑀢𑀺 ‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’𑀢𑀺 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀏𑀓𑁄 𑀯𑀻𑀭𑀺𑀬𑀁 𑀅𑀯𑀲𑁆𑀲𑀬𑀢𑀺. 𑀏𑀓𑁄 𑀘𑀺𑀢𑁆𑀢𑀁, 𑀏𑀓𑁄 𑀧𑀜𑁆𑀜𑀁 𑀅𑀯𑀲𑁆𑀲𑀬𑀢𑀺. 𑀧𑀜𑁆𑀜𑀸𑀬 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀁 𑀲𑀢𑀺 ‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺 ¶ , 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’𑀢𑀺 𑀧𑀜𑁆𑀜𑀁 𑀚𑁂𑀝𑁆𑀞𑀓𑀁 𑀧𑀜𑁆𑀜𑀁 𑀥𑀼𑀭𑀁 𑀧𑀜𑁆𑀜𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀢𑀺.

𑀓𑀣𑀁? 𑀬𑀣𑀸 𑀳𑀺 𑀘𑀢𑀽𑀲𑀼 𑀅𑀫𑀘𑁆𑀘𑀧𑀼𑀢𑁆𑀢𑁂𑀲𑀼 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁂𑀲𑀼 𑀏𑀓𑁄 𑀉𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀬𑀺, 𑀏𑀓𑁄 𑀲𑀽𑀭𑀪𑀸𑀯𑀁, 𑀏𑀓𑁄 𑀚𑀸𑀢𑀺𑀁, 𑀏𑀓𑁄 𑀫𑀦𑁆𑀢𑀁. 𑀓𑀣𑀁? 𑀢𑁂𑀲𑀼 𑀳𑀺 𑀧𑀞𑀫𑁄 ‘𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀸𑀤𑀓𑀸𑀭𑀺𑀢𑀸𑀬 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀢𑀺 𑀮𑀩𑁆𑀪𑀫𑀸𑀦𑀁 𑀮𑀘𑁆𑀙𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’𑀦𑁆𑀢𑀺 𑀉𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀬𑀺. 𑀤𑀼𑀢𑀺𑀬𑁄 ‘𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑁄𑀧𑀺 𑀏𑀓𑀘𑁆𑀘𑁄 𑀲𑀗𑁆𑀕𑀸𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀅𑀯𑀲𑁆𑀲𑀁 𑀔𑁄 𑀧𑀦 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑁆𑀧𑀺𑀲𑁆𑀲𑀢𑀺; 𑀢𑀲𑁆𑀫𑀺𑀁 𑀓𑀼𑀧𑁆𑀧𑀺𑀢𑁂 𑀭𑀣𑀥𑀼𑀭𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀆𑀳𑀭𑀸𑀧𑁂𑀲𑁆𑀲𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’𑀦𑁆𑀢𑀺 𑀲𑀽𑀭𑀪𑀸𑀯𑀁 𑀅𑀯𑀲𑁆𑀲𑀬𑀺. 𑀢𑀢𑀺𑀬𑁄 ‘𑀲𑀽𑀭𑀪𑀸𑀯𑁂𑀧𑀺 𑀲𑀢𑀺 𑀏𑀓𑀘𑁆𑀘𑁄 𑀳𑀻𑀦𑀚𑀸𑀢𑀺𑀓𑁄 𑀳𑁄𑀢𑀺; 𑀚𑀸𑀢𑀺𑀁 𑀲𑁄𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀤𑀤𑀦𑁆𑀢𑀸 𑀫𑀬𑁆𑀳𑀁 𑀤𑀲𑁆𑀲𑀦𑁆𑀢𑀻’𑀢𑀺 𑀚𑀸𑀢𑀺𑀁 𑀅𑀯𑀲𑁆𑀲𑀬𑀺. 𑀘𑀢𑀼𑀢𑁆𑀣𑁄 ‘𑀚𑀸𑀢𑀺𑀫𑀸𑀧𑀺 𑀏𑀓𑁄 𑀅𑀫𑀦𑁆𑀢𑀦𑀻𑀬𑁄 𑀳𑁄𑀢𑀺; 𑀫𑀦𑁆𑀢𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀆𑀳𑀭𑀸𑀧𑁂𑀲𑁆𑀲𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’𑀦𑁆𑀢𑀺 𑀫𑀦𑁆𑀢𑀁 ¶ 𑀅𑀯𑀲𑁆𑀲𑀬𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀯𑀲𑁆𑀲𑀬𑀩𑀮𑁂𑀦 𑀞𑀸𑀦𑀦𑁆𑀢𑀭𑀸𑀦𑀺 𑀧𑀸𑀧𑀼𑀡𑀺𑀁𑀲𑀼.

𑀢𑀢𑁆𑀣 𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀙𑀦𑁆𑀤𑀁 𑀅𑀯𑀲𑁆𑀲𑀸𑀬 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁂𑀦 𑀅𑀢𑁆𑀣𑀦𑀺𑀩𑁆𑀩𑀢𑁆𑀢𑀺𑀬𑀁 𑀲𑀢𑀺 ‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’𑀢𑀺 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄, 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 (𑀫. 𑀦𑀺. 𑁨.𑁨𑁯𑁩 𑀆𑀤𑀬𑁄) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑀽𑀭𑀪𑀸𑀯𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀯𑀻𑀭𑀺𑀬𑀁 𑀚𑁂𑀝𑁆𑀞𑀓𑀁 𑀯𑀻𑀭𑀺𑀬𑀁 𑀥𑀼𑀭𑀁 𑀯𑀻𑀭𑀺𑀬𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄, 𑀲𑁄𑀡𑀢𑁆𑀣𑁂𑀭𑁄 (𑀫𑀳𑀸𑀯. 𑁨𑁪𑁩) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺.

𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 ¶ 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀘𑀺𑀢𑁆𑀢𑀁 𑀥𑀼𑀭𑀁 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄, 𑀲𑀫𑁆𑀪𑀽𑀢𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀫𑀦𑁆𑀢𑀁 𑀅𑀯𑀲𑁆𑀲𑀸𑀬 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑁄 𑀯𑀺𑀬 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀯𑀻𑀫𑀁𑀲𑀁 𑀥𑀼𑀭𑀁 𑀯𑀻𑀫𑀁𑀲𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 ¶ 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄, 𑀣𑁂𑀭𑁄 𑀫𑁄𑀖𑀭𑀸𑀚𑀸 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀻𑀫𑀁𑀲𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺.

𑀏𑀢𑁆𑀣 𑀘 𑀢𑀬𑁄 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺. 𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯. 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸𑀧𑀺 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺. 𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯. 𑀅𑀬𑀁 𑀢𑀸𑀯 𑀅𑀪𑁂𑀤𑀢𑁄 𑀓𑀣𑀸.

𑀪𑁂𑀤𑀢𑁄 𑀧𑀦 ‘𑀙𑀦𑁆𑀤𑁄’ 𑀇𑀤𑁆𑀥𑀺 𑀦𑀸𑀫. 𑀙𑀦𑁆𑀤𑀥𑀼𑀭𑁂𑀦 𑀪𑀸𑀯𑀺𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀲𑀫𑀸𑀥𑀺 𑀧𑀥𑀸𑀦𑀲𑀗𑁆𑀔𑀸𑀭𑁄𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀲𑁂𑀦 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁂 𑀧𑀯𑀺𑀲𑀦𑁆𑀢𑀺; 𑀧𑀸𑀤𑁂 𑀧𑀯𑀺𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣𑁂𑀯 ‘𑀲𑀫𑀸𑀥𑀺’ 𑀇𑀤𑁆𑀥𑀺 𑀦𑀸𑀫. 𑀲𑀫𑀸𑀥𑀺𑀥𑀼𑀭𑁂𑀦 𑀪𑀸𑀯𑀺𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀫𑀸𑀥𑀺𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀙𑀦𑁆𑀤𑁄 ¶ 𑀧𑀥𑀸𑀦𑀲𑀗𑁆𑀔𑀸𑀭𑁄𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀲𑁂𑀦 𑀲𑀫𑀸𑀥𑀺𑀤𑁆𑀥𑀺𑀧𑀸𑀤𑁂 𑀧𑀯𑀺𑀲𑀦𑁆𑀢𑀺; 𑀧𑀸𑀤𑁂 𑀧𑀯𑀺𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀢𑀢𑁆𑀣𑁂𑀯 ‘𑀧𑀥𑀸𑀦𑀲𑀗𑁆𑀔𑀸𑀭𑁄’ 𑀇𑀤𑁆𑀥𑀺 𑀦𑀸𑀫. 𑀧𑀥𑀸𑀦𑀲𑀗𑁆𑀔𑀸𑀭𑀪𑀸𑀯𑀺𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀥𑀸𑀦𑀲𑀗𑁆𑀔𑀸𑀭𑀺𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀙𑀦𑁆𑀤𑁄 𑀲𑀫𑀸𑀥𑀻𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀲𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀺𑀤𑁆𑀥𑀺𑀧𑀸𑀤𑁂 𑀧𑀯𑀺𑀲𑀦𑁆𑀢𑀺; 𑀧𑀸𑀤𑁂 𑀧𑀯𑀺𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀢𑀢𑁆𑀣𑁂𑀯 ‘𑀯𑀻𑀭𑀺𑀬𑀁’ 𑀇𑀤𑁆𑀥𑀺 𑀦𑀸𑀫, ‘𑀘𑀺𑀢𑁆𑀢𑀁’ 𑀇𑀤𑁆𑀥𑀺 𑀦𑀸𑀫, ‘𑀯𑀻𑀫𑀁𑀲𑀸’ 𑀇𑀤𑁆𑀥𑀺 𑀦𑀸𑀫…𑀧𑁂… 𑀧𑀸𑀤𑁂 𑀧𑀯𑀺𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀅𑀬𑀁 𑀪𑁂𑀤𑀢𑁄 𑀓𑀣𑀸 𑀦𑀸𑀫.

𑀏𑀢𑁆𑀣 𑀧𑀦 𑀅𑀪𑀺𑀦𑀯𑀁 𑀦𑀢𑁆𑀣𑀺; 𑀕𑀳𑀺𑀢𑀫𑁂𑀯 𑀯𑀺𑀪𑀽𑀢𑀥𑀸𑀢𑀼𑀓𑀁 𑀓𑀢𑀁. 𑀓𑀣𑀁? 𑀙𑀦𑁆𑀤𑁄, 𑀲𑀫𑀸𑀥𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺. 𑀲𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯. 𑀇𑀫𑁂 𑀳𑀺 𑀢𑀬𑁄 𑀥𑀫𑁆𑀫𑀸 𑀇𑀚𑁆𑀛𑀫𑀸𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑁂𑀳𑀺 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀇𑀚𑁆𑀛𑀦𑁆𑀢𑀺, 𑀦 𑀯𑀺𑀦𑀸. 𑀲𑀫𑁆𑀧𑀬𑀼𑀢𑁆𑀢𑀓𑀸 𑀧𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀚𑁆𑀛𑀦𑀓𑀝𑁆𑀞𑁂𑀦 𑀇𑀤𑁆𑀥𑀺 𑀦𑀸𑀫 𑀳𑁄𑀦𑁆𑀢𑀺, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑁄 𑀦𑀸𑀫. ‘𑀇𑀤𑁆𑀥𑀻’𑀢𑀺 𑀯𑀸 ‘𑀇𑀤𑁆𑀥𑀺𑀧𑀸𑀤𑁄’𑀢𑀺 𑀯𑀸 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀥𑀺𑀯𑀘𑀦𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁𑀬𑁂𑀯 𑀅𑀥𑀺𑀯𑀘𑀦𑀁. 𑀯𑀻𑀭𑀺𑀬𑀁, 𑀘𑀺𑀢𑁆𑀢𑀁, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑁄𑀢𑀺 𑀢𑀬𑁄 𑀥𑀫𑁆𑀫𑀸…𑀧𑁂… 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁𑀬𑁂𑀯 𑀅𑀥𑀺𑀯𑀘𑀦𑀁.

𑀅𑀧𑀺𑀘 ¶ 𑀧𑀼𑀩𑁆𑀩𑀪𑀸𑀕𑁄 𑀧𑀼𑀩𑁆𑀩𑀪𑀸𑀕𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫; 𑀧𑀝𑀺𑀮𑀸𑀪𑁄 𑀧𑀝𑀺𑀮𑀸𑀪𑁄 𑀇𑀤𑁆𑀥𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑀢𑁆𑀣𑁄 𑀉𑀧𑀘𑀸𑀭𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀤𑀻𑀧𑁂𑀢𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑀧𑀭𑀺𑀓𑀫𑁆𑀫𑀜𑁆𑀳𑀺 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀧𑀞𑀫𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀧𑀭𑀺𑀓𑀫𑁆𑀫𑀁 ¶ 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀇𑀤𑁆𑀥𑀺 𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫. 𑀲𑀓𑀤𑀸𑀕𑀸𑀫𑀺, 𑀅𑀦𑀸𑀕𑀸𑀫𑀺, 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫. 𑀧𑀝𑀺𑀮𑀸𑀪𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀞𑀫𑀚𑁆𑀛𑀸𑀦𑀜𑁆𑀳𑀺 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫; 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀢𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫.

𑀓𑁂𑀦𑀝𑁆𑀞𑁂𑀦 ¶ 𑀇𑀤𑁆𑀥𑀺? 𑀓𑁂𑀦𑀝𑁆𑀞𑁂𑀦 𑀧𑀸𑀤𑁄𑀢𑀺? 𑀇𑀚𑁆𑀛𑀦𑀓𑀝𑁆𑀞𑁂𑀦𑁂𑀯 𑀇𑀤𑁆𑀥𑀺. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑁂𑀯 𑀧𑀸𑀤𑁄. 𑀏𑀯𑀫𑀺𑀥𑀸𑀧𑀺 𑀇𑀤𑁆𑀥𑀻𑀢𑀺 𑀯𑀸 𑀧𑀸𑀤𑁄𑀢𑀺 𑀯𑀸 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀥𑀺𑀯𑀘𑀦𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁𑀬𑁂𑀯 𑀅𑀥𑀺𑀯𑀘𑀦𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀇𑀤𑀫𑀸𑀳𑀁𑀲𑀼 𑁋 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀯 𑀅𑀥𑀺𑀯𑀘𑀦𑀁 𑀪𑀯𑁂𑀬𑁆𑀬, 𑀬𑀤𑀺 𑀲𑀢𑁆𑀣𑀸 𑀧𑀭𑀢𑁄 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑀁 𑀦𑀸𑀫 𑀦 𑀆𑀳𑀭𑁂𑀬𑁆𑀬. 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀧𑀦 ‘‘𑀙𑀦𑁆𑀤𑁄𑀬𑁂𑀯 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄, 𑀯𑀻𑀭𑀺𑀬𑀫𑁂𑀯, 𑀘𑀺𑀢𑁆𑀢𑀫𑁂𑀯, 𑀯𑀻𑀫𑀁𑀲𑀸𑀯 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 𑀓𑀣𑀺𑀢𑀁. 𑀓𑁂𑀘𑀺 𑀧𑀦 ‘‘𑀇𑀤𑁆𑀥𑀺 𑀦𑀸𑀫 𑀅𑀦𑀺𑀧𑁆𑀨𑀦𑁆𑀦𑀸, 𑀇𑀤𑁆𑀥𑀺𑀧𑀸𑀤𑁄 𑀦𑀺𑀧𑁆𑀨𑀦𑁆𑀦𑁄’’𑀢𑀺 𑀯𑀤𑀺𑀁𑀲𑀼. 𑀢𑁂𑀲𑀁 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑁆𑀥𑀻𑀧𑀺 𑀇𑀤𑁆𑀥𑀺𑀧𑀸𑀤𑁄𑀧𑀺 ‘𑀦𑀺𑀧𑁆𑀨𑀦𑁆𑀦𑁄 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑁄’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁪𑁪. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀦𑀬𑀸 𑀧𑀦𑁂𑀢𑁆𑀣 𑀕𑀡𑁂𑀢𑀩𑁆𑀩𑀸. ‘‘𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁂 ¶ 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀅𑀝𑁆𑀞𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀏𑀯𑀫𑁂𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑀁𑀬𑁂𑀯 𑀇𑀤𑁆𑀥𑀺𑀧𑀸𑀤𑀸𑀦𑀁 𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲𑀦𑀬𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁪𑁬𑁨. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 ¶ 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀇𑀤𑁆𑀥𑀺𑀧𑀸𑀤𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀏𑀯, 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸; 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦 𑀫𑀕𑁆𑀕𑀳𑁂𑀢𑀼𑀓𑀸, 𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄. 𑀘𑀢𑁆𑀢𑀸𑀭𑁄 𑀳𑀺 𑀅𑀥𑀺𑀧𑀢𑀬𑁄 𑀅𑀜𑁆𑀜𑀫𑀜𑁆𑀜𑀁 𑀕𑀭𑀼𑀁 𑀦 𑀓𑀭𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑀬𑀁 𑀚𑁂𑀝𑁆𑀞𑀓𑀢𑁆𑀢𑀸. 𑀬𑀣𑀸 𑀳𑀺 𑀲𑀫𑀚𑀸𑀢𑀺𑀓𑀸 𑀲𑀫𑀯𑀬𑀸 𑀲𑀫𑀣𑀸𑀫𑀸 𑀲𑀫𑀲𑀺𑀧𑁆𑀧𑀸 𑀘𑀢𑁆𑀢𑀸𑀭𑁄 𑀭𑀸𑀚𑀧𑀼𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑁂𑀝𑁆𑀞𑀓𑀢𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 ¶ 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀦𑁆𑀢𑀺, 𑀏𑀯𑀫𑀺𑀫𑁂𑀧𑀺 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀬𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀚𑁂𑀝𑁆𑀞𑀓𑀥𑀫𑁆𑀫𑀢𑀸𑀬 𑀅𑀜𑁆𑀜𑀫𑀜𑁆𑀜𑀁 𑀕𑀭𑀼𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀏𑀓𑀦𑁆𑀢𑁂𑀦𑁂𑀯 𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄. 𑀅𑀢𑀻𑀢𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀦 𑀯𑀢𑁆𑀢𑀩𑁆𑀩𑀸. 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀯 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀫𑀺𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀸𑀬𑁂𑀯𑀸𑀢𑀺. 𑀏𑀯𑀫𑀬𑀁 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁬𑁬. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 𑀲𑀢𑁆𑀢𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀩𑁄𑀚𑁆𑀛𑀗𑁆𑀕𑀸𑀢𑀺 𑀩𑁄𑀥𑀺𑀬𑀸 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀏𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀬𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀩𑀼𑀚𑁆𑀛𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸, 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀻𑀦𑀺 𑀯𑀺𑀬. 𑀬𑁄 𑀧𑀦𑁂𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸, 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀯𑀸 𑀩𑁄𑀚𑁆𑀛𑀗𑁆𑀕𑀸’’𑀢𑀺.

𑀅𑀧𑀺𑀘 ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺𑀆𑀤𑀻𑀲𑀼 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀘 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀢𑁆𑀣 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀯𑀺𑀘𑀬𑀮𑀓𑁆𑀔𑀡𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀕𑁆𑀕𑀳𑀮𑀓𑁆𑀔𑀡𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀨𑀭𑀡𑀮𑀓𑁆𑀔𑀡𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑀲𑀫𑀮𑀓𑁆𑀔𑀡𑁄 ¶ 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑁄 ¶ 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑁂𑀲𑀼 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪) 𑀯𑀘𑀦𑀢𑁄 𑀲𑀩𑁆𑀩𑁂𑀲𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀉𑀧𑀓𑀸𑀭𑀓𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀢𑀢𑁄 𑀧𑀭𑀁 ‘‘𑀲𑁄 𑀢𑀣𑀸 𑀲𑀢𑁄 𑀯𑀺𑀳𑀭𑀦𑁆𑀢𑁄 ¶ 𑀢𑀁 𑀥𑀫𑁆𑀫𑀁 𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧𑁫𑁦) 𑀦𑀬𑁂𑀦 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑁂𑀯 𑀦𑀺𑀓𑁆𑀔𑁂𑀧𑀧𑀬𑁄𑀚𑀦𑀁 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁂 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀮𑀻𑀦𑀼𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀲𑀩𑁆𑀩𑀢𑁆𑀣𑀺𑀓𑀢𑁄 𑀘. 𑀏𑀢𑁆𑀣 𑀳𑀺 𑀢𑀬𑁄 𑀩𑁄𑀚𑁆𑀛𑀗𑁆𑀕𑀸 𑀮𑀻𑀦𑀲𑁆𑀲 𑀧𑀝𑀺𑀧𑀓𑁆𑀔𑀸, 𑀬𑀣𑀸𑀳 𑁋 ‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀢𑀬𑁄 𑀉𑀤𑁆𑀥𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑀸, 𑀬𑀣𑀸𑀳 𑁋 ‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀏𑀓𑁄 𑀧𑀦𑁂𑀢𑁆𑀣 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑁂𑀲𑀼 𑀭𑀸𑀚𑀓𑀺𑀘𑁆𑀘𑁂𑀲𑀼, 𑀲𑀩𑁆𑀩𑀩𑁄𑀚𑁆𑀛𑀗𑁆𑀕𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑀢𑁄 𑀲𑀩𑁆𑀩𑀢𑁆𑀣𑀺𑀓𑁄, 𑀬𑀣𑀸𑀳 𑁋 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺. ‘‘𑀲𑀩𑁆𑀩𑀢𑁆𑀣𑀓’’𑀦𑁆𑀢𑀺𑀧𑀺 𑀧𑀸𑀴𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀮𑀻𑀦𑀼𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀲𑀩𑁆𑀩𑀢𑁆𑀣𑀺𑀓𑀢𑁄 𑀘 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁬𑁭. 𑀇𑀤𑀸𑀦𑀺 𑀦𑁂𑀲𑀁 𑀏𑀓𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀲𑁂𑀦 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀲𑀢𑀺𑀫𑀸 𑀳𑁄𑀢𑀻𑀢𑀺 𑀧𑀜𑁆𑀜𑀸𑀬 𑀧𑀜𑁆𑀜𑀯𑀸, 𑀬𑀲𑁂𑀦 𑀬𑀲𑀯𑀸, 𑀥𑀦𑁂𑀦 𑀥𑀦𑀯𑀸 𑀯𑀺𑀬 𑀲𑀢𑀺𑀬𑀸 𑀲𑀢𑀺𑀫𑀸 𑀳𑁄𑀢𑀺, 𑀲𑀢𑀺𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀧𑀭𑀫𑁂𑀦𑀸𑀢𑀺 𑀉𑀢𑁆𑀢𑀫𑁂𑀦; 𑀢𑀜𑁆𑀳𑀺 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀘𑁂𑀯 𑀫𑀕𑁆𑀕𑀲𑁆𑀲 𑀘 𑀅𑀦𑀼𑀮𑁄𑀫𑀢𑁄 𑀧𑀭𑀫𑀁 𑀦𑀸𑀫 𑀳𑁄𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁. 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸; 𑀲𑀢𑀺𑀬𑀸 𑀘𑁂𑀯 𑀦𑁂𑀧𑀓𑁆𑀓𑁂𑀦 ¶ 𑀘𑀸𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀲𑀢𑀺𑀪𑀸𑀚𑀦𑀻𑀬𑁂 𑀧𑀜𑁆𑀜𑀸 𑀲𑀗𑁆𑀕𑀳𑀺𑀢𑀸𑀢𑀺? 𑀲𑀢𑀺𑀬𑀸 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁. 𑀲𑀢𑀺 𑀳𑀺 𑀧𑀜𑁆𑀜𑀸𑀬 𑀲𑀤𑁆𑀥𑀺𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺 𑀯𑀺𑀦𑀸𑀧𑀺, 𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑀼𑀩𑁆𑀩𑀮𑀸. 𑀢𑁂𑀦𑀲𑁆𑀲𑀸 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀜𑁆𑀜𑀸 𑀲𑀗𑁆𑀕𑀳𑀺𑀢𑀸. 𑀬𑀣𑀸 𑀳𑀺 𑀤𑁆𑀯𑀻𑀲𑀼 ¶ 𑀤𑀺𑀲𑀸𑀲𑀼 𑀤𑁆𑀯𑁂 𑀭𑀸𑀚𑀫𑀳𑀸𑀫𑀢𑁆𑀢𑀸 𑀢𑀺𑀝𑁆𑀞𑁂𑀬𑁆𑀬𑀼𑀁; 𑀢𑁂𑀲𑀼 𑀏𑀓𑁄 𑀭𑀸𑀚𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀓𑀓𑁄𑀯 𑀢𑁂𑀲𑀼 𑀭𑀸𑀚𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀅𑀢𑁆𑀢𑀦𑁄𑀧𑀺 ¶ 𑀢𑁂𑀚𑁂𑀦 𑀭𑀸𑀚𑀧𑀼𑀢𑁆𑀢𑀲𑁆𑀲𑀧𑀺 𑀢𑁂𑀚𑁂𑀦 𑀢𑁂𑀚𑀯𑀸 𑀳𑁄𑀢𑀺; 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑁄 𑀦 𑀢𑁂𑀦 𑀲𑀫𑀢𑁂𑀚𑁄 𑀳𑁄𑀢𑀺; 𑀏𑀯𑀫𑁂𑀯 𑀭𑀸𑀚𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑀫𑀳𑀸𑀫𑀢𑁆𑀢𑁄 𑀯𑀺𑀬 𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸 𑀲𑀢𑀺, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑁄 𑀯𑀺𑀬 𑀯𑀺𑀦𑀸 𑀧𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀸. 𑀢𑀢𑁆𑀣 𑀬𑀣𑀸 𑀭𑀸𑀚𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀅𑀢𑁆𑀢𑀦𑁄𑀧𑀺 𑀢𑁂𑀚𑁂𑀦 𑀭𑀸𑀚𑀧𑀼𑀢𑁆𑀢𑀲𑁆𑀲𑀧𑀺 𑀢𑁂𑀚𑁂𑀦 𑀢𑁂𑀚𑀯𑀸 𑀳𑁄𑀢𑀺, 𑀏𑀯𑀁 𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀩𑀮𑀯𑀢𑀻 𑀳𑁄𑀢𑀺; 𑀬𑀣𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑁄 𑀦 𑀢𑁂𑀦 𑀲𑀫𑀢𑁂𑀚𑁄 𑀳𑁄𑀢𑀺, 𑀏𑀯𑀁 𑀯𑀺𑀦𑀸 𑀧𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀸 𑀤𑀼𑀩𑁆𑀩𑀮𑀸 𑀳𑁄𑀢𑀻𑀢𑀺 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀜𑁆𑀜𑀸 𑀕𑀳𑀺𑀢𑀸𑀢𑀺.

𑀘𑀺𑀭𑀓𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀓𑀸𑀬𑁂𑀦 𑀘𑀺𑀭𑀓𑀢𑀁 𑀯𑀢𑁆𑀢𑀁 𑀯𑀸 𑀓𑀲𑀺𑀡𑀫𑀡𑁆𑀟𑀮𑀁 𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀯𑀸. 𑀘𑀺𑀭𑀪𑀸𑀲𑀺𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀯𑀸𑀘𑀸𑀬 𑀘𑀺𑀭𑀪𑀸𑀲𑀺𑀢𑀁 𑀩𑀳𑀼𑀓𑀫𑁆𑀧𑀺, 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀥𑀫𑁆𑀫𑀓𑀣𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑀁 𑀯𑀸, 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀯𑀸 𑀞𑀢𑁆𑀯𑀸 𑀥𑀫𑁆𑀫𑀓𑀣𑀫𑁂𑀯. 𑀲𑀭𑀺𑀢𑀸 𑀳𑁄𑀢𑀻𑀢𑀺 𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀁 𑀅𑀭𑀽𑀧𑀥𑀫𑁆𑀫𑀓𑁄𑀝𑁆𑀞𑀸𑀲𑀁 ‘𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀦𑀺𑀭𑀼𑀤𑁆𑀥𑁄’𑀢𑀺 𑀲𑀭𑀺𑀢𑀸 𑀳𑁄𑀢𑀺. 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀭𑀺𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀅𑀬𑀁 𑀏𑀯𑀁 𑀉𑀧𑁆𑀧𑀦𑁆𑀦𑀸 𑀲𑁂𑀲𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀓𑀣𑀻𑀬𑀢𑀺.

𑀲𑁄 𑀢𑀣𑀸 𑀲𑀢𑁄 𑀯𑀺𑀳𑀭𑀦𑁆𑀢𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀸𑀓𑀸𑀭𑁂𑀦 𑀉𑀧𑁆𑀧𑀦𑁆𑀦𑀸𑀬 𑀲𑀢𑀺𑀬𑀸 𑀲𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀘𑀺𑀭𑀓𑀢𑀁 𑀘𑀺𑀭𑀪𑀸𑀲𑀺𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀥𑀫𑁆𑀫𑀁. 𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀢𑀻𑀢𑀺 𑀧𑀜𑁆𑀜𑀸𑀬 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀧𑀯𑀺𑀘𑀺𑀦𑀢𑀺. 𑀧𑀯𑀺𑀘𑀭𑀢𑀻𑀢𑀺 ¶ ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀢𑀢𑁆𑀣 𑀧𑀜𑁆𑀜𑀁 𑀘𑀭𑀸𑀧𑁂𑀦𑁆𑀢𑁄 𑀧𑀯𑀺𑀘𑀭𑀢𑀺. 𑀧𑀭𑀺𑀯𑀻𑀫𑀁𑀲𑀁 𑀆𑀧𑀚𑁆𑀚𑀢𑀻𑀢𑀺 𑀑𑀮𑁄𑀓𑀦𑀁 𑀕𑀯𑁂𑀲𑀦𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀓𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀢𑀲𑁆𑀲 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀥𑀫𑁆𑀫𑀁. 𑀆𑀭𑀤𑁆𑀥𑀁 𑀳𑁄𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀧𑀕𑁆𑀕𑀳𑀺𑀢𑀁. 𑀅𑀲𑀮𑁆𑀮𑀻𑀦𑀦𑁆𑀢𑀺 𑀆𑀭𑀤𑁆𑀥𑀢𑁆𑀢𑀸𑀬𑁂𑀯 𑀅𑀲𑀮𑁆𑀮𑀻𑀦𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀓𑀁 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀦𑀺𑀭𑀸𑀫𑀺𑀲𑀸𑀢𑀺 ¶ ¶ 𑀓𑀸𑀫𑀸𑀫𑀺𑀲𑀮𑁄𑀓𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀭𑀸𑀫𑀺𑀲𑀸 𑀧𑀭𑀺𑀲𑀼𑀤𑁆𑀥𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀧𑀻𑀢𑀺𑀫𑀦𑀲𑁆𑀲𑀸𑀢𑀺 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲. 𑀓𑀸𑀬𑁄𑀧𑀺 𑀧𑀲𑁆𑀲𑀫𑁆𑀪𑀢𑀻𑀢𑀺 𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑀸𑀢𑁄 𑀦𑀸𑀫𑀓𑀸𑀬𑁄 𑀓𑀺𑀮𑁂𑀲𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀧𑀲𑁆𑀲𑀫𑁆𑀪𑀢𑀺. 𑀘𑀺𑀢𑁆𑀢𑀫𑁆𑀧𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀧𑀺 𑀢𑀣𑁂𑀯 𑀧𑀲𑁆𑀲𑀫𑁆𑀪𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀲𑁆𑀲𑀤𑁆𑀥𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀲𑀼𑀔𑀺𑀦𑁄𑀢𑀺 𑀧𑀲𑁆𑀲𑀤𑁆𑀥𑀓𑀸𑀬𑀢𑀸𑀬 𑀉𑀧𑁆𑀧𑀦𑁆𑀦𑀲𑀼𑀔𑁂𑀦 𑀲𑀼𑀔𑀺𑀢𑀲𑁆𑀲. 𑀲𑀫𑀸𑀥𑀺𑀬𑀢𑀻𑀢𑀺 𑀲𑀫𑁆𑀫𑀸 𑀆𑀥𑀺𑀬𑀢𑀺, 𑀦𑀺𑀘𑁆𑀘𑀮𑀁 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑁂 𑀞𑀧𑀻𑀬𑀢𑀺, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀢𑀣𑀸 𑀲𑀫𑀸𑀳𑀺𑀢𑀦𑁆𑀢𑀺 𑀢𑁂𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑁂𑀦 𑀯𑀺𑀬 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁. 𑀲𑀸𑀥𑀼𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺; 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀯𑀟𑁆𑀠𑀦𑁂 𑀅𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀅𑀬𑀁 ¶ 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀙𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑁄𑀲𑀓𑁆𑀓𑀦𑀅𑀦𑀢𑀺𑀯𑀢𑁆𑀢𑀦𑀪𑀸𑀯𑀲𑀸𑀥𑀓𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁 𑀦𑀸𑀫 𑀳𑁄𑀢𑀺? 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀦𑀸𑀦𑀸𑀭𑀲𑀮𑀓𑁆𑀔𑀡𑀸 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀧𑀞𑀫𑁄 𑀦𑀬𑁄.

𑁪𑁬𑁮-𑁪𑁬𑁯. 𑀇𑀤𑀸𑀦𑀺 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺, 𑀢𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀤𑀼𑀢𑀺𑀬𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀲𑀢𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑀢𑀺. 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑀢𑀺. 𑀬𑀤𑀧𑀻𑀢𑀺 𑀬𑀸𑀧𑀺. 𑀢𑀤𑀧𑀻𑀢𑀺 𑀲𑀸𑀧𑀺. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀲𑀫𑁆𑀩𑁄𑀥𑀺 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀫𑀕𑁆𑀕𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 ¶ 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸; 𑀲𑀸 𑀢𑀢𑁆𑀣 ¶ 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀤𑀢𑁆𑀣𑀸𑀬, 𑀅𑀲𑀗𑁆𑀔𑀢𑀸𑀬 𑀅𑀫𑀢𑀥𑀸𑀢𑀼𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄.

𑀓𑀸𑀬𑀺𑀓𑀁 𑀯𑀻𑀭𑀺𑀬𑀦𑁆𑀢𑀺 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀦𑁆𑀢𑀺 ‘‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑀸𑀬𑀧𑀬𑁄𑀕𑀁 𑀯𑀺𑀦𑀸 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀓𑀸𑀬𑀧𑀲𑁆𑀲𑀤𑁆𑀥𑀻𑀢𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀇𑀫𑀲𑁆𑀫𑀺𑀁 𑀦𑀬𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 ‘𑀏𑀢𑁆𑀢𑀓𑁂𑀦 𑀧𑀸𑀓𑀝𑀁 𑀦 𑀳𑁄𑀢𑀻’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀏𑀢𑁂𑀲𑀼 𑀳𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀼 𑀲𑀢𑀺 𑀧𑀯𑀺𑀘𑀬𑁄 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂 𑀢𑀬𑁄 𑀅𑀢𑁆𑀢𑀦𑁄 𑀔𑀦𑁆𑀥𑀸𑀭𑀫𑁆𑀫𑀡𑀢𑁆𑀢𑀸 𑀮𑁄𑀓𑀺𑀬𑀸𑀯 𑀳𑁄𑀦𑁆𑀢𑀺. 𑀢𑀣𑀸 𑀫𑀕𑁆𑀕𑀁 𑀅𑀧𑁆𑀧𑀢𑁆𑀢𑀁 𑀓𑀸𑀬𑀺𑀓𑀯𑀻𑀭𑀺𑀬𑀁. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 ¶ 𑀧𑀦 𑀧𑀻𑀢𑀺𑀲𑀫𑀸𑀥𑀺𑀬𑁄 𑀮𑁄𑀓𑀼𑀢𑁆𑀢𑀭𑀸 𑀳𑁄𑀦𑁆𑀢𑀺. 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀢𑀺.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀢𑀸𑀯 𑀥𑀫𑁆𑀫𑁂𑀲𑀼 𑀲𑀢𑀺𑀧𑀯𑀺𑀘𑀬𑀉𑀧𑁂𑀓𑁆𑀔𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺 𑀢𑁂𑀲𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀫𑀸 𑀬𑀼𑀚𑁆𑀚𑀺𑀢𑁆𑀣. 𑀘𑀗𑁆𑀓𑀫𑀧𑁆𑀧𑀬𑁄𑀕𑁂𑀦 𑀦𑀺𑀩𑁆𑀩𑀢𑁆𑀢𑀯𑀻𑀭𑀺𑀬𑀫𑁆𑀧𑀺 𑀮𑁄𑀓𑀺𑀬𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀦 𑀧𑀻𑀢𑀺𑀲𑀫𑀸𑀥𑀺𑀬𑁄 𑀓𑀤𑀸 𑀮𑁄𑀓𑀼𑀢𑁆𑀢𑀭𑀸 𑀳𑁄𑀦𑁆𑀢𑀻𑀢𑀺? 𑀓𑀸𑀫𑀸𑀯𑀘𑀭𑁂 𑀢𑀸𑀯 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀮𑀩𑁆𑀪𑀢𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺 𑀦 𑀮𑀩𑁆𑀪𑀢𑀺. 𑀭𑀽𑀧𑀸𑀯𑀘𑀭𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺 𑀮𑀩𑁆𑀪𑀢𑀺, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀦 𑀦 𑀮𑀩𑁆𑀪𑀢𑀺. 𑀅𑀭𑀽𑀧𑀸𑀯𑀘𑀭𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀮𑀩𑁆𑀪𑀢𑀺. 𑀏𑀢𑁆𑀣 𑀧𑀦 𑀅𑀮𑀩𑁆𑀪𑀫𑀸𑀦𑀓𑀁 𑀉𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀓𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀏𑀯𑀫𑀬𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀓𑀸𑀫𑀸𑀯𑀘𑀭𑀢𑁄𑀧𑀺 𑀦𑀺𑀓𑁆𑀔𑀦𑁆𑀢𑁄 𑀭𑀽𑀧𑀸𑀯𑀘𑀭𑀢𑁄𑀧𑀺 𑀅𑀭𑀽𑀧𑀸𑀯𑀘𑀭𑀢𑁄𑀧𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑁄 𑀬𑁂𑀯𑀸𑀢𑀺 𑀓𑀣𑀺𑀢𑁄.

𑀢𑀣𑀸 𑀓𑀸𑀫𑀸𑀯𑀘𑀭𑁂 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀮𑀩𑁆𑀪𑀢𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀧𑀦 𑀲𑀫𑀸𑀥𑀺 𑀦 𑀮𑀩𑁆𑀪𑀢𑀺. 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑁂𑀲𑀼 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀮𑀩𑁆𑀪𑀢𑀺, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀦 𑀦 𑀮𑀩𑁆𑀪𑀢𑀺. 𑀏𑀢𑁆𑀣 𑀧𑀦 𑀅𑀮𑀩𑁆𑀪𑀫𑀸𑀦𑀓𑀁 𑀉𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀓𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀏𑀯𑀫𑀬𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀓𑀸𑀫𑀸𑀯𑀘𑀭𑀢𑁄𑀧𑀺 𑀦𑀺𑀓𑁆𑀔𑀦𑁆𑀢𑁄 𑀭𑀽𑀧𑀸𑀯𑀘𑀭𑀢𑁄𑀧𑀺 𑀅𑀭𑀽𑀧𑀸𑀯𑀘𑀭𑀢𑁄𑀧𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑁄 𑀬𑁂𑀯𑀸𑀢𑀺 𑀓𑀣𑀺𑀢𑁄.

𑀅𑀧𑀺𑀘 ¶ ¶ 𑀮𑁄𑀓𑀺𑀬𑀁 𑀕𑀳𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑁄 𑀓𑀸𑀢𑀩𑁆𑀩𑁄; 𑀮𑁄𑀓𑀼𑀢𑁆𑀢𑀭𑀁 𑀕𑀳𑁂𑀢𑁆𑀯𑀸 𑀮𑁄𑀓𑀺𑀬𑁄 𑀓𑀸𑀢𑀩𑁆𑀩𑁄. 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀼 𑀳𑀺 𑀲𑀢𑀺𑀧𑀯𑀺𑀘𑀬𑀉𑀧𑁂𑀓𑁆𑀔𑀸𑀦𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀓𑀸𑀮𑁄𑀧𑀺 𑀅𑀢𑁆𑀣𑀺. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑁋 ‘‘𑀅𑀚𑁆𑀛𑀢𑁆𑀢𑀯𑀺𑀫𑁄𑀓𑁆𑀔𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀁 𑀯𑀤𑀸𑀫𑀺; 𑀏𑀯𑀫𑀲𑁆𑀲𑀺𑀫𑁂 𑀆𑀲𑀯𑀸 𑀦𑀸𑀦𑀼𑀲𑁂𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁩𑁨 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀮𑁄𑀓𑀼𑀢𑁆𑀢𑀭𑀸 𑀳𑁄𑀦𑁆𑀢𑀺. 𑀬𑀤𑀸 𑀧𑀦 𑀘𑀗𑁆𑀓𑀫𑀧𑀬𑁄𑀕𑁂𑀦 𑀦𑀺𑀩𑁆𑀩𑀢𑁆𑀢𑁂 𑀓𑀸𑀬𑀺𑀓𑀯𑀻𑀭𑀺𑀬𑁂 𑀅𑀦𑀼𑀧𑀲𑀦𑁆𑀢𑁂𑀬𑁂𑀯 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀖𑀝𑀻𑀬𑀢𑀺, 𑀢𑀤𑀸 𑀢𑀁 𑀮𑁄𑀓𑀼𑀢𑁆𑀢𑀭𑀁 𑀳𑁄𑀢𑀺. 𑀬𑁂 𑀧𑀦 𑀣𑁂𑀭𑀸 ‘‘𑀓𑀲𑀺𑀡𑀚𑁆𑀛𑀸𑀦𑁂, 𑀆𑀦𑀸𑀧𑀸𑀦𑀚𑁆𑀛𑀸𑀦𑁂, 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂 𑀘 𑀩𑁄𑀚𑁆𑀛𑀗𑁆𑀕𑁄 𑀉𑀤𑁆𑀥𑀭𑀦𑁆𑀢𑁄 𑀦 𑀯𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀺𑀬𑀸 𑀳𑁄𑀦𑁆𑀢𑀻𑀢𑀺.

𑀤𑀼𑀢𑀺𑀬𑁄 𑀦𑀬𑁄.

𑁪𑁭𑁦-𑁪𑁭𑁧. 𑀇𑀤𑀸𑀦𑀺 ¶ 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀢𑀢𑀺𑀬𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀧𑀺 𑀅𑀬𑀁 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺; 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑁂𑀓𑁂 𑀦𑀺𑀲𑁆𑀲𑀺𑀢𑀁. 𑀯𑀺𑀯𑁂𑀓𑁄𑀢𑀺 𑀯𑀺𑀯𑀺𑀢𑁆𑀢𑀢𑀸. 𑀲𑁄 𑀘𑀸𑀬𑀁 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀢𑀢𑁆𑀣 𑀢𑀤𑀗𑁆𑀕𑀯𑀺𑀯𑁂𑀓𑁄 𑀦𑀸𑀫 𑀯𑀺𑀧𑀲𑁆𑀲𑀦𑀸. 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀦𑀸𑀫 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄 𑀦𑀸𑀫 𑀫𑀕𑁆𑀕𑁄. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄 𑀦𑀸𑀫 𑀨𑀮𑀁. 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀦𑀸𑀫 𑀲𑀩𑁆𑀩𑀦𑀺𑀫𑀺𑀢𑁆𑀢𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀯𑀺𑀯𑁂𑀓𑁂 𑀦𑀺𑀲𑁆𑀲𑀺𑀢𑀁 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀜𑁆𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀳𑀺 𑀅𑀬𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀬𑁄𑀕𑀻 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑀸𑀮𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺. 𑀧𑀜𑁆𑀘𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀻𑀢𑀺 𑀏𑀓𑁂. 𑀢𑁂 𑀳𑀺 𑀦 𑀓𑁂𑀯𑀮𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀓𑁆𑀔𑀡𑁂𑀲𑀼 𑀏𑀯 𑀩𑁄𑀚𑁆𑀛𑀗𑁆𑀕𑀁 𑀉𑀤𑁆𑀥𑀭𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀓𑀲𑀺𑀡𑀚𑁆𑀛𑀸𑀦𑀆𑀦𑀸𑀧𑀸𑀦𑀸𑀲𑀼𑀪𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂𑀲𑀼𑀧𑀺 𑀉𑀤𑁆𑀥𑀭𑀦𑁆𑀢𑀺, 𑀦 𑀘 𑀧𑀝𑀺𑀲𑀺𑀤𑁆𑀥𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ¶ . 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀏𑀢𑁂𑀲𑀁 𑀛𑀸𑀦𑀸𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀏𑀯 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀬𑀣𑀸 𑀘 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 ‘‘𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 ¶ 𑀯𑀼𑀢𑁆𑀢𑀁, 𑀏𑀯𑀁 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀺 𑀪𑀸𑀯𑁂𑀢𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀸𑀤𑀻𑀲𑀼. 𑀯𑀺𑀯𑁂𑀓𑀢𑁆𑀣𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄.

𑀓𑁂𑀯𑀮𑀜𑁆𑀘𑁂𑀢𑁆𑀣 𑀯𑁄𑀲𑁆𑀲𑀕𑁆𑀕𑁄 𑀤𑀼𑀯𑀺𑀥𑁄 𑁋 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀘𑀸𑀢𑀺. 𑀢𑀢𑁆𑀣 ‘𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄’𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀘 𑀢𑀤𑀗𑁆𑀕𑀯𑀲𑁂𑀦 𑀫𑀕𑁆𑀕𑀓𑁆𑀔𑀡𑁂 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. ‘𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄’𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀆𑀭𑀫𑁆𑀫𑀡𑀓𑀭𑀡𑁂𑀦 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂 ¶ 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀅𑀬𑀁 𑀲𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀢𑀺.

𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀧𑀭𑀺𑀡𑀫𑀦𑁆𑀢𑀁 𑀧𑀭𑀺𑀡𑀢𑀜𑁆𑀘, 𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀬𑀣𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑀜𑁆𑀘 𑀧𑀭𑀺𑀧𑀘𑁆𑀘𑀢𑀺, 𑀬𑀣𑀸 𑀘 𑀧𑀭𑀺𑀧𑀓𑁆𑀓𑁄 𑀳𑁄𑀢𑀺, 𑀢𑀣𑀸 𑀦𑀁 𑀪𑀸𑀯𑁂𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀩𑁄𑀚𑁆𑀛𑀗𑁆𑀕𑁂𑀲𑀼𑀧𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀦𑀬𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁭𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀲𑀢𑁆𑀢𑀧𑀺 𑀩𑁄𑀚𑁆𑀛𑀗𑁆𑀕𑁂 𑀏𑀓𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘 𑀯𑀲𑁂𑀦 𑀤𑁆𑀯𑁂 𑀦𑀬𑀸. 𑀢𑁂𑀲𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑀺𑀤𑁆𑀤𑁂𑀲𑁂 𑀧𑀦 𑀉𑀧𑁂𑀓𑁆𑀔𑀦𑀯𑀲𑁂𑀦 𑀉𑀧𑁂𑀓𑁆𑀔𑀸. 𑀉𑀧𑁂𑀓𑁆𑀔𑀦𑀸𑀓𑀸𑀭𑁄 𑀉𑀧𑁂𑀓𑁆𑀔𑀦𑀸. 𑀉𑀧𑁂𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑁂 𑀲𑀫𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂 𑀇𑀓𑁆𑀔𑀢𑀺, 𑀦 𑀘𑁄𑀤𑁂𑀢𑀻𑀢𑀺 ¶ 𑀉𑀧𑁂𑀓𑁆𑀔𑀸. 𑀧𑀼𑀕𑁆𑀕𑀮𑀁 𑀉𑀧𑁂𑀓𑁆𑀔𑀸𑀧𑁂𑀢𑀻𑀢𑀺 𑀉𑀧𑁂𑀓𑁆𑀔𑀦𑀸 ¶ . 𑀩𑁄𑀚𑁆𑀛𑀗𑁆𑀕𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀮𑁄𑀓𑀺𑀬𑀉𑀧𑁂𑀓𑁆𑀔𑀦𑀸𑀬 𑀅𑀥𑀺𑀓𑀸 𑀉𑀧𑁂𑀓𑁆𑀔𑀦𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸. 𑀅𑀩𑁆𑀬𑀸𑀧𑀸𑀭𑀸𑀧𑀚𑁆𑀚𑀦𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑁄 𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀧𑀦 𑀘𑀺𑀢𑁆𑀢𑀲𑁆𑀲, 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀤𑀻𑀧𑁂𑀢𑀼𑀁 𑀫𑀚𑁆𑀛𑀢𑁆𑀢𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀦𑀬𑀸 𑀧𑀦𑁂𑀢𑁆𑀣 𑀕𑀡𑁂𑀢𑀩𑁆𑀩𑀸 𑁋 𑀲𑀢𑁆𑀢𑀦𑁆𑀦𑀫𑁆𑀧𑀺 𑀳𑀺 𑀩𑁄𑀚𑁆𑀛𑀗𑁆𑀕𑀸𑀦𑀁 𑀏𑀓𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 𑀏𑀓𑁂𑀓𑀫𑀕𑁆𑀕𑁂 𑀦𑀬𑀲𑀳𑀲𑁆𑀲𑀁 𑀦𑀬𑀲𑀳𑀲𑁆𑀲𑀦𑁆𑀢𑀺 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 𑀏𑀓𑁂𑀓𑀩𑁄𑀚𑁆𑀛𑀗𑁆𑀕𑀯𑀲𑁂𑀦 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀻𑀢𑀺 𑀲𑀢𑁆𑀢 𑀘𑀢𑀼𑀓𑁆𑀓𑀸 𑀅𑀝𑁆𑀞𑀯𑀻𑀲𑀢𑀺. 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀤𑁆𑀯𑀢𑁆𑀢𑀺𑀁𑀲 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀓𑀼𑀲𑀮𑀸𑀦𑁂𑀯. 𑀬𑀲𑁆𑀫𑀸 𑀧𑀦 𑀨𑀮𑀓𑁆𑀔𑀡𑁂𑀧𑀺 𑀩𑁄𑀚𑁆𑀛𑀗𑁆𑀕𑀸 𑀮𑀩𑁆𑀪𑀦𑁆𑀢𑀺, 𑀓𑀼𑀲𑀮𑀳𑁂𑀢𑀼𑀓𑀸𑀦𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀢𑀲𑁆𑀫𑀸 𑀢𑁂𑀲𑀼𑀧𑀺 𑀩𑁄𑀚𑁆𑀛𑀗𑁆𑀕𑀤𑀲𑁆𑀲𑀦𑀢𑁆𑀣𑀁 𑀓𑀼𑀲𑀮𑀦𑀺𑀤𑁆𑀤𑁂𑀲𑀧𑀼𑀩𑁆𑀩𑀗𑁆𑀕𑀫𑀸𑀬 𑀏𑀯 𑀢𑀦𑁆𑀢𑀺𑀬𑀸 𑀯𑀺𑀧𑀸𑀓𑀦𑀬𑁄 𑀆𑀭𑀤𑁆𑀥𑁄. 𑀲𑁄𑀧𑀺 ¶ 𑀏𑀓𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘, 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀘 𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀸𑀓𑁂 𑀧𑀦 𑀓𑀼𑀲𑀮𑀢𑁄 𑀢𑀺𑀕𑀼𑀡𑀸 𑀦𑀬𑀸 𑀓𑀸𑀢𑀩𑁆𑀩𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁪𑁮𑁨. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀩𑁄𑀚𑁆𑀛𑀗𑁆𑀕𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀏𑀯, 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸. 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦𑁂𑀢𑁆𑀣 𑀓𑀼𑀲𑀮𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀯𑀻𑀭𑀺𑀬𑀁 𑀯𑀸 𑀯𑀻𑀫𑀁𑀲𑀁 𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀺𑀓𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀯𑀢𑁆𑀢𑀩𑁆𑀩𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄𑀢𑀺, 𑀨𑀮𑀓𑀸𑀮𑁂𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀏𑀯.

𑀅𑀢𑀻𑀢𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀦𑀧𑀺 𑀦 𑀯𑀢𑁆𑀢𑀩𑁆𑀩𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀯 ¶ 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸 ¶ . 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲𑁂𑀯 𑀧𑀞𑀫𑀦𑀬𑀲𑁆𑀫𑀺𑀁 𑀮𑁄𑀓𑀺𑀬𑀸, 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀲𑁆𑀲 𑀧𑀦 𑀘𑀢𑀽𑀲𑀼𑀧𑀺 𑀦𑀬𑁂𑀲𑀼 𑀇𑀫𑀲𑁆𑀫𑀺𑀜𑁆𑀘 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀮𑁄𑀓𑀼𑀢𑁆𑀢𑀭𑀸𑀬𑁂𑀯𑀸𑀢𑀺 𑀏𑀯𑀫𑀬𑀁 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁮𑁬. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀫𑀕𑁆𑀕𑀯𑀺𑀪𑀗𑁆𑀕𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺𑀆𑀤𑀺 𑀲𑀩𑁆𑀩𑀁 𑀲𑀘𑁆𑀘𑀯𑀺𑀪𑀗𑁆𑀕𑁂 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀪𑀸𑀯𑀦𑀸𑀯𑀲𑁂𑀦 𑀧𑀸𑀝𑀺𑀬𑁂𑀓𑁆𑀓𑀁 𑀤𑀲𑁆𑀲𑀺𑀢𑁂 𑀤𑀼𑀢𑀺𑀬𑀦𑀬𑁂𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀺𑀤𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀬𑀸𑀦𑀁 𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀫𑁂𑀯 𑀓𑀣𑀺𑀢𑀁.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁯𑁦. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ‘𑀅𑀭𑀺𑀬𑁄’𑀢𑀺 𑀅𑀯𑀢𑁆𑀯𑀸 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀯𑀼𑀢𑁆𑀢𑁂𑀧𑀺 𑀅𑀬𑀁 𑀅𑀭𑀺𑀬𑁄 𑀏𑀯. 𑀬𑀣𑀸 𑀳𑀺 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀲𑁆𑀲 𑀭𑀜𑁆𑀜𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄𑀢𑀺 𑀅𑀯𑀼𑀢𑁆𑀢𑁂𑀧𑀺 𑀭𑀸𑀚𑀧𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀏𑀯𑀫𑀬𑀫𑁆𑀧𑀺 𑀅𑀭𑀺𑀬𑁄𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀭𑀺𑀬𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑀺𑀥𑀸𑀧𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁯𑁩. 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁂𑀧𑀺 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀝𑁆𑀞𑀗𑁆𑀕𑀺𑀓𑁄 𑀏𑀯 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑀺 𑀧𑀜𑁆𑀘𑀗𑁆𑀕𑀺𑀓𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀧𑀜𑁆𑀘𑀗𑁆𑀕𑀺𑀓𑁄𑀬𑁂𑀯 𑀳𑁄𑀢𑀻’’𑀢𑀺. 𑀲𑁄 ‘‘𑀲𑀼𑀢𑁆𑀢𑀁 𑀆𑀳𑀭𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀅𑀤𑁆𑀥𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄 𑀇𑀫𑀁 𑀫𑀳𑀸𑀲𑀴𑀸𑀬𑀢𑀦𑀢𑁄 𑀲𑀼𑀢𑁆𑀢𑀧𑁆𑀧𑀤𑁂𑀲𑀁 𑀆𑀳𑀭𑀺𑀲𑁆𑀲𑀢𑀺 ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀺, 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀗𑁆𑀓𑀧𑁆𑀧𑁄, 𑀯𑀸𑀬𑀸𑀫𑁄, 𑀲𑀢𑀺, 𑀬𑁄 ¶ 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺.

𑀢𑀢𑁄 ‘‘𑀏𑀢𑀲𑁆𑀲 𑀅𑀦𑀦𑁆𑀢𑀭𑀁 𑀲𑀼𑀢𑁆𑀢𑀧𑀤𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀆𑀳𑀭𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀆𑀳𑀭𑀢𑀺 𑀲𑀬𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀫𑀲𑁆𑀲𑀸𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧) ‘‘𑀇𑀫𑀺𑀦𑀸 ¶ ¶ 𑀢𑁂 𑀲𑀢𑁆𑀣𑀼𑀲𑀸𑀲𑀦𑁂𑀦 𑀯𑀸𑀤𑁄 𑀪𑀺𑀦𑁆𑀦𑁄; 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀅𑀝𑁆𑀞𑀗𑁆𑀕𑀺𑀓𑁄𑀯 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀇𑀫𑀸𑀦𑀺 𑀧𑀦 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀧𑀼𑀩𑁆𑀩𑁂 𑀧𑀭𑀺𑀲𑀼𑀤𑁆𑀥𑀸𑀦𑀺 𑀯𑀢𑁆𑀢𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀭𑀺𑀲𑀼𑀤𑁆𑀥𑀢𑀭𑀸𑀦𑀺 𑀳𑁄𑀦𑁆𑀢𑀺. 𑀅𑀣 ‘𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄’𑀢𑀺 𑀇𑀤𑀁 𑀓𑀺𑀫𑀢𑁆𑀣𑀁 𑀕𑀳𑀺𑀢𑀦𑁆𑀢𑀺? 𑀅𑀢𑀺𑀭𑁂𑀓𑀓𑀺𑀘𑁆𑀘𑀤𑀲𑁆𑀲𑀦𑀢𑁆𑀣𑀁. 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀫𑀺𑀘𑁆𑀙𑀸𑀯𑀸𑀘𑀁 𑀧𑀚𑀳𑀢𑀺, 𑀲𑀫𑁆𑀫𑀸𑀯𑀸𑀘𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀆𑀚𑀻𑀯𑀸 𑀦𑀢𑁆𑀣𑀺. 𑀇𑀫𑀸𑀦𑀺 𑀧𑀜𑁆𑀘𑀓𑀸𑀭𑀸𑀧𑀓𑀗𑁆𑀕𑀸𑀦𑁂𑀯 𑀫𑀺𑀘𑁆𑀙𑀸𑀯𑀸𑀘𑀁 𑀧𑀚𑀳𑀦𑁆𑀢𑀺; 𑀲𑀫𑁆𑀫𑀸𑀯𑀸𑀘𑀸 𑀧𑀦 𑀲𑀬𑀁 𑀯𑀺𑀭𑀢𑀺𑀯𑀲𑁂𑀦 𑀧𑀽𑀭𑁂𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀧𑀚𑀳𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀆𑀚𑀻𑀯𑀸 𑀦𑀢𑁆𑀣𑀺. 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀭𑀸𑀧𑀓𑀗𑁆𑀕𑀸𑀦𑁂𑀯 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀧𑀚𑀳𑀦𑁆𑀢𑀺; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀦 𑀲𑀬𑀁 𑀯𑀺𑀭𑀢𑀺𑀯𑀲𑁂𑀦 𑀧𑀽𑀭𑁂𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀚𑀳𑀢𑀺, 𑀲𑀫𑁆𑀫𑀸𑀆𑀚𑀻𑀯𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸 𑀦𑀢𑁆𑀣𑀺. 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀭𑀸𑀧𑀓𑀗𑁆𑀕𑀸𑀦𑁂𑀯 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀚𑀳𑀦𑁆𑀢𑀺; 𑀲𑀫𑁆𑀫𑀸𑀆𑀚𑀻𑀯𑁄 𑀧𑀦 𑀲𑀬𑀁 𑀯𑀺𑀭𑀢𑀺𑀯𑀲𑁂𑀦 𑀧𑀽𑀭𑁂𑀢𑀺. 𑀇𑀫𑀁 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀓𑀸𑀭𑀸𑀧𑀓𑀗𑁆𑀕𑀸𑀦𑀁 𑀓𑀺𑀘𑁆𑀘𑀸𑀢𑀺𑀭𑁂𑀓𑀢𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀕𑀳𑀺𑀢𑀁. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄𑀯 𑀳𑁄𑀢𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀦𑀸𑀫 𑀦𑀢𑁆𑀣𑀺.

‘‘𑀬𑀤𑀺 𑀲𑀫𑁆𑀫𑀸𑀯𑀸𑀘𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀯𑀤𑀣, 𑀘𑀢𑀲𑁆𑀲𑁄 𑀲𑀫𑁆𑀫𑀸𑀯𑀸𑀘𑀸𑀘𑁂𑀢𑀦𑀸, 𑀢𑀺𑀲𑁆𑀲𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀘𑁂𑀢𑀦𑀸, 𑀲𑀢𑁆𑀢 𑀲𑀫𑁆𑀫𑀸𑀆𑀚𑀻𑀯𑀘𑁂𑀢𑀦𑀸𑀢𑀺 𑀇𑀫𑀫𑁆𑀳𑀸 𑀘𑁂𑀢𑀦𑀸𑀩𑀳𑀼𑀢𑁆𑀢𑀸 𑀓𑀣𑀁 𑀫𑀼𑀘𑁆𑀘𑀺𑀲𑁆𑀲𑀣? 𑀢𑀲𑁆𑀫𑀸 𑀧𑀜𑁆𑀘𑀗𑁆𑀕𑀺𑀓𑁄𑀯 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄’’𑀢𑀺. ‘‘𑀘𑁂𑀢𑀦𑀸𑀩𑀳𑀼𑀢𑁆𑀢𑀸 𑀘 𑀧𑀫𑀼𑀘𑁆𑀘𑀺𑀲𑁆𑀲𑀸𑀫; 𑀅𑀝𑁆𑀞𑀗𑁆𑀕𑀺𑀓𑁄𑀯 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀢𑀺 𑀘 𑀯𑀓𑁆𑀔𑀸𑀫’’. ‘‘𑀢𑁆𑀯𑀁 𑀢𑀸𑀯 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀪𑀸𑀡𑀓𑁄 𑀳𑁄𑀲𑀺, 𑀦 𑀳𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 ‘‘𑀦 𑀳𑁄𑀫𑀻’’𑀢𑀺 𑀯𑀤𑀢𑀺, ‘‘𑀢𑁆𑀯𑀁 𑀅𑀪𑀸𑀡𑀓𑀢𑁆𑀢𑀸 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 ‘‘𑀪𑀸𑀡𑀓𑁄𑀲𑁆𑀫𑀻’’𑀢𑀺 𑀯𑀤𑀢𑀺, ‘‘𑀲𑀼𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀲𑀼𑀢𑁆𑀢𑀁 𑀆𑀳𑀭𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀆𑀳𑀭𑀢𑀺 𑀲𑀬𑀁 𑀉𑀧𑀭𑀺𑀧𑀡𑁆𑀡𑀸𑀲𑀢𑁄 𑀆𑀳𑀭𑀺𑀢𑀩𑁆𑀩𑀁 𑁋

‘‘𑀓𑀢𑀫𑀸 ¶ 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸? 𑀲𑀫𑁆𑀫𑀸𑀯𑀸𑀘𑀁𑀧𑀳𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀸𑀬𑀁 𑀯𑀤𑀸𑀫𑀺 𑁋 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀲𑀸𑀲𑀯𑀸 𑀧𑀼𑀜𑁆𑀜𑀪𑀸𑀕𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀸; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀅𑀭𑀺𑀬𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀗𑁆𑀕𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀲𑀸𑀲𑀯𑀸 ¶ 𑀧𑀼𑀜𑁆𑀜𑀪𑀸𑀕𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀸? 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀨𑀭𑀼𑀲𑀸𑀬 ¶ 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀲𑀸𑀲𑀯𑀸 𑀧𑀼𑀜𑁆𑀜𑀪𑀸𑀕𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀅𑀭𑀺𑀬𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀗𑁆𑀕𑀸? 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀲𑀯𑀘𑀺𑀢𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑀬𑀢𑁄 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸 𑀅𑀭𑀺𑀬𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀗𑁆𑀕𑀸…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄? 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁𑀧𑀳𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀯𑀤𑀸𑀫𑀺…𑀧𑁂… 𑀉𑀧𑀥𑀺𑀯𑁂𑀧𑀓𑁆𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀅𑀭𑀺𑀬𑁄 𑀅𑀦𑀸𑀲𑀯𑁄 𑀮𑁄𑀓𑀼𑀢𑁆𑀢𑀭𑁄…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄? 𑀲𑀫𑁆𑀫𑀸𑀆𑀚𑀻𑀯𑀁𑀧𑀳𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀸𑀬𑀁 𑀯𑀤𑀸𑀫𑀺…𑀧𑁂… 𑀉𑀧𑀥𑀺𑀯𑁂𑀧𑀓𑁆𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄 𑀅𑀭𑀺𑀬𑁄 𑀅𑀦𑀸𑀲𑀯𑁄 𑀮𑁄𑀓𑀼𑀢𑁆𑀢𑀭𑁄 𑀫𑀕𑁆𑀕𑀗𑁆𑀕𑁄? 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀲𑀯𑀘𑀺𑀢𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑀬𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄 𑀅𑀭𑀺𑀬𑁄 𑀅𑀦𑀸𑀲𑀯𑁄 𑀮𑁄𑀓𑀼𑀢𑁆𑀢𑀭𑁄 𑀫𑀕𑁆𑀕𑀗𑁆𑀕𑁄’’𑀢𑀺 (𑀫. 𑀦𑀺. 𑁩.𑁧𑁩𑁮 𑀆𑀤𑀬𑁄).

𑀏𑀯𑀫𑁂𑀢𑁆𑀣 ¶ 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺, 𑀢𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀳𑀺, 𑀫𑀺𑀘𑁆𑀙𑀸𑀚𑀻𑀯𑀢𑁄 𑀘𑀸𑀢𑀺 𑀏𑀓𑁂𑀓𑀸𑀯 𑀯𑀺𑀭𑀢𑀺 𑀅𑀭𑀺𑀬𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀗𑁆𑀕𑀸𑀢𑀺 𑀯𑀼𑀢𑁆𑀢𑀸. ‘‘𑀓𑀼𑀢𑁄 𑀏𑀢𑁆𑀣 𑀘𑁂𑀢𑀦𑀸𑀩𑀳𑀼𑀢𑁆𑀢𑀁? 𑀓𑀼𑀢𑁄 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀤𑀁 𑀢𑁂 𑀲𑀼𑀢𑁆𑀢𑀁 𑀅𑀓𑀸𑀫𑀓𑀲𑁆𑀲 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀤𑀻𑀧𑁂𑀢𑀺’’. 𑀲𑀘𑁂 𑀏𑀢𑁆𑀢𑀓𑁂𑀦 𑀲𑀮𑁆𑀮𑀓𑁆𑀔𑁂𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀲𑀮𑁆𑀮𑀓𑁆𑀔𑁂𑀢𑀺 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀺…𑀧𑁂… 𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺; 𑀇𑀥𑁂𑀯 ¶ , 𑀲𑀼𑀪𑀤𑁆𑀤, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀳𑀺 𑀅𑀜𑁆𑀜𑁂𑀳𑀻𑀢𑀺 (𑀤𑀻. 𑀦𑀺. 𑁨.𑁨𑁧𑁪).

𑀅𑀜𑁆𑀜𑁂𑀲𑀼𑀧𑀺 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀢𑁂𑀲𑀼 𑀅𑀝𑁆𑀞𑀗𑁆𑀕𑀺𑀓𑁄𑀯 𑀫𑀕𑁆𑀕𑁄 𑀆𑀕𑀢𑁄. 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺 (𑀓𑀣𑀸. 𑁮𑁭𑁨) 𑁋

‘‘𑀅𑀢𑁆𑀣𑁂𑀯 ¶ 𑀲𑀼𑀢𑁆𑀢𑀦𑁆𑀢𑁄𑀢𑀺’’? ‘‘𑀆𑀫𑀦𑁆𑀢𑀸’’‘‘𑀢𑁂𑀦 𑀳𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. 𑀲𑀘𑁂 𑀧𑀦 𑀏𑀢𑁆𑀢𑀓𑁂𑀦𑀸𑀧𑀺 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺, ‘‘𑀕𑀘𑁆𑀙, 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄. 𑀉𑀢𑁆𑀢𑀭𑀺𑀫𑁆𑀧𑀦 𑀓𑀸𑀭𑀡𑀁 𑀯𑀓𑁆𑀔𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀦𑀬𑀸 𑀧𑀦𑁂𑀢𑁆𑀣 𑀕𑀡𑁂𑀢𑀩𑁆𑀩𑀸. 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑁆𑀫𑀺𑀜𑁆𑀳𑀺 𑀏𑀓𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀯𑀺𑀲𑁆𑀲𑀚𑁆𑀚𑀦𑁂 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀧𑀜𑁆𑀘𑀗𑁆𑀕𑀺𑀓𑀫𑀕𑁆𑀕𑁂 𑀏𑀓𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀯𑀺𑀲𑁆𑀲𑀚𑁆𑀚𑀦𑁂 𑀘𑀢𑁆𑀢𑀸𑀭𑀺; 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀲𑁆𑀲𑀚𑁆𑀚𑀦𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀻𑀢𑀺 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀯𑀻𑀲𑀢𑀺. 𑀇𑀢𑀺 𑀧𑀼𑀭𑀺𑀫𑀸𑀦𑀺 𑀅𑀝𑁆𑀞 𑀇𑀫𑀸𑀦𑀺 𑀘 𑀯𑀻𑀲𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀫𑀕𑁆𑀕𑀯𑀺𑀪𑀗𑁆𑀕𑁂 𑀅𑀝𑁆𑀞𑀯𑀻𑀲𑀢𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀸𑀦𑀺 𑀘 𑀔𑁄 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀼𑀲𑀮𑀸𑀦𑁂𑀯. 𑀯𑀺𑀧𑀸𑀓𑁂 𑀧𑀦 𑀓𑀼𑀲𑀮𑀢𑁄 𑀢𑀺𑀕𑀼𑀡𑀸 𑀦𑀬𑀸 𑀓𑀸𑀢𑀩𑁆𑀩𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁫𑁦𑁪. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 ¶ 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀫𑀕𑁆𑀕𑀗𑁆𑀕𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀦𑁂𑀯, 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺. 𑀦𑁂𑀯 𑀳𑀺 𑀫𑀕𑁆𑀕𑁄 𑀦 𑀨𑀮𑀁 𑀫𑀕𑁆𑀕𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦𑁂𑀢𑁆𑀣 𑀓𑀼𑀲𑀮𑀸𑀦𑀺 𑀫𑀕𑁆𑀕𑀳𑁂𑀢𑀼𑀓𑀸𑀦𑀺; 𑀯𑀻𑀭𑀺𑀬𑀁 𑀯𑀸 𑀯𑀻𑀫𑀁𑀲𑀁 𑀯𑀸 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀻𑀦𑀺; 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀺𑀓𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀫𑀕𑁆𑀕𑀸𑀥𑀺𑀧𑀢𑀻𑀦𑀻𑀢𑀺; 𑀨𑀮𑀓𑀸𑀮𑁂𑀧𑀺 𑀦 𑀯𑀢𑁆𑀢𑀩𑁆𑀩𑀸𑀦𑁂𑀯.

𑀅𑀢𑀻𑀢𑀸𑀤𑀻𑀲𑀼 ¶ 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀦𑀧𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺; 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀫𑀕𑁆𑀕𑀗𑁆𑀕𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀫𑀺𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀓𑀣𑀺𑀢𑀸𑀦𑀺; 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀘 𑀮𑁄𑀓𑀼𑀢𑁆𑀢𑀭𑀸𑀦𑁂𑀯𑀸𑀢𑀺 𑀏𑀯𑀫𑀬𑀁 𑀫𑀕𑁆𑀕𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀛𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫𑁦𑁮. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀛𑀸𑀦𑀯𑀺𑀪𑀗𑁆𑀕𑁂 𑀬𑀸 𑀢𑀸𑀯 𑀅𑀬𑀁 𑀲𑀓𑀮𑀲𑁆𑀲𑀸𑀧𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲 𑀧𑀞𑀫𑀁 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀢𑀢𑁆𑀣 𑀇𑀥𑀸𑀢𑀺 𑀯𑀘𑀦𑀁 𑀧𑀼𑀩𑁆𑀩𑀪𑀸𑀕𑀓𑀭𑀡𑀻𑀬𑀲𑀫𑁆𑀧𑀤𑀸𑀬 𑀲𑀫𑁆𑀧𑀦𑁆𑀦𑀲𑁆𑀲 𑀲𑀩𑁆𑀩𑀧𑁆𑀧𑀓𑀸𑀭𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑀁, 𑀅𑀜𑁆𑀜𑀲𑀸𑀲𑀦𑀲𑁆𑀲 𑀘 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀳𑀺 𑀅𑀜𑁆𑀜𑁂𑀳𑀻’’𑀢𑀺 (𑀅. 𑀦𑀺. 𑁪.𑁨𑁪𑁧). 𑀪𑀺𑀓𑁆𑀔𑀽𑀢𑀺 𑀢𑁂𑀲𑀁 𑀛𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀓𑀧𑀼𑀕𑁆𑀕𑀮𑀧𑀭𑀺𑀤𑀻𑀧𑀦𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀯𑀺𑀳𑀭𑀢𑀻𑀢𑀺 𑀇𑀤𑀫𑀲𑁆𑀲 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀇𑀤𑀫𑀲𑁆𑀲 𑀳𑁂𑀝𑁆𑀞𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲 𑀉𑀧𑀭𑀺 𑀛𑀸𑀦𑀸𑀦𑀼𑀬𑁄𑀕𑀲𑁆𑀲 𑀘 𑀉𑀧𑀓𑀸𑀭𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀢𑁄 𑀅𑀘𑀯𑀦𑀥𑀫𑁆𑀫𑀢𑀸𑀧𑀭𑀺𑀤𑀻𑀧𑀦𑀁. 𑀲𑀫𑀸𑀤𑀸𑀬𑀸𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀢𑀻𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀸𑀬 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦𑀁.

𑀇𑀦𑁆𑀤𑁆𑀭𑀺𑀬𑁂𑀲𑀽𑀢𑀺 𑀇𑀤𑀫𑀲𑁆𑀲 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑀽𑀫𑀺𑀧𑀭𑀺𑀤𑀻𑀧𑀦𑀁; 𑀭𑀓𑁆𑀔𑀺𑀢𑀩𑁆𑀩𑁄𑀓𑀸𑀲𑀧𑀭𑀺𑀤𑀻𑀧𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺 𑀏𑀯. 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀇𑀤𑀫𑀲𑁆𑀲 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀪𑀸𑀯𑀧𑀭𑀺𑀤𑀻𑀧𑀦𑀁. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀇𑀤𑀫𑀲𑁆𑀲 𑀲𑀦𑁆𑀢𑁄𑀲𑀸𑀤𑀺𑀕𑀼𑀡𑀧𑀭𑀺𑀤𑀻𑀧𑀦𑀁. 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄𑀢𑀺 𑀇𑀤𑀫𑀲𑁆𑀲 𑀓𑀸𑀭𑀡𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀸𑀢𑀘𑁆𑀘𑀁 ¶ 𑀦𑁂𑀧𑀓𑁆𑀓𑀦𑁆𑀢𑀺 𑀇𑀤𑀫𑀲𑁆𑀲 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑁂𑀦 𑀯𑀻𑀭𑀺𑀬𑁂𑀦 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀧𑀭𑀺𑀤𑀻𑀧𑀦𑀁 ¶ . 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄𑀢𑀺 𑀇𑀤𑀫𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀧𑀭𑀺𑀤𑀻𑀧𑀦𑀁.

𑀲𑁄 𑀅𑀪𑀺𑀓𑁆𑀓𑀦𑁆𑀢𑁂…𑀧𑁂… 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺 𑀇𑀤𑀫𑀲𑁆𑀲 𑀲𑀩𑁆𑀩𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑀦𑁆𑀦𑀸𑀕𑀢𑀢𑁆𑀢𑀧𑀭𑀺𑀤𑀻𑀧𑀦𑀁. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻𑀢𑀺 𑀇𑀤𑀫𑀲𑁆𑀲 𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦𑀁. 𑀅𑀭𑀜𑁆𑀜𑀁…𑀧𑁂… 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀦𑁆𑀢𑀺 𑀇𑀤𑀫𑀲𑁆𑀲 𑀲𑁂𑀦𑀸𑀲𑀦𑀧𑁆𑀧𑀪𑁂𑀤𑀦𑀺𑀭𑀸𑀤𑀻𑀦𑀯𑀢𑀸𑀦𑀺𑀲𑀁𑀲𑀧𑀭𑀺𑀤𑀻𑀧𑀦𑀁. 𑀲𑁄 ¶ 𑀅𑀭𑀜𑁆𑀜𑀕𑀢𑁄 𑀯𑀸𑀢𑀺 𑀇𑀤𑀫𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑁂𑀦𑀸𑀲𑀦𑁂𑀦 𑀬𑀼𑀢𑁆𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀦𑀺𑀲𑀻𑀤𑀢𑀻𑀢𑀺 𑀇𑀤𑀫𑀲𑁆𑀲 𑀬𑁄𑀕𑀸𑀦𑀼𑀭𑀽𑀧𑀇𑀭𑀺𑀬𑀸𑀧𑀣𑀧𑀭𑀺𑀤𑀻𑀧𑀦𑀁. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀇𑀤𑀫𑀲𑁆𑀲 𑀬𑁄𑀕𑀸𑀭𑀫𑁆𑀪𑀧𑀭𑀺𑀤𑀻𑀧𑀦𑀁. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸𑀢𑀺𑀆𑀤𑀺 𑀧𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀧𑀭𑀺𑀤𑀻𑀧𑀦𑀁. 𑀢𑀲𑁆𑀲𑁂𑀯 𑀧𑀳𑀻𑀦𑀦𑀻𑀯𑀭𑀡𑀲𑁆𑀲 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀺 𑀧𑀝𑀺𑀧𑀸𑀝𑀺𑀬𑀸 𑀛𑀸𑀦𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁.

𑀅𑀧𑀺 𑀘 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀛𑀸𑀦𑀼𑀧𑁆𑀧𑀸𑀤𑀓𑁄 𑀪𑀺𑀓𑁆𑀔𑀼. 𑀇𑀤𑀸𑀦𑀺 𑀬𑀲𑁆𑀫𑀸 𑀛𑀸𑀦𑀼𑀧𑁆𑀧𑀸𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑁆𑀢𑀸𑀭𑀺 𑀲𑀻𑀮𑀸𑀦𑀺 𑀲𑁄𑀥𑁂𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀉𑀧𑀤𑀺𑀲𑀢𑀺. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀻𑀮𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀁. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁. 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀛𑀸𑀦𑀪𑀸𑀯𑀦𑀸𑀬 𑀉𑀧𑀓𑀸𑀭𑀓𑁂 𑀥𑀫𑁆𑀫𑁂. 𑀲𑁄 𑀅𑀪𑀺𑀓𑁆𑀓𑀦𑁆𑀢𑁂𑀢𑀺𑀆𑀤𑀺𑀦𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀧𑀭𑀺𑀳𑀸𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀘 𑀅𑀲𑀫𑁆𑀫𑁄𑀲𑀸𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑀸𑀬𑁄𑀕𑀁. 𑀲𑁄 𑀯𑀺𑀯𑀺𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀁. 𑀲𑁄 ¶ 𑀅𑀭𑀜𑁆𑀜𑀕𑀢𑁄 𑀯𑀸𑀢𑀺𑀆𑀤𑀺𑀦𑀸 𑀢𑀁 𑀲𑁂𑀦𑀸𑀲𑀦𑀁 𑀉𑀧𑀕𑀢𑀲𑁆𑀲 𑀛𑀸𑀦𑀸𑀦𑀼𑀭𑀽𑀧𑀇𑀭𑀺𑀬𑀸𑀧𑀣𑀜𑁆𑀘𑁂𑀯 𑀛𑀸𑀦𑀪𑀸𑀯𑀦𑀸𑀭𑀫𑁆𑀪𑀜𑁆𑀘. 𑀲𑁄 𑀅𑀪𑀺𑀚𑁆𑀛𑀦𑁆𑀢𑀺𑀆𑀤𑀺𑀦𑀸 𑀛𑀸𑀦𑀪𑀸𑀯𑀦𑀸𑀭𑀫𑁆𑀪𑁂𑀦 𑀛𑀸𑀦𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑁆𑀧𑀳𑀸𑀦𑀁. 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬𑀸𑀢𑀺𑀆𑀤𑀺𑀦𑀸 𑀏𑀯𑀁 𑀧𑀳𑀻𑀦𑀚𑁆𑀛𑀸𑀦𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑁆𑀲 𑀲𑀩𑁆𑀩𑀚𑁆𑀛𑀸𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀁 𑀉𑀧𑀤𑀺𑀲𑀢𑀻𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁦𑁯. 𑀇𑀤𑀸𑀦𑀺 ¶ 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀁 𑀫𑀸𑀢𑀺𑀓𑀁 𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀻𑀳𑀺 𑀤𑀲𑀳𑀺 𑀧𑀤𑁂𑀳𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀫𑁂𑀯 𑀓𑀣𑀺𑀢𑀁. 𑀢𑀜𑁆𑀳𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑀺𑀝𑁆𑀞𑀢𑁆𑀢𑀸 𑀤𑀺𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑁂𑀯 𑀔𑀫𑀦𑀯𑀲𑁂𑀦 𑀔𑀦𑁆𑀢𑀺, 𑀭𑀼𑀘𑁆𑀘𑀦𑀯𑀲𑁂𑀦 𑀭𑀼𑀘𑀺, 𑀕𑀳𑀡𑀯𑀲𑁂𑀦 𑀆𑀤𑀸𑀬𑁄, 𑀲𑀪𑀸𑀯𑀝𑁆𑀞𑁂𑀦 𑀥𑀫𑁆𑀫𑁄, 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 ¶ 𑀯𑀺𑀦𑀬𑁄, 𑀢𑀤𑀼𑀪𑀬𑁂𑀦𑀸𑀧𑀺 𑀥𑀫𑁆𑀫𑀯𑀺𑀦𑀬𑁄, 𑀧𑀯𑀼𑀢𑁆𑀢𑀯𑀲𑁂𑀦 𑀧𑀸𑀯𑀘𑀦𑀁, 𑀲𑁂𑀝𑁆𑀞𑀘𑀭𑀺𑀬𑀝𑁆𑀞𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀦𑀼𑀲𑀺𑀝𑁆𑀞𑀺𑀤𑀸𑀦𑀯𑀲𑁂𑀦 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀻𑀲𑀼 𑀇𑀫𑀺𑀲𑁆𑀲𑀸 𑀩𑀼𑀤𑁆𑀥𑀤𑀺𑀝𑁆𑀞𑀺𑀬𑀸, 𑀇𑀫𑀺𑀲𑁆𑀲𑀸 𑀩𑀼𑀤𑁆𑀥𑀔𑀦𑁆𑀢𑀺𑀬𑀸, 𑀇𑀫𑀺𑀲𑁆𑀲𑀸 𑀩𑀼𑀤𑁆𑀥𑀭𑀼𑀘𑀺𑀬𑀸, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀆𑀤𑀸𑀬𑁂, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀥𑀫𑁆𑀫𑁂, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀯𑀺𑀦𑀬𑁂.

‘‘𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀁𑀬𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀁𑀬𑁄𑀕𑀸𑀬, 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑀘𑀬𑀸𑀬, 𑀉𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀬𑀸, 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸, 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀯𑀺𑀯𑁂𑀓𑀸𑀬, 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬, 𑀤𑀼𑀩𑁆𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀼𑀪𑀭𑀢𑀸𑀬𑀸’𑀢𑀺 𑀏𑀓𑀁𑀲𑁂𑀦 𑀳𑀺, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬…𑀧𑁂… 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀤𑀼𑀩𑁆𑀪𑀭𑀢𑀸𑀬𑀸’𑀢𑀺. 𑀏𑀓𑀁𑀲𑁂𑀦 𑀳𑀺, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 (𑀅. 𑀦𑀺. 𑁮.𑁫𑁩; 𑀘𑀽𑀴𑀯. 𑁪𑁦𑁬).

𑀏𑀯𑀁 𑀯𑀼𑀢𑁆𑀢𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀥𑀫𑁆𑀫𑀯𑀺𑀦𑀬𑁂 ¶ , 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀧𑀸𑀯𑀘𑀦𑁂, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑁂, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀲𑀢𑁆𑀣𑀼𑀲𑀸𑀲𑀦𑁂𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑀁 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀔𑀸𑀢𑀁 𑀲𑀓𑀮𑀁 𑀲𑀸𑀲𑀦𑀁 𑀪𑀕𑀯𑀢𑀸 𑀤𑀺𑀝𑁆𑀞𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀘 𑀤𑀺𑀝𑁆𑀞𑀺, 𑀪𑀕𑀯𑀢𑁄 𑀔𑀫𑀦𑀯𑀲𑁂𑀦 𑀔𑀦𑁆𑀢𑀺, 𑀭𑀼𑀘𑁆𑀘𑀦𑀯𑀲𑁂𑀦 𑀭𑀼𑀘𑀺, 𑀕𑀳𑀡𑀯𑀲𑁂𑀦 𑀆𑀤𑀸𑀬𑁄. 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀲𑁄𑀯 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀯𑀺𑀦𑀢𑀻𑀢𑀺 ¶ 𑀯𑀺𑀦𑀬𑁄. 𑀥𑀫𑁆𑀫𑁄 𑀘 𑀲𑁄 𑀯𑀺𑀦𑀬𑁄 𑀘𑀸𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀓𑀼𑀲𑀮𑀥𑀫𑁆𑀫𑁂𑀳𑀺 𑀯𑀸 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀏𑀲 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬…𑀧𑁂… 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 ‘𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺.

𑀥𑀫𑁆𑀫𑁂𑀦 ¶ 𑀯𑀸 𑀯𑀺𑀦𑀬𑁄, 𑀦 𑀤𑀡𑁆𑀟𑀸𑀤𑀻𑀳𑀻𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀡𑁆𑀟𑁂𑀦𑁂𑀓𑁂 𑀤𑀫𑀬𑀦𑁆𑀢𑀺, 𑀅𑀗𑁆𑀓𑀼𑀲𑁂𑀳𑀺 𑀓𑀲𑀸𑀳𑀺 𑀘;

𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀦𑀸𑀕𑁄 𑀤𑀦𑁆𑀢𑁄 𑀫𑀳𑁂𑀲𑀺𑀦𑀸’’𑀢𑀺. (𑀘𑀽𑀴𑀯. 𑁩𑁪𑁨; 𑀫. 𑀦𑀺. 𑁨.𑁩𑁫𑁨);

𑀢𑀣𑀸 𑁋

‘‘𑀥𑀫𑁆𑀫𑁂𑀦 𑀦𑀻𑀬𑀫𑀸𑀦𑀸𑀦𑀁, 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢’’𑀦𑁆𑀢𑀺; (𑀫𑀳𑀸𑀯. 𑁬𑁩);

𑀥𑀫𑁆𑀫𑀸𑀬 𑀯𑀸 𑀯𑀺𑀦𑀬𑁄 𑀥𑀫𑁆𑀫𑀯𑀺𑀦𑀬𑁄. 𑀅𑀦𑀯𑀚𑁆𑀚𑀥𑀫𑁆𑀫𑀢𑁆𑀣𑀜𑁆𑀳𑁂𑀲 𑀯𑀺𑀦𑀬𑁄, 𑀦 𑀪𑀯𑀪𑁄𑀕𑀸𑀫𑀺𑀲𑀢𑁆𑀣𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀚𑀦𑀓𑀼𑀳𑀦𑀢𑁆𑀣’’𑀦𑁆𑀢𑀺 (𑀅. 𑀦𑀺. 𑁪.𑁨𑁫) 𑀯𑀺𑀢𑁆𑀣𑀸𑀭𑁄. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀆𑀳 𑁋 ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁯). 𑀯𑀺𑀲𑀺𑀝𑁆𑀞𑀁 𑀯𑀸 𑀦𑀬𑀢𑀻𑀢𑀺 𑀯𑀺𑀦𑀬𑁄. 𑀥𑀫𑁆𑀫𑀢𑁄 𑀯𑀺𑀦𑀬𑁄 𑀥𑀫𑁆𑀫𑀯𑀺𑀦𑀬𑁄. 𑀲𑀁𑀲𑀸𑀭𑀥𑀫𑁆𑀫𑀢𑁄 𑀳𑀺 𑀲𑁄𑀓𑀸𑀤𑀺𑀥𑀫𑁆𑀫𑀢𑁄 𑀯𑀸 𑀏𑀲 𑀯𑀺𑀲𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀦𑀬𑀢𑀺. 𑀥𑀫𑁆𑀫𑀲𑁆𑀲 𑀯𑀸 𑀯𑀺𑀦𑀬𑁄, 𑀦 𑀢𑀺𑀢𑁆𑀣𑀓𑀭𑀸𑀦𑀦𑁆𑀢𑀺 𑀥𑀫𑁆𑀫𑀯𑀺𑀦𑀬𑁄; 𑀥𑀫𑁆𑀫𑀪𑀽𑀢𑁄 𑀳𑀺 𑀪𑀕𑀯𑀸, 𑀢𑀲𑁆𑀲𑁂𑀯 𑀯𑀺𑀦𑀬𑁄. 𑀬𑀲𑁆𑀫𑀸 𑀯𑀸 𑀥𑀫𑁆𑀫𑀸𑀬𑁂𑀯 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀧𑀳𑀸𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀘, 𑀢𑀲𑁆𑀫𑀸 𑀏𑀲 𑀥𑀫𑁆𑀫𑁂𑀲𑀼 𑀯𑀺𑀦𑀬𑁄, 𑀦 𑀲𑀢𑁆𑀢𑁂𑀲𑀼, 𑀦 𑀚𑀻𑀯𑁂𑀲𑀼 𑀘𑀸𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀲𑀸𑀢𑁆𑀣𑀲𑀩𑁆𑀬𑀜𑁆𑀚𑀦𑀢𑀸𑀤𑀻𑀳𑀺 𑀅𑀜𑁆𑀜𑁂𑀲𑀁 𑀯𑀘𑀦𑀢𑁄 𑀧𑀥𑀸𑀦𑀁 𑀯𑀘𑀦𑀦𑁆𑀢𑀺 𑀧𑀯𑀘𑀦𑀁; 𑀧𑀯𑀘𑀦𑀫𑁂𑀯 𑀧𑀸𑀯𑀘𑀦𑀁. 𑀲𑀩𑁆𑀩𑀘𑀭𑀺𑀬𑀸𑀳𑀺 𑀯𑀺𑀲𑀺𑀝𑁆𑀞𑀘𑀭𑀺𑀬𑀸𑀪𑀸𑀯𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 ¶ 𑀲𑀢𑁆𑀣𑀼𑀪𑀽𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀺 𑀲𑀢𑁆𑀣𑀼𑀲𑀸𑀲𑀦𑀁; 𑀲𑀢𑁆𑀣𑀼𑀪𑀽𑀢𑀁 𑀯𑀸 𑀲𑀸𑀲𑀦𑀦𑁆𑀢𑀺𑀧𑀺 𑀲𑀢𑁆𑀣𑀼𑀲𑀸𑀲𑀦𑀁. ‘‘𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀳𑀺 𑀥𑀫𑁆𑀫𑀯𑀺𑀦𑀬𑁄𑀯 𑀲𑀢𑁆𑀣𑀸𑀢𑀺 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 ¶ 𑀧𑀦 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂 𑀲𑀩𑁆𑀩𑀧𑀓𑀸𑀭𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑁄 𑀪𑀺𑀓𑁆𑀔𑀼 𑀤𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀢𑁆𑀭, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 ‘𑀇𑀫𑀺𑀲𑁆𑀲𑀸’𑀢𑀺 𑀘 ‘𑀇𑀫𑀲𑁆𑀫𑀺’𑀦𑁆𑀢𑀺 𑀘 𑀅𑀬𑀁 𑀦𑀺𑀬𑀫𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀅𑀬𑀁 ‘𑀇𑀥𑀸’𑀢𑀺 𑀫𑀸𑀢𑀺𑀓𑀸𑀧𑀤𑀦𑀺𑀤𑁆𑀤𑁂𑀲𑀲𑁆𑀲 𑀅𑀢𑁆𑀣𑁄.

𑁫𑁧𑁦. 𑀪𑀺𑀓𑁆𑀔𑀼𑀦𑀺𑀤𑁆𑀤𑁂𑀲𑁂 𑀲𑀫𑀜𑁆𑀜𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺𑀬𑀸, 𑀯𑁄𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀜𑁆𑀜𑀸𑀬 𑀏𑀯 𑀳𑀺 𑀏𑀓𑀘𑁆𑀘𑁄 𑀪𑀺𑀓𑁆𑀔𑀽𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀦𑀺𑀫𑀦𑁆𑀢𑀦𑀸𑀤𑀺𑀫𑁆𑀳𑀺 𑀪𑀺𑀓𑁆𑀔𑀽𑀲𑀼 𑀕𑀡𑀻𑀬𑀫𑀸𑀦𑁂𑀲𑀼 𑀲𑀸𑀫𑀡𑁂𑀭𑁂𑀧𑀺 𑀕𑀳𑁂𑀢𑁆𑀯𑀸 ‘𑀲𑀢𑀁 𑀪𑀺𑀓𑁆𑀔𑀽, 𑀲𑀳𑀲𑁆𑀲𑀁 𑀪𑀺𑀓𑁆𑀔𑀽’𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀝𑀺𑀚𑀸𑀦𑀦𑁂𑀦. 𑀧𑀝𑀺𑀜𑁆𑀜𑀸𑀬𑀧𑀺 ¶ 𑀳𑀺 𑀏𑀓𑀘𑁆𑀘𑁄 𑀪𑀺𑀓𑁆𑀔𑀽𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀲 ‘‘𑀓𑁄 𑀏𑀢𑁆𑀣 𑀆𑀯𑀼𑀲𑁄’’𑀢𑀺? ‘‘𑀅𑀳𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁧𑁦.𑁯𑁬) 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑀺𑀓𑀸 𑀧𑀝𑀺𑀜𑁆𑀜𑀸. 𑀭𑀢𑁆𑀢𑀺𑀪𑀸𑀕𑁂 𑀧𑀦 𑀤𑀼𑀲𑁆𑀲𑀻𑀮𑀸𑀧𑀺 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀥𑀫𑁆𑀫𑀺𑀓𑀸𑀬 𑀧𑀝𑀺𑀜𑁆𑀜𑀸𑀬 𑀅𑀪𑀽𑀢𑀢𑁆𑀣𑀸𑀬 ‘‘𑀫𑀬𑀁 𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑀺.

𑀪𑀺𑀓𑁆𑀔𑀢𑀻𑀢𑀺 𑀬𑀸𑀘𑀢𑀺. 𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀢𑀺, 𑀪𑀺𑀓𑁆𑀔𑀁 𑀏𑀲𑀢𑀺 𑀕𑀯𑁂𑀲𑀢𑀺, 𑀲𑁄 𑀢𑀁 𑀮𑀪𑀢𑀼 𑀯𑀸 𑀫𑀸 𑀯𑀸, 𑀅𑀣 𑀔𑁄 𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼. 𑀪𑀺𑀓𑁆𑀔𑀓𑁄𑀢𑀺 𑀩𑁆𑀬𑀜𑁆𑀚𑀦𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁; 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀬 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄 𑀦𑀸𑀫. 𑀬𑁄 𑀳𑀺 𑀓𑁄𑀘𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀚𑀻𑀯𑀺𑀢𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀧𑀭𑀧𑁆𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼.

𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀪𑁂𑀤𑁂𑀦 𑀪𑀺𑀦𑁆𑀦𑀁 𑀧𑀝𑀁 𑀥𑀸𑀭𑁂𑀢𑀻𑀢𑀺 𑀪𑀺𑀦𑁆𑀦𑀧𑀝𑀥𑀭𑁄. 𑀢𑀢𑁆𑀣 𑀲𑀢𑁆𑀣𑀓𑀘𑁆𑀙𑁂𑀤𑀦𑁂𑀦 𑀅𑀕𑁆𑀖𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀲𑁆𑀲𑀕𑁆𑀖𑀦𑀓𑁄𑀧𑀺 𑀳𑀺 𑀧𑀝𑁄 𑀲𑀢𑁆𑀣𑀓𑁂𑀦 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 ¶ 𑀙𑀺𑀦𑁆𑀦𑁄 𑀪𑀺𑀦𑁆𑀦𑀕𑁆𑀖𑁄 𑀳𑁄𑀢𑀺, 𑀧𑀼𑀭𑀺𑀫𑀕𑁆𑀖𑀢𑁄 𑀉𑀧𑀟𑁆𑀠𑀫𑁆𑀧𑀺 𑀦 𑀅𑀕𑁆𑀖𑀢𑀺. 𑀲𑀼𑀢𑁆𑀢𑀲𑀁𑀲𑀺𑀩𑁆𑀩𑀦𑁂𑀦 𑀨𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀲𑀫𑁆𑀨𑀲𑁆𑀲𑁄𑀧𑀺 𑀳𑀺 𑀧𑀝𑁄 𑀲𑀼𑀢𑁆𑀢𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑁄 𑀪𑀺𑀦𑁆𑀦𑀨𑀲𑁆𑀲𑁄 𑀳𑁄𑀢𑀺, 𑀔𑀭𑀲𑀫𑁆𑀨𑀲𑁆𑀲𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀽𑀘𑀺𑀫𑀮𑀸𑀤𑀻𑀳𑀺 𑀯𑀡𑁆𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀧𑀭𑀺𑀲𑀼𑀤𑁆𑀥𑁄𑀧𑀺 𑀳𑀺 𑀧𑀝𑁄 𑀲𑀽𑀘𑀺𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀲𑀽𑀘𑀺𑀫𑀮𑁂𑀦, 𑀳𑀢𑁆𑀣𑀲𑁂𑀤𑀫𑀮𑀚𑀮𑁆𑀮𑀺𑀓𑀸𑀤𑀻𑀳𑀺 ¶ , 𑀅𑀯𑀲𑀸𑀦𑁂 𑀭𑀚𑀦𑀓𑀧𑁆𑀧𑀓𑀭𑀡𑁂𑀳𑀺 𑀘 𑀪𑀺𑀦𑁆𑀦𑀯𑀡𑁆𑀡𑁄 𑀳𑁄𑀢𑀺, 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀢𑀺. 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀪𑀺𑀦𑁆𑀦𑀧𑀝𑀥𑀸𑀭𑀡𑀢𑁄 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼. 𑀕𑀺𑀳𑀻𑀯𑀢𑁆𑀣𑀯𑀺𑀲𑀪𑀸𑀕𑀸𑀦𑀁 𑀯𑀸 𑀓𑀸𑀲𑀸𑀯𑀸𑀦𑀁 𑀥𑀸𑀭𑀡𑀫𑀢𑁆𑀢𑁂𑀦𑁂𑀯 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼.

𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀼. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀜𑁆𑀘 𑀓𑀺𑀮𑁂𑀲𑁂 𑀪𑀺𑀦𑁆𑀤𑀢𑀻𑀢𑀺 𑀪𑀺𑀓𑁆𑀔𑀼. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑁄, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑁄, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀝𑁆𑀞 𑀓𑀺𑀮𑁂𑀲𑁂 𑀪𑀺𑀦𑁆𑀤𑀢𑀻𑀢𑀺 𑀪𑀺𑀓𑁆𑀔𑀼. 𑀏𑀢𑁆𑀢𑀸𑀯𑀢𑀸 ¶ 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀤𑀲𑁆𑀲𑀺𑀢𑀸. 𑀪𑀺𑀦𑁆𑀦𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀦 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀜𑁆𑀘 𑀓𑀺𑀮𑁂𑀲𑁂 𑀪𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁄. 𑀲𑀓𑀤𑀸𑀕𑀸𑀫𑀻 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑁄, 𑀅𑀦𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑁄, 𑀅𑀭𑀳𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀝𑁆𑀞 𑀓𑀺𑀮𑁂𑀲𑁂 𑀪𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁄. 𑀏𑀯𑀫𑀬𑀁 𑀘𑀢𑀼𑀩𑁆𑀩𑀺𑀥𑁄 𑀨𑀮𑀝𑁆𑀞𑁄 𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀼 𑀦𑀸𑀫.

𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀢𑀺 𑀏𑀢𑁆𑀣 𑀤𑁆𑀯𑁂 𑀑𑀥𑀻 𑁋 𑀫𑀕𑁆𑀕𑁄𑀥𑀺 𑀘 𑀓𑀺𑀮𑁂𑀲𑁄𑀥𑀺 𑀘. 𑀑𑀥𑀺 𑀦𑀸𑀫 𑀲𑀻𑀫𑀸, 𑀫𑀭𑀺𑀬𑀸𑀤𑀸. 𑀢𑀢𑁆𑀣 𑀲𑁄𑀢𑀸𑀧𑀦𑁆𑀦𑁄 𑀫𑀕𑁆𑀕𑁄𑀥𑀺𑀦𑀸 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼. 𑀢𑀲𑁆𑀲 𑀳𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀏𑀓𑁂𑀦𑁂𑀯 𑀑𑀥𑀺𑀦𑀸 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀦 𑀲𑀓𑀮𑁂𑀦 𑀫𑀕𑁆𑀕𑀘𑀢𑀼𑀓𑁆𑀓𑁂𑀦. 𑀲𑀓𑀤𑀸𑀕𑀸𑀫𑀻𑀅𑀦𑀸𑀕𑀸𑀫𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀢𑀸𑀧𑀦𑁆𑀦𑁄 𑀘 𑀓𑀺𑀮𑁂𑀲𑁄𑀥𑀺𑀦𑀸𑀧𑀺 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼. 𑀢𑀲𑁆𑀲 𑀳𑀺 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂𑀲𑀼 𑀑𑀥𑀺𑀦𑀸𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁. 𑀅𑀭𑀳𑀸 𑀧𑀦 𑀅𑀦𑁄𑀥𑀺𑀲𑁄𑀯 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼. 𑀢𑀲𑁆𑀲 𑀳𑀺 𑀫𑀕𑁆𑀕𑀘𑀢𑀼𑀓𑁆𑀓𑁂𑀦 𑀅𑀦𑁄𑀥𑀺𑀦𑀸𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀦 𑀏𑀓𑀸𑀬 𑀫𑀕𑁆𑀕𑀲𑀻𑀫𑀸𑀬. 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂𑀲𑀼 𑀘 𑀅𑀦𑁄𑀥𑀺𑀲𑁄𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸. 𑀏𑀓𑀸𑀧𑀺 𑀳𑀺 𑀓𑀺𑀮𑁂𑀲𑀲𑀻𑀫𑀸 𑀞𑀺𑀢𑀸 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑁄 𑀉𑀪𑀬𑀣𑀸𑀧𑀺 𑀅𑀦𑁄𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼.

𑀲𑁂𑀓𑁆𑀔𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀅𑀭𑀺𑀬𑀸. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀓𑁆𑀔𑀸. 𑀢𑁂𑀲𑀼 𑀬𑁄 𑀓𑁄𑀘𑀺 𑀲𑁂𑀓𑁆𑀔𑁄 𑀪𑀺𑀓𑁆𑀔𑀼𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 ¶ 𑀲𑀺𑀓𑁆𑀔𑀢𑀻𑀢𑀺 𑀅𑀲𑁂𑀓𑁆𑀔𑁄. 𑀲𑁂𑀓𑁆𑀔𑀥𑀫𑁆𑀫𑁂 𑀅𑀢𑀺𑀓𑁆𑀓𑀫𑁆𑀫 𑀅𑀕𑁆𑀕𑀨𑀮𑁂 𑀞𑀺𑀢𑁄 𑀢𑀢𑁄 𑀉𑀢𑁆𑀢𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑁄 𑀅𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀲𑁂𑀲𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀦𑁂𑀯 𑀲𑀺𑀓𑁆𑀔𑀢𑀺, 𑀦 𑀲𑀺𑀓𑁆𑀔𑀺𑀢𑁆𑀯𑀸 𑀞𑀺𑀢𑁄𑀢𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀮𑀕𑁆𑀕𑀁 ¶ 𑀲𑀫𑀸𑀥𑀺𑀕𑁆𑀕𑀁 𑀧𑀜𑁆𑀜𑀕𑁆𑀕𑀁 𑀯𑀺𑀫𑀼𑀢𑁆𑀢𑀕𑁆𑀕𑀦𑁆𑀢𑀺 𑀇𑀤𑀁 𑀅𑀕𑁆𑀕𑀁 𑀧𑀢𑁆𑀯𑀸 𑀞𑀺𑀢𑀢𑁆𑀢𑀸 𑀅𑀕𑁆𑀕𑁄 𑀪𑀺𑀓𑁆𑀔𑀼 𑀦𑀸𑀫. 𑀪𑀤𑁆𑀭𑁄𑀢𑀺 𑀅𑀧𑀸𑀧𑀓𑁄. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀳𑀺 𑀬𑀸𑀯 𑀅𑀭𑀳𑀸 𑀢𑀸𑀯 𑀪𑀤𑁆𑀭𑁂𑀦 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀤𑁆𑀭𑁄 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀫𑀡𑁆𑀟𑁄 𑀪𑀺𑀓𑁆𑀔𑀽𑀢𑀺 𑀧𑀲𑀦𑁆𑀦𑁄 𑀪𑀺𑀓𑁆𑀔𑀼; 𑀲𑀧𑁆𑀧𑀺𑀫𑀡𑁆𑀟𑁄 𑀯𑀺𑀬 𑀅𑀦𑀸𑀯𑀺𑀮𑁄 𑀯𑀺𑀧𑁆𑀧𑀲𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀸𑀭𑁄𑀢𑀺 𑀢𑁂𑀳𑀺𑀬𑁂𑀯 𑀲𑀻𑀮𑀲𑀸𑀭𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀦𑀻𑀮𑀲𑀫𑀦𑁆𑀦𑀸𑀕𑀫𑁂𑀦 𑀦𑀻𑀮𑁄 𑀧𑀝𑁄 𑀯𑀺𑀬, 𑀲𑀸𑀭𑁄 𑀪𑀺𑀓𑁆𑀔𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀕𑀢𑀓𑀺𑀮𑁂𑀲𑀨𑁂𑀕𑁆𑀕𑀼𑀪𑀸𑀯𑀢𑁄 𑀯𑀸 𑀔𑀻𑀡𑀸𑀲𑀯𑁄𑀯 𑀲𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ¶ 𑀘 ‘‘𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀼, 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼, 𑀲𑁂𑀓𑁆𑀔𑁄 𑀪𑀺𑀓𑁆𑀔𑀽’’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀢𑁆𑀢 𑀲𑁂𑀓𑁆𑀔𑀸 𑀓𑀣𑀺𑀢𑀸. ‘‘𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀪𑀺𑀓𑁆𑀔𑀼, 𑀅𑀦𑁄𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀼, 𑀅𑀲𑁂𑀓𑁆𑀔𑁄 𑀪𑀺𑀓𑁆𑀔𑀼, 𑀅𑀕𑁆𑀕𑁄 𑀪𑀺𑀓𑁆𑀔𑀼, 𑀫𑀡𑁆𑀟𑁄 𑀪𑀺𑀓𑁆𑀔𑀽’’𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄. ‘‘𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑁄’’𑀢𑀺 𑀏𑀢𑁆𑀣 𑀧𑀼𑀣𑀼𑀚𑁆𑀚𑀦𑁄𑀯 𑀓𑀣𑀺𑀢𑁄. 𑀲𑁂𑀲𑀝𑁆𑀞𑀸𑀦𑁂𑀲𑀼 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄, 𑀲𑀢𑁆𑀢 𑀲𑁂𑀓𑁆𑀔𑀸, 𑀔𑀻𑀡𑀸𑀲𑀯𑁄𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀓𑀣𑀺𑀢𑀸.

𑀏𑀯𑀁 𑀲𑀫𑀜𑁆𑀜𑀸𑀤𑀻𑀳𑀺 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀆𑀕𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀆𑀳𑀝𑀢𑁆𑀢𑀸 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀢𑁄 𑀏𑀓𑀲𑁆𑀫𑀺𑀁 𑀓𑀫𑁆𑀫𑁂 𑀲𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁂𑀦. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸 𑀓𑀸𑀢𑀩𑁆𑀩𑁂𑀦. 𑀓𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀺𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦. 𑀅𑀓𑀼𑀧𑁆𑀧𑁂𑀦𑀸𑀢𑀺 ¶ 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀸𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀓𑁄𑀧𑁂𑀢𑀩𑁆𑀩𑀢𑀁 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀁 𑀉𑀧𑀕𑀢𑁂𑀦. 𑀞𑀸𑀦𑀸𑀭𑀳𑁂𑀦𑀸𑀢𑀺 𑀓𑀸𑀭𑀡𑀸𑀭𑀳𑁂𑀦 𑀲𑀢𑁆𑀣𑀼𑀲𑀸𑀲𑀦𑀸𑀭𑀳𑁂𑀦.

𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄, 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺 𑀉𑀧𑀭𑀺𑀪𑀸𑀯𑁄. 𑀢𑀜𑁆𑀘𑁂𑀲 𑀬𑀣𑀸𑀯𑀼𑀢𑁆𑀢𑁂𑀦 𑀓𑀫𑁆𑀫𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂𑀦 𑀬𑀸 𑀇𑀫𑀸 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸, 𑀲𑀭𑀡𑀸𑀕𑀫𑀦𑀽𑀧𑀲𑀫𑁆𑀧𑀤𑀸, 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸, 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸𑀢𑀺 𑀅𑀝𑁆𑀞 𑀉𑀧𑀲𑀫𑁆𑀧𑀤𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸, 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸𑀢𑀺 𑀇𑀫𑀸 ¶ 𑀢𑀺𑀲𑁆𑀲𑁄𑀯 𑀣𑀸𑀯𑀭𑀸. 𑀲𑁂𑀲𑀸 𑀩𑀼𑀤𑁆𑀥𑁂 𑀥𑀭𑀫𑀸𑀦𑁂𑀬𑁂𑀯 𑀅𑀳𑁂𑀲𑀼𑀁. 𑀢𑀸𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀬𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸𑀯 𑀅𑀥𑀺𑀧𑁆𑀧𑁂𑀢𑀸.

𑁫𑁧𑁧. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀦𑀺𑀤𑁆𑀤𑁂𑀲𑁂 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺, 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑀬𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀺, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀁 𑀧𑀢𑀺𑀝𑁆𑀞𑀸𑀢𑀺𑀆𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀲𑀻𑀮𑀦𑁆𑀢𑀺 𑀓𑀸𑀫𑀜𑁆𑀘𑁂𑀢𑀁 𑀲𑀳 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂𑀦 𑀇𑀚𑁆𑀛𑀦𑀓𑀲𑁆𑀲 ¶ 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀯𑁂𑀯𑀘𑀦𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀫𑁆𑀫𑀢𑁄 𑀏𑀢𑀁 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀺𑀁 𑀲𑀻𑀮’’𑀦𑁆𑀢𑀺? 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯).

𑀢𑀢𑁆𑀣 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀭𑀢𑀺. 𑀅𑀧𑀺𑀘 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀚𑀳𑀦𑁆𑀢𑀲𑁆𑀲 𑀲𑀢𑁆𑀢 𑀓𑀫𑁆𑀫𑀧𑀣𑀘𑁂𑀢𑀦𑀸. 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 ‘‘𑀅𑀪𑀺𑀚𑁆𑀛𑀁 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 𑀯𑀼𑀢𑁆𑀢𑀸 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸. 𑀲𑀁𑀯𑀭𑁄 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥𑁂𑀦 𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄 ¶ , 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺. 𑀢𑀲𑁆𑀲 𑀦𑀸𑀦𑀸𑀓𑀭𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬) 𑀯𑀼𑀢𑁆𑀢𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀦𑁆𑀢𑀺 𑀲𑀫𑀸𑀤𑀺𑀡𑁆𑀡𑀲𑀻𑀮𑀲𑁆𑀲 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀏𑀢𑁆𑀣 𑀘 𑀲𑀁𑀯𑀭𑀲𑀻𑀮𑀁 𑀅𑀯𑀻𑀢𑀺𑀓𑁆𑀓𑀫𑀲𑀻𑀮𑀦𑁆𑀢𑀺 𑀇𑀤𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀻𑀮𑀁; 𑀘𑁂𑀢𑀦𑀸 𑀲𑀻𑀮𑀁 𑀘𑁂𑀢𑀲𑀺𑀓𑀁 𑀲𑀻𑀮𑀦𑁆𑀢𑀺 𑀧𑀭𑀺𑀬𑀸𑀬𑀢𑁄 𑀲𑀻𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀪𑀺𑀓𑁆𑀔𑀼 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀺 𑀦𑀸𑀫, 𑀢𑀲𑁆𑀫𑀸 𑀢𑀁 ‘𑀧𑀢𑀺𑀝𑁆𑀞𑀸’𑀢𑀺 𑀯𑀼𑀢𑁆𑀢𑀁; 𑀧𑀢𑀺𑀝𑁆𑀞𑀳𑀢𑀺 𑀯𑀸 𑀏𑀢𑁆𑀣 𑀪𑀺𑀓𑁆𑀔𑀼, 𑀓𑀼𑀲𑀮𑀥𑀫𑁆𑀫𑀸 𑀏𑀯 𑀯𑀸 𑀏𑀢𑁆𑀣 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀸. 𑀅𑀬𑀫𑀢𑁆𑀣𑁄 𑁋

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 𑀘. (𑀲𑀁. 𑀦𑀺. 𑁧.𑁨𑁩);

‘‘𑀧𑀢𑀺𑀝𑁆𑀞𑀸 ¶ , 𑀫𑀳𑀸𑀭𑀸𑀚, 𑀲𑀻𑀮𑀁 𑀲𑀩𑁆𑀩𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦’’𑀦𑁆𑀢𑀺 𑀘 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 (𑀫𑀺. 𑀧. 𑁨.𑁧.𑁯) 𑀘 𑀆𑀤𑀺𑀲𑀼𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀤𑁂𑀢𑀁 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀆𑀤𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀉𑀢𑁆𑀢𑀺𑀬, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁮𑁨).

𑀬𑀣𑀸 ¶ 𑀳𑀺 𑀦𑀕𑀭𑀯𑀟𑁆𑀠𑀓𑀻 𑀦𑀕𑀭𑀁 𑀫𑀸𑀧𑁂𑀢𑀼𑀓𑀸𑀫𑁄 𑀧𑀞𑀫𑀁 𑀦𑀕𑀭𑀝𑁆𑀞𑀸𑀦𑀁 𑀲𑁄𑀥𑁂𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀯𑀻𑀣𑀺𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀢𑀺; 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀆𑀤𑀺𑀢𑁄𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸 𑀯𑀸 𑀧𑀦 𑀭𑀚𑀓𑁄 𑀧𑀞𑀫𑀁 𑀢𑀻𑀳𑀺 𑀔𑀸𑀭𑁂𑀳𑀺 𑀯𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂 𑀯𑀢𑁆𑀣𑁂 𑀬𑀤𑀺𑀘𑁆𑀙𑀓𑀁 𑀭𑀗𑁆𑀕𑀚𑀸𑀢𑀁 𑀉𑀧𑀦𑁂𑀢𑀺; 𑀬𑀣𑀸 𑀯𑀸 𑀧𑀦 𑀙𑁂𑀓𑁄 𑀘𑀺𑀢𑁆𑀢𑀓𑀸𑀭𑁄 𑀭𑀽𑀧𑀁 𑀮𑀺𑀔𑀺𑀢𑀼𑀓𑀸𑀫𑁄 𑀆𑀤𑀺𑀢𑁄𑀯 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺; 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀆𑀤𑀺𑀢𑁄𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀬𑁄 𑀥𑀫𑁆𑀫𑁂 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀫𑀸 𑀲𑀻𑀮𑀁 ‘‘𑀆𑀤𑀻’’𑀢𑀺 𑀯𑀼𑀢𑁆𑀢𑀁.

𑀢𑀤𑁂𑀢𑀁 𑀘𑀭𑀡𑀲𑀭𑀺𑀓𑁆𑀔𑀢𑀸𑀬 𑀘𑀭𑀡𑀁. 𑀘𑀭𑀡𑀸𑀢𑀺 𑀳𑀺 𑀧𑀸𑀤𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀙𑀺𑀦𑁆𑀦𑀘𑀭𑀡𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀺𑀲𑀁𑀕𑀫𑀦𑀸𑀪𑀺𑀲𑀗𑁆𑀔𑀸𑀭𑁄 𑀦 𑀚𑀸𑀬𑀢𑀺, 𑀧𑀭𑀺𑀧𑀼𑀡𑁆𑀡𑀧𑀸𑀤𑀲𑁆𑀲𑁂𑀯 𑀚𑀸𑀬𑀢𑀺; 𑀏𑀯𑀫𑁂𑀯 𑀬𑀲𑁆𑀲 𑀲𑀻𑀮𑀁 𑀪𑀺𑀦𑁆𑀦𑀁 𑀳𑁄𑀢𑀺 𑀔𑀡𑁆𑀟𑀁 𑀅𑀧𑀭𑀺𑀧𑀼𑀡𑁆𑀡𑀁, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀕𑀫𑀦𑀸𑀬 ¶ 𑀜𑀸𑀡𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀧𑀦 𑀢𑀁 𑀅𑀪𑀺𑀦𑁆𑀦𑀁 𑀳𑁄𑀢𑀺 𑀅𑀓𑁆𑀔𑀡𑁆𑀟𑀁 𑀧𑀭𑀺𑀧𑀼𑀡𑁆𑀡𑀁 𑀢𑀲𑁆𑀲 𑀦𑀺𑀩𑁆𑀩𑀸𑀦𑀕𑀫𑀦𑀸𑀬 𑀜𑀸𑀡𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀻𑀮𑀁 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀤𑁂𑀢𑀁 𑀲𑀁𑀬𑀫𑀦𑀯𑀲𑁂𑀦 𑀲𑀁𑀬𑀫𑁄, 𑀲𑀁𑀯𑀭𑀡𑀯𑀲𑁂𑀦 𑀲𑀁𑀯𑀭𑁄. 𑀉𑀪𑀬𑁂𑀦𑀸𑀧𑀺 𑀲𑀻𑀮𑀲𑀁𑀬𑀫𑁄 𑀘𑁂𑀯 𑀲𑀻𑀮𑀲𑀁𑀯𑀭𑁄 𑀘 𑀓𑀣𑀺𑀢𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀁𑀬𑀫𑁂𑀢𑀺 𑀯𑀻𑀢𑀺𑀓𑁆𑀓𑀫𑀯𑀺𑀧𑁆𑀨𑀦𑁆𑀤𑀦𑀁, 𑀧𑀼𑀕𑁆𑀕𑀮𑀁 𑀯𑀸 𑀲𑀁𑀬𑀫𑁂𑀢𑀺, 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀢𑀲𑁆𑀲 𑀯𑀺𑀧𑁆𑀨𑀦𑁆𑀤𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀲𑀁𑀬𑀫𑁄. 𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀯𑁂𑀲𑀦𑀤𑁆𑀯𑀸𑀭𑀁 𑀲𑀁𑀯𑀭𑀢𑀺 𑀧𑀺𑀤𑀳𑀢𑀻𑀢𑀺𑀧𑀺 𑀲𑀁𑀯𑀭𑁄. 𑀫𑁄𑀓𑁆𑀔𑀦𑁆𑀢𑀺 𑀉𑀢𑁆𑀢𑀫𑀁 𑀫𑀼𑀔𑀪𑀽𑀢𑀁 𑀯𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑁄 𑀆𑀳𑀸𑀭𑁄 𑀫𑀼𑀔𑁂𑀦 ¶ 𑀧𑀯𑀺𑀲𑀺𑀢𑁆𑀯𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀨𑀭𑀢𑀺, 𑀏𑀯𑀁 𑀬𑁄𑀕𑀺𑀦𑁄𑀧𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀁 𑀲𑀻𑀮𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁄𑀓𑁆𑀔’’𑀦𑁆𑀢𑀺. 𑀧𑀫𑀼𑀔𑁂 𑀲𑀸𑀥𑀽𑀢𑀺 𑀧𑀸𑀫𑁄𑀓𑁆𑀔𑀁; 𑀧𑀼𑀩𑁆𑀩𑀗𑁆𑀕𑀫𑀁 𑀲𑁂𑀝𑁆𑀞𑀁 𑀧𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀸𑀫𑁄𑀓𑁆𑀔𑀁 𑀧𑀼𑀩𑁆𑀩𑀗𑁆𑀕𑀫𑀁 𑀲𑁂𑀝𑁆𑀞𑀁 𑀧𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁. 𑀯𑀸𑀘𑀲𑀺𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁. 𑀓𑀸𑀬𑀺𑀓𑀯𑀸𑀘𑀲𑀺𑀓𑁄𑀢𑀺 𑀢𑀤𑀼𑀪𑀬𑀁. 𑀇𑀫𑀺𑀦𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀬𑀸𑀤𑀸𑀬 𑀤𑀲𑁆𑀲𑁂𑀢𑀺. 𑀲𑀁𑀯𑀼𑀢𑁄𑀢𑀺 𑀧𑀺𑀳𑀺𑀢𑁄; 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 ¶ 𑀅𑀢𑁆𑀣𑁄. 𑀬𑀣𑀸 𑀳𑀺 𑀲𑀁𑀯𑀼𑀢𑀤𑁆𑀯𑀸𑀭𑀁 𑀕𑁂𑀳𑀁 ‘‘𑀲𑀁𑀯𑀼𑀢𑀕𑁂𑀳𑀁 𑀧𑀺𑀳𑀺𑀢𑀕𑁂𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄 ‘‘𑀲𑀁𑀯𑀼𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁂𑀦 𑀘 𑀲𑀁𑀯𑀭𑁂𑀦 𑀘, 𑀧𑀸𑀢𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑁂𑀦 𑀯𑀸 𑀲𑀁𑀯𑀭𑁂𑀦. 𑀉𑀧𑁂𑀢𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁫𑁧𑁨. 𑀇𑀭𑀺𑀬𑀢𑀻𑀢𑀺𑀆𑀤𑀻𑀳𑀺 𑀲𑀢𑁆𑀢𑀳𑀺𑀧𑀺 𑀧𑀤𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀓𑀣𑀺𑀢𑁄.

𑁫𑁧𑁩. 𑀆𑀘𑀸𑀭𑀕𑁄𑀘𑀭𑀦𑀺𑀤𑁆𑀤𑁂𑀲𑁂 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀲𑀫𑀡𑀸𑀘𑀭𑀁 𑀲𑀫𑀡𑀕𑁄𑀘𑀭𑀁 𑀓𑀣𑁂𑀢𑀼𑀓𑀸𑀫𑁄 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑀺 𑀆𑀘𑀸𑀭𑁄, 𑀅𑀢𑁆𑀣𑀺 𑀅𑀦𑀸𑀘𑀸𑀭𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺. 𑀬𑀣𑀸 𑀧𑀦 𑀫𑀕𑁆𑀕𑀓𑀼𑀲𑀮𑁄 𑀧𑀼𑀭𑀺𑀲𑁄 𑀫𑀕𑁆𑀕𑀁 𑀅𑀘𑀺𑀓𑁆𑀔𑀦𑁆𑀢𑁄 ‘𑀯𑀸𑀫𑀁 𑀫𑀼𑀜𑁆𑀘 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’𑀢𑀺 𑀧𑀞𑀫𑀁 𑀫𑀼𑀜𑁆𑀘𑀺𑀢𑀩𑁆𑀩𑀁 𑀲𑀪𑀬𑀫𑀕𑁆𑀕𑀁 𑀉𑀧𑁆𑀧𑀣𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺 ¶ , 𑀧𑀘𑁆𑀙𑀸 𑀕𑀳𑁂𑀢𑀩𑁆𑀩𑀁 𑀔𑁂𑀫𑀫𑀕𑁆𑀕𑀁 𑀉𑀚𑀼𑀫𑀕𑁆𑀕𑀁; 𑀏𑀯𑀫𑁂𑀯 𑀫𑀕𑁆𑀕𑀓𑀼𑀲𑀮𑀧𑀼𑀭𑀺𑀲𑀲𑀤𑀺𑀲𑁄 𑀥𑀫𑁆𑀫𑀭𑀸𑀚𑀸 𑀧𑀞𑀫𑀁 𑀧𑀳𑀸𑀢𑀩𑁆𑀩𑀁 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑀁 𑀅𑀦𑀸𑀘𑀸𑀭𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀆𑀘𑀸𑀭𑀁 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄 ‘‘𑀢𑀢𑁆𑀣 𑀓𑀢𑀫𑁄 𑀅𑀦𑀸𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀧𑀼𑀭𑀺𑀲𑁂𑀦 𑀳𑀺 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁄 𑀲𑀫𑁆𑀧𑀚𑁆𑀚𑁂𑀬𑁆𑀬 𑀯𑀸 𑀦 𑀯𑀸, 𑀢𑀣𑀸𑀕𑀢𑁂𑀦 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁄 𑀅𑀧𑀡𑁆𑀡𑀓𑁄, 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞𑀁 𑀯𑀚𑀺𑀭𑀁 𑀯𑀺𑀬, 𑀅𑀯𑀺𑀭𑀚𑁆𑀛𑀦𑀓𑁄 𑀦𑀺𑀩𑁆𑀩𑀸𑀦𑀦𑀕𑀭𑀁𑀬𑁂𑀯 𑀲𑀫𑁄𑀲𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁩.𑁮𑁪).

𑀬𑀲𑁆𑀫𑀸 𑀯𑀸 𑀲𑀲𑀻𑀲𑀁 𑀦𑀳𑀸𑀦𑁂𑀦 𑀧𑀳𑀻𑀦𑀲𑁂𑀤𑀫𑀮𑀚𑀮𑁆𑀮𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀯𑀺𑀪𑀽𑀲𑀦𑀯𑀺𑀥𑀸𑀦𑀁 𑀯𑀺𑀬 𑀧𑀳𑀻𑀦𑀧𑀸𑀧𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀥𑀫𑁆𑀫𑀲𑀫𑀸𑀬𑁄𑀕𑁄 𑀲𑀫𑁆𑀧𑀦𑁆𑀦𑀭𑀽𑀧𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁂𑀤𑀫𑀮𑀚𑀮𑁆𑀮𑀺𑀓𑁆𑀓𑀁 𑀯𑀺𑀬 𑀧𑀳𑀸𑀢𑀩𑁆𑀩𑀁 𑀧𑀞𑀫𑀁 𑀅𑀦𑀸𑀘𑀸𑀭𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, 𑀧𑀳𑀻𑀦𑀲𑁂𑀤𑀫𑀮𑀚𑀮𑁆𑀮𑀺𑀓𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀯𑀺𑀪𑀽𑀲𑀦𑀯𑀺𑀥𑀸𑀦𑀁 ¶ 𑀯𑀺𑀬 𑀧𑀘𑁆𑀙𑀸 𑀆𑀘𑀸𑀭𑀁 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄𑀧𑀺 𑀢𑀢𑁆𑀣 𑀓𑀢𑀫𑁄 𑀅𑀦𑀸𑀘𑀸𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬𑀺𑀓𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁; 𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁; 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀢𑀤𑀼𑀪𑀬𑀁. 𑀏𑀯𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀲𑁆𑀲𑁂𑀯 𑀯𑀻𑀢𑀺𑀓𑁆𑀓𑀫𑀁 𑀤𑀲𑁆𑀲𑁂𑀲𑀺.

𑀬𑀲𑁆𑀫𑀸 𑀧𑀦 𑀦 𑀓𑁂𑀯𑀮𑀁 𑀓𑀸𑀬𑀯𑀸𑀘𑀸𑀳𑀺 𑀏𑀯 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀫𑀦𑀲𑀸𑀧𑀺 𑀆𑀘𑀭𑀢𑀺 𑀏𑀯, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀅𑀦𑀸𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀏𑀓𑀘𑁆𑀘𑀺𑀬𑀁 𑀅𑀦𑀸𑀘𑀸𑀭𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀇𑀥𑁂𑀓𑀘𑁆𑀘𑁄 𑀯𑁂𑀴𑀼𑀤𑀸𑀦𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀴𑀼𑀤𑀸𑀦𑁂𑀦𑀸𑀢𑀺 𑀧𑀘𑁆𑀘𑀬𑀳𑁂𑀢𑀼𑀓𑁂𑀦 𑀯𑁂𑀴𑀼𑀤𑀸𑀦𑁂𑀦. 𑀯𑀺𑀳𑀸𑀭𑁂 𑀉𑀝𑁆𑀞𑀺𑀢𑀜𑁆𑀳𑀺 𑀅𑀭𑀜𑁆𑀜𑀢𑁄 𑀯𑀸 𑀆𑀳𑀭𑀺𑀢𑁆𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀯𑁂𑀴𑀼𑀁 ‘𑀏𑀯𑀁 𑀫𑁂 𑀧𑀘𑁆𑀘𑀬𑀁 𑀤𑀲𑁆𑀲𑀦𑁆𑀢𑀻’𑀢𑀺 𑀉𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑁄 𑀅𑀦𑁂𑀲𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀢𑀺. 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀭𑀳𑀁 𑀧𑀸𑀧𑀼𑀡𑀸𑀢𑀺, 𑀲𑀫𑁆𑀧𑀭𑀸𑀬𑁂 𑀘 𑀅𑀧𑀸𑀬𑀧𑀭𑀺𑀧𑀽𑀭𑀓𑁄 𑀳𑁄𑀢𑀺. 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀯𑁂𑀴𑀼𑀁 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑀤𑀦𑁆𑀢𑁄 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀫𑀸𑀧𑀚𑁆𑀚𑀢𑀺; 𑀧𑀭𑀧𑀼𑀕𑁆𑀕𑀮𑀺𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀤𑀫𑀸𑀦𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀗𑁆𑀖𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀢𑀁 𑀇𑀲𑁆𑀲𑀭𑀯𑀢𑀸𑀬 𑀤𑁂𑀢𑀺 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀫𑀸𑀧𑀚𑁆𑀚𑀢𑀺 ¶ .

𑀓𑀢𑀭𑁄 𑀧𑀦 𑀯𑁂𑀴𑀼 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀓𑀢𑀭𑁄 𑀦 𑀳𑁄𑀢𑀻𑀢𑀺? 𑀬𑁄 𑀢𑀸𑀯 𑀅𑀭𑁄𑀧𑀺𑀫𑁄 𑀲𑀬𑀁𑀚𑀸𑀢𑀓𑁄, 𑀲𑁄 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁, 𑀢𑀢𑁄 𑀧𑀭𑀁 𑀦 𑀕𑀭𑀼𑀪𑀡𑁆𑀟𑀁; 𑀭𑁄𑀧𑀺𑀢𑀝𑁆𑀞𑀸𑀦𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀁. 𑀲𑁄 𑀧𑀦 𑀧𑀫𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑁂𑀮𑀦𑀸𑀴𑀺𑀧𑁆𑀧𑀫𑀸𑀡𑁄𑀧𑀺 𑀕𑀭𑀼𑀪𑀡𑁆𑀟𑀁, 𑀦 𑀢𑀢𑁄 𑀳𑁂𑀝𑁆𑀞𑀸. 𑀬𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀢𑁂𑀮𑀦𑀸𑀴𑀺𑀬𑀸 𑀯𑀸 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀅𑀢𑁆𑀣𑁄, 𑀢𑁂𑀦 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀨𑀸𑀢𑀺𑀓𑀫𑁆𑀫𑀁 𑀢𑀤𑀕𑁆𑀖𑀦𑀓𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀯𑀝𑁆𑀝𑀢𑀺, 𑀊𑀦𑀓𑀁 𑀦 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀫𑁆𑀧𑀺 𑀉𑀤𑀓𑀸𑀳𑀭𑀡𑀫𑀢𑁆𑀢𑀁 𑀯𑀸 𑀅𑀧𑁆𑀧𑀳𑀭𑀺𑀢𑀓𑀭𑀡𑀫𑀢𑁆𑀢𑀁 𑀯𑀸 𑀦 𑀯𑀝𑁆𑀝𑀢𑀺, 𑀢𑀁 𑀣𑀸𑀯𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀧𑁄𑀓𑁆𑀔𑀭𑀡𑀺𑀢𑁄 𑀯𑀸 𑀧𑀁𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑁄𑀧𑀸𑀦𑀁 𑀯𑀸 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀯𑀺𑀲𑀫𑀝𑁆𑀞𑀸𑀦𑀁 𑀯𑀸 𑀲𑀫𑀁 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀨𑀸𑀢𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀕𑀳𑀺𑀢𑁄 𑀢𑀢𑁆𑀣 𑀯𑀲𑀦𑁆𑀢𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄; 𑀧𑀓𑁆𑀓𑀫𑀦𑁆𑀢𑁂𑀦 𑀲𑀗𑁆𑀖𑀺𑀓𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀕𑀳𑁂𑀢𑁆𑀯𑀸 𑀕𑀢𑁂𑀦 𑀬𑀢𑁆𑀣 𑀕𑀢𑁄 𑀲𑀭𑀢𑀺, 𑀢𑀢𑁄 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑁄. 𑀲𑀘𑁂 𑀅𑀦𑁆𑀢𑀭𑀸 𑀪𑀬𑀁 𑀳𑁄𑀢𑀺, 𑀲𑀫𑁆𑀧𑀢𑁆𑀢𑀯𑀺𑀳𑀭𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀁 𑀬𑀸𑀘𑀦𑁆𑀢𑀺. 𑀪𑀺𑀓𑁆𑀔𑀽 ‘𑀲𑀗𑁆𑀖𑀺𑀓𑁄’𑀢𑀺 𑀤𑀸𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀺 𑀯𑀸 𑀢𑀚𑁆𑀚𑁂𑀦𑁆𑀢𑀺 𑀯𑀸. 𑀢𑀤𑀸 𑀪𑀺𑀓𑁆𑀔𑀽𑀳𑀺 ‘𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸’𑀢𑀺 𑀯𑀢𑁆𑀢𑀼𑀁 ¶ 𑀯𑀝𑁆𑀝𑀢𑀺; 𑀯𑁂𑀴𑀼𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀲𑀘𑁂 𑀢𑁂 𑀤𑀡𑁆𑀟𑀓𑀫𑁆𑀫𑀢𑁆𑀣𑀸𑀬 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀯𑀸 𑀤𑁂𑀦𑁆𑀢𑀺, 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀤𑀟𑁆𑀠𑀕𑁂𑀳𑀸 𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀲𑀘𑁂 ¶ 𑀲𑀗𑁆𑀖𑀲𑁆𑀲 𑀯𑁂𑀴𑀼𑀕𑀼𑀫𑁆𑀩𑁂 𑀯𑁂𑀴𑀼𑀤𑀽𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀅𑀓𑁄𑀝𑁆𑀝𑀸𑀧𑁂𑀦𑁆𑀢𑀸𑀦𑀁 𑀯𑁂𑀴𑀼 𑀦𑀲𑁆𑀲𑀢𑀺, 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀪𑀺𑀓𑁆𑀔𑀸𑀘𑀸𑀭𑁂 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀝𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺 ‘𑀲𑀫𑀪𑀸𑀕𑀁 𑀮𑀪𑀺𑀲𑁆𑀲𑀣𑀸’𑀢𑀺 𑀯𑀢𑁆𑀢𑀩𑁆𑀩𑀸; 𑀦 𑀇𑀘𑁆𑀙𑀦𑁆𑀢𑀺𑀬𑁂𑀯 ‘𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀮𑀪𑀺𑀲𑁆𑀲𑀣𑀸’𑀢𑀺 𑀯𑀢𑁆𑀢𑀩𑁆𑀩𑀸. 𑀏𑀯𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑁂𑀲𑀼 ‘𑀦𑀝𑁆𑀞𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀔𑀡𑁂 𑀲𑀢𑀺 𑀤𑀡𑁆𑀟𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀓𑁄𑀝𑁆𑀝𑁂𑀢𑁆𑀯𑀸 𑀕𑀡𑁆𑀳𑀣𑀸’𑀢𑀺 𑀯𑀢𑁆𑀢𑀩𑁆𑀩𑀸; 𑀯𑁂𑀴𑀼𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀯𑁂𑀴𑀼𑀕𑀼𑀫𑁆𑀩𑁂 𑀅𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀺𑀢𑁂𑀧𑀺, 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀯𑁂𑀴𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀼𑀓𑁆𑀔𑁂𑀲𑀼𑀧𑀺 𑀅𑀬𑀫𑁂𑀯 𑀓𑀣𑀸𑀫𑀕𑁆𑀕𑁄. 𑀭𑀼𑀓𑁆𑀔𑁄 𑀧𑀦 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀲𑀗𑁆𑀖𑀺𑀓𑁂 𑀭𑀼𑀓𑁆𑀔𑁂 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀲𑀗𑁆𑀖𑀺𑀓𑀁 𑀆𑀯𑀸𑀲𑀁 𑀓𑀸𑀢𑀼𑀁 ¶ 𑀮𑀩𑁆𑀪𑀢𑀺. 𑀯𑀘𑀦𑀧𑀣𑀘𑁆𑀙𑁂𑀤𑀦𑀢𑁆𑀣𑀁 𑀧𑀦 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑁄.

𑀧𑀼𑀕𑁆𑀕𑀮𑀺𑀓𑀁 𑀓𑀸𑀢𑀼𑀁 𑀮𑀩𑁆𑀪𑀢𑀺, 𑀦 𑀮𑀩𑁆𑀪𑀢𑀻𑀢𑀺? 𑀦 𑀮𑀩𑁆𑀪𑀢𑀺. 𑀳𑀢𑁆𑀣𑀓𑀫𑁆𑀫𑀲𑀻𑀲𑁂𑀦 𑀧𑀦 𑀏𑀓𑀲𑁆𑀫𑀺𑀁 𑀕𑁂𑀳𑁂 𑀫𑀜𑁆𑀘𑀝𑁆𑀞𑀸𑀦𑀫𑀢𑁆𑀢𑀁 𑀮𑀩𑁆𑀪𑀢𑀺, 𑀢𑀻𑀲𑀼 𑀕𑁂𑀳𑁂𑀲𑀼 𑀏𑀓𑀁 𑀕𑁂𑀳𑀁 𑀮𑀪𑀢𑀺. 𑀲𑀘𑁂 𑀤𑀩𑁆𑀪𑀲𑀫𑁆𑀪𑀸𑀭𑀸 𑀧𑀼𑀕𑁆𑀕𑀮𑀺𑀓𑀸 𑀳𑁄𑀦𑁆𑀢𑀺, 𑀪𑀽𑀫𑀺 𑀲𑀗𑁆𑀖𑀺𑀓𑀸, 𑀏𑀓𑀁 𑀕𑁂𑀳𑀁 𑀓𑀢𑁆𑀯𑀸 𑀲𑀫𑀪𑀸𑀕𑀁 𑀮𑀪𑀢𑀺, 𑀤𑁆𑀯𑀻𑀲𑀼 𑀕𑁂𑀳𑁂𑀲𑀼 𑀏𑀓𑀁 𑀕𑁂𑀳𑀁 𑀮𑀪𑀢𑀺. 𑀲𑀗𑁆𑀖𑀺𑀓𑀭𑀼𑀓𑁆𑀔𑁂 𑀲𑀗𑁆𑀖𑀺𑀓𑀁 𑀆𑀯𑀸𑀲𑀁 𑀩𑀸𑀥𑁂𑀦𑁆𑀢𑁂 𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀸 𑀳𑀸𑀭𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀯𑀝𑁆𑀝𑀢𑀺. 𑀯𑀘𑀦𑀧𑀣𑀘𑁆𑀙𑁂𑀤𑀦𑀢𑁆𑀣𑀁 𑀧𑀦 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀳𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀲𑁆𑀲 𑀫𑀳𑀦𑁆𑀢𑁄 𑀮𑀸𑀪𑁄 𑀳𑁄𑀢𑀺, 𑀦 𑀳𑀸𑀭𑁂𑀢𑀩𑁆𑀩𑁄. 𑀧𑀼𑀕𑁆𑀕𑀮𑀺𑀓𑀭𑀼𑀓𑁆𑀔𑁂 𑀲𑀗𑁆𑀖𑀺𑀓𑀁 𑀆𑀯𑀸𑀲𑀁 𑀩𑀸𑀥𑁂𑀦𑁆𑀢𑁂 𑀭𑀼𑀓𑁆𑀔𑀲𑀸𑀫𑀺𑀓𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀳𑀭𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀙𑁂𑀤𑀸𑀧𑁂𑀢𑁆𑀯𑀸 𑀳𑀸𑀭𑁂𑀢𑀩𑁆𑀩𑁄. ‘𑀭𑀼𑀓𑁆𑀔𑀁 𑀫𑁂 𑀤𑁂𑀣𑀸’𑀢𑀺 𑀘𑁄𑀤𑁂𑀦𑁆𑀢𑀲𑁆𑀲 𑀭𑀼𑀓𑁆𑀔𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀫𑀽𑀮𑀁 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀺𑀓𑁂 𑀭𑀼𑀓𑁆𑀔𑁂 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑀁, 𑀧𑀼𑀕𑁆𑀕𑀮𑀺𑀓𑁂 𑀘 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑀁 𑀩𑀸𑀥𑁂𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀮𑁆𑀮𑀺𑀬𑀫𑁆𑀧𑀺 𑀅𑀬𑀫𑁂𑀯 𑀓𑀣𑀸𑀫𑀕𑁆𑀕𑁄. 𑀯𑀮𑁆𑀮𑀺 𑀧𑀦 𑀬𑀢𑁆𑀣 𑀯𑀺𑀓𑁆𑀓𑀸𑀬𑀢𑀺, 𑀤𑀼𑀮𑁆𑀮𑀪𑀸 𑀳𑁄𑀢𑀺, 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁. 𑀲𑀸 𑀘 𑀔𑁄 𑀉𑀧𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬; 𑀢𑀢𑁄 𑀳𑁂𑀝𑁆𑀞𑀸 𑀯𑀮𑁆𑀮𑀺𑀔𑀡𑁆𑀟𑀁 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀺.

𑀧𑀢𑁆𑀢𑀤𑀸𑀦𑀸𑀤𑀻𑀲𑀼𑀧𑀺 𑀧𑀢𑁆𑀢𑀤𑀸𑀦𑁂𑀦𑀸𑀢𑀺 𑀧𑀘𑁆𑀘𑀬𑀳𑁂𑀢𑀼𑀓𑁂𑀦 𑀧𑀢𑁆𑀢𑀤𑀸𑀦𑁂𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀯𑁂𑀴𑀼𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀕𑀭𑀼𑀪𑀡𑁆𑀟𑀢𑀸𑀬 𑀧𑀦𑁂𑀢𑁆𑀣 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄. 𑀧𑀢𑁆𑀢𑀫𑁆𑀧𑀺 𑀳𑀺 𑀬𑀢𑁆𑀣 𑀯𑀺𑀓𑁆𑀓𑀸𑀬𑀢𑀺, 𑀕𑀦𑁆𑀥𑀺𑀓𑀸𑀤𑀬𑁄 ¶ 𑀕𑀦𑁆𑀥𑀧𑀮𑀺𑀯𑁂𑀞𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀺, 𑀢𑀸𑀤𑀺𑀲𑁂 𑀤𑀼𑀮𑁆𑀮𑀪𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀏𑀲 𑀢𑀸𑀯 𑀓𑀺𑀁𑀲𑀼𑀓𑀧𑀢𑁆𑀢𑀓𑀡𑁆𑀡𑀧𑀺𑀴𑀦𑁆𑀥𑀦𑀢𑀸𑀮𑀧𑀢𑁆𑀢𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄.

𑀢𑀸𑀮𑀧𑀡𑁆𑀡𑀫𑁆𑀧𑀺 ¶ 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀓𑀣𑁂𑀢𑀩𑁆𑀩𑀁. 𑀢𑀸𑀮𑀧𑀡𑁆𑀡𑀫𑁆𑀧𑀺 𑀳𑀺 𑀲𑀬𑀁𑀚𑀸𑀢𑁂 𑀢𑀸𑀮𑀯𑀦𑁂 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀕𑀭𑀼𑀪𑀡𑁆𑀟𑀁, 𑀦 𑀢𑀢𑁄 𑀧𑀭𑀁. 𑀭𑁄𑀧𑀺𑀫𑀢𑀸𑀮𑁂𑀲𑀼 𑀲𑀩𑁆𑀩𑀫𑁆𑀧𑀺 𑀕𑀭𑀼𑀪𑀡𑁆𑀟𑀁. 𑀢𑀲𑁆𑀲 𑀧𑀫𑀸𑀡𑀁 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀺 𑀭𑀺𑀢𑁆𑀢𑀧𑁄𑀢𑁆𑀣𑀓𑁄. 𑀢𑀺𑀡𑀫𑁆𑀧𑀺 𑀏𑀢𑁆𑀣𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀢𑀺𑀡𑀁 𑀦𑀢𑁆𑀣𑀺 𑀢𑀢𑁆𑀣 𑀫𑀼𑀜𑁆𑀚𑀧𑀮𑀸𑀮𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀳𑀺𑀧𑀺 𑀙𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀢𑀺𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀇𑀢𑀺 𑀫𑀼𑀜𑁆𑀚𑀧𑀮𑀸𑀮𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀁 𑀢𑀺𑀡𑀁, 𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀲𑀼 𑀘 𑀏𑀓𑀧𑀡𑁆𑀡𑀫𑁆𑀧𑀺 ¶ 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀢𑀢𑁆𑀣𑀚𑀸𑀢𑀓𑀁 𑀯𑀸 𑀩𑀳𑀺𑀆𑀭𑀸𑀫𑁂 𑀲𑀗𑁆𑀖𑀲𑁆𑀲 𑀢𑀺𑀡𑀯𑀢𑁆𑀣𑀼𑀫𑁆𑀳𑀺 𑀚𑀸𑀢𑀢𑀺𑀡𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀢𑀁 𑀧𑀦 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑁂𑀴𑀼𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄.

𑀧𑀼𑀧𑁆𑀨𑀤𑀸𑀦𑁂 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀧𑀼𑀧𑁆𑀨𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀯𑀢𑁆𑀣𑁂 𑀉𑀧𑀦𑁂𑀦𑁆𑀢𑀼, 𑀏𑀢𑁆𑀢𑀓𑁂𑀲𑀼 𑀲𑁂𑀦𑀸𑀲𑀦𑀧𑀝𑀺𑀲𑀗𑁆𑀔𑀭𑀡𑁂 𑀉𑀧𑀦𑁂𑀦𑁆𑀢𑀽’’𑀢𑀺 𑀏𑀯𑀁 𑀦𑀺𑀬𑀫𑀺𑀢𑀝𑁆𑀞𑀸𑀦𑁂 𑀏𑀯 𑀧𑀼𑀧𑁆𑀨𑀸𑀦𑀺 𑀕𑀭𑀼𑀪𑀡𑁆𑀟𑀸𑀦𑀺 𑀳𑁄𑀦𑁆𑀢𑀺. 𑀧𑀭𑀢𑀻𑀭𑁂 𑀲𑀸𑀫𑀡𑁂𑀭𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀧𑀼𑀧𑁆𑀨𑀪𑀸𑀚𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀡𑁂𑀢𑁆𑀯𑀸 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀺, 𑀲𑁄 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀤𑀸𑀢𑀼𑀁 𑀮𑀪𑀢𑀺; 𑀅𑀲𑀫𑁆𑀫𑀢𑁂𑀦 𑀧𑀦 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼 𑀧𑀦 𑀓𑀲𑁆𑀲 𑀧𑀼𑀧𑁆𑀨𑀸𑀦𑀺 𑀤𑀸𑀢𑀼𑀁 𑀮𑀪𑀢𑀺, 𑀓𑀲𑁆𑀲 𑀦 𑀮𑀪𑀢𑀻𑀢𑀺? 𑀫𑀸𑀢𑀸𑀧𑀺𑀢𑀽𑀦𑀁 𑀕𑁂𑀳𑀁 𑀳𑀭𑀺𑀢𑁆𑀯𑀸𑀧𑀺 𑀕𑁂𑀳𑀢𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺 ‘𑀯𑀢𑁆𑀣𑀼𑀧𑀽𑀚𑀁 𑀓𑀭𑁄𑀣𑀸’𑀢𑀺 𑀤𑀸𑀢𑀼𑀁 𑀮𑀪𑀢𑀺, 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀤𑀸𑀢𑀼𑀁 𑀦 𑀮𑀪𑀢𑀺; 𑀲𑁂𑀲𑀜𑀸𑀢𑀻𑀦𑀁 𑀧𑀦 𑀳𑀭𑀺𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀧𑀽𑀚𑀁 𑀓𑀭𑁄𑀣𑀸’𑀢𑀺 𑀤𑀸𑀢𑀩𑁆𑀩𑀁; 𑀲𑁂𑀲𑀚𑀦𑀲𑁆𑀲 𑀧𑀽𑀚𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀲𑁆𑀲 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀤𑀸𑀢𑀩𑁆𑀩𑀁; 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. 𑀯𑀺𑀳𑀸𑀭𑁂 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀪𑀺𑀓𑁆𑀔𑀼𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘𑀯𑀺𑀳𑀸𑀭𑁂 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺, 𑀧𑀽𑀚𑁂𑀣𑀸’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀘𑀦𑀫𑀢𑁆𑀢𑁂 𑀤𑁄𑀲𑁄 𑀦𑀢𑁆𑀣𑀺. ‘𑀫𑀦𑀼𑀲𑁆𑀲𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀆𑀤𑀸𑀬 𑀆𑀕𑀫𑀺𑀲𑁆𑀲𑀦𑁆𑀢𑀻’𑀢𑀺 𑀘𑀺𑀢𑁆𑀢𑁂𑀦 𑀧𑀦 𑀦 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ‘𑀯𑀺𑀳𑀸𑀭𑁂 𑀧𑀼𑀧𑁆𑀨𑀸𑀦𑀺 𑀅𑀢𑁆𑀣𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀅𑀲𑀼𑀓𑀤𑀺𑀯𑀲𑁂 𑀯𑀺𑀳𑀸𑀭𑀁 𑀆𑀕𑀫𑀺𑀲𑁆𑀲𑀸𑀫, 𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀫𑀸 𑀤𑁂𑀣𑀸’𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀸𑀫𑀡𑁂𑀭𑀸𑀦𑀁 𑀓𑀣𑁂𑀢𑀼𑀁 𑀧𑀫𑀼𑀝𑁆𑀞𑀸. 𑀲𑀸𑀫𑀡𑁂𑀭𑁂𑀳𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀸𑀦𑀺. 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀅𑀲𑀼𑀓𑀤𑀺𑀯𑀲𑁂𑀬𑁂𑀯 𑀆𑀭𑁄𑀘𑀬𑀺𑀫𑁆𑀳 ¶ 𑁋 ‘𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀫𑀸 𑀤𑁂𑀣𑀸’𑀢𑀺. 𑀓𑀲𑁆𑀫𑀸 𑀦 𑀯𑀸𑀭𑀬𑀺𑀢𑁆𑀣𑀸’’𑀢𑀺? ‘‘𑀲𑀢𑀺 ¶ 𑀫𑁂 𑀧𑀫𑀼𑀝𑁆𑀞𑀸, 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀫𑀢𑁆𑀢𑀸𑀦𑁂𑀯, 𑀢𑀸𑀯 𑀦 𑀧𑀽𑀚𑀸 𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀕𑀡𑁆𑀳𑀣 𑀧𑀽𑀚𑁂𑀣𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺, 𑀆𑀫𑀺𑀲𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀅𑀧𑀭𑁄 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀸𑀦𑀁 𑀆𑀘𑀺𑀓𑁆𑀔𑀢𑀺 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄 𑀧𑀼𑀧𑁆𑀨𑀸𑀦𑀺 𑀫𑀸 𑀑𑀘𑀺𑀦𑀺𑀢𑁆𑀣𑀸’’𑀢𑀺 𑀆𑀳𑀁𑀲𑀽𑀢𑀺. 𑀫𑀦𑀼𑀲𑁆𑀲𑀸𑀧𑀺 ¶ 𑀆𑀫𑀺𑀲𑀁 𑀆𑀳𑀭𑀺𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀫𑀦𑀼𑀲𑁆𑀲𑀸 𑀦 𑀩𑀳𑀼𑀓𑀸, 𑀲𑀸𑀫𑀡𑁂𑀭𑁂 𑀅𑀫𑁆𑀳𑁂𑀳𑀺 𑀲𑀳 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑀼𑀁 𑀆𑀡𑀸𑀧𑁂𑀣𑀸’’𑀢𑀺. ‘‘𑀲𑀸𑀫𑀡𑁂𑀭𑁂𑀳𑀺 𑀪𑀺𑀓𑁆𑀔𑀸 𑀮𑀤𑁆𑀥𑀸; 𑀬𑁂 𑀪𑀺𑀓𑁆𑀔𑀸𑀘𑀸𑀭𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀬𑀫𑁂𑀯 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀢𑀓𑀁 𑀦𑀬𑀁 𑀮𑀪𑀺𑀢𑁆𑀯𑀸 𑀲𑀸𑀫𑀡𑁂𑀭𑁂 𑀧𑀼𑀢𑁆𑀢𑁂 𑀯𑀸 𑀪𑀸𑀢𑀺𑀓𑁂 𑀯𑀸 𑀓𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀸𑀧𑁂𑀢𑀼𑀁 𑀤𑁄𑀲𑁄 𑀦𑀢𑁆𑀣𑀺; 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺.

𑀨𑀮𑀤𑀸𑀦𑁂 𑀨𑀮𑀫𑁆𑀧𑀺 𑀧𑀼𑀧𑁆𑀨𑀁 𑀯𑀺𑀬 𑀦𑀺𑀬𑀫𑀺𑀢𑀫𑁂𑀯 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀯𑀺𑀳𑀸𑀭𑁂 𑀩𑀳𑀼𑀓𑀫𑁆𑀳𑀺 𑀨𑀮𑀸𑀨𑀮𑁂 𑀲𑀢𑀺 𑀅𑀨𑀸𑀲𑀼𑀓𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑀺. 𑀪𑀺𑀓𑁆𑀔𑀽 ‘𑀲𑀗𑁆𑀖𑀺𑀓’𑀦𑁆𑀢𑀺 𑀤𑀸𑀢𑀼𑀁 𑀦 𑀉𑀲𑁆𑀲𑀳𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺. 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀨𑀮𑁂𑀳𑀺 𑀯𑀸 𑀭𑀼𑀓𑁆𑀔𑁂𑀳𑀺 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸 𑁋 ‘𑀅𑀲𑀼𑀓𑁂𑀲𑀼 𑀘 𑀭𑀼𑀓𑁆𑀔𑁂𑀲𑀼 𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑀸, 𑀏𑀢𑁆𑀢𑀓𑁂𑀲𑀼 𑀯𑀸 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸’𑀢𑀺. 𑀘𑁄𑀭𑀸 𑀧𑀦 𑀇𑀲𑁆𑀲𑀭𑀸 𑀯𑀸 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸; 𑀓𑀼𑀤𑁆𑀥𑀸 𑀢𑁂 𑀲𑀓𑀮𑀯𑀺𑀳𑀸𑀭𑀫𑁆𑀧𑀺 𑀦𑀸𑀲𑁂𑀬𑁆𑀬𑀼𑀁. 𑀆𑀤𑀻𑀦𑀯𑁄 𑀧𑀦 𑀓𑀣𑁂𑀢𑀩𑁆𑀩𑁄𑀢𑀺.

𑀲𑀺𑀦𑀸𑀦𑀤𑀸𑀦𑁂 𑀲𑀺𑀦𑀸𑀦𑀘𑀼𑀡𑁆𑀡𑀸𑀦𑀺 𑀓𑁄𑀝𑁆𑀝𑀺𑀢𑀸𑀦𑀺 𑀦 𑀕𑀭𑀼𑀪𑀡𑁆𑀟𑀸𑀦𑀺. 𑀅𑀓𑁄𑀝𑁆𑀝𑀺𑀢𑁄 𑀭𑀼𑀓𑁆𑀔𑀢𑁆𑀢𑀘𑁄𑀯 𑀕𑀭𑀼𑀪𑀡𑁆𑀟𑀁. 𑀘𑀼𑀡𑁆𑀡𑀁 𑀧𑀦 𑀅𑀕𑀺𑀮𑀸𑀦𑀲𑁆𑀲 𑀭𑀚𑀦𑀦𑀺𑀧𑀓𑁆𑀓𑀁 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲 𑀬𑀁𑀓𑀺𑀜𑁆𑀘𑀺 𑀘𑀼𑀡𑁆𑀡𑀁 𑀯𑀝𑁆𑀝𑀢𑀺𑀬𑁂𑀯. 𑀫𑀢𑁆𑀢𑀺𑀓𑀸𑀧𑀺 𑀏𑀢𑁆𑀣𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀫𑀢𑁆𑀢𑀺𑀓𑀸𑀧𑀺 𑀬𑀢𑁆𑀣 𑀤𑀼𑀮𑁆𑀮𑀪𑀸 𑀳𑁄𑀢𑀺, 𑀢𑀢𑁆𑀣𑁂𑀯 𑀕𑀭𑀼𑀪𑀡𑁆𑀟𑀁. 𑀲𑀸𑀧𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑀸𑀯 𑀢𑀢𑁄 𑀳𑁂𑀝𑁆𑀞𑀸 𑀦 𑀕𑀭𑀼𑀪𑀡𑁆𑀟𑀦𑁆𑀢𑀺.

𑀤𑀦𑁆𑀢𑀓𑀝𑁆𑀞𑀤𑀸𑀦𑁂 𑀤𑀦𑁆𑀢𑀓𑀝𑁆𑀞𑀁 𑀅𑀘𑁆𑀙𑀺𑀦𑁆𑀦𑀓𑀫𑁂𑀯 𑀕𑀭𑀼𑀪𑀡𑁆𑀟𑀁. 𑀬𑁂𑀲𑀁 𑀲𑀸𑀫𑀡𑁂𑀭𑀸𑀦𑀁 𑀲𑀗𑁆𑀖𑀢𑁄 𑀤𑀦𑁆𑀢𑀓𑀝𑁆𑀞𑀯𑀸𑀭𑁄 𑀧𑀸𑀧𑀼𑀡𑀸𑀢𑀺, 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀤𑀸𑀢𑀼𑀁 𑀦 𑀮𑀪𑀦𑁆𑀢𑀺. 𑀬𑁂𑀳𑀺 𑀧𑀦 ‘𑀏𑀢𑁆𑀢𑀓𑀸𑀦𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀆𑀳𑀭𑀺𑀢𑀩𑁆𑀩𑀸𑀦𑀻’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀭𑀁 𑀕𑀳𑀺𑀢𑀸𑀦𑀺, 𑀢𑁂 𑀅𑀢𑀺𑀭𑁂𑀓𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀸𑀢𑀼𑀁 𑀮𑀪𑀦𑁆𑀢𑀺. 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑀢𑁄 𑀩𑀳𑀽𑀦𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 ¶ 𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀤𑁂𑀯𑀲𑀺𑀓𑀁 𑀏𑀓𑁂𑀓𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀧𑀸𑀝𑀺𑀬𑁂𑀓𑁆𑀓𑀁 𑀯𑀲𑀦𑁆𑀢𑁂𑀦𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀡𑀬𑀺𑀢𑁆𑀯𑀸 𑀬𑀢𑁆𑀢𑀓𑀸𑀦𑀺 ¶ 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑁆𑀢𑀺 𑀢𑀢𑁆𑀢𑀓𑀸𑀦𑁂𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁; 𑀅𑀦𑁆𑀢𑀭𑀸 𑀆𑀕𑀦𑁆𑀢𑀼𑀓𑁂𑀲𑀼 𑀯𑀸 𑀆𑀕𑀢𑁂𑀲𑀼 ¶ 𑀤𑀺𑀲𑀁 𑀯𑀸 𑀧𑀓𑁆𑀓𑀫𑀦𑁆𑀢𑁂𑀦 𑀆𑀳𑀭𑀺𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑀩𑁆𑀩𑀸𑀦𑀺.

𑀘𑀸𑀝𑀼𑀓𑀫𑁆𑀬𑀢𑀸𑀬𑀸𑀢𑀺𑀆𑀤𑀻𑀲𑀼 𑀘𑀸𑀝𑀼𑀓𑀫𑁆𑀬𑀢𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸𑀦𑀁 𑀤𑀸𑀲𑀁 𑀯𑀺𑀬 𑀦𑀻𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀭𑀲𑁆𑀲 𑀔𑀮𑀺𑀢𑀯𑀘𑀦𑀫𑁆𑀧𑀺 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀬𑀓𑀸𑀫𑀢𑀸𑀬 𑀧𑀕𑁆𑀕𑀬𑁆𑀳𑀯𑀘𑀦𑀁. 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬𑀸𑀢𑀺 𑀫𑀼𑀕𑁆𑀕𑀲𑀽𑀧𑀲𑀫𑀸𑀦𑀸𑀬 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸 𑀳𑀺 𑀫𑀼𑀕𑁆𑀕𑀲𑀽𑀧𑁂 𑀧𑀘𑁆𑀘𑀦𑁆𑀢𑁂 𑀩𑀳𑀽 𑀫𑀼𑀕𑁆𑀕𑀸 𑀧𑀸𑀓𑀁 𑀕𑀘𑁆𑀙𑀦𑁆𑀢𑀺, 𑀣𑁄𑀓𑀸 𑀦 𑀕𑀘𑁆𑀙𑀦𑁆𑀢𑀺; 𑀏𑀯𑀫𑁂𑀯 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀢𑀓𑀧𑁆𑀧𑀓𑁂 𑀧𑀼𑀕𑁆𑀕𑀮𑁂 𑀩𑀳𑀼 𑀅𑀮𑀺𑀓𑀁 𑀳𑁄𑀢𑀺, 𑀅𑀧𑁆𑀧𑀓𑀁 𑀲𑀘𑁆𑀘𑀁. 𑀬𑀣𑀸 𑀯𑀸 𑀫𑀼𑀕𑁆𑀕𑀲𑀽𑀧𑀲𑁆𑀲 𑀅𑀧𑁆𑀧𑀯𑀺𑀲𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀏𑀯𑀫𑁂𑀯 𑀲𑀘𑁆𑀘𑀸𑀮𑀺𑀓𑀯𑀼𑀢𑁆𑀢𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀯𑀺𑀝𑁆𑀞𑀯𑀸𑀘𑀸 𑀦𑀸𑀫 𑀦𑀢𑁆𑀣𑀺; 𑀲𑀺𑀗𑁆𑀖𑀸𑀝𑀓𑀁 𑀯𑀺𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀥𑀸𑀭𑀸𑀬 𑀧𑀢𑀺𑀝𑁆𑀞𑀸𑀢𑀺. 𑀢𑁂𑀦𑀲𑁆𑀲 𑀲𑀸 𑀫𑀼𑀲𑀸𑀯𑀸𑀤𑀺𑀢𑀸 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀢𑀺 𑀯𑀼𑀢𑁆𑀢𑀸. 𑀧𑀸𑀭𑀺𑀪𑀝𑀬𑀢𑀸𑀢𑀺 𑀧𑀭𑀺𑀪𑀝𑀓𑀫𑁆𑀫𑀪𑀸𑀯𑁄. 𑀧𑀭𑀺𑀪𑀝𑀲𑁆𑀲 𑀳𑀺 𑀓𑀫𑁆𑀫𑀁 𑀧𑀸𑀭𑀺𑀪𑀝𑀬𑀁, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑀬𑀢𑀸; 𑀅𑀮𑀗𑁆𑀓𑀸𑀭𑀓𑀭𑀡𑀸𑀤𑀻𑀳𑀺 𑀤𑀸𑀭𑀓𑀓𑀻𑀴𑀸𑀧𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀚𑀗𑁆𑀖𑀧𑁂𑀲𑀦𑀺𑀓𑀦𑁆𑀢𑀺 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀲𑀸𑀲𑀦𑀧𑀝𑀺𑀲𑀸𑀲𑀦𑀳𑀭𑀡𑀁. 𑀇𑀤𑀜𑁆𑀳𑀺 𑀚𑀗𑁆𑀖𑀧𑁂𑀲𑀦𑀺𑀓𑀁 𑀦𑀸𑀫 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀽𑀦𑀁, 𑀬𑁂 𑀘𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀲𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀕𑀫𑀦𑀯𑀲𑁂𑀦 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀯𑀟𑁆𑀠𑀓𑀻𑀦𑀫𑁆𑀧𑀺 𑀲𑀸𑀲𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸 ‘‘𑀤𑀸𑀦𑀁 𑀤𑀲𑁆𑀲𑀸𑀫, 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀤𑀦𑁆𑀢𑀺; ‘‘𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀦𑀸𑀫 𑀤𑁂𑀣𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀘𑀻𑀯𑀭𑀁 𑀯𑀸 𑀤𑁂𑀦𑁆𑀢𑀺; ‘‘𑀯𑀺𑀳𑀸𑀭𑁂 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀯𑀸 𑀥𑀚𑀧𑀢𑀸𑀓𑀸𑀤𑀻𑀦𑀺 𑀯𑀸 𑀦𑀻𑀬𑁆𑀬𑀸𑀤𑁂𑀦𑁆𑀢𑀺, 𑀲𑀩𑁆𑀩𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺; 𑀚𑀗𑁆𑀖𑀧𑁂𑀲𑀦𑀺𑀓𑀁 𑀦𑀸𑀫 𑀦 𑀳𑁄𑀢𑀺. 𑀲𑁂𑀲𑀸𑀦𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑁄𑀲𑁄.

𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦𑀸𑀢𑀺 𑀏𑀢𑁂𑀲𑀁 𑀯𑀸 𑀯𑁂𑀴𑀼𑀤𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑁂𑀚𑁆𑀚𑀓𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀁 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑀫𑁆𑀫𑀁 ¶ 𑀲𑀗𑁆𑀖𑀼𑀧𑁆𑀧𑀸𑀤𑀘𑁂𑀢𑀺𑀬𑀼𑀧𑁆𑀧𑀸𑀤𑀉𑀧𑀝𑁆𑀞𑀸𑀧𑀦𑀓𑀫𑁆𑀫𑀦𑁆𑀢𑀺 𑀏𑀯𑀭𑀽𑀧𑀸𑀦𑀁 𑀯𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀓𑀓𑀫𑁆𑀫𑀸𑀦𑀁 𑀬𑁂𑀦 𑀓𑁂𑀦𑀘𑀺. 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦𑀸𑀢𑀺 𑀩𑀼𑀤𑁆𑀥𑁂𑀳𑀺 𑀕𑀭𑀳𑀺𑀢𑁂𑀦 𑀧𑀝𑀺𑀲𑀺𑀤𑁆𑀥𑁂𑀦. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀩𑁆𑀩𑁄𑀧𑀺 𑀅𑀦𑀸𑀘𑀸𑀭𑁄 𑀦𑀸𑀫 𑀓𑀣𑀻𑀬𑀢𑀺. 𑀆𑀘𑀸𑀭𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁫𑁧𑁪. 𑀕𑁄𑀘𑀭𑀦𑀺𑀤𑁆𑀤𑁂𑀲𑁂𑀧𑀺 ¶ ¶ 𑀧𑀞𑀫𑀁 𑀅𑀕𑁄𑀘𑀭𑀲𑁆𑀲 𑀯𑀘𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘 𑀕𑁄𑀘𑀭𑁄𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀕𑁄𑀘𑀭𑁄, 𑀅𑀬𑀼𑀢𑁆𑀢𑀝𑁆𑀞𑀸𑀦𑀁 𑀅𑀕𑁄𑀘𑀭𑁄. 𑀯𑁂𑀲𑀺𑀬𑀸 𑀕𑁄𑀘𑀭𑁄 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀕𑁄𑀘𑀭𑁄; 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑁂𑀲𑀺𑀬𑀸 𑀦𑀸𑀫 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄 𑀬𑁂𑀦 𑀓𑁂𑀦𑀘𑀺𑀤𑁂𑀯 𑀲𑀼𑀮𑀪𑀚𑁆𑀛𑀸𑀘𑀸𑀭𑀢𑀸𑀫𑀺𑀢𑁆𑀢𑀲𑀢𑁆𑀣𑀯𑀲𑀺𑀦𑁂𑀳𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀁 𑀓𑀸𑀭𑀡𑀸? 𑀆𑀭𑀓𑁆𑀔𑀯𑀺𑀧𑀢𑁆𑀢𑀺𑀢𑁄. 𑀏𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀳𑀺 𑀘𑀺𑀭𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁄𑀧𑀺 𑀲𑀫𑀡𑀥𑀫𑁆𑀫𑁄 𑀓𑀢𑀺𑀧𑀸𑀳𑁂𑀦𑁂𑀯 𑀦𑀲𑁆𑀲𑀢𑀺; 𑀲𑀘𑁂𑀧𑀺 𑀦 𑀦𑀲𑁆𑀲𑀢𑀺 𑀕𑀭𑀳𑀁 𑀮𑀪𑀢𑀺. 𑀤𑀓𑁆𑀔𑀺𑀡𑀸𑀯𑀲𑁂𑀦 𑀧𑀦 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁. 𑀯𑀺𑀥𑀯𑀸 𑀯𑀼𑀘𑁆𑀘𑀦𑁆𑀢𑀺 𑀫𑀢𑀧𑀢𑀺𑀓𑀸 𑀯𑀸 𑀧𑀯𑀼𑀢𑁆𑀣𑀧𑀢𑀺𑀓𑀸 𑀯𑀸. 𑀣𑀼𑀮𑁆𑀮𑀓𑀼𑀫𑀸𑀭𑀺𑀬𑁄𑀢𑀺 𑀫𑀳𑀮𑁆𑀮𑀺𑀓𑀸 𑀅𑀦𑀺𑀯𑀺𑀝𑁆𑀞𑀓𑀼𑀫𑀸𑀭𑀺𑀬𑁄. 𑀧𑀡𑁆𑀟𑀓𑀸𑀢𑀺 𑀮𑁄𑀓𑀸𑀫𑀺𑀲𑀦𑀺𑀲𑁆𑀲𑀺𑀢𑀓𑀣𑀸𑀩𑀳𑀼𑀮𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀅𑀯𑀽𑀧𑀲𑀦𑁆𑀢𑀧𑀭𑀺𑀴𑀸𑀳𑀸 𑀦𑀧𑀼𑀁𑀲𑀓𑀸. 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀲𑀗𑁆𑀓𑀫𑀦𑁂 𑀆𑀤𑀻𑀦𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘 𑀪𑀺𑀓𑁆𑀔𑀽 𑀦𑀸𑀫 𑀉𑀲𑁆𑀲𑀦𑁆𑀦𑀩𑁆𑀭𑀳𑁆𑀫𑀘𑀭𑀺𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑁄. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀣𑀯𑀯𑀲𑁂𑀦 𑀓𑀢𑀺𑀧𑀸𑀳𑁂𑀦𑁂𑀯 𑀭𑀓𑁆𑀔𑀺𑀢𑀕𑁄𑀧𑀺𑀢𑀲𑀫𑀡𑀥𑀫𑁆𑀫𑀁 𑀦𑀸𑀲𑁂𑀦𑁆𑀢𑀺. 𑀕𑀺𑀮𑀸𑀦𑀧𑀼𑀘𑁆𑀙𑀓𑁂𑀦 𑀧𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀸 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑀦𑀢𑁆𑀣𑀸𑀬𑀧𑀺 𑀑𑀯𑀸𑀤𑀤𑀸𑀦𑀢𑁆𑀣𑀸𑀬𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀧𑀸𑀦𑀸𑀕𑀸𑀭𑀦𑁆𑀢𑀺 𑀲𑀼𑀭𑀸𑀧𑀸𑀦𑀖𑀭𑀁. 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀓𑀭𑁂𑀳𑀺 𑀲𑀼𑀭𑀸𑀲𑁄𑀡𑁆𑀟𑁂𑀳𑀺 𑀅𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀳 𑀲𑁄𑀡𑁆𑀟𑀯𑀲𑁂𑀦 ¶ 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺; 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀻𑀢𑀺𑀆𑀤𑀻𑀲𑀼 𑀭𑀸𑀚𑀸𑀦𑁄𑀢𑀺 𑀅𑀪𑀺𑀲𑀺𑀢𑁆𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀦𑀪𑀺𑀲𑀺𑀢𑁆𑀢𑀸 𑀯𑀸 𑀬𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀭𑀸𑀚𑀫𑀳𑀸𑀫𑀢𑁆𑀢𑀸𑀢𑀺 𑀭𑀸𑀚𑀽𑀦𑀁 𑀇𑀲𑁆𑀲𑀭𑀺𑀬𑀲𑀤𑀺𑀲𑀸𑀬 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑀺𑀢𑁆𑀣𑀺𑀬𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑀸. 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀪𑀢𑁆𑀢𑀺𑀯𑀲𑁂𑀦 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸. 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀚𑀸𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦𑀸𑀢𑀺 𑀅𑀦𑀦𑀼𑀮𑁄𑀫𑀺𑀓𑀲𑀁𑀲𑀕𑁆𑀕𑁄 𑀦𑀸𑀫 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀅𑀦𑀦𑀼𑀮𑁄𑀫𑁄 𑀧𑀘𑁆𑀘𑀦𑀻𑀓𑀲𑀁𑀲𑀕𑁆𑀕𑁄, 𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀲𑀮𑁆𑀮𑁂𑀔𑀧𑀭𑀺𑀳𑀸𑀦𑀺𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀳𑀲𑁄𑀓𑀺𑀢𑀸, 𑀲𑀳𑀦𑀦𑁆𑀤𑀺𑀢𑀸, 𑀲𑀫𑀲𑀼𑀔𑀤𑀼𑀓𑁆𑀔𑀢𑀸, 𑀉𑀧𑁆𑀧𑀦𑁆𑀦𑁂𑀲𑀼 ¶ 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸𑀯 𑀬𑁄𑀕𑀁 𑀆𑀧𑀚𑁆𑀚𑀦𑀢𑀸, 𑀢𑀺𑀢𑁆𑀣𑀺𑀬𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀭𑀼𑀘𑀺𑀲𑀫𑀸𑀘𑀸𑀭𑀢𑀸 𑀏𑀓𑀘𑁆𑀙𑀦𑁆𑀤𑀭𑀼𑀘𑀺𑀲𑀫𑀸𑀘𑀸𑀭𑀪𑀸𑀯𑀸𑀯𑀳𑁄 𑀯𑀸 𑀲𑀺𑀦𑁂𑀳𑀩𑀳𑀼𑀫𑀸𑀦𑀲𑀦𑁆𑀣𑀯𑁄. 𑀢𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 ¶ 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀇𑀢𑀭𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀢𑁂𑀲𑀁 𑀮𑀤𑁆𑀥𑀺𑀕𑀳𑀡𑀁. 𑀢𑁂𑀲𑀁 𑀧𑀦 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀕𑀡𑁆𑀳𑀸𑀧𑁂𑀢𑀼𑀁 𑀲𑀫𑀢𑁆𑀣𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀅𑀕𑁄𑀘𑀭𑀁 𑀤𑀲𑁆𑀲𑁂𑀢𑀼𑀁 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀲𑁆𑀲𑀤𑁆𑀥𑀸𑀦𑀻𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸𑀦𑀺; 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀲𑀗𑁆𑀖𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦 𑀲𑀤𑁆𑀤𑀳𑀦𑁆𑀢𑀺. 𑀅𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀘𑀺𑀢𑁆𑀢𑀁 𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀻𑀢𑀺 𑀅𑀓𑁆𑀓𑁄𑀲𑀓𑀸𑀦𑀺 𑀘𑁂𑀯 𑀧𑀭𑀺𑀪𑀸𑀲𑀓𑀸𑀦𑀺 𑀘; ‘𑀘𑁄𑀭𑁄𑀲𑀺, 𑀩𑀸𑀮𑁄𑀲𑀺, 𑀫𑀽𑀴𑁆𑀳𑁄𑀲𑀺, 𑀑𑀝𑁆𑀞𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀺, 𑀆𑀧𑀸𑀬𑀺𑀓𑁄𑀲𑀺, 𑀦𑁂𑀭𑀬𑀺𑀓𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸’𑀢𑀺 𑀏𑀯𑀁 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺; ‘𑀳𑁄𑀢𑀼, 𑀇𑀤𑀸𑀦𑀺 𑀢𑀁 𑀧𑀳𑀭𑀺𑀲𑁆𑀲𑀸𑀫, 𑀩𑀦𑁆𑀥𑀺𑀲𑁆𑀲𑀸𑀫 ¶ , 𑀯𑀥𑀺𑀲𑁆𑀲𑀸𑀫𑀸’𑀢𑀺 𑀏𑀯𑀁 𑀪𑀬𑀤𑀲𑁆𑀲𑀦𑁂𑀦 𑀧𑀭𑀺𑀪𑀸𑀲𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀦𑀢𑁆𑀣𑀓𑀸𑀫𑀸𑀦𑀻𑀢𑀺 𑀅𑀢𑁆𑀣𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀦𑀢𑁆𑀣𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀅𑀳𑀺𑀢𑀓𑀸𑀫𑀸𑀦𑀻𑀢𑀺 𑀅𑀳𑀺𑀢𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀳𑀺𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀅𑀨𑀸𑀲𑀼𑀓𑀓𑀸𑀫𑀸𑀦𑀻𑀢𑀺 𑀨𑀸𑀲𑀼𑀓𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀨𑀸𑀲𑀼𑀓𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀻𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀦 𑀇𑀘𑁆𑀙𑀦𑁆𑀢𑀺, 𑀲𑀪𑀬𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀢𑁆𑀣 𑀲𑀸𑀫𑀡𑁂𑀭𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀺𑀬𑁄𑀧𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸𑀦𑀜𑁆𑀘𑁂𑀯 𑀲𑀭𑀡𑀕𑀢𑀸𑀦𑀜𑁆𑀘 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀢𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺𑀬𑁂𑀯. 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀻𑀢𑀺 𑀏𑀯𑀭𑀽𑀧𑀸𑀦𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺 𑀓𑀼𑀮𑀸𑀦𑀺. 𑀲𑁂𑀯𑀢𑀻𑀢𑀺 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀪𑀚𑀢𑀻𑀢𑀺 𑀉𑀧𑀲𑀗𑁆𑀓𑀫𑀢𑀺. 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀲𑀗𑁆𑀓𑀫𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀲𑁆𑀲 𑀯𑁂𑀲𑀺𑀬𑀸𑀤𑀺𑀓𑁄, 𑀭𑀸𑀚𑀸𑀤𑀺𑀲𑀁𑀲𑀝𑁆𑀞𑀲𑁆𑀲 𑀭𑀸𑀚𑀸𑀤𑀺𑀓𑁄, 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀲𑁂𑀯𑀓𑀲𑁆𑀲 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀘𑀸𑀢𑀺 𑀢𑀺𑀧𑁆𑀧𑀓𑀸𑀭𑁄𑀧𑀺 𑀅𑀬𑀼𑀢𑁆𑀢𑀕𑁄𑀘𑀭𑁄 𑀅𑀕𑁄𑀘𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀕𑁄𑀘𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀲𑀺𑀬𑀸𑀤𑀺𑀓𑁄 𑀢𑀸𑀯 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀬𑀢𑁄 𑀅𑀕𑁄𑀘𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀬𑀣𑀸𑀳 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄? 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺 ¶ (𑀲𑀁. 𑀦𑀺. 𑁫.𑁩𑁭𑁨) 𑀭𑀸𑀚𑀸𑀤𑀺𑀓𑁄 𑀛𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀧𑀦𑀺𑀲𑁆𑀲𑀬𑀢𑁄 𑀮𑀸𑀪𑀲𑀓𑁆𑀓𑀸𑀭𑀸𑀲𑀦𑀺𑀘𑀓𑁆𑀓𑀦𑀺𑀧𑁆𑀨𑀸𑀤𑀦𑀢𑁄 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀳𑁂𑀢𑀼𑀢𑁄 𑀘, 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀲𑀤𑁆𑀥𑀸𑀳𑀸𑀦𑀺𑀘𑀺𑀢𑁆𑀢𑀲𑀦𑁆𑀢𑀸𑀲𑀸𑀯𑀳𑀦𑀢𑁄 𑀅𑀕𑁄𑀘𑀭𑁄𑀢𑀺.

𑀕𑁄𑀘𑀭𑀦𑀺𑀤𑁆𑀤𑁂𑀲𑁂 𑀦 𑀯𑁂𑀲𑀺𑀬𑀕𑁄𑀘𑀭𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀑𑀧𑀸𑀦𑀪𑀽𑀢𑀸𑀦𑀻𑀢𑀺𑀆𑀤𑀻𑀲𑀼 ¶ 𑀧𑀦 𑀑𑀧𑀸𑀦𑀪𑀽𑀢𑀸𑀦𑀻𑀢𑀺 𑀉𑀤𑀧𑀸𑀦𑀪𑀽𑀢𑀸𑀦𑀺; 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀘𑀸𑀢𑀼𑀫𑀳𑀸𑀧𑀣𑁂 𑀔𑀢𑀧𑁄𑀓𑁆𑀔𑀭𑀡𑀻 𑀯𑀺𑀬, 𑀬𑀣𑀸𑀲𑀼𑀔𑀁 𑀑𑀕𑀸𑀳𑀦𑀓𑁆𑀔𑀫𑀸𑀦𑀺 𑀘𑀺𑀢𑁆𑀢𑀫𑀳𑀸𑀫𑀢𑁆𑀢𑀲𑁆𑀲 𑀕𑁂𑀳𑀲𑀤𑀺𑀲𑀸𑀦𑀺. 𑀢𑀲𑁆𑀲 𑀓𑀺𑀭 𑀕𑁂𑀳𑁂 𑀓𑀸𑀮𑀢𑁆𑀣𑀫𑁆𑀪𑁄 𑀬𑀼𑀢𑁆𑀢𑁄𑀬𑁂𑀯 ¶ . 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀯𑁂𑀓𑀮𑁆𑀮𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀤𑀺𑀯𑀲𑀁 𑀪𑁂𑀲𑀚𑁆𑀚𑀯𑀢𑁆𑀢𑀫𑁂𑀯 𑀲𑀝𑁆𑀞𑀺 𑀓𑀳𑀸𑀧𑀡𑀸𑀦𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀓𑀸𑀲𑀸𑀯𑀧𑀚𑁆𑀚𑁄𑀢𑀸𑀦𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀳𑀺 𑀦𑀺𑀯𑀢𑁆𑀣𑀧𑀸𑀭𑀼𑀢𑀸𑀦𑀁 𑀓𑀸𑀲𑀸𑀯𑀸𑀦𑀁𑀬𑁂𑀯 𑀧𑀪𑀸𑀬 𑀏𑀓𑁄𑀪𑀸𑀲𑀸𑀦𑀺 𑀪𑀽𑀢𑀧𑀸𑀮𑀲𑁂𑀝𑁆𑀞𑀺𑀓𑀼𑀮𑀲𑀤𑀺𑀲𑀸𑀦𑀺. 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸𑀦𑀻𑀢𑀺 𑀕𑁂𑀳𑀁 𑀧𑀯𑀺𑀲𑀦𑁆𑀢𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀗𑁆𑀔𑀸𑀢𑀸𑀦𑀁 𑀇𑀲𑀻𑀦𑀁 𑀘𑀻𑀯𑀭𑀯𑀸𑀢𑁂𑀦 𑀘𑁂𑀯 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀚𑀦𑀺𑀢𑀲𑀭𑀻𑀭𑀯𑀸𑀢𑁂𑀦 𑀘 𑀧𑀝𑀺𑀯𑀸𑀢𑀸𑀦𑀺 𑀧𑀯𑀸𑀬𑀺𑀢𑀸𑀦𑀺 𑀯𑀺𑀦𑀺𑀤𑁆𑀥𑀼𑀢𑀓𑀺𑀩𑁆𑀩𑀺𑀲𑀸𑀦𑀺 𑀯𑀸.

𑁫𑁧𑁫. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀺𑀢𑀸𑀦𑀺𑀤𑁆𑀤𑁂𑀲𑁂 𑀅𑀡𑀼𑀫𑀢𑁆𑀢𑀸𑀦𑀻𑀢𑀺 𑀅𑀡𑀼𑀧𑁆𑀧𑀫𑀸𑀡𑀸. 𑀯𑀚𑁆𑀚𑀸𑀢𑀺 𑀤𑁄𑀲𑀸. 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀸𑀦𑀻𑀢𑀺 𑀬𑀸𑀦𑀺 𑀢𑀸𑀦𑀺 𑀕𑀭𑀳𑀺𑀢𑀩𑁆𑀩𑀝𑁆𑀞𑁂𑀦 𑀯𑀚𑁆𑀚𑀸𑀦𑀺. 𑀅𑀧𑁆𑀧𑀫𑀢𑁆𑀢𑀓𑀸𑀦𑀻𑀢𑀺 𑀧𑀭𑀺𑀢𑁆𑀢𑀫𑀢𑁆𑀢𑀓𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀫𑀸𑀡𑀸𑀦𑀺. 𑀑𑀭𑀫𑀢𑁆𑀢𑀓𑀸𑀦𑀻𑀢𑀺 𑀧𑀭𑀺𑀢𑁆𑀢𑀢𑁄𑀧𑀺 𑀑𑀭𑀺𑀫𑀧𑁆𑀧𑀫𑀸𑀡𑀢𑁆𑀢𑀸 𑀑𑀭𑀫𑀢𑁆𑀢𑀓𑀸𑀦𑀺. 𑀮𑀳𑀼𑀲𑀸𑀦𑀻𑀢𑀺 𑀮𑀳𑀼𑀓𑀸𑀦𑀺. 𑀮𑀳𑀼𑀲𑀫𑁆𑀫𑀢𑀸𑀦𑀻𑀢𑀺 𑀮𑀳𑀽𑀢𑀺 𑀲𑀫𑁆𑀫𑀢𑀸𑀦𑀺. 𑀲𑀁𑀬𑀫𑀓𑀭𑀡𑀻𑀬𑀸𑀦𑀻𑀢𑀺 𑀲𑀁𑀬𑀫𑁂𑀦 𑀓𑀢𑁆𑀢𑀩𑁆𑀩𑀧𑀝𑀺𑀓𑀫𑁆𑀫𑀸𑀦𑀺. 𑀲𑀁𑀯𑀭𑀓𑀭𑀡𑀻𑀬𑀸𑀦𑀻𑀢𑀺 𑀲𑀁𑀯𑀭𑁂𑀦 𑀓𑀸𑀢𑀩𑁆𑀩𑀸𑀦𑀺 𑀲𑀁𑀯𑀭𑁂𑀦 𑀓𑀢𑁆𑀢𑀩𑁆𑀩𑀧𑀝𑀺𑀓𑀫𑁆𑀫𑀸𑀦𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀸𑀦𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀧𑀝𑀺𑀓𑀫𑁆𑀫𑀸𑀦𑀺. 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸𑀦𑀻𑀢𑀺 𑀫𑀦𑀲𑀸 𑀆𑀯𑀚𑁆𑀚𑀺𑀢𑀫𑀢𑁆𑀢𑁂𑀦𑁂𑀯 𑀓𑀢𑁆𑀢𑀩𑁆𑀩𑀧𑀝𑀺𑀓𑀫𑁆𑀫𑀸𑀦𑀺. 𑀓𑀸𑀦𑀺 𑀧𑀦 𑀢𑀸𑀦𑀻𑀢𑀺? 𑀤𑀺𑀯𑀸𑀯𑀺𑀳𑀸𑀭𑀯𑀸𑀲𑀻 𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑀸𑀦𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀓𑀸𑀦𑀺 𑀬𑀸𑀦𑀺 ‘𑀦 𑀧𑀼𑀦 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀫𑀦𑀲𑀸 𑀆𑀯𑀚𑁆𑀚𑀺𑀢𑀫𑀢𑁆𑀢𑁂𑀦𑁂𑀯 𑀲𑀼𑀚𑁆𑀛𑀦𑁆𑀢𑀺. 𑀅𑀥𑀺𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀁 𑀦𑀸𑀫𑁂𑀢𑀁 𑀓𑀣𑀺𑀢’’𑀦𑁆𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦𑀲𑁆𑀲 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲𑁂𑀯 𑀪𑀸𑀚𑀦𑀻𑀬𑀁. 𑀢𑀲𑁆𑀫𑀸 𑀲𑀩𑁆𑀩𑀮𑀳𑀼𑀓𑀁 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀁 𑀇𑀥 𑀯𑀚𑁆𑀚𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀁 𑀦𑀸𑀫𑁂𑀢𑀁 𑀓𑀣𑀺𑀢’’𑀦𑁆𑀢𑀺. 𑀇𑀢𑀺𑀇𑀫𑁂𑀲𑀽𑀢𑀺 ¶ 𑀏𑀯𑀁𑀧𑀓𑀸𑀭𑁂𑀲𑀼 𑀇𑀫𑁂𑀲𑀼. 𑀯𑀚𑁆𑀚𑀤𑀲𑁆𑀲𑀸𑀯𑀻𑀢𑀺 𑀯𑀚𑁆𑀚𑀢𑁄 𑀤𑁄𑀲𑀢𑁄 𑀤𑀲𑁆𑀲𑀦𑀲𑀻𑀮𑁄. 𑀪𑀬𑀤𑀲𑁆𑀲𑀸𑀯𑀻𑀢𑀺 ¶ 𑀘𑀢𑀼𑀩𑁆𑀩𑀺𑀥𑀲𑁆𑀲 𑀪𑀬𑀲𑁆𑀲 𑀓𑀸𑀭𑀡𑀢𑁆𑀢𑀸 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀇𑀥 𑀦𑀺𑀦𑁆𑀤𑀸𑀯𑀳𑀦𑀢𑁄, 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀢𑁄, 𑀉𑀧𑀭𑀺𑀕𑀼𑀡𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀡𑀢𑁄, 𑀯𑀺𑀧𑁆𑀧𑀝𑀺𑀲𑀸𑀭𑀚𑀦𑀦𑀢𑁄 𑀘 𑀏𑀢𑁂𑀦 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀤𑀻𑀦𑀯𑀢𑁄 𑀤𑀲𑁆𑀲𑀦𑀲𑀻𑀮𑁄.

𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻𑀢𑀺 𑀬𑀁 𑀢𑀢𑁆𑀣 𑀦𑀺𑀲𑁆𑀲𑀭𑀡𑀁 𑀢𑀲𑁆𑀲 𑀤𑀲𑁆𑀲𑀦𑀲𑀻𑀮𑁄. 𑀓𑀺𑀁 𑀧𑀦𑁂𑀢𑁆𑀣 𑀦𑀺𑀲𑁆𑀲𑀭𑀡𑀦𑁆𑀢𑀺? 𑀆𑀘𑀭𑀺𑀬𑀢𑁆𑀣𑁂𑀭𑀯𑀸𑀤𑁂 ¶ 𑀢𑀸𑀯 ‘‘𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑀢𑀸𑀬 𑀲𑀢𑀺 𑀅𑀥𑀺𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀓𑀣𑀺𑀢𑀁. 𑀅𑀦𑁆𑀢𑁂𑀯𑀸𑀲𑀺𑀓𑀢𑁆𑀣𑁂𑀭𑀯𑀸𑀤𑁂 𑀢𑀸𑀯 ‘‘𑀆𑀧𑀢𑁆𑀢𑀺𑀕𑀫𑀦𑀻𑀬𑀢𑀸𑀬 𑀲𑀢𑀺 𑀯𑀼𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀓𑀣𑀺𑀢𑀁.

𑀢𑀢𑁆𑀣 𑀢𑀣𑀸𑀭𑀽𑀧𑁄 𑀪𑀺𑀓𑁆𑀔𑀼 𑀅𑀡𑀼𑀫𑀢𑁆𑀢𑀸𑀦𑀺 𑀯𑀚𑁆𑀚𑀸𑀦𑀺 𑀯𑀚𑁆𑀚𑀢𑁄 𑀪𑀬𑀢𑁄 𑀧𑀲𑁆𑀲𑀢𑀺 𑀦𑀸𑀫. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀦𑀬𑁄 𑀓𑀣𑀺𑀢𑁄 𑁋 𑀧𑀭𑀫𑀸𑀡𑀼 𑀦𑀸𑀫, 𑀅𑀡𑀼 𑀦𑀸𑀫, 𑀢𑀚𑁆𑀚𑀸𑀭𑀻 𑀦𑀸𑀫, 𑀭𑀣𑀭𑁂𑀡𑀼 𑀦𑀸𑀫, 𑀮𑀺𑀓𑁆𑀔𑀸 𑀦𑀸𑀫, 𑀊𑀓𑀸 𑀦𑀸𑀫, 𑀥𑀜𑁆𑀜𑀫𑀸𑀲𑁄 𑀦𑀸𑀫, 𑀅𑀗𑁆𑀕𑀼𑀮𑀁 𑀦𑀸𑀫, 𑀯𑀺𑀤𑀢𑁆𑀣𑀺 𑀦𑀸𑀫, 𑀭𑀢𑀦𑀁 𑀦𑀸𑀫, 𑀬𑀝𑁆𑀞𑀺 𑀦𑀸𑀫, 𑀉𑀲𑀪𑀁 𑀦𑀸𑀫, 𑀕𑀸𑀯𑀼𑀢𑀁 𑀦𑀸𑀫, 𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀣 ‘𑀧𑀭𑀫𑀸𑀡𑀼’ 𑀦𑀸𑀫 𑀆𑀓𑀸𑀲𑀓𑁄𑀝𑁆𑀞𑀸𑀲𑀺𑀓𑁄 𑀫𑀁𑀲𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲𑁂𑀯 𑀆𑀕𑀘𑁆𑀙𑀢𑀺. ‘𑀅𑀡𑀼’ 𑀦𑀸𑀫 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑀢𑀸𑀮𑀘𑁆𑀙𑀺𑀤𑁆𑀤𑁂𑀳𑀺 𑀧𑀯𑀺𑀝𑁆𑀞𑀲𑀽𑀭𑀺𑀬𑀭𑀲𑁆𑀫𑀻𑀲𑀼 𑀯𑀝𑁆𑀝𑀺 𑀯𑀝𑁆𑀝𑀺 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. ‘𑀢𑀚𑁆𑀚𑀸𑀭𑀻’ 𑀦𑀸𑀫 𑀕𑁄𑀧𑀣𑀫𑀦𑀼𑀲𑁆𑀲𑀧𑀣𑀘𑀓𑁆𑀓𑀧𑀣𑁂𑀲𑀼 𑀙𑀺𑀚𑁆𑀚𑀺𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀉𑀕𑁆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. ‘𑀭𑀣𑀭𑁂𑀡𑀼’ 𑀦𑀸𑀫 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀮𑁆𑀮𑀻𑀬𑀢𑀺. 𑀮𑀺𑀓𑁆𑀔𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀏𑀢𑁂𑀲𑀼 𑀧𑀦 𑀙𑀢𑁆𑀢𑀺𑀁𑀲 𑀧𑀭𑀫𑀸𑀡𑀯𑁄 𑀏𑀓𑀲𑁆𑀲 𑀅𑀡𑀼𑀦𑁄 𑀧𑀫𑀸𑀡𑀁. 𑀙𑀢𑁆𑀢𑀺𑀁𑀲 𑀅𑀡𑀽 𑀏𑀓𑀸𑀬 𑀢𑀚𑁆𑀚𑀸𑀭𑀺𑀬𑀸 𑀧𑀫𑀸𑀡𑀁. 𑀙𑀢𑁆𑀢𑀺𑀁𑀲 𑀢𑀚𑁆𑀚𑀸𑀭𑀺𑀬𑁄 𑀏𑀓𑁄 𑀭𑀣𑀭𑁂𑀡𑀼. 𑀙𑀢𑁆𑀢𑀺𑀁𑀲 𑀭𑀣𑀭𑁂𑀡𑀽 𑀏𑀓𑀸 𑀮𑀺𑀓𑁆𑀔𑀸. 𑀲𑀢𑁆𑀢 𑀮𑀺𑀓𑁆𑀔𑀸 𑀏𑀓𑀸 𑀊𑀓𑀸. 𑀲𑀢𑁆𑀢 𑀊𑀓𑀸 𑀏𑀓𑁄 𑀥𑀜𑁆𑀜𑀫𑀸𑀲𑁄. 𑀲𑀢𑁆𑀢𑀥𑀜𑁆𑀜𑀫𑀸𑀲𑀧𑁆𑀧𑀫𑀸𑀡𑀁 𑀏𑀓𑀁 𑀅𑀗𑁆𑀕𑀼𑀮𑀁. 𑀢𑁂𑀦𑀗𑁆𑀕𑀼𑀮𑁂𑀦 𑀤𑁆𑀯𑀸𑀤𑀲𑀗𑁆𑀕𑀼𑀮𑀸𑀦𑀺 𑀯𑀺𑀤𑀢𑁆𑀣𑀺. 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄 𑀭𑀢𑀦𑀁. 𑀲𑀢𑁆𑀢 𑀭𑀢𑀦𑀸𑀦𑀺 𑀬𑀝𑁆𑀞𑀺. 𑀢𑀸𑀬 𑀬𑀝𑁆𑀞𑀺𑀬𑀸 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄 𑀉𑀲𑀪𑀁. 𑀅𑀲𑀻𑀢𑀺 𑀉𑀲𑀪𑀸𑀦𑀺 𑀕𑀸𑀯𑀼𑀢𑀁. 𑀘𑀢𑁆𑀢𑀸𑀭𑀺 𑀕𑀸𑀯𑀼𑀢𑀸𑀦𑀺 𑀬𑁄𑀚𑀦𑀁. 𑀢𑁂𑀦 𑀬𑁄𑀚𑀦𑁂𑀦 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸. 𑀬𑁄 𑀪𑀺𑀓𑁆𑀔𑀼 𑀅𑀡𑀼𑀫𑀢𑁆𑀢𑀁 𑀯𑀚𑁆𑀚𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑀤𑀺𑀲𑀁 𑀓𑀢𑁆𑀯𑀸 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺 𑁋 𑀅𑀬𑀁 𑀪𑀺𑀓𑁆𑀔𑀼 𑀅𑀡𑀼𑀫𑀢𑁆𑀢𑀸𑀦𑀺 ¶ 𑀯𑀚𑁆𑀚𑀸𑀦𑀺 𑀪𑀬𑀢𑁄 𑀧𑀲𑁆𑀲𑀢𑀺 𑀦𑀸𑀫. 𑀬𑁄𑀧𑀺 𑀪𑀺𑀓𑁆𑀔𑀼 𑀲𑀩𑁆𑀩𑀮𑀳𑀼𑀓𑀁 ¶ 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺 𑁋 𑀅𑀬𑀁 𑀅𑀡𑀼𑀫𑀢𑁆𑀢𑀸𑀦𑀺 𑀯𑀚𑁆𑀚𑀸𑀦𑀺 𑀯𑀚𑁆𑀚𑀢𑁄 𑀪𑀬𑀢𑁄 𑀧𑀲𑁆𑀲𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁧𑁬. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺𑀧𑀤𑀦𑀺𑀤𑁆𑀤𑁂𑀲𑁂 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀢𑀺 𑀪𑀺𑀓𑁆𑀔𑀽𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸. 𑀲𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸𑀧𑀺 𑀅𑀲𑀸𑀥𑀸𑀭𑀡𑀸𑀧𑀺 𑀪𑀺𑀓𑁆𑀔𑀼𑀲𑀺𑀓𑁆𑀔𑀸 𑀏𑀯 𑀦𑀸𑀫. 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸. 𑀲𑀸𑀧𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀧𑀺 𑀅𑀲𑀸𑀥𑀸𑀭𑀡𑀸𑀧𑀺 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀸 𑀏𑀯 𑀦𑀸𑀫. 𑀲𑀸𑀫𑀡𑁂𑀭𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀁 𑀲𑀺𑀓𑁆𑀔𑀸𑀧𑀺 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀸. 𑀉𑀧𑀸𑀲𑀓𑀲𑀺𑀓𑁆𑀔𑀸𑀢𑀺 𑀉𑀧𑀸𑀲𑀓𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸. 𑀲𑀸 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀯𑀲𑁂𑀦 𑀯𑀝𑁆𑀝𑀢𑀺. 𑀉𑀧𑀸𑀲𑀺𑀓𑀸𑀲𑀺𑀓𑁆𑀔𑀸𑀢𑀺 𑀉𑀧𑀸𑀲𑀺𑀓𑀸𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸. 𑀲𑀸𑀧𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀯𑀲𑁂𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀯𑀝𑁆𑀝𑀢𑀺. 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀲𑀺𑀓𑁆𑀔𑀸 ¶ 𑀬𑀸𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑀸. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀏𑀯 𑀲𑀺𑀓𑁆𑀔𑀢𑀺. 𑀲𑁂𑀲𑀲𑀺𑀓𑁆𑀔𑀸 𑀧𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀇𑀢𑀺 𑀇𑀫𑀸𑀲𑀼 𑀲𑀺𑀓𑁆𑀔𑀸𑀲𑀽𑀢𑀺 𑀏𑀯𑀁𑀧𑀓𑀸𑀭𑀸𑀲𑀼 𑀏𑀢𑀸𑀲𑀼 𑀲𑀺𑀓𑁆𑀔𑀸𑀲𑀼. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀦 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂𑀦 𑀲𑀩𑁆𑀩𑀁 𑀲𑀺𑀓𑁆𑀔𑀁. 𑀲𑀩𑁆𑀩𑀣𑀸 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀁 𑀲𑀺𑀓𑁆𑀔𑀁. 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀦𑁆𑀢𑀺 𑀲𑁂𑀲𑀸𑀪𑀸𑀯𑀢𑁄 𑀅𑀲𑁂𑀲𑀁; 𑀲𑀢𑀺𑀲𑀫𑁆𑀫𑁄𑀲𑁂𑀦 𑀪𑀺𑀦𑁆𑀦𑀲𑁆𑀲𑀸𑀧𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀼𑀦 𑀧𑀸𑀓𑀢𑀺𑀓𑀓𑀭𑀡𑀢𑁄 𑀦𑀺𑀲𑁆𑀲𑁂𑀲𑀁. 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀏𑀢𑀁 𑀲𑀩𑁆𑀩𑀁 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁂𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺 𑀧𑀽𑀭𑁂𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺.

𑁫𑁧𑁭-𑁮. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺𑀧𑀤𑀤𑁆𑀯𑀬𑀲𑁆𑀲 𑀦𑀺𑀤𑁆𑀤𑁂𑀲𑁂 𑀓𑀡𑁆𑀳𑀧𑀓𑁆𑀔𑀲𑁆𑀲 𑀧𑀞𑀫𑀯𑀘𑀦𑁂 𑀧𑀬𑁄𑀚𑀦𑀁 𑀆𑀘𑀸𑀭𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺𑀆𑀤𑀻𑀲𑀼 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁫𑁧𑁯. 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀦𑀺𑀤𑁆𑀤𑁂𑀲𑁂 ¶ 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀟𑁆𑀠𑀭𑀢𑁆𑀢𑀲𑀗𑁆𑀔𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀧𑀼𑀩𑁆𑀩𑀭𑀢𑁆𑀢𑀁; 𑀇𑀫𑀺𑀦𑀸 𑀧𑀞𑀫𑀬𑀸𑀫𑀜𑁆𑀘𑁂𑀯 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀕𑀡𑁆𑀳𑀸𑀢𑀺 ¶ . 𑀭𑀢𑁆𑀢𑀺𑀬𑀸 𑀧𑀘𑁆𑀙𑀸 𑀅𑀧𑀭𑀭𑀢𑁆𑀢𑀁; 𑀇𑀫𑀺𑀦𑀸 𑀧𑀘𑁆𑀙𑀺𑀫𑀬𑀸𑀫𑀜𑁆𑀘𑁂𑀯 𑀧𑀼𑀭𑁂𑀪𑀢𑁆𑀢𑀜𑁆𑀘 𑀕𑀡𑁆𑀳𑀸𑀢𑀺. 𑀫𑀚𑁆𑀛𑀺𑀫𑀬𑀸𑀫𑁄 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀤𑁆𑀤𑀸𑀓𑀺𑀮𑀫𑀣𑀯𑀺𑀦𑁄𑀤𑀦𑁄𑀓𑀸𑀲𑁄𑀢𑀺 𑀦 𑀕𑀳𑀺𑀢𑁄. 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀦𑁆𑀢𑀺 𑀚𑀸𑀕𑀭𑀺𑀬𑀲𑁆𑀲 𑀅𑀲𑀼𑀧𑀦𑀪𑀸𑀯𑀲𑁆𑀲 𑀅𑀦𑀼𑀬𑁄𑀕𑀁. 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀢𑀁 𑀅𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀆𑀲𑁂𑀯𑀦𑀁 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑁄, 𑀫𑀚𑁆𑀛𑀦𑁆𑀳𑁄, 𑀲𑀸𑀬𑀦𑁆𑀳𑁄𑀢𑀺 𑀢𑀬𑁄𑀧𑀺 𑀤𑀺𑀯𑀲𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸. 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸𑀢𑀺 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀇𑀫𑀺𑀦𑀸 𑀇𑀭𑀺𑀬𑀸𑀧𑀣𑀤𑁆𑀯𑀬𑁂𑀦𑁂𑀯 𑀯𑀺𑀳𑀭𑀦𑁆𑀢𑁄. 𑀘𑀺𑀢𑁆𑀢𑀲𑁆𑀲 𑀆𑀯𑀭𑀡𑀢𑁄 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀜𑁆𑀘𑀳𑀺𑀧𑀺 𑀦𑀻𑀯𑀭𑀡𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑁂𑀳𑀺 𑀯𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀲𑁄𑀥𑁂𑀢𑀺 𑀧𑀭𑀺𑀫𑁄𑀘𑁂𑀢𑀺. 𑀞𑀸𑀦𑀁 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀕𑀳𑀺𑀢𑀁, 𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀦 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀫𑁂𑀯. 𑀧𑀞𑀫𑀬𑀸𑀫𑀦𑁆𑀢𑀺 𑀲𑀓𑀮𑀲𑁆𑀫𑀺𑀫𑁆𑀧𑀺 𑀧𑀞𑀫𑀬𑀸𑀫𑁂. 𑀫𑀚𑁆𑀛𑀺𑀫𑀬𑀸𑀫𑀦𑁆𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀲𑁆𑀲 𑀙𑀝𑁆𑀞𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑁂 𑀫𑀚𑁆𑀛𑀺𑀫𑀬𑀸𑀫𑁂.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸, 𑀧𑁂𑀢𑀲𑁂𑀬𑁆𑀬𑀸, 𑀲𑀻𑀳𑀲𑁂𑀬𑁆𑀬𑀸, 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸. 𑀢𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺. ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂 ¶ , 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸; 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀳𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀚𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑁂𑀦𑁆𑀢𑀺. 𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺…𑀧𑁂… 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸; 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 ¶ 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺; 𑀤𑀺𑀯𑀲𑀫𑁆𑀧𑀺 𑀲𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀢𑀲𑀦𑁆𑀢𑁄 𑀧𑀩𑀼𑀚𑁆𑀛𑀢𑀺, 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺; 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺 ‘𑀦𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀦 𑀲𑀽𑀭𑀪𑀸𑀯𑀲𑁆𑀲 𑀅𑀦𑀼𑀭𑀽𑀧’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺; 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀘 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 ¶ 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 𑀧𑀦 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫.

𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼𑀓𑀸 𑀳𑁄𑀢𑀺; 𑀬𑀣𑀸 𑀧𑀦 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬𑀸’’𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘𑁂𑀯 𑀲𑀫𑁆𑀧𑀚𑀸𑀦𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. 𑀇𑀫𑀺𑀦𑀸 𑀲𑀼𑀧𑀭𑀺𑀕𑁆𑀕𑀸𑀳𑀓𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀓𑀣𑀺𑀢𑀁. 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀉𑀝𑁆𑀞𑀸𑀦𑀯𑁂𑀮𑀸𑀧𑀭𑀺𑀘𑁆𑀙𑁂𑀤𑀓𑀁 𑀉𑀝𑁆𑀞𑀸𑀦𑀲𑀜𑁆𑀜𑀁 𑀘𑀺𑀢𑁆𑀢𑁂 𑀉𑀧𑁂𑀢𑁆𑀯𑀸. 𑀏𑀯𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀉𑀝𑁆𑀞𑀸𑀢𑀼𑀁 𑀬𑀼𑀢𑁆𑀢𑁄.

𑁫𑁨𑁦-𑁫𑁨𑁧. 𑀲𑀸𑀢𑀘𑁆𑀘𑀁 𑀦𑁂𑀧𑀓𑁆𑀓𑀦𑁆𑀢𑀺 𑀲𑀢𑀢𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄 𑀲𑀸𑀢𑀘𑁆𑀘𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀜𑁆𑀘𑁂𑀯 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀦𑁂𑀧𑀓𑁆𑀓𑀲𑀗𑁆𑀔𑀸𑀢𑀁 𑀧𑀜𑁆𑀜𑀜𑁆𑀘 𑀬𑀼𑀢𑁆𑀢𑁄 𑀅𑀦𑀼𑀬𑀼𑀢𑁆𑀢𑁄 𑀧𑀯𑀢𑁆𑀢𑀬𑀫𑀸𑀦𑁄𑀬𑁂𑀯 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀯𑀻𑀭𑀺𑀬𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀓𑀣𑀺𑀢𑀁, 𑀧𑀜𑁆𑀜𑀸𑀧𑀺 𑀯𑀻𑀭𑀺𑀬𑀕𑀢𑀺𑀓𑀸 𑀏𑀯; 𑀯𑀻𑀭𑀺𑀬𑁂 𑀮𑁄𑀓𑀺𑀬𑀫𑁆𑀳𑀺 𑀮𑁄𑀓𑀺𑀬𑀸, 𑀮𑁄𑀓𑀼𑀢𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀸𑀢𑀺 𑀅𑀢𑁆𑀣𑁄.

𑁫𑁨𑁨. 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 ¶ 𑀥𑀫𑁆𑀫𑀸𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 ¶ 𑀫𑀕𑁆𑀕𑀜𑀸𑀡𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁 𑀥𑀫𑁆𑀫𑀸𑀦𑀁. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀫𑀽𑀳𑀢𑁄 𑀕𑀳𑁂𑀢𑁆𑀯𑀸 𑀮𑁄𑀓𑀺𑀬𑀸𑀬𑀧𑀺 𑀪𑀸𑀯𑀦𑀸𑀬 𑀏𑀓𑀸𑀭𑀫𑁆𑀫𑀡𑁂 𑀏𑀓𑀢𑁄 𑀧𑀯𑀢𑁆𑀢𑀦𑀲𑀫𑀢𑁆𑀣𑁂 𑀩𑁄𑀚𑁆𑀛𑀗𑁆𑀕𑁂𑀬𑁂𑀯 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀆𑀤𑀺𑀫𑀸𑀳. 𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫𑁨𑁩. 𑀅𑀪𑀺𑀓𑁆𑀓𑀦𑁆𑀢𑁂𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 𑀢𑀸𑀯 𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀧𑀼𑀭𑀢𑁄 𑀕𑀫𑀦𑀁. 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀦𑀺𑀯𑀢𑁆𑀢𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 ¶ 𑀮𑀩𑁆𑀪𑀢𑀺. 𑀕𑀫𑀦𑁂 𑀢𑀸𑀯 𑀧𑀼𑀭𑀢𑁄 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀞𑀸𑀦𑁂𑀧𑀺 𑀞𑀺𑀢𑀓𑁄𑀯 𑀓𑀸𑀬𑀁 𑀧𑀼𑀭𑀢𑁄 𑀑𑀦𑀸𑀫𑁂𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀢𑁄 𑀅𑀧𑀦𑀸𑀫𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀲𑀚𑁆𑀚𑀸𑀬𑀧𑀺 𑀦𑀺𑀲𑀺𑀦𑁆𑀦𑀓𑁄𑀯 𑀆𑀲𑀦𑁆𑀦𑀲𑁆𑀲 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄 𑀲𑀁𑀲𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀺𑀫𑀅𑀗𑁆𑀕𑀧𑁆𑀧𑀤𑁂𑀲𑀁 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀧𑀚𑁆𑀚𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻, 𑀲𑀫𑁆𑀧𑀚𑀜𑁆𑀜𑀲𑁆𑀲𑁂𑀯 𑀯𑀸 𑀓𑀸𑀭𑀻. 𑀲𑁄 𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯, 𑀦 𑀓𑀢𑁆𑀣𑀘𑀺 𑀲𑀫𑁆𑀧𑀚𑀜𑁆𑀜𑀯𑀺𑀭𑀳𑀺𑀢𑁄 𑀳𑁄𑀢𑀺. 𑀢𑀁 𑀧𑀦 𑀲𑀫𑁆𑀧𑀚𑀜𑁆𑀜𑀁 𑀬𑀲𑁆𑀫𑀸 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀢𑁂𑀦𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀪𑀺𑀓𑁆𑀓𑀫𑀢𑀺, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀓𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀬𑀜𑁆𑀳𑀺 𑀅𑀪𑀺𑀓𑁆𑀓𑀫𑀦𑁆𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁄 𑀯𑀸 𑀦 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑁄 𑀳𑁄𑀢𑀺; 𑀲𑀢𑀺𑀬𑀸 𑀧𑀦 𑀲𑀫𑀦𑁆𑀦𑀸𑀕𑀢𑁄 𑀧𑀜𑁆𑀜𑀸𑀬 𑀘 𑀲𑀫𑁆𑀧𑀚𑀸𑀦𑁄𑀬𑁂𑀯 𑀅𑀪𑀺𑀓𑁆𑀓𑀫𑀢𑀺 𑀘𑁂𑀯 𑀧𑀝𑀺𑀓𑁆𑀓𑀫𑀢𑀺 𑀘; 𑀲𑀩𑁆𑀩𑁂𑀲𑀼 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁 𑀑𑀢𑀸𑀭𑁂𑀢𑀺. 𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀲𑀫𑁆𑀧𑀚𑀜𑁆𑀜𑀁 𑁋 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁, 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁, 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀅𑀪𑀺𑀓𑁆𑀓𑀫𑀦𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀕𑀦𑁆𑀢𑁆𑀯𑀸 ‘𑀓𑀺𑀦𑁆𑀦𑀼 𑀫𑁂 𑀏𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺, 𑀦𑀢𑁆𑀣𑀻’𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’. 𑀢𑀢𑁆𑀣 𑀘 ‘𑀅𑀢𑁆𑀣𑁄’𑀢𑀺 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀲𑀗𑁆𑀖𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀅𑀲𑀼𑀪𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀥𑀫𑁆𑀫𑀢𑁄 𑀯𑀟𑁆𑀠𑀺. 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀳𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 ¶ 𑀧𑀻𑀢𑀺𑀁, 𑀲𑀗𑁆𑀖𑀤𑀲𑁆𑀲𑀦𑁂𑀦 𑀲𑀗𑁆𑀖𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀣𑁂𑀭𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬, 𑀅𑀲𑀼𑀪𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀁 𑀤𑀲𑁆𑀲𑀦𑀁 ¶ 𑀲𑀸𑀢𑁆𑀣𑀁. 𑀓𑁂𑀘𑀺 𑀧𑀦 ‘‘𑀆𑀫𑀺𑀲𑀢𑁄𑀧𑀺 𑀯𑀟𑁆𑀠𑀺 𑀅𑀢𑁆𑀣𑁄𑀬𑁂𑀯; 𑀢𑀁 𑀦𑀺𑀲𑁆𑀲𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

𑀢𑀲𑁆𑀫𑀺𑀁 𑀧𑀦 𑀕𑀫𑀦𑁂 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀤𑀲𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 ¶ , 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑀁 𑀇𑀢𑁆𑀣𑀺𑀬𑁄𑀧𑀺 𑀧𑀼𑀭𑀺𑀲𑀸𑀧𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬 𑀲𑀜𑁆𑀘𑀭𑀦𑁆𑀢𑀺, 𑀢𑀢𑁆𑀭 𑀘𑀲𑁆𑀲 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀧𑀝𑀺𑀖𑁄, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑀲𑀁𑀲𑀕𑁆𑀕𑀸𑀧𑀢𑁆𑀢𑀺𑀁 𑀯𑀸 𑀆𑀧𑀚𑁆𑀚𑀢𑀺, 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀯𑀸 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁. 𑀩𑁄𑀥𑀺𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀅𑀦𑁆𑀢𑁄𑀕𑀸𑀫𑁂 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑁄𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀚𑀦𑀲𑀦𑁆𑀦𑀺𑀧𑀸𑀢𑁄 𑀘𑁂𑀯 𑀅𑀦𑁆𑀢𑀭𑀸𑀬𑁄 𑀘 𑀳𑁄𑀢𑀺. 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀺; 𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁 𑀳𑁄𑀢𑀺. 𑀫𑀳𑀸𑀧𑀭𑀺𑀲𑀧𑀭𑀺𑀯𑀸𑀭𑀸𑀦𑀁 𑀣𑁂𑀭𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀼𑀪𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀢𑁆𑀣𑀸𑀬 𑀕𑀢𑁄. 𑀲𑀸𑀫𑀡𑁂𑀭𑁄 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀅𑀲𑀼𑀪𑀁 𑀤𑀺𑀲𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀢𑀻𑀡𑀺 𑀨𑀮𑀸𑀦𑀺 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀳𑀭𑁄 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀸𑀫𑀡𑁂𑀭𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 ‘𑀫𑀬𑀸 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸, 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑀭𑀺𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. ‘‘𑀏𑀳𑀻’’𑀢𑀺 𑀘 𑀯𑀼𑀢𑁆𑀢𑁄 𑀏𑀓𑀯𑀘𑀦𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀢𑀸𑀯 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀫𑀬𑀸 𑀞𑀺𑀢𑁄𑀓𑀸𑀲𑁂 𑀫𑀼𑀳𑀼𑀢𑁆𑀢𑀁 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 ¶ 𑀞𑀢𑁆𑀯𑀸 𑀑𑀮𑁄𑀓𑁂𑀣𑀸’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑁂𑀦 𑀧𑀢𑁆𑀢𑀯𑀺𑀲𑁂𑀲𑀫𑁂𑀯 𑀧𑀸𑀧𑀼𑀡𑀺. 𑀏𑀯𑀁 𑀏𑀓𑀁 𑀅𑀲𑀼𑀪𑀁 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀅𑀢𑁆𑀣𑀸𑀬 𑀚𑀸𑀢𑀁. 𑀏𑀯𑀁 𑀲𑀸𑀢𑁆𑀣𑀫𑁆𑀧𑀺 𑀧𑀦𑁂𑀢𑀁 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪𑀁 𑀅𑀲𑀧𑁆𑀧𑀸𑀬𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀧𑀼𑀭𑀺𑀲𑀸𑀲𑀼𑀪𑀁, 𑀲𑀪𑀸𑀕𑀫𑁂𑀯 𑀲𑀧𑁆𑀧𑀸𑀬𑀦𑁆𑀢𑀺. 𑀏𑀯𑀁 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀦𑀸𑀫.

𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑀸𑀢𑁆𑀣𑀲𑀧𑁆𑀧𑀸𑀬𑀲𑁆𑀲 𑀧𑀦 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 ¶ 𑀕𑁄𑀘𑀭𑀁 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀦𑀁 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀦𑀸𑀫. 𑀢𑀲𑁆𑀲𑀸𑀯𑀺𑀪𑀸𑀯𑀦𑀢𑁆𑀣𑀁 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋

𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀦 𑀳𑀭𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀧𑀦 𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 ¶ 𑀘. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑁆𑀯𑀸, 𑀢𑀣𑀸 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀫𑀚𑁆𑀛𑀺𑀫𑀬𑀸𑀫𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀦𑀺𑀲𑀚𑁆𑀚𑀸𑀘𑀗𑁆𑀓𑀫𑁂𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀕𑁂𑀯 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀲𑁄 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂 𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑁂𑀦𑀸𑀲𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸, 𑀲𑀘𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺 𑀢𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀘𑁂𑀢𑀺𑀬𑀗𑁆𑀕𑀡𑀁 𑀧𑀯𑀺𑀲𑀢𑀺, 𑀅𑀜𑁆𑀜𑀁 𑀘𑁂 𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺 𑀲𑁄𑀧𑀸𑀦𑀫𑀽𑀮𑁂 𑀞𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀪𑀡𑁆𑀟𑀁 𑀯𑀺𑀬 𑀢𑀁 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀘𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑀩𑁆𑀩𑀁, 𑀔𑀼𑀤𑁆𑀤𑀓𑀁 𑀘𑁂, 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑀩𑁆𑀩𑀁. 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑁄𑀥𑀺𑀬𑀗𑁆𑀕𑀡𑀁 𑀧𑀢𑁆𑀢𑁂𑀦𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀩𑁄𑀥𑀺 𑀯𑀦𑁆𑀤𑀺𑀢𑀩𑁆𑀩𑀸.

𑀲𑁄 𑀏𑀯𑀁 𑀘𑁂𑀢𑀺𑀬𑀜𑁆𑀘 𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀧𑀝𑀺𑀲𑀸𑀫𑀺𑀢𑀁 𑀪𑀡𑁆𑀟𑀓𑀁 𑀳𑀢𑁆𑀣𑁂𑀦 𑀕𑀡𑁆𑀳𑀦𑁆𑀢𑁄 ¶ 𑀯𑀺𑀬, 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀸𑀫𑀲𑀫𑀻𑀧𑁂 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘𑀅𑀬𑁆𑀬𑁄 𑀦𑁄 𑀆𑀕𑀢𑁄’𑀢𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀯𑀸 𑀕𑁂𑀳𑁂 𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀁 𑀦 𑀦𑀺𑀝𑁆𑀞𑀸𑀢𑀺 𑀢𑀸𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀲𑀘𑁂𑀧𑀺 𑀦 𑀓𑀣𑀸𑀧𑁂𑀦𑁆𑀢𑀺 ‘‘𑀚𑀦𑀲𑀗𑁆𑀕𑀳𑀢𑁆𑀣𑀁 𑀥𑀫𑁆𑀫𑀓𑀣𑀸 𑀦𑀸𑀫 𑀓𑀸𑀢𑀩𑁆𑀩𑀸𑀬𑁂𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀥𑀫𑁆𑀫𑀓𑀣𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺𑀬𑀫𑀸𑀦𑁂𑀳𑀺𑀧𑀺 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀕𑀢𑁄𑀯 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀢𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺.

𑀅𑀣 ¶ 𑀦𑀁 𑀧𑀼𑀭𑁂𑀢𑀭𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀲𑁆𑀲 𑀕𑀡𑁆𑀳𑀦𑁆𑀢𑀺. 𑀧𑁄𑀭𑀸𑀡𑀓𑀪𑀺𑀓𑁆𑀔𑀽 𑀓𑀺𑀭 ‘𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄’𑀢𑀺 𑀦 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀓𑀭𑁄𑀦𑁆𑀢𑀺. 𑀢𑁂 𑀢𑀁 𑀧𑀼𑀘𑁆𑀙𑀦𑁆𑀢𑀺 ‘‘𑀪𑀦𑁆𑀢𑁂, 𑀏𑀢𑁂 𑀫𑀦𑀼𑀲𑁆𑀲𑀸 ¶ 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀳𑁄𑀦𑁆𑀢𑀺? 𑀫𑀸𑀢𑀺𑀧𑀓𑁆𑀔𑀢𑁄 𑀲𑀫𑁆𑀩𑀦𑁆𑀥𑀸 𑀧𑀺𑀢𑀺𑀧𑀓𑁆𑀔𑀢𑁄’’𑀢𑀺? ‘‘𑀓𑀺𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀣𑀸’’𑀢𑀺? ‘‘𑀢𑀼𑀫𑁆𑀳𑁂𑀲𑀼 𑀏𑀢𑁂𑀲𑀁 𑀧𑁂𑀫𑀁 𑀩𑀳𑀼𑀫𑀸𑀦’’𑀦𑁆𑀢𑀺. ‘‘𑀆𑀯𑀼𑀲𑁄, 𑀬𑀁 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀤𑀼𑀓𑁆𑀓𑀭𑀁 𑀢𑀁 𑀏𑀢𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀓𑀭𑁄𑀦𑁆𑀢𑀺. 𑀧𑀢𑁆𑀢𑀘𑀻𑀯𑀭𑀫𑁆𑀧𑀺 𑀦𑁄 𑀏𑀢𑁂𑀲𑀁 𑀲𑀦𑁆𑀢𑀓𑀫𑁂𑀯, 𑀏𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀦𑁂𑀯 𑀪𑀬𑁂 𑀪𑀬𑀁, 𑀦 𑀙𑀸𑀢𑀓𑁂 𑀙𑀸𑀢𑀓𑀁 𑀚𑀸𑀦𑀸𑀫. 𑀏𑀤𑀺𑀲𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑀺𑀦𑁄 𑀦𑀢𑁆𑀣𑀻’’𑀢𑀺 𑀢𑁂𑀲𑀁 𑀕𑀼𑀡𑁂 𑀓𑀣𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’𑀢𑀺.

𑀬𑀲𑁆𑀲 𑀧𑀦 𑀧𑀕𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀚𑀢𑁂𑀚𑁄 𑀧𑀚𑁆𑀚𑀮𑀢𑀺, 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀸𑀤𑀺𑀦𑁆𑀦𑀓𑀁 𑀕𑀡𑁆𑀳𑀸𑀢𑀺, 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀻𑀣𑀺𑀁 𑀦𑀸𑀭𑁄𑀳𑀢𑀺, 𑀲𑁄 𑀧𑀕𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀕𑀲𑀸𑀯 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀕𑁄𑀭𑀽𑀧𑀸𑀦𑀁 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀫𑁂𑀯 𑀕𑀸𑀫𑀁 𑀬𑀸𑀕𑀼𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀺𑀯𑀢𑀺. 𑀅𑀣𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀅𑀚𑁆𑀛𑁄𑀳𑀭𑀡𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 ¶ 𑀕𑀡𑁆𑀳𑀸𑀢𑀺, 𑀖𑀝𑀲𑀢𑁂𑀦 𑀦𑁆𑀳𑀸𑀢𑁄 𑀯𑀺𑀬 𑀢𑁂𑀚𑁄𑀥𑀸𑀢𑀼𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀬𑀸𑀕𑀼𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀢𑁆𑀢𑀜𑁆𑀘 𑀫𑀼𑀔𑀜𑁆𑀘 𑀥𑁄𑀯𑀺𑀢𑁆𑀯𑀸 𑀅𑀦𑁆𑀢𑀭𑀸𑀪𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀢𑁆𑀯𑀸 𑀅𑀯𑀲𑁂𑀲𑀝𑁆𑀞𑀸𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀧𑀝𑁆𑀞𑀳𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀆𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘𑀦 𑀳𑀭𑀢𑀺 𑀧𑀘𑁆𑀘𑀸𑀳𑀭𑀢𑀻’𑀢𑀺. 𑀏𑀤𑀺𑀲𑀸 𑀘 𑀪𑀺𑀓𑁆𑀔𑀽 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀦𑀸𑀫 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀲𑀻𑀳𑀴𑀤𑀻𑀧𑁂𑀬𑁂𑀯 𑀢𑁂𑀲𑀼 𑀢𑁂𑀲𑀼 𑀕𑀸𑀫𑁂𑀲𑀼 𑀆𑀲𑀦𑀲𑀸𑀮𑀸𑀬 𑀦 𑀢𑀁 𑀆𑀲𑀦𑀁 𑀅𑀢𑁆𑀣𑀺, 𑀬𑀢𑁆𑀣 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀪𑀺𑀓𑁆𑀔𑀽 𑀦𑀢𑁆𑀣𑀻𑀢𑀺.

𑀬𑁄 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀻𑀮𑀯𑀺𑀦𑀺𑀩𑀦𑁆𑀥𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 ‘𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻’𑀢𑀺𑀧𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀻𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄 𑀘𑀭𑀺𑀢𑁆𑀯𑀸 𑀘 𑀪𑀼𑀜𑁆𑀚𑀺𑀢𑁆𑀯𑀸 𑀘 𑀢𑀼𑀘𑁆𑀙𑁄 𑀦𑀺𑀓𑁆𑀔𑀫𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’𑀢𑀺.

𑀬𑁄 ¶ 𑀧𑀦𑀸𑀬𑀁 ‘‘𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑁄, 𑀲𑁄 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀢𑁆𑀣𑀓𑀸𑀫𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 ¶ 𑀤𑀲𑀫𑁆𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀢𑀫𑁆𑀧𑀺 𑀏𑀓𑀢𑁄 𑀯𑀲𑀦𑁆𑀢𑀸 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀦 𑀇𑀡𑀝𑁆𑀝𑀸, 𑀦 𑀪𑀬𑀝𑁆𑀝𑀸, 𑀦 𑀆𑀚𑀻𑀯𑀺𑀓𑀸𑀧𑀓𑀢𑀸 𑀧𑀩𑁆𑀩𑀚𑀺𑀢𑀸; 𑀤𑀼𑀓𑁆𑀔𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑀸 𑀧𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀫𑀸 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀕𑀫𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣. 𑀞𑀸𑀦𑁂, 𑀦𑀺𑀲𑀚𑁆𑀚𑀸𑀬, 𑀲𑀬𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀲𑀬𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺.

𑀢𑁂 𑀏𑀯𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸, 𑀅𑀟𑁆𑀠𑀉𑀲𑀪𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀦𑁆𑀢𑀭𑁂𑀲𑀼 𑀧𑀸𑀲𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀓𑀲𑁆𑀲𑀘𑀺 𑀕𑀫𑀦𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀲𑁄 ‘𑀅𑀬𑀁 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀉𑀧𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀁 𑀚𑀸𑀦𑀸𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂 𑀏𑀢’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁄𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀻𑀢𑀺 𑀲𑁄 𑀏𑀯 𑀦𑀬𑁄. 𑀅𑀭𑀺𑀬𑀪𑀽𑀫𑀺𑀁 ¶ 𑀑𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀢𑀁 𑀓𑀺𑀮𑁂𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀭𑀢𑀺 𑀘𑁂 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀭𑀺𑀫𑀧𑀤𑁂𑀲𑀜𑁆𑀜𑁂𑀯 𑀏𑀢𑀺, 𑀆𑀮𑀺𑀦𑁆𑀤𑀓𑀯𑀸𑀲𑀻 𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀏𑀯 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀲𑀦𑁆𑀢𑀸 𑀘 𑀯𑀧𑀦𑁆𑀢𑀸 𑀘 𑀫𑀤𑁆𑀤𑀦𑁆𑀢𑀸 𑀘 𑀓𑀫𑁆𑀫𑀸𑀦𑀺 𑀘 𑀓𑀭𑁄𑀦𑁆𑀢𑀸 𑀣𑁂𑀭𑀁 𑀢𑀣𑀸𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀣𑁂𑀭𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀫𑀕𑁆𑀕𑀫𑀽𑀴𑁆𑀳𑁄 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀧𑀫𑀼𑀝𑁆𑀞𑁄’’𑀢𑀺 𑀲𑀫𑀼𑀮𑁆𑀮𑀧𑀦𑁆𑀢𑀺. 𑀲𑁄 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀧𑀢𑁆𑀢𑀤𑀺𑀯𑀲𑁂 𑀘𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀗𑁆𑀕𑀼𑀮𑀻𑀳𑀺 𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀁𑀲𑀼. 𑀢𑀜𑁆𑀘 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀯𑀦𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀘𑁆𑀙𑀺 𑁋 ‘‘𑀭𑀢𑁆𑀢𑀺𑀪𑀸𑀕𑁂 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀑𑀪𑀸𑀲𑁄 𑀅𑀳𑁄𑀲𑀺. 𑀓𑀺𑀁 𑀲𑁄 𑀑𑀪𑀸𑀲𑁄’’𑀢𑀺? 𑀣𑁂𑀭𑁄 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 ‘‘𑀑𑀪𑀸𑀲𑁄 𑀦𑀸𑀫 𑀤𑀻𑀧𑁄𑀪𑀸𑀲𑁄𑀧𑀺 𑀳𑁄𑀢𑀺, 𑀫𑀡𑀺𑀑𑀪𑀸𑀲𑁄𑀧𑀻’’𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁄 ‘‘𑀧𑀝𑀺𑀘𑁆𑀙𑀸𑀤𑁂𑀣 𑀢𑀼𑀫𑁆𑀳𑁂’’𑀢𑀺 𑀦𑀺𑀩𑀤𑁆𑀥𑁄 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀆𑀭𑁄𑀘𑁂𑀲𑀺.

𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 ¶ 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀘. 𑀲𑁄𑀧𑀺 𑀓𑀺𑀭 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 ‘𑀧𑀞𑀫𑀁 ¶ 𑀢𑀸𑀯 𑀪𑀕𑀯𑀢𑁄 𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻’𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀲𑀺; 𑀧𑀼𑀦 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀉𑀤𑁆𑀥𑀢𑁂 𑀧𑀸𑀤𑁂 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀕𑀸𑀫𑀲𑀻𑀫𑀁 𑀕𑀦𑁆𑀢𑁆𑀯𑀸 ‘𑀕𑀸𑀯𑀻 𑀦𑀼 𑀔𑁄, 𑀧𑀩𑁆𑀩𑀚𑀺𑀢𑁄 𑀦𑀼 𑀔𑁄’𑀢𑀺 𑀆𑀲𑀗𑁆𑀓𑀦𑀻𑀬𑀧𑁆𑀧𑀤𑁂𑀲𑁂 𑀞𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀘𑁆𑀙𑀓𑀦𑁆𑀢𑀭𑀢𑁄 𑀉𑀤𑀓𑁂𑀦 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? ‘𑀫𑀸 𑀫𑁂 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀯𑀸 𑀯𑀦𑁆𑀤𑀺𑀢𑀼𑀁 𑀯𑀸 𑀆𑀕𑀢𑁂 𑀫𑀦𑀼𑀲𑁆𑀲𑁂 ‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’𑀢𑀺 𑀯𑀘𑀦𑀫𑀢𑁆𑀢𑁂𑀦𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑁄 𑀅𑀳𑁄𑀲𑀻’𑀢𑀺. ‘𑀅𑀚𑁆𑀚, 𑀪𑀦𑁆𑀢𑁂, 𑀓𑀢𑀺𑀫𑀻’𑀢𑀺 𑀤𑀺𑀯𑀲𑀁 𑀯𑀸 𑀪𑀺𑀓𑁆𑀔𑀼𑀕𑀡𑀦𑀁 𑀯𑀸 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑁄 𑀧𑀦 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀢𑀺; 𑀲𑀘𑁂 𑀤𑀺𑀯𑀲𑀸𑀤𑀺𑀧𑀼𑀘𑁆𑀙𑀓𑀸 𑀦 𑀳𑁄𑀦𑁆𑀢𑀺, 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀁 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸𑀯 ¶ 𑀬𑀸𑀢𑀺.

𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀧𑀜𑁆𑀜𑀸𑀲 𑀪𑀺𑀓𑁆𑀔𑀽 𑀯𑀺𑀬 𑀘. 𑀢𑁂 𑀓𑀺𑀭 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀺𑀫𑀸𑀬𑀁 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦𑀸𑀮𑀧𑀺𑀲𑁆𑀲𑀸𑀫𑀸’’𑀢𑀺. 𑀕𑀸𑀫𑀜𑁆𑀘 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀧𑀯𑀺𑀲𑀺𑀁𑀲𑀼, 𑀤𑀺𑀯𑀲𑀸𑀤𑀻𑀲𑀼 𑀧𑀼𑀘𑁆𑀙𑀺𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀦𑀺𑀝𑁆𑀞𑀼𑀪𑀦𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀚𑀸𑀦𑀺𑀁𑀲𑀼 𑁋 ‘𑀅𑀚𑁆𑀚 𑀏𑀓𑁄 𑀆𑀕𑀢𑁄, 𑀅𑀚𑁆𑀚 𑀤𑁆𑀯𑁂’𑀢𑀺; 𑀏𑀯𑀜𑁆𑀘 𑀘𑀺𑀦𑁆𑀢𑁂𑀲𑀼𑀁 𑁋 ‘𑀓𑀺𑀦𑁆𑀦𑀼 𑀔𑁄 𑀏𑀢𑁂 𑀅𑀫𑁆𑀳𑁂𑀳𑁂𑀯 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀦𑁆𑀢𑀺 𑀉𑀤𑀸𑀳𑀼 𑀅𑀜𑁆𑀜𑀫𑀜𑁆𑀜𑀫𑁆𑀧𑀺? 𑀬𑀤𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀦 𑀲𑀮𑁆𑀮𑀧𑀦𑁆𑀢𑀺, 𑀅𑀤𑁆𑀥𑀸 𑀯𑀺𑀯𑀸𑀤𑀚𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀏𑀣 𑀦𑁂 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’𑀢𑀺 𑀲𑀩𑁆𑀩𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀸𑀲𑀸𑀬 𑀪𑀺𑀓𑁆𑀔𑀽𑀲𑀼 𑀤𑁆𑀯𑁂𑀧𑀺 𑀪𑀺𑀓𑁆𑀔𑀽 𑀏𑀓𑁄𑀓𑀸𑀲𑁂 𑀦𑀸𑀤𑁆𑀤𑀲𑀁𑀲𑀼. 𑀢𑀢𑁄 𑀬𑁄 𑀢𑁂𑀲𑀼 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑁄 𑀆𑀳 𑁋 ‘‘𑀦, 𑀪𑁄, 𑀓𑀮𑀳𑀓𑀸𑀭𑀓𑀸𑀦𑀁 𑀯𑀲𑀦𑁄𑀓𑀸𑀲𑁄 𑀈𑀤𑀺𑀲𑁄 𑀳𑁄𑀢𑀺. 𑀲𑀼𑀲𑀫𑁆𑀫𑀝𑁆𑀞𑀁 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀁, 𑀲𑀼𑀦𑀺𑀓𑁆𑀔𑀺𑀢𑁆𑀢𑀸 𑀲𑀫𑁆𑀫𑀚𑁆𑀚𑀦𑀺𑀬𑁄, 𑀲𑀽𑀧𑀝𑁆𑀞𑀺𑀢𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬’’𑀦𑁆𑀢𑀺. 𑀢𑁂 𑀢𑀢𑁄𑀯 𑀦𑀺𑀯𑀢𑁆𑀢𑀸. 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀦𑁆𑀢𑁄𑀢𑁂𑀫𑀸𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀁.

𑀏𑀯𑀁 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬, 𑀓𑀮𑀫𑁆𑀩𑀼𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀪𑀺𑀓𑁆𑀔𑀽 𑀯𑀺𑀬 𑀘 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 ¶ 𑀕𑀦𑁆𑀢𑁆𑀯𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀢𑁆𑀣 𑀲𑀼𑀭𑀸𑀲𑁄𑀡𑁆𑀟𑀥𑀼𑀢𑁆𑀢𑀸𑀤𑀬𑁄 𑀓𑀮𑀳𑀓𑀸𑀭𑀓𑀸 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀦𑀢𑁆𑀣𑀺, 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀦 𑀢𑀼𑀭𑀺𑀢𑀢𑀼𑀭𑀺𑀢𑁄 𑀯𑀺𑀬 𑀚𑀯𑁂𑀦 𑀕𑀘𑁆𑀙𑀢𑀺, 𑀦 𑀳𑀺 𑀚𑀯𑀦𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀁 𑀦𑀸𑀫 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀯𑀺𑀲𑀫𑀪𑀽𑀫𑀺𑀪𑀸𑀕𑀧𑁆𑀧𑀢𑁆𑀢𑀁 𑀧𑀦 𑀉𑀤𑀓𑀲𑀓𑀝𑀁 𑀯𑀺𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀦𑀼𑀖𑀭𑀁 𑀧𑀯𑀺𑀝𑁆𑀞𑁄 𑀘 𑀤𑀸𑀢𑀼𑀓𑀸𑀫𑀁 𑀯𑀸 𑀅𑀤𑀸𑀢𑀼𑀓𑀸𑀫𑀁 𑀯𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀢𑀤𑀦𑀼𑀭𑀽𑀧𑀁 𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀩𑀳𑀺𑀕𑀸𑀫𑁂 𑀯𑀸 𑀯𑀺𑀳𑀸𑀭𑀫𑁂𑀯 𑀯𑀸 𑀆𑀕𑀦𑁆𑀢𑁆𑀯𑀸 ¶ , 𑀬𑀣𑀸𑀨𑀸𑀲𑀼𑀓𑁂 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀸𑀮𑁂𑀧𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬, 𑀦 𑀫𑀤𑀸𑀬, 𑀦 𑀫𑀡𑁆𑀟𑀦𑀸𑀬, 𑀦 𑀯𑀺𑀪𑀽𑀲𑀦𑀸𑀬…𑀧𑁂… 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺. 𑀪𑀼𑀢𑁆𑀢𑀸𑀯𑀻 𑀘 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 ¶ 𑀪𑀢𑁆𑀢𑀓𑀺𑀮𑀫𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀬𑀣𑀸 𑀧𑀼𑀭𑁂𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀫𑀦𑀲𑀺𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘𑀸’𑀢𑀺.

𑀇𑀫𑀁 𑀧𑀦 𑀳𑀭𑀡𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄, 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀞𑀫𑀯𑀬𑁂 𑀏𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀦𑁄 𑀘𑁂 𑀧𑀞𑀫𑀯𑀬𑁂 𑀧𑀸𑀧𑀼𑀡𑀸𑀢𑀺 𑀅𑀣 𑀫𑀚𑁆𑀛𑀺𑀫𑀯𑀬𑁂, 𑀦𑁄 𑀘𑁂 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺 𑀅𑀣 𑀧𑀘𑁆𑀙𑀺𑀫𑀯𑀬𑁂, 𑀦𑁄 𑀘𑁂 𑀧𑀘𑁆𑀙𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺 𑀅𑀣 𑀫𑀭𑀡𑀲𑀫𑀬𑁂, 𑀦𑁄 𑀘𑁂 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸, 𑀦𑁄 𑀘𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀦𑀺𑀩𑁆𑀩𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀦𑁄 𑀘𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀯𑀸 𑀳𑁄𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄, 𑀫𑀳𑀸𑀧𑀜𑁆𑀜𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀺𑀤𑁆𑀥𑀺𑀓𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀥𑀼𑀢𑀗𑁆𑀕𑀥𑀭𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄, 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑁄, 𑀯𑀺𑀦𑀬𑀥𑀭𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀉𑀧𑀸𑀮𑀺, 𑀥𑀫𑁆𑀫𑀓𑀣𑀺𑀓𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄, 𑀆𑀭𑀜𑁆𑀜𑀺𑀓𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀭𑁂𑀯𑀢𑁄, 𑀩𑀳𑀼𑀲𑁆𑀲𑀼𑀢𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀆𑀦𑀦𑁆𑀤𑁄, 𑀲𑀺𑀓𑁆𑀔𑀸𑀓𑀸𑀫𑁄 𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀭𑀸𑀳𑀼𑀮𑁄 𑀩𑀼𑀤𑁆𑀥𑀧𑀼𑀢𑁆𑀢𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀬𑁆𑀯𑀸𑀬𑀁 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘, 𑀢𑀲𑁆𑀲 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀲𑀺𑀔𑀸𑀧𑁆𑀧𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀓𑁆𑀓𑀫𑀸𑀤𑀻𑀲𑀼 ¶ 𑀧𑀦 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀥 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀫𑀦𑁆𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁄 𑀯𑀸 𑀬𑀣𑀸 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 ‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀺, 𑀅𑀢𑁆𑀢𑀦𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’𑀢𑀺 𑀯𑀸 ‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀺, 𑀫𑀬𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’𑀢𑀺 𑀯𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄 ‘𑀅𑀪𑀺𑀓𑁆𑀓𑀫𑀸𑀫𑀻’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀅𑀬𑀁 𑀓𑀸𑀬𑀲𑀫𑁆𑀫𑀢𑁄 𑀅𑀝𑁆𑀞𑀺𑀲𑀗𑁆𑀖𑀸𑀢𑁄 𑀅𑀪𑀺𑀓𑁆𑀓𑀫𑀢𑀺. 𑀢𑀲𑁆𑀲𑁂𑀯𑀁 𑀅𑀪𑀺𑀓𑁆𑀓𑀫𑀢𑁄 𑀏𑀓𑁂𑀓𑀧𑀸𑀤𑀼𑀤𑁆𑀥𑀭𑀡𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 ¶ 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄; 𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼. 𑀯𑁄𑀲𑁆𑀲𑀚𑁆𑀚𑀦𑁂 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 ¶ 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄; 𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑁂𑀲𑀼 𑀢𑀢𑁆𑀣 𑀉𑀤𑁆𑀥𑀭𑀡𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺; 𑀢𑀣𑀸 𑀅𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑀻𑀢𑀺𑀳𑀭𑀡𑀁, 𑀯𑀻𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑁄𑀲𑁆𑀲𑀚𑁆𑀚𑀦𑀁, 𑀯𑁄𑀲𑁆𑀲𑀚𑁆𑀚𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀁, 𑀲𑀦𑁆𑀦𑀺𑀓𑁆𑀔𑁂𑀧𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀭𑀼𑀚𑁆𑀛𑀦𑀁 𑀦 𑀧𑀸𑀧𑀼𑀡𑀦𑁆𑀢𑀺; 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀩𑁆𑀩𑀁 𑀧𑀩𑁆𑀩𑀁 𑀲𑀦𑁆𑀥𑀺 𑀲𑀦𑁆𑀥𑀺 𑀑𑀥𑀺 𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀁 𑀯𑀺𑀬 𑀧𑀝𑀧𑀝𑀸𑀬𑀦𑁆𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺? 𑀓𑀲𑁆𑀲 𑀯𑀸 𑀏𑀓𑀲𑁆𑀲 𑀅𑀪𑀺𑀓𑁆𑀓𑀫𑀦𑀁? 𑀧𑀭𑀫𑀢𑁆𑀣𑀢𑁄 𑀳𑀺 𑀥𑀸𑀢𑀽𑀦𑀁𑀬𑁂𑀯 𑀕𑀫𑀦𑀁, 𑀥𑀸𑀢𑀽𑀦𑀁 𑀞𑀸𑀦𑀁, 𑀥𑀸𑀢𑀽𑀦𑀁 𑀦𑀺𑀲𑀚𑁆𑀚𑀸, 𑀥𑀸𑀢𑀽𑀦𑀁 𑀲𑀬𑀦𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀓𑁄𑀝𑁆𑀞𑀸𑀲𑁂 𑀲𑀤𑁆𑀥𑀺𑀁 𑀭𑀽𑀧𑁂𑀳𑀺 𑁋

𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺;

𑀅𑀯𑀻𑀘𑀺𑀫𑀦𑀼𑀲𑀫𑁆𑀩𑀦𑁆𑀥𑁄, 𑀦𑀤𑀻𑀲𑁄𑀢𑁄𑀯 𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀦𑀸𑀫𑀸𑀢𑀺.

𑀦𑀺𑀝𑁆𑀞𑀺𑀢𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺𑀧𑀤𑀲𑁆𑀲 𑀅𑀢𑁆𑀣𑁄.

𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂𑀢𑀺 𑀏𑀢𑁆𑀣 𑀧𑀦 𑀆𑀮𑁄𑀓𑀺𑀢𑀁 𑀦𑀸𑀫 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁, 𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁. 𑀅𑀜𑁆𑀜𑀸𑀦𑀺𑀧𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀘𑁆𑀙𑀢𑁄 𑀧𑁂𑀓𑁆𑀔𑀦𑀯𑀲𑁂𑀦 𑀑𑀮𑁄𑀓𑀺𑀢𑀉𑀮𑁆𑀮𑁄𑀓𑀺𑀢𑀸𑀧𑀮𑁄𑀓𑀺𑀢𑀸𑀦𑀺 𑀦𑀸𑀫 ¶ 𑀳𑁄𑀦𑁆𑀢𑀺. 𑀢𑀸𑀦𑀺 𑀇𑀥 𑀦 𑀕𑀳𑀺𑀢𑀸𑀦𑀺. 𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀦 𑀇𑀫𑀸𑀦𑁂𑀯 𑀤𑁆𑀯𑁂 𑀕𑀳𑀺𑀢𑀸𑀦𑀺. 𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸𑀢𑀺.

𑀢𑀢𑁆𑀣 ‘𑀆𑀮𑁄𑀓𑁂𑀲𑁆𑀲𑀸𑀫𑀻’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’. 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑁂𑀢𑀺 𑁋 ‘𑀏𑀯𑀁 𑀫𑁂 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑀬𑀢𑁄 𑀦 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀲𑀸𑀢𑁆𑀣𑀓𑀲𑀫𑁆𑀧𑀚𑀸𑀦𑁄 ¶ 𑀳𑁄𑀢𑀺. ‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀘𑁆𑀙𑀺𑀫𑀸 𑀤𑀺𑀲𑀸, 𑀉𑀢𑁆𑀢𑀭𑀸 𑀤𑀺𑀲𑀸, 𑀤𑀓𑁆𑀔𑀺𑀡𑀸 𑀤𑀺𑀲𑀸, 𑀉𑀤𑁆𑀥𑀁, 𑀅𑀥𑁄, 𑀅𑀦𑀼𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 ¶ 𑀦𑀦𑁆𑀤𑁄 𑀅𑀦𑀼𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀢𑀺 𑁋 𑀏𑀯𑀁 𑀫𑁂 𑀅𑀦𑀼𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑀬𑀢𑁄…𑀧𑁂… 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁯).

𑀅𑀧𑀺𑀘 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁂𑀢𑀺𑀬𑀤𑀲𑁆𑀲𑀦𑀸𑀤𑀺𑀯𑀲𑁂𑀦𑁂𑀯 𑀲𑀸𑀢𑁆𑀣𑀓𑀢𑀸 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀅𑀯𑀺𑀚𑀳𑀦𑀫𑁂𑀯 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’. 𑀢𑀲𑁆𑀫𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀳𑀺 𑀅𑀢𑁆𑀢𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯, 𑀓𑀲𑀺𑀡𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀳𑀺 𑀯𑀸 𑀧𑀦 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀆𑀮𑁄𑀓𑁂𑀢𑀸 𑀯𑀸 𑀯𑀺𑀮𑁄𑀓𑁂𑀢𑀸 𑀯𑀸 𑀦𑀢𑁆𑀣𑀺. ‘𑀆𑀮𑁄𑀓𑁂𑀲𑁆𑀲𑀸𑀫𑀻’𑀢𑀺 𑀧𑀦 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀳𑁂𑀝𑁆𑀞𑀺𑀫𑀁 𑀅𑀓𑁆𑀔𑀺𑀤𑀮𑀁 𑀅𑀥𑁄 𑀲𑀻𑀤𑀢𑀺, 𑀉𑀧𑀭𑀺𑀫𑀁 𑀉𑀤𑁆𑀥𑀁 𑀮𑀗𑁆𑀖𑁂𑀢𑀺. 𑀓𑁄𑀘𑀺 𑀬𑀦𑁆𑀢𑀓𑁂𑀦 𑀯𑀺𑀯𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀏𑀯𑀁 𑀧𑀚𑀸𑀦𑀦𑀁 𑀧𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀦𑀸𑀫.

𑀅𑀧𑀺𑀘 ¶ 𑀫𑀽𑀮𑀧𑀭𑀺𑀜𑁆𑀜𑀸𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦 𑀧𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀧𑀭𑀺𑀜𑁆𑀜𑀸𑀯𑀲𑁂𑀦 𑀢𑀸𑀯 𑁋

𑀪𑀯𑀗𑁆𑀕𑀸𑀯𑀚𑁆𑀚𑀦𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀚𑀯𑀦𑀁 𑀪𑀯𑀢𑀺 𑀲𑀢𑁆𑀢𑀫𑀁.

𑀢𑀢𑁆𑀣 𑀪𑀯𑀗𑁆𑀕𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀧𑀯𑀢𑁆𑀢𑀢𑀺; 𑀢𑀁 𑀆𑀯𑀢𑁆𑀢𑁂𑀢𑁆𑀯𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸; 𑀢𑀦𑁆𑀦𑀺𑀭𑁄𑀥𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁; 𑀢𑀦𑁆𑀦𑀺𑀭𑁄𑀥𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸; 𑀢𑀦𑁆𑀦𑀺𑀭𑁄𑀥𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸; 𑀢𑀦𑁆𑀦𑀺𑀭𑁄𑀥𑀸 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸; 𑀢𑀦𑁆𑀦𑀺𑀭𑁄𑀥𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀦𑀁 𑀚𑀯𑀢𑀺. 𑀢𑀢𑁆𑀣 𑀧𑀞𑀫𑀚𑀯𑀦𑁂𑀧𑀺 ‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’𑀢𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀦 𑀳𑁄𑀢𑀺; 𑀤𑀼𑀢𑀺𑀬𑀚𑀯𑀦𑁂𑀧𑀺…𑀧𑁂… 𑀲𑀢𑁆𑀢𑀫𑀚𑀯𑀦𑁂𑀧𑀺. 𑀏𑀢𑁂𑀲𑀼 𑀧𑀦, 𑀬𑀼𑀤𑁆𑀥𑀫𑀡𑁆𑀟𑀮𑁂 ¶ 𑀬𑁄𑀥𑁂𑀲𑀼 𑀯𑀺𑀬, 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 ¶ 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀼 ‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’𑀢𑀺 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀳𑁄𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 ‘𑀫𑀽𑀮𑀧𑀭𑀺𑀜𑁆𑀜𑀸𑀯𑀲𑁂𑀦’ 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀭𑀽𑀧𑁂 𑀆𑀧𑀸𑀣𑀕𑀢𑁂 𑀪𑀯𑀗𑁆𑀕𑀘𑀮𑀦𑀢𑁄 𑀉𑀤𑁆𑀥𑀁 𑀲𑀓𑀲𑀓𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀲𑀼 𑀅𑀯𑀲𑀸𑀦𑁂 𑀚𑀯𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀸𑀦𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀕𑁂𑀳𑀪𑀽𑀢𑁂 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀲 𑀬𑀣𑀸 𑀧𑀭𑀕𑁂𑀳𑁂 𑀓𑀺𑀜𑁆𑀘𑀺 𑀬𑀸𑀘𑀺𑀢𑀼𑀁 𑀧𑀯𑀺𑀝𑁆𑀞𑀲𑁆𑀲 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑀲𑁆𑀲 𑀕𑁂𑀳𑀲𑀸𑀫𑀺𑀓𑁂𑀲𑀼𑀧𑀺 𑀢𑀼𑀡𑁆𑀳𑀻𑀫𑀸𑀲𑀺𑀦𑁂𑀲𑀼 𑀆𑀡𑀸𑀓𑀭𑀡𑀁 𑀦 𑀬𑀼𑀢𑁆𑀢𑀁, 𑀏𑀯𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀕𑁂𑀳𑀪𑀽𑀢𑁂 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀸𑀤𑀻𑀲𑀼𑀧𑀺 𑀅𑀭𑀚𑁆𑀚𑀦𑁆𑀢𑁂𑀲𑀼 𑀅𑀤𑀼𑀲𑁆𑀲𑀦𑁆𑀢𑁂𑀲𑀼 𑀅𑀫𑀼𑀬𑁆𑀳𑀦𑁆𑀢𑁂𑀲𑀼 𑀘 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀁 𑀅𑀬𑀼𑀢𑁆𑀢𑀦𑁆𑀢𑀺. 𑀏𑀯𑀁 ‘𑀆𑀕𑀦𑁆𑀢𑀼𑀓𑀪𑀸𑀯𑀯𑀲𑁂𑀦’ 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀸𑀦𑀺 𑀧𑀦𑁂𑀢𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀇𑀢𑁆𑀢𑀭𑀸𑀦𑀺 𑀢𑀸𑀯𑀓𑀸𑀮𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀏𑀓𑀲𑁆𑀫𑀺𑀁 𑀖𑀭𑁂 𑀲𑀩𑁆𑀩𑁂𑀲𑀼 𑀫𑀸𑀦𑀼𑀲𑀓𑁂𑀲𑀼 𑀫𑀢𑁂𑀲𑀼 𑀅𑀯𑀲𑁂𑀲𑀲𑁆𑀲 𑀏𑀓𑀓𑀲𑁆𑀲 𑀢𑀗𑁆𑀔𑀡𑀁𑀬𑁂𑀯 𑀫𑀭𑀡𑀥𑀫𑁆𑀫𑀲𑁆𑀲 𑀦 𑀬𑀼𑀢𑁆𑀢𑀸 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀅𑀪𑀺𑀭𑀢𑀺 𑀦𑀸𑀫, 𑀏𑀯𑀫𑁂𑀯 𑀏𑀓𑀤𑁆𑀯𑀸𑀭𑁂 𑀲𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀯𑀚𑁆𑀚𑀦𑀸𑀤𑀻𑀲𑀼 ¶ 𑀢𑀢𑁆𑀣 𑀢𑀢𑁆𑀣𑁂𑀯 𑀫𑀢𑁂𑀲𑀼 𑀅𑀯𑀲𑁂𑀲𑀲𑁆𑀲 𑀢𑀗𑁆𑀔𑀡𑀁𑀜𑁆𑀜𑁂𑀯 𑀫𑀭𑀡𑀥𑀫𑁆𑀫𑀲𑁆𑀲 𑀚𑀯𑀦𑀲𑁆𑀲𑀸𑀧𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀅𑀪𑀺𑀭𑀢𑀺 𑀦𑀸𑀫 𑀦 𑀬𑀼𑀢𑁆𑀢𑀸𑀢𑀺. 𑀏𑀯𑀁 ‘𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦’ 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦𑀧𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀳𑀺 𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸𑀦𑀺 𑀘 𑀭𑀽𑀧𑀓𑁆𑀔𑀦𑁆𑀥𑁄, 𑀤𑀲𑁆𑀲𑀦𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑀸𑀤𑀺𑀓𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀏𑀯𑀫𑁂𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺? 𑀓𑁄 𑀯𑀺𑀮𑁄𑀓𑁂𑀢𑀺?

𑀢𑀣𑀸 𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁, 𑀤𑀲𑁆𑀲𑀦𑀁 𑀫𑀦𑀸𑀬𑀢𑀦𑀁, 𑀯𑁂𑀤𑀦𑀸𑀤𑀬𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀥𑀫𑁆𑀫𑀸𑀬𑀢𑀦𑀁. 𑀏𑀯𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀆𑀬𑀢𑀦𑀸𑀦𑀁 𑀲𑀫𑀯𑀸𑀬𑁂 ¶ 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺? 𑀓𑁄 𑀯𑀺𑀮𑁄𑀓𑁂𑀢𑀺?

𑀢𑀣𑀸 𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀁 𑀭𑀽𑀧𑀥𑀸𑀢𑀼, 𑀤𑀲𑁆𑀲𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 ¶ 𑀥𑀫𑁆𑀫𑀸 𑀥𑀫𑁆𑀫𑀥𑀸𑀢𑀼. 𑀏𑀯𑀫𑁂𑀢𑀸𑀲𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺? 𑀓𑁄 𑀯𑀺𑀮𑁄𑀓𑁂𑀢𑀺?

𑀢𑀣𑀸 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀆𑀯𑀚𑁆𑀚𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁄, 𑀆𑀮𑁄𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀯𑁂𑀤𑀦𑀸𑀤𑀬𑁄 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸. 𑀏𑀯𑀫𑁂𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺? 𑀓𑁄 𑀯𑀺𑀮𑁄𑀓𑁂𑀢𑀻𑀢𑀺? 𑀏𑀯𑀫𑁂𑀢𑁆𑀣 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦𑀸𑀧𑀺 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂𑀢𑀺 𑀧𑀩𑁆𑀩𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂. 𑀢𑀢𑁆𑀣 𑀘𑀺𑀢𑁆𑀢𑀯𑀲𑁂𑀦𑁂𑀯 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀅𑀓𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀧𑀘𑁆𑀘𑀬𑀸 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’. 𑀢𑀢𑁆𑀣 𑀳𑀢𑁆𑀣𑀧𑀸𑀤𑁂 𑀅𑀢𑀺𑀘𑀺𑀭𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀯𑀸 𑀧𑀲𑀸𑀭𑁂𑀢𑁆𑀯𑀸 𑀏𑀯 𑀯𑀸 𑀞𑀺𑀢𑀲𑁆𑀲 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀦 𑀮𑀪𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀧𑀢𑀢𑀺, 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺; 𑀓𑀸𑀮𑁂 𑀲𑀫𑀺𑀜𑁆𑀚𑀦𑁆𑀢𑀲𑁆𑀲 𑀓𑀸𑀮𑁂 𑀧𑀲𑀸𑀭𑁂𑀦𑁆𑀢𑀲𑁆𑀲 𑀧𑀦 𑀢𑀸 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀘𑁆𑀙𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺. 𑀏𑀯𑀁 ‘𑀅𑀢𑁆𑀣𑀸𑀦𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀣𑁂 ¶ 𑀧𑀦 𑀲𑀢𑀺𑀧𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀽 𑀲𑀚𑁆𑀛𑀸𑀬𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀢𑀢𑁆𑀭𑁂𑀓𑁄 𑀤𑀳𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀓𑀸𑀬𑀲𑀁𑀲𑀕𑁆𑀕𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀕𑀺𑀳𑀻 𑀚𑀸𑀢𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀧𑀸𑀤𑀁 𑀧𑀲𑀸𑀭𑁂𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀧𑀲𑀸𑀭𑁂𑀲𑀺. 𑀅𑀝𑁆𑀞𑀺𑀁 𑀆𑀳𑀘𑁆𑀘 𑀧𑀸𑀤𑁄 𑀛𑀸𑀬𑀺. 𑀅𑀧𑀭𑁄 𑀪𑀺𑀓𑁆𑀔𑀼 𑀯𑀫𑁆𑀫𑀺𑀓𑁂 𑀧𑀲𑀸𑀭𑁂𑀲𑀺. 𑀲𑁄 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑁂 𑀧𑀲𑀸𑀭𑁂𑀲𑀺. 𑀢𑀁 𑀫𑀡𑀺𑀲𑀧𑁆𑀧𑁄 𑀟𑀁𑀲𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁂 ¶ 𑀅𑀲𑀧𑁆𑀧𑀸𑀬𑁂 𑀅𑀧𑀲𑀸𑀭𑁂𑀢𑁆𑀯𑀸 𑀲𑀧𑁆𑀧𑀸𑀬𑁂 𑀧𑀲𑀸𑀭𑁂𑀢𑀩𑁆𑀩𑀁. 𑀇𑀤𑀫𑁂𑀢𑁆𑀣 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁.

‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀧𑀦 𑀫𑀳𑀸𑀣𑁂𑀭𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑀁 𑁋 𑀫𑀳𑀸𑀣𑁂𑀭𑁄 𑀓𑀺𑀭 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁄 𑀲𑀳𑀲𑀸 𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 ¶ 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀲𑀫𑀺𑀜𑁆𑀚𑁂𑀲𑀺. 𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀲𑀳𑀲𑀸 𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀲𑀫𑀺𑀜𑁆𑀚𑀺𑀢𑁆𑀣𑀸’’𑀢𑀺? ‘‘𑀬𑀢𑁄 𑀧𑀝𑁆𑀞𑀸𑀬 𑀫𑀬𑀸, 𑀆𑀯𑀼𑀲𑁄, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀦 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑁄 𑀲𑀫𑀺𑀜𑁆𑀚𑀺𑀢𑀧𑀼𑀩𑁆𑀩𑁄. 𑀇𑀤𑀸𑀦𑀺 𑀧𑀦 𑀫𑁂 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀫𑀺𑀜𑁆𑀚𑀺𑀢𑁄. 𑀢𑀲𑁆𑀫𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀫𑀺𑀜𑁆𑀚𑁂𑀲𑀺’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀫𑁂𑀢𑁆𑀣𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀫𑁂𑀯 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀲𑀫𑀺𑀜𑁆𑀚𑁂𑀦𑁆𑀢𑁄 𑀯𑀸 𑀧𑀲𑀸𑀭𑁂𑀦𑁆𑀢𑁄 𑀯𑀸 𑀦𑀢𑁆𑀣𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀧𑀦, 𑀲𑀼𑀢𑁆𑀢𑀸𑀓𑀟𑁆𑀠𑀦𑀯𑀲𑁂𑀦 𑀤𑀸𑀭𑀼𑀬𑀦𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑀘𑀮𑀦𑀁 𑀯𑀺𑀬, 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀳𑁄𑀢𑀻’𑀢𑀺 𑀧𑀭𑀺𑀚𑀸𑀦𑀦𑀁 𑀧𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂𑀢𑀺 𑀏𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 ‘𑀥𑀸𑀭𑀡𑀁’ 𑀦𑀸𑀫. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀥𑀸𑀭𑀡𑁂 𑀢𑀸𑀯 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀧𑀺𑀡𑁆𑀟𑀸𑀬 𑀘𑀭𑀢𑁄 ‘‘𑀆𑀫𑀺𑀲𑀮𑀸𑀪𑁄 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀬𑁂𑀯 𑀘 𑀅𑀢𑁆𑀣𑁄 ‘𑀅𑀢𑁆𑀣𑁄’ 𑀦𑀸𑀫. 𑀢𑀲𑁆𑀲 𑀯𑀲𑁂𑀦 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀉𑀡𑁆𑀳𑀧𑀓𑀢𑀺𑀓𑀲𑁆𑀲 ¶ 𑀧𑀦 𑀤𑀼𑀩𑁆𑀩𑀮𑀲𑁆𑀲 𑀘 𑀘𑀻𑀯𑀭𑀁 𑀲𑀼𑀔𑀼𑀫𑀁 𑀲𑀧𑁆𑀧𑀸𑀬𑀁, 𑀲𑀻𑀢𑀸𑀮𑀼𑀓𑀲𑁆𑀲 𑀖𑀦𑀁 𑀤𑀼𑀧𑀝𑁆𑀝𑀁; 𑀯𑀺𑀧𑀭𑀻𑀢𑀁 𑀅𑀲𑀧𑁆𑀧𑀸𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀺𑀡𑁆𑀡𑀁 𑀅𑀲𑀧𑁆𑀧𑀸𑀬𑀫𑁂𑀯. 𑀅𑀕𑁆𑀕𑀴𑀸𑀤𑀺𑀤𑀸𑀦𑁂𑀦 𑀳𑀺𑀲𑁆𑀲 𑀢𑀁 𑀧𑀮𑀺𑀩𑁄𑀥𑀓𑀭𑀁 𑀳𑁄𑀢𑀺. 𑀢𑀣𑀸 𑀧𑀝𑁆𑀝𑀼𑀡𑁆𑀡𑀤𑀼𑀓𑀽𑀮𑀸𑀤𑀺𑀪𑁂𑀤𑀁 𑀘𑁄𑀭𑀸𑀦𑀁 𑀮𑁄𑀪𑀦𑀻𑀬𑀘𑀻𑀯𑀭𑀁. 𑀢𑀸𑀤𑀺𑀲𑀜𑁆𑀳𑀺 𑀅𑀭𑀜𑁆𑀜𑁂 𑀏𑀓𑀓𑀲𑁆𑀲 𑀦𑀺𑀯𑀸𑀲𑀦𑁆𑀢𑀭𑀸𑀬𑀓𑀭𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑀓𑀭𑀜𑁆𑀘𑀸𑀧𑀺 𑀳𑁄𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀬𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁, 𑀬𑀜𑁆𑀘𑀲𑁆𑀲 𑀲𑁂𑀯𑀫𑀸𑀦𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀁 𑀅𑀲𑀧𑁆𑀧𑀸𑀬𑀁 ¶ ; 𑀯𑀺𑀧𑀭𑀻𑀢𑀁 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’ 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 𑀘 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀦 𑀘𑀻𑀯𑀭𑀧𑀸𑀭𑀼𑀧𑀦𑀁 𑀳𑁄𑀢𑀺. 𑀢𑀢𑁆𑀣 𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦𑀁, 𑀓𑀸𑀬𑁄𑀧𑀺 𑀅𑀘𑁂𑀢𑀦𑁄. 𑀘𑀻𑀯𑀭𑀁 𑀦 𑀚𑀸𑀦𑀸𑀢𑀺 𑁋 ‘𑀫𑀬𑀸 𑀓𑀸𑀬𑁄 𑀧𑀸𑀭𑀼𑀧𑀺𑀢𑁄’𑀢𑀺, 𑀓𑀸𑀬𑁄𑀧𑀺 𑀦 𑀚𑀸𑀦𑀸𑀢𑀺 𑁋 ‘𑀅𑀳𑀁 𑀘𑀻𑀯𑀭𑁂𑀦 𑀧𑀸𑀭𑀼𑀧𑀺𑀢𑁄’𑀢𑀺. 𑀥𑀸𑀢𑀼𑀬𑁄𑀯 𑀥𑀸𑀢𑀼𑀲𑀫𑀽𑀳𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀧𑀝𑀧𑀺𑀮𑁄𑀢𑀺𑀓𑀸𑀬 𑀧𑁄𑀢𑁆𑀣𑀓𑀭𑀽𑀧𑀧𑀝𑀺𑀘𑁆𑀙𑀸𑀤𑀦𑁂 𑀯𑀺𑀬. 𑀢𑀲𑁆𑀫𑀸 𑀦𑁂𑀯 𑀲𑀼𑀦𑁆𑀤𑀭𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀸𑀢𑀩𑁆𑀩𑀁 ¶ , 𑀦 𑀅𑀲𑀼𑀦𑁆𑀤𑀭𑀁 𑀮𑀪𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀁. 𑀦𑀸𑀕𑀯𑀫𑁆𑀫𑀺𑀓𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀲𑀼 𑀳𑀺 𑀓𑁂𑀘𑀺 𑀫𑀸𑀮𑀸𑀕𑀦𑁆𑀥𑀥𑀽𑀧𑀯𑀢𑁆𑀣𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀓𑁂𑀘𑀺 𑀕𑀽𑀣𑀫𑀼𑀢𑁆𑀢𑀓𑀤𑁆𑀤𑀫𑀤𑀡𑁆𑀟𑀲𑀢𑁆𑀣𑀧𑁆𑀧𑀳𑀸𑀭𑀸𑀤𑀻𑀳𑀺 𑀅𑀲𑀓𑁆𑀓𑀸𑀭𑀁. 𑀦 𑀢𑁂𑀳𑀺 𑀦𑀸𑀕𑀯𑀫𑁆𑀫𑀺𑀓𑀭𑀼𑀓𑁆𑀔𑀸𑀤𑀬𑁄 𑀲𑁄𑀫𑀦𑀲𑁆𑀲𑀁 𑀯𑀸 𑀤𑁄𑀫𑀦𑀲𑁆𑀲𑀁 𑀯𑀸 𑀓𑀭𑁄𑀦𑁆𑀢𑀺. 𑀏𑀯𑀫𑁂𑀯 𑀦𑁂𑀯 𑀲𑀼𑀦𑁆𑀤𑀭𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀸𑀢𑀩𑁆𑀩𑀁, 𑀦 𑀅𑀲𑀼𑀦𑁆𑀤𑀭𑀁 𑀮𑀪𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀦𑁆𑀢𑀺. 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀧𑀢𑁆𑀢𑀥𑀸𑀭𑀡𑁂𑀧𑀺 𑀧𑀢𑁆𑀢𑀁 𑀲𑀳𑀲𑀸𑀯 𑀅𑀕𑁆𑀕𑀳𑁂𑀢𑁆𑀯𑀸 ‘𑀇𑀫𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀪𑀺𑀓𑁆𑀔𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀧𑀢𑁆𑀢𑀕𑁆𑀕𑀳𑀡𑀧𑀘𑁆𑀘𑀬𑀸 𑀧𑀝𑀺𑀮𑀪𑀺𑀢𑀩𑁆𑀩𑀅𑀢𑁆𑀣𑀯𑀲𑁂𑀦 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀲𑀤𑀼𑀩𑁆𑀩𑀮𑀲𑀭𑀻𑀭𑀲𑁆𑀲 𑀧𑀦 𑀕𑀭𑀼𑀧𑀢𑁆𑀢𑁄 𑀅𑀲𑀧𑁆𑀧𑀸𑀬𑁄; 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑁄 𑀅𑀲𑀧𑁆𑀧𑀸𑀬𑁄𑀯. 𑀤𑀼𑀤𑁆𑀥𑁄𑀢𑀧𑀢𑁆𑀢𑁄 𑀳𑀺 𑀦 𑀯𑀝𑁆𑀝𑀢𑀺; 𑀢𑀁 𑀥𑁄𑀯𑀦𑁆𑀢𑀲𑁆𑀲𑁂𑀯 𑀘𑀲𑁆𑀲 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀫𑀡𑀺𑀯𑀡𑁆𑀡𑀧𑀢𑁆𑀢𑁄 𑀧𑀦 𑀮𑁄𑀪𑀦𑀻𑀬𑁄𑀯 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀲𑀧𑁆𑀧𑀸𑀬𑁄. 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀦 𑀮𑀤𑁆𑀥𑁄, 𑀬𑀜𑁆𑀘𑀲𑁆𑀲 𑀲𑁂𑀯𑀫𑀸𑀦𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀬𑀁 𑀏𑀓𑀦𑁆𑀢𑀸𑀲𑀧𑁆𑀧𑀸𑀬𑁄𑀯 𑀯𑀺𑀧𑀭𑀻𑀢𑁄 𑀲𑀧𑁆𑀧𑀸𑀬𑁄. 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’ 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 ¶ 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑁂𑀯 𑀧𑀦 𑀧𑀢𑁆𑀢𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄, 𑀳𑀢𑁆𑀣𑀸𑀧𑀺 𑀅𑀘𑁂𑀢𑀦𑀸. 𑀧𑀢𑁆𑀢𑁄 𑀦 𑀚𑀸𑀦𑀸𑀢𑀺 𑁋 ‘𑀅𑀳𑀁 𑀳𑀢𑁆𑀣𑁂𑀳𑀺 𑀕𑀳𑀺𑀢𑁄’𑀢𑀺. 𑀳𑀢𑁆𑀣𑀸𑀧𑀺 𑀦 𑀚𑀸𑀦𑀦𑁆𑀢𑀺 𑁋 ‘𑀧𑀢𑁆𑀢𑁄 𑀅𑀫𑁆𑀳𑁂𑀳𑀺 ¶ 𑀕𑀳𑀺𑀢𑁄’𑀢𑀺. 𑀥𑀸𑀢𑀼𑀬𑁄𑀯 𑀥𑀸𑀢𑀼𑀲𑀫𑀽𑀳𑀁 𑀕𑀡𑁆𑀳𑀦𑁆𑀢𑀺, 𑀲𑀡𑁆𑀟𑀸𑀲𑁂𑀦 𑀅𑀕𑁆𑀕𑀺𑀯𑀡𑁆𑀡𑀧𑀢𑁆𑀢𑀕𑀳𑀡𑁂 𑀯𑀺𑀬𑀸𑀢𑀺. 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀬𑀣𑀸 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑁂 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑀮𑁄𑀳𑀺𑀢𑀓𑀺𑀫𑀺𑀓𑀼𑀮𑁂 𑀦𑀻𑀮𑀫𑀓𑁆𑀔𑀺𑀓𑀲𑀫𑁆𑀧𑀭𑀺𑀓𑀺𑀡𑁆𑀡𑁂 𑀅𑀦𑀸𑀣𑀲𑀸𑀮𑀸𑀬𑀁 𑀅𑀦𑀸𑀣𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀤𑀬𑀸𑀮𑀼𑀓𑀸 𑀧𑀼𑀭𑀺𑀲𑀸 𑀢𑁂𑀲𑀁 𑀯𑀡𑀩𑀦𑁆𑀥𑀧𑀝𑁆𑀝𑀘𑁄𑀴𑀓𑀸𑀦𑀺 𑀘𑁂𑀯 𑀓𑀧𑀸𑀮𑀸𑀤𑀻𑀳𑀺 𑀘 𑀪𑁂𑀲𑀚𑁆𑀚𑀸𑀦𑀺 𑀉𑀧𑀦𑀸𑀫𑁂𑀦𑁆𑀢𑀺. 𑀢𑀢𑁆𑀣 𑀘𑁄𑀴𑀓𑀸𑀦𑀺𑀧𑀺 𑀓𑁂𑀲𑀜𑁆𑀘𑀺 𑀲𑀡𑁆𑀳𑀸𑀦𑀺 𑀓𑁂𑀲𑀜𑁆𑀘𑀺 𑀣𑀽𑀮𑀸𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀪𑁂𑀲𑀚𑁆𑀚𑀓𑀧𑀸𑀮𑀓𑀸𑀦𑀺𑀧𑀺 𑀓𑁂𑀲𑀜𑁆𑀘𑀺 𑀲𑀼𑀲𑀡𑁆𑀞𑀸𑀦𑀸𑀦𑀺 𑀓𑁂𑀲𑀜𑁆𑀘𑀺 𑀤𑀼𑀲𑁆𑀲𑀡𑁆𑀞𑀸𑀦𑀸𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀦 𑀢𑁂 𑀢𑀢𑁆𑀣 𑀲𑀼𑀫𑀦𑀸 𑀯𑀸 𑀳𑁄𑀦𑁆𑀢𑀺 𑀤𑀼𑀫𑁆𑀫𑀦𑀸 𑀯𑀸. 𑀯𑀡𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑁂𑀦𑁂𑀯 𑀳𑀺 𑀘𑁄𑀴𑀓𑁂𑀦, 𑀪𑁂𑀲𑀚𑁆𑀚𑀧𑀭𑀺𑀕𑁆𑀕𑀳𑀡𑀫𑀢𑁆𑀢𑁂𑀦𑁂𑀯 𑀘 𑀓𑀧𑀸𑀮𑀓𑁂𑀦 𑀢𑁂𑀲𑀁 𑀅𑀢𑁆𑀣𑁄. 𑀏𑀯𑀫𑁂𑀯 𑀬𑁄 𑀪𑀺𑀓𑁆𑀔𑀼 𑀯𑀡𑀘𑁄𑀴𑀓𑀁 𑀯𑀺𑀬 𑀘𑀻𑀯𑀭𑀁, 𑀪𑁂𑀲𑀚𑁆𑀚𑀓𑀧𑀸𑀮𑀓𑀁 𑀯𑀺𑀬 𑀘 𑀧𑀢𑁆𑀢𑀁, 𑀓𑀧𑀸𑀮𑁂 𑀪𑁂𑀲𑀚𑁆𑀚𑀫𑀺𑀯 ¶ 𑀘 𑀧𑀢𑁆𑀢𑁂 𑀮𑀤𑁆𑀥𑀪𑀺𑀓𑁆𑀔𑀁 𑀲𑀮𑁆𑀮𑀓𑁆𑀔𑁂𑀢𑀺 𑁋 𑀅𑀬𑀁 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑁂𑀦 𑀉𑀢𑁆𑀢𑀫𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀲𑀺𑀢𑀸𑀤𑀻𑀲𑀼 𑀅𑀲𑀺𑀢𑁂𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀺𑀪𑁄𑀚𑀦𑁂. 𑀧𑀻𑀢𑁂𑀢𑀺 𑀬𑀸𑀕𑀼𑀆𑀤𑀺𑀧𑀸𑀦𑁂. 𑀔𑀸𑀬𑀺𑀢𑁂𑀢𑀺 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺𑀔𑀸𑀤𑀦𑁂. 𑀲𑀸𑀬𑀺𑀢𑁂𑀢𑀺 𑀫𑀥𑀼𑀨𑀸𑀡𑀺𑀢𑀸𑀤𑀺𑀲𑀸𑀬𑀦𑁂. 𑀢𑀢𑁆𑀣 ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄 ‘𑀅𑀢𑁆𑀣𑁄’ 𑀦𑀸𑀫. 𑀢𑀲𑁆𑀲 𑀯𑀲𑁂𑀦 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀮𑀽𑀔𑀧𑀡𑀻𑀢𑀢𑀺𑀢𑁆𑀢𑀫𑀥𑀼𑀭𑀸𑀤𑀻𑀲𑀼 𑀧𑀦 𑀬𑁂𑀦 𑀪𑁄𑀚𑀦𑁂𑀦 𑀬𑀲𑁆𑀲 𑀅𑀨𑀸𑀲𑀼 𑀳𑁄𑀢𑀺, 𑀢𑀁 𑀢𑀲𑁆𑀲 𑀅𑀲𑀧𑁆𑀧𑀸𑀬𑀁. 𑀬𑀁 𑀧𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀁, 𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀁 𑀏𑀓𑀦𑁆𑀢𑀁 𑀅𑀲𑀧𑁆𑀧𑀸𑀬𑀫𑁂𑀯; 𑀯𑀺𑀧𑀭𑀻𑀢𑀁 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’ 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 𑀘 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀪𑀼𑀜𑁆𑀚𑀓𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀦 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺. 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀳𑀢𑁆𑀣𑀲𑁆𑀲 𑀧𑀢𑁆𑀢𑁂 𑀑𑀢𑀸𑀭𑀡𑀁 𑀦𑀸𑀫 𑀳𑁄𑀢𑀺. 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀆𑀮𑁄𑀧𑀓𑀭𑀡𑀁, 𑀆𑀮𑁄𑀧𑀉𑀤𑁆𑀥𑀭𑀡𑀁, 𑀫𑀼𑀔𑀯𑀺𑀯𑀭𑀡𑀜𑁆𑀘 ¶ 𑀳𑁄𑀢𑀺. 𑀦 𑀓𑁄𑀘𑀺 𑀓𑀼𑀜𑁆𑀘𑀺𑀓𑀸𑀬, 𑀦 𑀬𑀦𑁆𑀢𑀓𑁂𑀦 𑀳𑀦𑀼𑀓𑀝𑁆𑀞𑀺𑀁 𑀯𑀺𑀯𑀭𑀢𑀺. 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 ¶ 𑀆𑀮𑁄𑀧𑀲𑁆𑀲 𑀫𑀼𑀔𑁂 𑀞𑀧𑀦𑀁, 𑀉𑀧𑀭𑀺𑀤𑀦𑁆𑀢𑀸𑀦𑀁 𑀫𑀼𑀲𑀮𑀓𑀺𑀘𑁆𑀘𑀲𑀸𑀥𑀦𑀁, 𑀳𑁂𑀝𑁆𑀞𑀸𑀤𑀦𑁆𑀢𑀸𑀦𑀁 𑀉𑀤𑀼𑀓𑁆𑀔𑀮𑀓𑀺𑀘𑁆𑀘𑀲𑀸𑀥𑀦𑀁, 𑀚𑀺𑀯𑁆𑀳𑀸𑀬 𑀳𑀢𑁆𑀣𑀓𑀺𑀘𑁆𑀘𑀲𑀸𑀥𑀦𑀜𑁆𑀘 𑀳𑁄𑀢𑀺. 𑀇𑀢𑀺 𑀦𑀁 𑀢𑀢𑁆𑀣 𑀅𑀕𑁆𑀕𑀚𑀺𑀯𑁆𑀳𑀸𑀬 𑀢𑀦𑀼𑀓𑀔𑁂𑀴𑁄 𑀫𑀽𑀮𑀚𑀺𑀯𑁆𑀳𑀸𑀬 𑀩𑀳𑀮𑀔𑁂𑀴𑁄 𑀫𑀓𑁆𑀔𑁂𑀢𑀺. 𑀢𑀁 𑀳𑁂𑀝𑁆𑀞𑀸𑀤𑀦𑁆𑀢𑀉𑀤𑀼𑀓𑁆𑀔𑀮𑁂 𑀚𑀺𑀯𑁆𑀳𑀸𑀳𑀢𑁆𑀣𑀧𑀭𑀺𑀯𑀢𑁆𑀢𑀺𑀢𑀁 𑀔𑁂𑀴𑀉𑀤𑀓𑀢𑁂𑀫𑀺𑀢𑀁 𑀉𑀧𑀭𑀺𑀤𑀦𑁆𑀢𑀫𑀼𑀲𑀮𑀲𑀜𑁆𑀘𑀼𑀡𑁆𑀡𑀺𑀢𑀁 𑀓𑁄𑀘𑀺 𑀓𑀝𑀘𑁆𑀙𑀼𑀦𑀸 𑀯𑀸 𑀤𑀩𑁆𑀩𑀺𑀬𑀸 𑀯𑀸 𑀅𑀦𑁆𑀢𑁄 𑀧𑀯𑁂𑀲𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺; 𑀯𑀸𑀬𑁄𑀥𑀸𑀢𑀼𑀬𑀸𑀯 𑀧𑀯𑀺𑀲𑀢𑀺. 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀓𑁄𑀘𑀺 𑀧𑀮𑀸𑀮𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺; 𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀺. 𑀞𑀺𑀢𑀁 𑀞𑀺𑀢𑀁 𑀓𑁄𑀘𑀺 𑀉𑀤𑁆𑀥𑀦𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀧𑀘𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺; 𑀢𑁂𑀚𑁄𑀥𑀸𑀢𑀼𑀬𑀸𑀯 𑀧𑀘𑁆𑀘𑀢𑀺. 𑀧𑀓𑁆𑀓𑀁 𑀧𑀓𑁆𑀓𑀁 𑀓𑁄𑀘𑀺 𑀤𑀡𑁆𑀟𑀓𑁂𑀦 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀩𑀳𑀺 𑀦𑀻𑀳𑀸𑀭𑀓𑁄 𑀦𑀸𑀫 𑀦𑀢𑁆𑀣𑀺; 𑀯𑀸𑀬𑁄𑀥𑀸𑀢𑀼𑀬𑁂𑀯 𑀦𑀻𑀳𑀭𑀢𑀺. 𑀇𑀢𑀺 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀢𑀺 𑀘 𑀯𑀻𑀢𑀺𑀳𑀭𑀢𑀺 𑀘 𑀥𑀸𑀭𑁂𑀢𑀺 𑀘 𑀧𑀭𑀺𑀯𑀢𑁆𑀢𑁂𑀢𑀺 𑀘 𑀲𑀜𑁆𑀘𑀼𑀡𑁆𑀡𑁂𑀢𑀺 𑀘 𑀯𑀺𑀲𑁄𑀲𑁂𑀢𑀺 𑀘 𑀦𑀻𑀳𑀭𑀢𑀺 𑀘. 𑀧𑀣𑀯𑀻𑀥𑀸𑀢𑀼 𑀥𑀸𑀭𑁂𑀢𑀺 𑀘 𑀧𑀭𑀺𑀯𑀢𑁆𑀢𑁂𑀢𑀺 𑀘 𑀲𑀜𑁆𑀘𑀼𑀡𑁆𑀡𑁂𑀢𑀺 𑀘 𑀯𑀺𑀲𑁄𑀲𑁂𑀢𑀺 𑀘 𑀦𑀻𑀳𑀭𑀢𑀺 𑀘. 𑀆𑀧𑁄𑀥𑀸𑀢𑀼 𑀲𑀺𑀦𑁂𑀳𑁂𑀢𑀺 𑀘 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀺. 𑀢𑁂𑀚𑁄𑀥𑀸𑀢𑀼 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀧𑀭𑀺𑀧𑀸𑀘𑁂𑀢𑀺. 𑀆𑀓𑀸𑀲𑀥𑀸𑀢𑀼 ¶ 𑀅𑀜𑁆𑀚𑀲𑁄 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀫𑀦𑁆𑀯𑀸𑀬 𑀆𑀪𑀼𑀚𑀢𑀻𑀢𑀺. 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀕𑀫𑀦𑀢𑁄, 𑀧𑀭𑀺𑀬𑁂𑀲𑀦𑀢𑁄, 𑀧𑀭𑀺𑀪𑁄𑀕𑀢𑁄, 𑀆𑀲𑀬𑀢𑁄, 𑀦𑀺𑀥𑀸𑀦𑀢𑁄, 𑀅𑀧𑀭𑀺𑀧𑀓𑁆𑀓𑀢𑁄, 𑀧𑀭𑀺𑀧𑀓𑁆𑀓𑀢𑁄, 𑀨𑀮𑀢𑁄, 𑀦𑀺𑀲𑁆𑀲𑀦𑁆𑀤𑀦𑀢𑁄, 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀏𑀯𑀁 𑀤𑀲𑀯𑀺𑀥𑀧𑀝𑀺𑀓𑀽𑀮𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀧𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀆𑀳𑀸𑀭𑀧𑀝𑀺𑀓𑀽𑀮𑀲𑀜𑁆𑀜𑀸𑀦𑀺𑀤𑁆𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑀸.

𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀢𑀺 𑀉𑀘𑁆𑀘𑀸𑀭𑀲𑁆𑀲 𑀘 𑀧𑀲𑁆𑀲𑀸𑀯𑀲𑁆𑀲 𑀘 𑀓𑀭𑀡𑁂. 𑀢𑀢𑁆𑀣 𑀧𑀓𑁆𑀓𑀓𑀸𑀮𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀅𑀓𑀭𑁄𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀪𑀫𑀦𑁆𑀢𑀺, 𑀘𑀺𑀢𑁆𑀢𑀁 𑀦 𑀏𑀓𑀕𑁆𑀕𑀁 𑀳𑁄𑀢𑀺, 𑀅𑀜𑁆𑀜𑁂 𑀘 𑀭𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀲𑀩𑁆𑀩𑀁 𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀲𑁆𑀲 𑀯𑀲𑁂𑀦 ‘𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀸𑀦𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺 𑀳𑁄𑀢𑀺, 𑀅𑀬𑀲𑁄 𑀯𑀟𑁆𑀠𑀢𑀺, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺; 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀁 𑀢𑀁 ¶ 𑀦 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀯𑀲𑁂𑀦 ‘𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁’ 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 ¶ 𑀘 ‘𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀢𑁆𑀣𑀺. 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀦 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀁 𑀳𑁄𑀢𑀺. 𑀬𑀣𑀸 𑀧𑀦 𑀧𑀓𑁆𑀓𑁂 𑀕𑀡𑁆𑀟𑁂 𑀕𑀡𑁆𑀟𑀪𑁂𑀤𑁂𑀦 𑀧𑀼𑀩𑁆𑀩𑀮𑁄𑀳𑀺𑀢𑀁 𑀅𑀓𑀸𑀫𑀢𑀸𑀬 𑀦𑀺𑀓𑁆𑀔𑀫𑀢𑀺, 𑀬𑀣𑀸 𑀘 𑀅𑀢𑀺𑀪𑀭𑀺𑀢𑀸 𑀉𑀤𑀓𑀪𑀸𑀚𑀦𑀸 𑀉𑀤𑀓𑀁 𑀅𑀓𑀸𑀫𑀢𑀸𑀬 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀧𑀓𑁆𑀓𑀸𑀲𑀬𑀫𑀼𑀢𑁆𑀢𑀯𑀢𑁆𑀣𑀻𑀲𑀼 𑀲𑀦𑁆𑀦𑀺𑀘𑀺𑀢𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸 𑀯𑀸𑀬𑀼𑀯𑁂𑀕𑀲𑀫𑀼𑀧𑁆𑀧𑀻𑀴𑀺𑀢𑀸 𑀅𑀓𑀸𑀫𑀢𑀸𑀬𑀧𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀲𑁄 𑀧𑀦𑀸𑀬𑀁 𑀏𑀯𑀁 𑀦𑀺𑀓𑁆𑀔𑀫𑀦𑁆𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀦𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀳𑁄𑀢𑀺 𑀦 𑀧𑀭𑀲𑁆𑀲; 𑀓𑁂𑀯𑀮𑀁 𑀧𑀦 𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑁄𑀯 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀉𑀤𑀓𑀢𑀼𑀫𑁆𑀪𑀢𑁄 𑀧𑀼𑀭𑀸𑀡𑀉𑀤𑀓𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀦𑁂𑀯 𑀢𑀁 𑀅𑀢𑁆𑀢𑀦𑁄 𑀳𑁄𑀢𑀺 𑀦 𑀧𑀭𑁂𑀲𑀁, 𑀓𑁂𑀯𑀮𑀁 𑀧𑀝𑀺𑀚𑀕𑁆𑀕𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀦𑁆𑀢𑀺. 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 ‘𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁’ 𑀯𑁂𑀤𑀺𑀢𑀩𑁆𑀩𑀁.

𑀕𑀢𑀸𑀤𑀻𑀲𑀼 ¶ 𑀕𑀢𑁂𑀢𑀺 𑀕𑀫𑀦𑁂. 𑀞𑀺𑀢𑁂𑀢𑀺 𑀞𑀸𑀦𑁂. 𑀦𑀺𑀲𑀺𑀦𑁆𑀦𑁂𑀢𑀺 𑀦𑀺𑀲𑀚𑁆𑀚𑀸𑀬. 𑀲𑀼𑀢𑁆𑀢𑁂𑀢𑀺 𑀲𑀬𑀦𑁂. 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀁 𑀧𑀦𑁂𑀢𑁆𑀣 𑀅𑀧𑀭𑁄𑀧𑀺 𑀦𑀬𑁄 𑁋 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀢𑀣𑀸 𑀏𑀓𑁄 𑀪𑀺𑀓𑁆𑀔𑀼 𑀢𑀺𑀝𑁆𑀞𑀦𑁆𑀢𑁄, 𑀦𑀺𑀲𑀻𑀤𑀦𑁆𑀢𑁄, 𑀲𑀬𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀬𑀢𑀺. 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀬𑀢𑀺.

𑀏𑀢𑁆𑀢𑀓𑁂𑀦 𑀧𑀦 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑁂𑀦 𑀤𑀻𑀧𑀬𑀺𑀁𑀲𑀼. 𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑀦𑀁 𑀑𑀢𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺; ‘𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸𑀧𑀺 𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑀯𑁂𑀫𑀚𑁆𑀛𑁂 𑀧𑀯𑀢𑁆𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀞𑀸𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀞𑀸𑀦𑁂 𑀧𑀯𑀢𑁆𑀢𑀸 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀸 𑀲𑀬𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺; 𑀉𑀝𑁆𑀞𑀳𑀦𑁆𑀢𑁄 ¶ 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀸𑀢𑀺 𑁋 𑀅𑀬𑀁 𑀪𑀺𑀓𑁆𑀔𑀼 𑀕𑀢𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺.

𑀏𑀯𑀁 ¶ 𑀧𑀦 𑀲𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀦 𑀓𑀸𑀢𑀩𑁆𑀩𑀁. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀬𑀸𑀯 𑀲𑀓𑁆𑀓𑁄𑀢𑀺 𑀢𑀸𑀯 𑀘𑀗𑁆𑀓𑀫𑀺𑀢𑁆𑀯𑀸 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑀸𑀦𑁄 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀢𑀺 𑁋 ‘𑀓𑀸𑀬𑁄 𑀅𑀘𑁂𑀢𑀦𑁄, 𑀫𑀜𑁆𑀘𑁄 𑀅𑀘𑁂𑀢𑀦𑁄. 𑀓𑀸𑀬𑁄 𑀦 𑀚𑀸𑀦𑀸𑀢𑀺 𑁋 𑀅𑀳𑀁 𑀫𑀜𑁆𑀘𑁂 𑀲𑀬𑀺𑀢𑁄𑀢𑀺. 𑀫𑀜𑁆𑀘𑁄𑀧𑀺 𑀦 𑀚𑀸𑀦𑀸𑀢𑀺 𑁋 𑀫𑀬𑀺 𑀓𑀸𑀬𑁄 𑀲𑀬𑀺𑀢𑁄𑀢𑀺. 𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀲𑀬𑀺𑀢𑁄’𑀢𑀺. 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀧𑀩𑀼𑀚𑁆𑀛𑀫𑀸𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺. 𑀅𑀬𑀁 𑀲𑀼𑀢𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺.

𑀚𑀸𑀕𑀭𑀺𑀢𑁂𑀢𑀺 𑀚𑀸𑀕𑀭𑀡𑁂. 𑀢𑀢𑁆𑀣 ‘𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀚𑀸𑀕𑀭𑀺𑀢𑀁 𑀦𑀸𑀫 𑀦 𑀳𑁄𑀢𑀺; 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑁂 𑀧𑀯𑀢𑁆𑀢𑀦𑁆𑀢𑁂 𑀚𑀸𑀕𑀭𑀺𑀢𑀁 𑀦𑀸𑀫 𑀳𑁄𑀢𑀻’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀅𑀧𑀺𑀘 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀕𑁆𑀕𑀦𑁆𑀢𑁄𑀧𑀺 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺.

𑀪𑀸𑀲𑀺𑀢𑁂𑀢𑀺 ¶ 𑀓𑀣𑀦𑁂. 𑀢𑀢𑁆𑀣 ‘𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑁂 𑀲𑀢𑀺 𑀪𑀸𑀲𑀺𑀢𑀁 𑀦𑀸𑀫 𑀦 𑀳𑁄𑀢𑀺; 𑀢𑀲𑁆𑀫𑀺𑀁 𑀧𑀯𑀢𑁆𑀢𑀦𑁆𑀢𑁂 𑀳𑁄𑀢𑀻’𑀢𑀺 𑀧𑀭𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺.

𑀢𑀼𑀡𑁆𑀳𑀻𑀪𑀸𑀯𑁂𑀢𑀺 𑀅𑀓𑀣𑀦𑁂. 𑀢𑀢𑁆𑀣 ‘𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀺𑀬𑀁 𑀲𑀢𑀺 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺; 𑀅𑀧𑁆𑀧𑀯𑀢𑁆𑀢𑀺𑀬𑀁 𑀳𑁄𑀢𑀻’𑀢𑀺 𑀧𑀭𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻𑀬𑁂𑀯 𑀦𑀸𑀫 𑀳𑁄𑀢𑀺.

𑀏𑀢𑁆𑀣 𑀘 𑀏𑀓𑁄 𑀇𑀭𑀺𑀬𑀸𑀧𑀣𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀕𑀢𑁄. 𑀲𑁄 𑀳𑁂𑀝𑁆𑀞𑀸 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀕𑀘𑁆𑀙𑀢𑁄 𑀘 𑀆𑀕𑀘𑁆𑀙𑀢𑁄 𑀘 𑀅𑀤𑁆𑀥𑀸𑀦𑀕𑀫𑀦𑀯𑀲𑁂𑀦 𑀓𑀣𑀺𑀢𑁄. 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀘𑀼𑀡𑁆𑀡𑀺𑀓𑀧𑀸𑀤𑀼𑀤𑁆𑀥𑀸𑀭𑀇𑀭𑀺𑀬𑀸𑀧𑀣𑀯𑀲𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁨𑁪. 𑀢𑀢𑁆𑀣 𑀓𑀢𑀫𑀸 𑀲𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫𑁨𑁬. 𑀲𑁄 ¶ ¶ 𑀯𑀺𑀯𑀺𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀸𑀲𑀦𑀝𑁆𑀞𑀸𑀦𑀁 𑀬𑁄𑀕𑀧𑀣𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀏𑀢𑁆𑀢𑀓𑀸 𑀕𑀼𑀡𑀸 𑀅𑀢𑁆𑀣𑀺, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄 𑀅𑀭𑀜𑁆𑀜𑀯𑀸𑀲𑁄. 𑀬𑀲𑁆𑀲 𑀧𑀦𑁂𑀢𑁂 𑀦𑀢𑁆𑀣𑀺, 𑀢𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑁄. 𑀏𑀯𑀭𑀽𑀧𑀲𑁆𑀲 𑀳𑀺 𑀅𑀭𑀜𑁆𑀜𑀯𑀸𑀲𑁄 𑀓𑀸𑀴𑀫𑀓𑁆𑀓𑀝𑀅𑀘𑁆𑀙𑀢𑀭𑀘𑁆𑀙𑀤𑀻𑀧𑀺𑀫𑀺𑀕𑀸𑀤𑀻𑀦𑀁 𑀅𑀝𑀯𑀻𑀯𑀸𑀲𑀲𑀤𑀺𑀲𑁄 𑀳𑁄𑀢𑀺. 𑀓𑀲𑁆𑀫𑀸? 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀧𑀯𑀺𑀝𑁆𑀞𑀢𑁆𑀢𑀸. 𑀢𑀲𑁆𑀲 𑀳𑀺 𑀅𑀭𑀜𑁆𑀜𑀯𑀸𑀲𑀫𑀽𑀮𑀓𑁄 𑀓𑁄𑀘𑀺 𑀅𑀢𑁆𑀣𑁄 𑀦𑀢𑁆𑀣𑀺; 𑀅𑀭𑀜𑁆𑀜𑀯𑀸𑀲𑀜𑁆𑀘𑁂𑀯 𑀆𑀭𑀜𑁆𑀜𑀓𑁂 𑀘 𑀤𑀽𑀲𑁂𑀢𑀺; 𑀲𑀸𑀲𑀦𑁂 𑀅𑀧𑁆𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀬𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑁂 𑀏𑀢𑁆𑀢𑀓𑀸 𑀕𑀼𑀡𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀲𑁄 𑀅𑀦𑀼𑀘𑁆𑀙𑀯𑀺𑀓𑁄. 𑀲𑁄 𑀳𑀺 𑀅𑀭𑀜𑁆𑀜𑀯𑀸𑀲𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀲𑀓𑀮𑀅𑀭𑀜𑁆𑀜𑀯𑀸𑀲𑀁 𑀉𑀧𑀲𑁄𑀪𑁂𑀢𑀺, 𑀆𑀭𑀜𑁆𑀜𑀺𑀓𑀸𑀦𑀁 𑀲𑀻𑀲𑀁 𑀥𑁄𑀯𑀢𑀺, 𑀲𑀓𑀮𑀲𑀸𑀲𑀦𑀁 𑀧𑀲𑀸𑀭𑁂𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀸𑀲𑀦𑀝𑁆𑀞𑀸𑀦𑀁 𑀬𑁄𑀕𑀧𑀣𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀼𑀜𑁆𑀜𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁. 𑀏𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀢𑀜𑁆𑀘 𑀅𑀦𑀸𑀓𑀺𑀡𑁆𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀸𑀓𑀺𑀡𑁆𑀡𑀦𑁆𑀢𑀺 𑀅𑀲𑀗𑁆𑀓𑀺𑀡𑁆𑀡𑀁 𑀅𑀲𑀫𑁆𑀩𑀸𑀥𑀁. 𑀢𑀢𑁆𑀣 𑀬𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀸𑀫𑀦𑁆𑀢𑀸 𑀕𑀸𑀯𑀼𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 ¶ 𑀧𑀩𑁆𑀩𑀢𑀕𑀳𑀦𑀁 𑀯𑀦𑀕𑀳𑀦𑀁 𑀦𑀤𑀻𑀕𑀳𑀦𑀁 𑀳𑁄𑀢𑀺, 𑀦 𑀓𑁄𑀘𑀺 𑀅𑀯𑁂𑀮𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺 𑁋 𑀇𑀤𑀁 𑀲𑀦𑁆𑀢𑀺𑀓𑁂𑀧𑀺 𑀅𑀦𑀸𑀓𑀺𑀡𑁆𑀡𑀁 𑀦𑀸𑀫. 𑀬𑀁 𑀧𑀦 𑀅𑀟𑁆𑀠𑀬𑁄𑀚𑀦𑀺𑀓𑀁 𑀯𑀸 𑀬𑁄𑀚𑀦𑀺𑀓𑀁 𑀯𑀸 𑀳𑁄𑀢𑀺 𑁋 𑀇𑀤𑀁 𑀤𑀽𑀭𑀢𑀸𑀬 𑀏𑀯 𑀅𑀦𑀸𑀓𑀺𑀡𑁆𑀡𑀁 𑀦𑀸𑀫 𑀳𑁄𑀢𑀺.

𑁫𑁨𑁭. 𑀲𑁂𑀢𑀺 𑀘𑁂𑀯 𑀆𑀲𑀢𑀺 𑀘 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀁. 𑀢𑀲𑁆𑀲 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀫𑀜𑁆𑀘𑁄 𑀧𑀻𑀞𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀜𑁆𑀘𑁄𑀢𑀺 𑀘𑀢𑁆𑀢𑀸𑀭𑁄 𑀫𑀜𑁆𑀘𑀸 𑁋 𑀫𑀲𑀸𑀭𑀓𑁄, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄, 𑀆𑀳𑀘𑁆𑀘𑀧𑀸𑀤𑀓𑁄𑀢𑀺. 𑀢𑀣𑀸 𑀧𑀻𑀞𑀁. 𑀪𑀺𑀲𑀻𑀢𑀺 𑀧𑀜𑁆𑀘 𑀪𑀺𑀲𑀺𑀬𑁄 𑁋 𑀉𑀡𑁆𑀡𑀸𑀪𑀺𑀲𑀺, 𑀘𑁄𑀴𑀪𑀺𑀲𑀺, 𑀯𑀸𑀓𑀪𑀺𑀲𑀺, 𑀢𑀺𑀡𑀪𑀺𑀲𑀺, 𑀧𑀡𑁆𑀡𑀪𑀺𑀲𑀻𑀢𑀺. 𑀩𑀺𑀫𑁆𑀩𑁄𑀳𑀦𑀦𑁆𑀢𑀺 𑀲𑀻𑀲𑀼𑀧𑀥𑀸𑀦𑀁 𑀯𑀼𑀢𑁆𑀢𑀁. 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀯𑀝𑁆𑀝𑀢𑀺, 𑀤𑀻𑀖𑀢𑁄 𑀫𑀜𑁆𑀘𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀁. 𑀯𑀺𑀳𑀸𑀭𑁄𑀢𑀺 𑀲𑀫𑀦𑁆𑀢𑀸 𑀧𑀭𑀺𑀳𑀸𑀭𑀧𑀣𑀁 𑀅𑀦𑁆𑀢𑁄𑀬𑁂𑀯 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀲𑁂𑀦𑀸𑀲𑀦𑀁. 𑀅𑀟𑁆𑀠𑀬𑁄𑀕𑁄𑀢𑀺 ¶ 𑀲𑀼𑀧𑀡𑁆𑀡𑀯𑀗𑁆𑀓𑀕𑁂𑀳𑀁. 𑀧𑀸𑀲𑀸𑀤𑁄𑀢𑀺 𑀤𑁆𑀯𑁂 𑀓𑀡𑁆𑀡𑀺𑀓𑀸𑀦𑀺 𑀕𑀳𑁂𑀢𑁆𑀯𑀸 𑀓𑀢𑁄 𑀤𑀻𑀖𑀧𑀸𑀲𑀸𑀤𑁄. 𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄𑀢𑀺 𑀪𑁄𑀚𑀦𑀲𑀸𑀮𑀲𑀤𑀺𑀲𑁄 𑀫𑀡𑁆𑀟𑀮𑀫𑀸𑀴𑁄; 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 ¶ 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄𑀢𑀺 𑀯𑀼𑀢𑁆𑀢𑀁. 𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀁 𑀔𑀡𑀺𑀢𑁆𑀯𑀸 𑀯𑀸 𑀧𑀩𑁆𑀪𑀸𑀭𑀲𑁆𑀲 𑀅𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀸 𑀓𑀢𑀲𑁂𑀦𑀸𑀲𑀦𑀁. 𑀕𑀼𑀳𑀸𑀢𑀺 𑀪𑀽𑀫𑀺𑀤𑀭𑀺 𑀯𑀸 𑀬𑀢𑁆𑀣 𑀭𑀢𑁆𑀢𑀺𑀦𑁆𑀤𑀺𑀯𑀁 𑀤𑀻𑀧𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀧𑀩𑁆𑀩𑀢𑀕𑀼𑀳𑀸 𑀯𑀸 𑀪𑀽𑀫𑀺𑀕𑀼𑀳𑀸 𑀯𑀸. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸. 𑀯𑁂𑀴𑀼𑀕𑀼𑀫𑁆𑀩𑁄𑀢𑀺 𑀯𑁂𑀴𑀼𑀕𑀘𑁆𑀙𑁄. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀞𑀧𑁂𑀢𑁆𑀯𑀸 𑀯𑀸 𑀏𑀢𑀸𑀦𑀺 𑀫𑀜𑁆𑀘𑀸𑀤𑀻𑀦𑀺 𑀬𑀢𑁆𑀣 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀬𑀁 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑀸𑀭𑀳𑀝𑁆𑀞𑀸𑀦𑀁, 𑀲𑀩𑁆𑀩𑀫𑁂𑀢𑀁 𑀲𑁂𑀦𑀸𑀲𑀦𑀁.

𑁫𑁨𑁮. 𑀪𑀚𑀢𑀻𑀢𑀺 𑀉𑀧𑁂𑀢𑀺. 𑀲𑀫𑁆𑀪𑀚𑀢𑀻𑀢𑀺 𑀢𑀢𑁆𑀣 𑀅𑀪𑀺𑀭𑀢𑀺𑀯𑀲𑁂𑀦 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀲𑀼𑀝𑁆𑀞𑀼 𑀉𑀧𑁂𑀢𑀺. 𑀲𑁂𑀯𑀢𑀻𑀢𑀺 𑀦𑀺𑀯𑀸𑀲𑀦𑀯𑀲𑁂𑀦 𑀲𑁂𑀯𑀢𑀺 𑀦𑀺𑀲𑁂𑀯𑀢𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀲𑀦𑁆𑀦𑀺𑀲𑀺𑀢𑁄 𑀳𑀼𑀢𑁆𑀯𑀸 𑀲𑁂𑀯𑀢𑀺. 𑀲𑀁𑀲𑁂𑀯𑀢𑀻𑀢𑀺 𑀲𑁂𑀦𑀸𑀲𑀦𑀯𑀢𑁆𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀲𑁂𑀯𑀢𑀺.

𑁫𑁨𑁯. 𑀇𑀤𑀸𑀦𑀺 𑀬𑀁 𑀢𑀁 𑀯𑀺𑀯𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀭𑀜𑁆𑀜𑀦𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀸𑀯 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜’’𑀦𑁆𑀢𑀺 (𑀧𑀸𑀭𑀸. 𑁧𑁨) 𑀆𑀕𑀢𑀁. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀘𑀺. 𑁫𑁭𑁩) 𑀆𑀕𑀢𑀁. 𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀸 𑀧𑀦 𑀉𑀪𑁄𑀧𑀺 𑀧𑀭𑀺𑀬𑀸𑀬𑀤𑁂𑀲𑀦𑀸 𑀦𑀸𑀫. 𑀅𑀪𑀺𑀥𑀫𑁆𑀫𑁄 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸𑀢𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 ¶ 𑀅𑀭𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀯𑀼𑀢𑁆𑀢𑀁; 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁫𑁩𑁦. 𑀭𑀼𑀓𑁆𑀔𑀫𑀽𑀮𑀸𑀤𑀻𑀦𑀁 𑀧𑀓𑀢𑀺𑀬𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀭𑀼𑀓𑁆𑀔𑀫𑀽𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘𑁂𑀢𑁆𑀣 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀻𑀢𑀘𑁆𑀙𑀸𑀬𑀁 𑀯𑀺𑀯𑀺𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑀁. 𑀧𑀩𑁆𑀩𑀢𑀦𑁆𑀢𑀺 𑀲𑁂𑀮𑀁. 𑀢𑀢𑁆𑀣 𑀳𑀺 𑀉𑀤𑀓𑀲𑁄𑀡𑁆𑀟𑀻𑀲𑀼 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 ¶ 𑀲𑀻𑀢𑀸𑀬 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀦𑀸𑀦𑀸𑀤𑀺𑀲𑀸𑀲𑀼 𑀔𑀸𑀬𑀫𑀸𑀦𑀸𑀲𑀼 𑀲𑀻𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀓𑀦𑁆𑀤𑀭𑀦𑁆𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀭𑀺𑀢𑀁 𑀉𑀤𑀓𑁂𑀦 𑀪𑀺𑀦𑁆𑀦𑀁 𑀧𑀩𑁆𑀩𑀢𑀧𑁆𑀧𑀤𑁂𑀲𑀁; 𑀬𑀁 𑀦𑀺𑀢𑀼𑀫𑁆𑀩𑀦𑁆𑀢𑀺𑀧𑀺 𑀦𑀤𑀻𑀓𑀼𑀜𑁆𑀚𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀸 𑀯𑀸𑀮𑀺𑀓𑀸 𑀳𑁄𑀦𑁆𑀢𑀺, 𑀫𑀢𑁆𑀣𑀓𑁂 𑀫𑀡𑀺𑀯𑀺𑀢𑀸𑀦𑀁 𑀯𑀺𑀬 𑀯𑀦𑀕𑀳𑀦𑀁, 𑀫𑀡𑀺𑀓𑁆𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀁 𑀲𑀦𑁆𑀤𑀢𑀺. 𑀏𑀯𑀭𑀽𑀧𑀁 𑀓𑀦𑁆𑀤𑀭𑀁 𑀑𑀭𑀼𑀬𑁆𑀳 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀢𑁆𑀢𑀸𑀦𑀺 𑀲𑀻𑀢𑀁 𑀓𑀢𑁆𑀯𑀸 𑀯𑀸𑀮𑀺𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 ¶ 𑀦𑀺𑀲𑀺𑀦𑁆𑀦𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀕𑀺𑀭𑀺𑀕𑀼𑀳𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀉𑀫𑀗𑁆𑀕𑀲𑀤𑀺𑀲𑀁 𑀫𑀳𑀸𑀯𑀺𑀯𑀭𑀁. 𑀲𑀼𑀲𑀸𑀦𑀮𑀓𑁆𑀔𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁪) 𑀯𑀼𑀢𑁆𑀢𑀁.

𑁫𑁩𑁧. 𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀇𑀤𑀫𑁂𑀯𑁂𑀓𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸𑀲𑁆𑀲 𑀦𑀺𑀓𑁆𑀔𑁂𑀧𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀲𑀩𑁆𑀩𑀧𑀭𑀺𑀬𑀦𑁆𑀢𑁂 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀪𑁄𑀓𑀸𑀲𑀦𑁆𑀢𑀺 𑀅𑀘𑁆𑀙𑀦𑁆𑀦𑀁. 𑀆𑀓𑀗𑁆𑀔𑀫𑀸𑀦𑁄 𑀧𑀦𑁂𑀢𑁆𑀣 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀢𑀺. 𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀧𑀮𑀸𑀮𑀭𑀸𑀲𑀺. 𑀫𑀳𑀸𑀧𑀮𑀸𑀮𑀧𑀼𑀜𑁆𑀚𑀢𑁄 𑀳𑀺 𑀧𑀮𑀸𑀮𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀮𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑀦𑀧𑀢𑁆𑀣𑀦𑀺𑀤𑁆𑀤𑁂𑀲𑁂 𑀲𑀮𑁄𑀫𑀳𑀁𑀲𑀸𑀦𑀦𑁆𑀢𑀺 𑀬𑀢𑁆𑀣 𑀧𑀯𑀺𑀝𑁆𑀞𑀲𑁆𑀲 𑀮𑁄𑀫𑀳𑀁𑀲𑁄 𑀉𑀧𑁆𑀧𑀚𑁆𑀚𑀢𑀺; 𑀏𑀯𑀭𑀽𑀧𑀸𑀦𑀁 𑀪𑀻𑀲𑀦𑀓𑀲𑁂𑀦𑀸𑀲𑀦𑀸𑀦𑀁. 𑀧𑀭𑀺𑀬𑀦𑁆𑀢𑀸𑀦𑀦𑁆𑀢𑀺 𑀤𑀽𑀭𑀪𑀸𑀯𑁂𑀦 𑀧𑀭𑀺𑀬𑀦𑁆𑀢𑁂 𑀞𑀺𑀢𑀸𑀦𑀁. 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀦𑁆𑀢𑀺 𑀓𑀲𑀦𑀯𑀧𑀦𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀉𑀧𑀘𑀭𑀺𑀢𑀩𑁆𑀩𑀁 𑀯𑀦𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀁. 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀦𑁆𑀢𑀺 𑀅𑀮𑀤𑁆𑀥𑀯𑀺𑀯𑁂𑀓𑀲𑁆𑀲𑀸𑀤𑁂𑀳𑀺 𑀅𑀪𑀺𑀪𑀼𑀬𑁆𑀬 𑀯𑀲𑀺𑀢𑀼𑀁 𑀦𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀁.

𑁫𑁩𑁨. 𑀅𑀧𑁆𑀧𑀲𑀤𑁆𑀤𑀸𑀤𑀺𑀦𑀺𑀤𑁆𑀤𑁂𑀲𑁂 𑀅𑀧𑁆𑀧𑀲𑀤𑁆𑀤𑀦𑁆𑀢𑀺 𑀯𑀘𑀦𑀲𑀤𑁆𑀤𑁂𑀦 𑀅𑀧𑁆𑀧𑀲𑀤𑁆𑀤𑀁.

𑁫𑁩𑁩. 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 ¶ 𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲𑀁. 𑀬𑀲𑁆𑀫𑀸 ¶ 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀲𑀤𑁆𑀤𑀝𑁆𑀞𑁂𑀦 𑀏𑀓𑀁, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀬𑀤𑁂𑀯 𑀢𑀁 𑀅𑀧𑁆𑀧𑀲𑀤𑁆𑀤𑀁 𑀢𑀤𑁂𑀯 𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀚𑀦𑀯𑀸𑀢𑀦𑁆𑀢𑀺 𑀅𑀦𑀼𑀲𑀜𑁆𑀘𑀭𑀡𑀚𑀦𑀲𑁆𑀲 𑀲𑀭𑀻𑀭𑀯𑀸𑀢𑁂𑀦 𑀯𑀺𑀭𑀳𑀺𑀢𑀁. 𑀯𑀺𑀚𑀦𑀯𑀸𑀤𑀦𑁆𑀢𑀺𑀧𑀺 𑀧𑀸𑀞𑁄; 𑀅𑀦𑁆𑀢𑁄𑀚𑀦𑀯𑀸𑀤𑁂𑀦 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀬𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀢𑀤𑁂𑀯 𑀚𑀦𑀲𑀜𑁆𑀘𑀭𑀡𑁂𑀦 𑀘 𑀚𑀦𑀯𑀸𑀤𑁂𑀦 𑀘 𑀯𑀺𑀭𑀳𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀬𑀤𑁂𑀯 𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀢𑀤𑁂𑀯 𑀢𑀁 𑀯𑀺𑀚𑀦𑀯𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀭𑀳𑀲𑁆𑀲𑀓𑀺𑀭𑀺𑀬𑀝𑁆𑀞𑀸𑀦𑀺𑀬𑀁. 𑀬𑀲𑁆𑀫𑀸 𑀧𑀦 𑀢𑀁 𑀚𑀦𑀲𑀜𑁆𑀘𑀭𑀡𑀭𑀳𑀺𑀢𑀁 𑀳𑁄𑀢𑀺, 𑀢𑁂𑀦𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀬𑀤𑁂𑀯 𑀢𑀁 𑀯𑀺𑀚𑀦𑀯𑀸𑀢𑀁 𑀢𑀤𑁂𑀯 𑀢𑀁 𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀦𑁆𑀢𑀺 𑀯𑀺𑀯𑁂𑀓𑀸𑀦𑀼𑀭𑀽𑀧𑀁. 𑀬𑀲𑁆𑀫𑀸 𑀧𑀦 𑀢𑀁 𑀦𑀺𑀬𑀫𑁂𑀦𑁂𑀯 ¶ 𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀁 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀬𑀤𑁂𑀯 𑀢𑀁 𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀁 𑀢𑀤𑁂𑀯 𑀢𑀁 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑀁.

𑁫𑁩𑁪. 𑀅𑀭𑀜𑁆𑀜𑀕𑀢𑀸𑀤𑀺𑀦𑀺𑀤𑁆𑀤𑁂𑀲𑁂 𑀅𑀭𑀜𑁆𑀜𑀁 𑀯𑀼𑀢𑁆𑀢𑀫𑁂𑀯. 𑀢𑀣𑀸 𑀭𑀼𑀓𑁆𑀔𑀫𑀽𑀮𑀁. 𑀅𑀯𑀲𑁂𑀲𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀲𑁂𑀦𑀸𑀲𑀦𑀁 𑀲𑀼𑀜𑁆𑀜𑀸𑀕𑀸𑀭𑁂𑀦 𑀲𑀗𑁆𑀕𑀳𑀺𑀢𑀁.

𑁫𑁩𑁫. 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀁 𑀞𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀧𑀡𑀫𑀦𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺, 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺.

𑁫𑁩𑁬. 𑀉𑀚𑀼𑀓𑁄 𑀳𑁄𑀢𑀺 𑀓𑀸𑀬𑁄 𑀞𑀺𑀢𑁄 𑀧𑀡𑀺𑀳𑀺𑀢𑁄𑀢𑀺 𑀇𑀤𑀫𑁆𑀧𑀺 𑀳𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁫𑁩𑁭. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸, 𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀽𑀧𑀝𑁆𑀞𑀺𑀢𑀸 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸’’𑀢𑀺. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀉𑀢𑁆𑀢𑀭𑁄𑀝𑁆𑀞𑀲𑁆𑀲 𑀯𑁂𑀫𑀚𑁆𑀛𑀧𑁆𑀧𑀤𑁂𑀲𑁄 𑀤𑀝𑁆𑀞𑀩𑁆𑀩𑁄, 𑀬𑀢𑁆𑀣 𑀦𑀸𑀲𑀺𑀓𑀯𑀸𑀢𑁄 𑀧𑀝𑀺𑀳𑀜𑁆𑀜𑀢𑀺; 𑀅𑀣 𑀯𑀸 ¶ 𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄; 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁪) 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁄 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸’’𑀢𑀺.

𑁫𑁩𑁮. 𑀅𑀪𑀺𑀚𑁆𑀛𑀸𑀦𑀺𑀤𑁆𑀤𑁂𑀲𑁄 ¶ 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄. 𑀢𑀲𑁆𑀫𑀸 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀭𑀸𑀕𑀁 𑀧𑀳𑀸𑀬 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑁫𑁩𑁯. 𑀯𑀺𑀕𑀢𑀸𑀪𑀺𑀚𑁆𑀛𑁂𑀦𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀢𑁆𑀢𑀸 𑀯𑀺𑀕𑀢𑀸𑀪𑀺𑀚𑁆𑀛𑁂𑀦, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁫𑁪𑁧. 𑀅𑀪𑀺𑀚𑁆𑀛𑀸𑀬 ¶ 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻𑀢𑀺 𑀅𑀪𑀺𑀚𑁆𑀛𑀸𑀢𑁄 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀬𑀣𑀸 𑀦𑀁 𑀲𑀸 𑀫𑀼𑀜𑁆𑀘𑀢𑀺 𑀘𑁂𑀯, 𑀫𑀼𑀜𑁆𑀘𑀺𑀢𑁆𑀯𑀸 𑀘 𑀦 𑀧𑀼𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑁂𑀲𑀧𑀤𑁂𑀲𑀼 𑀧𑀦𑀲𑁆𑀲 𑀆𑀲𑁂𑀯𑀦𑁆𑀢𑁄 𑀲𑁄𑀥𑁂𑀢𑀺, 𑀪𑀸𑀯𑁂𑀦𑁆𑀢𑁄 𑀯𑀺𑀲𑁄𑀥𑁂𑀢𑀺, 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀧𑀭𑀺𑀲𑁄𑀥𑁂𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑁄𑀘𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁫𑁪𑁨-𑁫𑁪𑁩. 𑀩𑁆𑀬𑀸𑀧𑀸𑀤𑀤𑁄𑀲𑀁 𑀧𑀳𑀸𑀬𑀸𑀢𑀺𑀆𑀤𑀻𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀁 𑀧𑀽𑀢𑀺𑀓𑀼𑀫𑁆𑀫𑀸𑀲𑀸𑀤𑀬𑁄 𑀯𑀺𑀬 𑀧𑀓𑀢𑀺𑀁 𑀚𑀳𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀬𑀸 𑀧𑀤𑀼𑀲𑁆𑀲𑀢𑀺, 𑀧𑀭𑀁 𑀯𑀸 𑀧𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀧𑀤𑁄𑀲𑁄. 𑀉𑀪𑀬𑀫𑁂𑀢𑀁 𑀓𑁄𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀬𑁄 𑀩𑁆𑀬𑀸𑀧𑀸𑀤𑁄 𑀲𑁄 𑀧𑀤𑁄𑀲𑁄; 𑀬𑁄 𑀧𑀤𑁄𑀲𑁄 𑀲𑁄 𑀩𑁆𑀬𑀸𑀧𑀸𑀤𑁄’’𑀢𑀺. 𑀬𑀲𑁆𑀫𑀸 𑀘𑁂𑀲 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻’’𑀢𑀺 𑀅𑀯𑀢𑁆𑀯𑀸 ‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑁫𑁪𑁬. 𑀣𑀺𑀦𑀁 𑀘𑀺𑀢𑁆𑀢𑀕𑁂𑀮𑀜𑁆𑀜𑀁, 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀕𑁂𑀮𑀜𑁆𑀜𑀁; 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀤𑁆𑀯𑁂𑀧𑀺 𑀥𑀫𑁆𑀫𑀸 𑀦𑀺𑀭𑁄𑀥𑀲𑀦𑁆𑀢𑀢𑀸𑀬 𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺. 𑀇𑀤𑀁 𑀲𑀦𑁆𑀥𑀸𑀬𑁂𑀢𑁆𑀣 𑀯𑀘𑀦𑀪𑁂𑀤𑁄 𑀓𑀢𑁄.

𑁫𑁪𑁯. 𑀆𑀮𑁄𑀓𑀲𑀜𑁆𑀜𑀻𑀢𑀺 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀤𑀺𑀝𑁆𑀞𑀸𑀮𑁄𑀓𑀲𑀜𑁆𑀚𑀸𑀦𑀦𑀲𑀫𑀢𑁆𑀣𑀸𑀬 𑀯𑀺𑀕𑀢𑀦𑀻𑀯𑀭𑀡𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄.

𑁫𑁫𑁦. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀇𑀤𑀁 𑀉𑀪𑀬𑀁 𑀆𑀮𑁄𑀓𑀲𑀜𑁆𑀜𑀸𑀬 𑀉𑀧𑀓𑀸𑀭𑀓𑀢𑁆𑀢𑀸 𑀯𑀼𑀢𑁆𑀢𑀁.

𑁫𑁫𑁩. 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀢𑀸𑀬 ¶ 𑀧𑀦 𑀆𑀮𑁄𑀓𑀲𑀜𑁆𑀜𑀸𑀬 𑀦𑀺𑀤𑁆𑀤𑁂𑀲𑀧𑀤𑁂𑀲𑀼 𑀘𑀢𑁆𑀢𑀢𑁆𑀢𑀸𑀢𑀺𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯 ¶ . 𑀢𑀢𑁆𑀣 𑀘𑀢𑁆𑀢𑀢𑁆𑀢𑀸𑀢𑀺 𑀘𑀢𑁆𑀢𑀓𑀸𑀭𑀡𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑁆𑀢𑀢𑁆𑀢𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀦𑁆𑀢𑀢𑁆𑀢𑀸𑀢𑀺 𑀇𑀤𑀁 𑀧𑀼𑀦 𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀫𑀼𑀢𑁆𑀢𑀢𑁆𑀢𑀸𑀢𑀺 𑀇𑀤𑀁 𑀲𑀦𑁆𑀢𑀢𑀺𑀢𑁄 𑀯𑀺𑀦𑀺𑀫𑁄𑀘𑀦𑀯𑀲𑁂𑀦. 𑀧𑀳𑀻𑀦𑀢𑁆𑀢𑀸𑀢𑀺 𑀇𑀤𑀁 𑀫𑀼𑀢𑁆𑀢𑀲𑁆𑀲𑀸𑀧𑀺 𑀓𑀢𑁆𑀣𑀘𑀺 𑀞𑀸𑀦𑀸𑀪𑀸𑀯𑀯𑀲𑁂𑀦. 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦. 𑀧𑀝𑀺𑀫𑀼𑀜𑁆𑀘𑀢𑁄 𑀯𑀸 𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀪𑀸𑀯𑀦𑀸𑀩𑀮𑁂𑀦 𑀅𑀪𑀺𑀪𑀼𑀬𑁆𑀬 ¶ 𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀳𑀻𑀦𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀬𑀣𑀸𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀧𑀳𑀸𑀦𑀁 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀲𑀦𑁆𑀢𑀢𑀺𑀁 𑀦 𑀅𑀚𑁆𑀛𑀸𑀭𑀼𑀳𑀢𑀺, 𑀢𑀣𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺. 𑀆𑀮𑁄𑀓𑀸 𑀳𑁄𑀢𑀻𑀢𑀺 𑀲𑀧𑁆𑀧𑀪𑀸 𑀳𑁄𑀢𑀺. 𑀦𑀺𑀭𑀸𑀯𑀭𑀡𑀝𑁆𑀞𑁂𑀦 𑀯𑀺𑀯𑀝𑀸. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥𑀸. 𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢𑀸.

𑁫𑁫𑁬. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀏𑀢𑁆𑀣 𑀉𑀤𑁆𑀥𑀢𑀸𑀓𑀸𑀭𑁄 𑀉𑀤𑁆𑀥𑀘𑁆𑀘𑀁, 𑀆𑀭𑀫𑁆𑀫𑀡𑁂 𑀅𑀦𑀺𑀘𑁆𑀙𑀬𑀢𑀸𑀬 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀇𑀥𑀸𑀧𑀺 ‘‘𑀲𑀦𑁆𑀢𑀸 𑀳𑁄𑀦𑁆𑀢𑀻’’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀘𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁫𑁮. 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀦𑀺𑀤𑁆𑀤𑁂𑀲𑁂𑀧𑀺𑀲𑁆𑀲 𑀢𑀺𑀡𑁆𑀡𑁄𑀢𑀺 𑀇𑀤𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀦𑀺𑀫𑀼𑀕𑁆𑀕𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀢𑁆𑀢𑀺𑀡𑁆𑀡𑁄𑀢𑀺 𑀇𑀤𑀁 𑀢𑀲𑁆𑀲𑀸 𑀅𑀢𑀺𑀓𑁆𑀓𑀫𑀤𑀲𑁆𑀲𑀦𑀯𑀲𑁂𑀦. 𑀦𑀺𑀢𑁆𑀢𑀺𑀡𑁆𑀡𑁄𑀢𑀺 𑀇𑀤𑀁 𑀪𑀸𑀯𑀦𑀸𑀩𑀮𑁂𑀦 𑀅𑀪𑀺𑀪𑀼𑀬𑁆𑀬 𑀉𑀧𑀤𑁆𑀤𑀯𑁂 𑀢𑀺𑀡𑁆𑀡𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸𑀪𑀸𑀯𑀲𑀗𑁆𑀔𑀸𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀧𑀸𑀭𑀁 𑀕𑀢𑁄. 𑀧𑀸𑀭𑀫𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑀤𑁂𑀯 𑀧𑀸𑀭𑀁 𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀧𑀢𑁆𑀢𑁄𑀢𑀺. 𑀏𑀯𑀫𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸 𑀲𑀨𑀮𑀢𑀁 𑀤𑀲𑁆𑀲𑁂𑀢𑀺.

𑁫𑁫𑁯. 𑀅𑀓𑀣𑀁𑀓𑀣𑀻𑀢𑀺 ‘𑀓𑀣𑀫𑀺𑀤𑀁 𑀓𑀣𑀫𑀺𑀤’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀓𑀣𑀁𑀓𑀣𑀸𑀬 𑀯𑀺𑀭𑀳𑀺𑀢𑁄. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼. 𑀦 𑀓𑀗𑁆𑀔𑀢𑀻𑀢𑀺 ‘𑀇𑀫𑁂 𑀦𑀼 𑀔𑁄 𑀓𑀼𑀲𑀮𑀸’𑀢𑀺 𑀓𑀗𑁆𑀔𑀁 𑀦 𑀉𑀧𑁆𑀧𑀸𑀤𑁂𑀢𑀺. 𑀦 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀢𑁂 𑀥𑀫𑁆𑀫𑁂 𑀲𑀪𑀸𑀯𑀢𑁄 𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀓𑀺𑀘𑁆𑀙𑀢𑀺, 𑀦 𑀓𑀺𑀮𑀫𑀢𑀺. 𑀅𑀓𑀣𑀁𑀓𑀣𑀻 𑀳𑁄𑀢𑀻𑀢𑀺 ‘𑀓𑀣𑀁 𑀦𑀼 𑀔𑁄 𑀇𑀫𑁂 𑀓𑀼𑀲𑀮𑀸’𑀢𑀺 ¶ 𑀓𑀣𑀁𑀓𑀣𑀸𑀬 𑀭𑀳𑀺𑀢𑁄 𑀳𑁄𑀢𑀺. 𑀦𑀺𑀓𑁆𑀓𑀣𑀁𑀓𑀣𑀻 𑀯𑀺𑀕𑀢𑀓𑀣𑀁𑀓𑀣𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀓𑀣𑀁𑀓𑀣𑀸𑀢𑁄 𑀦𑀺𑀓𑁆𑀔𑀦𑁆𑀢𑁄𑀢𑀺 𑀦𑀺𑀓𑁆𑀓𑀣𑀁𑀓𑀣𑁄. 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑁄.

𑁫𑁬𑁨. 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀉𑀧𑀓𑁆𑀓𑀺𑀮𑁂𑀲𑀪𑀽𑀢𑁂. 𑀢𑁂 𑀳𑀺 𑀘𑀺𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀓𑀺𑀮𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁫𑁬𑁩. 𑀧𑀜𑁆𑀜𑀸𑀬 ¶ 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀬𑀲𑁆𑀫𑀸 𑀇𑀫𑁂 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀅𑀧𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀯𑀸 𑀅𑀪𑀺𑀜𑁆𑀜𑀸𑀬𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀫𑀸 ‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀧𑀜𑁆𑀜𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 ¶ 𑀘 𑀧𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀇𑀤𑀫𑁆𑀧𑀺 𑀳𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫𑁬𑁪. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀻𑀲𑀼𑀧𑀺 𑀦𑀺𑀤𑁆𑀤𑁂𑀲𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑀅𑀝𑁆𑀞. 𑁧𑁬𑁦) 𑀭𑀽𑀧𑀸𑀯𑀘𑀭𑀦𑀺𑀤𑁆𑀤𑁂𑀲𑁂 𑀇𑀥𑁂𑀯 𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀬𑀣𑀸 𑀢𑀸𑀦𑀺 𑀛𑀸𑀦𑀸𑀦𑀺 𑀳𑁂𑀝𑁆𑀞𑀸 ‘𑀢𑀺𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺, 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀅𑀯𑀢𑁆𑀯𑀸 ‘‘𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀲𑀸𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀛𑀸𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑁄 𑀧𑀻𑀢𑀺𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀁 𑀢𑀁 𑀛𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑁫𑁮𑁮. 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀻𑀢𑀺𑀧𑀤𑀦𑀺𑀤𑁆𑀤𑁂𑀲𑁂 𑀧𑀦 𑀓𑀺𑀜𑁆𑀘𑀸𑀧𑀺 ‘𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀻’𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺, 𑀏𑀯𑀁 𑀲𑀦𑁆𑀢𑁂𑀧𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺𑀆𑀤𑀺𑀉𑀤𑁆𑀤𑁂𑀲𑀯𑀲𑁂𑀦 𑀆𑀘𑀺𑀓𑁆𑀔𑀦𑁆𑀢𑀺, 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑁂𑀦𑁆𑀢𑀺, 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀁 𑀞𑀧𑁂𑀢𑁆𑀯𑀸 𑀧𑀝𑁆𑀞𑀧𑁂𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲𑀢𑁆𑀣𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀯𑀭𑀦𑁆𑀢𑀺, 𑀩𑁆𑀬𑀜𑁆𑀚𑀦𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀪𑀚𑀦𑁆𑀢𑀺, 𑀦𑀺𑀓𑁆𑀓𑀼𑀚𑁆𑀚𑀺𑀢𑀪𑀸𑀯𑀁 𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀯𑀸 𑀲𑁄𑀢𑀽𑀦𑀁 𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀁 𑀚𑀦𑀬𑀦𑁆𑀢𑀸 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀲𑁄𑀢𑀽𑀦𑀁 𑀅𑀜𑁆𑀜𑀸𑀡𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑀸 𑀧𑀓𑀸𑀲𑁂𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀫𑀢𑀺𑀓𑁆𑀓𑀫𑀦𑀺𑀤𑁆𑀤𑁂𑀲𑁂𑀧𑀺 𑀢𑀢𑁆𑀣 𑀢𑀢𑁆𑀣 𑀢𑁂𑀳𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀼𑀝𑁆𑀞𑀺𑀢𑀢𑁆𑀢𑀸 𑀅𑀢𑀺𑀓𑁆𑀓𑀫𑀦𑁆𑀢𑁄, 𑀉𑀧𑀭𑀺𑀪𑀽𑀫𑀺𑀧𑁆𑀧𑀢𑁆𑀢𑀺𑀬𑀸 ¶ 𑀯𑀻𑀢𑀺𑀓𑁆𑀓𑀦𑁆𑀢𑁄, 𑀢𑀢𑁄 𑀅𑀧𑀭𑀺𑀳𑀸𑀦𑀺𑀪𑀸𑀯𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁨𑁩. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ¶ 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀆𑀕𑀢𑀦𑀬𑁂𑀦𑁂𑀯 𑀢𑀦𑁆𑀢𑀺 𑀞𑀧𑀺𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀛𑀸𑀦𑀸𑀦𑀁 ¶ 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀤𑁆𑀥𑀺𑀓𑀦𑀯𑀓𑀸𑀤𑀺𑀪𑁂𑀤𑁄𑀧𑀺 𑀲𑀩𑁆𑀩𑁄 𑀢𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁬𑁩𑁮. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀛𑀸𑀦𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀢𑀺𑀡𑁆𑀡𑀁 𑀛𑀸𑀦𑀸𑀦𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀸 𑀧𑀦𑁂𑀢𑁆𑀣 𑀫𑀕𑁆𑀕𑀓𑀸𑀮𑁂 𑀨𑀮𑀓𑀸𑀮𑁂 𑀯𑀸 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀢𑁄 𑀢𑁂𑀭𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁, 𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁, 𑀤𑀺𑀩𑁆𑀩𑀲𑁄𑀢𑀜𑀸𑀡𑀘𑀢𑀼𑀢𑁆𑀣𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁, 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀘𑀢𑀼𑀢𑁆𑀣𑀁, 𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀘𑀢𑀼𑀢𑁆𑀣𑀁, 𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺.

𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑁂 𑀓𑀸𑀬𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁.

𑀤𑀺𑀩𑁆𑀩𑀲𑁄𑀢𑀜𑀸𑀡𑀘𑀢𑀼𑀢𑁆𑀣𑀁 𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁.

𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁 ¶ 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀧𑀼𑀣𑀼𑀚𑁆𑀚𑀦𑀸𑀦𑀁𑀬𑁂𑀯 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦 𑀅𑀭𑀺𑀬𑀸𑀦𑀁. 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘𑁂𑀯 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘; 𑀲𑀓𑀤𑀸𑀕𑀸𑀫𑀻 𑀲𑀓𑀤𑀸𑀕𑀸𑀫𑀺𑀦𑁄 𑀘𑁂𑀯 𑀳𑁂𑀝𑁆𑀞𑀺𑀫𑀸𑀦𑀜𑁆𑀘 ¶ 𑀤𑁆𑀯𑀺𑀦𑁆𑀦𑀁; 𑀅𑀦𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀦𑁄 𑀘𑁂𑀯 𑀳𑁂𑀝𑁆𑀞𑀺𑀫𑀸𑀦𑀜𑁆𑀘 𑀢𑀺𑀡𑁆𑀡𑀁; 𑀔𑀻𑀡𑀸𑀲𑀯𑁄 𑀲𑀩𑁆𑀩𑁂𑀲𑀫𑁆𑀧𑀺 𑀚𑀸𑀦𑀸𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁 ¶ 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, ‘‘𑀅𑀢𑀻𑀢𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀫𑀕𑁆𑀕𑀁 𑀪𑀸𑀯𑀬𑀺𑀁𑀲𑀼, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀁𑀲𑀽’’𑀢𑀺 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁 𑀯𑀡𑁆𑀡𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁.

𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀘𑀢𑀼𑀢𑁆𑀣𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁.

𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑁂 𑀓𑀸𑀫𑀥𑀸𑀢𑀼𑀬𑀸 𑀦𑀺𑀩𑁆𑀩𑀢𑁆𑀢𑀺𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, ‘‘𑀅𑀦𑀸𑀕𑀢𑁂 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁦𑁮) 𑀦𑀬𑁂𑀦 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁.

𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁.

𑀓𑀺𑀭𑀺𑀬𑀢𑁄𑀧𑀺 𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀛𑀸𑀦𑀸𑀦𑀁 𑀇𑀤𑀫𑁂𑀯 𑀆𑀭𑀫𑁆𑀫𑀡𑀯𑀺𑀥𑀸𑀦𑀁. 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀫𑀕𑁆𑀕𑀸𑀭𑀫𑁆𑀫𑀡𑀸𑀢𑀺 ¶ 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀸 𑀘𑁂𑀢𑁄𑀧𑀭𑀺𑀬𑀸𑀤𑀺𑀜𑀸𑀡𑀁 𑀯𑀸 𑀫𑀕𑁆𑀕𑀁 𑀆𑀭𑀫𑁆𑀫𑀡𑀁 𑀓𑀭𑁂𑀬𑁆𑀬, 𑀢𑀻𑀡𑀺 𑀛𑀸𑀦𑀸𑀦𑀺 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀦𑀫𑀕𑁆𑀕𑀸𑀭𑀫𑁆𑀫𑀡𑀸, 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀧𑀦 𑀲𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀸; 𑀯𑀻𑀭𑀺𑀬𑀚𑁂𑀝𑁆𑀞𑀺𑀓𑀸𑀬 𑀯𑀸 𑀯𑀻𑀫𑀁𑀲𑀸𑀚𑁂𑀝𑁆𑀞𑀺𑀓𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀬 𑀫𑀕𑁆𑀕𑀸𑀥𑀺𑀧𑀢𑀺𑀦𑁄; 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀓𑀓𑀸𑀮𑁂 𑀨𑀮𑀓𑀸𑀮𑁂 𑀘 𑀦𑀯𑀢𑁆𑀢𑀩𑁆𑀩𑀸.

𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺 𑀇𑀥𑀸𑀧𑀺 𑀓𑀼𑀲𑀮𑀢𑁄 𑀢𑁂𑀭𑀲𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀲𑀼 𑀲𑀩𑁆𑀩𑀢𑁆𑀣𑀧𑀸𑀤𑀓𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀤𑀺𑀩𑁆𑀩𑀘𑀓𑁆𑀔𑀼𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀘𑀢𑀼𑀢𑁆𑀣𑀜𑁆𑀘𑁂𑀯 𑀘𑀢𑀼𑀩𑁆𑀩𑀺𑀥𑀜𑁆𑀘 𑀆𑀭𑀼𑀧𑁆𑀧𑀘𑀢𑀼𑀢𑁆𑀣𑀁 𑀫𑀕𑁆𑀕𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀁. 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁 𑀧𑀦 𑀫𑀕𑁆𑀕𑀸𑀭𑀫𑁆𑀫𑀡𑀁 ¶ 𑀳𑁄𑀢𑀺. 𑀦 𑀯𑀢𑁆𑀢𑀩𑁆𑀩𑀁 𑀫𑀕𑁆𑀕𑀳𑁂𑀢𑀼𑀓𑀁 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀯𑀸; 𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀁 𑀫𑀕𑁆𑀕𑀸𑀭𑀫𑁆𑀫𑀡𑀁 𑀦 𑀳𑁄𑀢𑀺; 𑀫𑀕𑁆𑀕𑀓𑀸𑀮𑁂 𑀧𑀦 ¶ 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀫𑀕𑁆𑀕𑀳𑁂𑀢𑀼𑀓𑀁; 𑀯𑀻𑀭𑀺𑀬𑀯𑀻𑀫𑀁𑀲𑀸𑀚𑁂𑀝𑁆𑀞𑀺𑀓𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀫𑀕𑁆𑀕𑀸𑀥𑀺𑀧𑀢𑀺; 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀺𑀓𑀸𑀬 𑀘𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀨𑀮𑀓𑀸𑀮𑁂 𑀘 𑀦 𑀯𑀢𑁆𑀢𑀩𑁆𑀩𑀁. 𑀓𑀺𑀭𑀺𑀬𑀢𑁄𑀧𑀺 𑀤𑁆𑀯𑀸𑀤𑀲𑀲𑀼 𑀛𑀸𑀦𑁂𑀲𑀼 𑀅𑀬𑀫𑁂𑀯 𑀦𑀬𑁄.

𑀢𑀻𑀡𑀺 𑀛𑀸𑀦𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑀻𑀢𑀸𑀤𑀻𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀆𑀭𑀩𑁆𑀪 𑀅𑀧𑁆𑀧𑀯𑀢𑁆𑀢𑀺𑀢𑁄 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺 𑀓𑀼𑀲𑀮𑀢𑁄 𑀢𑁂𑀭𑀲𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀲𑀼 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀫𑁂𑀯. 𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀢𑀻𑀢𑀸𑀭𑀫𑁆𑀫𑀡𑀁; ‘‘𑀅𑀦𑀸𑀕𑀢𑁂 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀫𑀸 𑀫𑀺𑀮𑀸𑀬𑀺𑀁𑀲𑀼, 𑀤𑀻𑀧𑀸 𑀫𑀸 𑀦𑀺𑀩𑁆𑀩𑀸𑀬𑀺𑀁𑀲𑀼, 𑀏𑀓𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀸𑀢𑀼, 𑀧𑀩𑁆𑀩𑀢𑁄 𑀲𑀫𑀼𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑀓𑀸𑀮𑁂 𑀅𑀦𑀸𑀕𑀢𑀸𑀭𑀫𑁆𑀫𑀡𑀁; 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀧𑀭𑀺𑀡𑀸𑀫𑀦𑀓𑀸𑀮𑁂 𑀓𑀸𑀬𑀸𑀭𑀫𑁆𑀫𑀡𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. 𑀤𑀺𑀩𑁆𑀩𑀲𑁄𑀢𑀜𑀸𑀡𑀘𑀢𑀼𑀢𑁆𑀣𑀁 𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑀸𑀭𑀫𑁆𑀫𑀡𑀁. 𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀅𑀢𑀻𑀢𑀸𑀭𑀫𑁆𑀫𑀡𑀁; 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀅𑀦𑀸𑀕𑀢𑀸𑀭𑀫𑁆𑀫𑀡𑀁. ‘‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻𑀢𑀺. 𑀲𑁄 𑀩𑀳𑀼𑀜𑁆𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺 𑀦𑁄 𑀅𑀜𑁆𑀜𑀣𑀸’’𑀢𑀺 𑀇𑀫𑀺𑀦𑀸 𑀳𑀺 𑀲𑀼𑀢𑁆𑀢𑁂𑀦 (𑀅. 𑀦𑀺. 𑁩.𑁬𑁧) 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲𑁂𑀯 𑀧𑀯𑀢𑁆𑀢𑀺 𑀧𑀓𑀸𑀲𑀺𑀢𑀸. 𑀅𑀤𑁆𑀥𑀸𑀦𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁 ¶ 𑀅𑀢𑀻𑀢𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀢𑀻𑀢𑀸𑀭𑀫𑁆𑀫𑀡𑀁, 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁 𑀯𑀡𑁆𑀡𑀸𑀭𑀫𑁆𑀫𑀡𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑀻𑀢𑀓𑀫𑁆𑀫𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀁. 𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀦𑀸𑀕𑀢𑀸𑀭𑀫𑁆𑀫𑀡𑀁, 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 ¶ 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀫𑁂𑀯. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯. 𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀫𑁂𑀯. 𑀓𑀺𑀭𑀺𑀬𑀢𑁄𑀧𑀺 𑀤𑁆𑀯𑀸𑀤𑀲𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄.

𑀢𑀻𑀡𑀺 ¶ 𑀛𑀸𑀦𑀸𑀦𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺 𑀅𑀚𑁆𑀛𑀢𑁆𑀢𑀢𑁄 𑀩𑀳𑀺𑀤𑁆𑀥𑀸𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺 𑀇𑀥𑀸𑀧𑀺 𑀓𑀼𑀲𑀮𑀢𑁄 𑀢𑁂𑀭𑀲𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀲𑀼 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁂𑀯.

𑀇𑀤𑁆𑀥𑀺𑀯𑀺𑀥𑀘𑀢𑀼𑀢𑁆𑀣𑀁 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂𑀧𑀺 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀧𑀭𑀺𑀡𑀸𑀫𑀦𑁂𑀧𑀺 𑀅𑀢𑁆𑀢𑀦𑁄𑀯 𑀓𑀸𑀬𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁; ‘‘𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀤𑀺𑀩𑁆𑀩𑀲𑁄𑀢𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀕𑀢𑀲𑀤𑁆𑀤𑀸𑀭𑀫𑁆𑀫𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀲𑀤𑁆𑀤𑀸𑀭𑀫𑁆𑀫𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀘𑁂𑀢𑁄𑀧𑀭𑀺𑀬𑀜𑀸𑀡𑀘𑀢𑀼𑀢𑁆𑀣𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁂𑀯.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑁆𑀢𑀦𑁄 𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀔𑀦𑁆𑀥𑀸𑀦𑀜𑁆𑀘𑁂𑀯 𑀦𑀸𑀫𑀕𑁄𑀢𑁆𑀢𑀲𑁆𑀲 𑀘 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑁆𑀢𑀦𑁄 𑀭𑀽𑀧𑀸𑀭𑀫𑁆𑀫𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀘𑀢𑀼𑀢𑁆𑀣𑀁 ¶ 𑀅𑀢𑁆𑀢𑀦𑁄 𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀅𑀦𑀸𑀕𑀢𑀁𑀲𑀜𑀸𑀡𑀘𑀢𑀼𑀢𑁆𑀣𑀁 𑀅𑀢𑁆𑀢𑀦𑁄 𑀅𑀦𑀸𑀕𑀢𑁂 𑀦𑀺𑀩𑁆𑀩𑀢𑁆𑀢𑀺𑀚𑀸𑀦𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀘𑁂𑀯 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀘 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀉𑀪𑀬𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀘𑀢𑀼𑀢𑁆𑀣𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀢𑀼𑀢𑁆𑀣𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁.

𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁂𑀯. 𑀓𑀺𑀭𑀺𑀬𑀢𑁄𑀧𑀺 𑀤𑁆𑀯𑀸𑀤𑀲𑀲𑀼 𑀛𑀸𑀦𑁂𑀲𑀼 𑀅𑀬𑀫𑁂𑀯 𑀦𑀬𑁄𑀢𑀺.

𑀇𑀫𑀲𑁆𑀫𑀺𑀁 ¶ ¶ 𑀧𑀦 𑀛𑀸𑀦𑀯𑀺𑀪𑀗𑁆𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀛𑀸𑀦𑀸𑀦𑀺 𑀓𑀣𑀺𑀢𑀸𑀦𑀺; 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺. 𑀢𑀬𑁄𑀧𑀺 𑀳𑀺 𑀏𑀢𑁂 𑀦𑀬𑀸 𑀢𑁂𑀪𑀽𑀫𑀓𑀥𑀫𑁆𑀫𑀫𑀺𑀲𑁆𑀲𑀓𑀢𑁆𑀢𑀸 𑀏𑀓𑀧𑀭𑀺𑀘𑁆𑀙𑁂𑀤𑀸 𑀏𑀯. 𑀏𑀯𑀫𑀬𑀁 𑀛𑀸𑀦𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀛𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁪𑁨. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁂 𑀘𑀢𑀲𑁆𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀏𑀢𑀸 𑀳𑀺 𑀆𑀭𑀫𑁆𑀫𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑁂 𑀯𑀸 𑀲𑀢𑁆𑀢𑁂 𑀨𑀭𑀦𑁆𑀢𑀺, 𑀏𑀓𑀲𑀢𑁆𑀢𑀫𑁆𑀧𑀺 𑀯𑀸 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀨𑀭𑀦𑁆𑀢𑀻𑀢𑀺 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁂𑀦. 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦. 𑀏𑀓𑀁 𑀤𑀺𑀲𑀦𑁆𑀢𑀺 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬. 𑀧𑀞𑀫𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀁 𑀉𑀧𑀸𑀤𑀸𑀬 𑀏𑀓𑀤𑀺𑀲𑀸𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀨𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀯𑀺𑀳𑀭𑀢𑀻𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀥𑀺𑀝𑁆𑀞𑀺𑀢𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁 𑀧𑀯𑀢𑁆𑀢𑁂𑀢𑀺. 𑀢𑀣𑀸 𑀤𑀼𑀢𑀺𑀬𑀦𑁆𑀢𑀺 𑀬𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑁂𑀯 𑀢𑀤𑀦𑀦𑁆𑀢𑀭𑀁 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀉𑀤𑁆𑀥𑀦𑁆𑀢𑀺 𑀢𑁂𑀦𑁂𑀯 𑀘 𑀦𑀬𑁂𑀦 𑀉𑀧𑀭𑀺𑀫𑀁 𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀅𑀥𑁄𑀤𑀺𑀲𑀫𑁆𑀧𑀺 𑀢𑀺𑀭𑀺𑀬𑀁𑀤𑀺𑀲𑀫𑁆𑀧𑀺 𑀏𑀯𑀫𑁂𑀯. 𑀏𑀢𑁆𑀣 𑀘 𑀅𑀥𑁄𑀢𑀺 𑀳𑁂𑀝𑁆𑀞𑀸, 𑀢𑀺𑀭𑀺𑀬𑀦𑁆𑀢𑀺 𑀅𑀦𑀼𑀤𑀺𑀲𑀸. 𑀏𑀯𑀁 𑀲𑀩𑁆𑀩𑀤𑀺𑀲𑀸𑀲𑀼 𑀅𑀲𑁆𑀲𑀫𑀡𑁆𑀟𑀮𑁂 𑀅𑀲𑁆𑀲𑀫𑀺𑀯 𑀫𑁂𑀢𑁆𑀢𑀸𑀲𑀳𑀕𑀢𑀁 𑀘𑀺𑀢𑁆𑀢𑀁 𑀲𑀸𑀭𑁂𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀢𑀺𑀧𑀻𑀢𑀺 𑀏𑀢𑁆𑀢𑀸𑀯𑀢𑀸 𑀏𑀓𑀫𑁂𑀓𑀁 𑀤𑀺𑀲𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀑𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀁 𑀤𑀲𑁆𑀲𑀺𑀢𑀁. 𑀲𑀩𑁆𑀩𑀥𑀻𑀢𑀺𑀆𑀤𑀺 𑀧𑀦 𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀲𑀼 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀫𑀺𑀢𑁆𑀢𑀲𑀧𑀢𑁆𑀢𑀫𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑁂𑀲𑀼 𑀅𑀢𑁆𑀢𑀢𑀸𑀬 ‘𑀅𑀬𑀁 𑀧𑀭𑀲𑀢𑁆𑀢𑁄’𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀢𑁆𑀢𑀲𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺; 𑀅𑀣 𑀯𑀸 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀦 𑀘𑀺𑀢𑁆𑀢𑀪𑀸𑀯𑁂𑀦 𑀈𑀲𑀓𑀫𑁆𑀧𑀺 ¶ 𑀩𑀳𑀺 𑀅𑀯𑀺𑀓𑁆𑀔𑀺𑀧𑀫𑀸𑀦𑁄𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁.

𑀯𑀺𑀧𑀼𑀮𑁂𑀦𑀸𑀢𑀺𑀏𑀯𑀫𑀸𑀤𑀺𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁄 𑀧𑀦𑁂𑀢𑁆𑀣 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀏𑀢𑁆𑀣 𑀑𑀥𑀺𑀲𑁄 𑀨𑀭𑀡𑁂 𑀯𑀺𑀬 𑀧𑀼𑀦 ‘𑀢𑀣𑀸’𑀲𑀤𑁆𑀤𑁄 ‘𑀇𑀢𑀺’𑀲𑀤𑁆𑀤𑁄 𑀯𑀸 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁; 𑀦𑀺𑀕𑀫𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀯𑀺𑀧𑀼𑀮𑁂𑀦𑀸𑀢𑀺 𑀏𑀢𑁆𑀣 𑀘 𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀪𑀽𑀫𑀺𑀯𑀲𑁂𑀦 𑀧𑀦 𑀢𑀁 𑀫𑀳𑀕𑁆𑀕𑀢𑀁, 𑀧𑀕𑀼𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀁 ¶ , 𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁, 𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦 𑀅𑀯𑁂𑀭𑀁, 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀢𑁄 𑀅𑀩𑁆𑀬𑀸𑀧𑀚𑁆𑀛𑀁, 𑀦𑀺𑀤𑁆𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀢𑀸𑀯 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀞𑀧𑀺𑀢𑀸𑀬 𑀫𑀸𑀢𑀺𑀓𑀸𑀬 𑀅𑀢𑁆𑀣𑁄.

𑁬𑁪𑁩. 𑀇𑀤𑀸𑀦𑀺 𑀬𑀤𑁂𑀢𑀁 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀤𑀪𑀸𑀚𑀦𑀻𑀬𑀁, 𑀢𑀢𑁆𑀣 𑀬𑀲𑁆𑀫𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑁄𑀲𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁, 𑀢𑀲𑁆𑀫𑀸 𑀬𑀣𑀸𑀭𑀽𑀧𑁂 𑀧𑀼𑀕𑁆𑀕𑀮𑁂 𑀅𑀬𑀁 𑀫𑁂𑀢𑁆𑀢𑀸 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀁 𑀫𑁂𑀢𑁆𑀢𑀸𑀬 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀣𑀸 𑀏𑀓𑀁 𑀧𑀼𑀕𑁆𑀕𑀮𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀬𑀦𑁆𑀢𑀺 𑀧𑁂𑀫𑀦𑀻𑀬𑀁. 𑀫𑀦𑀸𑀧𑀦𑁆𑀢𑀺 𑀳𑀤𑀬𑀯𑀼𑀟𑁆𑀠𑀺𑀓𑀭𑀁. 𑀢𑀢𑁆𑀣 𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸 𑀧𑀺𑀬𑁄 𑀦𑀸𑀫 𑀳𑁄𑀢𑀺, 𑀲𑀻𑀮𑀸𑀤𑀺𑀕𑀼𑀡𑀲𑀫𑀸𑀬𑁄𑀕𑁂𑀦 𑀫𑀦𑀸𑀧𑁄 𑀦𑀸𑀫; 𑀤𑀸𑀦𑀲𑀫𑀸𑀦𑀢𑁆𑀢𑀢𑀸𑀳𑀺 𑀯𑀸 𑀧𑀺𑀬𑀢𑀸, 𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀢𑀸𑀳𑀺 𑀫𑀦𑀸𑀧𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘𑁂𑀢𑁆𑀣 𑀧𑀺𑀬𑀢𑀸𑀬 𑀇𑀫𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺, 𑀢𑀢𑁄 𑀫𑁂𑀢𑁆𑀢𑀸 𑀲𑀼𑀔𑀁 𑀨𑀭𑀢𑀺, 𑀫𑀦𑀸𑀧𑀢𑀸𑀬 𑀉𑀤𑀸𑀲𑀻𑀦𑀢𑀸 𑀦 𑀲𑀡𑁆𑀞𑀸𑀢𑀺, 𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀢𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀼𑀧𑀸𑀮𑀺𑀢𑀸 𑀫𑁂𑀢𑁆𑀢𑀸 𑀦 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀉𑀧𑀫𑀁 𑀓𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 𑀧𑀺𑀬𑀁 𑀫𑀦𑀸𑀧𑀦𑁆𑀢𑀺. 𑀫𑁂𑀢𑁆𑀢𑀸𑀬𑁂𑀬𑁆𑀬𑀸𑀢𑀺 𑀫𑁂𑀢𑁆𑀢𑀸𑀬 𑀨𑀭𑁂𑀬𑁆𑀬; 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀁 𑀓𑀭𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 ¶ 𑀲𑀩𑁆𑀩𑁂 𑀲𑀢𑁆𑀢𑁂𑀢𑀺 𑀬𑀣𑀸 𑀧𑀺𑀬𑀁 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀬𑁂𑀬𑁆𑀬, 𑀏𑀯𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀯𑀲𑀻𑀪𑀸𑀯𑀁 𑀉𑀧𑀕𑀢𑀸𑀬 𑀫𑁂𑀢𑁆𑀢𑀸𑀬 𑀫𑀚𑁆𑀛𑀢𑁆𑀢𑀯𑁂𑀭𑀺𑀲𑀗𑁆𑀔𑀸𑀢𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑁂 𑀅𑀦𑀼𑀓𑁆𑀓𑀫𑁂𑀦 𑀨𑀭𑀢𑀻𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁬𑁪𑁪. 𑀯𑀺𑀤𑀺𑀲𑀁 𑀯𑀸𑀢𑀺 𑀧𑀤𑀁 𑀢𑀺𑀭𑀺𑀬𑀁 𑀯𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁬𑁪𑁫. 𑀨𑀭𑀺𑀢𑁆𑀯𑀸𑀢𑀺 ¶ 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀨𑀼𑀲𑀺𑀢𑁆𑀯𑀸. 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀥𑀺𑀓𑀪𑀸𑀯𑁂𑀦 𑀫𑀼𑀜𑁆𑀘𑀺𑀢𑁆𑀯𑀸, 𑀬𑀣𑀸 𑀫𑀼𑀢𑁆𑀢𑀁 𑀲𑀼𑀫𑀼𑀢𑁆𑀢𑀁 𑀳𑁄𑀢𑀺 𑀲𑀼𑀧𑁆𑀧𑀲𑀸𑀭𑀺𑀢𑀁 𑀲𑀼𑀯𑀺𑀢𑁆𑀣𑀢𑀁 𑀢𑀣𑀸 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁬𑁪𑁮. 𑀲𑀩𑁆𑀩𑀥𑀺𑀆𑀤𑀺𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀢𑀻𑀡𑀺𑀧𑀺 𑀏𑀢𑀸𑀦𑀺 𑀧𑀤𑀸𑀦𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸𑀦𑀺, 𑀢𑀲𑁆𑀫𑀸 𑀦𑁂𑀲𑀁 𑀏𑀓𑀢𑁄𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁬𑁫𑁦. 𑀯𑀺𑀧𑀼𑀮𑀸𑀤𑀺𑀦𑀺𑀤𑁆𑀤𑁂𑀲𑁂 ¶ 𑀬𑀲𑁆𑀫𑀸 𑀬𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀦𑁆𑀢𑀲𑀢𑁆𑀢𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀁, 𑀢𑀁 𑀦𑀺𑀬𑀫𑀢𑁄 𑀪𑀽𑀫𑀺𑀯𑀲𑁂𑀦 𑀫𑀳𑀕𑁆𑀕𑀢𑀁 𑀳𑁄𑀢𑀺. 𑀬𑀜𑁆𑀘 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀕𑁄𑀘𑀭𑀯𑀲𑁂𑀦 𑀅𑀧𑁆𑀧𑀫𑀸𑀡𑀁. 𑀬𑀁 𑀅𑀧𑁆𑀧𑀫𑀸𑀡𑀁 𑀢𑀁 𑀧𑀘𑁆𑀘𑀢𑁆𑀣𑀺𑀓𑀯𑀺𑀖𑀸𑀢𑀯𑀲𑁂𑀦 𑀅𑀯𑁂𑀭𑀁. 𑀬𑀜𑁆𑀘 𑀅𑀯𑁂𑀭𑀁 𑀢𑀁 𑀯𑀺𑀳𑀢𑀩𑁆𑀬𑀸𑀧𑀚𑁆𑀚𑀢𑀸𑀬 𑀅𑀩𑁆𑀬𑀸𑀧𑀚𑁆𑀚𑀁. 𑀢𑀲𑁆𑀫𑀸 ‘‘𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑁂𑀭𑁄 𑀅𑀩𑁆𑀬𑀸𑀧𑀚𑁆𑀚𑁄𑀢𑀺 𑀘𑁂𑀢𑁆𑀣 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀫𑀦𑁂𑀦 𑀯𑀸 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑁋 𑀬𑀁 𑀅𑀧𑁆𑀧𑀫𑀸𑀡𑀁 𑀘𑀺𑀢𑁆𑀢𑀁, 𑀲𑁄 𑀅𑀯𑁂𑀭𑁄 𑀫𑀦𑁄; 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄𑀢𑀺. 𑀅𑀧𑀺𑀘𑁂𑀢𑁆𑀣 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀧𑀤𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲, 𑀉𑀧𑀭𑀺𑀫𑀁 𑀯𑀸 𑀉𑀧𑀭𑀺𑀫𑀁 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀅𑀢𑁆𑀣𑁄𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑁄.

𑁬𑁫𑁩. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀤𑀼𑀕𑁆𑀕𑀢𑀁 𑀤𑀼𑀭𑀼𑀧𑁂𑀢𑀦𑁆𑀢𑀺 𑀇𑀤𑀫𑁆𑀧𑀺 𑀓𑀭𑀼𑀡𑀸𑀬 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀲𑁆𑀫𑀺𑀜𑁆𑀳𑀺 𑀧𑀼𑀕𑁆𑀕𑀮𑁂 𑀩𑀮𑀯𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀤𑀼𑀕𑁆𑀕𑀢𑀦𑁆𑀢𑀺 𑀤𑀼𑀓𑁆𑀔𑁂𑀦 𑀲𑀫𑀗𑁆𑀕𑀻𑀪𑀸𑀯𑀁 𑀕𑀢𑀁. 𑀤𑀼𑀭𑀼𑀧𑁂𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀉𑀧𑁂𑀢𑀁. 𑀕𑀢𑀺𑀓𑀼𑀮𑀪𑁄𑀕𑀸𑀤𑀺𑀯𑀲𑁂𑀦 𑀯𑀸 𑀢𑀫𑀪𑀸𑀯𑁂 𑀞𑀺𑀢𑁄 𑀧𑀼𑀕𑁆𑀕𑀮𑁄 𑀤𑀼𑀕𑁆𑀕𑀢𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀉𑀧𑁂𑀢𑀢𑁆𑀢𑀸 𑀢𑀫𑀧𑀭𑀸𑀬𑀡𑀪𑀸𑀯𑁂 𑀞𑀺𑀢𑁄 𑀤𑀼𑀭𑀼𑀧𑁂𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁬𑁩. 𑀏𑀓𑀁 𑀧𑀼𑀕𑁆𑀕𑀮𑀁 𑀧𑀺𑀬𑀁 𑀫𑀦𑀸𑀧𑀦𑁆𑀢𑀺 𑀇𑀤𑀫𑁆𑀧𑀺 𑀫𑀼𑀤𑀺𑀢𑀸𑀬 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀕𑀢𑀺𑀓𑀼𑀮𑀪𑁄𑀕𑀸𑀤𑀺𑀯𑀲𑁂𑀦 𑀚𑁄𑀢𑀺𑀪𑀸𑀯𑁂 𑀞𑀺𑀢𑁄 𑀧𑀺𑀬𑁄, 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀉𑀧𑁂𑀢𑀢𑁆𑀢𑀸 𑀚𑁄𑀢𑀺𑀧𑀭𑀸𑀬𑀡𑀪𑀸𑀯𑁂 𑀞𑀺𑀢𑁄 𑀫𑀦𑀸𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁬𑁭𑁩. 𑀦𑁂𑀯 𑀫𑀦𑀸𑀧𑀁 𑀦 𑀅𑀫𑀦𑀸𑀧𑀦𑁆𑀢𑀺 𑀇𑀤𑀫𑁆𑀧𑀺 𑀉𑀧𑁂𑀓𑁆𑀔𑀸𑀬 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀺𑀢𑁆𑀢𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀢𑀸𑀬 𑀦𑁂𑀯 𑀫𑀦𑀸𑀧𑁄, 𑀅𑀫𑀺𑀢𑁆𑀢𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀢𑀸𑀬 𑀦 𑀅𑀫𑀦𑀸𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀼𑀢𑁆𑀢𑀫𑁂𑀯. 𑀪𑀸𑀯𑀦𑀸𑀯𑀺𑀥𑀸𑀦𑀫𑁆𑀧𑀺 𑀏𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀓𑀣𑀺𑀢𑀫𑁂𑀯𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 ¶ ¶ 𑀓𑀼𑀲𑀮𑀢𑁄𑀧𑀺 𑀯𑀺𑀧𑀸𑀓𑀢𑁄𑀧𑀺 𑀓𑀺𑀭𑀺𑀬𑀢𑁄𑀧𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀪𑀸𑀚𑀺𑀢𑀦𑀬𑁂𑀦𑁂𑀯 𑀪𑀸𑀚𑀺𑀢𑀁. 𑀅𑀢𑁆𑀣𑁄𑀧𑀺𑀲𑁆𑀲 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀫𑁂𑀢𑁆𑀢𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀲𑀩𑁆𑀩𑀸𑀧𑀺 𑀢𑀻𑀲𑀼 𑀢𑀺𑀓𑁂𑀲𑀼 𑀦𑀯𑀢𑀩𑁆𑀩𑀸𑀭𑀫𑁆𑀫𑀡𑀸 𑀏𑀯. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂𑀧𑀺 𑀮𑁄𑀓𑀺𑀬𑀸 𑀏𑀯 𑀅𑀧𑁆𑀧𑀫𑀜𑁆𑀜𑀸𑀬𑁄 𑀓𑀣𑀺𑀢𑀸, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺. 𑀢𑀬𑁄𑀧𑀺 𑀳𑀺 𑀏𑀢𑁂 𑀦𑀬𑀸 𑀮𑁄𑀓𑀺𑀬𑀢𑁆𑀢𑀸 𑀏𑀓𑀧𑀭𑀺𑀘𑁆𑀙𑁂𑀤𑀸 𑀏𑀯. 𑀏𑀯𑀫𑀬𑀁 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁦𑁩. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀧𑀤𑀸𑀦𑀺; 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀉𑀧𑀭𑀺 𑀆𑀕𑀢𑀸 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸. 𑀧𑀜𑁆𑀘𑀲𑀼 𑀧𑀦 𑀲𑀻𑀮𑀗𑁆𑀕𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀗𑁆𑀕𑀁 𑀢𑀸𑀲𑀁 𑀲𑀺𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀦𑀁 𑀧𑀤𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀧𑀸𑀡𑀸𑀢𑀺𑀧𑀸𑀢𑀸𑀢𑀺 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑀸 𑀖𑀸𑀢𑀦𑀸 𑀫𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀯𑁂𑀭𑀫𑀡𑀻𑀢𑀺 𑀯𑀺𑀭𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸𑀢𑀺 𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀸; 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀳𑀭𑀡𑀸𑀢𑀺 𑀅𑀢𑁆𑀣𑁄. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀫𑀺𑀘𑁆𑀙𑀸𑀘𑀸𑀭𑀸𑀢𑀺 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀮𑀸𑀫𑀓𑀸𑀘𑀸𑀭𑀸. 𑀫𑀼𑀲𑀸𑀯𑀸𑀤𑀸𑀢𑀺 𑀅𑀪𑀽𑀢𑀯𑀸𑀤𑀢𑁄. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸𑀢𑀺 𑀏𑀢𑁆𑀣 𑀲𑀼𑀭𑀸𑀢𑀺 𑀧𑀺𑀝𑁆𑀞𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘 𑀲𑀼𑀭𑀸. 𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘 𑀆𑀲𑀯𑀸. 𑀢𑀤𑀼𑀪𑀬𑀫𑁆𑀧𑀺 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀁. 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀧𑀺𑀯𑀦𑁆𑀢𑀺, 𑀲𑀸 𑀧𑀫𑀸𑀤𑀓𑀸𑀭𑀡𑀢𑁆𑀢𑀸 𑀧𑀫𑀸𑀤𑀝𑁆𑀞𑀸𑀦𑀁; 𑀢𑀲𑁆𑀫𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸. 𑀅𑀬𑀁 𑀢𑀸𑀯𑁂𑀢𑁆𑀣 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑀲𑁆𑀲 𑀅𑀢𑁆𑀣𑁄.

𑁭𑁦𑁪. 𑀧𑀤𑀪𑀸𑀚𑀦𑀻𑀬𑁂 𑀧𑀦 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀲𑁆𑀫𑀸 𑀧𑀦 𑀦 𑀓𑁂𑀯𑀮𑀁 𑀯𑀺𑀭𑀢𑀺𑀬𑁂𑀯 𑀲𑀺𑀓𑁆𑀔𑀸𑀧𑀤𑀁, 𑀘𑁂𑀢𑀦𑀸𑀧𑀺 𑀲𑀺𑀓𑁆𑀔𑀸𑀧𑀤𑀫𑁂𑀯, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀦𑀬𑁄 𑀤𑀲𑁆𑀲𑀺𑀢𑁄. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀏𑀢𑁂𑀬𑁂𑀯 𑀤𑁆𑀯𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸𑀧𑀤𑀁, 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀧𑀭𑁄𑀧𑀡𑁆𑀡𑀸𑀲𑀥𑀫𑁆𑀫𑀸𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀓𑁄𑀝𑁆𑀞𑀸𑀲𑀢𑁄 𑀲𑀺𑀓𑁆𑀔𑀸𑀧𑀤𑀫𑁂𑀯, 𑀢𑀲𑁆𑀫𑀸 𑀢𑀢𑀺𑀬𑀦𑀬𑁄𑀧𑀺 𑀤𑀲𑁆𑀲𑀺𑀢𑁄.

𑀢𑀢𑁆𑀣 ¶ 𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀁 𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀢𑁆𑀣 𑀯𑀺𑀭𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀁. 𑀲𑀸 𑀳𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺 ¶ 𑀧𑀸𑀴𑀺𑀬𑀁 𑀆𑀕𑀢𑀸, 𑀦𑁄 𑀘𑁂𑀢𑀦𑀸. 𑀯𑀺𑀭𑀫𑀦𑁆𑀢𑁄 𑀘 𑀢𑀸𑀬 𑀏𑀯 𑀢𑀢𑁄 𑀢𑀢𑁄 𑀯𑀺𑀭𑀫𑀢𑀺, 𑀦 𑀘𑁂𑀢𑀦𑀸𑀬. 𑀘𑁂𑀢𑀦𑀁 𑀧𑀦 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑀣𑀸 𑀲𑁂𑀲𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂. 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀳𑀺 𑀯𑁂𑀭𑀘𑁂𑀢𑀦𑀸 𑀤𑀼𑀲𑁆𑀲𑀻𑀮𑁆𑀬𑀁 𑀦𑀸𑀫. 𑀢𑀲𑁆𑀫𑀸 𑀲𑀸 𑀯𑀺𑀭𑀢𑀺𑀓𑀸𑀮𑁂𑀧𑀺 𑀲𑀼𑀲𑀻𑀮𑁆𑀬𑀯𑀲𑁂𑀦 𑀯𑀼𑀢𑁆𑀢𑀸. 𑀨𑀲𑁆𑀲𑀸𑀤𑀬𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀕𑀳𑀺𑀢𑀸𑀢𑀺.

𑀇𑀤𑀸𑀦𑀺 ¶ 𑀏𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀜𑀸𑀡𑀲𑀫𑀼𑀢𑁆𑀢𑁂𑀚𑀦𑀢𑁆𑀣𑀁 𑀇𑀫𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀥𑀫𑁆𑀫𑀢𑁄, 𑀓𑁄𑀝𑁆𑀞𑀸𑀲𑀢𑁄, 𑀆𑀭𑀫𑁆𑀫𑀡𑀢𑁄, 𑀯𑁂𑀤𑀦𑀸𑀢𑁄, 𑀫𑀽𑀮𑀢𑁄, 𑀓𑀫𑁆𑀫𑀢𑁄, 𑀲𑀸𑀯𑀚𑁆𑀚𑀢𑁄, 𑀧𑀬𑁄𑀕𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘𑀥𑀫𑁆𑀫𑀢𑁄’𑀢𑀺 𑀧𑀜𑁆𑀘𑀧𑁂𑀢𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀘𑁂𑀢𑀦𑀸𑀥𑀫𑁆𑀫𑀸𑀯 𑀳𑁄𑀦𑁆𑀢𑀺. ‘𑀓𑁄𑀝𑁆𑀞𑀸𑀲𑀢𑁄’ 𑀧𑀜𑁆𑀘𑀧𑀺 𑀓𑀫𑁆𑀫𑀧𑀣𑀸 𑀏𑀯.

‘𑀆𑀭𑀫𑁆𑀫𑀡𑀢𑁄’ 𑀧𑀸𑀡𑀸𑀢𑀺𑀧𑀸𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑁄. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀁 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸. 𑀫𑀺𑀘𑁆𑀙𑀸𑀘𑀸𑀭𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀭𑀫𑁆𑀫𑀡𑁄. 𑀫𑀼𑀲𑀸𑀯𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸. 𑀲𑀼𑀭𑀸𑀧𑀸𑀦𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁.

‘𑀯𑁂𑀤𑀦𑀸𑀢𑁄’ 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑁄. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀺𑀯𑁂𑀤𑀦𑀁. 𑀢𑀜𑁆𑀳𑀺 𑀳𑀝𑁆𑀞𑀢𑀼𑀝𑁆𑀞𑀲𑁆𑀲 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀲𑀼𑀔𑀯𑁂𑀤𑀦𑀁 𑀳𑁄𑀢𑀺, 𑀪𑀻𑀢𑀓𑀸𑀮𑁂 𑀤𑀼𑀓𑁆𑀔𑀯𑁂𑀤𑀦𑀁, 𑀫𑀚𑁆𑀛𑀢𑁆𑀢𑀲𑁆𑀲 𑀳𑀼𑀢𑁆𑀯𑀸 𑀕𑀡𑁆𑀳𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁. 𑀫𑀺𑀘𑁆𑀙𑀸𑀘𑀸𑀭𑁄 𑀲𑀼𑀔𑀯𑁂𑀤𑀦𑁄 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑁄 𑀯𑀸. 𑀫𑀼𑀲𑀸𑀯𑀸𑀤𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀢𑀺𑀯𑁂𑀤𑀦𑁄. 𑀲𑀼𑀭𑀸𑀧𑀸𑀦𑀁 𑀲𑀼𑀔𑀫𑀚𑁆𑀛𑀢𑁆𑀢𑀯𑁂𑀤𑀦𑀁.

‘𑀫𑀽𑀮𑀢𑁄’ 𑀧𑀸𑀡𑀸𑀢𑀺𑀧𑀸𑀢𑁄 𑀤𑁄𑀲𑀫𑁄𑀳𑀫𑀽𑀮𑁄. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀺𑀜𑁆𑀘𑀺𑀓𑀸𑀮𑁂 𑀮𑁄𑀪𑀫𑁄𑀳𑀫𑀽𑀮𑀁, 𑀓𑀺𑀜𑁆𑀘𑀺𑀓𑀸𑀮𑁂 𑀤𑁄𑀲𑀫𑁄𑀳𑀫𑀽𑀮𑀁. 𑀫𑀺𑀘𑁆𑀙𑀸𑀘𑀸𑀭𑁄 𑀮𑁄𑀪𑀫𑁄𑀳𑀫𑀽𑀮𑁄. 𑀫𑀼𑀲𑀸𑀯𑀸𑀤𑁄 𑀓𑀺𑀜𑁆𑀘𑀺𑀓𑀸𑀮𑁂 𑀮𑁄𑀪𑀫𑁄𑀳𑀫𑀽𑀮𑁄, 𑀓𑀺𑀜𑁆𑀘𑀺𑀓𑀸𑀮𑁂 𑀤𑁄𑀲𑀫𑁄𑀳𑀫𑀽𑀮𑁄. 𑀲𑀼𑀭𑀸𑀧𑀸𑀦𑀁 𑀮𑁄𑀪𑀫𑁄𑀳𑀫𑀽𑀮𑀁.

‘𑀓𑀫𑁆𑀫𑀢𑁄’ 𑀫𑀼𑀲𑀸𑀯𑀸𑀤𑁄 𑀘𑁂𑀢𑁆𑀣 𑀯𑀘𑀻𑀓𑀫𑁆𑀫𑀁. 𑀲𑁂𑀲𑀸 𑀓𑀸𑀬𑀓𑀫𑁆𑀫𑀫𑁂𑀯.

‘𑀲𑀸𑀯𑀚𑁆𑀚𑀢𑁄’ ¶ 𑀧𑀸𑀡𑀸𑀢𑀺𑀧𑀸𑀢𑁄 𑀅𑀢𑁆𑀣𑀺 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀢𑁆𑀣𑀺 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺. 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀫𑁂𑀯.

𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄 𑁋 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀲𑁆𑀲 𑀳𑀺 𑀯𑀥𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀢𑁄 𑀫𑀳𑀦𑁆𑀢𑀢𑀭𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑁄; 𑀲𑁄𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀢𑁄 𑀫𑀳𑀦𑁆𑀢𑀢𑀭𑀸𑀬 𑀲𑀓𑀼𑀡𑀺𑀓𑀸𑀬 𑀫𑀳𑀸𑀲𑀸𑀯𑀚𑁆𑀚𑁄; 𑀢𑀢𑁄 𑀕𑁄𑀥𑀸𑀬, 𑀢𑀢𑁄 𑀲𑀲𑀓𑀲𑁆𑀲, 𑀢𑀢𑁄 𑀫𑀺𑀕𑀲𑁆𑀲, 𑀢𑀢𑁄 𑀕𑀯𑀬𑀲𑁆𑀲, 𑀢𑀢𑁄 𑀅𑀲𑁆𑀲𑀲𑁆𑀲, 𑀢𑀢𑁄 𑀳𑀢𑁆𑀣𑀺𑀲𑁆𑀲 𑀯𑀥𑁄 𑀫𑀳𑀸𑀲𑀸𑀯𑀚𑁆𑀚𑁄, 𑀢𑀢𑁄𑀧𑀺 𑀤𑀼𑀲𑁆𑀲𑀻𑀮𑀫𑀦𑀼𑀲𑁆𑀲𑀲𑁆𑀲 ¶ , 𑀢𑀢𑁄 𑀕𑁄𑀭𑀽𑀧𑀲𑀻𑀮𑀓𑀫𑀦𑀼𑀲𑁆𑀲𑀲𑁆𑀲, 𑀢𑀢𑁄 𑀲𑀭𑀡𑀕𑀢𑀲𑁆𑀲, 𑀢𑀢𑁄 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀺𑀓𑀲𑁆𑀲, 𑀢𑀢𑁄 𑀲𑀸𑀫𑀡𑁂𑀭𑀲𑁆𑀲, 𑀢𑀢𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑁄 ¶ , 𑀢𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀢𑀢𑁄 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀢𑀢𑁄 𑀅𑀦𑀸𑀕𑀸𑀫𑀺𑀲𑁆𑀲, 𑀢𑀢𑁄 𑀔𑀻𑀡𑀸𑀲𑀯𑀲𑁆𑀲 𑀯𑀥𑁄 𑀅𑀢𑀺𑀫𑀳𑀸𑀲𑀸𑀯𑀚𑁆𑀚𑁄𑀬𑁂𑀯.

𑀅𑀤𑀺𑀦𑁆𑀦𑀸𑀤𑀸𑀦𑀁 𑀤𑀼𑀲𑁆𑀲𑀻𑀮𑀲𑁆𑀲 𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀢𑀢𑁄 𑀕𑁄𑀭𑀽𑀧𑀲𑀻𑀮𑀓𑀲𑁆𑀲 𑀲𑀦𑁆𑀢𑀓𑁂 𑀫𑀳𑀸𑀲𑀸𑀯𑀚𑁆𑀚𑀁; 𑀢𑀢𑁄 𑀲𑀭𑀡𑀕𑀢𑀲𑁆𑀲, 𑀢𑀢𑁄 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀺𑀓𑀲𑁆𑀲, 𑀢𑀢𑁄 𑀲𑀸𑀫𑀡𑁂𑀭𑀲𑁆𑀲, 𑀢𑀢𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑁄, 𑀢𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀢𑀢𑁄 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀢𑀢𑁄 𑀅𑀦𑀸𑀕𑀸𑀫𑀺𑀲𑁆𑀲 𑀲𑀦𑁆𑀢𑀓𑁂 𑀫𑀳𑀸𑀲𑀸𑀯𑀚𑁆𑀚𑀁, 𑀢𑀢𑁄 𑀔𑀻𑀡𑀸𑀲𑀯𑀲𑁆𑀲 𑀲𑀦𑁆𑀢𑀓𑁂 𑀅𑀢𑀺𑀫𑀳𑀸𑀲𑀸𑀯𑀚𑁆𑀚𑀁𑀬𑁂𑀯.

𑀫𑀺𑀘𑁆𑀙𑀸𑀘𑀸𑀭𑁄 𑀤𑀼𑀲𑁆𑀲𑀻𑀮𑀸𑀬 𑀇𑀢𑁆𑀣𑀺𑀬𑀸 𑀯𑀻𑀢𑀺𑀓𑁆𑀓𑀫𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀢𑁄 𑀕𑁄𑀭𑀽𑀧𑀲𑀻𑀮𑀓𑀸𑀬 𑀫𑀳𑀸𑀲𑀸𑀯𑀚𑁆𑀚𑁄; 𑀢𑀢𑁄 𑀲𑀭𑀡𑀕𑀢𑀸𑀬, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀺𑀓𑀸𑀬, 𑀲𑀸𑀫𑀡𑁂𑀭𑀺𑀬𑀸, 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑀺𑀬𑀸, 𑀲𑁄𑀢𑀸𑀧𑀦𑁆𑀦𑀸𑀬, 𑀲𑀓𑀤𑀸𑀕𑀸𑀫𑀺𑀦𑀺𑀬𑀸, 𑀢𑀢𑁄 𑀅𑀦𑀸𑀕𑀸𑀫𑀺𑀦𑀺𑀬𑀸 𑀯𑀻𑀢𑀺𑀓𑁆𑀓𑀫𑁂 𑀫𑀳𑀸𑀲𑀸𑀯𑀚𑁆𑀚𑁄, 𑀔𑀻𑀡𑀸𑀲𑀯𑀸𑀬 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑁄𑀯.

𑀫𑀼𑀲𑀸𑀯𑀸𑀤𑁄 𑀓𑀸𑀓𑀡𑀺𑀓𑀫𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀫𑀼𑀲𑀸𑀓𑀣𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀢𑁄 𑀅𑀟𑁆𑀠𑀫𑀸𑀲𑀓𑀲𑁆𑀲, 𑀫𑀸𑀲𑀓𑀲𑁆𑀲, 𑀧𑀜𑁆𑀘𑀫𑀸𑀲𑀓𑀲𑁆𑀲, 𑀅𑀟𑁆𑀠𑀓𑀳𑀸𑀧𑀡𑀲𑁆𑀲, 𑀓𑀳𑀸𑀧𑀡𑀲𑁆𑀲, 𑀢𑀢𑁄 𑀅𑀦𑀕𑁆𑀖𑀦𑀺𑀬𑀪𑀡𑁆𑀟𑀲𑁆𑀲 𑀅𑀢𑁆𑀣𑀸𑀬 𑀫𑀼𑀲𑀸𑀓𑀣𑀦𑁂 𑀫𑀳𑀸𑀲𑀸𑀯𑀚𑁆𑀚𑁄, 𑀫𑀼𑀲𑀸 𑀓𑀣𑁂𑀢𑁆𑀯𑀸 𑀧𑀦 𑀲𑀗𑁆𑀖𑀁 𑀪𑀺𑀦𑁆𑀤𑀦𑁆𑀢𑀲𑁆𑀲 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑁄𑀯.

𑀲𑀼𑀭𑀸𑀧𑀸𑀦𑀁 𑀧𑀲𑀢𑀫𑀢𑁆𑀢𑀲𑁆𑀲 𑀧𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀅𑀜𑁆𑀚𑀮𑀺𑀫𑀢𑁆𑀢𑀲𑁆𑀲 𑀧𑀸𑀦𑁂 𑀫𑀳𑀸𑀲𑀸𑀯𑀚𑁆𑀚𑀁; 𑀓𑀸𑀬𑀘𑀸𑀮𑀦𑀲𑀫𑀢𑁆𑀣𑀁 𑀧𑀦 𑀩𑀳𑀼𑀁 𑀧𑀺𑀯𑀺𑀢𑁆𑀯𑀸 𑀕𑀸𑀫𑀖𑀸𑀢𑀦𑀺𑀕𑀫𑀖𑀸𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑀫𑁂𑀯.

𑀧𑀸𑀡𑀸𑀢𑀺𑀧𑀸𑀢𑀜𑁆𑀳𑀺 ¶ 𑀧𑀢𑁆𑀯𑀸 𑀔𑀻𑀡𑀸𑀲𑀯𑀲𑁆𑀲 𑀯𑀥𑁄 𑀫𑀳𑀸𑀲𑀸𑀯𑀚𑁆𑀚𑁄; 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀢𑁆𑀯𑀸 𑀔𑀻𑀡𑀸𑀲𑀯𑀲𑀦𑁆𑀢𑀓𑀲𑁆𑀲 𑀳𑀭𑀡𑀁, 𑀫𑀺𑀘𑁆𑀙𑀸𑀘𑀸𑀭𑀁 𑀧𑀢𑁆𑀯𑀸 𑀔𑀻𑀡𑀸𑀲𑀯𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀻𑀢𑀺𑀓𑁆𑀓𑀫𑀦𑀁, 𑀫𑀼𑀲𑀸𑀯𑀸𑀤𑀁 𑀧𑀢𑁆𑀯𑀸 𑀫𑀼𑀲𑀸𑀯𑀸𑀤𑁂𑀦 𑀲𑀗𑁆𑀖𑀪𑁂𑀤𑁄, 𑀲𑀼𑀭𑀸𑀧𑀸𑀦𑀁 𑀧𑀢𑁆𑀯𑀸 𑀓𑀸𑀬𑀘𑀸𑀮𑀦𑀲𑀫𑀢𑁆𑀣𑀁 𑀩𑀳𑀼𑀁 𑀧𑀺𑀯𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀖𑀸𑀢𑀦𑀁 𑀫𑀳𑀸𑀲𑀸𑀯𑀚𑁆𑀚𑀁. 𑀲𑀩𑁆𑀩𑁂𑀳𑀺𑀧𑀺 𑀧𑀦𑁂𑀢𑁂𑀳𑀺 𑀫𑀼𑀲𑀸𑀯𑀸𑀤𑁂𑀦 𑀲𑀗𑁆𑀖𑀪𑁂𑀤𑀦𑀫𑁂𑀯 𑀫𑀳𑀸𑀲𑀸𑀯𑀚𑁆𑀚𑀁. 𑀢𑀜𑁆𑀳𑀺 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀸𑀘𑀦𑀲𑀫𑀢𑁆𑀣𑀁 𑀫𑀳𑀸𑀓𑀺𑀩𑁆𑀩𑀺𑀲𑀁.

‘𑀧𑀬𑁄𑀕𑀢𑁄’𑀢𑀺 ¶ 𑀧𑀸𑀡𑀸𑀢𑀺𑀧𑀸𑀢𑁄 𑀲𑀸𑀳𑀢𑁆𑀣𑀺𑀓𑁄𑀧𑀺 𑀳𑁄𑀢𑀺 𑀆𑀡𑀢𑁆𑀢𑀺𑀓𑁄𑀧𑀺. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀫𑀺𑀘𑁆𑀙𑀸𑀘𑀸𑀭𑀫𑀼𑀲𑀸𑀯𑀸𑀤𑀲𑀼𑀭𑀸𑀧𑀸𑀦𑀸𑀦𑀺 𑀲𑀸𑀳𑀢𑁆𑀣𑀺𑀓𑀸𑀦𑁂𑀯𑀸𑀢𑀺.

𑀏𑀯𑀫𑁂𑀢𑁆𑀣 ¶ 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀥𑀫𑁆𑀫𑀸𑀤𑀺𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺𑀆𑀤𑀻𑀦𑀫𑁆𑀧𑀺 𑀥𑀫𑁆𑀫𑀢𑁄, 𑀓𑁄𑀝𑁆𑀞𑀸𑀲𑀢𑁄, 𑀆𑀭𑀫𑁆𑀫𑀡𑀢𑁄, 𑀯𑁂𑀤𑀦𑀸𑀢𑁄, 𑀫𑀽𑀮𑀢𑁄, 𑀓𑀫𑁆𑀫𑀢𑁄, 𑀔𑀡𑁆𑀟𑀢𑁄, 𑀲𑀫𑀸𑀤𑀸𑀦𑀢𑁄, 𑀧𑀬𑁄𑀕𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘𑀥𑀫𑁆𑀫𑀢𑁄’𑀢𑀺 𑀧𑀭𑀺𑀬𑀸𑀬𑀲𑀻𑀮𑀯𑀲𑁂𑀦 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀘𑁂𑀢𑀦𑀸𑀥𑀫𑁆𑀫𑀸𑀯. ‘𑀓𑁄𑀝𑁆𑀞𑀸𑀲𑀢𑁄’𑀢𑀺 𑀧𑀜𑁆𑀘𑀧𑀺 𑀓𑀫𑁆𑀫𑀧𑀣𑀸 𑀏𑀯. ‘𑀆𑀭𑀫𑁆𑀫𑀡𑀢𑁄’𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑁂𑀭𑀘𑁂𑀢𑀦𑀸𑀬 𑀯𑀺𑀭𑀫𑀢𑀺. 𑀇𑀢𑀭𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀧𑀺 𑀳𑀺 𑀏𑀢𑀸 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀭𑀘𑁂𑀢𑀦𑀸𑀳𑀺𑀬𑁂𑀯 𑀯𑀺𑀭𑀫𑀦𑁆𑀢𑀺. ‘𑀯𑁂𑀤𑀦𑀸𑀢𑁄’𑀢𑀺 𑀲𑀩𑁆𑀩𑀸𑀧𑀺 𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀦𑁆𑀢𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀯𑀸. ‘𑀫𑀽𑀮𑀢𑁄’𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀅𑀮𑁄𑀪𑀅𑀤𑁄𑀲𑀅𑀫𑁄𑀳𑀫𑀽𑀮𑀸 𑀳𑁄𑀦𑁆𑀢𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀅𑀮𑁄𑀪𑀅𑀤𑁄𑀲𑀫𑀽𑀮𑀸 𑀳𑁄𑀦𑁆𑀢𑀺. ‘𑀓𑀫𑁆𑀫𑀢𑁄’𑀢𑀺 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻𑀬𑁂𑀯𑁂𑀢𑁆𑀣 𑀯𑀘𑀻𑀓𑀫𑁆𑀫𑀁; 𑀲𑁂𑀲𑀸 𑀓𑀸𑀬𑀓𑀫𑁆𑀫𑀁. ‘𑀔𑀡𑁆𑀟𑀢𑁄’𑀢𑀺 𑀕𑀳𑀝𑁆𑀞𑀸 𑀬𑀁 𑀬𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀢𑀁 𑀢𑀤𑁂𑀯 𑀔𑀡𑁆𑀟𑀁 𑀳𑁄𑀢𑀺 𑀪𑀺𑀚𑁆𑀚𑀢𑀺, 𑀅𑀯𑀲𑁂𑀲𑀁 𑀦 𑀪𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀕𑀳𑀝𑁆𑀞𑀸 𑀳𑀺 𑀅𑀦𑀺𑀩𑀤𑁆𑀥𑀲𑀻𑀮𑀸 𑀳𑁄𑀦𑁆𑀢𑀺, 𑀬𑀁 𑀬𑀁 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀢𑀤𑁂𑀯 𑀕𑁄𑀧𑁂𑀦𑁆𑀢𑀺. 𑀲𑀸𑀫𑀡𑁂𑀭𑀸𑀦𑀁 𑀧𑀦 𑀏𑀓𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁂 𑀲𑀩𑁆𑀩𑀸𑀦𑀺 𑀪𑀺𑀚𑁆𑀚𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑀸𑀦𑀺, 𑀲𑁂𑀲𑀲𑀻𑀮𑀸𑀦𑀺𑀧𑀺 𑀪𑀺𑀚𑁆𑀚𑀦𑁆𑀢𑀺𑀬𑁂𑀯. 𑀢𑁂𑀲𑀁 𑀧𑀦 𑀯𑀻𑀢𑀺𑀓𑁆𑀓𑀫𑁄 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼𑀓𑁄. ‘𑀧𑀼𑀦 𑀏𑀯𑀭𑀽𑀧𑀁 𑀦 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀤𑀡𑁆𑀟𑀓𑀫𑁆𑀫𑁂 𑀓𑀢𑁂 𑀲𑀻𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. ‘𑀲𑀫𑀸𑀤𑀸𑀦𑀢𑁄’𑀢𑀺 𑀲𑀬𑀫𑁂𑀯 ‘𑀧𑀜𑁆𑀘 𑀲𑀻𑀮𑀸𑀦𑀺 𑀅𑀥𑀺𑀝𑁆𑀞𑀳𑀸𑀫𑀻’𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑁂𑀦𑀧𑀺, 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀲𑀫𑀸𑀤𑀺𑀬𑀦𑁆𑀢𑁂𑀦𑀧𑀺 𑀲𑀫𑀸𑀤𑀺𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀸𑀫𑀻’𑀢𑀺 𑀲𑀫𑀸𑀤𑀺𑀬𑀦𑁆𑀢𑁂𑀦𑀧𑀺, 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀲𑀫𑀸𑀤𑀺𑀬𑀦𑁆𑀢𑁂𑀦𑀧𑀺 ¶ 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺. ‘𑀧𑀬𑁄𑀕𑀢𑁄’ 𑀲𑀩𑁆𑀩𑀸𑀦𑀺𑀧𑀺 𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁭𑁧𑁨. 𑀇𑀤𑀸𑀦𑀺 𑀬𑀸𑀲𑀁 𑀲𑀺𑀓𑁆𑀔𑀸𑀦𑀁 𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀇𑀫𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸𑀢𑀺 𑀅𑀬𑀁 𑀲𑀺𑀓𑁆𑀔𑀸𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 ¶ 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 ¶ 𑀲𑀺𑀓𑁆𑀔𑀸, 𑀢𑀲𑁆𑀫𑀸 𑀢𑁂 𑀤𑀲𑁆𑀲𑁂𑀢𑀼𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀦𑁆𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁧𑁪. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀢𑁆𑀣 𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀲𑁆𑀫𑀸 𑀲𑀢𑁆𑀢𑁄𑀢𑀺 𑀲𑀗𑁆𑀔𑀁 𑀕𑀢𑁂 𑀲𑀗𑁆𑀔𑀸𑀭𑁂𑀬𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀲𑁆𑀫𑀸 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀘 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀘 𑀯𑀼𑀢𑁆𑀢𑀁. 𑀬𑀢𑁄 𑀧𑀦 𑀯𑀺𑀭𑀫𑀢𑀺 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀘𑁆𑀘𑀦𑁆𑀢𑀩𑀳𑀺𑀤𑁆𑀥𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺 𑀮𑁄𑀓𑀺𑀬𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀣𑀺𑀢𑀸𑀦𑀺. 𑀉𑀪𑁄𑀧𑀺 𑀳𑀺 𑀏𑀢𑁂 𑀦𑀬𑀸 𑀮𑁄𑀓𑀺𑀬𑀢𑁆𑀢𑀸 𑀏𑀓𑀧𑀭𑀺𑀘𑁆𑀙𑁂𑀤𑀸 𑀏𑀯. 𑀏𑀯𑀫𑀬𑀁 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄 𑀤𑁆𑀯𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸

𑁭𑁧𑁮. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀘𑀢𑀲𑁆𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀧𑀪𑁂𑀤𑀸. 𑀬𑀲𑁆𑀫𑀸 𑀧𑀦 𑀧𑀭𑀢𑁄 𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺𑀆𑀤𑀺𑀫𑀸𑀳, 𑀢𑀲𑁆𑀫𑀸 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀧𑀪𑁂𑀤𑀸, 𑀜𑀸𑀡𑀲𑁆𑀲𑁂𑀯 𑀧𑀪𑁂𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 ‘‘𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀧𑀤𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀧𑁆𑀧𑀪𑁂𑀤𑀸𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀢𑁆𑀣𑁂 𑀧𑀝𑀺𑀲𑀫𑁆𑀪𑀺𑀤𑀸; 𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀸𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀳𑀺 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀸𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫. 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀸𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫. 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀸𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫.

𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸 𑀧𑀝𑀺𑀲𑀫𑁆𑀪𑀺𑀤𑀸 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀁. 𑀢𑀜𑁆𑀳𑀺 𑀳𑁂𑀢𑀼𑀯𑀲𑁂𑀦 𑀅𑀭𑀡𑀻𑀬𑀁 𑀕𑀦𑁆𑀢𑀩𑁆𑀩𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸.

𑀥𑀫𑁆𑀫𑁄𑀢𑀺 ¶ 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑁄. 𑀲𑁄 𑀳𑀺 𑀬𑀲𑁆𑀫𑀸 𑀢𑀁 𑀢𑀁 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘, 𑀢𑀲𑁆𑀫𑀸 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄, 𑀪𑀸𑀲𑀺𑀢𑀁 ¶ , 𑀓𑀼𑀲𑀮𑀁, 𑀅𑀓𑀼𑀲𑀮𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸.

𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀢𑀲𑁆𑀲𑀸 𑀅𑀪𑀺𑀮𑀸𑀧𑁂 𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 ¶ 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀏𑀯𑀫𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸 𑀦𑀸𑀫 𑀚𑀸𑀢𑀸, 𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀦𑁆𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀳𑀺 ‘‘𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, ‘‘𑀨𑀲𑁆𑀲𑀸’’𑀢𑀺 𑀯𑀸 ‘‘𑀨𑀲𑁆𑀲’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀦 ‘‘𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑀁 𑀧𑀦𑁂𑀲 𑀦𑀸𑀫𑀆𑀔𑁆𑀬𑀸𑀢𑀉𑀧𑀲𑀕𑁆𑀕𑀩𑁆𑀬𑀜𑁆𑀚𑀦𑀲𑀤𑁆𑀤𑀁 𑀚𑀸𑀦𑀸𑀢𑀺 𑀦 𑀚𑀸𑀦𑀸𑀢𑀻𑀢𑀺? 𑀬𑀤𑀕𑁆𑀕𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑀤𑀕𑁆𑀕𑁂𑀦 𑀢𑀫𑁆𑀧𑀺 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀢𑀁 𑀧𑀦 𑀦𑀬𑀺𑀤𑀁 𑀧𑀝𑀺𑀲𑀫𑁆𑀪𑀺𑀤𑀸𑀓𑀺𑀘𑁆𑀘𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀢𑁆𑀣𑀼 𑀓𑀣𑀺𑀢𑀁 𑁋

𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀩𑁄𑀥𑀺𑀫𑀡𑁆𑀟𑁂 𑀲𑀼𑀯𑀡𑁆𑀡𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀲𑀼 𑀪𑀸𑀲𑀸𑀲𑀼 ‘𑀓𑀢𑀭𑀪𑀸𑀲𑀸𑀬 𑀓𑀣𑁂𑀫𑀻’𑀢𑀺 𑀧𑀯𑀸𑀭𑁂𑀲𑀺. 𑀢𑀁 𑀧𑀦 𑀢𑁂𑀦 𑀅𑀢𑁆𑀢𑀦𑁄 𑀉𑀕𑁆𑀕𑀳𑁂 𑀞𑀢𑁆𑀯𑀸 𑀧𑀯𑀸𑀭𑀺𑀢𑀁, 𑀦 𑀧𑀝𑀺𑀲𑀫𑁆𑀪𑀺𑀤𑀸𑀬 𑀞𑀺𑀢𑁂𑀦. 𑀲𑁄 𑀳𑀺 𑀫𑀳𑀸𑀧𑀜𑁆𑀜𑀢𑀸𑀬 𑀢𑀁 𑀢𑀁 𑀪𑀸𑀲𑀁 𑀓𑀣𑀸𑀧𑁂𑀢𑁆𑀯𑀸 𑀓𑀣𑀸𑀧𑁂𑀢𑁆𑀯𑀸 𑀉𑀕𑁆𑀕𑀡𑁆𑀳𑀺; 𑀢𑀢𑁄 𑀉𑀕𑁆𑀕𑀳𑁂 𑀞𑀢𑁆𑀯𑀸 𑀏𑀯𑀁 𑀧𑀯𑀸𑀭𑁂𑀲𑀺.

𑀪𑀸𑀲𑀁 𑀦𑀸𑀫 𑀲𑀢𑁆𑀢𑀸 𑀉𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀯𑀢𑁆𑀯𑀸 𑀘 𑀧𑀦𑁂𑀢𑁆𑀣 𑀇𑀤𑀁 𑀓𑀣𑀺𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀤𑀳𑀭𑀓𑀸𑀮𑁂 𑀓𑀼𑀫𑀸𑀭𑀓𑁂 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀁 𑀢𑀁 𑀓𑀣𑀬𑀫𑀸𑀦𑀸 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺. 𑀤𑀸𑀭𑀓𑀸 𑀢𑁂𑀲𑀁 𑀢𑀁 𑀢𑀁 𑀪𑀸𑀲𑀁 𑀯𑀯𑀢𑁆𑀣𑀸𑀧𑁂𑀦𑁆𑀢𑀺 𑁋 𑀇𑀫𑀺𑀦𑀸 𑀇𑀤𑀁 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀩𑁆𑀩𑀫𑁆𑀧𑀺 𑀪𑀸𑀲𑀁 𑀚𑀸𑀦𑀦𑁆𑀢𑀺. 𑀫𑀸𑀢𑀸 𑀤𑀫𑀺𑀴𑀻, 𑀧𑀺𑀢𑀸 𑀅𑀦𑁆𑀥𑀓𑁄. 𑀢𑁂𑀲𑀁 𑀚𑀸𑀢𑁄 𑀤𑀸𑀭𑀓𑁄 𑀲𑀘𑁂 𑀫𑀸𑀢𑀼𑀓𑀣𑀁 𑀧𑀞𑀫𑀁 𑀲𑀼𑀡𑀸𑀢𑀺, 𑀤𑀫𑀺𑀴𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺; 𑀲𑀘𑁂 𑀧𑀺𑀢𑀼𑀓𑀣𑀁 𑀧𑀞𑀫𑀁 𑀲𑀼𑀡𑀸𑀢𑀺, 𑀅𑀦𑁆𑀥𑀓𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀓𑀣𑀁 𑀅𑀲𑁆𑀲𑀼𑀡𑀦𑁆𑀢𑁄 𑀫𑀸𑀕𑀥𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺.

𑀬𑁄𑀧𑀺 ¶ 𑀅𑀕𑀸𑀫𑀓𑁂 𑀫𑀳𑀸𑀭𑀜𑁆𑀜𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀅𑀜𑁆𑀜𑁄 𑀓𑀣𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑁄𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀯𑀘𑀦𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀫𑀸𑀕𑀥𑀪𑀸𑀲𑀫𑁂𑀯 ¶ 𑀪𑀸𑀲𑀺𑀲𑁆𑀲𑀢𑀺. 𑀦𑀺𑀭𑀬𑁂, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀧𑁂𑀢𑁆𑀢𑀺𑀯𑀺𑀲𑀬𑁂, 𑀫𑀦𑀼𑀲𑁆𑀲𑀮𑁄𑀓𑁂, 𑀤𑁂𑀯𑀮𑁄𑀓𑁂𑀢𑀺 𑀲𑀩𑁆𑀩𑀢𑁆𑀣 𑀫𑀸𑀕𑀥𑀪𑀸𑀲𑀸𑀯 𑀉𑀲𑁆𑀲𑀦𑁆𑀦𑀸. 𑀢𑀢𑁆𑀣 𑀲𑁂𑀲𑀸 𑀑𑀝𑁆𑀝𑀓𑀺𑀭𑀸𑀢𑀅𑀦𑁆𑀥𑀓𑀬𑁄𑀦𑀓𑀤𑀫𑀺𑀴𑀪𑀸𑀲𑀸𑀤𑀺𑀓𑀸 𑀅𑀝𑁆𑀞𑀸𑀭𑀲 𑀪𑀸𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 ¶ . 𑀅𑀬𑀫𑁂𑀯𑁂𑀓𑀸 𑀬𑀣𑀸𑀪𑀼𑀘𑁆𑀘𑀩𑁆𑀭𑀳𑁆𑀫𑀯𑁄𑀳𑀸𑀭𑀅𑀭𑀺𑀬𑀯𑁄𑀳𑀸𑀭𑀲𑀗𑁆𑀔𑀸𑀢𑀸 𑀫𑀸𑀕𑀥𑀪𑀸𑀲𑀸 𑀦 𑀧𑀭𑀺𑀯𑀢𑁆𑀢𑀢𑀺. 𑀲𑀫𑁆𑀫𑀸𑀲𑀩𑀼𑀤𑁆𑀥𑁄𑀧𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀢𑀦𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑀫𑀸𑀕𑀥𑀪𑀸𑀲𑀸𑀬 𑀏𑀯 𑀆𑀭𑁄𑀧𑁂𑀲𑀺. 𑀓𑀲𑁆𑀫𑀸? 𑀏𑀯𑀜𑁆𑀳𑀺 𑀅𑀢𑁆𑀣𑀁 𑀆𑀳𑀭𑀺𑀢𑀼𑀁 𑀲𑀼𑀔𑀁 𑀳𑁄𑀢𑀺. 𑀫𑀸𑀕𑀥𑀪𑀸𑀲𑀸𑀬 𑀳𑀺 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀲𑁄𑀢𑀧𑀣𑀸𑀕𑀫𑀦𑀫𑁂𑀯 𑀧𑀧𑀜𑁆𑀘𑁄; 𑀲𑁄𑀢𑁂 𑀧𑀦 𑀲𑀗𑁆𑀖𑀝𑁆𑀝𑀺𑀢𑀫𑀢𑁆𑀢𑁂𑀬𑁂𑀯 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀺. 𑀅𑀜𑁆𑀜𑀸𑀬 𑀧𑀦 𑀪𑀸𑀲𑀸𑀬 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀁 𑀧𑁄𑀣𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑀩𑁆𑀩𑀁 𑀳𑁄𑀢𑀺. 𑀩𑀳𑀼𑀫𑁆𑀧𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀦 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀅𑀭𑀺𑀬𑀲𑀸𑀯𑀓𑁄 𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁄 𑀦𑀸𑀫 𑀦𑀢𑁆𑀣𑀺.

𑀜𑀸𑀡𑁂𑀲𑀼 𑀜𑀸𑀡𑀦𑁆𑀢𑀺 𑀲𑀩𑁆𑀩𑀢𑁆𑀣𑀓𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺. 𑀇𑀫𑀸 𑀧𑀦 𑀘𑀢𑀲𑁆𑀲𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘. 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑁄𑀝𑁆𑀞𑀺𑀢𑀢𑁆𑀣𑁂𑀭𑀲𑁆𑀲𑀸𑀢𑀺 𑀅𑀲𑀻𑀢𑀺𑀬𑀸𑀧𑀺 𑀫𑀳𑀸𑀣𑁂𑀭𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀁 𑀕𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀥𑀫𑁆𑀫𑀺𑀓𑀲𑁆𑀲 𑀉𑀧𑀸𑀲𑀓𑀲𑁆𑀲 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀦𑁄 𑀔𑀼𑀚𑁆𑀚𑀼𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬𑀸𑀢𑀺 𑀏𑀯𑀫𑀸𑀤𑀻𑀦𑀁 𑀧𑀝𑀺𑀲𑀫𑁆𑀪𑀺𑀤𑀸 𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀁 𑀕𑀢𑀸𑀢𑀺 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺.

𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺? 𑀅𑀥𑀺𑀕𑀫𑁂𑀦, 𑀧𑀭𑀺𑀬𑀢𑁆𑀢𑀺𑀬𑀸, 𑀲𑀯𑀦𑁂𑀦, 𑀧𑀭𑀺𑀧𑀼𑀘𑁆𑀙𑀸𑀬, 𑀧𑀼𑀩𑁆𑀩𑀬𑁄𑀕𑁂𑀦𑀸𑀢𑀺. 𑀢𑀢𑁆𑀣 ‘𑀅𑀥𑀺𑀕𑀫𑁄’ 𑀦𑀸𑀫 𑀅𑀭𑀳𑀢𑁆𑀢𑀁. 𑀢𑀜𑁆𑀳𑀺 𑀧𑀢𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. ‘𑀧𑀭𑀺𑀬𑀢𑁆𑀢𑀺’ 𑀦𑀸𑀫 𑀩𑀼𑀤𑁆𑀥𑀯𑀘𑀦𑀁. 𑀢𑀜𑁆𑀳𑀺 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. ‘𑀲𑀯𑀦𑀁’ 𑀦𑀸𑀫 𑀥𑀫𑁆𑀫𑀲𑁆𑀲𑀯𑀦𑀁. 𑀲𑀓𑁆𑀓𑀘𑁆𑀘𑀜𑁆𑀳𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 ¶ 𑀯𑀺𑀲𑀤𑀸 𑀳𑁄𑀦𑁆𑀢𑀺. ‘𑀧𑀭𑀺𑀧𑀼𑀘𑁆𑀙𑀸’ 𑀦𑀸𑀫 𑀅𑀝𑁆𑀞𑀓𑀣𑀸. 𑀉𑀕𑁆𑀕𑀳𑀺𑀢𑀧𑀸𑀴𑀺𑀬𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. ‘𑀧𑀼𑀩𑁆𑀩𑀬𑁄𑀕𑁄’ 𑀦𑀸𑀫 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀢𑀸, 𑀅𑀢𑀻𑀢𑀪𑀯𑁂 𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀢𑀸; 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀲𑁆𑀲 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺 ¶ . 𑀢𑀢𑁆𑀣 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀼𑀦𑀩𑁆𑀩𑀲𑀼𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀲𑁆𑀲 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀅𑀳𑁂𑀲𑀼𑀁. 𑀲𑁄 𑀓𑀺𑀭 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 ¶ 𑀦𑀸𑀯𑀁 𑀅𑀪𑀺𑀭𑀼𑀳𑀦𑀢𑀺𑀢𑁆𑀣𑁂 𑀏𑀓𑀲𑁆𑀫𑀺𑀁 𑀧𑀤𑁂 𑀉𑀧𑁆𑀧𑀦𑁆𑀦𑀓𑀗𑁆𑀔𑁄 𑀬𑁄𑀚𑀦𑀲𑀢𑀫𑀕𑁆𑀕𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄 𑀧𑀲𑀻𑀤𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀓𑀫𑁆𑀩𑀮𑀁 𑀅𑀤𑀸𑀲𑀺. 𑀲𑁄𑀧𑀺 𑀢𑀁 𑀆𑀳𑀭𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀯𑀸𑀲𑀺𑀬𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑁂 𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀲𑀺. 𑀓𑀺𑀫𑀢𑁆𑀣𑀸𑀬𑀸𑀢𑀺? 𑀧𑀘𑁆𑀙𑀺𑀫𑀸𑀬 𑀚𑀦𑀢𑀸𑀬 𑀅𑀦𑀼𑀕𑁆𑀕𑀳𑀢𑁆𑀣𑀸𑀬𑀸𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀕𑀢𑀫𑀕𑁆𑀕𑀁 𑀆𑀯𑀚𑁆𑀚𑁂𑀢𑁆𑀯𑀸 𑀅𑀦𑀸𑀕𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀑𑀭𑀼𑀬𑁆𑀳 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀦𑀯𑁂𑀮𑀸𑀬 𑀯𑀸𑀮𑀺𑀓𑀯𑀺𑀳𑀸𑀭𑀁 𑀧𑀢𑁆𑀯𑀸 𑀲𑀫𑁆𑀫𑀚𑁆𑀚𑀺. 𑀢𑀲𑁆𑀲 𑀲𑀫𑁆𑀫𑀚𑁆𑀚𑀺𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘𑀇𑀤𑀁 𑀯𑀻𑀢𑀭𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑁆𑀫𑀝𑁆𑀞𑀝𑁆𑀞𑀸𑀦’𑀦𑁆𑀢𑀺 𑀣𑁂𑀭𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀢𑀸𑀬 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂 𑀓𑀣𑁂𑀲𑀻𑀢𑀺.

𑀧𑀭𑀺𑀬𑀢𑁆𑀢𑀺𑀬𑀸 𑀧𑀦 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀘𑁂𑀯 𑀦𑀸𑀕𑀲𑁂𑀦𑀢𑁆𑀣𑁂𑀭𑀲𑁆𑀲 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀅𑀳𑁂𑀲𑀼𑀁. 𑀲𑀓𑁆𑀓𑀘𑁆𑀘𑀥𑀫𑁆𑀫𑀲𑀯𑀦𑁂𑀦 𑀲𑀼𑀥𑀫𑁆𑀫𑀲𑀸𑀫𑀡𑁂𑀭𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀅𑀳𑁂𑀲𑀼𑀁. 𑀲𑁄 𑀓𑀺𑀭 𑀢𑀮𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀫𑀸𑀢𑀼𑀮𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀦𑁆𑀢𑁄𑀬𑁂𑀯 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀧𑀕𑀼𑀡𑀸𑀦𑀺 𑀅𑀓𑀸𑀲𑀺. 𑀉𑀕𑁆𑀕𑀳𑀺𑀢𑀧𑀸𑀴𑀺𑀬𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲 𑀧𑀦 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀏𑀯 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀅𑀳𑁂𑀲𑀼𑀁. 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀬𑀸𑀯 𑀅𑀦𑀼𑀮𑁄𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 ¶ 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀆𑀕𑀢𑀸𑀦𑀁 𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺.

𑀏𑀢𑁂𑀲𑀼 𑀧𑀦 𑀓𑀸𑀭𑀡𑁂𑀲𑀼 𑀧𑀭𑀺𑀬𑀢𑁆𑀢𑀺, 𑀲𑀯𑀦𑀁, 𑀧𑀭𑀺𑀧𑀼𑀘𑁆𑀙𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀪𑁂𑀤𑀲𑁆𑀲𑁂𑀯 𑀩𑀮𑀯𑀓𑀸𑀭𑀡𑀸𑀦𑀺. 𑀧𑀼𑀩𑁆𑀩𑀬𑁄𑀕𑁄 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑁄, 𑀧𑀪𑁂𑀤𑀲𑁆𑀲 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀳𑁄𑀢𑀺, 𑀦 𑀧𑀦 𑀢𑀣𑀸. 𑀧𑀭𑀺𑀬𑀢𑁆𑀢𑀺𑀲𑀯𑀦𑀧𑀭𑀺𑀧𑀼𑀘𑁆𑀙𑀸 𑀳𑀺 𑀧𑀼𑀩𑁆𑀩𑁂 𑀳𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀧𑀼𑀩𑁆𑀩𑀬𑁄𑀕𑁂𑀦 𑀧𑀼𑀩𑁆𑀩𑁂 𑀘𑁂𑀯 𑀏𑀢𑀭𑀳𑀺 𑀘 𑀲𑀗𑁆𑀔𑀸𑀭𑀲𑀫𑁆𑀫𑀲𑀦𑀁 𑀯𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫 𑀦𑀢𑁆𑀣𑀺. 𑀇𑀫𑁂 𑀧𑀦 𑀤𑁆𑀯𑁂𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀯𑀺𑀲𑀤𑀸 𑀓𑀭𑁄𑀦𑁆𑀢𑀻𑀢𑀺.

𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸.

𑁨. 𑀲𑀘𑁆𑀘𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁭𑁧𑁯. 𑀇𑀤𑀸𑀦𑀺 ¶ ¶ 𑀬𑁂 𑀲𑀗𑁆𑀕𑀳𑀯𑀸𑀭𑁂 𑀧𑀜𑁆𑀘 𑀅𑀢𑁆𑀣𑀸 𑀘 𑀥𑀫𑁆𑀫𑀸 𑀘 𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀧𑀪𑁂𑀤𑀤𑀲𑁆𑀲𑀦𑀦𑀬𑁂𑀦 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀢𑀲𑁆𑀲𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀪𑁂𑀤𑀯𑀸𑀭𑁄 𑀆𑀭𑀤𑁆𑀥𑁄. 𑀲𑁄 𑀲𑀘𑁆𑀘𑀯𑀸𑀭𑀳𑁂𑀢𑀼𑀯𑀸𑀭𑀥𑀫𑁆𑀫𑀯𑀸𑀭𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑀧𑀭𑀺𑀬𑀢𑁆𑀢𑀺𑀯𑀸𑀭𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀢𑀢𑁆𑀣 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀘𑁆𑀘𑀬𑁂𑀦 𑀧𑀢𑁆𑀢𑀩𑁆𑀩𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀢𑁆𑀣𑀪𑀸𑀯𑀁, 𑀨𑀮𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀲𑀫𑀼𑀤𑀬𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀥𑀫𑁆𑀫𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘𑀲𑀘𑁆𑀘𑀯𑀸𑀭𑁄’ 𑀯𑀼𑀢𑁆𑀢𑁄. 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀦 𑀳𑁂𑀢𑀼𑀨𑀮𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀳𑁂𑀢𑀼𑀦𑁄 𑀥𑀫𑁆𑀫𑀪𑀸𑀯𑀁, 𑀳𑁂𑀢𑀼𑀨𑀮𑀲𑁆𑀲 𑀘 𑀅𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀳𑁂𑀢𑀼𑀯𑀸𑀭𑁄’ 𑀯𑀼𑀢𑁆𑀢𑁄. 𑀢𑀢𑁆𑀣 𑀘 𑀳𑁂𑀢𑀼𑀨𑀮𑀓𑁆𑀓𑀫𑀯𑀲𑁂𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀬𑁂 𑀧𑀦 𑀥𑀫𑁆𑀫𑀸 𑀢𑀫𑁆𑀳𑀸 𑀢𑀫𑁆𑀳𑀸 𑀭𑀽𑀧𑀸𑀭𑀽𑀧𑀧𑁆𑀧𑀪𑁂𑀤𑀸 𑀳𑁂𑀢𑀼𑀢𑁄 𑀚𑀸𑀢𑀸, 𑀢𑁂𑀲𑀁 𑀅𑀢𑁆𑀣𑀪𑀸𑀯𑀁, 𑀢𑀲𑁆𑀲 𑀢𑀲𑁆𑀲 𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀳𑁂𑀢𑀼𑀦𑁄 𑀥𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀥𑀫𑁆𑀫𑀯𑀸𑀭𑁄’ 𑀯𑀼𑀢𑁆𑀢𑁄. 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀦 𑀅𑀢𑁆𑀣𑀪𑀸𑀯𑀁, 𑀚𑀭𑀸𑀫𑀭𑀡𑀸𑀤𑀺𑀲𑀫𑀼𑀤𑀬𑀲𑀗𑁆𑀔𑀸𑀢𑀸𑀦𑀁 𑀚𑀸𑀢𑀺𑀆𑀤𑀻𑀦𑀜𑁆𑀘 𑀥𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁄’ 𑀯𑀼𑀢𑁆𑀢𑁄. 𑀢𑀢𑁄 𑀧𑀭𑀺𑀬𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀥𑀫𑁆𑀫𑀪𑀸𑀯𑀁, 𑀪𑀸𑀲𑀺𑀢𑀲𑀗𑁆𑀔𑀸𑀢𑁂𑀦 𑀧𑀘𑁆𑀘𑀬𑁂𑀦 𑀧𑀢𑁆𑀢𑀩𑁆𑀩𑀲𑁆𑀲 𑀪𑀸𑀲𑀺𑀢𑀢𑁆𑀣𑀲𑁆𑀲 𑀘 𑀅𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀧𑀭𑀺𑀬𑀢𑁆𑀢𑀺𑀯𑀸𑀭𑁄’ 𑀯𑀼𑀢𑁆𑀢𑁄.

𑀢𑀢𑁆𑀣 𑀘 𑀬𑀲𑁆𑀫𑀸 𑀪𑀸𑀲𑀺𑀢𑀁 𑀜𑀢𑁆𑀯𑀸 𑀢𑀲𑁆𑀲𑀢𑁆𑀣𑁄 𑀜𑀸𑀬𑀢𑀺, 𑀢𑀲𑁆𑀫𑀸 𑀪𑀸𑀲𑀺𑀢𑀪𑀸𑀲𑀺𑀢𑀢𑁆𑀣𑀓𑁆𑀓𑀫𑁂𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀢𑀢𑁆𑀣 𑀓𑀢𑀫𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀧𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑁄 ¶ 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺𑀆𑀤𑀻𑀳𑀺 𑀦𑀯𑀳𑀺 𑀅𑀗𑁆𑀕𑁂𑀳𑀺 𑀦𑀺𑀧𑁆𑀧𑀤𑁂𑀲𑀢𑁄 𑀢𑀦𑁆𑀢𑀺 𑀕𑀳𑀺𑀢𑀸. 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀪𑀸𑀲𑀺𑀢𑀯𑀲𑁂𑀦 𑀦𑀺𑀧𑁆𑀧𑀤𑁂𑀲𑀢𑁄 𑀢𑀦𑁆𑀢𑀺 𑀏𑀯 𑀕𑀳𑀺𑀢𑀸𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁨𑁫. 𑀢𑀢𑁆𑀣 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀸. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 ¶ . 𑀲𑀸 𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀫𑀕𑁆𑀕𑀨𑀮𑀜𑀸𑀡𑀸𑀦𑀁 𑀯𑀲𑁂𑀦 ¶ 𑀮𑁄𑀓𑀼𑀢𑁆𑀢𑀭𑀸𑀧𑀺 𑀳𑁄𑀢𑀺. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀬𑀢𑁆𑀢𑀓𑀸𑀦𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑁧 𑀆𑀤𑀬𑁄) 𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀯𑀲𑁂𑀦 𑀏𑀓𑁂𑀓𑀲𑁆𑀫𑀺𑀁 𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁂 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀧𑀸𑀓𑀓𑀺𑀭𑀺𑀬𑀯𑀸𑀭𑁂𑀲𑀼 𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀅𑀢𑁆𑀣𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀁 𑀙𑀟𑁆𑀟𑁂𑀢𑁆𑀯𑀸, 𑀏𑀓𑁂𑀓𑀲𑁆𑀫𑀺𑀁 𑀯𑀺𑀧𑀸𑀓𑀘𑀺𑀢𑁆𑀢𑁂 𑀘 𑀓𑀺𑀭𑀺𑀬𑀘𑀺𑀢𑁆𑀢𑁂 𑀘 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄𑀯 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀪𑀢𑁆𑀢𑀸. 𑀧𑀸𑀴𑀺 𑀧𑀦 𑀫𑀼𑀔𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸. 𑀲𑀸 𑀳𑁂𑀝𑁆𑀞𑀸 𑀆𑀕𑀢𑀯𑀺𑀢𑁆𑀣𑀸𑀭𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦 𑀬𑀣𑀸 𑀓𑀼𑀲𑀮𑀸𑀓𑀼𑀲𑀮𑀯𑀸𑀭𑁂𑀲𑀼 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀬𑁂𑀲𑀁 𑀥𑀫𑁆𑀫𑀸𑀦𑀁 𑀇𑀫𑁂 𑀯𑀺𑀧𑀸𑀓𑀸, 𑀢𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁, ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀅𑀬𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀺 𑀇𑀥 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺? 𑀦𑁄 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀳𑁂𑀝𑁆𑀞𑀸 𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀯𑀼𑀢𑁆𑀢𑀢𑁆𑀢𑀸. 𑀓𑀺𑀭𑀺𑀬𑀯𑀸𑀭𑁂 𑀘 ‘‘𑀬𑁂𑀲𑀁 𑀥𑀫𑁆𑀫𑀸𑀦𑀁 𑀇𑀫𑁂 𑀓𑀺𑀭𑀺𑀬𑀸’’𑀢𑀺 𑀯𑀘𑀦𑀫𑁂𑀯 𑀦 𑀬𑀼𑀚𑁆𑀚𑀢𑀻𑀢𑀺 𑀤𑁆𑀯𑀻𑀲𑀼𑀧𑀺 𑀇𑀫𑁂𑀲𑀼 𑀯𑀸𑀭𑁂𑀲𑀼 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄𑀯 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀪𑀢𑁆𑀢𑀸.

𑀢𑀢𑁆𑀣 𑀬𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀢𑁆𑀢𑀺 𑀳𑁄𑀢𑀻𑀢𑀺 𑀬𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀢𑁂𑀲𑀁 𑀨𑀲𑁆𑀲𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 ‘‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸’’𑀢𑀺 𑀏𑀯𑀁 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀢𑀢𑁆𑀣 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀥𑀫𑁆𑀫𑁂 𑀘 𑀧𑀯𑀢𑁆𑀢𑀫𑀸𑀦𑀸𑀬 𑀢𑀲𑁆𑀲𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑁂 𑀜𑀸𑀡𑀁. 𑀅𑀪𑀺𑀮𑀸𑀧𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀜𑀸𑀡𑀫𑁂𑀯 𑀇𑀥𑀸𑀧𑀺 𑀓𑀣𑀺𑀢𑀁. 𑀬𑁂𑀦 𑀜𑀸𑀡𑁂𑀦𑀸𑀢𑀺 𑀬𑁂𑀦 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂𑀦. 𑀢𑀸𑀦𑀺 ¶ 𑀜𑀸𑀡𑀸𑀦𑀺 𑀚𑀸𑀦𑀸𑀢𑀻𑀢𑀺 𑀇𑀢𑀭𑀸𑀦𑀺 𑀢𑀻𑀡𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺 𑀚𑀸𑀦𑀸𑀢𑀺.

𑀇𑀤𑀸𑀦𑀺 𑀬𑀣𑀸 𑀬𑀁 𑀜𑀸𑀡𑀁 𑀢𑀸𑀦𑀺 𑀜𑀸𑀡𑀸𑀦𑀺 𑀚𑀸𑀦𑀸𑀢𑀺, 𑀢𑀣𑀸 𑀢𑀲𑁆𑀲 𑀢𑁂𑀲𑀼 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀚𑁄𑀢𑀓𑀸𑀦𑀺 𑀧𑀓𑀸𑀲𑀓𑀸𑀦𑀺; 𑀇𑀫𑀁 𑀦𑀸𑀫 𑀅𑀢𑁆𑀣𑀁 𑀚𑁄𑀢𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀜𑀸𑀡𑁂𑀲𑀼 𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀧𑀯𑀢𑁆𑀢𑀁 𑀢𑀻𑀲𑀼 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫.

𑀢𑀢𑁆𑀣 ¶ ¶ 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 ‘𑀇𑀫𑀺𑀲𑁆𑀲𑀸 𑀇𑀤𑀁 𑀓𑀺𑀘𑁆𑀘𑀁, 𑀇𑀫𑀺𑀲𑁆𑀲𑀸 𑀇𑀤𑀁 𑀓𑀺𑀘𑁆𑀘’𑀦𑁆𑀢𑀺 𑀇𑀢𑀭𑀸𑀲𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀓𑀺𑀘𑁆𑀘𑀁 𑀚𑀸𑀦𑀸𑀢𑀺, 𑀲𑀬𑀁 𑀧𑀦 𑀢𑀸𑀲𑀁 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀳𑀼𑀲𑁆𑀲𑀼𑀢𑀥𑀫𑁆𑀫𑀓𑀣𑀺𑀓𑁄 𑀯𑀺𑀬 𑀅𑀧𑁆𑀧𑀲𑁆𑀲𑀼𑀢𑀥𑀫𑁆𑀫𑀓𑀣𑀺𑀓𑀲𑁆𑀲. 𑀤𑁆𑀯𑁂 𑀓𑀺𑀭 𑀪𑀺𑀓𑁆𑀔𑀽. 𑀏𑀓𑁄 𑀩𑀳𑀼𑀲𑁆𑀲𑀼𑀢𑁄, 𑀏𑀓𑁄 𑀅𑀧𑁆𑀧𑀲𑁆𑀲𑀼𑀢𑁄. 𑀢𑁂 𑀏𑀓𑀢𑁄𑀯 𑀏𑀓𑀁 𑀥𑀫𑁆𑀫𑀓𑀣𑀸𑀫𑀕𑁆𑀕𑀁 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣 𑀅𑀧𑁆𑀧𑀲𑁆𑀲𑀼𑀢𑁄 𑀲𑀭𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀇𑀢𑀭𑁄 𑀫𑀦𑁆𑀤𑀲𑁆𑀲𑀭𑁄. 𑀢𑁂𑀲𑀼 𑀅𑀧𑁆𑀧𑀲𑁆𑀲𑀼𑀢𑁄 𑀕𑀢𑀕𑀢𑀝𑁆𑀞𑀸𑀦𑁂 𑀅𑀢𑁆𑀢𑀦𑁄 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑀮𑀧𑀭𑀺𑀲𑀁 𑀔𑁄𑀪𑁂𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑀺. 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀳𑀝𑁆𑀞𑀢𑀼𑀝𑁆𑀞𑀫𑀸𑀦𑀲𑀸 𑀳𑀼𑀢𑁆𑀯𑀸 𑁋 ‘𑀬𑀣𑀸 𑀏𑀲 𑀥𑀫𑁆𑀫𑀁 𑀓𑀣𑁂𑀲𑀺, 𑀏𑀓𑁄 𑀢𑀺𑀧𑀺𑀝𑀓𑀥𑀭𑁄 𑀫𑀜𑁆𑀜𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀯𑀤𑀦𑁆𑀢𑀺. 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀼 𑀧𑀦 𑁋 ‘𑀥𑀫𑁆𑀫𑀲𑀯𑀦𑁂 𑀚𑀸𑀦𑀺𑀲𑁆𑀲𑀣 𑀅𑀬𑀁 𑀢𑀺𑀧𑀺𑀝𑀓𑀥𑀭𑁄 𑀯𑀸 𑀦𑁄 𑀯𑀸’𑀢𑀺 𑀆𑀳. 𑀲𑁄 𑀓𑀺𑀜𑁆𑀘𑀸𑀧𑀺 𑀏𑀯𑀫𑀸𑀳, 𑀬𑀣𑀸 𑀧𑀦 𑀲𑀓𑀮𑀧𑀭𑀺𑀲𑀁 𑀔𑁄𑀪𑁂𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑀲𑁆𑀲 𑀓𑀣𑀦𑀲𑀫𑀢𑁆𑀣𑀢𑀸 𑀦𑀢𑁆𑀣𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸, 𑀩𑀳𑀼𑀲𑁆𑀲𑀼𑀢𑁄 𑀯𑀺𑀬 𑀅𑀧𑁆𑀧𑀲𑁆𑀲𑀼𑀢𑀲𑁆𑀲, 𑀇𑀢𑀭𑀸𑀲𑀁 𑀓𑀺𑀘𑁆𑀘𑀁 𑀚𑀸𑀦𑀸𑀢𑀺, 𑀲𑀬𑀁 𑀧𑀦 𑀢𑀁 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭𑁪𑁬. 𑀏𑀯𑀁 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑀸𑀲𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺 𑀇𑀤𑀁 𑀲𑁂𑀓𑁆𑀔𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺𑀧𑀺 𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀧𑀜𑁆𑀘𑀧𑁆𑀧𑀓𑀸𑀭𑀁 𑀥𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀦𑀺𑀭𑀼𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸; 𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 ¶ 𑀲𑀩𑁆𑀩𑀢𑁆𑀣𑀓𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺.

𑀓𑀺𑀭𑀺𑀬𑀢𑁄 𑀘𑀢𑀽𑀲𑀽𑀢𑀺 𑀇𑀤𑀁 𑀧𑀦 𑀅𑀲𑁂𑀓𑁆𑀔𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀧𑀜𑁆𑀘𑀧𑁆𑀧𑀓𑀸𑀭𑀁 𑀥𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀦𑀺𑀭𑀼𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸; 𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀲𑀩𑁆𑀩𑀢𑁆𑀣𑀓𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺.

𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀏𑀢𑁂𑀲𑀼 𑀘𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀧𑀦 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑁂𑀓𑁆𑀔𑀸𑀦𑀁 𑀅𑀢𑁆𑀣𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀅𑀢𑁆𑀣𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀅𑀬𑀁 ¶ 𑀉𑀧𑁆𑀧𑀚𑁆𑀚𑀢𑀺, 𑀫𑀕𑁆𑀕𑀨𑀮𑀓𑀸𑀮𑁂 𑀘 𑀫𑀕𑁆𑀕𑀨𑀮𑁂𑀲𑀼. 𑀅𑀲𑁂𑀓𑁆𑀔𑀲𑁆𑀲 𑀧𑀦 𑀅𑀢𑁆𑀣𑀁 ¶ 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑀫𑁂𑀯 𑀅𑀢𑁆𑀣𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀨𑀮𑀓𑀸𑀮𑁂 𑀘 𑀉𑀧𑀭𑀺𑀫𑁂 𑀲𑀸𑀫𑀜𑁆𑀜𑀨𑀮𑁂𑀢𑀺. 𑀏𑀯𑀫𑁂𑀢𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀸𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁪𑁭. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀧𑀦 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀓𑀺𑀭𑀺𑀬𑀲𑀗𑁆𑀔𑀸𑀢𑀜𑁆𑀘𑁂𑀯 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸; 𑀯𑀼𑀢𑁆𑀢𑀧𑁆𑀧𑀪𑁂𑀤𑀫𑁂𑀯 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸; 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀢𑁆𑀣𑀜𑁆𑀘𑁂𑀯 𑀧𑀭𑀫𑀢𑁆𑀣𑀜𑁆𑀘 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀥𑀫𑁆𑀫𑀁 𑀅𑀓𑀼𑀲𑀮𑀥𑀫𑁆𑀫𑀁 𑀧𑀘𑁆𑀘𑀬𑀥𑀫𑁆𑀫𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸; 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀥𑀫𑁆𑀫𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 ¶ ; 𑀮𑁄𑀓𑀼𑀢𑁆𑀢𑀭𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀥𑀫𑁆𑀫𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀜𑀸𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸; 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀜𑀸𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀺 𑀯𑀺𑀚𑀸𑀦𑀦𑁆𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸; 𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀜𑀸𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸.

𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀲𑀳𑀚𑀸𑀢𑀳𑁂𑀢𑀼𑀯𑀲𑁂𑀦 𑀲𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀯𑀻𑀭𑀺𑀬𑀚𑁂𑀝𑁆𑀞𑀺𑀓𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺, 𑀙𑀦𑁆𑀤𑀘𑀺𑀢𑁆𑀢𑀚𑁂𑀝𑁆𑀞𑀺𑀓𑀸𑀬 𑀦𑀯𑀢𑁆𑀢𑀩𑁆𑀩𑀸, 𑀨𑀮𑀓𑀸𑀮𑁂𑀧𑀺 𑀦𑀯𑀢𑁆𑀢𑀩𑁆𑀩𑀸 𑀏𑀯. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀫𑀕𑁆𑀕𑀸𑀥𑀺𑀧𑀢𑀺. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀫𑀕𑁆𑀕𑀸𑀥𑀺𑀧𑀢𑀺, 𑀲𑁂𑀲𑀜𑀸𑀡𑀁 𑀧𑀜𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 ¶ ¶ . 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸.

𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀢𑀻𑀢𑀁 𑀯𑀺𑀧𑀸𑀓𑀢𑁆𑀣𑀁 𑀓𑀺𑀭𑀺𑀬𑀢𑁆𑀣𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀦𑀸𑀕𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀮𑁄𑀓𑀼𑀢𑁆𑀢𑀭𑀁 𑀧𑀭𑀫𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀢𑀻𑀢𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀧𑀘𑁆𑀘𑀬𑀥𑀫𑁆𑀫𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀦𑀸𑀕𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀢𑀻𑀢𑀁 𑀓𑀼𑀲𑀮𑀜𑀸𑀡𑀁 𑀯𑀺𑀧𑀸𑀓𑀜𑀸𑀡𑀁 𑀓𑀺𑀭𑀺𑀬𑀜𑀸𑀡𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀦𑀸𑀕𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸.

𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀇𑀢𑀭𑀸𑀲𑀼 𑀢𑀻𑀲𑀼 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀚𑁆𑀛𑀢𑁆𑀢𑀁 𑀯𑀺𑀧𑀸𑀓𑀢𑁆𑀣𑀁 𑀓𑀺𑀭𑀺𑀬𑀢𑁆𑀣𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀩𑀳𑀺𑀤𑁆𑀥𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 ¶ , 𑀧𑀭𑀫𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀏𑀯. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀚𑁆𑀛𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀧𑀘𑁆𑀘𑀬𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀩𑀳𑀺𑀤𑁆𑀥𑀸 𑀓𑀼𑀲𑀮𑀸𑀓𑀼𑀲𑀮𑀁 𑀧𑀘𑁆𑀘𑀬𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀼𑀲𑀮𑀸𑀓𑀼𑀲𑀮𑀁 𑀧𑀘𑁆𑀘𑀬𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀚𑁆𑀛𑀢𑁆𑀢𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀩𑀳𑀺𑀤𑁆𑀥𑀸…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺.

𑀇𑀥𑀸𑀧𑀺 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀸; 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀬𑁄𑀧𑀺 𑀦𑀬𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀢𑁆𑀢𑀸 𑀏𑀓𑀧𑀭𑀺𑀘𑁆𑀙𑁂𑀤𑀸𑀯 𑀓𑀣𑀺𑀢𑀸. 𑀢𑀻𑀲𑀼𑀧𑀺 𑀳𑀺 𑀏𑀢𑀸𑀲𑀼 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀢𑀺. 𑀏𑀯𑀫𑀬𑀁 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄𑀧𑀺 𑀢𑁂𑀧𑀭𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀜𑀸𑀡𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁭𑁫𑁧. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀜𑀸𑀡𑀯𑀺𑀪𑀗𑁆𑀕𑁂 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀞𑀫𑀁 𑀏𑀓𑀯𑀺𑀥𑀸𑀤𑀻𑀳𑀺 𑀤𑀲𑀯𑀺𑀥𑀧𑀭𑀺𑀬𑁄𑀲𑀸𑀦𑁂𑀳𑀺 𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀢𑀢𑁆𑀣 𑀏𑀓𑀯𑀺𑀥𑁂𑀦𑀸𑀢𑀺 𑀏𑀓𑀧𑁆𑀧𑀓𑀸𑀭𑁂𑀦, 𑀏𑀓𑀓𑁄𑀝𑁆𑀞𑀸𑀲𑁂𑀦 𑀯𑀸. 𑀜𑀸𑀡𑀯𑀢𑁆𑀣𑀽𑀢𑀺 𑀏𑀢𑁆𑀣 𑀧𑀦 𑀜𑀸𑀡𑀜𑁆𑀘 𑀢𑀁 𑀯𑀢𑁆𑀣𑀼 𑀘 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀫𑁆𑀧𑀢𑁆𑀢𑀻𑀦𑀦𑁆𑀢𑀺 𑀜𑀸𑀡𑀯𑀢𑁆𑀣𑀼; 𑀑𑀓𑀸𑀲𑀝𑁆𑀞𑁂𑀦 𑀜𑀸𑀡𑀲𑁆𑀲 𑀯𑀢𑁆𑀣𑀽𑀢𑀺𑀧𑀺 𑀜𑀸𑀡𑀯𑀢𑁆𑀣𑀼. 𑀇𑀥 𑀧𑀦 𑀧𑀼𑀭𑀺𑀫𑁂𑀦𑁂𑀯𑀢𑁆𑀣𑁂𑀦 𑀜𑀸𑀡𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀏𑀓𑀯𑀺𑀥𑀧𑀭𑀺𑀘𑁆𑀙𑁂𑀤𑀸𑀯𑀲𑀸𑀦𑁂 ‘‘𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸 𑁋 𑀏𑀯𑀁 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘. 𑀦 𑀳𑁂𑀢𑀽𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧.𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀤𑀼𑀓𑀫𑀸𑀢𑀺𑀓𑀸𑀤𑀺𑀧𑀤𑁂𑀲𑀼𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀁 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀳𑀺 ‘‘𑀦 𑀳𑁂𑀢𑀼 𑀅𑀳𑁂𑀢𑀼𑀓𑀸’’𑀢𑀺𑀆𑀤𑀻𑀳𑀺 𑀢𑀸𑀯 𑀥𑀫𑁆𑀫𑀲𑀗𑁆𑀕𑀳𑀫𑀸𑀢𑀺𑀓𑀸𑀯𑀲𑁂𑀦, ‘‘𑀅𑀦𑀺𑀘𑁆𑀘𑀸 𑀚𑀭𑀸𑀪𑀺𑀪𑀽𑀢𑀸’’𑀢𑀺𑀆𑀤𑀻𑀳𑀺 𑀅𑀫𑀸𑀢𑀺𑀓𑀸𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁂𑀳𑀺 𑀧𑀪𑁂𑀤𑀢𑁄 𑀅𑀝𑁆𑀞𑀲𑀢𑁆𑀢𑀢𑀺𑀬𑀸 𑀧𑀤𑁂𑀳𑀺 𑀏𑀓𑀓𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸.

𑀤𑀼𑀓𑀸𑀦𑀼𑀭𑀽𑀧𑁂𑀳𑀺 𑀧𑀦 𑀧𑀜𑁆𑀘𑀢𑀺𑀁𑀲𑀸𑀬 𑀤𑀼𑀓𑁂𑀳𑀺 𑀤𑀼𑀓𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸.

𑀢𑀺𑀓𑀸𑀦𑀼𑀭𑀽𑀧𑁂𑀳𑀺 ‘‘𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀩𑀸𑀳𑀺𑀭𑀢𑁆𑀢𑀺𑀓𑁂𑀳𑀺, ‘‘𑀯𑀺𑀧𑀸𑀓𑀸 𑀧𑀜𑁆𑀜𑀸’’𑀢𑀺𑀆𑀤𑀻𑀳𑀺 ¶ 𑀅𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀘𑀼𑀤𑁆𑀤𑀲𑀳𑀺 𑀫𑀸𑀢𑀺𑀓𑀸𑀢𑀺𑀓𑁂𑀳𑀺, 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀧𑀞𑀫𑀧𑀤𑁂𑀦 𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀢𑁂𑀭𑀲𑀳𑀺, 𑀤𑀼𑀢𑀺𑀬𑀧𑀤𑁂𑀦 𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀲𑀢𑁆𑀢𑀳𑀺, 𑀢𑀢𑀺𑀬𑀧𑀤𑁂𑀦 𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀤𑁆𑀯𑀸𑀤𑀲𑀳𑀺, 𑀧𑀻𑀢𑀺𑀢𑁆𑀢𑀺𑀓𑁂 𑀘 𑀧𑀞𑀫𑀧𑀤𑁂𑀦 𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀢𑁂𑀭𑀲𑀳𑀺, 𑀢𑀣𑀸 𑀤𑀼𑀢𑀺𑀬𑀧𑀤𑁂𑀦, 𑀢𑀢𑀺𑀬𑀧𑀤𑁂𑀦 𑀦𑀺𑀬𑀫𑀺𑀢𑀧𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀤𑁆𑀯𑀸𑀤𑀲𑀳𑀻𑀢𑀺 𑀅𑀝𑁆𑀞𑀸𑀲𑀻𑀢𑀺𑀬𑀸 𑀢𑀺𑀓𑁂𑀳𑀺 𑀢𑀺𑀓𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸.

𑀘𑀢𑀼𑀓𑁆𑀓𑀫𑀸𑀢𑀺𑀓𑀸 ¶ ¶ 𑀧𑀦 ‘𑀓𑀫𑁆𑀫𑀲𑁆𑀲𑀓𑀢𑀜𑀸𑀡’𑀦𑁆𑀢𑀺𑀆𑀤𑀻𑀳𑀺 𑀏𑀓𑀯𑀻𑀲𑀢𑀺𑀬𑀸 𑀘𑀢𑀼𑀓𑁆𑀓𑁂𑀳𑀺, 𑀧𑀜𑁆𑀘𑀓𑀫𑀸𑀢𑀺𑀓𑀸 𑀤𑁆𑀯𑀻𑀳𑀺 𑀧𑀜𑁆𑀘𑀓𑁂𑀳𑀺, 𑀙𑀓𑁆𑀓𑀫𑀸𑀢𑀺𑀓𑀸 𑀏𑀓𑁂𑀦 𑀙𑀓𑁆𑀓𑁂𑀦, 𑀲𑀢𑁆𑀢𑀓𑀫𑀸𑀢𑀺𑀓𑀸 ‘‘𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻’’𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑁂𑀳𑀺 𑀏𑀓𑀸𑀤𑀲𑀳𑀺 𑀲𑀢𑁆𑀢𑀓𑁂𑀳𑀺, 𑀅𑀝𑁆𑀞𑀓𑀫𑀸𑀢𑀺𑀓𑀸 𑀏𑀓𑁂𑀦 𑀅𑀝𑁆𑀞𑀓𑁂𑀦, 𑀦𑀯𑀓𑀫𑀸𑀢𑀺𑀓𑀸 𑀏𑀓𑁂𑀦 𑀦𑀯𑀓𑁂𑀦.

𑁧𑁦. 𑀤𑀲𑀓𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁭𑁬𑁦. 𑀤𑀲𑀓𑀫𑀸𑀢𑀺𑀓𑀸 ‘‘𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺𑀆𑀤𑀺𑀦𑀸 𑀏𑀓𑁂𑀦𑁂𑀯 𑀤𑀲𑀓𑁂𑀦 𑀦𑀺𑀓𑁆𑀔𑀺𑀢𑁆𑀢𑀸. 𑀢𑀢𑁆𑀣 𑀤𑀲𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀬𑀣𑀸 𑀯𑀺𑀧𑀲𑁆𑀲𑀻𑀆𑀤𑀬𑁄 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀆𑀕𑀢𑀸 𑀢𑀣𑀸 𑀆𑀕𑀢𑀲𑁆𑀲; 𑀬𑀣𑀸 𑀘 𑀢𑁂 𑀕𑀢𑀸 𑀢𑀣𑀸 𑀕𑀢𑀲𑁆𑀲. 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺; 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺 𑀢𑀣𑀸 𑀆𑀕𑀢𑀩𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀲𑁆𑀲 𑀩𑀮𑀁 𑁋 𑀓𑀸𑀬𑀩𑀮𑀜𑁆𑀘 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸𑀢𑀺. 𑁋

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺.

𑀢𑀢𑁆𑀣 ‘𑀓𑀸𑀴𑀸𑀯𑀓’𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁 𑀢𑀁 𑀏𑀓𑀲𑁆𑀲 ¶ 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁 𑀢𑀁 𑀏𑀓𑀲𑁆𑀲 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀦𑀸𑀭𑀸𑀬𑀦𑀲𑀗𑁆𑀔𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 ¶ 𑀕𑀡𑀦𑀸𑀬 𑀳𑀢𑁆𑀣𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁.

𑀜𑀸𑀡𑀩𑀮𑀁 ¶ 𑀧𑀦 𑀇𑀥 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯 𑀤𑀲𑀩𑀮𑀜𑀸𑀡𑀁. 𑀫𑀳𑀸𑀲𑀻𑀳𑀦𑀸𑀤𑁂 (𑀫. 𑀦𑀺. 𑁧.𑁧𑁪𑁬 𑀆𑀤𑀬𑁄) 𑀤𑀲𑀩𑀮𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁨.𑁩𑁩-𑁩𑁪) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀜𑀸𑀡𑀲𑀳𑀲𑁆𑀲𑀸𑀦𑀺 𑁋 𑀏𑀢𑀁 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀳𑀺 𑀤𑀲𑀳𑀺 𑀜𑀸𑀡𑀩𑀮𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁; 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺 𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄; 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄; 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀓𑀫𑁆𑀧𑀦𑀻𑀬𑁄 𑀦𑀺𑀲𑀪𑁄. 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄 𑀘 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀉𑀧𑀕𑀘𑁆𑀙𑀢𑀺, 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 ¶ 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀘 𑀳𑀦𑀦𑀢𑁄 𑀘 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄 ¶ 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 ¶ 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀢𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺.

𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀯𑀺𑀲𑀼𑀤𑁆𑀥𑀁. 𑀘𑀓𑁆𑀓𑀲𑀤𑁆𑀤𑁄 𑀘 𑀧𑀦𑀸𑀬𑀁 𑁋

𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;

𑀤𑀸𑀦𑁂 𑀭𑀢𑀦𑀥𑀫𑁆𑀫𑀽𑀭, 𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺;

𑀥𑀫𑁆𑀫𑀘𑀓𑁆𑀓𑁂 𑀇𑀥 𑀫𑀢𑁄, 𑀢𑀜𑁆𑀘 𑀤𑁆𑀯𑁂𑀥𑀸 𑀯𑀺𑀪𑀸𑀯𑀬𑁂.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫) 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀧𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀉𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀥𑀫𑁆𑀫𑀘𑀓𑁆𑀓𑁂 𑀫𑀢𑁄.

𑀢𑀁 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁; 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 ¶ 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 ¶ , 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫; 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫; 𑀤𑀻𑀧𑀗𑁆𑀓𑀭𑀩𑁆𑀬𑀸𑀓𑀭𑀡𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 ¶ , 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.

𑀇𑀤𑀸𑀦𑀺 𑀬𑁂𑀳𑀺 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀬𑀸𑀦𑀺 𑀆𑀤𑀺𑀢𑁄𑀯 ‘‘𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀓𑀢𑀫𑀸𑀦𑀺 𑀤𑀲? 𑀇𑀥 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀪𑀕𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬 𑀢𑀁 𑀢𑀁 𑀞𑀸𑀦’’𑀦𑁆𑀢𑀺 𑀘 ‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬 𑀢𑀁 𑀢𑀁 𑀅𑀝𑁆𑀞𑀸𑀦’𑀦𑁆𑀢𑀺 𑀘 𑀧𑀚𑀸𑀦𑀦𑁆𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦. 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁; 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼.

𑀲𑀩𑁆𑀩𑀢𑁆𑀣 𑀕𑀸𑀫𑀺𑀦𑀺𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀜𑁆𑀘 𑀅𑀕𑀢𑀺𑀕𑀸𑀫𑀺𑀦𑀺𑀜𑁆𑀘. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 ‘𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀢𑁆𑀢𑀻𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀧𑀚𑀸𑀦𑀸𑀢𑀺.

𑀅𑀦𑁂𑀓𑀥𑀸𑀢𑀼𑀦𑁆𑀢𑀺 ¶ ¶ 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀥𑀸𑀢𑀽𑀳𑀺 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀼𑀦𑁆𑀢𑀺 𑀢𑀸𑀲𑀁𑀬𑁂𑀯 ¶ 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀸𑀲𑀁 𑀢𑀸𑀲𑀁 𑀥𑀸𑀢𑀽𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀺.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁.

𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁; 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀤𑁆𑀯𑁂𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀜𑁆𑀘 𑀅𑀧𑀭𑀪𑀸𑀯𑀜𑁆𑀘 𑀯𑀼𑀟𑁆𑀠𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀅𑀢𑁆𑀣𑁄.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀁 𑀓𑀸𑀭𑀡𑀁.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀁.

𑀘𑀼𑀢𑀽𑀧𑀧𑀸𑀢𑀦𑁆𑀢𑀺 𑀘𑀼𑀢𑀺𑀜𑁆𑀘 𑀉𑀧𑀧𑀸𑀢𑀜𑁆𑀘.

𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀔𑀬𑀲𑀗𑁆𑀔𑀸𑀢𑀁 𑀆𑀲𑀯𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁.

𑀇𑀫𑀸𑀦𑀻𑀢𑀺 𑀬𑀸𑀦𑀺 𑀳𑁂𑀝𑁆𑀞𑀸 ‘‘𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀅𑀯𑁄𑀘, 𑀇𑀫𑀸𑀦𑀺 𑀢𑀸𑀦𑀻𑀢𑀺 𑀅𑀧𑁆𑀧𑀦𑀁 𑀓𑀭𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀧𑀞𑀫𑀁𑀬𑁂𑀯 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀘𑁂𑀯 𑀅𑀦𑀥𑀺𑀕𑀫𑀲𑁆𑀲 𑀘 𑀞𑀸𑀦𑀸𑀝𑁆𑀞𑀸𑀦𑀪𑀽𑀢𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀞𑀸𑀦𑀤𑀲𑁆𑀲𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀞𑀸𑀦𑀸𑀪𑀸𑀯𑀤𑀲𑁆𑀲𑀦𑀢𑁄 𑀘. 𑀅𑀣 𑀦𑁂𑀲𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑁂𑀦 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺 ¶ , 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀤𑀲𑁆𑀲𑀦𑀢𑁄. 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀜𑀸𑀡𑁂𑀦 𑀓𑀫𑁆𑀫𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀅𑀦𑀸𑀯𑀭𑀡𑀸𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑁂𑀦 𑀅𑀦𑀼𑀓𑀽𑀮𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀭𑀺𑀬𑀸𑀯𑀺𑀲𑁂𑀲𑀁 𑀧𑀲𑁆𑀲𑀢𑀺, 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀅𑀣 𑀦𑁂𑀲𑀁 ¶ 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑁂𑀦 𑀅𑀥𑀺𑀫𑀼𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 ¶ 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀢𑁆𑀣𑀁. 𑀅𑀣𑁂𑀯𑀁 𑀤𑀺𑀝𑁆𑀞𑀸𑀥𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀧𑀲𑁆𑀲𑀢𑀺, 𑀲𑀤𑁆𑀥𑀸𑀤𑀻𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀧𑀭𑀺𑀜𑁆𑀜𑀸𑀢𑀺𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀸𑀧𑀺 𑀧𑀦𑁂𑀢𑁂 𑀲𑀘𑁂 𑀤𑀽𑀭𑁂 𑀳𑁄𑀦𑁆𑀢𑀺, 𑀅𑀣 𑀛𑀸𑀦𑀸𑀤𑀺𑀧𑀭𑀺𑀜𑁆𑀜𑀸𑀡𑁂𑀦 𑀛𑀸𑀦𑀸𑀤𑀻𑀲𑀼 𑀯𑀲𑀻𑀪𑀽𑀢𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑁂𑀲𑁂𑀦 𑀔𑀺𑀧𑁆𑀧𑀁 𑀉𑀧𑀕𑀘𑁆𑀙𑀢𑀺. 𑀉𑀧𑀕𑀦𑁆𑀢𑁆𑀯𑀸 𑀘 𑀦𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑀚𑀸𑀢𑀺𑀪𑀸𑀯𑀦𑀁, 𑀤𑀺𑀩𑁆𑀩𑀘𑀓𑁆𑀔𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀫𑁆𑀧𑀢𑁆𑀢𑀺𑀘𑀺𑀢𑁆𑀢𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀼𑀪𑀸𑀯𑁂𑀦 𑀆𑀲𑀯𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀤𑀲𑀩𑀮𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯 𑀫𑀸𑀢𑀺𑀓𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

(𑁧.) 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁧. 𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀬 𑀫𑀸𑀢𑀺𑀓𑀸𑀬 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀦 𑀳𑁂𑀢𑀼𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀤𑁆𑀥𑁂 𑀦𑀺𑀤𑁆𑀤𑁂𑀲𑀯𑀸𑀭𑁂 𑀦 𑀳𑁂𑀢𑀼𑀫𑁂𑀯𑀸𑀢𑀺 𑀲𑀸𑀥𑀸𑀭𑀡𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣 ‘‘𑀳𑁂𑀢𑀼𑀳𑁂𑀢𑀼, 𑀧𑀘𑁆𑀘𑀬𑀳𑁂𑀢𑀼, 𑀉𑀢𑁆𑀢𑀫𑀳𑁂𑀢𑀼, 𑀲𑀸𑀥𑀸𑀭𑀡𑀳𑁂𑀢𑀽𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀭𑀽𑀧𑀓𑀡𑁆𑀟𑁂 ‘‘𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼𑀫𑁂𑀯𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁫𑁯𑁪) 𑀯𑀼𑀢𑁆𑀢𑀫𑁂𑀯. 𑀅𑀳𑁂𑀢𑀼𑀓𑀫𑁂𑀯𑀸𑀢𑀺𑀆𑀤𑀻𑀲𑀼 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀫𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄; 𑀅𑀳𑁂𑀢𑀼𑀓𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘 ‘‘𑀳𑁂𑀢𑀽 𑀥𑀫𑁆𑀫𑀸 𑀦𑀳𑁂𑀢𑀽 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧) 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀯𑀸 𑀲𑀳𑁂𑀢𑀼𑀓𑀸 𑀥𑀫𑁆𑀫𑀸𑀢𑀺 ¶ 𑀯𑀸 𑀦 𑀳𑁄𑀦𑁆𑀢𑀺. 𑀏𑀓𑀦𑁆𑀢𑁂𑀦 𑀧𑀦 𑀦 𑀳𑁂𑀢𑀽𑀬𑁂𑀯, 𑀅𑀳𑁂𑀢𑀼𑀓𑀸 𑀬𑁂𑀯𑀸𑀢𑀺 𑀇𑀫𑀸𑀦𑀺𑀧𑀺 𑀦𑀬𑁂𑀦𑁂𑀢𑁆𑀣 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀬𑀸𑀓𑀢𑀫𑁂𑀯𑀸𑀢𑀺 𑀧𑀤𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀯𑀲𑁂𑀦. 𑀧𑀘𑁆𑀘𑀬𑀸𑀭𑀫𑁆𑀫𑀡𑀁 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀦𑁆𑀢𑀺 𑀳𑀺 𑀤𑀼𑀯𑀺𑀥𑀁 𑀆𑀭𑀫𑁆𑀫𑀡𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀫𑁂𑀯 𑀥𑀼𑀭𑀁, 𑀧𑀘𑁆𑀘𑀬𑀸𑀭𑀫𑁆𑀫𑀡𑀫𑁆𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀅𑀘𑁂𑀢𑀲𑀺𑀓𑀫𑁂𑀯𑀸𑀢𑀺 𑀧𑀤𑀁 𑀘𑀺𑀢𑁆𑀢𑀁, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀻𑀲𑀼 𑀅𑀘𑁂𑀢𑀲𑀺𑀓𑁂𑀲𑀼 𑀘𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑁄 𑀅𑀧𑀭𑀺𑀬𑀸𑀧𑀦𑁆𑀦𑀫𑁂𑀯𑀸𑀢𑀺 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀘𑀼𑀢𑀺𑀧𑀭𑀺𑀬𑀸𑀧𑀦𑁆𑀦𑀲𑀁𑀲𑀸𑀭𑀯𑀝𑁆𑀝𑀪𑀯𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀢𑁄 𑀧𑀭𑀺𑀬𑀸𑀧𑀦𑁆𑀦𑀸 𑀏𑀯, 𑀦𑁄 𑀅𑀧𑀭𑀺𑀬𑀸𑀧𑀦𑁆𑀦𑀸. 𑀮𑁄𑀓𑀢𑁄 𑀯𑀝𑁆𑀝𑀢𑁄 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀸 ¶ . 𑀉𑀧𑁆𑀧𑀦𑁆𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀭𑀽𑀧𑀓𑀡𑁆𑀟𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑁂𑀯 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀢𑀻𑀢𑀸𑀤𑀺𑀯𑀺𑀲𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑀧𑀢𑀺𑀢𑀫𑁂𑀯 𑀓𑀢𑁆𑀯𑀸 ‘‘𑀉𑀧𑀧𑀦𑁆𑀦𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀥. 𑀲. 𑁫𑁮𑁪) 𑀯𑀼𑀢𑁆𑀢𑀁. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀧𑀦 𑀬𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 ¶ 𑀆𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀫𑁂𑀯𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸𑀬𑁂𑀯. 𑀚𑀭𑀸𑀪𑀺𑀪𑀽𑀢𑀫𑁂𑀯𑀸𑀢𑀺 𑀚𑀭𑀸𑀬 𑀅𑀪𑀺𑀪𑀽𑀢𑀢𑁆𑀢𑀸 𑀚𑀭𑀸𑀪𑀺𑀪𑀽𑀢𑀸 𑀏𑀯.

𑁭𑁬𑁨. 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀅𑀦𑀸𑀕𑀢𑀧𑀝𑀺𑀓𑁆𑀔𑁂𑀧𑁄. 𑀦 𑀳𑀺 𑀢𑁂 𑀅𑀦𑀸𑀕𑀢𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀸 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸𑀢𑀺 𑀲𑀳𑀼𑀧𑁆𑀧𑀢𑁆𑀢𑀺𑀧𑀝𑀺𑀓𑁆𑀔𑁂𑀧𑁄. 𑀦 𑀳𑀺 𑀢𑁂 𑀲𑀳𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁 𑀯𑀸 𑀆𑀭𑀫𑁆𑀫𑀡𑀁 𑀯𑀸 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀬𑀁 𑀧𑀦 𑀧𑀘𑁆𑀙𑀸𑀚𑀸𑀢𑀸 𑀳𑀼𑀢𑁆𑀯𑀸 𑀧𑀼𑀭𑁂𑀚𑀸𑀢𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀢𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀅𑀚𑁆𑀛𑀢𑁆𑀢𑀺𑀓𑁂 𑀧𑀜𑁆𑀘 𑀧𑀲𑀸𑀤𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀳𑀺𑀭𑀸𑀭𑀫𑁆𑀫𑀡𑀸𑀢𑀺 𑀩𑀸𑀳𑀺𑀭𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸. 𑀢𑀢𑁆𑀣 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀳𑀺 𑀧𑀲𑀸𑀤𑀯𑀢𑁆𑀣𑀼𑀓𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀳𑀤𑀬𑀭𑀽𑀧𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀯𑀢𑁆𑀣𑀼𑀓𑀁, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀩𑀸𑀳𑀺𑀭𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸 ¶ , 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀳𑀤𑀬𑀭𑀽𑀧𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀩𑀸𑀳𑀺𑀭𑀸 𑀩𑀸𑀳𑀺𑀭𑀯𑀢𑁆𑀣𑀼𑀓𑀸.

𑀅𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸𑀢𑀺 𑀅𑀦𑀺𑀭𑀼𑀤𑁆𑀥𑀯𑀢𑁆𑀣𑀼𑀓𑀸. 𑀦 𑀳𑀺 𑀢𑁂 𑀦𑀺𑀭𑀼𑀤𑁆𑀥𑀁 𑀅𑀢𑀻𑀢𑀁 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀲𑀫𑁆𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀅𑀜𑁆𑀜𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀳𑀺 𑀅𑀜𑁆𑀜𑀁 𑀯𑀢𑁆𑀣𑀼, 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁. 𑀅𑀜𑁆𑀜𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀧𑀲𑀸𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀢𑁆𑀣𑀼𑀁, 𑀲𑀤𑁆𑀤𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀧𑁆𑀧𑀢𑁄 𑀓𑀧𑁆𑀧𑀁 𑀕𑀦𑁆𑀢𑁆𑀯𑀸𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺; 𑀘𑀓𑁆𑀔𑀼𑀧𑀲𑀸𑀤𑀫𑁂𑀯 𑀧𑀦 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀭𑀽𑀧𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑀲𑁆𑀲 𑀯𑀢𑁆𑀣𑀼𑀧𑀺 𑀤𑁆𑀯𑀸𑀭𑀫𑁆𑀧𑀺 𑀆𑀭𑀫𑁆𑀫𑀡𑀫𑁆𑀧𑀺 𑀦𑀺𑀩𑀤𑁆𑀥𑀁, 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀯𑀸 𑀤𑁆𑀯𑀸𑀭𑀁 𑀯𑀸 𑀆𑀭𑀫𑁆𑀫𑀡𑀁 𑀯𑀸 𑀦 𑀲𑀗𑁆𑀓𑀫𑀢𑀺, 𑀦𑀺𑀩𑀤𑁆𑀥𑀯𑀢𑁆𑀣𑀼 ¶ 𑀦𑀺𑀩𑀤𑁆𑀥𑀤𑁆𑀯𑀸𑀭𑀁 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑀫𑁂𑀯 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁭𑁬𑁩. 𑀦 ¶ 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀻𑀢𑀺 𑀏𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘𑀓𑁆𑀔𑀼 𑀲𑁄𑀢𑀲𑁆𑀲, 𑀲𑁄𑀢𑀁 𑀯𑀸 𑀘𑀓𑁆𑀔𑀼𑀲𑁆𑀲𑀸𑀢𑀺 𑀏𑀯𑀁 𑀏𑀓𑀁 𑀏𑀓𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀳𑀺 𑀦𑀻𑀮𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀦𑁂𑀬𑁆𑀬 ‘𑀇𑀗𑁆𑀖 𑀢𑀸𑀯 𑀦𑀁 𑀯𑀯𑀢𑁆𑀣𑀸𑀧𑁂𑀳𑀺 𑀯𑀺𑀪𑀸𑀯𑁂𑀳𑀺 𑁋 𑀓𑀺𑀁 𑀦𑀸𑀫𑁂𑀢𑀁 𑀆𑀭𑀫𑁆𑀫𑀡’𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀦𑀸𑀧𑀺 𑀫𑀼𑀔𑁂𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀭𑁂 𑀅𑀦𑁆𑀥𑀩𑀸𑀮, 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀥𑀸𑀯𑀫𑀸𑀦𑁄 𑀅𑀜𑁆𑀜𑀢𑁆𑀭 𑀫𑀬𑀸 𑀓𑀼𑀳𑀺𑀁 𑀏𑀢𑀲𑁆𑀲 𑀚𑀸𑀦𑀦𑀓𑀁 𑀮𑀪𑀺𑀲𑁆𑀲𑀲𑀺; 𑀆𑀳𑀭 𑀦𑀁 𑀘𑀓𑁆𑀔𑀼𑀧𑀲𑀸𑀤𑁂 𑀉𑀧𑀦𑁂𑀳𑀺; 𑀅𑀳𑀫𑁂𑀢𑀁 𑀆𑀭𑀫𑁆𑀫𑀡𑀁 𑀚𑀸𑀦𑀺𑀲𑁆𑀲𑀸𑀫𑀺 𑁋 𑀬𑀤𑀺 𑀯𑀸 𑀦𑀻𑀮𑀁 𑀬𑀤𑀺 𑀯𑀸 𑀧𑀻𑀢𑀓𑀁. 𑀦 𑀳𑀺 𑀏𑀲𑁄 𑀅𑀜𑁆𑀜𑀲𑁆𑀲 𑀯𑀺𑀲𑀬𑁄; 𑀫𑀬𑁆𑀳𑀫𑁂𑀯𑁂𑀲𑁄 𑀯𑀺𑀲𑀬𑁄’𑀢𑀺. 𑀲𑁂𑀲𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀦𑁆𑀢𑀺 𑀦𑀸𑀫.

𑁭𑁬𑁪. 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲𑀸𑀢𑀺 𑀆𑀯𑀚𑁆𑀚𑀦𑁂𑀦𑁂𑀯 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲.

𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀆𑀯𑀚𑁆𑀚𑀦𑁂𑀦𑁂𑀯 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲. 𑀏𑀢𑀸𑀦𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀆𑀯𑀚𑁆𑀚𑀦𑁂𑀦 𑀲𑀫𑀦𑁆𑀦𑀸𑀳𑀝𑀓𑀸𑀮𑁂 𑀫𑀦𑀲𑀺𑀓𑀢𑀓𑀸𑀮𑁂𑀬𑁂𑀯 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀦 𑀅𑀩𑁆𑀩𑁄𑀓𑀺𑀡𑁆𑀡𑀸𑀢𑀺 𑀅𑀜𑁆𑀜𑁂𑀦 𑀯𑀺𑀜𑁆𑀜𑀸𑀡𑁂𑀦 𑀅𑀩𑁆𑀩𑁄𑀓𑀺𑀡𑁆𑀡𑀸 𑀦𑀺𑀭𑀦𑁆𑀢𑀭𑀸𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁂𑀦 𑀢𑁂𑀲𑀁 𑀅𑀦𑀦𑁆𑀢𑀭𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸.

𑁭𑁬𑁫. 𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀢𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀲𑀳𑀼𑀧𑁆𑀧𑀢𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦 ¶ 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁂𑀦 𑀲𑀫𑀦𑀦𑁆𑀢𑀭𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸.

𑁭𑁬𑁬. 𑀆𑀯𑀝𑁆𑀝𑀦𑀸 𑀯𑀸𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺𑀧𑀺 𑀆𑀯𑀚𑁆𑀚𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀢𑀜𑁆𑀳𑀺 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀦𑀢𑁄 𑀆𑀯𑀝𑁆𑀝𑀦𑀸, 𑀢𑀲𑁆𑀲𑁂𑀯 𑀆𑀪𑀼𑀚𑀦𑀢𑁄 𑀆𑀪𑁄𑀕𑁄, 𑀭𑀽𑀧𑀸𑀤𑀻𑀦𑀁 𑀲𑀫𑀦𑁆𑀦𑀸𑀳𑀭𑀡𑀢𑁄 𑀲𑀫𑀦𑁆𑀦𑀸𑀳𑀸𑀭𑁄, 𑀢𑁂𑀲𑀁𑀬𑁂𑀯 𑀫𑀦𑀲𑀺𑀓𑀭𑀡𑀢𑁄 𑀫𑀦𑀲𑀺𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀆𑀯𑀚𑁆𑀚𑀦𑀸𑀤𑀺𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄.

𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀫𑁆𑀧𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺.

𑀅𑀜𑁆𑀜𑀢𑁆𑀭 ¶ ¶ 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸𑀢𑀺 𑀞𑀧𑁂𑀢𑁆𑀯𑀸 𑀭𑀽𑀧𑀸𑀤𑀻𑀦𑀁 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀼𑀧𑀡𑁆𑀟𑀺𑀢𑁄𑀧𑀺 𑀧𑀼𑀭𑀺𑀲𑁄, 𑀞𑀧𑁂𑀢𑁆𑀯𑀸 𑀆𑀧𑀸𑀣𑀕𑀢𑀸𑀦𑀺 𑀭𑀽𑀧𑀸𑀤𑀻𑀦𑀺, 𑀅𑀜𑁆𑀜𑀁 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀦𑁂𑀢𑁆𑀣 𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀫𑀢𑁆𑀢𑀸𑀦𑁂𑀯. 𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑀢𑁄 𑀧𑀦 𑀫𑀼𑀢𑁆𑀢𑀸 𑀅𑀜𑁆𑀜𑀸 𑀏𑀢𑁂𑀲𑀁 𑀓𑀼𑀲𑀮𑀸𑀤𑀺𑀧𑀝𑀺𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀫𑀦𑁄𑀥𑀸𑀢𑀼𑀬𑀸𑀧𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀬𑀸𑀧𑀺. 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀘𑁂𑀢𑁆𑀣 𑀧𑀺𑀓𑀸𑀭𑁄. 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼𑀬𑀸𑀧𑀺 𑀢𑀢𑁄 𑀧𑀭𑀸𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺𑀧𑀻𑀢𑀺 𑀲𑀩𑁆𑀩𑁂𑀳𑀺𑀧𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀦 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀕𑀫𑀦𑀸𑀤𑀻𑀲𑀼 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀦 𑀓𑀸𑀬𑀓𑀫𑁆𑀫𑀁 𑀦 𑀯𑀘𑀻𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑀺, 𑀦 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀺𑀬𑀢𑀺, 𑀦 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀢𑀺 𑀮𑁄𑀓𑀺𑀬𑀁 𑀯𑀸 𑀮𑁄𑀓𑀼𑀢𑁆𑀢𑀭𑀁 𑀯𑀸, 𑀦 𑀲𑀫𑀸𑀥𑀺𑀢𑁄 𑀯𑀼𑀝𑁆𑀞𑀸𑀢𑀺 𑀮𑁄𑀓𑀺𑀬𑀸 𑀯𑀸 𑀮𑁄𑀓𑀼𑀢𑁆𑀢𑀭𑀸 𑀯𑀸, 𑀦 𑀪𑀯𑀢𑁄 𑀘𑀯𑀢𑀺, 𑀦 𑀪𑀯𑀦𑁆𑀢𑀭𑁂 𑀉𑀧𑀧𑀚𑁆𑀚𑀢𑀺. 𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀧𑀝𑀺𑀯𑀺𑀚𑀸𑀦𑀦𑀸𑀤𑀺𑀯𑀘𑀦𑀧𑀭𑀺𑀬𑁄𑀲𑀸𑀦𑀁 𑀓𑀺𑀘𑁆𑀘𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦𑀸𑀢𑀺 𑀲𑀩𑁆𑀩𑀲𑁆𑀲𑀸𑀧𑁂𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀭𑀡𑁂 𑀲𑀳𑀚𑀯𑀦𑀓𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀬𑀣𑀸 𑀘𑁂𑀢𑁂𑀲𑀁 ¶ 𑀏𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀦𑀢𑁆𑀣𑀺, 𑀏𑀯𑀁 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀤𑀻𑀦𑀺𑀧𑀺. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺, 𑀦 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁; 𑀦 𑀘𑁂𑀢𑀁 𑀚𑀯𑀦𑀁 𑀦𑀸𑀫𑀕𑁄𑀢𑁆𑀢𑀫𑀸𑀭𑀩𑁆𑀪 𑀚𑀯𑀢𑀺, 𑀦 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀁; 𑀦 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦; 𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀆𑀭𑀩𑁆𑀪 𑀚𑀯𑀢𑀺, 𑀦 𑀦𑀺𑀩𑁆𑀩𑀸𑀦𑀁; 𑀦 𑀘𑁂𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀪𑀺𑀜𑁆𑀜𑀸𑀜𑀸𑀡𑀁, 𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀲𑀩𑁆𑀩𑁄𑀧𑀺 𑀧𑀦𑁂𑀲 𑀧𑀪𑁂𑀤𑁄 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀬𑁂𑀯 𑀮𑀩𑁆𑀪𑀢𑀺.

𑀦 𑀲𑀼𑀧𑀢𑀺 𑀦 𑀧𑀝𑀺𑀩𑀼𑀚𑁆𑀛𑀢𑀺 𑀦 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀲𑀩𑁆𑀩𑁂𑀦𑀸𑀧𑀺 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀦𑁂𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀦 𑀦𑀺𑀤𑁆𑀤𑀸𑀬𑀢𑀺, 𑀦 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀓𑀺𑀜𑁆𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀳 𑀚𑀯𑀦𑁂𑀦 𑀯𑀻𑀣𑀺𑀘𑀺𑀢𑁆𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀳𑀺 𑀫𑀳𑀸𑀯𑀝𑁆𑀝𑀺𑀁 𑀚𑀸𑀮𑁂𑀢𑁆𑀯𑀸 𑀤𑀻𑀧𑁂 𑀘𑀓𑁆𑀔𑀼𑀲𑀫𑀻𑀧𑁂 𑀉𑀧𑀦𑀻𑀢𑁂 𑀧𑀞𑀫𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀁 𑀆𑀯𑀚𑁆𑀚𑀦𑀁 ¶ 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺. 𑀅𑀣 ¶ 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀁 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺. 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 𑀜𑀢𑁆𑀯𑀸 ‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀮𑁄𑀓𑁄’𑀢𑀺 𑀚𑀸𑀦𑀸𑀢𑀺.

𑀢𑀣𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀓𑀡𑁆𑀡𑀲𑀫𑀻𑀧𑁂 𑀢𑀽𑀭𑀺𑀬𑁂𑀲𑀼 𑀧𑀕𑁆𑀕𑀳𑀺𑀢𑁂𑀲𑀼, 𑀖𑀸𑀦𑀲𑀫𑀻𑀧𑁂 𑀲𑀼𑀕𑀦𑁆𑀥𑁂𑀲𑀼 𑀯𑀸 𑀤𑀼𑀕𑁆𑀕𑀦𑁆𑀥𑁂𑀲𑀼 𑀯𑀸 𑀧𑀼𑀧𑁆𑀨𑁂𑀲𑀼 𑀉𑀧𑀦𑀻𑀢𑁂𑀲𑀼, 𑀫𑀼𑀔𑁂 𑀲𑀧𑁆𑀧𑀺𑀫𑁆𑀳𑀺 𑀯𑀸 𑀨𑀸𑀡𑀺𑀢𑁂 𑀯𑀸 𑀧𑀓𑁆𑀔𑀺𑀢𑁆𑀢𑁂, 𑀧𑀺𑀝𑁆𑀞𑀺𑀬𑀁 𑀧𑀸𑀡𑀺𑀦𑀸 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀞𑀫𑀁 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀦𑁆𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺. 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀦𑁆𑀢𑀺. 𑀢𑀢𑁄 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 𑀜𑀢𑁆𑀯𑀸 ‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀤𑁆𑀤𑁄 𑁋 𑀲𑀗𑁆𑀔𑀲𑀤𑁆𑀤𑁄, 𑀪𑁂𑀭𑀺𑀲𑀤𑁆𑀤𑁄’𑀢𑀺 𑀯𑀸 ‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀕𑀦𑁆𑀥𑁄 𑁋 𑀫𑀽𑀮𑀕𑀦𑁆𑀥𑁄, 𑀲𑀸𑀭𑀕𑀦𑁆𑀥𑁄’𑀢𑀺 𑀯𑀸 ‘𑀓𑀺𑀁 ¶ 𑀇𑀤𑀁 𑀫𑀬𑁆𑀳𑀁 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀭𑀲𑀁 𑁋 𑀲𑀧𑁆𑀧𑀻𑀢𑀺 𑀯𑀸 𑀨𑀸𑀡𑀺𑀢’𑀦𑁆𑀢𑀺 𑀯𑀸 ‘𑀓𑁂𑀦𑀫𑁆𑀳𑀺 𑀧𑀺𑀝𑁆𑀞𑀺𑀬𑀁 𑀧𑀳𑀢𑁄, 𑀅𑀢𑀺𑀣𑀤𑁆𑀥𑁄 𑀫𑁂 𑀧𑀳𑀸𑀭𑁄’𑀢𑀺 𑀯𑀸 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀲𑀼𑀧𑀺𑀦𑀫𑁆𑀧𑀺 𑀢𑁂𑀦𑁂𑀯 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦.

𑀢𑀜𑁆𑀘 𑀧𑀦𑁂𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 𑁋 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺. 𑀢𑀢𑁆𑀣 𑀧𑀺𑀢𑁆𑀢𑀸𑀤𑀻𑀦𑀁 𑀔𑁄𑀪𑀓𑀭𑀡𑀧𑀘𑁆𑀘𑀬𑀬𑁄𑀕𑁂𑀦 𑀔𑀼𑀪𑀺𑀢𑀥𑀸𑀢𑀼𑀓𑁄 ‘𑀥𑀸𑀢𑀼𑀓𑁆𑀔𑁄𑀪𑀢𑁄’ 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀧𑀲𑁆𑀲𑀦𑁆𑀢𑁄 𑀘 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑁋 𑀧𑀩𑁆𑀩𑀢𑀸 𑀧𑀢𑀦𑁆𑀢𑁄 𑀯𑀺𑀬, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬, 𑀯𑀸𑀴𑀫𑀺𑀕𑀳𑀢𑁆𑀣𑀺𑀘𑁄𑀭𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑁄 𑀯𑀺𑀬 𑀘 𑀳𑁄𑀢𑀺. ‘𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄’ 𑀧𑀲𑁆𑀲𑀦𑁆𑀢𑁄 𑀧𑀼𑀩𑁆𑀩𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀺. ‘𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄’ 𑀧𑀲𑁆𑀲𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀉𑀧𑀲𑀁𑀳𑀭𑀦𑁆𑀢𑀺. 𑀲𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀢𑀺. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀅𑀦𑀢𑁆𑀣𑀲𑁆𑀲 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 ¶ 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁, 𑀩𑁄𑀥𑀺𑀲𑀢𑁆𑀢𑁄 ¶ 𑀯𑀺𑀬 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 (𑀅. 𑀦𑀺. 𑁫.𑁧𑁯𑁬), 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀘 𑀲𑁄𑀴𑀲 𑀲𑀼𑀧𑀺𑀦𑁂𑀢𑀺 (𑀚𑀸. 𑁧.𑁧.𑁪𑁧).

𑀢𑀢𑁆𑀣 𑀬𑀁 𑀥𑀸𑀢𑀼𑀓𑁆𑀔𑁄𑀪𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀲𑀘𑁆𑀘𑀁 𑀳𑁄𑀢𑀺. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺, 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀺𑀓𑀁 𑀯𑀸. 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀉𑀧𑀸𑀬𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀭𑁄𑀳𑀡𑁂 𑀓𑀺𑀭 𑀦𑀸𑀕𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸𑀯 𑀏𑀓𑀁 𑀦𑀸𑀕𑀭𑀼𑀓𑁆𑀔𑀁 𑀙𑀺𑀦𑁆𑀤𑀸𑀧𑁂𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀧𑀞𑀫𑀫𑁂𑀯 𑀦𑀁 𑀧𑀮𑁄𑀪𑁂𑀢𑁆𑀯𑀸 𑀧𑀘𑁆𑀙𑀸 ‘𑀇𑀢𑁄 𑀢𑁂 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀉𑀧𑀝𑁆𑀞𑀸𑀓𑁄 𑀭𑀸𑀚𑀸 𑀫𑀭𑀺𑀲𑁆𑀲𑀢𑀻’𑀢𑀺 𑀲𑀼𑀧𑀺𑀦𑁂 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀦𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑁄𑀭𑁄𑀥𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀭𑀸𑀚𑀸 ‘𑀓𑀺𑀁 𑀏𑀢’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 ‘𑀏𑀯𑀁 𑀣𑁂𑀭𑁂𑀦 𑀯𑀼𑀢𑁆𑀢’𑀦𑁆𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀤𑀺𑀯𑀲𑁂 𑀕𑀡𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑀧𑀸𑀤𑁂 𑀙𑀺𑀦𑁆𑀤𑀸𑀧𑁂𑀲𑀺.

𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 ¶ 𑀫𑀽𑀮𑀓𑀸𑀭𑀡𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀺 𑀲𑀼𑀧𑀺𑀦𑀪𑁂𑀤𑁄 𑀳𑁄𑀢𑀺𑀬𑁂𑀯. 𑀢𑀜𑁆𑀘 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀼𑀧𑀺𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸; 𑀅𑀲𑁂𑀓𑁆𑀔𑀸 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸.

𑀓𑀺𑀁 𑀧𑀦 𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀧𑀝𑀺𑀩𑀼𑀤𑁆𑀥𑁄? 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺. 𑀢𑀜𑁆𑀘 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀦 𑀲𑀼𑀧𑀺𑀦𑀁 𑀦𑀸𑀫 𑀧𑀲𑁆𑀲𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀺? 𑀦 𑀅𑀪𑀸𑀯𑁄 ¶ . 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁫.𑁩.𑁫). ‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄’𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺, 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸; 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺, 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀢𑁂𑀦𑀸𑀬𑀁 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺 𑀅𑀩𑁆𑀬𑀸𑀓𑀢𑁄𑀧𑀺 𑁩𑁮𑁬. 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀓𑀼𑀲𑀮𑁄, 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀧𑀺𑀦𑁂𑀦𑁂𑀯 ‘𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂’𑀢𑀺 𑀓𑀣𑀦𑀓𑀸𑀮𑁂𑀧𑀺 𑀅𑀩𑁆𑀬𑀸𑀓𑀢𑁄𑀬𑁂𑀯.

𑀓𑀺𑀁 𑀧𑀦 𑀲𑀼𑀧𑀺𑀦𑁂 𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀲𑀯𑀺𑀧𑀸𑀓𑀁 𑀅𑀯𑀺𑀧𑀸𑀓𑀦𑁆𑀢𑀺? 𑀲𑀯𑀺𑀧𑀸𑀓𑀁; 𑀤𑀼𑀩𑁆𑀩𑀮𑀢𑁆𑀢𑀸 𑀧𑀦 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀺𑀦𑁆𑀦𑀸𑀬 𑀅𑀜𑁆𑀜𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑁂 𑀯𑁂𑀤𑀦𑀻𑀬𑀁 𑀳𑁄𑀢𑀺.

𑀏𑀯𑀁 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸𑀢𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀦 𑀳𑁂𑀢𑁆𑀯𑀝𑁆𑀞𑁄 𑀬𑀸𑀣𑀸𑀯𑀝𑁆𑀞𑁄. 𑀢𑀁 ¶ 𑀬𑀸𑀣𑀸𑀯𑀝𑁆𑀞𑀁 𑀯𑀢𑁆𑀣𑀼𑀁 𑀯𑀺𑀪𑀸𑀯𑁂𑀢𑀻𑀢𑀺 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸. 𑀢𑀣𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀅𑀳𑁂𑀢𑀼𑀓𑀝𑁆𑀞𑁄, 𑀚𑀭𑀸𑀪𑀺𑀪𑀽𑀢𑀝𑁆𑀞𑁄, 𑀦 𑀲𑀼𑀧𑀺𑀦𑀁 𑀧𑀲𑁆𑀲𑀦𑀝𑁆𑀞𑁄, 𑀬𑀸𑀣𑀸𑀯𑀝𑁆𑀞𑁄. 𑀢𑀁 𑀬𑀸𑀣𑀸𑀯𑀝𑁆𑀞𑀁 𑀯𑀢𑁆𑀣𑀼𑀁 𑀯𑀺𑀪𑀸𑀯𑁂𑀢𑀻𑀢𑀺 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸. 𑀇𑀢𑀺 𑀬𑀸 𑀳𑁂𑀝𑁆𑀞𑀸 ‘‘𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸’’𑀢𑀺 𑀫𑀸𑀢𑀺𑀓𑀸𑀬 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸 𑀏𑀯𑀁 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲𑀸 𑀏𑀯 𑀘 𑀯𑀲𑁂𑀦 𑀏𑀯𑀁 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽𑀢𑀺 𑀏𑀯𑀁 𑀏𑀓𑁂𑀓𑀓𑁄𑀝𑁆𑀞𑀸𑀲𑁂𑀦 𑀜𑀸𑀡𑀕𑀡𑀦𑀸 𑀏𑀓𑁂𑀦 𑀯𑀸 𑀆𑀓𑀸𑀭𑁂𑀦 𑀜𑀸𑀡𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁨.) 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁭. 𑀤𑀼𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑁂𑀢𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀧𑀜𑁆𑀜𑀸. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 ¶ 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸. 𑀅𑀭𑀳𑀢𑁄 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂𑀢𑀺 𑀅𑀪𑀺𑀜𑁆𑀜𑀸𑀬 𑀘𑁂𑀯 𑀲𑀫𑀸𑀧𑀢𑁆𑀢𑀺𑀬𑀸 𑀘 𑀧𑀭𑀺𑀓𑀫𑁆𑀫𑀲𑀫𑀬𑁂 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀧𑀜𑁆𑀜𑀸. 𑀲𑀸 𑀳𑀺 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀧𑀪𑁂𑀤𑀁 𑀓𑀺𑀭𑀺𑀬𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸 𑀧𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀅𑀬𑀁 𑀧𑀦 𑀅𑀧𑀭𑁄𑀧𑀺 𑀧𑀸𑀴𑀺𑀫𑀼𑀢𑁆𑀢𑀓𑁄 ¶ 𑀅𑀝𑁆𑀞𑀓𑀣𑀸𑀦𑀬𑁄 𑁋 𑀬𑀸𑀧𑀺 𑀳𑀺 𑀧𑀼𑀭𑀺𑀫𑀸 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸 𑀧𑀘𑁆𑀙𑀺𑀫𑀸𑀬 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀬 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀸𑀧𑀺 𑀢𑀁 𑀓𑀺𑀭𑀺𑀬𑀢𑁆𑀣𑀁 𑀚𑀸𑀧𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸 𑀧𑀜𑁆𑀜𑀸 𑀦𑀸𑀫. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀤𑀼𑀢𑀺𑀬𑀧𑀤𑀦𑀺𑀤𑁆𑀤𑁂𑀲𑁂 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁂𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂 𑀧𑀜𑁆𑀜𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀢𑁆𑀣𑀁 𑀚𑀸𑀧𑁂𑀢𑁆𑀯𑀸 𑀞𑀺𑀢𑀸𑀢𑀺 𑀚𑀸𑀧𑀺𑀢𑀢𑁆𑀣𑀸. 𑀭𑀽𑀧𑀸𑀯𑀘𑀭𑀸𑀤𑀺𑀯𑀺𑀧𑀸𑀓𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀧𑀺 𑀯𑀸 𑀏𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀭𑀡𑁂𑀳𑀺 𑀚𑀸𑀧𑀺𑀢𑀸 𑀚𑀦𑀺𑀢𑀸 𑀧𑀯𑀢𑁆𑀢𑀺𑀢𑀸 𑀲𑀬𑀫𑁆𑀧𑀺 𑀅𑀢𑁆𑀣𑀪𑀽𑀢𑀸𑀢𑀺𑀧𑀺 𑀚𑀸𑀧𑀺𑀢𑀢𑁆𑀣𑀸. 𑀅𑀭𑀳𑀢𑁄 𑀉𑀧𑁆𑀧𑀦𑁆𑀦𑀸𑀬 𑀅𑀪𑀺𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀸𑀬 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀓𑀺𑀭𑀺𑀬𑀧𑀜𑁆𑀜𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀅𑀧𑀭𑁄𑀧𑀺 𑀧𑀸𑀴𑀺𑀫𑀼𑀢𑁆𑀢𑀓𑁄 𑀅𑀝𑁆𑀞𑀓𑀣𑀸𑀦𑀬𑁄 𑁋 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀧𑀜𑁆𑀜𑀸𑀧𑀺 𑀳𑀺 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀧𑁂𑀢𑁆𑀯𑀸 𑀞𑀺𑀢𑀸𑀢𑀺 𑀚𑀸𑀧𑀺𑀢𑀢𑁆𑀣𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀧𑀜𑁆𑀜𑀸𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀧𑀺 𑀯𑀸 𑀏𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀭𑀡𑁂𑀳𑀺 𑀚𑀸𑀧𑀺𑀢𑀸 𑀚𑀦𑀺𑀢𑀸 𑀧𑀯𑀢𑁆𑀢𑀺𑀢𑀸 𑀲𑀬𑀜𑁆𑀘 𑀅𑀢𑁆𑀣𑀪𑀽𑀢𑀸𑀢𑀺𑀧𑀺 𑀚𑀸𑀧𑀺𑀢𑀢𑁆𑀣𑀸. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯𑀸𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁩.) 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁮. 𑀢𑀺𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀬𑁄𑀕𑀯𑀺𑀳𑀺𑀢𑁂𑀲𑀽𑀢𑀺 𑀬𑁄𑀕𑁄 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸; 𑀧𑀜𑁆𑀜𑀸𑀯𑀺𑀳𑀺𑀢𑁂𑀲𑀼 𑀧𑀜𑁆𑀜𑀸𑀧𑀭𑀺𑀡𑀸𑀫𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀸𑀬𑀢𑀦𑁂𑀲𑀽𑀢𑀺 𑀏𑀢𑁆𑀣 𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁; 𑀅𑀣 𑀯𑀸 𑀓𑀫𑁆𑀫𑀜𑁆𑀘 𑀢𑀁 𑀆𑀬𑀢𑀦𑀜𑁆𑀘 𑀆𑀚𑀻𑀯𑀸𑀤𑀻𑀦𑀦𑁆𑀢𑀺𑀧𑀺 ¶ 𑀓𑀫𑁆𑀫𑀸𑀬𑀢𑀦𑀁. 𑀲𑀺𑀧𑁆𑀧𑀸𑀬𑀢𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀓𑀫𑁆𑀫𑀁 𑁋 𑀳𑀻𑀦𑀜𑁆𑀘 𑀉𑀓𑁆𑀓𑀝𑁆𑀞𑀜𑁆𑀘. 𑀢𑀢𑁆𑀣 𑀳𑀻𑀦𑀁 𑀦𑀸𑀫 𑀯𑀟𑁆𑀠𑀓𑀻𑀓𑀫𑁆𑀫𑀁, 𑀧𑀼𑀧𑁆𑀨𑀙𑀟𑁆𑀟𑀓𑀓𑀫𑁆𑀫𑀦𑁆𑀢𑀺 𑀏𑀯𑀫𑀸𑀤𑀺. 𑀉𑀓𑁆𑀓𑀝𑁆𑀞𑀁 𑀦𑀸𑀫 𑀓𑀲𑀺, 𑀯𑀡𑀺𑀚𑁆𑀚𑀸, 𑀕𑁄𑀭𑀓𑁆𑀔𑀦𑁆𑀢𑀺 𑀏𑀯𑀫𑀸𑀤𑀺. 𑀲𑀺𑀧𑁆𑀧𑀫𑁆𑀧𑀺 𑀤𑀼𑀯𑀺𑀥𑀁 𑀳𑀻𑀦𑀜𑁆𑀘 𑀉𑀓𑁆𑀓𑀝𑁆𑀞𑀜𑁆𑀘. 𑀢𑀢𑁆𑀣 𑀳𑀻𑀦𑀁 𑀲𑀺𑀧𑁆𑀧𑀁 𑀦𑀸𑀫 𑀦𑀴𑀓𑀸𑀭𑀲𑀺𑀧𑁆𑀧𑀁, 𑀧𑁂𑀲𑀓𑀸𑀭𑀲𑀺𑀧𑁆𑀧𑀁, 𑀓𑀼𑀫𑁆𑀪𑀓𑀸𑀭𑀲𑀺𑀧𑁆𑀧𑀁, 𑀘𑀫𑁆𑀫𑀓𑀸𑀭𑀲𑀺𑀧𑁆𑀧𑀁, 𑀦𑁆𑀳𑀸𑀧𑀺𑀢𑀲𑀺𑀧𑁆𑀧𑀦𑁆𑀢𑀺 𑀏𑀯𑀫𑀸𑀤𑀺. 𑀉𑀓𑁆𑀓𑀝𑁆𑀞𑀁 𑀦𑀸𑀫 𑀲𑀺𑀧𑁆𑀧𑀁 𑀫𑀼𑀤𑁆𑀤𑀸, 𑀕𑀡𑀦𑀸, 𑀮𑁂𑀔𑀜𑁆𑀘𑀸𑀢𑀺 𑀏𑀯𑀫𑀸𑀤𑀺 𑀯𑀺𑀚𑁆𑀚𑀸𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁. 𑀢𑀁 𑀥𑀫𑁆𑀫𑀺𑀓𑀫𑁂𑀯 𑀕𑀳𑀺𑀢𑀁. 𑀦𑀸𑀕𑀫𑀡𑁆𑀟𑀮𑀧𑀭𑀺𑀢𑁆𑀢𑀲𑀤𑀺𑀲𑀁, 𑀨𑀼𑀥𑀫𑀦𑀓𑀫𑀦𑁆𑀢𑀲𑀤𑀺𑀲𑀁, 𑀲𑀸𑀮𑀸𑀓𑀺𑀬𑀁 ¶ , 𑀲𑀮𑁆𑀮𑀓𑀢𑁆𑀢𑀺𑀬𑀦𑁆𑀢𑀺𑀆𑀤𑀻𑀦𑀺 𑀧𑀦 𑀯𑁂𑀚𑁆𑀚𑀲𑀢𑁆𑀣𑀸𑀦𑀺 ‘‘𑀇𑀘𑁆𑀙𑀸𑀫𑀳𑀁, 𑀆𑀘𑀭𑀺𑀬, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁨𑁯) 𑀲𑀺𑀧𑁆𑀧𑀸𑀬𑀢𑀦𑁂 𑀧𑀯𑀺𑀝𑁆𑀞𑀢𑁆𑀢𑀸 𑀦 𑀕𑀳𑀺𑀢𑀸𑀦𑀺.

𑀢𑀢𑁆𑀣 𑀏𑀓𑁄 𑀧𑀡𑁆𑀟𑀺𑀢𑁄 𑀫𑀦𑀼𑀲𑁆𑀲𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀅𑀢𑁆𑀢𑀦𑁄 𑀘 𑀥𑀫𑁆𑀫𑀢𑀸𑀬 𑀕𑁂𑀳𑀧𑀸𑀲𑀸𑀤𑀬𑀸𑀦𑀦𑀸𑀯𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀳𑀺 ‘𑀇𑀫𑁂 𑀫𑀦𑀼𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑁂𑀦 𑀯𑀺𑀦𑀸 𑀤𑀼𑀓𑁆𑀔𑀺𑀢𑀸’𑀢𑀺 𑀳𑀺𑀢𑀓𑀺𑀭𑀺𑀬𑀸𑀬 𑀞𑀢𑁆𑀯𑀸 𑀤𑀻𑀖𑀘𑀢𑀼𑀭𑀲𑁆𑀲𑀸𑀤𑀺𑀪𑁂𑀤𑀁 𑀕𑁂𑀳𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀻𑀢𑀼𑀡𑁆𑀳𑀧𑀝𑀺𑀖𑀸𑀢𑀢𑁆𑀣𑀸𑀬 𑀏𑀓𑀪𑀽𑀫𑀺𑀓𑀤𑁆𑀯𑀺𑀪𑀽𑀫𑀺𑀓𑀸𑀤𑀺𑀪𑁂𑀤𑁂 𑀧𑀸𑀲𑀸𑀤𑁂 𑀓𑀭𑁄𑀢𑀺, ‘𑀬𑀸𑀦𑁂 𑀅𑀲𑀢𑀺 𑀅𑀦𑀼𑀲𑀜𑁆𑀘𑀭𑀡𑀁 𑀦𑀸𑀫 𑀤𑀼𑀓𑁆𑀔’𑀦𑁆𑀢𑀺 𑀚𑀗𑁆𑀖𑀸𑀓𑀺𑀮𑀫𑀣𑀧𑀝𑀺𑀯𑀺𑀦𑁄𑀤𑀦𑀢𑁆𑀣𑀸𑀬 𑀯𑀬𑁆𑀳𑀲𑀓𑀝𑀲𑀦𑁆𑀤𑀫𑀸𑀦𑀺𑀓𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀢𑀺, ‘𑀦𑀸𑀯𑀸𑀬 𑀅𑀲𑀢𑀺 𑀲𑀫𑀼𑀤𑁆𑀤𑀸𑀤𑀻𑀲𑀼 𑀲𑀜𑁆𑀘𑀸𑀭𑁄 𑀦𑀸𑀫 𑀦𑀢𑁆𑀣𑀻’𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀦𑀸𑀯𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀬𑀺𑀭𑀫𑀸𑀦𑀁 𑀧𑀲𑁆𑀲𑀢𑀺, 𑀦 𑀓𑀢𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 ¶ 𑀓𑀣𑁂𑀦𑁆𑀢𑀸𑀦𑀁 𑀲𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀧𑀦 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀭𑁄𑀢𑀺. 𑀧𑀜𑁆𑀜𑀯𑀢𑀸 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀢𑀫𑁆𑀧𑀺 𑀅𑀜𑁆𑀜𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀭𑁄𑀦𑁆𑀢𑁂𑀳𑀺 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀅𑀬𑀁 𑀢𑀸𑀯 𑀳𑀻𑀦𑀓𑀫𑁆𑀫𑁂 𑀦𑀬𑁄.

𑀉𑀓𑁆𑀓𑀝𑁆𑀞𑀓𑀫𑁆𑀫𑁂𑀧𑀺 ‘𑀓𑀲𑀺𑀓𑀫𑁆𑀫𑁂 𑀅𑀲𑀢𑀺 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀁 𑀦 𑀧𑀯𑀢𑁆𑀢𑀢𑀻’𑀢𑀺 𑀏𑀓𑁄 𑀧𑀡𑁆𑀟𑀺𑀢𑁄 𑀫𑀦𑀼𑀲𑁆𑀲𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀓𑀲𑀺𑀪𑀡𑁆𑀟𑀸𑀦𑀺 𑀉𑀧𑁆𑀧𑀸𑀤𑁂𑀢𑀺; 𑀢𑀣𑀸 𑀦𑀸𑀦𑀧𑁆𑀧𑀓𑀸𑀭𑀁 𑀯𑀸𑀡𑀺𑀚𑀓𑀫𑁆𑀫𑀁 𑀕𑁄𑀭𑀓𑁆𑀔𑀜𑁆𑀘 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀁 𑀧𑀲𑁆𑀲𑀢𑀺…𑀧𑁂… 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀅𑀬𑀁 𑀉𑀓𑁆𑀓𑀝𑁆𑀞𑀓𑀫𑁆𑀫𑁂 𑀦𑀬𑁄.

𑀤𑀼𑀯𑀺𑀥𑁂𑀧𑀺 𑀧𑀦 𑀲𑀺𑀧𑁆𑀧𑀸𑀬𑀢𑀦𑁂 𑀏𑀓𑁄 𑀧𑀡𑁆𑀟𑀺𑀢𑁄 𑀫𑀦𑀼𑀲𑁆𑀲𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀦𑀴𑀓𑀸𑀭𑀲𑀺𑀧𑁆𑀧𑀸𑀤𑀻𑀦𑀺 𑀳𑀻𑀦𑀲𑀺𑀧𑁆𑀧𑀸𑀦𑀺, 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀲𑀗𑁆𑀔𑀸𑀢𑀁 𑀫𑀼𑀤𑁆𑀤𑀁, 𑀅𑀘𑁆𑀙𑀺𑀦𑁆𑀦𑀓𑀲𑀗𑁆𑀔𑀸𑀢𑀁 𑀕𑀡𑀦𑀁, 𑀫𑀸𑀢𑀺𑀓𑀸𑀧𑁆𑀧𑀪𑁂𑀤𑀓𑀸𑀤𑀺𑀪𑁂𑀤𑀜𑁆𑀘 𑀮𑁂𑀔𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀁 𑀧𑀲𑁆𑀲𑀢𑀺…𑀧𑁂… 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀅𑀬𑀁 𑀲𑀺𑀧𑁆𑀧𑀸𑀬𑀢𑀦𑁂 𑀦𑀬𑁄.

𑀏𑀓𑀘𑁆𑀘𑁄 ¶ 𑀧𑀦 𑀧𑀡𑁆𑀟𑀺𑀢𑁄 𑀅𑀫𑀦𑀼𑀲𑁆𑀲𑀲𑀭𑀻𑀲𑀧𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀢𑀺𑀓𑀺𑀘𑁆𑀙𑀦𑀢𑁆𑀣𑀸𑀬 𑀥𑀫𑁆𑀫𑀺𑀓𑀸𑀦𑀺 𑀦𑀸𑀕𑀫𑀡𑁆𑀟𑀮𑀫𑀦𑁆𑀢𑀸𑀤𑀻𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀸𑀦𑀺 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀸𑀦𑀺 𑀧𑀲𑁆𑀲𑀢𑀺, 𑀦 𑀓𑀢𑀸𑀦𑀺 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀣𑁂𑀦𑁆𑀢𑀸𑀦𑀁 𑀲𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀧𑀦 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀭𑁄𑀢𑀺. 𑀧𑀜𑁆𑀜𑀯𑀢𑀸 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀢𑀫𑁆𑀧𑀺 𑀅𑀜𑁆𑀜𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀭𑁄𑀦𑁆𑀢𑁂𑀳𑀺 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀺.

𑀓𑀫𑁆𑀫𑀲𑁆𑀲𑀓𑀢𑀁 ¶ 𑀯𑀸𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀲𑀢𑁆𑀢𑀸𑀦𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑀜𑀸𑀡𑀁. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀜𑁆𑀳𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀮𑁄𑀫𑀦𑀢𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀆𑀕𑀢𑀁, 𑀦 𑀤𑀼𑀓𑁆𑀔𑀮𑀓𑁆𑀔𑀡𑀅𑀦𑀢𑁆𑀢𑀮𑀓𑁆𑀔𑀡𑀸𑀦𑀺, 𑀅𑀢𑁆𑀣𑀯𑀲𑁂𑀦 𑀧𑀦 𑀆𑀕𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸𑀦𑀺 𑁋 𑀬𑀜𑁆𑀳𑀺 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸𑀢𑀺.

𑀬𑀁 𑀏𑀯𑀭𑀽𑀧𑀺𑀦𑁆𑀢𑀺 𑀬𑀁 𑀏𑀯𑀁 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑀪𑀸𑀯𑀁 𑀅𑀦𑀼𑀮𑁄𑀫𑀺𑀓𑀁. 𑀔𑀦𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑁂𑀯. 𑀲𑀸 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀭𑀡𑀸𑀦𑀁 𑀅𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑁂𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀦𑀼𑀮𑁄𑀫𑀺𑀓𑀸. 𑀢𑀣𑀸 ¶ 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸𑀬 𑀅𑀦𑀼𑀮𑁄𑀫𑁂𑀢𑀺, 𑀫𑀕𑁆𑀕𑀲𑀘𑁆𑀘𑀲𑁆𑀲 𑀅𑀦𑀼𑀮𑁄𑀫𑁂𑀢𑀺, 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑁂𑀢𑀻𑀢𑀺𑀧𑀺 𑀅𑀦𑀼𑀮𑁄𑀫𑀺𑀓𑀸. 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀓𑀸𑀭𑀡𑀸𑀦𑀺 𑀔𑀫𑀢𑀺 𑀲𑀳𑀢𑀺 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀻𑀢𑀺 𑀔𑀦𑁆𑀢𑀺, 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺, 𑀭𑁄𑀘𑁂𑀢𑀻𑀢𑀺 𑀭𑀼𑀘𑀺, 𑀫𑀼𑀤𑀢𑀻𑀢𑀺 𑀫𑀼𑀤𑀺, 𑀧𑁂𑀓𑁆𑀔𑀢𑀻𑀢𑀺 𑀧𑁂𑀓𑁆𑀔𑀸. 𑀲𑀩𑁆𑀩𑁂𑀧𑀺𑀲𑁆𑀲𑀸 𑀢𑁂 𑀓𑀫𑁆𑀫𑀸𑀬𑀢𑀦𑀸𑀤𑀬𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀘 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀯𑀲𑁂𑀦 𑀦𑀺𑀚𑁆𑀛𑀸𑀬𑀫𑀸𑀦𑀸 𑀢𑀁 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀥𑀫𑁆𑀫𑀦𑀺𑀚𑁆𑀛𑀸𑀦𑀔𑀦𑁆𑀢𑀻.

𑀧𑀭𑀢𑁄 𑀅𑀲𑁆𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀅𑀜𑁆𑀜𑀲𑁆𑀲 𑀉𑀧𑀤𑁂𑀲𑀯𑀘𑀦𑀁 𑀅𑀲𑁆𑀲𑀼𑀢𑁆𑀯𑀸 𑀲𑀬𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄 𑀧𑀝𑀺𑀮𑀪𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀪𑀺𑀜𑁆𑀜𑀸𑀢𑀸𑀦𑀁 𑀧𑀦 𑀫𑀳𑀸𑀲𑀢𑁆𑀢𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣𑀸𑀧𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀤𑁆𑀯𑀺𑀦𑁆𑀦𑀁𑀬𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀧𑀜𑁆𑀜𑀸 𑀲𑀩𑁆𑀩𑁂𑀲𑀫𑁆𑀧𑀺 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀭𑀢𑁄 ¶ 𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀏𑀢𑁆𑀣 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀧𑀭𑁂𑀦 𑀓𑀭𑀺𑀬𑀫𑀸𑀦𑀸𑀦𑀺 𑀯𑀸 𑀓𑀢𑀸𑀦𑀺 𑀯𑀸 𑀤𑀺𑀲𑁆𑀯𑀸𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀣𑀬𑀫𑀸𑀦𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀮𑀤𑁆𑀥𑀸 𑀲𑀩𑁆𑀩𑀸 𑀧𑀭𑀢𑁄 𑀲𑀼𑀢𑁆𑀯𑀸𑀬𑁂𑀯 𑀧𑀝𑀺𑀮𑀤𑁆𑀥𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀺𑀲𑁆𑀲; 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁭𑁬𑁯. 𑀤𑀸𑀦𑀁 ¶ 𑀆𑀭𑀩𑁆𑀪𑀸𑀢𑀺 𑀤𑀸𑀦𑀁 𑀧𑀝𑀺𑀘𑁆𑀘; 𑀤𑀸𑀦𑀘𑁂𑀢𑀦𑀸𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀤𑀸𑀦𑀸𑀥𑀺𑀕𑀘𑁆𑀙𑀸𑀢𑀺 𑀤𑀸𑀦𑀁 𑀅𑀥𑀺𑀕𑀘𑁆𑀙𑀦𑁆𑀢𑀲𑁆𑀲; 𑀧𑀸𑀧𑀼𑀡𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀸 𑀏𑀯𑀁 𑀤𑀸𑀦𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀤𑀸𑀦𑀫𑀬𑀸 𑀧𑀜𑁆𑀜𑀸 𑀦𑀸𑀫. 𑀲𑀸 𑀧𑀦𑁂𑀲𑀸 ‘𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲, 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲, 𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 ¶ 𑀧𑀼𑀩𑁆𑀩𑀘𑁂𑀢𑀦𑀸, 𑀫𑀼𑀜𑁆𑀘𑀘𑁂𑀢𑀦𑀸, 𑀅𑀧𑀭𑀘𑁂𑀢𑀦𑀸𑀢𑀺 𑀢𑀺𑀯𑀺𑀥𑁂𑀦 𑀉𑀧𑁆𑀧𑀚𑁆𑀚𑀢𑀺.

𑀲𑀻𑀮𑀁 𑀆𑀭𑀩𑁆𑀪 𑀲𑀻𑀮𑀸𑀥𑀺𑀕𑀘𑁆𑀙𑀸𑀢𑀺 𑀇𑀥𑀸𑀧𑀺 𑀲𑀻𑀮𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯 𑀲𑀻𑀮𑀫𑀬𑀸 𑀧𑀜𑁆𑀜𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀬𑀫𑁆𑀧𑀺 ‘𑀲𑀻𑀮𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲, 𑀲𑀻𑀮𑀁 𑀧𑀽𑀭𑁂𑀦𑁆𑀢𑀲𑁆𑀲, 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀼𑀩𑁆𑀩𑀘𑁂𑀢𑀦𑀸, 𑀫𑀼𑀜𑁆𑀘𑀘𑁂𑀢𑀦𑀸, 𑀅𑀧𑀭𑀘𑁂𑀢𑀦𑀸𑀢𑀺 𑀢𑀺𑀯𑀺𑀥𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀪𑀸𑀯𑀦𑀸𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯.

𑁭𑁭𑁦. 𑀅𑀥𑀺𑀲𑀻𑀮𑀧𑀜𑁆𑀜𑀸𑀤𑀻𑀲𑀼 𑀲𑀻𑀮𑀸𑀤𑀻𑀦𑀺 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀲𑀻𑀮𑀁, 𑀅𑀥𑀺𑀲𑀻𑀮𑀁; 𑀘𑀺𑀢𑁆𑀢𑀁, 𑀅𑀥𑀺𑀘𑀺𑀢𑁆𑀢𑀁; 𑀧𑀜𑁆𑀜𑀸, 𑀅𑀥𑀺𑀧𑀜𑁆𑀜𑀸𑀢𑀺. 𑀢𑀢𑁆𑀣 ‘‘𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺 (𑀲𑀁. 𑀦𑀺. 𑁨.𑁨𑁦; 𑀅. 𑀦𑀺. 𑁩.𑁧𑁩𑁭) 𑀇𑀫𑀸𑀬 𑀢𑀦𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀯𑀲𑁂𑀦 𑀧𑀜𑁆𑀘𑀧𑀺 𑀲𑀻𑀮𑀸𑀦𑀺 𑀤𑀲𑀧𑀺 𑀲𑀻𑀮𑀸𑀦𑀺 𑀲𑀻𑀮𑀁 𑀦𑀸𑀫. 𑀢𑀜𑁆𑀳𑀺 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀳𑁄𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀓𑁂 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺? 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀘 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀉𑀧𑁆𑀧𑀦𑁆𑀦𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑁄, 𑀉𑀧𑀸𑀲𑀓𑀸, 𑀉𑀧𑀸𑀲𑀺𑀓𑀸𑀬𑁄 𑀘 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀧𑀦 𑀲𑀩𑁆𑀩𑀲𑀻𑀮𑁂𑀳𑀺 𑀅𑀥𑀺𑀓𑀁 𑀉𑀧𑁆𑀧𑀦𑁆𑀦𑁂𑀬𑁂𑀯 𑀢𑀣𑀸𑀕𑀢𑁂 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀅𑀦𑀼𑀧𑁆𑀧𑀦𑁆𑀦𑁂. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀬𑁂𑀯 𑀘 𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀇𑀤𑀁 𑀦𑀸𑀫 𑀳𑁄𑀢𑀻’’𑀢𑀺 𑀧𑀜𑁆𑀜𑀸𑀧𑀦𑀜𑁆𑀳𑀺 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀏𑀲 𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁 𑀩𑀮𑀁. 𑀇𑀢𑀺 𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀅𑀥𑀺𑀲𑀻𑀮𑀁, 𑀢𑀲𑁆𑀫𑀸 𑀢𑀁 𑀅𑀥𑀺𑀲𑀻𑀮𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀲𑀁𑀯𑀭𑀦𑁆𑀢𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀳𑁂𑀝𑁆𑀞𑀸 ¶ 𑀯𑀼𑀢𑁆𑀢𑀸𑀬 𑀏𑀯 𑀧𑀦 𑀢𑀦𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀯𑀲𑁂𑀦 𑀯𑀝𑁆𑀝𑀧𑀸𑀤𑀺𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀺𑀢𑁆𑀢𑀁 𑀦𑀸𑀫. 𑀢𑀜𑁆𑀳𑀺 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 𑀳𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀓𑁂 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺? 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀘𑁂𑀯 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸 𑀘 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀘. 𑀉𑀧𑁆𑀧𑀦𑁆𑀦𑁂 𑀪𑀕𑀯𑀢𑀺 𑀯𑀺𑀲𑁂𑀲𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀆𑀤𑀬𑁄𑀧𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺𑀬𑁂𑀯. 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀢𑁆𑀢𑁂𑀳𑀺 ¶ 𑀅𑀥𑀺𑀓𑀸, 𑀉𑀧𑁆𑀧𑀦𑁆𑀦𑁂𑀬𑁂𑀯 𑀢𑀣𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀅𑀦𑀼𑀧𑁆𑀧𑀦𑁆𑀦𑁂. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀏𑀯 𑀘 𑀏𑀢𑀸 𑀧𑀜𑁆𑀜𑀸𑀧𑁂𑀦𑁆𑀢𑀺 ¶ . 𑀇𑀢𑀺 𑀬𑀲𑁆𑀫𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀅𑀥𑀺𑀘𑀺𑀢𑁆𑀢𑀁, 𑀢𑀲𑁆𑀫𑀸 𑀅𑀥𑀺𑀘𑀺𑀢𑁆𑀢𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬 𑀏𑀯 𑀧𑀦 𑀢𑀦𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀯𑀲𑁂𑀦 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀧𑀜𑁆𑀜𑀸 𑀦𑀸𑀫. 𑀢𑀜𑁆𑀳𑀺 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 𑀳𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀯𑁂𑀮𑀸𑀫𑀤𑀸𑀦𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺; 𑀉𑀧𑁆𑀧𑀦𑁆𑀦𑁂 𑀢𑁂𑀦 𑀜𑀸𑀡𑁂𑀦 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀫𑀕𑁆𑀕𑀨𑀮𑀧𑀜𑁆𑀜𑀸 𑀧𑀦 𑀲𑀩𑁆𑀩𑀧𑀜𑁆𑀜𑀸𑀳𑀺 𑀅𑀥𑀺𑀓𑀸, 𑀉𑀧𑁆𑀧𑀦𑁆𑀦𑁂𑀬𑁂𑀯 𑀢𑀣𑀸𑀕𑀢𑁂 𑀯𑀺𑀢𑁆𑀣𑀸𑀭𑀺𑀓𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦𑁄 𑀅𑀦𑀼𑀧𑁆𑀧𑀦𑁆𑀦𑁂. 𑀇𑀢𑀺 𑀬𑀲𑁆𑀫𑀸 𑀫𑀕𑁆𑀕𑀨𑀮𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀸, 𑀢𑀲𑁆𑀫𑀸 𑀅𑀢𑀺𑀭𑁂𑀓𑀧𑀜𑁆𑀜𑀸𑀬 𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀘𑀢𑀽𑀲𑀼 𑀫𑀕𑁆𑀕𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀺𑀬𑀸 𑁋 𑀲𑀻𑀮𑀁, 𑀅𑀥𑀺𑀲𑀻𑀮𑀁; 𑀘𑀺𑀢𑁆𑀢𑀁, 𑀅𑀥𑀺𑀘𑀺𑀢𑁆𑀢𑀁; 𑀧𑀜𑁆𑀜𑀸, 𑀅𑀥𑀺𑀧𑀜𑁆𑀜𑀸𑀢𑀺 𑀇𑀫𑁂𑀲𑀼 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀓𑀢𑀭𑀲𑀦𑁆𑀦𑀺𑀲𑁆𑀲𑀺𑀢𑀸𑀢𑀺? 𑀅𑀥𑀺𑀧𑀜𑁆𑀜𑀸𑀲𑀦𑁆𑀦𑀺𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀬𑀣𑀸 𑀑𑀫𑀓𑀢𑀭𑀧𑁆𑀧𑀫𑀸𑀡𑀁 𑀙𑀢𑁆𑀢𑀁 𑀯𑀸 𑀥𑀚𑀁 𑀯𑀸 𑀉𑀧𑀸𑀤𑀸𑀬 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁 𑀅𑀢𑀺𑀙𑀢𑁆𑀢𑀁 𑀅𑀢𑀺𑀥𑀚𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁 𑀉𑀧𑀸𑀤𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 ‘𑀅𑀥𑀺𑀲𑀻𑀮𑀁’ 𑀦𑀸𑀫; 𑀯𑀝𑁆𑀝𑀧𑀸𑀤𑀺𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑀸𑀤𑀸𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 ‘𑀅𑀥𑀺𑀘𑀺𑀢𑁆𑀢𑀁’ 𑀦𑀸𑀫, 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀁 𑀉𑀧𑀸𑀤𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘 𑀫𑀕𑁆𑀕𑀧𑀜𑁆𑀜𑀸 𑀘 𑀨𑀮𑀧𑀜𑁆𑀜𑀸 𑀘 ‘𑀅𑀥𑀺𑀧𑀜𑁆𑀜𑀸’ 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁭𑁭𑁧. 𑀆𑀬𑀓𑁄𑀲𑀮𑁆𑀮𑀸𑀤𑀺𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀆𑀬𑁄𑀢𑀺 𑀯𑀼𑀟𑁆𑀠𑀺, 𑀲𑀸 𑀅𑀦𑀢𑁆𑀣𑀳𑀸𑀦𑀺𑀢𑁄 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸; 𑀅𑀧𑀸𑀬𑁄𑀢𑀺 𑀅𑀯𑀼𑀟𑁆𑀠𑀺, 𑀲𑀸𑀧𑀺 𑀅𑀢𑁆𑀣𑀳𑀸𑀦𑀺𑀢𑁄 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸; 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀫𑁂 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀬𑀸 𑀇𑀫𑁂𑀲𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀧𑁆𑀧𑀳𑀸𑀦𑁂𑀲𑀼 𑀓𑀼𑀲𑀮𑀥𑀫𑁆𑀫𑀸𑀦𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀲𑀼 𑀧𑀜𑁆𑀜𑀸 𑁋 𑀇𑀤𑀁 𑀆𑀬𑀓𑁄𑀲𑀮𑁆𑀮𑀁 ¶ 𑀦𑀸𑀫 𑀯𑀼𑀘𑁆𑀘𑀢𑀺. 𑀬𑀸 𑀧𑀦𑁂𑀲𑀸 𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑁂𑀲𑀼 𑀅𑀓𑀼𑀲𑀮𑀥𑀫𑁆𑀫𑀸𑀦𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀲𑀼 𑀧𑀜𑁆𑀜𑀸 𑁋 𑀇𑀤𑀁 𑀅𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀆𑀬𑀓𑁄𑀲𑀮𑁆𑀮𑀁 𑀢𑀸𑀯 𑀧𑀜𑁆𑀜𑀸 𑀳𑁄𑀢𑀼; 𑀅𑀧𑀸𑀬𑀓𑁄𑀲𑀮𑁆𑀮𑀁 𑀓𑀣𑀁 𑀧𑀜𑁆𑀜𑀸 𑀦𑀸𑀫 𑀚𑀸𑀢𑀸𑀢𑀺? 𑀧𑀜𑁆𑀜𑀯𑀸𑀬𑁂𑀯 𑀳𑀺 ‘𑀫𑀬𑁆𑀳𑀁 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀦𑀺𑀭𑀼𑀚𑁆𑀛𑀦𑁆𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀯𑀟𑁆𑀠𑀦𑁆𑀢𑀻’𑀢𑀺 ¶ 𑀧𑀚𑀸𑀦𑀸𑀢𑀺. 𑀲𑁄 𑀏𑀯𑀁 𑀜𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀢𑀺, 𑀉𑀧𑁆𑀧𑀦𑁆𑀦𑁂 𑀧𑀚𑀳𑀢𑀺; 𑀅𑀦𑀼𑀧𑁆𑀧𑀦𑁆𑀦𑁂 𑀓𑀼𑀲𑀮𑁂 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 ¶ 𑀧𑀸𑀧𑁂𑀢𑀺. 𑀏𑀯𑀁 𑀅𑀧𑀸𑀬𑀓𑁄𑀲𑀮𑁆𑀮𑀫𑁆𑀧𑀺 𑀧𑀜𑁆𑀜𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀸𑀧𑀺 𑀢𑀢𑁆𑀭𑀽𑀧𑀸𑀬𑀸 𑀧𑀜𑁆𑀜𑀸 𑀉𑀧𑀸𑀬𑀓𑁄𑀲𑀮𑁆𑀮𑀦𑁆𑀢𑀺 𑀇𑀤𑀁 𑀧𑀦 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑁂 𑀯𑀸 𑀪𑀬𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀢𑀺𑀓𑀺𑀘𑁆𑀙𑀦𑀢𑁆𑀣𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀓𑀸𑀭𑀡𑀚𑀸𑀦𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁪.) 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁯𑁩. 𑀘𑀢𑀼𑀩𑁆𑀩𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀅𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀤𑀺𑀦𑁆𑀦𑀧𑀘𑁆𑀘𑀬𑀸 𑀨𑀮𑀁 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀜𑀸𑀡𑀁 ‘𑀇𑀤𑀁 𑀓𑀫𑁆𑀫𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’𑀦𑁆𑀢𑀺 𑀚𑀸𑀦𑀸𑀢𑀺 𑁋 𑀇𑀤𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀇𑀤𑀁 𑀦 𑀲𑀓𑀓𑀫𑁆𑀫𑀁 𑀦𑀸𑀫. 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀤𑀲𑀯𑀺𑀥𑀫𑁆𑀧𑀺 𑀲𑀼𑀘𑀭𑀺𑀢𑀁 𑀲𑀓𑀓𑀫𑁆𑀫𑀁 𑀦𑀸𑀫. 𑀅𑀢𑁆𑀢𑀦𑁄 𑀯𑀸𑀧𑀺 𑀳𑁄𑀢𑀼 𑀧𑀭𑀲𑁆𑀲 𑀯𑀸 𑀲𑀩𑁆𑀩𑀫𑁆𑀧𑀺 𑀅𑀓𑀼𑀲𑀮𑀁 𑀦 𑀲𑀓𑀓𑀫𑁆𑀫𑀁 𑀦𑀸𑀫. 𑀓𑀲𑁆𑀫𑀸? 𑀅𑀢𑁆𑀣𑀪𑀜𑁆𑀚𑀦𑀢𑁄 𑀅𑀦𑀢𑁆𑀣𑀚𑀦𑀦𑀢𑁄 𑀘. 𑀅𑀢𑁆𑀢𑀦𑁄 𑀯𑀸 𑀳𑁄𑀢𑀼 𑀧𑀭𑀲𑁆𑀲 𑀯𑀸 𑀲𑀩𑁆𑀩𑀫𑁆𑀧𑀺 𑀓𑀼𑀲𑀮𑀁 𑀲𑀓𑀓𑀫𑁆𑀫𑀁 𑀦𑀸𑀫. 𑀓𑀲𑁆𑀫𑀸? 𑀅𑀦𑀢𑁆𑀣𑀪𑀜𑁆𑀚𑀦𑀢𑁄 𑀅𑀢𑁆𑀣𑀚𑀦𑀦𑀢𑁄 𑀘. 𑀏𑀯𑀁 𑀚𑀸𑀦𑀦𑀲𑀫𑀢𑁆𑀣𑁂 𑀇𑀫𑀲𑁆𑀫𑀺𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑁂 𑀞𑀢𑁆𑀯𑀸 𑀩𑀳𑀼𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀔𑁂𑀦 𑀲𑀼𑀔𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀬𑀣𑀸 𑀳𑀺 𑀲𑀥𑀦𑁄 𑀧𑀼𑀭𑀺𑀲𑁄 𑀧𑀜𑁆𑀘𑀲𑀼 𑀲𑀓𑀝𑀲𑀢𑁂𑀲𑀼 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀮𑁄𑀡𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀘 𑀆𑀭𑁄𑀧𑁂𑀢𑁆𑀯𑀸 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀢𑁆𑀣𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑁂𑀲𑀁 𑀉𑀧𑀓𑀭𑀡𑀸𑀦𑀁 𑀕𑀳𑀺𑀢𑀢𑁆𑀢𑀸 𑀦 𑀘𑀺𑀦𑁆𑀢𑁂𑀢𑀺, 𑀦 𑀧𑀭𑀺𑀢𑀲𑁆𑀲𑀢𑀺, 𑀲𑀼𑀔𑁂𑀦𑁂𑀯 𑀔𑁂𑀫𑀦𑁆𑀢𑀁 ¶ 𑀧𑀸𑀧𑀼𑀡𑀸𑀢𑀺; 𑀏𑀯𑀫𑁂𑀯 𑀇𑀫𑀲𑁆𑀫𑀺𑀫𑁆𑀧𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑁂 𑀞𑀢𑁆𑀯𑀸 𑀩𑀳𑀼𑀁 𑀤𑀸𑀦𑀁 𑀤𑀢𑁆𑀯𑀸…𑀧𑁂… 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸𑀦𑀁 𑀕𑀡𑀦𑀧𑀣𑁄 𑀦𑀢𑁆𑀣𑀺. 𑀞𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀘 𑀅𑀦𑀼𑀮𑁄𑀫𑀦𑀢𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁭𑁯𑁪. 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 ¶ 𑀜𑀸𑀡𑀁 𑀤𑀼𑀓𑁆𑀔𑁂𑀧𑁂𑀢𑀁 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀏𑀓𑀫𑁂𑀯 ¶ 𑀫𑀕𑁆𑀕𑀜𑀸𑀡𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀗𑁆𑀕𑀳𑀺𑀢𑀁.

𑁭𑁯𑁬. 𑀥𑀫𑁆𑀫𑁂 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀫𑀕𑁆𑀕𑀧𑀜𑁆𑀜𑀸 𑀢𑀸𑀯 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 𑀥𑀫𑁆𑀫𑁂 𑀜𑀸𑀡𑀁 𑀦𑀸𑀫 𑀳𑁄𑀢𑀼; 𑀨𑀮𑀧𑀜𑁆𑀜𑀸 𑀓𑀣𑀁 𑀥𑀫𑁆𑀫𑁂 𑀜𑀸𑀡𑀁 𑀦𑀸𑀫𑀸𑀢𑀺? 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦. 𑀤𑀼𑀯𑀺𑀥𑀸𑀧𑀺 𑀳𑁂𑀲𑀸 𑀧𑀜𑁆𑀜𑀸 𑀅𑀧𑀭𑀧𑁆𑀧𑀘𑁆𑀘𑀬𑁂 𑀅𑀢𑁆𑀣𑀧𑀘𑁆𑀘𑀓𑁆𑀔𑁂 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁂 𑀓𑀺𑀘𑁆𑀘𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀧𑀯𑀢𑁆𑀢𑀢𑁆𑀢𑀸 𑀥𑀫𑁆𑀫𑁂 𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀫𑀕𑁆𑀕𑀜𑀸𑀡𑀁 𑀥𑀫𑁆𑀫𑀕𑁄𑀘𑀭𑀢𑁆𑀢𑀸 𑀕𑁄𑀘𑀭𑀯𑁄𑀳𑀸𑀭𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑀁, 𑀉𑀧𑀬𑁄𑀕𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁; 𑀇𑀫𑀁 𑀥𑀫𑁆𑀫𑀁 𑀜𑀸𑀢𑁂𑀦𑀸𑀢𑀺 𑀅𑀢𑁆𑀣𑁄; 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀞𑀺𑀢𑁂𑀦 𑀫𑀕𑁆𑀕𑀜𑀸𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀝𑁆𑀞𑁂𑀦𑀸𑀢𑀺 𑀤𑀲𑁆𑀲𑀦𑁂𑀦; 𑀥𑀫𑁆𑀫𑀁 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀢𑁆𑀢𑁂𑀦𑀸𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀢𑁆𑀯𑀸 𑀞𑀺𑀢𑀢𑁆𑀢𑀸 𑀥𑀫𑁆𑀫𑀁 𑀧𑀢𑁆𑀢𑁂𑀦. 𑀯𑀺𑀤𑀺𑀢𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀤𑀺𑀢𑀸𑀦𑀺 𑀧𑀸𑀓𑀝𑀸𑀦𑀺 𑀓𑀢𑀸𑀦𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀁 𑀯𑀺𑀤𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀺𑀤𑀺𑀢𑀥𑀫𑁆𑀫𑁂𑀦. 𑀧𑀭𑀺𑀬𑁄𑀕𑀸𑀴𑁆𑀳𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀞𑀺𑀢𑁂𑀦. 𑀦𑀬𑀁 𑀦𑁂𑀢𑀻𑀢𑀺 𑀅𑀢𑀻𑀢𑁂 𑀘 𑀅𑀦𑀸𑀕𑀢𑁂 𑀘 𑀦𑀬𑀁 𑀦𑁂𑀢𑀺 𑀳𑀭𑀢𑀺 𑀧𑁂𑀲𑁂𑀢𑀺. 𑀇𑀤𑀁 𑀧𑀦 𑀦 𑀫𑀕𑁆𑀕𑀜𑀸𑀡𑀲𑁆𑀲 𑀓𑀺𑀘𑁆𑀘𑀁, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀓𑀺𑀘𑁆𑀘𑀁. 𑀲𑀢𑁆𑀣𑀸𑀭𑀸 𑀧𑀦 𑀫𑀕𑁆𑀕𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑀬𑀦𑀲𑀤𑀺𑀲𑀁 𑀓𑀢𑀁. 𑀓𑀲𑁆𑀫𑀸? 𑀫𑀕𑁆𑀕𑀫𑀽𑀮𑀓𑀢𑁆𑀢𑀸. 𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀫𑀕𑁆𑀕𑀜𑀸𑀡𑀫𑁂𑀯 𑀦𑀬𑀁 𑀦𑀬𑀦𑀲𑀤𑀺𑀲𑀁 𑀅𑀓𑀸𑀲𑀺. 𑀅𑀧𑀺𑀘 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀬𑀤𑁂𑀢𑀁 𑀇𑀫𑀺𑀦𑀸 𑀘𑀢𑀼𑀲𑀘𑁆𑀘𑀕𑁄𑀘𑀭𑀁 𑀫𑀕𑁆𑀕𑀜𑀸𑀡𑀁 𑀅𑀥𑀺𑀕𑀢𑀁, 𑀢𑁂𑀦 𑀜𑀸𑀡𑁂𑀦 𑀓𑀸𑀭𑀡𑀪𑀽𑀢𑁂𑀦 𑀅𑀢𑀻𑀢𑀸𑀦𑀸𑀕𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑀗𑁆𑀔𑀸𑀢𑀁 𑀦𑀬𑀁 𑀦𑁂𑀢𑀺.

𑀇𑀤𑀸𑀦𑀺 𑀬𑀣𑀸 𑀢𑁂𑀦 𑀦𑀬𑀁 𑀦𑁂𑀢𑀺, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀬𑁂 𑀳𑀺 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀩𑁆𑀪𑀜𑁆𑀜𑀁𑀲𑀽𑀢𑀺 𑀚𑀸𑀦𑀺𑀁𑀲𑀼 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀇𑀫𑀜𑁆𑀜𑁂𑀯𑀸𑀢𑀺 𑀬𑀁 𑀤𑀼𑀓𑁆𑀔𑀁 𑀅𑀢𑀻𑀢𑁂 𑀅𑀩𑁆𑀪𑀜𑁆𑀜𑀁𑀲𑀼, 𑀬𑀜𑁆𑀘 𑀅𑀦𑀸𑀕𑀢𑁂 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀦 𑀢𑀜𑁆𑀜𑁂𑀯 𑀇𑀫𑀁; 𑀲𑀭𑀺𑀓𑁆𑀔𑀝𑁆𑀞𑁂𑀦 𑀧𑀦 𑀏𑀯𑀁 𑀯𑀼𑀢𑁆𑀢𑀁. 𑀅𑀢𑀻𑀢𑁂𑀧𑀺 𑀳𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀢𑁂𑀪𑀽𑀫𑀓𑀓𑁆𑀔𑀦𑁆𑀥𑁂𑀬𑁂𑀯 ¶ 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀁𑀲𑀼, 𑀢𑀡𑁆𑀳𑀁𑀬𑁂𑀯 ¶ 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑁂𑀯 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀁𑀲𑀼, 𑀅𑀦𑀸𑀕𑀢𑁂𑀧𑀺 𑀏𑀯𑀫𑁂𑀯 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺, 𑀏𑀢𑀭𑀳𑀺𑀧𑀺 𑀏𑀯𑀫𑁂𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺 𑀲𑀭𑀺𑀓𑁆𑀔𑀝𑁆𑀞𑁂𑀦 ‘‘𑀇𑀫𑀜𑁆𑀜𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑁆𑀯𑀬𑁂 𑀜𑀸𑀡𑀦𑁆𑀢𑀺 𑀇𑀤𑀁 𑀅𑀦𑀼𑀕𑀫𑀦𑀜𑀸𑀡𑀁 𑀦𑀬𑀦𑀜𑀸𑀡𑀁 𑀓𑀸𑀭𑀡𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀭𑀺𑀬𑁂 ¶ 𑀜𑀸𑀡𑀦𑁆𑀢𑀺 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑀸𑀡𑀁. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑁂𑀲𑀲𑀢𑁆𑀢𑀸𑀦𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀢𑁂𑀲𑀁 𑀘𑀺𑀢𑁆𑀢𑀁 𑀲𑀭𑀸𑀕𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀸𑀢𑀺. 𑀲𑀭𑀸𑀕𑀁 𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀥 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀮𑀩𑁆𑀪𑀢𑀺. 𑀅𑀯𑀺𑀧𑀲𑁆𑀲𑀦𑀽𑀧𑀕𑀫𑁆𑀧𑀺 𑀳𑀺 𑀧𑀭𑀘𑀺𑀢𑁆𑀢𑀜𑀸𑀡𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺𑀬𑁂𑀯.

𑀅𑀯𑀲𑁂𑀲𑀸 𑀧𑀜𑁆𑀜𑀸𑀢𑀺 𑀥𑀫𑁆𑀫𑁂 𑀜𑀸𑀡𑀸𑀤𑀺𑀓𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 𑀜𑀸𑀡𑀦𑁆𑀢𑀺 𑀲𑀫𑁆𑀫𑀢𑀢𑁆𑀢𑀸 𑀲𑀫𑁆𑀫𑀼𑀢𑀺𑀜𑀸𑀡𑀁 𑀦𑀸𑀫 𑀳𑁄𑀢𑀺. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀫𑁆𑀫𑀼𑀢𑀺𑀫𑁆𑀳𑀺 𑀜𑀸𑀡𑀦𑁆𑀢𑀺 𑀲𑀫𑁆𑀫𑀼𑀢𑀺𑀜𑀸𑀡𑀁.

𑁭𑁯𑁭. 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀧𑀜𑁆𑀜𑀸𑀢𑀺 𑀅𑀬𑀜𑁆𑀳𑀺 𑀏𑀓𑀦𑁆𑀢𑁂𑀦 𑀯𑀝𑁆𑀝𑀲𑁆𑀫𑀺𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀆𑀘𑀺𑀦𑀢𑁂𑀯, 𑀢𑀲𑁆𑀫𑀸 ‘‘𑀆𑀘𑀬𑀸𑀬 𑀦𑁄 𑀅𑀧𑀘𑀬𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀧𑀜𑁆𑀜𑀸 𑀧𑀦 𑀬𑀲𑁆𑀫𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀅𑀧𑀘𑀺𑀦𑀢𑁂𑀯, 𑀢𑀲𑁆𑀫𑀸 ‘‘𑀅𑀧𑀘𑀬𑀸𑀬 𑀦𑁄 𑀆𑀘𑀬𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀧𑀜𑁆𑀜𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀆𑀘𑀺𑀦𑀢𑀺, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑁂 𑀘𑁂𑀯 𑀓𑀺𑀮𑁂𑀲𑀫𑀽𑀮𑀓𑁂 𑀘 𑀥𑀫𑁆𑀫𑁂 𑀅𑀧𑀘𑀺𑀦𑀢𑀺, 𑀢𑀲𑁆𑀫𑀸 ‘‘𑀆𑀘𑀬𑀸𑀬 𑀘𑁂𑀯 𑀅𑀧𑀘𑀬𑀸𑀬 𑀘𑀸’’𑀢𑀺 𑀯𑀼𑀢𑁆𑀢𑀸. 𑀲𑁂𑀲𑀸 𑀦𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀆𑀘𑀺𑀦𑀢𑀺 𑀦 𑀅𑀧𑀘𑀺𑀦𑀢𑀺, 𑀢𑀲𑁆𑀫𑀸 ‘‘𑀦𑁂𑀯 𑀆𑀘𑀬𑀸𑀬 𑀦𑁄 𑀅𑀧𑀘𑀬𑀸𑀬𑀸’’𑀢𑀺 𑀯𑀼𑀢𑁆𑀢𑀸.

𑁭𑁯𑁮. 𑀦 𑀘 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀇𑀤𑀁 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸 𑀳𑀺𑀲𑁆𑀲 𑀓𑀸𑀫𑀯𑀺𑀯𑁂𑀓𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀓𑀺𑀮𑁂𑀲𑀦𑀺𑀩𑁆𑀩𑀺𑀤𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀸𑀬 𑀘𑁂𑀲 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀓𑀪𑀸𑀯𑀁 𑀧𑀦 𑀅𑀧𑁆𑀧𑀢𑁆𑀢𑀢𑀸𑀬 𑀦𑁂𑀯 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀏𑀯𑀫𑀬𑀁 𑀧𑀜𑁆𑀜𑀸 𑀦𑀺𑀩𑁆𑀩𑀺𑀤𑀸𑀬 𑀳𑁄𑀢𑀺 𑀦𑁄 𑀧𑀝𑀺𑀯𑁂𑀥𑀸𑀬. 𑀲𑁆𑀯𑁂𑀯𑀸𑀢𑀺 ¶ 𑀧𑀞𑀫𑀚𑁆𑀛𑀸𑀦𑀁 𑀧𑀢𑁆𑀯𑀸 𑀞𑀺𑀢𑁄. 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀲𑀫𑀸𑀦𑁄𑀢𑀺 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁𑀬𑁂𑀯 𑀓𑀸𑀫𑀸𑀦𑀁 𑀯𑀲𑁂𑀦 𑀯𑀻𑀢𑀭𑀸𑀕𑁄. 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 ¶ 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀜𑀸 𑀳𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀪𑀸𑀯𑁂𑀦𑀸𑀧𑀺 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀅𑀪𑀺𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀧𑀺 𑀧𑀝𑀺𑀯𑀺𑀚𑁆𑀛𑀢𑀺 𑀏𑀯. 𑀢𑀲𑁆𑀫𑀸 𑀲𑀸 𑀧𑀝𑀺𑀯𑁂𑀥𑀸𑀬 𑀳𑁄𑀢𑀺. 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸𑀬 𑀏𑀯 𑀧𑀦 𑀓𑀺𑀮𑁂𑀲𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑁆𑀢𑀸 𑀦𑁄 𑀦𑀺𑀩𑁆𑀩𑀺𑀤𑀸𑀬. 𑀬𑀸 𑀧𑀦𑀸𑀬𑀁 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀧𑀜𑁆𑀜𑀸, 𑀲𑀸 𑀓𑀢𑀭𑀓𑁄𑀝𑁆𑀞𑀸𑀲𑀁 𑀪𑀚𑀢𑀻𑀢𑀺? 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀫𑁆𑀧𑀺 𑀪𑀚𑀢𑀺, 𑀅𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺. 𑀏𑀯𑀫𑁂𑀲𑀸 𑀧𑀞𑀫𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑀸 𑀓𑀸𑀢𑀩𑁆𑀩𑀸. 𑀦𑀺𑀩𑁆𑀩𑀺𑀤𑀸𑀬 ¶ 𑀘𑁂𑀯 𑀧𑀝𑀺𑀯𑁂𑀥𑀸𑀬 𑀘𑀸𑀢𑀺 𑀫𑀕𑁆𑀕𑀧𑀜𑁆𑀜𑀸 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁄 𑀦𑀺𑀩𑁆𑀩𑀺𑀤𑀸𑀬, 𑀙𑀝𑁆𑀞𑀁 𑀅𑀪𑀺𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀦𑀢𑁄 𑀧𑀝𑀺𑀯𑁂𑀥𑀸𑀬 𑀘 𑀳𑁄𑀢𑀺.

𑁭𑁯𑁯. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺𑀆𑀤𑀻𑀲𑀼 𑀬𑁆𑀯𑀸𑀬𑀁 𑀅𑀧𑁆𑀧𑀕𑀼𑀡𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀮𑀸𑀪𑀻. 𑀢𑀁 𑀢𑀢𑁄 𑀯𑀼𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺. 𑀢𑀲𑁆𑀲 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺; 𑀢𑀲𑁆𑀫𑀸 𑀳𑀸𑀦𑀪𑀸𑀕𑀺𑀦𑀻𑀢𑀺 𑀯𑀼𑀢𑁆𑀢𑀸. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀭𑀽𑀧𑀲𑀪𑀸𑀯𑀸. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀫𑀺𑀘𑁆𑀙𑀸𑀲𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀫𑁆𑀫𑀸𑀲𑀢𑀺𑀁. 𑀬𑀲𑁆𑀲 𑀳𑀺 𑀧𑀞𑀫𑀚𑁆𑀛𑀸𑀦𑀸𑀦𑀼𑀭𑀽𑀧𑀲𑀪𑀸𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀤𑀺𑀲𑁆𑀯𑀸 𑀅𑀲𑁆𑀲𑀸𑀤𑀬𑀫𑀸𑀦𑀸 𑀅𑀪𑀺𑀦𑀦𑁆𑀤𑀫𑀸𑀦𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀦𑀺𑀓𑀦𑁆𑀢𑀺𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀦𑁂𑀯 𑀳𑀸𑀬𑀢𑀺, 𑀦 𑀯𑀟𑁆𑀠𑀢𑀺, 𑀞𑀺𑀢𑀺𑀓𑁄𑀝𑁆𑀞𑀸𑀲𑀺𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸𑀢𑀺. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀢𑀓𑁆𑀓𑀲𑀳𑀕𑀢𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀕𑀼𑀡𑀢𑁄 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺. 𑀢𑀲𑁆𑀲 𑀉𑀧𑀭𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀯𑀺𑀲𑁂𑀲𑀪𑀸𑀕𑀺𑀦𑀻𑀢𑀺 𑀯𑀼𑀢𑁆𑀢𑀸. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸𑀢𑀺 𑀢𑀫𑁂𑀯 ¶ 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀦𑀺𑀩𑁆𑀩𑀺𑀤𑀸𑀲𑀗𑁆𑀔𑀸𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀳𑀕𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀛𑀸𑀦𑀗𑁆𑀕𑀪𑁂𑀤𑁂 𑀯𑀢𑁆𑀢𑀦𑁆𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑀺 𑀉𑀓𑁆𑀓𑀡𑁆𑀞𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀺𑀤𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺. 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀉𑀧𑀲𑀁𑀳𑀺𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀳𑀺 𑀲𑀓𑁆𑀓𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼𑀦𑁆𑀢𑀺 𑀧𑀯𑀢𑁆𑀢𑀺𑀢𑁄 ‘‘𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀺 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸 𑀏𑀯 𑀦𑀸𑀫. 𑀢𑀲𑁆𑀲 𑀢𑁂𑀲𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀲𑁆𑀲 ¶ 𑀧𑀤𑀝𑁆𑀞𑀸𑀦𑀢𑀸𑀬 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻𑀢𑀺 𑀯𑀼𑀢𑁆𑀢𑀸. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀤𑀼𑀢𑀺𑀬𑀚𑁆𑀛𑀸𑀦𑀧𑀜𑁆𑀜𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁦𑁧. 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀆𑀕𑀫𑀦𑀓𑀸𑀮𑁂 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑀲𑁆𑀲 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀆𑀕𑀢𑀲𑁆𑀲. 𑀤𑀦𑁆𑀥𑀁 𑀢𑀡𑁆𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑁂𑀲𑀼 𑀓𑀺𑀮𑁂𑀲𑁂𑀲𑀼 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀢𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀲𑀗𑁆𑀔𑀸𑀢𑀁 𑀞𑀸𑀦𑀁 𑀤𑀦𑁆𑀥𑀁 𑀲𑀡𑀺𑀓𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 ¶ , 𑀧𑀸𑀧𑀼𑀡𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀬𑀸 𑀏𑀲𑀸 𑀏𑀯𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀸𑀬 𑀤𑀼𑀓𑁆𑀔𑀢𑁆𑀢𑀸, 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀧𑀜𑁆𑀜𑀸𑀬 𑀘 𑀤𑀦𑁆𑀥𑀢𑁆𑀢𑀸 𑀫𑀕𑁆𑀕𑀓𑀸𑀮𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀧𑀺 𑀧𑀜𑁆𑀜𑀸 𑀆𑀕𑀫𑀦𑀯𑀲𑁂𑀦 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀭𑀺 𑀢𑀻𑀲𑀼 𑀧𑀤𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁦𑁨. 𑀲𑀫𑀸𑀥𑀺𑀲𑁆𑀲 𑀦 𑀦𑀺𑀓𑀸𑀫𑀮𑀸𑀪𑀺𑀲𑁆𑀲𑀸𑀢𑀺 𑀬𑁄 𑀲𑀫𑀸𑀥𑀺𑀲𑁆𑀲 𑀦 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺, 𑀲𑁄 𑀢𑀲𑁆𑀲 𑀦 𑀦𑀺𑀓𑀸𑀫𑀮𑀸𑀪𑀻 𑀦𑀸𑀫. 𑀬𑀲𑁆𑀲 𑀲𑀫𑀸𑀥𑀺 𑀉𑀧𑀭𑀽𑀧𑀭𑀺 𑀲𑀫𑀸𑀧𑀚𑁆𑀚𑀦𑀢𑁆𑀣𑀸𑀬 𑀉𑀲𑁆𑀲𑀓𑁆𑀓𑀺𑀢𑀼𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀚𑁆𑀛𑀸𑀦𑀮𑀸𑀪𑀺𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀁 𑀣𑁄𑀓𑀁 𑀨𑀭𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑁂 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸 𑀆𑀭𑀫𑁆𑀫𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀧𑁆𑀧𑀦𑀁 𑀧𑀢𑁆𑀯𑀸 𑀢𑀁 𑀅𑀯𑀟𑁆𑀠𑀺𑀢𑀁 𑀣𑁄𑀓𑀫𑁂𑀯 𑀆𑀭𑀫𑁆𑀫𑀡𑀁 𑀨𑀭𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀦𑀺𑀓𑀸𑀫𑀮𑀸𑀪𑀻𑀧𑀝𑀺𑀧𑀓𑁆𑀔𑀢𑁄 𑀳𑀺 𑀧𑀕𑀼𑀡𑀚𑁆𑀛𑀸𑀦𑀮𑀸𑀪𑀻 𑀏𑀢𑁆𑀣 𑀦𑀺𑀓𑀸𑀫𑀮𑀸𑀪𑀻𑀢𑀺 𑀯𑀼𑀢𑁆𑀢𑁄. 𑀅𑀯𑀟𑁆𑀠𑀺𑀢𑀸𑀭𑀫𑁆𑀫𑀡𑀧𑀝𑀺𑀧𑀓𑁆𑀔𑀢𑁄 𑀘 𑀯𑀟𑁆𑀠𑀺𑀢𑀸𑀭𑀫𑁆𑀫𑀡𑀁 𑀯𑀺𑀧𑀼𑀮𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀚𑀭𑀸𑀫𑀭𑀡𑁂𑀧𑁂𑀢𑀁 ¶ 𑀜𑀸𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 𑀏𑀢𑀁 𑀯𑀼𑀢𑁆𑀢𑀁.

𑀚𑀭𑀸𑀫𑀭𑀡𑀁 𑀆𑀭𑀩𑁆𑀪𑀸𑀢𑀺𑀆𑀤𑀻𑀦𑀺 𑀧𑀦 𑀏𑀓𑁂𑀓𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀼𑀩𑁆𑀩𑀪𑀸𑀕𑁂 𑀲𑀘𑁆𑀘𑀯𑀯𑀢𑁆𑀣𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁫.) 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁪. 𑀧𑀜𑁆𑀘𑀯𑀺𑀥𑁂𑀦 ¶ 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀧𑀻𑀢𑀺𑀨𑀭𑀡𑀢𑀸𑀤𑀻𑀲𑀼 𑀧𑀻𑀢𑀺𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸 𑀦𑀸𑀫. 𑀲𑀼𑀔𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸 𑀦𑀸𑀫. 𑀧𑀭𑁂𑀲𑀁 𑀘𑁂𑀢𑁄𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂𑀢𑁄𑀧𑀭𑀺𑀬𑀧𑀜𑁆𑀜𑀸 𑀘𑁂𑀢𑁄𑀨𑀭𑀡𑀢𑀸 𑀦𑀸𑀫. 𑀆𑀮𑁄𑀓𑀁 ¶ 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸 𑀆𑀮𑁄𑀓𑀨𑀭𑀡𑀢𑀸 𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀘 𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸 𑀤𑁆𑀯𑁂 𑀧𑀸𑀤𑀸 𑀯𑀺𑀬, 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸 𑀤𑁆𑀯𑁂 𑀳𑀢𑁆𑀣𑀸 𑀯𑀺𑀬, 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀫𑀚𑁆𑀛𑀺𑀫𑀓𑀸𑀬𑁄 𑀯𑀺𑀬, 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁 𑀲𑀻𑀲𑀁 𑀯𑀺𑀬. 𑀇𑀢𑀺 𑀪𑀕𑀯𑀸 𑀧𑀜𑁆𑀘𑀗𑁆𑀕𑀺𑀓𑀁 𑀲𑀫𑁆𑀫𑀸𑀲𑀫𑀸𑀥𑀺𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀁 𑀧𑀼𑀭𑀺𑀲𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀅𑀬𑀁 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀬𑀁 𑀳𑀢𑁆𑀣𑀧𑀸𑀤𑀲𑀻𑀲𑀲𑀤𑀺𑀲𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀥𑀺𑀁 𑀓𑀣𑁂𑀲𑀺.

𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯𑀸𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀲𑀫𑀸𑀥𑀺𑀲𑀼𑀔𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄. 𑀲𑀦𑁆𑀢𑀁 𑀲𑀼𑀔𑀼𑀫𑀁 𑀨𑀮𑀘𑀺𑀢𑁆𑀢𑀁 𑀧𑀡𑀻𑀢𑀁 𑀫𑀥𑀼𑀭𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀳𑀺 𑀲𑀩𑁆𑀩𑀓𑀸𑀬𑀸𑀦𑀼𑀕𑀢𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀨𑁄𑀝𑁆𑀞𑀩𑁆𑀩𑀁 𑀧𑀝𑀺𑀘𑁆𑀘 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄. 𑀓𑀺𑀮𑁂𑀲𑁂𑀳𑀺 ¶ 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄. 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀸 𑀦𑀺𑀭𑀸𑀫𑀺𑀲𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁄. 𑀅𑀢𑀧𑁆𑀧𑀦𑀻𑀬𑀝𑁆𑀞𑁂𑀦 𑀧𑀡𑀻𑀢𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀲𑁆𑀲 𑀯𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀳𑀺 𑀇𑀤𑀁 𑀅𑀢𑁆𑀣𑀢𑁄 𑀏𑀓𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑁂𑀦 𑀯𑀸 𑀅𑀭𑀳𑀢𑀸 𑀮𑀤𑁆𑀥𑀢𑁆𑀢𑀸𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄. 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀫𑁂𑀯 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄. 𑀅𑀧𑁆𑀧𑀕𑀼𑀡𑀲𑀸𑀲𑀯𑀲𑀫𑀸𑀥𑀺 𑀯𑀺𑀬 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀢𑀜𑁆𑀘 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀢𑀢𑁄 𑀯𑀸 ¶ 𑀯𑀼𑀝𑁆𑀞𑀳𑀦𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸 𑀲𑀢𑁄𑀯 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄𑀯 𑀯𑀼𑀝𑁆𑀞𑀳𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀸 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄 𑀯𑀼𑀝𑁆𑀞𑀳𑀢𑀺. 𑀢𑀲𑁆𑀫𑀸 𑀬𑀤𑁂𑀢𑁆𑀣 ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀲𑁆𑀲 𑀧𑀘𑁆𑀘𑀢𑁆𑀢𑀁𑀬𑁂𑀯 𑀅𑀧𑀭𑀧𑁆𑀧𑀘𑁆𑀘𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑁋 𑀢𑀁 𑀏𑀓𑀫𑀗𑁆𑀕𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀫𑀺𑀫𑁂𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀅𑀬𑀁 𑀲𑀫𑀸𑀥𑀺 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 𑀦𑀸𑀫 𑀯𑀼𑀢𑁆𑀢𑁄𑀢𑀺.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁬.) 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁫. 𑀙𑀩𑁆𑀩𑀺𑀥𑁂𑀦 ¶ 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀇𑀤𑁆𑀥𑀺𑀯𑀺𑀥𑁂 𑀜𑀸𑀡𑀦𑁆𑀢𑀺 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 (𑀤𑀻. 𑀦𑀺. 𑁧.𑁪𑁮𑁪; 𑀧𑀝𑀺. 𑀫. 𑁧.𑁧𑁦𑁨) 𑀇𑀤𑁆𑀥𑀺𑀯𑀺𑀥𑁂 𑀜𑀸𑀡𑀁. 𑀇𑀫𑀺𑀦𑀸 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀯𑀘𑀭𑀸 𑀩𑀳𑀼𑀥𑀸𑀪𑀸𑀯𑀸𑀤𑀺𑀲𑀸𑀥𑀺𑀓𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀅𑀧𑁆𑀧𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸 𑀜𑀸𑀡𑀦𑁆𑀢𑀺 𑀤𑀽𑀭𑀲𑀦𑁆𑀢𑀺𑀓𑀸𑀤𑀺𑀪𑁂𑀤𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀜𑀸𑀡𑀁. 𑀇𑀫𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀯𑀘𑀭𑀸 𑀧𑀓𑀢𑀺𑀲𑁄𑀢𑀯𑀺𑀲𑀬𑀸𑀢𑀻𑀢𑀲𑀤𑁆𑀤𑀸𑀭𑀫𑁆𑀫𑀡𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀅𑀧𑁆𑀧𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀧𑀭𑀘𑀺𑀢𑁆𑀢𑁂 ¶ 𑀜𑀸𑀡𑀦𑁆𑀢𑀺 𑀧𑀭𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀜𑀸𑀡𑀁. 𑀇𑀫𑀺𑀦𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀭𑁂𑀲𑀁 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀅𑀧𑁆𑀧𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸 𑀜𑀸𑀡𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁. 𑀇𑀫𑀺𑀦𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀅𑀧𑁆𑀧𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑁂 𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀬𑀜𑁆𑀘 𑀉𑀧𑀧𑀸𑀢𑁂 𑀘 𑀜𑀸𑀡𑀁. 𑀇𑀫𑀺𑀦𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀸𑀦𑀁 𑀲𑀢𑁆𑀢𑀸𑀦𑀁 𑀯𑀡𑁆𑀡𑀥𑀸𑀢𑀼𑀆𑀭𑀫𑁆𑀫𑀡𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀅𑀧𑁆𑀧𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀜𑀸𑀡𑀁. 𑀇𑀤𑀁 𑀮𑁄𑀓𑀼𑀢𑁆𑀢𑀭𑀫𑁂𑀯. 𑀲𑁂𑀲𑀸𑀦𑀺 𑀮𑁄𑀓𑀺𑀬𑀸𑀦𑀻𑀢𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁭.) 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀸𑀤𑀺𑀯𑀡𑁆𑀡𑀦𑀸

𑁮𑁦𑁬. 𑀲𑀢𑁆𑀢𑀯𑀺𑀥𑁂𑀦 ¶ 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀲𑁂𑀦 𑀏𑀓𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑀢𑁆𑀢𑀬𑀪𑁂𑀤𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀢𑁆𑀯𑀸 𑀧𑀼𑀦 ‘‘𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 𑀏𑀯𑀁 𑀢𑀤𑁂𑀯 𑀜𑀸𑀡𑀁 𑀲𑀗𑁆𑀔𑁂𑀧𑀢𑁄 𑀔𑀬𑀥𑀫𑁆𑀫𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀤𑁆𑀯𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀦𑁆𑀢𑀺 𑀏𑀯𑀁 𑀅𑀢𑀻𑀢𑁂 𑀜𑀸𑀡𑀤𑁆𑀯𑀬𑀁, 𑀅𑀦𑀸𑀕𑀢𑁂 𑀜𑀸𑀡𑀤𑁆𑀯𑀬𑀦𑁆𑀢𑀺 𑀙. 𑀢𑀸𑀦𑀺 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢. 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 ¶ 𑀧𑀘𑁆𑀘𑀬𑀸𑀓𑀸𑀭𑀜𑀸𑀡𑀁. 𑀧𑀘𑁆𑀘𑀬𑀸𑀓𑀸𑀭𑁄 𑀳𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀓𑀸𑀭𑀡𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀻𑀢𑀺 𑀯𑀼𑀘𑁆𑀘𑀢𑀺; 𑀢𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀏𑀢𑀲𑁆𑀲𑁂𑀯 𑀙𑀩𑁆𑀩𑀺𑀥𑀲𑁆𑀲 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀏𑀓𑁂𑀓𑀲𑁆𑀫𑀺𑀁 𑀅𑀗𑁆𑀕𑁂 𑀇𑀫𑀸𑀦𑀺 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀏𑀓𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀲𑀢𑁆𑀢𑀲𑀢𑁆𑀢𑀢𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀔𑀬𑀥𑀫𑁆𑀫𑀦𑁆𑀢𑀺 𑀔𑀬𑀕𑀫𑀦𑀲𑀪𑀸𑀯𑀁. 𑀯𑀬𑀥𑀫𑁆𑀫𑀦𑁆𑀢𑀺 𑀯𑀬𑀕𑀫𑀦𑀲𑀪𑀸𑀯𑀁. 𑀯𑀺𑀭𑀸𑀕𑀥𑀫𑁆𑀫𑀦𑁆𑀢𑀺 ¶ 𑀯𑀺𑀭𑀚𑁆𑀚𑀦𑀲𑀪𑀸𑀯𑀁. 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀁. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀅𑀧𑀭𑀯𑀺𑀧𑀲𑁆𑀲𑀦𑀸𑀬 𑀧𑀼𑀭𑀺𑀫𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀲𑀦𑀁 𑀓𑀣𑀺𑀢𑀁. 𑀢𑁂𑀦 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀧𑀞𑀫𑀜𑀸𑀡𑁂𑀦 𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀢𑀺 𑀤𑀺𑀲𑁆𑀯𑀸 𑀢𑀁 𑀜𑀸𑀡𑀁 𑀤𑀼𑀢𑀺𑀬𑁂𑀦 𑀤𑀝𑁆𑀞𑀼𑀁 𑀯𑀝𑁆𑀝𑀢𑀺, 𑀤𑀼𑀢𑀺𑀬𑀁 𑀢𑀢𑀺𑀬𑁂𑀦, 𑀢𑀢𑀺𑀬𑀁 𑀘𑀢𑀼𑀢𑁆𑀣𑁂𑀦, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑁂𑀦, 𑀧𑀜𑁆𑀘𑀫𑀁 𑀙𑀝𑁆𑀞𑁂𑀦, 𑀙𑀝𑁆𑀞𑀁 𑀲𑀢𑁆𑀢𑀫𑁂𑀦. 𑀏𑀯𑀁 𑀲𑀢𑁆𑀢 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁮𑁦𑁭. 𑀅𑀝𑁆𑀞𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀜𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀫𑁆𑀳𑀺 𑀧𑀜𑁆𑀜𑀸. 𑀇𑀫𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁮𑁦𑁮. 𑀦𑀯𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀽𑀢𑀺 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀗𑁆𑀔𑀸𑀢𑀸𑀲𑀼 𑀲𑀫𑀸𑀧𑀢𑁆𑀢𑀻𑀲𑀼. 𑀢𑀸𑀲𑀁 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀯𑀺𑀳𑀸𑀭𑀺𑀢𑀩𑁆𑀩𑀝𑁆𑀞𑁂𑀦 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀢𑀸, 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀧𑀢𑁆𑀢𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀢𑀺𑀆𑀤𑀬𑁄 𑀅𑀝𑁆𑀞 𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸 ¶ . 𑀦𑀯𑀫𑀸 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸. 𑀲𑀸 𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀲𑁆𑀲 𑀧𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺.

𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁧𑁦.) 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑁄

𑁮𑁦𑁯. 𑀤𑀲𑀯𑀺𑀥𑁂𑀦 ¶ 𑀜𑀸𑀡𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀭𑀡𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀞𑀸𑀦𑀦𑁆𑀢𑀺 𑀘 𑀅𑀯𑀓𑀸𑀲𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄. 𑀓𑀜𑁆𑀘𑀺 ¶ 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀏𑀓𑀁 𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀘𑁄𑀢𑀺 𑀕𑀡𑁆𑀳𑁂𑀬𑁆𑀬. 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀺, 𑀦 𑀉𑀧𑀮𑀩𑁆𑀪𑀢𑀺. 𑀬𑀁 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀧𑀼𑀣𑀼𑀚𑁆𑀚𑀦𑁄. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺; 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀳𑀺 𑀲𑁄 𑀢𑁂𑀪𑀽𑀫𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑁄 𑀧𑀦 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁄 𑀅𑀬𑁄𑀕𑀼𑀴𑁄 𑀯𑀺𑀬 𑀫𑀓𑁆𑀔𑀺𑀓𑀸𑀦𑀁 𑀤𑀺𑀝𑁆𑀞𑀺𑀬𑀸 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀅𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀫𑁆𑀫𑀭𑀡𑀸’’𑀢𑀺 (𑀫. 𑀦𑀺. 𑁩.𑁨𑁧) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀸𑀪𑀺𑀪𑀽𑀢𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁆𑀣𑀁, 𑀫𑀢𑁆𑀢𑀳𑀢𑁆𑀣𑀻𑀧𑀭𑀺𑀢𑀸𑀲𑀺𑀢𑁄 𑀯𑀺𑀬, 𑀲𑀼𑀘𑀺𑀓𑀸𑀫𑁄 𑀧𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀕𑀽𑀣𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺. 𑀅𑀢𑁆𑀢𑀯𑀸𑀤𑁂 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀁 𑀲𑀗𑁆𑀔𑀸𑀭𑀦𑁆𑀢𑀺 𑀅𑀯𑀢𑁆𑀯𑀸 𑀓𑀜𑁆𑀘𑀺 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑀼𑀪𑀽𑀫𑀓𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑁂𑀪𑀽𑀫𑀓𑀯𑀲𑁂𑀦; 𑀲𑀩𑁆𑀩𑀯𑀸𑀭𑁂𑀲𑀼 𑀯𑀸 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀧𑀺 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀝𑁆𑀝𑀢𑀺. 𑀬𑀁 𑀬𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑁄 ¶ 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀬𑀁 𑀬𑀁 𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀅𑀭𑀺𑀬𑀲𑀸𑀯𑀓𑁄 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺.

𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸𑀯 𑀫𑀸𑀢𑀸. 𑀫𑀦𑀼𑀲𑁆𑀲𑀪𑀽𑀢𑁄𑀯 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁. 𑀲𑀘𑁂𑀧𑀺 𑀪𑀯𑀦𑁆𑀢𑀭𑀕𑀢𑀁 𑀅𑀭𑀺𑀬𑀲𑀸𑀯𑀓𑀁 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀫𑁆𑀧𑀺 𑀓𑁄𑀘𑀺 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀫𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’𑀢𑀺, 𑀦𑁂𑀯 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀣 𑀯𑀸𑀧𑀺 ¶ 𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀘𑁂 𑀇𑀫𑀁 𑀦 𑀖𑀸𑀢𑁂𑀲𑁆𑀲𑀲𑀺, 𑀲𑀻𑀲𑀁 ¶ 𑀢𑁂 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’𑀢𑀺, 𑀲𑀻𑀲𑀫𑁂𑀯𑀲𑁆𑀲 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀦𑁂𑀯 𑀲𑁄 𑀢𑀁 𑀖𑀸𑀢𑁂𑀬𑁆𑀬. 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘 𑀩𑀮𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀸𑀯𑀚𑁆𑀚𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀧𑀼𑀣𑀼𑀚𑁆𑀚𑀦𑁄 𑀫𑀸𑀢𑀼𑀖𑀸𑀢𑀸𑀤𑀻𑀦𑀺𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺. 𑀫𑀳𑀸𑀩𑀮𑁄 𑀅𑀭𑀺𑀬𑀲𑀸𑀯𑀓𑁄; 𑀲𑁄 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑁄𑀢𑀻𑀢𑀺.

𑀧𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀥𑀓𑀘𑀺𑀢𑁆𑀢𑁂𑀦. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑁋 𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀭𑀦𑁆𑀢𑁄, 𑀅𑀦𑀼𑀲𑁆𑀲𑀸𑀯𑀦𑁂𑀦, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮).

𑀢𑀢𑁆𑀣 ‘𑀓𑀫𑁆𑀫𑁂𑀦𑀸’𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. ‘𑀉𑀤𑁆𑀤𑁂𑀲𑁂𑀦𑀸’𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. ‘𑀯𑁄𑀳𑀭𑀦𑁆𑀢𑁄’𑀢𑀺 𑀓𑀣𑀬𑀦𑁆𑀢𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑁆𑀧𑀢𑁆𑀢𑀻𑀳𑀺 ‘𑀅𑀥𑀫𑁆𑀫𑀁 𑀥𑀫𑁆𑀫𑁄’𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. ‘𑀅𑀦𑀼𑀲𑁆𑀲𑀸𑀯𑀦𑁂𑀦𑀸’𑀢𑀺 ‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘! 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀦 𑀬𑀼𑀢𑁆𑀢𑀁. 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀁 𑀯𑀺𑀬 𑀲𑀻𑀢𑀮𑁄? 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦 ¶ . ‘𑀲𑀮𑀸𑀓𑀕𑁆𑀕𑀸𑀳𑁂𑀦𑀸’𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀦𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦. 𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀸𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 ¶ 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀏𑀢𑁆𑀢𑀸𑀯𑀢𑀸 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀬𑀸𑀦𑀺 𑀧𑀼𑀣𑀼𑀚𑁆𑀚𑀦𑁄 𑀓𑀭𑁄𑀢𑀺, 𑀦 𑀅𑀭𑀺𑀬𑀲𑀸𑀯𑀓𑁄. 𑀢𑁂𑀲𑀁 𑀆𑀯𑀺𑀪𑀸𑀯𑀢𑁆𑀣𑀁 𑁋

𑀓𑀫𑁆𑀫𑀢𑁄 ¶ 𑀤𑁆𑀯𑀸𑀭𑀢𑁄 𑀘𑁂𑀯, 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄 𑀢𑀣𑀸;

𑀧𑀸𑀓𑀲𑀸𑀥𑀸𑀭𑀡𑀸𑀤𑀻𑀳𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ‘𑀓𑀫𑁆𑀫𑀢𑁄’ 𑀢𑀸𑀯 𑁋 𑀏𑀢𑁆𑀣 𑀳𑀺 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺. 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻’𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀫𑀳𑀸𑀘𑁂𑀢𑀺𑀬𑀧𑁆𑀧𑀫𑀸𑀡𑁂𑀳𑀺 𑀓𑀜𑁆𑀘𑀦𑀣𑀽𑀧𑁂𑀳𑀺 𑀧𑀽𑀭𑁂𑀢𑁆𑀯𑀸𑀧𑀺, 𑀲𑀓𑀮𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀧𑀺, 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀯𑀺𑀘𑀭𑀺𑀢𑁆𑀯𑀸𑀧𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁂𑀯 𑀉𑀧𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸, 𑀲𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁, 𑀢𑀺𑀭𑀘𑁆𑀙𑀸𑀦𑀪𑀽𑀢𑁄𑀬𑁂𑀯 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀧𑀦 𑀯𑀲𑁂𑀦 𑀅𑀬𑀁 𑀧𑀜𑁆𑀳𑁄 𑀓𑀣𑀺𑀢𑁄.

𑀏𑀢𑁆𑀣 𑀏𑀴𑀓𑀘𑀢𑀼𑀓𑁆𑀓𑀁, 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁, 𑀘𑁄𑀭𑀘𑀢𑀼𑀓𑁆𑀓𑀜𑁆𑀘 𑀓𑀣𑁂𑀢𑀩𑁆𑀩𑀁. ‘𑀏𑀴𑀓𑀁 𑀫𑀸𑀭𑁂𑀫𑀻’𑀢𑀺 𑀅𑀪𑀺𑀲𑀦𑁆𑀥𑀺𑀦𑀸𑀧𑀺 𑀳𑀺 𑀏𑀴𑀓𑀝𑁆𑀞𑀸𑀦𑁂 𑀞𑀺𑀢𑀁 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺. 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸 𑀧𑀦 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺. 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀦𑁆𑀢𑁄 𑀨𑀼𑀲𑀢𑁂𑀯. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 ¶ 𑀘𑀢𑀼𑀓𑁆𑀓𑀤𑁆𑀯𑀬𑁂. 𑀬𑀣𑀸 𑀘 𑀫𑀸𑀢𑀸𑀧𑀺𑀢𑀽𑀲𑀼, 𑀏𑀯𑀁 𑀅𑀭𑀳𑀦𑁆𑀢𑁂𑀧𑀺 𑀏𑀢𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁂𑀯 𑀘 𑀫𑀸𑀭𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺, 𑀦 𑀬𑀓𑁆𑀔𑀪𑀽𑀢𑀁; 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀲𑀢𑁆𑀣𑀧𑁆𑀧𑀳𑀸𑀭𑁂 𑀯𑀸 𑀯𑀺𑀲𑁂 𑀯𑀸 𑀤𑀺𑀦𑁆𑀦𑁂𑀧𑀺 𑀬𑀤𑀺 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀫𑀭𑀢𑀺, 𑀅𑀭𑀳𑀦𑁆𑀢𑀖𑀸𑀢𑁄 𑀳𑁄𑀢𑀺𑀬𑁂𑀯. 𑀬𑀁 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀅𑀭𑀳𑀢𑁆𑀢𑀁 ¶ 𑀧𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺. 𑀲𑁂𑀲𑀅𑀭𑀺𑀬𑀧𑀼𑀕𑁆𑀕𑀮𑁂 𑀫𑀸𑀭𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀦𑀢𑁆𑀣𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯.

𑀮𑁄𑀳𑀺𑀢𑀼𑀧𑁆𑀧𑀸𑀤𑁂 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀮𑁄𑀳𑀺𑀢𑀧𑀕𑁆𑀖𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺. 𑀤𑁂𑀯𑀤𑀢𑁆𑀢𑁂𑀦 𑀧𑀝𑀺𑀯𑀺𑀤𑁆𑀥𑀲𑀺𑀮𑀸𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀲𑀓𑀮𑀺𑀓𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑀦𑁆𑀢𑀁 𑀧𑀳𑀭𑀺. 𑀨𑀭𑀲𑀼𑀦𑀸 𑀧𑀳𑀝𑁄 𑀯𑀺𑀬 𑀧𑀸𑀤𑁄 𑀅𑀦𑁆𑀢𑁄𑀮𑁄𑀳𑀺𑀢𑁄𑀬𑁂𑀯 𑀅𑀳𑁄𑀲𑀺. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺. 𑀚𑀻𑀯𑀓𑁄 ¶ 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀼𑀘𑀺𑀬𑀸 𑀲𑀢𑁆𑀣𑀓𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁆𑀳𑀸 𑀞𑀸𑀦𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀓𑀫𑀓𑀸𑀲𑀺. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀳𑁄𑀢𑀺.

𑀅𑀣 𑀬𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀦𑁆𑀢𑀺, 𑀩𑁄𑀥𑀺𑀁 𑀙𑀺𑀦𑁆𑀤𑀦𑁆𑀢𑀺, 𑀥𑀸𑀢𑀼𑀫𑁆𑀳𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀓𑀺𑀁 𑀳𑁄𑀢𑀻𑀢𑀺? 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁. 𑀲𑀥𑀸𑀢𑀼𑀓𑀁 𑀧𑀦 𑀣𑀽𑀧𑀁 𑀯𑀸 𑀧𑀝𑀺𑀫𑀁 𑀯𑀸 𑀩𑀸𑀥𑀬𑀫𑀸𑀦𑀁 𑀩𑁄𑀥𑀺𑀲𑀸𑀔𑀜𑁆𑀘 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀦𑀺𑀮𑀻𑀦𑀸 𑀲𑀓𑀼𑀡𑀸 𑀘𑁂𑀢𑀺𑀬𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀺, 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀳𑀺 𑀲𑀭𑀻𑀭𑀘𑁂𑀢𑀺𑀬𑀁 𑀫𑀳𑀦𑁆𑀢𑀢𑀭𑀁. 𑀘𑁂𑀢𑀺𑀬𑀯𑀢𑁆𑀣𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀫𑀽𑀮𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦 𑀩𑁄𑀥𑀺𑀲𑀸𑀔𑀸 𑀩𑁄𑀥𑀺𑀖𑀭𑀁 𑀩𑀸𑀥𑀢𑀺, 𑀢𑀁 𑀕𑁂𑀳𑀭𑀓𑁆𑀔𑀡𑀢𑁆𑀣𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀮𑀩𑁆𑀪𑀢𑀺. 𑀩𑁄𑀥𑀺𑀅𑀢𑁆𑀣𑀜𑁆𑀳𑀺 𑀕𑁂𑀳𑀁, 𑀦 𑀕𑁂𑀳𑀢𑁆𑀣𑀸𑀬 𑀩𑁄𑀥𑀺. 𑀆𑀲𑀦𑀖𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀧𑀦 𑀆𑀲𑀦𑀖𑀭𑁂 𑀥𑀸𑀢𑀼 𑀦𑀺𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀸𑀬 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀩𑁄𑀥𑀺𑀚𑀕𑁆𑀕𑀦𑀢𑁆𑀣𑀁 𑀑𑀚𑁄𑀳𑀭𑀡𑀲𑀸𑀔𑀁 𑀯𑀸 𑀧𑀽𑀢𑀺𑀝𑁆𑀞𑀸𑀦𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯; 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁂 𑀯𑀺𑀬 𑀧𑀼𑀜𑁆𑀜𑀫𑁆𑀧𑀺 𑀳𑁄𑀢𑀺.

𑀲𑀗𑁆𑀖𑀪𑁂𑀤𑁂 𑀲𑀻𑀫𑀝𑁆𑀞𑀓𑀲𑀗𑁆𑀖𑁂 𑀅𑀲𑀦𑁆𑀦𑀺𑀧𑀢𑀺𑀢𑁂 𑀯𑀺𑀲𑀼𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀓𑀢𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀲𑁆𑀲 𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀉𑀤𑁆𑀤𑁂𑀲𑀁 𑀯𑀸 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 ¶ 𑀪𑁂𑀤𑁄 𑀘 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀧𑀦 𑀯𑀝𑁆𑀝𑀢𑀺. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀳𑀺 𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀪𑁂𑀤𑁄 𑀳𑁄𑀢𑀺 𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁. 𑀢𑀣𑀸 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬𑀁. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀦 𑀧𑀭𑀺𑀘𑁆𑀙𑁂𑀤𑁂𑀦 𑀦𑀯𑀦𑁆𑀦𑀁 𑀚𑀦𑀸𑀦𑀁 𑀬𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 ¶ 𑀳𑁄𑀢𑀺. 𑀅𑀦𑀼𑀯𑀢𑁆𑀢𑀓𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀁 𑀓𑀫𑁆𑀫𑀁; 𑀥𑀫𑁆𑀫𑀯𑀸𑀤𑀺𑀦𑁄 𑀅𑀦𑀯𑀚𑁆𑀚𑀸. 𑀢𑀢𑁆𑀣 𑀦𑀯𑀦𑁆𑀦𑀫𑁂𑀯 𑀲𑀗𑁆𑀖𑀪𑁂𑀤𑁂 𑀇𑀤𑀁 𑀲𑀼𑀢𑁆𑀢𑀁 𑁋 ‘‘𑀏𑀓𑀢𑁄, 𑀉𑀧𑀸𑀮𑀺, 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀤𑀁 𑀕𑀡𑁆𑀳𑀣, 𑀇𑀤𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀦𑀯𑀦𑁆𑀦𑀁 𑀯𑀸, 𑀉𑀧𑀸𑀮𑀺, 𑀅𑀢𑀺𑀭𑁂𑀓𑀦𑀯𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸’’𑀢𑀺 (𑀘𑀽𑀴𑀯. 𑁩𑁫𑁧).

𑀏𑀢𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀲𑀗𑁆𑀖𑀪𑁂𑀤𑁄 𑀯𑀘𑀻𑀓𑀫𑁆𑀫𑀁, 𑀲𑁂𑀲𑀸𑀦𑀺 𑀓𑀸𑀬𑀓𑀫𑁆𑀫𑀸𑀦𑀻𑀢𑀺. 𑀏𑀯𑀁 𑀓𑀫𑁆𑀫𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀤𑁆𑀯𑀸𑀭𑀢𑁄’𑀢𑀺 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀓𑀸𑀬𑀤𑁆𑀯𑀸𑀭𑀢𑁄𑀧𑀺 𑀯𑀘𑀻𑀤𑁆𑀯𑀸𑀭𑀢𑁄𑀧𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀧𑀼𑀭𑀺𑀫𑀸𑀦𑀺 𑀧𑀦𑁂𑀢𑁆𑀣 ¶ 𑀘𑀢𑁆𑀢𑀸𑀭𑀺 𑀆𑀡𑀢𑁆𑀢𑀺𑀓𑀯𑀺𑀚𑁆𑀚𑀸𑀫𑀬𑀧𑀬𑁄𑀕𑀯𑀲𑁂𑀦 𑀯𑀘𑀻𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀦𑁆𑀢𑀺. 𑀲𑀗𑁆𑀖𑀪𑁂𑀤𑁄 𑀳𑀢𑁆𑀣𑀫𑀼𑀤𑁆𑀤𑀸𑀬 𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀤𑁆𑀯𑀸𑀭𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄’𑀢𑀺 𑀲𑀗𑁆𑀖𑀪𑁂𑀤𑁄𑀬𑁂𑀯 𑀘𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑁄. 𑀲𑀡𑁆𑀞𑀳𑀦𑁆𑀢𑁂 𑀳𑀺 𑀓𑀧𑁆𑀧𑁂 𑀓𑀧𑁆𑀧𑀯𑁂𑀫𑀚𑁆𑀛𑁂 𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀳𑀺 ‘𑀲𑁆𑀯𑁂 𑀓𑀧𑁆𑀧𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’𑀢𑀺 𑀅𑀚𑁆𑀚 𑀲𑀗𑁆𑀖𑀪𑁂𑀤𑀁 𑀓𑀭𑁄𑀢𑀺, 𑀲𑁆𑀯𑁂𑀬𑁂𑀯 𑀫𑀼𑀘𑁆𑀘𑀢𑀺, 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀏𑀯𑀁 𑀓𑀭𑀡𑀁 𑀧𑀦 𑀦𑀢𑁆𑀣𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑀧𑁆𑀧𑀝𑁆𑀞𑀺𑀢𑀺𑀬𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀧𑀸𑀓𑀢𑁄’𑀢𑀺 𑀬𑁂𑀦 𑀘 𑀧𑀜𑁆𑀘𑀧𑁂𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀖𑀪𑁂𑀤𑁄𑀬𑁂𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀲𑁂𑀲𑀸𑀦𑀺 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀲𑀗𑁆𑀖𑀪𑁂𑀤𑀸𑀪𑀸𑀯𑁂 𑀮𑁄𑀳𑀺𑀢𑀼𑀧𑁆𑀧𑀸𑀤𑁄, 𑀢𑀤𑀪𑀸𑀯𑁂 𑀅𑀭𑀳𑀦𑁆𑀢𑀖𑀸𑀢𑁄, 𑀢𑀤𑀪𑀸𑀯𑁂 𑀲𑀘𑁂 𑀧𑀺𑀢𑀸 ¶ 𑀲𑀻𑀮𑀯𑀸 𑀳𑁄𑀢𑀺, 𑀫𑀸𑀢𑀸 𑀤𑀼𑀲𑁆𑀲𑀻𑀮𑀸 𑀦𑁄 𑀯𑀸 𑀢𑀣𑀸 𑀲𑀻𑀮𑀯𑀢𑀻, 𑀧𑀺𑀢𑀼𑀖𑀸𑀢𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀲𑀘𑁂 𑀫𑀸𑀢𑀸 𑀫𑀸𑀢𑀼𑀖𑀸𑀢𑁄. 𑀤𑁆𑀯𑀻𑀲𑀼𑀧𑀺 𑀲𑀻𑀮𑁂𑀦 𑀯𑀸 𑀤𑀼𑀲𑁆𑀲𑀻𑀮𑁂𑀦 𑀯𑀸 𑀲𑀫𑀸𑀦𑁂𑀲𑀼 𑀫𑀸𑀢𑀼𑀖𑀸𑀢𑁄𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺; 𑀫𑀸𑀢𑀸 𑀳𑀺 𑀤𑀼𑀓𑁆𑀓𑀭𑀓𑀸𑀭𑀺𑀡𑀻 𑀩𑀳𑀽𑀧𑀓𑀸𑀭𑀸 𑀘 𑀧𑀼𑀢𑁆𑀢𑀸𑀦𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀧𑀸𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘𑀲𑀸𑀥𑀸𑀭𑀡𑀸𑀤𑀻𑀳𑀻’𑀢𑀺 ¶ 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀩𑁆𑀩𑁂𑀲𑀫𑁆𑀧𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀦𑀺. 𑀲𑀗𑁆𑀖𑀪𑁂𑀤𑁄 𑀧𑀦 ‘‘𑀦 𑀔𑁄, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀲𑀺𑀓𑁆𑀔𑀫𑀸𑀦𑀸, 𑀦 𑀲𑀸𑀫𑀡𑁂𑀭𑁄, 𑀦 𑀲𑀸𑀫𑀡𑁂𑀭𑀻, 𑀦 𑀉𑀧𑀸𑀲𑀓𑁄, 𑀦 𑀉𑀧𑀸𑀲𑀺𑀓𑀸 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺. 𑀪𑀺𑀓𑁆𑀔𑀼 𑀔𑁄, 𑀉𑀧𑀸𑀮𑀺, 𑀧𑀓𑀢𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺 (𑀘𑀽𑀴𑀯. 𑁩𑁫𑁧) 𑀯𑀘𑀦𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄𑀯 𑀳𑁄𑀢𑀺, 𑀦 𑀅𑀜𑁆𑀜𑀲𑁆𑀲; 𑀢𑀲𑁆𑀫𑀸 𑀅𑀲𑀸𑀥𑀸𑀭𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀩𑁆𑀩𑁂𑀧𑁂𑀢𑁂 𑀤𑀼𑀓𑁆𑀔𑀯𑁂𑀤𑀦𑀸𑀲𑀳𑀕𑀢𑀸 𑀤𑁄𑀲𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀲𑀸𑀥𑀸𑀭𑀡𑀸𑀤𑀻𑀳𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 ‘𑀅𑀬𑀁 𑀫𑁂 𑀲𑀢𑁆𑀣𑀸 𑀲𑀢𑁆𑀣𑀼𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘𑀅𑀬𑀁 𑀫𑁂 𑀲𑀢𑁆𑀣𑀸’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑀲𑀩𑁆𑀩𑀫𑀦𑁆𑀤𑀧𑀜𑁆𑀜𑁄𑀧𑀺 𑀲𑀢𑁆𑀢𑀫𑀁 𑀪𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀫𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺 ¶ . 𑀉𑀢𑁆𑀢𑀫𑀓𑁄𑀝𑀺𑀬𑀸 𑀳𑀺 𑀲𑀢𑁆𑀢𑀫𑀁 𑀪𑀯𑀁 𑀲𑀦𑁆𑀥𑀸𑀬𑁂𑀯𑁂𑀲 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺 𑀯𑀼𑀢𑁆𑀢𑁄. 𑀓𑀺𑀁 𑀧𑀦 𑀢𑀁 𑀦𑀺𑀬𑀸𑀫𑁂𑀢𑀺? 𑀓𑀺𑀁 𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀸𑀫𑁂𑀢𑀺 𑀉𑀤𑀸𑀳𑀼 𑀧𑀝𑀺𑀮𑀤𑁆𑀥𑀫𑀕𑁆𑀕𑁄 𑀉𑀤𑀸𑀳𑀼 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸𑀢𑀺? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀕𑀳𑀺𑀢𑀁 𑀦𑀸𑀫𑀫𑀢𑁆𑀢𑀫𑁂𑀢𑀁. 𑀧𑀼𑀕𑁆𑀕𑀮𑁄 𑀧𑀦 𑀦𑀺𑀬𑀢𑁄 𑀦𑀸𑀫 𑀦𑀢𑁆𑀣𑀺. ‘‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀸𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀇𑀘𑁆𑀘𑀲𑁆𑀲 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. ‘‘𑀧𑀝𑀺𑀮𑀤𑁆𑀥𑀫𑀕𑁆𑀕𑁄 𑀦𑀺𑀬𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀅𑀓𑀺𑀘𑁆𑀘𑀓𑀸 𑀳𑁄𑀦𑁆𑀢𑀺, 𑀧𑀞𑀫𑀫𑀕𑁆𑀕𑁄𑀯 𑀲𑀓𑀺𑀘𑁆𑀘𑀓𑁄, 𑀧𑀞𑀫𑀫𑀕𑁆𑀕𑁂𑀦𑁂𑀯 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀁 𑀳𑁄𑀢𑀺. ‘‘𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀬𑀸𑀫𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀞𑀫𑀫𑀕𑁆𑀕𑁄 𑀅𑀓𑀺𑀘𑁆𑀘𑀓𑁄 𑀳𑁄𑀢𑀺, 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸𑀯 𑀲𑀓𑀺𑀘𑁆𑀘𑀓𑀸, 𑀧𑀞𑀫𑀫𑀕𑁆𑀕𑀁 𑀅𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀧𑀞𑀫𑀫𑀕𑁆𑀕𑁂𑀦 𑀘 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀓𑀺𑀮𑁂𑀲𑀸 𑀔𑁂𑀧𑁂𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀬𑀸𑀫𑁂𑀢𑀺, 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀸𑀫𑁂𑀢𑀺. 𑀲𑀘𑁂 𑀳𑀺 𑀢𑁂𑀲𑀁 𑀯𑀺𑀧𑀲𑁆𑀲𑀦𑀸 ¶ 𑀢𑀺𑀓𑁆𑀔𑀸 𑀲𑀽𑀭𑀸 𑀳𑀼𑀢𑁆𑀯𑀸 𑀯𑀳𑀢𑀺, 𑀏𑀓𑀁𑀬𑁂𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ¶ 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀢𑀢𑁄 𑀫𑀦𑁆𑀤𑀢𑀭𑀧𑀜𑁆𑀜𑁄 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀘𑀢𑀼𑀢𑁆𑀣𑁂 𑀯𑀸 𑀧𑀜𑁆𑀘𑀫𑁂 𑀯𑀸 𑀙𑀝𑁆𑀞𑁂 𑀯𑀸 𑀪𑀯𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀲𑀩𑁆𑀩𑀫𑀦𑁆𑀤𑀧𑀜𑁆𑀜𑁄 𑀲𑀢𑁆𑀢𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀝𑁆𑀞𑀫𑁂 𑀪𑀯𑁂 𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀺. 𑀇𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀕𑀳𑀺𑀢𑀁 𑀦𑀸𑀫𑀫𑀢𑁆𑀢𑀫𑁂𑀢𑀁. 𑀲𑀢𑁆𑀣𑀸 𑀳𑀺 𑀩𑀼𑀤𑁆𑀥𑀢𑀼𑀮𑀸𑀬 𑀢𑀼𑀮𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘𑀅𑀬𑀁 𑀧𑀼𑀕𑁆𑀕𑀮𑁄 𑀲𑀩𑁆𑀩𑀫𑀳𑀸𑀧𑀜𑁆𑀜𑁄 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑁄 𑀏𑀓𑀫𑁂𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 ‘𑀏𑀓𑀩𑀻𑀚𑀻’𑀢𑀺 𑀦𑀸𑀫𑀁 𑀅𑀓𑀸𑀲𑀺; ‘𑀅𑀬𑀁 𑀧𑀼𑀕𑁆𑀕𑀮𑁄 𑀤𑀼𑀢𑀺𑀬𑀁, 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁, 𑀙𑀝𑁆𑀞𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 ‘𑀓𑁄𑀮𑀁𑀓𑁄𑀮𑁄’𑀢𑀺 𑀦𑀸𑀫𑀁 𑀅𑀓𑀸𑀲𑀺; ‘𑀅𑀬𑀁 𑀧𑀼𑀕𑁆𑀕𑀮𑁄 𑀲𑀢𑁆𑀢𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 ‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’𑀢𑀺 𑀦𑀸𑀫𑀁 𑀅𑀓𑀸𑀲𑀺.

𑀓𑁄𑀘𑀺 𑀧𑀦 𑀧𑀼𑀕𑁆𑀕𑀮𑁄 𑀲𑀢𑁆𑀢𑀦𑁆𑀦𑀁 𑀪𑀯𑀸𑀦𑀁 𑀦𑀺𑀬𑀢𑁄 𑀦𑀸𑀫 𑀦𑀢𑁆𑀣𑀺. 𑀅𑀭𑀺𑀬𑀲𑀸𑀯𑀓𑁄 𑀧𑀦 𑀬𑁂𑀦 𑀓𑁂𑀦𑀘𑀺𑀧𑀺 𑀆𑀓𑀸𑀭𑁂𑀦 𑀫𑀦𑁆𑀤𑀧𑀜𑁆𑀜𑁄 𑀲𑀫𑀸𑀦𑁄 𑀅𑀝𑁆𑀞𑀫𑀁 𑀪𑀯𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀲𑀓𑁆𑀓𑀲𑀤𑀺𑀲𑁄𑀧𑀺 𑀯𑀝𑁆𑀝𑀸𑀪𑀺𑀭𑀢𑁄 𑀲𑀢𑁆𑀢𑀫𑀁𑀬𑁂𑀯 𑀪𑀯𑀁 𑀕𑀘𑁆𑀙𑀢𑀺. 𑀲𑀢𑁆𑀢𑀫𑁂 𑀪𑀯𑁂 𑀲𑀩𑁆𑀩𑀓𑀸𑀭𑁂𑀦 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺. 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀆𑀭𑀫𑁆𑀫𑀡𑁂 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂𑀧𑀺 𑀳𑀺𑀲𑁆𑀲 𑀲𑀢𑁆𑀢𑀫𑁂 𑀪𑀯𑁂 𑀦𑀺𑀤𑁆𑀤𑀁 𑀯𑀸 𑀑𑀓𑁆𑀓𑀫𑀦𑁆𑀢𑀲𑁆𑀲, 𑀧𑀭𑀫𑁆𑀫𑀼𑀔𑀁 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲, 𑀧𑀘𑁆𑀙𑀢𑁄 𑀞𑀢𑁆𑀯𑀸 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑁄𑀘𑀺𑀤𑁂𑀯 𑀲𑀻𑀲𑀁 𑀧𑀸𑀢𑁂𑀬𑁆𑀬, 𑀉𑀤𑀓𑁂 𑀯𑀸 𑀑𑀲𑀸𑀤𑁂𑀢𑁆𑀯𑀸 𑀫𑀸𑀭𑁂𑀬𑁆𑀬, 𑀅𑀲𑀦𑀺 𑀯𑀸 𑀧𑀦𑀲𑁆𑀲 𑀲𑀻𑀲𑁂 𑀧𑀢𑁂𑀬𑁆𑀬, 𑀏𑀯𑀭𑀽𑀧𑁂𑀧𑀺 𑀓𑀸𑀮𑁂 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀓𑀸𑀮𑀁𑀓𑀺𑀭𑀺𑀬𑀸 ¶ 𑀦𑀸𑀫 𑀦 𑀳𑁄𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀢𑀻𑀡𑀺 𑀳𑀺 𑀔𑁂𑀢𑁆𑀢𑀸𑀦𑀺 𑁋 𑀚𑀸𑀢𑀺𑀔𑁂𑀢𑁆𑀢𑀁, 𑀆𑀡𑀸𑀔𑁂𑀢𑁆𑀢𑀁, 𑀯𑀺𑀲𑀬𑀓𑁆𑀔𑁂𑀢𑁆𑀢𑀦𑁆𑀢𑀺. 𑀢𑀢𑁆𑀣 ‘𑀚𑀸𑀢𑀺𑀓𑁆𑀔𑁂𑀢𑁆𑀢𑀁’ 𑀦𑀸𑀫 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀓𑀸𑀮𑁂, 𑀦𑀺𑀓𑁆𑀔𑀫𑀦𑀓𑀸𑀮𑁂, 𑀲𑀫𑁆𑀩𑁄𑀥𑀺𑀓𑀸𑀮𑁂, 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑁂, 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂, 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀓𑀫𑁆𑀧𑀢𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀦 ‘𑀆𑀡𑀸𑀔𑁂𑀢𑁆𑀢𑀁’ 𑀦𑀸𑀫. 𑀆𑀝𑀸𑀦𑀸𑀝𑀺𑀬𑀫𑁄𑀭𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢𑀭𑀢𑀦𑀧𑀭𑀺𑀢𑁆𑀢𑀸𑀤𑀻𑀦𑀜𑁆𑀳𑀺 ¶ 𑀏𑀢𑁆𑀣 𑀆𑀡𑀸 𑀯𑀢𑁆𑀢𑀢𑀺. ‘𑀯𑀺𑀲𑀬𑀔𑁂𑀢𑁆𑀢𑀲𑁆𑀲’ 𑀧𑀦 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 ‘‘𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁 ¶ , 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀁, 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺.

𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼, 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁, 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀢𑀻𑀡𑀺 𑀧𑀺𑀝𑀓𑀸𑀦𑀺 𑁋 𑀯𑀺𑀦𑀬𑀧𑀺𑀝𑀓𑀁, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺. 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑁋 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀬𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀻𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸; 𑀏𑀓𑀢𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 ‘‘𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀢𑀸𑀯 𑀧𑀼𑀩𑁆𑀩𑁂𑀦𑁆𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑁂𑀦𑁂𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄, 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬 𑀘 𑀬𑀸𑀯 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀺 𑀢𑀸𑀯 𑀧𑀘𑁆𑀙𑀸𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀸𑀢𑀽𑀲𑀼 𑀳𑀺 𑀞𑀺𑀢𑀸𑀲𑀼 𑀩𑀼𑀤𑁆𑀥𑀸 𑀞𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀧𑀦 𑀚𑀸𑀢𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸.

𑀢𑀻𑀡𑀺 ¶ 𑀳𑀺 𑀅𑀦𑁆𑀢𑀭𑀥𑀸𑀦𑀸𑀦𑀺 𑀦𑀸𑀫 𑁋 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀯𑁂𑀥𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀦𑁆𑀢𑀺. 𑀢𑀢𑁆𑀣 ‘𑀧𑀭𑀺𑀬𑀢𑁆𑀢𑀻’𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺; ‘𑀧𑀝𑀺𑀯𑁂𑀥𑁄’𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑁄; ‘𑀧𑀝𑀺𑀧𑀢𑁆𑀢𑀻’𑀢𑀺 𑀧𑀝𑀺𑀧𑀤𑀸. 𑀢𑀢𑁆𑀣 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀝𑀺𑀯𑁂𑀥𑀓𑀭𑀸 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺; ‘𑀏𑀲 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄’𑀢𑀺 𑀅𑀗𑁆𑀕𑀼𑀮𑀺𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀏𑀓𑀯𑀸𑀭𑀁 𑀓𑀺𑀭 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 ¶ 𑀦𑀸𑀫 𑀦𑀸𑀳𑁄𑀲𑀺. 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸𑀧𑀺 𑀓𑀤𑀸𑀘𑀺 𑀩𑀳𑀽 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀅𑀧𑁆𑀧𑀸. 𑀇𑀢𑀺 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺.

𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀦 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁. 𑀧𑀡𑁆𑀟𑀺𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀬𑀣𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀲𑀢𑁆𑀢 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 ‘𑀦 𑀚𑀸𑀦𑀸𑀫𑀻’𑀢𑀺 𑀆𑀳; 𑀢𑀢𑁄 𑀉𑀤𑀓𑀲𑁆𑀲 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺; 𑀲𑁄 𑀆𑀘𑀺𑀓𑁆𑀔𑀺; 𑀢𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀫𑁆𑀧𑀸𑀤𑁂𑀲𑀺; 𑀏𑀯𑀫𑁂𑀯 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺. 𑀬𑀤𑀸 𑀧𑀦 𑀲𑀸 𑀅𑀦𑁆𑀢𑀭𑀥𑀸𑀬𑀢𑀺 𑀢𑀤𑀸 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀲𑁆𑀲𑀢𑀺. 𑀢𑀢𑁆𑀣 𑀧𑀝𑁆𑀞𑀸𑀦𑀁 𑀲𑀩𑁆𑀩𑀧𑀞𑀫𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀙𑀸 𑀥𑀫𑁆𑀫𑀲𑀗𑁆𑀕𑀳𑁄. 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀧𑀺𑀝𑀓𑁂𑀲𑀼 𑀞𑀺𑀢𑁂𑀲𑀼 𑀲𑀸𑀲𑀦𑀁 𑀞𑀺𑀢𑀫𑁂𑀯 𑀳𑁄𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀧𑀞𑀫𑀁 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀏𑀓𑀸𑀤𑀲𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀓𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀦𑀦𑁆𑀢𑀭𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀘𑀓𑁆𑀓𑀧𑁂𑀬𑁆𑀬𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀑𑀖𑀢𑀭𑀡𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀦𑀦𑁆𑀢𑀭𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀽𑀮𑀧𑀭𑀺𑀬𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀦𑀦𑁆𑀢𑀭𑀁 𑀤𑀻𑀖𑀦𑀺𑀓𑀸𑀬𑁄 𑀤𑀲𑀼𑀢𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁆𑀭𑀳𑁆𑀫𑀚𑀸𑀮𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀏𑀓𑀺𑀲𑁆𑀲𑀸𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀸𑀣𑀸𑀦𑀁 𑀧𑀼𑀘𑁆𑀙𑀸 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀺; 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀲𑀪𑀺𑀬𑀧𑀼𑀘𑁆𑀙𑀸 (𑀲𑀼. 𑀦𑀺. 𑁫𑁧𑁫 𑀆𑀤𑀬𑁄) 𑀯𑀺𑀬 𑀆𑀴𑀯𑀓𑀧𑀼𑀘𑁆𑀙𑀸 (𑀲𑀼. 𑀦𑀺. 𑁧𑁮𑁩 𑀆𑀤𑀬𑁄; 𑀲𑀁. 𑀦𑀺. 𑁧.𑁨𑁪𑁬) 𑀯𑀺𑀬 𑀘. 𑀏𑀢𑀸 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀺𑀓𑀸 𑀅𑀦𑁆𑀢𑀭𑀸 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀤𑁆𑀯𑀻𑀲𑀼 𑀧𑀦 𑀧𑀺𑀝𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼𑀧𑀺 𑀯𑀺𑀦𑀬𑀧𑀺𑀝𑀓𑁂 𑀞𑀺𑀢𑁂 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀧𑀭𑀺𑀯𑀸𑀭𑀔𑀦𑁆𑀥𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼 𑀉𑀪𑀢𑁄𑀯𑀺𑀪𑀗𑁆𑀕𑁂 𑀞𑀺𑀢𑁂 𑀞𑀺𑀢𑀫𑁂𑀯 𑀳𑁄𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑁂 𑀅𑀦𑁆𑀢𑀭𑀳𑀺𑀢𑁂 𑀫𑀸𑀢𑀺𑀓𑀸𑀬 ¶ 𑀞𑀺𑀢𑀸𑀬𑀧𑀺 𑀞𑀺𑀢𑀫𑁂𑀯 𑀳𑁄𑀢𑀺. 𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀧𑀸𑀢𑀺𑀫𑁄𑀓𑁆𑀔𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼 𑀞𑀺𑀢𑀸𑀲𑀼 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀮𑀺𑀗𑁆𑀕𑀁 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀺. 𑀲𑁂𑀢𑀯𑀢𑁆𑀣𑀲𑀫𑀡𑀯𑀁𑀲𑁄 𑀧𑀦 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀲𑀘𑁆𑀘𑀧𑀝𑀺𑀯𑁂𑀥𑀢𑁄 𑀧𑀘𑁆𑀙𑀺𑀫𑀓𑀲𑁆𑀲 𑀲𑀻𑀮𑀪𑁂𑀤𑀢𑁄 𑀘 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀯𑀸𑀭𑀺𑀢𑀸.

𑀢𑀻𑀡𑀺 ¶ 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫 𑁋 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀢𑁆𑀣 ‘𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁’ 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺, ‘𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁’ 𑀓𑀼𑀲𑀺𑀦𑀸𑀭𑀸𑀬𑀁, ‘𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁’ 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺. 𑀲𑀸𑀲𑀦𑀲𑁆𑀲 𑀓𑀺𑀭 𑀑𑀲𑀓𑁆𑀓𑀦𑀓𑀸𑀮𑁂 ¶ 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀫𑀳𑀸𑀘𑁂𑀢𑀺𑀬𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁, 𑀢𑀢𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺. 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼 𑀦 𑀅𑀦𑁆𑀢𑀭𑀸 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀭𑀸𑀲𑀺𑀪𑀽𑀢𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀖𑀦𑀸 𑀳𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺. 𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀚𑁆𑀚 𑀲𑀸𑀲𑀦𑀁 𑀑𑀲𑀓𑁆𑀓𑀢𑀺, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀤𑀸𑀦𑀺 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑀢𑁄 𑀫𑀳𑀦𑁆𑀢𑀢𑀭𑀁 𑀓𑀸𑀭𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀞𑀧𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 𑀲𑀓𑀪𑀸𑀯𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑀸𑀢𑀽𑀲𑀼 𑀢𑁂𑀚𑁄𑀥𑀸𑀢𑀼 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺. 𑀲𑀸𑀲𑀧𑀫𑀢𑁆𑀢𑀸𑀬𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸𑀯 𑀪𑀯𑀺𑀲𑁆𑀲𑀢𑀺; 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀽𑀲𑀼 𑀅𑀦𑁆𑀢𑀭𑀳𑀺𑀢𑀸𑀲𑀼 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀸𑀯 𑀏𑀯𑀁 𑀦 𑀅𑀦𑁆𑀢𑀭𑀥𑀸𑀬𑀢𑀺 𑀢𑀸𑀯 𑀅𑀘𑀭𑀺𑀫𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀓𑀲𑁆𑀫𑀸 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀩𑀼𑀤𑁆𑀥𑀸 𑀳𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸, 𑀬𑀣𑀸𑀳 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁨). 𑀬𑀤𑀺 𑀘 𑀤𑁆𑀯𑁂 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀅𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀘𑁂𑀢𑀺𑀬𑀸𑀦𑀫𑁆𑀧𑀺 𑀮𑀸𑀪𑀲𑀓𑁆𑀓𑀸𑀭𑁄 𑀉𑀴𑀸𑀭𑁄 𑀦 𑀳𑁄𑀢𑀺, 𑀪𑀺𑀓𑁆𑀔𑀽𑀧𑀺 𑀩𑀳𑀼𑀢𑀸𑀬 𑀦 𑀅𑀘𑁆𑀙𑀭𑀺𑀬𑀸 𑀚𑀸𑀢𑀸, 𑀏𑀯𑀁 𑀩𑀼𑀤𑁆𑀥𑀸𑀧𑀺 𑀪𑀯𑁂𑀬𑁆𑀬𑀼𑀁; 𑀢𑀲𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀤𑁂𑀲𑀦𑀸𑀬 ¶ ¶ 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀏𑀓𑁄 𑀤𑁂𑀲𑁂𑀢𑀺, 𑀅𑀜𑁆𑀜𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑁄𑀯 𑀤𑁂𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀢𑁄 𑀅𑀦𑀘𑁆𑀙𑀭𑀺𑀬𑁄 𑀲𑀺𑀬𑀸. 𑀏𑀓𑀲𑁆𑀫𑀺𑀁 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀤𑁂𑀲𑀦𑀸𑀧𑀺 𑀅𑀘𑁆𑀙𑀭𑀺𑀬𑀸 𑀳𑁄𑀢𑀺. 𑀯𑀺𑀯𑀸𑀤𑀪𑀸𑀯𑀢𑁄 𑀘. 𑀩𑀳𑀽𑀲𑀼 𑀘 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀳𑀽𑀦𑀁 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 ‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀧𑀸𑀲𑀸𑀤𑀺𑀓𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀫𑀥𑀼𑀭𑀲𑁆𑀲𑀭𑁄 𑀮𑀸𑀪𑀻 𑀧𑀼𑀜𑁆𑀜𑀯𑀸’𑀢𑀺 𑀯𑀺𑀯𑀤𑁂𑀬𑁆𑀬𑀼𑀁; 𑀢𑀲𑁆𑀫𑀸𑀧𑀺 𑀏𑀯𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀺𑀘𑁂𑀢𑀁 ¶ 𑀓𑀸𑀭𑀡𑀁 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 (𑀫𑀺. 𑀧. 𑁫.𑁧.𑁧) 𑁋

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁧.𑁨𑁭𑁭; 𑀫. 𑀦𑀺. 𑁩.𑁧𑁨𑁯). 𑀤𑁂𑀲𑁂𑀦𑁆𑀢𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀓𑀣𑀬𑀫𑀸𑀦𑀸 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀣𑁂𑀦𑁆𑀢𑀺, 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀣𑀸𑀕𑀢𑀸𑀦𑀁 𑀏𑀓𑀸 𑀤𑁂𑀲𑀦𑀸 𑀏𑀓𑀸 𑀓𑀣𑀸 𑀏𑀓𑀸 𑀲𑀺𑀓𑁆𑀔𑀸 𑀏𑀓𑀸𑀦𑀼𑀲𑀺𑀝𑁆𑀞𑀺, 𑀓𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺? 𑀏𑀓𑁂𑀦𑀧𑀺 𑀢𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀅𑀬𑀁 𑀮𑁄𑀓𑁄 𑀑𑀪𑀸𑀲𑀚𑀸𑀢𑁄. 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀧𑀪𑀸𑀬 𑀅𑀬𑀁 𑀮𑁄𑀓𑁄 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀑𑀪𑀸𑀲𑀚𑀸𑀢𑁄 𑀪𑀯𑁂𑀬𑁆𑀬. 𑀑𑀯𑀤𑀦𑁆𑀢𑀸 𑀘 𑀤𑁆𑀯𑁂 𑀢𑀣𑀸𑀕𑀢𑀸 𑀲𑀼𑀔𑀁 𑀑𑀯𑀤𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀲𑀼𑀔𑀁 𑀅𑀦𑀼𑀲𑀸𑀲𑁂𑀬𑁆𑀬𑀼𑀁. 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀤𑀲𑁆𑀲𑁂𑀳𑀺 𑀬𑀣𑀸𑀳𑀁 𑀦𑀺𑀲𑁆𑀲𑀁𑀲𑀬𑁄 𑀪𑀯𑁂𑀬𑁆𑀬’’𑀦𑁆𑀢𑀺.

‘‘𑀅𑀬𑀁, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺. 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀏𑀓𑀧𑀼𑀭𑀺𑀲𑀲𑀦𑁆𑀥𑀸𑀭𑀡𑀻 𑀪𑀯𑁂𑀬𑁆𑀬, 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀅𑀪𑀺𑀭𑀽𑀴𑁆𑀳𑁂 𑀲𑀸 ¶ 𑀦𑀸𑀯𑀸 𑀲𑀫𑀼𑀧𑀸𑀤𑀺𑀓𑀸 𑀪𑀯𑁂𑀬𑁆𑀬. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ¶ 𑀢𑀸𑀤𑀺𑀲𑁄 𑀆𑀬𑀼𑀦𑀸 𑀯𑀡𑁆𑀡𑁂𑀦 𑀯𑀬𑁂𑀦 𑀧𑀫𑀸𑀡𑁂𑀦 𑀓𑀺𑀲𑀣𑀽𑀮𑁂𑀦 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑁂𑀦. 𑀲𑁄 𑀢𑀁 𑀦𑀸𑀯𑀁 𑀅𑀪𑀺𑀭𑀽𑀳𑁂𑀬𑁆𑀬. 𑀅𑀧𑀺𑀦𑀼 𑀲𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀸𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬, 𑀑𑀲𑀻𑀤𑁂𑀬𑁆𑀬 𑀉𑀤𑀓𑁂’’𑀢𑀺 ¶ . ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺. 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬 𑀙𑀸𑀤𑁂𑀦𑁆𑀢𑀁 𑀬𑀸𑀯𑀓𑀡𑁆𑀞𑀫𑀪𑀺𑀧𑀽𑀭𑀬𑀺𑀢𑁆𑀯𑀸. 𑀲𑁄 𑀢𑀢𑁄 𑀧𑀻𑀡𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀦𑀺𑀭𑀦𑁆𑀢𑀭𑁄 𑀢𑀦𑁆𑀤𑀻𑀕𑀢𑁄 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄 𑀧𑀼𑀦𑀤𑁂𑀯 𑀢𑀢𑁆𑀢𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬. 𑀅𑀧𑀺𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀓𑀺𑀁 𑀪𑀼𑀢𑁆𑀢𑁄𑀯 𑀫𑀭𑁂𑀬𑁆𑀬𑀸’’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻’’𑀢𑀺? ‘‘𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸 𑀭𑀢𑀦𑀧𑀭𑀺𑀧𑀽𑀭𑀺𑀢𑀸 𑀪𑀯𑁂𑀬𑁆𑀬𑀼𑀁 𑀬𑀸𑀯𑀲𑁆𑀫𑀸 𑀫𑀼𑀔𑀲𑀫𑀸. 𑀏𑀓 𑀲𑀓𑀝𑀢𑁄 𑀭𑀢𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑁆𑀳𑀺 𑀲𑀓𑀝𑁂 𑀆𑀓𑀺𑀭𑁂𑀬𑁆𑀬𑀼𑀁. 𑀅𑀧𑀺𑀦𑀼 𑀢𑀁, 𑀫𑀳𑀸𑀭𑀸𑀚, 𑀲𑀓𑀝𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀓𑀝𑀸𑀦𑀁 𑀭𑀢𑀦𑀁 𑀥𑀸𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀦𑀸𑀪𑀺𑀧𑀺 𑀢𑀲𑁆𑀲 𑀘𑀮𑁂𑀬𑁆𑀬, 𑀅𑀭𑀸𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁂𑀫𑀺𑀧𑀺 𑀢𑀲𑁆𑀲 𑀑𑀧𑀢𑁂𑀬𑁆𑀬, 𑀅𑀓𑁆𑀔𑁄𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀓𑀺𑀦𑁆𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀭𑀢𑀦𑀪𑀸𑀭𑁂𑀦 𑀲𑀓𑀝𑀁 𑀪𑀺𑀚𑁆𑀚𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺.

‘‘𑀅𑀧𑀺𑀘, 𑀫𑀳𑀸𑀭𑀸𑀚, 𑀇𑀫𑀁 𑀓𑀸𑀭𑀡𑀁 𑀩𑀼𑀤𑁆𑀥𑀩𑀮𑀧𑀭𑀺𑀤𑀻𑀧𑀦𑀸𑀬 𑀑𑀲𑀸𑀭𑀺𑀢𑀁. 𑀅𑀜𑁆𑀜𑀫𑁆𑀧𑀺 𑀢𑀢𑁆𑀣 𑀧𑀢𑀺𑀭𑀽𑀧𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀁 𑀩𑀮𑀯𑀸𑀫𑀘𑁆𑀘𑀸𑀦𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀢𑀼𑀫𑁆𑀳𑀸𑀓𑀁 𑀅𑀫𑀘𑁆𑀘𑁄, 𑀅𑀫𑁆𑀳𑀸𑀓𑀁 ¶ 𑀅𑀫𑀘𑁆𑀘𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀳𑁄𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 ¶ 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ¶ 𑁋 ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀇𑀤𑀁 𑀢𑀸𑀯 𑀫𑀳𑀸𑀭𑀸𑀚 𑀏𑀓𑀁 𑀓𑀸𑀭𑀡𑀁 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 ‘𑀅𑀕𑁆𑀕𑁄 𑀩𑀼𑀤𑁆𑀥𑁄’𑀢𑀺 𑀬𑀁 𑀯𑀘𑀦𑀁 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬, ‘𑀚𑁂𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺 ‘𑀲𑁂𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺 ‘𑀯𑀺𑀲𑀺𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺 ‘𑀉𑀢𑁆𑀢𑀫𑁄 𑀩𑀼𑀤𑁆𑀥𑁄’𑀢𑀺 ‘𑀧𑀯𑀭𑁄 𑀩𑀼𑀤𑁆𑀥𑁄’𑀢𑀺 ‘𑀅𑀲𑀫𑁄 𑀩𑀼𑀤𑁆𑀥𑁄’𑀢𑀺 ‘𑀅𑀲𑀫𑀲𑀫𑁄 𑀩𑀼𑀤𑁆𑀥𑁄’𑀢𑀺 ‘𑀅𑀧𑁆𑀧𑀝𑀺𑀲𑀫𑁄 𑀩𑀼𑀤𑁆𑀥𑁄’𑀢𑀺 ‘𑀅𑀧𑁆𑀧𑀝𑀺𑀪𑀸𑀕𑀻 𑀩𑀼𑀤𑁆𑀥𑁄’𑀢𑀺 ‘𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄’𑀢𑀺 𑀬𑀁 𑀯𑀘𑀦𑀁 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀇𑀤𑀫𑁆𑀧𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀢𑀣𑀢𑁄 𑀲𑀫𑁆𑀧𑀝𑀺𑀘𑁆𑀙 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀺𑀘, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀧𑀓𑀢𑀺 𑀏𑀲𑀸 𑀬𑀁 𑀏𑀓𑁄𑀬𑁂𑀯 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀫𑀳𑀦𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀕𑀼𑀡𑀸𑀦𑀁. 𑀅𑀜𑁆𑀜𑀫𑁆𑀧𑀺, 𑀫𑀳𑀸𑀭𑀸𑀚, 𑀬𑀁 𑀮𑁄𑀓𑁂 𑀫𑀳𑀦𑁆𑀢𑀁 𑀢𑀁 𑀏𑀓𑀁𑀬𑁂𑀯 𑀳𑁄𑀢𑀺. 𑀧𑀣𑀯𑀻, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀸, 𑀲𑀸 𑀏𑀓𑀸𑀬𑁂𑀯; 𑀲𑀸𑀕𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯; 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯; 𑀆𑀓𑀸𑀲𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯; 𑀲𑀓𑁆𑀓𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯; 𑀫𑀳𑀸𑀩𑁆𑀭𑀳𑁆𑀫𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯; 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯 𑀮𑁄𑀓𑀲𑁆𑀫𑀺𑀁. 𑀬𑀢𑁆𑀣 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀑𑀓𑀸𑀲𑁄 𑀦 𑀳𑁄𑀢𑀺. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑁄𑀬𑁂𑀯 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺 (𑀫𑀺. 𑀧. 𑁫.𑁧.𑁧).

𑀏𑀓𑀺𑀲𑁆𑀲𑀸 ¶ 𑀮𑁄𑀓𑀥𑀸𑀢𑀼𑀬𑀸𑀢𑀺 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂. 𑀳𑁂𑀝𑁆𑀞𑀸 𑀇𑀫𑀺𑀦𑀸𑀯 𑀧𑀤𑁂𑀦 𑀤𑀲 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀸𑀦𑀺𑀧𑀺 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀩𑀼𑀤𑁆𑀥𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀦 𑀯𑀸𑀭𑀺𑀢𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 ¶ 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀸𑀭𑀺𑀢𑀫𑁂𑀯 𑀳𑁄𑀢𑀺. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀼𑀩𑁆𑀩𑁂 𑀧𑀼𑀩𑁆𑀩𑀁, 𑀢𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀦𑀢𑁄 𑀧𑀘𑁆𑀙𑀸 𑀘𑀭𑀺𑀫𑀁. 𑀢𑀢𑁆𑀣 𑀤𑁆𑀯𑀺𑀥𑀸 𑀘𑀓𑁆𑀓𑀭𑀢𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺 𑁋 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑀓𑀺𑀭𑀺𑀬𑀸𑀬 𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸. 𑀅𑀦𑁆𑀢𑀭𑀥𑀸𑀬𑀫𑀸𑀦𑀜𑁆𑀘 𑀧𑀦 𑀢𑀁 𑀓𑀸𑀮𑀓𑀺𑀭𑀺𑀬𑀢𑁄 𑀯𑀸 𑀧𑀩𑁆𑀩𑀚𑁆𑀚𑀢𑁄 𑀯𑀸 𑀲𑀢𑁆𑀢𑀫𑁂 ¶ 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀢𑁄 𑀧𑀭𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀸𑀢𑀼𑀪𑀸𑀯𑁄 𑀅𑀯𑀸𑀭𑀺𑀢𑁄. 𑀓𑀲𑁆𑀫𑀸 𑀧𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀘𑀓𑁆𑀓𑀯𑀢𑁆𑀢𑀺𑀦𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄 𑀅𑀦𑀘𑁆𑀙𑀭𑀺𑀬𑀪𑀸𑀯𑀢𑁄 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘. 𑀤𑁆𑀯𑀻𑀲𑀼 𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 ‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄’𑀢𑀺 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. ‘𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻, 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻’𑀢𑀺 𑀘 𑀅𑀦𑀘𑁆𑀙𑀭𑀺𑀬𑁄 𑀪𑀯𑁂𑀬𑁆𑀬. 𑀬𑁄 𑀘𑀸𑀬𑀁 𑀘𑀓𑁆𑀓𑀭𑀢𑀦𑀲𑁆𑀲 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑀲𑀫𑀢𑁆𑀣𑁄 𑀫𑀳𑀸𑀦𑀼𑀪𑀸𑀯𑁄, 𑀲𑁄 𑀧𑀭𑀺𑀳𑀸𑀬𑁂𑀬𑁆𑀬. 𑀇𑀢𑀺 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄 𑀅𑀦𑀘𑁆𑀙𑀭𑀺𑀬𑀪𑀸𑀯𑀢𑁄 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘 𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀬𑀁 𑀇𑀢𑁆𑀣𑁄 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀢𑀺𑀝𑁆𑀞𑀢𑀼 𑀢𑀸𑀯 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀮𑁄𑀓𑀢𑁆𑀢𑀸𑀭𑀡𑀲𑀫𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑁄, 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀬𑀸 𑀦 𑀲𑀫𑁆𑀧𑀚𑁆𑀚𑀢𑀺.

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯);

𑀇𑀫𑀸𑀦𑀺 𑀳𑀺 𑀧𑀡𑀺𑀥𑀸𑀦𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀇𑀢𑀺 𑀧𑀡𑀺𑀥𑀸𑀦𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀓𑀼𑀢𑁄 𑀩𑀼𑀤𑁆𑀥𑀪𑀸𑀯𑁄𑀢𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀅𑀦𑀯𑀓𑀸𑀲𑁄 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀯𑀸 𑀧𑀼𑀜𑁆𑀜𑀼𑀲𑁆𑀲𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀭𑀺𑀲𑁄𑀯 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀬𑀁 ¶ 𑀇𑀢𑁆𑀣𑀻 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀬𑀲𑁆𑀫𑀸 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀸𑀤𑀻𑀦𑀁 𑀅𑀪𑀸𑀯𑁂𑀦 𑀮𑀓𑁆𑀔𑀡𑀸𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀇𑀢𑁆𑀣𑀺𑀭𑀢𑀦𑀪𑀸𑀯𑁂𑀦 𑀲𑀢𑁆𑀢𑀭𑀢𑀦𑀲𑀫𑀗𑁆𑀕𑀺𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑀦𑀼𑀲𑁆𑀲𑁂𑀳𑀺 𑀘 𑀅𑀥𑀺𑀓𑁄 𑀅𑀢𑁆𑀢𑀪𑀸𑀯𑁄 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀇𑀢𑁆𑀣𑀻 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀲𑀓𑁆𑀓𑀢𑁆𑀢𑀸𑀤𑀻𑀦𑀺𑀧𑀺 𑀢𑀻𑀡𑀺 𑀞𑀸𑀦𑀸𑀦𑀺 𑀉𑀢𑁆𑀢𑀫𑀸𑀦𑀺, 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘 𑀳𑀻𑀦𑀁 ¶ , 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀓𑁆𑀓𑀢𑁆𑀢𑀸𑀤𑀻𑀦𑀺𑀧𑀺 𑀧𑀝𑀺𑀲𑀺𑀤𑁆𑀥𑀸𑀦𑀺. 𑀦𑀦𑀼 𑀘 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀁 𑀏𑀯𑀁 𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀬𑀁 𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀢𑁆𑀢𑀁 𑀓𑀸𑀭𑁂𑀬𑁆𑀬 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦𑁄 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀩𑁆𑀭𑀳𑁆𑀫𑀢𑁆𑀢𑀦𑁆𑀢𑀺 𑀳𑀺 𑀫𑀳𑀸𑀩𑁆𑀭𑀳𑁆𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀇𑀢𑁆𑀣𑀻 𑀘 𑀇𑀥 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 ¶ 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺, 𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀧𑀼𑀭𑀺𑀲𑁄 𑀧𑀦 𑀢𑀢𑁆𑀣 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀫𑀸𑀦𑁂𑀧𑀺 𑀘𑁂𑀢𑁆𑀣 𑀉𑀪𑀬𑀮𑀺𑀗𑁆𑀕𑀸𑀪𑀸𑀯𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀯 𑀩𑁆𑀭𑀳𑁆𑀫𑀸𑀦𑁄, 𑀦 𑀇𑀢𑁆𑀣𑀺𑀲𑀡𑁆𑀞𑀸𑀦𑀸. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀯𑁂𑀢𑀁.

𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀬𑀣𑀸 𑀦𑀺𑀫𑁆𑀩𑀩𑀻𑀚𑀓𑁄𑀲𑀸𑀢𑀓𑀻𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀨𑀮𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀲𑀸𑀢𑀁 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀁 𑀯𑀺𑀧𑀸𑀓𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀬𑀣𑀸 𑀘 𑀉𑀘𑁆𑀙𑀼𑀩𑀻𑀚𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀲𑀸𑀥𑀼𑀭𑀲𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀲𑀸𑀢𑀁 𑀓𑀝𑀼𑀓𑀁, 𑀏𑀯𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀫𑁂𑀯 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀫𑀥𑀼𑀭𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬);

𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻𑀢𑀺𑀆𑀤𑀻𑀲𑀼 𑀲𑀫𑀗𑁆𑀕𑀻𑀢𑀺 𑀧𑀜𑁆𑀘𑀯𑀺𑀥𑀸 𑀲𑀫𑀗𑁆𑀕𑀺𑀢𑀸 𑁋 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸, 𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸, 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸𑀢𑀺. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 ‘𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸’ 𑀯𑀼𑀘𑁆𑀘𑀢𑀺. 𑀢𑀣𑀸 ‘𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸’. 𑀬𑀸𑀯 𑀧𑀦 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀢𑀸𑀯 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀧𑀼𑀩𑁆𑀩𑁂 𑀉𑀧𑀘𑀺𑀢𑀁 𑀯𑀺𑀧𑀸𑀓𑀸𑀭𑀳𑀁 𑀓𑀫𑁆𑀫𑀁 𑀲𑀦𑁆𑀥𑀸𑀬 𑀓𑀫𑁆𑀫𑀲𑀫𑀗𑁆𑀕𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺 𑁋 𑀏𑀲𑀸 ‘𑀓𑀫𑁆𑀫𑀲𑀫𑀗𑁆𑀕𑀺𑀢𑀸’. ‘𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸’ 𑀧𑀦 𑀯𑀺𑀧𑀸𑀓𑀓𑁆𑀔𑀡𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀸𑀯 𑀧𑀦 𑀲𑀢𑁆𑀢𑀸 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀢𑀸𑀯 𑀢𑁂𑀲𑀁 ¶ 𑀢𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀕𑁆𑀕𑀺𑀚𑀸𑀮𑀮𑁄𑀳𑀓𑀼𑀫𑁆𑀪𑀻𑀆𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀦𑀺𑀭𑀬𑁄, 𑀕𑀩𑁆𑀪𑀲𑁂𑀬𑁆𑀬𑀓𑀢𑁆𑀢𑀁 𑀆𑀧𑀚𑁆𑀚𑀫𑀸𑀦𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺, 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀧𑁆𑀧𑀭𑀼𑀓𑁆𑀔𑀯𑀺𑀫𑀸𑀦𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀤𑁂𑀯𑀮𑁄𑀓𑁄𑀢𑀺 ¶ 𑀏𑀯𑀁 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. 𑀇𑀢𑀺 𑀦𑁂𑀲𑀁 𑀇𑀫𑀺𑀦𑀸 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀽𑀧𑀝𑁆𑀞𑀸𑀦𑁂𑀦 𑀅𑀧𑀭𑀺𑀫𑀼𑀢𑁆𑀢𑀢𑁆𑀢𑀸 ‘𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸’ 𑀦𑀸𑀫. 𑀲𑀸𑀯 𑀘𑀮𑀢𑀺, 𑀲𑁂𑀲𑀸 𑀦𑀺𑀘𑁆𑀘𑀮𑀸. 𑀦𑀺𑀭𑀬𑁂 𑀳𑀺 𑀉𑀧𑀝𑁆𑀞𑀺𑀢𑁂𑀧𑀺 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀢𑀺; 𑀤𑁂𑀯𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀦𑀺𑀭𑀬𑁄 𑀉𑀧𑀝𑁆𑀞𑀸𑀢𑀺; 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀉𑀧𑀝𑁆𑀞𑀸𑀢𑀺; 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀘 𑀉𑀧𑀝𑁆𑀞𑀺𑀢𑀸𑀬𑀧𑀺 𑀫𑀦𑀼𑀲𑁆𑀲𑀮𑁄𑀓𑁄 𑀉𑀧𑀝𑁆𑀞𑀸𑀢𑀺𑀬𑁂𑀯.

𑀢𑀢𑁆𑀭𑀺𑀤𑀁 ¶ 𑀯𑀢𑁆𑀣𑀼 𑁋 𑀲𑁄𑀡𑀕𑀺𑀭𑀺𑀧𑀸𑀤𑁂 𑀓𑀺𑀭 𑀅𑀘𑁂𑀮𑀯𑀺𑀳𑀸𑀭𑁂 𑀲𑁄𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑀓𑀣𑀺𑀓𑁄. 𑀢𑀲𑁆𑀲 𑀧𑀺𑀢𑀸 𑀲𑀼𑀦𑀔𑀯𑀸𑀚𑀺𑀓𑁄 𑀦𑀸𑀫 𑀮𑀼𑀤𑁆𑀤𑀓𑁄 𑀅𑀳𑁄𑀲𑀺. 𑀣𑁂𑀭𑁄 𑀢𑀁 𑀧𑀝𑀺𑀩𑀸𑀳𑀦𑁆𑀢𑁄𑀧𑀺 𑀲𑀁𑀯𑀭𑁂 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘𑀫𑀸 𑀦𑀲𑁆𑀲𑀺 𑀯𑀭𑀸𑀓𑁄’𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀅𑀓𑀸𑀫𑀓𑀁 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑀲𑁆𑀲 𑀦𑀺𑀭𑀬𑁄 𑀉𑀧𑀝𑁆𑀞𑀸𑀲𑀺. 𑀲𑁄𑀡𑀕𑀺𑀭𑀺𑀧𑀸𑀤𑀢𑁄 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀲𑀼𑀦𑀔𑀸 𑀆𑀕𑀦𑁆𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀯𑀺𑀬 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀫𑀳𑀸𑀪𑀬𑀪𑀻𑀢𑁄 ‘‘𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡! 𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡𑀸’’𑀢𑀺 𑀆𑀳. ‘‘𑀓𑀺𑀁 𑀫𑀳𑀸𑀣𑁂𑀭𑀸’’𑀢𑀺? ‘‘𑀦 𑀧𑀲𑁆𑀲𑀲𑀺, 𑀢𑀸𑀢𑀸’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑁄𑀡𑀢𑁆𑀣𑁂𑀭𑁄 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀧𑀺𑀢𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀧𑀢𑀺𑀝𑁆𑀞𑀸𑀳𑀫𑀲𑁆𑀲 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀲𑀸𑀫𑀡𑁂𑀭𑁂𑀳𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀫𑀸𑀮𑀸𑀲𑀦𑁆𑀣𑀸𑀭𑀧𑀽𑀚𑀜𑁆𑀘 𑀆𑀲𑀦𑀧𑀽𑀚𑀜𑁆𑀘 𑀓𑀸𑀭𑁂𑀢𑁆𑀯𑀸 𑀧𑀺𑀢𑀭𑀁 𑀫𑀜𑁆𑀘𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀳𑀭𑀺𑀢𑁆𑀯𑀸 𑀫𑀜𑁆𑀘𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀫𑁂, 𑀫𑀳𑀸𑀣𑁂𑀭, 𑀧𑀽𑀚𑀸 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀓𑀢𑀸; ‘𑀅𑀬𑀁 𑀫𑁂, 𑀪𑀕𑀯𑀸, 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁄’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’’𑀢𑀺 𑀆𑀳. 𑀲𑁄 𑀫𑀳𑀸𑀣𑁂𑀭𑁄 𑀧𑀽𑀚𑀁 𑀤𑀺𑀲𑁆𑀯𑀸 𑀢𑀣𑀸𑀓𑀭𑁄𑀦𑁆𑀢𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀲𑀺, 𑀦𑀦𑁆𑀤𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀫𑀺𑀲𑁆𑀲𑀓𑀯𑀦𑀨𑀸𑀭𑀼𑀲𑀓𑀯𑀦𑀯𑀺𑀫𑀸𑀦𑀸𑀦𑀺 𑀘𑁂𑀯 𑀤𑁂𑀯𑀦𑀸𑀝𑀓𑀸𑀦𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀲𑁄 ‘‘𑀅𑀧𑁂𑀣, 𑀲𑁄𑀡! 𑀅𑀧𑁂𑀣, 𑀲𑁄𑀡𑀸’’𑀢𑀺 𑀆𑀳. ‘‘𑀓𑀺𑀫𑀺𑀤𑀁, 𑀫𑀳𑀸𑀣𑁂𑀭𑀸’’𑀢𑀺? ‘‘𑀏𑀢𑀸 𑀢𑁂, 𑀢𑀸𑀢, 𑀫𑀸𑀢𑀭𑁄 𑀆𑀕𑀘𑁆𑀙𑀦𑁆𑀢𑀻’’𑀢𑀺. ‘𑀣𑁂𑀭𑁄 𑀲𑀕𑁆𑀕𑁄 𑀉𑀧𑀝𑁆𑀞𑀺𑀢𑁄 𑀫𑀳𑀸𑀣𑁂𑀭𑀲𑁆𑀲𑀸’𑀢𑀺 𑀘𑀺𑀦𑁆𑀢𑁂𑀲𑀺 ¶ . 𑀏𑀯𑀁 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀘𑀮𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀲𑀫𑀗𑁆𑀕𑀺𑀢𑀸𑀲𑀼 𑀇𑀥 𑀆𑀬𑀽𑀳𑀦𑀘𑁂𑀢𑀦𑀸𑀓𑀫𑁆𑀫𑀲𑀫𑀗𑁆𑀕𑀺𑀢𑀸𑀯𑀲𑁂𑀦 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑁄

𑁮𑁧𑁦. 𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑁂 ¶ 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀻𑀢𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀦𑀺𑀯𑀸𑀭𑀺𑀢𑀸𑀦𑀺 𑀧𑀝𑀺𑀲𑁂𑀥𑀺𑀢𑀸𑀦𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀕𑀢𑀺𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀧𑀦𑁆𑀦𑀸 𑀕𑀢𑀺 𑀤𑁂𑀯𑀮𑁄𑀓𑁄 𑀘 𑀫𑀦𑀼𑀲𑁆𑀲𑀮𑁄𑀓𑁄 𑀘. 𑀕𑀢𑀺𑀯𑀺𑀧𑀢𑁆𑀢𑀻𑀢𑀺 𑀯𑀺𑀧𑀦𑁆𑀦𑀸 𑀕𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸. 𑀉𑀧𑀥𑀺𑀲𑀫𑁆𑀧𑀢𑁆𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺. 𑀉𑀧𑀥𑀺𑀯𑀺𑀧𑀢𑁆𑀢𑀻𑀢𑀺 𑀳𑀻𑀦𑀅𑀢𑁆𑀢𑀪𑀸𑀯𑀢𑀸. 𑀓𑀸𑀮𑀲𑀫𑁆𑀧𑀢𑁆𑀢𑀻𑀢𑀺 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀓𑀸𑀮𑀲𑀗𑁆𑀔𑀸𑀢𑁄 ¶ 𑀲𑀫𑁆𑀧𑀦𑁆𑀦𑀓𑀸𑀮𑁄. 𑀓𑀸𑀮𑀯𑀺𑀧𑀢𑁆𑀢𑀻𑀢𑀺 𑀤𑀼𑀭𑀸𑀚𑀤𑀼𑀫𑀦𑀼𑀲𑁆𑀲𑀓𑀸𑀮𑀲𑀗𑁆𑀔𑀸𑀢𑁄 𑀯𑀺𑀧𑀦𑁆𑀦𑀓𑀸𑀮𑁄. 𑀧𑀬𑁄𑀕𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀫𑀸𑀧𑀬𑁄𑀕𑁄. 𑀧𑀬𑁄𑀕𑀯𑀺𑀧𑀢𑁆𑀢𑀻𑀢𑀺 𑀫𑀺𑀘𑁆𑀙𑀸𑀧𑀬𑁄𑀕𑁄.

𑀢𑀢𑁆𑀣 𑀏𑀓𑀘𑁆𑀘𑀲𑁆𑀲 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀁 𑀤𑁂𑀯𑁂𑀲𑀼 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀤𑀺𑀲𑁂 𑀘 𑀞𑀸𑀦𑁂 𑀅𑀓𑀼𑀲𑀮𑀲𑁆𑀲 𑀯𑀸𑀭𑁄 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀓𑀼𑀲𑀮𑀲𑁆𑀲𑁂𑀯 𑀯𑀸𑀭𑁄𑀢𑀺. 𑀏𑀯𑀫𑀲𑁆𑀲 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀉𑀧𑀥𑀺𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑁄 𑀲𑀼𑀲𑀡𑁆𑀞𑀺𑀢𑀗𑁆𑀕𑀧𑀘𑁆𑀘𑀗𑁆𑀕𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀩𑁆𑀭𑀳𑁆𑀫𑀯𑀘𑁆𑀙𑀲𑀤𑀺𑀲𑁄. 𑀲𑀘𑁂𑀧𑀺 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀤𑀸𑀲𑀚𑀸𑀢𑁄 𑀳𑁄𑀢𑀺 ‘𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀓𑀺𑀮𑀺𑀝𑁆𑀞𑀓𑀫𑁆𑀫𑀲𑁆𑀲 𑀦𑀸𑀦𑀼𑀘𑁆𑀙𑀯𑀺𑀓𑁄’𑀢𑀺 𑀳𑀢𑁆𑀣𑀺𑀫𑁂𑀡𑁆𑀟𑀅𑀲𑁆𑀲𑀩𑀦𑁆𑀥𑀓𑀕𑁄𑀧𑀸𑀮𑀓𑀓𑀫𑁆𑀫𑀸𑀤𑀻𑀦𑀺 𑀢𑀁 𑀦 𑀓𑀸𑀭𑁂𑀦𑁆𑀢𑀺; 𑀲𑀼𑀔𑀼𑀫𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀸𑀤𑀻𑀲𑀼 𑀞𑀧𑁂𑀦𑁆𑀢𑀺. 𑀲𑀘𑁂 𑀇𑀢𑁆𑀣𑀻 𑀳𑁄𑀢𑀺, 𑀳𑀢𑁆𑀣𑀺𑀪𑀢𑁆𑀢𑀧𑀘𑀦𑀸𑀤𑀻𑀦𑀺 𑀦 𑀓𑀸𑀭𑁂𑀦𑁆𑀢𑀺; 𑀯𑀢𑁆𑀣𑀸𑀮𑀗𑁆𑀓𑀸𑀭𑀁 𑀤𑀢𑁆𑀯𑀸 𑀲𑀬𑀦𑀧𑀸𑀮𑀺𑀓𑀁 𑀯𑀸 𑀦𑀁 𑀓𑀭𑁄𑀦𑁆𑀢𑀺, 𑀲𑁄𑀫𑀤𑁂𑀯𑀺 𑀯𑀺𑀬 𑀯𑀮𑁆𑀮𑀪𑀝𑁆𑀞𑀸𑀦𑁂 𑀯𑀸 𑀞𑀧𑁂𑀦𑁆𑀢𑀺. 𑀪𑀸𑀢𑀺𑀓𑀭𑀸𑀚𑀓𑀸𑀮𑁂 𑀓𑀺𑀭 𑀕𑁄𑀫𑀁𑀲𑀔𑀸𑀤𑀓𑁂 𑀩𑀳𑀼𑀚𑀦𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 ¶ 𑀤𑀲𑁆𑀲𑁂𑀲𑀼𑀁. 𑀢𑁂 ‘𑀤𑀡𑁆𑀟𑀁 𑀤𑀸𑀢𑀼𑀁 𑀲𑀓𑁆𑀓𑁄𑀣𑀸’𑀢𑀺 𑀧𑀼𑀝𑁆𑀞𑀸 ‘𑀦 𑀲𑀓𑁆𑀓𑁄𑀫𑀸’𑀢𑀺 𑀯𑀤𑀺𑀁𑀲𑀼. 𑀅𑀣 𑀦𑁂 𑀭𑀸𑀚𑀗𑁆𑀕𑀡𑁂 𑀲𑁄𑀥𑀓𑁂 𑀅𑀓𑀁𑀲𑀼. 𑀢𑁂𑀲𑀁 𑀏𑀓𑀸 𑀥𑀻𑀢𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀅𑀦𑁆𑀢𑁂𑀧𑀼𑀭𑀁 𑀅𑀪𑀺𑀦𑁂𑀢𑁆𑀯𑀸 𑀯𑀮𑁆𑀮𑀪𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁂𑀲𑀜𑀸𑀢𑀓𑀸𑀧𑀺 𑀢𑀲𑁆𑀲𑀸 𑀆𑀦𑀼𑀪𑀸𑀯𑁂𑀦 𑀲𑀼𑀔𑀁 𑀚𑀻𑀯𑀺𑀁𑀲𑀼. 𑀢𑀸𑀤𑀺𑀲𑀲𑁆𑀫𑀺𑀜𑁆𑀳𑀺 𑀅𑀢𑁆𑀢𑀪𑀸𑀯𑁂 𑀧𑀸𑀧𑀓𑀫𑁆𑀫𑀸𑀦𑀺𑀧𑀺 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀏𑀓𑀲𑁆𑀲 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 ¶ 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀯𑀸 𑀩𑀼𑀤𑁆𑀥𑀸𑀦𑀁 𑀯𑀸 𑀉𑀧𑁆𑀧𑀢𑁆𑀢𑀺𑀲𑀫𑀬𑁂 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀤𑀺𑀲𑁂 𑀘 𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀑𑀓𑀸𑀲𑁄 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀓𑀼𑀲𑀮𑀲𑁆𑀲𑁂𑀯 𑀑𑀓𑀸𑀲𑁄𑀢𑀺. 𑀏𑀯𑀁 𑀓𑀸𑀮𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀁 ¶ 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀢𑁄 𑀓𑀸𑀬𑀯𑀘𑀻𑀫𑀦𑁄𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑀺. 𑀢𑀸𑀤𑀺𑀲𑁂 𑀞𑀸𑀦𑁂 𑀅𑀓𑀼𑀲𑀮𑀲𑁆𑀲 𑀯𑀺𑀧𑀘𑁆𑀘𑀦𑁄𑀓𑀸𑀲𑁄 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀓𑀼𑀲𑀮𑀲𑁆𑀲𑁂𑀯 𑀑𑀓𑀸𑀲𑁄𑀢𑀺. 𑀏𑀯𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦𑁂𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀕𑀢𑀺𑀯𑀺𑀧𑀢𑁆𑀢𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺 𑁋 𑀓𑀸𑀮𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺, 𑀓𑀸𑀮𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀓𑀸𑀮𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑁂, 𑀓𑀸𑀮𑁂𑀦 𑀅𑀲𑀼𑀭𑀓𑀸𑀬𑁂, 𑀤𑀻𑀖𑁂𑀦𑀸𑀧𑀺 𑀅𑀤𑁆𑀥𑀼𑀦𑀸 𑀅𑀧𑀸𑀬𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀏𑀯𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁 ¶ . 𑀲𑁄 𑀧𑀦 𑀏𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀉𑀧𑀥𑀺𑀯𑀺𑀧𑀢𑁆𑀢𑀺𑀬𑀁𑀬𑁂𑀯 𑀧𑀢𑀺𑀝𑁆𑀞𑀺𑀢𑁄 𑀤𑀼𑀩𑁆𑀩𑀡𑁆𑀡𑁄 𑀤𑀼𑀭𑀽𑀧𑁄 𑀤𑀼𑀲𑁆𑀲𑀡𑁆𑀞𑀺𑀢𑁄 𑀩𑀻𑀪𑀘𑁆𑀙𑁄 𑀧𑀺𑀲𑀸𑀘𑀲𑀤𑀺𑀲𑁄. 𑀲𑁄 𑀲𑀘𑁂 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀬𑀁 𑀤𑀸𑀲𑀚𑀸𑀢𑁄 ‘𑀇𑀫𑀸𑀦𑀺 𑀏𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀻’𑀢𑀺 𑀲𑀩𑁆𑀩𑀸𑀦𑀺 𑀦𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀸𑀦𑀺 ¶ 𑀓𑀸𑀭𑁂𑀦𑁆𑀢𑀺 𑀅𑀦𑁆𑀢𑀫𑀲𑁄 𑀧𑀼𑀧𑁆𑀨𑀙𑀟𑁆𑀟𑀓𑀓𑀫𑁆𑀫𑀁 𑀉𑀧𑀸𑀤𑀸𑀬. 𑀲𑀘𑁂 𑀇𑀢𑁆𑀣𑀻 𑀳𑁄𑀢𑀺 ‘𑀇𑀫𑀸𑀦𑀺 𑀏𑀢𑀺𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀸𑀦𑀻’𑀢𑀺 𑀲𑀩𑁆𑀩𑀸𑀦𑀺 𑀦𑀁 𑀳𑀢𑁆𑀣𑀺𑀪𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀺𑀮𑀺𑀝𑁆𑀞𑀓𑀫𑁆𑀫𑀸𑀦𑀺 𑀓𑀸𑀭𑁂𑀦𑁆𑀢𑀺. 𑀓𑀼𑀮𑀕𑁂𑀳𑁂 𑀚𑀸𑀢𑀫𑁆𑀧𑀺 𑀩𑀮𑀺𑀁 𑀲𑀸𑀥𑀬𑀫𑀸𑀦𑀸 𑀭𑀸𑀚𑀧𑀼𑀭𑀺𑀲𑀸 ‘𑀕𑁂𑀳𑀤𑀸𑀲𑀻’𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀓𑁄𑀢𑀮𑀯𑀸𑀧𑀻𑀕𑀸𑀫𑁂 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀖𑀭𑀡𑀻 𑀯𑀺𑀬. 𑀏𑀯𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀉𑀧𑀥𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀤𑀼𑀭𑀸𑀚𑀤𑀼𑀫𑀦𑀼𑀲𑁆𑀲𑀓𑀸𑀮𑁂 𑀓𑀲𑀝𑁂 𑀦𑀺𑀭𑁄𑀚𑁂 𑀤𑀲𑀯𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀬𑀤𑀸 𑀧𑀜𑁆𑀘 𑀕𑁄𑀭𑀲𑀸 𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀓𑀼𑀤𑁆𑀭𑀽𑀲𑀓𑀁 𑀅𑀕𑁆𑀕𑀪𑁄𑀚𑀦𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀫𑀺𑀕𑀧𑀲𑀼𑀲𑀭𑀺𑀓𑁆𑀔𑀚𑀻𑀯𑀺𑀓𑁄 𑀧𑀦 𑀳𑁄𑀢𑀺. 𑀏𑀯𑀭𑀽𑀧𑁂 𑀓𑀸𑀮𑁂 𑀓𑀼𑀲𑀮𑀲𑁆𑀲 𑀯𑀺𑀧𑀘𑁆𑀘𑀦𑁄𑀓𑀸𑀲𑁄 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀅𑀓𑀼𑀲𑀮𑀲𑁆𑀲𑁂𑀯 𑀳𑁄𑀢𑀺. 𑀏𑀯𑀁 𑀓𑀸𑀮𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 ¶ 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀓𑀸𑀮𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀭𑁄𑀢𑀺. 𑀢𑀫𑁂𑀦𑀁 𑀲𑀳𑁄𑀟𑁆𑀠𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺. 𑀭𑀸𑀚𑀸 𑀩𑀳𑀽𑀓𑀫𑁆𑀫𑀓𑀸𑀭𑀡𑀸𑀦𑀺 𑀓𑀸𑀭𑁂𑀢𑁆𑀯𑀸 𑀖𑀸𑀢𑀸𑀧𑁂𑀢𑀺. 𑀏𑀯𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀧𑀝𑀺𑀩𑀸𑀳𑀺𑀢𑀁 𑀧𑀸𑀧𑀓𑀫𑁆𑀫𑀁 𑀯𑀺𑀧𑀸𑀓𑀁 𑀅𑀤𑀢𑁆𑀯𑀸 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀆𑀕𑀫𑁆𑀫 𑀤𑁂𑀢𑀺.

𑀬𑀣𑀸 𑀳𑀺 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀓𑁂𑀦𑀘𑀺𑀤𑁂𑀯 𑀓𑀫𑁆𑀫𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀬𑁆𑀬. 𑀅𑀣𑀲𑁆𑀲 𑀭𑀸𑀚𑀸 𑀞𑀸𑀦𑀦𑁆𑀢𑀭𑀁 𑀤𑀢𑁆𑀯𑀸 𑀚𑀦𑀧𑀤𑀁 𑀤𑀤𑁂𑀬𑁆𑀬. 𑀲𑁄 𑀢𑀁 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀓𑁆𑀓𑀝𑁂𑀦 𑀕𑀳𑀺𑀢𑀪𑀢𑁆𑀢𑀧𑀼𑀝𑀁 𑀯𑀺𑀬 𑀪𑀺𑀦𑁆𑀤𑁂𑀬𑁆𑀬; 𑀬𑀲𑁆𑀲 𑀬𑀁 𑀬𑀸𑀦𑀁 𑀯𑀸 𑀯𑀸𑀳𑀦𑀁 𑀯𑀸 𑀤𑀸𑀲𑀁 𑀯𑀸 𑀤𑀸𑀲𑀺𑀁 𑀯𑀸 𑀆𑀭𑀸𑀫𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀲𑀫𑁆𑀧𑀦𑁆𑀦𑀭𑀽𑀧𑀁 𑀧𑀲𑁆𑀲𑀢𑀺, 𑀲𑀩𑁆𑀩𑀁 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑁂𑀬𑁆𑀬. 𑀫𑀦𑀼𑀲𑁆𑀲𑀸 ‘𑀭𑀸𑀚𑀯𑀮𑁆𑀮𑀪𑁄’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁. 𑀲𑁄 𑀅𑀜𑁆𑀜𑀲𑁆𑀲 𑀯𑀮𑁆𑀮𑀪𑀢𑀭𑀲𑁆𑀲 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀼𑀧𑁄𑀣𑀺𑀢𑀁 𑀧𑁄𑀣𑀸𑀧𑁂𑀢𑁆𑀯𑀸 𑀪𑀽𑀫𑀺𑀁 𑀧𑀺𑀝𑁆𑀞𑀺𑀬𑀸 𑀖𑀁𑀲𑀸𑀧𑁂𑀦𑁆𑀢𑁄 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀅𑀲𑀼𑀓𑁄 𑀦𑀸𑀫 𑀢𑁂 ¶ , 𑀤𑁂𑀯, 𑀚𑀦𑀧𑀤𑀁 𑀪𑀺𑀦𑁆𑀤𑀢𑀻’𑀢𑀺 𑀕𑀡𑁆𑀳𑀸𑀧𑁂𑀬𑁆𑀬. 𑀭𑀸𑀚𑀸 𑀩𑀦𑁆𑀥𑀦𑀸𑀕𑀸𑀭𑁂 𑀩𑀦𑁆𑀥𑀸𑀧𑁂𑀢𑁆𑀯𑀸 ‘𑀅𑀲𑀼𑀓𑁂𑀦 𑀦𑀸𑀫 𑀓𑀲𑁆𑀲 𑀓𑀺𑀁 𑀅𑀯𑀳𑀝’𑀦𑁆𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀬𑁆𑀬. 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 ‘𑀫𑀬𑁆𑀳𑀁 𑀇𑀤𑀁 𑀕𑀳𑀺𑀢𑀁, 𑀫𑀬𑁆𑀳𑀁 𑀇𑀤𑀁 𑀕𑀳𑀺𑀢’𑀦𑁆𑀢𑀺 𑀯𑀺𑀭𑀯𑀲𑀳𑀲𑁆𑀲𑀁 𑀉𑀝𑁆𑀞𑀸𑀧𑁂𑀬𑁆𑀬𑀼𑀁. 𑀭𑀸𑀚𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀓𑀼𑀤𑁆𑀥𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀢𑀁 𑀩𑀦𑁆𑀥𑀦𑀸𑀕𑀸𑀭𑁂 𑀓𑀺𑀮𑀫𑁂𑀢𑁆𑀯𑀸 𑀖𑀸𑀢𑀸𑀧𑁂𑀢𑁆𑀯𑀸 ‘𑀕𑀘𑁆𑀙𑀣 𑀦𑀁 𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸 𑀆𑀳𑀭𑀣𑀸’𑀢𑀺 𑀯𑀤𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀳𑀺 𑀓𑁂𑀦𑀘𑀺𑀤𑁂𑀯 𑀓𑀫𑁆𑀫𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀮𑀤𑁆𑀥𑀓𑀸𑀮𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀓𑁂𑀦𑀘𑀺𑀤𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁄. 𑀢𑀲𑁆𑀫𑀺𑀁 𑀚𑀦𑀧𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀫𑀺𑀫𑁆𑀧𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁂 ¶ 𑀅𑀓𑀼𑀲𑀮𑀲𑁆𑀲 𑀯𑀺𑀧𑀘𑁆𑀘𑀦𑁄𑀓𑀸𑀲𑀁 𑀅𑀮𑀪𑀦𑀓𑀸𑀮𑁄. 𑀢𑀲𑁆𑀲 𑀏𑀓𑀤𑀺𑀯𑀲𑀁 𑀏𑀓𑀲𑁆𑀫𑀺𑀁 𑀭𑀸𑀚𑀯𑀮𑁆𑀮𑀪𑀢𑀭𑁂 ¶ 𑀯𑀺𑀭𑀚𑁆𑀛𑀺𑀢𑁆𑀯𑀸 𑀢𑁂𑀦 𑀓𑀼𑀤𑁆𑀥𑁂𑀦 𑀦𑀁 𑀧𑁄𑀣𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀩𑀦𑁆𑀥𑀸𑀧𑀺𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀲𑀕𑁆𑀕𑀢𑁄 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁄. 𑀫𑀦𑀼𑀲𑁆𑀲𑀸𑀦𑀁 ‘𑀫𑀬𑁆𑀳𑀁 𑀇𑀤𑀁 𑀕𑀳𑀺𑀢𑀁, 𑀫𑀬𑁆𑀳𑀁 𑀇𑀤𑀁 𑀕𑀳𑀺𑀢’𑀦𑁆𑀢𑀺 𑀯𑀺𑀭𑀯𑀓𑀸𑀮𑁄 𑀯𑀺𑀬 𑀢𑀲𑁆𑀫𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂 𑀲𑀩𑁆𑀩𑀸𑀓𑀼𑀲𑀮𑀓𑀫𑁆𑀫𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀕𑀳𑀡𑀓𑀸𑀮𑁄. 𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸𑀦𑀁 𑀆𑀳𑀭𑀡𑀓𑀸𑀮𑁄 𑀯𑀺𑀬 𑀏𑀓𑁂𑀓𑀲𑁆𑀫𑀺𑀁 𑀓𑀫𑁆𑀫𑁂 𑀔𑀻𑀡𑁂 𑀇𑀢𑀭𑀲𑁆𑀲 𑀇𑀢𑀭𑀲𑁆𑀲 𑀯𑀺𑀧𑀸𑀓𑁂𑀦 𑀦𑀺𑀭𑀬𑀢𑁄 𑀲𑀻𑀲𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀲𑀓𑀮𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀦𑀓𑀸𑀮𑁄. 𑀓𑀧𑁆𑀧𑀝𑁆𑀞𑀺𑀢𑀺𑀓𑀓𑀫𑁆𑀫𑀜𑁆𑀳𑀺 𑀓𑀢𑁆𑀯𑀸 𑀏𑀓𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀦𑀓𑀲𑀢𑁆𑀢𑀸 𑀦𑁂𑀯 𑀏𑀓𑁄, 𑀦 𑀤𑁆𑀯𑁂, 𑀦 𑀲𑀢𑀁, 𑀦 𑀲𑀳𑀲𑁆𑀲𑀁. 𑀏𑀯𑀁 𑀧𑀘𑁆𑀘𑀦𑀓𑀲𑀢𑁆𑀢𑀸 𑀓𑀺𑀭 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸.

𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀥𑁂𑀓𑀘𑁆𑀘𑀲𑁆𑀲 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀕𑀢𑀺𑀯𑀺𑀧𑀢𑁆𑀢𑀺𑀬𑀁 𑀦𑀺𑀭𑀬𑁂 𑀯𑀸 𑀅𑀲𑀼𑀭𑀓𑀸𑀬𑁂 𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀤𑀺𑀲𑁂 𑀘 𑀞𑀸𑀦𑁂 𑀓𑀼𑀲𑀮𑀁 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀓𑀦𑁆𑀢𑀁 𑀅𑀓𑀼𑀲𑀮𑀫𑁂𑀯 𑀲𑀓𑁆𑀓𑁄𑀢𑀻𑀢𑀺. 𑀏𑀯𑀫𑀲𑁆𑀲 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀉𑀧𑀥𑀺𑀯𑀺𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺 𑀧𑀺𑀲𑀸𑀘𑀲𑀤𑀺𑀲𑁄. 𑀲𑁄 𑀲𑀘𑁂𑀧𑀺 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀺𑀢𑀼𑀅𑀘𑁆𑀘𑀬𑁂𑀦 ¶ ‘𑀓𑀺𑀁 𑀇𑀫𑀲𑁆𑀲 𑀦𑀺𑀲𑁆𑀲𑀺𑀭𑀻𑀓𑀲𑁆𑀲 𑀭𑀚𑁆𑀚𑁂𑀦𑀸’𑀢𑀺 𑀭𑀚𑁆𑀚𑀁 𑀦 𑀮𑀪𑀢𑀺. 𑀲𑁂𑀦𑀸𑀧𑀢𑀺𑀕𑁂𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄𑀧𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀦 𑀮𑀪𑀢𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀁 𑀤𑀻𑀧𑀭𑀸𑀚𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁 𑁋 𑀭𑀸𑀚𑀸 𑀓𑀺𑀭 𑀧𑀼𑀢𑁆𑀢𑁂 𑀚𑀸𑀢𑁂 𑀤𑁂𑀯𑀺𑀬𑀸 𑀧𑀲𑀻𑀤𑀺𑀢𑁆𑀯𑀸 𑀯𑀭𑀁 𑀅𑀤𑀸𑀲𑀺. 𑀲𑀸 𑀯𑀭𑀁 𑀕𑀳𑁂𑀢𑁆𑀯𑀸 𑀞𑀧𑁂𑀲𑀺. 𑀓𑀼𑀫𑀸𑀭𑁄 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂𑀯 𑀭𑀸𑀚𑀗𑁆𑀕𑀡𑁂 𑀓𑀼𑀓𑁆𑀓𑀼𑀝𑁂 𑀬𑀼𑀚𑁆𑀛𑀸𑀧𑁂𑀲𑀺. 𑀏𑀓𑁄 𑀓𑀼𑀓𑁆𑀓𑀼𑀝𑁄 𑀉𑀧𑁆𑀧𑀢𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀺. 𑀓𑀼𑀫𑀸𑀭𑀫𑀸𑀢𑀸 𑀤𑁂𑀯𑀻 𑀧𑀼𑀢𑁆𑀢𑀲𑁆𑀲 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀓𑀸𑀮𑁂 ‘𑀭𑀚𑁆𑀚𑀁 𑀯𑀸𑀭𑁂𑀲𑁆𑀲𑀸𑀫𑀻’𑀢𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀓𑀼𑀫𑀸𑀭𑀲𑁆𑀲 𑀚𑀸𑀢𑀓𑀸𑀮𑁂 𑀯𑀭𑁄 𑀤𑀺𑀦𑁆𑀦𑁄. 𑀫𑀬𑀸 𑀲𑁄 𑀕𑀳𑁂𑀢𑁆𑀯𑀸 𑀞𑀧𑀺𑀢𑁄; 𑀇𑀤𑀸𑀦𑀺 𑀦𑀁 𑀕𑀡𑁆𑀳𑀸𑀫𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯𑀺, 𑀕𑀡𑁆𑀳𑀸𑀳𑀻’’𑀢𑀺. ‘‘𑀫𑀬𑀸, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀁 𑀦𑀸𑀫 𑀦𑀢𑁆𑀣𑀺 ¶ . 𑀇𑀤𑀸𑀦𑀺 𑀧𑀦 𑀫𑀫 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀯𑀸𑀭𑁂𑀫𑀻’’𑀢𑀺. ‘‘𑀤𑁂𑀯𑀺, 𑀢𑀯 𑀧𑀼𑀢𑁆𑀢𑁄 𑀅𑀗𑁆𑀕𑀯𑀺𑀓𑀮𑁄. 𑀦 𑀲𑀓𑁆𑀓𑀸 𑀢𑀲𑁆𑀲 𑀭𑀚𑁆𑀚𑀁 𑀤𑀸𑀢𑀼’’𑀦𑁆𑀢𑀺 ¶ . ‘‘𑀢𑀼𑀫𑁆𑀳𑁂 𑀫𑀬𑁆𑀳𑀁 𑀭𑀼𑀘𑁆𑀘𑀦𑀓𑀯𑀭𑀁 𑀅𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀲𑁆𑀫𑀸 𑀯𑀭𑀁 𑀅𑀤𑀢𑁆𑀣𑀸’’𑀢𑀺? 𑀭𑀸𑀚𑀸 𑀅𑀢𑀺𑀯𑀺𑀬 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 ‘‘𑀦 𑀲𑀓𑁆𑀓𑀸 𑀢𑀼𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀭𑀚𑁆𑀚𑀁 𑀤𑀸𑀢𑀼𑀁; 𑀦𑀸𑀕𑀤𑀻𑀧𑁂 𑀧𑀦 𑀙𑀢𑁆𑀢𑀁 𑀅𑀲𑁆𑀲𑀸𑀧𑁂𑀢𑁆𑀯𑀸 𑀯𑀲𑀢𑀽’’𑀢𑀺 𑀦𑀸𑀕𑀤𑀻𑀧𑀁 𑀧𑁂𑀲𑁂𑀲𑀺. 𑀲𑁄 𑀤𑀻𑀧𑀭𑀸𑀚𑀸 𑀦𑀸𑀫 𑀅𑀳𑁄𑀲𑀺. 𑀲𑀘𑁂 𑀘𑀓𑁆𑀔𑀼𑀯𑀺𑀓𑀮𑁄 𑀦𑀸𑀪𑀯𑀺𑀲𑁆𑀲𑀸 𑀢𑀺𑀬𑁄𑀚𑀦𑀲𑀢𑀺𑀓𑁂 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀭𑀺𑀯𑀸𑀭𑀁 𑀭𑀚𑁆𑀚𑀁 𑀅𑀮𑀪𑀺𑀲𑁆𑀲𑀸. 𑀏𑀯𑀁 𑀉𑀧𑀥𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀤𑀼𑀭𑀸𑀚𑀤𑀼𑀫𑀦𑀼𑀲𑁆𑀲𑀓𑀸𑀮𑁂 𑀓𑀲𑀝𑁂 𑀦𑀺𑀭𑁄𑀚𑁂 𑀅𑀧𑁆𑀧𑀸𑀬𑀼𑀓𑁂 𑀕𑀢𑀺𑀓𑁄𑀝𑀺𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀤𑀺𑀲𑁂 𑀘 𑀓𑀸𑀮𑁂 𑀓𑀮𑁆𑀬𑀸𑀡𑀓𑀫𑁆𑀫𑀁 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺. 𑀏𑀯𑀁 𑀓𑀸𑀮𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀅𑀬𑀁 𑀧𑀦 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀧𑀸𑀡𑀁 𑀳𑀦𑁆𑀢𑀺…𑀧𑁂… 𑀲𑀩𑁆𑀩𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀽𑀭𑁂𑀢𑀺. 𑀢𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀚𑀸𑀢𑀺𑀓𑀸𑀦𑀺𑀧𑀺 𑀓𑀼𑀮𑀸𑀦𑀺 𑀆𑀯𑀸𑀳𑀯𑀺𑀯𑀸𑀳𑀁 𑀦 𑀓𑀭𑁄𑀦𑁆𑀢𑀺; ‘𑀇𑀢𑁆𑀣𑀺𑀥𑀼𑀢𑁆𑀢𑁄 𑀲𑀼𑀭𑀸𑀥𑀼𑀢𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 𑀅𑀬𑀁 𑀧𑀸𑀧𑀧𑀼𑀭𑀺𑀲𑁄’𑀢𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀺. 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀁 𑀧𑀬𑁄𑀕𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀘𑀢𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 ¶ 𑀆𑀕𑀫𑁆𑀫 𑀯𑀺𑀧𑀸𑀓𑀤𑀸𑀬𑀓𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀘𑀢𑀽𑀳𑀺 𑀯𑀺𑀧𑀢𑁆𑀢𑀻𑀳𑀺 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀦 𑀯𑀺𑀧𑀘𑁆𑀘𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺 𑁋 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺, 𑀓𑀸𑀮𑁂𑀦 𑀤𑁂𑀯𑀮𑁄𑀓𑁂. 𑀏𑀯𑀁 𑀕𑀢𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀕𑀢𑀺𑀫𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀉𑀧𑀥𑀺𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 ¶ 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀁𑀬𑁂𑀯 𑀧𑀢𑀺𑀝𑁆𑀞𑀺𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀩𑁆𑀭𑀳𑁆𑀫𑀯𑀘𑁆𑀙𑀲𑀤𑀺𑀲𑁄. 𑀢𑀲𑁆𑀲 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀢𑁆𑀢𑀸 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺. 𑀲𑀘𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀢𑀺 𑀅𑀜𑁆𑀜𑁂𑀲𑀼 𑀚𑁂𑀝𑁆𑀞𑀓𑀪𑀸𑀢𑀺𑀓𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 ‘𑀏𑀢𑀲𑁆𑀲 𑀅𑀢𑁆𑀢𑀪𑀸𑀯𑁄 ¶ 𑀲𑀫𑀺𑀤𑁆𑀥𑁄, 𑀏𑀢𑀲𑁆𑀲 𑀙𑀢𑁆𑀢𑁂 𑀉𑀲𑁆𑀲𑀸𑀧𑀺𑀢𑁂 𑀮𑁄𑀓𑀲𑁆𑀲 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻’𑀢𑀺 𑀢𑀫𑁂𑀯 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀦𑁆𑀢𑀺. 𑀉𑀧𑀭𑀸𑀚𑀕𑁂𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀧𑀺𑀢𑀼𑀅𑀘𑁆𑀘𑀬𑁂𑀦 𑀑𑀧𑀭𑀚𑁆𑀚𑀁, 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀁, 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀢𑀺. 𑀏𑀯𑀁 𑀉𑀧𑀥𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀓𑀸𑀮𑁂. 𑀢𑀸𑀤𑀺𑀲𑀸𑀬 𑀓𑀸𑀮𑀲𑀫𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀁 𑀯𑀺𑀧𑀸𑀓𑀁 𑀤𑁂𑀢𑀺.

𑀢𑀢𑁆𑀭𑀺𑀤𑀁 𑀫𑀳𑀸𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁 𑁋 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀓𑀺𑀭 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺𑀁 𑀧𑀝𑀺𑀯𑀲𑀦𑁆𑀢𑀺. 𑀢𑀣𑀸 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂. 𑀤𑁆𑀯𑀻𑀲𑀼𑀧𑀺 𑀫𑀳𑀸𑀯𑀺𑀳𑀸𑀭𑁂𑀲𑀼 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀯𑀝𑁆𑀝𑀁 𑀏𑀓𑀭𑀢𑁆𑀢𑀫𑁂𑀯 𑀫𑀳𑀸𑀫𑀽𑀲𑀺𑀓𑀸𑀬𑁄 𑀔𑀸𑀤𑀺𑀢𑁆𑀯𑀸 𑀣𑀼𑀲𑀫𑀢𑁆𑀢𑀫𑁂𑀯 𑀞𑀧𑁂𑀲𑀼𑀁. 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 ‘𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀯𑀝𑁆𑀝𑀁 𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺. 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 ‘𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀯𑀝𑁆𑀝𑀁 𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺. 𑀉𑀪𑀢𑁄𑀧𑀺 ¶ 𑀏𑀓𑀺𑀲𑁆𑀲𑀸 𑀕𑀫𑁆𑀪𑀻𑀭𑀓𑀦𑁆𑀤𑀭𑀸𑀬 𑀢𑀻𑀭𑁂 𑀲𑀫𑀸𑀕𑀢𑀸 𑀧𑀼𑀘𑁆𑀙𑀺𑀢𑁆𑀯𑀸 𑀯𑀝𑁆𑀝𑀲𑁆𑀲 𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 ‘𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀘𑀢𑀼𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀕𑀫𑁆𑀪𑀻𑀭𑀓𑀦𑁆𑀤𑀭𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑀻𑀳𑀸𑀭𑁂𑀦𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀧𑀘𑁆𑀙𑀸 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀥𑀸𑀢𑀼𑀬𑁄 𑀲𑀁𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀸𑀲𑀺.

𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀘𑁄𑀭𑁄𑀧𑀺 𑀚𑀦𑀧𑀤𑀁 𑀯𑀺𑀤𑁆𑀥𑀁𑀲𑁂𑀲𑀺. 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 ‘‘𑀘𑁄𑀭𑀁 𑀧𑀝𑀺𑀩𑀸𑀳𑀢𑀽’’𑀢𑀺 𑀲𑀓𑁆𑀓𑀲𑀦𑁆𑀢𑀺𑀓𑀁 𑀅𑀝𑁆𑀞 𑀣𑁂𑀭𑁂 𑀧𑁂𑀲𑁂𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀫𑀬𑀸, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑁄 𑀘𑁄𑀭𑁄 𑀦 ¶ 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁. 𑀲𑀗𑁆𑀖𑁄 𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀢𑀼. 𑀅𑀳𑀁 𑀲𑀫𑀼𑀤𑁆𑀤𑀸𑀭𑀓𑁆𑀔𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀗𑁆𑀖𑁄 𑀲𑀩𑁆𑀩𑀤𑀺𑀲𑀸𑀳𑀺 𑀦𑀸𑀕𑀤𑀻𑀧𑀁 𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀢𑀺𑀪𑀽𑀫𑀺𑀓𑀁 𑀫𑀳𑀸𑀉𑀴𑀼𑀫𑁆𑀧𑀁 𑀩𑀦𑁆𑀥𑀸𑀧𑁂𑀲𑀺. 𑀏𑀓𑀸 𑀪𑀽𑀫𑀺𑀓𑀸 𑀉𑀤𑀓𑁂 𑀑𑀲𑀻𑀤𑀺. 𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀲𑀺𑀦𑁆𑀦𑁄. 𑀏𑀓𑀺𑀲𑁆𑀲𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀞𑀧𑀬𑀺𑀁𑀲𑀼. 𑀲𑀁𑀬𑀼𑀢𑁆𑀢𑀪𑀸𑀡𑀓𑀘𑀽𑀴𑀲𑀻𑀯𑀢𑁆𑀣𑁂𑀭𑁄, 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑁄, 𑀫𑀳𑀸𑀲𑁄𑀡𑀢𑁆𑀣𑁂𑀭𑁄𑀢𑀺 𑀢𑀬𑁄 𑀣𑁂𑀭𑀸 𑀢𑀸𑀲𑀁 𑀧𑀭𑀺𑀲𑀸𑀦𑀁 𑀧𑀸𑀫𑁄𑀓𑁆𑀔𑀸. 𑀢𑁂𑀲𑀼 𑀤𑁆𑀯𑁂 𑀣𑁂𑀭𑀸 𑀫𑀳𑀸𑀲𑁄𑀡𑀢𑁆𑀣𑁂𑀭𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀫𑀳𑀸𑀲𑁄𑀡, 𑀅𑀪𑀺𑀭𑀼𑀳 𑀫𑀳𑀸𑀉𑀴𑀼𑀫𑁆𑀧’’𑀦𑁆𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺? ‘‘𑀆𑀯𑀼𑀲𑁄, 𑀉𑀤𑀓𑁂 𑀫𑀭𑀡𑀫𑁆𑀧𑀺 𑀣𑀮𑁂 𑀫𑀭𑀡𑀫𑁆𑀧𑀺 𑀏𑀓𑀫𑁂𑀯 ¶ . 𑀦 𑀫𑀬𑀁 𑀕𑀫𑀺𑀲𑁆𑀲𑀸𑀫. 𑀢𑀁 𑀦𑀺𑀲𑁆𑀲𑀸𑀬 𑀧𑀦 𑀅𑀦𑀸𑀕𑀢𑁂 𑀲𑀸𑀲𑀦𑀲𑁆𑀲 𑀧𑀯𑁂𑀡𑀻 𑀞𑀲𑁆𑀲𑀢𑀺. 𑀕𑀘𑁆𑀙 𑀢𑁆𑀯𑀁, 𑀆𑀯𑀼𑀲𑁄’’𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀅𑀕𑀘𑁆𑀙𑀦𑁆𑀢𑁂𑀲𑀼 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀯𑀢𑀢𑀺𑀬𑀁 𑀓𑀣𑁂𑀢𑁆𑀯𑀸𑀧𑀺 𑀣𑁂𑀭𑀁 𑀆𑀭𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀺𑀯𑀢𑁆𑀢𑀺𑀁𑀲𑀼.

𑀅𑀣 𑀘𑀽𑀴𑀲𑀻𑀯𑀢𑁆𑀣𑁂𑀭𑁄 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀅𑀦𑀸𑀕𑀢𑁂 𑀫𑀳𑀸𑀲𑁄𑀡𑀢𑁆𑀣𑁂𑀭𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑀧𑀯𑁂𑀡𑀻 𑀞𑀲𑁆𑀲𑀢𑀺; 𑀫𑀸 𑀔𑁄 𑀢𑀁 𑀳𑀢𑁆𑀣𑀢𑁄 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺? ‘‘𑀅𑀳𑀁 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑁂 𑀣𑁂𑀭𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀫𑀳𑀸𑀯𑀺𑀳𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀯𑀺𑀳𑀸𑀭𑁄 𑀲𑀼𑀜𑁆𑀜𑁄. 𑀘𑁂𑀢𑀺𑀬𑀗𑁆𑀕𑀡𑁂 𑀏𑀭𑀡𑁆𑀟𑀸 𑀚𑀸𑀢𑀸. 𑀘𑁂𑀢𑀺𑀬𑀁 𑀕𑀘𑁆𑀙𑁂𑀳𑀺 𑀧𑀭𑀺𑀯𑀸𑀭𑀺𑀢𑀁, 𑀲𑁂𑀯𑀸𑀮𑁂𑀦 𑀧𑀭𑀺𑀬𑁄𑀦𑀤𑁆𑀥𑀁. 𑀣𑁂𑀭𑁄 𑀥𑀭𑀫𑀸𑀦𑀓𑀩𑀼𑀤𑁆𑀥𑀲𑁆𑀲 𑀦𑀺𑀧𑀘𑁆𑀘𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀺𑀫𑀤𑀺𑀲𑀸𑀬 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘𑀏𑀯𑀭𑀽𑀧𑀲𑁆𑀲 𑀦𑀸𑀫 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀲𑁆𑀲 𑀲𑀭𑀻𑀭𑀥𑀸𑀢𑀼𑀘𑁂𑀢𑀺𑀬𑀝𑁆𑀞𑀸𑀦𑀁 𑀅𑀦𑀸𑀣𑀁 𑀚𑀸𑀢’𑀦𑁆𑀢𑀺 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑀻𑀤𑀺.

𑀅𑀣 ¶ 𑀅𑀯𑀺𑀤𑀽𑀭𑁂 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀤𑁆𑀥𑀺𑀓𑀫𑀦𑀼𑀲𑁆𑀲𑀭𑀽𑀧𑁂𑀦 𑀢𑀡𑁆𑀟𑀼𑀮𑀦𑀸𑀴𑀺𑀜𑁆𑀘 𑀕𑀼𑀴𑀧𑀺𑀡𑁆𑀟𑀜𑁆𑀘 𑀆𑀤𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀢𑁆𑀣 𑀕𑀘𑁆𑀙𑀣, 𑀪𑀦𑁆𑀢𑁂’’𑀢𑀺? ‘‘𑀅𑀳𑀁 𑀤𑀓𑁆𑀔𑀺𑀡𑀤𑀺𑀲𑀁, 𑀉𑀧𑀸𑀲𑀓𑀸’’𑀢𑀺. ‘‘𑀅𑀳𑀫𑁆𑀧𑀺 𑀢𑀢𑁆𑀣𑁂𑀯 𑀕𑀦𑁆𑀢𑀼𑀓𑀸𑀫𑁄, 𑀲𑀳 𑀕𑀘𑁆𑀙𑀸𑀫, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀤𑀼𑀩𑁆𑀩𑀮𑁄; 𑀢𑀯 𑀕𑀢𑀺𑀬𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺; 𑀢𑁆𑀯𑀁 𑀧𑀼𑀭𑀢𑁄 𑀕𑀘𑁆𑀙, 𑀉𑀧𑀸𑀲𑀓𑀸’’𑀢𑀺. ‘‘𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀕𑀢𑀺𑀬𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺. 𑀢𑀺𑀲𑁆𑀲𑀯𑀸𑀧𑀺𑀧𑀸𑀴𑀺𑀁 𑀆𑀭𑀼𑀴𑁆𑀳𑀓𑀸𑀮𑁂 𑀘 𑀧𑀢𑁆𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀸𑀦𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑀲𑁆𑀲 𑀧𑀻𑀢𑀫𑀢𑁆𑀢𑁂𑀬𑁂𑀯 𑀩𑀮𑀫𑀢𑁆𑀢𑀸 𑀲𑀡𑁆𑀞𑀸𑀢𑀺. 𑀤𑁂𑀯𑀢𑀸 𑀧𑀣𑀯𑀺𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑁂𑀡𑀼𑀦𑀤𑀻𑀲𑀦𑁆𑀢𑀺𑀓𑁂 𑀏𑀓𑀁 𑀙𑀟𑁆𑀟𑀺𑀢𑀯𑀺𑀳𑀸𑀭𑀁 𑀧𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀅𑀤𑀸𑀲𑀺.

𑀧𑀼𑀦𑀤𑀺𑀯𑀲𑁂 ¶ 𑀣𑁂𑀭𑁂𑀦 𑀫𑀼𑀔𑁂 𑀥𑁄𑀯𑀺𑀢𑀫𑀢𑁆𑀢𑁂 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀅𑀤𑀸𑀲𑀺; 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀣𑁂𑀭𑁄 ‘‘𑀢𑀼𑀬𑁆𑀳𑀁 𑀞𑀧𑁂𑀳𑀺, 𑀉𑀧𑀸𑀲𑀓𑀸’’𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀧𑀺𑀤𑀳𑀺. ‘‘𑀅𑀳𑀁 𑀦 𑀤𑀽𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀯𑀢𑀸 𑀣𑁂𑀭𑀲𑁆𑀲𑁂𑀯 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀧𑀣𑀯𑀺𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀚𑀚𑁆𑀚𑀭𑀦𑀤𑀻𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀏𑀢𑀁 𑀧𑀡𑁆𑀡𑀔𑀸𑀤𑀓𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑀁, 𑀥𑀽𑀫𑁄 𑀧𑀜𑁆𑀜𑀸𑀬𑀢𑀺. 𑀅𑀳𑀁 𑀧𑀼𑀭𑀢𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀲𑀩𑁆𑀩𑀫𑁆𑀧𑀺 𑀪𑀬𑀓𑀸𑀮𑀁 𑀧𑀡𑁆𑀡𑀔𑀸𑀤𑀓𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬 𑀯𑀲𑀺.

𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑁄𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀴𑀚𑀦𑀧𑀤𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀦𑀸𑀢𑀺𑀧𑀓𑁆𑀓𑀸𑀦𑀺 ¶ 𑀫𑀥𑀼𑀓𑀨𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀆𑀤𑀸𑀬 𑀢𑀘𑀁 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀣𑁂𑀭𑁄 ‘‘𑀆𑀯𑀼𑀲𑁄 𑀫𑀳𑀸𑀲𑁄𑀡, 𑀪𑀺𑀓𑁆𑀔𑀸𑀳𑀸𑀭𑁄 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀭𑀼𑀡𑀤𑀸𑀭𑀓𑀸 𑀣𑁂𑀭𑀁 𑀞𑀺𑀢𑀁 𑀤𑀺𑀲𑁆𑀯𑀸 ‘𑀇𑀫𑀺𑀦𑀸 𑀓𑁄𑀘𑀺 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀯𑀸𑀮𑀼𑀓𑀁 𑀧𑀼𑀜𑁆𑀙𑀺𑀢𑁆𑀯𑀸 𑀫𑀥𑀼𑀓𑀨𑀮𑀢𑁆𑀢𑀘𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀁𑀲𑀼; 𑀣𑁂𑀭𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀲𑀢𑁆𑀢𑀸𑀳𑀫𑀢𑁆𑀢𑀁 𑀲𑁄𑀬𑁂𑀯 𑀆𑀳𑀸𑀭𑁄 𑀅𑀳𑁄𑀲𑀺.

𑀅𑀦𑀼𑀧𑀼𑀩𑁆𑀩𑁂𑀦 𑀘𑁄𑀭𑀺𑀬𑀲𑁆𑀲𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀓𑀼𑀫𑀼𑀤𑀸𑀦𑀺 𑀕𑀳𑁂𑀢𑁆𑀯𑀸 𑀓𑀼𑀫𑀼𑀤𑀦𑀸𑀮𑁂 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀣𑁂𑀭𑁄 ‘‘𑀆𑀯𑀼𑀲𑁄 𑀫𑀳𑀸𑀲𑁄𑀡, 𑀪𑀺𑀓𑁆𑀔𑀸𑀳𑀸𑀭𑁄 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀕𑀸𑀫𑀤𑀸𑀭𑀓𑀸 𑀓𑀼𑀫𑀼𑀤𑀦𑀸𑀮𑁂 𑀲𑁄𑀥𑁂𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀁𑀲𑀼; 𑀣𑁂𑀭𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀲𑀢𑁆𑀢𑀸𑀳𑀫𑀢𑁆𑀢𑀁 𑀲𑁄𑀯 𑀆𑀳𑀸𑀭𑁄 𑀅𑀳𑁄𑀲𑀺.

𑀅𑀦𑀼𑀧𑀼𑀩𑁆𑀩𑁂𑀦 ¶ 𑀘𑀭𑀦𑁆𑀢𑀸 𑀧𑀡𑁆𑀡𑀔𑀸𑀤𑀓𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀏𑀓𑀁 𑀕𑀸𑀫𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀏𑀓𑀺𑀲𑁆𑀲𑀸 𑀤𑀸𑀭𑀺𑀓𑀸𑀬 𑀫𑀸𑀢𑀸𑀧𑀺𑀢𑀭𑁄 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀸 ‘‘𑀲𑀘𑁂 𑀓𑁄𑀘𑀺 𑀅𑀬𑁆𑀬𑁄 𑀆𑀕𑀘𑁆𑀙𑀢𑀺, 𑀓𑀢𑁆𑀣𑀘𑀺 𑀕𑀦𑁆𑀢𑀼𑀁 𑀫𑀸 𑀅𑀤𑀸𑀲𑀺; 𑀅𑀬𑁆𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, 𑀅𑀫𑁆𑀫𑀸’’𑀢𑀺 𑀆𑀳𑀁𑀲𑀼. 𑀲𑀸 𑀣𑁂𑀭𑁂 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. 𑀕𑁂𑀳𑁂 𑀥𑀜𑁆𑀜𑀚𑀸𑀢𑀺 𑀦𑀸𑀫 𑀦𑀢𑁆𑀣𑀺. 𑀯𑀸𑀲𑀺𑀁 𑀧𑀦 𑀕𑀳𑁂𑀢𑁆𑀯𑀸 𑀕𑀼𑀜𑁆𑀚𑀘𑁄𑀘𑀭𑀼𑀓𑁆𑀔𑀢𑁆𑀢𑀘𑀁 𑀕𑀼𑀜𑁆𑀚𑀮𑀢𑀸𑀧𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀓𑁄𑀝𑁆𑀝𑁂𑀢𑁆𑀯𑀸 𑀢𑀬𑁄 𑀧𑀺𑀡𑁆𑀟𑁂 𑀓𑀢𑁆𑀯𑀸 𑀏𑀓𑀁 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀏𑀓𑀁 𑀫𑀳𑀸𑀲𑁄𑀡𑀢𑁆𑀣𑁂𑀭𑀲𑁆𑀲 𑀧𑀢𑁆𑀢𑁂 𑀞𑀧𑁂𑀢𑁆𑀯𑀸 ‘𑀅𑀢𑀺𑀭𑁂𑀓𑀧𑀺𑀡𑁆𑀟𑀁 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀢𑁆𑀢𑁂 𑀞𑀧𑁂𑀲𑁆𑀲𑀸𑀫𑀻’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀳𑀢𑁆𑀣𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀲𑁄𑀡𑀢𑁆𑀣𑁂𑀭𑀲𑁆𑀲 𑀧𑀢𑁆𑀢𑁂 ¶ 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑁄 ‘𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀕𑀼𑀜𑁆𑀚𑀘𑁄𑀘𑀧𑀺𑀡𑁆𑀟𑁂 𑀯𑀺𑀧𑀸𑀓𑀤𑀸𑀬𑀓𑀓𑀫𑁆𑀫𑀁 𑀤𑁂𑀲𑀓𑀸𑀮𑀲𑀫𑁆𑀧𑀤𑀸𑀬 𑀓𑀻𑀯𑀧𑀫𑀸𑀡𑀁 𑀯𑀺𑀧𑀸𑀓𑀁 𑀤𑀲𑁆𑀲𑀢𑀻’𑀢𑀺 𑀆𑀳. 𑀢𑁂 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑀸𑀧𑀺 𑀅𑀭𑀜𑁆𑀜𑀢𑁄 𑀆𑀕𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀺𑀓𑁆𑀔𑀺 ‘‘𑀤𑁆𑀯𑁂 𑀣𑁂𑀭𑀸 𑀆𑀕𑀢𑀸. 𑀢𑁂𑀲𑀁 𑀫𑁂 𑀯𑀲𑀦𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢’’𑀦𑁆𑀢𑀺. 𑀢𑁂 𑀉𑀪𑁄𑀧𑀺 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀬𑀁 𑀫𑀬𑀁 𑀮𑀪𑀸𑀫, 𑀢𑁂𑀦 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫; 𑀇𑀥𑁂𑀯 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺𑀁𑀲𑀼. 𑀣𑁂𑀭𑀸𑀧𑀺 𑀲𑀩𑁆𑀩𑀪𑀬𑀓𑀸𑀮𑀁 𑀢𑁂 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀘𑁄𑀭𑁂 𑀫𑀢𑁂 𑀧𑀺𑀢𑀼𑀫𑀳𑀸𑀭𑀸𑀚𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑀺. ‘𑀪𑀬𑀁 𑀯𑀽𑀧𑀲𑀦𑁆𑀢𑀁, 𑀚𑀦𑀧𑀤𑁄 𑀲𑀫𑁆𑀧𑀼𑀡𑁆𑀡𑁄’𑀢𑀺 𑀲𑀼𑀢𑁆𑀯𑀸 𑀧𑀭𑀲𑀫𑀼𑀤𑁆𑀤𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀸𑀯𑀸𑀬 𑀫𑀳𑀸𑀢𑀺𑀢𑁆𑀣𑀧𑀝𑁆𑀝𑀦𑁂 𑀑𑀭𑀼𑀬𑁆𑀳 ‘𑀫𑀳𑀸𑀲𑁄𑀡𑀢𑁆𑀣𑁂𑀭𑁄 𑀓𑀳𑀁 𑀯𑀲𑀢𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀓𑀸𑀮𑀓𑀕𑀸𑀫𑁂 ¶ 𑀫𑀡𑁆𑀟𑀮𑀸𑀭𑀸𑀫𑀯𑀺𑀳𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀮𑀓𑀕𑀸𑀫𑁂 𑀲𑀢𑁆𑀢𑀫𑀢𑁆𑀢𑀸𑀦𑀺 𑀓𑀼𑀮𑀲𑀢𑀸𑀦𑀺 𑀧𑀝𑀺𑀯𑀲𑀦𑁆𑀢𑀺. 𑀭𑀢𑁆𑀢𑀺𑀪𑀸𑀕𑁂 𑀤𑁂𑀯𑀢𑀸 𑀆𑀳𑀺𑀡𑁆𑀟𑀺𑀢𑁆𑀯𑀸 ‘‘𑀫𑀳𑀸𑀲𑁄𑀡𑀢𑁆𑀣𑁂𑀭𑁄 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀫𑀡𑁆𑀟𑀮𑀸𑀭𑀸𑀫𑀯𑀺𑀳𑀸𑀭𑀁 𑀧𑀢𑁆𑀢𑁄. 𑀏𑀓𑁂𑀓𑁄 𑀦𑀯𑀳𑀢𑁆𑀣𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀏𑀓𑁂𑀓𑀓𑀳𑀸𑀧𑀡𑀕𑁆𑀖𑀦𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀽’’𑀢𑀺 𑀫𑀦𑀼𑀲𑁆𑀲𑁂 𑀅𑀯𑁄𑀘𑀼𑀁. 𑀧𑀼𑀦𑀤𑀺𑀯𑀲𑁂 𑀘 𑀣𑁂𑀭𑀸 𑀓𑀸𑀮𑀓𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀅𑀤𑀁𑀲𑀼. 𑀫𑀡𑁆𑀟𑀮𑀸𑀭𑀸𑀫𑀯𑀸𑀲𑀻 𑀢𑀺𑀲𑁆𑀲𑀪𑀽𑀢𑀺𑀢𑁆𑀣𑁂𑀭𑁄 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀓𑁄 𑀫𑀳𑀸𑀉𑀧𑀸𑀲𑀓𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀳𑀸𑀲𑁄𑀡𑀢𑁆𑀣𑁂𑀭𑁄 𑀦𑀸𑀫 𑀓𑀢𑀭𑁄’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 𑀲𑀫𑀬𑁂𑀦 𑀣𑁂𑀭𑁄 𑀦𑀯𑀓𑁄 𑀳𑁄𑀢𑀺 𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑁄. 𑀣𑁂𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀫𑀳𑀸𑀲𑁄𑀡𑁄 𑀦𑀸𑀫 ¶ 𑀏𑀲, 𑀉𑀧𑀸𑀲𑀓𑀸’’𑀢𑀺 𑀆𑀳. 𑀉𑀧𑀸𑀲𑀓𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀦 𑀤𑁂𑀢𑀺. 𑀢𑀺𑀲𑁆𑀲𑀪𑀽𑀢𑀺𑀢𑁆𑀣𑁂𑀭𑁄 ‘‘𑀆𑀯𑀼𑀲𑁄 𑀲𑁄𑀡, 𑀬𑀣𑀸 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀫𑀬𑀫𑁆𑀧𑀺 𑀏𑀯𑀫𑁂𑀯 𑀦 𑀚𑀸𑀦𑀸𑀫; 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀤𑁂𑀯𑀢𑀸 𑀧𑀭𑀺𑀧𑀸𑀘𑁂𑀦𑁆𑀢𑀺; 𑀧𑀢𑁆𑀢𑀁 𑀤𑁂𑀳𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀗𑁆𑀕𑀳𑀁 𑀓𑀭𑁄𑀳𑀻’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀅𑀤𑀸𑀲𑀺. 𑀫𑀳𑀸𑀉𑀧𑀸𑀲𑀓𑁄 𑀧𑀢𑁆𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀓𑀳𑀸𑀧𑀡𑀕𑁆𑀖𑀦𑀓𑀲𑁆𑀲 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀯𑀳𑀢𑁆𑀣𑀲𑀸𑀝𑀓𑀁 𑀆𑀥𑀸𑀭𑀓𑀁 𑀓𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺; 𑀅𑀧𑀭𑁄𑀧𑀺 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲𑀸𑀢𑀺 𑀲𑀢𑁆𑀢 𑀲𑀸𑀝𑀓𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀺𑀡𑁆𑀟𑀧𑀸𑀢𑀲𑀢𑀸𑀦𑀺 𑀣𑁂𑀭𑀲𑁆𑀲𑁂𑀯 𑀅𑀤𑀁𑀲𑀼.

𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀯𑀺𑀳𑀸𑀭𑀁 𑀧𑀸𑀧𑀼𑀡𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀣𑀽𑀧𑀸𑀭𑀸𑀫𑁂 𑀞𑀺𑀢𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀢𑁄 𑀬𑀸𑀯 𑀯𑀴𑀜𑁆𑀚𑀦𑀓𑀲𑀸𑀮𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀲𑀝𑁆𑀞𑀺𑀓𑀳𑀸𑀧𑀡𑀕𑁆𑀖𑀦𑀓𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀓𑁆𑀓𑀸𑀭𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺. 𑀏𑀯𑀁 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀫𑀥𑀼𑀓𑀨𑀮𑀢𑁆𑀢𑀘𑁄𑀧𑀺 𑀓𑀼𑀫𑀼𑀤𑀦𑀸𑀴𑀺𑀧𑀺 𑀤𑀼𑀮𑁆𑀮𑀪𑀸 𑀚𑀸𑀢𑀸. 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀏𑀯𑀭𑀽𑀧𑁄 𑀫𑀳𑀸𑀮𑀸𑀪𑁄 𑀉𑀤𑀧𑀸𑀤𑀺.

𑀯𑀢𑁆𑀢𑀩𑁆𑀩𑀓𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲𑀸𑀧𑀺 𑀲𑀸𑀫𑀡𑁂𑀭𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑀁 𑀉𑀤𑀧𑀸𑀤𑀺. 𑀲𑀸𑀫𑀡𑁂𑀭𑁄 𑀘 𑀉𑀧𑀚𑁆𑀛𑀸𑀬𑁄 𑀘𑀲𑁆𑀲 𑀧𑀭𑀲𑀫𑀼𑀤𑁆𑀤𑀁 𑀦𑀸𑀕𑀫𑀺𑀁𑀲𑀼; ‘𑀧𑀡𑁆𑀡𑀔𑀸𑀤𑀓𑀫𑀦𑀼𑀲𑁆𑀲𑁂 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀧𑀘𑁆𑀘𑀦𑁆𑀢𑀸𑀪𑀺𑀫𑀼𑀔𑀸 𑀅𑀳𑁂𑀲𑀼𑀁. 𑀲𑀸𑀫𑀡𑁂𑀭𑁄 𑀲𑀢𑁆𑀢𑀸𑀳𑀫𑀢𑁆𑀢𑀁 𑀅𑀦𑀸𑀳𑀸𑀭𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀝𑁆𑀞𑀸𑀦𑁂 𑀢𑀸𑀮𑀭𑀼𑀓𑁆𑀔𑁂 𑀢𑀸𑀮𑀧𑀓𑁆𑀓𑀁 𑀤𑀺𑀲𑁆𑀯𑀸 𑀉𑀧𑀚𑁆𑀛𑀸𑀬𑀁 𑀆𑀳 𑁋 ‘‘𑀪𑀦𑁆𑀢𑁂, 𑀣𑁄𑀓𑀁 𑀆𑀕𑀫𑁂𑀣; 𑀢𑀸𑀮𑀧𑀓𑁆𑀓𑀁 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺. ‘‘𑀤𑀼𑀩𑁆𑀩𑀮𑁄𑀲𑀺 𑀢𑁆𑀯𑀁, 𑀲𑀸𑀫𑀡𑁂𑀭, 𑀫𑀸 𑀅𑀪𑀺𑀭𑀼𑀳𑀻’’𑀢𑀺. ‘‘𑀅𑀪𑀺𑀭𑀼𑀳𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀔𑀼𑀤𑁆𑀤𑀓𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀢𑀸𑀮𑀁 𑀆𑀭𑀼𑀬𑁆𑀳 𑀢𑀸𑀮𑀧𑀺𑀡𑁆𑀟𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀯𑀸𑀲𑀺𑀨𑀮𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺.

𑀣𑁂𑀭𑁄 ¶ 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀺𑀮𑀦𑁆𑀢𑁄𑀯 𑀭𑀼𑀓𑁆𑀔𑀁 𑀆𑀭𑀼𑀴𑁆𑀳𑁄; 𑀓𑀺𑀁 𑀦𑀼 𑀔𑁄 𑀇𑀤𑀸𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀡𑁂𑀭𑁄 𑀢𑀸𑀮𑀧𑀡𑁆𑀡𑀁 𑀨𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀯𑀸𑀲𑀺𑀤𑀡𑁆𑀟𑀓𑁂 𑀩𑀦𑁆𑀥𑀺𑀢𑁆𑀯𑀸 𑀖𑀝𑁆𑀝𑁂𑀦𑁆𑀢𑁄 𑀖𑀝𑁆𑀝𑁂𑀦𑁆𑀢𑁄 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀯𑀸𑀲𑀺𑀨𑀮𑀁 𑀏𑀢𑁆𑀣 𑀧𑀯𑁂𑀲𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀣𑁂𑀭𑁄 ‘𑀉𑀧𑀸𑀬𑀲𑀫𑁆𑀧𑀦𑁆𑀦𑁄 𑀲𑀸𑀫𑀡𑁂𑀭𑁄’𑀢𑀺 𑀯𑀸𑀲𑀺𑀨𑀮𑀁 𑀧𑀯𑁂𑀲𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀯𑀸𑀲𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀮𑀨𑀮𑀸𑀦𑀺 𑀧𑀸𑀢𑁂𑀲𑀺. 𑀣𑁂𑀭𑁄 𑀯𑀸𑀲𑀺𑀁 𑀧𑀸𑀢𑀸𑀧𑁂𑀢𑁆𑀯𑀸 𑀧𑀯𑀝𑁆𑀝𑀺𑀢𑁆𑀯𑀸 ¶ 𑀕𑀢𑀁 𑀢𑀸𑀮𑀨𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀑𑀢𑀺𑀡𑁆𑀡𑀓𑀸𑀮𑁂 𑀆𑀳 ‘‘𑀲𑀸𑀫𑀡𑁂𑀭, 𑀢𑁆𑀯𑀁 𑀤𑀼𑀩𑁆𑀩𑀮𑁄, 𑀇𑀤𑀁 𑀢𑀸𑀯 𑀔𑀸𑀤𑀸𑀳𑀻’’𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀔𑀸𑀤𑀺𑀢𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀢𑀸𑀮𑀨𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀢𑀸𑀮𑀫𑀺𑀜𑁆𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀲𑀬𑀁 𑀔𑀸𑀤𑀺. 𑀬𑀸𑀯 𑀢𑀸𑀮𑀨𑀮𑀸𑀦𑀺 𑀅𑀳𑁂𑀲𑀼𑀁, 𑀢𑀸𑀯 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀨𑀮𑁂𑀲𑀼 𑀔𑀻𑀡𑁂𑀲𑀼 𑀅𑀦𑀼𑀧𑀼𑀩𑁆𑀩𑁂𑀦 𑀧𑀡𑁆𑀡𑀔𑀸𑀤𑀓𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀏𑀓𑀁 𑀙𑀟𑁆𑀟𑀺𑀢𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀺. 𑀣𑁂𑀭𑁄 𑀲𑀸𑀫𑀡𑁂𑀭𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀲𑀸𑀫𑀡𑁂𑀭𑁄 ‘𑀅𑀦𑀸𑀬𑀢𑀦𑁂 𑀦𑀝𑁆𑀞𑀸𑀦𑀁 𑀅𑀢𑁆𑀢𑀪𑀸𑀯𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀁 ¶ 𑀉𑀧𑀝𑁆𑀞𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀳𑀭𑀺𑀢𑀁 𑀓𑀭𑁄𑀢𑀺; 𑀲𑀢𑁆𑀢𑀸𑀳𑀫𑀢𑁆𑀢𑀁 𑀦𑀺𑀭𑀸𑀳𑀸𑀭𑀢𑀸𑀬 𑀧𑀯𑁂𑀥𑀫𑀸𑀦𑁄 𑀧𑀢𑀺𑀢𑁆𑀯𑀸 𑀦𑀺𑀧𑀦𑁆𑀦𑀓𑁄𑀯 𑀢𑀺𑀡𑀸𑀦𑀺 𑀉𑀤𑁆𑀥𑀭𑀢𑀺. 𑀏𑀓𑀘𑁆𑀘𑁂 𑀘 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑁂 𑀘𑀭𑀦𑁆𑀢𑀸 𑀫𑀥𑀼𑀁 𑀮𑀪𑀺𑀢𑁆𑀯𑀸 𑀤𑀸𑀭𑀽𑀦𑀺 𑀘𑁂𑀯 𑀲𑀸𑀓𑀧𑀡𑁆𑀡𑀜𑁆𑀘 𑀕𑀳𑁂𑀢𑁆𑀯𑀸 𑀢𑀺𑀡𑀘𑀮𑀦𑀲𑀜𑁆𑀜𑀸𑀬 ‘𑀫𑀺𑀕𑁄 𑀦𑀼 𑀔𑁄 𑀏𑀲𑁄’𑀢𑀺 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺, 𑀲𑀸𑀫𑀡𑁂𑀭𑀸’’𑀢𑀺 𑀆𑀳𑀁𑀲𑀼. ‘‘𑀢𑀺𑀡𑀕𑀡𑁆𑀞𑀺𑀁 𑀕𑀡𑁆𑀳𑀸𑀫𑀺, 𑀉𑀧𑀸𑀲𑀓𑀸’’𑀢𑀺. ‘‘𑀅𑀜𑁆𑀜𑁄𑀧𑀺 𑀓𑁄𑀘𑀺 𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀉𑀧𑀸𑀲𑀓𑀸, 𑀉𑀧𑀚𑁆𑀛𑀸𑀬𑁄 𑀫𑁂 𑀅𑀦𑁆𑀢𑁄𑀕𑀩𑁆𑀪𑁂’’𑀢𑀺. ‘‘𑀫𑀳𑀸𑀣𑁂𑀭𑀲𑁆𑀲 𑀤𑀢𑁆𑀯𑀸 𑀔𑀸𑀤𑁂𑀬𑁆𑀬𑀸𑀲𑀺, 𑀪𑀦𑁆𑀢𑁂’’𑀢𑀺 𑀲𑀸𑀫𑀡𑁂𑀭𑀲𑁆𑀲 𑀫𑀥𑀼𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀫𑀬𑀁 𑀲𑀸𑀔𑀸𑀪𑀗𑁆𑀕𑀁 𑀓𑀭𑁄𑀦𑁆𑀢𑀸 𑀕𑀫𑀺𑀲𑁆𑀲𑀸𑀫. 𑀏𑀢𑀸𑀬 𑀲𑀜𑁆𑀜𑀸𑀬 𑀣𑁂𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀅𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀅𑀕𑀫𑀁𑀲𑀼.

𑀲𑀸𑀫𑀡𑁂𑀭𑁄 𑀫𑀥𑀼𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑀳𑀺 𑀞𑀢𑁆𑀯𑀸 ‘‘𑀯𑀦𑁆𑀤𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 ‘𑀲𑀸𑀫𑀡𑁂𑀭𑁄 𑀚𑀺𑀖𑀘𑁆𑀙𑀸𑀬 𑀅𑀦𑀼𑀟𑀬𑁆𑀳𑀫𑀸𑀦𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀧𑀼𑀦𑀧𑀺 ‘‘𑀯𑀦𑁆𑀤𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀓𑀲𑁆𑀫𑀸, 𑀲𑀸𑀫𑀡𑁂𑀭, 𑀤𑀼𑀩𑁆𑀩𑀮𑀪𑀺𑀓𑁆𑀔𑀽𑀦𑀁 𑀲𑀼𑀔𑁂𑀦 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀤𑁂𑀲𑀻’’𑀢𑀺? ‘‘𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑀼𑀁 𑀲𑀸𑀭𑀼𑀧𑁆𑀧𑀁, 𑀪𑀦𑁆𑀢𑁂’’𑀢𑀺? 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀓𑀺𑀁 𑀢𑁂, 𑀲𑀸𑀫𑀡𑁂𑀭, 𑀮𑀤𑁆𑀥𑀁’’𑀢𑀺 𑀆𑀳. 𑀫𑀦𑀼𑀲𑁆𑀲𑁂𑀳𑀺 𑀫𑀥𑀼 𑀤𑀺𑀦𑁆𑀦𑀁, 𑀔𑀸𑀤𑀺𑀢𑀼𑀁 𑀲𑀸𑀭𑀼𑀧𑁆𑀧𑀁, 𑀪𑀦𑁆𑀢𑁂’’𑀢𑀺? ‘‘𑀲𑀸𑀫𑀡𑁂𑀭, 𑀏𑀯𑀫𑁂𑀯 𑀔𑀸𑀤𑀺𑀢𑀼𑀁 𑀓𑀺𑀮𑀫𑀺𑀲𑁆𑀲𑀸𑀫, 𑀧𑀸𑀦𑀓𑀁 𑀓𑀢𑁆𑀯𑀸 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺. 𑀲𑀸𑀫𑀡𑁂𑀭𑁄 𑀧𑀸𑀦𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀦𑀁 𑀣𑁂𑀭𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀲𑀺, 𑀲𑀸𑀫𑀡𑁂𑀭𑀸’’𑀢𑀺 𑀆𑀳. 𑀲𑀬𑀫𑁂𑀯 𑀆𑀘𑀺𑀓𑁆𑀔𑀺𑀁𑀲𑀼, 𑀪𑀦𑁆𑀢𑁂’’𑀢𑀺. ‘‘𑀲𑀸𑀫𑀡𑁂𑀭, 𑀧𑀸𑀢𑁄𑀯 𑀕𑀘𑁆𑀙𑀦𑁆𑀢𑀸 𑀓𑀺𑀮𑀫𑀺𑀲𑁆𑀲𑀸𑀫; 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 ¶ 𑀧𑀢𑁆𑀢𑀘𑀻𑀯𑀭𑀁 ¶ 𑀕𑀡𑁆𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑁂 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀧𑀚𑁆𑀚𑀺𑀁𑀲𑀼.

𑀲𑀸𑀫𑀡𑁂𑀭𑁄 𑀭𑀢𑁆𑀢𑀺𑀪𑀸𑀕𑁂 𑀘𑀺𑀦𑁆𑀢𑁂𑀲𑀺 𑁋 ‘𑀫𑀬𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀸𑀫𑀦𑁆𑀢𑁂 𑀅𑀭𑀼𑀡𑀁 𑀦𑀸𑀫 𑀦 𑀉𑀝𑁆𑀞𑀸𑀧𑀺𑀢𑀧𑀼𑀩𑁆𑀩’𑀦𑁆𑀢𑀺. 𑀲𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀅𑀭𑀜𑁆𑀜𑀁 𑀅𑀕𑀫𑀸𑀲𑀺. 𑀫𑀳𑀸𑀣𑁂𑀭𑁄 𑀲𑀸𑀫𑀡𑁂𑀭𑀁 𑀦𑀺𑀧𑀦𑁆𑀦𑀝𑁆𑀞𑀸𑀦𑁂 𑀅𑀧𑀲𑁆𑀲𑀦𑁆𑀢𑁄 ‘𑀫𑀦𑀼𑀲𑁆𑀲𑀔𑀸𑀤𑀓𑁂𑀳𑀺 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸𑀫𑀡𑁂𑀭𑁄 𑀅𑀭𑀜𑁆𑀜𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀢𑁆𑀢𑁂𑀦 𑀉𑀤𑀓𑀜𑁆𑀘 𑀤𑀦𑁆𑀢𑀓𑀝𑁆𑀞𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀫𑀺. ‘‘𑀲𑀸𑀫𑀡𑁂𑀭, 𑀓𑀼𑀳𑀺𑀁 𑀕𑀢𑁄𑀲𑀺? 𑀫𑀳𑀮𑁆𑀮𑀓𑀪𑀺𑀓𑁆𑀔𑀽𑀦𑀁 𑀢𑁂 𑀯𑀺𑀢𑀓𑁆𑀓𑁄 𑀉𑀧𑁆𑀧𑀸𑀤𑀺𑀢𑁄; 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀸’’𑀢𑀺. ‘‘𑀆𑀳𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀉𑀪𑁄𑀧𑀺 𑀫𑀦𑀼𑀲𑁆𑀲𑀸𑀦𑀁 ¶ 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀫𑀦𑀼𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀁 𑀓𑀦𑁆𑀤𑀫𑀽𑀮𑀨𑀮𑀧𑀡𑁆𑀡𑀁 𑀅𑀤𑀁𑀲𑀼. 𑀣𑁂𑀭𑁄𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 ‘‘𑀧𑀸𑀤𑁂 𑀥𑁄𑀯𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀲𑀸𑀫𑀡𑁂𑀭, 𑀢𑁆𑀯𑀁 𑀭𑀢𑁆𑀢𑀺𑀁 𑀓𑀼𑀳𑀺𑀁 𑀕𑀢𑁄? 𑀅𑀫𑁆𑀳𑀸𑀓𑀁 𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺. ‘‘𑀪𑀦𑁆𑀢𑁂, 𑀕𑀸𑀫𑀦𑁆𑀢𑁂 𑀫𑁂 𑀅𑀭𑀼𑀡𑀁 𑀦 𑀉𑀝𑁆𑀞𑀸𑀧𑀺𑀢𑀧𑀼𑀩𑁆𑀩𑀁; 𑀅𑀭𑀼𑀡𑀼𑀝𑁆𑀞𑀸𑀧𑀦𑀢𑁆𑀣𑀸𑀬 𑀅𑀭𑀜𑁆𑀜𑀁 𑀅𑀕𑀫𑀸𑀲𑀺’’𑀦𑁆𑀢𑀺. ‘‘𑀲𑀸𑀫𑀡𑁂𑀭, 𑀦 𑀢𑀼𑀬𑁆𑀳𑀁 𑀤𑀡𑁆𑀟𑀓𑀫𑁆𑀫𑀁 𑀅𑀦𑀼𑀘𑁆𑀙𑀯𑀺𑀓𑀁 𑀅𑀫𑁆𑀳𑀸𑀓𑀫𑁂𑀯 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀲𑀺; 𑀲𑀸𑀫𑀡𑁂𑀭𑀲𑁆𑀲 𑀘 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀫𑀬𑀁 𑀢𑀸𑀯 𑀫𑀳𑀮𑁆𑀮𑀓𑀸; ‘𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’𑀢𑀺 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀢𑀼𑀯𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑁄 𑀓𑀺𑀭 𑀅𑀦𑀸𑀕𑀸𑀫𑀻. 𑀢𑀁 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑀔𑀸𑀤𑀓𑀸 𑀔𑀸𑀤𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀺𑀢𑁆𑀯𑀸 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀺𑀧𑀺𑀝𑀓𑀥𑀭𑁄 𑀳𑀼𑀢𑁆𑀯𑀸 𑀯𑀢𑁆𑀢𑀩𑁆𑀩𑀓𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄 𑀦𑀸𑀫 𑀚𑀸𑀢𑁄.

𑀧𑀺𑀢𑀼𑀫𑀳𑀸𑀭𑀸𑀚𑀸 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀺. 𑀧𑀭𑀲𑀫𑀼𑀤𑁆𑀤𑀸 𑀆𑀕𑀢𑀸𑀕𑀢𑀸 𑀪𑀺𑀓𑁆𑀔𑀽 ‘‘𑀓𑀳𑀁 𑀯𑀢𑁆𑀢𑀩𑁆𑀩𑀓𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄, 𑀓𑀳𑀁 𑀯𑀢𑁆𑀢𑀩𑁆𑀩𑀓𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀣𑁂𑀭𑀁 𑀧𑀭𑀺𑀯𑀸𑀭𑁂𑀲𑀺. 𑀲𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀯𑀺𑀳𑀸𑀭𑀁 𑀧𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀫𑀳𑀸𑀘𑁂𑀢𑀺𑀬𑀁 𑀣𑀽𑀧𑀸𑀭𑀸𑀫𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀸𑀬𑀸𑀲𑀺. 𑀬𑀸𑀯 𑀤𑀓𑁆𑀔𑀺𑀡𑀤𑁆𑀯𑀸𑀭𑀸 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀦𑀯𑀲𑀼 𑀞𑀸𑀦𑁂𑀲𑀼 𑀢𑀺𑀘𑀻𑀯𑀭𑀁 𑀉𑀧𑀧𑀚𑁆𑀚𑀺; 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀇𑀢𑀺 𑀓𑀸𑀮𑀯𑀺𑀧𑀢𑁆𑀢𑀺𑀬𑀁 𑀢𑀸𑀮𑀨𑀮𑀓𑀦𑁆𑀤𑀫𑀽𑀮𑀧𑀡𑁆𑀡𑀫𑁆𑀧𑀺 𑀤𑀼𑀮𑁆𑀮𑀪𑀁 𑀚𑀸𑀢𑀁. 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀏𑀯𑀭𑀽𑀧𑁄 𑀫𑀳𑀸𑀮𑀸𑀪𑁄 𑀉𑀧𑁆𑀧𑀦𑁆𑀦𑁄𑀢𑀺. 𑀏𑀯𑀁 𑀓𑀸𑀮𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 ¶ 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀧𑀭𑀲𑁆𑀲𑀸𑀧𑀺 ¶ 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀺𑀧𑀘𑁆𑀘𑁂𑀬𑁆𑀬𑀼𑀁. 𑀲𑁄 𑀧𑀦 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀲𑀫𑁆𑀫𑀸𑀧𑀬𑁄𑀕𑁂 𑀧𑀢𑀺𑀝𑁆𑀞𑀺𑀢𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑀺, 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁 𑀭𑀓𑁆𑀔𑀢𑀺. 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑁆𑀲 𑀭𑀸𑀚𑀸𑀦𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑀸 𑀭𑀸𑀚𑀓𑀜𑁆𑀜𑀸𑀬𑁄 ‘𑀏𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸’𑀢𑀺 𑀧𑁂𑀲𑁂𑀦𑁆𑀢𑀺, 𑀬𑀸𑀦𑀯𑀸𑀳𑀦𑀫𑀡𑀺𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀪𑁂𑀤𑀁 𑀢𑀁 𑀢𑀁 𑀧𑀡𑁆𑀡𑀸𑀓𑀸𑀭𑀁 ‘𑀏𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓’𑀦𑁆𑀢𑀺 𑀧𑁂𑀲𑁂𑀦𑁆𑀢𑀺 ¶ .

𑀧𑀩𑁆𑀩𑀚𑁆𑀚𑀽𑀧𑀕𑀢𑁄𑀧𑀺 𑀫𑀳𑀸𑀬𑀲𑁄 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀓𑀽𑀝𑀓𑀡𑁆𑀡𑀭𑀸𑀚𑀸 𑀓𑀺𑀭 𑀕𑀺𑀭𑀺𑀕𑀸𑀫𑀓𑀡𑁆𑀡𑀯𑀸𑀲𑀺𑀓𑀁 𑀘𑀽𑀴𑀲𑀼𑀥𑀫𑁆𑀫𑀢𑁆𑀣𑁂𑀭𑀁 𑀫𑀫𑀸𑀬𑀢𑀺. 𑀲𑁄 𑀉𑀧𑁆𑀧𑀮𑀯𑀸𑀧𑀺𑀬𑀁 𑀯𑀲𑀫𑀸𑀦𑁄 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀫𑀸𑀮𑀸𑀭𑀸𑀫𑀯𑀺𑀳𑀸𑀭𑁂 𑀯𑀲𑀢𑀺. 𑀭𑀸𑀚𑀸 𑀣𑁂𑀭𑀲𑁆𑀲 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀣𑁂𑀭𑁄 𑀧𑀺𑀬𑀸𑀬𑀢𑀻’’𑀢𑀺? ‘‘𑀓𑀦𑁆𑀤𑀁 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀓𑀦𑁆𑀤𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀤𑀤𑀫𑀸𑀦𑁄 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀩𑀳𑀺𑀧𑀭𑀺𑀯𑁂𑀡𑁂 𑀤𑁂𑀯𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀻𑀤𑀺𑀲𑁄 𑀣𑁂𑀭𑁄’’𑀢𑀺? ‘‘𑀢𑁆𑀯𑀁 𑀧𑀼𑀭𑀺𑀲𑁄 𑀳𑀼𑀢𑁆𑀯𑀸 𑀉𑀮𑁆𑀮𑁄𑀓𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺; 𑀅𑀳𑀁 𑀓𑀣𑀁 𑀲𑀓𑁆𑀔𑀺𑀲𑁆𑀲𑀸𑀫𑀺? 𑀦𑀸𑀳𑀁 𑀚𑀸𑀦𑀸𑀫𑀺 𑀓𑀻𑀤𑀺𑀲𑁄’’𑀢𑀺. 𑀭𑀸𑀚𑀸 ‘𑀫𑀫 𑀭𑀝𑁆𑀞𑁂 𑀩𑀮𑀺𑀓𑀸𑀭𑀕𑀳𑀧𑀢𑀺𑀧𑀼𑀢𑁆𑀢𑀁 𑀉𑀮𑁆𑀮𑁄𑀓𑁂𑀢𑀼𑀁 𑀦 𑀯𑀺𑀲𑀳𑀸𑀫𑀺. 𑀫𑀳𑀦𑁆𑀢𑀁 𑀯𑀢 𑀪𑁄 𑀩𑀼𑀤𑁆𑀥𑀲𑀸𑀲𑀦𑀁 𑀦𑀸𑀫𑀸’𑀢𑀺 𑀅𑀧𑁆𑀨𑁄𑀝𑁂𑀲𑀺. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀫𑁆𑀧𑀺 𑀫𑀫𑀸𑀬𑀢𑀺. 𑀢𑀲𑁆𑀲 𑀅𑀗𑁆𑀕𑀼𑀮𑀺𑀬𑀁 𑀏𑀓𑀸 𑀧𑀺𑀴𑀓𑀸 𑀉𑀝𑁆𑀞𑀳𑀺. 𑀭𑀸𑀚𑀸 ‘𑀣𑁂𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀩𑀮𑀯𑀧𑁂𑀫𑁂𑀦 𑀅𑀗𑁆𑀕𑀼𑀮𑀺𑀁 𑀫𑀼𑀔𑁂𑀦 𑀕𑀡𑁆𑀳𑀺. 𑀅𑀦𑁆𑀢𑁄𑀫𑀼𑀔𑁂𑀬𑁂𑀯 𑀧𑀺𑀴𑀓𑀸 𑀪𑀺𑀦𑁆𑀦𑀸, 𑀧𑀼𑀩𑁆𑀩𑀮𑁄𑀳𑀺𑀢𑀁 𑀅𑀦𑀼𑀝𑁆𑀞𑀼𑀪𑀺𑀢𑁆𑀯𑀸 𑀣𑁂𑀭𑁂 𑀲𑀺𑀦𑁂𑀳𑁂𑀦 𑀅𑀫𑀢𑀁 𑀯𑀺𑀬 𑀅𑀚𑁆𑀛𑁄𑀳𑀭𑀺. 𑀲𑁄𑀬𑁂𑀯 𑀣𑁂𑀭𑁄 𑀅𑀧𑀭𑀪𑀸𑀕𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀚𑁆𑀚𑀺. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀅𑀲𑀼𑀘𑀺𑀓𑀧𑀮𑁆𑀮𑀓𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 ‘𑀥𑀫𑁆𑀫𑀲𑀓𑀝𑀲𑁆𑀲 𑀅𑀓𑁆𑀔𑁄 𑀪𑀺𑀚𑁆𑀚𑀢𑀺 𑀅𑀓𑁆𑀔𑁄 𑀪𑀺𑀚𑁆𑀚𑀢𑀻’𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀯𑀺𑀘𑀭𑀺. 𑀧𑀣𑀯𑀺𑀲𑁆𑀲𑀭𑀲𑁆𑀲 𑀅𑀲𑀼𑀘𑀺𑀓𑀧𑀮𑁆𑀮𑀓𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀡𑀁 𑀦𑀸𑀫 𑀓𑀲𑁆𑀲 𑀕𑀢𑀫𑀕𑁆𑀕𑁄? 𑀲𑀫𑁆𑀫𑀸𑀧𑀬𑁄𑀕𑀲𑁆𑀲 𑀕𑀢𑀫𑀕𑁆𑀕𑁄𑀢𑀺. 𑀏𑀯𑀁 𑀧𑀬𑁄𑀕𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀘𑀢𑀽𑀳𑀺 𑀯𑀺𑀧𑀢𑁆𑀢𑀻𑀳𑀺 𑀧𑀝𑀺𑀩𑀸𑀳𑀺𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀯𑀺𑀧𑀸𑀓𑀁 𑀅𑀤𑀢𑁆𑀯𑀸 𑀘𑀢𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀆𑀕𑀫𑁆𑀫 𑀤𑁂𑀢𑀺.

𑀢𑀢𑁆𑀭𑀺𑀤𑀁 𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸 𑀑𑀧𑀫𑁆𑀫𑀁 𑁋 𑀏𑀓𑁄 𑀓𑀺𑀭 𑀫𑀳𑀸𑀭𑀸𑀚𑀸 𑀏𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀅𑀧𑁆𑀧𑀫𑀢𑁆𑀢𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀢𑀁 𑀩𑀦𑁆𑀥𑀦𑀸𑀕𑀸𑀭𑁂 𑀩𑀦𑁆𑀥𑀸𑀧𑁂𑀲𑀺. 𑀢𑀲𑁆𑀲 𑀜𑀸𑀢𑀓𑀸 𑀭𑀜𑁆𑀜𑁄 ¶ 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀘𑀡𑁆𑀟𑀓𑁄𑀧𑁂 𑀯𑀺𑀕𑀢𑁂 𑀭𑀸𑀚𑀸𑀦𑀁 𑀢𑀲𑁆𑀲 𑀦𑀺𑀭𑀧𑀭𑀸𑀥𑀪𑀸𑀯𑀁 𑀚𑀸𑀦𑀸𑀧𑁂𑀲𑀼𑀁. 𑀭𑀸𑀚𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀲𑁆𑀲 𑀞𑀸𑀦𑀦𑁆𑀢𑀭𑀁 𑀧𑀝𑀺𑀧𑀸𑀓𑀢𑀺𑀓𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀢𑀢𑁄 𑀢𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀧𑀡𑁆𑀡𑀸𑀓𑀸𑀭𑀸𑀦𑀁 𑀧𑀫𑀸𑀡𑀁 𑀦𑀸𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁆𑀣 ¶ 𑀭𑀜𑁆𑀜𑁄 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 ¶ 𑀩𑀦𑁆𑀥𑀸𑀧𑀺𑀢𑀓𑀸𑀮𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁄. 𑀅𑀣𑀲𑁆𑀲 𑀜𑀸𑀢𑀓𑁂𑀳𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀲𑁆𑀲 𑀧𑀝𑀺𑀧𑀸𑀓𑀢𑀺𑀓𑀓𑀭𑀡𑀓𑀸𑀮𑁄 𑀯𑀺𑀬 𑀢𑀲𑁆𑀲 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁄. 𑀧𑀡𑁆𑀡𑀸𑀓𑀸𑀭𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄 𑀯𑀺𑀬 𑀘𑀢𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀆𑀕𑀫𑁆𑀫 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀁 𑀤𑁂𑀯𑀮𑁄𑀓𑀢𑁄 𑀫𑀦𑀼𑀲𑁆𑀲𑀮𑁄𑀓𑀁, 𑀫𑀦𑀼𑀲𑁆𑀲𑀮𑁄𑀓𑀢𑁄 𑀤𑁂𑀯𑀮𑁄𑀓𑀦𑁆𑀢𑀺 𑀏𑀯𑀁 𑀲𑀼𑀔𑀝𑁆𑀞𑀸𑀦𑀢𑁄 𑀲𑀼𑀔𑀝𑁆𑀞𑀸𑀦𑀫𑁂𑀯 𑀦𑁂𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀲𑀼𑀔𑀯𑀺𑀧𑀸𑀓𑀁 𑀤𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀢𑀸𑀯 𑀧𑀸𑀴𑀺𑀯𑀲𑁂𑀦𑁂𑀯 𑀤𑀼𑀢𑀺𑀬𑀁 𑀩𑀮𑀁 𑀤𑀻𑀧𑁂𑀢𑁆𑀯𑀸 𑀧𑀼𑀦 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 𑀤𑀻𑀧𑁂𑀢𑀩𑁆𑀩𑀁. 𑀢𑀢𑁆𑀣 ‘𑀅𑀳𑁄𑀲𑀺 𑀓𑀫𑁆𑀫’𑀦𑁆𑀢𑀺 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁 𑀅𑀢𑀻𑀢𑁂𑀬𑁂𑀯 𑀅𑀳𑁄𑀲𑀺. 𑀬𑁂𑀦 𑀧𑀦 𑀅𑀢𑀻𑀢𑁂 𑀯𑀺𑀧𑀸𑀓𑁄 𑀤𑀺𑀦𑁆𑀦𑁄, 𑀢𑀁 𑀲𑀦𑁆𑀥𑀸𑀬 ‘𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀲𑀼 𑀧𑀦 𑀩𑀳𑀽𑀲𑀼𑀧𑀺 𑀆𑀬𑀽𑀳𑀺𑀢𑁂𑀲𑀼 𑀏𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀏𑀓𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀏𑀓𑁂𑀦𑀸𑀦𑀦𑁆𑀢𑀭𑀺𑀬𑁂𑀦 𑀦𑀺𑀭𑀬𑁂 𑀉𑀧𑀧𑀚𑁆𑀚𑀢𑀺, 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑀸𑀬 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁂𑀲𑀸 𑀅𑀯𑀺𑀧𑀸𑀓𑀸. 𑀇𑀤𑀁 𑀲𑀦𑁆𑀥𑀸𑀬 ‘𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’𑀢𑀺 𑀯𑀼𑀢𑁆𑀢𑀁. 𑀬𑁄 𑀧𑀦 𑀩𑀳𑀼𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁄 ‘𑀦𑀸𑀳𑁄𑀲𑀺’ 𑀦𑀸𑀫. 𑀬𑀁 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀏𑀢𑀭𑀳𑀺 𑀯𑀺𑀧𑀸𑀓𑀁 𑀤𑁂𑀢𑀺 𑀢𑀁 ‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀯𑀺𑀧𑀸𑀓𑀢𑀁 𑀆𑀧𑀚𑁆𑀚𑀢𑀺 𑀢𑀁 ‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺 𑀢𑀁 ‘𑀅𑀳𑁄𑀲𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀧𑀼𑀭𑀺𑀫𑀦𑀬𑁂𑀦 𑀅𑀯𑀺𑀧𑀸𑀓𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 ‘𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫.

𑀬𑀁 ¶ 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀏𑀢𑀭𑀳𑀺𑀬𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺 𑀢𑀁 ‘𑀅𑀢𑁆𑀣𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 ¶ 𑀅𑀯𑀺𑀧𑀸𑀓𑀢𑀁 𑀆𑀧𑀚𑁆𑀚𑀢𑀺 𑀢𑀁 ‘𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺 𑀢𑀁 ‘𑀅𑀢𑁆𑀣𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫. 𑀬𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀯𑀺𑀧𑀸𑀓𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 ‘𑀅𑀢𑁆𑀣𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫.

𑀬𑀁 𑀲𑀬𑀫𑁆𑀧𑀺 𑀅𑀦𑀸𑀕𑀢𑀁, 𑀯𑀺𑀧𑀸𑀓𑁄𑀧𑀺𑀲𑁆𑀲 𑀅𑀦𑀸𑀕𑀢𑁄 𑀢𑀁 ‘𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ ¶ 𑀦𑀸𑀫. 𑀬𑀁 𑀲𑀬𑀁 𑀪𑀯𑀺𑀲𑁆𑀲𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀯𑀺𑀧𑀸𑀓𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 ‘𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’ 𑀦𑀸𑀫.

𑀇𑀤𑀁 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺𑀧𑀺 𑀏𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑀣𑀸𑀕𑀢𑀲𑁆𑀲 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀚𑀸𑀦𑀦𑀜𑀸𑀡𑀁 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀤𑀼𑀢𑀺𑀬𑀩𑀮𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀢𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑁄

𑁮𑁧𑁧. 𑀢𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑁂 𑀫𑀕𑁆𑀕𑁄𑀢𑀺 𑀯𑀸 𑀧𑀝𑀺𑀧𑀤𑀸𑀢𑀺 𑀯𑀸 𑀓𑀫𑁆𑀫𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀦𑀺𑀭𑀬𑀕𑀸𑀫𑀺𑀦𑀻𑀢𑀺𑀆𑀤𑀻𑀲𑀼 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀢𑀺𑀅𑀢𑁆𑀣𑁂𑀦 𑀘 𑀦𑀺𑀭𑀬𑁄. 𑀉𑀤𑁆𑀥𑀁 𑀅𑀦𑀼𑀕𑀦𑁆𑀢𑁆𑀯𑀸 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸; 𑀢𑀺𑀭𑀘𑁆𑀙𑀸𑀦𑀸𑀬𑁂𑀯 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀧𑁂𑀢𑀢𑀸𑀬 𑀧𑁂𑀢𑁆𑀢𑀺; 𑀇𑀢𑁄 𑀧𑁂𑀘𑁆𑀘 𑀕𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀧𑁂𑀢𑁆𑀢𑀺𑀬𑁂𑀯 𑀧𑁂𑀢𑁆𑀢𑀺𑀯𑀺𑀲𑀬𑁄. 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸; 𑀫𑀦𑀼𑀲𑁆𑀲𑀸𑀯 𑀫𑀦𑀼𑀲𑁆𑀲𑀮𑁄𑀓𑁄. 𑀤𑀺𑀩𑁆𑀩𑀦𑁆𑀢𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀅𑀥𑀺𑀫𑀢𑁆𑀢𑀸𑀬 𑀯𑀸 𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀤𑁂𑀯𑀸; 𑀤𑁂𑀯𑀸𑀯 𑀤𑁂𑀯𑀮𑁄𑀓𑁄. 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸; 𑀢𑀁 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀺𑀭𑀬𑀁 𑀕𑀘𑁆𑀙𑀢𑀻𑀢𑀺 𑀦𑀺𑀭𑀬𑀕𑀸𑀫𑀻. 𑀇𑀤𑀁 𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀧𑀤𑀸 𑀧𑀦 𑀦𑀺𑀭𑀬𑀕𑀸𑀫𑀺𑀦𑀻 𑀦𑀸𑀫 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀧𑀝𑀺𑀧𑀤𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺.

𑀓𑀣𑀁 ¶ ? 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼𑀧𑀺 𑀳𑀺 𑀏𑀓𑀢𑁄 𑀏𑀓𑀁 𑀲𑀽𑀓𑀭𑀁 𑀯𑀸 𑀫𑀺𑀕𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸𑀯 𑀳𑁄𑀢𑀺. 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀦𑀸𑀦𑀸 𑀳𑁄𑀢𑀺. 𑀢𑁂𑀲𑀼 𑀳𑀺 𑀏𑀓𑁄 𑀆𑀤𑀭𑁂𑀦 𑀙𑀦𑁆𑀤𑀚𑀸𑀢𑁄 𑀓𑀭𑁄𑀢𑀺. 𑀏𑀓𑁄 ‘𑀏𑀳𑀺 𑀢𑁆𑀯𑀫𑁆𑀧𑀺 𑀓𑀭𑁄𑀳𑀻’𑀢𑀺 𑀧𑀭𑁂𑀳𑀺 𑀦𑀺𑀧𑁆𑀧𑀻𑀴𑀺𑀢𑀢𑁆𑀢𑀸 𑀓𑀭𑁄𑀢𑀺. 𑀏𑀓𑁄 𑀲𑀫𑀸𑀦𑀘𑁆𑀙𑀦𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀧𑁆𑀧𑀝𑀺𑀩𑀸𑀳𑀺𑀬𑀫𑀸𑀦𑁄 𑀯𑀺𑀘𑀭𑀢𑀺. 𑀢𑁂𑀲𑀼 𑀏𑀓𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑁂. 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 ‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 ¶ , 𑀏𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀲 𑀧𑁂𑀢𑁆𑀢𑀺𑀯𑀺𑀲𑀬𑁂’𑀢𑀺 𑀧𑀚𑀸𑀦𑀸𑀢𑀺 ¶ . 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘𑀏𑀲 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀲𑁄𑀴𑀲𑀲𑀼 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘𑀏𑀲 𑀅𑀧𑀸𑀤𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀤𑁆𑀯𑀺𑀧𑀸𑀤𑀓𑁄, 𑀏𑀲 𑀘𑀢𑀼𑀧𑁆𑀧𑀸𑀤𑀓𑁄, 𑀏𑀲 𑀩𑀳𑀼𑀧𑁆𑀧𑀸𑀤𑀓𑁄’𑀢𑀺 𑀧𑀚𑀸𑀦𑀸𑀢𑀺. 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘𑀏𑀲 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀔𑀼𑀧𑁆𑀧𑀺𑀧𑀸𑀲𑀺𑀓𑁄, 𑀏𑀲 𑀧𑀭𑀤𑀢𑁆𑀢𑀽𑀧𑀚𑀻𑀯𑀻’𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 ‘𑀇𑀤𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀤𑀼𑀩𑁆𑀩𑀮𑀁 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀢𑀣𑀸 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼 𑀏𑀓𑀢𑁄 𑀧𑀺𑀡𑁆𑀟𑀧𑀸𑀢𑀁 𑀤𑀤𑀫𑀸𑀦𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀧𑀺𑀡𑁆𑀟𑀧𑀸𑀢𑀸𑀭𑀫𑁆𑀫𑀡𑀸𑀯 𑀳𑁄𑀢𑀺. 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀧𑀼𑀭𑀺𑀫𑀦𑀬𑁂𑀦 𑀦𑀸𑀦𑀸 𑀳𑁄𑀢𑀺. 𑀢𑁂𑀲𑀼 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 ‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀤𑁂𑀯𑀮𑁄𑀓𑁂’𑀢𑀺 𑀧𑀚𑀸𑀦𑀸𑀢𑀺. 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀫𑁆𑀧𑀺 ‘𑀏𑀲 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀦𑀺𑀫𑁆𑀫𑀸𑀦𑀭𑀢𑀻𑀲𑀼, 𑀏𑀲 𑀢𑀼𑀲𑀺𑀢𑁂𑀲𑀼, 𑀏𑀲 𑀬𑀸𑀫𑁂𑀲𑀼, 𑀏𑀲 𑀢𑀸𑀯𑀢𑀺𑀁𑀲𑁂𑀲𑀼, 𑀏𑀲 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼, 𑀏𑀲 𑀪𑀼𑀫𑁆𑀫𑀤𑁂𑀯𑁂𑀲𑀼; 𑀏𑀲 𑀧𑀦 𑀚𑁂𑀝𑁆𑀞𑀓𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀏𑀢𑀲𑁆𑀲 𑀤𑀼𑀢𑀺𑀬𑀁 𑀯𑀸 𑀢𑀢𑀺𑀬𑀁 𑀯𑀸 𑀞𑀸𑀦𑀦𑁆𑀢𑀭𑀁 𑀓𑀭𑁄𑀦𑁆𑀢𑁄 𑀧𑀭𑀺𑀘𑀸𑀭𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀫𑁆𑀧𑀺 ‘𑀏𑀲 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀩𑁆𑀭𑀸𑀳𑁆𑀫𑀡𑀓𑀼𑀮𑁂, 𑀏𑀲 𑀯𑁂𑀲𑁆𑀲𑀓𑀼𑀮𑁂, 𑀏𑀲 𑀲𑀼𑀤𑁆𑀤𑀓𑀼𑀮𑁂; 𑀏𑀲 𑀧𑀦 𑀫𑀦𑀼𑀲𑁆𑀲𑁂𑀲𑀼 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀏𑀢𑀲𑁆𑀲 𑀤𑀼𑀢𑀺𑀬𑀁 𑀯𑀸 𑀢𑀢𑀺𑀬𑀁 𑀯𑀸 𑀞𑀸𑀦𑀦𑁆𑀢𑀭𑀁 𑀓𑀭𑁄𑀦𑁆𑀢𑁄 𑀧𑀭𑀺𑀘𑀸𑀭𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀺 ¶ . 𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 ‘𑀇𑀤𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀤𑀼𑀩𑁆𑀩𑀮𑀁 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀺.

𑀢𑀣𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀲𑀼𑀬𑁂𑀯 𑀬𑁂𑀦 𑀦𑀻𑀳𑀸𑀭𑁂𑀦 𑀯𑀺𑀧𑀲𑁆𑀲𑀦𑀸 𑀆𑀭𑀤𑁆𑀥𑀸, ‘𑀏𑀲 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀏𑀲 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀏𑀲 𑀅𑀦𑀸𑀕𑀸𑀫𑀻𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀏𑀲 𑀲𑀓𑀤𑀸𑀕𑀸𑀫𑀻𑀬𑁂𑀯, 𑀏𑀲 𑀲𑁄𑀢𑀸𑀧𑀦𑁆𑀦𑁄𑀬𑁂𑀯; 𑀏𑀲 𑀧𑀦 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬𑀫𑁂𑀯 𑀞𑀲𑁆𑀲𑀢𑀺; 𑀏𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 ¶ 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀅𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯 𑀞𑀲𑁆𑀲𑀢𑀺, 𑀏𑀲 𑀫𑀳𑀸𑀪𑀽𑀢𑀫𑀢𑁆𑀢𑀫𑁂𑀯 𑀯𑀯𑀢𑁆𑀣𑀸𑀧𑁂𑀲𑁆𑀲𑀢𑀺, 𑀏𑀲 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀺.

𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 ‘𑀏𑀢𑀲𑁆𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀼𑀁 ¶ 𑀦 𑀲𑀓𑁆𑀔𑀺𑀲𑁆𑀲𑀢𑀺; 𑀏𑀲 𑀧𑀦 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀅𑀧𑁆𑀧𑀦𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺; 𑀏𑀲 𑀅𑀧𑁆𑀧𑀦𑀁 𑀧𑀸𑀧𑁂𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 𑀧𑀚𑀸𑀦𑀸𑀢𑀻𑀢𑀺.

𑀢𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀘𑀢𑀼𑀢𑁆𑀣𑀩𑀮𑀦𑀺𑀤𑁆𑀤𑁂𑀲𑁄

𑁮𑁧𑁨. 𑀘𑀢𑀼𑀢𑁆𑀣𑀩𑀮𑀦𑀺𑀤𑁆𑀤𑁂𑀲𑁂 𑀔𑀦𑁆𑀥𑀦𑀸𑀦𑀢𑁆𑀢𑀦𑁆𑀢𑀺 ‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸’𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀚𑀸𑀦𑀸𑀢𑀺. 𑀢𑁂𑀲𑀼𑀧𑀺 ‘𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀆𑀬𑀢𑀦𑀦𑀸𑀦𑀢𑁆𑀢𑀦𑁆𑀢𑀺 ‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸’𑀢𑀺 𑀏𑀯𑀁 𑀆𑀬𑀢𑀦𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀥𑀸𑀢𑀼𑀦𑀸𑀦𑀢𑁆𑀢𑀦𑁆𑀢𑀺 ‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸’𑀢𑀺 𑀏𑀯𑀁 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺.

𑀧𑀼𑀦 ¶ 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀦𑀸𑀦𑀢𑁆𑀢𑀦𑁆𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑁂𑀯 𑀦𑀸𑀦𑀢𑁆𑀢𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀸𑀧𑀺 𑀦𑀸𑀦𑀢𑁆𑀢𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀕𑀳𑀺𑀢𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀺 𑀤𑁆𑀯𑁂 𑀘 𑀅𑀕𑁆𑀕𑀲𑀸𑀯𑀓𑀸 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀸𑀧𑀺 𑀦𑀸𑀦𑀢𑁆𑀢𑀁 𑀏𑀓𑀤𑁂𑀲𑀢𑁄𑀯 𑀚𑀸𑀦𑀦𑁆𑀢𑀺 𑀦𑁄 𑀦𑀺𑀧𑁆𑀧𑀤𑁂𑀲𑀢𑁄, 𑀅𑀦𑀼𑀧𑀸𑀤𑀺𑀦𑁆𑀦𑀓𑀮𑁄𑀓𑀲𑁆𑀲 𑀧𑀦 𑀦𑀸𑀦𑀢𑁆𑀢𑀁 𑀦 𑀚𑀸𑀦𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀧𑀦 ‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀦𑀸𑀫 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀓𑀸𑀴𑀓𑁄, 𑀇𑀫𑀲𑁆𑀲 𑀫𑀝𑁆𑀝𑁄; 𑀇𑀫𑀲𑁆𑀲 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄; 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁 𑀦𑀸𑀫 𑀳𑁄𑀢𑀺; 𑀇𑀫𑀸𑀬 𑀧𑀦 𑀥𑀸𑀢𑀼𑀬𑀸 ¶ 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀓𑀁 𑀳𑁄𑀢𑀺, 𑀧𑀻𑀢𑀓𑀁, 𑀮𑁄𑀳𑀺𑀢𑀓𑀁, 𑀑𑀤𑀸𑀢𑀁, 𑀲𑀼𑀕𑀦𑁆𑀥𑀁 ¶ , 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺; 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀨𑀮𑀁 𑀔𑀼𑀤𑁆𑀤𑀓𑀁 𑀳𑁄𑀢𑀺, 𑀫𑀳𑀦𑁆𑀢𑀁, 𑀤𑀻𑀖𑀁, 𑀭𑀲𑁆𑀲𑀁, 𑀯𑀝𑁆𑀝𑀁, 𑀲𑀼𑀲𑀡𑁆𑀞𑀸𑀦𑀁, 𑀤𑀼𑀲𑁆𑀲𑀡𑁆𑀞𑀸𑀦𑀁, 𑀫𑀝𑁆𑀞𑀁, 𑀨𑀭𑀼𑀲𑀁, 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀁, 𑀫𑀥𑀼𑀭𑀁, 𑀢𑀺𑀢𑁆𑀢𑀓𑀁, 𑀅𑀫𑁆𑀩𑀺𑀮𑀁, 𑀓𑀝𑀼𑀓𑀁, 𑀓𑀲𑀸𑀯𑀁 𑀳𑁄𑀢𑀺; 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀳𑁄𑀢𑀺, 𑀅𑀢𑀺𑀔𑀺𑀡𑁄, 𑀉𑀚𑀼𑀓𑁄, 𑀓𑀼𑀝𑀺𑀮𑁄, 𑀢𑀫𑁆𑀩𑁄, 𑀓𑀸𑀴𑀓𑁄, 𑀦𑀻𑀮𑁄, 𑀑𑀤𑀸𑀢𑁄 𑀳𑁄𑀢𑀻’𑀢𑀺 𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑀺 𑀏𑀢𑀁 𑀩𑀮𑀁, 𑀦 𑀅𑀜𑁆𑀜𑁂𑀲𑀦𑁆𑀢𑀺.

𑀘𑀢𑀼𑀢𑁆𑀣𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑁄

𑁮𑁧𑁩. 𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀳𑀻𑀦𑀚𑁆𑀛𑀸𑀲𑀬𑀸. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑀸. 𑀲𑁂𑀯𑀦𑁆𑀢𑀻𑀢𑀺 𑀦𑀺𑀲𑁆𑀲𑀬𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺. 𑀪𑀚𑀦𑁆𑀢𑀻𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀧𑀬𑀺𑀭𑀼𑀧𑀸𑀲𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑀘𑁂 𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀦 𑀲𑀻𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀲𑀻𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀧𑀺 𑀦 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽, 𑀇𑀢𑀭𑁂 𑀅𑀲𑀸𑀭𑀼𑀧𑁆𑀧𑀸, 𑀢𑁂𑀧𑀺 𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀉𑀧𑀲𑀗𑁆𑀓𑀫𑀦𑁆𑀢𑀺.

𑀏𑀯𑀁 ¶ 𑀉𑀧𑀲𑀗𑁆𑀓𑀫𑀦𑀁 𑀧𑀦 𑀦 𑀓𑁂𑀯𑀮𑀁 𑀏𑀢𑀭𑀳𑁂𑀯, 𑀅𑀢𑀻𑀢𑀸𑀦𑀸𑀕𑀢𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀤𑀁 𑀧𑀦 𑀤𑀼𑀲𑁆𑀲𑀻𑀮𑀸𑀦𑀁 𑀤𑀼𑀲𑁆𑀲𑀻𑀮𑀲𑁂𑀯𑀦𑀫𑁂𑀯, 𑀲𑀻𑀮𑀯𑀦𑁆𑀢𑀸𑀦𑀁 𑀲𑀻𑀮𑀯𑀦𑁆𑀢𑀲𑁂𑀯𑀦𑀫𑁂𑀯, 𑀤𑀼𑀧𑁆𑀧𑀜𑁆𑀜𑀸𑀦𑀁 𑀤𑀼𑀧𑁆𑀧𑀜𑁆𑀜𑀲𑁂𑀯𑀦𑀫𑁂𑀯, 𑀧𑀜𑁆𑀜𑀯𑀦𑁆𑀢𑀸𑀦𑀁 𑀧𑀜𑁆𑀜𑀯𑀦𑁆𑀢𑀲𑁂𑀯𑀦𑀫𑁂𑀯 𑀓𑁄 𑀦𑀺𑀬𑀸𑀫𑁂𑀢𑀻𑀢𑀺? 𑀅𑀚𑁆𑀛𑀸𑀲𑀬𑀥𑀸𑀢𑀼 𑀦𑀺𑀬𑀸𑀫𑁂𑀢𑀺. 𑀲𑀫𑁆𑀩𑀳𑀼𑀮𑀸 𑀓𑀺𑀭 𑀪𑀺𑀓𑁆𑀔𑀽 𑀏𑀓𑀁 𑀕𑀸𑀫𑀁 𑀕𑀡𑀪𑀺𑀓𑁆𑀔𑀸𑀘𑀸𑀭𑀁 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀩𑀳𑀼𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀧𑀢𑁆𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀬𑀣𑀸𑀲𑀪𑀸𑀕𑁂𑀦 𑀧𑀭𑀺𑀪𑀼𑀜𑁆𑀜𑀣𑀸’’𑀢𑀺 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁. 𑀪𑀺𑀓𑁆𑀔𑀽𑀧𑀺 𑀆𑀳𑀁𑀲𑀼 ‘‘𑀆𑀯𑀼𑀲𑁄, 𑀫𑀦𑀼𑀲𑁆𑀲𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑀓𑀫𑁆𑀫𑁂 𑀧𑀬𑁄𑀚𑁂𑀦𑁆𑀢𑀻’’𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄𑀧𑀺 𑀦𑀸𑀕𑀤𑀻𑀧𑁂 𑀘𑁂𑀢𑀺𑀬𑀁 𑀯𑀦𑁆𑀤𑀦𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑀺 𑀦𑀺𑀫𑀦𑁆𑀢𑀺𑀢𑁄. 𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀏𑀓𑁄 𑀅𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀼 𑀅𑀢𑁆𑀣𑀺. 𑀥𑀼𑀭𑀯𑀺𑀳𑀸𑀭𑁂𑀧𑀺 ¶ 𑀏𑀓𑁄 𑀅𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀼 𑀅𑀢𑁆𑀣𑀺. 𑀤𑁆𑀯𑀻𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑁂𑀲𑀼 𑀕𑀸𑀫𑀁 ¶ 𑀑𑀲𑀭𑀦𑁆𑀢𑁂𑀲𑀼 𑀢𑁂 𑀉𑀪𑁄𑀧𑀺 𑀚𑀦𑀸, 𑀓𑀺𑀜𑁆𑀘𑀸𑀧𑀺 𑀆𑀕𑀦𑁆𑀢𑀼𑀓𑁂𑀦 𑀦𑁂𑀯𑀸𑀲𑀺𑀓𑁄 𑀦𑁂𑀯𑀸𑀲𑀺𑀓𑁂𑀦 𑀯𑀸 𑀆𑀕𑀦𑁆𑀢𑀼𑀓𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀯𑀁 𑀲𑀦𑁆𑀢𑁂𑀧𑀺, 𑀏𑀓𑀢𑁄 𑀳𑀼𑀢𑁆𑀯𑀸 𑀳𑀲𑀺𑀢𑁆𑀯𑀸 𑀳𑀲𑀺𑀢𑁆𑀯𑀸 𑀓𑀣𑀬𑀫𑀸𑀦𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀤𑀺𑀲𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀚𑀸𑀦𑀺𑀢𑁆𑀯𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑀁 𑀓𑀣𑀺𑀢’’𑀦𑁆𑀢𑀺 𑀆𑀳.

𑀏𑀯𑀁 ‘𑀅𑀚𑁆𑀛𑀸𑀲𑀬𑀥𑀸𑀢𑀼 𑀦𑀺𑀬𑀸𑀫𑁂𑀢𑀻’𑀢𑀺 𑀯𑀢𑁆𑀯𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑁂𑀦 𑀅𑀬𑀫𑁂𑀯𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀲𑁆𑀫𑀺𑀜𑁆𑀳𑀺 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑁄 𑀪𑀕𑀯𑀸 𑀆𑀭𑀓𑁆𑀔𑀡𑀢𑁆𑀣𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀲𑀦𑁆𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀲𑀼 𑀏𑀓𑀫𑁂𑀓𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀁 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑁆𑀢’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀳𑀸𑀧𑀜𑁆𑀜𑀸’’𑀢𑀺 (𑀲𑀁. 𑀦𑀺. 𑁨.𑁯𑁯) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑁄

𑁮𑁧𑁪. 𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑁂 𑀆𑀲𑀬𑀦𑁆𑀢𑀺 𑀬𑀢𑁆𑀣 𑀲𑀢𑁆𑀢𑀸 𑀆𑀲𑀬𑀦𑁆𑀢𑀺 𑀦𑀺𑀯𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀯𑀸. 𑀅𑀦𑀼𑀲𑀬𑀦𑁆𑀢𑀺 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀁 ¶ 𑀓𑀺𑀮𑁂𑀲𑀁. 𑀘𑀭𑀺𑀢𑀦𑁆𑀢𑀺 𑀓𑀸𑀬𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀁 𑀓𑀼𑀲𑀮𑀸𑀓𑀼𑀲𑀮𑀁. 𑀅𑀥𑀺𑀫𑀼𑀢𑁆𑀢𑀦𑁆𑀢𑀺 𑀅𑀚𑁆𑀛𑀸𑀲𑀬𑀁. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺𑀆𑀤𑀻𑀲𑀼 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸. 𑀢𑀲𑁆𑀲𑁂𑀯 𑀫𑀳𑀦𑁆𑀢𑀢𑀸𑀬 𑀫𑀳𑀸𑀭𑀚𑀓𑁆𑀔𑀸. 𑀉𑀪𑀬𑁂𑀦𑀸𑀧𑀺 𑀫𑀦𑁆𑀤𑀓𑀺𑀮𑁂𑀲𑁂 𑀫𑀳𑀸𑀓𑀺𑀮𑁂𑀲𑁂 𑀘 𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀬𑁂𑀲𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺, 𑀢𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑀸𑀦𑀺 𑀫𑀼𑀤𑀽𑀦𑀺, 𑀢𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀆𑀲𑀬𑀸𑀤𑀬𑁄 𑀓𑁄𑀝𑁆𑀞𑀸𑀲𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀯𑀺𑀧𑀭𑀻𑀢𑀸 𑀤𑁆𑀯𑀸𑀓𑀸𑀭𑀸. 𑀬𑁂 𑀓𑀣𑀺𑀢𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀯𑀺𑀧𑀭𑀻𑀢𑀸 𑀤𑀼𑀯𑀺𑀜𑁆𑀜𑀸𑀧𑀬𑀸. 𑀬𑁂 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸, 𑀢𑁂 𑀪𑀩𑁆𑀩𑀸. 𑀯𑀺𑀧𑀭𑀻𑀢𑀸 𑀅𑀪𑀩𑁆𑀩𑀸.

𑁮𑁧𑁫. 𑀏𑀯𑀁 ¶ 𑀙𑀝𑁆𑀞𑀩𑀮𑀲𑁆𑀲 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀦𑁆𑀢𑁄 𑀓𑀢𑀫𑁄 𑀘 𑀲𑀢𑁆𑀢𑀸𑀦𑀁 𑀆𑀲𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ¶ 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁧𑁦𑁫) 𑀯𑀼𑀢𑁆𑀢𑁄𑀬𑁂𑀯. 𑀇𑀢𑀺 𑀪𑀯𑀤𑀺𑀝𑁆𑀞𑀺𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑀸𑀢𑀺 𑀏𑀯𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀯𑀸 𑀲𑀦𑁆𑀦𑀺𑀲𑁆𑀲𑀺𑀢𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀳𑀺 𑀏𑀢𑁆𑀣 𑀪𑀯𑀤𑀺𑀝𑁆𑀞𑀻𑀢𑀺 𑀯𑀼𑀢𑁆𑀢𑀸; 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀻𑀢𑀺. 𑀲𑀩𑁆𑀩𑀤𑀺𑀝𑁆𑀞𑀻𑀦𑀜𑁆𑀳𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻 𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀢𑁆𑀢𑀸 𑀇𑀫𑀸𑀯 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄 𑀲𑀦𑁆𑀦𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀤𑁆𑀯𑀬𑀲𑀦𑁆𑀦𑀺𑀲𑁆𑀲𑀺𑀢𑁄 𑀔𑁄 𑀧𑀦𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑁋 𑀅𑀢𑁆𑀣𑀺𑀢𑀜𑁆𑀘𑁂𑀯 𑀦𑀢𑁆𑀣𑀺𑀢𑀜𑁆𑀘𑀸’’𑀢𑀺 (𑀲𑀁. 𑀦𑀺. 𑁨.𑁧𑁫). 𑀏𑀢𑁆𑀣 𑀳𑀺 𑀅𑀢𑁆𑀣𑀺𑀢𑀸𑀢𑀺 𑀲𑀲𑁆𑀲𑀢𑀁, 𑀦𑀢𑁆𑀣𑀺𑀢𑀸𑀢𑀺 𑀉𑀘𑁆𑀙𑁂𑀤𑁄. 𑀅𑀬𑀁 𑀢𑀸𑀯 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀧𑀼𑀣𑀼𑀚𑁆𑀚𑀦𑀲𑀢𑁆𑀢𑀸𑀦𑀁 𑀆𑀲𑀬𑁄.

𑀇𑀤𑀸𑀦𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀆𑀲𑀬𑀁 𑀤𑀲𑁆𑀲𑁂𑀢𑀼𑀁 𑀏𑀢𑁂 𑀯𑀸 𑀧𑀦 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑁂 𑀯𑀸 𑀧𑀦𑀸𑀢𑀺 𑀏𑀢𑁂𑀬𑁂𑀯. 𑀉𑀪𑁄 𑀅𑀦𑁆𑀢𑁂𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀤𑁆𑀯𑁂 𑀅𑀦𑁆𑀢𑁂. 𑀅𑀦𑀼𑀧𑀕𑀫𑁆𑀫𑀸𑀢𑀺 𑀅𑀦𑀮𑁆𑀮𑀻𑀬𑀺𑀢𑁆𑀯𑀸. 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀘𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀘. 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀬𑀣𑀸𑀪𑀽𑀢𑀁 𑀯𑀸 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀘𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀘 𑀏𑀢𑁂 𑀉𑀪𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀅𑀦𑁆𑀢𑁂 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀧𑀝𑀺𑀮𑀤𑁆𑀥𑀸, 𑀬𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀫𑀕𑁆𑀕𑀜𑀸𑀡𑀁 𑁋 𑀅𑀬𑀁 𑀲𑀢𑁆𑀢𑀸𑀦𑀁 𑀆𑀲𑀬𑁄, 𑀅𑀬𑀁 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀜𑁆𑀘 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀜𑁆𑀘 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑁄, 𑀇𑀤𑀁 𑀯𑀲𑀦𑀝𑁆𑀞𑀸𑀦𑀦𑁆𑀢𑀺. 𑀅𑀬𑀁 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸.

𑀯𑀺𑀢𑀡𑁆𑀟𑀯𑀸𑀤𑀻 ¶ 𑀧𑀦𑀸𑀳 𑁋 ‘𑀫𑀕𑁆𑀕𑁄 𑀦𑀸𑀫 𑀯𑀸𑀲𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀦𑀦𑀼 𑀢𑁆𑀯𑀁 𑀫𑀕𑁆𑀕𑁄 𑀯𑀸𑀲𑁄𑀢𑀺 𑀯𑀤𑁂𑀲𑀻’𑀢𑀺? 𑀲𑁄 𑀯𑀢𑁆𑀢𑀩𑁆𑀩𑁄 ‘𑀢𑁆𑀯𑀁 𑀅𑀭𑀺𑀬𑀯𑀸𑀲𑀪𑀸𑀡𑀓𑁄 𑀳𑁄𑀲𑀺 𑀦 𑀳𑁄𑀲𑀻’𑀢𑀺? 𑀲𑀘𑁂 𑀧𑀦 ‘𑀦 𑀳𑁄𑀫𑀻’𑀢𑀺 𑀯𑀤𑀢𑀺, ‘𑀅𑀪𑀸𑀡𑀓𑀢𑀸𑀬 𑀦 𑀚𑀸𑀦𑀸𑀲𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 ‘𑀪𑀸𑀡𑀓𑁄𑀲𑁆𑀫𑀻’𑀢𑀺 𑀯𑀤𑀢𑀺, ‘𑀲𑀼𑀢𑁆𑀢𑀁 𑀆𑀳𑀭𑀸’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀆𑀳𑀭𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀆𑀳𑀭𑀢𑀺 𑀲𑀬𑀁 𑀆𑀳𑀭𑀺𑀢𑀩𑁆𑀩𑀁 𑁋 ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀸𑀲𑀸, 𑀬𑁂 𑀅𑀭𑀺𑀬𑀸 𑀆𑀯𑀲𑀺𑀁𑀲𑀼 𑀯𑀸 𑀆𑀯𑀲𑀦𑁆𑀢𑀺 𑀯𑀸 𑀆𑀯𑀲𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺 (𑀅. 𑀦𑀺. 𑁧𑁦.𑁧𑁯). 𑀏𑀢𑀜𑁆𑀳𑀺 𑀲𑀼𑀢𑁆𑀢𑀁 𑀫𑀕𑁆𑀕𑀲𑁆𑀲 𑀯𑀸𑀲𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 ¶ 𑀲𑀼𑀓𑀣𑀺𑀢𑀫𑁂𑀯𑁂𑀢𑀦𑁆𑀢𑀺. 𑀇𑀤𑀁 𑀧𑀦 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀦𑁆𑀢𑁄 𑀇𑀫𑁂𑀲𑀜𑁆𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀕𑁆𑀕𑀜𑀸𑀡𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺 𑀏𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀸𑀫𑀁 ¶ 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀩𑁆𑀬𑀸𑀧𑀸𑀤𑀁…𑀧𑁂… 𑀅𑀩𑁆𑀬𑀸𑀧𑀸𑀤𑀁… 𑀣𑀺𑀦𑀫𑀺𑀤𑁆𑀥𑀁…𑀧𑁂… 𑀆𑀮𑁄𑀓𑀲𑀜𑁆𑀜𑀁 𑀦𑁂𑀓𑁆𑀔𑀫𑁆𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀆𑀮𑁄𑀓𑀲𑀜𑁆𑀜𑀸𑀕𑀭𑀼𑀓𑁄 𑀆𑀮𑁄𑀓𑀲𑀜𑁆𑀜𑀸𑀲𑀬𑁄 𑀆𑀮𑁄𑀓𑀲𑀜𑁆𑀜𑀸𑀥𑀺𑀫𑀼𑀢𑁆𑀢𑁄’’𑀢𑀺 (𑀧𑀝𑀺. 𑀫. 𑁧.𑁧𑁧𑁩).

𑁮𑁧𑁬. 𑀅𑀦𑀼𑀲𑀬𑀦𑀺𑀤𑁆𑀤𑁂𑀲𑁂 𑀓𑀸𑀫𑀭𑀸𑀕𑁄 𑀘 𑀲𑁄 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑁄 𑀘𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀦𑁆𑀢𑀺 𑀬𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀺𑀬𑀚𑀸𑀢𑀺𑀓𑀁. 𑀲𑀸𑀢𑀭𑀽𑀧𑀦𑁆𑀢𑀺 𑀲𑀸𑀢𑀚𑀸𑀢𑀺𑀓𑀁 𑀅𑀲𑁆𑀲𑀸𑀤𑀧𑀤𑀝𑁆𑀞𑀸𑀦𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀏𑀢𑁆𑀣 𑀲𑀢𑁆𑀢𑀸𑀦𑀁 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀏𑀢𑀲𑁆𑀫𑀺𑀁 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀦𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀬𑀣𑀸 𑀦𑀸𑀫 𑀉𑀤𑀓𑁂 𑀦𑀺𑀫𑀼𑀕𑁆𑀕𑀲𑁆𑀲 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀲𑀫𑀦𑁆𑀢𑀪𑀸𑀕𑁂 𑀘 𑀉𑀤𑀓𑀫𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀼𑀧𑁆𑀧𑀢𑁆𑀢𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸. 𑀢𑀣𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀝𑀺𑀖𑀼𑀧𑁆𑀧𑀢𑁆𑀢𑀺. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀯𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑀸𑀫𑀭𑀸𑀕𑀧𑀝𑀺𑀖𑀯𑀦𑁆𑀢𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀥𑀫𑁆𑀫𑁂𑀲𑀼. 𑀅𑀯𑀺𑀚𑁆𑀚𑀸𑀦𑀼𑀧𑀢𑀺𑀢𑀸𑀢𑀺 𑀓𑀸𑀫𑀭𑀸𑀕𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀯𑀺𑀚𑁆𑀚𑀸 𑀅𑀦𑀼𑀧𑀢𑀺𑀢𑀸. 𑀢𑀤𑁂𑀓𑀝𑁆𑀞𑁄𑀢𑀺 𑀢𑀸𑀬 𑀅𑀯𑀺𑀚𑁆𑀚𑀸𑀬 ¶ 𑀲𑀫𑁆𑀧𑀬𑀼𑀢𑁆𑀢𑁂𑀓𑀝𑁆𑀞𑀯𑀲𑁂𑀦 𑀏𑀓𑀝𑁆𑀞𑁄. 𑀫𑀸𑀦𑁄 𑀘 𑀤𑀺𑀝𑁆𑀞𑀺 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘𑀸𑀢𑀺 𑀦𑀯𑀯𑀺𑀥𑁄 𑀫𑀸𑀦𑁄, 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸 𑀤𑀺𑀝𑁆𑀞𑀺, 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸. 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀦𑁂𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁧𑁭. 𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀤𑁆𑀯𑀸𑀤𑀲 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀘𑀢𑀲𑁆𑀲𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁄 𑀧𑀭𑀺𑀢𑁆𑀢𑀪𑀽𑀫𑀓𑁄, 𑀇𑀢𑀭𑁄 𑀫𑀳𑀸𑀪𑀽𑀫𑀓𑁄. 𑀢𑀻𑀲𑀼𑀧𑀺 ¶ 𑀯𑀸 𑀏𑀢𑁂𑀲𑀼 𑀬𑁄 𑀓𑁄𑀘𑀺 𑀅𑀧𑁆𑀧𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀪𑀽𑀫𑀓𑁄, 𑀩𑀳𑀼𑀯𑀺𑀧𑀸𑀓𑁄 𑀫𑀳𑀸𑀪𑀽𑀫𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁧𑁮. 𑀅𑀥𑀺𑀫𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄𑀯. 𑀓𑀲𑁆𑀫𑀸 𑀧𑀦𑀸𑀬𑀁 𑀅𑀥𑀺𑀫𑀼𑀢𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀧𑀺 𑀧𑀼𑀦 𑀕𑀳𑀺𑀢𑀸𑀢𑀺? 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀧𑀸𑀝𑀺𑀬𑁂𑀓𑁆𑀓𑀁 𑀩𑀮𑀤𑀲𑁆𑀲𑀦𑀯𑀲𑁂𑀦 𑀕𑀳𑀺𑀢𑀸, 𑀇𑀥 𑀲𑀢𑁆𑀢𑀸𑀦𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑁮𑁧𑁯. 𑀫𑀳𑀸𑀭𑀚𑀓𑁆𑀔𑀦𑀺𑀤𑁆𑀤𑁂𑀲𑁂 ¶ 𑀉𑀲𑁆𑀲𑀤𑀕𑀢𑀸𑀦𑀻𑀢𑀺 𑀯𑁂𑀧𑀼𑀮𑁆𑀮𑀕𑀢𑀸𑀦𑀺. 𑀧𑀳𑀸𑀦𑀓𑁆𑀓𑀫𑀯𑀲𑁂𑀦 𑀘𑁂𑀲 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑁮𑁨𑁦. 𑀅𑀦𑀼𑀲𑁆𑀲𑀤𑀕𑀢𑀸𑀦𑀻𑀢𑀺 𑀅𑀯𑁂𑀧𑀼𑀮𑁆𑀮𑀕𑀢𑀸𑀦𑀺𑀁. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑀉𑀧𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀓𑀣𑀺𑀢𑀸𑀦𑀺. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑁂𑀲𑁂 𑀧𑀦𑁂𑀢𑁆𑀣 𑀧𑀬𑁄𑀚𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁮𑁨𑁩. 𑀢𑀣𑀸 𑀤𑁆𑀯𑀸𑀓𑀸𑀭𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀧𑀸𑀧𑀸𑀲𑀬𑀸𑀢𑀺 𑀅𑀓𑀼𑀲𑀮𑀸𑀲𑀬𑀸. 𑀧𑀸𑀧𑀘𑀭𑀺𑀢𑀸𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀭𑀺𑀧𑀽𑀭𑀓𑀸. 𑀧𑀸𑀧𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀲𑀓𑁆𑀓𑀸𑀬𑀸𑀪𑀺𑀭𑀢𑀸 𑀯𑀝𑁆𑀝𑀚𑁆𑀛𑀸𑀲𑀬𑀸.

𑁮𑁨𑁪. 𑀲𑁆𑀯𑀸𑀓𑀸𑀭𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀓𑀮𑁆𑀬𑀸𑀡𑀓𑁄 𑀦𑀸𑀫 𑀅𑀦𑀼𑀲𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀓𑀮𑁆𑀬𑀸𑀡𑀸𑀦𑀼𑀲𑀬𑀸𑀢𑀺 𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁮𑁨𑁬. 𑀪𑀩𑁆𑀩𑀸𑀪𑀩𑁆𑀩𑀦𑀺𑀤𑁆𑀤𑁂𑀲𑁂 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦. 𑀓𑀺𑀮𑁂𑀲𑀸𑀯𑀭𑀡𑁂𑀦𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀯𑀺𑀧𑀸𑀓𑀸𑀯𑀭𑀡𑁂𑀦𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸. 𑀬𑀲𑁆𑀫𑀸 𑀧𑀦 𑀤𑀼𑀳𑁂𑀢𑀼𑀓𑀸𑀦𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀺 𑀯𑀺𑀧𑀸𑀓𑀸𑀯𑀭𑀡𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀲𑁆𑀲𑀤𑁆𑀥𑀸𑀢𑀺 ¶ 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀭𑀳𑀺𑀢𑀸. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀭𑀳𑀺𑀢𑀸. 𑀉𑀢𑁆𑀢𑀭𑀓𑀼𑀭𑀼𑀓𑀸 𑀫𑀦𑀼𑀲𑁆𑀲𑀸 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑀸. 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀬𑀲𑁆𑀲 𑀪𑀯𑀗𑁆𑀕𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀸𑀤𑀓𑀁 𑀦 𑀳𑁄𑀢𑀺, 𑀲𑁄 𑀤𑀼𑀧𑁆𑀧𑀜𑁆𑀜𑁄𑀬𑁂𑀯 𑀦𑀸𑀫. 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀑𑀓𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑀸.

𑁮𑁨𑁭. 𑀦 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀁 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀪𑀸𑀚𑀦𑀻𑀬𑀁 𑁋 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀲𑁆𑀲 ¶ 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑀲𑁆𑀲 𑀘. 𑀏𑀢𑁆𑀣 𑀳𑀺 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀫𑁆𑀧𑀺 𑀪𑀸𑀚𑀺𑀢𑀁. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀩𑀮𑀜𑀸𑀡𑀁 𑀦𑀸𑀫 𑀚𑀸𑀢𑀦𑁆𑀢𑀺.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑁄

𑁮𑁨𑁮. 𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑁂 ¶ 𑀛𑀸𑀬𑀢𑀻𑀢𑀺 𑀛𑀸𑀬𑀻. 𑀘𑀢𑁆𑀢𑀸𑀭𑁄 𑀛𑀸𑀬𑀻𑀢𑀺 𑀛𑀸𑀬𑀺𑀦𑁄 𑀘𑀢𑁆𑀢𑀸𑀭𑁄 𑀚𑀦𑀸 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀘𑀢𑀼𑀓𑁆𑀓𑁂 𑀢𑀸𑀯 𑀧𑀞𑀫𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀫𑀸𑀦𑁄𑀬𑁂𑀯 ‘𑀦 𑀮𑀸𑀪𑀻𑀫𑁆𑀳𑀻’𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑀸𑀦𑀁𑀬𑁂𑀯 ‘𑀦 𑀓𑀫𑁆𑀫𑀝𑁆𑀞𑀸𑀦’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀅𑀬𑀁 𑀅𑀧𑁆𑀧𑀕𑀼𑀡𑀚𑁆𑀛𑀸𑀦𑀮𑀸𑀪𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑁄 𑀲𑀫𑀸𑀧𑀢𑁆𑀢𑀺𑀬𑀸 𑀅𑀮𑀸𑀪𑀻𑀬𑁂𑀯 ‘𑀮𑀸𑀪𑀻𑀫𑁆𑀳𑀻’𑀢𑀺, 𑀅𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑀸𑀦𑀁𑀬𑁂𑀯 ‘𑀓𑀫𑁆𑀫𑀝𑁆𑀞𑀸𑀦’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀅𑀬𑀁 𑀦𑀺𑀤𑁆𑀤𑀸𑀛𑀸𑀬𑀻 𑀦𑀸𑀫. 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀝𑀺𑀩𑀼𑀤𑁆𑀥𑁄 𑀏𑀯𑀁 𑀫𑀜𑁆𑀜𑀢𑀺. 𑀢𑀢𑀺𑀬𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀫𑀸𑀦𑁄 ‘𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀫𑁆𑀳𑀻’𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀲𑀫𑀸𑀦𑀁 ‘𑀓𑀫𑁆𑀫𑀝𑁆𑀞𑀸𑀦’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀅𑀬𑀁 𑀧𑀕𑀼𑀡𑀚𑁆𑀛𑀸𑀦𑀮𑀸𑀪𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑁄 𑀅𑀮𑀸𑀪𑀻𑀬𑁂𑀯 ‘𑀅𑀮𑀸𑀪𑀻𑀫𑁆𑀳𑀻’𑀢𑀺, 𑀅𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 ‘𑀅𑀓𑀫𑁆𑀫𑀝𑁆𑀞𑀸𑀦’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀏𑀯𑀫𑁂𑀢𑁆𑀣 𑀤𑁆𑀯𑁂 𑀚𑀦𑀸 𑀅𑀚𑁆𑀛𑀸𑀬𑀺𑀦𑁄𑀯 𑀛𑀸𑀬𑀻𑀦𑀁 𑀅𑀦𑁆𑀢𑁄 𑀧𑀯𑀺𑀝𑁆𑀞𑀢𑁆𑀢𑀸 𑀛𑀸𑀬𑀻𑀢𑀺 𑀯𑀼𑀢𑁆𑀢𑀸.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀺𑀓𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀦𑁆𑀥𑀁 𑀲𑀫𑀸𑀧𑀚𑁆𑀚𑀢𑀺 𑀦𑀸𑀫. 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀞𑀢𑁆𑀯𑀸 𑀲𑀳𑀲𑀸 𑀯𑀼𑀝𑁆𑀞𑀳𑀦𑁆𑀢𑀸 𑀔𑀺𑀧𑁆𑀧𑀁 𑀯𑀼𑀝𑁆𑀞𑀳𑀢𑀺 𑀦𑀸𑀫. 𑀲𑀼𑀔𑁂𑀦𑁂𑀯 𑀧𑀦 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀺𑀓𑀥𑀫𑁆𑀫𑁂 𑀲𑁄𑀥𑁂𑀦𑁆𑀢𑁄 𑀔𑀺𑀧𑁆𑀧𑀁 𑀲𑀫𑀸𑀧𑀚𑁆𑀚𑀢𑀺 𑀦𑀸𑀫. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑀸𑀮𑀁 ¶ 𑀅𑀢𑀺𑀦𑀸𑀫𑁂𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀤𑀦𑁆𑀥𑀁 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀇𑀢𑀭𑁂 𑀤𑁆𑀯𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀯.

𑀢𑀢𑀺𑀬𑀘𑀢𑀼𑀓𑁆𑀓𑁂 ‘𑀇𑀤𑀁 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁, 𑀇𑀤𑀁 𑀘𑀢𑀼𑀭𑀗𑁆𑀕𑀺𑀓’𑀦𑁆𑀢𑀺 𑀏𑀯𑀁 𑀅𑀗𑁆𑀕𑀯𑀯𑀢𑁆𑀣𑀸𑀦𑀧𑀭𑀺𑀘𑁆𑀙𑁂𑀤𑁂 𑀙𑁂𑀓𑁄 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄 𑀦𑀸𑀫. 𑀦𑀻𑀯𑀭𑀡𑀸𑀦𑀺 𑀧𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀘𑀺𑀢𑁆𑀢𑀫𑀜𑁆𑀚𑀽𑀲𑀸𑀬 𑀘𑀺𑀢𑁆𑀢𑀁 𑀞𑀧𑁂𑀢𑀼𑀁 𑀅𑀙𑁂𑀓𑁄 𑀦𑁄 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀦𑀸𑀫. 𑀇𑀢𑀭𑁂𑀧𑀺 𑀢𑀬𑁄 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀧𑀺 𑀘𑀢𑁆𑀢𑀸𑀭𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀬𑁂𑀯.

𑀇𑀤𑀸𑀦𑀺 𑀬𑀸𑀦𑀺 𑀛𑀸𑀦𑀸𑀦𑀺 𑀦𑀺𑀲𑁆𑀲𑀸𑀬 𑀇𑀫𑁂 𑀧𑀼𑀕𑁆𑀕𑀮𑀸 ‘𑀛𑀸𑀬𑀻’ 𑀦𑀸𑀫 𑀚𑀸𑀢𑀸, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 ¶ 𑀢𑀬𑁄 𑀘 𑀯𑀺𑀫𑁄𑀓𑁆𑀔𑀸 𑀅𑀢𑁆𑀣𑀢𑁄 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀫𑁂𑀯 (𑀥. 𑀲. 𑀅𑀝𑁆𑀞. 𑁧𑁬𑁦, 𑁨𑁪𑁮) 𑀧𑀓𑀸𑀲𑀺𑀢𑀸. 𑀲𑁂𑀲𑀸𑀦𑀫𑁆𑀧𑀺 𑀯𑀺𑀫𑁄𑀓𑁆𑀔𑀝𑁆𑀞𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 𑀘 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀅𑀝𑁆𑀞𑀫𑁄 𑀧𑀦 𑀲𑀩𑁆𑀩𑀲𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑁂𑀳𑀺 ¶ 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀧𑀕𑀢𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀲𑀫𑀸𑀥𑀻𑀲𑀼 𑀘𑀢𑀼𑀓𑁆𑀓𑀦𑀬𑀧𑀜𑁆𑀘𑀓𑀦𑀬𑁂𑀲𑀼 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀦𑀸𑀫. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑀫𑀸𑀥𑀺 𑀦𑀸𑀫. 𑀘𑀢𑀼𑀓𑁆𑀓𑀦𑀬𑁂𑀧𑀺 𑀧𑀜𑁆𑀘𑀓𑀦𑀬𑁂𑀧𑀺 𑀉𑀧𑀭𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓 𑀅𑀯𑀺𑀘𑀸𑀭𑀲𑀫𑀸𑀥𑀺 𑀦𑀸𑀫. 𑀲𑀫𑀸𑀧𑀢𑁆𑀢𑀻𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 ‘𑀲𑀫𑀸𑀥𑀻’𑀢𑀺𑀧𑀺 𑀦𑀸𑀫𑀁 ‘𑀲𑀫𑀸𑀧𑀢𑁆𑀢𑀻’𑀢𑀺𑀧𑀺. 𑀓𑀲𑁆𑀫𑀸? 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀩𑁆𑀪𑀸𑀯𑀢𑁄. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄 𑀦 𑀲𑀫𑀸𑀥𑀻𑀢𑀺 𑀦𑀸𑀫𑀁.

𑀳𑀸𑀦𑀪𑀸𑀕𑀺𑀬𑁄 𑀥𑀫𑁆𑀫𑁄𑀢𑀺 𑀅𑀧𑁆𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁. 𑀯𑀺𑀲𑁂𑀲𑀪𑀸𑀕𑀺𑀬𑁄 𑀥𑀫𑁆𑀫𑁄𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁. 𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀕𑀼𑀡𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀓𑀣𑀺𑀢𑀁. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀪𑀯𑀗𑁆𑀕𑀯𑀼𑀝𑁆𑀞𑀸𑀦𑀁 𑀦𑀸𑀫 𑀓𑀣𑀺𑀢𑀁. 𑀪𑀯𑀗𑁆𑀕𑁂𑀦 𑀳𑀺 𑀲𑀩𑁆𑀩𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀦𑀺𑀭𑁄𑀥𑀢𑁄 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀯 𑀯𑀼𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀼𑀝𑁆𑀞𑀸𑀦𑀁 𑀦𑀸𑀫𑀸𑀢𑀺.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀅𑀝𑁆𑀞𑀫𑀩𑀮𑀸𑀤𑀺𑀦𑀺𑀤𑁆𑀤𑁂𑀲𑁄

𑁮𑁨𑁯. 𑀅𑀝𑁆𑀞𑀫𑀩𑀮𑀦𑀺𑀤𑁆𑀤𑁂𑀲𑁂 ¶ 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺𑀆𑀤𑀺 𑀲𑀩𑁆𑀩𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀦𑀯𑀫𑀩𑀮𑀦𑀺𑀤𑁆𑀤𑁂𑀲𑁂𑀧𑀺 ¶ 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀢𑀢𑁆𑀣𑁂𑀯 𑀯𑀺𑀢𑁆𑀣𑀸𑀭𑀺𑀢𑀁.

𑀦𑀯𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑁄

𑁮𑁩𑁧. 𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑁂 ¶ 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀜𑀸𑀡𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸. 𑀧𑀭𑀯𑀸𑀤𑀻 𑀧𑀦𑀸𑀳 𑁋 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄’’𑀢𑀺. 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼𑀧𑀺 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺, 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯, 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯, 𑀘𑀢𑀼𑀢𑁆𑀣𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀭𑀡𑀫𑁂𑀯, 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯, 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯, 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯, 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯, 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀏𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀁, 𑀓𑀸𑀫𑀸𑀯𑀘𑀭𑀁, 𑀭𑀽𑀧𑀸𑀯𑀘𑀭𑀁, 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺? 𑀚𑀸𑀦𑀦𑁆𑀢𑁄 ‘‘𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺; 𑀢𑀢𑁄 ‘‘𑀧𑀭𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺; ‘‘𑀆𑀲𑀯𑀓𑁆𑀔𑀬𑀜𑀸𑀡𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭’’𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 ‘‘𑀧𑀝𑀺𑀧𑀸𑀝𑀺𑀬𑀸 ¶ 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀓𑁆𑀔𑀢𑀺; ‘‘𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯, 𑀓𑀸𑀫𑀸𑀯𑀘𑀭𑀫𑁂𑀯, 𑀮𑁄𑀓𑀺𑀬𑀫𑁂𑀯𑀸’’𑀢𑀺 𑀯𑀓𑁆𑀔𑀢𑀺. 𑀇𑀢𑀺 𑀅𑀜𑁆𑀜𑀤𑁂𑀯 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑁆𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀜𑀸𑀡𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁮𑁩𑁨. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂𑀧𑀺 𑀧𑀞𑀫𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀭𑀸𑀬𑀁 𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄. 𑀆𑀤𑀺𑀢𑁄 𑀢𑀸𑀯 𑀚𑀸𑀢𑀺𑀫𑀤𑁄𑀢𑀺𑀆𑀤𑀬𑁄 𑀢𑁂𑀲𑀢𑁆𑀢𑀢𑀺 𑀏𑀓𑀓𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀢𑁄 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘𑀸𑀢𑀺𑀆𑀤𑀬𑁄 𑀅𑀝𑁆𑀞𑀸𑀭𑀲 𑀤𑀼𑀓𑀸, 𑀅𑀓𑀼𑀲𑀮𑀫𑀽𑀮𑀸𑀤𑀬𑁄 𑀧𑀜𑁆𑀘𑀢𑀺𑀁𑀲 𑀢𑀺𑀓𑀸, 𑀆𑀲𑀯𑀘𑀢𑀼𑀓𑁆𑀓𑀸𑀤𑀬𑁄 𑀘𑀼𑀤𑁆𑀤𑀲 𑀘𑀢𑀼𑀓𑁆𑀓𑀸, 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀤𑀬𑁄 𑀧𑀦𑁆𑀦𑀭𑀲 𑀧𑀜𑁆𑀘𑀓𑀸, 𑀯𑀺𑀯𑀸𑀤𑀫𑀽𑀮𑀸𑀤𑀬𑁄 𑀘𑀼𑀤𑁆𑀤𑀲 𑀙𑀓𑁆𑀓𑀸, 𑀅𑀦𑀼𑀲𑀬𑀸𑀤𑀬𑁄 𑀲𑀢𑁆𑀢 𑀲𑀢𑁆𑀢𑀓𑀸, 𑀓𑀺𑀮𑁂𑀲𑀯𑀢𑁆𑀣𑀼𑀆𑀤𑀬𑁄 𑀅𑀝𑁆𑀞 𑀅𑀝𑁆𑀞𑀓𑀸, 𑀆𑀖𑀸𑀢𑀯𑀢𑁆𑀣𑀼𑀆𑀤𑀬𑁄 𑀦𑀯 𑀦𑀯𑀓𑀸, 𑀓𑀺𑀮𑁂𑀲𑀯𑀢𑁆𑀣𑀼𑀆𑀤𑀬𑁄 𑀲𑀢𑁆𑀢 𑀤𑀲𑀓𑀸, 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺𑀆𑀤𑀬𑁄 𑀙 𑀅𑀝𑁆𑀞𑀸𑀭𑀲𑀓𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀅𑀝𑁆𑀞 𑀓𑀺𑀮𑁂𑀲𑀲𑀢𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯 𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄.

(𑁧.) 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪𑁩-𑁮𑁪𑁪. 𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀬 𑀫𑀸𑀢𑀺𑀓𑀸𑀬 𑀢𑀢𑁆𑀣 𑀓𑀢𑀫𑁄 𑀚𑀸𑀢𑀺𑀫𑀤𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀤𑁆𑀥𑁂 𑀦𑀺𑀤𑁆𑀤𑁂𑀲𑀯𑀸𑀭𑁂 𑀚𑀸𑀢𑀺𑀁 𑀧𑀝𑀺𑀘𑁆𑀘𑀸𑀢𑀺 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬. 𑀏𑀢𑁆𑀣 𑀘 𑀅𑀢𑁆𑀣𑀺𑀧𑀝𑀺𑀘𑁆𑀘𑀁 𑀦𑀸𑀫 𑀓𑀣𑀺𑀢𑀁, 𑀢𑀲𑁆𑀫𑀸 𑀚𑀸𑀢𑀺𑀬𑀸 𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀕𑁄𑀢𑁆𑀢𑀁 𑀧𑀝𑀺𑀘𑁆𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀤𑀦𑀯𑀲𑁂𑀦 𑀫𑀤𑁄. 𑀫𑀚𑁆𑀚𑀦𑀸𑀓𑀸𑀭𑁄 𑀫𑀚𑁆𑀚𑀦𑀸. 𑀫𑀚𑁆𑀚𑀺𑀢𑀪𑀸𑀯𑁄 𑀫𑀚𑁆𑀚𑀺𑀢𑀢𑁆𑀢𑀁. 𑀫𑀸𑀦𑁄 𑀫𑀜𑁆𑀜𑀦𑀸𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁧𑁨𑁧) 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀁 𑀚𑀸𑀢𑀺𑀬𑀸 𑀲𑀢𑀺 𑀢𑀁 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀫𑀸𑀦𑁄 𑀚𑀸𑀢𑀺𑀫𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀁 ¶ 𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀳𑀺 𑀔𑀢𑁆𑀢𑀺𑀬𑁄 ‘𑀫𑀸𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺. 𑀅𑀯𑀲𑁂𑀲𑀸 𑀅𑀦𑁆𑀢𑀭𑀸 𑀉𑀝𑁆𑀞𑀸𑀬 𑀔𑀢𑁆𑀢𑀺𑀬𑀸 𑀚𑀸𑀢𑀸. 𑀅𑀳𑀁 𑀧𑀦 𑀯𑀁𑀲𑀸𑀕𑀢𑀔𑀢𑁆𑀢𑀺𑀬𑁄’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑁄𑀢𑁆𑀢𑀫𑀤𑀦𑀺𑀤𑁆𑀤𑁂𑀲𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀢𑁆𑀢𑀺𑀬𑁄𑀧𑀺 ¶ 𑀳𑀺 ‘𑀅𑀳𑀁 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑁄, 𑀅𑀳𑀁 𑀆𑀤𑀺𑀘𑁆𑀘𑀕𑁄𑀢𑁆𑀢𑁄’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 ‘𑀅𑀳𑀁 𑀓𑀲𑁆𑀲𑀧𑀕𑁄𑀢𑁆𑀢𑁄 ¶ , 𑀅𑀳𑀁 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀯𑁂𑀲𑁆𑀲𑁄𑀧𑀺 𑀲𑀼𑀤𑁆𑀤𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀮𑀕𑁄𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀢𑀺. 𑀅𑀝𑁆𑀞𑀸𑀭𑀲𑀸𑀧𑀺 𑀲𑁂𑀡𑀺𑀬𑁄 ‘𑀏𑀓𑀺𑀲𑁆𑀲𑀸 𑀲𑁂𑀡𑀺𑀬𑀸 𑀚𑀸𑀢𑀫𑁆𑀳𑀸’𑀢𑀺 𑀫𑀸𑀦𑀁 𑀓𑀭𑁄𑀦𑁆𑀢𑀺𑀬𑁂𑀯.

𑀆𑀭𑁄𑀕𑁆𑀬𑀫𑀤𑀸𑀤𑀻𑀲𑀼 ‘𑀅𑀳𑀁 𑀅𑀭𑁄𑀕𑁄, 𑀅𑀯𑀲𑁂𑀲𑀸 𑀭𑁄𑀕𑀩𑀳𑀼𑀮𑀸, 𑀕𑀤𑁆𑀤𑀼𑀳𑀦𑀫𑀢𑁆𑀢𑀫𑁆𑀧𑀺 𑀫𑀬𑁆𑀳𑀁 𑀩𑁆𑀬𑀸𑀥𑀺 𑀦𑀸𑀫 𑀦𑀢𑁆𑀣𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀆𑀭𑁄𑀕𑁆𑀬𑀫𑀤𑁄 𑀦𑀸𑀫.

‘𑀅𑀳𑀁 𑀢𑀭𑀼𑀡𑁄, 𑀅𑀯𑀲𑁂𑀲𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁄 𑀧𑀧𑀸𑀢𑁂 𑀞𑀺𑀢𑀭𑀼𑀓𑁆𑀔𑀲𑀤𑀺𑀲𑁄, 𑀅𑀳𑀁 𑀧𑀦 𑀧𑀞𑀫𑀯𑀬𑁂 𑀞𑀺𑀢𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀬𑁄𑀩𑁆𑀩𑀦𑀫𑀤𑁄 𑀦𑀸𑀫.

‘𑀅𑀳𑀁 𑀘𑀺𑀭𑀁 𑀚𑀻𑀯𑀺𑀁, 𑀘𑀺𑀭𑀁 𑀚𑀻𑀯𑀸𑀫𑀺, 𑀘𑀺𑀭𑀁 𑀚𑀻𑀯𑀺𑀲𑁆𑀲𑀸𑀫𑀺; 𑀲𑀼𑀔𑀁 𑀚𑀻𑀯𑀺𑀁, 𑀲𑀼𑀔𑀁 𑀚𑀻𑀯𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀚𑀻𑀯𑀺𑀢𑀫𑀤𑁄 𑀦𑀸𑀫.

‘𑀅𑀳𑀁 𑀮𑀸𑀪𑀻, 𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀮𑀸𑀪𑀸, 𑀫𑀬𑁆𑀳𑀁 𑀧𑀦 𑀮𑀸𑀪𑀲𑁆𑀲 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀮𑀸𑀪𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀮𑀪𑀦𑁆𑀢𑀺, 𑀅𑀳𑀁 𑀧𑀦 𑀲𑀼𑀓𑀢𑀁 𑀧𑀡𑀻𑀢𑀁 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀁 𑀮𑀪𑀸𑀫𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀓𑁆𑀓𑀸𑀭𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀪𑀺𑀓𑁆𑀔𑀽𑀦𑀁 𑀧𑀸𑀤𑀧𑀺𑀝𑁆𑀞𑀺𑀬𑀁 𑀅𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 𑀅𑀬𑀁 𑀲𑀫𑀡𑁄𑀢𑀺𑀧𑀺 𑀦 𑀯𑀦𑁆𑀤𑀦𑁆𑀢𑀺, 𑀫𑀁 𑀧𑀦 𑀤𑀺𑀲𑁆𑀯𑀸𑀯 𑀯𑀦𑁆𑀤𑀦𑁆𑀢𑀺, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀤𑀼𑀭𑀸𑀲𑀤𑀁 𑀓𑀢𑁆𑀯𑀸 𑀫𑀜𑁆𑀜𑀦𑁆𑀢𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀕𑀭𑀼𑀓𑀸𑀭𑀫𑀤𑁄 𑀦𑀸𑀫.

‘𑀉𑀧𑁆𑀧𑀦𑁆𑀦𑁄 ¶ 𑀧𑀜𑁆𑀳𑁄 𑀫𑀬𑁆𑀳𑀫𑁂𑀯 𑀫𑀼𑀔𑁂𑀦 𑀙𑀺𑀚𑁆𑀚𑀢𑀺, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸𑀧𑀺 𑀫𑀫𑁂𑀯 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀼𑀭𑁂𑀓𑁆𑀔𑀸𑀭𑀫𑀤𑁄 𑀦𑀸𑀫.

𑀅𑀕𑀸𑀭𑀺𑀓𑀲𑁆𑀲 𑀢𑀸𑀯 𑀫𑀳𑀸𑀧𑀭𑀺𑀯𑀸𑀭𑀲𑁆𑀲 ‘𑀧𑀼𑀭𑀺𑀲𑀲𑀢𑀫𑁆𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀫𑁆𑀧𑀺 𑀫𑀁 𑀧𑀭𑀺𑀯𑀸𑀭𑁂𑀢𑀺,’ 𑀅𑀦𑀕𑀸𑀭𑀺𑀬𑀲𑁆𑀲 𑀧𑀦 ‘𑀲𑀫𑀡𑀲𑀢𑀫𑁆𑀧𑀺 𑀲𑀫𑀡𑀲𑀳𑀲𑁆𑀲𑀫𑁆𑀧𑀺 𑀫𑀁 𑀧𑀭𑀺𑀯𑀸𑀭𑁂𑀢𑀺, 𑀲𑁂𑀲𑀸 𑀅𑀧𑁆𑀧𑀧𑀭𑀺𑀯𑀸𑀭𑀸, 𑀅𑀳𑀁 𑀫𑀳𑀸𑀧𑀭𑀺𑀯𑀸𑀭𑁄 𑀘𑁂𑀯 𑀲𑀼𑀘𑀺𑀧𑀭𑀺𑀯𑀸𑀭𑁄 𑀘𑀸’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀭𑀺𑀯𑀸𑀭𑀫𑀤𑁄 𑀦𑀸𑀫.

𑀪𑁄𑀕𑁄 ¶ 𑀧𑀦 𑀓𑀺𑀜𑁆𑀘𑀸𑀧𑀺 𑀮𑀸𑀪𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀓𑁆𑀔𑁂𑀧𑀭𑀸𑀲𑀺 𑀦𑀸𑀫 𑀕𑀳𑀺𑀢𑁄; 𑀢𑀲𑁆𑀫𑀸 ‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀫𑀢𑁆𑀢𑀫𑁆𑀧𑀺 𑀦 𑀮𑀪𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀦𑀺𑀥𑀸𑀦𑀕𑀢𑀲𑁆𑀲𑁂𑀯 𑀥𑀦𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀪𑁄𑀕𑀫𑀤𑁄 𑀦𑀸𑀫.

𑀯𑀡𑁆𑀡𑀁 ¶ 𑀧𑀝𑀺𑀘𑁆𑀘𑀸𑀢𑀺 𑀲𑀭𑀻𑀭𑀯𑀡𑁆𑀡𑀫𑁆𑀧𑀺 𑀕𑀼𑀡𑀯𑀡𑁆𑀡𑀫𑁆𑀧𑀺 𑀧𑀝𑀺𑀘𑁆𑀘. ‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸 𑀤𑀼𑀭𑀽𑀧𑀸, 𑀅𑀳𑀁 𑀧𑀦 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄; 𑀅𑀯𑀲𑁂𑀲𑀸 𑀲𑀢𑁆𑀢𑀸 𑀦𑀺𑀕𑁆𑀕𑀼𑀡𑀸 𑀧𑀢𑁆𑀣𑀝𑀅𑀓𑀺𑀢𑁆𑀢𑀺𑀦𑁄, 𑀫𑀬𑁆𑀳𑀁 𑀧𑀦 𑀓𑀺𑀢𑁆𑀢𑀺𑀲𑀤𑁆𑀤𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀸𑀓𑀝𑁄 𑁋 𑀇𑀢𑀺𑀧𑀺 𑀣𑁂𑀭𑁄 𑀩𑀳𑀼𑀲𑁆𑀲𑀼𑀢𑁄, 𑀇𑀢𑀺𑀧𑀺 𑀲𑀻𑀮𑀯𑀸, 𑀇𑀢𑀺𑀧𑀺 𑀥𑀼𑀢𑀕𑀼𑀡𑀬𑀼𑀢𑁆𑀢𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀯𑀡𑁆𑀡𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀳𑀁 𑀧𑀦 𑀩𑀳𑀼𑀲𑁆𑀲𑀼𑀢𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀼𑀢𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀪𑀸𑀦𑀸, 𑀫𑀬𑁆𑀳𑀁 𑀧𑀦 𑀧𑀝𑀺𑀪𑀸𑀦𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀝𑀺𑀪𑀸𑀦𑀫𑀤𑁄 𑀦𑀸𑀫.

‘𑀅𑀳𑀁 𑀭𑀢𑁆𑀢𑀜𑁆𑀜𑀽 𑀅𑀲𑀼𑀓𑀁 𑀩𑀼𑀤𑁆𑀥𑀯𑀁𑀲𑀁, 𑀭𑀸𑀚𑀯𑀁𑀲𑀁, 𑀚𑀦𑀧𑀤𑀯𑀁𑀲𑀁, 𑀕𑀸𑀫𑀯𑀁𑀲𑀁, 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁, 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀬𑁄𑀕𑀁 𑀚𑀸𑀦𑀸𑀫𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀭𑀢𑁆𑀢𑀜𑁆𑀜𑀼𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸 𑀧𑀺𑀡𑁆𑀟𑀧𑀸𑀢𑀺𑀓𑀸 𑀚𑀸𑀢𑀸, 𑀅𑀳𑀁 𑀧𑀦 𑀚𑀸𑀢𑀺𑀧𑀺𑀡𑁆𑀟𑀧𑀸𑀢𑀺𑀓𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 ¶ 𑀲𑀢𑁆𑀢𑀸 𑀉𑀜𑁆𑀜𑀸𑀢𑀸 𑀅𑀯𑀜𑁆𑀜𑀸𑀢𑀸, 𑀅𑀳𑀁 𑀧𑀦 𑀅𑀦𑀼𑀜𑁆𑀜𑀸𑀢𑁄 𑀅𑀦𑀯𑀜𑁆𑀜𑀸𑀢𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀅𑀦𑀯𑀜𑁆𑀜𑀸𑀢𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸𑀦𑀁 𑀇𑀭𑀺𑀬𑀸𑀧𑀣𑁄 𑀅𑀧𑀸𑀲𑀸𑀤𑀺𑀓𑁄, 𑀫𑀬𑁆𑀳𑀁 𑀧𑀦 𑀧𑀸𑀲𑀸𑀤𑀺𑀓𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀇𑀭𑀺𑀬𑀸𑀧𑀣𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑀲𑀤𑀺𑀲𑀸, 𑀅𑀳𑀁 𑀧𑀦 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’𑀢𑀺 𑀯𑀸 ‘𑀅𑀳𑀁 𑀬𑀁 𑀬𑀁 𑀓𑀫𑁆𑀫𑀁 𑀓𑀭𑁄𑀫𑀺, 𑀢𑀁 𑀢𑀁 𑀇𑀚𑁆𑀛𑀢𑀻’𑀢𑀺 𑀯𑀸 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀇𑀤𑁆𑀥𑀺𑀫𑀤𑁄 𑀦𑀸𑀫.

𑀳𑁂𑀝𑁆𑀞𑀸 𑀧𑀭𑀺𑀯𑀸𑀭𑀕𑁆𑀕𑀳𑀡𑁂𑀦 𑀬𑀲𑁄 𑀕𑀳𑀺𑀢𑁄𑀯 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀉𑀧𑀝𑁆𑀞𑀸𑀓𑀫𑀤𑁄 𑀦𑀸𑀫 𑀕𑀳𑀺𑀢𑁄. 𑀲𑁄 𑀅𑀕𑀸𑀭𑀺𑀓𑁂𑀦𑀧𑀺 𑀅𑀦𑀕𑀸𑀭𑀺𑀓𑁂𑀦𑀧𑀺 𑀤𑀻𑀧𑁂𑀢𑀩𑁆𑀩𑁄. 𑀅𑀕𑀸𑀭𑀺𑀓𑁄 𑀳𑀺 𑀏𑀓𑀘𑁆𑀘𑁄 𑀅𑀝𑁆𑀞𑀸𑀭𑀲𑀲𑀼 𑀲𑁂𑀡𑀻𑀲𑀼 𑀏𑀓𑀺𑀲𑁆𑀲𑀸 𑀚𑁂𑀝𑁆𑀞𑀓𑁄 𑀳𑁄𑀢𑀺, 𑀢𑀲𑁆𑀲 ‘𑀅𑀯𑀲𑁂𑀲𑁂 𑀧𑀼𑀭𑀺𑀲𑁂 𑀅𑀳𑀁 𑀧𑀝𑁆𑀞𑀧𑁂𑀫𑀺, 𑀅𑀳𑀁 𑀯𑀺𑀘𑀸𑀭𑁂𑀫𑀻’𑀢𑀺 ¶ ; 𑀅𑀦𑀕𑀸𑀭𑀺𑀓𑁄𑀧𑀺 𑀏𑀓𑀘𑁆𑀘𑁄 𑀓𑀢𑁆𑀣𑀘𑀺 𑀚𑁂𑀝𑁆𑀞𑀓𑁄 𑀳𑁄𑀢𑀺, 𑀢𑀲𑁆𑀲 ‘𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀫𑀬𑁆𑀳𑀁 𑀑𑀯𑀸𑀤𑁂 𑀯𑀢𑁆𑀢𑀦𑁆𑀢𑀺, 𑀅𑀳𑀁 𑀚𑁂𑀝𑁆𑀞𑀓𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀬𑀲𑀫𑀤𑁄 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀤𑀼𑀲𑁆𑀲𑀻𑀮𑀸, 𑀅𑀳𑀁 𑀧𑀦 𑀲𑀻𑀮𑀯𑀸’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀻𑀮𑀫𑀤𑁄 𑀦𑀸𑀫. ‘𑀅𑀯𑀲𑁂𑀲𑀲𑀢𑁆𑀢𑀸𑀦𑀁 𑀓𑀼𑀓𑁆𑀓𑀼𑀝𑀲𑁆𑀲 𑀉𑀤𑀓𑀧𑀸𑀦𑀫𑀢𑁆𑀢𑁂𑀧𑀺 𑀓𑀸𑀮𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀢𑁆𑀣𑀺, 𑀅𑀳𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀦𑀁 𑀮𑀸𑀪𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀛𑀸𑀦𑀫𑀤𑁄 ¶ 𑀦𑀸𑀫.

‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀦𑀺𑀲𑁆𑀲𑀺𑀧𑁆𑀧𑀸, 𑀅𑀳𑀁 𑀧𑀦 𑀲𑀺𑀧𑁆𑀧𑀯𑀸’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀺𑀧𑁆𑀧𑀫𑀤𑁄 𑀦𑀸𑀫. ‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀭𑀲𑁆𑀲𑀸, 𑀅𑀳𑀁 𑀧𑀦 𑀤𑀻𑀖𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀆𑀭𑁄𑀳𑀫𑀤𑁄 𑀦𑀸𑀫. ‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀭𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺 𑀤𑀻𑀖𑀸 𑀯𑀸, 𑀅𑀳𑀁 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀭𑀺𑀡𑀸𑀳𑀫𑀤𑁄 𑀦𑀸𑀫. ‘𑀅𑀯𑀲𑁂𑀲𑀲𑀢𑁆𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀁 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁, 𑀫𑀬𑁆𑀳𑀁 𑀧𑀦 𑀫𑀦𑀸𑀧𑀁 𑀧𑀸𑀲𑀸𑀤𑀺𑀓’𑀦𑁆𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀡𑁆𑀞𑀸𑀦𑀫𑀤𑁄 𑀦𑀸𑀫. ‘𑀅𑀯𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂 𑀩𑀳𑀽 𑀤𑁄𑀲𑀸, 𑀫𑀬𑁆𑀳𑀁 𑀧𑀦 𑀲𑀭𑀻𑀭𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀦𑀢𑁆𑀣𑀻’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀸𑀭𑀺𑀧𑀽𑀭𑀺𑀫𑀤𑁄 𑀦𑀸𑀫.

𑁮𑁪𑁫. 𑀇𑀫𑀺𑀦𑀸 ¶ 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀯𑀢𑁆𑀣𑀼𑀓𑀁 𑀫𑀸𑀦𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀢𑁆𑀣𑀼𑀓𑀁 𑀦𑀺𑀩𑁆𑀩𑀢𑁆𑀢𑀺𑀢𑀫𑀸𑀦𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀓𑀢𑀫𑁄 𑀫𑀤𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁮𑁪𑁬. 𑀧𑀫𑀸𑀤𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄𑀢𑀺 𑀇𑀫𑁂𑀲𑀼 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀲𑀢𑀺𑀬𑀸 𑀅𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑀁; 𑀲𑀢𑀺𑀯𑀺𑀭𑀳𑁄𑀢𑀺 𑀅𑀢𑁆𑀣𑁄. 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀦𑁆𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀤𑀸𑀦𑀁; 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀏𑀢𑁂𑀲𑀁 𑀤𑀸𑀦𑀸𑀤𑀻𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀸 𑀅𑀲𑀓𑁆𑀓𑀘𑁆𑀘𑀓𑀭𑀡𑀯𑀲𑁂𑀦 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸. 𑀲𑀢𑀢𑀪𑀸𑀯𑁄 𑀲𑀸𑀢𑀘𑁆𑀘𑀁. 𑀦 𑀲𑀢𑀢𑀪𑀸𑀯𑁄 𑀅𑀲𑀸𑀢𑀘𑁆𑀘𑀁. 𑀦 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸. 𑀅𑀦𑀝𑁆𑀞𑀺𑀢𑀓𑀭𑀡𑀁 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸. 𑀬𑀣𑀸 𑀦𑀸𑀫 𑀓𑀓𑀡𑁆𑀝𑀓𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀣𑁄𑀓𑀁 𑀢𑀺𑀝𑁆𑀞𑀢𑀺, 𑀦 𑀦𑀺𑀭𑀦𑁆𑀢𑀭𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀬𑁄 𑀧𑀼𑀕𑁆𑀕𑀮𑁄 𑀏𑀓𑀤𑀺𑀯𑀲𑀁 𑀤𑀸𑀦𑀁 𑀯𑀸 𑀤𑀢𑁆𑀯𑀸 𑀧𑀽𑀚𑀁 𑀯𑀸 𑀓𑀢𑁆𑀯𑀸 𑀥𑀫𑁆𑀫𑀁 𑀯𑀸 𑀲𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀧𑀼𑀦 𑀘𑀺𑀭𑀲𑁆𑀲𑀁 𑀓𑀭𑁄𑀢𑀺, 𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀲 𑀲𑀸 ¶ 𑀓𑀺𑀭𑀺𑀬𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀑𑀮𑀻𑀦𑀯𑀼𑀢𑁆𑀢𑀺𑀢𑀸𑀢𑀺 𑀦𑀺𑀭𑀦𑁆𑀢𑀭𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑁆𑀨𑀸𑀭𑀲𑁆𑀲𑁂𑀯 𑀅𑀪𑀸𑀯𑁂𑀦 𑀮𑀻𑀦𑀯𑀼𑀢𑁆𑀢𑀺𑀢𑀸. 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸𑀢𑀺 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀙𑀦𑁆𑀤𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁄. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀢𑀺 𑀯𑀻𑀭𑀺𑀬𑀥𑀼𑀭𑀲𑁆𑀲 𑀑𑀭𑁄𑀧𑀦𑀁, 𑀑𑀲𑀓𑁆𑀓𑀺𑀢𑀫𑀸𑀦𑀲𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀝𑁆𑀞𑀸𑀦𑀦𑁆𑀢𑀺 ¶ 𑀓𑀼𑀲𑀮𑀓𑀭𑀡𑁂 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀅𑀦𑀦𑀼𑀬𑁄𑀕𑁄𑀢𑀺 𑀅𑀦𑀦𑀼𑀬𑀼𑀜𑁆𑀚𑀦𑀁. 𑀧𑀫𑀸𑀤𑁄𑀢𑀺 𑀧𑀫𑀚𑁆𑀚𑀦𑀁. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄𑀢𑀺 𑀇𑀤𑀁 𑀅𑀢𑁆𑀣𑀧𑀭𑀺𑀬𑀸𑀬𑀲𑁆𑀲 𑀩𑁆𑀬𑀜𑁆𑀚𑀦𑀧𑀭𑀺𑀬𑀸𑀬𑀲𑁆𑀲 𑀘 𑀧𑀭𑀺𑀬𑀦𑁆𑀢𑀸𑀪𑀸𑀯𑀢𑁄 𑀆𑀓𑀸𑀭𑀤𑀲𑁆𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁆𑀯𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑀺𑀢𑁄 𑀧𑀫𑀸𑀤𑁄, 𑀬𑁄 𑀅𑀜𑁆𑀜𑁄𑀧𑀺 𑀏𑀯𑀫𑀸𑀓𑀸𑀭𑁄 𑀏𑀯𑀁𑀚𑀸𑀢𑀺𑀓𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸𑀓𑀸𑀭𑀯𑀲𑁂𑀦 𑀧𑀫𑀚𑁆𑀚𑀦𑀸, 𑀧𑀫𑀚𑁆𑀚𑀺𑀢𑀪𑀸𑀯𑀯𑀲𑁂𑀦 𑀧𑀫𑀚𑁆𑀚𑀺𑀢𑀢𑁆𑀢𑀦𑁆𑀢𑀺 𑀲𑀗𑁆𑀔𑀁 𑀕𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄𑀢𑀺. 𑀮𑀓𑁆𑀔𑀡𑀢𑁄 𑀧𑀦𑁂𑀲 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁄, 𑀢𑀢𑁆𑀣𑁂𑀯 𑀲𑀢𑀺𑀬𑀸 𑀯𑀺𑀲𑁆𑀲𑀝𑁆𑀞𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁪𑁭. 𑀣𑀫𑁆𑀪𑀦𑀺𑀤𑁆𑀤𑁂𑀲𑁂 𑀣𑀤𑁆𑀥𑀝𑁆𑀞𑁂𑀦 𑀣𑀫𑁆𑀪𑁄; 𑀔𑀮𑀺𑀬𑀸 𑀣𑀤𑁆𑀥𑀲𑀸𑀝𑀓𑀲𑁆𑀲 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀢𑀸 𑀏𑀢𑁆𑀣 𑀓𑀣𑀺𑀢𑀸. 𑀣𑀫𑁆𑀪𑀦𑀸𑀓𑀸𑀭𑁄 𑀣𑀫𑁆𑀪𑀦𑀸. 𑀣𑀫𑁆𑀪𑀺𑀢𑀲𑁆𑀲 𑀪𑀸𑀯𑁄 𑀣𑀫𑁆𑀪𑀺𑀢𑀢𑁆𑀢𑀁. 𑀓𑀓𑁆𑀔𑀴𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀓𑀓𑁆𑀔𑀴𑀺𑀬𑀁. 𑀨𑀭𑀼𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀨𑀸𑀭𑀼𑀲𑀺𑀬𑀁. 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀫𑀻𑀘𑀺𑀭𑀳𑀸𑀦𑀁 𑀢𑀲𑁆𑀲𑀸 𑀲𑀸𑀫𑀻𑀘𑀺𑀬𑀸 𑀅𑀓𑀭𑀡𑀯𑀲𑁂𑀦 𑀉𑀚𑀼𑀫𑁂𑀯 𑀞𑀧𑀺𑀢𑀘𑀺𑀢𑁆𑀢𑀪𑀸𑀯𑁄 𑀉𑀚𑀼𑀘𑀺𑀢𑁆𑀢𑀢𑀸. 𑀣𑀤𑁆𑀥𑀲𑁆𑀲 𑀅𑀫𑀼𑀤𑀼𑀦𑁄 𑀪𑀸𑀯𑁄 𑀅𑀫𑀼𑀤𑀼𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀣𑀫𑁆𑀪𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀕𑀺𑀮𑀺𑀢𑀦𑀗𑁆𑀕𑀮𑀲𑀻𑀲𑁄 𑀯𑀺𑀬 𑀅𑀚𑀕𑀭𑁄, 𑀯𑀸𑀢𑀪𑀭𑀺𑀢𑀸 𑀯𑀺𑀬 𑀪𑀲𑁆𑀢𑀸 𑀘𑁂𑀢𑀺𑀬𑀁 𑀯𑀸 𑀯𑀼𑀟𑁆𑀠𑀢𑀭𑁂 𑀯𑀸 𑀤𑀺𑀲𑁆𑀯𑀸 𑀑𑀦𑀫𑀺𑀢𑀼𑀁 ¶ 𑀦 𑀲𑀓𑁆𑀓𑁄𑀢𑀺, 𑀧𑀭𑀺𑀬𑀦𑁆𑀢𑁂𑀦𑁂𑀯 𑀘𑀭𑀢𑀺. 𑀲𑁆𑀯𑀸𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀮𑀓𑁆𑀔𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁪𑁮. 𑀲𑀸𑀭𑀫𑁆𑀪𑀦𑀺𑀤𑁆𑀤𑁂𑀲𑁂 𑀲𑀸𑀭𑀫𑁆𑀪𑀦𑀯𑀲𑁂𑀦 𑀲𑀸𑀭𑀫𑁆𑀪𑁄. 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀲𑀸𑀭𑀫𑁆𑀪𑁄 𑀧𑀝𑀺𑀲𑀸𑀭𑀫𑁆𑀪𑁄. 𑀲𑀸𑀭𑀫𑁆𑀪𑀦𑀸𑀓𑀸𑀭𑁄 𑀲𑀸𑀭𑀫𑁆𑀪𑀦𑀸. 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀲𑀸𑀭𑀫𑁆𑀪𑀦𑀸 𑀧𑀝𑀺𑀲𑀸𑀭𑀫𑁆𑀪𑀦𑀸. 𑀧𑀝𑀺𑀲𑀸𑀭𑀫𑁆𑀪𑀺𑀢𑀲𑁆𑀲 𑀪𑀸𑀯𑁄 𑀧𑀝𑀺𑀲𑀸𑀭𑀫𑁆𑀪𑀺𑀢𑀢𑁆𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀸𑀭𑀫𑁆𑀪𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀁 𑀮𑀓𑁆𑀔𑀡𑀢𑁄 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀁 𑀓𑀭𑁄𑀢𑀺. 𑀅𑀕𑀸𑀭𑀺𑀓𑁄 𑀲𑀫𑀸𑀦𑁄 𑀏𑀓𑁂𑀦𑁂𑀓𑀲𑁆𑀫𑀺𑀁 𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀲𑀚𑁆𑀚𑀺𑀢𑁂 𑀅𑀧𑀭𑁄 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀲𑀚𑁆𑀚𑁂𑀢𑀺, 𑀅𑀧𑀭𑁄 𑀘𑀢𑁆𑀢𑀸𑀭𑀺, 𑀅𑀧𑀭𑁄 ¶ 𑀅𑀝𑁆𑀞, 𑀅𑀧𑀭𑁄 𑀲𑁄𑀴𑀲. 𑀅𑀦𑀕𑀸𑀭𑀺𑀓𑁄 𑀲𑀫𑀸𑀦𑁄 𑀏𑀓𑁂𑀦𑁂𑀓𑀲𑁆𑀫𑀺𑀁 𑀦𑀺𑀓𑀸𑀬𑁂 𑀕𑀳𑀺𑀢𑁂, ‘𑀦𑀸𑀳𑀁 𑀏𑀢𑀲𑁆𑀲 𑀳𑁂𑀝𑁆𑀞𑀸 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀅𑀧𑀭𑁄 𑀤𑁆𑀯𑁂 𑀕𑀡𑁆𑀳𑀸𑀢𑀺, 𑀅𑀧𑀭𑁄 𑀢𑀬𑁄, 𑀅𑀧𑀭𑁄 𑀘𑀢𑁆𑀢𑀸𑀭𑁄, 𑀅𑀧𑀭𑁄 𑀧𑀜𑁆𑀘. 𑀲𑀸𑀭𑀫𑁆𑀪𑀯𑀲𑁂𑀦 𑀳𑀺 𑀕𑀡𑁆𑀳𑀺𑀢𑀼𑀁 𑀦 ¶ 𑀯𑀝𑁆𑀝𑀢𑀺. 𑀅𑀓𑀼𑀲𑀮𑀧𑀓𑁆𑀔𑁄 𑀏𑀲 𑀦𑀺𑀭𑀬𑀕𑀸𑀫𑀺𑀫𑀕𑁆𑀕𑁄. 𑀓𑀼𑀲𑀮𑀧𑀓𑁆𑀔𑀯𑀲𑁂𑀦 𑀧𑀦 𑀏𑀓𑀲𑁆𑀫𑀺𑀁 𑀏𑀓𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑁂 𑀤𑁆𑀯𑁂 𑀤𑀸𑀢𑀼𑀁, 𑀤𑁆𑀯𑁂 𑀤𑁂𑀦𑁆𑀢𑁂 𑀘𑀢𑁆𑀢𑀸𑀭𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀸𑀧𑀺 𑀧𑀭𑁂𑀦 𑀏𑀓𑀲𑁆𑀫𑀺𑀁 𑀦𑀺𑀓𑀸𑀬𑁂 𑀕𑀳𑀺𑀢𑁂, ‘𑀤𑁆𑀯𑁂 𑀦𑀺𑀓𑀸𑀬𑁂 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀫𑁂 𑀨𑀸𑀲𑀼 𑀳𑁄𑀢𑀻’𑀢𑀺 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀢𑁆𑀯𑀸 𑀢𑀤𑀼𑀢𑁆𑀢𑀭𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑁮𑁪𑁯. 𑀅𑀢𑁆𑀭𑀺𑀘𑁆𑀙𑀢𑀸𑀦𑀺𑀤𑁆𑀤𑁂𑀲𑁂 𑀬𑀣𑀸 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑁂 (𑀅. 𑀦𑀺. 𑁪.𑁨𑁮) ‘𑀮𑀸𑀫𑀓𑀮𑀸𑀫𑀓𑀝𑁆𑀞𑁄 𑀇𑀢𑀭𑀻𑀢𑀭𑀝𑁆𑀞𑁄’ 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀘𑀻𑀯𑀭𑀸𑀤𑀻𑀲𑀼 𑀬𑀁 𑀬𑀁 𑀮𑀤𑁆𑀥𑀁 𑀳𑁄𑀢𑀺, 𑀢𑁂𑀦 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀲𑁆𑀲; 𑀕𑀺𑀳𑀺𑀦𑁄 𑀯𑀸 𑀧𑀦 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀲𑀼 𑀬𑀁 𑀬𑀁 𑀮𑀤𑁆𑀥𑀁 𑀳𑁄𑀢𑀺, 𑀢𑁂𑀦 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀲𑁆𑀲. 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀢𑀺 𑀯𑀺𑀲𑁂𑀲𑀓𑀸𑀫𑀢𑀸. 𑀇𑀘𑁆𑀙𑀦𑀓𑀯𑀲𑁂𑀦 𑀇𑀘𑁆𑀙𑀸. 𑀇𑀘𑁆𑀙𑀸𑀯 𑀇𑀘𑁆𑀙𑀸𑀕𑀢𑀸, 𑀇𑀘𑁆𑀙𑀦𑀸𑀓𑀸𑀭𑁄 𑀯𑀸. 𑀅𑀢𑁆𑀢𑀦𑁄 𑀮𑀸𑀪𑀁 𑀅𑀢𑀺𑀘𑁆𑀘 𑀇𑀘𑁆𑀙𑀦𑀪𑀸𑀯𑁄 𑀅𑀢𑀺𑀘𑁆𑀙𑀢𑀸. 𑀭𑀸𑀕𑁄𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀢𑀺𑀘𑁆𑀙𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀢𑁆𑀭𑀺𑀘𑁆𑀙𑀢𑀸𑀢𑀺𑀧𑀺 𑀏𑀢𑀺𑀲𑁆𑀲𑀸 𑀏𑀯 𑀦𑀸𑀫𑀁. 𑀮𑀓𑁆𑀔𑀡𑀢𑁄 𑀧𑀦 𑀲𑀓𑀮𑀸𑀪𑁂 𑀅𑀲𑀦𑁆𑀢𑀼𑀝𑁆𑀞𑀺 𑀧𑀭𑀮𑀸𑀪𑁂 𑀘 𑀧𑀢𑁆𑀣𑀦𑀸 𑁋 𑀏𑀢𑀁 𑀅𑀢𑁆𑀭𑀺𑀘𑁆𑀙𑀢𑀸𑀮𑀓𑁆𑀔𑀡𑀁. 𑀅𑀢𑁆𑀭𑀺𑀘𑁆𑀙𑀧𑀼𑀕𑁆𑀕𑀮𑀲𑁆𑀲 𑀳𑀺 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀫𑁆𑀧𑀺 𑀮𑀸𑀫𑀓𑀁 𑀯𑀺𑀬 𑀔𑀸𑀬𑀢𑀺, 𑀧𑀭𑁂𑀦 𑀮𑀤𑁆𑀥𑀁 𑀮𑀸𑀫𑀓𑀫𑁆𑀧𑀺 𑀧𑀡𑀻𑀢𑀁 𑀯𑀺𑀬 𑀔𑀸𑀬𑀢𑀺; 𑀏𑀓𑀪𑀸𑀚𑀦𑁂 𑀧𑀓𑁆𑀓𑀬𑀸𑀕𑀼 𑀯𑀸 𑀪𑀢𑁆𑀢𑀁 𑀯𑀸 𑀧𑀽𑀯𑁄 𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀮𑀸𑀫𑀓𑁄 𑀯𑀺𑀬, 𑀧𑀭𑀲𑁆𑀲 𑀧𑀢𑁆𑀢𑁂 𑀧𑀡𑀻𑀢𑁄 𑀯𑀺𑀬 𑀔𑀸𑀬𑀢𑀺. 𑀅𑀬𑀁 𑀧𑀦 𑀅𑀢𑁆𑀭𑀺𑀘𑁆𑀙𑀢𑀸 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀳𑁄𑀢𑀺 𑀕𑀺𑀳𑀻𑀦𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀏𑀓𑁄 𑀓𑀺𑀭 𑀓𑀼𑀝𑀼𑀫𑁆𑀩𑀺𑀓𑁄 𑀢𑀺𑀁𑀲 𑀪𑀺𑀓𑁆𑀔𑀼𑀦𑀺𑀬𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀧𑀽𑀯𑀁 𑀪𑀢𑁆𑀢𑀁 𑀅𑀤𑀸𑀲𑀺 ¶ . 𑀲𑀗𑁆𑀖𑀢𑁆𑀣𑁂𑀭𑀻 𑀲𑀩𑁆𑀩𑀪𑀺𑀓𑁆𑀔𑀽𑀦𑀻𑀦𑀁 𑀧𑀢𑁆𑀢𑁂 𑀧𑀽𑀯𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑀸 𑀮𑀤𑁆𑀥𑀫𑁂𑀯 𑀔𑀸𑀤𑀺. 𑀩𑀸𑀭𑀸𑀡𑀲𑀺𑀭𑀸𑀚𑀸𑀧𑀺 ‘𑀅𑀗𑁆𑀕𑀸𑀭𑀧𑀓𑁆𑀓𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀤𑁂𑀯𑀺𑀁 𑀆𑀤𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀏𑀓𑀁 𑀓𑀺𑀦𑁆𑀦𑀭𑀺𑀁 𑀤𑀺𑀲𑁆𑀯𑀸, 𑀤𑁂𑀯𑀺𑀁 𑀧𑀳𑀸𑀬, 𑀢𑀲𑁆𑀲𑀸𑀦𑀼𑀧𑀤𑀁 𑀕𑀢𑁄. 𑀤𑁂𑀯𑀻 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀕𑀦𑁆𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ¶ 𑀭𑀸𑀚𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑀅𑀢𑁆𑀭𑀺𑀘𑁆𑀙𑀁 𑀅𑀢𑀺𑀮𑁄𑀪𑁂𑀦, 𑀅𑀢𑀺𑀮𑁄𑀪𑀫𑀤𑁂𑀦 𑀘;

𑀏𑀯𑀁 𑀳𑀸𑀬𑀢𑀺 𑀅𑀢𑁆𑀣𑀫𑁆𑀳𑀸, 𑀅𑀳𑀁𑀯 𑀅𑀲𑀺𑀢𑀸𑀪𑀼𑀬𑀸𑀢𑀺. (𑀚𑀸. 𑁧.𑁨.𑁧𑁬𑁮);

𑀬𑀣𑀸 ¶ 𑀘𑀦𑁆𑀤𑀓𑀺𑀦𑁆𑀦𑀭𑀺𑀁 𑀧𑀢𑁆𑀣𑀬𑀦𑁆𑀢𑁄 𑀅𑀲𑀺𑀢𑀸𑀪𑀼𑀬𑀸 𑀭𑀸𑀚𑀥𑀻𑀢𑀸𑀬 𑀳𑀻𑀦𑁄 𑀧𑀭𑀺𑀳𑀻𑀦𑁄, 𑀏𑀯𑀁 𑀅𑀢𑁆𑀭𑀺𑀘𑁆𑀙𑀁 𑀅𑀢𑀺𑀮𑁄𑀪𑁂𑀦 𑀅𑀢𑁆𑀣𑀫𑁆𑀳 𑀳𑀸𑀬𑀢𑀺 𑀚𑀻𑀬𑀢𑀻𑀢𑀺 𑀤𑁂𑀯𑀢𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑁂𑀴𑀺𑀫𑀓𑀸𑀲𑀺.

𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂𑀧𑀺 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀫𑀸𑀢𑀭𑀸 ‘𑀢𑀸𑀢, 𑀅𑀚𑁆𑀚 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑁂 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑀯𑀦𑀁 𑀲𑀼𑀡, 𑀲𑀳𑀲𑁆𑀲𑀁 𑀢𑁂 𑀤𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁂 𑀥𑀦𑀮𑁄𑀪𑁂𑀦 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀇𑀤𑀁 𑀞𑀸𑀦𑀁 𑀅𑀓𑀼𑀢𑁄𑀪𑀬’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑁄 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀖𑀭𑀁 𑀅𑀕𑀫𑀸𑀲𑀺. 𑀫𑀸𑀢𑀸 𑀧𑀸𑀢𑁄𑀯 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀲𑁄 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸𑀯 𑀬𑀸𑀕𑀼𑀁 𑀧𑀺𑀯𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀥𑀦𑀁 𑀲𑀁𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸 ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀅𑀢𑁆𑀣𑀺; 𑀅𑀮𑀁 𑀕𑀫𑀦𑁂𑀦𑀸’’𑀢𑀺 𑀯𑀸𑀭𑁂𑀲𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀢𑀺 𑀏𑀯. 𑀲𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 ‘𑀅𑀬𑀁 𑀫𑀬𑁆𑀳𑀁 𑀧𑀼𑀭𑀢𑁄 𑀢𑀺𑀝𑁆𑀞𑀢𑀻’𑀢𑀺 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀢𑀺𑀢𑀁 𑀫𑀸𑀢𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀸𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀫𑀸𑀤𑀺𑀲𑀸𑀬 𑀫𑀸𑀢𑀭𑀺 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀕𑀢𑀲𑁆𑀲 𑀫𑁂 𑀕𑀢𑀝𑁆𑀞𑀸𑀦𑁂 𑀲𑀼𑀔𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁𑀲𑀜𑁆𑀜𑀻 𑀦𑀸𑀫 𑀢𑁆𑀯𑀁 𑀧𑀼𑀢𑁆𑀢𑀸𑀢𑀺 𑀆𑀳. 𑀢𑀲𑁆𑀲 𑀦𑀸𑀯𑀁 𑀆𑀭𑀼𑀬𑁆𑀳 𑀕𑀘𑁆𑀙𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀢𑁂 𑀫𑀦𑀼𑀲𑁆𑀲𑀸 ‘‘𑀅𑀤𑁆𑀥𑀸 𑀏𑀢𑁆𑀣 𑀧𑀸𑀧𑀧𑀼𑀭𑀺𑀲𑁄 𑀅𑀢𑁆𑀣𑀺; 𑀲𑀮𑀸𑀓𑀁 𑀤𑁂𑀣𑀸’’𑀢𑀺 𑀲𑀮𑀸𑀓𑀸 𑀤𑀻𑀬𑀫𑀸𑀦𑀸 𑀢𑀲𑁆𑀲𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀧𑀼𑀡𑀺. 𑀢𑁂 𑀢𑀲𑁆𑀲 𑀉𑀴𑀼𑀫𑁆𑀧𑀁 𑀤𑀢𑁆𑀯𑀸 𑀢𑀁 𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀏𑀓𑀁 𑀤𑀻𑀧𑀁 𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀧𑁂𑀢𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀸𑀳𑀺 ‘‘𑀧𑀼𑀭𑀢𑁄 𑀫𑀸 𑀅𑀕𑀫𑀸𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀤𑁆𑀤𑀺𑀕𑀼𑀡𑀁 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀔𑀼𑀭𑀘𑀓𑁆𑀓𑀥𑀭𑀁 𑀏𑀓𑀁 𑀧𑀼𑀭𑀺𑀲𑀁 𑀅𑀤𑁆𑀤𑀲. 𑀢𑀲𑁆𑀲 𑀢𑀁 𑀘𑀓𑁆𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀲𑁄 𑀢𑀁 𑀆𑀳 𑁋 ‘‘𑀅𑀫𑁆𑀪𑁄, 𑀇𑀤𑀁 𑀢𑀬𑀸 𑀧𑀺𑀴𑀦𑁆𑀥𑀧𑀤𑀼𑀫𑀁 ¶ 𑀫𑀬𑁆𑀳𑀁 𑀤𑁂𑀳𑀻’’𑀢𑀺. ‘‘𑀦𑀬𑀺𑀤𑀁, 𑀲𑀸𑀫𑀺 ¶ , 𑀧𑀤𑀼𑀫𑀁; 𑀔𑀼𑀭𑀘𑀓𑁆𑀓𑀁 𑀏𑀢’’𑀦𑁆𑀢𑀺. 𑀲𑁄 ‘‘𑀯𑀜𑁆𑀘𑁂𑀲𑀺 𑀫𑀁 𑀢𑁆𑀯𑀁. 𑀓𑀺𑀁 𑀫𑁂 𑀧𑀤𑀼𑀫𑀁 𑀦 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀜𑁆𑀳𑀺 𑀮𑁄𑀳𑀺𑀢𑀘𑀦𑁆𑀤𑀦𑀁 𑀮𑀺𑀫𑁆𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀧𑀤𑀼𑀫𑀧𑀼𑀧𑁆𑀨𑀁 𑀫𑀬𑁆𑀳𑀁 𑀦 𑀤𑀸𑀢𑀼𑀓𑀸𑀫𑁄𑀲𑀻’’𑀢𑀺 𑀆𑀳. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘𑀅𑀬𑀫𑁆𑀧𑀺 𑀫𑀬𑀸 𑀓𑀢𑀲𑀤𑀺𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁄’𑀢𑀺. 𑀅𑀣 𑀦𑀁 ‘‘𑀳𑀦𑁆𑀤 𑀭𑁂’’𑀢𑀺 𑀯𑀢𑁆𑀯𑀸 ¶ 𑀢𑀲𑁆𑀲 𑀫𑀢𑁆𑀣𑀓𑁂 𑀘𑀓𑁆𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀳𑀺 𑀧𑀺𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺. (𑀚𑀸. 𑁧.𑁧.𑁧𑁦𑁪);

𑀅𑀜𑁆𑀜𑀢𑀭𑁄𑀧𑀺 𑀅𑀢𑁆𑀭𑀺𑀘𑁆𑀙𑁄 𑀅𑀫𑀘𑁆𑀘𑁄 𑀲𑀓𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀯𑀺𑀲𑀬𑀁 𑀧𑀸𑀯𑀺𑀲𑀺. 𑀢𑀢𑁆𑀣 𑀧𑁄𑀣𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀏𑀓𑀲𑁆𑀲 𑀢𑀸𑀧𑀲𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀦𑀺𑀧𑀚𑁆𑀚𑀺. 𑀲𑁄 𑀢𑀸𑀧𑀲𑁂𑀦 ‘𑀓𑀺𑀁 𑀢𑁂 𑀓𑀢’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀲𑀓𑀁 𑀦𑀺𑀓𑁂𑀢𑀁 𑀅𑀢𑀺𑀳𑀻𑀴𑀬𑀸𑀦𑁄,

𑀅𑀢𑁆𑀭𑀺𑀘𑁆𑀙𑀢𑀸 𑀫𑀮𑁆𑀮𑀕𑀸𑀫𑀁 𑀅𑀕𑀘𑁆𑀙𑀺𑀁;

𑀢𑀢𑁄 𑀚𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀕𑀸𑀫𑀸,

𑀓𑁄𑀤𑀡𑁆𑀟𑀓𑁂𑀦 𑀧𑀭𑀺𑀧𑁄𑀣𑀬𑀺𑀁𑀲𑀼 𑀫𑀁.

‘‘𑀲𑁄 𑀪𑀺𑀦𑁆𑀦𑀲𑀻𑀲𑁄 𑀭𑀼𑀳𑀺𑀭𑀫𑀓𑁆𑀔𑀺𑀢𑀗𑁆𑀕𑁄,

𑀧𑀘𑁆𑀘𑀸𑀕𑀫𑀸𑀲𑀺𑀁 𑀲𑀓𑀁 𑀦𑀺𑀓𑁂𑀢𑀁;

𑀢𑀲𑁆𑀫𑀸 𑀅𑀳𑀁 𑀧𑁄𑀲𑀣𑀁 𑀧𑀸𑀮𑀬𑀸𑀫𑀺,

𑀅𑀢𑁆𑀭𑀺𑀘𑁆𑀙𑀢𑀸 𑀫𑀸 𑀧𑀼𑀦𑀭𑀸𑀕𑀫𑀸𑀲𑀻’’𑀢𑀺. (𑀚𑀸. 𑁧.𑁧𑁪.𑁧𑁩𑁮-𑁧𑁩𑁯);

𑁮𑁫𑁦. 𑀫𑀳𑀺𑀘𑁆𑀙𑀢𑀸𑀦𑀺𑀤𑁆𑀤𑁂𑀲𑁂 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺 𑀇𑀘𑁆𑀙𑀢𑀺, 𑀫𑀳𑀢𑀻 𑀯𑀸𑀲𑁆𑀲 𑀇𑀘𑁆𑀙𑀸𑀢𑀺 𑀫𑀳𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀫𑀳𑀺𑀘𑁆𑀙𑀢𑀸. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑁋 𑀏𑀢𑀁 𑀫𑀳𑀺𑀘𑁆𑀙𑀢𑀸𑀮𑀓𑁆𑀔𑀡𑀁. 𑀫𑀳𑀺𑀘𑁆𑀙𑁄 𑀳𑀺 𑀧𑀼𑀕𑁆𑀕𑀮𑁄 𑀬𑀣𑀸 𑀦𑀸𑀫 𑀓𑀘𑁆𑀙𑀧𑀼𑀝𑀯𑀸𑀡𑀺𑀚𑁄 𑀧𑀺𑀴𑀦𑁆𑀥𑀦𑀪𑀡𑁆𑀟𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑁂𑀧𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 ¶ ‘‘𑀅𑀫𑁆𑀫𑀸, 𑀅𑀲𑀼𑀓𑀁 𑀕𑀡𑁆𑀳𑀣, 𑀅𑀲𑀼𑀓𑀁 𑀕𑀡𑁆𑀳𑀣𑀸’’𑀢𑀺 𑀫𑀼𑀔𑁂𑀦 𑀲𑀁𑀯𑀺𑀤𑀳𑀢𑀺. 𑀏𑀯𑀫𑁂𑀯 𑀲𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀕𑀦𑁆𑀣𑀁 𑀯𑀸 𑀥𑀼𑀢𑀕𑀼𑀡𑀁 𑀯𑀸 𑀅𑀦𑁆𑀢𑀫𑀲𑁄 𑀅𑀭𑀜𑁆𑀜𑀯𑀸𑀲𑀫𑀢𑁆𑀢𑀓𑀫𑁆𑀧𑀺 𑀫𑀳𑀸𑀚𑀦𑀲𑁆𑀲 𑀚𑀸𑀦𑀦𑁆𑀢𑀲𑁆𑀲𑁂𑀯 𑀲𑀫𑁆𑀪𑀸𑀯𑁂𑀢𑀼𑀓𑀸𑀫𑁄 ¶ 𑀳𑁄𑀢𑀺, 𑀲𑀫𑁆𑀪𑀸𑀯𑁂𑀢𑁆𑀯𑀸 𑀘 𑀧𑀦 𑀲𑀓𑀝𑁂𑀳𑀺𑀧𑀺 𑀉𑀧𑀦𑀻𑀢𑁂 𑀧𑀘𑁆𑀘𑀬𑁂 ‘𑀅𑀮’𑀦𑁆𑀢𑀺 𑀅𑀯𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀬𑁄 𑀳𑀺 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑀸 𑁋 𑀅𑀕𑁆𑀕𑀺 𑀉𑀧𑀸𑀤𑀸𑀦𑁂𑀦, 𑀲𑀫𑀼𑀤𑁆𑀤𑁄 𑀉𑀤𑀓𑁂𑀦, 𑀫𑀳𑀺𑀘𑁆𑀙𑁄 𑀧𑀘𑁆𑀘𑀬𑁂𑀳𑀻𑀢𑀺.

𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀩𑀳𑀼𑀓𑁂 𑀧𑀘𑁆𑀘𑀬𑁂 𑀤𑁂𑀦𑁆𑀢𑁂, 𑀢𑀬𑁄 𑀧𑁂𑀢𑁂 𑀦 𑀧𑀽𑀭𑀬𑁂.

𑀫𑀳𑀺𑀘𑁆𑀙𑀧𑀼𑀕𑁆𑀕𑀮𑁄 ¶ 𑀳𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀫𑀦𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀕𑁂𑀯 𑀉𑀧𑀝𑁆𑀞𑀸𑀓𑀸𑀦𑀁.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀏𑀓𑁄 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀧𑀺𑀝𑁆𑀞𑀧𑀽𑀯𑁂 𑀧𑀺𑀬𑀸𑀬𑀢𑀺. 𑀅𑀣𑀲𑁆𑀲 𑀫𑀸𑀢𑀸 𑀧𑀝𑀺𑀧𑀢𑁆𑀢𑀺𑀁 𑀯𑀻𑀫𑀁𑀲𑀫𑀸𑀦𑀸 ‘𑀲𑀘𑁂 𑀫𑁂 𑀧𑀼𑀢𑁆𑀢𑁄 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀲𑀓𑀮𑀫𑁆𑀧𑀺 𑀦𑀁 𑀢𑁂𑀫𑀸𑀲𑀁 𑀧𑀽𑀯𑁂𑀳𑁂𑀯 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀭𑀺𑀯𑀻𑀫𑀁𑀲𑀫𑀸𑀦𑀸 𑀧𑀞𑀫𑀁 𑀏𑀓𑀁 𑀧𑀽𑀯𑀁 𑀅𑀤𑀸𑀲𑀺, 𑀢𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀤𑀼𑀢𑀺𑀬𑀁, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀝𑁆𑀞𑀺𑀢𑁂 𑀢𑀢𑀺𑀬𑀁. 𑀤𑀳𑀭𑁄 ‘𑀅𑀮’𑀦𑁆𑀢𑀺 𑀅𑀯𑀢𑁆𑀯𑀸 𑀔𑀸𑀤𑀺𑀬𑁂𑀯. 𑀫𑀸𑀢𑀸 𑀢𑀲𑁆𑀲 𑀅𑀫𑀢𑁆𑀢𑀜𑁆𑀜𑀼𑀪𑀸𑀯𑀁 𑀜𑀢𑁆𑀯𑀸 ‘𑀅𑀚𑁆𑀚𑁂𑀯 𑀫𑁂 𑀧𑀼𑀢𑁆𑀢𑁂𑀦 𑀲𑀓𑀮𑀢𑁂𑀫𑀸𑀲𑀲𑁆𑀲 𑀧𑀽𑀯𑀸 𑀔𑀸𑀤𑀺𑀢𑀸’𑀢𑀺 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑀧𑀽𑀯𑀫𑁆𑀧𑀺 𑀦 𑀅𑀤𑀸𑀲𑀺.

𑀢𑀺𑀲𑁆𑀲𑀫𑀳𑀸𑀭𑀸𑀚𑀸𑀧𑀺 𑀤𑁂𑀯𑀲𑀺𑀓𑀁 𑀘𑁂𑀢𑀺𑀬𑀧𑀩𑁆𑀩𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀤𑀫𑀸𑀦𑁄 ‘𑀫𑀳𑀸𑀭𑀸𑀚, 𑀓𑀺𑀁 𑀏𑀓𑀫𑁂𑀯 𑀞𑀸𑀦𑀁 𑀪𑀚𑀲𑀺? 𑀓𑀺𑀁 𑀅𑀜𑁆𑀜𑀢𑁆𑀣 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀚𑀸𑀦𑀧𑀤𑁂𑀳𑀺 𑀯𑀼𑀢𑁆𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀦𑀼𑀭𑀸𑀥𑀧𑀼𑀭𑁂 𑀫𑀳𑀸𑀤𑀸𑀦𑀁 𑀤𑀸𑀧𑁂𑀲𑀺. 𑀏𑀓𑀪𑀺𑀓𑁆𑀔𑀼𑀧𑀺 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀦 𑀅𑀜𑁆𑀜𑀸𑀲𑀺. 𑀏𑀓𑀫𑁂𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑁆𑀯𑁂 𑀢𑀬𑁄 𑀚𑀦𑀸 𑀉𑀓𑁆𑀔𑀺𑀧𑀺𑀁𑀲𑀼. 𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀺𑀬𑀧𑀩𑁆𑀩𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀁 𑀆𑀕𑀢𑀓𑀸𑀮𑁂 ‘‘𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀆𑀳. ‘‘𑀅𑀮𑀁, 𑀫𑀳𑀸𑀭𑀸𑀚, 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀪𑀺𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀏𑀓𑀪𑀺𑀓𑁆𑀔𑀼𑀧𑀺 𑀧𑀢𑁆𑀢𑀁 𑀦 𑀅𑀤𑀸𑀲𑀺. 𑀲𑀩𑁆𑀩𑁂 𑀧𑀫𑀸𑀡𑀬𑀼𑀢𑁆𑀢𑀓𑀫𑁂𑀯 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀆𑀳 𑁋 ‘‘𑀧𑀲𑁆𑀲𑀣 𑀢𑀼𑀫𑁆𑀳𑀸𑀓𑀁 𑀪𑀺𑀓𑁆𑀔𑀽𑀲𑀼 𑀏𑀓𑁄𑀧𑀺 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀳𑀺𑀬𑁆𑀬𑁄 𑀓𑀺𑀜𑁆𑀘𑀺 𑀅𑀯𑀲𑁂𑀲𑀁 𑀦𑀸𑀳𑁄𑀲𑀺. 𑀅𑀚𑁆𑀚 𑀕𑀳𑀺𑀢𑀁 𑀫𑀦𑁆𑀤𑀁, 𑀅𑀯𑀲𑁂𑀲𑀫𑁂𑀯 𑀩𑀳𑀽’’𑀢𑀺 𑀢𑁂𑀲𑀁 𑀫𑀢𑁆𑀢𑀜𑁆𑀜𑀼𑀢𑀸𑀬 𑀅𑀢𑁆𑀢𑀫𑀦𑁄 𑀇𑀢𑀭𑁂𑀲𑀜𑁆𑀘 𑀅𑀫𑀢𑁆𑀢𑀜𑁆𑀜𑀼𑀢𑀸𑀬 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.

𑁮𑁫𑁧. 𑀧𑀸𑀧𑀺𑀘𑁆𑀙𑀢𑀸𑀦𑀺𑀤𑁆𑀤𑁂𑀲𑁂 ¶ 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺𑀆𑀤𑀻𑀲𑀼 𑀏𑀯𑀁 𑀇𑀘𑁆𑀙𑀦𑁆𑀢𑁄 𑀓𑀺𑀁 𑀓𑀭𑁄𑀢𑀺? 𑀅𑀲𑁆𑀲𑀤𑁆𑀥𑁄 𑀲𑀤𑁆𑀥𑀸𑀓𑀸𑀭𑀁 𑀤𑀲𑁆𑀲𑁂𑀢𑀺; 𑀤𑀼𑀲𑁆𑀲𑀻𑀮𑀸𑀤𑀬𑁄 𑀲𑀻𑀮𑀯𑀦𑁆𑀢𑀸𑀤𑀻𑀦𑀁 𑀆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀓𑀣𑀁? 𑀅𑀲𑁆𑀲𑀤𑁆𑀥𑁄 ¶ 𑀢𑀸𑀯 𑀫𑀳𑀸𑀫𑀳𑀤𑀺𑀯𑀲𑁂 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀁 𑀆𑀕𑀫𑀦𑀯𑁂𑀮𑀸𑀬 𑀲𑀫𑁆𑀫𑀚𑁆𑀚𑀦𑀺𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀚𑁆𑀚𑀢𑀺, 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀫𑀦𑀼𑀲𑁆𑀲𑁂𑀳𑀺 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀕𑀘𑁆𑀙𑀢𑀺, 𑀢𑀢𑁆𑀣𑀸𑀧𑀺 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀯𑀸𑀮𑀺𑀓𑀁 𑀲𑀫𑀁 𑀓𑀭𑁄𑀢𑀺, 𑀆𑀲𑀦𑀸𑀦𑀺 𑀥𑁄𑀯𑀢𑀺, 𑀩𑁄𑀥𑀺𑀫𑁆𑀳𑀺 𑀉𑀤𑀓𑀁 𑀲𑀺𑀜𑁆𑀘𑀢𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘𑀦𑀢𑁆𑀣𑀺 𑀫𑀜𑁆𑀜𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀯𑀺𑀳𑀸𑀭𑀚𑀕𑁆𑀕𑀦𑀓𑁄, 𑀅𑀬𑀫𑁂𑀯 𑀇𑀫𑀁 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀢𑀺, 𑀲𑀤𑁆𑀥𑁄 𑀣𑁂𑀭𑁄’𑀢𑀺 𑀕𑀫𑀦𑀓𑀸𑀮𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀤𑀼𑀲𑁆𑀲𑀻𑀮𑁄𑀧𑀺 ¶ 𑀉𑀧𑀝𑁆𑀞𑀸𑀓𑀸𑀦𑀁 𑀲𑀫𑁆𑀫𑀼𑀔𑁂 𑀯𑀺𑀦𑀬𑀥𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀪𑀦𑁆𑀢𑁂, 𑀫𑀬𑀺 𑀕𑀘𑁆𑀙𑀦𑁆𑀢𑁂 𑀕𑁄𑀡𑁄 𑀉𑀩𑁆𑀩𑀺𑀕𑁆𑀕𑁄. 𑀢𑁂𑀦 𑀥𑀸𑀯𑀢𑀸 𑀢𑀺𑀡𑀸𑀦𑀺 𑀙𑀺𑀦𑁆𑀦𑀸𑀦𑀺. 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲 𑀫𑁂 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺. 𑀘𑀗𑁆𑀓𑀫𑀦𑁆𑀢𑀲𑁆𑀲 𑀫𑁂 𑀧𑀸𑀡𑀓𑀸 𑀫𑀻𑀬𑀦𑁆𑀢𑀺. 𑀔𑁂𑀴𑀁 𑀧𑀸𑀢𑁂𑀦𑁆𑀢𑀲𑁆𑀲 𑀅𑀲𑀢𑀺𑀬𑀸 𑀢𑀺𑀡𑀫𑀢𑁆𑀣𑀓𑁂 𑀧𑀢𑀢𑀺; 𑀢𑀢𑁆𑀣 𑀢𑀢𑁆𑀣 𑀓𑀺𑀁 𑀳𑁄𑀢𑀻’’𑀢𑀺? ‘‘𑀅𑀦𑀸𑀧𑀢𑁆𑀢𑀺, 𑀆𑀯𑀼𑀲𑁄, 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀭𑀼𑀓𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺; 𑀲𑀼𑀝𑁆𑀞𑀼 𑀯𑀻𑀫𑀁𑀲𑀣𑀸’’𑀢𑀺 𑀪𑀡𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 ‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀏𑀢𑁆𑀢𑀓𑁂𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺! 𑀅𑀜𑁆𑀜𑀲𑁆𑀫𑀺𑀁 𑀑𑀴𑀸𑀭𑀺𑀓𑁂 𑀓𑀺𑀁 𑀦𑀸𑀫 𑀓𑀭𑀺𑀲𑁆𑀲𑀢𑀺; 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑀺𑀲𑁄 𑀲𑀻𑀮𑀯𑀸𑀢𑀺 𑀧𑀲𑀦𑁆𑀦𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀅𑀧𑁆𑀧𑀲𑁆𑀲𑀼𑀢𑁄𑀧𑀺 𑀉𑀧𑀝𑁆𑀞𑀸𑀓𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀅𑀲𑀼𑀓𑁄 𑀢𑀺𑀧𑀺𑀝𑀓𑀥𑀭𑁄, 𑀅𑀲𑀼𑀓𑁄 𑀘𑀢𑀼𑀦𑀺𑀓𑀸𑀬𑀺𑀓𑁄 𑀫𑀬𑁆𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀫𑀫 𑀲𑀦𑁆𑀢𑀺𑀓𑁂 𑀢𑁂𑀳𑀺 𑀥𑀫𑁆𑀫𑁄 𑀉𑀕𑁆𑀕𑀳𑀺𑀢𑁄’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 ‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁂𑀦 𑀲𑀤𑀺𑀲𑁄 𑀩𑀳𑀼𑀲𑁆𑀲𑀼𑀢𑁄 𑀦𑀢𑁆𑀣𑀺, 𑀏𑀢𑀲𑁆𑀲 𑀓𑀺𑀭 𑀲𑀦𑁆𑀢𑀺𑀓𑁂 𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘 𑀥𑀫𑁆𑀫𑁄 𑀉𑀕𑁆𑀕𑀳𑀺𑀢𑁄’𑀢𑀺 𑀧𑀲𑀦𑁆𑀦𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀲𑀗𑁆𑀕𑀡𑀺𑀓𑀸𑀭𑀸𑀫𑁄𑀧𑀺 𑀫𑀳𑀸𑀫𑀳𑀤𑀺𑀯𑀲𑁂 𑀤𑀻𑀖𑀧𑀻𑀞𑀜𑁆𑀘 𑀅𑀧𑀲𑁆𑀲𑀬𑀜𑁆𑀘 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀢𑀺. 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 ‘‘𑀣𑁂𑀭𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺. ‘‘𑀕𑀡𑁆𑀞𑀺𑀓𑀧𑀼𑀢𑁆𑀢𑀸 𑀦𑀸𑀫 𑀕𑀡𑁆𑀞𑀺𑀓𑀸 𑀏𑀯 𑀳𑁄𑀦𑁆𑀢𑀺. 𑀢𑁂𑀦 𑀣𑁂𑀭𑁄 𑀏𑀯𑀭𑀽𑀧𑁂 𑀓𑀸𑀮𑁂 𑀇𑀥 𑀦 𑀦𑀺𑀲𑀻𑀤𑀢𑀺, 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀤𑀺𑀯𑀸𑀝𑁆𑀞𑀸𑀦𑁂 𑀤𑀻𑀖𑀘𑀗𑁆𑀓𑀫𑁂 𑀯𑀺𑀳𑀭𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑁄𑀧𑀺 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀦𑀮𑀸𑀝𑁂 𑀫𑀓𑁆𑀓𑀝𑀲𑀼𑀢𑁆𑀢𑀁 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸 𑀧𑀻𑀞𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀫𑁆𑀫 𑀧𑀭𑀺𑀯𑁂𑀡𑀤𑁆𑀯𑀸𑀭𑁂 𑀦𑀺𑀲𑀻𑀤𑀢𑀺. 𑀫𑀦𑀼𑀲𑁆𑀲𑀸 ‘‘𑀓𑀳𑀁, 𑀪𑀦𑁆𑀢𑁂, 𑀕𑀢𑀢𑁆𑀣? 𑀆𑀕𑀦𑁆𑀢𑁆𑀯𑀸 𑀦 𑀅𑀤𑁆𑀤𑀲𑀫𑁆𑀳𑀸’’𑀢𑀺 𑀯𑀤𑀦𑁆𑀢𑀺. ‘‘𑀉𑀧𑀸𑀲𑀓𑀸, 𑀅𑀦𑁆𑀢𑁄𑀯𑀺𑀳𑀸𑀭𑁄 𑀆𑀓𑀺𑀡𑁆𑀡𑁄; 𑀤𑀳𑀭𑀲𑀸𑀫𑀡𑁂𑀭𑀸𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑀫𑁂𑀢𑀁 𑀲𑀝𑁆𑀞𑀺𑀳𑀢𑁆𑀣𑀘𑀗𑁆𑀓𑀫𑁂 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀫𑁆𑀳𑀸’’𑀢𑀺 𑀅𑀢𑁆𑀢𑀦𑁄 𑀧𑀯𑀺𑀯𑀺𑀢𑁆𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀺.

𑀓𑀼𑀲𑀻𑀢𑁄𑀧𑀺 𑀉𑀧𑀝𑁆𑀞𑀸𑀓𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀉𑀧𑀸𑀲𑀓𑀸, 𑀢𑀼𑀫𑁆𑀳𑁂𑀳𑀺 𑀉𑀓𑁆𑀓𑀸𑀧𑀸𑀢𑁄 𑀤𑀺𑀝𑁆𑀞𑁄’’𑀢𑀺 𑀯𑀤𑀢𑀺. ‘‘𑀦 ¶ 𑀧𑀲𑁆𑀲𑀸𑀫, 𑀪𑀦𑁆𑀢𑁂; 𑀓𑀸𑀬 𑀯𑁂𑀮𑀸𑀬 𑀅𑀳𑁄𑀲𑀻’’𑀢𑀺 ¶ 𑀘 𑀧𑀼𑀝𑁆𑀞𑁄 ‘‘𑀅𑀫𑁆𑀳𑀸𑀓𑀁 𑀘𑀗𑁆𑀓𑀫𑀦𑀯𑁂𑀮𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀪𑀽𑀫𑀺𑀘𑀸𑀮𑀲𑀤𑁆𑀤𑀁 𑀅𑀲𑁆𑀲𑀼𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀢𑀺. ‘‘𑀦 𑀲𑀼𑀡𑀸𑀫, 𑀪𑀦𑁆𑀢𑁂; 𑀓𑀸𑀬 𑀯𑁂𑀮𑀸𑀬𑀸’’𑀢𑀺 𑀧𑀼𑀝𑁆𑀞𑁄 ‘‘𑀫𑀚𑁆𑀛𑀺𑀫𑀬𑀸𑀫𑁂 𑀅𑀫𑁆𑀳𑀸𑀓𑀁 𑀆𑀮𑀫𑁆𑀩𑀦𑀨𑀮𑀓𑀁 𑀅𑀧𑀲𑁆𑀲𑀸𑀬 𑀞𑀺𑀢𑀓𑀸𑀮𑁂’’𑀢𑀺 𑀯𑀢𑁆𑀯𑀸 ‘‘𑀫𑀳𑀸𑀑𑀪𑀸𑀲𑁄 𑀅𑀳𑁄𑀲𑀺; 𑀲𑁄 𑀯𑁄 𑀤𑀺𑀝𑁆𑀞𑁄’’𑀢𑀺 𑀧𑀼𑀘𑁆𑀙𑀢𑀺. ‘‘𑀓𑀸𑀬 𑀯𑁂𑀮𑀸𑀬, 𑀪𑀦𑁆𑀢𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀘𑀗𑁆𑀓𑀫𑀫𑁆𑀳𑀸 𑀑𑀢𑀭𑀡𑀓𑀸𑀮𑁂’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 ¶ ‘𑀅𑀫𑁆𑀳𑀸𑀓𑀁 𑀣𑁂𑀭𑁄 𑀢𑀻𑀲𑀼𑀧𑀺 𑀬𑀸𑀫𑁂𑀲𑀼 𑀘𑀗𑁆𑀓𑀫𑁂𑀬𑁂𑀯 𑀳𑁄𑀢𑀺; 𑀦𑀢𑁆𑀣𑀺 𑀅𑀬𑁆𑀬𑁂𑀦 𑀲𑀤𑀺𑀲𑁄 𑀆𑀭𑀤𑁆𑀥𑀯𑀻𑀭𑀺𑀬𑁄’𑀢𑀺 𑀧𑀲𑀦𑁆𑀦𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀫𑀼𑀝𑁆𑀞𑀲𑁆𑀲𑀢𑀻𑀧𑀺 𑀉𑀧𑀝𑁆𑀞𑀸𑀓𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀫𑀬𑀸 𑀅𑀲𑀼𑀓𑀓𑀸𑀮𑁂 𑀦𑀸𑀫 𑀤𑀻𑀖𑀦𑀺𑀓𑀸𑀬𑁄 𑀉𑀕𑁆𑀕𑀳𑀺𑀢𑁄, 𑀅𑀲𑀼𑀓𑀓𑀸𑀮𑁂 𑀫𑀚𑁆𑀛𑀺𑀫𑁄, 𑀲𑀁𑀬𑀼𑀢𑁆𑀢𑀓𑁄, 𑀅𑀗𑁆𑀕𑀼𑀢𑁆𑀢𑀭𑀺𑀓𑁄; 𑀅𑀦𑁆𑀢𑀭𑀸 𑀑𑀮𑁄𑀓𑀦𑀁 𑀦𑀸𑀫 𑀦𑀢𑁆𑀣𑀺, 𑀇𑀘𑁆𑀙𑀺𑀢𑀺𑀘𑁆𑀙𑀢𑀝𑁆𑀞𑀸𑀦𑁂 𑀫𑀼𑀔𑀸𑀭𑀼𑀴𑁆𑀳𑁄𑀯 𑀢𑀦𑁆𑀢𑀺 𑀆𑀕𑀘𑁆𑀙𑀢𑀺; 𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀏𑀴𑀓𑀸 𑀯𑀺𑀬 𑀫𑀼𑀔𑀁 𑀨𑀦𑁆𑀤𑀸𑀧𑁂𑀦𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 ‘𑀦𑀢𑁆𑀣𑀺 𑀅𑀬𑁆𑀬𑁂𑀦 𑀲𑀤𑀺𑀲𑁄 𑀉𑀧𑀝𑁆𑀞𑀺𑀢𑀲𑀢𑀻’𑀢𑀺 𑀧𑀲𑀦𑁆𑀦𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀅𑀲𑀫𑀸𑀳𑀺𑀢𑁄𑀧𑀺 𑀉𑀧𑀝𑁆𑀞𑀸𑀓𑀸𑀦𑀁 𑀲𑀫𑁆𑀫𑀼𑀔𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘𑀓𑀲𑀺𑀡𑀁 𑀦𑀸𑀫 𑀓𑀣𑀁 𑀪𑀸𑀯𑁂𑀢𑀺? 𑀓𑀺𑀢𑁆𑀢𑀓𑁂𑀦 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺? 𑀓𑀺𑀢𑁆𑀢𑀓𑁂𑀦 𑀉𑀧𑀘𑀸𑀭𑁄? 𑀓𑀺𑀢𑁆𑀢𑀓𑁂𑀦 𑀅𑀧𑁆𑀧𑀦𑀸? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀓𑀢𑀺 𑀅𑀗𑁆𑀕𑀸𑀦𑀺? 𑀤𑀼𑀢𑀺𑀬𑀲𑁆𑀲 𑀢𑀢𑀺𑀬𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀓𑀢𑀺 𑀅𑀗𑁆𑀕𑀸𑀦𑀺’’𑀢𑀺 𑀧𑀼𑀘𑁆𑀙𑀢𑀺. 𑀢𑁂𑀳𑀺 𑀅𑀢𑁆𑀢𑀦𑁄 𑀉𑀕𑁆𑀕𑀳𑀺𑀢𑀸𑀦𑀼𑀭𑀽𑀧𑁂𑀦 𑀓𑀣𑀺𑀢𑀓𑀸𑀮𑁂 𑀲𑀺𑀢𑀁 𑀓𑀢𑁆𑀯𑀸 ‘𑀓𑀺𑀁, 𑀆𑀯𑀼𑀲𑁄, 𑀏𑀯𑀁 𑀦 𑀳𑁄𑀲𑀻’𑀢𑀺 𑀯𑀼𑀢𑁆𑀢𑁂 ‘𑀯𑀝𑁆𑀝𑀢𑀺, 𑀪𑀦𑁆𑀢𑁂’𑀢𑀺 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀁 𑀲𑀽𑀘𑁂𑀢𑀺. 𑀫𑀦𑀼𑀲𑁆𑀲𑀸 ‘𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀅𑀬𑁆𑀬𑁄’𑀢𑀺 𑀧𑀲𑀦𑁆𑀦𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀤𑀼𑀧𑁆𑀧𑀜𑁆𑀜𑁄𑀧𑀺 𑀉𑀧𑀝𑁆𑀞𑀸𑀓𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑁂 𑀧𑀜𑁆𑀘𑀢𑁆𑀢𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀳𑀺𑀤𑁆𑀥𑀺𑀬𑀸𑀯 𑀫𑀕𑁆𑀕𑁄 𑀆𑀕𑀢𑁄. 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀅𑀫𑁆𑀳𑀸𑀓𑀁 𑀦 𑀤𑀼𑀓𑁆𑀓𑀭𑀸. 𑀧𑀭𑀺𑀬𑀢𑁆𑀢𑀺𑀯𑀸𑀯𑀝𑁄 𑀧𑀦 𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀧𑀭𑀺𑀬𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑀬𑀺𑀫𑁆𑀳𑀸’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑁄 𑀫𑀳𑀸𑀧𑀜𑁆𑀜𑀢𑀁 𑀤𑀻𑀧𑁂𑀢𑀺. 𑀏𑀯𑀁 𑀯𑀤𑀦𑁆𑀢𑁄 𑀧𑀦𑀲𑁆𑀲 𑀲𑀸𑀲𑀦𑁂 𑀧𑀳𑀸𑀭𑀁 𑀤𑁂𑀢𑀺. 𑀇𑀫𑀺𑀦𑀸 𑀲𑀤𑀺𑀲𑁄 𑀫𑀳𑀸𑀘𑁄𑀭𑁄 𑀦𑀸𑀫 𑀦𑀢𑁆𑀣𑀺. 𑀦 𑀳𑀺 𑀧𑀭𑀺𑀬𑀢𑁆𑀢𑀺𑀥𑀭𑁄 𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺. 𑀅𑀔𑀻𑀡𑀸𑀲𑀯𑁄𑀧𑀺 𑀕𑀸𑀫𑀤𑀸𑀭𑀓𑁂 𑀤𑀺𑀲𑁆𑀯𑀸 ‘𑀢𑀼𑀫𑁆𑀳𑀸𑀓𑀁 𑀫𑀸𑀢𑀸𑀧𑀺𑀢𑀭𑁄 𑀅𑀫𑁆𑀳𑁂 𑀓𑀺𑀁 𑀯𑀤𑀦𑁆𑀢𑀻’’𑀢𑀺? ‘‘𑀅𑀭𑀳𑀸𑀢𑀺 ¶ 𑀯𑀤𑀦𑁆𑀢𑀺, 𑀪𑀦𑁆𑀢𑁂’’𑀢𑀺. ‘𑀬𑀸𑀯 𑀙𑁂𑀓𑀸 𑀕𑀳𑀧𑀢𑀺𑀓𑀸, 𑀦 𑀲𑀓𑁆𑀓𑀸 𑀯𑀜𑁆𑀘𑁂𑀢𑀼’𑀦𑁆𑀢𑀺 𑀅𑀢𑁆𑀢𑀦𑁄 𑀔𑀻𑀡𑀸𑀲𑀯𑀪𑀸𑀯𑀁 𑀤𑀻𑀧𑁂𑀢𑀺.

𑀅𑀜𑁆𑀜𑁂𑀧𑀺 ¶ 𑀘𑁂𑀢𑁆𑀣 𑀘𑀸𑀝𑀺𑀅𑀭𑀳𑀦𑁆𑀢𑀧𑀸𑀭𑁄𑀳𑀅𑀭𑀳𑀦𑁆𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀓𑁄 𑀓𑀺𑀭 𑀓𑀼𑀳𑀓𑁄 𑀅𑀦𑁆𑀢𑁄𑀕𑀩𑁆𑀪𑁂 𑀘𑀸𑀝𑀺𑀁 𑀦𑀺𑀔𑀡𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀆𑀕𑀫𑀦𑀓𑀸𑀮𑁂 𑀧𑀯𑀺𑀲𑀢𑀺. 𑀫𑀦𑀼𑀲𑁆𑀲𑀸 ‘𑀓𑀳𑀁 𑀣𑁂𑀭𑁄’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘𑀅𑀦𑁆𑀢𑁄𑀕𑀩𑁆𑀪𑁂’𑀢𑀺 𑀘 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀸𑀧𑀺 𑀅𑀤𑀺𑀲𑁆𑀯𑀸 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 ‘𑀦𑀢𑁆𑀣𑀺 𑀣𑁂𑀭𑁄’𑀢𑀺 𑀯𑀤𑀦𑁆𑀢𑀺. ‘𑀅𑀦𑁆𑀢𑁄𑀕𑀩𑁆𑀪𑁂𑀬𑁂𑀯 𑀣𑁂𑀭𑁄’𑀢𑀺 𑀘 𑀯𑀼𑀢𑁆𑀢𑁂 𑀧𑀼𑀦 𑀧𑀯𑀺𑀲𑀦𑁆𑀢𑀺. 𑀣𑁂𑀭𑁄 𑀘𑀸𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀢𑁄 𑀢𑁂𑀳𑀺 ‘𑀫𑀬𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀅𑀤𑀺𑀲𑁆𑀯𑀸 𑀦𑀺𑀓𑁆𑀔𑀦𑁆𑀢𑀸, 𑀓𑀳𑀁 𑀢𑀼𑀫𑁆𑀳𑁂 𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 ‘𑀲𑀫𑀡𑀸 𑀦𑀸𑀫 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀻’𑀢𑀺 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀔𑀻𑀡𑀸𑀲𑀯𑀪𑀸𑀯𑀁 𑀤𑀻𑀧𑁂𑀢𑀺.

𑀅𑀧𑀭𑁄𑀧𑀺 𑀓𑀼𑀳𑀓𑁄 𑀏𑀓𑀲𑁆𑀫𑀺𑀁 𑀧𑀩𑁆𑀩𑀢𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀢𑀺. 𑀧𑀡𑁆𑀡𑀲𑀸𑀮𑀸𑀬 𑀘 𑀧𑀘𑁆𑀙𑀢𑁄 𑀧𑀧𑀸𑀢𑀝𑁆𑀞𑀸𑀦𑁂 𑀏𑀓𑁄 𑀓𑀘𑁆𑀙𑀓𑀭𑀼𑀓𑁆𑀔𑁄 𑀅𑀢𑁆𑀣𑀺. 𑀢𑀲𑁆𑀲 𑀧𑀸𑀭𑁄𑀳𑁄 𑀕𑀦𑁆𑀢𑁆𑀯𑀸 𑀧𑀭𑀪𑀸𑀕𑁂 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄. 𑀫𑀦𑀼𑀲𑁆𑀲𑀸 𑀫𑀕𑁆𑀕𑁂𑀦𑀸𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀲𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀸𑀭𑁄𑀳𑁂𑀦 𑀑𑀢𑀭𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁄 𑀫𑀦𑀼𑀲𑁆𑀲𑁂𑀳𑀺 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 ‘𑀓𑀢𑀭𑁂𑀦 𑀫𑀕𑁆𑀕𑁂𑀦 𑀆𑀕𑀢𑀢𑁆𑀣, 𑀪𑀦𑁆𑀢𑁂’𑀢𑀺 𑀧𑀼𑀝𑁆𑀞𑁄 ‘𑀲𑀫𑀡𑀸𑀦𑀁 𑀆𑀕𑀢𑀫𑀕𑁆𑀕𑁄 𑀦𑀸𑀫 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑁂𑀦𑁂𑀯 𑀆𑀕𑀘𑁆𑀙𑀦𑁆𑀢𑀻’𑀢𑀺 𑀯𑀘𑀦𑁂𑀦 𑀔𑀻𑀡𑀸𑀲𑀯𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀁 𑀧𑀦 𑀓𑀼𑀳𑀓𑀁 𑀏𑀓𑁄 𑀯𑀺𑀤𑁆𑀥𑀓𑀡𑁆𑀡𑁄 𑀜𑀢𑁆𑀯𑀸 ‘𑀧𑀭𑀺𑀕𑁆𑀕𑀳𑁂𑀲𑁆𑀲𑀸𑀫𑀺 𑀦’𑀦𑁆𑀢𑀺 𑀏𑀓𑀤𑀺𑀯𑀲𑀁 𑀧𑀸𑀭𑁄𑀳𑁂𑀦 𑀑𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀙𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦 𑀞𑀧𑁂𑀲𑀺. 𑀲𑁄 ‘𑀧𑀸𑀭𑁄𑀳𑀢𑁄 𑀑𑀢𑀭𑀺𑀲𑁆𑀲𑀸𑀫𑀻’𑀢𑀺 ‘𑀞’𑀦𑁆𑀢𑀺 𑀧𑀢𑀺𑀢𑁄, 𑀫𑀢𑁆𑀢𑀺𑀓𑀸 𑀧𑀢𑁆𑀢𑁄 𑀪𑀺𑀚𑁆𑀚𑀺. 𑀲𑁄 ‘𑀜𑀸𑀢𑁄𑀫𑁆𑀳𑀻’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺. 𑀧𑀸𑀧𑀺𑀘𑁆𑀙𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸, 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸; 𑀏𑀢𑀁 𑀧𑀸𑀧𑀺𑀘𑁆𑀙𑀢𑀸𑀮𑀓𑁆𑀔𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁫𑁨. 𑀲𑀺𑀗𑁆𑀕𑀦𑀺𑀤𑁆𑀤𑁂𑀲𑁂 𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀺𑀗𑁆𑀕𑀁; 𑀦𑀸𑀕𑀭𑀺𑀓𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀲𑀺𑀗𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀺𑀗𑁆𑀕𑀸𑀭𑀪𑀸𑀯𑁄 𑀲𑀺𑀗𑁆𑀕𑀸𑀭𑀢𑀸, 𑀲𑀺𑀗𑁆𑀕𑀸𑀭𑀓𑀭𑀡𑀸𑀓𑀸𑀭𑁄 𑀯𑀸. 𑀘𑀢𑀼𑀭𑀪𑀸𑀯𑁄 𑀘𑀢𑀼𑀭𑀢𑀸. 𑀢𑀣𑀸 𑀘𑀸𑀢𑀼𑀭𑀺𑀬𑀁. 𑀧𑀭𑀺𑀓𑁆𑀔𑀢𑀪𑀸𑀯𑁄 𑀧𑀭𑀺𑀓𑁆𑀔𑀢𑀢𑀸; 𑀧𑀭𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀲𑁆𑀲𑁂𑀯 𑀤𑀴𑁆𑀳𑀲𑀺𑀗𑁆𑀕𑀸𑀭𑀪𑀸𑀯𑀲𑁆𑀲𑁂𑀢𑀁 𑀦𑀸𑀫𑀁 ¶ . 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀏𑀯𑀁 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀓𑀺𑀮𑁂𑀲𑀲𑀺𑀗𑁆𑀕𑀸𑀭𑀢𑀸𑀯 𑀓𑀣𑀺𑀢𑀸.

𑁮𑁫𑁩. 𑀢𑀺𑀦𑁆𑀢𑀺𑀡𑀦𑀺𑀤𑁆𑀤𑁂𑀲𑁂 𑀢𑀺𑀦𑁆𑀢𑀺𑀡𑀦𑁆𑀢𑀺 𑀔𑀻𑀬𑀦𑀁. 𑀢𑀺𑀦𑁆𑀢𑀺𑀡𑀸𑀬𑀦𑀸𑀓𑀸𑀭𑁄 𑀢𑀺𑀦𑁆𑀢𑀺𑀡𑀸𑀬𑀦𑀸. 𑀢𑀺𑀦𑁆𑀢𑀺𑀡𑁂𑀦 𑀅𑀬𑀺𑀢𑀲𑁆𑀲 𑀢𑀺𑀦𑁆𑀢𑀺𑀡𑀲𑀫𑀗𑁆𑀕𑀺𑀦𑁄 𑀪𑀸𑀯𑁄 𑀢𑀺𑀦𑁆𑀢𑀺𑀡𑀸𑀬𑀺𑀢𑀢𑁆𑀢𑀁. 𑀮𑁄𑀮𑀼𑀧𑀪𑀸𑀯𑁄 𑀮𑁄𑀮𑀼𑀧𑁆𑀧𑀁. 𑀇𑀢𑀭𑁂 𑀤𑁆𑀯𑁂 ¶ 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀧𑀼𑀘𑁆𑀙𑀜𑁆𑀚𑀺𑀓𑀢𑀸𑀢𑀺 ¶ 𑀮𑀸𑀪𑀮𑀪𑀦𑀓𑀝𑁆𑀞𑀸𑀦𑁂 𑀯𑁂𑀥𑀦𑀸𑀓𑀫𑁆𑀧𑀦𑀸 𑀦𑀻𑀘𑀯𑀼𑀢𑁆𑀢𑀺𑀢𑀸. 𑀲𑀸𑀥𑀼𑀓𑀫𑁆𑀬𑀢𑀸𑀢𑀺 𑀧𑀡𑀻𑀢𑀧𑀡𑀻𑀢𑀸𑀦𑀁 𑀧𑀢𑁆𑀣𑀦𑀸. 𑀏𑀯𑀁 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀲𑀼𑀯𑀸𑀦𑀤𑁄𑀡𑀺𑀬𑀁 𑀓𑀜𑁆𑀚𑀺𑀬𑀁 𑀧𑀺𑀯𑀦𑀓𑀲𑀼𑀦𑀔𑀲𑁆𑀲 𑀅𑀜𑁆𑀜𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀪𑀼𑀪𑀼𑀓𑁆𑀓𑀭𑀡𑀁 𑀯𑀺𑀬 ‘𑀢𑀯 𑀲𑀦𑁆𑀢𑀓𑀁, 𑀫𑀫 𑀲𑀦𑁆𑀢𑀓’𑀦𑁆𑀢𑀺 𑀓𑀺𑀮𑁂𑀲𑀯𑀲𑁂𑀦 𑀔𑀻𑀬𑀦𑀸𑀓𑀸𑀭𑁄 𑀓𑀣𑀺𑀢𑁄.

𑁮𑁫𑁪. 𑀘𑀸𑀧𑀮𑁆𑀬𑀦𑀺𑀤𑁆𑀤𑁂𑀲𑁂 𑀆𑀓𑁄𑀝𑀺𑀢𑀧𑀘𑁆𑀘𑀸𑀓𑁄𑀝𑀺𑀢𑀪𑀸𑀯𑀸𑀤𑀻𑀳𑀺 𑀘𑀻𑀯𑀭𑀲𑁆𑀲 𑀫𑀡𑁆𑀟𑀦𑀸 𑀘𑀻𑀯𑀭𑀫𑀡𑁆𑀟𑀦𑀸. 𑀫𑀡𑀺𑀯𑀡𑁆𑀡𑀘𑁆𑀙𑀯𑀺𑀓𑀭𑀡𑀸𑀤𑀻𑀳𑀺 𑀧𑀢𑁆𑀢𑀲𑁆𑀲 𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸. 𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀳𑀺 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑀲𑁆𑀲 𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸. 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀫𑀦𑀼𑀲𑁆𑀲𑀲𑀭𑀻𑀭𑀲𑁆𑀲. 𑀬𑀣𑀸 𑀳𑀺 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 𑀚𑀭𑀲𑀺𑀗𑁆𑀕𑀸𑀮𑁄𑀢𑁆𑀯𑁂𑀯 𑀊𑀭𑀼𑀧𑁆𑀧𑀫𑀸𑀡𑀸𑀧𑀺 𑀘 𑀕𑀴𑁄𑀘𑀺𑀮𑀢𑀸 𑀧𑀽𑀢𑀺𑀮𑀢𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀏𑀯𑀁 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀫𑀦𑀼𑀲𑁆𑀲𑀓𑀸𑀬𑁄 𑀧𑀽𑀢𑀺𑀓𑀸𑀬𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀭𑀢𑁆𑀢𑀯𑀡𑁆𑀡𑀧𑀡𑁆𑀟𑀼𑀯𑀡𑁆𑀡𑀸𑀤𑀻𑀳𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀻𑀳𑀺 𑀲𑀚𑁆𑀚𑀦𑀸 𑀫𑀡𑁆𑀟𑀦𑀸 𑀦𑀸𑀫. 𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀲𑁂𑀲𑀧𑀭𑀺𑀓𑁆𑀔𑀸𑀭𑀸𑀦𑀁; 𑀅𑀣𑀯𑀸 𑀬𑀸 𑀏𑀲𑀸 𑀘𑀻𑀯𑀭𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸𑀢𑀺 𑀯𑀼𑀢𑁆𑀢𑀸, 𑀲𑀸 𑀢𑁂𑀳𑀺 𑀯𑀸 𑀧𑀭𑀺𑀓𑁆𑀔𑀸𑀭𑁂𑀳𑀺 𑀓𑀸𑀬𑀲𑁆𑀲 𑀫𑀡𑁆𑀟𑀦𑀸 𑀢𑁂𑀲𑀁 𑀯𑀸 𑀩𑀸𑀳𑀺𑀭𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑁂𑀢𑁆𑀯𑀸 𑀞𑀧𑀦𑀯𑀲𑁂𑀦 𑀫𑀡𑁆𑀟𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀡𑁆𑀟𑀦𑀸 𑀯𑀺𑀪𑀽𑀲𑀦𑀸𑀢𑀺 𑀏𑀢𑁆𑀣 𑀊𑀦𑀝𑁆𑀞𑀸𑀦𑀲𑁆𑀲 𑀧𑀽𑀭𑀡𑀯𑀲𑁂𑀦 𑀫𑀡𑁆𑀟𑀦𑀸, 𑀙𑀯𑀺𑀭𑀸𑀕𑀸𑀤𑀺𑀯𑀲𑁂𑀦 𑀯𑀺𑀪𑀽𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀴𑀦𑀸𑀢𑀺 𑀓𑀻𑀴𑀦𑀸. 𑀧𑀭𑀺𑀓𑁂𑀴𑀦𑀸𑀢𑀺 𑀧𑀭𑀺𑀓𑀻𑀴𑀦𑀸. 𑀕𑀺𑀤𑁆𑀥𑀺𑀓𑀢𑀸𑀢𑀺 𑀕𑁂𑀥𑀬𑀼𑀢𑁆𑀢𑀢𑀸. 𑀕𑀺𑀤𑁆𑀥𑀺𑀓𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀧𑀮𑀪𑀸𑀯𑁄 𑀘𑀧𑀮𑀢𑀸. 𑀢𑀣𑀸 𑀘𑀸𑀧𑀮𑁆𑀬𑀁. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀘𑀸𑀧𑀮𑁆𑀬𑀁 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀫𑀸𑀦𑁄 𑀢𑀤𑀳𑀼𑀚𑀸𑀢𑀤𑀸𑀭𑀓𑁄 𑀯𑀺𑀬 𑀳𑁄𑀢𑀺.

𑁮𑁫𑁫. 𑀅𑀲𑀪𑀸𑀕𑀯𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀧𑁆𑀧𑀝𑀺𑀓𑀽𑀮𑀕𑁆𑀕𑀸𑀳𑀺𑀢𑀸𑀢𑀺 𑀅𑀦𑀦𑀼𑀮𑁄𑀫𑀕𑁆𑀕𑀸𑀳𑀺𑀢𑀸. 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑀢𑀸𑀢𑀺 ¶ 𑀯𑀺𑀧𑀘𑁆𑀘𑀦𑀻𑀓𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀓𑀭𑀡𑁂𑀦 𑀲𑀼𑀔𑀸𑀬𑀦𑀸. 𑀅𑀦𑀸𑀤𑀭𑀪𑀸𑀯𑁄 𑀅𑀦𑀸𑀤𑀭𑀺𑀬𑀁. 𑀢𑀣𑀸 𑀅𑀦𑀸𑀤𑀭𑀺𑀬𑀢𑀸. 𑀅𑀕𑀸𑀭𑀯𑀲𑁆𑀲 𑀪𑀸𑀯𑁄 𑀅𑀕𑀸𑀭𑀯𑀢𑀸. 𑀚𑁂𑀝𑁆𑀞𑀓𑀪𑀸𑀯𑀲𑁆𑀲 𑀅𑀓𑀭𑀡𑀁 𑀅𑀧𑁆𑀧𑀢𑀺𑀲𑁆𑀲𑀯𑀢𑀸. 𑀅𑀬𑀁 ¶ 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀲𑀪𑀸𑀕𑀯𑀼𑀢𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑀺; 𑀯𑀺𑀲𑀪𑀸𑀕𑀚𑀻𑀯𑀺𑀓𑀢𑀸𑀢𑀺 𑀅𑀢𑁆𑀣𑁄; 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸 𑀕𑀺𑀮𑀸𑀦𑀁 𑀧𑀝𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀢𑀺; 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀓𑀸𑀭𑀡𑀸 𑀫𑀸𑀢𑀭𑀸 𑀲𑀤𑁆𑀥𑀺𑀁, 𑀫𑀸𑀢𑀼𑀲𑀦𑁆𑀢𑀓𑀲𑁆𑀲 𑀓𑀸𑀭𑀡𑀸 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀢𑀺; 𑀯𑀺𑀲𑀪𑀸𑀕𑀚𑀻𑀯𑀺𑀢𑀁 𑀚𑀻𑀯𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀲𑁆𑀲 𑀓𑀸𑀭𑀡𑀸 𑀚𑁂𑀝𑁆𑀞𑁂𑀦 𑀯𑀸 𑀓𑀦𑀺𑀝𑁆𑀞𑁂𑀦 𑀯𑀸 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀢𑀺, 𑀦𑀺𑀮𑁆𑀮𑀚𑁆𑀚𑀯𑀘𑀦𑀁 𑀯𑀤𑀢𑀺, 𑀆𑀘𑀭𑀺𑀬𑀲𑁆𑀲 𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀦 𑀓𑀭𑁄𑀢𑀺, 𑀕𑀺𑀮𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺, 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀘𑁂𑀢𑀺𑀬𑀤𑀲𑁆𑀲𑀦𑀝𑁆𑀞𑀸𑀦𑁂 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑁄𑀢𑀺, 𑀔𑁂𑀴𑀫𑁆𑀧𑀺 ¶ 𑀲𑀺𑀗𑁆𑀖𑀸𑀡𑀺𑀓𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳 𑀕𑀘𑁆𑀙𑀢𑀺, 𑀩𑀼𑀤𑁆𑀥𑀲𑀸𑀯𑀓𑁂𑀲𑀼 𑀦 𑀮𑀚𑁆𑀚𑀢𑀺, 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀢𑀺, 𑀫𑀸𑀢𑀺𑀫𑀢𑁆𑀢𑀧𑀺𑀢𑀺𑀫𑀢𑁆𑀢𑀸𑀤𑀻𑀲𑀼 𑀕𑀭𑀼𑀝𑁆𑀞𑀸𑀦𑀻𑀬𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀁 𑀦 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀩𑁆𑀩𑀸 𑀧𑁂𑀲𑀸 𑀓𑀺𑀭𑀺𑀬𑀸 𑀫𑀸𑀢𑀭𑀻𑀢𑀺𑀆𑀤𑀻𑀲𑀼𑀧𑀺 𑀯𑀢𑁆𑀣𑀽𑀲𑀼 𑀅𑀲𑀪𑀸𑀕𑀯𑀼𑀢𑁆𑀢𑀺𑀢𑀸 𑀦𑀸𑀫 𑀳𑁄𑀢𑀺.

𑁮𑁫𑁬. 𑀅𑀭𑀢𑀺𑀦𑀺𑀤𑁆𑀤𑁂𑀲𑁂 𑀧𑀦𑁆𑀢𑁂𑀲𑀽𑀢𑀺 𑀤𑀽𑀭𑁂𑀲𑀼 𑀯𑀺𑀯𑀺𑀢𑁆𑀢𑁂𑀲𑀼 𑀯𑀸. 𑀅𑀥𑀺𑀓𑀼𑀲𑀮𑁂𑀲𑀽𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼. 𑀅𑀭𑀢𑀻𑀢𑀺 𑀭𑀢𑀺𑀧𑀝𑀺𑀓𑁆𑀔𑁂𑀧𑁄. 𑀅𑀭𑀢𑀺𑀢𑀸𑀢𑀺 𑀅𑀭𑀫𑀡𑀸𑀓𑀸𑀭𑁄. 𑀅𑀦𑀪𑀺𑀭𑀢𑀻𑀢𑀺 𑀅𑀦𑀪𑀺𑀭𑀢𑀪𑀸𑀯𑁄. 𑀅𑀦𑀪𑀺𑀭𑀫𑀡𑀸𑀢𑀺 𑀅𑀦𑀪𑀺𑀭𑀫𑀡𑀸𑀓𑀸𑀭𑁄. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀸𑀓𑀸𑀭𑁄. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦𑁂𑀯 𑀧𑀭𑀺𑀢𑀲𑁆𑀲𑀦𑀸.

𑁮𑁫𑁭. 𑀢𑀦𑁆𑀤𑀻𑀦𑀺𑀤𑁆𑀤𑁂𑀲𑁂 𑀢𑀦𑁆𑀤𑀻𑀢𑀺 𑀚𑀸𑀢𑀺𑀆𑀮𑀲𑀺𑀬𑀁. 𑀢𑀦𑁆𑀤𑀺𑀬𑀦𑀸𑀢𑀺 𑀢𑀦𑁆𑀤𑀺𑀬𑀦𑀸𑀓𑀸𑀭𑁄. 𑀢𑀦𑁆𑀤𑀺𑀫𑀦𑀓𑀢𑀸𑀢𑀺 𑀢𑀦𑁆𑀤𑀺𑀬𑀸 𑀅𑀪𑀺𑀪𑀽𑀢𑀘𑀺𑀢𑁆𑀢𑀢𑀸. 𑀅𑀮𑀲𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀁. 𑀆𑀮𑀲𑁆𑀬𑀸𑀬𑀦𑀸𑀓𑀸𑀭𑁄 𑀆𑀮𑀲𑁆𑀬𑀸𑀬𑀦𑀸. 𑀅𑀮𑀲𑁆𑀬𑀸𑀬𑀺𑀢𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀸𑀮𑀲𑀺𑀬𑀁 𑀓𑀣𑀺𑀢𑀁.

𑁮𑁫𑁮. 𑀯𑀺𑀚𑀫𑁆𑀪𑀺𑀢𑀸𑀦𑀺𑀤𑁆𑀤𑁂𑀲𑁂 𑀚𑀫𑁆𑀪𑀦𑀸𑀢𑀺 𑀨𑀦𑁆𑀤𑀦𑀸. 𑀧𑀼𑀦𑀧𑁆𑀧𑀼𑀦𑀁 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸. 𑀆𑀦𑀫𑀦𑀸𑀢𑀺 ¶ 𑀧𑀼𑀭𑀢𑁄 𑀦𑀫𑀦𑀸. 𑀯𑀺𑀦𑀫𑀦𑀸𑀢𑀺 𑀧𑀘𑁆𑀙𑀢𑁄 𑀦𑀫𑀦𑀸. 𑀲𑀦𑁆𑀦𑀫𑀦𑀸𑀢𑀺 𑀲𑀫𑀦𑁆𑀢𑀢𑁄 𑀦𑀫𑀦𑀸. 𑀧𑀡𑀫𑀦𑀸𑀢𑀺 𑀬𑀣𑀸 𑀳𑀺 𑀢𑀦𑁆𑀢𑀢𑁄 𑀉𑀝𑁆𑀞𑀺𑀢𑀧𑁂𑀲𑀓𑀸𑀭𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀳𑁂𑀢𑁆𑀯𑀸 𑀉𑀚𑀼𑀓𑀁 𑀓𑀸𑀬𑀁 𑀉𑀲𑁆𑀲𑀸𑀧𑁂𑀢𑀺, 𑀏𑀯𑀁 𑀓𑀸𑀬𑀲𑁆𑀲 𑀉𑀤𑁆𑀥𑀁 𑀞𑀧𑀦𑀸. 𑀩𑁆𑀬𑀸𑀥𑀺𑀬𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀢𑀸. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀨𑀦𑁆𑀤𑀦𑀫𑁂𑀯 𑀓𑀣𑀺𑀢𑀁.

𑁮𑁫𑁯. 𑀪𑀢𑁆𑀢𑀲𑀫𑁆𑀫𑀤𑀦𑀺𑀤𑁆𑀤𑁂𑀲𑁂 ¶ 𑀪𑀼𑀢𑁆𑀢𑀸𑀯𑀺𑀲𑁆𑀲𑀸𑀢𑀺 𑀪𑀼𑀢𑁆𑀢𑀯𑀢𑁄. 𑀪𑀢𑁆𑀢𑀫𑀼𑀘𑁆𑀙𑀸𑀢𑀺 𑀪𑀢𑁆𑀢𑀕𑁂𑀮𑀜𑁆𑀜𑀁; 𑀩𑀮𑀯𑀪𑀢𑁆𑀢𑁂𑀦 𑀳𑀺 𑀫𑀼𑀘𑁆𑀙𑀸𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀪𑀢𑁆𑀢𑀓𑀺𑀮𑀫𑀣𑁄𑀢𑀺 𑀪𑀢𑁆𑀢𑁂𑀦 𑀓𑀺𑀮𑀦𑁆𑀢𑀪𑀸𑀯𑁄. 𑀪𑀢𑁆𑀢𑀧𑀭𑀺𑀴𑀸𑀳𑁄𑀢𑀺 𑀪𑀢𑁆𑀢𑀤𑀭𑀣𑁄. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀧𑀭𑀺𑀴𑀸𑀳𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺, 𑀓𑀸𑀬𑁄 𑀚𑀻𑀭𑀢𑀺. 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀪𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸.

𑁮𑁬𑁦. 𑀘𑁂𑀢𑀲𑁄 𑀮𑀻𑀦𑀢𑁆𑀢𑀦𑀺𑀤𑁆𑀤𑁂𑀲𑁄 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀣𑁄𑀬𑁂𑀯. 𑀇𑀫𑁂𑀳𑀺 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀸𑀓𑀸𑀭𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁬𑁧. 𑀓𑀼𑀳𑀦𑀸𑀦𑀺𑀤𑁆𑀤𑁂𑀲𑁂 ¶ 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑀸𑀢𑀺 𑀮𑀸𑀪𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘 𑀦𑀺𑀲𑁆𑀲𑀺𑀢𑀲𑁆𑀲, 𑀧𑀢𑁆𑀣𑀬𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀸𑀧𑀺𑀘𑁆𑀙𑀲𑁆𑀲𑀸𑀢𑀺 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀓𑀸𑀫𑀲𑁆𑀲. 𑀇𑀘𑁆𑀙𑀸𑀧𑀓𑀢𑀲𑁆𑀲𑀸𑀢𑀺 𑀇𑀘𑁆𑀙𑀸𑀬 𑀅𑀧𑀓𑀢𑀲𑁆𑀲, 𑀉𑀧𑀤𑁆𑀤𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀇𑀢𑁄 𑀧𑀭𑀁 𑀬𑀲𑁆𑀫𑀸 𑀧𑀘𑁆𑀘𑀬𑀧𑀝𑀺𑀲𑁂𑀯𑀦 𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼 𑀆𑀕𑀢𑀁, 𑀢𑀲𑁆𑀫𑀸 𑀢𑀺𑀯𑀺𑀥𑀫𑁆𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦 𑀯𑀸𑀢𑀺 𑀏𑀯𑀫𑀸𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘𑀻𑀯𑀭𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀢𑀤𑀢𑁆𑀣𑀺𑀓𑀲𑁆𑀲𑁂𑀯 𑀲𑀢𑁄 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑀺𑀧𑀦𑁂𑀦, 𑀢𑁂 𑀘 𑀕𑀳𑀧𑀢𑀺𑀓𑁂 𑀅𑀢𑁆𑀢𑀦𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁂 𑀜𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄, 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀢𑀺, 𑀲𑀼𑀮𑀤𑁆𑀥𑀁 𑀯𑀢 𑀦𑁄 𑀅𑀲𑁆𑀲 𑀲𑀘𑁂 𑀅𑀧𑁆𑀧𑀫𑀢𑁆𑀢𑀓𑀁 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀉𑀧𑀦𑁂𑀦𑁆𑀢𑀸𑀦𑀁 𑀢𑀤𑀦𑀼𑀕𑁆𑀕𑀳𑀓𑀸𑀫𑀢𑀁𑀬𑁂𑀯 𑀆𑀯𑀺𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀢𑀢𑁄 𑀧𑀪𑀼𑀢𑀺 𑀅𑀲𑀻𑀢𑀺𑀲𑀓𑀝𑀪𑀸𑀭𑁂𑀳𑀺 𑀉𑀧𑀦𑀸𑀫𑀦𑀳𑁂𑀢𑀼𑀪𑀽𑀢𑀁 𑀯𑀺𑀫𑁆𑀳𑀸𑀧𑀦𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁮𑁭) 𑁋

‘‘𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀦𑁆𑀢𑀺 ¶ 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 𑀘𑀻𑀯𑀭 ¶ …𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦? 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦? 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦? 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀲𑁄𑀲𑀸𑀦𑀺𑀓𑁄 𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦? 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀯𑀸 𑀳𑀭𑀻𑀢𑀓𑀻𑀔𑀡𑁆𑀟𑁂𑀦 𑀯𑀸 𑀑𑀲𑀥𑀁 𑀓𑀭𑁂𑀬𑁆𑀬𑀸𑀢𑀺. 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺, 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺. 𑀢𑀫𑁂𑀦𑀁 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀲𑀫𑀡𑁄 ¶ 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀢𑀯𑀸𑀤𑁄’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀏𑀯𑀫𑀸𑀳 𑁋 ‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺 𑁋 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲…𑀧𑁂… 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄. 𑀲𑀘𑀸𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀣; 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀅𑀧𑀺𑀘 𑀢𑀼𑀫𑁆𑀳𑀸𑀓𑀁 𑀏𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁…𑀧𑁂… 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺.

𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀯𑀸𑀘𑀸𑀬 ¶ 𑀢𑀣𑀸 𑀢𑀣𑀸 𑀯𑀺𑀫𑁆𑀳𑀸𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼 ¶ ? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’𑀢𑀺 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺; ‘𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁, 𑀮𑁄𑀳𑀣𑀸𑀮𑀓𑀁, 𑀥𑀫𑀓𑀭𑀡𑀁, 𑀧𑀭𑀺𑀲𑀸𑀯𑀦𑀁, 𑀓𑀼𑀜𑁆𑀘𑀺𑀓𑀁, 𑀉𑀧𑀸𑀳𑀦𑀁, 𑀓𑀸𑀬𑀩𑀦𑁆𑀥𑀦𑀁, 𑀆𑀬𑁄𑀕𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺; ‘𑀬𑀲𑁆𑀲 𑀏𑀯𑀭𑀽𑀧𑁄 𑀉𑀧𑀚𑁆𑀛𑀸𑀬𑁄, 𑀆𑀘𑀭𑀺𑀬𑁄, 𑀲𑀫𑀸𑀦𑀼𑀧𑀚𑁆𑀛𑀸𑀬𑁄, 𑀲𑀫𑀸𑀦𑀸𑀘𑀭𑀺𑀬𑀓𑁄, 𑀫𑀺𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑁄, 𑀲𑀫𑁆𑀪𑀢𑁆𑀢𑁄, 𑀲𑀳𑀸𑀬𑁄; 𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺 𑁋 𑀅𑀟𑁆𑀠𑀬𑁄𑀕𑁂, 𑀧𑀸𑀲𑀸𑀤𑁂, 𑀳𑀫𑁆𑀫𑀺𑀬𑁂, 𑀕𑀼𑀳𑀸𑀬𑀁, 𑀮𑁂𑀡𑁂, 𑀓𑀼𑀝𑀺𑀬𑀸, 𑀓𑀽𑀝𑀸𑀕𑀸𑀭𑁂, 𑀅𑀝𑁆𑀝𑁂, 𑀫𑀸𑀴𑁂, 𑀉𑀤𑁄𑀲𑀺𑀢𑁂, 𑀉𑀤𑁆𑀤𑀡𑁆𑀟𑁂, 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁, 𑀫𑀡𑁆𑀟𑀧𑁂, 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’𑀢𑀺 𑀪𑀡𑀢𑀺.

‘‘𑀅𑀣 𑀯𑀸 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀓𑀼𑀳𑀓𑀓𑀼𑀳𑀓𑁄 𑀮𑀧𑀓𑀮𑀧𑀓𑁄 𑀫𑀼𑀔𑀲𑀫𑁆𑀪𑀸𑀯𑀺𑀢𑁄 ‘𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀲𑀦𑁆𑀢𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’𑀢𑀺 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺.

𑀧𑀸𑀧𑀺𑀘𑁆𑀙𑀲𑁆𑀲𑁂𑀯 ¶ 𑀧𑀦 𑀲𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀓𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀫𑁆𑀳𑀸𑀧𑀦𑀁 𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀼𑀳𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀓𑀢𑀫𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’𑀢𑀺 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺, 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺, 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺, 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺, 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻𑀯 𑀳𑁄𑀢𑀺. 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀽’’𑀢𑀺.

𑀢𑀢𑁆𑀣 ¶ ¶ 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦𑀸𑀢𑀺 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀦𑁆𑀢𑀺 𑀏𑀯𑀁 𑀲𑀗𑁆𑀔𑀸𑀢𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑁂𑀦. 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑁂𑀦𑀸𑀢𑀺 𑀲𑀫𑀻𑀧𑁂 𑀪𑀡𑀺𑀢𑁂𑀦. 𑀇𑀭𑀺𑀬𑀸𑀧𑀣𑀲𑁆𑀲𑀸𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀲𑁆𑀲. 𑀆𑀞𑀧𑀦𑀸𑀢𑀺 𑀆𑀤𑀺𑀞𑀧𑀦𑀸, 𑀆𑀤𑀭𑁂𑀦 𑀯𑀸 𑀞𑀧𑀦𑀸. 𑀞𑀧𑀦𑀸𑀢𑀺 𑀞𑀧𑀦𑀸𑀓𑀸𑀭𑁄. 𑀲𑀡𑁆𑀞𑀧𑀦𑀸𑀢𑀺 𑀅𑀪𑀺𑀲𑀗𑁆𑀔𑀭𑀡𑀸, 𑀧𑀸𑀲𑀸𑀤𑀺𑀓𑀪𑀸𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀓𑀼𑀝𑀺𑀓𑀸𑀢𑀺 𑀧𑀥𑀸𑀦𑀧𑀼𑀭𑀺𑀫𑀝𑁆𑀞𑀺𑀢𑀪𑀸𑀯𑀤𑀲𑁆𑀲𑀦𑁂𑀦 𑀪𑀸𑀓𑀼𑀝𑀺𑀓𑀭𑀡𑀁, 𑀫𑀼𑀔𑀲𑀗𑁆𑀓𑁄𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀓𑀼𑀝𑀺𑀓𑀭𑀡𑀁 𑀲𑀻𑀮𑀫𑀲𑁆𑀲𑀸𑀢𑀺 𑀪𑀸𑀓𑀼𑀝𑀺𑀓𑁄; 𑀪𑀸𑀓𑀼𑀝𑀺𑀓𑀲𑁆𑀲 𑀪𑀸𑀯𑁄 𑀪𑀸𑀓𑀼𑀝𑀺𑀬𑀁. 𑀓𑀼𑀳𑀦𑀸𑀢𑀺 𑀯𑀺𑀫𑁆𑀳𑀸𑀧𑀦𑀁, 𑀓𑀼𑀳𑀲𑁆𑀲 𑀆𑀬𑀦𑀸 𑀓𑀼𑀳𑀸𑀬𑀦𑀸. 𑀓𑀼𑀳𑀺𑀢𑀲𑁆𑀲 𑀪𑀸𑀯𑁄 𑀓𑀼𑀳𑀺𑀢𑀢𑁆𑀢𑀦𑁆𑀢𑀺.

𑁮𑁬𑁨. 𑀮𑀧𑀦𑀸𑀦𑀺𑀤𑁆𑀤𑁂𑀲𑁂 𑀆𑀮𑀧𑀦𑀸𑀢𑀺 𑀯𑀺𑀳𑀸𑀭𑀁 𑀆𑀕𑀢𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀺𑀫𑀢𑁆𑀣𑀸𑀬 𑀪𑁄𑀦𑁆𑀢𑁄 𑀆𑀕𑀢𑀸? 𑀓𑀺𑀁 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀼𑀁? 𑀬𑀤𑀺 𑀏𑀯𑀁 𑀕𑀘𑁆𑀙𑀣; 𑀅𑀳𑀁 𑀧𑀘𑁆𑀙𑀢𑁄 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’𑀢𑀺 𑀏𑀯𑀁 𑀆𑀤𑀺𑀢𑁄𑀯 𑀮𑀧𑀦𑀸. 𑀅𑀣 𑀯𑀸 𑀅𑀢𑁆𑀢𑀸𑀦𑀁 𑀉𑀧𑀦𑁂𑀢𑁆𑀯𑀸 ‘𑀅𑀳𑀁 𑀢𑀺𑀲𑁆𑀲𑁄, 𑀫𑀬𑀺 𑀭𑀸𑀚𑀸 𑀧𑀲𑀦𑁆𑀦𑁄, 𑀫𑀬𑀺 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀭𑀸𑀚𑀫𑀳𑀸𑀫𑀢𑁆𑀢𑁄 𑀧𑀲𑀦𑁆𑀦𑁄’𑀢𑀺 𑀏𑀯𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀸 𑀮𑀧𑀦𑀸 𑀆𑀮𑀧𑀦𑀸. 𑀮𑀧𑀦𑀸𑀢𑀺 𑀧𑀼𑀝𑁆𑀞𑀲𑁆𑀲 𑀲𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀮𑀧𑀦𑀁. 𑀲𑀮𑁆𑀮𑀧𑀦𑀸𑀢𑀺 𑀕𑀳𑀧𑀢𑀺𑀓𑀸𑀦𑀁 𑀉𑀓𑁆𑀓𑀡𑁆𑀞𑀦𑁂 𑀪𑀻𑀢𑀲𑁆𑀲 𑀑𑀓𑀸𑀲𑀁 𑀤𑀢𑁆𑀯𑀸 𑀲𑀼𑀝𑁆𑀞𑀼 𑀮𑀧𑀦𑀸. 𑀉𑀮𑁆𑀮𑀧𑀦𑀸𑀢𑀺 ‘𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄, 𑀫𑀳𑀸𑀦𑀸𑀯𑀺𑀓𑁄, 𑀫𑀳𑀸𑀤𑀸𑀦𑀧𑀢𑀻’𑀢𑀺 𑀏𑀯𑀁 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀸. 𑀲𑀫𑀼𑀮𑁆𑀮𑀧𑀦𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀸. 𑀉𑀦𑁆𑀦𑀳𑀦𑀸𑀢𑀺 ‘𑀉𑀧𑀸𑀲𑀓𑀸, 𑀧𑀼𑀩𑁆𑀩𑁂 𑀈𑀤𑀺𑀲𑁂 𑀓𑀸𑀮𑁂 𑀤𑀸𑀦𑀁 𑀤𑁂𑀣; 𑀇𑀤𑀸𑀦𑀺 𑀓𑀺𑀁 𑀦 𑀤𑁂𑀣𑀸’𑀢𑀺 𑀏𑀯𑀁 𑀬𑀸𑀯 ‘𑀤𑀲𑁆𑀲𑀸𑀫, 𑀪𑀦𑁆𑀢𑁂, 𑀑𑀓𑀸𑀲𑀁 𑀦 𑀮𑀪𑀸𑀫𑀸’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺 𑀢𑀸𑀯 𑀉𑀤𑁆𑀥𑀁 𑀦𑀳𑀦𑀸, 𑀯𑁂𑀞𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀉𑀘𑁆𑀙𑀼𑀳𑀢𑁆𑀣𑀁 𑀤𑀺𑀲𑁆𑀯𑀸 ‘𑀓𑀼𑀢𑁄 𑀆𑀕𑀢𑀸, 𑀉𑀧𑀸𑀲𑀓𑀸’𑀢𑀺 𑀧𑀼𑀘𑁆𑀙𑀢𑀺. ‘𑀉𑀘𑁆𑀙𑀼𑀔𑁂𑀢𑁆𑀢𑀢𑁄, 𑀪𑀦𑁆𑀢𑁂’𑀢𑀺. ‘𑀓𑀺𑀁 𑀢𑀢𑁆𑀣 𑀉𑀘𑁆𑀙𑀼 𑀫𑀥𑀼𑀭’𑀦𑁆𑀢𑀺? ‘𑀔𑀸𑀤𑀺𑀢𑁆𑀯𑀸, 𑀪𑀦𑁆𑀢𑁂, 𑀚𑀸𑀦𑀺𑀢𑀩𑁆𑀩’𑀦𑁆𑀢𑀺. ‘𑀦, 𑀉𑀧𑀸𑀲𑀓𑀸, 𑀪𑀺𑀓𑁆𑀔𑀼𑀲𑁆𑀲 ‘𑀉𑀘𑁆𑀙𑀼𑀁 𑀤𑁂𑀣𑀸’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀬𑀸 𑀏𑀯𑀭𑀽𑀧𑀸 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲𑀸𑀧𑀺 ¶ 𑀯𑁂𑀞𑀦𑀓𑀓𑀣𑀸, 𑀲𑀸 𑀉𑀦𑁆𑀦𑀳𑀦𑀸 ¶ . 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀦𑁆𑀦𑀳𑀦𑀸 𑀲𑀫𑀼𑀦𑁆𑀦𑀳𑀦𑀸. 𑀉𑀓𑁆𑀓𑀸𑀘𑀦𑀸𑀢𑀺 ‘𑀏𑀢𑀁 𑀓𑀼𑀮𑀁 𑀫𑀁𑀬𑁂𑀯 𑀚𑀸𑀦𑀸𑀢𑀺, 𑀲𑀘𑁂 𑀏𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀫𑀬𑁆𑀳𑀫𑁂𑀯 𑀤𑁂𑀢𑀻’𑀢𑀺 𑀏𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀘𑀦𑀸 𑀉𑀓𑁆𑀓𑀸𑀘𑀦𑀸; 𑀉𑀤𑁆𑀤𑀻𑀧𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂𑀮𑀓𑀦𑁆𑀤𑀭𑀺𑀓𑀯𑀢𑁆𑀣𑀼 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀤𑁆𑀯𑁂 𑀓𑀺𑀭 𑀪𑀺𑀓𑁆𑀔𑀽 𑀏𑀓𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀺𑀁𑀲𑀼. 𑀢𑀸𑀬 ¶ 𑀆𑀕𑀢𑀸𑀬 𑀢𑀢𑁆𑀭𑁂𑀓𑁄 𑀏𑀓𑀁 𑀧𑀼𑀘𑁆𑀙𑀺 𑁋 ‘𑀅𑀬𑀁, 𑀪𑀦𑁆𑀢𑁂, 𑀓𑀲𑁆𑀲 𑀓𑀼𑀫𑀸𑀭𑀺𑀓𑀸’𑀢𑀺? ‘𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀬𑀺𑀓𑀸𑀬 𑀢𑁂𑀮𑀓𑀦𑁆𑀤𑀭𑀺𑀓𑀸𑀬 𑀥𑀻𑀢𑀸, 𑀆𑀯𑀼𑀲𑁄. 𑀇𑀫𑀺𑀲𑁆𑀲𑀸 𑀫𑀸𑀢𑀸 𑀫𑀬𑀺 𑀕𑁂𑀳𑀁 𑀕𑀢𑁂 𑀲𑀧𑁆𑀧𑀺𑀁 𑀤𑀤𑀫𑀸𑀦𑀸 𑀖𑀝𑁂𑀦𑁂𑀯 𑀤𑁂𑀢𑀺, 𑀅𑀬𑀫𑁆𑀧𑀺 𑀫𑀸𑀢𑀸 𑀯𑀺𑀬 𑀖𑀝𑁂𑀦𑁂𑀯 𑀤𑁂𑀢𑀻’𑀢𑀺 𑀉𑀓𑁆𑀓𑀸𑀘𑁂𑀢𑀺.

𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀓𑁆𑀓𑀸𑀘𑀦𑀸 𑀲𑀫𑀼𑀓𑁆𑀓𑀸𑀘𑀦𑀸. 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸𑀢𑀺 𑀲𑀘𑁆𑀘𑀸𑀦𑀼𑀭𑀽𑀧𑀁 𑀯𑀸 𑀥𑀫𑁆𑀫𑀸𑀦𑀼𑀭𑀽𑀧𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀬𑀪𑀡𑀦𑀫𑁂𑀯. 𑀘𑀸𑀝𑀼𑀓𑀫𑁆𑀬𑀢𑀸𑀢𑀺 𑀦𑀻𑀘𑀯𑀼𑀢𑁆𑀢𑀺𑀢𑀸; 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀢𑁄 𑀞𑀧𑁂𑀢𑁆𑀯𑀸 𑀯𑀢𑁆𑀢𑀦𑀁. 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀢𑀺 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀢𑀸. 𑀬𑀣𑀸 𑀫𑀼𑀕𑁆𑀕𑁂𑀲𑀼 𑀧𑀘𑁆𑀘𑀫𑀸𑀦𑁂𑀲𑀼 𑀓𑁄𑀘𑀺𑀤𑁂𑀯 𑀦 𑀧𑀘𑁆𑀘𑀢𑀺, 𑀅𑀯𑀲𑁂𑀲𑀸 𑀧𑀘𑁆𑀘𑀦𑁆𑀢𑀺; 𑀏𑀯𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑁂 𑀓𑀺𑀜𑁆𑀘𑀺𑀤𑁂𑀯 𑀲𑀘𑁆𑀘𑀁 𑀳𑁄𑀢𑀺, 𑀲𑁂𑀲𑀁 𑀅𑀮𑀺𑀓𑀁 𑁋 𑀅𑀬𑀁 𑀧𑀼𑀕𑁆𑀕𑀮𑁄 𑀫𑀼𑀕𑁆𑀕𑀲𑀽𑀧𑁆𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀪𑀸𑀯𑁄 𑀫𑀼𑀕𑁆𑀕𑀲𑀽𑀧𑁆𑀬𑀢𑀸. 𑀧𑀸𑀭𑀺𑀪𑀝𑀬𑀢𑀸𑀢𑀺 𑀧𑀸𑀭𑀺𑀪𑀝𑀬𑀪𑀸𑀯𑁄. 𑀬𑁄 𑀳𑀺 𑀓𑀼𑀮𑀤𑀸𑀭𑀓𑁂 𑀥𑀸𑀢𑀻 𑀯𑀺𑀬 𑀅𑀗𑁆𑀓𑁂𑀦 𑀯𑀸 𑀔𑀦𑁆𑀥𑁂𑀦 𑀯𑀸 𑀧𑀭𑀺𑀪𑀝𑀢𑀺, 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄; 𑀢𑀲𑁆𑀲 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑀬𑀁; 𑀧𑀸𑀭𑀺𑀪𑀝𑀬𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑀬𑀢𑀸𑀢𑀺.

𑁮𑁬𑁩. 𑀦𑁂𑀫𑀺𑀢𑁆𑀢𑀺𑀓𑀢𑀸𑀦𑀺𑀤𑁆𑀤𑁂𑀲𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀁𑀬𑁄𑀚𑀦𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁. 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀓𑀭𑀡𑀓𑁄𑀲𑀮𑁆𑀮𑀁.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀧𑀺𑀡𑁆𑀟𑀧𑀸𑀢𑀺𑀓𑁄 𑀉𑀧𑀝𑁆𑀞𑀸𑀓𑀓𑀫𑁆𑀫𑀸𑀭𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘𑀓𑀺𑀁 𑀪𑀦𑁆𑀢𑁂’𑀢𑀺 𑀧𑀼𑀘𑁆𑀙𑀺𑀢𑁄 𑀘𑀻𑀯𑀭𑀦𑁆𑀢𑀭𑁂𑀦 𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 ¶ 𑀯𑀸𑀲𑀺𑀧𑀳𑀭𑀡𑀸𑀓𑀸𑀭𑀁 𑀅𑀓𑀸𑀲𑀺. 𑀓𑀫𑁆𑀫𑀸𑀭𑁄 ‘𑀲𑀮𑁆𑀮𑀓𑁆𑀔𑀺𑀢𑀁 𑀫𑁂, 𑀪𑀦𑁆𑀢𑁂’𑀢𑀺 𑀯𑀸𑀲𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀑𑀪𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀑𑀪𑀸𑀲𑀓𑀫𑁆𑀫𑀦𑁆𑀢𑀺 𑀯𑀘𑁆𑀙𑀓𑀧𑀸𑀮𑀓𑁂 𑀤𑀺𑀲𑁆𑀯𑀸 ‘𑀓𑀺𑀁 𑀇𑀫𑁂 𑀯𑀘𑁆𑀙𑀸 𑀔𑀻𑀭𑀕𑁄𑀯𑀘𑁆𑀙𑀸, 𑀢𑀓𑁆𑀓𑀕𑁄𑀯𑀘𑁆𑀙𑀸’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀔𑀻𑀭𑀕𑁄𑀯𑀘𑁆𑀙𑀸, 𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂 ‘𑀦 𑀔𑀻𑀭𑀕𑁄𑀯𑀘𑁆𑀙𑀸, 𑀬𑀤𑀺 𑀔𑀻𑀭𑀕𑁄𑀯𑀘𑁆𑀙𑀸 𑀲𑀺𑀬𑀼𑀁 𑀪𑀺𑀓𑁆𑀔𑀽𑀧𑀺 𑀔𑀻𑀭𑀁 𑀮𑀪𑁂𑀬𑁆𑀬𑀼’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀦𑀺𑀯𑁂𑀤𑁂𑀢𑁆𑀯𑀸 𑀔𑀻𑀭𑀤𑀸𑀧𑀦𑀸𑀤𑀺𑀓𑀁 𑀑𑀪𑀸𑀲𑀓𑀭𑀡𑀁. 𑀲𑀸𑀫𑀦𑁆𑀢𑀚𑀧𑁆𑀧𑀸𑀢𑀺 𑀲𑀫𑀻𑀧𑀁 𑀓𑀢𑁆𑀯𑀸 𑀚𑀧𑁆𑀧𑀦𑀁.

𑀚𑀸𑀢𑀓𑀪𑀸𑀡𑀓𑀯𑀢𑁆𑀣𑀼 ¶ 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀏𑀓𑁄 𑀓𑀺𑀭 𑀚𑀸𑀢𑀓𑀪𑀸𑀡𑀓𑀢𑁆𑀣𑁂𑀭𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀉𑀧𑀝𑁆𑀞𑀸𑀬𑀺𑀓𑀸𑀬 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀸 𑀅𑀤𑀸𑀢𑀼𑀓𑀸𑀫𑀸 ‘𑀢𑀡𑁆𑀟𑀼𑀮𑀸 𑀦𑀢𑁆𑀣𑀻’𑀢𑀺 𑀪𑀡𑀦𑁆𑀢𑀻 𑀢𑀡𑁆𑀟𑀼𑀮𑁂 𑀆𑀳𑀭𑀺𑀢𑀼𑀓𑀸𑀫𑀸 𑀯𑀺𑀬 𑀧𑀝𑀺𑀯𑀺𑀲𑁆𑀲𑀓𑀖𑀭𑀁 𑀕𑀢𑀸. 𑀪𑀺𑀓𑁆𑀔𑀼 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀯𑀸𑀝𑀓𑁄𑀡𑁂 ¶ 𑀉𑀘𑁆𑀙𑀼𑀁, 𑀪𑀸𑀚𑀦𑁂 𑀕𑀼𑀴𑀁, 𑀧𑀺𑀝𑀓𑁂 𑀮𑁄𑀡𑀫𑀘𑁆𑀙𑀨𑀸𑀮𑀁, 𑀓𑀼𑀫𑁆𑀪𑀺𑀬𑀁 𑀢𑀡𑁆𑀟𑀼𑀮𑁂, 𑀖𑀝𑁂 𑀖𑀢𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀖𑀭𑀡𑀻 ‘𑀢𑀡𑁆𑀟𑀼𑀮𑀁 𑀦𑀸𑀮𑀢𑁆𑀣’𑀦𑁆𑀢𑀺 𑀆𑀕𑀢𑀸. 𑀣𑁂𑀭𑁄 ‘𑀉𑀧𑀸𑀲𑀺𑀓𑁂, 𑀅𑀚𑁆𑀚 𑀪𑀺𑀓𑁆𑀔𑀸 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀧𑀝𑀺𑀓𑀘𑁆𑀘𑁂𑀯 𑀦𑀺𑀫𑀺𑀢𑁆𑀢𑀁 𑀅𑀤𑁆𑀤𑀲’𑀦𑁆𑀢𑀺 𑀆𑀳. ‘𑀓𑀺𑀁, 𑀪𑀦𑁆𑀢𑁂’𑀢𑀺? ‘𑀓𑀯𑀸𑀝𑀓𑁄𑀡𑁂 𑀦𑀺𑀓𑁆𑀔𑀺𑀢𑁆𑀢𑀁 𑀉𑀘𑁆𑀙𑀼𑀁 𑀯𑀺𑀬 𑀲𑀧𑁆𑀧𑀁 𑀅𑀤𑁆𑀤𑀲𑀁; ‘𑀢𑀁 𑀧𑀳𑀭𑀺𑀲𑁆𑀲𑀸𑀫𑀻’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀪𑀸𑀚𑀦𑁂 𑀞𑀧𑀺𑀢𑀁 𑀕𑀼𑀴𑀧𑀺𑀡𑁆𑀟𑀁 𑀯𑀺𑀬 𑀧𑀸𑀲𑀸𑀡𑀁 𑀮𑁂𑀟𑁆𑀟𑀼𑀓𑁂𑀦; 𑀧𑀳𑀝𑁂𑀦 𑀲𑀧𑁆𑀧𑁂𑀦 𑀓𑀢𑀁, 𑀧𑀺𑀝𑀓𑁂 𑀦𑀺𑀓𑁆𑀔𑀺𑀢𑁆𑀢𑀮𑁄𑀡𑀫𑀘𑁆𑀙𑀨𑀸𑀮𑀲𑀤𑀺𑀲𑀁, 𑀨𑀡𑀁; 𑀢𑀲𑁆𑀲 𑀢𑀁 𑀮𑁂𑀟𑁆𑀟𑀼𑀁 𑀟𑀁𑀲𑀺𑀢𑀼𑀓𑀸𑀫𑀲𑁆𑀲, 𑀓𑀼𑀫𑁆𑀪𑀺𑀬𑀸 𑀢𑀡𑁆𑀟𑀼𑀮𑀲𑀤𑀺𑀲𑁂 𑀤𑀦𑁆𑀢𑁂; 𑀅𑀣𑀲𑁆𑀲 𑀓𑀼𑀧𑀺𑀢𑀲𑁆𑀲, 𑀖𑀝𑁂 𑀧𑀓𑁆𑀔𑀺𑀢𑁆𑀢𑀖𑀢𑀲𑀤𑀺𑀲𑀁, 𑀫𑀼𑀔𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀯𑀺𑀲𑀫𑀺𑀲𑁆𑀲𑀓𑀁 𑀔𑁂𑀴’𑀦𑁆𑀢𑀺. 𑀲𑀸 ‘𑀦 𑀲𑀓𑁆𑀓𑀸 𑀫𑀼𑀡𑁆𑀟𑀓𑀁 𑀯𑀜𑁆𑀘𑁂𑀢𑀼’𑀦𑁆𑀢𑀺 𑀉𑀘𑁆𑀙𑀼𑀁 𑀤𑀢𑁆𑀯𑀸 𑀑𑀤𑀦𑀁 𑀧𑀘𑀺𑀢𑁆𑀯𑀸 𑀖𑀢𑀕𑀼𑀴𑀫𑀘𑁆𑀙𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀻𑀢𑀺. 𑀏𑀯𑀁 𑀲𑀫𑀻𑀧𑀁 𑀓𑀢𑁆𑀯𑀸 𑀚𑀧𑁆𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀓𑀣𑀸𑀢𑀺 𑀬𑀣𑀸 𑀢𑀁 𑀮𑀪𑀢𑀺 𑀢𑀣𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀣𑀦𑀁.

𑁮𑁬𑁪. 𑀦𑀺𑀧𑁆𑀧𑁂𑀲𑀺𑀓𑀢𑀸𑀦𑀺𑀤𑁆𑀤𑁂𑀲𑁂 𑀅𑀓𑁆𑀓𑁄𑀲𑀦𑀸𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑀸. 𑀯𑀫𑁆𑀪𑀦𑀸𑀢𑀺 𑀧𑀭𑀺𑀪𑀯𑀺𑀢𑁆𑀯𑀸 𑀓𑀣𑀦𑀁. 𑀕𑀭𑀳𑀦𑀸𑀢𑀺 ¶ ‘𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁄𑀲𑀸𑀭𑁄𑀧𑀦𑀸. 𑀉𑀓𑁆𑀔𑁂𑀧𑀦𑀸𑀢𑀺 ‘𑀫𑀸 𑀏𑀢𑀁 𑀏𑀢𑁆𑀣 𑀓𑀣𑁂𑀣𑀸’𑀢𑀺 𑀯𑀸𑀘𑀸𑀬 𑀉𑀓𑁆𑀔𑀺𑀧𑀦𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑀯𑀢𑁆𑀣𑀼𑀓𑀁 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸. 𑀅𑀣𑀯𑀸 𑀅𑀤𑁂𑀦𑁆𑀢𑀁 ‘𑀅𑀳𑁄 𑀤𑀸𑀦𑀧𑀢𑀻’𑀢𑀺 𑀏𑀯𑀁 𑀉𑀓𑁆𑀔𑀺𑀧𑀦𑀁 𑀉𑀓𑁆𑀔𑁂𑀧𑀦𑀸. ‘𑀫𑀳𑀸𑀤𑀸𑀦𑀧𑀢𑀻’𑀢𑀺 𑀏𑀯𑀁 𑀲𑀼𑀝𑁆𑀞𑀼 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸. 𑀔𑀺𑀧𑀦𑀸𑀢𑀺 ‘𑀓𑀺𑀁 𑀇𑀫𑀲𑁆𑀲 𑀚𑀻𑀯𑀺𑀢𑀁 𑀩𑀻𑀚𑀪𑁄𑀚𑀺𑀦𑁄’𑀢𑀺 𑀏𑀯𑀁 𑀉𑀧𑁆𑀧𑀡𑁆𑀟𑀦𑀸. 𑀲𑀗𑁆𑀔𑀺𑀧𑀦𑀸𑀢𑀺 ‘𑀓𑀺𑀁 𑀇𑀫𑀁 𑀅𑀤𑀸𑀬𑀓𑁄𑀢𑀺 𑀪𑀡𑀣 𑀬𑁄 𑀦𑀺𑀘𑁆𑀘𑀓𑀸𑀮𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀘𑀦𑀁 𑀤𑁂𑀢𑀻’𑀢𑀺 𑀏𑀯𑀁 𑀲𑀼𑀝𑁆𑀞𑀼𑀢𑀭𑀁 𑀉𑀧𑁆𑀧𑀡𑁆𑀟𑀦𑀸. 𑀧𑀸𑀧𑀦𑀸𑀢𑀺 𑀅𑀤𑀸𑀬𑀓𑀢𑁆𑀢𑀲𑁆𑀲 𑀅𑀯𑀡𑁆𑀡𑀲𑁆𑀲 𑀯𑀸 𑀧𑀸𑀧𑀦𑀁. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀸𑀧𑀦𑀸 𑀲𑀫𑁆𑀧𑀸𑀧𑀦𑀸. 𑀅𑀯𑀡𑁆𑀡𑀳𑀸𑀭𑀺𑀓𑀸𑀢𑀺 ‘𑀏𑀯𑀁 𑀫𑁂 𑀅𑀯𑀡𑁆𑀡𑀪𑀬𑀸𑀧𑀺 𑀤𑀲𑁆𑀲𑀢𑀻’𑀢𑀺 𑀕𑁂𑀳𑀢𑁄 𑀕𑁂𑀳𑀁, 𑀕𑀸𑀫𑀢𑁄 𑀕𑀸𑀫𑀁, 𑀚𑀦𑀧𑀤𑀢𑁄 𑀚𑀦𑀧𑀤𑀁 𑀅𑀯𑀡𑁆𑀡𑀳𑀭𑀡𑀁. 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀢𑀺 𑀧𑀼𑀭𑀢𑁄 𑀫𑀥𑀼𑀭𑀁 𑀪𑀡𑀺𑀢𑁆𑀯𑀸 𑀧𑀭𑀫𑁆𑀫𑀼𑀔𑁂 𑀅𑀯𑀡𑁆𑀡𑀪𑀸𑀲𑀺𑀢𑀸. 𑀏𑀲𑀸 𑀳𑀺 𑀅𑀪𑀺𑀫𑀼𑀔𑀁 𑀑𑀮𑁄𑀓𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀭𑀫𑁆𑀫𑀼𑀔𑀸𑀦𑀁 𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀦𑀁 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀢𑀺 𑀯𑀼𑀢𑁆𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀧𑁆𑀧𑁂𑀲𑀺𑀓𑀢𑀸𑀢𑀺 𑀅𑀬𑀁 𑀬𑀲𑁆𑀫𑀸 𑀯𑁂𑀴𑀼𑀧𑁂𑀲𑀺𑀓𑀸 𑀯𑀺𑀬 𑀅𑀩𑁆𑀪𑀗𑁆𑀕𑀁 𑀧𑀭𑀲𑁆𑀲 𑀕𑀼𑀡𑀁 𑀦𑀺𑀧𑁆𑀧𑁂𑀲𑁂𑀢𑀺 𑀦𑀺𑀧𑀼𑀜𑁆𑀙𑀢𑀺, 𑀬𑀲𑁆𑀫𑀸 𑀯𑀸 𑀕𑀦𑁆𑀥𑀚𑀸𑀢𑀁 𑀦𑀺𑀧𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀕𑁆𑀕𑀦𑀸 𑀯𑀺𑀬 ¶ 𑀧𑀭𑀕𑀼𑀡𑁂 ¶ 𑀦𑀺𑀧𑀺𑀲𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑁂𑀢𑁆𑀯𑀸 𑀏𑀲𑀸 𑀮𑀸𑀪𑀫𑀕𑁆𑀕𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀧𑁂𑀲𑀺𑀓𑀢𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁮𑁬𑁫. 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀦𑀺𑀤𑁆𑀤𑁂𑀲𑁂 𑀦𑀺𑀚𑀺𑀕𑀻𑀲𑀦𑀢𑀸𑀢𑀺 𑀫𑀕𑁆𑀕𑀦𑀸. 𑀇𑀢𑁄 𑀮𑀤𑁆𑀥𑀦𑁆𑀢𑀺 𑀇𑀫𑀫𑁆𑀳𑀸 𑀕𑁂𑀳𑀸 𑀮𑀤𑁆𑀥𑀁. 𑀅𑀫𑀼𑀢𑁆𑀭𑀸𑀢𑀺 𑀅𑀫𑀼𑀓𑀫𑁆𑀳𑀺 𑀕𑁂𑀳𑁂. 𑀏𑀝𑁆𑀞𑀻𑀢𑀺 𑀇𑀘𑁆𑀙𑀦𑀸. 𑀕𑀯𑁂𑀝𑁆𑀞𑀻𑀢𑀺 𑀫𑀕𑁆𑀕𑀦𑀸. 𑀧𑀭𑀺𑀬𑁂𑀝𑁆𑀞𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀕𑁆𑀕𑀦𑀸. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀺𑀓𑁆𑀔𑀁 𑀢𑀢𑁆𑀭 𑀢𑀢𑁆𑀭 𑀓𑀼𑀮𑀤𑀸𑀭𑀓𑀸𑀦𑀁 𑀤𑀢𑁆𑀯𑀸 𑀅𑀦𑁆𑀢𑁂 𑀔𑀻𑀭𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀕𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀏𑀲𑀦𑀸𑀢𑀺𑀆𑀤𑀻𑀦𑀺 𑀏𑀝𑁆𑀞𑀻𑀢𑀺𑀆𑀤𑀻𑀦𑀁 𑀯𑁂𑀯𑀘𑀦𑀸𑀦𑀺, 𑀢𑀲𑁆𑀫𑀸 𑀏𑀝𑁆𑀞𑀻𑀢𑀺 𑀏𑀲𑀦𑀸, 𑀕𑀯𑁂𑀝𑁆𑀞𑀻𑀢𑀺 𑀕𑀯𑁂𑀲𑀦𑀸, 𑀧𑀭𑀺𑀬𑁂𑀝𑁆𑀞𑀻𑀢𑀺 𑀧𑀭𑀺𑀬𑁂𑀲𑀦𑀸. 𑀇𑀘𑁆𑀘𑁂𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁬𑁬. 𑀲𑁂𑀬𑁆𑀬𑀫𑀸𑀦𑀦𑀺𑀤𑁆𑀤𑁂𑀲𑁂 ¶ 𑀚𑀸𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀪𑀸𑀯𑀸𑀤𑀺𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸. 𑀕𑁄𑀢𑁆𑀢𑁂𑀦𑀸𑀢𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀺𑀦𑀸 𑀉𑀓𑁆𑀓𑀝𑁆𑀞𑀕𑁄𑀢𑁆𑀢𑁂𑀦. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦𑀸𑀢𑀺 𑀫𑀳𑀸𑀓𑀼𑀮𑀪𑀸𑀯𑁂𑀦. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑀸𑀬. 𑀲𑀭𑀻𑀭𑀜𑁆𑀳𑀺 𑀧𑁄𑀓𑁆𑀔𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀽𑀧𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀥𑀦𑁂𑀦𑀸𑀢𑀺𑀆𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀏𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑀁 𑀧𑀯𑀢𑁆𑀢𑁂𑀢𑀺 𑀓𑀭𑁄𑀢𑀺.

𑁮𑁬𑁭. 𑀲𑀤𑀺𑀲𑀫𑀸𑀦𑀦𑀺𑀤𑁆𑀤𑁂𑀲𑁂 𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀏𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸 ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀲𑁂𑀲𑁄. 𑀧𑀸𑀴𑀺𑀬𑀁 𑀧𑀦 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺.

𑁮𑁬𑁮. 𑀳𑀻𑀦𑀫𑀸𑀦𑀦𑀺𑀤𑁆𑀤𑁂𑀲𑁂 𑀑𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀳𑁂𑀝𑁆𑀞𑀸𑀫𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀑𑀫𑀸𑀦𑁄𑀢𑀺 𑀮𑀸𑀫𑀓𑁄 𑀳𑁂𑀝𑁆𑀞𑀸𑀫𑀸𑀦𑁄. 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀦𑁆𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄. 𑀳𑀻𑀴𑀦𑀸𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀢𑁆𑀢𑀚𑀺𑀕𑀼𑀘𑁆𑀙𑀦𑀸. 𑀑𑀳𑀻𑀴𑀦𑀸𑀢𑀺 𑀅𑀢𑀺𑀭𑁂𑀓𑀢𑁄 𑀳𑀻𑀴𑀦𑀸. 𑀑𑀳𑀻𑀴𑀺𑀢𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀪𑀸𑀯𑀦𑀺𑀤𑁆𑀤𑁂𑀲𑁄. 𑀅𑀢𑁆𑀢𑀼𑀜𑁆𑀜𑀸𑀢𑀺 𑀅𑀢𑁆𑀢𑀸𑀦𑀁 𑀳𑀻𑀦𑀁 𑀓𑀢𑁆𑀯𑀸 𑀚𑀸𑀦𑀦𑀸. 𑀅𑀢𑁆𑀢𑀸𑀯𑀜𑁆𑀜𑀸𑀢𑀺 𑀅𑀢𑁆𑀢𑀸𑀦𑀁 𑀅𑀯𑀚𑀸𑀦𑀦𑀸. 𑀅𑀢𑁆𑀢𑀧𑀭𑀺𑀪𑀯𑁄𑀢𑀺 𑀚𑀸𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀦𑀸𑀫𑀫𑁂𑀯 𑀚𑀸𑀢𑀸𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀪𑀯𑀺𑀢𑁆𑀯𑀸 𑀫𑀜𑁆𑀜𑀦𑀸. 𑀏𑀯𑀫𑀺𑀫𑁂 𑀢𑀬𑁄 𑀫𑀸𑀦𑀸 𑀧𑀼𑀕𑁆𑀕𑀮𑀁 𑀅𑀦𑀺𑀲𑁆𑀲𑀸𑀬 𑀚𑀸𑀢𑀺𑀆𑀤𑀺𑀯𑀢𑁆𑀣𑀼𑀯𑀲𑁂𑀦𑁂𑀯 𑀓𑀣𑀺𑀢𑀸. 𑀢𑁂𑀲𑀼 𑀏𑀓𑁂𑀓𑁄 𑀢𑀺𑀡𑁆𑀡𑀫𑁆𑀧𑀺 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑁄 𑀲𑁂𑀬𑁆𑀬𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄. ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 ¶ 𑀫𑀸𑀦𑁄 ¶ 𑀲𑀤𑀺𑀲𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄. ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑁄 𑀳𑀻𑀦𑀲𑁆𑀲𑁂𑀯 𑀬𑀸𑀣𑀸𑀯𑀫𑀸𑀦𑁄, 𑀲𑁂𑀲𑀸𑀦𑀁 𑀅𑀬𑀸𑀣𑀸𑀯𑀫𑀸𑀦𑁄.

𑁮𑁬𑁯. 𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺𑀆𑀤𑀬𑁄 𑀧𑀦 𑀦𑀯 𑀫𑀸𑀦𑀸 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀓𑀣𑀺𑀢𑀸. 𑀢𑁂𑀲𑀼 𑀢𑀬𑁄 𑀢𑀬𑁄 𑀏𑀓𑁂𑀓𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀤𑀳𑀢𑀻𑀢𑀺 𑀞𑀧𑁂𑀢𑀺. 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀲𑁂𑀬𑁆𑀬𑀢𑁄 𑀤𑀳𑀦𑀁 𑀦𑀺𑀲𑁆𑀲𑀸𑀬. 𑀏𑀢𑁆𑀣 𑀧𑀦 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 𑀭𑀸𑀚𑀽𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘𑀭𑀝𑁆𑀞𑁂𑀦 𑀯𑀸 𑀥𑀦𑁂𑀦 𑀯𑀸 𑀯𑀸𑀳𑀦𑁂𑀳𑀺 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 ¶ 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑁮𑁭𑁦. 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘𑀭𑀝𑁆𑀞𑁂𑀦 𑀯𑀸 𑀥𑀦𑁂𑀦 𑀯𑀸 𑀯𑀸𑀳𑀦𑁂𑀳𑀺 𑀯𑀸 𑀅𑀜𑁆𑀜𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑁮𑁭𑁧. 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀳𑀺 𑀭𑀜𑁆𑀜𑁄 𑀭𑀝𑁆𑀞𑀁 𑀯𑀸 𑀥𑀦𑀁 𑀯𑀸 𑀯𑀸𑀳𑀦𑀸𑀦𑀺 𑀯𑀸 𑀲𑀫𑁆𑀧𑀦𑁆𑀦𑀸𑀦𑀺 𑀦 𑀳𑁄𑀦𑁆𑀢𑀺, 𑀲𑁄 ‘𑀫𑀬𑁆𑀳𑀁 𑀭𑀸𑀚𑀸𑀢𑀺 𑀯𑁄𑀳𑀸𑀭𑀲𑀼𑀔𑀫𑀢𑁆𑀢𑀫𑁂𑀯; 𑀓𑀺𑀁 𑀭𑀸𑀚𑀸 𑀦𑀸𑀫 𑀅𑀳’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘𑀅𑀧𑁆𑀧𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑀁. 𑀥𑀫𑁆𑀫𑀓𑀣𑀺𑀓𑁄 𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀣𑁂𑀭𑁄𑀢𑀺 𑀓𑀣𑀸𑀫𑀢𑁆𑀢𑀫𑁂𑀯. 𑀓𑀺𑀁 𑀥𑀫𑁆𑀫𑀓𑀣𑀺𑀓𑁄 𑀦𑀸𑀫𑀸𑀳𑀁, 𑀓𑀺𑀁 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫𑀸𑀳𑀁, 𑀓𑀺𑀁 𑀫𑀳𑀸𑀣𑁂𑀭𑁄 𑀦𑀸𑀫𑀸𑀳𑀁 𑀬𑀲𑁆𑀲 𑀫𑁂 𑀮𑀸𑀪𑀲𑀓𑁆𑀓𑀸𑀭𑁄 𑀦𑀢𑁆𑀣𑀻’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑁮𑁭𑁨. 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀅𑀫𑀘𑁆𑀘𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀫𑀘𑁆𑀘𑁄 𑀳𑀺 𑀭𑀝𑁆𑀞𑀺𑀬𑁄 𑀯𑀸 ‘𑀪𑁄𑀕𑀬𑀸𑀦𑀯𑀸𑀳𑀦𑀸𑀤𑀻𑀳𑀺 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀭𑀸𑀚𑀧𑀼𑀭𑀺𑀲𑁄 𑀅𑀢𑁆𑀣𑀻’𑀢𑀺 𑀯𑀸 ‘𑀫𑀬𑁆𑀳𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡’𑀦𑁆𑀢𑀺 𑀯𑀸 ‘𑀅𑀫𑀘𑁆𑀘𑁄𑀢𑀺 𑀦𑀸𑀫𑀫𑀢𑁆𑀢𑀫𑁂𑀯 𑀫𑀬𑁆𑀳𑀁; 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑁂 𑀦𑀢𑁆𑀣𑀺. 𑀓𑀺𑀁 𑀅𑀫𑀘𑁆𑀘𑁄 𑀦𑀸𑀫𑀸𑀳’𑀦𑁆𑀢𑀺 𑀏𑀢𑁂 𑀫𑀸𑀦𑁂 𑀓𑀭𑁄𑀢𑀺.

𑁮𑁭𑁫. 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀤𑀸𑀲𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀸𑀲𑁄 𑀳𑀺 ‘𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀤𑀸𑀲𑁄 ¶ 𑀦𑀸𑀫 𑀅𑀢𑁆𑀣𑀺’ 𑀅𑀜𑁆𑀜𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀼𑀘𑁆𑀙𑀺𑀳𑁂𑀢𑀼 ¶ 𑀤𑀸𑀲𑀸 𑀦𑀸𑀫 𑀚𑀸𑀢𑀸. 𑀅𑀳𑀁 𑀧𑀦 𑀧𑀯𑁂𑀡𑀻𑀆𑀕𑀢𑀢𑁆𑀢𑀸 𑀲𑁂𑀬𑁆𑀬𑁄’𑀢𑀺 𑀯𑀸 ‘𑀧𑀯𑁂𑀡𑀻𑀆𑀕𑀢𑀪𑀸𑀯𑁂𑀦 𑀉𑀪𑀢𑁄𑀲𑀼𑀤𑁆𑀥𑀺𑀓𑀤𑀸𑀲𑀢𑁆𑀢𑁂𑀦 𑀅𑀲𑀼𑀓𑀤𑀸𑀲𑁂𑀦 𑀦𑀸𑀫 𑀲𑀤𑁆𑀥𑀺𑀁 𑀓𑀺𑀁 𑀫𑀬𑁆𑀳𑀁 𑀦𑀸𑀦𑀸𑀓𑀭𑀡’𑀦𑁆𑀢𑀺 𑀯𑀸 ‘𑀓𑀼𑀘𑁆𑀙𑀺𑀯𑀲𑁂𑀦𑀸𑀳𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄. 𑀫𑀸𑀢𑀸𑀧𑀺𑀢𑀼𑀓𑁄𑀝𑀺𑀬𑀸 𑀧𑀦 𑀫𑁂 𑀤𑀸𑀲𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀓𑀺𑀁 𑀤𑀸𑀲𑁄 𑀦𑀸𑀫 𑀅𑀳’𑀦𑁆𑀢𑀺 𑀯𑀸 𑀏𑀢𑁂 𑀫𑀸𑀦𑁂 𑀓𑀭𑁄𑀢𑀺. 𑀬𑀣𑀸 𑀘 𑀤𑀸𑀲𑁄 𑀏𑀯𑀁 𑀧𑀼𑀓𑁆𑀓𑀼𑀲𑀘𑀡𑁆𑀟𑀸𑀮𑀸𑀤𑀬𑁄𑀧𑀺 𑀏𑀢𑁂 𑀫𑀸𑀦𑁂 𑀓𑀭𑁄𑀦𑁆𑀢𑀺𑀬𑁂𑀯.

𑀏𑀢𑁆𑀣 𑀘 ‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀣𑀸 ‘𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 ‘𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀢𑁆𑀣 𑀬𑀸𑀣𑀸𑀯𑀫𑀸𑀦𑀸 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸, 𑀅𑀬𑀸𑀣𑀸𑀯𑀫𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸.

𑁮𑁭𑁮. 𑀏𑀯𑀁 𑀲𑀯𑀢𑁆𑀣𑀼𑀓𑁂 𑀫𑀸𑀦𑁂 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀢𑁆𑀣𑀼𑀓𑀁 𑀦𑀺𑀩𑁆𑀩𑀢𑁆𑀢𑀺𑀢𑀫𑀸𑀦𑀫𑁂𑀯 ¶ 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀫𑀸𑀦𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁭𑁯. 𑀅𑀢𑀺𑀫𑀸𑀦𑀦𑀺𑀤𑁆𑀤𑁂𑀲𑁂 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀚𑀸𑀢𑀺𑀆𑀤𑀻𑀦𑀁 𑀯𑀢𑁆𑀣𑀼𑀯𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀅𑀢𑀺𑀫𑀜𑁆𑀜𑀢𑀻𑀢𑀺 ‘𑀚𑀸𑀢𑀺𑀆𑀤𑀻𑀳𑀺 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀻’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺.

𑁮𑁮𑁦. 𑀫𑀸𑀦𑀸𑀢𑀺𑀫𑀸𑀦𑀦𑀺𑀤𑁆𑀤𑁂𑀲𑁂 𑀬𑁄 𑀏𑀯𑀭𑀽𑀧𑁄𑀢𑀺 𑀬𑁄 𑀏𑀲𑁄 ‘𑀅𑀬𑀁 𑀧𑀼𑀩𑁆𑀩𑁂 𑀫𑀬𑀸 𑀲𑀤𑀺𑀲𑁄, 𑀇𑀤𑀸𑀦𑀺 𑀅𑀳𑀁 𑀲𑁂𑀝𑁆𑀞𑁄, 𑀅𑀳𑀁 𑀳𑀻𑀦𑀢𑀭𑁄’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀅𑀬𑀁 𑀪𑀸𑀭𑀸𑀢𑀺𑀪𑀸𑀭𑁄 𑀯𑀺𑀬 𑀧𑀼𑀭𑀺𑀫𑀁 𑀲𑀤𑀺𑀲𑀫𑀸𑀦𑀁 𑀉𑀧𑀸𑀤𑀸𑀬 𑀫𑀸𑀦𑀸𑀢𑀺𑀫𑀸𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳.

𑁮𑁮𑁧. 𑀑𑀫𑀸𑀦𑀦𑀺𑀤𑁆𑀤𑁂𑀲𑁄 𑀳𑀻𑀦𑀫𑀸𑀦𑀦𑀺𑀤𑁆𑀤𑁂𑀲𑀲𑀤𑀺𑀲𑁄𑀬𑁂𑀯. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀲𑁄 ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀫𑀸𑀦𑁄 𑀦𑀸𑀫 𑀯𑀼𑀢𑁆𑀢𑁄 𑁋 𑀅𑀬𑀁 𑀑𑀫𑀸𑀦𑁄 𑀦𑀸𑀫. 𑀅𑀧𑀺𑀘𑁂𑀢𑁆𑀣 ‘𑀢𑁆𑀯𑀁 𑀚𑀸𑀢𑀺𑀫𑀸, 𑀓𑀸𑀓𑀚𑀸𑀢𑀺 𑀯𑀺𑀬 𑀢𑁂 𑀚𑀸𑀢𑀺; 𑀢𑁆𑀯𑀁 𑀕𑁄𑀢𑁆𑀢𑀯𑀸, 𑀘𑀡𑁆𑀟𑀸𑀮𑀕𑁄𑀢𑁆𑀢𑀁 𑀯𑀺𑀬 𑀢𑁂 𑀕𑁄𑀢𑁆𑀢𑀁; 𑀢𑀼𑀬𑁆𑀳𑀁 𑀲𑀭𑁄 𑀅𑀢𑁆𑀣𑀺, 𑀓𑀸𑀓𑀲𑁆𑀲𑀭𑁄 𑀯𑀺𑀬 𑀢𑁂 𑀲𑀭𑁄’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀅𑀬𑀁 𑀑𑀫𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁮𑁨. 𑀅𑀥𑀺𑀫𑀸𑀦𑀦𑀺𑀤𑁆𑀤𑁂𑀲𑁂 ¶ 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀧𑁆𑀧𑀢𑁆𑀯𑀸 𑀧𑀢𑁆𑀢𑀲𑀜𑁆𑀜𑀺𑀢𑀸𑀬 ¶ . 𑀅𑀓𑀢𑁂𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂 𑀅𑀓𑀢𑁂𑀬𑁂𑀯. 𑀅𑀦𑀥𑀺𑀕𑀢𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀦𑀥𑀺𑀕𑀢𑁂. 𑀅𑀲𑀘𑁆𑀙𑀺𑀓𑀢𑁂𑀢𑀺 𑀅𑀭𑀳𑀢𑁆𑀢𑁂𑀦 𑀅𑀧𑀘𑁆𑀘𑀓𑁆𑀔𑀓𑀢𑁂. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀥𑀺𑀫𑀸𑀦𑁄𑀢𑀺 𑀅𑀬𑀁 𑀅𑀥𑀺𑀕𑀢𑀫𑀸𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀅𑀬𑀁 𑀧𑀦 𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄. 𑀢𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 ‘𑀅𑀳𑀁 𑀲𑀓𑀤𑀸𑀕𑀸𑀫𑀻’𑀢𑀺𑀆𑀤𑀺𑀯𑀲𑁂𑀦 𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀺; 𑀤𑀼𑀲𑁆𑀲𑀻𑀮𑀲𑁆𑀲𑀸𑀧𑀺 𑀦𑀼𑀧𑁆𑀧𑀚𑁆𑀚𑀢𑀺; 𑀲𑁄 𑀳𑀺 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀸𑀲𑁄𑀯. 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺.

𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺; 𑀉𑀧𑁆𑀧𑀦𑁆𑀦𑁂 𑀘 𑀲𑀼𑀤𑁆𑀥𑀲𑀫𑀣𑀮𑀸𑀪𑀻 𑀯𑀸 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀯𑀸 𑀅𑀦𑁆𑀢𑀭𑀸 𑀞𑀧𑁂𑀢𑀺. 𑀲𑁄 𑀳𑀺 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 ¶ 𑀅𑀧𑀲𑁆𑀲𑀦𑁆𑀢𑁄 ‘𑀅𑀳𑀁 𑀲𑁄𑀢𑀸𑀧𑀦𑁆𑀦𑁄’𑀢𑀺 𑀯𑀸 ‘𑀲𑀓𑀤𑀸𑀕𑀸𑀫𑀻’𑀢𑀺 𑀯𑀸 ‘𑀅𑀦𑀸𑀕𑀸𑀫𑀻’𑀢𑀺 𑀯𑀸 𑀫𑀜𑁆𑀜𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀧𑀦 𑀅𑀭𑀳𑀢𑁆𑀢𑁂𑀬𑁂𑀯 𑀞𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀺𑀩𑀮𑁂𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀗𑁆𑀔𑀸𑀭𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀅𑀲𑀻𑀢𑀺𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺; 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀘𑀸𑀭𑁄 𑀳𑁄𑀢𑀺. 𑀲𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸𑀯 ‘𑀅𑀭𑀳𑀸 𑀅𑀳’𑀦𑁆𑀢𑀺 𑀫𑀜𑁆𑀜𑀢𑀺, 𑀉𑀘𑁆𑀘𑀫𑀸𑀮𑀗𑁆𑀓𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬, 𑀳𑀗𑁆𑀓𑀦𑀓𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄 𑀯𑀺𑀬, 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀦𑀺𑀗𑁆𑀓𑀧𑁄𑀡𑁆𑀡𑀧𑀥𑀸𑀦𑀖𑀭𑀯𑀸𑀲𑀻 𑀘𑀽𑀴𑀲𑀼𑀫𑀢𑁆𑀣𑁂𑀭𑁄 𑀯𑀺𑀬 𑀘.

𑀢𑀢𑁆𑀭𑀺𑀤𑀁 𑀏𑀓𑀯𑀢𑁆𑀣𑀼𑀧𑀭𑀺𑀤𑀻𑀧𑀦𑀁 𑁋 𑀢𑀮𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀏𑀓𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀫𑀳𑀸𑀔𑀻𑀡𑀸𑀲𑀯𑁄 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀤𑀸𑀬𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘𑀓𑀺𑀦𑁆𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀉𑀘𑁆𑀘𑀢𑀮𑀺𑀗𑁆𑀓𑀯𑀸𑀲𑀻𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀲𑀫𑀡𑀓𑀺𑀘𑁆𑀘𑀁 ¶ 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀦𑁄’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀫𑁂𑀯𑀲𑁆𑀲 𑀤𑀺𑀲𑁆𑀯𑀸 ‘𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀫𑁂𑀯 𑀓𑀭𑀺𑀲𑁆𑀲𑀢𑀻’𑀢𑀺 𑀘 𑀜𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀑𑀭𑁄𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. ‘𑀓𑀺𑀁, 𑀆𑀯𑀼𑀲𑁄 𑀥𑀫𑁆𑀫𑀤𑀺𑀦𑁆𑀦, 𑀅𑀓𑀸𑀮𑁂 𑀆𑀕𑀢𑁄𑀲𑀻’𑀢𑀺 𑀘 𑀯𑀼𑀢𑁆𑀢𑁄 ‘𑀧𑀜𑁆𑀳𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄𑀫𑁆𑀳𑀻’𑀢𑀺 𑀆𑀳.

𑀢𑀢𑁄 ‘𑀧𑀼𑀘𑁆𑀙𑀸𑀯𑀼𑀲𑁄, 𑀚𑀸𑀦𑀫𑀸𑀦𑁄 𑀓𑀣𑀬𑀺𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁄 𑀧𑀜𑁆𑀳𑀸𑀲𑀳𑀲𑁆𑀲𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀅𑀲𑀚𑁆𑀚𑀫𑀸𑀦𑁄𑀯 𑀓𑀣𑁂𑀲𑀺. 𑀢𑀢𑁄 ‘𑀅𑀢𑀺𑀢𑀺𑀓𑁆𑀔𑀁 𑀢𑁂, 𑀪𑀦𑁆𑀢𑁂, 𑀜𑀸𑀡𑀁. 𑀓𑀤𑀸 𑀢𑀼𑀫𑁆𑀳𑁂𑀳𑀺 𑀅𑀬𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄’𑀢𑀺 𑀯𑀼𑀢𑁆𑀢𑁄 ‘𑀇𑀢𑁄 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂, 𑀆𑀯𑀼𑀲𑁄’𑀢𑀺 𑀆𑀳. ‘𑀲𑀫𑀸𑀥𑀺𑀫𑁆𑀧𑀺, 𑀪𑀦𑁆𑀢𑁂, 𑀯𑀴𑀜𑁆𑀚𑁂𑀣𑀸’𑀢𑀺? ‘𑀦 𑀇𑀤𑀁, 𑀆𑀯𑀼𑀲𑁄, 𑀪𑀸𑀭𑀺𑀬’𑀦𑁆𑀢𑀺. ‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀏𑀓𑀁 𑀳𑀢𑁆𑀣𑀺𑀁 𑀫𑀸𑀧𑁂𑀣𑀸’𑀢𑀺. 𑀣𑁂𑀭𑁄 𑀲𑀩𑁆𑀩𑀲𑁂𑀢𑀁 𑀳𑀢𑁆𑀣𑀺𑀁 𑀫𑀸𑀧𑁂𑀲𑀺. ‘𑀇𑀤𑀸𑀦𑀺, 𑀪𑀦𑁆𑀢𑁂, 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀅𑀜𑁆𑀘𑀺𑀢𑀓𑀡𑁆𑀡𑁄 𑀧𑀲𑀸𑀭𑀺𑀢𑀦𑀗𑁆𑀕𑀼𑀝𑁆𑀞𑁄 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑁂𑀭𑀯𑀁 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺 𑀢𑀣𑀸 𑀢𑀁 𑀓𑀭𑁄𑀣𑀸’𑀢𑀺. 𑀣𑁂𑀭𑁄 𑀢𑀣𑀸 𑀓𑀢𑁆𑀯𑀸 𑀯𑁂𑀕𑁂𑀦 𑀆𑀕𑀘𑁆𑀙𑀢𑁄 𑀳𑀢𑁆𑀣𑀺𑀲𑁆𑀲 𑀪𑁂𑀭𑀯𑀁 𑀆𑀓𑀸𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀢𑀫𑁂𑀦𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀳𑀢𑁆𑀣𑀁 ¶ 𑀧𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀲𑀸𑀭𑀚𑁆𑀚𑀁 𑀦𑀸𑀫 𑀳𑁄𑀢𑀻’𑀢𑀺 𑀆𑀳. 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 ‘𑀅𑀯𑀲𑁆𑀲𑀬𑁄 𑀫𑁂, 𑀆𑀯𑀼𑀲𑁄 𑀥𑀫𑁆𑀫𑀤𑀺𑀦𑁆𑀦, 𑀳𑁄𑀳𑀻’𑀢𑀺 𑀯𑀢𑁆𑀯𑀸 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. ‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀺𑀘𑁆𑀘𑁂𑀯𑀸𑀳𑀁 𑀆𑀕𑀢𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀘𑀗𑁆𑀓𑀫𑀁 𑀆𑀭𑀼𑀬𑁆𑀳 𑀢𑀢𑀺𑀬𑁂 𑀧𑀤𑀯𑀸𑀭𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀓𑀺𑀭 𑀤𑁄𑀲𑀘𑀭𑀺𑀢𑁄 𑀅𑀳𑁄𑀲𑀺.

𑁮𑁮𑁩. 𑀅𑀲𑁆𑀫𑀺𑀫𑀸𑀦𑀦𑀺𑀤𑁆𑀤𑁂𑀲𑁂 𑀭𑀽𑀧𑀁 𑀅𑀲𑁆𑀫𑀻𑀢𑀺 𑀫𑀸𑀦𑁄𑀢𑀺 ‘𑀅𑀳𑀁 𑀭𑀽𑀧’𑀦𑁆𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀙𑀦𑁆𑀤𑁄𑀢𑀺 𑀫𑀸𑀦𑀁 𑀅𑀦𑀼𑀕𑀢𑀘𑁆𑀙𑀦𑁆𑀤𑁄𑀯. 𑀢𑀣𑀸 𑀅𑀦𑀼𑀲𑀬𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁮𑁮𑁪. 𑀫𑀺𑀘𑁆𑀙𑀸𑀫𑀸𑀦𑀦𑀺𑀤𑁆𑀤𑁂𑀲𑁂 𑀧𑀸𑀧𑀓𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦𑀸𑀢𑀺 𑀆𑀤𑀻𑀲𑀼 𑀧𑀸𑀧𑀓𑀁 𑀓𑀫𑁆𑀫𑀸𑀬𑀢𑀦𑀁 𑀦𑀸𑀫 𑀓𑁂𑀯𑀝𑁆𑀝𑀫𑀘𑁆𑀙𑀩𑀦𑁆𑀥𑀦𑁂𑀲𑀸𑀤𑀸𑀤𑀻𑀦𑀁 𑀓𑀫𑁆𑀫𑀁. 𑀧𑀸𑀧𑀓𑀁 𑀲𑀺𑀧𑁆𑀧𑀸𑀬𑀢𑀦𑀁 ¶ 𑀦𑀸𑀫 𑀫𑀘𑁆𑀙𑀚𑀸𑀮𑀔𑀺𑀧𑀦𑀓𑀼𑀫𑀺𑀦𑀓𑀭𑀡𑁂𑀲𑀼 𑀘𑁂𑀯 𑀧𑀸𑀲𑀑𑀟𑁆𑀟𑀦𑀲𑀽𑀮𑀸𑀭𑁄𑀧𑀦𑀸𑀤𑀻𑀲𑀼 𑀘 𑀙𑁂𑀓𑀢𑀸. 𑀧𑀸𑀧𑀓𑀁 𑀯𑀺𑀚𑁆𑀚𑀸𑀝𑁆𑀞𑀸𑀦𑀁 𑀦𑀸𑀫 𑀬𑀸 𑀓𑀸𑀘𑀺 𑀧𑀭𑀽𑀧𑀖𑀸𑀢𑀯𑀺𑀚𑁆𑀚𑀸. 𑀧𑀸𑀧𑀓𑀁 𑀲𑀼𑀢𑀁 𑀦𑀸𑀫 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁. 𑀧𑀸𑀧𑀓𑀁 𑀧𑀝𑀺𑀪𑀸𑀦𑀁 𑀦𑀸𑀫 𑀤𑀼𑀩𑁆𑀪𑀸𑀲𑀺𑀢𑀬𑀼𑀢𑁆𑀢𑀁 𑀓𑀧𑁆𑀧𑀦𑀸𑀝𑀓𑀯𑀺𑀮𑀧𑁆𑀧𑀦𑀸𑀤𑀺𑀧𑀝𑀺𑀪𑀸𑀦𑀁. 𑀧𑀸𑀧𑀓𑀁 𑀲𑀻𑀮𑀁 𑀦𑀸𑀫 𑀅𑀚𑀲𑀻𑀮𑀁 𑀕𑁄𑀲𑀻𑀮𑀁. 𑀯𑀢𑀫𑁆𑀧𑀺 𑀅𑀚𑀯𑀢𑀕𑁄𑀯𑀢𑀫𑁂𑀯. 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀦 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼 𑀬𑀸 𑀓𑀸𑀘𑀺 𑀤𑀺𑀝𑁆𑀞𑀺.

𑁮𑁮𑁫. 𑀜𑀸𑀢𑀺𑀯𑀺𑀢𑀓𑁆𑀓𑀦𑀺𑀤𑁆𑀤𑁂𑀲𑀸𑀤𑀻𑀲𑀼 ‘𑀫𑀬𑁆𑀳𑀁 𑀜𑀸𑀢𑀬𑁄 𑀲𑀼𑀔𑀚𑀻𑀯𑀺𑀦𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’𑀢𑀺 𑀏𑀯𑀁 𑀧𑀜𑁆𑀘𑀓𑀸𑀫𑀕𑀼𑀡𑀲𑀦𑁆𑀦𑀺𑀲𑁆𑀲𑀺𑀢𑁂𑀦 ¶ 𑀕𑁂𑀳𑀲𑀺𑀢𑀧𑁂𑀫𑁂𑀦 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄𑀯 𑀜𑀸𑀢𑀺𑀯𑀺𑀢𑀓𑁆𑀓𑁄 𑀦𑀸𑀫. ‘𑀔𑀬𑀁 𑀕𑀢𑀸 𑀯𑀬𑀁 𑀕𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀦 𑀜𑀸𑀢𑀺𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀳𑁄𑀢𑀺.

𑁮𑁮𑁬. ‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁄 𑀲𑀼𑀪𑀺𑀓𑁆𑀔𑁄 𑀲𑀫𑁆𑀧𑀦𑁆𑀦𑀲𑀲𑁆𑀲𑁄’𑀢𑀺 𑀢𑀼𑀝𑁆𑀞𑀫𑀸𑀦𑀲𑁆𑀲 𑀕𑁂𑀳𑀲𑀺𑀢𑀧𑁂𑀫𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄 𑀦𑀸𑀫. ‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁂 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸 𑀯𑀬𑀁 𑀕𑀢𑀸’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀦 𑀚𑀦𑀧𑀤𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀳𑁄𑀢𑀺.

𑁮𑁮𑁭. 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄, 𑀅𑀫𑀭𑁄 𑀯𑀸 𑀯𑀺𑀢𑀓𑁆𑀓𑁄𑀢𑀺 𑀅𑀫𑀭𑀯𑀺𑀢𑀓𑁆𑀓𑁄. 𑀢𑀢𑁆𑀣 ‘𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀤𑀼𑀓𑁆𑀔𑁂 𑀦𑀺𑀚𑁆𑀚𑀺𑀡𑁆𑀡𑁂 𑀲𑀫𑁆𑀧𑀭𑀸𑀬𑁂 𑀅𑀢𑁆𑀢𑀸 ¶ 𑀲𑀼𑀔𑀻 𑀳𑁄𑀢𑀺 𑀅𑀫𑀭𑁄’𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀦𑀸𑀫. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀦 ‘𑀲𑀲𑁆𑀲𑀢𑀁 𑀯𑀤𑁂𑀲𑀻’𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄’ 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺 (𑀤𑀻. 𑀦𑀺. 𑁧.𑁬𑁨) 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄 𑀤𑀺𑀝𑁆𑀞𑀺𑀕𑀢𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀬𑀣𑀸 𑀅𑀫𑀭𑁄 𑀦𑀸𑀫 𑀫𑀘𑁆𑀙𑁄 𑀉𑀤𑀓𑁂 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀢𑀺, 𑀕𑀸𑀳𑀁 𑀦 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀅𑀲𑀡𑁆𑀞𑀳𑀦𑀢𑁄 𑀦 𑀫𑀭𑀢𑀻𑀢𑀺 𑀅𑀫𑀭𑁄 𑀦𑀸𑀫 𑀳𑁄𑀢𑀺. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀫𑀭𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑀁.

𑁮𑁮𑁮. 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀅𑀦𑀼𑀤𑁆𑀤𑀬𑀢𑀸𑀧𑀢𑀺𑀭𑀽𑀧𑀓𑁂𑀦 𑀕𑁂𑀳𑀲𑀺𑀢𑀧𑁂𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀲𑀳𑀦𑀦𑁆𑀤𑀻𑀢𑀺𑀆𑀤𑀻𑀲𑀼 𑀉𑀧𑀝𑁆𑀞𑀸𑀓𑁂𑀲𑀼 𑀦𑀦𑁆𑀤𑀦𑁆𑀢𑁂𑀲𑀼 𑀲𑁄𑀘𑀦𑁆𑀢𑁂𑀲𑀼 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀤𑀺𑀕𑀼𑀡𑀁 𑀦𑀦𑁆𑀤𑀢𑀺, 𑀤𑀺𑀕𑀼𑀡𑀁 𑀲𑁄𑀘𑀢𑀺; 𑀢𑁂𑀲𑀼 𑀲𑀼𑀔𑀺𑀢𑁂𑀲𑀼 ¶ 𑀤𑀺𑀕𑀼𑀡𑀁 𑀲𑀼𑀔𑀺𑀢𑁄 𑀳𑁄𑀢𑀺, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀺𑀕𑀼𑀡𑀁 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺. 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀽𑀢𑀺 𑀢𑁂𑀲𑀼 𑀫𑀳𑀦𑁆𑀢𑁂𑀲𑀼 𑀯𑀸 𑀔𑀼𑀤𑁆𑀤𑀓𑁂𑀲𑀼 𑀯𑀸 𑀓𑀫𑁆𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼. 𑀅𑀢𑁆𑀢𑀦𑀸 𑀯𑀸 𑀬𑁄𑀕𑀁 𑀆𑀧𑀚𑁆𑀚𑀢𑀻𑀢𑀺 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀦𑁆𑀢𑁄 𑀧𑀜𑁆𑀜𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀲𑀮𑁆𑀮𑁂𑀔𑀁 𑀓𑁄𑀧𑁂𑀢𑀺. 𑀬𑁄 𑀢𑀢𑁆𑀣𑀸𑀢𑀺 𑀬𑁄 𑀢𑀲𑁆𑀫𑀺𑀁 𑀲𑀁𑀲𑀝𑁆𑀞𑀯𑀺𑀳𑀸𑀭𑁂, 𑀢𑀲𑁆𑀫𑀺𑀁 𑀯𑀸 𑀬𑁄𑀕𑀸𑀧𑀚𑁆𑀚𑀦𑁂 𑀕𑁂𑀳𑀲𑀺𑀢𑁄 𑀯𑀺𑀢𑀓𑁆𑀓𑁄 𑁋 𑀅𑀬𑀁 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫.

𑁮𑁮𑁯. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀻𑀯𑀭𑀸𑀤𑀺𑀮𑀸𑀪𑁂𑀦 𑀘𑁂𑀯 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄.

𑁮𑁯𑁦. 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 ¶ ‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼𑀁, 𑀦 𑀧𑁄𑀣𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀓𑀣𑁂𑀬𑁆𑀬𑀼’𑀦𑁆𑀢𑀺 𑀏𑀯𑀁 𑀅𑀦𑀯𑀜𑁆𑀜𑀸𑀢𑀪𑀸𑀯𑀧𑀢𑁆𑀣𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑀯𑀺𑀢𑀓𑁆𑀓𑁄. 𑀬𑁄 𑀢𑀢𑁆𑀣 𑀕𑁂𑀳𑀲𑀺𑀢𑁄𑀢𑀺 𑀬𑁄 𑀢𑀲𑁆𑀫𑀺𑀁 ‘𑀫𑀸 𑀫𑀁 𑀧𑀭𑁂 𑀅𑀯𑀚𑀸𑀦𑀺𑀁𑀲𑀽’𑀢𑀺 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑁂 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀕𑁂𑀳𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁨.) 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯𑁧. 𑀤𑀼𑀓𑁂𑀲𑀼 𑀓𑁄𑀥𑀦𑀺𑀤𑁆𑀤𑁂𑀲𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀳𑁂𑀝𑁆𑀞𑀸 𑀅𑀦𑀸𑀕𑀢𑁂𑀲𑀼 𑀧𑀦 𑀉𑀧𑀦𑀸𑀳𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀧𑀼𑀩𑁆𑀩𑀓𑀸𑀮𑀁 𑀓𑁄𑀥𑀁 𑀉𑀧𑀦𑀬𑁆𑀳𑀢𑀻𑀢𑀺 𑀅𑀧𑀭𑀓𑀸𑀮𑀓𑁄𑀥𑁄 𑀉𑀧𑀦𑀸𑀳𑁄 𑀦𑀸𑀫. 𑀉𑀧𑀦𑀬𑁆𑀳𑀦𑀸𑀓𑀸𑀭𑁄 ¶ 𑀉𑀧𑀦𑀬𑁆𑀳𑀦𑀸. 𑀉𑀧𑀦𑀬𑁆𑀳𑀺𑀢𑀲𑁆𑀲 𑀪𑀸𑀯𑁄 𑀉𑀧𑀦𑀬𑁆𑀳𑀺𑀢𑀢𑁆𑀢𑀁. 𑀅𑀝𑁆𑀞𑀧𑀦𑀸𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀲𑁆𑀲 𑀅𑀦𑀦𑁆𑀢𑀭𑀝𑁆𑀞𑀧𑀦𑀸 𑀫𑀭𑀺𑀬𑀸𑀤𑀝𑁆𑀞𑀧𑀦𑀸 𑀯𑀸. 𑀞𑀧𑀦𑀸𑀢𑀺 𑀧𑀓𑀢𑀺𑀞𑀧𑀦𑀸. 𑀲𑀡𑁆𑀞𑀧𑀦𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀖𑀸𑀢𑀝𑁆𑀞𑀧𑀦𑀸. 𑀅𑀦𑀼𑀲𑀁𑀲𑀦𑁆𑀤𑀦𑀸𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑁂𑀦 𑀓𑁄𑀥𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑀭𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀻𑀪𑀸𑀯𑀓𑀭𑀡𑀸. 𑀅𑀦𑀼𑀧𑁆𑀧𑀩𑀦𑁆𑀥𑀦𑀸𑀢𑀺 𑀧𑀼𑀭𑀺𑀫𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀲𑁆𑀲 𑀖𑀝𑀦𑀸. 𑀤𑀴𑁆𑀳𑀻𑀓𑀫𑁆𑀫𑀦𑁆𑀢𑀺 𑀣𑀺𑀭𑀓𑀭𑀡𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀉𑀧𑀦𑀦𑁆𑀥𑀦𑀮𑀓𑁆𑀔𑀡𑁄 𑀯𑁂𑀭𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀭𑀲𑁄 𑀉𑀧𑀦𑀸𑀳𑁄𑀢𑀺 𑀯𑀼𑀘𑁆𑀘𑀢𑀺; 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀯𑁂𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺; ‘𑀏𑀯𑀁 𑀦𑀸𑀫 𑀫𑀁 𑀏𑀲 𑀯𑀢𑁆𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑁄’𑀢𑀺 𑀅𑀧𑀭𑀸𑀧𑀭𑀁 𑀅𑀦𑀼𑀩𑀦𑁆𑀥𑀢𑀺; 𑀆𑀤𑀺𑀢𑁆𑀢𑀧𑀽𑀢𑀺𑀅𑀮𑀸𑀢𑀁 𑀯𑀺𑀬 𑀚𑀮𑀢𑁂𑀯 ¶ ; 𑀥𑁄𑀯𑀺𑀬𑀫𑀸𑀦𑀁 𑀅𑀘𑁆𑀙𑀘𑀫𑁆𑀫𑀁 𑀯𑀺𑀬, 𑀯𑀲𑀸𑀢𑁂𑀮𑀫𑀓𑁆𑀔𑀺𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀘 𑀦 𑀧𑀭𑀺𑀲𑀼𑀚𑁆𑀛𑀢𑀺.

𑁮𑁯𑁨. 𑀫𑀓𑁆𑀔𑀦𑀪𑀸𑀯𑀯𑀲𑁂𑀦 𑀫𑀓𑁆𑀔𑁄; 𑀧𑀭𑀕𑀼𑀡𑀫𑀓𑁆𑀔𑀦𑀸𑀬 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀅𑀢𑁆𑀢𑀦𑁄 𑀓𑀸𑀭𑀡𑀁, 𑀕𑀽𑀣𑀧𑀳𑀭𑀡𑀓𑀁 𑀕𑀽𑀣𑁄 𑀯𑀺𑀬, 𑀧𑀞𑀫𑀢𑀭𑀁 𑀫𑀓𑁆𑀔𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀸 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀦𑀺𑀝𑁆𑀞𑀼𑀭𑀪𑀸𑀯𑁄 𑀦𑀺𑀝𑁆𑀞𑀼𑀭𑀺𑀬𑀁; ‘𑀢𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀻’𑀢𑀺 𑀔𑁂𑀴𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀦𑁆𑀢𑀺 𑀦𑀺𑀝𑁆𑀞𑀼𑀭𑀺𑀬𑀓𑀭𑀡𑀁. 𑀕𑀳𑀝𑁆𑀞𑁄 𑀯𑀸 𑀳𑀺 𑀕𑀳𑀝𑁆𑀞𑀁, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀓𑀼𑀚𑁆𑀛𑀺𑀢𑁆𑀯𑀸 ‘𑀢𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀻’𑀢𑀺 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀧𑀸𑀤𑁂𑀦 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀦𑀺𑀝𑁆𑀞𑀼𑀭𑀺𑀬𑀁 𑀦𑀸𑀫 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀲 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 ¶ 𑀫𑀓𑁆𑀔𑁄, 𑀢𑁂𑀲𑀁 𑀯𑀺𑀦𑀸𑀲𑀦𑀭𑀲𑁄, 𑀧𑀭𑁂𑀦 𑀲𑀼𑀓𑀢𑀸𑀦𑀁 𑀓𑀺𑀭𑀺𑀬𑀸𑀦𑀁 𑀅𑀯𑀘𑁆𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀧𑀴𑀸𑀲𑀢𑀻𑀢𑀺 𑀧𑀴𑀸𑀲𑁄; 𑀧𑀭𑀲𑁆𑀲 𑀕𑀼𑀡𑁂 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀴𑀸𑀲𑀲𑁆𑀲 𑀆𑀬𑀦𑀸 𑀧𑀴𑀸𑀲𑀸𑀬𑀦𑀸. 𑀧𑀴𑀸𑀲𑁄 𑀘 𑀲𑁄 𑀅𑀢𑁆𑀢𑀦𑁄 𑀚𑀬𑀸𑀳𑀭𑀡𑀢𑁄 𑀆𑀳𑀸𑀭𑁄 𑀘𑀸𑀢𑀺 𑀧𑀴𑀸𑀲𑀸𑀳𑀸𑀭𑁄. 𑀯𑀺𑀯𑀸𑀤𑀝𑁆𑀞𑀸𑀦𑀦𑁆𑀢𑀺 𑀯𑀺𑀯𑀸𑀤𑀓𑀸𑀭𑀡𑀁. 𑀬𑀼𑀕𑀕𑁆𑀕𑀸𑀳𑁄𑀢𑀺 𑀲𑀫𑀥𑀼𑀭𑀕𑁆𑀕𑀳𑀡𑀁. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁄𑀢𑀺 𑀅𑀢𑁆𑀢𑀦𑀸 𑀕𑀳𑀺𑀢𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀁. 𑀮𑀓𑁆𑀔𑀡𑀸𑀤𑀺𑀢𑁄 ¶ 𑀧𑀦𑁂𑀲 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄, 𑀧𑀭𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀲𑀫𑀓𑀭𑀡𑀭𑀲𑁄, 𑀧𑀭𑁂𑀲𑀁 𑀕𑀼𑀡𑀧𑁆𑀧𑀫𑀸𑀡𑁂𑀦 𑀉𑀧𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀧𑀴𑀸𑀲𑀻 𑀳𑀺 𑀧𑀼𑀕𑁆𑀕𑀮𑁄 𑀤𑀼𑀢𑀺𑀬𑀲𑁆𑀲 𑀥𑀼𑀭𑀁 𑀦 𑀤𑁂𑀢𑀺, 𑀲𑀫𑀁 𑀧𑀲𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸𑀓𑀘𑁆𑀙𑀫𑀡𑁆𑀟𑀮𑁂 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀩𑀳𑀽𑀲𑀼 𑀲𑀼𑀢𑁆𑀢𑁂𑀲𑀼 𑀘 𑀓𑀸𑀭𑀡𑁂𑀲𑀼 𑀘 𑀆𑀪𑀢𑁂𑀲𑀼𑀧𑀺 ‘𑀢𑀯 𑀘 𑀫𑀫 𑀘 𑀯𑀸𑀤𑁂 𑀓𑀺𑀁 𑀦𑀸𑀫 𑀦𑀸𑀦𑀸𑀓𑀭𑀡𑀁? 𑀦𑀦𑀼 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀫𑁂𑀯 𑀅𑀫𑁆𑀳𑀸𑀓𑀁 𑀯𑀘𑀦’𑀦𑁆𑀢𑀺 𑀯𑀤𑀢𑀺. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀦𑀺𑀤𑁆𑀤𑁂𑀲𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑁮𑁯𑁪. 𑀫𑀸𑀬𑀸𑀦𑀺𑀤𑁆𑀤𑁂𑀲𑁂 ¶ 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀚𑀸𑀦𑀁𑀬𑁂𑀯 ‘𑀧𑀡𑁆𑀡𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀸 𑀪𑀺𑀓𑁆𑀔𑀽 𑀪𑀸𑀭𑀺𑀬𑀁 𑀓𑀭𑁄𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀯𑀻𑀢𑀺𑀓𑁆𑀓𑀫𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’𑀢𑀺 𑀉𑀧𑀲𑀦𑁆𑀢𑁄 𑀯𑀺𑀬 𑀪𑀸𑀲𑀢𑀺. 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀻𑀢𑀺 ‘𑀫𑀬𑀸 𑀓𑀢𑀁 𑀇𑀤𑀁 𑀧𑀸𑀧𑀓𑀫𑁆𑀫𑀁 𑀫𑀸 𑀓𑁂𑀘𑀺 𑀚𑀸𑀦𑀺𑀁𑀲𑀽’𑀢𑀺 𑀓𑀸𑀬𑁂𑀦 𑀯𑀢𑁆𑀢𑀁 𑀓𑀭𑁄𑀢𑀺. 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀢𑁄 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸 𑀯𑀺𑀬𑀸𑀢𑀺 𑀫𑀸𑀬𑀸. 𑀫𑀸𑀬𑀸𑀯𑀺𑀦𑁄 𑀪𑀸𑀯𑁄 𑀫𑀸𑀬𑀸𑀯𑀺𑀢𑀸. 𑀓𑀢𑁆𑀯𑀸 𑀧𑀸𑀧𑀁 𑀧𑀼𑀦 𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀢𑀺𑀘𑁆𑀘 𑀆𑀲𑀭𑀦𑁆𑀢𑀺 𑀏𑀢𑀸𑀬 ¶ 𑀲𑀢𑁆𑀢𑀸𑀢𑀺 𑀅𑀘𑁆𑀘𑀸𑀲𑀭𑀸. 𑀓𑀸𑀬𑀯𑀸𑀘𑀸𑀓𑀺𑀭𑀺𑀬𑀸𑀳𑀺 𑀅𑀜𑁆𑀜𑀣𑀸 𑀤𑀲𑁆𑀲𑀦𑀢𑁄 𑀯𑀜𑁆𑀘𑁂𑀢𑀻𑀢𑀺 𑀯𑀜𑁆𑀘𑀦𑀸. 𑀏𑀢𑀸𑀬 𑀲𑀢𑁆𑀢𑀸 𑀦𑀺𑀓𑀭𑁄𑀦𑁆𑀢𑀻𑀢𑀺 𑀦𑀺𑀓𑀢𑀺; 𑀫𑀺𑀘𑁆𑀙𑀸𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’𑀢𑀺 𑀧𑀸𑀧𑀸𑀦𑀁 𑀯𑀺𑀓𑁆𑀔𑀺𑀧𑀦𑀢𑁄 𑀯𑀺𑀓𑀺𑀭𑀡𑀸. ‘𑀦𑀸𑀳𑀁 𑀏𑀯𑀁 𑀓𑀭𑁄𑀫𑀻’𑀢𑀺 𑀧𑀭𑀺𑀯𑀚𑁆𑀚𑀦𑀢𑁄 𑀧𑀭𑀺𑀳𑀭𑀡𑀸. 𑀓𑀸𑀬𑀸𑀤𑀻𑀳𑀺 𑀲𑀁𑀯𑀭𑀡𑀢𑁄 𑀕𑀽𑀳𑀦𑀸. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸. 𑀢𑀺𑀡𑀧𑀡𑁆𑀡𑁂𑀳𑀺 𑀯𑀺𑀬 𑀕𑀽𑀣𑀁 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀧𑀸𑀧𑀁 𑀙𑀸𑀤𑁂𑀢𑀻𑀢𑀺 𑀙𑀸𑀤𑀦𑀸. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀙𑀸𑀤𑀦𑀸 𑀧𑀝𑀺𑀘𑁆𑀙𑀸𑀤𑀦𑀸. 𑀦 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀁. 𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀦𑀸𑀯𑀺𑀓𑀫𑁆𑀫𑀁. 𑀲𑀼𑀝𑁆𑀞𑀼 𑀙𑀸𑀤𑀦𑀸 𑀯𑁄𑀘𑁆𑀙𑀸𑀤𑀦𑀸. 𑀓𑀢𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀧𑀼𑀦𑀧𑀺 𑀧𑀸𑀧𑀲𑁆𑀲 𑀓𑀭𑀡𑀢𑁄 𑀧𑀸𑀧𑀓𑀺𑀭𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀓𑀢𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸 𑀦𑀸𑀫 𑀯𑀼𑀘𑁆𑀘𑀢𑀺; 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀲𑁆𑀫𑀸𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀅𑀗𑁆𑀕𑀸𑀭𑁄, 𑀉𑀤𑀓𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀔𑀸𑀡𑀼, 𑀧𑀺𑀮𑁄𑀢𑀺𑀓𑀸𑀧𑀮𑀺𑀯𑁂𑀞𑀺𑀢𑀁 𑀯𑀺𑀬 𑀘 𑀲𑀢𑁆𑀣𑀁 𑀳𑁄𑀢𑀺.

𑀲𑀸𑀞𑁂𑀬𑁆𑀬𑀦𑀺𑀤𑁆𑀤𑁂𑀲𑁂 ¶ 𑀲𑀞𑁄𑀢𑀺 𑀅𑀲𑀦𑁆𑀢𑀕𑀼𑀡𑀧𑀭𑀺𑀤𑀻𑀧𑀦𑀢𑁄 𑀦 𑀲𑀫𑁆𑀫𑀸 𑀪𑀸𑀲𑀺𑀢𑀸. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀲𑀞𑁄 𑀧𑀭𑀺𑀲𑀞𑁄. 𑀬𑀁 𑀢𑀢𑁆𑀣𑀸𑀢𑀺 𑀬𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀲𑀞𑀦𑁆𑀢𑀺 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀁 𑀓𑁂𑀭𑀸𑀝𑀺𑀬𑀁. 𑀲𑀞𑀢𑀸𑀢𑀺 𑀲𑀞𑀸𑀓𑀸𑀭𑁄. 𑀓𑀓𑁆𑀓𑀭𑀢𑀸𑀢𑀺 𑀧𑀤𑀼𑀫𑀦𑀸𑀮𑀺𑀲𑁆𑀲 𑀯𑀺𑀬 𑀅𑀧𑀭𑀸𑀫𑀲𑀦𑀓𑁆𑀔𑀫𑁄 𑀔𑀭𑀨𑀭𑀼𑀲𑀪𑀸𑀯𑁄. 𑀓𑀓𑁆𑀓𑀭𑀺𑀬𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀤𑀴𑁆𑀳𑀓𑁂𑀭𑀸𑀝𑀺𑀬𑀁 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁 𑀦𑀸𑀫 𑀯𑀼𑀘𑁆𑀘𑀢𑀺; 𑀬𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀼𑀘𑁆𑀙𑀺𑀁 𑀯𑀸 𑀧𑀺𑀝𑁆𑀞𑀺𑀁 𑀯𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸.

𑀯𑀸𑀫𑁂𑀦 𑀲𑀽𑀓𑀭𑁄 𑀳𑁄𑀢𑀺, 𑀤𑀓𑁆𑀔𑀺𑀡𑁂𑀦 𑀅𑀚𑀸𑀫𑀺𑀕𑁄;

𑀲𑀭𑁂𑀦 𑀦𑁂𑀮𑀓𑁄 𑀳𑁄𑀢𑀺, 𑀯𑀺𑀲𑀸𑀡𑁂𑀦 𑀚𑀭𑀕𑁆𑀕𑀯𑁄𑀢𑀺.

𑀏𑀯𑀁 𑀯𑀼𑀢𑁆𑀢𑀬𑀓𑁆𑀔𑀲𑀽𑀓𑀭𑀲𑀤𑀺𑀲𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀤𑀺𑀦𑀺𑀤𑁆𑀤𑁂𑀲𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑁯𑁦𑁨. 𑀅𑀦𑀚𑁆𑀚𑀯𑀦𑀺𑀤𑁆𑀤𑁂𑀲𑁂 𑀅𑀦𑀚𑁆𑀚𑀯𑁄𑀢𑀺 𑀅𑀦𑀼𑀚𑀼𑀢𑀸𑀓𑀸𑀭𑁄. 𑀅𑀦𑀚𑁆𑀚𑀯𑀪𑀸𑀯𑁄 𑀅𑀦𑀚𑁆𑀚𑀯𑀢𑀸. 𑀚𑀺𑀫𑁆𑀳𑀢𑀸𑀢𑀺 𑀘𑀦𑁆𑀤𑀯𑀗𑁆𑀓𑀢𑀸. 𑀯𑀗𑁆𑀓𑀢𑀸𑀢𑀺 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸. 𑀓𑀼𑀝𑀺𑀮𑀢𑀸𑀢𑀺 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸. 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀸𑀬𑀯𑀘𑀻𑀘𑀺𑀢𑁆𑀢𑀯𑀗𑁆𑀓𑀢𑀸𑀯 𑀓𑀣𑀺𑀢𑀸.

𑀅𑀫𑀤𑁆𑀤𑀯𑀦𑀺𑀤𑁆𑀤𑁂𑀲𑁂 𑀦 𑀫𑀼𑀤𑀼𑀪𑀸𑀯𑁄 𑀅𑀫𑀼𑀤𑀼𑀢𑀸. 𑀅𑀫𑀤𑁆𑀤𑀯𑀸𑀓𑀸𑀭𑁄 𑀅𑀫𑀤𑁆𑀤𑀯𑀢𑀸. 𑀓𑀓𑁆𑀔𑀴𑀪𑀸𑀯𑁄 𑀓𑀓𑁆𑀔𑀴𑀺𑀬𑀁. 𑀫𑀤𑁆𑀤𑀯𑀓𑀭𑀲𑁆𑀲 𑀲𑀺𑀦𑁂𑀳𑀲𑁆𑀲 𑀅𑀪𑀸𑀯𑀢𑁄 𑀨𑀭𑀼𑀲𑀪𑀸𑀯𑁄 𑀨𑀸𑀭𑀼𑀲𑀺𑀬𑀁. 𑀅𑀦𑀻𑀘𑀯𑀼𑀢𑁆𑀢𑀺𑀢𑀸𑀬 𑀉𑀚𑀼𑀓𑀫𑁂𑀯 𑀞𑀺𑀢𑀘𑀺𑀢𑁆𑀢𑀪𑀸𑀯𑁄 𑀉𑀚𑀼𑀘𑀺𑀢𑁆𑀢𑀢𑀸 ¶ . 𑀧𑀼𑀦 𑀅𑀫𑀼𑀤𑀼𑀢𑀸𑀕𑀳𑀡𑀁 𑀢𑀲𑁆𑀲𑀸 𑀯𑀺𑀲𑁂𑀲𑀦𑀢𑁆𑀣𑀁 ‘𑀅𑀫𑀼𑀤𑀼𑀢𑀸𑀲𑀗𑁆𑀔𑀸𑀢𑀸 𑀉𑀚𑀼𑀘𑀺𑀢𑁆𑀢𑀢𑀸, 𑀦 𑀅𑀚𑁆𑀚𑀯𑀲𑀗𑁆𑀔𑀸𑀢𑀸 𑀉𑀚𑀼𑀘𑀺𑀢𑁆𑀢𑀢𑀸’𑀢𑀺.

𑁯𑁦𑁩. 𑀅𑀓𑁆𑀔𑀦𑁆𑀢𑀺𑀦𑀺𑀤𑁆𑀤𑁂𑀲𑀸𑀤𑀬𑁄 𑀔𑀦𑁆𑀢𑀺𑀦𑀺𑀤𑁆𑀤𑁂𑀲𑀸𑀤𑀺𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑀸.

𑁯𑁦𑁮. 𑀲𑀁𑀬𑁄𑀚𑀦𑀦𑀺𑀤𑁆𑀤𑁂𑀲𑁂 𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄. 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀢𑁆𑀢𑀸 𑀓𑀸𑀫𑀪𑀯𑁂 𑀅𑀧𑁆𑀧𑀁 ¶ 𑀓𑀸𑀮𑀁 𑀯𑀲𑀦𑁆𑀢𑀺 𑀓𑀧𑁆𑀧𑀲𑁆𑀲 𑀘𑀢𑀼𑀢𑁆𑀣𑀫𑁂𑀯 𑀓𑁄𑀝𑁆𑀞𑀸𑀲𑀁, 𑀇𑀢𑀭𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀓𑀸𑀫𑀪𑀯𑁄 𑀲𑀼𑀜𑁆𑀜𑁄 𑀳𑁄𑀢𑀺 𑀢𑀼𑀘𑁆𑀙𑁄, 𑀭𑀽𑀧𑀸𑀭𑀽𑀧𑀪𑀯𑁂 𑀩𑀳𑀼𑀁 𑀓𑀸𑀮𑀁 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀦𑁂𑀲𑀁 𑀬𑀲𑁆𑀫𑀸 𑀓𑀸𑀫𑀪𑀯𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸 𑀳𑁄𑀦𑁆𑀢𑀺, 𑀅𑀧𑁆𑀧𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼, 𑀬𑀢𑁆𑀣 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸 𑀢𑀢𑁆𑀣 𑀆𑀮𑀬𑁄𑀧𑀺 𑀧𑀢𑁆𑀣𑀦𑀸𑀧𑀺 𑀅𑀪𑀺𑀮𑀸𑀲𑁄𑀧𑀺 𑀩𑀳𑀼 𑀳𑁄𑀢𑀺, 𑀬𑀢𑁆𑀣 𑀅𑀧𑁆𑀧𑀸 𑀢𑀢𑁆𑀣 𑀅𑀧𑁆𑀧𑁄, 𑀢𑀲𑁆𑀫𑀸 𑀓𑀸𑀫𑀪𑀯𑁄 ¶ 𑀅𑀚𑁆𑀛𑀢𑁆𑀢𑀁 𑀦𑀸𑀫 𑀚𑀸𑀢𑁄, 𑀭𑀽𑀧𑀸𑀭𑀽𑀧𑀪𑀯𑀸 𑀩𑀳𑀺𑀤𑁆𑀥𑀸 𑀦𑀸𑀫. 𑀇𑀢𑀺 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀓𑀸𑀫𑀪𑀯𑁂 𑀩𑀦𑁆𑀥𑀦𑀁 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫, 𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀢𑁂𑀲𑀼 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀩𑀦𑁆𑀥𑀦𑀁 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀣 𑀏𑀓𑁂𑀓𑀁 𑀧𑀜𑁆𑀘𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀻’’𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀉𑀤𑁆𑀥𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀻𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁩.) 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁦𑁯. 𑀢𑀺𑀓𑀦𑀺𑀤𑁆𑀤𑁂𑀲𑁂 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄 𑀓𑀣𑀺𑀢𑁄. 𑀅𑀓𑀼𑀲𑀮𑀯𑀺𑀢𑀓𑁆𑀓𑀸𑀤𑀻𑀲𑀼 𑀯𑀺𑀢𑀓𑁆𑀓𑀦𑀯𑀲𑁂𑀦 𑀯𑀺𑀢𑀓𑁆𑀓𑁄, 𑀲𑀜𑁆𑀚𑀸𑀦𑀦𑀯𑀲𑁂𑀦 𑀲𑀜𑁆𑀜𑀸, 𑀲𑀪𑀸𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀘𑁆𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀧𑀞𑀫𑀦𑀬𑁄 𑀓𑀫𑁆𑀫𑀧𑀣𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀤𑀼𑀢𑀺𑀬𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀫𑁆𑀫𑀯𑀲𑁂𑀦, 𑀢𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑀺𑀢𑀘𑁂𑀢𑀦𑀸𑀯𑀲𑁂𑀦𑁂𑀯.

𑁯𑁧𑁪. 𑀆𑀲𑀯𑀦𑀺𑀤𑁆𑀤𑁂𑀲𑁂 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀬𑁄𑀯 𑀆𑀲𑀯𑀸 𑀓𑀣𑀺𑀢𑀸.

𑁯𑁧𑁯. 𑀏𑀲𑀦𑀸𑀦𑀺𑀤𑁆𑀤𑁂𑀲𑁂 ¶ 𑀲𑀗𑁆𑀔𑁂𑀧𑀢𑁄 𑀢𑀢𑁆𑀣 𑀓𑀢𑀫𑀸 𑀓𑀸𑀫𑁂𑀲𑀦𑀸𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀓𑀸𑀫𑀕𑀯𑁂𑀲𑀦𑀭𑀸𑀕𑁄 𑀓𑀸𑀫𑁂𑀲𑀦𑀸. 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀪𑀯𑀕𑀯𑁂𑀲𑀦𑀭𑀸𑀕𑁄 𑀪𑀯𑁂𑀲𑀦𑀸. 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀕𑀯𑁂𑀲𑀦𑀸 𑀤𑀺𑀝𑁆𑀞𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀭𑀸𑀕𑀤𑀺𑀝𑁆𑀞𑀺𑀬𑁄 𑀏𑀯 𑀏𑀲𑀦𑀸, 𑀢𑀤𑁂𑀓𑀝𑁆𑀞𑀁 𑀧𑀦 𑀓𑀫𑁆𑀫𑀫𑁆𑀧𑀺 𑀏𑀲𑀦𑀸 𑀏𑀯, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀦𑀬𑁄 𑀯𑀺𑀪𑀢𑁆𑀢𑁄. 𑀢𑀢𑁆𑀣 𑀢𑀤𑁂𑀓𑀝𑁆𑀞𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀓𑀝𑁆𑀞𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ¶ 𑀓𑀸𑀫𑀭𑀸𑀕𑁂𑀓𑀝𑁆𑀞𑀁 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀫𑁂𑀯 𑀧𑀯𑀢𑁆𑀢𑀢𑀺; 𑀪𑀯𑀭𑀸𑀕𑁂𑀓𑀝𑁆𑀞𑀁 𑀧𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀘𑀗𑁆𑀓𑀫𑀦𑁆𑀢𑀸𑀦𑀁 𑀛𑀸𑀦𑀗𑁆𑀕𑀸𑀦𑀁 𑀅𑀲𑁆𑀲𑀸𑀤𑀦𑀓𑀸𑀮𑁂 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, ‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’𑀦𑁆𑀢𑀺 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀸𑀤𑀦𑀓𑀸𑀮𑁂 𑀯𑀘𑀻𑀓𑀫𑁆𑀫𑀁, 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 ¶ 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸𑀯 𑀅𑀲𑁆𑀲𑀸𑀤𑀦𑀓𑀸𑀮𑁂 𑀫𑀦𑁄𑀓𑀫𑁆𑀫𑀁. 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀯𑀲𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀘𑀗𑁆𑀓𑀫𑀦𑀸𑀤𑀺𑀯𑀲𑁂𑀦 𑀢𑀸𑀦𑀺 𑀳𑁄𑀦𑁆𑀢𑀺𑀬𑁂𑀯.

𑁯𑁨𑁦. 𑀯𑀺𑀥𑀸𑀦𑀺𑀤𑁆𑀤𑁂𑀲𑁂 ‘‘𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁫) 𑀆𑀓𑀸𑀭𑀲𑀡𑁆𑀞𑀸𑀦𑀁 𑀯𑀺𑀥𑀸 𑀦𑀸𑀫. ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁫𑁧) 𑀓𑁄𑀝𑁆𑀞𑀸𑀲𑁄. ‘‘𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀢𑀻’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁧𑁦𑁭𑁯) 𑀫𑀸𑀦𑁄. 𑀇𑀥𑀸𑀧𑀺 𑀫𑀸𑀦𑁄𑀯 𑀯𑀺𑀥𑀸 𑀦𑀸𑀫. 𑀲𑁄 𑀳𑀺 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀯𑀺𑀤𑀳𑀦𑀢𑁄 𑀯𑀺𑀥𑀸𑀢𑀺 𑀯𑀼𑀘𑁆𑀘𑀢𑀺. 𑀞𑀧𑀦𑀝𑁆𑀞𑁂𑀦 𑀯𑀸 𑀯𑀺𑀥𑀸. 𑀢𑀲𑁆𑀫𑀸 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀸 𑀫𑀸𑀦𑀯𑀺𑀥𑀸 𑀫𑀸𑀦𑀞𑀧𑀦𑀸 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀧𑀤𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁯𑁨𑁧. 𑀪𑀬𑀦𑀺𑀤𑁆𑀤𑁂𑀲𑁂 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀪𑀬𑀦𑁆𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀪𑀬𑀁. 𑀪𑀬𑀸𑀦𑀓𑀦𑁆𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀪𑀬𑀯𑀲𑁂𑀦 𑀕𑀢𑁆𑀢𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀮𑁄𑀫𑀸𑀦𑀁 𑀳𑀁𑀲𑀦𑀁, 𑀉𑀤𑁆𑀥𑀕𑁆𑀕𑀪𑀸𑀯𑁄. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀓𑀺𑀘𑁆𑀘𑀢𑁄 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀘𑁂𑀢𑀲𑁄 𑀉𑀢𑁆𑀭𑀸𑀲𑁄𑀢𑀺 𑀲𑀪𑀸𑀯𑀢𑁄 𑀤𑀲𑁆𑀲𑀺𑀢𑀁.

𑁯𑁨𑁨. 𑀢𑀫𑀦𑀺𑀤𑁆𑀤𑁂𑀲𑁂 𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀲𑁂𑀦 𑀅𑀯𑀺𑀚𑁆𑀚𑀸 𑀓𑀣𑀺𑀢𑀸. ‘‘𑀢𑀫𑀦𑁆𑀥𑀓𑀸𑀭𑁄 𑀲𑀫𑁆𑀫𑁄𑀳𑁄, 𑀅𑀯𑀺𑀚𑁆𑀚𑁄𑀖𑁄 𑀫𑀳𑀩𑁆𑀪𑀬𑁄’’𑀢𑀺 𑀯𑀘𑀦𑀢𑁄 𑀳𑀺 𑀅𑀯𑀺𑀚𑁆𑀚𑀸 𑀢𑀫𑁄 ¶ 𑀦𑀸𑀫. 𑀢𑀺𑀡𑁆𑀡𑀁 𑀧𑀦 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸𑀲𑀼𑀔𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀲𑁂𑀦 𑀤𑁂𑀲𑀦𑀸 𑀓𑀢𑀸. 𑀢𑀢𑁆𑀣 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑁂 𑀔𑀢𑁆𑀢𑀺𑀬𑁄 𑀅𑀳𑁄𑀲𑀺𑀁 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄 𑀲𑀼𑀤𑁆𑀤𑁄 𑀓𑀸𑀴𑁄 𑀑𑀤𑀸𑀢𑁄 𑀭𑀲𑁆𑀲𑁄 𑀤𑀻𑀖𑁄’𑀢𑀺 𑀓𑀗𑁆𑀔𑀦𑁆𑀢𑁄 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀗𑁆𑀔𑀢𑀺 𑀦𑀸𑀫. ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑁂 𑀔𑀢𑁆𑀢𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄…𑀧𑁂… 𑀤𑀻𑀖𑁄’𑀢𑀺 𑀓𑀗𑁆𑀔𑀦𑁆𑀢𑁄 𑀅𑀦𑀸𑀕𑀢𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀗𑁆𑀔𑀢𑀺 𑀦𑀸𑀫. ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀏𑀢𑀭𑀳𑀺 𑀔𑀢𑁆𑀢𑀺𑀬𑁄 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄 𑀲𑀼𑀤𑁆𑀤𑁄; 𑀓𑀺𑀁 𑀯𑀸 𑀅𑀳𑀁 𑀭𑀽𑀧𑀁 𑀉𑀤𑀸𑀳𑀼 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀓𑀗𑁆𑀔𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀗𑁆𑀔𑀢𑀺 𑀦𑀸𑀫.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀔𑀢𑁆𑀢𑀺𑀬𑁄 𑀯𑀸 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁, 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑀪𑀸𑀯𑀁, 𑀯𑁂𑀲𑁆𑀲𑁄 𑀯𑀸 𑀯𑁂𑀲𑁆𑀲𑀪𑀸𑀯𑀁, 𑀲𑀼𑀤𑁆𑀤𑁄 𑀯𑀸 𑀲𑀼𑀤𑁆𑀤𑀪𑀸𑀯𑀁 𑀅𑀚𑀸𑀦𑀦𑀓𑁄 𑀦𑀸𑀫 𑀦𑀢𑁆𑀣𑀺, 𑀚𑀻𑀯𑀮𑀤𑁆𑀥𑀺𑀓𑁄 ¶ 𑀧𑀦 𑀲𑀢𑁆𑀢𑁄 𑀔𑀢𑁆𑀢𑀺𑀬𑀚𑀻𑀯𑀸𑀤𑀻𑀦𑀁 𑀯𑀡𑁆𑀡𑀸𑀤𑀺𑀪𑁂𑀤𑀁 𑀲𑀼𑀢𑁆𑀯𑀸 ‘𑀓𑀻𑀤𑀺𑀲𑁄 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑁋 𑀓𑀺𑀁 𑀦𑀼 𑀔𑁄 ¶ 𑀦𑀻𑀮𑀓𑁄 𑀉𑀤𑀸𑀳𑀼 𑀧𑀻𑀢𑀓𑁄 𑀮𑁄𑀳𑀺𑀢𑀓𑁄 𑀑𑀤𑀸𑀢𑁄 𑀘𑀢𑀼𑀭𑀁𑀲𑁄 𑀙𑀴𑀁𑀲𑁄 𑀅𑀝𑁆𑀞𑀁𑀲𑁄’𑀢𑀺 𑀓𑀗𑁆𑀔𑀦𑁆𑀢𑁄 𑀏𑀯𑀁 𑀓𑀗𑁆𑀔𑀢𑀺 𑀦𑀸𑀫.

𑁯𑁨𑁩. 𑀢𑀺𑀢𑁆𑀣𑀸𑀬𑀢𑀦𑀸𑀦𑀻𑀢𑀺 𑀢𑀺𑀢𑁆𑀣𑀪𑀽𑀢𑀸𑀦𑀺 𑀆𑀬𑀢𑀦𑀸𑀦𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀆𑀬𑀢𑀦𑀸𑀦𑀺. 𑀢𑀢𑁆𑀣 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀬𑁂𑀲𑀁 𑀢𑀸 𑀤𑀺𑀝𑁆𑀞𑀺𑀬𑁄 𑀭𑀼𑀘𑁆𑀘𑀦𑁆𑀢𑀺 𑀔𑀫𑀦𑁆𑀢𑀺. 𑀆𑀬𑀢𑀦𑀝𑁆𑀞𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀜𑁆𑀚𑀸𑀬𑀫𑀸𑀦𑀸 𑀇𑀫𑁂𑀲𑀼𑀬𑁂𑀯 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀜𑁆𑀚𑀸𑀬𑀦𑁆𑀢𑀺, 𑀲𑀫𑁄𑀲𑀭𑀫𑀸𑀦𑀸𑀧𑀺 𑀏𑀢𑁂𑀲𑀼𑀬𑁂𑀯 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁂 𑀘 𑀦𑁂𑀲𑀁 𑀏𑀢𑀸𑀦𑀺𑀬𑁂𑀯 𑀓𑀸𑀭𑀡𑀸𑀦𑀺, 𑀢𑀲𑁆𑀫𑀸 𑀢𑀺𑀢𑁆𑀣𑀸𑀦𑀺 𑀘 𑀢𑀸𑀦𑀺 𑀲𑀜𑁆𑀚𑀸𑀢𑀸𑀦𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑁂𑀦 𑀆𑀬𑀢𑀦𑀸𑀦𑀺 𑀘𑀸𑀢𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺; 𑀢𑁂𑀦𑁂𑀯𑀢𑁆𑀣𑁂𑀦 𑀢𑀺𑀢𑁆𑀣𑀺𑀬𑀸𑀦𑀁 𑀆𑀬𑀢𑀦𑀸𑀦𑀻𑀢𑀺𑀧𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺. 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀲𑀢𑁆𑀢𑁄. 𑀓𑀸𑀫𑀜𑁆𑀘 𑀧𑀼𑀭𑀺𑀲𑁄𑀢𑀺𑀧𑀺 𑀧𑀼𑀕𑁆𑀕𑀮𑁄𑀢𑀺𑀧𑀺 𑀯𑀼𑀢𑁆𑀢𑁂 𑀲𑀢𑁆𑀢𑁄𑀬𑁂𑀯 𑀯𑀼𑀢𑁆𑀢𑁄, 𑀅𑀬𑀁 𑀧𑀦 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫 𑀬𑁄 𑀬𑀣𑀸 𑀚𑀸𑀦𑀸𑀢𑀺 𑀢𑀲𑁆𑀲 𑀢𑀣𑀸 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀁 𑀚𑀸𑀦𑀸𑀢𑀺, 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 𑀅𑀦𑀼𑀪𑀯𑀢𑀺 𑀯𑀸. 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀧𑀼𑀩𑁆𑀩𑁂 𑀓𑀢𑀓𑀸𑀭𑀡𑀸, 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀧𑀘𑁆𑀘𑀬𑁂𑀦𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀦𑀺𑀕𑀡𑁆𑀞𑀲𑀫𑀬𑁄. 𑀏𑀯𑀁𑀯𑀸𑀤𑀺𑀦𑁄 𑀧𑀦 𑀢𑁂 𑀓𑀫𑁆𑀫𑀯𑁂𑀤𑀦𑀜𑁆𑀘 𑀓𑀺𑀭𑀺𑀬𑀯𑁂𑀤𑀦𑀜𑁆𑀘 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀯𑀺𑀧𑀸𑀓𑀯𑁂𑀤𑀦𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 (𑀫𑀳𑀸𑀦𑀺. 𑁫) 𑀘 𑀅𑀝𑁆𑀞𑀲𑀼 𑀆𑀩𑀸𑀥𑁂𑀲𑀼 ¶ 𑀲𑀢𑁆𑀢 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀫𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀲𑀼 𑀘 𑀢𑀻𑀲𑀼 𑀓𑀫𑁆𑀫𑁂𑀲𑀼 𑀤𑁆𑀯𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀲𑀗𑁆𑀔𑀸𑀢𑀸𑀲𑀼 𑀘 𑀘𑀢𑀽𑀲𑀼 𑀘𑁂𑀢𑀦𑀸𑀲𑀼 𑀯𑀺𑀧𑀸𑀓𑀘𑁂𑀢𑀦𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺.

𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀓𑀸𑀭𑀡𑀸; 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀧𑀚𑀸𑀧𑀢𑀺𑀦𑀸 𑀯𑀸 𑀇𑀲𑁆𑀲𑀭𑁂𑀦 𑀦𑀺𑀫𑁆𑀫𑀺𑀢𑀢𑁆𑀢𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑁄. 𑀅𑀬𑀜𑁆𑀳𑀺 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑀸 𑀓𑀢𑀫𑀽𑀮𑀓𑁂𑀦 𑀯𑀸 𑀆𑀡𑀢𑁆𑀢𑀺𑀫𑀽𑀮𑀓𑁂𑀦 𑀯𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀯𑀸 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸 𑀯𑀸 𑀧𑀝𑀺𑀲𑀁𑀯𑁂𑀤𑁂𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸; 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀓𑀸𑀭𑀡𑀸 𑀏𑀯 𑀧𑀦 𑀇𑀫𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺. 𑀏𑀯𑀁𑀯𑀸𑀤𑀺𑀦𑁄 𑀧𑀦𑁂𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀆𑀩𑀸𑀥𑁂𑀲𑀼 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀩𑀸𑀳𑀦𑁆𑀢𑀺. 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀲𑀼𑀧𑀺 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 ¶ 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀩𑀸𑀳𑀦𑁆𑀢𑀺.

𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸𑀢𑀺 𑀳𑁂𑀢𑀼𑀜𑁆𑀘 𑀧𑀘𑁆𑀘𑀬𑀜𑁆𑀘 𑀯𑀺𑀦𑀸 𑀅𑀓𑀸𑀭𑀡𑁂𑀦𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 ¶ 𑀆𑀚𑀻𑀯𑀓𑀲𑀫𑀬𑁄. 𑀏𑀯𑀁 𑀯𑀸𑀤𑀺𑀦𑁄 𑀏𑀢𑁂𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀓𑀸𑀭𑀡𑁂𑀲𑀼 𑀘 𑀩𑁆𑀬𑀸𑀥𑀻𑀲𑀼 𑀘 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺.

𑁯𑁨𑁪. 𑀓𑀺𑀜𑁆𑀘𑀦𑀸𑀢𑀺 𑀧𑀮𑀺𑀩𑁄𑀥𑀸. 𑀭𑀸𑀕𑁄 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀢𑁆𑀢𑁂 𑀩𑀦𑁆𑀥𑀢𑀺 𑀧𑀮𑀺𑀩𑀼𑀦𑁆𑀥𑁂𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀗𑁆𑀕𑀡𑀸𑀦𑀻𑀢𑀺 ‘‘𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼’’𑀦𑁆𑀢𑀺 (𑀚𑀸. 𑁧.𑁧.𑁨) 𑀆𑀕𑀢𑀝𑁆𑀞𑀸𑀦𑁂 𑀪𑀽𑀫𑀺𑀧𑁆𑀧𑀤𑁂𑀲𑁄 𑀅𑀗𑁆𑀕𑀡𑀁. ‘‘𑀢𑀲𑁆𑀲𑁂𑀯 𑀭𑀚𑀲𑁆𑀲 𑀯𑀸 𑀅𑀗𑁆𑀕𑀡𑀲𑁆𑀲 𑀯𑀸 𑀧𑀳𑀸𑀦𑀸𑀬 𑀯𑀸𑀬𑀫𑀢𑀻’’𑀢𑀺 (𑀫. 𑀦𑀺. 𑁧.𑁧𑁮𑁪; 𑀅. 𑀦𑀺. 𑁧𑁦.𑁫𑁧) 𑀆𑀕𑀢𑀝𑁆𑀞𑀸𑀦𑁂 𑀬𑀁 𑀓𑀺𑀜𑁆𑀘𑀺 𑀫𑀮𑀁 𑀯𑀸 𑀧𑀗𑁆𑀓𑁄 𑀯𑀸. ‘‘𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄’’𑀢𑀺 (𑀫. 𑀦𑀺. 𑁧.𑁫𑁭) 𑀆𑀕𑀢𑀝𑁆𑀞𑀸𑀦𑁂 𑀦𑀸𑀦𑀧𑁆𑀧𑀓𑀸𑀭𑁄 𑀢𑀺𑀩𑁆𑀩𑀓𑀺𑀮𑁂𑀲𑁄. 𑀇𑀥𑀸𑀧𑀺 𑀢𑀤𑁂𑀯 𑀓𑀺𑀮𑁂𑀲𑀗𑁆𑀕𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯 𑀭𑀸𑀕𑁄 𑀅𑀗𑁆𑀕𑀡𑀦𑁆𑀢𑀺𑀆𑀤𑀺𑀫𑀸𑀳.

𑀫𑀮𑀸𑀦𑀻𑀢𑀺 𑀫𑀮𑀺𑀦𑀪𑀸𑀯𑀓𑀭𑀡𑀸𑀦𑀺. 𑀭𑀸𑀕𑁄 𑀫𑀮𑀦𑁆𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀘𑀺𑀢𑁆𑀢𑀁 𑀫𑀮𑀺𑀦𑀁 𑀓𑀭𑁄𑀢𑀺, 𑀫𑀮𑀁 𑀕𑀸𑀳𑀸𑀧𑁂𑀢𑀺, 𑀢𑀲𑁆𑀫𑀸 𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄.

𑀯𑀺𑀲𑀫𑀦𑀺𑀤𑁆𑀤𑁂𑀲𑁂 ¶ 𑀬𑀲𑁆𑀫𑀸 𑀭𑀸𑀕𑀸𑀤𑀻𑀲𑀼 𑀘𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼 𑀘 𑀲𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑀺, 𑀧𑀓𑁆𑀔𑀮𑀺𑀢𑀸 𑀘 𑀧𑀦 𑀲𑀸𑀲𑀦𑀢𑁄𑀧𑀺 𑀲𑀼𑀕𑀢𑀺𑀢𑁄𑀧𑀺 𑀧𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀓𑁆𑀔𑀮𑀦𑀧𑀸𑀢𑀳𑁂𑀢𑀼𑀢𑁄 𑀭𑀸𑀕𑁄 𑀯𑀺𑀲𑀫𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀕𑁆𑀕𑀻𑀢𑀺 𑀅𑀦𑀼𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺. 𑀭𑀸𑀕𑀕𑁆𑀕𑀻𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀢𑁆𑀢𑁂 𑀅𑀦𑀼𑀤𑀳𑀢𑀺 𑀛𑀸𑀧𑁂𑀢𑀺, 𑀢𑀲𑁆𑀫𑀸 𑀅𑀕𑁆𑀕𑀻𑀢𑀺 𑀯𑀼𑀘𑁆𑀘𑀢𑀺. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀯𑀢𑁆𑀣𑀽𑀦𑀺 𑁋 𑀏𑀓𑀸 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼𑀦𑀻 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑁂 𑀉𑀧𑁄𑀲𑀣𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀧𑀸𑀮𑀓𑀭𑀽𑀧𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸. 𑀅𑀣𑀲𑁆𑀲𑀸 𑀅𑀦𑁆𑀢𑁄 𑀭𑀸𑀕𑁄 𑀉𑀧𑁆𑀧𑀦𑁆𑀦𑁄. 𑀲𑀸 𑀢𑁂𑀦𑁂𑀯 𑀛𑀸𑀬𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀕𑀘𑁆𑀙𑀫𑀸𑀦𑀸 ‘𑀅𑀬𑀁 𑀤𑀳𑀭𑀸 𑀞𑀺𑀢𑀸, 𑀧𑀓𑁆𑀓𑁄𑀲𑀣 𑀦’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑀸 𑀕𑀦𑁆𑀢𑁆𑀯𑀸 ‘𑀓𑀲𑁆𑀫𑀸 𑀞𑀺𑀢𑀸𑀲𑀻’𑀢𑀺 𑀳𑀢𑁆𑀣𑁂 𑀕𑀡𑁆𑀳𑀺. 𑀕𑀳𑀺𑀢𑀫𑀢𑁆𑀢𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀢𑀸. 𑀇𑀤𑀁 𑀢𑀸𑀯 𑀭𑀸𑀕𑀲𑁆𑀲 𑀅𑀦𑀼𑀤𑀳𑀦𑀢𑀸𑀬 𑀯𑀢𑁆𑀣𑀼. 𑀤𑁄𑀲𑀲𑁆𑀲 𑀧𑀦 𑀅𑀦𑀼𑀤𑀳𑀦𑀢𑀸𑀬 𑀫𑀦𑁄𑀧𑀤𑁄𑀲𑀺𑀓𑀸 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸. 𑀫𑁄𑀳𑀲𑁆𑀲 𑀅𑀦𑀼𑀤𑀳𑀦𑀢𑀸𑀬 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸. 𑀫𑁄𑀳𑀦𑀯𑀲𑁂𑀦 𑀳𑀺 𑀢𑁂𑀲𑀁 𑀲𑀢𑀺𑀲𑀫𑁆𑀫𑁄𑀲𑁄 𑀳𑁄𑀢𑀺. 𑀢𑀲𑁆𑀫𑀸 𑀔𑀺𑀟𑁆𑀟𑀸𑀯𑀲𑁂𑀦 𑀆𑀳𑀸𑀭𑀓𑀸𑀮𑀁 𑀅𑀢𑀺𑀯𑀢𑁆𑀢𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀓𑀲𑀸𑀯𑀸𑀢𑀺 ¶ 𑀓𑀲𑀝𑀸 𑀦𑀺𑀭𑁄𑀚𑀸. 𑀭𑀸𑀕𑀸𑀤𑀻𑀲𑀼 𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼 𑀘 𑀏𑀓𑀫𑁆𑀧𑀺 𑀧𑀡𑀻𑀢𑀁 𑀑𑀚𑀯𑀦𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀸𑀕𑁄 𑀓𑀲𑀸𑀯𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁯𑁨𑁫. 𑀅𑀲𑁆𑀲𑀸𑀤𑀤𑀺𑀝𑁆𑀞𑀻𑀢𑀺 ¶ 𑀅𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑀝𑀺𑀲𑁂𑀯𑀦𑀤𑁄𑀲𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀧𑀸𑀢𑀩𑁆𑀩𑀪𑀸𑀯𑀁 𑀧𑀭𑀺𑀪𑀼𑀜𑁆𑀚𑀦𑀁 𑀅𑀚𑁆𑀛𑁄𑀳𑀭𑀡𑀁. 𑀏𑀯𑀁𑀯𑀸𑀤𑀻 𑀳𑀺 𑀲𑁄 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀁 𑀧𑀺𑀯𑀦𑁆𑀢𑁄 𑀯𑀺𑀬 𑀅𑀚𑁆𑀛𑁄𑀳𑀭𑀦𑁆𑀢𑁄 𑀯𑀺𑀬 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀻𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀕𑀢𑀸 𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀮𑀸𑀫𑀓𑀸 𑀤𑀺𑀝𑁆𑀞𑀺. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁆𑀣 𑀧𑀞𑀫𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀳𑁄𑀢𑀺, 𑀤𑀼𑀢𑀺𑀬𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀢𑀢𑀺𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑀲𑁆𑀲𑀢𑀤𑀺𑀝𑁆𑀞𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀻𑀢𑀺𑀆𑀤𑀺𑀫𑀸𑀳.

𑁯𑁨𑁬. 𑀅𑀭𑀢𑀺𑀦𑀺𑀤𑁆𑀤𑁂𑀲𑁄 𑀘 𑀯𑀺𑀳𑁂𑀲𑀸𑀦𑀺𑀤𑁆𑀤𑁂𑀲𑁄 𑀘 𑀯𑀼𑀢𑁆𑀢𑀢𑁆𑀣𑁄𑀬𑁂𑀯. 𑀅𑀥𑀫𑁆𑀫𑀲𑁆𑀲 𑀘𑀭𑀺𑀬𑀸 𑀅𑀥𑀫𑁆𑀫𑀘𑀭𑀺𑀬𑀸, 𑀅𑀥𑀫𑁆𑀫𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀫𑀸 𑀘𑀭𑀺𑀬𑀸, 𑀯𑀺𑀲𑀫𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀘𑀭𑀺𑀬𑀸𑀢𑀺 𑀯𑀺𑀲𑀫𑀘𑀭𑀺𑀬𑀸. 𑀤𑁄𑀯𑀘𑀲𑁆𑀲𑀢𑀸𑀧𑀸𑀧𑀫𑀺𑀢𑁆𑀢𑀢𑀸 𑀦𑀺𑀤𑁆𑀤𑁂𑀲𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀧𑀼𑀣𑀼𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀢𑁄 𑀦𑀸𑀦𑀢𑁆𑀢𑁂𑀲𑀼 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸. 𑀬𑀲𑁆𑀫𑀸 𑀯𑀸 𑀅𑀜𑁆𑀜𑀸𑀯 𑀓𑀸𑀫𑀲𑀜𑁆𑀜𑀸, 𑀅𑀜𑁆𑀜𑀸 𑀩𑁆𑀬𑀸𑀧𑀸𑀤𑀸𑀤𑀺𑀲𑀜𑁆𑀜𑀸, 𑀢𑀲𑁆𑀫𑀸 ¶ 𑀦𑀸𑀦𑀢𑁆𑀢𑀸 𑀲𑀜𑁆𑀜𑀸𑀢𑀺𑀧𑀺 𑀦𑀸𑀦𑀢𑁆𑀢𑀲𑀜𑁆𑀜𑀸. 𑀓𑁄𑀲𑀚𑁆𑀚𑀧𑀫𑀸𑀤𑀦𑀺𑀤𑁆𑀤𑁂𑀲𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲 𑀓𑀼𑀲𑀮𑀥𑀫𑁆𑀫𑀪𑀸𑀯𑀦𑀸𑀬 𑀅𑀦𑀦𑀼𑀬𑁄𑀕𑀯𑀲𑁂𑀦 𑀮𑀻𑀦𑀯𑀼𑀢𑁆𑀢𑀺𑀢𑀸 𑀓𑁄𑀲𑀚𑁆𑀚𑀁, 𑀧𑀫𑀚𑁆𑀚𑀦𑀯𑀲𑁂𑀦 𑀧𑀫𑀢𑁆𑀢𑀪𑀸𑀯𑁄 𑀧𑀫𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀤𑀺𑀦𑀺𑀤𑁆𑀤𑁂𑀲𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑁯𑁩𑁧. 𑀅𑀦𑀸𑀤𑀭𑀺𑀬𑀦𑀺𑀤𑁆𑀤𑁂𑀲𑁂 𑀑𑀯𑀸𑀤𑀲𑁆𑀲 𑀅𑀦𑀸𑀤𑀺𑀬𑀦𑀯𑀲𑁂𑀦 𑀅𑀦𑀸𑀤𑀭𑀪𑀸𑀯𑁄 𑀅𑀦𑀸𑀤𑀭𑀺𑀬𑀁. 𑀅𑀦𑀸𑀤𑀭𑀺𑀬𑀦𑀸𑀓𑀸𑀭𑁄 𑀅𑀦𑀸𑀤𑀭𑀢𑀸. 𑀲𑀕𑀭𑀼𑀯𑀸𑀲𑀁 𑀅𑀯𑀲𑀦𑀝𑁆𑀞𑁂𑀦 𑀅𑀕𑀸𑀭𑀯𑀪𑀸𑀯𑁄 𑀅𑀕𑀸𑀭𑀯𑀢𑀸. 𑀲𑀚𑁂𑀝𑁆𑀞𑀓𑀯𑀸𑀲𑀁 𑀅𑀯𑀲𑀦𑀝𑁆𑀞𑁂𑀦 𑀅𑀧𑁆𑀧𑀢𑀺𑀲𑁆𑀲𑀯𑀢𑀸. 𑀅𑀦𑀤𑁆𑀤𑀸𑀢𑀺 𑀅𑀦𑀸𑀤𑀺𑀬𑀦𑀸. 𑀅𑀦𑀤𑁆𑀤𑀸𑀬𑀦𑀸𑀢𑀺 𑀅𑀦𑀸𑀤𑀺𑀬𑀦𑀸𑀓𑀸𑀭𑁄. 𑀅𑀦𑀤𑁆𑀤𑀸𑀬 𑀅𑀬𑀺𑀢𑀲𑁆𑀲 𑀪𑀸𑀯𑁄 𑀅𑀦𑀤𑁆𑀤𑀸𑀬𑀺𑀢𑀢𑁆𑀢𑀁. 𑀅𑀲𑀻𑀮𑀲𑁆𑀲 𑀪𑀸𑀯𑁄 𑀅𑀲𑀻𑀮𑁆𑀬𑀁. 𑀅𑀘𑀺𑀢𑁆𑀢𑀻𑀓𑀸𑀭𑁄𑀢𑀺 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀲𑁆𑀲 𑀅𑀓𑀭𑀡𑀁.

𑁯𑁩𑁨. 𑀅𑀲𑁆𑀲𑀤𑁆𑀥𑀪𑀸𑀯𑁄 𑀅𑀲𑁆𑀲𑀤𑁆𑀥𑀺𑀬𑀁. 𑀅𑀲𑀤𑁆𑀤𑀳𑀦𑀸𑀓𑀸𑀭𑁄 𑀅𑀲𑀤𑁆𑀤𑀳𑀦𑀸. 𑀑𑀓𑀧𑁆𑀧𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀕𑁆𑀕𑀳𑀡𑀁 𑀅𑀦𑁄𑀓𑀧𑁆𑀧𑀦𑀸. 𑀅𑀧𑁆𑀧𑀲𑀻𑀤𑀦𑀝𑁆𑀞𑁂𑀦 𑀅𑀦𑀪𑀺𑀧𑁆𑀧𑀲𑀸𑀤𑁄.

𑀅𑀯𑀤𑀜𑁆𑀜𑀼𑀢𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀬𑀯𑀲𑁂𑀦 ‘𑀤𑁂𑀳𑀺, 𑀓𑀭𑁄𑀳𑀻’𑀢𑀺 𑀯𑀘𑀦𑀲𑁆𑀲 𑀅𑀚𑀸𑀦𑀢𑀸.

𑁯𑁩𑁪. 𑀩𑀼𑀤𑁆𑀥𑀸 ¶ 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘𑀸𑀢𑀺 𑀏𑀢𑁆𑀣 𑀩𑀼𑀤𑁆𑀥𑀕𑁆𑀕𑀳𑀡𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀕𑀳𑀺𑀢𑀸𑀯. 𑀅𑀲𑀫𑁂𑀢𑀼𑀓𑀫𑁆𑀬𑀢𑀸𑀢𑀺 ¶ 𑀢𑁂𑀲𑀁 𑀲𑀫𑀻𑀧𑀁 𑀅𑀕𑀦𑁆𑀢𑀼𑀓𑀸𑀫𑀢𑀸. 𑀲𑀤𑁆𑀥𑀫𑁆𑀫𑀁 𑀅𑀲𑁄𑀢𑀼𑀓𑀫𑁆𑀬𑀢𑀸𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑁄 𑀦𑀸𑀫, 𑀢𑀁 𑀅𑀲𑀼𑀡𑀺𑀢𑀼𑀓𑀸𑀫𑀢𑀸. 𑀅𑀦𑀼𑀕𑁆𑀕𑀳𑁂𑀢𑀼𑀓𑀫𑁆𑀬𑀢𑀸𑀢𑀺 𑀦 𑀉𑀕𑁆𑀕𑀳𑁂𑀢𑀼𑀓𑀸𑀫𑀢𑀸.

𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀸𑀢𑀺 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀪𑀸𑀯𑁄. 𑀬𑀲𑁆𑀫𑀸 𑀧𑀦 𑀲𑁄 𑀅𑀢𑁆𑀣𑀢𑁄 𑀉𑀧𑀸𑀭𑀫𑁆𑀪𑁄𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀉𑀧𑀸𑀭𑀫𑁆𑀪𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀸𑀭𑀫𑁆𑀪𑀦𑀯𑀲𑁂𑀦 𑀉𑀧𑀸𑀭𑀫𑁆𑀪𑁄. 𑀧𑀼𑀦𑀧𑁆𑀧𑀼𑀦𑀁 𑀉𑀧𑀸𑀭𑀫𑁆𑀪𑁄 𑀅𑀦𑀼𑀧𑀸𑀭𑀫𑁆𑀪𑁄 𑀉𑀧𑀸𑀭𑀫𑁆𑀪𑀦𑀸𑀓𑀸𑀭𑁄 𑀉𑀧𑀸𑀭𑀫𑁆𑀪𑀦𑀸. 𑀧𑀼𑀦𑀧𑁆𑀧𑀼𑀦𑀁 𑀉𑀧𑀸𑀭𑀫𑁆𑀪𑀦𑀸 𑀅𑀦𑀼𑀧𑀸𑀭𑀫𑁆𑀪𑀦𑀸. 𑀅𑀦𑀼𑀧𑀸𑀭𑀫𑁆𑀪𑀺𑀢𑀲𑁆𑀲 𑀪𑀸𑀯𑁄 𑀅𑀦𑀼𑀧𑀸𑀭𑀫𑁆𑀪𑀺𑀢𑀢𑁆𑀢𑀁. 𑀉𑀜𑁆𑀜𑀸𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀚𑀸𑀦𑀦𑀸. 𑀅𑀯𑀜𑁆𑀜𑀸𑀢𑀺 𑀅𑀯𑀚𑀸𑀦𑀦𑀸. 𑀧𑀭𑀺𑀪𑀯𑀦𑀁 𑀧𑀭𑀺𑀪𑀯𑁄. 𑀭𑀦𑁆𑀥𑀲𑁆𑀲 𑀕𑀯𑁂𑀲𑀺𑀢𑀸 𑀭𑀦𑁆𑀥𑀕𑀯𑁂𑀲𑀺𑀢𑀸. 𑀭𑀦𑁆𑀥𑀁 𑀯𑀸 𑀕𑀯𑁂𑀲𑀢𑀻𑀢𑀺 𑀭𑀦𑁆𑀥𑀕𑀯𑁂𑀲𑀻, 𑀢𑀲𑁆𑀲 𑀪𑀸𑀯𑁄 𑀭𑀦𑁆𑀥𑀕𑀯𑁂𑀲𑀺𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑁄 𑀉𑀧𑀸𑀭𑀫𑁆𑀪𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄, 𑀬𑀣𑀸 𑀦𑀸𑀫 𑀢𑀼𑀦𑁆𑀦𑀓𑀸𑀭𑁄 ¶ 𑀲𑀸𑀝𑀓𑀁 𑀧𑀲𑀸𑀭𑁂𑀢𑁆𑀯𑀸 𑀙𑀺𑀤𑁆𑀤𑀫𑁂𑀯 𑀑𑀮𑁄𑀓𑁂𑀢𑀺, 𑀏𑀯𑀫𑁂𑀯 𑀧𑀭𑀲𑁆𑀲 𑀲𑀩𑁆𑀩𑁂𑀧𑀺 𑀕𑀼𑀡𑁂 𑀫𑀓𑁆𑀔𑁂𑀢𑁆𑀯𑀸 𑀅𑀕𑀼𑀡𑁂𑀲𑀼𑀬𑁂𑀯 𑀧𑀢𑀺𑀝𑁆𑀞𑀸𑀢𑀺.

𑁯𑁩𑁬. 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄. 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑁂𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 ‘𑀇𑀤𑀁 𑀦𑀺𑀘𑁆𑀘’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄. 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁆𑀘𑀯𑀺𑀧𑁆𑀧𑀝𑀺𑀓𑀼𑀮𑁂𑀦 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀦𑀼𑀮𑁄𑀫𑀯𑀲𑁂𑀦. 𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺𑀧𑀺 𑀆𑀯𑀚𑁆𑀚𑀦𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑁂𑀯. 𑀆𑀯𑀚𑁆𑀚𑀦𑀜𑁆𑀳𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀯𑀝𑁆𑀝𑁂𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸. 𑀅𑀦𑀼𑀅𑀦𑀼 𑀆𑀯𑀝𑁆𑀝𑁂𑀢𑀻𑀢𑀺 𑀅𑀦𑀸𑀯𑀝𑁆𑀝𑀦𑀸. 𑀆𑀪𑀼𑀚𑀢𑀻𑀢𑀺 𑀆𑀪𑁄𑀕𑁄. 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀲𑀫𑀦𑁆𑀦𑀸𑀳𑀸𑀭𑁄. 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀢𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀫𑀦𑀲𑀺𑀓𑀭𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑁄. 𑀓𑀭𑁄𑀢𑀻𑀢𑀺 𑀞𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀤𑀻𑀦𑀺 𑀲𑀘𑁆𑀘𑀸𑀦𑀺 𑀬𑀸𑀣𑀸𑀯𑀢𑁄 𑀆𑀯𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀸𑀦𑀺𑀤𑁆𑀤𑁂𑀲𑁂 𑀬𑀁 𑀓𑀼𑀫𑁆𑀫𑀕𑁆𑀕𑀁 𑀲𑁂𑀯𑀢𑁄 𑀲𑁂𑀯𑀦𑀸 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀓𑀼𑀫𑁆𑀫𑀕𑁆𑀕𑁄𑀢𑀺 ¶ 𑀤𑀼𑀢𑀺𑀬𑀧𑀼𑀘𑁆𑀙𑀸 𑀓𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁪.) 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁩𑁯. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑁂 ¶ 𑀢𑀡𑁆𑀳𑀼𑀧𑁆𑀧𑀸𑀤𑁂𑀲𑀼 𑀘𑀻𑀯𑀭𑀳𑁂𑀢𑀽𑀢𑀺 ‘𑀓𑀢𑁆𑀣 𑀫𑀦𑀸𑀧𑀁 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀘𑀻𑀯𑀭𑀓𑀸𑀭𑀡𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺𑀪𑀯𑀸𑀪𑀯𑀳𑁂𑀢𑀽𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄; 𑀬𑀣𑀸 𑀘𑀻𑀯𑀭𑀸𑀤𑀺𑀳𑁂𑀢𑀼 𑀏𑀯𑀁 𑀪𑀯𑀸𑀪𑀯𑀳𑁂𑀢𑀽𑀢𑀺𑀧𑀺 𑀅𑀢𑁆𑀣𑁄. 𑀪𑀯𑀸𑀪𑀯𑁄𑀢𑀺 𑀘𑁂𑀢𑁆𑀣 𑀧𑀡𑀻𑀢𑀧𑀡𑀻𑀢𑀢𑀭𑀸𑀦𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀢𑀡𑁆𑀳𑀼𑀧𑁆𑀧𑀸𑀤𑀸𑀦𑀁 𑀧𑀳𑀸𑀦𑀢𑁆𑀣𑀸𑀬 𑀧𑀝𑀺𑀧𑀸𑀝𑀺𑀬𑀸𑀯 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸 𑀤𑁂𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀕𑀢𑀺𑀕𑀫𑀦𑁂𑀲𑀼 ¶ 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀙𑀦𑁆𑀤𑁂𑀦 𑀧𑁂𑀫𑁂𑀦 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺. 𑀧𑀭𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑁄 ‘𑀅𑀬𑀁 𑀫𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸 𑀜𑀸𑀢𑀓𑁄 𑀯𑀸 𑀮𑀜𑁆𑀚𑀁 𑀯𑀸 𑀧𑀦 𑀫𑁂 𑀤𑁂𑀢𑀻’𑀢𑀺 𑀙𑀦𑁆𑀤𑀯𑀲𑁂𑀦 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺 𑁋 𑀅𑀬𑀁 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 ‘𑀅𑀬𑀁 𑀫𑁂 𑀯𑁂𑀭𑀻’𑀢𑀺 𑀧𑀓𑀢𑀺𑀯𑁂𑀭𑀯𑀲𑁂𑀦 𑀯𑀸 𑀢𑀗𑁆𑀔𑀡𑀼𑀧𑁆𑀧𑀦𑁆𑀦𑀓𑁄𑀥𑀯𑀲𑁂𑀦 𑀯𑀸 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀓𑀭𑁄𑀢𑀺 𑁋 𑀅𑀬𑀁 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀯𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺 𑁋 𑀅𑀬𑀁 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 ‘𑀅𑀬𑀁 𑀭𑀸𑀚𑀯𑀮𑁆𑀮𑀪𑁄 𑀯𑀸 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀯𑀸 𑀅𑀦𑀢𑁆𑀣𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬𑀸’𑀢𑀺 𑀪𑀻𑀢𑁄 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺 𑁋 𑀅𑀬𑀁 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀯𑀸 𑀧𑀦 𑀪𑀸𑀚𑀺𑀬𑀝𑁆𑀞𑀸𑀦𑁂 𑀓𑀺𑀜𑁆𑀘𑀺 𑀪𑀸𑀚𑁂𑀦𑁆𑀢𑁄 ‘𑀅𑀬𑀁 𑀫𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸’𑀢𑀺 𑀧𑁂𑀫𑀯𑀲𑁂𑀦 𑀅𑀢𑀺𑀭𑁂𑀓𑀁 𑀤𑁂𑀢𑀺, ‘𑀅𑀬𑀁 𑀫𑁂 𑀯𑁂𑀭𑀻’𑀢𑀺 𑀤𑁄𑀲𑀯𑀲𑁂𑀦 𑀊𑀦𑀓𑀁 𑀤𑁂𑀢𑀺, 𑀫𑁄𑀫𑀽𑀳𑀢𑁆𑀢𑀸 𑀤𑀺𑀦𑁆𑀦𑀸𑀤𑀺𑀦𑁆𑀦𑀁 𑀅𑀚𑀸𑀦𑀫𑀸𑀦𑁄 𑀓𑀲𑁆𑀲𑀘𑀺 𑀊𑀦𑀓𑀁 𑀓𑀲𑁆𑀲𑀘𑀺 𑀅𑀥𑀺𑀓𑀁 𑀤𑁂𑀢𑀺, ‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀤𑀻𑀬𑀫𑀸𑀦𑁂 𑀫𑀬𑁆𑀳𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’𑀢𑀺 𑀪𑀻𑀢𑁄 𑀓𑀲𑁆𑀲𑀘𑀺 𑀅𑀢𑀺𑀭𑁂𑀓𑀁 𑀤𑁂𑀢𑀺, 𑀲𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀬𑀣𑀸𑀦𑀼𑀓𑁆𑀓𑀫𑁂𑀦 𑀙𑀦𑁆𑀤𑀸𑀕𑀢𑀺𑀆𑀤𑀻𑀦𑀺 𑀕𑀘𑁆𑀙𑀢𑀺 𑀦𑀸𑀫. 𑀅𑀭𑀺𑀬𑀸 𑀏𑀢𑀸𑀬 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀕𑀢𑀺, 𑀅𑀦𑀭𑀺𑀬𑀸 𑀇𑀫𑀺𑀦𑀸 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀕𑀢𑀺𑀕𑀫𑀦𑀁. 𑀇𑀫𑀁 𑀤𑁆𑀯𑀬𑀁 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀙𑀦𑁆𑀤𑁂𑀦 𑀕𑀫𑀦𑀁 𑀙𑀦𑁆𑀤𑀕𑀫𑀦𑀁. 𑀇𑀤𑀁 𑀤𑁄𑀲𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀓𑀧𑀓𑁆𑀔𑀭𑀸𑀕𑀜𑁆𑀘 𑀧𑀭𑀧𑀓𑁆𑀔𑀤𑁄𑀲𑀜𑁆𑀘 𑀧𑀼𑀭𑀓𑁆𑀔𑀢𑁆𑀯𑀸 𑀅𑀲𑀫𑀕𑁆𑀕𑀪𑀸𑀯𑁂𑀦 𑀕𑀫𑀦𑀁 𑀯𑀕𑁆𑀕𑀕𑀫𑀦𑀁. 𑀇𑀤𑀁 𑀙𑀦𑁆𑀤𑀤𑁄𑀲𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀸𑀭𑀺𑀦𑁄 𑀯𑀺𑀬 𑀬𑀣𑀸𑀦𑀺𑀦𑁆𑀦𑀁 𑀕𑀫𑀦𑀦𑁆𑀢𑀺 𑀯𑀸𑀭𑀺𑀕𑀫𑀦𑀁. 𑀇𑀤𑀁 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁.

𑀯𑀺𑀧𑀭𑀺𑀬𑀸𑀲𑁂𑀲𑀼 ¶ 𑀅𑀦𑀺𑀘𑁆𑀘𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀢𑁄 𑀏𑀲𑀦𑁆𑀢𑀻𑀢𑀺 𑀯𑀺𑀧𑀭𑀺𑀬𑀸𑀲𑀸, 𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑀸𑀲𑁄 𑀲𑀜𑁆𑀜𑀸𑀯𑀺𑀧𑀭𑀺𑀬𑀸𑀲𑁄. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁂 𑀘𑀢𑀼𑀦𑁆𑀦𑀁 ¶ 𑀯𑀢𑁆𑀣𑀽𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀬𑁂𑀲𑀼 𑀯𑀢𑁆𑀣𑀽𑀲𑀼 𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀝𑁆𑀞 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀓𑀸 𑀳𑁄𑀦𑁆𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀭𑀺𑀬𑀯𑁄𑀳𑀸𑀭𑁂𑀲𑀼 ¶ 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀅𑀦𑀭𑀺𑀬𑀸𑀦𑀁 𑀮𑀸𑀫𑀓𑀸𑀦𑀁 𑀯𑁄𑀳𑀸𑀭𑀸. 𑀤𑀺𑀝𑁆𑀞𑀯𑀸𑀤𑀺𑀢𑀸𑀢𑀺 ‘𑀤𑀺𑀝𑁆𑀞𑀁 𑀫𑀬𑀸’𑀢𑀺 𑀏𑀯𑀁 𑀯𑀸𑀤𑀺𑀢𑀸. 𑀏𑀢𑁆𑀣 𑀘 𑀢𑀁 𑀢𑀁 𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳 𑀲𑀤𑁆𑀤𑁂𑀦 𑀘𑁂𑀢𑀦𑀸 𑀓𑀣𑀺𑀢𑀸𑀢𑀺𑀧𑀺 𑀯𑀼𑀢𑁆𑀢𑀫𑁂𑀯. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀺𑀬𑁄 𑀳𑀺 𑀅𑀤𑀺𑀲𑁆𑀯𑀸 𑀯𑀸 ‘𑀤𑀺𑀝𑁆𑀞𑀁 𑀫𑀬𑀸’𑀢𑀺 𑀤𑀺𑀲𑁆𑀯𑀸 𑀯𑀸 ‘𑀦 𑀤𑀺𑀝𑁆𑀞𑀁 𑀫𑀬𑀸’𑀢𑀺 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺; 𑀅𑀦𑀭𑀺𑀬𑁄𑀯 𑀏𑀯𑀁 𑀯𑀤𑀢𑀺. 𑀢𑀲𑁆𑀫𑀸 𑀏𑀯𑀁 𑀯𑀤𑀦𑁆𑀢𑀲𑁆𑀲 𑀏𑀢𑀸 𑀲𑀳 𑀲𑀤𑁆𑀤𑁂𑀦 𑀅𑀝𑁆𑀞 𑀘𑁂𑀢𑀦𑀸 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀘𑁆𑀘𑀭𑀺𑀢𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑀁 𑀯𑁂𑀭𑀘𑁂𑀢𑀦𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦.

𑀪𑀬𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀚𑀸𑀢𑀺𑀪𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀭𑀸𑀚𑀢𑁄 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀭𑀸𑀚𑀪𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑀺𑀬𑀘𑀢𑀼𑀓𑁆𑀓𑁂 𑀘𑀢𑁆𑀢𑀸𑀭𑀺 𑀪𑀬𑀸𑀦𑀻𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀯𑀼𑀢𑁆𑀢𑀪𑀬𑀸𑀦𑀺. 𑀫𑀳𑀸𑀲𑀫𑀼𑀤𑁆𑀤𑁂 𑀓𑀺𑀭 𑀫𑀳𑀺𑀦𑁆𑀤𑀯𑀻𑀘𑀺 𑀦𑀸𑀫 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀉𑀕𑁆𑀕𑀘𑁆𑀙𑀢𑀺. 𑀕𑀗𑁆𑀕𑀸𑀯𑀻𑀘𑀺 𑀦𑀸𑀫 𑀧𑀡𑁆𑀡𑀸𑀲. 𑀭𑁄𑀳𑀡𑀯𑀻𑀘𑀺 𑀦𑀸𑀫 𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀉𑀕𑁆𑀕𑀘𑁆𑀙𑀢𑀺. 𑀏𑀯𑀭𑀽𑀧𑀸 𑀊𑀫𑀺𑀬𑁄 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀊𑀫𑀺𑀪𑀬𑀁 𑀦𑀸𑀫. 𑀓𑀼𑀫𑁆𑀪𑀻𑀮𑀢𑁄 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀓𑀼𑀫𑁆𑀪𑀻𑀮𑀪𑀬𑀁. 𑀉𑀤𑀓𑀸𑀯𑀝𑁆𑀝𑀢𑁄 𑀪𑀬𑀁 𑀆𑀯𑀝𑁆𑀝𑀪𑀬𑀁. 𑀲𑀼𑀲𑀼𑀓𑀸 𑀯𑀼𑀘𑁆𑀘𑀢𑀺 𑀘𑀡𑁆𑀟𑀫𑀘𑁆𑀙𑁄; 𑀢𑀢𑁄 𑀪𑀬𑀁 𑀲𑀼𑀲𑀼𑀓𑀸𑀪𑀬𑀁.

𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀧𑀸𑀧𑀓𑀫𑁆𑀫𑀺𑀦𑁄 𑀅𑀢𑁆𑀢𑀸𑀦𑀁 𑀅𑀦𑀼𑀯𑀤𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀧𑀭𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀧𑀭𑀲𑁆𑀲 𑀅𑀦𑀼𑀯𑀸𑀤𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑀡𑁆𑀟𑀪𑀬𑀦𑁆𑀢𑀺 𑀅𑀕𑀸𑀭𑀺𑀓𑀲𑁆𑀲 𑀭𑀜𑁆𑀜𑀸 𑀧𑀯𑀢𑁆𑀢𑀺𑀢𑀤𑀡𑁆𑀟𑀁, 𑀅𑀦𑀕𑀸𑀭𑀺𑀓𑀲𑁆𑀲 𑀯𑀺𑀦𑀬𑀤𑀡𑁆𑀟𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀇𑀢𑀺 ¶ 𑀇𑀫𑁂𑀳𑀺 𑀘𑀢𑀽𑀳𑀺 𑀘𑀢𑀼𑀓𑁆𑀓𑁂𑀳𑀺 𑀲𑁄𑀴𑀲 𑀫𑀳𑀸𑀪𑀬𑀸𑀦𑀺 𑀦𑀸𑀫 𑀓𑀣𑀺𑀢𑀸𑀦𑀺.

𑀤𑀺𑀝𑁆𑀞𑀺𑀘𑀢𑀼𑀓𑁆𑀓𑁂 ¶ 𑀢𑀺𑀫𑁆𑀩𑀭𑀼𑀓𑀤𑀺𑀝𑁆𑀞𑀺 (𑀲𑀁. 𑀦𑀺. 𑁨.𑁧𑁮) 𑀦𑀸𑀫 𑀓𑀣𑀺𑀢𑀸. 𑀢𑀢𑁆𑀣 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀯𑁂𑀤𑀦𑀸𑀬 𑀏𑀯 𑀯𑁂𑀤𑀦𑀸 𑀓𑀢𑀸𑀢𑀺 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺. 𑀏𑀯𑀜𑁆𑀘 𑀲𑀢𑀺 𑀢𑀲𑁆𑀲𑀸 𑀯𑁂𑀤𑀦𑀸𑀬 𑀧𑀼𑀩𑁆𑀩𑁂𑀧𑀺 𑀅𑀢𑁆𑀣𑀺𑀢𑀸 𑀆𑀧𑀚𑁆𑀚𑀢𑀻𑀢𑀺 𑀅𑀬𑀁 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀲𑀘𑁆𑀘𑀢𑁄 𑀣𑁂𑀢𑀢𑁄𑀢𑀺 𑀲𑀘𑁆𑀘𑀢𑁄 𑀣𑀺𑀭𑀢𑁄. 𑀧𑀭𑀁𑀓𑀢𑀦𑁆𑀢𑀺 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑁂𑀤𑀦𑀢𑁄 𑀅𑀜𑁆𑀜𑀁 𑀯𑁂𑀤𑀦𑀸𑀓𑀸𑀭𑀡𑀁 𑀯𑁂𑀤𑀦𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑁄 ‘𑀅𑀜𑁆𑀜𑀸𑀬 𑀯𑁂𑀤𑀦𑀸𑀬 𑀅𑀬𑀁 𑀯𑁂𑀤𑀦𑀸 𑀓𑀢𑀸’𑀢𑀺 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺. 𑀏𑀯𑀁 𑀲𑀢𑀺 𑀧𑀼𑀭𑀺𑀫𑀸𑀬 𑀓𑀸𑀭𑀡𑀯𑁂𑀤𑀦𑀸𑀬 𑀉𑀘𑁆𑀙𑁂𑀤𑁄 𑀆𑀧𑀚𑁆𑀚𑀢𑀻𑀢𑀺 𑀅𑀬𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀅𑀢𑁆𑀣𑁂𑀦 ‘𑀉𑀧𑀟𑁆𑀠𑀁 𑀲𑀬𑀁𑀓𑀢𑀁, 𑀉𑀧𑀟𑁆𑀠𑀁 𑀧𑀭𑁂𑀦 𑀓𑀢’𑀦𑁆𑀢𑀺 𑀕𑀡𑁆𑀳𑀢𑁄 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺 𑁋 𑀅𑀬𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀸𑀫. 𑀘𑀢𑀼𑀢𑁆𑀣𑀸 𑀅𑀓𑀸𑀭𑀡𑀸 𑀏𑀯 𑀲𑀼𑀔𑀤𑀼𑀓𑁆𑀔𑀁 𑀳𑁄𑀢𑀻𑀢𑀺 𑀕𑀡𑁆𑀳𑀢𑁄 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺. 𑀏𑀯𑀁 𑀲𑀢𑀺 𑀅𑀬𑀁 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀦𑀸𑀫. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁫.) 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁦. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀬𑁂𑀲𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀢𑁂 𑀪𑀯𑀕𑁆𑀕𑁂𑀧𑀺 𑀦𑀺𑀩𑁆𑀩𑀢𑁆𑀢𑁂 𑀏𑀢𑀸𑀦𑀺 𑀆𑀓𑀟𑁆𑀠𑀺𑀢𑁆𑀯𑀸 𑀓𑀸𑀫𑀪𑀯𑁂𑀬𑁂𑀯 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀫𑀸 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀢𑀺 𑀏𑀢𑀸𑀦𑀺 𑀧𑀜𑁆𑀘 𑀕𑀘𑁆𑀙𑀦𑁆𑀢𑀁 𑀦 𑀯𑀸𑀭𑁂𑀦𑁆𑀢𑀺, 𑀕𑀢𑀁 𑀧𑀦 𑀆𑀦𑁂𑀦𑁆𑀢𑀺. 𑀭𑀽𑀧𑀭𑀸𑀕𑀸𑀤𑀻𑀦𑀺𑀧𑀺 𑀧𑀜𑁆𑀘 𑀕𑀘𑁆𑀙𑀦𑁆𑀢𑀁 𑀦 𑀯𑀸𑀭𑁂𑀦𑁆𑀢𑀺, 𑀆𑀕𑀦𑁆𑀢𑀼𑀁 𑀧𑀦 𑀦 𑀤𑁂𑀦𑁆𑀢𑀺. 𑀭𑀸𑀕𑀸𑀤𑀬𑁄 𑀧𑀜𑁆𑀘 𑀮𑀕𑁆𑀕𑀦𑀝𑁆𑀞𑁂𑀦 𑀲𑀗𑁆𑀕𑀸, 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀧𑀦 𑀲𑀮𑁆𑀮𑀸𑀢𑀺 𑀯𑀼𑀢𑁆𑀢𑀸.

𑁯𑁪𑁧. 𑀘𑁂𑀢𑁄𑀔𑀺𑀮𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀸 𑀓𑀘𑀯𑀭𑀪𑀸𑀯𑀸 𑀔𑀸𑀡𑀼𑀓𑀪𑀸𑀯𑀸. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀻𑀢𑀺 𑀲𑀢𑁆𑀣𑀼 𑀲𑀭𑀻𑀭𑁂 𑀯𑀸 𑀕𑀼𑀡𑁂 𑀯𑀸 𑀓𑀗𑁆𑀔𑀢𑀺. 𑀲𑀭𑀻𑀭𑁂 𑀓𑀗𑁆𑀔𑀫𑀸𑀦𑁄 ‘𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀦𑀸𑀫 𑀲𑀭𑀻𑀭𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀕𑀼𑀡𑁂 𑀓𑀗𑁆𑀔𑀫𑀸𑀦𑁄 ‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺, 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀺, 𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 ¶ ‘𑀏𑀯𑀫𑁂𑀢’𑀦𑁆𑀢𑀺 𑀅𑀥𑀺𑀫𑁄𑀓𑁆𑀔𑀁 𑀦 𑀧𑀝𑀺𑀮𑀪𑀢𑀺 ¶ . 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀕𑀼𑀡𑁂𑀲𑀼 𑀑𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀪𑀸𑀯𑁂𑀦 𑀧𑀲𑀻𑀤𑀺𑀢𑀼𑀁 𑀅𑀦𑀸𑀯𑀺𑀮𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀥𑀫𑁆𑀫𑁂𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀘 𑀧𑀝𑀺𑀯𑁂𑀥𑀥𑀫𑁆𑀫𑁂 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄 ‘𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀁 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀧𑀝𑀺𑀯𑁂𑀥𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄 ‘𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀫𑀕𑁆𑀕𑁄 𑀦𑀸𑀫 ¶ , 𑀫𑀕𑁆𑀕𑀦𑀺𑀲𑁆𑀲𑀦𑁆𑀤𑁄 𑀨𑀮𑀁 𑀦𑀸𑀫, 𑀲𑀩𑁆𑀩𑀲𑀗𑁆𑀔𑀸𑀭𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺’.

𑀲𑀗𑁆𑀖𑁂 𑀓𑀗𑁆𑀔𑀢𑀻𑀢𑀺 ‘𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀏𑀯𑀭𑀽𑀧𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀪𑀽𑀢𑁄 𑀲𑀗𑁆𑀖𑁄 𑀦𑀸𑀫 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺. 𑀲𑀺𑀓𑁆𑀔𑀸𑀬 𑀓𑀗𑁆𑀔𑀫𑀸𑀦𑁄 ‘𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀦𑀸𑀫 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀦𑀸𑀫 𑀅𑀥𑀺𑀧𑀜𑁆𑀜𑀸 𑀲𑀺𑀓𑁆𑀔𑀸 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀲𑀸 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’𑀢𑀺 𑀓𑀗𑁆𑀔𑀢𑀺.

𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸𑀢𑀺 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀡𑁆𑀳𑀦𑁆𑀢𑀻𑀢𑀺 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸. 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀺. 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂. 𑀭𑀽𑀧𑁂𑀢𑀺 𑀩𑀳𑀺𑀤𑁆𑀥𑀸 𑀭𑀽𑀧𑁂. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺 𑀢𑀢𑁆𑀢𑀓𑀁. 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀉𑀤𑀭𑀧𑀽𑀭𑀁. 𑀢𑀜𑁆𑀳𑀺 𑀉𑀤𑀭𑀁 𑀅𑀯𑀤𑁂𑀳𑀦𑀢𑁄 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀬𑁆𑀬𑀲𑀼𑀔𑀦𑁆𑀢𑀺 𑀫𑀜𑁆𑀘𑀧𑀻𑀞𑀲𑀼𑀔𑀁 𑀉𑀢𑀼𑀲𑀼𑀔𑀁 𑀯𑀸. 𑀧𑀲𑁆𑀲𑀲𑀼𑀔𑀦𑁆𑀢𑀺 𑀬𑀣𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀬𑀦𑁆𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑀯𑀸𑀫𑀧𑀲𑁆𑀲𑀸𑀦𑀁 𑀲𑀼𑀔𑀁 𑀳𑁄𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀲𑀼𑀔𑀁. 𑀫𑀺𑀤𑁆𑀥𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀲𑀼𑀔𑀁. 𑀅𑀦𑀼𑀬𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑀬𑀺𑀢𑁆𑀯𑀸. 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀢𑀧𑁄𑀢𑀺 𑀢𑀧𑀘𑀭𑀡𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑀳𑁂𑀲𑀓𑁆𑀔𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺. 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺 𑀅𑀧𑁆𑀧𑁂𑀲𑀓𑁆𑀔𑀤𑁂𑀯𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄. 𑀓𑀼𑀲𑀮𑀥𑀫𑁆𑀫𑁂 𑀆𑀯𑀭𑀦𑁆𑀢𑀺 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀦𑀻𑀯𑀭𑀡𑀸𑀦𑀺.

𑀫𑀸𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸 𑀳𑁄𑀢𑀻𑀢𑀺 𑀫𑀦𑀼𑀲𑁆𑀲𑁂𑀦𑁂𑀯 𑀲𑀓𑀚𑀦𑀺𑀓𑀸 𑀫𑀦𑀼𑀲𑁆𑀲𑀫𑀸𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸 𑀳𑁄𑀢𑀺. 𑀧𑀺𑀢𑀸𑀧𑀺 ¶ 𑀫𑀦𑀼𑀲𑁆𑀲𑀧𑀺𑀢𑀸𑀯. 𑀅𑀭𑀳𑀸𑀧𑀺 𑀫𑀦𑀼𑀲𑁆𑀲𑀅𑀭𑀳𑀸𑀯. 𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀯𑀥𑀓𑀘𑀺𑀢𑁆𑀢𑁂𑀦.

𑀲𑀜𑁆𑀜𑀻𑀢𑀺 𑀲𑀜𑁆𑀜𑀸𑀲𑀫𑀗𑁆𑀕𑀻. 𑀅𑀭𑁄𑀕𑁄𑀢𑀺 𑀦𑀺𑀘𑁆𑀘𑁄. 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻𑀢𑀺 𑀇𑀢𑁆𑀣𑀁 𑀏𑀓𑁂 𑀅𑀪𑀺𑀯𑀤𑀦𑁆𑀢𑀺, 𑀏𑀯𑀫𑁂𑀓𑁂 𑀅𑀪𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸. 𑀅𑀲𑀜𑁆𑀜𑀻𑀢𑀺 ¶ 𑀲𑀜𑁆𑀜𑀸𑀯𑀺𑀭𑀳𑀺𑀢𑁄. 𑀇𑀫𑀺𑀦𑀸 𑀧𑀤𑁂𑀦 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸. 𑀢𑀢𑀺𑀬𑀧𑀤𑁂𑀦 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸. 𑀲𑀢𑁄 𑀯𑀸 𑀧𑀦 𑀲𑀢𑁆𑀢𑀲𑁆𑀲𑀸𑀢𑀺 𑀅𑀣𑀯𑀸 𑀧𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀲𑀢𑁆𑀢𑀲𑁆𑀲. 𑀉𑀘𑁆𑀙𑁂𑀤𑀦𑁆𑀢𑀺 𑀉𑀧𑀘𑁆𑀙𑁂𑀤𑀁. 𑀯𑀺𑀦𑀸𑀲𑀦𑁆𑀢𑀺 𑀅𑀤𑀲𑁆𑀲𑀦𑀁. 𑀯𑀺𑀪𑀯𑀦𑁆𑀢𑀺 𑀪𑀸𑀯𑀯𑀺𑀕𑀫𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀢𑀢𑁆𑀣 𑀤𑁆𑀯𑁂 𑀚𑀦𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺 𑁋 𑀮𑀸𑀪𑀻 ¶ 𑀘 𑀅𑀮𑀸𑀪𑀻 𑀘. 𑀢𑀢𑁆𑀣 𑀮𑀸𑀪𑀻 𑀅𑀭𑀳𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀉𑀧𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄, 𑀬𑁄 𑀯𑀸 𑀘𑀼𑀢𑀺𑀫𑀢𑁆𑀢𑀫𑁂𑀯 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀅𑀮𑀸𑀪𑀻 ‘𑀓𑁄 𑀧𑀭𑀮𑁄𑀓𑀁 𑀚𑀸𑀦𑀸𑀢𑀻’𑀢𑀺 𑀓𑀸𑀫𑀲𑀼𑀔𑀕𑀺𑀤𑁆𑀥𑀢𑀸𑀬 𑀯𑀸 ‘𑀬𑀣𑀸 𑀭𑀼𑀓𑁆𑀔𑀢𑁄 𑀧𑀡𑁆𑀡𑀸𑀦𑀺 𑀧𑀢𑀺𑀢𑀸𑀦𑀺 𑀦 𑀧𑀼𑀦 𑀯𑀺𑀭𑀼𑀳𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀸’𑀢𑀺𑀆𑀤𑀺𑀦𑀸 𑀯𑀺𑀢𑀓𑁆𑀓𑁂𑀦 𑀯𑀸 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀢𑀺. 𑀇𑀥 𑀧𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀢𑀣𑀸 𑀘 𑀅𑀜𑁆𑀜𑀣𑀸 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸𑀯 𑀉𑀧𑁆𑀧𑀦𑁆𑀦𑀸 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀓𑀣𑀺𑀢𑀸. 𑀢𑁂𑀲𑀜𑁆𑀳𑀺 𑀇𑀤𑀁 𑀲𑀗𑁆𑀕𑀳𑀯𑀘𑀦𑀁. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀯𑀸 𑀧𑀦𑁂𑀓𑁂𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁; 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀸 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀜𑁆𑀘𑀦𑁆𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀦𑀁 𑀲𑀗𑁆𑀕𑀳𑀯𑀘𑀦𑀁.

𑁯𑁪𑁨. 𑀯𑁂𑀭𑀸𑀢𑀺 𑀯𑁂𑀭𑀘𑁂𑀢𑀦𑀸. 𑀩𑁆𑀬𑀲𑀦𑀸𑀢𑀺 𑀯𑀺𑀦𑀸𑀲𑀸. 𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀦𑀥𑀺𑀯𑀸𑀲𑀦𑀸𑀬. 𑀅𑀧𑁆𑀧𑀺𑀬𑁄𑀢𑀺 𑀤𑀲𑁆𑀲𑀦𑀲𑀯𑀦𑀧𑀝𑀺𑀓𑀽𑀮𑀢𑀸𑀬 𑀦 𑀧𑀺𑀬𑀸𑀬𑀺𑀢𑀩𑁆𑀩𑁄. 𑀘𑀺𑀦𑁆𑀢𑁂𑀢𑀼𑀫𑁆𑀧𑀺 𑀧𑀝𑀺𑀓𑀽𑀮𑀢𑁆𑀢𑀸 𑀫𑀦𑁄 𑀏𑀢𑀲𑁆𑀫𑀺𑀁 𑀦 𑀅𑀧𑁆𑀧𑁂𑀢𑀻𑀢𑀺 𑀅𑀫𑀦𑀸𑀧𑁄. 𑀯𑁂𑀭𑀩𑀳𑀼𑀮𑁄𑀢𑀺 𑀩𑀳𑀼𑀯𑁂𑀭𑁄. 𑀯𑀚𑁆𑀚𑀩𑀳𑀼𑀮𑁄𑀢𑀺 𑀩𑀳𑀼𑀤𑁄𑀲𑁄.

𑀆𑀚𑀻𑀯𑀓𑀪𑀬𑀦𑁆𑀢𑀺 𑀆𑀚𑀻𑀯𑀁 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀪𑀬𑀁 ¶ . 𑀢𑀁 𑀅𑀕𑀸𑀭𑀺𑀓𑀲𑁆𑀲𑀧𑀺 𑀳𑁄𑀢𑀺 𑀅𑀦𑀕𑀸𑀭𑀺𑀓𑀲𑁆𑀲𑀧𑀺. 𑀢𑀢𑁆𑀣 𑀅𑀕𑀸𑀭𑀺𑀓𑁂𑀦 𑀢𑀸𑀯 𑀆𑀚𑀻𑀯𑀳𑁂𑀢𑀼 𑀩𑀳𑀼𑀁 𑀅𑀓𑀼𑀲𑀮𑀁 𑀓𑀢𑀁 𑀳𑁄𑀢𑀺. 𑀅𑀣𑀲𑁆𑀲 𑀫𑀭𑀡𑀲𑀫𑀬𑁂 𑀦𑀺𑀭𑀬𑁂 𑀉𑀧𑀝𑁆𑀞𑀳𑀦𑁆𑀢𑁂 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀕𑀸𑀭𑀺𑀓𑁂𑀦𑀸𑀧𑀺 𑀩𑀳𑀼 𑀅𑀦𑁂𑀲𑀦𑀸 𑀓𑀢𑀸 𑀳𑁄𑀢𑀺. 𑀅𑀣𑀲𑁆𑀲 𑀫𑀭𑀡𑀓𑀸𑀮𑁂 𑀦𑀺𑀭𑀬𑁂 𑀉𑀧𑀝𑁆𑀞𑀳𑀦𑁆𑀢𑁂 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀆𑀚𑀻𑀯𑀓𑀪𑀬𑀁 𑀦𑀸𑀫. 𑀅𑀲𑀺𑀮𑁄𑀓𑀪𑀬𑀦𑁆𑀢𑀺 𑀕𑀭𑀳𑀪𑀬𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀦𑁆𑀢𑀺 𑀓𑀢𑀧𑀸𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀁 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀲𑀸𑀭𑀚𑁆𑀚𑀲𑀗𑁆𑀔𑀸𑀢𑀁 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁 𑀦𑀸𑀫. 𑀇𑀢𑀭𑀤𑁆𑀯𑀬𑀁 𑀧𑀸𑀓𑀝𑀫𑁂𑀯.

𑁯𑁪𑁩. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀭𑁂𑀲𑀼 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀳𑀺 𑀧𑀜𑁆𑀘𑀳𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺 𑀩𑀦𑁆𑀥𑀦𑁂𑀳𑀺 𑀯𑀸. 𑀲𑀫𑀧𑁆𑀧𑀺𑀢𑁄𑀢𑀺 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑁄 𑀅𑀮𑁆𑀮𑀻𑀦𑁄 𑀳𑀼𑀢𑁆𑀯𑀸. 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀭𑀺𑀘𑀸𑀭𑁂𑀢𑀻𑀢𑀺 𑀢𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀢𑀺 𑀲𑀜𑁆𑀘𑀸𑀭𑁂𑀢𑀺 𑀇𑀢𑁄 𑀘𑀺𑀢𑁄 ¶ 𑀘 𑀉𑀧𑀦𑁂𑀢𑀺; 𑀅𑀣 𑀯𑀸 𑀧𑀦 𑀮𑀴𑀢𑀺 𑀭𑀫𑀢𑀺 𑀓𑀻𑀴𑀢𑀻𑀢𑀺. 𑀏𑀢𑁆𑀣 𑀘 𑀤𑀼𑀯𑀺𑀥𑀸 𑀓𑀸𑀫𑀕𑀼𑀡𑀸 𑁋 𑀫𑀸𑀦𑀼𑀲𑁆𑀲𑀓𑀸 𑀘𑁂𑀯 𑀤𑀺𑀩𑁆𑀩𑀸 𑀘. 𑀫𑀸𑀦𑀼𑀲𑁆𑀲𑀓𑀸 𑀫𑀦𑁆𑀥𑀸𑀢𑀼𑀓𑀸𑀫𑀕𑀼𑀡𑀲𑀤𑀺𑀲𑀸 𑀤𑀝𑁆𑀞𑀩𑁆𑀩𑀸; 𑀤𑀺𑀩𑁆𑀩𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀭𑀸𑀚𑀲𑁆𑀲 𑀓𑀸𑀫𑀕𑀼𑀡𑀲𑀤𑀺𑀲𑀸𑀢𑀺. 𑀏𑀯𑀭𑀽𑀧𑁂 𑀓𑀸𑀫𑁂 ¶ 𑀉𑀧𑀕𑀢𑀜𑁆𑀳𑀺 𑀢𑁂 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀭𑀫𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁, 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀯𑀸𑀭𑁂 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸; 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸; 𑀧𑀓𑀢𑀺𑀚𑀳𑀦𑀝𑁆𑀞𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸𑀢𑀺 𑀢𑁂𑀲𑀁 𑀓𑀸𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀢𑀸 𑀅𑀜𑁆𑀜𑀣𑀸𑀪𑀸𑀯𑀸. ‘𑀬𑀫𑁆𑀧𑀺 𑀫𑁂 𑀅𑀳𑁄𑀲𑀺 𑀢𑀫𑁆𑀧𑀺 𑀫𑁂 𑀦𑀢𑁆𑀣𑀻’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀢𑀢𑁆𑀣 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁄 𑀲𑁄𑀓𑁄; 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀮𑀓𑁆𑀔𑀡𑁄 𑀧𑀭𑀺𑀤𑁂𑀯𑁄; 𑀓𑀸𑀬𑀧𑀝𑀺𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁; 𑀫𑀦𑁄𑀯𑀺𑀖𑀸𑀢𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁; 𑀯𑀺𑀖𑀸𑀢𑀮𑀓𑁆𑀔𑀡𑁄 𑀉𑀧𑀸𑀬𑀸𑀲𑁄.

𑀯𑀺𑀢𑀓𑁆𑀓𑀺𑀢𑀦𑁆𑀢𑀺 𑀅𑀪𑀺𑀦𑀺𑀭𑁄𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀯𑀺𑀘𑀸𑀭𑀺𑀢𑀦𑁆𑀢𑀺 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄. 𑀏𑀢𑁂𑀦 𑀏𑀢𑀦𑁆𑀢𑀺 𑀏𑀢𑁂𑀦 𑀯𑀺𑀢𑀓𑁆𑀓𑁂𑀦 𑀘 𑀯𑀺𑀘𑀸𑀭𑁂𑀦 𑀘 𑀏𑀢𑀁 𑀧𑀞𑀫𑀚𑁆𑀛𑀸𑀦𑀁 𑀑𑀴𑀸𑀭𑀺𑀓𑀁 𑀲𑀓𑀡𑁆𑀝𑀓𑀁 𑀯𑀺𑀬 𑀔𑀸𑀬𑀢𑀺.

𑀧𑀻𑀢𑀺𑀕𑀢𑀦𑁆𑀢𑀺 𑀧𑀻𑀢𑀺𑀫𑁂𑀯. 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀺𑀮𑀪𑀸𑀯𑀓𑀭𑀡𑀁. 𑀘𑁂𑀢𑀲𑁄 𑀆𑀪𑁄𑀕𑁄𑀢𑀺 𑀛𑀸𑀦𑀸 𑀯𑀼𑀝𑁆𑀞𑀸𑀬 ¶ 𑀢𑀲𑁆𑀫𑀺𑀁 𑀲𑀼𑀔𑁂 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀲𑁆𑀲 𑀆𑀪𑁄𑀕𑁄 𑀫𑀦𑀲𑀺𑀓𑀸𑀭𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁬.) 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁪. 𑀙𑀓𑁆𑀓𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀓𑀼𑀤𑁆𑀥𑁄 𑀯𑀸 𑀓𑁄𑀥𑀯𑀲𑁂𑀦, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀯𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸𑀬 ¶ 𑀓𑀮𑀳𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑁄𑀥𑀸𑀤𑀬𑁄 ‘𑀯𑀺𑀯𑀸𑀤𑀫𑀽𑀮𑀸𑀦𑀻’𑀢𑀺 𑀯𑀼𑀢𑁆𑀢𑀸.

𑀙𑀦𑁆𑀤𑀭𑀸𑀕𑀦𑀺𑀤𑁆𑀤𑁂𑀲𑁂 𑀓𑀸𑀫𑀕𑁂𑀳𑀲𑀺𑀢𑀢𑁆𑀢𑀸 𑀙𑀦𑁆𑀤𑀭𑀸𑀕𑀸 𑀕𑁂𑀳𑀲𑁆𑀲𑀺𑀢𑀸 𑀥𑀫𑁆𑀫𑀸𑀢𑀺 𑀲𑀗𑁆𑀕𑀳𑀢𑁄 𑀯𑀢𑁆𑀯𑀸 𑀧𑀼𑀦 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑀸𑀧𑀺𑀬𑁂𑀲𑀽𑀢𑀺 𑀫𑀦𑀯𑀟𑁆𑀠𑀦𑀓𑁂𑀲𑀼 𑀇𑀝𑁆𑀞𑁂𑀲𑀼. 𑀯𑀺𑀭𑁄𑀥𑀸 𑀏𑀯 𑀯𑀺𑀭𑁄𑀥𑀯𑀢𑁆𑀣𑀽𑀦𑀺. 𑀅𑀫𑀦𑀸𑀧𑀺𑀬𑁂𑀲𑀽𑀢𑀺 𑀅𑀦𑀺𑀝𑁆𑀞𑁂𑀲𑀼.

𑁯𑁪𑁫. 𑀅𑀕𑀸𑀭𑀯𑁂𑀲𑀼 𑀅𑀕𑀸𑀭𑀯𑁄𑀢𑀺 𑀕𑀸𑀭𑀯𑀯𑀺𑀭𑀳𑀺𑀢𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑀬𑁄 𑀅𑀦𑀻𑀘𑀯𑀼𑀢𑁆𑀢𑀺. 𑀏𑀢𑁆𑀣 𑀧𑀦 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂 𑀢𑀻𑀲𑀼 𑀓𑀸𑀮𑁂𑀲𑀼 𑀉𑀧𑀝𑁆𑀞𑀸𑀦𑀁 𑀦 𑀬𑀸𑀢𑀺, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀦𑁆𑀢𑁂 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺 ¶ , 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀳𑁂𑀝𑁆𑀞𑀸 𑀯𑀲𑀦𑁆𑀢𑁂 𑀉𑀧𑀭𑀺 𑀯𑀲𑀢𑀺, 𑀲𑀢𑁆𑀣𑀼𑀤𑀲𑁆𑀲𑀦𑀝𑁆𑀞𑀸𑀦𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀦𑁆𑀳𑀸𑀬𑀢𑀺, 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀯𑀸 𑀧𑀦 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑀼𑀁 𑀦 𑀕𑀘𑁆𑀙𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂 𑀲𑀢𑁆𑀣𑀼𑀤𑀲𑁆𑀲𑀦𑀝𑁆𑀞𑀸𑀦𑁂 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀓𑀭𑁄𑀢𑀺 𑁋 𑀅𑀬𑀁 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀦𑀸𑀫. 𑀬𑁄 𑀧𑀦 𑀥𑀫𑁆𑀫𑀲𑀯𑀦𑁂 𑀲𑀗𑁆𑀖𑀼𑀝𑁆𑀞𑁂 𑀲𑀓𑁆𑀓𑀘𑁆𑀘𑀁 𑀦 𑀕𑀘𑁆𑀙𑀢𑀺, 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺, 𑀲𑀫𑀼𑀮𑁆𑀮𑀧𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀦 𑀲𑀓𑁆𑀓𑀘𑁆𑀘𑀁 𑀕𑀡𑁆𑀳𑀸𑀢𑀺, 𑀦 𑀲𑀓𑁆𑀓𑀘𑁆𑀘𑀁 𑀯𑀸𑀘𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀦𑀸𑀫. 𑀬𑁄 𑀧𑀦 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀚𑁆𑀛𑀺𑀝𑁆𑀞𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀜𑁆𑀳𑀁 𑀓𑀣𑁂𑀢𑀺, 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀖𑀝𑁆𑀝𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀓𑀭𑁄𑀢𑀺, 𑀲𑀗𑁆𑀖𑀫𑀚𑁆𑀛𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀢𑀺 𑁋 𑀅𑀬𑀁 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀦𑀸𑀫. 𑀏𑀓𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀳𑀺 𑀅𑀕𑀸𑀭𑀯𑁂 𑀓𑀢𑁂 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀓𑀢𑁄𑀯 𑀳𑁄𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀦 𑀅𑀧𑀽𑀭𑀬𑀫𑀸𑀦𑁄𑀯 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀦𑀸𑀫. 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀅𑀦𑀦𑀼𑀩𑁆𑀭𑀽𑀳𑀬𑀫𑀸𑀦𑁄 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀦𑀸𑀫. 𑀤𑀼𑀯𑀺𑀥𑀁 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀭𑁄𑀦𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑁄 𑀦𑀸𑀫.

𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸𑀢𑀺 𑀧𑀭𑀺𑀳𑀸𑀦𑀓𑀭𑀸 𑀥𑀫𑁆𑀫𑀸. 𑀓𑀫𑁆𑀫𑀸𑀭𑀸𑀫𑀢𑀸𑀢𑀺 ¶ 𑀦𑀯𑀓𑀫𑁆𑀫𑁂 𑀯𑀸 𑀘𑀻𑀯𑀭𑀯𑀺𑀘𑀸𑀭𑀡𑀸𑀤𑀻𑀲𑀼 𑀯𑀸 𑀓𑀫𑁆𑀫𑁂𑀲𑀼 𑀅𑀪𑀺𑀭𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀪𑀲𑁆𑀲𑀸𑀭𑀸𑀫𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀲𑁂𑀦 𑀪𑀲𑁆𑀲𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀦𑀺𑀤𑁆𑀤𑀸𑀭𑀸𑀫𑀢𑀸𑀢𑀺 𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀢𑀺 𑀲𑀗𑁆𑀕𑀡𑀺𑀓𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀲𑀁𑀲𑀕𑁆𑀕𑀸𑀭𑀸𑀫𑀢𑀸𑀢𑀺 𑀲𑀯𑀦𑀲𑀁𑀲𑀕𑁆𑀕𑁂, 𑀤𑀲𑁆𑀲𑀦𑀲𑀁𑀲𑀕𑁆𑀕𑁂, 𑀲𑀫𑀼𑀮𑁆𑀮𑀸𑀧𑀲𑀁𑀲𑀕𑁆𑀕𑁂, 𑀧𑀭𑀺𑀪𑁄𑀕𑀲𑀁𑀲𑀕𑁆𑀕𑁂, 𑀓𑀸𑀬𑀲𑀁𑀲𑀕𑁆𑀕𑁂𑀢𑀺 𑀧𑀜𑁆𑀘𑀯𑀺𑀥𑁂 𑀲𑀁𑀲𑀕𑁆𑀕𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀧𑀧𑀜𑁆𑀘𑀸𑀭𑀸𑀫𑀢𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑁂𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸.

𑁯𑁪𑁬. 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸𑀤𑀻𑀲𑀼 ¶ 𑀲𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀉𑀧𑀯𑀺𑀘𑀭𑀦𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀭𑀡𑀪𑀽𑀢𑀁. 𑀉𑀧𑀯𑀺𑀘𑀭𑀢𑀻𑀢𑀺 𑀢𑀢𑁆𑀣 𑀯𑀺𑀘𑀸𑀭𑀧𑁆𑀧𑀯𑀢𑁆𑀢𑀦𑁂𑀦 𑀉𑀧𑀯𑀺𑀘𑀭𑀢𑀺. 𑀯𑀺𑀢𑀓𑁆𑀓𑁄 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀢𑀻𑀲𑀼𑀧𑀺 𑀙𑀓𑁆𑀓𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯𑁪𑁭. 𑀕𑁂𑀳𑀲𑀺𑀢𑀸𑀦𑀻𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀺. 𑀲𑁄𑀫𑀦𑀲𑁆𑀲𑀸𑀦𑀻𑀢𑀺 𑀘𑁂𑀢𑀲𑀺𑀓𑀲𑀼𑀔𑀸𑀦𑀺. 𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀦𑀺. 𑀉𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 ¶ 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸, 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀢𑀺𑀧𑀺 𑀏𑀢𑀸𑀲𑀁𑀬𑁂𑀯 𑀦𑀸𑀫𑀁.

𑁯𑁪𑁮. 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀯𑀸𑀢𑀺 𑀲𑀩𑁆𑀩𑀧𑀤𑁂𑀲𑀼 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄; 𑀏𑀯𑀁 𑀯𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀘𑁂𑀢𑁆𑀣 𑀲𑀲𑁆𑀲𑀢𑀤𑀺𑀝𑁆𑀞𑀺 𑀲𑀩𑁆𑀩𑀓𑀸𑀮𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀣𑀺𑀢𑀁 𑀕𑀡𑁆𑀳𑀸𑀢𑀺. 𑀲𑀘𑁆𑀘𑀢𑁄 𑀣𑁂𑀢𑀢𑁄𑀢𑀺 𑀪𑀽𑀢𑀢𑁄 𑀘 𑀣𑀺𑀭𑀢𑁄 𑀘; 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀲𑀼𑀝𑁆𑀞𑀼 𑀤𑀴𑁆𑀳𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀅𑀬𑀁 𑀧𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀲𑀢𑁄 𑀲𑀢𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀯𑀕𑁆𑀕𑀳𑀡𑀢𑁄. 𑀅𑀣 𑀯𑀸 𑀧𑀼𑀭𑀺𑀫𑀸𑀧𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀢𑁆𑀣𑀻𑀢𑀺 𑀕𑀳𑀡𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀅𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀻 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀧𑀘𑁆𑀙𑀺𑀫𑀸𑀧𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀦𑀢𑁆𑀣𑀻𑀢𑀺 𑀕𑀳𑀡𑀢𑁄 ‘𑀪𑀲𑁆𑀫𑀦𑁆𑀢𑀸 𑀆𑀳𑀼𑀢𑀺𑀬𑁄’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺𑀓𑀸𑀦𑀁 𑀯𑀺𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀅𑀢𑀻𑀢𑁂𑀬𑁂𑀯 𑀦𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀻 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀲𑁆𑀲𑁂𑀯 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀻𑀲𑁂𑀦 𑀔𑀦𑁆𑀥𑁂 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀅𑀯𑀲𑁂𑀲𑀓𑁆𑀔𑀦𑁆𑀥𑁂 𑀲𑀜𑁆𑀚𑀸𑀦𑀦𑀢𑁄 ‘𑀇𑀫𑀺𑀦𑀸 𑀅𑀢𑁆𑀢𑀦𑀸 𑀇𑀫𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀏𑀯𑀁 𑀳𑁄𑀢𑀺. 𑀅𑀢𑁆𑀢𑀦𑀸 𑀯𑀸 𑀅𑀦𑀢𑁆𑀢𑀸𑀦𑀦𑁆𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀁𑀬𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀅𑀦𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀢𑁂𑀲𑀁 𑀚𑀸𑀦𑀦𑀢𑁄 𑀏𑀯𑀁 𑀳𑁄𑀢𑀺. 𑀅𑀦𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀅𑀦𑀢𑁆𑀢𑀸𑀢𑀺 ¶ 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀢𑁂𑀲𑀁 𑀚𑀸𑀦𑀦𑀢𑁄 𑀏𑀯𑀁 𑀳𑁄𑀢𑀺. 𑀲𑀩𑁆𑀩𑀸𑀧𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀯.

𑀯𑀤𑁄 𑀯𑁂𑀤𑁂𑀬𑁆𑀬𑁄𑀢𑀺 𑀆𑀤𑀬𑁄 𑀧𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀏𑀯 𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑀸. 𑀢𑀢𑁆𑀣 𑀯𑀤𑀢𑀻𑀢𑀺 𑀯𑀤𑁄; 𑀯𑀘𑀻𑀓𑀫𑁆𑀫𑀲𑁆𑀲 𑀓𑀸𑀭𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀤𑀬𑀢𑀻𑀢𑀺 𑀯𑁂𑀤𑁂𑀬𑁆𑀬𑁄; 𑀚𑀸𑀦𑀸𑀢𑀺 𑀅𑀦𑀼𑀪𑀯𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀬𑀁 𑀲𑁄 𑀯𑁂𑀤𑁂𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀭 𑀢𑀢𑁆𑀭 𑀤𑀻𑀖𑀭𑀢𑁆𑀢𑀁 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑀦𑀺𑀓𑀸𑀬𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀸. 𑀤𑀻𑀖𑀭𑀢𑁆𑀢𑀦𑁆𑀢𑀺 𑀘𑀺𑀭𑀭𑀢𑁆𑀢𑀁. 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀻𑀢𑀺 𑀲𑁄 𑀅𑀢𑁆𑀢𑀸 𑀅𑀚𑀸𑀢𑀺𑀥𑀫𑁆𑀫𑀢𑁄 ¶ 𑀦 𑀚𑀸𑀢𑁄 𑀦𑀸𑀫; 𑀲𑀤𑀸 𑀯𑀺𑀚𑁆𑀚𑀫𑀸𑀦𑁄 𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀅𑀢𑀻𑀢𑁂 𑀦𑀸𑀳𑁄𑀲𑀺, 𑀅𑀦𑀸𑀕𑀢𑁂𑀧𑀺 𑀦 𑀪𑀯𑀺𑀲𑁆𑀲𑀢𑀺. 𑀬𑁄 𑀳𑀺 𑀚𑀸𑀢𑁄 𑀲𑁄 𑀅𑀳𑁄𑀲𑀺, 𑀬𑁄 𑀘 𑀚𑀸𑀬𑀺𑀲𑁆𑀲𑀢𑀺 𑀲𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀣𑀯𑀸 ‘𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀻’𑀢𑀺 𑀲𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀢𑀻𑀢𑁂𑀧𑀺 𑀦 𑀚𑀸𑀢𑀼 𑀦𑀸𑀳𑁄𑀲𑀺 ¶ , 𑀅𑀦𑀸𑀕𑀢𑁂𑀧𑀺 𑀦 𑀚𑀸𑀢𑀼 𑀦 𑀪𑀯𑀺𑀲𑁆𑀲𑀢𑀺. 𑀦𑀺𑀘𑁆𑀘𑁄𑀢𑀺 𑀉𑀧𑁆𑀧𑀸𑀤𑀯𑀬𑀭𑀳𑀺𑀢𑁄. 𑀥𑀼𑀯𑁄𑀢𑀺 𑀣𑀺𑀭𑁄 𑀲𑀸𑀭𑀪𑀽𑀢𑁄. 𑀲𑀲𑁆𑀲𑀢𑁄𑀢𑀺 𑀲𑀩𑁆𑀩𑀓𑀸𑀮𑀺𑀓𑁄. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀪𑀸𑀯𑀁 𑀅𑀯𑀺𑀚𑀳𑀦𑀥𑀫𑁆𑀫𑁄 𑀓𑀓𑀡𑁆𑀝𑀓𑁄 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀢𑁆𑀢𑀁 𑀦𑀸𑀧𑀚𑁆𑀚𑀢𑀺. 𑀏𑀯𑀫𑀬𑀁 𑀲𑀩𑁆𑀩𑀸𑀲𑀯𑀤𑀺𑀝𑁆𑀞𑀺 (𑀫. 𑀦𑀺. 𑁧.𑁧𑁭 𑀆𑀤𑀬𑁄) 𑀦𑀸𑀫 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁭.) 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁯. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑁂 𑀣𑀸𑀫𑀕𑀢𑀝𑁆𑀞𑁂𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀘 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀲𑀁𑀬𑁄𑀚𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺. 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀧𑀭𑀺𑀬𑀼𑀝𑁆𑀞𑀳𑀦𑁆𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺. 𑀓𑀸𑀫𑀭𑀸𑀕𑁄𑀯 𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁯𑁫𑁦. 𑀅𑀲𑀢𑀁 𑀥𑀫𑁆𑀫𑀸, 𑀮𑀸𑀫𑀓𑀝𑁆𑀞𑁂𑀦 𑀯𑀸 𑀅𑀲𑀦𑁆𑀢𑀸 𑀥𑀫𑁆𑀫𑀸𑀢𑀺 𑀅𑀲𑀤𑁆𑀥𑀫𑁆𑀫𑀸. 𑀭𑀸𑀕𑀸𑀤𑀻𑀳𑀺 𑀤𑁄𑀲𑁂𑀳𑀺 𑀤𑀼𑀝𑁆𑀞𑀸𑀦𑀺 𑀘𑀭𑀺𑀢𑀸𑀦𑀻𑀢𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀫𑀜𑁆𑀜𑀦𑁆𑀢𑀻𑀢𑀺 𑀫𑀸𑀦𑀸.

𑁯𑁫𑁧. 𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁂 𑀭𑀽𑀧𑀻𑀢𑀺 𑀭𑀽𑀧𑀯𑀸. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑁄. 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀦𑁆𑀢𑀺 𑀫𑀸𑀢𑀸𑀧𑁂𑀢𑁆𑀢𑀺𑀓𑀁. 𑀓𑀺𑀦𑁆𑀢𑀁? 𑀲𑀼𑀓𑁆𑀓𑀲𑁄𑀡𑀺𑀢𑀁. 𑀫𑀸𑀢𑀸𑀧𑁂𑀢𑁆𑀢𑀺𑀓𑁂 𑀲𑀫𑁆𑀪𑀽𑀢𑁄 𑀚𑀸𑀢𑁄𑀢𑀺 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄. 𑀇𑀥 𑀭𑀽𑀧𑀓𑀸𑀬𑀲𑀻𑀲𑁂𑀦 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀅𑀢𑁆𑀢𑀸𑀢𑀺 𑀯𑀤𑀢𑀺. 𑀤𑀼𑀢𑀺𑀬𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀩𑁆𑀩𑀢𑁆𑀢𑀪𑀸𑀯𑀁 𑀯𑀤𑀢𑀺. 𑀤𑀺𑀩𑁆𑀩𑁄𑀢𑀺 𑀤𑁂𑀯𑀮𑁄𑀓𑁂 𑀲𑀫𑁆𑀪𑀽𑀢𑁄. 𑀓𑀸𑀫𑀸𑀯𑀘𑀭𑁄𑀢𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑀧𑀭𑀺𑀬𑀸𑀧𑀦𑁆𑀦𑁄 ¶ . 𑀓𑀩𑀴𑀻𑀓𑀸𑀭𑀁 𑀪𑀓𑁆𑀔𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑀪𑀓𑁆𑀔𑁄. 𑀫𑀦𑁄𑀫𑀬𑁄𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑁄. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀬𑀼𑀢𑁆𑀢𑁄. 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄𑀢𑀺 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄; 𑀬𑀸𑀦𑀺 𑀩𑁆𑀭𑀳𑁆𑀫𑀮𑁄𑀓𑁂 𑀅𑀢𑁆𑀣𑀺 𑀢𑁂𑀲𑀁 𑀯𑀲𑁂𑀦, 𑀇𑀢𑀭𑁂𑀲𑀜𑁆𑀘 𑀲𑀡𑁆𑀞𑀸𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑁄𑀢𑀺 ¶ 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀸𑀯𑀁 𑀉𑀧𑀕𑀢𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁮.) 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁫𑁨. 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑁂 ¶ 𑀓𑀺𑀮𑁂𑀲𑀸𑀬𑁂𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀓𑀼𑀲𑀻𑀢𑀯𑀢𑁆𑀣𑀽𑀦𑀻𑀢𑀺 𑀓𑀼𑀲𑀻𑀢𑀲𑁆𑀲 𑀅𑀮𑀲𑀲𑁆𑀲 𑀯𑀢𑁆𑀣𑀽𑀦𑀺, 𑀧𑀢𑀺𑀝𑁆𑀞𑀸, 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀳𑁄𑀢𑀻𑀢𑀺 𑀘𑀻𑀯𑀭𑀯𑀺𑀘𑀸𑀭𑀡𑀸𑀤𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀦𑀸𑀭𑀪𑀢𑀺. 𑀅𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑀲𑁆𑀲 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸. 𑀅𑀦𑀥𑀺𑀕𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀢𑁆𑀣𑀸𑀬. 𑀅𑀲𑀘𑁆𑀙𑀺𑀓𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬. 𑀇𑀤𑀁 𑀧𑀞𑀫𑀦𑁆𑀢𑀺 ‘𑀇𑀤𑀁 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺 𑀏𑀯𑀁 𑀑𑀲𑀻𑀤𑀦𑀁 𑀧𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀧𑀦 𑀫𑀸𑀲𑀸𑀘𑀺𑀢𑀁 𑀦𑀸𑀫 𑀢𑀺𑀦𑁆𑀢𑀫𑀸𑀲𑁄; 𑀬𑀣𑀸 𑀢𑀺𑀦𑁆𑀢𑀫𑀸𑀲𑁄 𑀕𑀭𑀼𑀓𑁄 𑀳𑁄𑀢𑀺, 𑀏𑀯𑀁 𑀕𑀭𑀼𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺.

𑁯𑁫𑁪. 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀮𑁄𑀓𑀲𑁆𑀲 𑀥𑀫𑁆𑀫𑀸𑀢𑀺 𑀮𑁄𑀓𑀥𑀫𑁆𑀫𑀸. 𑀏𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑁄𑀦𑁆𑀢𑀺 𑀏𑀯. 𑀢𑀲𑁆𑀫𑀸 ‘𑀮𑁄𑀓𑀥𑀫𑁆𑀫𑀸’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀝𑀺𑀖𑀸𑀢𑁄𑀢𑀺 𑀧𑀝𑀺𑀳𑀜𑁆𑀜𑀦𑀸𑀓𑀸𑀭𑁄. 𑀮𑀸𑀪𑁂 𑀲𑀸𑀭𑀸𑀕𑁄𑀢𑀺 ‘𑀅𑀳𑀁 𑀮𑀸𑀪𑀁 𑀮𑀪𑀸𑀫𑀻’𑀢𑀺 𑀏𑀯𑀁 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀲𑀸𑀭𑀸𑀕𑁄; 𑀲𑁄 𑀘𑀺𑀢𑁆𑀢𑀁 𑀧𑀝𑀺𑀳𑀦𑀢𑀺. 𑀅𑀮𑀸𑀪𑁂 𑀧𑀝𑀺𑀯𑀺𑀭𑁄𑀥𑁄𑀢𑀺 ‘𑀅𑀳𑀁 𑀮𑀸𑀪𑀁 𑀦 𑀮𑀪𑀸𑀫𑀻’𑀢𑀺 𑀤𑁄𑀫𑀦𑀲𑁆𑀲𑀯𑀲𑁂𑀦 𑀉𑀧𑁆𑀧𑀦𑁆𑀦𑀯𑀺𑀭𑁄𑀥𑁄; 𑀲𑁄𑀧𑀺 𑀘𑀺𑀢𑁆𑀢𑀁 𑀧𑀝𑀺𑀳𑀦𑀢𑀺. 𑀢𑀲𑁆𑀫𑀸 ‘𑀧𑀝𑀺𑀖𑀸𑀢𑁄’𑀢𑀺 𑀯𑀼𑀢𑁆𑀢𑁄. 𑀬𑀲𑀸𑀤𑀻𑀲𑀼𑀧𑀺 ‘𑀅𑀳𑀁 𑀫𑀳𑀸𑀧𑀭𑀺𑀯𑀸𑀭𑁄, 𑀅𑀳𑀁 𑀅𑀧𑁆𑀧𑀧𑀭𑀺𑀯𑀸𑀭𑁄, 𑀅𑀳𑀁 𑀧𑀲𑀁𑀲𑀧𑁆𑀧𑀢𑁆𑀢𑁄, 𑀅𑀳𑀁 𑀕𑀭𑀳𑀧𑁆𑀧𑀢𑁆𑀢𑁄, 𑀅𑀳𑀁 𑀲𑀼𑀔𑀧𑁆𑀧𑀢𑁆𑀢𑁄, 𑀅𑀳𑀁 𑀤𑀼𑀓𑁆𑀔𑀧𑁆𑀧𑀢𑁄’𑀢𑀺 𑀏𑀯𑀫𑁂𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀅𑀦𑀭𑀺𑀬𑀸𑀦𑀁 𑀯𑁄𑀳𑀸𑀭𑀸.

𑁯𑁫𑁭. 𑀧𑀼𑀭𑀺𑀲𑀤𑁄𑀲𑀸𑀢𑀺 ¶ 𑀧𑀼𑀭𑀺𑀲𑀸𑀦𑀁 𑀤𑁄𑀲𑀸. 𑀦 𑀲𑀭𑀸𑀫𑀻𑀢𑀺 ‘𑀫𑀬𑀸 𑀏𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀝𑁆𑀞𑀸𑀦𑀁 𑀦 𑀲𑀭𑀸𑀫𑀺 𑀦 𑀲𑀮𑁆𑀮𑀓𑁆𑀔𑁂𑀫𑀻’𑀢𑀺 ¶ 𑀏𑀯𑀁 𑀅𑀲𑁆𑀲𑀢𑀺𑀪𑀸𑀯𑁂𑀦 𑀦𑀺𑀩𑁆𑀩𑁂𑀞𑁂𑀢𑀺 𑀫𑁄𑀘𑁂𑀢𑀺. 𑀘𑁄𑀤𑀓𑀁𑀬𑁂𑀯 𑀧𑀝𑀺𑀧𑁆𑀨𑀭𑀢𑀻𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑀼𑀢𑁆𑀯𑀸 𑀨𑀭𑀢𑀺, 𑀧𑀝𑀺𑀪𑀸𑀡𑀺𑀢𑀪𑀸𑀯𑁂𑀦 𑀢𑀺𑀝𑁆𑀞𑀢𑀺. 𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀦𑁆𑀢𑀺 ‘𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦 𑀦𑀸𑀫 𑀓𑀺𑀁’ 𑀬𑁄 𑀢𑁆𑀯𑀁 𑀦𑁂𑀯 𑀯𑀢𑁆𑀣𑀼𑀦𑀸 𑀆𑀧𑀢𑁆𑀢𑀺𑀁, 𑀦 𑀘𑁄𑀤𑀦𑀁 𑀚𑀸𑀦𑀸𑀲𑀻’𑀢𑀺 𑀤𑀻𑀧𑁂𑀢𑀺; ‘𑀢𑁆𑀯𑀁 𑀧𑀺 𑀦𑀸𑀫 𑀏𑀯𑀁 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀲𑀻’𑀢𑀺 ¶ 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀧𑀘𑁆𑀘𑀸𑀭𑁄𑀧𑁂𑀢𑀻𑀢𑀺 ‘𑀢𑁆𑀯𑀁 𑀧𑀺 𑀔𑁄𑀲𑀻’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀝𑀺𑀆𑀭𑁄𑀧𑁂𑀢𑀺. 𑀧𑀝𑀺𑀓𑀭𑁄𑀳𑀻𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀳𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀸𑀳𑀺 𑀢𑀢𑁄 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀅𑀜𑁆𑀜𑀁 𑀘𑁄𑀤𑁂𑀲𑁆𑀲𑀲𑀻’𑀢𑀺 𑀤𑀻𑀧𑁂𑀢𑀺.

𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀯𑀘𑀦𑁂𑀦 𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀘𑀦𑀁 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. ‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’𑀢𑀺 𑀯𑀼𑀢𑁆𑀢𑁄 ‘𑀓𑁄 𑀆𑀧𑀦𑁆𑀦𑁄? 𑀓𑀺𑀁 𑀆𑀧𑀦𑁆𑀦𑁄? 𑀓𑀣𑀁 𑀆𑀧𑀦𑁆𑀦𑁄? 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄? 𑀓𑀁 𑀪𑀡𑀣? 𑀓𑀺𑀁 𑀪𑀡𑀣𑀸’𑀢𑀺 𑀯𑀤𑀢𑀺. ‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’𑀦𑁆𑀢𑀺 𑀯𑀼𑀢𑁆𑀢𑁂 ‘𑀦 𑀲𑀼𑀡𑀸𑀫𑀻’𑀢𑀺 𑀲𑁄𑀢𑀁 𑀯𑀸 𑀉𑀧𑀦𑁂𑀢𑀺. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 ‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’𑀢𑀺 𑀧𑀼𑀝𑁆𑀞𑁄 ‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀧𑀼𑀦 ‘𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀦 𑀧𑀼𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 ‘𑀢𑀢𑁄 𑀭𑀸𑀚𑀕𑀳𑀁 𑀕𑀢𑁄𑀫𑁆𑀳𑀻’𑀢𑀺 ‘𑀭𑀸𑀚𑀕𑀳𑀁 𑀯𑀸 𑀬𑀸𑀳𑀺, 𑀩𑁆𑀭𑀸𑀳𑁆𑀫𑀡𑀕𑁂𑀳𑀁 𑀯𑀸; 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’𑀢𑀺? ‘𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀓𑀣𑀁 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀧𑀢𑀺. 𑀓𑁄𑀧𑀦𑁆𑀢𑀺 𑀓𑀼𑀧𑀺𑀢𑀪𑀸𑀯𑀁. 𑀤𑁄𑀲𑀦𑁆𑀢𑀺 𑀤𑀼𑀝𑁆𑀞𑀪𑀸𑀯𑀁. 𑀉𑀪𑀬𑀫𑁆𑀧𑁂𑀢𑀁 𑀓𑁄𑀥𑀲𑁆𑀲𑁂𑀯 𑀦𑀸𑀫𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀲𑀦𑁆𑀢𑀼𑀝𑁆𑀞𑀸𑀓𑀸𑀭𑀁; 𑀤𑁄𑀫𑀦𑀲𑁆𑀲𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀸𑀢𑀼𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀧𑀓𑀸𑀲𑁂𑀢𑀺. 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 𑀪𑀡𑀢𑀻𑀢𑀺 𑀩𑀸𑀳𑀸 𑀯𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀮𑀚𑁆𑀚𑀺𑀯𑀘𑀦𑀁 𑀯𑀤𑀢𑀺. 𑀯𑀺𑀳𑁂𑀲𑁂𑀢𑀻𑀢𑀺 𑀯𑀺𑀳𑁂𑀞𑁂𑀢𑀺 𑀩𑀸𑀥𑀢𑀺. 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑀻𑀓𑀸𑀭𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀯𑀚𑀸𑀦𑀺𑀢𑁆𑀯𑀸; 𑀅𑀦𑀸𑀤𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀢𑀺𑀩𑀸𑀴𑁆𑀳𑀦𑁆𑀢𑀺 𑀅𑀢𑀺𑀤𑀴𑁆𑀳𑀁 𑀅𑀢𑀺𑀧𑁆𑀧𑀫𑀸𑀡𑀁. 𑀫𑀬𑀺 𑀩𑁆𑀬𑀸𑀯𑀝𑀸𑀢𑀺 𑀫𑀬𑀺 𑀩𑁆𑀬𑀸𑀧𑀸𑀭𑀁 𑀆𑀧𑀦𑁆𑀦𑀸. 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸𑀢𑀺 𑀳𑀻𑀦𑀲𑁆𑀲 𑀕𑀺𑀳𑀺𑀪𑀸𑀯𑀲𑁆𑀲 𑀅𑀢𑁆𑀣𑀸𑀬 𑀆𑀯𑀢𑁆𑀢𑀺𑀢𑁆𑀯𑀸; 𑀕𑀺𑀳𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀫𑀦𑀸 𑀳𑁄𑀣𑀸𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀳𑁄𑀣, ‘𑀫𑀬𑀸 𑀮𑀪𑀺𑀢𑀩𑁆𑀩𑀁 𑀮𑀪𑀣, 𑀫𑀬𑀸 𑀯𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀯𑀲𑀣, 𑀨𑀸𑀲𑀼𑀯𑀺𑀳𑀸𑀭𑁄 𑀯𑁄 𑀫𑀬𑀸 𑀓𑀢𑁄’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑁯𑁫𑁮. 𑀅𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀅𑀲𑀜𑁆𑀜𑀻𑀯𑀸𑀤𑁄; 𑀲𑁄 𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀲𑀜𑁆𑀜𑀻𑀯𑀸𑀤𑀸. 𑀭𑀽𑀧𑀻 𑀅𑀢𑁆𑀢𑀸𑀢𑀺𑀆𑀤𑀻𑀲𑀼 𑀮𑀸𑀪𑀺𑀦𑁄 𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀭𑀽𑀧𑀻𑀢𑀺 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀮𑀸𑀪𑀺𑀦𑁄 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 ¶ ¶ , 𑀆𑀚𑀻𑀯𑀓𑀸𑀦𑀁 𑀯𑀺𑀬. 𑀮𑀸𑀪𑀺𑀦𑁄𑀬𑁂𑀯 𑀘 𑀧𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀅𑀭𑀽𑀧𑀻𑀢𑀺 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀮𑀸𑀪𑀺𑀦𑁄 𑀢𑀓𑁆𑀓𑀫𑀢𑁆𑀢𑁂𑀦𑁂𑀯, 𑀦𑀺𑀕𑀡𑁆𑀞𑀸𑀦𑀁 𑀯𑀺𑀬. 𑀅𑀲𑀜𑁆𑀜𑀻𑀪𑀸𑀯𑁂 𑀧𑀦𑁂𑀢𑁆𑀣 𑀏𑀓𑀦𑁆𑀢𑁂𑀦𑁂𑀯 𑀓𑀸𑀭𑀡𑀁 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀤𑀺𑀝𑁆𑀞𑀺𑀕𑀢𑀺𑀓𑁄 ¶ 𑀳𑀺 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀬𑀁 𑀯𑀸 𑀢𑀁 𑀯𑀸 𑀕𑀡𑁆𑀳𑀸𑀢𑀺. 𑀭𑀽𑀧𑀻 𑀘 𑀅𑀭𑀽𑀧𑀻 𑀘𑀸𑀢𑀺 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑀕𑀸𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀬𑀁 𑀤𑀺𑀝𑁆𑀞𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀧𑀺 𑀢𑀓𑁆𑀓𑀺𑀓𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀦𑁂𑀯 𑀭𑀽𑀧𑀻 𑀦𑀸𑀭𑀽𑀧𑀻𑀢𑀺 𑀧𑀦 𑀏𑀓𑀦𑁆𑀢𑀢𑁄 𑀢𑀓𑁆𑀓𑀺𑀓𑀤𑀺𑀝𑁆𑀞𑀺𑀬𑁂𑀯. 𑀅𑀦𑁆𑀢𑀯𑀸𑀢𑀺 𑀧𑀭𑀺𑀢𑁆𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀤𑀺𑀝𑁆𑀞𑀺. 𑀅𑀦𑀦𑁆𑀢𑀯𑀸𑀢𑀺 𑀅𑀧𑁆𑀧𑀫𑀸𑀡𑀓𑀲𑀺𑀡𑀁. 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘𑀸𑀢𑀺 𑀉𑀤𑁆𑀥𑀫𑀥𑁄 𑀲𑀧𑀭𑀺𑀬𑀦𑁆𑀢𑀁 𑀢𑀺𑀭𑀺𑀬𑀁 𑀅𑀧𑀭𑀺𑀬𑀦𑁆𑀢𑀁 𑀓𑀲𑀺𑀡𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸𑀢𑀺 𑀢𑀓𑁆𑀓𑀺𑀓𑀤𑀺𑀝𑁆𑀞𑀺𑀬𑁂𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁯.) 𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁦. 𑀦𑀯𑀓𑀦𑀺𑀤𑁆𑀤𑁂𑀲𑁂 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 𑀲𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀓𑀣𑀺𑀢𑀸𑀦𑀺. 𑀧𑀼𑀭𑀺𑀲𑀸𑀦𑀁 𑀫𑀮𑀸𑀦𑀻𑀢𑀺 𑀧𑀼𑀭𑀺𑀲𑀫𑀮𑀸𑀦𑀺. 𑀦𑀯𑀯𑀺𑀥𑀸𑀢𑀺 𑀦𑀯𑀓𑁄𑀝𑁆𑀞𑀸𑀲𑀸 𑀦𑀯𑀧𑁆𑀧𑀪𑁂𑀤𑀸 𑀯𑀸.

𑁯𑁬𑁩. 𑀢𑀡𑁆𑀳𑀁 𑀧𑀝𑀺𑀘𑁆𑀘𑀸𑀢𑀺 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬. 𑀧𑀭𑀺𑀬𑁂𑀲𑀦𑀸𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸. 𑀲𑀸 𑀳𑀺 𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀺. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄. 𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀧𑀦 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸, 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁨𑁩) 𑀅𑀬𑀁 𑀜𑀸𑀡𑀯𑀺𑀦𑀺𑀘𑁆𑀙𑀬𑁄. ‘‘𑀯𑀺𑀦𑀺𑀘𑁆𑀙𑀬𑁄𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑁋 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀘 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘𑀸’’𑀢𑀺 (𑀫𑀳𑀸𑀦𑀺. 𑁧𑁦𑁨) 𑀏𑀯𑀁 𑀆𑀕𑀢𑀸𑀦𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄. ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 (𑀤𑀻. 𑀦𑀺. 𑁨.𑁩𑁫𑁮) 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀇𑀥 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄. 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀜𑁆𑀘 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀺 𑁋 ‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺 ¶ , 𑀏𑀢𑁆𑀢𑀓𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀢𑁆𑀣𑀸𑀬 ¶ , 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑀙𑀦𑁆𑀤𑀭𑀸𑀕𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀩𑁆𑀩𑀮𑀭𑀸𑀕𑁄 𑀘 𑀩𑀮𑀯𑀭𑀸𑀕𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀜𑁆𑀳𑀺 𑀇𑀥 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦𑀁 ¶ . 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 𑁋 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀭𑀓𑁆𑀔𑁄𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀼𑀲𑀕𑁄𑀧𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀡𑀁. 𑀅𑀥𑀺𑀓𑀭𑁄𑀢𑀻𑀢𑀺 𑀅𑀥𑀺𑀓𑀭𑀡𑀁; 𑀓𑀸𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁; 𑀆𑀭𑀓𑁆𑀔𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀏𑀓𑀢𑁄𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀯𑀺𑀭𑁄𑀥𑁄 𑀯𑀺𑀕𑁆𑀕𑀳𑁄, 𑀧𑀘𑁆𑀙𑀺𑀫𑁄 𑀧𑀘𑁆𑀙𑀺𑀫𑁄 𑀯𑀺𑀯𑀸𑀤𑁄. 𑀢𑀼𑀯𑀁 𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀘𑀦𑀁, 𑀢𑁆𑀯𑀁 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄.

𑁯𑁬𑁪. 𑀇𑀜𑁆𑀚𑀺𑀢𑀸𑀦𑀻𑀢𑀺 𑀇𑀜𑁆𑀚𑀦𑀸𑀦𑀺 𑀘𑀮𑀦𑀸𑀦𑀺. 𑀅𑀲𑁆𑀫𑀻𑀢𑀺 𑀇𑀜𑁆𑀚𑀺𑀢𑀫𑁂𑀢𑀦𑁆𑀢𑀺𑀆𑀤𑀻𑀳𑀺 𑀲𑀩𑁆𑀩𑀧𑀤𑁂𑀳𑀺 𑀫𑀸𑀦𑁄𑀯 𑀓𑀣𑀺𑀢𑁄. 𑀅𑀳𑀦𑁆𑀢𑀺 𑀧𑀯𑀢𑁆𑀢𑁄𑀧𑀺 𑀳𑀺 𑀫𑀸𑀦𑁄 𑀇𑀜𑁆𑀚𑀺𑀢𑀫𑁂𑀯, 𑀅𑀬𑀫𑀳𑀦𑁆𑀢𑀺 𑀧𑀯𑀢𑁆𑀢𑁄𑀧𑀺, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀧𑀯𑀢𑁆𑀢𑁄𑀧𑀺. 𑀲𑁂𑀲𑀦𑀯𑀓𑁂𑀳𑀺𑀧𑀺 𑀫𑀸𑀦𑁄𑀯 𑀓𑀣𑀺𑀢𑁄. 𑀫𑀸𑀦𑁄 𑀳𑀺 𑀇𑀜𑁆𑀚𑀦𑀢𑁄 𑀇𑀜𑁆𑀚𑀺𑀢𑀁, 𑀫𑀜𑁆𑀜𑀦𑀢𑁄 𑀫𑀜𑁆𑀜𑀺𑀢𑀁, 𑀨𑀦𑁆𑀤𑀦𑀢𑁄 𑀨𑀦𑁆𑀤𑀺𑀢𑀁, 𑀧𑀧𑀜𑁆𑀘𑀦𑀢𑁄 𑀧𑀧𑀜𑁆𑀘𑀺𑀢𑀁. 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀢𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

(𑁧𑁦.) 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁬. 𑀤𑀲𑀓𑀦𑀺𑀤𑁆𑀤𑁂𑀲𑁂 𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀆𑀖𑀸𑀢𑀯𑀢𑁆𑀣𑀽𑀦𑀺 𑀧𑀦𑁂𑀢𑁆𑀣 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀻𑀦𑀁 ¶ 𑀯𑀲𑁂𑀦 𑀅𑀯𑀺𑀓𑁄𑀧𑁂𑀢𑀩𑁆𑀩𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀺𑀫𑁆𑀳𑀺𑀧𑀺 𑀅𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀖𑀸𑀢𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀸𑀦𑀺.

𑁯𑁭𑁦. 𑀫𑀺𑀘𑁆𑀙𑀢𑁆𑀢𑁂𑀲𑀼 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀧𑀸𑀧𑀓𑀺𑀭𑀺𑀬𑀸𑀲𑀼 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦 𑀧𑀸𑀧𑀁 𑀓𑀢𑁆𑀯𑀸 ‘𑀲𑀼𑀓𑀢𑀁 𑀫𑀬𑀸’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 ¶ 𑀅𑀯𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀢𑁄 𑀯𑀺𑀫𑀼𑀢𑁆𑀢𑀲𑀜𑁆𑀜𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁩. 𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀢𑀡𑁆𑀳𑀸𑀲𑀫𑀼𑀤𑀸𑀘𑀸𑀭𑀸 𑀢𑀡𑁆𑀳𑀸𑀧𑀯𑀢𑁆𑀢𑀺𑀬𑁄. 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀇𑀤𑀜𑁆𑀳𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀅𑀚𑁆𑀛𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀽𑀳𑀕𑀸𑀳𑀢𑁄 ‘𑀅𑀲𑁆𑀫𑀻’𑀢𑀺 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀻𑀢𑀺 ¶ 𑀅𑀢𑁆𑀣𑁄. 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀻𑀢𑀺𑀆𑀤𑀻𑀲𑀼 𑀧𑀦 𑀏𑀯𑀁 𑀲𑀫𑀽𑀳𑀢𑁄 ‘𑀅𑀳’𑀦𑁆𑀢𑀺 𑀕𑀳𑀡𑁂 𑀲𑀢𑀺 𑀢𑀢𑁄 𑀅𑀦𑀼𑀧𑀦𑀺𑀥𑀸𑀬 𑀘 𑀉𑀧𑀦𑀺𑀥𑀸𑀬 𑀘𑀸𑀢𑀺 𑀤𑁆𑀯𑀺𑀥𑀸 𑀕𑀳𑀡𑀁 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀧𑀦𑀺𑀥𑀸𑀬𑀸𑀢𑀺 𑀅𑀜𑁆𑀜𑀁 𑀆𑀓𑀸𑀭𑀁 𑀅𑀦𑀼𑀧𑀕𑀫𑁆𑀫 𑀲𑀓𑀪𑀸𑀯𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 ‘𑀇𑀢𑁆𑀣𑀲𑁆𑀫𑀻’𑀢𑀺 𑀳𑁄𑀢𑀺; 𑀔𑀢𑁆𑀢𑀺𑀬𑀸𑀤𑀻𑀲𑀼 ‘𑀇𑀤𑀁𑀧𑀓𑀸𑀭𑁄 𑀅𑀳’𑀦𑁆𑀢𑀺 𑀏𑀯𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀸𑀯 𑀅𑀦𑀼𑀧𑀦𑀺𑀥𑀸𑀬 𑀕𑀳𑀡𑀁. 𑀉𑀧𑀦𑀺𑀥𑀸𑀬 𑀕𑀳𑀡𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀲𑀫𑀢𑁄 𑀘 𑀅𑀲𑀫𑀢𑁄 𑀘. 𑀢𑀁 𑀤𑀲𑁆𑀲𑁂𑀢𑀼𑀁 𑀏𑀯𑀲𑁆𑀫𑀻𑀢𑀺 𑀘 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀲𑁆𑀫𑀻𑀢𑀺 𑀇𑀤𑀁 𑀲𑀫𑀢𑁄 𑀉𑀧𑀦𑀺𑀥𑀸𑀬 𑀕𑀳𑀡𑀁; 𑀬𑀣𑀸 𑀅𑀬𑀁 𑀔𑀢𑁆𑀢𑀺𑀬𑁄, 𑀬𑀣𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀏𑀯𑀁 𑀅𑀳𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀇𑀤𑀁 𑀧𑀦 𑀅𑀲𑀫𑀢𑁄 𑀕𑀳𑀡𑀁; 𑀬𑀣𑀸𑀬𑀁 𑀔𑀢𑁆𑀢𑀺𑀬𑁄, 𑀬𑀣𑀸𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀢𑀢𑁄 𑀅𑀜𑁆𑀜𑀣𑀸 𑀅𑀳𑀁 𑀳𑀻𑀦𑁄 𑀯𑀸 𑀅𑀥𑀺𑀓𑁄 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀢𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀦𑀸𑀕𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑁂𑀲𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑁆𑀫𑀻𑀢𑀺 𑀲𑀲𑁆𑀲𑀢𑁄 𑀅𑀲𑁆𑀫𑀺. 𑀲𑀸𑀢𑀲𑁆𑀫𑀻𑀢𑀺 𑀅𑀲𑀲𑁆𑀲𑀢𑁄 𑀅𑀲𑁆𑀫𑀺. 𑀅𑀲𑀲𑁆𑀫𑀻𑀢𑀺 𑀲𑀢𑀲𑁆𑀫𑀻𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀅𑀲𑀁; 𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀻𑀤𑀢𑀻𑀢𑀺 𑀲𑀢𑀁; 𑀅𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀸𑀦𑀺 ¶ 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀢𑁄 𑀧𑀭𑀸𑀦𑀺 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 ‘‘𑀅𑀧𑀺 𑀦𑀸𑀫𑀸𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁂𑀲𑀼 𑁋

𑀤𑁆𑀯𑁂 ¶ 𑀤𑀺𑀝𑁆𑀞𑀺𑀲𑀻𑀲𑀸 𑀘𑀢𑁆𑀢𑀸𑀭𑁄, 𑀲𑀼𑀤𑁆𑀥𑀲𑀻𑀲𑀸 𑀲𑀻𑀲𑀫𑀽𑀮𑀓𑀸;

𑀢𑀬𑁄 𑀢𑀬𑁄𑀢𑀺 𑀏𑀢𑀸𑀦𑀺, 𑀅𑀝𑁆𑀞𑀸𑀭𑀲 𑀯𑀺𑀪𑀸𑀯𑀬𑁂.

𑀏𑀢𑁂𑀲𑀼 𑀳𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸 𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸 𑀦𑀸𑀫. 𑀅𑀲𑁆𑀫𑀻𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀲𑀼𑀤𑁆𑀥𑀲𑀻𑀲𑀸𑀏𑀯. 𑀇𑀢𑁆𑀣𑀲𑁆𑀫𑀻𑀢𑀺 𑀆𑀤𑀬𑁄 𑀢𑀬𑁄 𑀢𑀬𑁄𑀢𑀺 𑀤𑁆𑀯𑀸𑀤𑀲 𑀲𑀻𑀲𑀫𑀽𑀮𑀓𑀸 𑀦𑀸𑀫𑀸𑀢𑀺. 𑀏𑀯𑀫𑁂𑀢𑁂 𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸, 𑀘𑀢𑁆𑀢𑀸𑀭𑁄 𑀲𑀼𑀤𑁆𑀥𑀲𑀻𑀲𑀸, 𑀤𑁆𑀯𑀸𑀤𑀲 𑀲𑀻𑀲𑀫𑀽𑀮𑀓𑀸𑀢𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑁯𑁭𑁪. 𑀇𑀤𑀸𑀦𑀺 𑀧𑀝𑀺𑀧𑀸𑀝𑀺𑀬𑀸𑀯 𑀢𑁂 𑀥𑀫𑁆𑀫𑁂 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀣𑀜𑁆𑀘 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀯𑀓𑀸𑀭𑀺𑀁 𑀓𑀭𑀺𑀢𑁆𑀯𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 𑀓𑀜𑁆𑀘𑀺 𑀏𑀓𑀥𑀫𑁆𑀫𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀁 ¶ 𑀓𑀢𑁆𑀯𑀸, 𑀏𑀓𑁂𑀓𑀢𑁄 𑀅𑀕𑁆𑀕𑀳𑁂𑀢𑁆𑀯𑀸, 𑀲𑀫𑀽𑀳𑀢𑁄𑀯 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀫𑀻𑀢𑀺 𑀙𑀦𑁆𑀤𑀁 𑀧𑀝𑀺𑀮𑀪𑀢𑀻𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀭𑀯𑀲𑁂𑀲𑀢𑁄 𑀕𑀳𑁂𑀢𑁆𑀯𑀸 ‘𑀅𑀳’𑀦𑁆𑀢𑀺 𑀢𑀡𑁆𑀳𑀁 𑀧𑀝𑀺𑀮𑀪𑀢𑀺. 𑀫𑀸𑀦𑀤𑀺𑀝𑁆𑀞𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑁄, 𑀫𑀸𑀦𑀤𑀺𑀝𑁆𑀞𑀺𑀬𑁄 𑀧𑀦 𑀦 𑀯𑀺𑀦𑀸 𑀢𑀡𑁆𑀳𑀸𑀬, 𑀢𑀲𑁆𑀫𑀸 𑀢𑀤𑁂𑀓𑀝𑁆𑀞𑀯𑀲𑁂𑀦 𑀇𑀥 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀲𑀻𑀲𑁂𑀦 𑀯𑀸 𑀧𑀧𑀜𑁆𑀘𑀢𑁆𑀢𑀬𑀫𑁆𑀧𑀺 𑀉𑀤𑁆𑀤𑀺𑀝𑁆𑀞𑀁. 𑀢𑀁 𑀉𑀤𑁆𑀤𑁂𑀲𑀸𑀦𑀼𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀼𑀫𑁆𑀧𑀺 𑀫𑀸𑀦𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸. 𑀢𑀡𑁆𑀳𑀸𑀧𑀧𑀜𑁆𑀘𑀁 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀲𑁂𑀲𑀧𑀧𑀜𑁆𑀘𑁂𑀧𑀺 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳.

𑀢𑀲𑁆𑀫𑀺𑀁 𑀲𑀢𑀺 𑀇𑀫𑀸𑀦𑀺 𑀧𑀧𑀜𑁆𑀘𑀺𑀢𑀸𑀦𑀻𑀢𑀺 𑀢𑀲𑁆𑀫𑀺𑀁 ‘‘𑀅𑀲𑁆𑀫𑀻𑀢𑀺 𑀙𑀦𑁆𑀤𑀁 𑀧𑀝𑀺𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂 𑀧𑀧𑀜𑁆𑀘𑀢𑁆𑀢𑀬𑁂 𑀲𑀢𑀺 𑀧𑀼𑀦 𑀇𑀫𑀸𑀦𑀺 ‘‘𑀇𑀢𑁆𑀣𑀲𑁆𑀫𑀻𑀢𑀺 𑀯𑀸’’𑀢𑀺𑀆𑀤𑀻𑀦𑀺 𑀧𑀧𑀜𑁆𑀘𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀔𑀢𑁆𑀢𑀺𑀬𑁄𑀲𑁆𑀫𑀻𑀢𑀺𑀆𑀤𑀻𑀲𑀼 𑀅𑀪𑀺𑀲𑁂𑀓𑀲𑁂𑀦𑀸𑀫𑀘𑁆𑀘𑀸𑀤𑀺𑀦𑀸 ‘𑀔𑀢𑁆𑀢𑀺𑀬𑁄 𑀅𑀳𑀁’, 𑀫𑀦𑁆𑀢𑀚𑁆𑀛𑁂𑀦 𑀧𑁄𑀭𑁄𑀳𑀺𑀘𑁆𑀘𑀸𑀤𑀺𑀦𑀸 ‘𑀩𑁆𑀭𑀸𑀳𑁆𑀫𑀡𑁄 𑀅𑀳𑀁’, 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀦𑀸 ‘𑀯𑁂𑀲𑁆𑀲𑁄 𑀅𑀳𑀁’, 𑀅𑀲𑀺𑀢𑀩𑁆𑀬𑀸𑀪𑀗𑁆𑀕𑀺𑀢𑀸𑀬 ‘𑀲𑀼𑀤𑁆𑀤𑁄 𑀅𑀳𑀁’ ¶ , 𑀕𑀺𑀳𑀺𑀩𑁆𑀬𑀜𑁆𑀚𑀦𑁂𑀦 ‘𑀕𑀳𑀝𑁆𑀞𑁄 𑀅𑀳’𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀏𑀯𑀁 𑀔𑀢𑁆𑀢𑀺𑀬𑀸𑀤𑀻𑀲𑀼 𑀔𑀢𑁆𑀢𑀺𑀬𑀸𑀤𑀺𑀧𑁆𑀧𑀓𑀸𑀭𑀁 𑀅𑀢𑁆𑀢𑀦𑀺 𑀉𑀧𑁆𑀧𑀸𑀤𑀬𑀺𑀢𑁆𑀯𑀸 ‘𑀇𑀢𑁆𑀣𑀁𑀧𑀓𑀸𑀭𑁄 𑀅𑀳’𑀦𑁆𑀢𑀺 𑀳𑁄𑀢𑀺.

𑀬𑀣𑀸 𑀲𑁄 𑀔𑀢𑁆𑀢𑀺𑀬𑁄𑀢𑀺𑀆𑀤𑀻𑀲𑀼 ‘𑀬𑀣𑀸 𑀲𑁄 𑀅𑀪𑀺𑀲𑁂𑀓𑀲𑁂𑀦𑀸𑀫𑀘𑁆𑀘𑀸𑀤𑀺𑀦𑀸 𑀔𑀢𑁆𑀢𑀺𑀬𑁄, 𑀢𑀣𑀸 ‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀦𑀬𑁂 ‘𑀬𑀣𑀸 𑀲𑁄 𑀅𑀪𑀺𑀲𑁂𑀓𑀲𑁂𑀦𑀸𑀫𑀘𑁆𑀘𑀸𑀤𑀺𑀦𑀸 𑀔𑀢𑁆𑀢𑀺𑀬𑁄, 𑀦𑀸𑀳𑀁 𑀢𑀣𑀸 𑀔𑀢𑁆𑀢𑀺𑀬𑁄; 𑀅𑀳𑀁 𑀧𑀦 𑀢𑀢𑁄 𑀳𑀻𑀦𑁄 𑀯𑀸 𑀲𑁂𑀝𑁆𑀞𑁄 𑀯𑀸’𑀢𑀺 ¶ 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁯𑁭𑁫. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀪𑀸𑀚𑁂𑀢𑁆𑀯𑀸 𑀇𑀤𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀪𑀸𑀚𑁂𑀢𑀼𑀁 𑀢𑀢𑁆𑀣 𑀓𑀢𑀫𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬𑀸𑀢𑀺 𑀩𑀸𑀳𑀺𑀭𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀇𑀤𑀫𑁆𑀧𑀺 𑀳𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀭𑀽𑀧𑁂𑀦 𑀯𑀸…𑀧𑁂… 𑀯𑀺𑀜𑁆𑀜𑀸𑀡𑁂𑀦 𑀯𑀸. 𑀅𑀯𑀲𑁂𑀲𑀁 𑀧𑀦 𑀉𑀤𑁆𑀤𑁂𑀲𑀯𑀸𑀭𑁂 𑀢𑀸𑀯 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁯𑁭𑁬. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦 𑀅𑀯𑀓𑀸𑀭𑀺𑀁 𑀓𑀭𑀺𑀢𑁆𑀯𑀸𑀢𑀺 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸. 𑀇𑀫𑀺𑀦𑀸 𑀅𑀲𑁆𑀫𑀻𑀢𑀺 𑀙𑀦𑁆𑀤𑀁 𑀧𑀝𑀺𑀮𑀪𑀢𑀻𑀢𑀺𑀆𑀤𑀻𑀲𑀼 𑀇𑀫𑀺𑀦𑀸 𑀭𑀽𑀧𑁂𑀦 𑀯𑀸…𑀧𑁂… 𑀯𑀺𑀜𑁆𑀜𑀸𑀡𑁂𑀦 𑀯𑀸𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀏𑀓𑀤𑁂𑀲𑀢𑁄 𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 ‘𑀅𑀳’𑀦𑁆𑀢𑀺 𑀙𑀦𑁆𑀤𑀸𑀤𑀻𑀦𑀺 𑀧𑀝𑀺𑀮𑀪𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀺𑀦𑀸 𑀔𑀢𑁆𑀢𑀺𑀬𑁄𑀲𑁆𑀫𑀻𑀢𑀺𑀆𑀤𑀻𑀲𑀼 ‘𑀇𑀫𑀺𑀦𑀸 𑀙𑀢𑁆𑀢𑁂𑀦 ¶ 𑀯𑀸 𑀔𑀕𑁆𑀕𑁂𑀦 𑀯𑀸 𑀅𑀪𑀺𑀲𑁂𑀓𑀲𑁂𑀦𑀸𑀫𑀘𑁆𑀘𑀸𑀤𑀺𑀦𑀸 𑀯𑀸 𑀔𑀢𑁆𑀢𑀺𑀬𑁄 𑀅𑀳’𑀦𑁆𑀢𑀺 𑀏𑀯𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸𑀢𑀺 𑀧𑀤𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄.

𑀬𑀣𑀸 𑀲𑁄 𑀔𑀢𑁆𑀢𑀺𑀬𑁄𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀢𑀺 𑀯𑀼𑀢𑁆𑀢𑀧𑀤𑀫𑁂𑀯 𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀢𑀲𑁆𑀲 𑀯𑀲𑁂𑀦 𑀬𑀣𑀸 𑀔𑀢𑁆𑀢𑀺𑀬𑁄, 𑀏𑀯𑀁 𑀅𑀳𑀫𑁆𑀧𑀺 𑀇𑀫𑀺𑀦𑀸 𑀔𑀕𑁆𑀕𑁂𑀦 𑀯𑀸 𑀙𑀢𑁆𑀢𑁂𑀦 𑀯𑀸 𑀅𑀪𑀺𑀲𑁂𑀓𑀲𑁂𑀦𑀸𑀫𑀘𑁆𑀘𑀸𑀤𑀺𑀦𑀸 𑀯𑀸 𑀔𑀢𑁆𑀢𑀺𑀬𑁄𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀺𑀘𑁆𑀘𑁄𑀲𑁆𑀫𑀻𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀯𑀓𑀸𑀭𑀺𑀁 𑀓𑀢𑁆𑀯𑀸 𑀭𑀽𑀧𑀸𑀤𑀻𑀲𑀼 𑀏𑀓𑀫𑁂𑀯 𑀥𑀫𑁆𑀫𑀁 ‘𑀅𑀳’𑀦𑁆𑀢𑀺 𑀕𑀳𑁂𑀢𑁆𑀯𑀸 ‘𑀇𑀫𑀺𑀦𑀸 𑀔𑀕𑁆𑀕𑁂𑀦 𑀯𑀸 𑀙𑀢𑁆𑀢𑁂𑀦 𑀯𑀸 𑀅𑀳𑀁 𑀦𑀺𑀘𑁆𑀘𑁄 𑀥𑀼𑀯𑁄’𑀢𑀺 𑀫𑀜𑁆𑀜𑀢𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀏𑀯𑀭𑀽𑀧𑀸𑀦𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀓𑁂𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲. 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀓𑁂𑀓𑀲𑁆𑀲𑁂𑀯 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀓𑁂𑀓𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 ¶ 𑀬𑀣𑀸𑀮𑀸𑀪𑀯𑀲𑁂𑀦 𑀩𑀳𑀼𑀦𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀦 𑀏𑀓𑀁𑀲𑁂𑀦𑁂𑀯 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀦𑀦𑁆𑀢𑀸 𑀳𑀺 𑀅𑀲𑀤𑀺𑀲𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀪𑁂𑀤𑀸 𑀲𑀢𑁆𑀢𑀸. 𑀅𑀝𑁆𑀞𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀝𑁆𑀞𑀲𑀢𑀲𑀗𑁆𑀔𑀸𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑀳𑁄𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀤𑀺𑀝𑁆𑀞𑀺𑀕𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁭. 𑀤𑀺𑀝𑁆𑀞𑀺𑀕𑀢𑀦𑀺𑀤𑁆𑀤𑁂𑀲𑁂 ¶ 𑀩𑁆𑀭𑀳𑁆𑀫𑀚𑀸𑀮𑁂 𑀯𑁂𑀬𑁆𑀬𑀸𑀓𑀭𑀡𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀦𑀸𑀫𑀓𑁂 𑀯𑁂𑀬𑁆𑀬𑀸𑀓𑀭𑀡𑁂, 𑀤𑀻𑀖𑀦𑀺𑀓𑀸𑀬𑀲𑁆𑀲 𑀧𑀞𑀫𑀲𑀼𑀢𑁆𑀢𑀦𑁆𑀢𑁂. 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸𑀢𑀺 𑀲𑀢𑁆𑀣𑀸𑀭𑀸 𑀲𑀬𑀁 𑀆𑀳𑀘𑁆𑀘 𑀪𑀸𑀲𑀺𑀢𑀸𑀦𑀺. 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸𑀢𑀺𑀆𑀤𑀻𑀲𑀼 ‘‘𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀸𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁯-𑁩𑁦) 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀪𑁂𑀤𑁄 𑀘 𑀅𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄

𑁧. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑀯𑀡𑁆𑀡𑀦𑀸

𑁯𑁭𑁮. 𑀇𑀤𑀸𑀦𑀺 ¶ ¶ ¶ 𑀢𑀤𑀦𑀦𑁆𑀢𑀭𑁂 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀧𑀸𑀴𑀺𑀧𑀭𑀺𑀘𑁆𑀙𑁂𑀤𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀏𑀢𑁆𑀣 𑀳𑀺 𑀆𑀤𑀺𑀢𑁄𑀯 𑀔𑀦𑁆𑀥𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄 𑀦𑀸𑀫 𑀯𑀼𑀢𑁆𑀢𑁄. 𑀤𑀼𑀢𑀺𑀬𑁄 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀓𑀸𑀫𑀥𑀸𑀢𑀼𑀆𑀤𑀻𑀲𑀼 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀢𑀢𑀺𑀬𑁄 𑀢𑀢𑁆𑀣𑁂𑀯 𑀧𑀭𑀺𑀬𑀸𑀧𑀦𑁆𑀦𑀸𑀧𑀭𑀺𑀬𑀸𑀧𑀦𑁆𑀦𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀘𑀢𑀼𑀢𑁆𑀣𑁄 𑀢𑀻𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀧𑀜𑁆𑀘𑀫𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀪𑀽𑀫𑀦𑁆𑀢𑀭𑀯𑀲𑁂𑀦 𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀙𑀝𑁆𑀞𑁄 𑀕𑀢𑀻𑀲𑀼 𑀉𑀧𑁆𑀧𑀸𑀤𑀓𑀓𑀫𑁆𑀫𑀆𑀬𑀼𑀧𑁆𑀧𑀫𑀸𑀡𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀲𑀢𑁆𑀢𑀫𑁄 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑁄 𑀦𑀸𑀫. 𑀅𑀝𑁆𑀞𑀫𑁄 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀯𑀸𑀭𑁄 𑀦𑀸𑀫. 𑀦𑀯𑀫𑁄 𑀢𑁂𑀲𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀸𑀦𑀁 𑀤𑀺𑀝𑁆𑀞𑀲𑀼𑀢𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀯𑀸𑀭𑁄 𑀦𑀸𑀫. 𑀤𑀲𑀫𑁄 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀯𑀸𑀭𑁄 𑀦𑀸𑀫.

𑁯𑁭𑁯. 𑀏𑀯𑀁 𑀤𑀲𑀳𑀺 𑀯𑀸𑀭𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀧𑀸𑀴𑀺𑀬𑀸 𑀧𑀞𑀫𑁂 𑀢𑀸𑀯 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁂 ‘‘𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀁 𑀏𑀢𑁆𑀣𑀦𑁆𑀢𑀭𑁂 𑀓𑀢𑀺 𑀔𑀦𑁆𑀥𑀸’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀏𑀓𑁄𑀢𑀺 𑀯𑀸…𑀧𑁂… 𑀘𑀢𑁆𑀢𑀸𑀭𑁄𑀢𑀺 𑀯𑀸 𑀙𑀸𑀢𑀺 𑀯𑀸 𑀅𑀯𑀢𑁆𑀯𑀸 𑀧𑀜𑁆𑀘𑀸𑀢𑀺 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑁄 𑀦𑀢𑁆𑀣𑀻’’𑀢𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑀁 𑀤𑀻𑀧𑁂𑀦𑁆𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀯𑀺𑀲𑁆𑀲𑀚𑁆𑀚𑀦𑀁 𑀆𑀳. 𑀬𑀣𑀸𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀩𑁆𑀬𑀸𑀓𑀭𑀡𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀪𑁂𑀤𑁄 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨. 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁯𑁯𑁧. 𑀤𑀼𑀢𑀺𑀬𑀯𑀸𑀭𑁂 ¶ 𑀬𑁂 𑀥𑀫𑁆𑀫𑀸 𑀓𑀸𑀫𑀪𑀯𑁂 𑀓𑀸𑀫𑀥𑀸𑀢𑀼𑀲𑀫𑁆𑀪𑀽𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀓𑀸𑀫𑀥𑀸𑀢𑀼𑀬𑀁 𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 𑁋 𑀢𑁂 𑀲𑀩𑁆𑀩𑁂 𑀲𑀗𑁆𑀕𑀳𑁂𑀢𑁆𑀯𑀸 𑀓𑀸𑀫𑀥𑀸𑀢𑀼𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀽𑀧𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀧𑀦 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀭𑀽𑀧𑀥𑀸𑀢𑀼𑀬𑀸 𑀙 𑀆𑀬𑀢𑀦𑀸𑀦𑀺, 𑀦𑀯 𑀥𑀸𑀢𑀼𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁 ¶ . 𑀬𑀲𑁆𑀫𑀸 𑀘 𑀑𑀓𑀸𑀲𑀯𑀲𑁂𑀦 𑀯𑀸 𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 ¶ 𑀯𑀸 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼𑀬𑀸𑀢𑀺 𑀅𑀯𑀢𑁆𑀯𑀸 𑀬𑀁 𑀬𑀁 𑀅𑀧𑀭𑀺𑀬𑀸𑀧𑀦𑁆𑀦𑀁 𑀢𑀁 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 𑀅𑀧𑀭𑀺𑀬𑀸𑀧𑀦𑁆𑀦𑁂 𑀓𑀢𑀺 𑀔𑀦𑁆𑀥𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩. 𑀧𑀭𑀺𑀬𑀸𑀧𑀦𑁆𑀦𑀸𑀧𑀭𑀺𑀬𑀸𑀧𑀦𑁆𑀦𑀯𑀸𑀭𑀯𑀡𑁆𑀡𑀦𑀸

𑁯𑁯𑁯. 𑀢𑀢𑀺𑀬𑀯𑀸𑀭𑁂 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀓𑀸𑀫𑀥𑀸𑀢𑀼𑀪𑀚𑀦𑀝𑁆𑀞𑁂𑀦 𑀧𑀭𑀺𑀬𑀸𑀧𑀦𑁆𑀦𑀸; 𑀢𑀁𑀦𑀺𑀲𑁆𑀲𑀺𑀢𑀸 𑀢𑀤𑀦𑁆𑀢𑁄𑀕𑀥𑀸 𑀓𑀸𑀫𑀥𑀸𑀢𑀼𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀪𑀯𑀯𑀲𑁂𑀦 𑀑𑀓𑀸𑀲𑀯𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀅𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀢𑀣𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸.

𑁪. 𑀥𑀫𑁆𑀫𑀤𑀲𑁆𑀲𑀦𑀯𑀸𑀭𑀯𑀡𑁆𑀡𑀦𑀸

𑁧𑁦𑁦𑁭. 𑀘𑀢𑀼𑀢𑁆𑀣𑀯𑀸𑀭𑁂 𑀏𑀓𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀸𑀦𑀺. 𑀢𑀜𑁆𑀳𑀺 𑀏𑀓𑀦𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀓𑁂 ‘‘𑀤𑁂𑀯𑀸𑀦𑀁 𑀅𑀲𑀼𑀭𑀸𑀦’’𑀦𑁆𑀢𑀺 𑀕𑀢𑀺𑀯𑀲𑁂𑀦 𑀅𑀯𑀢𑁆𑀯𑀸 𑀅𑀯𑀺𑀲𑁂𑀲𑁂𑀦 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸 𑀲𑀫𑁆𑀪𑀯𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀢𑁂𑀲𑀁 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀥𑀸𑀢𑀼𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀧𑀜𑁆𑀘𑀫𑀯𑀸𑀭𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁬. 𑀉𑀧𑁆𑀧𑀸𑀤𑀓𑀓𑀫𑁆𑀫𑀆𑀬𑀼𑀧𑁆𑀧𑀫𑀸𑀡𑀯𑀸𑀭𑀯𑀡𑁆𑀡𑀦𑀸

(𑁧.) 𑀉𑀧𑁆𑀧𑀸𑀤𑀓𑀓𑀫𑁆𑀫𑀁

𑁧𑁦𑁨𑁧. 𑀙𑀝𑁆𑀞𑀯𑀸𑀭𑁂 ¶ 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀸 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀲𑀫𑁆𑀫𑀼𑀢𑀺𑀤𑁂𑀯𑀸𑀢𑀺 ‘𑀤𑁂𑀯𑁄, 𑀤𑁂𑀯𑀻’𑀢𑀺 𑀏𑀯𑀁 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀤𑁂𑀯𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸𑀢𑀺 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀉𑀧𑀧𑀢𑁆𑀢𑀺𑀬𑀸 𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀧𑀽𑀚𑀸𑀭𑀳𑀸 𑀲𑀩𑁆𑀩𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸 𑀤𑁂𑀯𑀸. 𑀭𑀸𑀚𑀸𑀦𑁄𑀢𑀺 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀔𑀢𑁆𑀢𑀺𑀬𑀸. 𑀤𑁂𑀯𑀺𑀬𑁄𑀢𑀺 𑀢𑁂𑀲𑀁 𑀫𑀳𑁂𑀲𑀺𑀬𑁄. 𑀓𑀼𑀫𑀸𑀭𑀸𑀢𑀺 𑀅𑀪𑀺𑀲𑀺𑀢𑁆𑀢𑀭𑀸𑀚𑀽𑀦𑀁 𑀅𑀪𑀺𑀲𑀺𑀢𑁆𑀢𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀓𑀼𑀫𑀸𑀭𑀸.

𑀉𑀧𑁄𑀲𑀣𑀓𑀫𑁆𑀫𑀁 ¶ 𑀓𑀢𑁆𑀯𑀸𑀢𑀺 𑀘𑀸𑀢𑀼𑀤𑁆𑀤𑀲𑀸𑀤𑀻𑀲𑀼 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸. 𑀇𑀤𑀸𑀦𑀺 𑀬𑀲𑁆𑀫𑀸 𑀧𑀭𑀺𑀢𑁆𑀢𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀁 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀸𑀬 𑀧𑀘𑁆𑀘𑀬𑁄, 𑀫𑀢𑁆𑀢𑀲𑁄 𑀓𑀢𑀁 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀸𑀬 𑀅𑀥𑀺𑀫𑀢𑁆𑀢𑀁, 𑀅𑀥𑀺𑀫𑀢𑁆𑀢𑀪𑀸𑀯𑁂𑀧𑀺 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀺𑀪𑀸𑀯𑀲𑁆𑀲 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀢𑀲𑁆𑀲 𑀯𑀲𑁂𑀦 𑀉𑀧𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ¶ 𑀫𑀳𑀸𑀲𑀸𑀭𑁄 𑀏𑀢𑁂𑀲𑀦𑁆𑀢𑀺 𑀫𑀳𑀸𑀲𑀸𑀭𑀸; 𑀭-𑀓𑀸𑀭𑀲𑁆𑀲 𑀧𑀦 𑀮-𑀓𑀸𑀭𑀁 𑀓𑀢𑁆𑀯𑀸 𑀫𑀳𑀸𑀲𑀸𑀮𑀸𑀢𑀺 𑀯𑀼𑀢𑁆𑀢𑀁. 𑀕𑀳𑀧𑀢𑀺𑀬𑁄𑀯 𑀫𑀳𑀸𑀲𑀸𑀮𑀸, 𑀕𑀳𑀧𑀢𑀻𑀲𑀼 𑀯𑀸 𑀫𑀳𑀸𑀲𑀸𑀮𑀸𑀢𑀺 𑀕𑀳𑀧𑀢𑀺𑀫𑀳𑀸𑀲𑀸𑀮𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑀲𑁆𑀲 𑀕𑁂𑀳𑁂 𑀧𑀘𑁆𑀙𑀺𑀫𑀦𑁆𑀢𑁂𑀦 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀥𑀸𑀦𑀕𑀢𑀁 𑀳𑁄𑀢𑀺, 𑀓𑀳𑀸𑀧𑀡𑀸𑀦𑀜𑁆𑀘 𑀧𑀜𑁆𑀘 𑀅𑀫𑁆𑀩𑀡𑀸𑀦𑀺 𑀤𑀺𑀯𑀲𑀯𑀴𑀜𑁆𑀚𑁄 𑀦𑀺𑀓𑁆𑀔𑀫𑀢𑀺 𑁋 𑀅𑀬𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑁄 𑀦𑀸𑀫. 𑀬𑀲𑁆𑀲 𑀧𑀦 𑀕𑁂𑀳𑁂 𑀧𑀘𑁆𑀙𑀺𑀫𑀦𑁆𑀢𑁂𑀦 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀦𑀺𑀥𑀸𑀦𑀕𑀢𑀁 𑀳𑁄𑀢𑀺, 𑀓𑀳𑀸𑀧𑀡𑀸𑀦𑀜𑁆𑀘 𑀤𑀲𑀅𑀫𑁆𑀩𑀡𑀸𑀦𑀺 𑀤𑀺𑀯𑀲𑀯𑀴𑀜𑁆𑀚𑁄 𑀦𑀺𑀓𑁆𑀔𑀫𑀢𑀺 𑁋 𑀅𑀬𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀦𑀸𑀫. 𑀬𑀲𑁆𑀲 𑀧𑀦 𑀕𑁂𑀳𑁂 𑀧𑀘𑁆𑀙𑀺𑀫𑀦𑁆𑀢𑁂𑀦 𑀓𑁄𑀝𑀺𑀲𑀢𑀥𑀦𑀁 𑀦𑀺𑀥𑀸𑀦𑀕𑀢𑀁 𑀳𑁄𑀢𑀺, 𑀓𑀳𑀸𑀧𑀡𑀸𑀦𑀜𑁆𑀘 𑀯𑀻𑀲𑀢𑀺 𑀅𑀫𑁆𑀩𑀡𑀸𑀦𑀺 𑀤𑀺𑀯𑀲𑀯𑀴𑀜𑁆𑀚𑁄 𑀦𑀺𑀓𑁆𑀔𑀫𑀢𑀺 𑁋 𑀅𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑁄 𑀦𑀸𑀫.

𑀲𑀳𑀩𑁆𑀬𑀢𑀦𑁆𑀢𑀺 𑀲𑀳𑀪𑀸𑀯𑀁; 𑀲𑀪𑀸𑀕𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀦𑀸𑀫 𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀩𑁆𑀩𑀢𑀝𑁆𑀞𑀓𑀸𑀧𑀺 𑀅𑀢𑁆𑀣𑀺, 𑀆𑀓𑀸𑀲𑀝𑁆𑀞𑀸𑀧𑀺; 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸. 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸, 𑀫𑀦𑁄𑀧𑀤𑁄𑀲𑀺𑀓𑀸, 𑀲𑀻𑀢𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸, 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄, 𑀲𑀽𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀝𑁆𑀞𑀓𑀸 𑀏𑀯.

𑀢𑁂𑀢𑁆𑀢𑀺𑀁𑀲 ¶ 𑀚𑀦𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸𑀢𑀺 𑀢𑀸𑀯𑀢𑀺𑀁𑀲𑀸. 𑀅𑀧𑀺𑀘 𑀢𑀸𑀯𑀢𑀺𑀁𑀲𑀸𑀢𑀺 𑀢𑁂𑀲𑀁 𑀤𑁂𑀯𑀸𑀦𑀁 𑀦𑀸𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑁂𑀧𑀺 𑀅𑀢𑁆𑀣𑀺 𑀧𑀩𑁆𑀩𑀢𑀝𑁆𑀞𑀓𑀸, 𑀅𑀢𑁆𑀣𑀺 𑀆𑀓𑀸𑀲𑀝𑁆𑀞𑀓𑀸. 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸. 𑀢𑀣𑀸 𑀬𑀸𑀫𑀸𑀤𑀻𑀦𑀁. 𑀏𑀓𑀤𑁂𑀯𑀮𑁄𑀓𑁂𑀧𑀺 𑀳𑀺 𑀤𑁂𑀯𑀸𑀦𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀅𑀧𑁆𑀧𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀤𑀺𑀩𑁆𑀩𑀁 𑀲𑀼𑀔𑀁 𑀬𑀸𑀢𑀸 𑀧𑀬𑀸𑀢𑀸 𑀲𑀫𑁆𑀧𑀢𑁆𑀢𑀸𑀢𑀺 𑀬𑀸𑀫𑀸. 𑀢𑀼𑀝𑁆𑀞𑀸 𑀧𑀳𑀝𑁆𑀞𑀸𑀢𑀺 𑀢𑀼𑀲𑀺𑀢𑀸. 𑀧𑀓𑀢𑀺𑀧𑀝𑀺𑀬𑀢𑁆𑀢𑀸𑀭𑀫𑁆𑀫𑀡𑀢𑁄 𑀅𑀢𑀺𑀭𑁂𑀓𑁂𑀦 𑀭𑀫𑀺𑀢𑀼𑀓𑀸𑀫𑀓𑀸𑀮𑁂 𑀬𑀣𑀸𑀭𑀼𑀘𑀺𑀢𑁂 𑀪𑁄𑀕𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀻𑀢𑀺 𑀦𑀺𑀫𑁆𑀫𑀸𑀦𑀭𑀢𑀻. 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀧𑀭𑁂𑀳𑀺 𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻.

(𑁨.) 𑀆𑀬𑀼𑀧𑁆𑀧𑀫𑀸𑀡𑀁

𑁧𑁦𑁨𑁨. 𑀅𑀧𑁆𑀧𑀁 ¶ 𑀯𑀸 𑀪𑀺𑀬𑁆𑀬𑁄𑀢𑀺 𑀤𑀼𑀢𑀺𑀬𑀁 𑀯𑀲𑁆𑀲𑀲𑀢𑀁 𑀅𑀧𑁆𑀧𑀢𑁆𑀯𑀸 𑀯𑀻𑀲𑀸𑀬 𑀯𑀸 𑀢𑀺𑀁𑀲𑀸𑀬 𑀯𑀸 𑀘𑀢𑁆𑀢𑀸𑀮𑀻𑀲𑀸𑀬 𑀯𑀸 𑀧𑀜𑁆𑀜𑀸𑀲𑀸𑀬 𑀯𑀸 𑀲𑀝𑁆𑀞𑀺𑀬𑀸 𑀯𑀸 𑀯𑀲𑁆𑀲𑁂𑀳𑀺 𑀅𑀥𑀺𑀓𑀫𑁆𑀧𑀺 𑀯𑀲𑁆𑀲𑀲𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀤𑀼𑀢𑀺𑀬𑀁 𑀯𑀲𑁆𑀲𑀲𑀢𑀁 𑀅𑀧𑁆𑀧𑀢𑁆𑀢𑀢𑁆𑀢𑀸 𑀅𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁦𑁨𑁪. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀲𑀼 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀸𑀭𑀺𑀲𑀚𑁆𑀚𑀸 𑀧𑀭𑀺𑀘𑀸𑀭𑀺𑀓𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸. 𑀢𑁂𑀲𑀁 𑀧𑀼𑀭𑁄𑀳𑀺𑀢𑀪𑀸𑀯𑁂 𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀯𑀡𑁆𑀡𑀯𑀦𑁆𑀢𑀢𑀸𑀬 ¶ 𑀘𑁂𑀯 𑀤𑀻𑀖𑀸𑀬𑀼𑀓𑀢𑀸𑀬 𑀘 𑀫𑀳𑀦𑁆𑀢𑁄 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸, 𑀢𑁂𑀲𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀇𑀫𑁂 𑀢𑀬𑁄𑀧𑀺 𑀚𑀦𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀏𑀓𑀢𑀮𑁂 𑀯𑀲𑀦𑁆𑀢𑀺; 𑀆𑀬𑀼𑀅𑀦𑁆𑀢𑀭𑀁 𑀧𑀦 𑀦𑁂𑀲𑀁 𑀦𑀸𑀦𑀸.

𑁧𑁦𑁨𑁫. 𑀧𑀭𑀺𑀢𑁆𑀢𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀪𑀸. 𑀅𑀧𑁆𑀧𑀫𑀸𑀡𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀪𑀸. 𑀤𑀡𑁆𑀟𑀤𑀻𑀧𑀺𑀓𑀸𑀬 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀯𑀺𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸. 𑀇𑀫𑁂𑀧𑀺 𑀢𑀬𑁄 𑀚𑀦𑀸 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀏𑀓𑀢𑀮𑁂 𑀯𑀲𑀦𑁆𑀢𑀺; 𑀆𑀬𑀼𑀅𑀦𑁆𑀢𑀭𑀁 𑀧𑀦 𑀦𑁂𑀲𑀁 𑀦𑀸𑀦𑀸.

𑁧𑁦𑁨𑁬. 𑀧𑀭𑀺𑀢𑁆𑀢𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸. 𑀅𑀧𑁆𑀧𑀫𑀸𑀡𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸. 𑀲𑀼𑀪𑁂𑀦 𑀑𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸, 𑀲𑀼𑀪𑁂𑀦 𑀲𑀭𑀻𑀭𑀧𑁆𑀧𑀪𑀸𑀯𑀡𑁆𑀡𑁂𑀦 𑀏𑀓𑀕𑁆𑀖𑀦𑀸, 𑀲𑀼𑀯𑀡𑁆𑀡𑀫𑀜𑁆𑀚𑀼𑀲𑀸𑀬 𑀞𑀧𑀺𑀢𑀲𑀫𑁆𑀧𑀚𑁆𑀚𑀮𑀺𑀢𑀓𑀜𑁆𑀘𑀦𑀧𑀺𑀡𑁆𑀟𑀲𑀲𑁆𑀲𑀺𑀭𑀻𑀓𑀸𑀢𑀺 𑀲𑀼𑀪𑀓𑀺𑀡𑁆𑀳𑀸. 𑀇𑀫𑁂𑀧𑀺 𑀢𑀬𑁄 𑀚𑀦𑀸 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀏𑀓𑀢𑀮𑁂 𑀯𑀲𑀦𑁆𑀢𑀺; 𑀆𑀬𑀼𑀅𑀦𑁆𑀢𑀭𑀁 𑀧𑀦 𑀦𑁂𑀲𑀁 𑀦𑀸𑀦𑀸.

𑁧𑁦𑁨𑁭. 𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀢𑀸𑀢𑀺 ¶ 𑀆𑀭𑀫𑁆𑀫𑀡𑀲𑁆𑀲 𑀦𑀸𑀦𑀢𑁆𑀢𑀪𑀸𑀯𑁄. 𑀫𑀦𑀲𑀺𑀓𑀸𑀭𑀦𑀸𑀦𑀢𑁆𑀢𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀏𑀓𑀲𑁆𑀲 𑀧𑀣𑀯𑀻𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺…𑀧𑁂… 𑀏𑀓𑀲𑁆𑀲 𑀑𑀤𑀸𑀢𑀓𑀲𑀺𑀡𑀦𑁆𑀢𑀺 𑀇𑀤𑀁 𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀁. 𑀏𑀓𑁄 𑀧𑀣𑀯𑀻𑀓𑀲𑀺𑀡𑀁 𑀫𑀦𑀲𑀺 𑀓𑀭𑁄𑀢𑀺…𑀧𑁂… 𑀏𑀓𑁄 𑀑𑀤𑀸𑀢𑀓𑀲𑀺𑀡𑀦𑁆𑀢𑀺 𑀇𑀤𑀁 𑀫𑀦𑀲𑀺𑀓𑀸𑀭𑀦𑀸𑀦𑀢𑁆𑀢𑀁. 𑀏𑀓𑀲𑁆𑀲 𑀧𑀣𑀯𑀻𑀓𑀲𑀺𑀡𑁂 𑀙𑀦𑁆𑀤𑁄 𑀳𑁄𑀢𑀺…𑀧𑁂… 𑀏𑀓𑀲𑁆𑀲 𑀑𑀤𑀸𑀢𑀓𑀲𑀺𑀡𑁂𑀢𑀺 𑀇𑀤𑀁 𑀙𑀦𑁆𑀤𑀦𑀸𑀦𑀢𑁆𑀢𑀁. 𑀏𑀓𑁄 𑀧𑀣𑀯𑀻𑀓𑀲𑀺𑀡𑁂 𑀧𑀢𑁆𑀣𑀦𑀁 𑀓𑀭𑁄𑀢𑀺…𑀧𑁂… 𑀏𑀓𑁄 𑀑𑀤𑀸𑀢𑀓𑀲𑀺𑀡𑁂𑀢𑀺 𑀇𑀤𑀁 𑀧𑀡𑀺𑀥𑀺𑀦𑀸𑀦𑀢𑁆𑀢𑀁. 𑀏𑀓𑁄 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀅𑀥𑀺𑀫𑀼𑀘𑁆𑀘𑀢𑀺…𑀧𑁂… 𑀏𑀓𑁄 𑀑𑀤𑀸𑀢𑀓𑀲𑀺𑀡𑀯𑀲𑁂𑀦𑀸𑀢𑀺 𑀇𑀤𑀁 𑀅𑀥𑀺𑀫𑁄𑀓𑁆𑀔𑀦𑀸𑀦𑀢𑁆𑀢𑀁. 𑀏𑀓𑁄 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺…𑀧𑁂… 𑀏𑀓𑁄 ¶ 𑀑𑀤𑀸𑀢𑀓𑀲𑀺𑀡𑀯𑀲𑁂𑀦𑀸𑀢𑀺 𑀇𑀤𑀁 𑀅𑀪𑀺𑀦𑀻𑀳𑀸𑀭𑀦𑀸𑀦𑀢𑁆𑀢𑀁. 𑀏𑀓𑀲𑁆𑀲 𑀧𑀣𑀯𑀻𑀓𑀲𑀺𑀡𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀧𑀜𑁆𑀜𑀸 𑀳𑁄𑀢𑀺…𑀧𑁂… 𑀏𑀓𑀲𑁆𑀲 𑀑𑀤𑀸𑀢𑀓𑀲𑀺𑀡𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀧𑀜𑁆𑀜𑀸𑀢𑀺 𑀇𑀤𑀁 𑀧𑀜𑁆𑀜𑀸𑀦𑀸𑀦𑀢𑁆𑀢𑀁. 𑀢𑀢𑁆𑀣 𑀆𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀸 𑀧𑀼𑀩𑁆𑀩𑀪𑀸𑀕𑁂𑀦 𑀓𑀣𑀺𑀢𑀸. 𑀙𑀦𑁆𑀤𑀧𑀡𑀺𑀥𑀺𑀅𑀥𑀺𑀫𑁄𑀓𑁆𑀔𑀸𑀪𑀺𑀦𑀻𑀳𑀸𑀭𑀸 𑀅𑀧𑁆𑀧𑀦𑀸𑀬𑀧𑀺 𑀯𑀢𑁆𑀢𑀦𑁆𑀢𑀺 𑀉𑀧𑀘𑀸𑀭𑁂𑀧𑀺. 𑀧𑀜𑁆𑀜𑀸 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑀅𑀲𑀜𑁆𑀜𑀲𑀢𑁆𑀢𑀸𑀦𑀦𑁆𑀢𑀺 𑀲𑀜𑁆𑀜𑀸𑀯𑀺𑀭𑀳𑀺𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀏𑀓𑀘𑁆𑀘𑁂 𑀳𑀺 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 ‘𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻’𑀢𑀺 𑀘𑀺𑀢𑁆𑀢𑁂 𑀤𑁄𑀲𑀁 𑀤𑀺𑀲𑁆𑀯𑀸 ‘𑀅𑀘𑀺𑀢𑁆𑀢𑀓𑀪𑀸𑀯𑁄 𑀦𑀸𑀫 𑀲𑁄𑀪𑀦𑁄, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀫𑁂𑀢’𑀦𑁆𑀢𑀺 ¶ 𑀲𑀜𑁆𑀜𑀸𑀯𑀺𑀭𑀸𑀕𑀁 𑀚𑀦𑁂𑀢𑁆𑀯𑀸 𑀢𑀢𑁆𑀭𑀽𑀧𑀕𑀁 𑀧𑀜𑁆𑀘𑀫𑀁 𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀲𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀏𑀓𑁄 𑀭𑀽𑀧𑀓𑁆𑀔𑀦𑁆𑀥𑁄𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀞𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀞𑀺𑀢𑀓𑁄 𑀏𑀯 𑀳𑁄𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀦𑀺𑀲𑀺𑀦𑁆𑀦𑀓𑁄𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀦𑀺𑀧𑀦𑁆𑀦𑁄𑀯. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀲𑀤𑀺𑀲𑀸 𑀳𑀼𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀲𑀁 𑀧𑀭𑀺𑀬𑁄𑀲𑀸𑀦𑁂 𑀲𑁄 𑀭𑀽𑀧𑀓𑀸𑀬𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀸𑀫𑀸𑀯𑀘𑀭𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺; 𑀢𑁂𑀦 𑀇𑀥 𑀲𑀜𑁆𑀜𑀼𑀧𑁆𑀧𑀸𑀤𑁂𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸𑀢𑀺 𑀧𑀜𑁆𑀜𑀸𑀬𑀦𑁆𑀢𑀺.

𑀯𑀺𑀧𑀼𑀮𑀸 𑀨𑀮𑀸 𑀏𑀢𑁂𑀲𑀦𑁆𑀢𑀺 𑀯𑁂𑀳𑀧𑁆𑀨𑀮𑀸. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦 𑀳𑀸𑀬𑀦𑁆𑀢𑀺 𑀦 𑀯𑀺𑀳𑀸𑀬𑀦𑁆𑀢𑀻𑀢𑀺 𑀅𑀯𑀺𑀳𑀸. 𑀦 𑀓𑀜𑁆𑀘𑀺 𑀲𑀢𑁆𑀢𑀁 𑀢𑀧𑁆𑀧𑀦𑁆𑀢𑀻𑀢𑀺 𑀅𑀢𑀧𑁆𑀧𑀸. 𑀲𑀼𑀦𑁆𑀤𑀭𑀸 𑀤𑀲𑁆𑀲𑀦𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸𑀢𑀺 𑀲𑀼𑀤𑀲𑁆𑀲𑀸. 𑀲𑀼𑀝𑁆𑀞 𑀧𑀲𑁆𑀲𑀦𑁆𑀢𑀺, 𑀲𑀼𑀦𑁆𑀤𑀭𑀫𑁂𑀢𑁂𑀲𑀁 𑀯𑀸 𑀤𑀲𑁆𑀲𑀦𑀦𑁆𑀢𑀺 𑀲𑀼𑀤𑀲𑁆𑀲𑀻. 𑀲𑀩𑁆𑀩𑁂𑀳𑀺 𑀏𑀯 𑀕𑀼𑀡𑁂𑀳𑀺 𑀘 𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀘 𑀚𑁂𑀝𑁆𑀞𑀸, 𑀦𑀢𑁆𑀣𑁂𑀢𑁆𑀣 𑀓𑀦𑀺𑀝𑁆𑀞𑀸𑀢𑀺 𑀅𑀓𑀦𑀺𑀝𑁆𑀞𑀸.

𑁧𑁦𑁨𑁮. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀕𑀢𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄 ¶ . 𑀇𑀢𑀺 𑀙 𑀓𑀸𑀫𑀸𑀯𑀘𑀭𑀸, 𑀦𑀯 𑀩𑁆𑀭𑀳𑁆𑀫𑀮𑁄𑀓𑀸, 𑀧𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀸 𑀅𑀲𑀜𑁆𑀜𑀲𑀢𑁆𑀢𑀯𑁂𑀳𑀧𑁆𑀨𑀮𑁂𑀳𑀺 𑀲𑀤𑁆𑀥𑀺𑀁 𑀙𑀩𑁆𑀩𑀻𑀲𑀢𑀺 𑀤𑁂𑀯𑀮𑁄𑀓𑀸; 𑀫𑀦𑀼𑀲𑁆𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀯𑀻𑀲𑀢𑀺.

𑀢𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀦𑀼𑀲𑁆𑀲𑀸𑀦𑀁 𑀤𑁂𑀯𑀸𑀦𑀜𑁆𑀘 𑀆𑀬𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀫𑀸𑀦𑁂𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀪𑀼𑀫𑁆𑀫𑀤𑁂𑀯𑁂𑀲𑀼 𑀘 𑀆𑀬𑀼 𑀧𑀭𑀺𑀘𑁆𑀙𑀺𑀦𑁆𑀦𑀁 𑀢𑀁 𑀓𑀲𑁆𑀫𑀸𑀢𑀺? 𑀦𑀺𑀭𑀬𑁂 𑀢𑀸𑀯 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁. 𑀬𑀸𑀯 𑀓𑀫𑁆𑀫𑀁 𑀦 𑀔𑀻𑀬𑀢𑀺, 𑀦 𑀢𑀸𑀯 𑀘𑀯𑀦𑁆𑀢𑀺. 𑀢𑀣𑀸 𑀲𑁂𑀲𑀅𑀧𑀸𑀬𑁂𑀲𑀼. 𑀪𑀼𑀫𑁆𑀫𑀤𑁂𑀯𑀸𑀦𑀫𑁆𑀧𑀺 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀳𑀺 𑀓𑁂𑀘𑀺 ¶ 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑀦𑁆𑀢𑀺, 𑀓𑁂𑀘𑀺 𑀅𑀤𑁆𑀥𑀫𑀸𑀲𑀁, 𑀓𑁂𑀘𑀺 𑀫𑀸𑀲𑀁, 𑀓𑀧𑁆𑀧𑀁 𑀢𑀺𑀝𑁆𑀞𑀫𑀸𑀦𑀸𑀧𑀺 𑀅𑀢𑁆𑀣𑀺𑀬𑁂𑀯.

𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀕𑀺𑀳𑀺𑀪𑀸𑀯𑁂 𑀞𑀺𑀢𑀸𑀬𑁂𑀯 𑀲𑁄𑀢𑀸𑀧𑀦𑁆𑀦𑀸𑀧𑀺 𑀳𑁄𑀦𑁆𑀢𑀺, 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀲𑀼 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺. 𑀔𑀻𑀡𑀸𑀲𑀯𑀸 𑀧𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺 𑀯𑀸 𑀧𑀩𑁆𑀩𑀚𑀦𑁆𑀢𑀺 𑀯𑀸. 𑀓𑀲𑁆𑀫𑀸? 𑀅𑀭𑀳𑀢𑁆𑀢𑀁 𑀦𑀸𑀫 𑀲𑁂𑀝𑁆𑀞𑀕𑀼𑀡𑁄, 𑀕𑀺𑀳𑀺𑀮𑀺𑀗𑁆𑀕𑀁 𑀳𑀻𑀦𑀁, 𑀢𑀁 𑀳𑀻𑀦𑀢𑀸𑀬 𑀉𑀢𑁆𑀢𑀫𑀁 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑁂 𑀧𑀭𑀺𑀦𑀺𑀩𑁆𑀩𑀸𑀢𑀼𑀓𑀸𑀫𑀸 𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀯𑀸 𑀳𑁄𑀦𑁆𑀢𑀺.

𑀪𑀼𑀫𑁆𑀫𑀤𑁂𑀯𑀸 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺. 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺; 𑀅𑀦𑀸𑀕𑀸𑀫𑀺𑀦𑀸 𑀭𑀽𑀧𑀪𑀯𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀔𑀻𑀡𑀸𑀲𑀯𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀼𑀁. 𑀓𑀲𑁆𑀫𑀸 ¶ ? 𑀦𑀺𑀮𑀻𑀬𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀲𑀼 𑀲𑀩𑁆𑀩𑁂𑀧𑀺 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀣 𑀭𑀽𑀧𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀦 𑀧𑀼𑀦 𑀇𑀥𑀸𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀏𑀢𑁂 𑀳𑀺 𑀛𑀸𑀦𑀅𑀦𑀸𑀕𑀸𑀫𑀺𑀦𑁄 𑀦𑀸𑀫.

𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀧𑀦 𑀓𑀺𑀁 𑀦𑀺𑀬𑀫𑁂𑀢𑀺? 𑀧𑀕𑀼𑀡𑀚𑁆𑀛𑀸𑀦𑀁. 𑀬𑀤𑁂𑀯𑀲𑁆𑀲 𑀧𑀕𑀼𑀡𑀁 𑀳𑁄𑀢𑀺, 𑀢𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀼 𑀧𑀦 𑀧𑀕𑀼𑀡𑁂𑀲𑀼 𑀓𑀺𑀁 𑀦𑀺𑀬𑀫𑁂𑀢𑀺? 𑀧𑀢𑁆𑀣𑀦𑀸. 𑀬𑀢𑁆𑀣 𑀉𑀧𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑀺 𑀢𑀢𑁆𑀣𑁂𑀯 𑀉𑀧𑀧𑀚𑁆𑀚𑀢𑀺. 𑀧𑀢𑁆𑀣𑀦𑀸𑀬 𑀅𑀲𑀢𑀺 𑀓𑀺𑀁 𑀦𑀺𑀬𑀫𑁂𑀢𑀺? 𑀫𑀭𑀡𑀲𑀫𑀬𑁂 𑀲𑀫𑀸𑀧𑀦𑁆𑀦𑀸 𑀲𑀫𑀸𑀧𑀢𑁆𑀢𑀺. 𑀫𑀭𑀡𑀲𑀫𑀬𑁂 𑀲𑀫𑀸𑀧𑀦𑁆𑀦𑀸 𑀦𑀢𑁆𑀣𑀺, 𑀓𑀺𑀁 𑀦𑀺𑀬𑀫𑁂𑀢𑀺? 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀏𑀓𑀁𑀲𑁂𑀦 𑀳𑀺 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀉𑀧𑀧𑀚𑁆𑀚𑀢𑀺. 𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺 ¶ 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀧𑀺. 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀘𑀢𑀽𑀲𑀼 𑀘 𑀅𑀭𑀽𑀧𑁂𑀲𑀼 𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺. 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑀸𑀕𑀸𑀫𑀻 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀫𑀢𑁆𑀣𑀓𑁂 𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀯𑁂𑀳𑀧𑁆𑀨𑀮𑀸, 𑀅𑀓𑀦𑀺𑀝𑁆𑀞𑀸, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂 𑀢𑀬𑁄 𑀤𑁂𑀯𑀮𑁄𑀓𑀸 𑀲𑁂𑀝𑁆𑀞𑀪𑀯𑀸 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀦𑁂𑀯 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀺, 𑀦 𑀅𑀥𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺. 𑀇𑀤𑀫𑁂𑀢𑁆𑀣 𑀧𑀓𑀺𑀡𑁆𑀡𑀓𑀁.