📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀜𑁆𑀘𑀧𑀓𑀭𑀡-𑀅𑀝𑁆𑀞𑀓𑀣𑀸

𑀥𑀸𑀢𑀼𑀓𑀣𑀸-𑀅𑀝𑁆𑀞𑀓𑀣𑀸

𑀅𑀝𑁆𑀞𑀸𑀭𑀲𑀳𑀺 ¶ ¶ ¶ 𑀪𑁂𑀤𑁂𑀳𑀺, 𑀯𑀺𑀪𑀗𑁆𑀕𑀁 𑀫𑀸𑀭𑀪𑀜𑁆𑀚𑀦𑁄;

𑀤𑁂𑀲𑀬𑀺𑀢𑁆𑀯𑀸 𑀫𑀳𑀸𑀯𑀻𑀭𑁄, 𑀬𑀁 𑀢𑀲𑁆𑀲𑁂𑀯 𑀅𑀦𑀦𑁆𑀢𑀭𑀁.

𑀅𑀤𑁂𑀲𑀬𑀺 𑀥𑀸𑀢𑀼𑀓𑀣𑀁, 𑀥𑀸𑀢𑀼𑀪𑁂𑀤𑀧𑁆𑀧𑀓𑀸𑀲𑀦𑁄;

𑀢𑀲𑁆𑀲𑀢𑁆𑀣𑀁 𑀤𑀻𑀧𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀲𑀗𑁆𑀕𑀳𑁄 ¶ 𑀅𑀲𑀗𑁆𑀕𑀳𑁄𑀢𑀺𑀆𑀤𑀻𑀦𑀜𑁆𑀳𑀺 𑀯𑀲𑁂𑀦 𑀇𑀤𑀁 𑀧𑀓𑀭𑀡𑀁 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀢𑁄 𑀤𑁆𑀯𑀺𑀥𑀸 𑀞𑀺𑀢𑀁. 𑀢𑀢𑁆𑀣 𑀫𑀸𑀢𑀺𑀓𑀸 𑀉𑀤𑁆𑀤𑁂𑀲𑁄. 𑀲𑀸 𑀧𑀜𑁆𑀘𑀯𑀺𑀥𑀸 𑁋 𑀦𑀬𑀫𑀸𑀢𑀺𑀓𑀸, 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸, 𑀦𑀬𑀫𑀼𑀔𑀫𑀸𑀢𑀺𑀓𑀸, 𑀮𑀓𑁆𑀔𑀡𑀫𑀸𑀢𑀺𑀓𑀸, 𑀩𑀸𑀳𑀺𑀭𑀫𑀸𑀢𑀺𑀓𑀸𑀢𑀺. 𑀢𑀢𑁆𑀣 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑁋 𑀅𑀬𑀁 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀦𑀬𑀫𑀸𑀢𑀺𑀓𑀸 𑀦𑀸𑀫. 𑀅𑀬𑀜𑁆𑀳𑀺 𑀇𑀫𑀺𑀦𑀸 𑀲𑀗𑁆𑀕𑀳𑀸𑀤𑀺𑀓𑁂𑀦 𑀦𑀬𑁂𑀦 𑀥𑀸𑀢𑀼𑀓𑀣𑀸 𑀥𑀫𑁆𑀫𑀸 𑀯𑀺𑀪𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂𑀲𑀁 𑀧𑀤𑀸𑀦𑀁 𑀫𑀽𑀮𑀪𑀽𑀢𑀢𑁆𑀢𑀸 𑀫𑀽𑀮𑀫𑀸𑀢𑀺𑀓𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁨. 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨. 𑀧𑀜𑁆𑀘𑀓𑁆𑀔𑀦𑁆𑀥𑀸 ¶ …𑀧𑁂… 𑀫𑀦𑀲𑀺𑀓𑀸𑀭𑁄𑀢𑀺 𑀅𑀬𑀁 𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀸𑀫. 𑀅𑀬𑀜𑁆𑀳𑀺 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 𑀏𑀯𑀁 𑀅𑀯𑀢𑁆𑀯𑀸 𑀲𑀗𑁆𑀕𑀳𑀸𑀤𑀺𑀦𑀸 𑀦𑀬𑁂𑀦 𑀯𑀺𑀪𑀚𑀺𑀢𑀩𑁆𑀩𑁂 𑀔𑀦𑁆𑀥𑀸𑀤𑀺𑀥𑀫𑁆𑀫𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀞𑀧𑀺𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀔𑀦𑁆𑀥𑀸𑀤𑀺𑀧𑀤𑀸𑀦𑀁 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸𑀬 ¶ 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀓𑀺𑀡𑁆𑀡𑀓𑀫𑀸𑀢𑀺𑀓𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁩. 𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁩. 𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄; 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄𑀢𑀺 𑀅𑀬𑀁 𑀘𑀢𑀽𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀦𑀬𑀫𑀼𑀔𑀫𑀸𑀢𑀺𑀓𑀸 𑀦𑀸𑀫. 𑀅𑀬𑀜𑁆𑀳𑀺 𑀲𑀩𑁆𑀩𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀻𑀲𑀼 𑀘𑁂𑀯 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀘 𑀫𑀸𑀢𑀺𑀓𑀸𑀥𑀫𑁆𑀫𑁂𑀲𑀼, 𑀢𑀻𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀤𑁂𑀳𑁂𑀯 𑀲𑀗𑁆𑀕𑀳𑁄 𑀘 𑀅𑀲𑀗𑁆𑀕𑀳𑁄 𑀘 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄 𑀘 𑀯𑀺𑀧𑁆𑀧𑀬𑁄𑀕𑁄 𑀘. 𑀏𑀢𑀸𑀦𑀺 𑀇𑀫𑁂𑀲𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀦𑀁 𑀦𑀬𑀸𑀦𑀁 𑀫𑀼𑀔𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀼𑀔𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑁪. 𑀮𑀓𑁆𑀔𑀡𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁪. 𑀲𑀪𑀸𑀕𑁄 ¶ , 𑀯𑀺𑀲𑀪𑀸𑀕𑁄𑀢𑀺 𑀅𑀬𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀮𑀓𑁆𑀔𑀡𑀫𑀸𑀢𑀺𑀓𑀸 𑀦𑀸𑀫. 𑀅𑀬𑀜𑁆𑀳𑀺 𑀲𑀪𑀸𑀕𑀮𑀓𑁆𑀔𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀦𑀬𑁄, 𑀯𑀺𑀲𑀪𑀸𑀕𑀮𑀓𑁆𑀔𑀡𑁂𑀳𑀺 𑀅𑀲𑀗𑁆𑀕𑀳𑀦𑀬𑁄, 𑀢𑀣𑀸 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀦𑀬𑁄 𑀬𑁄𑀚𑁂𑀢𑀩𑁆𑀩𑁄𑀢𑀺 𑀲𑀪𑀸𑀕𑀯𑀺𑀲𑀪𑀸𑀕𑀮𑀓𑁆𑀔𑀡𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀮𑀓𑁆𑀔𑀡𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑁫. 𑀩𑀸𑀳𑀺𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫. 𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀢𑀺 𑀅𑀬𑀁 𑀙𑀲𑀝𑁆𑀞𑀺 𑀢𑀺𑀓𑀧𑀤𑀸𑀦𑀺, 𑀤𑁆𑀯𑁂 𑀘 𑀤𑀼𑀓𑀧𑀤𑀲𑀢𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸 𑀩𑀸𑀳𑀺𑀭𑀫𑀸𑀢𑀺𑀓𑀸 𑀦𑀸𑀫. 𑀅𑀬𑀜𑁆𑀳𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸…𑀧𑁂… 𑀫𑀦𑀲𑀺𑀓𑀸𑀭𑁄’’𑀢𑀺 𑀏𑀯𑀁 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂 𑀅𑀯𑀢𑁆𑀯𑀸 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻’’𑀢𑀺 𑀏𑀯𑀁 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀢𑁄 𑀩𑀳𑀺 𑀞𑀧𑀺𑀢𑀢𑁆𑀢𑀸 𑀩𑀸𑀳𑀺𑀭𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 ¶ 𑀫𑀸𑀢𑀺𑀓𑀸𑀬 𑀧𑀜𑁆𑀘𑀥𑀸 𑀞𑀺𑀢𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀇𑀤𑀸𑀦𑀺 ‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’𑀢𑀺𑀆𑀤𑀻𑀲𑀼 𑀲𑀗𑁆𑀕𑀳𑁄 𑀢𑀸𑀯 𑀚𑀸𑀢𑀺𑀲𑀜𑁆𑀚𑀸𑀢𑀺𑀓𑀺𑀭𑀺𑀬𑀸𑀕𑀡𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑁋 ‘‘𑀲𑀩𑁆𑀩𑁂 𑀔𑀢𑁆𑀢𑀺𑀬𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀸, 𑀲𑀩𑁆𑀩𑁂 𑀯𑁂𑀲𑁆𑀲𑀸, 𑀲𑀩𑁆𑀩𑁂 𑀲𑀼𑀤𑁆𑀤𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀅𑀬𑀁 𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀏𑀓𑀚𑀸𑀢𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀳𑀺 𑀇𑀥 𑀲𑀩𑁆𑀩𑁂𑀧𑀺 𑀚𑀸𑀢𑀺𑀬𑀸 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀲𑀩𑁆𑀩𑁂 𑀓𑁄𑀲𑀮𑀓𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀫𑀸𑀕𑀥𑀓𑀸, 𑀲𑀩𑁆𑀩𑁂 𑀪𑀸𑀭𑀼𑀓𑀘𑁆𑀙𑀓𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄; 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 ¶ 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀏𑀓𑀝𑁆𑀞𑀸𑀦𑁂 𑀚𑀸𑀢𑀸 𑀲𑀁𑀯𑀟𑁆𑀠𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀳𑀺 𑀇𑀥 𑀲𑀩𑁆𑀩𑁂𑀧𑀺 𑀲𑀜𑁆𑀚𑀸𑀢𑀺𑀞𑀸𑀦𑁂𑀦 𑀦𑀺𑀯𑀼𑀢𑁆𑀣𑁄𑀓𑀸𑀲𑁂𑀦 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀲𑀩𑁆𑀩𑁂 𑀳𑀢𑁆𑀣𑀸𑀭𑁄𑀳𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂 𑀅𑀲𑁆𑀲𑀸𑀭𑁄𑀳𑀸, 𑀲𑀩𑁆𑀩𑁂 𑀭𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀼’’, ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀓𑀺𑀭𑀺𑀬𑀸𑀲𑀗𑁆𑀕𑀳𑁄 𑀦𑀸𑀫. 𑀲𑀩𑁆𑀩𑁂𑀯 𑀳𑁂𑀢𑁂 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀓𑀭𑀡𑁂𑀦 𑀏𑀓𑀲𑀗𑁆𑀕𑀳𑀁 𑀕𑀢𑀸. ‘‘𑀘𑀓𑁆𑀔𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻’’𑀢𑀺. 𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀓𑀣𑀸. 𑁪𑁭𑁧), 𑀅𑀬𑀁 ¶ 𑀕𑀡𑀦𑀲𑀗𑁆𑀕𑀳𑁄 𑀦𑀸𑀫. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀤𑀻𑀦𑀺. 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀲𑀫𑁆𑀧𑀬𑁄𑀕𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀯𑀺𑀧𑁆𑀧𑀬𑁄𑀕𑁄. 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀻𑀦𑀺. 𑀢𑀤𑀼𑀪𑀬𑀲𑀁𑀲𑀕𑁆𑀕𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀆𑀤𑀻𑀦𑀺. 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀆𑀤𑀻𑀦𑀺 𑀧𑀦 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀨𑀲𑁆𑀲𑀸𑀤𑀬𑁄 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀸𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀬𑁄 𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀧𑀤𑀯𑀡𑁆𑀡𑀦𑀸

𑁬. 𑀇𑀤𑀸𑀦𑀺 ¶ 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀦𑀺𑀓𑁆𑀔𑀺𑀢𑁆𑀢𑀫𑀸𑀢𑀺𑀓𑀁 ‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’𑀢𑀺𑀆𑀤𑀻𑀳𑀺 𑀦𑀬𑀫𑀸𑀢𑀺𑀓𑀸𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀻𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀬𑀲𑁆𑀫𑀸 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄𑀢𑀺𑀆𑀤𑀺𑀓𑀸𑀬 𑀦𑀬𑀫𑀸𑀢𑀺𑀓𑀸𑀬 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀦𑀬𑀫𑀼𑀔𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀢𑀲𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀓𑀢𑀺𑀳𑀸𑀬𑀢𑀦𑁂𑀳𑀺 𑀓𑀢𑀺𑀳𑀺 𑀥𑀸𑀢𑀽𑀳𑀻𑀢𑀺 𑀢𑀻𑀡𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀤𑀸𑀦𑁂𑀯 𑀉𑀤𑁆𑀥𑀝𑀸𑀦𑀺. ‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’𑀢𑀺𑀆𑀤𑀻𑀲𑀼 𑀏𑀓𑀫𑁆𑀧𑀺 𑀦 𑀧𑀭𑀸𑀫𑀝𑁆𑀞𑀁. 𑀬𑀲𑁆𑀫𑀸 𑀘 ‘‘𑀲𑀪𑀸𑀕𑁄 𑀯𑀺𑀲𑀪𑀸𑀕𑁄’’𑀢𑀺 𑀏𑀯𑀁 𑀮𑀓𑁆𑀔𑀡𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀢𑀲𑁆𑀫𑀸 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀪𑀸𑀕𑀸 𑀳𑀺 𑀢𑀲𑁆𑀲 𑀏𑀢𑁂 𑀔𑀦𑁆𑀥𑀸𑀤𑀬𑁄𑀢𑀺. 𑀢𑀢𑁆𑀣 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦𑁂𑀯. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑀲𑀪𑀸𑀕𑀢𑁆𑀢𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦𑁂𑀯 𑀕𑀡𑀺𑀢𑀁, 𑀢𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀻𑀢𑀺 𑀫𑀦𑀸𑀬𑀢𑀦𑀯𑀚𑁆𑀚𑁂𑀳𑀺. 𑀲𑀩𑁆𑀩𑁄𑀧𑀺 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄 𑀤𑀲𑀸𑀬𑀢𑀦𑀸𑀦𑀺 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀕𑀡𑀺𑀢𑁄 ¶ , 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀻𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑀺 𑀏𑀓𑀸𑀤𑀲𑀳𑀺 𑀏𑀢𑀸𑀲𑀼 𑀳𑀺 𑀅𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺.

𑀅𑀲𑀗𑁆𑀕𑀳𑀦𑀬𑀦𑀺𑀤𑁆𑀤𑁂𑀲𑁂 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑁄𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀧𑀼𑀘𑁆𑀙𑀸 𑀓𑀢𑀸. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑀲𑁆𑀲 𑀬𑀲𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀺𑀲𑀪𑀸𑀕𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸, 𑀏𑀓𑀁 𑀫𑀦𑀸𑀬𑀢𑀦𑀁, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄; 𑀢𑀲𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑁋 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’’𑀢𑀺𑀆𑀤𑀺𑀫𑁆𑀳𑀺 𑀢𑀸𑀯 𑀏𑀓𑀫𑀽𑀮𑀓𑁂 𑀲𑀗𑁆𑀕𑀳𑀦𑀬𑁂 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸 𑀧𑀜𑁆𑀘 𑀧𑀼𑀘𑁆𑀙𑀸, 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀅𑀲𑀗𑁆𑀕𑀳𑀦𑀬𑁂 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑀸 𑀧𑀜𑁆𑀘 𑀧𑀼𑀘𑁆𑀙𑀸, 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀤𑀼𑀓𑀫𑀽𑀮𑀓𑀸𑀤𑀻𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 ¶ 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀬𑁂𑀯 𑀘𑁂𑀢𑁆𑀣 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀸 𑀤𑀲𑁆𑀲𑀺𑀢𑀸. 𑀧𑀜𑁆𑀘𑀓𑁂 𑀧𑀦 ‘‘𑀭𑀽𑀧𑀓𑁆𑀔𑀦𑁆𑀥𑁄 ¶ 𑀘…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀘𑀸’’𑀢𑀺 𑀏𑀯𑀁 𑀪𑁂𑀤𑀢𑁄 𑀘, ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’’𑀢𑀺 𑀏𑀯𑀁 𑀅𑀪𑁂𑀤𑀢𑁄 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀢𑀸𑀦𑀺. 𑀏𑀯𑀁 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑁨. 𑀆𑀬𑀢𑀦𑀧𑀤𑀸𑀤𑀺𑀯𑀡𑁆𑀡𑀦𑀸

𑁨𑁨. 𑀆𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀆𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑁂 𑀢𑀸𑀯 𑀘𑀓𑁆𑀔𑀸𑀬𑀢𑀦𑀁 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦𑁂𑀯, 𑀏𑀓𑁂𑀦 𑀘𑀓𑁆𑀔𑀸𑀬𑀢𑀦𑁂𑀦𑁂𑀯 𑀏𑀓𑀸𑀬 𑀘𑀓𑁆𑀔𑀼𑀥𑀸𑀢𑀼𑀬𑀸𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀢𑀸𑀬𑀢𑀦𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀅𑀲𑀗𑁆𑀔𑀢𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀜𑁆𑀘 𑀔𑀦𑁆𑀥𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺; 𑀢𑀲𑁆𑀫𑀸 ‘𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸’𑀢𑀺 𑀯𑀼𑀢𑁆𑀢𑀁. 𑀘𑀢𑀽𑀳𑀺 𑀔𑀦𑁆𑀥𑁂𑀳𑀻𑀢𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀦𑀺𑀩𑁆𑀩𑀸𑀦𑀯𑀚𑁆𑀚𑀜𑁆𑀳𑀺 𑀥𑀫𑁆𑀫𑀸𑀬𑀢𑀦𑀁 𑀏𑀢𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀧𑀦 𑀞𑀧𑁂𑀢𑁆𑀯𑀸 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀬𑁄 𑀲𑁂𑀲𑀸𑀬𑀢𑀦𑀥𑀸𑀢𑀽𑀳𑀺 𑀘 𑀢𑀁 𑀦 𑀲𑀗𑁆𑀕𑀬𑁆𑀳𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑁂𑀦 𑀔𑀦𑁆𑀥𑁂𑀦, 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺, 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺. 𑀬𑀣𑀸 𑀘 𑀢𑁂 𑀳𑁂𑀝𑁆𑀞𑀸 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸, 𑀏𑀯𑀫𑀺𑀥𑀸𑀧𑀺 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑀸𑀯 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀓𑀫𑀢𑁆𑀢𑀫𑁂𑀯 𑀧𑀦 𑀧𑀸𑀴𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺 𑀅𑀪𑁂𑀤𑀢𑁄𑀯 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀥𑀸𑀢𑀼𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄.

𑁪𑁦. 𑀲𑀘𑁆𑀘𑀦𑀺𑀤𑁆𑀤𑁂𑀲𑁂 ¶ 𑁋 𑀲𑀩𑁆𑀩𑁂𑀧𑀺 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀸 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀸. 𑀬𑀲𑁆𑀫𑀸 𑀘 𑀤𑀼𑀓𑀢𑀺𑀓𑁂𑀲𑀼 𑀲𑀫𑀼𑀤𑀬𑀲𑀘𑁆𑀘𑀲𑀤𑀺𑀲𑀫𑁂𑀯 𑀫𑀕𑁆𑀕𑀲𑀘𑁆𑀘𑁂𑀧𑀺 𑀯𑀺𑀲𑁆𑀲𑀚𑁆𑀚𑀦𑀁, 𑀢𑀲𑁆𑀫𑀸 𑀢𑀁 𑀲𑀫𑀼𑀤𑀬𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀁.

𑁫𑁦. 𑀇𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂 𑁋 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀻𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ¶ 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀧𑀦𑁂𑀢𑁆𑀣 𑀆𑀬𑀢𑀦𑀥𑀸𑀢𑀼𑀦𑀺𑀤𑁆𑀤𑁂𑀲𑀲𑀤𑀺𑀲𑀫𑁂𑀯.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁬𑁧. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑁋 ‘‘𑀅𑀯𑀺𑀚𑁆𑀚𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’’𑀢𑀺 𑀧𑀼𑀘𑁆𑀙𑀁 𑀅𑀦𑀸𑀭𑀪𑀺𑀢𑁆𑀯𑀸 𑀅𑀯𑀺𑀚𑁆𑀚𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀲𑀩𑁆𑀩𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁. 𑀢𑁂𑀦𑁂𑀯𑀸𑀳 ¶ 𑁋 ‘‘𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺. 𑀦𑀸𑀫𑀭𑀽𑀧𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑁂𑀢𑁆𑀣 𑀲𑀤𑁆𑀤𑀸𑀬𑀢𑀦𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄. 𑀨𑀲𑁆𑀲𑀸𑀤𑀻𑀲𑀼 𑀔𑀦𑁆𑀥𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂𑀦𑁂𑀯 𑀳𑀺 𑀏𑀓𑁂𑀦 𑀔𑀦𑁆𑀥𑁂𑀦 𑀨𑀲𑁆𑀲𑁄 𑀲𑀗𑁆𑀕𑀳𑀺𑀢𑁄, 𑀅𑀜𑁆𑀜𑁂𑀦 𑀯𑁂𑀤𑀦𑀸, 𑀢𑀡𑁆𑀳𑀸𑀉𑀧𑀸𑀤𑀸𑀦𑀓𑀫𑁆𑀫𑀪𑀯𑀸 𑀧𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀪𑀯𑀧𑀤𑀜𑁆𑀘𑁂𑀢𑁆𑀣 𑀓𑀫𑁆𑀫𑀪𑀯𑀸𑀤𑀻𑀦𑀁 𑀯𑀲𑁂𑀦 𑀏𑀓𑀸𑀤𑀲𑀥𑀸 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀨𑀲𑁆𑀲𑀸𑀤𑀻𑀳𑀺 𑀲𑀤𑀺𑀲𑀯𑀺𑀲𑀚𑁆𑀚𑀦𑀢𑁆𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀤𑀲𑁆𑀲𑀺𑀢𑁄. 𑀉𑀧𑀧𑀢𑁆𑀢𑀺𑀪𑀯𑀓𑀸𑀫𑀪𑀯𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀏𑀓𑀢𑁄 𑀤𑀲𑁆𑀲𑀺𑀢𑀸. 𑀬𑀲𑁆𑀫𑀸 𑀘𑁂𑀢𑁂 𑀉𑀧𑀸𑀤𑀺𑀦𑁆𑀦𑀓𑀥𑀫𑁆𑀫𑀸𑀯 𑀢𑀲𑁆𑀫𑀸 ‘‘𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀻’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀤𑀸𑀬𑀢𑀦𑀜𑁆𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀢𑀁 𑀏𑀢𑁆𑀣 𑀦 𑀕𑀳𑀺𑀢𑀁.

𑁬𑁮. 𑀭𑀽𑀧𑀪𑀯𑀦𑀺𑀤𑁆𑀤𑁂𑀲𑁂 𑁋 𑀧𑀜𑁆𑀘𑀳𑀸𑀬𑀢𑀦𑁂𑀳𑀻𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑀭𑀽𑀧𑀥𑀫𑁆𑀫𑀸𑀬𑀢𑀦𑁂𑀳𑀺. 𑀅𑀝𑁆𑀞𑀳𑀺 𑀥𑀸𑀢𑀽𑀳𑀻𑀢𑀺 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁄𑀢𑀯𑀺𑀜𑁆𑀜𑀸𑀡𑀭𑀽𑀧𑀥𑀫𑁆𑀫𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀅𑀭𑀽𑀧𑀪𑀯𑀸𑀤𑀬𑁄𑀧𑀺 𑀢𑀬𑁄 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸𑀯 𑀏𑀓𑀢𑁄 𑀤𑀲𑁆𑀲𑀺𑀢𑀸. 𑀢𑀣𑀸 𑀅𑀲𑀜𑁆𑀜𑀸𑀪𑀯𑀏𑀓𑀯𑁄𑀓𑀸𑀭𑀪𑀯𑀸. 𑀢𑀢𑁆𑀣 𑀤𑁆𑀯𑀻𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺. 𑀥𑀸𑀢𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀢𑀮𑀯𑀸𑀲𑀺𑀓𑀸𑀦𑀜𑁆𑀳𑀺 𑀲𑁂𑀲𑀩𑁆𑀭𑀳𑁆𑀫𑀸𑀦𑀁 𑀘𑀓𑁆𑀔𑀼𑀲𑀩𑁆𑀪𑀸𑀯𑀢𑁄 𑀢𑀲𑁆𑀲𑀸𑀭𑀫𑁆𑀫𑀡𑀢𑁆𑀢𑀸 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀉𑀤𑁆𑀥𑀝𑀁.

𑁭𑁧. 𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀻𑀢𑀺 𑀭𑀽𑀧𑀚𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀅𑀭𑀽𑀧𑀚𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀚𑀭𑀸𑀫𑀭𑀡𑁂𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄. 𑀲𑁄𑀓𑀸𑀤𑀻𑀲𑀼𑀧𑀺 ¶ 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦, 𑀧𑀭𑀺𑀤𑁂𑀯𑁄 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀉𑀧𑀸𑀬𑀸𑀲𑀸𑀤𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑀸𑀢𑀺 𑀏𑀯𑀁 𑀔𑀦𑁆𑀥𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁭𑁩. 𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀻𑀢𑀺 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺, 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀘. 𑀛𑀸𑀦𑀁 𑀤𑁆𑀯𑀻𑀳𑀻𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀅𑀧𑁆𑀧𑀫𑀜𑁆𑀜𑀸𑀤𑀬𑁄 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀏𑀓𑀢𑁄 𑀦𑀺𑀤𑁆𑀤𑀺𑀝𑁆𑀞𑀸. 𑀘𑀺𑀢𑁆𑀢𑀁 𑀧𑀦 𑀘𑁂𑀢𑀦𑀸𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀅𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀧𑀘𑁆𑀙𑀸 𑀕𑀳𑀺𑀢𑀁. 𑀢𑀢𑁆𑀣 𑀅𑀧𑁆𑀧𑀫𑀜𑁆𑀜𑀸𑀤𑀻𑀲𑀼 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀲𑁂𑀲𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀏𑀯𑀁 𑀔𑀦𑁆𑀥𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁭. 𑀢𑀺𑀓𑀧𑀤𑀯𑀡𑁆𑀡𑀦𑀸

𑁭𑁭. 𑀏𑀯𑀁 ¶ 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀬 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑀸𑀳𑀺𑀭𑀫𑀸𑀢𑀺𑀓𑀸𑀬 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀯𑁂𑀤𑀦𑀸𑀢𑁆𑀢𑀺𑀓𑁂 𑀢𑀻𑀳𑀺 𑀥𑀸𑀢𑀽𑀳𑀻𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀫𑁆𑀫𑀥𑀸𑀢𑀽𑀳𑀺. 𑀲𑀢𑁆𑀢𑀳𑀺 𑀥𑀸𑀢𑀽𑀳𑀻𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀘𑁂𑀯 𑀫𑀦𑁄𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀘. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀅𑀝𑁆𑀞𑀳𑀺 𑀥𑀸𑀢𑀽𑀳𑀻𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀢𑀸𑀳𑀺𑀬𑁂𑀯. 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀧𑀦 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀏𑀓𑀢𑁄 𑀕𑀳𑀺𑀢𑀸. 𑀬𑀣𑀸 𑀘𑁂𑀢𑁂, 𑀏𑀯𑀁 𑀲𑀩𑁆𑀩𑀢𑀺𑀓𑀤𑀼𑀓𑀧𑀤𑁂𑀲𑀼 𑀬𑀁 𑀬𑀁 𑀧𑀤𑀁 𑀬𑁂𑀦 𑀬𑁂𑀦 𑀧𑀤𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺, 𑀢𑀁 𑀢𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀧𑀺 𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀢𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀲𑀗𑁆𑀕𑀳𑀸𑀲𑀗𑁆𑀕𑀳𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸.

𑁨. 𑀤𑀼𑀢𑀺𑀬𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁧. 𑀇𑀤𑀸𑀦𑀺 ¶ 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀘𑀓𑁆𑀔𑀸𑀬𑀢𑀦𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀭𑀺𑀤𑀁 ¶ 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀬𑀁 𑀔𑀦𑁆𑀥𑀧𑀤𑁂𑀦 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀔𑀦𑁆𑀥𑀸𑀬𑀢𑀦𑀧𑀤𑁂𑀳𑀺 𑀯𑀸 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀥𑀸𑀢𑀼𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄. 𑀲𑁄 𑀘 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄. 𑀲𑁄𑀧𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀏𑀯𑀭𑀽𑀧𑀸𑀦𑀺 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀭𑀽𑀧𑁂𑀓𑀤𑁂𑀲𑀁 𑀅𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁, 𑀯𑀺𑀜𑁆𑀜𑀸𑀡𑁂𑀓𑀤𑁂𑀲𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀧𑀭𑀺𑀬𑁄𑀲𑀸𑀦𑁂 𑀘 𑁋

‘‘𑀤𑀲𑀸𑀬𑀢𑀦𑀸 ¶ 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄,

𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀲𑀜𑁆𑀜𑀸𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄;

𑀧𑀭𑀺𑀤𑁂𑀯𑁄 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁,

𑀅𑀦𑀺𑀤𑀲𑁆𑀲𑀦𑀁 𑀧𑀼𑀦𑀤𑁂𑀯 𑀲𑀧𑁆𑀧𑀝𑀺𑀖𑀁 𑀉𑀧𑀸𑀤𑀸’’𑀢𑀺.

𑀏𑀯𑀁 𑀉𑀤𑁆𑀤𑀸𑀦𑀕𑀸𑀣𑀸𑀬 𑀤𑀲𑁆𑀲𑀺𑀢𑀸𑀦𑁂𑀯. 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦𑁂𑀯 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀳𑀯𑀲𑁂𑀦 𑀳𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀆𑀬𑀢𑀦𑀥𑀸𑀢𑀼𑀯𑀲𑁂𑀦𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑁂 𑀯𑀻𑀲𑀢𑀺 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀏𑀓𑁄 𑀧𑀜𑁆𑀳𑁄 𑀓𑀢𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀏𑀓𑁄, 𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀏𑀓𑁄, 𑀤𑁆𑀯𑁂 𑀪𑀯𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀏𑀓𑁄, 𑀧𑀭𑀺𑀤𑁂𑀯𑁂𑀦 𑀘 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁂𑀳𑀺 𑀘 𑀏𑀓𑁄, 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁂𑀳𑀺 𑀏𑀓𑁄, 𑀲𑀦𑀺𑀤𑀲𑁆𑀲𑀦𑁂𑀳𑀺 𑀏𑀓𑁄, 𑀲𑀧𑁆𑀧𑀝𑀺𑀖𑁂𑀳𑀺 𑀘 𑀉𑀧𑀸𑀤𑀸𑀥𑀫𑁆𑀫𑁂𑀳𑀺 𑀘 𑀏𑀓𑁄𑀢𑀺 𑀅𑀝𑁆𑀞 𑀧𑀜𑁆𑀳𑀸 𑀓𑀢𑀸. 𑀢𑁂𑀲𑀼 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 ¶ 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀞𑀫𑀧𑀜𑁆𑀳𑁂 𑀢𑀸𑀯 𑀘𑀢𑀽𑀳𑀺 𑀔𑀦𑁆𑀥𑁂𑀳𑀻𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀸𑀬𑀢𑀦𑁂𑀳𑀻𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀫𑀦𑀸𑀬𑀢𑀦𑁂𑀦, 𑀅𑀝𑁆𑀞𑀳𑀺 𑀥𑀸𑀢𑀽𑀳𑀻𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀲𑀼 𑀏𑀓𑁂𑀓𑀸𑀬 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀘𑀓𑁆𑀔𑀸𑀬𑀢𑀦𑁂𑀦 𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀭𑀽𑀧𑀓𑁆𑀔𑀦𑁆𑀥𑁄 𑀲𑀗𑁆𑀕𑀳𑀺𑀢𑁄. 𑀢𑀲𑁆𑀫𑀺𑀁 𑀲𑀗𑁆𑀕𑀳𑀺𑀢𑁂 𑀭𑀽𑀧𑀓𑁆𑀔𑀦𑁆𑀥𑁂 𑀆𑀬𑀢𑀦𑀲𑀗𑁆𑀕𑀳𑁂𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑁂𑀓𑀁 𑀲𑀗𑁆𑀕𑀳𑀺𑀢𑀁. 𑀲𑁂𑀲𑀸𑀦𑀺 𑀤𑀲 𑀆𑀬𑀢𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀥𑀸𑀢𑀼𑀲𑀗𑁆𑀕𑀳𑁂𑀦𑀧𑀺 𑀢𑁂𑀦 𑀘𑀓𑁆𑀔𑀼𑀥𑀸𑀢𑀼𑀬𑁂𑀯𑁂𑀓𑀸 𑀲𑀗𑁆𑀕𑀳𑀺𑀢𑀸. 𑀲𑁂𑀲𑀸 𑀤𑀲 𑀥𑀸𑀢𑀼𑀬𑁄 𑀅𑀲𑀗𑁆𑀕𑀳𑀺𑀢𑀸. 𑀇𑀢𑀺 𑀬𑀸𑀦𑀺 𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀤𑀲𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀘𑀓𑁆𑀔𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 ¶ 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀬𑀸𑀧𑀺 𑀢𑁂𑀦 𑀅𑀲𑀗𑁆𑀕𑀳𑀺𑀢𑀸 𑀤𑀲 𑀥𑀸𑀢𑀼𑀬𑁄, 𑀢𑀸 𑀘𑀓𑁆𑀔𑀼𑀥𑀸𑀢𑀼𑀬𑀸 𑀘𑁂𑀯 𑀲𑀢𑁆𑀢𑀳𑀺 𑀘 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺. 𑀭𑀽𑀧𑀸𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁭𑁨. 𑀤𑀼𑀢𑀺𑀬𑀧𑀜𑁆𑀳𑁂 𑁋 𑀬𑀲𑁆𑀫𑀸 𑀬𑀸𑀬 𑀓𑀸𑀬𑀘𑀺 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀫𑀦𑀸𑀬𑀢𑀦𑁂𑀦 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀘𑀢𑀽𑀳𑀺 𑀔𑀦𑁆𑀥𑁂𑀳𑀻𑀢𑀺 𑀭𑀽𑀧𑀸𑀤𑀻𑀳𑀺 𑀘𑀢𑀽𑀳𑀺. 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀻𑀢𑀺 𑀫𑀦𑀸𑀬𑀢𑀦𑀯𑀚𑁆𑀚𑁂𑀳𑀺. 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀻𑀢𑀺 𑀬𑀣𑀸𑀦𑀼𑀭𑀽𑀧𑀸 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀳𑀺 𑀤𑁆𑀯𑀸𑀤𑀲𑀳𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁂𑀯 𑀲𑀗𑁆𑀕𑀳𑀺𑀢𑀸, 𑀇𑀢𑀭𑀸 𑀅𑀲𑀗𑁆𑀕𑀳𑀺𑀢𑀸. 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁭𑁩. 𑀢𑀢𑀺𑀬𑀧𑀜𑁆𑀳𑁂 ¶ 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀲𑀤𑀺𑀲𑀫𑁂𑀯. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀲𑀼 𑀧𑀦 𑀥𑀫𑁆𑀫𑀸𑀬𑀢𑀦𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀆𑀬𑀢𑀦𑀸𑀦𑀺, 𑀥𑀫𑁆𑀫𑀥𑀸𑀢𑀼𑀬𑀸 𑀘 𑀲𑀤𑁆𑀥𑀺𑀁 𑀅𑀝𑁆𑀞 𑀥𑀸𑀢𑀼𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁭𑁪. 𑀘𑀢𑀼𑀢𑁆𑀣𑀧𑀜𑁆𑀳𑁂 𑁋 𑀢𑀻𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀢𑁂𑀲𑀼 𑀳𑀺 𑀪𑀯𑁂𑀲𑀼 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀤𑁆𑀯𑁂𑀯 𑀆𑀬𑀢𑀦𑀸𑀦𑀺 𑀢𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 ¶ . 𑀲𑁂𑀲𑀸𑀦𑀺 𑀦𑀯 𑀭𑀽𑀧𑀸𑀬𑀢𑀦𑀸𑀦𑀺 𑀢𑁂𑀳𑁂𑀯 𑀘 𑀤𑁆𑀯𑀻𑀳𑀺, 𑀫𑀦𑀸𑀬𑀢𑀦𑁂𑀦 𑀘𑀸𑀢𑀺 𑀢𑀻𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀦𑀯𑀳𑀺 𑀥𑀸𑀢𑀽𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀽𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺.

𑁧𑁭𑁫. 𑀧𑀜𑁆𑀘𑀫𑀧𑀜𑁆𑀳𑁂 𑁋 𑀤𑁆𑀯𑀻𑀳𑀸𑀬𑀢𑀦𑁂𑀳𑀻𑀢𑀺 𑀧𑀞𑀫𑀧𑀤𑀁 𑀲𑀦𑁆𑀥𑀸𑀬 𑀲𑀤𑁆𑀤𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀤𑀼𑀢𑀺𑀬𑀧𑀤𑀁 𑀲𑀦𑁆𑀥𑀸𑀬 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀥𑀸𑀢𑀼𑀬𑁄𑀧𑀺 𑀢𑁂𑀲𑀁𑀬𑁂𑀯 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁭𑁬. 𑀙𑀝𑁆𑀞𑀧𑀜𑁆𑀳𑁂 𑁋 𑀤𑀲𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑁂𑀳𑀺. 𑀲𑁄𑀴𑀲𑀳𑀺 𑀥𑀸𑀢𑀽𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀚𑁆𑀚𑁂𑀳𑁂𑀯. 𑀓𑀣𑀁? 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀳𑀺 𑀥𑀫𑁆𑀫𑀸 𑀦𑀸𑀫 𑀦𑀯 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺. 𑀢𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁂 𑀭𑀽𑀧𑀓𑁆𑀔𑀦𑁆𑀥𑁂, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀢𑀸𑀦𑁂𑀯 𑀦𑀯𑀸𑀬𑀢𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀥𑀸𑀢𑀼𑀲𑀗𑁆𑀕𑀳𑁂𑀦𑀧𑀺 𑀢𑀸 𑀏𑀯 𑀦𑀯 𑀥𑀸𑀢𑀼𑀬𑁄 𑀲𑀗𑁆𑀕𑀳𑀺𑀢𑀸. 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀬𑁄 𑀅𑀲𑀗𑁆𑀕𑀳𑀺𑀢𑀸. 𑀇𑀢𑀺 𑀬𑀸𑀦𑀺 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀤𑁆𑀯𑁂 𑀆𑀬𑀢𑀦𑀸𑀦𑀺 ¶ , 𑀢𑀸𑀦𑀺 𑀭𑀽𑀧𑀸𑀬𑀢𑀦𑀯𑀚𑁆𑀚𑁂𑀳𑀺 𑀦𑀯𑀳𑀺 𑀑𑀴𑀸𑀭𑀺𑀓𑀸𑀬𑀢𑀦𑁂𑀳𑀺, 𑀫𑀦𑀸𑀬𑀢𑀦𑁂𑀦 𑀘𑀸𑀢𑀺 𑀤𑀲𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀬𑀸𑀧𑀺 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀸 𑀤𑁆𑀯𑁂 𑀥𑀸𑀢𑀼𑀬𑁄, 𑀢𑀸 𑀭𑀽𑀧𑀥𑀸𑀢𑀼𑀯𑀚𑁆𑀚𑀸𑀳𑀺 𑀦𑀯𑀳𑀺 𑀑𑀴𑀸𑀭𑀺𑀓𑀥𑀸𑀢𑀽𑀳𑀺, 𑀲𑀢𑁆𑀢𑀳𑀺 𑀘 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻𑀢𑀺 𑀲𑁄𑀴𑀲𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁭𑁭. 𑀲𑀢𑁆𑀢𑀫𑀧𑀜𑁆𑀳𑁂 𑁋 𑀤𑁆𑀯𑀻𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀅𑀝𑁆𑀞𑀳𑀺 𑀥𑀸𑀢𑀽𑀳𑀻𑀢𑀺 𑀭𑀽𑀧𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺.

𑁧𑁭𑁮. 𑀅𑀝𑁆𑀞𑀫𑀧𑀜𑁆𑀳𑁂 𑁋 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀻𑀢𑀺 𑀲𑀧𑁆𑀧𑀝𑀺𑀖𑀥𑀫𑁆𑀫𑁂 𑀲𑀦𑁆𑀥𑀸𑀬 𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑁂𑀳𑀺, 𑀉𑀧𑀸𑀤𑀸𑀥𑀫𑁆𑀫𑁂 𑀲𑀦𑁆𑀥𑀸𑀬 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀯𑀚𑁆𑀚𑁂𑀳𑀺. 𑀥𑀸𑀢𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀬𑁄𑀚𑀦𑀸 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑁩. 𑀢𑀢𑀺𑀬𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁯. 𑀇𑀤𑀸𑀦𑀺 ¶ ¶ 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀭𑀺𑀤𑀁 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀬𑀁 𑀔𑀦𑁆𑀥𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀢𑁂𑀦 𑀏𑀓𑀥𑀫𑁆𑀫𑁄𑀧𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀦𑀦𑀼 𑀘 𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸𑀢𑀺? 𑀲𑀗𑁆𑀕𑀳𑀺𑀢𑀸. 𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀥𑀫𑁆𑀫𑀸𑀬𑀢𑀦𑀁, 𑀭𑀽𑀧𑀓𑁆𑀔𑀦𑁆𑀥𑀢𑁄 𑀳𑀺 𑀲𑀼𑀔𑀼𑀫𑀭𑀽𑀧𑀫𑀢𑁆𑀢𑀁 𑀥𑀫𑁆𑀫𑀸𑀬𑀢𑀦𑀁 𑀪𑀚𑀢𑀺. 𑀢𑀲𑁆𑀫𑀸 𑀬𑁂 𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸, 𑀦 𑀢𑁂 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸 𑀦𑀸𑀫. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦𑀧𑀺 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀢𑁂𑀦 𑀏𑀓𑁄𑀧𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀏𑀯𑀭𑀽𑀧𑀸𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀤𑀸𑀦𑀺 ¶ 𑀯𑀺𑀜𑁆𑀜𑀸𑀡𑁂𑀦 𑀯𑀸 𑀑𑀴𑀸𑀭𑀺𑀓𑀭𑀽𑀧𑁂𑀦 𑀯𑀸 𑀅𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀢𑀬𑁄 𑀔𑀦𑁆𑀥𑀸 𑀢𑀣𑀸 𑀲𑀘𑁆𑀘𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀲𑁄𑀴𑀲;

𑀧𑀤𑀸𑀦𑀺 𑀧𑀘𑁆𑀘𑀬𑀸𑀓𑀸𑀭𑁂, 𑀘𑀼𑀤𑁆𑀤𑀲𑀽𑀧𑀭𑀺 𑀘𑀼𑀤𑁆𑀤𑀲.

‘‘𑀲𑀫𑀢𑀺𑀁𑀲 𑀧𑀤𑀸 𑀳𑁄𑀦𑁆𑀢𑀺, 𑀕𑁄𑀘𑁆𑀙𑀓𑁂𑀲𑀼 𑀤𑀲𑀲𑁆𑀯𑀣;

𑀤𑀼𑀯𑁂 𑀘𑀽𑀴𑀦𑁆𑀢𑀭𑀤𑀼𑀓𑀸, 𑀅𑀝𑁆𑀞 𑀳𑁄𑀦𑁆𑀢𑀺 𑀫𑀳𑀦𑁆𑀢𑀭𑀸’’𑀢𑀺.

𑀏𑀢𑁂𑀲𑀼 𑀧𑀦 𑀧𑀤𑁂𑀲𑀼 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀤𑁆𑀯𑀸𑀤𑀲 𑀧𑀜𑁆𑀳𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀏𑀯𑀁 𑀔𑀦𑁆𑀥𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀬𑀢𑀦𑀥𑀸𑀢𑀽𑀲𑀼 𑀧𑀦 𑀪𑁂𑀤𑁄 𑀦𑀢𑁆𑀣𑀺. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀢𑀸𑀯 𑁋 𑀢𑀻𑀳𑀺 𑀔𑀦𑁆𑀥𑁂𑀳𑀻𑀢𑀺 𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀆𑀬𑀢𑀦𑀥𑀸𑀢𑀼𑀬𑁄 𑀧𑀦 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀦𑀺𑀩𑁆𑀩𑀸𑀦𑀜𑁆𑀘 𑀲𑀼𑀔𑀼𑀫𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑀸 ¶ 𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺, 𑀲𑁂𑀲𑀸 𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑀁 𑀧𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀕𑀘𑁆𑀙𑀢𑁂𑀯. 𑀢𑁂𑀦 𑀯𑀼𑀢𑁆𑀢𑀁 ¶ 𑁋 ‘‘𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺, 𑀏𑀓𑁂𑀦𑀸𑀬𑀢𑀦𑁂𑀦, 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸’’𑀢𑀺. 𑀲𑀜𑁆𑀜𑀸𑀓𑁆𑀔𑀦𑁆𑀥𑀧𑀓𑁆𑀔𑁂 𑀧𑀦𑁂𑀢𑁆𑀣 𑀲𑀜𑁆𑀜𑀁 𑀅𑀧𑀦𑁂𑀢𑁆𑀯𑀸 𑀯𑁂𑀤𑀦𑀸𑀬 𑀲𑀤𑁆𑀥𑀺𑀁 𑀢𑀬𑁄 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸𑀤𑀻𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀅𑀧𑀦𑁂𑀢𑁆𑀯𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀯𑀲𑁂𑀦 𑀢𑀬𑁄 𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁮𑁦. 𑀤𑀼𑀢𑀺𑀬𑁂 𑁋 𑀘𑀢𑀽𑀳𑀺 𑀔𑀦𑁆𑀥𑁂𑀳𑀻𑀢𑀺 𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀳𑀺. 𑀢𑁂 𑀳𑀺 𑀦𑀺𑀭𑁄𑀥𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸.

𑁧𑁮𑁧. 𑀢𑀢𑀺𑀬𑁂 𑁋 𑀤𑁆𑀯𑀻𑀳𑀻𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺. 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀧𑀦 𑀯𑁂𑀤𑀦𑀸𑀲𑀜𑁆𑀜𑀸𑀯 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀻’’𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀔𑀦𑁆𑀥𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀜𑁆𑀳𑀺 𑀔𑀦𑁆𑀥𑀸𑀦𑀁 𑀦𑀸𑀫𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑁧𑁮𑁨. 𑀘𑀢𑀼𑀢𑁆𑀣𑁂 ¶ 𑁋 𑀢𑀻𑀳𑀺 𑀔𑀦𑁆𑀥𑁂𑀳𑀻𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀲𑀼 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺, 𑀯𑁂𑀤𑀦𑀸𑀧𑀜𑁆𑀘𑀓𑁂 𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺; 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀨𑀲𑁆𑀲𑀧𑀭𑀺𑀬𑁄𑀲𑀸𑀦𑁂𑀲𑀼 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺. 𑀯𑁂𑀤𑀦𑀸𑀬 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑀺𑀲𑁄𑀯 𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀪𑀯𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑁧𑁮𑁩. 𑀧𑀜𑁆𑀘𑀫𑁂 𑁋 𑀚𑀸𑀢𑀺𑀚𑀭𑀸𑀫𑀭𑀡𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀤𑀺𑀲𑁄𑀯. 𑀛𑀸𑀦𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀲𑀼𑀔𑀼𑀫𑀭𑀽𑀧𑀁 𑀲𑀜𑁆𑀜𑀸 𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀭𑀽𑀧𑀓𑁆𑀔𑀦𑁆𑀥𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦 𑀤𑁆𑀯𑁂 𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁮𑁪. 𑀙𑀝𑁆𑀞𑁂 𑁋 𑀲𑁄𑀓𑀸𑀤𑀺𑀢𑁆𑀢𑀬𑁂 𑀯𑁂𑀤𑀦𑀸𑀬 𑀲𑀤𑀺𑀲𑁄. 𑀉𑀧𑀸𑀬𑀸𑀲𑀸𑀤𑀻𑀲𑀼 𑀲𑀗𑁆𑀔𑀸𑀭𑀲𑀤𑀺𑀲𑁄. 𑀧𑀼𑀦 𑀯𑁂𑀤𑀦𑀸𑀬 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑀺𑀲𑁄, 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀤𑀺𑀲𑁄, 𑀘𑁂𑀢𑀦𑀸𑀤𑀻𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀤𑀺𑀲𑁄 ¶ 𑀯𑀺𑀦𑀺𑀘𑁆𑀙𑀬𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀢𑁆𑀢𑀫𑀧𑀜𑁆𑀳𑀸𑀤𑀻𑀲𑀼𑀧𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑁪. 𑀘𑀢𑀼𑀢𑁆𑀣𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁧. 𑀇𑀤𑀸𑀦𑀺 ¶ 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀲𑀫𑀼𑀤𑀬𑀲𑀘𑁆𑀘𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀁, 𑀧𑀼𑀦 𑀢𑀲𑁆𑀲𑁂𑀯 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀏𑀓𑀫𑁆𑀧𑀺 𑀲𑀓𑀮𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀞𑀺𑀢𑀧𑀤𑁂𑀲𑀼 𑀦 𑀬𑀼𑀚𑁆𑀚𑀢𑀺. 𑀲𑀓𑀮𑁂𑀦 𑀳𑀺 𑀔𑀦𑁆𑀥𑀸𑀤𑀺𑀧𑀤𑁂𑀦 𑀅𑀜𑁆𑀜𑀁 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀬𑀁 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬. 𑀢𑀲𑁆𑀫𑀸 𑀢𑀣𑀸𑀭𑀽𑀧𑀸𑀦𑀺 𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀲𑀗𑁆𑀔𑀸𑀭𑁂𑀓𑀤𑁂𑀲𑀁 𑀯𑀸 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺 𑁋 𑀯𑁂𑀤𑀦𑁂𑀓𑀤𑁂𑀲𑀁 𑀯𑀸 𑀲𑀼𑀔𑀼𑀫𑀭𑀽𑀧𑀁 𑀯𑀸 𑀲𑀤𑁆𑀤𑁂𑀓𑀤𑁂𑀲𑀁 𑀯𑀸, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀤𑁆𑀯𑁂 𑀲𑀘𑁆𑀘𑀸 𑀧𑀦𑁆𑀦𑀭𑀲𑀺𑀦𑁆𑀤𑁆𑀭𑀺𑀬𑀸, 𑀏𑀓𑀸𑀤𑀲 𑀧𑀝𑀺𑀘𑁆𑀘𑀧𑀤𑀸;

𑀉𑀤𑁆𑀥𑀁 𑀧𑀼𑀦 𑀏𑀓𑀸𑀤𑀲, 𑀕𑁄𑀘𑁆𑀙𑀓𑀧𑀤𑀫𑁂𑀢𑁆𑀣 𑀢𑀺𑀁𑀲𑀯𑀺𑀥’’𑀦𑁆𑀢𑀺.

𑀧𑀜𑁆𑀳𑀸 ¶ 𑀧𑀦𑁂𑀢𑁆𑀣 𑀤𑁆𑀯𑁂𑀬𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀤𑁂𑀯 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀁, 𑀢𑁂 𑀥𑀫𑁆𑀫𑁂 𑀲𑀦𑁆𑀥𑀸𑀬 𑀲𑀩𑁆𑀩𑀢𑁆𑀣 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀳𑀺 𑀢𑀡𑁆𑀳𑀸𑀯𑀚𑁆𑀚𑀸 𑀲𑁂𑀲𑀸 𑀲𑀗𑁆𑀔𑀸𑀭𑀸 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀧𑀼𑀦 𑀢𑁂𑀳𑀺 𑀢𑀡𑁆𑀳𑀸𑀯 𑀲𑀗𑁆𑀕𑀳𑀺𑀢𑀸. 𑀲𑀸 ¶ 𑀢𑀡𑁆𑀳𑀸 𑀧𑀼𑀦 𑀲𑀗𑁆𑀔𑀸𑀭𑁂𑀳𑁂𑀯 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀭𑀽𑀧𑀥𑀫𑁆𑀫𑀧𑀼𑀘𑁆𑀙𑀸𑀲𑀼 𑀧𑀦𑁂𑀢𑁆𑀣 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑀸 𑀏𑀓𑁄 𑀔𑀦𑁆𑀥𑁄 𑀦𑀸𑀫. 𑀭𑀽𑀧𑀥𑀫𑁆𑀫𑀧𑀼𑀘𑁆𑀙𑀸𑀲𑀼 𑀭𑀽𑀧𑀓𑁆𑀔𑀦𑁆𑀥𑁄. 𑀧𑀭𑀺𑀤𑁂𑀯𑀧𑀼𑀘𑁆𑀙𑀸𑀬 𑀲𑀤𑁆𑀤𑀸𑀬𑀢𑀦𑀁 𑀏𑀓𑀁 𑀆𑀬𑀢𑀦𑀁 𑀦𑀸𑀫. 𑀲𑀤𑁆𑀤𑀥𑀸𑀢𑀼 𑀏𑀓𑀸 𑀥𑀸𑀢𑀼 𑀦𑀸𑀫, 𑀲𑁂𑀲𑀝𑁆𑀞𑀸𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑁫. 𑀧𑀜𑁆𑀘𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁩. 𑀇𑀤𑀸𑀦𑀺 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀧𑀼𑀦 𑀢𑀲𑁆𑀲𑁂𑀯 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀧𑀜𑁆𑀘𑀓𑁆𑀔𑀦𑁆𑀥𑀕𑁆𑀕𑀸𑀳𑀓𑁂𑀲𑀼 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀲𑀼 ¶ 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀼𑀔𑀼𑀫𑀭𑀽𑀧𑀕𑁆𑀕𑀸𑀳𑀓𑁂𑀲𑀼 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀤𑀻𑀲𑀼 𑀘 𑀧𑀤𑁂𑀲𑀼 𑀦 𑀬𑀼𑀚𑁆𑀚𑀢𑀺. 𑀢𑀸𑀤𑀺𑀲𑁂𑀦 𑀳𑀺 𑀧𑀤𑁂𑀦 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀫𑀢𑁆𑀢𑀁 𑀦 𑀕𑀘𑁆𑀙𑁂𑀬𑁆𑀬. 𑀲𑁂𑀲𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀥𑀫𑁆𑀫𑀸 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀣𑀸𑀭𑀽𑀧𑀸𑀦𑀺 𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀺𑀜𑁆𑀜𑀸𑀡𑀜𑁆𑀘 𑀲𑀼𑀔𑀼𑀫𑀭𑀽𑀧𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀦 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀲𑀩𑁆𑀩𑁂 𑀔𑀦𑁆𑀥𑀸 𑀢𑀣𑀸𑀬𑀢𑀦𑀥𑀸𑀢𑀼𑀬𑁄 𑀲𑀘𑁆𑀘𑀢𑁄 𑀢𑀬𑁄;

𑀇𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀲𑀩𑁆𑀩𑀸𑀦𑀺, 𑀢𑁂𑀯𑀻𑀲𑀢𑀺 𑀧𑀝𑀺𑀘𑁆𑀘𑀢𑁄.

‘‘𑀧𑀭𑀢𑁄 𑀲𑁄𑀴𑀲 𑀧𑀤𑀸, 𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀢𑀺𑀓𑁂;

𑀕𑁄𑀘𑁆𑀙𑀓𑁂 𑀲𑀢𑁆𑀢𑀢𑀺 𑀤𑁆𑀯𑁂 𑀘, 𑀲𑀢𑁆𑀢 𑀘𑀽𑀴𑀦𑁆𑀢𑀭𑁂 𑀧𑀤𑀸.

‘‘𑀫𑀳𑀦𑁆𑀢𑀭𑁂 ¶ 𑀧𑀤𑀸 𑀯𑀼𑀢𑁆𑀢𑀸, 𑀅𑀝𑁆𑀞𑀸𑀭𑀲 𑀢𑀢𑁄 𑀧𑀭𑀁;

𑀅𑀝𑁆𑀞𑀸𑀭𑀲𑁂𑀯 𑀜𑀸𑀢𑀩𑁆𑀩𑀸, 𑀲𑁂𑀲𑀸 𑀇𑀥 𑀦 𑀪𑀸𑀲𑀺𑀢𑀸’’𑀢𑀺.

𑀧𑀜𑁆𑀳𑀸 𑀧𑀦𑁂𑀢𑁆𑀣 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀢𑀺𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀁 ¶ 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀤𑁂𑀯 𑀬𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑁂 𑀥𑀫𑁆𑀫𑁂 𑀲𑀦𑁆𑀥𑀸𑀬 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀺𑀩𑁆𑀩𑀸𑀦𑀜𑁆𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀧𑀦 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀁 𑀅𑀯𑀲𑁂𑀲𑀸 𑀲𑀗𑁆𑀕𑀳𑀺𑀢𑀸𑀢𑀺 𑀯𑀺𑀜𑁆𑀜𑀸𑀡𑀫𑁂𑀯 𑀢𑀻𑀳𑀺𑀧𑀺 𑀔𑀦𑁆𑀥𑀲𑀗𑁆𑀕𑀳𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫. 𑀧𑀼𑀦 𑀢𑁂𑀦 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑁂𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂 𑀲𑀩𑁆𑀩𑁂𑀧𑀺 𑀧𑀼𑀦 𑀯𑀺𑀜𑁆𑀜𑀸𑀡𑁂𑀦𑁂𑀯 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸𑀢𑀺 𑀏𑀓𑁂𑀦 𑀔𑀦𑁆𑀥𑁂𑀦, 𑀏𑀓𑁂𑀦𑀸𑀬𑀢𑀦𑁂𑀦, 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀣 𑀯𑀸 𑁋 𑀬𑀤𑁂𑀢𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀜𑁆𑀜𑀸𑀡𑀫𑁂𑀯 𑀢𑀻𑀳𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑁂𑀳𑀺𑀧𑀺 𑀯𑀺𑀜𑁆𑀜𑀸𑀡𑀥𑀫𑁆𑀫𑁂𑀳𑀺 𑀢𑁂 𑀭𑀽𑀧𑀥𑀫𑁆𑀫𑀸𑀯 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀧𑀼𑀦 𑀢𑁂 𑀭𑀽𑀧𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑁂𑀦𑁂𑀯 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘 𑀔𑀦𑁆𑀥𑀢𑁄 𑀏𑀓𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀳𑁄𑀢𑀺, 𑀆𑀬𑀢𑀦𑀢𑁄 𑀏𑀓𑀁 𑀫𑀦𑀸𑀬𑀢𑀦𑀁, 𑀥𑀸𑀢𑀼𑀢𑁄 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀢𑀲𑁆𑀫𑀸 ‘‘𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀤𑁂𑀯 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀔𑀦𑁆𑀥𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀤𑀼𑀢𑀺𑀬𑀧𑀜𑁆𑀳𑁂 𑀢𑀸𑀯 𑁋 𑀭𑀽𑀧𑀯𑀺𑀜𑁆𑀜𑀸𑀡𑀸𑀦𑀁 𑀯𑀲𑁂𑀦 ¶ 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀤𑀦𑀸𑀤𑀬𑁄 𑀳𑀺 𑀭𑀽𑀧𑀯𑀺𑀜𑁆𑀜𑀸𑀡𑁂𑀳𑁂𑀯 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂 𑀘 𑀤𑁆𑀯𑁂 𑀔𑀦𑁆𑀥𑀸 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺.

𑁧𑁯𑁫. 𑀢𑀢𑀺𑀬𑀧𑀜𑁆𑀳𑁂 𑁋 𑀯𑀺𑀜𑁆𑀜𑀸𑀡𑀁 𑀭𑀽𑀧𑀸𑀤𑀻𑀳𑀺 𑀘𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁯𑁬. 𑀘𑀢𑀼𑀢𑁆𑀣𑀧𑀜𑁆𑀳𑁂 𑁋 𑀘𑀓𑁆𑀔𑀸𑀬𑀢𑀦𑀁 𑀯𑁂𑀤𑀦𑀸𑀤𑀻𑀳𑀺 𑀘𑀢𑀽𑀳𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑁂 𑁋 𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀉𑀤𑁆𑀤𑀸𑀦𑀕𑀸𑀣𑀸𑀬 𑀤𑀲𑁆𑀲𑀺𑀢𑀥𑀫𑁆𑀫𑀸𑀬𑁂𑀯 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺.

𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑁬. 𑀙𑀝𑁆𑀞𑀦𑀬𑁄 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸

𑁨𑁨𑁮. 𑀇𑀤𑀸𑀦𑀺 ¶ ¶ 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀁 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀮𑀩𑁆𑀪𑀢𑀺 𑀬𑀜𑁆𑀘 𑀦 𑀮𑀩𑁆𑀪𑀢𑀺 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀸𑀬 𑀕𑀳𑀺𑀢𑀁. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 𑀬𑀁 𑀦 𑀮𑀩𑁆𑀪𑀢𑀺, 𑀢𑀁 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄; 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄𑀢𑀺 𑀳𑀺 𑀯𑀘𑀦𑀢𑁄 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑁂𑀯 𑀲𑀪𑀸𑀕𑀸𑀦𑀁 𑀏𑀓𑀲𑀦𑁆𑀢𑀸𑀦𑀲𑁆𑀫𑀺𑀁 𑀏𑀓𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀺. 𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺, 𑀯𑀺𑀲𑀪𑀸𑀕𑀸 𑀳𑀺 𑀢𑁂 𑀢𑁂𑀲𑀁. 𑀬𑀣𑀸 𑀘 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺, 𑀏𑀯𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑁂𑀳𑀺 𑀦𑀸𑀦𑀸𑀓𑁆𑀔𑀡𑀺𑀓𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺𑀧𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺𑀬𑁂𑀯. 𑀢𑁂𑀧𑀺 𑀳𑀺 𑀢𑁂𑀲𑀁 𑀲𑀦𑁆𑀢𑀸𑀦𑀓𑁆𑀔𑀡𑀯𑀺𑀲𑀪𑀸𑀕𑀢𑀸𑀬 𑀯𑀺𑀲𑀪𑀸𑀕𑀸𑀬𑁂𑀯. 𑀅𑀬𑀁 𑀧𑀦 𑀯𑀺𑀲𑀪𑀸𑀕𑀢𑀸 𑀲𑀗𑁆𑀕𑀳𑀝𑁆𑀞𑁂𑀦 𑀯𑀺𑀭𑀼𑀚𑁆𑀛𑀦𑀢𑁄 𑀲𑀗𑁆𑀕𑀳𑀦𑀬𑁂 𑀦𑀢𑁆𑀣𑀺. 𑀕𑀡𑀦𑀽𑀧𑀕𑀫𑀢𑁆𑀢𑀜𑁆𑀳𑀺 𑀲𑀗𑁆𑀕𑀳𑀝𑁆𑀞𑁄. 𑀲𑀫𑁆𑀧𑀬𑁄𑀕𑀦𑀬𑁂 𑀧𑀦 𑀅𑀢𑁆𑀣𑀺, 𑀏𑀓𑀼𑀧𑁆𑀧𑀸𑀤𑀢𑀸𑀤𑀺𑀮𑀓𑁆𑀔𑀡𑀜𑁆𑀳𑀺 𑀲𑀫𑁆𑀧𑀬𑁄𑀕𑀝𑁆𑀞𑁄𑀢𑀺. 𑀏𑀯𑀫𑁂𑀢𑁆𑀣 𑀬𑀲𑁆𑀲 𑀏𑀓𑀥𑀫𑁆𑀫𑁂𑀦𑀧𑀺 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀁 𑀦 𑀬𑀼𑀚𑁆𑀛𑀢𑀺, 𑀢𑀲𑁆𑀲 𑀧𑀼𑀘𑁆𑀙𑀸𑀬 𑀲𑀗𑁆𑀕𑀳𑀁 𑀓𑀢𑁆𑀯𑀸𑀧𑀺 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. 𑀬𑀲𑁆𑀲 𑀯𑀺𑀧𑁆𑀧𑀬𑁄𑀕𑀮𑀓𑁆𑀔𑀡𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀲 𑀯𑀺𑀧𑁆𑀧𑀬𑁄𑀕𑁄 𑀤𑀲𑁆𑀲𑀺𑀢𑁄. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀏𑀓𑀸𑀬𑀧𑀺 𑀅𑀯𑀺𑀧𑁆𑀧𑀬𑀼𑀢𑁆𑀢𑁂 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸 𑀫𑀺𑀲𑁆𑀲𑀓𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀲𑀩𑁆𑀩𑀣𑀸𑀧𑀺 𑀇𑀥 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀥𑀫𑁆𑀫𑀸𑀬𑀢𑀦𑀁 ¶ 𑀥𑀫𑁆𑀫𑀥𑀸𑀢𑀼, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀚𑀻𑀯𑀺𑀢𑀁;

𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑀁, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀯𑀸.

‘‘𑀚𑀸𑀢𑀺𑀚𑀭𑀸 𑀘 𑀫𑀭𑀡𑀁, 𑀢𑀺𑀓𑁂𑀲𑁆𑀯𑁂𑀓𑀽𑀦𑀯𑀻𑀲𑀢𑀺;

𑀕𑁄𑀘𑁆𑀙𑀓𑁂𑀲𑀼 𑀘 𑀧𑀜𑁆𑀜𑀸𑀲, 𑀅𑀝𑁆𑀞 𑀘𑀽𑀴𑀦𑁆𑀢𑀭𑁂 𑀧𑀤𑀸.

‘‘𑀫𑀳𑀦𑁆𑀢𑀭𑁂 𑀧𑀦𑁆𑀦𑀭𑀲, 𑀅𑀝𑁆𑀞𑀸𑀭𑀲 𑀢𑀢𑁄 𑀧𑀭𑁂;

𑀢𑁂𑀯𑀻𑀲 𑀧𑀤𑀲𑀢𑀁 𑀏𑀢𑀁, 𑀲𑀫𑁆𑀧𑀬𑁄𑀕𑁂 𑀦 𑀮𑀩𑁆𑀪𑀢𑀻’’𑀢𑀺.

𑀥𑀫𑁆𑀫𑀸𑀬𑀢𑀦𑀜𑁆𑀳𑀺 ¶ 𑀭𑀽𑀧𑀦𑀺𑀩𑁆𑀩𑀸𑀦𑀫𑀺𑀲𑁆𑀲𑀓𑀢𑁆𑀢𑀸 𑀢𑀲𑁆𑀫𑀺𑀁 𑀅𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀺𑀜𑁆𑀜𑀸𑀡𑁂𑀦𑀧𑀺 𑀦 𑀲𑀓𑁆𑀓𑀸 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 ¶ 𑀯𑀢𑁆𑀢𑀼𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀏𑀢𑀸𑀦𑀺 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀇𑀥 𑀦 𑀕𑀳𑀺𑀢𑀸𑀦𑀺. 𑀲𑁂𑀲𑀸𑀦𑀺 𑀔𑀦𑁆𑀥𑀸𑀤𑀻𑀦𑀺 𑀬𑀼𑀚𑁆𑀚𑀦𑁆𑀢𑀻𑀢𑀺 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀏𑀓𑁂𑀓𑀯𑀲𑁂𑀦 𑀘 𑀲𑀫𑁄𑀥𑀸𑀦𑁂𑀦 𑀘 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑁂𑀲𑀼 𑀧𑀜𑁆𑀳𑁂𑀲𑀼, 𑀧𑀞𑀫𑁂 𑁋 𑀏𑀓𑁂𑀦𑀸𑀬𑀢𑀦𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀓𑁂𑀳𑀺𑀘𑀻𑀢𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺.

𑁨𑁨𑁯. 𑀤𑀼𑀢𑀺𑀬𑁂 𑁋 𑀢𑀻𑀳𑀻𑀢𑀺 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺. 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺. 𑀇𑀢𑀭𑁂𑀧𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀇𑀢𑀭𑁂𑀳𑀺. 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀭𑀽𑀧𑀲𑁆𑀲 𑀯𑀺𑀧𑁆𑀧𑀬𑁄𑀕𑁂 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀅𑀭𑀽𑀧𑀁, 𑀅𑀭𑀽𑀧𑀲𑁆𑀲 𑀯𑀺𑀧𑁆𑀧𑀬𑁄𑀕𑁂 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀢𑀢𑀺𑀬𑀧𑀜𑁆𑀳𑁄 𑀉𑀢𑁆𑀢𑀸𑀦𑀢𑁆𑀣𑁄𑀯.

𑁨𑁩𑁧. 𑀘𑀢𑀼𑀢𑁆𑀣𑁂 𑁋 ‘𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’𑀢𑀺𑀆𑀤𑀺𑀁 𑀅𑀯𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀔𑀦𑁆𑀥𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀢𑁄𑀧𑀺 𑀏𑀯𑀭𑀽𑀧𑁂𑀲𑀼 𑀧𑀜𑁆𑀳𑁂𑀲𑀼 𑀏𑀲𑁂𑀯 𑀦𑀬𑁄. 𑀆𑀤𑀺𑀧𑀜𑁆𑀳𑀲𑁆𑀫𑀺𑀜𑁆𑀳𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀭𑀢𑁄 𑀧𑀸𑀴𑀺 𑀲𑀁𑀔𑀺𑀢𑁆𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀣 𑀧𑀦 𑀦𑀸𑀢𑀺𑀧𑀸𑀓𑀝𑀸 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫.

𑁨𑁩𑁪. 𑀲𑁄𑀴𑀲𑀳𑀺 𑀥𑀸𑀢𑀽𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀸𑀯 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀙𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀤𑀲𑀳𑀺 𑀘 𑀭𑀽𑀧𑀥𑀸𑀢𑀽𑀳𑀺. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁩𑁫. 𑀢𑀻𑀳𑀺 ¶ 𑀔𑀦𑁆𑀥𑁂𑀳𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺. 𑀏𑀓𑀸𑀬 𑀥𑀸𑀢𑀼𑀬𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀲𑀫𑀼𑀤𑀬𑀫𑀕𑁆𑀕𑀸𑀦𑀜𑁆𑀳𑀺 𑀅𑀜𑁆𑀜𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀏𑀓𑁂𑀦𑀸𑀬𑀢𑀦𑁂𑀦𑀸𑀢𑀺 𑀥𑀫𑁆𑀫𑀸𑀬𑀢𑀦𑁂𑀦. 𑀏𑀓𑀸𑀬 ¶ 𑀥𑀸𑀢𑀼𑀬𑀸𑀢𑀺 𑀥𑀫𑁆𑀫𑀥𑀸𑀢𑀼𑀬𑀸. 𑀏𑀢𑁂𑀲𑀼 𑀳𑀺 𑀢𑀁 𑀲𑀘𑁆𑀘𑀤𑁆𑀯𑀬𑀁 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁.

𑁨𑁩𑁮. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀜𑁆𑀳𑁂 𑁋 𑀢𑀻𑀳𑀻𑀢𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀳𑀺. 𑀏𑀓𑀸𑀬 𑀥𑀸𑀢𑀼𑀬𑀸𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘. 𑀙𑀳𑀺 𑀥𑀸𑀢𑀽𑀳𑀻𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑀺.

𑁨𑁪𑁫. 𑀭𑀽𑀧𑀪𑀯𑀧𑀜𑁆𑀳𑁂 𑁋 𑀲𑀩𑁆𑀩𑁂𑀲𑀫𑁆𑀧𑀺 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀅𑀭𑀽𑀧𑀸𑀬𑀢𑀦𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀬 𑀦 𑀓𑁂𑀳𑀺𑀘𑀻𑀢𑀺 ¶ 𑀯𑀼𑀢𑁆𑀢𑀁. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀧𑀦 𑀦𑀢𑁆𑀣𑀺𑀢𑀸𑀬 𑀢𑀻𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁.

𑁨𑁫𑁬. 𑀅𑀥𑀺𑀫𑁄𑀓𑁆𑀔𑀧𑀜𑁆𑀳𑁂 𑁋 𑀤𑁆𑀯𑀻𑀳𑀺 𑀥𑀸𑀢𑀽𑀳𑀻𑀢𑀺 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀧𑀦𑁆𑀦𑀭𑀲𑀳𑀻𑀢𑀺 𑀲𑁂𑀲𑀸𑀳𑀺 𑀤𑀲𑀳𑀺 𑀭𑀽𑀧𑀥𑀸𑀢𑀽𑀳𑀺, 𑀧𑀜𑁆𑀘𑀳𑀺 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺.

𑁨𑁫𑁭. 𑀓𑀼𑀲𑀮𑀧𑀜𑁆𑀳𑁂 𑁋 𑀓𑀼𑀲𑀮𑁂𑀳𑀺 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀕𑀳𑀺𑀢𑀢𑁆𑀢𑀸 𑀲𑀫𑁆𑀧𑀬𑁄𑀕𑁄 𑀧𑀝𑀺𑀓𑁆𑀔𑀺𑀢𑁆𑀢𑁄.

𑁨𑁫𑁮. 𑀯𑁂𑀤𑀦𑀸𑀢𑁆𑀢𑀺𑀓𑀧𑀜𑁆𑀳𑁂 𑁋 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦𑁂𑀯. 𑀧𑀦𑁆𑀦𑀭𑀲𑀳𑀻𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀽𑀳𑀺 𑀘𑁂𑀯 𑀭𑀽𑀧𑀥𑀸𑀢𑀽𑀳𑀺 𑀘. 𑀏𑀓𑀸𑀤𑀲𑀳𑀻𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀭𑀽𑀧𑀥𑀸𑀢𑀽𑀳𑀺.

𑁨𑁬𑁨. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀧𑀜𑁆𑀳𑁂 𑁋 𑀧𑀜𑁆𑀘𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺. 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀧𑀜𑁆𑀳𑁂 𑁋 𑀙𑀳𑀻𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑀺. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀧𑀜𑁆𑀳𑁂 𑁋 𑀧𑀦𑁆𑀦𑀭𑀲𑀳𑀻𑀢𑀺 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀲𑀤𑁆𑀥𑀺𑀁 𑀭𑀽𑀧𑀥𑀸𑀢𑀽𑀳𑀺. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀧𑀜𑁆𑀳𑁂 𑁋 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀘𑀸𑀭𑀜𑁆𑀳𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀦𑀸𑀫. 𑀧𑀻𑀢𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀧𑀻𑀢𑀺𑀲𑀳𑀕𑀢𑀸. 𑀢𑀢𑁆𑀣 𑀯𑀺𑀘𑀸𑀭𑁄 𑀯𑀺𑀘𑀸𑀭𑁂𑀦, 𑀧𑀻𑀢𑀺 𑀘 𑀧𑀻𑀢𑀺𑀬𑀸 𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁄𑀴𑀲𑀳𑀻𑀢𑀺 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑁂𑀯. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀧𑀜𑁆𑀳𑁂 ¶ ¶ 𑁋 𑀏𑀓𑀸𑀬 𑀥𑀸𑀢𑀼𑀬𑀸𑀢𑀺 𑀫𑀦𑁄𑀥𑀸𑀢𑀼𑀬𑀸. 𑀲𑀼𑀔𑀲𑀳𑀕𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀘 𑀯𑁂𑀤𑀦𑀸𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀯. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀤𑀬𑁄 𑀓𑀼𑀲𑀮𑀲𑀤𑀺𑀲𑀸𑀯.

𑁨𑁭𑁧. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀯𑀺𑀧𑀸𑀓𑀥𑀫𑁆𑀫𑀲𑀤𑀺𑀲𑀁. 𑀏𑀓𑀸𑀬 𑀥𑀸𑀢𑀼𑀬𑀸𑀢𑀺 𑀥𑀫𑁆𑀫𑀥𑀸𑀢𑀼𑀬𑀸. 𑀓𑁂𑀳𑀺𑀘𑀻𑀢𑀺 𑀬𑁂 𑀢𑀢𑁆𑀣 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀢𑁂𑀳𑀺. 𑀥𑀫𑁆𑀫𑀥𑀸𑀢𑀼 𑀧𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀙𑀦𑁆𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀞𑀫𑀧𑀝𑀺𑀓𑁆𑀔𑁂𑀧𑀫𑁂𑀯 𑀪𑀚𑀢𑀺. 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀤𑀬𑁄 𑀓𑀼𑀲𑀮𑀲𑀤𑀺𑀲𑀸𑀯.

𑁨𑁭𑁩. 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑁋 𑀧𑀜𑁆𑀘𑀳𑀺 𑀥𑀸𑀢𑀽𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺. 𑀢𑀸𑀦𑀺 𑀳𑀺 𑀏𑀓𑀦𑁆𑀢𑁂𑀦 𑀉𑀧𑁆𑀧𑀸𑀤𑀺𑀥𑀫𑁆𑀫𑀪𑀽𑀢𑀸𑀦𑁂𑀯, 𑀉𑀧𑁆𑀧𑀦𑁆𑀦𑀓𑁄𑀝𑁆𑀞𑀸𑀲𑀫𑁆𑀧𑀺 𑀧𑀦 𑀪𑀚𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀤𑀬𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀲𑀤𑀺𑀲𑀸𑀯 ¶ . 𑀳𑁂𑀢𑀼𑀆𑀤𑀬𑁄 𑀲𑀫𑀼𑀤𑀬𑀲𑀤𑀺𑀲𑀸𑀯. 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽𑀧𑀺 𑀧𑀻𑀢𑀺𑀲𑀳𑀕𑀢𑀲𑀤𑀺𑀲𑀸𑀯. 𑀢𑀣𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸. 𑀅𑀦𑀼𑀧𑀸𑀤𑀺𑀦𑁆𑀦𑀸 𑀅𑀦𑀼𑀧𑁆𑀧𑀦𑁆𑀦𑀲𑀤𑀺𑀲𑀸𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸.

𑁭. 𑀲𑀢𑁆𑀢𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁦𑁬. 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀁 𑀪𑀸𑀚𑁂𑀢𑀼𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀭𑀺𑀤𑀁 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀜𑁆𑀘 𑀅𑀜𑁆𑀜𑀸𑀦𑀺 𑀘 𑀏𑀯𑀭𑀽𑀧𑀸𑀦𑀺 𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑀸 ¶ 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂 𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀘𑀢𑁆𑀢𑀸𑀭𑁄 ¶ 𑀔𑀦𑁆𑀥𑀸𑀬𑀢𑀦𑀜𑁆𑀘 𑀏𑀓𑀁,

𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸 𑀥𑀸𑀢𑀼𑀧𑀤𑀸𑀦𑀺 𑀲𑀢𑁆𑀢;

𑀢𑀬𑁄 𑀧𑀝𑀺𑀘𑁆𑀘𑀸 𑀅𑀣 𑀨𑀲𑁆𑀲𑀲𑀢𑁆𑀢𑀓𑀁,

𑀢𑀺𑀓𑁂 𑀢𑀬𑁄 𑀲𑀢𑁆𑀢 𑀫𑀳𑀦𑁆𑀢𑀭𑁂 𑀘.

‘‘𑀏𑀓𑀁 𑀲𑀯𑀺𑀢𑀓𑁆𑀓𑀁, 𑀲𑀯𑀺𑀘𑀸𑀭𑀫𑁂𑀓𑀁;

𑀬𑀼𑀢𑁆𑀢𑀁 𑀉𑀧𑁂𑀓𑁆𑀔𑀸𑀬 𑀘 𑀏𑀓𑀫𑁂𑀯𑀸’’𑀢𑀺.

𑀧𑀭𑀺𑀬𑁄𑀲𑀸𑀦𑁂 𑁋 𑀔𑀦𑁆𑀥𑀸 𑀘𑀢𑀼𑀭𑁄𑀢𑀺𑀆𑀤𑀺𑀦𑀸𑀧𑀺 𑀅𑀬𑀫𑁂𑀯𑀢𑁆𑀣𑁄 𑀲𑀗𑁆𑀕𑀳𑀺𑀢𑁄. 𑀢𑀢𑁆𑀣 𑀬𑀸𑀦𑀺 𑀧𑀤𑀸𑀦𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀢𑀸𑀦𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀓𑀸 𑀧𑀜𑁆𑀳𑀸 𑀓𑀢𑀸. 𑀢𑁂𑀲𑀼 𑀏𑀯𑀁 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀜𑁆𑀳𑁂 𑀢𑀸𑀯 𑁋 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀲𑀢𑁆𑀢𑀳𑀻𑀢𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀓𑁂𑀳𑀺𑀘𑀻𑀢𑀺 𑀥𑀫𑁆𑀫𑀸𑀬𑀢𑀦𑁂 𑀯𑁂𑀤𑀦𑀸𑀤𑀻𑀳𑀺. 𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀜𑁆𑀳𑁂 ¶ 𑁋 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀻𑀢𑀺 𑀢𑁂 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑀁 𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀸, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀢𑁂𑀳𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀆𑀬𑀢𑀦𑁂𑀳𑀺 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀓𑀸𑀬 𑀥𑀸𑀢𑀼𑀬𑀸𑀢𑀺 𑀬𑀸 𑀬𑀸 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀸 𑀳𑁄𑀢𑀺 𑀢𑀸𑀬 𑀢𑀸𑀬.

𑁩𑁦𑁯. 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀧𑀜𑁆𑀳𑁂 𑁋 𑀧𑀜𑁆𑀘𑀳𑀻𑀢𑀺 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀳𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁮. 𑀅𑀝𑁆𑀞𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁭. 𑀇𑀤𑀸𑀦𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀁 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀼𑀘𑁆𑀙𑀸 𑀫𑁄𑀖𑀧𑀼𑀘𑁆𑀙𑀸𑀯 ¶ . 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀜𑁆𑀘, 𑀢𑀲𑁆𑀲 𑀘 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀲𑀫𑁆𑀧𑀬𑁄𑀕𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀧𑀼𑀘𑁆𑀙𑀸𑀬 𑀫𑁄𑀖𑀢𑁆𑀢𑀸 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀦𑀢𑁆𑀣𑀺 𑀦𑀢𑁆𑀣𑀺𑀇𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁯. 𑀦𑀯𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁯. 𑀇𑀤𑀸𑀦𑀺 ¶ 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀁 𑀪𑀸𑀚𑁂𑀢𑀼𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 ¶ 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀧𑀼𑀦 𑀢𑀲𑁆𑀲𑁂𑀯 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀁 𑀭𑀽𑀧𑁂𑀦 𑀯𑀸 𑀭𑀽𑀧𑀫𑀺𑀲𑁆𑀲𑀓𑁂𑀳𑀺 𑀯𑀸 𑀲𑀩𑁆𑀩𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀯𑀸 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀦 𑀬𑀼𑀚𑁆𑀚𑀢𑀺. 𑀭𑀽𑀧𑁂𑀦 𑀳𑀺 𑀭𑀽𑀧𑀫𑀺𑀲𑁆𑀲𑀓𑁂𑀦 𑀯𑀸 𑀅𑀜𑁆𑀜𑁂𑀲𑀁 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀲𑀩𑁆𑀩𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀲𑀩𑁆𑀩𑁂𑀲𑀁 𑀲𑀫𑁆𑀧𑀬𑁄𑀕𑀸𑀭𑀳𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀕𑀳𑀺𑀢𑀢𑁆𑀢𑀸 𑀅𑀜𑁆𑀜𑀁𑀬𑁂𑀯 𑀦𑀢𑁆𑀣𑀺, 𑀬𑀁 𑀢𑁂𑀦 𑀲𑀳 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑁂𑀬𑁆𑀬. 𑀢𑀲𑁆𑀫𑀸 𑀢𑀣𑀸𑀭𑀽𑀧𑀸𑀦𑀺 𑀧𑀤𑀸𑀦𑀺 𑀇𑀥 𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀅𑀭𑀽𑀧𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀅𑀭𑀽𑀧𑀓𑁆𑀔𑀦𑁆𑀥𑀸 𑀘𑀢𑁆𑀢𑀸𑀭𑁄, 𑀫𑀦𑀸𑀬𑀢𑀦𑀫𑁂𑀯 𑀘;

𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀢𑁆𑀢, 𑀤𑁆𑀯𑁂 𑀲𑀘𑁆𑀘𑀸 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸.

‘‘𑀧𑀘𑁆𑀘𑀬𑁂 𑀤𑁆𑀯𑀸𑀤𑀲 𑀧𑀤𑀸, 𑀢𑀢𑁄 𑀉𑀧𑀭𑀺 𑀲𑁄𑀴𑀲;

𑀢𑀺𑀓𑁂𑀲𑀼 𑀅𑀝𑁆𑀞 𑀕𑁄𑀘𑁆𑀙𑀓𑁂, 𑀢𑁂𑀘𑀢𑁆𑀢𑀸𑀮𑀻𑀲𑀫𑁂𑀯 𑀘.

‘‘𑀫𑀳𑀦𑁆𑀢𑀭𑀤𑀼𑀓𑁂 𑀲𑀢𑁆𑀢, 𑀧𑀤𑀸 𑀧𑀺𑀝𑁆𑀞𑀺𑀤𑀼𑀓𑁂𑀲𑀼 𑀙;

𑀦𑀯𑀫𑀲𑁆𑀲 𑀧𑀤𑀲𑁆𑀲𑁂𑀢𑁂, 𑀦𑀺𑀤𑁆𑀤𑁂𑀲𑁂 𑀲𑀗𑁆𑀕𑀳𑀁 𑀕𑀢𑀸’’𑀢𑀺.

𑀲𑀩𑁆𑀩𑀧𑀜𑁆𑀳𑁂𑀲𑀼 𑀧𑀦 𑀬𑁂 𑀥𑀫𑁆𑀫𑀸 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀸, 𑀢𑁂 𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀇𑀢𑀭𑁂 𑀢𑀬𑁄 𑀔𑀦𑁆𑀥𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀧𑀼𑀦 𑀢𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀫𑁆𑀧𑀬𑀼𑀢𑁆𑀢𑁄. 𑀲𑁄 𑀢𑁂𑀳𑀺 𑀲𑀜𑁆𑀜𑀸𑀤𑀻𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺, 𑀏𑀓𑁂𑀦 𑀫𑀦𑀸𑀬𑀢𑀦𑁂𑀦, 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀏𑀓𑀲𑁆𑀫𑀺𑀁 𑀥𑀫𑁆𑀫𑀸𑀬𑀢𑀦𑁂, 𑀥𑀫𑁆𑀫𑀥𑀸𑀢𑀼𑀬𑀸 𑀘, 𑀓𑁂𑀳𑀺𑀘𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑁂𑀯 𑀲𑀫𑁆𑀧𑀬𑀼𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁧𑁦. 𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁫𑁩. 𑀇𑀤𑀸𑀦𑀺 ¶ 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀁 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀸 𑀉𑀤𑁆𑀥𑀝𑀸, 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀢𑁂𑀬𑁂𑀯 𑀉𑀤𑁆𑀥𑀝𑀸. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀧𑀦 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸 ¶ 𑀧𑀤𑀸𑀦𑀺 𑀅𑀜𑁆𑀜𑀸𑀬 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀸𑀦𑀺. 𑀢𑀢𑁆𑀣 𑀬𑀁 𑀧𑀤𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁, 𑀢𑀁 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁, 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀯𑁂𑀤𑀦𑀸𑀤𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀘 𑀭𑀽𑀧𑀓𑁆𑀔𑀦𑁆𑀥𑁄 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀫𑁂𑀯. 𑀲𑁄 𑀭𑀽𑀧𑀓𑁆𑀔𑀦𑁆𑀥𑁄 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀏𑀓𑁂𑀦 𑀫𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼, 𑀓𑁂𑀳𑀺𑀘𑀺 𑀯𑁂𑀤𑀦𑀸𑀤𑀻𑀳𑀺 𑀥𑀫𑁆𑀫𑁂𑀳𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁧𑁧. 𑀏𑀓𑀸𑀤𑀲𑀫𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀇𑀤𑀸𑀦𑀺 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀁 𑀪𑀸𑀚𑁂𑀢𑀼𑀁 𑀲𑀫𑀼𑀤𑀬𑀲𑀘𑁆𑀘𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀲𑀫𑀼𑀤𑀬𑀲𑀘𑁆𑀘𑀸𑀤𑀬𑁄𑀯 𑀥𑀫𑁆𑀫𑀸 𑀉𑀤𑁆𑀥𑀝𑀸, 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀢𑁂𑀬𑁂𑀯 𑀉𑀤𑁆𑀥𑀝𑀸. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀧𑀦 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸 𑀧𑀤𑀸𑀦𑀺 𑀅𑀜𑁆𑀜𑀸𑀬 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀸𑀦𑀺. 𑀢𑀢𑁆𑀣 𑀬𑁂 𑀥𑀫𑁆𑀫𑀸 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀯𑀸 𑀯𑀺𑀧𑁆𑀧𑀬𑁄𑀕𑁄 𑀯𑀸 𑀳𑁄𑀢𑀺, 𑀢𑁂𑀲𑀁 𑀯𑀲𑁂𑀦 ¶ 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀢𑀸𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑁂 𑀘 𑀲𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺, 𑀏𑀓𑁂𑀦 𑀫𑀦𑀸𑀬𑀢𑀦𑁂𑀦, 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀲𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀏𑀓𑁂𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀤𑀲𑀳𑀺 𑀭𑀽𑀧𑀸𑀬𑀢𑀦𑁂𑀳𑀺, 𑀭𑀽𑀧𑀥𑀸𑀢𑀽𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑀲𑁆𑀫𑀺𑀁 𑀥𑀫𑁆𑀫𑀸𑀬𑀢𑀦𑁂 ¶ 𑀥𑀫𑁆𑀫𑀥𑀸𑀢𑀼𑀬𑀸 𑀘, 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁧𑁨. 𑀤𑁆𑀯𑀸𑀤𑀲𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀇𑀤𑀸𑀦𑀺 ¶ 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀸 𑀉𑀤𑁆𑀥𑀝𑀸, 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀢𑁂𑀬𑁂𑀯 𑀉𑀤𑁆𑀥𑀝𑀸. 𑀢𑀢𑁆𑀣 𑀬𑁂 𑀥𑀫𑁆𑀫𑀸 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀬𑁂𑀳𑀺 𑀲𑀗𑁆𑀕𑀳𑁄 𑀯𑀸 𑀅𑀲𑀗𑁆𑀕𑀳𑁄 𑀯𑀸 𑀳𑁄𑀢𑀺, 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀳𑀺 𑀲𑀜𑁆𑀜𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀢𑁂 𑀲𑀜𑁆𑀜𑀸𑀤𑀬𑁄 𑀢𑀻𑀳𑀺 𑀲𑀜𑁆𑀜𑀸𑀤𑀺𑀓𑁆𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀺 𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺, 𑀥𑀫𑁆𑀫𑀥𑀸𑀢𑀼𑀬𑀸 𑀘𑁂𑀯, 𑀲𑀢𑁆𑀢𑀳𑀺 𑀘 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻𑀢𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀲𑁂𑀲𑀸𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑁧𑁩. 𑀢𑁂𑀭𑀲𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁪𑁮. 𑀇𑀤𑀸𑀦𑀺 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀁 ¶ 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂 𑀧𑀜𑁆𑀘𑀫𑁂 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀧𑀜𑁆𑀳𑀸 𑀥𑀫𑁆𑀫𑀸, 𑀬𑁂 𑀘 𑀅𑀭𑀽𑀧𑀪𑀯𑁂𑀦 𑀲𑀤𑀺𑀲𑀸, 𑀢𑁂𑀬𑁂𑀯 𑀉𑀤𑁆𑀥𑀝𑀸. 𑀲𑁂𑀲𑀸 𑀧𑀦 𑀦 𑀭𑀼𑀳𑀦𑁆𑀢𑀻𑀢𑀺 𑀦 𑀉𑀤𑁆𑀥𑀝𑀸. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 ¶ 𑀔𑀦𑁆𑀥𑀸𑀤𑀺𑀯𑀲𑁂𑀦 𑀧𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑀸𑀦𑀺 𑀧𑀤𑀸𑀦𑀺 𑀭𑀼𑀳𑀦𑁆𑀢𑀺, 𑀢𑀸𑀦𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑁂𑀳𑀺 𑀲𑀤𑁆𑀥𑀺𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀉𑀤𑁆𑀥𑀝𑀸𑀦𑀺. 𑀢𑀢𑁆𑀣 𑀬𑁂 𑀥𑀫𑁆𑀫𑀸 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀢𑀸𑀯 𑀯𑀺𑀜𑁆𑀜𑀸𑀡𑀫𑁂𑀯 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁. 𑀢𑀁 𑀯𑁂𑀤𑀦𑀸𑀤𑀻𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀯𑁂𑀤𑀦𑀸𑀤𑀻𑀳𑁂𑀯 𑀲𑀫𑁆𑀧𑀬𑀼𑀢𑁆𑀢𑀁. 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀤𑀲𑀳𑀺 𑀭𑀽𑀧𑀸𑀬𑀢𑀦𑀭𑀽𑀧𑀥𑀸𑀢𑀽𑀳𑀺, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 ¶ 𑀘 𑀭𑀽𑀧𑀦𑀺𑀩𑁆𑀩𑀸𑀦𑀥𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁. 𑀢𑀁 𑀲𑀦𑁆𑀥𑀸𑀬 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸.

𑁧𑁪. 𑀘𑀼𑀤𑁆𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁫𑁬. 𑀇𑀤𑀸𑀦𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀁 𑀪𑀸𑀚𑁂𑀢𑀼𑀁 𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁂𑀲𑀁 𑀧𑀤𑀸𑀦𑀁 𑀯𑀺𑀧𑁆𑀧𑀬𑁄𑀕𑁄 𑀦 𑀭𑀼𑀳𑀢𑀺, 𑀢𑀸𑀦𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦 𑀕𑀳𑀺𑀢𑀸𑀦𑀺. 𑀓𑀸𑀦𑀺 𑀧𑀦 𑀢𑀸𑀦𑀻𑀢𑀺? 𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀺. 𑀥𑀫𑁆𑀫𑀸𑀬𑀢𑀦𑀲𑁆𑀲 𑀳𑀺 𑀔𑀦𑁆𑀥𑀸𑀤𑀻𑀲𑀼 𑀏𑀓𑁂𑀦𑀸𑀧𑀺 𑀯𑀺𑀧𑁆𑀧𑀬𑁄𑀕𑁄 𑀦 𑀭𑀼𑀳𑀢𑀺. 𑀥𑀫𑁆𑀫𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀁 𑀇𑀤𑀫𑀼𑀤𑁆𑀤𑀸𑀦𑀁 𑁋

‘‘𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀘;

𑀦𑀸𑀫𑀭𑀽𑀧𑀧𑀤𑀜𑁆𑀘𑁂𑀯, 𑀲𑀴𑀸𑀬𑀢𑀦𑀫𑁂𑀯 𑀘.

‘‘𑀚𑀸𑀢𑀺𑀆𑀤𑀺𑀢𑁆𑀢𑀬𑀁 𑀏𑀓𑀁, 𑀧𑀤𑀁 𑀯𑀻𑀲𑀢𑀺𑀫𑁂 𑀢𑀺𑀓𑁂;

𑀢𑀺𑀓𑀸𑀯𑀲𑀸𑀦𑀺𑀓𑀁 𑀏𑀓𑀁, 𑀲𑀢𑁆𑀢 𑀘𑀽𑀴𑀦𑁆𑀢𑀭𑁂 𑀧𑀤𑀸.

‘‘𑀤𑀲𑁂𑀯 ¶ 𑀕𑁄𑀘𑁆𑀙𑀓𑁂 𑀳𑁄𑀦𑁆𑀢𑀺, 𑀫𑀳𑀦𑁆𑀢𑀭𑀫𑁆𑀳𑀺 𑀘𑀼𑀤𑁆𑀤𑀲;

𑀙 𑀧𑀤𑀸𑀦𑀺 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑀸𑀦𑀺𑀧𑀺 𑀲𑀫𑀸𑀲𑀢𑁄;

𑀧𑀤𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺, 𑀘𑀢𑁆𑀢𑀸𑀮𑀻𑀲𑀜𑁆𑀘 𑀲𑀢𑁆𑀢 𑀘𑀸’’𑀢𑀺.

𑀧𑀭𑀺𑀬𑁄𑀲𑀸𑀦𑁂 ¶ 𑀘 𑁋 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀽𑀢𑀺 𑀕𑀸𑀣𑀸𑀧𑀺 𑀇𑀫𑀫𑁂𑀯𑀢𑁆𑀣𑀁 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀸. 𑀇𑀫𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀺. 𑀢𑁂𑀲𑀼 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 ¶ 𑀘 𑁋

𑀥𑀸𑀢𑀼𑀧𑁆𑀧𑀪𑁂𑀤𑀓𑀼𑀲𑀮𑁄, 𑀬𑀁 𑀥𑀸𑀢𑀼𑀓𑀣𑀁 𑀢𑀣𑀸𑀕𑀢𑁄 𑀆𑀳;

𑀢𑀲𑁆𑀲𑀸 𑀦𑀬𑀫𑀼𑀔𑀪𑁂𑀤-𑀧𑁆𑀧𑀓𑀸𑀲𑀦𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀺.

𑀇𑀫𑀺𑀦𑀸 𑀦𑀬𑀫𑀼𑀔𑀪𑁂𑀤-𑀧𑁆𑀧𑀓𑀸𑀲𑀦𑁂𑀦 𑀳𑀺 𑀯𑀺𑀪𑀸𑀯𑀺𑀦𑀸 𑀲𑀓𑁆𑀓𑀸;

𑀜𑀸𑀢𑀼𑀁 𑀲𑀩𑁆𑀩𑁂𑀧𑀺 𑀦𑀬𑀸, 𑀲𑀗𑁆𑀔𑁂𑀧𑀓𑀣𑀸𑀯 𑀇𑀢𑀺 𑀯𑀼𑀢𑁆𑀢𑀸.

𑀏𑀓𑁂𑀓𑀲𑁆𑀲 𑀧𑀦 𑀲𑀘𑁂, 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀫𑁂𑀯 𑀪𑀸𑀲𑁂𑀬𑁆𑀬𑀁;

𑀯𑀘𑀦𑀜𑁆𑀘 𑀅𑀢𑀺𑀯𑀺𑀬 𑀩𑀳𑀼𑀁, 𑀪𑀯𑁂𑀬𑁆𑀬 𑀅𑀢𑁆𑀣𑁄 𑀘 𑀅𑀯𑀺𑀲𑁂𑀲𑁄.

𑀇𑀢𑀺 𑀊𑀦𑀪𑀸𑀡𑀯𑀸𑀭𑀤𑁆𑀯𑀬𑀸𑀬, 𑀬𑀁 𑀢𑀦𑁆𑀢𑀺𑀬𑀸 𑀫𑀬𑀸 𑀏𑀢𑀁;

𑀓𑀼𑀭𑀼𑀦𑀸 𑀧𑀢𑁆𑀢𑀁 𑀧𑀼𑀜𑁆𑀜𑀁, 𑀲𑀼𑀔𑀸𑀬 𑀢𑀁 𑀳𑁄𑀢𑀼 𑀮𑁄𑀓𑀲𑁆𑀲𑀸𑀢𑀺.

𑀥𑀸𑀢𑀼𑀓𑀣𑀸-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺-𑀅𑀝𑁆𑀞𑀓𑀣𑀸

𑀦𑀺𑀧𑀼𑀡𑀢𑁆𑀣𑀁 ¶ ¶ ¶ 𑀧𑀓𑀭𑀡𑀁, 𑀥𑀸𑀢𑀼𑀪𑁂𑀤𑀧𑁆𑀧𑀓𑀸𑀲𑀦𑁄;

𑀲𑀢𑁆𑀣𑀸 𑀥𑀸𑀢𑀼𑀓𑀣𑀁 𑀦𑀸𑀫, 𑀤𑁂𑀲𑀬𑀺𑀢𑁆𑀯𑀸 𑀲𑀼𑀭𑀸𑀮𑀬𑁂.

𑀅𑀦𑀦𑁆𑀢𑀭𑀁 𑀢𑀲𑁆𑀲 𑀚𑀺𑀦𑁄, 𑀧𑀜𑁆𑀜𑀢𑁆𑀢𑀺𑀪𑁂𑀤𑀤𑀻𑀧𑀦𑀁;

𑀆𑀳 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁, 𑀬𑀁 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄.

𑀢𑀲𑁆𑀲𑀸 𑀲𑀁𑀯𑀡𑁆𑀡𑀦𑁄𑀓𑀸𑀲𑁄, 𑀬𑀲𑁆𑀫𑀸 𑀤𑀸𑀦𑀺 𑀉𑀧𑀸𑀕𑀢𑁄;

𑀢𑀲𑁆𑀫𑀸 𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀙 ¶ 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀔𑀦𑁆𑀥𑀧𑀜𑁆𑀜𑀢𑁆𑀢𑀺…𑀧𑁂… 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀅𑀬𑀁 𑀢𑀸𑀯 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀤𑁆𑀤𑁂𑀲𑁄. 𑀢𑀢𑁆𑀣 𑀙𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀬𑁂 𑀥𑀫𑁆𑀫𑁂 𑀇𑀥 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 𑀢𑁂𑀲𑀁 𑀕𑀡𑀦𑀯𑀲𑁂𑀦 𑀲𑀁𑀔𑁂𑀧𑀢𑁄 𑀧𑀜𑁆𑀜𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 ‘‘𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀝𑁆𑀞𑀸𑀦𑁂 𑀧𑀜𑁆𑀜𑀸𑀧𑀦𑀸 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞’’𑀦𑁆𑀢𑀺 (𑀧𑀸𑀭𑀸. 𑁨𑁬𑁯) 𑀆𑀕𑀢𑀝𑁆𑀞𑀸𑀦𑁂 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀙 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀳𑀺 𑀙 𑀧𑀜𑁆𑀜𑀸𑀧𑀦𑀸, 𑀙 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸𑀢𑀺𑀧𑀺; 𑀙 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸𑀢𑀺𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑀫𑁂𑀯. 𑀦𑀸𑀫𑀧𑀜𑁆𑀜𑀢𑁆𑀢𑀺 𑀳𑀺 𑀢𑁂 𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑀺𑀧𑀺, 𑀢𑁂𑀦 𑀢𑁂𑀦 𑀓𑁄𑀝𑁆𑀞𑀸𑀲𑁂𑀦 𑀞𑀧𑁂𑀢𑀺𑀧𑀺.

𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺 𑀧𑀦 𑀲𑀁𑀔𑁂𑀧𑀢𑁄 𑀢𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀢𑀢𑁆𑀣 𑀔𑀦𑁆𑀥𑀸𑀦𑀁 ‘𑀔𑀦𑁆𑀥𑀸’𑀢𑀺 𑀧𑀜𑁆𑀜𑀸𑀧𑀦𑀸 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀆𑀬𑀢𑀦𑀸𑀦𑀁 𑀆𑀬𑀢𑀦𑀸𑀦𑀻𑀢𑀺, 𑀥𑀸𑀢𑀽𑀦𑀁 𑀥𑀸𑀢𑀼𑀬𑁄𑀢𑀺, 𑀲𑀘𑁆𑀘𑀸𑀦𑀁 𑀲𑀘𑁆𑀘𑀸𑀦𑀻𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺, 𑀧𑀼𑀕𑁆𑀕𑀮𑀸𑀦𑀁 𑀧𑀼𑀕𑁆𑀕𑀮𑀸𑀢𑀺 𑀧𑀜𑁆𑀜𑀸𑀧𑀦𑀸 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀧𑀸𑀴𑀺𑀫𑀼𑀢𑁆𑀢𑀓𑁂𑀦 ¶ 𑀧𑀦 𑀅𑀝𑁆𑀞𑀓𑀣𑀸𑀦𑀬𑁂𑀦 𑀅𑀧𑀭𑀸𑀧𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 ¶ 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀲𑁆𑀲𑁂𑀯 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁄 𑀲𑀫𑁆𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀜𑁆𑀜𑀸𑀧𑀦𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀲𑀺𑀤𑁆𑀥𑀲𑁆𑀲 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑀲𑁆𑀲 𑀧𑀜𑁆𑀜𑀸𑀧𑀦𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀅𑀦𑀼𑀧𑀮𑀩𑁆𑀪𑀦𑁂𑀬𑁆𑀬𑀲𑁆𑀲 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀲𑁆𑀲𑁂𑀯 𑀧𑀜𑁆𑀘𑀫𑀲𑀘𑁆𑀘𑀸𑀤𑀺𑀓𑀲𑁆𑀲 𑀢𑀺𑀢𑁆𑀣𑀺𑀬𑀸𑀦𑀁 𑀅𑀡𑀼𑀧𑀓𑀢𑀺𑀧𑀼𑀭𑀺𑀲𑀸𑀤𑀺𑀓𑀲𑁆𑀲 𑀯𑀸 𑀧𑀜𑁆𑀜𑀸𑀧𑀦𑀸𑀧𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯. 𑀲𑀸 𑀧𑀦 𑀲𑀸𑀲𑀦𑀸𑀯𑀘𑀭𑀸 𑀦 𑀳𑁄𑀢𑀻𑀢𑀺 𑀇𑀥 𑀦 𑀕𑀳𑀺𑀢𑀸. 𑀇𑀢𑀺 𑀇𑀫𑁂𑀲𑀁 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀸𑀦𑀁 𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. ‘𑀢𑁂𑀯𑀺𑀚𑁆𑀚𑁄’, ‘𑀙𑀴𑀪𑀺𑀜𑁆𑀜𑁄’𑀢𑀺𑀆𑀤𑀻𑀲𑀼 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘 𑀯𑀺𑀚𑁆𑀚𑀫𑀸𑀦𑀸, 𑀧𑀼𑀕𑁆𑀕𑀮𑁄 𑀅𑀯𑀺𑀚𑁆𑀚𑀫𑀸𑀦𑁄. 𑀢𑀲𑁆𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀲𑁆𑀲𑀸𑀢𑀺 𑀢𑁂𑀯𑀺𑀚𑁆𑀚𑁄, 𑀙 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀁 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀢𑁄 𑀏𑀯𑀭𑀽𑀧𑀸 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. ‘𑀇𑀢𑁆𑀣𑀺𑀭𑀽𑀧𑀁’, ‘𑀧𑀼𑀭𑀺𑀲𑀭𑀽𑀧’𑀦𑁆𑀢𑀺𑀆𑀤𑀻𑀲𑀼 ¶ 𑀧𑀦 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀯𑀺𑀚𑁆𑀚𑀫𑀸𑀦𑀸, 𑀭𑀽𑀧𑀁 𑀯𑀺𑀚𑁆𑀚𑀫𑀸𑀦𑀁. 𑀢𑀲𑁆𑀫𑀸 𑀇𑀢𑁆𑀣𑀺𑀬𑀸 𑀭𑀽𑀧𑀁 𑀇𑀢𑁆𑀣𑀺𑀭𑀽𑀧𑀁, 𑀧𑀼𑀭𑀺𑀲𑀲𑁆𑀲 𑀭𑀽𑀧𑀁 𑀧𑀼𑀭𑀺𑀲𑀭𑀽𑀧𑀦𑁆𑀢𑀺 𑀏𑀯𑀁 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀢𑁄 𑀏𑀯𑀭𑀽𑀧𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀲𑁄𑀢𑀲𑀫𑁆𑀨𑀲𑁆𑀲𑁄𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀲𑁄𑀢𑀸𑀤𑀬𑁄𑀧𑀺 𑀨𑀲𑁆𑀲𑁄𑀧𑀺 𑀯𑀺𑀚𑁆𑀚𑀫𑀸𑀦𑁄𑀬𑁂𑀯. 𑀢𑀲𑁆𑀫𑀸 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄, 𑀘𑀓𑁆𑀔𑀼𑀢𑁄 𑀚𑀸𑀢𑁄 𑀲𑀫𑁆𑀨𑀲𑁆𑀲𑁄, 𑀘𑀓𑁆𑀔𑀼𑀲𑁆𑀲 𑀯𑀸 𑀨𑀮𑀪𑀽𑀢𑁄 𑀲𑀫𑁆𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀏𑀯𑀁 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀢𑁄 𑀏𑀯𑀭𑀽𑀧𑀸 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀔𑀢𑁆𑀢𑀺𑀬𑀧𑀼𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀢𑀺𑀆𑀤𑀻𑀲𑀼 𑀔𑀢𑁆𑀢𑀺𑀬𑀸𑀤𑀬𑁄𑀧𑀺 𑀅𑀯𑀺𑀚𑁆𑀚𑀫𑀸𑀦𑀸, 𑀧𑀼𑀢𑁆𑀢𑁄𑀧𑀺. 𑀢𑀲𑁆𑀫𑀸 𑀔𑀢𑁆𑀢𑀺𑀬𑀲𑁆𑀲 𑀧𑀼𑀢𑁆𑀢𑁄 𑀔𑀢𑁆𑀢𑀺𑀬𑀧𑀼𑀢𑁆𑀢𑁄𑀢𑀺 𑀏𑀯𑀁 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀢𑁄 𑀏𑀯𑀭𑀽𑀧𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀸𑀲𑀼 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄𑀯 𑀧𑀜𑁆𑀜𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺. ‘‘𑀔𑀦𑁆𑀥𑀧𑀜𑁆𑀜𑀢𑁆𑀢𑀺…𑀧𑁂… 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀜𑁆𑀳𑀺 ¶ 𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀧𑀜𑁆𑀜𑀸𑀧𑀺𑀢𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀮𑀩𑁆𑀪𑀢𑀺. ‘‘𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀤𑁂 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀧𑀭𑀢𑁄 𑀧𑀦 ‘𑀢𑁂𑀯𑀺𑀚𑁆𑀚𑁄’, ‘𑀙𑀴𑀪𑀺𑀜𑁆𑀜𑁄’𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀮𑀩𑁆𑀪𑀢𑀻𑀢𑀺.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦 𑀧𑀦 𑀆𑀘𑀭𑀺𑀬𑀦𑀬𑁂𑀦 𑀅𑀧𑀭𑀸𑀧𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺, 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺, 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺, 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺, 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀻𑀢𑀺 ¶ . 𑀢𑀢𑁆𑀣 𑀬𑁄 𑀭𑀽𑀧𑀯𑁂𑀤𑀦𑀸𑀤𑀻𑀳𑀺 𑀏𑀓𑀢𑁆𑀢𑁂𑀦 𑀯𑀸 𑀅𑀜𑁆𑀜𑀢𑁆𑀢𑁂𑀦 𑀯𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀯𑀺𑀬 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑁄𑀧𑀺 𑀭𑀽𑀧𑀯𑁂𑀤𑀦𑀸𑀤𑀺𑀪𑁂𑀤𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 𑀲𑀫𑁆𑀫𑀢𑁄 𑀲𑀢𑁆𑀢𑁄. 𑀢𑀸𑀦𑀺 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀭𑀣𑁄 𑀕𑁂𑀳𑀁 𑀫𑀼𑀝𑁆𑀞𑀺 𑀉𑀤𑁆𑀥𑀦𑀦𑁆𑀢𑀺 𑀘; 𑀢𑁂 𑀢𑁂𑀬𑁂𑀯 𑀭𑀽𑀧𑀸𑀤𑀬𑁄 𑀉𑀧𑀸𑀤𑀸𑀬 𑀖𑀝𑁄 𑀧𑀝𑁄; 𑀘𑀦𑁆𑀤𑀲𑀽𑀭𑀺𑀬𑀧𑀭𑀺𑀯𑀢𑁆𑀢𑀸𑀤𑀬𑁄 𑀉𑀧𑀸𑀤𑀸𑀬 𑀓𑀸𑀮𑁄, 𑀤𑀺𑀲𑀸; 𑀢𑀁 𑀢𑀁 𑀪𑀽𑀢𑀦𑀺𑀫𑀺𑀢𑁆𑀢𑀜𑁆𑀘𑁂𑀯 𑀪𑀸𑀯𑀦𑀸𑀦𑀺𑀲𑀁𑀲𑀜𑁆𑀘 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 𑀲𑀫𑁆𑀫𑀢𑀁 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀉𑀧𑀝𑁆𑀞𑀺𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀜𑁆𑀜𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦. 𑀬𑀸 𑀧𑀦 𑀢𑀲𑁆𑀲𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯.

𑀬𑀸 𑀧𑀞𑀫𑀤𑀼𑀢𑀺𑀬𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺𑀆𑀤𑀺𑀓𑀸, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀉𑀧𑀦𑀺𑀥𑀸𑀬 𑀤𑀻𑀖𑀁 𑀭𑀲𑁆𑀲𑀁, 𑀤𑀽𑀭𑀁, 𑀲𑀦𑁆𑀢𑀺𑀓𑀦𑁆𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸; 𑀅𑀬𑀁 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀅𑀧𑀺𑀘𑁂𑀲𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑁋 𑀢𑀤𑀜𑁆𑀜𑀸𑀧𑁂𑀓𑁆𑀔𑀽𑀧𑀦𑀺𑀥𑀸, 𑀳𑀢𑁆𑀣𑀕𑀢𑀽𑀧𑀦𑀺𑀥𑀸, 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸, 𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸, 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸 ¶ , 𑀧𑀝𑀺𑀪𑀸𑀕𑀽𑀧𑀦𑀺𑀥𑀸, 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸, 𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸𑀢𑀺𑀆𑀤𑀺𑀦𑀸 𑀪𑁂𑀤𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀸.

𑀢𑀢𑁆𑀣 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺𑀆𑀤𑀺𑀓𑀸𑀯 𑀢𑀤𑀜𑁆𑀜𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀢𑀸𑀬 𑀢𑀤𑀜𑁆𑀜𑀸𑀧𑁂𑀓𑁆𑀔𑀽𑀧𑀦𑀺𑀥𑀸 𑀦𑀸𑀫. 𑀙𑀢𑁆𑀢𑀧𑀸𑀡𑀺, 𑀲𑀢𑁆𑀣𑀧𑀸𑀡𑀻𑀢𑀺𑀆𑀤𑀺𑀓𑀸 𑀳𑀢𑁆𑀣𑀕𑀢𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 ¶ 𑀳𑀢𑁆𑀣𑀕𑀢𑀽𑀧𑀦𑀺𑀥𑀸 𑀦𑀸𑀫. 𑀓𑀼𑀡𑁆𑀟𑀮𑀻, 𑀲𑀺𑀔𑀭𑀻, 𑀓𑀺𑀭𑀺𑀝𑀻𑀢𑀺𑀆𑀤𑀺𑀓𑀸 𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸 𑀦𑀸𑀫. 𑀥𑀜𑁆𑀜𑀲𑀓𑀝𑀁, 𑀲𑀧𑁆𑀧𑀺𑀓𑀼𑀫𑁆𑀪𑁄𑀢𑀺𑀆𑀤𑀺𑀓𑀸 𑀲𑀫𑀸𑀭𑁄𑀧𑀺𑀢𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸 𑀦𑀸𑀫. 𑀇𑀦𑁆𑀤𑀲𑀸𑀮𑀕𑀼𑀳𑀸, 𑀧𑀺𑀬𑀗𑁆𑀕𑀼𑀕𑀼𑀳𑀸, 𑀲𑁂𑀭𑀻𑀲𑀓𑀦𑁆𑀢𑀺𑀆𑀤𑀺𑀓𑀸 𑀅𑀯𑀺𑀤𑀽𑀭𑀕𑀢𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸 𑀦𑀸𑀫. 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀉𑀲𑀪𑀕𑀸𑀫𑀻𑀢𑀺𑀆𑀤𑀺𑀓𑀸 𑀧𑀝𑀺𑀪𑀸𑀕𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀧𑀝𑀺𑀪𑀸𑀕𑀽𑀧𑀦𑀺𑀥𑀸 𑀦𑀸𑀫. 𑀧𑀤𑀼𑀫𑀲𑁆𑀲𑀭𑁄, 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺𑀆𑀤𑀺𑀓𑀸 𑀢𑀩𑁆𑀩𑀳𑀼𑀮𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸 𑀦𑀸𑀫. 𑀫𑀡𑀺𑀓𑀝𑀓𑀁, 𑀯𑀚𑀺𑀭𑀓𑀝𑀓𑀦𑁆𑀢𑀺𑀆𑀤𑀺𑀓𑀸 𑀢𑀩𑁆𑀩𑀺𑀲𑀺𑀝𑁆𑀞𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀢𑀸𑀬 𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸 𑀦𑀸𑀫.

𑀬𑀸 𑀧𑀦 𑀢𑁂𑀲𑀁 𑀢𑁂𑀲𑀁 𑀲𑀫𑁄𑀥𑀸𑀦𑀫𑀧𑁂𑀓𑁆𑀔𑀺𑀢𑁆𑀯𑀸 𑀢𑀺𑀤𑀡𑁆𑀟𑀁, 𑀅𑀝𑁆𑀞𑀧𑀤𑀁, 𑀥𑀜𑁆𑀜𑀭𑀸𑀲𑀺, 𑀧𑀼𑀧𑁆𑀨𑀭𑀸𑀲𑀻𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀬𑀸 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂, 𑀢𑀻𑀡𑀺, 𑀘𑀢𑁆𑀢𑀸𑀭𑀻𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 ¶ 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀬𑀸 𑀢𑀁 𑀢𑀁 𑀥𑀫𑁆𑀫𑀲𑀪𑀸𑀯𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀣𑀯𑀻, 𑀢𑁂𑀚𑁄, 𑀓𑀓𑁆𑀔𑀴𑀢𑀸, 𑀉𑀡𑁆𑀳𑀢𑀸𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀬𑀸 𑀧𑀦 𑀲𑀦𑁆𑀢𑀢𑀺𑀯𑀺𑀘𑁆𑀙𑁂𑀤𑀸𑀪𑀸𑀯𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀆𑀲𑀻𑀢𑀺𑀓𑁄, 𑀦𑀸𑀯𑀼𑀢𑀺𑀓𑁄𑀢𑀺𑀆𑀤𑀺𑀓𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀏𑀢𑀸𑀲𑀼 𑀧𑀦 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯. 𑀲𑁂𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘𑁂𑀯, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘 𑀪𑀚𑀦𑁆𑀢𑀺.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦 𑀆𑀘𑀭𑀺𑀬𑀦𑀬𑁂𑀦𑁂𑀯 𑀅𑀧𑀭𑀸𑀧𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺, 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺, 𑀪𑀽𑀫𑀺𑀧𑀜𑁆𑀜𑀢𑁆𑀢𑀺, 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺, 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀻𑀢𑀺. 𑀢𑀢𑁆𑀣 𑀪𑀸𑀡𑀓𑁄, 𑀥𑀫𑁆𑀫𑀓𑀣𑀺𑀓𑁄𑀢𑀺𑀆𑀤𑀺𑀓𑀸 𑀓𑀺𑀘𑁆𑀘𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀓𑀺𑀲𑁄, 𑀣𑀽𑀮𑁄, 𑀧𑀭𑀺𑀫𑀡𑁆𑀟𑀮𑁄, 𑀘𑀢𑀼𑀭𑀲𑁆𑀲𑁄𑀢𑀺𑀆𑀤𑀺𑀓𑀸 𑀲𑀡𑁆𑀞𑀸𑀦𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 ¶ 𑀦𑀸𑀫. 𑀇𑀢𑁆𑀣𑀻, 𑀧𑀼𑀭𑀺𑀲𑁄𑀢𑀺𑀆𑀤𑀺𑀓𑀸 𑀮𑀺𑀗𑁆𑀕𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀮𑀺𑀗𑁆𑀕𑀧𑀜𑁆𑀜𑀢𑀺 𑀦𑀸𑀫. 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀓𑁄𑀲𑀮𑀓𑀸, 𑀫𑀸𑀥𑀼𑀭𑀸𑀢𑀺𑀆𑀤𑀺𑀓𑀸 𑀪𑀽𑀫𑀺𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀺𑀲𑁆𑀲𑁄 ¶ , 𑀦𑀸𑀕𑁄, 𑀲𑀼𑀫𑀦𑁄𑀢𑀺𑀆𑀤𑀺𑀓𑀸 𑀧𑀘𑁆𑀘𑀢𑁆𑀢𑀦𑀸𑀫𑀓𑀭𑀡𑀫𑀢𑁆𑀢𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺𑀆𑀤𑀺𑀓𑀸 𑀅𑀲𑀗𑁆𑀔𑀢𑀥𑀫𑁆𑀫𑀲𑁆𑀲 𑀧𑀜𑁆𑀜𑀸𑀧𑀦𑀸 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀢𑁆𑀣 𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯, 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀁 𑀪𑀚𑀢𑀺. 𑀲𑁂𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁄 𑀦𑀸𑀫.

𑁨. 𑀇𑀤𑀸𑀦𑀺 𑀬𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀉𑀤𑁆𑀤𑁂𑀲𑀯𑀸𑀭𑁂 𑀲𑀗𑁆𑀔𑁂𑀧𑀢𑁄 𑀲𑀭𑀽𑀧𑀤𑀲𑁆𑀲𑀦𑀁 𑀓𑀢𑀁, 𑀲𑀗𑁆𑀔𑁂𑀧𑀢𑁄𑀬𑁂𑀯 𑀢𑀸𑀯 𑀢𑀸𑀲𑀁 𑀯𑀢𑁆𑀣𑀼𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀢𑀸 𑀤𑀲𑁆𑀲𑁂𑀢𑀼𑀁 𑀓𑀺𑀢𑁆𑀢𑀸𑀯𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀘𑁆𑀙𑀸𑀬 𑀢𑀸𑀯 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀸 𑀅𑀬𑀁 𑀔𑀦𑁆𑀥𑀸𑀦𑀁 ‘𑀔𑀦𑁆𑀥𑀸’𑀢𑀺 𑀧𑀜𑁆𑀜𑀸𑀧𑀦𑀸, 𑀤𑀲𑁆𑀲𑀦𑀸, 𑀞𑀧𑀦𑀸, 𑀲𑀸 𑀓𑀺𑀢𑁆𑀢𑀓𑁂𑀦 𑀳𑁄𑀢𑀻𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀧𑀭𑀢𑁄 𑀓𑀺𑀢𑁆𑀢𑀸𑀯𑀢𑀸 𑀆𑀬𑀢𑀦𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀯𑀸 𑀧𑀪𑁂𑀤𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀸; 𑀢𑀢𑁆𑀭𑀸𑀧𑀺 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄, 𑀲𑁂𑀲𑀸 𑀘𑀢𑀼𑀪𑀽𑀫𑀺𑀓𑀸𑀢𑀺 𑀯𑀸 𑀏𑀯𑀭𑀽𑀧𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺; 𑀏𑀢𑁆𑀢𑀓𑁂𑀦 𑀔𑀦𑁆𑀥𑀸𑀦𑀁 ‘𑀔𑀦𑁆𑀥𑀸’𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺.

𑁩. 𑀢𑀣𑀸 𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀯𑀸, 𑀧𑀪𑁂𑀤𑀢𑁄 ‘‘𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀯𑀸; 𑀢𑀢𑁆𑀭𑀸𑀧𑀺 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸 ¶ , 𑀤𑁆𑀯𑀸𑀬𑀢𑀦𑀸 𑀘𑀢𑀼𑀪𑀽𑀫𑀺𑀓𑀸𑀢𑀺 𑀯𑀸, 𑀏𑀯𑀭𑀽𑀧𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺; 𑀏𑀢𑁆𑀢𑀓𑁂𑀦 𑀆𑀬𑀢𑀦𑀸𑀦𑀁 𑀆𑀬𑀢𑀦𑀸𑀦𑀻𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺.

𑁪. 𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀢𑀺 𑀯𑀸 ¶ , 𑀧𑀪𑁂𑀤𑀢𑁄 ‘‘𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀯𑀸; 𑀢𑀢𑁆𑀭𑀸𑀧𑀺 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀘𑀢𑀼𑀪𑀽𑀫𑀺𑀓𑀸𑀢𑀺 𑀯𑀸 𑀏𑀯𑀭𑀽𑀧𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺; 𑀏𑀢𑁆𑀢𑀓𑁂𑀦 𑀥𑀸𑀢𑀽𑀦𑀁 𑀥𑀸𑀢𑀽𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺.

𑁫. 𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀯𑀸, 𑀧𑀪𑁂𑀤𑀢𑁄 ‘‘𑀤𑀼𑀓𑁆𑀔𑀲𑀘𑁆𑀘𑀁…𑀧𑁂… 𑀦𑀺𑀭𑁄𑀥𑀲𑀘𑁆𑀘’’𑀦𑁆𑀢𑀺 𑀯𑀸; 𑀢𑀢𑁆𑀭𑀸𑀧𑀺 𑀤𑁆𑀯𑁂 𑀲𑀘𑁆𑀘𑀸 𑀮𑁄𑀓𑀺𑀬𑀸, 𑀤𑁆𑀯𑁂 𑀲𑀘𑁆𑀘𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀯𑀸 𑀏𑀯𑀭𑀽𑀧𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺; 𑀏𑀢𑁆𑀢𑀓𑁂𑀦 𑀲𑀘𑁆𑀘𑀸𑀦𑀁 ‘𑀲𑀘𑁆𑀘𑀸𑀦𑀻’𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺.

𑁬. 𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀸, 𑀧𑀪𑁂𑀤𑀢𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀸; 𑀢𑀢𑁆𑀭𑀸𑀧𑀺 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 ¶ 𑀫𑀺𑀲𑁆𑀲𑀓𑀸𑀦𑀺, 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀯𑀸 𑀏𑀯𑀭𑀽𑀧𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺; 𑀏𑀢𑁆𑀢𑀓𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀗𑁆𑀔𑁂𑀧𑀢𑁄 𑀯𑀢𑁆𑀣𑀼𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀘 𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑁭. 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀣𑀼𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀢𑀺𑀮𑁂 𑀯𑀺𑀲𑀸𑀭𑀬𑀫𑀸𑀦𑁂𑀦 𑀯𑀺𑀬, 𑀯𑀸𑀓𑁂 𑀳𑀻𑀭𑀬𑀫𑀸𑀦𑁂𑀦 𑀯𑀺𑀬 𑀘, 𑀳𑁂𑀝𑁆𑀞𑀸 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀇𑀫𑀸𑀲𑀁 𑀧𑀜𑁆𑀘𑀦𑁆𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀯𑀢𑁆𑀣𑀼𑀪𑀽𑀢𑀸 𑀔𑀦𑁆𑀥𑀸𑀤𑀬𑁄 𑀦𑀺𑀧𑁆𑀧𑀤𑁂𑀲𑁂𑀦 𑀓𑀣𑀺𑀢𑀸𑀢𑀺 𑀢𑁂𑀦 𑀢𑁂 𑀇𑀥 𑀏𑀓𑀤𑁂𑀲𑁂𑀦𑁂𑀯 𑀓𑀣𑁂𑀲𑀺. 𑀙𑀝𑁆𑀞𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀳𑁂𑀝𑁆𑀞𑀸 𑀅𑀓𑀣𑀺𑀢𑀸𑀯. 𑀇𑀥𑀸𑀧𑀺 𑀉𑀤𑁆𑀤𑁂𑀲𑀯𑀸𑀭𑁂 𑀏𑀓𑀤𑁂𑀲𑁂𑀦𑁂𑀯 𑀓𑀣𑀺𑀢𑀸; 𑀢𑀲𑁆𑀫𑀸 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑀼𑀓𑀸𑀫𑁄 𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀫𑀸𑀢𑀺𑀓𑀁 𑀞𑀧𑁂𑀲𑀻𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ¶ ¶ 𑀬𑀣𑀸𑀞𑀧𑀺𑀢𑀁 𑀫𑀸𑀢𑀺𑀓𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄𑀢𑀺 𑀏𑀓𑁄 𑀧𑀼𑀕𑁆𑀕𑀮𑁄. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀬𑁂𑀦 𑀲𑀫𑀬𑀦𑁆𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸𑀲𑀜𑁆𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀦𑀸𑀫𑀁. 𑀓𑀸𑀬𑁂𑀦𑀸𑀢𑀺 𑀯𑀺𑀫𑁄𑀓𑁆𑀔𑀲𑀳𑀚𑀸𑀢𑁂𑀦 𑀦𑀸𑀫𑀓𑀸𑀬𑁂𑀦. 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀇𑀭𑀺𑀬𑀢𑀺. 𑀓𑀢𑀫𑀲𑁆𑀫𑀺𑀁 𑀧𑀦𑁂𑀲 𑀓𑀸𑀮𑁂 𑀯𑀺𑀫𑁄𑀓𑁆𑀔𑁂 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀳𑀺 𑀓𑀸𑀮𑁄 𑀦𑀸𑀫 𑀅𑀢𑁆𑀣𑀺, 𑀅𑀓𑀸𑀮𑁄 𑀦𑀸𑀫 𑀅𑀢𑁆𑀣𑀺. 𑀢𑀢𑁆𑀣 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀓𑀸𑀮𑁄, 𑀯𑀢𑁆𑀢𑀓𑀭𑀡𑀓𑀸𑀮𑁄 𑀘 𑀲𑀫𑀸𑀧𑀚𑁆𑀚𑀦𑀲𑁆𑀲 𑀅𑀓𑀸𑀮𑁄 𑀦𑀸𑀫. 𑀲𑀭𑀻𑀭𑀁 𑀧𑀦 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀬𑀸𑀯 𑀧𑀺𑀡𑁆𑀟𑀸𑀬 𑀕𑀫𑀦𑀓𑀸𑀮𑁄 𑀦𑀸𑀕𑀘𑁆𑀙𑀢𑀺, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀲𑀫𑀸𑀧𑀚𑁆𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫.

𑀧𑀺𑀡𑁆𑀟𑀸𑀬 𑀕𑀫𑀦𑀓𑀸𑀮𑀁 𑀧𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀘𑁂𑀢𑀺𑀬𑀯𑀦𑁆𑀤𑀦𑀓𑀸𑀮𑁄, 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀲𑁆𑀲 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀸𑀦𑀓𑀸𑀮𑁄 𑀧𑀺𑀡𑁆𑀟𑀸𑀬 𑀕𑀫𑀦𑀓𑀸𑀮𑁄 𑀕𑀸𑀫𑁂 𑀘𑀭𑀡𑀓𑀸𑀮𑁄; 𑀆𑀲𑀦𑀲𑀸𑀮𑀸𑀬 𑀬𑀸𑀕𑀼𑀧𑀸𑀦𑀓𑀸𑀮𑁄 𑀯𑀢𑁆𑀢𑀓𑀭𑀡𑀓𑀸𑀮𑁄𑀢𑀺 𑀅𑀬𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀲𑁆𑀲 𑀅𑀓𑀸𑀮𑁄 𑀦𑀸𑀫. 𑀆𑀲𑀦𑀲𑀸𑀮𑀸𑀬 𑀧𑀦 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀲𑀢𑀺 𑀬𑀸𑀯 𑀪𑀢𑁆𑀢𑀓𑀸𑀮𑁄 𑀦𑀸𑀕𑀘𑁆𑀙𑀢𑀺, 𑀏𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑁂 𑀲𑀫𑀸𑀧𑀚𑁆𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫. 𑀪𑀢𑁆𑀢𑀁 𑀧𑀦 𑀪𑀼𑀜𑁆𑀚𑀦𑀓𑀸𑀮𑁄, 𑀯𑀺𑀳𑀸𑀭𑀕𑀫𑀦𑀓𑀸𑀮𑁄, 𑀧𑀢𑁆𑀢𑀘𑀻𑀯𑀭𑀧𑀝𑀺𑀲𑀸𑀫𑀦𑀓𑀸𑀮𑁄, 𑀤𑀺𑀯𑀸𑀯𑀢𑁆𑀢𑀓𑀭𑀡𑀓𑀸𑀮𑁄, 𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑀓𑀸𑀮𑁄𑀢𑀺 𑀅𑀬𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀲𑁆𑀲 𑀅𑀓𑀸𑀮𑁄 𑀦𑀸𑀫. 𑀬𑁄 𑀅𑀓𑀸𑀮𑁄, 𑀲𑁆𑀯𑁂𑀯 𑀅𑀲𑀫𑀬𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀓𑀸𑀮𑁂 𑀓𑀸𑀮𑁂, 𑀲𑀫𑀬𑁂 𑀲𑀫𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀅𑀝𑁆𑀞 ¶ 𑀯𑀺𑀫𑁄𑀓𑁆𑀔𑁂 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑁄, ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘𑁂𑀲 ¶ 𑀲𑀨𑀲𑁆𑀲𑀓𑁂𑀳𑀺 𑀲𑀳𑀚𑀸𑀢𑀦𑀸𑀫𑀥𑀫𑁆𑀫𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂 𑀨𑀼𑀲𑀢𑀺𑀬𑁂𑀯 𑀦𑀸𑀫, 𑀉𑀧𑀘𑀸𑀭𑁂𑀦 𑀅𑀧𑁆𑀧𑀦𑀁 𑀨𑀼𑀲𑀢𑀺𑀬𑁂𑀯 𑀦𑀸𑀫. 𑀧𑀼𑀭𑀺𑀫𑀸𑀬 𑀅𑀧𑁆𑀧𑀦𑀸𑀬 𑀅𑀧𑀭𑀁 𑀅𑀧𑁆𑀧𑀦𑀁 𑀨𑀼𑀲𑀢𑀺𑀬𑁂𑀯. 𑀬𑁂𑀦 𑀳𑀺 𑀲𑀤𑁆𑀥𑀺𑀁 𑀬𑁂 𑀥𑀫𑁆𑀫𑀸 𑀲𑀳𑀚𑀸𑀢𑀸, 𑀢𑁂𑀦 𑀢𑁂 𑀧𑀝𑀺𑀮𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀨𑀲𑁆𑀲𑁂𑀦𑀸𑀧𑀺 𑀨𑀼𑀝𑁆𑀞𑀸𑀬𑁂𑀯 𑀦𑀸𑀫 𑀳𑁄𑀦𑁆𑀢𑀺. 𑀉𑀧𑀘𑀸𑀭𑀫𑁆𑀧𑀺 𑀅𑀧𑁆𑀧𑀦𑀸𑀬 𑀧𑀝𑀺𑀮𑀸𑀪𑀓𑀸𑀭𑀡𑀫𑁂𑀯, 𑀢𑀣𑀸 𑀧𑀼𑀭𑀺𑀫𑀸 𑀅𑀧𑁆𑀧𑀦𑀸 𑀅𑀧𑀭𑀅𑀧𑁆𑀧𑀦𑀸𑀬. 𑀢𑀢𑁆𑀭𑀸𑀲𑁆𑀲 𑀏𑀯𑀁 𑀲𑀳𑀚𑀸𑀢𑁂𑀳𑀺 𑀲𑀳𑀚𑀸𑀢𑀸𑀦𑀁 𑀨𑀼𑀲𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀧𑀞𑀫𑀚𑁆𑀛𑀸𑀦𑀜𑁆𑀳𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁. 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀲𑁂𑀲𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀦𑀸𑀫𑀓𑀸𑀬𑁂𑀦 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑀁 𑀨𑀼𑀲𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀳𑀺 𑀢𑀺𑀯𑀗𑁆𑀕𑀺𑀓𑀁, 𑀢𑀢𑀺𑀬𑀁 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀳𑀺 𑀤𑀼𑀯𑀗𑁆𑀕𑀺𑀓𑀁, 𑀘𑀢𑀼𑀢𑁆𑀣𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀳𑀺 𑀤𑀼𑀯𑀗𑁆𑀕𑀺𑀓𑀁, 𑀢𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀜𑁆𑀘. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀲𑁂𑀲𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀦𑀸𑀫𑀓𑀸𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑀁 𑀨𑀼𑀲𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺.

𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀗𑁆𑀔𑀸𑀭𑀕𑀢𑀁, 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀧𑀲𑁆𑀲𑀺𑀢𑁆𑀯𑀸. 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀉𑀧𑀟𑁆𑀠𑀼𑀧𑀟𑁆𑀠𑀸 𑀧𑀞𑀫𑀫𑀕𑁆𑀕𑀸𑀤𑀺𑀯𑀚𑁆𑀛𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁆𑀣 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀢𑁂𑀦 ¶ 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 ¶ 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀔𑀻𑀡𑀸 𑀆𑀲𑀯𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀦 𑀕𑀳𑀺𑀢𑁄. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀔𑀻𑀡𑀸𑀲𑀯𑁄𑀧𑀺 𑀢𑁂𑀦 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀲 𑀧𑀦 𑀅𑀧𑀭𑀺𑀓𑁆𑀔𑀻𑀡𑀸𑀲𑀯𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄𑀧𑀺 𑀦 𑀕𑀳𑀺𑀢𑁄. 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀧𑀦 𑀢𑀺𑀡𑁆𑀡𑀁 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀁𑀬𑁂𑀯𑁂𑀢𑀁 𑀦𑀸𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨. 𑀅𑀲𑀫𑀬𑀯𑀺𑀫𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀧𑀼𑀭𑀺𑀫𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀧𑀦𑁂𑀢𑁆𑀣 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀧𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀘 𑀔𑀻𑀡𑀸𑀲𑀯𑀸 𑀧𑀼𑀣𑀼𑀚𑁆𑀚𑀦𑀸 𑀘 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀦 𑀮𑀩𑁆𑀪𑀦𑁆𑀢𑀺, 𑀤𑀼𑀓𑀫𑀼𑀢𑁆𑀢𑀓𑀧𑀼𑀕𑁆𑀕𑀮𑀸 ¶ 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀳𑁂𑀝𑁆𑀞𑀸 𑀕𑀳𑀺𑀢𑁂 𑀘 𑀅𑀕𑁆𑀕𑀳𑀺𑀢𑁂 𑀘 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀤𑁆𑀥𑀺𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑁂𑀳𑀺 𑀢𑀦𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑀲𑀩𑁆𑀩𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀺𑀬𑁂 𑀯𑀺𑀫𑁄𑀓𑁆𑀔𑁂𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁂𑀢𑀺 𑀲𑀗𑁆𑀔𑀁 𑀕𑀢𑁂 𑀮𑁄𑀓𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀩𑀸𑀳𑀺𑀭𑀸𑀦𑀜𑁆𑀳𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀲𑀫𑀬𑁄𑀧𑀺 𑀅𑀢𑁆𑀣𑀺 𑀅𑀲𑀫𑀬𑁄𑀧𑀺. 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀺. 𑀬𑀲𑁆𑀲 𑀲𑀤𑁆𑀥𑀸 𑀩𑀮𑀯𑀢𑀻, 𑀯𑀺𑀧𑀲𑁆𑀲𑀦𑀸 𑀘 𑀆𑀭𑀤𑁆𑀥𑀸, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑀲𑁆𑀲 𑀦𑀺𑀲𑀻𑀤𑀦𑁆𑀢𑀲𑁆𑀲 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀔𑀸𑀤𑀦𑁆𑀢𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺. 𑀇𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀻𑀢𑀺 𑀳𑁂𑀝𑁆𑀞𑀸 𑀕𑀳𑀺𑀢𑁂 𑀘 𑀅𑀕𑁆𑀕𑀳𑀺𑀢𑁂 𑀘 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀇𑀫𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀁 𑀢𑀦𑁆𑀢𑀺𑀁 𑀆𑀭𑁄𑀧𑁂𑀲𑀺 𑀥𑀫𑁆𑀫𑀭𑀸𑀚𑀸. 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀇𑀫𑀸𑀬𑀧𑀺 𑀢𑀦𑁆𑀢𑀺𑀬𑀸 𑀅𑀕𑁆𑀕𑀳𑀺𑀢𑁄𑀯. 𑀪𑀚𑀸𑀧𑀺𑀬𑀫𑀸𑀦𑁄 𑀧𑀦 ¶ 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀪𑀸𑀯𑀁 𑀪𑀚𑁂𑀬𑁆𑀬.

𑁩. 𑀓𑀼𑀧𑁆𑀧𑀥𑀫𑁆𑀫𑀸𑀓𑀼𑀧𑁆𑀧𑀥𑀫𑁆𑀫𑀦𑀺𑀤𑁆𑀤𑁂𑀲𑁂𑀲𑀼 𑁋 𑀬𑀲𑁆𑀲 𑀅𑀥𑀺𑀕𑀢𑁄 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁄 𑀓𑀼𑀧𑁆𑀧𑀢𑀺 𑀦𑀲𑁆𑀲𑀢𑀺, 𑀲𑁄 𑀓𑀼𑀧𑁆𑀧𑀥𑀫𑁆𑀫𑁄. 𑀭𑀽𑀧𑀲𑀳𑀕𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑁂𑀦 𑀭𑀽𑀧𑁂𑀦 𑀲𑀳𑀕𑀢𑀸𑀦𑀁. 𑀢𑁂𑀦 𑀲𑀤𑁆𑀥𑀺𑀁 𑀧𑀯𑀢𑁆𑀢𑀸𑀦𑀁 𑀦 𑀯𑀺𑀦𑀸 𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀲𑀳𑀕𑀢𑀸𑀦𑀦𑁆𑀢𑀺 𑀭𑀽𑀧𑀢𑁄 𑀅𑀜𑁆𑀜𑀁, 𑀦 𑀭𑀽𑀧𑀦𑁆𑀢𑀺 𑀅𑀭𑀽𑀧𑀁. 𑀅𑀭𑀽𑀧𑁂𑀦 𑀲𑀳𑀕𑀢𑀸𑀦𑀁 𑀢𑁂𑀦 𑀲𑀤𑁆𑀥𑀺𑀁 𑀧𑀯𑀢𑁆𑀢𑀸𑀦𑀁 𑀦 𑀯𑀺𑀦𑀸 𑀅𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀦𑀺𑀓𑀸𑀫𑀮𑀸𑀪𑀻𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀘𑀺𑀡𑁆𑀡𑀯𑀲𑀺𑀢𑀸𑀬 𑀇𑀘𑁆𑀙𑀺𑀢𑀸𑀓𑀸𑀭𑁂𑀦 𑀅𑀮𑀤𑁆𑀥𑀢𑁆𑀢𑀸 𑀦 𑀦𑀺𑀓𑀸𑀫𑀮𑀸𑀪𑀻. 𑀅𑀧𑁆𑀧𑀕𑀼𑀡𑀲𑀫𑀸𑀧𑀢𑁆𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀦 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀓𑀺𑀘𑁆𑀙𑀮𑀸𑀪𑀻 𑀤𑀼𑀓𑁆𑀔𑀮𑀸𑀪𑀻. 𑀬𑁄 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀉𑀧𑀘𑀸𑀭𑀁 𑀧𑀸𑀧𑁂𑀦𑁆𑀢𑁄 ¶ 𑀅𑀧𑁆𑀧𑀦𑀁 𑀧𑀸𑀧𑁂𑀦𑁆𑀢𑁄 𑀘𑀺𑀢𑁆𑀢𑀫𑀜𑁆𑀚𑀽𑀲𑀁 𑀮𑀪𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀢𑀁 𑀲𑀫𑁆𑀧𑀤𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀦 𑀅𑀓𑀺𑀘𑁆𑀙𑀮𑀸𑀪𑀻 𑀦𑀸𑀫. 𑀦 𑀅𑀓𑀲𑀺𑀭𑀮𑀸𑀪𑀻𑀢𑀺 𑀅𑀯𑀺𑀧𑀼𑀮𑀮𑀸𑀪𑀻. 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀅𑀤𑁆𑀥𑀸𑀦𑀁 𑀨𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀯𑀢𑁆𑀢𑁂𑀢𑁆𑀯𑀸 𑀲𑀳𑀲𑀸𑀯 𑀯𑀼𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄.

𑀬𑀢𑁆𑀣𑀺𑀘𑁆𑀙𑀓𑀦𑁆𑀢𑀺 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀇𑀘𑁆𑀙𑀢𑀺. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀓𑀲𑀺𑀡𑀚𑁆𑀛𑀸𑀦𑀁 𑀯𑀸 𑀆𑀦𑀸𑀧𑀸𑀦𑀚𑁆𑀛𑀸𑀦𑀁 𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑀁 𑀯𑀸 𑀅𑀲𑀼𑀪𑀚𑁆𑀛𑀸𑀦𑀁 ¶ 𑀯𑀸𑀢𑀺 𑀬𑀁 𑀬𑀁 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀇𑀘𑁆𑀙𑀢𑀺. 𑀬𑀸𑀯𑀢𑀺𑀘𑁆𑀙𑀓𑀦𑁆𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂𑀦 𑀬𑀢𑁆𑀢𑀓𑀁 𑀓𑀸𑀮𑀁 𑀇𑀘𑁆𑀙𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀢𑁆𑀣 𑀬𑀢𑁆𑀣 𑀬𑀁 𑀬𑀁 𑀲𑀫𑀸𑀧𑀢𑁆𑀢𑀺𑀁 𑀬𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀼𑀝𑁆𑀞𑀸𑀢𑀼𑀫𑁆𑀧𑀺 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀢𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀼𑀝𑁆𑀞𑀸𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀘𑀦𑁆𑀤𑀁 𑀯𑀸 𑀲𑀽𑀭𑀺𑀬𑀁 𑀯𑀸 𑀉𑀮𑁆𑀮𑁄𑀓𑁂𑀢𑁆𑀯𑀸 ‘𑀇𑀫𑀲𑁆𑀫𑀺𑀁 ¶ 𑀘𑀦𑁆𑀤𑁂 𑀯𑀸 𑀲𑀽𑀭𑀺𑀬𑁂 𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀦𑁆𑀢𑀭𑀸𑀯 𑀯𑀼𑀝𑁆𑀞𑀸𑀢𑀺; 𑀲𑀫𑀸𑀧𑀢𑁆𑀢𑀺𑀬𑀸 𑀅𑀧𑁆𑀧𑀕𑀼𑀡𑀢𑀸𑀬𑀸𑀢𑀺.

𑀧𑀫𑀸𑀤𑀫𑀸𑀕𑀫𑁆𑀫𑀸𑀢𑀺 𑀧𑀫𑀸𑀤𑀁 𑀧𑀝𑀺𑀘𑁆𑀘. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀁𑀯𑀺𑀥𑁄 𑀧𑀼𑀕𑁆𑀕𑀮𑁄 𑀓𑀼𑀧𑁆𑀧𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑀤𑀸𑀕𑀸𑀫𑀺𑀦𑁄𑀢𑀺 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀦𑀸𑀫𑀁. 𑀏𑀢𑁂𑀲𑀜𑁆𑀳𑀺 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀓𑀸 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀩𑀦𑁆𑀥𑀓𑀸 𑀘 𑀥𑀫𑁆𑀫𑀸 𑀦 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀸, 𑀦 𑀲𑀼𑀯𑀺𑀓𑁆𑀔𑀸𑀮𑀺𑀢𑀸, 𑀢𑁂𑀦 𑀢𑁂𑀲𑀁 𑀲𑀫𑀸𑀧𑀢𑁆𑀢𑀺 𑀦𑀲𑁆𑀲𑀢𑀺 𑀧𑀭𑀺𑀳𑀸𑀬𑀢𑀺. 𑀲𑀸 𑀘 𑀔𑁄 𑀦𑁂𑀯 𑀲𑀻𑀮𑀪𑁂𑀤𑁂𑀦, 𑀦𑀸𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂𑀦. 𑀦 𑀕𑀭𑀼𑀓𑀫𑁄𑀓𑁆𑀔𑀥𑀫𑁆𑀫𑁄 𑀧𑀦𑁂𑀲 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀓𑀺𑀘𑁆𑀘𑀓𑀭𑀡𑀻𑀬𑁂𑀦 𑀯𑀸 𑀯𑀢𑁆𑀢𑀪𑁂𑀤𑀫𑀢𑁆𑀢𑀓𑁂𑀦 𑀯𑀸 𑀦𑀲𑁆𑀲𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀁 𑀯𑀴𑀜𑁆𑀚𑁂𑀢𑀺. 𑀢𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀯𑀺𑀝𑁆𑀞𑁂 𑀤𑀸𑀭𑀓𑀸 𑀧𑀭𑀺𑀯𑁂𑀡𑁂 𑀓𑀻𑀴𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 ‘𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀦𑀺𑀲𑀻𑀤𑀺. 𑀲𑁄 𑀅𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄, ‘𑀓𑀺𑀁 𑀦𑀼 𑀔𑁄 𑀆𑀯𑀭𑀡’𑀦𑁆𑀢𑀺 𑀲𑀻𑀮𑀁 𑀆𑀯𑀚𑁆𑀚𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑀻𑀢𑀺𑀓𑁆𑀓𑀫𑀁 𑀅𑀤𑀺𑀲𑁆𑀯𑀸 ‘𑀯𑀢𑁆𑀢𑀪𑁂𑀤𑁄 𑀦𑀼 𑀔𑁄 𑀅𑀢𑁆𑀣𑀻’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀯𑁂𑀡𑀲𑁆𑀲 𑀅𑀲𑀫𑁆𑀫𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀦𑁆𑀢𑁄𑀯 𑀦𑀺𑀲𑀻𑀤𑀺.

𑁪. 𑀅𑀓𑀼𑀧𑁆𑀧𑀥𑀫𑁆𑀫𑀦𑀺𑀤𑁆𑀤𑁂𑀲𑁄 ¶ 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀼𑀧𑁆𑀧𑀥𑀫𑁆𑀫𑁄𑀢𑀺 𑀇𑀤𑀁 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀦𑀸𑀕𑀸𑀫𑀺𑀲𑁆𑀲 𑀘𑁂𑀯 𑀔𑀻𑀡𑀸𑀲𑀯𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀸𑀫𑀁. 𑀢𑁂𑀲𑀜𑁆𑀳𑀺 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀓𑀸 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀩𑀦𑁆𑀥𑀓𑀸 𑀘 𑀥𑀫𑁆𑀫𑀸 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀸 𑀲𑀼𑀯𑀺𑀓𑁆𑀔𑀸𑀮𑀺𑀢𑀸; 𑀢𑁂𑀦 𑀢𑁂𑀲𑀁 ¶ 𑀪𑀲𑁆𑀲𑀲𑀗𑁆𑀕𑀡𑀺𑀓𑀸𑀭𑀸𑀫𑀸𑀤𑀺𑀓𑀺𑀘𑁆𑀘𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀫𑀸𑀤𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀺 𑀦 𑀓𑀼𑀧𑁆𑀧𑀢𑀺, 𑀦 𑀦𑀲𑁆𑀲𑀢𑀺. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀧𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸 𑀇𑀫𑀲𑁆𑀫𑀺𑀁 𑀤𑀼𑀓𑁂 ¶ 𑀦 𑀮𑀩𑁆𑀪𑀦𑁆𑀢𑀺; 𑀤𑀼𑀓𑀫𑀼𑀢𑁆𑀢𑀓𑀧𑀼𑀕𑁆𑀕𑀮𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀳𑁂𑀝𑁆𑀞𑀸 𑀕𑀳𑀺𑀢𑁂 𑀘 𑀅𑀕𑁆𑀕𑀳𑀺𑀢𑁂 𑀘 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀇𑀫𑀲𑁆𑀫𑀺𑀫𑁆𑀧𑀺 𑀤𑀼𑀓𑁂 𑀲𑀤𑁆𑀥𑀺𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑁂𑀳𑀺 𑀢𑀦𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑀲𑀩𑁆𑀩𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀦𑁆𑀦𑀜𑁆𑀳𑀺 𑀲𑀫𑀸𑀧𑀢𑁆𑀢𑀻𑀦𑀁 𑀓𑀼𑀧𑁆𑀧𑀦𑀁 𑀦𑀲𑁆𑀲𑀦𑀁 𑀪𑀯𑁂𑀬𑁆𑀬, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀧𑀦 𑀲𑀓𑀺𑀁 𑀧𑀝𑀺𑀯𑀺𑀤𑁆𑀥𑀲𑁆𑀲 𑀓𑀼𑀧𑁆𑀧𑀦𑀁 𑀦𑀲𑁆𑀲𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁫. 𑀧𑀭𑀺𑀳𑀸𑀦𑀥𑀫𑁆𑀫𑀸𑀧𑀭𑀺𑀳𑀸𑀦𑀥𑀫𑁆𑀫𑀦𑀺𑀤𑁆𑀤𑁂𑀲𑀸𑀧𑀺 𑀓𑀼𑀧𑁆𑀧𑀥𑀫𑁆𑀫𑀸𑀓𑀼𑀧𑁆𑀧𑀥𑀫𑁆𑀫𑀦𑀺𑀤𑁆𑀤𑁂𑀲𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀇𑀥 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀤𑀁 𑀧𑀝𑀺𑀘𑁆𑀘 𑀥𑀫𑁆𑀫𑀸𑀦𑀁 𑀧𑀭𑀺𑀳𑀸𑀦𑀫𑁆𑀧𑀺 𑀅𑀧𑀭𑀺𑀳𑀸𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀇𑀤𑀁 𑀧𑀭𑀺𑀬𑀸𑀬𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀢𑀸𑀤𑀺𑀲𑀫𑁂𑀯.

𑁭. 𑀘𑁂𑀢𑀦𑀸𑀪𑀩𑁆𑀩𑀦𑀺𑀤𑁆𑀤𑁂𑀲𑁂 𑁋 𑀘𑁂𑀢𑀦𑀸𑀪𑀩𑁆𑀩𑁄𑀢𑀺 𑀘𑁂𑀢𑀦𑀸𑀬 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄. 𑀲𑀘𑁂 𑀅𑀦𑀼𑀲𑀜𑁆𑀘𑁂𑀢𑁂𑀢𑀻𑀢𑀺, 𑀲𑀘𑁂 𑀲𑀫𑀸𑀧𑀚𑁆𑀚𑀢𑀺. 𑀲𑀫𑀸𑀧𑀢𑁆𑀢𑀺𑀜𑁆𑀳𑀺 𑀲𑀫𑀸𑀧𑀚𑁆𑀚𑀦𑁆𑀢𑁄 𑀅𑀦𑀼𑀲𑀜𑁆𑀘𑁂𑀢𑁂𑀢𑀺 𑀦𑀸𑀫. 𑀲𑁄 𑀦 𑀧𑀭𑀺𑀳𑀸𑀬𑀢𑀺, 𑀇𑀢𑀭𑁄 𑀧𑀭𑀺𑀳𑀸𑀬𑀢𑀺.

𑁮. 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑀦𑀺𑀤𑁆𑀤𑁂𑀲𑁂 𑁋 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄𑀢𑀺 𑀅𑀦𑀼𑀭𑀓𑁆𑀔𑀡𑀸𑀬 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄. 𑀲𑀘𑁂 𑀅𑀦𑀼𑀭𑀓𑁆𑀔𑀢𑀻𑀢𑀺 𑀲𑀘𑁂 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 𑀧𑀳𑀸𑀬 𑀉𑀧𑀓𑀸𑀭𑀥𑀫𑁆𑀫𑁂 𑀲𑁂𑀯𑀦𑁆𑀢𑁄 𑀲𑀫𑀸𑀧𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀦𑀼𑀭𑀓𑁆𑀔𑀢𑀺 𑀦𑀸𑀫. 𑀲𑁄 𑀦 𑀧𑀭𑀺𑀳𑀸𑀬𑀢𑀺, 𑀇𑀢𑀭𑁄 𑀧𑀭𑀺𑀳𑀸𑀬𑀢𑀺.

𑀇𑀫𑁂 𑀤𑁆𑀯𑁂𑀧𑀺 𑀲𑀫𑀸𑀧𑀢𑁆𑀢𑀺𑀁 𑀞𑀧𑁂𑀢𑀼𑀁 𑀣𑀸𑀯𑀭𑀁 𑀓𑀸𑀢𑀼𑀁 𑀧𑀝𑀺𑀩𑀮𑀸. 𑀘𑁂𑀢𑀦𑀸𑀪𑀩𑁆𑀩𑀢𑁄 𑀧𑀦 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄𑀯 𑀩𑀮𑀯𑀢𑀭𑁄. 𑀘𑁂𑀢𑀦𑀸𑀪𑀩𑁆𑀩𑁄 𑀳𑀺 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀉𑀧𑀓𑀸𑀭𑀥𑀫𑁆𑀫𑁂 𑀦𑀼𑀤𑀢𑀺 𑀦𑀻𑀳𑀭𑀢𑀺, 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 𑀲𑁂𑀯𑀢𑀺. 𑀲𑁄 𑀢𑁂 𑀲𑁂𑀯𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀧𑀭𑀺𑀳𑀸𑀬𑀢𑀺 ¶ . 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 ¶ 𑀦𑀼𑀤𑀢𑀺 𑀦𑀻𑀳𑀭𑀢𑀺, 𑀉𑀧𑀓𑀸𑀭𑀥𑀫𑁆𑀫𑁂 𑀲𑁂𑀯𑀢𑀺. 𑀲𑁄 𑀢𑁂 𑀲𑁂𑀯𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀦 𑀧𑀭𑀺𑀳𑀸𑀬𑀢𑀺.

𑀬𑀣𑀸 𑀳𑀺 𑀤𑁆𑀯𑁂 𑀔𑁂𑀢𑁆𑀢𑀧𑀸𑀮𑀸 𑀏𑀓𑁄 𑀧𑀡𑁆𑀟𑀼𑀭𑁄𑀕𑁂𑀦 𑀲𑀭𑁄𑀕𑁄 𑀅𑀓𑁆𑀔𑀫𑁄 𑀲𑀻𑀢𑀸𑀤𑀻𑀦𑀁, 𑀏𑀓𑁄 𑀅𑀭𑁄𑀕𑁄 𑀲𑀻𑀢𑀸𑀤𑀻𑀦𑀁 𑀲𑀳𑁄. 𑀲𑀭𑁄𑀕𑁄 𑀳𑁂𑀝𑁆𑀞𑀸𑀓𑀼𑀝𑀺𑀁 𑀦 𑀑𑀢𑀭𑀢𑀺, 𑀭𑀢𑁆𑀢𑀸𑀭𑀓𑁆𑀔𑀁 𑀤𑀺𑀯𑀸𑀭𑀓𑁆𑀔𑀁 𑀯𑀺𑀚𑀳𑀢𑀺. 𑀢𑀲𑁆𑀲 𑀤𑀺𑀯𑀸 𑀲𑀼𑀓𑀫𑁄𑀭𑀸𑀤𑀬𑁄 𑀔𑁂𑀢𑁆𑀢𑀁 𑀑𑀢𑀭𑀺𑀢𑁆𑀯𑀸 𑀲𑀸𑀮𑀺𑀲𑀻𑀲𑀁 𑀔𑀸𑀤𑀦𑁆𑀢𑀺, 𑀭𑀢𑁆𑀢𑀺𑀁 𑀫𑀺𑀕𑀲𑀽𑀓𑀭𑀸𑀤𑀬𑁄 𑀧𑀯𑀺𑀲𑀺𑀢𑁆𑀯𑀸 𑀔𑀮𑀁 ¶ 𑀢𑀘𑁆𑀙𑀺 𑀢𑀁 𑀯𑀺𑀬 𑀙𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀧𑀫𑀢𑁆𑀢𑀓𑀸𑀭𑀡𑀸 𑀧𑀼𑀦 𑀩𑀻𑀚𑀫𑀢𑁆𑀢𑀫𑁆𑀧𑀺 𑀦 𑀮𑀪𑀢𑀺. 𑀇𑀢𑀭𑁄 𑀭𑀢𑁆𑀢𑀸𑀭𑀓𑁆𑀔𑀁 𑀤𑀺𑀯𑀸𑀭𑀓𑁆𑀔𑀁 𑀦 𑀯𑀺𑀚𑀳𑀢𑀺. 𑀲𑁄 𑀅𑀢𑁆𑀢𑀦𑁄 𑀅𑀧𑁆𑀧𑀫𑀢𑁆𑀢𑀓𑀸𑀭𑀡𑀸 𑀏𑀓𑀓𑀭𑀻𑀲𑀢𑁄 𑀘𑀢𑁆𑀢𑀸𑀭𑀺𑀧𑀺 𑀅𑀝𑁆𑀞𑀧𑀺 𑀲𑀓𑀝𑀸𑀦𑀺 𑀮𑀪𑀢𑀺.

𑀢𑀢𑁆𑀣 𑀲𑀭𑁄𑀕𑀔𑁂𑀢𑁆𑀢𑀧𑀸𑀮𑁄 𑀯𑀺𑀬 𑀘𑁂𑀢𑀦𑀸𑀪𑀩𑁆𑀩𑁄, 𑀅𑀭𑁄𑀕𑁄 𑀯𑀺𑀬 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄 𑀤𑀝𑁆𑀞𑀩𑁆𑀩𑁄. 𑀲𑀭𑁄𑀕𑀲𑁆𑀲 𑀅𑀢𑁆𑀢𑀦𑁄 𑀧𑀫𑀸𑀤𑁂𑀦 𑀧𑀼𑀦 𑀩𑀻𑀚𑀫𑀢𑁆𑀢𑀲𑁆𑀲𑀧𑀺 𑀅𑀮𑀪𑀦𑀁 𑀯𑀺𑀬 𑀘𑁂𑀢𑀦𑀸𑀪𑀩𑁆𑀩𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀅𑀚𑀸𑀦𑀺𑀢𑁆𑀯𑀸 𑀉𑀧𑀓𑀸𑀭𑁂 𑀧𑀳𑀸𑀬 𑀅𑀦𑀼𑀧𑀓𑀸𑀭𑁂 𑀲𑁂𑀯𑀦𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀳𑀸𑀦𑀁. 𑀇𑀢𑀭𑀲𑁆𑀲 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑁂𑀦 𑀏𑀓𑀓𑀭𑀻𑀲𑀫𑀢𑁆𑀢𑀢𑁄 𑀘𑀢𑀼𑀅𑀝𑁆𑀞𑀲𑀓𑀝𑀉𑀤𑁆𑀥𑀭𑀡𑀁 𑀯𑀺𑀬 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀅𑀦𑀼𑀧𑀓𑀸𑀭𑁂 𑀧𑀳𑀸𑀬 𑀉𑀧𑀓𑀸𑀭𑁂 𑀲𑁂𑀯𑀦𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀬𑀸 𑀅𑀧𑀭𑀺𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀘𑁂𑀢𑀦𑀸𑀪𑀩𑁆𑀩𑀢𑁄 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄𑀯 𑀲𑀫𑀸𑀧𑀢𑁆𑀢𑀺𑀁 𑀣𑀸𑀯𑀭𑀁 𑀓𑀸𑀢𑀼𑀁 𑀩𑀮𑀯𑀢𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁯. 𑀧𑀼𑀣𑀼𑀚𑁆𑀚𑀦𑀦𑀺𑀤𑁆𑀤𑁂𑀲𑁂 𑁋 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀸𑀦𑀺. 𑀏𑀢𑀸𑀦𑀺 𑀳𑀺 𑀨𑀮𑀓𑁆𑀔𑀡𑁂 𑀧𑀳𑀻𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀅𑀬𑀁 𑀧𑀦 𑀨𑀮𑀓𑁆𑀔𑀡𑁂𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀲𑀁𑀬𑁄𑀚𑀦𑀥𑀫𑁆𑀫𑀸𑀦𑀁. 𑀫𑀕𑁆𑀕𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀢𑁂𑀲𑀁 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀫𑀕𑁆𑀕𑀓𑁆𑀔𑀡𑁂𑀧𑀺 𑀦 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄 𑀣𑀽𑀮𑀩𑀸𑀮𑀧𑀼𑀣𑀼𑀚𑁆𑀚𑀦𑁄𑀯 𑀇𑀥 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀕𑁄𑀢𑁆𑀭𑀪𑀼𑀦𑀺𑀤𑁆𑀤𑁂𑀲𑁂 ¶ 𑁋 𑀬𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀁 𑀕𑁄𑀢𑁆𑀭𑀪𑀼𑀜𑀸𑀡𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸𑀦𑀁 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑀸𑀦𑀁. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲. 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀑𑀓𑁆𑀓𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀜𑀸𑀡𑁂𑀦 𑀲𑀩𑁆𑀩𑀁 𑀧𑀼𑀣𑀼𑀚𑁆𑀚𑀦𑀲𑀗𑁆𑀔𑀁 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀁 ¶ 𑀧𑀼𑀣𑀼𑀚𑁆𑀚𑀦𑀫𑀡𑁆𑀟𑀮𑀁 𑀧𑀼𑀣𑀼𑀚𑁆𑀚𑀦𑀧𑀜𑁆𑀜𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀺𑀬𑀲𑀗𑁆𑀔𑀁 𑀅𑀭𑀺𑀬𑀕𑁄𑀢𑁆𑀢𑀁 𑀅𑀭𑀺𑀬𑀫𑀡𑁆𑀟𑀮𑀁 𑀅𑀭𑀺𑀬𑀧𑀜𑁆𑀜𑀢𑁆𑀢𑀺𑀁 𑀑𑀓𑁆𑀓𑀫𑀦𑀢𑁄 𑀕𑁄𑀢𑁆𑀭𑀪𑀽𑀧𑀼𑀕𑁆𑀕𑀮𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑁧𑁧. 𑀪𑀬𑀽𑀧𑀭𑀢𑀦𑀺𑀤𑁆𑀤𑁂𑀲𑁂 𑁋 𑀪𑀬𑁂𑀦 𑀉𑀧𑀭𑀢𑁄𑀢𑀺 𑀪𑀬𑀽𑀧𑀭𑀢𑁄. 𑀲𑀢𑁆𑀢𑀧𑀺 𑀲𑁂𑀓𑁆𑀔𑀸 𑀧𑀼𑀣𑀼𑀚𑁆𑀚𑀦𑀸 𑀘 𑀪𑀸𑀬𑀺𑀢𑁆𑀯𑀸 𑀧𑀸𑀧𑀢𑁄 𑀑𑀭𑀫𑀦𑁆𑀢𑀺 𑀧𑀸𑀧𑀁 𑀦 𑀓𑀭𑁄𑀦𑁆𑀢𑀺 ¶ . 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀸 𑀤𑀼𑀕𑁆𑀕𑀢𑀺𑀪𑀬𑀁, 𑀯𑀝𑁆𑀝𑀪𑀬𑀁, 𑀓𑀺𑀮𑁂𑀲𑀪𑀬𑀁, 𑀉𑀧𑀯𑀸𑀤𑀪𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀦𑁆𑀢𑀺. 𑀢𑁂𑀲𑀼 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀤𑀼𑀕𑁆𑀕𑀢𑀺𑀬𑁂𑀯 𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑁄 ‘𑀲𑀘𑁂 𑀢𑁆𑀯𑀁 𑀧𑀸𑀧𑀁 𑀓𑀭𑀺𑀲𑁆𑀲𑀲𑀺, 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑀘𑁆𑀙𑀸𑀢𑀅𑀚𑀕𑀭𑀲𑀤𑀺𑀲𑀸, 𑀢𑁂𑀲𑀼 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀓𑀣𑀁 𑀪𑀯𑀺𑀲𑁆𑀲𑀲𑀻’𑀢𑀺 𑀤𑀼𑀕𑁆𑀕𑀢𑀺𑀪𑀬𑀁 𑀪𑀸𑀬𑀺𑀢𑁆𑀯𑀸 𑀧𑀸𑀧𑀁 𑀦 𑀓𑀭𑁄𑀢𑀺. 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀁𑀬𑁂𑀯 𑀧𑀦 𑀯𑀝𑁆𑀝𑀪𑀬𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀅𑀓𑀼𑀲𑀮𑀁 𑀓𑀺𑀮𑁂𑀲𑀪𑀬𑀁 𑀦𑀸𑀫. 𑀕𑀭𑀳𑀸 𑀧𑀦 𑀉𑀧𑀯𑀸𑀤𑀪𑀬𑀁 𑀦𑀸𑀫. 𑀢𑀸𑀦𑀺𑀧𑀺 𑀪𑀸𑀬𑀺𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑁄 𑀧𑀸𑀧𑀁 𑀦 𑀓𑀭𑁄𑀢𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀧𑀦 𑀢𑀬𑁄 𑀲𑁂𑀓𑁆𑀔𑀸 𑀤𑀼𑀕𑁆𑀕𑀢𑀺𑀁 𑀅𑀢𑀻𑀢𑀢𑁆𑀢𑀸 𑀲𑁂𑀲𑀸𑀦𑀺 𑀢𑀻𑀡𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀧𑀸𑀧𑀁 𑀦 𑀓𑀭𑁄𑀦𑁆𑀢𑀺. 𑀫𑀕𑁆𑀕𑀝𑁆𑀞𑀓𑀲𑁂𑀓𑁆𑀔𑀸 𑀆𑀕𑀫𑀦𑀯𑀲𑁂𑀦 𑀯𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀪𑀬𑀢𑁆𑀢𑀸 𑀯𑀸 𑀪𑀬𑀽𑀧𑀭𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀪𑀬𑁂𑀲𑀼 𑀏𑀓𑀫𑁆𑀧𑀺 𑀦 𑀪𑀸𑀬𑀢𑀺. 𑀲𑁄 𑀳𑀺 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀪𑀬𑁄; 𑀢𑀲𑁆𑀫𑀸 𑀅𑀪𑀬𑀽𑀧𑀭𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀁 𑀧𑀦 𑀲𑁄 𑀉𑀧𑀯𑀸𑀤𑀫𑁆𑀧𑀺 𑀦 𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀉𑀧𑀯𑀸𑀤𑀁 𑀧𑀦 𑀭𑀓𑁆𑀔𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀤𑁄𑀡𑀼𑀧𑁆𑀧𑀮𑀯𑀸𑀧𑀺𑀕𑀸𑀫𑁂 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀯𑀺𑀬.

𑁧𑁨. 𑀅𑀪𑀩𑁆𑀩𑀸𑀕𑀫𑀦𑀦𑀺𑀤𑁆𑀤𑁂𑀲𑁂 ¶ 𑁋 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀸𑀕𑀫𑀦𑀲𑁆𑀲 𑀅𑀪𑀩𑁆𑀩𑁄𑀢𑀺 𑀅𑀪𑀩𑁆𑀩𑀸𑀕𑀫𑀦𑁄. 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦. 𑀓𑀺𑀮𑁂𑀲𑀸𑀯𑀭𑀡𑁂𑀦𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀯𑀺𑀧𑀸𑀓𑀸𑀯𑀭𑀡𑁂𑀦𑀸𑀢𑀺 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸. 𑀅𑀲𑁆𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀲𑀤𑁆𑀥𑀸𑀭𑀳𑀺𑀢𑀸. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀭𑀳𑀺𑀢𑀸. 𑀢𑁂 𑀞𑀧𑁂𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀁 𑀇𑀢𑀭𑀤𑀻𑀧𑀢𑁆𑀢𑀬𑀯𑀸𑀲𑀺𑀦𑁄 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀳𑀺 𑀫𑀦𑀼𑀲𑁆𑀲𑀸 𑀅𑀘𑁆𑀙𑀦𑁆𑀤𑀺𑀓𑀪𑀸𑀯𑀁 𑀧𑀯𑀺𑀝𑁆𑀞𑀸 𑀦𑀸𑀫. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀭𑀳𑀺𑀢𑀸. 𑀅𑀪𑀩𑁆𑀩𑀸𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀫𑀕𑁆𑀕𑀨𑀮𑀽𑀧𑀦𑀺𑀲𑁆𑀲𑀬𑀸. 𑀦𑀺𑀬𑀸𑀫𑀦𑁆𑀢𑀺 𑀫𑀕𑁆𑀕𑀦𑀺𑀬𑀸𑀫𑀁, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁. 𑀑𑀓𑁆𑀓𑀫𑀺𑀢𑀼𑀦𑁆𑀢𑀺 𑀏𑀢𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀲𑀗𑁆𑀔𑀸𑀢𑀁 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀧𑀯𑀺𑀲𑀺𑀢𑀼𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀼𑀁 𑀅𑀪𑀩𑁆𑀩𑀸.

𑁧𑁩. 𑀪𑀩𑁆𑀩𑀸𑀕𑀫𑀦𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀫𑀲𑁆𑀫𑀺𑀁 𑀤𑀼𑀓𑁂 𑀬𑁂 𑀘 𑀧𑀼𑀕𑁆𑀕𑀮𑀸 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀸, 𑀬𑁂 𑀘 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀬𑁂𑀳𑀺 𑀘 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸 ¶ , 𑀬𑁂 𑀘 𑀩𑀼𑀤𑁆𑀥𑀸𑀤𑀻𑀦𑀁 𑀦 𑀲𑀤𑁆𑀤𑀳𑀦𑁆𑀢𑀺, 𑀬𑁂𑀲𑀜𑁆𑀘 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀦𑀢𑁆𑀣𑀺, 𑀬𑁂 𑀘 𑀅𑀧𑀭𑀺𑀧𑀼𑀡𑁆𑀡𑀪𑀯𑀗𑁆𑀕𑀧𑀜𑁆𑀜𑀸, 𑀬𑁂𑀲𑀜𑁆𑀘 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀢𑁂 𑀲𑀩𑁆𑀩𑁂𑀧𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑀸, 𑀯𑀺𑀧𑀭𑀻𑀢𑀸 𑀪𑀩𑁆𑀩𑀸𑀢𑀺 𑀯𑀼𑀢𑁆𑀢𑀸.

𑁧𑁪. 𑀦𑀺𑀬𑀢𑀸𑀦𑀺𑀬𑀢𑀦𑀺𑀤𑁆𑀤𑁂𑀲𑁂 ¶ 𑁋 𑀆𑀦𑀦𑁆𑀢𑀭𑀺𑀓𑀸𑀢𑀺 𑀆𑀦𑁆𑀢𑀭𑀺𑀓𑀓𑀫𑁆𑀫𑀲𑀫𑀗𑁆𑀕𑀺𑀦𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀗𑁆𑀕𑀺𑀦𑁄. 𑀲𑀩𑁆𑀩𑁂𑀧𑀺 𑀳𑁂𑀢𑁂 𑀦𑀺𑀭𑀬𑀲𑁆𑀲 𑀅𑀢𑁆𑀣𑀸𑀬 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑀸 𑀦𑀸𑀫. 𑀅𑀝𑁆𑀞 𑀧𑀦 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀪𑀸𑀯𑀸𑀬 𑀉𑀧𑀭𑀽𑀧𑀭𑀺𑀫𑀕𑁆𑀕𑀨𑀮𑀢𑁆𑀣𑀸𑀬 𑀘𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀘 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑀸 𑀦𑀸𑀫. 𑀅𑀯𑀲𑁂𑀲𑀧𑀼𑀕𑁆𑀕𑀮𑀸 𑀧𑀦 𑀅𑀦𑀺𑀩𑀤𑁆𑀥𑀕𑀢𑀺𑀓𑀸. 𑀬𑀣𑀸 𑀆𑀓𑀸𑀲𑁂 𑀔𑀺𑀢𑁆𑀢𑀤𑀡𑁆𑀟𑁄 𑀧𑀣𑀯𑀺𑀬𑀁 𑀧𑀢𑀦𑁆𑀢𑁄 ‘𑀅𑀕𑁆𑀕𑁂𑀦 𑀯𑀸 𑀫𑀚𑁆𑀛𑁂𑀦 𑀯𑀸 𑀫𑀽𑀮𑁂𑀦 𑀯𑀸 𑀧𑀢𑀺𑀲𑁆𑀲𑀢𑀻’𑀢𑀺 𑀦 𑀜𑀸𑀬𑀢𑀺; 𑀏𑀯𑀫𑁂𑀯 ‘𑀅𑀲𑀼𑀓𑀕𑀢𑀺𑀬𑀸 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀻’𑀢𑀺 𑀦𑀺𑀬𑀫𑀸𑀪𑀸𑀯𑀸 𑀅𑀦𑀺𑀬𑀢𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀦𑀺𑀬𑀢𑀕𑀢𑀺𑀓𑀢𑀸 ¶ 𑀯𑀼𑀢𑁆𑀢𑀸, 𑀦 𑀲𑀸 𑀦𑀺𑀬𑀢𑀥𑀫𑁆𑀫𑀯𑀲𑁂𑀦. 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀬𑁂𑀯 𑀳𑀺 𑀦𑀺𑀬𑀢𑀸 𑀦𑀸𑀫. 𑀢𑁂𑀲𑀜𑁆𑀘 𑀯𑀲𑁂𑀦𑀸𑀬𑀁 𑀧𑀼𑀕𑁆𑀕𑀮𑀦𑀺𑀬𑀫𑁄 𑀓𑀣𑀺𑀢𑁄𑀢𑀺.

𑁧𑁫. 𑀧𑀝𑀺𑀧𑀦𑁆𑀦𑀓𑀦𑀺𑀤𑁆𑀤𑁂𑀲𑁂 𑁋 𑀫𑀕𑁆𑀕𑀲𑀫𑀗𑁆𑀕𑀺𑀦𑁄𑀢𑀺 𑀫𑀕𑁆𑀕𑀝𑁆𑀞𑀓𑀧𑀼𑀕𑁆𑀕𑀮𑀸. 𑀢𑁂 𑀳𑀺 𑀨𑀮𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀝𑀺𑀧𑀦𑁆𑀦𑀓𑀸 𑀦𑀸𑀫. 𑀨𑀮𑀲𑀫𑀗𑁆𑀕𑀺𑀦𑁄𑀢𑀺 𑀨𑀮𑀧𑀝𑀺𑀮𑀸𑀪𑀲𑀫𑀗𑁆𑀕𑀺𑀢𑀸𑀬 𑀨𑀮𑀲𑀫𑀗𑁆𑀕𑀺𑀦𑁄. 𑀨𑀮𑀧𑀝𑀺𑀮𑀸𑀪𑀢𑁄 𑀧𑀝𑁆𑀞𑀸𑀬 𑀳𑀺 𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀲𑀫𑀸𑀧𑀦𑁆𑀦𑀸𑀧𑀺 𑀨𑀮𑁂 𑀞𑀺𑀢𑀸𑀬𑁂𑀯 𑀦𑀸𑀫.

𑁧𑁬. 𑀲𑀫𑀲𑀻𑀲𑀻𑀦𑀺𑀤𑁆𑀤𑁂𑀲𑁂 𑁋 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀧𑀭𑀺𑀓𑁆𑀔𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀲𑀫𑀲𑀻𑀲𑀻 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑁄 𑀧𑀦𑁂𑀲 𑀢𑀺𑀯𑀺𑀥𑁄 𑀳𑁄𑀢𑀺 𑁋 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑁄 𑀘𑀗𑁆𑀓𑀫𑀦𑁆𑀢𑁄𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀺 𑀧𑀤𑀼𑀫𑀢𑁆𑀣𑁂𑀭𑁄 𑀯𑀺𑀬; 𑀞𑀺𑀢𑀓𑁄𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀞𑀺𑀢𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀺 𑀓𑁄𑀝𑀧𑀩𑁆𑀩𑀢𑀯𑀺𑀳𑀸𑀭𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬; 𑀦𑀺𑀲𑀺𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀦𑀺𑀧𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀦𑀺𑀧𑀦𑁆𑀦𑁄𑀯 𑀧𑀭𑀺𑀦𑀺𑀩𑁆𑀩𑀸𑀢𑀺 𑁋 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫.

𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂𑀬𑁂𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀺 𑁋 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫.

𑀓𑀢𑀭𑁄 ¶ ¶ 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫? ‘‘𑀲𑀻𑀲𑀦𑁆𑀢𑀺 𑀢𑁂𑀭𑀲 𑀲𑀻𑀲𑀸𑀦𑀺 𑁋 𑀧𑀮𑀺𑀩𑁄𑀥𑀲𑀻𑀲𑀜𑁆𑀘 𑀢𑀡𑁆𑀳𑀸, 𑀯𑀺𑀦𑀺𑀩𑀦𑁆𑀥𑀦𑀲𑀻𑀲𑀜𑁆𑀘 𑀫𑀸𑀦𑁄, 𑀧𑀭𑀸𑀫𑀸𑀲𑀲𑀻𑀲𑀜𑁆𑀘 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀲𑀻𑀲𑀜𑁆𑀘 𑀉𑀤𑁆𑀥𑀘𑁆𑀘𑀁, 𑀲𑀁𑀓𑀺𑀮𑁂𑀲𑀲𑀻𑀲𑀜𑁆𑀘 𑀅𑀯𑀺𑀚𑁆𑀚𑀸, 𑀅𑀥𑀺𑀫𑁄𑀓𑁆𑀔𑀲𑀻𑀲𑀜𑁆𑀘 𑀲𑀤𑁆𑀥𑀸, 𑀧𑀕𑁆𑀕𑀳𑀲𑀻𑀲𑀜𑁆𑀘 𑀯𑀻𑀭𑀺𑀬𑀁, 𑀉𑀧𑀝𑁆𑀞𑀸𑀦𑀲𑀻𑀲𑀜𑁆𑀘 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀲𑀻𑀲𑀜𑁆𑀘 𑀲𑀫𑀸𑀥𑀺, 𑀤𑀲𑁆𑀲𑀦𑀲𑀻𑀲𑀜𑁆𑀘 𑀧𑀜𑁆𑀜𑀸, 𑀧𑀯𑀢𑁆𑀢𑀲𑀻𑀲𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀘𑀭𑀲𑀻𑀲𑀜𑁆𑀘 𑀯𑀺𑀫𑁄𑀓𑁆𑀔𑁄, 𑀲𑀗𑁆𑀔𑀸𑀭𑀲𑀻𑀲𑀜𑁆𑀘 𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁮𑁭). 𑀢𑀢𑁆𑀣 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺. 𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 ¶ 𑀘𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁. 𑀬𑀲𑁆𑀲 𑀘𑁂𑀢𑀁 𑀲𑀻𑀲𑀤𑁆𑀯𑀬𑀁 𑀲𑀫𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀲𑁄 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫.

𑀓𑀣𑀫𑀺𑀤𑀁 𑀲𑀫𑀁 𑀳𑁄𑀢𑀻𑀢𑀺? 𑀯𑀸𑀭𑀲𑀫𑀢𑀸𑀬. 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺 𑁋 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑀁 𑀳𑁄𑀢𑀺 𑀦𑀸𑀫. 𑀢𑁂𑀦𑀸𑀬𑀁 𑀧𑀼𑀕𑁆𑀕𑀮𑁄 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀯 𑀘 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑁧𑁭. 𑀞𑀺𑀢𑀓𑀧𑁆𑀧𑀻𑀦𑀺𑀤𑁆𑀤𑁂𑀲𑁂 𑁋 𑀞𑀺𑀢𑁄 𑀓𑀧𑁆𑀧𑁄𑀢𑀺 𑀞𑀺𑀢𑀓𑀧𑁆𑀧𑁄, 𑀞𑀺𑀢𑀓𑀧𑁆𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀞𑀺𑀢𑀓𑀧𑁆𑀧𑀻. 𑀓𑀧𑁆𑀧𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀉𑀟𑁆𑀟𑀬𑁆𑀳𑀦𑀯𑁂𑀮𑀸 𑀅𑀲𑁆𑀲𑀸𑀢𑀺 𑀛𑀸𑀬𑀦𑀓𑀸𑀮𑁄 𑀪𑀯𑁂𑀬𑁆𑀬. 𑀦𑁂𑀯 𑀢𑀸𑀯𑀸𑀢𑀺 𑀬𑀸𑀯 𑀏𑀲 𑀫𑀕𑁆𑀕𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀢𑀺, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀛𑀸𑀬𑁂𑀬𑁆𑀬. 𑀛𑀸𑀬𑀫𑀸𑀦𑁄𑀧𑀺 𑀅𑀚𑁆𑀛𑀸𑀬𑀺𑀢𑁆𑀯𑀸𑀯 𑀢𑀺𑀝𑁆𑀞𑁂𑀬𑁆𑀬. 𑀓𑀧𑁆𑀧𑀯𑀺𑀦𑀸𑀲𑁄 𑀳𑀺 𑀦𑀸𑀫 𑀫𑀳𑀸𑀯𑀺𑀓𑀸𑀭𑁄 𑀫𑀳𑀸𑀧𑀬𑁄𑀕𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑁆𑀲 𑀛𑀸𑀬𑀦𑀯𑀲𑁂𑀦 𑀫𑀳𑀸𑀮𑁄𑀓𑀯𑀺𑀦𑀸𑀲𑁄. 𑀅𑀬𑀫𑁆𑀧𑀺 𑀏𑀯𑀁 𑀫𑀳𑀸𑀯𑀺𑀦𑀸𑀲𑁄 𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺 𑀯𑀤𑀢𑀺. 𑀲𑀸𑀲𑀦𑁂 𑀧𑀦 𑀥𑀭𑀫𑀸𑀦𑁂 𑀅𑀬𑀁 𑀓𑀧𑁆𑀧𑀯𑀺𑀦𑀸𑀲𑁄 𑀦𑀸𑀫 𑀦𑀢𑁆𑀣𑀺. 𑀓𑀧𑁆𑀧𑀯𑀺𑀦𑀸𑀲𑁂 𑀲𑀸𑀲𑀦𑀁 𑀦𑀢𑁆𑀣𑀺. 𑀕𑀢𑀓𑁄𑀝𑀺𑀓𑁂 𑀳𑀺 𑀓𑀸𑀮𑁂 𑀓𑀧𑁆𑀧𑀯𑀺𑀦𑀸𑀲𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀢𑁆𑀣𑀸 𑀅𑀦𑁆𑀢𑀭𑀸𑀬𑀸𑀪𑀸𑀯𑀁 𑀤𑀻𑀧𑁂𑀢𑀼𑀁 𑀇𑀤𑀁 𑀓𑀸𑀭𑀡𑀁 𑀆𑀳𑀭𑀺 𑁋 ‘‘𑀇𑀤𑀫𑁆𑀧𑀺 𑀪𑀯𑁂𑀬𑁆𑀬, 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀧𑀦 𑀨𑀮𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺. 𑀅𑀬𑀁 𑀧𑀦 𑀧𑀼𑀕𑁆𑀕𑀮𑁄 𑀓𑀧𑁆𑀧𑀁 𑀞𑀧𑁂𑀦𑁆𑀢𑁄 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀞𑀧𑁂𑀬𑁆𑀬𑀸𑀢𑀺? 𑀬𑀲𑁆𑀫𑀺𑀁 ¶ 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀣 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀦𑁆𑀢𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀢𑀻𑀡𑀺 𑀅𑀦𑀼𑀮𑁄𑀫𑀸𑀦𑀺, 𑀏𑀓𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁, 𑀏𑀓𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀤𑁆𑀯𑁂 𑀨𑀮𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 ¶ 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀻𑀢𑀺 ¶ 𑀏𑀢𑁆𑀢𑀓𑀁 𑀓𑀸𑀮𑀁 𑀞𑀧𑁂𑀬𑁆𑀬. 𑀇𑀫𑀁 𑀧𑀦𑀢𑁆𑀣𑀁 𑀩𑀸𑀳𑀺𑀭𑀸𑀬 𑀆𑀕𑀦𑁆𑀢𑀼𑀓𑀽𑀧𑀫𑀸𑀬𑀧𑀺 𑀏𑀯𑀁 𑀤𑀻𑀧𑀬𑀺𑀁𑀲𑀼. 𑀲𑀘𑁂 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀫𑀢𑁆𑀣𑀓𑀽𑀧𑀭𑀺 𑀬𑁄𑀚𑀦𑀺𑀓𑀁 𑀏𑀓𑀕𑁆𑀖𑀦𑀲𑁂𑀮𑀁 𑀢𑀺𑀯𑀝𑁆𑀝𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑁂𑀬𑁆𑀬, 𑀏𑀓𑀲𑁆𑀫𑀺𑀁 𑀯𑀝𑁆𑀝𑁂 𑀙𑀺𑀦𑁆𑀦𑁂 𑀤𑁆𑀯𑀻𑀳𑀺 𑀑𑀮𑀫𑁆𑀩𑁂𑀬𑁆𑀬, 𑀤𑁆𑀯𑀻𑀲𑀼 𑀙𑀺𑀦𑁆𑀦𑁂𑀲𑀼 𑀏𑀓𑁂𑀦 𑀑𑀮𑀫𑁆𑀩𑁂𑀬𑁆𑀬𑁂𑀯, 𑀢𑀲𑁆𑀫𑀺𑀫𑁆𑀧𑀺 𑀙𑀺𑀦𑁆𑀦𑁂 𑀅𑀩𑁆𑀪𑀓𑀽𑀝𑀁 𑀯𑀺𑀬 𑀆𑀓𑀸𑀲𑁂 𑀢𑀺𑀝𑁆𑀞𑁂𑀬𑁆𑀬, 𑀦 𑀢𑁆𑀯𑁂𑀯 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸𑀢𑀺. 𑀅𑀬𑀁 𑀧𑀦 𑀤𑀻𑀧𑀦𑀸 𑀧𑀭𑀺𑀢𑁆𑀢𑀸, 𑀧𑀼𑀭𑀺𑀫𑀸𑀯 𑀫𑀳𑀦𑁆𑀢𑀸. 𑀦 𑀓𑁂𑀯𑀮𑀁 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄𑀯 𑀓𑀧𑁆𑀧𑀁 𑀞𑀧𑁂𑀢𑀺, 𑀇𑀢𑀭𑁂 𑀫𑀕𑁆𑀕𑀲𑀫𑀗𑁆𑀕𑀺𑀦𑁄𑀧𑀺 𑀞𑀧𑁂𑀦𑁆𑀢𑀺𑀬𑁂𑀯. 𑀢𑁂𑀦 𑀪𑀕𑀯𑀸 𑀳𑁂𑀝𑁆𑀞𑀸 𑀕𑀳𑀺𑀢𑀜𑁆𑀘 𑀅𑀕𑁆𑀕𑀳𑀺𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀤𑁆𑀥𑀺𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀧𑀼𑀕𑁆𑀕𑀮𑁂𑀳𑀺 𑀇𑀫𑀁 𑀢𑀦𑁆𑀢𑀺𑀁 𑀆𑀭𑁄𑀧𑁂𑀲𑀺 𑁋 ‘‘𑀲𑀩𑁆𑀩𑁂𑀧𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸 𑀞𑀺𑀢𑀓𑀧𑁆𑀧𑀺𑀦𑁄’’𑀢𑀺.

𑁧𑁮. 𑀅𑀭𑀺𑀬𑀦𑀺𑀤𑁆𑀤𑁂𑀲𑁂 𑁋 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑀸. 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀭𑀡𑀻𑀬𑀢𑁆𑀢𑀸 𑀅𑀭𑀺𑀬𑀸. 𑀅𑀭𑀺𑀬𑀝𑁆𑀞𑁄 𑀦𑀸𑀫 𑀧𑀭𑀺𑀲𑀼𑀤𑁆𑀥𑀝𑁆𑀞𑁄𑀢𑀺 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀧𑀺 𑀅𑀭𑀺𑀬𑀸. 𑀲𑁂𑀲𑀸 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀅𑀦𑀭𑀺𑀬𑀸.

𑁧𑁯. 𑀲𑁂𑀓𑁆𑀔𑀦𑀺𑀤𑁆𑀤𑁂𑀲𑁂 𑁋 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀫𑀕𑁆𑀕𑀓𑁆𑀔𑀡𑁂, 𑀨𑀮𑀲𑀫𑀗𑁆𑀕𑀺𑀦𑁄 𑀘 𑀨𑀮𑀓𑁆𑀔𑀡𑁂, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀓𑀸 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀺𑀬𑁂𑀯𑀸𑀢𑀺 𑀲𑁂𑀓𑁆𑀔𑀸. 𑀅𑀭𑀳𑀢𑀸 𑀧𑀦 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑀸. 𑀧𑀼𑀦 𑀢𑀲𑁆𑀲 𑀲𑀺𑀓𑁆𑀔𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀲𑁂𑀓𑁆𑀔𑀸. 𑀇𑀢𑀺 𑀲𑀢𑁆𑀢 𑀅𑀭𑀺𑀬𑀸 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀓𑁆𑀔𑀸. 𑀔𑀻𑀡𑀸𑀲𑀯𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀲𑀻𑀮𑀸𑀤𑀻𑀦𑀁 𑀲𑀺𑀓𑁆𑀔𑀺𑀢𑀢𑁆𑀢𑀸 𑀲𑀺𑀓𑁆𑀔𑀺𑀢𑀅𑀲𑁂𑀓𑁆𑀔𑀸 𑀦𑀸𑀫. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀬𑀫𑁆𑀪𑀽𑀢𑀢𑀸𑀬 𑀅𑀲𑀺𑀓𑁆𑀔𑀺𑀢𑀅𑀲𑁂𑀓𑁆𑀔𑀸 𑀦𑀸𑀫. 𑀲𑁂𑀲𑀧𑀼𑀕𑁆𑀕𑀮𑀸 𑀦𑁂𑀯 𑀲𑀺𑀓𑁆𑀔𑀦𑁆𑀢𑀺 𑀦 𑀲𑀺𑀓𑁆𑀔𑀺𑀢𑀸𑀢𑀺 𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀸.

𑁨𑁦. 𑀢𑁂𑀯𑀺𑀚𑁆𑀚𑀦𑀺𑀤𑁆𑀤𑁂𑀲𑁂 𑁋 𑀧𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀧𑀺, 𑀧𑀞𑀫𑀁 𑀅𑀭𑀳𑀢𑁆𑀢𑀁 ¶ 𑀧𑀢𑁆𑀯𑀸 𑀧𑀘𑁆𑀙𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀦𑀺𑀩𑁆𑀩𑀢𑁆𑀢𑀓𑁄𑀧𑀺 𑀢𑁂𑀯𑀺𑀚𑁆𑀚𑁄𑀬𑁂𑀯 𑀦𑀸𑀫. 𑀲𑀼𑀢𑁆𑀢𑀦𑁆𑀢𑀓𑀣𑀸 𑀧𑀦 𑀧𑀭𑀺𑀬𑀸𑀬𑀤𑁂𑀲𑀦𑀸 𑀅𑀪𑀺𑀥𑀫𑁆𑀫𑀓𑀣𑀸 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀕𑀫𑀦𑀻𑀬𑀫𑁂𑀯 𑀥𑀼𑀭𑀁. 𑀢𑀲𑁆𑀫𑀸 𑀧𑀞𑀫𑀁 𑀤𑁆𑀯𑁂 𑀯𑀺𑀚𑁆𑀚𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀙𑀴𑀪𑀺𑀜𑁆𑀜𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁨. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀦𑀺𑀤𑁆𑀤𑁂𑀲𑁂 ¶ 𑁋 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 𑀧𑀘𑁆𑀙𑀺𑀫𑀪𑀯𑁂 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁄 𑀧𑀼𑀩𑁆𑀩𑁂 𑀅𑀜𑁆𑀜𑀲𑁆𑀲 ¶ 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑁂𑀲𑀼. 𑀢𑀢𑁄 𑀧𑀼𑀭𑀺𑀫𑀧𑀼𑀭𑀺𑀫𑁂𑀲𑀼 𑀧𑀦 𑀪𑀯𑁂𑀲𑀼 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀆𑀭𑀼𑀬𑁆𑀳 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀁 𑀆𑀳𑀘𑁆𑀘 𑀞𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀧𑀘𑁆𑀙𑀺𑀫𑀪𑀯𑀲𑁆𑀫𑀺𑀁𑀬𑁂𑀯 𑀅𑀦𑀸𑀘𑀭𑀺𑀬𑀓𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀤𑀸 𑀳𑀺 𑀢𑀣𑀸𑀕𑀢𑁄 𑀧𑀽𑀭𑀺𑀢𑀧𑀸𑀭𑀫𑀺𑀢𑁆𑀢𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀲𑀸𑀫𑀁 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑁂𑀲𑀼 ‘‘𑀇𑀤𑀁 𑀤𑀼𑀓𑁆𑀔𑀁…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀜𑀸𑀡𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺.

𑀢𑀢𑁆𑀣 𑀘𑀸𑀢𑀺 𑀢𑀲𑁆𑀫𑀺𑀜𑁆𑀘 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑁂 𑀅𑀭𑀳𑀢𑁆𑀢𑀫𑀕𑁆𑀕𑁂. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑁂𑀯 𑀩𑀮𑁂𑀲𑀼 𑀘 𑀘𑀺𑀡𑁆𑀡𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀘𑁂𑀯 𑀤𑀲𑀩𑀮𑀜𑀸𑀡𑀲𑁆𑀲 𑀘 𑀅𑀥𑀺𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀓𑀸𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀉𑀪𑀢𑁄𑀲𑀼𑀚𑀸𑀢𑀲𑁆𑀲 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 ‘𑀇𑀤𑀁 𑀦𑀸𑀫 𑀇𑀲𑁆𑀲𑀭𑀺𑀬𑀁 𑀅𑀦𑀸𑀕𑀢’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀆𑀕𑀢𑀫𑁂𑀯 𑀳𑁄𑀢𑀺. 𑀏𑀯𑀫𑁂𑀯 𑀩𑀼𑀤𑁆𑀥𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 ‘𑀅𑀬𑀁 𑀦𑀸𑀫 𑀕𑀼𑀡𑁄 𑀦 𑀆𑀕𑀢𑁄, 𑀦 𑀧𑀝𑀺𑀯𑀺𑀤𑁆𑀥𑁄, 𑀦 𑀧𑀘𑁆𑀘𑀓𑁆𑀔𑁄’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑀸 𑀆𑀕𑀢𑀸 𑀧𑀝𑀺𑀯𑀺𑀤𑁆𑀥𑀸 𑀧𑀘𑁆𑀘𑀓𑁆𑀔𑀓𑀢𑀸𑀯 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀁 𑀧𑀸𑀭𑀫𑀻𑀧𑀽𑀭𑀡𑀲𑀺𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀕𑀼𑀡𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁩. 𑀧𑀘𑁆𑀘𑁂𑀓𑀩𑀼𑀤𑁆𑀥𑀦𑀺𑀤𑁆𑀤𑁂𑀲𑁂𑀧𑀺 ¶ 𑁋 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 𑀧𑀤𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀳𑀺 𑀧𑀘𑁆𑀙𑀺𑀫𑀪𑀯𑁂 𑀅𑀦𑀸𑀘𑀭𑀺𑀬𑀓𑁄 𑀅𑀢𑁆𑀢𑀼𑀓𑁆𑀓𑀁𑀲𑀺𑀓𑀜𑀸𑀡𑁂𑀦𑁂𑀯 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑁂𑀯 𑀩𑀮𑁂𑀲𑀼 𑀘 𑀘𑀺𑀡𑁆𑀡𑀯𑀲𑀻𑀪𑀸𑀯𑀁 𑀦 𑀧𑀸𑀧𑀼𑀡𑀸𑀢𑀺.

𑁨𑁪. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀗𑁆𑀔𑀸𑀭𑀕𑀢𑀁, 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 ¶ 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀳𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀢𑀢𑁆𑀭𑀸𑀬𑀁 𑀣𑁂𑀭𑀯𑀸𑀤𑁄 𑁋 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 ¶ 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄’’𑀢𑀺. 𑀢𑀺𑀧𑀺𑀝𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 ‘‘𑀦𑀸𑀫𑀦𑀺𑀲𑁆𑀲𑀺𑀢𑀓𑁄 𑀏𑀲𑁄’’𑀢𑀺 𑀯𑀢𑁆𑀯𑀸 𑁋

‘‘𑀅𑀘𑁆𑀘𑀻 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, (𑀉𑀧𑀲𑀻𑀯𑀸𑀢𑀺 𑀪𑀕𑀯𑀸;)

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄,

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁮𑁦);

𑀯𑀢𑁆𑀯𑀸 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀦𑀸𑀫𑀓𑀸𑀬𑀢𑁄 𑀘 𑀭𑀽𑀧𑀓𑀸𑀬𑀢𑁄 𑀘 𑀲𑀼𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀆𑀳. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑁄 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺. 𑀇𑀫𑁂 𑀧𑀦 𑀢𑀬𑁄𑀧𑀺 𑀣𑁂𑀭𑀸 𑀧𑀡𑁆𑀟𑀺𑀢𑀸, ‘𑀢𑀺𑀡𑁆𑀡𑀫𑁆𑀧𑀺 𑀯𑀸𑀤𑁂 𑀓𑀸𑀭𑀡𑀁 𑀤𑀺𑀲𑁆𑀲𑀢𑀻’𑀢𑀺 𑀢𑀺𑀡𑁆𑀡𑀫𑁆𑀧𑀺 ¶ 𑀯𑀸𑀤𑀁 𑀢𑀦𑁆𑀢𑀺𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼.

𑀲𑀗𑁆𑀔𑁂𑀧𑀢𑁄 𑀧𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀲𑀫𑀸𑀧𑀢𑁆𑀢𑀺𑀲𑀻𑀲𑀁 𑀦𑀺𑀭𑁄𑀥𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀅𑀦𑀸𑀕𑀸𑀫𑀻 𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑁄 𑀦𑀸𑀫. 𑀦𑀦𑀼 𑀘 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀳𑀺 𑀤𑀼𑀯𑀗𑁆𑀕𑀺𑀓𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀭𑀽𑀧𑀓𑀸𑀬𑀢𑁄 𑀅𑀯𑀺𑀫𑀼𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀓𑀺𑀮𑁂𑀲𑀓𑀸𑀬𑀢𑁄𑀯 𑀯𑀺𑀫𑀼𑀢𑁆𑀢𑀁, 𑀦 𑀭𑀽𑀧𑀓𑀸𑀬𑀢𑁄; 𑀢𑀲𑁆𑀫𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺 ¶ . 𑀅𑀭𑀽𑀧𑀸𑀯𑀘𑀭𑀁 𑀧𑀦 𑀦𑀸𑀫𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀁 𑀭𑀽𑀧𑀓𑀸𑀬𑀢𑁄 𑀘𑀸𑀢𑀺 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁫. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘𑀢𑀽𑀳𑀺 ¶ 𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀏𑀢𑁂𑀲𑀼 𑀳𑀺 𑀏𑀓𑁄𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻 𑀦 𑀳𑁄𑀢𑀺. 𑀢𑁂𑀦𑁂𑀯 𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂𑀢𑀺𑀆𑀤𑀺𑀫𑀸𑀳. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀧𑀦 𑀏𑀓𑀲𑁆𑀫𑀺𑀁 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺.

𑁨𑁬. 𑀓𑀸𑀬𑀲𑀓𑁆𑀔𑀺𑀦𑀺𑀤𑁆𑀤𑁂𑀲𑁂 𑁋 𑀏𑀓𑀘𑁆𑀘𑁂 𑀆𑀲𑀯𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻. 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺𑀧𑀺 𑀓𑀸𑀬𑀲𑀓𑁆𑀔𑀻. 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 𑀙𑀩𑁆𑀩𑀺𑀥𑁄 𑀳𑁄𑀢𑀺.

𑁨𑁭. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀦𑀺𑀤𑁆𑀤𑁂𑀲𑁂 ¶ 𑁋 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀁. 𑀤𑀼𑀓𑁆𑀔𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 ‘𑀤𑀼𑀓𑁆𑀔𑀲𑀘𑁆𑀘’𑀦𑁆𑀢𑀺 𑀬𑀸𑀣𑀸𑀯𑀲𑀭𑀲𑀢𑁄 𑀧𑀚𑀸𑀦𑀸𑀢𑀺. 𑀢𑀡𑁆𑀳𑀸 𑀧𑀦 𑀤𑀼𑀓𑁆𑀔𑀁 𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀧𑀪𑀸𑀯𑁂𑀢𑀺, 𑀢𑀢𑁄 𑀢𑀁 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺; 𑀢𑀲𑁆𑀫𑀸 𑀦𑀁 𑀅𑀬𑀁 ‘𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺; 𑀢𑀲𑁆𑀫𑀸 𑀦𑀁 ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀭𑀺𑀬𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺; 𑀢𑁂𑀦 𑀢𑀁 ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀸𑀓𑁆𑀔𑀡𑁂 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀏𑀓𑀓𑁆𑀔𑀡𑁂 𑀤𑀲𑁆𑀲𑁂𑀢𑀼𑀁 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸𑀢𑀺 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀢𑁆𑀯𑀸 𑀢𑀣𑀸𑀕𑀢𑁂𑀦 𑀧𑀝𑀺𑀯𑀺𑀤𑁆𑀥𑀸 𑀯𑀺𑀤𑀺𑀢𑀸 𑀧𑀸𑀓𑀝𑀻𑀓𑀢𑀸. 𑀥𑀫𑁆𑀫𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸. 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀯𑁄𑀘𑀭𑀺𑀢𑀸𑀢𑀺 𑀲𑀼𑀘𑀭𑀺𑀢𑀸. 𑀢𑁂𑀲𑀼 𑀅𑀦𑁂𑀦 𑀧𑀜𑁆𑀜𑀸 𑀲𑀼𑀝𑁆𑀞𑀼 𑀘𑀭𑀸𑀧𑀺𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀳𑀺 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄. ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄’’𑀢𑀺 𑀜𑀸𑀡𑀁 𑀳𑁄𑀢𑀺 ¶ . 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀧𑀲𑁆𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑀤𑀺𑀝𑁆𑀞𑀧𑁆𑀧𑀢𑁆𑀢𑁄. 𑀅𑀬𑀫𑁆𑀧𑀺 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀙𑀩𑁆𑀩𑀺𑀥𑁄𑀯 𑀳𑁄𑀢𑀺.

𑁨𑁮. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀦𑁄 𑀘 𑀔𑁄 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦 𑀏𑀯𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀦𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺? 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦. 𑀤𑀺𑀝𑁆𑀞𑀺𑀧𑁆𑀧𑀢𑁄 𑀳𑀺 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀧𑁆𑀧𑀓𑀲𑀺𑀭𑁂𑀦 𑀅𑀓𑀺𑀮𑀫𑀦𑁆𑀢𑁄𑀯 ¶ 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 ¶ 𑀧𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀅𑀧𑀺𑀘 𑀦𑁂𑀲𑀁 𑀧𑀜𑁆𑀜𑀸𑀬𑀧𑀺 𑀦𑀸𑀦𑀢𑁆𑀢𑀁 𑀅𑀢𑁆𑀣𑀺𑀬𑁂𑀯. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀢𑀺𑀓𑁆𑀔𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀯𑀳𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑁄 𑀢𑀺𑀓𑁆𑀔𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀢𑀲𑁆𑀫𑀸𑀧𑀺 𑀲𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺.

𑀬𑀣𑀸 𑀳𑀺 𑀤𑁆𑀯𑀻𑀲𑀼 𑀢𑀭𑀼𑀡𑁂𑀲𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁂𑀲𑀼 𑀏𑀓𑀲𑁆𑀲 𑀳𑀢𑁆𑀣𑁂 𑀢𑀺𑀔𑀺𑀡𑁄 𑀅𑀲𑀺, 𑀏𑀓𑀲𑁆𑀲 𑀓𑀼𑀡𑁆𑀞𑁄. 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀻 𑀙𑀺𑀚𑁆𑀚𑀫𑀸𑀦𑀸 𑀲𑀤𑁆𑀤𑀁 𑀦 𑀓𑀭𑁄𑀢𑀺. 𑀓𑀼𑀡𑁆𑀞𑁂𑀦 𑀅𑀲𑀺𑀦𑀸 𑀙𑀺𑀚𑁆𑀚𑀫𑀸𑀦𑀸 ‘𑀓𑀝𑀓𑀝𑀸’𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺. 𑀢𑀢𑁆𑀣 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑀺𑀬𑀸 𑀏𑀯 𑀓𑀤𑀮𑀺𑀬𑀸 𑀙𑁂𑀤𑀦𑀁 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀔𑀺𑀡𑀲𑀽𑀭𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄. 𑀓𑀼𑀡𑁆𑀞𑁂𑀦 𑀅𑀲𑀺𑀦𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸𑀧𑀺 𑀓𑀤𑀮𑀺𑀬𑀸 𑀙𑁂𑀤𑀦𑀁 𑀯𑀺𑀬 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀢𑀺𑀔𑀺𑀡𑀅𑀲𑀽𑀭𑀅𑀧𑁆𑀧𑀲𑀦𑁆𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀁 𑀧𑀦 𑀦𑀬𑀁 ‘𑀦𑁄’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁.

𑀆𑀕𑀫𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀁 𑁋 ‘‘𑀏𑀢𑁂𑀲𑀼 𑀳𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬 𑀑𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀬 𑀘 𑀓𑀺𑀮𑁂𑀲𑀓𑁆𑀔𑀬𑁄 𑀳𑁄𑀢𑀺. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀜𑀸𑀡𑀁 𑀅𑀤𑀦𑁆𑀥𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀳𑀼𑀢𑁆𑀯𑀸 𑀯𑀳𑀢𑀺. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀅𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀦 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀦 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀩𑀮𑀯𑀢𑀭𑁄 𑀯𑀸𑀬𑀸𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺 ¶ ; 𑀏𑀯𑀭𑀽𑀧𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸. 𑀬𑀣𑀸 𑀧𑀦 𑀲𑀼𑀦𑀺𑀲𑀺𑀢𑁂𑀦𑁂𑀯 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀩𑀮𑀯𑀯𑀸𑀬𑀸𑀫𑀓𑀺𑀘𑁆𑀘𑀁 𑀦 𑀳𑁄𑀢𑀺; 𑀏𑀯𑀭𑀽𑀧𑀸 ¶ 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀳𑀺 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀅𑀬𑀫𑁆𑀧𑀺 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀙𑀩𑁆𑀩𑀺𑀥𑁄𑀯 𑀳𑁄𑀢𑀺.

𑁨𑁯. 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀺𑀤𑁆𑀤𑁂𑀲𑁂 𑁋 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀇𑀫𑀺𑀦𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀤𑀲𑁆𑀲𑀺𑀢𑁄. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀩𑀮𑀯𑀁. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻. 𑀧𑀜𑁆𑀜𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻𑀢𑀺𑀧𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀧𑀜𑁆𑀜𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑁩𑁦. 𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀺𑀤𑁆𑀤𑁂𑀲𑁂𑀧𑀺 𑁋 𑀲𑀤𑁆𑀥𑀁 𑀯𑀸𑀳𑁂𑀢𑀻𑀢𑀺 𑀲𑀤𑁆𑀥𑀸𑀯𑀸𑀳𑀻. 𑀲𑀤𑁆𑀥𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀲𑀤𑁆𑀥𑀸𑀯𑀸𑀳𑀻𑀢𑀺𑀧𑀺 𑀯𑀼𑀢𑁆𑀢𑀫𑁂𑀯. 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀲𑀤𑁆𑀥𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀲𑀤𑁆𑀥𑀸𑀬 𑀲𑀭𑀢𑀺. 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀳𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫, 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸 𑀦𑀸𑀫, 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀢𑀢𑁆𑀣 𑀲𑀤𑁆𑀥𑀸𑀥𑀼𑀭𑀁 𑀧𑀜𑁆𑀜𑀸𑀥𑀼𑀭𑀦𑁆𑀢𑀺 𑁋 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫. 𑀏𑀓𑁄 𑀧𑀦 𑀪𑀺𑀓𑁆𑀔𑀼 𑀲𑀫𑀣𑀸𑀪𑀺𑀦𑀺𑀯𑁂𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀺, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂𑀦𑀸𑀢𑀺 𑁋 𑀇𑀫𑁂 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸 𑀦𑀸𑀫. 𑀏𑀓𑁄 𑀘 𑀫𑀢𑁆𑀣𑀓𑀁 𑀧𑀸𑀧𑀼𑀡𑀦𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀏𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑁋 𑀇𑀫𑀸𑀦𑀺 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀬𑁂 𑀓𑁂𑀘𑀺 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂 𑀤𑁆𑀯𑁂 𑀥𑀫𑁆𑀫𑁂 𑀥𑀼𑀭𑀁 𑀓𑀢𑁆𑀯𑀸 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀢𑁂𑀲𑀼 𑀬𑁄 𑀪𑀺𑀓𑁆𑀔𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀣𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻 𑀦𑀸𑀫. 𑀅𑀭𑀳𑀢𑁆𑀢𑀨𑀮𑁂 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫.

𑀅𑀧𑀭𑁄 ¶ 𑀧𑀜𑁆𑀜𑀫𑁂𑀯 ¶ 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫. 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀇𑀥 𑀤𑁆𑀯𑁂 𑀦𑀸𑀫𑀸𑀦𑀺 𑀅𑀧𑀼𑀩𑁆𑀩𑀸𑀦𑀺, 𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘 𑀳𑁄𑀦𑁆𑀢𑀺. 𑀅𑀧𑀭𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑁋 𑀅𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻𑀬𑁂𑀯 𑀦𑀸𑀫. 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫. 𑀇𑀥 𑀏𑀓𑀫𑁂𑀯 𑀦𑀸𑀫𑀁 𑀅𑀧𑀼𑀩𑁆𑀩𑀁. 𑀢𑁂𑀦 𑀲𑀤𑁆𑀥𑀺𑀁 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀙 𑀳𑁄𑀦𑁆𑀢𑀺. 𑀅𑀧𑀭𑁄 𑀲𑀤𑁆𑀥𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 ¶ 𑀦𑀸𑀫. 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀇𑀥𑀸𑀧𑀺 𑀏𑀓𑀫𑁂𑀯 𑀦𑀸𑀫𑀁 𑀅𑀧𑀼𑀩𑁆𑀩𑀁. 𑀢𑁂𑀦 𑀲𑀤𑁆𑀥𑀺𑀁 𑀧𑀼𑀭𑀺𑀫𑀸𑀦𑀺 𑀙 𑀲𑀢𑁆𑀢 𑀳𑁄𑀦𑁆𑀢𑀺. 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫𑀸𑀢𑀺.

𑁩𑁧. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀦𑀺𑀤𑁆𑀤𑁂𑀲𑁂 𑁋 𑀲𑀢𑁆𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀲𑀢𑁆𑀢𑀯𑀸𑀭𑁂. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸 𑀪𑀯𑀽𑀧𑀧𑀢𑁆𑀢𑀺 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀁 𑀅𑀲𑁆𑀲, 𑀢𑀢𑁄 𑀧𑀭𑀁 𑀅𑀝𑁆𑀞𑀫𑀁 𑀪𑀯𑀁 𑀦𑀸𑀤𑀺𑀬𑀢𑀻𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄. 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀲𑁄𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫. 𑀬𑀣𑀸𑀳 𑁋

‘‘𑀲𑁄𑀢𑁄 𑀲𑁄𑀢𑁄𑀢𑀺 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑁄𑀢𑀺? 𑀅𑀬𑀫𑁂𑀯 𑀳𑀺, 𑀪𑀦𑁆𑀢𑁂, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑁄𑀢𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻𑀢𑀺. 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄𑀢𑀺, 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑀸𑀧𑀦𑁆𑀦𑁄𑀢𑀺? 𑀬𑁄 𑀳𑀺, 𑀪𑀦𑁆𑀢𑁂, 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀬𑀁 𑀯𑀼𑀘𑁆𑀘𑀢𑀺 𑀲𑁄𑀢𑀸𑀧𑀦𑁆𑀦𑁄, 𑀲𑁆𑀯𑀸𑀬𑀁 𑀆𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀇𑀢𑀺 𑀯𑀸’’𑀢𑀺 (𑀲𑀁. 𑀦𑀺. 𑁫.𑁧𑁦𑁦𑁧).

𑀏𑀯𑀁 ¶ 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀇𑀥 ¶ 𑀧𑀦 𑀫𑀕𑁆𑀕𑁂𑀦 𑀨𑀮𑀲𑁆𑀲 𑀦𑀸𑀫𑀁 𑀤𑀺𑀦𑁆𑀦𑀦𑁆𑀢𑀺 𑀨𑀮𑀓𑁆𑀔𑀡𑁂 𑀲𑁄𑀢𑀸𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄.

𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀯𑀺𑀦𑀺𑀧𑀸𑀢𑀲𑀗𑁆𑀔𑀸𑀢𑀁 𑀅𑀧𑀸𑀬𑀁 𑀉𑀧𑀧𑀢𑁆𑀢𑀺𑀯𑀲𑁂𑀦 𑀅𑀦𑀸𑀕𑀫𑀦𑀲𑀪𑀸𑀯𑁄. 𑀦𑀺𑀬𑀢𑁄𑀢𑀺 𑀫𑀕𑁆𑀕𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺 𑀩𑀼𑀚𑁆𑀛𑀦𑀓𑀪𑀸𑀯𑀧𑀭𑀸𑀬𑀡𑁄. 𑀲𑁄 𑀳𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁂𑀦 𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀉𑀧𑀭𑀺 𑀢𑀻𑀳𑀺 𑀫𑀕𑁆𑀕𑁂𑀳𑀺 𑀅𑀯𑀲𑁆𑀲𑀁 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘𑀸𑀢𑀺 𑀤𑁂𑀯𑀮𑁄𑀓𑀜𑁆𑀘 𑀫𑀦𑀼𑀲𑁆𑀲𑀮𑁄𑀓𑀜𑁆𑀘. 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀧𑀭𑀸𑀧𑀭𑀁 𑀕𑀦𑁆𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀭𑀺𑀯𑀝𑀼𑀫𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦 𑀓𑀸𑀮𑁂𑀦 𑀤𑁂𑀯𑀮𑁄𑀓𑀲𑁆𑀲 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀲𑁆𑀲 𑀯𑀲𑁂𑀦 𑀫𑀺𑀲𑁆𑀲𑀓𑀪𑀯𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁨. 𑀓𑁄𑀮𑀁𑀓𑁄𑀮𑀦𑀺𑀤𑁆𑀤𑁂𑀲𑁂 𑁋 𑀓𑀼𑀮𑀢𑁄 𑀓𑀼𑀮𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀢𑁄 𑀳𑀺 𑀧𑀝𑁆𑀞𑀸𑀬 𑀦𑀻𑀘𑁂 𑀓𑀼𑀮𑁂 𑀉𑀧𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀫𑀳𑀸𑀪𑁄𑀕𑀓𑀼𑀮𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 ¶ 𑀅𑀢𑁆𑀣𑁄. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀪𑀯𑁂. 𑀇𑀢𑀺 𑀅𑀬𑀫𑁆𑀧𑀺 𑀫𑀺𑀲𑁆𑀲𑀓𑀪𑀯𑁂𑀦𑁂𑀯 𑀓𑀣𑀺𑀢𑁄. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁 𑁋 ‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸’𑀢𑀺. 𑀬𑀸𑀯 𑀙𑀝𑁆𑀞𑀪𑀯𑀸 𑀲𑀁𑀲𑀭𑀦𑁆𑀢𑁄𑀧𑀺 𑀧𑀦 𑀓𑁄𑀮𑀁𑀓𑁄𑀮𑁄𑀯 𑀳𑁄𑀢𑀺.

𑁩𑁩. 𑀏𑀓𑀩𑀻𑀚𑀺𑀦𑀺𑀤𑁆𑀤𑁂𑀲𑁂 𑁋 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀓𑀣𑀺𑀢𑀁. 𑀬𑀲𑁆𑀲 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀏𑀓𑀁𑀬𑁂𑀯 𑀔𑀦𑁆𑀥𑀩𑀻𑀚𑀁 𑀅𑀢𑁆𑀣𑀺, 𑀏𑀓𑀁 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀁, 𑀲𑁄 𑀏𑀓𑀩𑀻𑀚𑀻 𑀦𑀸𑀫. 𑀫𑀸𑀦𑀼𑀲𑀓𑀁 𑀪𑀯𑀦𑁆𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀤𑁂𑀲𑀦𑀸𑀫𑀢𑁆𑀢𑀫𑁂𑀯. 𑀤𑁂𑀯𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺𑀧𑀺 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀪𑀕𑀯𑀢𑀸 𑀕𑀳𑀺𑀢𑀦𑀸𑀫𑀯𑀲𑁂𑀦𑁂𑀯 𑀘𑁂𑀢𑀸𑀦𑀺 𑀏𑀢𑁂𑀲𑀁 𑀦𑀸𑀫𑀸𑀦𑀺. 𑀏𑀢𑁆𑀢𑀓𑀁 𑀞𑀸𑀦𑀁 𑀕𑀢𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺, 𑀏𑀢𑁆𑀢𑀓𑀁 𑀓𑁄𑀮𑀁𑀓𑁄𑀮𑁄, 𑀏𑀢𑁆𑀢𑀓𑀁 𑀏𑀓𑀩𑀻𑀚𑀻𑀢𑀺 𑀪𑀕𑀯𑀢𑀸 𑀏𑀢𑁂𑀲𑀁 𑀦𑀸𑀫𑀁 𑀕𑀳𑀺𑀢𑀁. 𑀦𑀺𑀬𑀫𑀢𑁄 𑀧𑀦 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀅𑀬𑀁 𑀓𑁄𑀮𑀁𑀓𑁄𑀮𑁄, 𑀅𑀬𑀁 𑀏𑀓𑀩𑀻𑀚𑀻𑀢𑀺 𑀦𑀢𑁆𑀣𑀺.

𑀓𑁄 ¶ 𑀧𑀦 𑀢𑁂𑀲𑀁 𑀏𑀢𑀁 𑀧𑀪𑁂𑀤𑀁 𑀦𑀺𑀬𑀫𑁂𑀢𑀻𑀢𑀺? 𑀓𑁂𑀘𑀺 𑀢𑀸𑀯 𑀣𑁂𑀭𑀸 ‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 ‘𑀧𑀞𑀫𑀫𑀕𑁆𑀕𑁄’, 𑀓𑁂𑀘𑀺 ‘𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸’, 𑀓𑁂𑀘𑀺 ‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸’𑀢𑀺. 𑀢𑀢𑁆𑀣 ‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’𑀢𑀺 𑀯𑀸𑀤𑁂 ‘𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀓𑀢𑁄 𑀦𑀸𑀫 𑀳𑁄𑀢𑀺, 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀭𑀼𑀧𑀦𑀺𑀲𑁆𑀲𑀬𑀸 𑀉𑀧𑁆𑀧𑀦𑁆𑀦𑀸’𑀢𑀺 𑀯𑀘𑀦𑀁 𑀆𑀧𑀚𑁆𑀚𑀢𑀺. ‘𑀧𑀞𑀫𑀫𑀕𑁆𑀕𑁄 𑀦𑀺𑀬𑀫𑁂𑀢𑀻’𑀢𑀺 ¶ 𑀯𑀸𑀤𑁂 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺. ‘𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀬𑀫𑁂𑀦𑁆𑀢𑀻’𑀢𑀺 𑀯𑀸𑀤𑁂 ‘𑀅𑀝𑁆𑀞𑀫𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀦𑁆𑀦𑀸’𑀢𑀺 𑀆𑀧𑀚𑁆𑀚𑀢𑀺. ‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻’𑀢𑀺 𑀯𑀸𑀤𑁄 𑀧𑀦 𑀬𑀼𑀚𑁆𑀚𑀢𑀺. 𑀲𑀘𑁂 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺; 𑀢𑀢𑁄 𑀫𑀦𑁆𑀤𑀢𑀭𑀸𑀬 𑀓𑁄𑀮𑀁𑀓𑁄𑀮𑁄; 𑀢𑀢𑁄 𑀫𑀦𑁆𑀤𑀢𑀭𑀸𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺.

𑀏𑀓𑀘𑁆𑀘𑁄 𑀳𑀺 𑀲𑁄𑀢𑀸𑀧𑀦𑁆𑀦𑁄 𑀯𑀝𑁆𑀝𑀚𑁆𑀛𑀸𑀲𑀬𑁄 𑀳𑁄𑀢𑀺, 𑀯𑀝𑁆𑀝𑀸𑀪𑀺𑀭𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀢𑀺 𑀲𑀦𑁆𑀤𑀺𑀲𑁆𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑁂𑀝𑁆𑀞𑀺, 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸, 𑀘𑀽𑀴𑀭𑀣𑀫𑀳𑀸𑀭𑀣𑀸 𑀤𑁂𑀯𑀧𑀼𑀢𑁆𑀢𑀸, 𑀅𑀦𑁂𑀓𑀯𑀡𑁆𑀡𑁄 𑀤𑁂𑀯𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀦𑀸𑀕𑀤𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀇𑀫𑁂 𑀳𑀺 𑀏𑀢𑁆𑀢𑀓𑀸 𑀚𑀦𑀸 𑀯𑀝𑁆𑀝𑀚𑁆𑀛𑀸𑀲𑀬𑀸 𑀯𑀝𑁆𑀝𑀸𑀪𑀺𑀭𑀢𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀇𑀫𑁂 𑀇𑀥 𑀦 𑀕𑀳𑀺𑀢𑀸. 𑀦 𑀓𑁂𑀯𑀮𑀜𑁆𑀘𑀺𑀫𑁂; 𑀬𑁄𑀧𑀺 𑀫𑀦𑀼𑀲𑁆𑀲𑁂𑀲𑀼𑀬𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀬𑁄𑀧𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑁂𑀲𑀼𑀬𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀧𑀭𑀸𑀧𑀭𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀇𑀫𑁂𑀧𑀺 𑀇𑀥 𑀦 𑀕𑀳𑀺𑀢𑀸. 𑀫𑀺𑀲𑁆𑀲𑀓𑀪𑀯𑀯𑀲𑁂𑀦𑁂𑀯 𑀧𑀦𑁂𑀢𑁆𑀣 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑁄𑀮𑀁𑀓𑁄𑀮𑀸 ¶ 𑀫𑀸𑀦𑀼𑀲𑀓𑀪𑀯𑀦𑀺𑀩𑁆𑀩𑀢𑁆𑀢𑀓𑁄𑀬𑁂𑀯 𑀘 𑀏𑀓𑀩𑀻𑀚𑀻 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀏𑀓𑁂𑀓𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀲𑀤𑁆𑀥𑀸𑀥𑀼𑀭𑁂𑀦𑁂𑀯 𑀘𑀢𑁆𑀢𑀸𑀭𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸, 𑀘𑀢𑁆𑀢𑀸𑀭𑁄 𑀓𑁄𑀮𑀁𑀓𑁄𑀮𑀸, 𑀘𑀢𑁆𑀢𑀸𑀭𑁄 𑀏𑀓𑀩𑀻𑀚𑀺𑀦𑁄𑀢𑀺 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀲𑀘𑁂 𑀧𑀜𑁆𑀜𑀸𑀬 𑀲𑀓𑁆𑀓𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, ‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀪𑀸𑀯𑀁 𑀧𑀢𑁆𑀢𑀸𑀧𑀺 𑀧𑀝𑀺𑀧𑀤𑀸𑀯𑀲𑁂𑀦 𑀤𑁆𑀯𑀸𑀤𑀲𑁂𑀯𑀸𑀢𑀺 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸 𑀇𑀳𑀝𑁆𑀞𑀓𑀦𑀺𑀚𑁆𑀛𑀸𑀦𑀺𑀓𑀯𑀲𑁂𑀦𑁂𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁪. 𑀲𑀓𑀤𑀸𑀕𑀸𑀫𑀺𑀦𑀺𑀤𑁆𑀤𑁂𑀲𑁂 𑁋 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀁𑀬𑁂𑀯. 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀼 ¶ 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 ¶ 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 𑀅𑀬𑀁 𑀏𑀓𑁄𑀯 𑀇𑀥 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯. 𑀇𑀫𑀲𑁆𑀲 𑀧𑀦 𑀲𑀓𑀤𑀸𑀕𑀸𑀫𑀺𑀦𑁄 𑀏𑀓𑀩𑀻𑀚𑀺𑀦𑀸 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀏𑀓𑀩𑀻𑀚𑀺𑀲𑁆𑀲 𑀏𑀓𑀸𑀯 𑀧𑀝𑀺𑀲𑀦𑁆𑀥𑀺, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄 𑁋 𑀇𑀤𑀁 𑀦𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺.

𑁩𑁫. 𑀅𑀦𑀸𑀕𑀸𑀫𑀺𑀦𑀺𑀤𑁆𑀤𑁂𑀲𑁂 𑁋 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼. 𑀬𑀲𑁆𑀲 𑀇𑀫𑀸𑀦𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁄 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀕𑀺𑀮𑀺𑀢𑀩𑀴𑀺𑀲𑁄 𑀫𑀘𑁆𑀙𑁄 𑀯𑀺𑀬 𑀤𑀻𑀖𑀲𑀼𑀢𑁆𑀢𑀓𑁂𑀦 𑀧𑀸𑀤𑁂 𑀩𑀤𑁆𑀥𑀓𑀸𑀓𑁄 𑀯𑀺𑀬 𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀆𑀓𑀟𑁆𑀠𑀺𑀬𑀫𑀸𑀦𑁄 𑀓𑀸𑀫𑀥𑀸𑀢𑀼𑀬𑀁𑀬𑁂𑀯 𑀧𑀯𑀢𑁆𑀢𑀢𑀻𑀢𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀺 𑀳𑁂𑀝𑁆𑀞𑀸𑀓𑁄𑀝𑁆𑀞𑀸𑀲𑀺𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀬𑀸𑀢𑀺 𑀢𑁂𑀲𑀁 𑀩𑀦𑁆𑀥𑀦𑀸𑀦𑀁 𑀧𑀭𑀺𑀓𑁆𑀔𑀬𑁂𑀦. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑀧𑀸𑀢𑀬𑁄𑀦𑀺𑀓𑁄. 𑀇𑀫𑀺𑀦𑀸𑀲𑁆𑀲 𑀕𑀩𑁆𑀪𑀲𑁂𑀬𑁆𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀢𑀢𑁆𑀣 𑀲𑀼𑀤𑁆𑀥𑀸𑀯𑀸𑀲𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀢𑀲𑁆𑀫𑀸 𑀮𑁄𑀓𑀸 𑀇𑀥 𑀅𑀦𑀸𑀯𑀢𑁆𑀢𑀦𑀲𑀪𑀸𑀯𑁄. 𑀩𑀼𑀤𑁆𑀥𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑀸𑀦𑀁 𑀧𑀦𑀢𑁆𑀣𑀸𑀬𑀲𑁆𑀲 𑀆𑀕𑀫𑀦𑀁 𑀅𑀦𑀺𑀯𑀸𑀭𑀺𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀁𑀯𑀺𑀥𑁄 𑀧𑀼𑀕𑁆𑀕𑀮𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀼𑀦 𑀅𑀦𑀸𑀕𑀫𑀦𑀢𑁄 𑀅𑀦𑀸𑀕𑀸𑀫𑀻 𑀦𑀸𑀫 𑀯𑀼𑀘𑁆𑀘𑀢𑀺.

𑁩𑁬. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀺𑀤𑁆𑀤𑁂𑀲𑁂 ¶ 𑁋 𑀉𑀧𑀧𑀦𑁆𑀦𑀁 𑀯𑀸 𑀲𑀫𑀦𑀦𑁆𑀢𑀭𑀸𑀢𑀺 𑀉𑀧𑀧𑀦𑁆𑀦𑀲𑀫𑀦𑀦𑁆𑀢𑀭𑀸 𑀯𑀸 𑀳𑀼𑀢𑁆𑀯𑀸. 𑀅𑀧𑁆𑀧𑀢𑁆𑀢𑀁 𑀯𑀸 𑀯𑁂𑀫𑀚𑁆𑀛𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀢𑀁 𑀯𑀸 𑀳𑀼𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀲𑀤𑁆𑀤𑀯𑀺𑀓𑀧𑁆𑀧𑀢𑁄 𑀧𑀦 𑀯𑁂𑀫𑀚𑁆𑀛𑀁 𑀧𑀢𑁆𑀢𑀦𑁆𑀢𑀺𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀉𑀧𑀭𑀺𑀝𑁆𑀞𑀺𑀫𑀸𑀦𑀁 𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀉𑀧𑀭𑀺 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀸 𑀓𑀺𑀮𑁂𑀲𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀏𑀢𑁂𑀲𑀁 𑀧𑀚𑀳𑀦𑀢𑁆𑀣𑀸𑀬 ¶ 𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀆𑀬𑀼𑀯𑁂𑀫𑀚𑁆𑀛𑀲𑁆𑀲 𑀅𑀦𑁆𑀢𑀭𑀸𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀯𑀼𑀘𑁆𑀘𑀢𑀺.

𑁩𑁭. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀺𑀤𑁆𑀤𑁂𑀲𑁂 ¶ 𑁋 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀫𑀚𑁆𑀛𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀉𑀧𑀳𑀘𑁆𑀘 𑀯𑀸 𑀓𑀸𑀮𑀓𑀺𑀭𑀺𑀬𑀦𑁆𑀢𑀺 𑀉𑀧𑀕𑀦𑁆𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁. 𑀆𑀬𑀼𑀓𑁆𑀔𑀬𑀲𑁆𑀲 𑀆𑀲𑀦𑁆𑀦𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀯𑀺𑀳𑁂𑀲𑀼 𑀢𑀸𑀯 𑀓𑀧𑁆𑀧𑀲𑀳𑀲𑁆𑀲𑀧𑁆𑀧𑀫𑀸𑀡𑀲𑁆𑀲 𑀆𑀬𑀼𑀦𑁄 𑀧𑀜𑁆𑀘𑀓𑀧𑁆𑀧𑀲𑀢𑀲𑀗𑁆𑀔𑀸𑀢𑀁 𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀙𑀝𑁆𑀞𑁂 𑀯𑀸 𑀓𑀧𑁆𑀧𑀲𑀢𑁂 𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑀲𑀫𑁂𑀬𑁂𑀯 𑀯𑀸 𑀓𑀧𑁆𑀧𑀲𑀢𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀯𑀼𑀘𑁆𑀘𑀢𑀺.

𑁩𑁮. 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀺𑀤𑁆𑀤𑁂𑀲𑁂𑀲𑀼 𑁋 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀥𑀺𑀫𑀢𑁆𑀢𑀧𑀬𑁄𑀕𑀁 𑀅𑀓𑀢𑁆𑀯𑀸𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀥𑀫𑁆𑀫𑁄𑀢𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀲𑀲𑀗𑁆𑀔𑀸𑀭𑁂𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀅𑀥𑀺𑀫𑀢𑁆𑀢𑀧𑀬𑁄𑀕𑀁 𑀓𑀢𑁆𑀯𑀸𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀥𑀫𑁆𑀫𑁄𑀢𑀺 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻.

𑁪𑁦. 𑀉𑀤𑁆𑀥𑀁𑀲𑁄𑀢𑀦𑀺𑀤𑁆𑀤𑁂𑀲𑁂 𑁋 𑀉𑀤𑁆𑀥𑀁 𑀯𑀸𑀳𑀺𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀁 𑀯𑀸𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀫𑀲𑁆𑀲 𑀫𑀕𑁆𑀕𑀲𑁄𑀢𑀦𑁆𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀅𑀯𑀺𑀳𑀸 𑀘𑀼𑀢𑁄 𑀅𑀢𑀧𑁆𑀧𑀁 𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀅𑀯𑀺𑀳𑁂 𑀓𑀧𑁆𑀧𑀲𑀳𑀲𑁆𑀲𑀁 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀅𑀢𑀧𑁆𑀧𑀁 𑀕𑀘𑁆𑀙𑀢𑀺. 𑀢𑀢𑁆𑀭𑀸𑀧𑀺 𑀤𑁆𑀯𑁂 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀲𑀼𑀤𑀲𑁆𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀭𑀸𑀧𑀺 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀲𑀼𑀤𑀲𑁆𑀲𑀺𑀁 𑀕𑀘𑁆𑀙𑀢𑀺. 𑀢𑀢𑁆𑀭𑀸𑀧𑀺 𑀅𑀝𑁆𑀞 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀯𑀲𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀁 ¶ 𑀧𑀦 𑀅𑀦𑀸𑀕𑀸𑀫𑀻𑀦𑀁 𑀧𑀪𑁂𑀤𑀚𑀸𑀦𑀦𑀢𑁆𑀣𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑁄 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀳𑁂𑀝𑁆𑀞𑀸 𑀢𑀬𑁄 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀲𑀼𑀤𑀲𑁆𑀲𑀻𑀤𑁂𑀯𑀮𑁄𑀓𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄, 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫 ¶ . 𑀬𑁄 𑀧𑀦 𑀇𑀢𑁄 𑀅𑀓𑀦𑀺𑀝𑁆𑀞𑀫𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄, 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫 ¶ . 𑀬𑁄 𑀧𑀦 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀤𑁂𑀯𑀮𑁄𑀓𑁂𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄, 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫𑀸𑀢𑀺. 𑀏𑀯𑀫𑁂𑀢𑁂 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄 𑀳𑁄𑀦𑁆𑀢𑀺.

𑀓𑀣𑀁? 𑀅𑀯𑀺𑀳𑁂 𑀢𑀸𑀯 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘𑀸𑀢𑀺 𑀤𑀲 𑀳𑁄𑀦𑁆𑀢𑀺. 𑀢𑀣𑀸 𑀅𑀢𑀧𑁆𑀧𑀸𑀲𑀼𑀤𑀲𑁆𑀲𑀸𑀲𑀼𑀤𑀲𑁆𑀲𑀻𑀲𑀽𑀢𑀺 𑀘𑀢𑁆𑀢𑀸𑀭𑁄 𑀤𑀲𑀓𑀸 𑀘𑀢𑁆𑀢𑀸𑀮𑀻𑀲𑀁. 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺. 𑀢𑀬𑁄 𑀧𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀘𑀢𑁆𑀢𑀸𑀭𑁄, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞. 𑀏𑀯𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀳𑁄𑀦𑁆𑀢𑀺.

𑀢𑁂 𑀲𑀩𑁆𑀩𑁂𑀧𑀺 𑀧𑀧𑀝𑀺𑀓𑁄𑀧𑀫𑀸𑀬 𑀤𑀻𑀧𑀺𑀢𑀸 𑁋 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑀸𑀦𑀫𑁆𑀧𑀺 𑀳𑀺 𑀆𑀭𑀓𑀡𑁆𑀝𑀓𑀯𑀺𑀧𑁆𑀨𑀮𑀺𑀓𑀦𑀔𑀘𑁆𑀙𑁂𑀤𑀦𑀸𑀦𑀁 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀧𑀞𑀫𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀉𑀧𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀢𑀢𑁄 𑀫𑀳𑀦𑁆𑀢𑀢𑀭𑁂 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀆𑀓𑀸𑀲𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀤𑀼𑀢𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸? 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀢𑀢𑁄 𑀫𑀳𑀦𑁆𑀢𑀢𑀭𑁂 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀆𑀓𑀸𑀲𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑀸 𑀧𑀣𑀯𑀺𑀬𑀁 𑀅𑀦𑀼𑀧𑀳𑀘𑁆𑀘𑀢𑀮𑀸 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀢𑀢𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸? 𑀯𑁂𑀫𑀚𑁆𑀛𑀁 𑀧𑀢𑁆𑀯𑀸 𑀅𑀦𑀼𑀧𑀳𑀘𑁆𑀘 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀢𑀢𑁄 𑀫𑀳𑀦𑁆𑀢𑀢𑀭𑁂 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀆𑀓𑀸𑀲𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀉𑀧𑀳𑀘𑁆𑀘𑀢𑀮𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀓𑀸𑀮𑀓𑀺𑀭𑀺𑀬𑀁 𑀉𑀧𑀕𑀦𑁆𑀢𑁆𑀯𑀸 𑀆𑀬𑀼𑀕𑀢𑀺𑀁 𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀢𑀢𑁄 𑀫𑀳𑀦𑁆𑀢𑀢𑀭𑁂 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀧𑀭𑀺𑀢𑁆𑀢𑁂 𑀢𑀺𑀡𑀓𑀝𑁆𑀞𑁂 𑀧𑀢𑀺𑀢𑁆𑀯𑀸 𑀢𑀁 𑀧𑀭𑀺𑀢𑁆𑀢𑀁 𑀢𑀺𑀡𑀓𑀝𑁆𑀞𑀁 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀅𑀧𑁆𑀧𑀬𑁄𑀕𑁂𑀦 𑀮𑀳𑀼𑀲𑀸𑀬 𑀕𑀢𑀺𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀢𑀢𑁄 𑀫𑀳𑀦𑁆𑀢𑀢𑀭𑁂 𑀅𑀬𑁄𑀫𑀼𑀔𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀯𑀺𑀧𑀼𑀮𑁂 𑀢𑀺𑀡𑀓𑀝𑁆𑀞𑀧𑀼𑀜𑁆𑀚𑁂 ¶ 𑀧𑀢𑀺𑀢𑁆𑀯𑀸 𑀢𑀁 𑀯𑀺𑀧𑀼𑀮𑀁 𑀢𑀺𑀡𑀓𑀝𑁆𑀞𑀧𑀼𑀜𑁆𑀚𑀁 ¶ 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀲𑀧𑁆𑀧𑀬𑁄𑀕𑁂𑀦 𑀅𑀮𑀳𑀼𑀲𑀸𑀬 ¶ 𑀕𑀢𑀺𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀅𑀧𑀭𑀸 𑀫𑀳𑀦𑁆𑀢𑁂𑀲𑀼 𑀢𑀺𑀡𑀓𑀝𑁆𑀞𑀧𑀼𑀜𑁆𑀚𑁂𑀲𑀼 𑀧𑀢𑀢𑀺, 𑀢𑀢𑁆𑀣 𑀫𑀳𑀦𑁆𑀢𑁂𑀲𑀼 𑀢𑀺𑀡𑀓𑀝𑁆𑀞𑀧𑀼𑀜𑁆𑀚𑁂𑀲𑀼 𑀛𑀸𑀬𑀫𑀸𑀦𑁂𑀲𑀼 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁄 𑀯𑀸 𑀚𑀸𑀮𑀸 𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀓𑀫𑁆𑀫𑀸𑀭𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀦𑀕𑀭𑀭𑀝𑁆𑀞𑀁 𑀛𑀸𑀧𑁂𑀢𑁆𑀯𑀸 𑀲𑀫𑀼𑀤𑁆𑀤𑀦𑁆𑀢𑀁 𑀧𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺 𑁋 𑀏𑀯𑀭𑀽𑀧𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸? 𑀅𑀦𑁂𑀓𑀪𑀯𑀩𑀻𑀚𑀯𑀺𑀧𑁆𑀨𑀸𑀭𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀬𑀲𑁆𑀫𑀸 𑀧𑀦 𑀆𑀭𑀓𑀡𑁆𑀝𑀓𑀸𑀤𑀺𑀪𑁂𑀤𑀁 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀅𑀬𑁄𑀓𑀧𑀸𑀮𑀫𑁂𑀯, 𑀢𑀲𑁆𑀫𑀸 𑀲𑀼𑀢𑁆𑀢𑁂 𑀲𑀩𑁆𑀩𑀯𑀸𑀭𑁂𑀲𑀼 𑀅𑀬𑁄𑀓𑀧𑀸𑀮𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁 (𑀅. 𑀦𑀺. 𑁭.𑁫𑁫). 𑀬𑀣𑀸𑀳 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲, 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺, 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁, 𑀢𑀁 𑀧𑀚𑀳𑀸𑀫𑀻’’’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺. 𑀢𑀲𑁆𑀲 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 ¶ 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀧𑀳𑀘𑁆𑀘 ¶ 𑀢𑀮𑀁 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑀳𑀘𑁆𑀘 𑀢𑀮𑀁 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀬𑀸 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀭𑀺𑀢𑁆𑀢𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬, 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬, 𑀥𑀽𑀫𑀫𑁆𑀧𑀺 𑀚𑀦𑁂𑀬𑁆𑀬, 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀢𑁆𑀯𑀸 𑀥𑀽𑀫𑀫𑁆𑀧𑀺 𑀚𑀦𑁂𑀢𑁆𑀯𑀸 𑀢𑀫𑁂𑀯 𑀧𑀭𑀺𑀢𑁆𑀢𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 ¶ 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀬𑀸 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀧𑀼𑀮𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬, 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬…𑀧𑁂… 𑀢𑀫𑁂𑀯 𑀯𑀺𑀧𑀼𑀮𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀬𑀸 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀦𑁆𑀢𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬, 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬…𑀧𑁂… 𑀢𑀫𑁂𑀯 𑀫𑀳𑀦𑁆𑀢𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀫𑁆𑀧𑀺 𑀤𑀳𑁂𑀬𑁆𑀬, 𑀤𑀸𑀬𑀫𑁆𑀧𑀺 𑀤𑀳𑁂𑀬𑁆𑀬 ¶ , 𑀕𑀘𑁆𑀙𑀫𑁆𑀧𑀺 𑀤𑀳𑀺𑀢𑁆𑀯𑀸 𑀤𑀸𑀬𑀫𑁆𑀧𑀺 ¶ 𑀤𑀳𑀺𑀢𑁆𑀯𑀸 𑀳𑀭𑀺𑀢𑀦𑁆𑀢𑀁 𑀯𑀸 𑀧𑀣𑀦𑁆𑀢𑀁 𑀯𑀸 𑀲𑁂𑀮𑀦𑁆𑀢𑀁 𑀯𑀸 𑀉𑀤𑀓𑀦𑁆𑀢𑀁 𑀯𑀸 𑀭𑀫𑀡𑀻𑀬𑀁 𑀯𑀸 𑀪𑀽𑀫𑀺𑀪𑀸𑀕𑀁 𑀆𑀕𑀫𑁆𑀫 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀬𑀸 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻’’𑀢𑀺 (𑀅. 𑀦𑀺. 𑁭.𑁫𑁫).

𑁪𑁧-𑁪𑁪. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀸𑀤𑀺𑀦𑀺𑀤𑁆𑀤𑁂𑀲𑀸 𑀉𑀢𑁆𑀢𑀸𑀦𑀢𑁆𑀣𑀸𑀯. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀅𑀭𑀳𑀸𑀢𑀺 𑀏𑀢𑁆𑀣 𑀧𑀦 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀢𑀬𑁄 𑀳𑀺 𑀯𑀺𑀫𑁄𑀓𑁆𑀔𑀸 𑁋 𑀲𑀼𑀜𑁆𑀜𑀢𑁄, 𑀅𑀦𑀺𑀫𑀺𑀢𑁆𑀢𑁄, 𑀅𑀧𑁆𑀧𑀡𑀺𑀳𑀺𑀢𑁄𑀢𑀺. 𑀢𑀢𑁆𑀣 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀔𑀻𑀡𑀸𑀲𑀯𑁄 𑀧𑀝𑀺𑀧𑀤𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺; 𑀢𑀣𑀸 𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀳𑀻𑀢𑀺 𑁋 𑀏𑀯𑀁 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑁂 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁄 𑀯𑀺𑀬 𑀤𑁆𑀯𑀸𑀤𑀲𑁂𑀯 𑀲𑀓𑀤𑀸𑀕𑀸𑀫𑀺𑀦𑁄, 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄𑀢𑀺 𑀏𑀢𑁆𑀢𑀓𑀸 𑀧𑀼𑀕𑁆𑀕𑀮𑀸 𑀇𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑀲𑁆𑀫𑀺𑀜𑁆𑀜𑁂𑀯 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁫. 𑀤𑀼𑀓𑀦𑀺𑀤𑁆𑀤𑁂𑀲𑁂 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀲𑀻𑀮𑁄 𑀫𑀳𑀸𑀓𑁄𑀥𑁄. 𑀏𑀯𑀁 𑀧𑀼𑀕𑁆𑀕𑀮𑀁 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀥𑀫𑁆𑀫𑁂𑀦 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀓𑀢𑀫𑁄 𑀓𑁄𑀥𑁄𑀢𑀺𑀆𑀤𑀺𑀫𑀸𑀳. 𑀉𑀧𑀦𑀸𑀳𑀻𑀦𑀺𑀤𑁆𑀤𑁂𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁄𑀥𑁄 𑀓𑀼𑀚𑁆𑀛𑀦𑀸𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀢𑀣𑀸 𑀉𑀧𑀦𑀸𑀳𑀻𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀧𑀼𑀩𑁆𑀩𑀓𑀸𑀮𑀁 𑀓𑁄𑀥𑁄𑀢𑀺𑀆𑀤𑀻𑀦𑀺. 𑀅𑀬𑀁 𑀓𑁄𑀥𑁄 𑀅𑀧𑁆𑀧𑀳𑀻𑀦𑁄𑀢𑀺 𑀅𑀬𑀁 𑀏𑀢𑁆𑀢𑀓𑁄 𑀓𑁄𑀥𑁄 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀯𑀸 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀯𑀸 𑀅𑀧𑁆𑀧𑀳𑀻𑀦𑁄. 𑀧𑀭𑀢𑁄 𑀉𑀧𑀦𑀸𑀳𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁫𑁩. 𑀅𑀳𑀺𑀭𑀺𑀓𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑁋 𑀇𑀫𑀺𑀦𑀸 𑀅𑀳𑀺𑀭𑀺𑀓𑁂𑀦𑀸𑀢𑀺 𑀇𑀫𑀺𑀦𑀸 𑀏𑀯𑀁𑀧𑀓𑀸𑀭𑁂𑀦 𑀅𑀳𑀺𑀭𑀺𑀓𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀫𑀺𑀦𑀸 𑀅𑀦𑁄𑀢𑁆𑀢𑀧𑁆𑀧𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬𑁩. 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄𑀢𑀺 ¶ ¶ 𑀅𑀚𑁆𑀛𑀢𑁆𑀢𑀩𑀦𑁆𑀥𑀦𑁄. 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄𑀢𑀺 𑀩𑀳𑀺𑀤𑁆𑀥𑀸𑀩𑀦𑁆𑀥𑀦𑁄. 𑀢𑁂 𑀉𑀪𑁄𑀧𑀺 𑀯𑀘𑁆𑀙𑀓𑀲𑀸𑀮𑀽𑀧𑀫𑀸𑀬 𑀤𑀻𑀧𑁂𑀢𑀩𑁆𑀩𑀸. 𑀯𑀘𑁆𑀙𑀓𑀲𑀸𑀮𑀸𑀬 𑀳𑀺 𑀅𑀦𑁆𑀢𑁄 𑀩𑀤𑁆𑀥𑁄 𑀅𑀦𑁆𑀢𑁄𑀬𑁂𑀯 ¶ 𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀇𑀥𑀝𑁆𑀞𑀓𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄. 𑀢𑁂𑀲𑀜𑁆𑀳𑀺 𑀩𑀦𑁆𑀥𑀦𑀫𑁆𑀧𑀺 𑀇𑀥𑁂𑀯, 𑀲𑀬𑀫𑁆𑀧𑀺 𑀇𑀥𑁂𑀯. 𑀅𑀦𑁆𑀢𑁄 𑀩𑀤𑁆𑀥𑁄 𑀧𑀦 𑀩𑀳𑀺 𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑁂 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄. 𑀢𑁂𑀲𑀜𑁆𑀳𑀺 𑀩𑀦𑁆𑀥𑀦𑀫𑁂𑀯 𑀇𑀥, 𑀲𑀬𑀁 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀸. 𑀩𑀳𑀺 𑀩𑀤𑁆𑀥𑁄 𑀩𑀳𑀺 𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑁂 𑀅𑀦𑀸𑀕𑀸𑀫𑀻. 𑀢𑀲𑁆𑀲 𑀳𑀺 𑀩𑀦𑁆𑀥𑀦𑀫𑁆𑀧𑀺 𑀩𑀳𑀺𑀤𑁆𑀥𑀸, 𑀲𑀬𑀫𑁆𑀧𑀺 𑀩𑀳𑀺𑀤𑁆𑀥𑀸𑀯. 𑀩𑀳𑀺 𑀩𑀤𑁆𑀥𑁄 𑀧𑀦 𑀅𑀦𑁆𑀢𑁄𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀇𑀥𑀝𑁆𑀞𑀓𑀅𑀦𑀸𑀕𑀸𑀫𑀻. 𑀢𑀲𑁆𑀲 𑀳𑀺 𑀩𑀦𑁆𑀥𑀦𑀁 𑀭𑀽𑀧𑀸𑀭𑀽𑀧𑀪𑀯𑁂𑀲𑀼, 𑀲𑀬𑀁 𑀧𑀦 𑀇𑀥 𑀞𑀺𑀢𑁄.

𑁬𑁫. 𑀅𑀓𑁆𑀓𑁄𑀥𑀦𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑁋 𑀧𑀳𑀻𑀦𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀯𑀸, 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑀸, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀯𑀸 𑀧𑀳𑀻𑀦𑁄.

𑁮𑁩. 𑀤𑀼𑀮𑁆𑀮𑀪𑀦𑀺𑀤𑁆𑀤𑁂𑀲𑁂 𑁋 𑀤𑀼𑀮𑁆𑀮𑀪𑀸𑀢𑀺 𑀦 𑀲𑀼𑀮𑀪𑀸. 𑀧𑀼𑀩𑁆𑀩𑀓𑀸𑀭𑀻𑀢𑀺 𑀧𑀞𑀫𑀫𑁂𑀯 𑀓𑀸𑀭𑀓𑁄. 𑀓𑀢𑀯𑁂𑀤𑀻𑀢𑀺 𑀓𑀢𑀁 𑀯𑁂𑀤𑁂𑀢𑀺, 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑁂 𑀅𑀕𑀸𑀭𑀺𑀬𑀸𑀦𑀕𑀸𑀭𑀺𑀬𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀅𑀕𑀸𑀭𑀺𑀬𑁂𑀲𑀼 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀧𑀼𑀩𑁆𑀩𑀓𑀸𑀭𑀺𑀦𑁄 𑀦𑀸𑀫. 𑀧𑀼𑀢𑁆𑀢𑀥𑀻𑀢𑀭𑁄 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀢𑁂𑀲𑀁 𑀓𑀼𑀭𑀼𑀫𑀸𑀦𑀸 𑀓𑀢𑀯𑁂𑀤𑀺𑀦𑁄 𑀦𑀸𑀫. 𑀅𑀦𑀕𑀸𑀭𑀺𑀬𑁂𑀲𑀼 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀧𑀼𑀩𑁆𑀩𑀓𑀸𑀭𑀺𑀦𑁄 𑀦𑀸𑀫. 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀢𑁂𑀲𑀁 𑀓𑀼𑀭𑀼𑀫𑀸𑀦𑀸 𑀓𑀢𑀯𑁂𑀤𑀺𑀦𑁄 𑀦𑀸𑀫. 𑀢𑁂𑀲𑀁 𑀆𑀯𑀺𑀪𑀸𑀯𑀢𑁆𑀣𑀸𑀬 𑀉𑀧𑀚𑁆𑀛𑀸𑀬𑀧𑁄𑀲𑀓𑀲𑁄𑀡𑀢𑁆𑀣𑁂𑀭𑀸𑀤𑀻𑀦𑀁 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀅𑀧𑀭𑁄 𑀦𑀬𑁄 𑁋 𑀧𑀭𑁂𑀦 𑀅𑀓𑀢𑁂𑀬𑁂𑀯 𑀉𑀧𑀓𑀸𑀭𑁂 𑀅𑀢𑁆𑀢𑀦𑀺 𑀓𑀢𑀁 𑀉𑀧𑀓𑀸𑀭𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑀸𑀭𑀓𑁄 𑀧𑀼𑀩𑁆𑀩𑀓𑀸𑀭𑀻, 𑀲𑁂𑀬𑁆𑀬𑀣𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀘𑁂𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘. 𑀲𑁄 𑀤𑀼𑀮𑁆𑀮𑀪𑁄; 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀪𑀺𑀪𑀽𑀢𑀢𑁆𑀢𑀸. 𑀧𑀭𑁂𑀦 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀅𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀅𑀢𑁆𑀢𑀦𑀺 𑀓𑀢𑀁 𑀉𑀧𑀓𑀸𑀭𑀁 𑀉𑀧𑀓𑀸𑀭𑀢𑁄 𑀚𑀸𑀦𑀦𑁆𑀢𑁄, 𑀯𑁂𑀤𑀺𑀬𑀦𑁆𑀢𑁄, 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀲𑁂𑀬𑁆𑀬𑀣𑀸𑀧𑀺 𑀫𑀸𑀢𑀸𑀧𑀺𑀢𑀼𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄. 𑀲𑁄𑀧𑀺 𑀤𑀼𑀮𑁆𑀮𑀪𑁄; 𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀢𑁆𑀢𑀸.

𑀅𑀧𑀺𑀘 𑁋 𑀅𑀓𑀸𑀭𑀡𑀯𑀘𑁆𑀙𑀮𑁄 𑀧𑀼𑀩𑁆𑀩𑀓𑀸𑀭𑀻, 𑀲𑀓𑀸𑀭𑀡𑀯𑀘𑁆𑀙𑀮𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. ‘𑀓𑀭𑀺𑀲𑁆𑀲𑀢𑀺 𑀫𑁂’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀓𑀺𑀭𑀺𑀬𑁄 ¶ 𑀧𑀼𑀩𑁆𑀩𑀓𑀸𑀭𑀻. ‘𑀓𑀭𑀺𑀲𑁆𑀲𑀢𑀺 ¶ 𑀫𑁂’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀲𑀸𑀧𑁂𑀓𑁆𑀔𑀓𑀺𑀭𑀺𑀬𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀢𑀫𑁄𑀚𑁄𑀢𑀺𑀧𑀭𑀸𑀬𑀡𑁄 𑀧𑀼𑀩𑁆𑀩𑀓𑀸𑀭𑀻, 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀡𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀤𑁂𑀲𑁂𑀢𑀸 𑀧𑀼𑀩𑁆𑀩𑀓𑀸𑀭𑀻, 𑀧𑀝𑀺𑀧𑀚𑁆𑀚𑀺𑀢𑀸 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀧𑀼𑀩𑁆𑀩𑀓𑀸𑀭𑀻, 𑀅𑀭𑀺𑀬𑀲𑀸𑀯𑀓𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻𑀢𑀺. 𑀤𑀼𑀓𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁨.𑁨.𑁧𑁨𑁦) 𑀧𑀦 𑁋 ‘‘‘𑀧𑀼𑀩𑁆𑀩𑀓𑀸𑀭𑀻’𑀢𑀺 𑀧𑀞𑀫𑀁 𑀉𑀧𑀓𑀸𑀭𑀲𑁆𑀲 𑀓𑀸𑀭𑀓𑁄, ‘𑀓𑀢𑀜𑁆𑀜𑀼𑀓𑀢𑀯𑁂𑀤𑀻’𑀢𑀺 𑀢𑁂𑀦 𑀓𑀢𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀓𑀸𑀭𑀓𑁄. 𑀢𑁂𑀲𑀼 𑀧𑀼𑀩𑁆𑀩𑀓𑀸𑀭𑀻 𑀇𑀡𑀁 𑀤𑁂𑀫𑀻𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺, 𑀧𑀘𑁆𑀙𑀸𑀓𑀸𑀭𑀓𑁄 ‘𑀇𑀡𑀁 𑀚𑀻𑀭𑀸𑀧𑁂𑀫𑀻’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑁮𑁪. 𑀤𑀼𑀢𑁆𑀢𑀧𑁆𑀧𑀬𑀦𑀺𑀤𑁆𑀤𑁂𑀲𑁂 𑁋 𑀤𑀼𑀢𑁆𑀢𑀧𑁆𑀧𑀬𑀸𑀢𑀺 𑀅𑀢𑀧𑁆𑀧𑀬𑀸, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀢𑀧𑁆𑀧𑁂𑀢𑀼𑀁. 𑀬𑁄 𑀳𑀺 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸 𑀜𑀸𑀢𑀺𑀓𑀼𑀮𑀁 𑀯𑀸 𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑁄 𑀘𑀻𑀯𑀭𑁂 𑀚𑀺𑀡𑁆𑀡𑁂 𑀢𑁂𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀤𑀺𑀦𑁆𑀦𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑁂𑀯. 𑀬𑁄 𑀘 𑀢𑁂𑀦𑁂𑀯 𑀦𑀬𑁂𑀦 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑀺 𑀧𑀭𑀲𑁆𑀲 𑀤𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀫𑁆𑀧𑀺 𑀢𑀣𑁂𑀯 𑀓𑀭𑁄𑀢𑀺. 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀓𑀝𑁂𑀳𑀺𑀧𑀺 𑀧𑀘𑁆𑀘𑀬𑁂 𑀉𑀧𑀦𑁂𑀦𑁆𑀢𑁂𑀦 𑀢𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀼𑀢𑁆𑀢𑀧𑁆𑀧𑀬𑀸 𑀦𑀸𑀫.

𑁮𑁫. 𑀲𑀼𑀢𑀧𑁆𑀧𑀬𑀦𑀺𑀤𑁆𑀤𑁂𑀲𑁂 𑁋 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀢𑀦𑁄 𑀅𑀓𑀢𑁆𑀯𑀸 𑀧𑀭𑀲𑁆𑀲 𑀦 𑀤𑁂𑀢𑀺. 𑀅𑀢𑀺𑀭𑁂𑀓𑁂 𑀧𑀦 𑀲𑀢𑀺 𑀦 𑀦𑀺𑀓𑁆𑀔𑀺𑀧𑀢𑀺 𑀧𑀭𑀲𑁆𑀲 𑀤𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀦 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑀓𑀼𑀮𑀸 𑀯𑀸 𑀜𑀸𑀢𑀺𑀓𑀼𑀮𑀸 𑀯𑀸 𑀚𑀺𑀡𑁆𑀡𑀘𑀻𑀯𑀭𑁄 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀦 𑀦𑀺𑀓𑁆𑀔𑀺𑀧𑀢𑀺; 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀸𑀭𑀼𑀧𑀦𑁆𑀢𑁄𑀧𑀺 𑀧𑀼𑀦 𑀤𑀺𑀬𑁆𑀬𑀫𑀸𑀦𑁂 𑀲𑀳𑀲𑀸 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀭𑁂𑀲𑀁 𑀦 𑀤𑁂𑀢𑀺. 𑀇𑀫𑁂 𑀤𑁆𑀯𑁂𑀧𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀢𑀧𑁆𑀧𑁂𑀢𑀼𑀦𑁆𑀢𑀺 𑀲𑀼𑀢𑀧𑁆𑀧𑀬𑀸 𑀦𑀸𑀫𑀸𑀢𑀺.

𑁮𑁬. 𑀆𑀲𑀯𑀸𑀢𑀺 𑀓𑀺𑀮𑁂𑀲𑀸. 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀲𑀽𑀓𑀭𑀫𑀁𑀲𑀁 𑀮𑀪𑀺𑀢𑁆𑀯𑀸 𑀅𑀘𑁆𑀙𑀫𑀁𑀲𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀫𑀺𑀕𑀫𑀁𑀲𑀁, 𑀮𑀪𑀺𑀢𑁆𑀯𑀸 𑀤𑀻𑀧𑀺𑀫𑀁𑀲𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀓𑀸𑀮𑁂 𑀲𑀦𑁆𑀢𑁂𑀬𑁂𑀯 ‘𑀓𑀸𑀮𑁄 𑀦𑀢𑁆𑀣𑀻’𑀢𑀺, 𑀅𑀧𑁆𑀧𑀯𑀸𑀭𑁂𑀢𑁆𑀯𑀸𑀯 ‘𑀧𑀯𑀸𑀭𑀺𑀢𑁄𑀲𑁆𑀫𑀻’𑀢𑀺, 𑀧𑀢𑁆𑀢𑁂 𑀭𑀚𑀲𑁆𑀫𑀺𑀁 𑀅𑀧𑀢𑀺𑀢𑁂𑀬𑁂𑀯 ‘𑀧𑀢𑀺𑀢’𑀦𑁆𑀢𑀺, 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀫𑀘𑁆𑀙𑀫𑀁𑀲𑁂 𑀅𑀓𑀢𑁂𑀬𑁂𑀯 ‘𑀫𑀁 𑀉𑀤𑁆𑀤𑀺𑀲𑁆𑀲 𑀓𑀢’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀅𑀘𑁆𑀙𑀫𑀁𑀲𑀁 𑀮𑀪𑀺𑀢𑁆𑀯𑀸 𑀲𑀽𑀓𑀭𑀫𑀁𑀲𑀦𑁆𑀢𑀺 𑀦 ¶ 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺…𑀧𑁂… 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀫𑀘𑁆𑀙𑀫𑀁𑀲𑁂 𑀓𑀢𑁂 ‘𑀫𑀁 𑀉𑀤𑁆𑀤𑀺𑀲𑁆𑀲 𑀓𑀢’𑀦𑁆𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺 ¶ . 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦 𑁋 ‘‘‘𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩’𑀦𑁆𑀢𑀺 𑀲𑀗𑁆𑀖𑀪𑁄𑀕𑀲𑁆𑀲 𑀅𑀧𑀝𑁆𑀞𑀧𑀦𑀁 𑀅𑀯𑀺𑀘𑀸𑀭𑀡𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 ¶ 𑀦𑀸𑀫, 𑀢𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. ‘𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩’𑀦𑁆𑀢𑀺 𑀢𑀲𑁆𑀲𑁂𑀯 𑀧𑀝𑁆𑀞𑀧𑀦𑀁 𑀯𑀺𑀘𑀸𑀭𑀡𑀁, 𑀢𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀇𑀫𑁂𑀲𑀦𑁆𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀼𑀪𑀽𑀫𑀺𑀬𑀁 𑀢𑀺𑀡𑀮𑀢𑀸𑀤𑀻𑀦𑀺 𑀯𑀺𑀬 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀲𑀼𑀓𑁆𑀓𑀧𑀓𑁆𑀔𑁂 𑀓𑀧𑁆𑀧𑀺𑀬𑀫𑀁𑀲𑀁 𑀮𑀪𑀺𑀢𑁆𑀯𑀸 𑀓𑀧𑁆𑀧𑀺𑀬𑀫𑀁𑀲𑀦𑁆𑀢𑁆𑀯𑁂𑀯 𑀕𑀡𑁆𑀳𑀦𑁆𑀢𑁄 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁮. 𑀳𑀻𑀦𑀸𑀥𑀺𑀫𑀼𑀢𑁆𑀢𑁄𑀢𑀺 𑀳𑀻𑀦𑀚𑁆𑀛𑀸𑀲𑀬𑁄. 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄.

𑁮𑁯. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑁄𑀢𑀺 𑀧𑀡𑀻𑀢𑀚𑁆𑀛𑀸𑀲𑀬𑁄. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀪𑀤𑁆𑀤𑀓𑀥𑀫𑁆𑀫𑁄, 𑀲𑀼𑀘𑀺𑀥𑀫𑁆𑀫𑁄, 𑀲𑀼𑀦𑁆𑀤𑀭𑀥𑀫𑁆𑀫𑁄.

𑁯𑁦. 𑀢𑀺𑀢𑁆𑀢𑁄𑀢𑀺 𑀲𑀼𑀳𑀺𑀢𑁄 𑀧𑀭𑀺𑀬𑁄𑀲𑀺𑀢𑁄. 𑀢𑀧𑁆𑀧𑁂𑀢𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀢𑀺𑀢𑁆𑀢𑀺𑀓𑀭𑁄. 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀬𑁂 𑀘 𑀢𑀣𑀸𑀕𑀢𑀲𑀸𑀯𑀓𑀸𑀢𑀺 𑀏𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀲𑀬𑀁 𑀢𑀺𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸. 𑀅𑀜𑁆𑀜𑁂 𑀧𑀦 𑀢𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀥𑀫𑁆𑀫𑀓𑀣𑀸𑀬 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺. 𑀲𑀸𑀯𑀓𑀸𑀦𑀁 𑀧𑀦 𑀥𑀫𑁆𑀫𑀓𑀣𑀸𑀬 𑀅𑀧𑀭𑀺𑀫𑀸𑀡𑀸𑀦𑀫𑁆𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀲𑀫𑀬𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀧𑀦 𑀢𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀯𑀘𑀦𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀧𑀺 ‘𑀅𑀬𑀁 𑀪𑀺𑀓𑁆𑀔𑀼 𑀦 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀓𑀣𑁂𑀢𑀺, 𑀩𑀼𑀤𑁆𑀥𑁂𑀳𑀺 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀓𑀣𑁂𑀢𑀻’𑀢𑀺 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀢𑀺. 𑀇𑀢𑀺 𑀲𑁄 𑀘𑀺𑀢𑁆𑀢𑀻𑀓𑀸𑀭𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑁄𑀢𑀺. 𑀏𑀯𑀁 𑀢𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀢𑀧𑁆𑀧𑁂𑀢𑀸 𑀦𑀸𑀫. 𑀬𑀣𑀸 𑀳𑀺 ‘𑀅𑀲𑀼𑀓𑀲𑁆𑀲 𑀦𑀸𑀫 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸’𑀢𑀺 𑀭𑀜𑁆𑀜𑀸 𑀆𑀡𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀆𑀦𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀅𑀣 𑀔𑁄 𑀭𑀸𑀚𑀸𑀯 𑀢𑀢𑁆𑀣 𑀤𑀸𑀬𑀓𑁄. 𑀬𑁂𑀳𑀺𑀧𑀺 𑀮𑀤𑁆𑀥𑀁 𑀳𑁄𑀢𑀺, 𑀢𑁂 ‘𑀭𑀜𑁆𑀜𑀸 𑀅𑀫𑁆𑀳𑀸𑀓𑀁 𑀞𑀸𑀦𑀦𑁆𑀢𑀭𑀁 𑀤𑀺𑀦𑁆𑀦𑀁, 𑀇𑀲𑁆𑀲𑀭𑀺𑀬𑀯𑀺𑀪𑀯𑁄 𑀤𑀺𑀦𑁆𑀦𑁄’𑀢𑁆𑀯𑁂𑀯 𑀕𑀡𑁆𑀳𑀦𑁆𑀢𑀺, 𑀦 𑀭𑀸𑀚𑀧𑀼𑀭𑀺𑀲𑁂𑀳𑀻𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁧. 𑀢𑀺𑀓𑀦𑀺𑀤𑁆𑀤𑁂𑀲𑁂 ¶ ¶ 𑁋 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀼𑀲𑁆𑀲𑀻𑀮𑁄, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀧𑀥𑀫𑁆𑀫𑁄 ¶ . 𑀓𑀸𑀬𑀯𑀘𑀻𑀲𑀁𑀯𑀭𑀪𑁂𑀤𑁂𑀦 𑀤𑀼𑀲𑁆𑀲𑀻𑀮𑁄, 𑀲𑁂𑀲𑀲𑀁𑀯𑀭𑀪𑁂𑀤𑁂𑀦 𑀧𑀸𑀧𑀥𑀫𑁆𑀫𑁄. 𑀅𑀲𑀼𑀤𑁆𑀥𑀧𑀬𑁄𑀕𑀢𑀸𑀬 𑀤𑀼𑀲𑁆𑀲𑀻𑀮𑁄, 𑀅𑀲𑀼𑀤𑁆𑀥𑀸𑀲𑀬𑀢𑀸𑀬 𑀧𑀸𑀧𑀥𑀫𑁆𑀫𑁄. 𑀓𑀼𑀲𑀮𑀲𑀻𑀮𑀯𑀺𑀭𑀳𑁂𑀦 𑀤𑀼𑀲𑁆𑀲𑀻𑀮𑁄; 𑀅𑀓𑀼𑀲𑀮𑀲𑀻𑀮𑀲𑀫𑀦𑁆𑀦𑀸𑀕𑀫𑁂𑀦 𑀧𑀸𑀧𑀥𑀫𑁆𑀫𑁄. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀻𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀲𑀗𑁆𑀓𑀸𑀬 𑀧𑀭𑁂𑀳𑀺 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘𑀇𑀤𑀁 𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀏𑀯𑀁 𑀧𑀭𑁂𑀳𑀺 𑀆𑀲𑀗𑁆𑀓𑀦𑀻𑀬𑀲𑀫𑀸𑀘𑀸𑀭𑁄, 𑀅𑀢𑁆𑀢𑀦𑁄𑀬𑁂𑀯 𑀯𑀸 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄 𑁋 𑀲𑀸𑀲𑀗𑁆𑀓𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘𑀇𑀫𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’𑀢𑀺 𑀏𑀯𑀁 𑀲𑀸𑀲𑀗𑁆𑀓𑀲𑀫𑀸𑀘𑀸𑀭𑁄 𑀳𑁄𑀢𑀺.

𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀬𑀼𑀢𑁆𑀢𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄𑀢𑀺 𑀅𑀲𑁆𑀲𑀫𑀡𑁄 𑀳𑀼𑀢𑁆𑀯𑀸𑀯 𑀲𑀫𑀡𑀧𑀢𑀺𑀭𑀽𑀧𑀓𑀢𑀸𑀬 ‘𑀲𑀫𑀡𑁄 𑀅𑀳’𑀦𑁆𑀢𑀺 𑀏𑀯𑀁 𑀧𑀝𑀺𑀜𑁆𑀜𑁄. 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄𑀢𑀺 𑀅𑀜𑁆𑀜𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀼𑀦𑀺𑀯𑀢𑁆𑀣𑁂 𑀲𑀼𑀧𑀸𑀭𑀼𑀢𑁂 𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑁂 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀸𑀤𑀺𑀲𑁂𑀦 𑀆𑀓𑀸𑀭𑁂𑀦 𑀢𑀣𑀸 𑀧𑀝𑀺𑀧𑀚𑁆𑀚𑀦𑀢𑁄 ‘𑀅𑀳𑀁 𑀩𑁆𑀭𑀳𑁆𑀫𑀘𑀸𑀭𑀻’𑀢𑀺 𑀧𑀝𑀺𑀜𑁆𑀜𑀁 𑀤𑁂𑀦𑁆𑀢𑁄 𑀯𑀺𑀬 𑀳𑁄𑀢𑀺. ‘𑀅𑀳𑀁 𑀪𑀺𑀓𑁆𑀔𑀽’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑀸𑀤𑀻𑀦𑀺 𑀧𑀯𑀺𑀲𑀦𑁆𑀢𑁄 𑀧𑀦 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀳𑁄𑀢𑀺𑀬𑁂𑀯, 𑀢𑀣𑀸 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀕𑀡𑁆𑀳𑀦𑁆𑀢𑁄. 𑀅𑀦𑁆𑀢𑁄𑀧𑀽𑀢𑀻𑀢𑀺 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑁄, 𑀦𑀺𑀕𑁆𑀕𑀼𑀡𑀢𑀸𑀬 𑀯𑀸 𑀕𑀼𑀡𑀲𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺. 𑀅𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑀸𑀤𑀻𑀳𑀺 𑀢𑀺𑀦𑁆𑀢𑁄. 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑁄. 𑀅𑀣 𑀯𑀸 𑀓𑀲𑀫𑁆𑀩𑀼 𑀯𑀼𑀘𑁆𑀘𑀢𑀺 𑀢𑀺𑀦𑁆𑀢𑀓𑀼𑀡𑀧𑀕𑀢𑀁 𑀓𑀲𑀝𑀉𑀤𑀓𑀁. 𑀇𑀫𑀲𑁆𑀫𑀺𑀜𑁆𑀘 𑀲𑀸𑀲𑀦𑁂 𑀤𑀼𑀲𑁆𑀲𑀻𑀮𑁄 𑀦𑀸𑀫 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀢𑀺𑀦𑁆𑀢𑀓𑀼𑀡𑀧𑀓𑀲𑀝𑀉𑀤𑀓𑀲𑀤𑀺𑀲𑁄. 𑀢𑀲𑁆𑀫𑀸 𑀓𑀲𑀫𑁆𑀩𑀼 𑀯𑀺𑀬 𑀚𑀸𑀢𑁄𑀢𑀺 𑀓𑀲𑀫𑁆𑀩𑀼𑀚𑀸𑀢𑁄.

𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀻𑀢𑀺 𑀓𑀲𑁆𑀫𑀸 𑀦 𑀳𑁄𑀢𑀺? 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀅𑀭𑀳𑀢𑁆𑀢𑀁 𑀮𑀤𑁆𑀥𑀼𑀁, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀬 𑀪𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀳𑀺 𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀲𑁆𑀲 ¶ ‘𑀅𑀲𑀼𑀓𑁄 𑀦𑀸𑀫 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 ¶ 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸𑀧𑀺, 𑀬𑀲𑁆𑀫𑀺𑀁 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑀸 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀺𑀁 𑀓𑀼𑀮𑁂 𑀅𑀧𑀘𑁆𑀘𑀸𑀚𑀸𑀢𑀢𑁆𑀢𑀸 𑀦 𑀏𑀯𑀁 𑀳𑁄𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀲𑁄 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬 𑀅𑀪𑀺𑀲𑁂𑀓𑀁 ¶ 𑀧𑀸𑀧𑀼𑀡𑁂𑀬𑁆𑀬’𑀦𑁆𑀢𑀺; 𑀏𑀯𑀫𑁂𑀯 𑀤𑀼𑀲𑁆𑀲𑀻𑀮𑀲𑁆𑀲 ‘𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸𑀧𑀺, 𑀬𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀅𑀪𑀸𑀯𑀢𑁄 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀲𑁄 𑀲𑀻𑀮𑀯𑀸 𑀯𑀺𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬’𑀦𑁆𑀢𑀺 𑀦 𑀏𑀯𑀁 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀭𑀳𑀢𑁆𑀢𑀸𑀲𑀸𑀬 𑀅𑀪𑀸𑀯𑀸 𑀦𑀺𑀭𑀸𑀲𑁄𑀢𑀺 𑀯𑀼𑀘𑁆𑀘𑀢𑀺.

𑁯𑁨. 𑀢𑀲𑁆𑀲 𑀏𑀯𑀁 𑀳𑁄𑀢𑀻𑀢𑀺 𑀓𑀲𑁆𑀫𑀸 𑀳𑁄𑀢𑀺? 𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀬 𑀣𑀺𑀭𑀢𑁆𑀢𑀸. 𑀬𑀣𑀸 𑀳𑀺 𑀲𑀼𑀚𑀸𑀢𑀲𑁆𑀲 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 ‘𑀅𑀲𑀼𑀓𑁄 𑀦𑀸𑀫 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸𑀯 𑀬𑀲𑁆𑀫𑀺𑀁 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑀸 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀺𑀁 𑀧𑀘𑁆𑀘𑀸𑀚𑀸𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺, 𑀲𑁄 𑀓𑀼𑀫𑀸𑀭𑁄 𑀯𑀺𑀬 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑁂𑀬𑁆𑀬’𑀦𑁆𑀢𑀺 𑀏𑀯𑀫𑁂𑀯 𑀲𑀻𑀮𑀯𑀢𑁄 ‘𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸𑀯 𑀬𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀬 𑀣𑀺𑀭𑀢𑁆𑀢𑀸 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀲𑁄 𑀪𑀺𑀓𑁆𑀔𑀼 𑀯𑀺𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬’𑀦𑁆𑀢𑀺 𑀏𑀯𑀁 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀆𑀲𑀁𑀲𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀅𑀭𑀳𑀢𑁆𑀢𑀁 𑀆𑀲𑀁𑀲𑀢𑀺 𑀧𑀢𑁆𑀣𑁂𑀢𑀻𑀢𑀺 𑀆𑀲𑀁𑀲𑁄.

𑁯𑁩. 𑀬𑀸 𑀳𑀺𑀲𑁆𑀲 𑀧𑀼𑀩𑁆𑀩𑁂 𑀅𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀬𑀸 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀧𑀼𑀩𑁆𑀩𑁂 𑀅𑀭𑀳𑀢𑁆𑀢𑀯𑀺𑀫𑀼𑀢𑁆𑀢𑀺𑀬𑀸 𑀅𑀯𑀺𑀫𑀼𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀸𑀲𑀸 𑀅𑀳𑁄𑀲𑀺, 𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀢𑀲𑁆𑀫𑀸 𑀦 𑀏𑀯𑀁 𑀳𑁄𑀢𑀺. 𑀬𑀣𑀸 𑀳𑀺 𑀅𑀪𑀺𑀲𑀺𑀢𑁆𑀢𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 ‘𑀅𑀲𑀼𑀓𑁄 𑀦𑀸𑀫 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸 𑀏𑀓𑀲𑁆𑀲 𑀭𑀜𑁆𑀜𑁄 𑀤𑁆𑀯𑀺𑀦𑁆𑀦𑀁 𑀭𑀚𑁆𑀚𑀸𑀪𑀺𑀲𑁂𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑁂𑀢𑀘𑁆𑀙𑀢𑁆𑀢𑀸𑀦𑀁 𑀅𑀪𑀸𑀯𑀸 𑀦 𑀏𑀯𑀁 𑀳𑁄𑀢𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀲𑁄 𑀓𑀼𑀫𑀸𑀭𑁄 𑀯𑀺𑀬 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺; 𑀏𑀯𑀫𑁂𑀯 𑀔𑀻𑀡𑀸𑀲𑀯𑀲𑁆𑀲 ‘𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀲𑀼𑀢𑁆𑀯𑀸, 𑀤𑁆𑀯𑀺𑀦𑁆𑀦𑀁 𑀅𑀭𑀳𑀢𑁆𑀢𑀸𑀦𑀁 𑀅𑀪𑀸𑀯𑀸 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀲𑁄 𑀪𑀺𑀓𑁆𑀔𑀼 𑀯𑀺𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬’𑀦𑁆𑀢𑀺 ¶ 𑀦 𑀏𑀯𑀁 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀭𑀳𑀢𑁆𑀢𑀸𑀲𑀸𑀬 𑀯𑀺𑀕𑀢𑀢𑁆𑀢𑀸 𑀯𑀺𑀕𑀢𑀸𑀲𑁄𑀢𑀺 𑀯𑀼𑀘𑁆𑀘𑀢𑀺.

𑁯𑁪. 𑀕𑀺𑀮𑀸𑀦𑀽𑀧𑀫𑀦𑀺𑀤𑁆𑀤𑁂𑀲𑁂 𑁋 𑀬𑀸𑀬 𑀉𑀧𑀫𑀸𑀬 𑀢𑁂 𑀕𑀺𑀮𑀸𑀦𑀽𑀧𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀢𑀸𑀯 𑀉𑀧𑀫𑀁 𑀤𑀲𑁆𑀲𑁂𑀢𑀼𑀁 𑀢𑀬𑁄 𑀕𑀺𑀮𑀸𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀧𑁆𑀧𑀸𑀬𑀸𑀦𑀻𑀢𑀺 𑀳𑀺𑀢𑀸𑀦𑀺 𑀯𑀼𑀤𑁆𑀥𑀺𑀓𑀭𑀸𑀦𑀺. 𑀧𑀢𑀺𑀭𑀽𑀧𑀦𑁆𑀢𑀺 ¶ 𑀅𑀦𑀼𑀘𑁆𑀙𑀯𑀺𑀓𑀁. 𑀦𑁂𑀯 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸𑀢𑀺 𑀇𑀫𑀺𑀦𑀸 𑀅𑀢𑁂𑀓𑀺𑀘𑁆𑀙𑁂𑀦 𑀯𑀸𑀢𑀸𑀧𑀫𑀸𑀭𑀸𑀤𑀺𑀦𑀸 𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀺𑀝𑁆𑀞𑀧𑁆𑀧𑀢𑁆𑀢𑁄 𑀕𑀺𑀮𑀸𑀦𑁄 𑀓𑀣𑀺𑀢𑁄. 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸𑀢𑀺 𑀇𑀫𑀺𑀦𑀸 𑀔𑀺𑀧𑀺𑀢𑀓𑀘𑁆𑀙𑀼𑀢𑀺𑀡𑀧𑀼𑀧𑁆𑀨𑀓𑀚𑀭𑀸𑀤𑀺𑀧𑁆𑀧𑀪𑁂𑀤𑁄 𑀅𑀧𑁆𑀧𑀫𑀢𑁆𑀢𑀓𑀸𑀩𑀸𑀥𑁄 𑀓𑀣𑀺𑀢𑁄.

𑀮𑀪𑀦𑁆𑀢𑁄 ¶ 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀬𑁂𑀲𑀁 𑀧𑀝𑀺𑀚𑀕𑁆𑀕𑀦𑁂𑀦 𑀨𑀸𑀲𑀼𑀓𑀁 𑀳𑁄𑀢𑀺, 𑀲𑀩𑁆𑀩𑁂𑀧𑀺 𑀢𑁂 𑀆𑀩𑀸𑀥𑀸 𑀓𑀣𑀺𑀢𑀸. 𑀏𑀢𑁆𑀣 𑀘 𑀧𑀢𑀺𑀭𑀽𑀧𑁄 𑀉𑀧𑀝𑁆𑀞𑀸𑀓𑁄 𑀦𑀸𑀫 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀤𑀓𑁆𑀔𑁄 𑀅𑀦𑀮𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 ‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑁄’𑀢𑀺 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀕𑀺𑀮𑀸𑀦𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 ‘𑀏𑀓𑁄 𑀪𑀺𑀓𑁆𑀔𑀼 𑀘 𑀲𑀸𑀫𑀡𑁂𑀭𑁄 𑀘 𑀇𑀫𑀁 𑀧𑀝𑀺𑀚𑀕𑁆𑀕𑀣𑀸’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀬𑀸𑀯 𑀧𑀦 𑀢𑁂 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀢𑀸𑀯 𑀕𑀺𑀮𑀸𑀦𑀲𑁆𑀲 𑀘 𑀢𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀬𑁂𑀦𑀢𑁆𑀣𑁄 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀪𑀸𑀭𑁄. 𑀅𑀜𑁆𑀜𑁂𑀧𑀺 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸𑀢𑀺 𑀇𑀢𑀭𑁂𑀧𑀺 𑀤𑁆𑀯𑁂 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸. 𑀓𑀺𑀁 𑀓𑀸𑀭𑀡𑀸? 𑀬𑁄𑀧𑀺 𑀳𑀺 𑀦𑀺𑀝𑁆𑀞𑀧𑁆𑀧𑀢𑁆𑀢𑀕𑀺𑀮𑀸𑀦𑁄, 𑀲𑁄 𑀅𑀦𑀼𑀧𑀝𑁆𑀞𑀺𑀬𑀫𑀸𑀦𑁄 ‘𑀲𑀘𑁂 𑀫𑀁 𑀧𑀝𑀺𑀚𑀕𑁆𑀕𑁂𑀬𑁆𑀬𑀼𑀁, 𑀨𑀸𑀲𑀼𑀓𑀁 𑀫𑁂 𑀪𑀯𑁂𑀬𑁆𑀬, 𑀦 𑀔𑁄 𑀧𑀦 𑀫𑀁 𑀧𑀝𑀺𑀚𑀕𑁆𑀕𑀦𑁆𑀢𑀻’𑀢𑀺 𑀫𑀦𑁄𑀧𑀤𑁄𑀲𑀁 𑀓𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑀲𑁆𑀲 𑀧𑀦 𑀏𑀯𑀁 𑀳𑁄𑀢𑀺 𑁋 ‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑀁 𑀓𑀢𑁆𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 𑀓𑀢𑀁, 𑀫𑀬𑁆𑀳𑀁 𑀧𑀦 𑀓𑀫𑁆𑀫𑀯𑀺𑀧𑀸𑀓𑁄 𑀈𑀤𑀺𑀲𑁄’𑀢𑀺 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀬𑁄 𑀧𑀦 𑀅𑀧𑁆𑀧𑀫𑀢𑁆𑀢𑀓𑁂𑀦 𑀩𑁆𑀬𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀯𑀼𑀝𑁆𑀞𑀸𑀢𑀺𑀬𑁂𑀯, 𑀢𑀲𑁆𑀲 𑀯𑀺𑀦𑀸𑀧𑀺 𑀪𑁂𑀲𑀚𑁆𑀚𑁂𑀦 𑀯𑀽𑀧𑀲𑀫𑀦𑀓𑀩𑁆𑀬𑀸𑀥𑀺 𑀪𑁂𑀲𑀚𑁆𑀚𑁂 𑀓𑀢𑁂 𑀔𑀺𑀧𑁆𑀧𑀢𑀭𑀁 𑀯𑀽𑀧𑀲𑀫𑁆𑀫𑀢𑀺. 𑀢𑀢𑁄 𑀲𑁄 𑀩𑀼𑀤𑁆𑀥𑀯𑀘𑀦𑀁 ¶ 𑀯𑀸 𑀉𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀜𑁆𑀜𑁂𑀧𑀺 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁.

𑀦𑁂𑀯 𑀑𑀓𑁆𑀓𑀫𑀢𑀻𑀢𑀺 𑀦𑁂𑀯 𑀧𑀯𑀺𑀲𑀢𑀺. 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀫𑀕𑁆𑀕𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀲𑀫𑁆𑀫𑀢𑁆𑀢𑀁. 𑀇𑀫𑀺𑀦𑀸 𑀧𑀤𑀧𑀭𑀫𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄. 𑀤𑀼𑀢𑀺𑀬𑀯𑀸𑀭𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀕𑀳𑀺𑀢𑁄 𑀲𑀸𑀲𑀦𑁂 𑀦𑀸𑀴𑀓𑀢𑁆𑀣𑁂𑀭𑀲𑀤𑀺𑀲𑁄 ¶ . 𑀩𑀼𑀤𑁆𑀥𑀦𑁆𑀢𑀭𑁂 𑀏𑀓𑀯𑀸𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀘. 𑀢𑀢𑀺𑀬𑀯𑀸𑀭𑁂𑀦 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄. 𑀦𑁂𑀬𑁆𑀬𑁄 𑀧𑀦 𑀢𑀦𑁆𑀦𑀺𑀲𑁆𑀲𑀺𑀢𑁄𑀯 𑀳𑁄𑀢𑀺.

𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀫𑀸𑀲𑀲𑁆𑀲 𑀅𑀝𑁆𑀞 𑀯𑀸𑀭𑁂 𑀥𑀫𑁆𑀫𑀓𑀣𑀸 𑀅𑀦𑀼𑀜𑁆𑀜𑀸𑀢𑀸. 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄𑀢𑀺 𑀇𑀢𑀭𑁂𑀲𑀫𑁆𑀧𑀺 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀸? 𑀧𑀤𑀧𑀭𑀫𑀲𑁆𑀲 𑀳𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀺. 𑀬𑁄 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑀁 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀥𑀫𑁆𑀫𑀯𑀺𑀦𑀬𑀜𑁆𑀘 𑀲𑀯𑀦𑀸𑀬 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀺; 𑀲𑁄 𑀅𑀮𑀪𑀦𑁆𑀢𑁄 𑀦 𑀢𑀸𑀯 𑀅𑀪𑀺𑀲𑀫𑁂𑀢𑀺, 𑀮𑀪𑀦𑁆𑀢𑁄 𑀧𑀦 𑀔𑀺𑀧𑁆𑀧𑀫𑁂𑀯 𑀅𑀪𑀺𑀲𑀫𑁂𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 ¶ 𑀓𑀸𑀭𑀡𑁂𑀦 𑀢𑁂𑀲𑀁 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀢𑀢𑀺𑀬𑀲𑁆𑀲 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀤𑁂𑀲𑁂𑀢𑀩𑁆𑀩𑁄𑀯. 𑀓𑀸𑀬𑀲𑀓𑁆𑀔𑀺𑀤𑀺𑀝𑁆𑀞𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀬𑁂𑀯.

𑁯𑁮. 𑀕𑀽𑀣𑀪𑀸𑀡𑀻𑀆𑀤𑀻𑀲𑀼 𑁋 𑀲𑀪𑀕𑁆𑀕𑀢𑁄𑀢𑀺 𑀲𑀪𑀸𑀬𑀁 𑀞𑀺𑀢𑁄. 𑀧𑀭𑀺𑀲𑀕𑁆𑀕𑀢𑁄𑀢𑀺 𑀕𑀸𑀫𑀧𑀭𑀺𑀲𑀸𑀬 𑀞𑀺𑀢𑁄. 𑀜𑀸𑀢𑀺𑀫𑀚𑁆𑀛𑀕𑀢𑁄𑀢𑀺 𑀤𑀸𑀬𑀸𑀤𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀧𑀽𑀕𑀫𑀚𑁆𑀛𑀕𑀢𑁄𑀢𑀺 𑀲𑁂𑀡𑀻𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄𑀢𑀺 𑀭𑀸𑀚𑀓𑀼𑀮𑀲𑁆𑀲 𑀫𑀚𑁆𑀛𑁂 𑀫𑀳𑀸𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑁄. 𑀅𑀪𑀺𑀦𑀻𑀢𑁄𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬 𑀦𑀻𑀢𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑁄. 𑀏𑀳𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀳𑁂𑀢𑀼 𑀯𑀸 𑀥𑀦𑀳𑁂𑀢𑀼 𑀯𑀸. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸𑀢𑀺 𑀏𑀢𑁆𑀣 𑀆𑀫𑀺𑀲𑀦𑁆𑀢𑀺 𑀮𑀸𑀪𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀜𑁆𑀘𑀺𑀓𑁆𑀔𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁. 𑀅𑀦𑁆𑀢𑀫𑀲𑁄 𑀢𑀺𑀢𑁆𑀢𑀺𑀭𑀯𑀝𑁆𑀝𑀓𑀲𑀧𑁆𑀧𑀺𑀧𑀺𑀡𑁆𑀟𑀦𑀯𑀦𑀻𑀢𑀧𑀺𑀡𑁆𑀟𑀸𑀤𑀺𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀸𑀧𑀺 𑀮𑀜𑁆𑀚𑀲𑁆𑀲 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄𑀬𑁂𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀢𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀕𑀽𑀣𑀲𑀤𑀺𑀲𑀯𑀘𑀦𑀢𑁆𑀢𑀸 𑀕𑀽𑀣𑀪𑀸𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀕𑀽𑀣𑀁 𑀦𑀸𑀫 𑀫𑀳𑀸𑀚𑀦𑀲𑁆𑀲 𑀅𑀦𑀺𑀝𑁆𑀞𑀁 ¶ 𑀳𑁄𑀢𑀺 𑀅𑀓𑀦𑁆𑀢𑀁; 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀺𑀝𑁆𑀞𑀁 𑀳𑁄𑀢𑀺 𑀅𑀓𑀦𑁆𑀢𑀁.

𑁯𑁯. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀼𑀧𑁆𑀨𑀲𑀤𑀺𑀲𑀯𑀘𑀦𑀢𑁆𑀢𑀸 𑀧𑀼𑀧𑁆𑀨𑀪𑀸𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀨𑀼𑀮𑁆𑀮𑀸𑀦𑀺 𑀯𑀲𑁆𑀲𑀺𑀓𑀸𑀦𑀺 𑀯𑀸 𑀅𑀥𑀺𑀫𑀼𑀢𑁆𑀢𑀓𑀸𑀦𑀺 𑀯𑀸 𑀫𑀳𑀸𑀚𑀦𑀲𑁆𑀲 𑀇𑀝𑁆𑀞𑀸𑀦𑀺 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺; 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀝𑁆𑀞𑀁 ¶ 𑀳𑁄𑀢𑀺 𑀓𑀦𑁆𑀢𑀁.

𑁧𑁦𑁦. 𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄. 𑀦𑀸𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸. 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄, ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 (𑀉𑀤𑀸. 𑁬𑁫) 𑀏𑀢𑁆𑀣 𑀯𑀼𑀢𑁆𑀢𑀦𑁂𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸. 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻. 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺. 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺, 𑀫𑀸𑀢𑀺𑀫𑀢𑁆𑀢𑀁 𑀫𑀸𑀢𑀸𑀢𑀺, 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀩𑀳𑀼𑀚𑀦𑀲𑁆𑀲 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀤𑁆𑀥𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀫𑀥𑀼𑀪𑀸𑀡𑀻𑀢𑀺 ¶ 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀪𑀸𑀡𑀻𑀢𑀺𑀧𑀺 𑀧𑀸𑀞𑁄. 𑀉𑀪𑀬𑀢𑁆𑀣𑀸𑀧𑀺 𑀫𑀥𑀼𑀭𑀯𑀘𑀦𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀘𑀢𑀼𑀫𑀥𑀼𑀭𑀁 𑀦𑀸𑀫 𑀫𑀥𑀼𑀭𑀁 𑀧𑀡𑀻𑀢𑀁; 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀫𑀥𑀼𑀭𑀁 𑀳𑁄𑀢𑀺.

𑁧𑁦𑁧. 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑀸𑀤𑀻𑀲𑀼 𑁋 𑀅𑀪𑀺𑀲𑀚𑁆𑀚𑀢𑀻𑀢𑀺 𑀮𑀕𑁆𑀕𑀢𑀺. 𑀓𑀼𑀧𑁆𑀧𑀢𑀻𑀢𑀺 𑀓𑁄𑀧𑀯𑀲𑁂𑀦 𑀓𑀼𑀧𑁆𑀧𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀧𑀓𑀢𑀺𑀪𑀸𑀯𑀁 𑀧𑀚𑀳𑀢𑀺, 𑀧𑀽𑀢𑀺𑀓𑁄 𑀳𑁄𑀢𑀺. 𑀧𑀢𑀺𑀢𑁆𑀣𑀻𑀬𑀢𑀻𑀢𑀺 𑀣𑀺𑀦𑀪𑀸𑀯𑀁 𑀣𑀤𑁆𑀥𑀪𑀸𑀯𑀜𑁆𑀘 𑀆𑀧𑀚𑁆𑀚𑀢𑀺. 𑀓𑁄𑀧𑀦𑁆𑀢𑀺 𑀤𑀼𑀩𑁆𑀩𑀮𑀓𑁄𑀥𑀁. 𑀤𑁄𑀲𑀦𑁆𑀢𑀺 𑀤𑀼𑀲𑁆𑀲𑀦𑀯𑀲𑁂𑀦 𑀢𑀢𑁄 𑀩𑀮𑀯𑀢𑀭𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀢𑀼𑀝𑁆𑀞𑀸𑀓𑀸𑀭𑀁 𑀤𑁄𑀫𑀦𑀲𑁆𑀲𑀁. 𑀤𑀼𑀝𑁆𑀞𑀸𑀭𑀼𑀓𑁄𑀢𑀺 𑀧𑀼𑀭𑀸𑀡𑀯𑀡𑁄. 𑀓𑀝𑁆𑀞𑁂𑀦𑀸𑀢𑀺 𑀤𑀡𑁆𑀟𑀓𑀓𑁄𑀝𑀺𑀬𑀸. 𑀓𑀞𑀮𑀸𑀬𑀸𑀢𑀺 𑀓𑀧𑀸𑀮𑁂𑀦. 𑀆𑀲𑀯𑀁 𑀤𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀲𑀯𑀢𑀺. 𑀧𑀼𑀭𑀸𑀡𑀯𑀡𑁄 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀧𑀼𑀩𑁆𑀩𑀁 𑀮𑁄𑀳𑀺𑀢𑀁 𑀬𑀽𑀲𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀯𑀢𑀺 ¶ , 𑀖𑀝𑁆𑀝𑀺𑀢𑁄 𑀧𑀦 𑀢𑀸𑀦𑀺 𑀅𑀥𑀺𑀓𑀢𑀭𑀁 𑀲𑀯𑀢𑀺. 𑀏𑀯𑀫𑁂𑀯𑀁 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, 𑀤𑀼𑀝𑁆𑀞𑀸𑀭𑀼𑀓𑁄 𑀯𑀺𑀬 𑀳𑀺 𑀓𑁄𑀥𑀦𑁄 𑀧𑀼𑀕𑁆𑀕𑀮𑁄. 𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀯𑀦𑀁 𑀯𑀺𑀬 𑀓𑁄𑀥𑀦𑀲𑁆𑀲𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀤𑁆𑀥𑀼𑀫𑀸𑀢𑀓𑀲𑁆𑀲 𑀯𑀺𑀬 𑀘𑀡𑁆𑀟𑀺𑀓𑀢𑀲𑁆𑀲 𑀘𑀭𑀡𑀁. 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀖𑀝𑁆𑀝𑀦𑀁 𑀯𑀺𑀬 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 ¶ 𑀯𑀘𑀦𑀁 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀲𑀯𑀦𑀁 𑀯𑀺𑀬 ‘𑀫𑀸𑀤𑀺𑀲𑀁 𑀦𑀸𑀫 𑀏𑀲 𑀏𑀯𑀁 𑀯𑀤𑀢𑀻’𑀢𑀺 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀉𑀤𑁆𑀥𑀼𑀫𑀸𑀬𑀦𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀭𑀸𑀡𑀯𑀡𑀲𑀤𑀺𑀲𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁧𑁦𑁨. 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀸𑀢𑀺 𑀭𑀢𑁆𑀢𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀪𑀸𑀯𑀓𑀭𑀡𑁂 𑀩𑀳𑀮𑀢𑀫𑁂. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂. 𑀇𑀥𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀳𑀺 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸. 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁄. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀸𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁. 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸. 𑀧𑀼𑀦 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀸𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁. 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸. 𑀧𑀼𑀦 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀸𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀺𑀚𑁆𑀚𑀽𑀧𑀫𑀘𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑁆𑀢𑀭𑀓𑀸𑀮𑁄𑀪𑀸𑀲𑁂𑀦 𑀯𑀺𑀚𑁆𑀚𑀼𑀲𑀤𑀺𑀲𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁧𑁦𑁩. 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑀢𑀸𑀬𑀧𑀺 ¶ 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀯𑀚𑀺𑀭𑀁 𑀯𑀺𑀬 𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀫𑀡𑀺𑀕𑀡𑁆𑀞𑀺𑀧𑀸𑀲𑀸𑀡𑀕𑀡𑁆𑀞𑀺 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸. 𑀯𑀚𑀺𑀭𑀲𑁆𑀲 𑀫𑀡𑀺𑀕𑀡𑁆𑀞𑀺𑀁 𑀯𑀸 𑀧𑀸𑀲𑀸𑀡𑀕𑀡𑁆𑀞𑀺𑀁 𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀕𑀫𑀦𑀪𑀸𑀯𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀘𑁆𑀙𑁂𑀚𑁆𑀚𑀸𑀦𑀁 𑀓𑀺𑀮𑁂𑀲𑀸𑀦𑀁 𑀦𑀢𑁆𑀣𑀺𑀪𑀸𑀯𑁄. 𑀯𑀚𑀺𑀭𑁂𑀦 𑀦𑀺𑀩𑁆𑀩𑀺𑀤𑁆𑀥𑀯𑁂𑀥𑀲𑁆𑀲 𑀧𑀼𑀦 𑀅𑀧𑀝𑀺𑀧𑀽𑀭𑀡𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀦𑀼𑀧𑁆𑀧𑀸𑀤𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 ¶ 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀮𑁂𑀲𑀸𑀦𑀁 𑀫𑀽𑀮𑀖𑀸𑀢𑀓𑀭𑀡𑀲𑀫𑀢𑁆𑀣𑀢𑀸𑀬 𑀯𑀚𑀺𑀭𑁂𑀦 𑀲𑀤𑀺𑀲𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁧𑁦𑁪. 𑀅𑀦𑁆𑀥𑀸𑀤𑀻𑀲𑀼 𑀢𑀣𑀸𑀭𑀽𑀧𑀁 𑀘𑀓𑁆𑀔𑀼 𑀦 𑀳𑁄𑀢𑀻𑀢𑀺 𑀢𑀣𑀸𑀚𑀸𑀢𑀺𑀓𑀁 𑀢𑀣𑀸𑀲𑀪𑀸𑀯𑀁 ¶ 𑀧𑀜𑁆𑀜𑀸𑀘𑀓𑁆𑀔𑀼 𑀦 𑀳𑁄𑀢𑀺. 𑀨𑀸𑀢𑀺𑀁 𑀓𑀭𑁂𑀬𑁆𑀬𑀸𑀢𑀺 𑀨𑀻𑀢𑀁 𑀯𑀟𑁆𑀠𑀺𑀢𑀁 𑀓𑀭𑁂𑀬𑁆𑀬. 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂𑀢𑀺 𑀲𑀤𑁄𑀲𑀦𑀺𑀤𑁆𑀤𑁄𑀲𑁂. 𑀳𑀻𑀦𑀧𑁆𑀧𑀡𑀻𑀢𑁂𑀢𑀺 𑀅𑀥𑀫𑀼𑀢𑁆𑀢𑀫𑁂. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂𑀢𑀺 𑀓𑀡𑁆𑀳𑀲𑀼𑀓𑁆𑀓𑀸𑀬𑁂𑀯 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀸𑀳𑀦𑀢𑁄 𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀓𑀼𑀲𑀮𑁂 𑀥𑀫𑁆𑀫𑁂 ‘𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺 𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀚𑀸𑀦𑁂𑀬𑁆𑀬, 𑀅𑀓𑀼𑀲𑀮𑁂 𑀥𑀫𑁆𑀫𑁂 ‘𑀅𑀓𑀼𑀲𑀮𑀸 𑀥𑀫𑁆𑀫𑀸’𑀢𑀺, 𑀲𑀸𑀯𑀚𑁆𑀚𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂𑀲𑀼 𑀧𑀦 𑀓𑀡𑁆𑀳𑀥𑀫𑁆𑀫𑁂 ‘𑀲𑀼𑀓𑁆𑀓𑀲𑀼𑀧𑁆𑀧𑀝𑀺𑀪𑀸𑀕𑀸’𑀢𑀺, 𑀲𑀼𑀓𑁆𑀓𑀥𑀫𑁆𑀫𑁂 ‘𑀓𑀡𑁆𑀳𑀲𑀧𑁆𑀧𑀝𑀺𑀪𑀸𑀕𑀸’𑀢𑀺 𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀚𑀸𑀦𑁂𑀬𑁆𑀬. 𑀢𑀣𑀸𑀭𑀽𑀧𑀫𑁆𑀧𑀺𑀲𑁆𑀲 𑀘𑀓𑁆𑀔𑀼 𑀦 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀝𑁆𑀞𑀸𑀦𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀪𑁄𑀕𑀲𑀁𑀳𑀭𑀡𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀘 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑁄𑀥𑀦𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀘 𑀅𑀪𑀸𑀯𑀸 𑀅𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀢𑀺𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀪𑁄𑀕𑀲𑀁𑀳𑀭𑀡𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀪𑀸𑀯𑀸, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑁄𑀥𑀦𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀧𑀦 𑀅𑀪𑀸𑀯𑀸 𑀏𑀓𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺. 𑀢𑀢𑀺𑀬𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀪𑀸𑀯𑀸 𑀤𑁆𑀯𑀺𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁭. 𑀅𑀯𑀓𑀼𑀚𑁆𑀚𑀧𑀜𑁆𑀜𑀸𑀤𑀻𑀲𑀼 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀉𑀧𑀸𑀲𑀓𑁄 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀕𑀢𑁄𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀳𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀁 𑀦𑀺𑀤𑁆𑀤𑁄𑀲𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀆𑀤𑀻𑀢𑀺 𑀧𑀼𑀩𑁆𑀩𑀧𑀝𑁆𑀞𑀧𑀦𑀸. 𑀫𑀚𑁆𑀛𑀦𑁆𑀢𑀺 𑀓𑀣𑀸𑀯𑁂𑀫𑀚𑁆𑀛𑀁. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀇𑀢𑀺𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸 𑀧𑀼𑀩𑁆𑀩𑀧𑀝𑁆𑀞𑀧𑀦𑁂𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀯𑁂𑀫𑀚𑁆𑀛𑁂𑀧𑀺, 𑀧𑀭𑀺𑀬𑁄𑀲𑀸𑀦𑁂𑀧𑀺. 𑀏𑀢𑁆𑀣 𑀘 𑀅𑀢𑁆𑀣𑀺 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀺, 𑀅𑀢𑁆𑀣𑀺 𑀲𑀸𑀲𑀦𑀲𑁆𑀲. 𑀢𑀢𑁆𑀣 𑀤𑁂𑀲𑀦𑀸𑀬 𑀢𑀸𑀯 𑁋 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀬 𑀧𑀞𑀫𑀧𑀤𑀁 𑀆𑀤𑀺, 𑀤𑁆𑀯𑁂 𑀧𑀤𑀸𑀦𑀺 𑀫𑀚𑁆𑀛𑀁, 𑀅𑀯𑀲𑀸𑀦𑀧𑀤𑀁 𑀧𑀭𑀺𑀬𑁄𑀲𑀸𑀦𑀁. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑀼𑀢𑁆𑀢𑀲𑁆𑀲 𑁋 𑀦𑀺𑀤𑀸𑀦𑀁 𑀆𑀤𑀺, 𑀅𑀦𑀼𑀲𑀦𑁆𑀥𑀺 𑀫𑀚𑁆𑀛𑀁, 𑀇𑀤𑀫𑀯𑁄𑀘𑀸𑀢𑀺 𑀅𑀧𑁆𑀧𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑁋 𑀧𑀞𑀫𑁄 𑀅𑀦𑀼𑀲𑀦𑁆𑀥𑀺 𑀆𑀤𑀺 ¶ , 𑀢𑀢𑁄 𑀧𑀭𑀁 𑀏𑀓𑁄 𑀯𑀸 𑀅𑀦𑁂𑀓𑀸 𑀯𑀸 𑀫𑀚𑁆𑀛𑀁, 𑀧𑀘𑁆𑀙𑀺𑀫𑁄 𑀧𑀭𑀺𑀬𑁄𑀲𑀸𑀦𑀁. 𑀅𑀬𑀁 𑀢𑀸𑀯 𑀤𑁂𑀲𑀦𑀸𑀬 𑀦𑀬𑁄.

𑀲𑀸𑀲𑀦𑀲𑁆𑀲 ¶ 𑀧𑀦 𑀲𑀻𑀮𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑀁, 𑀯𑀺𑀧𑀲𑁆𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀲𑀫𑀸𑀥𑀺 𑀯𑀸 𑀆𑀤𑀺, 𑀯𑀺𑀧𑀲𑁆𑀲𑀦𑀸 𑀫𑀚𑁆𑀛𑀁, 𑀫𑀕𑁆𑀕𑁄 𑀧𑀭𑀺𑀬𑁄𑀲𑀸𑀦𑀁. 𑀯𑀺𑀧𑀲𑁆𑀲𑀦𑀸 𑀯𑀸 𑀆𑀤𑀺, 𑀫𑀕𑁆𑀕𑁄 𑀫𑀚𑁆𑀛𑀁, 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁. 𑀫𑀕𑁆𑀕𑁄 𑀯𑀸 𑀆𑀤𑀺, 𑀨𑀮𑀁 𑀫𑀚𑁆𑀛𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 ¶ . 𑀤𑁆𑀯𑁂 𑀤𑁆𑀯𑁂 𑀯𑀸 𑀓𑀭𑀺𑀬𑀫𑀸𑀦𑁂 𑀲𑀻𑀮𑀲𑀫𑀸𑀥𑀬𑁄 𑀆𑀤𑀺, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀲𑀸𑀢𑁆𑀣𑀦𑁆𑀢𑀺 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀓𑀮𑀧𑀭𑀺𑀧𑀼𑀡𑁆𑀡𑀁 𑀅𑀦𑀽𑀦𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀏𑀯𑀁 𑀤𑁂𑀲𑁂𑀦𑁆𑀢𑀸 𑀘 𑀲𑁂𑀝𑁆𑀞𑀘𑀭𑀺𑀬𑀪𑀽𑀢𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀧𑀓𑀸𑀲𑁂𑀦𑁆𑀢𑀺. 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀦𑁂𑀯 𑀧𑀼𑀩𑁆𑀩𑀧𑀝𑁆𑀞𑀧𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀓𑀼𑀫𑁆𑀪𑁄𑀢𑀺 𑀖𑀝𑁄. 𑀦𑀺𑀓𑁆𑀓𑀼𑀚𑁆𑀚𑁄𑀢𑀺 𑀅𑀥𑁄𑀫𑀼𑀔𑁄 𑀞𑀧𑀺𑀢𑁄. 𑀏𑀯𑀫𑁂𑀯𑀦𑁆𑀢𑀺 𑀏𑀢𑁆𑀣 𑀓𑀼𑀫𑁆𑀪𑁄 𑀦𑀺𑀓𑁆𑀓𑀼𑀚𑁆𑀚𑁄 𑀯𑀺𑀬 𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀉𑀤𑀓𑀸𑀲𑀺𑀜𑁆𑀘𑀦𑀓𑀸𑀮𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀮𑀤𑁆𑀥𑀓𑀸𑀮𑁄. 𑀉𑀤𑀓𑀲𑁆𑀲 𑀯𑀺𑀯𑀝𑁆𑀝𑀦𑀓𑀸𑀮𑁄 𑀯𑀺𑀬 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄. 𑀉𑀤𑀓𑀲𑁆𑀲 𑀅𑀲𑀡𑁆𑀞𑀸𑀦𑀓𑀸𑀮𑁄 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀯𑀓𑀼𑀚𑁆𑀚𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀥𑁄𑀫𑀼𑀔𑀧𑀜𑁆𑀜𑁄𑀢𑀺 𑀅𑀢𑁆𑀣𑁄.

𑁧𑁦𑁮. 𑀆𑀓𑀺𑀡𑁆𑀡𑀸𑀦𑀻𑀢𑀺 𑀧𑀓𑁆𑀔𑀺𑀢𑁆𑀢𑀸𑀦𑀺. 𑀲𑀢𑀺𑀲𑀫𑁆𑀫𑁄𑀲𑀸 𑀧𑀓𑀺𑀭𑁂𑀬𑁆𑀬𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀢𑀸𑀬 𑀯𑀺𑀓𑀺𑀭𑁂𑀬𑁆𑀬. 𑀏𑀯𑀫𑁂𑀯𑀦𑁆𑀢𑀺 𑀏𑀢𑁆𑀣 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀦𑀸𑀔𑀚𑁆𑀚𑀓𑀸𑀦𑀺 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀁 𑀩𑀼𑀤𑁆𑀥𑀯𑀘𑀦𑀁. 𑀉𑀘𑁆𑀙𑀗𑁆𑀕𑁂 𑀦𑀸𑀦𑀸𑀔𑀚𑁆𑀚𑀓𑀸𑀦𑀺 𑀔𑀸𑀤𑀦𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀳𑀡𑀓𑀸𑀮𑁄. 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑀸 𑀯𑀺𑀓𑀺𑀭𑀡𑀓𑀸𑀮𑁄 𑀯𑀺𑀬 𑀢𑀲𑁆𑀫𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀉𑀘𑁆𑀙𑀗𑁆𑀕𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀘𑁆𑀙𑀗𑁆𑀕𑀲𑀤𑀺𑀲𑀧𑀜𑁆𑀜𑁄𑀢𑀺 𑀅𑀢𑁆𑀣𑁄.

𑁧𑁦𑁯. 𑀉𑀓𑁆𑀓𑀼𑀚𑁆𑀚𑁄𑀢𑀺 𑀉𑀧𑀭𑀺𑀫𑀼𑀔𑁄 𑀞𑀧𑀺𑀢𑁄. 𑀲𑀡𑁆𑀞𑀸𑀢𑀻𑀢𑀺 𑀧𑀢𑀺𑀝𑁆𑀞𑀳𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀉𑀧𑀭𑀺𑀫𑀼𑀔𑁄 𑀞𑀧𑀺𑀢𑁄 𑀓𑀼𑀫𑁆𑀪𑁄 𑀯𑀺𑀬 𑀧𑀼𑀣𑀼𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀉𑀤𑀓𑀲𑁆𑀲 𑀆𑀲𑀺𑀢𑁆𑀢𑀓𑀸𑀮𑁄 𑀯𑀺𑀬 𑀤𑁂𑀲𑀦𑀸𑀬 𑀮𑀤𑁆𑀥𑀓𑀸𑀮𑁄. 𑀉𑀤𑀓𑀲𑁆𑀲 𑀲𑀡𑁆𑀞𑀸𑀦𑀓𑀸𑀮𑁄 𑀯𑀺𑀬 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀳𑀡𑀓𑀸𑀮𑁄. 𑀦𑁄 𑀯𑀺𑀯𑀝𑁆𑀝𑀦𑀓𑀸𑀮𑁄 ¶ ¶ 𑀯𑀺𑀬 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀼𑀣𑀼𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑁆𑀣𑀸𑀭𑀺𑀓𑀧𑀜𑁆𑀜𑁄𑀢𑀺 𑀅𑀢𑁆𑀣𑁄.

𑁧𑁧𑁦. 𑀅𑀯𑀻𑀢𑀭𑀸𑀕𑀸𑀤𑀻𑀲𑀼 𑁋 𑀬𑀣𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄𑀧𑀺 ¶ 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼, 𑀢𑀻𑀲𑀼 𑀘 𑀪𑀯𑁂𑀲𑀼 𑀅𑀯𑀻𑀢𑀭𑀸𑀕𑁄. 𑀅𑀤𑀩𑁆𑀩𑀢𑀸𑀬 𑀧𑀦 𑀦 𑀕𑀳𑀺𑀢𑁄. 𑀬𑀣𑀸 𑀳𑀺 𑀙𑁂𑀓𑁄 𑀯𑀟𑁆𑀠𑀓𑀻 𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀣𑀁 𑀯𑀦𑀁 𑀧𑀯𑀺𑀝𑁆𑀞𑁄 𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀭𑀼𑀓𑁆𑀔𑁂 𑀙𑀺𑀦𑁆𑀤𑀢𑀺, 𑀬𑁂 𑀧𑀦𑀲𑁆𑀲 𑀤𑀩𑁆𑀩𑀲𑀫𑁆𑀪𑀸𑀭𑀽𑀧𑀕𑀸 𑀳𑁄𑀦𑁆𑀢𑀺, 𑀢𑁂𑀬𑁂𑀯 𑀙𑀺𑀦𑁆𑀤𑀢𑀺; 𑀏𑀯𑀫𑀺𑀥𑀸𑀧𑀺 𑀪𑀕𑀯𑀢𑀸 𑀤𑀩𑁆𑀩𑀚𑀸𑀢𑀺𑀓𑀸 𑀅𑀭𑀺𑀬𑀸𑀯 𑀕𑀳𑀺𑀢𑀸, 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀅𑀤𑀩𑁆𑀩𑀢𑀸𑀬 𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀻𑀢𑀭𑀸𑀕𑁄. 𑀪𑀯𑁂𑀲𑀼 𑀅𑀯𑀻𑀢𑀭𑀸𑀕𑁄𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀯𑀻𑀢𑀭𑀸𑀕𑁄.

𑁧𑁧𑁩. 𑀧𑀸𑀲𑀸𑀡𑀮𑁂𑀔𑀽𑀧𑀫𑀸𑀤𑀻𑀲𑀼 𑁋 𑀅𑀦𑀼𑀲𑁂𑀢𑀻𑀢𑀺 𑀅𑀧𑁆𑀧𑀳𑀻𑀦𑀢𑀸𑀬 𑀅𑀦𑀼𑀲𑁂𑀢𑀺. 𑀦 𑀔𑀺𑀧𑁆𑀧𑀁 𑀮𑀼𑀚𑁆𑀚𑀢𑀻𑀢𑀺 𑀦 𑀅𑀦𑁆𑀢𑀭𑀸 𑀦𑀲𑁆𑀲𑀢𑀺, 𑀓𑀧𑁆𑀧𑀼𑀝𑁆𑀞𑀸𑀦𑁂𑀦𑁂𑀯 𑀦𑀲𑁆𑀲𑀢𑀺. 𑀏𑀯𑀫𑁂𑀯𑀦𑁆𑀢𑀺 𑀏𑀯𑀁 𑀢𑀲𑁆𑀲𑀸𑀧𑀺 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑁄 𑀦 𑀅𑀦𑁆𑀢𑀭𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀅𑀧𑀭𑀤𑀺𑀯𑀲𑁂 𑀯𑀸 𑀦𑀺𑀩𑁆𑀩𑀸𑀢𑀺, 𑀅𑀤𑁆𑀥𑀦𑀺𑀬𑁄 𑀧𑀦 𑀳𑁄𑀢𑀺. 𑀫𑀭𑀡𑁂𑀦𑁂𑀯 𑀦𑀺𑀩𑁆𑀩𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀓𑀼𑀚𑁆𑀛𑀦𑀪𑀸𑀯𑁂𑀦 𑀘𑀺𑀭𑀝𑁆𑀞𑀺𑀢𑀺𑀓𑀢𑁄 𑀧𑀸𑀲𑀸𑀡𑀮𑁂𑀔𑀽𑀧𑀫𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁪. 𑀲𑁄 𑀘 𑀔𑁆𑀯𑀲𑁆𑀲 𑀓𑁄𑀥𑁄𑀢𑀺 𑀲𑁄 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀸𑀭𑀡𑁂 𑀲𑀳𑀲𑀸 𑀓𑀼𑀤𑁆𑀥𑀲𑁆𑀲 𑀓𑁄𑀥𑁄. 𑀦 𑀘𑀺𑀭𑀦𑁆𑀢𑀺 𑀅𑀘𑀺𑀭𑀁 𑀅𑀧𑁆𑀧𑀳𑀻𑀦𑀢𑀸𑀬 𑀦𑀸𑀦𑀼𑀲𑁂𑀢𑀺. 𑀬𑀣𑀸 𑀧𑀦 𑀧𑀣𑀯𑀺𑀬𑀁 𑀆𑀓𑀟𑁆𑀠𑀺𑀢𑁆𑀯𑀸 𑀓𑀢𑀮𑁂𑀔𑀸 𑀯𑀸𑀢𑀸𑀤𑀻𑀳𑀺 𑀔𑀺𑀧𑁆𑀧𑀁 𑀦𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀲𑀳𑀲𑀸 𑀉𑀧𑁆𑀧𑀦𑁆𑀦𑁄𑀧𑀺 𑀓𑁄𑀥𑁄 𑀔𑀺𑀧𑁆𑀧𑀫𑁂𑀯 𑀦𑀺𑀩𑁆𑀩𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀣𑀯𑀺𑀬𑀁 𑀮𑁂𑀔𑀸 𑀯𑀺𑀬 𑀓𑀼𑀚𑁆𑀛𑀦𑀪𑀸𑀯𑁂𑀦 𑀅𑀘𑀺𑀭𑀝𑁆𑀞𑀺𑀢𑀺𑀓𑀢𑁄 𑀧𑀣𑀯𑀻𑀮𑁂𑀔𑀽𑀧𑀫𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁫. 𑀆𑀕𑀸𑀴𑁆𑀳𑁂𑀦𑀸𑀢𑀺 𑀅𑀢𑀺𑀕𑀸𑀴𑁆𑀳𑁂𑀦 𑀫𑀫𑁆𑀫𑀘𑁆𑀙𑁂𑀤𑀓𑁂𑀦 𑀣𑀤𑁆𑀥𑀯𑀘𑀦𑁂𑀦. 𑀨𑀭𑀼𑀲𑁂𑀦𑀸𑀢𑀺 𑀦 𑀲𑁄𑀢𑀲𑀼𑀔𑁂𑀦. 𑀅𑀫𑀦𑀸𑀧𑁂𑀦𑀸𑀢𑀺 𑀦 𑀘𑀺𑀢𑁆𑀢𑀲𑀼𑀔𑁂𑀦. 𑀲𑀁𑀲𑀦𑁆𑀤𑀢𑀻𑀢𑀺 𑀏𑀓𑀻𑀪𑀯𑀢𑀺. 𑀲𑀦𑁆𑀥𑀺𑀬𑀢𑀻𑀢𑀺 𑀖𑀝𑀬𑀢𑀺. 𑀲𑀫𑁆𑀫𑁄𑀤𑀢𑀻𑀢𑀺 𑀦𑀺𑀭𑀦𑁆𑀢𑀭𑁄 𑀳𑁄𑀢𑀺. 𑀅𑀣 𑀯𑀸 𑁋 𑀲𑀁𑀲𑀦𑁆𑀤𑀢𑀻𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀸𑀤𑀻𑀲𑀼 𑀘𑀺𑀢𑁆𑀢𑁂𑀦 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀔𑀻𑀭𑁄𑀤𑀓𑀁 𑀯𑀺𑀬 𑀏𑀓𑀻𑀪𑀸𑀯𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀥𑀺𑀬𑀢𑀻𑀢𑀺 𑀞𑀸𑀦𑀕𑀫𑀦𑀸𑀤𑀻𑀲𑀼 𑀓𑀸𑀬𑀓𑀺𑀭𑀺𑀬𑀸𑀤𑀻𑀲𑀼 ¶ 𑀓𑀸𑀬𑁂𑀦 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀢𑀺𑀮𑀢𑀡𑁆𑀟𑀼𑀮𑀸 𑀯𑀺𑀬 𑀫𑀺𑀲𑁆𑀲𑀻𑀪𑀸𑀯𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀤𑀢𑀻𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀯𑀘𑀻𑀓𑀺𑀭𑀺𑀬𑀸𑀲𑀼 𑀯𑀸𑀘𑀸𑀬 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀯𑀺𑀧𑁆𑀧𑀯𑀸𑀲𑀕𑀢𑁄𑀧𑀺 ¶ 𑀧𑀺𑀬𑀲𑀳𑀸𑀬𑀓𑁄 𑀯𑀺𑀬 𑀧𑀺𑀬𑀢𑀭𑀪𑀸𑀯𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑁋 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀤𑀺𑀢𑁄𑀯 𑀏𑀓𑀓𑀺𑀭𑀺𑀬𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑁄 𑀲𑀁𑀲𑀦𑁆𑀤𑀢𑀺. 𑀬𑀸𑀯 𑀫𑀚𑁆𑀛𑀸 𑀧𑀯𑀢𑁆𑀢𑀦𑁆𑀢𑁄 𑀲𑀦𑁆𑀥𑀺𑀬𑀢𑀺, 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀅𑀦𑀺𑀯𑀢𑁆𑀢𑀦𑁆𑀢𑁄 𑀲𑀫𑁆𑀫𑁄𑀤𑀢𑀻𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀉𑀤𑀓𑀮𑁂𑀔𑀸 ¶ 𑀯𑀺𑀬 𑀔𑀺𑀧𑁆𑀧𑀁 𑀲𑀁𑀲𑀦𑁆𑀤𑀦𑀢𑁄 𑀉𑀤𑀓𑀮𑁂𑀔𑀽𑀧𑀫𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁬. 𑀧𑁄𑀢𑁆𑀣𑀓𑀽𑀧𑀫𑁂𑀲𑀼 𑁋 𑀬𑀸𑀬 𑀉𑀧𑀫𑀸𑀬 𑀢𑁂 𑀧𑁄𑀢𑁆𑀣𑀓𑀽𑀧𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀢𑀸𑀯 𑀉𑀧𑀫𑀁 𑀤𑀲𑁆𑀲𑁂𑀢𑀼𑀁 𑀢𑀬𑁄 𑀧𑁄𑀢𑁆𑀣𑀓𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀯𑁄𑀢𑀺 𑀦𑀯𑀯𑀸𑀬𑀺𑀫𑁄. 𑀧𑁄𑀢𑁆𑀣𑀓𑁄𑀢𑀺 𑀲𑀸𑀡𑀯𑀸𑀓𑀲𑀸𑀝𑀓𑁄. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀯𑀺𑀯𑀡𑁆𑀡𑁄. 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄𑀢𑀺 𑀔𑀭𑀲𑀫𑁆𑀨𑀲𑁆𑀲𑁄. 𑀅𑀧𑁆𑀧𑀕𑁆𑀖𑁄𑀢𑀺 𑀅𑀢𑀺𑀩𑀳𑀼𑀁 𑀅𑀕𑁆𑀖𑀦𑁆𑀢𑁄 𑀓𑀳𑀸𑀧𑀡𑀕𑁆𑀖𑀦𑀓𑁄 𑀳𑁄𑀢𑀺. 𑀫𑀚𑁆𑀛𑀺𑀫𑁄𑀢𑀺 𑀧𑀭𑀺𑀪𑁄𑀕𑀫𑀚𑁆𑀛𑀺𑀫𑁄. 𑀲𑁄 𑀳𑀺 𑀦𑀯𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀺𑀡𑁆𑀡𑀪𑀸𑀯𑀁 𑀅𑀧𑁆𑀧𑀢𑁆𑀢𑁄 𑀫𑀚𑁆𑀛𑁂 𑀧𑀭𑀺𑀪𑁄𑀕𑀓𑀸𑀮𑁂𑀧𑀺 𑀤𑀼𑀩𑁆𑀩𑀡𑁆𑀡𑁄 𑀘 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀘 𑀅𑀧𑁆𑀧𑀕𑁆𑀖𑁄𑀬𑁂𑀯 𑀘 𑀳𑁄𑀢𑀺. 𑀅𑀢𑀺𑀩𑀳𑀼𑀁 𑀅𑀕𑁆𑀖𑀦𑁆𑀢𑁄 𑀅𑀟𑁆𑀠𑀁 𑀅𑀕𑁆𑀖𑀢𑀺. 𑀚𑀺𑀡𑁆𑀡𑀓𑀸𑀮𑁂 𑀧𑀦 𑀅𑀟𑁆𑀠𑀫𑀸𑀲𑀓𑀁 𑀯𑀸 𑀓𑀸𑀓𑀡𑀺𑀓𑀁 𑀯𑀸 𑀅𑀕𑁆𑀖𑀢𑀺. 𑀉𑀓𑁆𑀔𑀮𑀺𑀧𑀭𑀺𑀫𑀚𑁆𑀚𑀦𑀦𑁆𑀢𑀺 𑀓𑀸𑀴𑀼𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀁.

𑀦𑀯𑁄𑀢𑀺 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑀓𑀸𑀮𑀢𑁄 𑀳𑁂𑀝𑁆𑀞𑀸 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑁄𑀧𑀺 𑀦𑀯𑁄𑀬𑁂𑀯. 𑀤𑀼𑀩𑁆𑀩𑀡𑁆𑀡𑀢𑀸𑀬𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦𑀧𑀺 𑀕𑀼𑀡𑀯𑀡𑁆𑀡𑁂𑀦𑀧𑀺 𑀤𑀼𑀩𑁆𑀩𑀡𑁆𑀡𑀢𑀸𑀬. 𑀤𑀼𑀲𑁆𑀲𑀻𑀮𑀲𑁆𑀲 𑀳𑀺 𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀲𑁆𑀲 𑀦𑀺𑀢𑁆𑀢𑁂𑀚𑀢𑀸𑀬 𑀲𑀭𑀻𑀭𑀯𑀡𑁆𑀡𑁄𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀕𑀼𑀡𑀯𑀡𑁆𑀡𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑁂 𑀔𑁄 𑀧𑀦𑀲𑁆𑀲𑀸𑀢𑀺 𑀬𑁂 𑀔𑁄 𑀧𑀦 𑀢𑀲𑁆𑀲 𑀉𑀧𑀝𑁆𑀞𑀸𑀓𑀸 𑀯𑀸 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄 𑀯𑀸 𑀏𑀢𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀺. 𑀢𑁂𑀲𑀁 𑀢𑀦𑁆𑀢𑀺 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀙 𑀲𑀢𑁆𑀣𑀸𑀭𑁂 𑀲𑁂𑀯𑀦𑁆𑀢𑀸𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀺𑀬, 𑀤𑁂𑀯𑀤𑀢𑁆𑀢𑀁 𑀲𑁂𑀯𑀦𑁆𑀢𑀸𑀦𑀁 𑀓𑁄𑀓𑀸𑀮𑀺𑀓𑀸𑀤𑀻𑀦𑀁 𑀯𑀺𑀬 𑀘 𑀢𑀁 𑀲𑁂𑀯𑀦𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺. 𑀫𑀚𑁆𑀛𑀺𑀫𑁄𑀢𑀺 𑀧𑀜𑁆𑀘𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀯𑀯𑀲𑁆𑀲𑀓𑀸𑀮𑀸 𑀫𑀚𑁆𑀛𑀺𑀫𑁄 𑀦𑀸𑀫. 𑀣𑁂𑀭𑁄𑀢𑀺 𑀤𑀲𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄 𑀦𑀸𑀫. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀦𑁆𑀢𑀺 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀪𑀡𑀺𑀢𑁂𑀦 𑀓𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀦𑁆𑀢𑀺 𑀢𑀣𑀸𑀚𑀸𑀢𑀺𑀓𑀁 𑀢𑀣𑀸𑀲𑀪𑀸𑀯𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀽𑀢𑀁.

𑁧𑁧𑁭. 𑀓𑀸𑀲𑀺𑀓𑀯𑀢𑁆𑀣𑀽𑀧𑀫𑁂𑀲𑀼 ¶ 𑁋 𑀓𑀸𑀲𑀺𑀓𑀯𑀢𑁆𑀣𑀁 𑀦𑀸𑀫 𑀢𑀬𑁄 𑀓𑀧𑁆𑀧𑀸𑀲𑀁𑀲𑀽 𑀕𑀳𑁂𑀢𑁆𑀯𑀸 𑀓𑀦𑁆𑀢𑀺𑀢𑀲𑀼𑀢𑁆𑀢𑁂𑀦 𑀯𑀸𑀬𑀺𑀢𑀁 𑀲𑀼𑀔𑀼𑀫𑀯𑀢𑁆𑀣𑀁. 𑀢𑀁 𑀦𑀯𑀯𑀸𑀬𑀺𑀫𑀁 𑀅𑀦𑀕𑁆𑀖𑀁 𑀳𑁄𑀢𑀺. 𑀧𑀭𑀺𑀪𑁄𑀕𑀫𑀚𑁆𑀛𑀺𑀫𑀁 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺. 𑀚𑀺𑀡𑁆𑀡𑀓𑀸𑀮𑁂 𑀧𑀦 𑀅𑀝𑁆𑀞𑀧𑀺 𑀤𑀲𑀧𑀺 𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺.

𑀢𑁂𑀲𑀁 ¶ 𑀢𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀬𑁄 𑀲𑁂𑀯𑀦𑁆𑀢𑀸𑀦𑀁 𑀯𑀺𑀬 𑀢𑀁 𑀲𑁂𑀯𑀦𑀁 𑀤𑀻𑀖𑀭𑀢𑁆𑀢𑀁 ¶ 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀳𑀺 𑀏𑀓𑀁 𑀦𑀺𑀲𑁆𑀲𑀸𑀬 𑀬𑀸𑀯𑀚𑁆𑀚𑀓𑀸𑀮𑀸 𑀫𑀼𑀘𑁆𑀘𑀦𑀓𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂 𑀅𑀯𑀲𑁂𑀲𑁂 𑀘 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀦𑀺𑀲𑁆𑀲𑀸𑀬 𑀲𑀕𑁆𑀕𑀁 𑀕𑀢𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀬𑀸𑀯𑀚𑁆𑀚𑀓𑀸𑀮𑀸 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀧𑀝𑀺𑀧𑀦𑁆𑀦𑀲𑀢𑁆𑀢𑀸𑀦𑀫𑁆𑀧𑀺 𑀧𑀫𑀸𑀡𑀁 𑀦𑀢𑁆𑀣𑀺𑀬𑁂𑀯. 𑀆𑀥𑁂𑀬𑁆𑀬𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀢𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀬𑀣𑀸 𑀕𑀦𑁆𑀥𑀓𑀭𑀡𑁆𑀟𑀓𑁂 𑀓𑀸𑀲𑀺𑀓𑀯𑀢𑁆𑀣𑀁 𑀆𑀥𑀸𑀢𑀩𑁆𑀩𑀢𑀁 𑀞𑀧𑁂𑀢𑀩𑁆𑀩𑀢𑀁 𑀕𑀘𑁆𑀙𑀢𑀺, 𑀏𑀯𑀁 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀳𑀤𑀬𑁂 𑀘 𑀆𑀥𑀸𑀢𑀩𑁆𑀩𑀢𑀁 𑀞𑀧𑁂𑀢𑀩𑁆𑀩𑀢𑀫𑁆𑀧𑀺 𑀕𑀘𑁆𑀙𑀢𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁮. 𑀲𑀼𑀧𑁆𑀧𑀫𑁂𑀬𑁆𑀬𑀸𑀤𑀻𑀲𑀼 𑁋 𑀲𑀼𑀔𑁂𑀦 𑀧𑀫𑁂𑀢𑀩𑁆𑀩𑁄𑀢𑀺 𑀲𑀼𑀧𑁆𑀧𑀫𑁂𑀬𑁆𑀬𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀉𑀤𑁆𑀥𑀢𑁄𑀢𑀺 𑀉𑀤𑁆𑀥𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀦𑁆𑀦𑀴𑁄𑀢𑀺 𑀉𑀕𑁆𑀕𑀢𑀦𑀴𑁄; 𑀢𑀼𑀘𑁆𑀙𑀫𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀘𑀧𑀮𑁄𑀢𑀺 𑀧𑀢𑁆𑀢𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀼𑀔𑀭𑁄𑀢𑀺 𑀫𑀼𑀔𑀔𑀭𑁄. 𑀯𑀺𑀓𑀺𑀡𑁆𑀡𑀯𑀸𑀘𑁄𑀢𑀺 𑀅𑀲𑀁𑀬𑀢𑀯𑀘𑀦𑁄. 𑀅𑀲𑀫𑀸𑀳𑀺𑀢𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀭𑀳𑀺𑀢𑁄. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀪𑀦𑁆𑀢𑀘𑀺𑀢𑁆𑀢𑁄, 𑀪𑀦𑁆𑀢𑀕𑀸𑀯𑀻𑀪𑀦𑁆𑀢𑀫𑀺𑀕𑀻𑀲𑀧𑁆𑀧𑀝𑀺𑀪𑀸𑀕𑁄. 𑀧𑀸𑀓𑀝𑀺𑀦𑁆𑀤𑁆𑀭𑀺𑀬𑁄𑀢𑀺 𑀯𑀺𑀯𑀝𑀺𑀦𑁆𑀤𑁆𑀭𑀺𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 ‘𑀲𑀼𑀧𑁆𑀧𑀫𑁂𑀬𑁆𑀬𑁄’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀧𑀭𑀺𑀢𑁆𑀢𑀲𑁆𑀲 𑀉𑀤𑀓𑀲𑁆𑀲 𑀲𑀼𑀔𑁂𑀦 𑀧𑀫𑀸𑀡𑀁 𑀕𑀬𑁆𑀳𑀢𑀺; 𑀏𑀯𑀫𑁂𑀯 𑀇𑀫𑁂𑀳𑀺 𑀅𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀼𑀔𑁂𑀦 𑀧𑀫𑀸𑀡𑀁 𑀕𑀬𑁆𑀳𑀢𑀺. 𑀢𑁂𑀦𑁂𑀲 ‘𑀲𑀼𑀧𑁆𑀧𑀫𑁂𑀬𑁆𑀬𑁄’𑀢𑀺 𑀯𑀼𑀢𑁆𑀢𑁄.

𑁧𑁧𑁯. 𑀤𑀼𑀓𑁆𑀔𑁂𑀦 𑀧𑀫𑁂𑀢𑀩𑁆𑀩𑁄𑀢𑀺 𑀤𑀼𑀧𑁆𑀧𑀫𑁂𑀬𑁆𑀬𑁄. 𑀅𑀦𑀼𑀤𑁆𑀥𑀢𑀸𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 ‘𑀤𑀼𑀧𑁆𑀧𑀫𑁂𑀬𑁆𑀬𑁄’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀤𑀼𑀓𑁆𑀔𑁂𑀦 𑀧𑀫𑀸𑀡𑀁 𑀕𑀬𑁆𑀳𑀢𑀺; 𑀏𑀯𑀫𑁂𑀯 𑀇𑀫𑁂𑀳𑀺 𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀤𑀼𑀓𑁆𑀔𑁂𑀦 𑀧𑀫𑀸𑀡𑀁 𑀕𑀬𑁆𑀳𑀢𑀺. 𑀢𑀸𑀤𑀺𑀲𑁄 ‘𑀅𑀦𑀸𑀕𑀸𑀫𑀻 𑀦𑀼 𑀔𑁄, 𑀔𑀻𑀡𑀸𑀲𑀯𑁄 𑀦𑀼 𑀔𑁄’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀕𑀘𑁆𑀙𑀢𑀺, 𑀢𑁂𑀦𑁂𑀲 ‘𑀤𑀼𑀧𑁆𑀧𑀫𑁂𑀬𑁆𑀬𑁄’𑀢𑀺 𑀯𑀼𑀢𑁆𑀢𑁄.

𑁧𑁨𑁦. 𑀦 ¶ 𑀲𑀓𑁆𑀓𑀸 𑀧𑀫𑁂𑀢𑀼𑀦𑁆𑀢𑀺 𑀅𑀧𑁆𑀧𑀫𑁂𑀬𑁆𑀬𑁄. 𑀬𑀣𑀸 𑀳𑀺 𑀆𑀓𑀸𑀲𑀲𑁆𑀲 𑀦 𑀲𑀓𑁆𑀓𑀸 𑀧𑀫𑀸𑀡𑀁 𑀕𑀳𑁂𑀢𑀼𑀁, 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲. 𑀢𑁂𑀦𑁂𑀲 ‘𑀅𑀧𑁆𑀧𑀫𑁂𑀬𑁆𑀬𑁄’𑀢𑀺 𑀯𑀼𑀢𑁆𑀢𑁄.

𑁧𑁨𑁧. 𑀦 𑀲𑁂𑀯𑀺𑀢𑀩𑁆𑀩𑀸𑀤𑀻𑀲𑀼 𑁋 𑀦 𑀲𑁂𑀯𑀺𑀢𑀩𑁆𑀩𑁄𑀢𑀺 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄. 𑀦 𑀪𑀚𑀺𑀢𑀩𑁆𑀩𑁄𑀢𑀺 𑀦 𑀅𑀮𑁆𑀮𑀻𑀬𑀺𑀢𑀩𑁆𑀩𑁄. 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄𑀢𑀺 𑀦 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑀸𑀲𑀺𑀢𑀩𑁆𑀩𑁄. 𑀳𑀻𑀦𑁄 ¶ 𑀳𑁄𑀢𑀺 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀢𑀸 𑀯𑁂𑀤𑀺𑀢𑀩𑁆𑀩𑀸 ¶ . 𑀬𑁄 𑀳𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀲𑁄 𑀤𑀲 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑁄 𑀧𑀦 𑀤𑀲 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀲𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀭 𑀅𑀦𑀼𑀤𑁆𑀤𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀓𑀫𑁆𑀧𑀸𑀢𑀺 𑀞𑀧𑁂𑀢𑁆𑀯𑀸 𑀅𑀦𑀼𑀤𑁆𑀤𑀬𑀜𑁆𑀘 𑀅𑀦𑀼𑀓𑀫𑁆𑀧𑀜𑁆𑀘. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀯 𑀳𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀅𑀦𑀼𑀤𑁆𑀤𑀬𑀸𑀦𑀼𑀓𑀫𑁆𑀧𑀸𑀯𑀲𑁂𑀦 𑀧𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑁧𑁨𑁨. 𑀲𑀤𑀺𑀲𑁄 𑀳𑁄𑀢𑀻𑀢𑀺 𑀲𑀫𑀸𑀦𑁄 𑀳𑁄𑀢𑀺. 𑀲𑀻𑀮𑀲𑀸𑀫𑀜𑁆𑀜𑀕𑀢𑀸𑀦𑀁 𑀲𑀢𑀦𑁆𑀢𑀺 𑀲𑀻𑀮𑁂𑀦 𑀲𑀫𑀸𑀦𑀪𑀸𑀯𑀁 𑀕𑀢𑀸𑀦𑀁 𑀲𑀦𑁆𑀢𑀸𑀦𑀁. 𑀲𑀻𑀮𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀫𑀸𑀦𑀲𑀻𑀮𑀸𑀦𑀁 𑀅𑀫𑁆𑀳𑀸𑀓𑀁 𑀲𑀻𑀮𑀫𑁂𑀯 𑀆𑀭𑀩𑁆𑀪 𑀓𑀣𑀸 𑀪𑀯𑀺𑀲𑁆𑀲𑀢𑀺. 𑀲𑀸 𑀘 𑀦𑁄 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀲𑀸 𑀘 𑀲𑀻𑀮𑀓𑀣𑀸 𑀅𑀫𑁆𑀳𑀸𑀓𑀁 𑀨𑀸𑀲𑀼𑀯𑀺𑀳𑀸𑀭𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀺. 𑀲𑀸 𑀘 𑀦𑁄 𑀧𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀢𑀻𑀢𑀺 𑀲𑀸 𑀘 𑀅𑀫𑁆𑀳𑀸𑀓𑀁 𑀓𑀣𑀸 𑀤𑀺𑀯𑀲𑀫𑁆𑀧𑀺 𑀓𑀣𑁂𑀦𑁆𑀢𑀸𑀦𑀁 𑀧𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀦 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺. 𑀤𑁆𑀯𑀻𑀲𑀼 𑀳𑀺 𑀲𑀻𑀮𑀯𑀦𑁆𑀢𑁂𑀲𑀼 𑀏𑀓𑁂𑀦 𑀲𑀻𑀮𑀲𑁆𑀲 𑀯𑀡𑁆𑀡𑁂 𑀓𑀣𑀺𑀢𑁂 𑀇𑀢𑀭𑁄 𑀅𑀦𑀼𑀫𑁄𑀤𑀢𑀺; 𑀢𑁂𑀦 𑀢𑁂𑀲𑀁 𑀓𑀣𑀸 𑀨𑀸𑀲𑀼 𑀘𑁂𑀯 𑀳𑁄𑀢𑀺, 𑀧𑀯𑀢𑁆𑀢𑀺𑀦𑀻 𑀘. 𑀏𑀓𑀲𑁆𑀫𑀺𑀁 𑀧𑀦 𑀤𑀼𑀲𑁆𑀲𑀻𑀮𑁂 𑀲𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀓𑀣𑀸 𑀤𑀼𑀓𑁆𑀓𑀣𑀸𑀢𑀺 𑀦𑁂𑀯 𑀲𑀻𑀮𑀓𑀣𑀸 𑀳𑁄𑀢𑀺, 𑀦 𑀨𑀸𑀲𑀼 𑀳𑁄𑀢𑀺, 𑀦 𑀧𑀯𑀢𑁆𑀢𑀺𑀦𑀻. 𑀲𑀫𑀸𑀥𑀺𑀧𑀜𑁆𑀜𑀸𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑁂 𑀳𑀺 𑀲𑀫𑀸𑀥𑀺𑀮𑀸𑀪𑀺𑀦𑁄 𑀲𑀫𑀸𑀥𑀺𑀓𑀣𑀁, 𑀲𑀧𑁆𑀧𑀜𑁆𑀜𑀸 𑀘 𑀧𑀜𑁆𑀜𑀸𑀓𑀣𑀁 𑀓𑀣𑁂𑀦𑁆𑀢𑀸, 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀲𑀁 𑀯𑀸 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺.

𑁧𑁨𑁩. 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀲𑀓𑁆𑀓𑀸𑀭𑀜𑁆𑀘𑁂𑀯 𑀕𑀭𑀼𑀓𑀸𑀭𑀜𑁆𑀘 𑀓𑀭𑀺𑀢𑁆𑀯𑀸. 𑀅𑀥𑀺𑀓𑁄 𑀳𑁄𑀢𑀻𑀢𑀺 𑀅𑀢𑀺𑀭𑁂𑀓𑁄 𑀳𑁄𑀢𑀺. 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀲𑀻𑀮𑀭𑀸𑀲𑀺𑀁. 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀻𑀢𑀺 𑀢𑀁 𑀅𑀢𑀺𑀭𑁂𑀓𑀲𑀻𑀮𑀁 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀅𑀧𑀭𑀺𑀧𑀽𑀭𑀁 𑀲𑀻𑀮𑀭𑀸𑀲𑀺𑀁 𑀧𑀭𑀺𑀧𑀽𑀭𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀲𑀻𑀮𑀲𑁆𑀲 ¶ 𑀅𑀲𑀧𑁆𑀧𑀸𑀬𑁂 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀥𑀫𑁆𑀫𑁂 𑀲𑁂𑀯𑀦𑁆𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁨𑁪. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸𑀤𑀻𑀲𑀼 𑁋 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀕𑀽𑀣𑀁 𑀯𑀺𑀬 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄. 𑀅𑀣 𑀔𑁄 𑀦𑀦𑁆𑀢𑀺 𑀅𑀣 𑀔𑁄 𑀅𑀲𑁆𑀲. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀣𑀸𑀲𑀤𑁆𑀤𑁄. 𑀏𑀯𑀫𑁂𑀯𑀦𑁆𑀢𑀺 𑀏𑀢𑁆𑀣 𑀕𑀽𑀣𑀓𑀽𑀧𑁄 𑀯𑀺𑀬 𑀤𑀼𑀲𑁆𑀲𑀻𑀮𑁆𑀬𑀁 𑀤𑀝𑁆𑀞𑀩𑁆𑀩𑀁. 𑀕𑀽𑀣𑀓𑀽𑀧𑁂 𑀧𑀢𑀺𑀢𑁆𑀯𑀸 𑀞𑀺𑀢𑁄 𑀥𑀫𑀦𑀻𑀅𑀳𑀺 𑀯𑀺𑀬 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁄. 𑀕𑀼𑀣𑀓𑀽𑀧𑀢𑁄 𑀉𑀤𑁆𑀥𑀭𑀺𑀬𑀫𑀸𑀦𑁂𑀦 𑀢𑁂𑀦 𑀅𑀳𑀺𑀦𑀸 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀁 𑀆𑀭𑀼𑀴𑁆𑀳𑁂𑀦𑀸𑀧𑀺 𑀅𑀤𑀝𑁆𑀞𑀪𑀸𑀯𑁄 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀲𑁂𑀯𑀫𑀸𑀦𑀲𑁆𑀲𑀸𑀧𑀺 ¶ 𑀢𑀲𑁆𑀲 𑀓𑀺𑀭𑀺𑀬𑀸𑀬 ¶ 𑀓𑀸𑀭𑀡𑀪𑀸𑀯𑁄 𑀲𑀭𑀻𑀭𑀁 𑀕𑀽𑀣𑁂𑀦 𑀫𑀓𑁆𑀔𑁂𑀢𑁆𑀯𑀸 𑀅𑀳𑀺𑀦𑁄 𑀕𑀢𑀓𑀸𑀮𑁄 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀲𑁂𑀯𑀫𑀸𑀦𑀲𑁆𑀲 𑀧𑀸𑀧𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀅𑀩𑁆𑀪𑀼𑀕𑁆𑀕𑀫𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁫. 𑀢𑀺𑀦𑁆𑀤𑀼𑀓𑀸𑀮𑀸𑀢𑀦𑁆𑀢𑀺 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀅𑀮𑀸𑀢𑀁. 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀘𑀺𑀘𑁆𑀘𑀺𑀝𑀸𑀬𑀢𑀻𑀢𑀺 𑀢𑀜𑁆𑀳𑀺 𑀛𑀸𑀬𑀫𑀸𑀦𑀁 𑀧𑀓𑀢𑀺𑀬𑀸𑀧𑀺 𑀧𑀧𑀝𑀺𑀓𑀸𑀬𑁄 𑀫𑀼𑀜𑁆𑀘𑀦𑁆𑀢𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺. 𑀖𑀝𑁆𑀝𑀺𑀢𑀁 𑀧𑀦 𑀅𑀥𑀺𑀫𑀢𑁆𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯𑀦𑁆𑀢𑀺 𑀏𑀯𑀫𑁂𑀯𑀁 𑀓𑁄𑀥𑀦𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀉𑀤𑁆𑀥𑀢𑁄 𑀘𑀡𑁆𑀟𑀺𑀓𑀢𑁄 𑀳𑀼𑀢𑁆𑀯𑀸 𑀘𑀭𑀢𑀺. 𑀅𑀧𑁆𑀧𑀫𑀢𑁆𑀢𑀓𑀁 𑀧𑀦 𑀯𑀘𑀦𑀁 𑀯𑀼𑀢𑁆𑀢𑀓𑀸𑀮𑁂 ‘𑀫𑀸𑀤𑀺𑀲𑀁 𑀦𑀸𑀫 𑀏𑀯𑀁 𑀯𑀤𑀢𑀻’𑀢𑀺 𑀅𑀢𑀺𑀭𑁂𑀓𑀢𑀭𑀁 𑀉𑀤𑁆𑀥𑀢𑁄 𑀘𑀡𑁆𑀟𑀺𑀓𑀢𑁄 𑀳𑀼𑀢𑁆𑀯𑀸 𑀘𑀭𑀢𑀺. 𑀕𑀽𑀣𑀓𑀽𑀧𑁄𑀢𑀺 𑀕𑀽𑀣𑀧𑀼𑀡𑁆𑀡𑀓𑀽𑀧𑁄, 𑀕𑀽𑀣𑀭𑀸𑀲𑀺𑀬𑁂𑀯 𑀯𑀸. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄𑀢𑀺 𑀬𑀲𑁆𑀫𑀸 𑀓𑁄𑀥𑀦𑁄 𑀅𑀢𑀺𑀲𑁂𑀯𑀺𑀬𑀫𑀸𑀦𑁄𑀧𑀺 𑀅𑀢𑀺𑀉𑀧𑀲𑀗𑁆𑀓𑀫𑀺𑀬𑀫𑀸𑀦𑁄𑀧𑀺 𑀓𑀼𑀚𑁆𑀛𑀢𑀺𑀬𑁂𑀯, ‘𑀓𑀺𑀁 𑀇𑀫𑀺𑀦𑀸’𑀢𑀺 𑀧𑀝𑀺𑀓𑁆𑀓𑀫𑀦𑁆𑀢𑁄𑀧𑀺 𑀓𑀼𑀚𑁆𑀛𑀢𑀺𑀬𑁂𑀯, 𑀢𑀲𑁆𑀫𑀸 𑀧𑀮𑀸𑀮𑀕𑁆𑀕𑀺 𑀯𑀺𑀬 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀳𑀺 𑀧𑀮𑀸𑀮𑀕𑁆𑀕𑀺𑀁 𑀅𑀢𑀺𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀧𑁆𑀧𑀢𑀺, 𑀢𑀲𑁆𑀲 𑀲𑀭𑀻𑀭𑀁 𑀛𑀸𑀬𑀢𑀺. 𑀬𑁄 𑀅𑀢𑀺𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀢𑀧𑁆𑀧𑀢𑀺, 𑀢𑀲𑁆𑀲 𑀲𑀻𑀢𑀁 𑀦 𑀯𑀽𑀧𑀲𑀫𑁆𑀫𑀢𑀺. 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀧𑀦 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀢𑀧𑁆𑀧𑁂𑀦𑁆𑀢𑀲𑁆𑀲 𑀲𑀻𑀢𑀁 𑀯𑀽𑀧𑀲𑀫𑁆𑀫𑀢𑀺, 𑀓𑀸𑀬𑁄𑀧𑀺 𑀦 𑀟𑀬𑁆𑀳𑀢𑀺. 𑀢𑀲𑁆𑀫𑀸 𑀧𑀮𑀸𑀮𑀕𑁆𑀕𑀺 𑀯𑀺𑀬 𑀓𑁄𑀥𑀦𑁄 𑀧𑀼𑀕𑁆𑀕𑀮𑁄 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄, 𑀦 𑀪𑀚𑀺𑀢𑀩𑁆𑀩𑁄, 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄.

𑁧𑁨𑁬. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀲𑀼𑀘𑀺𑀫𑀺𑀢𑁆𑀢𑁄. 𑀓𑀮𑁆𑀬𑀸𑀡𑀲𑀳𑀸𑀬𑁄𑀢𑀺 𑀲𑀼𑀘𑀺𑀲𑀳𑀸𑀬𑁄. 𑀲𑀳𑀸𑀬𑁄𑀢𑀺 𑀲𑀳𑀕𑀸𑀫𑀻 𑀲𑀤𑁆𑀥𑀺𑀁𑀘𑀭𑁄. 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄𑀢𑀺 𑀓𑀮𑁆𑀬𑀸𑀡𑁂𑀲𑀼 ¶ 𑀲𑀼𑀘𑀺𑀧𑀼𑀕𑁆𑀕𑀮𑁂𑀲𑀼 𑀲𑀫𑁆𑀧𑀯𑀗𑁆𑀓𑁄, 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀫𑀸𑀦𑀲𑁄𑀢𑀺 𑀅𑀢𑁆𑀣𑁄.

𑁧𑁨𑁭. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻𑀢𑀺𑀆𑀤𑀻𑀲𑀼 𑁋 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺 𑀏𑀢𑁂 𑀅𑀭𑀺𑀬𑀲𑀸𑀯𑀓𑀸 𑀬𑀸𑀦𑀺 𑀢𑀸𑀦𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀦𑀺, 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀺, 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀲𑀻𑀮𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀁 𑀅𑀯𑀻𑀢𑀺𑀓𑁆𑀓𑀫𑀦𑀢𑁄 𑀬𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀳𑀺 𑀘 𑀯𑀼𑀝𑁆𑀞𑀸𑀦𑀢𑁄 𑀲𑀻𑀮𑁂𑀲𑀼 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀺𑀧𑀽𑀭𑀁 𑀲𑀫𑀢𑁆𑀢𑀁 𑀓𑀭𑁄𑀦𑁆𑀢𑀻𑀢𑀺 ‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀓𑀸𑀦𑀁 𑀧𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁, 𑀧𑀜𑁆𑀜𑀸𑀧𑀸𑀭𑀺𑀩𑀦𑁆𑀥𑀓𑀲𑁆𑀲 𑀘 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀲𑁆𑀲 ¶ 𑀅𑀲𑀫𑀽𑀳𑀢𑀢𑁆𑀢𑀸, 𑀲𑀫𑀸𑀥𑀺𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀦𑁆𑀢𑀸𑀧𑀺 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀬𑀁 ¶ 𑀓𑀢𑁆𑀢𑀩𑁆𑀩𑀁 𑀢𑀁 𑀫𑀢𑁆𑀢𑀲𑁄 𑀧𑀫𑀸𑀡𑁂𑀦 𑀧𑀤𑁂𑀲𑀫𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀜𑁆𑀜𑀸𑀬 𑀘 𑀫𑀢𑁆𑀢𑀲𑁄 𑀓𑀸𑀭𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀦𑀬𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀅𑀧𑀭𑁄𑀧𑀺 𑀲𑀼𑀢𑁆𑀢𑀦𑁆𑀢𑀦𑀬𑁄 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑀸𑀦𑀺 𑀆𑀧𑀚𑁆𑀚𑀢𑀺𑀧𑀺, 𑀯𑀼𑀝𑁆𑀞𑀸𑀢𑀺𑀧𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑀺 𑀫𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀅𑀪𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀬𑀸𑀦𑀺 𑀘 𑀔𑁄 𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑀸𑀭𑀼𑀧𑁆𑀧𑀸𑀦𑀺, 𑀢𑀢𑁆𑀣 𑀥𑀼𑀯𑀲𑀻𑀮𑁄 𑀘 𑀳𑁄𑀢𑀺, 𑀞𑀺𑀢𑀲𑀻𑀮𑁄 𑀘, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺, 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼…𑀧𑁂… 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸, 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸, 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺; 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺…𑀧𑁂… 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁…𑀧𑁂… 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂 ¶ , 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺…𑀧𑁂… 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁩.𑁮𑁭).

𑁧𑁩𑁦. 𑀲𑀢𑁆𑀣𑀸𑀭𑀦𑀺𑀤𑁆𑀤𑁂𑀲𑁂 𑁋 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀢𑀻𑀢𑀺 𑀧𑀳𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼. 𑀢𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀢𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑁄 𑀲𑀢𑁆𑀣𑀸 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀢𑁆𑀣𑀸 𑀢𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀢𑁂𑀦 𑀢𑀺𑀢𑁆𑀣𑀺𑀬𑁂𑀳𑀺 𑀅𑀲𑀸𑀥𑀸𑀭𑀡𑁂𑀦 𑀧𑀜𑁆𑀜𑀸𑀧𑀦𑁂𑀦 𑀅𑀬𑀁 𑀢𑀢𑀺𑀬𑁄 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀢𑁆𑀣𑀺𑀬𑀸 𑀳𑀺 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀸 𑀭𑀽𑀧𑀪𑀯𑀁 𑀯𑀓𑁆𑀔𑀦𑁆𑀢𑀺. 𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀸 ¶ 𑀅𑀭𑀽𑀧𑀪𑀯𑀁 𑀯𑀓𑁆𑀔𑀦𑁆𑀢𑀺. 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀸 𑀅𑀲𑀜𑁆𑀜𑀪𑀯𑀁 𑀯𑀓𑁆𑀔𑀦𑁆𑀢𑀺. 𑀲𑀫𑁆𑀫𑀸 𑀧𑀜𑁆𑀜𑀧𑁂𑀦𑁆𑀢𑀸 ‘𑀏𑀯𑀁 𑀧𑀜𑁆𑀜𑀧𑁂𑀬𑁆𑀬𑀼𑀁’, 𑀦𑁄 𑀘 𑀲𑀫𑁆𑀫𑀸 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀜𑁆𑀜𑀧𑁂𑀢𑀺 ¶ . 𑀭𑀽𑀧𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀁 𑀧𑀳𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀜𑁆𑀜𑀧𑁂𑀢𑀺. 𑀇𑀫𑁂 𑀢𑀬𑁄 𑀲𑀢𑁆𑀣𑀸𑀭𑁄𑀢𑀺 𑀇𑀫𑁂 𑀤𑁆𑀯𑁂 𑀚𑀦𑀸 𑀩𑀸𑀳𑀺𑀭𑀓𑀸, 𑀏𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀬𑁄 𑀲𑀢𑁆𑀣𑀸𑀭𑁄 𑀦𑀸𑀫.

𑁧𑁩𑁧. 𑀤𑀼𑀢𑀺𑀬𑁂 𑀲𑀢𑁆𑀣𑀸𑀭𑀦𑀺𑀤𑁆𑀤𑁂𑀲𑁂 𑁋 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂. 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀧𑁂𑀢𑀻𑀢𑀺 ‘‘𑀅𑀢𑁆𑀢𑀸 𑀦𑀸𑀫𑁂𑀓𑁄 𑀅𑀢𑁆𑀣𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺 𑀪𑀽𑀢𑀢𑁄 𑀣𑀺𑀭𑀢𑁄 𑀧𑀜𑁆𑀜𑀧𑁂𑀢𑀺. 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺 𑀅𑀧𑀭𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀏𑀯𑀫𑁂𑀯 𑀧𑀜𑁆𑀜𑀧𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁨. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑁂 𑁋 𑀅𑀲𑀧𑁆𑀧𑀼𑀭𑀺𑀲𑁄𑀢𑀺 𑀮𑀸𑀫𑀓𑀧𑀼𑀭𑀺𑀲𑁄. 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀻. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀻. 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀢𑀻𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻. 𑀫𑀼𑀲𑀸 𑀯𑀤𑀢𑀻𑀢𑀺 𑀫𑀼𑀲𑀸𑀯𑀸𑀤𑀻. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑁂 𑀢𑀺𑀝𑁆𑀞𑀢𑀻𑀢𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻.

𑁧𑁩𑁩. 𑀧𑀸𑀡𑀸𑀢𑀺𑀧𑀸𑀢𑁂 ¶ 𑀲𑀫𑀸𑀤𑀧𑁂𑀢𑀻𑀢𑀺 𑀬𑀣𑀸 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀺, 𑀢𑀣𑀸 𑀦𑀁 𑀢𑀢𑁆𑀣 𑀕𑀳𑀡𑀁 𑀕𑀡𑁆𑀳𑀸𑀧𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀲𑀬𑀁 𑀓𑀢𑁂𑀦 𑀘 𑀤𑀼𑀲𑁆𑀲𑀻𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀜𑁆𑀘 𑀲𑀫𑀸𑀤𑀧𑀺𑀢𑁂𑀦 𑀓𑀢𑀁, 𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑁄, 𑀢𑀲𑁆𑀫𑀸 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀧𑁆𑀧𑀼𑀭𑀺𑀲𑁄𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑁄.

𑁧𑁩𑁫. 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄𑀢𑀺 𑀅𑀢𑁆𑀢𑀦𑀸 𑀓𑀢𑁂𑀦 𑀲𑀼𑀲𑀻𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀬𑀜𑁆𑀘 𑀲𑀫𑀸𑀤𑀧𑀺𑀢𑁄 𑀓𑀭𑁄𑀢𑀺. 𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑀢𑁆𑀢𑀸 𑀉𑀢𑁆𑀢𑀫𑀧𑀼𑀭𑀺𑀲𑁂𑀦 𑀉𑀢𑁆𑀢𑀫𑀧𑀼𑀭𑀺𑀲𑀢𑀭𑁄.

𑁧𑁩𑁬. 𑀧𑀸𑀧𑁄𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁂𑀦 𑀤𑀲𑀯𑀺𑀥𑁂𑀦 𑀧𑀸𑀧𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁧𑁩𑁮. 𑀓𑀮𑁆𑀬𑀸𑀡𑁄𑀢𑀺 ¶ 𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁂𑀦 𑀤𑀲𑀯𑀺𑀥𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀤𑁆𑀥𑀓𑁄 ¶ 𑀪𑀤𑁆𑀭𑀓𑁄. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁪𑁦. 𑀧𑀸𑀧𑀥𑀫𑁆𑀫𑀸𑀤𑀻𑀲𑀼 𑁋 𑀧𑀸𑀧𑁄 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀧𑀸𑀧𑀥𑀫𑁆𑀫𑁄. 𑀓𑀮𑁆𑀬𑀸𑀡𑁄 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁪𑁪. 𑀲𑀸𑀯𑀚𑁆𑀚𑀸𑀤𑀻𑀲𑀼 𑁋 𑀲𑀸𑀯𑀚𑁆𑀚𑁄𑀢𑀺 𑀲𑀤𑁄𑀲𑁄. 𑀲𑀸𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀲𑀤𑁄𑀲𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸 𑀓𑀸𑀬𑀓𑀫𑁆𑀫𑁂𑀦. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑀲𑁆𑀲 𑀲𑀤𑁄𑀲𑀢𑁆𑀢𑀸, 𑀕𑀽𑀣𑀓𑀼𑀡𑀧𑀸𑀤𑀺𑀪𑀭𑀺𑀢𑁄 𑀧𑀤𑁂𑀲𑁄 𑀯𑀺𑀬 𑀲𑀸𑀯𑀚𑁆𑀚𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁪𑁫. 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀦𑁆𑀢𑀺 𑀬𑀲𑁆𑀲 𑀲𑀸𑀯𑀚𑁆𑀚𑀫𑁂𑀯 𑀓𑀸𑀬𑀓𑀫𑁆𑀫𑀁 𑀩𑀳𑀼 𑀳𑁄𑀢𑀺, 𑀅𑀧𑁆𑀧𑀁 𑀅𑀦𑀯𑀚𑁆𑀚𑀁; 𑀲𑁄 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀧𑁆𑀧𑀁 𑀅𑀦𑀯𑀚𑁆𑀚𑁂𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁄 𑀧𑀦 𑀏𑀯𑀭𑀽𑀧𑁄 𑀳𑁄𑀢𑀻𑀢𑀺? 𑀬𑁄 𑀕𑀸𑀫𑀥𑀫𑁆𑀫𑀢𑀸𑀬 𑀯𑀸 𑀦𑀺𑀕𑀫𑀥𑀫𑁆𑀫𑀢𑀸𑀬 𑀯𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀢𑀺, 𑀲𑀻𑀮𑀸𑀦𑀺 𑀧𑀽𑀭𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 ¶ 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑁂𑀲𑀼 𑀲𑀸𑀯𑀚𑁆𑀚𑀲𑁆𑀲𑁂𑀯 𑀩𑀳𑀼𑀮𑀢𑀸𑀬 𑀅𑀦𑀯𑀚𑁆𑀚𑀲𑁆𑀲 𑀅𑀧𑁆𑀧𑀢𑀸𑀬 𑀯𑀚𑁆𑀚𑀩𑀳𑀼𑀮𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀤𑀼𑀩𑁆𑀩𑀡𑁆𑀡𑀸𑀦𑀺 𑀤𑀼𑀕𑁆𑀕𑀦𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀭𑀸𑀲𑀺𑀓𑀢𑀸𑀦𑀲𑁆𑀲𑀼, 𑀢𑁂𑀲𑀁 𑀉𑀧𑀭𑀺 𑀢𑀳𑀁 𑀢𑀳𑀁 𑀅𑀢𑀺𑀫𑀼𑀢𑁆𑀢𑀓𑀯𑀲𑁆𑀲𑀺𑀓𑀧𑀸𑀝𑀮𑀸𑀦𑀺 𑀧𑀢𑀺𑀢𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀏𑀯𑀭𑀽𑀧𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀢𑀺𑀫𑀼𑀢𑁆𑀢𑀓𑀯𑀲𑁆𑀲𑀺𑀓𑀧𑀸𑀝𑀮𑀸𑀦𑀺 𑀭𑀸𑀲𑀺𑀓𑀢𑀸𑀦𑀲𑁆𑀲𑀼, 𑀢𑁂𑀲𑀁 𑀉𑀧𑀭𑀺 𑀢𑀳𑀁 𑀢𑀳𑀁 𑀤𑀼𑀩𑁆𑀩𑀡𑁆𑀡𑀤𑀼𑀕𑁆𑀕𑀦𑁆𑀥𑀸𑀦𑀺 𑀩𑀤𑀭𑀧𑀼𑀧𑁆𑀨𑀸𑀤𑀻𑀦𑀺 𑀧𑀢𑀺𑀢𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀏𑀯𑀭𑀽𑀧𑁄 𑀢𑀢𑀺𑀬𑁄 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑁄 𑀧𑀦 𑀢𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑀲𑁆𑀲 𑀦𑀺𑀤𑁆𑀤𑁄𑀲𑀢𑁆𑀢𑀸, 𑀘𑀢𑀼𑀫𑀥𑀼𑀭𑀪𑀭𑀺𑀢𑀲𑀼𑀯𑀡𑁆𑀡𑀧𑀸𑀢𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀢𑁂𑀲𑀼 𑀧𑀞𑀫𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑁄. 𑀤𑀼𑀢𑀺𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀓𑀼𑀲𑀮𑀲𑁆𑀲 𑀓𑀸𑀭𑀓𑁄 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑁄. 𑀢𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀘𑀢𑀼𑀢𑁆𑀣𑁄 𑀔𑀻𑀡𑀸𑀲𑀯𑁄. 𑀲𑁄 𑀳𑀺 𑀏𑀓𑀦𑁆𑀢𑁂𑀦 𑀅𑀦𑀯𑀚𑁆𑀚𑁄𑀬𑁂𑀯. 𑀅𑀬𑀁 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑁄.

𑁧𑁪𑁮. 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀲𑀼 𑁋 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀏𑀢𑁆𑀣 𑀉𑀕𑁆𑀖𑀝𑀺𑀢𑀁 𑀦𑀸𑀫 ¶ 𑀜𑀸𑀡𑀼𑀕𑁆𑀖𑀸𑀝𑀦𑀁, 𑀜𑀸𑀡𑁂 𑀉𑀕𑁆𑀖𑀝𑀺𑀢𑀫𑀢𑁆𑀢𑁂𑀬𑁂𑀯 ¶ 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀸𑀭𑁂 𑀉𑀤𑀸𑀳𑀝𑀫𑀢𑁆𑀢𑁂𑀬𑁂𑀯. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀪𑀺𑀲𑀫𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 ‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀸𑀬 𑀞𑀧𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀯𑀼𑀘𑁆𑀘𑀢𑀺.

𑁧𑁪𑁯. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀗𑁆𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀪𑀸𑀚𑀺𑀬𑀫𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀢𑀺 𑀯𑀼𑀘𑁆𑀘𑀢𑀺.

𑁧𑁫𑁦. 𑀉𑀤𑁆𑀤𑁂𑀲𑀸𑀤𑀻𑀳𑀺 𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺.

𑁧𑁫𑁧. 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 ¶ 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄. 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀦 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁨. 𑀬𑀼𑀢𑁆𑀢𑀧𑀝𑀺𑀪𑀸𑀦𑀸𑀤𑀻𑀲𑀼 𑁋 𑀧𑀝𑀺𑀪𑀸𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀫𑁆𑀧𑀺, 𑀜𑀸𑀡𑀲𑁆𑀲 𑀉𑀧𑀝𑁆𑀞𑀺𑀢𑀯𑀘𑀦𑀫𑁆𑀧𑀺. 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀜𑁆𑀘 𑀧𑀝𑀺𑀪𑀸𑀦𑀫𑀲𑁆𑀲𑀸𑀢𑀺 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄. 𑀧𑀼𑀘𑁆𑀙𑀺𑀢𑀸𑀦𑀦𑁆𑀢𑀭𑀫𑁂𑀯 𑀲𑀻𑀖𑀁 𑀩𑁆𑀬𑀸𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁄 𑀫𑀼𑀢𑁆𑀢𑀁 𑀧𑀝𑀺𑀪𑀸𑀦𑀫𑀲𑁆𑀲𑀸𑀢𑀺 𑀦𑁄 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀧𑀞𑀫𑁄 𑁋 𑀓𑀺𑀜𑁆𑀘𑀺 𑀓𑀸𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀫𑁂𑀯 𑀧𑁂𑀓𑁆𑀔𑀢𑀺, 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀓𑀺𑀭 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀭𑀡𑀫𑁂𑀯 𑀓𑀣𑁂𑀢𑀺.

𑀤𑀼𑀢𑀺𑀬𑁄 𑁋 𑀧𑀼𑀘𑁆𑀙𑀸𑀦𑀦𑁆𑀢𑀭𑀫𑁂𑀯 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀘𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸𑀧𑀺 𑀘 𑀬𑀼𑀢𑁆𑀢𑀁 𑀦 𑀧𑁂𑀓𑁆𑀔𑀢𑀺 𑀘𑀢𑀼𑀦𑀺𑀓𑀸𑀬𑀺𑀓𑀧𑀡𑁆𑀟𑀺𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀓𑀺𑀭 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀜𑁆𑀳𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀦𑀸𑀕𑀫𑁂𑀢𑀺, 𑀬𑀁 𑀯𑀸 𑀢𑀁 𑀯𑀸 𑀓𑀣𑁂𑀢𑀺𑀬𑁂𑀯. 𑀯𑀘𑀦𑀢𑁆𑀣𑀁 𑀧𑀦𑀲𑁆𑀲 𑀯𑀻𑀫𑀁𑀲𑀺𑀬𑀫𑀸𑀦𑀁 𑀓𑀢𑁆𑀣𑀘𑀺 𑀦 𑀮𑀕𑁆𑀕𑀢𑀺.

𑀢𑀢𑀺𑀬𑁄 𑁋 𑀧𑀼𑀘𑁆𑀙𑀸𑀲𑀫𑀓𑀸𑀮𑀫𑁂𑀯 𑀬𑀼𑀢𑁆𑀢𑀁 𑀧𑁂𑀓𑁆𑀔𑀢𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀯𑀘𑀦𑀁 𑀩𑁆𑀬𑀸𑀓𑀭𑁄𑀢𑀺 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 ¶ 𑀯𑀺𑀬. 𑀲𑁄 𑀓𑀺𑀭 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀻𑀖𑀫𑁂𑀯 𑀓𑀣𑁂𑀢𑀺, 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀭𑀡𑁄 𑀘 𑀳𑁄𑀢𑀺.

𑀘𑀢𑀼𑀢𑁆𑀣𑁄 𑁋 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦𑁂𑀯 𑀬𑀼𑀢𑁆𑀢𑀁 𑀧𑁂𑀓𑁆𑀔𑀢𑀺 ¶ , 𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀝𑀺𑀩𑀸𑀳𑀺𑀢𑀼𑀁 𑀲𑀓𑁆𑀓𑁄𑀢𑀺 𑀢𑀺𑀩𑁆𑀩𑀦𑁆𑀥𑀓𑀸𑀭𑀦𑀺𑀫𑀼𑀕𑁆𑀕𑁄 𑀯𑀺𑀬 𑀳𑁄𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄 𑀯𑀺𑀬.

𑁧𑁫𑁬. 𑀥𑀫𑁆𑀫𑀓𑀣𑀺𑀓𑁂𑀲𑀼 𑁋 𑀅𑀧𑁆𑀧𑀜𑁆𑀘 𑀪𑀸𑀲𑀢𑀻𑀢𑀺 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀣𑁄𑀓𑀫𑁂𑀯 𑀓𑀣𑁂𑀢𑀺. 𑀅𑀲𑀳𑀺𑀢𑀜𑁆𑀘𑀸𑀢𑀺 𑀓𑀣𑁂𑀦𑁆𑀢𑁄 𑀘 𑀧𑀦 𑀦 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀁 𑀓𑀣𑁂𑀢𑀺. 𑀧𑀭𑀺𑀲𑀸 𑀘𑀲𑁆𑀲 𑀦 𑀓𑀼𑀲𑀮𑀸 𑀳𑁄𑀢𑀻𑀢𑀺 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸 𑀘𑀲𑁆𑀲 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀓𑀸𑀭𑀡𑀸𑀓𑀸𑀭𑀡𑀁 𑀲𑀺𑀮𑀺𑀝𑁆𑀞𑀸𑀲𑀺𑀮𑀺𑀝𑁆𑀞𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑁄𑀢𑀺 𑀅𑀬𑀁 𑀏𑀯𑀁𑀚𑀸𑀢𑀺𑀓𑁄 𑀩𑀸𑀮𑀥𑀫𑁆𑀫𑀓𑀣𑀺𑀓𑁄. 𑀏𑀯𑀁𑀚𑀸𑀢𑀺𑀓𑀸𑀬 𑀩𑀸𑀮𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀤𑁆𑀯𑁂𑀬𑁂𑀯 𑀚𑀦𑀸 𑀲𑀪𑀸𑀯𑀥𑀫𑁆𑀫𑀓𑀣𑀺𑀓𑀸, 𑀇𑀢𑀭𑁂 𑀧𑀦 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀦𑁆𑀢𑀭𑁂 𑀧𑀯𑀺𑀝𑁆𑀞𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀸.

𑁧𑁫𑁭. 𑀯𑀮𑀸𑀳𑀓𑀽𑀧𑀫𑁂𑀲𑀼 ¶ 𑀯𑀮𑀸𑀳𑀓𑀸𑀢𑀺 𑀫𑁂𑀖𑀸. 𑀕𑀚𑁆𑀚𑀺𑀢𑀸𑀢𑀺 𑀣𑀦𑀺𑀢𑀸. 𑀢𑀢𑁆𑀣 𑀕𑀚𑁆𑀚𑀺𑀢𑁆𑀯𑀸 𑀦𑁄 𑀯𑀲𑁆𑀲𑀦𑀪𑀸𑀯𑁄 𑀦𑀸𑀫 𑀧𑀸𑀧𑀓𑁄. 𑀫𑀦𑀼𑀲𑁆𑀲𑀸 𑀳𑀺 𑀬𑀣𑀸 𑀤𑁂𑀯𑁄 𑀕𑀚𑁆𑀚𑀢𑀺 ‘𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻’𑀢𑀺 𑀩𑀻𑀚𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀧𑀦𑁆𑀢𑀺. 𑀅𑀣 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀔𑁂𑀢𑁆𑀢𑁂 𑀩𑀻𑀚𑀸𑀦𑀺 𑀔𑁂𑀢𑁆𑀢𑁂𑀬𑁂𑀯 𑀦𑀲𑁆𑀲𑀦𑁆𑀢𑀺, 𑀕𑁂𑀳𑁂 𑀩𑀻𑀚𑀸𑀦𑀺 𑀕𑁂𑀳𑁂𑀬𑁂𑀯 𑀦𑀲𑁆𑀲𑀦𑁆𑀢𑀻𑀢𑀺 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺. 𑀦𑁄 𑀕𑀚𑁆𑀚𑀺𑀢𑁆𑀯𑀸 𑀯𑀲𑁆𑀲𑀦𑀪𑀸𑀯𑁄𑀧𑀺 𑀧𑀸𑀧𑀓𑁄𑀯. 𑀫𑀦𑀼𑀲𑁆𑀲𑀸 𑀳𑀺 ‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻’𑀢𑀺 𑀦𑀺𑀦𑁆𑀦𑀝𑁆𑀞𑀸𑀦𑁂𑀲𑀼𑀬𑁂𑀯 𑀯𑀧𑁆𑀧𑀁 𑀓𑀭𑁄𑀦𑁆𑀢𑀺. 𑀅𑀣 𑀤𑁂𑀯𑁄 𑀯𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀩𑀻𑀚𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀫𑁂𑀯 𑀳𑁄𑀢𑀺. 𑀕𑀚𑁆𑀚𑀺𑀢𑁆𑀯𑀸 𑀯𑀲𑁆𑀲𑀦𑀪𑀸𑀯𑁄 𑀧𑀦 𑀪𑀤𑁆𑀤𑀓𑁄. 𑀢𑀤𑀸 𑀳𑀺 𑀲𑀼𑀪𑀺𑀓𑁆𑀔𑀁 𑀳𑁄𑀢𑀺. 𑀦𑁄 𑀕𑀚𑁆𑀚𑀺𑀢𑁆𑀯𑀸 𑀦𑁄 𑀯𑀲𑁆𑀲𑀦𑀪𑀸𑀯𑁄 𑀏𑀓𑀦𑁆𑀢𑀧𑀸𑀧𑀓𑁄𑀯.

𑀪𑀸𑀲𑀺𑀢𑀸 𑀳𑁄𑀢𑀺 𑀦𑁄 𑀓𑀢𑁆𑀢𑀸𑀢𑀺 ‘𑀇𑀤𑀸𑀦𑀺 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀺, 𑀯𑀸𑀲𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀓𑀣𑁂𑀢𑀺𑀬𑁂𑀯, 𑀦 𑀧𑀦 𑀉𑀤𑁆𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀺.

𑀓𑀢𑁆𑀢𑀸 𑀳𑁄𑀢𑀺 𑀦𑁄 𑀪𑀸𑀲𑀺𑀢𑀸𑀢𑀺 ‘𑀕𑀦𑁆𑀣𑀥𑀼𑀭𑀁 𑀯𑀸 𑀧𑀽𑀭𑁂𑀲𑁆𑀲𑀸𑀫𑀺 𑀯𑀸𑀲𑀥𑀼𑀭𑀁 𑀯𑀸’𑀢𑀺 𑀦 𑀪𑀸𑀲𑀢𑀺. 𑀲𑀫𑁆𑀧𑀢𑁆𑀢𑁂 𑀧𑀦 𑀓𑀸𑀮𑁂 𑀢𑀫𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀁 𑀧𑀦𑁂𑀢𑀁 𑀧𑀘𑁆𑀘𑀬𑀤𑀸𑀬𑀓𑁂𑀦𑁂𑀯 𑀓𑀣𑀺𑀢𑀁. 𑀏𑀓𑁄 𑀳𑀺 ‘𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀲𑀫𑁆𑀧𑀢𑁆𑀢𑀓𑀸𑀮𑁂 𑀦𑁄 𑀓𑀭𑁄𑀢𑀺. 𑀅𑀬𑀁 𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑁂𑀦 𑀧𑀭𑀺𑀳𑀸𑀬𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀮𑀸𑀪𑁂𑀦 𑀧𑀭𑀺𑀳𑀸𑀬𑀢𑀺 ¶ . 𑀅𑀧𑀭𑁄 𑀲𑀗𑁆𑀖𑀁 𑀅𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘𑀪𑀺𑀓𑁆𑀔𑀽 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀦 𑀮𑀪𑀢𑀺, 𑀲𑀩𑁆𑀩𑁂 𑀅𑀜𑁆𑀜𑀢𑁆𑀣 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀧𑀼𑀜𑁆𑀜𑁂𑀦 𑀧𑀭𑀺𑀳𑀸𑀬𑀢𑀺 ¶ , 𑀲𑀗𑁆𑀖𑁄𑀧𑀺 𑀢𑁂𑀦 𑀮𑀸𑀪𑁂𑀦 𑀧𑀭𑀺𑀳𑀸𑀬𑀢𑀺. 𑀅𑀧𑀭𑁄 𑀧𑀞𑀫𑀁 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀧𑀘𑁆𑀙𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀅𑀬𑀁 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺. 𑀅𑀧𑀭𑁄 𑀦𑁂𑀯 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀦 𑀤𑀸𑀦𑀁 𑀤𑁂𑀢𑀺, 𑀅𑀬𑀁 ‘𑀧𑀸𑀧𑀧𑀼𑀕𑁆𑀕𑀮𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁫𑁮. 𑀫𑀽𑀲𑀺𑀓𑀽𑀧𑀫𑁂𑀲𑀼 𑁋 𑀕𑀸𑀥𑀁 𑀓𑀢𑁆𑀢𑀸 𑀦𑁄 𑀯𑀲𑀺𑀢𑀸𑀢𑀺 𑀅𑀢𑁆𑀢𑀦𑁄 𑀆𑀲𑀬𑀁 𑀩𑀺𑀮𑀁 𑀓𑀽𑀧𑀁 𑀔𑀡𑀢𑀺, 𑀦𑁄 𑀢𑀢𑁆𑀣 𑀯𑀲𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀯𑀲𑀢𑀺, 𑀏𑀯𑀁 𑀩𑀺𑀴𑀸𑀭𑀸𑀤𑀺𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺. 𑀔𑀢𑁆𑀢𑀸𑀢𑀺𑀧𑀺 𑀧𑀸𑀞𑁄. 𑀯𑀲𑀺𑀢𑀸 𑀦𑁄 𑀕𑀸𑀥𑀁 𑀓𑀢𑁆𑀢𑀸𑀢𑀺 𑀲𑀬𑀁 𑀦 𑀔𑀡𑀢𑀺, 𑀧𑀭𑁂𑀦 𑀔𑀢𑁂 𑀩𑀺𑀮𑁂 𑀯𑀲𑀢𑀺, 𑀏𑀯𑀁 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺. 𑀢𑀢𑀺𑀬𑀸 𑀤𑁆𑀯𑁂𑀧𑀺 𑀓𑀭𑁄𑀦𑁆𑀢𑀻, 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺. 𑀘𑀢𑀼𑀢𑁆𑀣𑀸 𑀤𑁆𑀯𑁂𑀧𑀺 𑀅𑀓𑀭𑁄𑀦𑁆𑀢𑀻 𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺. 𑀇𑀫𑀸𑀬 𑀧𑀦 𑀉𑀧𑀫𑀸𑀬 𑀉𑀧𑀫𑀺𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 ¶ 𑀧𑀞𑀫𑁄 𑀬𑀣𑀸 𑀲𑀸 𑀫𑀽𑀲𑀺𑀓𑀸 𑀕𑀸𑀥𑀁 𑀔𑀡𑀢𑀺, 𑀏𑀯𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀬𑀣𑀸 𑀧𑀦 𑀲𑀸 𑀢𑀢𑁆𑀣 𑀦 𑀯𑀲𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀯𑀲𑀦𑁆𑀢𑀻, 𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺; 𑀢𑀣𑀸 𑀅𑀬𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀮𑁄𑀓𑀸𑀫𑀺𑀲𑀝𑁆𑀞𑀸𑀦𑁂𑀲𑀼𑀬𑁂𑀯 𑀘𑀭𑀦𑁆𑀢𑁄 𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑀗𑁆𑀔𑀸𑀢𑀸𑀦𑀁 𑀅𑀫𑀺𑀢𑁆𑀢𑀸𑀦𑀁 𑀯𑀲𑀁 𑀕𑀘𑁆𑀙𑀢𑀺. 𑀤𑀼𑀢𑀺𑀬𑁄 𑀬𑀣𑀸 𑀲𑀸 𑀫𑀽𑀲𑀺𑀓𑀸 𑀕𑀸𑀥𑀁 𑀦 𑀔𑀡𑀢𑀺, 𑀏𑀯𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺. 𑀬𑀣𑀸 𑀧𑀦 𑀧𑀭𑁂𑀦 𑀔𑀢𑀩𑀺𑀮𑁂 𑀯𑀲𑀦𑁆𑀢𑀻 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺; 𑀏𑀯𑀁 𑀧𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀯𑀲𑀁 𑀅𑀢𑀺𑀓𑁆𑀓𑀫𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼𑀧𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁫𑁯. 𑀅𑀫𑁆𑀩𑀽𑀧𑀫𑁂𑀲𑀼 𑁋 𑀆𑀫𑀁 𑀧𑀓𑁆𑀓𑀯𑀡𑁆𑀡𑀻𑀢𑀺 𑀅𑀦𑁆𑀢𑁄 𑀆𑀫𑀁 𑀩𑀳𑀺 𑀧𑀓𑁆𑀓𑀲𑀤𑀺𑀲𑀁. 𑀧𑀓𑁆𑀓𑀁 𑀆𑀫𑀯𑀡𑁆𑀡𑀻𑀢𑀺 𑀅𑀦𑁆𑀢𑁄 𑀧𑀓𑁆𑀓𑀁 𑀩𑀳𑀺 𑀆𑀫𑀲𑀤𑀺𑀲𑀁. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑀣𑀸 𑀅𑀫𑁆𑀩𑁂 𑀅𑀧𑀓𑁆𑀓𑀪𑀸𑀯𑁄 𑀆𑀫𑀢𑀸 𑀳𑁄𑀢𑀺, 𑀏𑀯𑀁 𑀧𑀼𑀕𑁆𑀕𑀮𑁂𑀧𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀆𑀫𑀢𑀸, 𑀅𑀭𑀺𑀬𑀪𑀸𑀯𑁄 𑀧𑀓𑁆𑀓𑀢𑀸. 𑀬𑀣𑀸 𑀘 𑀢𑀢𑁆𑀣 𑀧𑀓𑁆𑀓𑀲𑀤𑀺𑀲𑀢𑀸 𑀧𑀓𑁆𑀓𑀯𑀡𑁆𑀡𑀺𑀢𑀸; 𑀏𑀯𑀁 𑀧𑀼𑀕𑁆𑀕𑀮𑁂𑀧𑀺 𑀅𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀫𑀦𑀸𑀤𑀺𑀲𑀤𑀺𑀲𑀢𑀸 𑀧𑀓𑁆𑀓𑀯𑀡𑁆𑀡𑀺𑀢𑀸𑀢𑀺 𑁋 𑀇𑀫𑀺𑀦𑀸 𑀦𑀬𑁂𑀦 𑀉𑀧𑀫𑀺𑀢𑀧𑀼𑀕𑁆𑀕𑀮𑁂𑀲𑀼 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁬𑁦. 𑀓𑀼𑀫𑁆𑀪𑀽𑀧𑀫𑁂𑀲𑀼 ¶ 𑁋 𑀓𑀼𑀫𑁆𑀪𑁄𑀢𑀺 𑀖𑀝𑁄. 𑀢𑀼𑀘𑁆𑀙𑁄𑀢𑀺 𑀅𑀦𑁆𑀢𑁄 𑀭𑀺𑀢𑁆𑀢𑁄. 𑀧𑀺𑀳𑀺𑀢𑁄𑀢𑀺 𑀧𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑁄. 𑀧𑀼𑀭𑁄𑀢𑀺 𑀅𑀦𑁆𑀢𑁄 𑀧𑀼𑀡𑁆𑀡𑁄. 𑀯𑀺𑀯𑀝𑁄𑀢𑀺 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄. 𑀉𑀧𑀫𑀺𑀢𑀧𑀼𑀕𑁆𑀕𑀮𑁂𑀲𑀼 𑀧𑀦𑁂𑀢𑁆𑀣 𑀅𑀦𑁆𑀢𑁄 𑀕𑀼𑀡𑀲𑀸𑀭𑀯𑀺𑀭𑀳𑀺𑀢𑁄 ¶ 𑀢𑀼𑀘𑁆𑀙𑁄 𑀩𑀸𑀳𑀺𑀭𑀲𑁄𑀪𑀦𑀢𑀸𑀬 𑀧𑀺𑀳𑀺𑀢𑁄 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁬𑁧. 𑀉𑀤𑀓𑀭𑀳𑀤𑀽𑀧𑀫𑁂𑀲𑀼 𑁋 𑀉𑀤𑀓𑀭𑀳𑀤𑁄 𑀢𑀸𑀯 𑀚𑀡𑁆𑀡𑀼𑀫𑀢𑁆𑀢𑁂𑀧𑀺 𑀉𑀤𑀓𑁂 𑀲𑀢𑀺 𑀧𑀡𑁆𑀡𑀭𑀲𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀢𑁆𑀢𑀸 𑀯𑀸 𑀩𑀳𑀮𑀢𑁆𑀢𑀸 𑀯𑀸 𑀉𑀤𑀓𑀲𑁆𑀲 𑀅𑀧𑀜𑁆𑀜𑀸𑀬𑀫𑀸𑀦𑀢𑀮𑁄 𑀉𑀢𑁆𑀢𑀸𑀦𑁄 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫 𑀳𑁄𑀢𑀺. 𑀢𑀺𑀧𑁄𑀭𑀺𑀲 𑀘𑀢𑀼𑀧𑁄𑀭𑀺𑀲𑁂𑀧𑀺 𑀧𑀦 𑀉𑀤𑀓𑁂 𑀲𑀢𑀺 𑀅𑀘𑁆𑀙𑀢𑁆𑀢𑀸 𑀉𑀤𑀓𑀲𑁆𑀲 𑀧𑀜𑁆𑀜𑀸𑀬𑀫𑀸𑀦𑀢𑀮𑁄 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑁄𑀪𑀸𑀲𑁄 𑀦𑀸𑀫 𑀳𑁄𑀢𑀺. 𑀉𑀪𑀬𑀓𑀸𑀭𑀡𑀲𑀫𑁆𑀪𑀸𑀯𑀢𑁄 𑀧𑀦 𑀇𑀢𑀭𑁂 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀕𑁆𑀕𑀮𑁄𑀧𑀺 𑀓𑀺𑀮𑁂𑀲𑀼𑀲𑁆𑀲𑀤𑀪𑀸𑀯𑀢𑁄 𑀕𑀼𑀡𑀕𑀫𑁆𑀪𑀻𑀭𑀢𑀸𑀬 𑀘 𑀅𑀪𑀸𑀯𑀢𑁄 𑀕𑀼𑀡𑀕𑀫𑁆𑀪𑀻𑀭𑀸𑀦𑀁 𑀲𑀤𑀺𑀲𑁂𑀳𑀺 𑀅𑀪𑀺𑀓𑁆𑀓𑀫𑀸𑀤𑀻𑀳𑀺 𑀬𑀼𑀢𑁆𑀢𑁄 𑀉𑀢𑁆𑀢𑀸𑀦𑁄 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁬𑁨. 𑀩𑀮𑀻𑀩𑀤𑁆𑀤𑀽𑀧𑀫𑁂𑀲𑀼 ¶ 𑁋 𑀩𑀮𑀻𑀩𑀤𑁆𑀤𑁄 𑀢𑀸𑀯 𑀬𑁄 𑀅𑀢𑁆𑀢𑀦𑁄 𑀕𑁄𑀕𑀡𑀁 𑀖𑀝𑁆𑀝𑁂𑀢𑀺 𑀉𑀩𑁆𑀩𑁂𑀚𑁂𑀢𑀺, 𑀧𑀭𑀕𑁄𑀕𑀡𑁂 𑀧𑀦 𑀲𑁄𑀭𑀢𑁄 𑀲𑀼𑀔𑀲𑀻𑀮𑁄 𑀳𑁄𑀢𑀺 𑁋 𑀅𑀬𑀁 𑀲𑀓𑀕𑀯𑀘𑀡𑁆𑀟𑁄 𑀦𑁄 𑀧𑀭𑀕𑀯𑀘𑀡𑁆𑀟𑁄 𑀦𑀸𑀫. 𑀧𑀼𑀕𑁆𑀕𑀮𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀖𑀝𑁆𑀝𑁂𑀦𑁆𑀢𑁄 𑀯𑀺𑀚𑁆𑀛𑀦𑁆𑀢𑁄 𑀨𑀭𑀼𑀲𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑁄, 𑀧𑀭𑀧𑀭𑀺𑀲𑀸𑀬 𑀧𑀦 𑀲𑁄𑀭𑀘𑁆𑀘𑀁 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀲𑀓𑀕𑀯𑀘𑀡𑁆𑀟𑁄 𑀳𑁄𑀢𑀺 𑀦𑁄 𑀧𑀭𑀕𑀯𑀘𑀡𑁆𑀟𑁄 𑀦𑀸𑀫𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑁂𑀢𑁆𑀣 𑀉𑀩𑁆𑀩𑁂𑀚𑀺𑀢𑀸 𑀳𑁄𑀢𑀻𑀢𑀺 𑀖𑀝𑁆𑀝𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀉𑀩𑁆𑀩𑁂𑀕𑀧𑁆𑀧𑀢𑁆𑀢𑀁 𑀓𑀭𑁄𑀢𑀺𑀘𑁆𑀘𑁂𑀯 𑀅𑀢𑁆𑀣𑁄.

𑁧𑁬𑁩. 𑀆𑀲𑀻𑀯𑀺𑀲𑀽𑀧𑀫𑁂𑀲𑀼 𑁋 𑀆𑀲𑀻𑀯𑀺𑀲𑁄 𑀢𑀸𑀯 𑀬𑀲𑁆𑀲 𑀯𑀺𑀲𑀁 𑀆𑀲𑀼𑀁 𑀆𑀕𑀘𑁆𑀙𑀢𑀺 𑀲𑀻𑀖𑀁 𑀨𑀭𑀢𑀺; 𑀖𑁄𑀭𑀁 𑀧𑀦 𑀦 𑀳𑁄𑀢𑀺, 𑀘𑀺𑀭𑀓𑀸𑀮𑀁 𑀦 𑀧𑀻𑀴𑁂𑀢𑀺 𑁋 𑀅𑀬𑀁 𑀆𑀕𑀢𑀯𑀺𑀲𑁄 𑀦𑁄 𑀖𑁄𑀭𑀯𑀺𑀲𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀕𑁆𑀕𑀮𑀯𑀺𑀪𑀸𑀚𑀦𑀁 𑀧𑀦 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁬𑁪. 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀦𑀦𑀼𑀯𑀺𑀘𑁆𑀘𑀸𑀢𑀺 𑀅𑀢𑀼𑀮𑀬𑀺𑀢𑁆𑀯𑀸, 𑀅𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸. 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸𑀢𑀺 𑀧𑀜𑁆𑀜𑀸𑀬 𑀕𑀼𑀡𑁂 𑀅𑀦𑁄𑀕𑀸𑀳𑁂𑀢𑁆𑀯𑀸.

𑁧𑁬𑁬. 𑀪𑀽𑀢𑀁 𑀢𑀘𑁆𑀙𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀢𑁄 𑀪𑀽𑀢𑀁, 𑀅𑀯𑀺𑀧𑀭𑀻𑀢𑀢𑁄 𑀢𑀘𑁆𑀙𑀁. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀮𑁂𑀦. 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀳𑁄𑀢𑀻𑀢𑀺 𑀬𑀫𑀺𑀤𑀁 ¶ 𑀓𑀸𑀮𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭 𑀬𑁄 𑀧𑀼𑀕𑁆𑀕𑀮𑁄 𑀓𑀸𑀮𑀜𑁆𑀜𑀽 𑀳𑁄𑀢𑀺, 𑀓𑀸𑀮𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀢𑁆𑀣𑀸𑀬 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀧𑀼𑀘𑁆𑀙𑀺𑀢𑁂𑀦𑀸𑀧𑀺 𑀫𑀬𑀸 ¶ 𑀦 𑀓𑀣𑁂𑀢𑀩𑁆𑀩𑀸, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀣𑁂𑀢𑀩𑁆𑀩𑀸’’𑀢𑀺 𑁋 𑀅𑀬𑀁 𑀓𑀸𑀮𑁂𑀦 𑀪𑀡𑀢𑀺 𑀦𑀸𑀫. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻𑀢𑀺 𑀫𑀚𑁆𑀛𑀢𑁆𑀢𑀪𑀽𑀢𑀸𑀬 𑀉𑀧𑁂𑀓𑁆𑀔𑀸𑀬 𑀞𑀺𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁬𑁭. 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻𑀢𑀺𑀆𑀤𑀻𑀲𑀼 𑁋 𑀬𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦𑁂𑀯 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀫𑀢𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀁 𑀧𑀦 𑀉𑀝𑁆𑀞𑀸𑀦𑀁 𑀆𑀕𑀫𑁆𑀫 𑀓𑀺𑀜𑁆𑀘𑀺 𑀧𑀼𑀜𑁆𑀜𑀨𑀮𑀁 𑀦 𑀧𑀝𑀺𑀮𑀪𑀢𑀺, 𑀢𑀁 𑀲𑀦𑁆𑀥𑀸𑀬 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀝𑁆𑀞𑀳𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑀽𑀧𑀭𑀺 𑀤𑁂𑀯𑀸𑀢𑀺 𑀢𑀢𑁄 𑀉𑀧𑀭𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀬𑁄 𑀤𑁂𑀯𑀸. 𑀢𑁂𑀲𑀜𑁆𑀳𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀧𑀼𑀜𑁆𑀜𑀨𑀮𑀫𑁂𑀯 𑀉𑀧𑀚𑀻𑀯𑀦𑁆𑀢𑀺. 𑀧𑀼𑀜𑁆𑀜𑀯𑀢𑁄 𑀘𑀸𑀢𑀺 𑀇𑀤𑀁 𑀧𑀼𑀜𑁆𑀜𑀯𑀦𑁆𑀢𑁂 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀘𑁂𑀯 𑀪𑀼𑀫𑁆𑀫𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑁂 𑀘 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀳𑁂𑀢𑁂 𑀯𑀸𑀬𑀸𑀫𑀨𑀮𑀜𑁆𑀘𑁂𑀯 𑀧𑀼𑀜𑁆𑀜𑀨𑀮𑀜𑁆𑀘 𑀅𑀦𑀼𑀪𑀯𑀦𑁆𑀢𑀺. 𑀦𑁂𑀭𑀬𑀺𑀓𑀸 𑀧𑀦 𑀦𑁂𑀯 𑀉𑀝𑁆𑀞𑀸𑀦𑁂𑀦 𑀆𑀚𑀻𑀯𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦𑀸𑀧𑀺 𑀦𑁂𑀲𑀁 𑀧𑀼𑀜𑁆𑀜𑀨𑀮𑁂𑀦 𑀓𑁄𑀘𑀺 𑀆𑀚𑀻𑀯𑁄 𑀉𑀧𑁆𑀧𑀚𑁆𑀚𑀢𑀺.

𑁧𑁬𑁮. 𑀢𑀫𑀸𑀤𑀻𑀲𑀼 𑁋 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀦𑀺𑀭𑀬𑀢𑀫𑀽𑀧𑀕𑀫𑀦𑀢𑁄 𑀢𑀫𑀧𑀭𑀸𑀬𑀡𑁄. 𑀦𑁂𑀲𑀸𑀤𑀓𑀼𑀮𑁂𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀤𑀻𑀦𑀁 𑀓𑀼𑀮𑁂. 𑀯𑁂𑀦𑀓𑀼𑀮𑁂𑀢𑀺 𑀯𑀺𑀮𑀻𑀯𑀓𑀸𑀭𑀓𑀼𑀮𑁂. 𑀭𑀣𑀓𑀸𑀭𑀓𑀼𑀮𑁂𑀢𑀺 𑀘𑀫𑁆𑀫𑀓𑀸𑀭𑀓𑀼𑀮𑁂. 𑀧𑀼𑀓𑁆𑀓𑀼𑀲𑀓𑀼𑀮𑁂𑀢𑀺 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺 𑀤𑀼𑀓𑁆𑀔𑀯𑀼𑀢𑁆𑀢𑀺𑀓𑁂. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀤𑀼𑀤𑁆𑀤𑀲𑀺𑀓𑁄𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀤𑀲𑁆𑀲𑀦𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄. 𑀓𑀸𑀡𑁄𑀢𑀺 𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀔𑀜𑁆𑀚𑁄𑀢𑀺 𑀏𑀓𑀧𑀸𑀤𑀔𑀜𑁆𑀚𑁄 𑀯𑀸 𑀉𑀪𑀬𑀧𑀸𑀤𑀔𑀜𑁆𑀚𑁄 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀳𑀢𑀧𑀓𑁆𑀔𑁄 𑀧𑀻𑀞𑀲𑀧𑁆𑀧𑀻. 𑀧𑀤𑀻𑀧𑁂𑀬𑁆𑀬𑀲𑁆𑀲𑀸𑀢𑀺 𑀢𑁂𑀮𑀓𑀧𑀮𑁆𑀮𑀓𑀸𑀤𑀺𑀦𑁄 𑀧𑀤𑀻𑀧𑀽𑀧𑀓𑀭𑀡𑀲𑁆𑀲. 𑀏𑀯𑀁 𑀧𑀼𑀕𑁆𑀕𑀮𑁄 𑀢𑀫𑁄 𑀳𑁄𑀢𑀺 𑀢𑀫𑀧𑀭𑀸𑀬𑀡𑁄𑀢𑀺 𑀏𑀢𑁆𑀣 𑀏𑀓𑁄 𑀧𑀼𑀕𑁆𑀕𑀮𑁄 𑀩𑀳𑀺𑀤𑁆𑀥𑀸 𑀆𑀮𑁄𑀓𑀁 𑀅𑀤𑀺𑀲𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀜𑁆𑀜𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀲𑀓𑀮𑁂𑀧𑀺 𑀓𑀧𑁆𑀧𑁂 𑀲𑀁𑀲𑀭𑀢𑀺. 𑀲𑁄𑀧𑀺 𑀢𑀫𑁄 𑀢𑀫𑀧𑀭𑀸𑀬𑀡𑁄𑀯. 𑀲𑁄 𑀧𑀦 𑀓𑀼𑀳𑀓𑀧𑀼𑀕𑁆𑀕𑀮𑁄 𑀪𑀯𑁂𑀬𑁆𑀬. 𑀓𑀼𑀳𑀓𑀲𑁆𑀲 𑀳𑀺 𑀏𑀯𑀭𑀽𑀧𑀸 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 ¶ 𑀳𑁄𑀢𑀺 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸𑀢𑀺𑀆𑀤𑀻𑀳𑀺 𑀆𑀕𑀫𑀦𑀯𑀺𑀧𑀢𑁆𑀢𑀺 𑀘𑁂𑀯 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸. 𑀤𑀮𑀺𑀤𑁆𑀤𑁂𑀢𑀺𑀆𑀤𑀻𑀳𑀺 𑀧𑀯𑀢𑁆𑀢𑀺𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺𑀆𑀤𑀻𑀳𑀺 𑀆𑀚𑀻𑀯𑀼𑀧𑀸𑀬𑀯𑀺𑀧𑀢𑁆𑀢𑀺. 𑀤𑀼𑀩𑁆𑀩𑀡𑁆𑀡𑁄𑀢𑀺𑀆𑀤𑀻𑀳𑀺 𑀭𑀽𑀧𑀯𑀺𑀧𑀢𑁆𑀢𑀺. 𑀩𑀳𑁆𑀯𑀸𑀩𑀸𑀥𑁄𑀢𑀺𑀆𑀤𑀻𑀳𑀺 𑀤𑀼𑀓𑁆𑀔𑀓𑀸𑀭𑀡𑀲𑀫𑀸𑀬𑁄𑀕𑁄. 𑀦 𑀮𑀸𑀪𑀻𑀢𑀺𑀆𑀤𑀻𑀳𑀺 𑀲𑀼𑀔𑀓𑀸𑀭𑀡𑀯𑀺𑀧𑀢𑁆𑀢𑀺 𑀘𑁂𑀯 𑀉𑀧𑀪𑁄𑀕𑀯𑀺𑀧𑀢𑁆𑀢𑀺 ¶ 𑀘. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀦𑁆𑀢𑀺𑀆𑀤𑀻𑀳𑀺 𑀢𑀫𑀧𑀭𑀸𑀬𑀡𑀪𑀸𑀯𑀲𑁆𑀲 𑀓𑀸𑀭𑀡𑀲𑀫𑀸𑀬𑁄𑀕𑁄. 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺𑀆𑀤𑀻𑀳𑀺 𑀲𑀫𑁆𑀧𑀭𑀸𑀬𑀺𑀓𑀢𑀫𑀽𑀧𑀕𑀫𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀢𑀺𑀯𑀺𑀥𑀸𑀬 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀸𑀚𑀸𑀢𑀺𑀆𑀤𑀺𑀓𑁂𑀦 𑀚𑁄𑀢𑀺𑀦𑀸 𑀬𑀼𑀢𑁆𑀢𑀢𑁄 𑀚𑁄𑀢𑀺, 𑀆𑀮𑁄𑀓𑀪𑀽𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀧𑀦 𑀲𑀕𑁆𑀕𑀽𑀧𑀧𑀢𑁆𑀢𑀺𑀚𑁄𑀢𑀺𑀪𑀸𑀯𑀽𑀧𑀕𑀫𑀦𑀢𑁄 𑀚𑁄𑀢𑀺𑀧𑀭𑀸𑀬𑀡𑁄. 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸𑀢𑀺𑀆𑀤𑀻𑀲𑀼 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀢𑀺 𑀔𑀢𑁆𑀢𑀺𑀬𑀸 𑀫𑀳𑀸𑀲𑀸𑀭𑀸 ¶ 𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑀸 𑀔𑀢𑁆𑀢𑀺𑀬𑀸. 𑀬𑁂𑀲𑀜𑁆𑀳𑀺 𑀔𑀢𑁆𑀢𑀺𑀬𑀸𑀦𑀁 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀓𑁄𑀝𑀺𑀲𑀢𑀁 𑀦𑀺𑀥𑀸𑀦𑀕𑀢𑀁 𑀳𑁄𑀢𑀺, 𑀢𑀬𑁄 𑀓𑀳𑀸𑀧𑀡𑀓𑀼𑀫𑁆𑀪𑀸 𑀯𑀴𑀜𑁆𑀚𑀦𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀢𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀦𑀸𑀫. 𑀬𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀤𑀺𑀬𑀟𑁆𑀠𑁄 𑀓𑀳𑀸𑀧𑀡𑀓𑀼𑀫𑁆𑀪𑁄 𑀯𑀴𑀜𑁆𑀚𑀦𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑀸𑀫. 𑀬𑁂𑀲𑀁 𑀕𑀳𑀧𑀢𑀻𑀦𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀓𑀳𑀸𑀧𑀡𑀓𑀼𑀫𑁆𑀪𑁄 𑀯𑀴𑀜𑁆𑀚𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀢𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀦𑀸𑀫. 𑀢𑁂𑀲𑀁 𑀓𑀼𑀮𑁂𑀢𑀺 𑀅𑀢𑁆𑀣𑁄. 𑀅𑀟𑁆𑀠𑁂𑀢𑀺 𑀇𑀲𑁆𑀲𑀭𑁂. 𑀦𑀺𑀥𑀸𑀦𑀕𑀢𑀥𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀤𑁆𑀥𑀦𑁂. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀻𑀦𑀁 𑀉𑀧𑀪𑁄𑀕𑀪𑀡𑁆𑀟𑀸𑀦𑀁 𑀫𑀳𑀦𑁆𑀢𑀢𑀸𑀬 𑀫𑀳𑀸𑀪𑁄𑀕𑁂. 𑀦𑀺𑀥𑀸𑀦𑀕𑀢𑀲𑁆𑀲 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂. 𑀯𑀺𑀢𑁆𑀢𑀽𑀧𑀓𑀭𑀡𑀲𑁆𑀲 𑀢𑀼𑀝𑁆𑀞𑀺𑀓𑀭𑀡𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂. 𑀕𑁄𑀥𑀦𑀸𑀤𑀻𑀦𑀜𑁆𑀘 𑀲𑀢𑁆𑀢𑀯𑀺𑀥𑀥𑀜𑁆𑀜𑀸𑀦𑀜𑁆𑀘 𑀧𑀳𑀽𑀢𑀢𑀸𑀬 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀅𑀪𑀺𑀭𑀽𑀧𑁄𑀢𑀺 𑀲𑀼𑀦𑁆𑀤𑀭𑀭𑀽𑀧𑁄. 𑀤𑀲𑁆𑀲𑀦𑀻𑀬𑁄𑀢𑀺 𑀅𑀜𑁆𑀜𑀁 𑀓𑀫𑁆𑀫𑀁 𑀧𑀳𑀸𑀬 𑀤𑀺𑀯𑀲𑀫𑁆𑀧𑀺 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑁄. 𑀧𑀸𑀲𑀸𑀤𑀺𑀓𑁄𑀢𑀺 𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀧𑀲𑀸𑀤𑀸𑀯𑀳𑁄. 𑀧𑀭𑀫𑀸𑀬𑀸𑀢𑀺 𑀉𑀢𑁆𑀢𑀫𑀸𑀬. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀧𑁄𑀓𑁆𑀔𑀭𑀯𑀡𑁆𑀡𑀢𑀸𑀬. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁. 𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀉𑀧𑁂𑀢𑁄.

𑁧𑁬𑁯. 𑀑𑀡𑀢𑁄𑀡𑀢𑀸𑀤𑀻𑀲𑀼 ¶ 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀬 𑀯𑀸 𑀲𑀫𑁆𑀧𑀭𑀸𑀬𑀺𑀓𑀸𑀬 𑀯𑀸 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀭𑀳𑀺𑀢𑁄 𑀑𑀡𑀢𑁄. 𑀦𑀻𑀘𑁄, 𑀮𑀸𑀫𑀓𑁄𑀢𑀺 𑀅𑀢𑁆𑀣𑁄. 𑀢𑀩𑁆𑀩𑀺𑀧𑀓𑁆𑀔𑀢𑁄 𑀉𑀡𑁆𑀡𑀢𑁄. 𑀉𑀘𑁆𑀘𑁄, 𑀉𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀢𑀫𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘 𑁋 𑀑𑀡𑀢𑁄𑀡𑀢𑁄𑀢𑀺 𑀇𑀤𑀸𑀦𑀺 𑀦𑀻𑀘𑁄, 𑀆𑀬𑀢𑀺𑀫𑁆𑀧𑀺 𑀦𑀻𑀘𑁄𑀯 𑀪𑀯𑀺𑀲𑁆𑀲𑀢𑀺. 𑀑𑀡𑀢𑀼𑀡𑁆𑀡𑀢𑁄𑀢𑀺 𑀇𑀤𑀸𑀦𑀺 𑀦𑀻𑀘𑁄, 𑀆𑀬𑀢𑀺𑀁 𑀉𑀘𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀉𑀡𑁆𑀡𑀢𑁄𑀡𑀢𑁄𑀢𑀺 𑀇𑀤𑀸𑀦𑀺 𑀉𑀘𑁆𑀘𑁄, 𑀆𑀬𑀢𑀺𑀁 𑀦𑀻𑀘𑁄 𑀪𑀯𑀺𑀲𑁆𑀲𑀢𑀺. 𑀉𑀡𑁆𑀡𑀢𑀼𑀡𑁆𑀡𑀢𑁄𑀢𑀺 𑀇𑀤𑀸𑀦𑀺 𑀉𑀘𑁆𑀘𑁄, 𑀆𑀬𑀢𑀺𑀫𑁆𑀧𑀺 𑀉𑀘𑁆𑀘𑁄𑀯 𑀪𑀯𑀺𑀲𑁆𑀲𑀢𑀻𑀢𑀺.

𑁧𑁭𑁦. 𑀭𑀼𑀓𑁆𑀔𑀽𑀧𑀫𑁂𑀲𑀼 𑁋 𑀭𑀼𑀓𑁆𑀔𑁄 𑀢𑀸𑀯 𑀨𑁂𑀕𑁆𑀕𑀼𑀲𑀸𑀭𑀧𑀭𑀺𑀯𑀸𑀭𑁄𑀢𑀺 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑁄 𑀲𑀬𑀁 𑀨𑁂𑀕𑁆𑀕𑀼 𑀳𑁄𑀢𑀺 ¶ , 𑀧𑀭𑀺𑀯𑀸𑀭𑀭𑀼𑀓𑁆𑀔𑀸 𑀧𑀦𑀲𑁆𑀲 𑀲𑀸𑀭𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀕𑁆𑀕𑀮𑁂𑀲𑀼 𑀧𑀦 𑀲𑀻𑀮𑀲𑀸𑀭𑀯𑀺𑀭𑀳𑀢𑁄 𑀨𑁂𑀕𑁆𑀕𑀼𑀢𑀸, 𑀲𑀻𑀮𑀸𑀘𑀸𑀭𑀲𑀫𑀦𑁆𑀦𑀸𑀕𑀫𑁂𑀦 𑀘 𑀲𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁭𑁧. 𑀭𑀽𑀧𑀧𑁆𑀧𑀫𑀸𑀡𑀸𑀤𑀻𑀲𑀼 ¶ 𑁋 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀭𑀽𑀧𑀁 𑀧𑀫𑀸𑀡𑀁 𑀓𑀭𑁄𑀢𑀻𑀢𑀺 𑀭𑀽𑀧𑀧𑁆𑀧𑀫𑀸𑀡𑁄. 𑀢𑀢𑁆𑀣 𑀧𑀲𑀸𑀤𑀁 𑀚𑀦𑁂𑀢𑀻𑀢𑀺 𑀭𑀽𑀧𑀧𑁆𑀧𑀲𑀦𑁆𑀦𑁄. 𑀓𑀺𑀢𑁆𑀢𑀺𑀲𑀤𑁆𑀤𑀪𑀽𑀢𑀁 𑀖𑁄𑀲𑀁 𑀧𑀫𑀸𑀡𑀁 𑀓𑀭𑁄𑀢𑀻𑀢𑀺 𑀖𑁄𑀲𑀧𑁆𑀧𑀫𑀸𑀡𑁄. 𑀆𑀭𑁄𑀳𑀁 𑀯𑀸𑀢𑀺𑀆𑀤𑀻𑀲𑀼 𑀧𑀦 𑁋 𑀆𑀭𑁄𑀳𑀦𑁆𑀢𑀺 𑀉𑀘𑁆𑀘𑀢𑁆𑀢𑀦𑀁. 𑀧𑀭𑀺𑀡𑀸𑀳𑀦𑁆𑀢𑀺 𑀓𑀺𑀲𑀣𑀽𑀮𑀪𑀸𑀯𑀸𑀧𑀕𑀢𑀁 𑀧𑀭𑀺𑀓𑁆𑀔𑁂𑀧𑀲𑀫𑁆𑀧𑀢𑁆𑀢𑀺𑀁. 𑀲𑀡𑁆𑀞𑀸𑀦𑀦𑁆𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀤𑀻𑀖𑀭𑀲𑁆𑀲𑀯𑀝𑁆𑀝𑀢𑀸𑀤𑀺𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀪𑀸𑀯𑀁. 𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀅𑀦𑀽𑀦𑀢𑀁, 𑀮𑀓𑁆𑀔𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀯𑀸. 𑀧𑀭𑀯𑀡𑁆𑀡𑀦𑀸𑀬𑀸𑀢𑀺 𑀧𑀭𑁂𑀳𑀺 𑀧𑀭𑀫𑁆𑀫𑀼𑀔𑀸 𑀦𑀺𑀘𑁆𑀙𑀸𑀭𑀺𑀢𑀸𑀬 𑀕𑀼𑀡𑀯𑀡𑁆𑀡𑀦𑀸𑀬. 𑀧𑀭𑀣𑁄𑀫𑀦𑀸𑀬𑀸𑀢𑀺 𑀧𑀭𑁂𑀳𑀺 𑀣𑀼𑀢𑀺𑀯𑀲𑁂𑀦 𑀕𑀸𑀣𑀸𑀤𑀺𑀉𑀧𑀦𑀺𑀩𑀦𑁆𑀥𑀦𑁂𑀦 𑀯𑀼𑀢𑁆𑀢𑀸𑀬 𑀣𑁄𑀫𑀦𑀸𑀬. 𑀧𑀭𑀧𑀲𑀁𑀲𑀦𑀸𑀬𑀸𑀢𑀺 𑀧𑀭𑁂𑀳𑀺 𑀲𑀫𑁆𑀫𑀼𑀔𑀸 𑀯𑀼𑀢𑁆𑀢𑀸𑀬 𑀧𑀲𑀁𑀲𑀸𑀬. 𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬𑀸𑀢𑀺 𑀧𑀭𑀫𑁆𑀧𑀭𑀣𑀼𑀢𑀺𑀯𑀲𑁂𑀦 𑀧𑀭𑁂𑀳𑀺 𑀧𑀯𑀢𑁆𑀢𑀺𑀢𑀸𑀬 𑀯𑀡𑁆𑀡𑀳𑀭𑀡𑀸𑀬.

𑁧𑁭𑁨. 𑀘𑀻𑀯𑀭𑀮𑀽𑀔𑀦𑁆𑀢𑀺 𑀘𑀻𑀯𑀭𑀲𑁆𑀲 𑀤𑀼𑀩𑁆𑀩𑀡𑁆𑀡𑀸𑀤𑀺𑀪𑀸𑀯𑁂𑀦 𑀮𑀽𑀔𑀢𑀁. 𑀧𑀢𑁆𑀢𑀮𑀽𑀔𑀦𑁆𑀢𑀺 𑀪𑀸𑀚𑀦𑀲𑁆𑀲 𑀯𑀡𑁆𑀡𑀲𑀡𑁆𑀞𑀸𑀦𑀯𑀢𑁆𑀣𑀽𑀳𑀺 𑀮𑀽𑀔𑀢𑀁. 𑀲𑁂𑀦𑀸𑀲𑀦𑀮𑀽𑀔𑀦𑁆𑀢𑀺 𑀦𑀸𑀝𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑁂𑀦 𑀲𑁂𑀦𑀸𑀲𑀦𑀲𑁆𑀲 𑀮𑀽𑀔𑀢𑀁. 𑀯𑀺𑀯𑀺𑀥𑀦𑁆𑀢𑀺 𑀅𑀘𑁂𑀮𑀓𑀸𑀤𑀺𑀪𑀸𑀯𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀁. 𑀤𑀼𑀓𑁆𑀓𑀭𑀓𑀸𑀭𑀺𑀓𑀦𑁆𑀢𑀺 𑀲𑀭𑀻𑀭𑀢𑀸𑀧𑀦𑀁.

𑀅𑀧𑀭𑁄 𑀦𑀬𑁄 𑁋 𑀇𑀫𑁂𑀲𑀼 𑀳𑀺 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀭𑀽𑀧𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀭𑀽𑀧𑀧𑁆𑀧𑀫𑀸𑀡𑁄 𑀦𑀸𑀫. 𑀭𑀽𑀧𑀧𑁆𑀧𑀲𑀦𑁆𑀦𑁄𑀢𑀺 𑀢𑀲𑁆𑀲𑁂𑀯 𑀅𑀢𑁆𑀣𑀯𑀘𑀦𑀁. 𑀖𑁄𑀲𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀖𑁄𑀲𑀧𑁆𑀧𑀫𑀸𑀡𑁄 ¶ 𑀦𑀸𑀫. 𑀘𑀻𑀯𑀭𑀮𑀽𑀔𑀧𑀢𑁆𑀢𑀮𑀽𑀔𑁂𑀲𑀼 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀮𑀽𑀔𑀧𑁆𑀧𑀫𑀸𑀡𑁄 𑀦𑀸𑀫. 𑀥𑀫𑁆𑀫𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀦𑀸𑀫. 𑀇𑀢𑀭𑀸𑀦𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀯𑀘𑀦𑀸𑀦𑀺. 𑀲𑀩𑁆𑀩𑀲𑀢𑁆𑀢𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀭𑀽𑀧𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀭𑀽𑀧𑀧𑁆𑀧𑀫𑀸𑀡𑁄. 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀖𑁄𑀲𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀖𑁄𑀲𑀧𑁆𑀧𑀫𑀸𑀡𑁄. 𑀤𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀦𑀯 𑀓𑁄𑀝𑁆𑀞𑀸𑀲𑀸 𑀮𑀽𑀔𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀮𑀽𑀔𑀧𑁆𑀧𑀫𑀸𑀡𑁄. 𑀲𑀢𑀲𑀳𑀲𑁆𑀲𑀁 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀦 𑀏𑀓𑁄 𑀓𑁄𑀝𑁆𑀞𑀸𑀲𑁄𑀯 𑀥𑀫𑁆𑀫𑀧𑁆𑀧𑀫𑀸𑀡𑁄, 𑀲𑁂𑀲𑀸 𑀦 𑀥𑀫𑁆𑀫𑀧𑁆𑀧𑀫𑀸𑀡𑀸. 𑀏𑀯𑀫𑀬𑀁 𑀘𑀢𑀼𑀧𑁆𑀧𑀫𑀸𑀡𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄.

𑀏𑀢𑀲𑁆𑀫𑀺𑀁 𑀘𑀢𑀼𑀧𑁆𑀧𑀫𑀸𑀡𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀩𑀼𑀤𑁆𑀥𑁂𑀲𑀼 𑀅𑀧𑁆𑀧𑀲𑀦𑁆𑀦𑀸 𑀫𑀦𑁆𑀤𑀸, 𑀧𑀲𑀦𑁆𑀦𑀸𑀯 𑀩𑀳𑀼𑀓𑀸. 𑀭𑀽𑀧𑀧𑁆𑀧𑀫𑀸𑀡𑀲𑁆𑀲 𑀳𑀺 𑀩𑀼𑀤𑁆𑀥𑀭𑀽𑀧𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑀁 𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀖𑁄𑀲𑀧𑁆𑀧𑀫𑀸𑀡𑀲𑁆𑀲 𑀩𑀼𑀤𑁆𑀥𑀸𑀦𑀁 𑀓𑀺𑀢𑁆𑀢𑀺𑀖𑁄𑀲𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑁄 𑀖𑁄𑀲𑁄 𑀦𑀸𑀫 𑀦𑀢𑁆𑀣𑀺. 𑀮𑀽𑀔𑀧𑁆𑀧𑀫𑀸𑀡𑀲𑁆𑀲 𑀓𑀸𑀲𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀫𑀳𑀸𑀭𑀳𑀸𑀦𑀺 ¶ ¶ 𑀓𑀜𑁆𑀘𑀦𑀪𑀸𑀚𑀦𑀸𑀦𑀺 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂 𑀧𑀸𑀲𑀸𑀤𑀯𑀭𑁂 𑀧𑀳𑀸𑀬 𑀧𑀁𑀲𑀼𑀓𑀽𑀮𑀘𑀻𑀯𑀭𑀲𑁂𑀮𑀫𑀬𑀧𑀢𑁆𑀢𑀭𑀼𑀓𑁆𑀔𑀫𑀽𑀮𑀸𑀤𑀺𑀲𑁂𑀦𑀸𑀲𑀦𑀲𑁂𑀯𑀺𑀦𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀮𑀽𑀔𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑀁 𑀅𑀜𑁆𑀜𑀁 𑀮𑀽𑀔𑀁 𑀦𑀸𑀫 𑀦𑀢𑁆𑀣𑀺. 𑀥𑀫𑁆𑀫𑀧𑁆𑀧𑀫𑀸𑀡𑀲𑁆𑀲 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀲𑀸𑀥𑀸𑀭𑀡𑀲𑀻𑀮𑀸𑀤𑀺𑀕𑀼𑀡𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀢𑁄 𑀉𑀢𑁆𑀢𑀭𑀺 𑀧𑀲𑀸𑀤𑀸𑀯𑀳𑁄 𑀅𑀜𑁆𑀜𑁄 𑀲𑀻𑀮𑀸𑀤𑀺𑀕𑀼𑀡𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀪𑀕𑀯𑀸 𑀇𑀫𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑀁 𑀫𑀼𑀝𑁆𑀞𑀺𑀦𑀸 𑀕𑀳𑁂𑀢𑁆𑀯𑀸 𑀯𑀺𑀬 𑀞𑀺𑀢𑁄𑀢𑀺.

𑁧𑁭𑁩. 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑁋 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀻𑀮𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀓𑀣𑀺𑀢𑀁. 𑀢𑀣𑀸 𑀲𑀫𑀸𑀥𑀺𑀧𑀜𑁆𑀜𑀸 𑀘. 𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑁂𑀯. 𑀜𑀸𑀡𑀤𑀲𑁆𑀲𑀦𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀦𑁄 𑀧𑀭𑀦𑁆𑀢𑀺𑀆𑀤𑀻𑀲𑀼 𑁋 𑀧𑀭𑀧𑀼𑀕𑁆𑀕𑀮𑀁 ‘‘𑀢𑀬𑀸𑀧𑀺 𑀲𑀻𑀮𑀲𑀫𑁆𑀧𑀦𑁆𑀦𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀏𑀯𑀁 𑀦 𑀲𑀫𑀸𑀤𑀧𑁂𑀢𑀺, 𑀦 𑀕𑀡𑁆𑀳𑀸𑀧𑁂𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀢𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀞𑀫𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁄 𑀳𑁄𑀢𑀺. 𑀤𑀼𑀢𑀺𑀬𑁄 𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀲𑀤𑀺𑀲𑁄 ¶ . 𑀢𑀢𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑀤𑀺𑀲𑁄. 𑀘𑀢𑀼𑀢𑁆𑀣𑁄 𑀤𑁂𑀯𑀤𑀢𑁆𑀢𑀲𑀤𑀺𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁭𑁪. 𑀅𑀢𑁆𑀢𑀦𑁆𑀢𑀧𑀸𑀤𑀻𑀲𑀼 𑁋 𑀅𑀢𑁆𑀢𑀸𑀦𑀁 𑀢𑀧𑀢𑀺 𑀤𑀼𑀓𑁆𑀔𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁆𑀢𑀧𑁄. 𑀅𑀢𑁆𑀢𑀦𑁄 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀅𑀘𑁂𑀮𑀓𑁄𑀢𑀺 𑀦𑀺𑀘𑁆𑀘𑁂𑀮𑁄, 𑀦𑀕𑁆𑀕𑁄. 𑀫𑀼𑀢𑁆𑀢𑀸𑀘𑀸𑀭𑁄𑀢𑀺 𑀯𑀺𑀲𑀝𑁆𑀞𑀸𑀘𑀸𑀭𑁄. 𑀉𑀘𑁆𑀘𑀸𑀭𑀓𑀫𑁆𑀫𑀸𑀤𑀻𑀲𑀼 𑀮𑁄𑀓𑀺𑀬𑀓𑀼𑀮𑀧𑀼𑀢𑁆𑀢𑀸𑀘𑀸𑀭𑁂𑀦 𑀯𑀺𑀭𑀳𑀺𑀢𑁄 𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀢𑀺, 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺, 𑀔𑀸𑀤𑀢𑀺, 𑀪𑀼𑀜𑁆𑀚𑀢𑀺 𑀘. 𑀳𑀢𑁆𑀣𑀸𑀧𑀮𑁂𑀔𑀦𑁄𑀢𑀺 𑀳𑀢𑁆𑀣𑁂 𑀧𑀺𑀡𑁆𑀟𑀫𑁆𑀳𑀺 𑀦𑀺𑀝𑁆𑀞𑀺𑀢𑁂 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑁂𑀔𑀢𑀺. 𑀉𑀘𑁆𑀘𑀸𑀭𑀁 𑀯𑀸 𑀓𑀢𑁆𑀯𑀸 𑀳𑀢𑁆𑀣𑀲𑁆𑀫𑀺𑀜𑁆𑀜𑁂𑀯 𑀤𑀡𑁆𑀟𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀳𑀢𑁆𑀣𑁂𑀦 𑀅𑀧𑀮𑁂𑀔𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀓𑀺𑀭 𑀤𑀡𑁆𑀟𑀓𑀁 𑀲𑀢𑁆𑀢𑁄𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁄 𑀏𑀯𑀁 𑀓𑀭𑁄𑀢𑀺. 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 ‘𑀏𑀳𑀺 𑀪𑀤𑁆𑀤𑀦𑁆𑀢𑁂’𑀢𑀺 𑀯𑀼𑀢𑁆𑀢𑁄, 𑀦 𑀏𑀢𑀻𑀢𑀺 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄. 𑀢𑁂𑀦 𑀳𑀺 ‘𑀢𑀺𑀝𑁆𑀞 𑀪𑀤𑁆𑀤𑀦𑁆𑀢𑁂’𑀢𑀺 𑀯𑀼𑀢𑁆𑀢𑁄𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄. 𑀢𑀤𑀼𑀪𑀬𑀫𑁆𑀧𑀺 𑀳𑁂𑀢𑀁 𑀢𑀺𑀢𑁆𑀣𑀺𑀬𑀸 ‘‘𑀏𑀢𑀲𑁆𑀲 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀓𑀭𑁄𑀦𑁆𑀢𑀺. 𑀅𑀪𑀺𑀳𑀝𑀦𑁆𑀢𑀺 𑀧𑀼𑀭𑁂𑀢𑀭𑀁 𑀕𑀳𑁂𑀢𑁆𑀯𑀸 𑀆𑀳𑀝𑀁 𑀪𑀺𑀓𑁆𑀔𑀁. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 ‘‘𑀇𑀫𑀁 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀏𑀯𑀁 𑀆𑀭𑁄𑀘𑀺𑀢𑀪𑀺𑀓𑁆𑀔𑀁. 𑀦 𑀦𑀺𑀫𑀦𑁆𑀢𑀦𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀯𑀸 𑀯𑀻𑀣𑀺𑀁 𑀯𑀸 𑀕𑀸𑀫𑀁 𑀯𑀸 𑀧𑀯𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀫𑁆𑀧𑀺 𑀦 𑀲𑀸𑀤𑀺𑀬𑀢𑀺, 𑀦 𑀕𑀡𑁆𑀳𑀸𑀢𑀺.

𑀦 ¶ 𑀓𑀼𑀫𑁆𑀪𑀺𑀫𑀼𑀔𑀸𑀢𑀺 𑀓𑀼𑀫𑁆𑀪𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀢𑀺. 𑀦 𑀓𑀴𑁄𑀧𑀺𑀫𑀼𑀔𑀸𑀢𑀺 ¶ 𑀓𑀴𑁄𑀧𑀻𑀢𑀺 𑀉𑀓𑁆𑀔𑀮𑀺, 𑀧𑀘𑁆𑀙𑀺 𑀯𑀸. 𑀢𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀓𑀼𑀫𑁆𑀪𑀻 𑀓𑀴𑁄𑀧𑀺𑀬𑁄 𑀓𑀝𑀘𑁆𑀙𑀼𑀦𑀸 𑀧𑀳𑀸𑀭𑀁 𑀮𑀪𑀦𑁆𑀢𑀻𑀢𑀺. 𑀦 𑀏𑀴𑀓𑀫𑀦𑁆𑀢𑀭𑀦𑁆𑀢𑀺 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀅𑀬𑀁 𑀫𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑀭𑀓𑀭𑀡𑀁 𑀮𑀪𑀢𑀻𑀢𑀺. 𑀤𑀡𑁆𑀟𑀫𑀼𑀲𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀲𑀼 𑀪𑀼𑀜𑁆𑀚𑀫𑀸𑀦𑁂𑀲𑀼 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀬 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀢𑀺. 𑀓𑀲𑁆𑀫𑀸? 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀦 𑀕𑀩𑁆𑀪𑀺𑀦𑀺𑀬𑀸𑀢𑀺𑀆𑀤𑀻𑀲𑀼 𑀧𑀦 𑀕𑀩𑁆𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑁄 𑀓𑀺𑀮𑀫𑀢𑀺. 𑀧𑀸𑀬𑀦𑁆𑀢𑀺𑀬𑀸 𑀤𑀸𑀭𑀓𑀲𑁆𑀲 𑀔𑀻𑀭𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀭𑀢𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀲𑀗𑁆𑀓𑀺𑀢𑁆𑀢𑀻𑀲𑀽𑀢𑀺 𑀲𑀗𑁆𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀼. 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀓𑀺𑀭 𑀅𑀘𑁂𑀮𑀓𑀲𑀸𑀯𑀓𑀸 𑀅𑀘𑁂𑀮𑀓𑀸𑀦𑀁 𑀅𑀢𑁆𑀣𑀸𑀬 𑀢𑀢𑁄 𑀢𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀫𑀸𑀤𑀧𑁂𑀢𑁆𑀯𑀸 ¶ 𑀪𑀢𑁆𑀢𑀁 𑀧𑀘𑀦𑁆𑀢𑀺, 𑀉𑀓𑁆𑀓𑀝𑁆𑀞𑀸𑀘𑁂𑀮𑀓𑁄 𑀢𑀢𑁄 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀦 𑀬𑀢𑁆𑀣 𑀲𑀸𑀢𑀺 𑀬𑀢𑁆𑀣 𑀲𑀼𑀦𑀔𑁄 ‘𑀧𑀺𑀡𑁆𑀟𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀢𑀲𑁆𑀲 𑀅𑀤𑀢𑁆𑀯𑀸 𑀆𑀳𑀝𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀏𑀢𑀲𑁆𑀲 𑀧𑀺𑀡𑁆𑀟𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺.

𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻𑀢𑀺 𑀲𑀫𑀽𑀳𑀲𑀫𑀽𑀳𑀘𑀸𑀭𑀺𑀦𑀻. 𑀲𑀘𑁂 𑀳𑀺 𑀅𑀘𑁂𑀮𑀓𑀁 𑀤𑀺𑀲𑁆𑀯𑀸 ‘𑀇𑀫𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’𑀢𑀺 𑀫𑀸𑀦𑀼𑀲𑁆𑀲𑀓𑀸 𑀪𑀢𑁆𑀢𑀕𑁂𑀳𑀁 𑀧𑀯𑀺𑀲𑀦𑁆𑀢𑀺, 𑀢𑁂𑀲𑀼 𑀘 𑀧𑀯𑀺𑀲𑀦𑁆𑀢𑁂𑀲𑀼 𑀓𑀴𑁄𑀧𑀺𑀫𑀼𑀔𑀸𑀤𑀻𑀲𑀼 𑀦𑀺𑀮𑀻𑀦𑀸 𑀫𑀓𑁆𑀔𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀡𑁆𑀟𑀲𑀡𑁆𑀟𑀸 𑀘𑀭𑀦𑁆𑀢𑀺, 𑀢𑀢𑁄 𑀆𑀳𑀝𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀫𑀁 𑀦𑀺𑀲𑁆𑀲𑀸𑀬 𑀫𑀓𑁆𑀔𑀺𑀓𑀸𑀦𑀁 𑀕𑁄𑀘𑀭𑀦𑁆𑀢𑀭𑀸𑀬𑁄 𑀚𑀸𑀢𑁄𑀢𑀺. 𑀣𑀼𑀲𑁄𑀤𑀓𑀦𑁆𑀢𑀺 𑀲𑀩𑁆𑀩𑀲𑀲𑁆𑀲𑀲𑀫𑁆𑀪𑀸𑀭𑁂𑀳𑀺 𑀓𑀢𑀁 𑀲𑁄𑀯𑀻𑀭𑀓𑀁. 𑀏𑀢𑁆𑀣 𑀘 𑀲𑀼𑀭𑀸𑀧𑀸𑀦𑀫𑁂𑀯 𑀲𑀸𑀯𑀚𑁆𑀚𑀁. 𑀅𑀬𑀁 𑀧𑀦 𑀏𑀢𑀲𑁆𑀫𑀺𑀫𑁆𑀧𑀺 𑀲𑀸𑀯𑀚𑁆𑀚𑀲𑀜𑁆𑀜𑀻. 𑀏𑀓𑀸𑀕𑀸𑀭𑀺𑀓𑁄𑀢𑀺 𑀬𑁄 𑀏𑀓𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀏𑀓𑀸𑀮𑁄𑀧𑀺𑀓𑁄𑀢𑀺 𑀬𑁄 𑀏𑀓𑁂𑀦𑁂𑀯 𑀆𑀮𑁄𑀧𑁂𑀦 𑀬𑀸𑀧𑁂𑀢𑀺. 𑀤𑁆𑀯𑀸𑀕𑀸𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸𑀢𑀺 𑀏𑀓𑀸𑀬 𑀤𑀢𑁆𑀢𑀺𑀬𑀸. 𑀤𑀢𑁆𑀢𑀺 𑀦𑀸𑀫 𑀏𑀓𑀸 𑀔𑀼𑀤𑁆𑀤𑀓𑀧𑀸𑀢𑀺 𑀳𑁄𑀢𑀺, 𑀬𑀢𑁆𑀣 𑀅𑀕𑁆𑀕𑀪𑀺𑀓𑁆𑀔𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑀺.

𑀏𑀓𑀸𑀳𑀺𑀓𑀦𑁆𑀢𑀺 𑀏𑀓𑀤𑀺𑀯𑀲𑀦𑁆𑀢𑀭𑀺𑀓𑀁. 𑀅𑀟𑁆𑀠𑀫𑀸𑀲𑀺𑀓𑀦𑁆𑀢𑀺 𑀅𑀟𑁆𑀠𑀫𑀸𑀲𑀦𑁆𑀢𑀭𑀺𑀓𑀁. 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀦𑁆𑀢𑀺 𑀯𑀸𑀭𑀪𑀢𑁆𑀢𑀪𑁄𑀚𑀦𑀁. 𑀏𑀓𑀸𑀳𑀯𑀸𑀭𑁂𑀦 𑀤𑁆𑀯𑀻𑀳𑀯𑀸𑀭𑁂𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀟𑁆𑀠𑀫𑀸𑀲𑀯𑀸𑀭𑁂𑀦𑀸𑀢𑀺 𑁋 𑀏𑀯𑀁 𑀤𑀺𑀯𑀲𑀯𑀸𑀭𑁂𑀦 𑀆𑀪𑀢𑀪𑀢𑁆𑀢𑀪𑁄𑀚𑀦𑀁. 𑀲𑀸𑀓𑀪𑀓𑁆𑀔𑁄𑀢𑀺 𑀅𑀮𑁆𑀮𑀲𑀸𑀓𑀪𑀓𑁆𑀔𑁄. 𑀲𑀸𑀫𑀸𑀓𑀪𑀓𑁆𑀔𑁄𑀢𑀺 𑀲𑀸𑀫𑀸𑀓𑀢𑀡𑁆𑀟𑀼𑀮𑀪𑀓𑁆𑀔𑁄. 𑀦𑀻𑀯𑀸𑀭𑀸𑀤𑀻𑀲𑀼 𑁋 𑀦𑀻𑀯𑀸𑀭𑀸 𑀦𑀸𑀫 𑀢𑀸𑀯 𑀅𑀭𑀜𑁆𑀜𑁂 𑀲𑀬𑀁 𑀚𑀸𑀢𑀸 𑀯𑀻𑀳𑀺𑀚𑀸𑀢𑀺. 𑀤𑀤𑁆𑀤𑀼𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑁂𑀳𑀺 𑀘𑀫𑁆𑀫𑀁 𑀯𑀺𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁. 𑀳𑀝𑀁 𑀯𑀼𑀘𑁆𑀘𑀢𑀺 ¶ 𑀲𑀺𑀮𑁂𑀲𑁄𑀧𑀺, 𑀲𑁂𑀯𑀸𑀮𑁄𑀧𑀺 𑀓𑀡𑀺𑀓𑀸𑀭𑀸𑀤𑀺𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑁄𑀧𑀺. 𑀓𑀡𑀦𑁆𑀢𑀺 𑀓𑀼𑀡𑁆𑀟𑀓𑀁. 𑀆𑀘𑀸𑀫𑁄𑀢𑀺 𑀪𑀢𑁆𑀢𑀉𑀓𑁆𑀔𑀮𑀺𑀓𑀸𑀬 𑀮𑀕𑁆𑀕𑁄 𑀛𑀸𑀫𑁄𑀤𑀦𑁄. 𑀢𑀁 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺. ‘‘𑀑𑀤𑀦𑀓𑀜𑁆𑀚𑀺𑀬’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀺𑀜𑁆𑀜𑀸𑀓𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀧𑀯𑀢𑁆𑀢𑀨𑀮𑀪𑁄𑀚𑀻𑀢𑀺 𑀧𑀢𑀺𑀢𑀨𑀮𑀪𑁄𑀚𑀻.

𑀲𑀸𑀡𑀸𑀦𑀻𑀢𑀺 ¶ 𑀲𑀸𑀡𑀯𑀸𑀓𑀘𑁂𑀮𑀸𑀦𑀺. 𑀫𑀲𑀸𑀡𑀸𑀦𑀻𑀢𑀺 𑀫𑀺𑀲𑁆𑀲𑀓𑀘𑁂𑀮𑀸𑀦𑀺. 𑀙𑀯𑀤𑀼𑀲𑁆𑀲𑀸𑀦𑀻𑀢𑀺 𑀫𑀢𑀲𑀭𑀻𑀭𑀢𑁄 𑀙𑀟𑁆𑀟𑀺𑀢𑀯𑀢𑁆𑀣𑀸𑀦𑀺. 𑀏𑀭𑀓𑀢𑀺𑀡𑀸𑀤𑀻𑀦𑀺 𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀸𑀦𑀺. 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀧𑀣𑀯𑀺𑀬𑀁 𑀙𑀟𑁆𑀟𑀺𑀢𑀦𑀦𑁆𑀢𑀓𑀸𑀦𑀺. 𑀢𑀺𑀭𑀻𑀝𑀸𑀦𑀻𑀢𑀺 𑀭𑀼𑀓𑁆𑀔𑀢𑁆𑀢𑀘𑀯𑀢𑁆𑀣𑀸𑀦𑀺. 𑀅𑀚𑀺𑀦𑀦𑁆𑀢𑀺 ¶ 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀢𑀤𑁂𑀯 𑀫𑀚𑁆𑀛𑁂 𑀨𑀸𑀮𑀺𑀢𑀁. 𑀲𑀔𑀼𑀭𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀼𑀲𑀘𑀻𑀭𑀦𑁆𑀢𑀺 𑀓𑀼𑀲𑀢𑀺𑀡𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀓𑀁. 𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀲𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁 𑀓𑁂𑀲𑀓𑀫𑁆𑀩𑀮𑁄 𑀢𑁂𑀲𑀁 𑀧𑀢𑀺𑀓𑀼𑀝𑁆𑀞𑁄 𑀅𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁩.𑁧𑁩𑁮). 𑀯𑀸𑀴𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀴𑀸𑀤𑀻𑀳𑀺 𑀓𑀢𑀓𑀫𑁆𑀩𑀮𑀁. 𑀉𑀮𑀽𑀓𑀧𑀓𑁆𑀔𑀦𑁆𑀢𑀺 𑀉𑀮𑀽𑀓𑀧𑀢𑁆𑀢𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀁. 𑀉𑀩𑁆𑀪𑀝𑁆𑀞𑀓𑁄𑀢𑀺 𑀉𑀤𑁆𑀥𑀁 𑀞𑀺𑀢𑀓𑁄.

𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄𑀢𑀺 𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄. 𑀕𑀘𑁆𑀙𑀦𑁆𑀢𑁄𑀧𑀺 𑀉𑀓𑁆𑀓𑀼𑀝𑀺𑀓𑁄𑀯 𑀳𑀼𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀢𑀺 𑀅𑀬𑀓𑀡𑁆𑀝𑀓𑁂 𑀯𑀸 𑀧𑀓𑀢𑀺𑀓𑀡𑁆𑀝𑀓𑁂 𑀯𑀸 𑀪𑀽𑀫𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀦𑁆𑀢𑀺 𑀲𑀬𑀦𑁆𑀢𑁄𑀧𑀺 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀲𑀸𑀬𑀁 𑀢𑀢𑀺𑀬𑀫𑀲𑁆𑀲𑀸𑀢𑀺 𑀲𑀸𑀬𑀢𑀢𑀺𑀬𑀓𑀁. ‘‘𑀧𑀸𑀢𑁄, 𑀫𑀚𑁆𑀛𑀦𑁆𑀳𑀺𑀓𑁂, 𑀲𑀸𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀧𑀁 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

𑁧𑁭𑁫. 𑀧𑀭𑀁 𑀢𑀧𑀢𑀻𑀢𑀺 𑀧𑀭𑀦𑁆𑀢𑀧𑁄. 𑀧𑀭𑁂𑀲𑀁 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀑𑀭𑀩𑁆𑀪𑀺𑀓𑀸𑀤𑀻𑀲𑀼 𑁋 𑀉𑀭𑀩𑁆𑀪𑀸 𑀯𑀼𑀘𑁆𑀘𑀦𑁆𑀢𑀺 𑀏𑀴𑀓𑀸. 𑀉𑀭𑀩𑁆𑀪𑁂 𑀳𑀦𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀲𑀽𑀓𑀭𑀺𑀓𑀸𑀤𑀻𑀲𑀼𑀧𑀺 𑁋 𑀏𑀲𑁂𑀯 𑀦𑀬𑁄. 𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄 𑀓𑀓𑁆𑀔𑀴𑁄. 𑀫𑀘𑁆𑀙𑀖𑀸𑀢𑀓𑁄𑀢𑀺 𑀫𑀘𑁆𑀙𑀩𑀦𑁆𑀥𑁄 𑀓𑁂𑀯𑀝𑁆𑀝𑁄. 𑀩𑀦𑁆𑀥𑀦𑀸𑀕𑀸𑀭𑀺𑀓𑁄𑀢𑀺 𑀩𑀦𑁆𑀥𑀦𑀸𑀕𑀸𑀭𑀕𑁄𑀧𑀓𑁄. 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸.

𑁧𑁭𑁬. 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑁄. 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲𑀸𑀢𑀺 𑀦𑀕𑀭𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬. 𑀲𑀦𑁆𑀥𑀸𑀕𑀸𑀭𑀦𑁆𑀢𑀺 𑀬𑀜𑁆𑀜𑀲𑀸𑀮𑀁 ¶ . 𑀔𑀭𑀸𑀚𑀺𑀦𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀲𑀧𑁆𑀧𑀺𑀢𑁂𑀮𑁂𑀦𑀸𑀢𑀺 𑀲𑀧𑁆𑀧𑀺𑀦𑀸 𑀘 𑀢𑁂𑀮𑁂𑀦 𑀘. 𑀞𑀧𑁂𑀢𑁆𑀯𑀸 𑀳𑀺 𑀲𑀧𑁆𑀧𑀺𑀁 𑀅𑀯𑀲𑁂𑀲𑁄 𑀬𑁄 𑀓𑁄𑀘𑀺 𑀲𑁆𑀦𑁂𑀳𑁄 𑀢𑁂𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀟𑀼𑀯𑀫𑀸𑀦𑁄𑀢𑀺 𑀦𑀔𑀸𑀦𑀁 𑀙𑀺𑀦𑁆𑀦𑀢𑁆𑀢𑀸 𑀓𑀡𑁆𑀟𑀼𑀯𑀺𑀢𑀩𑁆𑀩𑀓𑀸𑀮𑁂 𑀢𑁂𑀦 𑀓𑀡𑁆𑀟𑀼𑀯𑀫𑀸𑀦𑁄. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀅𑀲𑀦𑁆𑀣𑀢𑀸𑀬. 𑀲𑀭𑀽𑀧𑀯𑀘𑁆𑀙𑀸𑀬𑀸𑀢𑀺 𑀲𑀤𑀺𑀲𑀯𑀘𑁆𑀙𑀸𑀬. 𑀲𑀘𑁂 𑀕𑀸𑀯𑀻 𑀲𑁂𑀢𑀸 𑀳𑁄𑀢𑀺, 𑀯𑀘𑁆𑀙𑁄𑀧𑀺 𑀲𑁂𑀢𑀓𑁄𑀯 𑀲𑀘𑁂 𑀓𑀩𑀭𑀸 𑀯𑀸, 𑀭𑀢𑁆𑀢𑀸 𑀯𑀸, 𑀯𑀘𑁆𑀙𑁄𑀧𑀺 𑀢𑀸𑀤𑀺𑀲𑁄𑀯𑀸𑀢𑀺 𑁋 𑀏𑀯𑀁 𑀲𑀭𑀽𑀧𑀯𑀘𑁆𑀙𑀸𑀬. 𑀲𑁄 𑀏𑀯𑀫𑀸𑀳𑀸𑀢𑀺 ¶ 𑀲𑁄 𑀭𑀸𑀚𑀸 𑀏𑀯𑀁 𑀯𑀤𑁂𑀢𑀺. 𑀯𑀘𑁆𑀙𑀢𑀭𑀸𑀢𑀺 𑀢𑀭𑀼𑀡𑀯𑀘𑁆𑀙𑀓𑀪𑀸𑀯𑀁 𑀅𑀢𑀺𑀓𑁆𑀓𑀦𑁆𑀢𑀸 ¶ 𑀩𑀮𑀯𑀯𑀘𑁆𑀙𑀸. 𑀯𑀘𑁆𑀙𑀢𑀭𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀸𑀬 𑀘𑁂𑀯 𑀬𑀜𑁆𑀜𑀪𑀽𑀫𑀺𑀬𑀁 𑀅𑀢𑁆𑀣𑀭𑀡𑀢𑁆𑀣𑀸𑀬 𑀘.

𑁧𑁭𑁭. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀦𑀺𑀘𑁆𑀙𑀸𑀢𑁄𑀢𑀺 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀸 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀸𑀢𑁄. 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀼𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀅𑀦𑁆𑀢𑁄 𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸 𑀲𑀻𑀢𑀮𑁄 𑀚𑀸𑀢𑁄𑀢𑀺 𑀲𑀻𑀢𑀻𑀪𑀽𑀢𑁄. 𑀛𑀸𑀦𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻. 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸𑀢𑀺 𑀲𑁂𑀝𑁆𑀞𑀪𑀽𑀢𑁂𑀦 𑀅𑀢𑁆𑀢𑀦𑀸.

𑀇𑀫𑀁 𑀧𑀦 𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 𑁋 𑀇𑀥 𑀢𑀣𑀸𑀕𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑁄𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑁋 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄𑀢𑀺. 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀁 𑀥𑀫𑁆𑀫𑀁. 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸𑀢𑀺 𑀓𑀲𑁆𑀫𑀸 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀺? 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀔𑀢𑁆𑀢𑀺𑀬𑀓𑀼𑀮𑀢𑁄 𑀧𑀩𑁆𑀩𑀚𑀺𑀢𑀸 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀫𑀦𑁆𑀢𑁂 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀳𑀻𑀦𑀚𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀦𑁄 𑀯𑀺𑀚𑀸𑀢𑀺𑀢𑀸𑀬 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀳𑀧𑀢𑀺𑀤𑀸𑀭𑀓𑀸 𑀧𑀦 𑀓𑀘𑁆𑀙𑁂𑀳𑀺 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑁂𑀳𑀺 𑀧𑀺𑀝𑁆𑀞𑀺𑀬𑀸 𑀮𑁄𑀡𑀁 𑀧𑀼𑀧𑁆𑀨𑀫𑀸𑀦𑀸𑀬 𑀪𑀽𑀫𑀺𑀁 𑀓𑀲𑀺𑀢𑁆𑀯𑀸 𑀢𑀸𑀤𑀺𑀲𑀲𑁆𑀲 𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀦𑀺𑀳𑀢𑀫𑀸𑀦𑀤𑀧𑁆𑀧𑀸 𑀳𑁄𑀦𑁆𑀢𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀢𑁆𑀯𑀸 𑀬𑀣𑀸𑀩𑀮𑀁 𑀩𑀼𑀤𑁆𑀥𑀯𑀘𑀦𑀁 ¶ 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀼𑀁. 𑀇𑀢𑀭𑁂𑀳𑀺 𑀘 𑀓𑀼𑀮𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀩𑀳𑀼𑀓𑀸, 𑀕𑀳𑀧𑀢𑀺𑀓𑀸𑀯 𑀩𑀳𑀼𑀓𑀸. 𑀇𑀢𑀺 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀻𑀢𑀺.

𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸𑀢𑀺 𑀇𑀢𑀭𑁂𑀲𑀁 𑀯𑀸 𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀘𑁆𑀘𑀸𑀚𑀸𑀢𑁄𑀢𑀺 𑀧𑀢𑀺𑀚𑀸𑀢𑁄. 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀁 ¶ 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑁆𑀲𑀸𑀫𑀺𑀫𑁆𑀳𑀺 𑀢𑀣𑀸𑀕𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺 𑀲𑀘𑁂𑀧𑀺 𑀲𑀝𑁆𑀞𑀺𑀳𑀢𑁆𑀣𑁂 𑀖𑀭𑁂 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀯𑀸 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀦𑁂𑀲𑀁 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀬𑁂𑀯. 𑀭𑀚𑁄𑀧𑀣𑁄𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ¶ 𑀯𑀼𑀢𑁆𑀢𑀁. 𑀆𑀕𑀫𑀦𑀧𑀣𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀮𑀕𑁆𑀕𑀦𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄 𑀯𑀺𑀬𑀸𑀢𑀺 𑀅𑀩𑁆𑀪𑁄𑀓𑀸𑀲𑁄. 𑀧𑀩𑁆𑀩𑀚𑀺𑀢𑁄 𑀳𑀺 𑀓𑀽𑀝𑀸𑀕𑀸𑀭𑀭𑀢𑀦𑀧𑀸𑀲𑀸𑀤𑁂 𑀘 𑀤𑁂𑀯𑀯𑀺𑀫𑀸𑀦𑀸𑀤𑀻𑀲𑀼 𑀘 𑀲𑀼𑀧𑀺𑀳𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑁂𑀲𑀼 𑀯𑀲𑀦𑁆𑀢𑁄𑀧𑀺 𑀦𑁂𑀯 𑀮𑀕𑁆𑀕𑀢𑀺, 𑀦 𑀲𑀚𑁆𑀚𑀢𑀺, 𑀦 𑀩𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺.

𑀅𑀧𑀺𑀘 𑁋 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀓𑀼𑀲𑀮𑀓𑀺𑀭𑀺𑀬𑀸𑀬 𑀑𑀓𑀸𑀲𑀸𑀪𑀸𑀯𑀢𑁄. 𑀭𑀚𑁄𑀧𑀣𑁄 𑀅𑀲𑀁𑀯𑀼𑀢𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀯𑀺𑀬 𑀭𑀚𑀸𑀦𑀁 𑀓𑀺𑀮𑁂𑀲𑀭𑀚𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄. 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀬𑀣𑀸𑀲𑀼𑀔𑀁 𑀑𑀓𑀸𑀲𑀲𑀫𑁆𑀪𑀸𑀯𑀢𑁄. 𑀦𑀬𑀺𑀤𑀁 𑀲𑀼𑀓𑀭𑀁…𑀧𑁂… 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀺𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁 𑁋 ‘‘𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 ‘‘𑀅𑀕𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 ‘‘𑀅𑀦𑀕𑀸𑀭𑀺𑀬’’𑀦𑁆𑀢𑀺 𑀜𑀸𑀢𑀩𑁆𑀩𑀸. 𑀢𑀁 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 ¶ 𑀧𑀝𑀺𑀧𑀚𑁆𑀚𑁂𑀬𑁆𑀬𑀁. 𑀅𑀧𑁆𑀧𑀁 𑀯𑀸𑀢𑀺 𑀲𑀳𑀲𑁆𑀲𑀢𑁄 𑀳𑁂𑀝𑁆𑀞𑀸 𑀪𑁄𑀕𑀓𑁆𑀔𑀦𑁆𑀥𑁄 𑀅𑀧𑁆𑀧𑁄 𑀦𑀸𑀫 𑀳𑁄𑀢𑀺, 𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 ¶ 𑀫𑀳𑀸. 𑀅𑀩𑀦𑁆𑀥𑀦𑀝𑁆𑀞𑁂𑀦 𑀜𑀸𑀢𑀺𑀬𑁂𑀯 𑀜𑀸𑀢𑀺𑀧𑀭𑀺𑀯𑀝𑁆𑀝𑁄. 𑀲𑁄𑀧𑀺 𑀯𑀻𑀲𑀢𑀺𑀬𑀸 𑀳𑁂𑀝𑁆𑀞𑀸 𑀅𑀧𑁆𑀧𑁄 𑀳𑁄𑀢𑀺, 𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀬 𑀫𑀳𑀸.

𑁧𑁭𑁮. 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸, 𑀢𑀜𑁆𑀘. 𑀬𑀢𑁆𑀣 𑀘𑁂𑀢𑁂 𑀲𑀳 𑀚𑀻𑀯𑀦𑁆𑀢𑀺, 𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀲𑀸𑀚𑀻𑀯𑀜𑁆𑀘. 𑀢𑀢𑁆𑀣 𑀲𑀺𑀓𑁆𑀔𑀦𑀪𑀸𑀯𑁂𑀦 𑀲𑀫𑀸𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀤𑀼𑀪𑀬𑀁 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀣𑀸 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯. 𑀧𑀳𑀸𑀬𑀸𑀢𑀺 𑀇𑀫𑀁 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀤𑀼𑀲𑁆𑀲𑀻𑀮𑁆𑀬𑀢𑁄 𑀑𑀭𑀢𑁄 𑀯𑀺𑀭𑀢𑁄𑀯 𑀳𑁄𑀢𑀺. 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄𑀢𑀺 𑀧𑀭𑀽𑀧𑀖𑀸𑀢𑀢𑁆𑀣𑀸𑀬 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀆𑀤𑀸𑀬 𑀅𑀯𑀢𑁆𑀢𑀦𑀢𑁄 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀘𑁂𑀯 𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑁄 𑀘𑀸𑀢𑀺 ¶ 𑀅𑀢𑁆𑀣𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀤𑀡𑁆𑀟𑀁, 𑀲𑀩𑁆𑀩𑀫𑁆𑀧𑀺 𑀅𑀯𑀲𑁂𑀲𑀁 𑀉𑀧𑀓𑀭𑀡𑀁 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑀦𑀪𑀸𑀯𑀢𑁄 ‘𑀲𑀢𑁆𑀣’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀪𑀺𑀓𑁆𑀔𑀽 𑀓𑀢𑁆𑀢𑀭𑀤𑀡𑁆𑀟𑀁 𑀯𑀸 𑀤𑀦𑁆𑀢𑀓𑀝𑁆𑀞𑀯𑀸𑀲𑀺𑀁 𑀯𑀸 𑀧𑀺𑀧𑁆𑀨𑀮𑀺𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀦 𑀢𑀁 𑀧𑀭𑀽𑀧𑀖𑀸𑀢𑀢𑁆𑀣𑀸𑀬. 𑀢𑀲𑁆𑀫𑀸 𑀦𑀺𑀳𑀺𑀢𑀤𑀡𑁆𑀟𑀸 𑀦𑀺𑀳𑀺𑀢𑀲𑀢𑁆𑀣𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀮𑀚𑁆𑀚𑀻𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀤𑀬𑀸𑀧𑀦𑁆𑀦𑁄𑀢𑀺 𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄. 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀲𑀩𑁆𑀩𑁂 𑀧𑀸𑀡𑀪𑀽𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑁄. 𑀢𑀸𑀬 𑀤𑀬𑀸𑀧𑀦𑁆𑀦𑀢𑀸𑀬 𑀲𑀩𑁆𑀩𑁂𑀲𑀁 𑀧𑀸𑀡𑀪𑀽𑀢𑀸𑀦𑀁 𑀳𑀺𑀢𑀘𑀺𑀢𑁆𑀢𑀓𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺, 𑀧𑀸𑀮𑁂𑀢𑀺.

𑀤𑀺𑀦𑁆𑀦𑀫𑁂𑀯 𑀆𑀤𑀺𑀬𑀢𑀻𑀢𑀺 𑀤𑀺𑀦𑁆𑀦𑀸𑀤𑀸𑀬𑀻. 𑀘𑀺𑀢𑁆𑀢𑁂𑀦𑀧𑀺 𑀤𑀺𑀦𑁆𑀦𑀫𑁂𑀯 𑀧𑀝𑀺𑀓𑀗𑁆𑀔𑀢𑀻𑀢𑀺 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻. 𑀣𑁂𑀦𑁂𑀢𑀻𑀢𑀺 𑀣𑁂𑀦𑁄. 𑀦 𑀣𑁂𑀦𑁂𑀦 𑀅𑀣𑁂𑀦𑁂𑀦. 𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀪𑀸𑀯𑁂𑀦. 𑀅𑀣𑁂𑀦𑀁 𑀲𑀼𑀘𑀺𑀪𑀽𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 ¶ 𑀅𑀲𑁂𑀝𑁆𑀞𑀘𑀭𑀺𑀬𑀁. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭𑀁 𑀘𑀭𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻. 𑀆𑀭𑀸𑀘𑀸𑀭𑀻𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄 𑀤𑀽𑀭𑀘𑀸𑀭𑀻. 𑀫𑁂𑀣𑀼𑀦𑀸𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀲𑀤𑀺𑀲𑀢𑁆𑀢𑀸 𑀫𑁂𑀣𑀼𑀦𑀓𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀳𑀺 𑀧𑀝𑀺𑀲𑁂𑀯𑀺𑀢𑀩𑁆𑀩𑀢𑁄 𑀫𑁂𑀣𑀼𑀦𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀅𑀲𑀤𑁆𑀥𑀫𑁆𑀫𑀸. 𑀕𑀸𑀫𑀥𑀫𑁆𑀫𑀸𑀢𑀺 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑀸.

𑀲𑀘𑁆𑀘𑀁 ¶ 𑀯𑀤𑀢𑀻𑀢𑀺 𑀲𑀘𑁆𑀘𑀯𑀸𑀤𑀻. 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺 𑀖𑀝𑁂𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑁄. 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀼𑀲𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀭𑀺𑀲𑁄 𑀓𑀤𑀸𑀘𑀺 𑀫𑀼𑀲𑀸 𑀯𑀤𑀢𑀺, 𑀓𑀤𑀸𑀘𑀺 𑀲𑀘𑁆𑀘𑀁, 𑀢𑀲𑁆𑀲 𑀫𑀼𑀲𑀸𑀯𑀸𑀤𑁂𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀲𑀘𑁆𑀘𑀁 𑀲𑀘𑁆𑀘𑁂𑀦 𑀦 𑀖𑀝𑀻𑀬𑀢𑀺, 𑀢𑀲𑁆𑀫𑀸 𑀦 𑀲𑁄 𑀲𑀘𑁆𑀘𑀲𑀦𑁆𑀥𑁄. 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄. 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸 𑀅𑀯𑀢𑁆𑀯𑀸 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀲𑀦𑁆𑀥𑁄. 𑀣𑁂𑀢𑁄𑀢𑀺 𑀣𑀺𑀭𑁄, 𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀳𑀺 𑀧𑀼𑀕𑁆𑀕𑀮𑁄 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬, 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼𑀓𑁄 𑀯𑀺𑀬, 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀫𑀺𑀯 𑀘, 𑀦 𑀣𑀺𑀭𑀓𑀣𑁄 𑀳𑁄𑀢𑀺. 𑀏𑀓𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬, 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀘 𑀣𑀺𑀭𑀓𑀣𑁄 𑀳𑁄𑀢𑀺. 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀦𑁆𑀤𑀦𑁆𑀢𑁂𑀧𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀣𑁂𑀢𑁄. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑁄, 𑀲𑀤𑁆𑀥𑀸𑀬𑀺𑀓𑁄𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 𑀦 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺. ‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁? 𑀅𑀲𑀼𑀓𑁂𑀦𑀸’𑀢𑀺 𑀯𑀼𑀢𑁆𑀢𑁂 ‘𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀣𑀸’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀓𑁄 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺. ‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁? 𑀅𑀲𑀼𑀓𑁂𑀦𑀸’𑀢𑀺 𑀯𑀼𑀢𑁆𑀢𑁂 ‘𑀬𑀤𑀺 𑀢𑁂𑀦 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀧𑀫𑀸𑀡𑀁, 𑀇𑀤𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀫𑁂𑀯 𑀇𑀤’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀺𑀓𑁄. 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸𑀢𑀺 𑀢𑀸𑀬 𑀲𑀘𑁆𑀘𑀯𑀸𑀤𑀺𑀢𑀸𑀬 𑀮𑁄𑀓𑀁 𑀦 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀁 ¶ 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄 𑀲𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁, 𑀢𑁂𑀲𑀁 𑀪𑁂𑀤𑀸𑀬. 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀫𑀺𑀢𑁆𑀢𑀸𑀦𑀁 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀪𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘𑀢𑀼𑀫𑁆𑀳𑀸𑀓𑀁 𑀈𑀤𑀺𑀲𑁂 𑀓𑀼𑀮𑁂 𑀚𑀸𑀢𑀸𑀦𑀁, 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀇𑀤𑀁 𑀦 𑀬𑀼𑀢𑁆𑀢’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀦𑁆𑀥𑀸𑀦𑀁 𑀓𑀢𑁆𑀢𑀸. 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸. 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸 𑁋 ‘𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸𑀦𑀁, 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 ¶ 𑀅𑀦𑀼𑀘𑁆𑀙𑀯𑀺𑀓𑀫𑁂𑀢’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀲𑀫𑀕𑁆𑀕𑀸𑀭𑀸𑀫𑁄. 𑀬𑀢𑁆𑀣 𑀲𑀫𑀕𑁆𑀕𑀸 𑀦𑀢𑁆𑀣𑀺, 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀸𑀫𑁄𑀢𑀺𑀧𑀺 𑀧𑀸𑀴𑀺. 𑀅𑀬𑀫𑁂𑀯 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀢𑁄𑀢𑀺 𑀲𑀫𑀕𑁆𑀕𑁂𑀲𑀼 𑀭𑀢𑁄. 𑀢𑁂 𑀧𑀳𑀸𑀬 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀺 𑀦𑀦𑁆𑀤𑀢𑀻𑀢𑀺 𑀲𑀫𑀕𑁆𑀕𑀦𑀦𑁆𑀤𑀻. 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀬𑀸 𑀯𑀸𑀘𑀸 𑀲𑀢𑁆𑀢𑁂 𑀲𑀫𑀕𑁆𑀕𑁂𑀬𑁂𑀯 𑀓𑀭𑁄𑀢𑀺, 𑀢𑀁 𑀲𑀸𑀫𑀕𑁆𑀕𑀻𑀕𑀼𑀡𑀧𑀭𑀺𑀤𑀻𑀧𑀓𑀫𑁂𑀯 ¶ 𑀯𑀸𑀘𑀁 𑀪𑀸𑀲𑀢𑀺, 𑀦 𑀇𑀢𑀭𑀦𑁆𑀢𑀺.

𑀓𑀸𑀮𑁂𑀦 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻. 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀪𑀽𑀢𑀁 𑀢𑀣𑀁 𑀢𑀘𑁆𑀙𑀁 𑀲𑀪𑀸𑀯𑀫𑁂𑀯 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻. 𑀦𑀺𑀥𑀸𑀦𑀁 𑀯𑀼𑀘𑁆𑀘𑀢𑀺 𑀞𑀧𑀦𑁄𑀓𑀸𑀲𑁄. 𑀦𑀺𑀥𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀥𑀸𑀦𑀯𑀢𑀻. 𑀳𑀤𑀬𑁂 𑀦𑀺𑀥𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀏𑀯𑀭𑀽𑀧𑀺𑀁 𑀪𑀸𑀲𑀫𑀸𑀦𑁄𑀧𑀺 𑀘 ‘‘𑀅𑀳𑀁 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀓𑀸𑀮𑁂𑀦 𑀪𑀸𑀲𑀢𑀺. 𑀬𑀼𑀢𑁆𑀢𑀓𑀸𑀮𑀁 𑀧𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀤𑁂𑀲𑀦𑁆𑀢𑀺 𑀲𑀉𑀧𑀫𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸. 𑀬𑀣𑀸𑀲𑁆𑀲𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀦𑁂𑀓𑁂𑀳𑀺𑀧𑀺 𑀦𑀬𑁂𑀳𑀺 𑀯𑀺𑀪𑀚𑀦𑁆𑀢𑁂𑀦 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀪𑀸𑀲𑀢𑀺. 𑀬𑀁 𑀯𑀸 𑀲𑁄 𑀅𑀢𑁆𑀣𑀯𑀸𑀤𑀻 𑀅𑀢𑁆𑀣𑀁 𑀯𑀤𑀢𑀺, 𑀢𑁂𑀦 𑀅𑀢𑁆𑀣𑁂𑀦 𑀲𑀁𑀳𑀺𑀢𑀢𑁆𑀢𑀸 𑀅𑀢𑁆𑀣𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺. 𑀦 𑀅𑀜𑁆𑀜𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀪𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁭𑁯. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸𑀢𑀺 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀴𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀲𑁆𑀲 𑀩𑀻𑀚𑀕𑀸𑀫𑀲𑁆𑀲 𑀘𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀪𑀽𑀢𑀕𑀸𑀫𑀲𑁆𑀲 𑀘 𑀲𑀫𑀸𑀭𑀫𑁆𑀪𑀸. 𑀙𑁂𑀤𑀦𑀪𑁂𑀤𑀦𑀧𑀘𑀦𑀸𑀤𑀺𑀪𑀸𑀯𑁂𑀦 𑀯𑀺𑀓𑁄𑀧𑀦𑀸 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀪𑀢𑁆𑀢𑀺𑀓𑁄𑀢𑀺 𑀧𑀸𑀢𑀭𑀸𑀲𑀪𑀢𑁆𑀢𑀁, 𑀲𑀸𑀬𑀫𑀸𑀲𑀪𑀢𑁆𑀢𑀦𑁆𑀢𑀺 𑀤𑁆𑀯𑁂 𑀪𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀸𑀢𑀭𑀸𑀲𑀪𑀢𑁆𑀢𑀁 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀇𑀢𑀭𑀁 𑀫𑀚𑁆𑀛𑀦𑁆𑀳𑀺𑀓𑀢𑁄 𑀉𑀤𑁆𑀥𑀁 𑀅𑀦𑁆𑀢𑁄𑀅𑀭𑀼𑀡𑁂𑀦. 𑀢𑀲𑁆𑀫𑀸 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂 ¶ 𑀤𑀲𑀓𑁆𑀔𑀢𑁆𑀢𑀼𑀁 ¶ 𑀪𑀼𑀜𑁆𑀚𑀫𑀸𑀦𑁄𑀧𑀺 𑀏𑀓𑀪𑀢𑁆𑀢𑀺𑀓𑁄𑀯 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀏𑀓𑀪𑀢𑁆𑀢𑀺𑀓𑁄𑀢𑀺. 𑀭𑀢𑁆𑀢𑀺𑀬𑀸 𑀪𑁄𑀚𑀦𑀁 𑀭𑀢𑁆𑀢𑀺, 𑀢𑀢𑁄 𑀉𑀧𑀭𑀢𑁄𑀢𑀺 𑀭𑀢𑁆𑀢𑀽𑀧𑀭𑀢𑁄. 𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀬𑀸𑀯 𑀲𑀽𑀭𑀺𑀬𑀲𑀢𑁆𑀣𑀗𑁆𑀕𑀫𑀦𑀸 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦𑀸𑀫, 𑀢𑀢𑁄 𑀯𑀺𑀭𑀢𑀢𑁆𑀢𑀸 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀻𑀪𑀽𑀢𑀁 𑀤𑀲𑁆𑀲𑀦𑀦𑁆𑀢𑀺 𑀯𑀺𑀲𑀽𑀓𑀤𑀲𑁆𑀲𑀦𑀁. 𑀅𑀢𑁆𑀢𑀦𑀸 𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦 𑀦𑀘𑁆𑀘𑀸 𑀘 𑀕𑀻𑀢𑀸 𑀘 𑀯𑀸𑀤𑀺𑀢𑀸 𑀘 𑀅𑀦𑁆𑀢𑀫𑀲𑁄 𑀫𑀬𑀽𑀭𑀦𑀘𑁆𑀘𑀦𑀸𑀧𑀦𑀸𑀤𑀺𑀯𑀲𑁂𑀦𑀧𑀺 𑀧𑀯𑀢𑁆𑀢𑀸𑀦𑀁 𑀦𑀘𑁆𑀘𑀸𑀤𑀻𑀦𑀁 𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸 𑀘𑀸𑀢𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸. 𑀦𑀘𑁆𑀘𑀸𑀤𑀻𑀦𑀺 ¶ 𑀳𑀺 𑀅𑀢𑁆𑀢𑀦𑀸 𑀧𑀬𑁄𑀚𑁂𑀢𑀼𑀁 𑀯𑀸 𑀧𑀭𑁂𑀳𑀺 𑀧𑀬𑁄𑀚𑀸𑀧𑁂𑀢𑀼𑀁 𑀯𑀸 𑀬𑀼𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑀼𑀁 𑀯𑀸 𑀦𑁂𑀯 𑀪𑀺𑀓𑁆𑀔𑀽𑀦𑀁 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀦𑁆𑀢𑀺. 𑀫𑀸𑀮𑀸𑀤𑀻𑀲𑀼 𑁋 𑀫𑀸𑀮𑀸𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀢𑀢𑁆𑀣 𑀧𑀺𑀴𑀦𑁆𑀥𑀦𑁆𑀢𑁄 𑀥𑀸𑀭𑁂𑀢𑀺 𑀦𑀸𑀫. 𑀊𑀦𑀝𑁆𑀞𑀸𑀦𑀁 𑀧𑀽𑀭𑁂𑀦𑁆𑀢𑁄 𑀫𑀡𑁆𑀟𑁂𑀢𑀺 𑀦𑀸𑀫. 𑀕𑀦𑁆𑀥𑀯𑀲𑁂𑀦 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑁆𑀢𑁄 𑀯𑀺𑀪𑀽𑀲𑁂𑀢𑀺 𑀦𑀸𑀫. 𑀞𑀸𑀦𑀁 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁. 𑀢𑀲𑁆𑀫𑀸 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀢𑀸𑀦𑀺 𑀫𑀸𑀮𑀸𑀥𑀸𑀭𑀡𑀸𑀤𑀻𑀦𑀺 𑀫𑀳𑀸𑀚𑀦𑁄 𑀓𑀭𑁄𑀢𑀺, 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁. 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀲𑀦𑁆𑀣𑀢𑀁, 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑁄, 𑀮𑁄𑀳𑀫𑀸𑀲𑀓𑁄, 𑀚𑀢𑀼𑀫𑀸𑀲𑀓𑁄, 𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲 𑀉𑀪𑀬𑀲𑁆𑀲𑀸𑀧𑀺 𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄, 𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄.

𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀕𑁄𑀥𑀼𑀫𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀲𑀗𑁆𑀔𑀸𑀢𑀲𑁆𑀲 𑀲𑀢𑁆𑀢𑀯𑀺𑀥𑀲𑁆𑀲𑀸𑀧𑀺 𑀆𑀫𑀓𑀥𑀜𑁆𑀜𑀲𑁆𑀲 𑀧𑀝𑀺𑀕𑁆𑀕𑀳𑀡𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀫𑁂𑀯, 𑀆𑀫𑀲𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸 𑀆𑀫𑀓𑀫𑀘𑁆𑀙𑀫𑀁𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀫𑁂𑀯 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺, 𑀦𑁄 𑀆𑀫𑀲𑀦𑀁. 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀇𑀢𑁆𑀣𑀻𑀢𑀺 𑀧𑀼𑀭𑀺𑀲𑀦𑁆𑀢𑀭𑀕𑀢𑀸. 𑀇𑀢𑀭𑀸 𑀓𑀼𑀫𑀸𑀭𑀺𑀓𑀸 𑀦𑀸𑀫. 𑀢𑀸𑀲𑀁 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀤𑀸𑀲𑀺𑀤𑀸𑀲𑀯𑀲𑁂𑀦𑁂𑀯 𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀝𑁆𑀝𑀢𑀺. ‘𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑀫𑁆𑀫𑀺’, ‘𑀆𑀭𑀸𑀫𑀺𑀓𑀁 𑀤𑀫𑁆𑀫𑀻’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺. 𑀅𑀚𑁂𑀴𑀓𑀸𑀤𑀻𑀲𑀼𑀧𑀺 𑀔𑁂𑀢𑁆𑀢𑀯𑀢𑁆𑀣𑀼𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀬𑁄 𑀯𑀺𑀦𑀬𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀢𑀢𑁆𑀣 𑀔𑁂𑀢𑁆𑀢𑀁 𑀦𑀸𑀫 𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀺. 𑀯𑀢𑁆𑀣𑀼 𑀦𑀸𑀫 𑀬𑀲𑁆𑀫𑀺𑀁 𑀅𑀧𑀭𑀡𑁆𑀡𑀁 𑀭𑀼𑀳𑀢𑀺. 𑀬𑀢𑁆𑀣 𑀯𑀸 𑀉𑀪𑀬𑀫𑁆𑀧𑀺 ¶ 𑀭𑀼𑀳𑀢𑀺 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀸𑀬 𑀅𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀔𑁂𑀢𑁆𑀢𑀯𑀢𑁆𑀣𑀼𑀲𑀻𑀲𑁂𑀦 𑀘𑁂𑀢𑁆𑀣 𑀯𑀸𑀧𑀺𑀢𑀴𑀸𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑁂𑀯.

𑀤𑀽𑀢𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀤𑀽𑀢𑀓𑀫𑁆𑀫𑀁. 𑀕𑀺𑀳𑀻𑀦𑀁 𑀧𑀳𑀺𑀢𑀁 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁 ¶ . 𑀧𑀳𑀻𑀡𑀕𑀫𑀦𑀁 𑀯𑀼𑀘𑁆𑀘𑀢𑀺 𑀧𑀭𑀖𑀭𑀁 𑀧𑁂𑀲𑀺𑀢𑀲𑁆𑀲 𑀔𑀼𑀤𑁆𑀤𑀓𑀕𑀫𑀦𑀁. 𑀅𑀦𑀼𑀬𑁄𑀕𑁄 𑀦𑀸𑀫 𑀢𑀤𑀼𑀪𑀬𑀓𑀭𑀡𑀁. 𑀢𑀲𑁆𑀫𑀸 𑀤𑀽𑀢𑁂𑀬𑁆𑀬𑀧𑀳𑀻𑀡𑀕𑀫𑀦𑀸𑀦𑀁 𑀅𑀦𑀼𑀕𑁄𑀢𑀺 ¶ 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀬𑀯𑀺𑀓𑁆𑀓𑀬𑀸𑀢𑀺 𑀓𑀬𑀸 𑀘 𑀯𑀺𑀓𑁆𑀓𑀬𑀸 𑀘. 𑀢𑀼𑀮𑀸𑀓𑀽𑀝𑀸𑀤𑀻𑀲𑀼 𑁋 𑀓𑀽𑀝𑀦𑁆𑀢𑀺 𑀯𑀜𑁆𑀘𑀦𑀁. 𑀢𑀢𑁆𑀣 𑀢𑀼𑀮𑀸𑀓𑀽𑀝𑀁 𑀦𑀸𑀫 𑀭𑀽𑀧𑀓𑀽𑀝𑀁, 𑀅𑀗𑁆𑀕𑀓𑀽𑀝𑀁 𑀕𑀳𑀡𑀓𑀽𑀝𑀁, 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑀽𑀝𑀁 𑀦𑀸𑀫 𑀤𑁆𑀯𑁂 𑀢𑀼𑀮𑀸 𑀲𑀫𑀭𑀽𑀧𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀫𑀳𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀔𑀼𑀤𑁆𑀤𑀺𑀓𑀸𑀬 𑀤𑁂𑀢𑀺. 𑀅𑀗𑁆𑀕𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺, 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀕𑀳𑀡𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀫𑀽𑀮𑁂 𑀭𑀚𑁆𑀚𑀼𑀁 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑁂. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀦𑀸𑀫 𑀢𑀼𑀮𑀁 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀬𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑀁 𑀧𑀘𑁆𑀙𑀸𑀪𑀸𑀕𑁂 𑀓𑀭𑁄𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑀪𑀸𑀕𑁂.

𑀓𑀁𑀲𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀧𑀸𑀢𑀺. 𑀢𑀸𑀬 𑀯𑀜𑁆𑀘𑀦𑀁 𑀓𑀁𑀲𑀓𑀽𑀝𑀁. 𑀓𑀣𑀁? 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀓𑀢𑁆𑀯𑀸 𑀅𑀜𑁆𑀜𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀮𑁄𑀳𑀧𑀸𑀢𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀺, 𑀢𑀢𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀟𑁆𑀠𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀓𑀺𑀡𑀣𑀸’𑀢𑀺 𑀯𑀢𑁆𑀯𑀸 𑀅𑀕𑁆𑀖𑁂 𑀧𑀼𑀘𑁆𑀙𑀺𑀢𑁂 𑀲𑀫𑀕𑁆𑀖𑀢𑀭𑀁 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀢𑀢𑁄 𑀢𑁂𑀳𑀺 ‘𑀓𑀣𑀁 𑀇𑀫𑁂𑀲𑀁 𑀲𑀼𑀯𑀡𑁆𑀡𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑁂 ‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀡𑁆𑀳𑀣𑀸’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀲𑀩𑁆𑀩𑀧𑀸𑀢𑀺𑀬𑁄 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀫𑀸𑀦𑀓𑀽𑀝𑀁 𑀦𑀸𑀫 𑀳𑀤𑀬𑀪𑁂𑀤𑀲𑀺𑀔𑀸𑀪𑁂𑀤𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀤𑀬𑀪𑁂𑀤𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀳𑁂𑀝𑁆𑀞𑀸 𑀙𑀺𑀤𑁆𑀤𑁂𑀦 𑀫𑀸𑀦𑁂𑀦 ‘𑀲𑀡𑀺𑀓𑀁 𑀆𑀲𑀺𑀜𑁆𑀘𑀸’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀪𑀸𑀚𑀦𑁂 𑀩𑀳𑀼𑀁 𑀧𑀕𑁆𑀖𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀤𑀤𑀦𑁆𑀢𑁄 𑀙𑀺𑀤𑁆𑀤𑀁 𑀧𑀺𑀥𑀸𑀬 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺. 𑀲𑀺𑀔𑀸𑀪𑁂𑀤𑁄 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀲𑀡𑀺𑀓𑀁 𑀲𑀺𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀤𑀤𑀦𑁆𑀢𑁄 𑀯𑁂𑀕𑁂𑀦 𑀧𑀽𑀭𑁂𑀢𑁆𑀯𑀸 𑀲𑀺𑀔𑀁 𑀙𑀺𑀦𑁆𑀤𑀦𑁆𑀢𑁄 𑀤𑁂𑀢𑀺. 𑀭𑀚𑁆𑀚𑀼𑀪𑁂𑀤𑁄 𑀔𑁂𑀢𑁆𑀢𑀯𑀢𑁆𑀣𑀼𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀳𑀺 𑀔𑁂𑀢𑁆𑀢𑀁 𑀅𑀫𑀳𑀦𑁆𑀢𑀫𑁆𑀧𑀺 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀺𑀦𑀦𑁆𑀢𑀺.

𑀉𑀓𑁆𑀓𑁄𑀝𑀦𑀸𑀤𑀻𑀲𑀼 ¶ 𑁋 𑀉𑀓𑁆𑀓𑁄𑀝𑀦𑀦𑁆𑀢𑀺 𑀅𑀲𑁆𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀸𑀢𑀼𑀁 𑀮𑀜𑁆𑀚𑀕𑁆𑀕𑀳𑀡𑀁. 𑀯𑀜𑁆𑀘𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑁂𑀲𑀁 𑀯𑀜𑁆𑀘𑀦𑀁. 𑀢𑀢𑁆𑀭𑀺𑀤𑀫𑁂𑀓𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀮𑀼𑀤𑁆𑀤𑀓𑁄 𑀫𑀺𑀕𑀜𑁆𑀘 𑀫𑀺𑀕𑀧𑁄𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀫𑁂𑀓𑁄 𑀥𑀼𑀢𑁆𑀢𑁄 𑁋 ‘‘𑀓𑀺𑀁 𑀪𑁄 𑀫𑀺𑀕𑁄 𑀅𑀕𑁆𑀖𑀢𑀺, 𑀓𑀺𑀁 𑀫𑀺𑀕𑀧𑁄𑀢𑀓𑁄’’𑀢𑀺 𑀆𑀳. ‘‘𑀫𑀺𑀕𑁄 𑀤𑁆𑀯𑁂 𑀓𑀳𑀸𑀧𑀡𑁂, 𑀫𑀺𑀕𑀧𑁄𑀢𑀓𑁄 𑀏𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 ¶ , ‘‘𑀦 𑀫𑁂 𑀪𑁄 𑀫𑀺𑀕𑀧𑁄𑀢𑀓𑁂𑀦 𑀅𑀢𑁆𑀣𑁄, 𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀢𑁂𑀦 𑀳𑀺 ‘‘𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀳𑀻’’𑀢𑀺. 𑀲𑁄 𑀆𑀳 𑁋 ‘‘𑀦𑀦𑀼 𑀢𑁂, 𑀪𑁄, 𑀫𑀬𑀸 𑀧𑀞𑀫𑀁 ¶ 𑀏𑀓𑁄 𑀓𑀳𑀸𑀧𑀡𑁄 𑀤𑀺𑀦𑁆𑀦𑁄’’𑀢𑀺? ‘‘𑀆𑀫 𑀤𑀺𑀦𑁆𑀦𑁄’’𑀢𑀺. 𑀇𑀤𑀫𑁆𑀧𑀺 𑀫𑀺𑀕𑀧𑁄𑀢𑀓𑀁 𑀕𑀡𑁆𑀳, 𑀏𑀯𑀁 𑀲𑁄 𑀘 𑀓𑀳𑀸𑀧𑀡𑁄 𑀅𑀬𑀜𑁆𑀘 𑀓𑀳𑀸𑀧𑀡𑀕𑁆𑀖𑀡𑀓𑁄 𑀫𑀺𑀕𑀧𑁄𑀢𑀓𑁄𑀢𑀺 𑀤𑁆𑀯𑁂 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀲𑁄 ‘‘𑀓𑀸𑀭𑀡𑀁 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀫𑀺𑀕𑀁 𑀅𑀤𑀸𑀲𑀻𑀢𑀺.

𑀦𑀺𑀓𑀢𑀻𑀢𑀺 𑀬𑁄𑀕𑀯𑀲𑁂𑀦 𑀯𑀸 𑀫𑀸𑀬𑀸𑀯𑀲𑁂𑀦 𑀯𑀸 𑀅𑀧𑀸𑀫𑀗𑁆𑀕𑀁 𑀧𑀸𑀫𑀗𑁆𑀕𑀦𑁆𑀢𑀺, 𑀅𑀫𑀡𑀺𑀁 𑀫𑀡𑀻𑀢𑀺, 𑀅𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀦𑁆𑀢𑀺 𑀓𑀢𑁆𑀯𑀸 𑀧𑀢𑀺𑀭𑀽𑀧𑀓𑁂𑀦 𑀯𑀜𑁆𑀘𑀦𑀁. 𑀲𑀸𑀘𑀺𑀬𑁄𑀕𑁄𑀢𑀺 𑀓𑀼𑀝𑀺𑀮𑀬𑁄𑀕𑁄. 𑀏𑀢𑁂𑀲𑀁𑀬𑁂𑀯 𑀉𑀓𑁆𑀓𑁄𑀝𑀦𑀸𑀤𑀻𑀦𑀫𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀉𑀓𑁆𑀓𑁄𑀝𑀦𑀲𑀸𑀘𑀺𑀬𑁄𑀕𑁄 𑀯𑀜𑁆𑀘𑀦𑀲𑀸𑀘𑀺𑀬𑁄𑀕𑁄 𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀅𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 ‘𑀲𑀸𑀘𑀺𑀬𑁄𑀕𑁄’𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀯𑀜𑁆𑀘𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁.

𑀙𑁂𑀤𑀦𑀸𑀤𑀻𑀲𑀼 𑁋 𑀙𑁂𑀤𑀦𑀦𑁆𑀢𑀺 𑀳𑀢𑁆𑀣𑀘𑁆𑀙𑁂𑀤𑀦𑀸𑀤𑀺. 𑀯𑀥𑁄𑀢𑀺 𑀫𑀸𑀭𑀡𑀁. 𑀩𑀦𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀦𑀁. 𑀯𑀺𑀧𑀭𑀸𑀫𑁄𑀲𑁄𑀢𑀺 𑀳𑀺𑀫𑀯𑀺𑀧𑀭𑀸𑀫𑁄𑀲𑁄, 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄𑀢𑀺 𑀤𑀼𑀯𑀺𑀥𑁄. 𑀬𑀜𑁆𑀳𑀺 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀚𑀦𑀁 𑀫𑀼𑀲𑀦𑁆𑀢𑀺, 𑀅𑀬𑀁 𑀳𑀺𑀫𑀯𑀺𑀧𑀭𑀸𑀫𑁄𑀲𑁄. 𑀬𑀁 𑀕𑀼𑀫𑁆𑀩𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀸 𑀫𑀼𑀲𑀦𑁆𑀢𑀺, 𑀅𑀬𑀁 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄. 𑀆𑀮𑁄𑀧𑁄 𑀯𑀼𑀘𑁆𑀘𑀢𑀺 𑀕𑀸𑀫𑀦𑀺𑀕𑀫𑀸𑀤𑀻𑀦𑀁 𑀯𑀺𑀮𑁄𑀧𑀓𑀭𑀡𑀁. 𑀲𑀳𑀲𑀸𑀓𑀸𑀭𑁄𑀢𑀺 𑀲𑀸𑀳𑀲𑀺𑀓𑀓𑀺𑀭𑀺𑀬𑀸. 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀉𑀭𑁂 𑀲𑀢𑁆𑀣𑀁 𑀞𑀧𑁂𑀢𑁆𑀯𑀸 𑀇𑀘𑁆𑀙𑀺𑀢𑀪𑀡𑁆𑀟𑀕𑁆𑀕𑀳𑀡𑀁. 𑀏𑀯𑀫𑁂𑀢𑀲𑁆𑀫𑀸 𑀙𑁂𑀤𑀦…𑀧𑁂… 𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺.

𑁧𑁮𑁦. 𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀲𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀤𑁆𑀯𑀸𑀤𑀲𑀯𑀺𑀥𑁂𑀦 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦𑀸𑀢𑀺 𑀓𑀸𑀬𑀁 𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦. 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦𑀸𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦. 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻𑀢𑀺 𑀅𑀝𑁆𑀞𑀯𑀺𑀥𑀁 𑀪𑀺𑀓𑁆𑀔𑀼 𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀓𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸𑀯 𑀓𑀸𑀬𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸𑀯 𑀕𑀘𑁆𑀙𑀢𑀺. ‘‘𑀫𑀫 ¶ 𑀯𑀺𑀳𑀸𑀭𑁄 𑀧𑀭𑀺𑀯𑁂𑀡𑀁 𑀉𑀧𑀝𑁆𑀞𑀸𑀓𑁄’’𑀢𑀺 𑀲𑀗𑁆𑀕𑁄 𑀯𑀸 𑀩𑀤𑁆𑀥𑁄 𑀯𑀸 𑀦 𑀳𑁄𑀢𑀺. 𑀲𑁄 𑀚𑀺𑀬𑀸 𑀫𑀼𑀢𑁆𑀢𑀲𑀭𑁄 𑀯𑀺𑀬 𑀬𑀽𑀣𑀸 𑀧𑀓𑁆𑀓𑀦𑁆𑀢𑁄, 𑀫𑀢𑁆𑀢𑀳𑀢𑁆𑀣𑀻 𑀯𑀺𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀲𑁂𑀦𑀸𑀲𑀦𑀁 𑀯𑀦𑀲𑀡𑁆𑀟𑀁 𑀭𑀼𑀓𑁆𑀔𑀫𑀽𑀮𑀁 𑀯𑀦𑀧𑀢𑁆𑀣𑀁 𑀧𑀩𑁆𑀪𑀸𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀏𑀓𑁄𑀯 𑀢𑀺𑀝𑁆𑀞𑀢𑀺, 𑀏𑀓𑁄𑀯 𑀦𑀺𑀲𑀻𑀤𑀢𑀺. 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑁄𑀯 𑀅𑀤𑀼𑀢𑀺𑀬𑁄.

‘‘𑀘𑀸𑀢𑀼𑀤𑁆𑀤𑀺𑀲𑁄 ¶ 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺,

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 ¶ 𑀲𑀳𑀺𑀢𑀸 𑀅𑀙𑀫𑁆𑀪𑀻,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁪𑁨);

𑀏𑀯𑀁 𑀯𑀡𑁆𑀡𑀺𑀢𑀁 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀢𑀁 𑀆𑀧𑀚𑁆𑀚𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄, ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺 𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄. 𑀟𑁂𑀢𑀻𑀢𑀺 𑀉𑀧𑁆𑀧𑀢𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀲𑀓𑀼𑀡𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀭𑀼𑀓𑁆𑀔𑁄 𑀧𑀭𑀺𑀧𑀓𑁆𑀓𑀨𑀮𑁄’’𑀢𑀺 𑀜𑀢𑁆𑀯𑀸 𑀦𑀸𑀦𑀸𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀦𑀔𑀧𑀓𑁆𑀔𑀢𑀼𑀡𑁆𑀟𑀸𑀤𑀻𑀳𑀺 𑀢𑀲𑁆𑀲 𑀨𑀮𑀸𑀦𑀺 𑀯𑀺𑀚𑁆𑀛𑀦𑁆𑀢𑀸 𑀯𑀺𑀥𑀼𑀦𑀦𑁆𑀢𑀸 𑀔𑀸𑀤𑀦𑁆𑀢𑀺. ‘‘𑀇𑀤𑀁 𑀅𑀚𑁆𑀚𑀢𑀦𑀸𑀬, 𑀇𑀤𑀁 𑀲𑁆𑀯𑀸𑀢𑀦𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑁂𑀲𑀁 𑀦 𑀳𑁄𑀢𑀺. 𑀨𑀮𑁂 𑀧𑀦 𑀔𑀻𑀡𑁂 𑀦𑁂𑀯 𑀭𑀼𑀓𑁆𑀔𑀲𑁆𑀲 𑀆𑀭𑀓𑁆𑀔𑀁 𑀞𑀧𑁂𑀦𑁆𑀢𑀺, 𑀦 𑀢𑀢𑁆𑀣 𑀧𑀢𑁆𑀢𑀁 𑀯𑀸 𑀦𑀔𑀁 𑀯𑀸 𑀢𑀼𑀡𑁆𑀟𑀁 𑀯𑀸 𑀞𑀧𑁂𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀬𑁄 𑀬𑀁 𑀤𑀺𑀲𑀸𑀪𑀸𑀕𑀁 𑀇𑀘𑁆𑀙𑀢𑀺, 𑀲𑁄 𑀢𑁂𑀦 𑀲𑀧𑀢𑁆𑀢𑀪𑀸𑀭𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀅𑀬𑀁 𑀪𑀺𑀓𑁆𑀔𑀼 𑀦𑀺𑀲𑁆𑀲𑀗𑁆𑀕𑁄 𑀦𑀺𑀭𑀧𑁂𑀓𑁆𑀔𑁄𑀬𑁂𑀯 𑀧𑀓𑁆𑀓𑀫𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻𑀢𑀺. 𑀅𑀭𑀺𑀬𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑁂𑀦. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀓𑁂 𑀅𑀢𑁆𑀢𑀪𑀸𑀯𑁂. 𑀅𑀦𑀯𑀚𑁆𑀚𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑁄𑀲𑀲𑀼𑀔𑀁.

𑁧𑁮𑁧. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀩𑁆𑀬𑀸𑀲𑁂𑀓𑀲𑀼𑀔𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑀺𑀢𑁆𑀢𑀲𑀼𑀔𑀁. 𑀅𑀯𑀺𑀓𑀺𑀡𑁆𑀡𑀲𑀼𑀔𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀔𑀜𑁆𑀳𑀺 𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀫𑀢𑁆𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀢𑀸𑀬 𑀅𑀯𑀺𑀓𑀺𑀡𑁆𑀡𑀁 𑀳𑁄𑀢𑀺.

𑁧𑁮𑁨. 𑀲𑁄 ¶ 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀲𑁄 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀇𑀫𑁂𑀲𑀼 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀛𑀸𑀦𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀫𑁂𑀯.

𑀲𑁄 𑀇𑀫𑀺𑀦𑀸 𑀘𑀸𑀢𑀺𑀆𑀤𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀅𑀭𑀜𑁆𑀜𑀯𑀸𑀲𑀲𑁆𑀲 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀢𑁆𑀣𑀺 ¶ , 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀦 𑀇𑀚𑁆𑀛𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀯𑀸 𑀯𑀦𑀘𑀭𑀓𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀅𑀭𑀜𑁆𑀜𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀓𑀺𑀁 𑀏𑀯𑀭𑀽𑀧𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑀯𑀸𑀲𑁂𑀦𑀸’’𑀢𑀺 𑀪𑁂𑀭𑀯𑀁 𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺. 𑀳𑀢𑁆𑀣𑁂𑀳𑀺 𑀲𑀻𑀲𑀁 𑀧𑀳𑀭𑀺𑀢𑁆𑀯𑀸 𑀧𑀮𑀸𑀬𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀺 ¶ . ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀧𑀸𑀧𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀅𑀬𑀲𑁄 𑀧𑀢𑁆𑀣𑀭𑀢𑀺. 𑀬𑀲𑁆𑀲 𑀧𑀦𑁂𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀢𑁆𑀣𑀺, 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀇𑀚𑁆𑀛𑀢𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀓𑀺𑀜𑁆𑀘𑀺 𑀓𑀸𑀴𑀓𑀁 𑀯𑀸 𑀢𑀺𑀮𑀓𑀁 𑀯𑀸 𑀅𑀧𑀲𑁆𑀲𑀦𑁆𑀢𑁄 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀅𑀭𑀜𑁆𑀜𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀇𑀢𑀺𑀲𑁆𑀲 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀩𑀺𑀦𑁆𑀤𑀼 𑀯𑀺𑀬 𑀬𑀲𑁄 𑀯𑀺𑀢𑁆𑀣𑀸𑀭𑀺𑀓𑁄 𑀳𑁄𑀢𑀺. 𑀯𑀺𑀯𑀺𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀢𑀓𑁂 𑀞𑀸𑀦𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯.

𑁧𑁮𑁫. 𑀢𑀢𑀺𑀬𑀯𑀺𑀚𑁆𑀚𑀸𑀬 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀢𑁆𑀣𑀸𑀬. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀆𑀲𑀯𑀸𑀦𑀁 𑀯𑀺𑀦𑀸𑀲𑀦𑀢𑁄 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀘𑁂𑀢𑀁 𑀜𑀸𑀡𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺. 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑁋 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀭𑀲𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀁 𑀢𑀡𑁆𑀳𑀁 𑁋 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺; 𑀢𑀤𑀼𑀪𑀬𑀫𑁆𑀧𑀺 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑁋 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺; 𑀢𑀲𑁆𑀲 𑀘 𑀲𑀫𑁆𑀧𑀸𑀧𑀓𑀁 𑀅𑀭𑀺𑀬𑀫𑀕𑁆𑀕𑀁 𑁋 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀲𑀭𑀽𑀧𑀢𑁄 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂 𑀆𑀲𑀯𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 ¶ 𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀺. 𑀓𑀸𑀫𑀸𑀲𑀯𑀸𑀢𑀺 𑀓𑀸𑀫𑀸𑀲𑀯𑀢𑁄. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀫𑀕𑁆𑀕𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀦𑁆𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀤𑀲𑁆𑀲𑁂𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺𑀁. 𑀢𑁂𑀦 𑀳𑀺 𑀜𑀸𑀡𑁂𑀦 𑀲𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘𑀔𑀻𑀡𑀸 𑀚𑀸𑀢𑀻’𑀢𑀺𑀆𑀤𑀻𑀦𑀺 𑀧𑀚𑀸𑀦𑀸𑀢𑀺. 𑀯𑀼𑀲𑀺𑀢𑀦𑁆𑀢𑀺 𑀯𑀼𑀝𑁆𑀞𑀁 𑀧𑀭𑀺𑀯𑀼𑀝𑁆𑀞𑀁 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑁂𑀓𑁆𑀔𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫. 𑀔𑀻𑀡𑀸𑀲𑀯𑁄 𑀯𑀼𑀝𑁆𑀞𑀯𑀸𑀲𑁄. 𑀢𑀲𑁆𑀫𑀸 𑀲𑁄 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 ¶ 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺; 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀲𑁄 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄. ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 ‘‘𑀇𑀤𑀸𑀦𑀺 𑀧𑀼𑀦 𑀏𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀧𑀚𑀸𑀦𑀸𑀢𑀺.

𑁧𑁮𑁬. 𑀲𑀭𑀸𑀕𑀸𑀤𑀻𑀲𑀼 𑁋 𑀅𑀧𑁆𑀧𑀳𑀻𑀦𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀯𑀸 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀯𑀸 𑀅𑀧𑁆𑀧𑀳𑀻𑀦𑁄.

𑁧𑁮𑁭. 𑀮𑀸𑀪𑀻 𑀳𑁄𑀢𑀻𑀢𑀺𑀆𑀤𑀻𑀲𑀼 𑁋 𑀮𑀸𑀪𑀻𑀢𑀺 𑀮𑀸𑀪𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀞𑀺𑀢𑁄. 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀲𑁆𑀲𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀲𑁆𑀲 𑀘𑁂𑀢𑁄𑀲𑀫𑀣𑀲𑁆𑀲. 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀔𑀦𑁆𑀥𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬. 𑀭𑀽𑀧𑀲𑀳𑀕𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀦𑀁. 𑀅𑀭𑀽𑀧𑀲𑀳𑀕𑀢𑀸𑀦𑀦𑁆𑀢𑀺 𑀦 𑀭𑀽𑀧𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁. 𑀏𑀢𑁆𑀣 𑀘 𑀧𑀞𑀫𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄. 𑀤𑀼𑀢𑀺𑀬𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀅𑀭𑀺𑀬𑀲𑀸𑀯𑀓𑁄. 𑀢𑀢𑀺𑀬𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 ¶ 𑀅𑀭𑀺𑀬𑀲𑀸𑀯𑀓𑁄. 𑀘𑀢𑀼𑀢𑁆𑀣𑁄 𑀮𑁄𑀓𑀺𑀬𑀫𑀳𑀸𑀚𑀦𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁮𑁮. 𑀅𑀦𑀼𑀲𑁄𑀢𑀕𑀸𑀫𑀻𑀆𑀤𑀻𑀲𑀼 𑁋 𑀅𑀦𑀼𑀲𑁄𑀢𑀕𑀸𑀫𑀻𑀢𑀺 𑀯𑀝𑁆𑀝𑀲𑁄𑀢𑀁 𑀅𑀦𑀼𑀕𑀢𑁄, 𑀯𑀝𑁆𑀝𑀲𑁄𑀢𑁂 𑀦𑀺𑀫𑀼𑀕𑁆𑀕𑁄 𑀧𑀼𑀣𑀼𑀚𑁆𑀚𑀦𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀲𑁄𑀢𑀕𑀸𑀫𑀻𑀢𑀺 𑀧𑀝𑀺𑀲𑁄𑀢𑀕𑀫𑀦𑁄 ¶ . 𑀅𑀦𑀼𑀲𑁄𑀢𑀁 𑀅𑀕𑀦𑁆𑀢𑁆𑀯𑀸 𑀧𑀝𑀺𑀲𑁄𑀢𑀁 𑀕𑀘𑁆𑀙𑀦𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀧𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀻𑀢𑀺 𑀧𑀜𑁆𑀜𑀢𑁆𑀢𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀦 𑀓𑀭𑁄𑀢𑀺. 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦𑀸𑀢𑀺 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑁂 𑀲𑀢𑀺 𑀉𑀧𑁆𑀧𑀦𑁆𑀦𑁂𑀦 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀫𑁆𑀧𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀏𑀓𑀸𑀬𑀧𑀺 𑀅𑀦𑀽𑀦𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁. 𑀇𑀫𑀺𑀦𑀸 𑀯𑀸𑀭𑁂𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀓𑀣𑀺𑀢𑀸. 𑀓𑀺𑀁 𑀧𑀦 𑀢𑁂 𑀭𑀼𑀤𑀦𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻𑀢𑀺? 𑀆𑀫. 𑀓𑀺𑀮𑁂𑀲𑀭𑁄𑀤𑀦𑁂𑀦 𑀭𑀼𑀤𑀦𑁆𑀢𑀸 𑀘𑀭𑀦𑁆𑀢𑀺 𑀦𑀸𑀫. 𑀲𑀻𑀮𑀲𑀫𑁆𑀧𑀦𑁆𑀦𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑁄.

𑀞𑀺𑀢𑀢𑁆𑀢𑁄𑀢𑀺 𑀞𑀺𑀢𑀲𑀪𑀸𑀯𑁄. 𑀅𑀦𑀸𑀕𑀸𑀫𑀻𑀢𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂𑀳𑀺 𑀅𑀓𑀫𑁆𑀧𑀦𑀻𑀬𑀘𑀺𑀢𑁆𑀢𑀢𑀸𑀬 𑀘 𑀢𑀫𑁆𑀳𑀸 𑀮𑁄𑀓𑀸 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀘 𑀞𑀺𑀢𑀲𑀪𑀸𑀯𑁄 𑀦𑀸𑀫. 𑀢𑀺𑀡𑁆𑀡𑁄𑀢𑀺 𑀢𑀡𑁆𑀳𑀸𑀲𑁄𑀢𑀁 𑀉𑀢𑁆𑀢𑀺𑀡𑁆𑀡𑁄. 𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀁 ¶ 𑀕𑀢𑁄. 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀣𑀮𑁂 𑀢𑀺𑀝𑁆𑀞𑀢𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀜𑀸𑀡𑀁. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀔𑀻𑀡𑀸𑀲𑀯𑁄 ‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀩𑀸𑀳𑀺𑀢𑀧𑀸𑀧𑀢𑀸𑀬 𑀳𑀺 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫.

𑁧𑁮𑁯. 𑀅𑀧𑁆𑀧𑀲𑁆𑀲𑀼𑀢𑀸𑀤𑀻𑀲𑀼 𑁋 𑀅𑀧𑁆𑀧𑀓𑀁 𑀲𑀼𑀢𑀁 𑀳𑁄𑀢𑀻𑀢𑀺 𑀦𑀯𑀗𑁆𑀕𑁂 𑀲𑀢𑁆𑀣𑀼𑀲𑀸𑀲𑀦𑁂 𑀓𑀺𑀜𑁆𑀘𑀺𑀤𑁂𑀯 𑀣𑁄𑀓𑀁 𑀲𑀼𑀢𑀁 𑀳𑁄𑀢𑀺. 𑀦 𑀅𑀢𑁆𑀣𑀫𑀜𑁆𑀜𑀸𑀬, 𑀦 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀦 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁯𑁦. 𑀲𑀫𑀡𑀫𑀘𑀮𑀸𑀤𑀻𑀲𑀼 𑁋 𑀲𑀫𑀡𑀫𑀘𑀮𑁄𑀢𑀺 𑀲𑀫𑀡𑀅𑀘𑀮𑁄, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀺𑀘𑁆𑀘𑀮𑀲𑀫𑀡𑁄, 𑀣𑀺𑀭𑀲𑀫𑀡𑁄𑀢𑀺 𑀅𑀢𑁆𑀣𑁄 ¶ . 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑁄𑀢𑀸𑀧𑀦𑁆𑀦𑁄 𑀲𑀸𑀲𑀦𑁂 𑀫𑀽𑀮𑀚𑀸𑀢𑀸𑀬 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 ‘𑀲𑀫𑀡𑀫𑀘𑀮𑁄’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑀤𑀸𑀕𑀸𑀫𑀻 𑀧𑀦 𑀭𑀚𑁆𑀚𑀦𑀓𑀺𑀮𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑀫𑀡𑀧𑀤𑀼𑀫𑁄𑀢𑀺 𑀯𑀼𑀢𑁆𑀢𑁄. 𑀭𑀢𑁆𑀢𑀝𑁆𑀞𑁄 𑀳𑀺 𑀇𑀥 𑀧𑀤𑀼𑀫𑀝𑁆𑀞𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀅𑀦𑀸𑀕𑀸𑀫𑀻 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑀲𑁆𑀲 𑀭𑀚𑁆𑀚𑀦𑀓𑀺𑀮𑁂𑀲𑀲𑁆𑀲 𑀦𑀢𑁆𑀣𑀺𑀢𑀸𑀬 𑀲𑀫𑀡𑀧𑀼𑀡𑁆𑀟𑀭𑀻𑀓𑁄𑀢𑀺 𑀯𑀼𑀢𑁆𑀢𑁄. 𑀧𑀡𑁆𑀟𑀭𑀝𑁆𑀞𑁄 𑀳𑀺 𑀇𑀥 𑀧𑀼𑀡𑁆𑀟𑀭𑀻𑀓𑀝𑁆𑀞𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ¶ . 𑀔𑀻𑀡𑀸𑀲𑀯𑁄 𑀘 𑀣𑀤𑁆𑀥𑀪𑀸𑀯𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑁄. 𑀅𑀧𑁆𑀧𑀤𑀼𑀓𑁆𑀔𑀝𑁆𑀞𑁂𑀦𑀧𑀺 𑀘𑁂𑀲 𑀲𑀫𑀡𑀲𑀼𑀔𑀼𑀫𑀸𑀮𑁄𑀬𑁂𑀯𑀸𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁧. 𑀧𑀜𑁆𑀘𑀓𑁂 𑁋 𑀢𑀢𑁆𑀭𑀸𑀢𑀺 𑀢𑁂𑀲𑀼 ‘‘𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑀧𑀼𑀕𑁆𑀕𑀮𑁂𑀲𑀼. 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁. 𑀆𑀭𑀪𑀢𑀻𑀢𑀺 𑀏𑀢𑁆𑀣 𑀆𑀭𑀫𑁆𑀪𑀲𑀤𑁆𑀤𑁄 𑀓𑀫𑁆𑀫𑀓𑀺𑀭𑀺𑀬𑀸𑀳𑀺𑀁𑀲𑀦𑀯𑀻𑀭𑀺𑀬𑀯𑀺𑀓𑁄𑀧𑀦𑀸𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂𑀲𑀼 𑀯𑀢𑁆𑀢𑀢𑀺. 𑀢𑀣𑀸 𑀳𑁂𑀲 ‘‘𑀬𑀁𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸’’𑀢𑀺 (𑀲𑀼. 𑀦𑀺. 𑁭𑁪𑁮) 𑀓𑀫𑁆𑀫𑁂 𑀆𑀕𑀢𑁄. ‘‘𑀫𑀳𑀸𑀬𑀜𑁆𑀜𑀸 𑀫𑀳𑀸𑀭𑀫𑁆𑀪𑀸, 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸’’𑀢𑀺 (𑀅. 𑀦𑀺. 𑁪.𑁩𑁯) 𑀓𑀺𑀭𑀺𑀬𑀸𑀬𑀁. ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 ¶ 𑀧𑀸𑀡𑀁 𑀆𑀭𑀪𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁫𑁧-𑁫𑁨) 𑀳𑀺𑀁𑀲𑀦𑁂. ‘‘𑀆𑀭𑀪𑀣, 𑀦𑀺𑀓𑁆𑀔𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 (𑀲𑀁. 𑀦𑀺. 𑁧.𑁧𑁮𑁫) 𑀯𑀻𑀭𑀺𑀬𑁂. ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪; 𑀫. 𑀦𑀺. 𑁧.𑁨𑁯𑁩) 𑀯𑀺𑀓𑁄𑀧𑀦𑁂. ‘‘𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁨) 𑀅𑀬𑀁 𑀧𑀦 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀆𑀕𑀢𑁄. 𑀢𑀲𑁆𑀫𑀸 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀭𑀪𑀢𑀺 𑀘𑁂𑀯 𑀢𑀧𑁆𑀧𑀘𑁆𑀘𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 𑀬𑀣𑀸𑀲𑀪𑀸𑀯𑀢𑁄 𑀦 𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀅𑀲𑁆𑀲, 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀏𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀧𑀢𑁆𑀯𑀸 𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀅𑀭𑀳𑀢𑁆𑀢𑀫𑀕𑁆𑀕𑀁. 𑀨𑀮𑀧𑁆𑀧𑀢𑁆𑀢𑀲𑁆𑀲 𑀧𑀦 𑀦𑀺𑀭𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀇𑀥 𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 𑀨𑀮𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀪𑀚𑀸𑀢𑀺 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀲𑀫𑁆𑀪𑀯𑀸. 𑀯𑀺𑀧𑁆𑀧𑀝𑀺𑀲𑀸𑀭𑀚𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀚𑀸𑀢𑀸. 𑀧𑀯𑀟𑁆𑀠𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑁂𑀦 𑀯𑀟𑁆𑀠𑀦𑁆𑀢𑀺. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀲𑀸𑀥𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯 𑀅𑀧𑀭𑀤𑁆𑀥𑀜𑁆𑀘 𑀯𑀢 𑀆𑀬𑀲𑁆𑀫𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀬𑀸𑀘𑀸𑀫 𑁋 ‘‘𑀤𑁂𑀲𑁂𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀤𑁂𑀲𑀦𑀸𑀬, 𑀯𑀼𑀝𑁆𑀞𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀯𑀼𑀝𑁆𑀞𑀸𑀦𑁂𑀦, 𑀆𑀯𑀺𑀓𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀆𑀯𑀺𑀓𑀺𑀭𑀺𑀬𑀸𑀬, 𑀆𑀭𑀫𑁆𑀪𑀚𑁂 𑀆𑀲𑀯𑁂 ¶ 𑀧𑀳𑀸𑀬, 𑀲𑀼𑀤𑁆𑀥𑀦𑁆𑀢𑁂 𑀞𑀺𑀢𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑀚𑁂 𑀆𑀲𑀯𑁂 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀽’’𑀢𑀺. 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦𑀸𑀢𑀺 𑀏𑀢𑁂𑀦 𑀧𑀜𑁆𑀘𑀫𑁂𑀦 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑁂𑀦. 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀲𑀫𑀪𑀸𑀯𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀔𑀻𑀡𑀸𑀲𑀯𑁂𑀦 𑀑𑀯𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀢𑀁 𑀧𑀦 𑀤𑁂𑀲𑁂𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀁 𑀧𑀭𑀺𑀬𑁂𑀲𑀢𑀺. 𑀢𑀲𑁆𑀫𑀸 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀼𑀝𑁆𑀞𑀺𑀢𑀢𑁆𑀢𑀸 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀆𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑀁 𑀆𑀧𑀢𑁆𑀢𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀓𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀙𑀸 𑀓𑀺𑀜𑁆𑀘𑀸𑀧𑀺 𑀦𑀸𑀧𑀚𑁆𑀚𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀦 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀓𑀢𑀫𑁄 𑀧𑀦𑁂𑀲 𑀧𑀼𑀕𑁆𑀕𑀮𑁄𑀢𑀺? 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀧𑀼𑀕𑁆𑀕𑀮𑁄. 𑀲𑁄 𑀳𑀺 ‘‘𑀓𑀺𑀁 𑀫𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 ¶ 𑀯𑀺𑀲𑀼𑀤𑁆𑀥𑀲𑀻𑀮𑁄𑀧𑀺 𑀧𑀝𑀺𑀧𑀢𑁆𑀢𑀺𑀁 𑀦 𑀧𑀽𑀭𑁂𑀢𑀺. 𑀲𑁄𑀧𑀺 ‘‘𑀓𑀺𑀫𑀢𑁆𑀣𑀁 𑀆𑀬𑀲𑁆𑀫𑀸 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀸𑀫 𑀕𑀢𑀺 𑀅𑀦𑀺𑀩𑀤𑁆𑀥𑀸. 𑀆𑀬𑀲𑁆𑀫𑀸 𑀳𑀺 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑀁 𑀮𑀪𑁂𑀬𑁆𑀬𑀧𑀺 𑀦 𑀮𑀪𑁂𑀬𑁆𑀬𑀸𑀧𑀻𑀢𑀺 𑀅𑀭𑀳𑀢𑁆𑀢𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀳𑀻’’𑀢𑀺 𑀑𑀯𑀤𑀺𑀢𑀩𑁆𑀩𑁄𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁯𑁨. 𑀤𑀢𑁆𑀯𑀸 ¶ 𑀅𑀯𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼 𑁋 𑀏𑀓𑁄 𑀪𑀺𑀓𑁆𑀔𑀼 𑀫𑀳𑀸𑀧𑀼𑀜𑁆𑀜𑁄 𑀘𑀢𑀼𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺. 𑀲𑁄 𑀘𑀻𑀯𑀭𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀧𑁆𑀧𑀧𑀼𑀜𑁆𑀜𑀁 𑀆𑀧𑀼𑀘𑁆𑀙𑀢𑀺. 𑀲𑁄𑀧𑀺 𑀢𑀲𑁆𑀫𑀺𑀁 𑀧𑀼𑀦𑀧𑁆𑀧𑀼𑀦𑀁 𑀆𑀧𑀼𑀘𑁆𑀙𑀦𑁆𑀢𑁂𑀧𑀺 𑀕𑀡𑁆𑀳𑀸𑀢𑀺𑀬𑁂𑀯. 𑀅𑀣𑀲𑁆𑀲 𑀇𑀢𑀭𑁄 𑀣𑁄𑀓𑀁 𑀓𑀼𑀧𑀺𑀢𑁄 𑀳𑀼𑀢𑁆𑀯𑀸 𑀫𑀗𑁆𑀓𑀼𑀪𑀸𑀯𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀯𑀤𑀢𑀺 𑁋 ‘‘𑀅𑀬𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀻𑀯𑀭𑀸𑀤𑀻𑀦𑀺 𑀦 𑀮𑀪𑀢𑀺, 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀢𑀻’’𑀢𑀺. 𑀏𑀯𑀁 𑀧𑀼𑀕𑁆𑀕𑀮𑁄 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺 𑀦𑀸𑀫. 𑀏𑀓𑁄 𑀧𑀦 𑀏𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀧𑀼𑀩𑁆𑀩𑁂 𑀢𑀁 𑀧𑀼𑀕𑁆𑀕𑀮𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀢𑀺, 𑀆𑀲𑀦𑀸𑀧𑀺 𑀦 𑀯𑀼𑀝𑁆𑀞𑀸𑀢𑀺, 𑀉𑀧𑀝𑁆𑀞𑀸𑀦𑀫𑁆𑀧𑀺 𑀦 𑀕𑀘𑁆𑀙𑀢𑀺. 𑀏𑀯𑀁 𑀧𑀼𑀕𑁆𑀕𑀮𑁄 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺 𑀦𑀸𑀫.

𑀆𑀥𑁂𑀬𑁆𑀬𑀫𑀼𑀔𑁄𑀢𑀺 ¶ 𑀆𑀤𑀺𑀢𑁄 𑀥𑁂𑀬𑁆𑀬𑀫𑀼𑀔𑁄. 𑀧𑀞𑀫𑀯𑀘𑀦𑀲𑁆𑀫𑀺𑀁𑀬𑁂𑀯 𑀞𑀧𑀺𑀢𑀫𑀼𑀔𑁄𑀢𑀺 𑀅𑀢𑁆𑀣𑁄. 𑀅𑀥𑀺𑀫𑀼𑀘𑁆𑀘𑀺𑀢𑀸 𑀳𑁄𑀢𑀻𑀢𑀺 𑀲𑀤𑁆𑀥𑀸𑀢𑀸 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀏𑀓𑁄 𑀧𑀼𑀕𑁆𑀕𑀮𑁄 𑀲𑀸𑀭𑀼𑀧𑁆𑀧𑀁𑀬𑁂𑀯 𑀪𑀺𑀓𑁆𑀔𑀼𑀁 ‘𑀅𑀲𑀸𑀭𑀼𑀧𑁆𑀧𑁄 𑀏𑀲𑁄’𑀢𑀺 𑀓𑀣𑁂𑀢𑀺, 𑀢𑀁 𑀲𑀼𑀢𑁆𑀯𑀸 𑀏𑀲 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀧𑀼𑀦 𑀅𑀜𑁆𑀜𑁂𑀦 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 ‘𑀲𑀸𑀭𑀼𑀧𑁆𑀧𑁄 𑀅𑀬’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀯𑀘𑀦𑀁 𑀦 𑀕𑀡𑁆𑀳𑀸𑀢𑀺 ‘‘𑀅𑀲𑀼𑀓𑁂𑀦 𑀦𑀸𑀫 ‘𑀅𑀲𑀸𑀭𑀼𑀧𑁆𑀧𑁄 𑀅𑀬’𑀦𑁆𑀢𑀺 𑀅𑀫𑁆𑀳𑀸𑀓𑀁 𑀓𑀣𑀺𑀢’’𑀦𑁆𑀢𑀺 𑀧𑀼𑀭𑀺𑀫𑀪𑀺𑀓𑁆𑀔𑀼𑀦𑁄𑀯 𑀓𑀣𑀁 𑀕𑀡𑁆𑀳𑀸𑀢𑀺. 𑀅𑀧𑀭𑁄𑀧𑀺𑀲𑁆𑀲 𑀤𑀼𑀲𑁆𑀲𑀻𑀮𑀁 ‘𑀲𑀻𑀮𑀯𑀸’𑀢𑀺 𑀓𑀣𑁂𑀢𑀺. 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦 ‘‘𑀅𑀲𑀸𑀭𑀼𑀧𑁆𑀧𑁄 𑀏𑀲 𑀪𑀺𑀓𑁆𑀔𑀼, 𑀦𑀸𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀲𑁆𑀲𑁂𑀯 𑀓𑀣𑀁 𑀕𑀡𑁆𑀳𑀸𑀢𑀺. 𑀅𑀧𑀭𑁄 𑀯𑀡𑁆𑀡𑀫𑁆𑀧𑀺 𑀓𑀣𑀺𑀢𑀁 𑀕𑀡𑁆𑀳𑀸𑀢𑀺, 𑀅𑀯𑀡𑁆𑀡𑀫𑁆𑀧𑀺 𑀓𑀣𑀺𑀢𑀁 𑀕𑀡𑁆𑀳𑀸𑀢𑀺𑀬𑁂𑀯. 𑀅𑀬𑀫𑁆𑀧𑀺 𑀆𑀥𑁂𑀬𑁆𑀬𑀫𑀼𑀔𑁄𑀬𑁂𑀯 𑀦𑀸𑀫. 𑀆𑀥𑀸𑀢𑀩𑁆𑀩𑀫𑀼𑀔𑁄 𑀬𑀁 𑀬𑀁 𑀲𑀼𑀡𑀸𑀢𑀺, 𑀢𑀢𑁆𑀣 𑀢𑀢𑁆𑀣 𑀞𑀧𑀺𑀢𑀫𑀼𑀔𑁄𑀢𑀺 𑀅𑀢𑁆𑀣𑁄.

𑀮𑁄𑀮𑁄𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀢𑁆𑀢𑀭𑀓𑀸𑀮𑀝𑁆𑀞𑀺𑀢𑀺𑀓𑀢𑁆𑀢𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀮𑀼𑀮𑀺𑀢𑀪𑀸𑀯𑁂𑀦 𑀮𑁄𑀮𑁄. 𑀇𑀢𑁆𑀢𑀭𑀲𑀤𑁆𑀥𑁄𑀢𑀺 𑀧𑀭𑀺𑀢𑁆𑀢𑀲𑀤𑁆𑀥𑁄, 𑀅𑀧𑀭𑀺𑀧𑀼𑀡𑁆𑀡𑀲𑀤𑁆𑀥𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀪𑀚𑀦𑀯𑀲𑁂𑀦 𑀲𑀤𑁆𑀥𑀸𑀯 𑀪𑀢𑁆𑀢𑀺. 𑀧𑁂𑀫𑀁 𑀲𑀤𑁆𑀥𑀸𑀧𑁂𑀫𑀁 𑀕𑁂𑀳𑀲𑀺𑀢𑀧𑁂𑀫𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀲𑀸𑀤𑁄 𑀲𑀤𑁆𑀥𑀸𑀧𑀲𑀸𑀤𑁄𑀯. 𑀏𑀯𑀁 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀻𑀢𑀺 𑀏𑀯𑀁 𑀇𑀢𑁆𑀢𑀭𑀲𑀤𑁆𑀥𑀸𑀤𑀺𑀢𑀸𑀬 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀦𑀸𑀫 𑀳𑁄𑀢𑀺. 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 ¶ , 𑀣𑀼𑀲𑀭𑀸𑀲𑀺𑀫𑁆𑀳𑀺 𑀓𑁄𑀝𑁆𑀝𑀺𑀢𑀔𑀸𑀡𑀼𑀓𑁄 𑀯𑀺𑀬, 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀁 ¶ 𑀯𑀺𑀬 𑀘 𑀅𑀦𑀺𑀩𑀤𑁆𑀥𑀝𑁆𑀞𑀸𑀦𑁄 𑀫𑀼𑀳𑀼𑀢𑁆𑀢𑁂𑀦 𑀧𑀲𑀻𑀤𑀢𑀺, 𑀫𑀼𑀳𑀼𑀢𑁆𑀢𑁂𑀦 𑀓𑀼𑀧𑁆𑀧𑀢𑀺.

𑀫𑀦𑁆𑀤𑁄 𑀫𑁄𑀫𑀽𑀳𑁄𑀢𑀺 𑀅𑀜𑁆𑀜𑀸𑀡𑀪𑀸𑀯𑁂𑀦 𑀫𑀦𑁆𑀤𑁄 𑀅𑀯𑀺𑀲𑀤𑀢𑀸𑀬 𑀫𑁄𑀫𑀽𑀳𑁄. 𑀫𑀳𑀸𑀫𑀽𑀴𑁆𑀳𑁄𑀢𑀺 𑀅𑀢𑁆𑀣𑁄.

𑁧𑁯𑁩. 𑀬𑁄𑀥𑀸𑀚𑀻𑀯𑀽𑀧𑀫𑁂𑀲𑀼 𑁋 𑀬𑁄𑀥𑀸𑀚𑀻𑀯𑀸𑀢𑀺 𑀬𑀼𑀤𑁆𑀥𑀽𑀧𑀚𑀻𑀯𑀺𑀦𑁄. 𑀭𑀚𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀧𑀸𑀤𑀧𑁆𑀧𑀳𑀸𑀭𑀪𑀺𑀦𑁆𑀦𑀸𑀬 𑀪𑀽𑀫𑀺𑀬𑀸 𑀉𑀕𑁆𑀕𑀢𑀁 𑀭𑀚𑀓𑁆𑀔𑀦𑁆𑀥𑀁. 𑀦 𑀲𑀦𑁆𑀣𑀫𑁆𑀪𑀢𑀻𑀢𑀺 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀳𑀢𑀺 𑀭𑀚𑀕𑁆𑀕𑀦𑁆𑀢𑀺 𑀭𑀚𑀓𑁆𑀔𑀦𑁆𑀥𑀁 𑀤𑀺𑀲𑁆𑀯𑀸𑀧𑀺 𑀅𑀥𑀺𑀯𑀸𑀲𑁂𑀢𑀺. 𑀥𑀚𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀺𑀝𑁆𑀞𑁂𑀲𑀼 𑀯𑀸 𑀭𑀣𑁂𑀲𑀼 𑀯𑀸 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀅𑀕𑁆𑀕𑀁. 𑀉𑀲𑁆𑀲𑀸𑀭𑀡𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀻𑀦𑀜𑁆𑀘𑁂𑀯 𑀩𑀮𑀓𑀸𑀬𑀲𑁆𑀲 𑀘 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁. 𑀲𑀫𑁆𑀧𑀳𑀸𑀭𑁂𑀢𑀺 𑀲𑀫𑀸𑀕𑀢𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀳𑀸𑀭𑁂. 𑀳𑀜𑁆𑀜𑀢𑀻𑀢𑀺 𑀯𑀺𑀳𑀜𑁆𑀜𑀢𑀺, 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀯𑀺𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀓𑀢𑀺𑀪𑀸𑀯𑀁 𑀚𑀳𑀢𑀺. 𑀲𑀳𑀢𑀺 𑀲𑀫𑁆𑀧𑀳𑀸𑀭𑀦𑁆𑀢𑀺 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀧𑀢𑁆𑀯𑀸𑀧𑀺 𑀲𑀳𑀢𑀺, 𑀅𑀥𑀺𑀯𑀸𑀲𑁂𑀢𑀺 ¶ . 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀦𑁆𑀢𑀺 𑀢𑀫𑁂𑀯 𑀚𑀬𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁. 𑀅𑀚𑁆𑀛𑀸𑀯𑀲𑀢𑀻𑀢𑀺 𑀲𑀢𑁆𑀢𑀸𑀳𑀫𑀢𑁆𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀆𑀯𑀲𑀢𑀺. 𑀓𑀺𑀁 𑀓𑀸𑀭𑀡𑀸? 𑀮𑀤𑁆𑀥𑀧𑁆𑀧𑀳𑀸𑀭𑀸𑀦𑀁 𑀧𑀳𑀸𑀭𑀚𑀕𑁆𑀕𑀦𑀢𑁆𑀣𑀜𑁆𑀘𑁂𑀯 𑀓𑀢𑀓𑀫𑁆𑀫𑀸𑀦𑀁 𑀯𑀺𑀲𑁂𑀲𑀁 𑀜𑀢𑁆𑀯𑀸 𑀞𑀸𑀦𑀦𑁆𑀢𑀭𑀤𑀸𑀦𑀢𑁆𑀣𑀜𑁆𑀘 𑀇𑀲𑁆𑀲𑀭𑀺𑀬𑀲𑀼𑀔𑀸𑀦𑀼𑀪𑀯𑀦𑀢𑁆𑀣𑀜𑁆𑀘.

𑁧𑁯𑁪. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀢𑁆𑀣𑀼 𑀬𑁄𑀥𑀸𑀚𑀻𑀯𑁂𑀳𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀲𑀦𑁂 𑀢𑀣𑀸𑀭𑀽𑀧𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀑𑀧𑀫𑁆𑀫𑀁 𑀆𑀪𑀢𑀁, 𑀢𑀲𑁆𑀫𑀸 𑀢𑁂 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑁂𑀯𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀁𑀲𑀻𑀤𑀢𑀻𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀲𑁆𑀫𑀺𑀁 𑀯𑀺𑀲𑀻𑀤𑀢𑀺, 𑀅𑀦𑀼𑀧𑀯𑀺𑀲𑀢𑀺. 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀅𑀦𑀼𑀧𑀘𑁆𑀙𑀺𑀚𑁆𑀚𑀫𑀸𑀦𑀁 𑀕𑁄𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸𑀢𑀺 𑀲𑀺𑀓𑁆𑀔𑀸𑀬 𑀤𑀼𑀩𑁆𑀩𑀮𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸. 𑀓𑀺𑀫𑀲𑁆𑀲 𑀭𑀚𑀕𑁆𑀕𑀲𑁆𑀫𑀺𑀦𑁆𑀢𑀺 𑀓𑀺𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀚𑀕𑁆𑀕𑀁 𑀦𑀸𑀫𑀸𑀢𑀺 𑀯𑀤𑀢𑀺. 𑀅𑀪𑀺𑀭𑀽𑀧𑀸𑀢𑀺 𑀅𑀪𑀺𑀭𑀽𑀧𑀯𑀢𑀻. 𑀤𑀲𑁆𑀲𑀦𑀻𑀬𑀸𑀢𑀺 𑀤𑀲𑁆𑀲𑀦𑀬𑁄𑀕𑁆𑀕𑀸. 𑀧𑀸𑀲𑀸𑀤𑀺𑀓𑀸𑀢𑀺 𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑀸𑀯𑀳𑀸. 𑀧𑀭𑀫𑀸𑀬𑀸𑀢𑀺 𑀉𑀢𑁆𑀢𑀫𑀸𑀬. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀘𑁂𑀯 𑀅𑀗𑁆𑀕𑀲𑀡𑁆𑀞𑀸𑀦𑁂𑀦 𑀘.

𑁧𑁯𑁬. 𑀊𑀳𑀲𑀢𑀻𑀢𑀺 𑀅𑀯𑀳𑀲𑀢𑀺. 𑀉𑀮𑁆𑀮𑀧𑀢𑀻𑀢𑀺 𑀓𑀣𑁂𑀢𑀺. 𑀉𑀚𑁆𑀚𑀕𑁆𑀖𑀢𑀻𑀢𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀳𑀲𑀺𑀢𑀁 ¶ 𑀳𑀲𑀢𑀺. 𑀉𑀧𑁆𑀧𑀡𑁆𑀟𑁂𑀢𑀻𑀢𑀺 𑀉𑀧𑁆𑀧𑀡𑁆𑀟𑀦𑀓𑀣𑀁 𑀓𑀣𑁂𑀢𑀺.

𑁧𑁯𑁭. 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 ¶ 𑀅𑀪𑀺𑀪𑀯𑀺𑀢𑁆𑀯𑀸 𑀲𑀦𑁆𑀢𑀺𑀓𑁂 𑀯𑀸 𑀏𑀓𑀸𑀲𑀦𑁂 𑀯𑀸 𑀦𑀺𑀲𑀻𑀤𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀯𑀢𑁆𑀣𑀭𑀢𑀺.

𑁧𑁯𑁮. 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀯𑀺𑀦𑀺𑀫𑁄𑀘𑁂𑀢𑁆𑀯𑀸𑀢𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀢𑀲𑁆𑀲 𑀳𑀢𑁆𑀣𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀘𑁂𑀯, 𑀫𑁄𑀘𑁂𑀢𑁆𑀯𑀸 𑀘. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁯𑁯. 𑀧𑀺𑀡𑁆𑀟𑀧𑀸𑀢𑀺𑀓𑁂𑀲𑀼 𑁋 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀦𑁂𑀯 𑀲𑀫𑀸𑀤𑀸𑀦𑀁 𑀚𑀸𑀦𑀸𑀢𑀺, 𑀦 𑀆𑀦𑀺𑀲𑀁𑀲𑀁; 𑀅𑀢𑁆𑀢𑀦𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀅𑀜𑁆𑀜𑀸𑀡𑁂𑀦𑁂𑀯 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀫𑁂 𑀲𑀢𑁄 ‘‘𑀅𑀬𑀁 𑀧𑀺𑀡𑁆𑀟𑀧𑀸𑀢𑀺𑀓𑁄’’𑀢𑀺 𑀘𑀢𑀼𑀧𑀘𑁆𑀘𑀬𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀮𑀚𑁆𑀚𑀻, 𑀅𑀧𑁆𑀧𑀺𑀘𑁆𑀙𑁄𑀢𑀺𑀆𑀤𑀻𑀳𑀺 𑀘 𑀕𑀼𑀡𑁂𑀳𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻𑀢𑀺. 𑀏𑀯𑀁 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀢𑀸𑀬 𑀧𑀸𑀧𑀺𑀘𑁆𑀙𑀸𑀬 𑀅𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀉𑀫𑁆𑀫𑀸𑀤𑀯𑀲𑁂𑀦 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀦 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀸 𑀧𑀺𑀡𑁆𑀟𑀧𑀸𑀢𑀺𑀓𑁄 ¶ 𑀦𑀸𑀫 𑀳𑁄𑀢𑀺. 𑀯𑀡𑁆𑀡𑀺𑀢𑀦𑁆𑀢𑀺 𑀇𑀤𑀁 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀦𑀸𑀫 𑀩𑀼𑀤𑁆𑀥𑁂𑀳𑀺 𑀘 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀘 𑀯𑀡𑁆𑀡𑀺𑀢𑀁 𑀧𑀲𑀢𑁆𑀣𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀅𑀧𑁆𑀧𑀺𑀘𑁆𑀙𑀢𑀁𑀬𑁂𑀯 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀻𑀲𑀼 𑁋 ‘‘𑀇𑀢𑀺 𑀅𑀧𑁆𑀧𑀺𑀘𑁆𑀙𑁄 𑀪𑀯𑀺𑀲𑁆𑀲𑀸𑀫𑀺, 𑀇𑀤𑀁 𑀫𑁂 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺; ‘𑀇𑀢𑀺 𑀲𑀦𑁆𑀢𑀼𑀝𑁆𑀞𑁄 𑀪𑀯𑀺𑀲𑁆𑀲𑀸𑀫𑀺 𑀇𑀤𑀁 𑀫𑁂 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀺𑀲𑁆𑀲𑀢𑀺’; ‘𑀇𑀢𑀺 𑀓𑀺𑀮𑁂𑀲𑁂 𑀲𑀁𑀮𑀺𑀔𑀺𑀲𑁆𑀲𑀸𑀫𑀺’, 𑀇𑀤𑀁 𑀫𑁂 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀇𑀤𑀫𑀢𑁆𑀣𑀺𑀢𑀦𑁆𑀢𑀺 𑀇𑀫𑀸𑀬 𑀓𑀮𑁆𑀬𑀸𑀡𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀣𑀺𑀓𑀪𑀸𑀯𑀁, 𑀇𑀫𑀺𑀦𑀸 𑀯𑀸 𑀧𑀺𑀡𑁆𑀟𑀧𑀸𑀢𑀫𑀢𑁆𑀢𑁂𑀦 𑀅𑀢𑁆𑀣𑀺𑀓𑀪𑀸𑀯𑀁. 𑀬𑀁 𑀬𑀁 𑀮𑀤𑁆𑀥𑀁 𑀢𑁂𑀦 𑀢𑁂𑀦𑁂𑀯 𑀬𑀸𑀧𑀦𑀪𑀸𑀯𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀕𑁆𑀕𑁄𑀢𑀺 𑀚𑁂𑀝𑁆𑀞𑀓𑁄. 𑀲𑁂𑀲𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺.

𑀕𑀯𑀸 𑀔𑀻𑀭𑀦𑁆𑀢𑀺 𑀕𑀸𑀯𑀺𑀢𑁄 𑀔𑀻𑀭𑀁 𑀦𑀸𑀫 𑀳𑁄𑀢𑀺, 𑀦 𑀯𑀺𑀦𑀸 𑀕𑀸𑀯𑀺𑀬𑀸. 𑀔𑀻𑀭𑀫𑁆𑀳𑀸 𑀤𑀥𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀕𑁄𑀭𑀲𑁂𑀲𑀼 𑀲𑀧𑁆𑀧𑀺𑀫𑀡𑁆𑀟𑁄 𑀅𑀕𑁆𑀕𑁄; 𑀏𑀯𑀫𑁂𑀯𑀁 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀺𑀡𑁆𑀟𑀧𑀸𑀢𑀺𑀓𑁂𑀲𑀼 𑀬𑁆𑀯𑀸𑀬𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀅𑀬𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘. 𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀧𑀺𑀡𑁆𑀟𑀧𑀸𑀢𑀺𑀓𑁂𑀲𑀼 𑀤𑁆𑀯𑁂𑀯 𑀚𑀦𑀸 𑀧𑀺𑀡𑁆𑀟𑀧𑀸𑀢𑀺𑀓𑀸 ¶ , 𑀢𑀬𑁄 𑀦 𑀧𑀺𑀡𑁆𑀟𑀧𑀸𑀢𑀺𑀓𑀸. 𑀦𑀸𑀫𑀫𑀢𑁆𑀢𑁂𑀦 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀙𑀓𑁆𑀓𑁂 ¶ 𑁋 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀙𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑁂𑀦 𑀅𑀦𑀸𑀘𑀭𑀺𑀬𑀓𑁂𑀦 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄.

𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀢𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀜𑀸𑀡𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄. 𑀢𑁂𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂𑀦 𑀢𑁂 𑀧𑀼𑀕𑁆𑀕𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸. 𑀢𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑀡𑁂𑀦 𑀢𑁂 𑀧𑀼𑀕𑁆𑀕𑀮𑀸 𑀅𑀯𑀲𑁂𑀲𑀸 𑀅𑀭𑀳𑀦𑁆𑀢𑁄. 𑀢𑁂𑀦 𑀇𑀢𑁆𑀣𑀢𑁆𑀢𑀁 𑀅𑀦𑀸𑀕𑀫𑀦𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀸𑀕𑀸𑀫𑀻. 𑀢𑁂𑀦 𑀇𑀢𑁆𑀣𑀢𑁆𑀢𑀁 𑀆𑀕𑀫𑀦𑁂𑀦 𑀢𑁂 𑀧𑀼𑀕𑁆𑀕𑀮𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑀝𑁆𑀞𑀩𑁆𑀩𑀸𑀢𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀲𑀢𑁆𑀢𑀓𑁂 ¶ 𑁋 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀢𑀺 𑀏𑀓𑀯𑀸𑀭𑀁 𑀦𑀺𑀫𑀼𑀕𑁆𑀕𑁄. 𑀏𑀓𑀦𑁆𑀢𑀓𑀸𑀴𑀓𑁂𑀳𑀻𑀢𑀺 𑀏𑀓𑀦𑁆𑀢𑁂𑀦𑁂𑀯 𑀓𑀸𑀴𑀓𑁂𑀳𑀺 𑀦𑀢𑁆𑀣𑀺𑀓𑀯𑀸𑀤𑀅𑀳𑁂𑀢𑀼𑀓𑀯𑀸𑀤𑀅𑀓𑀺𑀭𑀺𑀬𑀯𑀸𑀤𑀲𑀗𑁆𑀔𑀸𑀢𑁂𑀳𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑁂𑀳𑀺. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀏𑀓𑀯𑀸𑀭𑀁 𑀦𑀺𑀫𑀼𑀕𑁆𑀕𑁄 𑀢𑀣𑀸 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺. 𑀏𑀢𑀲𑁆𑀲 𑀳𑀺 𑀧𑀼𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀫𑀓𑁆𑀔𑀮𑀺𑀕𑁄𑀲𑀸𑀮𑀸𑀤𑀬𑁄 𑀯𑀺𑀬 𑀳𑁂𑀝𑁆𑀞𑀸 𑀦𑀭𑀓𑀕𑁆𑀕𑀻𑀦𑀁𑀬𑁂𑀯 𑀆𑀳𑀸𑀭𑁄 𑀳𑁄𑀢𑀺.

𑀲𑀸𑀳𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀤𑁆𑀥𑀸 𑀦𑀸𑀫 𑀲𑀸𑀥𑀼𑀮𑀤𑁆𑀥𑀺𑀓𑀸𑀢𑀺 𑀉𑀫𑁆𑀫𑀼𑀚𑁆𑀚𑀢𑀺. 𑀲𑁄 𑀢𑀸𑀯𑀢𑀓𑁂𑀦𑁂𑀯 𑀓𑀼𑀲𑀮𑁂𑀦 𑀉𑀫𑁆𑀫𑀼𑀚𑁆𑀚𑀢𑀺 𑀦𑀸𑀫. 𑀲𑀸𑀥𑀼 𑀳𑀺𑀭𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀳𑀸𑀬𑀢𑀺𑀬𑁂𑀯𑀸𑀢𑀺 𑀘𑀗𑁆𑀓𑀯𑀸𑀭𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀏𑀓𑀦𑁆𑀢𑁂𑀦 𑀧𑀭𑀺𑀳𑀸𑀬𑀢𑁂𑀯. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁 𑀲𑀸𑀳𑀼 𑀲𑀤𑁆𑀥𑀸𑀢𑀺. 𑀇𑀫𑁂𑀲𑀁 𑀲𑀤𑁆𑀥𑀸𑀤𑀻𑀦𑀁 𑀯𑀲𑁂𑀦 𑀏𑀓𑀯𑀸𑀭𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀳𑀸𑀦𑀺𑀬𑀸 𑀧𑀼𑀦 𑀦𑀺𑀫𑀼𑀚𑁆𑀚𑀢𑀺𑀬𑁂𑀯, 𑀤𑁂𑀯𑀤𑀢𑁆𑀢𑀸𑀤𑀬𑁄 𑀯𑀺𑀬. 𑀤𑁂𑀯𑀤𑀢𑁆𑀢𑁄 𑀳𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀧𑀼𑀦 𑀩𑀼𑀤𑁆𑀥𑀸𑀦𑀁 𑀧𑀝𑀺𑀓𑀡𑁆𑀝𑀓𑀢𑀸𑀬 𑀢𑁂𑀳𑀺 𑀕𑀼𑀡𑁂𑀳𑀺 𑀧𑀭𑀺𑀳𑀻𑀦𑁄 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 ¶ 𑀲𑀗𑁆𑀖𑀪𑁂𑀤𑀓𑀫𑁆𑀫𑀜𑁆𑀘 ¶ 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀓𑁄𑀓𑀸𑀮𑀺𑀓𑁄 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀉𑀧𑀯𑀤𑀺𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄.

𑀦𑁂𑀯 𑀳𑀸𑀬𑀢𑀺 𑀦𑁄 𑀯𑀟𑁆𑀠𑀢𑀻𑀢𑀺 𑀅𑀧𑁆𑀧𑀳𑁄𑀦𑀓𑀓𑀸𑀮𑁂𑀧𑀺 𑀦 𑀳𑀸𑀬𑀢𑀺, 𑀧𑀳𑁄𑀦𑀓𑀓𑀸𑀮𑁂𑀧𑀺 𑀦 𑀯𑀟𑁆𑀠𑀢𑀺. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀕𑀸𑀭𑀺𑀓𑁂𑀦𑀧𑀺 𑀅𑀦𑀕𑀸𑀭𑀺𑀓𑁂𑀦𑀧𑀺 𑀤𑀻𑀧𑁂𑀢𑀩𑁆𑀩𑀁. 𑀏𑀓𑀘𑁆𑀘𑁄 𑀳𑀺 𑀅𑀕𑀸𑀭𑀺𑀓𑁄 𑀅𑀧𑁆𑀧𑀳𑁄𑀦𑀓𑀓𑀸𑀮𑁂 𑀧𑀓𑁆𑀔𑀺𑀓𑀪𑀢𑁆𑀢𑀁 𑀯𑀸 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀸 𑀉𑀧𑀦𑀺𑀩𑀦𑁆𑀥𑀸𑀧𑁂𑀢𑀺. 𑀲𑁄 𑀧𑀘𑁆𑀙𑀸 𑀧𑀳𑁄𑀦𑀓𑀓𑀸𑀮𑁂𑀧𑀺 𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀫𑀢𑁆𑀢𑀫𑁂𑀯 𑀧𑀯𑀢𑁆𑀢𑁂𑀢𑀺. 𑀅𑀦𑀕𑀸𑀭𑀺𑀓𑁄𑀧𑀺 𑀆𑀤𑀺𑀫𑁆𑀳𑀺 𑀅𑀧𑁆𑀧𑀳𑁄𑀦𑀓𑀓𑀸𑀮𑁂 𑀉𑀤𑁆𑀤𑁂𑀲𑀁 𑀯𑀸 𑀥𑀼𑀢𑀗𑁆𑀕𑀁 𑀯𑀸 𑀕𑀡𑁆𑀳𑀸𑀢𑀺, 𑀫𑁂𑀥𑀸𑀩𑀮𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀳𑁄𑀦𑀓𑀓𑀸𑀮𑁂𑀧𑀺 𑀢𑀢𑁄 𑀉𑀢𑁆𑀢𑀭𑀺𑀁 𑀦 𑀓𑀭𑁄𑀢𑀺. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁 𑀇𑀫𑀸𑀬 𑀲𑀤𑁆𑀥𑀸𑀤𑀻𑀦𑀁 𑀞𑀺𑀢𑀺𑀬𑀸 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀦𑀸𑀫 𑀳𑁄𑀢𑀺.

𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀉𑀝𑁆𑀞𑀳𑀺𑀢𑁆𑀯𑀸 𑀕𑀫𑀦𑀫𑀕𑁆𑀕𑀁 𑀕𑀦𑁆𑀢𑀩𑁆𑀩𑀁 𑀤𑀺𑀲𑀁 𑀯𑀸 𑀆𑀮𑁄𑀓𑁂𑀢𑀺 𑀦𑀸𑀫.

𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 ¶ 𑀧𑀢𑀭𑀢𑀻𑀢𑀺 𑀲𑀓𑀤𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀢𑀦𑀼𑀢𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑁄 𑀧𑀢𑀭𑀢𑀺 𑀦𑀸𑀫.

𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀉𑀝𑁆𑀞𑀸𑀬 𑀯𑀺𑀮𑁄𑀓𑁂𑀢𑁆𑀯𑀸 𑀧𑀢𑀭𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀺𑀝𑁆𑀞𑀢𑀺, 𑀦 𑀧𑀼𑀦𑀸𑀕𑀘𑁆𑀙𑀢𑀺.

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑁄𑀖𑀁 𑀢𑀭𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀇𑀫𑁂 𑀧𑀦 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀉𑀤𑀓𑁄𑀧𑀫𑁂𑀦 𑀤𑀻𑀧𑀺𑀢𑀸.

𑀲𑀢𑁆𑀢 𑀓𑀺𑀭 𑀚𑀗𑁆𑀖𑀯𑀸𑀡𑀺𑀚𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀧𑀼𑀡𑁆𑀡𑀦𑀤𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀼 𑀧𑀞𑀫𑀁 𑀑𑀢𑀺𑀡𑁆𑀡𑁄 𑀉𑀤𑀓𑀪𑀻𑀭𑀼𑀓𑁄 𑀧𑀼𑀭𑀺𑀲𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀦 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀦𑁆𑀢𑁄𑀬𑁂𑀯 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁄 𑀚𑀸𑀢𑁄. 𑀤𑀼𑀢𑀺𑀬𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀓𑀺𑀁 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀦𑀺𑀫𑀼𑀕𑁆𑀕𑁄 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀦𑁆𑀢𑁄𑀬𑁂𑀯 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁄 𑀚𑀸𑀢𑁄. 𑀢𑀢𑀺𑀬𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀳𑀺. 𑀲𑁄 𑀫𑀚𑁆𑀛𑁂 𑀦𑀤𑀺𑀬𑀸 𑀞𑀢𑁆𑀯𑀸 𑀦𑁂𑀯 𑀑𑀭𑀢𑁄 𑀆𑀕𑀦𑁆𑀢𑀼𑀁, 𑀦 𑀧𑀭𑀢𑁄 𑀕𑀦𑁆𑀢𑀼𑀁 𑀅𑀲𑀓𑁆𑀔𑀺 ¶ . 𑀘𑀢𑀼𑀢𑁆𑀣𑁄 𑀉𑀝𑁆𑀞𑀸𑀬 𑀞𑀺𑀢𑁄 𑀉𑀢𑁆𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀲𑀺. 𑀧𑀜𑁆𑀘𑀫𑁄 𑀑𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀢𑁆𑀯𑀸 𑀧𑀢𑀭𑀺. 𑀙𑀝𑁆𑀞𑁄 𑀢𑀭𑀺𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑀁 𑀕𑀦𑁆𑀢𑁆𑀯𑀸 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀺𑀢𑁄. 𑀲𑀢𑁆𑀢𑀫𑁄 𑀧𑀸𑀭𑀺𑀫𑀢𑀻𑀭𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀸𑀤𑀻𑀳𑀺 𑀦𑁆𑀳𑀸𑀢𑁆𑀯𑀸 𑀯𑀭𑀯𑀢𑁆𑀣𑀸𑀦𑀺 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀭𑀪𑀺𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀸𑀦𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀫𑀳𑀸𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀯𑀭𑀫𑀸𑀭𑀼𑀬𑁆𑀳 𑀉𑀢𑁆𑀢𑀫𑀪𑁄𑀚𑀦𑀁 𑀪𑀼𑀜𑁆𑀚𑀺.

𑀢𑀢𑁆𑀣 𑀲𑀢𑁆𑀢 𑀚𑀗𑁆𑀖𑀯𑀸𑀡𑀺𑀚𑀸 𑀯𑀺𑀬 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸. 𑀦𑀤𑀻 𑀯𑀺𑀬 𑀯𑀝𑁆𑀝𑀁. 𑀧𑀞𑀫𑀲𑁆𑀲 𑀉𑀤𑀓𑀪𑀻𑀭𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀑𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀦𑀺𑀫𑀼𑀚𑁆𑀚𑀦𑀁 𑀯𑀺𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀦𑀁. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀕𑁆𑀕𑀧𑀼𑀭𑀺𑀲𑁄 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑁂𑀦 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀳𑀸𑀦𑀺𑀬𑀸 𑀦𑀺𑀫𑀼𑀕𑁆𑀕𑀧𑀼𑀕𑁆𑀕𑀮𑁄. 𑀫𑀚𑁆𑀛𑁂 𑀦𑀤𑀺𑀬𑀸 𑀞𑀺𑀢𑁄 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀞𑀺𑀢𑀺𑀬𑀸 𑀞𑀺𑀢𑀧𑀼𑀕𑁆𑀕𑀮𑁄. 𑀉𑀢𑁆𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀕𑀦𑁆𑀢𑀩𑁆𑀩𑀫𑀕𑁆𑀕𑀁 𑀕𑀦𑁆𑀢𑀩𑁆𑀩𑀤𑀺𑀲𑀁 𑀯𑀸 𑀑𑀮𑁄𑀓𑁂𑀦𑁆𑀢𑁄 𑀲𑁄𑀢𑀸𑀧𑀦𑁆𑀦𑁄. 𑀧𑀢𑀭𑀺𑀢𑀧𑀼𑀭𑀺𑀲𑁄 𑀯𑀺𑀬 𑀓𑀺𑀮𑁂𑀲𑀢𑀦𑀼𑀢𑀸𑀬 𑀧𑀢𑀭𑀦𑁆𑀢𑁄 𑀲𑀓𑀤𑀸𑀕𑀸𑀫𑀻. 𑀢𑀭𑀺𑀢𑁆𑀯𑀸 𑀓𑀝𑀺𑀫𑀢𑁆𑀢𑁂 𑀉𑀤𑀓𑁂 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀅𑀦𑀸𑀯𑀢𑁆𑀢𑀺𑀢𑀥𑀫𑁆𑀫𑀢𑀸𑀬 𑀞𑀺𑀢𑁄 𑀅𑀦𑀸𑀕𑀸𑀫𑀻. 𑀦𑁆𑀳𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑀁 ¶ 𑀉𑀢𑁆𑀢𑀭𑀺𑀢𑁆𑀯𑀸 𑀣𑀮𑁂 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀑𑀖𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄. 𑀣𑀮𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀯𑀭𑀁 𑀆𑀭𑀼𑀬𑁆𑀳 𑀉𑀢𑁆𑀢𑀫𑀪𑁄𑀚𑀦𑀪𑀼𑀜𑁆𑀚𑀦𑀁 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀯𑀻𑀢𑀺𑀦𑀸𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀬𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸𑀬𑁂𑀯𑀸𑀢𑀺.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁨𑁦𑁭. 𑀅𑀝𑁆𑀞𑀓𑀦𑀯𑀓𑀦𑀺𑀤𑁆𑀤𑁂𑀲𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁯. 𑀤𑀲𑀓𑀦𑀺𑀤𑁆𑀤𑁂𑀲𑁂 𑁋 𑀇𑀥𑀸𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁. 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀜𑁆𑀳𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀻𑀦𑀁 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀜𑁆𑀜𑁂𑀯 𑀦𑀺𑀝𑁆𑀞𑀸 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁂𑀦𑁂𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀥 ¶ 𑀯𑀺𑀳𑀸𑀬𑀸𑀢𑀺 𑀇𑀥 𑀓𑀸𑀫𑀸𑀯𑀘𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀳𑀸𑀬 𑀲𑀼𑀤𑁆𑀥𑀸𑀯𑀸𑀲𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀦𑀺𑀝𑁆𑀞𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀆𑀤𑀬𑁄 𑀳𑀺 𑀇𑀥 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀜𑁆𑀘𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀜𑁆𑀘 ¶ 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀬𑀁 𑀯𑁂 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀦𑀸𑀢𑀺𑀲𑀗𑁆𑀔𑁂𑀧𑀢𑁄 𑀲𑀢𑁆𑀣𑀸, 𑀤𑁂𑀲𑁂𑀲𑀺 𑀢𑀺𑀤𑀲𑀸𑀮𑀬𑁂.

𑀢𑀲𑁆𑀲𑀸 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀤𑀻𑀧𑀪𑀸𑀲𑀸𑀬 𑀲𑀗𑁆𑀔𑀢𑀁;

𑀆𑀕𑀫𑀝𑁆𑀞𑀓𑀣𑀸𑀬𑁄 𑀘, 𑀑𑀕𑀸𑀳𑁂𑀢𑁆𑀯𑀸 𑀅𑀲𑁂𑀲𑀢𑁄.

𑀲𑀼𑀯𑀺𑀪𑀢𑁆𑀢𑁄 ¶ 𑀅𑀲𑀁𑀓𑀺𑀡𑁆𑀡𑁄, 𑀬𑁄 𑀬𑁄 𑀅𑀢𑁆𑀣𑁄 𑀬𑀳𑀺𑀁 𑀬𑀳𑀺𑀁;

𑀢𑀢𑁄 𑀢𑀢𑁄 𑀢𑀁 𑀕𑀳𑁂𑀢𑁆𑀯𑀸, 𑀧𑀳𑀸𑀬 𑀅𑀢𑀺𑀯𑀺𑀢𑁆𑀣𑀸𑀭𑀁.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀬𑀁 𑀯𑀼𑀢𑁆𑀢𑀁, 𑀢𑀁 𑀅𑀦𑀸𑀤𑀸𑀬 𑀲𑀗𑁆𑀔𑀢𑀸;

𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭-𑀦𑀬𑁂𑀦𑀝𑁆𑀞𑀓𑀣𑀸 𑀅𑀬𑀁.

𑀢𑀁 𑀏𑀢𑀁 𑀲𑀢𑁆𑀢𑀫𑀢𑁆𑀢𑁂𑀳𑀺, 𑀪𑀸𑀡𑀯𑀸𑀭𑁂𑀳𑀺 𑀢𑀦𑁆𑀢𑀺𑀬𑀸;

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀲𑀗𑁆𑀔𑀭𑁄𑀦𑁆𑀢𑁂𑀦 𑀬𑀁 𑀫𑀬𑀸.

𑀲𑀫𑁆𑀧𑀢𑁆𑀢𑀁 𑀓𑀼𑀲𑀮𑀁 𑀢𑁂𑀦, 𑀲𑀤𑁆𑀥𑀫𑁆𑀫𑀁 𑀲𑀼𑀔𑀼𑀫𑀁 𑀲𑀺𑀯𑀁;

𑀑𑀮𑁄𑀓𑁂𑀦𑁆𑀢𑀼 𑀯𑀺𑀲𑀼𑀤𑁆𑀥𑁂𑀦, 𑀧𑀸𑀡𑀬𑁄 𑀥𑀫𑁆𑀫𑀘𑀓𑁆𑀔𑀼𑀦𑀸𑀢𑀺.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀓𑀣𑀸𑀯𑀢𑁆𑀣𑀼-𑀅𑀝𑁆𑀞𑀓𑀣𑀸

𑀦𑀺𑀲𑀺𑀦𑁆𑀦𑁄 ¶ ¶ ¶ 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀲𑀢𑁆𑀣𑀸 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑀲𑀩𑁆𑀩𑀧𑀜𑁆𑀜𑀢𑁆𑀢𑀺𑀓𑀼𑀲𑀮𑁄, 𑀧𑀜𑁆𑀜𑀢𑁆𑀢𑀺𑀧𑀭𑀺𑀤𑀻𑀧𑀦𑀁;

𑀯𑀢𑁆𑀯𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁, 𑀮𑁄𑀓𑁂 𑀉𑀢𑁆𑀢𑀫𑀧𑀼𑀕𑁆𑀕𑀮𑁄.

𑀬𑀁 𑀧𑀼𑀕𑁆𑀕𑀮𑀓𑀣𑀸𑀤𑀻𑀦𑀁, 𑀓𑀣𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄;

𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, 𑀲𑀗𑁆𑀔𑁂𑀧𑁂𑀦 𑀅𑀤𑁂𑀲𑀬𑀻.

𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯 ¶ , 𑀞𑀧𑀺𑀢𑀲𑁆𑀲 𑀲𑀼𑀭𑀸𑀮𑀬𑁂;

𑀢𑀲𑁆𑀲 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁂𑀦, 𑀯𑀺𑀪𑀢𑁆𑀢𑀲𑁆𑀲 𑀫𑀳𑀻𑀢𑀮𑁂.

𑀇𑀤𑀸𑀦𑀺 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑁄, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄;

𑀢𑀲𑁆𑀫𑀸 𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑀦𑀺𑀤𑀸𑀦𑀓𑀣𑀸

𑀬𑀫𑀓𑀧𑀸𑀝𑀺𑀳𑀻𑀭𑀸𑀯𑀲𑀸𑀦𑀲𑁆𑀫𑀺𑀜𑁆𑀳𑀺 𑀪𑀕𑀯𑀸 𑀢𑀺𑀤𑀲𑀧𑀼𑀭𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀤𑁂𑀯𑀧𑀭𑀺𑀲𑀸𑀬 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀥𑀫𑁆𑀫𑀲𑀗𑁆𑀕𑀡𑀻𑀯𑀺𑀪𑀗𑁆𑀕𑀥𑀸𑀢𑀼𑀓𑀣𑀸𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑁆𑀧𑀓𑀭𑀡𑀸𑀦𑀺 𑀤𑁂𑀲𑀬𑀺𑀢𑁆𑀯𑀸 𑀓𑀣𑀸𑀯𑀢𑁆𑀣𑀼𑀤𑁂𑀲𑀦𑀸𑀬 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 ‘‘𑀅𑀦𑀸𑀕𑀢𑁂 𑀫𑀫 𑀲𑀸𑀯𑀓𑁄 𑀫𑀳𑀸𑀧𑀜𑁆𑀜𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀲𑀸𑀲𑀦𑀫𑀮𑀁 𑀲𑁄𑀥𑁂𑀢𑁆𑀯𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 ¶ 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑀁 𑀧𑀓𑀭𑀡𑀁 𑀪𑀸𑀚𑁂𑀲𑁆𑀲𑀢𑀻’’𑀢𑀺 𑀢𑀲𑁆𑀲𑁄𑀓𑀸𑀲𑀁 𑀓𑀭𑁄𑀦𑁆𑀢𑁄 𑀬𑀸 𑀘𑁂𑀲𑀸 𑀧𑀼𑀕𑁆𑀕𑀮𑀯𑀸𑀤𑁂 𑀢𑀸𑀯 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀫𑀼𑀔𑀸 𑀯𑀸𑀤𑀬𑀼𑀢𑁆𑀢𑀺, 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀣𑀸𑀫𑀕𑁆𑀕𑁂𑀲𑀼 𑀅𑀲𑀫𑁆𑀧𑀼𑀡𑁆𑀡𑀪𑀸𑀡𑀯𑀸𑀭𑀫𑀢𑁆𑀢𑀸𑀬 𑀢𑀦𑁆𑀢𑀺𑀬𑀸 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀅𑀣𑀸𑀯𑀲𑁂𑀲𑀁 ¶ 𑀅𑀪𑀺𑀥𑀫𑁆𑀫𑀓𑀣𑀁 𑀯𑀺𑀢𑁆𑀣𑀸𑀭𑀦𑀬𑁂𑀦𑁂𑀯 𑀓𑀣𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀲𑀼𑀯𑀡𑁆𑀡𑀭𑀚𑀢𑀲𑁄𑀧𑀸𑀦𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀦𑁂𑀦 𑀤𑁂𑀯𑀮𑁄𑀓𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀭𑀼𑀬𑁆𑀳 𑀲𑀢𑁆𑀢𑀳𑀺𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀅𑀣𑀲𑁆𑀲 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁄 𑀯𑀲𑀻𑀕𑀡𑁄 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀦𑀁 𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀭𑀻𑀭𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀺. 𑀢𑀢𑁄 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑀬𑀺𑀁𑀲𑀼. 𑀢𑀸𑀦𑀺 𑀲𑀼𑀢𑁆𑀯𑀸 𑀓𑀸𑀓𑀡𑁆𑀟𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀬𑀲𑀢𑁆𑀣𑁂𑀭𑁄 𑀲𑀼𑀲𑀼𑀦𑀸𑀕𑀧𑀼𑀢𑁆𑀢𑀁 𑀓𑀸𑀮𑀸𑀲𑁄𑀓𑀁 𑀦𑀸𑀫 𑀭𑀸𑀚𑀸𑀦𑀁 𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀤𑀲𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀲𑀢𑁆𑀢𑀣𑁂𑀭𑀲𑀢𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀸𑀦𑀺 𑀤𑀲𑀯𑀢𑁆𑀣𑀽𑀦𑀺 𑀫𑀤𑁆𑀤𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀭𑀻𑀭𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀺.

𑀢𑁂𑀳𑀺 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀦𑀺𑀕𑁆𑀕𑀳𑀺𑀢𑀸 𑀤𑀲𑀲𑀳𑀲𑁆𑀲𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑀸 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀤𑀼𑀩𑁆𑀩𑀮𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀯𑀺𑀲𑀼𑀁 𑀫𑀳𑀸𑀲𑀗𑁆𑀖𑀺𑀓𑀸𑀘𑀭𑀺𑀬𑀓𑀼𑀮𑀁 𑀦𑀸𑀫 𑀅𑀓𑀁𑀲𑀼 ¶ . 𑀢𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀦𑀺 𑀤𑁆𑀯𑁂 𑀆𑀘𑀭𑀺𑀬𑀓𑀼𑀮𑀸𑀦𑀺 𑀚𑀸𑀢𑀸𑀦𑀺 𑁋 𑀕𑁄𑀓𑀼𑀮𑀺𑀓𑀸 𑀘 𑀏𑀓𑀩𑁆𑀬𑁄𑀳𑀸𑀭𑀺𑀓𑀸 𑀘. 𑀕𑁄𑀓𑀼𑀮𑀺𑀓𑀦𑀺𑀓𑀸𑀬𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀦𑀺 𑀤𑁆𑀯𑁂 𑀆𑀘𑀭𑀺𑀬𑀓𑀼𑀮𑀸𑀦𑀺 𑀚𑀸𑀢𑀸𑀦𑀺 𑁋 𑀧𑀡𑁆𑀡𑀢𑁆𑀢𑀺𑀯𑀸𑀤𑀸 𑀘 𑀩𑀸𑀳𑀼𑀮𑀺𑀬𑀸 𑀘. 𑀩𑀳𑀼𑀲𑁆𑀲𑀼𑀢𑀺𑀓𑀸𑀢𑀺𑀧𑀺 𑀢𑁂𑀲𑀁𑀬𑁂𑀯 𑀦𑀸𑀫𑀁. 𑀢𑁂𑀲𑀁𑀬𑁂𑀯 𑀅𑀦𑁆𑀢𑀭𑁂 𑀘𑁂𑀢𑀺𑀬𑀯𑀸𑀤𑀸 𑀦𑀸𑀫 𑀅𑀧𑀭𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀏𑀯𑀁 𑀫𑀳𑀸𑀲𑀗𑁆𑀖𑀺𑀓𑀸𑀘𑀭𑀺𑀬𑀓𑀼𑀮𑀢𑁄 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀧𑀜𑁆𑀘𑀸𑀘𑀭𑀺𑀬𑀓𑀼𑀮𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺. 𑀢𑀸𑀦𑀺 𑀫𑀳𑀸𑀲𑀗𑁆𑀖𑀺𑀓𑁂𑀳𑀺 𑀲𑀤𑁆𑀥𑀺𑀁 𑀙 𑀳𑁄𑀦𑁆𑀢𑀺.

𑀢𑀲𑁆𑀫𑀺𑀁𑀬𑁂𑀯 ¶ 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸 𑁋 𑀫𑀳𑀺𑀲𑀸𑀲𑀓𑀸 𑀘 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘. 𑀢𑀢𑁆𑀣 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑁂 𑀘𑀢𑁆𑀢𑀸𑀭𑁄 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸 𑁋 𑀥𑀫𑁆𑀫𑀼𑀢𑁆𑀢𑀭𑀺𑀬𑀸, 𑀪𑀤𑁆𑀭𑀬𑀸𑀦𑀺𑀓𑀸, 𑀙𑀦𑁆𑀦𑀸𑀕𑀸𑀭𑀺𑀓𑀸, 𑀲𑀫𑀺𑀢𑀺𑀬𑀸𑀢𑀺. 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀫𑀳𑀺𑀲𑀸𑀲𑀓𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀥𑀫𑁆𑀫𑀕𑀼𑀢𑁆𑀢𑀺𑀓𑀸𑀢𑀺 𑀤𑁆𑀯𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀲𑀩𑁆𑀩𑀢𑁆𑀣𑀺𑀯𑀸𑀤𑀓𑀼𑀮𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀧𑀺𑀓𑀸 𑀦𑀸𑀫 𑀚𑀸𑀢𑀸. 𑀓𑀲𑁆𑀲𑀧𑀺𑀓𑁂𑀲𑀼 𑀪𑀺𑀦𑁆𑀦𑁂𑀲𑀼 𑀅𑀧𑀭𑁂 𑀲𑀗𑁆𑀓𑀦𑁆𑀢𑀺𑀓𑀸 𑀦𑀸𑀫 𑀚𑀸𑀢𑀸. 𑀲𑀗𑁆𑀓𑀦𑁆𑀢𑀺𑀓𑁂𑀲𑀼 𑀪𑀺𑀦𑁆𑀦𑁂𑀲𑀼 𑀲𑀼𑀢𑁆𑀢𑀯𑀸𑀤𑀸 𑀦𑀸𑀫 𑀚𑀸𑀢𑀸𑀢𑀺 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀇𑀫𑁂 𑀏𑀓𑀸𑀤𑀲 ¶ 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀢𑁂 𑀣𑁂𑀭𑀯𑀸𑀤𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑁂 𑀘 𑀤𑁆𑀯𑀸𑀤𑀲, 𑀫𑀳𑀸𑀲𑀗𑁆𑀖𑀺𑀓𑀸𑀦𑀜𑁆𑀘 𑀙 𑀆𑀘𑀭𑀺𑀬𑀯𑀸𑀤𑀸𑀢𑀺 𑀲𑀩𑁆𑀩𑁂𑀯 𑀅𑀝𑁆𑀞𑀸𑀭𑀲 𑀆𑀘𑀭𑀺𑀬𑀯𑀸𑀤𑀸 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀉𑀧𑁆𑀧𑀦𑁆𑀦𑀸. 𑀅𑀝𑁆𑀞𑀸𑀭𑀲 𑀦𑀺𑀓𑀸𑀬𑀸𑀢𑀺𑀧𑀺, 𑀅𑀝𑁆𑀞𑀸𑀭𑀲𑀸𑀘𑀭𑀺𑀬𑀓𑀼𑀮𑀸𑀦𑀻𑀢𑀺𑀧𑀺 𑀏𑀢𑁂𑀲𑀁𑀬𑁂𑀯 𑀦𑀸𑀫𑀁. 𑀏𑀢𑁂𑀲𑀼 𑀧𑀦 𑀲𑀢𑁆𑀢𑀭𑀲 𑀯𑀸𑀤𑀸 𑀪𑀺𑀦𑁆𑀦𑀓𑀸, 𑀣𑁂𑀭𑀯𑀸𑀤𑁄 𑀅𑀲𑀫𑁆𑀪𑀺𑀦𑁆𑀦𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀦𑀺𑀓𑁆𑀓𑀟𑁆𑀠𑀺𑀢𑀸 𑀧𑀸𑀧𑀪𑀺𑀓𑁆𑀔𑀽, 𑀣𑁂𑀭𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑀸;

𑀅𑀜𑁆𑀜𑀁 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸𑀦, 𑀅𑀥𑀫𑁆𑀫𑀯𑀸𑀤𑀻 𑀩𑀳𑀽 𑀚𑀦𑀸.

‘‘𑀤𑀲𑀲𑀳𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀥𑀫𑁆𑀫𑀲𑀗𑁆𑀕𑀳𑀁;

𑀢𑀲𑁆𑀫𑀸𑀬𑀁 𑀥𑀫𑁆𑀫𑀲𑀗𑁆𑀕𑀻𑀢𑀺, 𑀫𑀳𑀸𑀲𑀗𑁆𑀕𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀫𑀳𑀸𑀲𑀗𑁆𑀕𑀻𑀢𑀺𑀓𑀸 𑀪𑀺𑀓𑁆𑀔𑀽, 𑀯𑀺𑀮𑁄𑀫𑀁 𑀅𑀓𑀁𑀲𑀼 𑀲𑀸𑀲𑀦𑁂;

𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀁, 𑀅𑀜𑁆𑀜𑀁 𑀅𑀓𑀁𑀲𑀼 𑀲𑀗𑁆𑀕𑀳𑀁.

‘‘𑀅𑀜𑁆𑀜𑀢𑁆𑀭 ¶ ¶ 𑀲𑀗𑁆𑀕𑀳𑀺𑀢𑀸 𑀲𑀼𑀢𑁆𑀢𑀁, 𑀅𑀜𑁆𑀜𑀢𑁆𑀭 𑀅𑀓𑀭𑀺𑀁𑀲𑀼 𑀢𑁂;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀯𑀺𑀦𑀬𑁂 𑀦𑀺𑀓𑀸𑀬𑁂𑀲𑀼 𑀘 𑀧𑀜𑁆𑀘𑀲𑀼.

‘‘𑀧𑀭𑀺𑀬𑀸𑀬𑀤𑁂𑀲𑀺𑀢𑀜𑁆𑀘𑀸𑀧𑀺, 𑀅𑀣𑁄 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀺𑀢𑀁;

𑀦𑀻𑀢𑀢𑁆𑀣𑀜𑁆𑀘𑁂𑀯 𑀦𑁂𑀬𑁆𑀬𑀢𑁆𑀣𑀁, 𑀅𑀚𑀸𑀦𑀺𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

‘‘𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁, 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼 𑀢𑁂;

𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀢𑁂 𑀪𑀺𑀓𑁆𑀔𑀽, 𑀩𑀳𑀼𑀁 𑀅𑀢𑁆𑀣𑀁 𑀯𑀺𑀦𑀸𑀲𑀬𑀼𑀁.

‘‘𑀙𑀟𑁆𑀟𑁂𑀢𑁆𑀯𑀸𑀦 𑀏𑀓𑀤𑁂𑀲𑀁, 𑀲𑀼𑀢𑁆𑀢𑀁 𑀯𑀺𑀦𑀬𑀕𑀫𑁆𑀪𑀻𑀭𑀁;

𑀧𑀢𑀺𑀭𑀽𑀧𑀁 𑀲𑀼𑀢𑁆𑀢𑀁 𑀯𑀺𑀦𑀬𑀁, 𑀢𑀜𑁆𑀘 𑀅𑀜𑁆𑀜𑀁 𑀓𑀭𑀺𑀁𑀲𑀼 𑀢𑁂.

‘‘𑀧𑀭𑀺𑀯𑀸𑀭𑀁 𑀅𑀢𑁆𑀣𑀼𑀤𑁆𑀥𑀸𑀭𑀁, 𑀅𑀪𑀺𑀥𑀫𑁆𑀫𑀁 𑀙𑀧𑁆𑀧𑀓𑀭𑀡𑀁;

𑀧𑀝𑀺𑀲𑀫𑁆𑀪𑀺𑀤𑀜𑁆𑀘 𑀦𑀺𑀤𑁆𑀤𑁂𑀲𑀁, 𑀏𑀓𑀤𑁂𑀲𑀜𑁆𑀘 𑀚𑀸𑀢𑀓𑀁.

‘‘𑀏𑀢𑁆𑀢𑀓𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦, 𑀅𑀜𑁆𑀜𑀸𑀦𑀺 𑀅𑀓𑀭𑀺𑀁𑀲𑀼 𑀢𑁂;

𑀦𑀸𑀫𑀁 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘.

‘‘𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂;

𑀧𑀼𑀩𑁆𑀩𑀗𑁆𑀕𑀫𑀸 𑀪𑀺𑀦𑁆𑀦𑀯𑀸𑀤𑀸, 𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀭𑀓𑀸.

‘‘𑀢𑁂𑀲𑀜𑁆𑀘 ¶ 𑀅𑀦𑀼𑀓𑀸𑀭𑁂𑀦, 𑀪𑀺𑀦𑁆𑀦𑀯𑀸𑀤𑀸 𑀩𑀳𑀽 𑀅𑀳𑀼;

𑀢𑀢𑁄 𑀅𑀧𑀭𑀓𑀸𑀮𑀫𑁆𑀳𑀺, 𑀢𑀲𑁆𑀫𑀺𑀁 𑀪𑁂𑀤𑁄 𑀅𑀚𑀸𑀬𑀣.

‘‘𑀕𑁄𑀓𑀼𑀮𑀺𑀓𑀸 𑀏𑀓𑀩𑁆𑀬𑁄𑀳𑀸𑀭𑀺, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄;

𑀕𑁄𑀓𑀼𑀮𑀺𑀓𑀸𑀦𑀁 𑀤𑁆𑀯𑁂 𑀪𑁂𑀤𑀸, 𑀅𑀧𑀭𑀓𑀸𑀮𑀫𑁆𑀳𑀺 𑀚𑀸𑀬𑀣.

‘‘𑀩𑀳𑀼𑀲𑁆𑀲𑀼𑀢𑀺𑀓𑀸 ¶ 𑀘 𑀧𑀜𑁆𑀜𑀢𑁆𑀢𑀺, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄;

𑀘𑁂𑀢𑀺𑀬𑀸 𑀘 𑀧𑀼𑀦𑀯𑀸𑀤𑀻, 𑀫𑀳𑀸𑀲𑀗𑁆𑀕𑀻𑀢𑀺𑀪𑁂𑀤𑀓𑀸.

‘‘𑀧𑀜𑁆𑀘𑀯𑀸𑀤𑀸 𑀇𑀫𑁂 𑀲𑀩𑁆𑀩𑁂, 𑀫𑀳𑀸𑀲𑀗𑁆𑀕𑀻𑀢𑀺𑀫𑀽𑀮𑀓𑀸;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀏𑀓𑀤𑁂𑀲𑀜𑁆𑀘 𑀲𑀗𑁆𑀕𑀳𑀁.

‘‘𑀕𑀦𑁆𑀣𑀜𑁆𑀘 𑀏𑀓𑀤𑁂𑀲𑀜𑁆𑀳𑀺, 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂;

𑀦𑀸𑀫𑀁 ¶ 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘.

‘‘𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂;

𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀫𑁆𑀳𑀺, 𑀧𑀼𑀦 𑀪𑁂𑀤𑁄 𑀅𑀚𑀸𑀬𑀣.

‘‘𑀫𑀳𑀺𑀲𑀸𑀲𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄;

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀸𑀤𑀫𑁆𑀳𑀺, 𑀘𑀢𑀼𑀥𑀸 𑀪𑁂𑀤𑁄 𑀅𑀚𑀸𑀬𑀣.

‘‘𑀥𑀫𑁆𑀫𑀼𑀢𑁆𑀢𑀭𑀺𑀓𑀸 𑀪𑀤𑁆𑀤𑀬𑀸𑀦𑀺𑀓𑀸, 𑀙𑀦𑁆𑀦𑀸𑀕𑀸𑀭𑀺𑀓𑀸 𑀘 𑀲𑀫𑀺𑀢𑀺;

𑀫𑀳𑀺𑀲𑀸𑀲𑀓𑀸𑀦𑀁 𑀤𑁆𑀯𑁂 𑀪𑁂𑀤𑀸, 𑀅𑀧𑀭𑀓𑀸𑀮𑀫𑁆𑀳𑀺 𑀅𑀚𑀸𑀬𑀣.

‘‘𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀥𑀫𑁆𑀫𑀕𑀼𑀢𑁆𑀢𑀸, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄;

𑀲𑀩𑁆𑀩𑀢𑁆𑀣𑀺𑀯𑀸𑀤𑀸𑀦𑀁 𑀓𑀲𑁆𑀲𑀧𑀺𑀓𑀸, 𑀲𑀗𑁆𑀓𑀦𑁆𑀢𑀺𑀓𑀲𑁆𑀲𑀧𑀺𑀓𑁂𑀦 𑀘.

‘‘𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀲𑀼𑀢𑁆𑀢𑀯𑀸𑀤𑀻, 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀣;

𑀇𑀫𑁂 𑀏𑀓𑀸𑀤𑀲 𑀯𑀸𑀤𑀸, 𑀲𑀫𑁆𑀪𑀺𑀦𑁆𑀦𑀸 𑀣𑁂𑀭𑀯𑀸𑀤𑀢𑁄.

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀏𑀓𑀤𑁂𑀲𑀜𑁆𑀘 𑀲𑀗𑁆𑀕𑀳𑀁;

𑀕𑀦𑁆𑀣𑀜𑁆𑀘 𑀏𑀓𑀤𑁂𑀲𑀜𑁆𑀳𑀺, 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀦𑀸𑀫𑀁 ¶ 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘;

𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀲𑀢𑁆𑀢𑀭𑀲 𑀪𑀺𑀦𑁆𑀦𑀯𑀸𑀤𑀸, 𑀏𑀓𑀯𑀸𑀤𑁄 𑀅𑀪𑀺𑀦𑁆𑀦𑀓𑁄;

𑀲𑀩𑁆𑀩𑁂𑀯𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀪𑀺𑀦𑁆𑀦𑀯𑀸𑀤𑁂𑀦 𑀢𑁂 𑀲𑀳.

‘‘𑀦𑀺𑀕𑁆𑀭𑁄𑀥𑁄𑀯 ¶ 𑀫𑀳𑀸𑀭𑀼𑀓𑁆𑀔𑁄, 𑀣𑁂𑀭 𑀯𑀸𑀤𑀸𑀦𑀫𑀼𑀢𑁆𑀢𑀫𑁄;

𑀅𑀦𑀽𑀦𑀁 𑀅𑀦𑀥𑀺𑀓𑀜𑁆𑀘, 𑀓𑁂𑀯𑀮𑀁 𑀚𑀺𑀦𑀲𑀸𑀲𑀦𑀁.

‘‘𑀲𑀦𑁆𑀢𑀓𑀸 𑀯𑀺𑀬 𑀭𑀼𑀓𑁆𑀔𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀸 𑀯𑀸𑀤𑀲𑁂𑀲𑀓𑀸;

𑀧𑀞𑀫𑁂 𑀯𑀲𑁆𑀲𑀲𑀢𑁂 𑀦𑀢𑁆𑀣𑀺, 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑀦𑁆𑀢𑀭𑁂;

𑀪𑀺𑀦𑁆𑀦𑀸 𑀲𑀢𑁆𑀢𑀭𑀲 𑀯𑀸𑀤𑀸, 𑀉𑀧𑁆𑀧𑀦𑁆𑀦𑀸 𑀚𑀺𑀦𑀲𑀸𑀲𑀦𑁂’’𑀢𑀺.

𑀅𑀧𑀭𑀸𑀧𑀭𑀁 𑀧𑀦 𑀳𑁂𑀫𑀯𑀢𑀺𑀓𑀸, 𑀭𑀸𑀚𑀕𑀺𑀭𑀺𑀓𑀸, 𑀲𑀺𑀤𑁆𑀥𑀢𑁆𑀣𑀺𑀓𑀸, 𑀧𑀼𑀩𑁆𑀩𑀲𑁂𑀮𑀺𑀬𑀸, 𑀅𑀧𑀭𑀲𑁂𑀮𑀺𑀬𑀸, 𑀯𑀸𑀚𑀺𑀭𑀺𑀬𑀸𑀢𑀺 𑀅𑀜𑁆𑀜𑁂𑀧𑀺 𑀙 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀢𑁂 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸. 𑀧𑀼𑀭𑀺𑀫𑀓𑀸𑀦𑀁 ¶ 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀆𑀘𑀭𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀥𑀫𑁆𑀫𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀲𑀗𑁆𑀖𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀲𑀢𑀲𑀳𑀲𑁆𑀲𑀁, 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀦𑁆𑀢𑀺 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀧𑀭𑀺𑀘𑁆𑀘𑀚𑀦𑁆𑀢𑁄 𑀲𑀸𑀲𑀦𑁂 𑀉𑀴𑀸𑀭𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀲𑀺.

𑀢𑀺𑀢𑁆𑀣𑀺𑀬𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀅𑀦𑁆𑀢𑀫𑀲𑁄 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑀺. 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸𑀧𑀺 𑀲𑀬𑀫𑁂𑀯 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑁂𑀲𑀼 𑀯𑀺𑀘𑀭𑀦𑁆𑀢𑀸 𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀓𑀭𑀡𑀓𑀸𑀮𑁂 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀺 𑀥𑀫𑁆𑀫𑀯𑀺𑀦𑀬𑀸𑀦𑀼𑀮𑁄𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀡𑁆𑀞𑀳𑀦𑁆𑀢𑀸 𑀅𑀦𑁂𑀓𑀭𑀽𑀧𑀁 𑀲𑀸𑀲𑀦𑀲𑁆𑀲 𑀅𑀩𑁆𑀩𑀼𑀤𑀜𑁆𑀘 𑀫𑀮𑀜𑁆𑀘 𑀓𑀡𑁆𑀝𑀓𑀜𑁆𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀓𑁂𑀘𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀸𑀢𑀧𑁂 𑀢𑀧𑀦𑁆𑀢𑀺, 𑀓𑁂𑀘𑀺 𑀆𑀤𑀺𑀘𑁆𑀘𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑁂𑀘𑀺 ‘‘𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀯𑁄𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀢𑀣𑀸 𑀢𑀣𑀸 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦 𑀢𑁂𑀳𑀺 𑀲𑀤𑁆𑀥𑀺𑀁 ¶ 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀅𑀓𑀸𑀲𑀺. 𑀅𑀲𑁄𑀓𑀸𑀭𑀸𑀫𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀉𑀧𑁄𑀲𑀣𑁄 𑀉𑀧𑀘𑁆𑀙𑀺𑀚𑁆𑀚𑀺.

𑀭𑀸𑀚𑀸 ‘‘𑀆𑀡𑀸𑀬 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀬𑀫𑀦𑁆𑀢𑁄𑀧𑀺 𑀓𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀜𑁆𑀜𑀤𑀢𑁆𑀣𑀼 𑀤𑀼𑀕𑁆𑀕𑀳𑀺𑀢𑀕𑀸𑀳𑀺𑀦𑀸 𑀩𑀸𑀮𑁂𑀦 𑀅𑀫𑀘𑁆𑀘𑁂𑀦 𑀅𑀦𑁂𑀓𑁂𑀲𑀼 𑀪𑀺𑀓𑁆𑀔𑀽𑀲𑀼 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁂𑀲𑀼 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀲𑁄 𑀢𑀜𑁆𑀘 𑀯𑀺𑀧𑁆𑀧𑀝𑀺𑀲𑀸𑀭𑀁 𑀢𑀜𑁆𑀘 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀯𑀽𑀧𑀲𑀫𑁂𑀢𑀼𑀓𑀸𑀫𑁄 ‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀧𑀝𑀺𑀩𑀮𑁄’’𑀢𑀺 ¶ 𑀲𑀗𑁆𑀖𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄, 𑀫𑀳𑀸𑀭𑀸𑀚𑀸’’𑀢𑀺 𑀲𑀼𑀢𑁆𑀯𑀸 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦 𑀅𑀳𑁄𑀕𑀗𑁆𑀕𑀸𑀧𑀩𑁆𑀩𑀢𑀢𑁄 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑁂𑀦 𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑁂 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀽𑀧𑀲𑀫𑁂𑀲𑀺. 𑀣𑁂𑀭𑁄𑀧𑀺 𑀢𑀁 𑀭𑀸𑀚𑀼𑀬𑁆𑀬𑀸𑀦𑁂𑀬𑁂𑀯 𑀯𑀲𑀦𑁆𑀢𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀫𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀉𑀕𑁆𑀕𑀳𑀺𑀢𑀲𑀫𑀬𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀲𑁄𑀓𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀏𑀓𑀮𑀤𑁆𑀥𑀺𑀓𑁂 𑀏𑀓𑀮𑀤𑁆𑀥𑀺𑀓𑁂 𑀪𑀺𑀓𑁆𑀔𑀽 ¶ 𑀏𑀓𑀢𑁄 𑀏𑀓𑀢𑁄 𑀓𑀸𑀭𑁂𑀢𑁆𑀯𑀸 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀲𑀫𑀽𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑀺𑀁𑀯𑀸𑀤𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? 𑀢𑀢𑁄 𑀲𑀲𑁆𑀲𑀢𑀯𑀸𑀤𑀺𑀦𑁄 𑁋 ‘‘𑀲𑀲𑁆𑀲𑀢𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑀜𑁆𑀜𑀻𑀯𑀸𑀤𑀸, 𑀅𑀲𑀜𑁆𑀜𑀻𑀯𑀸𑀤𑀸, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀉𑀘𑁆𑀙𑁂𑀤𑀯𑀸𑀤𑀸, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑁋 ‘‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀞𑀫𑀫𑁂𑀯 𑀲𑀫𑀬𑀲𑁆𑀲 𑀉𑀕𑁆𑀕𑀳𑀺𑀢𑀢𑁆𑀢𑀸 𑀦𑀬𑀺𑀫𑁂 𑀪𑀺𑀓𑁆𑀔𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀇𑀫𑁂𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀲𑁂𑀢𑀓𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀸 𑀅𑀳𑁂𑀲𑀼𑀁.

𑀅𑀣𑀜𑁆𑀜𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀭𑀸𑀚𑀸 ‘𑀲𑀼𑀤𑁆𑀥𑀁 𑀤𑀸𑀦𑀺, 𑀪𑀦𑁆𑀢𑁂, 𑀲𑀸𑀲𑀦𑀁, 𑀓𑀭𑁄𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣’𑀦𑁆𑀢𑀺 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀬𑀸𑀦𑀺 𑀘 𑀢𑀤𑀸 𑀉𑀧𑁆𑀧𑀦𑁆𑀦𑀸𑀦𑀺 𑀯𑀢𑁆𑀣𑀽𑀦𑀺, 𑀬𑀸𑀦𑀺 𑀘 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀝𑀺𑀩𑀸𑀳𑀦𑀢𑁆𑀣𑀁 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑀯𑀲𑁂𑀦𑁂𑀯 𑀢𑀣𑀸𑀕𑀢𑁂𑀦 𑀞𑀧𑀺𑀢𑀫𑀸𑀢𑀺𑀓𑀁 𑀯𑀺𑀪𑀚𑀦𑁆𑀢𑁄 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀇𑀫𑀁 𑀧𑀭𑀧𑁆𑀧𑀯𑀸𑀤𑀫𑀣𑀦𑀁 𑀆𑀬𑀢𑀺𑀮𑀓𑁆𑀔𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀅𑀪𑀸𑀲𑀺.

𑀢𑀢𑁄 ¶ 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑁂𑀲𑀼 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑀸𑀦𑀁 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀳𑀲𑁆𑀲𑀫𑁂𑀓𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀬𑀲𑀢𑁆𑀣𑁂𑀭𑁄 𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼; 𑀏𑀯𑀫𑁂𑀯 𑀲𑀗𑁆𑀕𑀸𑀬𑀦𑁆𑀢𑁄 ¶ 𑀲𑀸𑀲𑀦𑀫𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀅𑀓𑀸𑀲𑀺. 𑀢𑀢𑁆𑀣 𑀅𑀪𑀺𑀥𑀫𑁆𑀫𑀁 𑀲𑀗𑁆𑀕𑀸𑀬𑀦𑁆𑀢𑁄 𑀇𑀫𑀁 𑀬𑀣𑀸𑀪𑀸𑀲𑀺𑀢𑀁 𑀧𑀓𑀭𑀡𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀁 ¶ 𑀧𑀼𑀕𑁆𑀕𑀮𑀓𑀣𑀸𑀤𑀻𑀦𑀁, 𑀓𑀣𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄;

𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, 𑀲𑀗𑁆𑀔𑁂𑀧𑁂𑀦 𑀅𑀤𑁂𑀲𑀬𑀻.

‘‘𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯, 𑀞𑀧𑀺𑀢𑀲𑁆𑀲 𑀲𑀼𑀭𑀸𑀮𑀬𑁂;

𑀢𑀲𑁆𑀲 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁂𑀦, 𑀯𑀺𑀪𑀢𑁆𑀢𑀲𑁆𑀲 𑀫𑀳𑀻𑀢𑀮𑁂.

‘‘𑀇𑀤𑀸𑀦𑀺 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑁄, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄;

𑀢𑀲𑁆𑀫𑀸 𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺.

𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀓𑀣𑀸

𑁧. 𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧. 𑀢𑀢𑁆𑀣 ¶ ¶ ¶ 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀅𑀬𑀁 𑀧𑀼𑀘𑁆𑀙𑀸. 𑀆𑀫𑀦𑁆𑀢𑀸𑀢𑀺 𑀅𑀬𑀁 𑀧𑀝𑀺𑀚𑀸𑀦𑀦𑀸. 𑀓𑀲𑁆𑀲 𑀧𑀦𑀸𑀬𑀁 𑀧𑀼𑀘𑁆𑀙𑀸, 𑀓𑀲𑁆𑀲 𑀧𑀝𑀺𑀚𑀸𑀦𑀦𑀸𑀢𑀺? 𑀅𑀲𑀼𑀓𑀲𑁆𑀲𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀪𑀕𑀯𑀢𑀸 𑀳𑀺 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀮𑀤𑁆𑀥𑀻𑀦𑀁 𑀯𑀺𑀲𑁄𑀥𑀦𑀢𑁆𑀣𑀁 𑀢𑀦𑁆𑀢𑀺𑀯𑀲𑁂𑀦 𑀫𑀸𑀢𑀺𑀓𑀸 𑀞𑀧𑀺𑀢𑀸. 𑀲𑀸 𑀣𑁂𑀭𑁂𑀦 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀢𑀦𑁆𑀢𑀺𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀦 𑀳𑀺 𑀣𑁂𑀭𑁄 𑀬𑀢𑁆𑀢𑀓𑀸 𑀏𑀢𑁆𑀣 𑀯𑀸𑀤𑀫𑀕𑁆𑀕𑀸 𑀤𑀲𑁆𑀲𑀺𑀢𑀸, 𑀢𑀢𑁆𑀢𑀓𑁂𑀳𑀺 𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀸𑀤𑁂𑀦 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀓𑀣𑁂𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀦 𑀢𑀸𑀲𑀁 𑀢𑀸𑀲𑀁 𑀓𑀣𑀸𑀦𑀁 𑀅𑀢𑁆𑀣𑀲𑁆𑀲 𑀲𑀼𑀔𑀸𑀯𑀥𑀸𑀭𑀡𑀢𑁆𑀣𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸, 𑀧𑀭𑀯𑀸𑀤𑀻𑀧𑀼𑀘𑁆𑀙𑀸, 𑀲𑀓𑀯𑀸𑀤𑀻𑀧𑀝𑀺𑀜𑁆𑀜𑀸, 𑀧𑀭𑀯𑀸𑀤𑀻𑀧𑀝𑀺𑀜𑁆𑀜𑀸𑀢𑀺 𑀏𑀯𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸𑀯 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀳𑀺 𑀅𑀬𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸. 𑀢𑀸𑀬 ‘‘𑀬𑁂 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁𑀮𑀤𑁆𑀥𑀺𑀓𑀸 𑀧𑀼𑀕𑁆𑀕𑀮𑀯𑀸𑀤𑀺𑀦𑁄, 𑀢𑁂 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀤𑀻𑀧𑁂𑀢𑀺. 𑀓𑁂 𑀧𑀦 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀢𑀺? 𑀲𑀸𑀲𑀦𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘𑁂𑀯 𑀲𑀫𑀺𑀢𑀺𑀬𑀸 𑀘 𑀩𑀳𑀺𑀤𑁆𑀥𑀸 𑀘 𑀩𑀳𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀢𑀢𑁆𑀣 𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀢𑀸, 𑀲𑀢𑁆𑀢𑁄 𑀚𑀻𑀯𑁄. 𑀉𑀧𑀮𑀩𑁆𑀪𑀢𑀻𑀢𑀺 𑀧𑀜𑁆𑀜𑀸𑀬 𑀉𑀧𑀕𑀦𑁆𑀢𑁆𑀯𑀸 𑀮𑀩𑁆𑀪𑀢𑀺, 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀸𑀓𑀸𑀭𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀪𑀽𑀢𑀝𑁆𑀞𑁄. 𑀧𑀭𑀫𑀢𑁆𑀣𑁄𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀉𑀢𑁆𑀢𑀫𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀬𑁄 𑀧𑀭𑀢𑁄 ¶ ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀤𑀲𑁆𑀲𑀺𑀢𑁄 ¶ . 𑀬𑀣𑀸 𑀲𑁄 𑀪𑀽𑀢𑁂𑀦 𑀲𑀪𑀸𑀯𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀢𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀝𑀺𑀚𑀸𑀦𑀦𑀜𑁆𑀳𑀺 𑀓𑀢𑁆𑀣𑀘𑀺 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀆𑀕𑀘𑁆𑀙𑀢𑀺, 𑀓𑀢𑁆𑀣𑀘𑀺 ‘‘𑀆𑀫𑁄’’𑀢𑀺 𑀧𑀝𑀺𑀚𑀸𑀦𑀦𑀁 𑀆𑀕𑀘𑁆𑀙𑀢𑀺. 𑀇𑀥 𑀧𑀦 ‘‘𑀆𑀫𑀦𑁆𑀢𑀸’’𑀢𑀺 𑀆𑀕𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀲𑁄 𑀳𑀺 𑀬𑀁 𑀢𑀁 𑀧𑀭𑀢𑁄 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀢𑀁 ¶ 𑀆𑀕𑀢𑀁, 𑀢𑀁 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀦 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑁄 𑀯𑀸𑀘𑀁 𑀪𑀸𑀲𑀢𑀺, 𑀦𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀤𑁂𑀯𑀓𑀁 𑀧𑀦 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀢𑀲𑁆𑀫𑀸 𑀬𑁄 𑀢𑁂𑀦 𑀯𑀼𑀢𑁆𑀢𑁄 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺, 𑀲𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑁂𑀯 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺.

𑀅𑀣𑀲𑁆𑀲 𑀢𑀸𑀤𑀺𑀲𑀲𑁆𑀲 𑀮𑁂𑀲𑀯𑀘𑀦𑀲𑁆𑀲 𑀙𑀮𑀯𑀸𑀤𑀲𑁆𑀲 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄 𑀲𑀓𑀯𑀸𑀤𑀻 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀧𑀭𑀢𑁄 ‘‘𑀲𑀧𑁆𑀧𑀘𑁆𑀘𑀬𑁄 𑀅𑀧𑁆𑀧𑀘𑁆𑀘𑀬𑁄, 𑀲𑀗𑁆𑀔𑀢𑁄 𑀅𑀲𑀗𑁆𑀔𑀢𑁄, 𑀲𑀲𑁆𑀲𑀢𑁄, 𑀅𑀲𑀲𑁆𑀲𑀢𑁄 𑀲𑀦𑀺𑀫𑀺𑀢𑁆𑀢𑁄 𑀅𑀦𑀺𑀫𑀺𑀢𑁆𑀢𑁄’’𑀢𑀺 𑀏𑀯𑀁 𑀧𑀭𑀺𑀤𑀻𑀧𑀺𑀢𑁄 𑀭𑀽𑀧𑀸𑀤𑀺𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀆𑀕𑀢𑁄; 𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦, 𑀦𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀧𑀦 𑀪𑀽𑀢𑀢𑀸𑀬 𑀏𑀯 𑀲𑀘𑁆𑀘𑀺𑀓𑀝𑁆𑀞𑁄, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀘 𑀧𑀭𑀫𑀢𑁆𑀣𑁄. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑀢𑀢𑁄𑀢𑀺 𑀓𑀭𑀡𑀯𑀘𑀦𑀫𑁂𑀢𑀁, 𑀢𑀲𑁆𑀫𑀸 𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀼𑀧𑁆𑀧𑀦𑀸𑀤𑀺𑀪𑁂𑀤𑁂𑀦 𑀯𑀸 𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑁂𑀤𑁂𑀦 𑀯𑀸 𑀆𑀓𑀸𑀭𑁂𑀦 𑀬𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁄 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑁂 𑀧𑀼𑀕𑁆𑀕𑀮𑁄𑀧𑀺 𑀢𑁂𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂𑀢𑀺 𑀅𑀯𑀚𑀸𑀦𑀦𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀳𑀺 𑀢𑀣𑀸𑀭𑀽𑀧𑀁 𑀧𑀼𑀕𑁆𑀕𑀮𑀁 𑀅𑀦𑀺𑀘𑁆𑀙𑀦𑁆𑀢𑁄 𑀅𑀯𑀚𑀸𑀦𑀸𑀢𑀺. 𑀢𑀢𑁆𑀭𑀸𑀬𑀁 𑀧𑀤𑀘𑁆𑀙𑁂𑀤𑁄 𑁋 ‘𑀦 𑀳𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂’𑀢𑀺, 𑀦 𑀳𑀺 𑀏𑀯𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀯𑀁 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀲𑀓𑀯𑀸𑀤𑀺𑀯𑀘𑀦𑀁. 𑀬𑀲𑁆𑀫𑀸 𑀢𑁂 𑀧𑀼𑀭𑀺𑀫𑀸𑀬 𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸𑀬 𑀧𑀘𑁆𑀙𑀺𑀫𑀸 𑀦𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸, 𑀧𑀘𑁆𑀙𑀺𑀫𑀸𑀬 𑀘 𑀧𑀼𑀭𑀺𑀫𑀸 𑀦 𑀲𑀦𑁆𑀥𑀺𑀬𑀢𑀺, 𑀢𑀲𑁆𑀫𑀸𑀧𑀺 𑀦𑀺𑀕𑁆𑀕𑀳𑀁 𑀧𑀢𑁆𑀢𑁄. 𑀢𑀁 𑀦𑀺𑀕𑁆𑀕𑀳𑀁 𑀤𑁄𑀲𑀁 ¶ 𑀅𑀧𑀭𑀸𑀥𑀁 𑀲𑀫𑁆𑀧𑀝𑀺𑀘𑁆𑀙𑀸𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀁 ¶ 𑀦𑀺𑀕𑁆𑀕𑀳𑀁 𑀆𑀚𑀸𑀦𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀞𑀧𑀦𑀸𑀬 𑀘𑁂𑀯 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀲𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀬𑀤𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺, 𑀲𑀘𑁂 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 ¶ 𑀅𑀦𑀼𑀮𑁄𑀫𑀞𑀧𑀦𑀸 𑀦𑀸𑀫. 𑀢𑁂𑀦 𑀯𑀢 𑀭𑁂𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸 𑀅𑀦𑀼𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀢𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀯𑀢𑀸𑀢𑀺 𑀑𑀓𑀧𑁆𑀧𑀦𑀯𑀘𑀦𑀁. 𑀭𑁂𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀦, 𑀭𑁂 𑀯𑀢𑁆𑀢𑀩𑁆𑀩𑁂 𑀯𑀢, 𑀭𑁂 𑀳𑀫𑁆𑀪𑁄, 𑀪𑀤𑁆𑀭𑀫𑀼𑀔, 𑀢𑁂𑀦 𑀓𑀸𑀭𑀡𑁂𑀦 𑀯𑀢𑁆𑀢𑀩𑁆𑀩𑁄𑀬𑁂𑀯𑀸𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀅𑀦𑀼𑀮𑁄𑀫𑀭𑁄𑀧𑀦𑀸 𑀦𑀸𑀫. 𑀬𑀁 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀫𑀺𑀘𑁆𑀙𑀸𑀢𑀺𑀧𑀤𑀁 𑀢𑀲𑁆𑀲 𑀧𑀼𑀭𑀢𑁄 𑀇𑀤𑀁 𑀢𑁂’𑀢𑀺 𑀆𑀳𑀭𑀺𑀢𑀩𑁆𑀩𑀁. 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀧𑀭𑀢𑁄 𑀘 𑀧𑀸𑀴𑀺𑀬𑀁 𑀏𑀢𑀁 𑀆𑀕𑀢𑀫𑁂𑀯.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂𑀢𑀺𑀆𑀤𑀺 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀧𑀓𑁆𑀔𑀲𑁆𑀲 𑀞𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 𑀧𑀝𑀺𑀮𑁄𑀫𑀞𑀧𑀦𑀸 𑀦𑀸𑀫. 𑀦𑁄 𑀘 𑀯𑀢 𑀭𑁂𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀧𑀼𑀦 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀭𑁄𑀧𑀦𑀸 𑀦𑀸𑀫. 𑀇𑀥𑀸𑀧𑀺 𑀧𑀭𑀺𑀬𑁄𑀲𑀸𑀦𑁂 𑀫𑀺𑀘𑁆𑀙𑀸𑀢𑀺𑀧𑀤𑀲𑁆𑀲 𑀧𑀼𑀭𑀢𑁄 𑀇𑀤𑀁 𑀢𑁂𑀢𑀺 𑀆𑀳𑀭𑀺𑀢𑀩𑁆𑀩𑀫𑁂𑀯. 𑀧𑀭𑀢𑁄𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀤𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀪𑁄 𑀲𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀁 𑀧𑀦 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺, 𑀦𑁄 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀢𑀸𑀯 𑀅𑀦𑀼𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺. 𑀅𑀣 𑀦 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀢𑀢𑁄 𑀲𑁄 𑀉𑀧𑀮𑀩𑁆𑀪𑀢𑀻’’𑀢𑀺, 𑀧𑀼𑀭𑀺𑀫𑀧𑀜𑁆𑀳𑁂𑀧𑀺 𑀦 𑀯𑀢𑁆𑀢𑀩𑁆𑀩𑁄𑀯. 𑀬𑀁 𑀧𑀦𑁂𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺, 𑀦𑁄 ¶ 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀧𑀝𑀺𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀦𑀺𑀕𑁆𑀕𑀳𑀲𑁆𑀲 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀘𑀢𑀼𑀦𑁆𑀦𑀁 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀅𑀦𑀼𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄, 𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄𑀢𑀺 𑀤𑁆𑀯𑁂 𑀦𑀺𑀕𑁆𑀕𑀳𑀸 𑀓𑀢𑀸. ‘𑀆𑀚𑀸𑀦𑀸𑀳𑀺 ¶ 𑀦𑀺𑀕𑁆𑀕𑀳’𑀦𑁆𑀢𑀺 𑀏𑀢𑀲𑁆𑀲𑁂𑀯 𑀧𑀦𑁂𑀢𑁆𑀣 ¶ 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀞𑀫𑀁 𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀞𑀫𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀭𑁄𑀧𑀺𑀢𑀢𑁆𑀢𑀸 𑀏𑀓𑁄𑀯𑀸𑀬𑀁 𑀦𑀺𑀕𑁆𑀕𑀳𑁄𑀢𑀺 𑀧𑀞𑀫𑁄 𑀦𑀺𑀕𑁆𑀕𑀳𑁄.

𑁨. 𑀇𑀤𑀸𑀦𑀺 𑀧𑀘𑁆𑀘𑀦𑀻𑀓𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀳𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀕𑀳𑀺𑀢𑀢𑁆𑀢𑀸 ‘‘𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀏𑀯𑀁 𑀧𑀼𑀘𑁆𑀙𑀢𑀺. 𑀲𑀓𑀯𑀸𑀤𑀻 𑀬𑀣𑀸 𑀭𑀽𑀧𑀸𑀤𑀺𑀥𑀫𑁆𑀫𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀇𑀢𑀭𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀁𑀬𑁂𑀯 𑀲𑀦𑁆𑀥𑀸𑀬 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀏𑀯𑀫𑀸𑀳. 𑀲𑀓𑀯𑀸𑀤𑀻 ‘𑀧𑀼𑀕𑁆𑀕𑀮𑁄’𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀧𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀢𑁆𑀢𑀸𑀧𑀺 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀇𑀤𑀸𑀦𑀺 𑀓𑀺𑀜𑁆𑀘𑀸𑀧𑀺 𑀢𑁂𑀦 𑀧𑀞𑀫𑀁 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀦𑀼𑀧𑀮𑀩𑁆𑀪𑀦𑀻𑀬𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸, 𑀧𑀘𑁆𑀙𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀭𑀯𑀸𑀤𑀻 𑀧𑀦 ‘𑀦𑀼𑀧𑀮𑀩𑁆𑀪𑀢𑀻’𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀬𑀁 𑀢𑀬𑀸 𑀧𑀞𑀫𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀧𑀘𑁆𑀙𑀸 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀪𑀡𑁆𑀟𑀦𑀲𑁆𑀲 𑀧𑀝𑀺𑀪𑀡𑁆𑀟𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀓𑀢𑀲𑁆𑀲 𑀦𑀺𑀕𑁆𑀕𑀳𑀓𑀫𑁆𑀫𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫𑀦𑁆𑀢𑀺 𑀆𑀳. 𑀇𑀤𑀸𑀦𑀺 𑀬𑀣𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀯𑀸𑀤𑀝𑁆𑀞𑀧𑀦𑀁 𑀓𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑁄 𑀧𑀸𑀓𑀝𑁄 𑀓𑀢𑁄, 𑀏𑀯𑀁 𑀧𑀝𑀺𑀓𑀫𑁆𑀫𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀞𑀧𑀦𑀸 𑀦𑀸𑀫 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 ¶ ‘‘𑀅𑀬𑀁 𑀢𑀯 𑀤𑁄𑀲𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀦𑀺𑀕𑁆𑀕𑀳𑀲𑁆𑀲 𑀯𑀸 𑀧𑀝𑀺𑀓𑀫𑁆𑀫𑀲𑁆𑀲 𑀯𑀸 𑀧𑀸𑀓𑀝𑀪𑀸𑀯𑀓𑀭𑀡𑀁, 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀧𑀦𑀲𑁆𑀲 𑀧𑀸𑀓𑀝𑀓𑀭𑀡𑀁 𑀳𑁄𑀢𑀺. 𑀢𑀲𑁆𑀫𑀸 𑀇𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀯𑀲𑁂𑀦 𑀘𑀢𑀽𑀳𑀸𑀓𑀸𑀭𑁂𑀳𑀺. 𑀧𑀝𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀦𑀸𑀫𑀸𑀢𑀺 𑀏𑀓𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑁩. 𑀏𑀯𑀁 𑀧𑀝𑀺𑀓𑀫𑁆𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑀲𑁆𑀲 𑀢𑀫𑁂𑀯 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀓𑀝𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀢𑁆𑀯𑀜𑁆𑀘𑁂 𑀧𑀦 𑀫𑀜𑁆𑀜𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀻𑀢𑀺 𑀬𑀤𑀺 𑀢𑁆𑀯𑀁 𑀫𑀜𑁆𑀜𑀲𑀺. 𑀯𑀢𑁆𑀢𑀩𑁆𑀩𑁂 𑀔𑁄𑀢𑀺 𑀇𑀤𑀁 𑀧𑀘𑁆𑀘𑀦𑀻𑀓𑁂 𑀆𑀫𑀦𑁆𑀢𑀸𑀢𑀺 𑀧𑀝𑀺𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ¶ . 𑀦𑁄 𑀘 𑀯𑀢𑁆𑀢𑀩𑁆𑀩𑁂𑀢𑀺 𑀇𑀤𑀁 𑀧𑀦 𑀦 𑀳𑁂𑀯𑀸𑀢𑀺 𑀅𑀯𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀢𑀯 𑀢𑀢𑁆𑀣𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁𑀬𑁂𑀯 𑀢𑀲𑁆𑀫𑀺𑀁 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀓𑁆𑀔𑁂 𑁋 ‘‘𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀦𑁆𑀢𑀺 𑀆𑀫𑀦𑁆𑀢𑀸’’𑀢𑀺 ¶ 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑁄. 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀧𑀼𑀦 𑀦 𑀳𑁂𑀯𑀸𑀢𑀺 𑀅𑀯𑀚𑀸𑀦𑀦𑁆𑀢𑁄 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀅𑀣𑁂𑀯𑀁 𑀦𑀺𑀕𑁆𑀕𑀳𑀸𑀭𑀳𑀁 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫. 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀲𑀻𑀢𑀺 𑀲𑀓𑁂𑀦 𑀫𑀢𑁂𑀦 𑀦𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀪𑀯𑀲𑀺.

𑀏𑀯𑀫𑀲𑁆𑀲 𑀦𑀺𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀳𑀜𑁆𑀘𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀇𑀤𑀁 𑀢𑀯 𑀯𑀘𑀦𑀁 𑀫𑀺𑀘𑁆𑀙𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀙𑀮𑀯𑀸𑀤𑁂𑀦 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀦𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀁 𑀦𑀸𑀫.

𑁪. 𑀏𑀯𑀁 𑀦𑀺𑀕𑁆𑀕𑀳𑀁 𑀓𑀢𑁆𑀯𑀸𑀧𑀺 𑀇𑀤𑀸𑀦𑀺 ‘‘𑀬𑀤𑀺 𑀅𑀬𑀁 𑀫𑀬𑀸 𑀢𑀯 𑀫𑀢𑁂𑀦 𑀓𑀢𑁄 ¶ 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀬𑁄 𑀫𑀫 𑀢𑀬𑀸 𑀳𑁂𑀝𑁆𑀞𑀸 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀓𑀢𑁄 𑀦𑀺𑀕𑁆𑀕𑀳𑁄, 𑀲𑁄𑀧𑀺 𑀤𑀼𑀦𑁆𑀦𑀺𑀕𑁆𑀕𑀳𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂𑀢𑀺 𑀏𑀲𑁄 𑀘𑁂 𑀢𑀯 𑀯𑀸𑀤𑁄 𑀫𑀬𑀸 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁄. 𑀅𑀣 𑀯𑀸 𑀏𑀲𑁄 𑀘𑁂 𑀢𑀯 𑀫𑀬𑀸 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄. 𑀳𑁂𑀯𑀫𑁂𑀯𑀁 𑀢𑀢𑁆𑀣 𑀤𑀓𑁆𑀔𑀸𑀢𑀺 𑀢𑀢𑁆𑀣𑀸𑀧𑀺 𑀢𑀬𑀸 𑀫𑀫 𑀳𑁂𑀝𑁆𑀞𑀸 𑀓𑀢𑁂 𑀦𑀺𑀕𑁆𑀕𑀳𑁂 𑀏𑀯𑀫𑁂𑀯𑀁 𑀧𑀲𑁆𑀲. 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀳𑁂𑀝𑁆𑀞𑀸 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑀁 ‘‘𑀯𑀢𑁆𑀢𑀩𑁆𑀩𑁂 𑀔𑁄’’𑀢𑀺𑀆𑀤𑀺𑀯𑀘𑀦𑁂𑀦 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀦𑀺𑀕𑁆𑀕𑀳𑀁 𑀅𑀦𑀺𑀕𑁆𑀕𑀳𑀪𑀸𑀯𑀁 𑀉𑀧𑀦𑁂𑀦𑁆𑀢𑁄 𑀦𑁄 𑀘 𑀫𑀬𑀁 𑀢𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 𑀬𑀲𑁆𑀫𑀸 𑀲𑁄 𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 𑀫𑀬𑀁 𑀢𑀬𑀸 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀆𑀫𑀦𑁆𑀢𑀸𑀢𑀺 𑀏𑀢𑀸𑀬 𑀧𑀝𑀺𑀜𑁆𑀜𑀸𑀬 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀧𑀼𑀦 𑀦 𑀳𑁂𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑁂 𑀓𑀢𑁂𑀧𑀺 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀏𑀯𑀁 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀬𑁂𑀯. 𑀏𑀯𑀁 𑀅𑀦𑀺𑀕𑁆𑀕𑀳𑁂𑀢𑀩𑁆𑀩𑀫𑁆𑀧𑀺 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺, 𑀈𑀤𑀺𑀲𑁂𑀦 𑀧𑀦 𑀦𑀺𑀕𑁆𑀕𑀳𑁂𑀦 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀫𑀬𑀁 𑀳𑁄𑀫.

𑀇𑀤𑀸𑀦𑀺 𑀬𑀁 𑀦𑀺𑀕𑁆𑀕𑀳𑀁 𑀲𑀦𑁆𑀥𑀸𑀬 ‘‘𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫𑀸’’𑀢𑀺 𑀅𑀯𑁄𑀘, 𑀢𑀁 𑀤𑀲𑁆𑀲𑁂𑀢𑀼𑀁 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺𑀆𑀳. 𑀏𑀯𑀫𑀺𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 ¶ 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑀲𑁆𑀲 𑀉𑀧𑀦𑀻𑀢𑀢𑁆𑀢𑀸 𑀉𑀧𑀦𑀬𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺.

𑁫. 𑀇𑀤𑀸𑀦𑀺 ‘‘𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂’’𑀢𑀺𑀆𑀤𑀺𑀓𑀁 𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀬𑀣𑀸𑀳𑀁 𑀢𑀬𑀸 𑀦𑀺𑀕𑁆𑀕𑀳𑀺𑀢𑁄, 𑀦 𑀳𑀺 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀏𑀢𑀲𑁆𑀲 𑀳𑀺 𑀦𑀺𑀕𑁆𑀕𑀳𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀪𑀸𑀯𑁄 𑀫𑀬𑀸 𑀲𑀸𑀥𑀺𑀢𑁄. 𑀢𑁂𑀦 𑀳𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀬𑀲𑁆𑀫𑀸 𑀏𑀲 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 ¶ 𑀬𑀁 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺, 𑀇𑀤𑀁 𑀦𑀺𑀕𑁆𑀕𑀡𑁆𑀳𑀦𑀁 𑀢𑀯 𑀫𑀺𑀘𑁆𑀙𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀇𑀤𑀁 𑀫𑀺𑀘𑁆𑀙𑀸, 𑀢𑁂𑀦 𑀓𑀸𑀭𑀡𑁂𑀦 𑀬𑁄 𑀢𑀬𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀲𑁄 𑀤𑀼𑀓𑁆𑀓𑀝𑁄. 𑀬𑀁 𑀫𑀬𑀸 𑀧𑀝𑀺𑀓𑀫𑁆𑀫𑀁 𑀓𑀢𑀁, 𑀢𑀤𑁂𑀯 𑀲𑀼𑀓𑀢𑀁. 𑀬𑀸𑀧𑀺 ¶ 𑀘𑁂𑀲𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀺𑀯𑀲𑁂𑀦 𑀓𑀣𑀸𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀦𑀸 𑀓𑀢𑀸, 𑀲𑀸𑀧𑀺 𑀲𑀼𑀓𑀢𑀸. 𑀏𑀯𑀫𑁂𑀢𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀸𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀓𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀧𑀭𑀯𑀸𑀤𑀺𑀦𑁄 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀙𑀮𑀯𑀸𑀤𑁂𑀦 𑀚𑀬𑁄 𑀳𑁄𑀢𑀺.

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁬. 𑀇𑀤𑀸𑀦𑀺 𑀬𑀣𑀸 𑀧𑀭𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀲𑀓𑀯𑀸𑀤𑀺𑀦𑁄 𑀥𑀫𑁆𑀫𑁂𑀦𑁂𑀯 𑀢𑀣𑁂𑀦 𑀲𑀼𑀚𑀬𑁄 𑀳𑁄𑀢𑀺, 𑀢𑀣𑀸 𑀯𑀸𑀤𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀘𑁆𑀘𑀦𑀻𑀓𑁂 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀭𑀽𑀧𑀸𑀤𑀺𑀪𑁂𑀤𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀲𑀼𑀤𑁆𑀥𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 𑀧𑀭𑀫𑀢𑁆𑀣𑀫𑀺𑀲𑁆𑀲𑀓𑀁 𑀯𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀫𑁆𑀫𑀼𑀢𑀺𑀯𑀲𑁂𑀦 𑀦𑀼𑀧𑀮𑀩𑁆𑀪𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀅𑀦𑀼𑀬𑁄𑀕𑀲𑁆𑀲 𑀲𑀁𑀓𑀺𑀡𑁆𑀡𑀢𑁆𑀢𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀧𑀝𑀺𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀤𑀼𑀢𑀺𑀬𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑁄 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑁂𑀦 𑀙𑀮𑁂𑀦 𑀦𑀺𑀕𑁆𑀕𑀳𑁄 𑀆𑀭𑁄𑀧𑀺𑀢𑁄.

𑁭-𑁧𑁦. 𑀇𑀤𑀸𑀦𑀺 ¶ 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀢𑁆𑀢𑀦𑁄 𑀯𑀸𑀤𑁂 𑀚𑀬𑀁 ¶ 𑀤𑀲𑁆𑀲𑁂𑀢𑀼𑀁 𑀅𑀦𑀼𑀮𑁄𑀫𑀦𑀬𑁂 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀮𑀤𑁆𑀥𑀺𑀬𑀸 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀦 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁄 𑀧𑀭𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀢𑁆𑀢𑀦𑁄 𑀚𑀬𑀤𑀲𑁆𑀲𑀦𑀢𑁆𑀣𑀁 𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀓𑀯𑀸𑀤𑀻𑀯𑀘𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀤𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀲𑁆𑀲 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀻𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀏𑀯𑀫𑁂𑀢𑀸𑀦𑀺 𑀧𑀞𑀫𑀲𑀘𑁆𑀘𑀺𑀓𑀝𑁆𑀞𑁂 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀢𑀢𑁆𑀣 𑀧𑀼𑀭𑀺𑀫𑀧𑀜𑁆𑀘𑀓𑁂 ¶ 𑀧𑀭𑀯𑀸𑀤𑀺𑀲𑁆𑀲 𑀲𑀓𑀯𑀸𑀤𑀺𑀦𑀸 𑀓𑀢𑁄 𑀦𑀺𑀕𑁆𑀕𑀳𑁄 𑀲𑀼𑀦𑀺𑀕𑁆𑀕𑀳𑁄. 𑀲𑀓𑀯𑀸𑀤𑀺𑀲𑁆𑀲 𑀧𑀦 𑀧𑀭𑀯𑀸𑀤𑀺𑀦𑀸 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀲𑀸𑀥𑀺𑀢𑁄 𑀚𑀬𑁄 𑀤𑀼𑀚𑁆𑀚𑀬𑁄. 𑀤𑀼𑀢𑀺𑀬𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀲𑁆𑀲 𑀧𑀭𑀯𑀸𑀤𑀺𑀦𑀸 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄. 𑀧𑀭𑀯𑀸𑀤𑀺𑀲𑁆𑀲 𑀧𑀦 𑀲𑀓𑀯𑀸𑀤𑀺𑀦𑀸 𑀥𑀫𑁆𑀫𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀲𑀸𑀥𑀺𑀢𑁄 𑀚𑀬𑁄 𑀲𑀼𑀚𑀬𑁄𑀢𑀺 𑀧𑀞𑀫𑀲𑀘𑁆𑀘𑀺𑀓𑀝𑁆𑀞𑁄. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦𑀺𑀕𑁆𑀕𑀳𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀼𑀤𑁆𑀥𑁄 𑀧𑀞𑀫𑀧𑀜𑁆𑀘𑀓𑁂;

𑀅𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀦𑀺𑀕𑁆𑀕𑀳𑁄 𑀲𑀓𑀯𑀸𑀤𑀺𑀲𑁆𑀲, 𑀅𑀲𑀼𑀤𑁆𑀥𑁄 𑀤𑀼𑀢𑀺𑀬𑀧𑀜𑁆𑀘𑀓𑁂;

𑀯𑀺𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀢𑀲𑁆𑀫𑀸 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼, 𑀚𑀬𑁄𑀯 𑀲𑀓𑀯𑀸𑀤𑀺𑀦𑁄;

𑀥𑀫𑁆𑀫𑁂𑀦 𑀳𑀺 𑀚𑀬𑁄 𑀦𑀸𑀫, 𑀅𑀥𑀫𑁆𑀫𑁂𑀦 𑀓𑀼𑀢𑁄 𑀚𑀬𑁄.

‘‘𑀲𑀘𑁆𑀘𑀺𑀓𑀝𑁆𑀞𑁂 𑀬𑀣𑀸 𑀘𑁂𑀢𑁆𑀣, 𑀧𑀜𑁆𑀘𑀓𑀤𑁆𑀯𑀬𑀫𑀡𑁆𑀟𑀺𑀢𑁂;

𑀥𑀫𑁆𑀫𑀸𑀥𑀫𑁆𑀫𑀯𑀲𑁂𑀦𑁂𑀯, 𑀯𑀼𑀢𑁆𑀢𑁄 𑀚𑀬𑀧𑀭𑀸𑀚𑀬𑁄.

‘‘𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀧𑀡𑁆𑀟𑀺𑀢𑁄;

𑀏𑀯𑀫𑁂𑀯 𑀯𑀺𑀪𑀸𑀯𑁂𑀬𑁆𑀬, 𑀉𑀪𑁄 𑀚𑀬𑀧𑀭𑀸𑀚𑀬𑁂’’𑀢𑀺.

𑁨. 𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁧. 𑀏𑀯𑀁 ¶ ¶ 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀅𑀧𑀭𑁂𑀳𑀺 𑀑𑀓𑀸𑀲𑀸𑀤𑀻𑀳𑀺 𑀦𑀬𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀧𑀼𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀲𑀩𑁆𑀩𑀢𑁆𑀣𑀸𑀢𑀺 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀤𑁄𑀲𑀜𑁆𑀘 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀆𑀧𑀚𑁆𑀚𑀦𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀞𑁄 𑀧𑀦 𑀲𑀗𑁆𑀔𑀺𑀢𑁆𑀢𑁄 ¶ . 𑀢𑀢𑁆𑀣 𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀭𑀻𑀭𑀢𑁄 𑀩𑀳𑀺 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀞𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀅𑀯𑀚𑀸𑀦𑀸𑀢𑀻𑀢𑀺 𑀙𑀮𑀯𑀸𑀤𑀲𑁆𑀲 𑀯𑀲𑁂𑀦 𑀧𑀝𑀺𑀓𑀫𑁆𑀫𑀁 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁩. 𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑀦𑀬𑁂 𑀲𑀩𑁆𑀩𑀤𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀜𑁆𑀘 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀲𑁆𑀯𑁂𑀯 𑀔𑀢𑁆𑀢𑀺𑀬𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺𑀆𑀤𑀻𑀦𑀁 𑀆𑀧𑀢𑁆𑀢𑀺𑀤𑁄𑀲𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀧𑀞𑀫𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑁪. 𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑀦𑀬𑁂 𑀲𑀩𑁆𑀩𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀢𑁆𑀢𑀸𑀢𑀺𑀆𑀤𑀺𑀤𑁄𑀲𑀪𑀬𑁂𑀦 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀑𑀓𑀸𑀲𑀤𑀺𑀲𑀘𑁆𑀘𑀺𑀓𑀝𑁆𑀞𑀸𑀤𑀺

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁪. 𑀏𑀯𑀫𑁂𑀢𑀸𑀦𑀺 ¶ ¶ 𑀢𑀻𑀡𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀅𑀦𑀼𑀮𑁄𑀫𑀫𑀢𑁆𑀢𑀯𑀲𑁂𑀦𑁂𑀯 𑀢𑀸𑀯 𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑁂 𑀧𑀘𑁆𑀘𑀦𑀻𑀓𑀫𑀢𑁆𑀢𑀯𑀲𑁂𑀦𑁂𑀯 𑀪𑀸𑀚𑁂𑀢𑀼𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀧𑀸𑀴𑀺𑀬𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑁂 𑀧𑀘𑁆𑀘𑀦𑀻𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀦𑀻𑀓𑀲𑁆𑀲 𑀘 𑀧𑀸𑀴𑀺𑀬𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑁂 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀲𑀼𑀤𑁆𑀥𑀺𑀓𑀲𑁆𑀲 𑀘𑁂𑀯 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀺𑀓𑀝𑁆𑀞𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑀺𑀓𑀝𑁆𑀞𑁂 ¶ 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀲𑁆𑀲 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀦𑀻𑀓𑀸𑀦𑀁 𑀯𑀲𑁂𑀦 𑀅𑀬𑀁 𑀅𑀝𑁆𑀞𑀫𑀼𑀔𑀸 𑀦𑀸𑀫 𑀯𑀸𑀤𑀬𑀼𑀢𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀏𑀓𑁂𑀓𑀲𑁆𑀫𑀺𑀁 𑀫𑀼𑀔𑁂 𑀏𑀓𑁂𑀓𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀯𑀲𑁂𑀦 𑀅𑀝𑁆𑀞𑀓𑀦𑀺𑀕𑁆𑀕𑀳𑁄𑀢𑀺 𑀧𑀸𑀴𑀺𑀬𑀁 𑀮𑀺𑀔𑀺𑀬𑀢𑀺. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀘𑀢𑀼𑀩𑁆𑀩𑀺𑀥𑁂 𑀧𑀜𑁆𑀳𑁂, 𑀧𑀜𑁆𑀘𑀓𑀤𑁆𑀯𑀬𑀪𑁂𑀤𑀢𑁄;

𑀏𑀲𑀸 𑀅𑀝𑁆𑀞𑀫𑀼𑀔𑀸 𑀦𑀸𑀫, 𑀯𑀸𑀤𑀬𑀼𑀢𑁆𑀢𑀺 𑀧𑀓𑀸𑀲𑀺𑀢𑀸.

‘‘𑀅𑀝𑁆𑀞𑁂𑀯 𑀦𑀺𑀕𑁆𑀕𑀳𑀸 𑀢𑀢𑁆𑀣, 𑀘𑀢𑁆𑀢𑀸𑀭𑁄 𑀢𑁂𑀲𑀼 𑀥𑀫𑁆𑀫𑀺𑀓𑀸;

𑀅𑀥𑀫𑁆𑀫𑀺𑀓𑀸 𑀘 𑀘𑀢𑁆𑀢𑀸𑀭𑁄, 𑀲𑀩𑁆𑀩𑀢𑁆𑀣 𑀲𑀓𑀯𑀸𑀤𑀺𑀦𑁄;

𑀚𑀬𑁄 𑀧𑀭𑀸𑀚𑀬𑁄 𑀘𑁂𑀯, 𑀲𑀩𑁆𑀩𑀢𑁆𑀣 𑀧𑀭𑀯𑀸𑀤𑀺𑀦𑁄’’𑀢𑀺.

𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁧𑁭-𑁨𑁭. 𑀇𑀤𑀸𑀦𑀺 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀜𑁆𑀘𑀸𑀢𑀺 𑀬𑀣𑀸 𑀭𑀽𑀧𑀁 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑁂 𑀧𑀼𑀕𑁆𑀕𑀮𑁄𑀧𑀺 𑀢𑀣𑁂𑀯 𑀉𑀧𑀮𑀩𑁆𑀪𑀢𑀻𑀢𑀺 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀯𑀘𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀬𑀤𑀺 𑀢𑁂 𑀭𑀽𑀧𑀁 𑀯𑀺𑀬 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀭𑀽𑀧𑀢𑁄 𑀯𑁂𑀤𑀦𑀸𑀤𑀻𑀦𑀁 𑀯𑀺𑀬 ¶ 𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀅𑀜𑁆𑀜𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀲𑀫𑀬𑀲𑀼𑀢𑁆𑀢𑀯𑀺𑀭𑁄𑀥𑀁 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀅𑀢𑁆𑀣𑀢𑁄 ¶ 𑀧𑀸𑀓𑀝𑀫𑁂𑀯. 𑀥𑀫𑁆𑀫𑀢𑁄 𑀧𑀦𑁂𑀢𑁆𑀣 𑀲𑀢𑁆𑀢𑀧𑀜𑁆𑀜𑀸𑀲𑀪𑁂𑀤𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀲𑁆𑀲 𑀯𑀲𑁂𑀦 𑀲𑀓𑀯𑀸𑀤𑀻𑀧𑀓𑁆𑀔𑀫𑀽𑀮𑀓𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑁂 𑀲𑀢𑁆𑀢𑀧𑀜𑁆𑀜𑀸𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀗𑁆𑀔𑀺𑀢𑁆𑀢𑀸𑀦𑀺. 𑀧𑀭𑀯𑀸𑀤𑀻𑀧𑀓𑁆𑀔𑀫𑀽𑀮𑀓𑁂𑀧𑀺 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂 𑀲𑀢𑁆𑀢𑀧𑀜𑁆𑀜𑀸𑀲 𑀧𑀝𑀺𑀮𑁄𑀫𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀗𑁆𑀔𑀺𑀢𑁆𑀢𑀸𑀦𑀺. 𑀢𑀢𑁆𑀣 ‘‘𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀢𑀁 𑀭𑀽𑀧𑀲𑁆𑀲 𑀘 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀉𑀪𑀺𑀦𑁆𑀦𑀁 𑀅𑀜𑁆𑀜𑀢𑁆𑀢𑀁 𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀁 ¶ 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑁆𑀢𑀸 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀅𑀢𑁆𑀣𑀢𑁄 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸.

𑁬. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮-𑁩𑁬. 𑀇𑀤𑀸𑀦𑀺 𑀭𑀽𑀧𑀸𑀤𑀻𑀳𑁂𑀯 𑀲𑀤𑁆𑀥𑀺𑀁 𑀑𑀧𑀫𑁆𑀫𑀯𑀲𑁂𑀦 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀯𑁂𑀤𑀦𑀸𑀦𑀁 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸 𑀘 𑀧𑀼𑀕𑁆𑀕𑀮𑀭𑀽𑀧𑀸𑀦𑀁 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀧𑀼𑀘𑁆𑀙𑀸 𑀘𑀸𑀢𑀺 𑀧𑀼𑀘𑁆𑀙𑀸𑀤𑁆𑀯𑀬𑀫𑁆𑀧𑀺 𑀲𑀓𑀯𑀸𑀤𑀺𑀲𑁆𑀲, 𑀉𑀪𑁄𑀧𑀺 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀭𑀯𑀸𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑁂𑀦 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀭𑀽𑀧𑀯𑁂𑀤𑀦𑀸𑀦𑀁 𑀯𑀺𑀬 𑀭𑀽𑀧𑀧𑀼𑀕𑁆𑀕𑀮𑀸𑀦𑀁 𑀅𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲. 𑀲𑁂𑀲𑀫𑀺𑀥𑀸𑀧𑀺 𑀅𑀢𑁆𑀣𑀢𑁄 𑀧𑀸𑀓𑀝𑀫𑁂𑀯. 𑀥𑀫𑁆𑀫𑀢𑁄 𑀧𑀦𑁂𑀢𑁆𑀣 𑀭𑀽𑀧𑀫𑀽𑀮𑀓𑀸𑀤𑀻𑀦𑀁 𑀘𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀲𑀓𑀯𑀸𑀤𑀻𑀧𑀓𑁆𑀔𑁂 𑀯𑀻𑀲𑀸𑀥𑀺𑀓𑀸𑀦𑀺 𑀦𑀯 𑀦𑀺𑀕𑁆𑀕𑀳𑀧𑀜𑁆𑀘𑀓𑀲𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀓𑀣𑀁? 𑀔𑀦𑁆𑀥𑁂𑀲𑀼 𑀢𑀸𑀯 𑀭𑀽𑀧𑀫𑀽𑀮𑀓𑁂 𑀘𑀓𑁆𑀓𑁂 𑀘𑀢𑁆𑀢𑀸𑀭𑀺, 𑀢𑀣𑀸 𑀯𑁂𑀤𑀦𑀸𑀤𑀺𑀫𑀽𑀮𑀓𑁂𑀲𑀽𑀢𑀺 𑀯𑀻𑀲𑀢𑀺. 𑀆𑀬𑀢𑀦𑁂𑀲𑀼 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂 𑀘𑀓𑁆𑀓𑁂 𑀏𑀓𑀸𑀤𑀲, 𑀢𑀣𑀸 𑀲𑁂𑀲𑁂𑀲𑀽𑀢𑀺 𑀤𑁆𑀯𑀢𑁆𑀢𑀺𑀁𑀲𑀲𑀢𑀁. 𑀥𑀸𑀢𑀽𑀲𑀼 𑀘𑀓𑁆𑀔𑀼𑀥𑀸𑀢𑀼𑀫𑀽𑀮𑀓𑁂 𑀘𑀓𑁆𑀓𑁂 𑀲𑀢𑁆𑀢𑀭𑀲, 𑀢𑀣𑀸 𑀲𑁂𑀲𑁂𑀲𑀽𑀢𑀺 𑀙𑀸𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑁂 ¶ 𑀘𑀓𑁆𑀓𑁂 𑀏𑀓𑀯𑀻𑀲𑀢𑀺, 𑀢𑀣𑀸 𑀲𑁂𑀲𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀯𑀻𑀲𑀸𑀥𑀺𑀓𑀸𑀦𑀺 𑀦𑀯 𑀦𑀺𑀕𑁆𑀕𑀳𑀧𑀜𑁆𑀘𑀓𑀲𑀢𑀸𑀦𑀺 𑀳𑁄𑀦𑁆𑀢𑀺.

𑁩𑁭-𑁪𑁫. 𑀧𑀭𑀯𑀸𑀤𑀻𑀧𑀓𑁆𑀔𑁂𑀧𑀺 𑀭𑀽𑀧𑀁 𑀉𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀮𑁄𑀫𑀯𑀲𑁂𑀦𑁂𑀯 𑀭𑀽𑀧𑀯𑁂𑀤𑀦𑀸𑀤𑀻𑀦𑀁 𑀅𑀜𑁆𑀜𑀢𑁆𑀢𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀧𑀼𑀦 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀙𑀮𑀯𑀲𑁂𑀦 ¶ 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀓𑀢𑁄. 𑀲𑁂𑀲𑀫𑀺𑀥𑀸𑀧𑀺 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀥𑀫𑁆𑀫𑀢𑁄𑀧𑀺 𑀲𑀓𑀯𑀸𑀤𑀻𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑁂𑀦 𑀯𑀻𑀲𑀸𑀥𑀺𑀓𑀸𑀦𑀺 𑀦𑀯 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀲𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀑𑀧𑀫𑁆𑀫𑀯𑀲𑁂𑀦 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀁.

𑁭. 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁪𑁬-𑁫𑁨. 𑀇𑀤𑀸𑀦𑀺 ¶ 𑀬𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀺, 𑀢𑁂𑀦 𑀬𑀲𑁆𑀫𑀸 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀲𑀼 𑀅𑀜𑁆𑀜𑀢𑀭𑁂𑀦 𑀪𑀯𑀺𑀢𑀩𑁆𑀩𑀁; 𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑁂𑀦 𑀯𑀸, 𑀅𑀜𑁆𑀜𑀢𑁆𑀭 𑀯𑀸 𑀭𑀽𑀧𑀸𑀤𑀻𑀳𑀺, 𑀭𑀽𑀧𑀸𑀤𑀻𑀦𑀁 𑀯𑀸 𑀦𑀺𑀲𑁆𑀲𑀬𑁂𑀦, 𑀢𑀲𑁆𑀫𑀸 𑀇𑀫𑀺𑀦𑀸 𑀘𑀢𑀼𑀓𑁆𑀓𑀦𑀬𑁂𑀦 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀭𑀽𑀧𑀁 𑀧𑀼𑀕𑁆𑀕𑀮𑁄𑀢𑀺 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀪𑀬𑁂𑀦 𑀦 𑀳𑁂𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲, 𑀦𑀺𑀕𑁆𑀕𑀳𑀸𑀭𑁄𑀧𑀦𑀁 𑀲𑀓𑀯𑀸𑀤𑀺𑀲𑁆𑀲. 𑀓𑀺𑀁 𑀧𑀦𑁂𑀢𑀁 𑀬𑀼𑀢𑁆𑀢𑀁, 𑀦𑀦𑀼 𑀭𑀽𑀧𑀁 𑀯𑁂𑀤𑀦𑀸𑀢𑀺 𑀯𑀼𑀢𑁆𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯𑀸𑀢𑀺? 𑀆𑀫 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑀁 𑀧𑀦 𑀭𑀽𑀧𑀢𑁄 𑀯𑁂𑀤𑀦𑀸𑀬 𑀅𑀜𑁆𑀜𑀲𑀪𑀸𑀯𑀲𑀩𑁆𑀪𑀸𑀯𑀢𑁄, 𑀦 𑀅𑀜𑁆𑀜𑀢𑁆𑀢𑀸𑀪𑀸𑀯𑀢𑁄. 𑀅𑀬𑀜𑁆𑀘 𑀭𑀽𑀧𑀸𑀤𑀻𑀲𑀼 𑀏𑀓𑀥𑀫𑁆𑀫𑀢𑁄𑀧𑀺 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀢𑀁 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀬𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀦𑀼𑀬𑁄𑀕𑁄 𑀭𑀽𑀧𑀁 𑀧𑀼𑀕𑁆𑀕𑀮𑁄…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀧𑀼𑀕𑁆𑀕𑀮𑁄𑀢𑀺 𑀲𑀓𑀮𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬 𑀆𑀭𑀤𑁆𑀥𑁄. 𑀲𑀓𑀮𑀁 𑀧𑀦 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀯𑀲𑁂𑀦 𑀏𑀓𑀢𑁄 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀬𑁄𑀕𑀮𑀓𑁆𑀔𑀡𑀫𑀢𑁆𑀢𑀫𑁂𑀢𑀁 𑀞𑀧𑀺𑀢𑀁. 𑀢𑁂𑀦 𑀯𑀺𑀜𑁆𑀜𑀽 𑀅𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑀺. 𑀯𑀸𑀤𑀓𑀸𑀫𑁂𑀦 𑀧𑀦 𑀇𑀫𑀁 𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀬𑀣𑀸 𑀧𑀭𑀯𑀸𑀤𑀺𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺, 𑀢𑀣𑀸 𑀢𑀣𑀸 ¶ 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀬𑁄𑀕𑀮𑀓𑁆𑀔𑀡𑀲𑁆𑀲 𑀞𑀧𑀺𑀢𑀢𑁆𑀢𑀸𑀧𑀺 𑀬𑀼𑀢𑁆𑀢𑀫𑁂𑀯. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀦𑀼𑀬𑁄𑀕𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄𑀢𑀺𑀆𑀤𑀻𑀲𑀼 𑀬𑀣𑀸 𑀏𑀓𑀁 𑀫𑀳𑀸𑀪𑀽𑀢𑀁 𑀦𑀺𑀲𑁆𑀲𑀸𑀬 𑀢𑀬𑁄 𑀫𑀳𑀸𑀪𑀽𑀢𑀸, 𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀸𑀬 𑀯𑀺𑀜𑁆𑀜𑀸𑀡𑀁 𑀭𑀽𑀧𑀲𑁆𑀫𑀺𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀢𑁂 𑀏𑀯𑀁 𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄? 𑀬𑀣𑀸 𑀘 𑀲𑀪𑀸𑀕𑀯𑀺𑀦𑀺𑀩𑁆𑀪𑁄𑀕𑀢𑁄 𑀯𑁂𑀤𑀦𑀸𑀤𑀬𑁄 𑀲𑀩𑁆𑀩𑀥𑀫𑁆𑀫𑀸, 𑀅𑀭𑀽𑀧𑀸 𑀯𑀸 𑀧𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀢𑁂 𑀏𑀯𑀁 𑀧𑀼𑀕𑁆𑀕𑀮𑁄? 𑀬𑀣𑀸 ¶ 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀯𑀲𑁂𑀦 ‘‘𑀯𑁂𑀤𑀦𑀸𑀬 𑀭𑀽𑀧𑀁…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀭𑀽𑀧’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀢𑁂 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺? 𑀲𑀩𑁆𑀩𑀸𑀦𑀼𑀬𑁄𑀕𑁂𑀲𑀼 𑀧𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀪𑀬𑁂𑀦 𑀘𑁂𑀯 𑀲𑀫𑀬𑀯𑀺𑀭𑁄𑀥𑁂𑀦 𑀘 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀅𑀢𑁆𑀣𑀢𑁄 𑀧𑀸𑀓𑀝𑀫𑁂𑀯. 𑀥𑀫𑁆𑀫𑀢𑁄 𑀧𑀦𑁂𑀢𑁆𑀣 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀦𑀺𑀕𑁆𑀕𑀳𑀯𑀲𑁂𑀦 𑀅𑀝𑁆𑀞𑀯𑀻𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀧𑀜𑁆𑀘𑀓𑀲𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀧𑀭𑀯𑀸𑀤𑀻𑀧𑀓𑁆𑀔𑁂𑀧𑀺 𑀧𑀝𑀺𑀓𑀫𑁆𑀫𑀯𑀲𑁂𑀦 𑀢𑀢𑁆𑀢𑀓𑀸𑀦𑁂𑀯. 𑀬𑀸 𑀧𑀦𑁂𑀢𑁆𑀣 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀯𑀼𑀢𑁆𑀢𑁂 𑀲𑀓𑀯𑀸𑀤𑀺𑀲𑁆𑀲 𑀧𑀝𑀺𑀜𑁆𑀜𑀸, 𑀲𑀸 𑀲𑀼𑀢𑁆𑀢𑁂 𑀆𑀕𑀢𑁂𑀦 𑀲𑀫𑁆𑀫𑀼𑀢𑀺𑀯𑀲𑁂𑀦. 𑀬𑁄 𑀭𑀽𑀧𑀁 𑀧𑀼𑀕𑁆𑀕𑀮𑁄𑀢𑀺𑀆𑀤𑀻𑀲𑀼 𑀧𑀝𑀺𑀓𑁆𑀔𑁂𑀧𑁄, 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑁆𑀢𑀸. 𑀧𑀭𑀯𑀸𑀤𑀺𑀲𑁆𑀲 𑀧𑀝𑀺𑀓𑀫𑁆𑀫𑀁 𑀙𑀮𑀯𑀲𑁂𑀦𑁂𑀯𑀸𑀢𑀺.

𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀁.

𑀦𑀺𑀝𑁆𑀞𑀺𑀢𑀸 𑀘 𑀲𑀁𑀲𑀦𑁆𑀤𑀦𑀓𑀣𑀸.

𑁮. 𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁫𑁩. 𑀇𑀤𑀸𑀦𑀺 ¶ 𑀮𑀓𑁆𑀔𑀡𑀬𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀲𑁂𑀲𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁄 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀢𑀸𑀬 𑀲𑀧𑁆𑀧𑀘𑁆𑀘𑀬𑁄, 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀫𑁆𑀫 𑀓𑀢𑀢𑁆𑀢𑀸 𑀲𑀗𑁆𑀔𑀢𑁄, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀢𑁄 𑀲𑀤𑀸 𑀅𑀪𑀸𑀯𑀢𑁄 𑀅𑀲𑀲𑁆𑀲𑀢𑁄, 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑀗𑁆𑀔𑀸𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑀦𑀺𑀫𑀺𑀢𑁆𑀢𑁄, 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀪𑀸𑀯𑀢𑁄 𑀅𑀧𑁆𑀧𑀘𑁆𑀘𑀬𑀁 𑀅𑀲𑀗𑁆𑀔𑀢𑀁 𑀲𑀲𑁆𑀲𑀢𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀤𑀁 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀬𑀤𑀺 𑀧𑀼𑀕𑁆𑀕𑀮𑁄𑀧𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁄𑀯 𑀢𑀲𑁆𑀲𑀸𑀧𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀦𑁆𑀥𑀸𑀬 𑀧𑀼𑀕𑁆𑀕𑀮𑁄 𑀲𑀧𑁆𑀧𑀘𑁆𑀘𑀬𑁄𑀢𑀺𑀆𑀤𑀬𑁄 𑀅𑀝𑁆𑀞𑀧𑀺 𑀅𑀦𑀼𑀬𑁄𑀕𑀸 𑀲𑀓𑀯𑀸𑀤𑀺𑀲𑁆𑀲 ¶ , 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺𑀆𑀤𑀺 𑀧𑀦𑁂𑀢𑁆𑀣 𑀲𑀗𑁆𑀔𑀺𑀢𑁆𑀢𑀁. 𑀏𑀯𑀫𑁂𑀢𑀸𑀦𑀺 𑀲𑀓𑀯𑀸𑀤𑀻𑀧𑀓𑁆𑀔𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑁂 𑀅𑀦𑀼𑀮𑁄𑀫𑀫𑀢𑁆𑀢𑀯𑀲𑁂𑀦 𑀅𑀝𑁆𑀞 𑀧𑀜𑁆𑀘𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁪. 𑀧𑀭𑀯𑀸𑀤𑀻𑀧𑀓𑁆𑀔𑁂𑀧𑀺 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂 𑀧𑀘𑁆𑀘𑀦𑀻𑀓𑀫𑀢𑁆𑀢𑀯𑀲𑁂𑀦 𑀅𑀝𑁆𑀞𑁂𑀯. 𑀢𑀢𑁆𑀣 𑀬𑀲𑁆𑀫𑀸 𑀧𑀭𑀯𑀸𑀤𑀺𑀦𑀸 𑀲𑀼𑀢𑁆𑀢𑀯𑀲𑁂𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀸𑀥𑀺𑀢𑀁, 𑀲𑀫𑁆𑀫𑀼𑀢𑀺𑀬𑀸 𑀘 𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀸𑀯𑁄 ¶ 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀸𑀣𑀸𑀯𑀢𑁄 𑀘 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀙𑀮𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀁 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀇𑀥𑀸𑀧𑀺 𑀲𑀗𑁆𑀔𑀺𑀢𑁆𑀢𑀫𑁂𑀯.

𑀮𑀓𑁆𑀔𑀡𑀬𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀇𑀤𑀸𑀦𑀺 𑀯𑀘𑀦𑀲𑁄𑀥𑀦𑀁 𑀳𑁄𑀢𑀺. 𑀢𑀢𑁆𑀣 𑀬𑀤𑁂𑀢𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀘𑀦𑀁, 𑀢𑀁 𑀲𑁄𑀥𑁂𑀢𑀼𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺, 𑀉𑀧𑀮𑀩𑁆𑀪𑀢𑀺 𑀧𑀼𑀕𑁆𑀕𑀮𑁄𑀢𑀺. 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑁂𑀢𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀁, 𑀢𑀁 𑀏𑀓𑀢𑁆𑀣𑀁 𑀯𑀸 𑀪𑀯𑁂𑀬𑁆𑀬 𑀦𑀸𑀦𑀢𑁆𑀣𑀁 𑀯𑀸. 𑀬𑀤𑀺 𑀢𑀸𑀯 𑀦𑀸𑀦𑀢𑁆𑀣𑀁, 𑀬𑀣𑀸 𑀅𑀜𑁆𑀜𑀁 𑀭𑀽𑀧𑀁, 𑀅𑀜𑁆𑀜𑀸 𑀯𑁂𑀤𑀦𑀸, 𑀏𑀯𑀁 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄, 𑀅𑀜𑁆𑀜𑁄 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀅𑀣𑁂𑀓𑀢𑁆𑀣𑀁, 𑀬𑀣𑀸 𑀬𑀁 𑀘𑀺𑀢𑁆𑀢𑀁 𑀢𑀁 𑀫𑀦𑁄, 𑀏𑀯𑀁 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄, 𑀲𑁄 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀢𑁂𑀦 𑀢𑀁 𑀯𑀤𑀸𑀫𑀺 ‘‘𑀬𑀤𑀺 𑀢𑁂 𑀬𑁄 𑀧𑀼𑀕𑁆𑀕𑀮𑁄, 𑀲𑁄 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀲𑀦𑁆𑀢𑁂 𑀬𑁄 𑀬𑁄 𑀉𑀧𑀮𑀩𑁆𑀪𑀢𑀺, 𑀲𑁄 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀆𑀧𑀚𑁆𑀚𑀢𑀺, 𑀓𑀺𑀁 𑀲𑀫𑁆𑀧𑀝𑀺𑀘𑁆𑀙𑀲𑀺 𑀏𑀢’’𑀦𑁆𑀢𑀺? 𑀢𑀢𑁄 𑀧𑀼𑀕𑁆𑀕𑀮𑀯𑀸𑀤𑀻 𑀬𑀲𑁆𑀫𑀸 𑀧𑀼𑀕𑁆𑀕𑀮𑀲𑁆𑀲 𑀉𑀧𑀮𑀩𑁆𑀪𑀢𑀁 ¶ 𑀇𑀘𑁆𑀙𑀢𑀺, 𑀦 𑀉𑀧𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀧𑀼𑀕𑁆𑀕𑀮𑀪𑀸𑀯𑀁, 𑀢𑀲𑁆𑀫𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺, 𑀉𑀧𑀮𑀩𑁆𑀪𑀢𑀺 𑀓𑁂 𑀳𑀺 𑀘𑀺 𑀧𑀼𑀕𑁆𑀕𑀮𑁄 𑀓𑁂 𑀳𑀺 𑀘𑀺 𑀦 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀧𑀼𑀕𑁆𑀕𑀮𑁄 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀲𑀢𑁆𑀣𑀼 𑀯𑀘𑀦𑀢𑁄 𑀉𑀧𑀮𑀩𑁆𑀪𑀢𑀺. 𑀬𑁄 𑀧𑀦 𑀉𑀧𑀮𑀩𑁆𑀪𑀢𑀺, 𑀦 𑀲𑁄 𑀲𑀩𑁆𑀩𑁄 𑀧𑀼𑀕𑁆𑀕𑀮𑁄, 𑀅𑀣 𑀔𑁄 𑀓𑁂 𑀳𑀺 𑀘𑀺 𑀧𑀼𑀕𑁆𑀕𑀮𑁄 𑀓𑁂 𑀳𑀺 𑀘𑀺 𑀦 𑀧𑀼𑀕𑁆𑀕𑀮𑁄𑀢𑀺. 𑀢𑀢𑁆𑀣 𑀓𑁄-𑀓𑀸𑀭𑀢𑁆𑀣𑁂 𑀓𑁂-𑀓𑀸𑀭𑁄, 𑀳𑀺-𑀓𑀸𑀭𑁄 𑀘 𑀦𑀺𑀧𑀸𑀢𑀫𑀢𑁆𑀢𑁄. 𑀓𑁄𑀘𑀺 𑀧𑀼𑀕𑁆𑀕𑀮𑁄, 𑀓𑁄𑀘𑀺 𑀦 𑀧𑀼𑀕𑁆𑀕𑀮𑁄𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀼𑀕𑁆𑀕𑀮𑁄𑀧𑀺 𑀳𑀺 𑀭𑀽𑀧𑀸𑀤𑀻𑀲𑀼𑀧𑀺 𑀬𑁄 𑀓𑁄𑀘𑀺 𑀥𑀫𑁆𑀫𑁄 𑀉𑀧𑀮𑀩𑁆𑀪𑀢𑀺𑀬𑁂𑀯, 𑀢𑀢𑁆𑀣 𑀧𑀼𑀕𑁆𑀕𑀮𑁄𑀯 𑀧𑀼𑀕𑁆𑀕𑀮𑁄. 𑀭𑀽𑀧𑀸𑀤𑀻𑀲𑀼 ¶ 𑀧𑀦 𑀓𑁄𑀘𑀺𑀧𑀺 𑀦 𑀧𑀼𑀕𑁆𑀕𑀮𑁄𑀢𑀺. 𑀢𑀢𑁄 𑀢𑀁 𑀲𑀓𑀯𑀸𑀤𑀻 𑀆𑀳 𑁋 𑀧𑀼𑀕𑁆𑀕𑀮𑁄 𑀓𑁂 𑀳𑀺 𑀘𑀺 𑀉𑀧𑀮𑀩𑁆𑀪𑀢𑀺 𑀓𑁂 𑀳𑀺 𑀘𑀺 𑀦 𑀉𑀧𑀮𑀩𑁆𑀪𑀢𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂 𑀬𑀤𑀺 𑀉𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑁄 𑀥𑀫𑁆𑀫𑁄 𑀧𑀼𑀕𑁆𑀕𑀮𑀢𑁄 𑀅𑀦𑀜𑁆𑀜𑁄𑀧𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀓𑁄𑀘𑀺 𑀦 𑀧𑀼𑀕𑁆𑀕𑀮𑁄, 𑀧𑀼𑀕𑁆𑀕𑀮𑁄𑀧𑀺 ¶ 𑀢𑁂 𑀓𑁄𑀘𑀺 𑀉𑀧𑀮𑀩𑁆𑀪𑀢𑀺, 𑀓𑁄𑀘𑀺 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀓𑀺𑀁 𑀲𑀫𑁆𑀧𑀝𑀺𑀘𑁆𑀙𑀲𑀺 𑀏𑀢𑀦𑁆𑀢𑀺? 𑀲𑁄 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀮𑀤𑁆𑀥𑀺𑀁 𑀅𑀦𑀺𑀘𑁆𑀙𑀦𑁆𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑁄 𑀧𑀭𑀁 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀗𑁆𑀔𑀺𑀢𑁆𑀢𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀕𑁆𑀕𑀮𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀸𑀦𑀺 𑀳𑁂𑀢𑀸𑀦𑀺 𑀉𑀧𑀮𑀩𑁆𑀪𑀢𑀺𑀯𑁂𑀯𑀘𑀦𑀸𑀦𑁂𑀯, 𑀅𑀧𑀺𑀘 𑀬𑀲𑁆𑀫𑀸 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀅𑀬𑀁 𑀧𑀼𑀕𑁆𑀕𑀮𑀯𑀸𑀤𑀺𑀦𑁄 𑀧𑀝𑀺𑀜𑁆𑀜𑀸, 𑀢𑀲𑁆𑀫𑀸𑀲𑁆𑀲 𑀬𑀣𑁂𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀮𑀤𑁆𑀥𑀺, 𑀏𑀯𑀫𑁂𑀯𑀁 𑀧𑀼𑀕𑁆𑀕𑀮𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺𑀧𑀺 𑀆𑀧𑀚𑁆𑀚𑀢𑀺. 𑀬𑀸 𑀧𑀦𑀲𑁆𑀲 𑀧𑀼𑀕𑁆𑀕𑀮𑁄 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀢𑀲𑁆𑀲𑀸 𑀯𑀺𑀚𑁆𑀚𑀫𑀸𑀦𑁄𑀢𑀺𑀯𑁂𑀯𑀘𑀦𑀫𑁂𑀯, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀯𑀘𑀦𑀸𑀦𑀺 𑀲𑁄𑀥𑀺𑀢𑀸𑀦𑀺.

𑁬𑁦. 𑀢𑀢𑁆𑀣 𑀬𑀁 𑀅𑀯𑀲𑀸𑀦𑁂 ‘‘𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀅𑀢𑁆𑀣𑀺 𑀦 𑀲𑀩𑁆𑀩𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀜𑁆𑀳𑁂𑀢𑀁 𑀧𑀭𑀯𑀸𑀤𑀺𑀦𑀸 ‘‘𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀅𑀢𑁆𑀣𑀺 𑀓𑁂𑀳𑀺𑀘𑀺 𑀧𑀼𑀕𑁆𑀕𑀮𑁄, 𑀓𑁂𑀳𑀺𑀘𑀺 𑀦 𑀧𑀼𑀕𑁆𑀕𑀮𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀅𑀢𑁆𑀣𑀺 𑀦 𑀲𑀩𑁆𑀩𑁄 𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀢𑀓𑀁 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀲𑀓𑀯𑀸𑀤𑀻 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀏𑀯𑀁 𑀅𑀦𑀼𑀬𑀼𑀜𑁆𑀚𑀢𑀺. 𑀢𑀬𑀸 𑀳𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 ‘‘𑀧𑀼𑀕𑁆𑀕𑀮𑁄 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺 𑀕𑀳𑀺𑀢𑀸, 𑀬𑀣𑀸 𑀘 𑀪𑀕𑀯𑀢𑀸 𑀏𑀢𑀁 𑀯𑀼𑀢𑁆𑀢𑀁, 𑀢𑀣𑀸 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚𑀸, 𑀲𑀤𑀸 𑀲𑀢𑁄’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁧𑁨𑁫) 𑀦𑀬𑁂𑀦 ‘‘𑀦𑀢𑁆𑀣𑀻’’𑀢𑀺𑀧𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑁂𑀯 𑀢𑁂 ‘‘𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀅𑀢𑁆𑀣𑀺 𑀦 𑀲𑀩𑁆𑀩𑁄 𑀧𑀼𑀕𑁆𑀕𑀮𑁄’’𑀢𑀺 𑀮𑀤𑁆𑀥𑀺, 𑀢𑀣𑀸 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀦𑀢𑁆𑀣𑀺 𑀦 𑀲𑀩𑁆𑀩𑁄 𑀧𑀼𑀕𑁆𑀕𑀮𑁄𑀢𑀺𑀧𑀺 𑀆𑀧𑀚𑁆𑀚𑀢𑀺, 𑀓𑀺𑀁 𑀏𑀢𑀁 𑀲𑀫𑁆𑀧𑀝𑀺𑀘𑁆𑀙𑀲𑀻𑀢𑀺? 𑀅𑀣 𑀦𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦 𑀳𑁂𑀯𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀫𑁂𑀢𑁆𑀣 𑀦𑀺𑀕𑁆𑀕𑀳𑀸𑀤𑀺𑀯𑀺𑀥𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁧-𑁬𑁬. 𑀇𑀤𑀸𑀦𑀺 ¶ 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀦𑀸𑀫 𑀳𑁄𑀢𑀺. 𑀭𑀽𑀧𑀥𑀸𑀢𑀼𑀬𑀸 𑀳𑀺 𑀧𑀼𑀕𑁆𑀕𑀮𑀯𑀸𑀤𑀻 ¶ 𑀭𑀽𑀧𑀺𑀁 𑀧𑀼𑀕𑁆𑀕𑀮𑀁 𑀧𑀜𑁆𑀜𑀧𑁂𑀢𑀺, 𑀢𑀣𑀸 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀺𑀁. 𑀢𑀲𑁆𑀲 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑀼𑀁 𑀲𑀩𑁆𑀩𑀸𑀧𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀇𑀢𑀭𑀲𑁆𑀲 ¶ . 𑀲𑁄 𑀳𑀺 𑀭𑀽𑀧𑀻𑀢𑀺 𑀯𑀼𑀢𑁆𑀢𑁂 𑀭𑀽𑀧𑀓𑀸𑀬𑀲𑀩𑁆𑀪𑀸𑀯𑀢𑁄 𑀘𑁂𑀯 𑀢𑀣𑀸𑀭𑀽𑀧𑀸𑀬 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀸𑀫𑀻𑀢𑀺 𑀯𑀼𑀢𑁆𑀢𑁂 𑀯𑀻𑀢𑀭𑀸𑀕𑀲𑀩𑁆𑀪𑀸𑀯𑀢𑁄 𑀘𑁂𑀯 𑀢𑀣𑀸𑀭𑀽𑀧𑀸𑀬 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀦𑀢𑁆𑀣𑀺𑀢𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀭𑀽𑀧𑀻𑀢𑀺 𑀯𑀼𑀢𑁆𑀢𑁂𑀧𑀺 𑀅𑀭𑀽𑀧𑀓𑁆𑀔𑀦𑁆𑀥𑀲𑀩𑁆𑀪𑀸𑀯𑀢𑁄 𑀘𑁂𑀯 𑀢𑀣𑀸𑀭𑀽𑀧𑀸𑀬 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑀲𑀢𑁆𑀢𑁄𑀢𑀺 𑀧𑀼𑀕𑁆𑀕𑀮𑀲𑁆𑀲 𑀯𑁂𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁.

𑁬𑁭. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑁄 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑀼𑀁 𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸𑀢𑀺𑀆𑀤𑀺 𑀲𑀓𑀯𑀸𑀤𑀻𑀧𑀼𑀘𑁆𑀙𑀸 𑀳𑁄𑀢𑀺. 𑀢𑀢𑁆𑀣 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸𑀢𑀺 𑀓𑀸𑀬𑀁 𑀅𑀧𑁆𑀧𑁂𑀢𑀩𑁆𑀩𑀁 𑀅𑀮𑁆𑀮𑀻𑀬𑀸𑀧𑁂𑀢𑀩𑁆𑀩𑀁 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑀩𑁆𑀩𑀁 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀢𑁆𑀯𑀸 𑀧𑀼𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀲𑁂𑀲𑁂𑀢𑀺 𑀏𑀲𑁄 𑀲𑁄𑀬𑁂𑀯. 𑀏𑀲𑁂 𑀏𑀲𑁂𑀢𑀺𑀧𑀺 𑀧𑀸𑀞𑁄. 𑀏𑀲𑁄 𑀏𑀲𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀝𑁆𑀞𑁂𑀢𑀺 𑀏𑀓𑀝𑁆𑀞𑁄. 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂𑀢𑀺 𑀲𑀫𑁄 𑀲𑀫𑀪𑀸𑀕𑁄 𑀢𑀚𑁆𑀚𑀸𑀢𑀺𑀓𑁄. 𑀯𑀘𑀦𑀫𑀢𑁆𑀢𑁂𑀬𑁂𑀯𑁂𑀢𑁆𑀣 𑀪𑁂𑀤𑁄. 𑀅𑀢𑁆𑀣𑀢𑁄 𑀧𑀦 𑀓𑀸𑀬𑁄𑀯 𑀏𑀲𑁄𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 𑀦𑀸𑀦𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸𑀢𑀺 𑀧𑀼𑀘𑁆𑀙𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑁄 𑀓𑀸𑀬𑁄𑀢𑀺 𑀧𑀼𑀝𑁆𑀞𑁄 𑀧𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀧𑀼𑀝𑁆𑀞𑁄 𑀧𑀦 𑀆𑀳𑀘𑁆𑀘 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀚𑀸𑀦𑀸𑀢𑀺. 𑀢𑀢𑁄 𑀧𑀭𑀁 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁬𑁮. 𑀧𑀭𑀯𑀸𑀤𑀻𑀧𑀓𑁆𑀔𑁂 𑀧𑀦 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺 𑀧𑀼𑀝𑁆𑀞𑁄 𑀲𑀓𑀯𑀸𑀤𑀻 𑀞𑀧𑀦𑀻𑀬𑀧𑀜𑁆𑀳𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀭𑀯𑀸𑀤𑀻 𑀙𑀮𑀯𑀲𑁂𑀦 𑀧𑀝𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀫𑁆𑀧𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁯-𑁭𑁨. 𑀇𑀤𑀸𑀦𑀺 ¶ 𑀕𑀢𑀺𑀧𑀭𑀺𑀯𑀢𑁆𑀢𑀦𑀫𑀼𑀔𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀅𑀦𑀼𑀬𑁄𑀕𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀕𑁆𑀕𑀮𑀯𑀸𑀤𑀻 ‘‘𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 𑀲𑀦𑁆𑀥𑀸𑀯𑀺𑀢𑁆𑀯𑀸𑀦 ¶ 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁨.𑁧𑁩𑁩; 𑀇𑀢𑀺𑀯𑀼. 𑁨𑁪) 𑀲𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀸𑀬 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻𑀢𑀺 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺 ¶ , 𑀢𑀲𑁆𑀫𑀸𑀲𑁆𑀲 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑀼𑀁 𑀲𑀦𑁆𑀥𑀸𑀯𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀲𑀦𑁆𑀥𑀸𑀯𑀢𑀻𑀢𑀺 𑀲𑀁𑀲𑀭𑀢𑀺 𑀕𑀫𑀦𑀸𑀕𑀫𑀦𑀁 𑀓𑀭𑁄𑀢𑀺. 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀧𑀼𑀕𑁆𑀕𑀮𑁄𑀢𑀺𑀆𑀤𑀬𑁄 𑀅𑀦𑀼𑀬𑁄𑀕𑁄𑀧𑀺 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲. 𑀢𑀢𑁆𑀣 𑀲𑁄𑀢𑀺 𑀲𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦 𑀅𑀦𑀼𑀬𑀼𑀢𑁆𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀜𑁆𑀜𑁄𑀢𑀺 𑀧𑀼𑀝𑁆𑀞𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀪𑀬𑁂𑀦. 𑀲𑁄 𑀘 𑀅𑀜𑁆𑀜𑁄 𑀘𑀸𑀢𑀺 𑀧𑀼𑀝𑁆𑀞𑁄 𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦. 𑀦𑁂𑀯 𑀲𑁄 𑀦 𑀅𑀜𑁆𑀜𑁄𑀢𑀺 𑀧𑀼𑀝𑁆𑀞𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺𑀪𑀬𑁂𑀦. 𑀧𑀼𑀦 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀳𑁂 𑀏𑀓𑀢𑁄 𑀧𑀼𑀝𑁆𑀞𑁄 𑀘𑀢𑀼𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀬𑀸𑀦𑀺𑀲𑁆𑀲 𑀲𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀸𑀬 𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻𑀢𑀺𑀆𑀤𑀺𑀫𑀸𑀳.

𑁭𑁬. 𑀧𑀼𑀦 𑀲𑀓𑀯𑀸𑀤𑀺𑀦𑀸 ‘‘𑀬𑁆𑀯𑀸𑀬𑀁 𑀢𑀯 𑀮𑀤𑁆𑀥𑀺𑀬𑀸 𑀲𑀦𑁆𑀥𑀸𑀯𑀢𑀺, 𑀓𑀺𑀁 𑀲𑁄 𑀅𑀲𑁆𑀫𑀺𑀜𑁆𑀘 𑀧𑀭𑀲𑁆𑀫𑀺𑀜𑁆𑀘 𑀮𑁄𑀓𑁂 𑀏𑀓𑁄𑀬𑁂𑀯𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑁆𑀯𑁂𑀯𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀧𑀼𑀝𑁆𑀞𑁄 𑀲𑀲𑁆𑀲𑀢𑀪𑀬𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀢𑀣𑁂𑀯 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀲𑁄 𑀧𑀼𑀕𑁆𑀕𑀮𑁄𑀯 𑀦 𑀅𑀜𑁆𑀜𑁄 𑀪𑀸𑀯𑁄, ‘‘𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’’𑀢𑀺𑀆𑀤𑀺𑀲𑀼𑀢𑁆𑀢𑀫𑁆𑀧𑀺 (𑀧𑀸𑀭𑀸. 𑁧𑁨; 𑀤𑀻. 𑀦𑀺. 𑁧.𑁨𑁪𑁫) 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀲𑁆𑀯𑁂𑀯 𑀫𑀦𑀼𑀲𑁆𑀲𑁄𑀢𑀺 𑀧𑀼𑀝𑁆𑀞𑁄 𑀫𑀦𑀼𑀲𑁆𑀲𑀲𑁆𑀲𑁂𑀯 𑀤𑁂𑀯𑀢𑁆𑀢𑀸𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑁭𑁭. 𑀧𑀼𑀦 𑀧𑀼𑀝𑁆𑀞𑁄 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀅. 𑀦𑀺. 𑁭.𑁬𑁬 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀧𑀝𑀺𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀲𑀓𑀯𑀸𑀤𑀻 𑀤𑁂𑀯𑀫𑀦𑀼𑀲𑁆𑀲𑀼𑀧𑀧𑀢𑁆𑀢𑀻𑀦𑀁 𑀦𑀸𑀦𑀢𑁆𑀢𑀢𑁄 𑀯𑀘𑀦𑀁 𑀫𑀺𑀘𑁆𑀙𑀸𑀢𑀺 𑀧𑀓𑀸𑀲𑁂𑀦𑁆𑀢𑁄 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸𑀢𑀺𑀆𑀤𑀺𑀫𑀸𑀳.

𑁭𑁮. 𑀢𑀢𑁆𑀣 𑀳𑁂𑀯𑀁 𑀫𑀭𑀡𑀁 𑀦 𑀳𑁂𑀳𑀺𑀢𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀫𑀭𑀡𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑀁 𑀬𑀓𑁆𑀔𑁄 𑀧𑁂𑀢𑁄𑀢𑀺 𑀅𑀢𑁆𑀢𑀪𑀸𑀯𑀦𑀸𑀦𑀢𑁆𑀢𑀯𑀲𑁂𑀦 𑀅𑀦𑀼𑀬𑁄𑀕𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁨. 𑀔𑀢𑁆𑀢𑀺𑀬𑁄𑀢𑀺𑀆𑀤𑀻𑀦𑀺 𑀚𑀸𑀢𑀺𑀯𑀲𑁂𑀦 𑀘𑁂𑀯 𑀅𑀗𑁆𑀕𑀯𑁂𑀓𑀮𑁆𑀮𑀸𑀤𑀺𑀯𑀲𑁂𑀦 𑀘 𑀯𑀼𑀢𑁆𑀢𑀸𑀦𑀺.

𑁮𑁭. 𑀧𑀼𑀦 ¶ ¶ 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 𑀧𑀼𑀝𑁆𑀞𑁄 𑀇𑀥𑀝𑁆𑀞𑀓𑀲𑁆𑀲 𑀉𑀧𑀧𑀢𑁆𑀢𑀺𑀯𑀲𑁂𑀦 𑀧𑀭𑀮𑁄𑀓𑀲𑁆𑀲 𑀕𑀫𑀦𑀸𑀪𑀸𑀯𑀢𑁄 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲 𑀧𑀼𑀦 𑀲𑁄𑀢𑀸𑀧𑀦𑁆𑀦𑀲𑁆𑀲 𑀪𑀯𑀦𑁆𑀢𑀭𑁂𑀧𑀺 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀯𑀺𑀚𑀳𑀦𑀢𑁄 𑀤𑀼𑀢𑀺𑀬𑀧𑀝𑀺𑀜𑁆𑀜𑀸𑀧𑀺 𑀢𑀲𑁆𑀲𑁂𑀯. 𑀳𑀜𑁆𑀘𑀻𑀢𑀺𑀆𑀤𑀺𑀯𑀘𑀦𑀁 𑀧𑀭𑀯𑀸𑀤𑀺𑀲𑁆𑀲.

𑁮𑁮. 𑀧𑀼𑀦 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀲𑁆𑀲 𑀫𑀦𑀼𑀲𑁆𑀲𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲.

𑁮𑁯. 𑀢𑀢𑁄 𑀧𑀭𑀁 𑀅𑀦𑀜𑁆𑀜𑁄 𑀅𑀯𑀺𑀕𑀢𑁄𑀢𑀺 𑀏𑀢𑁆𑀣 𑀅𑀦𑀜𑁆𑀜𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀏𑀓𑀲𑀤𑀺𑀲𑁄. 𑀅𑀯𑀺𑀕𑀢𑁄𑀢𑀺 𑀏𑀓𑁂𑀦𑀸𑀧𑀺 𑀆𑀓𑀸𑀭𑁂𑀦 𑀅𑀯𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀦 𑀳𑁂𑀯𑀦𑁆𑀢𑀺 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀲𑁆𑀲 𑀫𑀦𑀼𑀲𑁆𑀲𑀪𑀸𑀯𑀸𑀪𑀸𑀯𑀢𑁄 𑀏𑀯𑀫𑀸𑀳.

𑁯𑁦. 𑀧𑀼𑀦 ¶ 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀦𑀼𑀬𑀼𑀢𑁆𑀢𑁄 ‘‘𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’’𑀢𑀺 𑀮𑀤𑁆𑀥𑀺𑀬𑀸 𑀅𑀦𑀼𑀚𑀸𑀦𑀸𑀢𑀺. 𑀳𑀢𑁆𑀣𑀘𑁆𑀙𑀺𑀦𑁆𑀦𑁄𑀢𑀺𑀆𑀤𑀺 𑀆𑀓𑀸𑀭𑀯𑀺𑀕𑀫𑀦𑀤𑀲𑁆𑀲𑀦𑁂𑀦 𑀅𑀯𑀺𑀕𑀢𑁄 𑀲𑀦𑁆𑀥𑀸𑀯𑀢𑀻𑀢𑀺 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀴𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀅𑀗𑁆𑀕𑀼𑀝𑁆𑀞𑀓𑀸 𑀙𑀺𑀦𑁆𑀦𑀸. 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀫𑀳𑀸𑀦𑁆𑀳𑀸𑀭𑀽 𑀙𑀺𑀦𑁆𑀦𑀸.

𑁯𑁧. 𑀲𑀭𑀽𑀧𑁄𑀢𑀺𑀆𑀤𑀻𑀲𑀼 𑀧𑀞𑀫𑁂 𑀧𑀜𑁆𑀳𑁂 𑀇𑀫𑀺𑀦𑀸 𑀭𑀽𑀧𑀓𑀸𑀬𑁂𑀦 𑀲𑀤𑁆𑀥𑀺𑀁 𑀅𑀕𑀫𑀦𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑁂 𑀅𑀦𑁆𑀢𑀭𑀸𑀪𑀯𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁄 𑀳𑀺 𑀢𑀲𑁆𑀲 𑀮𑀤𑁆𑀥𑀺𑀬𑀸 𑀲𑀭𑀽𑀧𑁄𑀯 𑀕𑀦𑁆𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀧𑀯𑀺𑀲𑀢𑀺. 𑀅𑀣𑀲𑁆𑀲 𑀢𑀁 𑀭𑀽𑀧𑀁 𑀪𑀺𑀚𑁆𑀚𑀢𑀺. 𑀢𑀁 𑀚𑀻𑀯𑀦𑁆𑀢𑀺 𑀬𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀓𑀺𑀫𑀲𑁆𑀲 𑀢𑀤𑁂𑀯 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 𑀇𑀥 𑀲𑀭𑀻𑀭𑀦𑀺𑀓𑁆𑀔𑁂𑀧𑀸 𑀲𑀼𑀢𑁆𑀢𑀯𑀺𑀭𑁄𑀥𑀸 𑀘 𑀧𑀝𑀺𑀓𑁆𑀔𑀺𑀧𑀢𑀺.

𑀲𑀯𑁂𑀤𑀦𑁄𑀢𑀺𑀆𑀤𑀻𑀲𑀼 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀤𑀜𑁆𑀜𑀁 𑀉𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀁 𑀚𑀻𑀯𑀦𑁆𑀢𑀺 𑀬𑁂𑀦 𑀯𑁂𑀤𑀦𑀸𑀤𑀺𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺. 𑀓𑀺𑀫𑀲𑁆𑀲 𑀢𑀤𑁂𑀯 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀏𑀢𑀺𑀲𑁆𑀲𑀸 𑀳𑀺 𑀮𑀤𑁆𑀥𑀺𑀬𑀸 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀲𑀭𑀻𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀭𑀯𑀸𑀤𑀻 𑀲𑀼𑀢𑁆𑀢𑀯𑀺𑀭𑁄𑀥𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁯𑁨. 𑀅𑀭𑀽𑀧𑁄𑀢𑀺𑀆𑀤𑀻𑀲𑀼 𑀧𑀞𑀫𑁂 𑀧𑀜𑁆𑀳𑁂 𑀅𑀦𑁆𑀢𑀭𑀸𑀪𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑁂 𑀅𑀭𑀽𑀧𑀸 𑀭𑀽𑀧𑀁 𑀉𑀧𑀧𑀚𑁆𑀚𑀫𑀸𑀦𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀜𑁆𑀜𑀁, 𑀚𑀻𑀯𑀦𑁆𑀢𑀺 𑀬𑀁 ¶ 𑀭𑀽𑀧𑀲𑀗𑁆𑀔𑀸𑀢𑀁 𑀲𑀭𑀻𑀭𑀁 𑀧𑀳𑀸𑀬 𑀅𑀭𑀽𑀧𑁄 ¶ 𑀲𑀦𑁆𑀥𑀸𑀯𑀢𑀺, 𑀓𑀺𑀁 𑀢𑁂 𑀢𑀁 𑀲𑀭𑀻𑀭𑀁 𑀅𑀜𑁆𑀜𑀁, 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀲𑀼𑀢𑁆𑀢𑀯𑀺𑀭𑁄𑀥𑀸 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀯𑁂𑀤𑀦𑁄𑀢𑀺𑀆𑀤𑀻𑀲𑀼 𑀲𑀜𑁆𑀜𑀻𑀪𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀤𑀜𑁆𑀜𑀁 𑀉𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀬𑀁 𑀯𑁂𑀤𑀦𑀸𑀤𑀺𑀲𑀗𑁆𑀔𑀸𑀢𑀁 𑀲𑀭𑀻𑀭𑀁 𑀧𑀳𑀸𑀬 𑀅𑀯𑁂𑀤𑀦𑁄 𑀅𑀯𑀺𑀜𑁆𑀜𑀸𑀡𑁄 𑀲𑀦𑁆𑀥𑀸𑀯𑀢𑀺, 𑀓𑀺𑀁 𑀢𑁂 𑀢𑀁 𑀅𑀜𑁆𑀜𑀁 𑀲𑀭𑀻𑀭𑀁, 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀲𑀼𑀢𑁆𑀢𑀯𑀺𑀭𑁄𑀥𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁯𑁩. 𑀭𑀽𑀧𑀁 𑀲𑀦𑁆𑀥𑀸𑀯𑀢𑀻𑀢𑀺𑀆𑀤𑀻𑀲𑀼 𑀬𑁂 𑀭𑀽𑀧𑀸𑀤𑀬𑁄 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀁 𑀧𑀜𑁆𑀜𑀧𑁂𑀢𑀺, 𑀓𑀺𑀁 𑀢𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀯𑀦𑁆𑀢𑁂 𑀢𑀫𑁆𑀧𑀺 𑀭𑀽𑀧𑀁 𑀲𑀦𑁆𑀥𑀸𑀯𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 𑀲𑀢𑁆𑀢𑀲𑁆𑀲𑁂𑀯 𑀲𑀦𑁆𑀥𑀸𑀯𑀦𑀯𑀘𑀦𑀢𑁄 ¶ 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀭𑀽𑀧𑀸𑀤𑀺𑀥𑀫𑁆𑀫𑁂 𑀯𑀺𑀦𑀸 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀲𑀦𑁆𑀥𑀸𑀯𑀦𑁆𑀢𑁂 𑀢𑁂𑀦𑀧𑀺 𑀭𑀽𑀧𑁂𑀦 𑀲𑀦𑁆𑀥𑀸𑀯𑀺𑀢𑀩𑁆𑀩𑀦𑁆𑀢𑀺 𑀲𑀜𑁆𑀜𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁯𑁪. 𑀭𑀽𑀧𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀢𑁂 𑀭𑀽𑀧𑀁 𑀧𑀼𑀕𑁆𑀕𑀮𑁄 𑀦 𑀳𑁄𑀢𑀺, 𑀲𑁆𑀯𑁂𑀯 𑀘 𑀲𑀦𑁆𑀥𑀸𑀯𑀢𑀻𑀢𑀺 𑀯𑀤𑁂𑀲𑀺, 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀢𑁂 𑀭𑀽𑀧𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑁄 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀯𑀦𑁆𑀢𑁂 𑀦 𑀲𑀓𑁆𑀓𑀸 𑀢𑀲𑁆𑀲 𑀉𑀧𑀸𑀤𑀸𑀦𑀪𑀽𑀢𑁂𑀦 𑀭𑀽𑀧𑁂𑀦 𑀲𑀦𑁆𑀥𑀸𑀯𑀺𑀢𑀼𑀦𑁆𑀢𑀺 𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀲𑀢𑁆𑀢𑀸𑀦𑀜𑁆𑀜𑁂𑀯 𑀲𑀦𑁆𑀥𑀸𑀯𑀦𑀯𑀘𑀦𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀕𑀸𑀣𑀸𑀦𑀁 𑀧𑀦 𑀅𑀬𑀫𑀢𑁆𑀣𑁄 𑁋 𑀆𑀬𑀲𑁆𑀫𑀢𑁄 𑀫𑀢𑁂𑀦 𑀭𑀼𑀓𑁆𑀔𑀁 𑀉𑀧𑀸𑀤𑀸𑀬 𑀙𑀸𑀬𑀸 𑀯𑀺𑀬, 𑀇𑀦𑁆𑀥𑀦𑀁 𑀉𑀧𑀸𑀤𑀸𑀬 𑀅𑀕𑁆𑀕𑀺 𑀯𑀺𑀬 𑀘, 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑁄; 𑀭𑀽𑀧𑀸𑀤𑀻𑀦𑀁 𑀲𑀦𑁆𑀥𑀸𑀯𑀦𑁂 𑀅𑀲𑀢𑀺 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑁄 𑀢𑀯 𑀧𑀼𑀕𑁆𑀕𑀮𑁄 𑀪𑀺𑀚𑁆𑀚𑀢𑀺 𑀘𑁂, 𑀏𑀯𑀁 𑀲𑀦𑁆𑀢𑁂 𑀉𑀘𑁆𑀙𑁂𑀤𑀸 𑀪𑀯𑀢𑀺 𑀤𑀺𑀝𑁆𑀞𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀢𑁂 𑀆𑀧𑀚𑁆𑀚𑀢𑀺. 𑀓𑀢𑀭𑀸 𑀬𑀸 𑀩𑀼𑀤𑁆𑀥𑁂𑀦 𑀯𑀺𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀤𑀺𑀝𑁆𑀞𑀺. 𑀬𑀸 𑀧𑀦 ‘‘𑀉𑀘𑁆𑀙𑁂𑀤𑀯𑀸𑀤𑀻 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀧𑀭𑀺𑀬𑀸𑀬𑀪𑀸𑀲𑀺𑀢𑀸, 𑀦 𑀢𑀁 𑀯𑀤𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀣𑀸𑀧𑀺 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑁄 𑀧𑀼𑀕𑁆𑀕𑀮𑁄 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀲𑀦𑁆𑀢𑁂 𑀲𑀲𑁆𑀲𑀢𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀢𑀢𑁄 𑀲𑁄 𑀦𑀺𑀩𑁆𑀩𑀸𑀦𑁂𑀦 𑀲𑀫𑀲𑀫𑁄 𑀆𑀧𑀚𑁆𑀚𑀢𑀺 ¶ . 𑀲𑀫𑀲𑀫𑁄𑀢𑀺 𑀅𑀢𑀺𑀯𑀺𑀬 𑀲𑀫𑁄, 𑀲𑀫𑁂𑀦 𑀯𑀸 𑀲𑀫𑁄, 𑀲𑀫𑀪𑀸𑀯𑁂𑀦𑁂𑀯 𑀲𑀫𑁄. 𑀬𑀣𑁂𑀯 𑀦𑀺𑀩𑁆𑀩𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀢𑁂 𑀧𑀼𑀕𑁆𑀕𑀮𑁄𑀧𑀺 𑀢𑁂𑀦 𑀲𑀫𑀲𑀫𑁄𑀢𑀺.

𑀕𑀢𑀺𑀧𑀭𑀺𑀯𑀢𑁆𑀢𑀦𑀫𑀼𑀔𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀸𑀦𑀼𑀬𑁄𑀕𑁄 𑀦𑀺𑀝𑁆𑀞𑀺𑀢𑁄.

𑀅𑀦𑀼𑀬𑁄𑀕𑀯𑀡𑁆𑀡𑀦𑀸.

𑁧𑁨. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁯𑁫. 𑀇𑀤𑀸𑀦𑀺 ¶ 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀳𑁄𑀢𑀺. 𑀢𑀢𑁆𑀣 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀳𑀺 𑀭𑀼𑀓𑁆𑀔𑀁 𑀉𑀧𑀸𑀤𑀸𑀬 𑀙𑀸𑀬𑀸𑀬 𑀯𑀺𑀬, 𑀇𑀦𑁆𑀥𑀦𑀁 𑀉𑀧𑀸𑀤𑀸𑀬 𑀅𑀕𑁆𑀕𑀺𑀲𑁆𑀲 𑀯𑀺𑀬 𑀘, 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀬 ¶ 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀸𑀧𑀦𑀁 𑀅𑀯𑀩𑁄𑀥𑀦𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀭𑀽𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀬𑀣𑀸 𑀭𑀼𑀓𑁆𑀔𑀼𑀧𑀸𑀤𑀸𑀦𑀸 𑀙𑀸𑀬𑀸 𑀭𑀼𑀓𑁆𑀔𑁄 𑀯𑀺𑀬, 𑀇𑀦𑁆𑀥𑀦𑀼𑀧𑀸𑀤𑀸𑀦𑁄 𑀘 𑀅𑀕𑁆𑀕𑀺 𑀇𑀦𑁆𑀥𑀦𑀁 𑀯𑀺𑀬 𑀅𑀦𑀺𑀘𑁆𑀘𑀸𑀤𑀺𑀥𑀫𑁆𑀫𑁄, 𑀏𑀯𑀁 𑀢𑁂 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀬𑁄 𑀯𑀺𑀬 𑀅𑀦𑀺𑀘𑁆𑀘𑁄𑀢𑀺 𑀇𑀫𑀫𑀢𑁆𑀣𑀁 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁯𑁭. 𑀦𑀻𑀮𑀁 𑀭𑀽𑀧𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺𑀆𑀤𑀻𑀲𑀼 𑀦𑀻𑀮𑀭𑀽𑀧𑁂𑀦 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀲𑁆𑀲 𑀏𑀓𑀢𑁆𑀢𑀁, 𑀏𑀓𑀲𑀭𑀻𑀭𑁂 𑀦𑀻𑀮𑀸𑀤𑀻𑀦𑀁 𑀩𑀳𑀽𑀦𑀁 𑀯𑀲𑁂𑀦 𑀩𑀳𑀼𑀪𑀸𑀯𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑁯𑁮. 𑀓𑀼𑀲𑀮𑀁 𑀯𑁂𑀤𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑁂𑀤𑀦𑀸𑀬 𑀲𑀤𑁆𑀥𑀺𑀁 𑀏𑀓𑀢𑁆𑀢𑀁 𑀏𑀓𑀲𑀦𑁆𑀢𑀸𑀦𑁂 𑀩𑀳𑀽𑀦𑀁 𑀓𑀼𑀲𑀮𑀯𑁂𑀤𑀦𑀸𑀦𑀁 𑀯𑀲𑁂𑀦 𑀩𑀳𑀼𑀪𑀸𑀯𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀦𑀬𑁂 𑀫𑀕𑁆𑀕𑀓𑀼𑀲𑀮𑁄𑀢𑀺𑀆𑀤𑀺𑀯𑀘𑀦𑀲𑀩𑁆𑀪𑀸𑀯𑀢𑁄 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀨𑀮𑁄𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 𑀢𑀣𑀸𑀭𑀽𑀧𑀲𑁆𑀲 𑀯𑁄𑀳𑀸𑀭𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑁯𑁯. 𑀅𑀓𑀼𑀲𑀮𑀧𑀓𑁆𑀔𑁂 𑀅𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑁧𑁦𑁦. 𑀅𑀩𑁆𑀬𑀸𑀓𑀢𑀧𑀓𑁆𑀔𑁂 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀅𑀩𑁆𑀬𑀸𑀓𑀢𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁪. 𑀘𑀓𑁆𑀔𑀼𑀁 ¶ 𑀉𑀧𑀸𑀤𑀸𑀬𑀸𑀢𑀺𑀆𑀤𑀻𑀲𑀼 ‘‘𑀘𑀓𑁆𑀔𑀼𑀫𑀸 𑀯𑀺𑀲𑀫𑀸𑀦𑀻𑀯…𑀧𑁂… 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺(𑀉𑀤𑀸. 𑁪𑁩) 𑀆𑀤𑀺𑀯𑁄𑀳𑀸𑀭𑀲𑀩𑁆𑀪𑀸𑀯𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀘𑀓𑁆𑀔𑀼𑀫𑀢𑁆𑀢𑀸𑀤𑀺𑀦𑀺𑀭𑁄𑀥𑁂𑀦 𑀧𑀼𑀕𑁆𑀕𑀮𑀦𑀺𑀭𑁄𑀥𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁦𑁭. 𑀭𑀽𑀧𑀁 𑀉𑀧𑀸𑀤𑀸𑀬 𑀯𑁂𑀤𑀦𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀅𑀜𑁆𑀜𑁂𑀧𑀺 𑀭𑀽𑀧𑀫𑀽𑀮𑀓𑀸 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀘𑀧𑀺 ¶ 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺. 𑀏𑀓𑀲𑀦𑁆𑀢𑀸𑀦𑁂 𑀧𑀦 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀯𑀸 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀆𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁧𑁨. 𑀇𑀤𑀸𑀦𑀺 𑀬𑀁 𑀉𑀧𑀸𑀤𑀸𑀬 𑀬𑀲𑁆𑀲 𑀧𑀜𑁆𑀜𑀢𑁆𑀢𑀺, 𑀬𑀣𑀸 𑀢𑀲𑁆𑀲 𑀅𑀦𑀺𑀘𑁆𑀘𑀢𑀸𑀬 𑀢𑀲𑁆𑀲𑀸𑀧𑀺 𑀅𑀦𑀺𑀘𑁆𑀘𑀢𑀸, 𑀢𑀢𑁄 𑀘 𑀅𑀜𑁆𑀜𑀢𑁆𑀢𑀁 𑀲𑀺𑀤𑁆𑀥𑀁, 𑀏𑀯𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀬𑀣𑀸 𑀭𑀼𑀓𑁆𑀔𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀸𑀤𑀸𑀬𑀸𑀢𑀺 𑀧𑀝𑀺𑀘𑁆𑀘 𑀆𑀕𑀫𑁆𑀫, 𑀦 𑀯𑀺𑀦𑀸 𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀯𑀸𑀤𑀻 𑀧𑀦 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁧𑁫. 𑀦𑀺𑀕𑀴𑁄𑀢𑀺 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁. 𑀦𑁂𑀕𑀴𑀺𑀓𑁄𑀢𑀺 𑀢𑁂𑀦 𑀩𑀦𑁆𑀥𑀓𑁄 𑀬𑀲𑁆𑀲 𑀭𑀽𑀧𑀁 𑀲𑁄 𑀭𑀽𑀧𑀯𑀸𑀢𑀺 𑀬𑀲𑁆𑀫𑀸 𑀬𑀲𑁆𑀲 𑀭𑀽𑀧𑀁 𑀲𑁄 𑀭𑀽𑀧𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀦 𑀦𑀺𑀕𑀴𑁄 ¶ …𑀧𑁂… 𑀅𑀜𑁆𑀜𑁄 𑀭𑀽𑀧𑀯𑀸𑀢𑀺 𑀅𑀢𑁆𑀣𑁄.

𑁧𑁧𑁬. 𑀘𑀺𑀢𑁆𑀢𑁂 𑀘𑀺𑀢𑁆𑀢𑁂𑀢𑀺𑀆𑀤𑀻𑀲𑀼 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑀯𑀲𑁂𑀦 𑀲𑀭𑀸𑀕𑀸𑀤𑀺𑀢𑀁 𑀲𑀦𑁆𑀥𑀸𑀬 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀚𑀸𑀬𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄 𑀧𑀼𑀕𑁆𑀕𑀮𑀲𑁆𑀲 𑀔𑀡𑀺𑀓𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑁄’’𑀢𑀺 𑀯𑀸 ‘‘𑀅𑀜𑁆𑀜𑁄’’𑀢𑀺 𑀯𑀸 𑀧𑀼𑀝𑁆𑀞𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀦 𑀯𑀢𑁆𑀢𑀩𑁆𑀩𑀁 ‘‘𑀓𑀼𑀫𑀸𑀭𑀓𑁄’’𑀢𑀺 𑀯𑀸 ‘‘𑀓𑀼𑀫𑀸𑀭𑀺𑀓𑀸’’𑀢𑀺 𑀯𑀸 𑀧𑀼𑀝𑁆𑀞𑁄 𑀮𑁄𑀓𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀪𑀬𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁧𑁧𑁮. 𑀇𑀤𑀸𑀦𑀺 𑀧𑀭𑀯𑀸𑀤𑀻 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀦 𑀯𑀢𑁆𑀢𑀩𑁆𑀩𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀓𑀺𑀁 𑀢𑁂 𑀇𑀫𑀺𑀦𑀸 𑀏𑀯𑀁 𑀩𑀳𑀼𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁂𑀦, 𑀇𑀤𑀁 𑀢𑀸𑀯 𑀯𑀤𑁂𑀳𑀺, 𑀓𑀺𑀁 𑀦 𑀯𑀢𑁆𑀢𑀩𑁆𑀩𑀁 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀢𑀢𑁄 𑀲𑀓𑀯𑀸𑀤𑀺𑀦𑀸 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑁂 𑀦𑀦𑀼 𑀬𑁄 𑀧𑀲𑁆𑀲𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄𑀢𑀺 𑀧𑀼𑀕𑁆𑀕𑀮𑁄 ¶ . 𑀬𑀦𑁆𑀢𑀺 𑀭𑀽𑀧𑀁. 𑀬𑁂𑀦𑀸𑀢𑀺 𑀘𑀓𑁆𑀔𑀼𑀦𑀸. 𑀲𑁄𑀢𑀺 𑀧𑀼𑀕𑁆𑀕𑀮𑁄. 𑀢𑀦𑁆𑀢𑀺 𑀭𑀽𑀧𑀁. 𑀢𑁂𑀦𑀸𑀢𑀺 𑀘𑀓𑁆𑀔𑀼𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑀦𑀼 𑀬𑁄 𑀬𑀁 𑀭𑀽𑀧𑀁 𑀬𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺, 𑀲𑁄 𑀢𑀁 𑀭𑀽𑀧𑀁 𑀢𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄 𑀧𑀼𑀕𑁆𑀕𑀮𑁄𑀢𑀺. 𑀲𑀓𑀯𑀸𑀤𑀻 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀁 𑀘𑀓𑁆𑀔𑀼𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀺, 𑀢𑀣𑀸 𑀲𑁄𑀢𑀫𑁂𑀯 𑀲𑀤𑁆𑀤𑀁 𑀲𑀼𑀡𑀸𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀫𑁂𑀯 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀘𑀓𑁆𑀔𑀼, 𑀧𑀲𑁆𑀲𑀢𑀺 𑀅𑀭𑀳𑀸 𑀘𑀓𑁆𑀔𑀼𑀦𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀲𑀫𑁆𑀫𑀼𑀢𑀺𑀯𑀲𑁂𑀦 𑀧𑀦 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺.

𑁧𑁨𑁦. 𑀢𑀢𑁄 ¶ 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀭𑀯𑀸𑀤𑀺𑀦𑀸 𑀧𑀼𑀕𑁆𑀕𑀮𑀲𑁆𑀲 𑀯𑀢𑁆𑀢𑀩𑁆𑀩𑀢𑀸𑀬 𑀲𑀸𑀥𑀺𑀢𑀸𑀬 𑀢𑀫𑁂𑀯 𑀯𑀸𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀦𑁆𑀥𑁄 𑀅𑀲𑀜𑁆𑀜𑀲𑀢𑁆𑀢𑁄 𑀅𑀭𑀽𑀧𑀁 𑀉𑀧𑀧𑀦𑁆𑀦𑁄 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀅𑀦𑀦𑁆𑀥𑁄𑀧𑀺 𑀘 𑀅𑀜𑁆𑀜𑀢𑁆𑀭 𑀤𑀲𑁆𑀲𑀦𑀲𑀫𑀬𑀸 𑀦 𑀧𑀲𑁆𑀲𑀢𑀺 𑀦𑀸𑀫. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀧𑀸𑀴𑀺𑀯𑀲𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁.

𑁧𑁨𑁨. 𑀲𑀼𑀢𑁆𑀢𑀲𑀁𑀲𑀦𑁆𑀤𑀦𑀸𑀬𑀁 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄 𑀭𑀽𑀧𑀕𑁄𑀘𑀭𑀢𑁆𑀢𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀆𑀳. 𑀤𑀼𑀢𑀺𑀬𑀯𑀸𑀭𑁂 ‘‘𑀲𑀢𑁆𑀢𑁂 𑀧𑀲𑁆𑀲𑀸𑀫𑀻’’𑀢𑀺𑀯𑀘𑀦𑀢𑁄 𑀧𑀼𑀕𑁆𑀕𑀮𑀁 𑀧𑀲𑁆𑀲𑀢𑀻𑀢𑀺 𑀆𑀳. 𑀢𑀢𑀺𑀬𑀯𑀸𑀭𑁂 ‘‘𑀭𑀽𑀧𑀁 𑀤𑀺𑀲𑁆𑀯𑀸 𑀧𑀼𑀕𑁆𑀕𑀮𑀁 𑀯𑀺𑀪𑀸𑀯𑁂𑀢𑀻’’𑀢𑀺 𑀮𑀤𑁆𑀥𑀺𑀢𑁄 𑀉𑀪𑁄 𑀧𑀲𑁆𑀲𑀢𑀻𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀧𑀲𑁆𑀲𑀺𑀢𑀩𑁆𑀩𑀁 𑀦𑀸𑀫 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑁂 𑀭𑀽𑀧𑀲𑀗𑁆𑀕𑀳𑁂 𑀭𑀽𑀧𑀸𑀬𑀢𑀦𑀫𑁂𑀯 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀫𑀸 𑀲𑀓𑀯𑀸𑀤𑀻 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄, 𑀧𑀼𑀕𑁆𑀕𑀮𑁄 𑀭𑀽𑀧𑀁, 𑀉𑀪𑁄 𑀭𑀽𑀧’’𑀦𑁆𑀢𑀺 𑀅𑀦𑀼𑀬𑁄𑀕𑀁 𑀓𑀭𑁄𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀸𑀓𑀝𑁄𑀬𑁂𑀯𑀸𑀢𑀺.

𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸.

𑁧𑁩. 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁨𑁩. 𑀇𑀤𑀸𑀦𑀺 ¶ 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑁄 𑀳𑁄𑀢𑀺. 𑀢𑀢𑁆𑀣 𑀓𑀫𑁆𑀫𑁂 𑀲𑀢𑀺 𑀦𑀺𑀬𑀫𑀢𑁄 𑀢𑀲𑁆𑀲 𑀓𑀸𑀭𑀓𑁂𑀦𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀢𑀣𑀸𑀭𑀽𑀧𑀸𑀦𑀁 𑀓𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀼𑀦 𑀓𑀢𑁆𑀢𑀸 𑀓𑀸𑀭𑁂𑀢𑀸𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀓𑀢𑁆𑀢𑀸𑀢𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀓𑀸𑀭𑀓𑁄. 𑀓𑀸𑀭𑁂𑀢𑀸𑀢𑀺 𑀆𑀡𑀢𑁆𑀢𑀺𑀤𑁂𑀲𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀓𑀸𑀭𑀸𑀧𑀓𑁄. 𑀇𑀤𑀸𑀦𑀺 𑀬𑀲𑁆𑀫𑀸 ¶ 𑀧𑀭𑀯𑀸𑀤𑀻 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀓𑀢𑁆𑀢𑀸𑀢𑀺 𑀧𑀼𑀘𑁆𑀙𑀢𑀺, 𑀦 𑀓𑀭𑀡𑀫𑀢𑁆𑀢𑀁, 𑀢𑀲𑁆𑀫𑀸 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲.

𑁧𑁨𑁪. 𑀢𑀲𑁆𑀲 𑀓𑀢𑁆𑀢𑀸 𑀓𑀸𑀭𑁂𑀢𑀸𑀢𑀺 𑀏𑀢𑁆𑀣 𑀬𑀤𑀺 𑀬𑀁 𑀬𑀁 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀓𑀢𑁆𑀢𑀸 𑀧𑀼𑀕𑁆𑀕𑀮𑁄 𑀢𑁂 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑀲𑁆𑀲𑀸𑀧𑀺 𑀓𑀸𑀭𑀓𑁄 𑀘 𑀓𑀸𑀭𑀸𑀧𑀓𑁄 𑀘 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀯𑀸𑀤𑀻 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀧𑀼𑀕𑁆𑀕𑀮𑀁 𑀫𑀸𑀢𑀸𑀧𑀺𑀢𑀭𑁄 𑀚𑀦𑁂𑀦𑁆𑀢𑀺 𑀦𑀸𑀫𑀁 𑀓𑀭𑁄𑀦𑁆𑀢𑀺 𑀧𑁄𑀲𑁂𑀦𑁆𑀢𑀺, 𑀢𑀲𑁆𑀫𑀸𑀲𑁆𑀲 𑀢𑁂 𑀓𑀸𑀭𑀓𑀸. 𑀬𑁂 𑀘 𑀧𑀦 𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀯𑀸 𑀆𑀘𑀭𑀺𑀬𑀸 𑀯𑀸 𑀢𑀸𑀦𑀺 𑀢𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 ¶ , 𑀢𑁂 𑀓𑀸𑀭𑀸𑀧𑀓𑀸 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀭𑀺𑀫𑀓𑀫𑁆𑀫𑀫𑁂𑀯 𑀢𑀲𑁆𑀲 𑀓𑀢𑁆𑀢𑀸 𑀘𑁂𑀯 𑀓𑀸𑀭𑀸𑀧𑁂𑀢𑀸 𑀘𑀸𑀢𑀺 𑀅𑀥𑀺𑀧𑁆𑀧𑁂𑀢𑀁.

𑁧𑁨𑁫. 𑀢𑀲𑁆𑀲 𑀢𑀲𑁆𑀲𑁂𑀯𑀸𑀢𑀺 𑀇𑀫𑀺𑀦𑀸 𑀇𑀤𑀁 𑀧𑀼𑀘𑁆𑀙𑀢𑀺 𑁋 𑀬𑀤𑀺 𑀓𑀫𑁆𑀫𑀸𑀦𑀁 𑀓𑀸𑀭𑀓𑀲𑁆𑀲 𑀓𑀢𑁆𑀢𑀸 𑀢𑀲𑁆𑀲𑀸𑀧𑀺 𑀓𑀢𑁆𑀢𑀸 𑀢𑀲𑁆𑀲𑀸𑀧𑀺 𑀓𑀢𑁆𑀢𑀸 𑀅𑀢𑁆𑀣𑁂𑀯, 𑀏𑀯𑀁 𑀲𑀦𑁆𑀢𑁂 𑀧𑀼𑀭𑀺𑀫𑁂𑀦 𑀧𑀼𑀭𑀺𑀫𑁂𑀦 𑀅𑀯𑀲𑁆𑀲𑀁 𑀧𑀘𑁆𑀙𑀸 𑀧𑀘𑁆𑀙𑀸 𑀧𑀼𑀕𑁆𑀕𑀮𑁄 𑀓𑀸𑀢𑀩𑁆𑀩𑁄𑀢𑀺 𑀇𑀫𑀺𑀦𑀸𑀧𑀺 𑀢𑁂 𑀓𑀫𑁆𑀫𑀸𑀦𑀁 𑀓𑀸𑀭𑀓𑁂𑀦 𑀧𑀼𑀕𑁆𑀕𑀮𑁂𑀦 𑀆𑀬𑀢𑀺𑀁 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀓𑀸𑀢𑀩𑁆𑀩𑁄, 𑀢𑁂𑀦𑀸𑀧𑀺 𑀅𑀜𑁆𑀜𑁄𑀢𑀺 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸, 𑀦𑀢𑁆𑀣𑀺 𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑁄, 𑀦𑀢𑁆𑀣𑀺 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁. 𑀧𑀘𑁆𑀘𑀬𑀸𑀪𑀸𑀯𑁂𑀦 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀸 𑀬𑀁 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀢𑁂 𑀢𑀦𑁆𑀢𑀺. 𑀅𑀣 𑀯𑀸 𑀢𑀲𑁆𑀲 𑀢𑀲𑁆𑀲𑁂𑀯𑀸𑀢𑀺 𑀬𑀤𑀺 𑀓𑀫𑁆𑀫𑀁 𑀓𑀫𑁆𑀫𑀫𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀲 𑀧𑀦 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲𑀸𑀧𑀺 𑀓𑀸𑀭𑀓𑁄, 𑀢𑀲𑁆𑀲𑀸𑀧𑀺 𑀓𑀸𑀭𑀓𑁄𑀢𑀺 𑀏𑀯𑀁 𑀧𑀼𑀕𑁆𑀕𑀮𑀧𑀭𑀫𑁆𑀧𑀭𑀸 𑀅𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂 𑀬𑀸 𑀏𑀲𑀸 𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀯𑀼𑀢𑁆𑀢𑀸, 𑀲𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀭𑀯𑀸𑀤𑀻 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑁄 𑀅𑀧𑀭𑀸𑀲𑀼𑀧𑀺 𑀉𑀧𑀮𑀩𑁆𑀪𑀢𑀺 𑀲𑀸𑀫𑀜𑁆𑀜𑁂𑀦 𑀓𑀸𑀭𑀓𑀧𑀼𑀘𑁆𑀙𑀸𑀲𑀼 𑀧𑀼𑀕𑁆𑀕𑀮𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀓𑀢𑁆𑀢𑀸 𑀓𑀸𑀭𑁂𑀢𑀸’’𑀢𑀺 ¶ 𑀯𑀼𑀢𑁆𑀢𑀁, 𑀦 𑀧𑀘𑁆𑀘𑀬𑁂. 𑀦 𑀳𑀺 𑀫𑀳𑀸𑀧𑀣𑀯𑀻𑀆𑀤𑀻𑀦𑀁 𑀧𑀘𑁆𑀘𑀬𑀸 𑀦𑀢𑁆𑀣𑀺.

𑁧𑁩𑁫. 𑀅𑀜𑁆𑀜𑁄 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑁆𑀢𑀸𑀢𑀺 𑀧𑀜𑁆𑀳𑁄 ‘‘𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀤𑀺𑀝𑁆𑀞𑀺𑀪𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑁄.

𑁧𑁩𑁬. 𑀯𑀺𑀧𑀸𑀓𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀻𑀯𑀲𑁂𑀦 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲 ¶ , 𑀯𑀺𑀧𑀸𑀓𑀧𑀯𑀢𑁆𑀢𑀺𑀢𑁄 𑀅𑀜𑁆𑀜𑀲𑁆𑀲 𑀯𑁂𑀤𑀓𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀧𑀼𑀦 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲.

𑁧𑁩𑁮. 𑀢𑀲𑁆𑀲 𑀧𑀝𑀺𑀲𑀁𑀯𑁂𑀤𑀻𑀢𑀺 𑀢𑀲𑁆𑀲 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀓𑀲𑁆𑀲 𑀧𑀝𑀺𑀲𑀁𑀯𑁂𑀤𑀻 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀁𑀯𑁂𑀤𑀺𑀢𑀩𑁆𑀩𑁄 𑀦𑀸𑀫 𑀯𑀺𑀧𑀸𑀓𑁄, 𑀦 𑀘 𑀧𑀼𑀕𑁆𑀕𑀮𑁄 𑀯𑀺𑀧𑀸𑀓𑁄, 𑀢𑀲𑁆𑀫𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀧𑀼𑀜𑁆𑀜𑀯𑀺𑀧𑀸𑀓𑁂 𑀞𑀺𑀢𑀢𑁆𑀢𑀸 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀻 𑀧𑀼𑀢𑁆𑀢𑀁 𑀯𑀸 𑀧𑀢𑀺𑀁 𑀯𑀸 𑀫𑀸𑀢𑀸 𑀯𑀸 𑀚𑀸𑀬𑀸 𑀯𑀸 𑀧𑀭𑀺𑀘𑀼𑀫𑁆𑀩𑀢𑀺 𑀧𑀭𑀺𑀲𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀣𑀸𑀭𑀽𑀧𑀁 𑀧𑀝𑀺𑀲𑀁𑀯𑁂𑀤𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺 𑀧𑀭𑀯𑀸𑀤𑀻.

𑀢𑀲𑁆𑀲 ¶ 𑀢𑀲𑁆𑀲𑁂𑀯𑀸𑀢𑀺 𑀬𑀤𑀺 𑀯𑀺𑀧𑀸𑀓𑁄 𑀯𑀺𑀧𑀸𑀓𑀫𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀲 𑀧𑀦 𑀧𑀝𑀺𑀲𑀁𑀯𑁂𑀤𑀻 𑀧𑀼𑀕𑁆𑀕𑀮𑁄, 𑀢𑀲𑁆𑀲𑀸𑀧𑀺 𑀧𑀝𑀺𑀲𑀁𑀯𑁂𑀤𑀻 𑀢𑀲𑁆𑀲𑀸𑀧𑀺 𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀯𑀁 𑀧𑀼𑀕𑁆𑀕𑀮𑀧𑀭𑀫𑁆𑀧𑀭𑀸 𑀅𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂 𑀬𑀸 𑀏𑀲𑀸 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀯𑀼𑀢𑁆𑀢𑀸, 𑀲𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑀁 𑀉𑀧𑀮𑀩𑁆𑀪𑀢𑀺𑀲𑀸𑀫𑀜𑁆𑀜𑁂𑀦 𑀧𑀝𑀺𑀲𑀁𑀯𑁂𑀤𑀻𑀧𑀼𑀘𑁆𑀙𑀸𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁪𑁨. 𑀅𑀜𑁆𑀜𑁄 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀜𑁆𑀳𑁄 ‘‘𑀯𑁂𑀤𑀦𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀤𑀺𑀝𑁆𑀞𑀺𑀪𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑁄.

𑁧𑁪𑁩. 𑀤𑀺𑀩𑁆𑀩𑀁 𑀲𑀼𑀔𑀦𑁆𑀢𑀺𑀆𑀤𑀺 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀆𑀭𑀤𑁆𑀥𑀁. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀓𑀯𑀸𑀤𑀺𑀦𑁄 𑀘𑁂𑀢𑁆𑀣 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀧𑀝𑀺𑀲𑀁𑀯𑁂𑀤𑀻𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀯𑁂𑀤𑀬𑀺𑀢𑀯𑀲𑁂𑀦.

𑁧𑁪𑁮. 𑀫𑀳𑀸𑀧𑀣𑀯𑀻𑀆𑀤𑀻𑀦𑀺 𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀬𑀺𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀧𑁆𑀧𑀝𑀺𑀲𑀺𑀤𑁆𑀥𑀸.

𑁧𑁭𑁦. 𑀓𑀢𑁆𑀢𑀸 𑀓𑀸𑀭𑁂𑀢𑀸 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀻𑀢𑀺𑀆𑀤𑀺 𑀯𑁄𑀫𑀺𑀲𑁆𑀲𑀓𑀦𑀬𑀯𑀲𑁂𑀦 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑁄 𑀓𑀭𑁄𑀢𑀻𑀢𑀺 𑀬𑀁 𑀢𑁆𑀯𑀁 𑀓𑀢𑁆𑀢𑀸𑀢𑀺 𑀘 𑀧𑀝𑀺𑀲𑀁𑀯𑁂𑀤𑀻𑀢𑀺 𑀘 𑀯𑀤𑁂𑀲𑀺, 𑀓𑀺𑀁 𑀲𑁄𑀬𑁂𑀯 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀬𑀫𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲.

𑁧𑁭𑁧. 𑀧𑀼𑀦 ¶ 𑀧𑀼𑀝𑁆𑀞𑁄 ‘‘𑀇𑀥 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀥. 𑀧. 𑁧𑁮) 𑀧𑀝𑀺𑀜𑁆𑀜𑀸 𑀢𑀲𑁆𑀲𑁂𑀯. 𑀅𑀣𑀲𑁆𑀲 𑀯𑀘𑀦𑁄𑀓𑀸𑀲𑀁 𑀧𑀝𑀺𑀩𑀸𑀳𑀦𑁆𑀢𑁄 𑀲𑀓𑀯𑀸𑀤𑀻 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 ¶ 𑀆𑀳.

𑁧𑁭𑁨. 𑀢𑀢𑁆𑀣 𑀅𑀜𑁆𑀜𑁄 𑀓𑀭𑁄𑀢𑀻𑀢𑀺 𑀓𑀸𑀭𑀓𑀯𑁂𑀤𑀓𑀸𑀦𑀁 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀯𑀸𑀤𑀻 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 ‘‘𑀫𑀦𑀼𑀲𑁆𑀲𑀪𑀽𑀢𑁄 𑀓𑀢𑁆𑀯𑀸 𑀤𑁂𑀯𑀪𑀽𑀢𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀺 ¶ . 𑀏𑀯𑀁𑀯𑀸𑀤𑀺𑀦𑁄 𑀧𑀦 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀧𑀼𑀝𑁆𑀞𑁄 𑀧𑀼𑀦 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁭𑁪. 𑀲𑁄 𑀘 𑀅𑀜𑁆𑀜𑁄 𑀘𑀸𑀢𑀺 𑀓𑀸𑀭𑀓𑀯𑁂𑀤𑀓𑀸𑀦𑀁 𑀏𑀓𑀢𑁆𑀢𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀯𑀸𑀤𑀻 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀧𑀼𑀭𑀺𑀫𑁂 𑀤𑁆𑀯𑁂𑀧𑀺 𑀦𑀬𑁂 𑀏𑀓𑀢𑁄 𑀓𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀁𑀯𑀸𑀤𑀺𑀦𑁄 𑀧𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀧𑀼𑀝𑁆𑀞𑁄 𑀧𑀼𑀦 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁭𑁬. 𑀦𑁂𑀯 𑀲𑁄 𑀓𑀭𑁄𑀢𑀻𑀢𑀺 𑀓𑀸𑀭𑀓𑀯𑁂𑀤𑀓𑀸𑀦𑀁 𑀏𑀓𑀢𑁆𑀢𑀅𑀜𑁆𑀜𑀢𑁆𑀢𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀯𑀸𑀤𑀻 𑀲𑀼𑀢𑁆𑀢𑀯𑀺𑀭𑁄𑀥𑀯𑀲𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀫𑀦𑀼𑀲𑁆𑀲𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀦 𑀫𑀦𑀼𑀲𑁆𑀲𑀪𑀽𑀢𑁄𑀯 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦𑀸𑀧𑀺 𑀬𑁂𑀦 𑀓𑀫𑁆𑀫𑀁 𑀓𑀢𑀁, 𑀢𑀢𑁄 𑀅𑀜𑁆𑀜𑁄𑀯 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀢𑀲𑁆𑀫𑀸 𑀓𑀸𑀭𑀓𑀢𑁄 𑀯𑁂𑀤𑀓𑁄 𑀦𑁂𑀯 𑀲𑁄 𑀳𑁄𑀢𑀺, 𑀦 𑀅𑀜𑁆𑀜𑁄𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀺. 𑀮𑀤𑁆𑀥𑀺𑀫𑀢𑁆𑀢𑀫𑁂𑀯𑁂𑀢𑀁? 𑀏𑀯𑀁𑀯𑀸𑀤𑀺𑀦𑁄 𑀧𑀦 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀧𑀼𑀝𑁆𑀞𑁄 𑀧𑀼𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀧𑀺𑀘 𑀇𑀫𑀲𑁆𑀫𑀺𑀁 𑀯𑁄𑀫𑀺𑀲𑁆𑀲𑀓𑀦𑀬𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸𑀧𑀺 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀳𑀺 𑀅𑀬𑀁 𑀧𑀼𑀕𑁆𑀕𑀮𑀯𑀸𑀤𑀻 𑀓𑀫𑁆𑀫𑀸𑀦𑀁 𑀓𑀸𑀭𑀓𑀜𑁆𑀘𑁂𑀯 𑀯𑁂𑀤𑀓𑀜𑁆𑀘 𑀇𑀘𑁆𑀙𑀢𑀺, 𑀢𑀲𑁆𑀫𑀸𑀲𑁆𑀲 𑀬𑁄 𑀓𑀸𑀭𑀓𑁄, 𑀢𑁂𑀦𑁂𑀯 𑀯𑀸 𑀯𑁂𑀤𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑁂𑀦 𑀯𑀸 𑀉𑀪𑁄𑀳𑀺 𑀯𑀸 𑀪𑀯𑀺𑀢𑀩𑁆𑀩𑀁, 𑀉𑀪𑁄𑀳𑀺 𑀯𑀸𑀧𑀺 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑀸𑀧𑀦𑁆𑀦𑀁 𑀳𑁄𑀢𑀺. 𑀏𑀯𑀫𑀸𑀧𑀦𑁆𑀦𑀫𑁂𑀯 𑀅𑀦𑀼𑀬𑁄𑀕𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀲𑀓𑀯𑀸𑀤𑀻 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀯𑀺𑀓𑀧𑁆𑀧𑁂 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯.

𑀧𑀭𑀺𑀬𑁄𑀲𑀸𑀦𑁂 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀳𑀸 𑀏𑀓𑀢𑁄 𑀧𑀼𑀝𑁆𑀞𑀸. 𑀢𑀢𑁆𑀣 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀝𑀺𑀚𑀸𑀦𑀦𑀸 𑀘 𑀲𑀬𑀁𑀓𑀢𑀸𑀤𑀺𑀤𑁄𑀲𑀧𑁆𑀧𑀢𑁆𑀢𑀺 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 ¶ 𑀧𑀭𑀁 ‘‘𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸 𑀏𑀯 ‘‘𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀺𑀓𑀧𑁆𑀧𑁂𑀦 𑀤𑀲𑁆𑀲𑀺𑀢𑀸. 𑀢𑁂𑀲𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑁧𑁪. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁯𑁩. 𑀇𑀢𑁄 ¶ 𑀧𑀭𑀁 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀸𑀤𑀺𑀯𑀲𑁂𑀦 𑀅𑀭𑀳𑀢𑁆𑀢𑀲𑀸𑀥𑀦𑀸 𑀳𑁄𑀢𑀺. 𑀢𑀢𑁆𑀣 𑀆𑀫𑀦𑁆𑀢𑀸𑀢𑀺 𑀲𑀓𑀯𑀸𑀤𑀺𑀦𑀸 𑀧𑀝𑀺𑀜𑁆𑀜𑀸𑀢𑁂 𑀧𑀭𑀯𑀸𑀤𑀻 ‘‘𑀩𑀳𑀺𑀤𑁆𑀥𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀇𑀤𑁆𑀥𑀺𑀯𑀺𑀥𑀸𑀤𑀺𑀯𑀺𑀲𑁂𑀲𑀸𑀥𑀺𑀕𑀫𑁄 𑀦𑀢𑁆𑀣𑀺, 𑀅𑀚𑁆𑀛𑀢𑁆𑀢𑀁 ¶ 𑀅𑀢𑁆𑀣𑀺, 𑀢𑀲𑁆𑀫𑀸 𑀇𑀤𑁆𑀥𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑁂𑀦 𑀧𑀼𑀕𑁆𑀕𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸.

𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁧𑁯𑁭. 𑀇𑀤𑀸𑀦𑀺 𑀫𑀸𑀢𑀸𑀢𑀺𑀆𑀤𑀺𑀓𑁄 𑀜𑀸𑀢𑀓𑀸𑀦𑀼𑀬𑁄𑀕𑁄. 𑀔𑀢𑁆𑀢𑀺𑀬𑁄𑀢𑀺𑀆𑀤𑀺𑀓𑁄 𑀚𑀸𑀢𑀺𑀅𑀦𑀼𑀬𑁄𑀕𑁄. 𑀕𑀳𑀝𑁆𑀞𑁄 𑀧𑀩𑁆𑀩𑀚𑀺𑀢𑁄𑀢𑀺 𑀧𑀝𑀺𑀧𑀢𑁆𑀢𑀺𑀅𑀦𑀼𑀬𑁄𑀕𑁄. 𑀤𑁂𑀯𑁄 𑀫𑀦𑀼𑀲𑁆𑀲𑁄𑀢𑀺 𑀉𑀧𑀧𑀢𑁆𑀢𑀺𑀅𑀦𑀼𑀬𑁄𑀕𑁄. 𑀲𑁄𑀢𑀸𑀧𑀦𑁆𑀦𑁄𑀢𑀺𑀆𑀤𑀺𑀓𑁄 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑁄, 𑀅𑀭𑀺𑀬𑀸𑀦𑀼𑀬𑁄𑀕𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂 𑀲𑀩𑁆𑀩𑁂 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯. ‘‘𑀅𑀭𑀳𑀸 𑀳𑀼𑀢𑁆𑀯𑀸 𑀦 𑀅𑀭𑀳𑀸’’𑀢𑀺 𑀧𑀦𑁂𑀢𑁆𑀣 𑀫𑁄𑀖𑀧𑀜𑁆𑀳𑀢𑁆𑀢𑀸 𑀦 𑀯𑀼𑀢𑁆𑀢𑀁.

𑁨𑁦𑁬. 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀬𑀼𑀕𑀸𑀢𑀺𑀆𑀤𑀺 𑀲𑀁𑀖𑀸𑀦𑀼𑀬𑁄𑀕𑁄, 𑀲𑁄𑀧𑀺 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁨𑁦𑁯. 𑀲𑀗𑁆𑀔𑀢𑁄𑀢𑀺𑀆𑀤𑀺 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀯𑀸𑀦𑀼𑀬𑁄𑀕𑁄. 𑀢𑀢𑁆𑀣 𑀢𑀢𑀺𑀬𑀸 𑀓𑁄𑀝𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀣𑀸𑀭𑀽𑀧𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀧𑀼𑀝𑁆𑀞𑁄 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀢𑀲𑁆𑀲𑁂𑀯.

𑁨𑁧𑁧. 𑀅𑀜𑁆𑀜𑁄 ¶ 𑀧𑀼𑀕𑁆𑀕𑀮𑁄𑀢𑀺𑀧𑀜𑁆𑀳𑁂𑀧𑀺 𑀲𑀗𑁆𑀔𑀢𑁂𑀳𑀺 𑀔𑀦𑁆𑀥𑁂𑀳𑀺 𑀅𑀜𑁆𑀜𑀢𑁆𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯.

𑁨𑁧𑁨. 𑀔𑀦𑁆𑀥𑀸 𑀲𑀗𑁆𑀔𑀢𑀸𑀢𑀺𑀆𑀤𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀦𑀺 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁨𑁧𑁩. 𑀭𑀽𑀧𑀁 𑀲𑀗𑁆𑀔𑀢𑀦𑁆𑀢𑀺𑀆𑀤𑀺 𑀔𑀦𑁆𑀥𑁂 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁨𑁧𑁪. 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄’’𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 ¶ 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀗𑁆𑀔𑀢𑀪𑀸𑀯𑀁 𑀧𑀦𑀲𑁆𑀲 𑀲𑁄 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁨𑁧𑁫. 𑀧𑀼𑀦 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄 ‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺 ¶ , 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁧.𑁧𑁭𑁧) 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑀸𑀤𑀬𑁄 𑀦𑀸𑀫 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀧𑀝𑀺𑀚𑀸𑀦𑀸𑀢𑀺.

𑁨𑁧𑁬. 𑀅𑀢𑁆𑀣𑀢𑁆𑀣𑀫𑁆𑀳𑀻𑀢𑀺 𑀅𑀢𑁆𑀣𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑀲𑁆𑀲𑀢𑀁, 𑀦𑀢𑁆𑀣𑀺𑀢𑀸𑀬. 𑀉𑀘𑁆𑀙𑁂𑀤𑁄 𑀆𑀧𑀚𑁆𑀚𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑁄 𑀧𑀘𑁆𑀙𑀸 𑀧𑀝𑀺𑀓𑁆𑀔𑀺𑀧𑀢𑀺.

𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸.

𑁧𑁯. 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁧𑁭. 𑀪𑀯𑀁 𑀦𑀺𑀲𑁆𑀲𑀸𑀬 𑀧𑀜𑁆𑀳𑁂 𑀪𑀯𑀦𑁆𑀢𑀺 𑀉𑀧𑀧𑀢𑁆𑀢𑀺𑀪𑀯𑀁.

𑁨𑁧𑁮. 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀧𑀜𑁆𑀳𑁂 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 𑀧𑀭𑀺𑀕𑁆𑀕𑀳𑀺𑀢𑀯𑁂𑀤𑀦𑁄 𑀬𑁄𑀕𑀸𑀯𑀘𑀭𑁄𑀯 𑀧𑀚𑀸𑀦𑀸𑀢𑀺, 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀦𑀧𑁆𑀧𑀚𑀸𑀦𑀸𑀢𑀺.

𑁨𑁨𑁪. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀜𑁆𑀳𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁨𑁨𑁬. 𑀧𑀸𑀭𑀸𑀬𑀦𑀕𑀸𑀣𑀸𑀬 ¶ 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀲𑀢𑁆𑀢𑀲𑀼𑀜𑁆𑀜𑀢𑀯𑀲𑁂𑀦 𑀔𑀦𑁆𑀥𑀮𑁄𑀓𑀁 𑀑𑀮𑁄𑀓𑁂𑀳𑀻𑀢𑀺 𑀅𑀢𑁆𑀣𑁄.

𑁨𑁨𑁮. 𑀧𑀼𑀕𑁆𑀕𑀮𑁄 𑀅𑀯𑁂𑀓𑁆𑀔𑀢𑀻𑀢𑀺 𑀲𑀓𑀯𑀸𑀤𑀺𑀧𑀼𑀘𑁆𑀙𑀸. 𑀧𑀭𑀯𑀸𑀤𑀺𑀲𑁆𑀲 𑀳𑀺 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 𑀕𑀸𑀣𑀸𑀬 𑀬𑁄 𑀅𑀯𑁂𑀓𑁆𑀔𑀢𑀺, 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀮𑀤𑁆𑀥𑀺, 𑀢𑀲𑁆𑀫𑀸 𑀦𑀁 𑀏𑀯𑀁 𑀧𑀼𑀘𑁆𑀙𑀢𑀺. 𑀲𑀳 𑀭𑀽𑀧𑁂𑀦𑀸𑀢𑀺 ¶ 𑀭𑀽𑀧𑀓𑀸𑀬𑁂𑀦 𑀲𑀤𑁆𑀥𑀺𑀁. 𑀢𑀢𑁄 𑀅𑀦𑀺𑀲𑁆𑀲𑀝𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀼𑀦 𑀢𑀁 𑀚𑀻𑀯𑀦𑁆𑀢𑀺 𑀧𑀼𑀝𑁆𑀞𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀯𑀺𑀦𑀸 𑀭𑀽𑀧𑁂𑀦𑀸𑀢𑀺 𑀇𑀤𑀁 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑀁 𑀚𑀻𑀯𑀦𑁆𑀢𑀺 𑀧𑀼𑀝𑁆𑀞𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀅𑀩𑁆𑀪𑀦𑁆𑀢𑀭𑀕𑀢𑁄’’𑀢𑀺 𑀘 ‘‘𑀩𑀳𑀺𑀤𑁆𑀥𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺 𑀘 𑀇𑀤𑀁 ‘‘𑀲𑀳 𑀭𑀽𑀧𑁂𑀦 𑀯𑀺𑀦𑀸 𑀭𑀽𑀧𑁂𑀦𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀮𑀓𑁆𑀔𑀡𑀯𑀘𑀦𑀁. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀕𑀢𑁄𑀢𑀺 𑀭𑀽𑀧𑀲𑁆𑀲 𑀅𑀦𑁆𑀢𑁄𑀕𑀢𑁄, 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀞𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀭𑀽𑀧𑀁 𑀅𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁩𑁧. 𑀅𑀦𑀢𑁆𑀢𑀸𑀢𑀺 𑀅𑀢𑁆𑀢𑀦𑀸 𑀚𑀻𑀯𑁂𑀦 𑀧𑀼𑀕𑁆𑀕𑀮𑁂𑀦 𑀭𑀳𑀺𑀢𑁄. 𑀏𑀓𑀥𑀫𑁆𑀫𑁂𑀧𑀺 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀲𑀼𑀢𑁆𑀢𑀸𑀦𑀁 𑀆𑀕𑀫𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 ¶ 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑁨𑁩𑁭. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀧𑁆𑀧𑀺𑀓𑀼𑀫𑁆𑀪𑁄𑀢𑀺𑀆𑀤𑀺 ‘‘𑀲𑀩𑁆𑀩𑀸𑀯 𑀤𑁂𑀲𑀦𑀸 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀅𑀢𑁆𑀣𑀢𑁄 𑀦 𑀕𑀳𑁂𑀢𑀩𑁆𑀩𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀪𑀢𑀁. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀓𑀢𑁄 𑀲𑀼𑀯𑀡𑁆𑀡𑀯𑀺𑀓𑀸𑀭𑁄 𑀓𑀼𑀫𑁆𑀪𑁄 𑀲𑀼𑀯𑀡𑁆𑀡𑀓𑀼𑀫𑁆𑀪𑁄𑀢𑀺 𑀯𑀼𑀘𑁆𑀘𑀢𑀺, 𑀦 𑀏𑀯𑀁 𑀲𑀧𑁆𑀧𑀺𑀁 𑀕𑀳𑁂𑀢𑁆𑀯𑀸 𑀓𑀢𑁄 𑀲𑀧𑁆𑀧𑀺𑀲𑁆𑀲 𑀯𑀺𑀓𑀸𑀭𑁄 𑀲𑀧𑁆𑀧𑀺𑀓𑀼𑀫𑁆𑀪𑁄 𑀦𑀸𑀫 𑀅𑀢𑁆𑀣𑀺. 𑀬𑀲𑁆𑀫𑀺𑀁 𑀧𑀦 𑀓𑀼𑀫𑁆𑀪𑁂 𑀲𑀧𑁆𑀧𑀺 𑀧𑀓𑁆𑀔𑀺𑀢𑁆𑀢𑀁, 𑀲𑁄 𑀲𑀧𑁆𑀧𑀺𑀓𑀼𑀫𑁆𑀪𑁄 𑀦𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑁂𑀮𑀓𑀼𑀫𑁆𑀪𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘𑀁 𑀥𑀼𑀯𑀁, 𑀦 𑀏𑀯𑀁 𑀪𑀢𑁆𑀢𑀁 𑀯𑀸 𑀬𑀸𑀕𑀼 𑀯𑀸 𑀅𑀢𑁆𑀣𑀺. 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀧𑀦 𑀅𑀓𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀲𑁆𑀲𑀸𑀫𑀸𑀢𑀺 𑀧𑀜𑁆𑀜𑀢𑁆𑀢𑀯𑀲𑁂𑀦 ‘‘𑀦𑀺𑀘𑁆𑀘𑀪𑀢𑁆𑀢𑀁 𑀥𑀼𑀯𑀬𑀸𑀕𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑀺, 𑀦 𑀏𑀯𑀁 𑀧𑀼𑀕𑁆𑀕𑀮𑁄 ¶ . 𑀭𑀽𑀧𑀸𑀤𑀻𑀲𑀼 𑀧𑀦 𑀲𑀢𑀺 ‘𑀏𑀯𑀁𑀦𑀸𑀫𑁄’‘𑀏𑀯𑀁𑀕𑁄𑀢𑁆𑀢𑁄’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀇𑀢𑀺 𑀇𑀫𑀺𑀦𑀸 𑀮𑁄𑀓𑀯𑁄𑀳𑀸𑀭𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀸 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋 ‘‘𑀇𑀫𑀸 𑀔𑁄 𑀘𑀺𑀢𑁆𑀢, 𑀮𑁄𑀓𑀲𑀫𑀜𑁆𑀜𑀸 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑁄 𑀮𑁄𑀓𑀯𑁄𑀳𑀸𑀭𑀸 𑀮𑁄𑀓𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 (𑀤𑀻. 𑀦𑀺. 𑁧.𑁪𑁪𑁦). 𑀭𑀽𑀧𑀸𑀤𑀺𑀥𑀫𑁆𑀫𑀸 𑀧𑀦 𑀯𑀺𑀦𑀸𑀧𑀺 𑀮𑁄𑀓𑀲𑀫𑁆𑀫𑀼𑀢𑀺𑀁 𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀧𑀜𑁆𑀜𑀸𑀧𑀦𑀢𑁄 𑀅𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀩𑀼𑀤𑁆𑀥𑀸𑀦𑀁 ¶ 𑀧𑀦 𑀤𑁆𑀯𑁂 𑀓𑀣𑀸 𑀲𑀫𑁆𑀫𑀼𑀢𑀺𑀓𑀣𑀸 𑀘 𑀧𑀭𑀫𑀢𑁆𑀣𑀓𑀣𑀸 𑀘. 𑀢𑀢𑁆𑀣 𑀲𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀤𑁂𑀯𑁄, 𑀩𑁆𑀭𑀳𑁆𑀫𑀸𑀢𑀺𑀆𑀤𑀺𑀓𑀸 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫. 𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸, 𑀔𑀦𑁆𑀥𑀸, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀺, 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺𑀆𑀤𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫.

𑀢𑀢𑁆𑀣 𑀬𑁄 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀬 𑀲𑀢𑁆𑀢𑁄𑀢𑀺 𑀯𑀸…𑀧𑁂… 𑀩𑁆𑀭𑀳𑁆𑀫𑀸𑀢𑀺 𑀯𑀸𑀢𑀺 𑀯𑀼𑀢𑁆𑀢𑁂 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀺𑀬𑁆𑀬𑀸𑀢𑀼𑀁 𑀅𑀭𑀳𑀢𑁆𑀢𑀚𑀬𑀕𑁆𑀕𑀸𑀳𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀪𑀕𑀯𑀸 𑀆𑀤𑀺𑀢𑁄𑀯 𑀲𑀢𑁆𑀢𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀧𑁄𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀩𑁆𑀭𑀳𑁆𑀫𑀸𑀢𑀺 𑀯𑀸 𑀓𑀣𑁂𑀢𑀺. 𑀬𑁄 𑀧𑀭𑀫𑀢𑁆𑀣𑀤𑁂𑀲𑀦𑀸𑀬 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀤𑀼𑀓𑁆𑀔𑀦𑁆𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀼𑀢𑁆𑀯𑀸𑀯 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀺𑀬𑁆𑀬𑀸𑀢𑀼𑀁 𑀅𑀭𑀳𑀢𑁆𑀢𑀚𑀬𑀕𑁆𑀕𑀸𑀳𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀣𑁂𑀢𑀺. 𑀢𑀣𑀸 𑀲𑀫𑁆𑀫𑀼𑀢𑀺𑀓𑀣𑀸𑀬 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲 𑀦 𑀧𑀞𑀫𑀁 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀢𑀺. 𑀲𑀫𑁆𑀫𑀼𑀢𑀺𑀓𑀣𑀸𑀬 𑀧𑀦 𑀩𑁄𑀥𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀢𑀺 ¶ . 𑀧𑀭𑀫𑀢𑁆𑀣𑀓𑀣𑀸𑀬 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀧𑀺 𑀦 𑀧𑀞𑀫𑀁 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀺. 𑀧𑀭𑀫𑀢𑁆𑀣𑀓𑀣𑀸𑀬 𑀧𑀦 𑀩𑁄𑀥𑁂𑀢𑁆𑀯𑀸 𑀧𑀘𑁆𑀙𑀸 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀺. 𑀧𑀓𑀢𑀺𑀬𑀸 𑀧𑀦 𑀧𑀞𑀫𑀫𑁂𑀯 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀤𑁂𑀲𑀦𑀸 𑀮𑀽𑀔𑀸𑀓𑀸𑀭𑀸 𑀳𑁄𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀸 𑀧𑀞𑀫𑀁 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀺. 𑀢𑁂 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀘𑁆𑀘𑀫𑁂𑀯 𑀲𑀪𑀸𑀯𑀫𑁂𑀯 𑀅𑀫𑀼𑀲𑀸𑀯 𑀓𑀣𑁂𑀦𑁆𑀢𑀺. 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀘𑁆𑀘𑀫𑁂𑀯 𑀲𑀪𑀸𑀯𑀫𑁂𑀯 𑀅𑀫𑀼𑀲𑀸𑀯 𑀓𑀣𑁂𑀦𑁆𑀢𑀺. 𑀅𑀬𑀜𑁆𑀳𑀺 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀼𑀧𑀮𑀩𑁆𑀪𑀢𑀺’’.

𑀢𑀢𑁆𑀣 ¶ 𑁋

‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀢𑀣𑀮𑀓𑁆𑀔𑀡’’𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀤𑁆𑀯𑁂 𑀪𑀕𑀯𑀢𑁄 𑀤𑁂𑀲𑀦𑀸 𑀧𑀭𑀫𑀢𑁆𑀣𑀤𑁂𑀲𑀦𑀸 𑀘 𑀔𑀦𑁆𑀥𑀸𑀤𑀺𑀯𑀲𑁂𑀦, 𑀲𑀫𑁆𑀫𑀼𑀢𑀺𑀤𑁂𑀲𑀦𑀸 𑀘 𑀲𑀧𑁆𑀧𑀺𑀓𑀼𑀫𑁆𑀪𑀸𑀤𑀺𑀯𑀲𑁂𑀦. 𑀦 𑀳𑀺 𑀪𑀕𑀯𑀸 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀢𑀺. 𑀢𑀲𑁆𑀫𑀸 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀯𑀘𑀦𑀫𑀢𑁆𑀢𑀢𑁄 𑀅𑀪𑀺𑀦𑀺𑀯𑁂𑀲𑁄 𑀦 𑀓𑀸𑀢𑀩𑁆𑀩𑁄. 𑀲𑀢𑁆𑀣𑀸𑀭𑀸 𑀳𑀺 𑁋

‘‘𑀧𑀜𑁆𑀜𑀢𑁆𑀢𑀺𑀁 ¶ 𑀅𑀦𑀢𑀺𑀓𑁆𑀓𑀫𑁆𑀫, 𑀧𑀭𑀫𑀢𑁆𑀣𑁄 𑀧𑀓𑀸𑀲𑀺𑀢𑁄;

𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀧𑀡𑁆𑀟𑀺𑀢𑁄;

𑀧𑀭𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀬𑁂’’.

𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀼𑀕𑁆𑀕𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀳𑀸𑀦𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁩𑁯. 𑀇𑀤𑀸𑀦𑀺 ¶ ¶ 𑀧𑀭𑀺𑀳𑀸𑀦𑀺𑀓𑀣𑀸 𑀳𑁄𑀢𑀺. 𑀧𑀭𑀺𑀳𑀸𑀦𑀺𑀥𑀫𑁆𑀫𑁄 𑀅𑀧𑀭𑀺𑀳𑀸𑀦𑀺𑀥𑀫𑁆𑀫𑁄, ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀓𑁆𑀔𑀲𑁆𑀲, 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺’’ (𑀅. 𑀦𑀺. 𑁨.𑁧𑁮𑁫), ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 ¶ 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁯) 𑀏𑀯𑀫𑀸𑀤𑀻𑀦𑀺 𑀳𑀺 𑀲𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀸𑀬 𑀲𑀫𑁆𑀫𑀺𑀢𑀺𑀬𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀺𑀦𑁄 𑀏𑀓𑀘𑁆𑀘𑁂 𑀘 𑀫𑀳𑀸𑀲𑀗𑁆𑀖𑀺𑀓𑀸 𑀅𑀭𑀳𑀢𑁄𑀧𑀺 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂𑀬𑁂𑀯 𑀯𑀸, 𑀬𑁂𑀲𑀁 𑀅𑀬𑀁 𑀮𑀤𑁆𑀥𑀺, 𑀢𑁂𑀲𑀁 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀁 𑀧𑀭𑀺𑀳𑀸𑀬𑀢𑀺 𑀅𑀭𑀳𑀸 𑀅𑀭𑀳𑀢𑁆𑀢𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀭 𑀧𑀭𑀺𑀳𑀸𑀬𑀢𑀻𑀢𑀺 𑀤𑁆𑀯𑁂 𑀧𑀭𑀺𑀳𑀸𑀦𑀺𑀬𑁄 𑀧𑀢𑁆𑀢𑀧𑀭𑀺𑀳𑀸𑀦𑀺 𑀘 𑀅𑀧𑁆𑀧𑀢𑁆𑀢𑀧𑀭𑀺𑀳𑀸𑀦𑀺 𑀘. 𑀢𑀢𑁆𑀣 ‘‘𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸 𑀲𑀸𑀫𑀬𑀺𑀓𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀻’’𑀢𑀺 (𑀲𑀁. 𑀦𑀺. 𑁧.𑁧𑁫𑁯) 𑀅𑀬𑀁 𑀧𑀢𑁆𑀢𑀧𑀭𑀺𑀳𑀸𑀦𑀺 𑀦𑀸𑀫. ‘‘𑀫𑀸 𑀯𑁄 𑀲𑀸𑀫𑀜𑁆𑀜𑀢𑁆𑀣𑀺𑀓𑀸𑀦𑀁 𑀲𑀢𑀁 𑀲𑀸𑀫𑀜𑁆𑀜𑀢𑁆𑀣𑁄 𑀧𑀭𑀺𑀳𑀸𑀬𑀻’’𑀢𑀺 (𑀫. 𑀦𑀺. 𑁧.𑁪𑁧𑁬-𑁪𑁧𑁮) 𑀅𑀬𑀁 𑀅𑀧𑁆𑀧𑀢𑁆𑀢𑀧𑀭𑀺𑀳𑀸𑀦𑀺. 𑀢𑀸𑀲𑀼 𑀇𑀥 𑀧𑀢𑁆𑀢𑀧𑀭𑀺𑀳𑀸𑀦𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀜𑁆𑀳𑀺 𑀲𑀦𑁆𑀥𑀸𑀬 𑀆𑀫𑀦𑁆𑀢𑀸𑀢𑀺 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀓𑀲𑀫𑀬𑁂 𑀧𑀦 𑀇𑀫𑀁 𑀧𑀢𑁆𑀢𑀧𑀭𑀺𑀳𑀸𑀦𑀺𑀁 𑀦𑀸𑀫 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑀸𑀯 𑀇𑀘𑁆𑀙𑀦𑁆𑀢𑀺, 𑀦 𑀅𑀭𑀳𑀢𑁆𑀢𑀸𑀤𑀻𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺. 𑀧𑀭𑀲𑀫𑀬𑁂𑀧𑀺 𑀦𑀁 𑀲𑀩𑁆𑀩𑀲𑀸𑀫𑀜𑁆𑀜𑀨𑀮𑁂𑀲𑀼 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑀓𑀸𑀮𑁂𑀲𑀼 𑀲𑀩𑁆𑀩𑁂𑀲𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀦 𑀇𑀘𑁆𑀙𑀦𑁆𑀢𑀺. 𑀢𑀁 𑀧𑀦 𑀢𑁂𑀲𑀁 𑀮𑀤𑁆𑀥𑀺𑀫𑀢𑁆𑀢𑀫𑁂𑀯𑀸𑀢𑀺 𑀲𑀩𑁆𑀩𑀁 𑀮𑀤𑁆𑀥𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑀼𑀁 𑀧𑀼𑀦 𑀲𑀩𑁆𑀩𑀢𑁆𑀣𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸.

𑀢𑀢𑁆𑀣 𑀬𑀲𑁆𑀫𑀸 𑀧𑀭𑀯𑀸𑀤𑀻 𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀞𑀺𑀢𑀲𑁆𑀲 𑀅𑀭𑀳𑀢𑁄 𑀧𑀭𑀺𑀳𑀸𑀦𑀺𑀁 𑀦 𑀇𑀘𑁆𑀙𑀢𑀺, 𑀉𑀧𑀭𑀺𑀨𑀮𑁂𑀲𑀼 𑀞𑀺𑀢𑀲𑁆𑀲𑁂𑀯 𑀇𑀘𑁆𑀙𑀢𑀺. 𑀬𑀲𑁆𑀫𑀸 𑀘 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀞𑀺𑀢𑀲𑁆𑀲 𑀦 𑀇𑀘𑁆𑀙𑀢𑀺, 𑀓𑀫𑁆𑀫𑀸𑀭𑀸𑀫𑀢𑀸𑀤𑀻𑀦𑀁 𑀧𑀦 𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸𑀦𑀁 𑀪𑀸𑀯𑀢𑁄 𑀓𑀸𑀫𑀪𑀯𑁂 𑀞𑀺𑀢𑀲𑁆𑀲𑁂𑀯 𑀇𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩𑀢𑁆𑀣𑀸’’𑀢𑀺 ¶ 𑀧𑀼𑀝𑁆𑀞𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀼𑀝𑁆𑀞𑁄 𑀓𑀸𑀫𑀪𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀳𑀺 𑀓𑀸𑀫𑀪𑀯𑁂 𑀧𑀭𑀺𑀳𑀸𑀦𑀺𑀓𑀭𑀸 𑀓𑀸𑀫𑀕𑀼𑀡𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀭𑀺𑀳𑀸𑀬𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺.

𑀢𑀢𑀺𑀬𑀧𑀼𑀘𑁆𑀙𑀸𑀬 ¶ 𑀧𑀭𑀺𑀳𑀸𑀦𑀻𑀢𑀺 𑀧𑀭𑀺𑀳𑀸𑀦𑀺𑀓𑀭𑁂 𑀥𑀫𑁆𑀫𑁂 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀭𑀺𑀳𑀸𑀦𑀺 𑀦𑀸𑀫 𑀓𑀫𑁆𑀫𑀸𑀭𑀸𑀫𑀢𑀸𑀤𑀺𑀥𑀫𑁆𑀫𑀸, 𑀯𑀺𑀲𑁂𑀲𑀢𑁄 𑀯𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀏𑀯, 𑀢𑁂 𑀘 𑀭𑀽𑀧𑀸𑀭𑀽𑀧𑀪𑀯𑁂 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲.

𑀲𑀩𑁆𑀩𑀤𑀸𑀢𑀺 𑀓𑀸𑀮𑀧𑀼𑀘𑁆𑀙𑀸. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀓𑀸𑀮𑁂 𑀅𑀧𑀭𑀺𑀳𑀸𑀬𑀦𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀲𑀩𑁆𑀩𑀤𑀸 𑀧𑀭𑀺𑀳𑀸𑀬𑀦𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑁂 𑀧𑀭𑀺𑀳𑀸𑀦𑀺𑀓𑀭𑀥𑀫𑁆𑀫𑀲𑀫𑀸𑀬𑁄𑀕𑁂 ¶ 𑀲𑀢𑀺 𑀫𑀼𑀳𑀼𑀢𑁆𑀢𑀫𑁂𑀯 𑀧𑀭𑀺𑀳𑀸𑀦𑀺 𑀦𑀸𑀫 𑀳𑁄𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀅𑀧𑀭𑀺𑀳𑀻𑀦𑀲𑁆𑀲 𑀧𑀘𑁆𑀙𑀸 𑀧𑀭𑀺𑀳𑀻𑀦𑀲𑁆𑀲 𑀘 𑀧𑀭𑀺𑀳𑀸𑀦𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄𑀢𑀺 𑀧𑀜𑁆𑀳𑀸𑀦𑀁 𑀧𑀞𑀫𑀲𑁆𑀫𑀺𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀲𑁆𑀫𑀺𑀁 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑀺𑀬𑀲𑁆𑀫𑀺𑀫𑁆𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺.

𑀲𑁂𑀝𑁆𑀞𑀺𑀉𑀤𑀸𑀳𑀭𑀡𑁂 𑀧𑀞𑀫𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀤𑀼𑀢𑀺𑀬𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀫𑀁 𑀢𑀼𑀫𑁆𑀳𑁂 𑀧𑀼𑀘𑁆𑀙𑀣 𑁋 ‘‘𑀅𑀭𑀳𑀸 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀦𑁆𑀢𑁄 𑀘𑀢𑀽𑀳𑀺 𑀨𑀮𑁂𑀳𑀺 𑀧𑀭𑀺𑀳𑀸𑀬𑀢𑀻’’𑀢𑀺, 𑀢𑀢𑁆𑀭 𑀯𑁄 𑀧𑀝𑀺𑀧𑀼𑀘𑁆𑀙𑀸𑀫𑀺 𑁋 ‘‘𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀲𑁂𑀝𑁆𑀞𑀻 𑀲𑁂𑀝𑁆𑀞𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀳𑀻𑀦𑁂 𑀲𑁂𑀝𑁆𑀞𑀻 𑀲𑁂𑀝𑁆𑀞𑀺𑀢𑁆𑀢𑀸 𑀧𑀭𑀺𑀳𑀻𑀦𑁄 𑀳𑁄𑀢𑀻’’𑀢𑀺. 𑀢𑀢𑁄 𑀲𑀓𑀯𑀸𑀤𑀺𑀦𑀸 𑀏𑀓𑀤𑁂𑀲𑁂𑀦 𑀧𑀭𑀺𑀳𑀸𑀦𑀺𑀁 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀸 𑀧𑀭𑀺𑀳𑀻𑀦𑁄 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀣𑀸 𑀅𑀧𑀭𑀺𑀳𑀻𑀦𑀢𑁆𑀢𑀸 𑀲𑀓𑀯𑀸𑀤𑀻 𑀦 𑀳𑁂𑀯𑀸𑀢𑀺 𑀯𑀢𑁆𑀯𑀸 𑀅𑀣 𑀦𑀁 ‘‘𑀏𑀯𑀫𑁂𑀯 𑀅𑀭𑀳𑀸𑀧𑀺 𑀧𑀭𑀺𑀳𑀸𑀬𑀢𑀺 𑀘. 𑀦 𑀘 𑀘𑀢𑀽𑀳𑀺 𑀨𑀮𑁂𑀳𑀻’’𑀢𑀺 𑀉𑀧𑁆𑀧𑀦𑁆𑀦𑀮𑀤𑁆𑀥𑀺𑀓𑀁 𑀤𑀼𑀢𑀺𑀬𑀁 𑀪𑀩𑁆𑀩𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 𑀲𑁂𑀝𑁆𑀞𑀺𑀦𑁄 𑀅𑀪𑀩𑁆𑀩𑀢𑀸𑀬 𑀦𑀺𑀬𑀫𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀭𑀳𑀢𑁄 𑀘𑀢𑀽𑀳𑀺 𑀨𑀮𑁂𑀳𑀺 𑀧𑀭𑀺𑀳𑀸𑀦𑀺𑀪𑀩𑁆𑀩𑀢𑀁 𑀧𑀼𑀝𑁆𑀞𑁄 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺 (𑀅. 𑀦𑀺. 𑁩.𑁮𑁭) 𑀯𑀘𑀦𑀲𑁆𑀲 𑀅𑀬𑁄𑀦𑀺𑀲𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀮𑀤𑁆𑀥𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄 𑀧𑀭𑀺𑀳𑀸𑀬𑀺𑀢𑀼𑀁 𑀅𑀪𑀩𑁆𑀩𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀁 𑀧𑀦𑀲𑁆𑀲 𑀮𑀤𑁆𑀥𑀺𑀫𑀢𑁆𑀢𑀫𑁂𑀯𑀸𑀢𑀺.

𑀏𑀢𑁆𑀢𑀸𑀯𑀢𑀸 𑀯𑀸𑀤𑀬𑀼𑀢𑁆𑀢𑀺 𑀦𑀸𑀫 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺.

𑁨. 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁪𑁦. 𑀇𑀤𑀸𑀦𑀺 ¶ ¶ 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀸 𑀆𑀭𑀤𑁆𑀥𑀸. 𑀢𑀢𑁆𑀣 𑀬𑀲𑁆𑀫𑀸 𑀓𑁂𑀘𑀺 𑀅𑀭𑀳𑀢𑁄𑀯 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄𑀧𑀺, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀲𑁆𑀲𑀧𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀦 𑀲𑀩𑁆𑀩𑁂𑀧𑀺 𑀦 𑀇𑀘𑁆𑀙𑀦𑁆𑀢𑀺𑀬𑁂𑀯. 𑀬𑁂 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀦𑀸𑀕𑀸𑀫𑀺𑀲𑀓𑀤𑀸𑀕𑀸𑀫𑀺𑀪𑀸𑀯𑁂 𑀞𑀺𑀢𑀸, 𑀢𑁂𑀲𑀁 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀺, 𑀦 𑀇𑀢𑀭𑁂𑀲𑀁 𑀅𑀦𑀸𑀕𑀸𑀫𑀺𑀲𑀓𑀤𑀸𑀕𑀸𑀫𑀻𑀦𑀁. 𑀲𑁄𑀢𑀸𑀧𑀦𑁆𑀦𑀲𑁆𑀲 ¶ 𑀧𑀦 𑀢𑁂𑀧𑀺 𑀲𑀩𑁆𑀩𑀣𑀸𑀧𑀺 𑀦 𑀇𑀘𑁆𑀙𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀧𑀼𑀘𑁆𑀙𑀸 𑀓𑀢𑀸. 𑀢𑀢𑁆𑀣 𑀢𑁂𑀲𑀁 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀭𑀺𑀳𑀸𑀬𑀢𑀺 𑀅𑀦𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀨𑀮𑀸’’𑀢𑀺 𑀳𑀺 𑀧𑀜𑁆𑀳𑀲𑁆𑀫𑀺𑀁 𑀬𑁂 𑀅𑀦𑀸𑀕𑀸𑀫𑀺𑀦𑁄 𑀧𑀭𑀺𑀳𑀸𑀦𑀺𑀁 𑀦 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀧𑀝𑀺𑀓𑁆𑀔𑁂𑀧𑁄. 𑀬𑁂 𑀧𑀓𑀢𑀺𑀅𑀦𑀸𑀕𑀸𑀫𑀺𑀦𑁄 𑀯𑀸 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀞𑀺𑀢𑀅𑀦𑀸𑀕𑀸𑀫𑀺𑀦𑁄 𑀯𑀸 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀧𑀝𑀺𑀜𑁆𑀜𑀸𑀢𑀺 𑀇𑀤𑀫𑁂𑀢𑁆𑀣 𑀦𑀬𑀫𑀼𑀔𑀁. 𑀢𑀲𑁆𑀲𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀧𑁂𑀬𑁆𑀬𑀸𑀮𑀸 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸.

𑁨𑁪𑁧. 𑀬𑀁 𑀧𑀦𑁂𑀢𑁆𑀣 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀅𑀦𑀦𑁆𑀢𑀭𑀸 𑀅𑀭𑀳𑀢𑁆𑀢𑀁𑀬𑁂𑀯 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀺𑀳𑀻𑀦𑀲𑁆𑀲 𑀧𑀼𑀦 𑀯𑀸𑀬𑀫𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀢𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁨𑁪𑁨. 𑀢𑀢𑁄 𑀧𑀭𑀁 ‘‘𑀧𑀭𑀺𑀳𑀸𑀦𑀺 𑀦𑀸𑀫𑁂𑀲𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀸 𑀫𑀦𑁆𑀤𑀢𑀸𑀬 𑀪𑀯𑁂𑀬𑁆𑀬, 𑀫𑀕𑁆𑀕𑀪𑀸𑀯𑀦𑀸𑀤𑀻𑀦𑀁 𑀯𑀸 𑀅𑀦𑀥𑀺𑀫𑀢𑁆𑀢𑀢𑀸𑀬, 𑀲𑀘𑁆𑀘𑀸𑀦𑀁 𑀯𑀸 𑀅𑀤𑀲𑁆𑀲𑀦𑁂𑀦𑀸’’𑀢𑀺 𑀏𑀯𑀫𑀸𑀤𑀻𑀦𑀁 𑀯𑀲𑁂𑀦 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀓𑀲𑁆𑀲 𑀩𑀳𑀼𑀢𑀭𑀸 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀸𑀥𑀺𑀧𑁆𑀧𑀸𑀬𑀫𑁂𑀯 𑀲𑀼𑀢𑁆𑀢𑀸𑀦𑀁 𑀧𑀦𑀢𑁆𑀣𑁄 𑀆𑀕𑀫𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁨. 𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀭𑀳𑀸 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀢𑀻𑀢𑀺 𑀏𑀢𑁆𑀣 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀫𑀬𑀯𑀺𑀫𑀼𑀢𑁆𑀢𑁄, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀲𑀓𑀲𑀫𑀬𑁂 𑀧𑀦 𑀅𑀯𑀲𑀺𑀧𑁆𑀧𑀢𑁆𑀢𑁄 𑀛𑀸𑀦𑀮𑀸𑀪𑀻 𑀲𑀫𑀬𑀯𑀺𑀫𑀼𑀢𑁆𑀢𑁄, 𑀯𑀲𑀺𑀧𑁆𑀧𑀢𑁆𑀢𑁄 𑀛𑀸𑀦𑀮𑀸𑀪𑀻 𑀘𑁂𑀯 𑀲𑀩𑁆𑀩𑁂 𑀘 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀭𑀺𑀬𑁂 𑀯𑀺𑀫𑁄𑀓𑁆𑀔𑁂 𑀅𑀲𑀫𑀬𑀯𑀺𑀫𑀼𑀢𑁆𑀢𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀲𑁄 𑀧𑀦 𑀢𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀫𑀬𑀯𑀺𑀫𑀼𑀢𑁆𑀢𑁄 ¶ 𑀧𑀭𑀺𑀳𑀸𑀬𑀢𑀺, 𑀇𑀢𑀭𑁄 𑀦 𑀧𑀭𑀺𑀳𑀸𑀬𑀢𑀻’’𑀢𑀺 𑀆𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸.

𑁩. 𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁬𑁫. 𑀇𑀤𑀸𑀦𑀺 ¶ 𑀲𑀼𑀢𑁆𑀢𑀲𑀸𑀥𑀦𑀸 𑀳𑁄𑀢𑀺. 𑀢𑀢𑁆𑀣 𑀉𑀘𑁆𑀘𑀸𑀯𑀘𑀸𑀢𑀺 𑀉𑀢𑁆𑀢𑀫𑀳𑀻𑀦𑀪𑁂𑀤𑀢𑁄 𑀉𑀘𑁆𑀘𑀸 𑀘 𑀅𑀯𑀘𑀸 𑀘. 𑀧𑀝𑀺𑀧𑀸𑀤𑀸𑀢𑀺 𑀧𑀝𑀺𑀧𑀤𑀸. 𑀲𑀫𑀡𑁂𑀦 𑀧𑀓𑀸𑀲𑀺𑀢𑀸𑀢𑀺 𑀩𑀼𑀤𑁆𑀥𑀲𑀫𑀡𑁂𑀦 𑀚𑁄𑀢𑀺𑀢𑀸. 𑀲𑀼𑀔𑀸𑀧𑀝𑀺𑀧𑀤𑀸 𑀳𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀉𑀘𑁆𑀘𑀸. 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀅𑀯𑀘𑀸. 𑀇𑀢𑀭𑀸 𑀤𑁆𑀯𑁂 𑀏𑀓𑁂𑀦𑀗𑁆𑀕𑁂𑀦 ¶ 𑀉𑀘𑁆𑀘𑀸, 𑀏𑀓𑁂𑀦 𑀅𑀯𑀘𑀸. 𑀧𑀞𑀫𑀁 𑀯𑀼𑀢𑁆𑀢𑀸 𑀏𑀯 𑀯𑀸 𑀉𑀘𑁆𑀘𑀸, 𑀇𑀢𑀭𑁄 𑀢𑀺𑀲𑁆𑀲𑁄𑀧𑀺 𑀅𑀯𑀘𑀸. 𑀢𑀸𑀬 𑀘𑁂𑀢𑀸𑀬 𑀉𑀘𑁆𑀘𑀸𑀯𑀘𑀸𑀬 𑀧𑀝𑀺𑀧𑀤𑀸𑀬 𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀺, 𑀏𑀓𑀫𑀕𑁆𑀕𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦𑀺𑀩𑁆𑀩𑀸𑀦𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑁂𑀦 𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂𑀦 𑀢𑁂𑀲𑀁 𑀧𑀼𑀦 𑀅𑀧𑁆𑀧𑀳𑀸𑀢𑀩𑁆𑀩𑀢𑁄. 𑀏𑀢𑁂𑀦 𑀧𑀭𑀺𑀳𑀸𑀦𑀺𑀥𑀫𑁆𑀫𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀦𑀬𑀺𑀤𑀁 𑀏𑀓𑀕𑀼𑀡𑀁 𑀫𑀼𑀢𑀦𑁆𑀢𑀺 𑀢𑀜𑁆𑀘 𑀇𑀤𑀁 𑀧𑀸𑀭𑀁 𑀏𑀓𑀯𑀸𑀭𑀁𑀬𑁂𑀯 𑀨𑀼𑀲𑀦𑀸𑀭𑀳𑀁 𑀦 𑀳𑁄𑀢𑀺. 𑀓𑀲𑁆𑀫𑀸? 𑀏𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀸𑀦𑀢𑁄. 𑀏𑀢𑁂𑀦 𑀏𑀓𑀫𑀕𑁆𑀕𑁂𑀦𑁂𑀯 𑀅𑀭𑀳𑀢𑁆𑀢𑀸𑀪𑀸𑀯𑀁 𑀤𑀻𑀧𑁂𑀢𑀺.

𑀅𑀢𑁆𑀣𑀺 𑀙𑀺𑀦𑁆𑀦𑀲𑁆𑀲 𑀙𑁂𑀤𑀺𑀬𑀦𑁆𑀢𑀺 𑀙𑀺𑀦𑁆𑀦𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀧𑀼𑀦 𑀙𑀺𑀦𑁆𑀤𑀺𑀢𑀩𑁆𑀩𑀁 𑀓𑀺𑀜𑁆𑀘𑀺 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀦𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀑𑀖𑀧𑀸𑀲𑁄𑀢𑀺 𑀓𑀺𑀮𑁂𑀲𑁄𑀖𑁄 𑀘𑁂𑀯 𑀓𑀺𑀮𑁂𑀲𑀧𑀸𑀲𑁄 𑀘.

𑁨𑁬𑁬. 𑀓𑀢𑀲𑁆𑀲 𑀧𑀝𑀺𑀘𑀬𑁄𑀢𑀺 𑀪𑀸𑀯𑀺𑀢𑀲𑁆𑀲 𑀫𑀕𑁆𑀕𑀲𑁆𑀲 𑀧𑀼𑀦 𑀪𑀸𑀯𑀦𑀸. 𑀇𑀥𑀸𑀧𑀺 𑀧𑀝𑀺𑀓𑁆𑀔𑁂𑀧𑀧𑀝𑀺𑀚𑀸𑀦𑀦𑀸𑀦𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁬𑁭. 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀯𑀸𑀤𑀺𑀦𑀸 𑀆𑀪𑀢𑁂 𑀲𑀼𑀢𑁆𑀢𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀧𑁆𑀧𑀢𑁆𑀢𑀧𑀭𑀺𑀳𑀸𑀦𑀸𑀬 𑀘𑁂𑀯 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀧𑀭𑀺𑀳𑀸𑀦𑀸𑀬 𑀘 𑀲𑀁𑀯𑀢𑁆𑀢𑀦𑁆𑀢𑀺. 𑀲𑁄 𑀧𑀦 𑀧𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀭𑀺𑀳𑀸𑀦𑀸𑀬 𑀲𑀮𑁆𑀮𑀓𑁆𑀔𑁂𑀢𑀺. 𑀢𑁂𑀦𑁂𑀯 𑀅𑀢𑁆𑀣𑀺 𑀅𑀭𑀳𑀢𑁄 𑀓𑀫𑁆𑀫𑀸𑀭𑀸𑀫𑀢𑀸𑀢𑀺 𑀆𑀳. 𑀇𑀢𑀭𑁄𑀧𑀺 𑀅𑀲𑀫𑀬𑀯𑀺𑀫𑀼𑀢𑁆𑀢𑀁 ¶ 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀭𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀸𑀫𑀭𑀸𑀕𑀯𑀲𑁂𑀦 𑀯𑀸 𑀧𑀯𑀢𑁆𑀢𑀫𑀸𑀦𑀁 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀭𑀣𑀸 𑀧𑀯𑀢𑁆𑀢𑀫𑀸𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀭𑀸𑀕𑀸𑀤𑀻𑀦𑀁 𑀧𑀦 𑀅𑀢𑁆𑀣𑀺𑀢𑀁 𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑁨𑁬𑁮. 𑀓𑀺𑀁 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀓𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑁄 𑀅𑀦𑀼𑀩𑀤𑁆𑀥𑁄 𑀅𑀚𑁆𑀛𑁄𑀢𑁆𑀣𑀢𑁄 𑀯𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀬𑀧𑀼𑀘𑁆𑀙𑀸𑀬𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑁂𑀯 𑀧𑀝𑀺𑀓𑁆𑀔𑁂𑀧𑀧𑀝𑀺𑀚𑀸𑀦𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀮𑁆𑀬𑀸𑀡𑀸𑀦𑀼𑀲𑀬𑁄𑀢𑀺 ¶ 𑀯𑀘𑀦𑀫𑀢𑁆𑀢𑀲𑀸𑀫𑀜𑁆𑀜𑁂𑀦 𑀯𑀸 𑀧𑀝𑀺𑀚𑀸𑀦𑀸𑀢𑀺. 𑀭𑀸𑀕𑁄 𑀉𑀧𑀘𑀬𑀁 𑀕𑀘𑁆𑀙𑀢𑀻𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀁 𑀲𑀦𑁆𑀥𑀸𑀬𑀸𑀳. 𑀧𑀭𑀢𑁄 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀦 𑀤𑀲𑁆𑀲𑀦𑁂𑀦 𑀧𑀳𑀻𑀦𑀢𑁆𑀢𑀸 𑀉𑀧𑀘𑀬𑀁 𑀦 𑀇𑀘𑁆𑀙𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀢𑁆𑀢𑀲𑀸𑀥𑀦𑀸.

𑀧𑀭𑀺𑀳𑀸𑀦𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁬𑁯. 𑀇𑀤𑀸𑀦𑀺 ¶ ¶ ¶ 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑁂 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸, 𑀫𑀕𑁆𑀕𑀪𑀸𑀯𑀦𑀸 𑀘 𑀧𑀩𑁆𑀩𑀚𑁆𑀚𑀸 𑀘. 𑀧𑀩𑁆𑀩𑀚𑁆𑀚𑀸 𑀲𑀩𑁆𑀩𑀤𑁂𑀯𑁂𑀲𑀼 𑀦𑀢𑁆𑀣𑀺. 𑀫𑀕𑁆𑀕𑀪𑀸𑀯𑀦𑀸 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑁂 𑀲𑁂𑀲𑁂𑀲𑀼 𑀅𑀧𑁆𑀧𑀝𑀺𑀲𑀺𑀤𑁆𑀥𑀸. 𑀢𑀢𑁆𑀣 𑀬𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀧𑀭𑀺𑀤𑁂𑀯𑁂𑀲𑀼 𑀫𑀕𑁆𑀕𑀪𑀸𑀯𑀦𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀲𑀫𑁆𑀫𑀺𑀢𑀺𑀬𑀸, 𑀢𑁂 𑀲𑀦𑁆𑀥𑀸𑀬 𑀦𑀢𑁆𑀣𑀺 𑀤𑁂𑀯𑁂𑀲𑀽𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧) 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀤𑁆𑀯𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸 𑀦𑀢𑁆𑀣𑀺 𑀤𑁂𑀯𑁂𑀲𑀽𑀢𑀺 𑀉𑀧𑁆𑀧𑀦𑁆𑀦𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀯𑀲𑁂𑀦𑁂𑀯 𑀲𑀩𑁆𑀩𑁂 𑀤𑁂𑀯𑀸 𑀚𑀴𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀳𑀢𑁆𑀣𑀲𑀁𑀯𑀸𑀘𑀺𑀓𑀸𑀢𑀺 𑀫𑀽𑀕𑀸 𑀯𑀺𑀬 𑀳𑀢𑁆𑀣𑀫𑀼𑀤𑁆𑀥𑀸𑀬 𑀯𑀢𑁆𑀢𑀸𑀭𑁄. 𑀧𑀭𑀢𑁄 𑀅𑀢𑁆𑀣𑀺 𑀤𑁂𑀯𑁂𑀲𑀽𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀫𑀕𑁆𑀕𑀪𑀸𑀯𑀦𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀝𑀺𑀜𑁆𑀜𑀸𑀬 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲.

𑁨𑁭𑁦. 𑀬𑀢𑁆𑀣 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸𑀢𑀺 𑀧𑀜𑁆𑀳𑁂 𑀕𑀺𑀳𑀻𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦𑀁 𑀫𑀕𑁆𑀕𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯. 𑀧𑀼𑀦 𑀧𑀼𑀝𑁆𑀞𑁄 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀘𑁂𑀯 𑀅𑀲𑀜𑁆𑀜𑀲𑀢𑁆𑀢𑁂 𑀘 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀢𑀲𑁆𑀲𑁂𑀯. 𑀬𑁄 𑀧𑀩𑁆𑀩𑀚𑀢𑀻𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀦 ‘‘𑀅𑀢𑁆𑀣𑀺 𑀤𑁂𑀯𑁂𑀲𑀽’’𑀢𑀺 𑀧𑀜𑁆𑀳𑁂𑀧𑀺 𑀫𑀕𑁆𑀕𑀪𑀸𑀯𑀦𑀁 𑀲𑀦𑁆𑀥𑀸𑀬𑁂𑀯 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲, ‘‘𑀲𑀩𑁆𑀩𑀤𑁂𑀯𑁂𑀲𑀽’’𑀢𑀺 𑀯𑀼𑀢𑁆𑀢𑁂 𑀅𑀲𑀜𑁆𑀜𑀲𑀢𑁆𑀢𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯.

𑁨𑁭𑁧. 𑀫𑀦𑀼𑀲𑁆𑀲𑁂𑀲𑀽𑀢𑀺 ¶ 𑀧𑀜𑁆𑀳𑀤𑁆𑀯𑀬𑁂 𑀚𑀫𑁆𑀩𑀼𑀤𑀻𑀧𑀓𑁂 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺 𑀢𑁂 𑀤𑁂𑀯𑀸, 𑀅𑀢𑁆𑀣𑀺 𑀯𑀸 𑀲𑁄 𑀧𑀤𑁂𑀲𑁄, 𑀬𑀢𑁆𑀣 𑀅𑀢𑁆𑀣𑀻𑀢𑀺 𑀏𑀯𑀁 𑀲𑀢𑁆𑀢𑀧𑀤𑁂𑀲𑀯𑀺𑀪𑀸𑀕𑀫𑀼𑀔𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀲𑀓𑀯𑀸𑀤𑀺𑀲𑁆𑀲. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂 𑀏𑀓𑀦𑁆𑀢𑀭𑀺𑀓𑀧𑀜𑁆𑀳𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁨. 𑀲𑀼𑀢𑁆𑀢𑀸𑀦𑀼𑀬𑁄𑀕𑁂 ¶ 𑀓𑀼𑀳𑀺𑀁 𑀨𑀮𑀼𑀧𑁆𑀧𑀢𑁆𑀢𑀻𑀢𑀺 𑀢𑀲𑁆𑀲 𑀅𑀦𑀸𑀕𑀸𑀫𑀺𑀦𑁄 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺 𑀓𑀼𑀳𑀺𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀲𑀼𑀤𑁆𑀥𑀸𑀯𑀸𑀲𑁂𑀲𑀽𑀢𑀺 𑀅𑀢𑁆𑀣𑁄.

𑀳𑀦𑁆𑀤 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀇𑀥 𑀮𑁄𑀓𑁂 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀦 𑀢𑀢𑁆𑀣 𑀅𑀜𑁆𑀜𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺.

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀯𑀡𑁆𑀡𑀦𑀸

𑁨𑁭𑁩. 𑀇𑀤𑀸𑀦𑀺 ¶ 𑀬𑀤𑀺 𑀅𑀜𑁆𑀜𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀅𑀜𑁆𑀜𑀢𑁆𑀣 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀫𑁆𑀧𑀺 𑀲𑀺𑀬𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀅𑀦𑀸𑀕𑀸𑀫𑀻𑀢𑀺𑀆𑀤𑀻𑀦𑀁 𑀲𑀁𑀲𑀦𑁆𑀤𑀦𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀦𑀸𑀕𑀸𑀫𑀺𑀲𑁆𑀲 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀜𑁆𑀜𑀸, 𑀲𑁂𑀲𑀸𑀦𑀁 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀇𑀥 𑀪𑀸𑀯𑀺𑀢𑀫𑀕𑁆𑀕𑁄 𑀳𑀺 𑀅𑀦𑀸𑀕𑀸𑀫𑀻 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀲𑁄 𑀇𑀥 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 ‘‘𑀑𑀧𑀧𑀸𑀢𑀺𑀓𑁄 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀘𑀦𑀢𑁄 ‘‘𑀧𑀼𑀦 𑀫𑀕𑁆𑀕𑀪𑀸𑀯𑀦𑀁 𑀯𑀺𑀦𑀸 𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀧𑀦 𑀢𑀢𑁆𑀣 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀭𑀼𑀧𑀧𑀢𑁆𑀢𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀇𑀥𑀸𑀕𑀫𑀦𑀜𑁆𑀜𑁂𑀯 𑀦𑀢𑁆𑀣𑀺. 𑀇𑀢𑀺 𑀲𑁄 𑀅𑀦𑀸𑀕𑀸𑀫𑀺𑀲𑁆𑀲 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀁 𑀧𑀼𑀝𑁆𑀞𑁄 𑀧𑀝𑀺𑀚𑀸𑀦𑀸𑀢𑀺. 𑀇𑀢𑀭𑁂𑀲𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦𑀸𑀢𑀺 𑀧𑀜𑁆𑀳𑁂 ‘‘𑀅𑀦𑀸𑀕𑀸𑀫𑀺𑀦𑁄 𑀢𑀢𑁆𑀣 𑀫𑀕𑁆𑀕𑀪𑀸𑀯𑀦𑀸𑀯 𑀦𑀢𑁆𑀣𑀻’’𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀦 𑀘 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲 ¶ , 𑀭𑀽𑀧𑀸𑀯𑀘𑀭𑀫𑀕𑁆𑀕𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦 𑀳𑀺 𑀲𑁄 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀚𑀸𑀢𑁄.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄𑀢𑀺 𑀧𑀜𑁆𑀳𑁂 ‘‘𑀑𑀧𑀧𑀸𑀢𑀺𑀓𑁄 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀘𑀦𑀢𑁄 𑀉𑀧𑀧𑀢𑁆𑀢𑀺𑀬𑀸𑀯𑀲𑁆𑀲 𑀓𑀢𑀓𑀭𑀡𑀻𑀬𑀸𑀤𑀺𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀭𑀳𑀸𑀢𑀺 𑀧𑀜𑁆𑀳𑁂 𑀇𑀥𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀭𑀳𑀢𑁄 𑀯𑀲𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀦𑀩𑁆𑀪𑀯𑁄𑀢𑀺𑀆𑀤𑀻𑀲𑀼𑀧𑀺 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻 𑀇𑀥𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄𑀯 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀧𑀼𑀝𑁆𑀞𑁄 ¶ 𑀇𑀥𑁂𑀯 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀲𑁆𑀲 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑀁 𑀇𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀬𑀣𑀸 𑀫𑀺𑀕𑁄𑀢𑀺 𑀧𑀞𑀫𑀁 𑀉𑀤𑀸𑀳𑀭𑀡𑀁 𑀧𑀭𑀯𑀸𑀤𑀺𑀲𑁆𑀲, 𑀤𑀼𑀢𑀺𑀬𑀁 𑀲𑀓𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀇𑀤𑀸𑀦𑀺 𑀑𑀥𑀺𑀲𑁄𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀑𑀥𑀺𑀲𑁄 𑀑𑀥𑀺𑀲𑁄 ¶ 𑀏𑀓𑀤𑁂𑀲𑁂𑀦 𑀏𑀓𑀤𑁂𑀲𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀇𑀘𑁆𑀙𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀲𑀫𑁆𑀫𑀺𑀢𑀺𑀬𑀸𑀤𑀬𑁄, 𑀢𑁂𑀲𑀁 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑀼𑀁 𑀑𑀥𑀺𑀲𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀏𑀓𑀤𑁂𑀲𑁂𑀦 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸.

𑁪. 𑀚𑀳𑀢𑀺𑀓𑀣𑀸

𑁧. 𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁭𑁯. 𑀇𑀤𑀸𑀦𑀺 ¶ 𑀚𑀳𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀲𑀳 𑀲𑀘𑁆𑀘𑀸𑀪𑀺𑀲𑀫𑀬𑀸 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀳𑀻𑀦𑀸’’𑀢𑀺 𑀮𑀤𑁆𑀥𑀺 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀲𑀫𑁆𑀫𑀺𑀢𑀺𑀬𑀸𑀦𑀁, 𑀢𑁂𑀲𑀁 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑀼𑀁 𑀚𑀳𑀢𑀺 𑀧𑀼𑀣𑀼𑀚𑁆𑀚𑀦𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀧𑀦 𑀢𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀫𑁆𑀧𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀅𑀘𑁆𑀘𑀦𑁆𑀢𑀁 ¶ 𑀧𑀳𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀦 𑀅𑀘𑁆𑀘𑀦𑁆𑀢𑀦𑁆𑀢𑀺𑀆𑀤𑀺𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀢𑀣𑀸𑀭𑀽𑀧𑀲𑁆𑀲 𑀧𑀳𑀸𑀦𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲. 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀅𑀘𑁆𑀘𑀦𑁆𑀢𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀧𑀭𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑁂𑀦 𑀲𑀤𑁆𑀥𑀺𑀁 𑀧𑀼𑀣𑀼𑀚𑁆𑀚𑀦𑀲𑀁𑀲𑀦𑁆𑀤𑀦𑀁 𑀳𑁄𑀢𑀺. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁮𑁦. 𑀢𑀢𑁄 𑀧𑀭𑀁 𑀅𑀦𑀸𑀕𑀸𑀫𑀺𑀨𑀮𑁂 𑀲𑀡𑁆𑀞𑀸𑀢𑀻𑀢𑀺 𑀧𑀼𑀝𑁆𑀞𑁄 𑀛𑀸𑀦𑀸𑀦𑀸𑀕𑀸𑀫𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀭𑀳𑀢𑁆𑀢𑁂 𑀲𑀡𑁆𑀞𑀸𑀢𑀻𑀢𑀺 𑀧𑀼𑀝𑁆𑀞𑁄 𑀤𑀲𑁆𑀲𑀦𑀫𑀕𑁆𑀕𑁂𑀦 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀧𑀳𑀸𑀦𑀸𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀢𑀬𑁄 𑀫𑀕𑁆𑀕𑁂𑀢𑀺 𑀧𑀼𑀝𑁆𑀞𑁄 𑀢𑀣𑀸𑀭𑀽𑀧𑀸𑀬 𑀪𑀸𑀯𑀦𑀸𑀬 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀺𑀘𑁆𑀘𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀢𑀫𑁂𑀦 𑀫𑀕𑁆𑀕𑁂𑀦𑀸𑀢𑀺 𑀧𑀼𑀝𑁆𑀞𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑀸𑀢𑀺 𑀛𑀸𑀦𑀸𑀦𑀸𑀕𑀸𑀫𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀼𑀦 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁 𑀧𑀼𑀝𑁆𑀞𑁄 𑀢𑀺𑀡𑁆𑀡𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑁂𑀬𑁆𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀧𑀞𑀫𑀫𑀕𑁆𑀕𑀲𑁆𑀲𑁂𑀯 ¶ 𑀛𑀸𑀦𑀸𑀦𑀸𑀕𑀸𑀫𑀺𑀫𑀕𑁆𑀕𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀚𑀳𑀢𑀺𑀓𑀣𑀸.

𑁫. 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁨𑁮𑁨. 𑀇𑀤𑀸𑀦𑀺 ¶ 𑀲𑀩𑁆𑀩𑀫𑀢𑁆𑀣𑀻𑀢𑀺𑀯𑀸𑀤𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁨) ‘‘𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀔𑀦𑁆𑀥𑀲𑀪𑀸𑀯𑀁 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀁 𑀅𑀢𑁆𑀣𑀺𑀬𑁂𑀯 𑀦𑀸𑀫𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀲𑀩𑁆𑀩𑀫𑀢𑁆𑀣𑀺𑀯𑀸𑀤𑀸𑀦𑀁, 𑀢𑁂𑀲𑀁 𑀮𑀤𑁆𑀥𑀺𑀯𑀺𑀲𑁄𑀥𑀦𑀢𑁆𑀣𑀁 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀮𑀤𑁆𑀥𑀺𑀬𑀸 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀩𑁆𑀩𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀩𑁆𑀩𑀤𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀦𑀸𑀓𑀸𑀭𑁂𑀦 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀬𑁄𑀕𑀦𑁆𑀢𑀺 ¶ 𑀅𑀬𑀼𑀢𑁆𑀢𑀁. 𑀦𑀸𑀦𑀸𑀲𑀪𑀸𑀯𑀸𑀦𑀜𑁆𑀳𑀺 𑀬𑁄𑀕𑁄 𑀳𑁄𑀢𑀺, 𑀦 𑀏𑀓𑀲𑀪𑀸𑀯𑀲𑁆𑀲. 𑀇𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀳𑁂 𑀭𑀽𑀧𑀁 𑀯𑁂𑀤𑀦𑀸𑀬, 𑀯𑁂𑀤𑀦𑀁 𑀯𑀸 𑀭𑀽𑀧𑁂𑀦 𑀅𑀦𑀸𑀦𑀁 𑀏𑀓𑀮𑀓𑁆𑀔𑀡𑀫𑁂𑀯 𑀓𑀢𑁆𑀯𑀸 𑀲𑀩𑁆𑀩𑀫𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀬𑀫𑁆𑀧𑀺 𑀦𑀢𑁆𑀣𑀺 𑀢𑀫𑁆𑀧𑀢𑁆𑀣𑀻𑀢𑀺 𑀬𑀫𑁆𑀧𑀺 𑀙𑀝𑁆𑀞𑀔𑀦𑁆𑀥𑀸𑀤𑀺𑀓𑀁 𑀲𑀲𑀯𑀺𑀲𑀸𑀡𑀸𑀤𑀺𑀓𑀁 𑀯𑀸 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀲𑀺𑀤𑁆𑀥𑀁, 𑀢𑀫𑁆𑀧𑀺 𑀢𑁂 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀩𑁆𑀩𑀫𑀢𑁆𑀣𑀻𑀢𑀺 𑀬𑀸 𑀤𑀺𑀝𑁆𑀞𑀺 𑀲𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺, 𑀬𑀸 𑀤𑀺𑀝𑁆𑀞𑀺 𑀲𑀸 𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀳𑁂𑀯𑀫𑀢𑁆𑀣𑀻𑀢𑀺 𑀇𑀫𑀺𑀦𑀸 𑀇𑀤𑀁 𑀧𑀼𑀘𑁆𑀙𑀢𑀺 𑁋 𑀬𑀸 𑀢𑁂 𑀏𑀲𑀸 𑀲𑀩𑁆𑀩𑀫𑀢𑁆𑀣𑀻𑀢𑀺 𑀤𑀺𑀝𑁆𑀞𑀺, 𑀲𑀸 𑀤𑀺𑀝𑁆𑀞𑀺 𑀅𑀬𑀸𑀣𑀸𑀯𑀓𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀏𑀯𑀁 𑀬𑀸 𑀅𑀫𑁆𑀳𑀸𑀓𑀁 𑀤𑀺𑀝𑁆𑀞𑀺, 𑀲𑀸 𑀤𑀺𑀝𑁆𑀞𑀺 𑀬𑀸𑀣𑀸𑀯𑀓𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀯𑀁 𑀢𑀯 𑀲𑀫𑀬𑁂 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀲𑀩𑁆𑀩𑁂𑀲𑀼𑀧𑀺 𑀏𑀢𑁂𑀲𑀼 𑀦𑀬𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀅𑀢𑁆𑀣𑀺𑀢𑀸𑀬 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀫𑁂𑀲𑀼 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀦𑀬𑁂𑀲𑀼 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁄 𑀓𑀣𑀸𑀫𑀕𑁆𑀕𑀪𑁂𑀤𑁄 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀸𑀤𑀬𑀼𑀢𑁆𑀢𑀺.

𑁨. 𑀓𑀸𑀮𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮𑁩-𑁨𑁮𑁪. 𑀇𑀤𑀸𑀦𑀺 ¶ 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺 𑀓𑀸𑀮𑀲𑀁𑀲𑀦𑁆𑀤𑀦𑀁 𑀳𑁄𑀢𑀺. 𑀢𑀢𑁆𑀣 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺𑀆𑀤𑀺𑀓𑀁 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀁. 𑀅𑀢𑀻𑀢𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺𑀆𑀤𑀺𑀓𑀁 𑀔𑀦𑁆𑀥𑀯𑀲𑁂𑀦 𑀓𑀸𑀮𑀲𑀁𑀲𑀦𑁆𑀤𑀦𑀁.

𑁨𑁮𑁫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑀻𑀢𑀸𑀦𑀸𑀕𑀢𑀁 𑀧𑀳𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀅𑀧𑁆𑀧𑀺𑀬𑀁 ¶ 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀭𑀺𑀢𑁆𑀯𑀸. 𑀭𑀽𑀧𑀪𑀸𑀯𑀁 𑀚𑀳𑀢𑀻𑀢𑀺𑀧𑀜𑁆𑀳𑁂 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀭𑀽𑀧𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀪𑀸𑀯𑀁 𑀦 𑀚𑀳𑀢𑀻𑀢𑀺 𑀧𑀝𑀺𑀮𑁄𑀫𑀧𑀜𑁆𑀳𑁂𑀧𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸𑀯 𑀧𑀝𑀺𑀚𑀸𑀦𑀸𑀢𑀺. 𑀑𑀤𑀸𑀢𑀁 𑀯𑀢𑁆𑀣𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀲𑀩𑁆𑀩𑀁 𑀯𑀢𑁆𑀣𑀁 𑀑𑀤𑀸𑀢𑀁, 𑀇𑀫𑀺𑀦𑀸 𑀧𑀦 𑀯𑀢𑁆𑀣𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀑𑀤𑀸𑀢𑀁 𑀯𑀢𑁆𑀣𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑀲𑀓𑀯𑀸𑀤𑀺𑀦𑀸 𑀏𑀓𑀢𑁆𑀣𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀑𑀤𑀸𑀢𑀪𑀸𑀯𑀁 𑀚𑀳𑀢𑀻𑀢𑀺 𑀧𑀜𑁆𑀳𑁂 𑀯𑀡𑁆𑀡𑀯𑀺𑀕𑀫𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀯𑀢𑁆𑀣𑀪𑀸𑀯𑀁 𑀚𑀳𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀕𑀢𑀢𑁆𑀢𑀸 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯. 𑀧𑀝𑀺𑀮𑁄𑀫𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁮𑁬. 𑀅𑀢𑀻𑀢𑀁 𑀅𑀢𑀻𑀢𑀪𑀸𑀯𑀁 𑀦 𑀚𑀳𑀢𑀻𑀢𑀺 𑀧𑀼𑀝𑁆𑀞𑁄 ‘‘𑀬𑀤𑀺 𑀚𑀳𑁂𑀬𑁆𑀬, 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀲𑀺𑀬𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀸𑀕𑀢𑀁 𑀅𑀦𑀸𑀕𑀢𑀪𑀸𑀯𑀁 𑀦 𑀚𑀳𑀢𑀻𑀢𑀺 𑀧𑀼𑀝𑁆𑀞𑁄 𑀧𑀦 ‘‘𑀬𑀤𑀺 𑀦 𑀚𑀳𑁂𑀬𑁆𑀬, 𑀅𑀦𑀸𑀕𑀢𑀫𑁂𑀯𑀲𑁆𑀲 ¶ , 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀦 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀜𑁆𑀳𑁂𑀧𑀺 𑀅𑀢𑀻𑀢𑀪𑀸𑀯𑀁 𑀅𑀦𑀸𑀧𑀚𑁆𑀚𑀦𑀤𑁄𑀲𑁄 𑀲𑀺𑀬𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀼𑀮𑁄𑀫𑀧𑀜𑁆𑀳𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁭. 𑀏𑀯𑀁 𑀲𑀼𑀤𑁆𑀥𑀺𑀓𑀦𑀬𑀁 𑀯𑀢𑁆𑀯𑀸 𑀧𑀼𑀦 𑀔𑀦𑁆𑀥𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀅𑀢𑀻𑀢𑀁 𑀭𑀽𑀧𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁨𑁮𑁮. 𑀇𑀤𑀸𑀦𑀺 ‘‘𑀅𑀢𑀻𑀢𑀁 𑀦𑁆𑀯𑀢𑁆𑀣𑀻’’𑀢𑀺𑀆𑀤𑀺 𑀯𑀘𑀦𑀲𑁄𑀥𑀦𑀸 𑀳𑁄𑀢𑀺. 𑀢𑀢𑁆𑀣 𑀳𑀜𑁆𑀘𑀺 𑀅𑀢𑀻𑀢𑀁 𑀦𑁆𑀯𑀢𑁆𑀣𑀻𑀢𑀺 𑀬𑀤𑀺 𑀅𑀢𑀻𑀢𑀁 𑀦𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀁 ¶ 𑀅𑀢𑁆𑀣𑀻𑀢𑀺 𑀫𑀺𑀘𑁆𑀙𑀸𑀢𑀺 𑀅𑀢𑀻𑀢𑀜𑁆𑀘 𑀢𑀁 𑀅𑀢𑁆𑀣𑀺 𑀘𑀸𑀢𑀺 𑀫𑀺𑀘𑁆𑀙𑀸 𑀏𑀯. 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀼𑀝𑁆𑀞𑁄 𑀅𑀦𑀸𑀕𑀢𑀓𑁆𑀔𑀡𑁂𑀬𑁂𑀯𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀓𑀸𑀮𑀦𑀸𑀦𑀢𑁆𑀢𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀬𑀁 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁 𑀅𑀳𑁄𑀲𑀺, 𑀢𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀚𑀸𑀦𑀸𑀢𑀺. 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀢𑀬𑀸 ‘‘𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀯𑀤𑀢𑀸 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦 ‘‘𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 ¶ 𑀯𑀼𑀢𑁆𑀢𑀁. 𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺? 𑀇𑀢𑀭𑁄 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀢𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑀁 𑀕𑀢𑀁, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀬𑀤𑀺 𑀢𑁂 𑀢𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 ‘𑀳𑀼𑀢𑁆𑀯𑀸 𑀳𑁄𑀢𑀻’𑀢𑀺 𑀲𑀗𑁆𑀔𑀁 𑀕𑀢𑀁, 𑀧𑀼𑀦 𑀳𑀼𑀢𑁆𑀯𑀸 𑀳𑁄𑀢𑀺, 𑀬𑀁 𑀅𑀦𑀸𑀕𑀢𑀁 𑀦 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀳𑁄𑀦𑁆𑀢𑀁 ‘𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’𑀢𑀺 𑀲𑀗𑁆𑀔𑀁 𑀕𑀢𑀁 𑀲𑀲𑀯𑀺𑀲𑀸𑀡𑀁, 𑀓𑀺𑀁 𑀢𑁂 𑀢𑀫𑁆𑀧𑀺 𑀧𑀼𑀦 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺𑀅𑀥𑀺𑀧𑁆𑀧𑀸𑀬𑁂𑀦 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 ‘‘𑀬𑀁 𑀦𑀢𑁆𑀣𑀺, 𑀢𑀁 𑀦𑀢𑁆𑀣𑀺𑀢𑀸𑀬, 𑀏𑀯 𑀅𑀦𑀸𑀕𑀢𑀁 𑀦 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀳𑁄𑀢𑀻𑀢𑀺 𑀦𑀳𑀼𑀢𑁆𑀯𑀸𑀦𑀳𑁄𑀢𑀺 𑀦𑀸𑀫 𑀢𑀸𑀯 𑀳𑁄𑀢𑀼, 𑀧𑀼𑀦 𑀦𑀳𑀼𑀢𑁆𑀯𑀸𑀦𑀳𑁄𑀢𑀺𑀪𑀸𑀯𑁄 𑀧𑀦𑀲𑁆𑀲 𑀓𑀼𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢𑀦𑁆𑀢𑀺 𑀧𑀜𑁆𑀳𑁂𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑁂𑀬𑁂𑀯𑀲𑁆𑀲 𑀅𑀢𑀻𑀢𑀢𑀸𑀬 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀓𑀸𑀮𑀦𑀸𑀦𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀼𑀢𑀺𑀬𑀧𑀜𑁆𑀳𑁂 ¶ 𑀧𑀼𑀝𑁆𑀞𑁄 𑀬𑀁 𑀅𑀢𑀻𑀢𑀪𑀸𑀯𑀢𑁄 𑀧𑀼𑀩𑁆𑀩𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀳𑁄𑀲𑀺, 𑀢𑀲𑁆𑀲𑁂𑀯 𑀅𑀢𑀻𑀢𑀢𑁆𑀢𑀸 𑀧𑀝𑀺𑀚𑀸𑀦𑀸𑀢𑀺. 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀢𑀬𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀅𑀢𑀻𑀢𑀁 𑀳𑁄𑀢𑀻’’𑀢𑀺 𑀯𑀤𑀢𑀸 ‘‘𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢’’𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀅𑀢𑀻𑀢𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺? 𑀇𑀢𑀭𑁄 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀼𑀢𑀺𑀬𑀧𑀜𑁆𑀳𑁂 𑀬𑀲𑁆𑀫𑀸 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀅𑀢𑀻𑀢𑀁 𑀳𑁄𑀦𑁆𑀢𑀁 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑀁 𑀕𑀢𑀁, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺 ¶ . 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀬𑀤𑀺 𑀢𑁂 𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀅𑀢𑀻𑀢𑀁 𑀳𑁄𑀦𑁆𑀢𑀁 ‘𑀳𑀼𑀢𑁆𑀯𑀸 𑀳𑁄𑀢𑀻’𑀢𑀺 𑀲𑀗𑁆𑀔𑀁 𑀕𑀢𑀁, 𑀧𑀼𑀦 𑀳𑀼𑀢𑁆𑀯𑀸 𑀳𑁄𑀢𑀺, 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀳𑀼𑀢𑁆𑀯𑀸 𑀅𑀢𑀻𑀢𑀁 𑀦 𑀳𑁄𑀦𑁆𑀢𑀁 ‘𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’𑀢𑀺 𑀲𑀗𑁆𑀔𑀁 𑀕𑀢𑀁 𑀲𑀲𑀯𑀺𑀲𑀸𑀡𑀁, 𑀓𑀺𑀁 𑀢𑁂 𑀢𑀫𑁆𑀧𑀺 𑀧𑀼𑀦 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 ‘‘𑀬𑀁 𑀦𑀢𑁆𑀣𑀺, 𑀢𑀁 𑀦𑀢𑁆𑀣𑀺𑀢𑀸𑀬 𑀏𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀳𑀼𑀢𑁆𑀯𑀸 𑀅𑀢𑀻𑀢𑀁 𑀦 𑀳𑁄𑀢𑀻𑀢𑀺 𑀦𑀳𑀼𑀢𑁆𑀯𑀸𑀦𑀳𑁄𑀢𑀺 𑀦𑀸𑀫 𑀢𑀸𑀯 𑀳𑁄𑀢𑀼. 𑀧𑀼𑀦 𑀦𑀳𑀼𑀢𑁆𑀯𑀸𑀦𑀳𑁄𑀢𑀺𑀪𑀸𑀯𑁄 𑀧𑀦𑀲𑁆𑀲 𑀓𑀼𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀉𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀆𑀕𑀢𑁂 𑀢𑀢𑀺𑀬𑀧𑀜𑁆𑀳𑁂𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀧𑀭𑁄 ¶ 𑀦𑀬𑁄 𑁋 𑀬𑀤𑀺 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀼𑀢𑁆𑀢𑁄 𑀳𑁄𑀢𑀺𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀦𑀸𑀕𑀢𑁂 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀏𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺? 𑀇𑀢𑀭𑁄 𑁋 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀜𑁆𑀳𑁂 𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀤𑀼𑀢𑀺𑀬𑁂 𑀧𑀜𑁆𑀳𑁂 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀜𑁆𑀳𑀸𑀯𑀲𑁂𑀦 𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀧𑀝𑀺𑀚𑀸𑀦𑀦𑁆𑀢𑀁 𑀧𑀼𑀭𑀺𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀦𑀦𑀼 ‘‘𑀢𑀬𑀸 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀞𑀫𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 𑀅𑀦𑀸𑀕𑀢𑀲𑁆𑀲 𑀳𑁄𑀢𑀺𑀪𑀸𑀯𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀳𑀼𑀢𑁆𑀯𑀸𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀢𑁂𑀦 𑀅𑀦𑀸𑀕𑀢𑀁 𑀦 𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀳𑀼𑀢𑁆𑀯𑀸 𑀦𑀸𑀫.

𑀤𑀼𑀢𑀺𑀬𑀧𑀜𑁆𑀳𑁂 ¶ 𑀘 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀁. 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀏𑀢𑁂𑀲𑀼 𑀏𑀓𑁂𑀓𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺? 𑀧𑀭𑀯𑀸𑀤𑀻 𑀲𑀩𑁆𑀩𑀢𑁄 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀬𑁄𑀦𑀤𑁆𑀥𑁄 𑀯𑀺𑀬 𑀢𑁂𑀲𑀁 𑀦𑀳𑀼𑀢𑁆𑀯𑀸𑀦𑀳𑁄𑀢𑀺𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀼𑀢𑀺𑀬𑀯𑀸𑀭𑁂𑀧𑀺 𑀬𑀤𑀺 𑀢𑀜𑁆𑀜𑁂𑀯 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀅𑀢𑀻𑀢𑁂 𑀯𑀼𑀢𑁆𑀢𑁄 𑀳𑁄𑀢𑀺𑀪𑀸𑀯𑁄, 𑀅𑀢𑀻𑀢𑀲𑁆𑀲 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀏𑀯𑀁 𑀲𑀦𑁆𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺 𑀦𑀸𑀫, 𑀅𑀢𑀻𑀢𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀏𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺? 𑀇𑀢𑀭𑁄 𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢𑀦𑁆𑀢𑀺𑀧𑀜𑁆𑀳𑁂 𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀤𑀼𑀢𑀺𑀬𑀧𑀜𑁆𑀳𑁂 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢’’𑀦𑁆𑀢𑀺 𑀧𑀜𑁆𑀳𑀸𑀯𑀲𑁂𑀦 𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀧𑀝𑀺𑀚𑀸𑀦𑀦𑁆𑀢𑀁 𑀧𑀼𑀭𑀺𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀦𑀦𑀼 𑀢𑀬𑀸 𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢𑀦𑁆𑀢𑀺 𑀯𑀼𑀢𑁆𑀢𑁂 𑀧𑀞𑀫𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀳𑁄𑀢𑀺𑀪𑀸𑀯𑁄, 𑀅𑀢𑀻𑀢𑀲𑁆𑀲 𑀘 𑀳𑀼𑀢𑁆𑀯𑀸𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀳𑁄𑀢𑀺 𑀦𑀸𑀫. 𑀅𑀢𑀻𑀢𑀁 𑀦𑀳𑀼𑀢𑁆𑀯𑀸 𑀦𑀸𑀫.

𑀤𑀼𑀢𑀺𑀬𑀧𑀜𑁆𑀳𑁂 𑀘 𑀢𑁂 ‘‘𑀢𑀜𑁆𑀜𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀁. 𑀏𑀯𑀁 𑀲𑀦𑁆𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 ¶ 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦𑀸𑀫, 𑀅𑀢𑀻𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀏𑀢𑁂𑀲𑀼 𑀏𑀓𑁂𑀓𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺, 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺. 𑀧𑀭𑀯𑀸𑀤𑀻 𑀲𑀩𑁆𑀩𑀢𑁄 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀬𑁄𑀦𑀤𑁆𑀥𑁄 𑀯𑀺𑀬 𑀢𑁂𑀲𑀁 𑀦𑀳𑀼𑀢𑁆𑀯𑀸𑀦𑀳𑁄𑀢𑀺𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀢𑀢𑀺𑀬𑀯𑀸𑀭𑁂𑀧𑀺 𑀬𑀤𑀺 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁 𑀅𑀢𑀻𑀢𑀁; 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑁂𑀲𑀼 𑀯𑀼𑀢𑁆𑀢𑁄 𑀳𑁄𑀢𑀺𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀦𑀜𑁆𑀘 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀢𑀻𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀢𑀻𑀲𑀼𑀧𑀺 𑀏𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 ¶ 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺? 𑀇𑀢𑀭𑁄 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀁 𑀅𑀢𑀻𑀢’’𑀦𑁆𑀢𑀺𑀧𑀜𑁆𑀳𑁂 𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀼𑀝𑁆𑀞𑁄 𑀤𑀼𑀢𑀺𑀬𑀧𑀜𑁆𑀳𑁂 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀁 𑀅𑀢𑀻𑀢’’𑀦𑁆𑀢𑀺 𑀧𑀜𑁆𑀳𑀸𑀯𑀲𑁂𑀦 𑀢𑁂𑀲𑀼 𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺, 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀧𑀝𑀺𑀚𑀸𑀦𑀦𑁆𑀢𑀁 𑀧𑀼𑀭𑀺𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀲𑁆𑀲𑀢𑁆𑀣𑁄 ¶ 𑁋 𑀦𑀦𑀼 𑀢𑀬𑀸 𑀢𑀜𑁆𑀜𑁂𑀯 𑀅𑀦𑀸𑀕𑀢𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀁 𑀅𑀢𑀻𑀢𑀦𑁆𑀢𑀺 𑀯𑀼𑀢𑁆𑀢𑁂 𑀧𑀞𑀫𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀳𑁄𑀢𑀺𑀪𑀸𑀯𑁄; 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀦𑀜𑁆𑀘 𑀳𑀼𑀢𑁆𑀯𑀸𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺? 𑀢𑁂𑀦 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀦 𑀳𑁄𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀅𑀢𑀻𑀢𑀜𑁆𑀘 𑀦 𑀳𑀼𑀢𑁆𑀯𑀸 𑀦𑀸𑀫.

𑀤𑀼𑀢𑀺𑀬𑀧𑀜𑁆𑀳𑁂 𑀘 𑀢𑁂 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀁 𑀅𑀢𑀻𑀢’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀁. 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀢𑀻𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺𑀬𑁂𑀯 𑀦𑀸𑀫. 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫 𑁋 ‘‘𑀓𑀺𑀁 𑀢𑁂 𑀏𑀢𑁂𑀲𑀼 𑀏𑀓𑁂𑀓𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺? 𑀧𑀭𑀯𑀸𑀤𑀻 𑀲𑀩𑁆𑀩𑀢𑁄 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀬𑁄𑀦𑀤𑁆𑀥𑁄 𑀯𑀺𑀬 𑀢𑁂𑀲𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺. 𑀦𑀺𑀕𑁆𑀕𑀳𑀸𑀤𑀻𑀦𑀺 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀘𑀓𑁆𑀔𑀼𑀭𑀽𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁮𑁯. 𑀅𑀢𑀻𑀢𑀁 ¶ 𑀘𑀓𑁆𑀔𑀼 𑀅𑀢𑁆𑀣𑀻𑀢𑀺𑀆𑀤𑀻𑀲𑀼𑀧𑀺 𑀘𑀓𑁆𑀔𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑁂𑀦𑁂𑀯 𑀅𑀢𑁆𑀣𑀺𑀢𑀁 𑀧𑀝𑀺𑀚𑀸𑀦𑀸𑀢𑀺. 𑀧𑀲𑁆𑀲𑀢𑀻𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 𑀧𑀦 𑀢𑁂𑀲𑀁 𑀯𑀺𑀜𑁆𑀜𑀸𑀡𑀸𑀦𑀁 𑀓𑀺𑀘𑁆𑀘𑀸𑀪𑀸𑀯𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀢𑁂𑀦 𑀜𑀸𑀡𑁂𑀦 𑀜𑀸𑀡𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺 𑀧𑀜𑁆𑀳𑁂 𑀢𑀲𑁆𑀲 𑀜𑀸𑀡𑀲𑁆𑀲 𑀦𑀺𑀭𑀼𑀤𑁆𑀥𑀢𑁆𑀢𑀸 𑀓𑀺𑀘𑁆𑀘𑀪𑀸𑀯𑀫𑀲𑁆𑀲 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀅𑀢𑀻𑀢𑀸𑀭𑀫𑁆𑀫𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡𑀁 𑀅𑀢𑀻𑀢𑀸𑀦𑀁 𑀥𑀫𑁆𑀫𑀸𑀦𑀁 𑀚𑀸𑀦𑀦𑀢𑁄 𑀅𑀢𑀻𑀢𑀁 𑀜𑀸𑀡𑀦𑁆𑀢𑀺 ¶ 𑀮𑁂𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 ‘‘𑀅𑀢𑀻𑀢𑀁 𑀜𑀸𑀡’’𑀦𑁆𑀢𑀺 𑀓𑀢𑁆𑀯𑀸 𑀢𑁂𑀦 𑀜𑀸𑀡𑁂𑀦 𑀜𑀸𑀡𑀓𑀭𑀡𑀻𑀬𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀲𑀓𑀯𑀸𑀤𑀻 𑀮𑁂𑀲𑁄𑀓𑀸𑀲𑀁 𑀅𑀤𑀢𑁆𑀯𑀸 𑀢𑁂𑀦 𑀜𑀸𑀡𑁂𑀦 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀻𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀅𑀢𑀻𑀢𑀸𑀭𑀫𑁆𑀫𑀡𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀅𑀪𑀸𑀯𑀸 ¶ 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀸𑀕𑀢𑀧𑀜𑁆𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀜𑁆𑀳𑁄 𑀘𑁂𑀯 𑀲𑀁𑀲𑀦𑁆𑀤𑀦𑀧𑀜𑁆𑀳𑁄 𑀘 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁧. 𑀅𑀭𑀳𑀢𑁄 𑀅𑀢𑀻𑀢𑁄 𑀭𑀸𑀕𑁄 𑀅𑀢𑁆𑀣𑀻𑀢𑀺𑀆𑀤𑀻𑀲𑀼𑀧𑀺 𑀭𑀸𑀕𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑁆𑀢𑁄 𑀏𑀯𑀁 𑀧𑀝𑀺𑀚𑀸𑀦𑀸𑀢𑀺. 𑀲𑀭𑀸𑀕𑁄𑀢𑀺𑀆𑀤𑀻𑀲𑀼 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀘𑁂𑀯 𑀬𑀼𑀢𑁆𑀢𑀺𑀯𑀺𑀭𑁄𑀥𑀪𑀬𑁂𑀦 𑀘 𑀧𑀝𑀺𑀓𑁆𑀔𑀺𑀧𑀢𑀺.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑀺𑀤𑀺𑀢𑁆𑀯𑀸 𑀧𑀭𑀢𑁄 𑀅𑀢𑁆𑀣𑀺 𑀲𑀺𑀬𑀸 𑀅𑀢𑀻𑀢𑀁, 𑀲𑀺𑀬𑀸 𑀦𑁆𑀯𑀸𑀢𑀻𑀢𑀦𑁆𑀢𑀺 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀅𑀢𑀻𑀢𑀫𑁂𑀯 𑀅𑀢𑁆𑀣𑀺, 𑀢𑀁 𑀅𑀢𑀻𑀢𑀁. 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁 𑀅𑀢𑁆𑀣𑀺, 𑀢𑀁 𑀦𑁄 𑀅𑀢𑁆𑀣𑀺, 𑀢𑀁 𑀦𑁄 𑀅𑀢𑀻𑀢𑀁. 𑀢𑁂𑀦𑀸𑀢𑀻𑀢𑀁 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀁 𑀅𑀢𑀻𑀢𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀢𑀻𑀢𑀁 𑀦𑁄 𑀅𑀢𑀻𑀢𑀁, 𑀦𑁄 𑀅𑀢𑀻𑀢𑀁 𑀅𑀢𑀻𑀢𑀦𑁆𑀢𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀘𑁆𑀙𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀼𑀢𑁆𑀢𑀲𑀸𑀥𑀦𑀯𑀡𑁆𑀡𑀦𑀸

𑁨𑁯𑁬. 𑀦 ¶ 𑀯𑀢𑁆𑀢𑀩𑁆𑀩𑀁 ‘‘𑀅𑀢𑀻𑀢𑀁 𑀅𑀢𑁆𑀣𑀺 𑀅𑀦𑀸𑀕𑀢𑀁 𑀅𑀢𑁆𑀣𑀻’’𑀢𑀺 𑀲𑀼𑀢𑁆𑀢𑀲𑀸𑀥𑀦𑀸𑀬 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀼𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀬𑀁𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀦𑁆𑀢𑀺 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲𑁂𑀯. 𑀤𑀼𑀢𑀺𑀬𑀦𑀬𑁂 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸 𑀘 𑀧𑀝𑀺𑀜𑁆𑀜𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑀁 𑀧𑀭𑀯𑀸𑀤𑀺𑀦𑀸 𑀅𑀦𑀸𑀕𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀓𑀩𑀴𑀻𑀓𑀸𑀭𑁂, 𑀘𑁂, 𑀪𑀺𑀓𑁆𑀔𑀯𑁂’’𑀢𑀺 𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺𑀆𑀤𑀺 𑀤𑀲𑁆𑀲𑀺𑀢𑀁 𑀦 𑀢𑀁 𑀅𑀦𑀸𑀕𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑀲𑀸𑀥𑀓𑀁 ¶ . 𑀢𑀜𑁆𑀳𑀺 𑀳𑁂𑀢𑀽𑀦𑀁 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀅𑀯𑀲𑁆𑀲𑀁 𑀪𑀸𑀯𑀺𑀢𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀯𑀼𑀢𑁆𑀢𑀁. 𑀅𑀬𑀁 𑀲𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀢𑀻𑀢𑀓𑁆𑀔𑀦𑁆𑀥𑀸𑀤𑀺𑀓𑀣𑀸

𑁧. 𑀦𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁭. 𑀇𑀤𑀸𑀦𑀺 ‘‘𑀅𑀢𑀻𑀢𑀁 𑀔𑀦𑁆𑀥𑀸’’𑀢𑀺𑀆𑀤𑀺𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀔𑀦𑁆𑀥𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀢𑁄 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀲𑁆𑀲 𑀅𑀢𑀻𑀢𑀁 𑀔𑀦𑁆𑀥𑀸𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀅𑀢𑀻𑀢𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑀺𑀢𑀢𑁆𑀢𑀸 𑀆𑀫𑀦𑁆𑀢𑀸𑀢𑀺 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀼𑀦 𑀅𑀢𑀻𑀢𑀁 ¶ 𑀦𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀢𑀲𑁆𑀲 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑁂𑀦 𑀅𑀢𑁆𑀣𑀺𑀢𑀸𑀬 𑀯𑀸𑀭𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀆𑀬𑀢𑀦𑀥𑀸𑀢𑀼𑀧𑀼𑀘𑁆𑀙𑀸𑀲𑀼𑀧𑀺 𑀅𑀦𑀸𑀕𑀢𑀧𑀜𑁆𑀳𑁂𑀲𑀼𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀆𑀕𑀢𑀧𑀜𑁆𑀳𑁂𑀲𑀼𑀧𑀺 ‘‘𑀅𑀢𑀻𑀢𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀧𑀜𑁆𑀳𑁂𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨. 𑀲𑀼𑀢𑁆𑀢𑀲𑀸𑀥𑀦𑀯𑀡𑁆𑀡𑀦𑀸

𑁨𑁯𑁮. 𑀲𑀼𑀢𑁆𑀢𑀲𑀸𑀥𑀦𑁂 ¶ 𑀧𑀦 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀦𑀢𑁆𑀣𑀺 𑀘𑁂𑀢𑁂𑀢𑀺 𑀦𑀢𑁆𑀣𑀺 𑀘 𑀏𑀢𑁂 𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀸𑀤𑀺𑀪𑀸𑀯𑁂 𑀲𑀢𑀺 𑀦𑀢𑁆𑀣𑀺𑀢𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀆𑀫𑀦𑁆𑀢𑀸𑀢𑀺 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲, 𑀅𑀣 𑀦𑁂𑀲𑀁 𑀦𑀢𑁆𑀣𑀺𑀪𑀸𑀯𑀲𑀸𑀥𑀦𑀢𑁆𑀣𑀁 𑀲𑀼𑀢𑁆𑀢𑀸𑀳𑀭𑀡𑀁 𑀲𑀓𑀯𑀸𑀤𑀺𑀲𑁆𑀲. 𑀤𑀼𑀢𑀺𑀬𑀧𑀼𑀘𑁆𑀙𑀸𑀧𑀺 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲, 𑀲𑀼𑀢𑁆𑀢𑀸𑀳𑀭𑀡𑀁 𑀧𑀭𑀯𑀸𑀤𑀺𑀲𑁆𑀲. 𑀢𑀁 𑀧𑀦 𑀦𑁂𑀲𑀁 𑀔𑀦𑁆𑀥𑀸𑀤𑀺𑀪𑀸𑀯𑀫𑁂𑀯 𑀲𑀸𑀥𑁂𑀢𑀺, 𑀦 𑀅𑀢𑁆𑀣𑀺𑀪𑀸𑀯𑀦𑁆𑀢𑀺 𑀆𑀳𑀝𑀫𑁆𑀧𑀺 𑀅𑀦𑀸𑀳𑀝𑀲𑀤𑀺𑀲𑀫𑁂𑀯𑀸𑀢𑀺.

𑀅𑀢𑀻𑀢𑀁 𑀔𑀦𑁆𑀥𑀸𑀢𑀺𑀆𑀤𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸

𑁧. 𑀅𑀢𑀻𑀢𑀸𑀤𑀺𑀏𑀓𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀇𑀤𑀸𑀦𑀺 ¶ 𑀏𑀓𑀘𑁆𑀘𑀁 𑀅𑀢𑁆𑀣𑀻𑀢𑀺 𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀬𑁂 ‘‘𑀏𑀓𑀘𑁆𑀘𑀁 𑀅𑀢𑀻𑀢𑀁 𑀅𑀢𑁆𑀣𑀻’’𑀢𑀺 𑀫𑀜𑁆𑀜𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀓𑀲𑁆𑀲𑀧𑀺𑀓𑀸; 𑀢𑁂𑀲𑀁 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀁 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀏𑀓𑀘𑁆𑀘𑀁 𑀅𑀢𑁆𑀣𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀅𑀬𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀁 𑀅𑀢𑁆𑀣𑀺, 𑀯𑀺𑀧𑀓𑁆𑀓𑀯𑀺𑀧𑀸𑀓𑀁 𑀦𑀢𑁆𑀣𑀻𑀢𑀺. 𑀏𑀓𑀘𑁆𑀘𑀁 𑀦𑀺𑀭𑀼𑀤𑁆𑀥𑀦𑁆𑀢𑀺 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀢𑁂 𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺 𑀏𑀓𑀘𑁆𑀘𑀁 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 𑀏𑀓𑀘𑁆𑀘𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁, 𑀏𑀓𑀘𑁆𑀘𑀁 𑀅𑀢𑀻𑀢𑀁 𑀅𑀦𑀺𑀭𑀼𑀤𑁆𑀥𑀁, 𑀢𑀣𑁂𑀯 𑀞𑀺𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀯𑀺𑀕𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀥𑀫𑁆𑀫𑀸 𑀏𑀓𑀘𑁆𑀘𑁂𑀢𑀺 𑀇𑀤𑀁 𑀬𑀲𑁆𑀫𑀸 𑀬𑁂𑀲𑀁 𑀲𑁄 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀢𑀺, 𑀢𑁂𑀧𑀺 𑀅𑀢𑀻𑀢𑀸𑀬𑁂𑀯. 𑀢𑀲𑁆𑀫𑀸 𑀬𑀣𑀸 𑀢𑁂 𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺, 𑀓𑀺𑀁 𑀢𑀣𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀧𑀺 𑀥𑀫𑁆𑀫𑀸 ¶ 𑀏𑀓𑀘𑁆𑀘𑁂 𑀅𑀢𑁆𑀣𑀻 𑀏𑀓𑀘𑁆𑀘𑁂 𑀦𑀢𑁆𑀣𑀻𑀢𑀺 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀢𑀺 𑀇𑀤𑀁 𑀬𑁂𑀲𑀁 𑀲𑁄 𑀦𑀢𑁆𑀣𑀺𑀢𑀁 𑀇𑀘𑁆𑀙𑀢𑀺, 𑀢𑁂𑀲𑀁 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀯𑀺𑀧𑀸𑀓𑀸𑀢𑀺 𑀇𑀤𑀁 𑀅𑀩𑁆𑀬𑀸𑀓𑀢𑀸𑀦𑀁 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀯𑀲𑁂𑀦 𑀲𑀩𑁆𑀩𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 𑀧𑀝𑀺𑀜𑁆𑀜𑀸 𑀘 ¶ 𑀧𑀝𑀺𑀓𑁆𑀔𑁂𑀧𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀢𑀻𑀢𑀸 𑀏𑀓𑀤𑁂𑀲𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑀸, 𑀏𑀓𑀤𑁂𑀲𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀢𑀺 𑀯𑀺𑀧𑁆𑀧𑀓𑀢𑀯𑀺𑀧𑀸𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀬𑁂𑀦 𑀳𑀺 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀦𑀺𑀩𑁆𑀩𑀢𑁆𑀢𑀺𑀢𑀸, 𑀪𑀯𑀗𑁆𑀕𑀫𑁆𑀧𑀺 𑀘𑀼𑀢𑀺𑀧𑀺 𑀢𑀲𑁆𑀲𑁂𑀯 𑀯𑀺𑀧𑀸𑀓𑁄. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀢𑁄 𑀬𑀸𑀯 𑀘𑀼𑀢𑀺, 𑀢𑀸𑀯 𑀢𑀁 𑀯𑀺𑀧𑁆𑀧𑀓𑀢𑀯𑀺𑀧𑀸𑀓𑀁 𑀦𑀸𑀫 𑀳𑁄𑀢𑀺. 𑀢𑀣𑀸𑀭𑀽𑀧𑁂 𑀥𑀫𑁆𑀫𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑁂 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀬𑀣𑀸 𑀥𑀫𑁆𑀫𑀥𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀺 𑀩𑀳𑀼𑀧𑀯𑀢𑁆𑀢𑀺𑀦𑁄 𑀥𑀫𑁆𑀫𑀸 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀅𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀧𑀘𑁆𑀘𑀼𑀧𑀦𑁆𑀦𑀸𑀢𑀺 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀓𑀫𑁆𑀫𑀸𑀦𑀁 𑀅𑀯𑀺𑀦𑀸𑀲𑀲𑀗𑁆𑀔𑀸𑀢𑁄 𑀓𑀫𑁆𑀫𑀽𑀧𑀘𑀬𑁄 𑀦𑀸𑀫𑁂𑀓𑁄 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲.

𑁨. 𑀅𑀦𑀸𑀕𑀢𑀸𑀤𑀺𑀏𑀓𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀅𑀦𑀸𑀕𑀢𑀁 ¶ 𑀅𑀢𑁆𑀣𑀻𑀢𑀺𑀆𑀤𑀻𑀲𑀼𑀧𑀺 𑀏𑀓𑀘𑁆𑀘𑀁 𑀅𑀢𑁆𑀣𑀻𑀢𑀺 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁧. 𑀇𑀤𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀓𑀣𑀸 𑀳𑁄𑀢𑀺. ‘‘𑀢𑀢𑁆𑀣 𑁋 𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁪𑁦𑁮) 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁂𑀲𑀁 𑀓𑀸𑀬𑀸𑀤𑀬𑁄 𑀲𑀢𑀺𑀬𑀸 𑀆𑀭𑀫𑁆𑀫𑀡𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁. 𑀅𑀦𑁆𑀥𑀓𑀸 𑀦𑀸𑀫 𑀧𑀼𑀩𑁆𑀩𑀲𑁂𑀮𑀺𑀬𑀸, 𑀅𑀧𑀭𑀲𑁂𑀮𑀺𑀬𑀸, 𑀭𑀸𑀚𑀕𑀺𑀭𑀺𑀬𑀸, 𑀲𑀺𑀤𑁆𑀥𑀢𑁆𑀣𑀺𑀓𑀸𑀢𑀺 𑀇𑀫𑁂 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀦𑀺𑀓𑀸𑀬𑀸. 𑀢𑁂𑀲𑀁 𑀮𑀤𑁆𑀥𑀺𑀯𑀺𑀯𑁂𑀘𑀦𑀢𑁆𑀣𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀬𑀲𑁆𑀫𑀸 ‘‘𑀧𑀢𑀺𑀝𑁆𑀞𑀸𑀢𑀺 𑀏𑀢𑁂𑀲𑀽𑀢𑀺 𑀧𑀝𑁆𑀞𑀸𑀦𑀸 ¶ . 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑀢𑀺𑀕𑁄𑀘𑀭𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀸. ‘‘𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀧𑀝𑁆𑀞𑀸𑀦𑀸. 𑀓𑀸 ¶ 𑀧𑀢𑀺𑀝𑁆𑀞𑀳𑀦𑁆𑀢𑀺? 𑀲𑀢𑀺𑀬𑁄. 𑀲𑀢𑀺𑀬𑁄𑀯 𑀧𑀝𑁆𑀞𑀸𑀦𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑀢𑀺𑀬𑁄𑀯 𑀲𑀢𑀺𑀧𑀝𑁆𑀞𑀸𑀦𑀸. 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀯𑀸𑀤𑀸 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀦𑁆𑀢𑀺. 𑀬𑁂 𑀧𑀦 𑀢𑀁 𑀧𑀭𑀺𑀬𑀸𑀬𑀁 𑀧𑀳𑀸𑀬 𑀏𑀓𑀦𑁆𑀢𑁂𑀦𑁂𑀯 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀆𑀭𑀫𑁆𑀫𑀡𑀯𑀲𑁂𑀦 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀻𑀢𑀺 𑀅𑀦𑀼𑀬𑀼𑀢𑁆𑀢𑀲𑁆𑀲 𑀧𑀦 𑀲𑀩𑁆𑀩𑁂𑀲𑀁 𑀲𑀢𑀺𑀲𑀪𑀸𑀯𑀸𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯. 𑀢𑀢𑁆𑀣 𑀔𑀬𑀕𑀸𑀫𑀻𑀢𑀺𑀆𑀤𑀻𑀦𑀺 𑀫𑀕𑁆𑀕𑀯𑀺𑀲𑁂𑀲𑀦𑀸𑀦𑀺. 𑀏𑀓𑀸𑀬𑀦𑀫𑀕𑁆𑀕𑁄 𑀳𑀺 𑀓𑀺𑀮𑁂𑀲𑀸𑀦𑀁 𑀔𑀬𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀔𑀬𑀕𑀸𑀫𑀻. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀩𑁄𑀥𑀕𑀸𑀫𑀻. 𑀯𑀝𑁆𑀝𑀁 𑀅𑀧𑀘𑀺𑀦𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀅𑀧𑀘𑀬𑀕𑀸𑀫𑀻. 𑀏𑀯𑀫𑁂𑀢𑁂𑀳𑀺 𑀧𑀤𑁂𑀳𑀺 ‘‘𑀓𑀺𑀁 𑀢𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀏𑀯𑀭𑀽𑀧𑁄 𑀢𑁂 𑀏𑀓𑀸𑀬𑀦𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀦𑀸𑀲𑀯𑀸 𑀅𑀲𑀁𑀬𑁄𑀚𑀦𑀺𑀬𑀸𑀢𑀺𑀆𑀤𑀻𑀦𑀺𑀧𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀯𑀼𑀢𑁆𑀢𑀸𑀦𑀺. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻𑀢𑀺𑀆𑀤𑀻𑀦𑀺 𑀧𑀪𑁂𑀤𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀘𑀓𑁆𑀔𑀸𑀬𑀢𑀦𑀁 ¶ 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺𑀆𑀤𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀪𑁂𑀤𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀲𑀢𑀺𑀯𑀲𑁂𑀦 𑀧𑀝𑀺𑀓𑁆𑀔𑁂𑀧𑁄, 𑀆𑀭𑀫𑁆𑀫𑀡𑀯𑀲𑁂𑀦 𑀧𑀝𑀺𑀜𑁆𑀜𑀸𑀢𑀺. 𑀏𑀯𑀁 𑀲𑀩𑁆𑀩𑀧𑀜𑁆𑀳𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀢𑁆𑀢𑀲𑀸𑀥𑀦𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯𑀸𑀢𑀺.

𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀇𑀤𑀸𑀦𑀺 𑀳𑁂𑀯𑀢𑁆𑀣𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀭𑀽𑀧𑀸𑀤𑀺𑀯𑀲𑁂𑀦 𑀅𑀢𑁆𑀣𑀺, 𑀅𑀢𑀻𑀢𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦, 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀺; 𑀢𑀲𑁆𑀫𑀸 𑀲𑀩𑁆𑀩𑀫𑁂𑀯𑀺𑀤𑀁 𑀏𑀯𑀁 𑀅𑀢𑁆𑀣𑀺 𑀏𑀯𑀁 𑀦𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀳𑁂𑀯𑀢𑁆𑀣𑀺 𑀳𑁂𑀯 𑀦𑀢𑁆𑀣𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀳𑁂𑀯𑀸𑀢𑀺 𑀏𑀯𑀁 ¶ . 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀬𑀤𑀺 𑀅𑀢𑀻𑀢𑁄𑀯 𑀏𑀯𑀁 𑀅𑀢𑁆𑀣𑀺, 𑀏𑀯𑀁 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀏𑀯𑀁 𑀲𑀦𑁆𑀢𑁂 𑀲𑁄𑀬𑁂𑀯 𑀅𑀢𑁆𑀣𑀺, 𑀲𑁄𑀬𑁂𑀯 𑀦𑀢𑁆𑀣𑀺 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀲𑁂𑀯𑀢𑁆𑀣𑀺, 𑀲𑁂𑀯 𑀦𑀢𑁆𑀣𑀻𑀢𑀺 𑀆𑀳. 𑀇𑀢𑀭𑁄 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀅𑀢𑁆𑀣𑀺𑀢𑀁, 𑀢𑁂𑀦𑁂𑀯 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 ¶ 𑀲𑀓𑀪𑀸𑀯𑁂𑀦𑁂𑀯 𑀅𑀢𑁆𑀣𑀺𑀢𑀁, 𑀧𑀭𑀪𑀸𑀯𑁂𑀦𑁂𑀯 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀧𑀭𑀁 𑀅𑀢𑁆𑀣𑀝𑁆𑀞𑁄 𑀦𑀢𑁆𑀣𑀝𑁆𑀞𑁄𑀢𑀺 𑀅𑀢𑁆𑀣𑀺𑀲𑀪𑀸𑀯𑁄 𑀦𑀢𑁆𑀣𑀺𑀲𑀪𑀸𑀯𑁄 𑀦𑀸𑀫 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀬𑁄𑀲𑀸𑀦𑁂 𑀧𑀦 ‘‘𑀢𑁂𑀦 𑀳𑀺 𑀅𑀢𑀻𑀢𑀁 𑀳𑁂𑀯𑀢𑁆𑀣𑀺, 𑀳𑁂𑀯 𑀦𑀢𑁆𑀣𑀻’’𑀢𑀺 𑀘 ‘‘𑀢𑁂𑀦 𑀳𑀺 𑀭𑀽𑀧𑀁 𑀳𑁂𑀯𑀢𑁆𑀣𑀺, 𑀳𑁂𑀯 𑀦𑀢𑁆𑀣𑀻’’𑀢𑀺 𑀘𑀸𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀧𑀭𑀯𑀸𑀤𑀺𑀦𑀸 𑀮𑀤𑁆𑀥𑀺 𑀧𑀢𑀺𑀝𑁆𑀞𑀸𑀧𑀺𑀢𑀸, 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀧𑀦𑁂𑀲𑀸 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸𑀬𑁂𑀯𑀸𑀢𑀺.

𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸.

𑀫𑀳𑀸𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀭𑀽𑀧𑀳𑀸𑀭𑀯𑀡𑁆𑀡𑀦𑀸

𑁩𑁦𑁭. 𑀇𑀤𑀸𑀦𑀺 ¶ ¶ 𑀧𑀭𑀽𑀧𑀳𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑀸𑀦𑀁 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻𑀦𑀁 𑀅𑀥𑀺𑀫𑀸𑀦𑀺𑀓𑀸𑀦𑀁 𑀓𑀼𑀳𑀓𑀸𑀦𑀁 𑀯𑀸 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀅𑀭𑀳𑀢𑁄 𑀅𑀲𑀼𑀘𑀺𑀁 𑀉𑀧𑀲𑀁𑀳𑀭𑀦𑁆𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀺; 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀼𑀩𑁆𑀩𑀲𑁂𑀮𑀺𑀬𑀸 𑀘 𑀅𑀧𑀭𑀲𑁂𑀮𑀺𑀬𑀸 𑀘; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀅𑀭𑀳𑀢𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀺 𑀅𑀭𑀳𑀢𑁄 𑀭𑀸𑀕𑁄𑀢𑀺 𑀅𑀦𑀼𑀬𑁄𑀕𑁄 𑀆𑀭𑀤𑁆𑀥𑁄. 𑀲𑁄 𑀲𑀩𑁆𑀩𑁄𑀧𑀺 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄𑀢𑀺𑀆𑀤𑀺𑀧𑀜𑁆𑀳𑁂 𑀬𑀲𑁆𑀫𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀲𑀼𑀓𑁆𑀓𑀁 𑀕𑀳𑁂𑀢𑁆𑀯𑀸 𑀦 𑀉𑀧𑀲𑀁𑀳𑀭𑀦𑁆𑀢𑀺, 𑀅𑀭𑀳𑀢𑁄 𑀧𑀦 𑀲𑀼𑀓𑁆𑀓𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀳𑁂𑀯𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀦𑁂𑀯 𑀅𑀢𑁆𑀢𑀦𑁄𑀢𑀺𑀧𑀜𑁆𑀳𑁂 𑀧𑀦 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀮𑁄𑀫𑀓𑀽𑀧𑁂𑀳𑀻𑀢𑀺𑀧𑀜𑁆𑀳𑁂 𑀲𑀧𑁆𑀧𑀺𑀢𑁂𑀮𑀸𑀦𑀁 𑀯𑀺𑀬 𑀮𑁄𑀫𑀓𑀽𑀧𑁂𑀳𑀺 𑀉𑀧𑀲𑀁𑀳𑀭𑀡𑀸𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺.

𑁩𑁦𑁮. 𑀳𑀦𑁆𑀤 ¶ 𑀳𑀻𑀢𑀺 𑀯𑀘𑀲𑀸𑀬𑀢𑁆𑀣𑁂 𑀦𑀺𑀧𑀸𑀢𑁄. ‘‘𑀅𑀭𑀳𑀸 𑀦𑀼 𑀔𑁄 𑀅𑀳𑀁, 𑀦𑁄’’𑀢𑀺 𑀏𑀯𑀁 𑀯𑀺𑀫𑀢𑀺𑀁 𑀕𑀸𑀳𑀬𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀯𑀘𑀲𑀸𑀬𑀁 𑀓𑀢𑁆𑀯𑀸 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀺 𑀅𑀭𑀳𑀢𑁄 𑀯𑀺𑀫𑀢𑀻𑀢𑀺 𑀧𑀼𑀝𑁆𑀞𑁄 𑀅𑀝𑁆𑀞𑀯𑀢𑁆𑀣𑀼𑀓𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑁩𑁦𑁯. 𑀅𑀢𑁆𑀣𑀺 𑀢𑀲𑁆𑀲 𑀆𑀲𑀬𑁄𑀢𑀺 𑀢𑀲𑁆𑀲 𑀲𑀼𑀓𑁆𑀓𑀲𑁆𑀲 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀦𑀁 𑀯𑀺𑀬 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺.

𑁩𑁧𑁨. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀥𑀫𑁆𑀫𑀫𑀢𑁆𑀢𑁂𑀬𑁂𑀯 𑀓𑀼𑀲𑀮𑀲𑁆𑀲. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀁 𑀲𑀦𑁆𑀥𑀸𑀬𑁂𑀯𑀁 ¶ 𑀯𑀤𑀢𑀺. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲𑀸𑀢𑀺 𑀲𑀥𑀫𑁆𑀫𑀢𑁄 𑀧𑀭𑀲𑁆𑀫𑀺𑀁 ¶ 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂𑀧𑀺 𑀓𑀼𑀲𑀮𑀲𑁆𑀲. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀲𑀦𑁆𑀥𑀸𑀬𑁂𑀯𑀁 𑀯𑀤𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀭𑀽𑀧𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁨-𑁩-𑁪. 𑀅𑀜𑁆𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁧𑁪. 𑀇𑀤𑀸𑀦𑀺 𑀅𑀜𑁆𑀜𑀸𑀡𑀁, 𑀓𑀗𑁆𑀔𑀸, 𑀧𑀭𑀯𑀺𑀢𑀭𑀡𑀸𑀢𑀺 𑀢𑀺𑀲𑁆𑀲𑁄 𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀅𑀭𑀳𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀦𑀁 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀅𑀢𑁆𑀣𑀺 𑀅𑀜𑁆𑀜𑀸𑀡𑀁, 𑀢𑀢𑁆𑀣𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑁂𑀦 𑀅𑀢𑁆𑀣𑀺 𑀓𑀗𑁆𑀔𑀸. 𑀬𑀲𑁆𑀫𑀸 𑀘 𑀦𑁂𑀲𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺 𑀧𑀭𑁂 𑀯𑀺𑀢𑀭𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀆𑀘𑀺𑀓𑁆𑀔𑀦𑁆𑀢𑀺, 𑀢𑀲𑁆𑀫𑀸 𑀦𑁂𑀲𑀁 𑀅𑀢𑁆𑀣𑀺 𑀧𑀭𑀯𑀺𑀢𑀭𑀡𑀸’’𑀢𑀺 𑀇𑀫𑀸 𑀮𑀤𑁆𑀥𑀺𑀬𑁄, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀤𑀻𑀦𑀁; 𑀢𑁂𑀲𑀁 𑀢𑀸 𑀮𑀤𑁆𑀥𑀺𑀬𑁄 𑀪𑀺𑀦𑁆𑀤𑀺𑀢𑀼𑀁 𑀢𑀻𑀲𑀼𑀧𑀺 𑀓𑀣𑀸𑀲𑀼 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀘 𑀧𑀝𑀺𑀓𑁆𑀔𑁂𑀧𑁄 𑀘 𑀇𑀢𑀭𑀲𑁆𑀲. 𑀢𑀢𑁆𑀣 𑀲𑀩𑁆𑀩𑁂𑀲𑀼𑀧𑀺 𑀧𑀜𑁆𑀳𑁂𑀲𑀼 𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘 𑀧𑀸𑀴𑀺𑀁 𑀅𑀦𑀼𑀕𑀦𑁆𑀢𑁆𑀯𑀸𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀜𑁆𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸.

𑁫. 𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁩𑁨𑁬. 𑀇𑀤𑀸𑀦𑀺 ¶ 𑀯𑀘𑀻𑀪𑁂𑀤𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀸 𑀪𑀺𑀚𑁆𑀚𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀤𑀻𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀫𑀸𑀧𑀦𑁆𑀦𑀲𑁆𑀲 𑀅𑀢𑁆𑀣𑀺 𑀯𑀘𑀻𑀪𑁂𑀤𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀲𑀩𑁆𑀩𑀢𑁆𑀣𑀸𑀢𑀺 𑀢𑀬𑁄 𑀪𑀯𑁂 𑀲𑀦𑁆𑀥𑀸𑀬 𑀧𑀼𑀝𑁆𑀞𑁄 𑀅𑀭𑀽𑀧𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀩𑁆𑀩𑀤𑀸𑀢𑀺 ¶ 𑀓𑀸𑀮𑀯𑀲𑁂𑀦 𑀧𑀼𑀝𑁆𑀞𑁄 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀧𑀞𑀫𑀚𑁆𑀛𑀸𑀦𑀺𑀓𑀲𑀫𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀁 𑀲𑀩𑁆𑀩𑀁 𑀲𑀫𑀸𑀧𑀢𑁆𑀢𑀺𑀓𑀸𑀮𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀩𑁆𑀩𑁂𑀲𑀁 𑀲𑀫𑀸𑀧𑀦𑁆𑀦𑀸𑀦𑀦𑁆𑀢𑀺 𑀧𑀼𑀝𑁆𑀞𑁄 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀦𑁆𑀦𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀲𑀽𑀢𑀺 𑀧𑀼𑀝𑁆𑀞𑁄 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀓𑀁 𑀮𑁄𑀓𑀼𑀢𑁆𑀢𑀭𑀁 𑀲𑀩𑁆𑀩𑀜𑁆𑀘 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺.

𑀓𑀸𑀬𑀪𑁂𑀤𑁄𑀢𑀺 ¶ 𑀅𑀪𑀺𑀓𑁆𑀓𑀫𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀇𑀤𑀁 ‘‘𑀬𑀸𑀦𑀺 𑀘𑀺𑀢𑁆𑀢𑀸𑀦𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀢𑀸𑀦𑁂𑀯 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀓𑀸𑀬𑀪𑁂𑀤𑁄𑀧𑀺 𑀦 𑀳𑁄𑀢𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺 𑀘𑁂𑀯 𑀧𑀝𑀺𑀚𑀸𑀦𑀸𑀢𑀺 𑀘. 𑀇𑀤𑀸𑀦𑀺 𑀬𑀤𑀺 𑀲𑁄 𑀫𑀕𑁆𑀕𑀓𑁆𑀔𑀡𑁂 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸𑀘𑀁 𑀪𑀸𑀲𑀢𑀺, ‘‘𑀲𑀫𑀼𑀤𑀬𑁄’’𑀢𑀺𑀆𑀤𑀺𑀓𑀫𑁆𑀧𑀺 𑀪𑀸𑀲𑁂𑀬𑁆𑀬. 𑀬𑀤𑀺 𑀯𑀸 𑀢𑀁 𑀦 𑀪𑀸𑀲𑀢𑀺, 𑀇𑀢𑀭𑀫𑁆𑀧𑀺 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀘𑁄𑀤𑀦𑀢𑁆𑀣𑀁 𑀤𑀼𑀓𑁆𑀔𑀦𑁆𑀢𑀺 𑀚𑀸𑀦𑀦𑁆𑀢𑁄𑀢𑀺𑀆𑀤𑀬𑁄 𑀧𑀜𑁆𑀳𑀸 𑀯𑀼𑀢𑁆𑀢𑀸. 𑀇𑀢𑀭𑁄 𑀧𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺 𑀘𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀘. 𑀮𑁄𑀓𑀼𑀢𑁆𑀢𑀭𑀁 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄 𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀲𑁆𑀲𑀢𑀻𑀢𑀺 𑀳𑀺𑀲𑁆𑀲 𑀮𑀤𑁆𑀥𑀺.

𑁩𑁨𑁮. 𑀜𑀸𑀡𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁 𑀘𑀢𑀼𑀲𑀘𑁆𑀘𑀜𑀸𑀡𑀁. 𑀲𑁄𑀢𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀬𑁂𑀦 𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀦𑁆𑀢𑀺 𑀲𑁄𑀢𑀲𑀫𑁆𑀨𑀲𑁆𑀲𑀫𑀦𑁄𑀲𑀫𑁆𑀨𑀲𑁆𑀲𑀸𑀦𑀁.

𑁩𑁨𑁯. 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂𑀢𑀺 𑀬𑀤𑀺 𑀅𑀯𑀺𑀲𑁂𑀲𑁂𑀦 𑀬𑀁𑀓𑀺𑀜𑁆𑀘𑀺 𑀲𑀫𑀸𑀧𑀦𑁆𑀦𑀲𑁆𑀲 𑀦𑀢𑁆𑀣𑀺 𑀯𑀘𑀻𑀪𑁂𑀤𑁄, 𑀦 𑀅𑀯𑀺𑀲𑁂𑀲𑁂𑀦 𑀯𑀢𑁆𑀢𑀩𑁆𑀩𑀁 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀅𑀢𑁆𑀣𑀺 𑀯𑀘𑀻𑀪𑁂𑀤𑁄’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 𑀲𑀤𑁆𑀥𑀺𑀁 𑀲𑀼𑀢𑁆𑀢𑀲𑀸𑀥𑀦𑀸𑀬. 𑀬𑀁 𑀧𑀦𑁂𑀢𑁂𑀦 ‘‘𑀲𑀺𑀔𑀺𑀲𑁆𑀲 𑀆𑀦𑀦𑁆𑀤, 𑀪𑀕𑀯𑀢𑁄’’𑀢𑀺 𑀧𑀭𑀺𑀬𑁄𑀲𑀸𑀦𑁂 𑀲𑀼𑀢𑁆𑀢𑀁 𑀆𑀪𑀢𑀁, 𑀢𑀢𑁆𑀣 𑀬𑁂𑀦 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑁂𑀦 𑀲𑁄 𑀯𑀘𑀻𑀪𑁂𑀤𑁄 𑀲𑀫𑀼𑀝𑁆𑀞𑀺𑀢𑁄, 𑀓𑀸𑀬𑀪𑁂𑀤𑁄𑀧𑀺 𑀢𑁂𑀦 𑀲𑀫𑀼𑀝𑁆𑀞𑀸𑀢𑀺𑀬𑁂𑀯, 𑀦 𑀘 𑀢𑀁 𑀮𑁄𑀓𑀼𑀢𑁆𑀢𑀭𑀁 𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸.

𑁬. 𑀤𑀼𑀓𑁆𑀔𑀸𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁩𑁪. 𑀇𑀤𑀸𑀦𑀺 ¶ 𑀤𑀼𑀓𑁆𑀔𑀸𑀳𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀤𑀼𑀓𑁆𑀔𑁂 𑀜𑀸𑀡𑀁 𑀆𑀳𑀭𑀢𑀺, 𑀢𑀁 𑀤𑀼𑀓𑁆𑀔𑀸𑀳𑀸𑀭𑁄 𑀦𑀸𑀫 𑀯𑀼𑀘𑁆𑀘𑀢𑀺 ¶ . 𑀢𑀜𑁆𑀘 𑀧𑀦𑁂𑀢𑀁 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀤𑀼𑀓𑁆𑀔𑀸𑀳𑀸𑀭𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀬𑁂 𑀓𑁂𑀘𑀻𑀢𑀺 𑀧𑀞𑀫𑀧𑀜𑁆𑀳𑁂 𑀅𑀯𑀺𑀧𑀲𑁆𑀲𑀓𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀤𑀼𑀢𑀺𑀬𑀧𑀜𑁆𑀳𑁂 ¶ 𑀯𑀺𑀧𑀲𑁆𑀲𑀓𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺, 𑀢𑀁 𑀧𑀦𑀲𑁆𑀲 𑀮𑀤𑁆𑀥𑀺𑀫𑀢𑁆𑀢𑀫𑁂𑀯. 𑀢𑀲𑁆𑀫𑀸 ‘‘𑀲𑀩𑁆𑀩𑁂 𑀢𑁂’’𑀢𑀺 𑀯𑀸𑀤𑀲𑁆𑀲 𑀪𑀺𑀦𑁆𑀤𑀦𑀢𑁆𑀣𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀼𑀓𑁆𑀔𑀸𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁭. 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁩𑁫. 𑀇𑀤𑀸𑀦𑀺 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀜𑁆𑀘𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑀜𑁆𑀘 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀓𑀫𑁂𑀯 𑀘𑀺𑀢𑁆𑀢𑀁 𑀘𑀺𑀭𑀁 𑀢𑀺𑀝𑁆𑀞𑀢𑀻’’𑀢𑀺 𑀮𑀤𑁆𑀥𑀺 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀦𑁆𑀥𑀓𑀸𑀦𑀁, 𑀢𑀁𑀮𑀤𑁆𑀥𑀺𑀯𑀺𑀲𑁄𑀥𑀦𑀢𑁆𑀣𑀁 𑀏𑀓𑀁, 𑀘𑀺𑀢𑁆𑀢𑀁 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀉𑀧𑀟𑁆𑀠𑀤𑀺𑀯𑀲𑁄 𑀉𑀧𑁆𑀧𑀸𑀤𑀓𑁆𑀔𑀡𑁄𑀢𑀺 𑀏𑀢𑁆𑀣 𑀞𑀺𑀢𑀺𑀓𑁆𑀔𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄’’𑀢𑀺 (𑀲𑀁. 𑀦𑀺. 𑁧.𑁧𑁮𑁬; 𑁨.𑁧𑁪𑁩) 𑀤𑁂𑀲𑀦𑀸𑀦𑀬𑁂𑀦 𑀉𑀧𑁆𑀧𑀸𑀤𑀯𑀬𑀯𑀲𑁂𑀦𑁂𑀯 𑀧𑀼𑀘𑁆𑀙𑀸 𑀓𑀢𑀸.

𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑁂𑀦 𑀮𑀳𑀼𑀧𑀭𑀺𑀯𑀢𑁆𑀢𑀸𑀢𑀺 𑀧𑀼𑀝𑁆𑀞𑁄 𑀘𑀺𑀢𑁆𑀢𑀢𑁄 𑀮𑀳𑀼𑀢𑀭𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑁂 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀤𑀻𑀖𑀝𑁆𑀞𑀺𑀢𑀺𑀁 𑀇𑀘𑁆𑀙𑀢𑀺, 𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀢𑀻𑀢𑀺 𑀧𑀜𑁆𑀳𑁂 ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽’’𑀢𑀺𑀆𑀤𑀺𑀯𑀘𑀦𑀯𑀲𑁂𑀦 (𑀫𑀳𑀸𑀦𑀺. 𑁧𑁦) 𑀆𑀭𑀼𑀧𑁆𑀧𑀢𑁄 𑀅𑀜𑁆𑀜𑀢𑁆𑀭 𑀧𑀝𑀺𑀓𑁆𑀔𑀺𑀧𑀢𑀺, 𑀆𑀭𑀼𑀧𑁆𑀧𑁂 𑀧𑀝𑀺𑀚𑀸𑀦𑀸𑀢𑀺. 𑀫𑀼𑀳𑀼𑀢𑁆𑀢𑀁 𑀫𑀼𑀳𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀜𑁆𑀳𑁂 𑀧𑀭𑀯𑀸𑀤𑀺𑀲𑁆𑀲 ‘‘𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄’’𑀢𑀺𑀆𑀤𑀺𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀞𑀺𑀢𑀺𑀁 𑀧𑀦𑀲𑁆𑀲 𑀮𑀤𑁆𑀥𑀺𑀯𑀲𑁂𑀦 𑀇𑀘𑁆𑀙𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀓𑀼𑀓𑁆𑀓𑀼𑀴𑀓𑀣𑀸𑀯𑀡𑁆𑀡𑀦𑀸

𑁩𑁩𑁮. 𑀇𑀤𑀸𑀦𑀺 ¶ ¶ 𑀓𑀼𑀓𑁆𑀓𑀼𑀴𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀦𑀺 (𑀥. 𑀧. 𑁨𑁭𑁮) 𑀲𑀼𑀢𑁆𑀢𑀸𑀦𑀺 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ¶ ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀓𑀼𑀓𑁆𑀓𑀼𑀴𑀸 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀲𑀫𑁆𑀫𑀺𑀲𑁆𑀲𑀸 𑀙𑀸𑀭𑀺𑀓𑀦𑀺𑀭𑀬𑀲𑀤𑀺𑀲𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀕𑁄𑀓𑀼𑀮𑀺𑀓𑀸𑀦𑀁; 𑀢𑁂𑀲𑀁 𑀦𑀸𑀦𑀧𑁆𑀧𑀓𑀸𑀭𑀲𑀼𑀔𑀲𑀦𑁆𑀤𑀲𑁆𑀲𑀦𑁂𑀦 𑀢𑀁 𑀮𑀤𑁆𑀥𑀺𑀁 𑀯𑀺𑀯𑁂𑀘𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀦𑁄𑀥𑀺𑀁 𑀓𑀢𑁆𑀯𑀸𑀢𑀺 𑀑𑀥𑀺𑀁 𑀫𑀭𑀺𑀬𑀸𑀤𑀁 𑀓𑁄𑀝𑁆𑀞𑀸𑀲𑀁 𑀅𑀓𑀭𑀺𑀢𑁆𑀯𑀸, 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀼𑀢𑁆𑀢𑀲𑀸𑀥𑀦𑀸𑀬𑀸𑀢𑀺.

𑀓𑀼𑀓𑁆𑀓𑀼𑀴𑀓𑀣𑀸𑀯𑀡𑁆𑀡𑀦𑀸.

𑁯. 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸

𑁩𑁩𑁯. 𑀇𑀤𑀸𑀦𑀺 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑁋

‘‘𑀅𑀦𑀼𑀧𑀼𑀩𑁆𑀩𑁂𑀦 𑀫𑁂𑀥𑀸𑀯𑀻, 𑀣𑁄𑀓𑀁 𑀣𑁄𑀓𑀁 𑀔𑀡𑁂 𑀔𑀡𑁂;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄’’𑀢𑀺. (𑀥. 𑀧. 𑁨𑁩𑁯) 𑁋

𑀆𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀏𑀓𑀘𑁆𑀘𑁂 𑀓𑀺𑀮𑁂𑀲𑁂 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀧𑀚𑀳𑀢𑀺, 𑀏𑀓𑀘𑁆𑀘𑁂 𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀤𑀲𑁆𑀲𑀦𑁂𑀦, 𑀢𑀣𑀸 𑀲𑁂𑀲𑀸𑀧𑀻𑀢𑀺 𑀏𑀯𑀁 𑀲𑁄𑀴𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀅𑀦𑀼𑀧𑀼𑀩𑁆𑀩𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀻’’𑀢𑀺 𑀏𑀯𑀭𑀽𑀧𑀸 𑀦𑀸𑀦𑀸𑀪𑀺𑀲𑀫𑀬𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀲𑀩𑁆𑀩𑀢𑁆𑀣𑀺𑀓𑀲𑀫𑁆𑀫𑀺𑀢𑀺𑀬𑀪𑀤𑁆𑀭𑀬𑀸𑀦𑀺𑀓𑀸𑀦𑀁; 𑀢𑁂𑀲𑀁 𑀮𑀤𑁆𑀥𑀺𑀯𑀺𑀯𑁂𑀘𑀦𑀢𑁆𑀣𑀁 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀦𑀼𑀧𑀼𑀩𑁆𑀩𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀦𑁆𑀢𑀺 𑀧𑀼𑀝𑁆𑀞𑁄 𑀧𑀦 𑀏𑀓𑀲𑁆𑀲 𑀫𑀕𑁆𑀕𑀲𑁆𑀲 𑀩𑀳𑀼𑀪𑀸𑀯𑀸𑀧𑀢𑁆𑀢𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀸𑀦𑀺 𑀯𑀸 𑀘𑀢𑁆𑀢𑀸𑀭𑀺𑀧𑀺 𑀜𑀸𑀡𑀸𑀦𑀺 𑀏𑀓𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀬𑁂𑀯𑀸𑀢𑀺 ¶ 𑀧𑀝𑀺𑀚𑀸𑀦𑀸𑀢𑀺, 𑀨𑀮𑀁 𑀧𑀦 𑀏𑀓𑀫𑁂𑀯 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄.

𑁩𑁪𑁪. 𑀫𑀕𑁆𑀕𑁂 𑀤𑀺𑀝𑁆𑀞𑁂 𑀨𑀮𑁂 𑀞𑀺𑀢𑁄𑀢𑀺 𑀧𑀜𑁆𑀳𑁂 𑀬𑀲𑁆𑀫𑀸 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀤𑀲𑁆𑀲𑀦𑀁 𑀅𑀧𑀭𑀺𑀦𑀺𑀝𑁆𑀞𑀺𑀢𑀁, 𑀫𑀕𑁆𑀕𑀤𑀲𑁆𑀲𑀦𑁂𑀦 𑀧𑀭𑀺𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀤𑀸 𑀲𑁄 𑀨𑀮𑁂 𑀞𑀺𑀢𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺.

𑁩𑁪𑁫. 𑀤𑀼𑀓𑁆𑀔𑁂 ¶ 𑀤𑀺𑀝𑁆𑀞𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀼𑀦 𑀤𑀼𑀓𑁆𑀔𑀲𑀘𑁆𑀘𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀅𑀦𑀼𑀬𑁄𑀕𑁂 𑀘𑀢𑀼𑀦𑁆𑀦𑀫𑁆𑀧𑀺 𑀦𑀸𑀦𑀸𑀲𑀪𑀸𑀯𑀢𑁆𑀢𑀸 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯.

𑀭𑀽𑀧𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑁂𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀲𑀫𑀼𑀤𑁆𑀤𑀢𑁄 𑀏𑀓𑀩𑀺𑀦𑁆𑀤𑀼𑀲𑁆𑀲 𑀭𑀲𑁂 𑀧𑀝𑀺𑀯𑀺𑀤𑁆𑀥𑁂 𑀲𑁂𑀲𑀉𑀤𑀓𑀲𑁆𑀲 𑀧𑀝𑀺𑀯𑁂𑀥𑁄 𑀯𑀺𑀬 𑀏𑀓𑀥𑀫𑁆𑀫𑁂 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀝𑀺𑀯𑀺𑀤𑁆𑀥𑁂 𑀲𑀩𑁆𑀩𑁂𑀧𑀺 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲.

𑀘𑀢𑀽𑀳𑀺 𑀜𑀸𑀡𑁂𑀳𑀻𑀢𑀺 𑀤𑀼𑀓𑁆𑀔𑁂 𑀜𑀸𑀡𑀸𑀤𑀻𑀳𑀺. 𑀅𑀝𑁆𑀞𑀳𑀺 𑀜𑀸𑀡𑁂𑀳𑀻𑀢𑀺 𑀲𑀸𑀯𑀓𑀸𑀦𑀁 𑀲𑀸𑀥𑀸𑀭𑀡𑁂𑀳𑀺 𑀲𑀘𑁆𑀘𑀜𑀸𑀡𑁂𑀳𑀺 𑀘𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂𑀳𑀺 𑀘. 𑀤𑁆𑀯𑀸𑀤𑀲𑀳𑀺 𑀜𑀸𑀡𑁂𑀳𑀻𑀢𑀺 𑀤𑁆𑀯𑀸𑀤𑀲𑀗𑁆𑀕𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑀸𑀡𑁂𑀳𑀺. 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀜𑀸𑀡𑁂𑀳𑀻𑀢𑀺 ‘‘𑀚𑀭𑀸𑀫𑀭𑀡𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡’’𑀦𑁆𑀢𑀺 𑀏𑀯𑀁 𑀦𑀺𑀤𑀸𑀦𑀯𑀕𑁆𑀕𑁂 𑀯𑀼𑀢𑁆𑀢𑀜𑀸𑀡𑁂𑀳𑀺. 𑀲𑀢𑁆𑀢𑀲𑀢𑁆𑀢𑀢𑀺𑀬𑀸 𑀜𑀸𑀡𑁂𑀳𑀻𑀢𑀺 ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀏𑀯𑀁 𑀢𑀢𑁆𑀣𑁂𑀯 𑀯𑀼𑀢𑁆𑀢𑀜𑀸𑀡𑁂𑀳𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀼𑀢𑁆𑀢𑀲𑀸𑀥𑀦𑁂𑀦𑀸𑀢𑀺.

𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁪𑁭. 𑀇𑀤𑀸𑀦𑀺 ¶ 𑀯𑁄𑀳𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀩𑀼𑀤𑁆𑀥𑁄 𑀪𑀕𑀯𑀸 𑀮𑁄𑀓𑀼𑀢𑁆𑀢𑀭𑁂𑀦 𑀯𑁄𑀳𑀸𑀭𑁂𑀦 𑀯𑁄𑀳𑀭𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀮𑁄𑀓𑀼𑀢𑁆𑀢𑀭𑁂 𑀲𑁄𑀢𑁂𑀢𑀺𑀆𑀤𑀻𑀦𑀺 𑀢𑀲𑁆𑀲 𑀅𑀬𑀼𑀢𑁆𑀢𑀯𑀸𑀤𑀻𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀤𑁆𑀤𑀸𑀬𑀢𑀦𑀫𑁂𑀯 𑀢𑁂 𑀮𑁄𑀓𑀼𑀢𑁆𑀢𑀭𑀁, 𑀉𑀤𑀸𑀳𑀼 𑀲𑁄𑀢𑀸𑀤𑀻𑀦𑀺𑀧𑀻’’𑀢𑀺.

𑀳𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀏𑀢𑁆𑀣 𑀬𑀤𑀺 𑀲𑁄 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑁂𑀬𑁆𑀬. 𑀮𑁄𑀓𑀼𑀢𑁆𑀢𑀭𑁄 𑀲𑀺𑀬𑀸𑀢𑀺 𑀏𑀯𑀫𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀮𑁄𑀓𑀺𑀬𑁂 ¶ 𑀧𑀝𑀺𑀳𑀜𑁆𑀜𑀫𑀸𑀦𑀲𑁆𑀲 𑀧𑀦 𑀮𑁄𑀓𑀼𑀢𑁆𑀢𑀭𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀮𑁄𑀓𑀺𑀬𑁂𑀦 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀮𑁄𑀓𑀺𑀬𑁂𑀦𑁂𑀯𑀸𑀢𑀺 ¶ 𑀅𑀢𑁆𑀣𑁄. 𑀇𑀢𑀭𑀣𑀸 𑀅𑀦𑁂𑀓𑀦𑁆𑀢𑀢𑀸 𑀲𑀺𑀬𑀸. 𑀮𑁄𑀓𑀼𑀢𑁆𑀢𑀭𑀜𑁆𑀳𑀺 𑀮𑁄𑀓𑀺𑀬𑁂𑀦𑀧𑀺 𑀜𑀸𑀡𑁂𑀦 𑀜𑀸𑀬𑀢𑀻. 𑀏𑀯𑀁 𑀲𑀩𑁆𑀩𑀁 𑀬𑀣𑀸𑀦𑀼𑀭𑀽𑀧𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂 𑀢𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺 𑀧𑀜𑁆𑀳𑁂𑀲𑀼 𑀬𑁂 𑀫𑀕𑁆𑀕𑀁 𑀦𑀧𑁆𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀬𑁂 𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑁩𑁫𑁧. 𑀲𑁄𑀯𑀡𑁆𑀡𑀫𑀬𑀸𑀬𑀸𑀢𑀺 𑀲𑀼𑀯𑀡𑁆𑀡𑀫𑀬𑀸𑀬. 𑀇𑀤𑀁 𑀧𑀭𑀯𑀸𑀤𑀺𑀲𑁆𑀲 𑀉𑀤𑀸𑀳𑀭𑀡𑀁.

𑀏𑀴𑀡𑁆𑀟𑀺𑀬𑀸𑀬𑀸𑀢𑀺 𑀏𑀴𑀡𑁆𑀟𑀫𑀬𑀸𑀬. 𑀇𑀤𑀁 𑀲𑀓𑀯𑀸𑀤𑀺𑀲𑁆𑀲 𑀉𑀤𑀸𑀳𑀭𑀡𑀁. 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄𑀢𑀺 𑀅𑀬𑀫𑁆𑀧𑀺 𑀏𑀓𑀸 𑀮𑀤𑁆𑀥𑀺. 𑀲𑀸 𑀏𑀢𑀭𑀳𑀺 𑀏𑀓𑀘𑁆𑀘𑀸𑀦𑀁 𑀅𑀦𑁆𑀥𑀓𑀸𑀦𑀁 𑀮𑀤𑁆𑀥𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁩𑁫𑁩. 𑀇𑀤𑀸𑀦𑀺 𑀦𑀺𑀭𑁄𑀥𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑀜𑁆𑀘 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑀜𑁆𑀘 𑀤𑁆𑀯𑁂𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀫𑀳𑀺𑀲𑀸𑀲𑀓𑀸𑀦𑀜𑁆𑀘𑁂𑀯 𑀅𑀦𑁆𑀥𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀤𑁆𑀯𑁂 𑀦𑀺𑀭𑁄𑀥𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲 ¶ . 𑀤𑁆𑀯𑁂 𑀤𑀼𑀓𑁆𑀔𑀦𑀺𑀭𑁄𑀥𑀸𑀢𑀺 𑀧𑀜𑁆𑀳𑁂𑀲𑀼 𑀬𑀲𑁆𑀫𑀸 𑀤𑁆𑀯𑁂 𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀲𑁆𑀫𑀸 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺𑀧𑀜𑁆𑀳𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀔𑀲𑀘𑁆𑀘𑀸𑀦𑀁 𑀦𑀺𑀭𑁄𑀥𑀯𑀲𑁂𑀦𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀤𑀼𑀓𑁆𑀔𑀲𑁆𑀲 𑀦𑀺𑀭𑀼𑀚𑁆𑀛𑀦𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑁂 𑀢𑀸𑀡𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀢𑁆𑀣𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀸𑀦𑀦𑁆𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀲𑀼 𑀉𑀘𑁆𑀘𑀦𑀻𑀘𑀢𑀸𑀤𑀻𑀦𑀺 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑁂𑀢𑀺 𑀬𑁂 𑀧𑀝𑀺𑀲𑀗𑁆𑀔𑀸𑀬 𑀮𑁄𑀓𑀼𑀢𑁆𑀢𑀭𑁂𑀦 𑀜𑀸𑀡𑁂𑀦 𑀅𑀦𑀺𑀭𑀼𑀤𑁆𑀥𑀸 𑀲𑀼𑀤𑁆𑀥𑀧𑀓𑀢𑀺𑀓𑀢𑁆𑀢𑀸 𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀯𑀸 𑀯𑀲𑁂𑀦 𑀦 𑀲𑀫𑀼𑀤𑀸𑀘𑀭𑀡𑀢𑁄 𑀦𑀺𑀭𑀼𑀤𑁆𑀥𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀲𑀗𑁆𑀔𑀸𑀭𑁂. 𑀧𑀝𑀺𑀲𑀗𑁆𑀔𑀸 𑀦𑀺𑀭𑁄𑀥𑁂𑀦𑁆𑀢𑀻𑀢𑀺. 𑀮𑁄𑀓𑀼𑀢𑁆𑀢𑀭𑀜𑀸𑀡𑁂𑀦 𑀦𑀺𑀭𑁄𑀥𑁂𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑀁 𑀕𑀫𑁂𑀦𑁆𑀢𑀺. 𑀦𑀦𑀼 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸 𑀲𑀗𑁆𑀔𑀸𑀭𑀸𑀢𑀺 ¶ 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲 ¶ . 𑀢𑀢𑁆𑀣 𑀪𑀕𑁆𑀕𑀸𑀦𑀁 𑀧𑀼𑀦 𑀅𑀪𑀜𑁆𑀚𑀦𑀢𑁄 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀦𑀁 𑀯𑀸 𑀅𑀭𑀺𑀬𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑁂 𑀢𑀣𑀸 𑀦𑀺𑀭𑀼𑀚𑁆𑀛𑀦𑀢𑁄𑀯 𑀲𑀓𑀯𑀸𑀤𑀻 𑀅𑀘𑁆𑀘𑀦𑁆𑀢𑀪𑀕𑁆𑀕𑀢𑀁 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀩𑀮𑀓𑀣𑀸𑀯𑀡𑁆𑀡𑀦𑀸

𑁩𑁫𑁪. 𑀇𑀤𑀸𑀦𑀺 ¶ 𑀩𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑁂 ‘‘𑀇𑀫𑁂𑀲𑀜𑁆𑀘 𑀧𑀦𑀸𑀳𑀁, 𑀆𑀯𑀼𑀲𑁄, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀫𑀻’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁫.𑁯𑁧𑁩) 𑀤𑀲𑀲𑀼𑀢𑁆𑀢𑀸𑀦𑀺 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀲𑀸𑀥𑀸𑀭𑀡’’𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀣𑀸𑀕𑀢𑀩𑀮𑀜𑁆𑀘 𑀦𑀸𑀫𑁂𑀢𑀁 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀫𑁆𑀧𑀺 𑀅𑀢𑁆𑀣𑀺 𑀅𑀲𑀸𑀥𑀸𑀭𑀡𑀫𑁆𑀧𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀫𑁆𑀧𑀺. 𑀢𑀢𑁆𑀣 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀲𑀸𑀥𑀸𑀭𑀡𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁 ¶ 𑀅𑀲𑀸𑀥𑀸𑀭𑀡𑀁. 𑀲𑁂𑀲𑀁 𑀲𑀸𑀥𑀸𑀭𑀡𑀜𑁆𑀘 𑀅𑀲𑀸𑀥𑀸𑀭𑀡𑀜𑁆𑀘. 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀳𑀺 𑀲𑀸𑀯𑀓𑀸 𑀧𑀤𑁂𑀲𑁂𑀦 𑀚𑀸𑀦𑀦𑁆𑀢𑀺, 𑀢𑀣𑀸𑀕𑀢𑀸 𑀦𑀺𑀧𑁆𑀧𑀤𑁂𑀲𑁂𑀦. 𑀇𑀢𑀺 𑀢𑀸𑀦𑀺 𑀉𑀤𑁆𑀤𑁂𑀲𑀢𑁄 𑀲𑀸𑀥𑀸𑀭𑀡𑀸𑀦𑀺, 𑀦 𑀦𑀺𑀤𑁆𑀤𑁂𑀲𑀢𑁄. 𑀅𑀬𑀁 𑀧𑀦 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀲𑀸𑀥𑀸𑀭𑀡𑀦𑁆𑀢𑀺 𑀆𑀳. 𑀢𑀫𑁂𑀦𑀁 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀩𑀮𑀦𑁆𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀦𑀺𑀤𑁆𑀤𑁂𑀲𑀢𑁄 𑀲𑀩𑁆𑀩𑀸𑀓𑀸𑀭𑀯𑀺𑀲𑀬𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀧𑀜𑁆𑀳𑁂 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀝𑁆𑀞𑀸𑀦𑀫𑀢𑁆𑀢𑀸𑀤𑀺𑀚𑀸𑀦𑀦𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀜𑁆𑀜𑁂𑀯𑀸𑀢𑀺𑀆𑀤𑀺𑀧𑀜𑁆𑀳𑁂𑀲𑀼 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑀸𑀬 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀘 𑀧𑀼𑀩𑁆𑀩𑀘𑀭𑀺𑀬𑀸 𑀘 𑀅𑀢𑁆𑀣𑀢𑁄 𑀏𑀓𑀁, 𑀢𑀣𑀸 𑀥𑀫𑁆𑀫𑀓𑁆𑀔𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀘.

𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀧𑀜𑁆𑀳𑁂 𑀏𑀓𑀤𑁂𑀲𑁂𑀦 𑀲𑀸𑀥𑀸𑀭𑀡𑀢𑀁 𑀲𑀦𑁆𑀥𑀸𑀬 𑀲𑀸𑀯𑀓𑀯𑀺𑀲𑀬𑁂 𑀧𑀝𑀺𑀚𑀸𑀦𑀸𑀢𑀺.

𑁩𑁫𑁫. 𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀲𑀸𑀯𑀓𑁄 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀲𑀸𑀯𑀓𑀲𑁆𑀲 𑀢𑀣𑀸 𑀚𑀸𑀦𑀦𑀁 𑀧𑀓𑀸𑀲𑁂𑀢𑁆𑀯𑀸 𑀢𑁂𑀦 𑀚𑀸𑀦𑀦𑀫𑀢𑁆𑀢𑀲𑀸𑀫𑀜𑁆𑀜𑁂𑀦 𑀢𑁂𑀲𑀁 𑀲𑀸𑀯𑀓𑀲𑀸𑀥𑀸𑀭𑀡𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀸𑀯𑀓𑁄 𑀞𑀸𑀦𑀸𑀝𑁆𑀞𑀸𑀦𑀁 ¶ 𑀚𑀸𑀦𑀸𑀢𑀻𑀢𑀺𑀆𑀤𑀬𑁄 𑀧𑀭𑀯𑀸𑀤𑀺𑀧𑀜𑁆𑀳𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁 𑀙𑀦𑁆𑀦𑀁 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀁 𑀅𑀜𑁆𑀜𑀢𑀭𑀦𑁆𑀢𑀺 𑀦 𑀕𑀳𑀺𑀢𑀁. 𑀆𑀲𑀯𑀓𑁆𑀔𑀬𑁂𑀦 𑀯𑀸 𑀆𑀲𑀯𑀓𑁆𑀔𑀬𑀦𑁆𑀢𑀺 𑀬𑀁 𑀢𑀣𑀸𑀕𑀢𑀲𑁆𑀲 𑀆𑀲𑀯𑀓𑁆𑀔𑀬𑁂𑀦 𑀲𑀤𑁆𑀥𑀺𑀁 𑀲𑀸𑀯𑀓𑀲𑁆𑀲 𑀆𑀲𑀯𑀓𑁆𑀔𑀬𑀁 𑀧𑀝𑀺𑀘𑁆𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀦𑀸𑀦𑀸𑀓𑀭𑀡𑀁, 𑀢𑀁 𑀦𑀢𑁆𑀣𑀺. 𑀯𑀺𑀫𑀼𑀢𑁆𑀢𑀺𑀬𑀸 𑀯𑀸 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁫𑁬. 𑀇𑀤𑀸𑀦𑀺 𑀬𑀁 𑀲𑀓𑀯𑀸𑀤𑀺𑀦𑀸 ‘‘𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀲𑀸𑀥𑀸𑀭𑀡’’𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑁂𑀲𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀪𑀸𑀯𑀁 𑀧𑀼𑀘𑁆𑀙𑀺𑀢𑀼𑀁 𑀧𑀼𑀦 𑀆𑀲𑀯𑀸𑀦𑀁 𑀔𑀬𑁂𑀢𑀺𑀆𑀤𑀬𑁄 𑀧𑀭𑀯𑀸𑀤𑀺𑀧𑀜𑁆𑀳𑀸𑀯 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀓𑀯𑀸𑀤𑀺𑀦𑀸 𑀆𑀲𑀯𑀓𑁆𑀔𑀬𑁂 𑀯𑀺𑀲𑁂𑀲𑀸𑀪𑀸𑀯𑁂𑀦 𑀢𑀁 𑀜𑀸𑀡𑀁 𑀲𑀸𑀥𑀸𑀭𑀡𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁. 𑀇𑀢𑀭𑁂𑀲𑀼𑀧𑀺 𑀯𑀺𑀲𑁂𑀲𑀸𑀪𑀸𑀯𑁂𑀦 𑀲𑀸𑀥𑀸𑀭𑀡𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀼𑀦 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀆𑀲𑀯𑀓𑁆𑀔𑀬𑁂𑀦𑁂𑀯 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲𑁂𑀯. 𑀢𑀢𑁆𑀣 𑀆𑀲𑀯𑀓𑁆𑀔𑀬𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑁄, 𑀲𑁂𑀲𑁂𑀲𑀼 𑀘 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀧𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀧𑀝𑀺𑀜𑁆𑀜𑀸, 𑀲𑁂𑀲𑁂𑀲𑀼 𑀘 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀲𑁆𑀲 𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀸𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸𑀯 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀧𑀝𑀺𑀓𑁆𑀔𑁂𑀧𑁄. 𑀲𑁂𑀲𑁂𑀲𑀼 𑀘 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲𑀸𑀢𑀺.

𑀩𑀮𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀇𑀤𑀸𑀦𑀺 ¶ 𑀅𑀭𑀺𑀬𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀦 𑀓𑁂𑀯𑀮𑀁 𑀆𑀲𑀯𑀓𑁆𑀔𑀬𑀜𑀸𑀡𑀫𑁂𑀯 𑀅𑀭𑀺𑀬𑀁, 𑀅𑀣 𑀔𑁄 𑀧𑀼𑀭𑀺𑀫𑀸𑀦𑀺𑀧𑀺 𑀦𑀯 𑀩𑀮𑀸𑀦𑀺 𑀅𑀭𑀺𑀬𑀸𑀦𑀺’’𑀘𑁆𑀘𑁂𑀯 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀭𑀺𑀬𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀦 𑀬𑀤𑀺 𑀢𑀁 𑀅𑀭𑀺𑀬𑀁, 𑀫𑀕𑁆𑀕𑀸𑀤𑀻𑀲𑀼 𑀢𑁂𑀦 𑀅𑀜𑁆𑀜𑀢𑀭𑁂𑀦 ¶ 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲.

𑀧𑀼𑀦 𑀲𑀼𑀜𑁆𑀜𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀤𑁆𑀯𑁂 𑀲𑀼𑀜𑁆𑀜𑀢𑀸 𑁋 𑀲𑀢𑁆𑀢𑀲𑀼𑀜𑁆𑀜𑀢𑀸 𑀘 𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑀸 𑀘. 𑀲𑀢𑁆𑀢𑀲𑀼𑀜𑁆𑀜𑀢𑀸 𑀦𑀸𑀫 𑀤𑀺𑀝𑁆𑀞𑀺𑀬𑀸 ¶ 𑀧𑀭𑀺𑀓𑀧𑁆𑀧𑀺𑀢𑁂𑀦 𑀲𑀢𑁆𑀢𑁂𑀦 𑀲𑀼𑀜𑁆𑀜𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑀸 𑀦𑀸𑀫 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑀁 𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀣 𑀧𑀭𑀯𑀸𑀤𑀻 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀧𑀼𑀝𑁆𑀞𑁄𑀧𑀺 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀲𑀓𑀯𑀸𑀤𑀺𑀦𑀸 ‘‘𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀫𑀦𑀲𑀺𑀓𑀸𑀭𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄, 𑀲𑀼𑀜𑁆𑀜𑀢𑀫𑀦𑀲𑀺𑀓𑀸𑀭𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄’’𑀢𑀺 𑀇𑀫𑀁 𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻’’𑀢𑀺 𑀧𑀼𑀝𑁆𑀞𑁄 𑀮𑁂𑀲𑁄𑀓𑀸𑀲𑀁 𑀅𑀮𑀪𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀳𑀺 𑀔𑀦𑁆𑀥𑀸 𑀅𑀦𑀺𑀫𑀺𑀢𑁆𑀢𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁. 𑀏𑀓𑀥𑀫𑁆𑀫𑀲𑁆𑀫𑀺𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀲𑀗𑁆𑀔𑀸𑀢𑁂𑀦 𑀘 𑀧𑀡𑀺𑀤𑀳𑀺𑀢𑀩𑁆𑀩𑀝𑁆𑀞𑁂𑀦 𑀧𑀡𑀺𑀳𑀺𑀢𑀲𑀗𑁆𑀔𑀁 𑀕𑀢𑁂𑀦 𑀲𑀢𑁆𑀢𑀧𑀡𑀺𑀥𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀸 𑀔𑀦𑁆𑀥𑀸. 𑀢𑀡𑁆𑀳𑀸𑀧𑀡𑀺𑀥𑀺𑀦𑀸 𑀢𑀡𑁆𑀳𑀸𑀬 𑀯𑀸 𑀆𑀭𑀫𑁆𑀫𑀡𑀪𑀽𑀢𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀧𑀡𑀺𑀥𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀁 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀫𑀸 𑀇𑀥𑀸𑀧𑀺 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀝𑀺𑀜𑁆𑀜𑀸 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁩𑁫𑁮. 𑀢𑀢𑁄 ‘‘𑀬𑀣𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀅𑀭𑀺𑀬𑀸 𑀘𑁂𑀯 𑀲𑀼𑀜𑁆𑀜𑀢𑀸𑀤𑀺𑀆𑀭𑀫𑁆𑀫𑀡𑀸 𑀘, 𑀓𑀺𑀁 𑀢𑁂 𑀏𑀯𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡’’𑀦𑁆𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀝𑀺𑀜𑁆𑀜𑀸 𑀲𑀩𑁆𑀩𑁂 𑀘 𑀧𑀝𑀺𑀓𑁆𑀔𑁂𑀧𑀸 𑀧𑀭𑀯𑀸𑀤𑀺𑀲𑁆𑀲𑁂𑀯. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑁂𑀲𑀜𑀸𑀡𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 𑀲𑁂𑀲𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀯𑀲𑀸𑀦𑁂 𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑁂𑀯 𑀯𑀺𑀪𑀢𑁆𑀢𑀁. 𑀢𑀢𑁄 𑀧𑀭𑀁 𑀲𑀓𑀲𑀫𑀬𑁂𑀧𑀺 ‘‘𑀅𑀭𑀺𑀬’’𑀦𑁆𑀢𑀺 𑀲𑀺𑀤𑁆𑀥𑁂𑀦 𑀆𑀲𑀯𑀸𑀦𑀁 𑀔𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑁂𑀲𑀜𑀸𑀡𑀸𑀦𑀁 𑀅𑀦𑀼𑀮𑁄𑀫𑀢𑁄 𑀘 𑀧𑀝𑀺𑀮𑁄𑀫𑀢𑁄 𑀘 𑀅𑀭𑀺𑀬𑀪𑀸𑀯𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸 𑀲𑀩𑁆𑀩𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀝𑀺𑀓𑁆𑀔𑁂𑀧𑁄 𑀘 𑀲𑀓𑀯𑀸𑀤𑀺𑀲𑁆𑀲 ¶ . 𑀢𑁂 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀧𑀞𑀫𑀦𑀯𑀫𑀸𑀦𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀗𑁆𑀔𑀺𑀢𑁆𑀢𑀸𑀦𑀻𑀢𑀺.

𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁩. 𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁬𑁩. 𑀇𑀤𑀸𑀦𑀺 ¶ ¶ 𑀯𑀺𑀫𑀼𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀯𑀻𑀢𑀭𑀸𑀕𑀘𑀺𑀢𑁆𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀧𑀬𑁄𑀚𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀫𑀮𑀻𑀦𑀁 𑀯𑀢𑁆𑀣𑀁 𑀥𑁄𑀯𑀺𑀬𑀫𑀸𑀦𑀁 𑀫𑀮𑀸 𑀯𑀺𑀫𑀼𑀘𑁆𑀘𑀢𑀺, 𑀏𑀯𑀁 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀭𑀸𑀕𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀭𑀸𑀕𑀲𑀳𑀕𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄 𑀫𑀕𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺 𑀦𑀸𑀫. 𑀢𑀤𑀸 𑀘 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀲𑀨𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄𑀧𑀺 𑀬𑀣𑀸 𑀨𑀲𑁆𑀲𑁄 𑀘 𑀘𑀺𑀢𑁆𑀢𑀜𑁆𑀘 𑀉𑀪𑁄 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀭𑀸𑀕𑀲𑁆𑀲 𑀯𑀺𑀫𑀼𑀢𑁆𑀢𑀺𑀁 𑀅𑀧𑀲𑁆𑀲𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀤𑁄𑀲𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀇𑀤𑀸𑀦𑀺 𑀯𑀺�