📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀜𑁆𑀘𑀧𑀓𑀭𑀡-𑀫𑀽𑀮𑀝𑀻𑀓𑀸

𑀥𑀸𑀢𑀼𑀓𑀣𑀸𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀥𑀸𑀢𑀼𑀓𑀣𑀸𑀧𑀓𑀭𑀡𑀁 ¶ ¶ 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀬𑀲𑁆𑀫𑀺𑀁 𑀲𑀫𑀬𑁂 𑀤𑁂𑀲𑁂𑀲𑀺, 𑀢𑀁 𑀲𑀫𑀬𑀁 𑀤𑀲𑁆𑀲𑁂𑀢𑀼𑀁, 𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀸 ‘‘𑀅𑀝𑁆𑀞𑀸𑀭𑀲𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲, 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀲𑁆𑀲, 𑀫𑀘𑁆𑀘𑀼𑀫𑀸𑀭𑀲𑁆𑀲 𑀘 𑀩𑁄𑀥𑀺𑀫𑀽𑀮𑁂 𑀏𑀯 𑀪𑀜𑁆𑀚𑀺𑀢𑀢𑁆𑀢𑀸 𑀧𑀭𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀁 ¶ 𑀦𑀺𑀭𑀢𑀺𑀲𑀬𑀁 𑀢𑀁 𑀪𑀜𑁆𑀚𑀦𑀁 𑀉𑀧𑀸𑀤𑀸𑀬 𑀪𑀕𑀯𑀸 𑀏𑀯 ‘‘𑀫𑀸𑀭𑀪𑀜𑁆𑀚𑀦𑁄’’𑀢𑀺 𑀣𑁄𑀫𑀺𑀢𑁄. 𑀢𑀢𑁆𑀣 𑀫𑀸𑀭𑁂 𑀅𑀪𑀜𑁆𑀚𑁂𑀲𑀺, 𑀫𑀸𑀭𑀪𑀜𑁆𑀚𑀦𑀁 𑀯𑀸 𑀏𑀢𑀲𑁆𑀲, 𑀦 𑀧𑀭𑀭𑀸𑀚𑀸𑀤𑀺𑀪𑀜𑁆𑀚𑀦𑀦𑁆𑀢𑀺 𑀫𑀸𑀭𑀪𑀜𑁆𑀚𑀦𑁄. 𑀫𑀳𑀸𑀯𑀺𑀓𑁆𑀓𑀦𑁆𑀢𑁄 𑀫𑀳𑀸𑀯𑀻𑀭𑀺𑀬𑁄𑀢𑀺 𑀫𑀳𑀸𑀯𑀻𑀭𑁄.

𑀔𑀦𑁆𑀥𑀸𑀤𑀬𑁄 𑀅𑀭𑀡𑀦𑁆𑀢𑀸 𑀥𑀫𑁆𑀫𑀸 𑀲𑀪𑀸𑀯𑀝𑁆𑀞𑁂𑀦 𑀥𑀸𑀢𑀼𑀬𑁄, 𑀅𑀪𑀺𑀥𑀫𑁆𑀫𑀓𑀣𑀸𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸𑀢𑀺 𑀓𑀢𑁆𑀯𑀸 𑀢𑁂𑀲𑀁 𑀓𑀣𑀦𑀢𑁄 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀢𑀺 𑀅𑀥𑀺𑀯𑀘𑀦𑀁. 𑀬𑀤𑀺𑀧𑀺 𑀅𑀜𑁆𑀜𑁂𑀲𑀼 𑀘 𑀧𑀓𑀭𑀡𑁂𑀲𑀼 𑀢𑁂 𑀲𑀪𑀸𑀯𑀸 𑀓𑀣𑀺𑀢𑀸, 𑀏𑀢𑁆𑀣 𑀧𑀦 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀲𑀼 𑀘𑀼𑀤𑁆𑀤𑀲𑀲𑀼 𑀦𑀬𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑀣𑀺𑀢𑀢𑁆𑀢𑀸 𑀲𑀸𑀢𑀺𑀲𑀬𑀁 𑀓𑀣𑀦𑀦𑁆𑀢𑀺 𑀇𑀤𑀫𑁂𑀯 𑀏𑀯𑀁𑀦𑀸𑀫𑀓𑀁. 𑀏𑀓𑀤𑁂𑀲𑀓𑀣𑀦𑀫𑁂𑀯 𑀳𑀺 𑀅𑀜𑁆𑀜𑀢𑁆𑀣 𑀓𑀢𑀦𑁆𑀢𑀺. 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀯𑀸 𑀔𑀦𑁆𑀥𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀬𑁄 𑀦𑀬𑀸 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 𑀫𑀳𑀸𑀯𑀺𑀲𑀬𑀸𑀦𑀁 𑀥𑀸𑀢𑀽𑀦𑀁 ¶ 𑀯𑀲𑁂𑀦 𑀥𑀸𑀢𑀽𑀳𑀺 𑀓𑀣𑀸 𑀥𑀸𑀢𑀼𑀓𑀣𑀸𑀢𑀺 𑀏𑀯𑀁 𑀅𑀲𑁆𑀲 𑀦𑀸𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀺𑀥𑀸 𑀢𑀺𑀥𑀸 𑀙𑀥𑀸 𑀅𑀝𑁆𑀞𑀸𑀭𑀲𑀥𑀸𑀢𑀺 𑀅𑀦𑁂𑀓𑀥𑀸 𑀥𑀸𑀢𑀼𑀪𑁂𑀤𑀁 𑀧𑀓𑀸𑀲𑁂𑀲𑀻𑀢𑀺 𑀥𑀸𑀢𑀼𑀪𑁂𑀤𑀧𑁆𑀧𑀓𑀸𑀲𑀦𑁄𑀢𑀺. 𑀢𑀲𑁆𑀲𑀢𑁆𑀣𑀦𑁆𑀢𑀺 𑀢𑀲𑁆𑀲𑀸 𑀥𑀸𑀢𑀼𑀓𑀣𑀸𑀬 𑀅𑀢𑁆𑀣𑀁. 𑀅-𑀓𑀸𑀭𑁂 𑀆-𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀁 𑀥𑀸𑀢𑀼𑀓𑀣’’𑀦𑁆𑀢𑀺 𑀯𑀸 𑀏𑀢𑁆𑀣 𑀧𑀓𑀭𑀡𑀦𑁆𑀢𑀺 𑀯𑀘𑀦𑀲𑁂𑀲𑁄 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀓𑀫𑁂𑀦 𑀯𑀡𑁆𑀡𑀦𑀸𑀬 𑀧𑀯𑀢𑁆𑀢𑀢𑁆𑀢𑀸𑀢𑀺 𑀢𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀓𑀭𑀡𑀲𑁆𑀲 𑀅𑀢𑁆𑀣𑀁 𑀢𑀲𑁆𑀲𑀢𑁆𑀣𑀦𑁆𑀢𑀺 𑀅-𑀓𑀸𑀭𑀮𑁄𑀧𑁄 𑀯𑀸. 𑀢𑀦𑁆𑀢𑀺 𑀢𑀁 𑀤𑀻𑀧𑀦𑀁 𑀲𑀼𑀡𑀸𑀣, 𑀢𑀁 𑀯𑀸 𑀅𑀢𑁆𑀣𑀁 𑀢𑀁𑀤𑀻𑀧𑀦𑀯𑀘𑀦𑀲𑀯𑀦𑁂𑀦 𑀉𑀧𑀥𑀸𑀭𑁂𑀣𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀳𑀺𑀢𑀸𑀢𑀺 𑀦𑀸𑀦𑀸𑀓𑀺𑀘𑁆𑀘𑁂𑀳𑀺 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸, 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀆𑀳𑀺𑀢𑀸𑀢𑀺 𑀯𑀸 𑀅𑀢𑁆𑀣𑁄.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀓𑁄 ¶ ¶ 𑀧𑀦𑁂𑀢𑀲𑁆𑀲 𑀧𑀓𑀭𑀡𑀲𑁆𑀲 𑀧𑀭𑀺𑀘𑁆𑀙𑁂𑀤𑁄𑀢𑀺? 𑀦 𑀲𑁄 𑀇𑀥 𑀯𑀢𑁆𑀢𑀩𑁆𑀩𑁄, 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀧𑀓𑀭𑀡𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀔𑀦𑁆𑀥𑀸𑀤𑀻𑀦𑀁 𑀤𑁂𑀲𑀦𑀸 𑀦𑀻𑀬𑀢𑀺 𑀧𑀯𑀢𑁆𑀢𑀻𑀬𑀢𑀺 𑀏𑀢𑁂𑀳𑀺, 𑀔𑀦𑁆𑀥𑀸𑀤𑀬𑁄 𑀏𑀯 𑀯𑀸 𑀦𑀻𑀬𑀦𑁆𑀢𑀺 𑀜𑀸𑀬𑀦𑁆𑀢𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀻𑀢𑀺 𑀦𑀬𑀸, 𑀦𑀬𑀸𑀦𑀁 𑀫𑀸𑀢𑀺𑀓𑀸 𑀉𑀤𑁆𑀤𑁂𑀲𑁄, 𑀦𑀬𑀸 𑀏𑀯 𑀯𑀸 𑀫𑀸𑀢𑀺𑀓𑀸𑀢𑀺 𑀦𑀬𑀫𑀸𑀢𑀺𑀓𑀸. 𑀏𑀢𑁂𑀲𑀁 𑀧𑀤𑀸𑀦𑀁 𑀫𑀽𑀮𑀪𑀽𑀢𑀢𑁆𑀢𑀸𑀢𑀺 ‘‘𑀫𑀽𑀮𑀫𑀸𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦𑀁 𑀧𑀤𑀸𑀦𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀯𑀺𑀪𑀚𑀦𑀲𑁆𑀲 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀫𑀽𑀮𑀪𑀽𑀢𑀢𑁆𑀢𑀸 𑀦𑀺𑀲𑁆𑀲𑀬𑀪𑀽𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁨. 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀘𑀦𑁂𑀦 𑀘 𑀬𑁂𑀲𑀼 𑀤𑁆𑀯𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑀤𑀢𑁆𑀣𑀸𑀦𑀺 𑀤𑁆𑀯𑀸𑀤𑀲 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀢𑁂𑀲𑀁 𑀢𑀣𑀸𑀤𑀲𑁆𑀲𑀺𑀢𑀸𑀦𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸𑀦𑀁 𑀨𑀲𑁆𑀲𑀸𑀤𑀻𑀦𑀜𑁆𑀘 𑀧𑀤𑀸𑀦𑀁 𑀯𑀲𑁂𑀦 𑀆𑀳 ‘‘𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀼𑀧𑀧𑀢𑁆𑀢𑀺𑀓𑀸𑀫𑀪𑀯𑀸𑀤𑀻𑀦𑀁 𑀇𑀥 𑀯𑀺𑀪𑀢𑁆𑀢𑀸𑀦𑀁 𑀪𑀸𑀯𑀦𑀪𑀯𑀦𑀪𑀸𑀯𑁂𑀦 𑀪𑀯𑁂 𑀯𑀺𑀬 𑀲𑁄𑀓𑀸𑀤𑀻𑀦𑀁 𑀚𑀭𑀸𑀫𑀭𑀡𑀲𑁆𑀲 𑀯𑀺𑀬 𑀅𑀦𑀺𑀝𑁆𑀞𑀢𑁆𑀢𑀸 𑀢𑀦𑁆𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦 𑀘 𑀚𑀭𑀸𑀫𑀭𑀡𑁂 𑀅𑀦𑁆𑀢𑁄𑀕𑀥𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁆𑀯𑀸𑀤𑀲𑀧𑀤𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 𑀧𑀸𑀴𑀺𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀫𑁆𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀓𑀭𑁄𑀦𑁆𑀢𑁄 𑀢𑁂𑀲𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀬𑀫𑀸𑀢𑀺𑀓𑀸𑀤𑀺𑀓𑀸 ¶ 𑀮𑀓𑁆𑀔𑀡𑀫𑀸𑀢𑀺𑀓𑀦𑁆𑀢𑀸 𑀫𑀸𑀢𑀺𑀓𑀸 𑀧𑀓𑀭𑀡𑀦𑁆𑀢𑀭𑀸𑀲𑀸𑀥𑀸𑀭𑀡𑀢𑀸𑀬 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸 𑀦𑀸𑀫, 𑀢𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑁂 𑀯𑀼𑀢𑁆𑀢𑁄 𑀯𑀺𑀪𑀚𑀺𑀢𑀩𑁆𑀩𑀸𑀦𑀁 𑀉𑀤𑁆𑀤𑁂𑀲𑁄 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀬𑀣𑀸 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀅𑀬𑀁 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀢𑁄 𑀩𑀳𑀺𑀤𑁆𑀥𑀸 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀘 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀸𑀯𑁂𑀡𑀺𑀓𑀫𑀸𑀢𑀺𑀓𑀸𑀅𑀩𑁆𑀪𑀦𑁆𑀢𑀭𑁂 𑀳𑀺 𑀞𑀧𑀺𑀢𑀸 𑀢𑀲𑁆𑀲𑀸𑀬𑁂𑀯 𑀅𑀩𑁆𑀪𑀦𑁆𑀢𑀭𑁂 𑀞𑀧𑀺𑀢𑀸𑀢𑀺 𑀯𑀼𑀢𑁆𑀢𑀸 ¶ . 𑀅𑀣 𑀯𑀸 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀬𑀣𑀸 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀥𑀸𑀢𑀼𑀓𑀣𑀸𑀢𑁄 𑀩𑀳𑀺𑀪𑀽𑀢𑀸 𑀓𑀼𑀲𑀮𑀸𑀤𑀺𑀅𑀭𑀡𑀦𑁆𑀢𑀸 𑀫𑀸𑀢𑀺𑀓𑀸 𑀧𑀓𑀭𑀡𑀦𑁆𑀢𑀭𑀕𑀢𑀸 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀘 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀞𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀓𑀺𑀡𑁆𑀡𑀪𑀸𑀯𑁂𑀦 𑀧𑀓𑀺𑀡𑁆𑀡𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁩. 𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁩. 𑀦𑀬𑀸𑀦𑀁 𑀧𑀯𑀢𑁆𑀢𑀺𑀤𑁆𑀯𑀸𑀭𑀪𑀽𑀢𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀺𑀬𑁄𑀕𑀻𑀲𑀳𑀬𑁄𑀕𑀻𑀥𑀫𑁆𑀫𑀸 𑀦𑀬𑀫𑀼𑀔𑀸𑀦𑀻𑀢𑀺 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀦𑀬𑀫𑀼𑀔𑀫𑀸𑀢𑀺𑀓𑀸. 𑀘𑀼𑀤𑁆𑀤𑀲𑀧𑀺 𑀳𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀦𑀁 𑀯𑁄𑀫𑀺𑀲𑁆𑀲𑀓𑀢𑀸𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀬𑁂𑀳𑀺 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀳𑁄𑀦𑁆𑀢𑀺, 𑀢𑁂 𑀥𑀫𑁆𑀫𑀸 𑀘𑀼𑀤𑁆𑀤𑀲𑀦𑁆𑀦𑀫𑁆𑀧𑀺 𑀦𑀬𑀸𑀦𑀁 𑀫𑀼𑀔𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀢𑀢𑁆𑀣 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀸𑀤𑀻𑀲𑀼 𑀲𑀘𑁆𑀘𑀸𑀤𑀻𑀳𑀺𑀧𑀺 𑀬𑀣𑀸𑀲𑀫𑁆𑀪𑀯𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀬𑀤𑀺𑀧𑀺 𑀯𑀼𑀢𑁆𑀢𑁄, 𑀲𑁄 𑀧𑀦 𑀲𑀗𑁆𑀕𑀸𑀳𑀓𑀪𑀽𑀢𑁂𑀳𑀺 𑀢𑁂𑀳𑀺 𑀯𑀼𑀢𑁆𑀢𑁄, 𑀦 𑀲𑀗𑁆𑀕𑀳𑀪𑀽𑀢𑁂𑀳𑀺, 𑀲𑁄𑀧𑀺 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀼𑀤𑁆𑀥𑀸𑀭𑁂 𑀢𑀢𑁆𑀣𑀸𑀧𑀺 𑀔𑀦𑁆𑀥𑀸𑀤𑀻𑀳𑁂𑀯 𑀲𑀗𑁆𑀕𑀳𑁂𑀳𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀼𑀤𑁆𑀥𑀸𑀭𑁂𑀧𑀺 𑀧𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸 𑀘𑀢𑀽𑀳𑁂𑀯 𑀔𑀦𑁆𑀥𑁂𑀳𑀺 𑀳𑁄𑀦𑁆𑀢𑀻𑀢𑀺 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘 𑀯𑀺𑀧𑁆𑀧𑀬𑁄𑀕𑁄 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀳𑁄𑀢𑀺, 𑀓𑀲𑁆𑀫𑀸 ‘‘𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀪𑀯𑀦𑁆𑀢𑀲𑁆𑀲𑀧𑀺 𑀘𑀢𑀽𑀳𑁂𑀯 𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀁 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀭𑀽𑀧𑁂𑀦, 𑀘𑀢𑀽𑀳𑁂𑀯 𑀧𑀦 𑀔𑀦𑁆𑀥𑁂𑀳𑀺 𑀳𑁄𑀢𑀻𑀢𑀺 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀯𑀺𑀧𑁆𑀧𑀬𑁄𑀕𑁄𑀧𑀺 𑀯𑀺𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀳𑀺 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀦𑀺𑀬𑀫𑀺𑀢𑁄 𑀢𑁂𑀳𑀺 𑀯𑀺𑀦𑀸 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀲𑁄 𑀘𑀸𑀬𑀁 ¶ 𑀯𑀺𑀧𑁆𑀧𑀬𑁄𑀕𑁄 𑀅𑀦𑀸𑀭𑀫𑁆𑀫𑀡𑀲𑁆𑀲, 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀺 𑀫𑀺𑀲𑁆𑀲𑀓𑀲𑁆𑀲 𑀘 𑀦 𑀳𑁄𑀢𑀺, 𑀅𑀦𑀸𑀭𑀫𑁆𑀫𑀡𑀲𑁆𑀲 𑀧𑀦 𑀫𑀺𑀲𑁆𑀲𑀓𑀲𑁆𑀲 𑀘 𑀲𑀸𑀭𑀫𑁆𑀫𑀡𑁂𑀦, 𑀲𑀸𑀭𑀫𑁆𑀫𑀡𑀲𑁆𑀲 𑀲𑀸𑀭𑀫𑁆𑀫𑀡𑁂𑀦 𑀅𑀦𑀸𑀭𑀫𑁆𑀫𑀡𑁂𑀦 𑀫𑀺𑀲𑁆𑀲𑀓𑁂𑀦 𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪. 𑀮𑀓𑁆𑀔𑀡𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁪. 𑀲𑀗𑁆𑀕𑀳𑁄𑀬𑁂𑀯 ¶ 𑀲𑀗𑁆𑀕𑀳𑀦𑀬𑁄. 𑀲𑀪𑀸𑀕𑁄. 𑀯𑀺𑀲𑀪𑀸𑀕𑁄𑀢𑀺 𑀏𑀢𑀲𑁆𑀲 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑁂𑀦, ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀏𑀢𑁂𑀦𑀧𑀺 𑀯𑀺𑀲𑀼𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄 𑀘 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘 𑀪𑀸𑀯𑁄, 𑀢𑀣𑀸 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀯𑀸 𑀲𑀗𑁆𑀕𑀳𑁄 𑀘 𑀅𑀲𑀗𑁆𑀕𑀳𑁄 𑀘, 𑀲𑁄 𑀥𑀫𑁆𑀫𑁄 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘, 𑀢𑀣𑀸 𑀬𑀲𑁆𑀲 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘, 𑀲𑁄𑀧𑀺 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸𑀢𑀺. 𑀢𑀢𑁆𑀣 𑀬𑁂𑀦 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀥𑀫𑁆𑀫𑀸 𑀕𑀡𑀦𑀁 𑀕𑀘𑁆𑀙𑀦𑁆𑀢𑀺, 𑀲𑁄 𑀭𑀼𑀧𑁆𑀧𑀦𑀸𑀤𑀺𑀓𑁄 𑀲𑀫𑀸𑀦𑀪𑀸𑀯𑁄 𑀲𑀗𑁆𑀕𑀳𑁂 𑀲𑀪𑀸𑀕𑀢𑀸, 𑀏𑀓𑀼𑀧𑁆𑀧𑀸𑀤𑀸𑀤𑀺𑀓𑁄 𑀲𑀫𑁆𑀧𑀬𑁄𑀕𑁂 𑀯𑁂𑀤𑀺𑀢𑀩𑁆𑀩𑁄.

𑁫. 𑀩𑀸𑀳𑀺𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫. 𑀏𑀯𑀁 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀢𑁄 𑀩𑀳𑀺 𑀞𑀧𑀺𑀢𑀢𑁆𑀢𑀸𑀢𑀺 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀏𑀢𑁂𑀦 𑀞𑀧𑀦𑀸𑀓𑀸𑀭𑁂𑀦 𑀩𑀳𑀺 𑀧𑀺𑀝𑁆𑀞𑀺𑀢𑁄 𑀞𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀯𑀸 𑀞𑀧𑀦𑀸𑀓𑀸𑀭𑁂𑀦 𑀓𑀼𑀲𑀮𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀇𑀥 𑀅𑀝𑁆𑀞𑀧𑁂𑀢𑁆𑀯𑀸 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀢𑁄 𑀩𑀳𑀺 𑀧𑀓𑀭𑀡𑀦𑁆𑀢𑀭𑀫𑀸𑀢𑀺𑀓𑀸𑀬 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀫𑀸𑀢𑀺𑀓𑀸𑀪𑀸𑀯𑁂𑀦 𑀞𑀧𑀺𑀢𑀢𑁆𑀢𑀸 𑀢𑀣𑀸 𑀧𑀓𑀸𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀲𑀗𑁆𑀕𑀳𑁄 𑀏𑀓𑀯𑀺𑀥𑁄𑀯, 𑀲𑁄 𑀓𑀲𑁆𑀫𑀸 ‘‘𑀘𑀢𑀼𑀩𑁆𑀩𑀺𑀥𑁄’’𑀢𑀺 𑀯𑀼𑀢𑁆𑀢𑁄𑀢𑀺? 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑀁 𑀅𑀯𑀢𑁆𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀲𑀤𑁆𑀤𑁂𑀲𑀼 𑀲𑀗𑁆𑀕𑀳𑀲𑀤𑁆𑀤𑁄 𑀢𑀸𑀯 𑀅𑀢𑁆𑀢𑀦𑁄 𑀅𑀢𑁆𑀣𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄. 𑀅𑀢𑁆𑀣𑁄𑀧𑀺 𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀁 𑀧𑀢𑁆𑀢𑁄 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 ‘‘𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀦 𑀓𑁄𑀘𑀺 𑀤𑁄𑀲𑁄. 𑀦𑀺𑀤𑁆𑀥𑀸𑀭𑀺𑀢𑁂 𑀳𑀺 𑀯𑀺𑀲𑁂𑀲𑁂 𑀢𑀲𑁆𑀲 𑀏𑀓𑀯𑀺𑀥𑀢𑀸 𑀲𑀺𑀬𑀸, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺. 𑀚𑀸𑀢𑀺𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀲𑀤𑁆𑀤𑀢𑁆𑀢𑀸 ‘‘𑀚𑀸𑀢𑀺𑀬𑀸 𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀚𑀸𑀢𑀺𑀬𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺 𑀲𑀫𑁆𑀩𑀦𑁆𑀥𑀸𑀭𑀳𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀚𑀸𑀢𑀺𑀲𑀗𑁆𑀕𑀳𑁄𑀢𑀺 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑁄 𑀲𑀚𑀸𑀢𑀺𑀲𑀗𑁆𑀕𑀳𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀏𑀢𑁆𑀣 ¶ ¶ 𑀦𑀬𑀫𑀸𑀢𑀺𑀓𑀸𑀬 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄, 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀇𑀫𑁂 𑀤𑁆𑀯𑁂 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀉𑀤𑁆𑀤𑁂𑀲𑀸, 𑀅𑀯𑀲𑁂𑀲𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸. ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀳𑀺 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀅𑀲𑀗𑁆𑀕𑀳𑀺𑀢𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄 𑀬𑁄 𑀅𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀢𑀦𑁆𑀦𑀺𑀲𑁆𑀲𑀺𑀢𑁄 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁄 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, ‘‘𑀲𑀗𑁆𑀕𑀳𑀺𑀢𑁂𑀦𑀸’’𑀢𑀺 𑀘 𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀢𑀢𑀺𑀬𑀸𑀤𑀻𑀲𑀼 𑀤𑀲𑀫𑀸𑀯𑀲𑀸𑀦𑁂𑀲𑀼 𑀦𑀬𑀼𑀤𑁆𑀤𑁂𑀲𑁂𑀲𑀼 𑀙𑀝𑁆𑀞𑀯𑀚𑁆𑀚𑁂𑀲𑀼. 𑀢𑁂𑀲𑀼𑀧𑀺 𑀳𑀺 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀦𑁆𑀢𑀺𑀫𑀧𑀤𑀲𑀤𑀺𑀲𑁂𑀦 𑀢𑀢𑀺𑀬𑀧𑀤𑁂𑀦 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀸 𑀉𑀤𑁆𑀤𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀲𑀢𑁆𑀢𑀫𑀸𑀤𑀻𑀲𑀼 𑀘 𑀘𑀢𑀽𑀲𑀼 𑀲𑀳𑀬𑁄𑀕𑁂 𑀤𑀝𑁆𑀞𑀩𑁆𑀩𑁄, 𑀦 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀺𑀬 𑀲𑀫𑀸𑀦𑀸𑀥𑀺𑀓𑀭𑀡𑁂 𑀯𑀺𑀲𑁂𑀲𑀦𑁂. 𑀢𑀢𑁆𑀣 𑀳𑀺 𑀲𑀪𑀸𑀯𑀦𑁆𑀢𑀭𑁂𑀦 𑀲𑀪𑀸𑀯𑀦𑁆𑀢𑀭𑀲𑁆𑀲 𑀯𑀺𑀲𑁂𑀲𑀦𑀁 𑀓𑀢𑀁, 𑀏𑀢𑁂𑀲𑀼 𑀥𑀫𑁆𑀫𑀦𑁆𑀢𑀭𑁂𑀦 𑀥𑀫𑁆𑀫𑀦𑁆𑀢𑀭𑀲𑁆𑀲𑀸𑀢𑀺. 𑀏𑀓𑀸𑀤𑀲𑀫𑀸𑀤𑀻𑀲𑀼 𑀧𑀦 𑀘𑀢𑀽𑀲𑀼 𑀆𑀤𑀺𑀧𑀤𑁂𑀦𑁂𑀯 𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀓𑀢𑁆𑀯𑀸 𑀇𑀢𑀭𑁂𑀳𑀺 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀸 𑀉𑀤𑁆𑀤𑀺𑀝𑁆𑀞𑀸. 𑀯𑀺𑀲𑁂𑀲𑀦𑁂 𑀏𑀯 𑀘𑁂𑀢𑁆𑀣 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀜𑁆𑀳𑀺 𑀦𑀺𑀲𑁆𑀲𑀬𑀪𑀽𑀢𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀢𑀸𑀤𑀺𑀯𑀺𑀲𑁂𑀲𑁂𑀦 𑀓𑀭𑀡𑀪𑀽𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀺𑀪𑀸𑀯𑀁 𑀅𑀢𑁆𑀢𑀦𑁄 𑀯𑀺𑀲𑁂𑀲𑁂𑀦𑁆𑀢𑀻𑀢𑀺.

𑀯𑀺𑀓𑀧𑁆𑀧𑀢𑁄𑀢𑀺 𑀯𑀺𑀯𑀺𑀥𑀓𑀧𑁆𑀧𑀦𑀢𑁄, 𑀯𑀺𑀪𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀬𑁄𑀕𑀯𑀲𑁂𑀦. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀢𑁂𑀲𑀁 𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀥𑀺𑀫𑁄𑀓𑁆𑀔𑁄 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄, 𑀇𑀢𑀭𑁂 𑀲𑀩𑁆𑀩𑁂𑀲𑀦𑁆𑀢𑀺. 𑀢𑀢𑁆𑀣 𑀲𑀸𑀥𑀸𑀭𑀡𑀸 𑀧𑀲𑀝𑀸 𑀧𑀸𑀓𑀝𑀸 𑀘𑀸𑀢𑀺 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀢𑁂𑀲𑀁 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀢𑁆𑀣𑀁 𑀉𑀤𑁆𑀤𑁂𑀲𑁄 𑀓𑀢𑁄, 𑀅𑀲𑀸𑀥𑀸𑀭𑀡𑀸𑀧𑀺 𑀧𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀯𑀸𑀢𑀺 𑀢𑁂𑀲𑀼 𑀫𑀳𑀸𑀯𑀺𑀲𑀬𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀅𑀥𑀺𑀫𑁄𑀓𑁆𑀔𑁄 𑀉𑀤𑁆𑀤𑀺𑀝𑁆𑀞𑁄. ‘‘𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀘 𑀥𑀫𑁆𑀫𑀲𑀗𑁆𑀕𑀳𑀯𑀡𑁆𑀡𑀦𑀸𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀘 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀬𑁂 𑀯𑀼𑀢𑁆𑀢𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀢𑁄𑀢𑀺 𑀧𑀦 𑀅𑀢𑁆𑀣𑁂 𑀲𑀢𑀺 ¶ 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀬𑁄 𑀅𑀲𑀸𑀥𑀸𑀭𑀡𑁂𑀲𑀼 𑀫𑀳𑀸𑀯𑀺𑀲𑀬𑁄 𑀅𑀥𑀺𑀫𑁄𑀓𑁆𑀔𑁄, 𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀢𑁄 𑀨𑀲𑁆𑀲𑀸𑀤𑀬𑁄 𑀲𑀩𑁆𑀩𑀲𑀸𑀥𑀸𑀭𑀡𑀸𑀢𑀺 𑀅𑀥𑀺𑀫𑁄𑀓𑁆𑀔𑁄 𑀘 𑀅𑀲𑀸𑀥𑀸𑀭𑀡𑁂𑀲𑀼 𑀫𑀳𑀸𑀯𑀺𑀲𑀬𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀸𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ¶ 𑀧𑀦𑁂𑀢𑁆𑀣 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀦 𑀅𑀲𑀫𑀸𑀥𑀺𑀲𑀪𑀸𑀯𑀸 𑀲𑀸𑀫𑀜𑁆𑀜𑀲𑀤𑁆𑀤𑁂𑀦𑁂𑀯 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀘 𑀲𑀫𑀸𑀥𑀺𑀲𑀪𑀸𑀯𑀸 𑀯𑀺𑀲𑁂𑀲𑀲𑀤𑁆𑀤𑀯𑀘𑀦𑀻𑀬𑀁 𑀅𑀜𑁆𑀜𑀁 𑀩𑁆𑀬𑀸𑀧𑁂𑀢𑀩𑁆𑀩𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀜𑁆𑀘 𑀦𑀢𑁆𑀣𑀻𑀢𑀺 𑀅𑀦𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑀲𑀸𑀫𑀜𑁆𑀜𑀯𑀺𑀲𑁂𑀲𑀤𑀻𑀧𑀦𑀢𑁄 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀪𑁂𑀤𑀤𑀻𑀧𑀓𑁂𑀳𑀺 𑀯𑀢𑁆𑀢𑀩𑁆𑀩𑀸, 𑀦 𑀲𑀼𑀔𑀸𑀤𑀺𑀲𑀪𑀸𑀯𑀸 𑀯𑁂𑀤𑀦𑀸 𑀯𑀺𑀬 𑀯𑀼𑀢𑁆𑀢𑀮𑀓𑁆𑀔𑀡𑀯𑀺𑀧𑀭𑀻𑀢𑁂𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑁂𑀯, 𑀢𑀲𑁆𑀫𑀸 ‘‘𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺 𑀅𑀬𑀁 𑀲𑀸𑀫𑀜𑁆𑀜𑀲𑀤𑁆𑀤𑁄 𑀲𑀫𑀸𑀥𑀺𑀲𑀪𑀸𑀯𑁂 𑀯𑀺𑀲𑁂𑀲𑀲𑀤𑁆𑀤𑀦𑀺𑀭𑀧𑁂𑀓𑁆𑀔𑁄 𑀧𑀯𑀢𑁆𑀢𑀫𑀸𑀦𑁄 𑀲𑀬𑀫𑁂𑀯 𑀯𑀺𑀲𑁂𑀲𑀲𑀤𑁆𑀤𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀲𑀫𑀸𑀥𑀺𑀲𑀪𑀸𑀯𑀫𑁂𑀯 𑀧𑀓𑀸𑀲𑁂𑀬𑁆𑀬, 𑀇𑀢𑀭𑁄 𑀘 𑀲𑀫𑀸𑀥𑀺𑀲𑀪𑀸𑀯𑀫𑁂𑀯𑀸𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀲𑀸𑀥𑀸𑀭𑀡𑀸 𑀘𑁂𑀯 𑀅𑀧𑁆𑀧𑀯𑀺𑀲𑀬𑀸 𑀘𑀸𑀢𑀺 𑀇𑀥 𑀉𑀤𑁆𑀤𑁂𑀲𑀁 𑀦 𑀅𑀭𑀳𑀢𑀺. 𑀅𑀪𑀺𑀦𑁆𑀦𑀸𑀧𑀺 𑀯𑀸 𑀨𑀲𑁆𑀲𑀸𑀤𑀻𑀦𑀁 𑀯𑀺𑀬 𑀧𑀸𑀓𑀝𑀢𑁆𑀢𑀸𑀪𑀸𑀯𑀢𑁄 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀯𑀢𑁆𑀢𑀩𑁆𑀩𑀢𑁄 𑀘 𑀲𑀸 𑀚𑀻𑀯𑀺𑀢𑀜𑁆𑀘 𑀦 𑀅𑀭𑀳𑀢𑀻𑀢𑀺 𑀦 𑀉𑀤𑁆𑀤𑀺𑀝𑁆𑀞𑀸𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀬𑁄 𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀧𑀤𑀯𑀡𑁆𑀡𑀦𑀸

𑁬. 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄𑀫𑀳𑀦𑁆𑀢𑀭𑁂 ¶ ¶ 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀦 𑀲𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀘𑁆𑀘𑀸𑀦𑀺, 𑀅𑀥𑀺𑀧𑀢𑀺𑀬𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘 𑀯𑀼𑀢𑁆𑀢𑀸𑀦𑀻𑀢𑀺 𑀲𑀘𑁆𑀘𑀸𑀤𑀺𑀯𑀺𑀲𑁂𑀲𑁄 𑀯𑀺𑀬 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀺𑀲𑁂𑀲𑁄 𑀘 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀺𑀢𑁄 𑀯𑀼𑀘𑁆𑀘𑀫𑀸𑀦𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀻𑀢𑀺 ‘‘𑀢𑀻𑀳𑀺 𑀲𑀗𑁆𑀕𑀳𑁄. 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀦𑀬𑀫𑀼𑀔𑀫𑀸𑀢𑀺𑀓𑀸 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑀢𑀽𑀳𑀻’’𑀢𑀺 𑀯𑀼𑀢𑁆𑀢𑀸 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸 𑀘 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀬𑁂𑀦 𑀔𑀦𑁆𑀥𑀸𑀤𑀻𑀳𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺. 𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀬𑁂 𑀥𑀫𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀢𑀸 𑀳𑁄𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑀲𑀗𑁆𑀔𑀸𑀢𑁂𑀦, 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀦𑁂𑀦 𑀲𑀗𑁆𑀕𑀳𑀁 𑀕𑀡𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀜𑁆𑀳𑀺 𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀳𑀺 𑀲𑀗𑁆𑀕𑀳𑀺𑀢𑀩𑁆𑀩𑀥𑀫𑁆𑀫𑁄 𑀤𑀲𑁆𑀲𑀺𑀢𑁄. 𑀬𑁂𑀦 𑀲𑀗𑁆𑀕𑀳𑁂𑀦 𑀲𑀗𑁆𑀕𑀬𑁆𑀳𑀢𑀺, 𑀢𑀲𑁆𑀲 𑀲𑀗𑁆𑀕𑀳𑀲𑁆𑀲 𑀤𑀲𑁆𑀲𑀦𑀁 ‘‘𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀯𑀘𑀦𑀁. 𑀧𑀜𑁆𑀘𑀲𑀼 𑀔𑀦𑁆𑀥𑀕𑀡𑀦𑁂𑀲𑀼 𑀏𑀓𑁂𑀦 𑀔𑀦𑁆𑀥𑀕𑀡𑀦𑁂𑀦 𑀕𑀡𑀺𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀬𑀲𑁆𑀫𑀸 𑀘 𑀔𑀦𑁆𑀥𑀸𑀤𑀺𑀯𑀘𑀦𑁂𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀉𑀧𑀭𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀻𑀢𑀺.

𑀅𑀲𑀗𑁆𑀕𑀳𑀦𑀬𑀦𑀺𑀤𑁆𑀤𑁂𑀲𑁂𑀢𑀺 𑀇𑀤𑀁 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑀲𑁆𑀲𑁂𑀯 𑀦𑀬𑀲𑁆𑀲 𑀏𑀓𑀤𑁂𑀲𑀦𑀬𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀦 𑀦𑀬𑀦𑁆𑀢𑀭𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀬𑁂𑀯 𑀘𑁂𑀢𑁆𑀣 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀸 𑀤𑀲𑁆𑀲𑀺𑀢𑀸𑀢𑀺 𑀏𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸 𑀧𑀼𑀭𑀺𑀫𑁂𑀦 𑀬𑁄𑀚𑀺𑀬𑀫𑀸𑀦𑁂 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀧𑀘𑁆𑀙𑀺𑀫𑁂𑀳𑁂𑀯 𑀬𑁄𑀚𑁂𑀢𑁆𑀯𑀸 𑀢𑀬𑁄 𑀤𑀼𑀓𑀸 𑀤𑁆𑀯𑁂 𑀢𑀺𑀓𑀸 ¶ 𑀏𑀓𑁄 𑀘𑀢𑀼𑀓𑁆𑀓𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸 𑀤𑁆𑀯𑁂 𑀤𑀼𑀓𑀸 𑀏𑀓𑁄 𑀢𑀺𑀓𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑁄 𑀏𑀓𑁄 𑀤𑀼𑀓𑁄𑀢𑀺 𑀏𑀢𑁂 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀧𑀦 𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀭𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀸𑀴𑀺𑀁 𑀦 𑀆𑀭𑁄𑀧𑀺𑀢𑀦𑁆𑀢𑀺.

𑀆𑀬𑀢𑀦𑀧𑀤𑀸𑀤𑀺𑀯𑀡𑁆𑀡𑀦𑀸

𑁪𑁦. 𑀬𑀲𑁆𑀫𑀸 ¶ 𑀘 𑀤𑀼𑀓𑀢𑀺𑀓𑁂𑀲𑀽𑀢𑀺 𑀬𑀤𑀺𑀧𑀺 𑀏𑀓𑀓𑁂𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀏𑀓𑀓𑁂 𑀧𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀤𑀼𑀓𑀸𑀤𑀻𑀲𑀼 𑀅𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁 𑀤𑀺𑀝𑁆𑀞𑀁. 𑀦 𑀳𑁂𑀢𑁆𑀣 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁, 𑀦𑀸𑀧𑀺 𑀤𑀼𑀓𑁂𑀳𑀺 𑀢𑀺𑀓𑀲𑁆𑀲, 𑀇𑀥 𑀧𑀦 𑀤𑀼𑀓𑁆𑀔𑀲𑀫𑀼𑀤𑀬𑀤𑀼𑀓𑁆𑀔𑀫𑀕𑁆𑀕𑀤𑀼𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀢𑀺𑀓𑁂𑀦 𑀘 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀤𑀼𑀓𑀢𑀺𑀓𑁂𑀲𑁆𑀯𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀁 𑀲𑀫𑀼𑀤𑀬𑀸𑀦𑀦𑁆𑀢𑀭𑀁 𑀫𑀕𑁆𑀕𑀲𑀘𑁆𑀘𑀲𑁆𑀲 𑀯𑀘𑀦𑁂 𑀓𑀸𑀭𑀡𑀁 𑀯𑀤𑀢𑀺.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁬𑁧. ‘‘𑀧𑀼𑀘𑁆𑀙𑀁 𑀅𑀦𑀸𑀭𑀪𑀺𑀢𑁆𑀯𑀸 𑀅𑀯𑀺𑀚𑁆𑀚𑀸 𑀏𑀓𑁂𑀦 𑀔𑀦𑁆𑀥𑁂𑀦, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀮𑀺𑀔𑀺𑀢𑀩𑁆𑀩𑁂𑀧𑀺 𑀧𑀫𑀸𑀤𑀯𑀲𑁂𑀦 ‘‘𑀅𑀯𑀺𑀚𑁆𑀚𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀇𑀤𑀁 𑀦 𑀮𑀺𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀭𑀽𑀧𑁂𑀓𑀲𑁂𑀲𑀁 𑀯𑀸 𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀯𑀘𑀦𑁂𑀦 𑀅𑀯𑀺𑀚𑁆𑀚𑀸𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑀺𑀢𑀦𑁆𑀢𑀺. 𑀲𑀩𑁆𑀩𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀯𑀺𑀧𑀸𑀓𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀦𑀁 𑀦 𑀓𑀸𑀢𑀩𑁆𑀩𑀁. 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀳𑀺 𑀯𑀺𑀜𑁆𑀜𑀸𑀡𑀸𑀦𑀁 𑀥𑀸𑀢𑀼𑀓𑀣𑀸𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀸𑀤𑀺𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸’’𑀢𑀺 𑀇𑀫𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸𑀲𑀤𑀺𑀲𑁂𑀦 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂𑀦 𑀤𑀲𑁆𑀲𑀺𑀢𑀸, 𑀇𑀥 𑀘 𑀦𑀸𑀫𑀭𑀽𑀧𑀲𑁆𑀲 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀗𑁆𑀕𑀳𑀯𑀘𑀦𑁂𑀦 𑀅𑀓𑀫𑁆𑀫𑀚𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺.

𑁭𑁧. 𑀚𑀸𑀬𑀫𑀸𑀦𑀧𑀭𑀺𑀧𑀘𑁆𑀘𑀫𑀸𑀦𑀪𑀺𑀚𑁆𑀚𑀫𑀸𑀦𑀸𑀦𑀁 𑀚𑀸𑀬𑀫𑀸𑀦𑀸𑀤𑀺𑀪𑀸𑀯𑀫𑀢𑁆𑀢𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀧𑀭𑀫𑀢𑁆𑀣𑀢𑁄 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀦𑀺 𑀧𑀭𑀫𑀢𑁆𑀣𑀸𑀦𑀁 𑀲𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀺, 𑀢𑀸𑀦𑀺 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀧𑀸𑀓𑀪𑁂𑀤𑀪𑀽𑀢𑀸𑀦𑀺 𑀭𑀼𑀧𑁆𑀧𑀦𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀲𑀪𑀸𑀕𑀸𑀦𑀺, 𑀅𑀭𑀽𑀧𑀸𑀦𑀁 𑀧𑀦 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀽𑀢𑀸𑀦𑀺 𑀭𑀽𑀧𑀓𑀮𑀸𑀧𑀚𑀸𑀢𑀺𑀆𑀤𑀻𑀦𑀺 𑀯𑀺𑀬 𑀲𑀳𑀼𑀧𑁆𑀧𑀚𑁆𑀚𑀫𑀸𑀦𑀘𑀢𑀼𑀓𑁆𑀔𑀦𑁆𑀥𑀓𑀮𑀸𑀧𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑀢𑁄 𑀏𑀓𑁂𑀓𑀪𑀽𑀢𑀸𑀦𑀺 𑀯𑁂𑀤𑀺𑀬𑀦𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑁂𑀳𑀺 𑀏𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀳𑀺 𑀅𑀕𑀬𑁆𑀳𑀫𑀸𑀦𑀸𑀦𑀺 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑁂𑀦 𑀅𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑀪𑀸𑀕𑀸𑀦𑀺, 𑀢𑀣𑀸 𑀤𑀼𑀯𑀺𑀥𑀸𑀦𑀺𑀧𑀺 ¶ 𑀢𑀸𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀏𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀳𑀺 𑀅𑀕𑀬𑁆𑀳𑀫𑀸𑀦𑀸𑀦𑀺 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀥𑀫𑁆𑀫𑁂𑀳𑀺 𑀲𑀪𑀸𑀕𑀸𑀦𑀺, 𑀢𑁂𑀦 𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀻’’𑀢𑀺𑀆𑀤𑀺𑀫𑀸𑀳.

𑀧𑀞𑀫𑀦𑀬𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁧. 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ¶ 𑀬𑀁 𑀢𑀁 𑀉𑀤𑁆𑀤𑁂𑀲𑁂 𑀅𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀁 𑀅𑀲𑀗𑁆𑀕𑀳𑀺𑀢𑀁 𑀥𑀫𑁆𑀫𑀚𑀸𑀢𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀤𑁂𑀯 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀆𑀳. 𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀲𑀸𑀫𑀜𑁆𑀜𑀸𑀦𑀁 𑀦𑀺𑀘𑁆𑀘𑀁 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀪𑁂𑀤𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸 𑀲𑀼𑀤𑁆𑀥𑀸. 𑀢𑀢𑁆𑀣 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀯𑀘𑀦𑀫𑀢𑁆𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 𑀢𑀻𑀲𑀼 𑀲𑀗𑁆𑀕𑀳𑁂𑀲𑀼 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀬𑁂 𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀬𑁂𑀯 𑀥𑀫𑁆𑀫𑀸 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁, 𑀢𑁂𑀲𑀁 𑀧𑀦 𑀏𑀯𑀁𑀯𑀺𑀥𑀸𑀦𑀁 𑀅𑀲𑀫𑁆𑀪𑀯𑀸 𑀦𑀬𑀫𑀸𑀢𑀺𑀓𑀸𑀬 𑀘 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀧𑁂𑀓𑁆𑀔𑀢𑁆𑀢𑀸 𑀉𑀤𑁆𑀤𑁂𑀲𑁂𑀧𑀺 𑀬𑀁 𑀬𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀲𑀗𑁆𑀕𑀸𑀳𑀓𑀁, 𑀢𑀁 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀁 𑀦𑀺𑀤𑁆𑀥𑀸𑀭𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑁂𑀦 𑀢𑁂𑀦 𑀲𑀗𑁆𑀕𑀸𑀳𑀓𑁂𑀦 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀥𑀫𑁆𑀫𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀢𑁆𑀣 𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀞𑀫𑀦𑀬𑁂 𑀙𑀝𑁆𑀞𑀦𑀬𑁂 𑀘 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁂𑀦, 𑀇𑀢𑀭𑁂𑀲𑀼 𑀘 𑀬𑀁 𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀦𑀺𑀬𑀸𑀫𑀓𑀪𑀸𑀯𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀅𑀭𑀡𑀦𑁆𑀢𑀸 𑀉𑀤𑁆𑀤𑀺𑀝𑁆𑀞𑀸𑀢𑀺.

𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀬𑀸’’𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄, ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀆𑀬𑀢𑀦𑀲𑀗𑁆𑀕𑀳𑁂𑀦 𑀥𑀸𑀢𑀼𑀲𑀗𑁆𑀕𑀳𑁂𑀦𑀸’’𑀢𑀺 𑀓𑀭𑀡𑀢𑁆𑀣𑁂. 𑀏𑀢𑁆𑀣 𑀘 𑀬𑁂𑀦 𑀬𑁂𑀦 𑀲𑀗𑁆𑀕𑀸𑀳𑀓𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀼 𑀢𑁂𑀦 𑀢𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀸𑀲𑀗𑁆𑀕𑀳𑁂𑀢𑀩𑁆𑀩𑀁 𑀅𑀜𑁆𑀜𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀉𑀤𑁆𑀥𑀝𑀁. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀧𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 ¶ , 𑀦 𑀘 𑀲𑁄 𑀏𑀯 𑀢𑀲𑁆𑀲 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀯𑀸 𑀳𑁄𑀢𑀺. 𑀬𑀜𑁆𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀦 𑀢𑀲𑁆𑀲𑁂𑀯 𑀢𑁂𑀦 𑀲𑀗𑁆𑀕𑀳𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑁂𑀦 𑀯𑀸 𑀕𑀳𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄.

𑀬𑀤𑀺 𑀘 𑀲𑁄 𑀏𑀯 𑀢𑁂𑀦 𑀲𑀗𑁆𑀕𑀬𑁆𑀳𑁂𑀬𑁆𑀬, 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑁋 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 ¶ 𑀲𑀗𑁆𑀕𑀳𑀺𑀢𑀸 𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀜𑁆𑀘 𑀦 𑀳𑁄𑀢𑀺, 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄 𑀘 𑀦 𑀳𑁄𑀢𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸𑀢𑀺. 𑀢𑁂𑀦𑁂𑀯 𑀦 𑀏𑀓𑀤𑁂𑀲𑀸 𑀯𑀺𑀬 𑀲𑀫𑀼𑀤𑀸𑀬𑀲𑁆𑀲, 𑀲𑀫𑀼𑀤𑀸𑀬𑁄 𑀏𑀓𑀤𑁂𑀲𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘. 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁, 𑀥𑀫𑁆𑀫𑀸𑀬𑀢𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁, 𑀲𑀭𑀡𑀸 𑀥𑀫𑁆𑀫𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀜𑁆𑀳𑀺 𑀏𑀓𑀤𑁂𑀲𑀸𑀦𑀁 𑀦 𑀯𑀺𑀪𑀸𑀕𑁄 𑀅𑀢𑁆𑀣𑀺, 𑀬𑁂𑀦 𑀢𑁂 𑀲𑀫𑀼𑀤𑀸𑀬𑀲𑁆𑀲 𑀲𑀫𑀼𑀤𑀸𑀬𑁄 𑀘 𑀢𑁂𑀲𑀁 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘 𑀲𑀺𑀬𑀸𑀢𑀺, 𑀢𑀣𑀸 𑀦 𑀲𑀫𑀼𑀤𑀸𑀬𑁄 𑀏𑀓𑀤𑁂𑀲𑀲𑀪𑀸𑀕𑀯𑀺𑀲𑀪𑀸𑀕𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘. 𑀬𑀣𑀸 𑀥𑀫𑁆𑀫𑀸𑀬𑀢𑀦𑀁 𑀲𑀼𑀔𑀼𑀫𑀭𑀽𑀧𑀲𑀪𑀸𑀕𑀲𑁆𑀲 𑀯𑁂𑀤𑀦𑀸𑀤𑀺𑀯𑀺𑀲𑀪𑀸𑀕𑀲𑁆𑀲 𑀘 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑁂𑀦, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀲𑀪𑀸𑀕𑀯𑀺𑀲𑀪𑀸𑀕𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀘 𑀚𑀻𑀯𑀺𑀢𑀯𑀚𑁆𑀚𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑁂𑀦𑁂𑀯. 𑀦 𑀳𑀺 𑀏𑀓𑀤𑁂𑀲𑀲𑀪𑀸𑀕𑀁 𑀲𑀫𑀼𑀤𑀸𑀬𑀲𑀪𑀸𑀕𑀁, 𑀦𑀸𑀧𑀺 𑀏𑀓𑀤𑁂𑀲𑀯𑀺𑀲𑀪𑀸𑀕𑀁 𑀲𑀫𑀼𑀤𑀸𑀬𑀯𑀺𑀲𑀪𑀸𑀕𑀦𑁆𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀅𑀢𑁆𑀢𑀢𑁄 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀢𑁄 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀢𑁄 𑀘 𑀅𑀜𑁆𑀜𑀲𑁆𑀲 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀲𑀗𑁆𑀕𑀸𑀳𑀓𑀢𑁆𑀢𑀫𑁂𑀯 𑀏𑀢𑁂𑀲𑀁 𑀦𑀢𑁆𑀣𑀺, 𑀬𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀸 𑀲𑀺𑀬𑀼𑀦𑁆𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀏𑀯𑀭𑀽𑀧𑀸𑀦𑀁 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀦 ‘‘𑀥𑀫𑁆𑀫𑀸𑀬𑀢𑀦𑀁 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁨𑁫), ‘‘𑀘𑀓𑁆𑀔𑀸𑀬𑀢𑀦𑀜𑁆𑀘 𑀲𑁄𑀢𑀸𑀬𑀢𑀦𑀜𑁆𑀘 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁨𑁬) 𑀘 𑀯𑀼𑀢𑁆𑀢𑀁, 𑀦 𑀢𑁂𑀦 𑀏𑀓𑀤𑁂𑀲𑀸𑀦𑀁 𑀲𑀫𑀼𑀤𑀸𑀬𑀲𑀗𑁆𑀕𑀸𑀳𑀓𑀢𑁆𑀢𑀁, 𑀲𑀫𑀼𑀤𑀸𑀬𑀲𑁆𑀲 𑀘 𑀏𑀓𑀤𑁂𑀲𑀲𑀗𑁆𑀕𑀸𑀳𑀓𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀺 𑀧𑀦 𑀥𑀫𑁆𑀫𑀸𑀬𑀢𑀦𑀲𑁆𑀲 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑁂𑀦 𑀧𑀜𑁆𑀘𑀥𑀸 𑀪𑀺𑀦𑁆𑀦𑀢𑀁, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀏𑀓𑀓𑁆𑀔𑀦𑁆𑀥𑀕𑀡𑀦𑁂𑀦 𑀕𑀡𑁂𑀢𑀩𑁆𑀩𑀢𑀸𑀬 𑀏𑀓𑀯𑀺𑀥𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸𑀦𑀁 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀸𑀦𑀁 𑀢𑀁𑀢𑀁𑀕𑀡𑀦𑁂𑀳𑀺 𑀕𑀡𑀦𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑀺 𑀧𑀞𑀫𑀦𑀬𑁄 𑀓𑀫𑁆𑀫𑀓𑀭𑀡𑀫𑀢𑁆𑀢𑀲𑀩𑁆𑀪𑀸𑀯𑀸, 𑀤𑀼𑀢𑀺𑀬𑀸𑀤𑀬𑁄 𑀧𑀦 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑁂𑀳𑀺 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀸𑀦𑀁 𑀅𑀕𑀡𑀦𑀸𑀤𑀺𑀤𑀲𑁆𑀲𑀦𑀸𑀦𑀺 𑀓𑀢𑁆𑀢𑀼𑀓𑀭𑀡𑀓𑀫𑁆𑀫𑀢𑁆𑀢𑀬𑀲𑀩𑁆𑀪𑀸𑀯𑀸 ¶ . 𑀢𑀣𑀸 𑀧𑀞𑀫𑀦𑀬𑁂 𑀢𑀣𑀸 𑀢𑀣𑀸 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁄 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 ¶ , 𑀤𑀼𑀢𑀺𑀬𑀸𑀤𑀻𑀲𑀼 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀁 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀲𑀪𑀸𑀕𑀢𑀸, 𑀢𑀤𑀪𑀸𑀯𑁄 𑀘 𑀯𑀺𑀲𑀪𑀸𑀕𑀢𑀸. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀏𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺.

𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀤𑀺𑀲𑀸𑀦𑀺 𑀧𑀦 𑀢𑁂𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀫𑁂𑀯 𑀅𑀢𑁆𑀣𑀺, 𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀲𑀤𑀺𑀲𑀸𑀦𑀺 𑀢𑁂𑀳𑀺 𑀯𑀺𑀲𑀪𑀸𑀕𑀲𑀫𑀼𑀤𑀸𑀬𑀪𑀽𑀢𑁂𑀳𑀺 𑀅𑀦𑁂𑀓𑀓𑁆𑀔𑀦𑁆𑀥𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀁, 𑀇𑀢𑀭𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀜𑁆𑀘 𑀦𑀢𑁆𑀣𑀻𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄. 𑀏𑀯𑀁 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀉𑀪𑀬𑀸𑀪𑀸𑀯𑀢𑁄 𑀘 𑀬𑀣𑀸𑀯𑀼𑀢𑁆𑀢𑀲𑀤𑀺𑀲𑀸𑀦𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀪𑀸𑀯𑀢𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑁂𑀯 𑀉𑀤𑁆𑀥𑀝𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀘𑀓𑁆𑀔𑀸𑀬𑀢𑀦𑀯𑀚𑁆𑀚𑀸 𑀭𑀽𑀧𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺. 𑀦 𑀳𑀺 𑀏𑀓𑀤𑁂𑀲𑁄 𑀲𑀫𑀼𑀤𑀸𑀬𑀲𑀗𑁆𑀕𑀸𑀳𑀓𑁄𑀢𑀺 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀔𑀦𑁆𑀥𑀧𑀤𑁂𑀦𑀸𑀢𑀺 𑀔𑀦𑁆𑀥𑀧𑀤𑀲𑀗𑁆𑀕𑀳𑁂𑀦𑀸𑀢𑀺 𑀅𑀢𑁆𑀣𑁄, 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺. ‘‘𑀓𑁂𑀦𑀘𑀺 𑀲𑀗𑁆𑀕𑀸𑀳𑀓𑁂𑀦𑀸’’𑀢𑀺 𑀇𑀤𑀁 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀻𑀢𑀺 𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀲𑀗𑁆𑀕𑀸𑀳𑀓𑁂𑀲𑀼 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺…𑀧𑁂… 𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁂𑀦 𑀦𑀬𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄, 𑀲𑁄 𑀘 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺𑀧𑀺 𑀦 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺. 𑀦 𑀳𑀺 𑀅𑀜𑁆𑀜𑀫𑀢𑁆𑀢𑀦𑀺𑀯𑀸𑀭𑀡𑀁 𑀏𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, 𑀅𑀣 𑀔𑁄 𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀦𑀺𑀯𑀸𑀭𑀡𑀁. 𑀲𑁄 𑀘𑀸𑀢𑀺𑀆𑀤𑀺 𑀘 𑀦 𑀦𑀺𑀭𑀧𑁂𑀓𑁆𑀔𑀯𑀘𑀦𑀁, 𑀅𑀣 𑀔𑁄 𑀲𑀗𑁆𑀕𑀸𑀳𑀓𑀸𑀧𑁂𑀓𑁆𑀔𑀦𑁆𑀢𑀺. 𑀓𑀣𑀁? 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄𑀢𑀺 𑀬𑀣𑀸 𑀘𑀓𑁆𑀔𑀸𑀬𑀢𑀦𑁂𑀦 𑀘𑀓𑁆𑀔𑀸𑀬𑀢𑀦𑀢𑁄 𑀅𑀜𑁆𑀜𑀫𑁆𑀧𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁 𑀅𑀢𑁆𑀣𑀺, 𑀬𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀳𑁄𑀢𑀺, 𑀦 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑀢𑁄 𑀅𑀜𑁆𑀜𑀁 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁 𑀅𑀢𑁆𑀣𑀺, 𑀬𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀲𑀺𑀬𑀸, 𑀭𑀽𑀧𑀓𑁆𑀔𑀦𑁆𑀥𑁂𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀲𑀺𑀬𑀸 𑀧𑀦𑁂𑀢𑀁 ‘‘𑀲𑁄 𑀏𑀯 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀽’’𑀢𑀺, 𑀢𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀲𑁄 𑀘 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 ¶ . 𑀏𑀢𑁆𑀣 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 ¶ 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀸 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀦 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀬𑀼𑀚𑁆𑀚𑀢𑀺, 𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀢𑀸𑀬. 𑀦 𑀳𑀺 𑀲𑀸 𑀲𑀗𑁆𑀕𑀳𑀺𑀢𑀢𑀸 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑁄𑀧𑀺 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸. 𑀢𑁂𑀦 𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑁄 𑀢𑀤𑁂𑀓𑀤𑁂𑀲𑁄 𑀯𑀸 𑀲𑀗𑁆𑀕𑀳𑀺𑀢𑀸 𑀲𑀺𑀬𑀼𑀁, 𑀅𑀢𑁆𑀣𑀺 𑀘 𑀢𑁂𑀲𑀁 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺.

𑀏𑀯𑀁 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺, 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀯𑀺𑀬 𑀏𑀢𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀲𑀗𑁆𑀕𑀳𑀺𑀢𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀬𑀣𑀸 𑀯𑀸 𑀢𑀣𑀸 𑀯𑀸 𑀏𑀢𑀸𑀦𑀺 𑀯𑀺𑀬 𑀅𑀬𑀼𑀚𑁆𑀚𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀏𑀯𑀭𑀽𑀧𑀸𑀦𑀺 𑀧𑀤𑀸𑀦𑀺 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀕𑀳𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄’’𑀢𑀺, 𑀢𑀁 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀦𑀺𑀯𑀸𑀭𑀺𑀢𑀁. 𑀬𑀜𑁆𑀳𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀲𑀢𑀺𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑁂 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀁 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀼 𑀬𑀼𑀚𑁆𑀚𑁂𑀬𑁆𑀬 𑀲𑀢𑀺 𑀢𑁂𑀳𑀺 𑀲𑀗𑁆𑀕𑀳𑀺𑀢𑁂 𑀢𑀤𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀧𑀦 𑀲𑀗𑁆𑀕𑀳𑀺𑀢𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀢𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑀸 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑁄 𑀏𑀯𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀁. 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀁 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀲𑁆𑀲 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀲𑁆𑀲 𑀘 𑀦𑀢𑁆𑀣𑀺, 𑀅𑀜𑁆𑀜𑀲𑁆𑀲 𑀧𑀦 𑀅𑀢𑁆𑀣𑀻𑀢𑀺 𑀦 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀲𑀼 𑀯𑀺𑀬 𑀉𑀪𑀬𑀸𑀪𑀸𑀯𑁄 𑀘𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘 𑀔𑀦𑁆𑀥𑀘𑀢𑀼𑀓𑁆𑀓𑀤𑀼𑀓𑀸𑀤𑀺𑀲𑀗𑁆𑀕𑀸𑀳𑀓𑀢𑁆𑀢𑁂 𑀲𑀢𑀺 𑀦 𑀢𑁂𑀲𑀁 𑀲𑀗𑁆𑀕𑀳𑀺𑀢𑀸𑀦𑀁 𑀢𑁂𑀳𑀺 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀢𑀸 𑀦𑀢𑁆𑀣𑀻𑀢𑀺 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀅𑀦𑁂𑀓𑀦𑁆𑀢𑀺𑀓𑁄, 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀕𑁆𑀕𑀳𑀺𑀢𑀸𑀦𑀁 𑀅𑀕𑁆𑀕𑀳𑀡𑁂, 𑀕𑀳𑀺𑀢𑀸𑀦𑀜𑁆𑀘 𑀕𑀳𑀡𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀦𑀺𑀤𑀲𑁆𑀲𑀦𑀁 𑀧𑀼𑀦𑀤𑁂𑀯 𑀲𑀧𑁆𑀧𑀝𑀺𑀖𑀦𑁆𑀢𑀺 𑀏𑀢𑁆𑀣 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑀏𑀢𑁂𑀦 ‘‘𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑁂𑀦 𑀲𑀧𑁆𑀧𑀝𑀺𑀖𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 ¶ 𑀤𑀲𑁆𑀲𑀺𑀢𑀸. 𑀧𑀼𑀦𑀤𑁂𑀯𑀸𑀢𑀺 𑀏𑀢𑁂𑀦 𑀢𑀢𑁆𑀣𑁂𑀯 𑀅𑀯𑀺𑀲𑀺𑀝𑁆𑀞𑀁 𑀲𑀦𑀺𑀤𑀲𑁆𑀲𑀦𑀧𑀤𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀦𑀺𑀤𑀲𑁆𑀲𑀦𑀤𑀼𑀓𑀧𑀤𑀁 𑀤𑀲𑁆𑀲𑁂𑀢𑀺. ‘‘𑀘𑀓𑁆𑀔𑀸𑀬𑀢𑀦𑁂𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑁂𑀓𑀁 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀇𑀤𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 ‘‘𑀘𑀓𑁆𑀔𑀸𑀬𑀢𑀦𑁂𑀦 ¶ 𑀘𑀓𑁆𑀔𑀸𑀬𑀢𑀦𑀁 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 ‘‘𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀲𑁆𑀲𑁂𑀯 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀜𑁆𑀘 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀘𑀦𑁂𑀲𑀼 𑀅𑀲𑀗𑁆𑀕𑀸𑀳𑀓𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀘𑀦𑁂𑀲𑀼 𑀘 𑀢𑀤𑀯𑀢𑁆𑀢𑀩𑁆𑀩𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀳𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺.

𑀤𑀼𑀢𑀺𑀬𑀦𑀬𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁯. 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑁂𑀲𑀼 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀲𑀼𑀔𑀼𑀫𑀭𑀽𑀧𑁂𑀦 𑀲𑀳 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑁂 𑀲𑀢𑀺𑀧𑀺 𑀦 𑀲𑀼𑀔𑀼𑀫𑀭𑀽𑀧𑀫𑁂𑀯 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑁂𑀦 𑀢𑀸𑀦𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀦 𑀓𑁂𑀯𑀮𑀁 𑀲𑀗𑁆𑀕𑀳𑀺𑀢𑀸𑀦𑁂𑀯, 𑀅𑀲𑀗𑁆𑀕𑀳𑀺𑀢𑀸𑀦𑀺𑀧𑀺 𑀢𑁂𑀦 𑀢𑀸𑀦𑀺 𑀢𑁂𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀳𑁄𑀦𑁆𑀢𑁂𑀯 𑀢𑀤𑁂𑀓𑀤𑁂𑀲𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑀸, 𑀲𑀗𑁆𑀕𑀳𑀺𑀢𑀸𑀪𑀸𑀯𑁄 𑀏𑀯 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀧𑀦 𑀅𑀲𑀗𑁆𑀕𑀳𑀺𑀢𑀸 𑀦 𑀢𑁂 𑀢𑁂𑀳𑀺 𑀓𑀣𑀜𑁆𑀘𑀺 𑀲𑀫𑁆𑀫𑀺𑀲𑁆𑀲𑀸𑀢𑀺 𑀲𑀩𑁆𑀩𑀣𑀸 𑀢𑁂 𑀢𑁂𑀳𑀺 𑀦 𑀲𑀗𑁆𑀕𑀳𑀺𑀢𑀸. 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺 𑀘 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀬 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁 𑀢𑁂𑀳𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀏𑀯𑀭𑀽𑀧𑀸𑀦𑀁 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀦𑀺𑀩𑁆𑀩𑀸𑀦𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑀸𑀦𑀁 𑀧𑀦 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀻𑀦𑀁 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀯. 𑀦 𑀳𑀺 𑀢𑀁 𑀓𑀜𑁆𑀘𑀺 𑀅𑀢𑁆𑀣𑀺, 𑀬𑀲𑁆𑀲 𑀢𑁂 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀸𑀳𑀓𑀸 𑀲𑀺𑀬𑀼𑀁, 𑀦 𑀘 𑀅𑀢𑁆𑀢𑀦𑁄 𑀏𑀓𑀤𑁂𑀲𑁄 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄 𑀘 𑀅𑀢𑁆𑀢𑀦𑀸 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀢𑀦𑀸 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀸𑀳𑀓𑀢𑁆𑀢𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀳𑀡𑀁 𑀓𑀢𑀦𑁆𑀢𑀺.

𑀬𑀁 ¶ 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀬𑁂 𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺, 𑀢𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀥𑀫𑁆𑀫𑀸𑀬𑀢𑀦𑁂𑀦 𑀳𑀺 𑀦 𑀓𑁄𑀘𑀺 𑀥𑀫𑁆𑀫𑁄 𑀓𑁂𑀦𑀘𑀺 𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑀺 𑀯𑀺𑀲𑀪𑀸𑀕𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀲𑀫𑀼𑀤𑀸𑀬𑀢𑁆𑀢𑀸 ¶ , 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀦 𑀳𑁄𑀢𑀻𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀘 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺 𑀏𑀢𑀲𑁆𑀲 𑀥𑀫𑁆𑀫𑀸𑀬𑀢𑀦𑀕𑀡𑀦𑁂𑀦 𑀕𑀡𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀸𑀦𑀺…𑀧𑁂… 𑀕𑀳𑀺𑀢𑀸𑀦𑀻𑀢𑀺 𑀏𑀢𑁂𑀦 𑀯𑀺𑀜𑁆𑀜𑀸𑀡𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀇𑀤𑁆𑀥𑀺𑀧𑀸𑀤𑀸𑀤𑀺𑀧𑀤𑀸𑀦𑀺, 𑀑𑀴𑀸𑀭𑀺𑀓𑀭𑀽𑀧𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀥𑀫𑁆𑀫𑀸𑀬𑀢𑀦𑀁 𑀅𑀤𑀻𑀧𑁂𑀦𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑀤𑀸𑀦𑀺, 𑀲𑀓𑀮𑀥𑀫𑁆𑀫𑀸𑀬𑀢𑀦𑀤𑀻𑀧𑀓𑀸𑀦𑀺 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀅𑀜𑁆𑀜𑀸𑀬𑀢𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑀺𑀬𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁧. 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀬𑀣𑀸 𑀤𑀼𑀢𑀺𑀬𑀢𑀢𑀺𑀬𑀦𑀬𑀸 𑀢𑀺𑀡𑁆𑀡𑀁 𑀲𑀗𑁆𑀕𑀳𑀸𑀦𑀁 𑀲𑀗𑁆𑀕𑀳𑀡𑀸𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀅𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 𑀉𑀤𑁆𑀤𑀺𑀝𑁆𑀞𑀸, 𑀦𑁂𑀯𑀁 𑀘𑀢𑀼𑀢𑁆𑀣𑀧𑀜𑁆𑀘𑀫𑀸. 𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁 𑀉𑀤𑁆𑀤𑀺𑀝𑁆𑀞𑀁, 𑀅𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀘 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑁂 𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀲𑀗𑁆𑀕𑀳𑀺𑀢𑀥𑀫𑁆𑀫𑀯𑀺𑀲𑁂𑀲𑁂 𑀦𑀺𑀲𑁆𑀲𑀺𑀢𑀸 𑀏𑀢𑁂 𑀤𑁆𑀯𑁂 𑀦𑀬𑀸𑀢𑀺 𑀏𑀢𑁆𑀣 𑀓𑁂𑀦𑀘𑀺 𑀲𑀗𑁆𑀕𑀳𑀺𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘, 𑀢𑀫𑁂𑀯 𑀢𑀸𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀲𑀗𑁆𑀕𑀳𑀺𑀢𑀸’’𑀢𑀺 𑀆𑀳. 𑀏𑀢𑁆𑀣 𑀘 𑀬𑁂 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀸𑀳𑀓𑀸 𑀭𑀽𑀧𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀺 𑀯𑀺𑀬, 𑀬𑁂 𑀘 𑀤𑁆𑀯𑀻𑀳𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀯𑀺𑀬, 𑀬𑁂 𑀘 𑀏𑀓𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦𑁂𑀯 𑀥𑀸𑀢𑀼𑀲𑀗𑁆𑀕𑀳𑁂𑀦𑁂𑀯 𑀘 𑀦 𑀲𑀗𑁆𑀕𑀸𑀳𑀓𑀸 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀦𑀺𑀭𑁄𑀥𑀲𑀘𑁆𑀘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀯𑀺𑀬 𑀘, 𑀢𑁂 𑀥𑀫𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀲𑀩𑁆𑀪𑀸𑀯𑀸 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀢𑀻𑀳𑀺𑀧𑀺 𑀧𑀦 𑀲𑀗𑁆𑀕𑀳𑁂𑀳𑀺 ¶ 𑀬𑁂 𑀲𑀗𑁆𑀕𑀸𑀳𑀓𑀸, 𑀢𑁂 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄 𑀇𑀥 𑀉𑀤𑁆𑀥𑀝𑀸. 𑀢𑁂𑀳𑀺 𑀲𑀗𑁆𑀕𑀳𑀺𑀢𑀸𑀧𑀺 𑀳𑀺 𑀏𑀓𑀦𑁆𑀢𑁂𑀦 ¶ 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀲𑁆𑀲 𑀲𑀗𑁆𑀕𑀸𑀳𑀓𑀸 𑀳𑁄𑀦𑁆𑀢𑀺, 𑀬𑀲𑁆𑀲 𑀧𑀼𑀦 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘𑀸𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀓𑀮𑁂𑀦 𑀳𑀺 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀲𑀓𑀮𑀯𑀸𑀘𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀬𑀁 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺, 𑀢𑀁 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀏𑀯𑀁 𑀅𑀬𑁄𑀚𑁂𑀢𑁆𑀯𑀸 𑀢𑀁 𑀅𑀜𑁆𑀜𑀁 𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀬𑁂𑀦 𑀬𑀁 𑀲𑀗𑁆𑀕𑀳𑀺𑀢𑀁, 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀦 𑀘 𑀢𑀲𑁆𑀲𑁂𑀯, 𑀅𑀣 𑀔𑁄 𑀢𑁂𑀦 𑀲𑀗𑁆𑀕𑀳𑀺𑀢𑀲𑁆𑀲𑀸𑀢𑀺. 𑀬𑀣𑀸 𑀯𑁂𑀤𑀦𑀸 𑀲𑀤𑁆𑀤𑁄 𑀘 𑀔𑀦𑁆𑀥𑁄 𑀆𑀬𑀢𑀦𑀜𑁆𑀘, 𑀦 𑀏𑀯𑀁 𑀲𑀼𑀔𑀼𑀫𑀭𑀽𑀧𑀁, 𑀢𑀁 𑀧𑀦 𑀔𑀦𑁆𑀥𑀸𑀬𑀢𑀦𑀸𑀦𑀁 𑀏𑀓𑀤𑁂𑀲𑁄𑀯, 𑀢𑀲𑁆𑀫𑀸 ‘‘𑀲𑀼𑀔𑀼𑀫𑀭𑀽𑀧𑁂𑀓𑀤𑁂𑀲𑀁 𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀼𑀔𑀼𑀫𑀭𑀽𑀧𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀫𑁆𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 ‘‘𑀢𑀤𑁂𑀯 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀁, 𑀢𑁂 𑀥𑀫𑁆𑀫𑁂 𑀲𑀦𑁆𑀥𑀸𑀬𑀸’’𑀢𑀺, 𑀢𑀫𑁆𑀧𑀺 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑁄 𑀏𑀢𑁆𑀣 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀘, 𑀅𑀣 𑀔𑁄 𑀲𑀗𑁆𑀕𑀳𑁄𑀯, 𑀢𑀲𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀏𑀓𑁂𑀦 𑀔𑀦𑁆𑀥𑀕𑀡𑀦𑁂𑀦𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄, 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺. 𑀦 𑀳𑀺 𑀏𑀓𑁄 𑀔𑀦𑁆𑀥𑁄 𑀅𑀢𑁆𑀢𑀦𑁄 𑀏𑀓𑀤𑁂𑀲𑀲𑁆𑀲 𑀲𑀗𑁆𑀕𑀸𑀳𑀓𑁄𑀢𑀺.

𑀘𑀢𑀼𑀢𑁆𑀣𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁩. 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀲𑀼𑀔𑀼𑀫𑀭𑀽𑀧𑀯𑀺𑀜𑁆𑀜𑀸𑀡𑀲𑀳𑀺𑀢𑀥𑀫𑁆𑀫𑀲𑀫𑀼𑀤𑀸𑀬𑀸 𑀬𑁂 𑀢𑁂 𑀤𑀼𑀓𑁆𑀔𑀲𑀘𑁆𑀘𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀅𑀘𑁂𑀢𑀲𑀺𑀓𑀸𑀦𑀼𑀧𑀸𑀤𑀸𑀲𑀤𑀺𑀲𑀸 𑀲𑀢𑀺𑀧𑀺 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀲𑀗𑁆𑀕𑀳𑁂𑀳𑀺 𑀓𑁂𑀲𑀜𑁆𑀘𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀸 𑀦 𑀳𑁄𑀦𑁆𑀢𑀺, 𑀅𑀩𑁆𑀬𑀸𑀓𑀢𑀥𑀫𑁆𑀫𑀲𑀤𑀺𑀲𑀸 𑀓𑁂𑀦𑀘𑀺 𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺, 𑀢𑁂𑀦 𑀢𑁂 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀇𑀢𑀭𑁂 𑀧𑀦 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀉𑀤𑁆𑀥𑀝𑀸𑀢𑀺.

𑀬𑀁 ¶ ¶ 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀸𑀤𑀺𑀲𑁂𑀦 𑀳𑀺 𑀧𑀤𑁂𑀦 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀫𑀢𑁆𑀢𑀁 𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀓𑁆𑀔𑀲𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁂𑀲𑀼 𑀧𑀦 𑀅𑀲𑀗𑁆𑀕𑀸𑀳𑀓𑁂𑀲𑀼 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄𑀕𑀥𑀁, 𑀦 𑀘 𑀢𑀤𑁂𑀯 𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀦𑁆𑀢𑀺. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀢𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀓𑀢𑁂𑀳𑀺 𑀤𑀼𑀢𑀺𑀬𑀧𑀜𑁆𑀳𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀞𑀫𑀧𑀜𑁆𑀳𑀦𑀸𑀫𑀭𑀽𑀧𑀧𑀜𑁆𑀳𑀸𑀤𑀬𑁄 𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀤𑁂𑀯𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀓𑀧𑀤𑀁 𑀯𑀤𑀢𑀺, 𑀦 𑀦𑀺𑀤𑁆𑀥𑀸𑀭𑀺𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀥𑀫𑁆𑀫𑁂. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀸, 𑀦 𑀧𑀤𑁂𑀦 𑀲𑀭𑀽𑀧𑀢𑁄𑀢𑀺. 𑀢𑀢𑁆𑀣 𑀢𑀤𑁂𑀯𑀸𑀢𑀺 𑀏𑀯-𑀲𑀤𑁆𑀤𑁂𑀦 𑀦 𑀢𑀁 𑀓𑀤𑀸𑀘𑀺 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀉𑀤𑁆𑀥𑀝𑀲𑁆𑀲𑁂𑀯 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑁂 𑀦𑀺𑀬𑀢𑀢𑀁 𑀅𑀜𑁆𑀜𑀲𑁆𑀲 𑀘 𑀅𑀦𑀺𑀬𑀢𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀤𑁂𑀯 𑀬𑁂𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 𑀳𑀺 ‘‘𑀦𑀺𑀬𑀫𑀢𑁄’’𑀢𑀺 𑀲𑀓𑁆𑀓𑀸 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀼𑀦𑁆𑀢𑀺. 𑀅𑀣 𑀯𑀸 𑀢𑀤𑁂𑀯𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀫𑁂𑀯 𑀏𑀯𑀁𑀧𑀓𑀸𑀭𑀫𑁂𑀯 𑀳𑀼𑀢𑁆𑀯𑀸 𑀬𑁂𑀳𑀺 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀲𑁆𑀲 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀪𑀸𑀯𑁂𑀦 𑀏𑀯𑀁 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑀦𑀺𑀬𑀫𑀦𑀢𑁆𑀣𑁄 𑀏𑀯-𑀲𑀤𑁆𑀤𑁄, 𑀦 𑀅𑀜𑁆𑀜𑀲𑁆𑀲 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀢𑀸𑀦𑀺𑀯𑀸𑀭𑀡𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀜𑁆𑀳𑀺 𑀅𑀜𑁆𑀜𑀲𑀳𑀺𑀢𑀁 𑀅𑀲𑀳𑀺𑀢𑀜𑁆𑀘 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺 𑀳𑀺 𑀅𑀜𑁆𑀜𑀲𑀳𑀺𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀻𑀦𑀺 𑀅𑀲𑀳𑀺𑀢𑀸𑀦𑀻𑀢𑀺.

𑀅𑀯𑀲𑁂𑀲𑀸 𑀲𑀗𑁆𑀕𑀳𑀺𑀢𑀸𑀢𑀺 𑀇𑀤𑀁 𑀅𑀯𑀲𑁂𑀲𑀸 𑀅𑀲𑀗𑁆𑀕𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀳𑀺𑀧𑀺 𑀯𑀺𑀜𑁆𑀜𑀸𑀡𑀥𑀫𑁆𑀫𑁂𑀳𑀺 𑀢𑁂 𑀭𑀽𑀧𑀥𑀫𑁆𑀫𑀸𑀯 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀸 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀳𑀼𑀢𑁆𑀯𑀸 𑀅𑀲𑀗𑁆𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀤𑁆𑀥𑀝𑀸 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀅𑀲𑀗𑁆𑀕𑀳𑀺𑀢𑀸 𑀏𑀯𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑁂 𑀦𑀬𑁂 𑀯𑁂𑀤𑀦𑀸𑀤𑀬𑁄𑀧𑀺 𑀯𑀺𑀜𑁆𑀜𑀸𑀡𑁂𑀦 𑀅𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸, 𑀤𑀼𑀢𑀺𑀬𑁂 𑀭𑀽𑀧𑀥𑀫𑁆𑀫𑀸𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀯𑁂𑀤𑀦𑀸𑀤𑀬𑁄 𑀳𑀺 𑀭𑀽𑀧𑀯𑀺𑀜𑁆𑀜𑀸𑀡𑁂𑀳𑁂𑀯 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸𑀢𑀺 𑀑𑀴𑀸𑀭𑀺𑀓𑀭𑀽𑀧𑁂𑀳𑀺 𑀯𑀺𑀜𑁆𑀜𑀸𑀡𑁂𑀦 𑀘 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀭𑀽𑀧𑁂𑀓𑀤𑁂𑀲𑁄 𑀳𑀺 𑀏𑀢𑁆𑀣 𑀭𑀽𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀢𑀺.

𑁧𑁯𑁬. 𑀘𑀢𑀼𑀢𑁆𑀣𑀧𑀜𑁆𑀳𑁂 𑀘𑀓𑁆𑀔𑀸𑀬𑀢𑀦𑀁 𑀯𑁂𑀤𑀦𑀸𑀤𑀻𑀳𑀺 𑀘𑀢𑀽𑀳𑀻𑀢𑀺 𑀏𑀢𑁆𑀣 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀏𑀢𑁂𑀦 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀅𑀲𑀗𑁆𑀕𑀸𑀳𑀓𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀔𑀸𑀬𑀢𑀦𑁂𑀦 𑀧𑀦 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀤𑀲 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺 𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑀸𑀢𑀺. ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀢𑀁 𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀅𑀲𑀗𑁆𑀕𑀳𑀺𑀢𑁂𑀦 𑀢𑁂𑀦 ¶ 𑀅𑀲𑀗𑁆𑀕𑀳𑀺𑀢𑀜𑁆𑀘 𑀯𑀺𑀜𑁆𑀜𑀸𑀡𑀯𑀚𑁆𑀚𑀁 𑀲𑀩𑁆𑀩𑀁 𑀢𑁂𑀯 𑀥𑀫𑁆𑀫𑁂 𑀉𑀤𑀸𑀦𑁂𑀢𑀺. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸 𑀳𑀺 𑀏𑀓𑀢𑁄 𑀉𑀤𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀢𑀢𑁆𑀣 𑀧𑀞𑀫𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀏𑀓𑀢𑁄 𑀉𑀤𑀸𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑁂𑀲𑀼 𑀅𑀜𑁆𑀜𑁂 𑀯𑀺𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸 ¶ 𑀦𑀬𑀤𑀸𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦𑀦𑁆𑀢𑀺…𑀧𑁂… 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸’’𑀢𑀺. 𑀢𑀢𑁆𑀣 𑀤𑁆𑀯𑁂 𑀪𑀯𑀸𑀢𑀺 𑀅𑀲𑀜𑁆𑀜𑁂𑀓𑀯𑁄𑀓𑀸𑀭𑀪𑀯𑀸. 𑀤𑁆𑀯𑁂𑀢𑀺 𑀩𑀸𑀳𑀺𑀭𑀼𑀧𑀸𑀤𑀸𑀥𑀫𑁆𑀫𑁂 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂𑀦 𑀅𑀲𑀗𑁆𑀕𑀸𑀳𑀓𑁂𑀦 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀲𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑁄 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀜𑁆𑀘 𑀦𑀺𑀲𑁆𑀲𑀬𑀪𑀸𑀯𑀢𑁄 ‘‘𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄, 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀧𑀦 𑀉𑀤𑁆𑀤𑀸𑀦𑀲𑁆𑀲 𑀦𑀬𑀤𑀸𑀦𑀫𑀢𑁆𑀢𑀢𑁆𑀢𑀸 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑁂𑀯𑀻𑀲𑀦𑀬𑁄 𑀘𑀸’’𑀢𑀺𑀧𑀺 𑀧𑀸𑀞𑁄, 𑀤𑁆𑀯𑁂𑀯𑀻𑀲𑀧𑀤𑀺𑀓𑁄 𑀏𑀲 𑀦𑀬𑁄 𑀘𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀦𑀬𑁄 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸

𑁨𑁨𑁮. 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 𑀬𑀁 𑀮𑀩𑁆𑀪𑀢𑀺, 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀸𑀬 𑀕𑀳𑀺𑀢𑀦𑁆𑀢𑀺 𑀇𑀤𑀁 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺 𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑀫𑁆𑀧𑀬𑁄𑀕𑀧𑀤𑀁 𑀯𑀺𑀧𑁆𑀧𑀬𑁄𑀕𑀧𑀤𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀳𑀺 𑀬𑀁 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀁 𑀦 𑀮𑀩𑁆𑀪𑀢𑀺, 𑀢𑀁 𑀧𑀼𑀘𑁆𑀙𑀸𑀬𑀧𑀺 𑀦 𑀕𑀳𑀺𑀢𑀁. 𑀲𑀫𑁆𑀧𑀬𑁄𑀕𑀧𑀤𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀬 𑀕𑀳𑀺𑀢𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀁, 𑀯𑀺𑀧𑁆𑀧𑀬𑁄𑀕𑀧𑀤𑀁 𑀧𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀫𑁂𑀯𑀸𑀢𑀺. 𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀲𑀪𑀸𑀕𑀢𑀸𑀬 𑀅𑀪𑀸𑀯𑀢𑁄 𑀲𑀫𑁆𑀧𑀬𑁄𑀕𑀁 𑀦𑀺𑀯𑀸𑀭𑁂𑀦𑁆𑀢𑁂𑀦 𑀲𑀸 𑀏𑀯 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀏𑀢𑁂𑀲𑀁 𑀯𑀺𑀲𑀪𑀸𑀕𑀢𑀸𑀢𑀺 𑀢𑀤𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑁄𑀧𑀺 𑀦𑀺𑀯𑀸𑀭𑀺𑀢𑁄 𑀏𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀘𑀢𑀽𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸 𑀳𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀢𑁂𑀲𑀁 𑀢𑁂𑀳𑀺 𑀘 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀯𑀺𑀲𑀪𑀸𑀕𑀢𑀸 𑀘, 𑀦 𑀘 𑀭𑀽𑀧𑁂𑀓𑀤𑁂𑀲𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀲𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀅𑀢𑁆𑀣𑀺, 𑀬𑀸 𑀭𑀽𑀧𑁂𑀓𑀤𑁂𑀲𑁂𑀦 𑀭𑀽𑀧𑁂𑀓𑀤𑁂𑀲𑀦𑀺𑀩𑁆𑀩𑀸𑀦𑀸𑀦𑀁 𑀦𑀺𑀩𑁆𑀩𑀸𑀦𑁂𑀦 𑀘 𑀭𑀽𑀧𑀲𑁆𑀲 𑀯𑀺𑀲𑀪𑀸𑀕𑀢𑀸 𑀲𑀺𑀬𑀸. 𑀢𑁂𑀦𑁂𑀯 ‘‘𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀲𑀢𑁆𑀢𑀲𑀼 ¶ 𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀏𑀓𑀸𑀬𑀧𑀺 𑀅𑀯𑀺𑀧𑁆𑀧𑀬𑀼𑀢𑁆𑀢𑁂𑀢𑀺 𑀬𑀣𑀸 𑀭𑀽𑀧𑀪𑀯𑁄 𑀢𑀻𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀧𑀜𑁆𑀘𑀳𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀏𑀓𑀸𑀬 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂 𑀥𑀫𑁆𑀫𑁂 ¶ 𑀤𑀻𑀧𑁂𑀦𑁆𑀢𑀺, 𑀏𑀯𑀁 𑀅𑀤𑀻𑀧𑁂𑀢𑁆𑀯𑀸 𑀏𑀓𑀸𑀬𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀳𑁄𑀦𑁆𑀢𑁂 𑀲𑀢𑁆𑀢𑀳𑀺𑀧𑀺 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀧𑀺 𑀯𑀸 𑀢𑀸 𑀤𑀻𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀧𑁆𑀧𑀬𑀼𑀢𑁆𑀢𑁂𑀢𑀺 𑀳𑀺 𑀬𑁂 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺, 𑀢𑁂 𑀥𑀫𑁆𑀫𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀦 𑀲𑀫𑁆𑀧𑀬𑀼𑀢𑁆𑀢𑁂𑀢𑀺. 𑀢𑁂𑀦 𑀬𑀸𑀦𑀺 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀺 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀸𑀦𑀺, 𑀬𑀸𑀦𑀺 𑀘 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀳𑀺 𑀦𑀯𑀢𑁆𑀢𑀩𑁆𑀩𑀁 𑀤𑀻𑀧𑁂𑀦𑁆𑀢𑀺 𑀅𑀘𑁂𑀢𑀲𑀺𑀓𑀸𑀤𑀺𑀧𑀤𑀸𑀦𑀺, 𑀬𑀸𑀦𑀺 𑀘 𑀲𑀫𑁆𑀧𑀬𑀼𑀢𑁆𑀢𑀦𑀯𑀢𑁆𑀢𑀩𑁆𑀩𑀸𑀦𑀺 𑀤𑀻𑀧𑁂𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀤𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀥𑀫𑁆𑀫𑀤𑀻𑀧𑀓𑀸𑀦𑀁 𑀅𑀕𑁆𑀕𑀳𑀡𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀤𑀼𑀪𑀬𑀲𑀫𑀼𑀤𑀸𑀬𑀸𑀦𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀯𑀸 𑀅𑀢𑁆𑀣𑀻𑀢𑀺.

𑀬𑀤𑀺 𑀏𑀯𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀳𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑁄𑀪𑀬𑀥𑀫𑁆𑀫𑀸𑀢𑀺? 𑀦, 𑀬𑀣𑀸𑀯𑀼𑀢𑁆𑀢𑀲𑀫𑀼𑀤𑀸𑀬𑀸𑀦𑀁 𑀔𑀦𑁆𑀥𑀸𑀤𑀻𑀳𑁂𑀯 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀯𑀘𑀦𑀢𑁄. 𑀔𑀦𑁆𑀥𑀸𑀤𑀬𑁄 𑀳𑀺 𑀢𑀤𑁂𑀓𑀤𑁂𑀲𑀸 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸 𑀘, 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀜𑁆𑀘 𑀯𑀺𑀪𑀸𑀕𑀸𑀪𑀸𑀯𑀢𑁄 𑀦 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑁂𑀦 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀳𑁄𑀢𑀺. 𑀓𑀼𑀲𑀮𑀸 𑀧𑀦 𑀥𑀫𑁆𑀫𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀯𑀺𑀪𑀢𑁆𑀢𑀸, 𑀢𑁂 𑀘 𑀓𑀼𑀲𑀮𑁂𑀳𑀺, 𑀦 𑀢𑁂𑀲𑀁 𑀲𑀫𑀼𑀤𑀸𑀬𑁂𑀓𑀤𑁂𑀲𑀪𑀸𑀯𑁄 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀪𑀸𑀯𑁄 𑀯𑀸, 𑀢𑀲𑁆𑀫𑀸 𑀔𑀦𑁆𑀥𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀫𑀢𑁆𑀢𑁂𑀦 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂 𑀓𑀼𑀲𑀮𑁂𑀳𑀺 𑀇𑀢𑀭𑁂𑀲𑀁, 𑀇𑀢𑀭𑁂𑀳𑀺 𑀘 𑀓𑀼𑀲𑀮𑀸𑀦𑀁 𑀯𑀺𑀧𑁆𑀧𑀬𑁄𑀕𑁄 𑀦 𑀦 𑀳𑁄𑀢𑀺 𑀯𑀺𑀲𑀪𑀸𑀕𑀢𑀸𑀲𑀩𑁆𑀪𑀸𑀯𑀢𑁄𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀏𑀯𑀭𑀽𑀧𑁂𑀲𑀼.

𑀉𑀤𑁆𑀤𑀸𑀦𑁂 𑀧𑀦 𑀅𑀝𑁆𑀞𑀸𑀭𑀲 𑀢𑀢𑁄 𑀧𑀭𑁂𑀢𑀺 𑀇𑀤𑀁 ‘‘𑀲𑁄𑀴𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑁂𑀯𑀻𑀲𑀦𑁆𑀢𑀺 𑀇𑀤𑀜𑁆𑀘 ‘‘𑀏𑀓𑀯𑀻𑀲’’𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀘 𑀓𑀸𑀮𑀲𑀦𑁆𑀢𑀸𑀦𑀪𑁂𑀤𑀭𑀳𑀺𑀢𑀸𑀭𑀳𑀺𑀢𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀦𑀁 𑀏𑀓𑀤𑁂𑀲𑀸 𑀲𑀫𑀼𑀤𑀬𑀲𑀘𑁆𑀘𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀏𑀓𑀤𑁂𑀲𑀲𑀫𑁆𑀫𑀺𑀲𑁆𑀲𑀸 𑀘 𑀇𑀤𑁆𑀥𑀺𑀧𑀸𑀤𑀸𑀤𑀬𑁄 𑀅𑀦𑀸𑀭𑀫𑁆𑀫𑀡𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀘 𑀲𑀸𑀭𑀫𑁆𑀫𑀡𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 ¶ 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀘 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑀸 𑀏𑀯 𑀕𑀳𑀺𑀢𑀸𑀢𑀺 𑀢𑁂𑀳𑀺 𑀢𑁂 𑀓𑁂𑀳𑀺𑀘𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑁂𑀳𑀺 𑀬𑀣𑀸𑀬𑁄𑀕𑀁 𑀲𑀫𑁆𑀧𑀬𑁄𑀕𑀁 𑀯𑀺𑀧𑁆𑀧𑀬𑁄𑀕𑀜𑁆𑀘 𑀮𑀪𑀦𑁆𑀢𑀺. 𑀅𑀢𑁆𑀣𑀺 𑀳𑀺 𑀢𑁂𑀲𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀲𑀪𑀸𑀕𑀢𑀸 𑀯𑀺𑀲𑀪𑀸𑀕𑀢𑀸 𑀘𑀸𑀢𑀺. 𑀢𑁂𑀦 𑀢𑀢𑁆𑀣 𑀢𑀢𑁆𑀣 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀘, ‘‘𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀪𑀺𑀦𑁆𑀦𑀓𑀸𑀮𑀲𑀫𑀼𑀤𑀸𑀬𑀸 𑀏𑀯 𑀧𑀦 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀯𑀢𑁆𑀢𑀫𑀸𑀦𑀸 𑀘 𑀏𑀓𑁂𑀓𑀥𑀫𑁆𑀫𑀸 𑀏𑀯, 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀸𑀦𑀓𑀸𑀮𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀸𑀕𑀁 𑀓𑀭𑁄𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀘 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀘. 𑀢𑁂𑀦 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺, ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀘 𑀏𑀯𑀫𑀸𑀤𑀺 𑀦 𑀯𑀼𑀢𑁆𑀢𑀁, 𑀔𑀦𑁆𑀥𑀸𑀬𑀢𑀦𑀯𑀺𑀪𑀸𑀕𑀯𑀺𑀭𑀳𑀺𑀢𑀫𑁆𑀧𑀺 𑀧𑀦 𑀯𑀺𑀜𑁆𑀜𑀸𑀡𑀁 𑀥𑀸𑀢𑀼𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑁂𑀯𑀁 𑀇𑀦𑁆𑀤𑁆𑀭𑀺𑀬𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀬𑀣𑀸𑀬𑁄𑀕𑀁 𑀯𑀺𑀧𑁆𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄, 𑀦𑀸𑀯𑀺𑀪𑀢𑁆𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸𑀢𑀺.

𑁨𑁩𑁫. 𑀬𑀣𑀸 𑀢𑀁𑀲𑀫𑁆𑀧𑀬𑁄𑀕𑀻𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀲𑀫𑀼𑀤𑀬𑀲𑀘𑁆𑀘𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀢𑀁𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀢𑀻𑀳𑀺 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀯𑀺𑀪𑀸𑀕𑁂𑀳𑀺 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑀯𑀘𑀦𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸. 𑀯𑀺𑀪𑀸𑀕𑁂 𑀳𑀺 𑀲𑀢𑀺 𑀲𑀫𑀼𑀤𑀬𑀲𑀘𑁆𑀘𑀁 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑁄 𑀅𑀜𑁆𑀜𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 𑀯𑀺𑀪𑀸𑀕𑁂𑀦𑁂𑀯 𑀯𑀺𑀲𑀪𑀸𑀕𑀢𑀸𑀬 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀯𑀺𑀪𑀸𑀕𑀭𑀳𑀺𑀢𑁂𑀳𑀺 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀦 𑀬𑀼𑀢𑁆𑀢𑀁, 𑀢𑁂𑀳𑀺 𑀯𑀺𑀚𑁆𑀚𑀫𑀸𑀦𑁂𑀳𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀼𑀤𑀬𑀲𑁆𑀲 𑀯𑀺𑀲𑀪𑀸𑀕𑀪𑀸𑀯𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀯𑀺𑀬 𑀆𑀫𑀝𑁆𑀞𑀓𑀸𑀮𑀪𑁂𑀤𑀁 𑀦 𑀳𑁄𑀢𑀺 𑀲𑀗𑁆𑀔𑀢𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀉𑀤𑁆𑀥𑀭𑀻𑀬𑀢𑀺, 𑀢𑀜𑁆𑀘 𑀯𑀺𑀪𑀸𑀕𑀭𑀳𑀺𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀔𑀢𑁂𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀫𑁂𑀯 𑀦𑀺𑀲𑁆𑀲𑀸𑀬 𑀅𑀦𑀸𑀫𑀝𑁆𑀞𑀓𑀸𑀮𑀪𑁂𑀤𑁂 𑀅𑀢𑁆𑀣𑀺𑀢𑀸𑀬 𑀏𑀯 𑀦𑀺𑀲𑁆𑀲𑀺𑀢𑀩𑁆𑀩𑀢𑁆𑀢𑀸. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀺 𑀅𑀯𑀺𑀚𑁆𑀚𑀫𑀸𑀦𑁂𑀦, 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑁂𑀦, 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀅𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺, 𑀯𑀺𑀧𑁆𑀧𑀬𑁄𑀕𑁄 𑀧𑀦 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀪𑁂𑀤𑁂 𑀕𑀳𑀺𑀢𑁂 𑀢𑁂𑀦𑁂𑀯 𑀯𑀺𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯𑀸𑀢𑀺 𑀳𑁄𑀢𑀺 ¶ . 𑀪𑁂𑀤𑁂 𑀧𑀦 𑀅𑀕𑁆𑀕𑀳𑀺𑀢𑁂 𑀢𑁂𑀦 𑀢𑁂𑀦 𑀕𑀳𑀡𑁂𑀦 𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀢𑀺 𑀲𑀪𑀸𑀕𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀢𑀸𑀬 𑀏𑀯 𑀥𑀫𑁆𑀫𑀸𑀦𑀁 𑀲𑀪𑀸𑀕𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄 𑀯𑀺𑀚𑁆𑀚𑀫𑀸𑀦𑀢𑀸 𑀤𑀲𑁆𑀲𑀺𑀢𑀸𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀸 𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀢𑀺. 𑀢𑀲𑁆𑀲𑀸 𑀘 𑀕𑀳𑀺𑀢𑀢𑁆𑀢𑀸 𑀲𑀫𑁆𑀧𑀬𑁄𑀕𑁄𑀯 𑀮𑀩𑁆𑀪𑀢𑀺, 𑀦 𑀯𑀺𑀧𑁆𑀧𑀬𑁄𑀕𑁄, 𑀢𑀲𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀢𑁆𑀢𑁂𑀦𑀸𑀢𑀺. 𑀏𑀲 𑀦𑀬𑁄 𑀫𑀕𑁆𑀕𑀲𑀘𑁆𑀘𑀸𑀤𑀻𑀲𑀼𑀧𑀻𑀢𑀺.

𑁨𑁬𑁨. ‘‘𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀘𑀸𑀭𑀜𑁆𑀳𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀬𑁂 𑀧𑀥𑀸𑀦𑀸 𑀯𑀺𑀢𑀓𑁆𑀓𑁄 𑀯𑀺𑀬 𑀓𑁄𑀝𑁆𑀞𑀸𑀲𑀦𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀮𑀻𑀦𑀸, 𑀢𑁂 𑀏𑀯 𑀇𑀥 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀳𑀺 𑀅𑀦𑀦𑁆𑀢𑀭𑀦𑀬𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀻𑀢𑀺 ¶ 𑀢𑁂 𑀦 𑀕𑀳𑀺𑀢𑀸. 𑀤𑀲𑀫𑁄𑀲𑀸𑀦𑀦𑀬𑁂𑀲𑀼 𑀘 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄 𑀅𑀝𑁆𑀞𑀸𑀭𑀲𑀲𑀗𑁆𑀕𑀳𑀺𑀢𑁄 𑀘 𑀯𑀼𑀢𑁆𑀢𑁄. 𑀯𑀺𑀢𑀓𑁆𑀓𑀲𑀳𑀺𑀢𑁂𑀲𑀼𑀧𑀺 𑀧𑀦 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀲𑀩𑁆𑀩𑁂𑀧𑀺 𑀢𑁂 𑀯𑀺𑀘𑀸𑀭𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑁄 𑀳𑀺 𑀲𑀫𑀼𑀤𑀸𑀬𑁄 𑀯𑀺𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀲𑀫𑁆𑀧𑀬𑀼𑀢𑁆𑀢𑁄 𑀦 𑀳𑁄𑀢𑀺. 𑀦 𑀳𑀺 𑀢𑀤𑁂𑀓𑀤𑁂𑀲𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀢𑁄 𑀅𑀜𑁆𑀜𑁂𑀦 𑀲𑀫𑁆𑀧𑀬𑁄𑀕𑁄 𑀲𑀫𑀼𑀤𑀸𑀬𑀲𑁆𑀲 𑀳𑁄𑀢𑀺. 𑀬𑀣𑀸 𑀦𑀸𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀲𑀫𑀼𑀤𑀸𑀬𑀲𑁆𑀲 𑀇𑀤𑁆𑀥𑀺𑀧𑀸𑀤𑀲𑁆𑀲 𑀏𑀓𑀤𑁂𑀲𑀸𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄 𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀧𑀦 𑀢𑁂𑀲𑀼 𑀏𑀓𑁄𑀧𑀺 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀘 𑀅𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀫𑀼𑀤𑀸𑀬𑀲𑁆𑀲 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀯𑀺𑀘𑀸𑀭𑁂𑀦 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀫𑀼𑀤𑀸𑀬𑀲𑁆𑀲 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀦𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀤𑀻𑀦𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀬𑀣𑀸 𑀳𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 𑀓𑁂𑀘𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀓𑁂𑀘𑀺 𑀅𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦 𑀲𑀫𑀼𑀤𑀸𑀬𑁄 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄, 𑀦𑀸𑀧𑀺 𑀅𑀜𑁆𑀜𑁄 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁂𑀦 𑀲𑁄 𑀲𑀫𑀼𑀤𑀸𑀬𑁄 𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸𑀢𑀺 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀲𑀳𑁂𑀢𑀼𑀓𑀸𑀤𑀬𑁄𑀧𑀺. 𑀦 𑀧𑀦𑁂𑀯𑀁 𑀬𑁂𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑀫𑀼𑀤𑀸𑀬𑁄 𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸, 𑀢𑀁 𑀦𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀓𑀲𑁆𑀲𑀘𑀺 𑀯𑀺𑀘𑀸𑀭𑁂𑀦 ¶ 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀸, 𑀢𑀲𑁆𑀫𑀸 𑀢𑁂 ‘‘𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀦 𑀦 𑀯𑀢𑁆𑀢𑀩𑁆𑀩𑀸𑀢𑀺. 𑀲𑀩𑁆𑀩𑀢𑁆𑀣 𑀘 𑀏𑀓𑀥𑀫𑁆𑀫𑁂𑀧𑀺 𑀓𑁂𑀳𑀺𑀘𑀻𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀲𑀗𑁆𑀔𑀸𑀬 𑀅𑀦𑀺𑀬𑀫𑀺𑀢𑀢𑁆𑀢𑀸 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀙𑀝𑁆𑀞𑀦𑀬𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁦𑁬. 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀪𑀸𑀯𑀢𑁄 𑀦 𑀕𑀳𑀺𑀢𑀸. 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀦𑀺 𑀲𑀢𑀺𑀧𑀺 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁂, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀦 𑀳𑀺 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 ¶ 𑀢𑀢𑁄 𑀅𑀜𑁆𑀜𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀅𑀢𑁆𑀣𑀺. 𑀦𑀦𑀼 𑀘 𑀢𑁂 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀟𑁆𑀠𑀤𑀼𑀢𑀺𑀬𑀸𑀦𑀺 𑀆𑀬𑀢𑀦𑀸𑀦𑀺 𑀅𑀟𑁆𑀠𑀤𑀼𑀢𑀺𑀬𑀸 𑀥𑀸𑀢𑀼𑀬𑁄 𑀘 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀢𑀤𑀜𑁆𑀜𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀺𑀪𑀸𑀯𑀢𑁄. 𑀦 𑀳𑀺 𑀢𑁂 𑀏𑀯 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀅𑀣 𑀔𑁄 𑀢𑁂 𑀘 𑀢𑀢𑁄 𑀅𑀜𑁆𑀜𑁂 𑀘, 𑀢𑀣𑀸 𑀅𑀟𑁆𑀠𑀤𑀼𑀢𑀺𑀬𑀸𑀬𑀢𑀦𑀥𑀸𑀢𑀼𑀬𑁄𑀧𑀺. 𑀦 𑀘 𑀢𑀤𑀜𑁆𑀜𑀲𑀫𑀼𑀤𑀸𑀬𑁂𑀳𑀺 𑀅𑀜𑁆𑀜𑁂 𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀁 𑀏𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸𑀦𑀜𑁆𑀘 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀏𑀲 𑀦𑀬𑁄 𑀫𑀕𑁆𑀕𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼𑀧𑀺 𑀦𑀺𑀭𑀯𑀲𑁂𑀲𑁂𑀲𑀼 𑀅𑀥𑀺𑀧𑁆𑀧𑁂𑀢𑁂𑀲𑀼 𑀢𑁂𑀲𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀭𑀽𑀧𑀸𑀦𑀻𑀢𑀺 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀬𑀼𑀚𑁆𑀚𑀢𑀺, 𑀏𑀯𑀁 𑀬𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀦 𑀬𑀼𑀚𑁆𑀚𑀢𑀺, 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀬𑁄𑀕𑁂𑀦 ‘‘𑀏𑀯𑀭𑀽𑀧𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀦 𑀲𑀫𑁆𑀧𑀬𑀼𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑀻𑀢𑀺 𑀏𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺 𑀤𑀲𑁆𑀲𑁂𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀫𑀦𑀸𑀬𑀢𑀦𑀸𑀤𑀺𑀧𑀤𑀸𑀦𑀺. 𑀢𑀢𑁆𑀣 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬𑀯𑁂𑀤𑀦𑀸𑀬𑀲𑀫𑁆𑀧𑀬𑀼𑀢𑁆𑀢𑀧𑀤𑀸𑀦𑀺𑀧𑀺 𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑁆𑀫𑀺𑀲𑁆𑀲𑀯𑀺𑀜𑁆𑀜𑀸𑀡𑀤𑀻𑀧𑀓𑀸𑀦𑀺 𑀇𑀥 𑀕𑀳𑀺𑀢𑀸𑀦𑀻𑀢𑀺. 𑀏𑀢𑁂𑀦 𑀘 𑀮𑀓𑁆𑀔𑀡𑁂𑀦 𑀏𑀯𑀭𑀽𑀧𑀸𑀦𑁂𑀯 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺, 𑀦 𑀏𑀯𑀭𑀽𑀧𑀸𑀦𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀇𑀤𑁆𑀥𑀺𑀧𑀸𑀤𑀸𑀤𑀺𑀧𑀤𑀸𑀦𑀁 ¶ 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀅𑀣 𑀨𑀲𑁆𑀲𑀲𑀢𑁆𑀢𑀓𑀁 𑀘𑀺𑀢𑁆𑀢𑀁 𑀲𑀳 𑀬𑀼𑀢𑁆𑀢𑀧𑀤𑁂𑀳𑀺 𑀲𑀢𑁆𑀢𑀸’’𑀢𑀺 𑀧𑀼𑀭𑀸𑀡𑀧𑀸𑀞𑁄, 𑀅𑀬𑀁 𑀧𑀦 𑀊𑀦𑁄𑀢𑀺 𑀓𑀢𑁆𑀯𑀸 ‘‘𑀅𑀣 𑀨𑀲𑁆𑀲𑀲𑀢𑁆𑀢𑀓𑀁, 𑀢𑀺𑀓𑁂 𑀢𑀬𑁄 𑀲𑀢𑁆𑀢 𑀫𑀳𑀦𑁆𑀢𑀭𑁂 𑀘𑀸’’𑀢𑀺 𑀧𑀸𑀞𑁄 𑀓𑀢𑁄.

𑁩𑁦𑁯. 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑀲𑁂𑀦𑀸𑀢𑀺 𑀇𑀤𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀴𑀺𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀤𑁆𑀯𑁂 𑀘 𑀫𑀦𑁂𑀦 𑀬𑀼𑀢𑁆𑀢𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀡𑀸𑀢𑀺 𑀫𑀦𑁄𑀥𑀸𑀢𑀼𑀬𑀸 𑀏𑀓𑀦𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀲𑀯𑀺𑀢𑀓𑁆𑀓𑀧𑀤𑀁 𑀲𑀯𑀺𑀘𑀸𑀭𑀧𑀤𑀜𑁆𑀘 𑀤𑀲𑁆𑀲𑁂𑀢𑀺.

𑀲𑀢𑁆𑀢𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁭. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 ¶ 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀦𑀢𑁆𑀣𑀻𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀅𑀯𑀢𑁆𑀯𑀸 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀓𑁂𑀦𑀘𑀺 𑀔𑀦𑁆𑀥𑀸𑀤𑀺𑀦𑀸 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀢𑀲𑁆𑀲 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀝𑁆𑀞𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁯. 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸𑀬𑀁 𑀬𑀁𑀔𑀦𑁆𑀥𑀸𑀤𑀺𑀯𑀲𑁂𑀦𑀸𑀢𑀺 𑀲𑀫𑀸𑀲𑀧𑀤𑀁 𑀇𑀤𑀁 𑀤𑀝𑁆𑀞𑀩𑁆𑀩𑀁, 𑀬𑀲𑁆𑀲 𑀔𑀦𑁆𑀥𑀸𑀤𑀺𑀦𑁄 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯𑀸𑀢𑀺 𑀘 𑀢𑀲𑁆𑀲𑁂𑀯 𑀔𑀦𑁆𑀥𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀇𑀥 𑀲𑀫𑁆𑀧𑀬𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀬𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀁, 𑀧𑀼𑀦 𑀢𑀲𑁆𑀲𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑁄 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁 ¶ . 𑀢𑀜𑁆𑀳𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 ‘‘𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀦𑁆𑀢𑀺. 𑀭𑀽𑀧𑁂𑀦 𑀯𑀸𑀢𑀺 𑀏𑀢𑁂𑀦 𑀦𑀺𑀭𑁄𑀥𑀲𑀘𑁆𑀘𑀅𑀧𑁆𑀧𑀘𑁆𑀘𑀬𑀅𑀲𑀗𑁆𑀔𑀢𑁂𑀳𑀺𑀧𑀺 𑀅𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀢𑀣𑀸 𑀭𑀽𑀧𑀫𑀺𑀲𑁆𑀲𑀓𑁂𑀳𑀺 𑀯𑀸𑀢𑀺 𑀏𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀸𑀦𑀫𑀺𑀲𑁆𑀲𑀓𑁂𑀳𑀺𑀧𑀺. 𑀯𑀓𑁆𑀔𑀢𑀺 𑀳𑀺 ‘‘𑀦𑀺𑀩𑁆𑀩𑀸𑀦𑀁 𑀧𑀦 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀫𑁂𑀯𑀸’’𑀢𑀺. 𑀲𑀩𑁆𑀩𑀸𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀻𑀢𑀺 𑀯𑀢𑁆𑀢𑀫𑀸𑀦𑀸𑀦𑀫𑁂𑀯 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀫𑀸𑀦𑁂𑀲𑀼 𑀏𑀓𑀫𑁆𑀧𑀺 𑀥𑀫𑁆𑀫𑀁 𑀅𑀦𑀧𑀦𑁂𑀢𑁆𑀯𑀸 𑀅𑀯𑀺𑀓𑀮𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀅𑀭𑀽𑀧𑀪𑀯𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀬𑁂 𑀲𑀫𑁆𑀧𑀬𑁄𑀕𑀁 𑀦 𑀮𑀪𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄, 𑀢𑁂 𑀲𑀩𑁆𑀩𑁂 𑀦 𑀕𑀳𑀺𑀢𑀸, 𑀇𑀢𑀭𑁂 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀲𑀩𑁆𑀩𑁂 𑀕𑀳𑀺𑀢𑀸𑀢𑀺.

𑀦𑀯𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁫𑁩. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 ¶ 𑀅𑀕𑁆𑀕𑀳𑀺𑀢𑁂𑀲𑀼 𑀥𑀫𑁆𑀫𑀸𑀬𑀢𑀦𑀸𑀤𑀺𑀥𑀫𑁆𑀫𑀸 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀸 𑀦 𑀕𑀳𑀺𑀢𑀸, 𑀤𑀼𑀓𑁆𑀔𑀲𑀘𑁆𑀘𑀘𑀢𑀼𑀫𑀳𑀸𑀪𑀯𑀅𑀩𑁆𑀬𑀸𑀓𑀢𑀸𑀤𑀺𑀥𑀫𑁆𑀫𑀸 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀫𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀏𑀓𑀸𑀤𑀲𑀫𑀦𑀬𑀯𑀡𑁆𑀡𑀦𑀸𑀬𑀁 ‘‘𑀢𑁂 𑀘 𑀲𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦 𑀫𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 ‘‘𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄. ‘‘𑀓𑁂𑀳𑀺𑀘𑀻’’𑀢𑀺 𑀏𑀢𑀲𑁆𑀲 𑀧𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀞𑀧𑁂𑀢𑁆𑀯𑀸 𑀢𑀡𑁆𑀳’’𑀦𑁆𑀢𑀺 𑀏𑀢𑁂𑀦 ‘‘𑀢𑁂 𑀘𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀥𑀫𑁆𑀫𑁂 𑀯𑀺𑀲𑁂𑀲𑁂𑀢𑁆𑀯𑀸 𑀢𑁂𑀲𑀁 𑀏𑀯 𑀯𑀺𑀲𑁂𑀲𑀺𑀢𑀸𑀦𑀁 𑀅𑀢𑁆𑀢𑀯𑀚𑁆𑀚𑁂𑀳𑀺 𑀲𑁂𑀲𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀢𑀡𑁆𑀳𑀸𑀬 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀢𑀡𑁆𑀳𑀸𑀬 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑀸𑀭𑀳𑁂𑀳𑀺 ¶ 𑀲𑀫𑁆𑀧𑀬𑀼𑀢𑁆𑀢𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺.

𑀏𑀓𑀸𑀤𑀲𑀫𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀤𑁆𑀯𑀸𑀤𑀲𑀫𑀦𑀬𑁂 𑀘 𑀦𑀯𑀫𑀦𑀬𑁂 𑀯𑀺𑀬 𑀲𑀫𑁆𑀧𑀬𑁄𑀕𑀸𑀭𑀳𑀸𑀯 𑀮𑀩𑁆𑀪𑀦𑁆𑀢𑀻𑀢𑀺 𑀆𑀳 ‘‘𑀢𑁂𑀬𑁂𑀯 𑀉𑀤𑁆𑀥𑀝𑀸’’𑀢𑀺.

𑀤𑁆𑀯𑀸𑀤𑀲𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁪𑁮. 𑀢𑁂𑀭𑀲𑀫𑀦𑀬𑀯𑀡𑁆𑀡𑀦𑀸𑀬𑀁 ¶ 𑀬𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀢𑁂 𑀧𑀸𑀴𑀺𑀬𑀁 ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀉𑀤𑁆𑀤𑀸𑀦𑀕𑀸𑀣𑀸𑀬 𑀤𑀲𑁆𑀲𑀺𑀢𑀸 𑀩𑀸𑀯𑀻𑀲 𑀥𑀫𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀧𑀜𑁆𑀳𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸. 𑀬𑁂𑀳𑀺 𑀧𑀦 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀅𑀭𑀽𑀧𑀪𑀯𑁂𑀦 𑀯𑀺𑀬 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑁂𑀯 𑀳𑁄𑀦𑁆𑀢𑀺, 𑀢𑁂 𑀯𑀼𑀢𑁆𑀢𑀸𑀯𑀲𑁂𑀲𑀸 𑀲𑀩𑁆𑀩𑁂 𑀇𑀥 𑀉𑀤𑁆𑀥𑀝𑀸 ‘‘𑀅𑀭𑀽𑀧𑀪𑀯𑁂𑀦 𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸. 𑀲𑁂𑀲𑀸𑀢𑀺 𑀲𑁂𑀲𑀸 𑀧𑀜𑁆𑀘𑀫𑀦𑀬𑁂 𑀆𑀕𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀇𑀥 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀭𑀼𑀳𑀦𑁆𑀢𑀻𑀢𑀺 𑀦 𑀉𑀤𑁆𑀥𑀝𑀸. 𑀬𑁂 𑀧𑀦 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀥𑀫𑁆𑀫𑀸, 𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀣𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀦 𑀭𑀼𑀳𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀲𑀫𑁆𑀧𑀬𑁄𑀕𑁂𑀳𑀺 𑀯𑁄𑀫𑀺𑀲𑁆𑀲𑀢𑀸𑀬 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀬𑀤𑀺 𑀧𑀦 𑀢𑁂 𑀓𑀤𑀸𑀘𑀺 𑀅𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑀸 𑀭𑀽𑀧𑀥𑀫𑁆𑀫𑀸 𑀘 𑀲𑀺𑀬𑀼𑀁, 𑀦 𑀢𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 ‘‘𑀯𑀺𑀧𑁆𑀧𑀬𑁄𑀕𑁄 𑀘 𑀦𑀢𑁆𑀣𑀻’’𑀢𑀺 𑀦 𑀯𑀼𑀢𑁆𑀢𑀁, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀢𑁆𑀣𑀺𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀬𑀸𑀪𑀸𑀯𑀢𑁄 𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀇𑀥 𑀦 𑀭𑀼𑀳𑀦𑁆𑀢𑀻𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀲𑀺𑀬𑀸 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀸 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 ¶ 𑀯𑀺𑀧𑁆𑀧𑀬𑁄𑀕𑁄 𑀘 𑀦𑀢𑁆𑀣𑀻’’𑀢𑀺. 𑀅𑀦𑀸𑀭𑀫𑁆𑀫𑀡𑀲𑀳𑀺𑀢𑀸𑀦𑀜𑁆𑀳𑀺 𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀤𑀼𑀪𑀬𑀥𑀫𑁆𑀫𑀸𑀦𑀜𑁆𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀺𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀅𑀭𑀼𑀳𑀡𑁂 𑀓𑀸𑀭𑀡𑀁. 𑀚𑀸𑀢𑀺𑀯𑀺𑀧𑁆𑀧𑀬𑁄𑀕𑀪𑀽𑀫𑀺𑀓𑀸𑀮𑀲𑀦𑁆𑀢𑀸𑀦𑀯𑀺𑀧𑁆𑀧𑀬𑁄𑀕𑀢𑁄 𑀘𑀢𑀼𑀩𑁆𑀩𑀺𑀥𑁄 𑀯𑀺𑀧𑁆𑀧𑀬𑁄𑀕𑁄. 𑀢𑀢𑁆𑀣 𑀚𑀸𑀢𑀺𑀯𑀺𑀧𑁆𑀧𑀬𑁄𑀕𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺, 𑀪𑀽𑀫𑀺𑀯𑀺𑀧𑁆𑀧𑀬𑁄𑀕𑁄 ‘‘𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸’’𑀢𑀺𑀆𑀤𑀺, 𑀓𑀸𑀮𑀯𑀺𑀧𑁆𑀧𑀬𑁄𑀕𑁄 ‘‘𑀅𑀢𑀻𑀢𑀸 𑀥𑀫𑁆𑀫𑀸, 𑀅𑀦𑀸𑀕𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺, 𑀲𑀦𑁆𑀢𑀸𑀦𑀯𑀺𑀧𑁆𑀧𑀬𑁄𑀕𑁄 ‘‘𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸 𑀥𑀫𑁆𑀫𑀸’’𑀢𑀺𑀆𑀤𑀺. 𑀏𑀯𑀁 𑀯𑀺𑀧𑁆𑀧𑀬𑁄𑀕𑁄 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀭𑀲𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁫𑁬. 𑀘𑀼𑀤𑁆𑀤𑀲𑀫𑀦𑀬𑁂 ¶ 𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀭𑀼𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀚𑀸𑀢𑀺𑀆𑀤𑀺𑀢𑁆𑀢𑀬𑀲𑁆𑀲 𑀘𑁂𑀢𑁆𑀣 𑀥𑀫𑁆𑀫𑀲𑀪𑀸𑀯𑀫𑀢𑁆𑀢𑀢𑁆𑀢𑀸 𑀦 𑀓𑀣𑀜𑁆𑀘𑀺 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘 𑀭𑀼𑀳𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀥𑀫𑁆𑀫𑀸𑀦𑀁 𑀲𑀩𑁆𑀩𑀥𑀫𑁆𑀫𑀲𑀫𑁄𑀥𑀸𑀦𑀢𑁆𑀢𑀸, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀤𑀻𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀥𑀫𑁆𑀫𑀸𑀯 𑀇𑀥 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀩𑁆𑀪𑀸𑀯𑀸 𑀕𑀳𑀺𑀢𑀸𑀢𑀺.

𑀧𑀸𑀴𑀺𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀲𑀫𑀼𑀘𑁆𑀙𑁂𑀤𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑁂 𑀦𑀬𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑁄𑀖𑀧𑀼𑀘𑁆𑀙𑀓𑁂𑀦 𑀘𑀸𑀢𑀺 𑀅𑀮𑀩𑁆𑀪𑀫𑀸𑀦𑀸 𑀘 𑀢𑁂 𑀫𑁄𑀖𑀧𑀼𑀘𑁆𑀙𑀓𑁂𑀦 𑀳𑁂𑀢𑀼𑀦𑀸 𑀦 𑀮𑀩𑁆𑀪𑀦𑁆𑀢𑀺 𑀢𑁂𑀲𑀁 𑀧𑀼𑀘𑁆𑀙𑀸𑀬 𑀫𑁄𑀖𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀫𑁄𑀖𑀧𑀼𑀘𑁆𑀙𑀓𑁄 𑀅𑀝𑁆𑀞𑀫𑁄 𑀦𑀬𑁄, 𑀢𑁂𑀦 𑀘 𑀲𑀳 𑀑𑀲𑀸𑀦𑀦𑀬𑁂 𑀏𑀢𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑁄𑀕𑀲𑁆𑀲𑀧𑀺 𑀅𑀪𑀸𑀯𑀸 𑀲𑀩𑁆𑀩𑀣𑀸𑀧𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀘𑀼𑀤𑁆𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀓𑀣𑀸𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀫𑀽𑀮𑀝𑀻𑀓𑀸

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀥𑀫𑁆𑀫𑀲𑀗𑁆𑀕𑀳𑁂 ¶ ¶ 𑀢𑀺𑀓𑀤𑀼𑀓𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀪𑀗𑁆𑀕𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀣𑀸𑀲𑀗𑁆𑀕𑀳𑀺𑀢𑀯𑀺𑀪𑀢𑁆𑀢𑀸𑀦𑀁 𑀥𑀸𑀢𑀼𑀓𑀣𑀸𑀬 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀧𑁆𑀧𑀪𑁂𑀤𑀁 𑀯𑀢𑁆𑀯𑀸 𑀬𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀢𑁂𑀲𑀁 𑀲𑀪𑀸𑀯𑀢𑁄 𑀉𑀧𑀸𑀤𑀸𑀬 𑀘 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺, 𑀢𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀆𑀭𑀤𑁆𑀥𑀸. 𑀢𑀢𑁆𑀣 𑀬𑁂 𑀥𑀫𑁆𑀫𑁂 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦 𑀉𑀧𑀸𑀤𑀸𑀬 ‘‘𑀧𑀼𑀕𑁆𑀕𑀮𑁄, 𑀇𑀢𑁆𑀣𑀻, 𑀧𑀼𑀭𑀺𑀲𑁄, 𑀤𑁂𑀯𑁄, 𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺𑀓𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀁 𑀅𑀜𑁆𑀜𑁂𑀲𑀜𑁆𑀘 𑀩𑀸𑀳𑀺𑀭𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀲𑀪𑀸𑀯𑀲𑀫𑀽𑀳𑀲𑀲𑀪𑀸𑀯𑀪𑁂𑀤𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀆𑀤𑀺𑀓𑀸 𑀧𑀜𑁆𑀘𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀬 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼 𑀯𑀺𑀪𑀢𑁆𑀢𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺. 𑀢𑀸𑀬 𑀘 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑀸𑀬 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀲𑀪𑀸𑀯𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀺𑀢𑁄 𑀧𑀥𑀸𑀦𑀸𑀬 ‘‘𑀯𑀺𑀳𑀸𑀭𑁄 𑀫𑀜𑁆𑀘𑁄’’𑀢𑀺𑀆𑀤𑀺𑀓𑀸 𑀘 𑀲𑀩𑁆𑀩𑀸 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀘. 𑀢𑀸 𑀏𑀯 𑀳𑀺 𑀯𑁄𑀫𑀺𑀲𑁆𑀲𑀸 𑀇𑀢𑀭𑀸 𑀘𑀢𑀲𑁆𑀲𑁄𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀤𑀲𑁆𑀲𑀦𑁂𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀻𑀲𑀼 𑀧𑀦 𑀙𑀲𑀼 𑀅𑀜𑁆𑀜𑀢𑁆𑀣 𑀅𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀁 𑀇𑀥𑁂𑀯 𑀘 𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁 𑀉𑀧𑀸𑀤𑀸𑀬 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀥𑀫𑁆𑀫𑁂 𑀇𑀥 𑀧𑀜𑁆𑀜𑀧𑁂𑀢𑀼𑀓𑀸𑀫𑁄𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀧𑀜𑁆𑀜𑀸𑀧𑀦𑀁 𑀓𑀭𑁄𑀢𑀺, 𑀯𑀢𑁆𑀣𑀽𑀳𑀺 𑀧𑀦 𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀻𑀢𑀺.

𑀔𑀦𑁆𑀥𑀸𑀢𑀺 ¶ 𑀧𑀜𑁆𑀜𑀸𑀧𑀦𑀸𑀢𑀺 𑀇𑀤𑀁 𑀔𑀦𑁆𑀥𑀸𑀢𑀺 𑀭𑀽𑀧𑀁 𑀧𑀣𑀯𑀻𑀢𑀺𑀆𑀤𑀺𑀓𑀸 𑀲𑀩𑁆𑀩𑀸𑀧𑀺 𑀲𑀸𑀫𑀜𑁆𑀜𑀧𑁆𑀧𑀪𑁂𑀤𑀧𑀜𑁆𑀜𑀸𑀧𑀦𑀸 𑀦𑀸𑀫 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀜𑁆𑀜𑀸𑀧𑀦𑀸𑀢𑀺 𑀏𑀢𑀲𑁆𑀲 𑀧𑀦 𑀤𑀲𑁆𑀲𑀦𑀸 𑀞𑀧𑀦𑀸𑀢𑀺 𑀏𑀢𑁂 𑀤𑁆𑀯𑁂 𑀅𑀢𑁆𑀣𑀸, 𑀢𑁂𑀲𑀁 𑀧𑀓𑀸𑀲𑀦𑀸 𑀦𑀺𑀓𑁆𑀔𑀺𑀧𑀦𑀸𑀢𑀺. 𑀢𑀢𑁆𑀣 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀇𑀤𑀫𑁂𑀯𑀁𑀦𑀸𑀫𑀓𑀁 𑀇𑀤𑀫𑁂𑀯𑀁𑀦𑀸𑀫𑀓𑀦𑁆𑀢𑀺 𑀢𑀁𑀢𑀁𑀓𑁄𑀝𑁆𑀞𑀸𑀲𑀺𑀓𑀓𑀭𑀡𑀁 𑀩𑁄𑀥𑀦𑀫𑁂𑀯 𑀦𑀺𑀓𑁆𑀔𑀺𑀧𑀦𑀸, 𑀦 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀁 𑀫𑀜𑁆𑀘𑀸𑀤𑀻𑀦𑀁 𑀯𑀺𑀬 𑀞𑀸𑀦𑀲𑀫𑁆𑀩𑀦𑁆𑀥𑀓𑀭𑀡𑀁. 𑀬𑁄 𑀧𑀦𑀸𑀬𑀁 ‘‘𑀦𑀸𑀫𑀧𑀜𑁆𑀜𑀢𑁆𑀢𑀺 𑀳𑀺 𑀤𑀲𑁆𑀲𑁂𑀢𑀺 𑀘 𑀞𑀧𑁂𑀢𑀺 𑀘𑀸’’𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀲𑁄 𑀪𑀸𑀯𑀪𑀽𑀢𑀸𑀬 𑀓𑀭𑀡𑀪𑀽𑀢𑀸𑀬 𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀺𑀝𑁆𑀞𑀢𑀸𑀬 𑀞𑀧𑀺𑀢𑀢𑀸𑀬 𑀘 𑀢𑀁𑀦𑀺𑀫𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺𑀦𑀸 𑀯𑀘𑀦𑁂𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑀁 𑀲𑀦𑁆𑀥𑀸𑀬 ‘‘𑀧𑀸𑀴𑀺𑀫𑀼𑀢𑁆𑀢𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑀸𑀓𑀼𑀲𑀮𑀲𑁆𑀲𑁂𑀯𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀯𑀺𑀬. 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀲𑀢𑁄𑀢𑀺, 𑀢𑀲𑁆𑀲 𑀅𑀢𑁆𑀣𑁄 𑀲𑀫𑁆𑀪𑀽𑀢𑀲𑁆𑀲𑀸𑀢𑀺. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁄𑀢𑀺 𑀯𑀸 𑀯𑀺𑀚𑁆𑀚𑀫𑀸𑀦𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀪𑀽𑀢𑀲𑁆𑀲𑀸’’𑀢𑀺. 𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀬𑀣𑀸 𑀓𑀼𑀲𑀮𑀸𑀤𑀻𑀦𑀺 𑀅𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑁄, 𑀨𑀲𑁆𑀲𑀸𑀤𑀬𑁄 𑀘 𑀯𑁂𑀤𑀦𑀸𑀤𑀺𑀲𑀪𑀸𑀯𑀢𑁄 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀸𑀦𑀺 𑀯𑀺𑀚𑁆𑀚𑀦𑁆𑀢𑀺, 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀉𑀧𑀮𑀤𑁆𑀥𑀺 𑀳𑁄𑀢𑀺, 𑀢𑁂 𑀅𑀧𑀦𑁂𑀢𑁆𑀯𑀸 𑀢𑁂𑀳𑀺 𑀯𑀺𑀦𑀺𑀯𑀢𑁆𑀢𑀲𑁆𑀲 𑀇𑀢𑁆𑀣𑀺𑀆𑀤𑀺𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀅𑀲𑀫𑁆𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑀲𑁆𑀲 ‘‘𑀢𑁂𑀦𑀸𑀓𑀸𑀭𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺 𑀅𑀢𑁆𑀣𑀁 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀜𑁆𑀜𑀢𑁆𑀢𑀺𑀤𑀼𑀓𑁂 𑀯𑀼𑀢𑁆𑀢𑀫𑁂𑀯. 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀪𑀸𑀯𑁂 𑀮𑁄𑀓𑀦𑀺𑀭𑀼𑀢𑁆𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀪𑀺𑀦𑀺𑀯𑁂𑀲𑁂𑀦 𑀘𑀺𑀢𑁆𑀢𑁂𑀦 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀕𑀳𑀡𑀲𑀩𑁆𑀪𑀸𑀯𑀸 ‘‘𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀲𑀺𑀤𑁆𑀥𑀲𑁆𑀲𑀸’’𑀢𑀺 𑀆𑀳. 𑀲𑀸𑀪𑀺𑀦𑀺𑀯𑁂𑀲𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀕𑀬𑁆𑀳𑀫𑀸𑀦𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀺𑀓𑀁 𑀦 𑀲𑀪𑀸𑀯𑀢𑁄, 𑀦𑀸𑀧𑀺 𑀲𑀗𑁆𑀓𑁂𑀢𑁂𑀦 𑀲𑀺𑀤𑁆𑀥𑀦𑁆𑀢𑀺 ‘‘𑀲𑀩𑁆𑀩𑀸𑀓𑀸𑀭𑁂𑀦𑀧𑀺 ¶ 𑀅𑀦𑀼𑀧𑀮𑀩𑁆𑀪𑀦𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀸𑀲𑀼 𑀇𑀫𑀲𑁆𑀫𑀺𑀁…𑀧𑁂… 𑀮𑀩𑁆𑀪𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀭𑀽𑀧𑀢𑁄 𑀢𑀺𑀲𑁆𑀲𑀦𑁆𑀦𑀁 𑀆𑀕𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀦 𑀅𑀝𑁆𑀞𑀓𑀣𑀸𑀦𑀬𑀲𑁆𑀲 𑀅𑀯𑀺𑀭𑁄𑀥𑁂𑀦 𑀆𑀘𑀭𑀺𑀬𑀯𑀸𑀤𑀸 𑀬𑁄𑀚𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀜𑁆𑀜𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑀲𑁆𑀲 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀧𑁂𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑀩𑁆𑀩𑀫𑁆𑀧𑀺 𑀳𑀺 𑀲𑀲𑀪𑀸𑀯𑀁 𑀢𑀚𑁆𑀚𑀧𑀭𑀫𑀢𑁆𑀣𑀦𑀸𑀫𑀮𑀸𑀪𑀢𑁄 𑀦 𑀧𑀭𑀢𑁄 𑀮𑀪𑀺𑀢𑀩𑁆𑀩𑀁 ¶ 𑀧𑀜𑁆𑀜𑀢𑁆𑀢𑀺𑀦𑀸𑀫𑀁 𑀮𑀪𑀢𑀺, 𑀦𑀺𑀲𑀪𑀸𑀯𑀁 𑀧𑀦 𑀲𑀪𑀸𑀯𑀸𑀪𑀸𑀯𑀢𑁄 𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀦𑀸𑀫𑀁 𑀮𑀪𑀢𑀻𑀢𑀺. 𑀲𑀢𑁆𑀢𑁄𑀢𑀺𑀆𑀤𑀺𑀓𑁂𑀦 𑀦𑀸𑀫𑁂𑀦 𑀧𑀜𑁆𑀜𑀧𑀺𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁 𑀮𑀪𑀢𑀺, 𑀦𑀺𑀲𑀪𑀸𑀯𑀸 𑀘 𑀲𑀢𑁆𑀢𑀸𑀤𑀬𑁄. 𑀦 𑀳𑀺 𑀲𑀲𑀪𑀸𑀯𑀲𑁆𑀲 𑀭𑀽𑀧𑀸𑀤𑀻𑀳𑀺 𑀏𑀓𑀢𑁆𑀢𑁂𑀦 𑀅𑀜𑁆𑀜𑀢𑁆𑀢𑁂𑀦 𑀯𑀸 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀢𑀸 𑀅𑀢𑁆𑀣𑀻𑀢𑀺.

𑀓𑀺𑀭𑀻𑀝𑀁 𑀫𑀓𑀼𑀝𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀺𑀭𑀻𑀝𑀻. 𑀏𑀢𑀲𑁆𑀫𑀺𑀜𑁆𑀘 𑀆𑀘𑀭𑀺𑀬𑀯𑀸𑀤𑁂 𑀅𑀦𑀽𑀦𑁂𑀦 𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀲𑀫𑁄𑀭𑁄𑀥𑁄 𑀓𑀸𑀢𑀩𑁆𑀩𑁄. 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺 𑀏𑀯𑀁𑀧𑀓𑀸𑀭𑀸 𑀳𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀧𑀜𑁆𑀜𑀢𑁆𑀢𑀺 𑀘 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸 𑀙𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀪𑀚𑀢𑀻𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁, 𑀇𑀢𑀭𑀸 𑀘 𑀬𑀣𑀸𑀬𑁄𑀕𑀁 𑀢𑀁 𑀢𑀁 𑀧𑀜𑁆𑀜𑀢𑁆𑀢𑀺𑀦𑁆𑀢𑀺. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺 𑀧𑀦 𑀲𑀗𑁆𑀔𑀸 𑀦𑀸𑀫 𑀓𑀸𑀘𑀺 𑀦𑀢𑁆𑀣𑀻𑀢𑀺 𑀢𑀸𑀲𑀁 𑀉𑀧𑀸𑀤𑀸𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁, 𑀇𑀢𑀭𑀸𑀲𑀜𑁆𑀘 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀻𑀦𑀁 𑀬𑀣𑀸𑀦𑀺𑀤𑀲𑁆𑀲𑀺𑀢𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀲𑁂𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘𑁂𑀯 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘 𑀪𑀚𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀻𑀦𑀁 𑀉𑀧𑀦𑀺𑀥𑀸𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀫𑁂𑀯 𑀫𑀜𑁆𑀜𑀢𑀺. 𑀬𑀜𑁆𑀳𑀺 𑀧𑀞𑀫𑀸𑀤𑀺𑀓𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀲𑁆𑀲 𑀘𑁂𑀓𑀸𑀤𑀺𑀓𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀜𑀸𑀧𑀻𑀬𑀢𑀺, 𑀢𑀜𑁆𑀘 𑀲𑀗𑁆𑀔𑀸𑀦𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺. 𑀢𑀣𑀸 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀘. 𑀦 𑀳𑀺 𑀅𑀲𑀻𑀢𑀺 𑀆𑀲𑀻𑀢𑀺𑀓𑁄 𑀘 𑀯𑀺𑀚𑁆𑀚𑀫𑀸𑀦𑁄𑀢𑀺.

𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀸𑀫𑀸𑀯𑀘𑀭𑀸𑀤𑀻 𑀳𑀺 𑀲𑀪𑀸𑀯𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑁄𑀢𑀺 𑀧𑀦 𑀑𑀓𑀸𑀲𑁂 𑀕𑀳𑀺𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀏𑀲𑀸 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀼 𑀕𑀳𑀺𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀣𑀸 𑀧𑀦 𑀯𑀘𑀦𑀲𑀗𑁆𑀔𑀸𑀢𑀸𑀬 𑀯𑀘𑀦𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀬 𑀯𑀸 𑀓𑀺𑀭𑀺𑀬𑀸𑀬 𑀪𑀸𑀡𑀓𑁄𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑀁 𑀪𑀚𑀢𑀺, 𑀏𑀯𑀁 𑀓𑀺𑀲𑁄 𑀣𑀽𑀮𑁄𑀢𑀺 𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑁂𑀦 𑀧𑀼𑀕𑁆𑀕𑀮𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀲𑀡𑁆𑀞𑀸𑀦𑀦𑁆𑀢𑀺 ¶ 𑀯𑀸 𑀭𑀽𑀧𑀸𑀬𑀢𑀦𑁂 𑀅𑀕𑁆𑀕𑀳𑀺𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀭𑀽𑀧𑀁 𑀨𑀲𑁆𑀲𑁄𑀢𑀺𑀆𑀤𑀺𑀓𑀸 𑀧𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀭𑀼𑀧𑁆𑀧𑀦𑀸𑀤𑀺𑀓𑀺𑀘𑁆𑀘𑀯𑀲𑁂𑀦 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀬𑀁, 𑀧𑀘𑁆𑀘𑀢𑁆𑀢𑀥𑀫𑁆𑀫𑀦𑀸𑀫𑀯𑀲𑁂𑀦 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀁 𑀯𑀸 𑀅𑀯𑀭𑁄𑀥𑁂𑀢𑀩𑁆𑀩𑀸. 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀲𑀼 𑀘 𑀯𑀼𑀢𑁆𑀢𑀸𑀲𑀼 𑀢𑀸𑀲𑀁 𑀯𑁄𑀫𑀺𑀲𑁆𑀲𑀢𑀸𑀯𑀲𑁂𑀦 ¶ 𑀧𑀯𑀢𑁆𑀢𑀸 𑀇𑀢𑀭𑀸𑀧𑀺 𑀯𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀆𑀘𑀭𑀺𑀬𑀯𑀸𑀤𑁄 𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁨. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀏𑀯𑀁 𑀧𑀸𑀴𑀺𑀬𑁄𑀚𑀦𑀁 𑀓𑀢𑁆𑀯𑀸 𑀲𑀗𑁆𑀔𑁂𑀧𑀧𑁆𑀧𑀪𑁂𑀤𑀯𑀲𑁂𑀦 𑀅𑀬𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺, ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀳𑀺 𑀇𑀫𑀲𑁆𑀲 𑀅𑀢𑁆𑀣𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀯𑀸’’𑀢𑀺 𑀏𑀢𑁂𑀦 𑀤𑀲𑁆𑀲𑀺𑀢𑁄, ‘‘𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀓𑀲𑁆𑀲 𑀧𑀦 ‘‘𑀧𑀪𑁂𑀤𑀢𑁄 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀓𑁂𑀦𑀸𑀢𑀺. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀢𑁂𑀦 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 ‘‘𑀢𑀢𑁆𑀭𑀸𑀧𑀺 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀸 𑀏𑀢𑁆𑀣 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀸 𑁋 ‘‘𑀬𑀸𑀯𑀢𑀸’’𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀬𑀢𑁆𑀢𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑀢𑁆𑀢𑀓𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺. 𑀬𑀢𑁆𑀢𑀓𑁄 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀢𑀧𑁆𑀧𑀪𑁂𑀤𑀸𑀦𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀪𑁂𑀤𑁄, 𑀢𑀢𑁆𑀢𑀓𑁄 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄𑀢𑀺 𑀧𑀓𑀭𑀡𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 𑀯𑀢𑁆𑀣𑀼𑀪𑁂𑀤𑁂𑀦 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 ‘‘𑀬𑀸𑀯𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑁭. 𑀏𑀓𑀤𑁂𑀲𑁂𑀦𑁂𑀯𑀸𑀢𑀺 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀛𑀸𑀦𑀗𑁆𑀕𑀸𑀦𑁂𑀯 ¶ ¶ 𑀯𑀺𑀫𑁄𑀓𑁆𑀔𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀺𑀫𑁄𑀓𑁆𑀔𑀲𑀳𑀚𑀸𑀢𑁂𑀦 𑀦𑀸𑀫𑀓𑀸𑀬𑁂𑀦𑀸’’𑀢𑀺. 𑀬𑁂𑀦 𑀳𑀺 𑀲𑀤𑁆𑀥𑀺𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀁 𑀯𑀺𑀯𑀭𑀢𑀺. 𑀨𑀲𑁆𑀲𑁂𑀦𑀧𑀺 𑀨𑀼𑀝𑁆𑀞𑀸𑀬𑁂𑀯 𑀦𑀸𑀫𑀸𑀢𑀺 𑀏𑀢𑁂𑀦 ‘‘𑀅𑀧𑀺𑀘𑁂𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀤𑀼𑀢𑀺𑀬𑀁 𑀲𑀫𑁆𑀨𑀲𑁆𑀲𑁂𑀦 𑀨𑀼𑀲𑀦𑀢𑁆𑀣𑀁, 𑀇𑀢𑀭𑁂𑀳𑀺 𑀇𑀢𑀭𑁂 𑀓𑀸𑀭𑀡𑀢𑁆𑀣𑁂. 𑀲𑀫𑀗𑁆𑀕𑀺𑀪𑀸𑀯𑀨𑀼𑀲𑀦𑀓𑀸𑀭𑀡𑀪𑀸𑀯𑀸 𑀳𑀺 𑀨𑀼𑀲𑀦𑀸𑀢𑀺 𑀯𑀼𑀢𑁆𑀢𑀸𑀢𑀺. 𑀧𑀼𑀦𑀧𑀺 𑀧𑀞𑀫𑀢𑁆𑀣𑀫𑁂𑀯 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀭𑀸𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀲𑁂𑀲𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸𑀢𑀺 𑀏𑀢𑁆𑀣 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀲𑀢𑀺 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀼𑀔𑀲𑁆𑀲 𑀨𑀼𑀲𑀺𑀢𑀩𑁆𑀩𑀢𑁆𑀢𑀸 𑀢𑀺𑀡𑁆𑀡𑀜𑁆𑀘 𑀢𑁂𑀲𑀁 𑀅𑀦𑀜𑁆𑀜𑀢𑁆𑀢𑀸 𑀢𑁂𑀦𑁂𑀯 𑀢𑀲𑁆𑀲 𑀨𑀼𑀲𑀦𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀯𑁂𑀤𑀬𑀺𑀢𑀸𑀥𑀺𑀧𑀢𑀺𑀬𑀝𑁆𑀞𑁂𑀳𑀺 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑀧𑀝𑀺𑀮𑀸𑀪𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀣 𑀯𑀸 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 𑀅𑀗𑁆𑀕𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁. 𑀢𑁂𑀲𑀼 𑀧𑀦 𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 ‘‘𑀯𑀺𑀢𑀓𑁆𑀓𑀁 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀲𑀼𑀔𑀁 𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀲𑁂𑀲𑀸 𑀢𑀬𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀇𑀢𑀭𑀸𑀲𑀼 𑀘𑀢𑁆𑀢𑀸𑀭𑁄𑀢𑀺. 𑀲𑀩𑁆𑀩𑀬𑁄𑀚𑀦𑀸𑀲𑀼 𑀘 𑀢𑀬𑁄 𑀅𑀦𑁆𑀢𑁄 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁨. 𑀬𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁂𑀦 𑀏𑀓𑀘𑁆𑀘𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑀽𑀧𑀦𑀺𑀲𑁆𑀲𑀬𑀮𑀸𑀪𑁂𑀦 𑀘 𑀲𑀸𑀢𑀺𑀲𑀬𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑁂𑀦, 𑀲𑁄 𑀏𑀯 𑀲𑀫𑀬𑀯𑀺𑀫𑀼𑀢𑁆𑀢𑁄. 𑀲𑁄 𑀳𑀺 𑀢𑁂𑀦 𑀯𑀺𑀫𑀼𑀢𑁆𑀢𑁄 𑀛𑀸𑀦𑀮𑀸𑀪𑀻 𑀲𑁂𑀓𑁆𑀔𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀅𑀧𑀼𑀦𑀭𑀸𑀯𑀝𑁆𑀝𑀓𑁄 𑀓𑀸𑀫𑀭𑀸𑀕𑀸𑀤𑀻𑀳𑀺 𑀢𑀣𑀸𑀯𑀺𑀫𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀛𑀸𑀦𑀮𑀸𑀪𑀻 𑀧𑀼𑀦𑀭𑀸𑀯𑀝𑁆𑀝𑀓𑀥𑀫𑁆𑀫𑁄 𑀧𑀼𑀦 𑀓𑀸𑀫𑀭𑀸𑀕𑀸𑀤𑀺𑀲𑀫𑀼𑀤𑀸𑀘𑀸𑀭𑀪𑀸𑀯𑀢𑁄 𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀦𑀸𑀭𑀳𑀢𑀺, 𑀢𑁂𑀦 𑀲𑁄 ¶ ‘‘𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺 𑀦 𑀯𑀼𑀢𑁆𑀢𑁄. 𑀅𑀭𑀳𑀢𑁄 𑀧𑀦 𑀅𑀧𑀭𑀺𑀓𑁆𑀔𑀻𑀡𑀸 𑀆𑀲𑀯𑀸 𑀦𑀢𑁆𑀣𑀺, 𑀬𑀢𑁄 𑀯𑀺𑀫𑀼𑀘𑁆𑀘𑁂𑀬𑁆𑀬. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀢𑁆𑀢𑀸 𑀳𑀺 𑀢𑀲𑁆𑀲 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀦 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑁆𑀲 𑀅𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑁆𑀲 𑀯𑀸 𑀓𑀸𑀭𑀡𑀁. 𑀢𑀤𑀓𑀸𑀭𑀡𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀼𑀁 ¶ ‘‘𑀦 𑀳𑁂𑀯 𑀔𑁄…𑀧𑁂… 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑁂𑀯 𑀅𑀲𑀫𑀬𑀯𑀺𑀫𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀧𑀺 𑀳𑀺 𑀅𑀭𑀳𑀸 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺. 𑀩𑀸𑀳𑀺𑀭𑀸𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀢𑁄 𑀩𑀳𑀺𑀪𑀽𑀢𑀸𑀦𑀁, 𑀮𑁄𑀓𑀺𑀬𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁩. 𑀅𑀭𑀽𑀧𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀫𑀢𑁆𑀢𑀯𑀸𑀘𑀓𑁄 𑀅𑀭𑀽𑀧𑀲𑀤𑁆𑀤𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀢𑁄 𑀅𑀜𑁆𑀜’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀫𑀜𑁆𑀚𑀽𑀲𑀦𑁆𑀢𑀺 𑀲𑀫𑀸𑀥𑀺𑀁. 𑀅𑀪𑀺𑀜𑁆𑀜𑀸𑀤𑀻𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀥𑀺 𑀫𑀜𑁆𑀚𑀽𑀲𑀸𑀲𑀤𑀺𑀲𑁄 𑀳𑁄𑀢𑀺. 𑀅𑀤𑁆𑀥𑀸𑀦𑀁 𑀨𑀭𑀺𑀢𑀼𑀦𑁆𑀢𑀺 𑀤𑀻𑀖𑀓𑀸𑀮𑀁 𑀩𑁆𑀬𑀸𑀧𑁂𑀢𑀼𑀁, 𑀧𑀯𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀫𑁆𑀫𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀆𑀤𑀭𑀲𑁆𑀲 𑀅𑀓𑀢𑀢𑁆𑀢𑀸 𑀯𑀢𑁆𑀢𑀪𑁂𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀢𑁆𑀢𑀪𑁂𑀤𑀫𑀢𑁆𑀢𑁂𑀦 𑀦𑀝𑁆𑀞𑀸 𑀧𑀦 𑀲𑀫𑀸𑀧𑀢𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀦𑀝𑁆𑀞𑀸 𑀯𑀺𑀬 𑀦 𑀓𑀺𑀜𑁆𑀘𑁂𑀦 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀸 𑀳𑁄𑀢𑀺 𑀫𑀦𑁆𑀤𑀧𑀸𑀭𑀺𑀧𑀦𑁆𑀣𑀓𑀢𑁆𑀢𑀸, 𑀢𑀲𑁆𑀫𑀸 𑀯𑀢𑁆𑀢𑀲𑀫𑀺𑀢𑀓𑀭𑀡𑀫𑀢𑁆𑀢𑁂𑀦𑁂𑀯 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀢𑁆𑀢𑀸 ‘‘𑀅𑀧𑁆𑀧𑁂𑀦𑁆𑀢𑁄𑀯 𑀦𑀺𑀲𑀻𑀤𑀻’’𑀢𑀺 𑀆𑀳.

𑁪. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀫𑀸𑀤𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀧𑀭𑀺𑀳𑀻𑀦𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀩𑁆𑀬𑀸𑀲𑀗𑁆𑀕𑁂 𑀧𑀝𑀺𑀲𑀁𑀳𑀝𑀫𑀢𑁆𑀢𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀺𑀲𑁆𑀲 𑀧𑀦, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑀸𑀬𑀸𑀢𑀺? 𑀬𑀸 𑀳𑀺𑀲𑁆𑀲 𑀲𑀸, 𑀆𑀦𑀦𑁆𑀤, 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀦𑀸𑀳𑀁 𑀢𑀲𑁆𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀺. 𑀬𑁂 𑀘 𑀔𑁆𑀯𑀲𑁆𑀲, 𑀆𑀦𑀦𑁆𑀤, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀅𑀥𑀺𑀕𑀢𑀸, 𑀢𑁂𑀲𑀸𑀳𑀫𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀻’’𑀢𑀺 𑀲𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁭𑁯) 𑀧𑀦 𑀲𑀫𑀬𑁂𑀦 𑀲𑀫𑀬𑀁 𑀆𑀧𑀚𑁆𑀚𑀦𑁂𑀦 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀯𑀺𑀳𑀸𑀭𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀩𑁆𑀬𑀸𑀲𑀗𑁆𑀕𑀓𑀸𑀮𑁂 𑀅𑀦𑀺𑀧𑁆𑀨𑀢𑁆𑀢𑀺𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀲𑁆𑀲 𑀢𑁂𑀦 𑀅𑀯𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁫. 𑀥𑀫𑁆𑀫𑀸𑀦𑀁…𑀧𑁂… 𑀧𑀻𑀢𑀺 𑀏𑀢𑁆𑀣 ‘‘𑀥𑀫𑁆𑀫𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀥 𑀳𑀺 𑀢𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀧𑀭𑀺𑀳𑀸𑀬𑁂𑀬𑁆𑀬𑀸𑀢𑀺 𑀥𑀫𑁆𑀫𑁂𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀳𑀸𑀦𑀫𑁆𑀧𑀺 𑀅𑀧𑀭𑀺𑀳𑀸𑀦𑀫𑁆𑀧𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀤𑀫𑀸𑀕𑀫𑁆𑀫 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀓𑀼𑀧𑁆𑀧𑁂𑀬𑁆𑀬𑀼𑀦𑁆𑀢𑀺 𑀥𑀫𑁆𑀫𑀸𑀦𑀁 𑀓𑀼𑀧𑁆𑀧𑀦𑀁 𑀅𑀓𑀼𑀧𑁆𑀧𑀦𑀜𑁆𑀘 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀧𑀭𑀺𑀳𑀸𑀦𑀥𑀫𑁆𑀫𑀸𑀦𑀫𑁂𑀯 ¶ 𑀯𑀺𑀦𑀸𑀲𑁄𑀢𑀺 𑀯𑀘𑀦𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀸 𑀧𑀭𑀺𑀬𑀸𑀬𑀦𑁆𑀢𑀭𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁭-𑁮. 𑀘𑁂𑀢𑀦𑀸 ¶ 𑀲𑀫𑀸𑀧𑀢𑁆𑀢𑀺𑀘𑁂𑀢𑀦𑀸 𑀢𑀤𑀸𑀬𑀽𑀳𑀦𑀸 𑀘. 𑀅𑀦𑀼𑀭𑀓𑁆𑀔𑀡𑀸 𑀲𑀫𑀸𑀧𑀢𑁆𑀢𑀺𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀧𑀜𑁆𑀜𑀸𑀲𑀳𑀺𑀢𑀸 𑀲𑀢𑀺. 𑀢𑀸𑀳𑀺 𑀘𑁂𑀢𑀺𑀬𑀫𑀸𑀦𑀅𑀦𑀼𑀭𑀓𑁆𑀔𑀺𑀬𑀫𑀸𑀦𑀲𑀫𑀸𑀧𑀢𑁆𑀢𑀻𑀦𑀁 𑀪𑀩𑁆𑀩𑀸 𑀘𑁂𑀢𑀦𑀸𑀪𑀩𑁆𑀩𑀸 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑀸.

𑁧𑁦. 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑀺𑀓𑁆𑀔𑀁, 𑀧𑀼𑀣𑀼𑀚𑁆𑀚𑀦𑀕𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀸 𑀳𑀺 𑀲𑀁𑀬𑁄𑀚𑀦𑀢𑁆𑀢𑀬𑀸𑀦𑀼𑀧𑀘𑁆𑀙𑁂𑀤𑁂𑀦 ‘‘𑀧𑀼𑀣𑀼𑀚𑁆𑀚𑀦𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑁧𑁧. 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀘 𑀯𑀝𑁆𑀝𑀪𑀬𑀢𑁄 𑀧𑀜𑁆𑀜𑀼𑀩𑁆𑀩𑁂𑀕𑁂𑀦 𑀉𑀩𑁆𑀩𑀺𑀚𑁆𑀚𑀦𑁆𑀢𑁄 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁂𑀳𑀺 𑀉𑀧𑀭𑀢𑁄𑀢𑀺 𑀪𑀬𑀽𑀧𑀭𑀢𑁄 𑀦𑀸𑀫𑀸𑀢𑀺 𑀆𑀳 ‘‘𑀲𑀢𑁆𑀢 𑀲𑁂𑀓𑁆𑀔𑀸 𑀪𑀬𑀽𑀧𑀭𑀢𑀸’’𑀢𑀺.

𑁧𑁨. 𑀪𑀯𑀗𑁆𑀕𑀧𑀜𑁆𑀜𑀸𑀯𑀺𑀭𑀳𑀺𑀢𑀸 ‘‘𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀇𑀫𑀺𑀦𑀸 𑀕𑀳𑀺𑀢𑀸𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀓𑁂𑀘𑀺 ‘‘𑀤𑀼𑀧𑁆𑀧𑀜𑁆𑀜𑀸’’𑀢𑀺 𑀇𑀫𑀺𑀦𑀸 𑀕𑀬𑁆𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑁆𑀧𑀝𑀺𑀮𑀤𑁆𑀥𑀫𑀕𑁆𑀕𑀨𑀮𑀽𑀧𑀦𑀺𑀲𑁆𑀲𑀬𑀸’’𑀢𑀺. 𑀧𑀜𑁆𑀜𑀸𑀬 𑀳𑀺 𑀯𑀺𑀦𑀸 𑀦 𑀢𑀤𑀼𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀻𑀢𑀺.

𑁧𑁪. 𑀬𑀢𑁆𑀣 𑀦𑀺𑀬𑀢𑀸𑀦𑀺𑀬𑀢𑀯𑁄𑀫𑀺𑀲𑁆𑀲𑀸 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀦𑀺𑀬𑀢𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀉𑀢𑁆𑀢𑀭𑀓𑀼𑀭𑀽𑀲𑀼 𑀢𑀤𑀪𑀸𑀯𑀸 𑀦𑀺𑀬𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸 𑀧𑀦 𑀉𑀢𑁆𑀢𑀭𑀓𑀼𑀭𑀼𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁬. 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀧𑀮𑀺𑀩𑁄𑀥𑀲𑀻𑀲𑀸𑀤𑀻𑀦𑀺 𑀧𑀯𑀢𑁆𑀢𑀲𑀻𑀲𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀺, 𑀅𑀥𑀺𑀫𑁄𑀓𑁆𑀔𑀲𑀻𑀲𑀸𑀤𑀻𑀦𑀺 𑀧𑀭𑀺𑀬𑀸𑀤𑀓𑀸𑀦𑀺, 𑀧𑀭𑀺𑀬𑀸𑀤𑀓𑀨𑀮𑀁 𑀕𑁄𑀘𑀭𑀲𑀻𑀲𑀁. 𑀢𑀜𑁆𑀳𑀺 𑀯𑀺𑀲𑀬𑀚𑁆𑀛𑀢𑁆𑀢𑀨𑀮𑀯𑀺𑀫𑁄𑀓𑁆𑀔𑁄𑀢𑀺. 𑀧𑀭𑀺𑀬𑀸𑀤𑀓𑀲𑁆𑀲 𑀫𑀕𑁆𑀕𑀲𑁆𑀲 𑀨𑀮𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀲𑀻𑀲𑀁 𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀁 𑀧𑀭𑀺𑀬𑀸𑀤𑀓𑀨𑀮𑀸𑀭𑀫𑁆𑀫𑀡𑀸𑀦𑀁 𑀲𑀳 𑀯𑀺𑀬 𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦 𑀲𑀫𑀲𑀻𑀲𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁮𑁭) 𑀢𑁂𑀭𑀲 𑀲𑀻𑀲𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀥 𑀧𑀦 ‘‘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘𑀸’’𑀢𑀺 𑀯𑀘𑀦𑀢𑁄 𑀢𑁂𑀲𑀼 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀫𑁂𑀯 𑀯𑀲𑁂𑀦 𑀬𑁄𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀢𑀢𑁆𑀣 𑀓𑀺𑀮𑁂𑀲𑀲𑀻𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀢𑁆𑀢𑀲𑀻𑀲𑀫𑁆𑀧𑀺 𑀯𑀝𑁆𑀝𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀫𑀕𑁆𑀕𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀺𑀬𑀢𑀺 ¶ , 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ¶ 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺 𑀆𑀳. 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀧𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁭𑁮; 𑀲𑀁. 𑀦𑀺. 𑁩.𑁧𑁨, 𑁧𑁪) 𑀯𑀘𑀦𑀢𑁄 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀲𑀫𑀸𑀧𑀦𑁂𑀦 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑀸𑀧𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀧𑀦 𑀧𑀭𑀺𑀲𑀫𑀸𑀧𑀦𑀁 𑀬𑀤𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀺, 𑀢𑁂𑀦𑁂𑀯 𑀚𑀻𑀯𑀺𑀢𑀧𑀭𑀺𑀲𑀫𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀘𑀼𑀢𑀺𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀸𑀘𑀭𑀺𑀫𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑀸𑀭𑀲𑀫𑀢𑀸𑀬𑀸’’𑀢𑀺. 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀏𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀫𑁂𑀯 𑀪𑀯𑀗𑁆𑀕𑁄𑀢𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁭. 𑀫𑀳𑀸𑀧𑀬𑁄𑀕𑁄𑀢𑀺 𑀫𑀳𑀸𑀓𑀺𑀭𑀺𑀬𑁄 𑀯𑀺𑀧𑀢𑁆𑀢𑀺𑀓𑀭𑀡𑀫𑀳𑀸𑀫𑁂𑀖𑀼𑀝𑁆𑀞𑀸𑀦𑀸𑀓𑀸𑀭𑀯𑀺𑀦𑀸𑀲𑁄. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀯𑀺𑀦𑀸𑀲𑁄 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁮. 𑀅𑀭𑀡𑀻𑀬𑀢𑁆𑀢𑀸𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁆𑀢𑀸.

𑁨𑁦. 𑀬𑀸𑀬 𑀓𑀢𑀓𑀺𑀘𑁆𑀘𑀢𑀸 𑀳𑁄𑀢𑀺, 𑀢𑀸𑀬 𑀅𑀕𑁆𑀕𑀯𑀺𑀚𑁆𑀚𑀸𑀬 𑀅𑀥𑀺𑀕𑀢𑀸𑀬 𑀢𑁂𑀯𑀺𑀚𑁆𑀚𑀢𑀸𑀪𑀸𑀯𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑀸, 𑀲𑀸 𑀘 𑀆𑀕𑀫𑀦𑀯𑀲𑁂𑀦 𑀲𑀺𑀤𑁆𑀥𑀸 𑀲𑀸𑀢𑀺𑀲𑀬𑀸 𑀢𑁂𑀯𑀺𑀚𑁆𑀚𑀢𑀸𑀢𑀺 𑀆𑀳 ‘‘𑀆𑀕𑀫𑀦𑀻𑀬𑀫𑁂𑀯 𑀥𑀼𑀭’’𑀦𑁆𑀢𑀺.

𑁨𑁨. 𑀢𑀢𑁆𑀣 𑀘𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑁂 𑀯𑀸. 𑀢𑀢𑁆𑀣𑁂𑀯 𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺.

𑁨𑁩. 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀲𑀘𑁆𑀘𑁂𑀲𑀽𑀢𑀺 𑀅𑀢𑁆𑀣𑁄.

𑁨𑁪. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀧𑀝𑀺. 𑀫. 𑁧.𑁨𑁦𑁯; 𑀥. 𑀲. 𑁨𑁪𑁮) 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀦𑁆𑀢𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀯𑀢𑁆𑀯𑀸 ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀬𑀤𑀺𑀧𑀺 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂 ¶ 𑀯𑀼𑀢𑁆𑀢𑀁, 𑀢𑀁 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀲𑁂𑀦 𑀲𑀩𑁆𑀩𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑀗𑁆𑀕𑀳𑀢𑁆𑀣𑀁 ‘‘𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀆𑀳. 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑁂 ¶ 𑀳𑀺 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸, 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁧𑁮𑁨) 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑁄 𑀘 𑀯𑀼𑀢𑁆𑀢𑀮𑀓𑁆𑀔𑀡𑁄𑀧𑀧𑀢𑁆𑀢𑀺𑀢𑁄𑀢𑀺. 𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄.

𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀦 𑀆𑀲𑀯𑀸 𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀦 𑀧𑀭𑀺𑀓𑁆𑀔𑀻𑀡𑀸 𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀼𑀢𑁆𑀢𑀸. 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸 𑀏𑀯 𑀳𑀺 𑀤𑀲𑁆𑀲𑀦𑀁 𑀧𑀼𑀭𑀺𑀫𑀓𑀺𑀭𑀺𑀬𑀸 𑀳𑁄𑀢𑀻𑀢𑀺. 𑀦𑀸𑀫𑀦𑀺𑀲𑁆𑀲𑀺𑀢𑀓𑁄 𑀏𑀲𑁄𑀢𑀺 𑀏𑀲𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀭𑀽𑀧𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀼𑀦 𑀢𑀢𑁄 𑀫𑀼𑀘𑁆𑀘𑀦𑀢𑁄 ‘‘𑀦𑀸𑀫𑀦𑀺𑀲𑁆𑀲𑀺𑀢𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘 𑀲𑀸𑀥𑀓𑀁 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀓𑀸𑀬𑀤𑁆𑀯𑀬𑀢𑁄 𑀲𑀼𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀆𑀳𑀸𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂 𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀉𑀧𑀲𑀻𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑀸 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀫𑀼𑀦𑀺 𑀅𑀓𑁆𑀔𑀸𑀢𑁄𑀢𑀺.

𑀧𑀞𑀫𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀉𑀪𑀢𑁄 𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺, 𑀢𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑀢𑁆𑀣 𑀯𑀺𑀫𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀦𑁂𑀳𑀺 𑀯𑀸 𑀓𑀸𑀬𑀤𑁆𑀯𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀽𑀧𑀸𑀯𑀘𑀭𑀁 𑀧𑀦 𑀦𑀸𑀫𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀳𑀺 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀦𑀸𑀫𑀓𑀸𑀬𑀢𑁄 𑀭𑀽𑀧𑀢𑀡𑁆𑀳𑀸𑀯𑀺𑀓𑁆𑀔𑀫𑁆𑀪𑀦𑁂𑀦 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀏𑀓𑀤𑁂𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀽𑀢𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀦𑀸𑀫𑀮𑀸𑀪𑀲𑁆𑀲 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫. 𑀏𑀢𑁂𑀲𑀼 𑀳𑀺 𑀏𑀓𑁄𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻 𑀦 𑀳𑁄𑀢𑀻𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀁 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀁 𑀏𑀓𑀫𑁆𑀧𑀺 𑀯𑀺𑀫𑁄𑀓𑁆𑀔𑀁 ¶ 𑀅𑀦𑀥𑀺𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀽𑀧𑀸𑀯𑀘𑀭𑁂𑀲𑀼 𑀳𑀺 𑀏𑀓𑀫𑁆𑀧𑀺 𑀅𑀥𑀺𑀕𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀓𑀸𑀭𑀡𑀧𑀝𑀺𑀮𑀸𑀪𑀢𑁄 𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦 𑀢𑁂𑀦 𑀢𑀁𑀦𑀸𑀫𑀤𑀸𑀦𑁂 ¶ 𑀲𑀫𑀢𑁆𑀣𑁂𑀦 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀧𑀦𑀸’’𑀢𑀺𑀆𑀤𑀺.

𑁨𑁬. 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀭𑁄𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁬𑁫) 𑀯𑀺𑀬 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄. 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 𑀯𑀺𑀫𑀼𑀢𑁆𑀢𑁄𑀢𑀺 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸.

𑁨𑁭. 𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄𑀢𑀺 𑀏𑀢𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀲𑁆𑀲 𑀧𑀢𑁆𑀢𑀢𑀁 𑀤𑀻𑀧𑁂𑀢𑀺. ‘‘𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀸 𑀧𑀸𑀞𑁄, 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺.

𑁨𑁮. 𑀇𑀫𑀁 𑀧𑀦 𑀦𑀬𑀁 ‘‘𑀦𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀧𑀜𑁆𑀜𑀸𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁, 𑀦 𑀧𑀦 𑀬𑁂𑀦 𑀯𑀺𑀲𑁂𑀲𑁂𑀦 𑀲𑁄 𑀯𑀺𑀲𑁂𑀲𑁄 𑀧𑀢𑁆𑀢𑁄, 𑀲𑁄 𑀯𑀼𑀢𑁆𑀢𑁄𑀢𑀺 𑀇𑀫𑀁 𑀤𑁄𑀲𑀁 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀕𑀫𑀝𑁆𑀞𑀓𑀣𑀸𑀲𑀽𑀢𑀺 𑀘 𑀯𑀘𑀦𑁂𑀦 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀯 𑀣𑀺𑀭𑀁 𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲𑀧𑀺 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁯. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀁 𑀲𑀸𑀢𑀺𑀲𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀕𑀫𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁧. 𑀏𑀯𑀁 ¶ 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀬𑀁 𑀅𑀧𑀺-𑀲𑀤𑁆𑀤𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄, 𑀦𑀦𑀼 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀳𑁄𑀢𑀻𑀢𑀺 𑀢𑀤𑀸 𑀏𑀯 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫𑀸𑀢𑀺 𑀆𑀧𑀦𑁆𑀦𑀦𑁆𑀢𑀺? 𑀦𑀸𑀧𑀦𑁆𑀦𑀁 ¶ . 𑀫𑀕𑁆𑀕𑁂𑀦 𑀳𑀺 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀸 𑀲𑀢𑁆𑀢𑀗𑁆𑀕𑀺𑀓𑀲𑁆𑀲 𑀯𑀸 𑀨𑀮𑀲𑁆𑀲 𑀲𑁄𑀢𑁄𑀢𑀺 𑀦𑀸𑀫𑀁 𑀤𑀺𑀦𑁆𑀦𑀦𑁆𑀢𑀺 𑀢𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀢𑁄, 𑀲𑁄𑀢𑁂𑀦 𑀯𑀸 𑀫𑀕𑁆𑀕𑁂𑀦 𑀧𑀯𑀢𑁆𑀢𑁂𑀢𑀼𑀁 𑀅𑀧𑀭𑀺𑀳𑀻𑀦𑁂𑀦 𑀨𑀮𑀝𑁆𑀞𑁄𑀧𑀺 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀦𑀸𑀫, 𑀦 𑀘 𑀢𑁂𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀲𑁄𑀢𑁄 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑁄, 𑀢𑀲𑁆𑀫𑀸 𑀲𑀫𑀸𑀧𑀦𑁆𑀦𑀲𑁄𑀢𑀢𑁆𑀢𑀸 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺 (𑀅. 𑀦𑀺. 𑁧𑁦.𑁬𑁪). 𑀢𑀢𑁆𑀣 𑀤𑀼𑀢𑀺𑀬𑀨𑀮𑀝𑁆𑀞𑀸𑀤𑀻𑀦𑀁 𑀯𑀺𑀲𑀼𑀁 𑀦𑀸𑀫𑀁 𑀅𑀢𑁆𑀣𑀻𑀢𑀺 𑀧𑀞𑀫𑀨𑀮𑀝𑁆𑀞𑁄 𑀏𑀯 𑀇𑀢𑀭𑁂𑀳𑀺 𑀯𑀺𑀲𑁂𑀲𑀺𑀬𑀫𑀸𑀦𑁄 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀲𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀧𑀝𑀺𑀮𑀤𑁆𑀥𑀫𑀕𑁆𑀕𑁂𑀦 𑀩𑀼𑀚𑁆𑀛𑀢𑀻𑀢𑀺 𑀏𑀢𑁂𑀦 𑀧𑀝𑀺𑀮𑀤𑁆𑀥𑀫𑀕𑁆𑀕𑀲𑁆𑀲 𑀘𑀢𑀼𑀲𑀘𑁆𑀘𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀳𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀕𑀢𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑁩𑁨. 𑀓𑁂𑀯𑀮𑁂𑀦 𑀓𑀼𑀮𑀲𑀤𑁆𑀤𑁂𑀦 𑀫𑀳𑀸𑀓𑀼𑀮𑀫𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀳𑀸𑀪𑁄𑀕𑀓𑀼𑀮𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑁩𑁩. 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀇𑀳𑀝𑁆𑀞𑀓𑀦𑀺𑀚𑁆𑀛𑀸𑀦𑀺𑀓𑀯𑀲𑁂𑀦𑁂𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀣𑀺𑀢𑀸𑀢𑀺 𑀲𑀚𑁆𑀛𑀸𑀦𑀓𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀲𑀫𑀼𑀘𑁆𑀙𑁂𑀤𑁂 𑀅𑀓𑀢𑁂𑀧𑀺 𑀅𑀦𑀸𑀕𑀸𑀫𑀺𑀲𑀪𑀸𑀕𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀇𑀥 𑀕𑀡𑀦𑀽𑀧𑀕𑁄 𑀦 𑀳𑁄𑀢𑀺, 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀲𑀁𑀲𑀭𑀡𑀓𑁄 𑀓𑀸𑀫𑀪𑀯𑀕𑀢𑁄 𑀳𑀻𑀦𑀚𑁆𑀛𑀸𑀦𑀓𑁄 𑀇𑀥 𑀕𑀡𑀦𑀽𑀧𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁪. 𑀬𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁩𑁬. 𑀉𑀧𑀧𑀦𑁆𑀦𑀁 𑀯𑀸 𑀲𑀫𑀦𑀦𑁆𑀢𑀭𑀸𑀢𑀺 𑀉𑀧𑀧𑀦𑁆𑀦𑀁 𑀯𑀸 𑀏𑀢𑁂𑀦 𑀧𑀼𑀕𑁆𑀕𑀮𑁂𑀦 𑀳𑁄𑀢𑀺, 𑀅𑀣 𑀲𑀫𑀦𑀦𑁆𑀢𑀭𑀸 𑀅𑀭𑀺𑀬𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀺. 𑀅𑀧𑁆𑀧𑀢𑁆𑀢𑀁 𑀯𑀸 𑀯𑁂𑀫𑀚𑁆𑀛𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀅𑀭𑀺𑀬𑀫𑀕𑁆𑀕𑀁 ¶ 𑀲𑀜𑁆𑀚𑀦𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀧𑁆𑀧𑀢𑁆𑀯𑀸 𑀧𑀩𑁆𑀩𑀢𑀁 𑀦𑀤𑀻’’𑀢𑀺 𑀯𑀺𑀬 𑀆𑀬𑀼𑀧𑁆𑀧𑀫𑀸𑀡𑀁 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀢𑀁 𑀯𑀸 𑀳𑀼𑀢𑁆𑀯𑀸𑀢𑀺 𑀧𑀭𑀲𑀤𑁆𑀤𑀬𑁄𑀕𑁂 𑀧𑀭𑀢𑁄 𑀪𑀽𑀢𑁄 𑀳𑀼𑀢𑁆𑀯𑀸 𑀲𑀤𑁆𑀤𑁄 𑀯𑀘𑀦𑀲𑁂𑀲𑀪𑀽𑀢𑁄 𑀧𑀬𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁭. 𑀉𑀧𑀳𑀘𑁆𑀘𑀸𑀢𑀺 ¶ 𑀏𑀢𑀲𑁆𑀲 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀢𑁂𑀦 𑀯𑁂𑀫𑀚𑁆𑀛𑀸𑀢𑀺𑀓𑁆𑀓𑀫𑁄 𑀓𑀸𑀮𑀓𑀺𑀭𑀺𑀬𑁄𑀧𑀕𑀫𑀦𑀜𑁆𑀘 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀫𑀚𑁆𑀛’’𑀦𑁆𑀢𑀺𑀆𑀤𑀺.

𑁪𑁦. 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦𑀸𑀢𑀺 𑀉𑀤𑁆𑀥𑀁 𑀯𑀳𑀢𑀻𑀢𑀺 𑀉𑀤𑁆𑀥𑀁𑀯𑀸𑀳𑀻, 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀁 𑀯𑀸, 𑀢𑀲𑁆𑀲 𑀪𑀸𑀯𑁄, 𑀢𑁂𑀦 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀳𑁂𑀲𑀼 𑀉𑀤𑁆𑀥𑀁𑀲𑁄𑀢𑁄 𑀬𑀤𑀺𑀧𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀦 𑀳𑁄𑀢𑀺, 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼, 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀦 𑀢𑀲𑁆𑀲 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀘 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀤𑀲 𑀅𑀦𑀸𑀕𑀸𑀫𑀺𑀦𑁄 𑀯𑀼𑀢𑁆𑀢𑀸, 𑀏𑀯𑀁 𑀅𑀢𑀧𑁆𑀧𑀸𑀤𑀻𑀲𑀼𑀧𑀺. 𑀅𑀦𑀼𑀧𑀳𑀘𑁆𑀘𑀢𑀮𑀸𑀢𑀺 𑀅𑀧𑁆𑀧𑀢𑁆𑀢𑀢𑀮𑀸. 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀮𑀳𑀼𑀲𑀸𑀮𑀳𑀼𑀲𑀕𑀢𑀺𑀓𑀸 𑀏𑀯 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀺𑀡𑀓𑀝𑁆𑀞𑀛𑀸𑀧𑀓𑀧𑀧𑁆𑀧𑀝𑀺𑀓𑀸𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀬𑀦𑀓𑀸𑀤𑀻𑀳𑀺 𑀅𑀥𑀺𑀫𑀢𑁆𑀢𑀢𑀸 𑀯𑀺𑀬 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀦𑀺𑀩𑁆𑀩𑀸𑀬𑀦𑀓𑀢𑁄 𑀅𑀦𑀥𑀺𑀫𑀢𑁆𑀢𑀢𑀸 𑀯𑀺𑀬 𑀘 𑀅𑀦𑁆𑀢𑀭𑀸 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀳𑀺 𑀉𑀤𑁆𑀥𑀁𑀲𑁄𑀢𑀢𑁄 𑀘 𑀅𑀥𑀺𑀫𑀢𑁆𑀢𑀸𑀦𑀥𑀺𑀫𑀢𑁆𑀢𑀢𑀸. 𑀢𑁂 𑀏𑀯 𑀳𑀺 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄𑀢𑀺. 𑀢𑀢𑁄 𑀫𑀳𑀦𑁆𑀢𑀢𑀭𑁂𑀢𑀺 𑀯𑀘𑀦𑀁 𑀢𑀺𑀡𑀓𑀝𑁆𑀞𑀛𑀸𑀧𑀦𑀲𑀫𑀢𑁆𑀣𑀧𑀧𑁆𑀧𑀝𑀺𑀓𑀸𑀤𑀲𑁆𑀲𑀦𑀢𑁆𑀣𑀁, 𑀦 𑀅𑀥𑀺𑀫𑀢𑁆𑀢 𑀦𑀸𑀥𑀺𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀦𑁆𑀢𑀺.

𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀓𑀁 𑀳𑁂𑀢𑀼𑀧𑀜𑁆𑀘𑀓𑀁 𑀦𑁄 𑀘 𑀅𑀲𑁆𑀲, 𑀯𑀺𑀜𑁆𑀜𑀸𑀡𑀸𑀤𑀺𑀓𑀁 𑀇𑀤𑀁 𑀨𑀮𑀧𑀜𑁆𑀘𑀓𑀁 𑀯𑀢𑁆𑀢𑀫𑀸𑀦𑀁 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀢𑀻𑀢𑀪𑀯𑀲𑀁𑀲𑀺𑀤𑁆𑀥𑀺𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑀢𑁄 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀔𑀦𑁆𑀥𑀸𑀦𑀁 𑀉𑀤𑀬𑀤𑀲𑁆𑀲𑀦𑀧𑀝𑀺𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀦 𑀪𑀯𑀺𑀲𑁆𑀲𑀢𑀺, 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀤𑀺 𑀏𑀢𑀭𑀳𑀺 𑀳𑁂𑀢𑀼𑀧𑀜𑁆𑀘𑀓𑀁 𑀦 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀨𑀮𑀧𑀜𑁆𑀘𑀓𑀁 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀬𑀤𑀲𑁆𑀲𑀦𑀧𑀝𑀺𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺, 𑀏𑀢𑀭𑀳𑀺 𑀅𑀦𑀸𑀕𑀢𑁂 𑀘 𑀅𑀢𑁆𑀢𑀢𑁆𑀢𑀦𑀺𑀬𑀦𑀺𑀯𑀸𑀭𑀡𑀯𑀲𑁂𑀦 𑀲𑀼𑀜𑁆𑀜𑀢𑀸𑀧𑀝𑀺𑀧𑀢𑁆𑀢𑀺 𑀯𑀸 𑀘𑀢𑀽𑀳𑀺𑀧𑀺 𑀯𑀼𑀢𑁆𑀢𑀸. 𑀬𑀤𑀢𑁆𑀣𑀻𑀢𑀺 𑀬𑀁 𑀅𑀢𑁆𑀣𑀺. 𑀪𑀽𑀢𑀦𑁆𑀢𑀺 𑀲𑀲𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑀁 𑀯𑀸 𑀬𑀣𑀸𑀤𑀺𑀝𑁆𑀞𑀉𑀤𑀬𑀩𑁆𑀩𑀬𑀁 𑀬𑀣𑀸𑀤𑀺𑀝𑁆𑀞𑀲𑀼𑀜𑁆𑀜𑀢𑀁 𑀯𑀸 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀓𑀧𑁆𑀧𑀺𑀢𑀇𑀢𑁆𑀣𑀺𑀧𑀼𑀭𑀺𑀲𑀲𑀢𑁆𑀢𑀸𑀤𑀺𑀪𑀸𑀯𑀭𑀳𑀺𑀢𑀁 𑀦𑀸𑀫𑀭𑀽𑀧𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀯𑀝𑁆𑀝𑀫𑀸𑀦𑀲𑁄 𑀢𑀁 𑀪𑀽𑀢𑀁 𑀧𑀚𑀳𑀸𑀫𑀻𑀢𑀺 ¶ 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑁂𑀦 𑀉𑀧𑁂𑀓𑁆𑀔𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀅𑀯𑀺𑀲𑀺𑀝𑁆𑀞𑁂 𑀯𑀺𑀲𑀺𑀝𑁆𑀞𑁂 𑀘 𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀧𑀦 𑀪𑀯𑁄 𑀪𑀯𑁄, 𑀅𑀦𑀸𑀕𑀢𑁄 𑀚𑀸𑀢𑀺𑀬𑀸 𑀕𑀳𑀡𑁂𑀦 𑀕𑀳𑀺𑀢𑁄 𑀲𑀫𑁆𑀪𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀪𑀯𑁄𑀢𑀺 𑀪𑀽𑀢𑀫𑁂𑀯 𑀯𑀼𑀘𑁆𑀘𑀢𑀺, 𑀲𑀫𑁆𑀪𑀯𑁄 𑀢𑀤𑀸𑀳𑀸𑀭𑁄, 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀦 𑀭𑀚𑁆𑀚𑀢𑀻𑀢𑀺 𑀲𑁂𑀓𑁆𑀔𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ¶ . 𑀪𑀽𑀢𑁂 𑀳𑀺 𑀲𑀲𑀫𑁆𑀪𑀯𑁂 𑀘 𑀯𑀺𑀭𑀸𑀕𑁄 𑀲𑁂𑀓𑁆𑀔𑀧𑀝𑀺𑀧𑀢𑁆𑀢𑀺. 𑀬𑀣𑀸𑀳 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀦𑁆𑀢𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁…𑀧𑁂… 𑀤𑀺𑀲𑁆𑀯𑀸 𑀢𑀤𑀸𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸𑀬…𑀧𑁂… 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸𑀬 𑀬𑀁 𑀪𑀽𑀢𑀁, 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁…𑀧𑁂… 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀦𑁆𑀢𑁂, 𑀲𑁂𑀓𑁆𑀔𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁩𑁧). 𑀅𑀣𑀼𑀢𑁆𑀢𑀭𑀻𑀢𑀺 𑀅𑀣 𑀏𑀯𑀁 𑀅𑀭𑀚𑁆𑀚𑀫𑀸𑀦𑁄 𑀉𑀢𑁆𑀢𑀭𑀺 𑀲𑀦𑁆𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀢𑀲𑁆𑀲 𑀢𑁂𑀦 𑀅𑀲𑀘𑁆𑀙𑀺𑀓𑀢𑀢𑁆𑀢𑀸.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁩. 𑀓𑀲𑁆𑀲𑀘𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑀲𑁆𑀲𑀘𑀺 𑀓𑀣𑀜𑁆𑀘𑀺 𑀅𑀯𑀺𑀫𑀼𑀢𑁆𑀢𑁄 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀅𑀚𑁆𑀛𑀢𑁆𑀢𑀁 𑀦𑀸𑀫. 𑀢𑀢𑁆𑀣 𑀩𑀦𑁆𑀥𑀦𑀁 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄.

𑁮𑁩. 𑀓𑀸𑀭𑀡𑁂𑀦 𑀯𑀺𑀦𑀸 𑀧𑀯𑀢𑁆𑀢𑀳𑀺𑀢𑀘𑀺𑀢𑁆𑀢𑁄 𑀅𑀓𑀸𑀭𑀡𑀯𑀘𑁆𑀙𑀮𑁄. 𑀅𑀦𑀸𑀕𑀢𑀫𑁆𑀧𑀺 𑀧𑀬𑁄𑀚𑀦𑀁 𑀅𑀧𑁂𑀓𑁆𑀔𑀫𑀸𑀦𑁄 𑀧𑀼𑀭𑀺𑀫𑀕𑁆𑀕𑀳𑀺𑀢𑀁 𑀢𑀁 𑀓𑀢𑀁 𑀉𑀧𑀸𑀤𑀸𑀬 𑀓𑀢𑀜𑁆𑀜𑀽 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀼𑀩𑁆𑀩𑀓𑀸𑀭𑀻𑀢𑀺 𑀆𑀳 ‘‘𑀓𑀭𑀺𑀲𑁆𑀲𑀢𑀺 𑀫𑁂’’𑀢𑀺𑀆𑀤𑀺. 𑀢𑀫𑁄𑀚𑁄𑀢𑀺𑀧𑀭𑀸𑀬𑀡𑁄 𑀧𑀼𑀜𑁆𑀜𑀨𑀮𑀁 𑀅𑀦𑀼𑀧𑀚𑀻𑀯𑀦𑁆𑀢𑁄 𑀏𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺 ‘‘𑀧𑀼𑀩𑁆𑀩𑀓𑀸𑀭𑀻’’𑀢𑀺 𑀯𑀼𑀢𑁆𑀢𑁄. ‘‘𑀇𑀡𑀁 𑀤𑁂𑀫𑀻’’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀻𑀢𑀺 𑀏𑀯𑀁𑀲𑀜𑁆𑀜𑀁 𑀅𑀓𑀭𑁄𑀦𑁆𑀢𑁄𑀧𑀺 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁮𑁬. 𑀅𑀘𑁆𑀙𑀫𑀁𑀲𑀁 ¶ 𑀮𑀪𑀺𑀢𑁆𑀯𑀸 𑀲𑀽𑀓𑀭𑀫𑀁𑀲𑀦𑁆𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀅𑀘𑁆𑀙𑀫𑀁𑀲𑀦𑁆𑀢𑀺 𑀚𑀸𑀦𑀦𑁆𑀢𑁄𑀧𑀺 𑀲𑀽𑀓𑀭𑀫𑀁𑀲𑀦𑁆𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁦. 𑀢𑀺𑀢𑁆𑀢𑁄𑀢𑀺 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀦𑀺𑀭𑀼𑀲𑁆𑀲𑀼𑀓𑁆𑀓𑁄.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁧. 𑀲𑁂𑀲𑀲𑀁𑀯𑀭𑀪𑁂𑀤𑁂𑀦𑀸𑀢𑀺 ¶ 𑀫𑀦𑁄𑀲𑀁𑀯𑀭𑀪𑁂𑀤𑁂𑀦, 𑀲𑀢𑀺𑀲𑀁𑀯𑀭𑀸𑀤𑀺𑀪𑁂𑀤𑁂𑀦 𑀯𑀸. 𑀅𑀓𑀼𑀲𑀮𑀲𑀻𑀮𑀲𑀫𑀦𑁆𑀦𑀸𑀕𑀫𑁂𑀦𑀸𑀢𑀺 ‘‘𑀓𑀢𑀫𑁂 𑀘 𑀣𑀧𑀢𑀺 𑀅𑀓𑀼𑀲𑀮𑀸 𑀲𑀻𑀮𑀸? 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀧𑀸𑀧𑀓𑁄 𑀆𑀚𑀻𑀯𑁄’’𑀢𑀺 𑀯𑀼𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀫𑁂𑀦. 𑀢𑀲𑁆𑀲 𑀳𑀺…𑀧𑁂… 𑀏𑀯𑀁 𑀲𑀸𑀲𑀗𑁆𑀓𑀲𑀫𑀸𑀘𑀸𑀭𑁄 𑀳𑁄𑀢𑀻𑀢𑀺 𑀏𑀯𑀁 𑀲𑀸𑀲𑀗𑁆𑀓𑁄 𑀲𑀫𑀸𑀘𑀸𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁯𑁪. 𑀲𑀫𑀸𑀦𑀯𑀺𑀲𑀬𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 ‘‘𑀓𑀸𑀬𑀲𑀓𑁆𑀔𑀻’’𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀁.

𑁧𑁦𑁭. 𑀲𑀫𑀸𑀥𑀺 𑀯𑀸 𑀆𑀤𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀳𑀺 𑀧𑀭𑀫𑀢𑁆𑀣𑀢𑁄 𑀲𑀸𑀲𑀦𑀦𑁆𑀢𑀺 𑀢𑀤𑀢𑁆𑀣𑁄 𑀧𑀸𑀤𑀓𑀲𑀫𑀸𑀥𑀺 𑀢𑀲𑁆𑀲 𑀆𑀤𑀺 𑀯𑀼𑀢𑁆𑀢𑁄, 𑀢𑀤𑀸𑀲𑀦𑁆𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲 𑀫𑀽𑀮𑁂𑀓𑀤𑁂𑀲𑀢𑁆𑀢𑀸 𑀫𑀕𑁆𑀕𑁄.

𑁧𑁦𑁮. 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄𑀢𑀺 𑀉𑀘𑁆𑀙𑀗𑁆𑀕𑀲𑀤𑀺𑀲𑀧𑀜𑁆𑀜𑀢𑀸𑀬 𑀏𑀯 𑀧𑀜𑁆𑀜𑀸 𑀯𑀺𑀬 𑀧𑀼𑀕𑁆𑀕𑀮𑁄𑀧𑀺 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀸𑀦𑀁 𑀅𑀘𑀺𑀭𑀝𑁆𑀞𑀸𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀯𑀓𑁆𑀔𑀢𑀺 𑀳𑀺 ‘‘𑀉𑀘𑁆𑀙𑀗𑁆𑀕𑀲𑀤𑀺𑀲𑀧𑀜𑁆𑀜𑁄𑀢𑀺𑀅𑀢𑁆𑀣𑁄’’𑀢𑀺.

𑁧𑁦𑁯. 𑀬𑀣𑀸 𑀘 𑀉𑀘𑁆𑀙𑀗𑁆𑀕𑀲𑀤𑀺𑀲𑀸 𑀧𑀜𑁆𑀜𑀸, 𑀏𑀯𑀁 𑀦𑀺𑀓𑁆𑀓𑀼𑀚𑁆𑀚𑀓𑀼𑀫𑁆𑀪𑀲𑀤𑀺𑀲𑀸 𑀧𑀜𑁆𑀜𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑁄, 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀅𑀦𑀯𑀝𑁆𑀞𑀸𑀦𑀢𑁄.

𑁧𑁧𑁩. 𑀘𑀺𑀭𑀝𑁆𑀞𑀸𑀦𑀢𑁄 𑀣𑀺𑀭𑀝𑁆𑀞𑀸𑀦𑀢𑁄 𑀘 𑀧𑀸𑀲𑀸𑀡𑀮𑁂𑀔𑀲𑀤𑀺𑀲𑀸 𑀧𑀭𑀸𑀧𑀭𑀸𑀥𑀦𑀺𑀩𑁆𑀩𑀢𑁆𑀢𑀸 𑀓𑁄𑀥𑀮𑁂𑀔𑀸 𑀬𑀲𑁆𑀲 𑀲𑁄 𑀧𑀸𑀲𑀸𑀡𑀮𑁂𑀔𑀽𑀧𑀫𑀲𑀫𑀦𑁆𑀦𑀸𑀕𑀢𑁄 𑀧𑀸𑀲𑀸𑀡𑀮𑁂𑀔𑀽𑀧𑀫𑁄𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀇𑀢𑀭𑁂𑀧𑀺.

𑁧𑁧𑁮. 𑀲𑀼𑀢𑀸𑀤𑀺𑀯𑀢𑁆𑀣𑀼𑀭𑀳𑀺𑀢𑁄 ¶ 𑀢𑀼𑀘𑁆𑀙𑀫𑀸𑀦𑁄 𑀦𑀴𑁄 𑀯𑀺𑀬𑀸𑀢𑀺 ‘‘𑀦𑀴𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀉𑀕𑁆𑀕𑀢𑁄 𑀦𑀴𑁄 𑀏𑀢𑀲𑁆𑀲𑀸𑀢𑀺 𑀉𑀦𑁆𑀦𑀴𑁄.

𑁧𑁨𑁨. ‘‘𑀲𑀻𑀮𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀻𑀮𑀓𑀣𑀸𑀪𑀯𑀦𑀁 𑀧𑀞𑀫𑀸𑀭𑀫𑁆𑀪𑁄𑀧𑀺 𑀤𑀼𑀲𑁆𑀲𑀻𑀮𑁂𑀦 𑀲𑀳 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀦𑁂𑀯 𑀲𑀻𑀮𑀓𑀣𑀸 𑀳𑁄𑀢𑀻’’𑀢𑀺.

𑁧𑁨𑁩. 𑀢𑀢𑁆𑀣 ¶ 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁂 𑀧𑀜𑁆𑀜𑀸𑀬 𑀲𑁄𑀥𑁂𑀢𑀩𑁆𑀩𑁂 𑀘 𑀯𑀟𑁆𑀠𑁂𑀢𑀩𑁆𑀩𑁂 𑀘 𑀅𑀥𑀺𑀓𑀲𑀻𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁧𑁨𑁪. 𑀕𑀽𑀣𑀓𑀽𑀧𑁄 𑀯𑀺𑀬 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀏𑀢𑁂𑀦 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀕𑀽𑀣𑀲𑀤𑀺𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺.

𑁧𑁩𑁦. 𑀦𑁄 𑀘 𑀲𑀫𑁆𑀫𑀸 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂 𑀢𑀲𑁆𑀫𑀺𑀁 𑀅𑀦𑀸𑀤𑀭𑀺𑀬𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀅𑀲𑀫𑀢𑁆𑀣𑀪𑀸𑀯𑀁 𑀯𑀸. 𑀢𑀺𑀢𑁆𑀣𑀺𑀬𑀸 𑀯𑀸 𑀧𑀽𑀭𑀡𑀸𑀤𑀬𑁄 𑀅𑀥𑀺𑀧𑁆𑀧𑁂𑀢𑀸.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁩. 𑀧𑀭𑁂𑀦 𑀓𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀆𑀡𑀢𑁆𑀢𑀺𑀬𑀸 𑀅𑀢𑁆𑀢𑀦𑀸 𑀘 𑀧𑀬𑁄𑀕𑁂𑀦 𑀓𑀢𑀦𑁆𑀢𑀺 𑀆𑀡𑀢𑁆𑀢𑀺𑀬𑀸 𑀧𑀸𑀧𑀲𑁆𑀲 𑀤𑀸𑀬𑀸𑀤𑁄 ‘‘𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑁄’’𑀢𑀺 𑀯𑀼𑀢𑁆𑀢𑁄.

𑁧𑁪𑁫. 𑀅𑀬𑀦𑁆𑀢𑀺 ‘‘𑀢𑁂𑀲𑀼 𑀧𑀞𑀫𑁄’’𑀢𑀺𑀆𑀤𑀺𑀓𑀁 𑀦𑀬𑀁 𑀯𑀤𑀢𑀺.

𑁧𑁪𑁮. 𑀤𑁂𑀲𑀦𑀸𑀬 𑀥𑀫𑁆𑀫𑀸𑀦𑀁 𑀜𑀸𑀡𑀲𑁆𑀲 𑀆𑀧𑀸𑀣𑀪𑀸𑀯𑀲𑀫𑁆𑀧𑀸𑀤𑀦𑀁 𑀜𑀸𑀡𑀼𑀕𑁆𑀖𑀸𑀝𑀦𑀁. 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀝𑀯𑁂𑀮𑀸𑀬 𑀲𑀤𑁆𑀥𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀦𑀢𑀺𑀓𑁆𑀓𑀦𑁆𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄.

𑁧𑁫𑁨. 𑀢𑀦𑁆𑀢𑀺 𑀅𑀦𑀦𑁆𑀢𑀭𑀯𑀘𑀦𑀁 𑀯𑀤𑀢𑀺. ‘‘𑀓𑀢𑀫𑁄 𑀮𑁄𑀓𑁄’’𑀢𑀺 𑀯𑀼𑀢𑁆𑀢𑁂 ‘‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀲𑀗𑁆𑀕𑀳𑀺𑀢𑁆𑀯𑀸 𑀞𑀺𑀢𑀯𑀘𑀦𑀁 𑀅𑀢𑁆𑀣𑀬𑀼𑀢𑁆𑀢𑀁. 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄𑀢𑀺 𑀓𑀸𑀭𑀡𑀬𑀼𑀢𑁆𑀢𑀁.

𑁧𑁫𑁬. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 ¶ 𑀲𑀳𑀺𑀢𑀸𑀲𑀳𑀺𑀢𑁂𑀢𑀺 𑀅𑀢𑁆𑀣𑁄, 𑀲𑀳𑀺𑀢𑀸𑀲𑀳𑀺𑀢𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀢𑀺 𑀯𑀸 ¶ . 𑀤𑁆𑀯𑁂𑀬𑁂𑀯𑀸𑀢𑀺 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀬𑁂𑀯. 𑀤𑁂𑀲𑀓𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀬𑀸 𑀩𑁄𑀥𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀲𑀪𑀸𑀯𑀥𑀫𑁆𑀫𑀓𑀣𑀺𑀓𑀸, 𑀲𑀘𑁆𑀘𑀥𑀫𑁆𑀫𑀓𑀣𑀺𑀓𑀸𑀢𑀺 𑀅𑀢𑁆𑀣𑁄.

𑁧𑁫𑁭. 𑀓𑀼𑀲𑀮𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀸𑀲𑀦𑀸𑀪𑀸𑀯𑀦𑀸 𑀯𑀸𑀲𑀥𑀼𑀭𑀁. 𑀅𑀬𑀁 𑀧𑀸𑀧𑀧𑀼𑀕𑁆𑀕𑀮𑁄𑀢𑀺 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀧𑀞𑀫𑁄. 𑀧𑀞𑀫𑁄 𑀳𑀺 𑀅𑀯𑀺𑀲𑀁𑀯𑀸𑀤𑁂𑀢𑀼𑀓𑀸𑀫𑁄 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄 𑀅𑀥𑀺𑀧𑁆𑀧𑁂𑀢𑁄𑀢𑀺.

𑁧𑁫𑁯. 𑀧𑀼𑀕𑁆𑀕𑀮𑁂𑀧𑀺 𑀅𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀫𑀦𑀸𑀤𑀺𑀲𑀤𑀺𑀲𑀢𑀸𑀢𑀺 𑀧𑀼𑀕𑁆𑀕𑀮𑁂 𑀅𑀪𑀺𑀓𑁆𑀓𑀫𑀦𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀫𑀦𑀸𑀤𑀺𑀲𑀤𑀺𑀲𑀢𑀸𑀢𑀺 𑀅𑀢𑁆𑀣𑁄, 𑀅𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀫𑀦𑀸𑀤𑀺𑀦𑀸 𑀧𑀼𑀕𑁆𑀕𑀮𑀲𑁆𑀲 𑀲𑀤𑀺𑀲𑀢𑀸𑀢𑀺 𑀯𑀸 𑀲𑀤𑀺𑀲𑀸𑀪𑀺𑀓𑁆𑀓𑀫𑀦𑀸𑀤𑀺𑀢𑀸𑀢𑀺 𑀅𑀢𑁆𑀣𑁄.

𑁧𑁬𑁬. 𑀤𑀼𑀲𑁆𑀲𑀻𑀮𑀁 ‘‘𑀤𑀼𑀲𑁆𑀲𑀻𑀮𑁄’’𑀢𑀺 𑀯𑀤𑀦𑁆𑀢𑁄 𑀪𑀽𑀢𑀁 𑀪𑀸𑀲𑀢𑀺 𑀦𑀸𑀫. 𑀧𑀸𑀡𑀸𑀢𑀺𑀧𑀸𑀢𑁂𑀦 𑀤𑀼𑀲𑁆𑀲𑀻𑀮𑀁 𑀅𑀤𑀺𑀦𑁆𑀦𑀸𑀤𑀸𑀦𑁂𑀦 𑀤𑀼𑀲𑁆𑀲𑀻𑀮𑁄𑀢𑀺 𑀅𑀯𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑁂𑀦𑁂𑀯𑀸𑀢𑀺 𑀯𑀤𑀦𑁆𑀢𑁄 𑀢𑀘𑁆𑀙𑀁 𑀪𑀸𑀲𑀢𑀺 𑀦𑀸𑀫. 𑀬𑀫𑀺𑀤𑀁 ‘‘𑀓𑀸𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀭 𑀢𑀲𑁆𑀫𑀺𑀁 𑀯𑀘𑀦𑁂, 𑀬𑁄 ‘‘𑀓𑀸𑀮𑁂𑀦 𑀪𑀡𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀻𑀤𑀺𑀲𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀮𑀜𑁆𑀜𑀽 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀫𑀺𑀤𑀁 𑀓𑀸𑀮𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀭 𑀬𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳.

𑁧𑁬𑁮. 𑀆𑀕𑀫𑀦𑀯𑀺𑀧𑀢𑁆𑀢𑀺 𑀦𑀸𑀫 𑀓𑀫𑁆𑀫𑀁, 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺 𑀲𑀼𑀓𑁆𑀓𑀲𑁄𑀡𑀺𑀢𑀁. 𑀧𑀯𑀢𑁆𑀢𑁂, 𑀧𑀯𑀢𑁆𑀢𑀲𑁆𑀲 𑀯𑀸 𑀧𑀘𑁆𑀘𑀬𑀸 𑀧𑀯𑀢𑁆𑀢𑀧𑀘𑁆𑀘𑀬𑀸, 𑀆𑀳𑀸𑀭𑀸𑀤𑀬𑁄. 𑀚𑁄𑀢𑁂𑀢𑀻𑀢𑀺 𑀚𑁄𑀢𑀺, 𑀆𑀮𑁄𑀓𑁄. 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑀸𑀤𑀻𑀳𑀺 𑀚𑁄𑀢𑀫𑀸𑀦𑁄 𑀘 𑀚𑁄𑀢𑀺 𑀯𑀺𑀬𑀸𑀢𑀺 𑀚𑁄𑀢𑀺.

𑁧𑁭𑁩. 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀧𑀺 𑀬𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄 𑀅𑀯𑀺𑀫𑀼𑀢𑁆𑀢𑁄 𑀘, 𑀢𑁂𑀲𑀁 𑀤𑀲𑁆𑀲𑀦𑀯𑀲𑁂𑀦 𑀯𑀺𑀫𑀼𑀢𑁆𑀢𑀺𑀤𑀲𑁆𑀲𑀦𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺.

𑁧𑁭𑁪. 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀦𑁆𑀢𑀺 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁 𑀬𑀸𑀦𑀺 𑀓𑀸𑀦𑀺𑀘𑀺 𑀯𑀢𑁆𑀣𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀬𑀁 𑀢𑀢𑀺𑀬𑀁 𑀅𑀲𑁆𑀲𑀸𑀢𑀺 𑀲𑀸𑀬𑀢𑀢𑀺𑀬𑁄. 𑀅𑀦𑀼𑀬𑀼𑀜𑁆𑀚𑀦𑀁 𑀅𑀦𑀼𑀬𑁄𑀕𑁄. 𑀢𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸.

𑁧𑁭𑁮. 𑀢𑀢𑁆𑀣 ¶ ¶ 𑀲𑀺𑀓𑁆𑀔𑀦𑀪𑀸𑀯𑁂𑀦𑀸𑀢𑀺 𑀲𑀺𑀓𑁆𑀔𑀸𑀬 𑀲𑀸𑀚𑀻𑀯𑁂 𑀘 𑀲𑀺𑀓𑁆𑀔𑀦𑀪𑀸𑀯𑁂𑀦. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺 𑀲𑀻𑀮𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑁄. 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀢𑀺 ‘‘𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀪𑀕𑀯𑀢𑁄 𑀯𑀘𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀘 𑀤𑁆𑀯𑀬𑀁 ‘‘𑀲𑀺𑀓𑁆𑀔𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑁄. 𑀢𑀢𑁄 𑀳𑀺 𑀬𑀸𑀯 𑀫𑀕𑁆𑀕𑀸 𑀲𑀁𑀯𑀭𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺. 𑀯𑀺𑀦𑀸𑀲𑀦𑀪𑀸𑀯𑀢𑁄𑀢𑀺 𑀳𑀺𑀁𑀲𑀦𑀪𑀸𑀯𑀢𑁄. 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 𑀦 𑀣𑀺𑀭𑀓𑀣𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀣𑀸𑀬 𑀅𑀝𑁆𑀞𑀺𑀢𑀪𑀸𑀯𑁂𑀦 𑀳𑀮𑀺𑀤𑁆𑀤𑀺𑀭𑀸𑀕𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀼𑀕𑁆𑀕𑀮𑀲𑁆𑀲.

𑁧𑁭𑁯. 𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀏𑀯𑀁𑀧𑀓𑀸𑀭𑁂 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀤𑀲𑀕𑁆𑀖𑀦𑀓𑀁 𑀯𑀢𑁆𑀣𑀬𑀼𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲 𑀧𑀜𑁆𑀘𑀕𑁆𑀖𑀦𑀓𑀲𑁆𑀲 𑀤𑀸𑀦𑀁.

𑁧𑁮𑁧. 𑀅𑀯𑀺𑀓𑀺𑀡𑁆𑀡𑀲𑀼𑀔𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀲𑀼𑀪𑀸𑀤𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀅𑀯𑀺𑀲𑀝𑀲𑀼𑀔𑀁.

𑁧𑁮𑁭. 𑀔𑀦𑁆𑀥𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀨𑀮𑀮𑀸𑀪𑁂𑀦 𑀧𑀝𑀺𑀮𑀤𑁆𑀥𑀸 𑀦𑀸𑀫 𑀳𑁄𑀢𑀺 𑀢𑀤𑀮𑀸𑀪𑁂𑀦 𑀅𑀦𑀯𑀝𑁆𑀞𑀸𑀦𑀢𑁄𑀢𑀺 𑀫𑀕𑁆𑀕𑀨𑀮𑀮𑀸𑀪𑀻 𑀏𑀯 ‘‘𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀮𑀸𑀪𑀻’’𑀢𑀺 𑀯𑀼𑀢𑁆𑀢𑁄, 𑀫𑀕𑁆𑀕𑀨𑀮𑀜𑀸𑀡𑀫𑁂𑀯 𑀘 𑀅𑀥𑀺𑀓𑀧𑀜𑁆𑀜𑀸𑀪𑀸𑀯𑀢𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀲𑀩𑁆𑀩𑀥𑀫𑁆𑀫𑀲𑁆𑀲 𑀯𑀭𑁂 𑀦𑀺𑀩𑁆𑀩𑀸𑀦𑁂 𑀏𑀯 𑀯𑀸 𑀯𑀺𑀲𑀺𑀝𑁆𑀞𑀤𑀲𑁆𑀲𑀦𑀪𑀸𑀯𑀢𑁄 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁧𑁮𑁯. 𑀲𑀼𑀢𑁂𑀦 𑀅𑀦𑀼𑀧𑀧𑀦𑁆𑀦𑁄𑀢𑀺 𑀬𑀣𑀸𑀲𑀼𑀢𑁂𑀦 𑀯𑀸 𑀅𑀢𑁆𑀣𑁂𑀦 𑀯𑀸 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁧. 𑀧𑀞𑀫𑀧𑀜𑁆𑀘𑀓𑁂 𑀉𑀤𑁆𑀤𑁂𑀲𑁂𑀦𑁂𑀯 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑀣𑀸 𑀢𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 ¶ , 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂 𑀯𑀺𑀪𑀚𑀦𑁆𑀢𑁄 ‘‘𑀢𑀢𑁆𑀭 𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀆𑀭𑀫𑁆𑀪𑀲𑀤𑁆𑀤𑁄𑀢𑀺 𑀆𑀭𑀫𑁆𑀪𑀓𑀺𑀭𑀺𑀬𑀸𑀯𑀸𑀘𑀓𑁄 𑀲𑀤𑁆𑀤𑁄𑀢𑀺 𑀅𑀢𑁆𑀣𑁄. 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 ¶ 𑀫𑀕𑁆𑀕𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 ‘‘𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 𑀨𑀮𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀆𑀬𑀸𑀘𑀦𑀲𑀸𑀥𑀽𑀢𑀺 𑀦 𑀧𑀲𑀁𑀲𑀦𑀸𑀤𑀺𑀲𑀸𑀥𑀽𑀢𑀺 𑀅𑀢𑁆𑀣𑁄.

𑁧𑁯𑁨. 𑀆𑀤𑀺𑀢𑁄 𑀥𑁂𑀬𑁆𑀬𑀁 𑀞𑀧𑁂𑀢𑀩𑁆𑀩𑀁 𑀆𑀥𑁂𑀬𑁆𑀬𑀁, 𑀤𑀲𑁆𑀲𑀦𑀲𑀯𑀦𑀧𑀝𑀺𑀯𑀘𑀦𑀤𑀸𑀦𑀯𑀲𑁂𑀦 𑀫𑀼𑀔𑁂𑀦 𑀯𑀺𑀬 𑀧𑀯𑀢𑁆𑀢𑀁 𑀕𑀳𑀡𑀁 𑀫𑀼𑀔𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀫𑀼𑀔𑀁 𑀆𑀥𑁂𑀬𑁆𑀬𑀁, 𑀕𑀳𑀡𑀢𑁆𑀣𑀁 𑀧𑀓𑀢𑀺𑀫𑀼𑀔𑀫𑁂𑀯 𑀯𑀸 𑀆𑀥𑁂𑀬𑁆𑀬𑀁 𑀬𑀲𑁆𑀲 𑀲𑁄 𑀆𑀥𑁂𑀬𑁆𑀬𑀫𑀼𑀔𑁄, 𑀅𑀯𑀺𑀘𑀸𑀭𑁂𑀢𑁆𑀯𑀸 𑀆𑀤𑀺𑀓𑀣𑀸𑀬 𑀏𑀯 𑀞𑀧𑀺𑀢𑀕𑀳𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁯𑁪. 𑀭𑀚𑀕𑁆𑀕𑀲𑁆𑀫𑀺𑀦𑁆𑀢𑀺 𑀭𑀚𑀕𑁆𑀕𑀪𑀸𑀯𑁂.

𑁧𑁯𑁯. 𑀕𑀯𑀸 𑀔𑀻𑀭𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀦 𑀏𑀯𑀁 𑀲𑀫𑁆𑀩𑀦𑁆𑀥𑁄, 𑀉𑀧𑁆𑀧𑀢𑁆𑀢𑀺𑀢𑁄 𑀧𑀦 𑀧𑀜𑁆𑀘 𑀕𑁄𑀭𑀲𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀅𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀕𑀯𑀸 𑀔𑀻𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀕𑀸𑀯𑀺𑀢𑁄 𑀔𑀻𑀭𑀁 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀙𑀓𑁆𑀓𑁂 𑀏𑀓𑀦𑁆𑀢𑀢𑁄 𑀧𑀸𑀓𑀝𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀬𑁄 𑀢𑁂 𑀬𑀣𑀸𑀯𑀼𑀢𑁆𑀢𑀕𑀼𑀡𑀸 𑀧𑀼𑀕𑁆𑀕𑀮𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦 𑀤𑀝𑁆𑀞𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦𑀸𑀢𑀺 𑀲𑀸𑀫𑀁 𑀲𑀘𑁆𑀘𑀸𑀪𑀺𑀲𑀫𑀬𑁄 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀺𑀩𑀮𑁂𑀲𑀼 𑀘 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀻𑀢𑀺 𑀏𑀢𑁂𑀦 𑀲𑀩𑁆𑀩𑁂𑀦 𑀲𑀫𑀼𑀤𑀺𑀢𑁂𑀦. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑁂 𑀲𑀩𑁆𑀩𑀫𑀺𑀤𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺 𑀲𑀸𑀫𑀁 𑀲𑀘𑁆𑀘𑀸𑀪𑀺𑀲𑀫𑀬𑁂𑀦 𑀩𑀮𑁂𑀲𑀼 𑀘 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘 𑀯𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀸, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀸𑀘𑀭𑀺𑀬𑀓𑁂𑀦 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦𑀸𑀢𑀺 𑀯𑀘𑀦𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀸𑀘𑀭𑀺𑀬𑀓𑀢𑁆𑀢𑀁 𑀧𑀭𑀢𑁄 𑀉𑀧𑁆𑀧𑀢𑁆𑀢𑀺𑀜𑁆𑀘 𑀧𑀝𑀺𑀲𑁂𑀥𑁂𑀢𑀺, 𑀦 𑀲𑀸𑀘𑀭𑀺𑀬𑀓𑀁 𑀧𑀭𑁂𑀳𑀺 𑀉𑀧𑁆𑀧𑀸𑀤𑀺𑀢𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀦 𑀳𑀺 𑀢𑀁 𑀢𑀸𑀤𑀺𑀲𑀁 𑀦𑀺𑀯𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀲𑀤𑁆𑀥𑀸 ¶ ¶ 𑀦𑀸𑀫 𑀲𑀸𑀥𑀼𑀮𑀤𑁆𑀥𑀺𑀓𑀸𑀢𑀺 𑀉𑀫𑁆𑀫𑀼𑀚𑁆𑀚𑀢𑀻𑀢𑀺 𑀏𑀢𑁂𑀦 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑁆𑀢𑁄𑀕𑀥𑀸, 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀸 𑀅𑀥𑀺𑀫𑁄𑀓𑁆𑀔𑀪𑀽𑀢𑀸 𑀲𑀤𑁆𑀥𑀸 𑀲𑀸𑀥𑀽𑀢𑀺 𑀉𑀫𑁆𑀫𑀼𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀤𑀲𑁆𑀲𑁂𑀢𑀺, 𑀏𑀯𑀁 𑀳𑀺𑀭𑀻𑀬𑀸𑀤𑀻𑀲𑀼 𑀘. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀢𑀤𑀦𑁆𑀢𑁄𑀕𑀥𑀢𑀸𑀬 𑀢𑀤𑀼𑀧𑀓𑀸𑀭𑀢𑀸𑀬 𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀳𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺𑀆𑀤𑀺𑀦𑀸 𑀲𑀤𑁆𑀥𑀸𑀤𑀻𑀦𑀁 𑀉𑀫𑁆𑀫𑀼𑀚𑁆𑀚𑀦𑀧𑀜𑁆𑀜𑀸𑀬 𑀲𑀤𑁆𑀥𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀢𑀲𑁆𑀲 𑀲𑀸 𑀲𑀤𑁆𑀥𑀸 𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀸𑀳𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀯𑀸 𑀉𑀫𑁆𑀫𑀼𑀚𑁆𑀚𑀦𑀲𑁆𑀲 𑀉𑀧𑀓𑀸𑀭𑀓𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑀁 𑀯𑀢𑁆𑀯𑀸 ‘‘𑀉𑀫𑁆𑀫𑀼𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀲𑀤𑁆𑀥𑀸𑀲𑀗𑁆𑀔𑀸𑀢𑀫𑁂𑀯 𑀉𑀫𑁆𑀫𑀼𑀚𑁆𑀚𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀗𑁆𑀓𑀯𑀸𑀭𑁂𑀢𑀺 𑀭𑀚𑀓𑀸𑀦𑀁 𑀔𑀸𑀭𑀧𑀭𑀺𑀲𑀸𑀯𑀦𑁂. 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀲𑀦𑁆𑀢𑀢𑀺 𑀏𑀓𑁄 𑀘𑀺𑀢𑁆𑀢𑀯𑀸𑀭𑁄𑀢𑀺 𑀘𑀼𑀢𑀺𑀢𑁄 𑀅𑀦𑀦𑁆𑀢𑀭𑁄 𑀬𑀣𑀸𑀕𑀳𑀺𑀢𑁄 𑀤𑀼𑀢𑀺𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂𑀦𑀸’’𑀢𑀺. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑀸𑀤𑀬𑁄 𑀘𑀢𑁆𑀢𑀸𑀭𑁄 𑀢𑀸𑀬 𑀢𑀸𑀬 𑀚𑀸𑀢𑀺𑀬𑀸 𑀅𑀭𑀳𑀢𑁆𑀢𑀁 𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑀸 𑀅𑀦𑁂𑀓𑁂 𑀧𑀼𑀕𑁆𑀕𑀮𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀧𑀦 𑀏𑀓𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀢𑀢𑀺𑀬𑀧𑀼𑀕𑁆𑀕𑀮𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁂 𑀲𑀢𑁆𑀢𑀫𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁯. 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸𑀢𑀺 𑀏𑀢𑁆𑀣 𑀬𑁂 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀭𑀽𑀧𑀸𑀭𑀽𑀧𑀪𑀯𑁂 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸𑀧𑀓𑁆𑀔𑀁 𑀪𑀚𑀫𑀸𑀦𑀸𑀧𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀸𑀦𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑁂 𑀘 𑀞𑀸𑀦𑁂 𑀉𑀧𑀧𑀢𑁆𑀢𑀺𑀬𑀸 𑀦 𑀕𑀳𑀺𑀢𑀸. 𑀅𑀲𑀸𑀥𑀸𑀭𑀡𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀆𑀤𑀬𑁄 𑀏𑀯 ‘‘𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀓𑀣𑀸𑀦𑀁 ¶ ¶ 𑀯𑀢𑁆𑀣𑀼𑀪𑀸𑀯𑀢𑁄𑀢𑀺 𑀓𑀣𑀸𑀲𑀫𑀼𑀤𑀸𑀬𑀲𑁆𑀲 𑀧𑀓𑀭𑀡𑀲𑁆𑀲 𑀅𑀢𑁆𑀢𑀦𑁄 𑀏𑀓𑀤𑁂𑀲𑀸𑀦𑀁 𑀑𑀓𑀸𑀲𑀪𑀸𑀯𑀁 𑀯𑀤𑀢𑀺. 𑀲𑀫𑀼𑀤𑀸𑀬𑁂 𑀳𑀺 𑀏𑀓𑀤𑁂𑀲𑀸 𑀅𑀦𑁆𑀢𑁄𑀕𑀥𑀸𑀢𑀺. 𑀬𑁂𑀦 𑀧𑀓𑀸𑀭𑁂𑀦 𑀲𑀗𑁆𑀔𑁂𑀧𑁂𑀦 𑀅𑀤𑁂𑀲𑀬𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯 𑀞𑀧𑀺𑀢𑀲𑁆𑀲𑀸’’𑀢𑀺 𑀆𑀳.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀭𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀸𑀬 𑀯𑀸 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀥𑀺𑀕𑀢𑀸𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀚𑀸𑀢𑀁, 𑀲𑀸 𑀢𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀯𑀽𑀧𑀲𑀫𑀲𑁆𑀲 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺. 𑀤𑀼𑀩𑁆𑀩𑀮𑀧𑀓𑁆𑀔𑀦𑁆𑀢𑀺 𑀦 𑀓𑀸𑀴𑀸𑀲𑁄𑀓𑀁 𑀯𑀺𑀬 𑀩𑀮𑀯𑀦𑁆𑀢𑀁, 𑀅𑀣 𑀔𑁄 𑀏𑀓𑀫𑀡𑁆𑀟𑀮𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀅𑀥𑀫𑁆𑀫𑀯𑀸𑀤𑀻𑀯𑀺𑀲𑁂𑀲𑀚𑀦𑀦𑀲𑀫𑀢𑁆𑀣𑀸𑀬 𑀧𑀦 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀤𑀼𑀩𑁆𑀩𑀮𑀢𑀸 𑀯𑀼𑀢𑁆𑀢𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀩𑀸𑀳𑀼𑀮𑀺𑀬𑀸𑀦𑀫𑁂𑀯 ¶ , 𑀩𑀳𑀼𑀲𑁆𑀲𑀼𑀢𑀺𑀓𑀸𑀢𑀺𑀧𑀺 𑀦𑀸𑀫𑀁. 𑀪𑀺𑀦𑁆𑀦𑀓𑀸𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀢𑁄 𑀫𑀽𑀮𑀦𑀺𑀓𑀸𑀬𑀢𑁄 𑀯𑀸 𑀪𑀺𑀦𑁆𑀦𑀸, 𑀮𑀤𑁆𑀥𑀺𑀬𑀸 𑀲𑀼𑀢𑁆𑀢𑀦𑁆𑀢𑁂𑀳𑀺 𑀮𑀺𑀗𑁆𑀕𑀸𑀓𑀧𑁆𑀧𑁂𑀳𑀺 𑀘 𑀯𑀺𑀲𑀤𑀺𑀲𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑀫𑀽𑀮𑀲𑀗𑁆𑀕𑀳𑀦𑁆𑀢𑀺 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀁. 𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀸𑀢𑀺𑀆𑀤𑀻𑀲𑀼 𑀤𑀻𑀖𑀸𑀤𑀻𑀲𑀼 𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀢𑁄 𑀲𑀼𑀢𑁆𑀢𑀦𑁆𑀢𑀭𑀸𑀲𑀺𑀢𑁄 𑀢𑀁 𑀢𑀁 𑀲𑀼𑀢𑁆𑀢𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀅𑀓𑀭𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀕𑀳𑀺𑀢𑀢𑁄 𑀯𑀸 𑀅𑀜𑁆𑀜𑀢𑁆𑀭 𑀅𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢𑀁 𑀅𑀜𑁆𑀜𑀢𑁆𑀭 𑀓𑀢𑁆𑀣𑀘𑀺 𑀅𑀓𑀭𑀺𑀁𑀲𑀼, 𑀅𑀜𑁆𑀜𑀁 𑀯𑀸 𑀅𑀓𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘𑀸𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀸𑀴𑀺𑀜𑁆𑀘. 𑀯𑀺𑀦𑀬𑁂 𑀦𑀺𑀓𑀸𑀬𑁂𑀲𑀼 𑀘 𑀧𑀜𑁆𑀘𑀲𑀽𑀢𑀺 𑀯𑀺𑀦𑀬𑁂 𑀘 𑀅𑀯𑀲𑁂𑀲𑀧𑀜𑁆𑀘𑀦𑀺𑀓𑀸𑀬𑁂𑀲𑀼 𑀘.

‘‘𑀤𑁆𑀯𑁂𑀧𑀸𑀦𑀦𑁆𑀤 ¶ , 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀫𑀬𑀸 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺 (𑀫. 𑀦𑀺. 𑁨.𑁮𑁯) 𑀧𑀭𑀺𑀬𑀸𑀬𑀤𑁂𑀲𑀺𑀢𑀁. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀳𑀺 𑀲𑀦𑁆𑀢𑀲𑁆𑀫𑀺𑀁 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀧𑀭𑀺𑀬𑀸𑀬𑁄. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁨𑁪𑁯-𑁨𑁫𑁧) 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀺𑀢𑀁. 𑀯𑁂𑀤𑀦𑀸𑀲𑀪𑀸𑀯𑁄 𑀳𑀺 𑀢𑀺𑀯𑀺𑀥𑁄𑀢𑀺 𑀅𑀬𑀫𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑀸. ‘‘𑀲𑀼𑀔𑀸𑀧𑀺 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁨𑁩) 𑀦𑀻𑀢𑀢𑁆𑀣𑀁. ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁩𑁨) 𑀦𑁂𑀬𑁆𑀬𑀢𑁆𑀣𑀁. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂’’𑀢𑀺𑀆𑀤𑀺𑀓𑀁 (𑀅. 𑀦𑀺. 𑁯.𑁨𑁧) 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼. ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺𑀆𑀤𑀺𑀓𑀁 (𑀓𑀣𑀸. 𑁨𑁭𑁦) 𑀲𑀼𑀢𑁆𑀢𑀜𑁆𑀘 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀅𑀢𑁆𑀣𑀜𑁆𑀘 𑀅𑀜𑁆𑀜𑀁 𑀞𑀧𑀬𑀺𑀁𑀲𑀽𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺 (𑀧𑀼. 𑀧. 𑀫𑀸𑀢𑀺𑀓𑀸 𑁪.𑁨𑁪) 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀲𑀡𑁆𑀳𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀸𑀤𑀺𑀅𑀢𑁆𑀣𑀁 𑀩𑀳𑀼𑀁 𑀯𑀺𑀦𑀸𑀲𑀬𑀼𑀁.

𑀯𑀺𑀦𑀬𑀕𑀫𑁆𑀪𑀻𑀭𑀦𑁆𑀢𑀺 𑀯𑀺𑀦𑀬𑁂 𑀕𑀫𑁆𑀪𑀻𑀭𑀜𑁆𑀘 𑀏𑀓𑀤𑁂𑀲𑀁 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀯𑀺𑀦𑀬𑁂𑀦 𑀯𑀸 𑀕𑀫𑁆𑀪𑀻𑀭𑀁 𑀏𑀓𑀤𑁂𑀲𑀁 𑀲𑀼𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀧𑀢𑀺𑀭𑀽𑀧𑀓𑀁 𑀯𑀸 𑀅𑀲𑀼𑀢𑁆𑀢𑀁. 𑀏𑀓𑀘𑁆𑀘𑁂 𑀅𑀝𑁆𑀞𑀓𑀣𑀸𑀓𑀡𑁆𑀟𑀫𑁂𑀯 𑀯𑀺𑀲𑁆𑀲𑀚𑁆𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀼𑀤𑁆𑀥𑀸𑀭𑀁 𑀅𑀪𑀺𑀥𑀫𑁆𑀫𑀁 𑀙𑀧𑁆𑀧𑀓𑀭𑀡’’𑀦𑁆𑀢𑀺. 𑀓𑀣𑀸𑀯𑀢𑁆𑀣𑀼𑀲𑁆𑀲 𑀲𑀯𑀺𑀯𑀸𑀤𑀢𑁆𑀢𑁂𑀧𑀺 𑀅𑀯𑀺𑀯𑀸𑀤𑀸𑀦𑀺 𑀙𑀧𑁆𑀧𑀓𑀭𑀡𑀸𑀦𑀺 𑀧𑀞𑀺𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀳𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀙𑀧𑁆𑀧𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀯𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀲𑁂𑀦 ‘‘𑀙𑀧𑁆𑀧𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁 ¶ . 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀸𑀦𑀺 𑀅𑀪𑀺𑀥𑀫𑁆𑀫𑀧𑀓𑀭𑀡𑀸𑀤𑀻𑀦𑀺. 𑀦𑀸𑀫𑀦𑁆𑀢𑀺 𑀬𑀁 𑀩𑀼𑀤𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀦 𑀳𑁄𑀢𑀺 𑀫𑀜𑁆𑀚𑀼𑀲𑀺𑀭𑀻𑀢𑀺𑀆𑀤𑀺𑀓𑀁, 𑀢𑀁 𑀦𑀺𑀓𑀸𑀬𑀦𑀸𑀫𑀁. 𑀮𑀺𑀗𑁆𑀕𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀯𑀺𑀲𑁂𑀲𑀓𑀢𑀁 𑀲𑀡𑁆𑀞𑀸𑀦𑀯𑀺𑀲𑁂𑀲𑀁. 𑀲𑀺𑀓𑁆𑀓𑀸𑀤𑀺𑀓𑀁 𑀧𑀭𑀺𑀓𑁆𑀔𑀸𑀭𑀁. 𑀆𑀓𑀧𑁆𑀧𑁄 𑀞𑀸𑀦𑀸𑀤𑀻𑀲𑀼 𑀅𑀗𑁆𑀕𑀝𑁆𑀞𑀧𑀦𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀭𑀡𑀦𑁆𑀢𑀺 𑀘𑀻𑀯𑀭𑀲𑀺𑀩𑁆𑀩𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑁄.

𑀲𑀗𑁆𑀓𑀦𑁆𑀢𑀺𑀓𑀲𑁆𑀲𑀧𑀺𑀓𑁂𑀦 𑀦𑀺𑀓𑀸𑀬𑁂𑀦 𑀯𑀸𑀤𑁂𑀦 𑀯𑀸 𑀪𑀺𑀦𑁆𑀦𑀸 𑀲𑀗𑁆𑀓𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀪𑁂𑀤𑀸 𑀲𑀼𑀢𑁆𑀢𑀯𑀸𑀤𑀻 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀣 𑀪𑀺𑀚𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀪𑀺𑀦𑁆𑀦𑀯𑀸𑀤𑁂𑀦𑀸𑀢𑀺 𑀪𑀺𑀦𑁆𑀦𑀸 𑀯𑀸𑀤𑀸 𑀏𑀢𑀲𑁆𑀫𑀺𑀦𑁆𑀢𑀺 𑀪𑀺𑀦𑁆𑀦𑀯𑀸𑀤𑁄, 𑀢𑁂𑀦 𑀅𑀪𑀺𑀦𑁆𑀦𑁂𑀦 ¶ 𑀣𑁂𑀭𑀯𑀸𑀤𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀦𑁆𑀦𑀯𑀸𑀤𑁂𑀦𑀸𑀢𑀺 𑀯𑀸 𑀪𑀺𑀦𑁆𑀦𑀸𑀬 𑀮𑀤𑁆𑀥𑀺𑀬𑀸 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀲𑀳𑀸𑀢𑀺 𑀅𑀢𑁆𑀣𑁄. 𑀣𑁂𑀭𑀯𑀸𑀤𑀸𑀦𑀫𑀼𑀢𑁆𑀢𑀫𑁄𑀢𑀺 𑀏𑀢𑁆𑀣 𑀣𑁂𑀭-𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄. 𑀣𑁂𑀭𑀸𑀦𑀁 𑀅𑀬𑀦𑁆𑀢𑀺 𑀣𑁂𑀭𑁄. 𑀓𑁄 𑀲𑁄? 𑀯𑀸𑀤𑁄. 𑀣𑁂𑀭𑁄 𑀯𑀸𑀤𑀸𑀦𑀫𑀼𑀢𑁆𑀢𑀫𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬 ‘‘𑀧𑀭𑀧𑁆𑀧𑀯𑀸𑀤𑀫𑀣𑀦’’𑀦𑁆𑀢𑀺 𑀆𑀳. 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀯𑀸𑀤𑀸𑀦𑀁 𑀧𑀝𑀺𑀲𑁂𑀥𑀦𑀮𑀓𑁆𑀔𑀡𑀪𑀸𑀯𑀢𑁄 ‘‘𑀆𑀬𑀢𑀺𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀓𑀣𑀸

𑁧. 𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧. 𑀫𑀸𑀬𑀸𑀬 ¶ ¶ 𑀅𑀫𑀡𑀺𑀆𑀤𑀬𑁄 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀤𑀺𑀲𑁆𑀲𑀫𑀸𑀦𑀸 ‘‘𑀫𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀪𑀽𑀢𑁂𑀦 𑀫𑀡𑀺𑀉𑀤𑀓𑀸𑀤𑀺𑀆𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑀸 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀅𑀪𑀽𑀢𑀜𑁆𑀜𑁂𑀬𑁆𑀬𑀸𑀓𑀸𑀭𑀢𑁆𑀢𑀸 𑀅𑀲𑀘𑁆𑀘𑀺𑀓𑀝𑁆𑀞𑀸. 𑀬𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀬𑀸…𑀧𑁂… 𑀪𑀽𑀢𑀢𑁆𑀣𑁄’’𑀢𑀺. 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀬𑁆𑀳𑀫𑀸𑀦𑁄 𑀢𑀣𑀸𑀧𑀺 𑀳𑁄𑀢𑀺 𑀅𑀜𑁆𑀜𑀣𑀸𑀧𑀻𑀢𑀺 𑀢𑀸𑀤𑀺𑀲𑁄 𑀜𑁂𑀬𑁆𑀬𑁄 𑀦 𑀧𑀭𑀫𑀢𑁆𑀣𑁄, 𑀅𑀢𑁆𑀢𑀧𑀘𑁆𑀘𑀓𑁆𑀔𑁄 𑀧𑀦 𑀧𑀭𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀲𑁆𑀲𑀯𑀸…𑀧𑁂… 𑀉𑀢𑁆𑀢𑀫𑀢𑁆𑀣𑁄’’𑀢𑀺.

𑀙𑀮𑀯𑀸𑀤𑀲𑁆𑀲𑀸𑀢𑀺 𑀅𑀢𑁆𑀣𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑁂𑀳𑀺 𑀭𑀽𑀧𑀸𑀤𑀻𑀳𑀺 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑁄 𑀲𑀘𑁆𑀘𑀺…𑀧𑁂… 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀘𑀦𑀢𑁄 𑀧𑀦 ‘‘𑀙𑀮𑀯𑀸𑀤𑀲𑁆𑀲𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀮𑀤𑁆𑀥𑀺 𑀙𑀮𑀦𑁆𑀢𑀺. 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄𑀢𑀺 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄. 𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑀺, 𑀭𑀽𑀧𑀸𑀤𑀬𑁄 𑀯𑀺𑀬 𑀉𑀧𑀮𑀩𑁆𑀪𑁂𑀬𑁆𑀬, 𑀢𑀣𑀸 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀦 𑀢𑀯 𑀯𑀸𑀤𑁄 𑀢𑀺𑀝𑁆𑀞𑀢𑀻𑀢𑀺 𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄, 𑀲𑁄 𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀤𑀻𑀧𑀺𑀢𑁄 ‘‘𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀲𑀼 𑀆𑀕𑀢𑁄 𑀥𑀫𑁆𑀫𑀧𑁆𑀧𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀢𑁂𑀦 ¶ 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦𑀸𑀓𑀸𑀭𑁂𑀦𑀸’’𑀢𑀺 𑀯𑀤𑀢𑁄 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺. 𑀅𑀜𑁆𑀜𑀣𑀸 𑀢𑀢𑁄𑀢𑀺 𑀢𑀲𑁆𑀲 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑁄 𑀧𑀦𑁂𑀢𑀺𑀲𑁆𑀲𑀸 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀘 𑀯𑀺𑀲𑁂𑀲𑁄𑀢𑀺? 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀬𑀣𑀸 𑀪𑀽𑀢𑁂𑀦 𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀲𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀬𑁂𑀦 𑀭𑀼𑀧𑁆𑀧𑀦𑀸𑀤𑀺𑀲𑀧𑁆𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀕𑁆𑀕𑀮𑁄𑀧𑀺 ¶ 𑀉𑀧𑀮𑀩𑁆𑀪𑀢𑀻𑀢𑀺 𑀏𑀲 𑀯𑀺𑀲𑁂𑀲𑁄. 𑀬𑀣𑀸 𑀧𑀦 𑀭𑀽𑀧𑀁 𑀯𑀺𑀬 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑀸 𑀯𑁂𑀤𑀦𑀸 𑀦 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀥𑀫𑁆𑀫𑀧𑁆𑀧𑀪𑁂𑀤𑁄 𑀯𑀺𑀬 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀧𑀼𑀕𑁆𑀕𑀮𑁄 𑀦 𑀭𑀼𑀧𑁆𑀧𑀦𑀸𑀤𑀺𑀲𑀧𑁆𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀲𑀓𑁆𑀓𑀸 𑀧𑀭𑀯𑀸𑀤𑀺𑀦𑀸 𑀯𑀢𑁆𑀢𑀼𑀦𑁆𑀢𑀺 𑀅𑀘𑁄𑀤𑀦𑀻𑀬𑀁 𑀏𑀢𑀁 𑀲𑀺𑀬𑀸. 𑀅𑀯𑀚𑀸𑀦𑀦𑀜𑁆𑀘 𑀢𑀲𑁆𑀲 𑀬𑀼𑀢𑁆𑀢𑀦𑁆𑀢𑀺 𑀦𑀺𑀕𑁆𑀕𑀳𑁄 𑀘 𑀦 𑀓𑀸𑀢𑀩𑁆𑀩𑁄. 𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀧𑀦 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯 𑀘𑁄𑀤𑁂𑀢𑀺. 𑀅𑀯𑀚𑀸𑀦𑀦𑁂𑀦𑁂𑀯 𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀧𑀓𑁆𑀔𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀳𑀺 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀧𑀓𑁆𑀔𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀧𑀓𑁆𑀔𑀸 𑀧𑀞𑀫𑀤𑀼𑀢𑀺𑀬𑀦𑀬𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀯𑀤𑀦𑁆𑀢𑁄 𑀯𑀢𑁆𑀢𑀩𑁆𑀩𑀲𑁆𑀲 𑀅𑀯𑀘𑀦𑁂 𑀤𑁄𑀲𑀁 𑀧𑀸𑀧𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀏𑀯𑀫𑁂𑀢𑀁 𑀦𑀺𑀕𑁆𑀕𑀳𑀲𑁆𑀲 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀘𑀢𑀼𑀦𑁆𑀦𑀁 𑀧𑀸𑀧𑀦𑀸𑀭𑁄𑀧𑀦𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀦 𑀤𑁆𑀯𑀻𑀳𑀺 𑀞𑀧𑀦𑀸𑀳𑀺 𑀲𑀳 𑀲𑀢𑁆𑀢𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁𑀯𑀚𑁆𑀚𑀦𑁂 𑀯𑀸 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀞𑀧𑀦𑀸 𑀦𑀸𑀫 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 ‘𑀅𑀬𑀁 𑀢𑀯 𑀤𑁄𑀲𑁄’𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀦𑀺𑀕𑁆𑀕𑀳𑀲𑁆𑀲 𑀯𑀸 𑀧𑀝𑀺𑀓𑀫𑁆𑀫𑀲𑁆𑀲 𑀯𑀸 𑀧𑀸𑀓𑀝𑀪𑀸𑀯𑀓𑀭𑀡’’𑀦𑁆𑀢𑀺 (𑀓𑀣𑀸. 𑀅𑀝𑁆𑀞. 𑁨). 𑀢𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀇𑀥𑀸𑀧𑀺 𑀞𑀧𑀦𑀸𑀤𑁆𑀯𑀬𑀁 𑀯𑀚𑁆𑀚𑁂𑀢𑀺. 𑀬𑀣𑀸 𑀧𑀦 𑀢𑀢𑁆𑀣 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀪𑀸𑀯𑀁 𑀅𑀯𑀢𑁆𑀯𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀪𑀸𑀯𑀁 𑀯𑀓𑁆𑀔𑀢𑀺, 𑀏𑀯𑀫𑀺𑀥𑀸𑀧𑀺 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀲𑀼𑀤𑁆𑀥𑀺𑀓𑀦𑀺𑀕𑁆𑀕𑀳𑀲𑁆𑀲 𑀧𑀦 𑀦𑀺𑀕𑁆𑀕𑀳𑀧𑁆𑀧𑀥𑀸𑀦𑀢𑁆𑀢𑀸 𑀉𑀤𑁆𑀤𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑁄 𑀦𑀺𑀕𑁆𑀕𑀳𑁄𑀯 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 ‘‘𑀅𑀬𑀣𑀸𑀪𑀽𑀢𑀦𑀺𑀕𑁆𑀕𑀳𑀢𑁆𑀢𑀸 𑀢𑀢𑁆𑀣 𑀧𑀝𑀺𑀓𑀫𑁆𑀫𑀁 𑀯𑀺𑀲𑀼𑀁 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀤𑀼𑀢𑀺𑀬𑁂 𑀯𑀸𑀤𑀫𑀼𑀔𑁂 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀪𑀸𑀯𑁄 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀪𑀸𑀯𑁄 𑀘 𑀆𑀧𑀚𑁆𑀚𑀢𑀺.

𑁨. 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀓𑁆𑀔𑀢𑀺 𑀳𑀺 ¶ ‘‘𑀲𑀼𑀤𑁆𑀥𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 𑀧𑀭𑀫𑀢𑁆𑀣𑀫𑀺𑀲𑁆𑀲𑀓𑀁 𑀯𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 (𑀓𑀣𑀸. 𑀅𑀝𑁆𑀞. 𑁬). 𑀢𑀢𑁆𑀣 𑀬𑀤𑀺 𑀧𑀭𑀯𑀸𑀤𑀺𑀦𑀸 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀁, 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀓𑀸𑀭𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀤𑀦𑁆𑀢𑁂𑀦 𑀲𑀫𑀸𑀦𑀮𑀤𑁆𑀥𑀺𑀓𑁄 𑀦𑀧𑁆𑀧𑀝𑀺𑀲𑁂𑀥𑀺𑀢𑀩𑁆𑀩𑁄, 𑀓𑀣𑀸 𑀏𑀯𑀸𑀬𑀁 𑀦𑀸𑀭𑀪𑀺𑀢𑀩𑁆𑀩𑀸. 𑀅𑀣 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑀸 ¶ 𑀘 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀁𑀬𑁂𑀯 𑀲𑀦𑁆𑀥𑀸𑀬 𑀧𑀭𑀯𑀸𑀤𑀻 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀬𑀫𑀢𑁆𑀣𑁄. 𑀲𑀓𑀯𑀸𑀤𑀺𑀦𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁𑀬𑁂𑀯 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀬𑀤𑀺 𑀉𑀪𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀧𑀼𑀦 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀏𑀯𑀫𑀸𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀬𑀤𑀺 𑀘 𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸, 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺 𑀅𑀦𑀼𑀬𑁄𑀕𑁄 𑀦 𑀓𑀸𑀢𑀩𑁆𑀩𑁄, 𑀦 𑀘 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀅𑀦𑀼𑀬𑁄𑀕𑁄 𑀬𑀼𑀢𑁆𑀢𑁄. 𑀦 𑀳𑀺 𑀯𑁂𑀤𑀬𑀺𑀢𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀸 𑀯𑁂𑀤𑀦𑀸 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸, 𑀦 𑀘 𑀧𑀭𑀯𑀸𑀤𑀻 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀁 𑀧𑀼𑀕𑁆𑀕𑀮𑀁 𑀇𑀘𑁆𑀙𑀢𑀺, 𑀅𑀣 𑀔𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀫𑁂𑀯𑀸𑀢𑀺. 𑀧𑀭𑀫𑀢𑁆𑀣𑀲𑀘𑁆𑀘𑀢𑁄 𑀅𑀜𑁆𑀜𑀲𑁆𑀫𑀺𑀁 𑀲𑀘𑁆𑀘𑀺𑀓𑀝𑁆𑀞𑁂 𑀯𑀺𑀚𑁆𑀚𑀫𑀸𑀦𑁂 𑀦𑀸𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸. 𑀅𑀲𑀘𑁆𑀘𑀺𑀓𑀝𑁆𑀞𑁂 𑀲𑀘𑁆𑀘𑀺𑀓𑀝𑁆𑀞𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀸𑀦𑀁 𑀯𑁄𑀳𑀭𑀺𑀢𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀢𑀸 𑀦 𑀬𑀼𑀢𑁆𑀢𑀸. 𑀯𑁄𑀳𑀭𑀺𑀢𑀧𑀭𑀫𑀢𑁆𑀣𑀲𑀘𑁆𑀘𑀺𑀓𑀝𑁆𑀞𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀺𑀓𑀝𑁆𑀞𑀪𑀸𑀯𑁂 𑀯𑀼𑀢𑁆𑀢𑀦𑀬𑁄𑀯 𑀤𑁄𑀲𑁄. 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀜𑁆𑀘 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑁂𑀬𑁆𑀬 𑀯𑀸 𑀦 𑀯𑀸. 𑀬𑀤𑀺 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑁄𑀧𑀺 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀅𑀦𑀼𑀚𑀸𑀦𑀦𑁆𑀢𑁄 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄. 𑀅𑀣 𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦, 𑀢𑀁𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸𑀓𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄 𑀅𑀲𑀺𑀤𑁆𑀥𑀢𑁆𑀢𑀸. 𑀯𑀓𑁆𑀔𑀢𑀺 𑀘 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑀺, 𑀦 𑀏𑀯𑀁 𑀧𑀼𑀕𑁆𑀕𑀮𑁄’’𑀢𑀺. 𑀢𑀲𑁆𑀫𑀸 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀦𑁆𑀢𑀺 𑀏𑀢𑁆𑀣 𑀲𑀘𑁆𑀘𑀤𑁆𑀯𑀬𑀸𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀅𑀦𑀼𑀜𑁆𑀜𑁂𑀬𑁆𑀬𑀫𑁂𑀢𑀁 𑀲𑀺𑀬𑀸, 𑀦 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀏𑀓𑀤𑁂𑀲𑁂𑀦 𑀧𑀭𑀫𑀢𑁆𑀣𑀸𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑀸 𑀅𑀦𑀼𑀚𑀸𑀦𑀦𑀲𑁆𑀲 𑀦 𑀓𑀸𑀭𑀡𑀁, 𑀏𑀯𑀁 𑀏𑀓𑀤𑁂𑀲𑁂𑀦 𑀲𑀫𑁆𑀫𑀼𑀢𑀺𑀬𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑀸 𑀧𑀝𑀺𑀓𑁆𑀔𑁂𑀧𑀲𑁆𑀲 𑀘𑀸𑀢𑀺 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣𑀸𑀧𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀼𑀧𑀮𑀩𑁆𑀪𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀦𑁆𑀢𑀺 𑀦𑀼𑀧𑀮𑀩𑁆𑀪𑀢𑀻𑀢𑀺 𑀇𑀤𑀫𑁂𑀯 𑀯𑀘𑀦𑀁 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 𑀏𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀉𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑁂𑀳𑀺 𑀅𑀳𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄, 𑀏𑀯𑀁 𑀦𑀼𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑁂𑀳𑀺 𑀢𑁆𑀯𑀦𑁆𑀢𑀺 𑀏𑀯𑀁 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀸𑀫𑀜𑁆𑀜𑁂𑀦 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀓𑀧𑁆𑀧𑀦𑀁 𑀧𑀦𑁂𑀢𑁆𑀣 𑀙𑀮𑀯𑀸𑀤𑁄 ¶ 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑁂𑀦 𑀦𑀼𑀧𑀮𑀩𑁆𑀪𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀙𑀮𑀯𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 ‘‘𑀙𑀮𑀯𑀸𑀤𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀜𑁆𑀘 𑀙𑀮𑀯𑀸𑀤𑀜𑁆𑀘 ¶ 𑀦𑀺𑀲𑁆𑀲𑀸𑀬𑀸𑀢𑀺 𑀯𑀸 𑀅𑀢𑁆𑀣𑁄. 𑀞𑀧𑀦𑀸 𑀦𑀺𑀕𑁆𑀕𑀳𑀧𑁆𑀧𑀝𑀺𑀓𑀫𑁆𑀫𑀸𑀦𑀁 𑀧𑀸𑀓𑀝𑀪𑀸𑀯𑀓𑀭𑀡𑀁 𑀦 𑀳𑁄𑀢𑀻𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀧𑀓𑁆𑀔𑀝𑁆𑀞𑀧𑀦𑁂𑀦 𑀯𑀺𑀦𑀸 𑀧𑀼𑀭𑀺𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑁆𑀲 𑀅𑀯𑀚𑀸𑀦𑀦𑀁, 𑀧𑀘𑁆𑀙𑀺𑀫𑀁 𑀯𑀸 𑀅𑀯𑀚𑀸𑀦𑀦𑁆𑀢𑀲𑁆𑀲 𑀧𑀼𑀭𑀺𑀫𑀸𑀦𑀼𑀚𑀸𑀦𑀦𑀁 𑀫𑀺𑀘𑁆𑀙𑀸𑀢𑀺 𑀲𑀓𑁆𑀓𑀸 𑀆𑀭𑁄𑀧𑁂𑀢𑀼𑀦𑁆𑀢𑀺.

𑁩. 𑀢𑀯𑀸𑀢𑀺, 𑀧𑀝𑀺𑀚𑀸𑀦𑀦𑁆𑀢𑀦𑁆𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀉𑀧𑀬𑁄𑀕𑀯𑀘𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑁆𑀯𑀁𑀬𑁂𑀯 𑀧𑀝𑀺𑀚𑀸𑀦𑀦𑁆𑀢𑁄’’𑀢𑀺 𑀆𑀳.

𑁪-𑁫. 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑀲𑁆𑀲 𑀉𑀧𑀦𑀻𑀢𑀢𑁆𑀢𑀸𑀢𑀺 ‘‘𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫, 𑀳𑀜𑁆𑀘𑀻’’𑀢𑀺𑀆𑀤𑀺𑀦𑀸 𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄, 𑀫𑀬𑀸 𑀢𑀯 𑀓𑀢𑁄 𑀦𑀺𑀕𑁆𑀕𑀳𑁄 𑀯𑀺𑀬 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀢𑁂𑀦 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀓𑀢𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀢𑁂𑀦 𑀦𑀺𑀬𑀸𑀫𑁂𑀦 𑀤𑀼𑀓𑁆𑀓𑀝𑀪𑀸𑀯𑀲𑁆𑀲 𑀅𑀢𑁆𑀢𑀦𑀸 𑀓𑀢𑀦𑀺𑀕𑁆𑀕𑀳𑁂𑀦 𑀲𑀳 𑀉𑀧𑀦𑀻𑀢𑀢𑁆𑀢𑀸 𑀅𑀦𑀺𑀕𑁆𑀕𑀳𑀪𑀸𑀯𑀲𑁆𑀲 𑀯𑀸 𑀉𑀧𑀕𑀫𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑁂𑀯 𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑀳𑀜𑁆𑀘𑀺…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀢𑀲𑁆𑀲 𑀅𑀦𑀺𑀕𑁆𑀕𑀳𑀪𑀸𑀯𑀦𑀺𑀕𑀫𑀦𑀲𑁆𑀲𑁂𑀯 𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁭-𑁧𑁦. ‘‘𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀧𑀝𑀺𑀓𑁆𑀔𑁂𑀧𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀬𑀤𑀺 𑀓𑀢𑁄, 𑀧𑀭𑀫𑀢𑁆𑀣𑀢𑁄 𑀅𑀜𑁆𑀜𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑀲𑁆𑀲 𑀮𑀤𑁆𑀥𑀻𑀢𑀺 𑀆𑀧𑀚𑁆𑀚𑀢𑀺. 𑀢𑀣𑀸 𑀘 𑀲𑀢𑀺 𑀦𑀸𑀬𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑁆𑀕𑀽𑀳𑀺𑀢𑁆𑀯𑀸 𑀧𑀭𑀲𑁆𑀲 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀬 𑀅𑀯𑀺𑀭𑁄𑀥𑀺𑀢𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀮𑀤𑁆𑀥𑀺𑀁 𑀯𑀤𑀦𑁆𑀢𑀲𑁆𑀲 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺. 𑀅𑀢𑁆𑀢𑀦𑁄 ¶ 𑀧𑀦 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀭𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀮𑀤𑁆𑀥𑀺 𑀕𑀳𑀺𑀢𑀸 𑀳𑁄𑀢𑀻𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸.

𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁧. 𑀲𑀩𑁆𑀩𑀢𑁆𑀣𑀸𑀢𑀺 ¶ 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂𑀢𑀺 𑀅𑀬𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀁𑀔𑀺𑀢𑁆𑀢𑀧𑀸𑀞𑁂. 𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀭𑀻𑀭𑀢𑁄 𑀩𑀳𑀺 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀏𑀢𑁂𑀦 𑀦 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀦 𑀳𑀺 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀲𑀭𑀻𑀭𑀢𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀉𑀧𑀮𑀤𑁆𑀥𑀺𑀑𑀓𑀸𑀲𑁄 𑀅𑀢𑁆𑀣𑀻𑀢𑀺.

𑁩. 𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁨. 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑀜𑁆𑀘𑀸𑀢𑀺 𑀫𑀚𑁆𑀛𑀺𑀫𑀚𑀸𑀢𑀺𑀓𑀸𑀮𑁂 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀢𑀲𑁆𑀲𑁂𑀯 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑁂𑀲𑀼 𑀉𑀧𑀮𑀤𑁆𑀥𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀧𑀞𑀫𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀞𑀫𑁂 ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯, 𑀓𑀺𑀁 𑀢𑀁? 𑀧𑀸𑀞𑀲𑁆𑀲 𑀲𑀁𑀔𑀺𑀢𑁆𑀢𑀢𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀳𑀺 𑀬𑀲𑁆𑀫𑀸 ‘‘𑀲𑀩𑁆𑀩𑀤𑀸 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀤𑀸 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺.

𑁪. 𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑀦𑀬𑁂 ¶ 𑀘 𑀬𑀲𑁆𑀫𑀸 ‘‘𑀲𑀩𑁆𑀩𑁂𑀲𑀼 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀸𑀤𑀺𑀲𑀫𑁂𑀯𑀸’’𑀢𑀺.

𑀑𑀓𑀸𑀲𑀸𑀤𑀺𑀲𑀘𑁆𑀘𑀺𑀓𑀝𑁆𑀞𑁄

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁪. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲𑀸𑀢𑀺𑀆𑀤𑀺𑀫𑁆𑀳𑀺 𑀅𑀦𑀼𑀮𑁄𑀫𑀧𑀜𑁆𑀘𑀓𑀦𑁆𑀢𑀺 𑀦𑀺𑀕𑁆𑀕𑀳𑀧𑀜𑁆𑀘𑀓𑀁, 𑀧𑀘𑁆𑀘𑀦𑀻𑀓𑀦𑁆𑀢𑀺 𑀘 𑀧𑀝𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 ‘‘𑀲𑀩𑁆𑀩𑀢𑁆𑀣 ¶ 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑁄 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀧𑀸𑀴𑀺𑀁 𑀲𑀁𑀔𑀺𑀧𑀺𑀢𑁆𑀯𑀸 𑀆𑀕𑀢𑁂 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂 ‘‘𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀦𑀸 (𑀓𑀣𑀸. 𑀅𑀝𑁆𑀞. 𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀧𑀘𑁆𑀘𑀦𑀻𑀓𑀲𑁆𑀲 𑀘 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀝𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀧𑀝𑀺𑀓𑀫𑁆𑀫𑀸𑀤𑀺𑀧𑀸𑀴𑀺𑀁 𑀲𑀁𑀔𑀺𑀧𑀺𑀢𑁆𑀯𑀸 𑀆𑀤𑀺𑀫𑀢𑁆𑀢𑀤𑀲𑁆𑀲𑀦𑁂𑀦 𑀆𑀕𑀢𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀫𑁆𑀳𑀺 𑀅𑀦𑀼𑀮𑁄𑀫𑁂 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀓𑀣𑀸. 𑀅𑀝𑁆𑀞. 𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 𑀬𑀁 𑀆𑀭𑀤𑁆𑀥𑀁, 𑀢𑀲𑁆𑀫𑀺𑀦𑁆𑀢𑀺 𑀏𑀯𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑁂𑀲𑀼 𑀢𑀻𑀲𑀼 𑀫𑀼𑀔𑁂𑀲𑀽𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀦𑀼𑀮𑁄𑀫𑀧𑀜𑁆𑀘𑀓𑀫𑀽𑀮𑀓𑀸 𑀘𑁂𑀢𑁆𑀣 𑀲𑀩𑁆𑀩𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀧𑀸𑀴𑀺 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀧𑀸𑀴𑀻𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀧𑀸𑀴𑀺 𑀘 𑀧𑀘𑁆𑀘𑀦𑀻𑀓𑀲𑁆𑀲 𑀧𑀸𑀴𑀻𑀢𑀺. 𑀢𑀁 𑀲𑀁𑀔𑀺𑀧𑀺𑀢𑁆𑀯𑀸 𑀧𑀝𑀺𑀓𑀫𑁆𑀫𑀯𑀲𑁂𑀦 𑀆𑀕𑀢𑁂 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑁂 𑀧𑀘𑁆𑀘𑀦𑀻𑀓𑁂 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑁂 𑀅𑀦𑀼𑀮𑁄𑀫𑁂 𑀘 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁧𑁭-𑁨𑁭. 𑀭𑀽𑀧𑀸𑀤𑀻𑀳𑀺 ¶ 𑀲𑀤𑁆𑀥𑀺𑀁 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀁, 𑀲𑀘𑁆𑀘𑀺𑀓𑀝𑁆𑀞𑁂 𑀯𑀸 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀲𑁆𑀲 𑀲𑀁𑀲𑀦𑁆𑀤𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑁄 𑀭𑀽𑀧𑀜𑁆𑀘𑀸𑀢𑀺 𑀘-𑀓𑀸𑀭𑀲𑁆𑀲 𑀲𑀫𑀼𑀘𑁆𑀘𑀬𑀢𑁆𑀣𑀢𑁆𑀢𑀸 𑀬𑀣𑀸 𑀭𑀽𑀧𑀦𑁆𑀢𑀺 𑀏𑀯𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀅𑀦𑀜𑁆𑀜𑁄 𑀘 𑀧𑀼𑀕𑁆𑀕𑀮𑁄 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀮𑀤𑁆𑀥𑀺 𑀲𑀫𑀬𑁄. ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀩𑁆𑀬𑀸𑀓𑀢𑀫𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀓𑀁 (𑀲𑀁. 𑀦𑀺. 𑁪.𑁪𑁧𑁬) 𑀲𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀬𑀫𑀸𑀦𑁂 𑀢𑀤𑀼𑀪𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑀬𑀲𑀼𑀢𑁆𑀢𑀯𑀺𑀭𑁄𑀥𑀁 𑀤𑀺𑀲𑁆𑀯𑀸’’𑀢𑀺.

𑀥𑀫𑁆𑀫𑀢𑁄𑀢𑀺 𑀧𑀸𑀴𑀺𑀢𑁄. ‘‘𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀁𑀔𑀺𑀢𑁆𑀢𑀸𑀦𑀺. 𑀧𑀭𑀯𑀸𑀤𑀻…𑀧𑁂… 𑀤𑀲𑁆𑀲𑀺𑀢𑀸𑀦𑀻’’𑀢𑀺 𑀯𑀤𑀦𑁆𑀢𑁂𑀳𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺…𑀧𑁂… 𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫𑀦𑁆𑀢𑀺 ¶ 𑀏𑀢𑁆𑀣 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀧𑀸𑀞𑁄 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺. 𑀅𑀜𑁆𑀜𑀢𑁆𑀢𑀁 𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀦𑁆𑀢𑀺 𑀬𑀣𑀸 𑀫𑀬𑀸 𑀅𑀜𑁆𑀜𑀢𑁆𑀢𑀁 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀘 𑀢𑀬𑀸𑀧𑀺 𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀢𑁆𑀢𑀧𑀝𑀺𑀜𑁆𑀜𑀸𑀬 𑀘𑁄𑀤𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑁆𑀢𑀸𑀢𑀺 𑀅𑀩𑁆𑀬𑀸𑀓𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀞𑀧𑀦𑀻𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀭𑁂𑀦𑀧𑀺 𑀞𑀧𑀦𑀻𑀬𑀢𑁆𑀢𑀸 𑀮𑀤𑁆𑀥𑀺𑀫𑁂𑀯 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀲𑁄𑀧𑀺 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀲𑀺𑀬𑀸. 𑀧𑀭𑁄 𑀧𑀦 𑀧𑀼𑀕𑁆𑀕𑀮𑁄𑀢𑀺 𑀓𑀜𑁆𑀘𑀺 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀞𑀧𑀦𑀻𑀬𑀢𑁆𑀢𑀁 𑀇𑀘𑁆𑀙𑀢𑀺, 𑀲𑀢𑀺 𑀘 𑀲𑀪𑀸𑀯𑁂 𑀞𑀧𑀦𑀻𑀬𑀢𑀸 𑀦 𑀬𑀼𑀢𑁆𑀢𑀸𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀲𑀫𑁆𑀫𑀼𑀢𑀺 𑀧𑀦 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀺. 𑀢𑁂𑀦𑁂𑀯𑀲𑁆𑀲 𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑀁 𑀯𑀤𑀦𑁆𑀢𑁄 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄.

𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮-𑁩𑁬. 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸 𑀘𑀸𑀢𑀺 𑀇𑀤𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀢𑀸 𑀦𑁄 𑀅𑀜𑁆𑀜𑀢𑁆𑀢𑀲𑁆𑀲 𑀓𑀸𑀭𑀡𑀁 𑀬𑀼𑀢𑁆𑀢𑀁, 𑀅𑀣 𑀔𑁄 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑀸𑀢𑀺 ¶ 𑀯𑀺𑀘𑀸𑀭𑁂𑀢𑀩𑁆𑀩𑀁. ‘‘𑀏𑀓𑀯𑀻𑀲𑀸𑀥𑀺𑀓𑀸𑀦𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀯𑀻𑀲𑀸𑀥𑀺𑀓𑀸𑀦𑀻𑀢𑀺 𑀧𑀦 𑀧𑀞𑀺𑀢𑀩𑁆𑀩𑀁.

𑁩𑁭-𑁪𑁫. ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀲𑀼𑀢𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀦𑁆𑀢𑁂𑀦 𑀉𑀧𑀮𑀤𑁆𑀥𑀺 𑀅𑀦𑀼𑀚𑀸𑀦𑀺𑀢𑀸 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀯𑀻𑀲𑀸𑀥𑀺𑀓𑀸𑀦𑀺 𑀦𑀯 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀲𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀏𑀢𑁂𑀦 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑁂𑀧𑀺 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀫𑀺𑀘𑁆𑀘𑁂𑀯 𑀧𑀸𑀞𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀜𑁆𑀘 𑀯𑀸𑀤𑀫𑀼𑀔𑁂𑀲𑀼 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁂 ‘‘𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 ‘‘𑀧𑀝𑀺𑀓𑀫𑁆𑀫𑀧𑀜𑁆𑀘𑀓’’𑀦𑁆𑀢𑀺.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁪𑁬-𑁫𑁨. 𑀏𑀓𑀥𑀫𑁆𑀫𑀢𑁄𑀧𑀺 ¶ 𑀅𑀜𑁆𑀜𑀢𑁆𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀭𑀽𑀧𑀸𑀤𑀺𑀏𑀓𑁂𑀓𑀥𑀫𑁆𑀫𑀯𑀲𑁂𑀦 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄. 𑀲𑀫𑀼𑀤𑀸𑀬𑀢𑁄 𑀳𑀺 𑀅𑀬𑀁 𑀅𑀜𑁆𑀜𑀢𑁆𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀏𑀓𑀤𑁂𑀲𑀢𑁄 𑀅𑀦𑀜𑁆𑀜𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸𑀢𑀺 𑀏𑀢𑀁 𑀯𑀘𑀦𑁄𑀓𑀸𑀲𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀅𑀬𑀜𑁆𑀘 𑀅𑀦𑀼𑀬𑁄𑀕𑁄’’𑀢𑀺𑀆𑀤𑀺𑀫𑀸𑀳. 𑀲𑀓𑀮𑀦𑁆𑀢𑀺 𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀧𑀭𑀫𑀢𑁆𑀣𑀲𑀘𑁆𑀘𑀁 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀏𑀯𑀁 𑀲𑀓𑀮𑀁 𑀲𑀦𑁆𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀓𑀮𑀁 𑀧𑀭𑀫𑀢𑁆𑀣𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀬𑁄𑀕𑀮𑀓𑁆𑀔𑀡𑀲𑁆𑀲 𑀞𑀧𑀺𑀢𑀢𑁆𑀢𑀸 𑀲𑀓𑀮𑀧𑀭𑀫𑀢𑁆𑀣𑀢𑁄 𑀘 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀸 𑀲𑀘𑁆𑀘𑀺𑀓𑀝𑁆𑀞𑁂𑀦 𑀧𑀼𑀕𑁆𑀕𑀮𑁂𑀦 𑀢𑀢𑁄 𑀅𑀜𑁆𑀜𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄’’𑀢𑀺 𑀇𑀫𑀁 𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀦𑀺𑀕𑁆𑀕𑀳𑀸𑀭𑁄𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀪𑀸𑀕𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀭𑀽𑀧𑀢𑁄 𑀅𑀜𑁆𑀜𑀲𑀪𑀸𑀕𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀥𑀫𑁆𑀫𑀸𑀢𑀺 𑀭𑀽𑀧𑀯𑀚𑁆𑀚𑁂 𑀲𑀩𑁆𑀩𑀥𑀫𑁆𑀫𑁂 𑀯𑀤𑀢𑀺. ‘‘𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄’’𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀯𑀺𑀦𑀸𑀲𑁂 𑀯𑀺𑀦𑀸𑀲𑀸𑀧𑀢𑁆𑀢𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀪𑀬𑁂𑀦 𑀘𑁂𑀯𑀸’’𑀢𑀺. 𑀢𑀻𑀲𑀼 𑀧𑀦 𑀲𑀫𑀬𑀯𑀺𑀭𑁄𑀥𑁂𑀦 𑀧𑀝𑀺𑀓𑁆𑀔𑁂𑀧𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀳𑀺 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀇𑀘𑁆𑀙𑀢𑀺, 𑀅𑀧𑀺𑀘 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀲𑀼 ¶ 𑀳𑀺 𑀧𑀜𑁆𑀘𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄𑀢𑀺. 𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺 𑀏𑀢𑁆𑀣 𑀘 𑀭𑀽𑀧𑀯𑀸 𑀧𑀼𑀕𑁆𑀕𑀮𑁄𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁫𑁪. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂𑀢𑀺 𑀇𑀤𑀁 𑀬𑀁 𑀯𑀓𑁆𑀔𑀢𑀺 ‘‘𑀙𑀮𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀁 ‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’𑀦𑁆𑀢𑀺𑀆𑀤𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁫𑁪), 𑀢𑁂𑀦 𑀧𑀦 𑀦 𑀲𑀫𑁂𑀢𑀺. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂 𑀳𑀺 𑀧𑀘𑁆𑀘𑀦𑀻𑀓𑁂 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀧𑀦 ‘‘𑀧𑀝𑀺𑀓𑀫𑁆𑀫’’𑀦𑁆𑀢𑀺.

𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀧𑀼𑀕𑁆𑀕𑀮𑁄 ¶ 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀢𑀺 𑀏𑀢𑁆𑀣 𑀢𑀤𑁂𑀯 𑀏𑀓𑀢𑁆𑀢𑀁 𑀧𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀧𑀼𑀕𑁆𑀕𑀮𑀲𑁆𑀲 𑀳𑀺 𑀅𑀯𑀺𑀪𑀚𑀺𑀢𑀩𑁆𑀩𑀢𑀁, 𑀉𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀢𑀁 𑀯𑀤𑀦𑁆𑀢𑁄 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺𑀧𑀼𑀕𑁆𑀕𑀮-𑀲𑀤𑁆𑀤𑀸𑀦𑀁 𑀓𑀣𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬𑀸𑀢𑀺? 𑀬𑀣𑀸 𑀘 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺-𑀭𑀽𑀧-𑀲𑀤𑁆𑀤𑀸𑀦𑀁 𑀢𑀁 𑀯𑀺𑀪𑀸𑀕𑀁 𑀯𑀤𑀢𑁄 𑀭𑀽𑀧𑀁 𑀓𑀺𑀜𑁆𑀘𑀺 𑀉𑀧𑀮𑀩𑁆𑀪𑀢𑀺, 𑀓𑀺𑀜𑁆𑀘𑀺 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀁 𑀧𑀲𑀗𑁆𑀕𑁄 𑀦𑀸𑀧𑀚𑁆𑀚𑀢𑀺, 𑀏𑀯𑀁 𑀏𑀢𑀲𑁆𑀲𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀁 𑀯𑀤𑀢𑁄 𑀬𑀣𑀸𑀆𑀧𑀸𑀤𑀺𑀢𑁂𑀦 𑀧𑀲𑀗𑁆𑀕𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁬𑁦. ‘‘𑀲𑀼𑀜𑁆𑀜𑀢𑁄 ¶ 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫) 𑀏𑀢𑁂𑀦 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀢𑁆𑀣𑀻𑀢𑀺𑀧𑀺 𑀯𑀼𑀢𑁆𑀢’’𑀦𑁆𑀢𑀺.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁧-𑁬𑁬. 𑀭𑀽𑀧𑀓𑀸𑀬𑀸𑀯𑀺𑀭𑀳𑀁 𑀲𑀦𑁆𑀥𑀸𑀬 ‘‘𑀭𑀽𑀧𑀓𑀸𑀬𑀲𑀩𑁆𑀪𑀸𑀯𑀢𑁄’’𑀢𑀺 𑀆𑀳. ‘‘𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸’’𑀢𑀺 (𑀇𑀢𑀺𑀯𑀼. 𑁯𑁦) 𑀲𑀼𑀢𑁆𑀢𑁂 𑀆𑀕𑀢𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀢𑀣𑀸𑀭𑀽𑀧𑀸𑀬 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀺𑀢𑀸𑀬𑀸’’𑀢𑀺. 𑀯𑀻𑀢𑀭𑀸𑀕𑀲𑀩𑁆𑀪𑀸𑀯𑀢𑁄𑀢𑀺 𑀓𑀸𑀫𑀻𑀪𑀸𑀯𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀓𑀸𑀫𑀥𑀸𑀢𑀼𑀬𑀸 𑀆𑀬𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 ‘‘𑀓𑀸𑀫𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁭. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀓𑀸𑀭𑀡𑀯𑀘𑀦𑀫𑁂𑀢𑀁, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀓𑀸𑀭𑀡𑀪𑀽𑀢𑀸𑀬 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀆𑀳𑀘𑁆𑀘 𑀪𑀸𑀲𑀺𑀢𑀦𑁆𑀢𑀺 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀩𑁆𑀬𑀸𑀓𑀢𑀫𑁂𑀢𑀁 𑀫𑀬𑀸’’𑀢𑀺 (𑀫. 𑀦𑀺. 𑁨.𑁧𑁨𑁮) 𑀆𑀳𑀘𑁆𑀘 𑀪𑀸𑀲𑀺𑀢𑀁.

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁯-𑁭𑁨. ‘‘𑀤𑀲𑁆𑀲𑁂𑀦𑁆𑀢𑁄 ¶ ‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁, ‘‘𑀤𑀲𑁆𑀲𑁂𑀦𑁆𑀢𑁄 ‘𑀦 𑀯𑀢𑁆𑀢𑀩𑁆𑀩𑀁 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀧𑀦 𑀪𑀯𑀺𑀢𑀩𑁆𑀩𑀁, 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁.

𑁯𑁧. 𑀬𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 ‘‘𑀭𑀽𑀧𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑁂𑀦 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄’’𑀢𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀬𑁂𑀦𑀸𑀓𑀸𑀭𑁂𑀦 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀇𑀤𑀁 𑀆𑀧𑀚𑁆𑀚𑀢𑀺 ¶ , 𑀲𑁄 𑀯𑀢𑁆𑀢𑀩𑁆𑀩𑁄. 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀦𑀺𑀭𑀬𑀽𑀧𑀕𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀜𑁆𑀜𑀽𑀧𑀕𑀲𑁆𑀲 𑀅𑀭𑀽𑀧𑀽𑀧𑀕𑀲𑁆𑀲 𑀘 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀻𑀢𑀺 𑀘𑀼𑀢𑀺𑀢𑁄 𑀅𑀦𑀦𑁆𑀢𑀭𑀁 𑀉𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀘 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀓𑀸𑀮𑁂 𑀘 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀕𑀳𑁂𑀢𑁆𑀯𑀸 𑀅𑀲𑀜𑁆𑀜𑀽𑀧𑀕𑀲𑁆𑀲 𑀘 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀦𑁆𑀢𑀭𑀸𑀪𑀯𑀪𑀸𑀯𑀢𑁄 ‘‘𑀅𑀲𑀜𑁆𑀜𑀽𑀧𑀧𑀢𑁆𑀢𑀺 𑀅𑀯𑁂𑀤𑀦𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑁯𑁨. 𑀅𑀯𑁂𑀤𑀦𑁄𑀢𑀺𑀆𑀤𑀻𑀲𑀼 𑀢𑀤𑀜𑁆𑀜𑀦𑁆𑀢𑀺 𑀲𑀜𑁆𑀜𑀪𑀯𑀢𑁄 𑀅𑀜𑁆𑀜𑀁 𑀅𑀲𑀜𑁆𑀜𑀸𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀼𑀧𑀧𑀢𑁆𑀢𑀺𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀧𑀺 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀇𑀘𑁆𑀙𑀦𑁆𑀢𑀺.

𑁯𑁩. 𑀬𑀲𑁆𑀫𑀸 𑀭𑀽𑀧𑀸𑀤𑀺𑀥𑀫𑁆𑀫𑁂 𑀯𑀺𑀦𑀸 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀇𑀦𑁆𑀥𑀦𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑁂𑀦 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀺𑀦𑀸 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺𑀯𑀲𑁂𑀦 𑀯𑀤𑀢𑀺.

𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁯𑁭. 𑀦𑀻𑀮𑀁 𑀭𑀽𑀧𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺𑀆𑀤𑀻𑀲𑀽𑀢𑀺 ‘‘𑀦𑀻𑀮𑀁 𑀭𑀽𑀧𑀁 𑀉𑀧𑀸𑀤𑀸𑀬 𑀦𑀻𑀮𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑁆𑀣 𑀬𑁄 𑀧𑀼𑀝𑁆𑀞𑁄 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺, 𑀢𑀤𑀸𑀤𑀻𑀲𑀽𑀢𑀺 𑀅𑀢𑁆𑀣𑁄.

𑁯𑁮. 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬𑀸𑀢𑀺 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀁. ‘‘𑀓𑀼𑀲𑀮𑀁 𑀯𑁂𑀤𑀦𑀁 𑀉𑀧𑀸𑀤𑀸𑀬𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁧𑁨. 𑀇𑀤𑀸𑀦𑀺 ¶ …𑀧𑁂… 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀭𑀼𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀫𑀸𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁧𑁫. ‘‘𑀬𑀲𑁆𑀲 ¶ 𑀭𑀽𑀧𑀁 𑀲𑁄 𑀭𑀽𑀧𑀯𑀸’’𑀢𑀺 𑀉𑀢𑁆𑀢𑀭𑀧𑀓𑁆𑀔𑁂 𑀯𑀼𑀢𑁆𑀢𑀁 𑀯𑀘𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳.

𑁧𑁧𑁬. 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀭𑀺𑀤𑀻𑀧𑀺𑀢𑀲𑁆𑀲 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑀬𑁄𑀕𑀲𑁆𑀲 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁮. 𑀬𑁂𑀦𑀸𑀢𑀺 𑀘𑀓𑁆𑀔𑀼𑀦𑁆𑀢𑀺 ‘‘𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀓𑀭𑀡𑀁 𑀘𑀓𑁆𑀔𑀼𑀦𑁆𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀫𑁂𑀯 𑀘𑀓𑁆𑀔𑀼𑀲𑁆𑀲 𑀤𑀲𑁆𑀲𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺.

𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁨𑁩. 𑀓𑀭𑀡𑀫𑀢𑁆𑀢𑀦𑁆𑀢𑀺 𑀓𑀫𑁆𑀫𑀸𑀦𑀁 𑀦𑀺𑀧𑁆𑀨𑀸𑀤𑀓𑀧𑁆𑀧𑀬𑁄𑀚𑀓𑀪𑀸𑀯𑁂𑀦 𑀧𑀯𑀢𑁆𑀢𑀸 𑀔𑀦𑁆𑀥𑀸.

𑁧𑁨𑁪. 𑀧𑀼𑀭𑀺𑀫𑀓𑀫𑁆𑀫𑁂𑀦 𑀯𑀺𑀦𑀸 𑀧𑀼𑀕𑁆𑀕𑀮𑀲𑁆𑀲 𑀚𑀸𑀢𑀺, 𑀚𑀸𑀢𑀲𑁆𑀲 𑀘 𑀯𑀺𑀚𑁆𑀚𑀝𑁆𑀞𑀸𑀦𑀸𑀤𑀻𑀲𑀼 𑀲𑀫𑁆𑀫𑀸 𑀫𑀺𑀘𑁆𑀙𑀸 𑀯𑀸 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀲𑀦𑁆𑀥𑀸𑀬 ‘‘𑀧𑀼𑀭𑀺𑀫𑀓𑀫𑁆𑀫𑀫𑁂𑀯 𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑁧𑁨𑁫. 𑀓𑀫𑁆𑀫𑀯𑀝𑁆𑀝𑀲𑁆𑀲𑀸𑀢𑀺 𑀏𑀢𑁆𑀣 𑀓𑀫𑁆𑀫𑀓𑀸𑀭𑀓𑀲𑁆𑀲 𑀬𑁄 𑀓𑀸𑀭𑀓𑁄, 𑀢𑁂𑀦𑀧𑀺 𑀅𑀜𑁆𑀜𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀲 𑀓𑀸𑀭𑀓𑁂𑀦𑀧𑀺 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀁 𑀯𑀤𑀦𑁆𑀢𑀺. 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑁄 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀆𑀧𑀚𑁆𑀚𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀫𑀸𑀢𑀸𑀧𑀺𑀢𑀽𑀳𑀺 𑀚𑀦𑀺𑀢𑀢𑀸𑀤𑀺𑀦𑀸 𑀢𑀲𑁆𑀲 𑀓𑀸𑀭𑀓𑀁 𑀇𑀘𑁆𑀙𑀦𑁆𑀢𑀲𑁆𑀲 𑀓𑀫𑁆𑀫𑀓𑀸𑀭𑀓𑀸𑀦𑀁 𑀓𑀸𑀭𑀓𑀧𑀭𑀫𑁆𑀧𑀭𑀸 𑀆𑀧𑀚𑁆𑀚𑀢𑀻𑀢𑀺 𑀇𑀤𑀜𑁆𑀘 𑀯𑀺𑀘𑀸𑀭𑁂𑀢𑀩𑁆𑀩𑀁.

𑁧𑁭𑁦. 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦𑀸𑀢𑀺 ‘‘𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻𑀢𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁨.𑁪𑁬) 𑀯𑀺𑀭𑁄𑀥𑀪𑀬𑀸.

𑁧𑁭𑁧. ‘‘𑀇𑀥 ¶ 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀻’’𑀢𑀺 (𑀥. 𑀧. 𑁧𑁮) 𑀯𑀘𑀦𑀢𑁄 𑀓𑀫𑁆𑀫𑀓𑀭𑀡𑀓𑀸𑀮𑁂 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀦𑀓𑀸𑀮𑁂 𑀘 𑀲𑁄𑀬𑁂𑀯𑀸𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀬𑀁𑀓𑀢𑀁 ¶ 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀘 𑀧𑀼𑀝𑁆𑀞𑁄 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺? 𑀫𑀸 𑀳𑁂𑀯𑀁 𑀓𑀲𑁆𑀲𑀧𑀸’’𑀢𑀺𑀆𑀤𑀺𑀲𑀼𑀢𑁆𑀢𑀯𑀺𑀭𑁄𑀥𑀸 (𑀲𑀁. 𑀦𑀺. 𑁨.𑁧𑁮) 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁭𑁬. 𑀮𑀤𑁆𑀥𑀺𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀲𑁄𑀬𑁂𑀯𑁂𑀓𑁄 𑀦𑁂𑀯 𑀲𑁄 𑀳𑁄𑀢𑀺 𑀦 𑀅𑀜𑁆𑀜𑁄𑀢𑀺 𑀇𑀤𑀁 𑀧𑀦 𑀦𑀢𑁆𑀣𑁂𑀯, 𑀢𑀲𑁆𑀫𑀸 𑀏𑀯𑀁𑀯𑀸𑀤𑀺𑀦𑁄 𑀅𑀲𑀬𑀁𑀓𑀸𑀭𑀦𑁆𑀢𑀺𑀆𑀤𑀺 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀦 𑀧𑀭𑀲𑁆𑀲 𑀇𑀘𑁆𑀙𑀸𑀯𑀲𑁂𑀦𑁂𑀯 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀺 𑀅𑀦𑀼𑀬𑁄𑀕𑁄 𑀯𑀼𑀢𑁆𑀢𑁄, 𑀅𑀣 𑀔𑁄 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀏𑀓𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀇𑀢𑀭𑀁, 𑀢𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀅𑀜𑁆𑀜𑀁 𑀆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀓𑀸𑀭𑀓𑀯𑁂𑀤𑀓𑀺𑀘𑁆𑀙𑀸𑀬 𑀞𑀢𑁆𑀯𑀸 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀢𑀁 𑀢𑀁 𑀅𑀦𑀺𑀘𑁆𑀙𑀸𑀬 𑀆𑀧𑀦𑁆𑀦𑀯𑀲𑁂𑀦𑀸𑀧𑀻𑀢𑀺. 𑀅𑀣 𑀯𑀸 𑀦 𑀓𑁂𑀯𑀮𑀁 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀦𑀁 𑀲𑀩𑁆𑀩𑁂𑀲𑀁 𑀆𑀧𑀦𑁆𑀦𑀢𑁆𑀢𑀸, 𑀅𑀣 𑀔𑁄 𑀏𑀓𑁂𑀓𑀲𑁆𑀲𑁂𑀯 𑀘 𑀆𑀧𑀦𑁆𑀦𑀢𑁆𑀢𑀸 𑀅𑀬𑀁 𑀅𑀦𑀼𑀬𑁄𑀕𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀏𑀢𑁂𑀦 ‘‘𑀇𑀥 𑀦𑀦𑁆𑀤𑀢𑀻’’𑀢𑀺𑀆𑀤𑀺 𑀲𑀩𑁆𑀩𑀁 𑀧𑀝𑀺𑀚𑀸𑀦𑀦𑀸𑀤𑀺𑀓𑀸𑀭𑀡𑀁 𑀏𑀓𑀢𑁄 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁯𑁩. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀸𑀤𑀺𑀯𑀲𑁂𑀦 𑀅𑀭𑀳𑀢𑁆𑀢𑀲𑀸𑀥𑀦𑀸𑀢𑀺 𑀏𑀢𑁆𑀣 ‘‘𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀻’’𑀢𑀺 𑀅𑀪𑀺𑀜𑁆𑀜𑀸𑀅𑀦𑀼𑀬𑁄𑀕𑁄 𑀘 ‘‘𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀻’’𑀢𑀺 𑀞𑀧𑀦𑀸 𑀘 ‘‘𑀢𑁂𑀦 𑀯𑀢 𑀭𑁂’’𑀢𑀺𑀆𑀤𑀺 𑀧𑀸𑀧𑀦𑀸 𑀘 𑀆𑀤𑀺𑀲𑀤𑁆𑀤𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑁄𑀯 𑀤𑀝𑁆𑀞𑀩𑁆𑀩𑁄. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀧𑀦𑁂𑀢𑁆𑀣 𑀅𑀪𑀺𑀜𑁆𑀜𑀸 𑀯𑀼𑀢𑁆𑀢𑀸𑀢𑀺 𑀢𑀤𑀪𑀺𑀜𑁆𑀜𑀸𑀯𑀢𑁄 𑀅𑀭𑀳𑀢𑁄 𑀲𑀸𑀥𑀦𑀁 ‘‘𑀅𑀭𑀳𑀢𑁆𑀢𑀲𑀸𑀥𑀦𑀸’’𑀢𑀺 𑀆𑀳. 𑀅𑀭𑀳𑀢𑁄 𑀳𑀺 𑀲𑀸𑀥𑀦𑀸 𑀢𑀩𑁆𑀪𑀸𑀯𑀲𑁆𑀲 𑀘 𑀲𑀸𑀥𑀦𑀸 𑀳𑁄𑀢𑀺𑀬𑁂𑀯𑀸𑀢𑀺.

𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁦𑁯. 𑀢𑀣𑀸𑀭𑀽𑀧𑀲𑁆𑀲𑀸𑀢𑀺 ¶ ¶ 𑀢𑀢𑀺𑀬𑀓𑁄𑀝𑀺𑀪𑀽𑀢𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀅𑀲𑀘𑁆𑀘𑀺𑀓𑀝𑁆𑀞𑀁 𑀢𑀢𑀺𑀬𑀓𑁄𑀝𑀺𑀪𑀽𑀢𑀁 𑀧𑀼𑀕𑁆𑀕𑀮𑀁 𑀯𑀤𑁂𑀬𑁆𑀬𑀸𑀢𑀺 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀇𑀘𑁆𑀙𑀦𑁆𑀢𑁄 𑀳𑀺 𑀲𑀼𑀢𑁆𑀢𑁂𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀲𑀺𑀬𑀸. 𑀓𑀲𑁆𑀫𑀸? 𑀢𑀣𑀸𑀭𑀽𑀧𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀢𑁄𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀓𑀲𑁆𑀲𑀘𑀺 𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑀸𑀭𑀳𑀢𑁆𑀢𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀽𑀳𑀺𑀢𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁧𑁮. 𑀧𑀭𑀺𑀕𑁆𑀕𑀳𑀺𑀢𑀯𑁂𑀤𑀦𑁄𑀢𑀺 𑀯𑀘𑀦𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀯𑁂𑀤𑀦𑀲𑁆𑀲 ‘‘𑀲𑀼𑀔𑀺𑀢𑁄𑀲𑁆𑀫𑀺, 𑀤𑀼𑀓𑁆𑀔𑀺𑀢𑁄𑀲𑁆𑀫𑀻’’𑀢𑀺 𑀚𑀸𑀦𑀦𑀁 𑀧𑀚𑀸𑀦𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀬𑁄𑀕𑀸𑀯𑀘𑀭𑀲𑁆𑀲 𑀲𑀼𑀔𑀼𑀫𑀸𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀧𑀭𑀺𑀘𑁆𑀙𑁂𑀤𑀦𑀲𑀫𑀢𑁆𑀣𑀢𑀜𑁆𑀘.

𑁨𑁨𑁮. 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀭𑀽𑀧𑀩𑁆𑀪𑀦𑁆𑀢𑀭𑀕𑀫𑀦𑀁 𑀲𑀳𑀭𑀽𑀧𑀪𑀸𑀯𑁄, 𑀩𑀳𑀺𑀤𑁆𑀥𑀸 𑀦𑀺𑀓𑁆𑀔𑀫𑀦𑀁 𑀯𑀺𑀦𑀸𑀭𑀽𑀧𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁩𑁭. 𑀇𑀫𑀸 𑀔𑁄𑀢𑀺 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀇𑀫𑀸 𑀮𑁄𑀓𑀲𑁆𑀲 𑀲𑀫𑀜𑁆𑀜𑀸, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀁, 𑀬𑁄 𑀲𑀘𑁆𑀘𑁄 𑀫𑁄𑀖𑁄 𑀯𑀸 𑀲𑀺𑀬𑀸, 𑀢𑀲𑁆𑀫𑀺𑀁 𑀅𑀦𑀼𑀧𑀮𑀩𑁆𑀪𑀫𑀸𑀦𑁂𑀧𑀺 𑀅𑀢𑁆𑀢𑀦𑀺 𑀢𑀤𑀦𑀼𑀧𑀮𑀩𑁆𑀪𑀢𑁄𑀬𑁂𑀯 𑀧𑀭𑀸𑀫𑀸𑀲𑀁 𑀅𑀢𑁆𑀢𑀤𑀺𑀝𑁆𑀞𑀺𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀮𑁄𑀓𑁂 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀧𑀯𑀢𑁆𑀢𑀯𑁄𑀳𑀸𑀭𑀯𑀲𑁂𑀦𑁂𑀯 𑀯𑁄𑀳𑀭𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀓𑀯𑁄𑀳𑀸𑀭𑁂𑀦 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑁂𑀦 𑀧𑀼𑀕𑁆𑀕𑀮𑁄𑀢𑀺 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀺 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀅𑀢𑁆𑀣𑀺𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀦 𑀮𑁄𑀓𑀯𑁄𑀳𑀸𑀭𑁂𑀦𑀸𑀢𑀺. 𑀇𑀫𑀺𑀦𑀸 𑀧𑀦 𑀬𑀣𑀸 𑀲𑀫𑁂𑀢𑀺, 𑀬𑀣𑀸 𑀘 ¶ 𑀧𑀭𑀸𑀫𑀸𑀲𑁄 𑀦 𑀳𑁄𑀢𑀺, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀸 𑀘 𑀅𑀢𑁆𑀣𑀯𑀡𑁆𑀡𑀦𑀸 𑀬𑁄𑀚𑁂𑀢𑀩𑁆𑀩𑀸.

𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀦𑁆𑀢𑀺 ¶ 𑀬𑀲𑁆𑀫𑀸 𑀮𑁄𑀓𑀲𑀫𑁆𑀫𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀮𑀓𑁆𑀔𑀡𑀦𑁆𑀢𑀺 𑀢𑀣𑀓𑀸𑀭𑀡𑀁. 𑀬𑀲𑁆𑀫𑀸 𑀥𑀫𑁆𑀫𑀸𑀦𑀁 𑀢𑀣𑀢𑀸𑀬 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀳𑀸𑀦𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. ‘‘𑀤𑁆𑀯𑁂𑀫𑁂 ¶ ¶ , 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁨.𑁧𑁮𑁫) 𑀇𑀤𑀁 𑀲𑀼𑀢𑁆𑀢𑀁 𑀅𑀭𑀳𑀢𑁄 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸 𑀦 𑀦𑀺𑀲𑁆𑀲𑀬𑁄, 𑀅𑀣 𑀔𑁄 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸, 𑀢𑀲𑁆𑀫𑀸 𑀅𑀭𑀳𑀢𑁄𑀧𑀺 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀅𑀦𑀸𑀕𑀸𑀫𑀺𑀲𑁆𑀲𑀧𑀺 𑀲𑀓𑀤𑀸𑀕𑀸𑀫𑀺𑀲𑁆𑀲𑀧𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀢𑀢𑀺𑀬𑀲𑁆𑀫𑀺𑀫𑁆𑀧𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀲𑁆𑀯𑁂𑀯 𑀧𑀦 𑀅𑀥𑀺𑀧𑁆𑀧𑁂𑀢𑁂𑀲𑀼 𑀧𑀭𑀺𑀓𑁆𑀔𑁂𑀧𑁄 𑀦 𑀓𑀸𑀢𑀩𑁆𑀩𑁄 𑀲𑀺𑀬𑀸, 𑀓𑀢𑁄 𑀘, 𑀢𑀲𑁆𑀫𑀸 ‘‘𑀢𑀢𑀺𑀬𑀲𑁆𑀫𑀺𑀫𑁆𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀻’’𑀢𑀺 𑀧𑀞𑀦𑁆𑀢𑀺.

𑀅𑀬𑁄𑀦𑀺𑀲𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀲𑁄𑀢𑀸𑀧𑀦𑁆𑀦𑁄𑀬𑁂𑀯 𑀦𑀺𑀬𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀲𑁄𑀬𑁂𑀯 𑀦 𑀧𑀭𑀺𑀳𑀸𑀬𑀢𑀺, 𑀦 𑀇𑀢𑀭𑁂𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸. ‘‘𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀬𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀏𑀢𑀫𑀢𑁆𑀣𑀁 𑀕𑀡𑁆𑀳𑀻𑀢𑀺 𑀧𑀦 𑀯𑀤𑀦𑁆𑀢𑀺.

𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁪𑁧. 𑀬𑀁 ¶ 𑀧𑀦𑁂𑀢𑁆𑀣𑀸𑀢𑀺𑀆𑀤𑀺𑀫𑁆𑀳𑀺 𑀤𑀲𑁆𑀲𑀦𑀫𑀕𑁆𑀕𑀨𑀮𑁂 𑀞𑀺𑀢𑀲𑁆𑀲 𑀅𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁, 𑀢𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀢𑀢𑁆𑀣 𑀘 𑀞𑀸𑀦𑀁 𑀇𑀘𑁆𑀙𑀦𑁆𑀢𑁄 𑀧𑀼𑀦 𑀯𑀸𑀬𑀸𑀫𑁂𑀦 𑀢𑀤𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀦 𑀇𑀘𑁆𑀙𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁.

𑁨𑁬𑁨. 𑀅𑀯𑀲𑀺𑀧𑁆𑀧𑀢𑁆𑀢𑁄 𑀛𑀸𑀦𑀮𑀸𑀪𑀻𑀢𑀺 𑀲𑁂𑀓𑁆𑀔𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀯𑀲𑀺𑀧𑁆𑀧𑀢𑁆𑀢𑁄 𑀅𑀯𑀲𑀺𑀧𑁆𑀧𑀢𑁆𑀢𑁄 𑀘 𑀲𑀫𑀬𑀯𑀺𑀫𑀼𑀢𑁆𑀢𑀅𑀲𑀫𑀬𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀬𑀸 𑀅𑀕𑁆𑀕𑀳𑀺𑀢𑁄, 𑀪𑀚𑀸𑀧𑀺𑀬𑀫𑀸𑀦𑁄 𑀧𑀦 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀪𑀸𑀯𑀁 𑀪𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁄𑀢𑀺.

𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁬𑁫. 𑀉𑀢𑁆𑀢𑀫𑀳𑀻𑀦𑀪𑁂𑀤𑁄 ¶ ‘‘𑀢𑀢𑁆𑀭 𑀬𑀸𑀬𑀁 𑀧𑀝𑀺𑀧𑀤𑀸 𑀲𑀼𑀔𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀲𑀸 𑀉𑀪𑀬𑁂𑀦𑁂𑀯 𑀧𑀡𑀻𑀢𑀸 𑀅𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁩.𑁧𑁫𑁨) 𑀯𑀼𑀢𑁆𑀢𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀫𑀼𑀢𑀲𑀤𑁆𑀤𑁄 𑀧𑀢𑁆𑀢𑀩𑁆𑀩𑀁 𑀯𑀤𑀢𑀻𑀢𑀺 𑀆𑀳 ‘‘𑀨𑀼𑀲𑀦𑀸𑀭𑀳’’𑀦𑁆𑀢𑀺.

𑁨𑁬𑁭. 𑀅𑀧𑁆𑀧𑀢𑁆𑀢𑀧𑀭𑀺𑀳𑀸𑀦𑀸𑀬 𑀘𑁂𑀯 𑀲𑀁𑀯𑀢𑁆𑀢𑀦𑁆𑀢𑀺 𑀬𑀣𑀸𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁬𑁯. ‘‘𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 ¶ ¶ 𑀉𑀧𑀸𑀤𑀸𑀬 𑀢𑀤𑀼𑀧𑀭𑀻’’𑀢𑀺 𑀯𑀼𑀢𑁆𑀢𑀁, ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀻’’𑀢𑀺 (𑀅. 𑀦𑀺. 𑁯.𑁨𑁧) 𑀧𑀦 𑀲𑀼𑀢𑁆𑀢𑀲𑁆𑀲 𑀯𑀘𑀦𑁂𑀦 𑀳𑁂𑀝𑁆𑀞𑀸𑀧𑀺 𑀫𑀕𑁆𑀕𑀪𑀸𑀯𑀦𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁨𑁭𑁦. ‘‘𑀕𑀺𑀳𑀻𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦𑀁 𑀫𑀕𑁆𑀕𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀬𑀢𑁆𑀣 𑀦𑀢𑁆𑀣𑀻’’𑀢𑀺 𑀧𑀦 𑀑𑀓𑀸𑀲𑀯𑀲𑁂𑀦 𑀧𑀼𑀝𑁆𑀞𑁄 𑀧𑀼𑀕𑁆𑀕𑀮𑀯𑀲𑁂𑀦 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄 𑀦 𑀬𑀼𑀢𑁆𑀢𑁄. 𑀬𑀤𑀺 𑀘 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄, 𑀲𑀓𑀯𑀸𑀤𑀺𑀦𑀸 𑀲𑀫𑀸𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄.

𑁨𑁭𑁧. 𑀏𑀓𑀦𑁆𑀢𑀭𑀺𑀓𑀧𑀜𑁆𑀳𑀸𑀢𑀺 𑀧𑀭𑀯𑀸𑀤𑀻𑀲𑀓𑀯𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀦𑁆𑀢𑀭𑀺𑀓𑀸 𑀧𑀜𑁆𑀳𑀸.

𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁭𑁩. 𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦 𑀳𑀺 𑀲𑁄 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀚𑀸𑀢𑁄𑀢𑀺 𑀇𑀤𑀁 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄 𑀳𑀺 𑀅𑀦𑀸𑀕𑀸𑀫𑀻 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀓𑁂𑀦 𑀮𑀤𑁆𑀥𑀺𑀓𑀺𑀢𑁆𑀢𑀦𑁂𑀦 𑀓𑀣𑀁 𑀲𑀫𑁂𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀧𑀦 𑀅𑀦𑀸𑀕𑀸𑀫𑀻 𑀏𑀯 𑀅𑀦𑀸𑀕𑀸𑀫𑀻𑀢𑀺 𑀯𑀼𑀢𑁆𑀢𑁄, 𑀇𑀥 𑀛𑀸𑀦𑀸𑀦𑀸𑀕𑀸𑀫𑀺𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁄𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀇𑀥𑁂𑀯 𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀁 ‘‘𑀇𑀥𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀤𑀢𑀺, 𑀇𑀥 𑀧𑀦 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀁 ‘‘𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀭𑀳𑀸’’𑀢𑀺.

𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀑𑀥𑀺𑀲𑁄 ¶ 𑀑𑀥𑀺𑀲𑁄𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀤𑁂𑀲𑁂𑀦 𑀏𑀓𑀤𑁂𑀲𑁂𑀦𑀸’’𑀢𑀺 𑀆𑀳.

𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀓𑀺𑀘𑁆𑀘𑀲𑀩𑁆𑀪𑀸𑀯𑀦𑁆𑀢𑀺 𑀢𑀻𑀳𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀻𑀦𑀢𑀁. 𑀢𑀁 𑀧𑀦 𑀓𑀺𑀘𑁆𑀘𑀁 𑀬𑀤𑀺 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀮𑀤𑁆𑀥𑀺, 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀏𑀯 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀳𑀻𑀦𑀸𑀢𑀺 𑀮𑀤𑁆𑀥𑀻𑀢𑀺 𑀏𑀢𑀁 𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀳𑀻𑀦𑀸𑀦𑀫𑁆𑀧𑀺 𑀤𑀲𑁆𑀲𑀦𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀓𑀤𑀸𑀘𑀺 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀺𑀘𑁆𑀘𑀁 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁨𑁮𑁨. 𑀲𑀩𑁆𑀩𑀲𑁆𑀫𑀺𑀁 ¶ 𑀲𑀭𑀻𑀭𑁂 𑀲𑀩𑁆𑀩𑀦𑁆𑀢𑀺 𑀲𑀺𑀭𑀲𑀺 𑀧𑀸𑀤𑀸 𑀧𑀘𑁆𑀙𑀢𑁄 𑀘𑀓𑁆𑀔𑀽𑀦𑀻𑀢𑀺 𑀏𑀯𑀁 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂𑀢𑀺 𑀩𑀸𑀮𑀓𑀸𑀮𑁂 𑀬𑀼𑀯𑀢𑀸, 𑀯𑀼𑀟𑁆𑀠𑀓𑀸𑀮𑁂 𑀩𑀸𑀮𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀁. 𑀲𑀩𑁆𑀩𑁂𑀦𑀸𑀓𑀸𑀭𑁂𑀦𑀸𑀢𑀺 𑀦𑀻𑀮𑀸𑀓𑀸𑀭𑁂𑀦 𑀧𑀻𑀢𑀁, 𑀧𑀻𑀢𑀸𑀓𑀸𑀭𑁂𑀦 𑀮𑁄𑀳𑀺𑀢𑀦𑁆𑀢𑀺 𑀏𑀯𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘𑀓𑁆𑀔𑀼𑀲𑁆𑀫𑀺𑀁 𑀲𑁄𑀢𑀁, 𑀲𑁄𑀢𑀲𑁆𑀫𑀺𑀁 𑀖𑀸𑀦𑀦𑁆𑀢𑀺 𑀏𑀯𑀁. 𑀅𑀬𑀼𑀢𑁆𑀢𑀦𑁆𑀢𑀺 𑀬𑁄𑀕𑀭𑀳𑀺𑀢𑀁 𑀯𑀤𑀢𑀺, 𑀢𑀁 𑀧𑀦 𑀏𑀓𑀲𑀪𑀸𑀯𑀁. 𑀓𑀣𑀁 𑀧𑀦 𑀏𑀓𑀲𑀪𑀸𑀯𑀲𑁆𑀲 𑀬𑁄𑀕𑀭𑀳𑀺𑀢𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀦𑀸𑀲𑀪𑀸𑀯𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀦𑀸𑀦𑀸𑀲𑀪𑀸𑀯𑀸𑀦𑀁 𑀅𑀗𑁆𑀕𑀼𑀮𑀻𑀦𑀁 𑀫𑁂𑀡𑁆𑀟𑀓𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀬𑁄𑀕𑁄 𑀳𑁄𑀢𑀺, 𑀦 𑀏𑀓𑀲𑁆𑀲𑁂𑀯 𑀲𑀢𑁄, 𑀢𑀲𑁆𑀫𑀸 𑀬𑁄 𑀦𑀸𑀦𑀸𑀲𑀪𑀸𑀯𑁂𑀲𑀼 𑀳𑁄𑀢𑀺 𑀬𑁄𑀕𑁄, 𑀢𑁂𑀦 𑀭𑀳𑀺𑀢𑀁 𑀏𑀓𑀲𑀪𑀸𑀯𑀁 𑀅𑀬𑁄𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀼𑀘𑁆𑀙𑀢𑀻𑀢𑀺 𑀧𑀭𑀯𑀸𑀤𑀻𑀤𑀺𑀝𑁆𑀞𑀺𑀬𑀸 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀬 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀮𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮𑁫. 𑀅𑀢𑀻𑀢𑀸𑀦𑀸𑀕𑀢𑀁 𑀧𑀳𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀅𑀧𑁆𑀧𑀺𑀬𑀁 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀭𑀺𑀢𑁆𑀯𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀭𑀽𑀧𑀲𑀤𑁆𑀤𑁂𑀦 𑀘𑀸𑀢𑀺 𑀉𑀪𑁄𑀳𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀯𑀢𑁆𑀢𑀩𑁆𑀩𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀕𑀢𑀢𑁆𑀢𑀸𑀢𑀺 𑀏𑀢𑁂𑀦 𑀇𑀤𑀁 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀭𑀽𑀧𑀧𑀜𑁆𑀜𑀢𑁆𑀢𑀺 𑀯𑀺𑀬 𑀯𑀢𑁆𑀣𑀧𑀜𑁆𑀜𑀢𑁆𑀢𑀺 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀲𑀫𑀽𑀳𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀯𑀢𑁆𑀣𑀪𑀸𑀯𑀲𑁆𑀲 𑀑𑀤𑀸𑀢𑀪𑀸𑀯𑀯𑀺𑀕𑀫𑁂 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸 𑀬𑀼𑀢𑁆𑀢𑀸, 𑀦 𑀧𑀦 𑀭𑀽𑀧𑀪𑀸𑀯𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀯𑀺𑀕𑀫𑁂’’𑀢𑀺.

𑀓𑀸𑀮𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁨𑁮𑁮. 𑀅𑀦𑀸𑀕𑀢𑀁 ¶ 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀦𑀸𑀕𑀢𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀼𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺, 𑀢𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀢𑀩𑁆𑀪𑀸𑀯𑀸𑀯𑀺𑀕𑀫𑀢𑁄 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑀁 𑀅𑀦𑀼𑀧𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄𑀢𑀺 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀧𑀼𑀦 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄.

𑀬𑀲𑁆𑀫𑀸 𑀢𑀦𑁆𑀢𑀺 𑀢𑀁 𑀳𑀼𑀢𑁆𑀯𑀸 𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀬𑀲𑁆𑀫𑀸 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁, 𑀢𑀲𑁆𑀫𑀸 𑀤𑀼𑀢𑀺𑀬𑀫𑁆𑀧𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀘𑀦𑀁 𑀅𑀭𑀳𑀢𑀻𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀥𑀫𑁆𑀫𑁂 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑀁 𑀯𑀤𑀦𑁆𑀢𑀲𑁆𑀲 𑀅𑀥𑀫𑁆𑀫𑁂 𑀲𑀲𑀯𑀺𑀲𑀸𑀡𑁂 𑀦𑀳𑀼𑀢𑁆𑀯𑀸𑀦 𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑁄 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀣 𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 ¶ 𑀓𑀸𑀮𑀦𑀸𑀦𑀢𑁆𑀢𑁂𑀦. 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦. 𑀅𑀢𑁆𑀣𑀸𑀦𑀸𑀦𑀢𑁆𑀢𑀁 𑀇𑀘𑁆𑀙𑀦𑁆𑀢𑁄𑀧𑀺 𑀧𑀦 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀼𑀢𑁆𑀢𑀁 𑀳𑁄𑀢𑀺𑀪𑀸𑀯𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀦𑀸𑀕𑀢𑁂 𑀯𑀼𑀢𑁆𑀢𑀁 𑀳𑀼𑀢𑁆𑀯𑀸𑀪𑀸𑀯𑀁 𑀓𑀣𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀢𑁆𑀣𑀸𑀦𑀸𑀦𑀢𑁆𑀢𑀫𑁂𑀯 𑀳𑀺 𑀢𑁂𑀦 𑀅𑀦𑀼𑀜𑁆𑀜𑀸𑀬𑀢𑀺, 𑀦 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀸 𑀅𑀦𑀸𑀕𑀢𑀪𑀸𑀯𑁄𑀢𑀺. 𑀧𑀼𑀭𑀺𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀦𑀼𑀜𑁆𑀜𑀸𑀢𑀧𑀜𑁆𑀳𑀲𑁆𑀲 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀯𑀼𑀢𑁆𑀢𑀤𑁄𑀲𑀁 𑀅𑀢𑀺𑀓𑁆𑀓𑀫𑁆𑀫 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀼𑀦 𑀕𑀳𑁂𑀢𑁆𑀯𑀸 𑀢𑁂𑀦 𑀘𑁄𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦 𑀳𑀼𑀢𑁆𑀯𑀸𑀳𑁄𑀢𑀻𑀢𑀺 𑀅𑀦𑀼𑀚𑀸𑀦𑀦𑁆𑀢𑀲𑁆𑀲 𑀤𑁄𑀲𑁄 𑀓𑀸𑀮𑀦𑀸𑀦𑀢𑁆𑀢𑀸𑀬𑁂𑀯 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁂𑀦 𑀓𑀣𑀁 𑀳𑁄𑀢𑀻𑀢𑀺? 𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑁂𑀓𑀦𑁆𑀢𑀺 𑀅𑀦𑀸𑀕𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀻𑀢𑀺 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸 ‘‘𑀏𑀓𑁂𑀓𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀏𑀓𑁂𑀓𑀫𑁂𑀯 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺. 𑀏𑀲 𑀦𑀬𑁄 𑀧𑀼𑀭𑀺𑀫𑀲𑁆𑀫𑀺𑀁 ‘‘𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀘𑀦𑁂𑀧𑀺. 𑀅𑀦𑀸𑀕𑀢𑀲𑁆𑀲 𑀳𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀦𑀸𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑀸𑀢𑀺 𑀤𑁆𑀯𑁂𑀧𑀺 𑀦𑀸𑀫𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀘𑁄𑀤𑀺𑀢𑀁, 𑀢𑀣𑀸 ‘‘𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀲𑀩𑁆𑀩𑀢𑁄 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀬𑁄𑀦𑀤𑁆𑀥𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀧𑀝𑀺𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀘𑁄𑀤𑀺𑀢𑁄, 𑀤𑀼𑀢𑀺𑀬𑀦𑀬𑁂 𑀅𑀦𑀸𑀕𑀢𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀦𑀸𑀫𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀧𑀼𑀦 𑀧𑀼𑀝𑁆𑀞𑁄…𑀧𑁂… 𑀅𑀢𑁆𑀣𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡𑀁 𑀢𑁂𑀦𑀸𑀢𑀺 𑀏𑀢𑁂𑀦 𑀅𑀦𑀼𑀯𑀢𑁆𑀢𑀫𑀸𑀦𑀸𑀧𑁂𑀓𑁆𑀔𑀦𑀯𑀘𑀦𑁂𑀦 𑀓𑀣𑀁 𑀯𑀼𑀘𑁆𑀘𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁧. 𑀬𑀼𑀢𑁆𑀢𑀺𑀯𑀺𑀭𑁄𑀥𑁄 ¶ 𑀅𑀭𑀳𑀢𑁄 𑀲𑀭𑀸𑀕𑀸𑀤𑀺𑀪𑀸𑀯𑁂 𑀧𑀼𑀣𑀼𑀚𑁆𑀚𑀦𑁂𑀦 𑀅𑀦𑀸𑀦𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀅𑀨𑀮𑀢𑀸𑀢𑀺 𑀏𑀯𑀫𑀸𑀤𑀺𑀓𑁄 𑀤𑀝𑁆𑀞𑀩𑁆𑀩𑁄.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑀻𑀢𑀅𑀢𑁆𑀣𑀺𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸 𑀅𑀢𑁆𑀣𑀺𑀲𑀤𑁆𑀤𑀢𑁆𑀣𑀲𑁆𑀲 𑀘 𑀦𑁆𑀯𑀸𑀢𑀻𑀢𑀪𑀸𑀯𑀢𑁄 ‘‘𑀅𑀢𑀻𑀢𑀁 ¶ 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀜𑁆𑀘 𑀅𑀢𑀻𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀧𑀦 𑀅𑀢𑀻𑀢𑀸𑀤𑀻𑀦𑀁 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑀲𑁆𑀲 𑀧𑀭𑀯𑀸𑀤𑀺𑀲𑁆𑀲𑁂𑀯𑀸𑀬𑀁 𑀤𑁄𑀲𑁄 𑀬𑀣𑀸 𑀆𑀧𑀚𑁆𑀚𑀢𑀺, 𑀦 𑀧𑀦 ‘‘𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀲𑀓𑀯𑀸𑀤𑀺𑀲𑁆𑀲, 𑀢𑀣𑀸 𑀧𑀝𑀺𑀧𑀸𑀤𑁂𑀢𑀩𑁆𑀩𑀁.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸

𑁧. 𑀅𑀢𑀻𑀢𑀸𑀤𑀺𑀏𑀓𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀢𑀺𑀡𑁆𑀡𑀁 𑀭𑀸𑀲𑀻𑀦𑀦𑁆𑀢𑀺 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀯𑀺𑀧𑀓𑁆𑀓𑀯𑀺𑀧𑀸𑀓𑀅𑀯𑀺𑀧𑀸𑀓𑀸𑀦𑀁. 𑀯𑁄𑀳𑀸𑀭𑀯𑀲𑁂𑀦 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀁 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑁄 𑀓𑀣𑀁 𑀘𑁄𑀤𑁂𑀢𑀩𑁆𑀩𑁄𑀢𑀺 𑀯𑀺𑀘𑀸𑀭𑁂𑀢𑀺 ‘‘𑀓𑀫𑁆𑀫𑀼𑀧𑀘𑀬𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀗𑁆𑀔𑀸𑀭𑀁 𑀇𑀘𑁆𑀙𑀦𑁆𑀢𑀻’’𑀢𑀺.

𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁧. 𑀮𑁄𑀓𑀼𑀢𑁆𑀢𑀭𑀪𑀸𑀯𑀁 𑀧𑀼𑀘𑁆𑀙𑀦𑀢𑁆𑀣𑀸𑀬𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀲𑀫𑁆𑀫𑀸𑀲𑀢𑀺𑀬𑀸 𑀲𑀢𑀺𑀧𑀝𑁆𑀞𑀸𑀦𑀢𑁆𑀢𑀸, 𑀮𑁄𑀓𑀼𑀢𑁆𑀢𑀭𑀸𑀬𑀬𑁂𑀯 𑀯𑀸 𑀧𑀭𑀫𑀢𑁆𑀣𑀲𑀢𑀺𑀧𑀝𑁆𑀞𑀸𑀦𑀢𑁆𑀢𑀸 𑀢𑀲𑁆𑀲𑀸 𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀪𑀸𑀯𑀁 𑀧𑀼𑀘𑁆𑀙𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀪𑁂𑀤𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀢𑀺𑀧𑀝𑁆𑀞𑀸𑀦𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀧𑀪𑁂𑀤𑀸𑀦𑀁 𑀧𑀼𑀘𑁆𑀙𑀸𑀯𑀲𑁂𑀦.

𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀅𑀬𑁄𑀦𑀺𑀲𑁄 ¶ 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸𑀢𑀺 𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑁂𑀦 𑀉𑀧𑁂𑀓𑁆𑀔𑀺𑀢𑀩𑁆𑀩𑁂𑀦 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀭𑀽𑀧𑀳𑀸𑀭𑀯𑀡𑁆𑀡𑀦𑀸

𑁩𑁦𑁭. 𑀅𑀥𑀺𑀫𑀸𑀦𑀺𑀓𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀤𑀲𑁆𑀲𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀢𑁂 𑀳𑀺 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀸𑀯, 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀘 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀅𑀥𑀺𑀫𑀸𑀦𑀺𑀓𑀧𑀼𑀩𑁆𑀩𑀸 𑀧𑀦 𑀅𑀥𑀺𑀧𑁆𑀧𑁂𑀢𑀸 𑀲𑀺𑀬𑀼𑀁.

𑁩𑁦𑁮. 𑀯𑀘𑀲𑀸𑀬𑀢𑁆𑀣𑁂𑀢𑀺 𑀦𑀺𑀘𑁆𑀙𑀬𑀢𑁆𑀣𑁂, ‘‘𑀓𑀺𑀁 𑀓𑀸𑀭𑀡𑀸’’𑀢𑀺 𑀧𑀦 𑀓𑀸𑀭𑀡𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀬𑀁 𑀯𑀺𑀬 𑀓𑀸𑀭𑀡𑀢𑁆𑀣𑁂𑀢𑀺 𑀬𑀼𑀢𑁆𑀢𑀁.

𑀧𑀭𑀽𑀧𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁩𑁨𑁬. 𑀯𑀘𑀻𑀪𑁂𑀤𑀓𑀣𑀸𑀬𑀁 𑀮𑁄𑀓𑀼𑀢𑁆𑀢𑀭𑀁 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀧𑀞𑀫𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀬𑀲𑁆𑀫𑀸 𑀲𑁄 𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀯𑀸𑀘𑀁 𑀪𑀸𑀲𑀢𑀺, 𑀦 𑀲𑀫𑀼𑀤𑀬𑁄𑀢𑀺𑀆𑀤𑀻𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁮. 𑀬𑁂𑀦 ¶ ¶ 𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀇𑀤𑀁 𑀯𑀘𑀻𑀲𑀫𑀼𑀝𑁆𑀞𑀸𑀧𑀦𑀓𑁆𑀔𑀡𑁂 𑀏𑀯 𑀏𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀇𑀘𑁆𑀙𑀺𑀢𑁂 𑀆𑀭𑁄𑀧𑀺𑀢𑁂 𑀯𑀸 𑀬𑀼𑀚𑁆𑀚𑀢𑀺.

𑁩𑁩𑁨. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀯𑀘𑀻𑀪𑁂𑀤𑀁 𑀇𑀘𑁆𑀙𑀢𑁄 𑀧𑀭𑀲𑁆𑀲 𑀅𑀪𑀺𑀪𑀽𑀲𑀼𑀢𑁆𑀢𑀸𑀳𑀭𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑀢𑁆𑀢𑀩𑁆𑀩𑁄.

𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁩𑁫. 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀬𑀁 𑀘𑀼𑀮𑁆𑀮𑀸𑀲𑀻𑀢𑀺…𑀧𑁂… 𑀆𑀤𑀺𑀯𑀘𑀦𑀯𑀲𑁂𑀦𑀸𑀢𑀺 𑀆𑀭𑀼𑀧𑁆𑀧𑁂𑀬𑁂𑀯 𑀏𑀯𑀁 𑀬𑀸𑀯𑀢𑀸𑀬𑀼𑀓𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀓𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀧𑀦 ‘‘𑀦 𑀢𑁆𑀯𑁂𑀯 𑀢𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑀲𑀫𑁄𑀳𑀺𑀢𑀸’’𑀢𑀺 (𑀫𑀳𑀸𑀦𑀺. 𑁧𑁦 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀤𑀼𑀢𑀺𑀬𑀸𑀧𑀺 𑀅𑀟𑁆𑀠𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸. 𑀧𑀼𑀭𑀺𑀫𑀸𑀬 𑀘 𑀯𑀲𑁆𑀲𑀲𑀢𑀸𑀤𑀺𑀝𑁆𑀞𑀸𑀦𑀸𑀦𑀼𑀜𑁆𑀜𑀸𑀬 𑀅𑀯𑀺𑀭𑁄𑀥𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀫𑀼𑀳𑀼𑀢𑁆𑀢𑀁 𑀫𑀼𑀳𑀼𑀢𑁆𑀢𑀦𑁆𑀢𑀺 𑀧𑀜𑁆𑀳𑁄 𑀲𑀓𑀯𑀸𑀤𑀺𑀦𑀸 𑀧𑀼𑀘𑁆𑀙𑀺𑀢𑁄 𑀯𑀺𑀬 𑀯𑀼𑀢𑁆𑀢𑁄, 𑀧𑀭𑀯𑀸𑀤𑀺𑀦𑀸 𑀧𑀦 𑀧𑀼𑀘𑁆𑀙𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸

𑁩𑁩𑁯. 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀬𑀁 𑀅𑀣𑀯𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀏𑀓𑀫𑀕𑁆𑀕𑀪𑀸𑀯𑀢𑁄 𑀦 𑀏𑀓𑀫𑀕𑁆𑀕𑀲𑁆𑀲 𑀩𑀳𑀼𑀪𑀸𑀯𑀸𑀧𑀢𑁆𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀉𑀧𑀧𑀦𑁆𑀦𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺.

𑁩𑁪𑁪. 𑀢𑀤𑀸𑀢𑀺 𑀤𑀲𑁆𑀲𑀦𑁂 𑀧𑀭𑀺𑀦𑀺𑀝𑁆𑀞𑀺𑀢𑁂.

𑁩𑁪𑁫. 𑀅𑀝𑁆𑀞𑀳𑀺 ¶ 𑀜𑀸𑀡𑁂𑀳𑀻𑀢𑀺 𑀏𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂𑀳𑀺 𑀲𑀳 𑀅𑀝𑁆𑀞𑀲𑀼 𑀕𑀳𑀺𑀢𑁂𑀲𑀼 𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀣𑀁 𑀳𑁄𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁪𑁭. 𑀯𑁄𑀳𑀸𑀭𑀓𑀣𑀸𑀬𑀁 ¶ 𑀉𑀤𑀸𑀳𑀼 𑀲𑁄𑀢𑀸𑀤𑀻𑀦𑀺𑀧𑀻𑀢𑀺 𑀏𑀓𑀦𑁆𑀢𑀮𑁄𑀓𑀺𑀬𑁂𑀲𑀼 𑀯𑀺𑀲𑀬𑀯𑀺𑀲𑀬𑀻𑀲𑀼 𑀯𑀺𑀲𑀬𑀲𑁆𑀲𑁂𑀯 𑀮𑁄𑀓𑀼𑀢𑁆𑀢𑀭𑀪𑀸𑀯𑁄, 𑀦 𑀯𑀺𑀲𑀬𑀻𑀦𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀓𑀸𑀭𑀡𑀁. 𑀬𑀣𑀸 𑀘 𑀯𑀺𑀲𑀬𑀻𑀦𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀅𑀲𑀺𑀤𑁆𑀥𑁄, 𑀢𑀣𑀸 𑀯𑀺𑀲𑀬𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲. 𑀢𑀢𑁆𑀣 𑀬𑀣𑀸 𑀅𑀲𑀺𑀤𑁆𑀥𑀮𑁄𑀓𑀼𑀢𑁆𑀢𑀭𑀪𑀸𑀯𑀲𑁆𑀲 𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀢𑀸, 𑀏𑀯𑀁 𑀲𑁄𑀢𑀸𑀤𑀻𑀦𑀁 𑀆𑀧𑀦𑁆𑀦𑀸𑀢𑀺 𑀓𑀺𑀦𑁆𑀢𑀺 𑀢𑀸𑀦𑀺𑀧𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀤𑀺 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑁂𑀬𑁆𑀬, 𑀮𑁄𑀓𑀼𑀢𑁆𑀢𑀭𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀭𑀺𑀓𑀧𑁆𑀧𑀺𑀢𑁂𑀧𑀺 𑀲𑀤𑁆𑀤𑀲𑁆𑀲 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀮𑁄𑀓𑀺𑀬𑁂𑀦 𑀜𑀸𑀡𑁂𑀦𑀸’’𑀢𑀺 𑀉𑀤𑁆𑀥𑀝𑀁, ‘‘𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺 𑀧𑀦 𑀧𑀸𑀴𑀺, 𑀢𑀜𑁆𑀘 𑀯𑀺𑀜𑁆𑀜𑀸𑀡𑀁 𑀲𑁄𑀢𑀲𑀫𑁆𑀩𑀦𑁆𑀥𑁂𑀦 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀅𑀦𑁂𑀓𑀦𑁆𑀢𑀢𑀸𑀢𑀺 𑀮𑁄𑀓𑀺𑀬𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀢𑁄 𑀮𑁄𑀓𑀺𑀬𑁄𑀢𑀺 𑀏𑀢𑀲𑁆𑀲 𑀳𑁂𑀢𑀼𑀲𑁆𑀲 𑀮𑁄𑀓𑀺𑀬𑁂 𑀮𑁄𑀓𑀼𑀢𑁆𑀢𑀭𑁂 𑀘 𑀲𑀫𑁆𑀪𑀯𑀢𑁄 𑀅𑀦𑁂𑀓𑀦𑁆𑀢𑀪𑀸𑀯𑁄 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁩𑁫𑁩. 𑀤𑁆𑀯𑁂 𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀦 𑀇𑀘𑁆𑀙𑀢𑀻𑀢𑀺 𑀬𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀻𑀳𑀺 𑀦𑀺𑀭𑁄𑀥𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀸𑀦𑀺 𑀤𑁆𑀯𑁂 𑀤𑀼𑀓𑁆𑀔𑀲𑀘𑁆𑀘𑀸𑀦𑀺 𑀦 𑀇𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂 𑀧𑀝𑀺𑀲𑀗𑁆𑀔𑀸𑀬 𑀮𑁄𑀓𑀼𑀢𑁆𑀢𑀭𑁂𑀦 𑀜𑀸𑀡𑁂𑀦 𑀅𑀦𑀺𑀭𑀼𑀤𑁆𑀥𑀸𑀢𑀺𑀆𑀤𑀺𑀦𑀸 𑀧𑀝𑀺𑀲𑀗𑁆𑀔𑀸𑀬 𑀯𑀺𑀦𑀸 𑀦𑀺𑀭𑀼𑀤𑁆𑀥𑀸 𑀅𑀲𑀫𑀼𑀤𑀸𑀘𑀭𑀡𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀢𑀺 𑀤𑀲𑁆𑀲𑁂𑀢𑀺 ¶ , 𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀗𑁆𑀕𑀸𑀢𑀺. 𑀢𑁂𑀦 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄 𑀘 𑀅𑀲𑀫𑀼𑀤𑀸𑀘𑀭𑀡𑀦𑀺𑀭𑁄𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀩𑀮𑀓𑀣𑀸𑀯𑀡𑁆𑀡𑀦𑀸

𑁩𑁫𑁪. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 ¶ 𑀅𑀲𑀸𑀥𑀸𑀭𑀡𑀦𑁆𑀢𑀺 𑀬𑀣𑀸 𑀦𑀺𑀤𑁆𑀤𑁂𑀲𑀢𑁄 𑀯𑀺𑀢𑁆𑀣𑀸𑀭𑀢𑁄 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑀁 𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀁 𑀅𑀚𑀸𑀦𑀦𑁆𑀢𑀸𑀧𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧.𑁨𑁬𑁮) 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀉𑀤𑁆𑀤𑁂𑀲𑀢𑁄 𑀲𑀗𑁆𑀔𑁂𑀧𑀢𑁄 𑀲𑀸𑀯𑀓𑀸 𑀚𑀸𑀦𑀦𑁆𑀢𑀺, 𑀦 𑀏𑀯𑀁 ‘‘𑀆𑀲𑀬𑀁 𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁧𑁩) 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀧𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀚𑀸𑀦𑀦𑁆𑀢𑀻𑀢𑀺 ‘‘𑀅𑀲𑀸𑀥𑀸𑀭𑀡’’𑀦𑁆𑀢𑀺 𑀆𑀳. 𑀣𑁂𑀭𑁂𑀦 𑀧𑀦 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀚𑀸𑀦𑀦𑀫𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀫𑀻’’𑀢𑀺 (𑀧𑀝𑀺. 𑀫. 𑁨.𑁪𑁪) 𑀯𑀼𑀢𑁆𑀢𑀁, 𑀦 𑀬𑀣𑀸𑀯𑀼𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁 𑀢𑀣𑀸𑀕𑀢𑀩𑀮𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. ‘‘𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀦 𑀧𑀝𑀺𑀚𑀸𑀦𑀦𑁆𑀢𑁂𑀦 ‘‘𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀲𑀸𑀥𑀸𑀭𑀡’’𑀦𑁆𑀢𑀺 𑀇𑀤𑀫𑁆𑀧𑀺 𑀏𑀯𑀫𑁂𑀯 𑀧𑀝𑀺𑀜𑁆𑀜𑀸𑀢𑀁 𑀲𑀺𑀬𑀸𑀢𑀺 𑀓𑀣𑀫𑀬𑀁 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸.

𑁩𑁫𑁬. 𑀲𑁂𑀲𑁂𑀲𑀼 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀻𑀦𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁆𑀢𑀸 𑀢𑀢𑁆𑀣 𑀲𑀸𑀥𑀸𑀭𑀡𑀧𑀓𑁆𑀔𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀲𑀗𑁆𑀔𑀸𑀭𑁂 ¶ 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀲𑀫𑁄𑀥𑀸𑀦𑀁 𑀓𑀣𑀁 𑀆𑀧𑀚𑁆𑀚𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀢𑀸𑀬 𑀲𑀢𑁆𑀢𑁄 ‘‘𑀧𑀡𑀺𑀥𑀻’’𑀢𑀺 𑀯𑀼𑀢𑁆𑀢𑁄. 𑀲𑁄 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀦 𑀞𑀧𑁂𑀢𑀩𑁆𑀩𑁄𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑁂𑀦 𑀢𑁂𑀦 𑀭𑀳𑀺𑀢𑀢𑀸 𑀯𑀼𑀢𑁆𑀢𑀸.

𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀛𑀸𑀦𑁂𑀦 ¶ 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀢𑀺𑀲𑁆𑀲𑀸 𑀮𑀤𑁆𑀥𑀺𑀬𑀸 𑀓𑁄 𑀤𑁄𑀲𑁄𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀬𑀤𑀺 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁂 𑀤𑁄𑀲𑁄, 𑀢𑀢𑁆𑀭𑀸𑀧𑀺 𑀢𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑀢𑀸𑀬 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑀺 𑀘 𑀤𑁄𑀲𑁂 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁, 𑀯𑀬𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺 𑀯𑀺𑀫𑀼𑀢𑁆𑀢𑀯𑀺𑀫𑀼𑀘𑁆𑀘𑀫𑀸𑀦𑀯𑀘𑀦𑀲𑁆𑀲 𑀦 𑀘𑁄𑀤𑁂𑀢𑀩𑁆𑀩𑀁 𑀲𑀺𑀬𑀸, 𑀅𑀣 𑀔𑁄 𑀯𑀺𑀫𑀼𑀘𑁆𑀘𑀫𑀸𑀦𑀯𑀘𑀦𑀫𑁂𑀯𑀸𑀢𑀺. 𑀏𑀓𑀤𑁂𑀲𑁂𑀦, 𑀏𑀓𑀤𑁂𑀲𑁂 𑀯𑀸 𑀯𑀺𑀫𑀼𑀘𑁆𑀘𑀫𑀸𑀦𑀲𑁆𑀲 𑀘 𑀯𑀺𑀫𑀼𑀢𑁆𑀢𑀓𑀺𑀭𑀺𑀬𑀸𑀬 𑀏𑀓𑀤𑁂𑀲𑁄 𑀯𑀺𑀲𑁂𑀲𑀦𑀁 𑀳𑁄𑀢𑀻𑀢𑀺 ‘‘𑀪𑀸𑀯𑀦𑀧𑀼𑀁𑀲𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀝𑀸𑀤𑀬𑁄𑀢𑀺 𑀓𑀝𑀧𑀝𑀸𑀤𑀬𑁄. 𑀏𑀓𑁂𑀦𑁂𑀯 𑀘𑀺𑀢𑁆𑀢𑁂𑀦𑀸𑀢𑀺 𑀏𑀓𑁂𑀦𑁂𑀯 𑀨𑀮𑀘𑀺𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸

𑁩𑁬𑁮. 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀓𑁆𑀔𑀡𑁂𑀧𑀺 𑀅𑀲𑀫𑀼𑀤𑀸𑀘𑀭𑀦𑁆𑀢𑀸 𑀫𑀕𑁆𑀕𑀓𑁆𑀔𑀡𑁂𑀧𑀺 𑀧𑀳𑀻𑀦𑀸 𑀏𑀯 𑀦𑀸𑀫 𑀪𑀯𑁂𑀬𑁆𑀬𑀼𑀦𑁆𑀢𑀺 𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀕𑁆𑀕𑀳𑀡𑀁 𑀓𑀭𑁄𑀢𑀺.

𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁭𑁧. 𑀇𑀦𑁆𑀤𑁆𑀭𑀺𑀬𑀸𑀦𑀺 ¶ 𑀧𑀝𑀺𑀮𑀪𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀅𑀦𑀺𑀦𑁆𑀤𑁆𑀭𑀺𑀬𑀪𑀽𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀦𑀺𑀬𑁆𑀬𑀸𑀦𑀺𑀓𑀸𑀦𑀺 𑀪𑀸𑀯𑁂𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀢𑀺, 𑀦 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸

𑁩𑁭𑁩. 𑀉𑀧𑀢𑁆𑀣𑀤𑁆𑀥𑀦𑁆𑀢𑀺 ¶ 𑀬𑀣𑀸 𑀯𑀺𑀲𑀬𑀸𑀦𑀼𑀪𑀸𑀯𑀕𑁄𑀘𑀭𑁂𑀳𑀺 𑀯𑀺𑀲𑀺𑀝𑁆𑀞𑀁 𑀳𑁄𑀢𑀺, 𑀢𑀣𑀸 𑀧𑀘𑁆𑀘𑀬𑀪𑀽𑀢𑁂𑀦 𑀓𑀢𑀩𑀮𑀸𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁𑀫𑀢𑁆𑀢𑀫𑁂𑀯𑀸𑀢𑀺 𑀧𑀼𑀭𑀺𑀫𑀁 𑀫𑀁𑀲𑀘𑀓𑁆𑀔𑀼𑀫𑀢𑁆𑀢𑀫𑁂𑀯 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀸𑀧𑀸𑀣𑀕𑀢𑀦𑁆𑀢𑀺 𑀫𑀁𑀲𑀘𑀓𑁆𑀔𑀼𑀦𑀸 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑀁 𑀆𑀧𑀸𑀣𑀁 𑀦𑀸𑀕𑀢𑀁. 𑀏𑀢𑁆𑀣 𑀘 𑀯𑀺𑀲𑀬𑀲𑁆𑀲 𑀤𑀻𑀧𑀓𑀁 𑀆𑀦𑀼𑀪𑀸𑀯𑀕𑁄𑀘𑀭𑀸𑀦𑀫𑁂𑀯 𑀅𑀲𑀤𑀺𑀲𑀢𑀁 𑀯𑀤𑀦𑁆𑀢𑁄 𑀬𑀸𑀤𑀺𑀲𑁄 𑀫𑀁𑀲𑀘𑀓𑁆𑀔𑀼𑀲𑁆𑀲 𑀯𑀺𑀲𑀬𑁄𑀢𑀺 𑀯𑀺𑀲𑀬𑀕𑁆𑀕𑀳𑀡𑀁 𑀦 𑀯𑀺𑀲𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁, 𑀅𑀣 𑀔𑁄 𑀬𑀸𑀤𑀺𑀲𑁂 𑀯𑀺𑀲𑀬𑁂 𑀆𑀦𑀼𑀪𑀸𑀯𑀕𑁄𑀘𑀭𑀯𑀺𑀲𑁂𑀲𑀸 𑀳𑁄𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀭𑀽𑀧𑀯𑀺𑀲𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀻𑀧𑁂𑀢𑀺, 𑀲𑀤𑀺𑀲𑀲𑁆𑀲 𑀯𑀸 𑀯𑀺𑀲𑀬𑀲𑁆𑀲 𑀆𑀦𑀼𑀪𑀸𑀯𑀕𑁄𑀘𑀭𑀯𑀺𑀲𑁂𑀲𑁄𑀯 𑀯𑀺𑀲𑁂𑀲𑀁.

𑀦 𑀘 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀇𑀘𑁆𑀙𑀢𑀻𑀢𑀺 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀓𑀸𑀮𑁂 𑀧𑀼𑀭𑀺𑀫𑀁 𑀫𑀁𑀲𑀘𑀓𑁆𑀔𑀼𑀫𑁂𑀯𑀸𑀢𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀁𑀲𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄 𑀫𑀕𑁆𑀕𑁄𑀢𑀺 𑀫𑀁𑀲𑀘𑀓𑁆𑀔𑀼𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁, 𑀦 𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀢𑀸𑀲𑀸𑀥𑀦𑀢𑁆𑀣𑀁. 𑀭𑀽𑀧𑀸𑀯𑀘𑀭𑀺𑀓𑀸𑀦𑀦𑁆𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀧𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀸𑀦𑀺 𑀫𑀳𑀸𑀪𑀽𑀢𑀸𑀦𑀺 𑀭𑀽𑀧𑀸𑀯𑀘𑀭𑀺𑀓𑀸𑀦𑀻𑀢𑀺 𑀲𑁄 𑀇𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 ‘‘𑀅𑀭𑀽𑀧𑀸𑀯𑀘𑀭𑀺𑀓𑀸𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀅𑀭𑀽𑀧𑀸𑀯𑀘𑀭𑀓𑁆𑀔𑀡𑁂 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀭𑀽𑀧𑀸𑀯𑀘𑀭𑀁 𑀳𑀼𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀁 𑀦 𑀚𑀸𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁭𑁪. 𑀓𑀺𑀜𑁆𑀘𑀸𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀲𑁆𑀲 𑀧𑀜𑁆𑀜𑀸𑀘𑀓𑁆𑀔𑀼𑀪𑀸𑀯𑀁 𑀦 𑀇𑀘𑁆𑀙𑀢𑀺, 𑀬𑁂𑀦 𑀢𑀻𑀡𑀺 𑀘𑀓𑁆𑀔𑀽𑀦𑀺 𑀥𑀫𑁆𑀫𑀼𑀧𑀢𑁆𑀣𑀫𑁆𑀪𑁂𑀦 𑀘𑀓𑁆𑀔𑀼𑀦𑁆𑀢𑀭𑀪𑀸𑀯𑀁 𑀯𑀤𑀢𑁄 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁩𑁭𑁭. 𑀤𑀺𑀩𑁆𑀩𑁂𑀦 ¶ 𑀘𑀓𑁆𑀔𑀼𑀦𑀸 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀻𑀢𑀺 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀺 𑀓𑀭𑀡𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦 𑀬𑀣𑀸𑀓𑀫𑁆𑀫𑀽𑀧𑀕𑀢𑀚𑀸𑀦𑀦𑀓𑀺𑀘𑁆𑀘𑀓𑁂. 𑀢𑀁𑀓𑀺𑀘𑁆𑀘𑀓𑁂𑀬𑁂𑀯 𑀧𑀦 𑀧𑀭𑁄 𑀓𑀭𑀡𑀦𑀺𑀤𑁆𑀤𑁂𑀲𑀁 𑀫𑀜𑁆𑀜𑀢𑀻𑀢𑀺 𑀆𑀳 ‘‘𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸’’𑀢𑀺. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀮𑀤𑁆𑀥𑀻𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀫𑁂𑀯 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀦𑁆𑀢𑀺 𑀏𑀯𑀁 ¶ 𑀪𑀯𑀺𑀢𑀩𑁆𑀩𑀁. 𑀏𑀯-𑀲𑀤𑁆𑀤𑁄 𑀘 𑀅𑀝𑁆𑀞𑀸𑀦𑁂 𑀞𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀲𑀤𑁆𑀤𑀲𑁆𑀲 𑀧𑀭𑀢𑁄 𑀬𑁄𑀚𑁂𑀢𑀩𑁆𑀩𑁄. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀲𑁆𑀲 𑀳𑀺 𑀲𑁄 𑀤𑀺𑀩𑁆𑀩𑀘𑀓𑁆𑀔𑀼𑀢𑁄 𑀅𑀢𑁆𑀣𑀦𑁆𑀢𑀭𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀦 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀢𑁄𑀢𑀺.

𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀁𑀯𑀭𑀸𑀲𑀁𑀯𑀭𑀲𑀩𑁆𑀪𑀸𑀯𑁄 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂𑀦 𑀧𑀓𑀸𑀲𑀺𑀢𑁄𑀢𑀺 ‘‘𑀢𑀸𑀯𑀢𑀺𑀁𑀲𑁂 𑀤𑁂𑀯𑁂 𑀉𑀧𑀸𑀤𑀸𑀬𑀸’’𑀢𑀺 𑀆𑀳. 𑀏𑀯𑀁 𑀲𑀢𑀺 𑀲𑀼𑀕𑀢𑀺𑀓𑀣𑀸𑀬𑀁 ‘‘𑀢𑀸𑀯𑀢𑀺𑀁𑀲𑁂 𑀲𑀗𑁆𑀕𑀳𑀺𑀢𑀸𑀦𑀁 𑀧𑀼𑀩𑁆𑀩𑀤𑁂𑀯𑀸𑀦𑀁 𑀲𑀼𑀭𑀸𑀧𑀸𑀦𑀁, 𑀲𑀓𑁆𑀓𑀤𑁂𑀯𑀸𑀦𑀁 𑀲𑀼𑀭𑀸𑀧𑀸𑀦𑀦𑀺𑀯𑀸𑀭𑀡𑀁 𑀲𑀼𑀬𑁆𑀬𑀢𑀺, 𑀢𑀁 𑀢𑁂𑀲𑀁 𑀲𑀼𑀭𑀸𑀧𑀸𑀦𑀁 𑀅𑀲𑀁𑀯𑀭𑁄 𑀦 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺.

𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁮𑁭. 𑀕𑀺𑀳𑀺𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑀸𑀢𑀺 ¶ 𑀏𑀢𑁂𑀦 𑀕𑀺𑀳𑀺𑀙𑀦𑁆𑀤𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀏𑀯 ‘‘𑀕𑀺𑀳𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁮𑁮. 𑀅𑀬𑁄𑀦𑀺𑀲𑁄𑀢𑀺 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺, 𑀢𑀢𑁆𑀣 𑀢𑀲𑁆𑀲𑀸𑀬𑁂𑀯𑀽𑀧𑀧𑀢𑁆𑀢𑀺𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁩𑁯𑁩. 𑀲𑀫𑀦𑁆𑀦𑀸𑀕𑀢𑀓𑀣𑀸𑀬𑀁 ¶ 𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀦𑁆𑀢𑁄 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀯𑀺𑀬 𑀲𑀫𑀦𑁆𑀦𑀸𑀕𑀫𑀁 𑀦 𑀯𑀤𑀢𑀻𑀢𑀺 𑀢𑀲𑁆𑀲 𑀘𑀢𑀽𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀫𑀧𑁆𑀧𑀲𑀗𑁆𑀕𑁄 𑀬𑀣𑀸 𑀳𑁄𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀁.

𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁩𑁯𑁭. 𑀇𑀫𑀺𑀦𑀸𑀯 ¶ 𑀦𑀬𑁂𑀦𑀸𑀢𑀺 ‘‘𑀢𑀢𑁆𑀣 𑀤𑁆𑀯𑁂 𑀲𑀫𑀦𑁆𑀦𑀸𑀕𑀫𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀢𑁆𑀢𑀺𑀥𑀫𑁆𑀫𑁄 𑀦𑀸𑀫 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀽𑀫𑀺𑀁 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀸𑀧𑀼𑀡𑀦𑁆𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀧𑀝𑀺𑀮𑀸𑀪𑁄. 𑀦𑀺𑀭𑀼𑀤𑁆𑀥𑁂𑀲𑀼𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀦𑀺𑀭𑀼𑀚𑁆𑀛𑀦𑀢𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀲𑀗𑁆𑀔𑀸𑀭𑁄, 𑀬𑁂𑀦 𑀲𑀼𑀧𑀦𑁆𑀢𑁄 𑀲𑀚𑁆𑀛𑀸𑀬𑀸𑀤𑀺𑀧𑀲𑀼𑀢𑁄 𑀘 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀤𑀦𑁆𑀢𑀺.

𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀩𑁄𑀥𑀺𑀬𑀸𑀩𑀼𑀤𑁆𑀥𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁯𑁮. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀜𑀸𑀡𑀤𑁆𑀯𑀬𑀲𑁆𑀲 𑀩𑁄𑀥𑀺𑀪𑀸𑀯𑀢𑁄. 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀦𑀢𑁆𑀣𑀺𑀢𑀸𑀬 𑀩𑁄𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀘 𑀅𑀦𑀼𑀬𑁄𑀕𑁄 𑀘 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀩𑁄𑀥𑀺𑀬𑀸𑀩𑀼𑀤𑁆𑀥𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀩𑁄𑀥𑀺𑀲𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁂𑀲𑀼 𑀅𑀩𑁄𑀥𑀺𑀲𑀢𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀦 ¶ 𑀩𑁄𑀥𑀺𑀲𑀢𑁆𑀢𑀢𑁄 𑀅𑀜𑁆𑀜𑁄 𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁄 𑀦𑀢𑁆𑀣𑀻𑀢𑀺. 𑀦𑀸𑀧𑀺 𑀲𑀩𑁆𑀩𑁂𑀲𑀁 𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀢𑀸, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁦𑁩. 𑀞𑀧𑁂𑀢𑁆𑀯𑀸 ¶ 𑀧𑀸𑀭𑀫𑀻𑀧𑀽𑀭𑀡𑀦𑁆𑀢𑀺 𑀧𑀸𑀭𑀫𑀻𑀧𑀽𑀭𑀡𑁂𑀦𑁂𑀯 𑀢𑁂 ‘‘𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀯𑀮𑀜𑁆𑀳𑀺 𑀦𑀦𑁆𑀢𑀺𑀆𑀤𑀺𑀦𑀸 𑀘 𑀦 𑀦𑀺𑀬𑀸𑀫𑀓𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁧𑁩. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯𑀸𑀢𑀺 𑀅𑀯𑀲𑀺𑀝𑁆𑀞𑀲𑁆𑀲 𑀧𑀳𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 ‘‘𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦’’𑀦𑁆𑀢𑀺 𑀇𑀫𑀁 𑀧𑀭𑀺𑀬𑀸𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀚𑀳𑀦𑀢𑁄 𑀏𑀯𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀳𑀻𑀦𑀲𑁆𑀲 𑀅𑀪𑀸𑀯𑀸𑀢𑀺 𑀅𑀯𑀲𑀺𑀝𑁆𑀞𑀲𑁆𑀲 𑀧𑀳𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀣𑀸 ‘‘𑀅𑀦𑀯𑀲𑁂𑀲𑀧𑁆𑀧𑀳𑀸𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀏𑀯𑀁 𑀲𑀢𑀺 𑀢𑁂𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀙𑀟𑁆𑀟𑁂𑀢𑁆𑀯𑀸 𑀲𑀓𑀯𑀸𑀤𑀺𑀲𑁆𑀲 𑀮𑀤𑁆𑀥𑀺𑀬𑀸 𑀧𑀝𑀺𑀜𑁆𑀜𑀸𑀢𑀦𑁆𑀢𑀺 𑀆𑀧𑀚𑁆𑀚𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁧. 𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁧𑁮. 𑀨𑀮𑀜𑀸𑀡𑀁 𑀦 𑀳𑁄𑀢𑀻𑀢𑀺 ‘‘𑀯𑀺𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀸 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀬𑀸𑀤𑀺𑀪𑀸𑀯𑀢𑁄 𑀫𑀕𑁆𑀕𑁂𑀦 𑀧𑀳𑀻𑀦𑀸𑀦𑀁 𑀧𑀼𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀘 ‘‘𑀅𑀯𑀺𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀸 ¶ 𑀦 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑁄𑀢𑁆𑀭𑀪𑀼𑀜𑀸𑀡𑀜𑁆𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁨𑁧. 𑀦 ¶ 𑀧𑀦𑁂𑀢𑀁 𑀅𑀲𑁂𑀔𑀦𑁆𑀢𑀺 𑀏𑀢𑁂𑀦 𑀅𑀲𑁂𑀔𑀯𑀺𑀲𑀬𑀢𑁆𑀢𑀸 𑀅𑀲𑁂𑀔𑀫𑁂𑀯 𑀜𑀸𑀡𑀦𑁆𑀢𑀺 𑀧𑀭𑀲𑁆𑀲 𑀮𑀤𑁆𑀥𑀺, 𑀦 𑀧𑀦 𑀅𑀲𑁂𑀔𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸

𑁪𑁨𑁪. 𑀦 𑀧𑀣𑀯𑀻𑀬𑁂𑀯𑀸𑀢𑀺 𑀮𑀓𑁆𑀔𑀡𑀧𑀣𑀯𑀻𑀬𑁂𑀯, 𑀲𑀲𑀫𑁆𑀪𑀸𑀭𑀧𑀣𑀯𑀻𑀬𑁂𑀯 𑀯𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀺𑀧𑀭𑀺𑀬𑁂𑀲𑁄 𑀧𑀦 𑀯𑀺𑀧𑀭𑀻𑀢𑀜𑀸𑀡𑀁 𑀦𑀸𑀫𑀸𑀢𑀺 𑀅𑀜𑁆𑀜𑀸𑀡𑁂𑀧𑀺 𑀜𑀸𑀡𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁪𑁨𑁮-𑁪𑁩𑁧. 𑀜𑀸𑀡𑀁 𑀅𑀢𑁆𑀣𑀺, 𑀬𑀁 𑀲𑀘𑁆𑀘𑀸𑀦𑀼𑀮𑁄𑀫𑀁 𑀫𑀕𑁆𑀕𑀜𑀸𑀡𑀸𑀦𑀼𑀕𑀢𑀺𑀓𑀁 𑀧𑀲𑁆𑀲𑀦𑁆𑀢𑁄 𑀪𑀕𑀯𑀸 ‘‘𑀪𑀩𑁆𑀩𑁄’’𑀢𑀺 𑀚𑀸𑀦𑀸𑀢𑀻𑀢𑀺 𑀮𑀤𑁆𑀥𑀺. 𑀧𑀞𑀫𑀧𑀜𑁆𑀳𑀫𑁂𑀯 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀦𑀺𑀬𑀢𑀲𑁆𑀲 𑀅𑀦𑀺𑀬𑀸𑀫𑀕𑀫𑀦𑀸𑀬𑀸’’𑀢𑀺 𑀯𑀺𑀧𑀭𑀻𑀢𑀸𑀦𑀼𑀬𑁄𑀕𑀢𑁄 𑀧𑀪𑀼𑀢𑀺 𑀕𑀡𑁂𑀢𑁆𑀯𑀸 ‘‘𑀘𑀢𑀼𑀢𑁆𑀣’’𑀦𑁆𑀢𑀺 𑀆𑀳.

𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸

𑁪𑁩𑁨-𑁪𑁩𑁩. 𑀬𑀁𑀓𑀺𑀜𑁆𑀘𑀺 ¶ 𑀅𑀭𑀺𑀬𑀸𑀦𑀁 𑀜𑀸𑀡𑀁, 𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀫𑁂𑀯𑀸𑀢𑀺 𑀕𑀡𑁆𑀳𑀦𑁆𑀢𑁂𑀦𑀧𑀺 𑀲𑀩𑁆𑀩𑀁 𑀜𑀸𑀡𑀁 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀦𑀭𑀺𑀬𑀸𑀦𑀫𑁆𑀧𑀺 𑀳𑀺 𑀜𑀸𑀡𑀁 𑀜𑀸𑀡𑀫𑁂𑀯𑀸𑀢𑀺 ¶ . 𑀢𑀲𑁆𑀲 𑀯𑀸 𑀜𑀸𑀡𑀢𑀁 𑀦 𑀇𑀘𑁆𑀙𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀣𑀯𑀻𑀓𑀲𑀺𑀡𑀲𑀫𑁆𑀫𑀼𑀢𑀺𑀬𑀁 𑀲𑀫𑀸𑀧𑀢𑁆𑀢𑀺𑀜𑀸𑀡𑀁 𑀲𑀦𑁆𑀥𑀸𑀬𑀸𑀢𑀺 𑀅𑀦𑀭𑀺𑀬𑀲𑁆𑀲 𑀏𑀢𑀁 𑀜𑀸𑀡𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸.

𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁪-𑁪𑁩𑁫. 𑀲𑀘𑁆𑀘𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦 𑀉𑀪𑀬𑀲𑁆𑀲𑀧𑀺 𑀲𑀘𑁆𑀘𑀲𑀸𑀫𑀜𑁆𑀜𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀤𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳.

𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁬-𑁪𑁩𑁮. 𑀨𑀲𑁆𑀲𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑀁 𑀫𑀦𑀲𑀺𑀓𑀭𑁄𑀢𑁄𑀢𑀺 𑀏𑀢𑁂𑀦 𑀧𑀼𑀭𑀺𑀫𑀸 𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸 𑀅𑀦𑀼𑀧𑀤𑀥𑀫𑁆𑀫𑀫𑀦𑀲𑀺𑀓𑀸𑀭𑀢𑁄 𑀅𑀜𑁆𑀜𑀁 𑀲𑀫𑀼𑀤𑀸𑀬𑀫𑀦𑀲𑀺𑀓𑀸𑀭𑀁 𑀲𑀦𑁆𑀥𑀸𑀬 𑀓𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁯-𑁪𑁪𑁦. 𑀲𑀩𑁆𑀩𑀲𑁆𑀫𑀺𑀫𑁆𑀧𑀻𑀢𑀺 ¶ ‘‘𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀔𑁄’’𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑁂 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀦𑀸𑀕𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀦𑀦𑁆𑀢𑀭𑀸𑀦𑀸𑀕𑀢𑁂𑀧𑀺 𑀜𑀸𑀡𑀁 𑀇𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁧-𑁪𑁪𑁨. 𑀯𑀘𑀦𑀁 ¶ 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀯𑀘𑀦𑀁, 𑀅𑀦𑀼𑀚𑀸𑀦𑀦𑀯𑀘𑀦𑀁 𑀯𑀸 𑀦𑀺𑀲𑁆𑀲𑀸𑀬. 𑀲𑀦𑁆𑀢𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀁 𑀪𑀗𑁆𑀕𑀢𑁄 𑀅𑀦𑀼𑀧𑀲𑁆𑀲𑀦𑀸𑀲𑀦𑁆𑀢𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁩-𑁪𑁪𑁪. 𑀩𑀼𑀤𑁆𑀥𑀸𑀦𑀁 𑀯𑀺𑀬𑀸𑀢𑀺 𑀬𑀣𑀸 𑀩𑀼𑀤𑁆𑀥𑀸 𑀲𑀩𑁆𑀩𑀧𑁆𑀧𑀓𑀸𑀭𑀨𑀮𑀧𑀭𑁄𑀧𑀭𑀺𑀬𑀢𑁆𑀢𑀚𑀸𑀦𑀦𑀯𑀲𑁂𑀦 𑀅𑀢𑁆𑀢𑀦𑁄 𑀏𑀯 𑀘 𑀩𑀮𑁂𑀦 𑀨𑀮𑀁 𑀚𑀸𑀦𑀦𑁆𑀢𑀺, 𑀏𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁬. 𑀙𑀝𑁆𑀞𑀯𑀕𑁆𑀕𑁄

𑁧. 𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁪𑁪𑁫-𑁪𑁪𑁭. 𑀅𑀦𑀺𑀬𑀢𑁄 ¶ 𑀦𑀸𑀫 𑀦 𑀳𑁄𑀢𑀻𑀢𑀺 𑀬𑀣𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑁆𑀲 𑀪𑀯𑀦𑁆𑀢𑀭𑁂 𑀅𑀦𑀺𑀬𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀏𑀢𑀲𑁆𑀲 𑀓𑀤𑀸𑀘𑀺𑀧𑀺 𑀅𑀦𑀺𑀬𑀢𑀢𑀸 𑀦 𑀳𑁄𑀢𑀻𑀢𑀺 𑀬𑁄 𑀦𑀺𑀬𑀸𑀫𑁄, 𑀲𑁄 𑀅𑀲𑀗𑁆𑀔𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀓𑀸𑀭𑀡𑀝𑁆𑀞𑁂𑀦 𑀞𑀺𑀢𑀢𑀸𑀢𑀺 𑀓𑀸𑀭𑀡𑀪𑀸𑀯𑁄𑀬𑁂𑀯. 𑀏𑀢𑁂𑀦 𑀘 𑀥𑀫𑁆𑀫𑀸𑀦𑀁 𑀓𑀸𑀭𑀡𑀪𑀸𑀯𑁄 𑀥𑀫𑁆𑀫𑀝𑁆𑀞𑀺𑀢𑀢𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑀸 ‘‘𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺 𑀏𑀢𑁆𑀣𑀸𑀧𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁪𑁫𑁨-𑁪𑁫𑁪. 𑀯𑀢𑁆𑀣𑀼𑀲𑀘𑁆𑀘𑀦𑁆𑀢𑀺 ¶ 𑀚𑀸𑀢𑀺𑀬𑀸𑀤𑀺 𑀓𑀸𑀫𑀢𑀡𑁆𑀳𑀸𑀤𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺 𑀘. 𑀩𑀸𑀥𑀦𑀧𑀪𑀯𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀳𑀺 𑀮𑀓𑁆𑀔𑀡𑀲𑀘𑁆𑀘𑀁 𑀩𑀸𑀥𑀦𑀸𑀤𑀺.

𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁫𑁭-𑁪𑁫𑁯. 𑀓𑀭𑀺𑀬𑀫𑀸𑀦𑀸 ¶ 𑀓𑀭𑀻𑀬𑀢𑀻𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀅𑀧𑁆𑀧𑀯𑀢𑁆𑀢𑀺 𑀲𑀸𑀥𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀢𑀸𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀧𑀦 𑀅𑀪𑀸𑀯𑁂𑀦𑀸𑀢𑀺 𑀯𑀤𑀦𑁆𑀢𑁄 𑀲𑀪𑀸𑀯𑀥𑀫𑁆𑀫𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀯𑁄𑀤𑀸𑀦𑀜𑁆𑀘 𑀯𑀼𑀝𑁆𑀞𑀸𑀦𑀧𑀭𑀺𑀬𑀸𑀬𑁄𑀯. 𑀅𑀲𑀗𑁆𑀔𑀢𑀪𑀸𑀯𑁂 𑀓𑀸𑀭𑀡𑀁 𑀦 𑀳𑁄𑀢𑀺 𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀲𑀸𑀥𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀯𑀕𑁆𑀕𑁄

𑁧. 𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁧-𑁪𑁭𑁨. 𑀲𑀗𑁆𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑀸.

𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁩-𑁪𑁭𑁪. 𑀦𑀸𑀦𑀢𑁆𑀢𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑁄 ‘‘𑀢𑀺𑀮𑀫𑁆𑀳𑀺 𑀢𑁂𑀮𑀁 𑀅𑀦𑀼𑀧𑀯𑀺𑀝𑁆𑀞’’𑀦𑁆𑀢𑀺 𑀯𑀘𑀦𑀫𑁂𑀯 𑀦 𑀬𑀼𑀚𑁆𑀚𑀢𑀻𑀢𑀺 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸

𑁪𑁭𑁫-𑁪𑁭𑁭. 𑀨𑀲𑁆𑀲𑀸𑀤𑀻𑀦𑀁 ¶ ¶ 𑀏𑀓𑀼𑀧𑁆𑀧𑀸𑀤𑀢𑀸𑀤𑀺𑀯𑀺𑀭𑀳𑀺𑀢𑀸 𑀲𑀳𑀚𑀸𑀢𑀢𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀫𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑀢𑀁 𑀲𑀦𑁆𑀥𑀸𑀬𑀸’’𑀢𑀺.

𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁭𑁮. 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀘𑁄𑀤𑁂𑀢𑀼𑀦𑁆𑀢𑀺 𑀬𑀤𑀺 𑀘𑁂𑀢𑀲𑀺𑀓𑁄𑀯 𑀥𑀫𑁆𑀫𑁄 𑀤𑀸𑀦𑀁, ‘‘𑀤𑀺𑀬𑁆𑀬𑀢𑀻𑀢𑀺 𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀅𑀢𑁆𑀣𑁂𑀦 𑀘𑁂𑀢𑀲𑀺𑀓𑀲𑁆𑀲𑁂𑀯 𑀤𑀸𑀦𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁭𑁯. 𑀅𑀦𑀺𑀝𑁆𑀞𑀨𑀮𑀦𑁆𑀢𑀺𑀆𑀤𑀺 𑀅𑀘𑁂𑀢𑀲𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑀸𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀨𑀮𑀤𑀸𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀺𑀝𑁆𑀞𑀨𑀮𑀦𑁆𑀢𑀺𑀆𑀤𑀺𑀦𑀸 𑀅𑀘𑁂𑀢𑀲𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀨𑀮𑀤𑀸𑀦𑀁 𑀯𑀼𑀢𑁆𑀢𑀁 𑀯𑀺𑀬 𑀳𑁄𑀢𑀺, 𑀦 𑀤𑀸𑀦𑀪𑀸𑀯𑁄, 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀜𑁆𑀘𑁂𑀢𑀫𑀸𑀳𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯𑀸𑀳 ‘‘𑀦 𑀳𑀺 𑀅𑀘𑁂𑀢𑀲𑀺𑀓𑁄 𑀅𑀦𑁆𑀦𑀸𑀤𑀺𑀥𑀫𑁆𑀫𑁄 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀤𑁂𑀢𑀻’’𑀢𑀺. 𑀇𑀝𑁆𑀞𑀨𑀮𑀪𑀸𑀯𑀦𑀺𑀬𑀫𑀦𑀢𑁆𑀣𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀯𑀺𑀬 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀦𑀺𑀝𑁆𑀞𑀨𑀮𑀢𑀸 𑀤𑀸𑀦𑀲𑁆𑀲 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀧𑀦 𑀇𑀝𑁆𑀞𑀨𑀮𑀫𑁂𑀯𑀸𑀢𑀺 𑀦𑀺𑀬𑀫𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀇𑀢𑀭𑁂𑀦𑀸𑀢𑀺 ‘‘𑀤𑀺𑀬𑁆𑀬𑀢𑀻𑀢𑀺 𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀦 𑀧𑀦 𑀏𑀓𑁂𑀦𑀢𑁆𑀣𑁂𑀦𑀸𑀢𑀺 ‘‘𑀤𑁂𑀬𑁆𑀬𑀥𑀫𑁆𑀫𑁄𑀯 𑀤𑀸𑀦’’𑀦𑁆𑀢𑀺 𑀇𑀫𑀁 𑀲𑀓𑀯𑀸𑀤𑀻𑀯𑀸𑀤𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀲𑀤𑁆𑀥𑀸 𑀳𑀺𑀭𑀺𑀬’’𑀦𑁆𑀢𑀺𑀆𑀤𑀺𑀓𑀁 𑀲𑀼𑀢𑁆𑀢𑀲𑀸𑀥𑀦𑀁 𑀧𑀭𑀯𑀸𑀤𑀻𑀯𑀸𑀤𑁂 𑀬𑀼𑀚𑁆𑀚𑀢𑀺, ‘‘𑀇𑀥𑁂𑀓𑀘𑁆𑀘𑁄 𑀅𑀦𑁆𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀓𑀜𑁆𑀘, ‘‘𑀘𑁂𑀢𑀲𑀺𑀓𑁄𑀯 𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀇𑀫𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀇𑀫𑀁 𑀧𑀦 𑀲𑀸𑀥𑁂𑀢𑀼𑀁 ‘‘𑀲𑀤𑁆𑀥𑀸 𑀳𑀺𑀭𑀺𑀬’’𑀦𑁆𑀢𑀺𑀆𑀤𑀺𑀓𑀁 𑀲𑀓𑀯𑀸𑀤𑀻𑀯𑀸𑀤𑁂 𑀬𑀼𑀚𑁆𑀚𑀢𑀺, ‘‘𑀇𑀥𑁂𑀓𑀘𑁆𑀘𑁄 𑀅𑀦𑁆𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀓𑀁 𑀯𑀸 ‘‘𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀲𑀸𑀥𑁂𑀢𑀼𑀦𑁆𑀢𑀺 𑀏𑀯𑀁 𑀦𑀺𑀯𑀢𑁆𑀢𑀦𑀲𑀸𑀥𑀦𑀢𑁆𑀣𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀦 𑀧𑀦 𑀏𑀓𑁂𑀦𑀢𑁆𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀬𑀣𑀸 𑀧𑀭𑀯𑀸𑀤𑀻𑀯𑀸𑀤𑁂 𑀘 𑀲𑀼𑀢𑁆𑀢𑀲𑀸𑀥𑀦𑀢𑁆𑀣𑀁 ‘‘𑀦 𑀯𑀢𑁆𑀢𑀩𑁆𑀩𑀁 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀸𑀬𑀁 𑀘𑁂𑀢𑀲𑀺𑀓𑁄𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀢𑀣𑀸 ‘‘𑀦 𑀯𑀢𑁆𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀸𑀬 𑀘 𑀤𑁂𑀬𑁆𑀬𑀥𑀫𑁆𑀫𑁄𑀯𑀸𑀢𑀺 ¶ . 𑀤𑁂𑀬𑁆𑀬𑀥𑀫𑁆𑀫𑁄 𑀇𑀝𑁆𑀞𑀨𑀮𑁄𑀢𑀺 𑀇𑀝𑁆𑀞𑀨𑀮𑀸𑀪𑀸𑀯𑀫𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 ‘‘𑀇𑀝𑁆𑀞𑀨𑀮𑀪𑀸𑀯𑀫𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ¶ . ‘‘𑀇𑀝𑁆𑀞𑀨𑀮𑀸𑀪𑀸𑀯𑀫𑀢𑁆𑀢𑀫𑁂𑀯 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁. 𑀲𑀗𑁆𑀓𑀭𑀪𑀸𑀯𑀫𑁄𑀘𑀦𑀢𑁆𑀣𑀦𑁆𑀢𑀺 𑀘𑁂𑀢𑀲𑀺𑀓𑀲𑁆𑀲 𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀘 𑀇𑀝𑁆𑀞𑀨𑀮𑀝𑁆𑀞𑁂𑀦 𑀤𑀸𑀦𑀪𑀸𑀯𑀫𑁄𑀘𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁪𑁮𑁩. 𑀧𑀭𑀺𑀪𑁄𑀕𑀫𑀬𑀁 𑀦𑀸𑀫 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀼𑀜𑁆𑀜𑀁 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺. 𑀢𑀜𑁆𑀳𑀺 𑀢𑁂 𑀲𑀦𑁆𑀥𑀸𑀬 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀯𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁮𑁫. 𑀢𑀲𑁆𑀲𑀸𑀧𑀺 𑀯𑀲𑁂𑀦𑀸𑀢𑀺 𑀢𑀲𑁆𑀲𑀸𑀧𑀺 𑀮𑀤𑁆𑀥𑀺𑀬𑀸 𑀯𑀲𑁂𑀦. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀬 𑀏𑀢𑁂𑀲𑀫𑁆𑀧𑀺 𑀲𑀫𑁄𑀥𑀸𑀦𑀁 𑀲𑀺𑀬𑀸𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑀨𑀲𑁆𑀲𑀸𑀤𑀻𑀦𑀫𑁂𑀯 𑀧𑀦 𑀲𑀫𑁄𑀥𑀸𑀦𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁮𑁬. 𑀅𑀧𑀭𑀺𑀪𑀼𑀢𑁆𑀢𑁂𑀧𑀻𑀢𑀺 𑀇𑀫𑀺𑀦𑀸 ‘‘𑀧𑀝𑀺𑀕𑁆𑀕𑀸𑀳𑀓𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀢𑀺 𑀙𑀟𑁆𑀟𑁂𑀢𑀻’’𑀢𑀺𑀆𑀤𑀺𑀓𑀁 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀪𑀼𑀢𑁆𑀢𑁂 𑀤𑁂𑀬𑁆𑀬𑀥𑀫𑁆𑀫𑁂 𑀧𑀼𑀜𑁆𑀜𑀪𑀸𑀯𑀢𑁄 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀅𑀬𑀁 𑀯𑀸𑀤𑁄 𑀳𑀻𑀬𑀢𑀺. 𑀢𑀲𑁆𑀫𑀺𑀜𑁆𑀘 𑀳𑀻𑀦𑁂 𑀲𑀓𑀯𑀸𑀤𑀻𑀯𑀸𑀤𑁄 𑀩𑀮𑀯𑀸. 𑀘𑀸𑀕𑀘𑁂𑀢𑀦𑀸𑀬 𑀏𑀯 𑀳𑀺 𑀧𑀼𑀜𑁆𑀜𑀪𑀸𑀯𑁄 𑀏𑀯𑀁 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑀺𑀪𑀼𑀢𑁆𑀢𑁂𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀧𑀼𑀜𑁆𑀜𑀪𑀸𑀯𑁂 𑀘𑀸𑀕𑀘𑁂𑀢𑀦𑀸𑀬 𑀏𑀯 𑀧𑀼𑀜𑁆𑀜𑀪𑀸𑀯𑁄𑀢𑀺 𑀆𑀳 ‘‘𑀲𑀓𑀯𑀸𑀤𑀻𑀯𑀸𑀤𑁄𑀯 𑀩𑀮𑀯𑀸’’𑀢𑀺.

𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀇𑀢𑁄𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁪𑁮𑁮-𑁪𑁯𑁧. 𑀢𑁂𑀦𑁂𑀯 ¶ 𑀬𑀸𑀧𑁂𑀦𑁆𑀢𑀻𑀢𑀺 𑀢𑁂𑀦𑁂𑀯 𑀘𑀻𑀯𑀭𑀸𑀤𑀺𑀦𑀸 𑀬𑀸𑀧𑁂𑀦𑁆𑀢𑀺, 𑀢𑁂𑀦𑁂𑀯 𑀯𑀸 𑀘𑀻𑀯𑀭𑀸𑀤𑀺𑀤𑀸𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀲𑀬𑀁𑀓𑀢𑁂𑀦 𑀓𑀫𑁆𑀫𑀼𑀦𑀸 𑀯𑀺𑀦𑀸𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀬𑀤𑀺 𑀬𑀁 𑀇𑀢𑁄 𑀘𑀻𑀯𑀭𑀸𑀤𑀺 𑀤𑀺𑀦𑁆𑀦𑀁, 𑀦 𑀢𑁂𑀦 𑀬𑀸𑀧𑁂𑀬𑁆𑀬𑀼𑀁, 𑀓𑀣𑀁 𑀅𑀦𑀼𑀫𑁄𑀤𑁂𑀬𑁆𑀬𑀼𑀁…𑀧𑁂… 𑀲𑁄𑀫𑀦𑀲𑁆𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀲𑁆𑀲𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑁄𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁨. 𑀨𑀲𑁆𑀲𑁄 ¶ 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀪𑁂𑀤𑁄 𑀳𑁄𑀢𑀻𑀢𑀺 𑀨𑀲𑁆𑀲𑁂𑀦 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀢𑁆𑀢𑀯𑀚𑁆𑀚𑁂𑀳𑀺 𑀲𑀫𑁆𑀧𑀬𑁄𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑁄 𑀘 𑀲𑀜𑁆𑀜𑀸𑀤𑀬𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀘 𑀦𑁂𑀲𑀦𑁆𑀢𑀺 𑀲𑀸𑀯𑀚𑁆𑀚𑀦𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀳𑀚𑀸𑀢𑀥𑀫𑁆𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁄 𑀢𑀢𑁆𑀣 𑀇𑀝𑁆𑀞𑀯𑀺𑀧𑀸𑀓𑁄, 𑀢𑀲𑁆𑀲 𑀧𑀢𑁆𑀣𑀦𑀸𑀢𑀺 𑀇𑀝𑁆𑀞𑀯𑀺𑀧𑀸𑀓𑁂 𑀏𑀯 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀪𑀽𑀢𑀫𑁂𑀯 𑀧𑀢𑁆𑀣𑀦𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑁂𑀤𑀦𑀸𑀧𑀘𑁆𑀘𑀬𑀁 𑀯𑀸 𑀢𑀡𑁆𑀳𑀁 𑀉𑀧𑀸𑀤𑀸𑀦𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀤𑀼𑀓𑁆𑀔𑀲𑁆𑀲 𑀧𑀪𑀸𑀯𑀺𑀢𑀁. 𑀫𑀽𑀮𑀢𑀡𑁆𑀳𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀯𑀝𑁆𑀝𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀧𑀼𑀭𑀺𑀫𑀢𑀡𑁆𑀳𑀁, 𑀓𑀫𑁆𑀫𑀲𑀳𑀸𑀬𑀁 𑀯𑀸 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀁.

𑁪𑁯𑁩. 𑀲𑀓𑀲𑀫𑀬𑀯𑀲𑁂𑀦 𑀘 𑀘𑁄𑀤𑀦𑀸𑀬 𑀧𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀜𑁆𑀘 𑀮𑀤𑁆𑀥𑀺𑀬𑀸’’𑀢𑀺𑀆𑀤𑀺𑀫𑀸𑀳.

𑁪𑁯𑁪. 𑀧𑀝𑀺𑀮𑀸𑀪𑀯𑀲𑁂𑀦𑀸𑀢𑀺 𑀓𑀫𑁆𑀫𑁂 𑀲𑀢𑀺 𑀧𑀣𑀯𑀺𑀬𑀸𑀤𑀻𑀦𑀁 𑀧𑀝𑀺𑀮𑀸𑀪𑁄 𑀳𑁄𑀢𑀻𑀢𑀺 𑀓𑀫𑁆𑀫𑀁 𑀢𑀁𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀭𑀸𑀫𑀭𑀡𑀁𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁫. 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀸𑀪𑀸𑀯𑀸𑀢𑀺 ¶ ‘‘𑀏𑀓𑀸𑀭𑀫𑁆𑀫𑀡𑀸’’𑀢𑀺 𑀇𑀫𑀲𑁆𑀲 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁯𑁬. 𑀧𑀭𑀺𑀬𑀸𑀬𑁄 𑀦𑀢𑁆𑀣𑀻𑀢𑀺 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀢𑀸𑀬 𑀧𑀭𑀺𑀬𑀸𑀬𑁄 𑀦𑀢𑁆𑀣𑀻𑀢𑀺 𑀅𑀩𑁆𑀬𑀸𑀓𑀢𑀸𑀦𑀁 𑀚𑀭𑀸𑀫𑀭𑀡𑀲𑁆𑀲 𑀯𑀺𑀧𑀸𑀓𑀦𑀺𑀯𑀸𑀭𑀡𑀢𑁆𑀣𑀁 𑀅𑀩𑁆𑀬𑀸𑀓𑀢𑀯𑀲𑁂𑀦 𑀧𑀼𑀘𑁆𑀙𑀸 𑀦 𑀓𑀢𑀸𑀢𑀺 𑀤𑀲𑁆𑀲𑁂𑀢𑀺.

𑁪𑁯𑁭. 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀢𑀸 𑀚𑀭𑀸𑀬𑁂𑀯𑀸𑀢𑀺 𑀓𑁂𑀘𑀺, 𑀢𑀁 𑀅𑀓𑀼𑀲𑀮𑀓𑀫𑁆𑀫𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀢𑀺𑀆𑀤𑀺𑀦𑀸 𑀭𑀽𑀧𑀲𑁆𑀲𑁂𑀯 𑀤𑀼𑀩𑁆𑀩𑀡𑁆𑀡𑀢𑀸𑀤𑀲𑁆𑀲𑀦𑁂𑀦 𑀲𑀫𑀫𑁂𑀯𑀸𑀢𑀺.

𑀚𑀭𑀸𑀫𑀭𑀡𑀁𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁫𑁦𑁦. 𑀯𑀝𑁆𑀝𑀦𑁆𑀢𑀺 ¶ 𑀓𑀫𑁆𑀫𑀸𑀤𑀺𑀯𑀝𑁆𑀝𑀁.

𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑀺𑀧𑀸𑀓𑁄𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁧. 𑀢𑀧𑁆𑀧𑀘𑁆𑀘𑀬𑀸𑀧𑀻𑀢𑀺 𑀬𑀲𑁆𑀲 𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺 𑀢𑀧𑁆𑀧𑀘𑁆𑀘𑀬𑀸𑀧𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑀢𑁄𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀳𑀻𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀬 𑀇𑀫𑀲𑁆𑀲 𑀘𑁄𑀤𑀦𑀲𑁆𑀲 𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀤𑀻𑀲𑀼 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀲𑀼 𑀢𑁂𑀦 𑀢𑁂𑀦 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀧𑀸𑀓𑁄𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀯𑀕𑁆𑀕𑁄

𑁧. 𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁩-𑁫𑁦𑁪. 𑀯𑀡𑁆𑀡𑁄𑀢𑀺 ¶ 𑀯𑀡𑁆𑀡𑀦𑀺𑀪𑀸 𑀲𑀡𑁆𑀞𑀸𑀦𑀜𑁆𑀘 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀤𑀺𑀲𑀭𑀽𑀧𑀲𑀡𑁆𑀞𑀸𑀦𑀸’’𑀢𑀺.

𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀅𑀢𑀺𑀤𑀽𑀭𑀲𑁆𑀲 𑀅𑀦𑁆𑀢𑀭𑀺𑀢𑀲𑁆𑀲 𑀧𑀢𑁆𑀢𑀩𑁆𑀩𑀲𑁆𑀲 𑀤𑁂𑀲𑀲𑁆𑀲 𑀤𑀲𑁆𑀲𑀦𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀯𑀺𑀬. 𑀆𑀓𑀸𑀲𑁂𑀦 𑀧𑀣𑀯𑀦𑁆𑀢𑀭𑀝𑁆𑀞𑀸𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀕𑀫𑀦𑀢𑁄 𑀇𑀤𑁆𑀥𑀺𑀫𑀸 𑀯𑀺𑀬. 𑀦 𑀲𑀳𑀥𑀫𑁆𑀫𑁂𑀦𑀸𑀢𑀺 𑀬𑀤𑀺 𑀲𑁄 𑀪𑀯𑀸𑀦𑀁 𑀅𑀦𑁆𑀢𑀭𑀸 𑀦 𑀲𑀺𑀬𑀸, 𑀦 𑀦𑀸𑀫 𑀅𑀦𑁆𑀢𑀭𑀸𑀪𑀯𑁄𑀢𑀺 𑀧𑀝𑀺𑀓𑁆𑀔𑁂𑀧𑁂 𑀓𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁦𑁬. 𑀢𑀢𑁆𑀣 ¶ 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀘𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑁄𑀢𑀺 𑀏𑀢𑁂𑀦 𑀘𑀼𑀢𑀺𑀅𑀦𑀦𑁆𑀢𑀭𑀁 𑀅𑀦𑁆𑀢𑀭𑀸𑀪𑀯𑀁 𑀔𑀦𑁆𑀥𑀸𑀢𑀺, 𑀯𑀢𑁆𑀢𑀫𑀸𑀦𑀸 𑀚𑀸𑀢𑀻𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀫𑁂𑀯 𑀧𑀯𑀺𑀝𑁆𑀞𑀸 𑀅𑀦𑁆𑀢𑀭𑀥𑀸𑀬𑀫𑀸𑀦𑀸 𑀫𑀭𑀡𑀦𑁆𑀢𑀺 𑀦 𑀇𑀘𑁆𑀙𑀢𑀺.

𑁫𑁦𑁭. 𑀬𑀣𑀸 𑀓𑀸𑀫𑀪𑀯𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀼𑀦𑀧𑁆𑀧𑀼𑀦𑀁 𑀘𑀯𑀺𑀢𑁆𑀯𑀸 𑀉𑀧𑀧𑀢𑁆𑀢𑀺𑀯𑀲𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸 𑀳𑁄𑀢𑀺, 𑀏𑀯𑀁 𑀢𑀁 𑀢𑀢𑁆𑀣 𑀦 𑀇𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁫𑁧𑁦. 𑀓𑀸𑀫𑀪𑀯𑀲𑁆𑀲 ¶ 𑀓𑀫𑀦𑀝𑁆𑀞𑁂𑀦 𑀓𑀸𑀫𑀪𑀯𑀪𑀸𑀯𑁄 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀔𑀦𑁆𑀥𑀸𑀤𑀬𑁄 𑀓𑀸𑀫𑀪𑀯𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀤𑀝𑁆𑀞𑀩𑁆𑀩𑁄. 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸𑀦𑀫𑁂𑀯 𑀧𑀦 𑀓𑀸𑀫𑀪𑀯𑀪𑀸𑀯𑁄 𑀥𑀸𑀢𑀼𑀓𑀣𑀸𑀬𑀁 𑀤𑀲𑁆𑀲𑀺𑀢𑁄, 𑀦 𑀓𑀫𑀦𑀝𑁆𑀞𑁂𑀦 𑀓𑀸𑀫𑀪𑀯𑀪𑀸𑀯𑁄. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀧𑀜𑁆𑀘𑁂𑀯 𑀓𑀸𑀫𑀓𑁄𑀝𑁆𑀞𑀸𑀲𑀸 ‘‘𑀓𑀸𑀫𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀓𑀸𑀫𑀥𑀸𑀢𑀽𑀢𑀺𑀯𑀘𑀦𑀁 𑀦 𑀅𑀜𑁆𑀜𑀲𑁆𑀲 𑀦𑀸𑀫𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀁 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄.

𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁫-𑁫𑁧𑁬. 𑀭𑀽𑀧𑀥𑀸𑀢𑀼𑀓𑀣𑀸𑀬𑀁 𑀭𑀽𑀧𑀥𑀸𑀢𑀽𑀢𑀺 𑀯𑀘𑀦𑀢𑁄 𑀭𑀽𑀧𑀻𑀥𑀫𑁆𑀫𑁂𑀳𑁂𑀯 𑀭𑀽𑀧𑀥𑀸𑀢𑀼𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀮𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀲𑀼𑀢𑁆𑀢𑁂𑀲𑀼 ‘‘𑀢𑀬𑁄𑀫𑁂 𑀪𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁦𑁫) 𑀧𑀭𑀺𑀘𑁆𑀙𑀺𑀦𑁆𑀦𑀪𑀽𑀫𑀺𑀬𑁄𑀯 𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄, ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺𑀓𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀤𑀦𑀫𑁆𑀧𑀺 (𑀯𑀺𑀪. 𑁧𑁮𑁨) 𑀯𑀤𑀦𑁆𑀢𑀺.

𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁭-𑁫𑁧𑁮. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦𑀸𑀢𑀺 ¶ 𑀬𑀣𑀸 𑀳𑀺 𑀧𑀼𑀭𑀺𑀫𑀓𑀣𑀸𑀬𑀁 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀯𑀺𑀲𑁂𑀲𑁂𑀦 ‘‘𑀭𑀽𑀧𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀯𑀺𑀲𑁂𑀲𑁂𑀦 ‘‘𑀅𑀭𑀽𑀧𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁄 𑀇𑀥𑀸𑀧𑀺 𑀲𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁫𑁧𑁯. 𑀖𑀸𑀦𑀦𑀺𑀫𑀺𑀢𑁆𑀢𑀸𑀦𑀺𑀧𑀻𑀢𑀺 ¶ 𑀇𑀤𑀁 𑀖𑀸𑀦𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀺𑀧𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀖𑀸𑀦𑀸𑀤𑀻𑀦𑀁 𑀑𑀓𑀸𑀲𑀪𑀸𑀯𑁂𑀦 𑀉𑀧𑀮𑀓𑁆𑀔𑀺𑀢𑀁 𑀢𑀣𑀸𑀯𑀺𑀥𑀲𑀡𑁆𑀞𑀸𑀦𑀁 𑀭𑀽𑀧𑀲𑀫𑀼𑀤𑀸𑀬𑀫𑀸𑀳.

𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀽𑀧𑁂𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁫𑁨𑁪-𑁫𑁨𑁬. 𑀲𑀼𑀔𑀼𑀫𑀭𑀽𑀧𑀁 𑀅𑀢𑁆𑀣𑀺, 𑀬𑀢𑁄 𑀦𑀺𑀲𑁆𑀲𑀭𑀡𑀁 𑀢𑀁 𑀆𑀭𑀼𑀧𑁆𑀧𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀽𑀧𑁂𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀁𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁨𑁭-𑁫𑁩𑁭. 𑀧𑀓𑀧𑁆𑀧𑀬𑀫𑀸𑀦𑀸𑀢𑀺 𑀆𑀬𑀽𑀳𑀫𑀸𑀦𑀸, 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀥𑀺𑀓𑀁 𑀩𑁆𑀬𑀸𑀧𑀸𑀭𑀁 𑀓𑀼𑀭𑀼𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀯𑀸𑀭𑁂𑀢𑀺 ‘‘𑀬𑀁𑀓𑀺𑀜𑁆𑀘𑀺 𑀅𑀓𑀼𑀲𑀮𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀺𑀢𑀁 𑀭𑀽𑀧𑀁, 𑀲𑀩𑁆𑀩𑀁 𑀢𑀁 𑀅𑀓𑀼𑀲𑀮’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀯𑀤𑀢𑀺.

𑀭𑀽𑀧𑀁𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁫𑁪𑁦. 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺𑀧𑀜𑁆𑀳𑁂 ¶ ‘‘𑀅𑀢𑁆𑀣𑀺 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀽’’𑀢𑀺𑀆𑀤𑀺𑀓𑀁 𑀧𑀜𑁆𑀳𑀁 𑀅𑀦𑁆𑀢𑀁 ¶ 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀇𑀘𑁆𑀙𑀢𑀻𑀢𑀺 𑀏𑀢𑁆𑀣 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀁 𑀇𑀘𑁆𑀙𑀦𑁆𑀢𑁄 𑀅𑀭𑀽𑀧𑀥𑀫𑁆𑀫𑀸𑀦𑀁 𑀇𑀘𑁆𑀙𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 ‘‘𑀅𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁪𑁧. 𑀲𑀢𑁆𑀢𑀲𑀦𑁆𑀢𑀸𑀦𑁂 𑀭𑀽𑀧𑀺𑀦𑁄 𑀯𑀸 𑀥𑀫𑁆𑀫𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀦𑀸𑀧𑀺 𑀢𑀫𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀁 𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁪𑁨. 𑀧𑀼𑀩𑁆𑀩𑀸𑀧𑀭𑀪𑀸𑀕𑀁 𑀲𑀦𑁆𑀥𑀸𑀬𑀸𑀢𑀺 𑀲𑀫𑀸𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀪𑀸𑀯𑀢𑁄 𑀢𑀤𑀸𑀧𑀺 𑀲𑀫𑀸𑀧𑀦𑁆𑀦𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁪𑁪-𑁫𑁪𑁫. 𑀤𑁆𑀯𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 ‘‘𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄. ‘‘𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲𑀸’’𑀢𑀺 𑀧𑀘𑁆𑀙𑀺𑀫𑀧𑀸𑀞𑁄, 𑀲𑁄 𑀬𑀼𑀢𑁆𑀢𑁄.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁪𑁬. 𑀲𑁂𑀲𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀲𑁆𑀲 𑀳𑁂𑀢𑀽𑀢𑀺 𑀇𑀢𑁄 𑀧𑀼𑀭𑀺𑀫𑀁 𑀲𑁄𑀢𑀸𑀧𑀦𑁆𑀦𑀸𑀤𑀺𑀅𑀦𑀼𑀬𑁄𑀕𑀁 𑀯𑀤𑀢𑀺. 𑀳𑀦𑁆𑀤 𑀳𑀻𑀢𑀺 𑀧𑀭𑀯𑀸𑀤𑀺𑀲𑁆𑀲𑁂𑀯𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀦𑀯𑀘𑀦𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, ‘‘𑀓𑀢𑀫𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀽’’𑀢𑀺 𑀧𑀦 𑀲𑀓𑀯𑀸𑀤𑀻 𑀢𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀯𑀤𑀢𑀻𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀦𑁆𑀢𑀺 𑀧𑀦 𑀧𑀓𑁆𑀔𑀁 𑀧𑀝𑀺𑀚𑀸𑀦𑀸𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀯𑀸𑀤𑀻 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀲𑀓𑀯𑀸𑀤𑀺𑀁 𑀕𑀸𑀳𑀸𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀯𑀕𑁆𑀕𑁄

𑁧. 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻𑀓𑀣𑀸𑀯𑀡𑁆𑀡𑀦𑀸

𑁫𑁪𑁭. 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀦𑁆𑀢𑀺 ¶ ¶ 𑀯𑀺𑀲𑀪𑀸𑀕𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀦𑀸𑀘𑀺𑀢𑁆𑀢𑀯𑀲𑁂𑀦 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀫𑀤𑁆𑀤𑀦𑀁 𑀓𑀣𑀁 𑀬𑀼𑀢𑁆𑀢𑀦𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀆𑀭𑀫𑁆𑀫𑀡𑀯𑀲𑁂𑀦 𑀳𑀺 𑀤𑀲𑁆𑀲𑀦𑀤𑁆𑀯𑀬𑀁 𑀲𑀳 𑀯𑀤𑀦𑁆𑀢𑀲𑁆𑀲 𑀢𑀤𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀆𑀭𑀤𑁆𑀥𑀦𑁆𑀢𑀺 𑀬𑀼𑀢𑁆𑀢𑀦𑁆𑀢𑀺. 𑀅𑀦𑀼𑀲𑁆𑀲𑀯𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀦 𑀓𑁂𑀯𑀮𑀁 𑀅𑀦𑀺𑀘𑁆𑀘𑀸𑀤𑀺𑀆𑀭𑀫𑁆𑀫𑀡𑀫𑁂𑀯 𑀜𑀸𑀡𑀁 𑀯𑀺𑀧𑀲𑁆𑀲𑀦𑀸, 𑀅𑀣 𑀔𑁄 ‘‘𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺𑀆𑀤𑀺𑀓𑀁 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑀜𑁆𑀘𑀸𑀢𑀺 𑀤𑀻𑀧𑁂𑀢𑀺.

𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀫𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁫𑁪𑁯. 𑀲𑀼𑀢𑁆𑀢𑀪𑀬𑁂𑀦𑀸𑀢𑀺 ‘‘𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀅𑀲𑀁𑀬𑁄𑀚𑀦𑀺𑀬𑀸𑀤𑀺𑀪𑀸𑀯𑀁 𑀲𑀦𑁆𑀥𑀸𑀬 𑀔𑁂𑀫𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑀸𑀤𑀺𑀦𑀸 𑀲𑀼𑀢𑁆𑀢𑀪𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀫𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀭𑀽𑀧𑀁𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁨-𑁫𑁫𑁩. 𑀆𑀭𑀫𑁆𑀫𑀡𑀢𑁆𑀣𑀲𑁆𑀲 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀘𑁆𑀘𑀬𑀝𑁆𑀞𑁄 𑀑𑀮𑀼𑀩𑁆𑀪𑀝𑁆𑀞𑁄𑀢𑀺 𑀏𑀯𑀁 𑀯𑀺𑀪𑀸𑀕𑁂 𑀯𑀺𑀚𑁆𑀚𑀫𑀸𑀦𑁂 ¶ 𑀧𑀘𑁆𑀘𑀬𑁄𑀮𑀼𑀩𑁆𑀪𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀁 𑀓𑀧𑁆𑀧𑁂𑀢𑁆𑀯𑀸 𑀅𑀓𑀧𑁆𑀧𑁂𑀢𑁆𑀯𑀸 𑀯𑀸 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑁂𑀦𑀧𑀺 𑀲𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀽𑀧𑀁𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀼𑀲𑀬𑀸𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁪-𑁫𑁫𑁬. 𑀅𑀧𑁆𑀧𑀳𑀻𑀦𑀢𑁆𑀢𑀸𑀯 ¶ 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀼𑀲𑀬𑀸𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀜𑀸𑀡𑀁𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁭-𑁮. 𑀢𑀲𑁆𑀲 𑀜𑀸𑀡𑀲𑁆𑀲𑀸𑀢𑀺 𑀫𑀕𑁆𑀕𑀜𑀸𑀡𑀲𑁆𑀲𑀸𑀢𑀺 𑀯𑀤𑀦𑁆𑀢𑀺.

𑀜𑀸𑀡𑀁𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀓𑀣𑀸𑀯𑀡𑁆𑀡𑀦𑀸

𑁫𑁬𑁨. 𑀅𑀯𑀺𑀲𑁂𑀲𑁂𑀦𑁂𑀯𑀸𑀢𑀺 𑀆𑀭𑀫𑁆𑀫𑀡𑀲𑀫𑁆𑀧𑀬𑁄𑀕𑁂𑀳𑀺 𑀤𑁆𑀯𑀻𑀳𑀺𑀧𑀻𑀢𑀺 𑀅𑀢𑁆𑀣𑁄.

𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸𑀯𑀡𑁆𑀡𑀦𑀸

𑁫𑁬𑁩. 𑀲𑀩𑁆𑀩𑀲𑁄𑀢𑀺 ¶ 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑀫𑀲𑁄 𑀫𑀦𑁄𑀥𑀸𑀢𑀼𑀧𑀯𑀢𑁆𑀢𑀺𑀓𑀸𑀮𑁂𑀧𑀻’’𑀢𑀺. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀫𑀢𑁆𑀢𑀦𑁆𑀢𑀺 𑀯𑀺𑀢𑀓𑁆𑀓𑀲𑁆𑀲 𑀧𑀯𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁬𑁫. 𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀸 𑀫𑀼𑀲𑀸𑀯𑀸𑀤𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁫𑁬𑁮-𑁫𑁭𑁦. 𑀢𑀸𑀲𑀽𑀢𑀺 ¶ 𑀢𑀸𑀲𑀼 𑀧𑀜𑁆𑀜𑀢𑁆𑀢𑀻𑀲𑀼. 𑀲𑀫𑀦𑁆𑀦𑀸𑀕𑀫𑀧𑀜𑁆𑀜𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀧𑀝𑀺𑀮𑀸𑀪𑀧𑀜𑁆𑀜𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺 𑀅𑀬𑀁 𑀲𑀫𑀦𑁆𑀦𑀸𑀕𑀫𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀮𑀸𑀪𑀻𑀢𑀺 𑀯𑀼𑀘𑁆𑀘𑀢𑀺 𑀅𑀬𑀁 𑀧𑀝𑀺𑀮𑀸𑀪𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀯𑀕𑁆𑀕𑁄

𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁫𑁭𑁧-𑁨. 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 ¶ 𑀪𑀗𑁆𑀕𑀓𑁆𑀔𑀡𑁂𑀦 𑀲𑀳𑁂𑀯𑀸𑀢𑀺𑀆𑀤𑀺𑀁 𑀯𑀤𑀦𑁆𑀢𑁂𑀦 𑀓𑀺𑀭𑀺𑀬𑀔𑀦𑁆𑀥𑀸𑀦𑀁 𑀪𑀗𑁆𑀕𑀓𑁆𑀔𑀡𑁂𑀦 𑀲𑀳 𑀉𑀧𑀧𑀢𑁆𑀢𑁂𑀲𑀺𑀬𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀉𑀧𑀧𑀢𑁆𑀢𑁂𑀲𑀺𑀬𑀸𑀦𑀁 𑀪𑀗𑁆𑀕𑀓𑁆𑀔𑀡𑁂𑀦 𑀲𑀳 𑀉𑀧𑀧𑀢𑁆𑀢𑁂𑀲𑀺𑀬𑀸, 𑀓𑀺𑀭𑀺𑀬𑀸𑀦𑀁 𑀪𑀗𑁆𑀕𑀓𑁆𑀔𑀡𑁂𑀦 𑀲𑀳 𑀓𑀺𑀭𑀺𑀬𑀸𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀓𑀺𑀭𑀺𑀬𑀸𑀘𑀢𑀼𑀓𑁆𑀔𑀦𑁆𑀥𑀕𑁆𑀕𑀳𑀡𑁂𑀦 𑀕𑀳𑀡𑀁. 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀁 𑀬𑀼𑀢𑁆𑀢𑀁.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁫𑁭𑁬. 𑀢𑀁 𑀮𑀓𑁆𑀔𑀡𑀦𑁆𑀢𑀺 ‘‘𑀙 𑀯𑀺𑀜𑁆𑀜𑀸𑀡𑀸’’𑀢𑀺 𑀅𑀯𑀢𑁆𑀯𑀸 ‘‘𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀮𑀓𑁆𑀔𑀡𑀁. ‘‘𑀙 𑀯𑀺𑀜𑁆𑀜𑀸𑀡𑀸’’𑀢𑀺 𑀅𑀯𑀘𑀦𑀁 𑀧𑀦𑁂𑀢𑁆𑀣 ‘‘𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀓𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑁫𑁭𑁭. 𑀮𑁄𑀓𑀺𑀬𑁄𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀫𑀸𑀳. 𑀬𑀁 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀓𑁆𑀔𑀡𑁂 𑀬𑀁 𑀅𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀯𑀼𑀢𑁆𑀢𑁄, 𑀢𑀤𑁂𑀯 𑀲𑀼𑀜𑁆𑀜𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁪-𑁫𑁮𑁬. 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 ¶ ¶ 𑀦𑀫𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀦𑀫𑀺𑀢𑁆𑀯𑀸 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸 𑀧𑀦 𑀆𑀭𑀫𑁆𑀫𑀡𑀧𑁆𑀧𑀓𑀸𑀭𑀕𑁆𑀕𑀳𑀡𑀁 𑀬𑁂𑀦 𑀅𑀮𑁄𑀪𑀸𑀤𑀻𑀳𑀺 𑀮𑁄𑀪𑀸𑀤𑀻𑀳𑀺 𑀘 𑀲𑀫𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄 ‘‘𑀲𑀼𑀔𑀫𑀺𑀢𑀺 𑀘𑁂𑀢𑀲𑁄 𑀅𑀪𑀸𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑁆𑀯𑀻𑀳𑀺𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁭-𑁫𑁮𑁯. 𑀔𑀡𑀪𑀗𑁆𑀕𑀦𑀺𑀭𑁄𑀥𑀁, 𑀦 𑀅𑀧𑁆𑀧𑀯𑀢𑁆𑀢𑀺𑀦𑀺𑀭𑁄𑀥𑀁, 𑀲𑀻𑀮𑀯𑀻𑀢𑀺𑀓𑁆𑀓𑀫𑀦𑀺𑀭𑁄𑀥𑀁 𑀯𑀸. 𑀯𑀻𑀢𑀺𑀓𑁆𑀓𑀫𑀁 𑀯𑀺𑀬𑀸𑀢𑀺 𑀬𑀣𑀸 𑀯𑀻𑀢𑀺𑀓𑁆𑀓𑀫𑁂 𑀓𑀢𑁂 𑀤𑀼𑀲𑁆𑀲𑀻𑀮𑁄, 𑀏𑀯𑀁 𑀦𑀺𑀭𑀼𑀤𑁆𑀥𑁂𑀧𑀻𑀢𑀺 𑀏𑀯𑀁 𑀯𑀻𑀢𑀺𑀓𑁆𑀓𑀫𑁂𑀦 𑀦𑀺𑀦𑁆𑀦𑀸𑀦𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀤𑁆𑀯𑀻𑀳𑀺𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁯𑁦-𑁫𑁯𑁪. 𑀬𑁂𑀦 𑀲𑁄 𑀲𑀻𑀮𑀯𑀸𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀬𑁂𑀦 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀞𑀺𑀢𑁂𑀦 𑀉𑀧𑀘𑀬𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀗𑁆𑀕𑀻 𑀲𑀻𑀮𑀯𑀸𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀫𑁂𑀢𑁆𑀣 ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀧𑀦 𑀓𑀣𑀸 𑀫𑀕𑁆𑀕𑀺𑀢𑀩𑁆𑀩𑀸.

𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁯𑁮-𑁬𑁦𑁦. 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀬𑀁 \𑁧𑁦𑁦 𑀧𑀼𑀭𑀺𑀫𑀓𑀣𑀸𑀲𑀤𑀺𑀲𑀫𑁂𑀯𑀸𑀢𑀺 𑀧𑀭𑀺𑀪𑁄𑀕𑀓𑀣𑁂𑀓𑀤𑁂𑀲𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁦𑁩-𑁬𑁦𑁪. 𑀆𑀡𑀢𑁆𑀢𑀺𑀬𑀸 ¶ 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀆𑀡𑀢𑁆𑀢𑀲𑁆𑀲 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀲𑁆𑀲 𑀢𑀤𑀸 𑀲𑀸 𑀆𑀡𑀢𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀦𑀸𑀬𑁂𑀯 𑀅𑀗𑁆𑀕𑀁 𑀳𑁄𑀢𑀻𑀢𑀺 𑀅𑀯𑀺𑀜𑁆𑀜𑀢𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁧. 𑀏𑀓𑀸𑀤𑀲𑀫𑀯𑀕𑁆𑀕𑁄

𑁪. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁬𑁧𑁪-𑁬𑁧𑁫. 𑀜𑀸𑀡𑀓𑀣𑀸𑀬𑀁 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀜𑀸𑀡𑀁𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀬𑀁 (𑀓𑀣𑀸. 𑁫𑁫𑁭 𑀆𑀤𑀬𑁄) 𑀯𑀼𑀢𑁆𑀢𑁂𑀳𑀺 𑀅𑀦𑁆𑀥𑀓𑁂𑀳𑀺 𑀅𑀜𑁆𑀜𑁂 𑀇𑀥 𑀫𑀳𑀸𑀲𑀗𑁆𑀖𑀺𑀓𑀸 𑀪𑀯𑁂𑀬𑁆𑀬𑀼𑀁. 𑀬𑀤𑀺 𑀅𑀜𑁆𑀜𑀸𑀡𑁂 𑀯𑀺𑀕𑀢𑁂𑀢𑀺𑀆𑀤𑀺𑀦𑀸 𑀭𑀸𑀕𑀯𑀺𑀕𑀫𑁄 𑀯𑀺𑀬 𑀯𑀻𑀢𑀭𑀸𑀕𑀧𑀜𑁆𑀜𑀢𑁆𑀢𑀺𑀬𑀸 𑀅𑀜𑁆𑀜𑀸𑀡𑀯𑀺𑀕𑀫𑁄 𑀜𑀸𑀡𑀻𑀧𑀜𑁆𑀜𑀢𑁆𑀢𑀺𑀬𑀸 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀜𑀸𑀡𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀜𑀸𑀡𑀻, 𑀅𑀣 𑀔𑁄 𑀅𑀜𑁆𑀜𑀸𑀡𑀻𑀧𑀝𑀺𑀧𑀓𑁆𑀔𑀢𑁄 𑀜𑀸𑀡𑀻𑀢𑀺 ¶ . 𑀬𑀲𑁆𑀫𑀸 𑀜𑀸𑀡𑀧𑀝𑀺𑀮𑀸𑀪𑁂𑀦𑀸𑀢𑀺 𑀏𑀢𑁆𑀣 𑀘 𑀜𑀸𑀡𑀧𑀝𑀺𑀮𑀸𑀪𑁂𑀦 𑀅𑀜𑁆𑀜𑀸𑀡𑀲𑁆𑀲 𑀯𑀺𑀕𑀢𑀢𑁆𑀢𑀸 𑀲𑁄 𑀜𑀸𑀡𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀇𑀤𑀁𑀤𑀼𑀓𑁆𑀔𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁧𑁮-𑁬𑁨𑁦. 𑀇𑀢𑀭𑁄 𑀧𑀦 𑀲𑀓𑀲𑀫𑀬𑁂𑀢𑀺 𑀧𑀭𑀯𑀸𑀤𑀻 𑀅𑀢𑁆𑀢𑀦𑁄 𑀲𑀫𑀬𑁂𑀢𑀺 𑀅𑀢𑁆𑀣𑁄.

𑀇𑀤𑀁𑀤𑀼𑀓𑁆𑀔𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸

𑁬𑁨𑁧-𑁬𑁨𑁪. 𑀓𑀫𑁆𑀫𑀲𑁆𑀲 ¶ 𑀯𑀺𑀧𑀸𑀓𑀯𑀲𑁂𑀦 𑀯𑀸𑀢𑀺 𑀦𑀺𑀭𑀬𑀁𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀅𑀩𑁆𑀩𑀼𑀤𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀢𑀸𑀤𑀺𑀲𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄. 𑀯𑀲𑁆𑀲𑀕𑀡𑀦𑀸𑀬 𑀯𑀸𑀢𑀺 𑀫𑀦𑀼𑀲𑁆𑀲𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑁂 𑀘 𑀲𑀦𑁆𑀥𑀸𑀬. 𑀢𑁂𑀲𑀜𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑀫𑁆𑀧𑀺 𑀓𑀸𑀮𑀁 𑀯𑀺𑀧𑀸𑀓𑀤𑀸𑀦𑀲𑀫𑀢𑁆𑀣𑀁 𑀓𑀫𑁆𑀫𑀁 𑀯𑀲𑁆𑀲𑀕𑀡𑀦𑀸𑀬 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺.

𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁬𑁨𑁫-𑁬𑁨𑁬. 𑀲𑀫𑀸𑀥𑀸𑀦𑀝𑁆𑀞𑁂𑀦𑀸𑀢𑀺 𑀲𑀫𑀁 𑀞𑀧𑀦𑀝𑁆𑀞𑁂𑀦 𑀲𑀫𑀸𑀥𑀺 𑀦𑀸𑀫 𑀘𑁂𑀢𑀲𑀺𑀓𑀦𑁆𑀢𑀭𑀁 𑀅𑀢𑁆𑀣𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 ¶ 𑀅𑀢𑁆𑀣𑁄. 𑀙𑀮𑁂𑀦𑀸𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀘 𑀛𑀸𑀦𑀘𑀺𑀢𑁆𑀢𑀲𑁆𑀲 𑀘 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀏𑀢𑁂𑀦 𑀲𑀸𑀫𑀜𑁆𑀜𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁭. 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀜𑁆𑀘𑁂𑀯𑀸𑀢𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀅𑀯𑀺𑀚𑁆𑀚𑀸𑀬 𑀬𑀸 𑀞𑀺𑀢𑀢𑀸 𑀢𑀢𑁄 𑀳𑁄𑀢𑀺, 𑀢𑀸𑀬 𑀞𑀺𑀢𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀸 𑀞𑀺𑀢𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀦𑁆𑀢𑀭𑀧𑀘𑁆𑀘𑀬𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀸𑀯𑀭𑀳𑀺𑀢𑀲𑁆𑀲 𑀏𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀳𑀺 𑀲𑀩𑁆𑀩𑁄 𑀢𑀸𑀤𑀺𑀲𑁄 𑀧𑀘𑁆𑀘𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀜𑁆𑀘𑀸𑀢𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀘 𑀅𑀯𑀺𑀚𑁆𑀚𑀸𑀬. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀸𑀬 𑀞𑀺𑀢𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀸 𑀞𑀺𑀢𑀢𑀸 𑀳𑁄𑀢𑀺, 𑀢𑀲𑁆𑀲𑀸 𑀘 𑀇𑀢𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁮. 𑀭𑀽𑀧𑀸𑀤𑀬𑁄 ¶ 𑀯𑀺𑀬 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀭𑀽𑀧𑀸𑀤𑀻𑀳𑀺 𑀲𑀳 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀢𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀢𑀸𑀯𑀺𑀪𑀸𑀕𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦𑀸𑀢𑀺 𑀢𑀻𑀲𑀼 𑀤𑀡𑁆𑀟𑁂𑀲𑀼 𑀤𑀡𑁆𑀟𑀯𑁄𑀳𑀸𑀭𑁄 𑀯𑀺𑀬 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀅𑀦𑀺𑀘𑁆𑀘𑀢𑀸𑀯𑁄𑀳𑀸𑀭𑁄 𑀳𑁄𑀢𑀻𑀢𑀺 𑀢𑀲𑁆𑀲𑀸 𑀯𑀺𑀪𑀸𑀕𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦𑀸𑀢𑀺 𑀯𑀤𑀦𑁆𑀢𑀺.

𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀯𑀕𑁆𑀕𑁄

𑁧. 𑀲𑀁𑀯𑀭𑁄𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁩𑁦-𑁬𑁩𑁨. 𑀯𑀺𑀧𑀸𑀓𑀤𑁆𑀯𑀸𑀭𑀦𑁆𑀢𑀺 ¶ 𑀪𑀯𑀗𑁆𑀕𑀫𑀦𑀁 𑀯𑀤𑀢𑀺. 𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀫𑀦𑀁.

𑀲𑀁𑀯𑀭𑁄𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁬𑁩𑁩-𑁬𑁩𑁫. 𑀅𑀩𑁆𑀬𑀸𑀓𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄𑀢𑀺 𑀲𑀓𑀲𑀫𑀬𑀮𑀓𑁆𑀔𑀡𑁂𑀦 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀯𑀤𑀦𑁆𑀢𑀺. 𑀅𑀯𑀺𑀧𑀸𑀓𑀘𑁂𑀢𑀦𑀸𑀬 𑀲𑀭𑀽𑀧𑁂𑀦 𑀤𑀲𑁆𑀲𑀺𑀢𑀸𑀬 𑀲𑀯𑀺𑀧𑀸𑀓𑀸𑀧𑀺 𑀤𑀲𑁆𑀲𑀺𑀢𑀸𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀘𑁂𑀢𑀦𑀁 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀤𑁆𑀤𑁄𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁩𑁬-𑁬𑁩𑁭. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀅𑀭𑀽𑀧𑀥𑀫𑁆𑀫𑀸𑀯𑀸𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂𑀲𑀼 𑀘𑀓𑁆𑀔𑀸𑀤𑀻𑀲𑀼𑀧𑀺 𑀯𑀺𑀧𑀸𑀓𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀓𑁄 𑀧𑀦 𑀯𑀸𑀤𑁄 𑀅𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀲𑀤𑁆𑀤𑁂𑀢𑀺 𑀤𑀲𑁆𑀲𑁂𑀢𑀺.

𑀲𑀤𑁆𑀤𑁄𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀴𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁬𑁩𑁮-𑁬𑁪𑁦. 𑀢𑀲𑁆𑀫𑀸 ¶ ¶ 𑀯𑀺𑀧𑀸𑀓𑁄𑀢𑀺 𑀅𑀯𑀺𑀲𑁂𑀲𑁂𑀦 𑀲𑀴𑀸𑀬𑀢𑀦𑀁 𑀯𑀺𑀧𑀸𑀓𑁄𑀢𑀺 𑀬𑁂𑀲𑀁 𑀮𑀤𑁆𑀥𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀴𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑀣𑀸𑀯𑀡𑁆𑀡𑀦𑀸

𑁬𑁪𑁧-𑁬𑁪𑁫. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀦𑀺𑀬𑀢𑁄𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀬 𑀦𑀺𑀬𑀢𑁄. 𑀇𑀫𑀁 𑀯𑀺𑀪𑀸𑀕𑀦𑁆𑀢𑀺 𑀇𑀫𑀁 𑀯𑀺𑀲𑁂𑀲𑀁. 𑀢𑁆𑀯𑀁 𑀧𑀦𑀲𑁆𑀲 𑀦𑀺𑀬𑀸𑀫𑀁 𑀇𑀘𑁆𑀙𑀲𑀻𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀸𑀨𑀮𑀧𑁆𑀧𑀢𑁆𑀢𑀻𑀳𑀺 𑀅𑀜𑁆𑀜𑀲𑁆𑀫𑀺𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀪𑀸𑀯𑁂 𑀘 𑀦𑀺𑀬𑀸𑀫𑀁 𑀇𑀘𑁆𑀙𑀲𑀻𑀢𑀺 𑀅𑀢𑁆𑀣𑁄.

𑀆𑀦𑀦𑁆𑀢𑀭𑀺𑀬𑀸𑀪𑀸𑀯𑀦𑁆𑀢𑀺 𑀬𑁂𑀦 𑀲𑁄 𑀥𑀫𑁆𑀫𑀸𑀪𑀺𑀲𑀫𑀬𑁂𑀦 𑀪𑀩𑁆𑀩𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑁆𑀲 𑀅𑀪𑀸𑀯𑀦𑁆𑀢𑀺 𑀅𑀢𑁆𑀣𑁄, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀆𑀦𑀦𑁆𑀢𑀭𑀺𑀬𑀪𑀸𑀯𑀲𑁆𑀲 𑀅𑀪𑀸𑀯𑀦𑁆𑀢𑀺. 𑀓𑀺𑀁 𑀧𑀦 𑀲𑁄 𑀅𑀦𑁆𑀢𑀭𑀸𑀥𑀫𑁆𑀫𑀁 𑀅𑀪𑀺𑀲𑀫𑀺𑀲𑁆𑀲𑀢𑀻𑀢𑀺? 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀲𑀢𑁆𑀢𑀫𑀁 𑀪𑀯𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀑𑀭𑀢𑁄 𑀧𑀦 𑀦𑀢𑁆𑀣𑀺 𑀧𑀝𑀺𑀲𑁂𑀥𑁄’’𑀢𑀺. 𑀅𑀧𑀭𑁂 ‘‘𑀬𑁄 𑀪𑀕𑀯𑀢𑀸 𑀜𑀸𑀡𑀩𑀮𑁂𑀦 𑀩𑁆𑀬𑀸𑀓𑀢𑁄, 𑀢𑀲𑁆𑀲 𑀅𑀦𑁆𑀢𑀭𑀸 𑀅𑀪𑀺𑀲𑀫𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀧𑀺 𑀪𑀯𑀦𑀺𑀬𑀸𑀫𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸 𑀪𑀩𑁆𑀩𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀓𑀼𑀲𑀮𑀸 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀓𑀤𑀸𑀘𑀺 𑀯𑀺𑀧𑀸𑀓𑀁 𑀅𑀤𑀤𑀫𑀸𑀦𑀸𑀧𑀺 𑀲𑀢𑀺 𑀓𑀸𑀭𑀡𑁂 𑀤𑀸𑀢𑀼𑀁 𑀪𑀩𑁆𑀩𑀢𑀸𑀬 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀦𑀸𑀫, 𑀢𑀣𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀼𑀤𑀼𑀢𑀸𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀦 𑀦𑀺𑀬𑀸𑀫𑀲𑀩𑁆𑀪𑀸𑀯𑀸 𑀦𑀸𑀧𑀺 𑀪𑀕𑀯𑀢𑀸 𑀩𑁆𑀬𑀸𑀓𑀢𑀢𑁆𑀢𑀸, 𑀦 𑀘 𑀇𑀦𑁆𑀤𑁆𑀭𑀺𑀬𑀫𑀼𑀤𑀼𑀢𑀸 𑀅𑀪𑀩𑁆𑀩𑀢𑀸𑀓𑀭𑁄 𑀥𑀫𑁆𑀫𑁄𑀢𑀺 𑀦 𑀲𑁄 𑀅𑀪𑀩𑁆𑀩𑁄 𑀦𑀸𑀫. 𑀅𑀪𑀩𑁆𑀩𑀢𑀸𑀓𑀭𑀥𑀫𑁆𑀫𑀸𑀪𑀸𑀯𑀢𑁄 𑀘𑁂𑀢𑁆𑀣 𑀅𑀪𑀩𑁆𑀩𑀢𑀸 𑀧𑀝𑀺𑀲𑁂𑀥𑀺𑀢𑀸, 𑀦 𑀧𑀦 𑀅𑀦𑁆𑀢𑀭𑀸 𑀅𑀪𑀺𑀲𑀫𑁂𑀢𑀼𑀁 𑀪𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀬𑀤𑀺 𑀘 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀅𑀦𑁆𑀢𑀭𑀸 𑀅𑀪𑀺𑀲𑀫𑁂𑀬𑁆𑀬, 𑀓𑁄𑀮𑀁𑀓𑁄𑀮𑁄 𑀲𑀺𑀬𑀸’’𑀢𑀺. 𑀯𑀺𑀲𑁂𑀲𑀁 𑀧𑀦 𑀅𑀓𑀢𑁆𑀯𑀸 𑀪𑀩𑁆𑀩𑀲𑀪𑀸𑀯𑀢𑀸𑀬 𑀪𑀩𑁆𑀩𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀦 𑀪𑀯𑀦𑀺𑀬𑀸𑀫𑀓𑀁 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀧𑀲𑁆𑀲𑀺𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄, 𑀩𑁆𑀬𑀸𑀓𑀭𑁄𑀢𑀻𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄.

𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀯𑀕𑁆𑀕𑁄

𑁧. 𑀓𑀧𑁆𑀧𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁬𑁫𑁪-𑁬𑁫𑁭. 𑀓𑀧𑁆𑀧𑀝𑁆𑀞𑀓𑀣𑀸𑀬𑀁 ¶ ¶ 𑀳𑁂𑀝𑁆𑀞𑀸𑀢𑀺 𑀇𑀤𑁆𑀥𑀺𑀩𑀮𑀓𑀣𑀸𑀬𑀁.

𑀓𑀧𑁆𑀧𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁬𑁬𑁦-𑁬𑁬𑁨. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸𑀬𑀁 𑀆𑀦𑀦𑁆𑀢𑀭𑀺𑀬𑀁 𑀧𑀬𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄𑀢𑀺 𑀆𑀦𑀦𑁆𑀢𑀭𑀺𑀬𑁂 𑀅𑀦𑀦𑁆𑀢𑀭𑀸𑀲𑀤𑁆𑀤𑀁 𑀆𑀭𑁄𑀧𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀦𑀦𑁆𑀢𑀭𑀧𑀬𑀼𑀢𑁆𑀢𑁄’’𑀢𑀺𑀧𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁬𑁬𑁩-𑁬𑁬𑁪. 𑀲𑁂𑀲𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀅𑀦𑀺𑀬𑀢𑀸 𑀦𑀸𑀫𑀸𑀢𑀺 𑀏𑀢𑁆𑀣 𑀅𑀧𑁆𑀧𑀢𑁆𑀢𑀦𑀺𑀬𑀸𑀫𑀸𑀦𑀁 𑀥𑀫𑁆𑀫𑁂 𑀲𑀦𑁆𑀥𑀸𑀬 ‘‘𑀢𑁂𑀪𑀽𑀫𑀓𑀥𑀫𑁆𑀫𑀸’’𑀢𑀺 𑀆𑀳. 𑀏𑀢𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀧𑀺 𑀅𑀦𑀺𑀬𑀢𑁄𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀢𑀺 𑀇𑀫𑀁 𑀯𑁄𑀳𑀸𑀭𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀦𑀺𑀬𑀢𑁄 𑀩𑁄𑀥𑀺𑀲𑀢𑁆𑀢𑁄 𑀧𑀘𑁆𑀙𑀺𑀫𑀪𑀯𑀺𑀓𑁄 𑀪𑀩𑁆𑀩𑁄 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀼𑀁 𑀑𑀓𑁆𑀓𑀫𑀺𑀢𑀼’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀻𑀢𑀺 𑀅𑀢𑁆𑀣𑀬𑁄𑀚𑀦𑀸. 𑀏𑀯𑀁 𑀧𑀦 𑀯𑁄𑀳𑀸𑀭𑀫𑀢𑁆𑀢𑀲𑀩𑁆𑀪𑀸𑀯𑁄 ‘‘𑀦𑀺𑀬𑀢𑁄’’𑀢𑀺 𑀯𑀘𑀦𑀲𑁆𑀲, 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀼𑀁 𑀪𑀩𑁆𑀩𑀢𑀸 𑀘 ‘‘𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺 ¶ 𑀯𑀘𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸 𑀳𑁄𑀢𑀺, 𑀪𑀩𑁆𑀩𑀢𑀸𑀬𑁂𑀯 𑀧𑀦 𑀉𑀪𑀬𑀲𑁆𑀲𑀧𑀺 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀁. 𑀅𑀜𑁆𑀜𑁂𑀦𑀸𑀢𑀺 𑀬𑀤𑀺 𑀦𑀺𑀬𑀢𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀯𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬, 𑀦 𑀘 𑀢𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀲𑀸𑀢𑀭𑀸𑀕𑀓𑀣𑀸𑀯𑀡𑁆𑀡𑀦𑀸

𑁬𑁭𑁪. 𑀅𑀲𑀸𑀢𑀭𑀸𑀕𑀓𑀣𑀸𑀬𑀁 ¶ ‘‘𑀅𑀳𑁄 𑀯𑀢 𑀫𑁂 𑀏𑀢𑀤𑁂𑀯 𑀪𑀯𑁂𑀬𑁆𑀬𑀸’’𑀢𑀺 𑀭𑀚𑁆𑀚𑀦𑀸𑀢𑀺 𑀇𑀫𑀺𑀦𑀸 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄𑀬𑁂𑀯 𑀮𑁄𑀪𑁄 𑀇𑀥 ‘‘𑀭𑀸𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀺.

𑁬𑁭𑁫. 𑀲𑀼𑀢𑁆𑀢𑁂 𑀧𑀦𑀸𑀢𑀺 𑀏𑀢𑀲𑁆𑀲 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄.

𑀅𑀲𑀸𑀢𑀭𑀸𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀢𑀡𑁆𑀳𑀸𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁭𑁬-𑁬𑁮𑁦. 𑀬𑀲𑁆𑀫𑀸 𑀥𑀫𑁆𑀫𑀢𑀡𑁆𑀳𑀸𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀮𑁄𑀓𑀼𑀢𑁆𑀢𑀭𑁂𑀲𑀼 𑀯𑀸 𑀲𑀩𑁆𑀩𑁂𑀲𑀼 𑀢𑀡𑁆𑀳𑀸 ‘‘𑀥𑀫𑁆𑀫𑀢𑀡𑁆𑀳𑀸’’𑀢𑀺 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀲𑀸 𑀢𑀡𑁆𑀳𑀸, 𑀢𑀲𑁆𑀫𑀸 𑀓𑀼𑀲𑀮𑀸 𑀦 𑀳𑁄𑀢𑀺, 𑀬𑀲𑁆𑀫𑀸 𑀧𑀦 𑀥𑀫𑁆𑀫𑁂 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀅𑀓𑀼𑀲𑀮𑀸 𑀦 𑀳𑁄𑀢𑀻𑀢𑀺 𑀅𑀩𑁆𑀬𑀸𑀓𑀢𑀸𑀢𑀺 𑀮𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀙𑀧𑀺 𑀢𑀡𑁆𑀳𑀸 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀥𑀫𑁆𑀫𑀢𑀡𑁆𑀳𑀸𑀧𑀺 𑀓𑀸𑀫𑀢𑀡𑁆𑀳𑀸𑀤𑀺𑀪𑀸𑀯𑀢𑁄 𑀦 𑀅𑀩𑁆𑀬𑀸𑀓𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀥𑀫𑁆𑀫𑀢𑀡𑁆𑀳𑀸𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀯𑀕𑁆𑀕𑁄

𑁧. 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸

𑁬𑁮𑁬-𑁬𑁯𑁦. 𑀢𑀦𑁆𑀢𑀺 ¶ 𑀓𑀼𑀲𑀮𑀁 𑀅𑀓𑀼𑀲𑀮𑀜𑁆𑀘𑀸𑀢𑀺 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀉𑀪𑀬𑀦𑁆𑀢𑀺 𑀯𑀸 𑀯𑀘𑀦𑀲𑁂𑀲𑁄. 𑀧𑀝𑀺𑀲𑀦𑁆𑀤𑀳𑀢𑀻𑀢𑀺 𑀖𑀝𑁂𑀢𑀺, 𑀅𑀦𑀦𑁆𑀢𑀭𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁯𑁧-𑁬𑁯𑁨. 𑀓𑁂𑀘𑀺 ¶ 𑀯𑀸𑀤𑀺𑀦𑁄 ‘‘𑀅𑀗𑁆𑀓𑀼𑀭𑁂 𑀲𑀸𑀔𑀸𑀯𑀺𑀝𑀧𑀸𑀤𑀺𑀲𑀫𑁆𑀧𑀦𑁆𑀦𑀸𑀦𑀁 𑀭𑀼𑀓𑁆𑀔𑀸𑀤𑀻𑀦𑀁 𑀩𑀻𑀚𑀫𑀢𑁆𑀢𑀁 𑀆𑀯𑀺𑀪𑀸𑀯𑀁 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺 𑀢𑁂𑀲𑀁 𑀯𑀸𑀤𑀁 𑀦𑀺𑀤𑀲𑁆𑀲𑀦𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀫𑁆𑀧𑀦𑁆𑀦𑀲𑀸𑀔𑀸𑀯𑀺𑀝𑀧𑀸𑀦’’𑀦𑁆𑀢𑀺𑀆𑀤𑀺.

𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁬𑁯𑁩-𑁬𑁯𑁭. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 ‘‘𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀧𑀺 𑀦 𑀲𑁄 𑀘𑀓𑁆𑀔𑀼𑀫𑁆𑀳𑀺 𑀭𑀽𑀧𑀸𑀭𑀫𑁆𑀫𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀇𑀘𑁆𑀙𑀢𑀺, 𑀅𑀣 𑀔𑁄 𑀲𑁄𑀢𑀫𑁆𑀳𑀺𑀬𑁂𑀯 𑀲𑀤𑁆𑀤𑀸𑀭𑀫𑁆𑀫𑀡𑀦𑁆𑀢𑀺 𑀅𑀦𑀦𑁆𑀢𑀭𑀽𑀧𑀮𑀤𑁆𑀥𑀺𑀯𑀲𑁂𑀦 𑀆𑀧𑀦𑁆𑀦𑀢𑁆𑀢𑀸 ‘‘𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁.

𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁬𑁯𑁮-𑁬𑁯𑁯. 𑀲𑀫𑁆𑀫𑀸𑀯𑀸𑀘𑀸𑀤𑀺 ¶ 𑀭𑀽𑀧𑀁 𑀫𑀕𑁆𑀕𑁄 𑀘𑀸𑀢𑀺 𑀇𑀘𑁆𑀙𑀦𑁆𑀢𑁄 ‘‘𑀅𑀭𑀺𑀬𑀭𑀽𑀧’’𑀦𑁆𑀢𑀺𑀧𑀺 𑀯𑀤𑀢𑀺.

𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀜𑁆𑀜𑁄𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁦-𑁭𑁦𑁧. ‘‘𑀲𑀭𑀸𑀕𑁄𑀢𑀺𑀆𑀤𑀺 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑀭𑀸𑀕𑁄𑀢𑀺 𑀯𑀢𑁆𑀢𑀩𑁆𑀩𑀢’’𑀦𑁆𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀲𑀸𑀦𑀼𑀲𑀬𑁄𑀢𑀺𑀆𑀤𑀺 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀼𑀲𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑀸𑀦𑀼𑀲𑀬𑁄𑀢𑀺 𑀯𑀢𑁆𑀢𑀩𑁆𑀩𑀢’’𑀦𑁆𑀢𑀺 𑀧𑀘𑁆𑀙𑀺𑀫𑀧𑀸𑀞𑁄, 𑀲𑁄 𑀬𑀼𑀢𑁆𑀢𑁄. 𑀲𑁄 𑀳𑀺 𑀦 𑀅𑀦𑀼𑀲𑀬𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀁 𑀅𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀅𑀲𑀸𑀥𑀓𑀦𑁆𑀢𑀺 𑀏𑀢𑁂𑀦 𑀲𑀫𑁂𑀢𑀻𑀢𑀺.

𑀅𑀜𑁆𑀜𑁄𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀭𑀺𑀬𑀼𑀝𑁆𑀞𑀸𑀦𑀁𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁨. 𑀬𑀲𑁆𑀫𑀸 ¶ 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺𑀓𑀭𑁄𑀢𑁄𑀧𑀺 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀘 𑀢𑁂 𑀯𑀺𑀧𑀲𑁆𑀲𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀮𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀬𑀼𑀝𑁆𑀞𑀸𑀦𑀁𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁩-𑁭𑁦𑁫. 𑀢𑀺𑀯𑀺𑀥𑀸𑀬𑀸𑀢𑀺 ¶ 𑀓𑀺𑀮𑁂𑀲𑀯𑀢𑁆𑀣𑀼𑀑𑀓𑀸𑀲𑀯𑀲𑁂𑀦, 𑀓𑀸𑀫𑀭𑀸𑀕𑀓𑀸𑀫𑀯𑀺𑀢𑀓𑁆𑀓𑀓𑀸𑀫𑀸𑀯𑀘𑀭𑀥𑀫𑁆𑀫𑀯𑀲𑁂𑀦 𑀯𑀸 𑀢𑀺𑀯𑀺𑀥𑀸𑀬. 𑀓𑀺𑀮𑁂𑀲𑀓𑀸𑀫𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀓𑀸𑀫𑀪𑀽𑀢𑀓𑀸𑀫𑀥𑀸𑀢𑀼𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀭𑀽𑀧𑀥𑀸𑀢𑀼𑀲𑀳𑀕𑀢𑀯𑀲𑁂𑀦 𑀅𑀦𑀼𑀲𑁂𑀢𑀻𑀢𑀺, 𑀭𑀽𑀧𑀥𑀸𑀢𑀼𑀥𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑀪𑀸𑀯𑁂𑀦 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀘 𑀧𑀼𑀘𑁆𑀙𑀺𑀢𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸

𑁭𑁦𑁬-𑁭𑁦𑁮. 𑀤𑀺𑀝𑁆𑀞𑀺𑀕𑀢𑀁 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺 𑀲𑀲𑁆𑀲𑀢𑀸𑀤𑀺𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀦 𑀦 𑀤𑀺𑀝𑁆𑀞𑀺𑀕𑀢𑀁 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 ‘‘𑀞𑀧𑀦𑀻𑀬𑁄 𑀏𑀲𑁄 𑀧𑀜𑁆𑀳𑁄’’𑀢𑀺 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 𑀤𑀺𑀝𑁆𑀞𑀺𑀕𑀢𑀁 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑀼𑀢𑁆𑀢𑀁.

𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁯-𑁭𑁧𑁦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀺𑀝𑁆𑀞𑀺𑀭𑀸𑀕𑀸𑀦𑀁 𑀲𑀫𑀸𑀦𑁂 𑀯𑀺𑀓𑁆𑀔𑀫𑁆𑀪𑀦𑀪𑀸𑀯𑁂𑀧𑀺 ‘‘𑀯𑀻𑀢𑀭𑀸𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀦 ‘‘𑀯𑀺𑀕𑀢𑀤𑀺𑀝𑁆𑀞𑀺𑀓𑁄’’𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺 𑀮𑁄𑀓𑀺𑀬𑀧𑀭𑀺𑀬𑀸𑀧𑀦𑁆𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀭𑀽𑀧𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑀸 𑀧𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀬 𑀤𑀺𑀝𑁆𑀞𑀺𑀬𑀸 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀘 𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀬𑀸, 𑀢𑀣𑀸 𑀘 ¶ 𑀲𑀢𑀺 𑀓𑀸𑀫𑀭𑀸𑀕𑁄 𑀯𑀺𑀬 𑀛𑀸𑀦𑀮𑀸𑀪𑀺𑀦𑁄 𑀤𑀺𑀝𑁆𑀞𑀺𑀧𑀺 𑀯𑀺𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀯𑀺𑀕𑀢𑀤𑀺𑀝𑁆𑀞𑀺𑀓𑁄’’𑀢𑀺 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀦 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀤𑀺𑀝𑁆𑀞𑀺. 𑀦 𑀳𑀺 𑀲𑀸 ¶ 𑀢𑀲𑁆𑀲 𑀅𑀯𑀺𑀕𑀢𑀸 𑀤𑀺𑀝𑁆𑀞𑀺 𑀓𑀸𑀫𑀭𑀸𑀕𑁄 𑀯𑀺𑀬 𑀓𑀸𑀫𑀤𑀺𑀝𑁆𑀞𑀺 𑀬𑁂𑀦 𑀓𑀸𑀫𑀥𑀸𑀢𑀼𑀬𑀸 𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀬𑀸𑀢𑀺 𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀤𑁆𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

𑁧. 𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸

𑁭𑁧𑁧-𑁭𑁧𑁭. 𑀢𑀲𑁆𑀫𑀸 𑀧𑀘𑁆𑀘𑀬𑀢𑀸 𑀯𑀯𑀢𑁆𑀣𑀺𑀢𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀸𑀤𑀺𑀦𑀸 𑀯𑀺𑀬 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀤𑀺𑀦𑀸 𑀘 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁄𑀬𑁂𑀯𑁂𑀢𑀲𑁆𑀲 𑀯𑀯𑀢𑁆𑀣𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁧𑁮-𑁭𑁧𑁯. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀯 𑀕𑀳𑀺𑀢𑁄 ‘‘𑀦𑀦𑀼 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑁂𑀦 𑀲𑀳𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀅𑀢𑁆𑀣𑀺𑀅𑀯𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑁄 𑀓𑀫𑀪𑁂𑀤𑁂𑀦 𑀅𑀢𑁆𑀣𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑁄 𑀳𑁄𑀢𑀻𑀢𑀺 𑀦 𑀯𑀼𑀢𑁆𑀢𑁄, 𑀓𑀫𑁆𑀫𑀸𑀳𑀸𑀭𑀸 𑀅𑀲𑀸𑀥𑀸𑀭𑀡𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀓𑁆𑀔𑀢𑀺 𑀳𑀺 ‘‘𑀢𑀻𑀡𑀺 𑀉𑀧𑀸𑀤𑀸𑀦𑀸𑀦𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀯𑀺𑀬 𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁭𑁧𑁮-𑁭𑁧𑁯), 𑀢𑀲𑁆𑀫𑀸 𑀉𑀧𑀸𑀤𑀸𑀦𑁂𑀳𑀺 𑀲𑀫𑀸𑀦𑀸 𑀏𑀯𑁂𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀢𑀸 𑀤𑀲𑁆𑀲𑀺𑀢𑀸𑀢𑀺.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸

𑁭𑁩𑁨. 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀬𑀁 ¶ ¶ 𑀲𑁂𑀲𑀲𑀢𑁆𑀢𑁂 𑀲𑀦𑁆𑀥𑀸𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀢𑁄 𑀅𑀜𑁆𑀜𑁂 𑀬𑁂𑀲𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀢𑁂 𑀧𑀜𑁆𑀘𑀯𑁄𑀓𑀸𑀭𑀲𑀢𑁆𑀢𑁂 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀲𑀜𑁆𑀜𑀲𑀢𑁆𑀢𑀸𑀦𑀫𑁆𑀧𑀺 𑀘 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘𑀼𑀢𑀺𑀁 𑀇𑀘𑁆𑀙𑀦𑁆𑀢𑀻𑀢𑀺 𑀲𑁂𑀲𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀥𑀸𑀬𑀸𑀢𑀺 𑀯𑀸. 𑀲𑀭𑀻𑀭𑀧𑀓𑀢𑀺𑀦𑁆𑀢𑀺 𑀢𑀣𑀸𑀭𑀽𑀧𑁄 𑀅𑀬𑀁 𑀓𑀸𑀬𑁄, 𑀬𑀣𑀸𑀭𑀽𑀧𑁂 𑀓𑀸𑀬𑁂 𑀧𑀸𑀡𑀺𑀲𑀫𑁆𑀨𑀲𑁆𑀲𑀸𑀧𑀺 𑀓𑀫𑀦𑁆𑀢𑀻𑀢𑀺𑀆𑀤𑀺𑀓𑀁.

𑁭𑁩𑁩-𑁭𑁩𑁪. 𑀲𑀼𑀢𑁆𑀢𑀯𑀺𑀭𑁄𑀥𑁄 𑀲𑀺𑀬𑀸𑀢𑀺 𑀇𑀤𑀁 𑀧𑀭𑀯𑀸𑀤𑀺𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁭𑁩𑁫. 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀪𑀸𑀯𑀦𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀧𑀻𑀢𑀺 𑀮𑀤𑁆𑀥𑀺𑀓𑀺𑀢𑁆𑀢𑀦𑁂 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀪𑀸𑀯𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁 ‘‘𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀻’’𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀧𑀺 𑀅𑀲𑀜𑁆𑀜𑀺𑀢𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁂𑀯 𑀦𑀸𑀫𑀸𑀢𑀺 𑀧𑀭𑀲𑁆𑀲 𑀮𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀮𑁄𑀪𑀸𑀤𑀬𑁄 𑀅𑀢𑁆𑀣𑀻𑀢𑀺 𑀏𑀢𑁆𑀣 𑀲𑀓𑀲𑀫𑀬𑀲𑀺𑀤𑁆𑀥𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 ‘‘𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸.

𑁭𑁩𑁬. 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 𑀅𑀲𑀜𑁆𑀜𑀺𑀢𑀸, 𑀦 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁩𑁮-𑁭𑁩𑁯. 𑀓𑀫𑁆𑀫𑁂𑀦 ¶ 𑀲𑀳𑀚𑀸𑀢𑁄𑀢𑀺 𑀧𑀜𑁆𑀳𑁂𑀲𑀼 ‘‘𑀓𑀫𑁆𑀫𑀽𑀧𑀘𑀬𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄, ‘‘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 ¶ 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀅𑀜𑁆𑀜𑀢𑁆𑀣. 𑀉𑀪𑀬𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑁭𑁪𑁧. 𑀢𑀲𑁆𑀫𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀏𑀓𑀓𑁆𑀔𑀡𑁂 𑀲𑀩𑁆𑀪𑀸𑀯𑀢𑁄 𑀢𑀺𑀡𑁆𑀡𑀁 𑀨𑀲𑁆𑀲𑀸𑀦𑀜𑁆𑀘 𑀲𑀫𑁄𑀥𑀸𑀦𑀸 𑀘 𑀏𑀓𑀢𑁆𑀢𑀁 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄.

𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀦𑁆𑀦𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁬. 𑀲𑁄𑀴𑀲𑀫𑀯𑀕𑁆𑀕𑁄

𑁩. 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁭𑁪𑁭-𑁭𑁪𑁮. 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀬𑀁 𑀬𑀁 𑀏𑀯𑀭𑀽𑀧𑀦𑁆𑀢𑀺 𑀬𑀁 𑀦𑁂𑀯𑀢𑁆𑀢𑀦𑁄, 𑀦 𑀧𑀭𑁂𑀲𑀁, 𑀦 𑀢𑀲𑁆𑀲, 𑀏𑀯𑀭𑀽𑀧𑀁 𑀦𑀸𑀫 𑀅𑀦𑀼𑀧𑁆𑀧𑀤𑀺𑀦𑁆𑀦𑀁 𑀪𑀯𑀺𑀢𑀼𑀁 𑀦 𑀅𑀭𑀳𑀢𑀺 𑀅𑀜𑁆𑀜𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀢𑀺 𑀮𑀤𑁆𑀥𑀺𑀫𑀢𑁆𑀢𑁂𑀦 𑀧𑀝𑀺𑀚𑀸𑀦𑀸𑀢𑀺, 𑀦 𑀬𑀼𑀢𑁆𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁭𑁪𑁯-𑁭𑁫𑁩. 𑀢𑀁𑀘𑀺𑀢𑁆𑀢𑀢𑀸𑀬𑀸𑀢𑀺 ¶ 𑀢𑀤𑁂𑀯 𑀆𑀭𑀫𑁆𑀫𑀡𑀪𑀽𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀢𑀁𑀘𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀢𑀁𑀘𑀺𑀢𑁆𑀢𑀢𑀸, 𑀢𑀸𑀬 𑀢𑀁𑀘𑀺𑀢𑁆𑀢𑀢𑀸𑀬. 𑀢𑀁 𑀯𑀸 𑀆𑀮𑀫𑁆𑀩𑀓𑀁 𑀆𑀮𑀫𑁆𑀩𑀺𑀢𑀩𑁆𑀩𑀜𑁆𑀘 𑀘𑀺𑀢𑁆𑀢𑀁 𑀢𑀁𑀘𑀺𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀢𑀲𑁆𑀲𑁂𑀯 𑀆𑀮𑀫𑁆𑀩𑀓𑀆𑀮𑀫𑁆𑀩𑀺𑀢𑀩𑁆𑀩𑀢𑀸 𑀢𑀁𑀘𑀺𑀢𑁆𑀢𑀢𑀸, 𑀢𑀸𑀬 𑀘𑁄𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀁𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁬𑁮-𑁭𑁭𑁦. 𑀭𑀽𑀧𑀁𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸𑀬𑀁 𑀳𑁂𑀝𑁆𑀞𑀸𑀢𑀺 𑀘𑀼𑀤𑁆𑀤𑀲𑀫𑀯𑀕𑁆𑀕𑁂 𑀆𑀕𑀢𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁭𑁦𑁩-𑁭𑁦𑁫). ‘‘𑀲𑀫𑀸𑀧𑀢𑁆𑀢𑁂𑀲𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀜𑁆𑀘𑁂𑀢𑁆𑀣 ¶ ‘‘𑀅𑀢𑁆𑀣𑀺 𑀭𑀽𑀧𑀁 𑀅𑀭𑀽𑀧𑀸𑀯𑀘𑀭’’𑀦𑁆𑀢𑀺 𑀅𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀫𑀯𑀕𑁆𑀕𑁂 𑀅𑀭𑀽𑀧𑁂𑀭𑀽𑀧𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁫𑁨𑁪-𑁫𑁨𑁬) 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀽𑀧𑀁𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

𑁧. 𑀅𑀢𑁆𑀣𑀺𑀅𑀭𑀳𑀢𑁄𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁭𑁬-𑁭𑁭𑁯. 𑀘𑀺𑀢𑁆𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 ‘‘𑀓𑀺𑀭𑀺𑀬𑀘𑀺𑀢𑁆𑀢𑁂𑀦 𑀤𑀸𑀦𑀸𑀤𑀺𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀢𑁆𑀣𑀺𑀅𑀭𑀳𑀢𑁄𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀢𑁆𑀣𑀺𑀅𑀭𑀳𑀢𑁄𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁦. 𑀅𑀬𑁄𑀦𑀺𑀲𑁄 ¶ 𑀕𑀳𑁂𑀢𑁆𑀯𑀸𑀢𑀺 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀸𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀩𑁆𑀬𑀦𑁆𑀢𑀻𑀪𑀸𑀯𑀁 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲 𑀩𑁆𑀬𑀦𑁆𑀢𑀻𑀪𑀸𑀯𑀁 𑀦 𑀯𑀤𑀸𑀫𑀻𑀢𑀺 𑀏𑀯𑀁 𑀅𑀬𑁄𑀦𑀺𑀲𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺.

𑁭𑁮𑁧. 𑀢𑀸𑀯 𑀦 𑀓𑀫𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀢𑀸𑀯 𑀦 𑀓𑀫𑀢𑀺, 𑀢𑀢𑁄 𑀧𑀭𑀁 𑀓𑀫𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀓𑀺𑀭 ‘‘𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀭𑀦𑁆𑀢𑀁 𑀓𑁄𑀝𑁆𑀝𑁂𑀦𑁆𑀢𑀲𑁆𑀲 𑀯𑀸 𑀲𑀻𑀲𑀁 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑀺𑀢𑁆𑀢𑀉𑀧𑀓𑁆𑀓𑀫𑀫𑀭𑀡𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀦 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀫𑀢𑁄𑀢𑀺 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀫𑀭𑀦𑁆𑀢𑁂𑀦 𑀢𑁂𑀦 𑀏𑀓𑀘𑀺𑀢𑁆𑀢𑀯𑀸𑀭𑀫𑁆𑀧𑀺 𑀥𑀫𑁆𑀫𑀢𑀸𑀫𑀭𑀡𑀢𑁄 𑀑𑀭𑀢𑁄 𑀦 𑀫𑀢𑁄𑀢𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀫𑁂𑀢𑀁.

𑀦𑀢𑁆𑀣𑀺𑀅𑀭𑀳𑀢𑁄𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀩𑁆𑀩𑀫𑀺𑀤𑀁𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁪. 𑀩𑀻𑀚𑀢𑁄 ¶ 𑀅𑀗𑁆𑀓𑀼𑀭𑀲𑁆𑀲𑁂𑀯𑀸𑀢𑀺 𑀬𑀣𑀸 𑀅𑀗𑁆𑀓𑀼𑀭𑀲𑁆𑀲 𑀅𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑀺 𑀦𑀢𑁆𑀣𑀺, 𑀢𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀯𑀢𑁆𑀢𑀲𑁆𑀲𑀧𑀺 𑀅𑀓𑀫𑁆𑀫𑀢𑁄 𑀓𑀫𑁆𑀫𑀯𑀺𑀧𑀸𑀓𑀢𑁄 𑀦𑀺𑀩𑁆𑀩𑀢𑁆𑀢𑀺 𑀦𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀤𑀸𑀦𑀨𑀮𑀁 𑀧𑀼𑀘𑁆𑀙𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀤𑁂𑀢𑀺, 𑀢𑀲𑁆𑀲 𑀤𑀸𑀦𑀲𑁆𑀲 𑀨𑀮𑀁 𑀧𑀼𑀘𑁆𑀙𑀢𑀺, 𑀦 𑀤𑁂𑀬𑁆𑀬𑀥𑀫𑁆𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑀫𑀺𑀤𑀁𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸

𑁭𑁮𑁮. 𑀯𑀺𑀦𑀸𑀧𑀺 ¶ 𑀅𑀦𑀺𑀘𑁆𑀘𑀢𑁆𑀢𑁂𑀦𑀸𑀢𑀺 ‘‘𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦) 𑀯𑀺𑀬 𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑁆𑀢𑁂𑀦𑀧𑀺 𑀤𑀼𑀓𑁆𑀔𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀯𑀢𑁆𑀢𑀩𑁆𑀩𑀁𑀲𑀗𑁆𑀖𑁄𑀤𑀓𑁆𑀔𑀺𑀡𑀁𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁩-𑁭𑁯𑁪. 𑀦𑀯𑀢𑁆𑀢𑀩𑁆𑀩𑀁𑀲𑀗𑁆𑀖𑁄𑀤𑀓𑁆𑀔𑀺𑀡𑀁𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀬𑀁 𑀦 𑀘 𑀢𑀸𑀦𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑀣𑀸 𑀧𑀼𑀕𑁆𑀕𑀮𑁄 𑀲𑀻𑀮𑀧𑀭𑀺𑀲𑁄𑀥𑀦𑀸𑀤𑀻𑀦𑀺 𑀓𑀢𑁆𑀯𑀸 𑀦𑀺𑀭𑁄𑀥𑀫𑁆𑀧𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀏𑀯𑀁 𑀫𑀕𑁆𑀕𑀨𑀮𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀧𑁆𑀧𑀝𑀺𑀕𑁆𑀕𑀳𑀡𑀢𑁄𑀢𑀺 𑀯𑀸.

𑀦𑀯𑀢𑁆𑀢𑀩𑁆𑀩𑀁𑀲𑀗𑁆𑀖𑁄𑀤𑀓𑁆𑀔𑀺𑀡𑀁𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁦𑁦-𑁮𑁦𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀯𑀺𑀲𑀼𑀚𑁆𑀛𑁂𑀬𑁆𑀬𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀧𑁆𑀨𑀮𑀸 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀤𑀸𑀬𑀓𑀲𑁆𑀲𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀯𑀺𑀧𑀸𑀓𑀤𑀸𑀬𑀺𑀓𑀸 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸 𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀘𑁆𑀘𑀬𑀪𑀽𑀢𑁂𑀦 𑀯𑀺𑀦𑀸 𑀤𑀸𑀬𑀓𑁂𑀦𑁂𑀯 𑀫𑀳𑀸𑀯𑀺𑀧𑀸𑀓𑀘𑁂𑀢𑀦𑀢𑁆𑀢𑀁 𑀆𑀧𑀸𑀤𑀺𑀓𑀸, 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸 𑀯𑀺𑀧𑀸𑀓𑀤𑀸𑀬𑀺𑀓𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 ¶ 𑀬𑀤𑀺 𑀤𑀸𑀬𑀓𑀲𑁆𑀲 𑀤𑀸𑀦𑀘𑁂𑀢𑀦𑀸 𑀦𑀸𑀫 𑀧𑀝𑀺𑀕𑁆𑀕𑀸𑀳𑀓𑁂𑀦 𑀓𑀢𑀸 𑀪𑀯𑁂𑀬𑁆𑀬, 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀮𑀤𑁆𑀥𑀺𑀓𑀺𑀢𑁆𑀢𑀦𑁂 ‘‘𑀤𑀸𑀬𑀓𑁂𑀦 𑀤𑀸𑀦𑀁 𑀤𑀺𑀦𑁆𑀦𑀁, 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀫𑁆𑀧𑀺 𑀧𑀦 𑀤𑀸𑀦𑀘𑁂𑀢𑀦𑀸𑀦𑀺𑀩𑁆𑀩𑀢𑁆𑀢𑀦𑁂𑀦 ¶ 𑀬𑀤𑀺 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

𑁧. 𑀫𑀦𑀼𑀲𑁆𑀲𑀮𑁄𑀓𑀓𑀣𑀸𑀯𑀡𑁆𑀡𑀦𑀸

𑁮𑁦𑁨-𑁮𑁦𑁩. 𑀅𑀬𑁄𑀦𑀺𑀲𑁄𑀢𑀺 ‘‘𑀢𑀼𑀲𑀺𑀢𑀧𑀼𑀭𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀓𑀁 𑀕𑀳𑀡𑀁 𑀲𑀦𑁆𑀥𑀸𑀬𑀸𑀳.

𑀫𑀦𑀼𑀲𑁆𑀲𑀮𑁄𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀥𑀫𑁆𑀫𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑁮𑁦𑁪-𑁮𑁦𑁬. 𑀢𑀲𑁆𑀲 𑀘 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀬𑀫𑁂𑀯 𑀘 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀤𑁂𑀲𑀺𑀢𑁄𑀢𑀺 𑀯𑀤𑀢𑀺.

𑀥𑀫𑁆𑀫𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁧𑁩-𑁮𑁧𑁬. 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸𑀬𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀢𑀺 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀢𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀬𑁄 𑀉𑀧𑀘𑀸𑀭𑀸𑀦𑀁 𑀛𑀸𑀦𑀸𑀦𑀜𑁆𑀘 𑀅𑀦𑀼𑀓𑁆𑀓𑀫𑁄, 𑀢𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄.

𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀛𑀸𑀦𑀦𑁆𑀢𑀭𑀺𑀓𑀓𑀣𑀸𑀯𑀡𑁆𑀡𑀦𑀸

𑁮𑁧𑁭-𑁮𑁧𑁯. 𑀛𑀸𑀦𑀦𑁆𑀢𑀭𑀺𑀓𑀸 ¶ ¶ 𑀦𑀸𑀫 𑀏𑀲𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀸𑀯𑀸𑀪𑀸𑀯𑀢𑁄 𑀦 𑀛𑀸𑀦𑀁, 𑀅𑀣 𑀔𑁄 𑀤𑀓𑁆𑀔𑀺𑀡𑀧𑀼𑀩𑁆𑀩𑀸𑀤𑀺𑀤𑀺𑀲𑀦𑁆𑀢𑀭𑀺𑀓𑀸 𑀯𑀺𑀬 𑀛𑀸𑀦𑀦𑁆𑀢𑀭𑀺𑀓𑀸 𑀦𑀸𑀫 𑀏𑀲𑀸𑀢𑀺. 𑀓𑀢𑀭𑀸? 𑀬𑁄𑀬𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀛𑀸𑀦𑀦𑁆𑀢𑀭𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀓𑁆𑀔𑀼𑀦𑀸𑀭𑀽𑀧𑀁𑀧𑀲𑁆𑀲𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁨𑁬-𑁮𑁨𑁭. 𑀧𑀝𑀺𑀚𑀸𑀦𑀦𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁩𑁫𑁨) 𑀦𑀬𑁂𑀦 𑀯𑀼𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀁 𑀓𑀺𑀭 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 ‘‘𑀏𑀯𑀁 𑀲𑀦𑁆𑀢𑁂 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀧𑀚𑁆𑀚𑀢𑀻𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀁 𑀧𑀦 𑀭𑀽𑀧𑀤𑀲𑁆𑀲𑀦𑀁 𑀓𑀣𑀁 𑀳𑁄𑀢𑀻’’𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀘𑀓𑁆𑀔𑀼𑀦𑀸𑀭𑀽𑀧𑀁𑀧𑀲𑁆𑀲𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸

𑁮𑁨𑁮-𑁮𑁩𑁧. 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀳𑀻𑀦𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀓𑀺𑀮𑁂𑀲𑀧𑀚𑀳𑀦𑀸𑀢𑀺 ¶ 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂 𑀧𑀦 𑀦𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸, 𑀦𑀸𑀧𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀘 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸

𑁮𑁩𑁨. 𑀅𑀦𑀢𑁆𑀢𑀮𑀓𑁆𑀔𑀡𑀁 ¶ 𑀢𑀸𑀯 𑀏𑀓𑀘𑁆𑀘𑀦𑁆𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀤𑀢𑀺. 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀚𑀭𑀸𑀫𑀭𑀡𑀪𑀸𑀯𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀤𑀦𑁆𑀢𑀺. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀜𑁆𑀳𑀺 𑀫𑀸 𑀚𑀻𑀭𑀢𑀼 𑀫𑀸 𑀫𑀭𑀢𑀽𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑁄 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀢𑀸, 𑀲𑀸 𑀅𑀢𑁆𑀣𑀢𑁄 𑀚𑀭𑀸𑀫𑀭𑀡𑀫𑁂𑀯, 𑀢𑀜𑁆𑀘 ‘‘𑀚𑀭𑀸𑀫𑀭𑀡𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁭𑁧) 𑀯𑀼𑀢𑁆𑀢𑀢𑁆𑀢𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀚𑀭𑀸𑀫𑀭𑀡𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸

𑁮𑁩𑁫-𑁮𑁩𑁬. 𑀨𑀮𑀼𑀧𑁆𑀧𑀢𑁆𑀢𑀺 𑀘𑀸𑀢𑀺 𑀧𑀢𑁆𑀢𑀺𑀥𑀫𑁆𑀫𑀁 𑀯𑀤𑀢𑀺.

𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸

𑁮𑁪𑁧-𑁮𑁪𑁩. 𑀭𑀽𑀧𑀸𑀤𑀺𑀲𑀪𑀸𑀯𑀢𑀸𑀲𑀗𑁆𑀔𑀸𑀢𑀸𑀢𑀺 ¶ 𑀏𑀢𑁆𑀣 𑀭𑀽𑀧𑀸𑀤𑀻𑀦𑀁 𑀲𑀪𑀸𑀯𑀢𑀸𑀢𑀺 𑀭𑀽𑀧𑀸𑀤𑀺𑀲𑀪𑀸𑀯𑀢𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀸𑀯𑀁 𑀳𑁂𑀲 𑀢𑀣𑀢𑀸𑀢𑀺 𑀯𑀤𑀢𑀺, 𑀦 𑀪𑀸𑀯𑀬𑁄𑀕𑀦𑁆𑀢𑀺.

𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸

𑁮𑁪𑁪-𑁮𑁪𑁬. 𑀅𑀦𑀯𑀚𑁆𑀚𑀪𑀸𑀯𑀫𑀢𑁆𑀢𑁂𑀦𑁂𑀯 𑀦𑀺𑀩𑁆𑀩𑀸𑀦𑀁 𑀓𑀼𑀲𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀓𑀼𑀲𑀮𑀁, 𑀲𑀩𑁆𑀩𑀁 𑀢𑀁 𑀅𑀦𑀯𑀚𑁆𑀚𑀪𑀸𑀯𑀫𑀢𑁆𑀢𑁂𑀦𑁂𑀯, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀓𑀼𑀲𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁮𑁪𑁭. ‘‘𑀲𑀓𑀺𑀁 ¶ 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀸𑀬 𑀚𑀸𑀢𑀺𑀬𑀸 𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀓𑀢𑀁 𑀅𑀯𑀥𑀸𑀭𑀡𑀁 𑀲𑀁𑀲𑀸𑀭𑀔𑀸𑀡𑀼𑀓𑀪𑀸𑀯𑀁 𑀲𑀦𑁆𑀥𑀸𑀬 𑀓𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀬𑀁 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸, 𑀬𑀸𑀬𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺 𑀯𑀤𑀢𑀺. 𑀯𑀺𑀘𑀺𑀓𑀺𑀘𑁆𑀙𑀼𑀧𑁆𑀧𑀢𑁆𑀢𑀺 𑀦𑀺𑀬𑀸𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀘 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀦𑀺𑀯𑀢𑁆𑀢𑀓𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁫𑁩-𑁮𑁫𑁬. 𑀮𑁄𑀓𑀺𑀬𑀸𑀦𑀫𑁆𑀧𑀻𑀢𑀺 ¶ 𑀮𑁄𑀓𑀼𑀢𑁆𑀢𑀭𑀸𑀦𑀁 𑀯𑀺𑀬 𑀮𑁄𑀓𑀺𑀬𑀸𑀦𑀫𑁆𑀧𑀺 𑀲𑀤𑁆𑀥𑀸𑀤𑀻𑀦𑀁𑀬𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦 𑀮𑁄𑀓𑀺𑀬𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀁 𑀲𑀸𑀥𑁂𑀢𑀼𑀁 𑀲𑀤𑁆𑀥𑀸𑀤𑀻𑀦𑀁𑀬𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁦. 𑀯𑀻𑀲𑀢𑀺𑀫𑀯𑀕𑁆𑀕𑁄

𑁨. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁬𑁩-𑁮𑁬𑁫. 𑀜𑀸𑀡𑀓𑀣𑀸𑀬𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀜𑀸𑀡𑀫𑁂𑀯 𑀤𑀻𑀧𑁂𑀢𑀻𑀢𑀺 ‘‘𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀤𑀦𑁆𑀢𑁄 𑀇𑀤𑀁 𑀢𑀯 𑀯𑀘𑀦𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀜𑀸𑀡𑀫𑁂𑀯 𑀤𑀻𑀧𑁂𑀢𑀺, 𑀦 𑀢𑀲𑁆𑀲𑁂𑀯 𑀜𑀸𑀡𑀪𑀸𑀯𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀦 𑀮𑁄𑀓𑀼𑀢𑁆𑀢𑀭𑀫𑁂𑀯 𑀜𑀸𑀡𑀁, 𑀢𑀲𑁆𑀫𑀸 𑀦 𑀇𑀤𑀁 𑀲𑀸𑀥𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸

𑁮𑁬𑁭-𑁮𑁬𑁮. 𑀧𑀡𑀼𑀦𑁆𑀦𑀦𑁆𑀢𑀺 ¶ 𑀧𑀡𑀼𑀤𑀺𑀢𑀁, 𑀅𑀦𑀯𑀲𑁂𑀲𑀔𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁬𑁯-𑁮𑁭𑁧. 𑀢𑀲𑁆𑀲 ¶ 𑀅𑀢𑁆𑀣𑀺𑀢𑀸𑀬 𑀧𑀝𑀺𑀜𑁆𑀜𑀸𑀢𑀺 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘 𑀤𑀺𑀩𑁆𑀩𑀬𑀸𑀦𑀲𑁆𑀲 𑀘 𑀅𑀢𑁆𑀣𑀺𑀢𑀸𑀬𑀸𑀢𑀺 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑀁.

𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁭𑁬-𑁮𑁭𑁭. 𑀜𑀸𑀡𑀓𑀣𑀸𑀬𑀁 𑀲𑀘𑁂 𑀢𑀁 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀦𑁆𑀢𑀺 𑀏𑀢𑁆𑀣 𑀘 ‘‘𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀘𑀦𑀲𑁂𑀲𑁄, 𑀢𑀁 𑀯𑀸 𑀮𑁄𑀓𑀼𑀢𑁆𑀢𑀭𑀜𑀸𑀡𑀁 𑀲𑀘𑁂 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁄, 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀅𑀧𑀭𑀪𑀸𑀕𑁄, 𑀲𑀘𑁆𑀘𑀜𑀸𑀡𑀁 𑀧𑀦 𑀫𑀕𑁆𑀕𑀓𑁆𑀔𑀡𑁂𑀧𑀺 𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑁂𑀳𑀻’’𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸

𑁮𑁭𑁮. 𑀢𑀻𑀲𑀼𑀧𑀺 𑀧𑀼𑀘𑁆𑀙𑀸𑀲𑀼 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀢𑀻𑀲𑀼𑀧𑀺 𑀧𑀼𑀘𑁆𑀙𑀸𑀲𑀼 ‘‘𑀲𑀸𑀲𑀦’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑀼𑀤𑀸𑀬𑀸 𑀏𑀓𑀤𑁂𑀲𑀸𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁮𑁩-𑁮𑁮𑁪. 𑀇𑀤𑁆𑀥𑀺𑀓𑀣𑀸𑀬𑀁 ¶ ¶ 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀇𑀚𑁆𑀛𑀦𑀢𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀯𑀁𑀦𑀸𑀫𑀺𑀓𑀸 𑀇𑀤𑁆𑀥𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁮𑁮𑁭-𑁮𑁮𑁮. 𑀥𑀫𑁆𑀫𑀓𑀣𑀸𑀬𑀁 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀸𑀢𑀺 𑀬𑁄 𑀭𑀽𑀧𑀲𑁆𑀲 𑀦𑀺𑀬𑀸𑀫𑁄 𑀯𑀼𑀘𑁆𑀘𑁂𑀬𑁆𑀬, 𑀲𑁄 𑀭𑀽𑀧𑀝𑁆𑀞𑁄 𑀦𑀸𑀫 𑀓𑁄𑀘𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻𑀢𑀺 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀁 𑀭𑀽𑀧𑀜𑁆𑀘 𑀦 𑀳𑁄𑀢𑀺, 𑀢𑀲𑁆𑀫𑀸 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸 𑀭𑀽𑀧𑀝𑁆𑀞𑁂𑀦 𑀦𑀺𑀬𑀸𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀭𑀽𑀧𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀝𑁆𑀞𑀲𑁆𑀲 𑀅𑀪𑀸𑀯𑁂 𑀤𑀲𑁆𑀲𑀺𑀢𑁂 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀢𑀫𑁂𑀯 𑀭𑀽𑀧𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀝𑁆𑀞𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀲𑀪𑀸𑀯𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀲 𑀯𑁄𑀳𑀸𑀭𑁄𑀢𑀺 𑀭𑀽𑀧𑀲𑁆𑀲 𑀲𑀪𑀸𑀯𑁄 𑀭𑀽𑀧𑀲𑀪𑀸𑀯𑁄, 𑀭𑀽𑀧𑀲𑁆𑀲 𑀅𑀢𑁆𑀣𑁄 𑀭𑀽𑀧𑀝𑁆𑀞𑁄𑀢𑀺 𑀏𑀯𑀁 𑀅𑀜𑁆𑀜𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑁄 𑀭𑀽𑀧𑀲𑀪𑀸𑀯𑀯𑁄𑀳𑀸𑀭𑁄 𑀭𑀽𑀧𑀝𑁆𑀞𑀯𑁄𑀳𑀸𑀭𑁄 𑀯𑀸 𑀯𑁂𑀤𑀦𑀸𑀤𑀻𑀳𑀺 𑀦𑀸𑀦𑀢𑁆𑀢𑀫𑁂𑀯 𑀲𑁄 𑀲𑀪𑀸𑀯𑁄𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀧𑀦𑀢𑁆𑀣𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀭𑀽𑀧𑀲𑁆𑀲 𑀭𑀽𑀧𑀝𑁆𑀞𑁂𑀦 𑀅𑀦𑀜𑁆𑀜𑀢𑁆𑀢𑀸. ‘‘𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀯𑀤𑀢𑁄 𑀢𑀜𑁆𑀘 𑀯𑀘𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀤𑁄𑀲𑀁, 𑀅𑀣 𑀓𑀲𑁆𑀫𑀸 ‘‘𑀭𑀽𑀧𑀜𑁆𑀳𑀺 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑁄 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀢𑀁 𑀅𑀢𑁆𑀢𑀦𑀸𑀯 𑀯𑀼𑀢𑁆𑀢𑀁, 𑀦 𑀧𑀭𑁂𑀦𑀸𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀁 𑀯𑀺𑀬 𑀯𑀘𑀦𑀢𑁄. 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀸 𑀲𑀓𑀯𑀸𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀘 𑀢𑁂𑀦 𑀯𑀢𑁆𑀢𑀩𑁆𑀩𑀁 𑀧𑀝𑀺𑀚𑀸𑀦𑀸𑀢𑀺 𑀘 𑀲𑁄 𑀏𑀢𑀫𑀢𑁆𑀣𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺 𑀲𑀓𑀯𑀸𑀤𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀢𑁆𑀣𑀦𑁆𑀢𑀭𑀯𑀲𑁂𑀦𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯 𑀓𑀸𑀭𑀡𑀁 𑀦𑀺𑀕𑀽𑀳𑀺𑀢𑁆𑀯𑀸 𑀧𑀭𑁂𑀦 𑀘𑁄𑀤𑀺𑀢𑀦𑁆𑀢𑀺 𑀢𑀫𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀭𑀽𑀧𑀸𑀤𑀺𑀲𑀪𑀸𑀯𑀫𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑁂𑀦 𑀧𑀭𑀺𑀓𑀧𑁆𑀧𑀺𑀢𑀁 𑀦𑀺𑀬𑀢𑀁 𑀦𑀢𑁆𑀣𑀻𑀢𑀺 ¶ 𑀢𑀲𑁆𑀲 ¶ 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀼𑀦 𑀢𑁂𑀦𑁂𑀯 𑀦𑀬𑁂𑀦 𑀘𑁄𑀤𑁂𑀢𑀼𑀁 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁨. 𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑁄

𑁨. 𑀓𑀼𑀲𑀮𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁮𑁯𑁪-𑁮𑁯𑁫. 𑀓𑀼𑀲𑀮𑀘𑀺𑀢𑁆𑀢𑀓𑀣𑀸𑀬𑀁 𑀚𑀯𑀦𑀓𑁆𑀔𑀡𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀢𑁄 𑀧𑀼𑀭𑀺𑀫𑀚𑀯𑀦𑀓𑁆𑀔𑀡𑁂.

𑀓𑀼𑀲𑀮𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀦𑁂𑀜𑁆𑀚𑀓𑀣𑀸𑀯𑀡𑁆𑀡𑀦𑀸

𑁮𑁯𑁬. 𑀪𑀯𑀗𑁆𑀕𑀘𑀺𑀢𑁆𑀢𑁂𑀢𑀺 𑀪𑀯𑀗𑁆𑀕𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘𑀼𑀢𑀺𑀘𑀺𑀢𑁆𑀢𑀁 ‘‘𑀪𑀯𑀗𑁆𑀕𑀘𑀺𑀢𑁆𑀢’’𑀦𑁆𑀢𑀺 𑀆𑀳.

𑀆𑀦𑁂𑀜𑁆𑀚𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁭. 𑀢𑀺𑀲𑁆𑀲𑁄𑀧𑀺𑀓𑀣𑀸𑀯𑀡𑁆𑀡𑀦𑀸

𑁮𑁯𑁮-𑁯𑁦𑁦. 𑀲𑀢𑁆𑀢𑀯𑀲𑁆𑀲𑀺𑀓𑀁 ¶ 𑀕𑀩𑁆𑀪𑀁 𑀤𑀺𑀲𑁆𑀯𑀸 ‘‘𑀕𑀩𑁆𑀪𑁂𑀬𑁂𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑁄 𑀅𑀢𑁆𑀣𑀻’’𑀢𑀺 ‘‘𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀧𑀺 𑀅𑀢𑁆𑀣𑀻’’𑀢𑀺 𑀫𑀜𑁆𑀜𑀢𑀺, 𑀆𑀓𑀸𑀲𑀲𑀼𑀧𑀺𑀦𑀁 𑀤𑀺𑀲𑁆𑀯𑀸 ‘‘𑀆𑀓𑀸𑀲𑀕𑀫𑀦𑀸𑀤𑀺𑀅𑀪𑀺𑀜𑁆𑀜𑀸 𑀯𑀺𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀅𑀢𑁆𑀣𑀻’’𑀢𑀺 𑀫𑀜𑁆𑀜𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀺𑀲𑁆𑀲𑁄𑀧𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀲𑁂𑀯𑀦𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁯𑁦𑁩-𑁯𑁦𑁫. 𑀦 ¶ 𑀓𑁄𑀘𑀺 𑀆𑀲𑁂𑀯𑀦𑀧𑀘𑁆𑀘𑀬𑀁 𑀆𑀲𑁂𑀯𑀢𑀺 𑀦𑀸𑀫𑀸𑀢𑀺 𑀬𑀣𑀸 𑀩𑀻𑀚𑀁 𑀘𑀢𑀼𑀫𑀥𑀼𑀭𑀪𑀸𑀯𑀁 𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀆𑀲𑁂𑀯𑀦𑀧𑀘𑁆𑀘𑀬𑀁 𑀕𑀡𑁆𑀳𑀦𑁆𑀢𑁄 𑀆𑀲𑁂𑀯𑀦𑁆𑀢𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀆𑀲𑁂𑀯𑀦𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀔𑀡𑀺𑀓𑀓𑀣𑀸𑀯𑀡𑁆𑀡𑀦𑀸

𑁯𑁦𑁬-𑁯𑁦𑁭. 𑀧𑀣𑀯𑀺𑀬𑀸𑀤𑀺𑀭𑀽𑀧𑁂𑀲𑀼 𑀓𑁂𑀲𑀜𑁆𑀘𑀺 𑀉𑀧𑁆𑀧𑀸𑀤𑁄 𑀓𑁂𑀲𑀜𑁆𑀘𑀺 𑀦𑀺𑀭𑁄𑀥𑁄𑀢𑀺 𑀏𑀯𑀁 𑀧𑀢𑀺𑀝𑁆𑀞𑀸𑀦𑀁 𑀭𑀽𑀧𑀲𑀦𑁆𑀢𑀢𑀺𑀬𑀸 𑀳𑁄𑀢𑀺. 𑀦 𑀳𑀺 𑀭𑀽𑀧𑀸𑀦𑀁 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸 𑀲𑀦𑁆𑀢𑀺, 𑀬𑁂𑀳𑀺 𑀅𑀭𑀽𑀧𑀲𑀦𑁆𑀢𑀢𑀺𑀬𑀸 𑀯𑀺𑀬 𑀭𑀽𑀧𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀺 𑀲𑀺𑀬𑀸𑀢𑀺 𑀘𑀺𑀢𑁆𑀢𑁂 ‘‘𑀘𑀺𑀢𑁆𑀢𑁂 𑀫𑀳𑀸𑀧𑀣𑀯𑀻 𑀲𑀡𑁆𑀞𑀸𑀢𑀻’’𑀢𑀺𑀆𑀤𑀺 𑀘𑁄𑀤𑀺𑀢𑀁.

𑀔𑀡𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁩. 𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸

𑁯𑁦𑁮. 𑀓𑀭𑀼𑀡𑀸𑀥𑀺𑀧𑁆𑀧𑀸𑀬𑁂𑀦 ¶ 𑀏𑀓𑀸𑀥𑀺𑀧𑁆𑀧𑀸𑀬𑁄𑀢𑀺 𑀭𑀸𑀕𑀸𑀥𑀺𑀧𑁆𑀧𑀸𑀬𑀢𑁄 𑀅𑀜𑁆𑀜𑀸𑀥𑀺𑀧𑁆𑀧𑀸𑀬𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀏𑀓𑀢𑁄𑀪𑀸𑀯𑁂 𑀏𑀓𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀸𑀦𑀢𑁆𑀣𑁂 𑀳𑀺 𑀲𑀢𑀺 𑀭𑀸𑀕𑀸𑀥𑀺𑀧𑁆𑀧𑀸𑀬𑁂𑀧𑀺 𑀏𑀓𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑀢𑀸 𑀅𑀢𑁆𑀣𑀻𑀢𑀺.

𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁭. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁯𑁧𑁦-𑁯𑁧𑁪. 𑀇𑀲𑁆𑀲𑀭𑀺𑀬𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀓𑀭𑀡𑀁 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸. 𑀕𑀘𑁆𑀙𑁂𑀬𑁆𑀬𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑁄𑀓𑁆𑀓𑀫𑀦𑀁 𑀕𑀘𑁆𑀙𑁂𑀬𑁆𑀬. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 ¶ 𑀦𑀸𑀫 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀻𑀬𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀦𑀸𑀫 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀓𑀭𑀺𑀬𑀫𑀸𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀻𑀬𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀦𑀸𑀫 𑀯𑀺𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀺𑀬𑀫𑀸𑀦𑀸 𑀦𑀢𑁆𑀣𑀻𑀢𑀺 𑀯𑀸.

𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁯𑁧𑁫-𑁯𑁧𑁬. 𑀫𑁂𑀢𑁆𑀢𑀸𑀤𑀬𑁄 𑀲𑀦𑁆𑀥𑀸𑀬 ‘‘𑀫𑁂𑀢𑁆𑀢𑀸𑀤𑀬𑁄 𑀯𑀺𑀬 𑀦 𑀭𑀸𑀕𑁄 𑀭𑀸𑀕𑀧𑀢𑀺𑀭𑀽𑀧𑀓𑁄 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀭𑀸𑀕𑀫𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀁 𑀤𑁄𑀲𑁂𑀧𑀻’’𑀢𑀺 𑀯𑀤𑀦𑁆𑀢𑀺.

𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁯𑁧𑁭-𑁯𑁧𑁮. 𑀦 ¶ 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀦𑁆𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀸𑀤𑀺𑀓𑁄 𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀦𑁆𑀢𑀺 𑀭𑀽𑀧𑀁 𑀯𑀼𑀢𑁆𑀢𑀁. ‘‘𑀦 𑀓𑁂𑀯𑀮𑀜𑁆𑀳𑀺 𑀧𑀞𑀫𑀲𑀘𑁆𑀘𑀫𑁂𑀯 𑀤𑀼𑀓𑁆𑀔’’𑀦𑁆𑀢𑀺 𑀯𑀤𑀦𑁆𑀢𑁂𑀦 ‘‘𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀓𑀢𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀯𑀁 𑀲𑀢𑀺 𑀢𑁂𑀦 ‘‘𑀘𑀓𑁆𑀔𑀸𑀬𑀢𑀦𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦 𑀳𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀸. 𑀢𑀦𑁆𑀢𑀺 ‘‘𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀁, 𑀦 𑀧𑀦 𑀭𑀽𑀧’’𑀦𑁆𑀢𑀺 𑀏𑀢𑀁 𑀭𑀽𑀧𑀲𑁆𑀲 𑀘 𑀤𑀼𑀓𑁆𑀔𑀢𑁆𑀢𑀸 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂𑀢𑀺 𑀅𑀢𑁆𑀣𑁄.

𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀬𑀫𑀓𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑁂𑀦 ¶ ¶ 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑀺𑀢𑁂𑀦 𑀥𑀫𑁆𑀫𑁂𑀲𑀼 𑀯𑀺𑀧𑀭𑀻𑀢𑀕𑁆𑀕𑀳𑀡𑀁 𑀦𑀺𑀯𑀸𑀭𑁂𑀢𑁆𑀯𑀸 𑀢𑁂𑀲𑁆𑀯𑁂𑀯 𑀥𑀫𑁆𑀫𑁂𑀲𑀼 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼 𑀧𑀓𑀸𑀲𑀺𑀢𑁂𑀲𑀼 𑀥𑀫𑁆𑀫𑀧𑀼𑀕𑁆𑀕𑀮𑁄𑀓𑀸𑀲𑀸𑀤𑀺𑀦𑀺𑀲𑁆𑀲𑀬𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸𑀦𑀁 𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀑𑀲𑀮𑁆𑀮𑀢𑁆𑀣𑀁 𑀬𑀫𑀓𑀧𑀓𑀭𑀡𑀁 𑀆𑀭𑀤𑁆𑀥𑀁, 𑀢𑀁 𑀲𑀫𑀬𑀤𑁂𑀲𑀤𑁂𑀲𑀓𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑀜𑁆𑀘𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀁 ‘‘𑀆𑀕𑀢𑁄 𑀪𑀸𑀭𑁄 𑀅𑀯𑀲𑁆𑀲𑀁 𑀯𑀳𑀺𑀢𑀩𑁆𑀩𑁄’’𑀢𑀺 𑀲𑀁𑀯𑀡𑁆𑀡𑀦𑀫𑀲𑁆𑀲 𑀧𑀝𑀺𑀚𑀸𑀦𑀦𑁆𑀢𑁄 𑀆𑀳 ‘‘𑀲𑀗𑁆𑀔𑁂𑀧𑁂𑀦𑁂𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀬𑀫𑀲𑁆𑀲 𑀯𑀺𑀲𑀬𑀸𑀢𑀻𑀢𑁄𑀢𑀺 𑀚𑀸𑀢𑀺𑀬𑀸 𑀲𑀢𑀺 𑀫𑀭𑀡𑀁 𑀳𑁄𑀢𑀻𑀢𑀺 𑀚𑀸𑀢𑀺, 𑀧𑀜𑁆𑀘 𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀫𑀲𑁆𑀲 𑀯𑀺𑀲𑀬𑁄, 𑀢𑀁 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀅𑀢𑀻𑀢𑁄𑀢𑀺 𑀅𑀢𑁆𑀣𑁄. 𑀬𑀫𑀲𑁆𑀲 𑀯𑀸 𑀭𑀜𑁆𑀜𑁄 𑀯𑀺𑀲𑀬𑀁 𑀫𑀭𑀡𑀁, 𑀢𑀲𑁆𑀲 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀤𑁂𑀲𑀁 𑀯𑀸 𑀅𑀢𑀻𑀢𑁄. ‘‘𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩 𑀓𑀸𑀢𑀼’’𑀦𑁆𑀢𑀺 (𑀔𑀼. 𑀧𑀸. 𑁬.𑁧𑁧; 𑀲𑀼. 𑀦𑀺. 𑁨𑁩𑁪) 𑀯𑀼𑀢𑁆𑀢𑀸𑀦𑀁 𑀙𑀦𑁆𑀦𑀁 𑀅𑀪𑀩𑁆𑀩𑀝𑁆𑀞𑀸𑀦𑀸𑀦𑀁 𑀤𑁂𑀲𑀓𑁄𑀢𑀺 𑀙𑀝𑁆𑀞𑀸𑀦𑀤𑁂𑀲𑀓𑁄 ¶ . 𑀅𑀬𑀫𑀸 𑀏𑀓𑁂𑀓𑀸 𑀳𑀼𑀢𑁆𑀯𑀸 𑀆𑀯𑀢𑁆𑀢𑀸 𑀦𑀻𑀮𑀸 𑀅𑀫𑀮𑀸 𑀘 𑀢𑀦𑀼𑀭𑀼𑀳𑀸 𑀅𑀲𑁆𑀲𑀸𑀢𑀺 𑀅𑀬𑀫𑀸𑀯𑀢𑁆𑀢𑀦𑀻𑀮𑀸𑀫𑀮𑀢𑀦𑀼𑀭𑀼𑀳𑁄.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀽𑀮𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀤𑀲𑀲𑀼 𑀏𑀓𑁂𑀓𑀲𑁆𑀲 𑀬𑀫𑀓𑀲𑀫𑀽𑀳𑀲𑁆𑀲 𑀢𑀁𑀲𑀫𑀽𑀳𑀲𑁆𑀲 𑀘 𑀲𑀓𑀮𑀲𑁆𑀲 𑀧𑀓𑀭𑀡𑀲𑁆𑀲 𑀬𑀫𑀓𑀸𑀦𑀁 𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑀢𑀁 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 ¶ 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀦𑁆𑀢𑀺 𑀏𑀢𑁂𑀦 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺 𑀏𑀢𑀲𑁆𑀲𑁂𑀯 𑀬𑀫𑀓𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀤𑀼𑀢𑀺𑀬𑀧𑀞𑀫𑀧𑀼𑀘𑁆𑀙𑀸𑀲𑀼 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀁, 𑀓𑀼𑀲𑀮𑀫𑀽𑀮𑀓𑀼𑀲𑀮𑀯𑀺𑀲𑁂𑀲𑁂𑀳𑀺 𑀯𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀧𑀞𑀫𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀜𑁆𑀳𑀺 𑀯𑀺𑀲𑁂𑀲𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀸𑀦𑀁, 𑀢𑀁𑀯𑀺𑀲𑁂𑀲𑀯𑀢𑀁 𑀯𑀸 𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀦𑀁 𑀏𑀢𑁆𑀣 𑀧𑀥𑀸𑀦𑀪𑀸𑀯𑁄𑀢𑀺 𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀏𑀓𑁂𑀓𑁄 𑀏𑀯 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺. 𑀅𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀦 𑀥𑀫𑁆𑀫𑀯𑀸𑀘𑀓𑁄 𑀳𑁂𑀢𑀼𑀨𑀮𑀸𑀤𑀺𑀯𑀸𑀘𑀓𑁄 𑀯𑀸, 𑀅𑀣 𑀔𑁄 𑀧𑀸𑀴𑀺𑀅𑀢𑁆𑀣𑀯𑀸𑀘𑀓𑁄. 𑀢𑁂𑀦𑁂𑀯𑀸𑀳 ‘‘𑀢𑁂𑀲𑀜𑁆𑀜𑁂𑀯 𑀅𑀢𑁆𑀣𑀸𑀦’’𑀦𑁆𑀢𑀺𑀆𑀤𑀺.

𑀢𑀻𑀡𑀺𑀧𑀺 𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀇𑀤𑀁 𑀦𑀸𑀫𑀧𑀤𑀲𑁆𑀲 𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀦𑀺𑀭𑀯𑀲𑁂𑀲𑀲𑀗𑁆𑀕𑀸𑀳𑀓𑀢𑁆𑀢𑀁. 𑀲𑀩𑁆𑀩𑀓𑀼𑀲𑀮𑀸𑀤𑀺𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑁂𑀯 𑀘 𑀦𑀸𑀫𑀧𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀘𑀢𑀽𑀲𑀼 𑀧𑀤𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁫𑁨. 𑀅𑀜𑁆𑀜𑀫𑀜𑁆𑀜𑀬𑀫𑀓𑁂 ¶ 𑀬𑁂 𑀓𑁂𑀘𑀺 𑀓𑀼𑀲𑀮𑀸𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀏𑀢𑁆𑀣 𑀬𑀣𑀸 𑀤𑀼𑀢𑀺𑀬𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸, 𑀏𑀯𑀫𑀺𑀥𑀸𑀧𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀸𑀢𑀩𑁆𑀩𑀸 𑀲𑀺𑀬𑀸 𑀧𑀼𑀭𑀺𑀫𑀬𑀫𑀓𑀯𑀺𑀲𑀺𑀝𑁆𑀞𑀁 𑀅𑀧𑀼𑀩𑁆𑀩𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀫𑀓𑀲𑁆𑀲 𑀅𑀧𑁆𑀧𑀯𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀪𑀸𑀯𑀢𑁄’’𑀢𑀺 𑀓𑁂𑀘𑀺. 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀧𑀦 𑀅𑀢𑁆𑀣𑀯𑀲𑁂𑀦 𑀓𑀢𑀸𑀬 𑀢𑀤𑀦𑀼𑀭𑀽𑀧𑀸𑀬 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀁 𑀅𑀦𑀼𑀮𑁄𑀫𑁂 𑀯𑀺𑀕𑀢𑀲𑀁𑀲𑀬𑀲𑁆𑀲 𑀧𑀝𑀺𑀮𑁄𑀫𑁂 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀢𑁄. 𑀢𑁂𑀦 𑀦 𑀘 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸𑀬 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀼𑀭𑀺𑀫𑁄𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀇𑀤𑀫𑁂𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑁄 𑀏𑀯 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑁄, 𑀢𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀅𑀲𑀫𑀸𑀦𑀁 𑀳𑁄𑀢𑀺. 𑀓𑀼𑀲𑀮𑀩𑁆𑀬𑀜𑁆𑀚𑀦𑁂𑀦 𑀳𑀺 ¶ 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀅𑀯𑀲𑁂𑀲𑀸’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀅𑀯𑀲𑁂𑀲𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀇𑀢𑀭𑀣𑀸 𑀅𑀯𑀲𑁂𑀲𑀸 𑀓𑀼𑀲𑀮𑀫𑀽𑀮𑀲𑀳𑀚𑀸𑀢𑀸 𑀥𑀫𑁆𑀫𑀸𑀢𑀺, 𑀦 𑀘 𑀢𑀸𑀦𑀺 𑀯𑀘𑀦𑀸𑀦𑀺 𑀲𑀫𑀸𑀦𑀢𑁆𑀣𑀸𑀦𑀺 𑀓𑀼𑀲𑀮𑀓𑀼𑀲𑀮𑀸𑀩𑁆𑀬𑀸𑀓𑀢𑀤𑀻𑀧𑀦𑀢𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲𑁂𑀯 𑀲𑀫𑁆𑀪𑀯𑀢𑁄 𑀤𑀼𑀢𑀺𑀬𑀬𑀫𑀓𑁂 𑀯𑀺𑀬 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀯𑀺𑀬 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑁂𑀳𑀺 𑀅𑀜𑁆𑀜𑁂 𑀓𑀼𑀲𑀮𑀸 𑀲𑀦𑁆𑀢𑀺, 𑀓𑀼𑀲𑀮𑁂𑀳𑀺 𑀧𑀦 𑀅𑀜𑁆𑀜𑁂𑀧𑀺 𑀢𑁂 𑀲𑀦𑁆𑀢𑀻𑀢𑀺.

𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀯𑀡𑁆𑀡𑀦𑀸𑀬𑀁 ‘‘𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀳𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀘 𑀧𑀼𑀘𑁆𑀙𑀺𑀢𑁂 ‘‘𑀆𑀫𑀦𑁆𑀢𑀸’’ 𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀓𑀺𑀜𑁆𑀘𑀺 𑀏𑀓𑀫𑀽𑀮𑀁 𑀦 𑀳𑁄𑀢𑀺, 𑀬𑁂𑀦 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬 𑀯𑀺𑀬 𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀬𑀢𑁆𑀣 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀏𑀓𑀫𑀽𑀮𑀸𑀦𑀺 𑀘 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀏𑀓𑁂𑀓𑁂𑀦 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀢𑁆𑀢𑀸. 𑀬𑀢𑁆𑀣 𑀧𑀦 𑀤𑁆𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑁂𑀯, 𑀦 𑀏𑀓𑀫𑀽𑀮𑀸𑀦𑀻𑀢𑀺 𑀏𑀢𑀲𑁆𑀲 𑀕𑀳𑀡𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀦, ‘‘𑀆𑀫𑀦𑁆𑀢𑀸’’𑀢𑀺 𑀇𑀫𑀺𑀦𑀸𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀢𑀁𑀕𑀳𑀡𑀦𑀺𑀯𑀸𑀭𑀡𑀢𑁄 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀦 𑀘 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀜𑁆𑀘 ¶ 𑀫𑀽𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀜𑁆𑀳𑀺 𑀲𑀫𑀸𑀦𑀫𑀽𑀮𑀢𑀸 𑀏𑀯 𑀏𑀓𑀫𑀽𑀮𑀯𑀘𑀦𑁂𑀦 𑀧𑀼𑀘𑁆𑀙𑀻𑀬𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀫𑀽𑀮𑀢𑀸, 𑀅𑀢𑁆𑀣𑀺 𑀘 𑀤𑁆𑀯𑀺𑀦𑁆𑀦𑀁 𑀫𑀽𑀮𑀸𑀦𑀁 𑀲𑀫𑀸𑀦𑀫𑀽𑀮𑀢𑀸. 𑀢𑁂𑀲𑀼 𑀳𑀺 𑀏𑀓𑁂𑀓𑀁 𑀇𑀢𑀭𑁂𑀦 𑀫𑀽𑀮𑁂𑀦 𑀢𑀁𑀫𑀽𑀮𑁂𑀳𑀺 𑀅𑀜𑁆𑀜𑁂𑀳𑀺 𑀲𑀫𑀸𑀦𑀫𑀽𑀮𑀦𑁆𑀢𑀺.

𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀧𑀦 𑀦𑀺𑀘𑁆𑀙𑀺𑀢𑁂 𑀏𑀓𑀫𑀽𑀮𑀢𑁆𑀢𑀲𑀁𑀲𑀬𑀸𑀪𑀸𑀯𑀢𑁄 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀦 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑀸 𑀏𑀢𑁂𑀲𑀦𑁆𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀫𑀸𑀦𑀢𑁆𑀣𑁂𑀦 𑀏𑀓𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀏𑀓𑀫𑀽𑀮𑀸’’𑀢𑀺 𑀉𑀪𑀬𑀫𑁆𑀧𑀺 𑀯𑀘𑀦𑀁 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀢𑁂𑀦𑁂𑀯 𑀘 𑀉𑀪𑀬𑀢𑁆𑀣𑀸𑀧𑀺 ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂 𑀏𑀓𑀫𑀽𑀮𑀢𑁆𑀢𑁂 𑀦𑀺𑀘𑁆𑀙𑀺𑀢𑁂 𑀢𑀩𑁆𑀩𑀺𑀲𑁂𑀲𑁄 𑀅𑀜𑁆𑀜𑀫𑀜𑁆𑀜𑀫𑀽𑀮𑀪𑀸𑀯𑁄 𑀦 𑀦𑀺𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 𑀅𑀦𑀼𑀮𑁄𑀫𑀧𑀼𑀘𑁆𑀙𑀸 𑀧𑀯𑀢𑁆𑀢𑀸, 𑀫𑀽𑀮𑀬𑁄𑀕𑀯𑀺𑀲𑁂𑀲𑁂 𑀧𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀦𑀺𑀘𑁆𑀙𑀺𑀢𑁂 𑀦 𑀯𑀺𑀦𑀸 𑀏𑀓𑀫𑀽𑀮𑀢𑁆𑀢𑁂𑀦 ¶ 𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑀁 𑀅𑀢𑁆𑀣𑀻𑀢𑀺 𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑀁 𑀏𑀓𑀫𑀽𑀮𑀢𑁆𑀢𑀁 𑀦𑀺𑀘𑁆𑀙𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸 𑀬𑀣𑀸 𑀓𑀼𑀲𑀮𑀫𑀽𑀮𑀯𑀘𑀦𑀁 𑀏𑀓𑀫𑀽𑀮𑀯𑀘𑀦𑀜𑁆𑀘 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀓𑀢𑀸, 𑀏𑀯𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀁 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸 𑀓𑀼𑀲𑀮𑀸𑀥𑀺𑀓𑀸𑀭𑀲𑁆𑀲 𑀘 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀓𑀢𑀸𑀢𑀺.

𑁫𑁩-𑁬𑁧. 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀅𑀢𑁆𑀣𑁂 𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦 𑀲𑀫𑀸𑀦𑁂𑀦 𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘 𑀫𑀽𑀮𑁂𑀦 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀓𑀸𑀲𑁂𑀢𑀼𑀁 𑀫𑀽𑀮𑀫𑀽𑀮𑀦𑀬𑁄 𑀯𑀼𑀢𑁆𑀢𑁄. 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀦𑁆𑀢𑁂𑀦 𑀓-𑀓𑀸𑀭𑁂𑀦 𑀢𑀻𑀲𑀼𑀧𑀺 𑀬𑀫𑀓𑁂𑀲𑀼 𑀫𑀽𑀮𑀬𑁄𑀕𑀫𑁂𑀯 𑀤𑀻𑀧𑁂𑀢𑀼𑀁 𑀫𑀽𑀮𑀓𑀦𑀬𑁄 𑀯𑀼𑀢𑁆𑀢𑁄. 𑀫𑀽𑀮𑀫𑀽𑀮𑀓𑀦𑀬𑀯𑀘𑀦𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀯.

𑁭𑁪-𑁮𑁫. 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀦 𑀏𑀓𑀫𑀽𑀮𑀪𑀸𑀯𑀁 𑀮𑀪𑀫𑀸𑀦𑁂𑀳𑀺 𑀏𑀓𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀳𑁂𑀢𑀼𑀓𑀯𑁄𑀳𑀸𑀭𑀭𑀳𑀺𑀢𑀁 𑀓𑀢𑁆𑀯𑀸. 𑀦 𑀯𑀸 𑀲𑀳𑁂𑀢𑀼𑀓𑀤𑀼𑀓𑁂 𑀯𑀺𑀬 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑀸𑀬𑁄𑀕𑀯𑀲𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑀁, 𑀅𑀣 𑀔𑁄 𑀲𑀳𑁂𑀢𑀼𑀓𑀯𑁄𑀳𑀸𑀭𑀫𑁂𑀯 𑀮𑀪𑀢𑀺, 𑀦 𑀅𑀳𑁂𑀢𑀼𑀓𑀯𑁄𑀳𑀸𑀭𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑀁. 𑀏𑀓𑀢𑁄 𑀮𑀩𑁆𑀪𑀫𑀸𑀦𑀓𑀯𑀲𑁂𑀦𑀸𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀺𑀩𑁆𑀩𑀸𑀦𑁂𑀳𑀺 𑀳𑁂𑀢𑀼𑀧𑀘𑁆𑀘𑀬𑀭𑀳𑀺𑀢𑁂𑀳𑀺 𑀲𑀳 𑀮𑀩𑁆𑀪𑀫𑀸𑀦𑀓𑀭𑀽𑀧𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁮𑁬-𑁯𑁭. 𑀬𑀲𑁆𑀲𑀁 𑀧𑀸𑀴𑀺𑀬𑀁 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀫𑀽𑀮𑁂𑀦 𑀦 𑀏𑀓𑀫𑀽𑀮𑀁, 𑀲𑀳𑁂𑀢𑀼𑀓𑀁 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮’’𑀦𑁆𑀢𑀺 (𑀬𑀫. 𑁧.𑀫𑀽𑀮𑀬𑀫𑀓.𑁮𑁭) ¶ 𑀧𑀸𑀞𑁄 𑀆𑀕𑀢𑁄, 𑀢𑀢𑁆𑀣 ‘‘𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸’’𑀢𑀺 𑀦𑀸𑀫𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 ‘‘𑀅𑀳𑁂𑀢𑀼𑀓𑀁 𑀲𑀳𑁂𑀢𑀼𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀦𑀸𑀫’’𑀦𑁆𑀢𑀺 𑀘 𑀇𑀤𑀁 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀧𑀦 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀁, 𑀲𑀳𑁂𑀢𑀼𑀓𑀁 𑀦𑀸𑀫’’𑀦𑁆𑀢𑀺 (𑀬𑀫. 𑁧.𑀫𑀽𑀮𑀬𑀫𑀓.𑁮𑁭) 𑀘 𑀧𑀸𑀞𑁄, 𑀢𑀢𑁆𑀣 𑀲𑀼𑀧𑀸𑀓𑀝𑀪𑀸𑀯𑀢𑁆𑀣𑀁 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀔𑀦𑁆𑀥𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨-𑁩. 𑀔𑀦𑁆𑀥𑀬𑀫𑀓𑁂 ¶ 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀧𑀼𑀕𑁆𑀕𑀮𑀑𑀓𑀸𑀲𑀧𑀼𑀕𑁆𑀕𑀮𑁄𑀓𑀸𑀲𑀯𑀲𑁂𑀦 𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀢𑁂𑀲𑀁 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸. 𑀢𑁂 𑀧𑀦 𑀔𑀦𑁆𑀥𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀤𑀲 𑀅𑀯𑀬𑀯𑀧𑀤𑀸𑀦𑀺. 𑀢𑀢𑁆𑀣 𑀬𑁄 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑀸𑀪𑀺𑀳𑀺𑀢𑁄 𑀥𑀫𑁆𑀫𑁄, 𑀓𑀺𑀁 𑀲𑁄 𑀏𑀯 𑀲𑀫𑀼𑀤𑀸𑀬𑀧𑀤𑀲𑁆𑀲 𑀅𑀢𑁆𑀣𑁄. 𑀬𑁄 𑀘 𑀲𑀫𑀼𑀤𑀸𑀬𑀧𑀤𑁂𑀦 𑀯𑀼𑀢𑁆𑀢𑁄, 𑀲𑁄 𑀏𑀯 𑀅𑀯𑀬𑀯𑀧𑀤𑀲𑁆𑀲𑀸𑀢𑀺 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀯𑀼𑀢𑁆𑀢𑁄 𑀏𑀓𑀤𑁂𑀲𑁄 𑀲𑀓𑀮𑁄 𑀯𑀸 𑀲𑀫𑀼𑀤𑀸𑀬𑀧𑀤𑀸𑀦𑀁 𑀅𑀢𑁆𑀣𑁄, 𑀲𑀫𑀼𑀤𑀸𑀬𑀧𑀤𑁂𑀳𑀺 𑀧𑀦 𑀯𑀼𑀢𑁆𑀢𑁄 𑀏𑀓𑀦𑁆𑀢𑁂𑀦 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑀸𑀦𑀁 𑀅𑀢𑁆𑀣𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀯𑀸𑀭𑁄 𑀯𑀼𑀢𑁆𑀢𑁄.

𑀧𑀼𑀦 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀁 𑀲𑀫𑀸𑀲𑀧𑀤𑀸𑀦𑀁 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀧𑀥𑀸𑀦𑀪𑀽𑀢𑀲𑁆𑀲 𑀔𑀦𑁆𑀥𑀧𑀤𑀲𑁆𑀲 𑀯𑁂𑀤𑀦𑀸𑀤𑀺𑀉𑀧𑀧𑀤𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄 𑀬𑀣𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 𑀭𑀽𑀧𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁄 𑀳𑁄𑀢𑀺 𑀭𑀽𑀧𑀲𑀤𑁆𑀤𑀲𑁆𑀲 𑀔𑀦𑁆𑀥𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄𑀢𑀺, 𑀏𑀯𑀁 𑀢𑀢𑁆𑀣 𑀧𑀥𑀸𑀦𑀪𑀽𑀢𑁂𑀦 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀳𑁄𑀢𑀺 𑀔𑀦𑁆𑀥𑀧𑀤𑁂𑀦 𑀯𑁂𑀤𑀦𑀸𑀤𑀺𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸𑀢𑀺 ¶ 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄 𑀓𑁄𑀘𑀺 𑀓𑁂𑀦𑀘𑀺 𑀲𑀫𑀼𑀤𑀸𑀬𑀧𑀤𑁂𑀦 𑀯𑀼𑀘𑁆𑀘𑀢𑀺, 𑀦 𑀲𑀩𑁆𑀩𑁄 𑀲𑀩𑁆𑀩𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 𑀭𑀽𑀧𑀸𑀤𑀺𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁄, 𑀔𑀦𑁆𑀥𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄, 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀢𑁂𑀦𑁂𑀢𑁆𑀣 𑀲𑀁𑀲𑀬𑁄 𑀳𑁄𑀢𑀺 𑁋 𑀓𑀺𑀁 𑀔𑀦𑁆𑀥𑀢𑁄 𑀅𑀜𑁆𑀜𑀫𑁆𑀧𑀺 𑀭𑀽𑀧𑀁 𑀅𑀢𑁆𑀣𑀺, 𑀬𑀢𑁄 𑀯𑀺𑀦𑀺𑀯𑀢𑁆𑀢𑀁 𑀭𑀽𑀧𑀁 𑀔𑀦𑁆𑀥𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀯 𑀔𑀦𑁆𑀥𑀸 𑀓𑀺𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑁂𑀦 𑀭𑀽𑀧𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺, 𑀓𑀺𑀁 𑀧𑀦 𑀢𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀁 𑀭𑀽𑀧𑀦𑁆𑀢𑀺? 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀁 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸. 𑀦𑀺𑀤𑁆𑀤𑁂𑀲𑁂 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺. 𑀏𑀯𑀁 𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂 𑀦 𑀔𑀦𑁆𑀥𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀅𑀢𑁆𑀣𑀺, 𑀢𑁂𑀦𑁂𑀯 𑀘𑁂𑀢𑁂𑀦 𑀭𑀽𑀧𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀲𑀼𑀤𑁆𑀥𑁂𑀦 𑀔𑀦𑁆𑀥𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑁂, 𑀦 ¶ 𑀘 𑀲𑀩𑁆𑀩𑁂 𑀔𑀦𑁆𑀥𑀸 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑁂𑀦 𑀭𑀽𑀧𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀸, 𑀢𑁂𑀦𑁂𑀯 𑀢𑁂 𑀯𑀺𑀪𑀚𑀺𑀢𑀩𑁆𑀩𑀸, 𑀏𑀲 𑀦𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀯𑀼𑀢𑁆𑀢𑁄.

𑀢𑀢𑁄 ‘‘𑀭𑀽𑀧𑀁 𑀔𑀦𑁆𑀥𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀬𑀫𑀸𑀦𑁂 ‘‘𑀦 𑀓𑁂𑀯𑀮𑀁 𑀅𑀬𑀁 𑀔𑀦𑁆𑀥𑀲𑀤𑁆𑀤𑁄 𑀭𑀽𑀧𑀯𑀺𑀲𑁂𑀲𑀦𑁄𑀯, 𑀅𑀣 𑀔𑁄 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀦𑁄 𑀘𑀸’’𑀢𑀺 𑀭𑀽𑀧𑀲𑁆𑀲 𑀔𑀦𑁆𑀥𑀪𑀸𑀯𑀦𑀺𑀘𑁆𑀙𑀬𑀸𑀦𑀦𑁆𑀢𑀭𑀁 𑀔𑀦𑁆𑀥𑀸𑀦𑀁 𑀭𑀽𑀧𑀯𑀺𑀲𑁂𑀲𑀦𑀬𑁄𑀕𑁂 𑀘 𑀲𑀁𑀲𑀬𑁄 𑀳𑁄𑀢𑀺. 𑀢𑀢𑁆𑀣 𑀦 𑀲𑀩𑁆𑀩𑁂 𑀔𑀦𑁆𑀥𑀸 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀦𑀬𑀼𑀢𑁆𑀢𑀸, 𑀅𑀣 𑀔𑁄 𑀓𑁂𑀘𑀺 𑀓𑁂𑀦𑀘𑀺 𑀯𑀺𑀲𑁂𑀲𑀦𑁂𑀦 𑀬𑀼𑀜𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀬𑁂𑀲𑀁 𑀉𑀧𑁆𑀧𑀸𑀤𑀸𑀤𑀬𑁄 𑀯𑀢𑁆𑀢𑀩𑁆𑀩𑀸, 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀯𑀲𑁂𑀦 𑀢𑀦𑁆𑀦𑀺𑀘𑁆𑀙𑀬𑀢𑁆𑀣𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸𑀢𑀺 𑀏𑀢𑁆𑀣 𑀘𑀓𑁆𑀓𑀸𑀯𑀬𑀯𑀪𑀸𑀯𑀢𑁄 𑀘𑀓𑁆𑀓𑀸𑀦𑀻𑀢𑀺 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸𑀢𑀺. 𑀇𑀫𑀺𑀦𑀸 𑀳𑀺 𑀏𑀢𑁆𑀣 𑀅𑀢𑁆𑀣𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺 𑀬𑀣𑀸 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀫𑀽𑀮𑀧𑀤𑀁 𑀦𑀸𑀪𑀺𑀁 𑀓𑀢𑁆𑀯𑀸 ‘‘𑀔𑀦𑁆𑀥𑀸’’𑀢𑀺 𑀇𑀤𑀁 𑀦𑁂𑀫𑀺𑀁, ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀺 𑀅𑀭𑁂 𑀓𑀢𑁆𑀯𑀸 𑀘𑀓𑁆𑀓𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀦 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀦𑀢𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀤𑀻𑀲𑀼𑀧𑀺 𑀳𑀺 𑀳𑁂𑀝𑁆𑀞𑀺𑀫𑀁 𑀲𑁄𑀥𑁂𑀢𑁆𑀯𑀸𑀯 𑀧𑀸𑀞𑁄 𑀕𑀢𑁄, 𑀦 𑀫𑀡𑁆𑀟𑀮𑀲𑀫𑁆𑀩𑀦𑁆𑀥𑁂𑀦𑀸𑀢𑀺. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦𑀸𑀢𑀺 𑀲𑀼𑀤𑁆𑀥𑀔𑀦𑁆𑀥𑀮𑀸𑀪𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀔𑀦𑁆𑀥𑀯𑀺𑀲𑁂𑀲𑀦𑁂 𑀭𑀽𑀧𑀸𑀤𑀺𑀫𑁆𑀳𑀺 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀢𑀸𑀬 ¶ 𑀅𑀝𑁆𑀞𑀢𑁆𑀯𑀸 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑀲𑀗𑁆𑀔𑀸𑀢𑀁 𑀭𑀽𑀧𑀸𑀤𑀺𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀔𑀦𑁆𑀥𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑁆𑀯𑀸 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀣𑀲𑁆𑀲 𑀯𑀺𑀪𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁬. 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁…𑀧𑁂… 𑀭𑀽𑀧𑀸 𑀮𑁄𑀓𑁂…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀭𑀽𑀧𑀲𑀜𑁆𑀜𑀸…𑀧𑁂… 𑀭𑀽𑀧𑀲𑀜𑁆𑀘𑁂𑀢𑀦𑀸…𑀧𑁂… 𑀭𑀽𑀧𑀢𑀡𑁆𑀳𑀸…𑀧𑁂… 𑀭𑀽𑀧𑀯𑀺𑀢𑀓𑁆𑀓𑁄…𑀧𑁂… 𑀭𑀽𑀧𑀯𑀺𑀘𑀸𑀭𑁄’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩) 𑀏𑀯𑀁 𑀯𑀼𑀢𑁆𑀢𑀁 𑀢𑀡𑁆𑀳𑀸𑀯𑀢𑁆𑀣𑀼𑀪𑀽𑀢𑀁 ¶ 𑀢𑁂𑀪𑀽𑀫𑀓𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑀁 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀁, 𑀢𑀁 𑀏𑀓𑀤𑁂𑀲𑁂𑀦 𑀭𑀽𑀧𑀓𑁆𑀔𑀦𑁆𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀧𑀺𑀬𑀲𑀪𑀸𑀯𑀢𑀸𑀬 𑀯𑀸 𑀭𑀽𑀧𑀓𑁆𑀔𑀦𑁆𑀥𑁄 𑀧𑀺𑀬𑀭𑀽𑀧𑁂 𑀧𑀯𑀺𑀲𑀢𑀺, 𑀦 𑀭𑀼𑀧𑁆𑀧𑀦𑀲𑀪𑀸𑀯𑁂𑀦𑀸𑀢𑀺 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀬𑀫𑀓𑁂 𑀢𑀸𑀯 𑀤𑀺𑀝𑁆𑀞𑀺𑀲𑀜𑁆𑀜𑀸𑀢𑀺 ‘‘𑀯𑀺𑀲𑁂𑀲𑁄’’𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀤𑀺𑀝𑁆𑀞𑀺 𑀏𑀯 𑀲𑀜𑁆𑀜𑀸 𑀤𑀺𑀝𑁆𑀞𑀺𑀲𑀜𑁆𑀜𑀸. ‘‘𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄’’𑀢𑀺 (𑀲𑀼. 𑀦𑀺. 𑁭𑁯𑁮), ‘‘𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸’’𑀢𑀺 (𑀲𑀼. 𑀦𑀺. 𑁮𑁫𑁩) 𑀘 𑀏𑀯𑀫𑀸𑀤𑀻𑀲𑀼 𑀳𑀺 𑀤𑀺𑀝𑁆𑀞𑀺 𑀘 ‘‘𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸𑀢𑀺.

𑁨𑁮. ‘‘𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀪𑀸𑀯𑁄𑀢𑀺 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀅𑀜𑁆𑀜𑀥𑀫𑁆𑀫𑀲𑀩𑁆𑀪𑀸𑀯𑁄 𑀏𑀯𑁂𑀢𑁆𑀣 𑀧𑀫𑀸𑀡𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀦𑀸𑀬𑀢𑀦𑀸 𑀦 𑀲𑁄𑀢𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀻𑀢𑀺.

𑁩𑁯. 𑀭𑀽𑀧𑀢𑁄 𑀅𑀜𑁆𑀜𑁂 𑀯𑁂𑀤𑀦𑀸𑀤𑀬𑁄𑀢𑀺 𑀏𑀢𑁆𑀣 𑀮𑁄𑀓𑀼𑀢𑁆𑀢𑀭𑀸 𑀯𑁂𑀤𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀢𑁂 𑀳𑀺 𑀧𑀺𑀬𑀭𑀽𑀧𑀸 𑀘 𑀲𑀸𑀢𑀭𑀽𑀧𑀸 𑀘 𑀦 𑀳𑁄𑀦𑁆𑀢𑀺 𑀢𑀡𑁆𑀳𑀸𑀬 𑀅𑀦𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀭𑀽𑀧𑀢𑁄 𑀅𑀜𑁆𑀜𑁂 𑀳𑁄𑀦𑁆𑀢𑀻𑀢𑀺. 𑀭𑀽𑀧𑀜𑁆𑀘 𑀔𑀦𑁆𑀥𑁂 𑀘 ¶ 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀢𑀺 𑀇𑀤𑀫𑁆𑀧𑀺 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀦-𑀲𑀤𑁆𑀤𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑀓𑁆𑀔𑀼𑀜𑁆𑀘 𑀆𑀬𑀢𑀦𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀘𑀓𑁆𑀔𑀼 𑀦 𑀘 𑀆𑀬𑀢𑀦𑀸’’𑀢𑀺𑀆𑀤𑀺𑀁 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁫) 𑀯𑀓𑁆𑀔𑀢𑀺. 𑀦 𑀳𑀺 𑀢𑀢𑁆𑀣 𑀅𑀯𑀲𑁂𑀲𑀕𑁆𑀕𑀳𑀡𑁂𑀦 𑀕𑀬𑁆𑀳𑀫𑀸𑀦𑀁 𑀓𑀜𑁆𑀘𑀺 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸. 𑀯𑀓𑁆𑀔𑀢𑀺 𑀳𑀺 ‘‘𑀥𑀫𑁆𑀫𑁄 𑀆𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁬). 𑀢𑀡𑁆𑀳𑀸𑀯𑀢𑁆𑀣𑀼 𑀘 𑀦 𑀢𑀁 𑀲𑀺𑀬𑀸. 𑀬𑀤𑀺 𑀲𑀺𑀬𑀸, 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀪𑀸𑀯𑀢𑁄 𑀭𑀽𑀧𑀁 𑀲𑀺𑀬𑀸 ‘‘𑀭𑀽𑀧𑀁 𑀔𑀦𑁆𑀥𑁄𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁧.𑀔𑀦𑁆𑀥𑀬𑀫𑀓.𑁪𑁦) 𑀯𑀘𑀦𑀢𑁄 𑀔𑀦𑁆𑀥𑁄 𑀘𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀯𑀺𑀚𑁆𑀚𑀫𑀸𑀦𑀁 𑀉𑀧𑀸𑀤𑀸𑀬 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀕𑁆𑀕𑀳𑀡𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀅𑀯𑀲𑁂𑀲𑀸𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁫𑁦-𑁨𑁦𑁫. 𑀧𑀯𑀢𑁆𑀢𑀺𑀯𑀸𑀭𑁂 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑀸𑀦𑀺 𑀧𑀘𑁆𑀙𑀺𑀫𑁂𑀦𑁂𑀯 𑀲𑀳 𑀬𑁄𑀚𑁂𑀢𑁆𑀯𑀸 𑀢𑀻𑀡𑀺 𑀤𑁆𑀯𑁂 𑀏𑀓𑀜𑁆𑀘 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀧𑀼𑀭𑀺𑀫𑁂𑀦. 𑀓𑀲𑁆𑀫𑀸? 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀯𑀸𑀭𑁂𑀲𑀼 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄. 𑀧𑀼𑀭𑀺𑀫𑀲𑁆𑀲 𑀳𑀺 𑀧𑀘𑁆𑀙𑀺𑀫𑁂𑀦 𑀬𑁄𑀚𑀺𑀢𑀬𑀫𑀓𑀫𑁂𑀯 𑀧𑀘𑁆𑀙𑀺𑀫𑀲𑁆𑀲 𑀧𑀼𑀭𑀺𑀫𑁂𑀦 𑀬𑁄𑀚𑀦𑀸𑀬 𑀧𑀼𑀘𑁆𑀙𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀘𑁆𑀘𑁂𑀬𑁆𑀬, 𑀅𑀢𑁆𑀣𑁂 𑀧𑀦 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑁂𑀦 𑀢𑀣𑀸 𑀬𑁄𑀚𑀦𑀸 𑀦 𑀓𑀢𑀸𑀢𑀺. 𑀓𑀸𑀮𑀪𑁂𑀤𑀸 𑀧𑀦𑁂𑀢𑁆𑀣 𑀙 𑀏𑀯 𑀯𑀼𑀢𑁆𑀢𑀸. 𑀅𑀢𑀻𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀦𑀸𑀕𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀦𑀸𑀕𑀢𑁂𑀦𑀸𑀢𑀻𑀢𑁄𑀢𑀺 𑀏𑀢𑁂 𑀧𑀦 𑀢𑀬𑁄 𑀬𑀣𑀸𑀤𑀲𑁆𑀲𑀺𑀢𑀸 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑀸 𑀏𑀯 𑀢𑀬𑁄, 𑀦 𑀯𑀺𑀲𑀼𑀁 𑀯𑀺𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸. 𑀢𑀢𑁆𑀣 𑀢𑀢𑁆𑀣 𑀳𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀳𑀺 𑀅𑀢𑀻𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀬𑁄 𑀓𑀸𑀮𑀪𑁂𑀤𑀸 𑀤𑀲𑁆𑀲𑀺𑀢𑀸, 𑀢𑁂𑀦𑁂𑀯 𑀘 𑀦𑀬𑁂𑀦 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁. 𑀢𑁂𑀦𑁂𑀯 𑀳𑀺 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀘 𑀦 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀲𑁆𑀲 𑀔𑀦𑁆𑀥𑀲𑁆𑀲 𑀧𑀼𑀭𑀺𑀫𑀧𑀼𑀭𑀺𑀫𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀕𑀳𑀺𑀢𑀦𑀺𑀬𑀸𑀫𑁂𑀦 𑀲𑀼𑀔𑀕𑁆𑀕𑀳𑀡𑀢𑁆𑀣𑀫𑁆𑀧𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀻𑀢𑀺.

𑀇𑀫𑀺𑀦𑀸𑀬𑁂𑀯 ¶ 𑀘 𑀮𑀓𑁆𑀔𑀡𑁂𑀦𑀸𑀢𑀺𑀆𑀤𑀺𑀦𑀸 𑀬𑁂𑀦 𑀓𑀸𑀭𑀡𑁂𑀦 ‘‘𑀧𑀼𑀭𑁂𑀧𑀜𑁆𑀳𑁄’’𑀢𑀺 𑀘 ‘‘𑀧𑀘𑁆𑀙𑀸𑀧𑀜𑁆𑀳𑁄’’𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺, 𑀲𑁄 𑀧𑀭𑀺𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁆𑀣𑀲𑀗𑁆𑀕𑀡𑁆𑀳𑀦𑀢𑁄 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀦𑀸𑀫. 𑀢𑀁𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀦 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂𑀦 𑀲𑀤𑀺𑀲𑀢𑁆𑀣𑀢𑀸𑀬 𑀧𑀼𑀭𑁂𑀧𑀜𑁆𑀳𑁄, 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀲𑀤𑀺𑀲𑀢𑁆𑀣𑀢𑀸𑀬 ‘‘𑀧𑀘𑁆𑀙𑀸𑀧𑀜𑁆𑀳𑁄’’𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀁. 𑀲𑀤𑀺𑀲𑀢𑁆𑀣𑀢𑀸 𑀘 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀧𑀤𑀯𑀺𑀲𑁂𑀲𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀓𑁂𑀦 𑀧𑀤𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑀦𑀺𑀭𑁄𑀥𑀮𑀸𑀪𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀧𑀼𑀭𑁂𑀧𑀜𑁆𑀳𑁂 𑀤𑀝𑁆𑀞𑀩𑁆𑀩𑀸. 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀲𑁆𑀲 𑀯𑀸 𑀔𑀦𑁆𑀥𑀲𑁆𑀲 𑀅𑀦𑀼𑀜𑁆𑀜𑀸𑀢𑀯𑀲𑁂𑀦 𑀧𑀼𑀭𑁂𑀧𑀜𑁆𑀳𑁄 𑀯𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀁.

𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀧𑀦𑀁 𑀧𑀝𑀺𑀓𑁆𑀔𑁂𑀧𑁄, 𑀲𑀁𑀲𑀬𑀢𑁆𑀣𑀦𑀺𑀯𑀸𑀭𑀡𑀁 𑀧𑀝𑀺𑀲𑁂𑀥𑁄𑀢𑀺 𑀅𑀬𑀁 𑀧𑀝𑀺𑀓𑁆𑀔𑁂𑀧𑀧𑀝𑀺𑀲𑁂𑀥𑀸𑀦𑀁 𑀯𑀺𑀲𑁂𑀲𑁄. 𑀧𑀸𑀴𑀺𑀧𑀤𑀫𑁂𑀯 𑀳𑀼𑀢𑁆𑀯𑀸𑀢𑀺 𑀧𑀼𑀘𑁆𑀙𑀸𑀧𑀸𑀴𑀺𑀬𑀸 ‘‘𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀬𑀁 𑀧𑀤𑀁 𑀯𑀼𑀢𑁆𑀢𑀁, 𑀦-𑀓𑀸𑀭𑀯𑀺𑀭𑀳𑀺𑀢𑀁 𑀢𑀤𑁂𑀯 𑀧𑀤𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀧𑀝𑀺𑀲𑁂𑀥𑀲𑁆𑀲 𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀸𑀴𑀺𑀕𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀉𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀸𑀦𑀫𑁂𑀯 𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀝𑀺𑀲𑁂𑀥𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀦𑁆𑀦𑀁 ¶ 𑀧𑀜𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑁂𑀧𑁄 𑀢𑀤𑁂𑀓𑀤𑁂𑀲𑀧𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀏𑀯 𑀳𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀘 𑀯𑀺𑀲𑁆𑀲𑀚𑁆𑀚𑀦𑀁 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺.

𑀓𑀺𑀁 𑀦𑀼 𑀲𑀓𑁆𑀓𑀸 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀧𑀸𑀴𑀺𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀸𑀤𑀺𑀢𑁄 𑀅𑀜𑁆𑀜𑁄 𑀓𑀺𑀁 𑀦𑀼 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀜𑁆𑀜𑀲𑁆𑀲 𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀏𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀻𑀲𑀼 𑀏𑀓𑀪𑀽𑀫𑀺𑀬𑀫𑁆𑀧𑀺 𑀤𑀼𑀢𑀺𑀬𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀜𑀸𑀧𑀺𑀢𑀁 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 𑀳𑀺 𑀬𑀸𑀯 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀓𑀫𑁆𑀫𑀚𑀲𑀦𑁆𑀢𑀸𑀦𑀁 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁂 𑀓𑀼𑀲𑀮𑀸𑀤𑀻𑀦𑀜𑁆𑀘 𑀧𑀯𑀢𑁆𑀢𑀺 𑀳𑁄𑀢𑀺, 𑀯𑁄𑀘𑁆𑀙𑀺𑀦𑁆𑀦𑁂 𑀘 𑀅𑀧𑁆𑀧𑀯𑀢𑁆𑀢𑀻𑀢𑀺 𑀢𑁂𑀦𑁂𑀯 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀢𑀲𑁆𑀲 𑀏𑀓𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀉𑀧𑁆𑀧𑀸𑀤𑀢𑁄 𑀬𑀸𑀯 𑀘𑀼𑀢𑀺𑀦𑀺𑀭𑁄𑀥𑁄, 𑀢𑀸𑀯 𑀅𑀢𑀻𑀢𑀢𑀸 𑀦𑀢𑁆𑀣𑀺, 𑀦 𑀘 𑀢𑀢𑁄 𑀧𑀼𑀩𑁆𑀩𑁂 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀫𑁆𑀫𑀚𑀲𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀔𑀦𑁆𑀥𑀤𑁆𑀯𑀬𑀫𑁆𑀧𑀺 ‘‘𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀏𑀢𑀸𑀬 𑀧𑀸𑀴𑀺𑀬𑀸 ¶ 𑀲𑀓𑀮𑁂𑀧𑀺 𑀲𑀼𑀤𑁆𑀥𑀸𑀯𑀸𑀲𑁂 𑀤𑀼𑀢𑀺𑀬𑀸 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀉𑀤𑁆𑀥𑀁𑀲𑁄𑀢𑀧𑀸𑀴𑀺𑀲𑀩𑁆𑀪𑀸𑀯𑀸. 𑀤𑁆𑀯𑁂𑀧𑀺 𑀳𑀺 𑀧𑀸𑀴𑀺𑀬𑁄 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀢𑀺.

‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀺𑀲𑁂𑀲𑀺𑀢𑀸 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀲𑀦𑁆𑀢𑀻𑀢𑀺 𑀢𑁂 𑀏𑀯 𑀕𑀳𑁂𑀢𑁆𑀯𑀸 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑁂 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀚𑁆𑀚𑀺𑀢𑀸, 𑀢𑁂 𑀢𑀢𑁄 𑀧𑀜𑁆𑀘𑀯𑁄𑀓𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁂𑀲𑀁 𑀧𑀼𑀦 𑀅𑀲𑀜𑁆𑀜𑁂 𑀉𑀧𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀅𑀢𑁆𑀣𑀻𑀢𑀺 𑀢𑁂 𑀲𑀦𑁆𑀥𑀸𑀬𑀸𑀳 𑁋 ‘‘𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 (𑀬𑀫. 𑁧.𑀔𑀦𑁆𑀥𑀬𑀫𑀓.𑁬𑁫). 𑀏𑀢𑁆𑀣 𑀓𑀺𑀁 𑀧𑀜𑁆𑀘𑀯𑁄𑀓𑀸𑀭𑀸𑀤𑀺𑀪𑀸𑀯𑁄 𑀯𑀺𑀬 𑀧𑀘𑁆𑀙𑀺𑀫𑀪𑀯𑁄𑀧𑀺 𑀓𑁄𑀘𑀺 𑀅𑀢𑁆𑀣𑀺, 𑀬𑀢𑁆𑀣 𑀢𑁂𑀲𑀫𑀦𑀼𑀧𑁆𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺 𑀧𑀜𑁆𑀘𑀯𑁄𑀓𑀸𑀭𑀸𑀤𑀺𑀪𑀯𑁂𑀲𑁆𑀯𑁂𑀯 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀞𑀺𑀢𑀸𑀦𑀁 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀇𑀢𑀭𑀸𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑀜𑁆𑀘 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀳𑀸𑀢𑀺.

‘‘𑀲𑀼𑀤𑁆𑀥𑀸𑀯𑀸𑀲𑁂 ¶ 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦’’𑀦𑁆𑀢𑀺 𑀇𑀤𑀁 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀢𑀁𑀢𑀁𑀪𑀽𑀫𑀺𑀬𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀜𑁆𑀳𑀺 𑀢𑁂𑀲𑀁 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺. 𑀬𑀣𑀸 𑀧𑀦 ‘‘𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀫𑁆𑀳𑀺 𑀧𑀯𑀢𑁆𑀢𑀢𑀺, 𑀦 𑀏𑀯𑀁 ‘‘𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀘𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑁂 𑀅𑀢𑀻𑀢𑁂 𑀏𑀯, 𑀢𑀲𑁆𑀫𑀸 ‘‘𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁 𑀉𑀧𑁆𑀧𑀦𑁆𑀦𑀲𑀦𑁆𑀢𑀸𑀦𑀲𑁆𑀲 𑀅𑀯𑀺𑀕𑀢𑀢𑁆𑀢𑀸. 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄𑀢𑀺 𑀑𑀓𑀸𑀲𑀲𑁆𑀲 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀑𑀓𑀸𑀲𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀫𑁆𑀧𑀺 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀲𑀁𑀓𑀺𑀡𑁆𑀡𑀢𑀸 𑀳𑁄𑀢𑀻𑀢𑀺 ‘‘𑀬𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁨𑁦𑁬-𑁨𑁦𑁮. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 ¶ 𑀮𑀩𑁆𑀪𑀫𑀸𑀦𑁄𑀧𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀑𑀓𑀸𑀲𑀯𑀸𑀭𑀲𑁆𑀲 𑀅𑀮𑀸𑀪𑁂 𑀢𑀲𑁆𑀲𑀧𑀺 𑀅𑀮𑀸𑀪𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦, 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀜𑁆𑀜𑀸𑀯𑀘𑀦𑀢𑁄. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀧𑀺 𑀳𑀺 𑀑𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀜𑁆𑀜𑀸 𑀯𑀼𑀘𑁆𑀘𑀢𑀺, 𑀦 𑀑𑀓𑀸𑀲𑀲𑁆𑀲. 𑀑𑀓𑀸𑀲𑀯𑀸𑀭𑁄𑀧𑀺 𑀘 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀑𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀭𑀺𑀚𑀸𑀦𑀦𑀯𑀲𑁂𑀦 𑀯𑀼𑀘𑁆𑀘𑁂𑀬𑁆𑀬, 𑀢𑀲𑁆𑀫𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑀲𑁆𑀲𑁂𑀯 𑀮𑀩𑁆𑀪𑀫𑀸𑀦𑀢𑀸 𑀯𑀼𑀢𑁆𑀢𑀸, 𑀦 𑀑𑀓𑀸𑀲𑀯𑀸𑀭𑀲𑁆𑀲𑀸𑀢𑀺. 𑀢𑁂𑀦𑀸𑀳 𑁋 ‘‘𑀆𑀫𑀦𑁆𑀢𑀸…𑀧𑁂… 𑀲𑀺𑀬𑀸’’𑀢𑀺.

𑀢𑁂𑀦𑁂𑀯𑀸𑀢𑀺 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀢𑀺𑀡𑁆𑀡𑀁 𑀅𑀤𑁆𑀥𑀸𑀦𑀁 𑀮𑀸𑀪𑀢𑁄 𑀏𑀯, 𑀅𑀜𑁆𑀜𑀣𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀚𑀸𑀦𑀦𑀲𑁆𑀲 𑀅𑀪𑀸𑀯𑀸 ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀏𑀢𑁆𑀣 ‘‘𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸, ‘‘𑀆𑀫𑀦𑁆𑀢𑀸’’𑀢𑀺 𑀘 𑀓𑀢𑀦𑁆𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀧𑀭𑀺𑀜𑁆𑀜𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀏𑀯 𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺 𑀧𑀜𑁆𑀳𑁂 𑀧𑀼𑀣𑀼𑀚𑁆𑀚𑀦𑀁 𑀲𑀦𑁆𑀥𑀸𑀬 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀩𑁆𑀩𑀣𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. ‘‘𑀅𑀭𑀳𑀸 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺 𑀦𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣, 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀭𑀳𑀦𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀢𑁆𑀣𑀸’’𑀢𑀺 𑀧𑀦 𑀯𑀘𑀦𑁂𑀦 ‘‘𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑁂𑀦 𑀢𑀤𑀯𑀲𑁂𑀲𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀬𑀢𑀦𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁯. 𑀆𑀬𑀢𑀦𑀬𑀫𑀓𑀸𑀤𑀻𑀲𑀼 ¶ 𑀘 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀧𑀤𑀲𑁄𑀥𑀦𑀯𑀸𑀭𑀸𑀤𑀻𑀦𑀁 𑀯𑀘𑀦𑁂 𑀓𑀸𑀭𑀡𑀁 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑀸𑀤𑀲 𑀏𑀓𑀸𑀤𑀲 𑀓𑀢𑁆𑀯𑀸 𑀢𑁂𑀢𑁆𑀢𑀺𑀁𑀲𑀲𑀢𑀁 𑀬𑀫𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀕𑀡𑀦𑀸 𑀮𑀺𑀔𑀺𑀢𑀸, 𑀲𑀸 𑀢𑀣𑀸 𑀦 𑀳𑁄𑀢𑀺. ‘‘𑀤𑁆𑀯𑀢𑁆𑀢𑀺𑀁𑀲𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑀢𑁆𑀣 𑀮𑀺𑀔𑀺𑀢𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧𑁦-𑁧𑁭. 𑀯𑀸𑀬𑀦𑀝𑁆𑀞𑁂𑀦𑀸𑀢𑀺 𑀧𑀲𑀸𑀭𑀡𑀝𑁆𑀞𑁂𑀦, 𑀧𑀸𑀓𑀝𑀪𑀸𑀯𑀝𑁆𑀞𑁂𑀦 𑀯𑀸. ‘‘𑀓𑀸𑀬𑁄 𑀥𑀫𑁆𑀫𑁄’’𑀢𑀺 𑀘 𑀯𑀼𑀘𑁆𑀘𑀫𑀸𑀦𑀁 𑀲𑀩𑁆𑀩𑀁 𑀲𑀲𑀪𑀸𑀯𑀁 𑀆𑀬𑀢𑀦𑀫𑁂𑀯𑀸𑀢𑀺 ‘‘𑀓𑀸𑀬𑁄 𑀆𑀬𑀢𑀦’’𑀦𑁆𑀢𑀺, ‘‘𑀥𑀫𑁆𑀫𑁄 𑀆𑀬𑀢𑀦’’𑀦𑁆𑀢𑀺 𑀘 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀯𑀘𑀦𑁂𑀦 𑀧𑀦 𑀥𑀫𑁆𑀫𑀯𑀘𑀦𑁂𑀦 𑀘 𑀅𑀯𑀼𑀘𑁆𑀘𑀫𑀸𑀦𑀁 𑀓𑀜𑁆𑀘𑀺 𑀲𑀲𑀪𑀸𑀯𑀁 𑀦𑀢𑁆𑀣𑀻𑀢𑀺 ‘‘𑀦 𑀓𑀸𑀬𑁄 𑀦𑀸𑀬𑀢𑀦𑀁, 𑀦 𑀥𑀫𑁆𑀫𑁄 𑀦𑀸𑀬𑀢𑀦’’𑀦𑁆𑀢𑀺 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑁄

𑁧. 𑀉𑀧𑁆𑀧𑀸𑀤𑀯𑀸𑀭𑀯𑀡𑁆𑀡𑀦𑀸

𑁧𑁮-𑁨𑁧. 𑀧𑀯𑀢𑁆𑀢𑀺𑀯𑀸𑀭𑁂 ¶ 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑀸𑀦𑀺 𑀏𑀓𑀸𑀤𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀯𑀲𑁂𑀦 𑀉𑀧𑀸𑀤𑀺𑀦𑁆𑀦𑀧𑀯𑀢𑁆𑀢𑀲𑁆𑀲 ¶ 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀘𑀦𑁂 𑀏𑀢𑀲𑁆𑀫𑀺𑀁 𑀅𑀮𑀩𑁆𑀪𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀲𑀤𑁆𑀤𑀸𑀬𑀢𑀦𑁂𑀦 𑀲𑀤𑁆𑀥𑀺𑀁 𑀬𑀫𑀓𑀁 𑀧𑀼𑀘𑁆𑀙𑀸𑀫𑀢𑁆𑀢𑀮𑀸𑀪𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀲𑀝𑁆𑀞𑀺 𑀬𑀫𑀓𑀸𑀦𑀻𑀢𑀺 𑀏𑀢𑁆𑀣 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀭𑀽𑀧𑀸𑀬𑀢𑀦𑀫𑀽𑀮𑀓𑁂𑀲𑀼 𑀏𑀓𑁂𑀓𑀁 𑀲𑀤𑁆𑀤𑀸𑀬𑀢𑀦𑀫𑀽𑀮𑀓𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀸𑀤𑀲 𑀬𑀫𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀳𑀸𑀧𑁂𑀢𑀩𑁆𑀩𑀸𑀦𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀬𑀫𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦𑀢𑁆𑀣𑀻’’𑀢𑀺 (𑀬𑀫. 𑀅𑀝𑁆𑀞. 𑀆𑀬𑀢𑀦𑀬𑀫𑀓 𑁧𑁮-𑁨𑁧).

𑀤𑀼𑀢𑀺𑀬𑀁 𑀓𑀺𑀜𑁆𑀘𑀸𑀧𑀺 𑀧𑀞𑀫𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺𑀆𑀤𑀺 𑀧𑀼𑀕𑁆𑀕𑀮𑀯𑀸𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀑𑀓𑀸𑀲𑀯𑀸𑀭𑁂 𑀧𑀦 𑀅𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀢𑀁 𑀲𑀩𑁆𑀩𑀢𑁆𑀣 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀜𑀸𑀧𑁂𑀢𑀼𑀁 𑀧𑀼𑀕𑁆𑀕𑀮𑀯𑀸𑀭𑁂𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀢𑀻𑀡𑀺 𑀬𑀫𑀓𑀸𑀦𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀭𑀽𑀧𑀸𑀯𑀘𑀭𑀲𑀢𑁆𑀢𑁂 𑀲𑀦𑁆𑀥𑀸𑀬 ‘‘𑀲𑀘𑀓𑁆𑀔𑀼𑀓𑀸𑀦𑀁 𑀅𑀕𑀦𑁆𑀥𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀯𑀺𑀭𑀢𑁆𑀢𑀓𑀸𑀫𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀩𑀻𑀚𑀲𑁆𑀲 𑀏𑀯𑀁𑀲𑀪𑀸𑀯𑀢𑁆𑀢𑀸 𑀖𑀸𑀦𑀸𑀤𑀻𑀦𑀺 𑀕𑀦𑁆𑀥𑀸𑀤𑀬𑁄 𑀘 𑀦 𑀲𑀦𑁆𑀢𑀻𑀢𑀺. 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸𑀢𑀺 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂𑀲𑀼 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀢𑀢𑁆𑀣 ‘‘𑀲𑀘𑀓𑁆𑀔𑀼𑀓𑀸𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀁 𑀧𑀯𑀢𑁆𑀢𑀁, 𑀇𑀥 𑀧𑀦 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 ‘‘𑀬𑀲𑁆𑀲 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀺𑀯𑁆𑀳𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀢𑀺? 𑀲𑀘𑁆𑀘𑀁, 𑀬𑀣𑀸 𑀧𑀦 𑀢𑀢𑁆𑀣 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀬𑀫𑀓𑀸𑀦𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀏𑀯𑀫𑀺𑀥𑀸𑀧𑀺 𑀚𑀺𑀯𑁆𑀳𑀸𑀓𑀆𑀬𑀸𑀬𑀢𑀦𑀬𑀫𑀓𑀸𑀦𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸 𑀧𑀸𑀴𑀺𑀬𑀁 𑀅𑀦𑀸𑀭𑀼𑀴𑁆𑀳𑀢𑀸𑀬 𑀓𑀸𑀭𑀡𑀦𑁆𑀢𑀺. 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀧𑀦 𑀕𑀳𑀺𑀢𑀁 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑀸𑀦𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀓𑀸𑀦𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦𑁂𑀯 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸’’𑀢𑀺 𑀆𑀳. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸 𑀘𑁂𑀢𑁆𑀣 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 𑀬𑁂𑀪𑀼𑀬𑁆𑀬𑀢𑀸𑀬 𑀤𑀝𑁆𑀞𑀩𑁆𑀩𑀸. 𑀢𑁂𑀲𑀼 𑀳𑀺 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀬𑀫𑀓𑁂𑀲𑀼 𑀢𑀺𑀡𑁆𑀡𑀁 𑀧𑀼𑀘𑁆𑀙𑀸𑀦𑀁 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁 ¶ , 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 ‘‘𑀲𑀓𑀸𑀬𑀓𑀸𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸𑀢𑀺.

𑀅𑀣 𑀯𑀸 𑀬𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑀸𑀦𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀺𑀬𑀫𑀓𑀸𑀦𑀁 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀢𑀻𑀲𑀼 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑀸𑀦𑀼𑀚𑀸𑀦𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀧𑀼𑀩𑁆𑀩𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀖𑀸𑀦𑀸𑀬𑀢𑀦𑀫𑀽𑀮𑀓𑀁 𑀚𑀺𑀯𑁆𑀳𑀸𑀬𑀢𑀦𑀬𑀫𑀓𑀁 ¶ 𑀅𑀧𑀼𑀩𑁆𑀩𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀧𑀸𑀴𑀺𑀁 𑀅𑀦𑀸𑀭𑀼𑀴𑁆𑀳𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀓𑀸𑀬𑀸𑀬𑀢𑀦𑀬𑀫𑀓𑀁 𑀧𑀦 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸, 𑀲𑀸 𑀘 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂𑀲𑀼 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸, 𑀢𑀲𑁆𑀫𑀸 𑀬𑀲𑁆𑀲𑀸 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀲𑀸 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀢𑀁𑀲𑁂𑀲𑀸𑀦𑀺 𑀧𑀸𑀴𑀺𑀁 𑀅𑀦𑀸𑀭𑀼𑀴𑁆𑀳𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀢𑀺 𑀇𑀤𑀁 𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑀢𑀸𑀲𑀸𑀫𑀜𑁆𑀜𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀓𑀸𑀭𑀡𑀲𑀸𑀫𑀜𑁆𑀜𑁂𑀦. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀸𑀦𑀁 𑀧𑀦 𑀅𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀦𑀁 𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀘 𑀆𑀬𑀢𑀦𑀧𑀸𑀭𑀺𑀧𑀽𑀭𑀺𑀓𑀸𑀮𑁂 𑀲𑀳𑀘𑀸𑀭𑀺𑀢𑀸𑀬 𑀅𑀯𑀺𑀲𑁂𑀲𑀢𑁆𑀢𑀸 𑀘 𑀅𑀧𑁆𑀧𑀯𑀺𑀲𑁂𑀲𑀢𑁆𑀢𑀸 𑀘 𑀏𑀓𑀲𑁆𑀫𑀺𑀁 𑀖𑀸𑀦𑀸𑀬𑀢𑀦𑀬𑀫𑀓𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀇𑀢𑀭𑀸𑀦𑀺 𑀤𑁆𑀯𑁂, 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 𑀘 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀇𑀢𑀭𑀤𑁆𑀯𑀬𑀫𑀽𑀮𑀓𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 ‘‘𑀬𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀫𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑀺𑀲𑁆𑀲𑀸 𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑁂𑀳𑀺 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀸𑀬𑀢𑀦𑀫𑀽𑀮𑀓𑁂𑀲𑀼 𑀳𑀺 𑀫𑀦𑀸𑀬𑀢𑀦𑀬𑀫𑀓𑁂 𑀆𑀤𑀺𑀧𑀼𑀘𑁆𑀙𑀸𑀬 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀬𑀫𑀓𑁂𑀲𑀼 𑀆𑀤𑀺𑀧𑀼𑀘𑁆𑀙𑀸𑀦𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸 𑀬𑀫𑀓𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑀦𑁂 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀧𑀼𑀘𑁆𑀙𑀸𑀦𑀜𑁆𑀳𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀓𑀸𑀢𑀩𑁆𑀩𑀁, 𑀆𑀤𑀺𑀧𑀼𑀘𑁆𑀙𑀸𑀦𑀜𑁆𑀘 𑀦 𑀓𑀸𑀢𑀩𑁆𑀩𑀦𑁆𑀢𑀺.

𑀳𑁂𑀝𑁆𑀞𑀺𑀫𑁂𑀳𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸𑀢𑀺 𑀏𑀢𑁆𑀣 𑀕𑀦𑁆𑀥𑀸𑀬𑀢𑀦𑀫𑀽𑀮𑀓𑀸𑀦𑀁 𑀭𑀲𑀨𑁄𑀝𑁆𑀞𑀩𑁆𑀩𑀬𑀫𑀓𑀸𑀦𑀁 𑀭𑀲𑀸𑀬𑀢𑀦𑀫𑀽𑀮𑀓𑀲𑁆𑀲 𑀘 𑀨𑁄𑀝𑁆𑀞𑀩𑁆𑀩𑀬𑀫𑀓𑀲𑁆𑀲 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑁂𑀲𑀁 𑀓𑀸𑀢𑀩𑁆𑀩𑀁, 𑀢𑁂𑀲𑀁 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀫𑀽𑀮𑀓𑀸𑀦𑀁 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀬𑀫𑀓𑀸𑀦𑀁 𑀘𑀓𑁆𑀔𑀸𑀤𑀺𑀧𑀜𑁆𑀘𑀸𑀬𑀢𑀦𑀫𑀽𑀮𑀓𑁂𑀳𑀺 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀬𑀫𑀓𑁂𑀳𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀸𑀬𑀢𑀦𑀸𑀤𑀺𑀫𑀽𑀮𑀓𑀸𑀦𑀺 𑀲𑀤𑁆𑀤𑀸𑀬𑀢𑀦𑀬𑀫𑀓𑀸𑀦𑀺 𑀲𑀤𑁆𑀤𑀸𑀬𑀢𑀦𑀫𑀽𑀮𑀓𑀸𑀦𑀺 𑀲𑀩𑁆𑀩𑀸𑀦𑀺 𑀅𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀅𑀮𑀩𑁆𑀪𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀢𑀸𑀤𑀲𑁆𑀲𑀦𑁂𑀦 ¶ 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀙𑀲𑀝𑁆𑀞𑀺 𑀬𑀫𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻’’𑀢𑀺.

𑀚𑀘𑁆𑀘𑀦𑁆𑀥𑀫𑁆𑀧𑀺 𑀚𑀘𑁆𑀘𑀩𑀥𑀺𑀭𑀫𑁆𑀧𑀻𑀢𑀺 𑀏𑀢𑁆𑀣 𑀘 𑀚𑀘𑁆𑀘𑀩𑀥𑀺𑀭𑀕𑁆𑀕𑀳𑀡𑁂𑀦 𑀚𑀘𑁆𑀘𑀦𑁆𑀥𑀩𑀥𑀺𑀭𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀖𑀸𑀦𑀓𑀸𑀦𑀁 𑀲𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀫𑁂𑀯 𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑀁 𑀯𑀼𑀢𑁆𑀢𑀦𑁆𑀢𑀺-𑀏𑀢𑀲𑁆𑀲 𑀧𑀭𑀢𑁄 𑀬𑁄𑀚𑁂𑀢𑁆𑀯𑀸 𑀬𑀣𑀸 ‘‘𑀲𑀖𑀸𑀦𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺 𑀇𑀤𑀁 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀏𑀯𑀁 ‘‘𑀲𑀖𑀸𑀦𑀓𑀸𑀦𑀁 𑀲𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺 𑀏𑀢𑀁. 𑀏𑀢𑀁 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀚𑀘𑁆𑀘𑀩𑀥𑀺𑀭𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑀸 𑀦 𑀯𑀸𑀭𑀺𑀢𑀸 𑀳𑁄𑀢𑀻𑀢𑀺.

𑁨𑁨-𑁨𑁫𑁪. 𑀬𑀢𑁆𑀣 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀁 𑀧𑀼𑀘𑁆𑀙𑀢𑀻𑀢𑀺 𑀦𑀺𑀬𑀫𑀢𑁄 𑀢𑀢𑁆𑀣 𑀘𑀓𑁆𑀔𑀼𑀲𑁄𑀢𑀸𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀯𑀤𑀢𑀺, 𑀑𑀓𑀸𑀲𑀯𑀸𑀭𑁂 𑀧𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸 𑀬𑀢𑁆𑀣 𑀓𑀸𑀫𑀥𑀸𑀢𑀼𑀬𑀁 𑀭𑀽𑀧𑀥𑀸𑀢𑀼𑀬𑀜𑁆𑀘 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀲𑁄𑀢𑀸𑀬𑀢𑀦𑀫𑁆𑀧𑀺 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀆𑀫𑀦𑁆𑀢𑀸’’𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁨𑁨) 𑀯𑀼𑀢𑁆𑀢𑀁.

‘‘𑀬𑀲𑁆𑀲 𑀯𑀸 𑀧𑀦 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀓𑀲𑁆𑀫𑀸 𑀧𑀝𑀺𑀜𑁆𑀜𑀸𑀢𑀁, 𑀦𑀦𑀼 𑀬𑁄 𑀕𑀩𑁆𑀪𑀲𑁂𑀬𑁆𑀬𑀓𑀪𑀸𑀯𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀢𑀲𑁆𑀲 𑀭𑀽𑀧𑀸𑀬𑀢𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀧𑀦 𑀘𑀓𑁆𑀔𑀸𑀬𑀢𑀦𑀦𑁆𑀢𑀺? 𑀬𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀤𑀯𑀢𑁆𑀣𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀬𑀢𑀦𑀼𑀧𑁆𑀧𑀸𑀤𑀢𑁄 𑀉𑀤𑁆𑀥𑀁 𑀘𑀓𑁆𑀔𑀸𑀬𑀢𑀦𑀲𑀦𑁆𑀢𑀸𑀦𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀬𑀫𑁆𑀧𑀺 𑀪𑀯𑀺𑀲𑁆𑀲𑀦𑁆𑀢𑀲𑁆𑀲 𑀧𑀝𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸. 𑀅𑀣 𑀓𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦 𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀦𑀦𑀼 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀏𑀓𑀸𑀤𑀲𑀫𑀲𑀢𑁆𑀢𑀸𑀳𑀸 𑀑𑀭𑀢𑁄 𑀞𑀺𑀢𑀲𑁆𑀲 𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑁄 𑀘 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀢𑀲𑁆𑀫𑀺𑀁 𑀪𑀯𑁂 𑀪𑀯𑀺𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀸𑀤𑀲𑁆𑀲 𑀅𑀦𑀸𑀕𑀢𑀪𑀸𑀯𑁂𑀦 𑀅𑀯𑀘𑀦𑀢𑁄. 𑀪𑀯𑀦𑁆𑀢𑀭𑁂 𑀳𑀺 𑀢𑀲𑁆𑀲 𑀢𑀲𑁆𑀲 𑀆𑀬𑀢𑀦𑀲𑀦𑁆𑀢𑀸𑀦𑀲𑁆𑀲 𑀬𑁄 𑀆𑀤𑀺𑀉𑀧𑁆𑀧𑀸𑀤𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀪𑀯𑀺𑀲𑁆𑀲𑀢𑀺, 𑀲𑁄 𑀅𑀦𑀸𑀕𑀢𑀼𑀧𑁆𑀧𑀸𑀤𑁄 𑀢𑀩𑁆𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑁄𑀕𑀥𑀢𑁆𑀢𑀸. 𑀦 𑀧𑀦 𑀬𑁄 𑀢𑀲𑁆𑀫𑀺𑀁𑀬𑁂𑀯 𑀪𑀯𑁂 𑀧𑀯𑀢𑁆𑀢𑁂 𑀪𑀯𑀺𑀲𑁆𑀲𑀢𑀺, 𑀲𑁄 𑀅𑀦𑀸𑀕𑀢𑀼𑀧𑁆𑀧𑀸𑀤𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑁄𑀕𑀥𑀢𑁆𑀢𑀸. 𑀅𑀤𑁆𑀥𑀸𑀯𑀲𑁂𑀦 𑀳𑁂𑀢𑁆𑀣 𑀓𑀫𑁆𑀫𑀚𑀧𑀯𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀸𑀮𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁩𑁬𑁮) ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺 ¶ , 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀇𑀢𑁆𑀣𑀻𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦𑀁, 𑀬𑀸 𑀘 𑀇𑀢𑁆𑀣𑀺𑀬𑁄 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀬𑀸 𑀘 𑀇𑀢𑁆𑀣𑀺𑀬𑁄 𑀏𑀢𑁂𑀦𑁂𑀯 𑀪𑀸𑀯𑁂𑀦 𑀓𑀢𑀺𑀘𑀺 𑀪𑀯𑁂 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑀸𑀲𑀁 𑀉𑀧𑀧𑀚𑁆𑀚𑀦𑁆𑀢𑀻𑀦𑀁 𑀢𑀸𑀲𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀸𑀲𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀢𑀲𑁆𑀫𑀺𑀁 𑀪𑀯𑁂 𑀧𑀯𑀢𑁆𑀢𑁂 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀲𑀩𑁆𑀪𑀸𑀯𑀸, 𑀪𑀯𑀦𑁆𑀢𑀭𑁂 𑀧𑀦 𑀆𑀤𑀺𑀉𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀦𑁄 𑀘 ¶ 𑀢𑀸𑀲𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀪𑀯𑀦𑁆𑀢𑀭𑁂 𑀳𑀺 𑀆𑀤𑀺𑀉𑀧𑁆𑀧𑀸𑀤𑀲𑁆𑀲 𑀅𑀦𑀸𑀕𑀢𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀢𑀺𑀘𑀺 𑀪𑀯𑁂 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀪𑀯𑀕𑁆𑀕𑀳𑀡𑀁 𑀓𑀢𑀦𑁆𑀢𑀺.

‘‘𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄 𑀚𑀸𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁮; 𑀯𑀺𑀪. 𑁨𑁩𑁫) 𑀯𑀘𑀦𑀢𑁄 𑀢𑀁𑀢𑀁𑀆𑀬𑀢𑀦𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀻𑀆𑀬𑀢𑀦𑀲𑁆𑀲 𑀬𑀸𑀯 𑀆𑀬𑀢𑀦𑀧𑀸𑀭𑀺𑀧𑀽𑀭𑀺, 𑀢𑀸𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀧𑀼𑀘𑁆𑀙𑀸𑀤𑁆𑀯𑀬𑀯𑀺𑀲𑁆𑀲𑀚𑁆𑀚𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀢𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀬𑁂 𑀘 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀲𑁄𑀢𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀬𑀫. 𑁧.𑀆𑀬𑀢𑀦𑀬𑀫𑀓.𑁯𑁫) 𑀕𑀩𑁆𑀪𑀲𑁂𑀬𑁆𑀬𑀓𑀸𑀧𑀺 𑀧𑀘𑁆𑀙𑀺𑀫𑀪𑀯𑀺𑀓𑀸𑀤𑀬𑁄 𑀉𑀧𑀧𑀚𑁆𑀚𑀦𑁆𑀢𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁬) ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀇𑀤𑀫𑁆𑀧𑀺 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀓𑀲𑁆𑀲 𑀓𑀫𑁆𑀫𑀲𑁆𑀲 𑀏𑀓𑀦𑁆𑀢𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀢𑁄 𑀕𑀩𑁆𑀪𑁂𑀧𑀺 𑀬𑀸𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺, 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑀢𑀸𑀬 𑀢𑀲𑁆𑀲𑀸 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀢𑁆𑀢𑀸.

𑀬𑀁 𑀧𑀦 ‘‘𑀬𑀲𑁆𑀲 𑀯𑀸 𑀧𑀦 𑀬𑀢𑁆𑀣 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀓𑀸𑀫𑀸𑀯𑀘𑀭𑀸 𑀘𑀯𑀦𑁆𑀢𑀸𑀦𑀁, 𑀅𑀖𑀸𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀭𑀽𑀧𑀸𑀯𑀘𑀭𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 ‘‘𑀅𑀖𑀸𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁭𑁬) 𑀯𑀼𑀢𑁆𑀢𑀁, 𑀢𑀁 𑀬𑁂 𑀏𑀓𑀸𑀤𑀲𑀫𑀲𑀢𑁆𑀢𑀸𑀳𑀸 𑀑𑀭𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀖𑀸𑀦𑀸𑀬𑀢𑀦𑀸𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀲𑁆𑀲 𑀬𑀢𑁆𑀣 𑀖𑀸𑀦𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 ¶ 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀓𑀸𑀫𑀸𑀯𑀘𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀅𑀖𑀸𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀸 𑀘𑀯𑀦𑁆𑀢𑀸𑀦𑀁, 𑀭𑀽𑀧𑀸𑀯𑀘𑀭𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀖𑀸𑀦𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀳𑀺 𑀏𑀢𑁆𑀣 ‘‘𑀅𑀖𑀸𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀸 𑀘𑀯𑀦𑁆𑀢𑀸𑀦’’𑀦𑁆𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁮𑁧) 𑀯𑀘𑀦𑀁 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀖𑀸𑀦𑀸𑀬𑀢𑀦𑁂 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀘𑀼𑀢𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀦 𑀳𑀺 𑀓𑀸𑀫𑀸𑀯𑀘𑀭𑁂 𑀕𑀩𑁆𑀪𑀲𑁂𑀬𑁆𑀬𑀓𑀢𑁄 𑀅𑀜𑁆𑀜𑁄 𑀅𑀖𑀸𑀦𑀓𑁄 𑀅𑀢𑁆𑀣𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 (𑀯𑀺𑀪. 𑁯𑁭𑁮 𑀆𑀤𑀬𑁄) ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸𑀢𑀺. 𑀅𑀣 𑀓𑀲𑁆𑀫𑀸 𑀑𑀧𑀧𑀸𑀢𑀺𑀓𑁂 𑀏𑀯 𑀲𑀦𑁆𑀥𑀸𑀬 𑀇𑀥, 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 𑀘 𑀬𑀣𑀸𑀤𑀲𑁆𑀲𑀺𑀢𑀸𑀲𑀼 𑀧𑀼𑀘𑁆𑀙𑀸𑀲𑀼 ¶ ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀬𑀫𑀓𑁂 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀢𑁆𑀣𑀲𑁆𑀲 𑀏𑀓𑀤𑁂𑀲𑁂 𑀲𑀁𑀲𑀬𑀢𑁆𑀣𑀲𑀫𑁆𑀪𑀯𑁂𑀦 𑀧𑀝𑀺𑀯𑀘𑀦𑀲𑁆𑀲 𑀅𑀓𑀭𑀡𑀢𑁄. 𑀪𑀺𑀦𑁆𑀤𑀺𑀢𑀩𑁆𑀩𑁂 𑀳𑀺 𑀦 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺. 𑀬𑀤𑀺 𑀲𑀺𑀬𑀸, 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦 𑀲𑀺𑀬𑀸𑀢𑀺. 𑀅𑀣 𑀓𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁬) 𑀇𑀫𑀺𑀦𑀸 ‘‘𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻’’𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺? 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑀢𑁆𑀢𑀸𑀦𑀁 𑀲𑀳𑁂𑀢𑀼𑀓𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀯𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀯𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁧𑁦𑁧𑁨).

𑀦𑀺𑀭𑁄𑀥𑀯𑀸𑀭𑁂 𑀅𑀦𑀸𑀕𑀢𑀓𑀸𑀮𑀪𑁂𑀤𑁂 𑀬𑀣𑀸 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁄 𑀅𑀦𑀸𑀕𑀢𑀪𑀸𑀯𑁂𑀦 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀯𑀼𑀢𑁆𑀢𑁄, 𑀏𑀯𑀁 𑀢𑀲𑁆𑀲𑁂𑀯 𑀓𑀫𑁆𑀫𑀚𑀲𑀦𑁆𑀢𑀸𑀦𑀲𑁆𑀲 𑀦𑀺𑀭𑁄𑀥𑁄 𑀅𑀦𑀸𑀕𑀢𑀪𑀸𑀯𑁂𑀦 𑀢𑀲𑁆𑀲 𑀉𑀧𑁆𑀧𑀸𑀤𑁂 𑀯𑀢𑁆𑀢𑀩𑁆𑀩𑁄𑀢𑀺 𑀲𑀩𑁆𑀩𑀢𑁆𑀣 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀏𑀯 𑀲𑁄 𑀢𑀣𑀸 𑀯𑀼𑀢𑁆𑀢𑁄, 𑀦 𑀉𑀧𑁆𑀧𑀦𑁆𑀦𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀦 𑀅𑀜𑁆𑀜𑀲𑁆𑀲 𑀅𑀦𑀸𑀕𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀦𑀺𑀭𑁄𑀥𑁄 𑀅𑀦𑀸𑀕𑀢𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁄, 𑀦 𑀢𑀲𑁆𑀲𑁂𑀯. 𑀢𑀲𑁆𑀲 𑀳𑀺 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀁 𑀦𑀺𑀭𑁄𑀥𑁄 𑀆𑀭𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀅𑀭𑀳𑀢𑀁 𑀧𑀯𑀢𑁆𑀢𑁂 𑀲𑁄𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀘 𑀪𑁂𑀤𑁂 𑀲𑀢𑀺𑀧𑀺 𑀅𑀦𑀸𑀕𑀢𑀓𑀸𑀮𑀸𑀫𑀲𑀦𑀯𑀲𑁂𑀦𑁂𑀯 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀲𑁄𑀢𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀤𑁆𑀯𑀬𑀁 𑀉𑀧𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀘 𑀉𑀧𑀧𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄 ¶ 𑀆𑀭𑀤𑁆𑀥𑁄 𑀦𑀸𑀫 𑀳𑁄𑀢𑀺, 𑀢𑀁𑀦𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦 𑀘𑀼𑀢𑀺𑀬𑀸 𑀦𑀺𑀭𑁄𑀥𑀯𑀘𑀦𑀁, 𑀢𑀲𑁆𑀫𑀸 𑀧𑀯𑀢𑁆𑀢𑁂 𑀦𑀺𑀭𑀼𑀤𑁆𑀥𑁂𑀧𑀺 𑀲𑀦𑁆𑀢𑀸𑀦𑁂𑀓𑀤𑁂𑀲𑁂 𑀅𑀦𑀺𑀭𑀼𑀤𑁆𑀥𑀁 𑀉𑀧𑀸𑀤𑀸𑀬 𑀅𑀦𑀺𑀝𑁆𑀞𑀺𑀢𑀦𑀺𑀭𑁄𑀥𑁄𑀢𑀺 𑀘𑀼𑀢𑀺𑀬𑀸𑀯 𑀢𑀲𑁆𑀲 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺, 𑀢𑁂𑀦𑁂𑀢𑁆𑀣𑀸𑀧𑀺 𑀘𑀼𑀢𑀺𑀦𑀺𑀭𑁄𑀥𑁂 𑀏𑀯 𑀘 𑀅𑀥𑀺𑀧𑁆𑀧𑁂𑀢𑁂 𑀬𑀜𑁆𑀘 𑀧𑀯𑀢𑁆𑀢𑁂 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀜𑁆𑀘 𑀦𑀺𑀝𑁆𑀞𑀸𑀦𑀯𑀲𑁂𑀦 𑀘𑀼𑀢𑀺𑀬𑀸 𑀏𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀬𑀼𑀢𑁆𑀢𑀁 𑀧𑀝𑀺𑀯𑀘𑀦𑀁. ‘‘𑀲𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀘 ‘‘𑀧𑀝𑀺𑀮𑀤𑁆𑀥𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺.

‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀅𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑁂𑀲𑀁 𑀲𑁄𑀢𑀸𑀬𑀢𑀦𑀁 ¶ 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀆𑀭𑀼𑀧𑁆𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀉𑀧𑀧𑀚𑁆𑀚𑀦𑁆𑀢𑀸, 𑀅𑀘𑀓𑁆𑀔𑀼𑀓𑀸 𑀘𑀯𑀦𑁆𑀢𑀸 𑀘 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂 𑀳𑀺 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂𑀦 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀢𑀤𑀧𑁂𑀓𑁆𑀔𑀢𑁆𑀢𑀸 𑀲𑀸𑀯𑀲𑁂𑀲𑀫𑀺𑀤𑀁 𑀲𑀩𑁆𑀩𑀯𑀘𑀦𑀁 𑀅𑀘𑀓𑁆𑀔𑀼𑀓𑀯𑀘𑀦𑀜𑁆𑀘𑀸𑀢𑀺. ‘‘𑀆𑀭𑀼𑀧𑁆𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀘 𑀅𑀭𑀽𑀧𑀢𑁄 𑀧𑀜𑁆𑀘𑀯𑁄𑀓𑀸𑀭𑀁 𑀅𑀕𑀘𑁆𑀙𑀦𑁆𑀢𑀸 𑀅𑀦𑀜𑁆𑀜𑀽𑀧𑀧𑀢𑁆𑀢𑀺𑀓𑀸𑀧𑀺 ‘‘𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸’’𑀇𑀘𑁆𑀘𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀽𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀥𑀸𑀢𑀼𑀬𑀫𑀓𑀁

𑁧-𑁧𑁯. 𑀮𑀩𑁆𑀪𑀫𑀸𑀦𑀸𑀦𑀦𑁆𑀢𑀺 𑀇𑀤𑀁 𑀧𑀯𑀢𑁆𑀢𑀺𑀯𑀸𑀭𑁂 𑀲𑀤𑁆𑀤𑀥𑀸𑀢𑀼𑀲𑀫𑁆𑀩𑀦𑁆𑀥𑀸𑀦𑀁 𑀬𑀫𑀓𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀺𑀲𑀫𑁆𑀩𑀦𑁆𑀥𑀸𑀦𑀜𑁆𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀥𑀸𑀢𑀼𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀘𑁆𑀘𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧𑁦-𑁨𑁬. ‘‘𑀤𑀼𑀓𑁆𑀔𑀁 ¶ 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀔𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀦𑁆𑀢𑀺 𑀢𑀻𑀲𑀼𑀧𑀺 𑀤𑀼𑀓𑁆𑀔𑀲𑀤𑁆𑀤𑁄 𑀧𑀯𑀢𑁆𑀢𑀢𑀺, ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪; 𑀯𑀺𑀪. 𑁧𑁯𑁦) 𑀚𑀸𑀢𑀺𑀆𑀤𑀻𑀲𑀼 𑀘, 𑀲𑁄 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑁄 𑀅𑀜𑁆𑀜𑀢𑁆𑀣 𑀧𑀯𑀢𑁆𑀢𑀫𑀸𑀦𑁄 ¶ 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑁄 𑀦𑀧𑁆𑀧𑀯𑀢𑁆𑀢𑀢𑀺. 𑀲𑀼𑀤𑁆𑀥𑀜𑁆𑀘𑁂𑀢𑁆𑀣 𑀤𑀼𑀓𑁆𑀔𑀧𑀤𑀁 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀁 𑀓𑀭𑁄𑀢𑀺, 𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 𑀏𑀯 𑀬𑀁 𑀤𑀼𑀓𑁆𑀔𑀤𑀼𑀓𑁆𑀔𑀁, 𑀢𑀲𑁆𑀫𑀺𑀁 𑀤𑀼𑀓𑁆𑀔𑀤𑀼𑀓𑁆𑀔𑁂 𑀏𑀲 𑀤𑀼𑀓𑁆𑀔𑀲𑀤𑁆𑀤𑁄, 𑀢𑀜𑁆𑀘 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑀫𑁂𑀯𑀸𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁂 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀲𑀼 𑀲𑀫𑀼𑀤𑀬𑁂𑀲𑀼 𑀓𑁄𑀘𑀺 𑀨𑀮𑀥𑀫𑁆𑀫𑁂𑀲𑀼 𑀦𑀢𑁆𑀣𑀺, 𑀦 𑀘 𑀨𑀮𑀥𑀫𑁆𑀫𑁂𑀲𑀼 𑀓𑁄𑀘𑀺 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑀺, 𑀫𑀕𑁆𑀕𑀲𑀤𑁆𑀤𑁄 𑀘 𑀨𑀮𑀨𑀮𑀗𑁆𑀕𑁂𑀲𑀼 𑀫𑀕𑁆𑀕𑀨𑀮𑀢𑁆𑀢𑀸 𑀧𑀯𑀢𑁆𑀢𑀢𑀺, 𑀦 𑀫𑀕𑁆𑀕𑀓𑀺𑀘𑁆𑀘𑀲𑀩𑁆𑀪𑀸𑀯𑀸. 𑀧𑀭𑀺𑀦𑀺𑀝𑁆𑀞𑀺𑀢𑀦𑀺𑀬𑁆𑀬𑀸𑀦𑀓𑀺𑀘𑁆𑀘𑀸𑀦𑀺 𑀳𑀺 𑀢𑀸𑀦𑀺. 𑀦𑀺𑀬𑁆𑀬𑀸𑀦𑀯𑀸𑀘𑀓𑁄 𑀘𑁂𑀢𑁆𑀣 𑀫𑀕𑁆𑀕𑀲𑀤𑁆𑀤𑁄, 𑀦 𑀦𑀺𑀬𑁆𑀬𑀸𑀦𑀨𑀮𑀯𑀸𑀘𑀓𑁄, 𑀢𑀲𑁆𑀫𑀸 𑀲𑀫𑀼𑀤𑀬𑁄 𑀲𑀘𑁆𑀘𑀁, 𑀦𑀺𑀭𑁄𑀥𑁄 𑀲𑀘𑁆𑀘𑀁, 𑀫𑀕𑁆𑀕𑁄 𑀲𑀘𑁆𑀘𑀦𑁆𑀢𑀺 𑀏𑀢𑁂𑀲𑀼𑀧𑀺 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁.

𑀅𑀣 𑀯𑀸 𑀧𑀤𑀲𑁄𑀥𑀦𑁂𑀦 𑀧𑀤𑁂𑀲𑀼 𑀲𑁄𑀥𑀺𑀢𑁂𑀲𑀼 𑀲𑀘𑁆𑀘𑀯𑀺𑀲𑁂𑀲𑀦𑀪𑀽𑀢𑀸 𑀏𑀯 𑀤𑀼𑀓𑁆𑀔𑀸𑀤𑀺𑀲𑀤𑁆𑀤𑀸 𑀇𑀥 𑀕𑀳𑀺𑀢𑀸𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀢𑁂𑀲𑀁 𑀧𑀦 𑀏𑀓𑀦𑁆𑀢𑁂𑀦 𑀲𑀘𑁆𑀘𑀯𑀺𑀲𑁂𑀲𑀦𑀪𑀸𑀯𑀁, 𑀲𑀘𑁆𑀘𑀸𑀦𑀜𑁆𑀘 𑀢𑀩𑁆𑀩𑀺𑀲𑁂𑀲𑀦𑀬𑁄𑀕𑀯𑀺𑀲𑁂𑀲𑀁 𑀤𑀻𑀧𑁂𑀢𑀼𑀁 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁄 𑀯𑀼𑀢𑁆𑀢𑁄𑀢𑀺 𑀲𑀘𑁆𑀘𑀯𑀺𑀲𑁂𑀲𑀦𑀸𑀦𑀁 𑀤𑀼𑀓𑁆𑀔𑀸𑀤𑀻𑀦𑀁 𑀏𑀓𑀦𑁆𑀢𑀲𑀘𑁆𑀘𑀢𑁆𑀢𑀸 ‘‘𑀤𑀼𑀓𑁆𑀔𑀁 𑀲𑀘𑁆𑀘𑀁…𑀧𑁂… 𑀫𑀕𑁆𑀕𑁄 𑀲𑀘𑁆𑀘𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀔𑀦𑁆𑀥𑀬𑀫𑀓𑀸𑀤𑀻𑀲𑀼𑀧𑀺 𑀲𑀼𑀤𑁆𑀥𑀔𑀦𑁆𑀥𑀸𑀤𑀺𑀯𑀸𑀭𑁂𑀲𑀼 𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀦𑀪𑀽𑀢𑀸𑀦𑀫𑁂𑀯 𑀭𑀽𑀧𑀸𑀤𑀻𑀦𑀁 𑀕𑀳𑀡𑀁 𑀬𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 (𑀬𑀫. 𑀅𑀝𑁆𑀞. 𑀔𑀦𑁆𑀥𑀬𑀫𑀓 𑁩𑁮) 𑀧𑀦 ‘‘𑀬𑀲𑁆𑀫𑀸 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀲𑀗𑁆𑀔𑀸𑀢𑀁 𑀯𑀸 𑀭𑀽𑀧𑀁 𑀳𑁄𑀢𑀼 𑀪𑀽𑀢𑀼𑀧𑀸𑀤𑀸𑀭𑀽𑀧𑀁 𑀯𑀸, 𑀲𑀩𑁆𑀩𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀢𑁂𑀯, 𑀢𑀲𑁆𑀫𑀸 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀘𑀦𑁂𑀦 𑀭𑀽𑀧𑀸𑀤𑀺𑀘𑀓𑁆𑀔𑀸𑀤𑀺𑀤𑀼𑀓𑁆𑀔𑀸𑀤𑀺𑀕𑁆𑀕𑀳𑀡𑁂𑀳𑀺 𑀲𑀼𑀤𑁆𑀥𑀔𑀦𑁆𑀥𑀸𑀤𑀺𑀯𑀸𑀭𑁂𑀲𑀼𑀧𑀺 𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀦𑀢𑁄 𑀅𑀜𑁆𑀜𑁂𑀧𑀺 𑀕𑀳𑀺𑀢𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀢𑁂𑀦 𑀢𑀤𑀦𑀼𑀭𑀽𑀧𑀢𑀸𑀯𑀲𑁂𑀦 𑀇𑀢𑀭𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁨𑁭-𑁧𑁬𑁪. 𑀅𑀦𑁆𑀢𑀫𑀲𑁄 ¶ 𑀲𑀼𑀤𑁆𑀥𑀸𑀯𑀸𑀲𑀸𑀦𑀫𑁆𑀧𑀻𑀢𑀺 𑀇𑀤𑀁 𑀢𑁂𑀲𑀁 𑀅𑀭𑀺𑀬𑀢𑁆𑀢𑀸 𑀤𑀼𑀓𑁆𑀔𑀲𑀘𑁆𑀘𑁂𑀦 𑀉𑀧𑀧𑀚𑁆𑀚𑀦𑁂 𑀆𑀲𑀗𑁆𑀓𑀸 𑀲𑀺𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁂𑀦 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀩𑁆𑀩𑁂 𑀉𑀧𑀧𑀚𑁆𑀚𑀦𑁆𑀢𑀸 𑀧𑀯𑀢𑁆𑀢𑀺𑀬𑀁 𑀘𑀢𑀼𑀯𑁄𑀓𑀸𑀭𑁂 ¶ 𑀫𑀕𑁆𑀕𑀨𑀮𑀢𑁄 𑀅𑀜𑁆𑀜𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀧𑀜𑁆𑀘𑀯𑁄𑀓𑀸𑀭𑁂 𑀘 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀲𑀗𑁆𑀕𑀳𑀺𑀢𑀸𑀢𑀺 𑀢𑁂𑀲𑁆𑀯𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀦𑀺𑀘𑁆𑀙𑀺𑀢𑁂𑀲𑀼 𑀓𑁂𑀘𑀺 ‘‘𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀏𑀢𑁂𑀦 𑀤𑀼𑀓𑁆𑀔𑀲𑀫𑀼𑀤𑀬𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀧𑁆𑀧𑀯𑀢𑁆𑀢𑀺𑀲𑀫𑀗𑁆𑀕𑀺𑀦𑁄 𑀤𑀲𑁆𑀲𑀻𑀬𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀲𑁆𑀲𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀢𑁄, 𑀢𑁂𑀦 𑀘𑀢𑀼𑀯𑁄𑀓𑀸𑀭𑀸𑀦𑀫𑁆𑀧𑀺 𑀕𑀳𑀡𑀁 𑀉𑀧𑀧𑀦𑁆𑀦𑀫𑁂𑀯. 𑀦 𑀳𑀺 𑀢𑁂𑀲𑀼 𑀫𑀕𑁆𑀕𑀨𑀮𑀼𑀧𑁆𑀧𑀸𑀤𑀲𑀫𑀗𑁆𑀕𑀻𑀲𑀼 𑀧𑀲𑀗𑁆𑀕𑀢𑀸 𑀅𑀢𑁆𑀣𑀺 𑀢𑀁𑀲𑀫𑀗𑁆𑀕𑀻𑀦𑀁 𑀢𑁂𑀲𑀁 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸𑀢𑀺. 𑀇𑀤𑀁 𑀇𑀥 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀘𑀢𑀼𑀯𑁄𑀓𑀸𑀭𑁂 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀇𑀥 𑀲𑀘𑁆𑀘𑀸𑀦𑀁 𑀉𑀧𑁆𑀧𑀸𑀤𑀯𑀘𑀦𑁂 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣 𑀘 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀇𑀤𑀁 𑀓𑀫𑁆𑀫𑀚𑀧𑀯𑀢𑁆𑀢𑀲𑁆𑀲 𑀧𑀞𑀫𑀼𑀧𑁆𑀧𑀸𑀤𑀤𑀲𑁆𑀲𑀦𑁂𑀦 𑀯𑀼𑀢𑁆𑀢𑀁, 𑀅𑀲𑀜𑁆𑀜𑀲𑀢𑁆𑀢𑀸𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀸. 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀇𑀤𑀁 𑀧𑀦 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀯𑁄𑀫𑀺𑀲𑁆𑀲𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀼𑀧𑁆𑀧𑀸𑀤𑀲𑁆𑀲 𑀢𑀁𑀭𑀳𑀺𑀢𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀢𑀁𑀲𑀳𑀺𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀯𑁄𑀫𑀺𑀲𑁆𑀲𑀲𑁆𑀲. 𑀢𑁂𑀲𑀁 𑀧𑀦 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀬𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀲𑀩𑁆𑀩𑀢𑁆𑀣 𑀦 𑀕𑀳𑀺𑀢𑁄, 𑀢𑀣𑀸 𑀦𑀺𑀭𑁄𑀥𑁄 𑀘𑀸𑀢𑀺. 𑀫𑀕𑁆𑀕𑀲𑀘𑁆𑀘𑀬𑀫𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀁 𑀢𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀘 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀔𑀡𑀯𑀲𑁂𑀦 𑀑𑀓𑀸𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀲𑀢𑀺 ‘‘𑀬𑀲𑁆𑀲 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁭𑁧) 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂 ‘‘𑀇𑀢𑀭𑁂𑀲𑀁 𑀘𑀢𑀼𑀯𑁄𑀓𑀸𑀭𑀁 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀦 𑀬𑀼𑀚𑁆𑀚𑁂𑀬𑁆𑀬. 𑀦 𑀳𑀺 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀘 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺. 𑀢𑀲𑁆𑀫𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑀲𑀫𑀗𑁆𑀕𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑁂 𑀲𑀸 𑀉𑀧𑀧𑀢𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀘 𑀧𑀯𑀢𑁆𑀢𑀫𑀸𑀦𑀸, 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀑𑀓𑀸𑀲𑀯𑀲𑁂𑀦𑁂𑀯𑁂𑀢𑁆𑀣 ¶ 𑀢𑀢𑁆𑀣-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 𑀳𑁂𑀲. 𑀢𑀢𑁆𑀣 𑀧𑀼𑀕𑁆𑀕𑀮𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀑𑀓𑀸𑀲𑁄 𑀧𑀦 𑀬𑀢𑁆𑀣 𑀢𑁂, 𑀲𑁄 𑀏𑀯𑀸𑀢𑀺.

‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀆𑀭𑀼𑀧𑁆𑀧𑁂 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀧𑀦 ‘‘𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀓𑀫𑁆𑀫𑀚𑀸𑀤𑀺𑀭𑀽𑀧𑀁 𑀘𑀺𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. ‘‘𑀬𑀲𑁆𑀲 𑀯𑀸 ¶ 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑁄 𑀧𑀼𑀕𑁆𑀕𑀮𑁄 𑀦 𑀘𑀺𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀕𑀳𑀺𑀢𑁄, 𑀅𑀣 𑀔𑁄 𑀬𑁄 𑀓𑁄𑀘𑀺 𑀏𑀯𑀁𑀧𑀓𑀸𑀭𑁄, 𑀢𑀲𑁆𑀫𑀸 ‘‘𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀘 𑀦 𑀘𑀺𑀢𑁆𑀢𑀸𑀧𑁂𑀓𑁆𑀔𑀫𑁂𑀯 𑀤𑀼𑀓𑁆𑀔𑀲𑀘𑁆𑀘𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀬𑀁 𑀓𑀺𑀜𑁆𑀘𑀻𑀢𑀺 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀦 𑀳𑀺 𑀬𑀫𑀓𑁂 𑀯𑀺𑀪𑀚𑀺𑀢𑀩𑁆𑀩𑁂 𑀅𑀯𑀺𑀪𑀢𑁆𑀢𑀸 𑀦𑀸𑀫 𑀧𑀼𑀘𑁆𑀙𑀸 𑀅𑀢𑁆𑀣𑀻𑀢𑀺.

‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂𑀯𑀢𑁆𑀢𑀫𑀸𑀦𑁂’’𑀢𑀺 𑀇𑀤𑀁 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑀲𑁆𑀲 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀁𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀧𑀦 𑀤𑀲𑁆𑀲𑀺𑀢𑁂 𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑀼𑀢𑀺𑀬𑀸𑀓𑀼𑀲𑀮𑀘𑀺𑀢𑁆𑀢𑀢𑁄 𑀧𑀼𑀭𑀺𑀫𑀲𑀩𑁆𑀩𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀢𑁂𑀦𑁂𑀯 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀇𑀢𑀭𑁂𑀲𑀁 𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀸𑀦’’𑀦𑁆𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀸 𑀲𑀼𑀤𑁆𑀥𑀸𑀯𑀸𑀲𑀸 𑀅𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀬𑀣𑀸 ‘‘𑀬𑀲𑁆𑀲 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁬𑁧) 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁬𑁧) 𑀏𑀢𑁂𑀦𑁂𑀯 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀲𑀫𑀸𑀦𑀕𑀢𑀺𑀓𑀸 𑀤𑀼𑀢𑀺𑀬𑀸𑀓𑀼𑀲𑀮𑀢𑁄 𑀧𑀼𑀭𑀺𑀫𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀦 𑀢𑁂 ‘‘𑀇𑀢𑀭𑁂𑀲’’𑀦𑁆𑀢𑀺 𑀏𑀢𑁂𑀦 𑀕𑀬𑁆𑀳𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. ‘‘𑀇𑀢𑀭𑁂𑀲’’𑀦𑁆𑀢𑀺 𑀯𑀘𑀦𑀁 𑀧𑀜𑁆𑀘𑀯𑁄𑀓𑀸𑀭𑀸𑀦𑀁 𑀯𑀺𑀲𑁂𑀲𑀦𑀢𑁆𑀣𑀁, 𑀦 𑀘𑀢𑀼𑀯𑁄𑀓𑀸𑀭𑀸𑀦𑀁. 𑀦 𑀳𑀺 𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀯𑀚𑁆𑀚𑁂𑀢𑀩𑁆𑀩𑀸 𑀲𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑀸 𑀯𑀺𑀬 𑀬𑀣𑀸𑀯𑀼𑀢𑁆𑀢𑀸 𑀲𑀼𑀤𑁆𑀥𑀸𑀯𑀸𑀲𑀸𑀢𑀺. ‘‘𑀅𑀪𑀺𑀲𑀫𑁂𑀢𑀸𑀯𑀻𑀦𑀁 𑀢𑁂𑀲𑀁 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀣 𑀫𑀕𑁆𑀕𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁪𑁧) 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀧𑀼𑀕𑁆𑀕𑀮𑁄𑀓𑀸𑀲𑀸 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑀸 𑀕𑀳𑀺𑀢𑀸𑀢𑀺 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀅𑀪𑀺𑀲𑀫𑁂𑀢𑀸𑀯𑀺𑀦𑁄, 𑀢𑁂 𑀏𑀯𑀁 ‘‘𑀅𑀪𑀺𑀲𑀫𑁂𑀢𑀸𑀯𑀻𑀦’’𑀦𑁆𑀢𑀺 𑀏𑀢𑁂𑀦 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 ¶ . 𑀢𑁂𑀦 𑀬𑁂 𑀓𑀸𑀫𑀸𑀯𑀘𑀭𑁂 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀯𑀸 𑀅𑀪𑀺𑀲𑀫𑁂𑀢𑀸𑀯𑀺𑀦𑁄 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀯𑀸 𑀉𑀧𑀧𑀦𑁆𑀦𑀸, 𑀬𑀸𑀯 𑀢𑀢𑁆𑀣𑀸𑀪𑀺𑀲𑀫𑀬𑁄 𑀉𑀧𑁆𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺, 𑀢𑀸𑀯 𑀢𑁂 𑀏𑀢𑁆𑀣 𑀦 𑀕𑀬𑁆𑀳𑀦𑁆𑀢𑀺, 𑀢𑁂 𑀧𑀦 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 ‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂’’𑀢𑀺 𑀏𑀯𑀁 𑀤𑀲𑁆𑀲𑀺𑀢𑁂𑀳𑀺 𑀲𑀼𑀤𑁆𑀥𑀸𑀯𑀸𑀲𑁂 𑀅𑀦𑀼𑀧𑁆𑀧𑀦𑁆𑀦𑀸𑀪𑀺𑀲𑀫𑀬𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀢𑀺 𑀯𑀺𑀲𑀼𑀁 𑀦 𑀤𑀲𑁆𑀲𑀺𑀢𑀸. ‘‘𑀅𑀦𑀪𑀺𑀲𑀫𑁂𑀢𑀸𑀯𑀻𑀦’’𑀦𑁆𑀢𑀺 𑀕𑀳𑀺𑀢𑀸 𑀬𑁂 𑀲𑀩𑁆𑀩𑀢𑁆𑀣 𑀢𑀢𑁆𑀣 𑀘 𑀅𑀦𑀪𑀺𑀲𑀫𑁂𑀢𑀸𑀯𑀺𑀦𑁄, 𑀢𑁂𑀲𑀼 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀕𑀳𑀡𑀓𑀸𑀮𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁪𑁨) 𑀯𑀼𑀢𑁆𑀢𑀦𑁆𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀏𑀢𑁂𑀦 𑀯𑁄𑀤𑀸𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑀸 𑀲𑀫𑀸𑀦𑀕𑀢𑀺𑀓𑀸 ¶ 𑀢𑀢𑁄 𑀧𑀼𑀭𑀺𑀫𑀢𑀭𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄𑀧𑀺 𑀬𑀸𑀯 𑀲𑀩𑁆𑀩𑀦𑁆𑀢𑀺𑀫𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑀫𑀗𑁆𑀕𑀻, 𑀢𑀸𑀯 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼 𑀏𑀯𑀭𑀽𑀧𑁂𑀲𑀽𑀢𑀺.

𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺 𑀆𑀕𑀢𑀝𑁆𑀞𑀸𑀦𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲𑀧𑀺 𑀪𑀗𑁆𑀕𑀓𑁆𑀔𑀡𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀢𑀣𑀸 ‘‘𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀘 𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑁆𑀲𑀸𑀢𑀺. ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁧𑁧𑁬) 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀤𑁆𑀯𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼 ‘‘𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀪𑀗𑁆𑀕𑀓𑁆𑀔𑀡𑁂’’𑀇𑀘𑁆𑀘𑁂𑀯 (𑀬𑀫. 𑁧.𑀲𑀘𑁆𑀘𑀬𑀫𑀓.𑁧𑁧𑁬) 𑀯𑀼𑀢𑁆𑀢𑀁, 𑀦 𑀯𑀺𑀲𑁂𑀲𑀺𑀢𑀁. 𑀓𑀲𑁆𑀫𑀸? 𑀏𑀓𑀲𑁆𑀲𑀧𑀺 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀉𑀪𑀬𑀓𑁄𑀝𑁆𑀞𑀸𑀲𑀪𑀚𑀦𑀢𑁄. 𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑁂𑀲𑀼 𑀳𑀺 𑀅𑀭𑀼𑀧𑁂 𑀫𑀕𑁆𑀕𑀨𑀮𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀻𑀲𑀼 𑀓𑁂𑀲𑀜𑁆𑀘𑀺 𑀢𑀺𑀡𑁆𑀡𑀁 𑀨𑀮𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀫𑀕𑁆𑀕𑀸𑀦𑀁 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀻𑀦𑀁 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺𑀁 𑀪𑀯𑀦𑀺𑀓𑀦𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑁂 𑀉𑀧𑀭𑀺𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀢𑁂𑀲𑀁𑀬𑁂𑀯 𑀧𑀦 𑀓𑁂𑀲𑀜𑁆𑀘𑀺 𑀅𑀦𑁆𑀢𑀭𑀸 𑀢𑀡𑁆𑀳𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀉𑀧𑁆𑀧𑀸𑀤𑁂𑀦𑁆𑀢𑀸𑀦𑀁 𑀫𑀕𑁆𑀕𑀨𑀮𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀻𑀦𑀁 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺. 𑀲𑀸𑀫𑀜𑁆𑀜𑀯𑀘𑀦𑁂𑀦𑀧𑀺 𑀘 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀯𑀼𑀘𑁆𑀘𑀫𑀸𑀦𑁂𑀦 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂 𑀯𑀓𑁆𑀔𑀫𑀸𑀦𑁂 𑀯𑀚𑁆𑀚𑁂𑀢𑁆𑀯𑀸𑀯 𑀕𑀳𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁧𑁬𑁫-𑁧𑁭𑁦. 𑀧𑀭𑀺𑀜𑁆𑀜𑀸𑀯𑀸𑀭𑁂 ¶ …𑀧𑁂… 𑀢𑀺𑀲𑁆𑀲𑁄𑀧𑁂𑀢𑁆𑀣 𑀧𑀭𑀺𑀜𑁆𑀜𑀸 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀣𑁂𑀯 𑀯𑀺𑀲𑁂𑀲𑀦𑀁 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀲𑀩𑁆𑀩𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀲𑀩𑁆𑀩𑀲𑀘𑁆𑀘𑀸𑀦𑀁 𑀅𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀲𑁆𑀲𑀦𑀢𑁆𑀣𑀁 𑀲𑀘𑁆𑀙𑀺𑀓𑀭𑀡𑀪𑀸𑀯𑀦𑀸𑀯𑀲𑁂𑀦 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀜𑁆𑀘. 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀢𑁆𑀣𑀁 𑀲𑀫𑀼𑀤𑀬𑀲𑁆𑀲 𑀘 𑀧𑀳𑀸𑀦𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀁 𑀲𑀘𑁆𑀘𑁂𑀲𑀼 𑀤𑀲𑁆𑀲𑁂𑀢𑀼𑀁 𑀤𑀼𑀓𑁆𑀔𑁂 𑀢𑀻𑀭𑀡𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀦 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀲𑀫𑀼𑀤𑀬𑁂 𑀘 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀦 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀜𑀸𑀢𑀧𑀭𑀺𑀜𑁆𑀜𑀸 𑀧𑀦 𑀲𑀸𑀥𑀸𑀭𑀡𑀸𑀢𑀺 𑀉𑀪𑀬𑀢𑁆𑀣 𑀯𑀼𑀢𑁆𑀢𑀸. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀺 𑀯𑀺𑀪𑀸𑀯𑁂𑀢𑀻𑀢𑀺 𑀜𑀸𑀢𑀧𑀭𑀺𑀜𑁆𑀜𑀸 𑀘 𑀳𑁄𑀢𑀺 ¶ , 𑀤𑀼𑀓𑁆𑀔𑀢𑀻𑀭𑀡𑀓𑀺𑀘𑁆𑀘𑀸𑀦𑀁 𑀦𑀺𑀧𑁆𑀨𑀸𑀤𑀦𑀢𑁄 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘, 𑀲𑀫𑀼𑀤𑀬𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀢𑁄𑀯 𑀧𑀳𑀸𑀦𑀧𑀭𑀺𑀜𑁆𑀜𑀸 𑀘𑀸𑀢𑀺 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀬𑁄𑀚𑁂𑀢𑀩𑁆𑀩𑀸𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀗𑁆𑀔𑀸𑀭𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀸𑀤𑀬𑁄 𑀯𑀺𑀬 𑀧𑀼𑀩𑁆𑀩𑁂 𑀅𑀯𑀺𑀪𑀢𑁆𑀢𑀸 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄𑀢𑀺 𑀢𑁂𑀲𑀁 𑀅𑀯𑀺𑀜𑁆𑀜𑀸𑀢𑀢𑁆𑀢𑀸 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁪𑁮) 𑀢𑀬𑁄 𑀲𑀗𑁆𑀔𑀸𑀭𑁂 𑀯𑀺𑀪𑀚𑀢𑀺. 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀧𑀞𑀫𑁂 𑀅𑀢𑁆𑀣𑁂 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀲𑀸𑀫𑀺𑀯𑀘𑀦𑀁, 𑀤𑀼𑀢𑀺𑀬𑁂 𑀅𑀢𑁆𑀣𑁂 𑀓𑀢𑁆𑀢𑀼𑀅𑀢𑁆𑀣𑁂. 𑀯𑀘𑀺𑀬𑀸 𑀲𑀗𑁆𑀔𑀸𑀭𑁄𑀢𑀺 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀘 𑀓𑀢𑁆𑀢𑀼𑀅𑀢𑁆𑀣𑁂𑀬𑁂𑀯. 𑀲𑁄 𑀧𑀦 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑁄𑀢𑀺 𑀓𑀢𑁆𑀯𑀸 ‘‘𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑁨-𑁭. 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑀸𑀪𑀸𑀯𑀢𑁄𑀢𑀺 𑀧𑀤𑀲𑁄𑀥𑀦𑀢𑀁𑀫𑀽𑀮𑀓𑀘𑀓𑁆𑀓𑀯𑀸𑀭𑁂𑀳𑀺 𑀬𑁄𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀮𑀩𑁆𑀪𑀫𑀸𑀦𑁄 𑀏𑀓𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑁄, 𑀢𑀲𑁆𑀲 𑀲𑀼𑀤𑁆𑀥𑀺𑀓𑁂𑀳𑀺 𑀓𑀸𑀬𑀸𑀤𑀺𑀧𑀤𑁂𑀳𑀺 𑀲𑀼𑀤𑁆𑀥𑀺𑀓𑁂𑀦 ¶ 𑀘 𑀲𑀗𑁆𑀔𑀸𑀭𑀧𑀤𑁂𑀦 𑀅𑀯𑀘𑀦𑀻𑀬𑀢𑁆𑀢𑀸 𑀬𑀣𑀸 𑀭𑀽𑀧𑀧𑀤𑀲𑁆𑀲 𑀔𑀦𑁆𑀥𑁂𑀓𑀤𑁂𑀲𑁄 𑀔𑀦𑁆𑀥𑀧𑀤𑀲𑁆𑀲 𑀔𑀦𑁆𑀥𑀲𑀫𑀼𑀤𑀸𑀬𑁄 𑀧𑀤𑀲𑁄𑀥𑀦𑁂 𑀤𑀲𑁆𑀲𑀺𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀅𑀢𑁆𑀣𑀺, 𑀏𑀯𑀁 𑀏𑀓𑁂𑀓𑀧𑀤𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺𑀆𑀤𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀬𑀤𑀺 𑀯𑀺𑀲𑀼𑀁 𑀅𑀤𑀻𑀧𑁂𑀢𑁆𑀯𑀸 𑀲𑀫𑀼𑀤𑀺𑀢𑁄 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀏𑀓𑀢𑁆𑀣 𑀤𑀻𑀧𑁂𑀢𑀺, 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀓𑀸𑀬𑀲𑀗𑁆𑀔𑀸𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀔𑀦𑁆𑀥𑀲𑀤𑁆𑀤𑁄 𑀯𑀺𑀬 𑀭𑀽𑀧𑀲𑀤𑁆𑀤𑁂𑀦 𑀓𑀸𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄 𑀳𑁂𑀲𑀸𑀢𑀺 𑀏𑀢𑁂𑀦 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀧𑀤𑀲𑁄𑀥𑀦𑁂𑀦 𑀤𑀲𑁆𑀲𑀺𑀢𑀸𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀫𑁂𑀯 𑀕𑀳𑀡𑀢𑁄 𑀢𑁂𑀲𑀜𑁆𑀘 𑀓𑀸𑀬𑀸𑀤𑀺𑀧𑀤𑁂𑀳𑀺 𑀅𑀕𑁆𑀕𑀳𑀺𑀢𑀢𑁆𑀢𑀸 ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀲𑀗𑁆𑀔𑀸𑀭𑀬𑀫𑀓𑁂 𑀓𑀸𑀬𑀸𑀤𑀺𑀧𑀤𑀸𑀦𑀁 𑀲𑀗𑁆𑀔𑀸𑀭𑀧𑀤𑀲𑁆𑀲 𑀘 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺𑀆𑀤𑀺𑀫𑁆𑀳𑀺 ¶ 𑀯𑀼𑀘𑁆𑀘𑀫𑀸𑀦𑁂 𑀅𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀘𑁆𑀘𑀸𑀕𑁄 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀕𑁆𑀕𑀳𑁄 𑀘 𑀓𑀢𑁄 𑀲𑀺𑀬𑀸𑀢𑀺 𑀲𑀼𑀤𑁆𑀥𑀲𑀗𑁆𑀔𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑀸 𑀦 𑀯𑀼𑀢𑁆𑀢𑀸. 𑀧𑀤𑀲𑁄𑀥𑀦𑀯𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑁂𑀳𑀺 𑀧𑀦 𑀅𑀲𑀫𑀸𑀦𑀸𑀥𑀺𑀓𑀭𑀡𑁂𑀳𑀺 𑀓𑀸𑀬𑀸𑀤𑀺𑀧𑀤𑁂𑀳𑀺 𑀲𑀗𑁆𑀔𑀸𑀭𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀻𑀬𑀢𑀸𑀬 𑀤𑀲𑁆𑀲𑀺𑀢𑀸𑀬 𑀲𑀁𑀲𑀬𑁄 𑀳𑁄𑀢𑀺 ‘‘𑀬𑁄 𑀅𑀢𑁆𑀣𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀦𑀸 𑀓𑀸𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀏𑀲𑁄 𑀅𑀢𑁆𑀣𑀦𑁆𑀢𑀭𑀧𑁆𑀧𑀯𑀢𑁆𑀢𑀻𑀳𑀺 𑀯𑀘𑀻𑀘𑀺𑀢𑁆𑀢𑁂𑀳𑀺 𑀯𑀺𑀲𑁂𑀲𑀺𑀢𑁄 𑀉𑀤𑀸𑀳𑀼 𑀅𑀜𑁆𑀜𑁄’’𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀢𑁆𑀣 𑀢𑁂𑀲𑀁 𑀅𑀜𑁆𑀜𑀢𑁆𑀣 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀙 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑀝𑁆𑀞𑀸𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀬𑀁 𑀦𑀬𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄𑀢𑀺 𑀯𑀼𑀢𑁆𑀢𑁄.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁯. 𑀧𑀯𑀢𑁆𑀢𑀺𑀯𑀸𑀭𑁂 𑀲𑀗𑁆𑀔𑀸𑀭𑀸𑀦𑀁 𑀧𑀼𑀕𑁆𑀕𑀮𑀸𑀦𑀜𑁆𑀘 𑀑𑀓𑀸𑀲𑀢𑁆𑀢𑀸 𑀛𑀸𑀦𑀁 𑀪𑀽𑀫𑀺 𑀘 𑀯𑀺𑀲𑀼𑀁 𑀑𑀓𑀸𑀲𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀧𑀼𑀕𑁆𑀕𑀮𑀯𑀸𑀭𑁂 𑀘 𑀑𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀕𑁆𑀕𑀳𑀡𑁂𑀦 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀑𑀓𑀸𑀲𑀸𑀦𑀁 𑀯𑀲𑁂𑀦 𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑁄𑀓𑀸𑀲𑀯𑀲𑁂𑀦 𑀕𑀳𑀺𑀢𑀸 𑀧𑀼𑀕𑁆𑀕𑀮𑀸 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 ¶ . 𑀧𑀼𑀦 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀸𑀦𑀦𑁆𑀢𑀺 𑀛𑀸𑀦𑁄𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺, 𑀓𑀸𑀫𑀸𑀯𑀘𑀭𑀸𑀦𑀦𑁆𑀢𑀺 𑀪𑀽𑀫𑁄𑀓𑀸𑀲𑀯𑀲𑁂𑀦. 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀫𑁆𑀧𑀺 𑀧𑀦 𑀢𑁂𑀲𑀁 𑀯𑀺𑀲𑁂𑀲𑀦𑀢𑁆𑀣𑀫𑀸𑀳 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺. 𑀢𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀓𑁂 𑀓𑀸𑀫𑀸𑀯𑀘𑀭𑁂 𑀕𑀩𑁆𑀪𑀕𑀢𑀸𑀤𑀺𑀓𑁂 𑀘 𑀦𑀺𑀯𑀢𑁆𑀢𑁂𑀢𑀺. 𑀓𑀸𑀫𑀸𑀯𑀘𑀭𑀸𑀦𑀫𑁆𑀧𑀺 𑀳𑀺 𑀕𑀩𑁆𑀪𑀕𑀢𑀸𑀤𑀻𑀦𑀁 𑀯𑀺𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀓𑀦𑁆𑀢𑀺𑀓𑀢𑁆𑀢𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀦𑀺𑀤𑀲𑁆𑀲𑀺𑀢𑀸. 𑀯𑀺𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀏𑀢𑁂𑀦 𑀧𑀦 𑀤𑀲𑁆𑀲𑀺𑀢𑀸 𑀧𑀼𑀕𑁆𑀕𑀮𑀸 𑀧𑀞𑀫𑀚𑁆𑀛𑀸𑀦𑁄𑀓𑀸𑀲𑀸 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑀸 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀺𑀭𑀳𑀯𑀺𑀲𑀺𑀝𑁆𑀞𑀸 𑀤𑀝𑁆𑀞𑀩𑁆𑀩𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁧. ‘‘𑀧𑀞𑀫𑀚𑁆𑀛𑀸𑀦𑁂 𑀓𑀸𑀫𑀸𑀯𑀘𑀭𑁂𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑁂 𑀧𑀞𑀫𑀚𑁆𑀛𑀸𑀦𑁂’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ¶ , 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀲𑀢𑀺 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀢𑀢𑁆𑀣 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀲𑁄 𑀘 𑀅𑀦𑀺𑀝𑁆𑀞𑁄 𑀪𑀽𑀫𑀻𑀦𑀁 𑀑𑀓𑀸𑀲𑀪𑀸𑀯𑀲𑁆𑀲𑁂𑀯 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀢𑁄, 𑀲𑀩𑁆𑀩𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀑𑀓𑀸𑀲𑀯𑀲𑁂𑀦 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀢𑁄 𑀘, 𑀢𑀲𑁆𑀫𑀸 𑀛𑀸𑀦𑀪𑀽𑀫𑁄𑀓𑀸𑀲𑀸𑀦𑀁 𑀲𑀗𑁆𑀓𑀭𑀁 𑀅𑀓𑀢𑁆𑀯𑀸 𑀯𑀺𑀲𑀼𑀁 𑀏𑀯 𑀑𑀓𑀸𑀲𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑁄𑀓𑀸𑀲𑁂𑀧𑀺 𑀳𑀺 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀘𑀻𑀲𑀗𑁆𑀔𑀸𑀭𑁄 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀸𑀯𑀘𑀭𑁄𑀓𑀸𑀲𑁂 𑀘. 𑀬𑀤𑀺𑀧𑀺 𑀦 𑀲𑀩𑁆𑀩𑀫𑁆𑀳𑀺 𑀧𑀞𑀫𑀚𑁆𑀛𑀸𑀦𑁂 𑀲𑀩𑁆𑀩𑀫𑁆𑀳𑀺 𑀘 𑀓𑀸𑀫𑀸𑀯𑀘𑀭𑁂 𑀤𑁆𑀯𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀧𑀦 𑀢𑀁𑀤𑁆𑀯𑀬𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀲𑀼𑀁 𑀑𑀓𑀸𑀲𑀢𑁆𑀢𑀸 𑀘 ‘‘𑀅𑀗𑁆𑀕𑀫𑀢𑁆𑀢𑀯𑀲𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺. 𑀇𑀫𑀫𑁆𑀳𑀺 𑀘 𑀬𑀫𑀓𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀯𑀺𑀘𑀸𑀭𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀼𑀤𑁆𑀥𑀪𑀽𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀕𑀳𑁂𑀢𑁆𑀯𑀸 𑀇𑀢𑀭𑀁 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀸. 𑀬𑀲𑁆𑀲𑀬𑀢𑁆𑀣𑀓𑁂 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 𑀦 𑀮𑀩𑁆𑀪𑀢𑀺. 𑀦 𑀳𑀺 𑀢𑁂 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀬 𑀑𑀓𑀸𑀲𑁂 𑀳𑁄𑀦𑁆𑀢𑀻𑀢𑀺.

𑁩𑁭. 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂𑀢𑀺 𑀢𑁂𑀲𑀁 𑀧𑀞𑀫𑀢𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀢𑁄 𑀤𑀼𑀢𑀺𑀬𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀧𑀺 𑀪𑀯𑀦𑀺𑀓𑀦𑁆𑀢𑀺𑀆𑀯𑀚𑁆𑀚𑀦𑁂 𑀯𑀢𑁆𑀢𑀫𑀸𑀦𑁂 𑀉𑀪𑀬𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀢𑀢𑁄 𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑁂𑀲𑀼𑀧𑀺 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 ¶ 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀧𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀆𑀤𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑀼𑀤𑁆𑀥𑀸𑀯𑀸𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀘𑀻𑀲𑀗𑁆𑀔𑀸𑀭𑀲𑁆𑀲 𑀆𑀤𑀺𑀤𑀲𑁆𑀲𑀦𑀢𑁆𑀣𑀁 ‘‘𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀼𑀲𑀬𑀬𑀫𑀓𑀁

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀧𑀭𑀺𑀬𑁄𑀲𑀸𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀢𑀺 𑀧𑀘𑁆𑀘𑀬𑀤𑀻𑀧𑀓𑁂𑀦 𑀫𑀽𑀮𑀬𑀫𑀓𑁂𑀦 𑀜𑀸𑀢𑀧𑀭𑀺𑀜𑁆𑀜𑀁 ¶ , 𑀔𑀦𑁆𑀥𑀸𑀤𑀻𑀲𑀼 𑀢𑀻𑀭𑀡𑀩𑀸𑀳𑀼𑀮𑁆𑀮𑀢𑁄 𑀔𑀦𑁆𑀥𑀸𑀤𑀺𑀬𑀫𑀓𑁂𑀳𑀺 𑀢𑀻𑀭𑀡𑀧𑀭𑀺𑀜𑁆𑀜𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸 𑀅𑀦𑀼𑀲𑀬𑀧𑀳𑀸𑀦𑀦𑁆𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀧𑀳𑀸𑀢𑀩𑁆𑀩𑀫𑀼𑀤𑁆𑀥𑀪𑀽𑀢𑁂𑀳𑀺 𑀅𑀦𑀼𑀲𑀬𑁂𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀁 𑀯𑀺𑀪𑀸𑀯𑁂𑀢𑀼𑀁 𑀅𑀦𑀼𑀲𑀬𑀬𑀫𑀓𑀁 𑀆𑀭𑀤𑁆𑀥𑀁. 𑀮𑀩𑁆𑀪𑀫𑀸𑀦𑀯𑀲𑁂𑀦𑀸𑀢𑀺 𑀅𑀦𑀼𑀲𑀬𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀸𑀦𑀁 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀻𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑀬𑀸𑀦𑀁 𑀕𑀸𑀳𑀸𑀧𑀦𑀁 𑀢𑁂𑀲𑀼 𑀢𑀣𑀸 𑀅𑀕𑁆𑀕𑀳𑀺𑀢𑁂𑀲𑀼 𑀅𑀦𑀼𑀲𑀬𑀯𑀸𑀭𑀸𑀤𑀺𑀧𑀸𑀴𑀺𑀬𑀸 𑀤𑀼𑀭𑀯𑀩𑁄𑀥𑀢𑁆𑀢𑀸.

𑀅𑀬𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑁂𑀲𑀽𑀢𑀺 𑀏𑀢𑁂𑀲𑀼 𑀲𑀸𑀦𑀼𑀲𑀬𑀯𑀸𑀭𑀸𑀤𑀻𑀲𑀼 𑀧𑀼𑀭𑀺𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 ‘‘𑀓𑀸𑀫𑀥𑀸𑀢𑀼𑀁 𑀯𑀸 𑀧𑀦 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲, 𑀭𑀽𑀧𑀥𑀸𑀢𑀼𑀁 𑀯𑀸 𑀧𑀦 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀅𑀯𑀼𑀘𑁆𑀘𑀫𑀸𑀦𑁂 𑀓𑀣𑀫𑀬𑀁 𑀬𑀫𑀓𑀤𑁂𑀲𑀦𑀸 𑀲𑀺𑀬𑀸𑀢𑀺? 𑀦𑀸𑀬𑀁 𑀬𑀫𑀓𑀤𑁂𑀲𑀦𑀸, 𑀧𑀼𑀭𑀺𑀫𑀯𑀸𑀭𑁂𑀳𑀺 𑀧𑀦 𑀬𑀫𑀓𑀯𑀲𑁂𑀦 𑀤𑁂𑀲𑀺𑀢𑀸𑀦𑀁 𑀅𑀦𑀼𑀲𑀬𑀸𑀦𑀁 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦 𑀅𑀦𑀼𑀲𑀬𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀬𑀫𑀓𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄 𑀧𑀦 𑀲𑀩𑁆𑀩𑀯𑀸𑀭𑀲𑀫𑀼𑀤𑀸𑀬𑀲𑁆𑀲 𑀅𑀦𑀼𑀲𑀬𑀬𑀫𑀓𑀦𑁆𑀢𑀺 𑀦𑀸𑀫𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀧𑀺 𑀅𑀢𑁆𑀣𑀯𑀲𑁂𑀦 𑀮𑀩𑁆𑀪𑀦𑁆𑀢𑀺, 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀦 𑀦 𑀯𑀼𑀢𑁆𑀢𑀸𑀢𑀺 𑀮𑀩𑁆𑀪𑀫𑀸𑀦𑀢𑀸𑀯𑀲𑁂𑀦 𑀏𑀢𑀺𑀲𑁆𑀲𑀸𑀧𑀺 𑀤𑁂𑀲𑀦𑀸𑀬 𑀬𑀫𑀓𑀤𑁂𑀲𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁂𑀦 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀳𑀻𑀦𑀸 𑀳𑀺 𑀅𑀦𑀼𑀲𑀬𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸𑀯 𑀘 𑀫𑀕𑁆𑀕𑁂𑀦 𑀢𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺𑀅𑀭𑀳𑀢𑀸 𑀦 𑀓𑀢𑀸 𑀳𑁄𑀢𑀺, 𑀢𑀸𑀯 ¶ 𑀢𑁂 𑀏𑀯𑀁𑀧𑀓𑀸𑀭𑀸 𑀏𑀯𑀸𑀢𑀺 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀏𑀯𑀁𑀧𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀕𑀳𑀺𑀢𑁄, 𑀦 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀯𑀺𑀬 𑀉𑀧𑁆𑀧𑀚𑁆𑀚𑀫𑀸𑀦𑀢𑀸. 𑀢𑁂𑀦𑁂𑀯 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀅𑀦𑀼𑀲𑀬𑀯𑀸𑀭𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑁄 𑀯𑀺𑀪𑀢𑁆𑀢𑁄. 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀧𑀦 𑀮𑀪𑀺𑀢𑁆𑀯𑀸 𑀬𑁂 𑀉𑀧𑁆𑀧𑀚𑁆𑀚𑀺𑀁𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘, 𑀢𑁂𑀧𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀅𑀳𑁂𑀲𑀼𑀁 𑀪𑀯𑀦𑁆𑀢𑀺 𑀘. 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀬 𑀏𑀯 𑀘 𑀢𑁂 𑀉𑀧𑁆𑀧𑀚𑁆𑀚𑀺𑀁𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘, 𑀦 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁄 𑀅𑀜𑁆𑀜𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀸 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀭𑀸𑀕𑀸𑀤𑀬𑁄 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦𑁂𑀯 𑀳𑀺 𑀅𑀦𑀼𑀲𑀬𑀸, 𑀅𑀧𑁆𑀧𑀳𑀻𑀦𑀸 𑀘 𑀅𑀢𑀻𑀢𑀸𑀤𑀬𑁄 𑀏𑀯, 𑀫𑀕𑁆𑀕𑀲𑁆𑀲 𑀧𑀦 𑀢𑀸𑀤𑀺𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀧𑀸𑀤𑀦𑁂𑀦 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺. 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀦𑀸𑀫 𑀥𑀫𑁆𑀫𑀸𑀓𑀸𑀭𑁄, 𑀦 𑀥𑀫𑁆𑀫𑁄, 𑀥𑀫𑁆𑀫𑁄 𑀏𑀯 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀸𑀦𑀼𑀲𑀬𑀸𑀢𑀺 𑀏𑀢𑁆𑀣 𑀬𑀤𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀣 𑀓𑀲𑁆𑀫𑀸 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸, 𑀦𑀦𑀼 𑀲𑀢𑁆𑀢𑀸𑀦𑀼𑀲𑀬𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀼𑀲𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺, 𑀅𑀧𑁆𑀧𑀳𑀻𑀦𑀫𑀢𑁆𑀢𑀲𑁆𑀲𑁂𑀯 𑀅𑀦𑀼𑀲𑀬𑀪𑀸𑀯𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ¶ ‘‘𑀅𑀦𑀼𑀲𑀬𑁄𑀢𑀺 𑀧𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁧), 𑀢𑀲𑁆𑀫𑀸 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄𑀬𑁂𑀯 𑀅𑀦𑀼𑀲𑀬𑁄 𑀦𑀸𑀫𑀸𑀢𑀺 𑀬𑀼𑀢𑁆𑀢𑀁. 𑀣𑀸𑀫𑀕𑀢𑀦𑁆𑀢𑀺 𑀘 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀥𑀫𑁆𑀫𑀲𑀪𑀸𑀯𑀩𑁄𑀥𑀺𑀦𑀸 𑀢𑀣𑀸𑀕𑀢𑁂𑀦 𑀇𑀫𑁂𑀬𑁂𑀯 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀢𑁆𑀢𑀸. 𑀣𑀸𑀫𑀕𑀢𑁄𑀢𑀺 𑀅𑀦𑀼𑀲𑀬𑀲𑀫𑀗𑁆𑀕𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀲𑀬𑀉𑀧𑁆𑀧𑀚𑁆𑀚𑀦𑀯𑀸𑀭𑀸𑀦𑀁 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀬𑀣𑀸 ‘‘𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀁 𑀅𑀧𑁆𑀧𑀳𑀻𑀦𑀸𑀓𑀸𑀭𑀤𑀻𑀧𑀓𑀁, 𑀏𑀯𑀁 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀲𑀺𑀬𑀸𑀢𑀺 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀦 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀯𑀼𑀢𑁆𑀢𑀢𑀸 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀘𑁂? 𑀢𑀁 𑀦, 𑀯𑀘𑀦𑀢𑁆𑀣𑀯𑀺𑀲𑁂𑀲𑁂𑀦 𑀢𑀁𑀤𑁆𑀯𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀳𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀯𑀺𑀲𑀺𑀝𑁆𑀞𑁂𑀧𑀺 ‘‘𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀁 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀺𑀢𑀢𑀁 𑀣𑀸𑀫𑀕𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀬𑀤𑀺 𑀢𑀫𑁂𑀯 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀤𑀻𑀧𑁂𑀬𑁆𑀬, 𑀓𑀲𑁆𑀲𑀘𑀺 𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀧𑀦 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀁 𑀤𑀻𑀧𑁂𑀢𑀺. 𑀓𑀲𑁆𑀫𑀸? 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀦 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀲𑁆𑀲 ¶ 𑀤𑀲𑁆𑀲𑀺𑀢𑀢𑁆𑀢𑀸, 𑀅𑀦𑀼𑀲𑀬𑀲𑀤𑁆𑀤𑀲𑁆𑀲 𑀲𑀩𑁆𑀩𑀤𑀸 𑀯𑀺𑀚𑁆𑀚𑀫𑀸𑀦𑀸𑀦𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀲𑀬𑀦𑀢𑁆𑀣𑀢𑀸𑀬 𑀦𑀺𑀯𑀸𑀭𑀡𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀬 𑀣𑀸𑀫𑀕𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀲𑀬𑀦𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀬𑀁 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯 𑀇𑀫𑀺𑀦𑀸 𑀢𑀦𑁆𑀢𑀺𑀧𑁆𑀧𑀫𑀸𑀡𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺𑀢𑁆𑀢𑀬𑁂𑀦𑀧𑀺 𑀳𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁨. 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀲𑀼𑀔𑀸𑀬 𑀘 𑀉𑀧𑁂𑀓𑁆𑀔𑀸𑀬 𑀘𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑀁 𑀤𑁆𑀯𑀺𑀦𑁆𑀦𑀁 𑀯𑁂𑀤𑀦𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀦 𑀯𑀼𑀢𑁆𑀢𑀸 𑀳𑁄𑀢𑀺. 𑀤𑁆𑀯𑀻𑀲𑀼 𑀧𑀦 𑀭𑀸𑀕𑁂𑀲𑀼 𑀪𑀯𑀭𑀸𑀕𑀲𑁆𑀲 𑀢𑀻𑀲𑀼 𑀥𑀸𑀢𑀽𑀲𑀼 𑀭𑀽𑀧𑀸𑀭𑀽𑀧𑀥𑀸𑀢𑀽𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸𑀢𑀺 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀯𑀢𑁆𑀢𑀩𑁆𑀩𑀸. 𑀥𑀸𑀢𑀼𑀯𑁂𑀤𑀦𑀸𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀯𑀲𑁂𑀦 ¶ 𑀳𑀺 𑀢𑀺𑀧𑁆𑀧𑀓𑀸𑀭𑀁 𑀅𑀦𑀼𑀲𑀬𑀸𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀻𑀲𑀼 𑀥𑀸𑀢𑀽𑀲𑀼 𑀓𑀸𑀫𑀥𑀸𑀢𑀼𑀬𑀸 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀏𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀯𑀺𑀲𑀼𑀁 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀥𑀸𑀢𑀼𑀬𑀸 𑀯𑁂𑀤𑀦𑀸𑀦𑀜𑁆𑀘 𑀬𑁄𑀚𑁂𑀢𑀩𑁆𑀩𑀸. 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀇𑀤𑀜𑁆𑀘 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀫𑀸𑀦𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀤𑁆𑀯𑀻𑀲𑁆𑀯𑁂𑀯 𑀅𑀦𑀼𑀲𑁂𑀢𑀺, 𑀦 𑀢𑀻𑀲𑀽𑀢𑀺 𑀢𑀺𑀡𑁆𑀡𑀫𑁆𑀧𑀺 𑀞𑀸𑀦𑀢𑀸𑀦𑀺𑀯𑀸𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀦 𑀲𑀩𑁆𑀩𑀸𑀲𑀼 𑀤𑁆𑀯𑀻𑀲𑀼 𑀅𑀦𑀼𑀲𑀬𑀦𑀧𑁆𑀧𑀢𑁆𑀢𑁄 𑀅𑀢𑁆𑀣𑀺, 𑀢𑁂𑀦 𑀯𑁂𑀤𑀦𑀸𑀯𑀺𑀲𑁂𑀲𑀦𑀢𑁆𑀣𑀁 𑀦 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑁂𑀦 𑀓𑁄𑀘𑀺 𑀅𑀢𑁆𑀣𑁄. 𑀪𑀯𑀭𑀸𑀕𑀸𑀦𑀼𑀲𑀬𑀦𑀝𑁆𑀞𑀸𑀦𑀜𑁆𑀳𑀺 𑀅𑀝𑁆𑀞𑀸𑀦𑀜𑁆𑀘 𑀅𑀦𑀼𑀲𑀬𑀸𑀦𑀁 𑀅𑀧𑀭𑀺𑀬𑀸𑀧𑀦𑁆𑀦𑀁 𑀲𑀓𑁆𑀓𑀸𑀬𑁂 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀧𑀸𑀓𑀝𑀫𑁂𑀢𑀁. 𑀬𑀣𑀸 𑀘 ‘‘𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀖𑀸𑀦𑀼𑀲𑀬𑀸𑀦𑀼𑀲𑀬𑀝𑁆𑀞𑀸𑀦𑀢𑁄 𑀅𑀜𑁆𑀜𑀸 𑀤𑁆𑀯𑁂 𑀯𑁂𑀤𑀦𑀸 𑀕𑀬𑁆𑀳𑀦𑁆𑀢𑀺, 𑀏𑀯𑀁 𑀪𑀯𑀭𑀸𑀕𑀸𑀦𑀼𑀲𑀬𑀸𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀘 𑀅𑀜𑁆𑀜𑀸 𑀢𑀸 𑀕𑀬𑁆𑀳𑀦𑁆𑀢𑀻𑀢𑀺.

𑀏𑀢𑁆𑀣 𑀘 𑀤𑁆𑀯𑀻𑀳𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀇𑀝𑁆𑀞𑀭𑀽𑀧𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀲𑀸𑀢𑀲𑀦𑁆𑀢𑀲𑀼𑀔𑀕𑀺𑀤𑁆𑀥𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀲𑁆𑀲 𑀅𑀦𑀼𑀲𑀬𑀦𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 ¶ 𑀳𑀺 𑀲𑁄 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀺 𑀲𑀼𑀔𑀫𑀺𑀘𑁆𑀘𑁂𑀯 𑀅𑀪𑀺𑀮𑀪𑀢𑀻𑀢𑀺. 𑀏𑀯𑀁 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀅𑀧𑁆𑀧𑀺𑀬𑀭𑀽𑀧𑀸𑀲𑀸𑀢𑀭𑀽𑀧𑁂𑀲𑀼 𑀅𑀦𑀺𑀝𑁆𑀞𑀭𑀽𑀧𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀼𑀓𑁆𑀔𑀧𑀝𑀺𑀓𑀽𑀮𑀢𑁄 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀧𑀝𑀺𑀳𑀜𑁆𑀜𑀢𑀻𑀢𑀺 𑀤𑀼𑀓𑁆𑀔𑀯𑁂𑀤𑀦𑀫𑁂𑀯 𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀺, 𑀢𑁂𑀦 𑀧𑀦 𑀢𑀲𑁆𑀫𑀺𑀁 𑀅𑀦𑀼𑀲𑀬𑀦𑀁 𑀯𑀼𑀢𑁆𑀢𑀁. 𑀏𑀯𑀁 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀁 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀯𑀘𑀦𑁂𑀦 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑁂𑀲𑀼 𑀆𑀭𑀫𑁆𑀫𑀡𑀧𑀓𑀢𑀺𑀬𑀸 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀘 𑀯𑀲𑁂𑀦 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀁 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑀺 𑀢𑁂 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀦𑁆𑀢𑀺 𑀦𑀸𑀫. 𑀯𑁂𑀤𑀦𑀸𑀢𑁆𑀢𑀬𑀫𑀼𑀔𑁂𑀦 𑀯𑀸 𑀏𑀢𑁆𑀣 𑀇𑀝𑁆𑀞𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀓𑀸𑀫𑀥𑀸𑀢𑀼𑀆𑀤𑀺𑀕𑁆𑀕𑀳𑀡𑁂𑀦 𑀓𑀸𑀫𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀪𑀽𑀢𑀸𑀦𑀁 𑀓𑀸𑀫𑀪𑀯𑀸𑀤𑀻𑀦𑀁. 𑀢𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀪𑀯𑀲𑁆𑀲𑀸𑀤𑀯𑀲𑁂𑀦 𑀅𑀦𑀼𑀲𑀬𑀫𑀸𑀦𑁄 𑀓𑀸𑀫𑀥𑀸𑀢𑀼𑀬𑀸 𑀅𑀦𑀼𑀲𑁂𑀢𑀺, 𑀓𑀸𑀫𑀲𑀼𑀔𑀲𑁆𑀲𑀸𑀤𑀯𑀲𑁂𑀦 𑀅𑀦𑀼𑀲𑀬𑀫𑀸𑀦𑁄 𑀲𑀼𑀔𑁄𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀼. 𑀧𑀝𑀺𑀖𑁄 𑀤𑀼𑀓𑁆𑀔𑀧𑀝𑀺𑀖𑀸𑀢𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀬𑀢𑁆𑀣 𑀢𑀢𑁆𑀣 𑀧𑀝𑀺𑀳𑀜𑁆𑀜𑀫𑀸𑀦𑁄𑀧𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀏𑀯 𑀅𑀦𑀼𑀲𑁂𑀢𑀺. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀘 𑀓𑀸𑀫𑀲𑁆𑀲𑀸𑀤𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀢𑀢𑁆𑀣 𑀅𑀦𑀼𑀲𑀬𑀫𑀸𑀦𑁄 𑀭𑀸𑀕𑁄 𑀪𑀯𑀭𑀸𑀕𑁄𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀕𑁆𑀕𑀳𑀡𑁂𑀦 𑀘 𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀕𑀳𑀺𑀢𑀢𑁆𑀢𑀸 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁪𑁬) 𑀏𑀯𑀫𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀧𑀺𑀳𑀧𑀘𑁆𑀘𑀬𑀸 ¶ 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁂 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀣𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀼 𑀓𑀸𑀫𑀭𑀸𑀕𑁂𑀦 𑀦𑀸𑀦𑀼𑀲𑀬𑀺𑀢𑀩𑁆𑀩𑀦𑁆𑀢𑀺 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀸𑀧𑀺 𑀤𑀺𑀝𑁆𑀞𑀸𑀦𑀼𑀲𑀬𑀸𑀦𑀼𑀲𑀬𑀦𑀝𑁆𑀞𑀸𑀦𑀪𑀽𑀢𑀸 𑀓𑀸𑀫𑀸𑀯𑀘𑀭𑀯𑁂𑀤𑀦𑀸 𑀲𑀦𑁆𑀢𑀻𑀢𑀺? 𑀳𑁄𑀦𑁆𑀢𑀼, 𑀦 𑀧𑀦 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀢𑁄 𑀅𑀜𑁆𑀜𑀁 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀫𑀸𑀦𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀦𑁆𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁫𑁨) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀤𑀼𑀓𑁆𑀔𑀁 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀮𑁄𑀓𑀺𑀬𑀲𑀼𑀔𑁄𑀧𑁂𑀓𑁆𑀔𑀸 𑀓𑀸𑀫𑀭𑀸𑀕𑀫𑀸𑀦𑀸𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺.

𑀅𑀧𑀺𑀘 ¶ 𑀲𑀼𑀢𑁆𑀢𑁂 ‘‘𑀇𑀥𑀸𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀤𑁄𑀫𑀦𑀲𑁆𑀲𑀁 𑀧𑀚𑀳𑁂𑀬𑁆𑀬’𑀦𑁆𑀢𑀺, 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀧𑀝𑀺𑀖𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀝𑀺𑀖𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀧𑁆𑀧𑀳𑀸𑀦𑀁, 𑀤𑁄𑀫𑀦𑀲𑁆𑀲𑁂𑀦 𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀁 𑀅𑀢𑁆𑀣𑀻𑀢𑀺. 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸𑀬 𑀧𑀦 𑀇𑀥 𑀲𑀩𑁆𑀩𑀁 𑀤𑀼𑀓𑁆𑀔𑀁 ‘‘𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸, 𑀲𑀸 𑀧𑀦 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 ‘‘𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀭𑀸𑀕𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀯𑀺𑀚𑁆𑀚𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀯𑀼𑀢𑁆𑀢𑀁. 𑀦 𑀳𑀺 𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀩𑁆𑀩𑀣𑀸 𑀦𑀸𑀦𑀼𑀲𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀏𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁨) 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑁆𑀲𑁂𑀯 𑀯𑀢𑁆𑀣𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸, 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀜𑁆𑀘 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀯𑀢𑁆𑀣𑀼 𑀦 𑀦 𑀳𑁄𑀢𑀻𑀢𑀺 𑀢𑀢𑁆𑀣𑀸𑀧𑀺 𑀢𑀲𑁆𑀲 𑀅𑀦𑀼𑀲𑀬𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀢𑁆𑀣𑀼𑀪𑀸𑀯𑀢𑁄 𑀳𑀺 𑀇𑀥 𑀅𑀦𑀼𑀲𑀬𑀦𑀁 𑀦 𑀯𑀼𑀘𑁆𑀘𑀢𑀺, 𑀦 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀺𑀬 𑀯𑀼𑀢𑁆𑀢𑀦𑀬𑁂𑀦 𑀢𑀁𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀢𑀁𑀲𑀫𑀼𑀕𑁆𑀖𑀸𑀢𑀓𑀫𑀕𑁆𑀕𑀲𑁆𑀲 𑀩𑀮𑀯𑀽𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀘𑀸𑀢𑀺.

𑀏𑀢𑁆𑀣 ¶ 𑀘 𑀆𑀭𑀫𑁆𑀫𑀡𑁂 𑀅𑀦𑀼𑀲𑀬𑀝𑁆𑀞𑀸𑀦𑁂 𑀲𑀢𑀺 𑀪𑀯𑀭𑀸𑀕𑀯𑀚𑁆𑀚𑁄 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀤𑀼𑀓𑁆𑀔𑀸𑀬 𑀳𑀺 𑀯𑁂𑀤𑀦𑀸𑀬 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀘 𑀅𑀦𑀼𑀲𑀬𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀧𑀺 𑀮𑁄𑀪𑁄 𑀮𑁄𑀪𑁄 𑀏𑀯, 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀬𑀤𑀺 𑀲𑀺𑀬𑀸, 𑀤𑀺𑀝𑁆𑀞𑀸𑀦𑀼𑀲𑀬𑀲𑁆𑀲 𑀯𑀺𑀬 𑀏𑀢𑀲𑁆𑀲𑀧𑀺 𑀞𑀸𑀦𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀅𑀣 𑀧𑀦 𑀅𑀚𑁆𑀛𑀸𑀲𑀬𑀯𑀲𑁂𑀦 𑀢𑀦𑁆𑀦𑀺𑀦𑁆𑀦𑀢𑀸𑀬 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀬𑀣𑀸 𑀇𑀝𑁆𑀞𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀧𑁆𑀧𑀝𑀺𑀮𑀤𑁆𑀥𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄, 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀯𑀸 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀕𑀢𑀁 𑀧𑀭𑀺𑀡𑀢𑀁 𑀲𑀫𑀦𑀼𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀝𑀺𑀖𑁄 𑀤𑀼𑀓𑁆𑀔𑁂 𑀧𑀝𑀺𑀳𑀜𑁆𑀜𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀼𑀓𑁆𑀔𑀫𑁂𑀯 𑀢𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀦𑀸𑀮𑀫𑁆𑀩𑀺𑀢𑀁, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀲𑀼 𑀅𑀪𑀺𑀦𑀺𑀯𑁂𑀲𑀦𑀯𑀲𑁂𑀦 ¶ 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀧𑀺 𑀮𑁄𑀪𑁄 𑀲𑀼𑀔𑀸𑀪𑀺𑀲𑀗𑁆𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀸𑀢𑀲𑀦𑁆𑀢𑀲𑀼𑀔𑀤𑁆𑀯𑀬𑀫𑁂𑀯𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀪𑀯𑀭𑀸𑀕𑀯𑀚𑁆𑀚𑀲𑁆𑀲 𑀲𑀩𑁆𑀩𑀮𑁄𑀪𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑀢𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀘 𑀆𑀭𑀫𑁆𑀫𑀡𑁂 𑀭𑀚𑁆𑀚𑀦𑁆𑀢𑀺 𑀤𑀼𑀲𑁆𑀲𑀦𑁆𑀢𑀺 𑀘. 𑀢𑀢𑁆𑀣 𑀭𑀸𑀕𑁄 𑀲𑀼𑀔𑀚𑁆𑀛𑀸𑀲𑀬𑁄 𑀧𑀝𑀺𑀖𑁄 𑀤𑀼𑀓𑁆𑀔𑀚𑁆𑀛𑀸𑀲𑀬𑁄𑀢𑀺 𑀢𑁂𑀲𑀁 𑀦𑀸𑀦𑀸𑀦𑀼𑀲𑀬𑀝𑁆𑀞𑀸𑀦𑀢𑀸 𑀳𑁄𑀢𑀺.

𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁪) 𑀯𑀼𑀢𑁆𑀢𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀘 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀁 𑀯𑀢𑁆𑀯𑀸 ‘‘𑀤𑁄𑀫𑀦𑀲𑁆𑀲𑀫𑀢𑁆𑀢𑀫𑁂𑀯 𑀧𑀦 𑀢𑀁 𑀳𑁄𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁨) 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀢𑀢𑁆𑀣 𑀧𑀝𑀺𑀖𑁄 𑀧𑀝𑀺𑀖𑀸𑀦𑀼𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀳𑀚𑀸𑀢𑁄 𑀮𑁄𑀪𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦 𑀳𑁄𑀢𑀺𑀘𑁆𑀘𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀤𑁄𑀫𑀦𑀲𑁆𑀲𑀫𑀢𑁆𑀢𑀫𑁂𑀯 𑀧𑀦 𑀢𑀁 𑀳𑁄𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄’’𑀢𑀺, 𑀏𑀢𑁆𑀣 𑀦 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀦𑀢𑁆𑀣𑀺 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀻𑀢𑀺.

𑀤𑁂𑀲𑀦𑀸 𑀲𑀁𑀓𑀺𑀡𑁆𑀡𑀸 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀪𑀯𑀭𑀸𑀕𑀲𑁆𑀲𑀧𑀺 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀯𑀺𑀬 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀤𑁂𑀲𑀦𑀸 𑀓𑀢𑀸 𑀲𑀳𑀚𑀸𑀢𑀯𑁂𑀤𑀦𑀸𑀯𑀺𑀲𑁂𑀲𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀸𑀭𑁄

𑁧. 𑀅𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸

𑁩. 𑀅𑀦𑀼𑀲𑁂𑀢𑀺 ¶ 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑁄𑀳𑀸𑀭𑀸 𑀧𑀯𑀢𑁆𑀢𑀸𑀯𑀺𑀭𑀸𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀫𑀕𑁆𑀕𑁂𑀦𑁂𑀯 𑀳𑀺 𑀅𑀦𑀼𑀲𑀬𑀸𑀦𑀁 𑀯𑀺𑀭𑀸𑀫𑁄 𑀯𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺.

𑁨𑁦. 𑀦𑀸𑀧𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀏𑀓𑀁 𑀥𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀻𑀢𑀺 𑀏𑀢𑁆𑀣 𑀧𑀼𑀭𑀺𑀫𑁂𑀦 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸, 𑀧𑀘𑁆𑀙𑀺𑀫𑁂𑀦 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑀲𑁆𑀲 𑀧𑀝𑀺𑀮𑁄𑀫𑁂 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 ¶ 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀅𑀦𑀦𑀼𑀲𑀬𑀦𑀝𑁆𑀞𑀸𑀦𑀁 𑀧𑀓𑀢𑀺𑀬𑀸 𑀧𑀳𑀸𑀦𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁, ‘‘𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀢𑁂𑀲𑀁 𑀢𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑁂𑀲𑀜𑁆𑀜𑁂𑀯 𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑁂 𑀢𑁂𑀲𑀁 𑀢𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀢𑀺, 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀢𑀻’’𑀢𑀺 𑀧𑀓𑀢𑀺𑀬𑀸 𑀤𑀼𑀓𑁆𑀔𑀸𑀤𑀻𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀅𑀦𑀦𑀼𑀲𑀬𑀝𑁆𑀞𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀩𑁆𑀩𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀢𑀺, 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁫𑁬) 𑀅𑀦𑀼𑀲𑀬𑀧𑁆𑀧𑀳𑀸𑀦𑁂𑀦. 𑀏𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀑𑀓𑀸𑀲𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸𑀦𑀁 𑀅𑀦𑀼𑀲𑀬𑀸𑀦𑀁 𑀅𑀦𑀦𑀼𑀲𑀬𑀦𑀁 𑀯𑀼𑀢𑁆𑀢𑀁, 𑀧𑀘𑁆𑀙𑀺𑀫𑀦𑀬𑁂𑀦 𑀧𑀼𑀕𑁆𑀕𑀮𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀑𑀓𑀸𑀲𑀲𑁆𑀲 𑀓𑀸𑀫𑀥𑀸𑀢𑀼𑀆𑀤𑀺𑀓𑀲𑁆𑀲 𑀅𑀦𑁄𑀓𑀸𑀲𑀢𑀸𑀢𑀺.

𑀅𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸

𑁬𑁬-𑁧𑁩𑁧. 𑀲𑀸𑀦𑀼𑀲𑀬𑀧𑀚𑀳𑀦𑀧𑀭𑀺𑀜𑁆𑀜𑀸𑀯𑀸𑀭𑁂𑀲𑀼 ‘‘𑀲𑀸𑀦𑀼𑀲𑀬𑁄, 𑀧𑀚𑀳𑀢𑀺, 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄. 𑀧𑀼𑀕𑁆𑀕𑀮𑀲𑁆𑀲 𑀘 𑀇𑀫𑀲𑁆𑀫𑀺𑀁 𑀪𑀯𑁂 𑀲𑀸𑀦𑀼𑀲𑀬𑁄𑀢𑀺 𑀏𑀯𑀁 𑀪𑀯𑀯𑀺𑀲𑁂𑀲𑁂𑀦 𑀯𑀸, 𑀇𑀫𑀲𑁆𑀫𑀺𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄 𑀇𑀫𑀲𑁆𑀫𑀺𑀁 𑀇𑀢𑀭𑁂𑀲𑀼 𑀓𑁂𑀦𑀘𑀻𑀢𑀺 𑀏𑀯𑀁 𑀪𑀯𑀸𑀦𑀼𑀲𑀬𑀯𑀺𑀲𑁂𑀲𑁂𑀦 𑀯𑀸 𑀲𑀸𑀦𑀼𑀲𑀬𑀢𑀸𑀦𑀺𑀭𑀦𑀼𑀲𑀬𑀢𑀸𑀤𑀺𑀓𑀸 ¶ 𑀦𑀢𑁆𑀣𑀺. 𑀢𑀣𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑀦𑀼𑀲𑀬𑁄𑀢𑀺 𑀇𑀤𑀫𑁆𑀧𑀺 𑀦𑀢𑁆𑀣𑀺. 𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀯𑁂𑀤𑀦𑀸 𑀑𑀓𑀸𑀲𑁄, 𑀅𑀣 𑀔𑁄 𑀅𑀦𑀼𑀲𑀬𑀸𑀦𑀦𑁆𑀢𑀺. 𑀅𑀦𑀼𑀲𑀬𑀲𑁆𑀲 𑀧𑀦 𑀢𑀲𑁆𑀲 𑀢𑀲𑁆𑀲 𑀲𑁄 𑀲𑁄 𑀅𑀦𑀼𑀲𑀬𑀦𑁄𑀓𑀸𑀲𑁄 𑀧𑀼𑀕𑁆𑀕𑀮𑀲𑁆𑀲 𑀢𑁂𑀦 𑀢𑁂𑀦 𑀅𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑀢𑀸𑀬, 𑀢𑀲𑁆𑀲 𑀢𑀲𑁆𑀲 𑀧𑀚𑀳𑀦𑀧𑀭𑀺𑀚𑀸𑀦𑀦𑀸𑀦𑀜𑁆𑀘 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺, 𑀅𑀦𑀦𑀼𑀲𑀬𑀦𑁄𑀓𑀸𑀲𑁄 𑀘 𑀦𑀺𑀭𑀦𑀼𑀲𑀬𑀢𑀸𑀤𑀻𑀦𑀁, 𑀢𑀲𑁆𑀫𑀸 𑀑𑀓𑀸𑀲𑀯𑀸𑀭𑁂𑀲𑀼 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 ‘‘𑀬𑀢𑁄 𑀢𑀢𑁄’’𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀁, 𑀧𑀚𑀳𑀦𑀧𑀭𑀺𑀜𑁆𑀜𑀸𑀯𑀸𑀭𑁂𑀲𑀼 𑀅𑀧𑀸𑀤𑀸𑀦𑀢𑁆𑀣𑁂 𑀏𑀯 𑀯𑀸. 𑀢𑀢𑁄 𑀢𑀢𑁄 𑀳𑀺 𑀑𑀓𑀸𑀲𑀢𑁄 𑀅𑀧𑀕𑀫𑀓𑀭𑀡𑀁 𑀯𑀺𑀦𑀸𑀲𑀦𑀁 𑀧𑀚𑀳𑀦𑀁 𑀧𑀭𑀺𑀚𑀸𑀦𑀦𑀜𑁆𑀘𑀸𑀢𑀺.

𑀢𑀢𑁆𑀣 𑀬𑀢𑁄𑀢𑀺 𑀬𑀢𑁄 𑀅𑀦𑀼𑀲𑀬𑀝𑁆𑀞𑀸𑀦𑀢𑁄 𑀅𑀦𑀼𑀮𑁄𑀫𑁂, 𑀧𑀝𑀺𑀮𑁄𑀫𑁂 𑀅𑀦𑀦𑀼𑀲𑀬𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀬𑀸𑀦𑀸𑀦𑀼𑀲𑀬𑀲𑁆𑀲𑁂𑀯 𑀳𑀺 𑀦𑀺𑀫𑀺𑀢𑁆𑀢𑀸𑀧𑀸𑀤𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ¶ ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀢𑀢𑁄 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺 (𑀬𑀫.𑁨.𑀅𑀦𑀼𑀲𑀬𑀬𑀫𑀓.𑁭𑁭), 𑀧𑀚𑀳𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁪𑁩) 𑀘 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁧𑁦), 𑀦 𑀧𑀚𑀳𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁭𑁪-𑁧𑁭𑁬) 𑀘 𑀏𑀯𑀫𑀸𑀤𑀻𑀲𑀼 𑀭𑀽𑀧𑀥𑀸𑀢𑀼𑀆𑀤𑀬𑁄 𑀏𑀯 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀢𑀼𑀢𑁆𑀣𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀭𑀽𑀧𑀢𑁄 𑀅𑀦𑀼𑀲𑀬𑀦𑀝𑁆𑀞𑀸𑀦𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀢𑀤𑀢𑁆𑀣𑁂 𑀆𑀤𑀺𑀧𑀜𑁆𑀳𑁂𑀧𑀺 ‘‘𑀬𑀢𑁄’’𑀢𑀺 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀼𑀦 ‘‘𑀬𑀢𑁄’’𑀢𑀺 𑀏𑀢𑀲𑁆𑀲 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀦𑁆𑀦𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀦 𑀳𑀺 𑀉𑀧𑁆𑀧𑀦𑁆𑀦𑁂𑀦𑁂𑀯 𑀅𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀜𑁆𑀘 𑀲𑀦𑁆𑀥𑀸𑀬𑁂𑀯 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀦𑀼𑀲𑀬𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸𑀢𑀺 𑀢𑀁 𑀢𑀣𑁂𑀯 𑀤𑀺𑀲𑁆𑀲𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀬𑀢𑁄 𑀉𑀧𑁆𑀧𑀦𑁆𑀦𑁂𑀦𑀸𑀢𑀺 𑀬𑀢𑁄 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀦𑁆𑀢𑀺. 𑀢𑀣𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑁂𑀦𑀸𑀢𑀺. 𑀉𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑁂 𑀅𑀓𑀢𑁂 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀪𑀸𑀯𑀁 𑀆𑀧𑀦𑁆𑀦𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀪𑀸𑀯𑀁 𑀅𑀧𑀦𑁂𑀢𑀺 𑀦𑀸𑀫. 𑀲𑀩𑁆𑀩𑀢𑁆𑀣𑀸𑀢𑀺 𑀏𑀢𑀲𑁆𑀲 𑀧𑀦 𑀲𑀩𑁆𑀩𑀝𑁆𑀞𑀸𑀦𑀢𑁄𑀢𑀺 𑀅𑀬𑀫𑀢𑁆𑀣𑁄 𑀦 𑀦 𑀲𑀫𑁆𑀪𑀯𑀢𑀺. 𑀢𑁆𑀣-𑀓𑀸𑀭𑀜𑁆𑀳𑀺 𑀪𑀼𑀫𑁆𑀫𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀻𑀢𑀺.

𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀚𑀳𑀦𑀯𑀸𑀭𑀯𑀡𑁆𑀡𑀦𑀸

𑁧𑁩𑁨-𑁧𑁯𑁭. 𑀧𑀚𑀳𑀦𑀯𑀸𑀭𑁂 ¶ 𑀬𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀬𑁄 𑀲𑀸𑀯𑀲𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀲𑁄 𑀢𑁂 𑀧𑀚𑀳𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑀦 𑀳𑁄𑀢𑀺 𑀅𑀧𑀚𑀳𑀦𑀲𑀩𑁆𑀪𑀸𑀯𑀸, 𑀢𑀲𑁆𑀫𑀸 𑀲𑀦𑁆𑀦𑀺𑀝𑁆𑀞𑀸𑀦𑁂 𑀦𑀺𑀭𑀯𑀲𑁂𑀲𑀧𑁆𑀧𑀚𑀳𑀦𑀓𑁄𑀬𑁂𑀯 𑀧𑀚𑀳𑀢𑀻𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀬𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁩𑁨) 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑀁𑀲𑀬𑀧𑀤𑁂𑀦 𑀧𑀳𑀸𑀦𑀓𑀭𑀡𑀫𑀢𑁆𑀢𑀫𑁂𑀯 𑀧𑀼𑀘𑁆𑀙𑀢𑀺, 𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀺𑀚𑁆𑀚𑀫𑀸𑀦𑀁 𑀧𑀳𑀸𑀦𑀁 𑀲𑀦𑁆𑀥𑀸𑀬 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑁂 𑀧𑀦 ‘‘𑀦𑀧𑁆𑀧𑀚𑀳𑀢𑀻’’𑀢𑀺 𑀧𑀚𑀳𑀦𑀸𑀪𑀸𑀯𑁄 𑀏𑀯 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑁂𑀦 𑀲𑀁𑀲𑀬𑀧𑀤𑁂𑀦 𑀘 𑀯𑀺𑀦𑀺𑀘𑁆𑀙𑀺𑀢𑁄 ¶ 𑀧𑀼𑀘𑁆𑀙𑀺𑀢𑁄 𑀘, 𑀢𑀲𑁆𑀫𑀸 𑀬𑁂𑀲𑀁 𑀧𑀚𑀳𑀦𑀁 𑀦𑀢𑁆𑀣𑀺 𑀦𑀺𑀭𑀯𑀲𑁂𑀲𑀯𑀲𑁂𑀦 𑀧𑀚𑀳𑀦𑀓𑀸𑀦𑀁, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀧𑁆𑀧𑀚𑀳𑀦𑀲𑀩𑁆𑀪𑀸𑀯𑁂𑀦𑁂𑀯 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀸, 𑀦 𑀘 𑀬𑀣𑀸𑀯𑀺𑀚𑁆𑀚𑀫𑀸𑀦𑁂𑀦 𑀧𑀳𑀸𑀦𑁂𑀦𑁂𑀯 𑀯𑀚𑁆𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺. ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀝𑁆𑀞𑀫𑀓𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀜𑁆𑀘 𑀦𑀧𑁆𑀧𑀚𑀳𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀜𑁆𑀘 𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁬𑁫) 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀣𑀼𑀚𑁆𑀚𑀦𑁄 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀅𑀪𑀸𑀯𑁂𑀦 𑀦𑀧𑁆𑀧𑀚𑀳𑀢𑀺, 𑀲𑁂𑀲𑀸 𑀢𑁂𑀲𑀁 𑀅𑀦𑀼𑀲𑀬𑀸𑀦𑀁 𑀧𑀳𑀻𑀦𑀢𑁆𑀢𑀸’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁧𑁩𑁨-𑁧𑁯𑁭) 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑁂𑀲𑀜𑁆𑀘𑀺 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀓𑁂𑀲𑀜𑁆𑀘𑀺 𑀉𑀪𑀬𑀦𑁆𑀢𑀺 𑀲𑁂𑀲𑀸𑀦𑀁 𑀢𑁂𑀲𑀁 𑀧𑀳𑀻𑀦𑀢𑀸 𑀅𑀢𑁆𑀣𑀺, 𑀢𑀣𑀸𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑀸 𑀉𑀪𑀬𑀸𑀧𑀚𑀳𑀦𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 ‘‘𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀣 𑀧𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀜𑁆𑀘 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀇𑀫𑀁 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀕𑀳𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀦 𑀢𑀢𑁆𑀣 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀧𑀼𑀘𑁆𑀙𑀺𑀢𑀲𑁆𑀲 𑀧𑀦 𑀲𑀁𑀲𑀬𑀢𑁆𑀣𑀲𑁆𑀲 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀲𑀢𑀺 ‘‘𑀲𑁂𑀲𑀸 𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀦𑀧𑁆𑀧𑀚𑀳𑀢𑀺, 𑀲𑁄 𑀤𑀺𑀝𑁆𑀞𑀸𑀦𑀼𑀲𑀬𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀦𑀧𑁆𑀧𑀚𑀳𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑁂 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀓𑁂 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁂 𑀲𑀦𑁆𑀥𑀸𑀬 𑀓𑀸𑀭𑀡𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀅𑀦𑀼𑀲𑀬𑀸𑀦𑀁 𑀧𑀳𑀻𑀦𑀢𑁆𑀢𑀸𑀢𑀺 𑀢𑁂𑀲𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀧𑀳𑀻𑀦𑀢𑁆𑀢𑀸 𑀢𑁂 𑀲𑀁𑀲𑀬𑀢𑁆𑀣𑀲𑀗𑁆𑀕𑀳𑀺𑀢𑁂 𑀅𑀦𑀼𑀲𑀬𑁂 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀚𑀳𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀳𑀻𑀦𑀯𑀸𑀭𑀯𑀡𑁆𑀡𑀦𑀸

𑁨𑁬𑁪-𑁨𑁭𑁪. 𑀧𑀳𑀻𑀦𑀯𑀸𑀭𑁂 ¶ 𑀨𑀮𑀝𑁆𑀞𑀯𑀲𑁂𑀦𑁂𑀯 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀅𑀦𑀼𑀮𑁄𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑁂 𑀳𑀺 𑀧𑀼𑀣𑀼𑀚𑁆𑀚𑀦𑀯𑀲𑁂𑀦𑀧𑀺 𑀤𑁂𑀲𑀦𑀸 𑀕𑀳𑀺𑀢𑀸𑀢𑀺. ‘‘𑀨𑀮𑀝𑁆𑀞𑀯𑀲𑁂𑀦𑁂𑀯𑀸’’𑀢𑀺 𑀘 𑀲𑀸𑀥𑀸𑀭𑀡𑀯𑀘𑀦𑁂𑀦 𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀅𑀕𑁆𑀕𑀳𑀺𑀢𑀢𑀁 𑀤𑀻𑀧𑁂𑀢𑀺. 𑀅𑀦𑀼𑀲𑀬𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑁂𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑀜𑁆𑀳𑀺 𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀦 𑀓𑁄𑀘𑀺 𑀅𑀦𑀼𑀲𑀬𑁄 𑀉𑀧𑁆𑀧𑀢𑁆𑀢𑀺𑀭𑀳𑁄, 𑀦𑀸𑀧𑀺 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀢𑀁 𑀆𑀧𑀸𑀤𑀺𑀢𑁄, 𑀢𑀲𑁆𑀫𑀸 𑀢𑁂 𑀦 𑀅𑀦𑀼𑀲𑀬𑀲𑀸𑀦𑀼𑀲𑀬𑀧𑀳𑀻𑀦𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀲𑀼 𑀕𑀳𑀺𑀢𑀸𑀢𑀺.

𑁨𑁭𑁫-𑁨𑁯𑁬. 𑀑𑀓𑀸𑀲𑀯𑀸𑀭𑁂 ¶ 𑀲𑁄 𑀲𑁄 𑀅𑀦𑀼𑀲𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀑𑀓𑀸𑀲𑁂 𑀏𑀯 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄 𑀧𑀳𑀻𑀦𑁄, 𑀅𑀦𑀸𑀧𑀸𑀤𑀺𑀢𑁄 𑀘 𑀅𑀧𑁆𑀧𑀳𑀻𑀦𑁄𑀢𑀺 𑀧𑀳𑀻𑀦𑀸𑀧𑁆𑀧𑀳𑀻𑀦𑀯𑀘𑀦𑀸𑀦𑀺 𑀢𑀤𑁄𑀓𑀸𑀲𑀫𑁂𑀯 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀦𑁄𑀓𑀸𑀲𑁂 𑀢𑀤𑀼𑀪𑀬𑀸𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺. 𑀲𑀸𑀥𑀸𑀭𑀡𑀝𑁆𑀞𑀸𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀧𑀳𑀻𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑁄𑀓𑀸𑀲𑁂 𑀧𑀳𑀻𑀦𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄, 𑀦 𑀲𑀫𑀸𑀦𑀓𑀸𑀮𑁂 𑀧𑀳𑀻𑀦𑁄𑀢𑀺.

𑀧𑀳𑀻𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀸𑀢𑀼𑀯𑀸𑀭𑀯𑀡𑁆𑀡𑀦𑀸

𑁩𑁩𑁨-𑁩𑁪𑁦. 𑀥𑀸𑀢𑀼𑀯𑀸𑀭𑁂 𑀲𑀦𑁆𑀢𑀸𑀦𑀁 𑀅𑀦𑀼𑀕𑀢𑀸 𑀳𑀼𑀢𑁆𑀯𑀸 𑀲𑀬𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀸, 𑀢𑀁𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀅𑀦𑀼𑀕𑀦𑁆𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀅𑀭𑀳𑀪𑀸𑀯𑁂𑀦 𑀲𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀢𑁆𑀢𑀺𑀭𑀳𑀢𑀸 𑀏𑀯 𑀳𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀥𑀸𑀧𑀺 𑀬𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘 𑀦 𑀓𑀸𑀫𑀥𑀸𑀢𑀼𑀆𑀤𑀻𑀦𑀺 𑀙 𑀧𑀝𑀺𑀦𑀺𑀲𑁂𑀥𑀯𑀘𑀦𑀸𑀦𑀺 𑀥𑀸𑀢𑀼𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 ‘‘𑀦 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀦 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀼𑀘𑁆𑀘𑀫𑀸𑀦𑁂 𑀇𑀫𑀁 𑀦𑀸𑀫 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀦 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀢𑀲𑁆𑀫𑀸 𑀢𑀁𑀫𑀽𑀮𑀺𑀓𑀸𑀲𑀼 𑀬𑁄𑀚𑀦𑀸𑀲𑀼 ‘‘𑀦 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀭𑀽𑀧𑀥𑀸𑀢𑀼𑀁 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺 𑀧𑀞𑀫𑀁 𑀬𑁄𑀚𑁂𑀢𑁆𑀯𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 ‘‘𑀦 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀓𑀸 𑀬𑁄𑀚𑀦𑀸 𑀓𑀢𑀸. 𑀏𑀯𑀜𑁆𑀳𑀺 𑀦 𑀓𑀸𑀫𑀥𑀸𑀢𑀼𑀆𑀤𑀺𑀧𑀤𑁂𑀳𑀺 𑀬𑀣𑀸𑀯𑀼𑀢𑁆𑀢𑀥𑀸𑀢𑀼𑀬𑁄𑀬𑁂𑀯 𑀕𑀳𑀺𑀢𑀸, 𑀦 𑀓𑀜𑁆𑀘𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀅𑀦𑀼𑀲𑀬𑀯𑀸𑀭𑁂 ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀧𑀤𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸 ‘‘𑀬𑀲𑁆𑀲 ¶ 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄. 𑀅𑀣𑀸𑀧𑀺 𑀅𑀧𑁆𑀧𑀳𑀻𑀦𑀢𑀁 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄 𑀢𑀢𑁆𑀣 𑀕𑀳𑀺𑀢𑁄, 𑀇𑀥𑀸𑀧𑀺 𑀲𑁄 𑀦 𑀦 𑀬𑀼𑀚𑁆𑀚𑀢𑀻𑀢𑀺. 𑀪𑀗𑁆𑀕𑀸𑀢𑀺 𑀪𑀜𑁆𑀚𑀺𑀢𑀩𑁆𑀩𑀸, 𑀤𑁆𑀯𑀺𑀥𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀦 𑀓𑁄𑀘𑀺 𑀅𑀦𑀼𑀲𑀬𑁄 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀼𑀲𑁂𑀢𑀺 𑀦𑀸𑀦𑀼𑀲𑁂𑀢𑀺 𑀘𑀸𑀢𑀺 𑀤𑁆𑀯𑀺𑀥𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀣𑁂𑀯 𑀓𑀲𑁆𑀫𑀸 ‘‘𑀓𑀢𑀺 𑀅𑀦𑀼𑀲𑀬𑀸 𑀪𑀗𑁆𑀕𑀸? 𑀅𑀦𑀼𑀲𑀬𑀸 𑀪𑀗𑁆𑀕𑀸 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀢𑀸𑀦𑀺. 𑀦 𑀳𑀺 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑁂 𑀲𑀁𑀲𑀬𑁄 𑀬𑀼𑀢𑁆𑀢𑁄𑀢𑀺 ¶ ? 𑀦 𑀦 𑀬𑀼𑀢𑁆𑀢𑁄, ‘‘𑀅𑀦𑀼𑀲𑀬𑀸 𑀪𑀗𑁆𑀕𑀸 𑀦𑀢𑁆𑀣𑀻’’𑀢𑀺 𑀅𑀯𑀼𑀢𑁆𑀢𑁂 𑀪𑀗𑁆𑀕𑀸𑀪𑀸𑀯𑀲𑁆𑀲 𑀅𑀯𑀺𑀜𑁆𑀜𑀸𑀢𑀢𑁆𑀢𑀸𑀢𑀺.

𑀥𑀸𑀢𑀼𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀲𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑀺𑀢𑁆𑀢𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁬𑁨. 𑀘𑀺𑀢𑁆𑀢𑀬𑀫𑀓𑀯𑀡𑁆𑀡𑀦𑀸𑀬𑀁 𑀆𑀤𑀺𑀢𑁄𑀯 𑀢𑀬𑁄 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀢𑀬𑁄 𑀫𑀳𑀸𑀯𑀸𑀭𑀸 𑀲𑀭𑀸𑀕𑀸𑀤𑀺𑀓𑀼𑀲𑀮𑀸𑀤𑀻𑀳𑀺 𑀫𑀺𑀲𑁆𑀲𑀓𑀸 𑀲𑀼𑀤𑁆𑀥𑀺𑀓𑀸 𑀘, 𑀢𑁂𑀲𑀼 𑀆𑀤𑀺𑀢𑁄 𑀲𑀼𑀤𑁆𑀥𑀺𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀲𑁆𑀲𑀓𑁂𑀲𑀼 𑀘 𑀏𑀓𑁂𑀓𑀲𑁆𑀫𑀺𑀁 𑀲𑀭𑀸𑀕𑀸𑀤𑀺𑀫𑀺𑀲𑁆𑀲𑀓𑀘𑀺𑀢𑁆𑀢𑁂 𑀢𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸, 𑀢𑁂 𑀢𑀢𑁆𑀣 𑀢𑀢𑁆𑀣 𑀧𑀦 𑀯𑀼𑀢𑁆𑀢𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ‘‘𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀦𑀺𑀭𑀦𑁆𑀢𑀭𑀁 𑀯𑀼𑀢𑁆𑀢𑁂𑀢𑀺. ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀸𑀦𑀜𑁆𑀘 𑀲𑀁𑀲𑀕𑁆𑀕𑀯𑀲𑁂𑀦 𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀧𑀯𑀢𑁆𑀢𑀢𑁆𑀢𑀸 ‘‘𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀯𑀸𑀭𑀸𑀦𑀁 𑀢𑀁𑀢𑀁𑀦𑀸𑀫𑀢𑀸 𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁬𑁩. 𑀢𑀣𑀸𑀭𑀽𑀧𑀲𑁆𑀲𑁂𑀯 ¶ 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀢𑀺 𑀇𑀤𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀥𑀺𑀧𑁆𑀧𑁂𑀢𑁂 𑀢𑀜𑁆𑀘 𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀭𑀳𑀢𑁄 𑀧𑀘𑁆𑀙𑀺𑀫𑀘𑀺𑀢𑁆𑀢𑀫𑁆𑀧𑀻𑀢𑀺 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀯𑀁𑀧𑀓𑀸𑀭𑀁 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁬𑁫-𑁮𑁨. 𑀉𑀧𑁆𑀧𑀸𑀤𑀯𑀸𑀭𑀲𑁆𑀲 𑀤𑀼𑀢𑀺𑀬𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁, 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 ¶ 𑀏𑀢𑁆𑀣 ‘‘𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀏𑀢𑀲𑁆𑀲 ‘‘𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑀼𑀢𑁆𑀯𑀸 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑀸𑀫𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘𑀸𑀢𑀺 𑀏𑀢𑀲𑁆𑀲𑀧𑀺 𑀉𑀧𑁆𑀧𑀸𑀤𑀁 𑀧𑀢𑁆𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀅𑀦𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀤𑁆𑀯𑀬𑀫𑁂𑀢𑀁 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ‘‘𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀅𑀢𑀻𑀢𑀯𑁄𑀳𑀸𑀭𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀦𑁄’’𑀢𑀺 𑀅𑀯𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀏𑀢𑁆𑀣 𑀘 ‘‘𑀦𑁄’’𑀢𑀺 𑀅𑀯𑀢𑁆𑀯𑀸 ‘‘𑀆𑀫𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. ‘‘𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀧𑀦 𑀪𑀺𑀚𑁆𑀚𑀫𑀸𑀦𑀘𑀺𑀢𑁆𑀢𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦 𑀘 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑀘𑀺𑀢𑁆𑀢𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀢𑀲𑁆𑀲𑀧𑀺 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀢𑁆𑀢𑀦𑁆𑀢𑀺 𑀳𑀺 𑀲𑀸𑀫𑀜𑁆𑀜𑀯𑀘𑀦𑀁 𑀏𑀓𑀲𑁆𑀫𑀺𑀁 𑀅𑀦𑁂𑀓𑀲𑁆𑀫𑀺𑀜𑁆𑀘 𑀬𑀣𑀸𑀕𑀳𑀺𑀢𑀯𑀺𑀲𑁂𑀲𑁂 𑀢𑀺𑀝𑁆𑀞𑀢𑀻𑀢𑀺. ‘‘𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀏𑀢𑁆𑀣 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀧𑀼𑀕𑁆𑀕𑀮𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄 𑀘 𑀧𑀼𑀕𑁆𑀕𑀮𑀯𑀸𑀭𑀸𑀤𑀻𑀲𑀼 𑀢𑀻𑀲𑀼𑀧𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀸 𑀉𑀤𑁆𑀤𑀺𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀸 𑀘. 𑀢𑀢𑁆𑀣 𑀧𑀼𑀕𑁆𑀕𑀮𑀯𑀸𑀭𑁂 𑀅𑀯𑀺𑀲𑁂𑀲𑁂𑀦 𑀬𑀁 𑀓𑀜𑁆𑀘𑀺 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀥𑀫𑁆𑀫𑀯𑀸𑀭𑁂 𑀘𑀺𑀢𑁆𑀢𑀫𑁂𑀯, 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁂 𑀧𑀼𑀕𑁆𑀕𑀮𑀁 𑀘𑀺𑀢𑁆𑀢𑀜𑁆𑀘𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁮𑁩. 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁂 𑀇𑀫𑀲𑁆𑀲 𑀧𑀼𑀕𑁆𑀕𑀮𑀯𑀸𑀭𑀢𑁆𑀢𑀸 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄𑀢𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 ¶ 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀏𑀢𑁂𑀦 𑀦 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀦 𑀕𑀳𑀺𑀢𑁄, 𑀏𑀯𑀁 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀦 𑀓𑁄𑀘𑀺 𑀦 𑀕𑀳𑀺𑀢𑁄. 𑀦 𑀳𑀺 𑀲𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀻𑀢𑀁 𑀦𑀢𑁆𑀣𑀺, 𑀢𑁂 𑀘 𑀧𑀦 𑀦𑀺𑀭𑀼𑀚𑁆𑀛𑀫𑀸𑀦𑀓𑁆𑀔𑀡𑀸𑀢𑀻𑀢𑀘𑀺𑀢𑁆𑀢𑀸 𑀦 𑀦 𑀳𑁄𑀦𑁆𑀢𑀻𑀢𑀺 𑀧𑀞𑀫𑁄 𑀧𑀜𑁆𑀳𑁄 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀲𑀺𑀬𑀸, 𑀢𑀣𑀸 𑀤𑀼𑀢𑀺𑀬𑀢𑀢𑀺𑀬𑀸. 𑀘𑀢𑀼𑀢𑁆𑀣𑁄 𑀧𑀦 ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁, 𑀦𑁄 𑀘 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁, 𑀇𑀢𑀭𑁂𑀲𑀁 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀜𑁆𑀘 𑀅𑀯𑀻𑀢𑀺𑀓𑁆𑀓𑀦𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀅𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀣𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀲𑁆𑀫𑀸 𑀲𑀩𑁆𑀩𑀢𑁆𑀣 𑀘𑀺𑀢𑁆𑀢𑀫𑁂𑀯 𑀯𑀺𑀪𑀢𑁆𑀢𑀦𑁆𑀢𑀺 ¶ ? 𑀘𑀺𑀢𑁆𑀢𑀯𑀲𑁂𑀦 𑀧𑀼𑀕𑁆𑀕𑀮𑀯𑀯𑀢𑁆𑀣𑀸𑀦𑀢𑁄. 𑀔𑀡𑀲𑁆𑀲 𑀳𑀺 𑀯𑀻𑀢𑀺𑀓𑁆𑀓𑀦𑁆𑀢𑀢𑀸𑀬 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀢𑀸𑀯𑀘𑀦𑁂𑀦 𑀯𑀢𑁆𑀢𑀫𑀸𑀦𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀻𑀢𑀘𑀺𑀢𑁆𑀢𑁄 𑀯𑀼𑀢𑁆𑀢𑁄 𑀅𑀢𑀻𑀢𑀲𑁆𑀲 𑀘, 𑀢𑀢𑁆𑀣 𑀧𑀼𑀭𑀺𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀪𑀗𑁆𑀕𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀧𑀘𑁆𑀙𑀺𑀫𑀲𑁆𑀲 𑀯𑀻𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀏𑀯𑀫𑀸𑀤𑀺𑀓𑁄 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀁𑀢𑀁𑀔𑀡𑀯𑀻𑀢𑀺𑀓𑁆𑀓𑀫𑀸𑀯𑀻𑀢𑀺𑀓𑁆𑀓𑀫𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘𑀺𑀢𑁆𑀢𑀫𑁂𑀯 𑀯𑀺𑀪𑀢𑁆𑀢𑀁. 𑀅𑀣 𑀯𑀸 𑀦𑀬𑀺𑀥 𑀥𑀫𑁆𑀫𑀫𑀢𑁆𑀢𑀯𑀺𑀲𑀺𑀝𑁆𑀞𑁄 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄, 𑀅𑀣 𑀔𑁄 𑀧𑀼𑀕𑁆𑀕𑀮𑀯𑀺𑀲𑀺𑀝𑁆𑀞𑀁 𑀘𑀺𑀢𑁆𑀢𑀁, 𑀢𑀲𑁆𑀫𑀸 𑀘𑀺𑀢𑁆𑀢𑀫𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺𑀧𑀺 𑀧𑀼𑀕𑁆𑀕𑀮𑀧𑁆𑀧𑀥𑀸𑀦𑀸 𑀧𑀼𑀘𑁆𑀙𑀸, 𑀅𑀣𑀸𑀧𑀺 𑀘𑀺𑀢𑁆𑀢𑀧𑁆𑀧𑀥𑀸𑀦𑀸, 𑀉𑀪𑀬𑀣𑀸𑀧𑀺 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸 𑀧𑀦 𑀅𑀯𑀢𑁆𑀯𑀸 𑀦𑀺𑀭𑁄𑀥𑀓𑁆𑀔𑀡𑀯𑀻𑀢𑀺𑀓𑁆𑀓𑀫𑁂𑀦 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀢𑀸 𑀦 𑀉𑀧𑁆𑀧𑀸𑀤𑀓𑁆𑀔𑀡𑀯𑀻𑀢𑀺𑀓𑁆𑀓𑀫𑁂𑀦 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀢𑀸 𑀯𑀺𑀬 𑀯𑀢𑁆𑀢𑀫𑀸𑀦𑀲𑁆𑀲 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀢𑀻𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺 𑀏𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 ‘‘𑀦 𑀦𑀺𑀭𑀼𑀚𑁆𑀛𑀫𑀸𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺.

𑁧𑁧𑁪-𑁧𑁧𑁬. 𑀫𑀺𑀲𑁆𑀲𑀓𑀯𑀸𑀭𑁂𑀲𑀼 𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀸, 𑀦𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀸𑀢𑀺𑀓𑀸𑀞𑀧𑀦𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀢𑀣𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀢𑁆𑀣𑁂𑀲𑀼 𑀲𑀭𑀸𑀕𑀸𑀤𑀺𑀫𑀺𑀲𑁆𑀲𑀓𑀘𑀺𑀢𑁆𑀢𑀯𑀲𑁂𑀦𑁂𑀯 𑀧𑀼𑀘𑁆𑀙𑀸 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀲𑀭𑀸𑀕𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀇𑀢𑀭𑁂𑀲𑀁 𑀲𑀭𑀸𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀸’’𑀢𑀺 𑀏𑀯𑀫𑀸𑀤𑀺𑀦𑀸 ¶ 𑀦𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀲𑀼𑀤𑁆𑀥𑀺𑀓𑀯𑀸𑀭𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀓𑀢𑁆𑀯𑀸 𑀲𑀁𑀔𑀺𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁧𑁬. 𑀥𑀫𑁆𑀫𑀬𑀫𑀓𑀯𑀡𑁆𑀡𑀦𑀸𑀬𑀁 ¶ 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺 𑀬𑀣𑀸 𑀫𑀽𑀮𑀬𑀫𑀓𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀤𑁂𑀲𑀺𑀢𑀸, 𑀬𑀣𑀸 𑀘 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀣𑀸 𑀲𑀗𑁆𑀕𑀳𑁂𑀢𑁆𑀯𑀸 𑀤𑁂𑀲𑀺𑀢𑀸, 𑀢𑀣𑀸 𑀅𑀤𑁂𑀲𑁂𑀢𑁆𑀯𑀸 𑀬𑀸 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀓𑀸 𑀫𑀸𑀢𑀺𑀓𑀸, 𑀢𑀁 𑀇𑀥 𑀆𑀤𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀤𑁂𑀲𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁩𑁩-𑁩𑁪. ‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀅𑀩𑁆𑀬𑀸𑀓𑀢𑀸 𑀘𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀇𑀫𑀲𑁆𑀫𑀺𑀁 𑀧𑀦 𑀧𑀜𑁆𑀳𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑀜𑁆𑀘 𑀮𑀩𑁆𑀪𑀢𑀺, 𑀢𑀁 𑀧𑀦 𑀧𑀝𑀺𑀮𑁄𑀫𑀯𑀸𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂, 𑀆𑀭𑀼𑀧𑁆𑀧𑁂 𑀅𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀓𑀼𑀲𑀮𑀸 𑀘 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀩𑁆𑀬𑀸𑀓𑀢𑀸 𑀘 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 ¶ 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀅𑀩𑁆𑀬𑀸𑀓𑀢𑀸 𑀘 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑁂 𑀦 𑀯𑀺𑀥𑀸𑀦𑀁, 𑀦𑀸𑀧𑀺 𑀧𑀝𑀺𑀲𑁂𑀥𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀦𑁄’’𑀢𑀺 (𑀬𑀫. 𑁩.𑀥𑀫𑁆𑀫𑀬𑀫𑀓.𑁧𑁬𑁩) 𑀯𑀼𑀢𑁆𑀢𑀦𑁆𑀢𑀺. 𑀢𑀁 𑀧𑀦𑁂𑀢𑀁 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀤𑀻𑀦𑀫𑁆𑀧𑀺 𑀉𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀦𑀺𑀭𑁄𑀥𑀲𑁆𑀲 𑀏𑀯𑀫𑀸𑀤𑀻𑀳𑀺 𑀏𑀯 𑀧𑀸𑀴𑀻𑀳𑀺 𑀧𑀝𑀺𑀲𑁂𑀥𑀲𑀺𑀤𑁆𑀥𑀺𑀢𑁄.

𑀬𑁂 𑀘 𑀯𑀤𑀦𑁆𑀢𑀺 ‘‘𑀬𑀣𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀦𑀺𑀭𑁄𑀥𑀓𑀣𑀸𑀬𑀁 ‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀚𑀸𑀢𑀸 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀩𑁆𑀩𑁂𑀧𑀺 𑀯𑀺𑀭𑀸𑀕𑀸 𑀘𑁂𑀯 𑀳𑁄𑀦𑁆𑀢𑀺 𑀯𑀺𑀭𑀸𑀕𑀸𑀭𑀫𑁆𑀫𑀡𑀸 𑀯𑀺𑀭𑀸𑀕𑀕𑁄𑀘𑀭𑀸 𑀯𑀺𑀭𑀸𑀕𑀲𑀫𑀼𑀤𑀸𑀕𑀢𑀸 𑀯𑀺𑀭𑀸𑀕𑀧𑀢𑀺𑀝𑁆𑀞𑀸’𑀢𑀺𑀆𑀤𑀻𑀲𑀼 ‘𑀞𑀧𑁂𑀢𑁆𑀯𑀸 𑀭𑀽𑀧’𑀦𑁆𑀢𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 ¶ ‘𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀓𑀣𑀺𑀢’’𑀦𑁆𑀢𑀺, 𑀢𑀜𑁆𑀘 𑀢𑀣𑀸 𑀦 𑀳𑁄𑀢𑀺. 𑀬𑁂𑀲𑀜𑁆𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀬𑁂𑀲𑀼 𑀘 𑀯𑀺𑀭𑀸𑀕𑀸𑀤𑀺𑀆𑀲𑀗𑁆𑀓𑀸 𑀳𑁄𑀢𑀺, 𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀳𑀚𑀸𑀢𑀸 𑀥𑀫𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀚𑀸𑀢𑀸 𑀥𑀫𑁆𑀫𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀚𑀸𑀢𑀸𑀢𑀺 𑀳𑀺 𑀯𑀘𑀦𑀁 𑀫𑀕𑁆𑀕𑁂 𑀚𑀸𑀢𑀢𑀁 𑀤𑀻𑀧𑁂𑀢𑀺, 𑀦 𑀘 𑀓𑀫𑁆𑀫𑀚𑀸𑀤𑀻𑀦𑀺 𑀅𑀫𑀕𑁆𑀕𑁂 𑀚𑀸𑀬𑀫𑀸𑀦𑀸𑀦𑀺 𑀫𑀕𑁆𑀕𑀓𑁆𑀔𑀡𑁂 𑀚𑀸𑀢𑀯𑁄𑀳𑀸𑀭𑀁 𑀅𑀭𑀳𑀦𑁆𑀢𑀺 𑀢𑁂𑀲𑀁 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀫𑀕𑁆𑀕𑀓𑁆𑀔𑀡𑁂 𑀢𑀁𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁 ‘‘𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀬𑀲𑁆𑀲 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀓𑀼𑀲𑀮𑀸𑀤𑀺𑀧𑀝𑀺𑀩𑀤𑁆𑀥𑀢𑀸 𑀅𑀧𑁆𑀧𑀝𑀺𑀩𑀤𑁆𑀥𑀢𑀸 𑀘 𑀆𑀫𑀝𑁆𑀞𑀸, 𑀦 𑀘 𑀓𑀫𑁆𑀫𑀚𑀸𑀤𑀺𑀭𑀽𑀧𑀁 𑀅𑀩𑁆𑀬𑀸𑀓𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀓𑀸𑀲𑁂 𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀩𑁆𑀬𑀸𑀓𑀢𑀸𑀦𑀁 𑀢𑁂 𑀯𑁂𑀤𑀺𑀢𑀩𑁆𑀩𑀸, 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀘 𑀧𑀝𑀺𑀲𑁂𑀥𑁂𑀢𑀩𑁆𑀩𑀸, 𑀦 𑀘 𑀅𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀅𑀩𑁆𑀬𑀸𑀓𑀢𑀸𑀢𑀺 𑀏𑀢𑁆𑀣 𑀦 𑀕𑀳𑀺𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀘𑀦𑀢𑁄𑀢𑀺.

𑀘𑀢𑀼𑀢𑁆𑀣𑀧𑀜𑁆𑀳𑁂 𑀧𑀯𑀢𑁆𑀢𑁂 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀇𑀤𑀁 ‘‘𑀬𑀲𑁆𑀲 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑁂𑀲𑀼 𑀧𑀜𑁆𑀘𑀯𑁄𑀓𑀸𑀭𑁂 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀸𑀦𑀁 𑀘𑀢𑀼𑀯𑁄𑀓𑀸𑀭𑁂 𑀘 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁭𑁯. ‘‘𑀏𑀓𑀸𑀯𑀚𑁆𑀚𑀦𑁂𑀦 𑁧𑁬𑁬 𑀉𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀦𑀸𑀦𑀸𑀯𑀚𑁆𑀚𑀦𑁂𑀦𑀧𑀺 𑀧𑀦 𑀢𑀢𑁄 𑀧𑀼𑀭𑀺𑀫𑀢𑀭𑀚𑀯𑀦𑀯𑀻𑀣𑀻𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 ‘‘𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀦𑁄 𑀘 𑀢𑁂𑀲𑀁 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀤𑀁 𑀮𑀓𑁆𑀔𑀡𑀁 𑀮𑀩𑁆𑀪𑀢𑁂𑀯, 𑀢𑀲𑁆𑀫𑀸 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀸𑀦𑀮𑀓𑁆𑀔𑀡𑀁 𑀲𑀩𑁆𑀩𑀁 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀏𑀢𑁂𑀦𑁂𑀯 𑀓𑀼𑀲𑀮𑀸𑀦𑀸𑀕𑀢𑀪𑀸𑀯𑀧𑀭𑀺𑀬𑁄𑀲𑀸𑀦𑁂𑀦 𑀢𑀸𑀬 𑀏𑀯 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀅𑀓𑀼𑀲𑀮𑀸𑀢𑀻𑀢𑀪𑀸𑀯𑀲𑁆𑀲 𑀅𑀩𑁆𑀬𑀸𑀓𑀢𑀸𑀢𑀻𑀢𑀪𑀸𑀯𑀲𑁆𑀲 𑀘 𑀆𑀤𑀺𑀫𑁆𑀳𑀺 ‘‘𑀤𑀼𑀢𑀺𑀬𑁂 𑀅𑀓𑀼𑀲𑀮𑁂’’𑀢𑀺, ‘‘𑀤𑀼𑀢𑀺𑀬𑁂 𑀘𑀺𑀢𑁆𑀢𑁂’’𑀢𑀺 𑀘 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀬𑀣𑀸 𑀳𑀺 𑀪𑀸𑀯𑀦𑀸𑀯𑀸𑀭𑁂 𑀪𑀸𑀯𑀦𑀸𑀧𑀳𑀸𑀦𑀸𑀦𑀁 𑀧𑀭𑀺𑀬𑁄𑀲𑀸𑀦𑁂𑀦 ¶ 𑀅𑀕𑁆𑀕𑀫𑀕𑁆𑀕𑁂𑀦 𑀢𑀢𑁄 𑀧𑀼𑀭𑀺𑀫𑀢𑀭𑀸𑀦𑀺𑀧𑀺 𑀪𑀸𑀯𑀦𑀸𑀧𑀳𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀢𑀁 𑀢𑀁 𑀢𑁂𑀦 𑀢𑁂𑀦 𑀆𑀤𑀺𑀦𑀸 𑀅𑀦𑁆𑀢𑁂𑀦 𑀘 𑀤𑀲𑁆𑀲𑀺𑀢𑀦𑁆𑀢𑀺.

𑁧𑁦𑁦. 𑀧𑀜𑁆𑀘𑀯𑁄𑀓𑀸𑀭𑁂 𑀅𑀓𑀼𑀲𑀮𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀅𑀓𑀼𑀲𑀮𑀸 𑀘 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀅𑀩𑁆𑀬𑀸𑀓𑀢𑀸 𑀘 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀯𑀘𑀦𑁂𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀲𑁄𑀴𑀲𑀫𑀁, 𑀢𑀢𑁄 𑀧𑀭𑀫𑁆𑀧𑀺 𑀯𑀸 𑀪𑀯𑀦𑀺𑀓𑀦𑁆𑀢𑀺𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀢𑀢𑁄 𑀑𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀇𑀦𑁆𑀤𑁆𑀭𑀺𑀬𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 𑀯𑀺𑀪𑀗𑁆𑀕𑁂 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀁 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁨) 𑀲𑀼𑀢𑁆𑀢𑁂 𑀤𑁂𑀲𑀺𑀢𑀓𑁆𑀓𑀫𑁂𑀦. 𑀧𑀯𑀢𑁆𑀢𑀺𑀯𑀸𑀭𑁂 𑀳𑀺 𑀏𑀓𑀦𑁆𑀢𑀁 𑀧𑀯𑀢𑁆𑀢𑀺𑀬𑀁 𑀏𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀓𑀫𑁆𑀫𑀚𑀸𑀦𑀁 𑀅𑀓𑀫𑁆𑀫𑀚𑀸𑀦𑀜𑁆𑀘 𑀅𑀦𑀼𑀧𑀸𑀮𑀓𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ¶ 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀫𑁆𑀫𑀚𑀸𑀦𑀦𑁆𑀢𑀺 𑀢𑀁𑀫𑀽𑀮𑀓𑀸𑀦𑀺 𑀬𑀫𑀓𑀸𑀦𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀯𑀲𑀸𑀦𑁂𑀲𑀼 𑀬𑀁 𑀫𑀽𑀮𑀓𑀫𑁂𑀯 𑀦 𑀳𑁄𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀫𑀽𑀮𑀓𑀸𑀦𑀺 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀸𑀦𑀺 𑀆𑀬𑀢𑀦𑀬𑀫𑀓𑁂 𑀯𑀺𑀬, 𑀢𑀲𑁆𑀫𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀫𑀚𑁆𑀛𑁂 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀅𑀦𑁆𑀢𑁂 𑀉𑀤𑁆𑀤𑀺𑀝𑁆𑀞𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁯𑁪. 𑀇𑀢𑁆𑀣𑀻 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀇𑀢𑁆𑀣𑀻𑀢𑀺 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀺, 𑀦 𑀘 𑀭𑀽𑀧𑀸𑀤𑀺𑀥𑀫𑁆𑀫𑁂 𑀉𑀧𑀸𑀤𑀸𑀬 𑀇𑀢𑁆𑀣𑀺𑀕𑁆𑀕𑀳𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀕𑁆𑀕𑀳𑀡𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 ¶ 𑀯𑀺𑀚𑁆𑀚𑀫𑀸𑀦𑀫𑀺𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀢𑀣𑀸𑀕𑀳𑀺𑀢𑀲𑁆𑀲 𑀯𑀲𑁂𑀦 ‘‘𑀦𑀢𑁆𑀣𑀻’’𑀢𑀺 𑀅𑀯𑀢𑁆𑀯𑀸 ‘‘𑀦𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀲𑁆𑀲 𑀘 𑀪𑁂𑀤𑀁 𑀓𑀢𑁆𑀯𑀸 ‘‘𑀲𑀼𑀔𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺, 𑀤𑀼𑀓𑁆𑀔𑀲𑁆𑀲 𑀘 ‘‘𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀘𑀦𑁂𑀦𑁂𑀯 𑀲𑁄𑀫𑀦𑀲𑁆𑀲𑀢𑁄 𑀅𑀜𑁆𑀜𑀸 𑀲𑀼𑀔𑀸 𑀯𑁂𑀤𑀦𑀸 𑀲𑀼𑀔𑀁, 𑀤𑁄𑀫𑀦𑀲𑁆𑀲𑀢𑁄 𑀘 𑀅𑀜𑁆𑀜𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀕𑀳𑀺𑀢𑁄𑀬𑁂𑀯𑀸𑀢𑀺 ‘‘𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑁧𑁪𑁦. 𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀸𑀭𑁂 𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁂𑀲𑀁 𑀲𑁄𑀢𑀦𑁆𑀢𑀺 𑀢𑀡𑁆𑀳𑀸𑀲𑁄𑀢𑀫𑁂𑀯𑀸𑀳.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨.𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁮𑁬. 𑀧𑀯𑀢𑁆𑀢𑀺𑀯𑀸𑀭𑁂 ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀙? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁫) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀇𑀥 𑀉𑀤𑁆𑀤𑀺𑀝𑁆𑀞𑀁 ¶ 𑀫𑀦𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀧𑀯𑀢𑁆𑀢𑀫𑀸𑀦𑁂𑀳𑀺 𑀓𑀫𑁆𑀫𑀚𑀸𑀓𑀫𑁆𑀫𑀚𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀬𑁄𑀕𑀁 𑀕𑀘𑁆𑀙𑀢𑀺, 𑀦 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀕𑀳𑁂𑀢𑀩𑁆𑀩𑀁, 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸𑀯 𑀧𑀥𑀸𑀦𑀁, 𑀢𑀲𑁆𑀫𑀸 𑀓𑀽𑀝𑀁 𑀯𑀺𑀬 𑀕𑁄𑀧𑀸𑀦𑀲𑀻𑀦𑀁 𑀲𑀩𑁆𑀩𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁 𑀅𑀦𑁆𑀢𑁂 𑀞𑀧𑁂𑀢𑁆𑀯𑀸 𑀬𑁄𑀚𑀺𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼 𑀧𑀯𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀕𑀢𑁂𑀲𑀼 ‘‘𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑁂𑀳𑀺 𑀘 𑀬𑁄𑀚𑀦𑀸 𑀮𑀩𑁆𑀪𑀢𑀺, 𑀢𑀣𑀸 ‘‘𑀬𑀲𑁆𑀲 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀢𑀁𑀫𑀽𑀮𑀓𑀸 𑀘 𑀦𑀬𑀸. 𑀢𑁂𑀳𑀺 𑀧𑀦 𑀧𑀯𑀢𑁆𑀢𑀺𑀬𑀁𑀬𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀬𑁄𑀚𑀦𑀸 𑀢𑀁𑀫𑀽𑀮𑀓𑀸 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀧𑀯𑀢𑁆𑀢𑀫𑀸𑀦𑁂𑀳𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀬𑁄𑀚𑀦𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀳𑀺 𑀘 𑀦𑀬𑁂𑀳𑀺 𑀧𑀸𑀓𑀝𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀲𑀘𑀓𑁆𑀔𑀼𑀓𑀸𑀦𑀁 ¶ 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑁄𑀫𑀦𑀲𑁆𑀲𑀯𑀺𑀭𑀳𑀺𑀢𑀲𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 ‘‘𑀘𑀢𑀼𑀦𑁆𑀦𑀁𑀬𑁂𑀯𑀸’’𑀢𑀺 𑀦𑀺𑀬𑀫𑁄 𑀓𑀢𑁄, 𑀢𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀸 𑀧𑀭𑀺𑀢𑁆𑀢𑀯𑀺𑀧𑀸𑀓𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑁄𑀧𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁂𑀲𑀼 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀲𑀫𑀸𑀦𑀢𑀸𑀬 𑀫𑀳𑀸𑀯𑀺𑀧𑀸𑀓𑁂𑀳𑀺 𑀘𑀢𑀽𑀳𑀺 𑀦𑀺𑀤𑀲𑁆𑀲𑀦𑀁 𑀓𑀢𑀁, 𑀢𑁂𑀦 𑀬𑀣𑀸 𑀲𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀸 𑀅𑀘𑀓𑁆𑀔𑀼𑀓𑀸 𑀦 𑀳𑁄𑀦𑁆𑀢𑀺, 𑀏𑀯𑀁 𑀇𑀢𑀭𑀫𑀳𑀸𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀓𑀸𑀧𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀘 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀘𑀯𑀦𑁆𑀢𑀸𑀦𑀁 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀦𑀺𑀬𑀫𑀢𑁄 𑀲𑀘𑀓𑁆𑀔𑀼𑀓𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑁂𑀧𑀺 𑀳𑀺 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀣𑀸 𑀆𑀬𑀢𑀦𑀬𑀫𑀓𑁂 𑀤𑀲𑁆𑀲𑀺𑀢𑀁. 𑀦 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀚𑁆𑀚𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺, ‘‘𑀇𑀢𑁆𑀣𑀻𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁭) 𑀘 𑀢𑁂 𑀏𑀯 𑀯𑀼𑀢𑁆𑀢𑀸𑀢𑀺.

𑀉𑀧𑁂𑀓𑁆𑀔𑀸𑀬 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘 𑀓𑀸𑀫𑀸𑀯𑀘𑀭𑁂 𑀲𑁄𑀧𑁂𑀓𑁆𑀔𑀅𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀬𑀸 ¶ 𑀢𑀁𑀲𑀫𑀸𑀦𑀮𑀓𑁆𑀔𑀡𑀁 𑀅𑀭𑀽𑀧𑀧𑀝𑀺𑀲𑀦𑁆𑀥𑀺𑀜𑁆𑀘 𑀦𑀺𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀲𑀼𑀘𑀺 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀅𑀳𑁂𑀢𑀼𑀓𑀸𑀭𑀽𑀧𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑁂𑀬𑁆𑀬𑁄.

‘‘𑀢𑀢𑁆𑀣 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀤𑀺 𑀧𑀦 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀲𑀦𑁆𑀢𑀺, ‘‘𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁧𑁩) ‘‘𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁧𑁧) 𑀯𑀘𑀦𑀢𑁄. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂 𑀘 𑀬𑀣𑀸 𑀲𑀫𑀸𑀥𑀺𑀮𑁂𑀲𑁄 𑀏𑀓𑀕𑁆𑀕𑀢𑀸 𑀅𑀢𑁆𑀣𑀺, 𑀦 𑀏𑀯𑀁 𑀯𑀻𑀭𑀺𑀬𑀮𑁂𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀢𑀢𑁆𑀣 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀏𑀓𑀕𑁆𑀕𑀢𑀸 𑀧𑀦 𑀲𑀫𑀸𑀥𑀺𑀮𑁂𑀲𑁄 𑀏𑀯 𑀳𑁄𑀢𑀻’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑀣𑀸 𑀅𑀜𑁆𑀜𑁂𑀲𑀼 𑀓𑁂𑀲𑀼𑀘𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀳𑁄𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀘, 𑀏𑀯𑀫𑀺𑀥 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺. 𑀲𑀫𑀸𑀥𑀺𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀦𑀫𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀳𑁂𑀢𑀼𑀓𑀦𑁆𑀢𑀭𑀢𑁄 𑀯𑀺𑀲𑁂𑀲𑁂𑀢𑀺 ¶ . 𑀢𑀢𑁆𑀣 ‘‘𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀧𑀦 𑀦 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀻’’𑀢𑀺 𑀲𑀫𑀸𑀥𑀺𑀮𑁂𑀲𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀪𑀸𑀯𑀁 𑀅𑀧𑁆𑀧𑀢𑁆𑀢𑀲𑁆𑀲 𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀦 𑀯𑀻𑀭𑀺𑀬𑀮𑁂𑀲𑀲𑁆𑀲. 𑀯𑀺𑀲𑁂𑀲𑀦𑀜𑁆𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑁂 𑀧𑀯𑀢𑁆𑀢𑀢𑀺. 𑀬𑁂𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀢𑁆𑀣 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀻’’𑀢𑀺 𑀧𑀸𑀞𑁄, 𑀲𑁄 𑀏𑀯 𑀲𑀼𑀦𑁆𑀤𑀭𑀢𑀭𑁄.

𑀬𑀸𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀕𑀩𑁆𑀪𑀕𑀢𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀪𑀸𑀯𑁄 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀲𑀳𑁂𑀢𑀼𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀘𑁂𑀯 𑀅𑀭𑀽𑀧𑀻𑀯𑀲𑁂𑀦 𑀘 𑀯𑀼𑀢𑁆𑀢’’𑀦𑁆𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀧𑀺 𑀧𑀦 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑀓𑀘𑀓𑁆𑀔𑀼𑀓𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀘𑀓𑁆𑀔𑀼𑀓𑀸𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀓𑀸𑀫𑀥𑀸𑀢𑀼𑀬𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥𑀸𑀧𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀘 𑀅𑀘𑀓𑁆𑀔𑀼𑀓𑀸 𑀮𑀩𑁆𑀪𑀦𑁆𑀢𑁂𑀯. 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀸𑀦𑀫𑁆𑀧𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀸𑀤𑁄, 𑀘𑀼𑀢𑀺𑀯𑀲𑁂𑀦 𑀦𑀺𑀭𑁄𑀥𑁄 𑀩𑀸𑀳𑀼𑀮𑁆𑀮𑀯𑀲𑁂𑀦 𑀤𑀲𑁆𑀲𑀺𑀢𑁄. 𑀓𑀤𑀸𑀘𑀺 𑀳𑀺 𑀢𑁂𑀲𑀁 𑀧𑀞𑀫𑀓𑀧𑁆𑀧𑀺𑀓𑀸𑀤𑀻𑀦𑀁 𑀯𑀺𑀬 𑀧𑀯𑀢𑁆𑀢𑀺𑀬𑀫𑁆𑀧𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀯𑀲𑀸𑀦𑁂𑀲𑀼 𑀇𑀦𑁆𑀤𑁆𑀭𑀺𑀬𑀫𑀽𑀮𑀬𑀫𑀓𑁂𑀲𑀼 𑀧𑀞𑀫𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑁂𑀳𑀺 𑀕𑀳𑀺𑀢𑁂𑀳𑀺 𑀉𑀧𑀧𑀢𑁆𑀢𑀺𑀘𑀼𑀢𑀺𑀯𑀲𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀦𑀺𑀬𑀫𑀺𑀢𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀯𑀢𑁆𑀢𑀺𑀯𑀲𑁂𑀦𑀧𑀺 𑀮𑀩𑁆𑀪𑀫𑀸𑀦𑀸𑀦𑀁 𑀉𑀧𑀧𑀢𑁆𑀢𑀺𑀘𑀼𑀢𑀺𑀯𑀲𑁂𑀦𑁂𑀯 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑁂𑀳𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁯𑁦. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ¶ 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀫𑀸𑀦𑀕𑀢𑀺𑀓𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯 𑀕𑀘𑁆𑀙𑀢𑀺 𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀤𑀲𑁆𑀲𑀦𑀢𑁄𑀢𑀺 𑀆𑀳 ‘‘𑀧𑀯𑀢𑁆𑀢𑁂 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀲𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀏𑀢𑁆𑀣 𑀏𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀜𑁆𑀘 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀽𑀢𑀺 𑀏𑀯𑀁 𑀬𑀣𑀸𑀮𑀸𑀪𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀙𑁂𑀤𑁂𑀬𑁂𑀯𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀲𑁆𑀲 𑀙𑁂𑀤𑁄𑀢𑀺 𑀦𑀸𑀫𑀁 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 ¶ 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀅𑀯𑀘𑀦𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀫𑀸𑀦𑀕𑀢𑀺𑀓𑀢𑀁 𑀤𑀻𑀧𑁂𑀢𑀺. 𑀢𑀲𑁆𑀲 𑀳𑀺 𑀉𑀧𑀧𑀢𑁆𑀢𑀺𑀬𑀁𑀬𑁂𑀯 𑀉𑀧𑁆𑀧𑀸𑀤𑁄 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀅𑀲𑀜𑁆𑀜𑀲𑀢𑁆𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀯𑀲𑁂𑀦 𑀢𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀘 𑀦 𑀯𑀼𑀢𑁆𑀢𑀸, 𑀅𑀦𑀼𑀧𑁆𑀧𑀸𑀤𑁄𑀧𑀺 𑀧𑀦𑁂𑀢𑀲𑁆𑀲 𑀘𑀼𑀢𑀺𑀉𑀧𑀧𑀢𑁆𑀢𑀻𑀲𑁆𑀯𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀧𑀯𑀢𑁆𑀢𑁂𑀢𑀺. 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂𑀧𑀺 ‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 ‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣𑁂𑀯 𑀅𑀲𑀜𑁆𑀜𑀲𑀢𑁆𑀢𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀯𑀢𑁆𑀢𑀺𑀯𑀲𑁂𑀦 𑀢𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀦 𑀘 𑀯𑀼𑀢𑁆𑀢𑀸. 𑀬𑀲𑁆𑀲𑀬𑀢𑁆𑀣𑀓𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀦 𑀤𑀲𑁆𑀲𑁂𑀢𑀩𑁆𑀩𑀸 𑀦 𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦 𑀳𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 𑀯𑀘𑀦𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀑𑀓𑀸𑀲𑀤𑀻𑀧𑀓𑀁, 𑀦𑀸𑀧𑀺 ‘‘𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀓𑁆𑀔𑀡𑀤𑀻𑀧𑀓𑀁, 𑀅𑀣 𑀔𑁄 𑀧𑀼𑀕𑁆𑀕𑀮𑀤𑀻𑀧𑀓𑀫𑁂𑀯𑀸𑀢𑀺.

𑀅𑀢𑀻𑀢𑀓𑀸𑀮𑀪𑁂𑀤𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀏𑀢𑁆𑀣 ‘‘𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀲𑀼𑀤𑁆𑀥𑀸𑀯𑀸𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁨𑁭𑁭) 𑀏𑀢𑁆𑀣 𑀯𑀺𑀬 ‘‘𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑁄𑀫𑀦𑀲𑁆𑀲𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸 𑀧𑀼𑀕𑁆𑀕𑀮𑀸 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀳𑁄𑀦𑁆𑀢𑀺, 𑀦 𑀏𑀯𑀁 𑀲𑁄𑀫𑀦𑀲𑁆𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀉𑀧𑀧𑀢𑁆𑀢𑀺𑀲𑀫𑀗𑁆𑀕𑀺𑀦𑁄𑀬𑁂𑀯 𑀳𑁄𑀦𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀳𑀺 𑀯𑀲𑁂𑀦 𑀬𑀸𑀯 𑀧𑀞𑀫𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀥𑀭𑀢𑀺, 𑀢𑀸𑀯 ¶ 𑀉𑀧𑀧𑀚𑁆𑀚𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀤𑀸 𑀘 𑀤𑀼𑀢𑀺𑀬𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀉𑀪𑀬𑀁 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀁. 𑀬𑀣𑀸 𑀳𑀺 ‘‘𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸’’𑀢𑀺 𑀇𑀤𑀁 𑀮𑀓𑁆𑀔𑀡𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀤𑁆𑀯𑀻𑀲𑀼 𑀔𑀡𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀧𑀞𑀫𑁂𑀦 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀁, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀸𑀕𑀢𑀓𑀸𑀮𑀪𑁂𑀤𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑁂 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀲 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑀢𑀸𑀯 𑀧𑀼𑀘𑁆𑀙𑀺𑀢𑀸. 𑀢𑀢𑁆𑀣 𑀬𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀪𑁂𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀪𑁂𑀤𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ , 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑁂𑀯 𑀧𑀼𑀘𑁆𑀙𑀺𑀢𑀸𑀦𑀁 𑀉𑀧𑀧𑀢𑁆𑀢𑀺𑀬𑀁𑀬𑁂𑀯 𑀢𑁂𑀲𑀁 𑀉𑀧𑁆𑀧𑀸𑀤𑁄 𑀲𑀫𑁆𑀪𑀯𑀢𑀺, 𑀦 𑀅𑀜𑁆𑀜𑀢𑁆𑀣, 𑀦 𑀏𑀯𑀫𑀺𑀥 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑁂𑀯 𑀧𑀼𑀘𑁆𑀙𑀺𑀢𑀸𑀦𑀁 𑀢𑁂𑀲𑀁 𑀉𑀧𑀧𑀢𑁆𑀢𑀺𑀢𑁄 𑀅𑀜𑁆𑀜𑀢𑁆𑀣 𑀉𑀧𑁆𑀧𑀸𑀤𑁄 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀭𑁄𑀥𑀯𑀸𑀭𑁂𑀧𑀺 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀅𑀧𑀺 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲. 𑀦 𑀳𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀘𑀼𑀢𑀺𑀢𑁄 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑀺𑀭𑁄𑀥𑁄 𑀦 𑀲𑀫𑁆𑀪𑀯𑀢𑀻𑀢𑀺. 𑀏𑀢𑁆𑀣 𑀳𑀺 𑀧𑀞𑀫𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀦𑀺𑀲𑁆𑀲𑀬𑁄 𑀫𑀸𑀤𑀺𑀲𑁄𑀯 𑀉𑀧𑀧𑀢𑁆𑀢𑀺𑀉𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀉𑀪𑀬𑀼𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀅𑀢𑁆𑀣𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑁄𑀢𑀺 𑀏𑀯𑀁 𑀯𑀺𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀫𑁂𑀯 𑀦𑀺𑀬𑀫𑁂𑀢𑀺, 𑀦 𑀢𑀢𑁆𑀣𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑀁 𑀅𑀦𑀸𑀕𑀢𑀪𑀸𑀯𑀫𑀢𑁆𑀢𑁂𑀦 𑀲𑀭𑀽𑀧𑀢𑁄 𑀕𑀳𑀺𑀢𑀁 𑀉𑀧𑁆𑀧𑀸𑀤𑀁 𑀯𑀸 𑀦𑀺𑀭𑁄𑀥𑀁 𑀯𑀸 𑀲𑀁𑀲𑀬𑀢𑁆𑀣𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀯𑀁 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲 𑀦𑀺𑀬𑀫𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁨𑁮𑁧) 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀦𑀺𑀭𑁄𑀥𑀯𑀸𑀭𑁂𑀧𑀺.

𑀧𑀝𑀺𑀮𑁄𑀫𑁂 𑀧𑀦 𑀬𑀣𑀸 𑀅𑀦𑀼𑀮𑁄𑀫𑁂 ‘‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀅𑀦𑀸𑀕𑀢𑀸 𑀲𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀢𑀢𑁆𑀣 𑀲𑀁𑀲𑀬𑀧𑀤𑁂𑀦 𑀕𑀳𑀺𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀺𑀬𑀫𑁆𑀧𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼 𑀬𑁄𑀚𑀺𑀢𑀸, 𑀦 𑀏𑀯𑀁 𑀬𑁄𑀚𑁂𑀢𑀩𑁆𑀩𑀸. 𑀬𑀣𑀸 𑀳𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀬𑁄𑀚𑁂𑀢𑀼𑀁, 𑀦 𑀏𑀯𑀁 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑁂 ¶ 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀅𑀪𑀽𑀢𑀸𑀪𑀸𑀯𑀲𑁆𑀲 𑀅𑀪𑀽𑀢𑀸𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀲𑀫𑁆𑀪𑀯𑀸𑀦𑀼𑀧𑁆𑀧𑀢𑁆𑀢𑀺𑀢𑁄, 𑀅𑀪𑀽𑀢𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁄 𑀘 𑀧𑀝𑀺𑀮𑁄𑀫𑁂 𑀧𑀼𑀘𑁆𑀙𑀺𑀢𑁄, 𑀢𑀲𑁆𑀫𑀸𑀲𑁆𑀲 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀅𑀪𑀽𑀢𑀸𑀪𑀸𑀯𑀲𑁆𑀲 𑀯𑀢𑁆𑀢𑀫𑀸𑀦𑀸𑀦𑀁 𑀉𑀧𑁆𑀧𑀸𑀤𑀲𑁆𑀲 𑀯𑀺𑀬 𑀓𑀸𑀮𑀦𑁆𑀢𑀭𑀬𑁄𑀕𑀸𑀪𑀸𑀯𑀢𑁄 𑀬𑀸𑀤𑀺𑀲𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲 𑀦𑀺𑀲𑁆𑀲𑀬𑁄 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀦𑁆𑀦𑀺𑀘𑁆𑀙𑀺𑀢𑁄, 𑀢𑀦𑁆𑀦𑀺𑀲𑁆𑀲𑀬𑀸 𑀢𑀸𑀤𑀺𑀲𑀸𑀦𑀁𑀬𑁂𑀯 𑀉𑀧𑀧𑀢𑁆𑀢𑀺𑀘𑀼𑀢𑀺𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀚𑀻𑀯𑀺𑀢𑀸𑀤𑀻𑀦𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸 𑀲𑀁𑀲𑀬𑀧𑀤𑁂𑀦 ¶ 𑀧𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀻𑀢𑀺 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁩𑁦𑁮) 𑀘, ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀬𑁂 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺.

𑀬𑁂 𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑁂 𑀲𑁄𑀧𑁂𑀓𑁆𑀔𑀧𑀝𑀺𑀲𑀦𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 ‘‘𑀬𑁂 𑀘 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁂𑀦 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀯𑀘𑀦𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀲𑀗𑁆𑀕𑀳𑀺𑀢𑀸𑀢𑀺 𑀬𑁂 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀝𑁆𑀞𑀓𑀣𑀸𑀬𑀁 𑀬𑁂𑀲𑀼 𑀆𑀤𑀺𑀫𑀧𑁄𑀢𑁆𑀣𑀓𑁂𑀲𑀼 ‘‘𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀥𑀫𑁆𑀫𑀬𑀫𑀓𑁂 𑀯𑀺𑀬 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁. 𑀬𑁂𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀸𑀭𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺…𑀧𑁂… 𑀢𑀲𑁆𑀫𑀺𑀁 𑀪𑀯𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑀼𑀦𑁆𑀤𑀭𑀢𑀭𑁄𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁪𑁩𑁫-𑁪𑁮𑁨. 𑀧𑀭𑀺𑀜𑁆𑀜𑀸𑀯𑀸𑀭𑁂 ¶ 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑀫𑀺𑀲𑁆𑀲𑀓𑀸𑀦𑀺 𑀘𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀏𑀓𑀦𑁆𑀢𑀧𑀭𑀺𑀜𑁆𑀜𑁂𑀬𑁆𑀬𑁂𑀳𑀺 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑁂𑀳𑀺 𑀫𑀺𑀲𑁆𑀲𑀓𑀢𑁆𑀢𑀸 𑀢𑀸𑀦𑀺 𑀉𑀧𑀸𑀤𑀸𑀬 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀘 𑀯𑀼𑀢𑁆𑀢𑀸. 𑀬𑀤𑀺 𑀧𑀭𑀺𑀜𑁆𑀜𑁂𑀬𑁆𑀬𑀫𑀺𑀲𑁆𑀲𑀓𑀢𑁆𑀢𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀳𑁄𑀢𑀺, 𑀓𑀲𑁆𑀫𑀸 𑀥𑀫𑁆𑀫𑀬𑀫𑀓𑁂 ‘‘𑀬𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀪𑀸𑀯𑁂𑀢𑀺, 𑀲𑁄 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀅𑀩𑁆𑀬𑀸𑀓𑀢𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀬𑀫𑀓𑀸𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀬𑀣𑀸 ‘‘𑀓𑀼𑀲𑀮𑀁 𑀪𑀸𑀯𑁂𑀫𑀺, 𑀅𑀓𑀼𑀲𑀮𑀁 𑀧𑀚𑀳𑀸𑀫𑀻’’𑀢𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 ¶ 𑀪𑀸𑀯𑀦𑀸𑀧𑀳𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀢𑀣𑀸 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀦𑀺𑀘𑁆𑀘𑁄, 𑀥𑀫𑁆𑀫𑀸𑀬𑀢𑀦𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀤𑀻𑀲𑀼 𑀧𑀭𑀺𑀚𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀚𑀸𑀦𑀺𑀢𑀩𑁆𑀩𑀸, 𑀢𑁂 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀧𑀭𑀺𑀚𑀸𑀦𑀺𑀢𑀩𑁆𑀩𑀸, 𑀦 𑀅𑀩𑁆𑀬𑀸𑀓𑀢𑀪𑀸𑀯𑀦𑁆𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀪𑀸𑀚𑀦𑀻𑀬𑁂 𑀆𑀕𑀢𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀧𑀳𑀸𑀢𑀩𑁆𑀩𑀢𑀸𑀯 𑀯𑀼𑀢𑁆𑀢𑀸, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀢𑀸, 𑀦𑀦𑀼 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺? 𑀲𑀘𑁆𑀘𑀁, 𑀬𑀣𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀪𑀸𑀯𑁂𑀢𑀩𑁆𑀩𑀧𑀳𑀸𑀢𑀩𑁆𑀩𑀪𑀸𑀯𑁂𑀳𑀺 𑀯𑀺𑀦𑀸𑀧𑀺 𑀳𑁄𑀢𑀺, 𑀦 𑀏𑀯𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀪𑀸𑀯𑁄 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀦𑀸 𑀳𑁄𑀢𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀳𑀸𑀢𑀩𑁆𑀩𑀢𑀸𑀯 𑀇𑀥 𑀯𑀼𑀢𑁆𑀢𑀸, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀓𑀼𑀲𑀮𑀁 𑀏𑀓𑀦𑁆𑀢𑀢𑁄 𑀧𑀳𑀸𑀢𑀩𑁆𑀩𑀫𑁂𑀯𑀸𑀢𑀺 𑀏𑀢𑁂𑀦 𑀧𑀳𑀸𑀢𑀩𑁆𑀩𑀫𑁂𑀯, 𑀦 𑀅𑀧𑁆𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀧𑁆𑀧𑀳𑀸𑀢𑀩𑁆𑀩𑀫𑁂𑀯 𑀦𑀺𑀯𑀸𑀭𑁂𑀢𑀺, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀩𑁆𑀩𑀦𑀺𑀝𑁆𑀞𑀁, 𑀦 𑀧𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑀺𑀝𑁆𑀞𑀦𑁆𑀢𑀺 𑀪𑀸𑀯𑁂𑀢𑀩𑁆𑀩𑀪𑀸𑀯𑁄 𑀏𑀯 𑀢𑀲𑁆𑀲 𑀕𑀳𑀺𑀢𑁄𑀢𑀺. ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀭𑀢𑁄 𑀮𑀺𑀔𑀺𑀢𑀩𑁆𑀩𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀮𑀺𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑀜𑁆𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀧𑀚𑀳𑀦𑁆𑀢𑀺 𑀦𑁄 𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦 𑀪𑀸𑀯𑁂𑀦𑁆𑀢𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁦).

𑀏𑀢𑁆𑀣 𑀘 𑀧𑀼𑀣𑀼𑀚𑁆𑀚𑀦𑁄, 𑀅𑀝𑁆𑀞 𑀘 𑀅𑀭𑀺𑀬𑀸𑀢𑀺 𑀦𑀯 𑀧𑀼𑀕𑁆𑀕𑀮𑀸. 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑁄 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑀼𑀯𑀺𑀥𑁄, 𑀲𑁄 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀙 𑀧𑀼𑀕𑁆𑀕𑀮𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀭𑀺𑀚𑀸𑀦𑀺𑀢𑁆𑀣 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀚𑀳𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁂 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁪𑁯, 𑁫𑁧-𑁫𑁨) ¶ 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀧𑀜𑁆𑀘 𑀧𑀼𑀕𑁆𑀕𑀮𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀚𑀳𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁫𑁧) 𑀘 𑀪𑀩𑁆𑀩𑁄 𑀏𑀯 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁫𑁧) 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀧𑁆𑀧𑀚𑀳𑀺𑀲𑁆𑀲𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁫𑁫) 𑀘 𑀅𑀪𑀩𑁆𑀩𑁄 𑀏𑀯. 𑀅𑀕𑁆𑀕𑀨𑀮𑀲𑀫𑀗𑁆𑀕𑀻 𑀘 𑀧𑀞𑀫𑀨𑀮𑀲𑀫𑀗𑁆𑀕𑀻 𑀅𑀭𑀳𑀸 𑀘𑀸𑀢𑀺 𑀤𑀼𑀯𑀺𑀥𑁄. 𑀲𑁄𑀧𑀺 ‘‘𑀅𑀭𑀳𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀪𑀸𑀯𑀺𑀢𑁆𑀣 ¶ 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀚𑀳𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁪) 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁄 𑀅𑀕𑁆𑀕𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁬) 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀚𑀳𑀺𑀢𑁆𑀣, 𑀦𑁄 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀲𑀘𑁆𑀙𑀺𑀓𑀭𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁪) 𑀘 𑀧𑀞𑀫𑀨𑀮𑀲𑀫𑀗𑁆𑀕𑀻 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁄 𑀅𑀕𑁆𑀕𑀨𑀮𑀁 𑀲𑀘𑁆𑀙𑀸𑀓𑀸𑀲𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁩, 𑁪𑁪𑁬) 𑀆𑀕𑀢𑀝𑁆𑀞𑀸𑀦𑁂𑀲𑀼 𑀇𑀢𑀭𑁄𑀯𑀸𑀢𑀺 𑀏𑀯𑀁 𑀧𑀼𑀕𑁆𑀕𑀮𑀪𑁂𑀤𑀁 𑀜𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀧𑀼𑀕𑁆𑀕𑀮𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀧𑀝𑁆𑀞𑀸𑀦𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀤𑀺𑀩𑁆𑀩𑀦𑁆𑀢𑀺 ¶ ¶ 𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀁 𑀢𑀁𑀢𑀁𑀅𑀢𑁆𑀣𑀸𑀦𑀼𑀲𑀸𑀲𑀦𑀜𑁆𑀘 𑀓𑀭𑁄𑀦𑁆𑀢𑀸 𑀯𑁄𑀳𑀭𑀦𑁆𑀢𑀺, 𑀧𑀼𑀜𑁆𑀜𑀬𑁄𑀕𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑀦𑁆𑀢𑀺, 𑀬𑀣𑀸𑀪𑀺𑀮𑀸𑀲𑀺𑀢𑀜𑁆𑀘 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀺, 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀸 𑀤𑁂𑀯𑀸, 𑀤𑁂𑀯𑀦𑀻𑀬𑀸 𑀯𑀸 𑀢𑀁𑀢𑀁𑀩𑁆𑀬𑀲𑀦𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀲𑀭𑀡𑀁 𑀧𑀭𑀸𑀬𑀡𑀦𑁆𑀢𑀺 𑀕𑀫𑀦𑀻𑀬𑀸, 𑀅𑀪𑀺𑀢𑁆𑀣𑀯𑀦𑀻𑀬𑀸 𑀯𑀸. 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦 𑀓𑀫𑀦𑀻𑀬𑀸𑀢𑀺 𑀯𑀸 𑀤𑁂𑀯𑀸. 𑀢𑁂 𑀢𑀺𑀯𑀺𑀥𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀪𑀕𑀯𑀸 𑀧𑀦 𑀦𑀺𑀭𑀢𑀺𑀲𑀬𑀸𑀬 𑀅𑀪𑀺𑀜𑁆𑀜𑀸𑀓𑀻𑀴𑀸𑀬, 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺, 𑀲𑀧𑀭𑀲𑀦𑁆𑀢𑀸𑀦𑀲𑀺𑀤𑁆𑀥𑀸𑀬 𑀧𑀜𑁆𑀘𑀯𑀺𑀥𑀫𑀸𑀭𑀯𑀺𑀚𑀬𑀺𑀘𑁆𑀙𑀸𑀦𑀺𑀧𑁆𑀨𑀢𑁆𑀢𑀺𑀬𑀸, 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑀢𑁆𑀢𑀥𑀦𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀲𑀪𑀸𑀯𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁂𑀦 𑀘 𑀯𑁄𑀳𑀸𑀭𑀸𑀢𑀺𑀲𑀬𑁂𑀦, 𑀧𑀭𑀫𑀸𑀬 𑀧𑀜𑁆𑀜𑀸𑀲𑀭𑀻𑀭𑀧𑁆𑀧𑀪𑀸𑀲𑀗𑁆𑀔𑀸𑀢𑀸𑀬 𑀚𑀼𑀢𑀺𑀬𑀸, 𑀅𑀦𑁄𑀧𑀫𑀸𑀬 𑀘 𑀜𑀸𑀡𑀲𑀭𑀻𑀭𑀕𑀢𑀺𑀬𑀸, 𑀫𑀸𑀭𑀯𑀺𑀚𑀬𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀭𑀳𑀺𑀢𑀦𑀺𑀧𑁆𑀨𑀸𑀤𑀦𑁂𑀲𑀼 ¶ 𑀅𑀧𑁆𑀧𑀝𑀺𑀳𑀢𑀸𑀬 𑀲𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀕𑀫𑀦𑀻𑀬𑀢𑁄, 𑀅𑀪𑀺𑀢𑁆𑀣𑀯𑀦𑀻𑀬𑀢𑁄, 𑀪𑀢𑁆𑀢𑀺𑀯𑀲𑁂𑀦 𑀓𑀫𑀦𑀻𑀬𑀢𑁄 𑀘 𑀲𑀩𑁆𑀩𑁂 𑀢𑁂 𑀤𑁂𑀯𑁂 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀢𑀺𑀓𑁆𑀓𑀦𑁆𑀢𑁄 𑀅𑀢𑀺𑀲𑀬𑁄 𑀯𑀸 𑀤𑁂𑀯𑁄𑀢𑀺 𑀤𑁂𑀯𑀸𑀢𑀺𑀤𑁂𑀯𑁄. 𑀲𑀩𑁆𑀩𑀤𑁂𑀯𑁂𑀳𑀺 𑀧𑀽𑀚𑀦𑀻𑀬𑀢𑀭𑁄 𑀤𑁂𑀯𑁄𑀢𑀺 𑀯𑀸 𑀤𑁂𑀯𑀸𑀢𑀺𑀤𑁂𑀯𑁄, 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀸𑀯𑀁 𑀯𑀸 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀮𑀗𑁆𑀓𑀸𑀭𑀁 𑀧𑀢𑁆𑀢𑀢𑁆𑀢𑀸 𑀅𑀜𑁆𑀜𑀤𑁂𑀯𑁂𑀳𑀺 𑀅𑀢𑀺𑀭𑁂𑀓𑀢𑀭𑁄 𑀯𑀸 𑀤𑁂𑀯𑁄 𑀤𑁂𑀯𑀸𑀢𑀺𑀤𑁂𑀯𑁄. 𑀤𑁂𑀯𑀸𑀦𑀦𑁆𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀢𑀤𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁. 𑀲𑀓𑁆𑀓𑀸𑀤𑀻𑀳𑀺 𑀤𑁂𑀯𑁂𑀳𑀺 𑀧𑀳𑀸𑀭𑀸𑀤𑀅𑀲𑀼𑀭𑀺𑀦𑁆𑀤𑀸𑀤𑀻𑀳𑀺 𑀤𑀸𑀦𑀯𑁂𑀳𑀺 𑀘 𑀧𑀽𑀚𑀺𑀢𑁄. 𑀓𑀸𑀬𑀯𑀘𑀻𑀲𑀁𑀬𑀫𑀲𑁆𑀲 𑀲𑀻𑀮𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀘𑀺𑀢𑁆𑀢𑀲𑀁𑀬𑀫𑀲𑁆𑀲 𑀲𑀫𑀸𑀥𑀺𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸𑀦𑀁 𑀅𑀘𑁆𑀘𑀦𑁆𑀢𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑀼𑀤𑁆𑀥𑀲𑀁𑀬𑀫𑁄.

𑀇𑀲𑀺𑀲𑀢𑁆𑀢𑀫𑁄𑀢𑀺 ¶ 𑀘𑀢𑀼𑀲𑀘𑁆𑀘𑀸𑀯𑀩𑁄𑀥𑀕𑀢𑀺𑀬𑀸 𑀇𑀲𑀬𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀦𑀁 𑀲𑀢𑀁 𑀧𑀲𑀢𑁆𑀣𑀸𑀦𑀁 𑀇𑀲𑀻𑀦𑀁 𑀅𑀢𑀺𑀲𑀬𑁂𑀦 𑀲𑀦𑁆𑀢𑁄 𑀧𑀲𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀻𑀆𑀤𑀬𑁄 𑀘 𑀉𑀧𑀸𑀤𑀸𑀬 𑀪𑀕𑀯𑀸 ‘‘𑀲𑀢𑁆𑀢𑀫𑁄’’𑀢𑀺 𑀯𑀼𑀢𑁆𑀢𑁄. 𑀬𑀢𑁄 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺, 𑀢𑀁 𑀦𑀸𑀫𑀭𑀽𑀧𑀁 𑀲𑀫𑀼𑀤𑀬𑀦𑀺𑀭𑁄𑀥𑀦𑁂𑀦 𑀦𑀺𑀭𑁄𑀥𑁂𑀲𑀻𑀢𑀺 𑀦𑀸𑀫𑀭𑀽𑀧𑀦𑀺𑀭𑁄𑀥𑀦𑁄. 𑀅𑀢𑀺𑀕𑀫𑁆𑀪𑀻𑀭𑀦𑀬𑀫𑀡𑁆𑀟𑀺𑀢𑀤𑁂𑀲𑀦𑀁 𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑁂𑀲𑀺 𑀧𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸

‘‘𑀓𑁂 𑀧𑀦 𑀢𑁂 𑀦𑀬𑀸, 𑀓𑀺𑀜𑁆𑀘 𑀢𑀁 𑀧𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀦𑀬𑀺𑀤𑀁 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀦𑀺𑀤𑀸𑀦𑀓𑀣𑀸𑀬𑀁 𑀧𑀝𑁆𑀞𑀸𑀦𑀲𑀫𑀸𑀦𑀦𑁂 𑀅𑀦𑀼𑀮𑁄𑀫𑀸𑀤𑀻𑀦𑀁 𑀦𑀬𑀸𑀦𑀁 𑀧𑀝𑁆𑀞𑀸𑀦𑀲𑁆𑀲 𑀘 𑀤𑀲𑁆𑀲𑀺𑀢𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺…𑀧𑁂… 𑀦𑀸𑀫𑀸𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀧𑀸𑀴𑀺𑀁 𑀆𑀳𑀭𑀺. 𑀢𑀢𑁆𑀣 𑀕𑀸𑀣𑀸𑀢𑁆𑀣𑀁 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑀜𑁆𑀘 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺.

𑀧𑀝𑁆𑀞𑀸𑀦𑀦𑀸𑀫𑀢𑁆𑀣𑁄 𑀧𑀦 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀦𑀁 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀦𑀸𑀫𑀢𑁆𑀣𑁄, 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀢𑀸 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀗𑁆𑀔𑁂𑀧𑀢𑁄 𑀧𑀝𑁆𑀞𑀸𑀦𑁂 𑀜𑀸𑀢𑁂 𑀯𑀺𑀢𑁆𑀣𑀸𑀭𑁄 𑀲𑀼𑀔𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀻𑀢𑀺. 𑀢𑀢𑁆𑀣 𑀘 𑀦𑀸𑀫𑀢𑁆𑀣𑁄 𑀧𑀞𑀫𑀁 𑀯𑀢𑁆𑀢𑀩𑁆𑀩𑁄𑀢𑀺 ‘‘𑀢𑀢𑁆𑀣 𑀬𑁂𑀲𑀁…𑀧𑁂… 𑀦𑀸𑀫𑀢𑁆𑀣𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑀲𑁆𑀲 𑀧𑀝𑁆𑀞𑀸𑀦𑀦𑀸𑀫𑀲𑁆𑀲𑁂𑀯 𑀢𑀸𑀯 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀧-𑀓𑀸𑀭𑁄 𑀳𑀻𑀢𑀺 𑀉𑀧𑀲𑀕𑁆𑀕𑀧𑀤𑀁 𑀤𑀲𑁆𑀲𑁂𑀢𑀺. 𑀲𑁄 ‘‘𑀧𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀬𑀁 𑀲𑁂𑀝𑁆𑀞𑀁 𑀢𑀤𑀼𑀧𑀸𑀕𑀫𑀼𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀢𑁆𑀣𑀁 𑀤𑀻𑀧𑁂𑀢𑀺. 𑀦𑀦𑀼 𑀧𑀓𑀸𑀭𑁂𑀳𑀺 𑀯𑀺𑀪𑀢𑁆𑀢𑀸 𑀧𑀯𑀺𑀪𑀢𑁆𑀢𑀸𑀢𑀺 𑀧-𑀇𑀢𑀺 𑀉𑀧𑀲𑀕𑁆𑀕𑁄 𑀧𑀓𑀸𑀭𑀢𑁆𑀣𑀫𑁂𑀯 𑀤𑀻𑀧𑁂𑀢𑀺, 𑀦 𑀦𑀸𑀦𑀧𑁆𑀧𑀓𑀸𑀭𑀢𑁆𑀣𑀦𑁆𑀢𑀺? 𑀦, 𑀢𑁂𑀲𑀁 𑀧𑀓𑀸𑀭𑀸𑀦𑀁 𑀦𑀸𑀦𑀸𑀯𑀺𑀥𑀪𑀸𑀯𑀢𑁄. 𑀅𑀢𑁆𑀣𑀢𑁄 𑀳𑀺 𑀆𑀧𑀦𑁆𑀦𑀁 𑀦𑀸𑀦𑀸𑀯𑀺𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀦𑀸𑀦𑀸-𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑀺. 𑀢𑀢𑁆𑀣 𑀏𑀓𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀳𑁂𑀢𑀼𑀆𑀤𑀻𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄 𑀘 𑀏𑀓𑁂𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀦𑁂𑀓𑀥𑀫𑁆𑀫𑀪𑀸𑀯𑀢𑁄 𑀘 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀢𑁆𑀢𑀸𑀢𑀺 𑀏𑀢𑁂𑀦 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼 𑀯𑀼𑀢𑁆𑀢𑀢𑁄 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀢𑁄 𑀲𑀸𑀢𑀺𑀲𑀬𑀯𑀺𑀪𑀸𑀕𑀢𑀁 𑀧𑀝𑁆𑀞𑀸𑀦𑀦𑀸𑀫𑀮𑀸𑀪𑀲𑁆𑀲 𑀓𑀸𑀭𑀡𑀁 ¶ 𑀤𑀲𑁆𑀲𑁂𑀢𑀺. 𑀕𑁄𑀝𑁆𑀞𑀸𑀢𑀺 𑀯𑀚𑀸. 𑀧𑀝𑁆𑀞𑀺𑀢𑀕𑀸𑀯𑁄𑀢𑀺 𑀕𑀢𑀕𑀸𑀯𑁄. 𑀆𑀕𑀢𑀝𑁆𑀞𑀸𑀦𑀲𑁆𑀫𑀺𑀦𑁆𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀯𑀤𑀢𑀺. 𑀧𑀯𑀢𑁆𑀢𑀕𑀫𑀦𑀢𑁆𑀢𑀸 𑀏𑀢𑁆𑀣𑀸𑀢𑀺 𑀯𑀘𑀦𑀲𑁂𑀲𑁄. 𑀅𑀣 𑀯𑀸 𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 𑀕𑀫𑀦𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀕𑀫𑀦𑀢𑁆𑀢𑀸 𑀕𑀫𑀦𑀤𑁂𑀲𑀪𑀸𑀯𑀢𑁄 𑀏𑀓𑁂𑀓𑀁 𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀜𑁆𑀜𑁂𑀳𑀺 𑀕𑀢𑀺𑀫𑀦𑁆𑀢𑁂𑀳𑀺 𑀅𑀢𑀺𑀲𑀬𑀬𑀼𑀢𑁆𑀢𑀲𑁆𑀲 𑀕𑀢𑀺𑀫𑀢𑁄 𑀕𑀫𑀦𑀝𑁆𑀞𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀫𑀳𑀸𑀯𑁂𑀕𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀧𑀸𑀢𑀝𑁆𑀞𑀸𑀦𑀁 𑀯𑀺𑀬 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀻𑀦𑀁 𑀲𑀸𑀲𑀗𑁆𑀕𑀕𑀫𑀦𑀝𑁆𑀞𑀸𑀦𑀪𑀸𑀯𑀁 𑀇𑀫𑀲𑁆𑀲 𑀘 𑀫𑀳𑀸𑀧𑀣𑁄 𑀯𑀺𑀬 𑀦𑀺𑀭𑀸𑀲𑀗𑁆𑀕𑀕𑀫𑀦𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑀺𑀲𑀬𑀬𑀼𑀢𑁆𑀢𑀕𑀫𑀦𑀝𑁆𑀞𑀸𑀦𑀪𑀸𑀯𑁄 𑀧𑀝𑁆𑀞𑀸𑀦𑀦𑀸𑀫𑀮𑀸𑀪𑀲𑁆𑀲 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀺𑀓𑀸𑀦𑀦𑁆𑀢𑀺 𑀢𑀺𑀓𑀯𑀲𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀦𑀁. 𑀲𑀫𑀦𑁆𑀢𑀸𑀢𑀺 𑀅𑀦𑀼𑀮𑁄𑀫𑀸𑀤𑀻𑀳𑀺 𑀲𑀩𑁆𑀩𑀸𑀓𑀸𑀭𑁂𑀳𑀺𑀧𑀺 𑀕𑀢𑀸𑀦𑀺 𑀘𑀢𑀼𑀯𑀻𑀲𑀢𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀻𑀢𑀺 ‘‘𑀲𑀫𑀦𑁆𑀢𑀘𑀢𑀼𑀯𑀻𑀲𑀢𑀺𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀫𑀦𑁆𑀢𑀲𑀤𑁆𑀤𑀲𑁆𑀲 𑀧𑀭𑀬𑁄𑀕𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀲𑀫𑀦𑁆𑀢𑀸 𑀙 𑀙 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀅𑀦𑀼𑀮𑁄𑀫𑀸𑀤𑀺𑀲𑀩𑁆𑀩𑀓𑁄𑀝𑁆𑀞𑀸𑀲𑀢𑁄 𑀢𑀺𑀓𑀸𑀤𑀺𑀙𑀙𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀲𑀫𑀦𑁆𑀢𑀲𑀤𑁆𑀤𑁄 𑀢𑀺𑀓𑀸𑀤𑀺𑀙𑀙𑀧𑀝𑁆𑀞𑀸𑀦𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀦 𑀘𑀢𑀼𑀯𑀻𑀲𑀢𑀺𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄 𑀧𑀝𑁆𑀞𑀸𑀦𑀸𑀦𑀺 𑀢𑀸𑀦𑀺 𑀘𑀢𑀼𑀯𑀻𑀲𑀢𑀻𑀢𑀺 𑀓𑀢𑁆𑀯𑀸 ‘‘𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀦𑁆𑀢𑀢𑁄 𑀯𑀸 𑀥𑀫𑁆𑀫𑀸𑀦𑀼𑀮𑁄𑀫𑀸𑀤𑀺𑀢𑀺𑀓𑀸𑀤𑀺𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀺𑀳𑁂𑀢𑀼𑀫𑀽𑀮𑀓𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀸𑀦𑀺 𑀧𑀝𑁆𑀞𑀸𑀦𑀸𑀦𑀺 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺, 𑀅𑀦𑀽𑀦𑁂𑀳𑀺 𑀦𑀬𑁂𑀳𑀺 𑀧𑀯𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀦𑀺 𑀧𑀦 𑀘𑀢𑀼𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀫𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀔𑀼𑀤𑁆𑀤𑀓𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀦𑀁 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀁 𑀲𑀫𑁄𑀥𑀸𑀦𑀯𑀲𑁂𑀦𑀸’’𑀢𑀺.

𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀳𑁂𑀢𑀼𑀦𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑀲𑁆𑀲 𑀘 𑀕𑀳𑀡𑀁 𑀲𑀺𑀬𑀸𑀢𑀺 ¶ 𑀢𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺. 𑀏𑀢𑁂𑀦𑀧𑀺 𑀲𑁄 𑀏𑀯 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺 𑀧𑀼𑀦𑀸𑀳 ‘‘𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑁂𑀦 𑀇𑀥 𑀳𑁂𑀢𑀼-𑀲𑀤𑁆𑀤𑁂𑀦 𑀥𑀫𑁆𑀫𑀕𑁆𑀕𑀳𑀡𑀁 𑀦 𑀓𑀢𑀁, 𑀅𑀣 𑀔𑁄 𑀥𑀫𑁆𑀫𑀲𑀢𑁆𑀢𑀺𑀯𑀺𑀲𑁂𑀲𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀲𑀦𑁆𑀥𑀸𑀬 ‘‘𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸’’𑀢𑀺, ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺 𑀘 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀭𑀢𑁄 𑀧𑀸𑀴𑀺𑀬𑀁 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢…𑀧𑁂… 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧) 𑀢𑁂𑀦 ¶ 𑀢𑁂𑀦 𑀳𑁂𑀢𑀼𑀪𑀸𑀯𑀸𑀤𑀺𑀉𑀧𑀓𑀸𑀭𑁂𑀦 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑀢𑁆𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁄 𑀳𑀺 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄’’𑀢𑀺 ‘‘𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺𑀘𑁆𑀘𑁂𑀯𑀫𑀸𑀤𑀺𑀦𑀸 𑀥𑀫𑁆𑀫𑀧𑁆𑀧𑀥𑀸𑀦𑀦𑀺𑀤𑁆𑀤𑁂𑀲𑁂𑀦 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀥𑀫𑁆𑀫𑀲𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀥𑀫𑁆𑀫𑁂𑀳𑁂𑀯 𑀥𑀫𑁆𑀫𑀲𑀢𑁆𑀢𑀺𑀯𑀺𑀪𑀸𑀯𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀥𑀸𑀧𑀺 𑀯𑀸 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀥𑀫𑁆𑀫𑁂𑀦𑁂𑀯 𑀥𑀫𑁆𑀫𑀲𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀳𑁂𑀢𑀼𑀧𑀘𑁆𑀘𑀬𑁄𑀢𑀺𑀆𑀤𑀺𑀓𑁄 𑀉𑀤𑁆𑀤𑁂𑀲𑁄 𑀓𑀼𑀲𑀮𑀸𑀤𑀺𑀉𑀤𑁆𑀤𑁂𑀲𑁄 𑀯𑀺𑀬 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀅𑀣 𑀔𑁄 𑀥𑀫𑁆𑀫𑀸𑀦𑀁 𑀉𑀧𑀓𑀸𑀭𑀧𑁆𑀧𑀥𑀸𑀦𑁄𑀢𑀺. 𑀏𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀢𑀻𑀢𑀺, 𑀢𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀦𑀁 𑀲𑀸𑀥𑀸𑀭𑀡𑀯𑀘𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸’’𑀢𑀺. 𑀓𑁄𑀘𑀺 𑀳𑀺 𑀧𑀘𑁆𑀘𑀬𑁄 𑀞𑀺𑀢𑀺𑀬𑀸 𑀏𑀯 𑀳𑁄𑀢𑀺 𑀬𑀣𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄, 𑀓𑁄𑀘𑀺 𑀉𑀧𑁆𑀧𑀢𑁆𑀢𑀺𑀬𑀸𑀬𑁂𑀯 𑀬𑀣𑀸 𑀅𑀦𑀦𑁆𑀢𑀭𑀸𑀤𑀬𑁄, 𑀓𑁄𑀘𑀺 𑀉𑀪𑀬𑀲𑁆𑀲 𑀬𑀣𑀸 𑀳𑁂𑀢𑀼𑀆𑀤𑀬𑁄𑀢𑀺.

𑀉𑀧𑀓𑀸𑀭𑀓𑀮𑀓𑁆𑀔𑀡𑁄𑀢𑀺 𑀘 𑀥𑀫𑁆𑀫𑁂𑀦 𑀥𑀫𑁆𑀫𑀲𑀢𑁆𑀢𑀺𑀉𑀧𑀓𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀺𑀦𑁄𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀳𑁂𑀢𑀼. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀳𑀺-𑀲𑀤𑁆𑀤𑁄 𑀫𑀽𑀮-𑀲𑀤𑁆𑀤𑁄 𑀯𑀺𑀬 𑀧𑀢𑀺𑀝𑁆𑀞𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄𑀢𑀺. 𑀳𑀺𑀦𑁄𑀢𑀺 𑀯𑀸 𑀏𑀢𑁂𑀦 𑀓𑀫𑁆𑀫𑀦𑀺𑀤𑀸𑀦𑀪𑀽𑀢𑁂𑀦 𑀉𑀤𑁆𑀥𑀁 𑀑𑀚𑀁 𑀅𑀪𑀺𑀳𑀭𑀦𑁆𑀢𑁂𑀦 𑀫𑀽𑀮𑁂𑀦 𑀯𑀺𑀬 𑀧𑀸𑀤𑀧𑁄 𑀢𑀧𑁆𑀧𑀘𑁆𑀘𑀬𑀁 𑀨𑀮𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀳𑁂𑀢𑀼. 𑀆𑀘𑀭𑀺𑀬𑀸𑀦𑀦𑁆𑀢𑀺 𑀭𑁂𑀯𑀢𑀢𑁆𑀣𑁂𑀭𑀁 𑀯𑀤𑀢𑀺.

‘‘𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺𑀆𑀤𑀻𑀳𑀺 (𑀅. 𑀦𑀺. 𑁧.𑁬𑁬-𑁬𑁭) 𑀓𑀼𑀲𑀮𑀪𑀸𑀯𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺 𑀆𑀳 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀪𑀸𑀯𑁄’’𑀢𑀺. 𑀏𑀢𑁂𑀦𑁂𑀯 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀸𑀯𑀸 𑀓𑀼𑀲𑀮𑀪𑀸𑀯𑁄 𑀯𑀺𑀬 𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀁 𑀧𑀦𑁂𑀓𑁂 𑀫𑀜𑁆𑀜𑁂𑀬𑁆𑀬𑀼𑀁 ‘‘𑀅𑀳𑁂𑀢𑀼𑀓𑀳𑁂𑀢𑀼𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀯𑀺𑀬 𑀲𑀳𑁂𑀢𑀼𑀓𑀳𑁂𑀢𑀽𑀦𑀁 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀅𑀜𑁆𑀜𑁂𑀲𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀧𑀝𑀺𑀩𑀤𑁆𑀥𑁄’’𑀢𑀺, 𑀢𑀲𑁆𑀲 𑀉𑀢𑁆𑀢𑀭𑀁 𑀯𑀢𑁆𑀢𑀼𑀁 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀮𑁄𑀪𑁄 𑀓𑀼𑀲𑀮𑁄 𑀯𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑁄 𑀯𑀸, 𑀬𑀤𑀺 𑀅𑀮𑁄𑀪𑁄 𑀲𑀪𑀸𑀯𑀢𑁄 𑀓𑀼𑀲𑀮𑁄, 𑀓𑀼𑀲𑀮𑀢𑁆𑀢𑀸 𑀅𑀩𑁆𑀬𑀸𑀓𑀢𑁄 𑀦 𑀲𑀺𑀬𑀸. 𑀅𑀣 𑀅𑀩𑁆𑀬𑀸𑀓𑀢𑁄, 𑀢𑀁𑀲𑀪𑀸𑀯𑀢𑁆𑀢𑀸 𑀓𑀼𑀲𑀮𑁄 𑀦 𑀲𑀺𑀬𑀸 𑀅𑀮𑁄𑀪𑀲𑀪𑀸𑀯𑀲𑁆𑀲 ¶ 𑀅𑀤𑁄𑀲𑀢𑁆𑀢𑀸𑀪𑀸𑀯𑁄 𑀯𑀺𑀬. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀲𑁄 ¶ 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀉𑀪𑀬𑀣𑀸 𑀳𑁄𑀦𑁆𑀢𑁂𑀲𑀼 𑀨𑀲𑁆𑀲𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑁂𑀢𑀼𑀧𑀝𑀺𑀩𑀤𑁆𑀥𑀓𑀼𑀲𑀮𑀸𑀤𑀺𑀪𑀸𑀯𑀁 𑀧𑀭𑀺𑀬𑁂𑀲𑀣, 𑀦 𑀲𑀪𑀸𑀯𑀢𑁄, 𑀏𑀯𑀁 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀢𑀸 𑀅𑀜𑁆𑀜𑀧𑀝𑀺𑀩𑀤𑁆𑀥𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀦 𑀲𑀪𑀸𑀯𑀢𑁄𑀢𑀺. 𑀬𑀁 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀽𑀲𑀼 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄’’𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺, 𑀲𑀸 𑀧𑀦 𑀧𑀭𑀺𑀬𑁂𑀲𑀺𑀬𑀫𑀸𑀦𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑀸 𑀳𑁄𑀢𑀻𑀢𑀺 𑀳𑁂𑀢𑀽𑀲𑀼 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀆𑀭𑀪𑀺𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀭𑀽𑀧𑀸𑀬𑀢𑀦𑀸𑀤𑀺𑀫𑀢𑁆𑀢𑁂 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀲𑁆𑀫𑀺𑀁 𑀅𑀝𑁆𑀞𑀢𑁆𑀯𑀸 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 𑀅𑀦𑀺𑀬𑀫𑁂𑀦 𑀲𑀩𑁆𑀩𑀭𑀽𑀧𑀸𑀬𑀢𑀦…𑀧𑁂… 𑀥𑀫𑁆𑀫𑀸𑀬𑀢𑀦𑀸𑀦𑀜𑁆𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦 𑀓𑁄𑀘𑀺 𑀥𑀫𑁆𑀫𑁄 𑀦 𑀳𑁄𑀢𑀻𑀢𑀺.

‘‘𑀙𑀦𑁆𑀤𑀯𑀢𑁄 𑀓𑀺𑀁 𑀦𑀸𑀫 𑀦 𑀲𑀺𑀚𑁆𑀛𑀢𑀻’’𑀢𑀺𑀆𑀤𑀺𑀓𑀁 𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑁂 𑀙𑀦𑁆𑀤𑀸𑀤𑀬𑁄 𑀥𑀼𑀭𑀪𑀽𑀢𑀸 𑀚𑁂𑀝𑁆𑀞𑀓𑀪𑀽𑀢𑀸 𑀲𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀸𑀥𑀬𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀢𑁂𑀲𑀁 𑀯𑀲𑁂 𑀯𑀢𑁆𑀢𑀦𑁆𑀢𑀺 𑀳𑀻𑀦𑀸𑀤𑀺𑀪𑀸𑀯𑁂𑀦 𑀢𑀤𑀦𑀼𑀯𑀢𑁆𑀢𑀦𑀢𑁄, 𑀢𑁂𑀦 𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀕𑀭𑀼𑀓𑀸𑀢𑀩𑁆𑀩𑀫𑁆𑀧𑀺 𑀆𑀭𑀫𑁆𑀫𑀡𑀁 𑀢𑀦𑁆𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀅𑀲𑁆𑀲𑀸𑀤𑀫𑀕𑁆𑀕𑀨𑀮𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀬𑀫𑀸𑀦𑀁 𑀯𑀺𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸𑀬𑀁 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺𑀆𑀤𑀺 𑀘𑀺𑀢𑁆𑀢𑀦𑀺𑀬𑀫𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀦𑁆𑀢𑀻𑀭𑀡𑀸𑀦𑀦𑁆𑀢𑀭𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀘𑀼𑀢𑀺𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀻𑀢𑀺 𑀬𑀲𑁆𑀲 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀬𑀁 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀤𑀦𑀦𑁆𑀢𑀭𑀼𑀧𑁆𑀧𑀸𑀤𑀦𑀺𑀬𑀫𑁄 𑀢𑀁𑀢𑀁𑀲𑀳𑀓𑀸𑀭𑀻𑀧𑀘𑁆𑀘𑀬𑀯𑀺𑀲𑀺𑀝𑁆𑀞𑀲𑁆𑀲 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲𑁂𑀯 𑀯𑀲𑁂𑀦 𑀇𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀸𑀯𑀦𑀸𑀩𑀮𑁂𑀦 𑀧𑀦 𑀯𑀸𑀭𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀯𑁂𑀔𑁂 𑀤𑀺𑀦𑁆𑀦𑁂 𑀧𑀼𑀧𑁆𑀨𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀧𑀼𑀧𑁆𑀨𑀦𑀁 𑀦 𑀳𑁄𑀢𑀺, 𑀅𑀕𑀤𑀯𑁂𑀔𑁂 𑀧𑀦 𑀅𑀧𑀦𑀻𑀢𑁂 𑀢𑀸𑀬𑀬𑁂𑀯 𑀲𑀫𑀢𑁆𑀣𑀢𑀸𑀬 𑀧𑀼𑀧𑁆𑀨𑀦𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀪𑀸𑀯𑀦𑀸𑀩𑀮𑁂𑀦 𑀯𑀸𑀭𑀺𑀢𑀢𑁆𑀢𑀸 𑀲𑀫𑀼𑀝𑁆𑀞𑀸𑀧𑀦𑀲𑀫𑀢𑁆𑀣𑀲𑁆𑀲𑁂𑀯 𑀅𑀲𑀫𑀼𑀝𑁆𑀞𑀸𑀧𑀦𑀁, 𑀢𑀲𑁆𑀫𑀺𑀜𑁆𑀘 𑀅𑀧𑀕𑀢𑁂 𑀢𑀸𑀬𑀬𑁂𑀯 𑀲𑀫𑀢𑁆𑀣𑀢𑀸𑀬 𑀲𑀫𑀼𑀝𑁆𑀞𑀸𑀧𑀦𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀅𑀢𑁆𑀣𑀢𑁄𑀢𑀺 𑀉𑀧𑀘𑀬𑀲𑀦𑁆𑀢𑀢𑀺𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀧𑀤𑀸𑀦𑀁 𑀯𑀺𑀬 𑀲𑀤𑁆𑀤𑀢𑁆𑀣𑀫𑀢𑁆𑀢𑀢𑁄 𑀦𑀸𑀦𑀸𑀓𑀭𑀡𑀁, 𑀦 𑀯𑀘𑀦𑀻𑀬𑀢𑁆𑀣𑀢𑁄𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 ¶ 𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑁄𑀥𑀼𑀧𑁆𑀧𑀸𑀤𑀦𑁆𑀢𑀭𑀸𑀪𑀸𑀯𑀢𑁄 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁄. 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀸𑀪𑀸𑀯𑀢𑁄 𑀘 ‘‘𑀇𑀤𑀫𑀺𑀢𑁄 𑀳𑁂𑀝𑁆𑀞𑀸 𑀉𑀤𑁆𑀥𑀁 𑀢𑀺𑀭𑀺𑀬’’𑀦𑁆𑀢𑀺 𑀯𑀺𑀪𑀸𑀕𑀸𑀪𑀸𑀯𑀸 𑀅𑀢𑁆𑀢𑀦𑀸 𑀏𑀓𑀢𑁆𑀢𑀫𑀺𑀯 𑀉𑀧𑀦𑁂𑀢𑁆𑀯𑀸 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸.

𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀢𑀺 𑀘 𑀅𑀩𑁆𑀬𑀸𑀧𑀸𑀭𑀢𑁆𑀢𑀸 𑀥𑀫𑁆𑀫𑀸𑀦𑀁 𑀬𑀲𑁆𑀫𑀺𑀁 𑀬𑀤𑀸𑀓𑀸𑀭𑁂 𑀦𑀺𑀭𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑁂 𑀯𑀸 𑀲𑀢𑀺 𑀢𑀁𑀢𑀁𑀯𑀺𑀲𑁂𑀲𑀯𑀦𑁆𑀢𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑁄𑀯 𑀆𑀓𑀸𑀭𑁄 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑁂𑀯 𑀘 𑀉𑀧𑀸𑀤𑀸𑀬 𑀓𑀸𑀮𑀯𑁄𑀳𑀸𑀭𑁄𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀲𑁆𑀲 𑀧𑀼𑀭𑀺𑀫𑀘𑀼𑀢𑀺𑀧𑀘𑁆𑀙𑀺𑀫𑀧𑀝𑀺𑀲𑀦𑁆𑀥𑀻𑀦𑀜𑁆𑀘 𑀦𑀺𑀭𑁄𑀥𑀼𑀧𑁆𑀧𑀸𑀤𑀦𑀺𑀭𑀦𑁆𑀢𑀭𑀢𑀸𑀬 𑀓𑀸𑀮𑀦𑁆𑀢𑀭𑀢𑀸 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀢𑁂𑀲𑀁 𑀅𑀦𑁆𑀢𑀭𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀬𑀁 𑀉𑀧𑀸𑀤𑀸𑀬 𑀓𑀸𑀮𑀦𑁆𑀢𑀭𑀢𑀸 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀅𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀓𑀭𑁄𑀢𑀺 𑀅𑀜𑁆𑀜𑀲𑀦𑁆𑀢𑀸𑀦𑀢𑁆𑀢𑀸. 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀦𑁆𑀢𑀢𑀺𑀬𑁄 𑀳𑀺 𑀤𑁆𑀯𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀲𑀪𑀸𑀯𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑀸𑀧𑀺 𑀯𑀺𑀲𑀼𑀁𑀬𑁂𑀯 𑀳𑁄𑀦𑁆𑀢𑀺. 𑀏𑀓𑀲𑀦𑁆𑀢𑀢𑀺𑀬𑀜𑁆𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀫𑀚𑁆𑀛𑁂 𑀯𑀢𑁆𑀢𑀫𑀸𑀦𑀁 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀦𑁆𑀢𑀭𑀓𑀸𑀭𑀓𑀁 𑀳𑁄𑀢𑀺. 𑀢𑀸𑀤𑀺𑀲𑀜𑁆𑀘 𑀓𑀜𑁆𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀫𑀚𑁆𑀛𑁂 𑀦𑀢𑁆𑀣𑀺, 𑀦 𑀘 𑀅𑀪𑀸𑀯𑁄 𑀅𑀦𑁆𑀢𑀭𑀓𑀸𑀭𑀓𑁄 𑀳𑁄𑀢𑀺 𑀅𑀪𑀸𑀯𑀢𑁆𑀢𑀸𑀬𑁂𑀯, 𑀢𑀲𑁆𑀫𑀸 𑀚𑀯𑀦𑀸𑀦𑀦𑁆𑀢𑀭𑀲𑁆𑀲 𑀚𑀯𑀦𑀲𑁆𑀲 𑀯𑀺𑀬, 𑀪𑀯𑀗𑁆𑀕𑀸𑀦𑀦𑁆𑀢𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀯𑀺𑀬 𑀘 𑀦𑀺𑀭𑀦𑁆𑀢𑀭𑀢𑀸 𑀲𑀼𑀝𑁆𑀞𑀼 𑀘 𑀅𑀦𑀦𑁆𑀢𑀭𑀢𑀸 𑀳𑁄𑀢𑀻𑀢𑀺 𑀢𑀣𑀸 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀼𑀢𑀻𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀸. 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀘𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀁 𑀧𑀸𑀓𑀝𑁄𑀢𑀺 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯 𑀯𑀼𑀢𑁆𑀢𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀕𑀳𑀺𑀢𑀸𑀦𑀁 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀅𑀮𑀪𑀦𑁆𑀢𑀸𑀦𑀁 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁨.𑁧𑁮.𑁫) 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀦 𑀲𑁄 𑀉𑀧𑁆𑀧𑀢𑁆𑀢𑀺𑀬𑀁𑀬𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀓𑀼𑀲𑀮𑀸𑀤𑀺𑀕𑁆𑀕𑀳𑀡𑀁 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁆𑀕𑀳𑀡𑀁 𑀅𑀧𑀭𑀺𑀘𑁆𑀙𑁂𑀤𑀁, 𑀬𑀢𑁄 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀲𑀫𑀗𑁆𑀕𑀺𑀦𑁄𑀬𑁂𑀯 𑀘 𑀕𑀳𑀡𑀁 𑀲𑀺𑀬𑀸, 𑀢𑁂𑀦𑁂𑀯 𑀘 𑀅𑀢𑀻𑀢𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀦 𑀲𑀦𑁆𑀢𑀻𑀢𑀺.

𑀉𑀧𑁆𑀧𑀚𑁆𑀚𑀫𑀸𑀦𑁄𑀯 ¶ 𑀲𑀳𑀼𑀧𑁆𑀧𑀸𑀤𑀪𑀸𑀯𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀧𑀸𑀓𑀝𑁂𑀦 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀲𑀳𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀢𑀺.

𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸, 𑀉𑀧𑀓𑀸𑀭𑀓𑀢𑀸 𑀘 𑀅𑀜𑁆𑀜𑀫𑀜𑁆𑀜𑀢𑀸𑀯𑀲𑁂𑀦𑁂𑀯 ¶ 𑀤𑀝𑁆𑀞𑀩𑁆𑀩𑀸, 𑀦 𑀲𑀳𑀚𑀸𑀢𑀸𑀤𑀺𑀯𑀲𑁂𑀦. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀳𑀺 𑀓𑁄𑀘𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀸𑀯𑁂𑀳𑀺 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑀸 𑀯𑀢𑁆𑀣𑀼𑀔𑀦𑁆𑀥𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀢𑀭𑀼𑀆𑀤𑀻𑀦𑀁 𑀧𑀣𑀯𑀻 𑀯𑀺𑀬 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀧𑀣𑀯𑀻𑀥𑀸𑀢𑀼 𑀲𑁂𑀲𑀥𑀸𑀢𑀽𑀦𑀁, 𑀘𑀓𑁆𑀔𑀸𑀤𑀬𑁄 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀉𑀧𑀓𑀸𑀭𑀓𑀸 𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀧𑀝𑀸𑀤𑀬𑁄 𑀯𑀺𑀬 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀔𑀦𑁆𑀥𑀸𑀤𑀬𑁄 𑀢𑀁𑀢𑀁𑀦𑀺𑀲𑁆𑀲𑀬𑀸𑀦𑀁 𑀔𑀦𑁆𑀥𑀸𑀤𑀻𑀦𑀁.

𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀺𑀲𑁆𑀲𑀬𑁄𑀢𑀺 𑀯𑀤𑀢𑀺. 𑀢𑀢𑁆𑀣 𑀬𑁄 𑀪𑀼𑀲𑁄, 𑀢𑀁 𑀉𑀧𑀦𑀺𑀲𑁆𑀲𑀬𑁄𑀢𑀺 𑀦𑀺𑀤𑁆𑀥𑀸𑀭𑁂𑀢𑀺.

𑀧𑀓𑀢𑁄𑀢𑀺 𑀏𑀢𑁆𑀣 𑀧-𑀓𑀸𑀭𑁄 𑀉𑀧𑀲𑀕𑁆𑀕𑁄, 𑀲𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑁂 𑀲𑀫𑀢𑁆𑀣𑀪𑀸𑀯𑁂𑀦 𑀲𑀼𑀝𑁆𑀞𑀼𑀓𑀢𑀢𑀁 𑀤𑀻𑀧𑁂𑀢𑀺. 𑀢𑀣𑀸 𑀘 𑀓𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀓𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂’’𑀢𑀺. 𑀓𑀭𑀡𑀜𑁆𑀘 𑀤𑀼𑀯𑀺𑀥𑀁 𑀦𑀺𑀧𑁆𑀨𑀸𑀤𑀦𑀁 𑀉𑀧𑀲𑁂𑀯𑀦𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀧𑁆𑀨𑀸𑀤𑀺𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀲𑁂𑀯𑀺𑀢𑁄 𑀯𑀸𑀢𑀺 𑀏𑀢𑁂𑀦 𑀓𑀸𑀬𑀅𑀮𑁆𑀮𑀻𑀬𑀸𑀧𑀦𑀯𑀲𑁂𑀦 𑀉𑀧𑀪𑁄𑀕𑀽𑀧𑀲𑁂𑀯𑀦𑀁 𑀯𑀺𑀚𑀸𑀦𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀽𑀧𑀲𑁂𑀯𑀦𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀅𑀦𑀸𑀕𑀢𑀸𑀦𑀫𑁆𑀧𑀺 𑀘𑀓𑁆𑀔𑀼𑀲𑀫𑁆𑀧𑀤𑀸𑀤𑀻𑀦𑀁 𑀆𑀭𑀫𑁆𑀫𑀡𑀽𑀧𑀲𑁂𑀯𑀦𑁂𑀦 𑀬𑀣𑀸𑀧𑀝𑀺𑀲𑁂𑀯𑀺𑀢𑀸𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺.

𑀬𑀣𑀸 𑀧𑀘𑁆𑀙𑀸𑀚𑀸𑀢𑁂𑀦 𑀯𑀺𑀦𑀸 𑀲𑀦𑁆𑀢𑀸𑀦𑀸𑀯𑀺𑀘𑁆𑀙𑁂𑀤𑀳𑁂𑀢𑀼𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀬𑁂 𑀧𑀘𑁆𑀙𑀸𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀸, 𑀢𑁂𑀲𑀁 𑀲𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀉𑀧𑀓𑀸𑀭𑀓𑀢𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀢𑀸, 𑀢𑀣𑀸 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀯𑀺𑀦𑀸 𑀉𑀧𑀓𑀸𑀭𑀓𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀼𑀭𑁂𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸, 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀸𑀓𑀸𑀭𑀯𑀺𑀲𑀺𑀝𑁆𑀞𑀸 𑀉𑀧𑀓𑀸𑀭𑀓𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 ¶ 𑀆𑀳𑀸𑀭𑀸𑀲𑀸𑀘𑁂𑀢𑀦𑀸 𑀯𑀺𑀬𑀸𑀢𑀺 𑀏𑀢𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀆𑀳𑀸𑀭𑀸𑀲𑀸 𑀯𑀺𑀬𑀸’’𑀢𑀺 𑀅𑀯𑀢𑁆𑀯𑀸 𑀘𑁂𑀢𑀦𑀸𑀕𑀳𑀡𑀁 𑀓𑀭𑁄𑀢𑀺.

𑀓𑀼𑀲𑀮𑀸𑀤𑀺𑀪𑀸𑀯𑁂𑀦 ¶ 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀧𑀯𑀢𑁆𑀢𑀦𑀁 𑀆𑀲𑁂𑀯𑀦𑀝𑁆𑀞𑁄, 𑀅𑀢𑁆𑀢𑀲𑀤𑀺𑀲𑀲𑀪𑀸𑀯𑀢𑀸𑀧𑀸𑀤𑀦𑀁 𑀯𑀸𑀲𑀦𑀁 𑀯𑀸. 𑀕𑀦𑁆𑀣𑀸𑀤𑀻𑀲𑀼 𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬𑀸𑀢𑀺 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀆𑀲𑁂𑀯𑀦𑀸 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀺𑀢𑁆𑀢𑀧𑁆𑀧𑀬𑁄𑀕𑁄 𑀘𑀺𑀢𑁆𑀢𑀓𑀺𑀭𑀺𑀬𑀸, 𑀆𑀬𑀽𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀓𑀸𑀬𑀯𑀘𑀻𑀧𑀬𑁄𑀕𑁄 𑀯𑀺𑀜𑁆𑀜𑀢𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀧𑁆𑀧𑀬𑁄𑀕𑁄 𑀘𑁂𑀢𑀦𑀸. 𑀲𑀸 𑀢𑀸𑀬 𑀉𑀧𑁆𑀧𑀦𑁆𑀦𑀓𑀺𑀭𑀺𑀬𑀢𑀸𑀯𑀺𑀲𑀺𑀝𑁆𑀞𑁂 𑀲𑀦𑁆𑀢𑀸𑀦𑁂 𑀲𑁂𑀲𑀧𑀘𑁆𑀘𑀬𑀲𑀫𑀸𑀕𑀫𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀢𑁂𑀦𑁂𑀯 𑀓𑀺𑀭𑀺𑀬𑀪𑀸𑀯𑁂𑀦 𑀉𑀧𑀓𑀸𑀭𑀺𑀓𑀸 𑀳𑁄𑀢𑀺. 𑀢𑀲𑁆𑀲 𑀳𑀺 𑀓𑀺𑀭𑀺𑀬𑀪𑀸𑀯𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺. 𑀲𑀳𑀚𑀸𑀢𑀸𑀦𑀁 𑀧𑀦 𑀢𑁂𑀦 𑀉𑀧𑀓𑀸𑀭𑀺𑀓𑀸𑀢𑀺 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀲𑀉𑀲𑁆𑀲𑀸𑀳𑁂𑀳𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀲𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀲𑀤𑀺𑀲𑀯𑀺𑀧𑀸𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀯𑀺𑀧𑀸𑀓𑀸𑀦𑀁 𑀧𑀬𑁄𑀕𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀸𑀬 𑀧𑀬𑁄𑀕𑁂𑀦 𑀅𑀜𑁆𑀜𑀣𑀸 𑀯𑀸 𑀲𑁂𑀲𑀧𑀘𑁆𑀘𑀬𑁂𑀲𑀼 𑀲𑀺𑀤𑁆𑀥𑁂𑀲𑀼 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸𑀬𑁂𑀯 𑀲𑀺𑀤𑁆𑀥𑀺𑀢𑁄 𑀦𑀺𑀭𑀼𑀲𑁆𑀲𑀸𑀳𑁄 𑀲𑀦𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀓𑀺𑀮𑁂𑀲𑀯𑀽𑀧𑀲𑀫𑀲𑀦𑁆𑀢𑀪𑀸𑀯𑁄, 𑀢𑀣𑀸𑀲𑀦𑁆𑀢𑀲𑀪𑀸𑀯𑀢𑁄𑀬𑁂𑀯 𑀪𑀯𑀗𑁆𑀕𑀸𑀤𑀬𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀸. 𑀧𑀜𑁆𑀘𑀤𑁆𑀯𑀸𑀭𑁂𑀧𑀺 𑀳𑀺 𑀚𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀭𑀽𑀧𑀸𑀤𑀻𑀦𑀁 𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀅𑀪𑀺𑀦𑀺𑀧𑀸𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀫𑀢𑁆𑀢𑀸 𑀧𑀦 𑀯𑀺𑀧𑀸𑀓𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀬𑁂𑀯. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬𑀸𑀢𑀺 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀢𑁆𑀣𑀸𑀬. 𑀏𑀢𑁂𑀦 𑀢𑀧𑁆𑀧𑀘𑁆𑀘𑀬𑀯𑀢𑀁 𑀅𑀯𑀺𑀧𑀸𑀓𑀸𑀦𑀫𑁆𑀧𑀺 𑀯𑀺𑀧𑀸𑀓𑀸𑀦𑀼𑀓𑀼𑀮𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀆𑀳𑀸𑀭𑀸𑀦𑀁 𑀧𑀥𑀸𑀦𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀜𑁆𑀳𑀺 𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀅𑀭𑀽𑀧𑀻𑀦𑀁 𑀆𑀳𑀸𑀭𑀸𑀦𑀁 𑀆𑀳𑀸𑀭𑀚𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀭𑀽𑀧𑀸𑀳𑀸𑀭𑀲𑁆𑀲 𑀘 𑀳𑁄𑀢𑀺, 𑀅𑀲𑀢𑀺𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀽𑀧𑀢𑁆𑀣𑀫𑁆𑀪𑀓𑀭𑀽𑀧𑀸𑀳𑀸𑀭𑀲𑁆𑀲, 𑀅𑀲𑀢𑀺 𑀧𑀦 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂 𑀆𑀳𑀸𑀭𑀸𑀦𑀁 𑀚𑀦𑀓𑀢𑁆𑀢𑀁 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦𑀁. 𑀚𑀦𑀬𑀫𑀸𑀦𑁄𑀧𑀺 𑀳𑀺 ¶ 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑁄𑀬𑁂𑀯 𑀚𑀦𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑀪𑀸𑀯𑁄 𑀆𑀳𑀸𑀭𑀪𑀸𑀯𑁄𑀢𑀺.

𑀅𑀥𑀺𑀧𑀢𑀺𑀬𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀯𑀺𑀬 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑁂𑀦 𑀕𑀭𑀼𑀪𑀸𑀯𑁄 𑀅𑀥𑀺𑀧𑀢𑀺𑀬𑀝𑁆𑀞𑁄, 𑀅𑀣 𑀔𑁄 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀚𑀻𑀯𑀦𑁂 𑀚𑀻𑀯𑀦𑁆𑀢𑁂𑀳𑀺 𑀲𑀼𑀔𑀺𑀢𑀸𑀤𑀺𑀪𑀸𑀯𑁂 𑀲𑀼𑀔𑀺𑀢𑀸𑀤𑀻𑀳𑀺 𑀅𑀥𑀺𑀫𑁄𑀓𑁆𑀔𑀧𑀕𑁆𑀕𑀳𑀼𑀧𑀝𑁆𑀞𑀸𑀦𑀸𑀯𑀺𑀓𑁆𑀔𑁂𑀧𑀚𑀸𑀦𑀦𑁂𑀲𑀼 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑀺𑀬𑀁 𑀆𑀚𑀸𑀦𑀦𑁂 𑀅𑀜𑁆𑀜𑀸𑀢𑀸𑀯𑀻𑀪𑀸𑀯𑁂 𑀘 𑀲𑀤𑁆𑀥𑀸𑀤𑀺𑀲𑀳𑀚𑀸𑀢𑁂𑀳𑀻𑀢𑀺 𑀏𑀯𑀁 𑀢𑀁𑀢𑀁𑀓𑀺𑀘𑁆𑀘𑁂𑀲𑀼 ¶ 𑀘𑀓𑁆𑀔𑀸𑀤𑀺𑀧𑀘𑁆𑀘𑀬𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑀻𑀬𑀢𑀸. 𑀢𑁂𑀲𑀼 𑀢𑁂𑀲𑀼 𑀳𑀺 𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 𑀇𑀲𑁆𑀲𑀭𑀺𑀬𑀁 𑀢𑀧𑁆𑀧𑀘𑁆𑀘𑀬𑀸𑀦𑀜𑁆𑀘 𑀢𑀤𑀦𑀼𑀯𑀢𑁆𑀢𑀦𑁂𑀦 𑀢𑀢𑁆𑀣 𑀧𑀯𑀢𑁆𑀢𑀻𑀢𑀺. 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀬𑀤𑀺𑀧𑀺 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸 𑀅𑀢𑁆𑀣𑀺, 𑀲𑀸 𑀧𑀦 𑀦 𑀧𑀘𑁆𑀘𑀬𑀪𑀸𑀯𑀢𑁄. 𑀬𑀣𑀸 𑀳𑀺 𑀚𑀻𑀯𑀺𑀢𑀸𑀳𑀸𑀭𑀸 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀅𑀦𑀼𑀧𑀸𑀮𑀓𑀉𑀧𑀢𑁆𑀣𑀫𑁆𑀪𑀓𑀸 𑀅𑀢𑁆𑀣𑀺, 𑀅𑀯𑀺𑀕𑀢𑀧𑀘𑁆𑀘𑀬𑀪𑀽𑀢𑀸 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀸 𑀮𑀺𑀗𑁆𑀕𑀸𑀤𑀻𑀦𑀁 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀬𑀣𑀸𑀲𑀓𑁂𑀳𑁂𑀯 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀸𑀦𑀁 𑀮𑀺𑀗𑁆𑀕𑀸𑀤𑀻𑀦𑀁 𑀬𑀣𑀸 𑀇𑀢𑁆𑀣𑀸𑀤𑀺𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂 𑀅𑀧𑁆𑀧𑀯𑀢𑁆𑀢𑀺𑀢𑁄 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸 𑀇𑀦𑁆𑀤𑁆𑀭𑀺𑀬𑀢𑀸 𑀘 𑀢𑁂𑀲𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀘𑀓𑁆𑀔𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯𑀸𑀢𑀺 𑀏𑀢𑁆𑀣 𑀲𑀼𑀔𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀘𑀓𑁆𑀔𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀮𑀓𑁆𑀔𑀡𑀸𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀪𑀽𑀢𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀢𑀓𑁆𑀓𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀁 𑀧𑁂𑀓𑁆𑀔𑀦𑀁, 𑀘𑀺𑀦𑁆𑀢𑀦𑀁 𑀯𑀸 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀲𑀸𑀥𑀸𑀭𑀡𑁄 𑀩𑁆𑀬𑀸𑀧𑀸𑀭𑁄 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁄. 𑀞𑀧𑁂𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬𑀦𑁆𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀞𑀧𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀩𑁆𑀩𑀸𑀦𑀺𑀧𑀻’’𑀢𑀺 𑀯𑀢𑁆𑀯𑀸 ‘‘𑀲𑀢𑁆𑀢𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀯𑀘𑀦𑁂𑀦 𑀅𑀛𑀸𑀦𑀗𑁆𑀕𑀸𑀦𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀦𑀺𑀯𑀢𑁆𑀢𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 ‘‘𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑁂 ‘‘𑀞𑀧𑁂𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀯𑁂𑀤𑀦𑀸𑀪𑁂𑀤𑁂𑀲𑀼 𑀧𑀜𑁆𑀘𑀲𑀼 𑀲𑀼𑀔𑀤𑀼𑀓𑁆𑀔𑀤𑁆𑀯𑀬𑀲𑁆𑀲 𑀏𑀓𑀦𑁆𑀢𑁂𑀦 𑀅𑀛𑀸𑀦𑀗𑁆𑀕𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀛𑀸𑀦𑀗𑁆𑀕𑀝𑁆𑀞𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀲𑀢𑀺𑀧𑀺 𑀯𑀸 𑀛𑀸𑀦𑀗𑁆𑀕𑀯𑁄𑀳𑀸𑀭𑁂 𑀯𑁂𑀤𑀦𑀸𑀪𑁂𑀤𑀤𑁆𑀯𑀬𑀲𑁆𑀲 𑀏𑀓𑀦𑁆𑀢𑁂𑀦 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀧𑀦 𑀬𑀤𑀺𑀧𑀺 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄 𑀅𑀢𑁆𑀣𑀺, 𑀛𑀸𑀦𑀧𑀘𑁆𑀘𑀬𑀪𑀸𑀯𑁄 𑀧𑀦 𑀦 𑀦𑀢𑁆𑀣𑀻𑀢𑀺 ‘‘𑀲𑀩𑁆𑀩𑀸𑀦𑀺𑀧𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀏𑀢𑁆𑀣 𑀕𑀳𑀡𑀁 ¶ 𑀓𑀢𑀁. 𑀢𑀢𑁆𑀣 ‘‘𑀲𑀩𑁆𑀩𑀸𑀦𑀺𑀧𑀻’’𑀢𑀺 𑀯𑀘𑀦𑀁 𑀲𑀩𑁆𑀩𑀓𑀼𑀲𑀮𑀸𑀤𑀺𑀪𑁂𑀤𑀲𑀗𑁆𑀕𑀡𑁆𑀳𑀦𑀢𑁆𑀣𑀁, 𑀦 𑀧𑀦 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀲𑀗𑁆𑀕𑀡𑁆𑀳𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀢𑁄 𑀢𑀢𑁄 𑀯𑀸𑀢𑀺 𑀲𑀫𑁆𑀫𑀸 𑀯𑀸 𑀫𑀺𑀘𑁆𑀙𑀸 𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂 𑀧𑀦 𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀇𑀤𑀁 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀺, 𑀦 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀽𑀢𑀺 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀏𑀯𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀮𑀸𑀪𑁄 𑀦 𑀯𑀸𑀭𑀺𑀢𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀦 𑀲𑀯𑀺𑀢𑀓𑁆𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀛𑀸𑀦𑀧𑀘𑁆𑀘𑀬𑀲𑁆𑀲𑁂𑀯 𑀅𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀯𑀸 𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑁂 𑀧𑀦 𑀇𑀫𑀲𑁆𑀫𑀺𑀁 𑀯𑀘𑀦𑁂 𑀲𑀯𑀺𑀢𑀓𑁆𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀛𑀸𑀦𑀧𑀘𑁆𑀘𑀬𑀲𑁆𑀲 𑀮𑀸𑀪𑀸𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑁂𑀦 𑀅𑀮𑀸𑀪𑁂𑀦 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀫𑀦𑁄𑀥𑀸𑀢𑀼𑀆𑀤𑀻𑀦𑀁 𑀲𑀗𑁆𑀕𑀳𑀲𑀼𑀜𑁆𑀜𑀢𑀯𑀸𑀭𑁂𑀲𑀼 𑀛𑀸𑀦𑀁 𑀦 𑀉𑀤𑁆𑀥𑀝𑀁 ¶ , 𑀢𑀁 𑀅𑀮𑀸𑀪𑀁 𑀲𑀦𑁆𑀥𑀸𑀬 𑀏𑀲 𑀛𑀸𑀦𑀧𑀘𑁆𑀘𑀬𑀲𑁆𑀲𑀧𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑀲𑀳𑁂𑀢𑀼𑀓𑁂𑀲𑀼 𑀯𑀺𑀢𑀓𑁆𑀓𑀸𑀤𑀻𑀦𑀁 𑀲𑀳𑀚𑀸𑀢𑁂 𑀲𑀁𑀓𑀟𑁆𑀠𑀺𑀢𑁆𑀯𑀸 𑀏𑀓𑀢𑁆𑀢𑀕𑀢𑀪𑀸𑀯𑀓𑀭𑀡𑀁 𑀉𑀧𑀦𑀺𑀚𑁆𑀛𑀸𑀬𑀦𑀩𑁆𑀬𑀸𑀧𑀸𑀭𑁄 𑀩𑀮𑀯𑀸, 𑀦 𑀢𑀣𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀧𑀓𑀭𑀡𑁂 𑀤𑀼𑀩𑁆𑀩𑀮𑀫𑁆𑀧𑀺 𑀉𑀧𑀦𑀺𑀚𑁆𑀛𑀸𑀬𑀦𑀁 𑀬𑀤𑀺𑀧𑀺 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀢𑁂𑀦 𑀉𑀧𑀓𑀸𑀭𑀓𑀢𑀸 𑀳𑁄𑀢𑀻𑀢𑀺 𑀲𑀯𑀺𑀢𑀓𑁆𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼𑀧𑀺 𑀛𑀸𑀦𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀯, 𑀢𑀲𑁆𑀫𑀸 𑀬𑁂 𑀏𑀯𑀁 𑀧𑀞𑀦𑁆𑀢𑀺 ‘‘𑀦 𑀏𑀢𑁂 𑀧𑀦 𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀬𑀣𑀸𑀲𑀗𑁆𑀔𑁆𑀬𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀻’’𑀢𑀺, 𑀢𑁂𑀲𑀁 𑀲𑁄 𑀧𑀸𑀞𑁄 𑀲𑀼𑀦𑁆𑀤𑀭𑀢𑀭𑁄, 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸, 𑀦 𑀥𑀫𑁆𑀫𑀲𑀗𑁆𑀕𑀡𑀺𑀬𑀸𑀢𑀺.

𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀢𑀸𑀬 𑀏𑀓𑀻𑀪𑀸𑀯𑁄𑀧𑀕𑀫𑁂𑀦 𑀯𑀺𑀬 𑀉𑀧𑀓𑀸𑀭𑀓𑀢𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸.

𑀬𑀼𑀢𑁆𑀢𑀸𑀦𑀫𑁆𑀧𑀺 𑀲𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀦𑀸𑀦𑀢𑁆𑀢𑀽𑀧𑀕𑀫𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀦 𑀳𑀺 𑀯𑀢𑁆𑀣𑀼𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀅𑀬𑀼𑀢𑁆𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀅𑀢𑁆𑀣𑀻𑀢𑀺. 𑀭𑀽𑀧𑀸𑀦𑀁 𑀧𑀦 𑀭𑀽𑀧𑁂𑀳𑀺 𑀲𑀢𑀺𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑁂 𑀯𑀺𑀧𑁆𑀧𑀬𑁄𑀕𑁄𑀬𑁂𑀯 𑀦𑀢𑁆𑀣𑀻𑀢𑀺 𑀦 𑀢𑁂𑀲𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 (𑀥𑀸𑀢𑀼. 𑁩).

𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑁂𑀦𑀸𑀢𑀺 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑁂𑀦. 𑀢𑁂𑀦 ‘‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 (𑀧𑀸𑀭𑀸. 𑁩𑁮), ‘‘𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 (𑀧𑀼. 𑀧. 𑀫𑀸𑀢𑀺𑀓𑀸 𑁪.𑁨𑁪) 𑀘 𑀏𑀯𑀫𑀸𑀤𑀻𑀲𑀼 𑀯𑀼𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀉𑀧𑀮𑀩𑁆𑀪𑀫𑀸𑀦𑀢𑀸𑀮𑀓𑁆𑀔𑀡𑀁 𑀅𑀢𑁆𑀣𑀺𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀉𑀧𑀢𑁆𑀣𑀫𑁆𑀪𑀓𑀧𑁆𑀧𑀥𑀸𑀦𑀸 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸𑀢𑀺 𑀆𑀳 ‘‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀇𑀤𑀜𑁆𑀘 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀸𑀤𑀻𑀦𑀁 𑀲𑀸𑀥𑀸𑀭𑀡𑀁 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀤𑀺𑀯𑀲𑁂𑀦 𑀯𑀢𑁆𑀢𑀫𑀸𑀦𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀲𑀳𑀪𑀸𑀯𑁄 𑀦𑀢𑁆𑀣𑀻𑀢𑀺 𑀏𑀓𑀲𑁆𑀫𑀺𑀁 𑀨𑀲𑁆𑀲𑀸𑀤𑀺𑀲𑀫𑀼𑀤𑀸𑀬𑁂 𑀲𑀢𑀺 𑀤𑀼𑀢𑀺𑀬𑁄 𑀦 𑀳𑁄𑀢𑀺, 𑀅𑀲𑀢𑀺 𑀧𑀦 𑀳𑁄𑀢𑀺, 𑀢𑁂𑀦 𑀦𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀦𑀢𑁆𑀣𑀺𑀧𑀘𑁆𑀘𑀬𑀢𑀸. 𑀲𑀢𑀺𑀧𑀺 𑀧𑀼𑀭𑀺𑀫𑀢𑀭𑀘𑀺𑀢𑁆𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑁂 𑀦 𑀢𑀸𑀦𑀺 𑀦𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀦𑀺, 𑀅𑀦𑀦𑁆𑀢𑀭𑀫𑁂𑀯 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀑𑀓𑀸𑀲𑀁 𑀅𑀮𑀪𑀫𑀸𑀦𑀸𑀦𑀁 𑀦𑀢𑁆𑀣𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀑𑀓𑀸𑀲𑀁 𑀤𑀤𑀫𑀸𑀦𑀁 𑀯𑀺𑀬 𑀉𑀧𑀓𑀸𑀭𑀓𑀁 𑀳𑁄𑀢𑀻𑀢𑀺 ‘‘𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀉𑀧𑀓𑀸𑀭𑀓𑀢𑀸’’𑀢𑀺 𑀆𑀳.

𑀏𑀢𑁆𑀣 𑀘 𑀅𑀪𑀸𑀯𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀑𑀓𑀸𑀲𑀤𑀸𑀦𑀁 𑀦𑀢𑁆𑀣𑀺𑀧𑀘𑁆𑀘𑀬𑀢𑀸, 𑀲𑀪𑀸𑀯𑀸𑀯𑀺𑀕𑀫𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀦𑀁 ¶ 𑀲𑀪𑀸𑀯𑀯𑀺𑀕𑀫𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀕𑀢𑀧𑀘𑁆𑀘𑀬𑀢𑀸, 𑀦𑀢𑁆𑀣𑀺𑀢𑀸 𑀘 𑀦𑀺𑀭𑁄𑀥𑀸𑀦𑀦𑁆𑀢𑀭𑀲𑀼𑀜𑁆𑀜𑀢𑀸, 𑀯𑀺𑀕𑀢𑀢𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑀢𑀸, 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄, 𑀢𑀣𑀸 𑀅𑀢𑁆𑀣𑀺𑀢𑀸𑀬 𑀲𑀲𑀪𑀸𑀯𑀢𑁄 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀲𑀪𑀸𑀯𑀸𑀯𑀺𑀕𑀫𑁂𑀦 𑀦𑀺𑀭𑁄𑀥𑀲𑁆𑀲 𑀅𑀧𑁆𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀓𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑀢𑀸𑀢𑀺 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄 𑀥𑀫𑁆𑀫𑀸𑀯𑀺𑀲𑁂𑀲𑁂𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀢𑁆𑀢𑀺𑀯𑀺𑀲𑁂𑀲𑀁 𑀲𑀩𑁆𑀩𑀁 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀯𑀺𑀲𑁂𑀲𑀸 𑀯𑀼𑀢𑁆𑀢𑀸𑀢𑀺 𑀪𑀕𑀯𑀢𑀺 𑀲𑀤𑁆𑀥𑀸𑀬 ‘‘𑀏𑀯𑀁𑀯𑀺𑀲𑁂𑀲𑀸 𑀏𑀢𑁂 𑀥𑀫𑁆𑀫𑀸’’𑀢𑀺 𑀲𑀼𑀢𑀫𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑁂𑀳𑀺 𑀢𑀤𑀪𑀺𑀲𑀫𑀬𑀸𑀬 𑀬𑁄𑀕𑁄 𑀓𑀸𑀢𑀩𑁆𑀩𑁄.

𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀏𑀓𑀲𑁆𑀲𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄 𑀦𑀸𑀫𑀥𑀫𑁆𑀫𑁂𑀓𑀤𑁂𑀲𑀢𑀸 𑀅𑀦𑀦𑁆𑀢𑀭𑀸𑀤𑀻𑀦𑀁 𑀦𑀢𑁆𑀣𑀻𑀢𑀺 ‘‘𑀦𑀸𑀫𑀥𑀫𑁆𑀫𑀸𑀯𑀸’’𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀪𑀚𑀦𑁆𑀢𑀸𑀦𑀁 𑀘𑀢𑀼𑀦𑁆𑀦𑀁𑀬𑁂𑀯 𑀔𑀦𑁆𑀥𑀸𑀦𑀁 𑀦𑀸𑀫𑀢𑀸, 𑀅𑀣 𑀔𑁄 𑀦𑀺𑀩𑁆𑀩𑀸𑀦𑀜𑁆𑀘 𑀦𑀸𑀫𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑁂𑀓𑀤𑁂𑀲𑁄𑀢𑀺 𑀏𑀢𑁆𑀣 𑀏𑀓𑀤𑁂𑀲𑀯𑀘𑀦𑁂𑀦 𑀭𑀽𑀧𑀭𑀽𑀧𑀢𑁄 ¶ 𑀅𑀜𑁆𑀜𑀁 𑀯𑀚𑁆𑀚𑁂𑀢𑀺, 𑀭𑀽𑀧𑀭𑀽𑀧𑀁 𑀧𑀦 𑀓𑀼𑀲𑀮𑀢𑁆𑀢𑀺𑀓𑁂 𑀅𑀦𑀸𑀕𑀢𑀫𑁆𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦 𑀅𑀜𑁆𑀜𑀢𑁆𑀣 𑀆𑀕𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁄 𑀥𑀫𑁆𑀫𑁄 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀆𑀧𑁄𑀥𑀸𑀢𑀼𑀁 𑀓𑀩𑀴𑀻𑀓𑀸𑀭𑀁 𑀆𑀳𑀸𑀭𑀁 𑀅𑀦𑀺𑀘𑁆𑀘𑀢𑁄…𑀧𑁂… 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁨.𑁨𑁨.𑁩𑁯).

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁧. 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀬𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄, 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀢𑁂𑀦 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀗𑁆𑀔𑀸𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺. 𑀬𑁄 𑀧𑀦 𑀳𑁂𑀢𑀼𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑁄 𑀧𑀘𑁆𑀘𑀬𑀥𑀫𑁆𑀫𑁄 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀪𑀬𑀣𑀸𑀧𑀺 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺. 𑀉𑀧𑀓𑀸𑀭𑀓𑀢𑀸 𑀧𑀦 𑀥𑀫𑁆𑀫𑀲𑀪𑀸𑀯𑁄 ¶ 𑀏𑀯, 𑀦 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀅𑀢𑁆𑀣𑀻𑀢𑀺. 𑀢𑀣𑀸 𑀢𑀣𑀸 𑀉𑀧𑀓𑀸𑀭𑀓𑀁 𑀢𑀁 𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀳𑀺 𑀪𑀕𑀯𑀸 𑀢𑀁 𑀢𑀁 𑀉𑀧𑀓𑀸𑀭𑀓𑀢𑀁 𑀤𑀲𑁆𑀲𑁂𑀢𑀻𑀢𑀺.

𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀞𑀫𑁄 𑀳𑁂𑀢𑀼-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀏𑀢𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀦𑀁. 𑀢𑁂𑀦 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀔𑁄 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀢𑁆𑀢𑀸 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀜𑁆𑀜𑀲𑁆𑀲 𑀅𑀧𑁂𑀓𑁆𑀔𑀺𑀢𑀩𑁆𑀩𑀲𑁆𑀲 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑀸𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀸𑀬𑀁 𑀏𑀓𑀦𑁆𑀢𑁄. 𑀳𑁂𑀢𑀼𑀲𑀤𑁆𑀤𑁄 𑀳𑀺 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣𑁂𑀯 𑀩𑁆𑀬𑀸𑀯𑀝𑁄 𑀬𑀤𑀸 𑀕𑀬𑁆𑀳𑀢𑀺 ¶ , 𑀢𑀤𑀸 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀲𑀺𑀝𑁆𑀞𑀸 𑀬𑁂 𑀓𑁂𑀘𑀺 𑀕𑀳𑀺𑀢𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦 𑀅𑀢𑁆𑀢𑀦𑀺 𑀏𑀯 𑀩𑁆𑀬𑀸𑀯𑀝𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑁂𑀦 𑀯𑀺𑀦𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀕𑀳𑀡𑀁 𑀳𑁄𑀢𑀻𑀢𑀺 𑀢𑀁 𑀲𑀦𑁆𑀥𑀸𑀬 ‘‘𑀅𑀣𑀸𑀧𑀺…𑀧𑁂… 𑀅𑀢𑁆𑀣𑁄 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀦𑀦𑀼 𑀬𑀣𑀸 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫), ‘‘𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧𑁬) 𑀘 𑀯𑀼𑀢𑁆𑀢𑁂 𑀤𑀼𑀢𑀺𑀬𑁂𑀦 𑀆𑀳𑀸𑀭𑀕𑁆𑀕𑀳𑀡𑁂𑀦 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀘 𑀯𑀺𑀦𑀸𑀧𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀲𑀺𑀬𑀸𑀢𑀺? 𑀦, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀯𑀚𑁆𑀚𑁂𑀢𑀩𑁆𑀩𑀸𑀪𑀸𑀯𑀢𑁄 𑀳𑀺 𑀢𑀢𑁆𑀣 𑀤𑀼𑀢𑀺𑀬𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂 𑀅𑀲𑀢𑀺𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀻𑀢𑀺 𑀢𑀁 𑀦 𑀓𑀢𑀁, 𑀇𑀥 𑀧𑀦 𑀯𑀚𑁆𑀚𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀦𑁆𑀢𑀺.

𑀏𑀯𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀲𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀓𑀳𑁂𑀢𑀽𑀢𑀺 𑀯𑀺𑀲𑁂𑀲𑀦𑀲𑁆𑀲 𑀅𑀓𑀢𑀢𑁆𑀢𑀸 𑀬𑁄 𑀓𑁄𑀘𑀺 𑀳𑁂𑀢𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑁂𑀯 𑀳𑁂𑀢𑀼𑀲𑁆𑀲 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀏𑀢𑀤𑀢𑁆𑀣𑀫𑁂𑀯 𑀘 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀧𑀺 𑀢𑀲𑁆𑀲 𑀕𑀳𑀡𑀁 𑀓𑀢𑀁. 𑀅𑀣 𑀯𑀸 𑀅𑀲𑀢𑀺 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦 𑀧𑀦 𑀳𑁂𑀢𑀽𑀦𑀦𑁆𑀢𑀺 𑀏𑀯𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀲𑁄 𑀯𑀼𑀢𑁆𑀢𑁄, 𑀢𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀁 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀳𑁂𑀢𑀽𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀛𑀸𑀦𑀫𑀕𑁆𑀕𑀸 𑀧𑀢𑀺𑀝𑁆𑀞𑀸𑀫𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀺𑀭𑀧𑁂𑀓𑁆𑀔𑀸, 𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀯𑀺𑀬 𑀲𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 𑀏𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀁 𑀳𑁂𑀢𑀸𑀤𑀺𑀕𑁆𑀕𑀳𑀡𑀁 𑀓𑀢𑀁. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀧𑀦 𑀆𑀳𑀭𑀺𑀢𑀩𑁆𑀩𑀇𑀲𑀺𑀢𑀩𑁆𑀩𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 ¶ 𑀢𑁂 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸 𑀏𑀯 𑀆𑀳𑀭𑀺𑀢𑀩𑁆𑀩𑁂 𑀘 𑀇𑀲𑀺𑀢𑀩𑁆𑀩𑁂 𑀘 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀪𑀽𑀢𑁂 𑀅𑀜𑁆𑀜𑁂 𑀘 𑀲𑀫𑁆𑀧𑀬𑀼𑀢𑁆𑀢𑀓𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺 𑀢𑀁 𑀢𑀢𑁆𑀣 𑀦 𑀓𑀢𑀁, 𑀇𑀥 𑀘 𑀤𑀼𑀢𑀺𑀬𑁂𑀦 𑀳𑁂𑀢𑀼𑀕𑁆𑀕𑀳𑀡𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀦𑀸 𑀧𑀘𑁆𑀘𑀬𑀪𑀽𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀽𑀦𑀁 𑀅𑀜𑁆𑀜𑁂𑀲𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀼𑀦 𑀯𑀺𑀲𑁂𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀜𑁆𑀳𑀸𑀯𑀸𑀭𑁂 ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁪𑁦𑁧) 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 ¶ 𑀅𑀧𑀸𑀓𑀝𑀢𑁆𑀢𑀸𑀢𑀺 𑀢𑀁-𑀲𑀤𑁆𑀤𑁄 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑁄 𑀯𑀼𑀢𑁆𑀢𑀲𑁆𑀲𑁂𑀯 𑀦𑀺𑀤𑁆𑀤𑁂𑀲𑁄 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁨) 𑀧𑀼𑀭𑀺𑀫𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂 𑀧𑀸𑀓𑀝𑀻𑀪𑀽𑀢𑁂 𑀏𑀯 𑀧𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀲𑀤𑁆𑀤𑁄 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀩𑁆𑀬𑀸𑀯𑀝𑁄 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦 𑀯𑀺𑀬 𑀢𑀁-𑀲𑀤𑁆𑀤𑁂𑀦𑀧𑀺 𑀅𑀦𑀧𑁂𑀓𑁆𑀔𑀦𑀻𑀬𑁄 𑀅𑀜𑁆𑀜𑁄 𑀘 𑀓𑁄𑀘𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀓𑁄 𑀯𑀼𑀢𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑁂𑀦 𑀅𑀲𑀫𑀢𑁆𑀢𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀦𑁆𑀢𑀭𑀸𑀧𑁂𑀓𑁆𑀔𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀧𑀸𑀓𑀝𑀻𑀓𑀢𑀁, 𑀢𑁂𑀦 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀢𑀁𑀕𑀳𑀡𑀁 𑀓𑀢𑀦𑁆𑀢𑀺. 𑀓𑀺𑀁 𑀧𑀦 𑀢𑀲𑁆𑀫𑀺𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑀤𑁆𑀤𑁂 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀧𑀸𑀓𑀝𑀻𑀪𑀽𑀢𑀦𑁆𑀢𑀺? 𑀬𑁂𑀳𑀺 𑀳𑁂𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸’’𑀢𑀺 𑀯𑀼𑀢𑁆𑀢𑀸, 𑀢𑁂 𑀳𑁂𑀢𑀽 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀯𑀺𑀲𑁂𑀲𑀦𑀪𑀽𑀢𑀸 𑀢𑀩𑁆𑀩𑀺𑀲𑁂𑀲𑀺𑀢𑀸 𑀘 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸. 𑀢𑁂𑀦𑀸𑀳 ‘‘𑀢𑁂 𑀳𑁂𑀢𑀽 𑀘𑁂𑀯𑀸’’𑀢𑀺𑀆𑀤𑀺. 𑀅𑀜𑁆𑀜𑀣𑀸 ‘‘𑀢𑁂 𑀳𑁂𑀢𑀽 𑀘𑁂𑀯𑀸’’𑀢𑀺 𑀏𑀢𑀲𑁆𑀲 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁂 𑀲𑀢𑀺 𑀬𑀣𑀸 𑀇𑀥 𑀢𑁂𑀦𑁂𑀯 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀧𑀸𑀓𑀝𑀸, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺 ‘‘𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 ‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’𑀦𑁆𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀤𑀼𑀯𑀺𑀥𑀫𑁆𑀧𑀺 𑀯𑀸 𑀳𑁂𑀢𑀼𑀕𑁆𑀕𑀳𑀡𑀁 𑀅𑀧𑀦𑁂𑀢𑁆𑀯𑀸 𑀢𑀁𑀲𑀤𑁆𑀤𑀯𑀘𑀦𑀻𑀬𑀢𑀁 𑀘𑁄𑀤𑁂𑀢𑀺 𑀧𑀭𑀺𑀳𑀭𑀢𑀺 𑀘. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀘 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀬𑀼𑀢𑁆𑀢𑀁. 𑀳𑁂𑀢𑀽 𑀳𑀺 𑀧𑀘𑁆𑀘𑀬𑀸𑀢𑀺.

𑀘𑀺𑀢𑁆𑀢𑀚𑀭𑀽𑀧𑀁 𑀅𑀚𑀦𑀬𑀫𑀸𑀦𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀚𑀦𑀬𑀫𑀸𑀦𑀸𑀧𑀺. 𑀬𑀤𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀅𑀕𑁆𑀕𑀳𑀡𑀢𑁄 𑀢𑀁 𑀦 𑀯𑀼𑀢𑁆𑀢𑀁, 𑀲𑀳𑀚𑀸𑀢𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀬𑀤𑀺 𑀘 𑀢𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀸𑀦𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁄 𑀦𑀺𑀤𑀲𑁆𑀲𑀺𑀢𑁄, 𑀏𑀯𑀫𑀺𑀥𑀸𑀧𑀺 𑀪𑀯𑀺𑀢𑀩𑁆𑀩𑀁. ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀧𑀦 𑀅𑀯𑀢𑁆𑀯𑀸 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 ¶ 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀫𑀼𑀝𑁆𑀞𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁𑀧𑀓𑀸𑀭𑁂𑀦 𑀳𑀺 𑀢𑀁𑀲𑀫𑀼𑀝𑁆𑀞𑀸𑀦𑀯𑀘𑀦𑁂𑀦 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀯𑀘𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀦𑀦𑀼 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸𑀢𑀺? 𑀦 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀏𑀯 𑀳𑀺 𑀢𑀢𑁆𑀣 𑀯𑀼𑀢𑁆𑀢𑁄𑀢𑀺.

𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ¶ 𑀏𑀢𑁂𑀦𑁂𑀯 𑀳𑁂𑀢𑀼𑀆𑀤𑀺𑀧𑀝𑀺𑀩𑀤𑁆𑀥𑀢𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺, 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺, 𑀬𑀜𑁆𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀼𑀴𑁆𑀳𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁩𑁯) 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂’’𑀢𑀺𑀆𑀤𑀺.

𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑀸𑀬 𑀧𑀣𑀯𑀺𑀬𑀸 𑀩𑀻𑀚𑀧𑀢𑀺𑀝𑁆𑀞𑀸𑀦𑀁 𑀯𑀺𑀬 𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑁂 𑀓𑀫𑁆𑀫𑁂 𑀢𑀦𑁆𑀦𑀺𑀩𑁆𑀩𑀢𑁆𑀢𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀩𑀻𑀚𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚’’𑀦𑁆𑀢𑀺. 𑀓𑀲𑁆𑀲 𑀧𑀦 𑀢𑀁 𑀔𑁂𑀢𑁆𑀢𑀁 𑀩𑀻𑀚𑀜𑁆𑀘𑀸𑀢𑀺? 𑀦𑀸𑀫𑀭𑀽𑀧𑀗𑁆𑀓𑀼𑀭𑀲𑁆𑀲.

𑀅𑀬𑀜𑁆𑀘 𑀧𑀦𑀢𑁆𑀣𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸. 𑀑𑀓𑀸𑀲𑀯𑀲𑁂𑀦𑁂𑀯𑀸𑀢𑀺 𑀦𑀸𑀫𑀭𑀽𑀧𑁄𑀓𑀸𑀲𑀯𑀲𑁂𑀦𑁂𑀯. 𑀲𑁄 𑀳𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀑𑀓𑀸𑀲𑁄𑀢𑀺. 𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀻𑀢𑀺 𑀯𑀤𑀦𑁆𑀢𑁄 𑀯𑀢𑁆𑀣𑀼𑀭𑀽𑀧𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀸𑀦𑀁 𑀲𑁂𑀲𑀭𑀽𑀧𑀸𑀦𑀫𑁆𑀧𑀺 𑀢𑀤𑀼𑀧𑀢𑁆𑀣𑀫𑁆𑀪𑀓𑀪𑀸𑀯𑁂𑀦𑁂𑀯 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑀳𑀪𑀯𑀦𑀫𑀢𑁆𑀢𑀁 𑀯𑀸. 𑀢𑀢𑁆𑀣 𑀓𑀸𑀬𑀪𑀸𑀯𑀸𑀤𑀺𑀓𑀮𑀸𑀧𑀸𑀦𑀁 𑀓𑀢𑁆𑀣𑀘𑀺 𑀅𑀪𑀸𑀯𑀢𑁄 𑀓𑀢𑁆𑀣𑀘𑀺 𑀅𑀪𑀸𑀯𑀸𑀪𑀸𑀯𑀢𑁄 ‘‘𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀺 𑀯𑀺𑀦𑀸’’𑀢𑀺 𑀆𑀳. 𑀲𑀲𑁆𑀲𑀸𑀫𑀺𑀓𑁂𑀢𑀺 𑀏𑀢𑀲𑁆𑀲𑁂𑀯 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀭𑀸𑀚𑀓𑁂’’𑀢𑀺 𑀯𑀼𑀢𑁆𑀢𑀁.

𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀩𑀸𑀳𑀦𑀢𑁄𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑀧𑁆𑀧𑀲𑀗𑁆𑀕𑁄𑀬𑁂𑀯 𑀦𑀢𑁆𑀣𑀺 ‘‘𑀳𑁂𑀢𑀽 𑀲𑀳𑀚𑀸𑀢𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧) 𑀯𑀘𑀦𑀢𑁄. 𑀦 𑀳𑀺 𑀬𑁂𑀲𑀁 𑀳𑁂𑀢𑀽 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺, 𑀢𑀸𑀦𑀺 𑀳𑁂𑀢𑀼𑀲𑀳𑀚𑀸𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀬𑀤𑀺 𑀲𑀺𑀬𑀼𑀁, ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀘 𑀮𑀩𑁆𑀪𑁂𑀬𑁆𑀬, 𑀦 𑀧𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀦 𑀢𑀸𑀦𑀺 𑀳𑁂𑀢𑀼𑀲𑀳𑀚𑀸𑀢𑀸𑀦𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑁄 𑀧𑀦 𑀳𑁂𑀢𑀽𑀳𑀺 𑀲𑀫𑀸𑀦𑀓𑀸𑀮𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀳𑁂𑀢𑀼𑀲𑀳𑀚𑀸𑀢𑀪𑀸𑀯𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲𑀸𑀬𑀁 𑀧𑀲𑀗𑁆𑀕𑁄 𑀅𑀢𑁆𑀣𑀻𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀕𑀯𑀸 𑀧𑀦 𑀯𑀘𑀦𑀸𑀦𑀁 𑀮𑀳𑀼𑀕𑀭𑀼𑀪𑀸𑀯𑀁 𑀦 𑀕𑀡𑁂𑀢𑀺, 𑀩𑁄𑀥𑀦𑁂𑀬𑁆𑀬𑀸𑀦𑀁 𑀧𑀦 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀢𑁄 𑀥𑀫𑁆𑀫𑀲𑀪𑀸𑀯𑀁 ¶ 𑀅𑀯𑀺𑀮𑁄𑀫𑁂𑀦𑁆𑀢𑁄 𑀢𑀣𑀸 𑀢𑀣𑀸 𑀤𑁂𑀲𑀦𑀁 𑀦𑀺𑀬𑀸𑀫𑁂𑀢𑀻𑀢𑀺 𑀦 𑀓𑀢𑁆𑀣𑀘𑀺 𑀅𑀓𑁆𑀔𑀭𑀸𑀦𑀁 𑀩𑀳𑀼𑀢𑀸 𑀯𑀸 𑀅𑀧𑁆𑀧𑀢𑀸 𑀯𑀸 𑀘𑁄𑀤𑁂𑀢𑀩𑁆𑀩𑀸𑀢𑀺.

𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨. 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀬𑁂𑀯𑀸𑀢𑀺 ¶ 𑀏𑀢𑁂𑀦 𑀯𑀢𑁆𑀢𑀫𑀸𑀦𑀓𑁆𑀔𑀡𑁂𑀓𑀤𑁂𑀲𑁂𑀦 𑀲𑀩𑁆𑀩𑀁 𑀯𑀢𑁆𑀢𑀫𑀸𑀦𑀓𑁆𑀔𑀡𑀁 𑀕𑀬𑁆𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀬𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀅𑀣 𑀔𑁄 𑀲𑀩𑁆𑀩𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀓𑁆𑀔𑀡𑁂𑀢𑀺. 𑀢𑁂𑀦 𑀆𑀮𑀫𑁆𑀩𑀺𑀬𑀫𑀸𑀦𑀸𑀦𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀢𑁆𑀢𑀫𑀸𑀦𑀢𑀸𑀬 𑀧𑀼𑀭𑁂 𑀧𑀘𑁆𑀙𑀸 𑀘 𑀯𑀺𑀚𑁆𑀚𑀫𑀸𑀦𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀦𑀸𑀮𑀫𑁆𑀩𑀺𑀬𑀫𑀸𑀦𑀸𑀦𑀁. 𑀦 𑀏𑀓𑀢𑁄 𑀳𑁄𑀦𑁆𑀢𑀻𑀢𑀺 𑀦𑀻𑀮𑀸𑀤𑀻𑀦𑀺 𑀲𑀩𑁆𑀩𑀭𑀽𑀧𑀸𑀦𑀺 𑀲𑀳 𑀦 𑀳𑁄𑀦𑁆𑀢𑀺, 𑀢𑀣𑀸 𑀲𑀤𑁆𑀤𑀸𑀤𑀬𑁄𑀧𑀻𑀢𑀺 𑀅𑀢𑁆𑀣𑁄. ‘‘𑀬𑀁 𑀬’’𑀦𑁆𑀢𑀺 𑀳𑀺 𑀯𑀘𑀦𑀁 𑀭𑀽𑀧𑀸𑀤𑀻𑀦𑀺 𑀪𑀺𑀦𑁆𑀤𑀢𑀻𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦𑀢𑁆𑀣𑁂𑀦 ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀮𑀓𑁆𑀔𑀡𑀤𑀻𑀧𑀦𑀢𑁆𑀣𑀁 ‘‘𑀬𑀁 𑀬𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 ‘‘𑀬𑀁 𑀬’’𑀦𑁆𑀢𑀺 𑀯𑀘𑀦𑁂𑀦 𑀭𑀽𑀧𑀸𑀤𑀺𑀪𑁂𑀤𑀤𑀻𑀧𑀦𑀢𑁆𑀣𑀦𑁆𑀢𑀺. ‘‘𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪𑀸’’𑀢𑀺 𑀏𑀢𑀲𑁆𑀲 𑀯𑀡𑁆𑀡𑀦𑀸𑀬𑀁 𑀤𑀲𑁆𑀲𑀺𑀢𑀲𑀩𑁆𑀩𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀯𑀸 𑀇𑀥𑀸𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸 𑀦𑀤𑀻𑀧𑀩𑁆𑀩𑀢𑀸𑀦𑀁 𑀲𑀦𑁆𑀤𑀦𑀁 𑀞𑀸𑀦𑀜𑁆𑀘 𑀧𑀯𑀢𑁆𑀢𑀁 𑀅𑀯𑀺𑀭𑀢𑀁 𑀅𑀯𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀼𑀢𑁆𑀢𑀁, 𑀏𑀯𑀁 ‘‘𑀬𑁂 𑀬𑁂 𑀥𑀫𑁆𑀫𑀸’’𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀲𑀗𑁆𑀕𑀳𑀲𑀫𑀼𑀤𑀸𑀬𑀯𑀲𑁂𑀦 𑀕𑀳𑀺𑀢𑀢𑁆𑀢𑀸 𑀢𑁂𑀲𑀁 𑀉𑀧𑁆𑀧𑀚𑁆𑀚𑀦𑀁 𑀧𑀯𑀢𑁆𑀢𑀦𑀁 𑀅𑀯𑀺𑀭𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑁂 𑀧𑀦 𑀦 𑀳𑁂𑀢𑀸𑀤𑀺𑀧𑀘𑁆𑀘𑀬𑀸 𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀳𑁄𑀦𑁆𑀢𑀺. 𑀦 𑀳𑀺 𑀅𑀢𑀻𑀢𑁄 𑀘 𑀅𑀦𑀸𑀕𑀢𑁄 𑀘 𑀅𑀢𑁆𑀣𑀺, 𑀬𑀲𑁆𑀲𑁂𑀢𑁂 𑀧𑀘𑁆𑀘𑀬𑀸 𑀲𑀺𑀬𑀼𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑀻𑀢𑀢𑁆𑀢𑀺𑀓𑁂 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀦 𑀓𑁄𑀘𑀺 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀬𑁂𑀲𑀁 𑀭𑀽𑀧𑀸𑀤𑀬𑁄 𑀆𑀭𑀫𑁆𑀫𑀡𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀲𑀼 𑀳𑀺 𑀤𑀲𑁆𑀲𑀺𑀢𑁂𑀲𑀼 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀢𑀁𑀢𑀁𑀧𑀘𑁆𑀘𑀬𑀸 𑀅𑀳𑁂𑀲𑀼𑀁 𑀪𑀯𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀦 𑀧𑀦 𑀢𑀁𑀢𑀁𑀧𑀘𑁆𑀘𑀬𑀯𑀦𑁆𑀢𑀢𑀸. 𑀧𑀘𑁆𑀘𑀬𑀯𑀦𑁆𑀢𑁄 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬𑁂𑀯𑀸𑀢𑀺.

𑀏𑀢𑁆𑀣 ¶ 𑀘 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑀁 𑀓𑀢𑁆𑀯𑀸 𑀧𑀼𑀦 ‘‘𑀢𑁂 𑀢𑁂 𑀥𑀫𑁆𑀫𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 ‘‘𑀬𑀁 𑀬’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀥𑀫𑁆𑀫𑀲𑁆𑀲 𑀅𑀦𑁂𑀓𑀪𑀸𑀯𑁄𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀳𑀺 𑀔𑀦𑁆𑀥𑀸 𑀲𑀳𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀢𑁂𑀲𑀼 𑀏𑀓𑁂𑀓𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸𑀤𑀻𑀲𑀼 𑀨𑀲𑁆𑀲𑀸𑀤𑀻𑀲𑀼 𑀘 𑀏𑀓𑁂𑀓𑀲𑁆𑀲𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑁂𑀲𑀁 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀁 ¶ 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑁂 𑀢𑁂’’𑀢𑀺. 𑀢𑀢𑁆𑀣 𑀬𑁄 𑀘 𑀭𑀽𑀧𑀸𑀤𑀺𑀓𑁄 𑀏𑀓𑁂𑀓𑁄𑀯 𑀬𑀁𑀬𑀁-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀬𑁂 𑀘 𑀅𑀦𑁂𑀓𑁂 𑀨𑀲𑁆𑀲𑀸𑀤𑀬𑁄 𑀏𑀓𑁂𑀓𑀯𑀲𑁂𑀦 𑀬𑀁𑀬𑀁-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸 ‘‘𑀢𑁂 𑀢𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀦𑀻𑀮𑀸𑀤𑀻𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘 𑀏𑀓𑁂𑀓𑀫𑁂𑀯 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂 𑀧𑀦 𑀆𑀮𑀫𑁆𑀩𑀺𑀬𑀫𑀸𑀦𑀸 𑀭𑀽𑀧𑀸𑀭𑀫𑁆𑀫𑀡𑀥𑀫𑁆𑀫𑀸 𑀘 𑀅𑀦𑁂𑀓𑁂, 𑀢𑀣𑀸 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀥𑀫𑁆𑀫𑀸 𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑁂 𑀢𑁂’’𑀢𑀺.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀤𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀔𑀦𑁆𑀥𑀧𑀝𑀺𑀩𑀤𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀺𑀩𑁆𑀩𑀸𑀦𑀫𑁆𑀧𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 𑀬𑀣𑀸 ‘‘𑀅𑀧𑁆𑀧𑀫𑀸𑀡𑀸 𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁫𑁮) 𑀯𑀼𑀢𑁆𑀢𑀁, 𑀏𑀯𑀁 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀁 𑀯𑀼𑀢𑁆𑀢𑀁. 𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑀁 𑀅𑀲𑀗𑁆𑀔𑀢𑀢𑁆𑀢𑀸, 𑀦 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑁂𑀲𑀼 𑀅𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑁂𑀲𑀼 𑀜𑀸𑀢𑁂𑀲𑀼 𑀦𑀺𑀩𑁆𑀩𑀸𑀦𑀚𑀸𑀦𑀦𑁂 𑀦 𑀢𑁂𑀦 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀬𑀣𑀸 𑀳𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀘𑀺𑀢𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀘𑀺𑀢𑁆𑀢𑀸𑀭𑀫𑁆𑀫𑀡𑀚𑀸𑀦𑀦𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀅𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑁂 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀢𑀤𑀸𑀭𑀫𑁆𑀫𑀡𑀚𑀸𑀦𑀦𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀤𑀺𑀝𑁆𑀞𑀦𑀺𑀩𑁆𑀩𑀸𑀦𑁄𑀬𑁂𑀯 𑀘 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑁂 𑀅𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑁂 𑀅𑀦𑀼𑀲𑁆𑀲𑀭𑀢𑀺, 𑀢𑁂𑀦 𑀬𑀣𑀸𑀤𑀺𑀝𑁆𑀞𑀫𑁂𑀯 𑀦𑀺𑀩𑁆𑀩𑀸𑀦𑀁 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀆𑀭𑀫𑁆𑀫𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀢𑀤𑀸𑀭𑀫𑁆𑀫𑀡𑀯𑀺𑀪𑀸𑀯𑀦𑀁 𑀓𑀸𑀢𑀩𑁆𑀩𑀁. 𑀯𑀺𑀪𑀽𑀢𑀫𑁂𑀯 𑀳𑀺 𑀢𑀁 𑀢𑀲𑁆𑀲𑀸𑀢𑀺. 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑁂𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀦 𑀓𑀲𑁆𑀲𑀘𑀺 𑀭𑀽𑀧𑀸𑀯𑀘𑀭𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 ‘‘𑀘𑀢𑀼𑀦𑁆𑀦𑀁 𑀭𑀸𑀲𑀻𑀦’’𑀦𑁆𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁.

𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩. 𑀥𑀼𑀭𑀦𑁆𑀢𑀺 ¶ ¶ 𑀥𑀼𑀭𑀕𑁆𑀕𑀸𑀳𑀁. 𑀚𑁂𑀝𑁆𑀞𑀓𑀦𑁆𑀢𑀺 𑀲𑁂𑀝𑁆𑀞𑀁. 𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀙𑀦𑁆𑀤𑀲𑁆𑀲 𑀲𑀫𑀸𑀦𑀭𑀽𑀧𑁂𑀦 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑁂𑀦 𑀢𑀁𑀲𑀫𑁆𑀩𑀦𑁆𑀥𑁂𑀦 𑀙𑀦𑁆𑀤𑀲𑀤𑁆𑀤𑁂𑀦𑁂𑀯 𑀧𑀘𑁆𑀘𑀬𑀪𑀽𑀢𑀲𑁆𑀲 𑀙𑀦𑁆𑀤𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀓𑀯𑀺𑀲𑁂𑀲𑀦𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺.

𑀕𑀭𑀼𑀓𑀸𑀭𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀯𑀸𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀮𑀤𑁆𑀥𑀁 𑀮𑀤𑁆𑀥𑀩𑁆𑀩𑀁, 𑀮𑀤𑁆𑀥𑀁 𑀅𑀯𑀺𑀚𑀳𑀺𑀢𑀩𑁆𑀩𑀁. 𑀬𑁂𑀦 𑀯𑀸 𑀯𑀺𑀦𑀸 𑀦 𑀪𑀯𑀺𑀢𑀩𑁆𑀩𑀁, 𑀢𑀁 𑀮𑀤𑁆𑀥𑀩𑁆𑀩𑀁, 𑀢𑀲𑁆𑀲𑁂𑀯𑀢𑁆𑀣𑁄 𑀅𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺. 𑀅𑀦𑀯𑀜𑁆𑀜𑀸𑀢𑀦𑁆𑀢𑀺 𑀅𑀯𑀜𑁆𑀜𑀸𑀢𑀫𑁆𑀧𑀺 𑀅𑀤𑁄𑀲𑀤𑀲𑁆𑀲𑀺𑀢𑀸𑀬 𑀅𑀲𑁆𑀲𑀸𑀤𑀦𑁂𑀦 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸.

𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀅𑀧𑁆𑀧𑀦𑀸𑀲𑀤𑀺𑀲𑀸 𑀫𑀳𑀸𑀩𑀮𑀸 𑀯𑀺𑀦𑀸 𑀅𑀥𑀺𑀧𑀢𑀺𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ‘‘𑀏𑀓𑀦𑁆𑀢𑁂𑀦𑁂𑀯𑀸’’𑀢𑀺 𑀆𑀳. 𑀓𑀫𑁆𑀫𑀓𑀺𑀮𑁂𑀲𑀸𑀯𑀭𑀡𑀪𑀽𑀢𑀸 𑀘 𑀢𑁂 𑀲𑀕𑁆𑀕𑀸𑀯𑀭𑀡𑀸 𑀘 𑀫𑀕𑁆𑀕𑀸𑀯𑀭𑀡𑀸 𑀘 𑀧𑀘𑁆𑀘𑀓𑁆𑀔𑀲𑀕𑁆𑀕𑀸𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀅𑀭𑀳𑀦𑁆𑀢𑀺, 𑀓𑁄 𑀧𑀦 𑀯𑀸𑀤𑁄 𑀭𑀽𑀧𑀸𑀭𑀽𑀧𑀻𑀦𑀦𑁆𑀢𑀺.

𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀧𑀦 𑀢𑀺𑀯𑀺𑀥𑁄 𑀓𑀺𑀭𑀺𑀬𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀤𑀁 𑀧𑀭𑀲𑀦𑁆𑀢𑀸𑀦𑀕𑀢𑀸𑀦𑀁 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑀲𑁆𑀲 𑀅𑀪𑀸𑀯𑀢𑁄 ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀲𑁆𑀲𑀸’’𑀢𑀺 𑀏𑀢𑁆𑀣 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄 𑀅𑀦𑀼𑀤𑁆𑀥𑀝𑀢𑁆𑀢𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁂𑀧𑀺 ‘‘𑀩𑀳𑀺𑀤𑁆𑀥𑀸 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀁 (𑀧𑀝𑁆𑀞𑀸. 𑁨.𑁨𑁦.𑁩𑁧) 𑀦𑀺𑀲𑁆𑀲𑀸𑀬 𑀅𑀭𑀳𑀢𑁄 𑀓𑀺𑀭𑀺𑀬𑀥𑀫𑁆𑀫𑀸 𑀧𑀼𑀣𑀼𑀚𑁆𑀚𑀦𑀸𑀤𑀻𑀳𑀺 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀺𑀬𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀔𑀦𑁆𑀥𑀸’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁨.𑁨𑁨.𑁩𑁦) 𑀯𑀺𑀬 𑀔𑀦𑁆𑀥𑀲𑀤𑁆𑀤𑁄 𑀭𑀽𑀧𑁂 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀯𑀺𑀘𑀸𑀭𑀺𑀢𑀫𑁂𑀢𑀁. 𑀧𑀼𑀣𑀼𑀚𑁆𑀚𑀦𑀸𑀤𑀺𑀓𑀸𑀮𑁂 𑀯𑀸 𑀅𑀦𑀸𑀕𑀢𑁂 𑀓𑀺𑀭𑀺𑀬𑀥𑀫𑁆𑀫𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁩.𑁯𑁬) 𑀓𑀺𑀭𑀺𑀬𑀥𑀫𑁆𑀫𑀸 𑀭𑀸𑀕𑀤𑀺𑀝𑁆𑀞𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑁂𑀯, 𑀢𑁂 𑀘 ‘‘𑀅𑀢𑀻𑀢𑀸𑀭𑀫𑁆𑀫𑀡𑁂 𑀅𑀦𑀸𑀕𑀢𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 ¶ (𑀧𑀝𑁆𑀞𑀸. 𑁨.𑁧𑁯.𑁨𑁩) 𑀅𑀦𑀸𑀕𑀢𑀸 𑀢𑁂𑀪𑀽𑀫𑀓𑀸𑀧𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺. 𑀆𑀯𑀚𑁆𑀚𑀦𑀓𑀺𑀭𑀺𑀬𑀲𑀩𑁆𑀪𑀸𑀯𑀢𑁄 𑀧𑀦 𑀇𑀤𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪. 𑀬𑀣𑀸 ¶ 𑀑𑀓𑀸𑀲𑀤𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀦𑀢𑁆𑀣𑀺𑀯𑀺𑀕𑀢𑀸 𑀯𑀼𑀢𑁆𑀢𑀸, 𑀦 𑀏𑀯𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸, 𑀏𑀢𑁂 𑀧𑀦 𑀘𑀺𑀢𑁆𑀢𑀦𑀺𑀬𑀸𑀫𑀳𑁂𑀢𑀼𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀘𑀺𑀢𑁆𑀢𑀦𑀺𑀬𑀸𑀫𑀳𑁂𑀢𑀼𑀯𑀺𑀲𑁂𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀥𑀸𑀢𑀼𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘 𑀦𑀺𑀤𑁆𑀤𑁂𑀲𑀫𑀸𑀳. 𑀢𑀢𑁆𑀣 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑁄 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀥𑀸𑀢𑀼𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀯𑀺𑀲𑁂𑀲𑁂 𑀤𑀲𑁆𑀲𑀦𑀁 𑀬𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀢𑀁 𑀯𑁄𑀘𑁆𑀙𑀺𑀚𑁆𑀚𑁂𑀬𑁆𑀬. ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼𑀬𑀸’’𑀢𑀺 𑀇𑀤𑀫𑁆𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀦𑀺𑀬𑀸𑀫𑀸𑀪𑀸𑀯𑀢𑁄, ‘‘𑀫𑀦𑁄𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀘 𑀢𑀣𑁂𑀯 𑀦 𑀲𑀓𑁆𑀓𑀸. 𑀦 𑀳𑀺 𑀫𑀦𑁄𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀬𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀦𑀺𑀬𑀸𑀫𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀸𑀓𑀝𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀥𑀸𑀢𑀼𑀯𑀺𑀲𑁂𑀲𑀦𑀺𑀬𑀸𑀫𑁄 𑀅𑀢𑁆𑀣𑀺, 𑀢𑀸𑀯 𑀦𑀺𑀤𑀲𑁆𑀲𑀦𑁂𑀦 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸’’𑀢𑀺𑀆𑀤𑀺𑀫𑀸𑀳. 𑀲𑀤𑀺𑀲𑀓𑀼𑀲𑀮𑀸𑀦𑀦𑁆𑀢𑀺 𑀯𑁂𑀤𑀦𑀸𑀬 𑀯𑀸 𑀳𑁂𑀢𑀽𑀳𑀺 𑀯𑀸 𑀲𑀤𑀺𑀲𑀓𑀼𑀲𑀮𑀸𑀦𑀁 𑀅𑀦𑀼𑀭𑀽𑀧𑀓𑀼𑀲𑀮𑀸𑀦𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦 𑀪𑀽𑀫𑀺𑀪𑀺𑀦𑁆𑀦𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀪𑀯𑀗𑁆𑀕𑀕𑁆𑀕𑀳𑀡𑁂𑀦 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀓𑁂𑀲𑀼 𑀘𑀼𑀢𑀺𑀧𑀺 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀩𑁆𑀬𑀸𑀓𑀢𑀫𑀽𑀮𑀓𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀬 𑀆𑀯𑀚𑁆𑀚𑀦𑀲𑁆𑀲𑀸𑀢𑀺 𑀆𑀯𑀚𑁆𑀚𑀦𑀕𑁆𑀕𑀳𑀡𑁂𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀭𑀸𑀲𑀺𑀲𑁆𑀲 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀳𑁄𑀦𑁆𑀢𑁄 𑀘 𑀆𑀯𑀚𑁆𑀚𑀦𑀲𑁆𑀲𑁂𑀯𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀯𑀚𑁆𑀚𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬. ‘‘𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 ¶ 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑁄𑀭𑀸𑀡𑀧𑀸𑀞𑁄. 𑀧𑀸𑀴𑀺𑀬𑀁 𑀧𑀦 ‘‘𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 ¶ , 𑀦 𑀅𑀯𑀼𑀢𑁆𑀢𑀲𑁆𑀲 ‘‘𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺 𑀇𑀫𑀲𑁆𑀲, 𑀦 𑀘 𑀲𑀫𑀸𑀦𑀢𑁆𑀣𑀲𑁆𑀲𑀧𑀺 𑀲𑀤𑁆𑀤𑀦𑁆𑀢𑀭𑀲𑁆𑀲 𑀅𑀢𑁆𑀣𑁂 𑀯𑀼𑀢𑁆𑀢𑁂 𑀲𑀤𑁆𑀤𑀦𑁆𑀢𑀭𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀞𑀦𑁆𑀢𑀺. 𑀑𑀓𑁆𑀓𑀦𑁆𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺𑀬𑁂𑀯 𑀯𑀼𑀘𑁆𑀘𑀢𑀺, 𑀦 𑀇𑀢𑀭𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂’’𑀢𑀺. 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀇𑀤𑀁 𑀬𑀤𑀺𑀧𑀺 𑀧𑀼𑀩𑁆𑀩𑁂 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀦 𑀢𑁂𑀦 𑀔𑀡𑀦𑁆𑀢𑀭𑁂 𑀧𑀘𑁆𑀘𑀬𑀪𑀸𑀯𑁄 𑀭𑀽𑀧𑀻𑀦𑀁 𑀦𑀺𑀯𑀸𑀭𑀺𑀢𑁄𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀜𑁆𑀘𑀺 𑀓𑀸𑀮𑁂𑀢𑀺 𑀓𑁂𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀓𑁂𑀘𑀺 𑀯𑀢𑁆𑀣𑀼𑀪𑀽𑀢𑀸 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀢𑀺 𑀭𑀽𑀧𑀦𑁆𑀢𑀭𑀸𑀦𑀁 𑀯𑀢𑁆𑀣𑀼𑀲𑁆𑀲 𑀘 𑀓𑀸𑀮𑀦𑁆𑀢𑀭𑁂 𑀅𑀭𑀽𑀧𑀻𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀁 𑀧𑀼𑀩𑁆𑀩𑁂 𑀅𑀦𑀺𑀯𑀸𑀭𑀺𑀢𑀁 𑀦𑀺𑀯𑀸𑀭𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀜𑁆𑀘𑀺 𑀓𑀸𑀮’’𑀦𑁆𑀢𑀺 𑀯𑀸 ‘‘𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀢𑁂𑀦 𑀳𑀺 ‘‘𑀓𑀜𑁆𑀘𑀻’’𑀢𑀺 𑀉𑀧𑀬𑁄𑀕𑁂𑀓𑀯𑀘𑀦𑀁 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁂𑀦 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀲𑁆𑀲 𑀆𑀤𑁂𑀲𑁄, ‘‘𑀓𑀸𑀮𑁂’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦 𑀪𑀼𑀫𑁆𑀫𑁂𑀓𑀯𑀘𑀦𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀼𑀭𑀺𑀫𑁂𑀦 𑀘 ‘‘𑀏𑀓𑁄 𑀔𑀦𑁆𑀥𑁄 𑀯𑀢𑁆𑀣𑀼 𑀘 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀸𑀫𑀲𑀳𑀺𑀢𑀲𑁆𑀲𑁂𑀯 𑀯𑀢𑁆𑀣𑀼𑀲𑁆𑀲 ‘‘𑀦𑀸𑀫𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑁂 𑀆𑀧𑀦𑁆𑀦𑁂 𑀏𑀢𑁂𑀦 𑀓𑁂𑀯𑀮𑀲𑁆𑀲𑁂𑀯 𑀢𑀣𑀸 𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺.

𑀢𑀬𑁄 𑀦 𑀅𑀜𑁆𑀜𑀫𑀜𑁆𑀜𑀯𑀲𑁂𑀦𑀸𑀢𑀺 𑀮𑀩𑁆𑀪𑀫𑀸𑀦𑁂𑀧𑀺 𑀓𑀢𑁆𑀣𑀘𑀺 𑀅𑀜𑁆𑀜𑀫𑀜𑁆𑀜𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁂 𑀯𑀘𑀦𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀲𑁆𑀲 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀭𑀽𑀧𑀲𑁆𑀲 𑀏𑀓𑀤𑁂𑀲𑀪𑀽𑀢𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀲𑀫𑀼𑀤𑀸𑀬𑁂𑀓𑀤𑁂𑀲𑀯𑀲𑁂𑀦 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀦𑀺𑀤𑁆𑀥𑀸𑀭𑀡𑁂 𑀯𑀸.

𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮. 𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀇𑀤𑀁 𑀦 𑀮𑀩𑁆𑀪𑀢𑀺. 𑀬𑀁 𑀧𑀦𑁂𑀢𑁆𑀣 𑀮𑀩𑁆𑀪𑀢𑀺 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀓𑁂𑀘𑀻’’𑀢𑀺, 𑀢𑀢𑁆𑀣 ¶ 𑀢𑁂 𑀏𑀯 𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. ‘‘𑀯𑀢𑁆𑀣𑀼𑀭𑀽𑀧𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀆𑀭𑀼𑀧𑁆𑀧𑀯𑀺𑀧𑀸𑀓’’𑀦𑁆𑀢𑀺 ¶ 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, ‘‘𑀢𑁂𑀪𑀽𑀫𑀓𑀯𑀺𑀧𑀸𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀦𑀼𑀧𑁆𑀧𑀚𑁆𑀚𑀦𑀓𑀁 𑀞𑀧𑁂𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑀲𑁆𑀲 𑀢𑀲𑁆𑀲 𑀧𑀓𑀸𑀲𑁂𑀢𑀩𑁆𑀩𑀢𑁆𑀢𑀸.

𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯. 𑀢𑁂 𑀢𑀬𑁄𑀧𑀺 𑀭𑀸𑀲𑀬𑁄𑀢𑀺 𑀉𑀧𑀦𑀺𑀲𑁆𑀲𑀬𑁂 𑀢𑀬𑁄 𑀅𑀦𑁂𑀓𑀲𑀗𑁆𑀕𑀸𑀳𑀓𑀢𑀸𑀬 𑀭𑀸𑀲𑀬𑁄𑀢𑀺 𑀯𑀤𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀉𑀧𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑁂 𑀬𑁂 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑁂𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑁂𑀲𑀜𑁆𑀘𑀺 𑀓𑀤𑀸𑀘𑀺, 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀲𑀗𑁆𑀕𑀳𑀺𑀢𑁄, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑁂 𑀧𑀦 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀦 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑁂𑀦 𑀳𑁄𑀦𑁆𑀢𑀺, 𑀬𑁂𑀲𑀁 𑀉𑀧𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀓𑀸 𑀧𑀘𑁆𑀘𑀬𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂𑀲𑀁 𑀦 𑀳𑁄𑀦𑁆𑀢𑀺, 𑀇𑀢𑀭𑁂𑀲𑀁 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀦 𑀮𑀩𑁆𑀪𑀢𑀺, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁. 𑀲𑀺𑀤𑁆𑀥𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀬𑁂𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀅𑀓𑀼𑀲𑀮𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀓𑁂𑀲𑀜𑁆𑀘𑀻𑀢𑀺 𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄, 𑀦 𑀧𑀦 𑀅𑀯𑀺𑀲𑁂𑀲𑁂𑀦 𑀅𑀓𑀼𑀲𑀮𑀸𑀤𑀻𑀲𑀼 𑀓𑁂𑀲𑀜𑁆𑀘𑀻𑀢𑀺.

𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀅𑀩𑁆𑀬𑀸𑀓𑀢𑀸𑀦𑀁 𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀭𑀽𑀧𑀸𑀩𑁆𑀬𑀸𑀓𑀢𑀁 𑀉𑀧𑀦𑀺𑀲𑁆𑀲𑀬𑀁 𑀮𑀪𑀢𑀻𑀢𑀺. 𑀓𑀣𑀁? 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀢𑀸𑀯 𑀦 𑀮𑀪𑀢𑀺 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀧𑀼𑀩𑁆𑀩𑀸𑀧𑀭𑀦𑀺𑀬𑀫𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘, 𑀧𑀓𑀢𑀽𑀧𑀦𑀺𑀲𑁆𑀲𑀬𑀜𑁆𑀘 𑀦 𑀮𑀪𑀢𑀺 𑀅𑀘𑁂𑀢𑀦𑁂𑀦 𑀭𑀽𑀧𑀲𑀦𑁆𑀢𑀸𑀦𑁂𑀦 𑀧𑀓𑀢𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀳𑀺 𑀅𑀭𑀽𑀧𑀲𑀦𑁆𑀢𑀸𑀦𑁂𑀦 𑀲𑀤𑁆𑀥𑀸𑀤𑀬𑁄 𑀦𑀺𑀧𑁆𑀨𑀸𑀤𑀺𑀢𑀸 𑀉𑀢𑀼𑀪𑁄𑀚𑀦𑀸𑀤𑀬𑁄 𑀘 𑀉𑀧𑀲𑁂𑀯𑀺𑀢𑀸, 𑀦 𑀏𑀯𑀁 𑀭𑀽𑀧𑀲𑀦𑁆𑀢𑀸𑀦𑁂𑀦. 𑀬𑀲𑁆𑀫𑀺𑀜𑁆𑀘 𑀉𑀢𑀼𑀩𑀻𑀚𑀸𑀤𑀺𑀓𑁂 𑀓𑀫𑁆𑀫𑀸𑀤𑀺𑀓𑁂 𑀘 𑀲𑀢𑀺 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀦 𑀢𑀁 𑀢𑁂𑀦 𑀧𑀓𑀢𑀁 𑀳𑁄𑀢𑀺. 𑀲𑀘𑁂𑀢𑀦𑀲𑁆𑀲𑁂𑀯 𑀳𑀺 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀼𑀧𑀬𑁄𑀕𑀸𑀤𑀺𑀯𑀲𑁂𑀦 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀧𑀓𑀭𑀡𑀁, 𑀭𑀽𑀧𑀜𑁆𑀘 𑀅𑀘𑁂𑀢𑀦𑀦𑁆𑀢𑀺. 𑀬𑀣𑀸 𑀘 𑀦𑀺𑀭𑀻𑀳𑀓𑁂𑀲𑀼 𑀧𑀘𑁆𑀘𑀬𑀸𑀬𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑁂𑀲𑀜𑁆𑀘𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀢𑀸 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀦, 𑀏𑀯𑀁 ¶ 𑀲𑀧𑁆𑀧𑀓𑀭𑀡𑀲𑀪𑀸𑀯𑀢𑀸 𑀦𑀺𑀧𑁆𑀧𑀓𑀭𑀡𑀲𑀪𑀸𑀯𑀢𑀸 𑀘 𑀤𑀝𑁆𑀞𑀩𑁆𑀩𑀸. 𑀉𑀢𑀼𑀩𑀻𑀚𑀸𑀤𑀬𑁄 𑀧𑀦 ¶ 𑀅𑀗𑁆𑀓𑀼𑀭𑀸𑀤𑀻𑀦𑀁 𑀢𑁂𑀲𑀼 𑀅𑀲𑀦𑁆𑀢𑁂𑀲𑀼 𑀅𑀪𑀸𑀯𑀢𑁄 𑀏𑀯 𑀧𑀘𑁆𑀘𑀬𑀸, 𑀦 𑀧𑀦 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀢𑁄𑀢𑀺. 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁𑀬𑁂𑀯 𑀧𑀦𑁂𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄 𑀩𑀸𑀳𑀼𑀮𑁆𑀮𑀯𑀲𑁂𑀦 𑀧𑀸𑀓𑀝𑀯𑀲𑁂𑀦 𑀘 𑀯𑀼𑀢𑁆𑀢𑁄. ‘‘𑀅𑀦𑀸𑀕𑀢𑁂 𑀔𑀦𑁆𑀥𑁂 𑀧𑀢𑁆𑀣𑀬𑀫𑀸𑀦𑁄 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁮) 𑀧𑀦 𑀅𑀦𑀸𑀕𑀢𑀸𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀧𑀼𑀭𑀺𑀫𑁂𑀳𑀺 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀳𑀺 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀇𑀥 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀼𑀕𑁆𑀕𑀮𑁄𑀧𑀺 𑀲𑁂𑀦𑀸𑀲𑀦𑀫𑁆𑀧𑀻𑀢𑀺 𑀧𑀼𑀕𑁆𑀕𑀮𑀲𑁂𑀦𑀸𑀲𑀦𑀕𑁆𑀕𑀳𑀡𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑀺, 𑀧𑀺-𑀲𑀤𑁆𑀤𑁂𑀦 𑀘𑀻𑀯𑀭𑀸𑀭𑀜𑁆𑀜𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑁂 𑀲𑀩𑁆𑀩𑁂 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 𑀳𑀺 ‘‘𑀲𑁂𑀦𑀸𑀲𑀦𑀁 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑀸𑀯 𑀥𑀫𑁆𑀫𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀧𑀼𑀕𑁆𑀕𑀮𑀸𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀲𑁂𑀦𑀸𑀲𑀦𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀓𑁆𑀔𑀢𑀺 𑀳𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀢𑀼𑀁 𑀪𑁄𑀚𑀦𑀁 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀲𑁂𑀦𑀸𑀲𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀉𑀢𑀼𑀆𑀤𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀁, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁨.𑁧𑁮.𑁪) 𑀘𑀓𑁆𑀔𑀸𑀤𑀻𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀪𑀸𑀯𑀜𑁆𑀘𑀸𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀘 𑀢𑀸𑀤𑀺𑀲𑀸𑀦𑀁 𑀧𑀼𑀩𑁆𑀩𑁂 𑀧𑀓𑀢𑀢𑁆𑀢𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀢𑀸 𑀤𑀝𑁆𑀞𑀩𑁆𑀩𑀸.

𑀓𑀲𑀺𑀡𑀸𑀭𑀫𑁆𑀫𑀡𑀸𑀤𑀻𑀦𑀺 𑀆𑀭𑀫𑁆𑀫𑀡𑀫𑁂𑀯 𑀳𑁄𑀦𑁆𑀢𑀺, 𑀦 𑀉𑀧𑀦𑀺𑀲𑁆𑀲𑀬𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀓𑀘𑁆𑀘𑀸𑀬𑀸’’𑀢𑀺 𑀆𑀳.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀬𑀲𑁆𑀫𑀺𑀁 𑀓𑀲𑀺𑀡𑀸𑀤𑀺𑀫𑁆𑀳𑀺 𑀛𑀸𑀦𑀁 𑀅𑀦𑀼𑀧𑁆𑀧𑀸𑀤𑀺𑀢𑀁, 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀦𑁆𑀦𑀛𑀸𑀦𑀼𑀧𑁆𑀧𑀸𑀤𑀦𑁂 𑀲𑀩𑁆𑀩𑀲𑁆𑀲 𑀘 𑀉𑀧𑁆𑀧𑀦𑁆𑀦𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑁂 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀅𑀪𑀺𑀜𑁆𑀜𑀸𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀪𑀽𑀫𑀓𑀓𑀼𑀲𑀮𑁄 𑀘𑀢𑀼𑀪𑀽𑀫𑀓𑀲𑁆𑀲𑀧𑀺 𑀓𑀼𑀲𑀮𑀲𑁆𑀲𑀸’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀭𑀽𑀧𑀸𑀯𑀘𑀭𑀁 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀯𑀺𑀧𑀲𑁆𑀲𑀦𑀁 𑀫𑀕𑁆𑀕𑀁 𑀅𑀪𑀺𑀜𑁆𑀜𑀁 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺 (𑀧𑀝𑁆𑀞𑀸. 𑁪.𑁧𑁩.𑁨𑁮𑁫). 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀫𑁆𑀧𑀺 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀯𑀲𑁂𑀦 ¶ , 𑀧𑀝𑀺𑀲𑀦𑁆𑀥𑀺𑀦𑀺𑀬𑀸𑀫𑀓𑀲𑁆𑀲 𑀘𑀼𑀢𑀺𑀢𑁄 𑀧𑀼𑀭𑀺𑀫𑀚𑀯𑀦𑀲𑁆𑀲 𑀘 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 ¶ 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑁂𑀦𑀸𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀁 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲 𑀘 𑀬𑀣𑀸𑀬𑁄𑀕𑀁 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀴𑀺𑀬𑀫𑁆𑀧𑀺 𑀳𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀦𑀬𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀧𑀜𑁆𑀳𑀸𑀯𑀸𑀭𑁂𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺.

𑀇𑀫𑀺𑀦𑀸 𑀧𑀦 𑀦𑀬𑁂𑀦𑀸𑀢𑀺 𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀢𑁆𑀢𑀦𑀁 𑀉𑀧𑀦𑀺𑀲𑁆𑀲𑀸𑀬 𑀲𑀺𑀦𑁂𑀳𑀼𑀧𑁆𑀧𑀸𑀤𑀦𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀥𑀫𑁆𑀫𑀸 𑀅𑀓𑀼𑀲𑀮𑀸𑀦𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀦 𑀇𑀤𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀸𑀯𑀘𑀭𑀸𑀤𑀺𑀢𑀺𑀳𑁂𑀢𑀼𑀓𑀪𑀯𑀗𑁆𑀕𑀁 𑀓𑀸𑀬𑀺𑀓𑀲𑀼𑀔𑀸𑀤𑀺 𑀘 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄, 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀢𑀁 𑀧𑀢𑁆𑀣𑁂𑀢𑁆𑀯𑀸 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀓𑀼𑀲𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑀉𑀧𑁆𑀧𑀸𑀤𑀺𑀬𑀫𑀸𑀦𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑀸𑀤𑀻𑀲𑀼 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀚𑀸𑀦𑀦𑀢𑁆𑀣𑀁 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀭𑀳𑀢𑁄, 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀸𑀦𑀁 𑀧𑀦 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑀯𑀲𑁂𑀦 𑀲𑁄 𑀲𑁄 𑀯𑀺𑀧𑀸𑀓𑁄 𑀉𑀧𑀦𑀺𑀲𑁆𑀲𑀬𑁄. 𑀢𑁂𑀦𑀸𑀳 ‘‘𑀢𑀣𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑁄’’𑀢𑀺. 𑀬𑀤𑀺𑀧𑀺 𑀅𑀭𑀳𑀢𑁆𑀢𑀨𑀮𑀢𑁆𑀢𑀁 𑀛𑀸𑀦𑀯𑀺𑀧𑀲𑁆𑀲𑀦𑀸 𑀉𑀧𑁆𑀧𑀸𑀤𑁂𑀢𑀺 𑀅𑀦𑀸𑀕𑀸𑀫𑀻, 𑀦 𑀧𑀦 𑀢𑁂𑀦 𑀢𑀁 𑀓𑀤𑀸𑀘𑀺 𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀼𑀣𑀼𑀚𑁆𑀚𑀦𑀸𑀤𑀻𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀯𑀺𑀬, 𑀢𑀲𑁆𑀫𑀸 𑀢𑀸𑀦𑀺 𑀯𑀺𑀬 𑀢𑁂𑀲𑀁 𑀛𑀸𑀦𑀸𑀤𑀻𑀦𑀁 𑀇𑀫𑀲𑁆𑀲 𑀘 𑀅𑀕𑁆𑀕𑀨𑀮𑀁 𑀦 𑀛𑀸𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑁄. 𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀳𑀺 𑀅𑀦𑀸𑀕𑀢𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑁄𑀢𑀺. 𑀢𑁂𑀦𑀸𑀳 ‘‘𑀉𑀧𑀭𑀺𑀝𑁆𑀞𑀺𑀫𑀁 𑀓𑀼𑀲𑀮𑀲𑁆𑀲𑀧𑀻’’𑀢𑀺.

𑀓𑀺𑀭𑀺𑀬𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀫𑁆𑀧𑀺 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦𑀸𑀤𑀺𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀸𑀧𑀺 𑀘𑀢𑀼𑀪𑀽𑀫𑀓𑀲𑁆𑀲𑀧𑀺 𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀭𑀸𑀕𑀸𑀤𑀺𑀉𑀧𑁆𑀧𑀸𑀤𑀦𑁂 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑀸𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑀫𑀼𑀔𑁂𑀦 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲. 𑀏𑀯𑀁 𑀓𑀺𑀭𑀺𑀬𑀲𑁆𑀲𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀓𑀺𑀭𑀺𑀬𑀲𑀗𑁆𑀔𑀸𑀢𑁄𑀧𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀘𑀢𑀼𑀪𑀽𑀫𑀓𑀸𑀦𑀁 𑀓𑀼𑀲𑀮𑀸𑀤𑀺𑀔𑀦𑁆𑀥𑀸𑀦𑀁 𑀳𑁄𑀢𑀺𑀬𑁂𑀯𑀸’’𑀢𑀺. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀲𑀼 𑀧𑀦 𑀉𑀢𑀼𑀪𑁄𑀚𑀦𑀲𑁂𑀦𑀸𑀲𑀦𑀸𑀦𑀫𑁂𑀯 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀤𑀲𑁆𑀲𑀦𑀁 𑀦𑀬𑀤𑀲𑁆𑀲𑀦𑀫𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑁂 𑀆𑀕𑀢𑀦𑀬𑁂𑀦𑀸𑀢𑀺 𑀇𑀤𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸, 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 ¶ (𑀧𑀝𑁆𑀞𑀸. 𑁧.𑁧.𑁯𑁧) 𑀏𑀯𑀫𑀸𑀤𑀺𑀓𑀁 𑀉𑀧𑀦𑀺𑀲𑁆𑀲𑀬𑀧𑀝𑀺𑀓𑁆𑀔𑁂𑀧𑀁, 𑀅𑀦𑀼𑀮𑁄𑀫𑁂 𑀘 𑀅𑀦𑀸𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀦𑀺𑀲𑀁 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑁂𑀦 (𑀲𑀁. 𑀦𑀺. 𑁨.𑁨𑁩),

‘‘𑀬𑀣𑀸𑀧𑀺 ¶ 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀢𑀁 𑀭𑀼𑀓𑁆𑀔𑀸 𑀉𑀧𑀦𑀺𑀲𑁆𑀲𑀸𑀬, 𑀯𑀟𑁆𑀠𑀦𑁆𑀢𑁂 𑀢𑁂 𑀯𑀦𑀧𑁆𑀧𑀢𑀻’’𑀢𑀺 (𑀅. 𑀦𑀺. 𑁩.𑁪𑁯). 𑁋

𑀆𑀤𑀺𑀓𑁂𑀦 𑀘.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦. 𑀦𑀬𑀤𑀲𑁆𑀲𑀦𑀯𑀲𑁂𑀦 𑀬𑀸𑀦𑀺 𑀯𑀺𑀦𑀸 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦 𑀦 𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀤𑀲𑁆𑀲𑀦𑁂𑀦 𑀫𑀦𑁄𑀤𑁆𑀯𑀸𑀭𑁂𑀧𑀺 𑀬𑀁 𑀬𑀤𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦 𑀯𑀢𑁆𑀢𑀢𑀺, 𑀢𑀲𑁆𑀲 𑀢𑀤𑀸𑀮𑀫𑁆𑀩𑀺𑀢𑀁 𑀲𑀩𑁆𑀩𑀫𑁆𑀧𑀺 𑀭𑀽𑀧𑀭𑀽𑀧𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑁆𑀢𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺, 𑀲𑀭𑀽𑀧𑁂𑀦 𑀧𑀦 𑀅𑀤𑀲𑁆𑀲𑀺𑀢𑀢𑁆𑀢𑀸 ‘‘𑀲𑀸𑀯𑀲𑁂𑀲𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸’’𑀢𑀺 𑀆𑀳. 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑀬𑀢𑁄 𑀇𑀤𑁆𑀥𑀺𑀯𑀺𑀥𑀸𑀪𑀺𑀜𑁆𑀜𑀸𑀬 𑀘 𑀅𑀝𑁆𑀞𑀸𑀭𑀲𑀲𑀼 𑀬𑀁𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀤𑀸𑀭𑀫𑁆𑀫𑀡𑀪𑀸𑀯𑀺𑀦𑁄𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀪𑀸𑀯𑀺𑀦𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀸𑀪𑀸𑀯𑁂𑀦 𑀇𑀢𑀭𑀲𑁆𑀲𑀧𑀺 𑀅𑀪𑀸𑀯𑀸 𑀅𑀕𑁆𑀕𑀳𑀡𑀁. 𑀪𑀯𑀗𑁆𑀕𑀪𑀸𑀯𑀺𑀦𑁄 𑀧𑀦 𑀕𑀳𑀡𑀁 𑀓𑀸𑀢𑀩𑁆𑀩𑀁 𑀦 𑀯𑀸 𑀓𑀸𑀢𑀩𑁆𑀩𑀁 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀬 𑀅𑀧𑀭𑀺𑀩𑁆𑀬𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀭𑀫𑁆𑀫𑀡𑀫𑀢𑁆𑀢𑀪𑀸𑀯𑀢𑁄, ‘‘𑀫𑀦𑁄𑀥𑀸𑀢𑀽𑀦𑀜𑁆𑀘𑀸’’𑀢𑀺 𑀏𑀢𑁆𑀣 𑀲𑀦𑁆𑀢𑀻𑀭𑀡𑀪𑀸𑀯𑀺𑀦𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀺.

𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧. 𑀢𑀲𑁆𑀲𑁂𑀯𑀸𑀢𑀺 ¶ ¶ 𑀇𑀤𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀦𑀺𑀭𑀯𑀲𑁂𑀲𑀤𑀲𑁆𑀲𑀺𑀢𑀧𑀼𑀭𑁂𑀚𑀸𑀢𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀦 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀦 𑀳𑁄𑀢𑀻𑀢𑀺.

𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨. 𑀧𑀕𑀼𑀡𑀢𑀭𑀩𑀮𑀯𑀢𑀭𑀪𑀸𑀯𑀯𑀺𑀲𑀺𑀝𑁆𑀞𑀦𑁆𑀢𑀺 𑀏𑀢𑁂𑀦 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀢𑁄 𑀯𑀺𑀲𑁂𑀲𑁂𑀢𑀺.

𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀁 𑀅𑀪𑀺𑀚𑁆𑀛𑀸𑀤𑀺 𑀓𑀫𑁆𑀫𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 ‘‘𑀘𑁂𑀢𑀦𑀸𑀓𑀫𑁆𑀫𑀫𑁂𑀯𑀸’’𑀢𑀺 𑀆𑀳. 𑀲𑀢𑀺𑀧𑀺 𑀳𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀢𑁆𑀢𑁂 𑀦 𑀘𑁂𑀢𑀦𑀸𑀯𑀚𑁆𑀚𑀸 𑀏𑀯𑀁𑀲𑀪𑀸𑀯𑀸𑀢𑀺. 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁂𑀦𑀸𑀢𑀺 𑀓𑀫𑁆𑀫𑀲𑁆𑀲 𑀲𑀫𑀢𑁆𑀣𑀢𑀸 𑀢𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀜𑁆𑀘𑀯𑁄𑀓𑀸𑀭𑁂𑀬𑁂𑀯, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀏𑀢𑁂𑀦 𑀓𑀸𑀫𑀸𑀯𑀘𑀭𑀘𑁂𑀢𑀦𑀸 𑀏𑀓𑀯𑁄𑀓𑀸𑀭𑁂 𑀭𑀽𑀧𑀫𑁆𑀧𑀺 𑀦 𑀚𑀦𑁂𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁪. 𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ¶ 𑀬𑁂𑀲𑀁 𑀏𑀓𑀦𑁆𑀢𑁂𑀦 𑀯𑀺𑀧𑀸𑀓𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀲𑀁 𑀯𑀲𑁂𑀦 𑀦𑀬𑀤𑀲𑁆𑀲𑀦𑀁 𑀓𑀢𑀁. 𑀦 𑀳𑀺 𑀆𑀭𑀼𑀧𑁆𑀧𑁂 𑀪𑀽𑀫𑀺𑀤𑁆𑀯𑀬𑀯𑀺𑀧𑀸𑀓𑁄 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁫. 𑀓𑀩𑀴𑀁 ¶ 𑀓𑀭𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑁄𑀯𑀸𑀢𑀺 𑀅𑀲𑀺𑀢𑀧𑀻𑀢𑀸𑀤𑀺𑀯𑀢𑁆𑀣𑀽𑀳𑀺 𑀲𑀳 𑀅𑀚𑁆𑀛𑁄𑀳𑀭𑀺𑀢𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑀩𑁆𑀩𑀲𑀸𑀬𑀺𑀢𑀩𑁆𑀩𑀸𑀦𑀺𑀧𑀺 𑀳𑀺 𑀲𑀪𑀸𑀯𑀯𑀲𑁂𑀦 𑀓𑀩𑀴𑀸𑀬𑁂𑀯 𑀳𑁄𑀦𑁆𑀢𑀻𑀢𑀺.

𑀲𑁂𑀲𑀢𑀺𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀦𑀼𑀧𑀸𑀮𑀓𑁄𑀯 𑀳𑀼𑀢𑁆𑀯𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀪𑀸𑀯𑁄 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀦𑁄𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀢𑀤𑀼𑀪𑀬𑀜𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀺𑀯𑀺𑀥𑁄𑀧𑀺 𑀧𑀦 𑀲𑁄 𑀦𑁄𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀸𑀬𑀲𑁆𑀲 𑀯𑀼𑀢𑁆𑀢𑁄𑀢𑀺.

𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁬. 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀫𑀺𑀲𑁆𑀲𑀓𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀭𑀽𑀧𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀯𑁄𑀳𑀸𑀭𑁄 𑀦𑀢𑁆𑀣𑀻𑀢𑀺 𑀅𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀽𑀢𑀸𑀦𑀺 𑀧𑀘𑁆𑀘𑀬𑀦𑁆𑀢𑀭𑀸𑀧𑁂𑀓𑁆𑀔𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀅𑀢𑁆𑀢𑀦𑁄 ¶ 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀅𑀨𑀭𑀦𑁆𑀢𑀸𑀦𑀺𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀲𑀺𑀬𑀼𑀁. 𑀬𑁄 𑀧𑀦 𑀦𑀺𑀭𑀧𑁂𑀓𑁆𑀔𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀲𑁄 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀅𑀨𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀘 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀮𑀺𑀗𑁆𑀕𑀸𑀤𑀻𑀦𑀁 𑀲𑀺𑀬𑀼𑀁, 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀢𑁂𑀲𑀫𑁆𑀧𑀺 𑀲𑀺𑀬𑀼𑀁. 𑀦 𑀳𑀺 𑀭𑀽𑀧𑀁 𑀭𑀽𑀧𑀲𑁆𑀲, 𑀅𑀭𑀽𑀧𑀁 𑀯𑀸 𑀅𑀭𑀽𑀧𑀲𑁆𑀲 𑀯𑀺𑀦𑀺𑀩𑁆𑀪𑀼𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀣𑀻𑀢𑀺. 𑀲𑀢𑀺 𑀘𑁂𑀯𑀁 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀢𑁆𑀢𑀸 𑀓𑀮𑀮𑀸𑀤𑀺𑀓𑀸𑀮𑁂 𑀘 𑀮𑀺𑀗𑁆𑀕𑀸𑀤𑀻𑀦𑀺 𑀲𑀺𑀬𑀼𑀁, 𑀬𑁂𑀲𑀁 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀨𑀭𑁂𑀬𑁆𑀬𑀼𑀁, 𑀦 𑀘 𑀨𑀭𑀦𑁆𑀢𑀺. 𑀢𑀲𑁆𑀫𑀸 𑀦 𑀢𑁂𑀳𑀺 𑀢𑀸𑀦𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀓𑀸𑀦𑀺, 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀦 𑀨𑀭𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀬𑁂𑀳𑀺 𑀢𑀸𑀦𑀺 𑀲𑀳𑀚𑀸𑀢𑀸𑀦𑀺, 𑀢𑁂𑀲𑀁 𑀅𑀩𑀻𑀚𑀪𑀸𑀯𑀢𑁄𑀬𑁂𑀯 𑀦 𑀨𑀭𑀦𑁆𑀢𑀺, 𑀢𑀲𑁆𑀫𑀸 𑀆𑀧𑀦𑁆𑀦𑀯𑀺𑀦𑀺𑀩𑁆𑀪𑀼𑀢𑁆𑀢𑀪𑀸𑀯𑀸𑀦𑀁 𑀢𑁂𑀲𑀁 𑀮𑀺𑀗𑁆𑀕𑀸𑀤𑀻𑀦𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀲𑀫𑀸𑀦𑀓𑀮𑀸𑀧𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀬 ¶ 𑀅𑀨𑀭𑀡𑀢𑁄 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻𑀢𑀺. 𑀬𑁂𑀲𑀁 𑀩𑀻𑀚𑀪𑀽𑀢𑀸𑀦𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀲𑀁 𑀮𑀺𑀗𑁆𑀕𑀸𑀤𑀻𑀦𑀁 𑀅𑀧𑀭𑀫𑀢𑁆𑀣𑀪𑀸𑀯𑀢𑁄𑀢𑀺 𑀓𑁂𑀘𑀺, 𑀢𑁂 𑀧𑀦 𑀓𑀮𑀮𑀸𑀤𑀺𑀓𑀸𑀮𑁂𑀧𑀺 𑀮𑀺𑀗𑁆𑀕𑀸𑀤𑀻𑀦𑀁 𑀢𑀤𑀦𑀼𑀭𑀽𑀧𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀺.

𑀚𑀸𑀢𑀺𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀪𑁂𑀤𑁂𑀲𑀼 𑀓𑀼𑀲𑀮𑀚𑀸𑀢𑀺𑀬𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁂𑀯 𑀆𑀭𑀼𑀧𑁆𑀧𑁂 𑀞𑀧𑁂𑀢𑀩𑁆𑀩𑀦𑁆𑀢𑀺 ‘‘𑀞𑀧𑁂𑀢𑁆𑀯𑀸 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀮𑁄𑀓𑀼𑀢𑁆𑀢𑀭𑀁 𑀧𑀦 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀜𑁆𑀘 𑀯𑀺𑀲𑀼𑀁 𑀏𑀓𑀸 𑀚𑀸𑀢𑀺 𑀪𑀽𑀫𑀺 𑀯𑀸 𑀦 𑀳𑁄𑀢𑀻𑀢𑀺 𑀆𑀭𑀼𑀧𑁆𑀧𑁂 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀞𑀧𑀺𑀢𑀁. 𑀳𑁂𑀢𑀼𑀆𑀤𑀻𑀲𑀼𑀧𑀺 ‘‘𑀢𑀣𑀸 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼, 𑀢𑀣𑀸 𑀅𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧) 𑀏𑀲 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀞𑀺𑀢𑀺𑀓𑁆𑀔𑀡𑁂𑀢𑀺 𑀇𑀤𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀧𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀯𑀓𑁆𑀔𑀢𑀺 𑀳𑀺 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘…𑀧𑁂… 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀓𑀫𑁆𑀫𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁬𑁬). 𑀦 𑀳𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀭𑀽𑀧𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀜𑁆𑀜𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑁂 𑀘 𑀓𑀝𑀢𑁆𑀢𑀸𑀭𑀽𑀧𑀲𑁆𑀲. 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀘 𑀙 𑀉𑀧𑁆𑀧𑀸𑀤𑀓𑁆𑀔𑀡𑀫𑁂𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀏𑀢𑁂𑀲𑀼 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀻𑀢𑀺.

𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀸𑀦𑀻𑀢𑀺 ¶ 𑀏𑀢𑁆𑀣 𑀬𑀤𑀺𑀧𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀦𑀢𑁆𑀣𑀺, 𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀺 𑀧𑀦 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀪𑀽𑀢𑀸𑀦𑁂𑀯 𑀛𑀸𑀦𑀗𑁆𑀕𑀸𑀦𑀺, 𑀦 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀪𑀽𑀢𑀸𑀦𑀻𑀢𑀺 𑀇𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀓𑀢𑀁. 𑀦𑀦𑀼 𑀘 ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀲𑀽’’𑀢𑀺 𑀯𑀘𑀦𑁂𑀦𑁂𑀯 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀚𑁆𑀚𑀺𑀢𑀸𑀦𑀻𑀢𑀺 𑀲𑀼𑀔𑀤𑀼𑀓𑁆𑀔𑀕𑁆𑀕𑀳𑀡𑀫𑁂𑀯 𑀓𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀛𑀸𑀦𑀗𑁆𑀕𑀲𑀼𑀔𑀤𑀼𑀓𑁆𑀔𑀸𑀦𑀁 𑀛𑀸𑀦𑀗𑁆𑀕𑀪𑀸𑀯𑀯𑀺𑀲𑁂𑀲𑀦𑀢𑁄. ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀲𑀼 𑀲𑀼𑀔𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀸𑀦𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀳𑀺 𑀲𑀤𑁆𑀥𑀺𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀺𑀧𑀺 ¶ 𑀯𑀚𑁆𑀚𑀺𑀢𑀸𑀦𑀻𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀦 𑀬𑀸𑀦𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀛𑀸𑀦𑀗𑁆𑀕𑀪𑀽𑀢𑁄 𑀲𑀼𑀔𑀪𑀸𑀯𑁄 𑀤𑀼𑀓𑁆𑀔𑀪𑀸𑀯𑁄 𑀘 𑀯𑀺𑀲𑁂𑀲𑀺𑀢𑁄, 𑀢𑀲𑁆𑀫𑀸 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀪𑀸𑀯𑀯𑀺𑀲𑀺𑀝𑁆𑀞𑁄𑀬𑁂𑀯 𑀲𑀼𑀔𑀤𑀼𑀓𑁆𑀔𑀪𑀸𑀯𑁄 𑀲𑀼𑀔𑀤𑀼𑀓𑁆𑀔𑀸𑀦𑀁 𑀛𑀸𑀦𑀗𑁆𑀕𑀪𑀸𑀯𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀓𑀭𑁄𑀢𑀺. 𑀢𑁂𑀦 ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀲𑀽’’𑀢𑀺 𑀯𑀘𑀦𑁂𑀦 𑀯𑀚𑁆𑀚𑀺𑀬𑀫𑀸𑀦𑀸𑀦𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀪𑀸𑀯𑀸𑀪𑀸𑀯𑀢𑁄 𑀛𑀸𑀦𑀗𑁆𑀕𑀪𑀸𑀯𑀸𑀪𑀸𑀯𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀣𑀸𑀯𑀚𑁆𑀚𑀺𑀢𑀸 𑀧𑀦 𑀲𑀼𑀔𑀤𑀼𑀓𑁆𑀔𑁄𑀧𑁂𑀓𑁆𑀔𑁂𑀓𑀕𑁆𑀕𑀢𑀸 𑀓𑀲𑁆𑀫𑀸 𑀯𑀚𑁆𑀚𑀺𑀢𑀸𑀢𑀺? 𑀬𑀢𑁆𑀣 𑀛𑀸𑀦𑀗𑁆𑀕𑀸𑀦𑀺 𑀉𑀤𑁆𑀥𑀭𑀻𑀬𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂, 𑀢𑀢𑁆𑀣 𑀘 𑀛𑀸𑀦𑀗𑁆𑀕𑀦𑁆𑀢𑀺 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀓𑀲𑁆𑀫𑀸 𑀧𑀦 𑀦 𑀉𑀤𑁆𑀥𑀝𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀦𑁆𑀦𑀁 𑀧𑀦 𑀯𑀺𑀜𑁆𑀜𑀸𑀡𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸𑀢𑀺 𑀏𑀢𑁂𑀦 𑀆𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑀸𑀬𑀧𑀺 𑀘𑀺𑀦𑁆𑀢𑀦𑀸𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑀸𑀦𑀻’’𑀢𑀺 𑀧𑁄𑀭𑀸𑀡𑀧𑀸𑀞𑁄. 𑀢𑀢𑁆𑀣 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑁂𑀳𑁂𑀯 𑀢𑀁𑀲𑀫𑀸𑀦𑀮𑀓𑁆𑀔𑀡𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀧𑀺 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀦𑀼𑀤𑁆𑀥𑀝𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀩𑁆𑀩𑁂 𑀧𑀦 𑀲𑀢𑁆𑀢 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀦𑁆𑀢𑁂𑀦 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀯𑀚𑁆𑀚𑀺𑀢𑀸𑀦𑀻𑀢𑀺 𑀢𑁂𑀲𑀁 𑀯𑀚𑁆𑀚𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀦 𑀲𑀫𑀸𑀦𑀮𑀓𑁆𑀔𑀡𑁂𑀦 𑀮𑁂𑀲𑁂𑀦 𑀤𑀲𑁆𑀲𑁂𑀢𑀩𑁆𑀩𑀁. 𑀅𑀝𑁆𑀞𑀓𑀣𑀸 𑀳𑁂𑀲𑀸𑀢𑀺. 𑀬𑀤𑀺 𑀘 𑀮𑁂𑀲𑁂𑀦 𑀤𑀲𑁆𑀲𑁂𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑁂𑀲𑀼𑀧𑀺 𑀢𑀻𑀲𑀼 𑀏𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀺𑀡𑁆𑀡𑀁 𑀧𑀦 𑀯𑀘𑀦𑁂𑀦 𑀢𑀢𑁄 𑀅𑀜𑁆𑀜𑀲𑁆𑀲 𑀛𑀸𑀦𑀗𑁆𑀕𑀦𑁆𑀢𑀺 𑀉𑀤𑁆𑀥𑀝𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀅𑀦𑀼𑀤𑁆𑀥𑀝𑀪𑀸𑀯𑁄 𑀯𑀸, 𑀢𑀲𑁆𑀫𑀸 𑀢𑀁𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀁 ‘‘𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀼𑀔𑀤𑀼𑀓𑁆𑀔𑀸𑀦𑀻’’𑀢𑀺 𑀧𑀞𑀦𑁆𑀢𑀺. 𑀬𑁂 𑀧𑀦 ‘‘𑀛𑀸𑀦𑀗𑁆𑀕𑀪𑀽𑀢𑁂𑀳𑀺 𑀲𑁄𑀫𑀦𑀲𑁆𑀲𑀸𑀤𑀻𑀳𑀺 𑀲𑀼𑀔𑀤𑀼𑀓𑁆𑀔𑁂𑀦 𑀅𑀯𑀺𑀪𑀽𑀢𑀪𑀸𑀯𑁂𑀦 𑀧𑀸𑀓𑀝𑀢𑀸𑀬 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀬𑀼𑀢𑁆𑀢𑀢𑀸𑀬 𑀘 𑀲𑀫𑀸𑀦𑀸𑀦𑀁 𑀲𑀼𑀔𑀸𑀤𑀻𑀦𑀁 𑀛𑀸𑀦𑀗𑁆𑀕𑀦𑁆𑀢𑀺 𑀅𑀦𑀼𑀤𑁆𑀥𑀝𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀸𑀢𑀺 ¶ 𑀲𑀸 𑀏𑀢𑁆𑀣 𑀦 𑀕𑀳𑀺𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀢𑀁 𑀭𑀼𑀘𑀺𑀫𑀢𑁆𑀢𑀁. 𑀬𑀤𑀺 𑀛𑀸𑀦𑀗𑁆𑀕𑀲𑀫𑀸𑀦𑀸𑀦𑀁 𑀛𑀸𑀦𑀗𑁆𑀕𑀦𑁆𑀢𑀺 𑀅𑀦𑀼𑀤𑁆𑀥𑀝𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘𑁂𑀢𑁆𑀣 𑀛𑀸𑀦𑀗𑁆𑀕𑀪𑀽𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑀫𑀦𑁄𑀥𑀸𑀢𑀼𑀆𑀤𑀻𑀲𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀲𑀫𑀸𑀦𑀸𑀢𑀺 𑀢𑀲𑁆𑀲𑀸 𑀅𑀦𑀼𑀤𑁆𑀥𑀝𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺. 𑀲𑁂𑀲𑀸𑀳𑁂𑀢𑀼𑀓𑁂𑀲𑀼𑀧𑀺 𑀛𑀸𑀦𑀗𑁆𑀕𑀁 𑀉𑀤𑁆𑀥𑀝𑀫𑁂𑀯 𑀉𑀤𑁆𑀥𑀭𑀡𑀝𑁆𑀞𑀸𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮. 𑀧𑀜𑁆𑀜𑀸 ¶ 𑀯𑀺𑀢𑀓𑁆𑀓𑁄 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀯𑀻𑀭𑀺𑀬𑀁 𑀲𑀢𑀺 𑀲𑀫𑀸𑀥𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀢𑀺 𑀇𑀫𑀸𑀦𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀻𑀢𑀺 𑀏𑀢𑁆𑀣 𑀤𑀼𑀯𑀺𑀥𑀫𑁆𑀧𑀺 𑀲𑀗𑁆𑀓𑀧𑁆𑀧𑀁 𑀯𑀻𑀭𑀺𑀬𑀁 𑀲𑀫𑀸𑀥𑀺𑀜𑁆𑀘 𑀯𑀺𑀢𑀓𑁆𑀓𑀯𑀻𑀭𑀺𑀬𑀲𑀫𑀸𑀥𑀺𑀯𑀘𑀦𑁂𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀅𑀬𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀺𑀘𑁆𑀙𑀸𑀫𑀕𑁆𑀕𑁄 𑀅𑀩𑁆𑀭𑀳𑁆𑀫𑀘𑀭𑀺𑀬𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀻’’𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁫.𑁧𑁮) 𑀲𑀼𑀢𑁆𑀢𑀯𑀘𑀦𑁂𑀳𑀺 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀲𑀼𑀧𑀺 𑀫𑀕𑁆𑀕𑀗𑁆𑀕𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀢𑁂𑀳𑀺 𑀲𑀳 𑀤𑁆𑀯𑀸𑀤𑀲𑀗𑁆𑀕𑀸𑀦𑀺 𑀇𑀥 𑀮𑀩𑁆𑀪𑀫𑀸𑀦𑀸𑀦𑀺 𑀘 𑀅𑀮𑀩𑁆𑀪𑀫𑀸𑀦𑀸𑀦𑀺 𑀘 𑀫𑀕𑁆𑀕𑀗𑁆𑀕𑀯𑀘𑀦𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀏𑀯𑀜𑁆𑀳𑀺 𑀲𑀼𑀢𑁆𑀢𑀦𑁆𑀢𑀯𑁄𑀳𑀸𑀭𑁄𑀧𑀺 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀏𑀯𑀁 𑀧𑀦 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀏𑀯𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀧𑀸𑀞𑀕𑀢𑀲𑁆𑀲 𑀫𑀕𑁆𑀕𑀗𑁆𑀕𑀲𑀤𑁆𑀤𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀇𑀫𑀸𑀦𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀺 𑀦 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀦 𑀳𑀺 𑀧𑀸𑀴𑀺𑀬𑀁 𑀫𑀕𑁆𑀕𑀗𑁆𑀕𑀲𑀤𑁆𑀤𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁄𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑁂𑀳𑀺 𑀲𑀫𑁆𑀫𑀸𑀯𑀸𑀘𑀸𑀤𑀻𑀳𑀺 𑀧𑀝𑀺𑀧𑀓𑁆𑀔𑀸 𑀘𑁂𑀢𑀦𑀸𑀥𑀫𑁆𑀫𑀸 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄𑀬𑁂𑀯 ‘‘𑀫𑀺𑀘𑁆𑀙𑀸𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺, 𑀦 𑀧𑀦 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑁂𑀦. 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑀪𑀽𑀢𑀸𑀦𑀺 𑀘 𑀇𑀥 𑀧𑀸𑀴𑀺𑀬𑀁 ‘‘𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀦 𑀘 𑀅𑀜𑁆𑀜𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀧𑀭𑀺𑀬𑀸𑀬𑀦𑀺𑀧𑁆𑀧𑀭𑀺𑀬𑀸𑀬𑀫𑀕𑁆𑀕𑀗𑁆𑀕𑀤𑀲𑁆𑀲𑀦𑀢𑁆𑀣𑀁 𑀧𑀦 𑀇𑀘𑁆𑀙𑀦𑁆𑀢𑁂𑀦 𑀧𑀸𑀴𑀺𑀕𑀢𑀫𑀕𑁆𑀕𑀗𑁆𑀕𑀲𑀤𑁆𑀤𑀧𑀢𑀺𑀭𑀽𑀧𑀓𑁄 𑀅𑀜𑁆𑀜𑁄 𑀫𑀕𑁆𑀕𑀗𑁆𑀕𑀲𑀤𑁆𑀤𑁄 𑀉𑀪𑀬𑀧𑀤𑀢𑁆𑀣𑁄 𑀉𑀤𑁆𑀥𑀭𑀺𑀢𑀩𑁆𑀩𑁄 𑀬𑀣𑀸 ‘‘𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺 (𑀧𑀸𑀭𑀸. 𑁩𑁮𑁬, 𑁪𑁦𑁫). 𑀇𑀥 𑀧𑀦 ‘‘𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀧𑀸𑀴𑀺𑀕𑀢𑁄𑀬𑁂𑀯 𑀫𑀕𑁆𑀕𑀗𑁆𑀕𑀲𑀤𑁆𑀤𑁄 𑀉𑀤𑁆𑀥𑀝𑁄, 𑀦 𑀘 𑀅𑀢𑁆𑀣𑀼𑀤𑁆𑀥𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀬𑀫𑀦𑀁 𑀓𑀢𑀁, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀫𑀕𑁆𑀕𑀗𑁆𑀕𑀲𑀤𑁆𑀤𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀁 𑀅𑀢𑁆𑀣𑀪𑀸𑀯𑁄 𑀫𑀸 𑀳𑁄𑀢𑀽𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀫𑀸𑀥𑀬𑁄𑀢𑀺 ¶ 𑀇𑀫𑀸𑀦𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀻’’𑀢𑀺 𑀧𑀞𑀦𑁆𑀢𑀺. 𑀦𑀦𑀼 𑀏𑀯𑀁 ‘‘𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀚𑁆𑀚𑁂𑀲𑀽’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀬𑀣𑀸𑀯𑀼𑀢𑁆𑀢𑀸 𑀲𑀦𑁆𑀢𑀺, 𑀬𑁂 𑀯𑀚𑁆𑀚𑁂𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺? 𑀦, 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀬𑀫𑀦𑀢𑁆𑀣𑀢𑁆𑀢𑀸. 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀚𑁆𑀚𑁂𑀲𑁆𑀯𑁂𑀯 𑀏𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼. 𑀢𑀢𑁆𑀣𑀼𑀧𑁆𑀧𑀦𑁆𑀦𑀸𑀦𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄.

𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁦. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦. 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 ¶ 𑀅𑀪𑀸𑀯𑀢𑁄𑀢𑀺 𑀏𑀢𑁂𑀦 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀯𑀢𑁆𑀣𑀼𑀪𑀽𑀢𑁄 𑀉𑀧𑀓𑀸𑀭𑀓𑀪𑀸𑀯𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧. 𑀓𑀼𑀲𑀮𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀦 𑀦𑀺𑀩𑁆𑀩𑀸𑀦𑀁. 𑀬𑁄 𑀳𑀺 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑁄 𑀅𑀢𑁆𑀣𑀺𑀪𑀸𑀯𑀁 𑀮𑀪𑀺𑀢𑁆𑀯𑀸 𑀉𑀧𑀓𑀸𑀭𑀓𑁄 𑀳𑁄𑀢𑀺, 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑀁 𑀳𑀼𑀢𑁆𑀯𑀸 𑀅𑀢𑁆𑀣𑀺𑀪𑀸𑀯𑀮𑀸𑀪𑁂𑀦 𑀉𑀧𑀓𑀸𑀭𑀓𑀁 𑀳𑁄𑀢𑀺. 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀁 𑀯𑀸 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄 𑀉𑀧𑀓𑀸𑀭𑀓𑀪𑀸𑀯𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀢𑀺 𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁄.

𑀲𑀢𑀺 𑀘 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀏𑀓𑀢𑁄 𑀧𑀼𑀭𑁂𑀢𑀭𑀁 𑀧𑀘𑁆𑀙𑀸 𑀘 𑀉𑀧𑁆𑀧𑀦𑁆𑀦𑀢𑁆𑀢𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀆𑀳 ‘‘𑀆𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀦 𑀮𑀪𑀢𑀻’’𑀢𑀺. 𑀢𑀤𑀪𑀸𑀯𑁄 𑀘 𑀏𑀢𑁂𑀲𑀁 𑀥𑀫𑁆𑀫𑀲𑀪𑀸𑀯𑀯𑀲𑁂𑀦 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁨-𑁨𑁩-𑁨𑁪. 𑀦𑀢𑁆𑀣𑀺𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨-𑁨𑁩. 𑀧𑀘𑁆𑀘𑀬𑀮𑀓𑁆𑀔𑀡𑀫𑁂𑀯 ¶ 𑀳𑁂𑀢𑁆𑀣 𑀦𑀸𑀦𑀦𑁆𑀢𑀺 𑀏𑀢𑁂𑀦 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀘 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀬𑁂𑀯 𑀦𑀸𑀦𑀢𑁆𑀢𑀁, 𑀦 𑀅𑀢𑁆𑀣𑁂𑀢𑀺 𑀇𑀤𑀁 𑀬𑁄 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀺𑀁 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀩𑁆𑀬𑀜𑁆𑀚𑀦𑀲𑀗𑁆𑀕𑀳𑀺𑀢𑁂 𑀧𑀘𑁆𑀘𑀬𑀮𑀓𑁆𑀔𑀡𑀫𑀢𑁆𑀢𑁂𑀬𑁂𑀯 𑀦𑀸𑀦𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀦𑀢𑁆𑀣𑀺𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

‘‘𑀮𑁄𑀪𑀤𑁄𑀲𑀫𑁄𑀳𑀸 ¶ 𑀯𑀺𑀧𑀸𑀓𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀺, 𑀲𑁂𑀲𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀫𑀧𑀸𑀞𑁄. 𑀏𑀢𑁆𑀣 𑀘 𑀮𑁄𑀪𑀤𑁄𑀲𑀫𑁄𑀳𑀸𑀦𑀁 𑀧𑀘𑁆𑀘𑁂𑀓𑀁 𑀲𑀢𑁆𑀢𑀭𑀲𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀩𑁆𑀩𑁂 𑀳𑁂𑀢𑀽 𑀲𑀳 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀫𑁄𑀳𑀸𑀤𑀻𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸𑀢𑀺 𑀤𑁄𑀲𑀲𑁆𑀲𑀧𑀺 𑀲𑀢𑁆𑀢𑀭𑀲𑀳𑀺 𑀧𑀘𑁆𑀘𑀬𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 𑀤𑁄𑀲𑀲𑁆𑀲𑀧𑀺 𑀕𑀭𑀼𑀓𑀭𑀡𑀁 𑀧𑀸𑀴𑀺𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. ‘‘𑀅𑀓𑀼𑀲𑀮𑁄 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀦𑀸𑀫 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁪) 𑀏𑀢𑁆𑀣𑀸𑀧𑀺 𑀮𑁄𑀪𑀤𑁄𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁄𑀲𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀧𑀺 𑀦𑀺𑀯𑀸𑀭𑁂𑀢𑀩𑁆𑀩𑀸. 𑀦 𑀘 ‘‘𑀲𑁂𑀲𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀦𑀺𑀯𑀸𑀭𑀺𑀢𑁄, 𑀅𑀣 𑀔𑁄 𑀲𑀗𑁆𑀕𑀳𑀺𑀢𑁄 𑀧𑀼𑀭𑁂𑀚𑀸𑀢𑀸𑀤𑀻𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑁂𑀲𑀢𑁆𑀢𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀤𑁄𑀲𑀁 𑀮𑁄𑀪𑀫𑁄𑀳𑁂𑀳𑀺 𑀲𑀳 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑀼𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀤𑁄𑀲𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀧𑀞𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁂𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀁, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀬𑀣𑀸𑀬𑁄𑀕𑀁 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀦 𑀳𑀺 𑀏𑀢𑀁 𑀏𑀓𑀧𑀘𑁆𑀘𑀬𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑁄 𑀘 𑀏𑀢𑁂𑀦 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀪𑁂𑀤𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀬𑁄𑀢𑀺 𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀢𑁂 𑀏𑀯 𑀕𑀳𑁂𑀢𑁆𑀯𑀸 𑀆𑀳 ¶ ‘‘𑀘𑀢𑀽𑀲𑀼 𑀔𑀦𑁆𑀥𑁂𑀲𑀽’’𑀢𑀺. 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀢𑁂𑀳𑀺 𑀘𑁂𑀯 𑀓𑀫𑁆𑀫𑀸𑀳𑀸𑀭𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺𑀥𑀸𑀢𑀺 𑀇𑀤𑀫𑁂𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀫𑀺𑀘𑁆𑀙𑀸𑀯𑀸𑀘𑀸𑀤𑀬𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀬 𑀫𑀕𑁆𑀕𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬 𑀫𑀕𑁆𑀕𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄. 𑀬𑀤𑀺 𑀘 𑀪𑀯𑁂𑀬𑁆𑀬, 𑀧𑀜𑁆𑀳𑀸𑀯𑀸𑀭𑁂 ‘‘𑀓𑀫𑁆𑀫𑀧𑀘𑁆𑀘𑀬𑀸 𑀫𑀕𑁆𑀕𑁂 𑀢𑀻𑀡𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀫𑀺𑀘𑁆𑀙𑀸𑀯𑀸𑀘𑀸𑀤𑀻𑀦𑀁 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑁄 𑀦 𑀯𑀢𑁆𑀢𑀩𑁆𑀩𑁄. 𑀧𑀝𑁆𑀞𑀸𑀦𑀲𑀁𑀯𑀡𑁆𑀡𑀦𑀸 𑀳𑁂𑀲𑀸. 𑀲𑁂𑀲𑀧𑀘𑁆𑀘𑀬𑀪𑀸𑀯𑁄 𑀘 𑀘𑁂𑀢𑀦𑀸𑀬 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀯𑀘𑀦𑁂𑀦 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀦 𑀇𑀤𑀁 𑀧𑀞𑀺𑀢𑀩𑁆𑀩𑀦𑁆𑀢𑀺 𑀦 𑀧𑀞𑀦𑁆𑀢𑀺. ‘‘𑀅𑀳𑀺𑀭𑀺𑀓𑀁…𑀧𑁂… 𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺𑀆𑀤𑀺𑀫𑀧𑀸𑀞𑁄, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀢𑀁 𑀢𑀢𑁆𑀣 𑀅𑀧𑀞𑀺𑀢𑁆𑀯𑀸 ‘‘𑀯𑀺𑀘𑀺𑀓𑀺𑀘𑁆𑀙𑀸𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀢𑀢𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸’’𑀢𑀺 𑀏𑀯𑀫𑁂𑀢𑁆𑀣 𑀧𑀞𑀦𑁆𑀢𑀺.

‘‘𑀘𑀢𑁆𑀢𑀸𑀭𑀺 ¶ 𑀫𑀳𑀸𑀪𑀽𑀢𑀸𑀦𑀺 𑀆𑀭𑀫𑁆𑀫𑀡…𑀧𑁂… 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀤𑀲𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀼𑀦 𑀢𑀣𑀸 𑀳𑀤𑀬𑀯𑀢𑁆𑀣𑀽’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀫𑀳𑀸𑀪𑀽𑀢𑀸𑀦𑀺 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 ‘‘𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀥𑀸 𑀯𑀢𑁆𑀣𑀼’’𑀦𑁆𑀢𑀺 𑀧𑀞𑀦𑁆𑀢𑀺. 𑀏𑀢𑁆𑀢𑀓𑀫𑁂𑀯𑁂𑀢𑁆𑀣 𑀅𑀧𑀼𑀩𑁆𑀩𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀲𑀳𑀚𑀸𑀢𑀦𑀺𑀲𑁆𑀲𑀬𑁂𑀳𑀺 𑀅𑀧𑀼𑀩𑁆𑀩𑀁 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀬𑀢𑀦𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄, 𑀆𑀭𑀫𑁆𑀫𑀡𑀸𑀦𑀺 𑀧𑀦𑁂𑀢𑀸𑀦𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁂 𑀯𑀼𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀸𑀢𑀺𑀓𑁆𑀓𑀦𑁆𑀢𑀧𑀘𑁆𑀘𑀬𑀸𑀧𑁂𑀓𑁆𑀔𑀸 𑀏𑀢𑁂𑀲𑀁 𑀅𑀧𑀼𑀩𑁆𑀩𑀢𑀸 𑀦𑀢𑁆𑀣𑀻𑀢𑀺. 𑀇𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀻𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀧𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀧𑀼𑀩𑁆𑀩𑀲𑁆𑀲 𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀪𑀸𑀯𑀁 𑀫𑀜𑁆𑀜𑀫𑀸𑀦𑁂𑀦 𑀅𑀧𑀼𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸. 𑀢𑀲𑁆𑀲 𑀧𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀸𑀯𑀢𑁄 𑀅𑀧𑀼𑀩𑁆𑀩𑀢𑀸. 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀘 𑀧𑀼𑀭𑁂𑀚𑀸𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄.

𑀆𑀓𑀸𑀭𑁄𑀢𑀺 𑀫𑀽𑀮𑀸𑀤𑀺𑀆𑀓𑀸𑀭𑁄. 𑀅𑀢𑁆𑀣𑁄𑀢𑀺 𑀢𑁂𑀦𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸. ‘‘𑀬𑁂𑀦𑀸𑀓𑀸𑀭𑁂𑀦𑀸’’𑀢𑀺 𑀏𑀢𑀲𑁆𑀲 𑀯𑀸 𑀅𑀢𑁆𑀣𑀯𑀘𑀦𑀁 ‘‘𑀬𑁂𑀦𑀢𑁆𑀣𑁂𑀦𑀸’’𑀢𑀺. 𑀯𑀺𑀧𑀸𑀓𑀳𑁂𑀢𑀽𑀲𑀼𑀬𑁂𑀯 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 𑀅𑀫𑁄𑀳𑀯𑀺𑀧𑀸𑀓𑀳𑁂𑀢𑀼𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄 𑀘 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁂𑀬𑁂𑀯 𑀮𑀩𑁆𑀪𑀢𑀻𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀧𑀞𑀺𑀢𑁆𑀯𑀸 ‘‘𑀙𑀳𑀸𑀓𑀸𑀭𑁂𑀳𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀢𑀁 𑀧𑀦 𑀧𑀞𑀺𑀢𑁆𑀯𑀸 ‘‘𑀲𑀢𑁆𑀢𑀳𑀸𑀓𑀸𑀭𑁂𑀳𑀻’’𑀢𑀺 𑀧𑀞𑀦𑁆𑀢𑀺. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀳𑁂𑀢𑁆𑀣 𑀯𑀼𑀘𑁆𑀘𑀢𑀺, 𑀦 𑀘 𑀬𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺.

𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑁂𑀲𑀼 𑀬𑀁 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀦 𑀆𑀲𑁂𑀯𑀦𑀧𑀘𑁆𑀘𑀬𑁄. 𑀬𑀜𑁆𑀘 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀢𑀁 𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀯𑀸’’𑀢𑀺 𑀯𑀼𑀢𑁆𑀢𑀁 ¶ , 𑀓𑀫𑁆𑀫𑀧𑀘𑁆𑀘𑀬𑁄𑀧𑀺 𑀧𑀦 𑀲𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀫𑁆𑀫𑀧𑀘𑁆𑀘𑀬𑁄 𑀘𑀸’’𑀢𑀺 𑀧𑀞𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀬𑁂𑀪𑀼𑀬𑁆𑀬𑁂𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀯 𑀳𑁄𑀢𑀺, 𑀓𑁄𑀘𑀺 𑀧𑀦𑁂𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑁄 𑀘 𑀳𑁄𑀢𑀻𑀢𑀺. ‘‘𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂 𑀧𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑁆𑀢𑀺 𑀬𑀤𑀺 𑀓𑀜𑁆𑀘𑀺 𑀆𑀭𑀫𑁆𑀫𑀡𑀪𑀽𑀢𑀁 𑀧𑀼𑀭𑁂𑀚𑀸𑀢𑀁 𑀯𑀼𑀢𑁆𑀢𑀁, 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀮𑀩𑁆𑀪𑀢𑀻𑀢𑀺 𑀲𑀸 𑀦 𑀮𑀩𑁆𑀪𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀣 𑀧𑀦 ¶ 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀢𑁄 𑀅𑀜𑁆𑀜𑀁 𑀯𑀢𑁆𑀣𑀼𑀪𑀸𑀯𑀭𑀳𑀺𑀢𑀸𑀭𑀫𑁆𑀫𑀡𑀫𑁂𑀯 ‘‘𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀦 𑀮𑀩𑁆𑀪𑀢𑀻𑀢𑀺 ‘‘𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀦 𑀮𑀩𑁆𑀪𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀢𑁄 𑀉𑀢𑁆𑀢𑀭𑀺𑀧𑀻𑀢𑀺 𑀧𑀼𑀭𑁂𑀚𑀸𑀢𑀢𑁄 𑀧𑀭𑀢𑁄𑀧𑀻𑀢𑀺 𑀅𑀢𑁆𑀣𑁄, 𑀇𑀢𑁄 𑀯𑀸 𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀯𑀸 𑀉𑀢𑁆𑀢𑀭𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀤𑀺 𑀘 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀓𑀫𑁆𑀫𑀸𑀤𑀻𑀲𑀼 𑀧𑀦 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀦 𑀯𑀓𑁆𑀔𑀢𑀻𑀢𑀺 𑀧𑀼𑀭𑀺𑀫𑁄𑀬𑁂𑀯𑁂𑀢𑁆𑀣 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄.

‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀧𑀘𑁆𑀘𑀬𑁄𑀯𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁄𑀧𑀺 𑀧𑀦 𑀲𑁄 𑀳𑁄𑀢𑀺, 𑀢𑁂𑀦 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀻’’𑀢𑀺 𑀧𑀞𑀦𑁆𑀢𑀺.

‘‘𑀬𑀣𑀸𑀦𑀼𑀭𑀽𑀧𑀁 𑀛𑀸𑀦𑀧𑀘𑁆𑀘𑀬𑁂 𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀳𑁂𑀢𑀼𑀅𑀥𑀺𑀧𑀢𑀻𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀬𑀣𑀸𑀦𑀼𑀭𑀽𑀧𑀁 𑀛𑀸𑀦𑀧𑀘𑁆𑀘𑀬𑁂 𑀯𑀼𑀢𑁆𑀢𑀸𑀦𑀁 𑀫𑀕𑁆𑀕𑀯𑀚𑁆𑀚𑀸𑀦𑀁 𑀦𑀯𑀦𑁆𑀦𑀁 𑀳𑁂𑀢𑀼𑀅𑀥𑀺𑀧𑀢𑀺𑀛𑀸𑀦𑀸𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦𑀸’’𑀢𑀺 𑀧𑀘𑁆𑀙𑀺𑀫𑀧𑀸𑀞𑁄, 𑀢𑁂𑀲𑀼 𑀯𑀺𑀘𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑁄 𑀕𑀳𑁂𑀢𑀩𑁆𑀩𑁄.

𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀢𑀸𑀬 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘 𑀲𑀤𑀺𑀲𑁄 𑀧𑀘𑁆𑀘𑀬𑀪𑀸𑀯𑁄 𑀧𑀘𑁆𑀘𑀬𑀲𑀪𑀸𑀕𑀢𑀸, 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀢𑀸 𑀧𑀘𑁆𑀘𑀬𑀯𑀺𑀲𑀪𑀸𑀕𑀢𑀸. ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦𑀸’’𑀢𑀺 𑀯𑀘𑀦𑀢𑁄 𑀳𑁂𑀢𑀼𑀆𑀤𑀻𑀦𑀁 𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀪𑀸𑀯𑁂𑀦 𑀲𑀪𑀸𑀕𑀢𑀸, 𑀲𑀳𑀚𑀸𑀢𑀸𑀲𑀳𑀚𑀸𑀢𑀸𑀦𑀁 𑀳𑁂𑀢𑀼𑀆𑀭𑀫𑁆𑀫𑀡𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀢𑀸𑀢𑀺 𑀏𑀯𑀫𑀸𑀤𑀺𑀦𑀸 𑀉𑀧𑀸𑀬𑁂𑀦 𑀲𑀪𑀸𑀕𑀢𑀸 𑀯𑀺𑀲𑀪𑀸𑀕𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀚𑀦𑀓𑀸𑀬𑁂𑀯, 𑀦 𑀅𑀚𑀦𑀓𑀸𑀢𑀺 𑀚𑀦𑀓𑀪𑀸𑀯𑀧𑁆𑀧𑀥𑀸𑀦𑀸𑀬𑁂𑀯 𑀳𑀼𑀢𑁆𑀯𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑀧𑁆𑀧𑀥𑀸𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀲𑀁 𑀳𑁂𑀢𑀼𑀆𑀤𑀬𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀳𑀺 𑀯𑀺𑀦𑀸 𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀘 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀁 𑀉𑀪𑀬𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀦 𑀳𑀺 𑀢𑁂 𑀅𑀦𑀦𑁆𑀢𑀭𑀸𑀤𑀬𑁄 𑀯𑀺𑀬 𑀚𑀦𑀦𑁂𑀦𑁂𑀯 𑀧𑀯𑀢𑁆𑀢𑀺𑀁 𑀓𑀭𑁄𑀦𑁆𑀢𑀻𑀢𑀺.

𑀲𑀩𑁆𑀩𑁂𑀲𑀁 ¶ 𑀞𑀸𑀦𑀁 𑀓𑀸𑀭𑀡𑀪𑀸𑀯𑁄 𑀲𑀩𑁆𑀩𑀝𑁆𑀞𑀸𑀦𑀁, 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀩𑁆𑀩𑀝𑁆𑀞𑀸𑀦𑀺𑀓𑀸. 𑀉𑀧𑀦𑀺𑀲𑁆𑀲𑀬𑀁 𑀪𑀺𑀦𑁆𑀤𑀦𑁆𑀢𑁂𑀦 𑀢𑀬𑁄𑀧𑀺 𑀉𑀧𑀦𑀺𑀲𑁆𑀲𑀬𑀸 𑀯𑀢𑁆𑀢𑀩𑁆𑀩𑀸, 𑀅𑀪𑀺𑀦𑁆𑀤𑀺𑀢𑁆𑀯𑀸 ¶ 𑀯𑀸 𑀉𑀧𑀦𑀺𑀲𑁆𑀲𑀬𑀕𑁆𑀕𑀳𑀡𑀫𑁂𑀯 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀪𑀺𑀦𑁆𑀤𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑁆𑀲 𑀭𑀽𑀧𑀸𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀦𑀁 𑀧𑀦 𑀧𑀼𑀩𑁆𑀩𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀕𑁆𑀕𑀳𑀡𑁂𑀳𑀺 𑀕𑀳𑀺𑀢𑀢𑁆𑀢𑀸 𑀢𑁂𑀲𑀼 𑀏𑀓𑀤𑁂𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂𑀦 𑀇𑀢𑀭𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀧𑀺 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀅𑀭𑀽𑀧𑀭𑀽𑀧𑀸𑀦𑀜𑁆𑀜𑁂𑀯 𑀬𑀣𑀸𑀓𑁆𑀓𑀫𑁂𑀦 𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀏𑀢𑁆𑀣 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀅𑀦𑀦𑁆𑀢𑀭𑀸𑀤𑀻𑀲𑀼 𑀏𑀯 𑀯𑀢𑁆𑀢𑀩𑁆𑀩𑁄 𑀢𑀁𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀦 𑀘 𑀬𑀼𑀕𑀴𑀪𑀸𑀯𑁄 𑀧𑀘𑁆𑀙𑀸𑀚𑀸𑀢𑁂𑀦 𑀲𑀳 𑀓𑀣𑀦𑁂 𑀓𑀸𑀭𑀡𑀁 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀤𑀲𑁆𑀲𑀦𑀫𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀢𑀁 𑀢𑀢𑁆𑀣 𑀧𑀞𑀺𑀢𑁆𑀯𑀸 ‘‘𑀧𑀘𑁆𑀙𑀸𑀚𑀸𑀢𑁄𑀧𑀺 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑁄 𑀭𑀽𑀧𑀸𑀦𑀁𑀬𑁂𑀯 𑀧𑀘𑁆𑀘𑀬𑀪𑀸𑀯𑀢𑁄’’𑀢𑀺 𑀧𑀞𑀦𑁆𑀢𑀺.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀘𑁆𑀙𑀸𑀯𑀸𑀭𑁄

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑀏𑀓𑁂𑀓𑀁 𑀢𑀺𑀓𑀤𑀼𑀓𑀦𑁆𑀢𑀺 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀜𑁆𑀘𑀸𑀢𑀺 𑀅𑀢𑁆𑀣𑁄, 𑀦 𑀢𑀺𑀓𑀤𑀼𑀓𑀦𑁆𑀢𑀺.

𑀧𑀘𑁆𑀘𑀬𑀸 𑀘𑁂𑀯𑀸𑀢𑀺 𑀬𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀘𑁆𑀘𑀢𑁆𑀣𑀁 𑀨𑀭𑀦𑁆𑀢𑀸 𑀓𑀼𑀲𑀮𑀸𑀤𑀺𑀧𑀘𑁆𑀘𑀬𑀸 𑀘𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑁂 𑀘 𑀔𑁄 𑀲𑀳𑀚𑀸𑀢𑀸𑀯𑀸’’𑀢𑀺. 𑀬𑁂𑀳𑀺 𑀧𑀦 𑀳𑁂𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑁂 𑀲𑀳𑀚𑀸𑀢𑀸𑀧𑀺 𑀳𑁄𑀦𑁆𑀢𑀺 𑀅𑀲𑀳𑀚𑀸𑀢𑀸𑀧𑀻𑀢𑀺. 𑀏𑀢𑁆𑀣 𑀧𑀝𑀺𑀘𑁆𑀘𑀲𑀳𑀚𑀸𑀢𑀯𑀸𑀭𑁂𑀳𑀺 𑀲𑀫𑀸𑀦𑀢𑁆𑀣𑁂𑀳𑀺 𑀧𑀝𑀺𑀘𑁆𑀘𑀲𑀳𑀚𑀸𑀢𑀸𑀪𑀺𑀥𑀸𑀦𑁂𑀳𑀺 𑀲𑀫𑀸𑀦𑀢𑁆𑀣𑀁 𑀩𑁄𑀥𑁂𑀦𑁆𑀢𑁂𑀦 𑀪𑀕𑀯𑀢𑀸 𑀧𑀘𑁆𑀙𑀺𑀫𑀯𑀸𑀭𑁂𑀦 𑀧𑀼𑀭𑀺𑀫𑀯𑀸𑀭𑁄, 𑀧𑀼𑀭𑀺𑀫𑀯𑀸𑀭𑁂𑀦 𑀘 𑀧𑀘𑁆𑀙𑀺𑀫𑀯𑀸𑀭𑁄 𑀘 𑀩𑁄𑀥𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀧𑀘𑁆𑀘𑀬𑀦𑀺𑀲𑁆𑀲𑀬𑀯𑀸𑀭𑁂𑀲𑀼 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁂𑀲𑀼 𑀘, 𑀏𑀯𑀜𑁆𑀘 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀁 𑀚𑀦𑀺𑀢𑀁 𑀳𑁄𑀢𑀻𑀢𑀺.

‘‘𑀢𑁂 𑀢𑁂 𑀧𑀦 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀓𑀼𑀲𑀮𑁄 𑀳𑁂𑀢𑀼 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁧) 𑀧𑀜𑁆𑀳𑀸𑀯𑀸𑀭𑀧𑀸𑀞𑁄𑀢𑀺 𑀧𑀫𑀸𑀤𑀮𑁂𑀔𑀸 ¶ 𑀏𑀲𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑀧𑀸𑀞𑀫𑁂𑀯 𑀧𑀞𑀦𑁆𑀢𑀺. 𑀧𑀼𑀭𑀺𑀫𑀯𑀸𑀭𑁂𑀲𑀼 𑀲𑀳𑀚𑀸𑀢𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁂𑀳𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀦𑀺𑀬𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀬𑀫𑁂 𑀓𑀼𑀲𑀮𑀸𑀤𑀻𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀉𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, 𑀦 𑀢𑀢𑁆𑀣 ‘‘𑀇𑀫𑁂 𑀦𑀸𑀫 𑀢𑁂 𑀥𑀫𑁆𑀫𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸’’𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ¶ 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁫) 𑀏𑀯𑀫𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑁂 𑀧𑀝𑀺𑀘𑁆𑀘𑀢𑁆𑀣𑀸𑀤𑀺𑀨𑀭𑀡𑀓𑀪𑀸𑀯𑁂 𑀳𑁂𑀢𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀳𑁂𑀢𑀸𑀤𑀺𑀧𑀘𑁆𑀘𑀬𑀸𑀦𑀁 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀦 𑀯𑀺𑀪𑀢𑁆𑀢𑀸, 𑀇𑀥 𑀧𑀦 ‘‘𑀲𑀺𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸 𑀓𑀼𑀲𑀮𑀸𑀤𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀦𑀺𑀘𑁆𑀙𑀺𑀢𑀸, 𑀦 𑀓𑁄𑀘𑀺 𑀧𑀼𑀘𑁆𑀙𑀸𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑁄 𑀅𑀦𑀺𑀘𑁆𑀙𑀺𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀧𑀺 𑀢𑁂 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀯𑀺𑀪𑀢𑁆𑀢𑀸’’𑀢𑀺. 𑀧𑀜𑁆𑀳𑀸 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀲𑀩𑁆𑀩𑀢𑁆𑀣 𑀲𑀫𑀸𑀦𑀦𑁆𑀢𑀺 𑀦 𑀢𑀁 𑀲𑀦𑁆𑀥𑀸𑀬 𑀦𑀺𑀚𑁆𑀚𑀝𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀉𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀧𑀼𑀘𑁆𑀙𑀸𑀫𑀢𑁆𑀢𑁂𑀦𑁂𑀯 𑀉𑀧𑁆𑀧𑀢𑁆𑀢𑀺𑀬𑀸 𑀞𑀧𑀺𑀢𑀢𑁆𑀢𑀸 𑀧𑀓𑀸𑀲𑀺𑀢𑀢𑁆𑀢𑀸, 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀸 𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁨𑁫-𑁩𑁪. 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀯𑀺𑀥𑀺𑀧𑀼𑀘𑁆𑀙𑀸. 𑀓𑀺𑀁 𑀲𑀺𑀬𑀸𑀢𑀺 𑀏𑀲𑁄 𑀯𑀺𑀥𑀺 𑀓𑀺𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀲𑀺𑀬𑀸, 𑀅𑀣 𑀦 𑀲𑀺𑀬𑀸𑀢𑀺 𑀲𑀫𑁆𑀧𑀼𑀘𑁆𑀙𑀦𑀁 𑀯𑀸 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀯𑀤𑀢𑀺. 𑀓𑀺𑀫𑀺𑀤𑀁 𑀲𑀫𑁆𑀧𑀼𑀘𑁆𑀙𑀦𑀁 𑀦𑀸𑀫? 𑀲𑀫𑁂𑀘𑁆𑀘 𑀧𑀼𑀘𑁆𑀙𑀦𑀁, ‘‘𑀓𑀺𑀁 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬, 𑀅𑀣 𑀅𑀪𑀺𑀥𑀫𑁆𑀫’’𑀦𑁆𑀢𑀺 𑀅𑀜𑁆𑀜𑁂𑀦 𑀲𑀳 𑀲𑀫𑁆𑀧𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸, 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺 𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀧𑀘𑁆𑀘𑀬𑁂𑀲𑀼𑀧𑀺 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 𑀧𑀯𑀢𑁆𑀢𑀺𑀢𑁄 ‘‘𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀯𑀺𑀧𑀸𑀓𑀧𑀘𑁆𑀘𑀬𑀸, 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀢𑀣𑀸 𑀘 𑀲𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀯𑀺𑀧𑀸𑀓𑀧𑀘𑁆𑀘𑀬𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀪𑀯𑀦𑀲𑁆𑀲 𑀧𑀼𑀘𑁆𑀙𑀦𑀢𑁄 𑀓𑀼𑀲𑀮𑀸𑀦𑀁 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀢𑀁𑀢𑀁𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀝𑀺𑀘𑁆𑀘 𑀪𑀯𑀦𑀫𑀢𑁆𑀣𑀺𑀢𑀸 𑀏𑀢𑁆𑀣 𑀧𑀼𑀘𑁆𑀙𑀺𑀢𑀸, 𑀅𑀣 𑀔𑁄 𑀉𑀧𑁆𑀧𑀢𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀧𑁆𑀧𑀢𑁆𑀢𑀺𑀬𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺, 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀲𑀤𑁄𑀲𑁄𑀢𑀺 ‘‘𑀅𑀣 𑀯𑀸’’𑀢𑀺 𑀅𑀢𑁆𑀣𑀦𑁆𑀢𑀭𑀯𑀘𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀣 ¶ ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀲𑀺𑀬𑀸 𑀏𑀢’’𑀦𑁆𑀢𑀺 𑀢𑀲𑁆𑀲𑀸 𑀳𑁂𑀢𑀼𑀧𑀘𑁆𑀘𑀬𑀸 𑀪𑀯𑀦𑀧𑀼𑀘𑁆𑀙𑀦𑀁, ‘‘𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑀲𑁆𑀲𑀸 ‘‘𑀲𑀺𑀬𑀸 𑀏𑀢’’𑀦𑁆𑀢𑀺 𑀪𑀯𑀦𑀧𑀼𑀘𑁆𑀙𑀦𑀜𑁆𑀘 𑀦 𑀬𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀢𑀜𑁆𑀳𑀺 𑀦𑀺𑀘𑁆𑀙𑀺𑀢𑀫𑁂𑀯𑀸𑀢𑀺. 𑀢𑀲𑁆𑀫𑀸 𑀅𑀦𑀦𑀼𑀚𑀸𑀦𑀺𑀢𑁆𑀯𑀸 ¶ ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀦𑀁 𑀓𑀺𑀁 𑀲𑀺𑀬𑀸𑀢𑀺 𑀧𑀼𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀸 𑀇𑀤𑀫𑁆𑀧𑀺 𑀲𑀫𑁆𑀧𑀼𑀘𑁆𑀙𑀦𑀫𑁂𑀯, 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀺𑀁 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀲𑀺𑀬𑀸𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀲𑁆𑀲 𑀲𑀫𑁆𑀪𑀯𑀁 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀏𑀯𑀁 𑀉𑀧𑁆𑀧𑀚𑁆𑀚𑀦𑀁 𑀲𑀺𑀬𑀸 𑀲𑀫𑁆𑀪𑀯𑁂𑀬𑁆𑀬𑀸’’𑀢𑀺, 𑀅𑀬𑀁 𑀦𑀬𑁄 𑀲𑀺𑀬𑀸𑀲𑀤𑁆𑀤𑀲𑁆𑀲 𑀧𑀘𑁆𑀙𑀸𑀬𑁄𑀚𑀦𑁂. 𑀬𑀣𑀸𑀞𑀸𑀦𑁂𑀬𑁂𑀯 𑀧𑀦 𑀞𑀺𑀢𑀸 ‘‘𑀲𑀺𑀬𑀸’’𑀢𑀺 𑀏𑀲𑀸 𑀲𑀸𑀫𑀜𑁆𑀜𑀧𑀼𑀘𑁆𑀙𑀸, 𑀢𑀸𑀬 𑀧𑀦 𑀧𑀼𑀘𑁆𑀙𑀸𑀬 ‘‘𑀇𑀤𑀁 𑀦𑀸𑀫 𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀲𑁆𑀲𑀸𑀬𑁂𑀯 𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀧𑀼𑀘𑁆𑀙𑀢𑀺, 𑀏𑀯𑀁 𑀯𑀺𑀲𑁂𑀲𑀺𑀢𑀩𑁆𑀩𑀯𑀺𑀲𑁂𑀲𑀦𑀪𑀸𑀯𑁂𑀦 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸 𑀏𑀓𑀸𑀬𑁂𑀯 𑀧𑀼𑀘𑁆𑀙𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀕𑀫𑀦𑀼𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀕𑀫𑀦𑀲𑁆𑀲 𑀲𑀫𑀸𑀦𑀓𑀢𑁆𑀢𑀼𑀓𑀧𑀘𑁆𑀙𑀺𑀫𑀓𑀸𑀮𑀓𑀺𑀭𑀺𑀬𑀸𑀧𑁂𑀓𑁆𑀔𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀧𑀝𑀺𑀕𑀫𑀦𑀼𑀧𑁆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀸 𑀦𑀢𑁆𑀣𑀺, 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺 𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀅𑀢𑁆𑀢𑀧𑀝𑀺𑀮𑀸𑀪𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀕𑀫𑀦𑀼𑀧𑁆𑀧𑀢𑁆𑀢𑀺𑀓𑀺𑀭𑀺𑀬𑀸𑀦𑀫𑁆𑀧𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀯𑁄𑀳𑀸𑀭𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀕𑀫𑀦𑀁 𑀯𑀸 𑀉𑀧𑁆𑀧𑀢𑁆𑀢𑀺 𑀏𑀯𑀸𑀢𑀺 𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀕𑀫𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀧𑀝𑀺𑀉𑀧𑁆𑀧𑀚𑁆𑀚𑀦𑀁 𑀲𑀫𑀸𑀦𑀓𑀺𑀭𑀺𑀬𑀸. 𑀧𑀝𑀺𑀓𑀭𑀡𑀜𑁆𑀳𑀺 𑀧𑀝𑀺𑀲𑀤𑁆𑀤𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀓𑀼𑀲𑀮𑀁 𑀥𑀫𑁆𑀫’’𑀦𑁆𑀢𑀺 𑀉𑀧𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀁 𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀝𑀺𑀘𑁆𑀘 𑀢𑀤𑀸𑀬𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀕𑀦𑁆𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄, 𑀢𑁂𑀦 𑀧𑀝𑀺𑀘𑁆𑀘𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀪𑀺𑀫𑀼𑀔𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀝𑀺𑀕𑀫𑀦𑀁, 𑀢𑀁 𑀓𑀢𑁆𑀯𑀸𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑁄𑀢𑀺.

𑁩𑁫-𑁩𑁮. 𑀢𑀸𑀲𑀼 𑀧𑀸𑀴𑀺𑀬𑀁 𑀤𑁆𑀯𑁂𑀬𑁂𑀯 𑀤𑀲𑁆𑀲𑀺𑀢𑀸𑀢𑀺 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀏𑀓𑀫𑀽𑀮𑀓𑀸𑀤𑀺𑀪𑀸𑀯𑁄 𑀧𑀼𑀘𑁆𑀙𑀸𑀦𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀧𑀘𑁆𑀘𑀬𑀸𑀦𑀁 𑀧𑀦 𑀯𑀲𑁂𑀦 𑀲𑀩𑁆𑀩𑀧𑀞𑀫𑁄 𑀧𑀘𑁆𑀘𑀬𑀦𑁆𑀢𑀭𑁂𑀦 𑀅𑀯𑁄𑀫𑀺𑀲𑁆𑀲𑀓𑀢𑁆𑀢𑀸 𑀲𑀼𑀤𑁆𑀥𑀺𑀓𑀦𑀬𑁄, 𑀤𑀼𑀢𑀺𑀬𑁄 𑀆𑀭𑀫𑁆𑀫𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑁂𑀢𑀼 𑀏𑀯 𑀏𑀓𑀫𑀽𑀮𑀓𑀦𑁆𑀢𑀺 𑀓𑀢𑁆𑀯𑀸 𑀏𑀓𑀫𑀽𑀮𑀓𑀦𑀬𑁄. 𑀏𑀯𑀁 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑀸𑀤𑀻𑀦𑀁 𑀅𑀥𑀺𑀧𑀢𑀺𑀆𑀤𑀻𑀦𑀁 𑀫𑀽𑀮𑀪𑀸𑀯𑀢𑁄 𑀤𑀼𑀓𑀫𑀽𑀮𑀓𑀸𑀤𑀬𑁄 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀯𑀻𑀲𑀢𑀺𑀫𑀽𑀮𑀓𑀦𑀬𑁄 𑀘 𑀢𑀢𑁄 𑀧𑀭𑀁 𑀫𑀽𑀮𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀢𑀢𑁆𑀣 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁂𑀦 𑀏𑀓…𑀧𑁂… 𑀲𑀩𑁆𑀩𑀫𑀽𑀮𑀓𑀁 𑀧𑀘𑁆𑀘𑀬𑀕𑀫𑀦𑀁 ¶ 𑀧𑀸𑀴𑀺𑀕𑀫𑀦𑀁 𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀓…𑀧𑁂… 𑀲𑀩𑁆𑀩𑀫𑀽𑀮𑀓𑀁 𑀦𑀬𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦𑀸𑀢𑀺 𑀉𑀧𑀬𑁄𑀕𑁄 𑀯𑀸 ¶ , 𑀇𑀥 𑀘 𑀲𑀩𑁆𑀩𑀫𑀽𑀮𑀓𑀦𑁆𑀢𑀺 𑀘 𑀢𑁂𑀯𑀻𑀲𑀢𑀺𑀫𑀽𑀮𑀓𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀦𑀻𑀬𑁂 𑀯𑀓𑁆𑀔𑀢𑀺 ‘‘𑀬𑀣𑀸 𑀅𑀦𑀼𑀮𑁄𑀫𑁂 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀁…𑀧𑁂… 𑀬𑀸𑀯 𑀢𑁂𑀯𑀻𑀲𑀢𑀺𑀫𑀽𑀮𑀓𑀁, 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁪𑁨-𑁪𑁪).

𑁩𑁯-𑁪𑁦. ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀬𑁄𑀲𑀸𑀦𑁄 𑀏𑀓𑀫𑀽𑀮𑀓𑀦𑀬𑁄 𑀤𑀲𑁆𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀯𑀺𑀦𑀬𑁂 𑀯𑀺𑀬 𑀘𑀓𑁆𑀓𑀩𑀦𑁆𑀥𑀦𑀯𑀲𑁂𑀦 𑀧𑀸𑀴𑀺𑀕𑀢𑀺 𑀆𑀧𑀚𑁆𑀚𑀢𑀺, 𑀦 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦. 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀘 𑀇𑀥 𑀅𑀪𑀺𑀥𑀫𑁆𑀫𑁂 𑀧𑀸𑀴𑀺 𑀕𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀢𑀻𑀡𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀦𑀯, 𑀆𑀭𑀫𑁆𑀫𑀡𑁂 𑀢𑀻𑀡𑀻’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀺𑀫𑀁 𑀲𑁄𑀥𑁂𑀢𑁆𑀯𑀸𑀯 𑀧𑀸𑀴𑀺 𑀧𑀯𑀢𑁆𑀢𑀸. 𑀬𑁄 𑀘𑁂𑀢𑁆𑀣 ‘‘𑀏𑀓𑀫𑀽𑀮𑀓𑀦𑀬𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑀼𑀤𑁆𑀥𑀺𑀓𑀦𑀬𑁄𑀯. 𑀲𑁄 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦 𑀮𑀩𑁆𑀪𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑀸𑀤𑀻𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑁂𑀧𑀺 𑀧𑀘𑁆𑀘𑀬𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑁂𑀦 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀲𑀼𑀤𑁆𑀥𑀺𑀓𑀢𑁄 𑀯𑀺𑀲𑁂𑀲𑀢𑁆𑀣𑁄 𑀮𑀩𑁆𑀪𑀢𑀺, 𑀢𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀲𑀼𑀤𑁆𑀥𑀺𑀓𑀦𑀬𑁄 𑀦 𑀤𑀲𑁆𑀲𑀺𑀢𑁄𑀢𑀺, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸…𑀧𑁂… 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁩𑁯) 𑀅𑀬𑀁 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀓𑁂 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄 𑀏𑀓𑀫𑀽𑀮𑀓𑀦𑀬𑁄 𑀤𑀝𑁆𑀞𑀩𑁆𑀩𑁄. ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀯𑀸 𑀏𑀓𑀫𑀽𑀮𑀓𑁂𑀲𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑁆𑀲 𑀫𑀽𑀮𑀓𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀦𑀺 𑀲𑀁𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀫𑀽𑀮𑀓𑀲𑁆𑀲𑀸𑀯𑀲𑀸𑀦𑁂𑀦 𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸 𑀲𑀳𑀚𑀸𑀢𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀢𑀺 𑀇𑀤𑀁 𑀫𑀽𑀮𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀦𑀁 𑀲𑀁𑀔𑀺𑀧𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀲𑀼𑀤𑁆𑀥𑀺𑀓𑀤𑀲𑁆𑀲𑀦𑀁, 𑀦𑀸𑀧𑀺 𑀲𑀩𑁆𑀩𑀫𑀽𑀮𑀓𑁂 𑀓𑀢𑀺𑀧𑀬𑀧𑀘𑁆𑀘𑀬𑀤𑀲𑁆𑀲𑀦𑀁.

𑁪𑁧. 𑀢𑀢𑁄 𑀦𑀺𑀲𑁆𑀲𑀬𑀸𑀤𑀻𑀦𑀺 𑀫𑀽𑀮𑀸𑀦𑀺𑀧𑀺 𑀲𑀁𑀔𑀺𑀧𑀺𑀢𑁆𑀯𑀸 𑀅𑀯𑀺𑀕𑀢𑀫𑀽𑀮𑀓𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑀲𑁆𑀫𑀺𑀜𑁆𑀘 𑀲𑀼𑀤𑁆𑀥𑀺𑀓𑀲𑁆𑀲 𑀅𑀤𑀲𑁆𑀲𑀦𑁂𑀦 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀼𑀤𑁆𑀥𑀺𑀓𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀜𑀸𑀧𑀺𑀢𑁄 𑀳𑁄𑀢𑀺. 𑀦 𑀳𑀺 𑀆𑀤𑀺 𑀓𑀢𑁆𑀣𑀘𑀺 𑀲𑀁𑀔𑁂𑀧𑀦𑁆𑀢𑀭𑀕𑀢𑁄 𑀳𑁄𑀢𑀺. 𑀆𑀤𑀺𑀅𑀦𑁆𑀢𑁂𑀳𑀺 𑀫𑀚𑁆𑀛𑀺𑀫𑀸𑀦𑀁 𑀤𑀲𑁆𑀲𑀦𑀜𑁆𑀳𑀺 𑀲𑀗𑁆𑀔𑁂𑀧𑁄, 𑀆𑀤𑀺𑀢𑁄 𑀧𑀪𑀼𑀢𑀺 𑀓𑀢𑀺𑀘𑀺 ¶ 𑀯𑀢𑁆𑀯𑀸 𑀕𑀢𑀺𑀤𑀲𑁆𑀲𑀦𑀁 𑀯𑀸𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑀁 𑀯𑀢𑁆𑀯𑀸 ‘‘𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀁 ¶ . 𑀢𑁂𑀦 𑀑𑀲𑀸𑀦𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑀺. 𑀢𑀢𑀺𑀬𑀘𑀢𑀼𑀓𑁆𑀓𑀢𑁄 𑀧𑀪𑀼𑀢𑀺 𑀯𑀸 𑀧𑀜𑁆𑀘𑀓𑀫𑀽𑀮𑀸𑀦𑀺 𑀲𑀁𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀫𑀽𑀮𑀓𑀲𑁆𑀲 𑀅𑀯𑀲𑀸𑀦𑁂𑀦 𑀦𑀺𑀝𑁆𑀞𑀧𑁂𑀢𑀺.

𑀏𑀢𑁆𑀣 𑀘 𑀤𑀼𑀓𑀫𑀽𑀮𑀓𑀸𑀤𑀻𑀲𑀼 𑀬𑀣𑀸 𑀳𑁂𑀢𑀼𑀆𑀭𑀫𑁆𑀫𑀡𑀤𑀼𑀓𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀸 𑀧𑀘𑁆𑀘𑀬𑀸 𑀬𑁄𑀚𑀺𑀢𑀸, 𑀳𑁂𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀢𑀺𑀓𑀸𑀤𑀻𑀳𑀺 𑀘 𑀅𑀯𑀲𑁂𑀲𑀸𑀯𑀲𑁂𑀲𑀸, 𑀏𑀯𑀁 𑀳𑁂𑀢𑀼𑀅𑀥𑀺𑀧𑀢𑀺𑀤𑀼𑀓𑀸𑀤𑀻𑀳𑀺 𑀳𑁂𑀢𑀼𑀅𑀥𑀺𑀧𑀢𑀺𑀅𑀦𑀦𑁆𑀢𑀭𑀢𑀺𑀓𑀸𑀤𑀻𑀳𑀺 𑀘 𑀅𑀯𑀲𑁂𑀲𑀸𑀯𑀲𑁂𑀲𑀸 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀼𑀁. 𑀬𑀤𑀺 𑀘 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸𑀦𑀁 𑀫𑀽𑀮𑀪𑀸𑀯𑁂𑀦 𑀬𑁄𑀚𑀺𑀢𑀢𑁆𑀢𑀸 𑀳𑁂𑀢𑀼𑀫𑀽𑀮𑀓𑁂 𑀳𑁂𑀢𑀼𑀅𑀥𑀺𑀧𑀢𑀺𑀆𑀤𑀺𑀤𑀼𑀓𑀸𑀦𑀁 𑀅𑀥𑀺𑀧𑀢𑀺𑀫𑀽𑀮𑀓𑀸𑀤𑀻𑀲𑀼 𑀅𑀥𑀺𑀧𑀢𑀺𑀳𑁂𑀢𑀼𑀆𑀤𑀺𑀤𑀼𑀓𑁂𑀳𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀢𑁂 𑀏𑀯 𑀳𑀺 𑀧𑀘𑁆𑀘𑀬𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀤𑀼𑀓𑀸𑀤𑀻𑀦𑀁 𑀅𑀯𑀲𑁂𑀲𑀸𑀯𑀲𑁂𑀲𑁂𑀳𑀺, 𑀳𑁂𑀢𑀼𑀫𑀽𑀮𑀓𑁂 𑀘 𑀳𑁂𑀢𑀼𑀅𑀥𑀺𑀧𑀢𑀺𑀅𑀦𑀦𑁆𑀢𑀭𑀢𑀺𑀓𑀸𑀤𑀻𑀦𑀁 𑀅𑀯𑀲𑁂𑀲𑀸𑀯𑀲𑁂𑀲𑁂𑀳𑀺 𑀬𑁄𑀚𑀦𑁂 𑀅𑀢𑁆𑀣𑀺 𑀯𑀺𑀲𑁂𑀲𑁄𑀢𑀺. 𑀬𑀲𑁆𑀫𑀸 𑀧𑀦 𑀏𑀯𑀁 𑀬𑁄𑀚𑀺𑀬𑀫𑀸𑀦𑁂𑀲𑀼𑀧𑀺 𑀲𑀼𑀔𑀕𑁆𑀕𑀳𑀡𑀁 𑀦 𑀳𑁄𑀢𑀺, 𑀦 𑀘 𑀬𑀣𑀸𑀯𑀼𑀢𑁆𑀢𑀸𑀬 𑀬𑁄𑀚𑀦𑀸𑀬 𑀲𑀩𑁆𑀩𑀸 𑀲𑀸 𑀬𑁄𑀚𑀦𑀸 𑀧𑀜𑁆𑀜𑀯𑀢𑀸 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀢𑀲𑁆𑀫𑀸 𑀢𑀣𑀸 𑀅𑀬𑁄𑀚𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦𑁂𑀯 𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸𑀯𑀺𑀥𑀸𑀦𑁂 𑀳𑀺 𑀪𑀕𑀯𑀸𑀯 𑀧𑀫𑀸𑀡𑀦𑁆𑀢𑀺. 𑀕𑀡𑀦𑀸𑀕𑀸𑀣𑀸 𑀆𑀤𑀺𑀫𑀧𑀸𑀞𑁂 𑀓𑀸𑀘𑀺 𑀯𑀺𑀭𑀼𑀤𑁆𑀥𑀸, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀕𑀡𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

‘‘𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀸𑀦𑀁 𑀲𑀢𑁂𑀦 𑀲𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀓𑁂𑀲𑀜𑁆𑀘𑀺 𑀧𑁄𑀢𑁆𑀣𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑁂𑀲𑀼𑀘𑀺 𑀧𑀦 𑀏𑀓𑁂𑀓𑁄 𑀤𑀼𑀓𑁄 𑀤𑁆𑀯𑀸𑀯𑀻𑀲𑀢𑀺𑀬𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀬𑁄𑀚𑀺𑀢𑁄, 𑀢𑀜𑁆𑀘 𑀕𑀫𑀦𑀁 𑀬𑀼𑀢𑁆𑀢𑀁. 𑀦 𑀳𑀺 𑀢𑀢𑁆𑀣 𑀢𑀺𑀓𑀲𑁆𑀲 𑀬𑁄𑀚𑀦𑀸 𑀅𑀢𑁆𑀣𑀺, 𑀅𑀣 𑀔𑁄 𑀢𑀺𑀓𑀸𑀦𑀁 𑀏𑀓𑁂𑀓𑁂𑀦 𑀧𑀤𑁂𑀦 𑀤𑀼𑀓𑀲𑁆𑀲𑀸𑀢𑀺. 𑀢𑀢𑁆𑀣 𑀙𑀲𑀝𑁆𑀞𑀺𑀬𑀸 𑀢𑀺𑀓𑀧𑀤𑁂𑀲𑀼 𑀏𑀓𑁂𑀓𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀙𑀲𑀝𑁆𑀞𑀺 𑀳𑁂𑀢𑀼𑀤𑀼𑀓𑀸, 𑀢𑀣𑀸 𑀲𑀳𑁂𑀢𑀼𑀓𑀤𑀼𑀓𑀸𑀤𑀬𑁄 𑀘𑀸𑀢𑀺 𑀤𑀼𑀓𑀸𑀦𑀁 𑀙𑀲𑀢𑀸𑀥𑀺𑀓𑀸𑀦𑀺 𑀙𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀲𑀢𑁆𑀢 𑀯𑀸𑀭𑀸 𑀦𑀬𑀸 𑀧𑀼𑀘𑁆𑀙𑀸 𑀘 𑀲𑀩𑁆𑀩𑀸 𑀤𑀼𑀓𑀧𑀝𑁆𑀞𑀸𑀦𑁂 𑀳𑁂𑀢𑀼𑀤𑀼𑀓𑁂𑀦 𑀲𑀫𑀸𑀦𑀸.

‘‘𑀤𑀼𑀓𑀲𑀢𑁂 𑀏𑀓𑁂𑀓𑀁 𑀤𑀼𑀓𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 𑀓𑁂𑀲𑀜𑁆𑀘𑀺 𑀧𑁄𑀢𑁆𑀣𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀬𑀼𑀢𑁆𑀢𑀕𑀫𑀦𑁂𑀲𑀼 𑀏𑀓𑁂𑀓𑁄 𑀢𑀺𑀓𑁄 𑀤𑀼𑀓𑀲𑀢𑁂𑀦 𑀬𑁄𑀚𑀺𑀢𑁄. 𑀢𑀢𑁆𑀣 𑀳𑁂𑀢𑀼𑀧𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁄 𑀏𑀓𑁄 𑀓𑀼𑀲𑀮𑀢𑁆𑀢𑀺𑀓𑁄, 𑀢𑀣𑀸 𑀦𑀳𑁂𑀢𑀼𑀧𑀤𑀁…𑀧𑁂… 𑀅𑀭𑀡𑀧𑀤𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀦𑀁 𑀤𑁆𑀯𑁂 ¶ 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀦𑀫𑁆𑀧𑀻𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀲𑀢𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑀦𑀬𑀧𑀼𑀘𑁆𑀙𑀸 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀫𑀸𑀦𑀸.

‘‘𑀙 ¶ 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀘𑀦𑀢𑁄 𑀧𑀦𑀸𑀢𑀺 𑀏𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀦𑀼𑀮𑁄𑀫𑀫𑁆𑀳𑀻’’𑀢𑀺 ‘‘𑀢𑀺𑀓𑀸𑀤𑀬𑁄 𑀙𑀦𑀬𑀸’’𑀢𑀺 𑀘 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀫𑁆𑀧𑀺 𑀅𑀦𑀼𑀮𑁄𑀫𑀁 𑀲𑀳 𑀕𑀳𑁂𑀢𑁆𑀯𑀸 ‘‘𑀙 𑀅𑀦𑀼𑀮𑁄𑀫𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀢𑀺𑀓𑀧𑀝𑁆𑀞𑀸𑀦𑀁 𑀲𑀳 𑀕𑀳𑁂𑀢𑁆𑀯𑀸 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭’’𑀦𑁆𑀢𑀺, 𑀢𑀣𑀸 𑀘𑀢𑀼𑀩𑁆𑀩𑀺𑀥𑀸𑀦𑀺 𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀦𑀺 𑀲𑀳 𑀕𑀳𑁂𑀢𑁆𑀯𑀸 ‘‘𑀤𑀼𑀓𑀼𑀢𑁆𑀢𑀫’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀲𑀢𑁆𑀢𑀧𑁆𑀧𑀪𑁂𑀤𑁂 𑀙𑀧𑀺 𑀏𑀢𑁂 𑀧𑀝𑁆𑀞𑀸𑀦𑀸 𑀧𑀝𑁆𑀞𑀸𑀦𑀦𑀬𑀸 𑀘𑀢𑀼𑀧𑁆𑀧𑀪𑁂𑀤𑀸 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺. 𑀏𑀯𑀜𑁆𑀳𑀺 𑀲𑀩𑁆𑀩𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀲𑀩𑁆𑀩𑁄 𑀧𑀘𑁆𑀘𑀬𑀸𑀦𑀼𑀮𑁄𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀧𑀘𑁆𑀘𑀦𑀻𑀬𑀕𑀸𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀲𑁂𑀲𑀺𑀢𑀩𑁆𑀩𑁂𑀳𑀺 𑀢𑀺𑀓𑁂𑀳𑀺 𑀧𑀝𑁆𑀞𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀁. 𑀤𑀼𑀓𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁. 𑀤𑀼𑀓𑀯𑀺𑀲𑁂𑀲𑀺𑀢𑀸 𑀯𑀸 𑀢𑀺𑀓𑀸 𑀤𑀼𑀓𑀢𑀺𑀓𑀸, 𑀤𑀼𑀓𑀢𑀺𑀓𑀸𑀦𑀁 𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑀸𑀤𑀺𑀯𑀺𑀲𑁂𑀲𑀺𑀢𑀲𑁆𑀲 𑀘𑁂𑀢𑁆𑀣 𑀢𑀺𑀓𑀸𑀤𑀺𑀧𑀤𑀲𑁆𑀲 𑀤𑀼𑀓𑀸𑀤𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀓𑀧𑀝𑁆𑀞𑀸𑀦𑀫𑁂𑀯 𑀳𑀺 𑀢𑀺𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀤𑀼𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀜𑁆𑀘, 𑀢𑀣𑀸 𑀢𑀺𑀓𑀧𑀝𑁆𑀞𑀸𑀦𑀫𑁂𑀯 𑀤𑀼𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀢𑀺𑀓𑀧𑀤𑀲𑀁𑀲𑀦𑁆𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀜𑁆𑀘𑀸𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁨-𑁪𑁪. 𑀢𑁂𑀯𑀻𑀲𑀢𑀺𑀫𑀽𑀮𑀓𑀦𑁆𑀢𑀺 𑀇𑀤𑀜𑁆𑀘𑁂𑀢𑁆𑀣 𑀤𑀼𑀫𑀽𑀮𑀓𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀤𑀼𑀓𑀫𑀽𑀮𑀓𑁂 𑀧𑀼𑀘𑁆𑀙𑀸𑀦𑀁 𑀫𑀽𑀮𑀪𑀽𑀢𑀸 𑀢𑁂𑀯𑀻𑀲𑀢𑀺 𑀤𑀼𑀓𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀢𑀲𑁆𑀲 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀬𑀸𑀯 𑀬𑀢𑁆𑀢𑀓𑁄 𑀧𑀪𑁂𑀤𑁄 𑀅𑀢𑁆𑀣𑀺, 𑀢𑀸𑀯 𑀢𑀢𑁆𑀢𑀓𑀁 𑀢𑁂𑀯𑀻𑀲𑀢𑀺𑀫𑀽𑀮𑀓𑀁 𑀬𑀣𑀸𑀦𑀼𑀮𑁄𑀫𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀼𑀓𑀫𑀽𑀮𑀓𑁂𑀦 𑀢𑀺𑀓𑀫𑀽𑀮𑀓𑀸𑀤𑀻𑀲𑀼 𑀦𑀬𑀁 𑀤𑀲𑁆𑀲𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀬𑀤𑀺 𑀧𑀦 𑀬𑀸𑀯 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮𑀁 𑀬𑀣𑀸 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, ‘‘𑀬𑀸𑀯 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮’’𑀦𑁆𑀢𑁆𑀯𑁂𑀯 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁 ¶ 𑀲𑀺𑀬𑀸. 𑀦 𑀳𑀺 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀏𑀢𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀢𑁂𑀯𑀻𑀲𑀢𑀺𑀫𑀁 𑀫𑀽𑀮𑀓𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀣𑀸 𑀅𑀦𑀼𑀮𑁄𑀫𑁂 ‘‘𑀏𑀓𑁂𑀓𑀧𑀤𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀦 𑀏𑀓𑀫𑀽𑀮𑀸𑀤𑀺𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀁 𑀢𑀢𑁆𑀣 𑀦𑀬𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑀁 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 ¶ 𑀲𑀩𑁆𑀩𑀫𑀽𑀮𑀓𑀫𑁂𑀯 𑀘𑁂𑀢𑁆𑀣 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀯𑀲𑁂𑀲𑀲𑁆𑀲 𑀧𑀘𑁆𑀘𑀬𑀲𑁆𑀲 𑀫𑀽𑀮𑀪𑀸𑀯𑀢𑁄 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓’’𑀦𑁆𑀢𑀺 𑀘 𑀢𑀢𑁄 𑀧𑀭𑀁 𑀫𑀽𑀮𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁫-𑁪𑁮. 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀓𑀫𑀽𑀮𑀓𑀸𑀤𑀻𑀲𑀼 𑀏𑀓𑁂𑀓𑀁 𑀧𑀤𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀢𑀢𑁆𑀣 𑀏𑀓𑀫𑀽𑀮𑀓𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀧𑀤𑀸𑀦𑀺 𑀇𑀥 𑀏𑀓𑀫𑀽𑀮𑀓𑁂 𑀢𑁂𑀯𑀻𑀲𑀢𑀺, 𑀏𑀓𑁄 𑀧𑀦 𑀧𑀘𑁆𑀘𑀬𑁄 𑀫𑀽𑀮𑀪𑀸𑀯𑁂𑀦 𑀞𑀺𑀢𑁄 𑀅𑀧𑀼𑀩𑁆𑀩𑀢𑀸𑀪𑀸𑀯𑀢𑁄 𑀅𑀕𑀡𑀦𑀽𑀧𑀕𑁄. 𑀢𑀢𑁆𑀣 𑀤𑀼𑀫𑀽𑀮𑀓𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀧𑀤𑀸𑀦𑀺 𑀕𑀡𑀦𑀽𑀧𑀕𑀸𑀦𑀺, 𑀇𑀥 𑀤𑀼𑀫𑀽𑀮𑀓𑁂 𑀤𑁆𑀯𑀸𑀯𑀻𑀲𑀢𑀻𑀢𑀺 𑀏𑀯𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲 𑀧𑀘𑁆𑀘𑀦𑀻𑀬𑀢𑁄 𑀅𑀮𑀩𑁆𑀪𑀫𑀸𑀦𑀸𑀦𑀁 𑀲𑀼𑀤𑁆𑀥𑀺𑀓𑀧𑀘𑁆𑀘𑀬𑀸𑀦𑀜𑁆𑀘 𑀅𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀮𑀩𑁆𑀪𑀫𑀸𑀦𑀧𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑀣𑀸 𑀧𑀼𑀘𑁆𑀙𑀸𑀯𑀲𑁂𑀦 𑀓𑁄𑀘𑀺 𑀧𑀘𑁆𑀘𑀬𑁄 𑀅𑀮𑀩𑁆𑀪𑀫𑀸𑀦𑁄 𑀦𑀸𑀫 𑀅𑀢𑁆𑀣𑀻𑀢𑀺. 𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑁂𑀦𑁂𑀯 𑀯𑀸 𑀧𑀯𑀢𑁆𑀢𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀤𑁂𑀲𑀦𑀁 𑀲𑀦𑁆𑀥𑀸𑀬 ‘‘𑀮𑀩𑁆𑀪𑀫𑀸𑀦𑀧𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀓𑀼𑀲𑀮𑀢𑁆𑀢𑀺𑀓𑀁

𑁧. 𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀁

(𑁧) 𑀯𑀺𑀪𑀗𑁆𑀕𑀯𑀸𑀭𑁄

𑁫𑁩. 𑀬𑀸 ¶ 𑀓𑀼𑀲𑀮𑀢𑁆𑀢𑀺𑀓𑁂 𑀮𑀪𑀦𑁆𑀢𑀺, 𑀦 𑀢𑀸𑀬𑁂𑀯 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀽𑀢𑀺 𑀢𑀺𑀓𑀧𑀤𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀺𑀦𑀸 𑀫𑀽𑀮𑀸𑀯𑀲𑀸𑀦𑀯𑀲𑁂𑀦 𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 ‘‘𑀦 ¶ 𑀢𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀓𑁂𑀯𑀮𑀁 𑀢𑀺𑀓𑀦𑁆𑀢𑀭𑁂𑀬𑁂𑀯, 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀧𑀦 𑀬𑀸 𑀧𑀝𑀺𑀘𑁆𑀘𑀯𑀸𑀭𑁂 𑀮𑀪𑀦𑁆𑀢𑀺, 𑀦 𑀢𑀸𑀬𑁂𑀯 𑀧𑀘𑁆𑀘𑀬𑀯𑀸𑀭𑀸𑀤𑀻𑀲𑀽𑀢𑀺 𑀲𑀩𑁆𑀩𑀧𑀼𑀘𑁆𑀙𑀸𑀲𑀫𑀸𑀳𑀭𑀡𑀁 𑀇𑀥 𑀓𑀢𑁆𑀢𑀩𑁆𑀩𑀫𑁂𑀯. 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀘 𑀢𑀺𑀓𑀧𑀝𑁆𑀞𑀸𑀦𑁂 𑀯𑀺𑀢𑀓𑁆𑀓𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀩𑁆𑀩𑀸𑀧𑁂𑀢𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀻𑀢𑀺 𑀏𑀢𑁆𑀣 𑀧𑀻𑀢𑀺𑀢𑁆𑀢𑀺𑀓𑀕𑁆𑀕𑀳𑀡𑀁 𑀦 𑀓𑀸𑀢𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀻𑀢𑀺.

𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀪𑀽𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀸𑀯 𑀦𑀺𑀭𑁄𑀥𑀕𑀫𑀦𑀸 𑀉𑀤𑁆𑀥𑀁 𑀧𑀚𑁆𑀚𑀢𑀻’’𑀢𑀺 𑀘 ‘‘𑀉𑀧𑁆𑀧𑀸𑀤𑀸𑀤𑀬𑁄 𑀯𑀸 𑀧𑀸𑀧𑀼𑀡𑀸𑀢𑀻’’𑀢𑀺 𑀘 𑀯𑀘𑀦𑁂𑀳𑀺 𑀔𑀡𑀢𑁆𑀢𑀬𑀲𑀫𑀗𑁆𑀕𑀻 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑀁 𑀯𑀺𑀬 𑀳𑁄𑀢𑀺, 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀻𑀬𑁂𑀯 𑀧𑀦 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀏𑀓𑁄 𑀔𑀦𑁆𑀥𑁄 𑀏𑀓𑀲𑁆𑀲𑀸𑀢𑀺𑀆𑀤𑀺 𑀇𑀥 𑀓𑀼𑀲𑀮𑀯𑀘𑀦𑁂𑀦 𑀕𑀳𑀺𑀢𑁂 𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼 𑀧𑀦 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑀺𑀦𑁆𑀦𑀁, 𑀤𑁆𑀯𑁂 𑀧𑀝𑀺𑀘𑁆𑀘 𑀏𑀓𑀲𑁆𑀲𑀧𑀺, 𑀳𑁂𑀢𑀼𑀤𑀼𑀓𑀸𑀤𑀻𑀲𑀼 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀁 𑀧𑀝𑀺𑀘𑁆𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲𑀧𑀺 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀏𑀓𑁂𑀓𑀲𑁆𑀲𑀧𑀺 𑀤𑀼𑀓𑀢𑀺𑀓𑀸𑀤𑀺𑀪𑁂𑀤𑀸𑀦𑀜𑁆𑀘 𑀧𑀘𑁆𑀘𑀬𑁄 𑀦𑀸𑀫 𑀳𑁄𑀢𑀺𑀬𑁂𑀯, 𑀢𑀣𑀸 𑀤𑀼𑀓𑀸𑀤𑀺𑀪𑁂𑀤𑀸𑀦𑀜𑁆𑀘𑀸𑀢𑀺.

‘‘𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀆𑀭𑀼𑀧𑁆𑀧𑀯𑀺𑀧𑀸𑀓𑀜𑁆𑀘 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀲𑀩𑁆𑀩𑀲𑁆𑀫𑀺𑀁 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀕𑀳𑁂𑀢𑀩𑁆𑀩𑀁, 𑀅𑀣 𑀔𑁄 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀏𑀢𑁆𑀣𑁂𑀯. 𑀦 𑀓𑁂𑀯𑀮𑀜𑁆𑀘 ¶ 𑀆𑀭𑀼𑀧𑁆𑀧𑀯𑀺𑀧𑀸𑀓𑁄𑀯, 𑀅𑀣 𑀔𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀫𑁆𑀧𑀺 𑀆𑀭𑀼𑀧𑁆𑀧𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀏𑀢𑁆𑀣 𑀦 𑀕𑀳𑁂𑀢𑀩𑁆𑀩𑀁. ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺 𑀏𑀢𑁆𑀣 𑀧𑀦 𑀦 𑀓𑀺𑀜𑁆𑀘𑀺 𑀭𑀽𑀧𑁂𑀦 𑀯𑀺𑀦𑀸 𑀲𑀳 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀳𑁂𑀢𑀼𑀓𑀁 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀅𑀕𑁆𑀕𑀳𑀺𑀢𑀁 𑀦𑀸𑀫 𑀅𑀢𑁆𑀣𑀺. 𑀢𑀢𑁆𑀣 𑀧𑀦 𑀬𑀁 𑀭𑀽𑀧𑁂𑀦 𑀲𑀳 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀏𑀢𑁆𑀢𑀓𑁂 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 ‘‘𑀓𑀝𑀢𑁆𑀢𑀸 𑀘 𑀭𑀽𑀧’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀸𑀫𑀜𑁆𑀜𑀯𑀘𑀦𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀯𑀸 𑀯𑀢𑁆𑀣𑀼𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀯𑀘𑀦𑀤𑁆𑀯𑀬𑀁 𑀯𑀼𑀢𑁆𑀢𑀁 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀫𑁆𑀧𑀺 𑀯𑀺𑀲𑀼𑀁 𑀉𑀤𑁆𑀥𑀝𑀁.

𑀫𑀳𑀸𑀪𑀽𑀢𑁂𑀧𑀺 ¶ 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀢𑀦𑁆𑀢𑀺 𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀉𑀧𑀸𑀤𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑁂𑀦 𑀯𑀺𑀦𑀸 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀫𑀳𑀸𑀪𑀽𑀢𑁂𑀧𑀺 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀫𑀺𑀁 𑀧𑀦 𑀤𑀲𑁆𑀲𑀦𑁂 𑀔𑀦𑁆𑀥𑀧𑀘𑁆𑀘𑀬𑀲𑀳𑀺𑀢𑀸𑀲𑀳𑀺𑀢𑀜𑁆𑀘 𑀲𑀩𑁆𑀩𑀁 𑀉𑀧𑀸𑀤𑀸𑀭𑀽𑀧𑀁 𑀇𑀢𑁄 𑀧𑀭𑁂𑀲𑀼 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀓𑀝𑀢𑁆𑀢𑀸𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀻’’𑀢𑀺 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀢𑁄 𑀅𑀬𑀁 𑀦𑀬𑁄 𑀯𑀼𑀢𑁆𑀢𑁄𑀢𑀺 𑀲𑀦𑁆𑀥𑀸𑀬𑀸𑀳.

𑁫𑁪. 𑀭𑀽𑀧𑀫𑀺𑀲𑁆𑀲𑀓𑀸 𑀧𑀳𑀸𑀬𑀸𑀢𑀺 𑀬𑀸𑀲𑀼 𑀧𑀼𑀘𑁆𑀙𑀸𑀲𑀼 𑀭𑀽𑀧𑁂𑀦 𑀯𑀺𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦 𑀮𑀩𑁆𑀪𑀢𑀺, 𑀅𑀣 𑀔𑁄 𑀭𑀽𑀧𑀫𑀺𑀲𑁆𑀲𑀓𑀫𑁂𑀯 𑀮𑀩𑁆𑀪𑀢𑀺, 𑀢𑀸 𑀧𑀳𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁭. ‘‘𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 𑀯𑀘𑀦𑀢𑁄𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀧𑀝𑀺𑀲𑀦𑁆𑀥𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀲𑀩𑁆𑀪𑀸𑀯𑁂𑀦 𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀸 𑀲𑀩𑁆𑀩𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺 𑀑𑀓𑁆𑀓𑀦𑁆𑀢𑀺𑀦𑀸𑀫𑀓𑀸𑀢𑀺 𑀲𑀸𑀥𑁂𑀢𑀺. 𑀧𑀭𑀺𑀧𑀼𑀡𑁆𑀡𑀥𑀫𑁆𑀫𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑀸.

𑀏𑀢𑁆𑀣 ¶ 𑀘 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁫𑁩) 𑀏𑀢𑁆𑀢𑀸𑀯𑀢𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀩𑁆𑀩𑀁 𑀘𑀺𑀢𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀤𑀲𑁆𑀲𑀺𑀢𑀁. 𑀅𑀯𑀲𑁂𑀲𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀩𑀸𑀳𑀺𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀸𑀳𑀺𑀭𑀦𑁆𑀢𑀺 𑀏𑀢𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁 𑀤𑀲𑁆𑀲𑁂𑀢𑀺, 𑀧𑀼𑀦 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀢𑁂𑀳𑀺 𑀲𑀩𑁆𑀩𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀆𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀢𑀢𑁆𑀣 ‘‘𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀏𑀓’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀫𑁆𑀧𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀢𑀲𑁆𑀲 𑀯𑀚𑁆𑀚𑀦𑁂 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺. 𑀆𑀤𑀺𑀫𑁆𑀳𑀺 𑀧𑀦 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀅𑀯𑀺𑀲𑁂𑀲𑀯𑀘𑀦𑀁 𑀲𑀳𑀚𑀸𑀢𑀁 𑀅𑀭𑀽𑀧𑀫𑁆𑀧𑀺 𑀧𑀘𑁆𑀘𑀬𑀁 𑀳𑁂𑀢𑀸𑀤𑀺𑀓𑁂 𑀘 𑀧𑀘𑁆𑀘𑀬𑁂 𑀩𑀳𑀼𑀢𑀭𑁂 𑀮𑀪𑀦𑁆𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀝𑀢𑁆𑀢𑀸𑀭𑀽𑀧𑀤𑁆𑀯𑀬𑀁 𑀲𑀳 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀫𑁆𑀩𑀦𑁆𑀥𑀁 𑀢𑀁𑀲𑀫𑀸𑀦𑀕𑀢𑀺𑀓𑀁 𑀧𑀜𑁆𑀘𑀯𑁄𑀓𑀸𑀭𑁂 𑀯𑀢𑁆𑀢𑀫𑀸𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀅𑀕𑁆𑀕𑀳𑀺𑀢𑀁 𑀓𑀝𑀢𑁆𑀢𑀸𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀸𑀤𑀸𑀭𑀽𑀧𑀁 𑀇𑀥𑀧𑀺 ¶ 𑀓𑀫𑁆𑀫𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀯𑀺𑀬 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁬𑁩) 𑀓𑀝𑀢𑁆𑀢𑀸𑀭𑀽𑀧𑀪𑀸𑀯𑀯𑀺𑀲𑀺𑀝𑁆𑀞𑀁 𑀉𑀧𑀸𑀤𑀸𑀭𑀽𑀧𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑀼𑀢𑁆𑀢𑀲𑁆𑀲 𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀼𑀦𑀯𑀘𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺.

𑀓𑀲𑁆𑀫𑀸 𑀧𑀦 𑀬𑀣𑀸 𑀩𑀸𑀳𑀺𑀭𑀸𑀤𑀻𑀲𑀼 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀯𑀢𑁆𑀯𑀸 𑀘𑀺𑀢𑁆𑀢𑀓𑀫𑁆𑀫𑀚𑀉𑀧𑀸𑀤𑀸𑀭𑀽𑀧𑀸𑀦𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀲𑀳 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀲𑀼 𑀯𑀺𑀲𑀼𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀪𑀸𑀯𑀓𑀝𑀢𑁆𑀢𑀸𑀭𑀽𑀧𑀪𑀸𑀯𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸𑀯 𑀯𑀼𑀢𑁆𑀢𑀸𑀦𑀻𑀢𑀺? 𑀢𑀢𑁆𑀣 𑀩𑀸𑀳𑀺𑀭𑀕𑁆𑀕𑀳𑀡𑀸𑀤𑀻𑀳𑀺 𑀯𑀺𑀬 𑀏𑀢𑁆𑀣 𑀫𑀳𑀸𑀪𑀽𑀢𑀸𑀦𑀁 𑀓𑁂𑀦𑀘𑀺 𑀅𑀯𑀺𑀲𑁂𑀲𑀺𑀢𑀢𑁆𑀢𑀸. 𑀅𑀧𑀺𑀘 𑀇𑀤𑁆𑀥𑀺𑀘𑀺𑀢𑁆𑀢𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸𑀦𑀜𑁆𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀩𑀸𑀳𑀺𑀭𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀘𑀺𑀢𑁆𑀢𑀁 𑀓𑀫𑁆𑀫𑀜𑁆𑀘 𑀳𑁂𑀢𑀸𑀤𑀻𑀲𑀼 𑀦 𑀓𑁄𑀘𑀺 𑀧𑀘𑁆𑀘𑀬𑁄, 𑀆𑀳𑀸𑀭𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀦 𑀘𑀺𑀢𑁆𑀢𑀁 𑀧𑀘𑁆𑀙𑀸𑀚𑀸𑀢𑀪𑀸𑀯𑁂𑀦 𑀉𑀧𑀢𑁆𑀣𑀫𑁆𑀪𑀓𑀫𑁂𑀯, 𑀦 𑀚𑀦𑀓𑀁, 𑀫𑀳𑀸𑀪𑀽𑀢𑀸𑀦𑁂𑀯 𑀧𑀦 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀪𑀸𑀯𑁂𑀦 𑀚𑀦𑀓𑀸𑀦𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀘𑀺𑀢𑁆𑀢𑁂𑀦 𑀓𑀫𑁆𑀫𑁂𑀦 𑀘 𑀯𑀺𑀦𑀸 𑀅𑀪𑀸𑀯𑁂 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀳𑀺 𑀅𑀭𑀽𑀧𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀝𑀢𑁆𑀢𑀸𑀭𑀽𑀧𑀪𑀽𑀢𑀸𑀦𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀸𑀦𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀓𑀫𑁆𑀫𑀚𑁂𑀲𑁆𑀯𑁂𑀯 𑀉𑀧𑀸𑀤𑀸𑀭𑀽𑀧𑁂𑀲𑀼 𑀯𑀺𑀲𑁂𑀲𑀦𑀁 𑀓𑀢𑀁. 𑀅𑀜𑁆𑀜𑀸𑀦𑀺 𑀯𑀸 𑀲𑀫𑀸𑀦𑀚𑀸𑀢𑀺𑀓𑁂𑀦 𑀭𑀽𑀧𑁂𑀦 𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀸𑀓𑀝𑀯𑀺𑀲𑁂𑀲𑀦𑀸𑀦𑁂𑀯𑀸𑀢𑀺 𑀦 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺, 𑀏𑀢𑀸𑀦𑀺 𑀧𑀦 𑀅𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀅𑀭𑀽𑀧𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀦𑀺 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀻𑀢𑀺 𑀯𑀺𑀲𑁂𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀯𑀸 𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀘𑀺𑀢𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀲𑀯𑀺𑀲𑁂𑀲𑁂𑀦 𑀧𑀘𑁆𑀘𑀬𑀪𑀸𑀯𑁂𑀦 ¶ 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀫𑀽𑀮𑀓𑀭𑀡𑀪𑀸𑀯𑀢𑁄 𑀘, 𑀦 𑀏𑀯𑀁 𑀉𑀢𑀼𑀆𑀳𑀸𑀭𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀘𑀺𑀢𑁆𑀢𑀓𑀫𑁆𑀫𑀚𑀸𑀦𑁂𑀯 𑀯𑀺𑀲𑀼𑀁 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺. 𑀇𑀢𑀭𑀸𑀦𑀺 𑀧𑀦 𑀫𑀳𑀸𑀪𑀽𑀢𑀯𑀺𑀲𑁂𑀲𑁂𑀦𑁂𑀯 𑀯𑀺𑀲𑁂𑀲𑀺𑀢𑀸𑀦𑀺, 𑀇𑀥 𑀉𑀧𑀸𑀤𑀸𑀭𑀽𑀧𑀯𑀺𑀲𑁂𑀲𑀦𑁂𑀦 𑀫𑀳𑀸𑀪𑀽𑀢𑀸𑀦𑀺 𑀯𑀺𑀬. 𑀦 𑀳𑀺 𑀅𑀜𑁆𑀜𑀢𑀭𑀯𑀺𑀲𑁂𑀲𑀦𑀁 𑀉𑀪𑀬𑀯𑀺𑀲𑁂𑀲𑀦𑀁 𑀦 𑀳𑁄𑀢𑀻𑀢𑀺.

𑁫𑁮. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸𑀢𑀺 𑀔𑀦𑁆𑀥𑀯𑀢𑁆𑀣𑀽𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑁂𑀦 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀧𑀘𑁆𑀘𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀯𑀢𑁆𑀣𑀼𑀦𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺. ‘‘𑀔𑀦𑁆𑀥𑁂 ¶ 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀇𑀤𑀁 𑀧𑀦 𑀘𑀢𑀼𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀏𑀓𑀢𑁄 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀢𑀸𑀤𑀲𑁆𑀲𑀦𑀢𑁆𑀣𑀁, ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀣𑀼𑀲𑁆𑀲. 𑀦 𑀓𑁂𑀯𑀮𑀜𑁆𑀘 𑀔𑀦𑁆𑀥𑀸𑀦𑀁 𑀇𑀥𑁂𑀯, 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀦𑀬𑁄. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀯𑀺𑀲𑀼𑀁 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀣𑀼𑀲𑁆𑀲𑀧𑀺 𑀤𑀲𑁆𑀲𑀺𑀢𑀸𑀬 ‘‘𑀏𑀓𑀁 𑀔𑀦𑁆𑀥𑀜𑁆𑀘 𑀯𑀢𑁆𑀣𑀼𑀜𑁆𑀘 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀯𑀢𑁆𑀣𑀽𑀦𑀜𑁆𑀘 𑀤𑀲𑁆𑀲𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸, 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀫𑀳𑀸𑀪𑀽𑀢𑀸’’𑀢𑀺 𑀏𑀯𑀫𑀸𑀤𑀺 𑀦 𑀯𑀼𑀢𑁆𑀢𑀁, 𑀦𑀦𑀼 𑀬𑀤𑁂𑀯 𑀧𑀝𑀺𑀘𑁆𑀘𑀢𑁆𑀣𑀁 𑀨𑀭𑀢𑀺, 𑀦 𑀢𑁂𑀦𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀯𑀺𑀬. 𑀦 𑀳𑀺 𑀬𑀁 ‘‘𑀏𑀓𑀁 𑀢𑀬𑁄 𑀤𑁆𑀯𑁂 𑀘 𑀔𑀦𑁆𑀥𑁂 𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀳𑁂𑀢𑀼𑀧𑀘𑁆𑀘𑀬𑀪𑀽𑀢𑀸 𑀏𑀯 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺. 𑀧𑀘𑁆𑀘𑀬𑀯𑀸𑀭𑁂 𑀘 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁫𑁬) 𑀯𑀼𑀢𑁆𑀢𑀁, 𑀦 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀘 𑀧𑀦 𑀢𑀁𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀏𑀯. 𑀬𑀤𑀺𑀧𑀺 𑀓𑀼𑀲𑀮𑀸 𑀔𑀦𑁆𑀥𑀸 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀢𑁂 𑀧𑀝𑀺𑀘𑁆𑀘 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺? 𑀦 𑀯𑀢𑁆𑀢𑀩𑁆𑀩𑀸 𑀔𑀦𑁆𑀥𑀲𑀳𑀚𑀸𑀢𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄. 𑀅𑀜𑁆𑀜𑀫𑀜𑁆𑀜𑀲𑀤𑁆𑀤𑁄 𑀳𑀺 𑀦 𑀳𑁂𑀢𑀸𑀤𑀺𑀲𑀤𑁆𑀤𑁄 𑀯𑀺𑀬 𑀦𑀺𑀭𑀧𑁂𑀓𑁆𑀔𑁄, 𑀲𑀳𑀚𑀸𑀢𑀸𑀤𑀺𑀲𑀤𑁆𑀤𑁄 𑀯𑀺𑀬 𑀯𑀸 𑀅𑀜𑁆𑀜𑀢𑀭𑀸𑀧𑁂𑀓𑁆𑀔𑁄, 𑀅𑀣 𑀔𑁄 𑀬𑀣𑀸𑀯𑀼𑀢𑁆𑀢𑁂𑀢𑀭𑁂𑀢𑀭𑀸𑀧𑁂𑀓𑁆𑀔𑁄. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀔𑀦𑁆𑀥𑀸 𑀫𑀳𑀸𑀪𑀽𑀢𑀸 𑀇𑀥 𑀬𑀣𑀸𑀯𑀼𑀢𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀢𑁂𑀲𑀼 𑀘 𑀫𑀳𑀸𑀪𑀽𑀢𑀸 𑀔𑀦𑁆𑀥𑀸𑀦𑀁 𑀦 𑀓𑁄𑀘𑀺 𑀧𑀘𑁆𑀘𑀬𑁄. 𑀬𑀲𑁆𑀲 𑀘 𑀲𑀬𑀁 𑀧𑀘𑁆𑀘𑀬𑁄, 𑀢𑀢𑁄 𑀢𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀯𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀬𑀣𑀸 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀔𑀦𑁆𑀥𑀸, 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀔𑀦𑁆𑀥𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀲𑁆𑀲 ¶ 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀢𑀤𑀧𑁂𑀓𑁆𑀔𑀢𑁆𑀢𑀸 𑀘 𑀅𑀜𑁆𑀜𑀫𑀜𑁆𑀜𑀲𑀤𑁆𑀤𑀲𑁆𑀲 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸 𑀘 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸, 𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀘 𑀯𑀼𑀢𑁆𑀢𑀸. 𑀔𑀦𑁆𑀥𑀸 𑀧𑀦 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀢𑁆𑀣𑀼𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺.

𑁫𑁯. 𑀦 ¶ 𑀲𑀸 𑀕𑀳𑀺𑀢𑀸𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀧𑀝𑀺𑀘𑁆𑀘𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀧𑀦 𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀯𑀺𑀬 𑀦 𑀕𑀳𑀺𑀢𑀸𑀦𑀻𑀢𑀺.

𑁬𑁦. 𑀤𑁆𑀯𑀻𑀲𑀼 𑀉𑀧𑀦𑀺𑀲𑁆𑀲𑀬𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀫𑁆𑀧𑀺 𑀧𑀦 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺 𑀆𑀳. 𑀢𑀢𑁆𑀣 ‘‘𑀦 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀁 𑀮𑀪𑀦𑁆𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄. 𑀓𑀼𑀲𑀮𑀸𑀧𑀺 𑀧𑀦 𑀫𑀳𑀕𑁆𑀕𑀢𑀸 𑀏𑀓𑀦𑁆𑀢𑁂𑀦, 𑀓𑀸𑀫𑀸𑀯𑀘𑀭𑀸 𑀘 𑀓𑀤𑀸𑀘𑀺 𑀦 𑀮𑀪𑀦𑁆𑀢𑀻𑀢𑀺 ‘‘𑀦 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸’’𑀢𑀺 𑀧𑀞𑀦𑁆𑀢𑀺.

𑁬𑁧. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀬𑀣𑀸 𑀅𑀜𑁆𑀜𑀢𑁆𑀣 𑀧𑀘𑁆𑀘𑀬𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀯 𑀤𑁂𑀲𑀦𑀸 𑀓𑀢𑀸, 𑀏𑀯𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 ‘‘𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀺𑀬𑀫𑀲𑀩𑁆𑀪𑀸𑀯𑀸. 𑀳𑁂𑀢𑀼𑀆𑀤𑀻𑀲𑀼 𑀳𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀦 𑀳𑀺 𑀢𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀮𑁄𑀪𑀸𑀤𑀻𑀲𑀼 𑀓𑀼𑀲𑀮𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀬𑀫𑁂𑀯 𑀧𑀘𑁆𑀘𑀬𑁄𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺, 𑀇𑀥 𑀧𑀦 𑀯𑀢𑁆𑀣𑀼 𑀦 𑀯𑀢𑁆𑀣𑀼𑀥𑀫𑁆𑀫𑁂𑀲𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀦𑀺𑀬𑀫𑀢𑁄 𑀙𑀩𑁆𑀩𑀺𑀥𑀁 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀫𑁆𑀧𑀺 𑀳𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁂 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀮𑀩𑁆𑀪𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀲𑁆𑀲 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀏𑀯 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲𑀧𑀺 𑀢𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀉𑀤𑁆𑀥𑀝𑁄. ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁 𑀧𑀝𑀺𑀘𑁆𑀘 𑀯𑀺𑀧𑀸𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀏𑀢𑀲𑁆𑀲𑀧𑀺 𑀅𑀮𑀸𑀪𑀢𑁄 𑀢𑀢𑁆𑀣 ‘‘𑀧𑀼𑀭𑁂𑀚𑀸𑀢𑁂 𑀢𑀻𑀡𑀻’’𑀢𑀺 (𑀧𑀝𑁆𑀞𑀸. 𑁧.𑁩.𑁧𑁨𑁪) 𑀯𑀼𑀢𑁆𑀢𑀦𑁆𑀢𑀺.

𑁬𑁩. 𑀢𑀣𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀫𑀳𑀸𑀪𑀽𑀢𑀸𑀦𑀁 𑀏𑀓𑀓𑁆𑀔𑀡𑀺𑀓𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦𑁂𑀯 ¶ 𑀢𑀤𑀼𑀧𑀸𑀤𑀸𑀭𑀽𑀧𑀸𑀦𑀫𑁆𑀧𑀺 𑀯𑀤𑀢𑀻𑀢𑀺 𑀘 𑀤𑀝𑁆𑀞𑀩𑁆𑀩𑀁. 𑀓𑀝𑀢𑁆𑀢𑀸𑀭𑀽𑀧𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪. 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑁂𑀲𑀼 𑀬𑀁 𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦.

𑁬𑁯. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀦𑀺𑀬𑀫𑀢𑁄 𑀯𑀢𑁆𑀣𑀼 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀓𑁂𑀲𑀜𑁆𑀘𑀺 𑀔𑀦𑁆𑀥𑀸, 𑀦 𑀘 𑀲𑀫𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀏𑀯 𑀓𑀼𑀲𑀮𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀦𑀸𑀦𑀸𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀧𑀺, 𑀢𑀲𑁆𑀫𑀸 𑀢𑀁 ¶ 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀧𑀘𑁆𑀘𑀬𑀁 𑀧𑀘𑁆𑀘𑀬𑀁 𑀓𑀭𑁄𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀼𑀁 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀓𑀭𑀡𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸, 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺, 𑀇𑀤𑀁 𑀧𑀦 𑀧𑀝𑀺𑀘𑁆𑀘𑀲𑀤𑁆𑀤𑁂𑀦 𑀅𑀬𑁄𑀚𑁂𑀢𑁆𑀯𑀸 ‘‘𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸’’𑀢𑀺 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲𑀢𑁆𑀣𑁄 ‘‘𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀺𑀁 𑀧𑀦 𑀧𑀝𑀺𑀘𑁆𑀘𑀸𑀢𑀺? 𑀬𑀁 ‘‘𑀏𑀓𑀁 𑀔𑀦𑁆𑀥’’𑀦𑁆𑀢𑀺𑀆𑀤𑀺𑀓𑀁 𑀧𑀸𑀴𑀺𑀬𑀁 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 ‘‘𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀔𑀦𑁆𑀥𑀸, 𑀯𑀢𑁆𑀣𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦𑀸’’𑀢𑀺 𑀧𑀞𑀦𑁆𑀢𑀺. 𑀅𑀦𑀦𑁆𑀢𑀭𑀢𑁆𑀢𑀸 𑀧𑀸𑀓𑀝𑀲𑁆𑀲 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀕𑀳𑀡𑀁 𑀫𑀸 𑀳𑁄𑀢𑀽𑀢𑀺 ‘‘𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁆𑀧𑀻’’𑀢𑀺 𑀆𑀳. 𑀆𑀲𑀦𑁆𑀦𑀫𑁆𑀧𑀺 𑀤𑀽𑀭𑀫𑁆𑀧𑀺 𑀲𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑁭𑁧-𑁭𑁨. ‘‘𑀇𑀫𑁂 𑀯𑀻𑀲𑀢𑀺 𑀧𑀘𑁆𑀘𑀬𑀸𑀢𑀺 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀏𑀓𑁂𑀦𑀧𑀺 𑀤𑁂𑀲𑀦𑀁 𑀲𑀁𑀔𑀺𑀢𑁆𑀢𑀁 𑀲𑀁𑀔𑀺𑀢𑁆𑀢𑀫𑁂𑀯, 𑀆𑀤𑀺𑀫𑁆𑀳𑀺 𑀧𑀦 𑀢𑀬𑁄 𑀧𑀘𑁆𑀘𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀏𑀓𑀫𑁆𑀧𑀺 𑀧𑀤𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀙𑀸𑀚𑀸𑀢𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 ‘‘𑀇𑀫𑁂 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀢𑁆𑀢𑀓𑀸 𑀳𑀺 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺. 𑀬𑁂 𑀧𑀦 𑀧𑀸𑀴𑀺𑀬𑀁 𑀯𑀺𑀢𑁆𑀣𑀸𑀭𑀺𑀢𑀁 𑀅𑀯𑀺𑀢𑁆𑀣𑀸𑀭𑀺𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 ‘‘𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀆𑀤𑀺𑀫𑁆𑀳𑀺 𑀧𑀦 𑀢𑀬𑁄 𑀧𑀘𑁆𑀘𑀬𑁂 𑀯𑀺𑀢𑁆𑀣𑀸𑀭𑀺𑀢𑁂 𑀯𑀚𑁆𑀚𑁂𑀢𑁆𑀯𑀸 𑀬𑀢𑁄 𑀧𑀪𑀼𑀢𑀺 𑀲𑀗𑁆𑀔𑁂𑀧𑁄 𑀆𑀭𑀤𑁆𑀥𑁄, 𑀢𑀢𑁄 𑀘𑀢𑀼𑀢𑁆𑀣𑀢𑁄 𑀧𑀪𑀼𑀢𑀺 𑀲𑀁𑀔𑀺𑀢𑁆𑀢𑀁 𑀯𑀺𑀢𑁆𑀣𑀸𑀭𑀺𑀢𑀜𑁆𑀘 𑀲𑀳 𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀢𑁂𑀯𑀻𑀲𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀪𑀗𑁆𑀕𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨) 𑀲𑀗𑁆𑀔𑁆𑀬𑀸𑀯𑀸𑀭𑁄

𑁭𑁩. 𑀢𑀣𑀸 ¶ 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀢𑀺 𑀬𑀣𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀯𑀺𑀲𑁂𑀲𑁄 𑀯𑀺𑀪𑀗𑁆𑀕𑁂 𑀅𑀢𑁆𑀣𑀺, 𑀢𑀣𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀧𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀳𑀺 𑀢𑀢𑁆𑀣 𑀯𑀺𑀲𑁂𑀲𑁄 𑀧𑀝𑀺𑀲𑀦𑁆𑀥𑀺𑀅𑀪𑀸𑀯𑁄 𑀘𑀸𑀢𑀺. 𑀯𑀺𑀧𑀸𑀓𑀸𑀦𑀺 𑀘𑁂𑀯 ¶ 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁂𑀦 ‘‘𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀓𑁂 (𑀧𑀝𑁆𑀞𑀸. 𑁧.𑁧.𑁫𑁩) 𑀯𑀺𑀪𑀗𑁆𑀕𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀪𑀸𑀯𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂 𑀘 𑀅𑀚𑀯𑀦𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀮𑀩𑁆𑀪𑀫𑀸𑀦𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑁭𑁪. 𑀏𑀓𑀫𑀽𑀮𑀓𑁂 𑀤𑀲𑁆𑀲𑀺𑀢𑀸𑀬 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀕𑀡𑀦𑀜𑁆𑀜𑁂𑀯 𑀆𑀤𑀸𑀬𑀸𑀢𑀺 𑀇𑀤𑀁 𑀏𑀢𑀲𑁆𑀫𑀺𑀁 𑀅𑀦𑀼𑀮𑁄𑀫𑁂 𑀲𑀼𑀤𑁆𑀥𑀺𑀓𑀦𑀬𑁂 𑀤𑀲𑁆𑀲𑀺𑀢𑀕𑀡𑀦𑀢𑁄 𑀢𑀢𑁄 𑀧𑀭𑁂𑀲𑀼 𑀦𑀬𑁂𑀲𑀼 𑀅𑀜𑁆𑀜𑀺𑀲𑁆𑀲𑀸 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀩𑀳𑀼𑀕𑀡𑀦𑁂𑀦 𑀬𑀼𑀢𑁆𑀢𑀲𑁆𑀲 𑀢𑁂𑀦 𑀲𑀫𑀸𑀦𑀕𑀡𑀦𑀢𑀸 𑀘 𑀇𑀫𑀲𑁆𑀫𑀺𑀁 𑀅𑀦𑀼𑀮𑁄𑀫𑁂𑀬𑁂𑀯 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀘𑀦𑀻𑀬𑁂 𑀧𑀦 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺𑀁 (𑀧𑀝𑁆𑀞𑀸. 𑁧.𑁧.𑁧𑁦𑁪) 𑀯𑀓𑁆𑀔𑀢𑀻𑀢𑀺.

𑁭𑁬-𑁭𑁯. 𑀢𑁂 𑀧𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑁂𑀯𑀻𑀲𑀢𑀺𑀫𑀽𑀮𑀓𑁄𑀯𑁂𑀢𑁆𑀣 𑀤𑀲𑁆𑀲𑀺𑀢𑁄𑀢𑀺 𑀏𑀢𑁆𑀣 𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀸𑀦𑀁 𑀧𑀭𑀺𑀳𑀻𑀦𑀢𑁆𑀢𑀸 ‘‘𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀲𑀸𑀲𑁂𑀯𑀦𑀲𑀯𑀺𑀧𑀸𑀓𑀸𑀦𑀁 𑀯𑀲𑁂𑀦. 𑀤𑀼𑀯𑀺𑀥𑀫𑁆𑀧𑀺 𑀧𑀦 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑀁 𑀲𑀳 𑀕𑀳𑁂𑀢𑁆𑀯𑀸 𑀲𑀗𑁆𑀕𑀳𑀺𑀢𑁂 𑀢𑀲𑁆𑀫𑀺𑀁 𑀉𑀪𑀬𑀲𑀩𑁆𑀪𑀸𑀯𑀢𑁄 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑁂𑀯𑀦𑀯𑀺𑀧𑀸𑀓𑀸𑀦𑀁 𑀯𑀸 𑀯𑀺𑀭𑁄𑀥𑀸𑀪𑀸𑀯𑁂 𑀲𑀢𑀺 𑀧𑀼𑀘𑁆𑀙𑀸𑀬 𑀤𑀲𑁆𑀲𑀺𑀢𑀦𑀬𑁂𑀦 𑀢𑁂𑀯𑀻𑀲𑀢𑀺𑀫𑀽𑀮𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀲 𑀘 𑀦𑀸𑀫𑀁 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀢𑁂𑀯𑀻𑀲𑀢𑀺𑀫𑀽𑀮𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻.

𑀆𑀭𑀫𑁆𑀫𑀡𑀧𑀤𑁂 𑀘𑁂𑀯𑀸𑀢𑀺 𑀏𑀢𑁂𑀦 𑀏𑀓𑀫𑀽𑀮𑀓𑁂 𑀅𑀜𑁆𑀜𑀧𑀤𑀸𑀦𑀺 𑀯𑀚𑁆𑀚𑁂𑀢𑀺. 𑀦 𑀳𑀺 𑀏𑀓𑀫𑀽𑀮𑀓𑁂 𑀳𑁂𑀢𑀸𑀤𑀻𑀲𑀼 𑀢𑀬𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀤𑁆𑀥𑀺𑀓𑀦𑀬𑁄 𑀧𑀦 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦 𑀮𑀩𑁆𑀪𑀢𑀻𑀢𑀺 𑀆𑀭𑀫𑁆𑀫𑀡𑀫𑀽𑀮𑀓𑁂 ‘‘𑀦𑀯𑀸’’𑀢𑀺 𑀏𑀢𑀸𑀬 𑀅𑀥𑀺𑀓𑀕𑀡𑀦𑀸𑀬 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀆𑀭𑀫𑁆𑀫𑀡𑁂 𑀞𑀺𑀢𑁂𑀦 𑀲𑀩𑁆𑀩𑀢𑁆𑀣 𑀢𑀻𑀡𑁂𑀯 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀢𑀩𑁆𑀩𑀸𑀢𑀺 𑀯𑀘𑀦𑀲𑁂𑀲𑁄. 𑀢𑀻𑀡𑁂𑀯𑀸𑀢𑀺 𑀘 𑀢𑀢𑁄 𑀉𑀤𑁆𑀥𑀁 𑀕𑀡𑀦𑀁 𑀦𑀺𑀯𑀸𑀭𑁂𑀢𑀺, 𑀦 𑀅𑀥𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦 ‘‘𑀯𑀺𑀧𑀸𑀓𑁂 𑀏𑀓’’𑀦𑁆𑀢𑀺 𑀕𑀡𑀦𑀸 𑀦 𑀦𑀺𑀯𑀸𑀭𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀻𑀲𑀼 𑀏𑀓𑀲𑁆𑀲 𑀅𑀦𑁆𑀢𑁄𑀕𑀥𑀢𑀸𑀬 𑀘 ‘‘𑀢𑀻𑀡𑁂𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀢𑀻𑀢𑀺𑀆𑀤𑀺𑀦𑀸 ‘‘𑀲𑀩𑁆𑀩𑀢𑁆𑀣 𑀢𑀻𑀡𑁂𑀯𑀸’’𑀢𑀺 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀤𑀴𑁆𑀳𑀁 𑀓𑀭𑁄𑀢𑀺.

𑁮𑁦-𑁮𑁫. 𑀬𑁂 ¶ …𑀧𑁂… 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺𑀧𑀺 𑀅𑀯𑀺𑀕𑀢𑀸𑀦𑀦𑁆𑀢𑀭𑀁 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀬𑀸 𑀕𑀡𑀦𑀸 𑀮𑀩𑁆𑀪𑀢𑀺, 𑀲𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀢𑀣𑀸𑀧𑀺 ¶ 𑀊𑀦𑀢𑀭𑀕𑀡𑀦𑁂𑀳𑀺 𑀲𑀫𑀸𑀦𑀕𑀡𑀦𑁂𑀳𑀺 𑀘 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀸 𑀲𑀫𑀸𑀦𑀸 𑀘 𑀳𑁄𑀢𑀺, 𑀦 𑀏𑀯𑀁 𑀆𑀯𑀺𑀓𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀯𑀺𑀧𑀮𑁆𑀮𑀸𑀲𑀬𑁄𑀚𑀦𑀸𑀬 𑀧𑀦 𑀢𑀣𑀸 𑀤𑀲𑁆𑀲𑁂𑀢𑀺. 𑀯𑀘𑀦𑁂𑀦 𑀯𑀸 𑀳𑀺 𑀮𑀺𑀗𑁆𑀕𑁂𑀦 𑀯𑀸 𑀅𑀢𑁆𑀣𑀯𑀺𑀲𑁂𑀲𑀸𑀯𑀺𑀓𑀭𑀡𑀁 𑀳𑁄𑀢𑀻𑀢𑀺. 𑀢𑁂𑀦𑁂𑀢𑀁 𑀆𑀯𑀺𑀓𑀭𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀅𑀥𑀺𑀧𑁆𑀧𑀸𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀘𑁆𑀘𑀦𑀻𑀬𑀸𑀤𑀻𑀲𑀼𑀧𑀺 𑀧𑀦 ‘‘𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀏𑀓𑀁…𑀧𑁂… 𑀦𑁄𑀯𑀺𑀕𑀢𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀏𑀓’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧𑁦𑁭) 𑀫𑀽𑀮𑀧𑀤𑀁 𑀆𑀤𑀺𑀫𑁆𑀳𑀺𑀬𑁂𑀯 𑀞𑀧𑁂𑀢𑁆𑀯𑀸 𑀬𑁄𑀚𑀦𑀸 𑀓𑀢𑀸, 𑀦 𑀘 𑀢𑀢𑁆𑀣 𑀏𑀢𑀁 𑀮𑀓𑁆𑀔𑀡𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀫𑀽𑀮𑀧𑀤𑀲𑁆𑀲 𑀆𑀤𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀬𑁄𑀚𑀦𑀫𑁂𑀯 𑀓𑀫𑁄, 𑀦 𑀘𑀓𑁆𑀓𑀩𑀦𑁆𑀥𑀦𑀦𑁆𑀢𑀺 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺𑀆𑀤𑀺 𑀬𑁄𑀚𑀺𑀢𑀁, 𑀦 𑀘 𑀯𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀯𑀘𑀦𑁂𑀦 𑀮𑀺𑀗𑁆𑀕𑁂𑀦 𑀘 𑀧𑀬𑁄𑀚𑀦𑀫𑀢𑁆𑀣𑀻𑀢𑀺.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀯𑀸𑀭𑁄

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁮𑁬-𑁮𑁭. ‘‘𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺 𑀇𑀤𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦𑁂𑀢𑀁 𑀦 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁.

𑁯𑁩. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀘 𑀲𑀳𑀚𑀸𑀢𑀸 𑀘 𑀳𑁂𑀢𑀸𑀤𑀬𑁄 𑀧𑀼𑀭𑁂𑀚𑀸𑀢𑀸 𑀘 𑀆𑀭𑀫𑁆𑀫𑀡𑀸𑀤𑀬𑁄 𑀧𑀘𑁆𑀘𑀬𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀦𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑁆𑀯𑀻𑀳𑁂𑀯 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀧𑀘𑁆𑀙𑀸𑀚𑀸𑀢𑀯𑀚𑁆𑀚𑁂𑀳𑀺 𑀲𑀩𑁆𑀩𑁂𑀳𑀻𑀢𑀺.

𑁯𑁪-𑁯𑁭. 𑀦𑀸𑀳𑀸𑀭𑀧𑀘𑁆𑀘𑀬𑁂 𑀏𑀓𑀘𑁆𑀘𑀁 𑀭𑀽𑀧𑀫𑁂𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺 𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀧𑀘𑁆𑀘𑀬𑁄 ¶ 𑀭𑀽𑀧𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀅𑀭𑀽𑀧𑀫𑁆𑀧𑀺 𑀳𑁄𑀢𑀺 𑀬𑀣𑀸 𑀓𑀫𑁆𑀫𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲.

𑁯𑁯-𑁧𑁦𑁨. 𑀦𑀫𑀕𑁆𑀕𑀧𑀘𑁆𑀘𑀬𑁂 𑀬𑀤𑀺𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂 𑀭𑀽𑀧𑀓𑁄𑀝𑁆𑀞𑀸𑀲𑀸 𑀮𑀩𑁆𑀪𑀦𑁆𑀢𑀺, 𑀢𑀣𑀸𑀧𑀺 𑀬𑀁 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀺, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 ‘‘𑀏𑀓𑀘𑁆𑀘𑀁 𑀭𑀽𑀧𑀁 ¶ 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑁂𑀯 𑀧𑀦 𑀦𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀓𑀘𑁆𑀘𑀭𑀽𑀧𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀤𑀝𑁆𑀞𑀩𑁆𑀩𑀸.

𑁧𑁦𑁭-𑁧𑁩𑁦. 𑀦𑀸𑀳𑀸𑀭𑀦𑀇𑀦𑁆𑀤𑁆𑀭𑀺𑀬𑀦𑀛𑀸𑀦𑀦𑀫𑀕𑁆𑀕𑀧𑀘𑁆𑀘𑀬𑀸 𑀲𑀩𑁆𑀩𑀢𑁆𑀣 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀇𑀤𑀁 𑀏𑀢𑁂𑀲𑀼 𑀫𑀽𑀮𑀪𑀸𑀯𑁂𑀦 𑀞𑀺𑀢𑁂𑀲𑀼 𑀕𑀡𑀦𑀸𑀬 𑀲𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀽𑀮𑀸𑀦𑀜𑁆𑀳𑀺 𑀇𑀥 𑀯𑀺𑀲𑁆𑀲𑀚𑁆𑀚𑀦𑀁 𑀕𑀡𑀦𑀸𑀬𑁂𑀯, 𑀦 𑀲𑀭𑀽𑀧𑀤𑀲𑁆𑀲𑀦𑀦𑁆𑀢𑀺. 𑀦𑀲𑀳𑀚𑀸𑀢𑀸𑀤𑀺𑀘𑀢𑀼𑀓𑁆𑀓𑀁 𑀇𑀥𑀸𑀧𑀺 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀲𑀼𑀤𑁆𑀥𑀺𑀓𑀦𑀬𑁂 𑀯𑀺𑀬 𑀫𑀽𑀮𑁂𑀲𑀼𑀧𑀺 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁧𑁩𑁧-𑁧𑁮𑁯. 𑀳𑁂𑀢𑀸𑀥𑀺𑀧𑀢𑀺𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂𑀲𑀼…𑀧𑁂… 𑀅𑀝𑁆𑀞 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀢𑀺𑀡𑁆𑀡𑀫𑁆𑀧𑀺 𑀲𑀸𑀥𑀸𑀭𑀡𑀸𑀦𑀁 𑀧𑀘𑁆𑀘𑀦𑀻𑀬𑀢𑁄 𑀅𑀮𑀩𑁆𑀪𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀕𑁆𑀕𑀧𑀘𑁆𑀘𑀬𑁂 𑀇𑀢𑀭𑁂𑀳𑀺 𑀲𑀸𑀥𑀸𑀭𑀡𑀸 𑀲𑀢𑁆𑀢𑁂𑀯 𑀬𑁄𑀚𑁂𑀢𑀩𑁆𑀩𑀸. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀅𑀦𑀼𑀮𑁄𑀫𑀢𑁄 𑀞𑀺𑀢𑁂 𑀳𑁂𑀢𑀼𑀧𑀘𑁆𑀘𑀬𑁄𑀧𑀺 𑀧𑀘𑁆𑀘𑀦𑀻𑀬𑀢𑁄 𑀦 𑀮𑀩𑁆𑀪𑀢𑀺, 𑀲𑁄 𑀧𑀦 𑀫𑀕𑁆𑀕𑁂𑀦 𑀅𑀲𑀸𑀥𑀸𑀭𑀡𑁄𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑁂𑀳𑀺 𑀯𑀺𑀦𑀸 𑀅𑀭𑀽𑀧𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑁂 𑀏𑀓𑀦𑁆𑀢𑀺𑀓𑀢𑁆𑀢𑀸 𑀅𑀭𑀽𑀧𑀝𑁆𑀞𑀸𑀦𑀺𑀓𑀸𑀢𑀺 𑀇𑀥 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀢𑁂𑀦 𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀧𑀘𑁆𑀘𑀬𑀸 𑀢𑁂𑀳𑀺 𑀯𑀺𑀦𑀸𑀧𑀺 𑀅𑀭𑀽𑀧𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀅𑀜𑁆𑀜𑀫𑀜𑁆𑀜𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀘 𑀢𑁂𑀳𑀺 𑀯𑀺𑀦𑀸 𑀅𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀲𑀗𑁆𑀕𑀳𑀺𑀢𑀸𑀢𑀺. 𑀊𑀦𑀢𑀭𑀕𑀡𑀦𑀸𑀦𑀁𑀬𑁂𑀯 𑀯𑀲𑁂𑀦𑀸𑀢𑀺 𑀬𑀤𑀺 𑀅𑀦𑀼𑀮𑁄𑀫𑀢𑁄 𑀞𑀺𑀢𑀸 𑀏𑀓𑀓𑀸𑀤𑀬𑁄 𑀤𑁆𑀯𑀸𑀯𑀻𑀲𑀢𑀺𑀧𑀭𑀺𑀬𑁄𑀲𑀸𑀦𑀸 𑀊𑀦𑀢𑀭𑀕𑀡𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑁄 𑀊𑀦𑀢𑀭𑀕𑀡𑀦𑁄, 𑀢𑀲𑁆𑀲 𑀯𑀲𑁂𑀦 𑀅𑀦𑀼𑀮𑁄𑀫𑀢𑁄 𑀞𑀺𑀢𑀲𑁆𑀲𑀧𑀺 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 ¶ 𑀅𑀢𑁆𑀣𑁄. ‘‘𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁧𑁪𑁬) 𑀧𑀦 𑀦 𑀇𑀤𑀁 𑀮𑀓𑁆𑀔𑀡𑀁 𑀏𑀓𑀦𑁆𑀢𑀺𑀓𑀁.

𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁯𑁦. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 ¶ 𑀦 𑀓𑁂𑀯𑀮𑀁 𑀳𑁂𑀢𑀼𑀫𑁆𑀳𑀺𑀬𑁂𑀯, 𑀅𑀣 𑀔𑁄 𑀲𑀩𑁆𑀩𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀼𑀭𑁂𑀚𑀸𑀢𑀁 𑀆𑀲𑁂𑀯𑀦𑀜𑁆𑀘 𑀅𑀮𑀪𑀦𑁆𑀢𑀁 𑀓𑀜𑁆𑀘𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳.

‘‘𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀲𑁂𑀯𑀦𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀦𑁆𑀢𑀻’’𑀢𑀺 𑀇𑀤𑀁 𑀅𑀯𑀲𑁂𑀲𑀸𑀦𑀁 𑀮𑀸𑀪𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀲𑀩𑁆𑀩𑁂𑀲𑀁 𑀅𑀯𑀲𑁂𑀲𑀸𑀦𑀁 𑀮𑀸𑀪𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺𑀧𑀺 𑀳𑀺 𑀧𑀘𑁆𑀙𑀸𑀚𑀸𑀢𑁂 𑀧𑀲𑀗𑁆𑀕𑁄 𑀦𑀢𑁆𑀣𑀺 ‘‘𑀅𑀦𑀼𑀮𑁄𑀫𑀢𑁄 𑀲𑀩𑁆𑀩𑀢𑁆𑀣𑁂𑀯 𑀦 𑀮𑀩𑁆𑀪𑀢𑀻’’𑀢𑀺 𑀅𑀧𑀯𑀸𑀤𑀲𑁆𑀲 𑀓𑀢𑀢𑁆𑀢𑀸, 𑀧𑀼𑀭𑁂𑀚𑀸𑀢𑁄 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀅𑀦𑀼𑀮𑁄𑀫𑀢𑁄 𑀮𑀩𑁆𑀪𑀢𑀻𑀢𑀺 𑀇𑀤𑀫𑁆𑀧𑀺 𑀅𑀯𑀲𑁂𑀲𑀸 𑀲𑀩𑁆𑀩𑁂𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀆𑀧𑀚𑁆𑀚𑁂𑀬𑁆𑀬. 𑀬𑀫𑁆𑀧𑀺 𑀓𑁂𑀘𑀺 ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀭𑀳𑀺𑀢𑁂 𑀆𑀭𑀼𑀧𑁆𑀧𑁂𑀧𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀲𑀫𑁆𑀪𑀯𑀁 𑀜𑀸𑀧𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀢𑁂𑀲𑀁 𑀭𑀼𑀘𑀺𑀫𑀢𑁆𑀢𑀫𑁂𑀯. 𑀦 𑀳𑀺 𑀬𑀢𑁆𑀣 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀦 𑀮𑀩𑁆𑀪𑀢𑀺, 𑀢𑀢𑁆𑀣 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺. 𑀬𑀼𑀚𑁆𑀚𑀫𑀸𑀦𑀓𑀯𑀲𑁂𑀦𑀸𑀢𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑀲𑁆𑀲 𑀞𑀧𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁, 𑀬𑀼𑀚𑁆𑀚𑀫𑀸𑀦𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸𑀢𑀺 𑀅𑀢𑁆𑀣𑁄. ‘‘𑀫𑀕𑁆𑀕𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀳𑁂𑀢𑀼𑀧𑀘𑁆𑀘𑀬𑁄 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀧𑀦 𑀦 𑀮𑀩𑁆𑀪𑀢𑀻𑀢𑀺 ‘‘𑀳𑁂𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀧𑀘𑁆𑀙𑀸𑀚𑀸𑀢𑀢𑁄 𑀅𑀜𑁆𑀜𑁄 𑀅𑀦𑀼𑀮𑁄𑀫𑀢𑁄 𑀅𑀮𑀩𑁆𑀪𑀫𑀸𑀦𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀺𑀘𑀸𑀭𑀺𑀢𑀁. 𑀅𑀜𑁆𑀜𑀫𑀜𑁆𑀜𑁂 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 ‘‘𑀅𑀭𑀽𑀧𑀸𑀦𑀁𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀸 𑀦𑀯 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀢𑀫𑁆𑀧𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀳𑀺 𑀲𑀤𑀺𑀲𑀢𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀦 𑀯𑀺𑀘𑀸𑀭𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺.

𑁧𑁯𑁧-𑁧𑁯𑁫. 𑀬𑀸𑀯 ¶ 𑀆𑀲𑁂𑀯𑀦𑀸 𑀲𑀩𑁆𑀩𑀁 𑀲𑀤𑀺𑀲𑀦𑁆𑀢𑀺 𑀦 𑀅𑀜𑁆𑀜𑀫𑀜𑁆𑀜𑁂𑀦 𑀖𑀝𑀺𑀢𑀲𑁆𑀲 𑀫𑀽𑀮𑀲𑁆𑀲 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 𑀢𑀢𑁄 𑀧𑀭𑀸𑀦𑀺 𑀫𑀽𑀮𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀼 𑀳𑀺 𑀅𑀦𑀼𑀮𑁄𑀫𑀢𑁄 𑀬𑁄𑀚𑁂𑀢𑀩𑁆𑀩𑀧𑀘𑁆𑀘𑀬𑀸 𑀘 𑀧𑀜𑁆𑀳𑀸 𑀘𑀸𑀢𑀺 𑀲𑀩𑁆𑀩𑀁 𑀲𑀤𑀺𑀲𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀢𑀺 𑀏𑀢𑀲𑁆𑀲 ‘‘𑀇𑀫𑁂𑀲𑀫𑁆𑀧𑀺 𑀧𑀓𑀺𑀡𑁆𑀡𑀓𑀸𑀦𑀁 𑀯𑀲𑁂𑀦𑁂𑀢𑁆𑀣 𑀕𑀡𑀦𑀯𑀸𑀭𑁄 𑀅𑀲𑀫𑁆𑀫𑁄𑀳𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄 ¶ . 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀘𑁆𑀘𑀬𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀮𑀩𑁆𑀪𑀫𑀸𑀦𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼𑀧𑀻𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦 𑀓𑁂𑀯𑀮𑀁 𑀧𑀘𑁆𑀘𑀬𑁂𑀲𑁆𑀯𑁂𑀯 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑀦𑀻𑀓𑀢𑁄 𑀞𑀺𑀢𑁂 𑀓𑁂𑀘𑀺 𑀅𑀦𑀼𑀮𑁄𑀫𑀢𑁄 𑀦 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼𑀧𑀺 𑀓𑁄𑀘𑀺 𑀏𑀓𑀘𑁆𑀘𑀁 𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀓𑀜𑁆𑀘𑀺 𑀧𑀘𑁆𑀘𑀬𑀁 𑀦 𑀮𑀪𑀢𑀻𑀢𑀺. 𑀢𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀮𑀪𑀢𑀺, 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀳𑁂𑀢𑀼𑀧𑀘𑁆𑀘𑀬𑀁, 𑀢𑀣𑀸 𑀘 𑀛𑀸𑀦𑀧𑀘𑁆𑀘𑀬𑀁 𑀮𑀪𑀫𑀸𑀦𑁄 𑀫𑀕𑁆𑀕𑀧𑀘𑁆𑀘𑀬𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀮𑀸𑀪𑀸𑀮𑀸𑀪𑀸 𑀯𑀺𑀘𑀸𑀭𑀺𑀢𑀸. 𑀬𑀢𑁆𑀣𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀧𑀯𑀢𑁆𑀢𑁂 𑀅𑀲𑀜𑁆𑀜𑁂𑀲𑀼 𑀘. 𑀭𑀽𑀧𑀥𑀫𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀳𑀺 𑀧𑀜𑁆𑀘𑀯𑁄𑀓𑀸𑀭𑀧𑀯𑀢𑁆𑀢𑁂 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀳𑁂𑀢𑀸𑀤𑀻𑀦𑀺 𑀦 𑀮𑀪𑀦𑁆𑀢𑀻𑀢𑀺. ‘‘𑀳𑁂𑀢𑀸𑀥𑀺𑀧𑀢𑀺𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀛𑀸𑀦𑀫𑀕𑁆𑀕𑁂𑀧𑀺 𑀧𑀦 𑀦 𑀮𑀪𑀦𑁆𑀢𑀻𑀢𑀺 ‘‘𑀳𑁂𑀢𑀸𑀥𑀺𑀧𑀢𑀺𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺. 𑀬𑁂 𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀭𑀽𑀧𑀝𑁆𑀞𑀸𑀦𑀺𑀓𑀯𑀚𑁆𑀚𑁂𑀲𑀼 𑀏𑀢𑁂𑀬𑁂𑀯 𑀦 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀺 𑀳𑀺 𑀧𑀯𑀢𑁆𑀢𑁂 𑀓𑀝𑀢𑁆𑀢𑀸𑀭𑀽𑀧𑀁 𑀮𑀪𑀢𑀻𑀢𑀺. 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀦 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺𑀅𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀦𑁆𑀢𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀮𑀸𑀪𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄 𑀲𑀺𑀬𑀸. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀳𑀺 𑀥𑀫𑁆𑀫𑀯𑀲𑁂𑀦 𑀧𑀘𑁆𑀙𑀸𑀚𑀸𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀅𑀮𑀪𑀦𑁆𑀢𑀁 𑀦𑀸𑀫 𑀓𑀝𑀢𑁆𑀢𑀸𑀭𑀽𑀧𑀁 𑀦𑀢𑁆𑀣𑀺. 𑀓𑁄 𑀧𑀦 𑀯𑀸𑀤𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀓𑀫𑁆𑀫𑁂𑀲𑀼. 𑀇𑀦𑁆𑀤𑁆𑀭𑀺𑀬𑀁 𑀧𑀦 𑀅𑀮𑀪𑀦𑁆𑀢𑀁 𑀅𑀢𑁆𑀣𑀺, 𑀓𑀺𑀦𑁆𑀢𑀁? 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀬𑀤𑀺 𑀏𑀯𑀁 𑀉𑀧𑀸𑀤𑀸𑀭𑀽𑀧𑀸𑀦𑀺 𑀲𑀦𑁆𑀥𑀸𑀬 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀫𑁆𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀦 𑀧𑀸𑀓𑀝𑀦𑁆𑀢𑀺 𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀮𑀸𑀪𑀁 𑀯𑀸 𑀲𑀦𑁆𑀥𑀸𑀬 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀮𑀸𑀪𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁧𑁯𑁬-𑁧𑁯𑁭. 𑀦𑀸𑀭𑀫𑁆𑀫𑀡𑀫𑀽𑀮𑀓𑁂𑀲𑀼 𑀤𑀼𑀓𑀸𑀤𑀻𑀲𑀼 𑀳𑁂𑀢𑀼𑀬𑀸 𑀧𑀜𑁆𑀘𑀸𑀢𑀺 𑀬𑀤𑀺𑀧𑀺 𑀢𑀺𑀓𑀸𑀤𑀻𑀲𑀼 ‘‘𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺 𑀇𑀤𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀤𑀼𑀓𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀅𑀦𑀼𑀢𑁆𑀢𑀸𑀦𑀁 𑀯𑀢𑁆𑀢𑀼𑀓𑀸𑀫𑁄 ‘‘𑀤𑀼𑀓𑀸𑀤𑀻𑀲𑀽’’𑀢𑀺 𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦 𑀯𑀢𑁆𑀯𑀸 𑀢𑀢𑁆𑀣 𑀬𑀁 𑀆𑀤𑀺𑀤𑀼𑀓𑁂 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺, 𑀢𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀓𑁂𑀘𑀺 𑀧𑀦 ‘‘𑀦𑀸𑀭𑀫𑁆𑀫𑀡𑀫𑀽𑀮𑀓𑁂 𑀳𑁂𑀢𑀼𑀬𑀸 𑀧𑀜𑁆𑀘𑀸’’𑀢𑀺 𑀧𑀸𑀞𑀁 𑀯𑀤𑀦𑁆𑀢𑀺. ‘‘𑀅𑀜𑁆𑀜𑀫𑀜𑁆𑀜𑁂 𑀏𑀓𑀦𑁆𑀢𑀺 𑀪𑀽𑀢𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀯𑀢𑁆𑀣𑀼𑀧𑀺 𑀧𑀦 𑀮𑀩𑁆𑀪𑀢𑀻𑀢𑀺 ‘‘𑀪𑀽𑀢𑀭𑀽𑀧𑀸𑀦𑀺 𑀘𑁂𑀯 𑀯𑀢𑁆𑀣𑀼𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀧𑀞𑀦𑁆𑀢𑀺. 𑀢𑀺𑀫𑀽𑀮𑀓𑁂𑀢𑀺 𑀇𑀥𑀸𑀧𑀺 𑀤𑀼𑀫𑀽𑀮𑀓𑀁 𑀢𑀺𑀫𑀽𑀮𑀓𑀦𑁆𑀢𑀺 𑀯𑀤𑀦𑁆𑀢𑀺.

𑁨𑁦𑁩-𑁨𑁩𑁩. 𑀦𑀓𑀫𑁆𑀫𑀫𑀽𑀮𑀓𑁂 ¶ 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺𑀆𑀤𑀻𑀲𑀼 𑀘𑁂𑀢𑀦𑀸𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀢𑀺 𑀇𑀤𑀁 ‘‘𑀳𑁂𑀢𑀼𑀬𑀸 𑀢𑀻𑀡𑀻’’𑀢𑀺 𑀏𑀯𑀁𑀧𑀓𑀸𑀭𑁂 𑀘𑁂𑀢𑀦𑀸𑀫𑀢𑁆𑀢𑀲𑀗𑁆𑀕𑀸𑀳𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀢𑁆𑀣𑁄𑀯 𑀳𑁄𑀢𑀻𑀢𑀺. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀳𑀸𑀭𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀧𑀦 𑀭𑀽𑀧𑀫𑁆𑀧𑀺 𑀮𑀩𑁆𑀪𑀢𑀻𑀢𑀺.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸

𑁨𑁩𑁪-𑁨𑁪𑁨. 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄, 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀲𑀳𑀚𑀸𑀢𑁄𑀢𑀺𑀆𑀤𑀻𑀲𑀼 𑀲𑀳𑀚𑀸𑀢𑀲𑀤𑁆𑀤𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑀓𑀭𑀡𑀁 𑀲𑀳𑀚𑀸𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀓𑀭𑀡𑀲𑁆𑀲 𑀕𑀫𑀦𑀲𑁆𑀲 𑀯𑀸 𑀓𑀼𑀲𑀮𑀸𑀤𑀻𑀦𑀁 𑀓𑀫𑁆𑀫𑀪𑀸𑀯𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀧𑀘𑁆𑀘𑀬𑀯𑀸𑀭𑀸𑀤𑀻𑀲𑀼𑀧𑀺. 𑀢𑀢𑁆𑀭𑀸𑀧𑀺 𑀳𑀺 𑀧𑀘𑁆𑀘𑀬𑀲𑀤𑁆𑀤𑁂𑀦 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑀓𑀭𑀡𑀁 𑀦𑀺𑀲𑁆𑀲𑀬𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸 𑀯𑀼𑀢𑁆𑀢𑀁, 𑀲𑀁𑀲𑀝𑁆𑀞𑀲𑀤𑁆𑀤𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀓𑀭𑀡𑀁 𑀲𑀫𑁆𑀧𑀬𑀼𑀢𑁆𑀢𑀸𑀬𑀢𑁆𑀢𑀪𑀸𑀯𑀕𑀫𑀦𑀁 𑀯𑀸𑀢𑀺 𑀢𑀁𑀓𑀫𑁆𑀫𑀪𑀸𑀯𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀼𑀲𑀮𑀸𑀤𑀻𑀲𑀼 𑀓𑀢𑀦𑁆𑀢𑀺. 𑀲𑀳𑀚𑀸𑀢𑀫𑁆𑀧𑀺 𑀘 𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 ‘‘𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀻𑀧𑀺𑀢𑁄 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀉𑀧𑀸𑀤𑀸𑀭𑀽𑀧𑀁 𑀪𑀽𑀢𑀭𑀽𑀧𑀲𑁆𑀲𑀸’’𑀢𑀺 𑀘 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑀸𑀤𑀸𑀭𑀽𑀧𑀲𑁆𑀲𑀧𑀺 𑀳𑀺 𑀉𑀧𑀸𑀤𑀸𑀭𑀽𑀧𑀁 𑀬𑀣𑀸𑀯𑀼𑀢𑁆𑀢𑁄 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀯𑀢𑁆𑀣𑀼𑀯𑀚𑁆𑀚𑀸𑀦𑀺 𑀭𑀽𑀧𑀸𑀦𑀺 𑀘 𑀅𑀭𑀽𑀧𑀸𑀦𑀦𑁆𑀢𑀺.

𑀲𑀳𑀚𑀸𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁪𑁩. 𑀧𑀘𑁆𑀘𑀬𑀸𑀢𑀺 ¶ 𑀏𑀢𑁆𑀣 𑀧𑀢𑀺 𑀅𑀬𑁄 𑀧𑀘𑁆𑀘𑀬𑁄. 𑀧𑀢𑀺-𑀲𑀤𑁆𑀤𑁄 𑀧𑀢𑀺𑀝𑁆𑀞𑀢𑁆𑀣𑀁 𑀤𑀻𑀧𑁂𑀢𑀺, 𑀅𑀬-𑀲𑀤𑁆𑀤𑁄 𑀕𑀢𑀺𑀁, 𑀧𑀢𑀺𑀝𑁆𑀞𑀸𑀪𑀽𑀢𑀸 𑀕𑀢𑀺 𑀦𑀺𑀲𑁆𑀲𑀬𑁄 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁄 𑀧𑀘𑁆𑀘𑀬𑀸, 𑀧𑀘𑁆𑀘𑀬𑀓𑀭𑀡𑀢𑁄 𑀢𑀤𑀸𑀬𑀢𑁆𑀢𑀪𑀸𑀯𑀕𑀫𑀦𑀢𑁄 𑀯𑀸𑀢𑀺 𑀅𑀢𑁆𑀣𑁄.

‘‘𑀫𑀳𑀸𑀪𑀽𑀢𑁂 ¶ 𑀧𑀘𑁆𑀘𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁨𑁪𑁫) 𑀪𑀽𑀢𑀼𑀧𑀸𑀤𑀸𑀭𑀽𑀧𑀸𑀦𑀺 𑀲𑀳 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂 𑀘 𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀲𑀬𑀁 𑀦𑀺𑀲𑁆𑀲𑀬𑁄 𑀅𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀉𑀧𑀸𑀤𑀸𑀭𑀽𑀧𑁂𑀦 𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁫𑁫. 𑀅𑀲𑀜𑁆𑀜…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀏𑀢𑁆𑀣 𑀬𑁄 𑀧𑀝𑀺𑀘𑁆𑀘𑀯𑀸𑀭𑁂 𑀲𑀳𑀚𑀸𑀢𑁂 𑀓𑀫𑁆𑀫𑀉𑀢𑀼𑀚𑀸𑀦𑀁, 𑀓𑀫𑁆𑀫𑁂 𑀘 𑀏𑀓𑀦𑁆𑀢𑀸𑀦𑁂𑀓𑀦𑁆𑀢𑀓𑀫𑁆𑀫𑀚𑀸𑀦𑀁 𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀲𑁄 𑀦𑀸𑀥𑀺𑀧𑁆𑀧𑁂𑀢𑁄 𑀏𑀯 ‘‘𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑁂𑀯 𑀲𑀩𑁆𑀩𑀲𑁆𑀲 𑀘 𑀕𑀳𑀺𑀢𑀢𑁆𑀢𑀸𑀢𑀺 𑀢𑀁 𑀧𑀳𑀸𑀬 𑀬𑀣𑀸𑀕𑀳𑀺𑀢𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀯𑀺𑀲𑁂𑀲𑀦𑀯𑀲𑁂𑀦 ‘‘𑀉𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑀁 𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺 𑀅𑀢𑁆𑀣𑀫𑀸𑀳. 𑀫𑀳𑀸𑀪𑀽𑀢𑁂 𑀧𑀦 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸 𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑁂𑀢𑀩𑁆𑀩𑀸𑀢𑀺 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑁂𑀦 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑁂𑀦𑁂𑀯 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁.

𑁨𑁬𑁯-𑁨𑁭𑁬. ‘‘𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢’’𑀦𑁆𑀢𑀺, ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲𑀸𑀢𑀺 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺 𑀘 𑀧𑀼𑀭𑀺𑀫𑀧𑀸𑀞𑁂 𑀧𑀫𑀸𑀤𑀮𑁂𑀔𑀸 𑀤𑀝𑁆𑀞𑀩𑁆𑀩𑀸.

𑁨𑁮𑁬-𑁨𑁮𑁭. 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀧𑀼𑀭𑁂𑀚𑀸𑀢𑁂 𑀤𑁆𑀯𑁂𑀢𑀺 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑀼𑀧𑁆𑀧𑁂 𑀧𑀦 𑀅𑀳𑁂𑀢𑀼𑀓𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀓𑀺𑀭𑀺𑀬𑀲𑁆𑀲 𑀘 𑀯𑀲𑁂𑀦 𑀤𑁆𑀯𑁂𑀢𑀺 𑀯𑀼𑀢𑁆𑀢𑀸, 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑁂𑀢𑀺 𑀆𑀭𑀼𑀧𑁆𑀧𑁂 𑀅𑀳𑁂𑀢𑀼𑀓𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀮𑀩𑁆𑀪𑀫𑀸𑀦𑁂𑀲𑀼 𑀏𑀓𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀭𑀼𑀧𑁆𑀧𑁂 𑀧𑀦 𑀅𑀳𑁂𑀢𑀼𑀓𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀬 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀘𑁆𑀘𑀲𑁆𑀲 𑀘 𑀭𑀽𑀧𑀲𑁆𑀲 𑀯𑀲𑁂𑀦 𑀤𑁆𑀯𑁂 𑀯𑀼𑀢𑁆𑀢𑀸𑀢𑀺, 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑁂𑀢𑀺 𑀆𑀭𑀼𑀧𑁆𑀧𑁂 𑀅𑀳𑁂𑀢𑀼𑀓𑀸𑀓𑀼𑀲𑀮𑀓𑀺𑀭𑀺𑀬𑀸𑀏𑀓𑀘𑁆𑀘𑀭𑀽𑀧𑀸𑀦𑀁 𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. ‘‘𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑁂𑀲𑀼 𑀏𑀓𑀦𑁆𑀢𑀺 𑀲𑀩𑁆𑀩𑀭𑀽𑀧𑀲𑁆𑀲 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦𑀳𑁂𑀢𑀼𑀫𑀽𑀮𑀓𑀢𑁆𑀢𑀸 𑀇𑀫𑀲𑁆𑀲 ¶ 𑀦𑀬𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀁 𑀮𑀪𑀦𑁆𑀢𑀁 𑀦 𑀮𑀩𑁆𑀪𑀢𑀻𑀢𑀺 ‘‘𑀏𑀓𑀘𑁆𑀘𑀲𑁆𑀲 𑀭𑀽𑀧𑀲𑁆𑀲 𑀯𑀲𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀁. 𑀘𑀓𑁆𑀔𑀸𑀤𑀺𑀥𑀫𑁆𑀫𑀯𑀲𑁂𑀦 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀯𑀸 𑀲𑀩𑁆𑀩𑀁 𑀮𑀩𑁆𑀪𑀢𑀻𑀢𑀺 ‘‘𑀲𑀩𑁆𑀩𑀭𑀽𑀧𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

𑁨𑁮𑁯-𑁨𑁯𑁬. 𑀆𑀕𑀢𑀸𑀦𑀸𑀕𑀢𑀦𑁆𑀢𑀺 ¶ 𑀧𑀜𑁆𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀦𑁆𑀢𑀺 𑀆𑀕𑀢𑁂 𑀘 𑀧𑀜𑁆𑀳𑁂 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀥𑀫𑁆𑀫𑀯𑀲𑁂𑀦.

𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸

𑁩𑁨𑁯-𑁩𑁩𑁭. 𑀧𑀘𑁆𑀘𑀬𑀯𑀸𑀭𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀦𑁆𑀢𑀺 𑀦𑀺𑀲𑁆𑀲𑀬𑀯𑀸𑀭𑁂 𑀯𑀼𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀁 𑀦𑀺𑀬𑀫𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀲𑁆𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸

𑁩𑁫𑁧-𑁩𑁬𑁮. 𑀲𑀁𑀲𑀝𑁆𑀞𑀯𑀸𑀭𑁂 𑀧𑀘𑁆𑀘𑀦𑀻𑀬𑁂 ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻’’𑀢𑀺 𑀇𑀤𑀁 𑀯𑀢𑁆𑀣𑀼𑀯𑀺𑀭𑀳𑀺𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀲𑀼𑀁 𑀅𑀦𑀼𑀤𑁆𑀥𑀭𑀡𑀢𑁄 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀳𑀺 𑀲𑀳𑀚𑀸𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀯𑀢𑁆𑀣𑀼𑀓𑀸 𑀧𑀝𑀺𑀲𑀦𑁆𑀥𑀺 𑀉𑀤𑁆𑀥𑀝𑀸, 𑀲𑀸 𑀇𑀥𑀸𑀧𑀺 𑀅𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑁂𑀲𑀼 𑀦𑀓𑀫𑁆𑀫𑀦𑀯𑀺𑀧𑀸𑀓𑀦𑀛𑀸𑀦𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀦 𑀮𑀩𑁆𑀪𑀢𑀺, 𑀅𑀜𑁆𑀜𑁂𑀲𑀼 𑀘 𑀅𑀦𑀼𑀮𑁄𑀫𑀢𑁄 𑀧𑀘𑁆𑀘𑀦𑀻𑀬𑀢𑁄 𑀘 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂𑀲𑀼 𑀮𑀩𑁆𑀪𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀥𑀝𑀸𑀢𑀺. 𑀲𑁂𑀲𑀸 𑀢𑁂𑀭𑀲 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀲𑁂𑀲𑀸 𑀘𑀼𑀤𑁆𑀤𑀲𑀸’’𑀢𑀺 𑀪𑀯𑀺𑀢𑀩𑁆𑀩𑀁. 𑀦 𑀛𑀸𑀦𑁂 𑀏𑀓𑀦𑁆𑀢𑀺 𑀅𑀳𑁂𑀢𑀼𑀓𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀲𑁂𑀦𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑀺𑀢𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, ‘‘𑀦𑀫𑀕𑁆𑀕𑁂 𑀏𑀓𑀦𑁆𑀢𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀁.

𑁩𑁬𑁯-𑁩𑁯𑁧. 𑀳𑁂𑀝𑁆𑀞𑀸 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀝𑀺𑀘𑁆𑀘𑀯𑀸𑀭𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀯𑀼𑀢𑁆𑀢𑀦𑀬𑁂𑀦. ‘‘𑀦𑀳𑁂𑀢𑀼𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀅𑀳𑁂𑀢𑀼𑀓𑀫𑁄𑀳𑁄𑀯 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀺, 𑀲𑁂𑀲𑀸 𑀦 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑁂𑀲𑁂𑀲𑀼 𑀧𑀦 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀸𑀳𑁂𑀢𑀼𑀓𑀓𑁆𑀔𑀦𑁆𑀥𑀸 𑀢𑀁𑀲𑀫𑀼𑀝𑁆𑀞𑀸𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀛𑀸𑀦𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀦 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑁂𑀦 𑀲𑀳 𑀬𑁄𑀚𑀦𑀸 𑀅𑀢𑁆𑀣𑀻𑀢𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀁 𑀲𑀳𑀺𑀢𑀁 𑀮𑀪𑀢𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘‘𑀅𑀳𑁂𑀢𑀼𑀓𑀫𑁄𑀳𑁄𑀯 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀁𑀲𑀝𑁆𑀞𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸

𑁩𑁯𑁨-𑁪𑁦𑁦. 𑀲𑀤𑀺𑀲𑀁 ¶ 𑀲𑀫𑁆𑀧𑀬𑀼𑀢𑁆𑀢𑀁 𑀲𑀁𑀲𑀝𑁆𑀞𑀁 𑀯𑁄𑀓𑀺𑀡𑁆𑀡𑀜𑁆𑀘 𑀲𑀁𑀲𑀝𑁆𑀞𑀁 𑀦 𑀳𑁄𑀢𑀻𑀢𑀺 𑀉𑀪𑀬𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀯𑀼𑀘𑁆𑀘𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀺𑀬𑀸𑀫𑀓𑀁 𑀳𑁄𑀢𑀻𑀢𑀺.

𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁦𑁧-𑁪𑁦𑁩. 𑀬𑁂𑀳𑀺 𑀧𑀘𑁆𑀘𑀬𑁂𑀳𑀺 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑀣𑀸𑀓𑁆𑀓𑀫𑁂𑀦 𑀆𑀕𑀢𑀸𑀕𑀢𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀢𑁂𑀦 𑀓𑀼𑀲𑀮𑁄 𑀓𑀼𑀲𑀮𑀸𑀤𑀻𑀦𑀁, 𑀅𑀓𑀼𑀲𑀮𑁄 𑀅𑀓𑀼𑀲𑀮𑀸𑀤𑀻𑀦𑀁, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀸𑀤𑀻𑀦𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀤𑀻𑀦𑀦𑁆𑀢𑀺𑀆𑀤𑀺𑀓𑁄 𑀲𑀩𑁆𑀩𑁄 𑀧𑀪𑁂𑀤𑁄 𑀦𑀺𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀬𑀣𑀸𑀦𑀺𑀤𑀲𑁆𑀲𑀺𑀢𑁂 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸 𑀆𑀳 ‘‘𑀢𑁂 𑀧𑀘𑁆𑀘𑀬𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑁪𑁦𑁪. 𑀤𑀢𑁆𑀯𑀸𑀢𑀺 𑀏𑀢𑁆𑀣 𑀤𑀸-𑀲𑀤𑁆𑀤𑁄 𑀲𑁄𑀥𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀫𑀦𑁆𑀢𑁆𑀯𑀸 𑀆𑀳 ‘‘𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸’’𑀢𑀺. 𑀢𑁂𑀲𑀜𑁆𑀳𑀺 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀢𑁂𑀲𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀸𑀭𑀳𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀧𑀼𑀭𑁂𑀘𑀸𑀭𑀺𑀓𑀁 𑀢𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀯𑀺𑀧𑀲𑁆𑀲𑀦𑀸𑀓𑀼𑀲𑀮𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀪𑀽𑀫𑀺𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀢𑁂𑀦𑁂𑀯𑀸𑀢𑀺 𑀥𑀫𑁆𑀫𑀯𑀲𑁂𑀦𑁂𑀯 𑀤𑀲𑁆𑀲𑀦𑀢𑁄, 𑀤𑁂𑀲𑀦𑀦𑁆𑀢𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁫. 𑀅𑀲𑁆𑀲𑀸𑀤𑀦𑀁 𑀲𑀭𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀲𑀲𑁄𑀫𑀦𑀲𑁆𑀲𑀲𑁆𑀲 𑀭𑀸𑀕𑀲𑁆𑀲 𑀘 𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀅𑀦𑀼𑀪𑀯𑀢𑀺 𑀘𑁂𑀯 𑀭𑀚𑁆𑀚𑀢𑀺 𑀘𑀸’’𑀢𑀺. 𑀅𑀪𑀺𑀦𑀦𑁆𑀤𑀦𑀁 𑀧𑀻𑀢𑀺𑀓𑀺𑀘𑁆𑀘𑀲𑀳𑀺𑀢𑀸𑀬 𑀢𑀡𑁆𑀳𑀸𑀬 𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦𑀸’’𑀢𑀺. 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀤𑀺𑀝𑁆𑀞𑀺𑀬𑁂𑀯. 𑀏𑀢𑁆𑀣 𑀧𑀦 𑀧𑀘𑁆𑀙𑀺𑀫𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀅𑀢𑁆𑀢𑀸 𑀅𑀢𑁆𑀢𑀦𑀺𑀬𑀦𑁆𑀢𑀺𑀆𑀤𑀺𑀯𑀲𑁂𑀦…𑀧𑁂… 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀦𑁆𑀤𑀦𑀸 𑀧𑀦 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬𑁂𑀯𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡…𑀧𑁂… 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁 𑀭𑀸𑀕𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻’’𑀢𑀺 (𑀧𑀝𑁆𑀞𑀸. 𑁨.𑁮.𑁭𑁨) 𑀯𑀘𑀦𑀢𑁄, 𑀢𑀲𑁆𑀫𑀸 𑀧𑀼𑀭𑀺𑀫𑁄𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀻𑀲𑀼 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 ¶ 𑀭𑀸𑀕𑁂𑀦 𑀘 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀢𑁂𑀲𑀼𑀬𑁂𑀯 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀘𑀢𑀽𑀲𑀼𑀧𑀺 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀘 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺𑀧𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀲𑀼𑀘𑀺𑀡𑁆𑀡𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁪𑁦𑁬. 𑀢𑀤𑀸𑀭𑀫𑁆𑀫𑀡𑀢𑀸𑀢𑀺 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦. 𑀯𑀺𑀪𑀢𑁆𑀢𑀺𑀮𑁄𑀧𑁄 𑀳𑁂𑀢𑁆𑀣 𑀓𑀢𑁄𑀢𑀺. 𑀪𑀸𑀯𑀯𑀦𑁆𑀢𑀢𑁄 𑀯𑀸 𑀅𑀜𑁆𑀜𑁄 𑀪𑀸𑀯𑁄 𑀦𑀢𑁆𑀣𑀻𑀢𑀺 𑀪𑀸𑀯𑁂𑀦𑁂𑀯 𑀯𑀺𑀧𑀸𑀓𑀁 𑀯𑀺𑀲𑁂𑀲𑁂𑀢𑀺, 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀪𑀸𑀯𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀸𑀦𑀁 𑀯𑀺𑀬 𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀦𑀺𑀬𑁄𑀕𑀢𑁄 𑀯𑀯𑀢𑁆𑀣𑀺𑀢𑀁 𑀇𑀤𑀜𑁆𑀘 𑀓𑀫𑁆𑀫𑀁 𑀆𑀭𑀫𑁆𑀫𑀡𑀦𑁆𑀢𑀺 𑀢𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀯𑀼𑀢𑁆𑀢𑀁. 𑀢𑀤𑀸𑀭𑀫𑁆𑀫𑀡𑁂𑀦 𑀧𑀦 𑀓𑀼𑀲𑀮𑀸𑀭𑀫𑁆𑀫𑀡𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀓𑀫𑁆𑀫𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺𑀆𑀤𑀬𑁄𑀧𑀺 𑀤𑀲𑁆𑀲𑀺𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀯𑀸𑀢𑀺 𑀯𑀤𑀦𑁆𑀢𑁂𑀦 𑀅𑀦𑀼𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁂 𑀬𑁂𑀪𑀼𑀬𑁆𑀬𑁂𑀦 𑀆𑀲𑀦𑁆𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀦 𑀧𑀝𑀺𑀮𑁄𑀫𑀢𑁄 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀘 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀲𑀦𑁆𑀦𑀸𑀧𑀺 𑀲𑀫𑀸𑀧𑀢𑁆𑀢𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀯𑀁 𑀅𑀦𑀼𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲𑀧𑀺 𑀪𑀯𑁂𑀬𑁆𑀬𑀸𑀢𑀺. ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲𑀸𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀚𑁆𑀚𑀦𑀸𑀬 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀯𑀸 ‘‘𑀬𑀸 𑀏𑀢𑁂𑀲𑀁 𑀆𑀯𑀚𑁆𑀚𑀦𑀸, 𑀢𑀲𑁆𑀲𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 ‘‘𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑀸’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸 𑀔𑀦𑁆𑀥𑀸 𑀅𑀩𑁆𑀬𑀸𑀓𑀢𑀲𑁆𑀲 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺 𑀢𑀁 𑀦 𑀯𑀼𑀢𑁆𑀢𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀦𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀁 𑀬𑀸𑀬 𑀓𑀸𑀬𑀘𑀺 𑀆𑀯𑀚𑁆𑀚𑀦𑀸𑀬 𑀘 𑀓𑀼𑀲𑀮𑀸𑀭𑀫𑁆𑀫𑀡𑀸𑀬 𑀓𑀼𑀲𑀮𑀸 𑀔𑀦𑁆𑀥𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁪𑁦𑁭-𑁪𑁦𑁯. 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀯𑀲𑁂𑀦 ¶ 𑀯𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀲𑀪𑀸𑀯𑀢𑁄 𑀘 𑀅𑀦𑀺𑀝𑁆𑀞𑀢𑀸𑀫𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀅𑀓𑁆𑀔𑀦𑁆𑀢𑀺𑀪𑁂𑀤𑀸 𑀯𑀸.

𑁪𑁧𑁦. 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀡𑀓𑀸𑀬𑁂𑀳𑀺 𑀦𑀺𑀬𑀢𑀸𑀭𑀫𑁆𑀫𑀡𑁂𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀅𑀩𑁆𑀬𑀸𑀓𑀢𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀩𑁆𑀩𑀲𑁆𑀲 𑀳𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑀁 𑀓𑀭𑁄𑀢𑀻𑀢𑀺.

𑁪𑁧𑁩-𑁪𑁧𑁬. 𑀘𑀢𑀼𑀪𑀽𑀫𑀓𑀁 ¶ 𑀓𑀼𑀲𑀮𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯.

𑁪𑁧𑁭. 𑀅𑀧𑀼𑀩𑁆𑀩𑀢𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀼𑀝𑁆𑀞𑀸𑀦𑀁 𑀪𑀯𑀗𑁆𑀕𑀫𑁂𑀯, 𑀢𑀁 𑀧𑀦 𑀫𑀽𑀮𑀸𑀕𑀦𑁆𑀢𑀼𑀓𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀢𑀤𑀸𑀭𑀫𑁆𑀫𑀡𑀁 𑀧𑀓𑀢𑀺𑀪𑀯𑀗𑁆𑀕𑀜𑁆𑀘. 𑀅𑀦𑀼𑀮𑁄𑀫𑀁 𑀲𑁂𑀓𑁆𑀔𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀓𑀸𑀬𑀘𑀺 𑀲𑁂𑀓𑁆𑀔𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀚𑁆𑀚𑁂𑀢𑀩𑁆𑀩𑀢𑁆𑀢𑀸 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀇𑀫𑀁 𑀦𑀺𑀩𑁆𑀩𑀺𑀲𑁂𑀲𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸 𑀤𑀼𑀯𑀺𑀥𑀲𑁆𑀲𑀧𑀺 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀯𑀼𑀝𑁆𑀞𑀸𑀦𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀯𑀼𑀢𑁆𑀢𑀫𑁂𑀯.

𑀢𑀸 𑀉𑀪𑁄𑀧𑀺…𑀧𑁂… 𑀤𑁆𑀯𑀸𑀤𑀲𑀦𑁆𑀦𑀦𑁆𑀢𑀺 𑀇𑀤𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀲𑁆𑀲 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨𑁩. 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀢𑁆𑀢𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀦𑁂𑀢𑀁 𑀏𑀓𑀦𑁆𑀢𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 ‘‘𑀩𑀮𑀯𑀘𑁂𑀢𑀦𑀸𑀯 𑀮𑀩𑁆𑀪𑀢𑀺, 𑀦 𑀤𑀼𑀩𑁆𑀩𑀮𑀸’’𑀢𑀺 𑀏𑀢𑀁 𑀏𑀓𑀦𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀤𑀴𑁆𑀳𑀁 𑀯𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀓𑀸𑀭𑀡𑀦𑁆𑀢𑀺? 𑀩𑀮𑀯𑀢𑁄 𑀤𑀼𑀩𑁆𑀩𑀮𑀲𑁆𑀲 𑀯𑀸 𑀓𑀢𑁄𑀓𑀸𑀲𑀲𑁆𑀲 𑀅𑀦𑁆𑀢𑀭𑀸𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀯𑀺𑀧𑀘𑁆𑀘𑀦𑀢𑁄 ‘‘𑀬𑀁𑀓𑀜𑁆𑀘𑀺 𑀬𑀤𑀺 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀻’’𑀢𑀺 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀢𑁄𑀓𑀸𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀧𑀦 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀯𑀺𑀧𑀸𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁩.𑁯𑁩) 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀯𑀺𑀲𑀼𑀁 ¶ 𑀉𑀤𑁆𑀥𑀝𑀢𑁆𑀢𑀸, 𑀯𑁂𑀤𑀦𑀸𑀢𑁆𑀢𑀺𑀓𑁂 𑀘 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑁂 𑀅𑀝𑁆𑀞𑀸’’𑀢𑀺 (𑀧𑀝𑁆𑀞𑀸. 𑁧.𑁨.𑁮𑁭) 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀺𑀧𑀸𑀓𑀚𑀦𑀓𑀫𑁆𑀧𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀢𑀲𑁆𑀫𑀺𑀁 𑀯𑀸 𑀯𑀺𑀭𑀼𑀤𑁆𑀥𑁄𑀢𑀺 𑀢𑀁𑀦𑀺𑀫𑀺𑀢𑁆𑀢𑀁 𑀯𑀺𑀭𑀼𑀤𑁆𑀥𑁄, 𑀯𑀺𑀭𑀼𑀤𑁆𑀥𑀦𑁆𑀢𑀺 𑀯𑀸 𑀧𑀸𑀞𑁄. 𑀑𑀫𑀸𑀦𑀦𑁆𑀢𑀺 𑀧𑀭𑀲𑁆𑀲 𑀧𑀯𑀢𑁆𑀢𑀑𑀫𑀸𑀦𑀁. 𑀭𑀸𑀕𑁄 𑀭𑀜𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀭𑀸𑀕𑀢𑀡𑁆𑀳𑀸, ‘‘𑀇𑀢𑀺 𑀫𑁂 𑀘𑀓𑁆𑀔𑀼𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀭𑀽𑀧𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀧𑀡𑀺𑀤𑀳𑀦𑀢𑀡𑁆𑀳𑀸 𑀧𑀢𑁆𑀣𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑁂𑀲𑀼 ¶ 𑀅𑀜𑁆𑀜𑀫𑁆𑀧𑀻𑀢𑀺 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀳𑀦𑀺𑀢𑀢𑁄 𑀅𑀜𑁆𑀜𑀫𑁆𑀧𑀺 𑀧𑀸𑀡𑀁 𑀳𑀦𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑀦𑀯𑀲𑁂𑀦 𑀯𑀸𑀢𑀺 𑀫𑀸𑀢𑀼𑀖𑀸𑀢𑀓𑀫𑁆𑀫𑁂𑀦 𑀲𑀤𑀺𑀲𑀢𑀸𑀬 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸𑀬𑀧𑀺 𑀆𑀡𑀢𑁆𑀢𑀘𑁂𑀢𑀦𑀸𑀬 𑀫𑀸𑀢𑀼𑀖𑀸𑀢𑀓𑀫𑁆𑀫𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀏𑀲 𑀦𑀬𑁄 𑀤𑁆𑀯𑀻𑀳𑀺 𑀧𑀳𑀸𑀭𑁂𑀳𑀻𑀢𑀺 𑀏𑀢𑁆𑀣𑀸𑀧𑀺.

𑀬𑀣𑁂𑀯 𑀳𑀺…𑀧𑁂… 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫𑀸𑀢𑀺 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻𑀢𑀺 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀯𑀲𑁂𑀦 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀬𑀣𑀸 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻𑀢𑀺𑀏𑀯𑀫𑀸𑀤𑀺 𑀳𑁄𑀢𑀺, 𑀏𑀯𑀁 𑀭𑀸𑀕𑀸𑀤𑀬𑁄 𑀲𑀤𑁆𑀥𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀤𑀫𑁆𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀬𑀺𑀓𑀁 𑀲𑀼𑀔𑀦𑁆𑀢𑀺𑀆𑀤𑀻𑀦𑀁 𑀏𑀓𑀢𑁄 𑀤𑀲𑁆𑀲𑀦𑁂𑀦 𑀯𑀺𑀲𑀼𑀁𑀬𑁂𑀯 𑀦 𑀏𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄, 𑀅𑀣 𑀔𑁄 𑀏𑀓𑀢𑁄𑀧𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨𑁫. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀧𑀘𑁆𑀘𑀬𑀢𑁆𑀢𑀸𑀬𑁂𑀯𑀸𑀢𑀺 𑀏𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀦 𑀧𑀼𑀭𑀺𑀫𑀯𑀸𑀭𑁂𑀲𑀼 𑀯𑀺𑀬 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀣 𑀔𑁄 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑁄, 𑀦 𑀘 𑀧𑀘𑁆𑀙𑀸𑀚𑀸𑀢𑀓𑁆𑀔𑀦𑁆𑀥𑀸 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑁂𑀦𑁂𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀇𑀥 𑀅𑀦𑀼𑀮𑁄𑀫𑀢𑁄 𑀆𑀕𑀢𑁄𑀢𑀺.

𑁪𑁨𑁭. 𑀘𑁂𑀢𑀦𑀸 𑀯𑀢𑁆𑀣𑀼𑀲𑁆𑀲𑀧𑀺 𑀧𑀘𑁆𑀘𑀬𑁄𑀢𑀺 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀪𑀽𑀢𑀲𑁆𑀲𑀧𑀺 𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀧𑀘𑁆𑀘𑀬𑀯𑀸𑀭𑁂 𑀯𑀺𑀬 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀤𑀼𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀧𑀜𑁆𑀳𑀸 𑀦 𑀉𑀤𑁆𑀥𑀝𑀸𑀢𑀺? 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑀢𑁆𑀣 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑁆𑀧𑀥𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁪𑁬) 𑀯𑀼𑀢𑁆𑀢𑀁. 𑀬𑀢𑁄 𑀢𑀢𑁄 𑀯𑀸 𑀉𑀪𑀬𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀁𑀬𑁂𑀯 𑀳𑀺 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀁, 𑀦 𑀉𑀪𑀬𑀲𑁆𑀲 𑀉𑀪𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑁄𑀢𑀺. 𑀇𑀥 𑀧𑀦 𑀧𑀘𑁆𑀘𑀬𑀧𑁆𑀧𑀥𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀉𑀪𑀺𑀦𑁆𑀦𑀁 𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 ¶ ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁.

𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸

𑁪𑁩𑁯. ‘‘𑀏𑀢𑁆𑀣 𑀧𑀦 𑀧𑀼𑀭𑁂𑀚𑀸𑀢𑀫𑁆𑀧𑀺 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀢𑀣𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? ‘‘𑀢𑀻𑀡𑀻’’𑀢𑀺 𑀕𑀡𑀦𑀫𑀢𑁆𑀢𑀲𑀸𑀫𑀜𑁆𑀜𑀢𑁄.

𑁪𑁪𑁦. ‘‘𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀁 𑀲𑁂𑀲𑀸𑀥𑀺𑀧𑀢𑀺𑀦𑁄 𑀯𑀺𑀲𑀪𑀸𑀕𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀯𑀺𑀲𑀪𑀸𑀕𑁂𑀦 𑀏𑀓𑁂𑀦 𑀆𑀭𑀫𑁆𑀫𑀡𑁂𑀦 𑀦𑀺𑀤𑀲𑁆𑀲𑀦𑀁 𑀅𑀓𑀢𑁆𑀯𑀸 𑀅𑀦𑀦𑁆𑀢𑀭𑀸𑀤𑀻𑀦𑀺 𑀯𑀤𑀦𑁆𑀢𑁄 𑀲𑀩𑁆𑀩𑁂 𑀯𑀺𑀲𑀪𑀸𑀕𑁂 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸 𑀘 𑀯𑀺𑀲𑀪𑀸𑀕𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 ‘‘𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑁂𑀲𑀼 𑀞𑀧𑁂𑀢𑁆𑀯𑀸 𑀧𑀜𑁆𑀜𑀁 𑀲𑁂𑀲𑀸 𑀥𑀫𑁆𑀫𑀸 𑀯𑀺𑀲𑀪𑀸𑀕𑀸’’𑀢𑀺 𑀧𑀞𑀦𑁆𑀢𑀺. 𑀢𑀣𑀸 𑀪𑀸𑀯𑀸𑀪𑀸𑀯𑀢𑁄 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄. 𑀦𑀦𑀼 𑀬𑀣𑀸 𑀅𑀫𑁄𑀳𑀯𑀚𑁆𑀚𑀸𑀦𑀁 𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀻𑀢𑀺 𑀧𑀜𑁆𑀜𑀸𑀯𑀚𑁆𑀚𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀦𑀁 𑀯𑀺𑀲𑀪𑀸𑀕𑀢𑀸, 𑀏𑀯𑀁 𑀓𑀼𑀲𑀮𑀸𑀤𑀺𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄 𑀳𑁂𑀢𑀼𑀯𑀚𑁆𑀚𑀸𑀦𑀁 𑀯𑀺𑀧𑀸𑀓𑀸𑀦𑀁 𑀯𑀺𑀲𑀪𑀸𑀕𑀢𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁, 𑀉𑀪𑀬𑀧𑀘𑁆𑀘𑀬𑀲𑀳𑀺𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀫𑁆𑀳𑀺 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀯𑀺𑀧𑀸𑀓𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀳𑁂𑀢𑀼𑀲𑀳𑀚𑀸𑀢𑀧𑀘𑁆𑀘𑀬𑀲𑀳𑀺𑀢𑀭𑀸𑀲𑀺𑀫𑁆𑀳𑀺 𑀲𑀢𑀺𑀧𑀺 𑀳𑁂𑀢𑀼𑀯𑀚𑁆𑀚𑀲𑀩𑁆𑀪𑀸𑀯𑁂 𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄 ¶ 𑀦𑀢𑁆𑀣𑀻𑀢𑀺 𑀦 𑀳𑁂𑀢𑀼𑀯𑀚𑁆𑀚𑀸𑀦𑀁 𑀲𑀳𑀚𑀸𑀢𑀸𑀦𑀁 𑀳𑁂𑀢𑀼𑀲𑁆𑀲 𑀯𑀺𑀲𑀪𑀸𑀕𑀢𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺. 𑀏𑀲 𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀧𑀺. 𑀅𑀧𑀺𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀧𑀘𑁆𑀘𑀬𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀢𑀣𑀸 𑀪𑀸𑀯𑀸𑀪𑀸𑀯𑀯𑀲𑁂𑀦 𑀲𑀪𑀸𑀕𑀢𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀦𑀸𑀦𑀸𑀓𑁆𑀔𑀡𑀯𑀲𑁂𑀦 𑀯𑀺𑀲𑀪𑀸𑀕𑀢𑀸 𑀢𑀲𑁆𑀲𑁂𑀯 𑀦 𑀯𑀢𑁆𑀢𑀩𑁆𑀩𑀸𑀢𑀺.

𑀓𑀼𑀲𑀮𑀸 𑀯𑀻𑀫𑀁𑀲𑀸𑀢𑀺 𑀇𑀤𑀁 ‘‘𑀓𑀼𑀲𑀮𑀸 𑀯𑀻𑀫𑀁𑀲𑀸𑀥𑀺𑀧𑀢𑀻’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀅𑀦𑀥𑀺𑀧𑀢𑀺𑀪𑀽𑀢𑀸 𑀯𑀻𑀫𑀁𑀲𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑁪𑁪𑁧-𑁪𑁪𑁩. ‘‘𑀲𑀘𑁂 ¶ 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀯𑀺𑀲𑀢𑀺, 𑀇𑀢𑀭𑀸𑀦𑀺 𑀤𑁆𑀯𑁂 𑀮𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘𑀸’’𑀢𑀺 𑀇𑀤𑀁 𑀧𑀦 𑀦 𑀮𑀩𑁆𑀪𑀢𑀻𑀢𑀺 ‘‘𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀤𑁆𑀯𑁂 𑀮𑀪𑀢𑀻’’𑀢𑀺 𑀧𑀞𑀦𑁆𑀢𑀺. 𑀊𑀦𑀢𑀭𑀕𑀡𑀦𑁂𑀲𑀽𑀢𑀺 𑀬𑁂𑀲𑀼 𑀧𑀯𑀺𑀝𑁆𑀞𑁂𑀲𑀼 𑀊𑀦𑀢𑀭𑀸 𑀕𑀡𑀦𑀸 𑀳𑁄𑀢𑀺, 𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀏𑀯𑀁 𑀊𑀦𑀢𑀭𑀕𑀡𑀦𑁂𑀲𑀼 𑀯𑀸 𑀅𑀜𑁆𑀜𑀫𑀜𑁆𑀜𑀸𑀤𑀻𑀲𑀼 𑀧𑀯𑀺𑀲𑀦𑁆𑀢𑁂𑀲𑀼 𑀢𑁂𑀲𑀁 𑀯𑀲𑁂𑀦 𑀢𑀺𑀓𑀢𑁄 𑀊𑀦𑀁 𑀬𑀣𑀸𑀮𑀤𑁆𑀥𑀜𑁆𑀘 𑀏𑀓𑀦𑁆𑀢𑀺 𑀕𑀡𑀦𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀅𑀯𑀺𑀧𑀸𑀓𑀸𑀦𑀻𑀢𑀺 𑀅𑀦𑀸𑀫𑀝𑁆𑀞𑀯𑀺𑀧𑀸𑀓𑀸𑀦𑀻𑀢𑀺 𑀅𑀢𑁆𑀣𑁄, 𑀦 𑀯𑀺𑀧𑀸𑀓𑀳𑁂𑀢𑀼𑀭𑀳𑀺𑀢𑀸𑀦𑀻𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀧𑀺 𑀲𑀳𑀚𑀸𑀢𑀯𑀺𑀧𑀸𑀓𑀸 𑀘𑁂𑀯𑀸𑀢𑀺 𑀢𑀢𑁆𑀣 𑀬𑁂 𑀲𑀳𑀚𑀸𑀢𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀲𑀳𑀚𑀸𑀢𑀭𑀽𑀧𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸 𑀘𑀸𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀝𑀢𑁆𑀢𑀸𑀭𑀽𑀧𑀸 𑀘 𑀮𑀩𑁆𑀪𑀦𑁆𑀢𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺𑀧𑀺 𑀧𑀦 𑀧𑀞𑀦𑁆𑀢𑀺.

𑀏𑀯𑀫𑁆𑀧𑀻𑀢𑀺 ‘‘𑀏𑀢𑁂𑀲𑀼 𑀧𑀦 𑀖𑀝𑀦𑁂𑀲𑀼 𑀲𑀩𑁆𑀩𑀧𑀞𑀫𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑀧𑀺. 𑀖𑀝𑀦𑁂𑀲𑀼 𑀧𑀦 𑀬𑁄 𑀬𑁄 𑀧𑀘𑁆𑀘𑀬𑁄 𑀫𑀽𑀮𑀪𑀸𑀯𑁂𑀦 𑀞𑀺𑀢𑁄, 𑀢𑀁𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀦𑀺𑀭𑀯𑀲𑁂𑀲𑀊𑀦𑀊𑀦𑀢𑀭𑀊𑀦𑀢𑀫𑀮𑀸𑀪𑀓𑁆𑀓𑀫𑁂𑀦 𑀖𑀝𑀦𑀸 𑀯𑀼𑀘𑁆𑀘𑀢𑀺, 𑀦𑀺𑀭𑀯𑀲𑁂𑀲𑀮𑀸𑀪𑁂 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑀯𑀲𑁂𑀲𑀮𑀸𑀪𑀓𑁆𑀓𑀫𑁂𑀦. 𑀢𑀣𑀸 𑀊𑀦𑀮𑀸𑀪𑀸𑀤𑀻𑀲𑀽𑀢𑀺 𑀅𑀬𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀳𑁂𑀢𑀼𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁪𑁫. 𑀯𑀢𑁆𑀣𑀼𑀯𑀲𑁂𑀦 ¶ 𑀲𑀦𑀺𑀲𑁆𑀲𑀬𑀁 𑀯𑀓𑁆𑀔𑀢𑀻𑀢𑀺 𑀦 𑀇𑀤𑀁 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀖𑀝𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀯𑀸’’𑀢𑀺.

𑁪𑁪𑁬. 𑀲𑀳𑀚𑀸𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀘 𑀲𑀤𑁆𑀥𑀺𑀁 𑀲𑀳𑀚𑀸𑀢𑀁 𑀦 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀬𑀣𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸 𑀏𑀓𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀘 𑀳𑁄𑀦𑁆𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀁 𑀏𑀓𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁 ¶ . 𑀦𑀺𑀲𑁆𑀲𑀬𑀪𑀸𑀯𑁄 𑀳𑀺 𑀅𑀢𑁆𑀣𑀺𑀅𑀯𑀺𑀕𑀢𑀪𑀸𑀯𑁄 𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀻𑀦𑀁 𑀲𑀫𑀸𑀦𑁄, 𑀦 𑀧𑀦𑁂𑀯𑀁 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄 𑀲𑀫𑀸𑀦𑁄. 𑀲𑀳𑀚𑀸𑀢𑁄 𑀳𑀺 𑀆𑀭𑀫𑁆𑀫𑀡𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀯𑀢𑁆𑀢𑀦𑀯𑀲𑁂𑀦 𑀅𑀥𑀺𑀧𑀢𑀺 𑀳𑁄𑀢𑀺, 𑀇𑀢𑀭𑁄 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀅𑀢𑁆𑀢𑀦𑀺 𑀦𑀺𑀦𑁆𑀦𑀢𑀸𑀓𑀭𑀡𑁂𑀦. 𑀲𑀳𑀚𑀸𑀢𑁄 𑀘 𑀯𑀺𑀚𑁆𑀚𑀫𑀸𑀦𑀪𑀸𑀯𑁂𑀦𑁂𑀯 𑀉𑀧𑀓𑀸𑀭𑀓𑁄, 𑀇𑀢𑀭𑁄 𑀅𑀢𑀻𑀢𑀸𑀦𑀸𑀕𑀢𑁄𑀧𑀺 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀯, 𑀢𑀲𑁆𑀫𑀸 𑀲𑀳𑀚𑀸𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀯𑀺𑀬 𑀪𑀺𑀦𑁆𑀦𑀲𑀪𑀸𑀯𑀸 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄𑀢𑀺 𑀦 𑀢𑁂 𑀏𑀓𑀢𑁄 𑀏𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀁 𑀪𑀚𑀦𑁆𑀢𑀺, 𑀢𑁂𑀦𑁂𑀯 𑀧𑀜𑁆𑀳𑀸𑀯𑀸𑀭𑀯𑀺𑀪𑀗𑁆𑀕𑁂 𑀘 ‘‘𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺.

𑁪𑁪𑁭-𑁪𑁫𑁨. 𑀲𑀸𑀳𑀸𑀭𑀓𑀖𑀝𑀦𑀸𑀦𑀁 𑀧𑀼𑀭𑀢𑁄 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀅𑀦𑀸𑀳𑀸𑀭𑀓𑀸𑀫𑀕𑁆𑀕𑀓𑀸𑀦𑀺 𑀲𑀇𑀦𑁆𑀤𑁆𑀭𑀺𑀬𑀖𑀝𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁 ‘‘𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀲𑀢𑁆𑀢. 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀢𑀻𑀡𑀺. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀢𑀻𑀡𑀺. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀏𑀓𑀁. 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀯𑀺𑀕𑀢𑀦𑁆𑀢𑀺 𑀏𑀓𑀁. 𑀅𑀥𑀺𑀧𑀢𑀺𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀏𑀓’’𑀦𑁆𑀢𑀺. 𑀓𑀲𑁆𑀫𑀸 𑀢𑀸𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀇𑀦𑁆𑀤𑁆𑀭𑀺𑀬𑀪𑀽𑀢𑀲𑁆𑀲 𑀅𑀥𑀺𑀧𑀢𑀺𑀲𑁆𑀲 𑀆𑀳𑀸𑀭𑀫𑀕𑁆𑀕𑁂𑀳𑀺 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸. 𑀘𑀺𑀢𑁆𑀢𑀸𑀥𑀺𑀧𑀢𑀺 𑀳𑀺 𑀆𑀳𑀸𑀭𑁄, 𑀯𑀻𑀭𑀺𑀬𑀯𑀻𑀫𑀁𑀲𑀸 𑀘 𑀫𑀕𑁆𑀕𑁄 𑀳𑁄𑀢𑀺, 𑀦 𑀘 𑀅𑀜𑁆𑀜𑁄 𑀇𑀦𑁆𑀤𑁆𑀭𑀺𑀬𑀪𑀽𑀢𑁄 𑀅𑀥𑀺𑀧𑀢𑀺 𑀅𑀢𑁆𑀣𑀺, 𑀬𑀲𑁆𑀲 𑀯𑀲𑁂𑀦 𑀅𑀦𑀸𑀳𑀸𑀭𑀓𑀸𑀫𑀕𑁆𑀕𑀓𑀸𑀦𑀺 𑀲𑀇𑀦𑁆𑀤𑁆𑀭𑀺𑀬𑀖𑀝𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀲𑁆𑀫𑀸 𑀢𑀸𑀦𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀸𑀥𑀺𑀧𑀢𑀺𑀆𑀤𑀻𑀦𑀁 𑀏𑀓𑀦𑁆𑀢𑁂𑀦 𑀆𑀳𑀸𑀭𑀫𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀸𑀳𑀸𑀭𑀓𑀲𑀫𑀕𑁆𑀕𑀓𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀘 𑀲𑀫𑀕𑁆𑀕𑀓𑁂𑀲𑀼 𑀤𑁆𑀯𑁂 𑀧𑀘𑁆𑀘𑀬𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀺, 𑀲𑀸𑀳𑀸𑀭𑀓𑁂𑀲𑀼 𑀏𑀓𑁄𑀬𑁂𑀯𑀸𑀢𑀺 𑀲𑀫𑀕𑁆𑀕𑀓𑀸𑀦𑀺 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁. 𑀲𑀇𑀦𑁆𑀤𑁆𑀭𑀺𑀬𑀓𑀸𑀦𑀺 𑀧𑀦 𑀬𑁂𑀳𑀺 𑀆𑀳𑀸𑀭𑀫𑀕𑁆𑀕𑁂𑀳𑀺 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀺 ¶ , 𑀢𑁂𑀲𑀁 𑀓𑀫𑀯𑀲𑁂𑀦 𑀧𑀘𑁆𑀙𑀸 𑀯𑀼𑀢𑁆𑀢𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀤𑀺𑀲𑀢𑁆𑀢𑀸𑀢𑀺 𑀲𑀫𑀕𑁆𑀕𑀓𑀢𑁆𑀢𑁂𑀦 𑀲𑀫𑀸𑀦𑀢𑁆𑀢𑀸, 𑀅𑀦𑀦𑁆𑀢𑀭𑀭𑀽𑀧𑀢𑁆𑀢𑀸𑀢𑀺 𑀯𑀸 𑀅𑀢𑁆𑀣𑁄.

𑁪𑁫𑁭-𑁪𑁬𑁦. 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀘𑀢𑁆𑀢𑀸𑀭𑀻𑀢𑀺 𑀅𑀩𑁆𑀬𑀸𑀓𑀢𑀲𑀳𑀺𑀢𑀲𑁆𑀲 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀓𑀼𑀲𑀮𑀫𑀽𑀮𑀓𑁂𑀲𑁆𑀯𑁂𑀯 𑀤𑀼𑀫𑀽𑀮𑀓𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀩𑁆𑀬𑀸𑀓𑀢𑁂 𑀯𑀢𑁆𑀣𑀼𑀭𑀽𑀧𑀫𑁆𑀧𑀻𑀢𑀺 𑀇𑀤𑀁 ‘‘𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀻’’𑀢𑀺 ¶ 𑀏𑀯𑀁 𑀯𑀢𑁆𑀢𑀩𑁆𑀩𑀁. ‘‘𑀤𑀼𑀢𑀺𑀬𑀖𑀝𑀦𑁂 𑀅𑀩𑁆𑀬𑀸𑀓𑀢𑀯𑀺𑀲𑁆𑀲𑀚𑁆𑀚𑀦𑁂 𑀭𑀽𑀧𑁂𑀲𑀼 𑀯𑀢𑁆𑀣𑀼𑀫𑁂𑀯 𑀮𑀩𑁆𑀪𑀢𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀪𑀽𑀢𑀭𑀽𑀧𑀫𑁆𑀧𑀺 𑀧𑀦 𑀮𑀩𑁆𑀪𑀢𑀻𑀢𑀺 ‘‘𑀯𑀢𑁆𑀣𑀼𑀜𑁆𑀘 𑀪𑀽𑀢𑀭𑀽𑀧𑀜𑁆𑀘 𑀮𑀩𑁆𑀪𑀢𑀻’’𑀢𑀺 𑀧𑀞𑀦𑁆𑀢𑀺. ‘‘𑀘𑀢𑀼𑀢𑁆𑀣𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀲𑀯𑀺𑀧𑀸𑀓𑁂𑀲𑀼 𑀧𑀞𑀫𑁂 𑀯𑀺𑀧𑀸𑀓𑀸 𑀘𑁂𑀯 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘𑀸𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑁂 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀇𑀥 𑀘 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸’’𑀢𑀺𑀧𑀺 𑀧𑀦 𑀧𑀞𑀦𑁆𑀢𑀺. 𑀏𑀢𑁆𑀣 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺 𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀖𑀝𑀦𑁂𑀲𑀼 𑀳𑁂𑀢𑀼𑀓𑀫𑁆𑀫𑀛𑀸𑀦𑀫𑀕𑁆𑀕𑁂𑀳𑀺 𑀖𑀝𑀦𑀸𑀦𑀺 𑀦 𑀬𑁄𑀚𑀺𑀢𑀸𑀦𑀺, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀯𑀚𑁆𑀚𑁂𑀲𑀼 𑀆𑀳𑀸𑀭𑁂𑀦, 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀚𑁆𑀚𑁂𑀲𑀼 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑁂𑀳𑀺 𑀘. 𑀓𑀲𑁆𑀫𑀸𑀢𑀺? 𑀢𑁂𑀲𑀼 𑀳𑀺 𑀬𑁄𑀚𑀺𑀬𑀫𑀸𑀦𑁂𑀲𑀼 𑀢𑀁𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀓𑀤𑁂𑀲𑀪𑀽𑀢𑀸 𑀳𑁂𑀢𑀼𑀆𑀤𑀬𑁄 𑀅𑀭𑀽𑀧𑀥𑀫𑁆𑀫𑀸𑀯 𑀧𑀘𑁆𑀘𑀬𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀺. 𑀢𑁂𑀦 𑀢𑁂𑀳𑀺 𑀖𑀝𑀦𑀸𑀦𑀺 𑀳𑁂𑀢𑀼𑀫𑀽𑀮𑀓𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸𑀪𑀸𑀯𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀻𑀢𑀺 𑀦 𑀯𑀼𑀢𑁆𑀢𑀸𑀦𑀺. 𑀅𑀢𑁆𑀣𑀺𑀅𑀯𑀺𑀕𑀢𑁂𑀳𑀺 𑀧𑀦 𑀬𑁄𑀚𑀺𑀬𑀫𑀸𑀦𑁄 𑀆𑀳𑀸𑀭𑁄 𑀦𑀺𑀲𑁆𑀲𑀬𑀸𑀤𑀻𑀳𑀺 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀭𑀽𑀧𑀫𑀺𑀲𑁆𑀲𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀸𑀦𑀺𑀧𑀺 𑀖𑀝𑀦𑀸𑀦𑀺 𑀅𑀢𑁆𑀣𑀺𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀦𑀺𑀲𑁆𑀲𑀬𑀸𑀤𑀺𑀫𑀽𑀮𑀓𑁂𑀲𑀼 𑀘 𑀆𑀳𑀸𑀭𑁂𑀦 𑀅𑀥𑀺𑀧𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀘 𑀲𑀼𑀧𑀸𑀓𑀝𑀪𑀸𑀯𑀢𑁆𑀣𑀁 𑀬𑁄𑀚𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺.

𑁪𑁬𑁨-𑁪𑁬𑁪. 𑀦𑀺𑀲𑁆𑀲𑀬𑀫𑀽𑀮𑀓𑁂 ‘‘𑀙𑀝𑁆𑀞𑁂 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀘𑀓𑁆𑀔𑀸𑀤𑀻𑀦𑀺 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀅𑀩𑁆𑀬𑀸𑀓𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀘𑀸’’𑀢𑀺 𑀧𑀞𑀦𑁆𑀢𑀺.

𑁪𑁬𑁬. 𑀉𑀧𑀦𑀺𑀲𑁆𑀲𑀬𑀫𑀽𑀮𑀓𑁂 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀧𑀞𑀫𑁂 ‘‘𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀧𑀘𑁆𑀘𑀬𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀮𑁄𑀓𑀼𑀢𑁆𑀢𑀭𑀸𑀧𑀺 𑀧𑀦 𑀕𑀳𑁂𑀢𑀩𑁆𑀩𑀸𑀯.

𑁪𑁭𑁩-𑁪𑁭𑁭. 𑀓𑀫𑁆𑀫𑀫𑀽𑀮𑀓𑁂 ¶ 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀧𑀻𑀢𑀺 𑀏𑀢𑁆𑀣 𑀦 𑀧𑀯𑀢𑁆𑀢𑁂 𑀯𑀺𑀬 𑀔𑀦𑁆𑀥𑀸𑀬𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀸𑀓𑀸𑀯𑀺𑀧𑀸𑀓𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀞𑀫𑁂 ‘‘𑀅𑀭𑀽𑀧𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀓𑀫𑁆𑀫𑀫𑀽𑀮𑀓𑁂 ‘‘𑀓𑀫𑁆𑀫𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀤𑁆𑀯𑁂’’𑀢𑀺, 𑀆𑀭𑀫𑁆𑀫𑀡𑀫𑀽𑀮𑀓𑁂 𑀘 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀓𑀫𑁆𑀫𑁂 ¶ 𑀤𑁆𑀯𑁂’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁, 𑀦𑀦𑀼 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀓𑀫𑁆𑀫𑀸𑀭𑀫𑁆𑀫𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀸𑀤𑀻𑀦𑀁 𑀓𑀫𑁆𑀫𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘 𑀳𑁄𑀢𑀺. 𑀬𑀣𑀸 𑀘 𑀆𑀭𑀫𑁆𑀫𑀡𑀪𑀽𑀢𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀫𑁆𑀫𑀫𑁆𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀓𑁆𑀔𑁂𑀧𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀳𑀺 𑀯𑀢𑁆𑀣𑀼 𑀦𑀺𑀲𑁆𑀲𑀬𑀪𑀸𑀯𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀆𑀮𑀫𑁆𑀩𑀺𑀬𑀫𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀓𑀫𑁆𑀫𑀁 𑀧𑀦 𑀢𑀲𑁆𑀫𑀺𑀁 𑀓𑀢𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀢𑀽𑀧𑀘𑀺𑀢𑀪𑀸𑀯𑁂𑀦 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀸𑀭𑀫𑁆𑀫𑀡𑀸𑀓𑀸𑀭𑁂𑀦, 𑀯𑀺𑀲𑀬𑀫𑀢𑁆𑀢𑀢𑀸𑀯𑀲𑁂𑀦 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀲𑀦𑁆𑀢𑀸𑀦𑀯𑀺𑀲𑁂𑀲𑀁 𑀓𑀢𑁆𑀯𑀸 𑀨𑀮𑀼𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑁂𑀦, 𑀢𑀲𑁆𑀫𑀸 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀘 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀦𑁆𑀢𑀺 ‘‘𑀓𑀫𑁆𑀫𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀲 𑀘 𑀲𑀪𑀸𑀯𑁄 𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀦𑀁 𑀯𑀢𑁆𑀣𑀼𑀘𑀓𑁆𑀔𑀸𑀤𑀻𑀦𑀁, 𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀲𑀳 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀸, 𑀅𑀢𑀻𑀢𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀅𑀬𑀁 𑀲𑀪𑀸𑀯𑁄, 𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀲𑀳 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀢𑀸. 𑀬𑀣𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀦𑀁 𑀲𑀳 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀸 𑀲𑀪𑀸𑀯𑁄, 𑀲𑀳𑀚𑀸𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀜𑁆𑀘 𑀲𑀳 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺.

𑁪𑁭𑁮-𑁪𑁮𑁩. 𑀦𑀺𑀭𑀸𑀥𑀺𑀧𑀢𑀺𑀯𑀺𑀜𑁆𑀜𑀸𑀡𑀸𑀳𑀸𑀭𑀯𑀲𑁂𑀦𑀸𑀢𑀺 𑀅𑀦𑀸𑀫𑀝𑁆𑀞𑀸𑀥𑀺𑀧𑀢𑀺𑀪𑀸𑀯𑀲𑁆𑀲 𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑁆𑀲 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀼 𑀧𑀭𑀺𑀳𑀸𑀬𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀮𑀪𑀦𑁆𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀲𑀩𑁆𑀩𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀭𑀺𑀳𑀸𑀦𑀁 𑀤𑀲𑁆𑀲𑁂𑀢𑀺.

𑁪𑁮𑁪-𑁪𑁯𑁫. ‘‘𑀢𑀢𑀺𑀬𑁂 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀓𑁆𑀔𑀸𑀤𑀻𑀦𑀺 𑀘 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀮𑀩𑁆𑀪𑀦𑁆𑀢𑀺. 𑀢𑀢𑁄 𑀯𑀻𑀭𑀺𑀬𑀯𑀲𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀙𑀸𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀯𑀻𑀫𑀁𑀲𑀸 𑀮𑀩𑁆𑀪𑀢𑀺, 𑀯𑀻𑀭𑀺𑀬𑀲𑁆𑀲 𑀧𑀦 𑀯𑀲𑁂𑀦 𑀢𑀁𑀲𑀫𑀸𑀦𑀕𑀢𑀺𑀓𑀸 𑀯𑀻𑀫𑀁𑀲𑀸𑀧𑀺 𑀕𑀳𑀺𑀢𑀸𑀢𑀺 ‘‘𑀯𑀻𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁫𑁧𑁧-𑁫𑁧𑁪. 𑀯𑀺𑀧𑁆𑀧𑀬𑀼𑀢𑁆𑀢𑀫𑀽𑀮𑀓𑁂 ¶ ‘‘𑀤𑀲𑀫𑁂 𑀓𑀼𑀲𑀮𑀸𑀤𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 ‘‘𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀢𑁆𑀣𑀼 𑀘 𑀔𑀦𑁆𑀥𑀸𑀦’’𑀦𑁆𑀢𑀺 𑀇𑀤𑀫𑁆𑀧𑀺 𑀮𑀩𑁆𑀪𑀢𑀺. ‘‘𑀏𑀓𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼 𑀔𑀦𑁆𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀧𑀸𑀓𑀧𑀘𑁆𑀘𑀬𑀲𑁆𑀲 ¶ 𑀅𑀕𑁆𑀕𑀳𑀺𑀢𑀢𑁆𑀢𑀸 𑀬𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀲𑁂𑀦 𑀖𑀝𑀦𑀁 𑀓𑀢𑀁, 𑀢𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀔𑀦𑁆𑀥𑀸 𑀘 𑀯𑀢𑁆𑀣𑀼𑀲𑁆𑀲𑀸’’𑀢𑀺 𑀇𑀤𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. ‘‘𑀤𑁆𑀯𑀸𑀤𑀲𑀫𑁂 𑀧𑀝𑀺𑀲𑀦𑁆𑀥𑀺𑀬𑀁 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦’’𑀦𑁆𑀢𑀺 𑀧𑀼𑀩𑁆𑀩𑀧𑀸𑀞𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀦 𑀦 𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 ‘‘𑀤𑁆𑀯𑀸𑀤𑀲𑀫𑁂 𑀔𑀦𑁆𑀥𑀸 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘𑀸’’𑀢𑀺 𑀧𑀞𑀦𑁆𑀢𑀺.

𑁫𑁧𑁫-𑁫𑁧𑁮. 𑀅𑀢𑁆𑀣𑀺𑀧𑀘𑁆𑀘𑀬𑀫𑀽𑀮𑀓𑁂 𑀧𑀞𑀫𑀖𑀝𑀦𑁂 ‘‘𑀅𑀭𑀽𑀧𑀯𑀢𑁆𑀣𑀸𑀭𑀫𑁆𑀫𑀡𑀫𑀳𑀸𑀪𑀽𑀢𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀘𑀸’’𑀢𑀺𑀧𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀇𑀦𑁆𑀤𑁆𑀭𑀺𑀬𑀸𑀳𑀸𑀭𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀸𑀤𑀬𑁄 𑀮𑀩𑁆𑀪𑀦𑁆𑀢𑀻𑀢𑀺. ‘‘𑀤𑀼𑀢𑀺𑀬𑁂 𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀸𑀳𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀸𑀦𑀺𑀧𑀺 𑀧𑀦 𑀅𑀮𑀩𑁆𑀪𑀫𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀸𑀳𑀸𑀭𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺, 𑀙𑀝𑁆𑀞𑀁 𑀲𑀩𑁆𑀩𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀢𑁆𑀢𑀫𑁂 𑀢𑀢𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀢𑁆𑀢𑀁 𑀧𑀭𑀺𑀳𑀸𑀬𑀢𑀻𑀢𑀺 𑀏𑀯𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁄 𑀏𑀓𑀸𑀤𑀲𑀫𑁂𑀢𑀺 𑀏𑀢𑁆𑀣 𑀢𑀢𑁄𑀢𑀺 𑀦𑀯𑀫𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀭𑀲𑀫𑁂 𑀯𑀢𑁆𑀣𑀸𑀭𑀫𑁆𑀫𑀡𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀕𑁆𑀕𑀳𑀡𑁂𑀦 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀦𑀺𑀧𑀺 𑀕𑀳𑀺𑀢𑀸𑀦𑀺, 𑀢𑀣𑀸 𑀘𑀼𑀤𑁆𑀤𑀲𑀫𑁂 𑀯𑀢𑁆𑀣𑀼𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺. ‘‘𑀲𑀢𑁆𑀢𑀭𑀲𑀫𑁂 𑀧𑀦 𑀢𑀤𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦, 𑀅𑀝𑁆𑀞𑀸𑀭𑀲𑀫𑁂𑀧𑀺 𑀢𑀤𑁂𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀧𑀼𑀭𑀺𑀫𑀧𑀸𑀞𑁄, ‘‘𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀅𑀬𑀁 𑀧𑀦 𑀲𑀢𑁆𑀢𑀭𑀲𑀫𑀢𑁄 𑀯𑀺𑀲𑁂𑀲𑁄 𑀦 𑀳𑁄𑀢𑀺, 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀦 𑀲𑀢𑁆𑀢𑀭𑀲𑀫𑁂 𑀅𑀝𑁆𑀞𑀸𑀭𑀲𑀫𑁂 𑀘 𑀯𑀢𑁆𑀣𑀼𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑁄 𑀯𑀺𑀲𑁂𑀲𑁄𑀢𑀺 ‘‘𑀲𑀢𑁆𑀢𑀭𑀲𑀫𑁂 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦 𑀘𑀓𑁆𑀔𑀸𑀤𑀻𑀦𑀺 𑀘, 𑀅𑀝𑁆𑀞𑀸𑀭𑀲𑀫𑁂 𑀯𑀢𑁆𑀣𑀼𑀲𑁆𑀲𑁂𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀧𑀞𑀦𑁆𑀢𑀺.

𑁫𑁧𑁯. 𑀲𑀳𑀚𑀸𑀢𑀸𑀦𑀺 𑀯𑀺𑀬 𑀲𑀳𑀚𑀸𑀢𑁂𑀦 𑀓𑁂𑀦𑀘𑀺 𑀏𑀓𑁂𑀦 𑀧𑀘𑁆𑀘𑀬𑁂𑀦 𑀅𑀦𑀺𑀬𑀫𑀺𑀢𑀢𑁆𑀢𑀸 𑀢𑀸𑀦𑀺 𑀧𑀓𑀺𑀡𑁆𑀡𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀳𑀚𑀸𑀢𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀲𑀸𑀫𑀜𑁆𑀜𑀯𑀲𑁂𑀦 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀆𑀭𑀫𑁆𑀫𑀡𑀫𑀽𑀮𑀓𑁂 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀼𑀭𑁂𑀚𑀸𑀢𑀸𑀢𑀺 𑀏𑀢𑁆𑀣 𑀉𑀧𑀦𑀺𑀲𑁆𑀲𑀬𑁄𑀧𑀺 𑀧𑀞𑀺𑀢𑀩𑁆𑀩𑁄.

𑀬𑁂𑀲𑀼 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀢𑀼𑀫𑀽𑀮𑀓𑀸𑀤𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀮𑁄𑀪𑀸𑀤𑀺𑀢𑀁𑀢𑀁𑀦𑀸𑀫𑀯𑀲𑁂𑀦 ¶ 𑀧𑀦 𑀳𑁂𑀢𑀼𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀥𑀫𑁆𑀫𑀸 𑀏𑀯𑀁 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀦 𑀧𑀜𑁆𑀜𑀸𑀬𑁂𑀬𑁆𑀬𑀼𑀦𑁆𑀢𑀺 𑀢𑁂 ¶ 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀸𑀤𑀲𑁂𑀯 𑀳𑀺 𑀳𑁂𑀢𑀽’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀏𑀢𑁆𑀢𑀓𑀸𑀬𑁂𑀯 𑀧𑀘𑁆𑀘𑀬𑀥𑀫𑁆𑀫𑀸’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀅𑀧𑀜𑁆𑀜𑀸𑀬𑀫𑀸𑀦𑁄𑀧𑀺 𑀢𑁂𑀲𑁆𑀯𑁂𑀯 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀙 𑀆𑀭𑀫𑁆𑀫𑀡𑀸𑀢𑀺 𑀏𑀢𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀪𑀸𑀯𑀢𑁄 𑀲𑀗𑁆𑀕𑀳𑀺𑀢𑁄𑀢𑀺 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀬𑁄’’𑀢𑀺 𑀯𑀼𑀢𑁆𑀢𑀁. 𑀏𑀓𑀦𑁆𑀢𑁂𑀦 𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀮𑀩𑁆𑀪𑀢𑀺. 𑀏𑀓𑀦𑁆𑀢𑁂𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀇𑀤𑀁 𑀧𑀦 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀛𑀸𑀦𑀗𑁆𑀕𑁂𑀲𑁆𑀯𑀧𑀺 𑀳𑀺 𑀤𑀼𑀓𑁆𑀔𑀁 𑀅𑀓𑀼𑀲𑀮𑀫𑁂𑀯 𑀯𑀺𑀧𑀸𑀓𑀲𑁆𑀲 𑀅𑀛𑀸𑀦𑀗𑁆𑀕𑀢𑁆𑀢𑀸. 𑀘𑀺𑀢𑁆𑀢𑀝𑁆𑀞𑀺𑀢𑀺𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸 𑀳𑁄𑀢𑀻𑀢𑀺. 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀇𑀦𑁆𑀤𑁆𑀭𑀺𑀬𑁂𑀲𑀼 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀮𑀩𑁆𑀪𑁂𑀬𑁆𑀬, 𑀓𑀼𑀲𑀮𑀯𑀺𑀧𑀸𑀓𑀸𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑁂𑀲𑁂𑀦 𑀧𑀦 𑀧𑀘𑁆𑀘𑀬𑀬𑁄𑀚𑀦𑀸 𑀦𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀧𑀜𑁆𑀳𑀸𑀯𑀸𑀭𑀲𑁆𑀲 𑀖𑀝𑀦𑁂 𑀅𑀦𑀼𑀮𑁄𑀫𑀕𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁫𑁨𑁭. 𑀏𑀓𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀦𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀳𑁂𑀢𑀼𑀧𑀘𑁆𑀘𑀬𑀢𑁄 𑀅𑀜𑁆𑀜𑁂𑀦 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀧𑀘𑁆𑀘𑀬𑀢𑁄 𑀘 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀅𑀝𑁆𑀞 𑀳𑁄𑀦𑁆𑀢𑀺, 𑀢𑁂𑀲𑀼 𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄, 𑀅𑀓𑀼𑀲𑀮𑀲𑁆𑀲 𑀤𑁆𑀯𑀻𑀳𑀺, 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀢𑀢𑁄 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀇𑀫𑁂𑀲𑁆𑀯𑁂𑀯 𑀆𑀭𑀫𑁆𑀫𑀡𑀸𑀤𑀻𑀲𑀼 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀘 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸 𑀯𑀼𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀲𑁆𑀲 𑀯𑀲𑁂𑀦 𑀧𑀼𑀭𑁂𑀚𑀸𑀢𑀁, 𑀲𑀳𑀚𑀸𑀢𑀢𑁄 𑀉𑀧𑀦𑀺𑀲𑁆𑀲𑀬𑀢𑁄 𑀘, 𑀅𑀜𑁆𑀜𑀺𑀲𑁆𑀲𑀸 𑀘𑁂𑀢𑀦𑀸𑀬 𑀯𑀲𑁂𑀦 𑀓𑀫𑁆𑀫𑀁, 𑀲𑀳𑀚𑀸𑀢𑀢𑁄 𑀅𑀜𑁆𑀜𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀯𑀲𑁂𑀦 𑀆𑀳𑀸𑀭𑁄, 𑀲𑀳𑀚𑀸𑀢𑀢𑁄 𑀧𑀼𑀭𑁂𑀚𑀸𑀢𑀢𑁄 𑀘 𑀅𑀜𑁆𑀜𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 ¶ 𑀧𑀘𑁆𑀘𑀬𑁄’’𑀢𑀺𑀘𑁆𑀘𑁂𑀯 (𑀧𑀝𑁆𑀞𑀸. 𑁧.𑁧.𑁪𑁦𑁪, 𑁪𑁧𑁯, 𑁪𑁨𑁩) 𑀯𑀼𑀢𑁆𑀢𑀁 ¶ , 𑀢𑀤𑀜𑁆𑀜𑀸𑀪𑀸𑀯𑀸 𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀢𑀲𑁆𑀫𑀸 ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁬𑁬, 𑁭𑁪) 𑀏𑀢𑁆𑀣 𑀆𑀭𑀫𑁆𑀫𑀡𑀲𑁆𑀲 𑀅𑀯𑀘𑀦𑀁, 𑀢𑀁 𑀧𑀼𑀭𑀺𑀫𑁂𑀳𑀺 𑀅𑀲𑀗𑁆𑀕𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀺𑀢𑀯𑀺𑀯𑀚𑁆𑀚𑀦𑀸𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑀢𑁄 𑀅𑀜𑁆𑀜𑀸𑀭𑀫𑁆𑀫𑀡𑀸𑀪𑀸𑀯𑀢𑁄 𑀘, 𑀦 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀲𑁆𑀲 𑀆𑀭𑀫𑁆𑀫𑀡𑁂 𑀅𑀲𑀗𑁆𑀕𑀳𑀺𑀢𑀢𑁆𑀢𑀸.

𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸 𑀬𑀤𑀺𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀯, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀧𑀦 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀸𑀦𑀁 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀳𑀸𑀧𑀺 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀦 𑀢𑀺𑀡𑁆𑀡𑀁 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀺𑀬 𑀯𑀺𑀲𑀼𑀁𑀬𑁂𑀯𑀸𑀢𑀺 ‘‘𑀅𑀢𑁆𑀣𑀺𑀅𑀯𑀺𑀕𑀢𑁂𑀲𑀼 𑀘 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀙𑀳𑀺 𑀪𑁂𑀤𑁂𑀳𑀺 𑀞𑀺𑀢𑀸’’𑀢𑀺 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀮𑀓𑁆𑀔𑀡𑁂𑀲𑀼 𑀏𑀓𑁂𑀓𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

‘‘𑀭𑀽𑀧𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀤𑀼𑀯𑀺𑀥𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀢𑁄’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁.

𑀘𑀢𑀼𑀯𑀻𑀲𑀢𑀺𑀬𑀸𑀧𑀻𑀢𑀺 𑀦 𑀲𑁄𑀴𑀲𑀦𑁆𑀦𑀁𑀬𑁂𑀯, 𑀦𑀸𑀧𑀺 𑀅𑀝𑁆𑀞𑀦𑁆𑀦𑀁𑀬𑁂𑀯, 𑀅𑀣 𑀔𑁄 𑀘𑀢𑀼𑀯𑀻𑀲𑀢𑀺𑀬𑀸𑀧𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀪𑀽𑀢𑀸𑀦𑀁 𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀉𑀧𑀦𑀺𑀲𑁆𑀲𑀬𑁂 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑁂 𑀲𑀗𑁆𑀕𑀳𑁄 𑀅𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀬𑁂𑀯 𑀞𑀧𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑀲𑁆𑀲 𑀢𑁂𑀲𑀜𑁆𑀘 𑀉𑀧𑀦𑀺𑀲𑁆𑀲𑀬𑀸𑀤𑀻𑀲𑀼 𑀲𑀗𑁆𑀕𑀳𑀁 𑀯𑀢𑁆𑀢𑀼𑀓𑀸𑀫𑁄 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀦 𑀲𑁂𑀲𑀸 𑀢𑁂𑀯𑀻𑀲𑀢𑀻’’𑀢𑀺 𑀆𑀳. 𑀘𑀢𑀼𑀢𑁆𑀣𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀢𑀺 𑀏𑀢𑁆𑀣 𑀬𑀣𑀸 ‘‘𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀧𑀼𑀭𑁂𑀚𑀸𑀢𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀣 𑀧𑀦 ‘‘𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀧𑀼𑀭𑁂𑀚𑀸𑀢𑀕𑁆𑀕𑀳𑀡𑁂𑀦 𑀕𑀳𑀺𑀢’’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀉𑀧𑀦𑀺𑀲𑁆𑀲𑀬𑀕𑁆𑀕𑀳𑀡𑁂𑀦𑀧𑀺 𑀆𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀲 𑀕𑀳𑀺𑀢𑀢𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀅𑀥𑀺𑀧𑀢𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀬𑁂𑀲𑀼 ¶ 𑀧𑀜𑁆𑀳𑁂𑀲𑀼…𑀧𑁂… 𑀏𑀓𑁄𑀯 𑀧𑀘𑁆𑀘𑀬𑁄 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀕𑀢𑁄𑀯𑀸𑀢𑀺 𑀏𑀯𑀁 𑀏𑀯𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦 𑀤𑁆𑀯𑀸𑀤𑀲𑀫𑀘𑀼𑀤𑁆𑀤𑀲𑀫𑁂𑀲𑀼 𑀧𑀜𑁆𑀳𑁂𑀲𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑁂𑀲𑀼 𑀏𑀓𑁂𑀓𑁄 𑀧𑀘𑁆𑀘𑀬𑁄 𑀦 𑀅𑀦𑀸𑀕𑀢𑁄 ¶ 𑀳𑁄𑀢𑀺, 𑀅𑀣 𑀔𑁄 𑀆𑀕𑀢𑁄𑀯𑀸𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀧𑀝𑀺𑀓𑁆𑀔𑁂𑀧𑁂 𑀢𑁂𑀧𑀺 𑀧𑀜𑁆𑀳𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀜𑁆𑀳𑁂𑀢𑀺 𑀤𑀼𑀢𑀺𑀬𑀙𑀝𑁆𑀞𑀧𑀜𑁆𑀳𑁂𑀲𑀼 𑀏𑀓𑁂𑀓𑀯𑀲𑁂𑀦 𑀕𑀳𑁂𑀢𑁆𑀯𑀸 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀏𑀯𑀦𑁆𑀢𑀺 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀤𑁆𑀯𑀸𑀤𑀲𑀫𑀘𑀼𑀤𑁆𑀤𑀲𑀫𑁂 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀲𑀼𑀧𑀺 𑀳𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀆𑀕𑀢𑀸, 𑀦 𑀧𑀦 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦𑀸𑀢𑀺 𑀅𑀯𑀲𑁂𑀲𑀸𑀦𑀁 𑀮𑀩𑁆𑀪𑀫𑀸𑀦𑀸𑀦𑀁 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑁂𑀭𑀲𑀫𑀧𑀦𑁆𑀦𑀭𑀲𑀫𑁂𑀲𑀼 𑀧𑀘𑁆𑀙𑀸𑀚𑀸𑀢𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀢𑁂 𑀧𑀜𑁆𑀳𑀸 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀲𑀳𑀚𑀸𑀢𑀲𑁆𑀲𑁂𑀯 𑀯𑀲𑁂𑀦𑀸𑀢𑀺. 𑀇𑀤𑀫𑁂𑀯 𑀘𑁂𑀢𑁆𑀣 𑀮𑀓𑁆𑀔𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀕𑀸𑀳𑀓𑀢𑁆𑀢𑀁, 𑀉𑀓𑁆𑀓𑀝𑁆𑀞𑀯𑀲𑁂𑀦 𑀧𑀜𑁆𑀳𑀸𑀧𑀭𑀺𑀘𑁆𑀙𑁂𑀤𑁄, 𑀢𑁂 𑀢𑁂 𑀧𑀘𑁆𑀘𑀬𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀲 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀧𑀭𑀺𑀳𑀸𑀦𑀸𑀧𑀭𑀺𑀳𑀸𑀦𑀻𑀢𑀺 𑀏𑀢𑀁 𑀲𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀧𑀪𑁂𑀤𑀧𑀭𑀺𑀳𑀸𑀦𑀻𑀲𑀼. 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁄 𑀲𑀩𑁆𑀩𑀧𑀘𑁆𑀘𑀦𑀻𑀬𑀲𑁆𑀲 𑀲𑀸𑀥𑀸𑀭𑀡𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑁄, 𑀦 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣𑁂𑀯 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀳𑁂𑀢𑀼𑀤𑀼𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀳𑁂𑀢𑀼𑀥𑀫𑁆𑀫𑁄 𑀳𑁂𑀢𑀼𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁪𑁩) 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀤𑀲𑁆𑀲𑀦𑁂 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀩𑁆𑀩𑀮𑀩𑁆𑀪𑀫𑀸𑀦𑀧𑀘𑁆𑀘𑀬𑀲𑀗𑁆𑀕𑀳𑀯𑀲𑁂𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀻𑀳𑀺 𑀧𑀘𑁆𑀘𑀬𑁂𑀳𑀺 𑀯𑀻𑀲𑀢𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀓𑀣𑀸’’𑀢𑀺, 𑀢𑀢𑁆𑀭 𑀧𑀪𑁂𑀤𑁂 𑀯𑀺𑀢𑁆𑀣𑀸𑀭𑀓𑀣𑀁 𑀯𑀢𑁆𑀯𑀸 𑀧𑀭𑀺𑀳𑀸𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑁂…𑀧𑁂… 𑀢𑁂 𑀧𑀭𑀢𑁄 𑀯𑀓𑁆𑀔𑀸𑀫𑀸’’𑀢𑀺 𑀆𑀳.

𑁫𑁨𑁮. 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑁂𑀲𑀼𑀧𑀺 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀢𑁂 𑀢𑁂𑀬𑁂𑀯 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸𑀢𑀺 𑀓𑀼𑀲𑀮𑀸𑀤𑀺𑀓𑁂𑀲𑀼 𑀤𑀲𑁆𑀲𑀺𑀢𑁂𑀳𑀺 ¶ 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 ‘‘𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀢𑀬𑁄 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸, 𑀅𑀣 𑀔𑁄 𑀤𑁆𑀯𑁂𑀬𑁂𑀯, 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀅𑀓𑀼𑀲𑀮𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺.

𑁫𑁩𑁦. 𑀲𑀳𑀚𑀸𑀢𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺 𑀯𑀢𑁆𑀣𑀼𑀫𑀺𑀲𑁆𑀲𑀓𑀢𑁆𑀢𑀸𑀢𑀺 𑀅𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀯𑀢𑁆𑀣𑀼𑀦𑀸 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦 ¶ 𑀕𑀳𑀺𑀢𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀳𑀚𑀸𑀢𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀦 𑀧𑀦 𑀲𑀼𑀤𑁆𑀥𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀯𑀢𑁆𑀣𑀼𑀦𑀸 𑀧𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀺𑀲𑁆𑀲𑀬𑀸𑀤𑀺𑀦𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀫𑁂𑀯 𑀦𑀺𑀲𑁆𑀲𑀬𑀸𑀤𑀺𑀁 𑀯𑀺𑀲𑁂𑀲𑁂𑀢𑀼𑀁 𑀲𑀳𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀇𑀫𑀲𑁆𑀫𑀺𑀁 𑀧𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁂 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀅𑀢𑁆𑀣𑀺𑀧𑀘𑁆𑀘𑀬𑁂𑀲𑀼 𑀘𑀢𑀽𑀲𑀼 𑀲𑀩𑁆𑀩𑀧𑀘𑁆𑀘𑀬𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀓𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁄 𑀦 𑀓𑀢𑁄𑀢𑀺? 𑀫𑀺𑀲𑁆𑀲𑀓𑀸𑀫𑀺𑀲𑁆𑀲𑀓𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀪𑀸𑀕𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀦 𑀳𑀺 ‘‘𑀅𑀯𑀺𑀪𑀸𑀕𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑁂 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘‘𑀓𑀺𑀁 𑀲𑀼𑀤𑁆𑀥𑁂𑀦 𑀲𑀳𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀯𑀸, 𑀅𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀫𑀺𑀲𑁆𑀲𑀓𑁂𑀦 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀫𑀺𑀲𑁆𑀲𑀓𑁂𑀦 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀫𑀺𑀲𑁆𑀲𑀓𑁂𑀦 𑀯𑀸’’𑀢𑀺. 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀧𑀦 𑀲𑀳𑀚𑀸𑀢𑀸𑀤𑀻𑀲𑀼 𑀲𑀭𑀽𑀧𑀢𑁄 𑀯𑀼𑀘𑁆𑀘𑀫𑀸𑀦𑁂𑀲𑀼 𑀬𑀢𑁆𑀣 𑀲𑀼𑀤𑁆𑀥𑀸𑀦𑀁 𑀲𑀳𑀚𑀸𑀢𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁆𑀣 ‘‘𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀸𑀦𑀁, 𑀬𑀢𑁆𑀣 𑀘 𑀫𑀺𑀲𑁆𑀲𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁆𑀣 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀸𑀦𑀁 𑀕𑀳𑀡𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀳𑀚𑀸𑀢𑀸𑀤𑀬𑁄 𑀕𑀳𑀺𑀢𑀸, 𑀢𑁂𑀦 𑀘 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀓𑀲𑁆𑀫𑀸 𑀧𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀬𑁄, 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀸 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀪𑀸𑀯𑁂𑀦 𑀦 𑀯𑀼𑀢𑁆𑀢𑁄𑀢𑀺? 𑀅𑀯𑀢𑁆𑀢𑀩𑁆𑀩𑀢𑁆𑀢𑀸, 𑀦𑀺𑀲𑁆𑀲𑀬𑁄 𑀢𑀸𑀯 𑀦 𑀯𑀢𑁆𑀢𑀩𑁆𑀩𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀲𑀼𑀤𑁆𑀥𑀸𑀦𑀁 𑀫𑀺𑀲𑁆𑀲𑀓𑀸𑀦𑀜𑁆𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄 𑀯𑀺𑀪𑀚𑀺𑀢𑀩𑁆𑀩𑀢𑀸𑀬 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀅𑀯𑀺𑀲𑀺𑀝𑁆𑀞𑀢𑁆𑀢𑀸, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀸𑀯𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀬 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀲𑁄 𑀯𑀺𑀬 𑀦 𑀯𑀢𑁆𑀢𑀩𑁆𑀩𑁄. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀜𑁆𑀘 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀦 ¶ 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁄. 𑀢𑀣𑀸 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀜𑁆𑀘 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁪.𑁮𑁪), 𑀦 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄, 𑀢𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑁂𑀦 𑀫𑀺𑀲𑁆𑀲𑀓𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀕𑁆𑀕𑀳𑀡𑀢𑁄 𑀦 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀪𑀺𑀬𑁆𑀬𑁄𑀧𑀺 𑀦 𑀯𑀢𑁆𑀢𑀩𑁆𑀩𑁄.

𑀦𑀦𑀼 𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀘 𑀳𑁂𑀢𑀼𑀆𑀤𑀻𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀲𑁄𑀧𑀺 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑀺𑀬 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑀪𑀸𑀯𑁂𑀦 ¶ 𑀦 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑁂𑀳𑀺 𑀅𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸. 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀬 𑀉𑀧𑁆𑀧𑀢𑁆𑀢𑀺𑀓𑀸𑀮𑀯𑀺𑀭𑀼𑀤𑁆𑀥𑁂𑀳𑀺 𑀧𑀘𑁆𑀘𑀬𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀸, 𑀦 𑀧𑀦 𑀲𑀳𑀚𑀸𑀢𑁄. 𑀳𑁂𑀢𑀼𑀆𑀤𑀬𑁄 𑀳𑀺 𑀲𑀳𑀚𑀸𑀢𑀸 𑀏𑀯, 𑀦 𑀉𑀧𑁆𑀧𑀢𑁆𑀢𑀺𑀓𑀸𑀮𑀯𑀺𑀭𑀼𑀤𑁆𑀥𑀸𑀢𑀺.

𑀧𑀘𑁆𑀘𑀦𑀻𑀬𑀼𑀤𑁆𑀥𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸

𑁫𑁩𑁨. 𑀲𑀼𑀤𑁆𑀥𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀻𑀢𑀺 𑀏𑀢𑁆𑀣 𑀲𑀼𑀤𑁆𑀥𑀕𑁆𑀕𑀳𑀡𑁂𑀦 𑀦 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁. 𑀆𑀭𑀫𑁆𑀫𑀡𑁂 𑀳𑀺 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀺𑀬𑁂𑀯𑀸𑀢𑀺. 𑀲𑀼𑀤𑁆𑀥𑁄𑀢𑀺 𑀯𑀸 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀓𑁂𑀯𑀮𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀧𑀭𑀺𑀳𑀸𑀬𑀢𑀺, 𑀦 𑀲𑁂𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀸𑀤𑀲𑀦𑁆𑀦𑀦𑁆𑀢𑀺 𑀲𑀳𑀚𑀸𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀏𑀓𑀸𑀤𑀲𑀦𑁆𑀦𑀁 𑀯𑀲𑁂𑀦. 𑀢𑁂𑀢𑀺 𑀢𑁂 𑀲𑀳𑀚𑀸𑀢𑁂 𑀅𑀦𑁆𑀢𑁄𑀕𑀥𑀸𑀬𑁂𑀯 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀅𑀦𑀦𑁆𑀢𑁄𑀕𑀥𑀸 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀤𑀬𑁄 𑀆𑀭𑀫𑁆𑀫𑀡𑀸𑀤𑀺𑀆𑀓𑀸𑀭𑁂𑀦 𑀮𑀪𑀦𑁆𑀢𑀻𑀢𑀺.

𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄𑀬𑁂𑀯 𑀦𑀢𑁆𑀣𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀇𑀫𑁂 𑀯𑀸𑀭𑀸 𑀦 𑀮𑀩𑁆𑀪𑁂𑀬𑁆𑀬𑀼𑀁, 𑀅𑀣 𑀔𑁄 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀏𑀢𑁂 𑀮𑀪𑀺𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀬𑀤𑀺𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦𑀢𑁆𑀣𑀺 ¶ , 𑀬𑀲𑁆𑀫𑀸 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑀥𑀫𑁆𑀫𑁂 𑀞𑀺𑀢𑀸 𑀏𑀢𑁂 𑀦 𑀦𑀺𑀲𑁆𑀲𑀬𑀸𑀤𑀬𑁄 𑀦 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀲𑀳𑀚𑀸𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂 𑀇𑀥 𑀲𑀳𑀚𑀸𑀢𑀧𑀝𑀺𑀓𑁆𑀔𑁂𑀧𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀧𑀺 𑀯𑀸𑀭𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀞𑀧𑁂𑀢𑁆𑀯𑀸 𑀲𑀳𑀚𑀸𑀢𑀧𑀘𑁆𑀘𑀬𑀦𑁆𑀢𑀺 𑀏𑀢𑁂𑀦 𑀦𑀺𑀲𑁆𑀲𑀬𑀸𑀤𑀺𑀪𑀽𑀢𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀢𑁄 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀓𑀼𑀲𑀮𑀲𑁆𑀲 𑀓𑀼𑀲𑀮𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ¶ 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄’’𑀢𑀺. 𑀬𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸 𑀬𑁂 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀢𑀺 𑀲𑀗𑁆𑀕𑀳𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁄 𑀘 𑀓𑀼𑀲𑀮𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀢𑀺 𑀓𑀢𑁆𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀲𑀗𑁆𑀕𑀳𑀁 𑀕𑀢𑁂𑀳𑁂𑀯 𑀥𑀫𑁆𑀫𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀫𑀼𑀤𑀸𑀬𑀪𑀽𑀢𑁄 𑀏𑀓𑀤𑁂𑀲𑀪𑀽𑀢𑁂𑀳𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑁄 𑀧𑀦 𑀓𑀼𑀲𑀮𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑁂𑀳𑁂𑀯 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀲𑀳𑀚𑀸𑀢𑀸𑀤𑀻𑀳𑀺, 𑀦 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑀫𑀜𑁆𑀜𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑁄 𑀯𑀸𑀭𑁄 𑀧𑀭𑀺𑀳𑀸𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑁄𑀯𑀸𑀢𑀺 𑀲𑀳𑀚𑀸𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑀳𑀚𑀸𑀢𑀸 𑀳𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑁄𑀯 𑀳𑁄𑀦𑁆𑀢𑀺. 𑀢𑁂𑀢𑀺 𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑀸.

𑁫𑁩𑁩. ‘‘𑀤𑀼𑀫𑀽𑀮𑀓𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀕𑀡𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀮𑀺𑀔𑀺𑀢𑀁, ‘‘𑀧𑀘𑁆𑀘𑀦𑀻𑀬𑀕𑀡𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀧𑀘𑁆𑀘𑀦𑀻𑀬𑀯𑀸𑀭𑀕𑀡𑀦𑀸 𑀳𑀺 𑀤𑀲𑁆𑀲𑀺𑀢𑀸𑀢𑀺.

‘‘𑀯𑀺𑀧𑀸𑀓𑀁 𑀧𑀦𑁂𑀢𑁆𑀣 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀯𑀺𑀧𑀸𑀓𑀲𑁆𑀲𑀧𑀺 𑀧𑀦 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑁄 𑀅𑀳𑀼𑀢𑁆𑀯𑀸𑀧𑀺 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀧𑀸𑀓𑀢𑁆𑀢𑀺𑀓𑁂 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺.

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁩𑁪. 𑀲𑀢𑁆𑀢 𑀧𑀜𑁆𑀘 𑀢𑀻𑀡𑀺 𑀤𑁆𑀯𑁂 𑀏𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀻𑀢𑀺 𑀲𑀢𑁆𑀢𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀳𑁂𑀢𑀼𑀫𑀽𑀮𑀓𑁂 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳.

𑁫𑁩𑁮. 𑀦𑀦𑀺𑀲𑁆𑀲𑀬𑀧𑀘𑁆𑀘𑀬𑀸 ¶ 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻𑀢𑀺 𑀫𑀽𑀮𑀓𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑀫𑀽𑀮𑀓𑁂 ‘‘𑀦𑀧𑀘𑁆𑀙𑀸𑀚𑀸𑀢𑁂 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀁 𑀕𑀡𑀦𑀁 𑀉𑀤𑁆𑀥𑀭𑀢𑀺. ‘‘𑀢𑁂𑀲𑀼 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀤𑁆𑀯𑀻𑀲𑀼 𑀧𑀦 𑀯𑀺𑀧𑀸𑀓𑁄 𑀢𑀢𑀺𑀬𑁂 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀳𑁄𑀢𑀺𑀬𑁂𑀯.

𑁫𑁪𑁫. 𑀅𑀩𑁆𑀬𑀸𑀓𑀢𑁄 𑀘 𑀲𑀳𑀚𑀸𑀢𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 ‘‘𑀅𑀭𑀽𑀧𑀸𑀩𑁆𑀬𑀸𑀓𑀢𑁄 𑀅𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲, 𑀭𑀽𑀧𑀸𑀩𑁆𑀬𑀸𑀓𑀢𑁄 ¶ 𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀏𑀢𑀁 𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀸𑀩𑁆𑀬𑀸𑀓𑀢𑁄 𑀧𑀦 𑀅𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲, 𑀅𑀭𑀽𑀧𑀸𑀩𑁆𑀬𑀸𑀓𑀢𑁄 𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. ‘‘𑀅𑀩𑁆𑀬𑀸𑀓𑀢𑁄 𑀲𑀳𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀏𑀯𑀁 𑀧𑀜𑁆𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁.

𑁫𑁪𑁬. 𑀦𑁄𑀅𑀢𑁆𑀣𑀺𑀧𑀘𑁆𑀘𑀬𑀸 𑀦𑀳𑁂𑀢𑀼𑀬𑀸 𑀦𑀯𑀸𑀢𑀺 𑀏𑀢𑁆𑀣 ‘‘𑀏𑀓𑀫𑀽𑀮𑀓𑁂𑀓𑀸𑀯𑀲𑀸𑀦𑀸 𑀅𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀺𑀧𑀘𑁆𑀘𑀬𑁂 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺, 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀸𑀦𑀺 𑀞𑀺𑀢𑀸𑀦𑀻𑀢𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀞𑀺𑀢𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀳𑀺 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀬𑁂 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑁂 𑀢𑁂 𑀅𑀧𑀦𑁂𑀢𑁆𑀯𑀸 𑀬𑁂 𑀬𑁂 𑀞𑀺𑀢𑀸, 𑀢𑁂𑀲𑀁 𑀯𑀲𑁂𑀦 𑀢𑁂 𑀢𑁂 𑀯𑀸𑀭𑀸 𑀮𑀩𑁆𑀪𑀦𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀦𑁆𑀢𑀺. 𑀬𑀸𑀯 𑀦𑀺𑀲𑁆𑀲𑀬𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀦𑀸𑀭𑀫𑁆𑀫𑀡𑁂𑀬𑁂𑀯 𑀞𑀢𑁆𑀯𑀸, 𑀅𑀣 𑀔𑁄 𑀬𑀸𑀯 𑀦𑀺𑀲𑁆𑀲𑀬𑀁, 𑀢𑀸𑀯 𑀞𑀢𑁆𑀯𑀸𑀧𑀺 𑀦𑀉𑀧𑀦𑀺𑀲𑁆𑀲𑀬𑁂 𑀤𑁆𑀯𑁂 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦𑀉𑀧𑀦𑀺𑀲𑁆𑀲𑀬𑀢𑁄 𑀳𑀺 𑀧𑀼𑀭𑀺𑀫𑁂𑀲𑀼 𑀘 𑀦𑀯𑀧𑀺 𑀮𑀩𑁆𑀪𑀦𑁆𑀢𑀺, 𑀦𑀉𑀧𑀦𑀺𑀲𑁆𑀲𑀬𑁂 𑀧𑀦 𑀧𑀯𑀢𑁆𑀢𑁂 𑀅𑀢𑁆𑀣𑀺𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀧𑀝𑀺𑀓𑁆𑀔𑁂𑀧𑁂𑀦 𑀲𑀢𑁆𑀢 𑀧𑀘𑁆𑀘𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀯𑀲𑀺𑀝𑁆𑀞𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀤𑁆𑀯𑁂𑀬𑁂𑀯𑀸𑀢𑀺.

𑀧𑀘𑁆𑀘𑀦𑀻𑀬𑀕𑀡𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁫𑁫𑁦. 𑀲𑀤𑀺𑀲𑀯𑀸𑀭𑀸𑀢𑀺 𑀅𑀦𑀼𑀭𑀽𑀧𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀦𑀅𑀜𑁆𑀜𑀫𑀜𑁆𑀜𑁂 𑀮𑀤𑁆𑀥𑁂𑀲𑀼 𑀳𑀺 𑀏𑀓𑀸𑀤𑀲𑀲𑀼 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑁂 𑀳𑁂𑀢𑀼𑀬𑀸 𑀮𑀤𑁆𑀥𑁂𑀲𑀼 𑀲𑀢𑁆𑀢𑀲𑀼 𑀇𑀫𑁂𑀳𑁂𑀯 𑀤𑁆𑀯𑀻𑀳𑀺 𑀲𑀫𑀸𑀦𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀸𑀪𑀸𑀯𑀢𑁄 ¶ 𑀧𑀦 𑀦 𑀅𑀦𑀼𑀭𑀽𑀧𑀸𑀢𑀺. 𑀅𑀣 𑀯𑀸 𑀯𑀘𑀦𑀢𑁄 𑀅𑀢𑁆𑀣𑀢𑁄 𑀘 𑀉𑀤𑁆𑀤𑁂𑀲𑀢𑁄 𑀬𑀣𑀸𑀬𑁄𑀕𑀁 𑀦𑀺𑀤𑁆𑀤𑁂𑀲𑀢𑁄 𑀘𑀸𑀢𑀺 𑀲𑀩𑁆𑀩𑀣𑀸 𑀲𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀲𑀤𑀺𑀲𑀯𑀸𑀭𑀸’’𑀢𑀺 𑀆𑀳.

𑁫𑁫𑁧. 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀲𑀦𑁆𑀥𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀳𑁂𑀢𑀼𑀦𑀸𑀫𑀧𑀘𑁆𑀘𑀬𑀁 𑀯𑀢𑁆𑀣𑀼𑀭𑀽𑀧𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ¶ . 𑀢𑀻𑀡𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀩𑁆𑀬𑀸𑀓𑀢𑁄 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀘𑀸’’𑀢𑀺 𑀇𑀤𑀫𑁆𑀧𑀺 𑀯𑀢𑁆𑀢𑀩𑁆𑀩𑀁.

𑁫𑁫𑁬. 𑀅𑀥𑀺𑀧𑀢𑀺𑀫𑀽𑀮𑀓𑁂 𑀦𑀳𑁂𑀢𑀼𑀬𑀸 𑀤𑀲𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀲𑁆𑀲, 𑀦𑀲𑀳𑀚𑀸𑀢𑁂 𑀲𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀖𑀝𑀦𑁂𑀲𑀼 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀖𑀝𑀺𑀢𑁂 𑀫𑀽𑀮𑀪𑀸𑀯𑁂𑀦 𑀞𑀺𑀢𑁂 𑀧𑀘𑁆𑀘𑀬𑁂 𑀬𑁂 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀬𑁂 𑀘 𑀢𑀺𑀝𑁆𑀞𑀦𑁆𑀢𑀺, 𑀢𑁂 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑁂 𑀥𑀫𑁆𑀫𑀸 𑀞𑀺𑀢𑀸 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀕𑀡𑀦𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑀖𑀝𑀺𑀢𑁂 𑀳𑀺 𑀫𑀽𑀮𑀪𑀸𑀯𑁂𑀦 𑀞𑀧𑁂𑀢𑁆𑀯𑀸 𑀖𑀝𑀺𑀢𑀸𑀯𑀲𑁂𑀲𑀸 𑀧𑀘𑁆𑀘𑀬𑀸 𑀧𑀘𑁆𑀘𑀦𑀻𑀬𑀢𑁄 𑀬𑁄𑀚𑀺𑀢𑀸𑀢𑀺 𑀢𑀢𑁆𑀣 𑀮𑀤𑁆𑀥𑀸𑀬𑁂𑀯 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀲𑀫𑀸𑀦𑀸 𑀊𑀦𑀸 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁬𑁩𑁧. 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀼𑀮𑁄𑀫𑀢𑁄 𑀬𑁄𑀚𑀺𑀬𑀫𑀸𑀦𑁂𑀦 𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑀲𑁆𑀲 𑀅𑀢𑀺𑀭𑁂𑀓𑀕𑀡𑀦𑀲𑁆𑀲𑀧𑀺 𑀕𑀡𑀦𑀁 𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀳𑀸𑀧𑀦𑀕𑀡𑀦𑀸𑀬 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀢𑁆𑀢𑀜𑁆𑀘 𑀦 𑀏𑀓𑀦𑁆𑀢𑀺𑀓𑀁. 𑀦𑀳𑁂𑀢𑀼𑀦𑀸𑀭𑀫𑁆𑀫𑀡𑀤𑀼𑀓𑀲𑁆𑀲 𑀳𑀺 𑀕𑀡𑀦𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀬𑁄𑀚𑀺𑀬𑀫𑀸𑀦𑁂𑀦 𑀊𑀦𑀢𑀭𑀕𑀡𑀦𑁂𑀦 𑀲𑀤𑁆𑀥𑀺𑀁 𑀧𑀭𑀺𑀳𑀻𑀦𑀸𑀧𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀮𑀤𑁆𑀥𑀕𑀡𑀦𑀸𑀬 𑀦 𑀲𑀫𑀸𑀦𑀸, 𑀅𑀣 𑀔𑁄 𑀢𑀢𑁄𑀧𑀺 𑀊𑀦𑀢𑀭𑀸 𑀳𑁄𑀢𑀻𑀢𑀺 𑀆𑀳 ‘‘𑀦 𑀧𑀦𑁂𑀢𑀁 𑀲𑀩𑁆𑀩𑀲𑀁𑀲𑀦𑁆𑀤𑀦𑁂𑀲𑀼 𑀕𑀘𑁆𑀙𑀢𑀻’’𑀢𑀺.

𑀦𑀺𑀲𑁆𑀲𑀬𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀲𑀳𑀚𑀸𑀢𑁂 𑀘 𑀅𑀦𑀼𑀮𑁄𑀫𑀢𑁄 𑀅𑀢𑀺𑀝𑁆𑀞𑀫𑀸𑀦𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀲𑀳𑀚𑀸𑀢𑀲𑁆𑀲 𑀘 𑀅𑀝𑁆𑀞𑀸𑀦𑀁 𑀧𑀸𑀓𑀝𑀦𑁆𑀢𑀺 𑀅𑀧𑀸𑀓𑀝𑀫𑁂𑀯 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀻’’𑀢𑀺 𑀆𑀳. 𑀆𑀳𑀸𑀭𑁂 𑀯𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀲𑀳𑀚𑀸𑀢𑁂 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀅𑀦𑀼𑀮𑁄𑀫𑀢𑁄 𑀅𑀢𑀺𑀝𑁆𑀞𑀫𑀸𑀦𑀸 𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀆𑀳𑀸𑀭𑁂 𑀯𑀸 𑀇𑀦𑁆𑀤𑁆𑀭𑀺𑀬𑁂 𑀯𑀸 𑀧𑀘𑁆𑀘𑀦𑀻𑀬𑀢𑁄 𑀞𑀺𑀢𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 ¶ 𑀳𑁂𑀢𑀼𑀆𑀤𑀬𑁄𑀧𑀺 𑀢𑀺𑀝𑁆𑀞𑀦𑁆𑀢𑀺. 𑀲𑀩𑁆𑀩𑀛𑀸𑀦𑀫𑀕𑁆𑀕𑁂𑀳𑀺 𑀧𑀦 𑀘𑀢𑀼𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀽𑀢𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀦 𑀘 𑀘𑀢𑀼𑀓𑁆𑀔𑀦𑁆𑀥𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀢𑀭𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀸𑀢𑀺 𑀆𑀭𑀫𑁆𑀫𑀡𑀫𑀺𑀲𑁆𑀲𑀸𑀦𑀫𑁆𑀧𑀺 𑀅𑀦𑀼𑀮𑁄𑀫𑀢𑁄 𑀞𑀸𑀦𑀁 𑀤𑀲𑁆𑀲𑁂𑀢𑀺.

‘‘𑀇𑀦𑁆𑀤𑁆𑀭𑀺𑀬𑁂 𑀏𑀓𑀦𑁆𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀯𑀲𑁂𑀦𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀓𑀫𑁂𑀦 𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻𑀢𑀺 𑀇𑀤𑀁 𑀧𑀸𑀓𑀝𑀪𑀸𑀯𑀢𑁆𑀣𑀁 ‘‘𑀦𑀯𑀫𑀽𑀮𑀓𑀸𑀤𑀻𑀲𑀼 𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀻’’𑀢𑀺 𑀏𑀯𑀁 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀉𑀤𑁆𑀥𑀝𑀁. 𑀇𑀫𑀸𑀦𑀺 𑀘 𑀤𑁆𑀯𑁂 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀇𑀤𑀁 ‘‘𑀇𑀫𑀸𑀦𑀺 𑀘 𑀤𑁆𑀯𑁂 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁.

𑀦𑀳𑁂𑀢𑀼𑀫𑀽𑀮𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁩𑁬. 𑀦𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁂𑀢𑀼𑀬𑀸 𑀢𑀻𑀡𑀻𑀢𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘𑀸’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀳𑁂𑀢𑀼𑀬𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀻𑀢𑀺 𑀯𑀸𑀭𑀲𑀸𑀫𑀜𑁆𑀜𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀢𑀣𑀸 𑀓𑀫𑁆𑀫𑁂 𑀢𑀻𑀡𑀻𑀢𑀺 𑀳𑁂𑀢𑀼𑀬𑀸 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀘. 𑀧𑀘𑁆𑀘𑀬𑁂𑀲𑀼 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀲𑁂𑀲𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀅𑀥𑀺𑀧𑀢𑀺𑀬𑀸 𑀢𑀻𑀡𑀻𑀢𑀺 𑀦𑀅𑀜𑁆𑀜𑀫𑀜𑁆𑀜𑀦𑀳𑁂𑀢𑀼𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀢𑀻𑀡𑀻𑀢𑀺 𑀏𑀢𑀸𑀦𑀺 𑀳𑁂𑀝𑁆𑀞𑀸 𑀳𑁂𑀢𑀼𑀬𑀸 𑀯𑀼𑀢𑁆𑀢𑀸𑀦𑁂𑀯𑀸𑀢𑀺.

𑁬𑁪𑁪. 𑀬𑀣𑀸 𑀘 𑀳𑁂𑀝𑁆𑀞𑀸𑀢𑀺 𑀬𑀣𑀸 𑀦𑀳𑁂𑀢𑀼𑀫𑀽𑀮𑀓𑁂 𑀬𑀸𑀯 𑀦𑀯𑀺𑀧𑀸𑀓𑀸, 𑀢𑀸𑀯 𑀕𑀦𑁆𑀢𑁆𑀯𑀸 𑀦𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀏𑀓𑁂𑀓𑀫𑁂𑀯 𑀕𑀳𑀺𑀢𑀁, 𑀢𑀣𑀸 𑀇𑀥𑀸𑀧𑀺 𑀦𑀸𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀏𑀓𑁂𑀓𑀫𑁂𑀯 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪𑁮. 𑀦𑀸𑀦𑀸𑀓𑁆𑀔𑀡𑀺𑀓𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀯𑀺𑀧𑀸𑀓𑀸𑀦’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀢𑀻𑀡𑀺 𑀲𑀳𑀚𑀸𑀢𑀲𑀤𑀺𑀲𑀸𑀦𑀺 𑀭𑀽𑀧𑀲𑁆𑀲𑀧𑀺 𑀧𑀘𑁆𑀘𑀬𑀪𑀸𑀯𑀢𑁄, 𑀛𑀸𑀦𑀫𑀕𑁆𑀕𑀸𑀤𑀻𑀲𑀼 𑀢𑀻𑀡𑀺 𑀳𑁂𑀢𑀼𑀲𑀤𑀺𑀲𑀸𑀦𑀺 𑀅𑀭𑀽𑀧𑀸𑀦𑀁𑀬𑁂𑀯 𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀆𑀤𑀺-𑀲𑀤𑁆𑀤𑁂𑀦 𑀘 ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑀦𑀳𑁂𑀢𑀼𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀬𑀸 𑀢𑀻𑀡𑀻’’𑀢𑀺𑀆𑀤𑀻𑀦𑀺 (𑀧𑀝𑁆𑀞𑀸. 𑁧.𑁧.𑁬𑁪𑁯) 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁫𑁦. 𑀬𑀁 ¶ ¶ 𑀧𑀦𑀸𑀢𑀺 𑀬𑀁 𑀧𑀘𑁆𑀘𑀬𑀁 𑀲𑀓𑀝𑁆𑀞𑀸𑀦𑁂 𑀅𑀦𑀼𑀮𑁄𑀫𑀢𑁄 𑀮𑀪𑀦𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑁂𑀢𑀭𑀸 𑀧𑀘𑁆𑀘𑀦𑀻𑀬𑀢𑁄 𑀕𑀬𑁆𑀳𑀦𑁆𑀢𑀺, 𑀲𑁄 𑀧𑀘𑁆𑀘𑀬𑁄 𑀧𑀘𑁆𑀙𑀸 𑀅𑀦𑀼𑀮𑁄𑀫𑀢𑁄𑀯 𑀬𑁄𑀚𑀦𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀦𑀳𑁂𑀢𑀼𑀫𑀽𑀮𑀓𑀸𑀤𑀻𑀲𑀼 𑀦𑀸𑀳𑀸𑀭𑁂 𑀖𑀝𑀺𑀢𑁂 𑀇𑀦𑁆𑀤𑁆𑀭𑀺𑀬𑀯𑀲𑁂𑀦, 𑀦𑀺𑀦𑁆𑀤𑁆𑀭𑀺𑀬𑁂 𑀘 𑀖𑀝𑀺𑀢𑁂 𑀆𑀳𑀸𑀭𑀯𑀲𑁂𑀦 𑀧𑀜𑁆𑀳𑀮𑀸𑀪𑁄 𑀳𑁄𑀢𑀻𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑀻𑀬𑀢𑁄 𑀅𑀬𑁄𑀚𑁂𑀢𑁆𑀯𑀸 𑀅𑀦𑀼𑀮𑁄𑀫𑀢𑁄 𑀬𑁄𑀚𑀺𑀢𑀁, 𑀏𑀯𑀁 𑀦𑁄𑀅𑀢𑁆𑀣𑀺𑀦𑁄𑀅𑀯𑀺𑀕𑀢𑀫𑀽𑀮𑀓𑁂𑀲𑀼 𑀉𑀧𑀦𑀺𑀲𑁆𑀲𑀬𑁂 𑀖𑀝𑀺𑀢𑁂 𑀓𑀫𑁆𑀫𑀯𑀲𑁂𑀦, 𑀓𑀫𑁆𑀫𑁂 𑀘 𑀖𑀝𑀺𑀢𑁂 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀜𑁆𑀳𑀮𑀸𑀪𑁄 𑀳𑁄𑀢𑀻𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑀻𑀬𑀢𑁄 𑀅𑀬𑁄𑀚𑁂𑀢𑁆𑀯𑀸 𑀅𑀦𑀼𑀮𑁄𑀫𑀢𑁄 𑀬𑁄𑀚𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀲𑀩𑁆𑀩𑀸𑀦𑀺 𑀫𑀽𑀮𑀸𑀦𑀺 𑀤𑁆𑀯𑁂𑀥𑀸 𑀪𑀺𑀦𑁆𑀦𑀸𑀦𑀺 𑀦𑀸𑀳𑀸𑀭𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀉𑀧𑀦𑀺𑀲𑁆𑀲𑀬𑀦𑀓𑀫𑁆𑀫𑀸𑀦𑀺 𑀘 𑀧𑀢𑁆𑀯𑀸𑀢𑀺.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸

𑁧. 𑀯𑁂𑀤𑀦𑀸𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀢𑀺𑀓𑀫𑀼𑀢𑁆𑀢𑀓𑀸𑀦𑀺 𑀧𑀝𑀺𑀘𑁆𑀘𑀸𑀤𑀺𑀦𑀺𑀬𑀫𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀜𑁆𑀘 𑀦 𑀮𑀪𑀦𑁆𑀢𑀺. 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀧𑀦 𑀙𑀲𑀼 𑀬𑀢𑁄 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀢𑁄 𑀢𑀺𑀓𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀢𑁆𑀣 𑀬𑀣𑀸𑀦𑀼𑀭𑀽𑀧𑀢𑁄 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑁧𑁦. 𑀲𑀩𑁆𑀩𑀅𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸 𑀧𑀦 𑀲𑀳𑀚𑀸𑀢𑀸𑀤𑀬𑁄 𑀧𑀘𑁆𑀘𑀬𑀸𑀢𑀺 𑀇𑀫𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀧𑀭𑀺𑀳𑀻𑀦𑀁 𑀲𑀳𑀚𑀸𑀢𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀢𑁆𑀢𑀸 𑀆𑀤𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀆𑀤𑀺𑀲𑀤𑁆𑀤𑁂𑀦 𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀯𑀘𑀦𑁂𑀦 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀲𑀩𑁆𑀩𑀅𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀆𑀭𑀫𑁆𑀫𑀡𑀸𑀤𑀻𑀦𑀁 𑀧𑀭𑀺𑀳𑀸𑀦𑀺𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀓𑀼𑀲𑀮𑀢𑁆𑀢𑀺𑀓𑀧𑀭𑀺𑀳𑀻𑀦𑀸𑀦𑀁 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀲𑀩𑁆𑀩𑀢𑀺𑀓𑀸𑀤𑀻𑀲𑀼 𑀧𑀭𑀺𑀳𑀸𑀦𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀜𑁆𑀘 𑀯𑀺𑀦𑀸𑀯 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀏𑀢𑁂𑀦 𑀧𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀅𑀦𑀼𑀮𑁄𑀫𑁂 𑀧𑀭𑀺𑀳𑀸𑀦𑀺𑀁, 𑀧𑀘𑁆𑀘𑀦𑀻𑀬𑁂 𑀘 𑀮𑀸𑀪𑀁 𑀤𑀲𑁆𑀲𑁂𑀢𑀺. 𑀲𑀳𑀚𑀸𑀢𑀸𑀤𑀬𑁄𑀢𑀺 𑀯𑀸 𑀲𑀳𑀚𑀸𑀢𑀫𑀽𑀮𑀓𑀸 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸 𑀧𑀝𑀺𑀘𑁆𑀘𑀸𑀤𑀺𑀁 𑀨𑀭𑀦𑁆𑀢𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀯𑀺𑀦𑀸 𑀧𑀘𑁆𑀘𑀬𑀸 𑀅𑀳𑁄𑀦𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸 𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸 𑀘 𑀬𑁂, 𑀢𑁂𑀯 ¶ 𑀧𑀭𑀺𑀳𑀸𑀬𑀦𑁆𑀢𑀺 ¶ , 𑀦 𑀧𑀦 𑀬𑁄 𑀲𑀳𑀚𑀸𑀢𑀸𑀦𑀺𑀩𑀦𑁆𑀥𑀦𑁄 𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑁄 𑀘 𑀦 𑀳𑁄𑀢𑀺, 𑀲𑁄 𑀧𑀘𑁆𑀙𑀸𑀚𑀸𑀢𑁄𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀲𑀳𑀚𑀸𑀢𑀸𑀤𑀻𑀳𑀺 𑀯𑀺𑀦𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀜𑁆𑀘 𑀯𑀺𑀦𑀸𑀯 𑀉𑀧𑁆𑀧𑀢𑁆𑀢𑀺𑀢𑁄’’𑀢𑀺 𑀆𑀳. 𑀢𑀢𑁆𑀣 𑀲𑀳𑀚𑀸𑀢𑀸𑀤𑀻𑀳𑀺 𑀯𑀺𑀦𑀸𑀢𑀺 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑁂𑀳𑀺 𑀲𑀩𑁆𑀩𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑁂𑀳𑀺 𑀘 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸𑀦𑀫𑁂𑀯 𑀧𑀭𑀺𑀳𑀸𑀦𑀺, 𑀦 𑀧𑀘𑁆𑀙𑀸𑀚𑀸𑀢𑀲𑁆𑀲 𑀲𑀳𑀚𑀸𑀢𑀸𑀦𑀺𑀩𑀦𑁆𑀥𑀦𑀲𑁆𑀲𑀸𑀢𑀺 𑀏𑀢𑁆𑀣𑁂𑀯 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀲𑀳𑀚𑀸𑀢𑀸𑀤𑀻𑀳𑀺 𑀯𑀺𑀦𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀜𑁆𑀘 𑀯𑀺𑀦𑀸𑀯 𑀉𑀧𑁆𑀧𑀢𑁆𑀢𑀺𑀢𑁄’’𑀢𑀺 𑀆𑀳. 𑀲𑀳𑀚𑀸𑀢𑀦𑀺𑀩𑀦𑁆𑀥𑀦𑀸𑀧𑀺 𑀧𑀦 𑀲𑀩𑁆𑀩𑀅𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀸𑀬𑁂𑀯 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺.

𑁧𑁭. 𑀦𑀯𑀺𑀧𑀸𑀓𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀦𑀬𑀤𑀲𑁆𑀲𑀦𑀫𑁂𑀯 𑀓𑀭𑁄𑀢𑀺, 𑀦 𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑀸𑀫𑀜𑁆𑀜𑀤𑀲𑁆𑀲𑀦𑀁. 𑀲𑀼𑀔𑀸𑀬 𑀳𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂 𑀧𑀝𑀺𑀘𑁆𑀘 𑀢𑀸𑀳𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀓𑀺𑀭𑀺𑀬𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀚𑀸𑀢𑀫𑁄𑀳𑁄 𑀘𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀦𑀬𑁄𑀢𑀺. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀏𑀓𑀦𑁆𑀢𑀺 𑀆𑀭𑀼𑀧𑁆𑀧𑁂 𑀆𑀯𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀆𑀯𑀚𑁆𑀚𑀦𑀸𑀳𑁂𑀢𑀼𑀓𑀫𑁄𑀳𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁫-𑁩𑁭. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀬𑀣𑀸 𑀓𑀼𑀲𑀮𑀢𑁆𑀢𑀺𑀓𑀁, 𑀏𑀯𑀁 𑀕𑀡𑁂𑀢𑀩𑁆𑀩𑀦𑁆𑀢𑀺 𑀳𑁂𑀢𑀼𑀫𑀽𑀮𑀓𑀸𑀤𑀻𑀦𑀁 𑀦𑀬𑀸𑀦𑀁 𑀏𑀓𑀫𑀽𑀮𑀓𑀤𑁆𑀯𑀺𑀫𑀽𑀮𑀓𑀸𑀤𑀺𑀯𑀲𑁂𑀦 𑀘 𑀬𑁄𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀕𑀡𑀦𑀲𑀸𑀫𑀜𑁆𑀜𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄. 𑀅𑀳𑁂𑀢𑀼𑀓𑀲𑁆𑀲 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀸𑀢𑀺𑀆𑀤𑀺 𑀦𑀳𑁂𑀢𑀼𑀫𑀽𑀮𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀅𑀳𑁂𑀢𑀼𑀓𑀲𑁆𑀲 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀫𑁄𑀳𑀲𑁆𑀲 𑀘𑀸’’𑀢𑀺 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀫𑁄𑀳𑀲𑁆𑀲 𑀘𑀸𑀧𑀺 𑀳𑀺 𑀅𑀳𑁂𑀢𑀼𑀓𑀲𑁆𑀲 𑀅𑀥𑀺𑀧𑀢𑀺𑀅𑀪𑀸𑀯𑀢𑁄 𑀅𑀥𑀺𑀧𑀢𑀺𑀦𑁄 𑀦𑀳𑁂𑀢𑀼𑀫𑀽𑀮𑀓𑁂 𑀅𑀦𑀼𑀮𑁄𑀫𑀢𑁄 𑀅𑀝𑁆𑀞𑀸𑀦𑀦𑁆𑀢𑀺. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀻𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀢𑀻𑀡𑀻𑀢𑀺 𑀏𑀯𑀁 𑀧𑀼𑀭𑀢𑁄 𑀞𑀺𑀢𑀫𑁆𑀧𑀺 𑀆𑀭𑀫𑁆𑀫𑀡𑀸𑀤𑀺𑀁 𑀧𑀘𑁆𑀙𑀢𑁄 𑀬𑁄𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁯. 𑀧𑀜𑁆𑀳𑀸𑀯𑀸𑀭𑁂 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀉𑀧𑀦𑀺𑀲𑁆𑀲𑀬𑀯𑀺𑀪𑀗𑁆𑀕𑁂 ‘‘𑀲𑀤𑁆𑀥𑀸𑀧𑀜𑁆𑀘𑀓𑁂𑀲𑀼 𑀫𑀸𑀦𑀁 𑀚𑀧𑁆𑀧𑁂𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻𑀢𑀺 𑀓𑀢𑁆𑀢𑀩𑁆𑀩𑀁, 𑀅𑀯𑀲𑁂𑀲𑁂𑀲𑀼 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀸𑀞𑀕𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀭𑀸𑀕𑀸𑀤𑀻𑀳𑀺 𑀫𑀸𑀦𑀤𑀺𑀝𑁆𑀞𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀳𑀺 𑀭𑀸𑀕𑀸𑀤𑀻𑀲𑀼 ‘‘𑀫𑀸𑀦𑀁 𑀚𑀧𑁆𑀧𑁂𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻’’𑀢𑀺 𑀧𑀸𑀴𑀺 𑀦 𑀯𑀼𑀢𑁆𑀢𑀸, ‘‘𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀧𑀢𑁆𑀣𑀦𑀸 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀫𑀸𑀦𑀲𑁆𑀲 ¶ 𑀤𑀺𑀝𑁆𑀞𑀺𑀬𑀸 𑀧𑀢𑁆𑀣𑀦𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁨.𑁫𑁩) 𑀧𑀦 𑀭𑀸𑀕𑀸𑀤𑀻𑀦𑀁 𑀫𑀸𑀦𑀤𑀺𑀝𑁆𑀞𑀺𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀣𑀸 𑀇𑀥𑀸𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 ¶ . ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀕𑀸𑀫𑀖𑀸𑀢𑀁 𑀦𑀺𑀕𑀫𑀖𑀸𑀢𑀁 𑀓𑀭𑁄𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀦 𑀕𑀸𑀫𑀦𑀺𑀕𑀫𑀯𑀺𑀮𑀼𑀧𑁆𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁬𑁨. 𑀲𑀼𑀤𑁆𑀥𑀸𑀦𑀦𑁆𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀤𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸 𑀧𑀦𑁂𑀢𑁆𑀣 𑀦 𑀯𑀺𑀚𑁆𑀚𑀦𑁆𑀢𑀺. 𑀦 𑀳𑀺 𑀧𑀼𑀭𑁂𑀚𑀸𑀢𑀸 𑀧𑀘𑁆𑀙𑀸𑀚𑀸𑀢𑀸 𑀯𑀸 𑀅𑀭𑀽𑀧𑀥𑀫𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀧𑀼𑀭𑁂𑀚𑀸𑀢𑀸𑀢𑀺 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀯𑀼𑀘𑁆𑀘𑀫𑀸𑀦𑀸 𑀅𑀥𑀺𑀓𑀸𑀭𑀧𑁆𑀧𑀢𑁆𑀢𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀤𑀬𑁄𑀯 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺 𑀧𑀼𑀭𑁂𑀚𑀸𑀢𑀢𑁆𑀢𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀣𑀸 𑀧𑀘𑁆𑀙𑀸𑀚𑀸𑀢𑀢𑁆𑀢𑀸𑀪𑀸𑀯𑀢𑁄 𑀧𑀘𑁆𑀙𑀸𑀚𑀸𑀢𑀸 𑀯𑀸 𑀳𑀼𑀢𑁆𑀯𑀸 𑀦 𑀳𑁄𑀦𑁆𑀢𑀻𑀢𑀺.

𑁬𑁩-𑁬𑁪. 𑀲𑀸𑀥𑀺𑀧𑀢𑀺𑀅𑀫𑁄𑀳𑀯𑀲𑁂𑀦𑀸𑀢𑀺 𑀅𑀥𑀺𑀧𑀢𑀺𑀪𑀸𑀯𑀲𑀳𑀺𑀢𑀸𑀫𑁄𑀳𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁮𑁩-𑁮𑁭. 𑀦𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀦𑀉𑀧𑀦𑀺𑀲𑁆𑀲𑀬𑁂 𑀅𑀝𑁆𑀞𑀸𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸 𑀦𑀉𑀧𑀦𑀺𑀲𑁆𑀲𑀬𑁂 𑀅𑀝𑁆𑀞𑀸𑀢𑀺 𑀏𑀯𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀭𑀢𑀺. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀇𑀤𑀁 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸’’𑀢𑀺 𑀏𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀅𑀝𑁆𑀞𑀲𑀼𑀧𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀲𑀫𑁆𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑁄 𑀅𑀝𑁆𑀞𑀲𑀼𑀧𑀺 𑀮𑀩𑁆𑀪𑀢𑀺, 𑀅𑀣 𑀔𑁄 𑀢𑀻𑀲𑁆𑀯𑁂𑀯𑀸𑀢𑀺.

𑀯𑁂𑀤𑀦𑀸𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁧-𑁨𑁩. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀯𑀺𑀧𑀸𑀓𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀯𑀺𑀧𑀸𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘. 𑀲𑀫𑀸𑀲𑁂𑀦𑀧𑀺 𑀳𑀺 𑀲𑁄𑀬𑁂𑀯𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀧𑀸𑀴𑀺𑀬𑀁 𑀲𑀫𑀸𑀲𑀁 𑀓𑀢𑁆𑀯𑀸 𑀮𑀺𑀔𑀺𑀢𑀁.

𑁨𑁪-𑁫𑁨. ‘‘𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁 ¶ 𑀧𑀝𑀺𑀘𑁆𑀘 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀯𑀺𑀧𑀸𑀓𑀧𑀘𑁆𑀘𑀬𑀸’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 ¶ 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀓𑀝𑀢𑁆𑀢𑀸𑀭𑀽𑀧’’𑀦𑁆𑀢𑀺. 𑀢𑀁 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀢𑁆𑀢𑀸 𑀦 𑀯𑀼𑀢𑁆𑀢𑀁. 𑀦 𑀳𑁂𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀬𑀲𑁆𑀲 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀧𑀯𑀢𑁆𑀢𑀺𑀬𑀁 𑀧𑀦 𑀓𑀝𑀢𑁆𑀢𑀸𑀭𑀽𑀧𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀢𑁂𑀦𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀭𑀽𑀧𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀦𑀸𑀳𑀸𑀭𑀧𑀘𑁆𑀘𑀬𑁂 𑀘 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀁 𑀦 𑀉𑀤𑁆𑀥𑀝𑀁. 𑀢𑀫𑁆𑀧𑀺 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀆𑀳𑀸𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀯𑀺𑀧𑀸𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸

𑁧𑁫. 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑁂 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸𑀢𑀺 𑀏𑀢𑁂𑀦 𑀲𑀬𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸 𑀅𑀯𑀺𑀭𑀳𑀺𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀻𑀲𑀼𑀧𑀺 𑀅𑀥𑀺𑀧𑀢𑀺 𑀤𑀼𑀯𑀺𑀥𑁂𑀦𑀧𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀅𑀬𑀫𑁂𑀢𑀲𑁆𑀲 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

𑁭𑁨. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀓𑀫𑁆𑀫𑀚𑀸𑀦𑀁 𑀭𑀽𑀧𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀸 𑀑𑀚𑀸 𑀢𑀲𑁆𑀲𑁂𑀯 𑀓𑀫𑁆𑀫𑀚𑀓𑀸𑀬𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀦𑀼𑀧𑀸𑀮𑀦𑀼𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀬𑁄, 𑀦 𑀚𑀦𑀓𑀯𑀲𑁂𑀦𑀸𑀢𑀺 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀘 𑀥𑀫𑁆𑀫𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀆𑀳𑀸𑀭’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀬𑀤𑀺 𑀘 𑀓𑀫𑁆𑀫𑀚𑀸 𑀑𑀚𑀸 𑀲𑀓𑀮𑀸𑀧𑀭𑀽𑀧𑀸𑀦𑀫𑁂𑀯 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀯𑀁 𑀲𑀢𑀺 ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀼𑀢𑁆𑀢𑀜𑁆𑀘𑀺𑀤𑀁, 𑀢𑀫𑁆𑀧𑀺 𑀅𑀦𑀚𑁆𑀛𑁄𑀳𑀝𑀸𑀬 𑀲𑀲𑀦𑁆𑀢𑀸𑀦𑀕𑀢𑀸𑀬 𑀉𑀧𑀸𑀤𑀺𑀦𑁆𑀦𑁄𑀚𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 ¶ ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀘 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 ¶ 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁪.𑁮𑁫) 𑀅𑀬𑀫𑁆𑀧𑀺 𑀧𑀜𑁆𑀳𑁄 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀯𑀲𑁂𑀦 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸, 𑀢𑀲𑁆𑀫𑀸 𑀅𑀚𑁆𑀛𑁄𑀳𑀝𑀲𑁆𑀲 𑀉𑀧𑀸𑀤𑀺𑀦𑁆𑀦𑀸𑀳𑀸𑀭𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑁆𑀔𑀡𑁂 𑀅𑀪𑀸𑀯𑀢𑁄 𑀤𑀼𑀫𑀽𑀮𑀓𑁂𑀲𑀼 𑀧𑀞𑀫𑀧𑀜𑁆𑀳𑁂 ‘‘𑀆𑀳𑀸𑀭’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀜𑁆𑀳𑁄 𑀘 𑀦 𑀉𑀤𑁆𑀥𑀝𑁄, 𑀦 𑀇𑀢𑀭𑀲𑁆𑀲 𑀉𑀧𑀸𑀤𑀺𑀦𑁆𑀦𑀸𑀳𑀸𑀭𑀲𑁆𑀲 𑀓𑀸𑀫𑀪𑀯𑁂 𑀅𑀲𑀫𑁆𑀪𑀯𑀸𑀪𑀸𑀯𑀢𑁄𑀢𑀺 𑀅𑀚𑁆𑀛𑁄𑀳𑀝𑀫𑁂𑀯 𑀫𑀡𑁆𑀟𑀽𑀓𑀸𑀤𑀺𑀲𑀭𑀻𑀭𑀕𑀢𑀁 𑀉𑀧𑀸𑀤𑀺𑀦𑁆𑀦𑀸𑀳𑀸𑀭𑀁 𑀲𑀦𑁆𑀥𑀸𑀬 ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁪.𑁭𑁪) 𑀯𑀤𑀦𑁆𑀢𑀸𑀦𑀁 𑀯𑀸𑀤𑁄 𑀩𑀮𑀯𑀢𑀭𑁄. 𑀦 𑀳𑀺 𑀅𑀚𑁆𑀛𑁄𑀳𑀝𑀫𑀢𑁆𑀢𑀸𑀯 𑀫𑀡𑁆𑀟𑀽𑀓𑀸𑀤𑀬𑁄 𑀓𑀼𑀘𑁆𑀙𑀺𑀯𑀺𑀢𑁆𑀣𑀢𑀁 𑀦 𑀓𑀭𑁄𑀦𑁆𑀢𑀺, 𑀦 𑀘 𑀩𑀮𑀁 𑀦 𑀉𑀧𑀚𑀸𑀬𑀦𑁆𑀢𑀺, 𑀦 𑀘 𑀭𑀽𑀧𑀯𑀺𑀲𑁂𑀲𑁄 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺.

‘‘𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀲𑀳𑀚𑀸𑀢𑀁 𑀧𑀘𑁆𑀙𑀸𑀚𑀸𑀢’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁪.𑁮𑁩) 𑀏𑀯𑀫𑀸𑀤𑀻𑀳𑀺 𑀇𑀥 𑀯𑀼𑀢𑁆𑀢𑁂𑀳𑀺 𑀏𑀓𑀫𑀽𑀮𑀓𑀤𑀼𑀓𑀢𑀺𑀓𑀸𑀯𑀲𑀸𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀳𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀲𑀳𑀚𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀇𑀥 𑀤𑀼𑀢𑀺𑀬𑀤𑀼𑀓𑀸𑀯𑀲𑀸𑀦𑁂 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀮𑀩𑁆𑀪𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀧𑀦 𑀢𑀢𑁆𑀣 𑀲𑀳𑀚𑀸𑀢𑀯𑀲𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀧𑀘𑁆𑀘𑀦𑀻𑀬𑁂 𑀧𑀦 𑀲𑀳𑀚𑀸𑀢𑀲𑁆𑀲𑁂𑀯 𑀅𑀧𑀝𑀺𑀓𑁆𑀔𑁂𑀧𑁂 𑀮𑀸𑀪𑀢𑁄, 𑀧𑀝𑀺𑀓𑁆𑀔𑁂𑀧𑁂 𑀘 𑀅𑀮𑀸𑀪𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀏𑀓𑀫𑀽𑀮𑀓𑀤𑀼𑀓𑀸𑀯𑀲𑀸𑀦𑀸 𑀢𑀢𑁆𑀣 𑀉𑀤𑁆𑀥𑀝𑀸, 𑀇𑀥 𑀧𑀦𑁂𑀢𑁂𑀳𑀺 𑀯𑀺𑀲𑁆𑀲𑀚𑁆𑀚𑀦𑁂𑀳𑀺 𑀏𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀸𑀤𑀻𑀲𑀼 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀅𑀦𑁂𑀓𑁂𑀳𑀺𑀧𑀺 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀓𑁄 𑀳𑀺 𑀥𑀫𑁆𑀫𑁄 𑀏𑀓𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑁂𑀦𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀓𑁄 𑀅𑀦𑁂𑀓𑁂𑀲𑀁 𑀏𑀓𑁂𑀦𑀧𑀺 𑀅𑀦𑁂𑀓𑁂𑀳𑀺𑀧𑀺, 𑀢𑀣𑀸 𑀅𑀦𑁂𑀓𑁄 𑀏𑀓𑀲𑁆𑀲, 𑀅𑀦𑁂𑀓𑁄 𑀅𑀦𑁂𑀓𑁂𑀲𑀁 𑀲𑀫𑀸𑀦𑀢𑁆𑀢𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀦𑀜𑁆𑀜𑀥𑀫𑁆𑀫𑀢𑁆𑀢𑁂 𑀧𑀘𑁆𑀙𑀸𑀚𑀸𑀢𑁂𑀦 𑀘, 𑀦 𑀦𑀸𑀦𑀸𑀥𑀫𑁆𑀫𑀢𑁆𑀢𑁂.

𑀬𑀤𑀺 𑀲𑀺𑀬𑀸, ‘‘𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀘 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀘 𑀥𑀫𑁆𑀫𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀢𑁆𑀣 ‘‘𑀲𑀳𑀚𑀸𑀢’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀫𑁆𑀫𑀚𑀸𑀦𑀜𑁆𑀳𑀺 𑀪𑀽𑀢𑀸𑀦𑀁 𑀲𑀳𑀚𑀸𑀢𑀸𑀦𑀁 ¶ 𑀧𑀘𑁆𑀙𑀸𑀚𑀸𑀢𑀸𑀦𑀜𑁆𑀘 𑀮𑁄𑀓𑀼𑀢𑁆𑀢𑀭𑀸𑀦𑀁 𑀏𑀓𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀏𑀓𑁄 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀦𑀸𑀦𑀸𑀥𑀫𑁆𑀫𑀸𑀦𑀁 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸𑀢𑀺 𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀘𑁆𑀘𑀦𑀻𑀬𑁂 𑀘 ‘‘𑀦𑀇𑀦𑁆𑀤𑁆𑀭𑀺𑀬𑁂 𑀩𑀸𑀯𑀻𑀲𑀸’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀧𑀝𑀺𑀓𑁆𑀔𑁂𑀧𑁂𑀧𑀺 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀢𑀲𑁆𑀲 𑀧𑀜𑁆𑀳𑀲𑁆𑀲 ¶ 𑀮𑀸𑀪𑀢𑁄 ‘‘𑀢𑁂𑀯𑀻𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀧𑀼𑀭𑁂𑀚𑀸𑀢𑀁 𑀲𑀳𑀚𑀸𑀢𑁂𑀦𑁂𑀯 𑀲𑀳 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀇𑀢𑀭𑁂𑀳𑀺, 𑀢𑀫𑁆𑀧𑀺 𑀯𑀢𑁆𑀣𑀼 𑀢𑀁𑀲𑀳𑀺𑀢𑀧𑀼𑀭𑁂𑀚𑀸𑀢𑀫𑁂𑀯, 𑀦 𑀇𑀢𑀭𑀁. 𑀓𑀼𑀲𑀮𑀢𑁆𑀢𑀺𑀓𑁂 𑀳𑀺 𑀧𑀜𑁆𑀳𑀸𑀯𑀸𑀭𑁂 ‘‘𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀅𑀢𑁆𑀣𑀺𑀬𑀸 𑀧𑀜𑁆𑀘𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁬𑁪𑁯) 𑀯𑀼𑀢𑁆𑀢𑀁, 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑁂 𑀧𑀦 ‘‘𑀯𑀺𑀧𑁆𑀧𑀬𑀼𑀢𑁆𑀢𑁂 𑀩𑀸𑀯𑀻𑀲𑀸’’𑀢𑀺. 𑀬𑀁 𑀧𑀦 𑀢𑀢𑁆𑀣 𑀅𑀢𑁆𑀣𑀺𑀯𑀺𑀪𑀗𑁆𑀕𑁂 𑀧𑀘𑁆𑀘𑀬𑀼𑀤𑁆𑀥𑀸𑀭𑁂 𑀘 𑀢𑀺𑀫𑀽𑀮𑀓𑁂𑀓𑀸𑀯𑀲𑀸𑀦𑀁 𑀉𑀤𑁆𑀥𑀝𑀁, 𑀢𑀁 𑀯𑀢𑁆𑀣𑀼𑀲𑀳𑀺𑀢𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀲𑁆𑀲 𑀲𑀳𑀚𑀸𑀢𑁂𑀦, 𑀲𑀳 𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀳𑁂𑀯, 𑀅𑀦𑀜𑁆𑀜𑀥𑀫𑁆𑀫𑀢𑁆𑀢𑁂 𑀘 𑀲𑀳𑀚𑀸𑀢𑁂𑀦 𑀘, 𑀆𑀳𑀸𑀭𑁄 𑀧𑀘𑁆𑀙𑀸𑀚𑀸𑀢𑀺𑀦𑁆𑀤𑁆𑀭𑀺𑀬𑁂𑀳𑁂𑀯, 𑀇𑀦𑁆𑀤𑁆𑀭𑀺𑀬𑀁 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑁂𑀦𑀸𑀢𑀺 𑀏𑀯𑀫𑁂𑀢𑀁 𑀅𑀢𑁆𑀣𑀺𑀧𑀘𑁆𑀘𑀬𑀯𑀺𑀪𑀸𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀼𑀮𑁄𑀫𑁂 𑀧𑀘𑁆𑀘𑀦𑀻𑀬𑀸𑀤𑀻𑀲𑀼 𑀘 𑀮𑀩𑁆𑀪𑀫𑀸𑀦𑀸 𑀧𑀜𑁆𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸.

𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸

𑁨𑁨. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀦𑀼𑀮𑁄𑀫𑁂 𑀅𑀥𑀺𑀧𑀢𑀺𑀬𑀸 𑀢𑁂𑀯𑀻𑀲𑀸𑀢𑀺 𑀲𑀢𑁆𑀢𑀲𑀼 𑀫𑀽𑀮𑀓𑁂𑀲𑀼 𑀬𑀣𑀸𑀓𑁆𑀓𑀫𑀁 𑀲𑀢𑁆𑀢 𑀧𑀜𑁆𑀘 𑀢𑀻𑀡𑀺 𑀏𑀓𑀁 𑀢𑀻𑀡𑀺 𑀢𑀻𑀡𑀺 𑀏𑀓𑀦𑁆𑀢𑀺 𑀏𑀯𑀁 𑀢𑁂𑀯𑀻𑀲, 𑀅𑀜𑁆𑀜𑀫𑀜𑁆𑀜𑁂 𑀅𑀝𑁆𑀞𑀯𑀻𑀲 𑀲𑀢𑁆𑀢 𑀧𑀜𑁆𑀘 𑀧𑀜𑁆𑀘 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀢𑀻𑀡𑀺 𑀏𑀓𑀦𑁆𑀢𑀺 𑀏𑀯𑀁, 𑀧𑀼𑀭𑁂𑀚𑀸𑀢𑁂 𑀏𑀓𑀸𑀤𑀲 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀤𑁆𑀯𑁂 𑀤𑀼𑀢𑀺𑀬𑀢𑀢𑀺𑀬𑀤𑀼𑀫𑀽𑀮𑀓𑁂𑀲𑀼 𑀏𑀓𑀁 𑀏𑀓𑀦𑁆𑀢𑀺 𑀏𑀯𑀁, 𑀢𑀣𑀸 𑀆𑀲𑁂𑀯𑀦𑁂. 𑀅𑀜𑁆𑀜𑀸𑀦𑀺 𑀕𑀡𑀦𑀸𑀦𑀺 𑀳𑁂𑀢𑀼𑀆𑀭𑀫𑁆𑀫𑀡𑀲𑀤𑀺𑀲𑀸𑀦𑀺.

𑁩𑁧. 𑀧𑀘𑁆𑀘𑀦𑀻𑀬𑁂 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑁂 𑀧𑀞𑀫𑀧𑀜𑁆𑀳𑁂 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀅𑀥𑀺𑀧𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀯𑀺𑀧𑀸𑀓𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, 𑀦 𑀧𑀦 𑀅𑀯𑀺𑀲𑁂𑀲𑁂𑀦. 𑀓𑀲𑁆𑀫𑀸? 𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀓𑁆𑀔𑀦𑁆𑀥𑀸𑀦𑀁 𑀏𑀓𑀦𑁆𑀢𑁂𑀦 𑀲𑀸𑀥𑀺𑀧𑀢𑀺𑀪𑀸𑀯𑀢𑁄 ¶ . 𑀯𑀺𑀧𑀸𑀓𑀸𑀦𑀁 𑀧𑀦 𑀮𑁄𑀓𑀼𑀢𑁆𑀢𑀭𑀸𑀦𑀫𑁂𑀯 𑀲𑀸𑀥𑀺𑀧𑀢𑀺𑀪𑀸𑀯𑁄, 𑀦 𑀇𑀢𑀭𑁂𑀲𑀦𑁆𑀢𑀺 𑀢𑁂 𑀯𑀺𑀲𑀼𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀥𑀺𑀧𑀢𑀺𑀲𑁆𑀲 𑀘𑁂𑀢𑁆𑀣 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂𑀬𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁮. 𑀦𑀸𑀲𑁂𑀯𑀦𑀫𑀽𑀮𑀓𑁂 ¶ 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀧𑀸𑀓𑁂𑀦 𑀲𑀳 𑀕𑀘𑁆𑀙𑀦𑁆𑀢𑁂𑀦𑀸𑀢𑀺 𑀏𑀢𑀁 𑀫𑀽𑀮𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀤𑁂𑀳𑀺 𑀅𑀯𑀺𑀢𑀓𑁆𑀓𑁂𑀳𑀺 𑀲𑀳 𑀬𑁄𑀚𑁂𑀦𑁆𑀢𑁂𑀦 𑀦𑀧𑀼𑀭𑁂𑀚𑀸𑀢𑀲𑀤𑀺𑀲𑀁 𑀧𑀸𑀴𑀺𑀕𑀫𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀤𑀺𑀲𑀢𑀸 𑀘𑁂𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀯𑀺𑀲𑀤𑀺𑀲𑀢𑀸 𑀘 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀳𑀺 𑀆𑀭𑀼𑀧𑁆𑀧𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀇𑀥 𑀯𑀺𑀧𑀸𑀓𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀦𑁆𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀇𑀤𑀜𑁆𑀘 𑀦𑀸𑀲𑁂𑀯𑀦𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀮𑀺𑀔𑀺𑀢𑀩𑁆𑀩𑀁, 𑀦 𑀛𑀸𑀦𑀸𑀦𑀦𑁆𑀢𑀭𑀁, 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁.

𑀧𑀘𑁆𑀘𑀬𑀯𑀸𑀭𑁂 𑀧𑀞𑀫𑀖𑀝𑀦𑁂 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀬𑁄𑀢𑀺 𑀤𑀼𑀫𑀽𑀮𑀓𑁂𑀲𑀼 𑀧𑀞𑀫𑁂 𑀲𑀢𑁆𑀢𑀲𑀼𑀧𑀺 𑀧𑀜𑁆𑀳𑁂𑀲𑀼 𑀧𑀯𑀢𑁆𑀢𑀺𑀜𑁆𑀘 𑀧𑀝𑀺𑀲𑀦𑁆𑀥𑀺𑀜𑁆𑀘 𑀬𑁄𑀚𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁯. 𑀧𑀘𑁆𑀘𑀦𑀻𑀬𑁂 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑁆𑀢 𑀫𑁄𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸 𑀫𑀽𑀮𑀧𑀤𑁂𑀲𑀼 𑀏𑀯𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀧𑀤𑁂𑀲𑀼 𑀫𑀽𑀮𑀧𑀤𑀫𑁂𑀯 𑀅𑀯𑀲𑀸𑀦𑀪𑀸𑀯𑁂𑀦 𑀬𑁂𑀲𑀼 𑀧𑀜𑁆𑀳𑁂𑀲𑀼 𑀬𑁄𑀚𑀺𑀢𑀁, 𑀢𑁂𑀲𑀼 𑀲𑀢𑁆𑀢𑀲𑀼 𑀧𑀜𑁆𑀳𑁂𑀲𑀼 𑀲𑀢𑁆𑀢 𑀫𑁄𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀥𑀫𑁆𑀫𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀉𑀧𑀦𑀺𑀲𑁆𑀲𑀬𑁂𑀦 𑀧𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀉𑀧𑀸𑀤𑀺𑀦𑁆𑀦𑀢𑁆𑀢𑀺𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 𑀳𑀺 ‘‘𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁪.𑁫𑁮, 𑁬𑁨) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀢𑁆𑀢𑀺𑀓𑀧𑀜𑁆𑀳𑀸𑀯𑀸𑀭𑀧𑀘𑁆𑀘𑀦𑀻𑀬𑁂 𑀘 ‘‘𑀫𑀳𑀕𑁆𑀕𑀢𑁄 𑀥𑀫𑁆𑀫𑁄 𑀫𑀳𑀕𑁆𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁫𑁭, 𑁬𑁫, 𑁭𑁩) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀏𑀢𑁆𑀢𑀓𑀫𑁂𑀯 𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀓𑀫𑁆𑀫𑀁 𑀅𑀧𑁆𑀧𑀫𑀸𑀡𑀁 𑀫𑀳𑀕𑁆𑀕𑀢𑀜𑁆𑀘, 𑀢𑀜𑁆𑀘 𑀤𑀼𑀩𑁆𑀩𑀮𑀁 𑀦 𑀳𑁄𑀢𑀻𑀢𑀺 𑀏𑀢𑁂𑀳𑀺𑀬𑁂𑀯 𑀯𑀘𑀦𑁂𑀳𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀯𑀺𑀢𑀓𑁆𑀓𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑀯𑀡𑁆𑀡𑀦𑀸

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂 ¶ ¶ 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑁂𑀦𑀧𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀇𑀤𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀯𑀺𑀘𑀸𑀭𑀺𑀢𑀦𑀬𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑀦𑁆𑀢𑀺.

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀘𑁆𑀙𑀸𑀕𑀡𑀦𑀕𑀸𑀣𑀸𑀬𑁄

𑀓𑀼𑀲𑀮𑀸𑀤𑀺 𑀏𑀓𑀓𑀢𑁆𑀢𑀬-𑀫𑀣𑀸𑀤𑀺 𑀅𑀦𑁆𑀢𑁂𑀦 𑀫𑀚𑁆𑀛𑀺𑀫𑀦𑁆𑀢𑁂𑀦;

𑀆𑀤𑀺 𑀘 𑀫𑀚𑁆𑀛𑁂𑀦 𑀤𑀼𑀓𑀸, 𑀢𑀬𑁄 𑀢𑀺𑀓𑁂𑀓𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄.

𑀢𑁂𑀲𑁆𑀯𑁂𑀓𑁂𑀓𑀁 𑀫𑀽𑀮𑀁 𑀓𑀢𑁆𑀯𑀸, 𑀢𑀁 𑀲𑀢𑁆𑀢𑀲𑀢𑁆𑀢𑀓𑀸 𑀧𑀼𑀘𑁆𑀙𑀸;

𑀏𑀓𑁂𑀓𑀧𑀘𑁆𑀘𑀬𑁂 𑀬𑀣𑀸, 𑀪𑀯𑀦𑁆𑀢𑀺 𑀏𑀓𑀽𑀦𑀧𑀜𑁆𑀜𑀸𑀲.

𑀙𑀲𑀢𑁆𑀢𑀢𑀸𑀥𑀺𑀓𑀲𑀢𑀁, 𑀲𑀳𑀲𑁆𑀲𑀫𑁂𑀓𑀜𑁆𑀘 𑀲𑀼𑀤𑁆𑀥𑀺𑀓𑁂 𑀧𑀼𑀘𑁆𑀙𑀸;

𑀏𑀲 𑀘 𑀦𑀬𑁄𑀦𑀼𑀮𑁄𑀫𑁂, 𑀧𑀘𑁆𑀘𑀦𑀻𑀬𑁂 𑀘𑀸𑀢𑀺 𑀦𑀸𑀜𑁆𑀜𑀢𑁆𑀣.

𑀭𑀸𑀲𑀺𑀕𑀼𑀡𑀺𑀢𑀲𑁆𑀲 𑀭𑀸𑀲𑀺𑀲𑁆𑀲𑀟𑁆𑀠𑀁, 𑀲𑀳 𑀭𑀸𑀲𑀺𑀓𑀲𑁆𑀲 𑀧𑀺𑀡𑁆𑀟𑁄 𑀲𑁄;

𑀭𑀸𑀲𑀺𑀲𑁆𑀲 𑀯𑀸 𑀲𑀳𑁂𑀓𑀲𑁆𑀲𑀟𑁆𑀠𑀁, 𑀧𑀼𑀦 𑀭𑀸𑀲𑀺𑀦𑀸 𑀕𑀼𑀡𑀺𑀢𑀁.

𑀇𑀢𑀺 𑀳𑁂𑀢𑀼𑀫𑀽𑀮𑀓𑀸𑀤𑀼𑀓-𑀢𑀺𑀓𑀸𑀤𑀬𑁄 𑀙𑀘𑁆𑀘 𑀲𑀢𑁆𑀢𑀢𑀺𑀲𑀢𑀸 𑀤𑁆𑀯𑁂;

𑀘𑀢𑀼𑀯𑀻𑀲𑀢𑁂𑀢𑁆𑀣 𑀧𑀼𑀘𑁆𑀙𑀸, 𑀅𑀟𑁆𑀠𑀼𑀟𑁆𑀠𑀲𑀳𑀲𑁆𑀲𑀦𑀳𑀼𑀢𑀜𑁆𑀘.

𑀢𑀸𑀲𑀁 ¶ 𑀬𑀲𑁆𑀫𑀸 𑀲𑀼𑀤𑁆𑀥𑀺𑀓-𑀦𑀬𑁄 𑀦 𑀧𑀘𑁆𑀘𑁂𑀓𑀧𑀘𑁆𑀘𑀬𑁂 𑀢𑀲𑁆𑀫𑀸;

𑀘𑀢𑀼𑀯𑀻𑀲𑀢𑀺𑀕𑀼𑀡𑀺𑀢𑀸𑀦𑀁, 𑀲𑀲𑀼𑀤𑁆𑀥𑀺𑀓𑀸𑀦𑀁 𑀅𑀬𑀁 𑀕𑀡𑀦𑀸.

𑀮𑀓𑁆𑀔𑀢𑁆𑀢𑀬𑀁 𑀤𑁆𑀯𑀺𑀦𑀳𑀼𑀢𑀁, 𑀧𑀜𑁆𑀘 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀲𑀢𑀸𑀦𑀺;

𑀤𑁆𑀯𑀸𑀧𑀜𑁆𑀜𑀸𑀲𑀸 𑀏𑀢𑀸, 𑀅𑀦𑀼𑀮𑁄𑀫𑁂 𑀧𑀺𑀡𑁆𑀟𑀺𑀢𑀸 𑀧𑀼𑀘𑁆𑀙𑀸.

𑀅𑀦𑀼𑀮𑁄𑀫𑀲𑀤𑀺𑀲𑀕𑀡𑀦𑀸, 𑀪𑀯𑀦𑁆𑀢𑀺 𑀧𑀼𑀘𑁆𑀙𑀸𑀦𑀬𑁂 𑀘 𑀧𑀘𑁆𑀘𑀦𑀻𑀬𑁂;

𑀳𑀸𑀧𑁂𑀢𑁆𑀯𑀸 𑀧𑀦 𑀲𑁂𑀲𑁂, 𑀦𑀬𑀤𑁆𑀯𑀬𑁂 𑀲𑀼𑀤𑁆𑀥𑀺𑀓𑁂 𑀮𑀤𑁆𑀥𑀸.

𑀙𑀧𑁆𑀧𑀜𑁆𑀜𑀸𑀲 𑀪𑀯𑀦𑁆𑀢𑀺 𑀧𑀼𑀘𑁆𑀙𑀸, 𑀙𑀲𑀢𑀲𑀳𑀺𑀢𑀜𑁆𑀘 𑀮𑀓𑁆𑀔𑀢𑁂𑀭𑀲𑀓𑀁;

𑀧𑀼𑀘𑁆𑀙𑀸𑀦𑀬𑁂𑀲𑀼 𑀕𑀡𑀺𑀢𑀸, 𑀧𑀝𑀺𑀘𑁆𑀘𑀯𑀸𑀭𑁂 𑀘𑀢𑀽𑀲𑁆𑀯𑀧𑀺.

𑀲𑀢𑁆𑀢𑀳𑀺 ¶ 𑀕𑀼𑀡𑀺𑀢𑀸 𑀓𑀼𑀲𑀮𑀢𑁆𑀢𑀺𑀓𑁂 𑀤𑁆𑀯𑀬𑀁, 𑀦𑀯𑀼𑀢𑀺𑀜𑁆𑀘𑁂𑀯 𑀧𑀜𑁆𑀘𑀲𑀢𑀸;

𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀘, 𑀢𑀣𑁂𑀓𑀦𑀯𑀼𑀢𑁂 𑀘 𑀮𑀓𑁆𑀔𑀓𑀸.

𑀦𑀸𑀤𑁆𑀯𑀸𑀯𑀻𑀲𑀢𑀺 𑀕𑀼𑀡𑀺𑀢𑀸, 𑀢𑀺𑀓𑁂𑀲𑀼 𑀲𑀩𑁆𑀩𑁂𑀲𑀼 𑀯𑀻𑀲𑀢𑀺 𑀘 𑀓𑁄𑀝𑀺;

𑀮𑀓𑁆𑀔𑀢𑁆𑀢𑀬𑀁 𑀲𑀳𑀲𑁆𑀲𑀁, 𑀘𑀢𑀼𑀯𑀻𑀲𑀢𑀺 𑀘𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀢𑀺𑀓𑀧𑀝𑁆𑀞𑀸𑀦𑀁.

𑀏𑀓𑀓𑀧𑀘𑁆𑀘𑀬𑁂 𑀧𑀦, 𑀦𑀯 𑀦𑀯 𑀓𑀢𑁆𑀯𑀸 𑀲𑀲𑁄𑀴𑀲𑀤𑁆𑀯𑀺𑀲𑀢𑀁;

𑀳𑁂𑀢𑀼𑀤𑀼𑀓𑀧𑀞𑀫𑀯𑀸𑀭𑁂, 𑀧𑀞𑀫𑀦𑀬𑁂 𑀲𑀼𑀤𑁆𑀥𑀺𑀓𑁂 𑀧𑀼𑀘𑁆𑀙𑀸.

𑀳𑁂𑀢𑀸𑀤𑀺𑀫𑀽𑀮𑀓𑀦𑀬𑁂-𑀲𑁆𑀯𑁂𑀓𑁂𑀓𑀲𑁆𑀫𑀺𑀁 𑀤𑀼𑀓𑀸𑀤𑀺𑀪𑁂𑀤𑀬𑀼𑀢𑁂;

𑀘𑀢𑀼𑀭𑀸𑀲𑀻𑀢𑀺𑀘𑀢𑀼𑀲𑀢-𑀲𑀳𑀺𑀢𑀁 𑀲𑀳𑀲𑁆𑀲𑀤𑁆𑀯𑀬𑀁 𑀧𑀼𑀘𑁆𑀙𑀸.

𑀢𑀸 𑀘𑀢𑀼𑀯𑀻𑀲𑀢𑀺𑀕𑀼𑀡𑀺𑀢𑀸, 𑀲𑀲𑀼𑀤𑁆𑀥𑀺𑀓𑀸 𑀏𑀢𑁆𑀣 𑀳𑁄𑀦𑁆𑀢𑀺 𑀅𑀦𑀼𑀮𑁄𑀫𑁂;

𑀤𑁆𑀯𑀢𑁆𑀢𑀺𑀁𑀲𑀝𑁆𑀞𑀲𑀢𑀸𑀥𑀺𑀓-𑀲𑀳𑀲𑁆𑀲𑀦𑀯𑀓𑀟𑁆𑀠𑀮𑀓𑁆𑀔𑀓𑀸.

𑀏𑀯𑀁 ¶ 𑀧𑀘𑁆𑀘𑀦𑀻𑀬𑁂 𑀤𑁆𑀯𑁂, 𑀲𑀼𑀤𑁆𑀥𑀺𑀓𑀭𑀳𑀺𑀢𑀸 𑀘𑀢𑀽𑀲𑁆𑀯𑀢𑁄 𑀳𑁄𑀦𑁆𑀢𑀺;

𑀙𑀦𑁆𑀦𑀯𑀼𑀢𑀝𑁆𑀞𑀲𑀢𑀝𑁆𑀞-𑀢𑀺𑀁𑀲𑀲𑀳𑀲𑁆𑀲𑀤𑁆𑀯𑀺𑀮𑀓𑁆𑀔𑀓𑀸𑀦𑀺.

𑀢𑀸 𑀧𑀦 𑀲𑀢𑁆𑀢𑀕𑀼𑀡𑀸 𑀤𑁆𑀯𑁂, 𑀲𑀢𑁆𑀢𑀢𑀺𑀲𑀢𑀤𑁆𑀯𑀬𑀁 𑀲𑀳𑀲𑁆𑀲𑀸𑀦𑀺;

𑀤𑁆𑀯𑀸𑀲𑀢𑁆𑀢𑀢𑀺 𑀳𑁄𑀦𑁆𑀢𑀺 𑀢𑀢𑁄, 𑀲𑁄𑀴𑀲 𑀮𑀓𑁆𑀔𑀸𑀦𑀺 𑀳𑁂𑀢𑀼𑀤𑀼𑀓𑁂.

𑀢𑀸 𑀲𑀢𑀕𑀼𑀡𑀸 𑀤𑀼𑀓𑀲𑀢𑁂, 𑀲𑀢𑀤𑁆𑀯𑀬𑀁 𑀲𑀢𑁆𑀢𑀯𑀻𑀲𑀢𑀺 𑀲𑀳𑀲𑁆𑀲𑀸;

𑀤𑁆𑀯𑀸𑀲𑀢𑁆𑀢𑀢𑀺𑀮𑀓𑁆𑀔𑀸𑀦𑀺 𑀘, 𑀲𑁄𑀴𑀲𑀓𑁄𑀝𑀺 𑀢𑀢𑁄 𑀧𑀼𑀘𑁆𑀙𑀸.

𑀤𑀼𑀓𑀧𑀝𑁆𑀞𑀸𑀦𑀁.

𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀢𑀺𑀓-𑀧𑀓𑁆𑀔𑁂𑀧𑁄 𑀳𑁄𑀢𑀺 𑀏𑀓𑀫𑁂𑀓𑀤𑀼𑀓𑁂;

𑀢𑀲𑁆𑀲 𑀙𑀲𑀝𑁆𑀞𑀺𑀕𑀼𑀡𑁂𑀦 𑀢𑁂, 𑀙𑀲𑀝𑁆𑀞𑀺𑀲𑀢𑀁 𑀤𑀼𑀓𑀸 𑀳𑁄𑀦𑁆𑀢𑀺.

𑀳𑁂𑀢𑀼𑀤𑀼𑀓𑀮𑀤𑁆𑀥𑀧𑀼𑀘𑁆𑀙𑀸, 𑀕𑀼𑀡𑀺𑀢𑀸 𑀢𑁂𑀳𑀺 𑀘 𑀳𑁄𑀦𑁆𑀢𑀺 𑀢𑀺𑀓𑀧𑀤𑀫𑁂𑀯;

𑀤𑀼𑀓𑀧𑀝𑁆𑀞𑀸𑀦𑁂 𑀧𑀼𑀘𑁆𑀙𑀸, 𑀢𑀸𑀲𑀁 𑀕𑀡𑀦𑀸 𑀅𑀬𑀁 𑀜𑁂𑀬𑁆𑀬𑀸.

𑀤𑁆𑀯𑀸𑀧𑀜𑁆𑀜𑀸𑀲 𑀲𑀢𑀸𑀦𑀺 𑀘, 𑀦𑀯𑁂𑀯 𑀦𑀳𑀼𑀢𑀸𑀦𑀺 𑀦𑀯 𑀘 𑀲𑀝𑁆𑀞𑀺𑀜𑁆𑀘;

𑀮𑀓𑁆𑀔𑀸𑀦𑀺 𑀢𑀻𑀳𑀺 𑀲𑀳𑀺𑀢𑀁, 𑀲𑀢𑀁 𑀲𑀳𑀲𑁆𑀲𑀜𑁆𑀘 𑀓𑁄𑀝𑀺𑀦𑀁.

𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁.

𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 ¶ 𑀢𑀺𑀓-𑀫𑁂𑀓𑁂𑀓𑀁 𑀤𑁆𑀯𑀺𑀲𑀢𑀪𑁂𑀤𑀦𑀁 𑀓𑀢𑁆𑀯𑀸;

𑀤𑁆𑀯𑀸𑀯𑀻𑀲𑀤𑁆𑀯𑀺𑀲𑀢𑀕𑀼𑀡𑀸, 𑀜𑁂𑀬𑁆𑀬𑀸 𑀓𑀼𑀲𑀮𑀢𑁆𑀢𑀺𑀓𑁂 𑀮𑀤𑁆𑀥𑀸.

𑀧𑀼𑀘𑁆𑀙𑀸 𑀅𑀝𑁆𑀞𑀲𑀢𑀸𑀥𑀺𑀓-𑀘𑀢𑀼𑀲𑀳𑀲𑁆𑀲𑀤𑁆𑀯𑀺𑀮𑀓𑁆𑀔𑀬𑀼𑀢𑁆𑀢𑀸𑀦𑀁;

𑀓𑁄𑀝𑀻𑀦𑀁 𑀙𑀓𑁆𑀓𑀫𑀣𑁄, 𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺.

𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁.

𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑁂 ¶ , 𑀢𑁂𑀲𑀝𑁆𑀞𑀺𑀯𑀺𑀥𑁂𑀓𑁂𑀓𑀪𑁂𑀤𑀦𑀸 𑀢𑀼 𑀢𑀺𑀓𑀸;

𑀢𑁂𑀳𑀺 𑀘 𑀕𑀼𑀡𑀺𑀢𑀸 𑀓𑀼𑀲𑀮-𑀢𑁆𑀢𑀺𑀓𑀧𑀼𑀘𑁆𑀙𑀸𑀧𑀺 𑀳𑁄𑀦𑁆𑀢𑀺 𑀧𑀼𑀘𑁆𑀙𑀸 𑀢𑀸.

𑀤𑁆𑀯𑀸𑀤𑀲 𑀧𑀜𑁆𑀘𑀲𑀢𑀸 𑀘𑀢𑀼-𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀦𑀯𑀼𑀢𑀺 𑀘𑁂𑀓𑀽𑀦𑀸;

𑀮𑀓𑁆𑀔𑀸𑀦𑀫𑁂𑀓𑀲𑀝𑁆𑀞𑀺, 𑀤𑁆𑀯𑀸𑀤𑀲𑀲𑀢𑀓𑁄𑀝𑀺𑀬𑁄 𑀘𑁂𑀯.

𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁.

𑀤𑁆𑀯𑀬𑀳𑀻𑀦𑀤𑁆𑀯𑀬𑀲𑀢𑀕𑀼𑀡𑁄, 𑀏𑀓𑁂𑀓𑁄 𑀤𑀼𑀓𑀤𑀼𑀓𑁂 𑀢𑁂𑀳𑀺;

𑀳𑁂𑀢𑀼𑀤𑀼𑀓𑁂 𑀮𑀤𑁆𑀥𑀸 𑀲𑀗𑁆𑀔𑁆𑀬-𑀪𑁂𑀤𑁂𑀳𑀺 𑀘 𑀯𑀟𑁆𑀠𑀺𑀢𑀸 𑀧𑀼𑀘𑁆𑀙𑀸.

𑀙𑀲𑀢𑀬𑀼𑀢𑀸𑀦𑀺 𑀧𑀜𑁆𑀘𑀸-𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀮𑀓𑁆𑀔𑀦𑀯𑀓𑀜𑁆𑀘;

𑀏𑀓𑀸𑀤𑀲𑀸𑀧𑀺 𑀓𑁄𑀝𑀺, 𑀧𑀼𑀦 𑀓𑁄𑀝𑀺𑀲𑀢𑀸𑀦𑀺 𑀢𑁂𑀢𑁆𑀢𑀺𑀁𑀲.

𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁.

𑀲𑀫𑁆𑀧𑀺𑀡𑁆𑀟𑀺𑀢𑀸 𑀢𑀼 𑀧𑀼𑀘𑁆𑀙𑀸, 𑀅𑀦𑀼𑀮𑁄𑀫𑁂 𑀙𑀩𑁆𑀩𑀺𑀥𑁂𑀧𑀺 𑀧𑀝𑁆𑀞𑀸𑀦𑁂;

𑀙𑀢𑁆𑀢𑀺𑀁𑀲𑀢𑀺𑀲𑀢𑀲𑀳𑀲𑁆𑀲-𑀝𑁆𑀞𑀓𑀬𑀼𑀢𑀲𑀢𑁆𑀢𑀦𑀳𑀼𑀢𑀸𑀦𑀺.

𑀮𑀓𑁆𑀔𑀸𑀦𑀺 𑀙𑀘𑁆𑀘 𑀘𑀢𑁆𑀢𑀸-𑀮𑀻𑀲𑁂𑀯 𑀦𑀯𑀸𑀣 𑀓𑁄𑀝𑀺𑀬𑁄 𑀤𑀲 𑀘;

𑀲𑀢𑁆𑀢𑀓𑁄𑀝𑀺𑀲𑀢𑁂𑀳𑀺 𑀘, 𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀦𑀯 𑀳𑁄𑀦𑁆𑀢𑀺.

𑀢𑀸 𑀘𑀢𑀼𑀕𑀼𑀡𑀺𑀢𑀸 𑀧𑀼𑀘𑁆𑀙𑀸, 𑀘𑀢𑀼𑀧𑁆𑀧𑀪𑁂𑀤𑁂 𑀲𑀫𑀦𑁆𑀢𑀧𑀝𑁆𑀞𑀸𑀦𑁂;

𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀢𑀢𑁆𑀢𑀬𑀁, 𑀲𑀳𑀲𑁆𑀲𑀸𑀦𑀺 𑀢𑁂𑀭𑀲 𑀘.

𑀲𑀢𑁆𑀢𑀸𑀲𑀻𑀢𑀺 ¶ ¶ 𑀘 𑀮𑀓𑁆𑀔𑀸𑀦𑀁, 𑀓𑁄𑀝𑀻𑀦𑀜𑁆𑀘 𑀲𑀢𑁆𑀢𑀲𑀢𑁆𑀢𑀢𑀺𑀬𑁄;

𑀳𑁄𑀦𑁆𑀢𑀺𑀝𑁆𑀞𑀲𑀢𑀸𑀦𑀺𑀝𑁆𑀞-𑀢𑀺𑀁𑀲𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀕𑀡𑀦𑀸.

𑀧𑀝𑁆𑀞𑀸𑀦𑀲𑁆𑀲 𑀧𑀼𑀘𑁆𑀙𑀸𑀕𑀡𑀦𑀕𑀸𑀣𑀸.

𑀧𑀝𑁆𑀞𑀸𑀦𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀇𑀢𑀺 𑀪𑀤𑀦𑁆𑀢𑀆𑀦𑀦𑁆𑀤𑀸𑀘𑀭𑀺𑀬𑀓𑁂𑀦 𑀓𑀢𑀸 𑀮𑀻𑀦𑀢𑁆𑀣𑀧𑀤𑀯𑀡𑁆𑀡𑀦𑀸

𑀅𑀪𑀺𑀥𑀫𑁆𑀫𑀲𑁆𑀲 𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.