📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀜𑁆𑀘𑀧𑀓𑀭𑀡-𑀅𑀦𑀼𑀝𑀻𑀓𑀸

𑀥𑀸𑀢𑀼𑀓𑀣𑀸𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀥𑀸𑀢𑀼𑀓𑀣𑀸𑀧𑀓𑀭𑀡𑀤𑁂𑀲𑀦𑀸𑀬 ¶ ¶ 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯𑀸𑀢𑀺 𑀓𑀸𑀮𑀸𑀧𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀸𑀢𑀼𑀓𑀣𑀸𑀧𑀓𑀭𑀡𑀁 𑀤𑁂𑀲𑁂𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. ‘‘𑀢𑀲𑁆𑀲𑁂𑀯 𑀅𑀦𑀦𑁆𑀢𑀭𑀁 𑀅𑀤𑁂𑀲𑀬𑀻’’𑀢𑀺 𑀳𑀺 𑀇𑀫𑀺𑀦𑀸 𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀥𑀸𑀢𑀼𑀓𑀣𑀸 𑀤𑁂𑀲𑀺𑀢𑀸𑀢𑀺 𑀢𑀲𑁆𑀲𑀸 𑀤𑁂𑀲𑀦𑀸𑀓𑀸𑀮𑁄 𑀅𑀧𑀤𑀺𑀝𑁆𑀞𑁄 𑀳𑁄𑀢𑀺. 𑀬𑁂 𑀧𑀦 ‘‘𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 ¶ 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀁 𑀤𑁂𑀲𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳.

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁭) 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀩𑀮𑀯𑀺𑀥𑀫𑀦𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, ‘‘𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦’’𑀦𑁆𑀢𑀺 𑀧𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀔𑀦𑁆𑀢𑀺𑀩𑀮𑀲𑀤𑁆𑀥𑀸𑀩𑀮𑀸𑀤𑀺𑀆𑀦𑀼𑀪𑀸𑀯𑁂𑀦 𑀉𑀲𑁆𑀲𑀸𑀳𑀧𑀭𑀺𑀲𑀸𑀩𑀮𑀪𑀜𑁆𑀚𑀦𑀫𑁂𑀯 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀩𑀮𑀯𑀺𑀤𑁆𑀥𑀁𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀁 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑁄. 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦𑀸𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀁 𑀯𑀲𑁂𑀦. 𑀦𑀦𑀼 𑀘𑁂𑀢𑀁 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀪𑀜𑁆𑀚𑀦𑀁 𑀲𑀸𑀯𑀓𑁂𑀲𑀼𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀭𑀽𑀧𑀦𑀺𑀲𑁆𑀲𑀬𑀭𑀳𑀺𑀢’’𑀦𑁆𑀢𑀺𑀆𑀤𑀺. 𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀫𑀳𑀸𑀯𑀻𑀭𑀺𑀬𑁄𑀢𑀺 𑀫𑀳𑀸𑀯𑀻𑀭𑁄’’𑀢𑀺. 𑀫𑀳𑀸𑀯𑀻𑀭𑀺𑀬𑀢𑀸 𑀘 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀬 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑁂𑀦 ¶ 𑀅𑀦𑀜𑁆𑀜𑀲𑀸𑀥𑀸𑀭𑀡𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀏𑀯 𑀳𑀺𑀲𑁆𑀲 𑀯𑀻𑀭𑀺𑀬𑀸𑀳𑀸𑀦𑀺𑀲𑀺𑀤𑁆𑀥𑀺𑀧𑀻𑀢𑀺.

𑀔𑀦𑁆𑀥𑀸𑀤𑀺𑀓𑁂 𑀥𑀫𑁆𑀫𑁂 𑀅𑀥𑀺𑀝𑁆𑀞𑀸𑀬 𑀦𑀺𑀲𑁆𑀲𑀸𑀬 𑀯𑀺𑀲𑀬𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀓𑀣𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀅𑀪𑀺𑀥𑀫𑁆𑀫𑀓𑀣𑀸𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸’’𑀢𑀺. 𑀢𑁂𑀲𑀁 𑀓𑀣𑀦𑀢𑁄𑀢𑀺 𑀢𑁂𑀲𑀁 𑀔𑀦𑁆𑀥𑀸𑀤𑀻𑀦𑀁 𑀓𑀣𑀸𑀪𑀸𑀯𑀢𑁄. 𑀏𑀢𑁂𑀦 𑀅𑀢𑁆𑀣𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑁄 𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁄 𑀧𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀥𑀸𑀢𑀼𑀬𑁄 𑀓𑀣𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀥𑀸𑀢𑀼𑀓𑀣𑀸, 𑀢𑀣𑀸𑀧𑀯𑀢𑁆𑀢𑁄 𑀩𑁆𑀬𑀜𑁆𑀚𑀦𑀢𑁆𑀣𑀲𑀫𑀼𑀤𑀸𑀬𑁄. 𑀬𑀤𑀺 𑀏𑀯𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀓𑀭𑀡𑀸𑀦𑀁 𑀥𑀸𑀢𑀼𑀓𑀣𑀸𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀤𑀺𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀢𑀺𑀲𑀬𑀦𑁆𑀢𑀺 𑀲𑀯𑀺𑀲𑁂𑀲𑀁 𑀯𑀺𑀘𑀺𑀢𑁆𑀢𑀸𑀢𑀺𑀭𑁂𑀓𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀘 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 (𑀥𑀸𑀢𑀼. 𑁫). 𑀢𑁂𑀦𑁂𑀯𑀸𑀳 ‘‘𑀏𑀓𑀤𑁂𑀲𑀓𑀣𑀦𑀫𑁂𑀯 𑀳𑀺 𑀅𑀜𑁆𑀜𑀢𑁆𑀣 𑀓𑀢’’𑀦𑁆𑀢𑀺.

𑀇𑀤𑀸𑀦𑀺 𑀲𑀸𑀲𑀦𑁂 𑀬𑁂𑀲𑀼 𑀥𑀸𑀢𑀼-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, 𑀢𑁂𑀲𑀁 𑀯𑀲𑁂𑀦 𑀅𑀜𑁆𑀜𑁂𑀳𑀺𑀧𑀺 𑀅𑀲𑀸𑀥𑀸𑀭𑀡𑀁 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼. 𑀫𑀳𑀦𑁆𑀢𑁄 𑀧𑀪𑁂𑀤𑀸𑀦𑀼𑀕𑀢𑁄 𑀯𑀺𑀲𑀬𑁄 𑀏𑀢𑀸𑀲𑀦𑁆𑀢𑀺 𑀫𑀳𑀸𑀯𑀺𑀲𑀬𑀸, 𑀥𑀸𑀢𑀼𑀬𑁄, 𑀦 𑀔𑀦𑁆𑀥𑀸𑀬𑀢𑀦𑀸𑀦𑀺 𑀅𑀧𑁆𑀧𑀢𑀭𑀧𑀤𑀢𑁆𑀢𑀸. 𑀬𑁂𑀦 𑀯𑀸 𑀲𑀪𑀸𑀯𑁂𑀦 𑀥𑀫𑁆𑀫𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑁂𑀳𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂 𑀮𑀪𑀦𑁆𑀢𑀺, 𑀲𑁄 𑀲𑀪𑀸𑀯𑁄 𑀥𑀸𑀢𑀼. 𑀲𑀸 𑀥𑀸𑀢𑀼 𑀇𑀥 𑀲𑀸𑀢𑀺𑀲𑀬𑀁 𑀤𑁂𑀲𑀺𑀢𑀸𑀢𑀺 𑀲𑀯𑀺𑀲𑁂𑀲𑀁 𑀥𑀸𑀢𑀼𑀬𑀸 𑀓𑀣𑀦𑀢𑁄 𑀇𑀤𑀁 𑀧𑀓𑀭𑀡𑀁 ‘‘𑀥𑀸𑀢𑀼𑀓𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀥𑀸𑀢𑀼-𑀲𑀤𑁆𑀤𑁄 ‘‘𑀥𑀸𑀢𑀼𑀲𑁄, 𑀪𑀺𑀓𑁆𑀔𑀯𑁂 ¶ , 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁯𑁮) 𑀯𑀺𑀬. 𑀥𑀸𑀢𑀼𑀪𑁂𑀤𑀦𑁆𑀢𑀺 𑀥𑀸𑀢𑀼𑀯𑀺𑀪𑀸𑀕𑀁. 𑀧𑀓𑀭𑀡𑀦𑁆𑀢𑀺 𑀯𑀘𑀦𑀲𑁂𑀲𑁄. 𑀓𑀼𑀢𑁄 𑀧𑀓𑀭𑀡-𑀲𑀤𑁆𑀤𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀓𑀫𑁂𑀦 𑀯𑀡𑁆𑀡𑀦𑀸𑀬 𑀧𑀯𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸𑀢𑀺 𑀢𑁂𑀦 𑀧𑀓𑀭𑀡-𑀲𑀤𑁆𑀤𑁂𑀦 ‘‘𑀥𑀸𑀢𑀼𑀓𑀣𑀸𑀯 𑀧𑀓𑀭𑀡𑀁 𑀥𑀸𑀢𑀼𑀓𑀣𑀸𑀧𑀓𑀭𑀡’’𑀦𑁆𑀢𑀺 𑀬𑁄𑀚𑀦𑀁 𑀓𑀢𑁆𑀯𑀸. 𑀢𑀁 𑀤𑀻𑀧𑀦𑀦𑁆𑀢𑀺 𑀢𑀁 𑀥𑀸𑀢𑀼𑀓𑀣𑀸𑀧𑀓𑀭𑀡𑀲𑁆𑀲 𑀅𑀢𑁆𑀣𑀤𑀻𑀧𑀦𑀁, 𑀅𑀢𑁆𑀣𑀤𑀻𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀯𑀡𑁆𑀡𑀦𑀁. ‘‘𑀅𑀢𑁆𑀣𑀁 𑀤𑀻𑀧𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀢𑀁 𑀲𑀼𑀡𑀸𑀣𑀸’’𑀢𑀺 𑀯𑀤𑀦𑁆𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀢𑀢𑁆𑀣 𑀉𑀧𑀥𑀸𑀭𑀡𑁂 𑀦𑀺𑀬𑁄𑀚𑁂𑀢𑀻𑀢𑀺 𑀆𑀳 ‘‘𑀢𑀁𑀤𑀻𑀧𑀦𑀯𑀘𑀦𑀲𑀯𑀦𑁂𑀦 𑀉𑀧𑀥𑀸𑀭𑁂𑀣𑀸𑀢𑀺 𑀅𑀢𑁆𑀣𑁄’’𑀢𑀺.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀘𑀼𑀤𑁆𑀤𑀲𑀯𑀺𑀥𑁂𑀦𑀸𑀢𑀺 ¶ ¶ 𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑁂𑀦, 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀇𑀤𑀫𑁂𑀓𑀁 𑀧𑀤𑀁, 𑀢𑀣𑀸 ‘‘𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄’’𑀢𑀺. ‘‘𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀧𑀦 𑀢𑀻𑀡𑀺 𑀢𑀻𑀡𑀺 𑀧𑀤𑀸𑀦𑀺 𑀏𑀓𑁂𑀓𑀁 𑀧𑀤𑀁. 𑀇𑀢𑀭𑁂𑀲𑀼 𑀧𑀤𑀯𑀺𑀪𑀸𑀕𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀏𑀢𑁂𑀳𑀻𑀢𑀺 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑁂𑀳𑀺. 𑀦𑀬𑀦𑀁 𑀧𑀸𑀧𑀦𑀁, 𑀢𑀁 𑀧𑀦 𑀧𑀯𑀢𑁆𑀢𑀦𑀁 𑀜𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 ‘‘𑀧𑀯𑀢𑁆𑀢𑀻𑀬𑀢𑀺 𑀜𑀸𑀬𑀦𑁆𑀢𑀻’’𑀢𑀺 𑀘 𑀤𑁆𑀯𑀺𑀥𑀸𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀬𑀸 𑀏𑀯 𑀉𑀤𑁆𑀤𑀺𑀲𑀺𑀬𑀫𑀸𑀦𑀸 𑀫𑀸𑀢𑀺𑀓𑀸. 𑀅𑀢𑁆𑀣𑀤𑁆𑀯𑀬𑁂𑀧𑀺 𑀧𑀯𑀢𑁆𑀢𑀦𑀜𑀸𑀡𑀓𑀺𑀭𑀺𑀬𑀸𑀦𑀁 𑀓𑀭𑀡𑀪𑀸𑀯𑁂𑀦 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑀸 𑀦𑀬𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀫𑀺𑀦𑀸 𑀲𑀗𑁆𑀕𑀳𑀸𑀤𑀺𑀓𑁂𑀦 𑀦𑀬𑁂𑀦𑀸’’𑀢𑀺 (𑀥𑀸𑀢𑀼. 𑀅𑀝𑁆𑀞. 𑁧). 𑀧𑀤𑀸𑀦𑀦𑁆𑀢𑀺 𑀅𑀢𑁆𑀣𑀤𑀻𑀧𑀓𑀸𑀦𑀁 𑀯𑀘𑀦𑀸𑀦𑀁. 𑀧𑀚𑁆𑀚𑀢𑀺 𑀏𑀢𑁂𑀦 𑀅𑀢𑁆𑀣𑁄𑀢𑀺 𑀳𑀺 𑀧𑀤𑀁. 𑀧𑀤𑀸𑀦𑀦𑁆𑀢𑀺 𑀘 𑀲𑀁𑀲𑀸𑀫𑀺𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, 𑀧𑀓𑀭𑀡𑀲𑁆𑀲𑀸𑀢𑀺 𑀧𑀦 𑀅𑀯𑀬𑀯𑀸𑀯𑀬𑀯𑀻𑀲𑀫𑁆𑀩𑀦𑁆𑀥𑁂.

𑁨. 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨. 𑀢𑀤𑀢𑁆𑀣𑀸𑀦𑀻𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁆𑀣𑀸𑀦𑀺. 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀲𑀗𑁆𑀔𑀸𑀭𑀸𑀤𑀺𑀓𑀁 𑀏𑀢𑀲𑁆𑀫𑀸𑀢𑀺 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀧𑀘𑁆𑀘𑁂𑀓𑀁 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀥𑀫𑁆𑀫𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸, 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺. 𑀢𑁂𑀲𑀦𑁆𑀢𑀺 𑀔𑀦𑁆𑀥𑀸𑀤𑀻𑀦𑀁. 𑀢𑀣𑀸𑀤𑀲𑁆𑀲𑀺𑀢𑀸𑀦𑀦𑁆𑀢𑀺 𑀕𑀡𑀦𑀼𑀤𑁆𑀤𑁂𑀲𑀯𑀺𑀪𑀸𑀕𑀫𑀢𑁆𑀢𑁂𑀦 𑀤𑀲𑁆𑀲𑀺𑀢𑀸𑀦𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁆𑀯𑀸𑀤𑀲𑀪𑀸𑀯𑁂𑀦𑁂𑀯 𑀕𑀳𑀺𑀢𑁄, 𑀦𑀦𑀼 𑀢𑀢𑁆𑀣 𑀪𑀯𑁄 𑀓𑀫𑁆𑀫𑀪𑀯𑀸𑀤𑀺𑀪𑁂𑀤𑁂𑀦, 𑀲𑁄𑀓𑀸𑀤𑀬𑁄 𑀘 𑀲𑀭𑀽𑀧𑀢𑁄𑀬𑁂𑀯 𑀇𑀥 𑀧𑀸𑀴𑀺𑀬𑀁 𑀕𑀳𑀺𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀯𑀘𑀦𑁂. 𑀓𑀫𑁆𑀫𑀪𑀯𑀲𑁆𑀲 𑀪𑀸𑀯𑀦𑀪𑀸𑀯𑁂𑀦, 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀪𑀯𑀦𑀪𑀸𑀯𑁂𑀦. 𑀧𑀤𑀢𑁆𑀣𑀢𑁄 𑀧𑀦 𑀓𑀫𑁆𑀫𑀪𑀯𑁄 ¶ 𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀪𑀯𑁄, 𑀇𑀢𑀭𑁄 𑀪𑀯𑀢𑀺, 𑀪𑀯𑀦𑀁 𑀯𑀸𑀢𑀺. 𑀢𑀦𑁆𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦𑀸𑀢𑀺 𑀚𑀭𑀸𑀫𑀭𑀡𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦.

‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 𑀇𑀤𑀫𑁆𑀧𑀺 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀓𑀺𑀢𑁆𑀢𑀦𑀫𑁂𑀯𑀸𑀢𑀺 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸𑀢𑀺 𑀅𑀬𑀁 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀢𑁄 𑀩𑀳𑀺𑀤𑁆𑀥𑀸 𑀯𑀼𑀢𑁆𑀢𑀸’’𑀢𑀺 𑀯𑀘𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳 ¶ . 𑀧𑀓𑀭𑀡𑀦𑁆𑀢𑀭𑀕𑀢𑀸 𑀯𑀼𑀢𑁆𑀢𑀸 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀫𑀸𑀢𑀺𑀓𑀸𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀧𑀓𑀭𑀡𑀦𑁆𑀢𑀭𑀕𑀢𑀢𑁆𑀢𑀸 𑀧𑀦 𑀅𑀜𑁆𑀜𑀢𑁄 𑀕𑀳𑁂𑀢𑀩𑁆𑀩𑀭𑀽𑀧𑀸 𑀇𑀢𑁄 𑀩𑀳𑀺𑀪𑀽𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑀭𑀽𑀧𑀢𑁄 𑀕𑀳𑀺𑀢𑀸𑀯 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀆𑀤𑀺𑀓𑀸 𑀅𑀩𑁆𑀪𑀦𑁆𑀢𑀭𑀸. 𑀢𑁂𑀦𑀸𑀳 ‘‘𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀞𑀧𑀺𑀢𑀢𑁆𑀢𑀸’’𑀢𑀺. 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀫𑀸𑀢𑀺𑀓𑀸𑀬 𑀲𑀭𑀽𑀧𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑁄 𑀓𑁄𑀘𑀺 𑀧𑀤𑀢𑁆𑀣𑁄 𑀅𑀢𑁆𑀣𑀺. 𑀯𑀺𑀓𑀺𑀡𑁆𑀡𑀪𑀸𑀯𑁂𑀦𑀸𑀢𑀺 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀺𑀡𑁆𑀡𑀪𑀸𑀯𑁂𑀦 𑀯𑀺𑀲𑀝𑀪𑀸𑀯𑁂𑀦.

𑁩. 𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁩. 𑀦𑀬𑀸𑀦𑀁 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀦𑀁 𑀧𑀯𑀢𑁆𑀢𑀺 𑀤𑁂𑀲𑀦𑀸, 𑀢𑀲𑁆𑀲𑀸 𑀯𑀺𑀦𑀺𑀕𑁆𑀕𑀫𑀝𑁆𑀞𑀸𑀦𑀢𑀸𑀬 𑀤𑁆𑀯𑀸𑀭𑀁. 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸 𑀬𑀣𑀸𑀭𑀳𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀅𑀭𑀽𑀧𑀺𑀦𑁄 𑀘 𑀔𑀦𑁆𑀥𑀸𑀢𑀺 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀦𑀬𑀫𑀼𑀔𑀫𑀸𑀢𑀺𑀓𑀸. 𑀢𑁂𑀦𑀸𑀳 ‘‘𑀦𑀬𑀸𑀦’’𑀦𑁆𑀢𑀺𑀆𑀤𑀺. 𑀯𑀺𑀬𑀼𑀚𑁆𑀚𑀦𑀲𑀻𑀮𑀸, 𑀯𑀺𑀬𑁄𑀕𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀬𑁄𑀕𑀺𑀦𑁄, 𑀢𑀣𑀸 𑀲𑀳𑀬𑁄𑀕𑀺𑀦𑁄, 𑀲𑀗𑁆𑀕𑀳𑀸𑀲𑀗𑁆𑀕𑀳𑀥𑀫𑁆𑀫𑀸 𑀘 𑀯𑀺𑀬𑁄𑀕𑀻𑀲𑀳𑀬𑁄𑀕𑀻𑀥𑀫𑁆𑀫𑀸 𑀘 𑀲𑀗𑁆𑀕𑀳𑀸…𑀧𑁂… 𑀥𑀫𑁆𑀫𑀸, 𑀲𑀗𑁆𑀕𑀡𑁆𑀳𑀦𑀸𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀯𑀺𑀬𑀼𑀚𑁆𑀚𑀦𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀓𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀘𑀼𑀤𑁆𑀤𑀲𑀧𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀬𑁂𑀳𑀻𑀢𑀺 𑀬𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀘. 𑀢𑁂 𑀘𑀢𑁆𑀢𑀸𑀭𑁄𑀢𑀺 𑀢𑁂 𑀲𑀗𑁆𑀕𑀳𑀸𑀤𑀬𑁄 𑀘𑀢𑁆𑀢𑀸𑀭𑁄. 𑀲𑀘𑁆𑀘𑀸𑀤𑀻𑀳𑀺𑀧𑀻𑀢𑀺 𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺𑀧𑀺 𑀲𑀳. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀸𑀦𑀼𑀭𑀽𑀧𑀁, 𑀬𑀁 𑀬𑀁 𑀧𑀤𑀁 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄𑀢𑀺 𑀘 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀁 𑀢𑀦𑁆𑀢𑀺 𑀅𑀢𑁆𑀣𑁄.

𑀲𑁄 𑀧𑀦𑀸𑀢𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄. 𑀲𑀗𑁆𑀕𑀸𑀳𑀓𑀪𑀽𑀢𑁂𑀳𑀻𑀢𑀺 𑀲𑀗𑁆𑀕𑀳𑀡𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑁂𑀳𑀺. 𑀢𑁂𑀳𑀻𑀢𑀺 𑀲𑀘𑁆𑀘𑀸𑀤𑀻𑀳𑀺. 𑀦 𑀲𑀗𑁆𑀕𑀳𑀪𑀽𑀢𑁂𑀳𑀻𑀢𑀺 𑀲𑀗𑁆𑀕𑀳𑀡𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑁂𑀳𑀺 𑀲𑀘𑁆𑀘𑀸𑀤𑀻𑀳𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀦 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀧𑀺 𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀏𑀯 𑀓𑀭𑀡𑀪𑀽𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀤𑀻𑀳𑁂𑀯 𑀲𑀗𑁆𑀕𑀳𑁂𑀳𑀻𑀢𑀺 𑀔𑀦𑁆𑀥𑀸𑀤𑀻𑀳𑀺𑀬𑁂𑀯 𑀲𑀗𑁆𑀕𑀡𑁆𑀳𑀦𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑁂𑀳𑀺, ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 ¶ , 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀸𑀬𑀢𑀦𑁂𑀳𑀺, 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀘𑁆𑀘𑀸𑀤𑀻𑀦𑀺 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀦 𑀲𑀗𑁆𑀕𑀳𑀪𑀸𑀯𑁂𑀦, 𑀔𑀦𑁆𑀥𑀸𑀤𑀻𑀦𑀺𑀬𑁂𑀯 𑀘 𑀲𑀗𑁆𑀕𑀳𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀲𑀘𑁆𑀘𑀸𑀤𑀬𑁄 𑀲𑀗𑁆𑀕𑀳𑀯𑀲𑁂𑀦 𑀦 𑀯𑀼𑀢𑁆𑀢𑀸𑀢𑀺? 𑀢𑀣𑀸𑀤𑁂𑀲𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀲𑀓𑁆𑀓𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺, 𑀲𑀜𑁆𑀜𑀸𑀤𑀻𑀦𑀁 𑀯𑀸 𑀇𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀲𑀗𑁆𑀕𑀳𑀦𑀬𑁂𑀦 𑀧𑀼𑀘𑁆𑀙𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀸𑀢𑀺. 𑀢𑀣𑀸 𑀅𑀭𑀺𑀬𑀨𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀯𑁂𑀤𑀦𑀸𑀤𑀻𑀦𑀁 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀢𑀸𑀬 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 ‘‘𑀏𑀓𑁂𑀦 𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀬𑀫𑁂𑀢𑁆𑀯𑀸 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀬𑁂𑀳𑀺 𑀲𑀫𑁆𑀧𑀬𑁄𑀕𑁄, 𑀬𑁂𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄, 𑀢𑀤𑀦𑀼𑀭𑀽𑀧𑀁.

𑀭𑀽𑀧𑀁 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀁 𑀦 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀭𑀽𑀧𑁂𑀦. 𑀓𑀲𑁆𑀫𑀸? 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀦𑀸𑀲𑀗𑁆𑀓𑀦𑀻𑀬𑀲𑀪𑀸𑀯𑀢𑁆𑀢𑀸. 𑀘𑀢𑀼𑀦𑁆𑀦𑀜𑁆𑀳𑀺 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑀻𑀪𑀸𑀯𑀢𑁄 ‘‘𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀲𑁄 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁 𑀇𑀢𑀭𑁂𑀳𑀺, 𑀇𑀢𑀭𑁂𑀲𑀜𑁆𑀘 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺, 𑀦 𑀧𑀦 𑀭𑀽𑀧𑀲𑁆𑀲 𑀭𑀽𑀧𑁂𑀦, 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀭𑀽𑀧𑁂𑀦 𑀓𑀢𑁆𑀣𑀘𑀺 𑀲𑀫𑁆𑀧𑀬𑁄𑀕𑁄 𑀅𑀢𑁆𑀣𑀻𑀢𑀺 𑀢𑀤𑀸𑀲𑀗𑁆𑀓𑀸𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑁄𑀧𑀺 𑀭𑀽𑀧𑀲𑁆𑀲 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺, 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀢𑁂𑀦 𑀦 𑀯𑀼𑀘𑁆𑀘𑀢𑀺, 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺𑀬𑁂𑀯 𑀧𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀘𑀢𑀽𑀳𑁂𑀯𑀸’’𑀢𑀺𑀆𑀤𑀺. 𑀅𑀦𑀸𑀭𑀫𑁆𑀫𑀡𑀲𑁆𑀲 𑀘𑀓𑁆𑀔𑀸𑀬𑀢𑀦𑀸𑀤𑀺𑀓𑀲𑁆𑀲. 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀻𑀢𑀺 𑀅𑀦𑀸𑀭𑀫𑁆𑀫𑀡𑁂𑀦 𑀲𑁄𑀢𑀸𑀬𑀢𑀦𑀸𑀤𑀺𑀦𑀸 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀦 𑀘 𑀥𑀫𑁆𑀫𑀸𑀬𑀢𑀦𑀸𑀤𑀺𑀦𑀸. 𑀫𑀺𑀲𑁆𑀲𑀓𑀲𑁆𑀲 𑀥𑀫𑁆𑀫𑀸𑀬𑀢𑀦𑀸𑀤𑀺𑀓𑀲𑁆𑀲. 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀺 𑀦 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑁂𑀲𑀁 𑀧𑀦 𑀬𑁂𑀳𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀸𑀭𑀫𑁆𑀫𑀡𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀲𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀭𑀫𑁆𑀫𑀡𑁂𑀦 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀦 𑀘 𑀯𑀺𑀧𑁆𑀧𑀬𑁄𑀕𑁄 𑀳𑁄𑀢𑀺, 𑀏𑀯𑀁 𑀲𑀸𑀭𑀫𑁆𑀫𑀡𑁂𑀦𑀧𑀺 𑀲𑁄 𑀳𑁄𑀢𑀺𑀬𑁂𑀯. 𑀢𑁂𑀦 𑀯𑀺𑀬 𑀅𑀦𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑁆𑀲 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁪. 𑀮𑀓𑁆𑀔𑀡𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁪. 𑀯𑀺𑀲𑀼𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀬𑁄 𑀢𑀻𑀳𑀺 𑀲𑀗𑁆𑀕𑀳𑁄 𑀘𑀢𑀽𑀳𑀺 𑀘 𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁 𑀲𑀪𑀸𑀕𑁄 𑀪𑀸𑀯𑁄 𑀧𑀬𑁄𑀚𑁂𑀢𑀺, 𑀬𑁄 𑀘 𑀢𑀻𑀳𑀺 𑀅𑀲𑀗𑁆𑀕𑀳𑁄 𑀘𑀢𑀽𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁 𑀯𑀺𑀲𑀪𑀸𑀕𑁄 𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀕𑀳𑁄…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀬𑀲𑁆𑀲 𑀲𑀗𑁆𑀕𑀳𑁄, 𑀲𑁄 𑀥𑀫𑁆𑀫𑁄 𑀔𑀦𑁆𑀥𑀸𑀤𑀺𑀓𑁄 ¶ 𑀲𑀪𑀸𑀕𑁄. 𑀬𑀲𑁆𑀲 𑀅𑀲𑀗𑁆𑀕𑀳𑁄, 𑀲𑁄 𑀯𑀺𑀲𑀪𑀸𑀕𑁄. 𑀢𑀣𑀸 𑀲𑀫𑁆𑀧𑀬𑁄𑀕𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀁 𑀲𑀪𑀸𑀕𑀢𑀁 𑀲𑀭𑀽𑀧𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀲𑀫𑀸𑀦𑀪𑀸𑀯𑁄 𑀲𑀗𑁆𑀕𑀳𑁂 𑀲𑀪𑀸𑀕𑀢𑀸, 𑀏𑀓𑀼𑀧𑁆𑀧𑀸𑀤𑀸𑀤𑀺𑀓𑁄 𑀲𑀫𑁆𑀧𑀬𑁄𑀕𑁂𑀢𑀺 𑀇𑀫𑀺𑀦𑀸 𑀭𑀼𑀧𑁆𑀧𑀦𑀸𑀤𑀺𑀯𑀺𑀥𑀼𑀭𑁄 𑀅𑀲𑀫𑀸𑀦𑀲𑀪𑀸𑀯𑁄 𑀅𑀲𑀗𑁆𑀕𑀳𑁂 𑀯𑀺𑀲𑀪𑀸𑀕𑀢𑀸, 𑀦𑀸𑀦𑀼𑀧𑁆𑀧𑀸𑀤𑀸𑀤𑀺𑀓𑁄 𑀯𑀺𑀧𑁆𑀧𑀬𑁄𑀕𑁂𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀲𑀺𑀤𑁆𑀥𑁄𑀢𑀺 𑀦 𑀯𑀼𑀢𑁆𑀢𑁄𑀢𑀺.

𑁫. 𑀩𑀸𑀳𑀺𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫. 𑀏𑀢𑁂𑀦 𑀞𑀧𑀦𑀸𑀓𑀸𑀭𑁂𑀦𑀸𑀢𑀺 𑀲𑀭𑀽𑀧𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀭𑀡𑀦𑁆𑀢𑀭𑀫𑀸𑀢𑀺𑀓𑀸𑀬 𑀇𑀥 𑀫𑀸𑀢𑀺𑀓𑀸𑀪𑀸𑀯𑀓𑀺𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀞𑀧𑀦𑀸𑀓𑀸𑀭𑁂𑀦. 𑀧𑀓𑀭𑀡𑀦𑁆𑀢𑀭𑀞𑀧𑀺𑀢𑀸𑀬 𑀫𑀸𑀢𑀺𑀓𑀸𑀬 𑀅𑀯𑀺𑀪𑀸𑀕𑁂𑀦 𑀧𑀘𑁆𑀙𑀢𑁄 𑀕𑀳𑀡𑀁 𑀩𑀳𑀺 𑀞𑀧𑀦𑀦𑁆𑀢𑀺 𑀆𑀳 ‘‘𑀩𑀳𑀺 𑀧𑀺𑀝𑁆𑀞𑀺𑀢𑁄 𑀞𑀧𑀺𑀢𑀢𑁆𑀢𑀸’’𑀢𑀺. 𑀇𑀥 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀇𑀫𑀺𑀲𑁆𑀲𑀸 𑀥𑀸𑀢𑀼𑀓𑀣𑀸𑀬 𑀲𑀭𑀽𑀧𑁂𑀦 𑀅𑀯𑀢𑁆𑀯𑀸. 𑀢𑀣𑀸 𑀧𑀓𑀸𑀲𑀺𑀢𑀢𑁆𑀢𑀸𑀢𑀺 𑀫𑀸𑀢𑀺𑀓𑀸𑀪𑀸𑀯𑁂𑀦 𑀚𑁄𑀢𑀺𑀢𑀢𑁆𑀢𑀸. 𑀥𑀫𑁆𑀫𑀲𑀗𑁆𑀕𑀡𑀻𑀲𑀻𑀲𑁂𑀦 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀆𑀕𑀢𑀫𑀸𑀢𑀺𑀓𑀸𑀯 𑀕𑀳𑀺𑀢𑀸𑀢𑀺. 𑀬𑁂𑀳𑀺 𑀦𑀬𑁂𑀳𑀺 𑀥𑀸𑀢𑀼𑀓𑀣𑀸𑀬 𑀦𑀺𑀤𑁆𑀤𑁂𑀲𑁄, 𑀢𑁂𑀲𑀼 𑀦𑀬𑁂𑀲𑀼, 𑀢𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀻𑀲𑀼, 𑀢𑁂𑀲𑀁 𑀦𑀬𑀸𑀦𑀁 𑀧𑀯𑀢𑁆𑀢𑀺𑀤𑁆𑀯𑀸𑀭𑀮𑀓𑁆𑀔𑀡𑁂𑀲𑀼 𑀘 𑀉𑀤𑁆𑀤𑀺𑀝𑁆𑀞𑁂𑀲𑀼 𑀥𑀸𑀢𑀼𑀓𑀣𑀸𑀬 𑀉𑀤𑁆𑀤𑁂𑀲𑀯𑀲𑁂𑀦 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀬𑀁 𑀉𑀤𑁆𑀤𑁂𑀲𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀢𑁆𑀯𑀸 𑀧𑀼𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀫𑀸𑀢𑀺𑀓𑀸𑀬 𑀦𑀺𑀓𑁆𑀔𑁂𑀧𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀕𑀸𑀯𑀻𑀢𑀺 𑀅𑀬𑀫𑀸𑀳𑀸’’𑀢𑀺 𑀏𑀢𑁆𑀣 𑀕𑀸𑀯𑀻-𑀲𑀤𑁆𑀤𑁄 𑀯𑀺𑀬 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑁆𑀣 𑀧𑀤𑀢𑁆𑀣𑀯𑀺𑀧𑀮𑁆𑀮𑀸𑀲𑀓𑀸𑀭𑀺𑀦𑀸 𑀇𑀢𑀺-𑀲𑀤𑁆𑀤𑁂𑀦 𑀅𑀢𑁆𑀣𑀧𑀤𑀢𑁆𑀣𑀓𑁄 𑀲𑀗𑁆𑀕𑀳𑀸𑀲𑀗𑁆𑀕𑀳-𑀲𑀤𑁆𑀤𑁄 𑀲𑀤𑁆𑀤𑀧𑀤𑀢𑁆𑀣𑀓𑁄 𑀚𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀢𑁄 𑀲𑀗𑁆𑀕𑀳𑀲𑀤𑁆𑀤𑀁 𑀲𑀁𑀯𑀡𑁆𑀡𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄𑀢𑀺 𑀅𑀲𑀗𑁆𑀕𑀳𑀺𑀢𑀚𑀸𑀢𑀺𑀲𑀜𑁆𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑁄. 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀦𑁆𑀢𑀺 𑀲𑀗𑁆𑀕𑀳𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀲𑀸𑀫𑀜𑁆𑀜𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑁄 𑀯𑀼𑀘𑁆𑀘𑀫𑀸𑀦𑁄 𑀯𑀸. 𑀦 𑀘𑁂𑀢𑁆𑀣 𑀲𑀸𑀫𑀜𑁆𑀜𑀜𑁆𑀘 𑀏𑀓𑀭𑀽𑀧𑀫𑁂𑀯𑀸𑀢𑀺 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸 𑀪𑁂𑀤𑀸𑀧𑁂𑀓𑁆𑀔𑀢𑁆𑀢𑀸 𑀢𑀲𑁆𑀲. 𑀬𑀢𑁆𑀢𑀓𑀸 𑀳𑀺 𑀢𑀲𑁆𑀲 𑀯𑀺𑀲𑁂𑀲𑀸, 𑀢𑀤𑀧𑁂𑀓𑁆𑀔𑀫𑁂𑀯 𑀢𑀦𑁆𑀢𑀺. ‘‘𑀅𑀢𑁆𑀢𑀦𑁄 𑀚𑀸𑀢𑀺𑀬𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀫𑀢𑁆𑀢𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀫𑀸𑀢𑀼 𑀳𑀺𑀢𑀸𑀢𑀺.

𑀥𑀫𑁆𑀫𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀤𑀺𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸. 𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀯𑀺𑀲𑁂𑀲𑁂𑀦. 𑀥𑀫𑁆𑀫𑀸𑀦𑀦𑁆𑀢𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀸𑀦𑀁. 𑀅𑀯𑀲𑁂𑀲𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 ‘‘𑀲𑀗𑁆𑀕𑀳𑀺𑀢𑁂𑀦 ¶ 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀺𑀓𑀸 𑀅𑀯𑀲𑁂𑀲𑀸 ¶ 𑀤𑁆𑀯𑀸𑀤𑀲𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀉𑀤𑁆𑀤𑁂𑀲𑀸𑀢𑀺 𑀬𑁄𑀚𑀦𑀸. 𑀦𑀦𑀼 𑀘 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀬𑁄𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀼𑀤𑁆𑀤𑁂𑀲𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀺. 𑀬𑀲𑁆𑀲 𑀅𑀢𑁆𑀣𑁄 𑀜𑀸𑀬𑀢𑀺, 𑀲𑀤𑁆𑀤𑁄 𑀘 𑀦 𑀧𑀬𑀼𑀚𑁆𑀚𑀢𑀺, 𑀲𑁄 𑀮𑁄𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀆𑀯𑀼𑀢𑁆𑀢𑀺𑀆𑀤𑀺𑀯𑀲𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁂𑀦 𑀅𑀲𑀗𑁆𑀕𑀳𑀺𑀢-𑀲𑀤𑁆𑀤𑁂𑀦. 𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄𑀢𑀺 𑀘𑀓𑁆𑀔𑀸𑀬𑀢𑀦𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄, 𑀢𑁂𑀦 𑀲𑁄𑀢𑀸𑀬𑀢𑀦𑀸𑀤𑀺𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑁄 𑀲𑁄𑀢𑀧𑀲𑀸𑀤𑀸𑀤𑀺𑀓𑁄 𑀬𑁄 𑀭𑀼𑀧𑁆𑀧𑀦𑀲𑀪𑀸𑀯𑁄 𑀥𑀫𑁆𑀫𑀯𑀺𑀲𑁂𑀲𑁄. 𑀢𑀦𑁆𑀦𑀺𑀲𑁆𑀲𑀺𑀢𑁄 𑀢𑀁 𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀲𑁆𑀲𑀸𑀬 𑀮𑀩𑁆𑀪𑀫𑀸𑀦𑁄. ‘‘𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁄 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀧𑀭𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁄 𑀇𑀥 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀏𑀯𑀫𑁂𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀼𑀤𑁆𑀤𑁂𑀲𑀸 𑀧𑀯𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 𑀘 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀦 𑀮𑀩𑁆𑀪𑀢𑀺 𑀢𑀲𑁆𑀲 𑀥𑀫𑁆𑀫𑀫𑀢𑁆𑀢𑀤𑀻𑀧𑀦𑀢𑁄. 𑀦𑀬𑀼𑀤𑁆𑀤𑁂𑀲𑁄 𑀳𑁂𑀲𑁄, 𑀦 𑀥𑀫𑁆𑀫𑀼𑀤𑁆𑀤𑁂𑀲𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦…𑀧𑁂… 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀢𑁆𑀯𑀸 ‘‘𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀅𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁧𑁭𑁧) 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀤𑀼𑀢𑀺𑀬𑀁 𑀅𑀲𑀗𑁆𑀕𑀳𑀺𑀢𑀧𑀤𑀁 𑀕𑀳𑀺𑀢𑀁. 𑀅𑀜𑁆𑀜𑀣𑀸 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂 𑀓𑀢𑀫𑁂’’𑀇𑀘𑁆𑀘𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀺𑀬𑀸.

𑀏𑀲 𑀦𑀬𑁄𑀢𑀺 𑀅𑀢𑀺𑀤𑁂𑀲𑁂𑀦 𑀤𑀲𑁆𑀲𑀺𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀢𑁂𑀲𑀼𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀧𑀤𑁂𑀦𑀸𑀢𑀺 𑀮𑀼𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀧𑀤𑀁 𑀲𑀦𑁆𑀥𑀸𑀬𑀸𑀳. 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑁂𑀳𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 ¶ 𑀳𑀺 𑀢𑀢𑁆𑀣 𑀧𑀸𑀴𑀺𑀬𑀁 ‘‘𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺 𑀥𑀫𑁆𑀫𑀫𑀼𑀔𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀧𑀦 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑀯𑀺𑀲𑁂𑀲𑀦𑀤𑁆𑀯𑀸𑀭𑁂𑀦 𑀥𑀫𑁆𑀫𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 ‘‘𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀢𑁆𑀣 𑀳𑀺…𑀧𑁂… 𑀥𑀫𑁆𑀫𑀦𑁆𑀢𑀭𑀲𑁆𑀲𑀸’’𑀢𑀺. 𑀢𑀢𑁆𑀣 𑀲𑀪𑀸𑀯𑀦𑁆𑀢𑀭𑁂𑀦𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀦 ¶ 𑀲𑀪𑀸𑀯𑀦𑁆𑀢𑀭𑁂𑀦 𑀧𑀓𑀸𑀭𑀦𑁆𑀢𑀭𑁂𑀦. 𑀲𑀪𑀸𑀯𑀦𑁆𑀢𑀭𑀲𑁆𑀲𑀸𑀢𑀺 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑀲𑁆𑀲 𑀲𑀪𑀸𑀯𑀦𑁆𑀢𑀭𑀲𑁆𑀲. 𑀏𑀢𑁂𑀲𑀽𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼. 𑀥𑀫𑁆𑀫𑀦𑁆𑀢𑀭𑁂𑀦𑀸𑀢𑀺 𑀅𑀜𑁆𑀜𑀥𑀫𑁆𑀫𑁂𑀦. 𑀥𑀫𑁆𑀫𑀦𑁆𑀢𑀭𑀲𑁆𑀲𑀸𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀦𑀁 𑀓𑀢𑀁. 𑀢𑀢𑁆𑀣 𑀳𑀺 𑀅𑀦𑁆𑀢𑀭𑁂𑀦 𑀧𑀓𑀸𑀭𑀯𑀺𑀲𑁂𑀲𑀸𑀫𑀲𑀦𑀁 𑀥𑀫𑁆𑀫𑁂𑀦𑁂𑀯 𑀥𑀫𑁆𑀫𑁄 𑀯𑀺𑀲𑁂𑀲𑀺𑀢𑁄𑀢𑀺. 𑀆𑀤𑀺𑀧𑀤𑁂𑀦𑁂𑀯𑀸𑀢𑀺 ‘‘𑀲𑀗𑁆𑀕𑀳𑀺𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀞𑀫𑀧𑀤𑁂𑀦𑁂𑀯. 𑀇𑀢𑀭𑁂𑀳𑀻𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀳𑀺 𑀤𑀼𑀢𑀺𑀬𑀢𑀢𑀺𑀬𑀧𑀤𑁂𑀳𑀺. 𑀏𑀢𑁆𑀣𑀸𑀢𑀺 𑀏𑀓𑀸𑀤𑀲𑀫𑀸𑀤𑀻𑀲𑀼 𑀘𑀢𑀽𑀲𑀼. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀺𑀬 𑀯𑀺𑀲𑁂𑀲𑀦𑁂 𑀏𑀯 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀯𑀺𑀬 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺.

𑀯𑀺𑀯𑀺𑀥𑀓𑀧𑁆𑀧𑀦𑀢𑁄𑀢𑀺 𑀯𑀺𑀯𑀺𑀥𑀁 𑀩𑀳𑀼𑀥𑀸 𑀓𑀧𑁆𑀧𑀦𑀢𑁄, 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀦𑀁 𑀯𑀺𑀲𑀼𑀁 𑀲𑀳 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀓𑀧𑁆𑀧𑀦𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀯𑀺𑀓𑀧𑁆𑀧𑀦𑀁 𑀯𑀼𑀢𑁆𑀢𑀸𑀓𑀸𑀭𑁂𑀦 𑀯𑀺𑀪𑀚𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀪𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁂𑀦 𑀅𑀥𑀺𑀫𑁄𑀓𑁆𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀆𑀭𑀫𑁆𑀫𑀡𑁂 𑀦𑀺𑀘𑁆𑀙𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀥𑀫𑁆𑀫𑀸. 𑀢𑁂 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀤𑀯𑀲𑀺𑀝𑁆𑀞𑁂 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀥𑀫𑁆𑀫𑁂 𑀘 𑀲𑀗𑁆𑀕𑀳𑁂𑀢𑁆𑀯𑀸 𑀆𑀳 ‘‘𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺. 𑀇𑀢𑀭𑁂𑀢𑀺 𑀨𑀲𑁆𑀲𑀸𑀤𑀬𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸. 𑀫𑀳𑀸𑀯𑀺𑀲𑀬𑁂𑀦 𑀅𑀥𑀺𑀫𑁄𑀓𑁆𑀔𑁂𑀦. 𑀅𑀜𑁆𑀜𑁂𑀲𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀁. 𑀯𑀘𑀦𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄, 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄’’𑀢𑀺 𑀥𑀫𑁆𑀫𑀲𑀗𑁆𑀕𑀳𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸) ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀘 𑀆𑀕𑀢𑀁 𑀯𑀘𑀦𑀁 𑀲𑀦𑁆𑀥𑀸𑀬. 𑀅𑀢𑁆𑀣𑁂 𑀲𑀢𑀻𑀢𑀺 ‘‘𑀲𑀦𑁆𑀦𑀺𑀝𑁆𑀞𑀸𑀦…𑀧𑁂… 𑀲𑀸𑀥𑀸𑀭𑀡𑀢𑁄’’𑀢𑀺 𑀏𑀯𑀫𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂. 𑀯𑀢𑁆𑀢𑀩𑁆𑀩𑁂𑀲𑀽𑀢𑀺 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀢𑁆𑀣𑀁 𑀯𑀢𑁆𑀢𑀩𑁆𑀩𑁂𑀲𑀼. 𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀫𑀦𑀲𑀺𑀓𑀸𑀭𑀧𑀭𑀺𑀬𑁄𑀲𑀸𑀦𑀸. 𑀢𑀸𑀤𑀺𑀲𑀲𑁆𑀲𑀸𑀢𑀺 ¶ 𑀨𑀲𑁆𑀲𑀸𑀤𑀺𑀲𑀤𑀺𑀲𑀲𑁆𑀲 𑀲𑀸𑀥𑀸𑀭𑀡𑀲𑁆𑀲 𑀅𑀥𑀺𑀫𑁄𑀓𑁆𑀔𑀲𑀤𑀺𑀲𑀲𑁆𑀲 𑀅𑀲𑀸𑀥𑀸𑀭𑀡𑀲𑁆𑀲 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸.

𑀦𑀦𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀘𑀺𑀢𑁆𑀢𑀝𑁆𑀞𑀺𑀢𑀺𑀬𑁄𑀧𑀺 𑀲𑀸𑀥𑀸𑀭𑀡𑀸𑀢𑀺? 𑀲𑀘𑁆𑀘𑀁 𑀲𑀸𑀥𑀸𑀭𑀡𑀸, 𑀅𑀢𑁆𑀣𑀺 𑀧𑀦 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦𑀸’’𑀢𑀺𑀆𑀤𑀺. 𑀅𑀲𑀫𑀸𑀥𑀺𑀲𑀪𑀸𑀯𑀸 𑀩𑀮𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀲𑀸𑀫𑀜𑁆𑀜𑀲𑀤𑁆𑀤𑁂𑀦𑁂𑀯 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀘𑀸𑀢𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀯𑀢𑁆𑀢𑀩𑁆𑀩𑀸 𑀘 𑀲𑀫𑀸𑀥𑀺𑀲𑀪𑀸𑀯𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀯𑀺𑀲𑁂𑀲𑀲𑀤𑁆𑀤𑀯𑀘𑀦𑀻𑀬𑀁 𑀅𑀜𑁆𑀜𑀦𑁆𑀢𑀺 𑀩𑀮𑀧𑁆𑀧𑀢𑁆𑀢𑀲𑀫𑀸𑀥𑀺𑀢𑁄 𑀅𑀜𑁆𑀜𑀁 𑀲𑀸𑀫𑀜𑁆𑀜𑀲𑀤𑁆𑀤𑁂𑀦 𑀩𑁆𑀬𑀸𑀧𑁂𑀢𑀩𑁆𑀩𑀁, 𑀯𑀺𑀲𑁂𑀲𑀲𑀤𑁆𑀤𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀁 𑀦𑀢𑁆𑀣𑀺 𑀲𑀫𑀸𑀥𑀺𑀲𑀪𑀸𑀯𑀸𑀬 𑀏𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀕𑀳𑀺𑀢𑀢𑁆𑀢𑀸. 𑀦 𑀅𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑁄 𑀲𑀸𑀫𑀜𑁆𑀜𑀯𑀺𑀲𑁂𑀲𑁄 𑀅𑀦𑀜𑁆𑀜…𑀧𑁂… 𑀯𑀺𑀲𑁂𑀲𑁄 ¶ , 𑀢𑀲𑁆𑀲 𑀤𑀻𑀧𑀦𑀢𑁄. 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀩𑀮𑀧𑁆𑀧𑀢𑁆𑀢𑀲𑀫𑀸𑀥𑀺𑀥𑀫𑁆𑀫𑀲𑁆𑀲. 𑀪𑁂𑀤𑀤𑀻𑀧𑀓𑁂𑀳𑀻𑀢𑀺 𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀲𑀫𑀸𑀥𑀺𑀩𑀮𑀸𑀤𑀺𑀯𑀘𑀦𑁂𑀳𑀺 𑀯𑀢𑁆𑀢𑀩𑁆𑀩𑀸. 𑀯𑀼𑀢𑁆𑀢𑀮𑀓𑁆𑀔𑀡𑀸 𑀅𑀦𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑀲𑀸𑀫𑀜𑁆𑀜𑀯𑀺𑀲𑁂𑀲𑀤𑀻𑀧𑀦𑀸 𑀲𑀤𑁆𑀤𑀸. 𑀢𑀢𑁄 𑀯𑀺𑀧𑀭𑀻𑀢𑁂𑀳𑀺 𑀅𑀜𑁆𑀜𑀁 𑀩𑁆𑀬𑀸𑀧𑁂𑀢𑀩𑁆𑀩𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀜𑁆𑀘 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑁂𑀯 𑀦 𑀲𑀼𑀔𑀸𑀤𑀺𑀲𑀪𑀸𑀯𑀸 𑀯𑁂𑀤𑀦𑀸 𑀯𑀺𑀬 𑀯𑀢𑁆𑀢𑀩𑁆𑀩𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀲𑀫𑀸𑀥𑀺𑀲𑀪𑀸𑀯𑀸 𑀲𑀫𑀸𑀥𑀺𑀲𑀪𑀸𑀯𑀸𑀢𑀺 𑀤𑁆𑀯𑁂𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀢𑀲𑁆𑀫𑀸. 𑀅𑀲𑀫𑀸𑀥𑀺𑀲𑀪𑀸𑀯𑀫𑁂𑀯 𑀧𑀓𑀸𑀲𑁂𑀬𑁆𑀬 𑀯𑀺𑀲𑁂𑀲𑀲𑀤𑁆𑀤𑀦𑀺𑀭𑀧𑁂𑀓𑁆𑀔𑀁 𑀧𑀯𑀢𑁆𑀢𑀫𑀸𑀦𑀢𑁆𑀢𑀸. 𑀇𑀢𑀭𑁄𑀢𑀺 𑀲𑀫𑀸𑀥𑀺𑀩𑀮𑀸𑀤𑀺𑀓𑁄 𑀯𑀺𑀲𑁂𑀲𑀲𑀤𑁆𑀤𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀼𑀤𑁆𑀤𑁂𑀲𑁂, 𑀲𑀸𑀥𑀸𑀭𑀡𑁂 𑀨𑀲𑁆𑀲𑀸𑀤𑀺𑀓𑁂, 𑀫𑀳𑀸𑀯𑀺𑀲𑀬𑁂 𑀯𑀸 𑀅𑀥𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑀺𑀬𑀫𑀸𑀦𑁂. 𑀦𑀦𑀼 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑁂𑀤𑀦𑀸 𑀯𑀺𑀬 𑀲𑀸𑀥𑀸𑀭𑀡𑀸 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀪𑀺𑀦𑁆𑀦𑀸𑀧𑀺 𑀯𑀸’’𑀢𑀺𑀆𑀤𑀺. ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 (𑀥. 𑀲. 𑁧𑁧, 𑁧𑁫). 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀻’’𑀢𑀺 (𑀥. 𑀲. 𑁧𑁯) 𑀯𑀘𑀦𑀢𑁄 𑀲𑀫𑀸𑀥𑀺𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀅𑀭𑀳𑀢𑀻𑀢𑀺 𑀇𑀥 𑀉𑀤𑁆𑀤𑁂𑀲𑀁 𑀦 𑀅𑀭𑀳𑀢𑀺 𑀲𑀫𑀼𑀔𑁂𑀦𑁂𑀯 𑀯𑀢𑁆𑀢𑀩𑁆𑀩𑁂𑀲𑀼 𑀨𑀲𑁆𑀲𑀸𑀤𑀻𑀲𑀼 𑀉𑀤𑁆𑀤𑀺𑀲𑀺𑀬𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀬𑁄 𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀧𑀤𑀯𑀡𑁆𑀡𑀦𑀸

𑁬. ‘‘𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀪𑀸𑀯𑁂𑀦 ¶ ¶ 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸, ‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀘 𑀅𑀪𑀺𑀜𑁆𑀜𑀸𑀢𑀮𑀓𑁆𑀔𑀡𑀯𑀺𑀲𑀬𑀸𑀢𑀺 𑀆𑀳 ‘‘𑀲𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀢𑀸𑀦’’𑀦𑁆𑀢𑀺. 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀢𑀸 𑀲𑀗𑁆𑀕𑀬𑁆𑀳𑀢𑀺. 𑀅𑀥𑀺𑀧𑀢𑀺𑀬𑀸𑀤𑀻𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀉𑀧𑀝𑁆𑀞𑀸𑀦𑀧𑀤𑀳𑀦𑀸𑀤𑀻𑀦𑀺. 𑀲𑀘𑁆𑀘𑀸𑀤𑀺𑀯𑀺𑀲𑁂𑀲𑁄 𑀯𑀺𑀬𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀭𑀺𑀬𑀸𑀬𑁄 𑀅𑀪𑀺𑀜𑁆𑀜𑁂𑀬𑁆𑀬𑀧𑀻𑀴𑀦𑀝𑁆𑀞𑀸𑀤𑀺𑀯𑀺𑀲𑁂𑀲𑁄 𑀯𑀺𑀬. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀦𑀬𑀫𑀼𑀔𑀫𑀸𑀢𑀺𑀓𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀬𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀏𑀯. 𑀢𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀦𑁆𑀥𑀪𑀸𑀯𑁂𑀦 𑀯𑀺𑀬 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀢𑀸 𑀳𑁄𑀢𑀺, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁂𑀦𑀸𑀢𑀺 𑀲𑀗𑁆𑀕𑀳𑀮𑀓𑁆𑀔𑀡𑀫𑀸𑀳. 𑀇𑀢𑀻𑀢𑀺 𑀢𑀲𑁆𑀫𑀸, 𑀬𑀲𑁆𑀫𑀸 𑀭𑀽𑀧𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀸, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑀲𑀗𑁆𑀔𑀸𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀅𑀢𑁆𑀣𑀫𑀼𑀔𑁂𑀦𑁂𑀯 𑀕𑀳𑀡𑁂. 𑀲𑀤𑁆𑀤𑀤𑁆𑀯𑀸𑀭𑁂𑀦 𑀧𑀦 𑀕𑀳𑀡𑁂 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀲𑀗𑁆𑀔𑀸𑀢𑁂𑀦 𑀯𑀸 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀯𑀘𑀦𑀻𑀬𑀢𑀸𑀲𑀗𑁆𑀔𑀸𑀢𑁂𑀦. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀢𑀺𑀆𑀤𑀻𑀲𑀼 ‘‘𑀧𑀼𑀭𑀺𑀫𑁂𑀦 𑀬𑁄𑀚𑀺𑀬𑀫𑀸𑀦𑁂’’𑀢𑀺𑀆𑀤𑀺𑀁 𑀆𑀦𑁂𑀢𑁆𑀯𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑀧𑀘𑁆𑀙𑀺𑀫𑀫𑁂𑀯𑀸𑀢𑀺 𑀆𑀳 ‘‘𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀭’’𑀦𑁆𑀢𑀺.

𑀆𑀬𑀢𑀦𑀧𑀤𑀸𑀤𑀺𑀯𑀡𑁆𑀡𑀦𑀸

𑁪𑁦. 𑀬𑀤𑀺𑀧𑀺 ¶ 𑀏𑀓𑀓𑁂𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀁 ‘‘𑀲𑀫𑀼𑀤𑀬𑀲𑀘𑁆𑀘𑀁 𑀏𑀓𑁂𑀦 𑀔𑀦𑁆𑀥𑁂𑀦…𑀧𑁂… 𑀫𑀕𑁆𑀕𑀲𑀘𑁆𑀘𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀁, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁪𑁧) 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀧𑀤𑀦𑀺𑀤𑁆𑀤𑁂𑀲𑁂 ¶ . 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀤𑀼𑀓𑀁 𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀦𑁆𑀢𑀺 𑀏𑀢𑁂𑀲𑀁 𑀤𑀼𑀓𑀸𑀦𑀁. 𑀘𑀓𑁆𑀔𑀼𑀲𑁄𑀢𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀳𑀺 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀁, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀓𑀓𑁂 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀤𑀼𑀓𑀲𑁆𑀲 𑀧𑀦 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀲𑁄𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀏𑀓𑁂𑀦 𑀔𑀦𑁆𑀥𑁂𑀦 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺, ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀲𑁆𑀲 𑀘 𑀅𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀦𑀸𑀧𑀺 𑀤𑀼𑀓𑁂𑀳𑀺 𑀢𑀺𑀓𑀲𑁆𑀲𑀸𑀢𑀺 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀤𑀼𑀓𑁂𑀳𑀺 𑀘𑀓𑁆𑀔𑀼𑀲𑁄𑀢𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑀺𑀓𑀲𑁆𑀲 𑀦𑀸𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀥𑀸𑀢𑀺 𑀲𑀘𑁆𑀘𑀧𑀤𑀦𑀺𑀤𑁆𑀤𑁂𑀲𑁂. 𑀢𑀺𑀓𑁂𑀦 𑀘𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑀕𑁆𑀕𑀸𑀤𑀺𑀢𑀺𑀓𑁂𑀦 𑀘. ‘‘𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀸𑀤𑀲𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀦 𑀓𑀸𑀳𑀺𑀘𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁬𑁧. 𑀅𑀯𑀺𑀚𑁆𑀚𑀸𑀯𑀘𑀦𑁂𑀦𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦. 𑀯𑀺𑀲𑁂𑀲𑀦𑀁 𑀦 𑀓𑀢𑁆𑀢𑀩𑁆𑀩𑀁, ‘‘𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀓𑀼𑀲𑀮𑀸𑀤𑀻𑀦𑀫𑁆𑀧𑀻’’𑀢𑀺𑀆𑀤𑀺𑀦𑀸. 𑀯𑀺𑀲𑁆𑀲𑀚𑁆𑀚𑀦𑀸𑀲𑀤𑀺𑀲𑁂𑀦 𑀲𑀩𑁆𑀩𑀯𑀺𑀜𑁆𑀜𑀸𑀡𑀸𑀤𑀺𑀲𑀗𑁆𑀕𑀳𑀡𑀢𑁄. 𑀢𑁂𑀲𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀺𑀧𑀤𑀸𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀦𑀬𑁂. 𑀅𑀓𑀫𑁆𑀫𑀚𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺 𑀲𑀤𑁆𑀤𑀸𑀬𑀢𑀦𑀲𑁆𑀲𑀧𑀺 𑀕𑀳𑀺𑀢𑀢𑁆𑀢𑀸.

𑁭𑁧. 𑀚𑀸𑀬𑀫𑀸𑀦…𑀧𑁂… 𑀫𑀸𑀦𑀸𑀦𑀦𑁆𑀢𑀺 𑀚𑀸𑀬𑀫𑀸𑀦𑀸𑀤𑀺𑀅𑀯𑀢𑁆𑀣𑀸𑀦𑀁 𑀥𑀫𑁆𑀫𑀸𑀦𑀁. 𑀚𑀸𑀬𑀫𑀸𑀦𑀸𑀤𑀺𑀪𑀸𑀯𑀫𑀢𑁆𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀅𑀯𑀢𑁆𑀣𑀸𑀫𑀢𑁆𑀢𑀪𑀸𑀯𑀢𑁄. 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸𑀢𑀺 𑀅𑀯𑀢𑁆𑀣𑀸𑀪𑀸𑀯𑀢𑁄 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀺, 𑀲𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀻𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀸𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀺 ¶ . 𑀅𑀧𑀭𑀫𑀢𑁆𑀣𑀲𑀪𑀸𑀯𑀸𑀦𑀺𑀧𑀺 𑀭𑀽𑀧𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑀢𑁄 𑀭𑀼𑀧𑁆𑀧𑀦𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀺. 𑀢𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀪𑀸𑀕𑀸𑀦𑀺, 𑀅𑀭𑀽𑀧𑀸𑀦𑀁 𑀧𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀻’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀓𑁂𑀓𑀪𑀽𑀢𑀸𑀦𑀻𑀢𑀺 𑀬𑀣𑀸 𑀏𑀓𑀲𑁆𑀫𑀺𑀁 𑀭𑀽𑀧𑀓𑀮𑀸𑀧𑁂 𑀚𑀸𑀢𑀺𑀆𑀤𑀻𑀦𑀺 𑀏𑀓𑁂𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀏𑀯𑀁 𑀏𑀓𑀲𑁆𑀫𑀺𑀁 𑀅𑀭𑀽𑀧𑀓𑀮𑀸𑀧𑁂𑀧𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ¶ ‘‘𑀭𑀽𑀧𑀓𑀮𑀸𑀧𑀚𑀸𑀢𑀺𑀆𑀤𑀻𑀦𑀺 𑀯𑀺𑀬𑀸’’𑀢𑀺𑀆𑀤𑀺. 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀓𑀺𑀘𑁆𑀘𑀸𑀦𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀽𑀢𑀸𑀦𑀺𑀧𑀺 𑀚𑀸𑀢𑀺𑀆𑀤𑀻𑀦𑀺 𑀢𑀣𑀸 𑀦 𑀕𑀬𑁆𑀳𑀦𑁆𑀢𑀻𑀢𑀺 𑀆𑀳 ‘‘𑀯𑁂𑀤𑀺𑀬𑀦…𑀧𑁂… 𑀅𑀕𑀬𑁆𑀳𑀫𑀸𑀦𑀸𑀦𑀻’’𑀢𑀺. 𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀚𑀸𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑀸𑀪𑀸𑀯𑀫𑀸𑀳. ‘‘𑀚𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀚𑀸𑀢𑀺𑀆𑀤𑀻𑀦𑀫𑁆𑀧𑀺 𑀲𑀗𑁆𑀔𑀢𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀢𑀸…𑀧𑁂… 𑀲𑀪𑀸𑀕𑀸𑀦𑀻’’𑀢𑀺. 𑀢𑁂𑀦𑁂𑀯 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀅𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀤𑀼𑀯𑀺𑀥𑀸𑀦𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀺. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀪𑀸𑀕𑀢𑁆𑀣𑁂𑀦. 𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺.

𑀧𑀞𑀫𑀦𑀬𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁧. ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀲𑀤𑁆𑀤𑀸 𑀪𑀺𑀦𑁆𑀦𑀸𑀥𑀺𑀓𑀭𑀡𑀸 𑀦 𑀕𑀳𑁂𑀢𑀩𑁆𑀩𑀸 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀬 𑀇𑀘𑁆𑀙𑀺𑀢𑀢𑁆𑀢𑀸. 𑀬𑁄 𑀳𑀺 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄 𑀅𑀲𑀗𑁆𑀕𑀳𑀺𑀢𑁄 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑁄, 𑀲𑁆𑀯𑁂𑀯 𑀇𑀥 𑀅𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀻𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀢𑀁…𑀧𑁂… 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀆𑀳. 𑀬𑁂 𑀳𑀺 𑀥𑀫𑁆𑀫𑀸 𑀘𑀓𑁆𑀔𑀸𑀬𑀢𑀦𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀘 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁𑀬𑁂𑀯 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀆𑀳𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀦𑀬𑁂𑀲𑀼 𑀯𑀸𑀭𑁂𑀲𑀼 𑀘. 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀲𑀸𑀫𑀜𑁆𑀜𑀸𑀦𑀦𑁆𑀢𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀸𑀦𑀁. ‘‘𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻’’𑀢𑀺 𑀆𑀳 ‘‘𑀦𑀺𑀘𑁆𑀘𑀁 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸’’𑀢𑀺. 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀸𑀦𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀪𑁂𑀤𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦’’𑀦𑁆𑀢𑀺. 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸𑀢𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀧𑀺 ¶ 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸, 𑀔𑀦𑁆𑀥𑀸𑀤𑀺𑀦𑀸 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀸𑀢𑀺 𑀓𑁂𑀯𑀮𑀸 𑀅𑀦𑀯𑀲𑁂𑀲𑀸, 𑀲𑀸𑀫𑀜𑁆𑀜𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣𑀸𑀢𑀺 𑀬𑀣𑀸𑀥𑀺𑀓𑀢𑁂 𑀤𑀼𑀢𑀺𑀬𑀦𑀬𑁂. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀆𑀳 ‘‘𑀲𑀗𑁆𑀕𑀳𑀺…𑀧𑁂… 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸’’𑀢𑀺. 𑀢𑀻𑀲𑀼 𑀲𑀗𑁆𑀕𑀳𑁂𑀲𑀽𑀢𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀼 ¶ 𑀢𑀻𑀲𑀼. 𑀅𑀜𑁆𑀜𑁂𑀳𑀻𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑁂𑀳𑀺 𑀤𑁆𑀯𑀻𑀳𑀺 𑀏𑀓𑁂𑀦 𑀯𑀸. 𑀏𑀢𑁆𑀢𑀓𑁂𑀦𑁂𑀯 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁 𑀢𑀸𑀯𑀢𑀸𑀧𑀺 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀪𑀸𑀯𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀦𑀁. 𑀏𑀯𑀁𑀯𑀺𑀥𑀸𑀦𑀦𑁆𑀢𑀺 ‘‘𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑀸𑀦𑀁. 𑀅𑀲𑀫𑁆𑀪𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀁 𑀅𑀲𑀫𑁆𑀪𑀯𑀸. 𑀲𑀗𑁆𑀕𑀳𑀸𑀤𑀺𑀦𑀬𑀤𑀲𑁆𑀲𑀦𑀫𑀢𑁆𑀢𑀁 𑀦𑀬𑀫𑀸𑀢𑀺𑀓𑀸𑀬 𑀩𑁆𑀬𑀸𑀧𑀸𑀭𑁄, 𑀬𑀢𑁆𑀣 𑀧𑀦 𑀲𑀗𑁆𑀕𑀳𑀸𑀤𑀬𑁄, 𑀢𑁂 𑀔𑀦𑁆𑀥𑀸𑀤𑀬𑁄 𑀓𑀼𑀲𑀮𑀸𑀤𑀬𑁄 𑀘 𑀢𑁂𑀲𑀁 𑀯𑀺𑀲𑀬𑀪𑀽𑀢𑀸𑀢𑀺 𑀢𑁂𑀳𑀺 𑀯𑀺𑀦𑀸 𑀲𑀗𑁆𑀕𑀳𑀸𑀤𑀻𑀦𑀁 𑀧𑀯𑀢𑁆𑀢𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀦𑀬𑀫𑀸𑀢𑀺𑀓𑀸𑀬 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀧𑁂𑀓𑁆𑀔𑀢𑁆𑀢𑀸’’𑀢𑀺. 𑀲𑀗𑁆𑀕𑀸𑀳𑀓𑀁 𑀅𑀲𑀗𑁆𑀕𑀸𑀳𑀓𑀜𑁆𑀘𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀬𑁄 𑀳𑀺 𑀇𑀥 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦𑀧𑀺 𑀯𑀼𑀢𑁆𑀢𑁄𑀬𑁂𑀯𑀸𑀢𑀺.

‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺, ‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀘 𑀬𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀧𑀞𑀫𑀦𑀬𑁂 𑀙𑀝𑁆𑀞𑀦𑀬𑁂 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 (𑀥𑀸𑀢𑀼. 𑁬), ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁨𑁮) 𑀘 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁂𑀦. 𑀇𑀢𑀭𑁂𑀲𑀽𑀢𑀺 𑀤𑀼𑀢𑀺𑀬𑀸𑀤𑀺𑀦𑀬𑁂𑀲𑀼. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 ‘‘𑀬𑁂 𑀥𑀫𑁆𑀫𑀸’’𑀢𑀺 𑀅𑀦𑀺𑀬𑀫𑀺𑀢𑀭𑀽𑀧𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀲𑁆𑀲 𑀢𑀲𑁆𑀲 ‘‘𑀢𑁂 𑀥𑀫𑁆𑀫𑀸’’𑀢𑀺 𑀦𑀺𑀬𑀸𑀫𑀓𑀪𑀸𑀯𑁂𑀦.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂. 𑀬𑁂𑀦 𑀬𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀺𑀦𑀸 𑀲𑀗𑁆𑀕𑀸𑀳𑀓𑁂𑀦. 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀲𑀼. 𑀢𑁂𑀦 𑀢𑁂𑀦𑀸𑀢𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦. 𑀅𑀜𑁆𑀜𑀦𑁆𑀢𑀺 𑀢𑀢𑁄 𑀢𑀢𑁄 𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀁. 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀲𑀗𑁆𑀕𑀳𑁂𑀢𑀩𑁆𑀩𑀸𑀲𑀗𑁆𑀕𑀳𑁂𑀢𑀩𑁆𑀩𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀉𑀤𑁆𑀥𑀝𑀁. 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺 𑀢𑀲𑁆𑀲 𑀲𑀪𑀸𑀕𑀪𑀸𑀯𑁂𑀦 𑀲𑀗𑁆𑀕𑀸𑀳𑀓𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀲𑀺𑀬𑀸 𑀧𑀦𑁂𑀢𑀁 𑀲𑀪𑀸𑀕𑁂𑀦 𑀏𑀓𑀤𑁂𑀲𑁂𑀦 𑀲𑀗𑁆𑀕𑀳𑁄𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦 𑀘 𑀲𑁄…𑀧𑁂… 𑀳𑁄𑀢𑀻’’𑀢𑀺. 𑀬𑀜𑁆𑀘𑀸𑀢𑀺𑀆𑀤𑀺𑀦𑀸 𑀯𑀘𑀦𑀦𑁆𑀢𑀭𑀁 𑀧𑀭𑀺𑀳𑀭𑀢𑀺.

𑀬𑀤𑀺 ¶ ¶ 𑀘𑀸𑀢𑀺𑀆𑀤𑀺𑀦𑀸𑀧𑀺 𑀢𑀲𑁆𑀲𑁂𑀯 𑀢𑁂𑀦 𑀲𑀗𑁆𑀕𑀳𑀸𑀪𑀸𑀯𑀁 𑀧𑀸𑀞𑀸𑀪𑀸𑀯𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀲𑁄 𑀏𑀯𑀸𑀢𑀺 𑀬𑁄 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑁄 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀲𑁄 𑀏𑀯 𑀢𑁂𑀦 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀬𑁆𑀳𑁂𑀬𑁆𑀬 𑀲𑀗𑁆𑀕𑀳𑁂𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀸𑀪𑀸𑀯𑁂 𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸’’𑀢𑀺. 𑀏𑀓𑀤𑁂𑀲𑀸 𑀯𑀺𑀬 𑀘𑀓𑁆𑀔𑀸𑀬𑀢𑀦𑀸𑀤𑀬𑁄 𑀲𑀫𑀼𑀤𑀸𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲. 𑀭𑀽𑀧𑀓𑁆𑀔𑀦𑁆𑀥𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀦 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀲𑀪𑀸𑀕𑀯𑀺𑀲𑀪𑀸𑀕𑀪𑀸𑀯𑀸𑀪𑀸𑀯𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀬𑁂𑀦𑀸𑀢𑀺 𑀯𑀺𑀪𑀸𑀕𑁂𑀦. 𑀢𑁂𑀢𑀺 𑀏𑀓𑀤𑁂𑀲𑀸. 𑀢𑁂𑀲𑀦𑁆𑀢𑀺 𑀏𑀓𑀤𑁂𑀲𑀸𑀦𑀁. 𑀏𑀢𑁆𑀣 𑀢𑀤𑀦𑁆𑀢𑁄𑀕𑀥𑀢𑀸𑀬 𑀯𑀺𑀪𑀸𑀕𑀸𑀪𑀸𑀯𑁄, 𑀯𑀺𑀪𑀸𑀕𑀸𑀪𑀸𑀯𑁂𑀦 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀪𑀸𑀯𑁄, 𑀢𑁂𑀦 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀢𑀸𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀪𑀸𑀕𑀯𑀺𑀲𑀪𑀸𑀕𑀸𑀪𑀸𑀯𑁂𑀦 𑀏𑀓𑀤𑁂𑀲𑀸𑀦𑀁 𑀲𑀫𑀼𑀤𑀸𑀬𑁄 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀦 𑀳𑁄𑀢𑀺, 𑀏𑀯𑀁 𑀏𑀓𑀤𑁂𑀲𑀲𑀪𑀸𑀕𑀯𑀺𑀲𑀪𑀸𑀕𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀢𑀺𑀆𑀤𑀺 𑀉𑀤𑀸𑀳𑀭𑀡𑀤𑀲𑁆𑀲𑀦𑁂𑀦 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀸𑀳𑀓𑀁 𑀅𑀲𑀗𑁆𑀕𑀸𑀳𑀓𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀢𑀣𑀸 𑀲𑁂𑀲𑁂𑀲𑀼𑀧𑀺. 𑀦 𑀳𑀺 𑀏𑀓𑀤𑁂𑀲…𑀧𑁂… 𑀯𑀺𑀲𑀪𑀸𑀕𑀁 𑀬𑁂𑀦 𑀲𑀫𑀼𑀤𑀸𑀬𑁄 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀢𑀸𑀯 𑀫𑀸 𑀳𑁄𑀢𑀼, 𑀅𑀲𑀗𑁆𑀕𑀸𑀳𑀓𑀢𑁆𑀢𑀁 𑀧𑀦 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀭𑀸𑀫𑀲𑀢𑀺. 𑀅𑀢𑁆𑀢𑀢𑁄 𑀅𑀜𑁆𑀜𑀲𑁆𑀲, 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀢𑁄 𑀅𑀜𑁆𑀜𑀲𑁆𑀲, 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀢𑁄 𑀅𑀜𑁆𑀜𑀲𑁆𑀲 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀢𑀁 𑀧𑀦𑁂𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄 𑀘 𑀦 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀢𑀬𑁄 𑀧𑀓𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀗𑁆𑀕𑀸𑀳𑀓𑀢𑁆𑀢𑀫𑁂𑀯 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺 𑀏𑀢𑁂𑀲𑀁 𑀅𑀢𑁆𑀢𑀸, 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑁄, 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄 𑀘𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀸𑀳𑀓𑀪𑀸𑀯𑁄 𑀏𑀯 𑀦𑀢𑁆𑀣𑀺 𑀲𑀪𑀸𑀕𑀸𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄’’𑀢𑀺𑀆𑀤𑀺. 𑀬𑁂𑀦𑀸𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑁂𑀦. 𑀏𑀯𑀭𑀽𑀧𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑀺𑀧𑁆𑀧𑀓𑀸𑀭𑀸𑀦𑀁 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁 𑀲𑀢𑀺𑀧𑀺 𑀯𑀺𑀲𑀪𑀸𑀕𑀪𑀸𑀯𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀦𑀸𑀢𑀺 ¶ ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀘𑀦𑁂𑀦. 𑀏𑀓𑀤𑁂𑀲𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀥𑀫𑁆𑀫𑀸𑀬𑀢𑀦𑀲𑁆𑀲 𑀲𑀗𑁆𑀕𑀸𑀳𑀓𑀢𑁆𑀢𑀁 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀲𑁆𑀲 𑀲𑀗𑁆𑀕𑀳𑀺𑀢𑀪𑀸𑀯𑀦𑁆𑀢𑀺 𑀅𑀢𑁆𑀣𑁄, 𑀲𑀫𑀼𑀤𑀸𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑀲𑁆𑀲 𑀘𑀓𑁆𑀔𑀸𑀬𑀢𑀦𑀲𑁆𑀲 𑀲𑁄𑀢𑀸𑀬𑀢𑀦𑀲𑁆𑀲 𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀲𑀫𑀼𑀤𑀸𑀬𑁂𑀦 𑀏𑀓𑀤𑁂𑀲𑀲𑁆𑀲 𑀲𑀗𑁆𑀕𑀳𑀺𑀢𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 𑀦 𑀤𑀲𑁆𑀲𑁂𑀢𑀺, 𑀅𑀣 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀻𑀢𑀺 𑀭𑀽𑀧𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀯𑀺𑀪𑀸𑀕𑁂𑀳𑀺 ¶ . 𑀧𑀜𑁆𑀘𑀥𑀸𑀢𑀺 𑀭𑀽𑀧𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀳𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑀗𑁆𑀕𑀳𑁄𑀢𑀺 𑀏𑀯𑀁 𑀧𑀜𑁆𑀘𑀧𑁆𑀧𑀓𑀸𑀭𑁂𑀦 𑀪𑀺𑀦𑁆𑀦𑀢𑀁. 𑀢𑁂𑀦𑀸𑀳 ‘‘𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑁂𑀦𑀸’’𑀢𑀺. ‘‘𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺𑀆𑀤𑀻𑀲𑀼 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀦 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸𑀦’’𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀓𑀭𑀡𑀫𑀢𑁆𑀢𑀲𑀩𑁆𑀪𑀸𑀯𑀸’’𑀢𑀺. 𑀤𑀼𑀢𑀺𑀬𑀸𑀤𑀬𑁄 𑀧𑀦 𑀦𑀬𑀸. 𑀅𑀕𑀡𑀦𑀸𑀤𑀺𑀤𑀲𑁆𑀲𑀦𑀸𑀦𑀻𑀢𑀺 𑀅𑀕𑀡𑀦𑀕𑀡𑀦𑀤𑀲𑁆𑀲𑀦𑀸𑀦𑀺. 𑀦𑀦𑀼 𑀘 𑀤𑀼𑀢𑀺𑀬𑀸𑀤𑀻𑀲𑀼 𑀕𑀡𑀦𑀸𑀤𑀻𑀦𑀺𑀧𑀺 𑀯𑀺𑀚𑁆𑀚𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑀺𑀲𑁂𑀲𑀦𑀪𑀽𑀢𑀸𑀦𑀺 𑀅𑀧𑁆𑀧𑀥𑀸𑀦𑀸𑀦𑀻𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀪𑀽𑀢𑀸𑀦𑀁 𑀧𑀥𑀸𑀦𑀸𑀦𑀁 𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀓𑀢𑁆𑀢𑀼𑀆𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀆𑀳 ‘‘𑀓𑀢𑁆𑀢𑀼𑀓𑀭𑀡𑀓𑀫𑁆𑀫𑀢𑁆𑀢𑀬𑀲𑀩𑁆𑀪𑀸𑀯𑀸’’𑀢𑀺.

𑀢𑀣𑀸 𑀢𑀣𑀸𑀢𑀺 𑀢𑁂𑀦 𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀓𑀸𑀭𑁂𑀦. 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀢𑀺 𑀭𑀽𑀧𑀥𑀫𑁆𑀫𑀸𑀤𑀻𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀲𑀪𑀸𑀕𑀢𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀅𑀪𑀸𑀯𑁄 𑀯𑀺𑀲𑀪𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂𑀢𑀺 ‘‘𑀬𑁂 𑀥𑀫𑁆𑀫𑀸, 𑀢𑁂 𑀥𑀫𑁆𑀫𑀸’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀧𑁆𑀧𑀓𑀸𑀭𑀥𑀫𑁆𑀫𑀦𑀺𑀭𑀽𑀧𑀦𑁂. 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀦𑁆𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀓𑀲𑁆𑀲 𑀲𑀗𑁆𑀕𑀸𑀳𑀓𑀲𑁆𑀲 𑀲𑁄𑀢𑀸𑀬𑀢𑀦𑀸𑀤𑀺𑀓𑀲𑁆𑀲 𑀘 𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲. 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄𑀢𑀺 𑀏𑀓𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄, 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀤𑀪𑀸𑀯𑁄𑀢𑀺 𑀢𑀲𑁆𑀲 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀲𑁆𑀲 𑀅𑀪𑀸𑀯𑁄 𑀅𑀜𑁆𑀜𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄. 𑀅𑀬𑀦𑁆𑀢𑀺 𑀬𑁆𑀯𑀸𑀬𑀁 𑀧𑀞𑀫𑀦𑀬𑁂 𑀢𑀣𑀸 𑀢𑀣𑀸 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁄 𑀤𑀼𑀢𑀺𑀬𑀸𑀤𑀺𑀦𑀬𑁂𑀲𑀼 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑀲𑀗𑁆𑀔𑀸𑀢𑁄 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀅𑀬𑀫𑁂𑀢𑁂𑀲𑀁 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀦𑀬𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀲𑀼 𑀯𑀺𑀲𑁂𑀲𑁄.

𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀕𑁆𑀕𑀲𑀘𑁆𑀘𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀺 𑀲𑀗𑁆𑀕𑀬𑁆𑀳𑀢𑀺. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀲𑁆𑀲 𑀅𑀲𑀗𑁆𑀕𑀸𑀳𑀓𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 ¶ . 𑀦 𑀳𑀺 𑀲𑀓𑁆𑀓𑀸 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁. 𑀤𑀼𑀓𑁆𑀔𑀲𑀘𑁆𑀘𑀲𑀤𑀺𑀲𑀸𑀦𑀺 𑀅𑀩𑁆𑀬𑀸𑀓𑀢𑀧𑀤𑀸𑀤𑀻𑀦𑀺. 𑀇𑀢𑀭𑁂𑀳𑀻𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀦 𑀲𑀩𑁆𑀩𑁄 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑁄𑀢𑀺 𑀅𑀢𑁆𑀣𑁄.

‘‘𑀔𑀦𑁆𑀥𑀧𑀤𑁂𑀦𑀸’’𑀢𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀦 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀆𑀳 ‘‘𑀔𑀦𑁆𑀥𑀧𑀤𑀲𑀗𑁆𑀕𑀳𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑁂𑀦𑁂𑀯𑀲𑁆𑀲 𑀓𑀢𑁆𑀢𑀼𑀅𑀢𑁆𑀣𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 ‘‘𑀦 𑀲𑀗𑁆𑀕𑀸𑀳𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀭𑀡𑀁 𑀧𑀦 𑀓𑀢𑁆𑀢𑀼𑀭𑀳𑀺𑀢𑀁 ¶ 𑀦𑀢𑁆𑀣𑀻𑀢𑀺 𑀆𑀳 ‘‘𑀓𑁂𑀦𑀘𑀺 𑀲𑀗𑁆𑀕𑀸𑀳𑀓𑁂𑀦𑀸𑀢𑀺 𑀇𑀤𑀁 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀲𑀗𑁆𑀕𑀸𑀳𑀓𑁂𑀲𑀼 𑀦 𑀬𑀼𑀚𑁆𑀚𑀢𑀺 𑀦 𑀲𑀗𑁆𑀕𑀳𑁂𑀢𑀩𑁆𑀩𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸 𑀳𑀺 ‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀸𑀢𑀺. 𑀲𑀫𑀼𑀤𑀸𑀬𑁂 𑀯𑀼𑀢𑁆𑀢𑀯𑀺𑀥𑀺 𑀢𑀤𑀯𑀬𑀯𑁂𑀧𑀺 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 ‘‘𑀏𑀢𑁂𑀦 𑀦𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀁 𑀏𑀯-𑀲𑀤𑁆𑀤𑁂𑀦 𑀓𑀭𑀻𑀬𑀢𑀻𑀢𑀺 𑀆𑀳 ‘‘𑀦 𑀳𑀺 𑀅𑀜𑁆𑀜𑀫𑀢𑁆𑀢𑀦𑀺𑀯𑀸𑀭𑀡𑀁 𑀏𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀦𑀺𑀯𑀸𑀭𑀡𑀁 𑀏𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺. 𑀲𑁄 𑀘…𑀧𑁂… 𑀧𑁂𑀓𑁆𑀔𑀦𑁆𑀢𑀺 𑀇𑀫𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀲𑀗𑁆𑀕𑀸𑀳𑀓𑀸𑀧𑁂𑀓𑁆𑀔𑀢𑁆𑀢𑁂 𑀳𑀺 ‘‘𑀲𑁄 𑀘𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄’’𑀢𑀺 𑀏𑀢𑁆𑀣 𑀘𑀓𑁆𑀔𑀸𑀬𑀢𑀦𑀁 𑀲𑀗𑁆𑀕𑀸𑀳𑀓𑀦𑁆𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀇𑀤𑀸𑀦𑀺 𑀢𑀁 𑀅𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣𑀸𑀢𑀺 ‘‘𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀻’’𑀢𑀺 𑀏𑀢𑁆𑀣. ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀆𑀬𑀢𑀦𑀥𑀸𑀢𑀼𑀯𑀺𑀲𑁂𑀲𑀦𑀢𑁆𑀣𑀁. 𑀦 𑀲𑁄 𑀏𑀯 𑀢𑀲𑁆𑀲, 𑀲𑀫𑀼𑀤𑀸𑀬𑁄 𑀯𑀸 𑀢𑀤𑁂𑀓𑀤𑁂𑀲𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀦 𑀳𑁄𑀢𑀻’’𑀢𑀺. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀬𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀗𑁆𑀕𑀸𑀳𑀓𑀢𑁆𑀢𑀁 𑀦𑀢𑁆𑀣𑀺 ‘‘𑀬𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀁 𑀲𑀺𑀬𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀬𑀁 (𑀥𑀸𑀢𑀼. 𑀅𑀝𑁆𑀞. 𑁧𑁭𑁧) ‘‘𑀲𑁄 𑀘…𑀧𑁂… 𑀦𑀢𑁆𑀣𑀻’’𑀢𑀺. 𑀲𑀗𑁆𑀕𑀳𑀺𑀢𑀢𑀸𑀬𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀲𑀸 𑀲𑀗𑁆𑀕𑀳𑀺𑀢𑀢𑀸𑀢𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄, 𑀅𑀢𑁆𑀢𑁂𑀓𑀤𑁂𑀲𑀸𑀦𑀁 ¶ 𑀯𑀸 𑀲𑀗𑁆𑀕𑀳𑀺𑀢𑀢𑀸. 𑀢𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀢𑁂𑀲𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀢𑀤𑁂𑀓𑀤𑁂𑀲𑀸𑀦𑀁. 𑀅𑀢𑁆𑀣𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀯𑀺𑀬𑀸𑀢𑀺 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀁. 𑀏𑀢𑁂𑀳𑀺 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀅𑀜𑁆𑀜𑁂𑀳𑀺 𑀘 𑀏𑀯𑀭𑀽𑀧𑁂𑀳𑀺. 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀸𑀭𑁂. 𑀅𑀕𑁆𑀕𑀳𑀡𑁂𑀢𑀺 𑀅𑀓𑀣𑀦𑁂, 𑀅𑀤𑁂𑀲𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀽𑀢𑀺 𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀬𑀼𑀚𑁆𑀚𑁂𑀬𑁆𑀬 𑀢𑀁 𑀓𑀸𑀭𑀡𑀁. 𑀓𑀲𑁆𑀫𑀸? 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁂 𑀥𑀫𑁆𑀫𑀚𑀸𑀢𑁂 𑀲𑀢𑀺 𑀢𑀲𑁆𑀲 𑀆𑀬𑀢𑀦𑀲𑀗𑁆𑀕𑀳𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀲𑀗𑁆𑀕𑀳𑀺𑀢𑀫𑁂𑀯 𑀦𑀢𑁆𑀣𑀺, 𑀓𑀲𑁆𑀫𑀸? ‘‘𑀲𑁄 𑀏𑀯 𑀢𑀲𑁆𑀲 𑀲𑀗𑁆𑀕𑀸𑀳𑀓𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀅𑀢𑁆𑀢𑀦𑁄…𑀧𑁂… 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀲 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀉𑀪𑀬𑀸𑀪𑀸𑀯𑁄𑀢𑀺 ¶ 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁄. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀸𑀭𑁂. 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀦𑁆𑀢𑀺 𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀔𑀦𑁆𑀥𑀘𑀢𑀼𑀓𑁆𑀓𑀲𑀗𑁆𑀕𑀸𑀳𑀓𑀢𑁆𑀢𑁂, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀔𑀦𑁆𑀥𑀤𑀼𑀓𑀲𑀗𑁆𑀕𑀸𑀳𑀓𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸 ‘‘𑀲𑀢𑀻’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀞𑀫𑁂𑀦 𑀥𑀫𑁆𑀫𑀥𑀸𑀢𑀼𑀲𑀴𑀸𑀬𑀢𑀦𑀸𑀤𑀻𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀏𑀓𑀓𑁆𑀔𑀦𑁆𑀥𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑁂𑀯 𑀲𑀗𑁆𑀕𑀸𑀳𑀓𑀁. 𑀢𑁂𑀲𑀦𑁆𑀢𑀺 𑀔𑀦𑁆𑀥𑀘𑀢𑀼𑀓𑁆𑀓𑀔𑀦𑁆𑀥𑀤𑀼𑀓𑀸𑀤𑀻𑀦𑀁 𑀅𑀲𑀗𑁆𑀕𑀳𑀺𑀢𑀢𑀸 𑀦 𑀦𑀢𑁆𑀣𑀺 𑀅𑀢𑁆𑀣𑁂𑀯𑀸𑀢𑀺 𑀢𑀲𑁆𑀲𑀸 𑀅𑀪𑀸𑀯𑁄 𑀅𑀦𑁂𑀓𑀦𑁆𑀢𑀺𑀓𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀧𑀤𑁂. 𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀧𑀘𑁆𑀘𑀸𑀫𑀲𑀦𑁆𑀢𑁄. 𑀢𑀤𑀯𑀢𑁆𑀢𑀩𑁆𑀩𑀢𑀸𑀢𑀺 𑀢𑁂𑀲𑀁 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀦𑀁 𑀅𑀯𑀢𑁆𑀢𑀩𑁆𑀩𑀢𑀸. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯…𑀧𑁂… 𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀬𑀲𑁆𑀫𑀸 𑀦𑁂𑀲𑀁 𑀅𑀲𑀗𑁆𑀕𑀸𑀳𑀓𑀢𑁆𑀢𑀁 𑀯𑀺𑀬 𑀲𑀗𑁆𑀕𑀸𑀳𑀓𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀢𑀢𑁄 𑀏𑀯 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺.

𑀤𑀼𑀢𑀺𑀬𑀦𑀬𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁯. 𑀭𑀽𑀧𑀓𑁆𑀔𑀦𑁆𑀥𑁂𑀦 ¶ 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀤𑁂𑀲𑀲𑀪𑀸𑀕𑀢𑀸 𑀲𑀫𑀼𑀤𑀸𑀬𑀲𑀪𑀸𑀕𑀢𑀸 𑀦 𑀳𑁄𑀢𑀺, 𑀢𑀲𑁆𑀫𑀸. 𑀢𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀢𑀸𑀦𑀻𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀦𑀺𑀩𑁆𑀩𑀸𑀦𑀸𑀦𑀺. 𑀬𑀣𑀸 𑀘 𑀏𑀓𑀤𑁂𑀲𑀯𑀺𑀲𑀪𑀸𑀕𑀢𑀸𑀬 𑀦 𑀲𑀗𑁆𑀕𑀳𑀺𑀢𑀢𑀸, 𑀏𑀯𑀁 𑀏𑀓𑀤𑁂𑀲𑀲𑀪𑀸𑀕𑀢𑀸𑀬 𑀅𑀲𑀗𑁆𑀕𑀳𑀺𑀢𑀢𑀸𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀗𑁆𑀕𑀳𑀺𑀢𑀸𑀦𑁂𑀯 𑀦 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀦𑀺𑀩𑁆𑀩𑀸𑀦𑀲𑀼𑀔𑀼𑀫𑀭𑀽𑀧𑀥𑀫𑁆𑀫𑀸. 𑀢𑁂𑀳𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺. 𑀦 𑀓𑀣𑀜𑁆𑀘𑀺 𑀲𑀫𑁆𑀫𑀺𑀲𑁆𑀲𑀸𑀢𑀺 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀦 𑀲𑀫𑁆𑀫𑀺𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀁 𑀲𑀸𑀥𑁂𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀬…𑀧𑁂… 𑀦 𑀳𑁄𑀢𑀻𑀢𑀺 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀪𑀸𑀕𑀢𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀦 𑀓𑁂𑀦𑀘𑀺𑀧𑀺 𑀲𑀗𑁆𑀕𑀳𑀡𑁂𑀦 𑀲𑀗𑁆𑀕𑀳𑀺𑀢𑀁, 𑀏𑀯𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀢𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑁄 𑀧𑀸𑀓𑀝𑁄 𑀯𑀼𑀢𑁆𑀢𑁄𑀯𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁.

𑀏𑀯𑀭𑀽𑀧𑀸𑀦𑀦𑁆𑀢𑀺 ¶ 𑀭𑀽𑀧𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁. 𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯𑀸’’𑀢𑀺. 𑀢𑀣𑀸 ‘‘𑀅𑀩𑁆𑀬𑀸𑀓𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀸𑀤𑀺𑀲𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀦𑀺𑀩𑁆𑀩𑀸𑀦…𑀧𑁂… 𑀪𑀸𑀯𑀢𑁄𑀯𑀸’’𑀢𑀺. 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀥𑀫𑁆𑀫𑀚𑀸𑀢𑀁. 𑀢𑁂𑀢𑀺 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀬𑁄. 𑀅𑀢𑁆𑀢𑀦𑁄𑀢𑀺 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀏𑀓𑀤𑁂𑀲𑁄𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺. 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀤𑁂𑀓𑀤𑁂𑀲𑀲𑀪𑀸𑀕𑁄. 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀯𑀺𑀲𑀪𑀸𑀕𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀲𑀫𑀼𑀤𑀸𑀬𑀢𑁆𑀢𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀥𑀫𑁆𑀫𑀸𑀬𑀢𑀦𑁂𑀦 𑀦 𑀓𑁄𑀘𑀺 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀲𑀸𑀢𑀺 ‘‘𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀥𑀫𑁆𑀫𑀸𑀬𑀢𑀦𑀕𑀡𑀦𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀑𑀴𑀸𑀭𑀺𑀓𑀭𑀽𑀧𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁.

𑀢𑀢𑀺𑀬𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁧. 𑀢𑀺𑀡𑁆𑀡𑀁 ¶ 𑀲𑀗𑁆𑀕𑀳𑀸𑀦𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑀸𑀦𑀁. 𑀲𑀗𑁆𑀕𑀳𑀡𑀧𑀼𑀩𑁆𑀩𑀁 𑀅𑀲𑀗𑁆𑀕𑀳𑀡𑀁, 𑀅𑀲𑀗𑁆𑀕𑀳𑀡𑀧𑀼𑀩𑁆𑀩𑀁 𑀲𑀗𑁆𑀕𑀳𑀡𑀜𑁆𑀘 𑀯𑀼𑀘𑁆𑀘𑀫𑀸𑀦𑀁 𑀲𑀗𑁆𑀕𑀳𑀡𑀸𑀲𑀗𑁆𑀕𑀳𑀡𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀕𑀳𑀡𑀸…𑀧𑁂… 𑀉𑀤𑁆𑀤𑀺𑀝𑁆𑀞𑀸’’𑀢𑀺. 𑀲𑀗𑁆𑀕𑀳𑀸𑀪𑀸𑀯𑀓𑀢𑁄 𑀅𑀲𑀗𑁆𑀕𑀳𑁄 𑀲𑀗𑁆𑀕𑀳𑀳𑁂𑀢𑀼𑀓𑁄 𑀲𑀗𑁆𑀕𑀳𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑁂’’𑀢𑀺. 𑀓𑁂𑀦𑀘𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀢𑀣𑁂𑀯 𑀲𑀗𑁆𑀕𑀳𑀺𑀢𑁄 𑀲𑁄 𑀏𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀓𑁄 𑀥𑀫𑁆𑀫𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑁄. 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀲𑀩𑁆𑀪𑀸𑀯𑀸 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀦 𑀅𑀲𑀗𑁆𑀕𑀸𑀳𑀓𑀢𑁆𑀢𑀸 𑀏𑀯. 𑀬𑀣𑀸 𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀸𑀳𑀓𑀸, 𑀏𑀯𑀁 ¶ 𑀤𑁆𑀯𑀻𑀳𑀺, 𑀏𑀓𑁂𑀦𑀧𑀺 𑀲𑀗𑁆𑀕𑀳𑁂𑀦 𑀦 𑀲𑀗𑁆𑀕𑀸𑀳𑀓𑀸 𑀇𑀥 𑀦 𑀉𑀤𑁆𑀥𑀝𑀸. 𑀢𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 𑀢𑁂𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀲𑁆𑀲.

𑀲𑀓𑀮𑀯𑀸𑀘𑀓𑁂𑀦𑀸𑀢𑀺 𑀅𑀦𑀯𑀲𑁂𑀲𑀁 𑀔𑀦𑁆𑀥𑀸𑀤𑀺𑀅𑀢𑁆𑀣𑀁 𑀯𑀤𑀦𑁆𑀢𑁂𑀦. 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 ‘‘𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀧𑀦 𑀅𑀬𑁄𑀚𑁂𑀢𑁆𑀯𑀸 ‘‘𑀬𑀁 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬, 𑀢𑀁 𑀅𑀜𑁆𑀜𑀁 𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸𑀢𑀺 𑀘𑁂? 𑀦 𑀳𑀺 𑀬𑁂𑀦 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀁 𑀥𑀫𑁆𑀫𑀚𑀸𑀢𑀁 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁, 𑀢𑁂𑀦𑁂𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀢𑀲𑁆𑀲 𑀢𑀤𑀯𑀲𑀺𑀝𑁆𑀞𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑁆𑀲, 𑀦 𑀘 𑀢𑀲𑁆𑀲𑁂𑀯 𑀓𑁂𑀯𑀮𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀓𑀲𑁆𑀲 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺 𑀬𑁄𑀚𑀦𑀸, 𑀅𑀣 𑀔𑁄 𑀢𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑁂𑀦 𑀨𑀲𑁆𑀲𑀸𑀤𑀺𑀦𑀸. 𑀲𑀗𑁆𑀕𑀳𑀺𑀢𑀲𑁆𑀲𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀓𑀮𑀓𑁆𑀔𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦 𑀬𑀁 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬, 𑀢𑀁 𑀢𑀸𑀤𑀺𑀲𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀦𑀸 𑀲𑀤𑁆𑀤𑁄 𑀘 𑀔𑀦𑁆𑀥𑁄 𑀆𑀬𑀢𑀦𑀜𑁆𑀘𑀸𑀢𑀺 𑀯𑁂𑀤𑀦𑀸 𑀯𑀺𑀲𑀼𑀁 𑀔𑀦𑁆𑀥𑁄, 𑀲𑀤𑁆𑀤𑁄 𑀘 𑀯𑀺𑀲𑀼𑀁 𑀆𑀬𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦 𑀔𑀦𑁆𑀥𑀦𑁆𑀢𑀭𑀸𑀤𑀺𑀦𑀸. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀩𑁆𑀬𑀸𑀓𑀢𑀤𑀼𑀓𑁆𑀔𑀲𑀘𑁆𑀘𑀸𑀤𑀺 𑀯𑀺𑀬 𑀅𑀫𑀺𑀲𑁆𑀲𑀺𑀢𑀁. 𑀦 𑀳𑀺…𑀧𑁂… 𑀏𑀢𑁆𑀣𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑁂𑀦 𑀥𑀫𑁆𑀫𑁂𑀦 𑀬𑁄 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑁄, 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑁄𑀬𑁂𑀯 𑀬𑁄 𑀲𑀗𑁆𑀕𑀳𑁄, 𑀲𑁄 𑀦 𑀏𑀢𑁆𑀣 𑀯𑀸𑀭𑁂 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀘. 𑀲𑀗𑁆𑀕𑀳𑁄𑀯𑀸𑀢𑀺 𑀓𑁂𑀯𑀮𑁄 𑀲𑀗𑁆𑀕𑀳𑁄 ¶ , 𑀦 𑀓𑀢𑁆𑀢𑀸𑀧𑁂𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀦𑀺𑀯𑀢𑁆𑀢𑀺𑀢𑀲𑁆𑀲 𑀤𑀲𑁆𑀲𑀦𑀁. 𑀦 𑀳𑀻𑀢𑀺𑀆𑀤𑀺 𑀢𑀁𑀲𑀫𑀢𑁆𑀣𑀦𑀁.

𑀘𑀢𑀼𑀢𑁆𑀣𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁩. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀬𑀲𑁆𑀫𑀸 𑀲𑀗𑁆𑀕𑀳𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑀥𑀫𑁆𑀫𑀯𑀺𑀲𑁂𑀲𑀦𑀺𑀲𑁆𑀲𑀺𑀢𑁄 𑀧𑀜𑁆𑀘𑀫𑀦𑀬𑁄, 𑀢𑀲𑁆𑀫𑀸 𑀬𑁄 𑀏𑀢𑁆𑀣 𑀓𑁂𑀦𑀘𑀺 𑀅𑀲𑀗𑁆𑀕𑀳𑀺𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀅𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘. 𑀢𑀫𑁂𑀯 𑀢𑀸𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀅𑀲𑀗𑁆𑀕𑀳𑀺𑀢𑀸𑀢𑀺 𑀆𑀳𑀸’’𑀢𑀺 𑀘𑀢𑀼𑀢𑁆𑀣𑀦𑀬𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦. 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑀦𑁆𑀢𑀺 𑀧𑀸𑀴𑀺𑀬𑀁 𑀦𑀺𑀤𑁆𑀥𑀸𑀭𑀺𑀢𑀧𑁆𑀧𑀓𑀸𑀭𑀥𑀫𑁆𑀫𑀤𑀲𑁆𑀲𑀦𑀁. 𑀲𑀳 𑀲𑀼𑀔𑀼𑀫𑀭𑀽𑀧𑁂𑀦𑀸𑀢𑀺 𑀲𑀲𑀼𑀔𑀼𑀫𑀭𑀽𑀧𑀁, 𑀢𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀲𑀤𑁆𑀥𑀺𑀁 𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀲𑀳𑀺𑀢𑀥𑀫𑁆𑀫𑀲𑀫𑀼𑀤𑀸𑀬𑀸 𑀲𑀲𑀼𑀔𑀼𑀫…𑀧𑁂… 𑀤𑀸𑀬𑀸. 𑀓𑁂 𑀧𑀦 𑀢𑁂𑀢𑀺 𑀆𑀳 ‘‘𑀤𑀼𑀓𑁆𑀔𑀲𑀘𑁆𑀘𑀸’’𑀢𑀺𑀆𑀤𑀺. 𑀓𑁂𑀲𑀜𑁆𑀘𑀻𑀢𑀺 𑀦𑀺𑀩𑁆𑀩𑀸𑀦𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁. 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺. 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀸. 𑀅𑀩𑁆𑀬𑀸𑀓𑀢𑀥𑀫𑁆𑀫𑀲𑀤𑀺𑀲𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀸𑀤𑀬𑁄. 𑀇𑀢𑀭𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦, 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀲𑀗𑁆𑀕𑀸𑀳𑀓𑁂𑀲𑀼 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄𑀕𑀥𑀁, 𑀢𑀲𑁆𑀫𑀸 𑀢𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀘 𑀢𑀤𑁂𑀯 𑀢𑀲𑁆𑀲 𑀅𑀲𑀗𑁆𑀕𑀸𑀳𑀓’’𑀦𑁆𑀢𑀺. ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀦𑀯 𑀧𑀜𑁆𑀳𑀸 𑀤𑀼𑀢𑀺𑀬𑀧𑀜𑁆𑀳𑀸𑀤𑀬𑁄, 𑀢𑁂 𑀧𑀞𑀫𑀧𑀜𑁆𑀳𑁂𑀦 𑀲𑀤𑁆𑀥𑀺𑀁 𑀤𑀲, 𑀦𑀸𑀫𑀭𑀽𑀧𑀧𑀜𑁆𑀳𑀸𑀤𑀬𑁄 𑀧𑀦 𑀘𑀢𑀼𑀯𑀻𑀲𑀢𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻’’𑀢𑀺. 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀓𑀧𑀤𑀦𑁆𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀲𑀗𑁆𑀕𑀸𑀳𑀓𑀢𑁆𑀢𑁂𑀦 𑀯𑀺𑀲𑁂𑀲𑀓𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀁. 𑀧𑀼𑀘𑁆𑀙𑀸𑀬𑀸𑀢𑀺 𑀘 𑀧𑀼𑀘𑁆𑀙𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺 𑀲𑀩𑁆𑀩𑀫𑁆𑀧𑀺 𑀯𑀸 𑀯𑀺𑀜𑁆𑀜𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑀪𑀸𑀯𑁂𑀦 𑀯𑀘𑀦𑀁 𑀧𑀜𑁆𑀳𑀪𑀸𑀯𑀢𑁄 𑀧𑀼𑀘𑁆𑀙𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ¶ ‘‘𑀧𑀜𑁆𑀳𑀸 𑀧𑀦𑁂𑀢𑁆𑀣…𑀧𑁂… 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻’’𑀢𑀺. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀸𑀢𑀺 𑀢𑁂 𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀸 𑀢𑁂𑀦𑁂𑀯 𑀅𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀢𑀸𑀬 𑀦𑀺𑀤𑁆𑀥𑀸𑀭𑀡𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑁂𑀦 𑀤𑀲𑁆𑀲𑀺𑀢𑀸.

𑀢𑀤𑁂𑀯𑀸𑀢𑀺 𑀏𑀯-𑀲𑀤𑁆𑀤𑁂𑀦𑀸𑀢𑀺 ‘‘𑀢𑀤𑁂𑀯𑀸’’𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦. ‘‘𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀁 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 ‘‘𑀔𑀦𑁆𑀥𑀸𑀤𑀻𑀳𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀦𑀺𑀧𑁆𑀧𑀬𑁄𑀚𑀦𑀁 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. ‘‘𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀲𑀗𑁆𑀕𑀳𑀺𑀢𑀫𑁂𑀯𑀸’’𑀢𑀺 𑀲𑀗𑁆𑀕𑀳𑀺𑀢𑀢𑀸𑀦𑀺𑀯𑀢𑁆𑀢𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀤𑁂𑀯𑀸𑀢𑀺 𑀧𑀦 𑀇𑀘𑁆𑀙𑀺𑀢𑀁 𑀉𑀤𑁆𑀥𑀝𑀲𑁆𑀲𑁂𑀯 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑀲𑁆𑀲 𑀅𑀯𑀥𑀸𑀭𑁂𑀢𑀩𑁆𑀩𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑀤𑀸𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑀼𑀤𑁆𑀥𑀝𑀲𑁆𑀲. 𑀅𑀦𑀺𑀬𑀢𑀢𑀁 𑀤𑀲𑁆𑀲𑁂𑀢𑀻𑀢𑀺 𑀇𑀤𑀁 𑀅𑀯𑀥𑀸𑀭𑀡𑀨𑀮𑀤𑀲𑁆𑀲𑀦𑀁. 𑀦𑀺𑀬𑀫𑀢𑁄𑀢𑀺 𑀲𑀓𑁆𑀓𑀸 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀼𑀦𑁆𑀢𑀺 𑀇𑀤𑀫𑁆𑀧𑀺 𑀏𑀯-𑀓𑀸𑀭𑁂𑀦 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 𑀯𑀼𑀢𑁆𑀢𑀁. 𑀬𑀢𑁄 𑀳𑀺 𑀏𑀯-𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁆𑀣 𑀦𑀺𑀬𑀫𑁄𑀢𑀺. 𑀏𑀯𑀁𑀧𑀓𑀸𑀭𑀫𑁂𑀯𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑁆𑀧𑀓𑀸𑀭𑀫𑁂𑀯, 𑀬𑀁 𑀧𑀓𑀸𑀭𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁, 𑀢𑀁𑀧𑀓𑀸𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 ¶ 𑀅𑀲𑀗𑁆𑀕𑀳𑀺𑀢𑀲𑁆𑀲. 𑀅𑀜𑁆𑀜𑀲𑁆𑀲𑀸𑀢𑀺 𑀧𑀼𑀘𑁆𑀙𑀸𑀬 𑀅𑀦𑀼𑀤𑁆𑀥𑀝𑀧𑁆𑀧𑀓𑀸𑀭𑀲𑁆𑀲. 𑀏𑀢𑁂𑀦 𑀬𑁄 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑁄 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑁄, 𑀢𑀲𑁆𑀲𑁂𑀯 𑀇𑀥 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁄, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀜𑁆𑀳𑀻’’𑀢𑀺𑀆𑀤𑀺. 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑀯𑀲𑁂𑀦 𑀘𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀜𑁆𑀜𑀲𑀳𑀺𑀢𑀢𑀸, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀲𑀳𑀺𑀢𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀲𑁂𑀲𑀸 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀦𑀺𑀩𑁆𑀩𑀸𑀦𑀜𑁆𑀘 𑀲𑀓𑀮𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄 𑀦𑀢𑁆𑀣𑀻𑀢𑀺 ‘‘𑀲𑀗𑁆𑀕𑀳𑀺𑀢𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀏𑀓𑀤𑁂𑀲𑁂𑀦 𑀧𑀦 𑀲𑀗𑁆𑀕𑀳𑁄 𑀅𑀢𑁆𑀣𑀻𑀢𑀺 ‘‘𑀅𑀲𑀗𑁆𑀕𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. ‘‘𑀭𑀽𑀧𑀥𑀫𑁆𑀫𑀸𑀯𑀸’’𑀢𑀺 𑀦𑀺𑀬𑀫𑀦𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀪𑀸𑀯𑀸𑀧𑁂𑀓𑁆𑀔𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀘𑁆𑀙𑀸𑀬…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀤𑁆𑀥𑀝𑀸 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀅𑀲𑀗𑁆𑀕𑀳𑀺𑀢𑀸 𑀏𑀯𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀘𑀫𑀦𑀬𑀦𑀺𑀤𑁆𑀤𑁂𑀲𑁂. 𑀧𑀞𑀫𑁂 𑀦𑀬𑁂𑀢𑀺 𑀧𑀞𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂. 𑀢𑀣𑀸 𑀤𑀼𑀢𑀺𑀬𑁂𑀢𑀺 𑀏𑀢𑁆𑀣𑀸𑀧𑀺. 𑀭𑀽𑀧𑀯𑀺𑀜𑁆𑀜𑀸𑀡𑁂𑀳𑀻𑀢𑀺 𑀅𑀲𑀼𑀔𑀼𑀫𑀭𑀽𑀧𑀥𑀫𑁆𑀫𑁂𑀳𑀺 𑀯𑀺𑀜𑁆𑀜𑀸𑀡𑁂𑀦 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀴𑀸𑀭𑀺𑀓…𑀧𑁂… 𑀅𑀢𑁆𑀣𑁄’’𑀢𑀺 𑀆𑀳. 𑀓𑀣𑀁 𑀧𑀦 𑀭𑀽𑀧𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑁂 𑀑𑀴𑀸𑀭𑀺𑀓𑀭𑀽𑀧𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 𑀆𑀳 ‘‘𑀭𑀽𑀧𑁂𑀓𑀤𑁂𑀲𑁄 𑀳𑀺 𑀏𑀢𑁆𑀣 𑀭𑀽𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑁄’’𑀢𑀺.

𑁧𑁯𑁬. 𑀅𑀲𑀗𑁆𑀕𑀸𑀳𑀓𑀦𑁆𑀢𑀺 ¶ ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀯𑀁 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀫𑁆𑀧𑀺 𑀓𑀸𑀫𑀁 𑀯𑁂𑀤𑀦𑀸𑀤𑀻𑀳𑁂𑀯 𑀘𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑀁 𑀧𑀦 𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀔𑀦𑁆𑀥𑀸𑀤𑀻𑀲𑀼 𑀬𑁂𑀳𑀺. 𑀲𑀩𑁆𑀩𑀁 𑀥𑀫𑁆𑀫𑀚𑀸𑀢𑀁 𑀢𑁂𑀯 𑀭𑀽𑀧𑀸𑀤𑀺𑀓𑁂 𑀥𑀫𑁆𑀫𑁂 𑀉𑀤𑀸𑀦𑁂𑀢𑀺 𑀧𑀸𑀴𑀺𑀬𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀉𑀤𑀸𑀦𑁂𑀢𑀻𑀢𑀺 𑀆𑀳 ‘‘𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺. 𑀧𑀞𑀫𑁂𑀦 𑀉𑀤𑀸𑀦𑁂𑀦. 𑀤𑁆𑀯𑁂𑀢𑀺 ‘‘𑀩𑀸𑀳𑀺𑀭𑀸 𑀉𑀧𑀸𑀤𑀸 𑀤𑁆𑀯𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀤𑁆𑀯𑁂-𑀲𑀤𑁆𑀤𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲 𑀅𑀲𑀗𑁆𑀕𑀳𑀺𑀢𑀲𑁆𑀲. 𑀬𑀣𑀸𑀤𑀲𑁆𑀲𑀺𑀢𑀲𑁆𑀲𑀸𑀢𑀺 ‘‘𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀲𑁆𑀲. 𑀥𑀫𑁆𑀫𑀦𑁆𑀯𑀬𑀜𑀸𑀡𑀼𑀧𑁆𑀧𑀸𑀤𑀦𑀁 𑀦𑀬𑀤𑀸𑀦𑀁. ‘‘𑀭𑀽𑀧𑀁 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀤𑁆𑀯𑁂𑀯𑀻𑀲𑀧𑀤𑀺𑀓𑁄 𑀏𑀲 𑀦𑀬𑁄.

𑀧𑀜𑁆𑀘𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀦𑀬𑁄 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸

𑁨𑁨𑁮. ‘‘𑀢𑀢𑁆𑀣𑀸’’𑀢𑀺 ¶ 𑀇𑀫𑀺𑀦𑀸 ‘‘𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀁 𑀪𑀸𑀚𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀁 𑀪𑀸𑀚𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑀸𑀬 𑀘 𑀧𑀥𑀸𑀦𑀪𑀽𑀢𑀁 𑀧𑀘𑁆𑀘𑀸𑀫𑀝𑁆𑀞𑀁, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀮𑀩𑁆𑀪𑀢𑀺…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀢𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀸 𑀕𑀳𑁂𑀢𑀼𑀁 𑀦 𑀮𑀩𑁆𑀪𑀢𑀺, 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀧𑀼𑀘𑁆𑀙𑀸𑀬 𑀕𑀳𑀺𑀢𑀁 𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀧𑀝𑀺𑀓𑁆𑀔𑁂𑀧𑁄𑀧𑀺 𑀳𑀺 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀫𑁂𑀯. 𑀢𑀣𑀸 𑀳𑀺 𑀬𑀫𑀓𑁂 (𑀬𑀫. 𑁧.𑀔𑀦𑁆𑀥𑀬𑀫𑀓.𑁫𑁯-𑁬𑁧) ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀢𑁂𑀦 𑀧𑀦𑁂𑀢𑁆𑀣 𑀭𑀽𑀧𑀥𑀫𑁆𑀫𑁂𑀲𑀼 𑀲𑀫𑁆𑀧𑀬𑁄𑀕𑀝𑁆𑀞𑁄 𑀦 𑀮𑀩𑁆𑀪𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀲𑀫𑁆𑀧𑀬𑁄𑀕𑀧𑀤𑀁 𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀏𑀢𑁂𑀲𑀦𑁆𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁. 𑀯𑀺𑀲𑀪𑀸𑀕𑀢𑀸𑀢𑀺 𑀅𑀢𑀁𑀲𑀪𑀸𑀕𑀢𑀸. 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁄 𑀳𑀺 𑀲𑀫𑁆𑀧𑀬𑁄𑀕𑁂 𑀲𑀪𑀸𑀕𑀢𑀸, 𑀦 𑀲𑀗𑁆𑀕𑀳𑁂 𑀯𑀺𑀬 𑀲𑀫𑀸𑀦𑀲𑀪𑀸𑀕𑀢𑀸, 𑀢𑀲𑁆𑀫𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀭𑀳𑀺𑀢𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀯𑀺𑀲𑀪𑀸𑀕𑀢𑀸 𑀯𑀼𑀢𑁆𑀢𑀸. 𑀢𑀤𑀪𑀸𑀯𑀢𑁄𑀢𑀺 𑀢𑀲𑁆𑀲𑀸 𑀯𑀺𑀲𑀪𑀸𑀕𑀢𑀸𑀬 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀅𑀪𑀸𑀯𑀢𑁄. 𑀯𑀺𑀧𑁆𑀧𑀬𑁄𑀕𑁄𑀧𑀺 𑀦𑀺𑀯𑀸𑀭𑀺𑀢𑁄 𑀏𑀯 𑀳𑁄𑀢𑀺, 𑀯𑀺𑀲𑀪𑀸𑀕𑁄 𑀪𑀸𑀯𑁄 𑀯𑀺𑀧𑁆𑀧𑀬𑁄𑀕𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺. ‘‘𑀘𑀢𑀽𑀲𑀼 ¶ 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀢𑁂𑀲𑀁 𑀢𑁂𑀳𑀻𑀢𑀺 𑀘 𑀅𑀭𑀽𑀧𑀓𑁆𑀔𑀦𑁆𑀥𑁂 𑀏𑀯 𑀧𑀭𑀸𑀫𑀲𑀢𑀺. 𑀯𑀺𑀲𑀪𑀸𑀕𑀢𑀸 𑀘 𑀳𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀘 𑀭𑀽𑀧𑁂𑀓𑀤𑁂𑀲𑀲𑁆𑀲𑀸’’𑀢𑀺𑀆𑀤𑀺. 𑀢𑁂𑀦𑁂𑀯𑀸𑀢𑀺 𑀘𑀢𑀼𑀓𑁆𑀔𑀦𑁆𑀥𑀲𑀪𑀸𑀕𑀢𑁆𑀢𑀸 𑀏𑀯.

𑀢𑀻𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂 𑀭𑀽𑀧𑀥𑀫𑁆𑀫𑀫𑀺𑀲𑁆𑀲𑀓𑁂 𑀥𑀫𑁆𑀫𑁂 𑀤𑀻𑀧𑁂𑀢𑀺 𑀭𑀽𑀧𑀪𑀯𑁄𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀏𑀓𑀸𑀬 𑀫𑀦𑁄𑀥𑀸𑀢𑀼𑀬𑀸. 𑀦 𑀲𑀫𑁆𑀧𑀬𑀼𑀢𑁆𑀢𑁂𑀢𑀺 𑀦 𑀲𑀫𑁆𑀧𑀬𑀼𑀢𑁆𑀢𑁂 𑀏𑀯. 𑀢𑀣𑀸 𑀳𑀺 ‘‘𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀳𑁄𑀦𑁆𑀢𑁂 𑀲𑀢𑁆𑀢𑀳𑀺𑀧𑀺 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀧𑀺 𑀯𑀸 𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀧𑀝𑀺𑀓𑁆𑀔𑁂𑀧𑁂𑀦. 𑀢𑀸𑀳𑀻𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀺𑀬𑁂𑀯, 𑀦 𑀲𑀫𑁆𑀧𑀬𑀼𑀢𑁆𑀢𑁂 𑀏𑀯𑀸𑀢𑀺 𑀏𑀯𑀫𑀯𑀥𑀸𑀭𑀡𑀁 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑁆𑀧𑀬𑀼𑀢𑁆𑀢𑁂 𑀯𑁂𑀤𑀦𑀸𑀤𑀺𑀓𑁂. 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀳𑀺 𑀦𑀯𑀢𑁆𑀢𑀩𑁆𑀩𑀁, 𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀢𑁆𑀢𑀓𑀁. 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀦𑀯𑀢𑁆𑀢𑀩𑁆𑀩𑀸𑀦𑀺, 𑀪𑀺𑀦𑁆𑀦𑀲𑀦𑁆𑀢𑀸𑀦𑀺𑀓𑀸𑀦𑀺, 𑀦𑀸𑀦𑀸𑀓𑁆𑀔𑀡𑀺𑀓𑀸𑀦𑀺 𑀘 𑀅𑀭𑀽𑀧𑀸𑀦𑀺𑀧𑀺 𑀥𑀫𑁆𑀫𑀚𑀸𑀢𑀸𑀦𑀺. 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸, 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 ¶ 𑀅𑀘𑁂𑀢𑀲𑀺𑀓𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸, 𑀢𑀤𑀼𑀪𑀬𑀲𑀫𑀼𑀤𑀸𑀬𑀸 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑁄𑀪𑀬𑀥𑀫𑁆𑀫𑀸𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀲𑀳𑀺𑀢𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀔𑀦𑁆𑀥𑀸𑀤𑀻𑀳𑁂𑀯𑀸𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀏𑀯, 𑀦 𑀅𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑁂𑀦. 𑀅𑀭𑀽𑀧𑀓𑁆𑀔𑀦𑁆𑀥𑁂𑀬𑁂𑀯 𑀧𑀦 𑀲𑀦𑁆𑀥𑀸𑀬 ‘‘𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀸𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀤𑁂𑀓𑀤𑁂𑀲𑀸𑀢𑀺 ‘‘𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀸. 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸𑀢𑀺 𑀢𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀯𑀬𑀯𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀫𑀼𑀤𑀸𑀬𑀪𑀽𑀢𑀸. 𑀯𑀺𑀪𑀸𑀕𑀸𑀪𑀸𑀯𑀢𑁄𑀢𑀺 𑀪𑁂𑀤𑀸𑀪𑀸𑀯𑀢𑁄. 𑀪𑁂𑀤𑁄𑀢𑀺 𑀘𑁂𑀢𑁆𑀣 𑀅𑀘𑁆𑀘𑀦𑁆𑀢𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀳𑀺 𑀲𑀫𑀼𑀤𑀸𑀬𑀸𑀯𑀬𑀯𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀸𑀦𑀁 𑀯𑀺𑀬 𑀅𑀘𑁆𑀘𑀦𑁆𑀢𑀪𑁂𑀤𑁄 𑀅𑀢𑁆𑀣𑀺 𑀪𑁂𑀤𑀸𑀪𑁂𑀤𑀬𑀼𑀢𑁆𑀢𑀢𑁆𑀢𑀸. 𑀢𑁂𑀲𑀁 𑀅𑀘𑁆𑀘𑀦𑁆𑀢𑀪𑁂𑀤𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀁 𑀏𑀓𑀤𑁂𑀲𑀸𑀦𑀁 𑀦 𑀯𑀺𑀪𑀸𑀕𑁄 𑀅𑀢𑁆𑀣𑀻’’𑀢𑀺 𑀲𑀗𑁆𑀕𑀳𑁂𑀧𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀅𑀯𑀺𑀪𑀸𑀕𑀲𑀩𑁆𑀪𑀸𑀯𑀢𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑁆𑀢𑀸𑀪𑀸𑀯𑁂𑀦. 𑀢𑁂𑀲𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 ¶ . 𑀢𑁂 𑀘 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀪𑀢𑁆𑀢𑀲𑀪𑀸𑀯𑀸𑀦𑀁 𑀦 𑀢𑁂𑀲𑀁 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀤𑀺𑀪𑀸𑀯𑁄, 𑀢𑀲𑁆𑀫𑀸. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀤𑀬𑁄 𑀏𑀯 𑀔𑀦𑁆𑀥𑀸𑀤𑀬𑁄𑀢𑀺 𑀔𑀦𑁆𑀥𑀸𑀤𑀺𑀆𑀫𑀲𑀦𑁂𑀦 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀤𑀺𑀪𑀸𑀯𑁄 𑀆𑀧𑀦𑁆𑀦𑁄 𑀏𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀔𑀦𑁆𑀥𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀤𑀻𑀦𑀁. 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸 ‘‘𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸. 𑀲𑀩𑁆𑀩𑁂𑀲𑀽𑀢𑀺 𑀤𑀼𑀢𑀺𑀬𑀸𑀤𑀺𑀲𑀩𑁆𑀩𑀧𑀜𑁆𑀳𑁂𑀲𑀼.

𑀙𑀢𑁆𑀢𑀺𑀁𑀲𑀸𑀬 𑀧𑀺𑀝𑁆𑀞𑀺𑀤𑀼𑀓𑀧𑀤𑁂𑀲𑀼 𑀯𑀻𑀲𑀢𑀺 𑀤𑀼𑀓𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀦𑀬𑁂 𑀮𑀩𑁆𑀪𑀦𑁆𑀢𑀺, 𑀅𑀯𑀲𑀺𑀝𑁆𑀞𑀸𑀦𑀺 𑀲𑁄𑀴𑀲𑁂𑀯𑀸𑀢𑀺 𑀆𑀳 ‘‘𑀲𑁄𑀴𑀲𑀸𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀢𑁄 𑀏𑀯 ‘‘𑀢𑁂𑀯𑀻𑀲𑀧𑀤𑀲𑀢’’𑀦𑁆𑀢𑀺 𑀏𑀢𑁆𑀣 ‘‘𑀢𑁂𑀯𑀻𑀲’’𑀦𑁆𑀢𑀺 𑀇𑀤𑀜𑁆𑀘 ‘‘𑀏𑀓𑀯𑀻𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀧𑀜𑁆𑀳𑁂𑀲𑀼. 𑀏𑀓𑀓𑀸𑀮𑁂𑀓𑀲𑀦𑁆𑀢𑀸𑀦𑀸𑀦𑀁 𑀪𑀺𑀦𑁆𑀦𑀓𑀸𑀮𑀪𑀺𑀦𑁆𑀦𑀲𑀦𑁆𑀢𑀸𑀦𑀸𑀦𑀜𑁆𑀘 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀬𑁄𑀢𑀺 𑀆𑀳 ‘‘𑀓𑀸𑀮𑀲𑀦𑁆𑀢𑀸𑀦…𑀧𑁂… 𑀥𑀸𑀢𑀽𑀦’’𑀦𑁆𑀢𑀺. 𑀏𑀓𑀤𑁂𑀲𑀲𑀫𑁆𑀫𑀺𑀲𑁆𑀲𑀸𑀢𑀺 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀸𑀤𑀺𑀦𑀸 𑀅𑀢𑁆𑀢𑀦𑁄 𑀏𑀓𑀤𑁂𑀲𑁂𑀦𑁂𑀯 𑀔𑀦𑁆𑀥𑀦𑁆𑀢𑀭𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀸 𑀇𑀤𑁆𑀥𑀺𑀧𑀸𑀤𑀸𑀤𑀬𑁄, 𑀅𑀦𑀸𑀭𑀫𑁆𑀫𑀡𑁂𑀳𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀘 𑀅𑀲𑀫𑁆𑀫𑀺𑀲𑁆𑀲𑀸. 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀻𑀢𑀺 𑀏𑀓𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀓𑀸𑀮𑀲𑀦𑁆𑀢𑀸𑀦𑀪𑁂𑀤𑀭𑀳𑀺𑀢𑁂𑀳𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀦𑁆𑀢𑀭𑁂𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀯𑀺𑀲𑁂𑀲𑀪𑀽𑀢𑁂𑀳𑀺 ¶ 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀪𑀢𑁆𑀢𑀸 𑀏𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀬𑁄 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦, 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀬𑁄𑀚𑀦𑀸. 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺. 𑀢𑁂 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀬𑁄. 𑀓𑁂𑀳𑀺𑀘𑀺 𑀲𑀳𑀼𑀧𑁆𑀧𑀚𑁆𑀚𑀦𑀸𑀭𑀳𑁂𑀳𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑁂𑀳𑀺. 𑀦 𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂𑀧𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀬𑁄 𑀫𑀕𑁆𑀕𑀲𑀘𑁆𑀘𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀮𑀪𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀦𑀁. 𑀏𑀓𑀼𑀧𑁆𑀧𑀸𑀤𑀸…𑀧𑁂… 𑀯𑀺𑀲𑀪𑀸𑀕𑀢𑀸 𑀘𑀸𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀲𑀗𑁆𑀔𑀸𑀢𑀸 𑀬𑀣𑀸𑀭𑀳𑀁 𑀲𑀪𑀸𑀕𑀢𑀸 𑀯𑀺𑀲𑀪𑀸𑀕𑀢𑀸 𑀘. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀫𑁆𑀧𑀬𑁄𑀕𑀲𑁆𑀲 𑀯𑀺𑀧𑁆𑀧𑀬𑁄𑀕𑀲𑁆𑀲 𑀘 𑀮𑀪𑀦𑀢𑁄.

𑀪𑀺𑀦𑁆𑀦𑀓𑀸𑀮𑀸𑀦𑀁 𑀲𑀫𑀼𑀤𑀸𑀬𑀻𑀦𑀁 𑀲𑀫𑀼𑀤𑀸𑀬𑀸 𑀪𑀺𑀦𑁆𑀦𑀓𑀸𑀮𑀲𑀫𑀼𑀤𑀸𑀬𑀸. 𑀯𑀢𑁆𑀢𑀫𑀸𑀦𑀸 𑀘 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀏𑀓𑁂𑀓𑀥𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸. 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀏𑀓𑀤𑁂𑀲𑀪𑀽𑀢𑀲𑁆𑀲 𑀅𑀪𑀸𑀯𑀢𑁄. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀽𑀢𑀸𑀦𑀺𑀧𑀺. 𑀢𑁂𑀦 𑀯𑀺𑀪𑀸𑀕𑀸𑀓𑀭𑀡𑁂𑀦 ¶ . 𑀬𑀤𑀺 𑀲𑀫𑀸𑀦𑀓𑀸𑀮𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀸𑀕𑀁 𑀦 𑀓𑀭𑁄𑀦𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀔𑀦𑁆𑀥𑀸𑀬𑀢𑀦…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀥𑀸𑀢𑀼𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲, 𑀏𑀯𑀫𑁂𑀯𑀁.

𑁨𑁩𑁫. 𑀢𑀁𑀲𑀫𑁆𑀧𑀬𑁄𑀕𑀻𑀪𑀸𑀯𑀦𑁆𑀢𑀺 𑀢𑁂𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑀻𑀪𑀸𑀯𑀁. 𑀬𑀣𑀸 𑀳𑀺 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀢𑀸, 𑀏𑀯𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑁂𑀳𑀺 𑀪𑀺𑀦𑁆𑀦𑀓𑀸𑀮𑁂𑀳𑀺 𑀘 𑀢𑁂𑀳𑀺 𑀢𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺 𑀆𑀳 ‘‘𑀏𑀯𑀁 𑀢𑀁𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑀁…𑀧𑁂… 𑀦 𑀯𑀼𑀢𑁆𑀢’’𑀦𑁆𑀢𑀺. 𑀯𑀺𑀲𑀪𑀸𑀕𑀢𑀸𑀦𑀺𑀩𑀦𑁆𑀥𑀲𑁆𑀲 𑀯𑀺𑀪𑀸𑀕𑀲𑁆𑀲 𑀅𑀪𑀸𑀯𑁂𑀦 𑀅𑀯𑀺𑀪𑀸𑀕𑁂𑀳𑀺 𑀢𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺. 𑀯𑀺𑀪𑀸𑀕𑁂 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀯𑀺𑀪𑀸𑀕𑀭𑀳𑀺𑀢𑁂𑀳𑀻𑀢𑀺 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀢𑁆𑀢𑀸 𑀅𑀯𑀺𑀪𑀢𑁆𑀢𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀦 𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀢𑁆𑀢𑀼𑀁. 𑀢𑁂𑀦𑀸𑀳 ‘‘𑀯𑀺𑀚𑁆𑀚𑀫𑀸𑀦𑁂𑀳𑀺…𑀧𑁂… 𑀪𑀸𑀯𑀢𑁄’’𑀢𑀺. 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀸𑀦𑀲𑁆𑀲 𑀲𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀯𑀺𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀺𑀲𑀪𑀸𑀕𑀁 𑀦 𑀳𑁄𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀯𑀺𑀬𑀸𑀢𑀺 𑀇𑀤𑀁 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀤𑀲𑁆𑀲𑀦𑀁. 𑀬𑀣𑀸 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀅𑀦𑀸𑀕𑀢𑀓𑀸𑀮𑀁 𑀯𑀼𑀘𑁆𑀘𑀢𑀻𑀢𑀺 𑀆𑀫𑀝𑁆𑀞𑀓𑀸𑀮𑀪𑁂𑀤𑀁, 𑀏𑀯𑀁 𑀬𑀁 𑀆𑀫𑀝𑁆𑀞𑀓𑀸𑀮𑀪𑁂𑀤𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀭𑀺𑀢𑀩𑁆𑀩𑀁 𑀤𑁂𑀲𑀦𑀸𑀬 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄, 𑀲𑀫𑁆𑀧𑀬𑁄𑀕𑀸𑀭𑀳𑀲𑁆𑀲𑁂𑀯 ¶ 𑀘 𑀯𑀺𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑀺𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺 𑀆𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀦𑀺𑀲𑁆𑀲𑀸𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺. 𑀢𑀜𑁆𑀘𑀸𑀢𑀺 𑀉𑀤𑁆𑀥𑀭𑀡𑀁.

𑀯𑀺𑀪𑀸𑀕𑀭𑀳𑀺𑀢𑁂𑀳𑀻𑀢𑀺 𑀯𑀺𑀲𑀪𑀸𑀕𑀢𑀸𑀪𑀸𑀯𑀢𑁄 𑀅𑀯𑀺𑀪𑀸𑀕𑁂𑀳𑀺. 𑀅𑀦𑀸𑀫𑀝𑁆𑀞𑀓𑀸𑀮𑀪𑁂𑀤𑁂𑀢𑀺 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁂. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲…𑀧𑁂… 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀧𑀸𑀭𑀺𑀲𑁂𑀲𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄 𑀤𑀲𑁆𑀲𑀺𑀢𑁄. 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀪𑁂𑀤𑁂 𑀕𑀳𑀺𑀢𑁂𑀢𑀺 𑀬𑀣𑀸𑀕𑀳𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀤𑀻𑀧𑀓𑁂 𑀢𑁂𑀲𑀁𑀬𑁂𑀯 𑀯𑀺𑀲𑁂𑀲𑁂 ‘‘𑀅𑀭𑀽𑀧𑀪𑀯𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁨𑁪𑁬) 𑀕𑀳𑀺𑀢𑁂 𑀢𑁂𑀦𑁂𑀯 𑀭𑀼𑀧𑁆𑀧𑀦𑀸𑀤𑀺𑀦𑀸 𑀪𑁂𑀤𑁂𑀦 𑀢𑁂𑀲𑀁 ¶ 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯𑀸𑀢𑀺 𑀯𑀺𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀪𑁂𑀤𑁂 𑀧𑀦 𑀅𑀕𑁆𑀕𑀳𑀺𑀢𑁂 𑀢𑁂𑀦 𑀢𑁂𑀦 𑀕𑀳𑀡𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀯𑀺𑀲𑁂𑀲𑁂, 𑀯𑀺𑀲𑀪𑀸𑀕𑁂 𑀯𑀸 𑀅𑀕𑁆𑀕𑀳𑀺𑀢𑁂 ‘‘𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀕𑀳𑀡𑁂𑀦 𑀲𑀪𑀸𑀕𑀢𑀸𑀤𑀻𑀧𑀦𑁂𑀦 𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀪𑀸𑀕𑀢𑀸𑀯 𑀳𑁄𑀢𑀺. 𑀢𑀣𑀸 𑀘 𑀲𑀢𑀺 𑀲𑀪𑀸𑀕𑀢𑁆𑀢𑁂 𑀓𑀸 𑀧𑀦𑁂𑀢𑁆𑀣 𑀲𑀪𑀸𑀕𑀢𑀸𑀢𑀺 𑀆𑀳 ‘‘𑀯𑀺𑀚𑁆𑀚𑀫𑀸𑀦𑀢𑀸𑀬…𑀧𑁂… 𑀳𑁄𑀢𑀻’’𑀢𑀺. 𑀢𑀲𑁆𑀲𑀸𑀢𑀺 𑀲𑀪𑀸𑀕𑀢𑀸𑀬. 𑀢𑀲𑁆𑀫𑀸𑀢𑀺 𑀯𑀺𑀲𑀪𑀸𑀕𑀢𑀸𑀬 𑀅𑀮𑀩𑁆𑀪𑀫𑀸𑀦𑀢𑁆𑀢𑀸, 𑀲𑀪𑀸𑀕𑀢𑀸𑀬 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸.

𑁨𑁬𑁨. 𑀯𑀺𑀢𑀓𑁆𑀓𑁄 𑀯𑀺𑀬𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑁄 𑀯𑀺𑀬. 𑀲𑁄 𑀳𑀺 𑀯𑀺𑀢𑀓𑁆𑀓𑀭𑀳𑀺𑀢𑀢𑁆𑀢𑀸 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀘. 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀦𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀮𑀻𑀦𑀸’’𑀢𑀺. 𑀢𑀢𑁄 𑀏𑀯 𑀲𑁄 𑀅𑀧𑁆𑀧𑀥𑀸𑀦𑁄, 𑀤𑀼𑀢𑀺𑀬𑀛𑀸𑀦𑀥𑀫𑁆𑀫𑀸 𑀏𑀯𑁂𑀢𑁆𑀣 𑀧𑀥𑀸𑀦𑀸𑀢𑀺 𑀆𑀳 ‘‘𑀬𑁂 𑀧𑀥𑀸𑀦𑀸’’𑀢𑀺. 𑀢𑁂𑀦𑁂𑀯𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑀲𑁆𑀲 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀕𑁆𑀕𑀳𑀡𑁂𑀦 𑀇𑀥 𑀅𑀕𑁆𑀕𑀳𑀺𑀢𑀢𑁆𑀢𑀸, 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀤𑀼𑀢𑀺𑀬𑀭𑀸𑀲𑀺𑀬𑁂𑀯 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀦𑀦𑁆𑀢𑀭𑀦𑀬𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸 𑀲𑀤𑀺𑀲𑀧𑁆𑀧𑀯𑀢𑁆𑀢𑀺𑀓𑀸. 𑀇𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀢𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 𑀦 𑀕𑀳𑀺𑀢𑀸, 𑀲𑀫𑀼𑀤𑀬𑀲𑀘𑁆𑀘𑀁 𑀯𑀺𑀬 𑀦 𑀤𑁂𑀲𑀦𑀸𑀭𑀼𑀴𑁆𑀳𑀸. 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀬𑀤𑀺 𑀳𑀺 𑀢𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸 𑀲𑀺𑀬𑀼𑀁, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺, 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺, 𑀏𑀓𑀸𑀬 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀬𑀲𑁆𑀫𑀸 𑀧𑀦 𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸. 𑀬𑀣𑀸 𑀳𑀺 𑀬𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑁄𑀕𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀢𑁂𑀳𑀺𑀧𑀺 ¶ . 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀦𑀻’’𑀢𑀺𑀆𑀤𑀺. 𑀤𑀲𑀫𑁄…𑀧𑁂… 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀤𑀲𑀫𑀦𑀬𑁂 𑀢𑁂𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀑𑀲𑀸𑀦𑀦𑀬𑁂 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑁄 𑀘 𑀯𑀼𑀢𑁆𑀢𑁄𑀢𑀺 𑀢𑀲𑁆𑀫𑀸 𑀦 𑀢𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀢𑀓𑁆𑀓𑀲𑀳𑀺𑀢𑁂𑀲𑀽𑀢𑀺 ¶ 𑀲𑀳𑀯𑀺𑀢𑀓𑁆𑀓𑁂𑀲𑀼. 𑀢𑁂𑀲𑀽𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀲𑀳 𑀯𑀺𑀢𑀓𑁆𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑁂𑀲𑀼, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀕𑀳𑀺𑀢𑁂𑀲𑀼 𑀯𑀼𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀧𑀺 𑀢𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸 𑀯𑀺𑀢𑀓𑁆𑀓𑁄 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀥𑀫𑁆𑀫𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀦𑀺𑀤𑁆𑀤𑁂𑀲𑁂 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀲𑁄 𑀳𑀺 𑀲𑀫𑀼𑀤𑀸𑀬𑁄𑀢𑀺 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁄. 𑀦𑀦𑀼 𑀯𑀺𑀢𑀓𑁆𑀓𑁄𑀧𑁂𑀢𑁆𑀣 𑀥𑀫𑁆𑀫𑀲𑀗𑁆𑀕𑀳𑀁 𑀕𑀢𑁄, 𑀲𑁄 𑀘 𑀯𑀺𑀘𑀸𑀭𑀢𑁄 𑀅𑀜𑁆𑀜𑁂𑀦𑀧𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀳𑀺 𑀢𑀤𑁂𑀓𑀤𑁂𑀲𑀲𑁆𑀲…𑀧𑁂… 𑀳𑁄𑀢𑀻’’𑀢𑀺. 𑀬𑀣𑀸𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀇𑀤𑁆𑀥𑀺𑀧𑀸𑀤𑀦𑀺𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀇𑀤𑁆𑀥𑀺𑀧𑀸𑀤𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀪𑀽𑀢𑀸𑀦𑀁 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀤𑀻𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀺, 𑀏𑀯𑀁 𑀇𑀥𑀸𑀧𑀺 𑀯𑀺𑀢𑀓𑁆𑀓𑀲𑁆𑀲 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀻𑀢𑀺.

𑀬𑀤𑀺 𑀏𑀯𑀁 ‘‘𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦𑁄 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀽𑀢𑀺 𑀇𑀤𑁆𑀥𑀺𑀧𑀸𑀤𑁂𑀲𑀼. 𑀲𑀫𑀼𑀤𑀸𑀬𑀲𑁆𑀲𑀸𑀢𑀺 𑀇𑀤𑁆𑀥𑀺𑀧𑀸𑀤𑀲𑀫𑀼𑀤𑀸𑀬𑀲𑁆𑀲. 𑀢𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸 ‘‘𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑀸𑀢𑀺 𑀯𑀺𑀘𑀸𑀭𑁂𑀦. 𑀦 𑀳𑀻𑀢𑀺𑀆𑀤𑀺𑀦𑀸 𑀬𑀣𑀸𑀥𑀺𑀕𑀢𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀦𑀯𑀢𑁆𑀢𑀩𑁆𑀩𑀸𑀪𑀸𑀯𑀁 𑀉𑀤𑀸𑀳𑀭𑀡𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀸𑀯𑁂𑀢𑀺. 𑀓𑁂𑀘𑀺 𑀯𑀺𑀘𑀺𑀓𑀺𑀘𑁆𑀙𑀸 𑀢𑀁𑀲𑀳𑀕𑀢𑀸 𑀘 𑀫𑁄𑀳𑀯𑀚𑁆𑀚𑀸 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀓𑁂𑀘𑀺 𑀅𑀲𑀫𑁆𑀧𑀬𑀼𑀢𑁆𑀢𑀸. 𑀫𑁄𑀳𑁂𑀦𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀫𑁄𑀳𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀲𑀫𑀼𑀤𑀸𑀬𑁄 𑀢𑁂𑀦 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑁄. 𑀅𑀜𑁆𑀜𑁄 𑀓𑁄𑀘𑀺 𑀥𑀫𑁆𑀫𑁄 𑀳𑁂𑀢𑀼𑀪𑀸𑀯𑁄 𑀦𑀸𑀧𑀺 𑀅𑀢𑁆𑀣𑀺, 𑀬𑁂𑀦 𑀳𑁂𑀢𑀼𑀦𑀸 𑀲𑁄 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁄𑀢𑀺 𑀯𑀼𑀢𑁆𑀢𑁄 𑀲𑀫𑀼𑀤𑀸𑀬𑁄. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 ‘‘𑀪𑀸𑀯𑀦𑀸…𑀧𑁂… 𑀬𑁄𑀧𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀦𑀯𑀢𑁆𑀢𑀩𑁆𑀩𑀢𑀸𑀬 𑀦𑀺𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀬𑀣𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀲𑀫𑀼𑀤𑀸𑀬𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀯𑀢𑁆𑀢𑀩𑁆𑀩𑀸, 𑀏𑀯𑀁 𑀬𑁂𑀦 𑀥𑀫𑁆𑀫𑁂𑀦 𑀅𑀯𑀺𑀢𑀓𑁆𑀓…𑀧𑁂… 𑀲𑀺𑀬𑀸, 𑀢𑀁 𑀦 𑀦𑀢𑁆𑀣𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀓𑁄𑀘𑀺𑀧𑀺 𑀯𑀺𑀘𑀸𑀭𑁂𑀦 ¶ 𑀅𑀲𑀫𑁆𑀧𑀬𑀼𑀢𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀢𑁂𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 ¶ 𑀥𑀫𑁆𑀫𑀸. 𑀏𑀓𑀥𑀫𑁆𑀫𑁂𑀧𑀺…𑀧𑁂… 𑀓𑀢𑁄 𑀬𑀣𑀸 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’𑀢𑀺.

𑀙𑀝𑁆𑀞𑀦𑀬𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁦𑁬. 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺 𑀔𑀦𑁆𑀥𑀢𑁆𑀢𑀬𑀔𑀦𑁆𑀥𑁂𑀓𑀤𑁂𑀲𑀸𑀤𑀺𑀓𑁂 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑀺𑀧𑀺, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂 𑀭𑀽𑀧𑀦𑀺𑀩𑁆𑀩𑀸𑀦𑀸𑀤𑀺𑀓𑁂 𑀢𑀤𑀜𑁆𑀜𑀥𑀫𑁆𑀫𑁂 𑀲𑀢𑀺𑀧𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀅𑀜𑁆𑀜𑀥𑀫𑁆𑀫𑀸𑀦𑀁 𑀅𑀯𑀲𑀺𑀝𑁆𑀞𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀦 𑀳𑀺 𑀅𑀢𑁆𑀣𑀺 𑀔𑀦𑁆𑀥𑀧𑀜𑁆𑀘𑀓𑀸𑀤𑀻𑀦𑀁 𑀲𑀗𑁆𑀕𑀡𑁆𑀳𑀦𑀢𑁄 𑀢𑁂𑀲𑀁. 𑀢𑁂 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀢𑁂 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀯. 𑀢𑀤𑀜𑁆𑀜𑀥𑀫𑁆𑀫𑀸𑀦𑀦𑁆𑀢𑀺 𑀢𑀤𑀜𑁆𑀜𑀥𑀫𑁆𑀫𑀸𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀢𑀺 𑀇𑀫𑀺𑀦𑀸 𑀦 𑀘 𑀢𑁂 𑀏𑀯 𑀥𑀫𑁆𑀫𑀸 𑀅𑀟𑁆𑀠𑀤𑀼𑀢𑀺𑀬𑀸𑀬𑀢𑀦𑀥𑀸𑀢𑀼𑀬𑁄, 𑀅𑀣 𑀔𑁄 𑀢𑁂 𑀘 𑀢𑀢𑁄 𑀅𑀜𑁆𑀜𑁂 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺.

𑀦𑀦𑀼 𑀢𑀤𑀜𑁆𑀜𑀪𑀸𑀯𑀢𑁄 𑀏𑀯 𑀢𑁂𑀳𑀺 𑀇𑀢𑀭𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀦 𑀘𑀸’’𑀢𑀺𑀆𑀤𑀺. 𑀢𑀤𑀜𑁆𑀜𑀲𑀫𑀼𑀤𑀸𑀬𑁂𑀳𑀻𑀢𑀺 𑀢𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀅𑀜𑁆𑀜𑀲𑀫𑀼𑀤𑀸𑀬𑁂𑀳𑀺 𑀅𑀜𑁆𑀜𑁂 𑀮𑁄𑀪𑀲𑀳𑀕𑀢𑀸 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑀫𑀼𑀤𑀸𑀬𑁂…𑀧𑁂… 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑀫𑀼𑀤𑀸𑀬𑁂𑀦 𑀮𑁄𑀪𑀲𑀳𑀕𑀢𑀢𑀤𑀜𑁆𑀜𑀥𑀫𑁆𑀫𑀭𑀸𑀲𑀺𑀦𑀸 𑀏𑀓𑀤𑁂𑀲𑀸𑀦𑀁 𑀮𑁄𑀪𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄, 𑀢𑀣𑀸 𑀬𑁂 𑀏𑀓𑀤𑁂𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀯𑀬𑀯𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑀸, 𑀢𑁂𑀲𑀜𑁆𑀘 𑀲𑀫𑀼𑀤𑀸𑀬𑁂𑀦 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺. 𑀅𑀦𑁂𑀦 𑀲𑀫𑀼𑀤𑀸𑀬𑁂𑀦 𑀅𑀯𑀬𑀯𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑁂𑀦 𑀘 𑀢𑀲𑁆𑀲 𑀦 𑀯𑀺𑀧𑁆𑀧𑀬𑁄𑀕𑁄, 𑀅𑀯𑀬𑀯𑀲𑁆𑀲𑁂𑀯 𑀧𑀦 𑀅𑀯𑀬𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀲𑀫𑀼𑀤𑀬𑀲𑀘𑁆𑀘𑁂 𑀯𑀼𑀢𑁆𑀢𑁄 𑀯𑀺𑀥𑀺, 𑀏𑀲𑁂𑀯 𑀫𑀕𑁆𑀕𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀅𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀢𑁆𑀢𑀸 𑀢𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀭𑀯𑀲𑁂𑀲𑁂𑀲𑀽𑀢𑀺 𑀅𑀩𑀳𑀺𑀓𑀢𑀯𑀺𑀢𑀓𑁆𑀓𑁂𑀲𑀼. 𑀯𑀺𑀢𑀓𑁆𑀓𑁄 𑀳𑀺 𑀲𑀫𑀼𑀤𑀸𑀬𑀢𑁄 𑀅𑀩𑀳𑀺𑀓𑀢𑁄. ‘‘𑀲𑁄 𑀳𑀺 𑀲𑀫𑀼𑀤𑀸𑀬𑁄’’𑀢𑀺𑀆𑀤𑀺𑀓𑁄 𑀯𑀼𑀢𑁆𑀢𑀦𑀬𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀻’’𑀢𑀺.

𑀅𑀜𑁆𑀜𑁂𑀲𑀼𑀧𑀺 ¶ ¶ 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀼 𑀯𑀺𑀲𑁆𑀲𑀚𑁆𑀚𑀦𑀲𑁆𑀲…𑀧𑁂… 𑀤𑀝𑁆𑀞𑀩𑁆𑀩𑀁, 𑀬𑀢𑁄 𑀲𑀫𑀼𑀤𑀬𑀲𑀘𑁆𑀘𑀸𑀤𑀺 𑀇𑀥 𑀦 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀧𑀬𑀼𑀢𑁆𑀢𑀸𑀥𑀺𑀓𑀸𑀭𑀢𑁄 ‘‘𑀅𑀜𑁆𑀜𑁂𑀦𑀸’’𑀢𑀺 𑀧𑀤𑀁 𑀲𑀫𑁆𑀧𑀬𑀼𑀢𑁆𑀢𑀢𑁄 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀆𑀳 ‘‘𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑁂𑀦𑀧𑀺 𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸…𑀧𑁂… 𑀕𑀳𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 ‘‘𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦. 𑀘𑀺𑀢𑁆𑀢𑀦𑁆𑀢𑀺 ‘‘𑀘𑀺𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺 𑀧𑀜𑁆𑀳𑀁 𑀉𑀧𑀮𑀓𑁆𑀔𑁂𑀢𑀺. 𑀲𑀳𑀬𑀼𑀢𑁆𑀢𑀧𑀤𑁂𑀳𑀺 𑀲𑀢𑁆𑀢𑀸𑀢𑀺 ‘‘𑀘𑁂𑀢𑀲𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀲𑀳𑀬𑀼𑀢𑁆𑀢𑁂 𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑁂𑀳𑀺 𑀧𑀤𑁂𑀳𑀺 𑀆𑀕𑀢𑀸 𑀲𑀢𑁆𑀢 𑀧𑀜𑁆𑀳𑀸. 𑀢𑀺𑀡𑁆𑀡𑀁 𑀢𑀺𑀓𑀧𑀤𑀸𑀦𑀫𑀕𑁆𑀕𑀳𑀡𑁂𑀦 𑀊𑀦𑁄𑀢𑀺 𑀓𑀢𑁆𑀯𑀸. 𑀬𑁂 𑀲𑀦𑁆𑀥𑀸𑀬 ‘‘𑀢𑀺𑀓𑁂 𑀢𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀯𑁂𑀤𑀦𑀸𑀧𑀻𑀢𑀺𑀢𑁆𑀢𑀺𑀓𑁂𑀲𑀼 𑀧𑀘𑁆𑀙𑀺𑀫𑀁, 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀧𑀞𑀫𑀦𑁆𑀢𑀺 𑀧𑀤𑀢𑁆𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑁩𑁦𑁯. 𑀉𑀤𑁆𑀥𑀝𑀧𑀤𑁂𑀦 𑀧𑀓𑀸𑀲𑀺𑀬𑀫𑀸𑀦𑀸 𑀅𑀢𑁆𑀣𑀸 𑀅𑀪𑁂𑀤𑁄𑀧𑀘𑀸𑀭𑁂𑀦 ‘‘𑀉𑀤𑁆𑀥𑀝𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀻’’𑀢𑀺. 𑀢𑁂𑀦 𑀘 𑀬𑀣𑀸𑀯𑀼𑀢𑁆𑀢𑁂𑀦 𑀉𑀤𑁆𑀥𑀝𑀧𑀤𑁂𑀦. 𑀫𑀦𑁂𑀦 𑀬𑀼𑀢𑁆𑀢𑀸𑀢𑀺 𑀏𑀢𑁆𑀣 𑀫𑀦𑀦𑀫𑀢𑁆𑀢𑀢𑁆𑀢𑀸 𑀫𑀦𑁄𑀥𑀸𑀢𑀼 ‘‘𑀫𑀦𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀫𑀦𑁄𑀥𑀸𑀢𑀼𑀬𑀸 𑀏𑀓𑀦𑁆𑀢𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺.

𑀲𑀢𑁆𑀢𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁭. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑁄𑀕𑀺𑀦𑁄 𑀅𑀪𑀸𑀯𑀢𑁄. 𑀲𑀫𑀼𑀤𑀸𑀬𑀲𑁆𑀲 𑀘 𑀏𑀓𑀤𑁂𑀲𑁂𑀦 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀜𑁆𑀘, 𑀢𑀲𑁆𑀲 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺…𑀧𑁂… 𑀦𑀢𑁆𑀣𑀻’’𑀢𑀺. 𑀢𑁂𑀦𑀸𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦.

𑀅𑀝𑁆𑀞𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁯. ‘‘𑀲𑀫𑀸𑀲𑀧𑀤𑀁 ¶ ¶ 𑀇𑀤’’𑀦𑁆𑀢𑀺 𑀯𑀢𑁆𑀯𑀸 𑀅𑀬𑀁 𑀦𑀸𑀫 𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲 𑀔𑀦𑁆𑀥𑀸𑀤𑀺𑀦𑁄’’𑀢𑀺𑀆𑀤𑀺𑀫𑀸𑀳, 𑀬𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀬𑀁 𑀇𑀥 𑀲𑀫𑁆𑀧𑀬𑀼𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀦𑀯𑀫𑀦𑀬𑁂 𑀬𑀁 𑀥𑀫𑁆𑀫𑀚𑀸𑀢𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀥𑀫𑁆𑀫𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀜𑁆𑀳𑀺 𑀥𑀫𑁆𑀫𑀚𑀸𑀢𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀬𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀁. 𑀅𑀬𑁄𑀕𑁄𑀢𑀺 𑀅𑀲𑀫𑁆𑀧𑀬𑁄𑀕𑁄. 𑀯𑀓𑁆𑀔𑀢𑀺 𑀤𑀲𑀫𑀦𑀬𑁂. 𑀢𑀢𑁆𑀣 𑀳𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁂𑀤𑀦𑀸𑀤𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑁄 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀓𑀣𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀩𑁆𑀩𑀸𑀦𑀁 𑀧𑀦 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀫𑀦𑀸𑀬𑀢𑀦𑀁 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀳𑀺 𑀬𑀣𑀸 𑀲𑀼𑀔𑀼𑀫𑀭𑀽𑀧𑀁 𑀯𑀺𑀬 𑀲𑀭𑀽𑀧𑀢𑁄 𑀅𑀦𑀼𑀤𑁆𑀥𑀝𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀓𑁂𑀳𑀺𑀘𑀻𑀢𑀺𑀧𑀤𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀸𑀦𑀁 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀭𑀽𑀧𑀫𑀺𑀲𑁆𑀲𑀓𑁂𑀳𑀺 𑀯𑀸’’𑀢𑀺 𑀏𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀸𑀦𑀫𑀺𑀲𑁆𑀲𑀓𑁂𑀳𑀺𑀧𑀺 𑀅𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀓𑀮𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀧𑀤𑁂𑀳𑀺 𑀲𑀳𑀯𑀢𑁆𑀢𑀺𑀦𑁄 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑁄𑀕𑀺𑀦𑁄 𑀅𑀪𑀸𑀯𑀢𑁄 𑀅𑀢𑀻𑀢𑀸𑀦𑀸𑀕𑀢𑁂𑀳𑀺 𑀘 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑁂𑀯𑀸𑀢𑀺 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀫𑀸𑀦𑀸𑀦𑀫𑁂𑀯…𑀧𑁂… 𑀅𑀭𑀽𑀧𑀪𑀯𑀸𑀤𑀻𑀳𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀇𑀢𑀭𑁂𑀢𑀺 𑀬𑁂 𑀲𑀫𑁆𑀧𑀬𑁄𑀕𑀁 𑀮𑀪𑀦𑁆𑀢𑀺, 𑀓𑁂 𑀧𑀦 𑀢𑁂 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀸 𑀅𑀭𑀽𑀧𑁂𑀓𑀤𑁂𑀲𑀪𑀽𑀢𑀸. 𑀢𑁂𑀦𑀸𑀳 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄’’𑀢𑀺.

𑀦𑀯𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁫𑁩. 𑀬𑁂 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀧𑀸𑀴𑀺𑀬𑀁 𑀅𑀕𑁆𑀕𑀳𑀺𑀢𑀸, 𑀢𑁂𑀲𑀼 𑀓𑁂𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄 𑀓𑁂𑀘𑀺 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀸𑀬𑀢𑀦𑀸𑀤𑀺𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀪𑀺𑀦𑁆𑀦𑀓𑀸𑀮𑀢𑀸𑀤𑀺𑀯𑀺𑀲𑁂𑀲𑀯𑀢𑁄 𑀅𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀅𑀪𑀸𑀯𑀫𑀸𑀳, 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀲𑀩𑁆𑀩𑀲𑁆𑀲𑀧𑀺. 𑀓𑀸𑀫𑀪𑀯𑁄 ¶ 𑀉𑀧𑀧𑀢𑁆𑀢𑀺𑀪𑀯𑁄 𑀲𑀜𑁆𑀜𑀻𑀪𑀯𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺 ¶ 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀯𑀸. 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺 𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀢𑁄. 𑀦 𑀳𑀺 𑀬𑁂 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀲𑀁𑀬𑁂𑀯 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀲𑀫𑁆𑀪𑀯𑀢𑀺.

𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀫𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀢𑁂𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸. 𑀲𑁂𑀲𑁂𑀳𑀻𑀢𑀺 𑀅𑀯𑀲𑀺𑀝𑁆𑀞𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺. ‘‘𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄’’𑀢𑀺 𑀇𑀫𑀺𑀦𑀸 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀫𑀼𑀔𑁂𑀦 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀯𑀭𑀡𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀓𑁂𑀳𑀺𑀘𑀻𑀢𑀺𑀧𑀤𑀲𑁆𑀲𑀢𑁆𑀣𑀁 𑀓𑀸𑀢𑀼𑀁 ‘‘𑀓𑁂𑀳𑀺𑀘𑀻𑀢𑀺 𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀡𑁆𑀳𑀸𑀯𑀚𑁆𑀚𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑀸𑀓𑀺𑀢𑁆𑀢𑀦𑀁 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀬𑀢𑁄 𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸. 𑀲𑀬𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀯𑀚𑁆𑀚𑁂𑀳𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀁 𑀦 𑀯𑀢𑁆𑀢𑀩𑁆𑀩𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺𑀧𑀺, 𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀧𑀻’’𑀢𑀺. 𑀲𑀫𑁆𑀧𑀬𑁄𑀕𑀸𑀭𑀳𑁂𑀳𑀻𑀢𑀺 𑀯𑀺𑀲𑁂𑀲𑀦𑀁 𑀲𑀼𑀔𑀼𑀫𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑁆𑀯𑁂 𑀲𑀦𑁆𑀥𑀸𑀬 𑀓𑀢𑀁, 𑀦 𑀢𑀡𑁆𑀳𑀸𑀤𑀺𑀓𑁂.

𑀏𑀓𑀸𑀤𑀲𑀫𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀦𑀯𑀫𑀦𑀬𑁂 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀉𑀤𑁆𑀥𑀝𑀸, 𑀤𑁆𑀯𑀸𑀤𑀲𑀫𑀦𑀬𑁂 𑀘 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀸𑀢𑀺 𑀉𑀪𑀬𑀢𑁆𑀣𑀸𑀧𑀺 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸𑀯 𑀕𑀳𑀺𑀢𑀸𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀫…𑀧𑁂… 𑀮𑀩𑁆𑀪𑀦𑁆𑀢𑀻’’𑀢𑀺.

𑀤𑁆𑀯𑀸𑀤𑀲𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁪𑁮. 𑀬𑁂𑀳𑀻𑀢𑀺 ¶ ¶ 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀻𑀳𑀺. 𑀢𑀻𑀳𑀺𑀧𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀲𑀗𑁆𑀕𑀳𑁂𑀳𑀺. 𑀧𑀼𑀦 𑀬𑁂𑀳𑀻𑀢𑀺 𑀅𑀭𑀽𑀧𑀪𑀯𑀸𑀤𑀻𑀳𑀺. 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑁂𑀯 𑀳𑁄𑀦𑁆𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑁂𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑀸𑀤𑀬𑁄. 𑀯𑀼𑀢𑁆𑀢𑀸𑀯𑀲𑁂𑀲𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀻𑀳𑀺 𑀅𑀯𑀲𑀺𑀝𑁆𑀞𑀸. 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀫𑁆𑀧𑀬𑁄𑀕𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀇𑀥 𑀢𑁂𑀭𑀲𑀫𑀦𑀬𑁂 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀭𑀼𑀳𑀦𑁆𑀢𑀺 𑀦𑀸𑀭𑁄𑀳𑀦𑁆𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻’’𑀢𑀺 (𑀥𑀸𑀢𑀼. 𑁪𑁪𑁮) 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺 𑀅𑀯𑀺𑀓𑀮𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀪𑀸𑀯𑀢𑁄.

𑀢𑁂𑀢𑀺 ‘‘𑀤𑀼𑀓𑁆𑀔𑀲𑀘𑁆𑀘𑀸𑀤𑀻’’𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀥𑀫𑁆𑀫𑀸. 𑀅𑀲𑀩𑁆𑀩…𑀧𑁂… 𑀲𑀺𑀬𑀼𑀁 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸𑀤𑀺𑀥𑀫𑁆𑀫𑀸 𑀯𑀺𑀬. 𑀦 𑀢𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀲𑀫𑁆𑀪𑀯𑀢𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀢𑁆𑀢𑀸 𑀦 ‘‘𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀸𑀳 ‘‘𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸’’𑀢𑀺. 𑀉𑀪𑀬𑀸𑀪𑀸𑀯𑀢𑁄𑀢𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀅𑀦𑀸𑀭𑀫𑁆𑀫𑀡𑀲𑀳𑀺𑀢𑀲𑀩𑁆𑀩𑀯𑀺𑀜𑁆𑀜𑀸𑀡𑀢𑀁𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀢𑀤𑀼𑀪𑀬𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀘𑁂𑀢𑀲𑀺𑀓𑀮𑁄𑀓𑀺𑀬𑀧𑀤𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀭𑀲𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁫𑁬. 𑀥𑀫𑁆𑀫𑀲𑀪𑀸𑀯𑀫𑀢𑁆𑀢𑀢𑁆𑀢𑀸𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑁆𑀢𑀸 𑀅𑀯𑀢𑁆𑀣𑀸𑀯𑀺𑀲𑁂𑀲𑀫𑀢𑁆𑀢𑀢𑁆𑀢𑀸.

𑀲𑀫𑀼𑀘𑁆𑀙𑀺𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑁄. 𑀲𑀗𑁆𑀕𑀳𑀸𑀤𑀺𑀯𑀺𑀘𑀸𑀭𑀧𑀭𑀺𑀦𑀺𑀝𑁆𑀞𑀸𑀦𑀪𑀽𑀢𑁄 𑀘𑀼𑀤𑁆𑀤𑀲𑀫𑀦𑀬𑁄. 𑀢𑁂𑀦𑀸𑀳 ‘‘𑀧𑀭𑀺𑀬𑁄𑀲𑀸𑀦𑁂 𑀦𑀬𑁂’’𑀢𑀺. 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀯𑀺𑀢𑁆𑀢𑀸 𑀧𑀼𑀘𑁆𑀙𑀸 𑀫𑁄𑀖𑀧𑀼𑀘𑁆𑀙𑀸, 𑀲𑀸 𑀢𑀣𑀸𑀪𑀽𑀢𑀸𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀸𑀪𑀸𑀯𑀲𑁆𑀲 𑀜𑀸𑀧𑀺𑀓𑀸 𑀳𑁄𑀢𑀻𑀢𑀺 𑀆𑀳 ‘‘𑀢𑁂𑀲𑀁 𑀧𑀼𑀘𑁆𑀙𑀸𑀬 𑀫𑁄𑀖𑀢𑁆𑀢𑀸 𑀢𑁂 𑀦 𑀮𑀩𑁆𑀪𑀦𑁆𑀢𑀻’’𑀢𑀺. 𑀫𑁄𑀖𑀸 𑀧𑀼𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀫𑁄𑀖𑀧𑀼𑀘𑁆𑀙𑀓𑁄. 𑀅𑀝𑁆𑀞𑀫𑁄 𑀦𑀬𑁄 ¶ 𑀢𑀢𑁆𑀣 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 𑀫𑁄𑀖𑀢𑁆𑀢𑀸 ¶ . 𑀢𑁂𑀦 𑀘 𑀲𑀳𑀸𑀢𑀺 𑀢𑁂𑀦 𑀅𑀝𑁆𑀞𑀫𑀦𑀬𑁂𑀦 𑀲𑀤𑁆𑀥𑀺𑀁 𑀇𑀫𑀲𑁆𑀫𑀺𑀁 𑀑𑀲𑀸𑀦𑀦𑀬𑁂 𑀅𑀝𑁆𑀞𑀫𑀦𑀬𑁂 𑀘 𑀑𑀲𑀸𑀦𑀦𑀬𑁂 𑀘 𑀏𑀢𑁂 𑀥𑀫𑁆𑀫𑀸𑀬𑀢𑀦𑀸𑀤𑀬𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀧𑁆𑀧𑀬𑁄𑀕𑀲𑁆𑀲𑀧𑀺 𑀅𑀪𑀸𑀯𑀸𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳.

𑀘𑀼𑀤𑁆𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀓𑀣𑀸𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀅𑀦𑀼𑀝𑀻𑀓𑀸

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. ‘‘𑀥𑀸𑀢𑀼𑀓𑀣𑀁 ¶ ¶ 𑀤𑁂𑀲𑀬𑀺𑀢𑁆𑀯𑀸 𑀅𑀦𑀦𑁆𑀢𑀭𑀁 𑀢𑀲𑁆𑀲 𑀆𑀳 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀓𑀸𑀭𑀡𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀥𑀫𑁆𑀫𑀲𑀗𑁆𑀕𑀳𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀺𑀧𑀺 𑀥𑀫𑁆𑀫𑀲𑀗𑁆𑀕𑀳𑁂 𑀨𑀲𑁆𑀲𑀸𑀤𑀻𑀦𑀁 𑀧𑀣𑀯𑀻𑀆𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑁄 𑀅𑀦𑀼𑀧𑀤𑀯𑀺𑀪𑀸𑀕𑁄𑀧𑀺 𑀓𑀢𑁄, 𑀦 𑀲𑀗𑁆𑀕𑀳𑁄 𑀏𑀯, 𑀲𑁄 𑀧𑀦 𑀢𑁂𑀲𑀁 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀳𑁂𑀢𑀼𑀤𑀼𑀓𑀸𑀤𑀺𑀢𑀺𑀓𑀤𑀼𑀓𑁂𑀳𑀺 𑀲𑀗𑁆𑀕𑀳𑀲𑀦𑁆𑀤𑀲𑁆𑀲𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀲𑀗𑁆𑀕𑀳𑁂 𑀢𑀺𑀓𑀤𑀼𑀓𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀢𑀁 𑀧𑀓𑀭𑀡𑀁 ‘‘𑀥𑀫𑁆𑀫𑀲𑀗𑁆𑀕𑀳𑁄’’𑀢𑀺 𑀲𑀫𑀜𑁆𑀜𑀁 𑀮𑀪𑀺. 𑀓𑀸𑀫𑀜𑁆𑀘 𑀥𑀫𑁆𑀫𑀲𑀗𑁆𑀕𑀳𑁂𑀧𑀺 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮) 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀲𑁄 𑀧𑀦 𑀦 𑀢𑀣𑀸 𑀲𑀸𑀢𑀺𑀲𑀬𑁄, 𑀬𑀣𑀸 𑀯𑀺𑀪𑀗𑁆𑀕𑀧𑀓𑀭𑀡𑁂𑀢𑀺 𑀲𑀸𑀢𑀺𑀲𑀬𑀁 𑀢𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀯𑀺𑀪𑀗𑁆𑀕𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀬𑀢𑁄 𑀢𑀁 ‘‘𑀯𑀺𑀪𑀗𑁆𑀕𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀥𑀸𑀢𑀼𑀓𑀣𑀸𑀬𑀸𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀢𑀣𑀸 ‘‘𑀥𑀫𑁆𑀫𑀲𑀗𑁆𑀕𑀳𑁂 𑀯𑀺𑀪𑀗𑁆𑀕𑁂’’𑀢𑀺 𑀏𑀢𑁆𑀣𑀸𑀧𑀺. 𑀆𑀥𑀸𑀭𑁄 𑀳𑀺 𑀲𑀗𑁆𑀕𑀳𑀡𑀯𑀺𑀪𑀚𑀦𑀧𑁆𑀧𑀪𑁂𑀤𑀯𑀘𑀦𑀲𑀗𑁆𑀔𑀸𑀢𑀸𑀦𑀁 ¶ 𑀅𑀯𑀬𑀯𑀓𑀺𑀭𑀺𑀬𑀸𑀦𑀁 𑀢𑀁𑀲𑀫𑀼𑀤𑀸𑀬𑀪𑀽𑀢𑀸𑀦𑀺 𑀧𑀓𑀭𑀡𑀸𑀦𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀓𑀭𑀡𑀯𑀘𑀦𑀁 𑀯𑀸 𑀏𑀢𑀁, 𑀥𑀸𑀢𑀼𑀓𑀣𑀸𑀬 𑀓𑀭𑀡𑀪𑀽𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀢𑀺𑀓𑀤𑀼𑀓𑀯𑀲𑁂𑀦 𑀢𑀸𑀯 𑀦𑁂𑀲𑀁 𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀲𑀗𑁆𑀕𑀡𑀺𑀁 𑀤𑁂𑀲𑁂𑀢𑁆𑀯𑀸 𑀲𑀗𑁆𑀕𑀳𑀧𑀼𑀩𑁆𑀩𑀓𑀢𑁆𑀢𑀸 𑀯𑀺𑀪𑀸𑀕𑀲𑁆𑀲 𑀢𑀤𑀦𑀦𑁆𑀢𑀭𑀁 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀪𑀗𑁆𑀕𑀁 𑀤𑁂𑀲𑁂𑀲𑀺. 𑀧𑀼𑀦 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀲𑀗𑁆𑀕𑀳𑀬𑀼𑀢𑁆𑀢𑁂 𑀥𑀫𑁆𑀫𑁂 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀦𑀬𑀧𑁆𑀧𑀪𑁂𑀤𑀢𑁄 𑀤𑀲𑁆𑀲𑁂𑀦𑁆𑀢𑁄 𑀥𑀸𑀢𑀼𑀓𑀣𑀁 𑀤𑁂𑀲𑁂𑀲𑀺 𑀢𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀲𑀭𑀻𑀭𑀓𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀸 𑀔𑀦𑁆𑀥𑀸𑀤𑀺𑀓𑁂 𑀓𑀼𑀲𑀮𑀸𑀤𑀺𑀓𑁂 𑀘 𑀯𑀺𑀦𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀦𑀬𑀁 𑀦𑁂𑀢𑀼𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀣𑀸𑀲𑀗𑁆𑀕𑀳𑀺𑀢𑀯𑀺𑀪𑀢𑁆𑀢𑀸𑀦’’𑀦𑁆𑀢𑀺. 𑀏𑀯𑀁 𑀲𑀗𑁆𑀕𑀳𑀢𑁄 𑀯𑀺𑀪𑀸𑀕𑀢𑁄 𑀧𑀪𑁂𑀤𑀢𑁄 𑀘 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸 𑀬𑀲𑁆𑀲𑀸 ¶ 𑀧𑀜𑁆𑀜𑀢𑁆𑀢𑀺𑀬𑀸 𑀯𑀲𑁂𑀦 𑀳𑁄𑀢𑀺, 𑀬𑁄 𑀘𑀸𑀬𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀼𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑀯𑁄𑀳𑀸𑀭𑁄, 𑀢𑀲𑁆𑀲 𑀘 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁄, 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀤𑁂𑀲𑀺𑀢𑀸𑀢𑀺 𑀇𑀤𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀓𑀭𑀡𑀸𑀦𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀢𑁂𑀲𑀦𑁆𑀢𑀺 𑀥𑀫𑁆𑀫𑀸𑀦𑀁. 𑀲𑀪𑀸𑀯𑀢𑁄𑀢𑀺 ‘‘𑀨𑀲𑁆𑀲𑁄 𑀯𑁂𑀤𑀦𑀸’’𑀢𑀺𑀆𑀤𑀺𑀲𑀪𑀸𑀯𑀢𑁄. 𑀉𑀧𑀸𑀤𑀸𑀬𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀧𑁄𑀲𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑁂 𑀉𑀧𑀸𑀤𑀸𑀬. 𑀧𑀜𑁆𑀜𑀸𑀧𑀦𑀁 𑀬𑀸𑀬 𑀢𑀚𑁆𑀚𑀸𑀉𑀧𑀸𑀤𑀸𑀤𑀺𑀪𑁂𑀤𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀳𑁄𑀢𑀺, 𑀢𑀁 𑀧𑀜𑁆𑀜𑀢𑁆𑀢𑀺𑀁. 𑀧𑀪𑁂𑀤𑀢𑁄𑀢𑀺 𑀔𑀦𑁆𑀥𑀸𑀤𑀺𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀺𑀪𑀸𑀕𑀢𑁄. 𑀬𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑀪𑀸𑀯𑀢𑁄 𑀉𑀧𑀸𑀤𑀸𑀬 𑀘 𑀧𑀜𑁆𑀜𑀸𑀧𑀦𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀣 𑀬𑁂 𑀥𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀫𑀽𑀮𑀪𑀽𑀢𑀁 𑀉𑀧𑀸𑀤𑀸𑀦𑀁 𑀲𑀪𑀸𑀯𑀥𑀫𑁆𑀫𑁄 𑀏𑀯, 𑀓𑁂𑀯𑀮𑀁 𑀧𑀦 𑀢𑁂𑀲𑀁 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀲𑀦𑁆𑀦𑀺𑀲𑁆𑀲𑀬𑀢𑁄 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀥𑀫𑁆𑀫𑁂…𑀧𑁂… 𑀳𑁄𑀢𑀻’’𑀢𑀺 𑀆𑀳. 𑀢𑀢𑁆𑀣 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂𑀢𑀺 𑀇𑀫𑀺𑀦𑀸 𑀧𑀩𑀦𑁆𑀥𑀲𑀦𑁆𑀦𑀺𑀲𑁆𑀲𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺𑀁 𑀯𑀤𑀢𑀺, 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦𑀸𑀢𑀺 𑀇𑀫𑀺𑀦𑀸 𑀲𑁂𑀲𑀧𑀜𑁆𑀜𑀢𑁆𑀢𑀺𑀁. 𑀢𑀺𑀲𑁆𑀲𑁄 𑀳𑀺 𑀧𑀜𑁆𑀜𑀢𑁆𑀢𑀺𑀬𑁄 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀽𑀳𑀧𑀜𑁆𑀜𑀢𑁆𑀢𑀺 𑀅𑀯𑀢𑁆𑀣𑀸𑀯𑀺𑀲𑁂𑀲𑀧𑀜𑁆𑀜𑀢𑁆𑀢𑀻𑀢𑀺. 𑀢𑀢𑁆𑀣 𑀧𑀩𑀦𑁆𑀥𑁄 𑀲𑀦𑁆𑀢𑀸𑀦𑁄. 𑀲𑀫𑀼𑀤𑀸𑀬𑁄 𑀲𑀫𑀽𑀳𑁄. 𑀉𑀧𑁆𑀧𑀸𑀤𑀸𑀤𑀺𑀓𑁄 𑀤𑀳𑀭𑀪𑀸𑀯𑀸𑀤𑀺𑀓𑁄 𑀘 𑀅𑀯𑀢𑁆𑀣𑀸𑀯𑀺𑀲𑁂𑀲𑁄. 𑀢𑁂𑀲𑀼 𑀅𑀲𑀪𑀸𑀯𑀕𑁆𑀕𑀳𑀡𑁂𑀦 𑀯𑀺𑀦𑀸 𑀧𑀩𑀦𑁆𑀥𑀲𑀫𑀽𑀳𑀸𑀦𑀁 𑀅𑀲𑀪𑀸𑀯𑀢𑁆𑀢𑁂 𑀲𑀺𑀤𑁆𑀥𑁂 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦𑀸𑀢𑀺 𑀅𑀲𑀪𑀸𑀯𑀕𑁆𑀕𑀳𑀡𑀁 𑀧𑀩𑀦𑁆𑀥𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀦𑁆𑀢𑀺 𑀧𑀼𑀩𑁆𑀩𑁂 𑀬𑀁-𑀲𑀤𑁆𑀤𑁂𑀦 𑀧𑀭𑀸𑀫𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀥𑀫𑁆𑀫𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀅𑀜𑁆𑀜𑁂𑀲𑀜𑁆𑀘 𑀩𑀸𑀳𑀺𑀭𑀭𑀽𑀧𑀦𑀺𑀩𑁆𑀩𑀸𑀦𑀸𑀦’’𑀦𑁆𑀢𑀺. 𑀲𑀲𑀪𑀸𑀯𑀲𑀫𑀽𑀳𑀲𑀲𑀪𑀸𑀯𑀧𑁆𑀧𑀪𑁂𑀤𑀯𑀲𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀲𑀪𑀸𑀯𑀲𑀫𑀽𑀳𑀯𑀲𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀺𑀲𑀲𑀪𑀸𑀯𑀯𑀺𑀲𑁂𑀲𑀯𑀲𑁂𑀦 𑀘. ‘‘𑀲𑀲𑀪𑀸𑀯𑀲𑀫𑀽𑀳𑀲𑀪𑀸𑀯𑀪𑁂𑀤𑀯𑀲𑁂𑀦𑀸’’𑀢𑀺 𑀘 𑀧𑀸𑀞𑁄. 𑀢𑀢𑁆𑀣 𑀲𑀫𑀽𑀳𑀲𑀪𑀸𑀯𑁄𑀢𑀺 ¶ 𑀲𑀪𑀸𑀯𑀲𑀦𑁆𑀢𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀺𑀥𑀼𑀭𑀁 𑀲𑀫𑀽𑀳𑀯𑀲𑁂𑀦 𑀮𑀓𑁆𑀔𑀡𑀫𑁂𑀯𑀸𑀳. 𑀢𑀣𑀸 𑀳𑀺 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀢𑀸 𑀯𑀼𑀢𑁆𑀢𑀸. 𑀢𑀸𑀬𑀸𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀆𑀤𑀺𑀧𑁆𑀧𑀪𑁂𑀤𑀸𑀬 𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸. 𑀯𑀺𑀪𑀢𑁆𑀢𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨) 𑀯𑀺𑀪𑀢𑁆𑀢𑀸 𑀨𑀲𑁆𑀲𑀸𑀤𑀺𑀲𑀪𑀸𑀯𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀸𑀫𑀜𑁆𑀜𑀯𑀲𑁂𑀦 𑀧𑀯𑀢𑁆𑀢𑀁 𑀓𑀼𑀲𑀮𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁂𑀦 ¶ 𑀧𑀯𑀢𑁆𑀢𑀫𑀸𑀦𑁄 𑀅𑀯𑀢𑁆𑀣𑀸𑀯𑀺𑀲𑁂𑀲𑀲𑀳𑀺𑀢𑁄 𑀏𑀓𑀢𑁆𑀢𑀕𑁆𑀕𑀳𑀡𑀦𑀺𑀩𑀦𑁆𑀥𑀦𑁄 𑀲𑀢𑁆𑀢𑁄𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀲𑁄 𑀲𑀪𑀸𑀯𑀥𑀫𑁆𑀫𑁄 𑀦𑀸𑀫 𑀧𑀦 𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀸𑀬𑀸𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸. 𑀬𑀲𑁆𑀫𑀸 𑀧𑀦 𑀥𑀫𑁆𑀫𑀸𑀦𑀁 𑀧𑀩𑀦𑁆𑀥𑁄 𑀲𑀫𑀽𑀳𑁄 𑀘 𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 ‘‘𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀲𑀪𑀸𑀯𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀧𑀦 ‘‘𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 ‘‘𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄. 𑀬𑀤𑀺 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄 𑀇𑀥 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀓𑀣𑀁 ‘‘𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀦𑀸𑀫𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀻𑀲𑀽’’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼. 𑀬𑁂 𑀥𑀫𑁆𑀫𑁂𑀢𑀺 𑀬𑁂 𑀔𑀦𑁆𑀥𑀸𑀤𑀺𑀥𑀫𑁆𑀫𑁂. 𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀸𑀯𑁂𑀦𑀸𑀢𑀺 𑀧𑀜𑁆𑀜𑀸𑀧𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦. 𑀅𑀥𑀺𑀝𑁆𑀞𑀸𑀦𑀜𑁆𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀥𑀫𑁆𑀫𑀸 𑀧𑀜𑁆𑀜𑀸𑀧𑀦𑀲𑁆𑀲. 𑀏𑀯𑀜𑁆𑀘 𑀓𑀢𑁆𑀯𑀸 𑀔𑀦𑁆𑀥𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑁄 𑀕𑀳𑀺𑀢𑁄. 𑀬𑁂 𑀥𑀫𑁆𑀫𑁂𑀢𑀺 𑀯𑀸 𑀬𑁂 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂. 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑁄𑀢𑀺 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄 𑀯𑀢𑁆𑀣𑀼𑀪𑁂𑀤𑀢𑁄 𑀅𑀲𑀗𑁆𑀓𑀭𑀢𑁄 𑀞𑀧𑁂𑀢𑀼𑀓𑀸𑀫𑁄. 𑀧𑀜𑁆𑀜𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀘 𑀯𑀢𑁆𑀣𑀼𑀪𑁂𑀤𑀪𑀺𑀦𑁆𑀦𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁 𑀧𑀭𑀺𑀘𑁆𑀙𑁂𑀤𑀁. 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀸𑀫𑀜𑁆𑀜𑀧𑁆𑀧𑀪𑁂𑀤𑀧𑀜𑁆𑀜𑀸𑀧𑀦𑀸𑀢𑀺 𑀲𑀸𑀫𑀜𑁆𑀜𑀪𑀽𑀢𑀸𑀦𑀁 𑀯𑀺𑀲𑁂𑀲𑀪𑀽𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀧𑀜𑁆𑀜𑀸𑀧𑀦𑀸. 𑀢𑁂𑀲𑀦𑁆𑀢𑀺 𑀅𑀢𑁆𑀣-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣𑀸𑀢𑀺 𑀧𑀜𑁆𑀜𑀸𑀧𑀦𑀸𑀬 𑀅𑀢𑁆𑀣𑀤𑀲𑁆𑀲𑀦𑀪𑀽𑀢𑁂𑀲𑀼 𑀤𑀲𑁆𑀲𑀦𑀸𑀤𑀻𑀲𑀼. 𑀇𑀤𑀫𑁂𑀯𑀁𑀦𑀸𑀫𑀓𑀦𑁆𑀢𑀺 𑀇𑀤𑀁 𑀭𑀼𑀧𑁆𑀧𑀦𑀸𑀤𑀺𑀅𑀢𑁆𑀣𑀚𑀸𑀢𑀁 𑀇𑀢𑁆𑀣𑀦𑁆𑀦𑀸𑀫𑀓𑀁 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀲𑀫𑀜𑁆𑀜𑀁. 𑀢𑀁𑀢𑀁𑀓𑁄𑀝𑁆𑀞𑀸𑀲𑀺𑀓𑀓𑀭𑀡𑀦𑁆𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀢𑀁𑀢𑀁𑀅𑀢𑁆𑀣𑀯𑀺𑀪𑀸𑀕𑀧𑀭𑀺𑀬𑀸𑀧𑀦𑁆𑀦𑀢𑀸𑀧𑀸𑀤𑀦𑀁. 𑀢𑀣𑀸 𑀲𑀜𑁆𑀜𑀼𑀧𑁆𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀩𑁄𑀥𑀦𑀫𑁂𑀯 𑀦𑀺𑀓𑁆𑀔𑀺𑀧𑀦𑀸’’𑀢𑀺. 𑀩𑁄𑀥𑀦𑀜𑁆𑀳𑀺 𑀩𑁄𑀥𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀩𑁄𑀥𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀞𑀧𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀦𑀺𑀓𑁆𑀔𑀺𑀧𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀜𑁆𑀜𑀸𑀧𑀦𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀲𑀸𑀥𑀦𑁂𑀦 𑀯𑀢𑁆𑀯𑀸 𑀲𑀸𑀥𑀦𑀦𑁆𑀢𑀭𑀸𑀫𑀲𑀦𑁂𑀦 𑀅𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀸𑀲𑀗𑁆𑀓𑀸 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀬𑁄 𑀧𑀦𑀸𑀬𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑀁𑀢𑀁𑀧𑀜𑁆𑀜𑀸𑀧𑁂𑀢𑀩𑁆𑀩𑀥𑀫𑁆𑀫𑀸𑀦𑀁. 𑀤𑀲𑁆𑀲𑀦𑀪𑀽𑀢𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀤𑀺𑀝𑁆𑀞𑀢𑀸𑀬, 𑀞𑀧𑀦𑀪𑀽𑀢𑀸𑀬 𑀞𑀧𑀺𑀢𑀢𑀸𑀬. 𑀢𑀁𑀦𑀺𑀫𑀺𑀢𑁆𑀢𑀢𑀦𑁆𑀢𑀺 𑀢𑀲𑁆𑀲 𑀤𑀲𑁆𑀲𑀦𑀲𑁆𑀲 𑀞𑀧𑀦𑀲𑁆𑀲 𑀘 𑀦𑀺𑀫𑀺𑀢𑁆𑀢𑀓𑀸𑀭𑀡𑀢𑀁. 𑀦𑀺𑀫𑀺𑀢𑁆𑀢𑀜𑁆𑀳𑀺 𑀓𑀢𑁆𑀢𑀼𑀪𑀸𑀯𑁂𑀦 ¶ 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀪𑀺𑀓𑁆𑀔𑀸 𑀯𑀸𑀲𑁂𑀢𑀻’’𑀢𑀺, ‘‘𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀘.

𑀧𑀸𑀴𑀺𑀬𑀁 ¶ 𑀅𑀦𑀸𑀕𑀢𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀢𑀸𑀤𑀺𑀯𑀺𑀲𑁂𑀲𑀯𑀘𑀦𑁂𑀦 𑀲𑀳 𑀧𑀸𑀞𑀸𑀦𑀸𑀭𑀼𑀴𑁆𑀳𑀢𑀁. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀸𑀦𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀚𑁆𑀚𑀫𑀸𑀦𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀢𑀣𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑁆𑀲. 𑀢𑀁 𑀧𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑀁 𑀢𑀣𑀸-𑀲𑀤𑁆𑀤𑁂𑀦 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀻𑀧𑀺𑀢𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀣𑀸 𑀓𑀼𑀲𑀮𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀸𑀦𑀻𑀢𑀺 𑀯𑀺𑀪𑀢𑁆𑀢𑀲𑀪𑀸𑀯𑀸𑀦𑀺. 𑀉𑀧𑀮𑀤𑁆𑀥𑀻𑀢𑀺 𑀕𑀳𑀡𑀁. 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀢𑁂𑀦 𑀭𑀽𑀧𑀯𑁂𑀤𑀦𑀸𑀤𑀺𑀆𑀓𑀸𑀭𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲. 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀢𑀺 𑀢𑀢𑁄 𑀭𑀽𑀧𑀯𑁂𑀤𑀦𑀸𑀤𑀺𑀢𑁄 𑀅𑀜𑁆𑀜𑁂𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁂𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀧𑀜𑁆𑀜𑀸𑀧𑀦𑀸𑀓𑀸𑀭𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲. 𑀧𑀜𑁆𑀜𑀢𑁆𑀢𑀺𑀤𑀼𑀓𑁂 𑀯𑀼𑀢𑁆𑀢𑀫𑁂𑀯 ‘‘𑀅𑀬𑀜𑁆𑀘 𑀯𑀸𑀤𑁄 𑀲𑁂𑀯𑀢𑁆𑀣𑀺𑀓𑀣𑀸𑀬 𑀧𑀝𑀺𑀲𑀺𑀤𑁆𑀥𑁄’’𑀢𑀺𑀆𑀤𑀺𑀦𑀸. 𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀲𑀺𑀤𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀫𑀢𑁆𑀢𑀕𑁆𑀕𑀳𑀡𑀁 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼𑀲𑁆𑀲 𑀦 𑀓𑁂𑀯𑀮𑀁 𑀯𑀺𑀚𑁆𑀚𑀫𑀸𑀦𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑁂𑀯, 𑀅𑀣 𑀔𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑀦𑀺𑀯𑀢𑁆𑀢𑀦𑀢𑁆𑀣𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀪𑀺𑀦𑀺𑀯𑁂𑀲𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀆𑀳. 𑀘𑀢𑀼𑀲𑀘𑁆𑀘𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀲𑀘𑁆𑀘𑀦𑁆𑀢𑀭𑀔𑀦𑁆𑀥𑀦𑁆𑀢𑀭𑀸𑀤𑀺𑀓𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀺𑀓𑀁. 𑀲𑀘𑁂 𑀢𑀁 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀧𑀝𑀺𑀚𑀸𑀦𑁂𑀬𑁆𑀬, 𑀅𑀬𑀸𑀣𑀸𑀯𑀕𑀳𑀺𑀢𑀲𑁆𑀲 𑀢𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀪𑀺𑀦𑀺𑀯𑁂𑀲𑁂𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀉𑀤𑁆𑀤𑁂𑀲𑁂 𑀦𑀺𑀤𑁆𑀤𑁂𑀲𑁂 𑀘 𑀲𑀢𑁆𑀢𑀯𑀦𑁆𑀢𑀁 𑀧𑀥𑀸𑀦𑀪𑀸𑀯𑁂𑀦 𑀆𑀕𑀫𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀭𑀽𑀧𑀢𑁄 𑀢𑀺𑀲𑁆𑀲𑀦𑁆𑀦𑀁 𑀆𑀕𑀢𑀢’’𑀦𑁆𑀢𑀺. 𑀕𑀼𑀡𑀪𑀸𑀯𑁂𑀦 𑀧𑀦 𑀉𑀤𑁆𑀥𑀁𑀲𑁄𑀢𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀧𑀸𑀲𑀸𑀡𑀮𑁂𑀔𑀸𑀤𑀺𑀕𑁆𑀕𑀳𑀡𑁂𑀲𑀼 𑀇𑀢𑀭𑀸𑀧𑀺 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀆𑀕𑀢𑀸 𑀏𑀯.

𑀬𑀣𑀸𑀯𑀼𑀢𑁆𑀢𑀲𑁆𑀲…𑀧𑁂… 𑀅𑀯𑀺𑀭𑁄𑀥𑁂𑀦𑀸𑀢𑀺 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀅𑀯𑀺𑀮𑁄𑀫𑀦𑁂𑀦. 𑀆𑀘𑀭𑀺𑀬𑀯𑀸𑀤𑀸𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀅𑀜𑁆𑀜𑀢𑁆𑀣 𑀧𑀦 𑀅𑀝𑁆𑀞𑀓𑀣𑀸 𑀘. 𑀬𑀣𑀸 𑀘 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀫𑀢𑁆𑀢𑀢𑁆𑀣𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁂𑀦 ‘‘𑀅𑀯𑀺𑀚𑁆𑀚𑀫𑀸𑀦𑀸 𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀁 𑀲𑀫𑀸𑀲𑀯𑀺𑀓𑀧𑁆𑀧𑀫𑀸𑀳. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀳𑀺 𑀤𑁆𑀯𑁂 𑀲𑀫𑀸𑀲𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲, 𑀅𑀯𑀺𑀚𑁆𑀚𑀫𑀸𑀦𑀸 𑀯𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑁂𑀲𑀼 𑀧𑀼𑀭𑀺𑀫𑁂𑀦 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀤𑀼𑀢𑀺𑀬𑁂𑀦 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀸 𑀇𑀢𑀭𑀸𑀧𑀺. 𑀲𑀲𑀪𑀸𑀯𑀁 𑀯𑁂𑀤𑀦𑀸𑀤𑀺𑀓𑀁. 𑀢𑀚𑁆𑀚𑀧𑀭𑀫𑀢𑁆𑀣𑀦𑀸𑀫𑀮𑀸𑀪𑀢𑁄𑀢𑀺 𑀢𑀚𑁆𑀚𑀲𑁆𑀲 𑀢𑀤𑀦𑀼𑀭𑀽𑀧𑀲𑁆𑀲 𑀧𑀭𑀫𑀢𑁆𑀣𑀲𑁆𑀲 𑀅𑀦𑁆𑀯𑀢𑁆𑀣𑀲𑁆𑀲 𑀦𑀸𑀫𑀲𑁆𑀲 𑀮𑀪𑀦𑀢𑁄, 𑀅𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀫𑀢𑁆𑀣𑀺𑀓𑀲𑁆𑀲 𑀯𑁂𑀤𑀦𑀸𑀤𑀺𑀦𑀸𑀫𑀲𑁆𑀲 𑀮𑀪𑀦𑀢𑁆𑀢𑀸𑀢𑀺 𑀅𑀢𑁆𑀣𑁄 ¶ . 𑀏𑀢𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 ¶ 𑀫𑀢𑁆𑀢-𑀲𑀤𑁆𑀤𑁄, 𑀢𑁂𑀦 𑀘𑀸𑀬𑀁 𑀯𑀺𑀲𑁂𑀲𑁄 𑀦𑀺𑀯𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀢𑁄 𑀮𑀪𑀺𑀢𑀩𑁆𑀩𑀦𑁆𑀢𑀺 𑀧𑀭𑀁 𑀉𑀧𑀸𑀤𑀸𑀬 𑀮𑀤𑁆𑀥𑀩𑁆𑀩𑀁 𑀬𑀣𑀸 𑀭𑀽𑀧𑀸𑀤𑀺𑀓𑁂 𑀉𑀧𑀸𑀤𑀸𑀬 𑀲𑀢𑁆𑀢𑁄𑀢𑀺 𑀦𑀺𑀲𑁆𑀲𑀪𑀸𑀯𑀲𑀫𑀽𑀳𑀲𑀦𑁆𑀢𑀸𑀦𑀸𑀤𑀺 𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼. 𑀏𑀓𑀢𑁆𑀢𑁂𑀦𑀸𑀢𑀺 𑀅𑀦𑀜𑁆𑀜𑀢𑁆𑀢𑁂𑀦. 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀢𑀸 𑀜𑀸𑀡𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀲𑀪𑀸𑀯𑀢𑀸, 𑀬𑀢𑁄 𑀢𑁂 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀲𑀲𑀽𑀓𑀲𑀸𑀮𑀺𑀭𑀸𑀲𑀺𑀆𑀤𑀺𑀆𑀓𑀸𑀭𑁂𑀦 𑀲𑀁𑀓𑀼𑀘𑀺𑀢𑀕𑁆𑀕𑁄 𑀯𑀸𑀲𑀯𑀯𑀸𑀲𑀼𑀤𑁂𑀯𑀸𑀤𑀻𑀦𑀁 𑀯𑀺𑀬 𑀫𑁄𑀮𑀺𑀯𑀺𑀲𑁂𑀲𑁄 𑀓𑀺𑀭𑀻𑀝𑀁, 𑀲𑁄 𑀧𑀦 𑀫𑀓𑀼𑀝𑀯𑀺𑀲𑁂𑀲𑁄𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀓𑀺𑀭𑀻𑀝𑀁 𑀫𑀓𑀼𑀝’’𑀦𑁆𑀢𑀺. 𑀲𑀩𑁆𑀩𑀲𑀫𑁄𑀭𑁄𑀥𑁄𑀢𑀺 𑀲𑀩𑁆𑀩𑀸𑀲𑀁 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀙𑀦𑁆𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀅𑀦𑁆𑀢𑁄𑀓𑀭𑀡𑀁. 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸𑀢𑀺 𑀇𑀤𑀁 𑀮𑀓𑁆𑀔𑀡𑀯𑀘𑀦𑀁. 𑀦 𑀳𑀺 𑀲𑀩𑁆𑀩𑀸𑀧𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀯𑀲𑁂𑀦 𑀧𑀯𑀢𑁆𑀢𑀸, 𑀦𑀸𑀧𑀺 𑀲𑀩𑁆𑀩𑀸 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀸. 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺𑀆𑀤𑀺𑀓𑀁 𑀧𑀦 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀬𑀸, 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺𑀓𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀏𑀓𑀤𑁂𑀲𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀘 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀢𑀸𑀬𑀸𑀳 ‘‘𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸’’𑀢𑀺. 𑀧𑀽𑀭𑀡𑀢𑁆𑀣𑁄 𑀳𑀺 𑀲𑀤𑁆𑀤𑁄 𑀢𑀤𑀢𑁆𑀣𑀤𑀻𑀧𑀦𑀫𑀼𑀔𑁂𑀦 𑀧𑀽𑀭𑁂𑀢𑀩𑁆𑀩𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀲𑁄 𑀘 𑀲𑀗𑁆𑀔𑀸𑀯𑀺𑀲𑀬𑁄 𑀧𑀥𑀸𑀦𑁄𑀯𑀸𑀢𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀬𑀸𑀯 𑀳𑀺 𑀤𑀲𑀲𑀗𑁆𑀔𑀸 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸𑀢𑀺. 𑀢𑀣𑀸 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀻𑀦𑀁. 𑀲𑀗𑁆𑀔𑀸𑀢𑀩𑁆𑀩𑁄 𑀧𑀦 𑀅𑀢𑁆𑀣𑁄 𑀓𑁄𑀘𑀺 𑀯𑀺𑀚𑁆𑀚𑀫𑀸𑀦𑁄, 𑀓𑁄𑀘𑀺 𑀅𑀯𑀺𑀚𑁆𑀚𑀫𑀸𑀦𑁄, 𑀓𑁄𑀘𑀺 𑀲𑀳 𑀯𑀺𑀲𑀼𑀜𑁆𑀘 𑀢𑀤𑀼𑀪𑀬𑀁 𑀫𑀺𑀲𑁆𑀲𑁄𑀢𑀺 𑀙𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀪𑀚𑀢𑀻𑀢𑀺.

𑀇𑀢𑀭𑀸𑀢𑀺 𑀉𑀧𑀸𑀤𑀸𑀲𑀫𑁄𑀥𑀸𑀦𑀢𑀚𑁆𑀚𑀸𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀢𑁆𑀢𑀸𑀯𑀲𑁂𑀲𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑁄 𑀘. 𑀲𑀢𑁆𑀢𑀭𑀣𑀸𑀤𑀺𑀪𑁂𑀤𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀤𑀻𑀖𑀭𑀲𑁆𑀲𑀸𑀤𑀺𑀪𑁂𑀤𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀳𑀢𑁆𑀣𑀕𑀢𑀸𑀤𑀺𑀯𑀺𑀲𑀺𑀝𑁆𑀞𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺, 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑀣𑁂𑀯 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑀺𑀆𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑀕𑀩𑁆𑀪𑀸 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀁 𑀪𑀚𑀦𑁆𑀢𑀻𑀢𑀺 𑀆𑀳 ‘‘𑀬𑀣𑀸𑀬𑁄𑀕𑀁 𑀢𑀁 𑀢𑀁 𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑀁 𑀢𑀢𑀺𑀬𑀁…𑀧𑁂… 𑀪𑀚𑀦𑁆𑀢𑀻’’𑀢𑀺. 𑀬𑀜𑁆𑀳𑀻𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀉𑀧𑀦𑀺𑀥𑀸𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑀫𑀢𑁆𑀣𑀦𑀁. 𑀢𑀢𑁆𑀣 𑀢𑀜𑁆𑀘 𑀲𑀗𑁆𑀔𑀸𑀦𑀦𑁆𑀢𑀺 𑀬𑀁 ‘‘𑀧𑀞𑀫𑀁 𑀏𑀓’’𑀦𑁆𑀢𑀺𑀆𑀤𑀺𑀓𑀁 𑀲𑀗𑁆𑀔𑀸𑀦𑀁, 𑀢𑀜𑁆𑀘 𑀲𑀗𑁆𑀔𑀸𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀭𑀽𑀧𑀁. 𑀘-𑀲𑀤𑁆𑀤𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀫𑁆𑀧𑀺 𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀧𑀜𑁆𑀜𑀢𑁆𑀢𑀻𑀢𑀺. 𑀢𑀲𑁆𑀲𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯. 𑀓𑀺𑀜𑁆𑀘𑀺 ¶ 𑀦𑀢𑁆𑀣𑀻𑀢𑀺 𑀧𑀭𑀫𑀢𑁆𑀣𑀢𑁄 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑀣𑀸𑀢𑀺 𑀇𑀫𑀺𑀦𑀸 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀦𑁆𑀢𑀺 𑀏𑀢𑀁 𑀆𑀓𑀟𑁆𑀠𑀢𑀺. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀯𑀺𑀚𑁆𑀚𑀫𑀸𑀦𑁄’’𑀢𑀺.

𑀑𑀓𑀸𑀲𑁂𑀢𑀺 ¶ 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀤𑁂𑀲𑁂. 𑀲𑁄 𑀳𑀺 𑀓𑀸𑀫𑀸𑀥𑀺𑀝𑁆𑀞𑀸𑀦𑀢𑁄 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀽𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀓𑀸𑀫𑀪𑀯𑀁 ‘‘𑀓𑀸𑀫𑁄’’𑀢𑀺 𑀯𑀤𑀢𑀺. 𑀪𑀡𑀦𑀁 𑀲𑀤𑁆𑀤𑁄 𑀘𑁂𑀢𑀦𑀸 𑀯𑀸, 𑀢𑀁𑀲𑀫𑀗𑁆𑀕𑀺𑀢𑀸𑀬 𑀢𑀩𑁆𑀩𑀺𑀲𑀺𑀝𑁆𑀞𑁂 𑀧𑀼𑀕𑁆𑀕𑀮𑁂 𑀪𑀸𑀡𑀓𑁄𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀆𑀳 ‘‘𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑀁 𑀪𑀚𑀢𑀻’’𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀭𑀽𑀧𑀸𑀬𑀢𑀦𑀕𑁆𑀕𑀳𑀡𑀫𑀼𑀔𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑀁 𑀕𑀬𑁆𑀳𑀢𑀻𑀢𑀺 𑀢𑀲𑁆𑀲 𑀢𑁂𑀦 𑀅𑀪𑁂𑀤𑁄𑀧𑀘𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑁂𑀦𑀸’’𑀢𑀺. 𑀬𑀁 𑀅𑀪𑁂𑀤𑁄𑀧𑀘𑀸𑀭𑀁 𑀪𑀺𑀦𑁆𑀤𑀺𑀢𑀼𑀁 𑀅𑀚𑀸𑀦𑀦𑁆𑀢𑀸 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀭𑀽𑀧𑀸𑀬𑀢𑀦𑀁 𑀲𑀡𑁆𑀞𑀸𑀦𑀲𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀺. ‘‘𑀓𑀺𑀲𑁄 𑀧𑀼𑀕𑁆𑀕𑀮𑁄, 𑀣𑀽𑀮𑁄 𑀧𑀼𑀕𑁆𑀕𑀮𑁄, 𑀓𑀺𑀲𑁄 𑀤𑀡𑁆𑀟𑁄, 𑀣𑀽𑀮𑁄 𑀤𑀡𑁆𑀟𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀢𑀣𑀸𑀢𑀣𑀸𑀲𑀦𑁆𑀦𑀺𑀯𑀺𑀝𑁆𑀞𑁂 𑀭𑀽𑀧𑀲𑀗𑁆𑀔𑀸𑀢𑁂 𑀓𑀺𑀲𑀸𑀤𑀺𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀦 𑀭𑀽𑀧𑀸𑀬𑀢𑀦𑀫𑀢𑁆𑀢𑁂𑀢𑀺 𑀆𑀳 ‘‘𑀲𑀡𑁆𑀞𑀸𑀦𑀦𑁆𑀢𑀺 𑀯𑀸 𑀭𑀽𑀧𑀸𑀬𑀢𑀦𑁂 𑀅𑀕𑁆𑀕𑀳𑀺𑀢𑁂’’𑀢𑀺. 𑀧𑀘𑁆𑀘𑀢𑁆𑀢𑀥𑀫𑁆𑀫𑀦𑀸𑀫𑀯𑀲𑁂𑀦𑀸𑀢𑀺 ‘‘𑀧𑀣𑀯𑀻 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀸𑀦𑀁 𑀢𑀁𑀢𑀁𑀦𑀸𑀫𑀯𑀲𑁂𑀦. 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑁂𑀦 𑀧𑀯𑀢𑁆𑀢𑁄 𑀅𑀬𑀫𑁆𑀧𑀺 𑀆𑀘𑀭𑀺𑀬𑀯𑀸𑀤𑁄 ‘‘𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺 𑀏𑀓𑀘𑁆𑀘𑀸 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀪𑀽𑀫𑀺𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦 𑀯𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀥𑀫𑁆𑀫𑀓𑀣𑀸 𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺𑀆𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄, 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀘 𑀤𑀲𑁆𑀲𑀺𑀢𑀦𑀬𑁄𑀢𑀺 𑀆𑀳 ‘‘𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑀸𑀯𑁄 𑀘𑁂𑀢𑁆𑀣 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑀸𑀯𑁄 𑀘 𑀢𑀸𑀲𑀁 𑀬𑀣𑀸𑀭𑀳𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

𑁨. 𑀲𑀗𑁆𑀔𑁂𑀧𑀧𑁆𑀧𑀪𑁂𑀤𑀯𑀲𑁂𑀦𑀸𑀢𑀺 ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀲𑀩𑁆𑀩𑁂𑀧𑀺 𑀔𑀦𑁆𑀥𑁂 𑀔𑀦𑁆𑀥𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀁𑀔𑀺𑀧𑀦𑀯𑀲𑁂𑀦, ‘‘𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀦𑀁 𑀢𑀢𑁄 𑀲𑀸𑀫𑀜𑁆𑀜𑀢𑁄 𑀧𑀓𑀸𑀭𑁂𑀳𑀺 𑀪𑀺𑀦𑁆𑀤𑀦𑀯𑀲𑁂𑀦 𑀘. 𑀅𑀬𑀁 𑀅𑀢𑁆𑀣𑁄𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀢𑁄 𑀯𑀸 𑀳𑀺 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺 𑀯𑀺𑀲𑁂𑀲𑀢𑁄 𑀯𑀸. 𑀯𑀺𑀲𑁂𑀲𑁄 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀧𑀦 𑀲𑁄𑀧𑀺 𑀲𑀸𑀫𑀜𑁆𑀜𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀲𑀗𑁆𑀔𑁂𑀧𑀢𑁄 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 ¶ ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣𑀸𑀧𑀺 ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀸𑀯𑀢𑀸…𑀧𑁂… 𑀧𑀜𑁆𑀜𑀢𑁆𑀢𑀻’’𑀢𑀺. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺. 𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀯𑀫𑁂𑀢𑁆𑀣 𑀧𑀸𑀴𑀺𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀗𑁆𑀔𑁂𑀧𑀢𑁄 𑀧𑀪𑁂𑀤𑀢𑁄 𑀘 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀢𑀺. 𑀢𑀣𑀸 𑀳𑀺 𑀇𑀫𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀪𑀸𑀯𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀢𑀓𑁂𑀦…𑀧𑁂… 𑀆𑀤𑀺𑀓𑁂𑀦𑀸’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀢𑁆𑀣𑀯𑀘𑀦𑁂, 𑀢𑀲𑁆𑀫𑀺𑀁 𑀯𑀸 𑀯𑀺𑀲𑁆𑀲𑀚𑁆𑀚𑀦𑀧𑀸𑀞𑁂 𑀢𑀤𑀢𑁆𑀣𑀯𑀘𑀦𑁂 𑀘. 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀧𑀪𑁂𑀤𑀲𑁆𑀲 𑀉𑀤𑀸𑀳𑀭𑀡𑀫𑀢𑁆𑀢𑀁. 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀪𑀽𑀢𑀼𑀧𑀸𑀤𑀺𑀓𑁄, 𑀲𑀼𑀔𑀸𑀤𑀺𑀓𑁄 𑀘 𑀧𑀪𑁂𑀤𑁄. 𑀢𑀁 𑀧𑀦 𑀪𑀽𑀫𑀺𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀯𑀸𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀯𑀺𑀲𑁆𑀲𑀚𑁆𑀚𑀦𑁂. 𑀇𑀤𑀦𑁆𑀢𑀺 𑀇𑀤𑀁 𑀧𑀤𑀁. 𑀬𑀢𑁆𑀢𑀓𑁄…𑀧𑁂… 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀔𑀦𑁆𑀥𑀸𑀦𑀁 𑀧𑀪𑁂𑀤𑀁 𑀧𑀢𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀪𑁂𑀤𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀧𑀓𑀭𑀡𑀦𑁆𑀢𑀭𑁂𑀢𑀺 𑀯𑀺𑀪𑀗𑁆𑀕𑀧𑀓𑀭𑀡𑁂. 𑀢𑀢𑁆𑀣 𑀳𑀺 𑀲𑀸𑀢𑀺𑀲𑀬𑀁 𑀔𑀦𑁆𑀥𑀸𑀦𑀁 𑀯𑀺𑀪𑀸𑀕𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺…𑀧𑁂… 𑀓𑀣𑀺𑀢𑀸’’𑀢𑀺. 𑀏𑀢𑁆𑀣 𑀘 𑀧𑀞𑀫𑀦𑀬𑁂 𑀲𑀫𑀼𑀔𑁂𑀦, 𑀤𑀼𑀢𑀺𑀬𑁂 𑀯𑀢𑁆𑀣𑀼𑀫𑀼𑀔𑁂𑀦 𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀪𑀸𑀕𑀸 𑀤𑀲𑁆𑀲𑀺𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀯𑀼𑀢𑁆𑀢𑀫𑀢𑁆𑀣𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸𑀤𑀻𑀲𑀼 𑀅𑀢𑀺𑀤𑀺𑀲𑀢𑀺. 𑀢𑀢𑁆𑀣 ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺, ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀆𑀤𑀺𑀧𑀭𑀺𑀬𑁄𑀲𑀸𑀦𑀕𑁆𑀕𑀳𑀡𑀫𑀼𑀔𑁂𑀦 𑀤𑀲𑁆𑀲𑀦𑀁. ‘‘𑀬𑀸𑀯𑀢𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺, ‘‘𑀆𑀬𑀢𑀦𑀸𑀦𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺 𑀏𑀢𑁂𑀦 𑀤𑀲𑁆𑀲𑀺𑀢𑁄, ‘‘𑀬𑀸𑀯𑀢𑀸 𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀧𑀦 ‘‘𑀧𑀪𑁂𑀤𑀢𑁄 𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑁂𑀦𑀸𑀢𑀺. 𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀏𑀢𑁂𑀦 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 ‘‘𑀢𑀢𑁆𑀭𑀸𑀧𑀺 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀸 𑀏𑀢𑁆𑀣 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀸 𑁋 ‘‘𑀬𑀸𑀯𑀢𑀸’’𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺 𑀧𑀤𑁂𑀳𑀺 ¶ 𑀬𑁄𑀚𑁂𑀢𑁆𑀯𑀸 ‘‘𑀬𑀢𑁆𑀢𑀓𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺…𑀧𑁂… 𑀬𑀢𑁆𑀢𑀓𑁄 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁, 𑀢𑀧𑁆𑀧𑀪𑁂𑀤𑀸𑀦𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀪𑁂𑀤𑁄, 𑀢𑀢𑁆𑀢𑀓𑁄 𑀆𑀬𑀢𑀦𑀸𑀦𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄’’𑀢𑀺 𑀧𑀓𑀭𑀡𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 𑀯𑀢𑁆𑀣𑀼𑀧𑀪𑁂𑀤𑁂𑀦 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑀁 𑀤𑀲𑁆𑀲𑁂𑀢𑀻𑀢𑀺𑀆𑀤𑀺𑀦𑀸 𑀇𑀢𑀭𑀧𑀜𑁆𑀜𑀢𑁆𑀢𑀻𑀲𑀼𑀧𑀺 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑁭. ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄…𑀧𑁂… 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀢𑁆𑀢𑀸𑀯𑀢𑀸…𑀧𑁂… 𑀏𑀢𑁆𑀢𑀸𑀯𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀻’’𑀢𑀺 𑀅𑀬𑀁 𑀧𑀸𑀴𑀺𑀧𑀤𑁂𑀲𑁄 𑀦𑀺𑀤𑁆𑀤𑁂𑀲𑁄𑀧𑀺 𑀲𑀫𑀸𑀦𑁄 ¶ 𑀧𑀓𑀭𑀡𑀦𑁆𑀢𑀭𑁂 𑀯𑀢𑁆𑀣𑀼𑀪𑁂𑀤𑁂𑀦 𑀯𑀼𑀢𑁆𑀢𑀁 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺𑀧𑁆𑀧𑀪𑁂𑀤𑀁 𑀉𑀧𑀸𑀤𑀸𑀬 𑀉𑀤𑁆𑀤𑁂𑀲𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 ¶ ¶ 𑀛𑀸𑀧𑀦𑀝𑁆𑀞𑁂𑀦 𑀛𑀸𑀦𑀁, 𑀢𑀢𑁄 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀛𑀸𑀦𑀗𑁆𑀕𑀸𑀦𑁂𑀯 𑀯𑀺𑀫𑁄𑀓𑁆𑀔𑁄𑀢𑀺 𑀅𑀝𑁆𑀞𑀓𑀣𑀸𑀅𑀥𑀺𑀧𑁆𑀧𑀸𑀬𑁄. 𑀝𑀻𑀓𑀸𑀓𑀸𑀭𑁂𑀦 𑀧𑀦 ‘‘𑀅𑀪𑀺𑀪𑀸𑀬𑀢𑀦𑀁 𑀯𑀺𑀬 𑀲𑀲𑀫𑁆𑀧𑀬𑀼𑀢𑁆𑀢𑀁 𑀛𑀸𑀦𑀁 𑀯𑀺𑀫𑁄𑀓𑁆𑀔𑁄’’𑀢𑀺 𑀫𑀜𑁆𑀜𑀫𑀸𑀦𑁂𑀦 ‘‘𑀅𑀥𑀺𑀧𑁆𑀧𑀸𑀬𑁂𑀦𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀥𑀫𑁆𑀫𑀸 𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀦 𑀯𑀺𑀦𑀸, 𑀢𑀣𑀸 𑀅𑀪𑀺𑀭𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀦𑀺𑀭𑀸𑀲𑀗𑁆𑀓𑀧𑁆𑀧𑀯𑀢𑁆𑀢𑀺𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀯𑀸 𑀛𑀸𑀦𑀗𑁆𑀕𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 𑀲𑀯𑀺𑀲𑁂𑀲𑁄 𑀛𑀸𑀦𑀧𑀭𑀺𑀬𑀸𑀬𑁄, 𑀏𑀯𑀁 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀬𑁄𑀕𑀢𑁄 𑀢𑁂𑀲𑀁 𑀲𑀯𑀺𑀲𑁂𑀲𑁄 𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄, 𑀢𑀤𑀼𑀧𑀘𑀸𑀭𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀁 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀦𑁆𑀢𑀺 𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬𑀸𑀳. ‘‘𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀇𑀭𑀺𑀬𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁂𑀦 𑀳𑀺 𑀲𑀤𑁆𑀥𑀺𑀁…𑀧𑁂… 𑀧𑀝𑀺𑀮𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀢𑁂𑀳𑀺 𑀲𑀸𑀥𑁂𑀢𑀩𑁆𑀩𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀮𑀸𑀪𑁄𑀬𑁂𑀯𑁂𑀢𑁆𑀣 𑀧𑀝𑀺𑀮𑀸𑀪𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀨𑀲𑁆𑀲𑁄 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀧𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀆𑀳 ‘‘𑀲𑀫𑁆𑀨𑀲𑁆𑀲𑁂𑀦 𑀨𑀼𑀲𑀦𑀢𑁆𑀣’’𑀦𑁆𑀢𑀺. 𑀢𑀲𑁆𑀲 ‘‘𑀯𑀺𑀯𑀭𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀳𑀻𑀢𑀺 𑀉𑀧𑀘𑀸𑀭𑀫𑁆𑀧𑀻𑀢𑀺𑀆𑀤𑀺𑀦𑀸 𑀉𑀧𑀘𑀸𑀭𑀧𑀼𑀭𑀺𑀫𑀧𑁆𑀧𑀦𑀸𑀧𑀭𑀧𑁆𑀧𑀦𑀸𑀦𑀁 𑀧𑀝𑀺𑀮𑀸𑀪𑀓𑀸𑀭𑀡𑀦𑁆𑀢𑀺 𑀯𑀘𑀦𑁂𑀳𑀺. 𑀇𑀢𑀭𑁂 𑀓𑀸𑀭𑀡𑀢𑁆𑀣𑁂𑀢𑀺 ‘‘𑀉𑀧𑀘𑀸𑀭𑁂𑀦…𑀧𑁂… 𑀨𑀼𑀲𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀓𑀸𑀭𑀡𑀢𑁆𑀣𑀤𑀻𑀧𑀓𑁂 𑀅𑀢𑁆𑀣𑁂. 𑀨𑀼𑀲𑀢𑀺 𑀨𑀮𑀁 𑀅𑀥𑀺𑀕𑀘𑁆𑀙𑀢𑀺 𑀏𑀢𑀸𑀬𑀸𑀢𑀺 𑀓𑀸𑀭𑀡𑀪𑀸𑀯𑀲𑁆𑀲 𑀨𑀼𑀲𑀦𑀸𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀞𑀫𑀢𑁆𑀣𑀫𑁂𑀯𑀸𑀢𑀺 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀫𑁂𑀯. 𑀢𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 𑀇𑀫𑀺𑀦𑀸 𑀛𑀸𑀦𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀬𑁂𑀯 𑀕𑀳𑀺𑀢𑀸, 𑀦 𑀨𑀲𑁆𑀲𑀧𑀜𑁆𑀘𑀫𑀓𑀇𑀦𑁆𑀤𑁆𑀭𑀺𑀬𑀝𑁆𑀞𑀓𑀸𑀤𑀺𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀸…𑀧𑁂… 𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺. 𑀏𑀯𑀁 𑀲𑀢𑀻𑀢𑀺 𑀲𑀼𑀔𑀲𑀗𑁆𑀔𑀸𑀢𑀛𑀸𑀦𑀗𑁆𑀕𑀢𑁄 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑁂𑀲𑀺𑀢𑀩𑁆𑀩𑀪𑀸𑀯𑁂 ¶ 𑀲𑀢𑀺. 𑀏𑀯𑀜𑁆𑀳𑀺 𑀦𑁂𑀲𑀁 𑀨𑀲𑁆𑀲𑀓𑀢𑀸 𑀇𑀢𑀭𑀲𑁆𑀲 𑀨𑀲𑁆𑀲𑀺𑀢𑀩𑁆𑀩𑀢𑀸𑀯 𑀲𑀺𑀬𑀸. 𑀢𑁂𑀦𑀸𑀳 ‘‘𑀲𑀼𑀔𑀲𑁆𑀲 𑀨𑀼𑀲𑀺𑀢𑀩𑁆𑀩𑀢𑁆𑀢𑀸’’𑀢𑀺. 𑀯𑁂𑀤𑀬𑀺𑀢𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀳𑀻𑀢𑀺 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀲𑀗𑁆𑀔𑀸𑀢𑁂𑀦 𑀯𑁂𑀤𑀬𑀺𑀢𑀲𑀪𑀸𑀯𑁂𑀦, 𑀢𑀲𑁆𑀲𑁂𑀯 𑀲𑀸𑀢𑀯𑀺𑀲𑁂𑀲𑀲𑀗𑁆𑀔𑀸𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁂𑀦 𑀘. 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑁄𑀧𑀺 𑀬𑀣𑀸𑀯𑀼𑀢𑁆𑀢𑀯𑁂𑀤𑀬𑀺𑀢𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑀯𑀺𑀲𑀺𑀝𑁆𑀞𑁄 𑀑𑀴𑀸𑀭𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀦𑀺𑀚𑁆𑀛𑀸𑀬𑀦𑀪𑀸𑀯𑁄. 𑀅𑀪𑀺𑀦𑁆𑀦𑀲𑀪𑀸𑀯𑁄𑀧𑀺 𑀳𑀺 𑀥𑀫𑁆𑀫𑁄 𑀧𑀼𑀭𑀺𑀫𑀯𑀺𑀲𑀺𑀝𑁆𑀞𑀧𑀘𑁆𑀘𑀬𑀯𑀺𑀲𑁂𑀲𑀲𑀫𑁆𑀪𑀯𑁂𑀦 𑀯𑀺𑀲𑁂𑀲𑁂𑀦 ¶ 𑀪𑀺𑀦𑁆𑀦𑀸𑀓𑀸𑀭𑁄 𑀳𑀼𑀢𑁆𑀯𑀸 𑀯𑀺𑀲𑀺𑀝𑁆𑀞𑀨𑀮𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀬𑀣𑁂𑀓𑀁𑀬𑁂𑀯 𑀓𑀫𑁆𑀫𑀁 𑀘𑀓𑁆𑀔𑀸𑀤𑀺𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑁂𑀤𑀬𑀺𑀢𑀸…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀅𑀗𑁆𑀕𑀸𑀦𑀻𑀢𑀺 𑀦𑀸𑀬𑀁 𑀢𑀧𑁆𑀧𑀭𑀪𑀸𑀯𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀅𑀦𑀦𑁆𑀢𑀪𑀸𑀯𑀢𑁄, 𑀓𑁂𑀯𑀮𑀜𑁆𑀘 𑀅𑀗𑁆𑀕𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁, 𑀢𑁂𑀦 𑀓𑀺𑀁 𑀲𑀺𑀤𑁆𑀥𑀁? 𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺. 𑀬𑀤𑀺 ‘‘𑀲𑀼𑀔𑀁 𑀞𑀧𑁂𑀢𑁆𑀯𑀸’’𑀢𑀺 𑀬𑁄𑀚𑀦𑀸𑀬𑀁 𑀲𑁂𑀲𑀸 𑀢𑀬𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀲𑁂𑀲𑀸 𑀢𑀬𑁄, 𑀘𑀢𑁆𑀢𑀸𑀭𑁄 𑀘 𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦, 𑀘𑀢𑀽𑀲𑀼 𑀢𑀺𑀡𑁆𑀡𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀩𑁆𑀩𑀬𑁄𑀚𑀦𑀸…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑁨. 𑀅𑀲𑀫𑀬𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑀳𑁂𑀝𑁆𑀞𑀸𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦. 𑀲𑁄 𑀳𑀺 𑀮𑁄𑀓𑀺𑀬𑀯𑀺𑀫𑁄𑀓𑁆𑀔𑁄 𑀯𑀺𑀬 𑀅𑀥𑀺𑀕𑀫𑀯𑀴𑀜𑁆𑀚𑀦𑀢𑁆𑀣𑀁 𑀧𑀓𑀧𑁆𑀧𑁂𑀢𑀩𑁆𑀩𑀲𑀫𑀬𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑁄. 𑀅𑀕𑁆𑀕𑀫𑀕𑁆𑀕𑀯𑀺𑀫𑁄𑀓𑁆𑀔𑁄 𑀧𑀦 𑀏𑀓𑀘𑁆𑀘𑀸𑀲𑀯𑀯𑀺𑀫𑀼𑀢𑁆𑀢𑀺𑀯𑀘𑀦𑀢𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺. 𑀏𑀓𑀘𑁆𑀘𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀤𑀺𑀝𑁆𑀞𑀸𑀲𑀯𑀸𑀤𑀻𑀳𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄. 𑀅𑀲𑀫𑀬…𑀧𑁂… 𑀮𑀸𑀪𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀅𑀲𑀫𑀬𑀯𑀺𑀫𑁄𑀓𑁆𑀔𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀅𑀥𑀺𑀕𑀫𑁂𑀦. 𑀢𑀢𑁄 𑀏𑀯 𑀲𑀸𑀢𑀺𑀲𑀬𑁂𑀦, 𑀏𑀓𑀘𑁆𑀘𑁂𑀳𑀺 𑀓𑀸𑀫𑀸𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀏𑀯 𑀏𑀓𑀘𑁆𑀘𑀲𑀫𑀬𑀯𑀺𑀫𑁄𑀓𑁆𑀔𑀮𑀸𑀪𑀻 𑀬𑀣𑀸𑀯𑀼𑀢𑁆𑀢𑁄 𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀲𑁆𑀲 𑀯𑀲𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑀧𑀜𑁆𑀜𑀢𑁆𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁄𑀢𑀺 𑀅𑀲𑀫𑀬𑀯𑀺𑀫𑁄𑀓𑁆𑀔𑀽𑀧𑀦𑀺𑀲𑁆𑀲𑀬𑀲𑀫𑀬𑀯𑀺𑀫𑁄𑀓𑁆𑀔𑀮𑀸𑀪𑀻. 𑀢𑁂𑀦 𑀲𑀸𑀢𑀺𑀲𑀬𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑁂𑀦. 𑀢𑀣𑀸𑀯𑀺𑀫𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀣𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀮𑀤𑁆𑀥𑀼𑀁 𑀅𑀭𑀳𑀢𑀻𑀢𑀺 𑀧𑀭𑀺𑀜𑁆𑀜𑀸𑀢𑀢𑁆𑀣𑀁 𑀳𑁂𑀢𑀼𑀦𑀸 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦𑀧𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀧𑀼𑀣𑀼𑀚𑁆𑀚𑀦𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀼𑀤𑀸𑀘𑀸𑀭𑀪𑀸𑀯𑀢𑁄𑀢𑀺 𑀲𑀫𑀼𑀤𑀸𑀘𑀸𑀭𑀲𑁆𑀲 𑀲𑀫𑁆𑀪𑀯𑀢𑁄. 𑀲𑁄𑀢𑀺 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄.

𑀬𑀤𑀺 𑀧𑀼𑀦𑀭𑀸𑀯𑀢𑁆𑀢𑀓𑀥𑀫𑁆𑀫𑀢𑀸𑀬 𑀧𑀼𑀣𑀼𑀚𑁆𑀚𑀦𑁄 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀦 𑀯𑀼𑀢𑁆𑀢𑁄, 𑀢𑀤𑀪𑀸𑀯𑀢𑁄 𑀓𑀲𑁆𑀫𑀸 𑀅𑀭𑀳𑀸 𑀢𑀣𑀸 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀭𑀳𑀢𑁄 𑀧𑀦𑀸’’𑀢𑀺𑀆𑀤𑀺. 𑀢𑀤𑀓𑀸𑀭𑀡𑀪𑀸𑀯𑀦𑁆𑀢𑀺 𑀢𑁂𑀲𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀢𑀲𑁆𑀲 𑀯𑀸 𑀲𑀫𑀬𑀯𑀺𑀫𑀼𑀢𑁆𑀢𑀺𑀪𑀸𑀯𑀲𑁆𑀲 𑀅𑀓𑀸𑀭𑀡𑀪𑀸𑀯𑀁. 𑀲𑀩𑁆𑀩𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀧𑀺 𑀲𑀫𑀣𑀬𑀸𑀦𑀺𑀓𑁄𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻𑀧𑀺 ¶ . 𑀩𑀳𑀺𑀅𑀩𑁆𑀪𑀦𑁆𑀢𑀭𑀪𑀸𑀯𑀸 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀸, 𑀯𑀢𑁆𑀢𑀼 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀭𑀽𑀧𑀸 𑀘𑀸𑀢𑀺 𑀆𑀳 ‘‘𑀩𑀸𑀳𑀺𑀭𑀸𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀢𑁄 𑀩𑀳𑀺𑀪𑀽𑀢𑀸𑀦’’𑀦𑁆𑀢𑀺.

𑁩. 𑀭𑀽𑀧𑀢𑁄 ¶ 𑀅𑀜𑁆𑀜𑀁 𑀦 𑀭𑀽𑀧𑀦𑁆𑀢𑀺 𑀢𑀢𑁆𑀣 𑀭𑀽𑀧𑀧𑀝𑀺𑀪𑀸𑀕𑀁 𑀓𑀲𑀺𑀡𑀭𑀽𑀧𑀸𑀤𑀺 𑀭𑀽𑀧-𑀲𑀤𑁆𑀤𑁂𑀦 𑀕𑀳𑀺𑀢𑀦𑁆𑀢𑀺 𑀢𑀤𑀜𑁆𑀜𑀁 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀲𑀬𑀫𑀢𑁆𑀢𑀁 𑀅𑀭𑀽𑀧𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀯𑀺𑀦𑀺𑀫𑀼𑀢𑁆𑀢𑀁 𑀅𑀭𑀽𑀧-𑀲𑀤𑁆𑀤𑁂𑀦 𑀕𑀳𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀧𑀓𑁆𑀔𑀪𑀽𑀢𑁂𑀳𑀺 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀫𑀽𑀲𑀺𑀢𑀩𑁆𑀩𑀁 𑀛𑀸𑀦𑀫𑁂𑀯 𑀘𑀺𑀢𑁆𑀢𑀫𑀜𑁆𑀚𑀽𑀲𑀁. 𑀲𑀫𑀸𑀥𑀺𑀦𑁆𑀢𑀺 𑀯𑀸 𑀲𑀫𑀸𑀥𑀺𑀲𑀻𑀲𑁂𑀦 𑀛𑀸𑀦𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀫𑀸𑀤𑁂𑀦𑀸𑀢𑀺 𑀏𑀢𑁆𑀣 𑀅𑀦𑀸𑀕𑀸𑀫𑀺𑀦𑁄 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀓𑁆𑀓𑀘𑁆𑀘𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀤𑀺𑀦𑀸. 𑀔𑀻𑀡𑀸𑀲𑀯𑀲𑁆𑀲 𑀧𑀦 𑀢𑀸𑀤𑀺𑀲𑁂𑀦 𑀧𑀫𑀸𑀤𑀧𑀢𑀺𑀭𑀽𑀧𑀓𑁂𑀦, 𑀢𑀸𑀤𑀺𑀲𑀸𑀬 𑀯𑀸 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬. 𑀲𑀸 𑀘𑀲𑁆𑀲 𑀉𑀲𑁆𑀲𑀼𑀓𑁆𑀓𑀸𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀸 𑀳𑀺 𑀢𑁂 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀲𑀫𑀬𑁂𑀦 𑀲𑀫𑀬𑀦𑁆𑀢𑀺 𑀲𑀫𑀬𑁂 𑀲𑀫𑀬𑁂. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀓𑀭𑀡𑀯𑀘𑀦𑀁 𑀉𑀧𑀬𑁄𑀕𑀯𑀘𑀦𑀜𑁆𑀘. 𑀅𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀅𑀲𑁆𑀲𑀸𑀢𑀺 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲. 𑀢𑁂𑀦𑀸𑀢𑀺 𑀬𑀣𑀸𑀪𑀢𑁂𑀦 𑀲𑀼𑀢𑁆𑀢𑁂𑀦.

𑁫. 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀥𑀫𑁆𑀫𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀇𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑀸𑀢𑀺 ‘‘𑀧𑀭𑀺𑀳𑀸𑀦𑀥𑀫𑁆𑀫𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂. 𑀢𑀢𑁆𑀣𑀸𑀢𑀺 ‘‘𑀓𑀼𑀧𑁆𑀧𑀥𑀫𑁆𑀫𑁄 𑀅𑀓𑀼𑀧𑁆𑀧𑀥𑀫𑁆𑀫𑁄’’𑀢𑀺 𑀧𑀤𑀤𑁆𑀯𑀬𑁂. 𑀲𑀢𑀺 𑀯𑀘𑀦𑀦𑀸𑀦𑀢𑁆𑀢𑁂 𑀅𑀢𑁆𑀣𑁂𑀯 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀸’’𑀢𑀺. 𑀯𑀘𑀦𑀢𑁆𑀣𑀕𑁆𑀕𑀳𑀡𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀲𑁆𑀲 𑀧𑀦 𑀯𑀺𑀪𑀸𑀯𑀦𑀢𑁆𑀣𑀲𑁆𑀲 𑀦𑀢𑁆𑀣𑁂𑀢𑁆𑀣 𑀦𑀸𑀦𑀢𑁆𑀢𑀁, 𑀬𑀢𑁄 𑀢𑁂𑀲𑀁 𑀧𑀭𑀺𑀬𑀸𑀬𑀦𑁆𑀢𑀭𑀢𑀸𑀲𑀺𑀤𑁆𑀥𑀺.

𑁭-𑁮. 𑀲𑀫𑀸𑀧𑀢𑁆𑀢𑀺𑀘𑁂𑀢𑀦𑀸𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀺 𑀲𑀫𑀸𑀧𑀚𑁆𑀚𑀢𑀺 𑀘. 𑀢𑁂𑀦𑀸𑀳 ‘‘𑀢𑀤𑀸𑀬𑀽𑀳𑀦𑀸’’𑀢𑀺. 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀅𑀦𑀼𑀭𑀓𑁆𑀔𑀡𑀸…𑀧𑁂… 𑀲𑀢𑀻’’𑀢𑀺. 𑀢𑁂𑀦𑀸𑀳 ‘‘𑀏𑀓𑀸𑀭𑀓𑁆𑀔𑁄 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺. 𑀢𑀣𑀸 𑀳𑀺 𑀲𑀸 ‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀢𑀻’’𑀢𑀺 𑀯𑀼𑀢𑁆𑀢𑀸.

𑁧𑁧. 𑀅𑀕𑁆𑀕𑀫𑀕𑁆𑀕𑀝𑁆𑀞𑁄𑀧𑀺 𑀇𑀢𑀭𑀫𑀕𑁆𑀕𑀝𑁆𑀞𑀸 𑀯𑀺𑀬 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀬𑀢𑁆𑀢𑀸 𑀪𑀬𑀽𑀧𑀭𑀢𑀯𑁄𑀳𑀸𑀭𑀁 𑀮𑀪𑀢𑀻𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀘…𑀧𑁂… 𑀪𑀬𑀽𑀧𑀭𑀢𑁄’’𑀢𑀺.

𑁧𑁨. 𑀓𑁂𑀘𑀻𑀢𑀺 ¶ 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀫𑀦𑁆𑀤𑀩𑀼𑀤𑁆𑀥𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀧𑁆𑀧𑀜𑁆𑀜𑀸𑀢𑀺 𑀇𑀫𑀺𑀦𑀸 𑀕𑀬𑁆𑀳𑀦𑁆𑀢𑀻’’𑀢𑀺. 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀬𑁂𑀲𑀁 𑀢𑁂 𑀤𑀼𑀧𑁆𑀧𑀜𑁆𑀜𑀸𑀢𑀺.

𑁧𑁪. 𑀅𑀦𑀺𑀬𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀲𑁆𑀲𑁂𑀯 ¶ 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀦𑀺𑀬𑀢𑀥𑀫𑁆𑀫𑀧𑀝𑀺𑀮𑀸𑀪𑁄𑀢𑀺 𑀆𑀳 ‘‘𑀬𑀢𑁆𑀣…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀢𑀤𑀪𑀸𑀯𑀸𑀢𑀺 𑀦𑀺𑀬𑀢𑀸𑀦𑀺𑀬𑀢𑀯𑁄𑀫𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀸.

𑁧𑁬. 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀻𑀢𑀺 𑀧𑀭𑀺𑀬𑀸𑀤𑀓𑁂𑀦 𑀫𑀕𑁆𑀕𑁂𑀦 𑀔𑁂𑀧𑁂𑀢𑀩𑁆𑀩𑀸𑀦𑀺. 𑀢𑀡𑁆𑀳𑀸𑀤𑀻𑀦𑀁 𑀧𑀮𑀺𑀩𑀼𑀥𑀦𑀸𑀤𑀺𑀓𑀺𑀭𑀺𑀬𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀻𑀲𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀯𑀺𑀲𑀗𑁆𑀔𑀸𑀭𑀪𑀸𑀯𑀢𑁄 𑀲𑀗𑁆𑀔𑀸𑀭𑀲𑀻𑀲𑀢𑀸. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄’’𑀢𑀺. 𑀓𑁂𑀘𑀺 𑀧𑀦 ‘‘𑀲𑀗𑁆𑀔𑀸𑀭𑀲𑀻𑀲𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀲𑁆𑀲 𑀲𑀻𑀲𑀪𑀸𑀯𑀸𑀦𑀼𑀧𑀧𑀢𑁆𑀢𑀺𑀢𑁄 𑀢𑀤𑀼𑀤𑁆𑀥𑀜𑁆𑀘 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀲𑀳 𑀯𑀺𑀬𑀸𑀢𑀺 𑀏𑀓𑀚𑁆𑀛𑀁 𑀯𑀺𑀬. 𑀏𑀢𑁂𑀦 𑀲𑀫-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀲𑀳𑀢𑁆𑀣𑁄 𑀳𑁂𑀲 𑀲𑀫-𑀲𑀤𑁆𑀤𑁄. 𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀁𑀲𑀺𑀤𑁆𑀥𑀺𑀬𑀸 𑀦𑀺𑀝𑁆𑀞𑀸𑀦𑀲𑁆𑀲 𑀉𑀧𑀭𑀫𑀲𑁆𑀲 𑀤𑀲𑁆𑀲𑀦𑁂𑀦.

𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺𑀬𑀸, 𑀇𑀫𑀺𑀲𑁆𑀲𑀸 𑀯𑀸 𑀢𑀤𑀝𑁆𑀞𑀓𑀣𑀸𑀬. 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀦𑁆𑀢𑀺 𑀓𑀺𑀮𑁂𑀲𑀲𑀻𑀲𑀧𑀯𑀢𑁆𑀢𑀲𑀻𑀲𑀸𑀦𑀁. 𑀢𑁂𑀲𑀼 𑀳𑀺 𑀕𑀳𑀺𑀢𑁂𑀲𑀼 𑀇𑀢𑀭𑀫𑁆𑀧𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀁 𑀓𑀺𑀮𑁂𑀲𑀪𑀸𑀯𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑁂𑀦 𑀘 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀓𑀺𑀮𑁂𑀲𑀯𑀝𑁆𑀝𑀧𑀭𑀺𑀬𑀸𑀤𑀸𑀦𑁂𑀦 𑀫𑀕𑁆𑀕𑀲𑁆𑀲 𑀇𑀢𑀭𑀯𑀝𑁆𑀝𑀸𑀦𑀫𑁆𑀧𑀺 𑀧𑀭𑀺𑀬𑀸𑀤𑀺𑀬𑀦𑀁. 𑀯𑀝𑁆𑀝𑀼𑀧𑀘𑁆𑀙𑁂𑀤𑀓𑁂𑀦 𑀫𑀕𑁆𑀕𑁂𑀦𑁂𑀯 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀅𑀦𑀯𑀲𑁂𑀲𑀢𑁄 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀯𑀢𑁆𑀢𑀲𑀻𑀲𑀁 𑀯𑀺𑀲𑀼𑀁 𑀕𑀳𑀺𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀯𑀢𑁆𑀢𑀲𑀻𑀲𑀫𑁆𑀧𑀻’’𑀢𑀺𑀆𑀤𑀺. 𑀑𑀥𑀺𑀲𑁄 𑀘 𑀅𑀦𑁄𑀥𑀺𑀲𑁄 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂 𑀲𑀢𑀺 𑀲𑀺𑀚𑁆𑀛𑀫𑀸𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀢𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀆𑀕𑀫𑁂𑀦 𑀲𑀸𑀥𑁂𑀦𑁆𑀢𑁄 ‘‘𑀯𑀺𑀫𑀼𑀢𑁆𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑀫𑀸𑀧𑀦𑀪𑀽𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑀼𑀢𑀺𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑁂𑀤𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁭. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀦 𑀉𑀧𑀕𑀘𑁆𑀙𑁂𑀬𑁆𑀬. 𑀞𑀸𑀦𑀜𑁆𑀳𑀺 𑀕𑀢𑀺𑀦𑀺𑀯𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺.

𑁧𑁮. 𑀧𑀬𑀺𑀭𑀼𑀧𑀸𑀲𑀦𑀸𑀬 𑀩𑀳𑀽𑀧𑀓𑀸𑀭𑀢𑁆𑀢𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁆𑀢𑀸.

𑁨𑁦. 𑀅𑀕𑁆𑀕𑀯𑀺𑀚𑁆𑀚𑀸 ¶ 𑀬𑀲𑁆𑀲 𑀅𑀦𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀳𑁄𑀢𑀺, 𑀲𑁄 𑀘𑁂 𑀧𑀘𑁆𑀙𑀸 𑀯𑀺𑀚𑁆𑀚𑀸𑀤𑁆𑀯𑀬𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀲𑁆𑀲 𑀧𑀞𑀫𑀁 𑀅𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀯𑀺𑀬 𑀅𑀢𑁂𑀯𑀺𑀚𑁆𑀚𑀢𑀸𑀪𑀸𑀯𑀸 ¶ 𑀬𑀤𑀺𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑀸 𑀢𑁂𑀯𑀺𑀚𑁆𑀚𑀢𑀸, 𑀧𑀞𑀫𑀁 𑀅𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀧𑀦 𑀲𑀸 𑀲𑀯𑀺𑀲𑁂𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀬 𑀓𑀢𑀓𑀺𑀘𑁆𑀘𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀯𑀺𑀚𑁆𑀚𑀸𑀢𑀺 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀫𑁂𑀯 𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀘 𑀢𑁂𑀯𑀺𑀚𑁆𑀚𑀢𑀸𑀢𑀺 𑀬𑁄𑀚𑀦𑀸.

𑁨𑁨. 𑀢𑀢𑁆𑀣𑁂𑀯𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁂 𑀏𑀯.

𑁨𑁪. 𑀢𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀢𑀸𑀯𑀘𑀦𑀁. 𑀯𑀼𑀢𑁆𑀢𑀮𑀓𑁆𑀔𑀡𑀽𑀧𑀧𑀢𑁆𑀢𑀺𑀓𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀲𑀫𑀦𑁆𑀦𑀸𑀕𑀢𑁄. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀦𑀺𑀭𑁄𑀥𑀢𑁄 𑀘 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀢𑀣𑀸 𑀲𑁂𑀓𑁆𑀔𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀓𑀸𑀬𑀲𑀓𑁆𑀔𑀺𑀦𑁄 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀤𑀲𑁆𑀲𑀦𑀓𑀸𑀭𑀡𑀸𑀢𑀺 𑀇𑀫𑀺𑀦𑀸 ‘‘𑀤𑀺𑀲𑁆𑀯𑀸’’𑀢𑀺 𑀏𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼. 𑀤𑀲𑁆𑀲𑀦𑁂 𑀲𑀢𑀺 𑀧𑀭𑀺𑀓𑁆𑀔𑀬𑁄, 𑀦𑀸𑀲𑀢𑀻𑀢𑀺 𑀆𑀳 ‘‘𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸’’𑀢𑀺. 𑀧𑀼𑀭𑀺𑀫𑀓𑀺𑀭𑀺𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀺𑀭𑀺𑀬𑀸. 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀳𑀺 𑀓𑀸𑀭𑀡𑀓𑀺𑀭𑀺𑀬𑀸 𑀨𑀮𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀲𑀺𑀤𑁆𑀥𑀸 𑀯𑀺𑀬 𑀯𑁄𑀳𑀭𑀻𑀬𑀢𑀺. 𑀢𑀢𑁄 𑀦𑀸𑀫𑀓𑀸𑀬𑀢𑁄 𑀫𑀼𑀘𑁆𑀘𑀦𑀢𑁄. 𑀬𑀢𑁄 𑀳𑀺 𑀬𑁂𑀦 𑀫𑀼𑀘𑁆𑀘𑀺𑀢𑀩𑁆𑀩𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀸𑀫𑀦𑀺𑀲𑁆𑀲𑀺𑀢𑀓𑁄’’𑀢𑀺. 𑀢𑀲𑁆𑀲𑀸𑀢𑀺 𑀓𑀸𑀬𑀤𑁆𑀯𑀬𑀯𑀺𑀫𑀼𑀢𑁆𑀢𑀺𑀬𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀲𑁆𑀲. 𑀅𑀭𑀽𑀧𑀮𑁄𑀓𑁂 𑀳𑀺 𑀞𑀺𑀢𑀸𑀭𑀳𑀦𑁆𑀢𑀯𑀲𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀼𑀢𑁆𑀢𑁂 𑀳𑀻’’𑀢𑀺𑀆𑀤𑀺.

𑀤𑁆𑀯𑀻𑀳𑀺 𑀪𑀸𑀕𑁂𑀳𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀪𑀸𑀕𑁂𑀳𑀺. 𑀤𑁆𑀯𑁂 𑀯𑀸𑀭𑁂𑀢𑀺 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀇𑀤𑀁 𑀧𑀞𑀫𑀢𑀢𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀤𑀼𑀢𑀺𑀬𑀯𑀸𑀤𑀲𑁆𑀲. 𑀅𑀭𑀽𑀧𑀚𑁆𑀛𑀸𑀦𑀁 𑀬𑀤𑀺𑀧𑀺 𑀭𑀽𑀧𑀲𑀜𑁆𑀜𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀁 𑀢𑀁𑀲𑀫𑀢𑀺𑀓𑁆𑀓𑀫𑀸𑀤𑀺𑀦𑀸 𑀧𑀢𑁆𑀢𑀩𑁆𑀩𑀢𑁆𑀢𑀸, 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂𑀳𑀺 𑀧𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺𑀬𑁂𑀯𑀲𑁆𑀲 𑀯𑀺𑀫𑀼𑀢𑁆𑀢𑀺 𑀲𑀸𑀢𑀺𑀲𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀆𑀳. 𑀬𑀜𑁆𑀘𑀸𑀧𑀺 𑀅𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀮𑁄𑀓𑁂 𑀯𑀺𑀯𑁂𑀓𑀝𑁆𑀞𑀢𑀸𑀯𑀲𑁂𑀦𑀧𑀺 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀁, 𑀢𑀁 𑀧𑀦 𑀭𑀽𑀧𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑁂𑀦𑁂𑀯 𑀳𑁄𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 ¶ 𑀧𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀢𑀡𑁆𑀳𑀸𑀯𑀺𑀓𑁆𑀔𑀫𑁆𑀪𑀦𑁂𑀦 ¶ 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸’’𑀢𑀺. 𑀏𑀓𑀤𑁂𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀅𑀪𑀸𑀯𑀸.

𑁨𑁫. ‘‘𑀲𑀢𑁆𑀢𑀺𑀲𑀬𑁄’’𑀢𑀺 𑀯𑀺𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦…𑀧𑁂… 𑀯𑀼𑀘𑁆𑀘𑀢𑀻’’𑀢𑀺.

𑁨𑁬. 𑀨𑀼𑀝𑁆𑀞𑀸𑀦𑀦𑁆𑀢𑀺 𑀨𑀲𑁆𑀲𑀺𑀢𑀸𑀦𑀁, 𑀅𑀥𑀺𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀢𑀺 𑀅𑀦𑁆𑀢𑀲𑀤𑀺𑀲𑁄 𑀨𑀲𑁆𑀲𑀦𑀸𑀬 𑀧𑀭𑀓𑀸𑀮𑁄. 𑀢𑀤𑀦𑀦𑁆𑀢𑀭𑁄 𑀳𑀺 𑀢𑀧𑁆𑀧𑀭𑀺𑀬𑁄𑀲𑀸𑀦𑁄 𑀯𑀺𑀬 𑀳𑁄𑀢𑀻𑀢𑀺. 𑀓𑀸𑀮𑀯𑀺𑀲𑀬𑁄 𑀘𑀸𑀬𑀁 𑀅𑀦𑁆𑀢-𑀲𑀤𑁆𑀤𑁄, 𑀦 𑀧𑀦 𑀓𑀸𑀮𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄𑀢𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄. 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀩𑀦𑁆𑀥𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀮𑁄𑀘𑀦𑁂 𑀧𑀓𑀸𑀲𑀦𑁂 𑀲𑀫𑀢𑁆𑀣𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑀼𑀧𑁆𑀧𑀸𑀤𑀦𑀢𑁄. 𑀦 𑀢𑀼 𑀯𑀺𑀫𑀼𑀢𑁆𑀢𑁄𑀢𑀺 𑀯𑀺𑀫𑀼𑀢𑁆𑀢𑁄𑀢𑀺 𑀦 𑀯𑀼𑀘𑁆𑀘𑀢𑁂𑀯.

𑁨𑁮. 𑀇𑀫𑀁 𑀧𑀦 𑀦𑀬𑀦𑁆𑀢𑀺 ‘‘𑀅𑀧𑀺𑀘 𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀯𑀺𑀥𑀺𑀁. 𑀬𑁂𑀦 𑀯𑀺𑀲𑁂𑀲𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑀯𑀺𑀲𑁂𑀲𑁂𑀦. 𑀲𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑁄 𑀧𑀜𑁆𑀜𑀸𑀬 𑀯𑀺𑀲𑁂𑀲𑁄. 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀓𑀸𑀭𑀡𑀲𑁆𑀲 𑀅𑀯𑀺𑀪𑀸𑀯𑀺𑀢𑀢𑁆𑀢𑀸. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀺𑀬, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀯𑀺𑀬 𑀯𑀸 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲 𑀲𑀸𑀯𑀲𑁂𑀲𑀯𑀺𑀫𑀼𑀢𑁆𑀢𑀺𑀬𑀫𑁆𑀧𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀯𑀺𑀬 𑀧𑀜𑁆𑀜𑀸𑀬 𑀲𑀸𑀢𑀺𑀲𑀬𑀸𑀬 𑀅𑀪𑀸𑀯𑀢𑁄 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀇𑀤𑀁 𑀆𑀕𑀫𑀦𑀯𑀲𑁂𑀦 𑀲𑀤𑁆𑀥𑀸𑀬 𑀅𑀥𑀺𑀓𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀦𑀲𑁆𑀲 𑀧𑀘𑁆𑀘𑀓𑁆𑀔𑀫𑁂𑀯 𑀜𑀸𑀡𑀤𑀲𑁆𑀲𑀦𑀁.

𑁩𑁧. ‘‘𑀲𑁄𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀸𑀫’’𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀁𑀲𑀫𑀗𑁆𑀕𑀻 𑀲𑁄𑀢𑀸𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑀓𑁄 ‘‘𑀅𑀧𑀺-𑀲𑀤𑁆𑀤𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄’’𑀢𑀺 𑀘𑁄𑀤𑀦𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀇𑀢𑀭𑁄 ‘‘𑀦𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀦𑀸𑀫 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸. 𑀇𑀢𑀭𑁂𑀳𑀻𑀢𑀺 𑀤𑀼𑀢𑀺𑀬𑀫𑀕𑁆𑀕𑀝𑁆𑀞𑀸𑀤𑀻𑀳𑀺. 𑀲𑁄 𑀏𑀯𑀸𑀢𑀺 𑀧𑀞𑀫𑀨𑀮𑀝𑁆𑀞𑁄 𑀏𑀯. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀦𑀺𑀤𑁆𑀤𑁂𑀲𑁂. 𑀲𑁄𑀢𑀁 𑀯𑀸 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀧𑀦𑁆𑀦𑁄 𑀅𑀥𑀺𑀕𑀢𑁄𑀢𑀺 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀫𑀸𑀦𑁂 𑀤𑀼𑀢𑀺𑀬𑀫𑀕𑁆𑀕𑀝𑁆𑀞𑀸𑀤𑀻𑀦𑀁 ¶ 𑀦𑀢𑁆𑀣𑁂𑀯 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀧𑀢𑁆𑀢𑀺. 𑀲𑀼𑀢𑁆𑀢𑁂 𑀧𑀦 𑀲𑁄𑀢𑀁 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀫𑀭𑀺𑀬𑀸𑀤𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀧𑀦𑁆𑀦𑁄 𑀧𑀝𑀺𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀫𑀕𑁆𑀕𑀲𑀫𑀗𑁆𑀕𑀻 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀬𑀸𑀬𑁂𑀦 𑀇𑀢𑀭𑁄𑀧𑀺 𑀢𑀲𑁆𑀲 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀲𑀫𑀼𑀤𑀬𑀲𑀘𑁆𑀘𑀁 𑀯𑀺𑀬 𑀤𑀼𑀓𑁆𑀔𑀲𑀘𑁆𑀘𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀁 𑀳𑁄𑀢𑀺 𑀲𑀘𑁆𑀘𑀤𑁆𑀯𑀬𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ¶ 𑀓𑀺𑀮𑁂𑀲𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀉𑀧𑀭𑀺𑀫𑀕𑁆𑀕𑀨𑀮𑀥𑀫𑁆𑀫𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁨. 𑀫𑀳𑀸𑀓𑀼𑀮𑀫𑁂𑀯𑀸𑀢𑀺 𑀉𑀴𑀸𑀭𑀓𑀼𑀮𑀫𑁂𑀯 𑀯𑀼𑀘𑁆𑀘𑀢𑀺 ‘‘𑀓𑀼𑀮𑀻𑀦𑁄 𑀓𑀼𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑁩𑁩. 𑀲𑀚𑁆𑀛𑀸𑀦𑀓𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀓𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑀼𑀢𑁆𑀯𑀸 𑀯𑀝𑁆𑀝𑀚𑁆𑀛𑀸𑀲𑀬𑁄 𑀘𑁂, 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀻𑀢𑀺 𑀆𑀳 ‘‘𑀅𑀦𑀸𑀕𑀸𑀫𑀺𑀲𑀪𑀸𑀕𑁄’’𑀢𑀺. 𑀬𑀢𑁄 𑀲𑁄 𑀛𑀸𑀦𑀸𑀦𑀸𑀕𑀸𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄’’𑀢𑀺.

𑁩𑁬. 𑀧𑀭𑀬𑁄𑀕𑁂 𑀢𑁆𑀯𑀸-𑀲𑀤𑁆𑀤𑁄 𑀢𑀤𑀦𑁆𑀢𑁄 𑀳𑀼𑀢𑁆𑀯𑀸 ‘‘𑀧𑀭𑀲𑀤𑁆𑀤𑀬𑁄𑀕𑁂’’𑀢𑀺 𑀯𑀼𑀢𑁆𑀢𑁄, 𑀅𑀧𑁆𑀧𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀅𑀧𑁆𑀧𑀢𑁆𑀢𑀁 𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀢𑀺.

𑁩𑁭. 𑀢𑁂𑀦𑀸𑀢𑀺 ‘‘𑀉𑀧𑀳𑀘𑁆𑀘𑀸’’𑀢𑀺 𑀧𑀤𑁂𑀦. 𑀦𑀦𑀼 𑀘 𑀯𑁂𑀫𑀚𑁆𑀛𑀸𑀢𑀺𑀓𑁆𑀓𑀫𑁄 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀫𑀚𑁆𑀛’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦. 𑀢𑀡𑁆𑀳𑀸𑀯𑀝𑁆𑀝𑀲𑁄𑀢𑀸 𑀢𑀡𑁆𑀳𑀸𑀯𑀝𑁆𑀝𑀩𑀦𑁆𑀥𑀸. 𑀢𑀲𑁆𑀲𑀸𑀢𑀺 𑀲𑁄𑀢𑀲𑁆𑀲. 𑀲𑀫𑁆𑀩𑀦𑁆𑀥𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀉𑀤𑁆𑀥𑀁𑀲𑁄𑀢𑀲𑁆𑀲 𑀉𑀧𑀭𑀺𑀪𑀯𑀽𑀧𑀕𑀢𑀸 𑀏𑀓𑀁𑀲𑀺𑀓𑀸𑀢𑀺 𑀆𑀳 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸’’𑀢𑀺. 𑀢𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑀲𑁆𑀲. 𑀢𑀢𑁆𑀣𑀸𑀢𑀺 𑀅𑀯𑀺𑀳𑁂𑀲𑀼. 𑀮𑀳𑀼𑀲𑀸𑀮𑀳𑀼𑀲𑀕𑀢𑀺𑀓𑀸𑀢𑀺 𑀮𑀳𑀼𑀓𑀸𑀮𑀳𑀼𑀓𑀸𑀬𑀼𑀕𑀢𑀺𑀓𑀸, 𑀮𑀳𑀼𑀓𑀸𑀮𑀳𑀼𑀓𑀜𑀸𑀡𑀕𑀢𑀺𑀓𑀸 𑀯𑀸. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀬𑀦𑀓𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀆𑀓𑀸𑀲𑀁 𑀮𑀗𑁆𑀖𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀉𑀧𑀫𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑀭𑀸𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀳𑀺 𑀅𑀥𑀺𑀫𑀢𑁆𑀢𑀢𑀸, 𑀉𑀤𑁆𑀥𑀁𑀲𑁄𑀢𑀢𑁄 𑀅𑀦𑀥𑀺𑀫𑀢𑁆𑀢𑀢𑀸 𑀘 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑁂 𑀏𑀯𑀸𑀢𑀺 𑀅𑀦𑁆𑀢𑀭𑀸𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀉𑀤𑁆𑀥𑀁𑀲𑁄𑀢𑀸 𑀏𑀯. 𑀬𑀤𑀺 𑀏𑀯𑀁 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀉𑀧𑀫𑀸𑀯𑀘𑀦𑁂𑀦 𑀢𑀢𑁄 𑀫𑀳𑀦𑁆𑀢𑀢𑀭𑁂𑀳𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁄 𑀫𑀳𑀦𑁆𑀢…𑀧𑁂… 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺.

𑀢𑁂𑀦𑀸𑀢𑀺 ¶ ‘‘𑀦𑁄 𑀘𑀲𑁆𑀲, 𑀦𑁄 𑀘 𑀫𑁂 𑀲𑀺𑀬𑀸’’𑀢𑀺 𑀯𑀘𑀦𑁂𑀦. 𑀢𑁂𑀦𑀸𑀢𑀺 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀢𑀲𑁆𑀲 𑀅𑀢𑁆𑀣𑀯𑀘𑀦𑁂𑀦. 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲𑀸𑀢𑀺 𑀇𑀫𑀲𑁆𑀲 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀲𑁆𑀲 𑀯𑀺𑀜𑁆𑀜𑀸𑀡𑀸𑀤𑀺𑀤𑀼𑀓𑁆𑀔𑀲𑁆𑀲. 𑀉𑀤𑀬𑀤𑀲𑁆𑀲𑀦𑀁 𑀜𑀸𑀡𑀁. 𑀘𑀢𑀽𑀳𑀺𑀧𑀻𑀢𑀺 ‘‘𑀦𑁄 𑀘𑀲𑁆𑀲𑀸’’𑀢𑀺 𑀘𑀢𑀽𑀳𑀺 𑀧𑀤𑁂𑀳𑀺. 𑀬𑀁 𑀅𑀢𑁆𑀣𑀻𑀢𑀺 𑀬𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀢𑀺 ¶ . 𑀢𑁂𑀦𑀸𑀳 ‘‘𑀪𑀽𑀢𑀦𑁆𑀢𑀺 𑀲𑀲𑀪𑀸𑀯’’𑀦𑁆𑀢𑀺, 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺. 𑀯𑀺𑀯𑀝𑁆𑀝𑀫𑀸𑀦𑀲𑁄 𑀯𑀺𑀯𑀺𑀘𑁆𑀘𑀫𑀸𑀦𑀳𑀤𑀬𑁄 𑀢𑀡𑁆𑀳𑀸𑀤𑀺𑀲𑁄𑀢𑀢𑁄 𑀦𑀺𑀯𑀢𑁆𑀢𑀚𑁆𑀛𑀸𑀲𑀬𑁄. 𑀉𑀧𑁂𑀓𑁆𑀔𑀓𑁄 𑀳𑁄𑀢𑀻𑀢𑀺 𑀘𑀢𑁆𑀢𑀪𑀭𑀺𑀬𑁄 𑀯𑀺𑀬 𑀧𑀼𑀭𑀺𑀲𑁄 𑀪𑀬𑀁 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬 𑀉𑀤𑀸𑀲𑀺𑀦𑁄 𑀳𑁄𑀢𑀺.

𑀅𑀯𑀺𑀲𑀺𑀝𑁆𑀞𑁂𑀢𑀺 𑀳𑀻𑀦𑁂. 𑀯𑀺𑀲𑀺𑀝𑁆𑀞𑁂𑀢𑀺 𑀉𑀢𑁆𑀢𑀫𑁂. ‘‘𑀪𑀯𑁂’’𑀢𑀺 𑀯𑀢𑁆𑀯𑀸 ‘‘𑀲𑀫𑁆𑀪𑀯𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀁 𑀅𑀯𑀼𑀢𑁆𑀢𑀯𑀸𑀘𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀫𑀸𑀳. 𑀪𑀽𑀢𑀫𑁂𑀯 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀪𑀽𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀪𑀯𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀪𑀯𑀢𑀺 𑀅𑀳𑁄𑀲𑀻𑀢𑀺 𑀯𑀸. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄. 𑀢𑀤𑀸𑀳𑀸𑀭𑁄 𑀢𑀲𑁆𑀲 𑀪𑀯𑀲𑁆𑀲 𑀧𑀘𑁆𑀘𑀬𑁄. 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀮𑀤𑁆𑀥𑀸𑀬 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀢𑁂𑀦𑀸𑀢𑀺 𑀲𑁂𑀓𑁆𑀔𑁂𑀦.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁩. 𑀓𑀲𑁆𑀲𑀘𑀻𑀢𑀺 𑀓𑀲𑁆𑀲𑀘𑀺𑀧𑀺. 𑀓𑀣𑀜𑁆𑀘𑀻𑀢𑀺 𑀓𑁂𑀦𑀘𑀺 𑀧𑀓𑀸𑀭𑁂𑀦, 𑀯𑀺𑀓𑁆𑀔𑀫𑁆𑀪𑀦𑀫𑀢𑁆𑀢𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀕𑁆𑀕𑀸𑀳𑀲𑁆𑀲.

𑁮𑁩. 𑀧𑀼𑀭𑀺𑀫𑀕𑁆𑀕𑀳𑀺𑀢𑀦𑁆𑀢𑀺 ‘‘𑀓𑀭𑀺𑀲𑁆𑀲𑀢𑀺 𑀫𑁂’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀧𑀞𑀫𑀁 𑀕𑀳𑀺𑀢𑀁. 𑀢𑀁 𑀓𑀢𑀦𑁆𑀢𑀺 𑀢𑀁 𑀢𑀸𑀤𑀺𑀲𑀁 𑀉𑀧𑀓𑀸𑀭𑀁. 𑀧𑀼𑀜𑁆𑀜𑀨𑀮𑀁 𑀉𑀧𑀚𑀻𑀯𑀦𑁆𑀢𑁄 𑀓𑀢𑀜𑁆𑀜𑀼𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀨𑀮𑀁 𑀅𑀦𑀼𑀧𑀚𑀻𑀯𑀦𑁆𑀢𑁄’’𑀢𑀺.

𑁯𑁦. 𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀧𑀭𑀺𑀧𑀼𑀡𑁆𑀡𑁄 𑀬𑀸𑀯𑀤𑀢𑁆𑀣𑁄 𑀇𑀥 𑀢𑀺𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀦𑀺𑀭𑀼𑀲𑁆𑀲𑀼𑀓𑁆𑀓𑁄’’𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁧. 𑀲𑁂𑀲𑀲𑀁𑀯𑀭𑀪𑁂𑀤𑁂𑀦𑀸𑀢𑀺 ¶ ¶ 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀢𑁄 𑀲𑁂𑀲𑁂𑀦 𑀲𑀁𑀯𑀭𑀯𑀺𑀦𑀸𑀲𑁂𑀦. 𑀲𑁄 𑀧𑀦 𑀤𑁆𑀯𑀸𑀭𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀫𑀦𑁄𑀤𑁆𑀯𑀸𑀭𑀺𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑁄𑀲𑀁𑀯𑀭𑀪𑁂𑀤𑁂𑀦𑀸’’𑀢𑀺. 𑀇𑀤𑀸𑀦𑀺 𑀢𑀁 𑀧𑀓𑀸𑀭𑀪𑁂𑀤𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑀺𑀲𑀁𑀯𑀭𑀸𑀤𑀺𑀪𑁂𑀤𑁂𑀦 𑀯𑀸’’𑀢𑀺 𑀆𑀳, 𑀫𑀼𑀝𑁆𑀞𑀲𑀘𑁆𑀘𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀲𑀪𑀸𑀯𑀪𑀽𑀢𑀁 𑀘𑀭𑀺𑀢𑀫𑁆𑀧𑀺 ‘‘𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀓𑀼𑀲𑀮𑀲𑁆𑀲𑀧𑀺 𑀲𑀻𑀮𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄.

𑁯𑁪. 𑀲𑀫𑀸𑀦𑀯𑀺𑀲𑀬𑀸𑀦𑀦𑁆𑀢𑀺 𑀧𑀞𑀫𑀨𑀮𑀸𑀤𑀺𑀓𑁄 𑀲𑀫𑀸𑀦𑁄 𑀏𑀯𑀭𑀽𑀧𑁄 𑀯𑀺𑀲𑀬𑁄 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀯𑀺𑀲𑀬𑀸, 𑀢𑁂𑀲𑀁.

𑁧𑁦𑁭. 𑀢𑀤𑀢𑁆𑀣𑁄 𑀢𑀧𑁆𑀧𑀬𑁄𑀚𑀦𑁄 𑀮𑁄𑀓𑀼𑀢𑁆𑀢𑀭𑀲𑀸𑀥𑀓𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀭𑀫𑀢𑁆𑀣𑀲𑀸𑀲𑀦𑀲𑁆𑀲. 𑀫𑀽𑀮𑁂𑀓𑀤𑁂𑀲𑀢𑁆𑀢𑀸𑀢𑀺 𑀫𑀽𑀮𑀪𑀸𑀯𑁂𑀦 𑀏𑀓𑀤𑁂𑀲𑀢𑁆𑀢𑀸.

𑁧𑁧𑁮. 𑀉𑀦𑁆𑀦𑀴𑁄 𑀉𑀕𑁆𑀕𑀢𑀢𑀼𑀘𑁆𑀙𑀫𑀸𑀦𑁄.

𑁧𑁨𑁩. 𑀲𑀻𑀮𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀁 𑀅𑀧𑀭𑀺𑀲𑀼𑀤𑁆𑀥𑀺𑀬𑀁 𑀲𑁄𑀥𑀦𑀁 𑀅𑀧𑀸𑀭𑀺𑀧𑀽𑀭𑀺𑀬𑀁 𑀧𑀽𑀭𑀡𑀜𑁆𑀘𑀸𑀢𑀺 𑀆𑀳 ‘‘𑀲𑁄𑀥𑁂𑀢𑀩𑁆𑀩𑁂 𑀘 𑀯𑀟𑁆𑀠𑁂𑀢𑀩𑁆𑀩𑁂 𑀘𑀸’’𑀢𑀺. 𑀅𑀥𑀺𑀲𑀻𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀥𑀺𑀲𑀻𑀮𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀜𑁆𑀜𑀸𑀬.

𑁧𑁨𑁪. 𑀕𑀽𑀣𑀲𑀤𑀺𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀕𑀽𑀣𑀓𑀽𑀧𑀲𑀤𑀺𑀲𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀽𑀣𑀯𑀲𑁂𑀦𑁂𑀯 𑀳𑀺 𑀓𑀽𑀧𑀲𑁆𑀲𑀧𑀺 𑀚𑀺𑀕𑀼𑀘𑁆𑀙𑀦𑀻𑀬𑀢𑀸𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀕𑀽𑀣𑀭𑀸𑀲𑀺𑀬𑁂𑀯 𑀕𑀽𑀣𑀓𑀽𑀧𑁄𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀦𑀯𑀢𑁆𑀢𑀩𑁆𑀩𑁄 𑀲𑀺𑀬𑀸.

𑁧𑁩𑁦. 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀸𑀤𑀬𑁄 𑀭𑀽𑀧𑀪𑀯𑀸𑀤𑀺𑀓𑀸𑀫𑀸𑀤𑀺𑀧𑀭𑀺𑀜𑁆𑀜𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑁄 𑀮𑁄𑀓𑀺𑀬𑀁 𑀧𑀭𑀺𑀜𑁆𑀜𑀁 𑀲𑀫𑁆𑀫𑀤𑁂𑀯 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀅𑀲𑀫𑀢𑁆𑀣𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀦𑁄 𑀘 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁩. 𑀧𑀭𑁂𑀦𑀸𑀢𑀺 ¶ ¶ 𑀅𑀜𑁆𑀜𑁂𑀦, 𑀆𑀡𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀡𑀢𑁆𑀢𑀺𑀬𑀸 𑀅𑀢𑁆𑀢𑀦𑀸 𑀘𑀸𑀢𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸, 𑀅𑀢𑁆𑀢𑀦𑀸 𑀘 𑀆𑀡𑀢𑁆𑀢𑁂𑀦 𑀓𑀢𑀁 𑀢𑀜𑁆𑀘 𑀢𑀲𑁆𑀲 𑀆𑀡𑀸𑀧𑀓𑀲𑁆𑀲 𑀬𑀁 𑀯𑀘𑀻𑀧𑀬𑁄𑀕𑁂𑀦 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀆𑀡𑀢𑁆𑀢𑀺𑀬𑀸 𑀧𑀸𑀧𑀲𑁆𑀲𑀸𑀢𑀺 𑀆𑀡𑀸𑀧𑀦𑀯𑀲𑁂𑀦 𑀧𑀲𑀼𑀢𑀧𑀸𑀧𑀲𑁆𑀲.

𑁧𑁪𑁮. 𑀤𑁂𑀲𑀦𑀸𑀬 𑀓𑀭𑀡𑀪𑀽𑀢𑀸𑀬. 𑀥𑀫𑁆𑀫𑀸𑀦𑀦𑁆𑀢𑀺 𑀤𑁂𑀲𑀦𑀸𑀬 𑀬𑀣𑀸𑀩𑁄𑀥𑁂𑀢𑀩𑁆𑀩𑀸𑀦𑀁 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁.

𑁧𑁫𑁨. 𑀅𑀦𑀦𑁆𑀢𑀭𑀦𑁆𑀢𑀺 𑀜𑀸𑀡𑀲𑁆𑀲 𑀉𑀧𑀝𑁆𑀞𑀺𑀢𑀦𑁆𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀯𑀘𑀦’’𑀦𑁆𑀢𑀺. 𑀮𑀼𑀚𑁆𑀚𑀢𑀻𑀢𑀺 𑀇𑀤𑀁 𑀬𑁂𑀦 𑀓𑀸𑀭𑀡𑁂𑀦 𑀮𑁄𑀓-𑀲𑀤𑁆𑀤𑁄 𑀢𑀤𑀢𑁆𑀣𑁂 𑀧𑀯𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀓𑀸𑀭𑀡𑀬𑀼𑀢𑁆𑀢’’𑀦𑁆𑀢𑀺.

𑁧𑁫𑁬. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 𑀓𑀼𑀲𑀮𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳𑀺𑀢𑀸𑀲𑀳𑀺𑀢𑁂𑀢𑀺 𑀅𑀢𑁆𑀣𑁄’’𑀢𑀺. 𑀲𑀳𑀺𑀢𑀪𑀸𑀲𑀦𑁂𑀦 𑀤𑁂𑀲𑀓𑀲𑀫𑁆𑀧𑀢𑁆𑀢𑀺, 𑀲𑀳𑀺𑀢𑀸𑀲𑀳𑀺𑀢𑀓𑁄𑀲𑀮𑁆𑀮𑁂𑀦 𑀲𑀸𑀯𑀓𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀧𑀺 𑀜𑀸𑀡𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀝𑀺𑀪𑀸𑀦𑀲𑀫𑁆𑀧𑀤𑀸𑀬 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀬𑀸 𑀩𑁄𑀥𑁂𑀢𑀼𑀁 𑀲𑀫𑀢𑁆𑀣𑀢𑀸𑀬𑀸’’𑀢𑀺.

𑁧𑁫𑁭. 𑀓𑀼𑀲𑀮𑀥𑀫𑁆𑀫𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺. 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑁄, 𑀬𑁄 𑀦𑁂𑀯 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀦 𑀤𑀸𑀦𑀁 𑀤𑁂𑀢𑀺.

𑁧𑁬𑁬. 𑀬𑀫𑀺𑀤𑀁 ‘‘𑀓𑀸𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀬𑁄 𑀢𑀢𑁆𑀣 𑀅𑀯𑀡𑁆𑀡𑁄, 𑀢𑀫𑁆𑀧𑀺 𑀪𑀡𑀢𑀺 𑀓𑀸𑀮𑁂𑀦. 𑀬𑁄𑀧𑀺 𑀢𑀢𑁆𑀣 𑀯𑀡𑁆𑀡𑁄, 𑀢𑀫𑁆𑀧𑀺 𑀪𑀡𑀢𑀺 𑀓𑀸𑀮𑁂𑀦𑀸’’𑀢𑀺 𑀬𑀁 𑀇𑀤𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀭 𑀢𑀲𑁆𑀫𑀺𑀁 𑀯𑀘𑀦𑁂 𑀯𑀸𑀓𑁆𑀬𑁂 𑀬𑁄 𑀧𑀼𑀕𑁆𑀕𑀮𑁄 ‘‘𑀓𑀸𑀮𑁂𑀦 𑀪𑀡𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀻𑀤𑀺𑀲𑁄𑀢𑀺 𑀯𑀺𑀘𑀸𑀭𑀡𑀸𑀬 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀮𑀜𑁆𑀜𑀽 𑀳𑁄𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀗𑁆𑀕𑀳𑁂 𑀆𑀳𑀸𑀢𑀺 𑀬𑁄𑀚𑀦𑀸.

𑁧𑁬𑁮. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀢𑁂𑀲𑀁 𑀯𑀺𑀧𑀢𑁆𑀢𑀺 𑀧𑀯𑀢𑁆𑀢𑀧𑁆𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁭𑁩. 𑀢𑁂𑀲𑀦𑁆𑀢𑀺 ¶ ¶ 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁. 𑀯𑀺𑀫𑀼𑀢𑁆𑀢𑀺𑀤𑀲𑁆𑀲𑀦𑀫𑁂𑀯 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀅𑀢𑁆𑀣𑀢𑁆𑀢𑀸 𑀢𑀁𑀤𑀲𑁆𑀲𑀦𑀲𑁆𑀲.

𑁧𑁭𑁪. 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁.

𑁧𑁭𑁮. 𑀦𑀸𑀫𑀓𑀸𑀬𑁄𑀢𑀺 𑀦𑀸𑀫𑀲𑀫𑀽𑀳𑁄. 𑀇𑀤𑀫𑁂𑀯 𑀘 𑀤𑁆𑀯𑀬𑀦𑁆𑀢𑀺 𑀲𑀻𑀮𑀲𑀁𑀯𑀭𑀧𑀽𑀭𑀡𑀁, 𑀲𑀸𑀚𑀻𑀯𑀸𑀯𑀻𑀢𑀺𑀓𑁆𑀓𑀫𑀦𑀜𑁆𑀘𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁. 𑀢𑀢𑁄𑀢𑀺 𑀲𑀸𑀚𑀻𑀯𑀸𑀯𑀻𑀢𑀺𑀓𑁆𑀓𑀫𑀦𑀢𑁄. 𑀓𑀣𑀸𑀬 𑀳𑀮𑀺𑀤𑁆𑀤𑀭𑀸𑀕𑀸𑀤𑀺𑀲𑀤𑀺𑀲𑀢𑀸𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀦 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺.

𑁧𑁭𑁯. 𑀇𑀢𑀺-𑀲𑀤𑁆𑀤𑁂𑀦𑀸𑀢𑀺 ‘‘𑀤𑀸𑀭𑀼𑀫𑀸𑀲𑀓𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀇𑀢𑀺-𑀲𑀤𑁆𑀤𑁂𑀦. 𑀏𑀯𑀁𑀧𑀓𑀸𑀭𑁂𑀢𑀺 𑀇𑀫𑀺𑀦𑀸𑀧𑀺 𑀲𑀮𑀸𑀓𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁮𑁧. 𑀅𑀯𑀺𑀲𑀝𑀲𑀼𑀔𑀦𑁆𑀢𑀺 𑀅𑀯𑀺𑀓𑁆𑀔𑁂𑀧𑀲𑀼𑀔𑀁.

𑁧𑁮𑁭. 𑀔𑀦𑁆𑀥𑀥𑀫𑁆𑀫𑁂𑀲𑀽𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼. 𑀢𑀤𑀮𑀸𑀪𑁂𑀦𑀸𑀢𑀺 𑀫𑀕𑁆𑀕𑀨𑀮𑀸𑀮𑀸𑀪𑁂𑀦. 𑀅𑀢𑁆𑀣𑁂𑀦𑀸𑀢𑀺 𑀲𑀻𑀮𑀸𑀤𑀺𑀅𑀢𑁆𑀣𑁂𑀦.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁧. 𑀬𑀣𑀸 𑀢𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀧𑀼𑀕𑁆𑀕𑀮𑁂𑀲𑀼 𑀬𑀣𑀸𑀭𑀳𑀁 𑀉𑀧𑀫𑁂𑀬𑁆𑀬𑁄𑀧𑀫𑀸𑀤𑀲𑁆𑀲𑀦𑀫𑀼𑀔𑁂𑀦 𑀳𑀺𑀢𑀽𑀧𑀤𑁂𑀲𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸 𑀅𑀜𑁆𑀜𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀭𑀺𑀬𑀸𑀯𑀸𑀘𑀻 𑀆𑀭𑀫𑁆𑀪-𑀲𑀤𑁆𑀤𑁄 𑀅𑀥𑀺𑀧𑁆𑀧𑁂𑀢𑁄, 𑀦 ‘‘𑀆𑀭𑀫𑁆𑀪𑀓𑀢𑁆𑀢𑀼𑀲𑁆𑀲 𑀓𑀲𑀸𑀯𑀧𑀼𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀥𑀫𑁆𑀫𑀯𑀸𑀘𑀻𑀢𑀺 𑀆𑀳 ‘‘𑀆𑀭𑀫𑁆𑀪𑀓𑀺𑀭𑀺𑀬𑀸𑀯𑀸𑀘𑀓𑁄 𑀲𑀤𑁆𑀤𑁄’’𑀢𑀺. ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁧𑁯𑁨. 𑀕𑀳𑀡𑀁 ¶ ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁.

𑁧𑁯𑁯. 𑀦 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀅𑀲𑀫𑀸𑀦𑀚𑀸𑀢𑀺𑀓𑀢𑁆𑀢𑀸.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀇𑀤𑀁 ¶ 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀸𑀤𑀺𑀓𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺 𑀨𑀮𑀲𑁆𑀲 𑀳𑁂𑀢𑀼𑀦𑀸 𑀅𑀯𑀺𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀸𑀫’’𑀦𑁆𑀢𑀺𑀆𑀤𑀺. 𑀅𑀦𑀸𑀘𑀭𑀺𑀬𑀓𑁂𑀦 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦𑀸𑀢𑀺 𑀇𑀤𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀯𑀺𑀚𑁆𑀚𑀫𑀸𑀦𑀕𑀼𑀡𑀓𑀣𑀦𑀁, 𑀦 𑀢𑀩𑁆𑀩𑀺𑀥𑀼𑀭𑀥𑀫𑁆𑀫𑀦𑁆𑀢𑀭𑀦𑀺𑀯𑀢𑁆𑀢𑀦𑀁 𑀢𑀣𑀸𑀭𑀽𑀧𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀲𑁆𑀲 𑀲𑀸𑀘𑀭𑀺𑀬𑀓𑀢𑀸, 𑀧𑀭𑀢𑁄 𑀘 𑀉𑀧𑁆𑀧𑀢𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀸𑀘𑀭𑀺𑀬𑀓𑀢𑁆𑀢𑀁 𑀧𑀭𑀽𑀧𑀤𑁂𑀲𑀳𑁂𑀢𑀼𑀓𑀢𑀸, 𑀧𑀭𑀢𑁄 𑀉𑀧𑁆𑀧𑀢𑁆𑀢𑀺 𑀉𑀧𑀤𑁂𑀲𑁂𑀦 𑀯𑀺𑀦𑀸𑀧𑀺 𑀲𑀦𑁆𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑁆𑀢𑁄𑀕𑀥𑀸’’𑀢𑀺 𑀆𑀳. 𑀇𑀤𑀸𑀦𑀺 𑀯𑀺𑀲𑀬𑀮𑀓𑁆𑀔𑀡𑀁 𑀏𑀢𑀁 𑀪𑀼𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀤𑀼𑀧𑀓𑀸𑀭𑀢𑀸𑀬𑀸’’𑀢𑀺 𑀇𑀤𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀥𑁂𑀢𑀩𑁆𑀩𑁂𑀲𑀽𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀫𑁆𑀫𑀼𑀚𑁆𑀚𑀦𑀧𑀜𑁆𑀜𑀸𑀬𑀸𑀢𑀺 𑀉𑀫𑁆𑀫𑀼𑀚𑁆𑀚𑀸𑀧𑀦𑀧𑀜𑁆𑀜𑀸𑀬, 𑀉𑀫𑁆𑀫𑀼𑀚𑁆𑀚𑀦𑀸𑀓𑀸𑀭𑁂𑀦 𑀯𑀸 𑀧𑀯𑀢𑁆𑀢𑀧𑀜𑁆𑀜𑀸𑀬. 𑀢𑁂𑀦𑁂𑀯𑀸𑀢𑀺 𑀉𑀫𑁆𑀫𑀼𑀚𑁆𑀚𑀦𑀫𑀢𑁆𑀢𑀢𑁆𑀢𑀸 𑀏𑀯. 𑀬𑀣𑀸 𑀳𑀺 𑀜𑀸𑀡𑀼𑀧𑁆𑀧𑀸𑀤𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀉𑀫𑁆𑀫𑀼𑀚𑁆𑀚𑀦𑀁, 𑀏𑀯𑀁 𑀲𑀤𑁆𑀥𑀼𑀧𑁆𑀧𑀸𑀤𑁄𑀧𑀻𑀢𑀺 𑀆𑀳 ‘‘𑀲𑀤𑁆𑀥𑀸𑀲𑀗𑁆𑀔𑀸𑀢𑀫𑁂𑀯 𑀉𑀫𑁆𑀫𑀼𑀚𑁆𑀚𑀦’’𑀦𑁆𑀢𑀺. 𑀘𑀺𑀢𑁆𑀢𑀯𑀸𑀭𑁄𑀢𑀺 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑀯𑀸𑀭𑁄. 𑀧𑀘𑁆𑀘𑁂𑀓𑀁 𑀞𑀸𑀦𑀯𑀺𑀧𑀲𑁆𑀲𑀦𑀸𑀧𑀢𑀭𑀡𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀺𑀦𑀺𑀝𑁆𑀞𑀢𑁆𑀢𑀸 ¶ 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 ‘‘𑀅𑀦𑁂𑀓𑁂 𑀧𑀼𑀕𑁆𑀕𑀮𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀢𑀢𑀺𑀬𑀧𑀼𑀕𑁆𑀕𑀮𑀸𑀤𑀺𑀪𑀸𑀯𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀸𑀤𑀺𑀪𑀸𑀯𑀁.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁯. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀢𑀺 ¶ 𑀯𑀼𑀢𑁆𑀢𑀯𑀺𑀲𑁂𑀲𑀬𑀼𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀛𑀸𑀦𑀸𑀦𑀸𑀕𑀸𑀫𑀺𑀦𑁄. 𑀅𑀲𑀸…𑀧𑁂… 𑀧𑀦𑀸𑀢𑀺 𑀏𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑁄. 𑀢𑁂𑀦 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸’’𑀢𑀺 𑀇𑀤𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.

𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀲𑀫𑀼𑀤𑀸𑀬𑁂 ¶ ¶ 𑀏𑀓𑀤𑁂𑀲𑀸 𑀅𑀦𑁆𑀢𑁄𑀕𑀥𑀸𑀢𑀺 𑀲𑀫𑀼𑀤𑀸𑀬𑁄 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀣𑀸𑀲𑀫𑀼𑀤𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀓𑀣𑀸𑀦𑀦𑁆𑀢𑀺 𑀢𑀺𑀲𑁆𑀲𑁄 𑀓𑀣𑀸 𑀯𑀸𑀤𑁄 𑀚𑀧𑁆𑀧𑁄 𑀯𑀺𑀢𑀡𑁆𑀟𑀸𑀢𑀺. 𑀢𑁂𑀲𑀼 𑀬𑁂𑀦 𑀧𑀫𑀸𑀡𑀢𑀓𑁆𑀓𑁂𑀳𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀧𑀦𑀧𑀝𑀺𑀓𑁆𑀔𑁂𑀧𑀸 𑀳𑁄𑀦𑁆𑀢𑀺, 𑀲𑁄 𑀯𑀸𑀤𑁄. 𑀏𑀓𑀸𑀥𑀺𑀓𑀭𑀡𑀸 𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸 𑀥𑀫𑁆𑀫𑀸 𑀧𑀓𑁆𑀔𑀧𑀝𑀺𑀧𑀓𑁆𑀔𑀸 𑀬𑀣𑀸 ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁬𑁫). 𑀦𑀸𑀦𑀸𑀥𑀺𑀓𑀭𑀡𑀸 𑀧𑀦 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀧𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸 𑀦𑀸𑀫 𑀦 𑀳𑁄𑀦𑁆𑀢𑀺 𑀬𑀣𑀸 ‘‘𑀅𑀦𑀺𑀘𑁆𑀘𑀁 𑀭𑀽𑀧𑀁, 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀬𑁂𑀦 𑀙𑀮𑀚𑀸𑀢𑀺𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀳𑀺 𑀧𑀓𑁆𑀔𑀧𑀝𑀺𑀧𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀧𑀦𑀁 𑀧𑀝𑀺𑀓𑁆𑀔𑁂𑀧𑀸𑀭𑀫𑁆𑀪𑁄, 𑀲𑁄 𑀚𑀧𑁆𑀧𑁄. 𑀆𑀭𑀫𑁆𑀪𑀫𑀢𑁆𑀢𑀫𑁂𑀯𑁂𑀢𑁆𑀣, 𑀦 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀫𑁆𑀪𑀕𑁆𑀕𑀳𑀡𑀁. 𑀬𑀸𑀬 𑀧𑀦 𑀙𑀮𑀚𑀸𑀢𑀺𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀳𑀺 𑀧𑀝𑀺𑀧𑀓𑁆𑀔𑀧𑀝𑀺𑀓𑁆𑀔𑁂𑀧𑀸𑀬 𑀯𑀸𑀬𑀫𑀦𑁆𑀢𑀺, 𑀲𑀸 𑀯𑀺𑀢𑀡𑁆𑀟𑀸. 𑀢𑀢𑁆𑀣 𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮𑀁 𑀬𑀣𑀸 ‘‘𑀦𑀯𑀓𑀫𑁆𑀩𑀮𑁄𑀬𑀁 𑀧𑀼𑀭𑀺𑀲𑁄, 𑀭𑀸𑀚𑀸 𑀦𑁄 𑀲𑀓𑁆𑀔𑀻’’𑀢𑀺 𑀏𑀯𑀫𑀸𑀤𑀺 ¶ . 𑀤𑀽𑀲𑀦𑀪𑀸𑀲𑀸 𑀚𑀸𑀢𑀬𑁄, 𑀉𑀢𑁆𑀢𑀭𑀧𑀢𑀺𑀭𑀽𑀧𑀓𑀸𑀢𑀺 𑀅𑀢𑁆𑀣𑁄. 𑀦𑀺𑀕𑁆𑀕𑀳𑀝𑁆𑀞𑀸𑀦𑀸𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀯𑀸𑀤𑀚𑀧𑁆𑀧𑀯𑀺𑀢𑀡𑁆𑀟𑀧𑁆𑀧𑀪𑁂𑀤𑀸𑀲𑀼 𑀢𑀻𑀲𑀼 𑀓𑀣𑀸𑀲𑀼 𑀇𑀥 𑀯𑀸𑀤𑀓𑀣𑀸 ‘‘𑀓𑀣𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀔𑁄 𑀅𑀯𑀺𑀧𑀭𑀻𑀢𑀥𑀫𑁆𑀫𑀢𑀸𑀬 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦, 𑀦 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯𑀸𑀢𑀺 𑀉𑀤𑁆𑀤𑁂𑀲𑀤𑁂𑀲𑀦𑀸𑀬 𑀏𑀯. 𑀞𑀧𑀺𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸 𑀳𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀞𑀧𑀦𑀢𑁄 𑀦𑀺𑀓𑁆𑀔𑀺𑀧𑀦𑀢𑁄 𑀞𑀧𑀦𑀁, 𑀦𑀺𑀓𑁆𑀔𑁂𑀧𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 ¶ …𑀧𑁂… 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀲𑀪𑀸𑀯𑀫𑁆𑀧𑀺 𑀳𑀺 𑀅𑀢𑁆𑀣𑀁 𑀢𑀤𑀜𑁆𑀜𑀥𑀫𑁆𑀫𑀢𑁄 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺 𑀬𑀣𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧). 𑀲𑀸𑀢𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀉𑀧𑀲𑀫𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑀁 𑀲𑀦𑁆𑀥𑀸𑀬. 𑀥𑀫𑁆𑀫𑀯𑀸𑀤𑀻…𑀧𑁂… 𑀤𑀼𑀩𑁆𑀩𑀮𑀢𑀸 𑀯𑀼𑀢𑁆𑀢𑀸 𑀢𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀪𑀸𑀯𑁂 𑀢𑀸𑀤𑀺𑀲𑀸𑀦𑀁 𑀧𑀓𑁆𑀔𑀪𑀸𑀯𑀸𑀪𑀸𑀯𑀢𑁄. 𑀮𑀤𑁆𑀥𑀺𑀬𑀸𑀢𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀧𑀭𑀺𑀳𑀸𑀬𑀢𑀺 𑀅𑀭𑀳𑀸 𑀅𑀭𑀳𑀢𑁆𑀢𑀸’’𑀢𑀺𑀆𑀤𑀺𑀮𑀤𑁆𑀥𑀺𑀬𑀸. 𑀲𑀼𑀢𑁆𑀢𑀦𑁆𑀢𑁂𑀳𑀻𑀢𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀻𑀳𑀺. 𑀮𑀺𑀗𑁆𑀕𑀸𑀓𑀧𑁆𑀧𑀪𑁂𑀤𑀁 𑀧𑀭𑀢𑁄 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀦𑁆𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀁 𑀯𑀺𑀦𑀸𑀲𑁂𑀢𑁆𑀯𑀸, 𑀪𑁂𑀤𑀁 𑀯𑀸 𑀓𑀢𑁆𑀯𑀸 𑀬𑀣𑀸 𑀲𑀸 𑀞𑀺𑀢𑀸, 𑀢𑀢𑁄 𑀅𑀜𑁆𑀜𑀣𑀸 𑀓𑀢𑁆𑀯𑀸. 𑀲𑀗𑁆𑀕𑀳𑀺𑀢𑀢𑁄 𑀯𑀸 𑀅𑀜𑁆𑀜𑀢𑁆𑀭𑀸𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀬𑀸 𑀲𑀗𑁆𑀕𑀳𑀺𑀢𑀢𑁄 𑀅𑀜𑁆𑀜𑀢𑁆𑀭. 𑀢𑁂𑀦𑀸𑀳 ‘‘𑀅𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢’’𑀦𑁆𑀢𑀺. 𑀦𑀻𑀢𑀢𑁆𑀣𑀁 𑀬𑀣𑀸𑀭𑀼𑀢𑀯𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑁆𑀢𑀸. 𑀦𑁂𑀬𑁆𑀬𑀢𑁆𑀣𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀢𑁆𑀣𑀢𑁆𑀢𑀸. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 ‘‘𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀦𑁆𑀢𑀺 𑀏𑀓𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁. 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀽𑀢𑀺 𑀲𑀩𑁆𑀩𑀲𑁆𑀲𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀯𑀲𑁂𑀦 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺𑀆𑀤𑀺𑀓𑀁 (𑀓𑀣𑀸. 𑁨𑁬𑁯) 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼. 𑀲𑀼𑀢𑁆𑀢𑀜𑁆𑀘 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀢𑀢𑁄 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀓𑀢𑁆𑀯𑀸 ¶ 𑀞𑀧𑀬𑀺𑀁𑀲𑀼, 𑀢𑀲𑁆𑀲 𑀅𑀢𑁆𑀣𑀜𑁆𑀘 𑀅𑀜𑁆𑀜𑀁 𑀞𑀧𑀬𑀺𑀁𑀲𑀽𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀜𑁆𑀜𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀺𑀘𑁆𑀘𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀕𑀫𑁆𑀪𑀻𑀭𑀁 𑀏𑀓𑀤𑁂𑀲𑀁 𑀫𑀳𑀸𑀧𑀤𑁂𑀲𑀧𑀭𑀺𑀯𑀸𑀭𑀸𑀤𑀺𑀁. 𑀏𑀓𑀘𑁆𑀘𑁂 𑀲𑀓𑀮𑀁 𑀅𑀪𑀺𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑀺𑀁𑀲𑀼 𑀙𑀟𑁆𑀟𑀬𑀺𑀁𑀲𑀼 𑀲𑁂𑀬𑁆𑀬𑀣𑀸𑀧𑀺 𑀲𑀼𑀢𑁆𑀢𑀦𑁆𑀢𑀺𑀓𑀸. 𑀢𑁂 𑀳𑀺 𑀢𑀁 𑀦 𑀚𑀺𑀦𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀣𑀸𑀯𑀢𑁆𑀣𑀼𑀲𑁆𑀲 𑀲𑀯𑀺𑀯𑀸𑀤𑀢𑁆𑀢𑁂𑀢𑀺𑀆𑀤𑀺 𑀳𑁂𑀝𑁆𑀞𑀸 𑀦𑀺𑀤𑀸𑀦𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀯𑀺𑀯𑀸𑀤𑀢𑁆𑀢𑀁 𑀫𑀜𑁆𑀜𑀦𑁆𑀢𑀺. ‘‘𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀲𑁂𑀦𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀧𑀼𑀩𑁆𑀩𑁂𑀧𑀺 𑀢𑀁 𑀫𑀸𑀢𑀺𑀓𑀸𑀭𑀽𑀧𑁂𑀦 𑀧𑀯𑀢𑁆𑀢𑀢𑁂𑀯? 𑀦𑀺𑀤𑁆𑀤𑁂𑀲𑀁 𑀯𑀸 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀸𑀓𑀸𑀭𑀸𑀦𑀺 𑀅𑀪𑀺𑀥𑀫𑁆𑀫𑀧𑀓𑀭𑀡𑀸𑀤𑀻𑀦𑀺 𑀅𑀓𑀭𑀺𑀁𑀲𑀼, 𑀧𑀯𑀢𑁆𑀢𑀦𑁆𑀢𑀸𑀦𑀺𑀧𑀺 𑀢𑀸𑀦𑀺 𑀅𑀜𑁆𑀜𑀣𑀸 𑀓𑀢𑁆𑀯𑀸 𑀧𑀞𑀺𑀁𑀲𑀽𑀢𑀺 𑀅𑀢𑁆𑀣𑁄 ¶ . 𑀫𑀜𑁆𑀚𑀼𑀲𑀺𑀭𑀻𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀦𑀸𑀫𑀁 𑀧𑀺𑀝𑀓𑀢𑁆𑀢𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀕𑀬𑁆𑀳𑀢𑀺? 𑀇𑀢𑀭𑁂𑀳𑀺 𑀕𑀬𑁆𑀳𑀫𑀸𑀦𑀫𑁆𑀧𑀺 𑀯𑀸 𑀲𑀸𑀲𑀦𑀺𑀓𑀧𑀭𑀺𑀜𑁆𑀜𑁂𑀳𑀺 𑀦 𑀲𑀸𑀲𑀦𑀸𑀯𑀘𑀭𑀁 𑀕𑀬𑁆𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀺𑀓𑀸𑀬𑀦𑀸𑀫𑀦𑁆𑀢𑀺 𑀫𑀳𑀸𑀲𑀗𑁆𑀖𑀺𑀓𑀸𑀤𑀺𑀦𑀺𑀓𑀸𑀬𑀦𑀸𑀫𑀁, 𑀤𑀼𑀢𑁆𑀢𑀕𑀼𑀢𑁆𑀢𑀸𑀤𑀺𑀯𑀕𑁆𑀕𑀦𑀸𑀫𑀜𑁆𑀘.

𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀪𑁂𑀤𑁄 𑀲𑀼𑀢𑁆𑀢𑀯𑀸𑀤𑀻𑀢𑀺 𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀅𑀦𑀦𑁆𑀢𑀭𑁂 𑀏𑀓𑁄 𑀦𑀺𑀓𑀸𑀬𑀪𑁂𑀤𑁄 𑀲𑀼𑀢𑁆𑀢𑀯𑀸𑀤𑀻 𑀦𑀸𑀫 𑀪𑀺𑀚𑁆𑀚𑀺𑀢𑁆𑀣. 𑀲𑀳𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸, 𑀕𑀡𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬𑀸𑀢𑀺 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬. 𑀉𑀧𑁆𑀧𑀚𑁆𑀚𑀦𑀓𑁂𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦𑀸 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀦𑀓𑁂. 𑀲𑀼𑀢𑁆𑀢𑀲𑀳𑀲𑁆𑀲𑀸𑀳𑀭𑀡𑀜𑁆𑀘𑁂𑀢𑁆𑀣 𑀧𑀭𑀯𑀸𑀤𑀪𑀜𑁆𑀚𑀦𑀢𑁆𑀣𑀜𑁆𑀘 𑀲𑀓𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀜𑁆𑀘. 𑀲𑀼𑀢𑁆𑀢𑁂𑀓𑀤𑁂𑀲𑁄𑀧𑀺 𑀳𑀺 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀲𑀼𑀧𑀺 𑀤𑀺𑀲𑁆𑀲𑀦𑀢𑁄 𑀬𑀣𑀸 ‘‘𑀧𑀝𑁄 𑀤𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺 𑀘. 𑀢𑁂 𑀧𑀦𑁂𑀢𑁆𑀣 𑀲𑀼𑀢𑁆𑀢𑀧𑀤𑁂𑀲𑀸 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀓𑀣𑀸

𑁧. 𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧. 𑀲𑀫𑁆𑀩𑀭𑀸𑀤𑀻𑀳𑀺 ¶ ¶ 𑀧𑀓𑀧𑁆𑀧𑀺𑀢𑀯𑀺𑀚𑁆𑀚𑀸, 𑀢𑀣𑀸𑀪𑀺𑀲𑀗𑁆𑀔𑀢𑀸𑀦𑀺 𑀑𑀲𑀥𑀸𑀦𑀺 𑀘 ‘‘𑀫𑀸𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀥 𑀧𑀦 𑀫𑀸𑀬𑀸𑀬 𑀆𑀳𑀺𑀢𑀯𑀺𑀲𑁂𑀲𑀸 𑀅𑀪𑀽𑀢𑀜𑁆𑀜𑁂𑀬𑁆𑀬𑀸𑀓𑀸𑀭𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀬𑀸𑀬 𑀅𑀫𑀡𑀺𑀆𑀤𑀬𑁄 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀤𑀺𑀲𑁆𑀲𑀫𑀸𑀦𑀸 𑀫𑀸𑀬𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀲𑀘𑁆𑀘𑀜𑁆𑀜𑁂𑀯 𑀲𑀘𑁆𑀘𑀺𑀓𑀁, 𑀲𑁄 𑀏𑀯 𑀅𑀢𑁆𑀣𑁄 𑀅𑀯𑀺𑀧𑀭𑀻𑀢𑀲𑁆𑀲 𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀝𑁆𑀞𑁂𑀦𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑁄. 𑀢𑁂𑀦𑀸𑀳 ‘‘𑀪𑀽𑀢𑀝𑁆𑀞𑁄’’𑀢𑀺. 𑀅𑀯𑀺𑀧𑀭𑀻𑀢𑀪𑀸𑀯𑀢𑁄 𑀏𑀯 𑀧𑀭𑀫𑁄 𑀧𑀥𑀸𑀦𑁄 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑁄, 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀪𑀽𑀢𑁄 𑀥𑀫𑁆𑀫𑀸𑀦𑀁 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑀢𑁆𑀣𑁄’’𑀢𑀺.

𑀅𑀢𑁆𑀣𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦𑀸𑀢𑀺 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁯𑁬; 𑀓𑀣𑀸. 𑁨𑁨) ‘‘𑀅𑀢𑁆𑀣𑀻’’𑀢𑀺 𑀧𑀯𑀢𑁆𑀢𑀯𑀘𑀦𑀲𑀸𑀫𑀜𑁆𑀜𑁂𑀦. 𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄𑀢𑀺 𑀳𑁂𑀢𑀼𑀁 𑀤𑀽𑀲𑁂𑀦𑁆𑀢𑁄, 𑀅𑀳𑁂𑀢𑀼𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀳𑁂𑀢𑀼 𑀳𑀺 𑀧𑀝𑀺𑀜𑁆𑀜𑀸𑀬 𑀧𑀢𑀺𑀝𑁆𑀞𑀸𑀧𑀦𑀢𑁄 𑀧𑀢𑀺𑀝𑁆𑀞𑀸, 𑀢𑀁 𑀧𑀦 𑀳𑁂𑀢𑀼𑀁 𑀅𑀢𑁆𑀣𑀫𑀢𑁆𑀢𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀬𑁄𑀕𑀢𑁄 𑀧𑀦 𑀤𑀽𑀲𑀦𑁂𑀦 𑀲𑀤𑁆𑀥𑀺𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄𑀢𑀺 𑀬𑀣𑀸𑀦𑀼𑀭𑀽𑀧𑀁 𑀬𑀼𑀢𑁆𑀢𑀺𑀁 𑀯𑀢𑁆𑀢𑀼𑀁 𑀅𑀯𑀲𑀭𑀁 𑀅𑀤𑁂𑀦𑁆𑀢𑁄. 𑀅𑀣 𑀯𑀸 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄, 𑀧𑀝𑀺𑀜𑁆𑀜𑀁 𑀏𑀯 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀮𑀩𑁆𑀪𑀢𑀺 𑀧𑀼𑀕𑁆𑀕𑀮𑁄𑀢𑀺 𑀳𑀺 𑀲𑀓𑀯𑀸𑀤𑀺𑀁 𑀉𑀤𑁆𑀤𑀺𑀲𑁆𑀲 𑀧𑀭𑀯𑀸𑀤𑀺𑀦𑁄 𑀧𑀝𑀺𑀜𑁆𑀜𑀸𑀯 ¶ 𑀦 𑀬𑀼𑀢𑁆𑀢𑀸 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀅𑀦𑀼𑀧𑀮𑀩𑁆𑀪𑀦𑁂𑀬𑁆𑀬𑀢𑁄 𑀦 𑀢𑀯 𑀯𑀸𑀤𑁄 𑀢𑀺𑀝𑁆𑀞𑀢𑀻𑀢𑀺 𑀦𑀺𑀯𑀢𑁆𑀢𑁂𑀦𑁆𑀢𑁄’’𑀢𑀺. 𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀺…𑀧𑁂… 𑀤𑀲𑁆𑀲𑁂𑀢𑀻𑀢𑀺 𑀏𑀢𑁂𑀦 𑀧𑀭𑀯𑀸𑀤𑀺𑀦𑀸 𑀅𑀥𑀺𑀧𑁆𑀧𑁂𑀢𑀳𑁂𑀢𑀼𑀦𑁄 𑀯𑀺𑀧𑀭𑀻𑀢𑀢𑁆𑀣𑀲𑀸𑀥𑀓𑀢𑁆𑀢𑀁 𑀤𑀲𑁆𑀲𑁂𑀢𑀺.

𑀉𑀧𑀮𑀩𑁆𑀪𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀓𑀸𑀭𑀢𑁄 𑀢𑀁𑀆𑀓𑀸𑀭𑀯𑀦𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸𑀢𑀺 𑀆𑀓𑀸𑀭, 𑀆𑀓𑀸𑀭𑀯𑀦𑁆𑀢𑀸𑀦𑀁 𑀪𑁂𑀤𑁂. 𑀏𑀢𑀺𑀲𑁆𑀲𑀸𑀢𑀺 ‘‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦𑀸’’𑀢𑀺 𑀏𑀯𑀁 ¶ 𑀯𑀼𑀢𑁆𑀢𑀸𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀬. 𑀏𑀲 𑀯𑀺𑀲𑁂𑀲𑁄𑀢𑀺 𑀬𑁄 𑀬𑀣𑀸𑀯𑀼𑀢𑁆𑀢𑁄 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀯𑀺𑀲𑀬𑀲𑁆𑀲 𑀲𑀪𑀸𑀯𑀸𑀓𑀸𑀭𑀪𑁂𑀤𑁄, 𑀏𑀲 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀯𑀺𑀲𑁂𑀲𑁄. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦 𑀅𑀪𑀺𑀦𑁆𑀦𑀸𑀦𑀫𑁆𑀧𑀺 𑀲𑀮𑀓𑁆𑀔𑀡𑀢𑁄 𑀪𑁂𑀤𑁄𑀬𑁂𑀯𑀸𑀢𑀺 𑀅𑀜𑁆𑀜𑀥𑀫𑁆𑀫𑀲𑁆𑀲 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀦 𑀓𑀤𑀸𑀘𑀺𑀧𑀺 𑀉𑀧𑀮𑀩𑁆𑀪𑁄 𑀪𑀯𑁂𑀬𑁆𑀬. 𑀬𑀤𑀺 𑀲𑀺𑀬𑀸, 𑀅𑀜𑁆𑀜𑀢𑁆𑀢𑀫𑁂𑀯 𑀦 𑀲𑀺𑀬𑀸𑀢𑀺 𑀭𑀼𑀧𑁆𑀧𑀦𑀸𑀤𑀺𑀲𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑁄𑀧𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀪𑀽𑀢𑀲𑀪𑀸𑀯𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑁂𑀯𑀸𑀢𑀺 𑀯𑀤𑀦𑁆𑀢𑀁 𑀧𑀭𑀯𑀸𑀤𑀺𑀦𑀁 𑀧𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀧𑀦…𑀧𑁂… 𑀦𑀺𑀕𑁆𑀕𑀳𑁄 𑀘 𑀦 𑀓𑀸𑀢𑀩𑁆𑀩𑁄’’𑀢𑀺. 𑀢𑀢𑁆𑀣 𑀦𑀺𑀕𑁆𑀕𑀳𑁄𑀢𑀺 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀦𑀺𑀕𑁆𑀕𑀳𑁄, 𑀧𑀭𑀸𑀚𑀬𑀸𑀭𑁄𑀧𑀦𑁂𑀦 𑀧𑀭𑀯𑀸𑀤𑀺𑀦𑁄 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀅𑀢𑁆𑀣𑁄.

𑀲𑁆𑀯𑀸𑀬𑀁 𑀧𑀦 𑀬𑀲𑁆𑀫𑀸 𑀢𑀲𑁆𑀲 𑀯𑀸𑀤𑀸𑀧𑀭𑀸𑀥𑀳𑁂𑀢𑀼𑀓𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 𑀤𑁄𑀲𑀸𑀧𑀭𑀸𑀥𑀧𑀭𑀺𑀬𑀸𑀬𑁂𑀳𑀺 𑀯𑀺𑀪𑀸𑀯𑀺𑀢𑁄. 𑀅𑀯𑀚𑀸𑀦𑀦𑀜𑁆𑀳𑁂𑀢𑁆𑀣 𑀦𑀺𑀕𑁆𑀕𑀳𑀝𑁆𑀞𑀸𑀦𑀁. 𑀢𑀣𑀸 𑀳𑀺 𑀧𑀝𑀺𑀜𑁆𑀜𑀸𑀳𑀸𑀦𑀺, 𑀧𑀝𑀺𑀜𑁆𑀜𑀸𑀦𑁆𑀢𑀭𑀁, 𑀧𑀝𑀺𑀜𑁆𑀜𑀸𑀯𑀺𑀭𑁄𑀥𑁄, 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄, 𑀳𑁂𑀢𑁆𑀯𑀦𑁆𑀢𑀭𑀁, 𑀅𑀢𑁆𑀣𑀦𑁆𑀢𑀭𑀁, 𑀦𑀺𑀭𑀢𑁆𑀣𑀓𑀁, 𑀅𑀯𑀺𑀜𑁆𑀜𑀸𑀢𑀢𑁆𑀣𑀁, 𑀅𑀲𑀫𑁆𑀩𑀦𑁆𑀥𑀢𑁆𑀣𑀁, 𑀅𑀧𑁆𑀧𑀢𑁆𑀢𑀓𑀸𑀮𑀁, 𑀊𑀦𑀁, 𑀅𑀥𑀺𑀓𑀁, 𑀧𑀼𑀦𑀭𑀼𑀢𑁆𑀢𑀁, 𑀅𑀦𑀦𑀼𑀪𑀸𑀲𑀦𑀁, 𑀅𑀯𑀺𑀜𑁆𑀜𑀸𑀢𑀁, 𑀅𑀧𑁆𑀧𑀝𑀺𑀪𑀸, 𑀯𑀺𑀓𑁆𑀔𑁂𑀧𑁄, 𑀫𑀢𑀸𑀦𑀼𑀜𑁆𑀜𑀸, 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀉𑀧𑁂𑀓𑁆𑀔𑀦𑀁, 𑀅𑀦𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀅𑀦𑀼𑀬𑁄𑀕𑁄, 𑀅𑀧𑀲𑀺𑀤𑁆𑀥𑀦𑁆𑀢𑀭𑀁, 𑀳𑁂𑀢𑁆𑀯𑀸𑀪𑀸𑀲𑀸 𑀘𑀸𑀢𑀺 𑀤𑁆𑀯𑀸𑀯𑀻𑀲𑀢𑀺 𑀦𑀺𑀕𑁆𑀕𑀳𑀝𑁆𑀞𑀸𑀦𑀸𑀦𑀺 𑀜𑀸𑀬𑀯𑀸𑀤𑀺𑀦𑁄 𑀯𑀤𑀦𑁆𑀢𑀺.

𑀢𑀢𑁆𑀣 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀥𑀫𑁆𑀫𑀸𑀦𑀼𑀚𑀸𑀦𑀦𑀁 𑀧𑀞𑀫𑀼𑀤𑀸𑀳𑀭𑀡𑁂 𑀧𑀝𑀺𑀜𑁆𑀜𑀸𑀳𑀸𑀦𑀺. 𑀧𑀝𑀺𑀜𑁆𑀜𑀸𑀢𑀢𑁆𑀣𑀧𑀝𑀺𑀲𑁂𑀥𑁂 𑀢𑀤𑀜𑁆𑀜𑀢𑁆𑀣𑀦𑀺𑀤𑁆𑀤𑁂𑀲𑁄 𑀧𑀝𑀺𑀜𑁆𑀜𑀸𑀦𑁆𑀢𑀭𑀁. 𑀧𑀝𑀺𑀜𑁆𑀜𑀸𑀯𑀺𑀭𑀼𑀤𑁆𑀥𑀳𑁂𑀢𑀼𑀓𑀺𑀢𑁆𑀢𑀦𑀁 𑀧𑀝𑀺𑀜𑁆𑀜𑀸𑀯𑀺𑀭𑁄𑀥𑁄. 𑀧𑀝𑀺𑀜𑁆𑀜𑀸𑀢𑀢𑁆𑀣𑀸𑀧𑀦𑀬𑀦𑀁 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄. 𑀅𑀯𑀺𑀲𑁂𑀲𑀯𑀼𑀢𑁆𑀢𑁂 𑀳𑁂𑀢𑀼𑀫𑁆𑀳𑀺 𑀧𑀝𑀺𑀲𑀺𑀤𑁆𑀥𑁂 𑀯𑀺𑀲𑁂𑀲𑀳𑁂𑀢𑀼𑀓𑀣𑀦𑀁 𑀳𑁂𑀢𑁆𑀯𑀦𑁆𑀢𑀭𑀁. 𑀅𑀥𑀺𑀓𑀢𑀢𑁆𑀣𑀸𑀦𑀼𑀧𑀬𑁄𑀕𑀺𑀅𑀢𑁆𑀣𑀓𑀣𑀦𑀁 𑀅𑀢𑁆𑀣𑀦𑁆𑀢𑀭𑀁. 𑀫𑀸𑀢𑀺𑀓𑀸𑀧𑀸𑀞𑁄 𑀯𑀺𑀬 𑀅𑀢𑁆𑀣𑀳𑀻𑀦𑀁 𑀦𑀺𑀭𑀢𑁆𑀣𑀓𑀁. 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀫𑁆𑀧𑀺 𑀲𑀓𑁆𑀔𑀺𑀧𑀝𑀺𑀯𑀸𑀤𑀻𑀳𑀺 𑀅𑀯𑀺𑀤𑀺𑀢𑀁 𑀅𑀯𑀺𑀜𑁆𑀜𑀸𑀢𑀢𑁆𑀣𑀁. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀲𑀫𑁆𑀩𑀦𑁆𑀥𑀭𑀳𑀺𑀢𑀁 𑀅𑀲𑀫𑁆𑀩𑀦𑁆𑀥𑀢𑁆𑀣𑀁. 𑀅𑀯𑀬𑀯𑀯𑀺𑀧𑀮𑁆𑀮𑀸𑀲𑀯𑀘𑀦𑀁 𑀅𑀧𑁆𑀧𑀢𑁆𑀢𑀓𑀸𑀮𑀁. 𑀅𑀯𑀬𑀯𑀯𑀺𑀓𑀮𑀁 𑀊𑀦𑀁. 𑀅𑀥𑀺𑀓𑀳𑁂𑀢𑀽𑀤𑀸𑀳𑀭𑀡𑀁 𑀅𑀥𑀺𑀓𑀁. 𑀞𑀧𑁂𑀢𑁆𑀯𑀸 ¶ 𑀅𑀦𑀼𑀯𑀸𑀤𑀁 𑀲𑀤𑁆𑀤𑀢𑁆𑀣𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁 𑀅𑀢𑁆𑀣𑀸𑀧𑀦𑁆𑀦𑀯𑀘𑀦𑀜𑁆𑀘 𑀧𑀼𑀦𑀭𑀼𑀢𑁆𑀢𑀁. 𑀧𑀭𑀺𑀲𑀸𑀬 𑀯𑀺𑀤𑀺𑀢𑀲𑁆𑀲 𑀢𑀻𑀳𑀺 𑀯𑀼𑀢𑁆𑀢𑀲𑁆𑀲 𑀅𑀧𑀘𑁆𑀘𑀼𑀤𑀸𑀳𑀸𑀭𑁄 𑀅𑀦𑀦𑀼𑀪𑀸𑀲𑀦𑀁. 𑀬𑀁 𑀯𑀸𑀤𑀺𑀦𑀸 ¶ 𑀯𑀼𑀢𑁆𑀢𑀁 𑀧𑀭𑀺𑀲𑀸𑀬 𑀯𑀺𑀜𑁆𑀜𑀸𑀢𑀁 𑀧𑀝𑀺𑀯𑀸𑀤𑀺𑀦𑀸 𑀤𑀼𑀯𑀺𑀜𑁆𑀜𑀸𑀢𑀁, 𑀢𑀁 𑀅𑀯𑀺𑀜𑁆𑀜𑀸𑀢𑀁. 𑀢𑀁𑀯𑀸𑀤𑀺𑀦𑀸 𑀯𑀢𑁆𑀢𑀩𑁆𑀩𑁂 𑀯𑀼𑀢𑁆𑀢𑁂 𑀧𑀭𑀯𑀸𑀤𑀺𑀦𑁄 𑀧𑀝𑀺𑀯𑀘𑀦𑀲𑁆𑀲 𑀅𑀦𑀼𑀧𑀝𑁆𑀞𑀸𑀦𑀁 𑀅𑀧𑁆𑀧𑀝𑀺𑀪𑀸. 𑀓𑀺𑀘𑁆𑀘𑀦𑁆𑀢𑀭𑀧𑁆𑀧𑀲𑀗𑁆𑀕𑁂𑀦 𑀓𑀣𑀸𑀯𑀺𑀘𑁆𑀙𑀺𑀦𑁆𑀤𑀦𑀁 𑀯𑀺𑀓𑁆𑀔𑁂𑀧𑁄. 𑀅𑀢𑁆𑀢𑀦𑁄 𑀤𑁄𑀲𑀸𑀦𑀼𑀚𑀸𑀦𑀦𑁂𑀦 𑀧𑀭𑀧𑀓𑁆𑀔𑀲𑁆𑀲 𑀤𑁄𑀲𑀧𑁆𑀧𑀲𑀜𑁆𑀚𑀦𑀁 𑀧𑀭𑀫𑀢𑀸𑀦𑀼𑀚𑀸𑀦𑀦𑀁 𑀫𑀢𑀸𑀦𑀼𑀜𑁆𑀜𑀸. 𑀦𑀺𑀕𑁆𑀕𑀳𑀧𑁆𑀧𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀉𑀧𑁂𑀓𑁆𑀔𑀦𑀁. 𑀲𑀫𑁆𑀧𑀢𑁆𑀢𑀦𑀺𑀕𑁆𑀕𑀳𑀲𑁆𑀲 𑀅𑀦𑀺𑀕𑁆𑀕𑀳𑀝𑁆𑀞𑀸𑀦𑁂 𑀘 𑀦𑀺𑀕𑁆𑀕𑀡𑁆𑀳𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀅𑀦𑀼𑀬𑁄𑀕𑁄. 𑀏𑀓𑀁 𑀲𑀺𑀤𑁆𑀥𑀦𑁆𑀢𑀫𑀦𑀼𑀚𑀸𑀦𑀺𑀢𑁆𑀯𑀸 𑀅𑀦𑀺𑀬𑀫𑀢𑁄 𑀢𑀤𑀜𑁆𑀜𑀲𑀺𑀤𑁆𑀥𑀦𑁆𑀢𑀓𑀣𑀸𑀧𑁆𑀧𑀲𑀜𑁆𑀚𑀦𑀁 𑀅𑀧𑀲𑀺𑀤𑁆𑀥𑀦𑁆𑀢𑀭𑀁. 𑀅𑀲𑀺𑀤𑁆𑀥𑀸 𑀅𑀦𑁂𑀓𑀦𑁆𑀢𑀺𑀓𑀸 𑀯𑀺𑀭𑀼𑀤𑁆𑀥𑀸 𑀘 𑀳𑁂𑀢𑁆𑀯𑀸𑀪𑀸𑀲𑀸, 𑀳𑁂𑀢𑀼𑀧𑀢𑀺𑀭𑀽𑀧𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀘 𑀓𑀣𑀦𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺.

𑀇𑀫𑁂𑀲𑀼 𑀤𑁆𑀯𑀸𑀯𑀻𑀲𑀢𑀺𑀬𑀸 𑀦𑀺𑀕𑁆𑀕𑀳𑀝𑁆𑀞𑀸𑀦𑁂𑀲𑀼 𑀇𑀤𑀁 𑀧𑀝𑀺𑀜𑁆𑀜𑀸𑀬 𑀅𑀧𑀦𑀬𑀦𑀢𑁄 𑀲𑀬𑀫𑁂𑀯 𑀧𑀘𑁆𑀘𑀓𑁆𑀔𑀸𑀦𑀢𑁄 𑀧𑀝𑀺𑀜𑁆𑀜𑀸𑀲𑀜𑁆𑀜𑀸𑀲𑁄 𑀦𑀸𑀫 𑀦𑀺𑀕𑁆𑀕𑀳𑀝𑁆𑀞𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀅𑀯𑀚𑀸𑀦𑀦𑁂𑀦𑁂𑀯 𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀻’’𑀢𑀺. 𑀅𑀲𑀺𑀤𑁆𑀥𑀢𑁆𑀢𑀸𑀢𑀺 𑀏𑀢𑁂𑀦 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀫𑀸𑀦𑀢𑁄 𑀘 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀳. 𑀦 𑀳𑀺 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀉𑀧𑀮𑀩𑁆𑀪𑁂𑀬𑁆𑀬, 𑀯𑀺𑀯𑀸𑀤𑁄 𑀏𑀯 𑀦 𑀲𑀺𑀬𑀸, 𑀅𑀦𑀼𑀫𑀸𑀦𑀫𑁆𑀧𑀺 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀬𑁂𑀦 𑀧𑀼𑀕𑁆𑀕𑀮𑀁 𑀅𑀦𑀼𑀫𑀺𑀦𑁂𑀬𑁆𑀬𑀼𑀁. 𑀢𑀣𑀸 𑀳𑀺 𑀢𑀁 𑀲𑀸𑀲𑀦𑀺𑀓𑁄 𑀧𑀼𑀕𑁆𑀕𑀮𑀯𑀸𑀤𑀻 𑀯𑀤𑁂𑀬𑁆𑀬 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀯𑁂𑀤𑀦𑀸𑀤𑀺 𑀯𑀺𑀬. 𑀬𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀢𑁆𑀣𑀻’’𑀢𑀺 𑀬𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺 𑀬𑀣𑀸 𑀢𑀁 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀬𑀁 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀦 𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀢𑀁 𑀧𑀓𑀢𑀺𑀯𑀸𑀤𑀺𑀆𑀤𑀻𑀦𑀁 𑀧𑀓𑀢𑀺𑀆𑀤𑀻𑀢𑀺, 𑀢𑀁 𑀫𑀺𑀘𑁆𑀙𑀸. 𑀏𑀢𑁆𑀣 𑀳𑀺 𑀬𑀤𑀺 𑀯𑁄𑀳𑀸𑀭𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀲𑀺𑀤𑁆𑀥𑀁 𑀲𑀸𑀥𑀦𑀁, 𑀅𑀣 𑀧𑀭𑀫𑀢𑁆𑀣𑀢𑁄, 𑀅𑀲𑀺𑀤𑁆𑀥𑁄 𑀳𑁂𑀢𑀼 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀯𑀺𑀭𑀼𑀤𑁆𑀥𑁄 𑀘 𑀢𑀲𑁆𑀲 𑀅𑀦𑀺𑀘𑁆𑀘𑀲𑀗𑁆𑀔𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀤𑀺𑀪𑀸𑀯𑀸𑀲𑀸𑀥𑀦𑀢𑁄 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 𑀢𑀣𑀸 𑀤𑀺𑀝𑁆𑀞𑀢𑁆𑀢𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀅𑀳𑁂𑀢𑀼𑀓𑀪𑀸𑀯𑀲𑁆𑀲𑁂𑀯 𑀧𑀸𑀓𑀝𑀪𑀸𑀯𑀢𑁄.

𑀬𑀁 𑀧𑀦 𑀩𑀸𑀳𑀺𑀭𑀓𑀸 𑀧𑀼𑀣𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀯𑀤𑀦𑁆𑀢𑀺. 𑀅𑀢𑁆𑀣𑁂𑀯 𑀘 𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀸 𑀜𑀸𑀡𑀸𑀪𑀺𑀥𑀸𑀦𑀲𑁆𑀲 𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀭𑀽𑀧𑀸𑀤𑀺 𑀯𑀺𑀬. 𑀅𑀣 𑀯𑀸 𑀅𑀢𑁆𑀢𑀸𑀢𑀺𑀭𑀺𑀢𑁆𑀢𑀧𑀤𑀢𑁆𑀣𑀦𑁆𑀢𑀭𑁄 𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑀲𑀪𑀸𑀯𑀢𑁆𑀢𑀸 𑀬𑀣𑀸 𑀢𑀁 𑀇𑀢𑀭𑀓𑁆𑀔𑀦𑁆𑀥𑀸. 𑀬𑀜𑁆𑀳𑁂𑀢𑁆𑀣 𑀧𑀤𑀢𑁆𑀣𑀦𑁆𑀢𑀭𑀁, 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 ¶ 𑀘 𑀧𑀼𑀭𑀺𑀫𑀲𑁆𑀲 𑀳𑁂𑀢𑀼𑀦𑁄 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑁂𑀓𑀦𑁆𑀢𑀺𑀓𑀢𑀸 𑀅𑀲𑀺𑀤𑁆𑀥𑀢𑀸 𑀘. 𑀦 𑀳𑀺 𑀅𑀲𑀢𑁄 𑀲𑀓𑀯𑀸𑀤𑀺𑀦𑀁 ¶ 𑀧𑀢𑀺 𑀧𑀭𑀫𑀢𑁆𑀣𑀢𑁄 𑀜𑀸𑀡𑀸𑀪𑀺𑀥𑀸𑀦𑀧𑁆𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑁄 𑀲𑀺𑀚𑁆𑀛𑀢𑀺. 𑀯𑁄𑀳𑀸𑀭𑀢𑁄 𑀘𑁂, 𑀢𑀤𑀲𑀺𑀤𑁆𑀥𑀲𑀸𑀥𑀦𑀢𑀸 𑀭𑀽𑀧𑀸𑀤𑀺𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀭𑀽𑀧𑁄𑀧𑀺 𑀧𑀼𑀕𑁆𑀕𑀮𑁄 𑀦 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀯𑀺𑀭𑀼𑀤𑁆𑀥𑀢𑁆𑀣𑀢𑀸. 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀳𑁂𑀢𑀼𑀦𑁄 𑀲𑀸𑀥𑁂𑀢𑀩𑁆𑀩𑀢𑁆𑀣𑀲𑀸𑀫𑀜𑁆𑀜𑀧𑀭𑀺𑀕𑁆𑀕𑀳𑁂 𑀲𑀺𑀤𑁆𑀥𑀲𑀸𑀥𑀦𑀢𑀸, 𑀭𑀽𑀧𑀓𑁆𑀔𑀦𑁆𑀥𑀢𑁄 𑀧𑀤𑀢𑁆𑀣𑀦𑁆𑀢𑀭𑀢𑁄 𑀧𑀭𑀫𑀢𑁆𑀣𑀦𑁆𑀢𑀭𑀪𑀽𑀢𑀯𑁂𑀤𑀦𑀸𑀤𑀺𑀲𑀫𑁆𑀪𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀘. 𑀢𑀩𑁆𑀩𑀺𑀲𑁂𑀲𑀧𑀭𑀺𑀕𑁆𑀕𑀳𑁂 𑀘 𑀲𑀓𑀯𑀸𑀤𑀺𑀦𑀁 𑀧𑀢𑀺 𑀉𑀤𑀸𑀳𑀭𑀡𑀸𑀪𑀸𑀯𑁄 𑀧𑀭𑀧𑀭𑀺𑀓𑀧𑁆𑀧𑀺𑀢𑀚𑀻𑀯𑀧𑀤𑀢𑁆𑀣𑀯𑀺𑀭𑀳𑀢𑁄. 𑀇𑀢𑀭𑀓𑁆𑀔𑀦𑁆𑀥𑀸𑀦𑀁 𑀯𑁂𑀤𑀦𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀉𑀪𑀬𑀲𑀺𑀤𑁆𑀥𑀚𑀻𑀯𑀧𑀤𑀢𑁆𑀣𑀲𑀳𑀺𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀳𑁄𑀢𑀺 𑀇𑀢𑀭𑀓𑁆𑀔𑀦𑁆𑀥𑀸 𑀯𑀺𑀬𑀸𑀢𑀺 𑀯𑀺𑀭𑀼𑀤𑁆𑀥𑀢𑁆𑀣𑀢𑀸 𑀘.

𑀬𑀁 𑀧𑀦 𑀓𑀸𑀡𑀸𑀤𑀸 ‘‘𑀲𑀼𑀔𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄’’𑀢𑀺 𑀅𑀦𑀼𑀫𑀸𑀦𑀁 𑀯𑀤𑀦𑁆𑀢𑀺, 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 𑁋 𑀓𑀺𑀁 𑀲𑀼𑀔𑀸𑀤𑀻𑀦𑀁 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀁 𑀬𑀢𑁄 𑀲𑀼𑀔𑀸𑀤𑀺𑀦𑀺𑀲𑁆𑀲𑀬𑀢𑀸𑀬 𑀅𑀢𑁆𑀢𑀸 𑀅𑀦𑀼𑀫𑀻𑀬𑀢𑀺. 𑀬𑀤𑀺 𑀉𑀧𑁆𑀧𑀸𑀤𑁄, 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀧𑀺 𑀲𑀼𑀔𑀸𑀤𑀬𑁄 𑀏𑀓𑀢𑁄 𑀏𑀯 𑀪𑀯𑁂𑀬𑁆𑀬𑀼𑀁 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀢𑁄 𑀘. 𑀅𑀣 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀸𑀤𑀺𑀓𑀸𑀭𑀡𑀦𑁆𑀢𑀭𑀫𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀤𑁂𑀯 𑀳𑁄𑀢𑀼 𑀓𑀸𑀭𑀡𑀁, 𑀓𑀺𑀫𑀜𑁆𑀜𑁂𑀦 𑀅𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀁. 𑀅𑀣 𑀧𑀦 𑀢𑁂𑀲𑀁 𑀅𑀢𑁆𑀢𑀸𑀥𑀻𑀦𑀸 𑀯𑀼𑀢𑁆𑀢𑀻𑀢𑀺 𑀯𑀤𑁂𑀬𑁆𑀬𑀼𑀁, 𑀏𑀯𑀫𑁆𑀧𑀺 𑀦 𑀲𑀺𑀚𑁆𑀛𑀢𑀺 𑀉𑀤𑀸𑀳𑀭𑀡𑀸𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀢𑀸𑀤𑀺𑀲𑁄 𑀓𑁄𑀘𑀺 𑀲𑀪𑀸𑀯𑀥𑀫𑁆𑀫𑁄 𑀲𑀼𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑁄 𑀅𑀢𑁆𑀣𑀺, 𑀬𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀉𑀤𑀸𑀳𑀭𑀡𑀁 𑀅𑀧𑀤𑀺𑀲𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀦𑀬𑁂𑀦 𑀅𑀲𑀫𑀸𑀲𑀧𑀤𑀸𑀪𑀺𑀥𑁂𑀬𑁆𑀬𑀢𑁆𑀢𑀸𑀢𑀺𑀆𑀤𑀻𑀦𑀫𑁆𑀧𑀺 𑀅𑀬𑀼𑀢𑁆𑀢𑀢𑁆𑀢𑀸 𑀦𑀺𑀯𑀸𑀭𑁂𑀢𑀩𑁆𑀩𑀸. 𑀢𑀣𑀸 ‘‘𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀘 𑀧𑀓𑀢𑀺𑀅𑀡𑀼𑀆𑀤𑀻𑀦𑀫𑁆𑀧𑀺 𑀩𑀸𑀳𑀺𑀭𑀧𑀭𑀺𑀓𑀧𑁆𑀧𑀺𑀢𑀸𑀦𑀁 𑀅𑀲𑀺𑀤𑁆𑀥𑀢𑀸 𑀯𑀼𑀢𑁆𑀢𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦 𑀢𑁂𑀲𑀁 𑀅𑀲𑀺𑀤𑁆𑀥𑀻𑀢𑀺? 𑀧𑀫𑀸𑀡𑁂𑀦 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀦 𑀳𑀺 𑀧𑀘𑁆𑀘𑀓𑁆𑀔𑀢𑁄 𑀧𑀓𑀢𑀺 𑀲𑀺𑀤𑁆𑀥𑀸 𑀓𑀧𑀺𑀮𑀲𑁆𑀲𑀧𑀺 𑀇𑀲𑀺𑀦𑁄 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀲𑁆𑀲 𑀓𑀸𑀧𑀺𑀮𑁂𑀳𑀺 𑀅𑀦𑀼𑀜𑁆𑀜𑀸𑀬𑀫𑀸𑀦𑀢𑁆𑀢𑀸.

𑀬𑀁 𑀧𑀦 ‘‘𑀅𑀢𑁆𑀣𑀺 𑀧𑀥𑀸𑀦𑀁 𑀪𑁂𑀤𑀸𑀦𑀁 𑀅𑀦𑁆𑀯𑀬𑀤𑀲𑁆𑀲𑀦𑀢𑁄 𑀲𑀓𑀮𑀓𑀮𑀸𑀧𑀫𑀢𑁆𑀢𑀁 𑀯𑀺𑀬𑀸’’𑀢𑀺 𑀢𑁂 𑀅𑀦𑀼𑀫𑀸𑀦𑀁 𑀯𑀤𑀦𑁆𑀢𑀺. 𑀇𑀫𑀺𑀦𑀸 𑀳𑀺 𑀪𑁂𑀤𑀸𑀦𑀁 𑀲𑀢𑁆𑀯𑀸𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑀧𑀥𑀸𑀦𑀢𑀸 𑀧𑀝𑀺𑀜𑁆𑀜𑀸𑀢𑀸. 𑀏𑀢𑁆𑀣 𑀘 𑀯𑀼𑀘𑁆𑀘𑀢𑁂 𑁋 𑀲𑀓𑀮𑀸𑀤𑀻𑀦𑀁 𑀧𑀥𑀸𑀦𑀁 𑀢𑀩𑁆𑀩𑀺𑀪𑀸𑀕𑁂𑀳𑀺 𑀓𑀺𑀁 𑀅𑀜𑁆𑀜𑀢𑁆𑀢𑀁, 𑀉𑀤𑀸𑀳𑀼 𑀅𑀦𑀜𑁆𑀜𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀅𑀜𑁆𑀜𑀢𑁆𑀢𑀁, 𑀲𑀩𑁆𑀩𑁄 𑀮𑁄𑀓𑁄 𑀧𑀥𑀸𑀦𑀫𑀬𑁄𑀢𑀺 𑀲𑀫𑀬𑀯𑀺𑀭𑁄𑀥𑁄 𑀲𑀺𑀬𑀸, 𑀲𑀡𑁆𑀞𑀸𑀦𑀪𑁂𑀤𑁂𑀦 𑀅𑀜𑁆𑀜𑀢𑁆𑀣 𑀧𑀝𑀺𑀚𑀸𑀦𑀦𑀢𑁄 ¶ 𑀦 𑀤𑁄𑀲𑁄𑀢𑀺 𑀘𑁂? 𑀢𑀁 𑀦, 𑀯𑀮𑀬𑀓𑀝𑀓𑀸𑀤𑀺𑀲𑀡𑁆𑀞𑀸𑀦𑀪𑁂𑀤𑁂𑀧𑀺 𑀓𑀦𑀓𑀸𑀪𑁂𑀤𑀤𑀲𑁆𑀲𑀦𑀢𑁄. 𑀦 𑀳𑀺 𑀲𑀡𑁆𑀞𑀸𑀦𑀁 𑀯𑀢𑁆𑀣𑀼𑀪𑁂𑀤𑀦𑀺𑀫𑀺𑀢𑁆𑀢𑀁 𑀢𑀲𑁆𑀲 𑀅𑀦𑀼𑀧𑀸𑀤𑀸𑀦𑀢𑁆𑀢𑀸. 𑀬𑀁 𑀬𑀲𑁆𑀲 𑀪𑁂𑀤𑀦𑀺𑀫𑀺𑀢𑁆𑀢𑀁, 𑀦 𑀢𑀁 𑀢𑀲𑁆𑀲 𑀅𑀦𑀼𑀧𑀸𑀤𑀸𑀦𑀁 𑀬𑀣𑀸 𑀲𑀼𑀯𑀡𑁆𑀡𑀫𑀢𑁆𑀢𑀺𑀓𑀸𑀤𑀺𑀖𑀝𑀸𑀤𑀻𑀦𑀁 𑀲𑀼𑀯𑀡𑁆𑀡𑀖𑀝𑁄 𑀫𑀢𑁆𑀢𑀺𑀓𑀸𑀖𑀝𑁄 𑀓𑁄𑀲𑁂𑀬𑁆𑀬𑀧𑀝𑁄 𑀓𑀧𑁆𑀧𑀸𑀲𑀧𑀝𑁄𑀢𑀺 𑀘 𑀲𑀸𑀥𑁂𑀢𑀩𑁆𑀩𑀥𑀫𑁆𑀫𑀭𑀳𑀺𑀢𑀜𑁆𑀘 𑀉𑀤𑀸𑀳𑀭𑀡𑀁. 𑀦 𑀳𑀺 𑀧𑀥𑀸𑀦𑁂𑀓𑀓𑀸𑀭𑀡𑀧𑀼𑀩𑁆𑀩𑀓𑀢𑁆𑀢𑀁 𑀲𑀓𑀮𑀸𑀤𑀻𑀦𑀁 𑀧𑀓𑀢𑀺𑀯𑀸𑀤𑀺𑀦𑁄 ¶ 𑀲𑀺𑀤𑁆𑀥𑀁, 𑀦𑀸𑀧𑀺 𑀓𑀸𑀧𑀺𑀮𑀸𑀦𑀁 𑀓𑀣𑀜𑁆𑀘𑀺 𑀅𑀜𑁆𑀜𑀢𑁆𑀢𑀸𑀦𑀼𑀚𑀸𑀦𑀦𑀢𑁄. 𑀅𑀦𑀜𑁆𑀜𑀢𑁆𑀢𑁂 𑀧𑀦 𑀉𑀤𑀸𑀳𑀭𑀡𑀸𑀪𑀸𑀯𑁄. 𑀦 𑀳𑀺 𑀢𑀤𑁂𑀯 𑀲𑀸𑀥𑁂𑀢𑀩𑁆𑀩𑀁 𑀢𑀤𑁂𑀯 𑀘 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀁, 𑀅𑀦𑁆𑀯𑀬𑀤𑀲𑁆𑀲𑀦𑀫𑁆𑀧𑀺 𑀅𑀲𑀺𑀤𑁆𑀥𑀁. 𑀦 𑀳𑀺 𑀢𑀤𑁂𑀯 𑀢𑁂𑀦 𑀅𑀦𑁆𑀯𑀺𑀢𑀁 𑀬𑀼𑀚𑁆𑀚𑀢𑀺. 𑀧𑀥𑀸𑀦𑁂𑀦 𑀅𑀦𑁆𑀯𑀬𑀤𑀲𑁆𑀲𑀦𑀫𑁆𑀧𑀺 𑀅𑀲𑀺𑀤𑁆𑀥𑀁 𑀧𑀭𑀯𑀸𑀤𑀺𑀦𑁄𑀢𑀺 𑀕𑀼𑀡𑀲𑁆𑀲 𑀧𑀥𑀸𑀦𑀲𑁆𑀲 𑀅𑀦𑀦𑀼𑀚𑀸𑀦𑀦𑀢𑁄. 𑀅𑀣 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀧𑀥𑀸𑀦𑀁 ‘‘𑀧𑀥𑀻𑀬𑀢𑀺 𑀏𑀢𑁆𑀣 𑀨𑀮’’𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀲𑀺𑀤𑁆𑀥𑀫𑁂𑀯 𑀓𑀸𑀭𑀡𑁂 𑀨𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀸𑀦𑀦𑀼𑀚𑀸𑀦𑀦𑀢𑁄, 𑀳𑁂𑀢𑀼𑀦𑁄 𑀘 𑀅𑀲𑀺𑀤𑁆𑀥𑀦𑀺𑀲𑁆𑀲𑀬𑀢𑀸𑀧𑀭𑀸𑀪𑀺𑀫𑀢𑀪𑁂𑀤𑀸𑀦𑀦𑀼𑀚𑀸𑀦𑀦𑀢𑁄. 𑀅𑀣 𑀯𑀺𑀲𑁂𑀲𑁂𑀦 𑀓𑀸𑀭𑀡𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀨𑀮𑀲𑁆𑀲 𑀲𑀸𑀥𑀻𑀬𑀢𑀺, 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀤𑁆𑀥𑀁 𑀥𑀫𑁆𑀫𑀸𑀦𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸𑀢𑀺.

𑀅𑀧𑀺𑀘 𑀧𑀓𑀢𑀺𑀯𑀸𑀤𑀺𑀦𑁄 ‘‘𑀲𑀢𑁆𑀯𑀭𑀚𑀢𑀫𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀕𑀼𑀡𑀸𑀦𑀁 𑀲𑀫𑀪𑀸𑀯𑁄 𑀧𑀓𑀢𑀺, 𑀲𑀸 𑀘 𑀦𑀺𑀘𑁆𑀘𑀸 𑀲𑀢𑁆𑀯𑀸𑀤𑀺𑀯𑀺𑀲𑀫𑀲𑀪𑀸𑀯𑀢𑁄 𑀅𑀦𑀺𑀘𑁆𑀘𑀢𑁄 𑀫𑀳𑀢𑀸𑀤𑀺𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀲𑀸 𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀓𑀢𑀺 𑀦 𑀲𑀺𑀚𑁆𑀛𑀢𑀺 𑀢𑀢𑁄 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁄 𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀢𑁆𑀢𑀸. 𑀦 𑀳𑀺 𑀅𑀲𑁆𑀲𑀲𑁆𑀲 𑀯𑀺𑀲𑀸𑀡𑀁 𑀤𑀻𑀖𑀁, 𑀢𑀜𑁆𑀘 𑀭𑀲𑁆𑀲𑀢𑁄 𑀕𑁄𑀯𑀺𑀲𑀸𑀡𑀢𑁄 𑀅𑀦𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀺𑀚𑁆𑀛𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀢𑀺𑀡𑁆𑀡𑀁 𑀏𑀓𑀪𑀸𑀯𑀸𑀪𑀸𑀯𑀢𑁄. 𑀲𑀢𑁆𑀯𑀸𑀤𑀺𑀕𑀼𑀡𑀢𑁆𑀢𑀬𑀢𑁄 𑀳𑀺 𑀧𑀓𑀢𑀺𑀬𑀸 𑀅𑀦𑀜𑁆𑀜𑀢𑁆𑀢𑀁 𑀇𑀘𑁆𑀙𑀦𑁆𑀢𑀸𑀦𑀁 𑀢𑁂𑀲𑀁 𑀲𑀢𑁆𑀯𑀸𑀤𑀻𑀦𑀫𑁆𑀧𑀺 𑀧𑀓𑀢𑀺𑀬𑀸 𑀅𑀦𑀜𑁆𑀜𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀦 𑀘 𑀬𑀼𑀢𑁆𑀢𑀁 𑀢𑀺𑀡𑁆𑀡𑀁 𑀏𑀓𑀪𑀸𑀯𑁄𑀢𑀺. 𑀏𑀯𑀫𑁆𑀧𑀺 𑀧𑀓𑀢𑀺 𑀦 𑀲𑀺𑀚𑁆𑀛𑀢𑀺. 𑀓𑀣𑀁? 𑀅𑀦𑁂𑀓𑀤𑁄𑀲𑀸𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀩𑁆𑀬𑀢𑁆𑀢𑀲𑀪𑀸𑀯𑀢𑁄 𑀯𑀺𑀓𑀸𑀭𑀢𑁄 𑀅𑀩𑁆𑀬𑀢𑁆𑀢𑀲𑀪𑀸𑀯𑀸 𑀧𑀓𑀢𑀺 𑀅𑀦𑀜𑁆𑀜𑀸, 𑀏𑀯𑀁 𑀲𑀦𑁆𑀢𑁂 𑀳𑁂𑀢𑀼𑀫𑀦𑁆𑀢𑀢𑀸 𑀅𑀦𑀺𑀘𑁆𑀘𑀢𑀸 𑀅𑀩𑁆𑀬𑀸𑀧𑀺𑀢𑀸 𑀲𑀓𑀺𑀭𑀺𑀬𑀢𑀸 𑀅𑀦𑁂𑀓𑀢𑀸 𑀦𑀺𑀲𑁆𑀲𑀺𑀢𑀢𑀸 𑀮𑀺𑀗𑁆𑀕𑀢𑀸 𑀲𑀸𑀯𑀬𑀯𑀢𑀸 𑀧𑀭𑀢𑀦𑁆𑀢𑁆𑀭𑀢𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑁂𑀓𑁂 𑀤𑁄𑀲𑀸 𑀧𑀓𑀢𑀺𑀬𑀸 𑀆𑀧𑀚𑁆𑀚𑀦𑁆𑀢𑀺, 𑀦 𑀚𑀸𑀢𑀺𑀯𑀺𑀓𑀸𑀭𑀢𑁄 𑀅𑀦𑀜𑁆𑀜𑀸 𑀧𑀝𑀺𑀚𑀸𑀦𑀺𑀢𑀩𑁆𑀩𑀸. 𑀢𑀣𑀸 𑀘 𑀲𑀢𑀺 𑀲𑀫𑀬𑀯𑀺𑀭𑁄𑀥𑁄𑀢𑀺 𑀓𑀧𑁆𑀧𑀦𑀸𑀫𑀢𑁆𑀢𑀁 𑀧𑀓𑀢𑀻𑀢𑀺 𑀅𑀲𑀺𑀤𑁆𑀥𑀸 𑀲𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀧𑀓𑀢𑀺𑀬𑀸 ¶ 𑀘 𑀅𑀲𑀺𑀤𑁆𑀥𑀸𑀬 𑀢𑀁𑀦𑀺𑀫𑀺𑀢𑁆𑀢𑀓𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸 𑀫𑀳𑀢𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸 𑀏𑀯. 𑀬𑀣𑀸 𑀘 𑀧𑀓𑀢𑀺 𑀫𑀳𑀢𑀸𑀤𑀬𑁄 𑀘, 𑀏𑀯𑀁 𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺. 𑀏𑀢𑁂𑀲𑀼 𑀳𑀺 𑀇𑀲𑁆𑀲𑀭𑁄 𑀢𑀸𑀯 𑀦 𑀲𑀺𑀚𑁆𑀛𑀢𑀺 𑀉𑀧𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄. 𑀲𑀢𑁆𑀢𑀸𑀦𑀜𑁆𑀳𑀺 𑀚𑀸𑀢𑀺𑀬𑀁 𑀫𑀸𑀢𑀸𑀧𑀺𑀢𑀽𑀦𑀁 𑀩𑀻𑀚𑀔𑁂𑀢𑁆𑀢𑀪𑀸𑀯𑁂𑀦 𑀓𑀫𑁆𑀫𑀲𑁆𑀲 𑀳𑀻𑀦𑀢𑀸𑀤𑀺𑀯𑀺𑀪𑀸𑀕𑀓𑀭𑀡𑁂𑀦, 𑀢𑀢𑁄 𑀧𑀭𑀜𑁆𑀘 𑀉𑀢𑀼𑀆𑀳𑀸𑀭𑀸𑀦𑀁 𑀩𑁆𑀭𑀽𑀳𑀦𑀼𑀧𑀢𑁆𑀣𑀫𑁆𑀪𑀦𑁂𑀦, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑁂𑀦 𑀉𑀧𑀓𑀸𑀭𑁄 𑀤𑀺𑀲𑁆𑀲𑀢𑀺, 𑀦, 𑀏𑀯𑀫𑀺𑀲𑁆𑀲𑀭𑀲𑁆𑀲. 𑀳𑀻𑀦𑀢𑀸𑀤𑀺𑀯𑀺𑀪𑀸𑀕𑀓𑀭𑀡𑀫𑀺𑀲𑁆𑀲𑀭𑀲𑁆𑀲𑀸𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁄 𑀉𑀧𑀓𑀸𑀭𑀯𑀺𑀲𑁂𑀲𑁄 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑁄, 𑀦 𑀓𑀫𑁆𑀫𑀼𑀦𑀸𑀢𑀺 𑀲𑀸𑀥𑀦𑀻𑀬𑀫𑁂𑀢𑀁. 𑀇𑀢𑀭𑀢𑁆𑀭𑀸𑀧𑀺 𑀲𑀫𑀸𑀦𑀫𑁂𑀢𑀦𑁆𑀢𑀺 𑀘𑁂? 𑀦, 𑀓𑀫𑁆𑀫𑀢𑁄 𑀨𑀮𑀦𑀺𑀬𑀫𑀲𑀺𑀤𑁆𑀥𑀢𑁆𑀢𑀸 ¶ . 𑀲𑀢𑀺 𑀳𑀺 𑀓𑀢𑀽𑀧𑀘𑀺𑀢𑁂 𑀓𑀫𑁆𑀫𑀲𑁆𑀫𑀺𑀁 𑀢𑀢𑁆𑀣 𑀬𑀁 𑀅𑀓𑀼𑀲𑀮𑀁, 𑀢𑀢𑁄 𑀳𑀻𑀦𑀢𑀸, 𑀬𑀁 𑀓𑀼𑀲𑀮𑀁, 𑀢𑀢𑁄 𑀧𑀡𑀻𑀢𑀢𑀸𑀢𑀺 𑀲𑀺𑀤𑁆𑀥𑀫𑁂𑀢𑀁. 𑀇𑀲𑁆𑀲𑀭𑀯𑀸𑀤𑀺𑀦𑀸𑀧𑀺 𑀳𑀺 𑀦 𑀲𑀓𑁆𑀓𑀸 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁.

𑀅𑀧𑀺𑀘𑁂𑀢𑀲𑁆𑀲 𑀮𑁄𑀓𑀯𑀺𑀘𑀺𑀢𑁆𑀢𑀲𑁆𑀲 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀪𑀸𑀯𑁂 𑀩𑀳𑀽 𑀤𑁄𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀓𑀣𑀁? 𑀬𑀤𑀺 𑀲𑀩𑁆𑀩𑀫𑀺𑀤𑀁 𑀮𑁄𑀓𑀯𑀺𑀘𑀺𑀢𑁆𑀢𑀁 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑀁, 𑀲𑀳𑁂𑀯 𑀯𑀘𑀦𑁂𑀦 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀓𑀫𑁂𑀦. 𑀦 𑀳𑀺 𑀲𑀦𑁆𑀦𑀺𑀳𑀺𑀢𑀓𑀸𑀭𑀡𑀸𑀦𑀁 𑀨𑀮𑀸𑀦𑀁 𑀓𑀫𑁂𑀦 𑀉𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸, 𑀓𑀸𑀭𑀡𑀦𑁆𑀢𑀭𑀸𑀧𑁂𑀓𑁆𑀔𑀸𑀬 𑀇𑀲𑁆𑀲𑀭𑀲𑁆𑀲 𑀲𑀸𑀫𑀢𑁆𑀣𑀺𑀬𑀳𑀸𑀦𑀺. 𑀘𑀓𑁆𑀔𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑀸𑀭𑀡𑀪𑀸𑀯𑁄 𑀦 𑀬𑀼𑀢𑁆𑀢𑁄. 𑀓𑀭𑁄𑀢𑀻𑀢𑀺 𑀳𑀺 𑀓𑀸𑀭𑀡𑀦𑁆𑀢𑀺. 𑀇𑀲𑁆𑀲𑀭𑁄 𑀏𑀯 𑀘 𑀓𑀸𑀭𑀓𑁄𑀢𑀺 𑀲𑀩𑁆𑀩𑀓𑀸𑀭𑀡𑀸𑀦𑀁 𑀓𑀸𑀭𑀡𑀪𑀸𑀯𑀳𑀸𑀦𑀺. 𑀬𑁂𑀳𑀺 𑀧𑀼𑀣𑀼𑀯𑀺𑀲𑁂𑀲𑁂𑀳𑀺 𑀇𑀲𑁆𑀲𑀭𑁄 𑀧𑀲𑀻𑀤𑁂𑀬𑁆𑀬, 𑀢𑁂𑀲𑀜𑁆𑀘 𑀲𑀬𑀁𑀓𑀸𑀭𑀢𑀸 𑀆𑀧𑀚𑁆𑀚𑀢𑀺, 𑀢𑀣𑀸 𑀲𑀩𑁆𑀩𑁂𑀲𑀁 𑀳𑁂𑀢𑀼𑀓𑀸𑀦𑀁 𑀓𑀸𑀭𑀡𑀪𑀸𑀯𑁄. 𑀬𑀜𑁆𑀚𑁂𑀢𑀁 𑀦𑀺𑀫𑁆𑀫𑀸𑀦𑀁, 𑀢𑀜𑁆𑀘𑀲𑁆𑀲 𑀅𑀢𑁆𑀢𑀤𑀢𑁆𑀣𑀁 𑀯𑀸 𑀲𑀺𑀬𑀸, 𑀧𑀭𑀢𑁆𑀣𑀁 𑀯𑀸 𑀲𑀺𑀬𑀸. 𑀅𑀢𑁆𑀢𑀤𑀢𑁆𑀣𑀢𑀸𑀬𑀁 𑀅𑀢𑁆𑀢𑀦𑁄 𑀇𑀲𑁆𑀲𑀭𑀪𑀸𑀯𑀳𑀸𑀦𑀺 𑀅𑀓𑀢𑀓𑀺𑀘𑁆𑀘𑀢𑀸𑀬 𑀇𑀲𑀺𑀢𑀸𑀯𑀲𑀺𑀢𑀸𑀪𑀸𑀯𑀢𑁄. 𑀢𑁂𑀦 𑀯𑀸 𑀦𑀺𑀫𑁆𑀫𑀺𑀢𑁂𑀦 𑀬𑀁 𑀅𑀢𑁆𑀢𑀦𑁄 𑀓𑀸𑀢𑀩𑁆𑀩𑀁, 𑀢𑀁 𑀓𑀲𑁆𑀫𑀸 𑀲𑀬𑀫𑁂𑀯 𑀦 𑀓𑀭𑁄𑀢𑀺. 𑀧𑀭𑀢𑁆𑀣𑀢𑀸𑀬𑀁 𑀧𑀦 𑀧𑀭𑁄 𑀦𑀸𑀫𑁂𑀢𑁆𑀣 𑀮𑁄𑀓𑁄 𑀏𑀯𑀸𑀢𑀺 𑀓𑀺𑀫𑀢𑁆𑀣𑀺𑀬𑀁 𑀢𑀲𑁆𑀲 𑀦𑀺𑀭𑀬𑀸𑀤𑀺𑀭𑁄𑀕𑀸𑀤𑀺𑀯𑀺𑀲𑀸𑀤𑀺𑀦𑀺𑀫𑁆𑀫𑀸𑀦𑀁. 𑀬𑀸 𑀘𑀲𑁆𑀲 𑀇𑀲𑁆𑀲𑀭𑀢𑀸, 𑀲𑀸 𑀲𑀬𑀁𑀓𑀢𑀸 𑀯𑀸 𑀲𑀺𑀬𑀸 𑀧𑀭𑀁𑀓𑀢𑀸 𑀯𑀸 𑀅𑀳𑁂𑀢𑀼𑀓𑀸 𑀯𑀸. 𑀢𑀢𑁆𑀣 𑀲𑀬𑀁𑀓𑀢𑀸 𑀘𑁂, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀲𑁆𑀲𑀭𑀪𑀸𑀯𑀸𑀧𑀢𑁆𑀢𑀺. 𑀧𑀭𑀁𑀓𑀢𑀸 𑀘𑁂, 𑀧𑀘𑁆𑀙𑀸𑀧𑀺 𑀅𑀦𑀺𑀲𑁆𑀲𑀭𑀪𑀸𑀯𑀸𑀧𑀢𑁆𑀢𑀺 𑀲𑀉𑀢𑁆𑀢𑀭𑀢𑀸 𑀘 𑀲𑀺𑀬𑀸. 𑀅𑀳𑁂𑀢𑀼𑀓𑀸 𑀘𑁂, 𑀦 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀭𑀢𑀸𑀢𑀺 𑀏𑀯𑀫𑀺𑀲𑁆𑀲𑀭𑀲𑁆𑀲𑀧𑀺 𑀅𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀘 𑀇𑀲𑁆𑀲𑀭𑁄, 𑀏𑀯𑀁 𑀧𑀚𑀸𑀧𑀢𑀺 𑀧𑀼𑀭𑀺𑀲𑁄 𑀘. 𑀦𑀸𑀫𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀳𑀺 𑀯𑀸𑀤𑀻𑀳𑀺 𑀧𑀓𑀧𑁆𑀧𑀺𑀢𑀁 𑀬𑀤𑀺𑀤𑀁 ‘‘𑀧𑀚𑀸𑀧𑀢𑀺 𑀧𑀼𑀭𑀺𑀲𑁄’’𑀢𑀺. 𑀢𑀁𑀦𑀺𑀫𑀺𑀢𑁆𑀢𑀓𑀁 ¶ 𑀧𑀦 𑀮𑁄𑀓𑀧𑁆𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀸𑀦𑀁 𑀧𑀚𑀸𑀧𑀢𑀺𑀯𑀸𑀤𑁂 𑀧𑀼𑀭𑀺𑀲𑀯𑀸𑀤𑁂 𑀘 𑀇𑀲𑁆𑀲𑀭𑀯𑀸𑀤𑁂 𑀯𑀺𑀬 𑀤𑁄𑀲𑀸 𑀅𑀲𑀺𑀤𑁆𑀥𑀺 𑀘 𑀯𑀺𑀥𑀸𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁂 𑀇𑀲𑁆𑀲𑀭𑀸𑀤𑀬𑁄, 𑀏𑀯𑀁 𑀓𑀸𑀮𑁄𑀧𑀺 𑀅𑀲𑀺𑀤𑁆𑀥𑁄 𑀮𑀓𑁆𑀔𑀡𑀸𑀪𑀸𑀯𑀢𑁄. 𑀧𑀭𑀫𑀢𑁆𑀣𑀢𑁄 𑀳𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀗𑁆𑀔𑀸𑀢𑀁 𑀮𑀓𑁆𑀔𑀡𑀁 𑀉𑀧𑀮𑀩𑁆𑀪𑀢𑀺. 𑀬𑀣𑀸 𑀧𑀣𑀯𑀺𑀬𑀸 𑀓𑀣𑀺𑀦𑀢𑀸, 𑀦 𑀏𑀯𑀁 𑀓𑀸𑀮𑀲𑁆𑀲, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄𑀢𑀺. 𑀓𑀸𑀮𑀯𑀸𑀤𑀻 𑀧𑀦𑀸𑀳 ‘‘𑀯𑀢𑁆𑀢𑀦𑀸𑀮𑀓𑁆𑀔𑀡𑁄 𑀓𑀸𑀮𑁄’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀓𑀸 𑀧𑀦𑀸𑀬𑀁 𑀯𑀢𑁆𑀢𑀦𑀸’’𑀢𑀺. 𑀲𑁄 𑀆𑀳 ‘‘𑀲𑀫𑀬𑀫𑀼𑀳𑀼𑀢𑁆𑀢𑀸𑀤𑀻𑀦𑀁 𑀧𑀯𑀢𑁆𑀢𑀻’’𑀢𑀺. 𑀢𑀫𑁆𑀧𑀺 𑀦, 𑀭𑀽𑀧𑀸𑀤𑀻𑀳𑀺 𑀅𑀢𑁆𑀣𑀦𑁆𑀢𑀭𑀪𑀸𑀯𑁂𑀦 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸. 𑀧𑀭𑀫𑀢𑁆𑀣𑀢𑁄 𑀳𑀺 𑀅𑀦𑀺𑀤𑁆𑀥𑀸𑀭𑀺𑀢𑀲𑀪𑀸𑀯𑀲𑁆𑀲 𑀯𑀢𑁆𑀢𑀦𑀸𑀮𑀓𑁆𑀔𑀡𑀢𑀸𑀬𑀁 𑀲𑀲𑀯𑀺𑀲𑀸𑀡𑀸𑀤𑀻𑀦𑀫𑁆𑀧𑀺 𑀢𑀁𑀮𑀓𑁆𑀔𑀡𑀢𑀸 𑀆𑀧𑀚𑁆𑀚𑁂𑀬𑁆𑀬.

𑀬𑀁 𑀧𑀦 𑀯𑀤𑀦𑁆𑀢𑀺 𑀓𑀸𑀡𑀸𑀤𑀸 ‘‘𑀅𑀧𑀭𑀲𑁆𑀫𑀺𑀁 𑀅𑀧𑀭𑀁 𑀬𑀼𑀕𑀧𑀤𑀺 𑀘𑀺𑀭𑀁 𑀔𑀺𑀧𑁆𑀧𑀫𑀺𑀢𑀺 𑀓𑀸𑀮𑀮𑀺𑀗𑁆𑀕𑀸𑀦𑀻𑀢𑀺 𑀮𑀺𑀗𑁆𑀕𑀲𑀩𑁆𑀪𑀸𑀯𑀢𑁄 ¶ 𑀅𑀢𑁆𑀣𑀺 𑀓𑀸𑀮𑁄’’𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀮𑀺𑀗𑁆𑀕𑀺𑀦𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑁂𑀲𑀼 𑀳𑀺 𑀮𑀺𑀗𑁆𑀕𑁂𑀲𑀼 𑀮𑀺𑀗𑁆𑀕𑀫𑀢𑁆𑀢𑀕𑁆𑀕𑀳𑀡𑁂𑀦 𑀮𑀺𑀗𑁆𑀕𑀺𑀦𑀺 𑀅𑀯𑀩𑁄𑀥𑁄 𑀪𑀯𑁂𑀬𑁆𑀬. 𑀦 𑀘 𑀓𑁂𑀦𑀘𑀺 𑀅𑀯𑀺𑀧𑀭𑀻𑀢𑀘𑁂𑀢𑀲𑀸 𑀢𑁂𑀦 𑀮𑀺𑀗𑁆𑀕𑁂𑀦 𑀲𑀳 𑀓𑀤𑀸𑀘𑀺 𑀓𑀸𑀮𑀲𑀗𑁆𑀔𑀸𑀢𑁄 𑀮𑀺𑀗𑁆𑀕𑀻 𑀕𑀳𑀺𑀢𑀧𑀼𑀩𑁆𑀩𑁄𑀢𑀺. 𑀅𑀢𑁄 𑀦 𑀬𑀼𑀢𑁆𑀢𑀁 ‘‘𑀮𑀺𑀗𑁆𑀕𑀲𑀩𑁆𑀪𑀸𑀯𑀢𑁄 𑀅𑀢𑁆𑀣𑀺 𑀓𑀸𑀮𑁄’’𑀢𑀺. ‘‘𑀅𑀧𑀭𑀲𑁆𑀫𑀺𑀁 𑀅𑀧𑀭’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀯𑀺𑀲𑁂𑀲𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀧𑀞𑀫𑀚𑀸𑀢𑀢𑀸𑀤𑀺𑀦𑀺𑀫𑀺𑀢𑁆𑀢𑀓𑀢𑁆𑀢𑀸 𑀢𑀲𑁆𑀲. 𑀦 𑀘 𑀧𑀞𑀫𑀚𑀸𑀢𑀢𑀸𑀤𑀺 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺 𑀅𑀜𑁆𑀜𑀢𑁆𑀭 𑀲𑀫𑀜𑁆𑀜𑀸𑀫𑀢𑁆𑀢𑀢𑁄𑀢𑀺 𑀦𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄, 𑀩𑀳𑀽𑀦𑀁 𑀏𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂𑀦 𑀳𑀺 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦 𑀩𑀳𑀽 𑀓𑀸𑀮𑀪𑁂𑀤𑀸. 𑀢𑁆𑀯𑀜𑁆𑀘𑁂𑀢𑀁 𑀏𑀓𑀁 𑀯𑀤𑀲𑀻𑀢𑀺 𑀩𑀳𑀽𑀦𑀁 𑀏𑀓𑀪𑀸𑀯𑀸𑀪𑀸𑀯𑀢𑁄 𑀦𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀢𑀣𑀸 𑀏𑀓𑀲𑁆𑀲 𑀅𑀦𑁂𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀳𑀺 𑀅𑀬𑀁 𑀅𑀚𑁆𑀚 𑀯𑀢𑁆𑀢𑀫𑀸𑀦𑀓𑀸𑀮𑁄, 𑀲𑁄 𑀳𑀺𑀬𑁆𑀬𑁄 𑀅𑀦𑀸𑀕𑀢𑁄 𑀅𑀳𑁄𑀲𑀺, 𑀲𑁆𑀯𑁂 𑀅𑀢𑀻𑀢𑁄 𑀪𑀯𑀺𑀲𑁆𑀲𑀢𑀺. 𑀳𑀺𑀬𑁆𑀬𑁄 𑀘 𑀯𑀢𑁆𑀢𑀫𑀸𑀦𑁄 𑀅𑀚𑁆𑀚 𑀅𑀢𑀻𑀢𑁄 𑀅𑀳𑁄𑀲𑀺, 𑀢𑀣𑀸 𑀲𑁆𑀯𑁂 𑀯𑀢𑁆𑀢𑀫𑀸𑀦𑁄𑀧𑀺 𑀅𑀧𑀭𑀚𑁆𑀚. 𑀦 𑀘𑁂𑀓𑀲𑀪𑀸𑀯𑀲𑁆𑀲 𑀅𑀦𑁂𑀓𑀲𑀪𑀸𑀯𑀢𑀸 𑀬𑀼𑀢𑁆𑀢𑀸𑀢𑀺 𑀅𑀲𑀺𑀤𑁆𑀥𑁄 𑀧𑀭𑀫𑀢𑁆𑀣𑀢𑁄 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀧𑀦 𑀉𑀧𑀸𑀤𑀸𑀬 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀸𑀬 𑀮𑁄𑀓𑀲𑀫𑀜𑁆𑀜𑀸𑀬 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀢𑁄 𑀯𑁄𑀳𑀭𑀻𑀬𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸. 𑀓𑀺𑀁 𑀓𑀸𑀭𑀡𑀸? 𑀮𑀓𑁆𑀔𑀡𑀸𑀪𑀸𑀯𑀸. 𑀦 𑀳𑀺 𑀲𑀪𑀸𑀯𑀢𑁄 𑀦𑀺𑀬𑀢𑀺𑀬𑀤𑀺𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀣𑀸 𑀏𑀯𑀁𑀯𑀺𑀥𑁄 𑀓𑁄𑀘𑀺 ¶ 𑀪𑀸𑀯𑁄 𑀅𑀢𑁆𑀣𑀺 𑀘𑁂, 𑀢𑁂𑀲𑀁 𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀢𑀺𑀝𑁆𑀞𑀸𑀧𑀓𑀳𑁂𑀢𑀼𑀦𑀸 𑀘 𑀦 𑀘𑀢𑁆𑀣𑀺. 𑀓𑁂𑀯𑀮𑀁 𑀧𑀦𑁂𑀢𑁂 𑀯𑀸𑀤𑀸 𑀯𑀺𑀫𑀤𑁆𑀤𑀺𑀬𑀫𑀸𑀦𑀸 𑀅𑀳𑁂𑀢𑀼𑀯𑀸𑀤𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀘𑀸𑀳𑁂𑀢𑀼𑀓𑀁 𑀮𑁄𑀓𑀯𑀺𑀘𑀺𑀢𑁆𑀢𑀁 𑀯𑀺𑀲𑁂𑀲𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀅𑀳𑁂𑀢𑀼𑀓𑀪𑀸𑀯𑁂 𑀳𑀺 𑀧𑀯𑀢𑁆𑀢𑀺𑀬𑀸 𑀬𑁆𑀯𑀸𑀬𑀁 𑀦𑀭𑀲𑀼𑀭𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑁂𑀲𑁄, 𑀢𑀲𑁆𑀲 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘𑀸𑀬𑀁 𑀧𑀡𑁆𑀟𑀺𑀢𑁂𑀳𑀺 𑀇𑀘𑁆𑀙𑀺𑀢𑁄. 𑀓𑀺𑀜𑁆𑀘? 𑀤𑀺𑀝𑁆𑀞𑀪𑀸𑀯𑀢𑁄. 𑀤𑀺𑀝𑁆𑀞𑀸 𑀳𑀺 𑀘𑀓𑁆𑀔𑀸𑀤𑀺𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀩𑀻𑀚𑀸𑀤𑀺𑀢𑁄 𑀅𑀗𑁆𑀓𑀼𑀭𑀸𑀤𑀻𑀦𑀁 𑀧𑀯𑀢𑁆𑀢𑀺, 𑀢𑀲𑁆𑀫𑀸𑀧𑀺 𑀳𑁂𑀢𑀼𑀢𑁄𑀯𑀸𑀬𑀁 𑀧𑀯𑀢𑁆𑀢𑀺. 𑀢𑀣𑀸 𑀧𑀼𑀭𑁂 𑀧𑀘𑁆𑀙𑀸 𑀘 𑀅𑀪𑀸𑀯𑀢𑁄. 𑀬𑀢𑁄 𑀬𑀢𑁄 𑀳𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀢𑁄 𑀬𑀁 𑀬𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀦 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀓𑀺𑀜𑁆𑀘 𑀩𑀳𑀼𑀦𑀸. 𑀬𑀤𑀺 𑀅𑀳𑁂𑀢𑀼𑀢𑁄 𑀧𑀯𑀢𑁆𑀢𑀺 𑀲𑀺𑀬𑀸, 𑀅𑀳𑁂𑀢𑀼𑀓𑀸 𑀧𑀯𑀢𑁆𑀢𑀻𑀢𑀺 𑀇𑀫𑀸𑀧𑀺 𑀯𑀸𑀘𑀸 𑀬𑀣𑀸𑀲𑀓𑀧𑀘𑁆𑀘𑀬𑀲𑀫𑀯𑀸𑀬𑀢𑁄 𑀧𑀼𑀭𑁂 𑀧𑀘𑁆𑀙𑀸 𑀘 𑀪𑀯𑁂𑀬𑁆𑀬𑀼𑀁, 𑀦 𑀘 𑀪𑀯𑀦𑁆𑀢𑀺 𑀅𑀮𑀤𑁆𑀥𑀧𑁆𑀧𑀘𑁆𑀘𑀬𑀢𑁆𑀢𑀸, 𑀫𑀚𑁆𑀛𑁂 𑀏𑀯 𑀘 𑀪𑀯𑀦𑁆𑀢𑀺 𑀮𑀤𑁆𑀥𑀧𑁆𑀧𑀘𑁆𑀘𑀬𑀢𑁆𑀢𑀸. 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸𑀢𑀺 𑀦 𑀲𑀺𑀚𑁆𑀛𑀢𑀺 𑀅𑀳𑁂𑀢𑀼𑀯𑀸𑀤𑁄. 𑀢𑀲𑁆𑀫𑀺𑀜𑁆𑀘 𑀅𑀲𑀺𑀤𑁆𑀥𑁂 𑀧𑀯𑀢𑁆𑀢𑀺𑀬𑀸 𑀅𑀳𑁂𑀢𑀼𑀪𑀸𑀯𑁄 𑀯𑀺𑀬 𑀅𑀳𑁂𑀢𑀼𑀧𑀭𑀺𑀬𑀸𑀬𑀯𑀺𑀲𑁂𑀲𑀪𑀽𑀢𑀸 𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀬𑁄𑀧𑀺 𑀅𑀲𑀺𑀤𑁆𑀥𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀓𑀸𑀡𑀸𑀤𑀸 ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸, 𑀢𑁂𑀳𑀺 𑀤𑁆𑀯𑀺𑀅𑀡𑀼𑀓𑀸𑀤𑀺𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀜𑁆𑀘 𑀅𑀦𑀺𑀘𑁆𑀘𑀁 ¶ , 𑀢𑀲𑁆𑀲 𑀯𑀲𑁂𑀦𑁂𑀢𑀁 𑀮𑁄𑀓𑀯𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀫𑀺𑀘𑁆𑀙𑀸𑀧𑀭𑀺𑀓𑀧𑁆𑀧𑀫𑀢𑁆𑀢𑀁. 𑀦 𑀳𑀺 𑀧𑀭𑀫𑀸𑀡𑀯𑁄 𑀦𑀸𑀫 𑀲𑀦𑁆𑀢𑀺 𑀅𑀜𑁆𑀜𑀢𑁆𑀭 𑀪𑀽𑀢𑀲𑀗𑁆𑀖𑀸𑀢𑀸. 𑀲𑁄 𑀧𑀦 𑀅𑀦𑀺𑀘𑁆𑀘𑁄𑀯, 𑀦 𑀘 𑀦𑀺𑀘𑁆𑀘𑀢𑁄 𑀅𑀦𑀺𑀘𑁆𑀘𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀬𑀼𑀢𑁆𑀢𑀸 𑀢𑀲𑁆𑀲 𑀓𑀸𑀭𑀡𑀪𑀸𑀯𑀸𑀦𑀼𑀧𑀧𑀢𑁆𑀢𑀺𑀢𑁄 𑀢𑀣𑀸 𑀅𑀤𑀲𑁆𑀲𑀦𑀢𑁄 𑀘. 𑀬𑀤𑀺 𑀘 𑀲𑁄 𑀓𑀲𑁆𑀲𑀘𑀺 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑁂𑀬𑁆𑀬, 𑀅𑀦𑀺𑀘𑁆𑀘𑁄 𑀏𑀯 𑀲𑀺𑀬𑀸 𑀯𑀺𑀓𑀸𑀭𑀸𑀧𑀢𑁆𑀢𑀺𑀢𑁄. 𑀦 𑀘𑀸𑀬𑀁 𑀲𑀫𑁆𑀪𑀯𑁄 𑀅𑀢𑁆𑀣𑀺, 𑀬𑀁 𑀯𑀺𑀓𑀸𑀭𑀁 𑀅𑀦𑀸𑀧𑀚𑁆𑀚𑀦𑁆𑀢𑀫𑁂𑀯 𑀓𑀸𑀭𑀡𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺. 𑀯𑀺𑀓𑀸𑀭𑀜𑁆𑀘𑁂 𑀆𑀧𑀚𑁆𑀚𑀢𑀺, 𑀓𑀼𑀢𑀲𑁆𑀲 𑀦𑀺𑀘𑁆𑀘𑀢𑀸𑀯𑀓𑀸𑀲𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀭𑀫𑀸𑀡𑀯𑁄 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸, 𑀅𑀜𑁆𑀜𑁂𑀧𑀺 𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀩𑀸𑀳𑀺𑀭𑀓𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀸 𑀅𑀲𑀺𑀤𑁆𑀥𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀧𑀦 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸’’𑀢𑀺.

𑀏𑀢𑁆𑀣𑀸𑀳 ‘‘𑀬𑀤𑀺 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀧𑀦 𑀧𑀼𑀕𑁆𑀕𑀮𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 𑀅𑀣 𑀓𑀲𑁆𑀫𑀸 𑀪𑀕𑀯𑀸 ‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’𑀢𑀺 (𑀅. 𑀦𑀺. 𑁪.𑁯𑁫; 𑀓𑀣𑀸. 𑁨𑁨), ‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’𑀦𑁆𑀢𑀺 ¶ (𑀅. 𑀦𑀺. 𑁪.𑁯𑁫; 𑀓𑀣𑀸. 𑁨𑁨) 𑀘 𑀢𑀢𑁆𑀣 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀧𑀯𑁂𑀤𑁂𑀲𑀻’’𑀢𑀺. 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦. 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀳𑀺 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀕𑁆𑀕𑀮𑀕𑁆𑀕𑀳𑀡𑀁 𑀓𑀭𑁄𑀢𑀺, 𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄.

𑀅𑀧𑀺𑀘 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁, 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁, 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁, 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸𑀢𑀺. ‘‘𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀯𑀸 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀇𑀢𑁆𑀣𑀻 𑀳𑀺𑀭𑀻𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀧𑀼𑀭𑀺𑀲𑁄, 𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀦 𑀯𑀼𑀢𑁆𑀢𑁂 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀓𑀫𑁆𑀫𑀲𑁆𑀲𑀓𑀸, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀯𑁂𑀴𑀼𑀯𑀦𑀸𑀤𑀬𑁄 𑀫𑀳𑀸𑀯𑀺𑀳𑀸𑀭𑀸 𑀔𑀦𑁆𑀥𑁂𑀳𑀺 𑀓𑀸𑀭𑀸𑀧𑀺𑀢𑀸, 𑀥𑀸𑀢𑀽𑀳𑀺, 𑀆𑀬𑀢𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 ‘‘𑀔𑀦𑁆𑀥𑀸 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁, 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁, 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺, ‘‘𑀔𑀦𑁆𑀥𑀸 𑀫𑁂𑀢𑁆𑀢𑀸𑀬𑀦𑁆𑀢𑀺 ¶ , 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺, ‘‘𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀜𑁆𑀘 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀥𑀸𑀢𑀼𑀬𑁄, 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀯𑀸 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀧𑀼𑀕𑁆𑀕𑀮𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑁂 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. 𑀮𑁄𑀓𑀲𑀫𑁆𑀫𑀼𑀢𑀺𑀜𑁆𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀦𑀧𑁆𑀧𑀚𑀳𑀦𑁆𑀢𑀺 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀻𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 ¶ 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺, 𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸 𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯 𑀧𑀼𑀕𑁆𑀕𑀮𑀲𑁆𑀲 𑀉𑀧𑀮𑀤𑁆𑀥𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀓𑀺𑀁 𑀢𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀫𑀸𑀦𑁄 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀉𑀤𑀸𑀳𑀼 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀸𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑁂𑀲𑀼 𑀅𑀜𑁆𑀜𑀢𑀭𑀸𑀓𑀸𑀭𑁂𑀦𑀸’’𑀢𑀺 𑀤𑀲𑁆𑀲𑁂𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀮𑁄𑀓𑁂 𑀅𑀪𑀸𑀯𑀢𑁄. 𑀅𑀯𑀺𑀲𑁂𑀲𑀯𑀺𑀲𑁂𑀲𑁂𑀳𑀺 𑀧𑀼𑀕𑁆𑀕𑀮𑀽𑀧𑀮𑀩𑁆𑀪𑀲𑁆𑀲 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀧𑀓𑁆𑀔𑀸 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀧𑀓𑁆𑀔𑀸. 𑀬𑀤𑀺𑀧𑀺𑀫𑁂 𑀤𑁆𑀯𑁂𑀧𑀺 𑀧𑀓𑁆𑀔𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀆𑀤𑀺𑀢𑁄 𑀧𑀦 𑀧𑀞𑀫𑀁 𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑁄 𑀧𑀞𑀫𑀦𑀬𑁄, 𑀇𑀢𑀭𑁄 𑀤𑀼𑀢𑀺𑀬𑀦𑁆𑀢𑀺 𑀇𑀫𑀁 𑀦𑁂𑀲𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀚𑀸𑀦𑀦𑀸…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀬𑀣𑀸𑀥𑀺𑀓𑀢𑀸𑀬 𑀮𑀤𑁆𑀥𑀺𑀬𑀸 𑀅𑀦𑀼𑀮𑁄𑀫𑀦𑀢𑁄 𑀘𑁂𑀢𑁆𑀣 𑀧𑀞𑀫𑁄 𑀦𑀬𑁄 𑀅𑀦𑀼𑀮𑁄𑀫𑀧𑀓𑁆𑀔𑁄, 𑀢𑀩𑁆𑀩𑀺𑀮𑁄𑀫𑀦𑀢𑁄 𑀇𑀢𑀭𑁄 𑀧𑀝𑀺𑀮𑁄𑀫𑀧𑀓𑁆𑀔𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀢𑁂𑀦 𑀯𑀢 𑀭𑁂𑀢𑀺 𑀏𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀬𑁂𑀦 𑀧𑀼𑀕𑁆𑀕𑀮𑀽𑀧𑀮𑀩𑁆𑀪𑁄 𑀧𑀢𑀺𑀝𑁆𑀞𑀧𑀻𑀬𑀢𑀺, 𑀢𑁂𑀦 𑀳𑁂𑀢𑀼𑀦𑀸. 𑀲𑁆𑀯𑀸𑀬𑀁 𑀳𑁂𑀢𑀼 𑀲𑀸𑀲𑀦𑀺𑀓𑀲𑁆𑀲 𑀩𑀸𑀳𑀺𑀭𑀓𑀲𑁆𑀲 𑀘 𑀯𑀲𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯. 𑀳𑁂𑀢𑀼𑀧𑀢𑀺𑀭𑀽𑀧𑀓𑁂 𑀘𑀸𑀬𑀁 𑀳𑁂𑀢𑀼𑀲𑀫𑀜𑁆𑀜𑀸 𑀧𑀭𑀫𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀳𑁂𑀝𑁆𑀞𑀸 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀦𑀺𑀕𑁆𑀕𑀳𑀲𑁆𑀲 𑀲𑀜𑁆𑀜𑀸𑀧𑀦𑀫𑀢𑁆𑀢𑀁 𑀓𑀢𑀁, 𑀢𑀁 𑀇𑀤𑀸𑀦𑀺 ‘‘𑀬𑀁 𑀢𑀢𑁆𑀣 𑀯𑀤𑁂𑀲𑀻’’𑀢𑀺𑀆𑀤𑀺𑀦𑀸 𑀦𑀺𑀕𑀫𑀦𑀭𑀽𑀧𑁂𑀦 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑁂𑀦 𑀘 𑀯𑀺𑀪𑀸𑀯𑀺𑀬𑀫𑀸𑀦𑀁 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀆𑀭𑁄𑀧𑀺𑀢𑀁 𑀧𑀢𑀺𑀝𑁆𑀞𑀸𑀧𑀺𑀢𑀁 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑁄𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 ¶ 𑀘 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀧𑀝𑀺𑀜𑁆𑀜𑀸𑀯𑀬𑀯𑁄 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑁄. ‘‘𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀢𑁄 𑀳𑁂𑀢𑀸𑀯𑀬𑀯𑁄 𑀤𑀲𑁆𑀲𑀺𑀢𑁄. 𑀬𑁆𑀯𑀸𑀬𑀁 𑀬𑀲𑁆𑀫𑀸 𑀧𑀝𑀺𑀜𑁆𑀜𑀸𑀥𑀫𑁆𑀫𑁄 𑀳𑀼𑀢𑁆𑀯𑀸 𑀲𑀤𑀺𑀲𑀧𑀓𑁆𑀔𑁂 𑀯𑀺𑀚𑁆𑀚𑀫𑀸𑀦𑁄, 𑀯𑀺𑀲𑀤𑀺𑀲𑀧𑀓𑁆𑀔𑁂 𑀅𑀯𑀺𑀚𑁆𑀚𑀫𑀸𑀦𑁄𑀬𑁂𑀯 𑀳𑁂𑀢𑀼 𑀮𑀓𑁆𑀔𑀡𑀽𑀧𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀦 𑀇𑀢𑀭𑁄, 𑀢𑀲𑁆𑀫𑀸 𑀬𑀢𑁆𑀣 𑀲𑁄 𑀯𑀺𑀚𑁆𑀚𑀢𑀺 𑀦 𑀯𑀺𑀚𑁆𑀚𑀢𑀺 𑀘, 𑀲𑁄 𑀲𑀤𑀺𑀲𑀸𑀲𑀤𑀺𑀲𑀪𑀸𑀯𑀪𑀺𑀦𑁆𑀦𑁄 𑀤𑀼𑀯𑀺𑀥𑁄 𑀤𑀺𑀝𑁆𑀞𑀦𑁆𑀢𑀸𑀯𑀬𑀯𑁄. 𑀬𑀣𑀸 𑀭𑀽𑀧𑀸𑀤𑀺 𑀉𑀧𑀮𑀩𑁆𑀪𑀢𑀺, 𑀢𑀣𑀸 𑀧𑀼𑀕𑁆𑀕𑀮𑁄. 𑀬𑀣𑀸 𑀘 𑀲𑀲𑀯𑀺𑀲𑀸𑀡𑀁 𑀦 𑀉𑀧𑀮𑀩𑁆𑀪𑀢𑀺, 𑀦 𑀢𑀣𑀸 𑀧𑀼𑀕𑁆𑀕𑀮𑁄𑀢𑀺 𑀉𑀧𑀦𑀬𑁄. 𑀲𑁆𑀯𑀸𑀬𑀁 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀤𑀻𑀧𑀺𑀢𑁄, 𑀬𑁄 𑀅𑀝𑁆𑀞𑀓𑀣𑀸𑀬𑀁 𑀲𑀤𑁆𑀥𑀺𑀁 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 ‘‘𑀧𑀸𑀧𑀦𑀸’’𑀢𑀺 𑀯𑀼𑀢𑁆𑀢𑁄. 𑀦𑀺𑀕𑀫𑀦𑀁 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦𑁂𑀯 𑀆𑀕𑀢𑀁, 𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀭𑁄𑀧𑀦𑀸’’𑀢𑀺 ¶ 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀧𑁄𑀭𑀸𑀡𑁂𑀦 𑀜𑀸𑀬𑀓𑁆𑀓𑀫𑁂𑀦 𑀲𑀸𑀥𑀦𑀸𑀯𑀬𑀯𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀯𑀢𑁆𑀢𑀦𑁂𑀦 𑀧𑀭𑀧𑀓𑁆𑀔𑀼𑀧𑀮𑀓𑁆𑀔𑀺𑀢𑁂 𑀳𑁂𑀢𑀼𑀤𑀸𑀳𑀭𑀡𑁂 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀥𑀦𑀧𑀬𑁄𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀳𑁂𑀢𑀼𑀤𑀸𑀳𑀭𑀡𑁂𑀳𑀺𑀬𑁂𑀯 𑀳𑀺 𑀲𑀧𑀭𑀧𑀓𑁆𑀔𑀸𑀦𑀁 𑀲𑀸𑀥𑀦𑀁 𑀤𑀽𑀲𑀦𑀁 𑀯𑀸, 𑀦 𑀧𑀝𑀺𑀜𑁆𑀜𑀸𑀬, 𑀢𑀲𑁆𑀲𑀸 𑀲𑀸𑀥𑁂𑀢𑀩𑁆𑀩𑀸𑀤𑀺𑀪𑀸𑀯𑀢𑁄. 𑀢𑀁 𑀧𑀦 𑀤𑁆𑀯𑀬𑀁 ‘‘𑀢𑁂𑀦 𑀯𑀢 𑀭𑁂’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀯𑀺𑀪𑀸𑀯𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀸𑀧𑀦𑀸𑀭𑁄𑀧𑀦𑀸𑀲𑀻𑀲𑁂𑀦 𑀤𑀲𑁆𑀲𑀺𑀢𑀁. 𑀧𑀝𑀺𑀜𑁆𑀜𑀸𑀞𑀧𑀦𑀸 𑀧𑀦 𑀢𑁂𑀲𑀁 𑀯𑀺𑀲𑀬𑀤𑀲𑁆𑀲𑀦𑀁 𑀓𑀣𑀸𑀬𑀁 𑀢𑀁𑀫𑀽𑀮𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀁 𑀧𑀦 𑀯𑀓𑁆𑀔𑀢𑀻’’𑀢𑀺𑀆𑀤𑀺. 𑀢𑁂𑀦𑁂𑀯 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀤𑀁 𑀅𑀦𑀼𑀮𑁄𑀫…𑀧𑁂… 𑀏𑀓𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 𑀘𑀸𑀳 ‘‘𑀬𑀣𑀸 𑀧𑀦 𑀢𑀢𑁆𑀣𑀸’’𑀢𑀺𑀆𑀤𑀺. 𑀦𑀺𑀕𑁆𑀕𑀳𑁄𑀯 𑀯𑀺𑀲𑀼𑀁 𑀯𑀼𑀢𑁆𑀢𑁄, 𑀦 𑀧𑀝𑀺𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺 𑀘 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀦 𑀢𑀤𑀜𑁆𑀜𑀢𑀭𑁄 𑀯𑀺𑀬 𑀢𑀤𑀦𑁆𑀢𑁄𑀕𑀥𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀦𑀸𑀧𑀺 𑀞𑀧𑀦𑀸 𑀯𑀺𑀬 𑀅𑀕𑀡𑀦𑀼𑀧𑀕𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂 𑀧𑀦𑀸𑀢𑀺 𑀧𑀤𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀤𑀼𑀢𑀺𑀬𑁂…𑀧𑁂… 𑀆𑀧𑀚𑁆𑀚𑀢𑀺 𑀢𑀢𑁆𑀣 𑀦𑀺𑀕𑁆𑀕𑀳𑀲𑁆𑀲 𑀅𑀬𑀣𑀸𑀪𑀽𑀢𑀢𑁆𑀢𑀸 𑀧𑀝𑀺𑀓𑀫𑁆𑀫𑀲𑁆𑀲 𑀘 𑀬𑀣𑀸𑀪𑀽𑀢𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨. 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀁 𑀦𑀸𑀦𑀼𑀚𑀸𑀦𑀸𑀢𑀺, 𑀯𑁄𑀳𑀸𑀭𑀢𑁄 𑀧𑀦 𑀅𑀦𑀼𑀚𑀸𑀦𑀸𑀢𑀻𑀢𑀺 𑀲𑀓𑀯𑀸𑀤𑀺𑀫𑀢𑀁 𑀚𑀸𑀦𑀦𑁆𑀢𑁂𑀦𑀧𑀺 𑀧𑀭𑀯𑀸𑀤𑀺𑀦𑀸 𑀙𑀮𑀯𑀲𑁂𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 𑀲𑀓𑀯𑀸𑀤𑀻 𑀢𑀢𑁆𑀣 𑀅𑀬𑀁 𑀧𑀼𑀕𑁆𑀕𑀮𑀯𑀸𑀤𑀻, 𑀇𑀫𑀲𑁆𑀲 𑀮𑀤𑁆𑀥𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀫𑀦𑁆𑀢𑀸’’𑀢𑀺. ‘‘𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 𑀇𑀢𑀭𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑁄 𑀲𑀘𑁆𑀘𑀺𑀓𑀝𑁆𑀞𑁄, 𑀢𑀢𑁄 𑀏𑀯 𑀓𑁂𑀦𑀘𑀺 𑀅𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄 𑀧𑀭𑀫𑀢𑁆𑀣𑀢𑁄 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 ¶ 𑀦𑀼𑀧𑀮𑀩𑁆𑀪𑀢𑀻𑀢𑀺. 𑀧𑀼𑀦 𑀲𑀓𑀯𑀸𑀤𑀻 𑀧𑀼𑀩𑁆𑀩𑁂 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀧𑀼𑀕𑁆𑀕𑀮𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀇𑀤𑀸𑀦𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦𑀸𑀬𑀁 𑀧𑀼𑀘𑁆𑀙𑀸𑀢𑀺 𑀫𑀦𑁆𑀢𑁆𑀯𑀸 𑀢𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 ¶ . 𑀏𑀯𑀫𑀯𑀝𑁆𑀞𑀺𑀢𑁂 ‘‘𑀬𑀤𑀺 𑀧𑀭𑀯𑀸𑀤𑀺𑀦𑀸…𑀧𑁂… 𑀦𑀸𑀭𑀪𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀧𑀞𑀫𑀧𑀼𑀘𑁆𑀙𑀸𑀬 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀅𑀣 𑀲𑀓𑀯𑀸𑀤𑀺𑀦𑀸…𑀧𑁂… 𑀆𑀧𑀚𑁆𑀚𑀢𑀻’’𑀢𑀺 𑀇𑀤𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀬𑀤𑀺 𑀉𑀪𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀇𑀤𑀁 𑀬𑀤𑀺 𑀧𑀞𑀫𑀧𑀼𑀘𑁆𑀙𑀁 𑀲𑀦𑁆𑀥𑀸𑀬, 𑀢𑀤𑀬𑀼𑀢𑁆𑀢𑀁 𑀢𑀲𑁆𑀲𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲𑁂𑀯 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀅𑀣 𑀤𑀼𑀢𑀺𑀬𑀧𑀼𑀘𑁆𑀙𑀁 𑀲𑀦𑁆𑀥𑀸𑀬, 𑀢𑀲𑁆𑀲𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀧𑀞𑀫𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀫𑀺𑀲𑁆𑀲𑀓𑀯𑀲𑁂𑀦 𑀯𑀢𑁆𑀢𑀼𑀁 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀏𑀯𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀻𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺. 𑀢𑁂𑀲𑀼 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀪𑀸𑀯𑁄, 𑀇𑀢𑀭𑀲𑁆𑀲 𑀉𑀧𑀘𑀸𑀭𑁂𑀦. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀫𑀸𑀬𑀸 𑀫𑀭𑀻𑀘𑀺…𑀧𑁂… 𑀉𑀢𑁆𑀢𑀫𑀝𑁆𑀞𑁄’’𑀢𑀺. 𑀢𑀲𑁆𑀫𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦𑀧𑀺 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀅𑀦𑀺𑀘𑁆𑀙𑀦𑀢𑁄 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀬𑁄𑀕𑁄 𑀬𑀼𑀢𑁆𑀢𑁄. ‘‘𑀧𑀥𑀸𑀦𑀧𑁆𑀧𑀥𑀸𑀦𑁂𑀲𑀼 𑀧𑀥𑀸𑀦𑁂 𑀓𑀺𑀘𑁆𑀘𑀲𑀺𑀤𑁆𑀥𑀻’’𑀢𑀺 𑀏𑀢𑁂𑀦𑁂𑀯 ‘‘𑀦 𑀘 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀅𑀦𑀼𑀬𑁄𑀕𑁄’’𑀢𑀺𑀆𑀤𑀺 𑀦𑀺𑀯𑀢𑁆𑀢𑀺𑀢𑀜𑁆𑀘 𑀳𑁄𑀢𑀺 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑀪𑀸𑀯𑀲𑁆𑀲𑁂𑀯 𑀅𑀲𑀺𑀤𑁆𑀥𑀢𑁆𑀢𑀸. 𑀦𑀸𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸𑀢𑀺 𑀅𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀧𑀭𑀯𑀸𑀤𑀺𑀦𑀸 𑀦 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀲𑀓𑀯𑀸𑀤𑀺𑀦𑁄𑀧𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀢𑁄 𑀢𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀳𑀭𑀺𑀢𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀢𑀸𑀧𑀺 𑀬𑀼𑀢𑁆𑀢𑀸 𑀢𑀲𑁆𑀲 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀬𑁂𑀯. 𑀯𑀼𑀢𑁆𑀢𑀦𑀬𑁄𑀯 𑀤𑁄𑀲𑁄𑀢𑀺 ‘‘𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑀫𑁂𑀯 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲 𑀧𑀦 𑀅𑀤𑁄𑀲𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯. 𑀅𑀣 𑀦 𑀇𑀢𑀺 𑀅𑀣 𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀯𑀢𑁆𑀢𑀩𑁆𑀩𑁄𑀢𑀺 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀬𑁄 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀏𑀢𑁆𑀣 ‘‘𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀁 𑀦𑀸𑀦𑀼𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀧𑁆𑀧𑀸𑀬𑀫𑀕𑁆𑀕𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀦𑀼𑀜𑁆𑀜𑁂𑀬𑁆𑀬𑀫𑁂𑀢𑀁 𑀲𑀺𑀬𑀸𑀢𑀺 𑀏𑀢𑀁 𑀅𑀦𑀼𑀧𑀮𑀩𑁆𑀪𑀦𑀁 𑀧𑀞𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀫𑁆𑀧𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸. 𑀦 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀣 𑀯𑀸 𑀓𑀺𑀜𑁆𑀘𑀺 𑀦 𑀯𑀢𑁆𑀢𑀩𑁆𑀩𑀁 𑀞𑀧𑀦𑀻𑀬𑀢𑁆𑀢𑀸 𑀧𑀜𑁆𑀳𑀲𑁆𑀲. 𑀢𑀣𑀸 𑀳𑀺𑀲𑁆𑀲 𑀞𑀧𑀦𑀻𑀬𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀸𑀫𑀁 𑀲𑀘𑁆𑀘𑀤𑁆𑀯𑀬𑀸𑀓𑀸𑀭𑁂𑀦 ¶ 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺, 𑀲𑀫𑁆𑀫𑀼𑀢𑀺𑀬𑀸𑀓𑀸𑀭𑁂𑀦 𑀧𑀦 𑀦𑀼𑀧𑀮𑀩𑁆𑀪𑀢𑀻𑀢𑀺 𑀉𑀧𑀮𑀩𑁆𑀪𑀦𑀪𑀸𑀯𑀲𑁆𑀲 𑀯𑀲𑁂𑀦 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 ¶ 𑀧𑀞𑀫𑀧𑀼𑀘𑁆𑀙𑀸𑀬𑀁 𑀅𑀦𑀼𑀜𑁆𑀜𑀸𑀢𑀁, 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀏𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀏𑀢𑀁 𑀏𑀓𑀁𑀬𑁂𑀯 𑀯𑀢𑁆𑀣𑀼𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑀺𑀧𑀦𑀸𑀓𑀸𑀭𑀁 𑀙𑀮𑀯𑀘𑀦𑀁 𑀦𑀺𑀲𑁆𑀲𑀸𑀬. 𑀢𑁆𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀸𑀫𑀜𑁆𑀜𑁂𑀦𑀸𑀢𑀺 𑀦𑀺𑀕𑁆𑀕𑀳𑀝𑁆𑀞𑀸𑀦𑀪𑀸𑀯𑁂𑀦 𑀲𑀫𑁆𑀪𑀯𑀦𑁆𑀢𑀲𑁆𑀲 𑀅𑀦𑀼𑀮𑁄𑀫𑀦𑀬𑁂𑀦 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀲𑁆𑀲 𑀲𑀫𑀸𑀦𑀪𑀸𑀯𑁂𑀦. 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀓𑀧𑁆𑀧𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀦𑀬𑁂𑀦 𑀢𑀲𑁆𑀲 𑀦𑀺𑀕𑁆𑀕𑀳𑀝𑁆𑀞𑀸𑀦𑀪𑀸𑀯𑁂𑀦 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀢𑀣𑀸 𑀓𑀧𑁆𑀧𑀦𑀁 𑀲𑀁𑀯𑀺𑀥𑀸𑀦𑀁 𑀙𑀮𑀯𑀸𑀤𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺. ‘‘𑀅𑀢𑁆𑀣𑀯𑀺𑀓𑀧𑁆𑀧𑀼𑀧𑀧𑀢𑁆𑀢𑀺𑀬𑀸 𑀯𑀘𑀦𑀯𑀺𑀖𑀸𑀢𑁄 𑀙𑀮’’𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀧𑁆𑀧𑀦𑀁 𑀙𑀮𑀯𑀸𑀤𑁄𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀓𑀧𑁆𑀧𑀺𑀢𑀁 𑀙𑀮𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀙𑀮𑀯𑀸𑀤𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀙𑀮𑀯𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 𑀙𑀮𑀯𑀸𑀤𑁄’’𑀢𑀺. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀅𑀢𑁆𑀣𑀪𑀽𑀢𑀁 𑀢𑀤𑀢𑁆𑀣𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬. ‘‘𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀺𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀬𑀤𑀺𑀧𑀺 𑀧𑀓𑁆𑀔𑀲𑁆𑀲 𑀞𑀧𑀦𑀸𑀫𑀽𑀮𑀓𑀁 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀸𑀦𑀁 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀁 𑀢𑀩𑁆𑀩𑀺𑀲𑀬𑀢𑁆𑀢𑀸, 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀯 𑀧𑀦 𑀲𑁄 𑀯𑀺𑀪𑀸𑀯𑀻𑀬𑀢𑀺, 𑀦 𑀞𑀧𑀦𑀸𑀬𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄.

𑁪-𑁫. 𑀢𑁂𑀦𑀸𑀢𑀺 𑀲𑀓𑀯𑀸𑀤𑀺𑀦𑀸. 𑀢𑁂𑀦 𑀦𑀺𑀬𑀸𑀫𑁂𑀦𑀸𑀢𑀺 𑀬𑁂𑀦 𑀦𑀺𑀬𑀸𑀫𑁂𑀦 𑀲𑀓𑀯𑀸𑀤𑀺𑀦𑀸 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺𑀲𑁆𑀲 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑁂𑀦 𑀦𑀺𑀬𑀸𑀫𑁂𑀦 𑀦𑀬𑁂𑀦. 𑀲𑁄 𑀦𑀺𑀕𑁆𑀕𑀳𑁄 𑀤𑀼𑀓𑁆𑀓𑀝𑁄 𑀅𑀦𑀺𑀕𑁆𑀕𑀳𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀺𑀕𑁆𑀕𑀳𑀪𑀸𑀯𑀲𑁆𑀲 𑀯𑀸 𑀉𑀧𑀕𑀫𑀺𑀢𑀢𑁆𑀢𑀸’’𑀢𑀺, 𑀧𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯𑀸𑀢𑀺 𑀬𑀣𑀸 ‘‘𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄’’𑀢𑀺𑀆𑀤𑀺𑀦𑀸 𑀅𑀦𑀺𑀕𑁆𑀕𑀳𑀪𑀸𑀯𑀽𑀧𑀦𑀬𑁄 𑀯𑀼𑀢𑁆𑀢𑁄, 𑀏𑀯𑀫𑁂𑀯. 𑀏𑀢𑀲𑁆𑀲𑀸𑀢𑀺 ‘‘𑀢𑁂𑀦 𑀳𑀻’’𑀢𑀺𑀆𑀤𑀺𑀦𑀸 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀼𑀢𑁆𑀢𑀲𑁆𑀲.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁭-𑁧𑁦. 𑀅𑀜𑁆𑀜𑁂𑀦𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑁂𑀦. 𑀧𑀭𑀲𑁆𑀲𑀸𑀢𑀺 𑀲𑀓𑀯𑀸𑀤𑀺𑀦𑁄. 𑀲𑁄 𑀳𑀺 𑀧𑀭𑀯𑀸𑀤𑀺𑀦𑀸 𑀧𑀭𑁄 𑀦𑀸𑀫 𑀳𑁄𑀢𑀺. 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀸𑀦𑀁 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸 ‘‘𑀅𑀯𑀺𑀭𑁄𑀥𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀸𑀥𑀺𑀓𑀭𑀡𑀁 ¶ 𑀯𑀺𑀬 𑀳𑀺 𑀅𑀪𑀺𑀦𑁆𑀦𑀯𑀺𑀲𑀬𑀫𑁂𑀯 𑀯𑀺𑀭𑀼𑀤𑁆𑀥𑀁 𑀦𑀸𑀫 𑀲𑀺𑀬𑀸, 𑀦 𑀇𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀳𑀺…𑀧𑁂… 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀬𑀤𑀺 𑀏𑀯𑀁 𑀓𑀣𑀫𑀺𑀤𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 ¶ 𑀧𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀝𑀺𑀜𑁆𑀜𑀸𑀦𑁆𑀢𑀭𑀁 𑀦𑀸𑀫 𑀅𑀜𑁆𑀜𑀫𑁂𑀯𑁂𑀢𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁧. 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂𑀢𑀺 𑀅𑀬𑀫𑀢𑁆𑀣𑁄’’𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀯𑀺𑀲𑁂𑀲𑀢𑁆𑀣𑀺𑀦𑀸 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺. 𑀏𑀢𑁂𑀦𑀸𑀢𑀺 𑀤𑁂𑀲𑀯𑀲𑁂𑀦 𑀲𑀩𑁆𑀩𑀢𑁆𑀣 𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦.

𑁩. 𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁨. 𑀫𑀚𑁆𑀛𑀺𑀫𑀚𑀸𑀢𑀺𑀓𑀸𑀮𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀪𑀸𑀯𑀓𑀸𑀮𑁂. 𑀅𑀢𑁆𑀢𑀪𑀸𑀯𑁄 𑀳𑀺 𑀇𑀥 ‘‘𑀚𑀸𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁄 𑀅𑀢𑀻𑀢𑁄 𑀧𑀼𑀭𑀺𑀫𑀚𑀸𑀢𑀺𑀓𑀸𑀮𑁄, 𑀅𑀦𑀸𑀕𑀢𑁄 𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑁄. 𑀇𑀫𑁂𑀲𑀼 𑀢𑀻𑀲𑀽𑀢𑀺 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸, 𑀲𑀩𑁆𑀩𑁂𑀲𑀽𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀦𑀬𑁂𑀲𑀼. 𑀧𑀸𑀞𑀲𑁆𑀲 𑀲𑀁𑀔𑀺𑀢𑁆𑀢𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀅𑀢𑁆𑀣𑀲𑁆𑀲 𑀲𑀤𑀺𑀲𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀇𑀥𑀸𑀧𑀺 𑀳𑀺…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀏𑀢𑁆𑀣𑀸𑀧𑀺 ‘‘𑀦 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀦 𑀳𑀺 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀲𑀓𑀮𑁂𑀓𑀤𑁂𑀲𑀯𑀺𑀦𑀺𑀫𑀼𑀢𑁆𑀢𑁄 𑀧𑀯𑀢𑁆𑀢𑀺𑀓𑀸𑀮𑁄 𑀦𑀸𑀫 𑀅𑀢𑁆𑀣𑀻𑀢𑀺.

𑁪. 𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑀦𑀬𑁂 ¶ 𑀦 𑀲𑀩𑁆𑀩𑁂𑀓𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀑𑀓𑀸𑀲𑀸𑀤𑀺𑀲𑀘𑁆𑀘𑀺𑀓𑀝𑁆𑀞𑁄

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁪. 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲𑀸𑀢𑀺𑀆𑀤𑀺𑀫𑁆𑀳𑀺 ¶ 𑀅𑀝𑁆𑀞𑀓𑀣𑀸𑀯𑀘𑀦𑁂. 𑀧𑀼𑀦 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀯𑀘𑀦𑁂, 𑀢𑁂𑀲𑀼 𑀯𑀸 𑀅𑀦𑀼𑀮𑁄𑀫𑀧𑀜𑁆𑀘𑀓𑀧𑀘𑁆𑀘𑀦𑀻𑀓𑁂𑀲𑀼. 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀧𑀸𑀞𑀧𑁆𑀧𑀤𑁂𑀲𑀲𑁆𑀲 𑀅𑀢𑁆𑀣𑁄 ‘‘𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀧𑀝𑀺𑀓𑀫𑁆𑀫𑀸𑀤𑀺𑀧𑀸𑀴𑀺𑀦𑁆𑀢𑀺 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑀉𑀧𑀦𑀬𑀦𑀦𑀺𑀕𑀫𑀦𑀧𑀸𑀴𑀺𑀁. 𑀢𑀻𑀲𑀼 𑀫𑀼𑀔𑁂𑀲𑀽𑀢𑀺 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀯𑀸𑀤𑀫𑀼𑀔𑁂𑀲𑀼. 𑀧𑀘𑁆𑀘𑀦𑀻𑀓𑀲𑁆𑀲 𑀧𑀸𑀴𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀧𑀸𑀴𑀺𑀁. 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑀢𑁆𑀢𑀸 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂. 𑀲𑀼𑀤𑁆𑀥𑀺𑀓…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀺 𑀢𑀢𑁆𑀣 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀲𑀭𑀻𑀭𑀸𑀤𑀺𑀦𑁄 𑀧𑀭𑀸𑀫𑀲𑀦𑀁 𑀦𑀢𑁆𑀣𑀺, 𑀇𑀥 𑀅𑀢𑁆𑀣𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺.

𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁧𑁭-𑁨𑁭. 𑀲𑀘𑁆𑀘𑀺𑀓𑀝𑁆𑀞𑀲𑁆𑀲, 𑀲𑀘𑁆𑀘𑀺𑀓𑀝𑁆𑀞𑁂 𑀯𑀸 𑀲𑀁𑀲𑀦𑁆𑀤𑀦𑀁 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀫𑀸𑀲𑀤𑁆𑀯𑀬𑀁 𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑀺𑀓𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀯𑀲𑁆𑀲 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀲𑀪𑀸𑀯𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀘𑁆𑀘𑀺𑀓𑀝𑁆𑀞𑀢𑀸𑀲𑀸𑀫𑀜𑁆𑀜𑁂𑀦 𑀭𑀽𑀧𑀸𑀤𑀻𑀳𑀺 𑀲𑀫𑀻𑀓𑀭𑀡𑀁. 𑀲𑀘𑁆𑀘𑀺𑀓𑀝𑁆𑀞𑁂𑀢𑀺 𑀲𑀘𑁆𑀘𑀺𑀓𑀝𑁆𑀞𑀳𑁂𑀢𑀼, 𑀢𑀢𑁆𑀣 𑀯𑀸 𑀢𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. ‘‘𑀢𑀼𑀮𑁆𑀬𑀬𑁄𑀕𑁂 𑀲𑀫𑀼𑀘𑁆𑀘𑀬𑁄’’𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑀢𑁆𑀢𑀸 𑀏𑀯 𑀘-𑀓𑀸𑀭𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑁂𑀦 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 ¶ 𑀇𑀥 𑀭𑀽𑀧𑀫𑀸𑀳𑀝𑀦𑁆𑀢𑀺 𑀢𑀲𑁆𑀲 𑀉𑀤𑀸𑀳𑀝𑀪𑀸𑀯𑁄 𑀬𑀼𑀢𑁆𑀢𑁄𑀢𑀺 ‘‘𑀬𑀣𑀸𑀭𑀽𑀧’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀅𑀜𑁆𑀜𑀣𑀸 𑀇𑀥 𑀭𑀽𑀧𑀲𑁆𑀲 𑀆𑀳𑀭𑀡𑀫𑁂𑀯 𑀓𑀺𑀫𑀢𑁆𑀣𑀺𑀬𑀁. 𑀏𑀯𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺. 𑀬𑀸 𑀧𑀦𑁂𑀢𑁆𑀣 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸, 𑀲𑀸𑀧𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀉𑀧𑀩𑁆𑀭𑀽𑀳𑁂𑀢𑀺 𑀅𑀜𑁆𑀜𑀢𑁆𑀢𑀦𑀺𑀩𑀦𑁆𑀥𑀦𑀢𑁆𑀢𑀸 𑀢𑀲𑁆𑀲. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂 𑀧𑀦 𑀦𑀺𑀤𑀲𑁆𑀲𑀦𑀢𑁆𑀣𑁄 𑀕𑀸𑀳𑀻𑀬𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑁂 𑀓𑁂𑀯𑀮𑀁 𑀲𑀫𑀼𑀘𑁆𑀘𑀬𑀯𑀲𑁂𑀦𑁂𑀯 𑀅𑀢𑁆𑀣𑀤𑀲𑁆𑀲𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲 𑀲𑁄 𑀢𑁂𑀳𑀺 𑀅𑀜𑁆𑀜𑁄, 𑀅𑀦𑀜𑁆𑀜𑁄 𑀘𑀸𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀬𑀁 𑀲𑀸𑀲𑀦𑀓𑁆𑀓𑀫𑁄𑀢𑀺 𑀆𑀳 ‘‘𑀭𑀽𑀧𑀸𑀤𑀻𑀳𑀺…𑀧𑁂… 𑀲𑀫𑀬𑁄’’𑀢𑀺. 𑀅𑀦𑀼𑀜𑁆𑀜𑀸𑀬𑀫𑀸𑀦𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀢𑁆𑀢𑁂 𑀘 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀬𑀫𑀸𑀦𑁂. 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀸𑀲𑀦𑀺𑀓𑀲𑁆𑀲 𑀧𑀭𑀯𑀸𑀤𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀆𑀚𑀸𑀦𑀸𑀳𑀺 ¶ 𑀦𑀺𑀕𑁆𑀕𑀳’’𑀦𑁆𑀢𑀺 𑀧𑀸𑀞𑁄 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀣𑀸 ‘‘𑀧𑀝𑀺𑀮𑁄𑀫𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀁𑀔𑀺𑀢𑁆𑀢𑀸𑀦𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑁄𑀤𑀦𑀸𑀬 𑀯𑀺𑀦𑀸 𑀧𑀭𑀯𑀸𑀤𑀺𑀦𑁄 𑀧𑀝𑀺𑀚𑀸𑀦𑀸𑀧𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀦𑁆𑀢𑀺…𑀧𑁂… 𑀘𑁄𑀤𑀦𑀢𑁆𑀣’’𑀦𑁆𑀢𑀺. 𑀘𑁄𑀤𑀦𑀸𑀧𑀼𑀩𑁆𑀩𑀓𑀜𑁆𑀳𑀺 𑀢𑀲𑁆𑀲 𑀧𑀝𑀺𑀚𑀸𑀦𑀸𑀧𑀦𑀁. 𑀢𑁂𑀦 𑀨𑀮𑀯𑁄𑀳𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀩𑁆𑀬𑀸𑀓𑀢𑀢𑁆𑀢𑀸𑀢𑀺 𑀅𑀩𑁆𑀬𑀸𑀓𑀭𑀡𑀻𑀬𑀢𑁆𑀢𑀸, 𑀪𑀕𑀯𑀢𑀸 𑀯𑀸 𑀦 𑀩𑁆𑀬𑀸𑀓𑀢𑀢𑁆𑀢𑀸. 𑀬𑀤𑀺 𑀞𑀧𑀦𑀻𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀦𑀻𑀓𑀦𑀬𑁂 𑀞𑀧𑀦𑀻𑀬𑀢𑁆𑀢𑀸 𑀧𑀜𑁆𑀳𑀲𑁆𑀲 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀭𑁂𑀦𑀧𑀻𑀢𑀺 𑀧𑀭𑀯𑀸𑀤𑀺𑀦𑀸𑀧𑀺 𑀞𑀧𑀦𑀻𑀬𑀢𑁆𑀢𑀸 𑀮𑀤𑁆𑀥𑀺𑀫𑁂𑀯 𑀦𑀺𑀲𑁆𑀲𑀸𑀬 𑀅𑀦𑀼𑀮𑁄𑀫𑀦𑀬𑁂 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀸𑀬 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀅𑀦𑀼𑀮𑁄𑀫𑁂𑀧𑀺 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀢𑁆𑀢𑀘𑁄𑀤𑀦𑀸𑀬𑀫𑁂𑀯 𑀧𑀭𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑀲𑁆𑀲 𑀓𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮-𑁩𑁬. 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸 𑀘𑀸𑀢𑀺 𑀇𑀫𑀺𑀦𑀸 𑀤𑁆𑀯𑀬𑀫𑁆𑀧𑀺 𑀉𑀤𑁆𑀥𑀭𑀢𑀺 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸, 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀧𑀼𑀘𑁆𑀙𑀸 𑀘𑀸𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀢𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀤𑁆𑀯𑀺𑀦𑁆𑀦𑀁 𑀭𑀽𑀧𑀯𑁂𑀤𑀦𑀸𑀦𑀁 𑀯𑀺𑀬 𑀭𑀽𑀧𑀧𑀼𑀕𑁆𑀕𑀮𑀸𑀦𑀁 𑀲𑀘𑁆𑀘𑀺𑀓𑀝𑁆𑀞𑁂𑀦 𑀲𑀫𑀸𑀦𑀢𑀸 ¶ 𑀢𑁂𑀲𑀁 𑀅𑀜𑁆𑀜𑀢𑁆𑀢𑀲𑁆𑀲 𑀓𑀸𑀭𑀡𑀁 𑀬𑀼𑀢𑁆𑀢𑀁 𑀦 𑀳𑁄𑀢𑀺. 𑀅𑀣 𑀔𑁄…𑀧𑁂… 𑀉𑀧𑀮𑀩𑁆𑀪𑀦𑀻𑀬𑀢𑀸𑀢𑀺 𑀇𑀤𑀜𑁆𑀘 𑀲𑀁𑀲𑀦𑁆𑀤𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑀲𑀸𑀫𑀜𑁆𑀜𑁂𑀦 𑀭𑀽𑀧𑀧𑀼𑀕𑁆𑀕𑀮𑀸𑀦𑀁 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀁 𑀇𑀘𑁆𑀙𑀺𑀢𑀁, 𑀢𑁂𑀦𑁂𑀯 𑀦𑁂𑀲𑀁 𑀅𑀜𑁆𑀜𑀢𑁆𑀢𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀅𑀣 𑀧𑀭𑀫𑀢𑁆𑀣𑀯𑁄𑀳𑀸𑀭𑀪𑁂𑀤𑀢𑁄 𑀢𑁂𑀲𑀁 𑀅𑀜𑁆𑀜𑀢𑁆𑀢𑀁 𑀦 𑀇𑀘𑁆𑀙𑀺𑀢𑀁, 𑀢𑀢𑁄 𑀏𑀯 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀫𑁆𑀧𑀺 𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺.

𑁩𑁭-𑁪𑁫. 𑀉𑀧𑀮𑀤𑁆𑀥𑀻𑀢𑀺 𑀧𑀼𑀕𑁆𑀕𑀮𑀲𑁆𑀲 𑀉𑀧𑀮𑀤𑁆𑀥𑀺 𑀯𑀺𑀚𑁆𑀚𑀫𑀸𑀦𑀢𑀸. ‘‘𑀧𑀝𑀺𑀓𑀫𑁆𑀫𑀧𑀜𑁆𑀘𑀓’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁪𑁬-𑁫𑁨. 𑀏𑀓𑀥𑀫𑁆𑀫𑀢𑁄𑀧𑀻𑀢𑀺 ¶ 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀏𑀓𑀥𑀫𑁆𑀫𑀢𑁄𑀧𑀺. 𑀏𑀢𑁂𑀦 𑀢𑀢𑁄 𑀲𑀩𑁆𑀩𑀢𑁄𑀧𑀺 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀢𑀸𑀦𑀦𑀼𑀚𑀸𑀦𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀓𑀮𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀦𑁆𑀥𑀸𑀬𑀸’’𑀢𑀺. 𑀭𑀽𑀧𑀸𑀤𑀺𑀏𑀓𑁂𑀓𑀥𑀫𑁆𑀫𑀯𑀲𑁂𑀦 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀦 𑀲𑀫𑀼𑀤𑀸𑀬𑀸𑀯𑀬𑀯𑀸 𑀪𑀺𑀦𑁆𑀦𑀲𑀪𑀸𑀯𑀸, 𑀢𑀲𑁆𑀫𑀸 ‘‘𑀲𑀫𑀼𑀤𑀸𑀬𑀢𑁄…𑀧𑁂… 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸’’𑀢𑀺 𑀧𑀭𑀯𑀸𑀤𑀺𑀦𑁄 𑀆𑀲𑀗𑁆𑀓𑀫𑀸𑀳. 𑀏𑀢𑀁 𑀯𑀘𑀦𑁄𑀓𑀸𑀲𑀦𑁆𑀢𑀺 𑀬𑀤𑀺𑀧𑀺 𑀲𑀢𑁆𑀢𑀧𑀜𑁆𑀜𑀸𑀲𑀥𑀫𑁆𑀫𑀲𑀫𑀼𑀤𑀸𑀬𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀢𑀁 𑀦 𑀇𑀘𑁆𑀙𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀢𑁄, 𑀢𑀤𑁂𑀓𑀤𑁂𑀲𑀢𑁄 𑀧𑀦𑀲𑁆𑀲 𑀅𑀦𑀜𑁆𑀜𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑀢𑁂𑀯. 𑀦 𑀳𑀺 𑀲𑀫𑀼𑀤𑀸𑀬𑁄 𑀅𑀯𑀬𑀯𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸 ‘‘𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀓𑀺𑀁 𑀦𑀺𑀕𑁆𑀕𑀳𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀩𑁆𑀪𑁂𑀣𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀯𑀺𑀪𑀸𑀕𑀫𑀼𑀔𑁂𑀦𑁂𑀯 𑀅𑀦𑀯𑀲𑁂𑀲𑀢𑁄 𑀧𑀼𑀕𑁆𑀕𑀮𑁄𑀢𑀺 𑀕𑀳𑀡𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 𑀧𑀞𑀫𑀯𑀺𑀓𑀧𑁆𑀧𑁄, 𑀤𑀼𑀢𑀺𑀬𑁄 𑀧𑀦 𑀅𑀯𑀺𑀪𑀸𑀕𑀢𑁄 𑀧𑀭𑀫𑀢𑁆𑀣𑀲𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀸𑀦𑀁 𑀯𑀺𑀲𑁂𑀲𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀏𑀯’’𑀦𑁆𑀢𑀺.

𑀲𑀪𑀸𑀯𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀲𑀪𑀸𑀯𑁂𑀦 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑀩𑁆𑀩𑀢𑁄. 𑀲𑀪𑀸𑀯𑀪𑀺𑀦𑁆𑀦𑁄 𑀳𑀺 𑀥𑀫𑁆𑀫𑁄 𑀢𑀤𑀜𑁆𑀜𑀥𑀫𑁆𑀫𑀢𑁄 𑀯𑀺𑀦𑀺𑀩𑁆𑀪𑁄𑀕𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀢𑁄 𑀅𑀜𑁆𑀜𑀲𑀪𑀸𑀕𑀢𑁆𑀢𑀸’’𑀢𑀺. 𑀭𑀽𑀧𑀯𑀚𑁆𑀚𑁂𑀢𑀺 𑀭𑀽𑀧𑀥𑀫𑁆𑀫𑀯𑀚𑁆𑀚𑁂 ¶ . 𑀢𑀻𑀲𑀼𑀧𑀻𑀢𑀺 ‘‘𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄, 𑀅𑀜𑁆𑀜𑀢𑁆𑀭 𑀭𑀽𑀧𑀸, 𑀧𑀼𑀕𑁆𑀕𑀮𑀲𑁆𑀫𑀺𑀁 𑀭𑀽𑀧’’𑀦𑁆𑀢𑀺 𑀇𑀫𑁂𑀲𑀼 𑀏𑀯𑀁 𑀧𑀯𑀢𑁆𑀢𑁂𑀲𑀼 𑀢𑀻𑀲𑀼𑀧𑀺 𑀅𑀦𑀼𑀬𑁄𑀕𑁂𑀲𑀼. 𑀲𑀸𑀲𑀦𑀺𑀓𑁄 𑀏𑀯𑀸𑀬𑀁 𑀧𑀼𑀕𑁆𑀕𑀮𑀯𑀸𑀤𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀦 𑀳𑀺 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀇𑀘𑁆𑀙𑀢𑀻’’𑀢𑀺. ‘‘𑀭𑀽𑀧𑀯𑀸’’𑀢𑀺 𑀇𑀫𑀺𑀦𑀸 𑀭𑀽𑀧𑁂𑀦 𑀲𑀓𑀺𑀜𑁆𑀘𑀦𑀢𑀸𑀯 𑀜𑀸𑀧𑀻𑀬𑀢𑀺, 𑀦 𑀭𑀽𑀧𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺 𑀏𑀢𑁆𑀣 𑀘 𑀭𑀽𑀧𑀯𑀸 𑀧𑀼𑀕𑁆𑀕𑀮𑁄𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄’’𑀢𑀺.

𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁫𑁪. 𑀮𑀓𑁆𑀔𑀡𑀬𑀼𑀢𑁆𑀢𑀺𑀓𑀣𑀸𑀬𑀁 ¶ ‘‘𑀙𑀮𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀁 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄.

𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀢𑀺 𑀧𑀤𑀤𑁆𑀯𑀬𑀲𑁆𑀲 𑀏𑀓𑀢𑁆𑀢𑀢𑁆𑀣𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀳𑁂𑀢𑀁 𑀤𑁄𑀲𑀤𑀲𑁆𑀲𑀦𑀢𑁆𑀣𑀁 ‘‘𑀏𑀯𑀁 𑀲𑀦𑁆𑀢𑁂 𑀅𑀬𑀁 𑀤𑁄𑀲𑁄’’𑀢𑀺. 𑀢𑀬𑀺𑀤𑀁 𑀏𑀓𑀢𑁆𑀢𑀁 𑀉𑀧𑀮𑀩𑁆𑀪𑀢𑀺 𑀏𑀯𑀸𑀢𑀺 𑀧𑀘𑁆𑀙𑀺𑀫𑀧𑀤𑀸𑀯𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀓𑁂𑀳𑀺𑀘𑀺 𑀧𑀼𑀕𑁆𑀕𑀮𑁄 𑀓𑁂𑀳𑀺𑀘𑀺 𑀦 𑀧𑀼𑀕𑁆𑀕𑀮𑁄’’𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀭𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀓𑀢𑁆𑀯𑀸 𑀢𑀫𑁂𑀯 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀧𑀼𑀕𑁆𑀕𑀮𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀪𑀚𑀺𑀢𑀩𑁆𑀩𑀢𑀦𑁆𑀢𑀺 ‘‘𑀉𑀧𑀮𑀩𑁆𑀪𑀢𑀺 𑀘𑀸’’𑀢𑀺 𑀏𑀯𑀁 𑀅𑀯𑀺𑀪𑀚𑀺𑀢𑀩𑁆𑀩𑀢𑀁. 𑀯𑀺𑀪𑀚𑀺𑀢𑀩𑁆𑀩𑀢𑀦𑁆𑀢𑀺 ‘‘𑀧𑀼𑀕𑁆𑀕𑀮𑁄 𑀘 𑀢𑀤𑀜𑁆𑀜𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺 𑀏𑀯𑀁 𑀯𑀺𑀪𑀚𑀺𑀢𑀩𑁆𑀩𑀢𑀁. 𑀏𑀢𑁂𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀏𑀯𑀸’’𑀢𑀺 𑀧𑀘𑁆𑀙𑀺𑀫𑀧𑀤𑀸𑀯𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀦 ‘‘𑀧𑀼𑀕𑁆𑀕𑀮𑁄 𑀏𑀯 𑀉𑀧𑀮𑀩𑁆𑀪𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀁 𑀯𑀺𑀪𑀸𑀕𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀁 𑀯𑀺𑀪𑀸𑀕𑀁 𑀯𑀤𑀢𑁄 𑀲𑀓𑀯𑀸𑀤𑀺𑀦𑁄, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺. 𑀏𑀢𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀦𑁄 ¶ . 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀦𑁆𑀢𑀺 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺…𑀧𑁂… 𑀓𑁂𑀳𑀺𑀘𑀺 𑀦 𑀧𑀼𑀕𑁆𑀕𑀮𑁄’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀪𑀸𑀕𑀁. 𑀬𑀣𑀸𑀆𑀧𑀸𑀤𑀺𑀢𑁂𑀦𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀆𑀧𑀸𑀤𑀺𑀢𑀧𑁆𑀧𑀓𑀸𑀭𑁂𑀦. 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑀤𑀺𑀧𑀺 𑀢𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀏𑀯 𑀯𑀼𑀘𑁆𑀘𑀢𑀺, 𑀉𑀧𑀮𑀩𑁆𑀪𑀢𑀻𑀢𑀺 𑀧𑀦 𑀧𑀼𑀕𑁆𑀕𑀮𑁄 𑀏𑀯 𑀦 𑀯𑀼𑀘𑁆𑀘𑀢𑀺, 𑀅𑀣 𑀔𑁄 𑀅𑀜𑁆𑀜𑁄𑀧𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀲𑀗𑁆𑀕𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑁬𑁦. 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀯𑀺𑀳𑀺𑀢𑀢𑁆𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁧-𑁬𑁬. 𑀭𑀽𑀧𑀓𑀸𑀬𑀸𑀯𑀺𑀭𑀳𑀁 ¶ 𑀲𑀦𑁆𑀥𑀸𑀬 𑀆𑀳, 𑀦 𑀭𑀽𑀧𑀢𑀡𑁆𑀳𑀸𑀲𑀩𑁆𑀪𑀸𑀯𑀁. 𑀢𑀣𑀸 𑀲𑀢𑀺 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯 𑀲𑀺𑀬𑀸, 𑀦 𑀅𑀦𑀼𑀚𑀸𑀦𑀺𑀢𑀩𑁆𑀩𑀦𑁆𑀢𑀺. ‘‘𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀻𑀪𑀸𑀯𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀓𑀲𑁆𑀲𑀘𑀺 𑀓𑀸𑀫𑀥𑀸𑀢𑀽𑀧𑀧𑀦𑁆𑀦𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀆𑀬𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 𑀓𑀤𑀸𑀘𑀺 𑀪𑀸𑀯𑀲𑁆𑀲𑁂𑀯𑀸𑀢𑀺 𑀬𑁄𑀚𑀦𑀸.

𑁬𑁭. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑁂𑀲𑀦𑀸𑀬. 𑀲𑀸 𑀳𑀺 𑀓𑀸𑀬𑀓𑀸𑀬𑀸𑀦𑀼𑀧𑀲𑁆𑀲𑀻𑀦𑀁 𑀯𑀺𑀪𑀸𑀕𑀕𑁆𑀕𑀳𑀡𑀲𑁆𑀲 𑀓𑀸𑀭𑀡𑀪𑀽𑀢𑀸, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀏𑀯 𑀯𑀸. 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸𑀢𑀺 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸. 𑀆𑀳𑀘𑁆𑀘 𑀪𑀸𑀲𑀺𑀢𑀦𑁆𑀢𑀺 𑀞𑀸𑀦𑀓𑀭𑀡𑀸𑀦𑀺 𑀆𑀳𑀦𑁆𑀢𑁆𑀯𑀸 𑀓𑀣𑀺𑀢𑀁, 𑀪𑀕𑀯𑀢𑀸 𑀲𑀸𑀫𑀁 𑀤𑁂𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁯-𑁭𑁨. 𑀬𑀸𑀦𑀺𑀲𑁆𑀲 ¶ 𑀲𑀼𑀢𑁆𑀢𑀸𑀦𑀺 𑀦𑀺𑀲𑁆𑀲𑀸𑀬 𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀁 𑀤𑀲𑁆𑀲𑀦𑀢𑁄 𑀧𑀭𑀢𑁄 ‘‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸, 𑀧𑀼𑀭𑀢𑁄 𑀧𑀦 ‘‘𑀦 𑀯𑀢𑁆𑀢𑀩𑁆𑀩𑀁 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’’𑀢𑀺𑀆𑀤𑀺𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀲𑁆𑀲𑁂𑀦𑁆𑀢𑁄…𑀧𑁂… 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀬𑀸𑀦𑀺𑀲𑁆𑀲…𑀧𑁂… 𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀸 𑀇𑀤𑀁 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀦 𑀯𑀢𑁆𑀢𑀫𑀸𑀦𑀢𑀸𑀫𑀢𑁆𑀢𑀯𑀘𑀦𑀁, 𑀅𑀣 𑀔𑁄 𑀢𑀲𑁆𑀲𑀸 𑀮𑀓𑁆𑀔𑀡𑀢𑁆𑀣𑀯𑀘𑀦𑀁, 𑀳𑁂𑀢𑀼𑀪𑀸𑀯𑀯𑀘𑀦𑀁 𑀯𑀸𑀢𑀺 𑀦 𑀓𑁄𑀘𑀺 𑀤𑁄𑀲𑁄.

𑁯𑁧. 𑀲𑁄 𑀯𑀢𑁆𑀢𑀩𑁆𑀩𑁄𑀢𑀺 𑀲𑁄 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑀸𑀧𑀚𑁆𑀚𑀦𑀸𑀓𑀸𑀭𑁄 𑀯𑀢𑁆𑀢𑀩𑁆𑀩𑁄, 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀇𑀫𑀺𑀲𑁆𑀲𑀸 𑀮𑀤𑁆𑀥𑀺𑀬𑀸 𑀯𑀲𑁂𑀦 ‘‘𑀬𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑀪𑀽𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀲𑁄 𑀆𑀓𑀸𑀭𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺, 𑀢𑀣𑀸 𑀘 𑀲𑀢𑀺 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄𑀢𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀬𑀲𑁆𑀫𑀸 𑀧𑀦 ‘‘𑀇𑀥 𑀲𑀭𑀻𑀭𑀦𑀺𑀓𑁆𑀔𑁂𑀧𑀸’’𑀢𑀺 𑀅𑀦𑀦𑁆𑀢𑀭𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 ¶ ‘‘𑀲𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀦𑀺𑀭𑀬𑀽𑀧𑀕𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀻𑀢𑀺 𑀇𑀤𑀁 𑀧𑀼𑀭𑀸𑀢𑀦𑀸𑀦𑀁 𑀅𑀦𑁆𑀢𑀭𑀸𑀪𑀯𑀯𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀥𑀼𑀦𑀸𑀢𑀦𑀸 𑀧𑀦 ‘‘𑀉𑀤𑁆𑀥𑀁𑀧𑀸𑀤𑁄 𑀢𑀼 𑀦𑀸𑀭𑀓𑁄’’𑀢𑀺 𑀯𑀤𑀦𑁆𑀢𑀸 𑀢𑀲𑁆𑀲𑀧𑀺 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑁂𑀯, 𑀓𑁂𑀘𑀺 𑀧𑀦 𑀅𑀲𑀜𑁆𑀜𑀽𑀧𑀕𑀸𑀦𑀁. 𑀅𑀭𑀽𑀧𑀽𑀧𑀕𑀸𑀦𑀁 𑀧𑀦 𑀲𑀩𑁆𑀩𑁂𑀧𑀺 𑀦 𑀇𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀬𑁂 ‘‘𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀘𑀼𑀢𑀽𑀧𑀧𑀸𑀢𑀓𑀸𑀮𑁂𑀲𑀼 𑀅𑀲𑀜𑁆𑀜𑀻𑀦𑀁 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀅𑀦𑁆𑀢𑀭𑀸𑀪𑀯𑀢𑁄𑀯 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺, 𑀢𑀤𑀜𑁆𑀜𑁂𑀲𑀁 𑀯𑀲𑁂𑀦 ‘‘𑀲𑀯𑁂𑀤𑀦𑁄…𑀧𑁂… 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑁂 𑀧𑀦𑁂𑀯𑀁 𑀇𑀘𑁆𑀙𑀦𑁆𑀢𑀺? 𑀲𑀩𑁆𑀩𑀢𑁆𑀣𑀺𑀯𑀸𑀤𑀻𑀲𑀼 𑀏𑀓𑀘𑁆𑀘𑁂.

𑁯𑁨. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀪𑀯𑁂, 𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀸 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄 𑀲𑁄 𑀲𑀜𑁆𑀜𑀸𑀪𑀯𑁂𑀦 𑀅𑀲𑀗𑁆𑀕𑀳𑀺𑀢𑁄, 𑀪𑀯𑀦𑁆𑀢𑀭𑀪𑀸𑀯𑁂𑀦 𑀘 𑀲𑀗𑁆𑀕𑀳𑀺𑀢𑁄.

𑁯𑁩. 𑀇𑀦𑁆𑀥𑀦𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑁂𑀦 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀺𑀦𑀸 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀸 𑁋 𑀬𑀣𑀸 𑀦 𑀯𑀺𑀦𑀸 𑀇𑀦𑁆𑀥𑀦𑁂𑀦 𑀅𑀕𑁆𑀕𑀺 𑀧𑀜𑁆𑀜𑀸𑀧𑀻𑀬𑀢𑀺, 𑀦 𑀘 𑀢𑀁 𑀅𑀜𑁆𑀜𑀁 𑀇𑀦𑁆𑀥𑀦𑀢𑁄 𑀲𑀓𑁆𑀓𑀸 𑀧𑀝𑀺𑀚𑀸𑀦𑀺𑀢𑀼𑀁, 𑀦𑀸𑀧𑀺 𑀅𑀦𑀜𑁆𑀜𑀁. 𑀬𑀤𑀺 𑀳𑀺 𑀅𑀜𑁆𑀜𑀁 𑀲𑀺𑀬𑀸, 𑀦 𑀉𑀡𑁆𑀳𑀁 𑀇𑀦𑁆𑀥𑀦𑀁 ¶ 𑀲𑀺𑀬𑀸, 𑀅𑀣 𑀅𑀦𑀜𑁆𑀜𑀁, 𑀦𑀺𑀤𑀳𑀺𑀢𑀩𑁆𑀩𑀁𑀬𑁂𑀯 𑀤𑀸𑀳𑀓𑀁 𑀲𑀺𑀬𑀸, 𑀏𑀯𑀁 𑀦 𑀯𑀺𑀦𑀸 𑀭𑀽𑀧𑀸𑀤𑀻𑀳𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀧𑀻𑀬𑀢𑀺, 𑀦 𑀘 𑀢𑁂𑀳𑀺 𑀅𑀜𑁆𑀜𑁄, 𑀦𑀸𑀧𑀺 𑀅𑀦𑀜𑁆𑀜𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀧𑁆𑀧𑀲𑀗𑁆𑀕𑀢𑁄𑀢𑀺 𑀧𑀭𑀯𑀸𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀬𑀤𑀺 𑀅𑀕𑁆𑀕𑀺𑀦𑁆𑀥𑀦𑁄𑀧𑀫𑀸 𑀮𑁄𑀓𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸, 𑀅𑀧𑀴𑀺𑀢𑁆𑀢𑀁 𑀓𑀝𑁆𑀞𑀸𑀤𑀺𑀇𑀦𑁆𑀥𑀦𑀁 𑀦𑀺𑀤𑀳𑀺𑀢𑀩𑁆𑀩𑀜𑁆𑀘, 𑀧𑀴𑀺𑀢𑁆𑀢𑀁 𑀪𑀸𑀲𑀼𑀭𑀼𑀡𑁆𑀳𑀁 𑀅𑀕𑁆𑀕𑀺𑀤𑀸𑀳𑀓𑀜𑁆𑀘, 𑀢𑀜𑁆𑀘 𑀑𑀚𑀝𑁆𑀞𑀫𑀓𑀭𑀽𑀧𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀬𑀤𑀺 𑀏𑀯𑀁 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀦𑁆𑀦𑁄, 𑀅𑀣 𑀧𑀭𑀫𑀢𑁆𑀣𑀢𑁄 𑀘, 𑀢𑀲𑁆𑀫𑀺𑀁𑀬𑁂𑀯 𑀓𑀝𑁆𑀞𑀸𑀤𑀺𑀲𑀜𑁆𑀜𑀺𑀢𑁂 𑀭𑀽𑀧𑀲𑀗𑁆𑀔𑀸𑀢𑀧𑀴𑀺𑀢𑁆𑀢𑁂 𑀬𑀁 𑀉𑀲𑀼𑀫𑀁 𑀲𑁄 𑀅𑀕𑁆𑀕𑀺 𑀢𑀁𑀲𑀳𑀚𑀸𑀢𑀸𑀦𑀺 𑀢𑀻𑀡𑀺𑀪𑀽𑀢𑀸𑀦𑀺 𑀇𑀦𑁆𑀥𑀦𑀁. 𑀏𑀯𑀫𑁆𑀧𑀺 𑀲𑀺𑀤𑁆𑀥𑀁 𑀮𑀓𑁆𑀔𑀡𑀪𑁂𑀤𑀢𑁄 𑀅𑀕𑁆𑀕𑀺𑀦𑁆𑀥𑀦𑀸𑀦𑀁 𑀅𑀜𑁆𑀜𑀢𑁆𑀢𑀦𑁆𑀢𑀺 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑀢𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀚𑁆𑀚𑀢𑀻𑀢𑀺.

𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁯𑁭. 𑀦𑀻𑀮𑀕𑀼𑀡𑀬𑁄𑀕𑀢𑁄 ¶ 𑀦𑀻𑀮𑁄, 𑀦𑀻𑀮𑁄 𑀏𑀯 𑀦𑀻𑀮𑀓𑁄, 𑀢𑀲𑁆𑀲, 𑀅𑀬𑀁 𑀧𑀦𑀲𑁆𑀲 𑀦𑀻𑀮𑀧𑀜𑁆𑀜𑀢𑁆𑀢𑀺 𑀦𑀻𑀮𑀭𑀽𑀧𑀼𑀧𑀸𑀤𑀸𑀦𑀸𑀢𑀺 𑀆𑀳 ‘‘𑀦𑀻𑀮𑀁…𑀧𑁂… 𑀧𑀜𑁆𑀜𑀢𑁆𑀢𑀻’’𑀢𑀺. 𑀏𑀯𑀁 𑀧𑀦 𑀧𑀸𑀞𑁂 𑀞𑀺𑀢𑁂 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺 𑀓𑀣𑀫𑀬𑀁 𑀧𑀤𑀼𑀤𑁆𑀥𑀸𑀭𑁄𑀢𑀺 𑀆𑀳 ‘‘𑀦𑀻𑀮𑀁 𑀭𑀽𑀧𑀁…𑀧𑁂… 𑀏𑀢𑁆𑀣 𑀬𑁄 𑀧𑀼𑀝𑁆𑀞𑁄 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀢𑀤𑀸𑀤𑀻𑀲𑀽𑀢𑀺 ‘‘𑀧𑀻𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺𑀓𑀁 𑀅𑀝𑁆𑀞𑀓𑀣𑀸𑀬𑀁 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑀫𑁂𑀯 𑀢𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀕𑀡𑁆𑀳𑀸𑀢𑀺.

𑁯𑁮. 𑀯𑀼𑀢𑁆𑀢𑀦𑁆𑀢𑀺 ‘‘𑀫𑀕𑁆𑀕𑀓𑀼𑀲𑀮𑁄’’𑀢𑀺𑀆𑀤𑀻𑀲𑀼 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀁 𑀓𑀼𑀲𑀮𑀯𑁄𑀳𑀸𑀭𑀁.

𑁧𑁧𑁨. 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀫𑀸𑀳𑀸𑀢𑀺 𑀧𑀭𑀯𑀸𑀤𑀻 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀓𑀯𑀸𑀤𑀺𑀲𑁆𑀲 𑀉𑀢𑁆𑀢𑀭𑀫𑀸𑀳.

𑁧𑁧𑁫. ‘‘𑀭𑀽𑀧𑀁 𑀭𑀽𑀧𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑀯𑀸𑀤𑀺𑀯𑀸𑀤𑀁 𑀪𑀺𑀦𑁆𑀤𑀺𑀢𑀼𑀁 ‘‘𑀬𑀣𑀸 𑀦 𑀦𑀺𑀕𑀴𑁄 𑀦𑁂𑀕𑀴𑀺𑀓𑁄’’𑀢𑀺𑀆𑀤𑀺𑀦𑀸 ¶ 𑀲𑀓𑀯𑀸𑀤𑀺𑀯𑀸𑀤𑁄 𑀆𑀭𑀤𑁆𑀥𑁄𑀢𑀺 𑀆𑀳 ‘‘𑀬𑀲𑁆𑀲 𑀭𑀽𑀧𑀁 𑀲𑁄 𑀭𑀽𑀧𑀯𑀸𑀢𑀺 𑀉𑀢𑁆𑀢𑀭𑀧𑀓𑁆𑀔𑁂 𑀯𑀼𑀢𑁆𑀢𑀁 𑀯𑀘𑀦𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺.

𑁧𑁧𑁮. 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀁. 𑀢𑀬𑀺𑀤𑀁 𑀯𑀺𑀲𑁂𑀲𑀦𑀁 𑀘𑀓𑁆𑀔𑀼𑀲𑁆𑀲𑀸𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀦𑁆𑀢𑀺 𑀦 𑀓𑀢𑀁 𑀤𑀝𑁆𑀞𑀩𑁆𑀩𑀁.

𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁨𑁩. 𑀓𑀫𑁆𑀫𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁. 𑀢𑀕𑁆𑀕𑀳𑀡𑁂𑀦𑁂𑀯 𑀳𑀺 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀻𑀬𑁂 𑀓𑀺𑀭𑀺𑀬𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀧𑁆𑀨𑀸𑀤𑀓𑀧𑁆𑀧𑀬𑁄𑀚𑀓𑀪𑀸𑀯𑁂𑀦𑀸𑀢𑀺 𑀓𑀸𑀭𑀓𑀓𑀸𑀭𑀸𑀧𑀓𑀪𑀸𑀯𑁂𑀦.

𑁧𑁨𑁫. 𑀓𑀫𑁆𑀫𑀓𑀸𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀓𑀸𑀭𑀓𑁄. 𑀢𑁂𑀦𑀧𑀻𑀢𑀺 𑀓𑀸𑀭𑀓𑀓𑀸𑀭𑀓𑁂𑀦𑀧𑀺. 𑀢𑀲𑁆𑀲𑀸𑀢𑀺 𑀓𑀸𑀭𑀓𑀓𑀸𑀭𑀓𑀲𑁆𑀲. 𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀓𑀫𑁆𑀫𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀓𑁂𑀳𑀺 𑀧𑀼𑀕𑁆𑀕𑀮𑀸 𑀯𑀺𑀬 𑀅𑀜𑁆𑀜𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀻𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ¶ ‘‘𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀁 𑀯𑀤𑀦𑁆𑀢𑀻’’𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑁄, 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀇𑀥 𑀅𑀦𑀸𑀫𑀝𑁆𑀞𑁄 𑀳𑁄𑀢𑀺, 𑀢𑀣𑀸 𑀘 𑀲𑀢𑀺 𑀓𑀸𑀭𑀓𑀧𑀭𑀫𑁆𑀧𑀭𑀸𑀬 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲…𑀧𑁂… 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢’’𑀦𑁆𑀢𑀺. 𑀢𑀲𑁆𑀲 𑀓𑀸𑀭𑀓𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑀁. 𑀇𑀤𑀜𑁆𑀘𑀸𑀢𑀺 𑀦 𑀓𑁂𑀯𑀮𑀁 𑀧𑀼𑀕𑁆𑀕𑀮𑀓𑀸𑀭𑀓𑀲𑁆𑀲 𑀓𑀫𑁆𑀫𑀓𑀸𑀭𑀓𑀢𑀸𑀧𑀢𑁆𑀢𑀺𑀬𑁂𑀯 𑀤𑁄𑀲𑁄, 𑀅𑀣 𑀔𑁄 𑀇𑀤𑀁 𑀓𑀫𑁆𑀫𑀓𑀸𑀭𑀓𑀢𑀸𑀬 𑀓𑀸𑀭𑀓𑀧𑀭𑀫𑁆𑀧𑀭𑀸𑀧𑀚𑁆𑀚𑀦𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀸𑀦𑀜𑁆𑀳𑀺 𑀧𑀝𑀺𑀧𑀸𑀝𑀺𑀬𑀸 𑀓𑀸𑀭𑀓𑀪𑀸𑀯𑁄 𑀓𑀸𑀭𑀓𑀧𑀭𑀫𑁆𑀧𑀭𑀸.

𑁧𑁭𑁦. 𑀏𑀓𑁄 𑀅𑀦𑁆𑀢𑁄𑀢𑀺 ‘‘𑀕𑀸𑀳𑁄’’𑀢𑀺 𑀲𑀲𑁆𑀲𑀢𑀕𑀸𑀳𑀲𑀗𑁆𑀔𑀸𑀢𑁄 𑀅𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁧𑁭𑁬. 𑀲𑀺𑀬𑀸 𑀅𑀜𑁆𑀜𑁄, 𑀲𑀺𑀬𑀸 𑀅𑀦𑀜𑁆𑀜𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄 ‘‘𑀅𑀜𑁆𑀜𑁄𑀢𑀺 𑀯𑀸 𑀅𑀦𑀜𑁆𑀜𑁄𑀢𑀺 𑀯𑀸’’𑀢𑀺 ¶ , 𑀏𑀯𑀁 𑀧𑀯𑀢𑁆𑀢𑀦𑀺𑀕𑀡𑁆𑀞𑀯𑀸𑀤𑀲𑀤𑀺𑀲𑀢𑁆𑀢𑀸 𑀲𑁄 𑀏𑀯 𑀏𑀓𑁄 𑀦𑁂𑀯 𑀲𑁄 𑀳𑁄𑀢𑀺, 𑀦 𑀅𑀜𑁆𑀜𑁄𑀢𑀺 𑀮𑀤𑁆𑀥𑀺𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀦𑀢𑁆𑀣𑁂𑀯𑀸’’𑀢𑀺. 𑀧𑀭𑀲𑁆𑀲 𑀇𑀘𑁆𑀙𑀸𑀯𑀲𑁂𑀦𑁂𑀯𑀸𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺𑀯𑀲𑁂𑀦𑁂𑀯. 𑀏𑀓𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀏𑀓𑀁 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀕𑀳𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀇𑀢𑀭𑀁 𑀉𑀘𑁆𑀙𑁂𑀤𑀕𑁆𑀕𑀳𑀡𑀁 𑀆𑀧𑀦𑁆𑀦𑀁. 𑀢𑀜𑁆𑀘 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀅𑀜𑁆𑀜𑀁 𑀫𑀺𑀲𑁆𑀲𑀓𑀁 𑀦𑀺𑀘𑁆𑀘𑀸𑀦𑀺𑀘𑁆𑀘𑀕𑁆𑀕𑀳𑀡𑀁, 𑀯𑀺𑀓𑁆𑀔𑁂𑀧𑀕𑁆𑀕𑀳𑀡𑀜𑁆𑀘 𑀆𑀧𑀦𑁆𑀦𑀁. 𑀓𑀸𑀭𑀓𑀯𑁂𑀤𑀓𑀺𑀘𑁆𑀙𑀸𑀬 𑀞𑀢𑁆𑀯𑀸𑀢𑀺 𑀲𑁆𑀯𑁂𑀯 𑀓𑀸𑀭𑀓𑁄 𑀯𑁂𑀤𑀓𑁄 𑀘𑀸𑀢𑀺 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀞𑀢𑁆𑀯𑀸. 𑀢𑀁𑀢𑀁𑀅𑀦𑀺𑀘𑁆𑀙𑀸𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀸𑀤𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀦𑁂𑀦. 𑀆𑀧𑀦𑁆𑀦𑀯𑀲𑁂𑀦𑀧𑀻𑀢𑀺 𑀆𑀧𑀦𑁆𑀦𑀕𑀸𑀳𑀯𑀲𑁂𑀦𑀧𑀺 𑀅𑀬𑀁 𑀅𑀦𑀼𑀬𑁄𑀕𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂𑀲𑀁 𑀆𑀧𑀦𑁆𑀦𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀯𑀺𑀓𑀧𑁆𑀧𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀆𑀧𑀦𑁆𑀦𑀢𑁆𑀢𑀸 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁄𑀢𑀺 𑀬𑁄𑀚𑀦𑀸. 𑀏𑀓𑁂𑀓𑀲𑁆𑀲𑁂𑀯𑀸𑀢𑀺 𑀢𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀏𑀓𑁂𑀓𑀲𑁆𑀲𑁂𑀯 𑀆𑀧𑀦𑁆𑀦𑀢𑁆𑀢𑀸. 𑀢𑀦𑁆𑀢𑀺𑀯𑀲𑁂𑀦 𑀧𑀦 𑀢𑁂 𑀯𑀺𑀓𑀧𑁆𑀧𑀸 𑀏𑀓𑀚𑁆𑀛𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀢𑁄 𑀬𑁄𑀚𑁂𑀢𑀩𑁆𑀩𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀜𑁆𑀳𑀸𑀦𑀁 𑀏𑀓𑀢𑁄 𑀧𑀼𑀝𑁆𑀞𑀢𑁆𑀢𑀸.

𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁯𑁩. 𑀯𑀺𑀓𑀼𑀩𑁆𑀩𑀢𑀻𑀢𑀺 ¶ 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀤𑀪𑀺𑀜𑁆𑀜𑀸𑀯𑀢𑁄𑀢𑀺 𑀆𑀲𑀯𑀓𑁆𑀔𑀬𑀸𑀪𑀺𑀜𑁆𑀜𑀸𑀯𑀢𑁄. 𑀅𑀭𑀳𑀢𑁄 𑀲𑀸𑀥𑀦𑀦𑁆𑀢𑀺 𑀅𑀭𑀳𑀢𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀧𑀼𑀕𑁆𑀕𑀮𑀢𑁆𑀢𑀸𑀪𑀸𑀯𑀲𑀸𑀥𑀦𑀁. 𑀢𑀩𑁆𑀪𑀸𑀯𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀲𑁆𑀲. 𑀅𑀭𑀳𑀢𑁆𑀢𑀥𑀸𑀭𑀸𑀦𑀜𑁆𑀳𑀺 𑀔𑀦𑁆𑀥𑀸 𑀦𑀸𑀫 𑀧𑀼𑀕𑁆𑀕𑀮𑀢𑁆𑀢𑀁 𑀢𑀲𑁆𑀲𑀧𑀺 𑀳𑁄𑀢𑀻𑀢𑀺.

𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁦𑁯. 𑀢𑀢𑀺𑀬𑀓𑁄𑀝𑀺𑀪𑀽𑀢𑀲𑁆𑀲𑀸𑀢𑀺 ¶ 𑀢𑀢𑀺𑀬𑀓𑁄𑀝𑀺𑀲𑀪𑀸𑀯𑀲𑁆𑀲 𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯𑀲𑁆𑀲. 𑀲𑀪𑀸𑀯𑀲𑁆𑀲𑀸𑀢𑀺 𑀘 𑀲𑀪𑀸𑀯𑀥𑀫𑁆𑀫𑀲𑁆𑀲. 𑀮𑀤𑁆𑀥𑀺𑀁 𑀦𑀺𑀕𑀽𑀳𑀺𑀢𑁆𑀯𑀸𑀢𑀺 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄, 𑀦𑀸𑀲𑀗𑁆𑀔𑀢𑁄𑀢𑀺 𑀮𑀤𑁆𑀥𑀺𑀁 𑀅𑀯𑀺𑀪𑀸𑀯𑁂𑀢𑁆𑀯𑀸.

𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁧𑁮. 𑀧𑀚𑀸𑀦𑀦𑀁 𑀦𑀸𑀫 𑀦 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀤𑀻𑀦𑀁 𑀅𑀧𑁆𑀧𑀘𑁆𑀘𑀬𑀢𑁆𑀢𑀸. 𑀧𑀭𑀺𑀘𑁆𑀙𑁂𑀤𑀦𑀲𑀫𑀢𑁆𑀣𑀢𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁮. 𑀲𑀳𑀭𑀽𑀧𑀪𑀸𑀯𑁄 𑀭𑀽𑀧𑁂𑀦 𑀲𑀫𑀗𑁆𑀕𑀺𑀢𑀸, 𑀯𑀺𑀦𑀸𑀭𑀽𑀧𑀪𑀸𑀯𑁄 𑀢𑀢𑁄 𑀯𑀺𑀦𑀺𑀲𑁆𑀲𑀝𑀢𑀸𑀢𑀺 𑀢𑀤𑀼𑀪𑀬𑀁 𑀭𑀽𑀧𑀲𑁆𑀲 𑀅𑀩𑁆𑀪𑀦𑁆𑀢𑀭𑀕𑀫𑀦𑀁 𑀩𑀳𑀺𑀦𑀺𑀓𑁆𑀔𑀫𑀦𑀜𑁆𑀘 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀤𑁆𑀯𑀬𑀁 𑀲𑀳𑀭𑀽𑀧𑀪𑀸𑀯𑀯𑀺𑀦𑀸𑀭𑀽𑀧𑀪𑀸𑀯𑀸𑀦𑀁 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁩𑁭. 𑀑𑀴𑀸𑀭𑀺𑀓𑁄𑀢𑀺 𑀣𑀽𑀮𑁄. 𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀲𑁄 𑀏𑀯 𑀬𑀣𑀸𑀲𑀓𑀁 𑀓𑀫𑁆𑀫𑀼𑀦𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀧𑀝𑀺𑀮𑀸𑀪𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁄 𑀓𑀣𑀺𑀢𑁄. 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ¶ 𑀫𑀦𑁄𑀫𑀬𑁄. 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀅𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀭𑀽𑀧𑁂𑀦 𑀅𑀫𑀺𑀲𑁆𑀲𑀺𑀢𑀢𑁆𑀢𑀸 𑀅𑀭𑀽𑀧𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀢𑁆𑀢𑀸’’𑀢𑀺 𑀧𑀦 𑀚𑀻𑀯𑁂 𑀮𑁄𑀓𑀯𑁄𑀳𑀸𑀭𑁄 𑀦𑀺𑀭𑀼𑀴𑁆𑀳𑁄, 𑀅𑀲𑀢𑀺𑀧𑀺 𑀚𑀻𑀯𑁂 𑀢𑀣𑀸𑀦𑀺𑀭𑀼𑀴𑁆𑀳𑀁 𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀧𑀺 𑀯𑁄𑀳𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀸 𑀮𑁄𑀓𑀲𑁆𑀲 𑀲𑀫𑀜𑁆𑀜𑀸, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀻’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸 𑀯𑁄𑀳𑀭𑀦𑁆𑀢𑀺, 𑀢𑀁 𑀧𑀓𑀸𑀭𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀧𑀭𑀸𑀫𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀮𑀓𑁆𑀔𑀡𑀯𑀲𑁂𑀦 𑀅𑀦𑀺𑀘𑁆𑀘𑀢𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀘. 𑀇𑀫𑀺𑀦𑀸𑀢𑀺 ‘‘𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀸𑀪𑀸𑀯𑀯𑀘𑀦𑁂𑀦 ¶ . 𑀇𑀢𑁄 𑀧𑀼𑀭𑀺𑀫𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀓𑀯𑀸𑀤𑀺𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀸 𑀇𑀢𑁄 𑀅𑀢𑁆𑀣𑀲𑀁𑀯𑀡𑁆𑀡𑀦𑀢𑁄 𑀧𑀼𑀭𑀺𑀫𑀸. 𑀇𑀫𑀺𑀦𑀸𑀢𑀺 𑀯𑀸 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑁂𑀦. 𑀬𑀣𑀸 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀲𑀫𑀜𑁆𑀜𑀸𑀦𑀢𑀺𑀥𑀸𑀯𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀭𑀸𑀫𑀸𑀲𑁄 𑀘 𑀦 𑀳𑁄𑀢𑀺 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀢𑁄, 𑀬𑀣𑀸 𑀘 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀦 𑀳𑁄𑀢𑀺, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀸 𑀘 𑀅𑀢𑁆𑀣𑀯𑀡𑁆𑀡𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀳𑀺 𑀲𑀢𑀺 𑀲𑀩𑁆𑀩𑀮𑁄𑀓𑀯𑁄𑀳𑀸𑀭𑀽𑀧𑀘𑁆𑀙𑁂𑀤𑁄 𑀲𑀺𑀬𑀸𑀢𑀺.

𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀬𑀲𑁆𑀫𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀓𑀸𑀭𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀦𑁆𑀢𑁄 𑀓𑁂𑀯𑀮𑀁 𑀮𑁄𑀓𑀲𑀫𑁆𑀫𑀼𑀢𑀺𑀬𑀸𑀯 𑀯𑁄𑀳𑀭𑀢𑀺, 𑀢𑀲𑁆𑀫𑀸 𑀲𑀘𑁆𑀘𑀁 𑀧𑀭𑁂𑀲𑀁 𑀅𑀯𑀺𑀲𑀁𑀯𑀸𑀤𑀦𑀢𑁄. 𑀢𑀣𑀓𑀸𑀭𑀡𑀦𑁆𑀢𑀺 𑀢𑀣𑁄 𑀅𑀯𑀺𑀢𑀣𑁄 𑀥𑀫𑁆𑀫𑀲𑀪𑀸𑀯𑁄 𑀓𑀸𑀭𑀡𑀁 𑀧𑀯𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀢𑀣𑀓𑀸𑀭𑀡𑀁, 𑀧𑀭𑀫𑀢𑁆𑀣𑀯𑀘𑀦𑀁, 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀯𑀺𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀥𑀫𑁆𑀫𑀸𑀦𑀁 𑀢𑀣𑀢𑀸𑀬 𑀧𑀯𑀢𑁆𑀢’’𑀦𑁆𑀢𑀺.

𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀳𑀸𑀦𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. 𑀇𑀤𑀁 ¶ ¶ 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀮𑀓𑁆𑀔𑀡𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁯-𑁧𑁫𑁦) 𑀇𑀤𑀫𑁆𑀧𑀺 𑀳𑀺 𑀲𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀆𑀤𑀻𑀦𑀁𑀬𑁂𑀯 𑀧𑀭𑀺𑀳𑀸𑀦𑀺𑀦𑀺𑀲𑁆𑀲𑀬𑁄, 𑀦 𑀅𑀭𑀳𑀢𑁄. 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀲𑁂𑀓𑁆𑀔𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀬𑁂𑀦 𑀲𑀫𑀬𑀁 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁧).

‘‘𑀧𑀭𑀺𑀳𑀸𑀦𑀺𑀥𑀫𑁆𑀫𑁄’’𑀢𑀺 𑀘 𑀧𑀼𑀣𑀼𑀚𑁆𑀚𑀦𑁄 𑀘 𑀏𑀓𑀘𑁆𑀘𑁄 𑀘 𑀲𑁂𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀭𑀳𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀤𑀲𑁆𑀲𑀺𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸 𑀦𑀺𑀲𑁆𑀲𑀬𑁄, 𑀦 𑀅𑀭𑀳𑀢𑁄, 𑀢𑀲𑁆𑀫𑀸. 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀲𑁆𑀫𑀸 ‘‘𑀅𑀭𑀳𑀢𑁄𑀧𑀻’’𑀢𑀺 𑀏𑀢𑁆𑀣 𑀅𑀭𑀳𑀢𑁄𑀧𑀺 𑀧𑀭𑀺𑀳𑀸𑀦𑀺, 𑀓𑁄 𑀧𑀦 𑀯𑀸𑀤𑁄 𑀅𑀦𑀸𑀕𑀸𑀫𑀺𑀆𑀤𑀻𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀧𑀺-𑀲𑀤𑁆𑀤𑀲𑀫𑁆𑀧𑀺𑀡𑁆𑀟𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀳𑀢𑁄𑀧𑀺…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀬𑀲𑁆𑀫𑀸 𑀯𑀸 𑀓𑀸𑀫𑀜𑁆𑀘𑁂𑀢𑁆𑀣 𑀤𑀼𑀢𑀺𑀬𑀲𑀼𑀢𑁆𑀢𑀁 𑀲𑁂𑀓𑁆𑀔𑀯𑀲𑁂𑀦 𑀆𑀕𑀢𑀁, 𑀧𑀞𑀫𑀢𑀢𑀺𑀬𑀲𑀼𑀢𑁆𑀢𑀸𑀦𑀺 𑀧𑀦 𑀅𑀲𑁂𑀓𑁆𑀔𑀯𑀲𑁂𑀦𑀧𑀺 𑀆𑀕𑀢𑀸𑀦𑀻𑀢𑀺 𑀢𑁂𑀲𑀁 𑀮𑀤𑁆𑀥𑀺, 𑀢𑀲𑁆𑀫𑀸 ‘‘𑀅𑀭𑀳𑀢𑁄𑀧𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀁 𑀲𑀼𑀢𑁆𑀢𑀁 𑀅𑀭𑀳𑀢𑁄’’𑀢𑀺𑀆𑀤𑀺.

𑀢𑀢𑀺𑀬𑀲𑁆𑀫𑀺𑀦𑁆𑀢𑀺 ‘‘𑀲𑀩𑁆𑀩𑁂𑀲𑀜𑁆𑀜𑁂𑀯 𑀅𑀭𑀳𑀦𑁆𑀢𑀸𑀦𑀁 𑀧𑀭𑀺𑀳𑀸𑀦𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂. 𑀲𑁄 𑀳𑀺 ‘‘𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄’’𑀢𑀺𑀆𑀤𑀺𑀦𑀸 ¶ 𑀆𑀕𑀢𑁂𑀲𑀼 𑀢𑀢𑀺𑀬𑁄 𑀧𑀜𑁆𑀳𑁄. 𑀢𑁂𑀲𑀦𑁆𑀢𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀦𑀁. 𑀢𑀢𑀺𑀬𑀲𑁆𑀫𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄. 𑀢𑁂𑀦 𑀧𑀞𑀫𑀧𑀜𑁆𑀳𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 ‘‘𑀢𑀢𑁆𑀣𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺.

𑀲𑁄𑀬𑁂𑀯 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑁄𑀬𑁂𑀯 𑀲𑁄𑀢𑀸𑀧𑀦𑁆𑀦𑀪𑀸𑀯𑀢𑁄 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀦 𑀘𑁂𑀢𑁆𑀣 𑀲𑀓𑀤𑀸𑀕𑀸𑀫𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀧𑀕𑀫𑁄 𑀧𑀭𑀺𑀳𑀸𑀦𑀺 𑀳𑁄𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀪𑀸𑀯𑀢𑁄. 𑀧𑀢𑁆𑀢𑀯𑀺𑀲𑁂𑀲𑀢𑁄 ¶ 𑀳𑀺 𑀧𑀭𑀺𑀳𑀸𑀦𑀻𑀢𑀺. 𑀇𑀢𑀭𑁂𑀢𑀺 𑀲𑀓𑀤𑀸𑀕𑀸𑀫𑀺𑀆𑀤𑀺𑀓𑀸. 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬𑀸𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀧𑀝𑀺𑀮𑀸𑀪𑀢𑁆𑀣𑀸𑀬 ‘‘𑀦𑀺𑀬𑀢𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸.

𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁪𑁧. 𑀢𑀢𑁄𑀢𑀺 𑀅𑀭𑀳𑀢𑁆𑀢𑀢𑁄. 𑀢𑀢𑁆𑀣𑀸𑀢𑀺 𑀤𑀲𑁆𑀲𑀦𑀫𑀕𑁆𑀕𑀨𑀮𑁂. 𑀯𑀸𑀬𑀸𑀫𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀼𑀲𑁆𑀲𑀸𑀳𑀦𑁂𑀦. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀦𑀦𑁆𑀢𑀭𑀁. 𑀧𑀞𑀫𑀁 𑀤𑀲𑁆𑀲𑀦𑀫𑀕𑁆𑀕𑀨𑀮𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀧𑀭𑀺𑀳𑀻𑀦𑁄 𑀧𑀼𑀦 𑀯𑀸𑀬𑀫𑀦𑁆𑀢𑁄 𑀢𑀤𑀦𑀦𑁆𑀢𑀭𑀁 𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀓𑀸 𑀏𑀢𑁆𑀣 𑀬𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀯𑀸𑀤𑀻 𑀦𑀸𑀫 𑀬𑀼𑀢𑁆𑀢𑀫𑁆𑀧𑀺 𑀯𑀤𑀢𑀺 𑀅𑀬𑀼𑀢𑁆𑀢𑀫𑁆𑀧𑀻𑀢𑀺 𑀓𑀺𑀁 𑀢𑀲𑁆𑀲 𑀯𑀸𑀤𑁂 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀬𑀸𑀢𑀺 𑀧𑀦 𑀤𑀝𑁆𑀞𑀩𑁆𑀩𑀁. 𑀅𑀧𑀭𑀺𑀳𑀸𑀦𑀲𑀪𑀸𑀯𑁄 𑀪𑀸𑀯𑀦𑀸𑀫𑀕𑁆𑀕𑁄 𑀅𑀭𑀺𑀬𑀫𑀕𑁆𑀕𑀢𑁆𑀢𑀸 𑀤𑀲𑁆𑀲𑀦𑀸𑀤𑀲𑁆𑀲𑀦𑀫𑀕𑁆𑀕𑁄 𑀯𑀺𑀬. 𑀦 𑀘𑁂𑀢𑁆𑀣 𑀅𑀲𑀺𑀤𑁆𑀥𑀢𑀸𑀲𑀗𑁆𑀓𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀧𑀭𑀲𑁆𑀲𑀧𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀲𑁆𑀲 𑀲𑀺𑀤𑁆𑀥𑀢𑁆𑀢𑀸, 𑀦𑀸𑀧𑀺 𑀮𑁄𑀓𑀺𑀬𑀫𑀕𑁆𑀕𑁂𑀦 𑀅𑀦𑁂𑀓𑀦𑁆𑀢𑀺𑀓𑀢𑀸 𑀅𑀭𑀺𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑀣𑀸 𑀦 𑀯𑀺𑀭𑀼𑀤𑁆𑀥𑀢𑀸 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀦𑀁 𑀪𑀸𑀯𑀦𑀸𑀫𑀕𑁆𑀕𑀪𑀸𑀯𑀲𑁆𑀲 𑀑𑀴𑀸𑀭𑀺𑀓𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀤𑀻𑀦𑀜𑁆𑀘 𑀧𑀭𑀲𑁆𑀲𑀧𑀺 𑀆𑀕𑀫𑀢𑁄 𑀲𑀺𑀤𑁆𑀥𑀢𑁆𑀢𑀸.

𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁬𑁫. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 ¶ ‘‘𑀧𑀢𑁆𑀢𑀺, 𑀨𑀼𑀲𑀦𑀸’’𑀢𑀺 𑀘 𑀧𑀘𑁆𑀘𑀓𑁆𑀔𑀢𑁄 𑀅𑀥𑀺𑀕𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀩𑁆𑀩𑀁 𑀯𑀤𑀢𑀻𑀢𑀺 𑀆𑀳 𑀨𑀼𑀲𑀦𑀸𑀭𑀳’’𑀦𑁆𑀢𑀺.

𑁨𑁬𑁭. 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑁂 𑀫𑀸𑀲𑁂 𑀉𑀢𑀼𑀫𑁆𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀯𑀸 𑀅𑀜𑁆𑀜𑀁 𑀆𑀭𑀸𑀥𑁂𑀲𑁆𑀲𑀸𑀫𑀻𑀢𑀺 𑀓𑀢𑀦𑀺𑀘𑁆𑀙𑀬𑀲𑁆𑀲.

𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁬𑁯. 𑀳𑁂𑀝𑁆𑀞𑀸𑀧𑀻𑀢𑀺 ¶ ¶ 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂𑀳𑀺 𑀳𑁂𑀝𑁆𑀞𑀸𑀧𑀺. 𑀫𑀕𑁆𑀕𑀪𑀸𑀯𑀦𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀇𑀫𑀺𑀦𑀸 ‘‘𑀤𑁆𑀯𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸 𑀦𑀢𑁆𑀣𑀺 𑀤𑁂𑀯𑁂𑀲𑀽𑀢𑀺 𑀉𑀧𑀮𑀤𑁆𑀥𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁨𑁭𑁦. 𑀢𑀲𑁆𑀲𑁂𑀯𑀸𑀢𑀺 𑀧𑀭𑀯𑀸𑀤𑀺𑀦𑁄 𑀏𑀯. 𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 ‘‘𑀕𑀺𑀳𑀻𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦’’𑀦𑁆𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀦𑁄. 𑀧𑀝𑀺𑀓𑁆𑀔𑁂𑀧𑁄 𑀦 𑀬𑀼𑀢𑁆𑀢𑁄𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀸 𑀦 𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀧𑀦 𑀓𑀢𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀑𑀓𑀸𑀲𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀦𑀸𑀬𑀁 𑀤𑁄𑀲𑁄. 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀬𑀁 ‘‘𑀕𑀺𑀳𑀻𑀦𑀜𑁆𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀢𑀲𑁆𑀲 𑀧𑀭𑀯𑀸𑀤𑀺𑀦𑁄 𑀬𑀤𑀺 𑀅𑀥𑀺𑀧𑁆𑀧𑀸𑀬𑁄, 𑀏𑀯𑀁 𑀲𑀜𑁆𑀜𑀸𑀬 𑀧𑀭𑀯𑀸𑀤𑀺𑀦𑁄 𑀲𑀓𑀯𑀸𑀤𑀺𑀦𑀸 𑀲𑀫𑀸𑀦𑀸𑀤𑀸𑀬𑁄𑀢𑀺 𑀦 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸. 𑀢𑁂𑀦𑀸𑀳 ‘‘𑀲𑀓…𑀧𑁂… 𑀢𑀩𑁆𑀩𑁄’’𑀢𑀺. 𑀧𑀞𑀫𑀁 𑀧𑀦 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀦𑀺𑀕𑁆𑀕𑀳𑁂𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 ‘‘𑀬𑀢𑁆𑀣 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸, 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀧𑀼𑀘𑁆𑀙𑀸𑀬 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀁 𑀲𑀦𑁆𑀥𑀸𑀬 𑀧𑀭𑀯𑀸𑀤𑀺𑀦𑁄 𑀧𑀝𑀺𑀓𑁆𑀔𑁂𑀧𑁄. 𑀬𑀤𑀺𑀧𑀺 𑀲𑁄 𑀤𑁂𑀯𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀁 𑀦 𑀇𑀘𑁆𑀙𑀢𑀺, 𑀲𑀫𑁆𑀪𑀯𑀦𑁆𑀢𑀁 𑀧𑀦 𑀲𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘𑀕𑀺𑀳𑀻𑀦’𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 ‘𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 ‘‘𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀬𑀼𑀢𑁆𑀢𑁄.

𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁭𑁩. 𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦𑀸𑀢𑀺 ¶ 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀦. 𑀢𑀜𑁆𑀳𑀺 𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 ‘‘𑀭𑀽𑀧𑀼𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁦). 𑀇𑀤𑀦𑁆𑀢𑀺 𑀇𑀤𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁. ‘‘𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑀳𑁂𑀢𑀼𑀪𑀽𑀢𑁄 𑀭𑀽𑀧𑀸𑀯𑀘𑀭𑀫𑀕𑁆𑀕𑁄’’𑀢𑀺𑀆𑀤𑀺𑀓𑀁 𑀤𑀻𑀧𑁂𑀦𑁆𑀢𑀁 𑀯𑀘𑀦𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀢𑀩𑁆𑀪𑀸𑀯𑀤𑀻𑀧𑀓𑁂𑀦 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄’’𑀢𑀺𑀆𑀤𑀺𑀓𑁂𑀦 𑀓𑀣𑀁 𑀲𑀫𑁂𑀢𑀻𑀢𑀺 𑀘𑁄𑀤𑁂𑀢𑁆𑀯𑀸 𑀬𑀣𑀸 𑀲𑀫𑁂𑀢𑀺 ¶ , 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀼𑀩𑁆𑀩𑁂’’𑀢𑀺 𑀇𑀫𑀺𑀦𑀸 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄’’𑀢𑀺𑀆𑀤𑀺𑀓𑀁 𑀯𑀤𑀦𑁆𑀢𑀺, 𑀇𑀥𑀸𑀧𑀺 𑀧𑀦 ‘‘𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦𑀸’’𑀢𑀺𑀆𑀤𑀺𑀓𑀁. 𑀢𑀢𑁆𑀣 𑀅𑀦𑀸𑀕𑀸𑀫𑀻 𑀏𑀯𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀝𑁆𑀞𑁄 𑀏𑀯. 𑀛𑀸𑀦𑀸𑀦𑀸𑀕𑀸𑀫𑀻𑀢𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄𑀧𑀺 𑀭𑀽𑀧𑀪𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀤𑁆𑀯𑀺𑀦𑁆𑀦𑀁 𑀅𑀝𑁆𑀞𑀓𑀣𑀸𑀯𑀘𑀦𑀸𑀦𑀁 𑀅𑀯𑀺𑀭𑁄𑀥𑀤𑀻𑀧𑀓𑁄 𑀅𑀥𑀺𑀧𑁆𑀧𑀸𑀬𑁄.

𑀇𑀥𑀸𑀢𑀺 𑀓𑀸𑀫𑀮𑁄𑀓𑁂. 𑀢𑀢𑁆𑀣𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂. 𑀏𑀢𑁆𑀣 𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀻’’𑀢𑀺 𑀲𑀼𑀢𑁆𑀢𑀁 𑀓𑀺𑀁 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑀁, 𑀉𑀤𑀸𑀳𑀼 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑁆𑀢𑀺? 𑀢𑀢𑁆𑀣 𑀚𑀸𑀦𑀫𑀸𑀦𑁄 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑁆𑀢𑀺 𑀯𑀤𑁂𑀬𑁆𑀬. 𑀅𑀜𑁆𑀜𑀣𑀸 ‘‘𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸 ‘‘𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀳𑀺 𑀢𑀲𑁆𑀲 ‘‘𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑀤𑁂𑀯𑀸 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸𑀢𑀺 𑀢𑁂𑀲𑀁 𑀕𑀳𑀡𑀁, 𑀦 𑀢𑁂𑀬𑁂𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀼𑀢𑁆𑀢𑀧𑀤𑀲𑁆𑀲 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀏𑀢𑁆𑀣𑀸𑀧𑀺 𑀅𑀦𑀯𑀚𑁆𑀚𑀲𑀼𑀔𑀅𑀩𑁆𑀬𑀸𑀲𑁂𑀓𑀲𑀼𑀔𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀫𑀳𑀸𑀦𑀺𑀲𑀁𑀲𑀢𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀤𑁂𑀯𑀸𑀦𑀜𑁆𑀘 𑀅𑀦𑁄𑀓𑀸𑀲𑀪𑀸𑀯𑀢𑁄 𑀤𑀼𑀓𑁆𑀓𑀭𑀸 𑀤𑀼𑀮𑁆𑀮𑀪𑀸 𑀘. 𑀢𑀢𑁆𑀣 𑀲𑀽𑀭𑀺𑀬𑀧𑀭𑀺𑀯𑀢𑁆𑀢𑀸𑀤𑀻𑀳𑀺𑀧𑀺 𑀤𑁂𑀯𑁂𑀲𑀼 𑀫𑀕𑁆𑀕𑀧𑀝𑀺𑀮𑀸𑀪𑀸𑀬 𑀅𑀢𑁆𑀣𑀺𑀢𑀸 𑀯𑀺𑀪𑀸𑀯𑁂𑀢𑀩𑁆𑀩𑀸, 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀯𑀺𑀲𑁂𑀲𑀸𑀦𑀥𑀺𑀕𑀫𑀪𑀸𑀯𑁄 𑀉𑀪𑀺𑀦𑁆𑀦𑀫𑁆𑀧𑀺 𑀇𑀘𑁆𑀙𑀺𑀢𑁄 𑀏𑀯𑀸𑀢𑀺.

𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀑𑀥𑀺𑀲𑁄𑀢𑀺 ¶ 𑀪𑀸𑀕𑀲𑁄, 𑀪𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀸𑀕𑁄 𑀦𑀸𑀫 𑀬𑀲𑁆𑀫𑀸 𑀏𑀓𑀤𑁂𑀲𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑀤𑁂𑀲𑁂𑀦 𑀏𑀓𑀤𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀘𑀢𑀼𑀪𑀸𑀕𑁂𑀳𑀺 𑀧𑀳𑀸𑀦𑀁 ‘‘𑀑𑀥𑀺𑀲𑁄 𑀧𑀳𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀇𑀘𑁆𑀙𑀺𑀢𑀫𑁂𑀯𑁂𑀢𑀁 𑀲𑀓𑀯𑀸𑀤𑀺𑀲𑁆𑀲 ‘‘𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺 ¶ 𑀘 𑀆𑀤𑀺𑀯𑀘𑀦𑀢𑁄. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀓𑀺𑀘𑁆𑀘𑀓𑀭𑁄, 𑀦 𑀏𑀓𑀸𑀪𑀺𑀲𑀫𑀬𑀯𑀲𑁂𑀦𑀸𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺, 𑀢𑀲𑁆𑀫𑀸 𑀬𑀣𑀸 ‘‘𑀫𑀕𑁆𑀕𑁄 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀸𑀮𑁂𑀦 𑀲𑀫𑀼𑀤𑀬𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀦𑀸𑀦𑀓𑁆𑀔𑀡𑀯𑀲𑁂𑀦 𑀲𑀘𑁆𑀘𑁂𑀲𑀼 𑀧𑀯𑀢𑁆𑀢𑀢𑀻𑀢𑀺 𑀇𑀘𑁆𑀙𑀺𑀢𑁄, 𑀏𑀯𑀁 𑀧𑀘𑁆𑀘𑁂𑀓𑀫𑁆𑀧𑀺 𑀦𑀸𑀦𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑁂𑀬𑁆𑀬. 𑀢𑀣𑀸 𑀲𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀏𑀓𑀤𑁂𑀲𑀏𑀓𑀤𑁂𑀲𑀫𑁂𑀯 𑀧𑀭𑀺𑀚𑀸𑀦𑀸𑀢𑀺 𑀧𑀚𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀏𑀓𑀤𑁂𑀲𑁂 𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺 𑀳𑀺 𑀦𑀸𑀦𑀸𑀪𑀺𑀲𑀫𑀬𑁂 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀲𑀁𑀬𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀤𑀼𑀓𑁆𑀔𑀤𑀲𑁆𑀲𑀦𑀸𑀤𑀻𑀳𑀺 𑀏𑀓𑀤𑁂𑀲𑀏𑀓𑀤𑁂𑀲𑀧𑁆𑀧𑀳𑀸𑀦𑀁 𑀲𑀺𑀬𑀸𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀤𑀺𑀢𑀸, 𑀢𑀢𑁄 𑀏𑀯 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀸𑀤𑀺𑀢𑀸 𑀘 𑀆𑀧𑀚𑁆𑀚𑀢𑀺 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁, 𑀦 𑀘 𑀢𑀁 𑀬𑀼𑀢𑁆𑀢𑀁. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀯𑀺𑀦𑀸 𑀲𑁄 𑀏𑀯 𑀲𑁄𑀢𑀸𑀧𑀦𑁆𑀦𑁄, 𑀅𑀲𑁄𑀢𑀸𑀧𑀦𑁆𑀦𑁄 𑀘𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺.

𑀅𑀧𑀺𑀘𑀸𑀬𑀁 𑀦𑀸𑀦𑀸𑀪𑀺𑀲𑀫𑀬𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀫𑀕𑁆𑀕𑀜𑀸𑀡𑀁 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀓𑀺𑀁 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀉𑀤𑀸𑀳𑀼 𑀓𑀺𑀘𑁆𑀘𑀢𑁄’’𑀢𑀺. 𑀬𑀤𑀺 𑀆𑀭𑀫𑁆𑀫𑀡𑀢𑁄𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀯𑀺𑀬 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀅𑀘𑁆𑀘𑀦𑁆𑀢𑀧𑀭𑀺𑀘𑁆𑀙𑁂𑀤𑀲𑀫𑀼𑀘𑁆𑀙𑁂𑀤𑀸 𑀦 𑀬𑀼𑀢𑁆𑀢𑀸 𑀢𑀢𑁄 𑀅𑀦𑀺𑀲𑁆𑀲𑀝𑀢𑁆𑀢𑀸, 𑀢𑀣𑀸 𑀫𑀕𑁆𑀕𑀤𑀲𑁆𑀲𑀦𑀁. 𑀦 𑀳𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀁, 𑀫𑀕𑁆𑀕𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸𑀬𑀁 𑀅𑀦𑀯𑀝𑁆𑀞𑀸𑀦𑀁 𑀆𑀧𑀚𑁆𑀚𑀢𑀻𑀢𑀺, 𑀢𑀲𑁆𑀫𑀸 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀓𑀺𑀘𑁆𑀘𑀢𑁄, 𑀦𑀺𑀭𑁄𑀥𑀁 𑀓𑀺𑀘𑁆𑀘𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀏𑀯𑀫𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀦𑀢𑁆𑀣𑁂𑀯 𑀦𑀸𑀦𑀸𑀪𑀺𑀲𑀫𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺. 𑀦 𑀘𑁂𑀢𑀁 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀦𑁄 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀪𑀸𑀯𑀯𑀺𑀘𑀸𑀭𑀡𑀸𑀬𑀁 𑀢𑀤𑀢𑁆𑀣𑀲𑀸𑀥𑀦𑀢𑁆𑀣𑀁 𑀆𑀬𑀲𑁆𑀫𑀢𑀸 𑀕𑀯𑀁𑀧𑀢𑀺𑀢𑁆𑀣𑁂𑀭𑁂𑀦 𑀆𑀪𑀢𑀢𑁆𑀢𑀸 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑀢𑁆𑀢𑀬𑀤𑀲𑁆𑀲𑀦𑀲𑁆𑀲 𑀬𑁄𑀚𑀺𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀼𑀦 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀦𑁂 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀦𑀫𑀬𑁄𑀚𑀦𑀻𑀬𑀁 ¶ 𑀲𑀺𑀬𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀮𑁄𑀓𑀺𑀬𑀫𑀕𑁆𑀕𑁄 𑀯𑀺𑀬 𑀓𑀢𑀓𑀸𑀭𑀺𑀪𑀸𑀯𑁂𑀦 𑀧𑀯𑀢𑁆𑀢𑀢𑀺 𑀲𑀫𑀼𑀘𑁆𑀙𑁂𑀤𑀓𑀢𑁆𑀢𑀸. 𑀢𑀣𑀸 𑀬𑁄𑀚𑀦𑁂 𑀘 𑀲𑀩𑁆𑀩𑀁 𑀤𑀲𑁆𑀲𑀦𑀁 ¶ 𑀤𑀲𑁆𑀲𑀦𑀦𑁆𑀢𑀭𑀧𑀭𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀧𑀭𑀫𑁄 𑀲𑀺𑀬𑀸. 𑀏𑀯𑀁 𑀆𑀕𑀫𑀢𑁄 𑀬𑀼𑀢𑁆𑀢𑀺𑀢𑁄 𑀘 𑀦𑀸𑀦𑀸𑀪𑀺𑀲𑀫𑀬𑀲𑁆𑀲 𑀅𑀲𑀫𑁆𑀪𑀯𑀢𑁄 𑀧𑀘𑁆𑀘𑁂𑀓𑀁 𑀫𑀕𑁆𑀕𑀸𑀦𑀁 𑀑𑀥𑀺𑀲𑁄 𑀧𑀳𑀸𑀦𑀁 𑀦𑀢𑁆𑀣𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀬𑀤𑀺𑀧𑀺 𑀧𑀸𑀴𑀺𑀬𑀁 ‘‘𑀢𑀬𑁄 𑀫𑀕𑁆𑀕𑁂 𑀪𑀸𑀯𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀫𑀕𑁆𑀕𑀪𑀸𑀯𑀦𑀸 𑀧𑀦 𑀬𑀸𑀯𑀤𑁂𑀯 𑀓𑀺𑀮𑁂𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀢𑀺 𑀜𑀢𑁆𑀯𑀸 ‘‘𑀓𑀺𑀘𑁆𑀘𑀲𑀩𑁆𑀪𑀸𑀯𑀦𑁆𑀢𑀺 𑀢𑀻𑀳𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀻𑀦𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀢𑀻𑀳𑀻𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀧𑀳𑀸𑀢𑀩𑁆𑀩𑀲𑁆𑀲 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀲𑁆𑀲 𑀧𑀳𑀻𑀦𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀓𑀺𑀘𑁆𑀘𑀦𑁆𑀢𑀺 𑀅𑀥𑁄𑀪𑀸𑀕𑀺𑀬𑀲𑀁𑀬𑁄𑀚𑀦𑁂𑀲𑀼 𑀫𑀕𑁆𑀕𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑀓𑀺𑀘𑁆𑀘𑀁. 𑀢𑁂𑀦𑁂𑀯 𑀫𑀕𑁆𑀕𑁂𑀦𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯. 𑀏𑀢𑀁 𑀦 𑀲𑀫𑁂𑀢𑀻𑀢𑀺 𑀏𑀯𑀁 𑀫𑀕𑁆𑀕𑀼𑀧𑁆𑀧𑀸𑀤𑀢𑁄 𑀧𑀕𑁂𑀯 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀳𑀻𑀬𑀦𑁆𑀢𑀻𑀢𑀺 𑀮𑀤𑁆𑀥𑀺𑀓𑀺𑀢𑁆𑀢𑀦𑀁 𑀇𑀫𑀺𑀦𑀸 𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀲𑀩𑁆𑀪𑀸𑀯𑀓𑀣𑀦𑁂𑀦 𑀦 𑀲𑀫𑁂𑀢𑀺 𑀦 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀯𑀺𑀭𑁄𑀥𑀁 𑀧𑀘𑁆𑀘𑀸𑀫𑀲𑀢𑀺. 𑀧𑀳𑀻𑀦𑀸𑀦𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁. 𑀬𑁄 𑀳𑀺 𑀛𑀸𑀦𑀮𑀸𑀪𑀻 𑀛𑀸𑀦𑁂𑀦 𑀬𑀣𑀸𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀤𑀲𑁆𑀲𑀦𑀫𑀕𑁆𑀕𑁂…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁨𑁮𑁨. 𑀲𑀩𑁆𑀩𑀁 ¶ 𑀅𑀢𑁆𑀣𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀺 𑀥𑀭𑀫𑀸𑀦𑀲𑀪𑀸𑀯𑀦𑁆𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺, 𑀢𑀲𑁆𑀫𑀸 𑀲𑀩𑁆𑀩𑀦𑁆𑀢𑀺 𑀓𑀸𑀮𑀯𑀺𑀪𑀸𑀕𑀢𑁄 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁. 𑀲𑁄 𑀧𑀦 ‘‘𑀬𑀫𑁆𑀧𑀺 𑀦𑀢𑁆𑀣𑀺, 𑀢𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀓𑀸𑀮𑀯𑀺𑀫𑀼𑀢𑁆𑀢𑀲𑁆𑀲 𑀯𑀲𑁂𑀦 𑀅𑀦𑀼𑀬𑁄𑀕𑁄, 𑀢𑀁 𑀅𑀢𑀺𑀧𑁆𑀧𑀲𑀗𑁆𑀕𑀤𑀲𑁆𑀲𑀦𑀯𑀲𑁂𑀦 𑀧𑀭𑀯𑀸𑀤𑀺𑀧𑀝𑀺𑀜𑁆𑀜𑀸𑀬 𑀤𑁄𑀲𑀸𑀭𑁄𑀧𑀦𑀁. 𑀦𑀬𑀤𑀲𑁆𑀲𑀦𑀁 𑀯𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑀲𑁆𑀲. 𑀅𑀢𑁆𑀣𑀻𑀢𑀺 ¶ 𑀧𑀦 𑀅𑀬𑀁 𑀅𑀢𑁆𑀣𑀺𑀪𑀸𑀯𑁄 𑀬𑀲𑁆𑀫𑀸 𑀤𑁂𑀲𑀓𑀸𑀮𑀸𑀓𑀸𑀭𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀢𑀸𑀯 𑀢𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀦𑀼𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀢𑁆𑀣 𑀲𑀩𑁆𑀩𑀫𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀧𑀯𑀢𑁆𑀢𑀸. 𑀢𑀢𑁆𑀣 𑀬𑀤𑀺𑀧𑀺 𑀲𑀩𑁆𑀩𑀢𑁆𑀣𑀸𑀢𑀺 𑀇𑀤𑀁 𑀲𑀸𑀫𑀜𑁆𑀜𑀯𑀘𑀦𑀁, 𑀢𑀁 𑀧𑀦 𑀬𑀲𑁆𑀫𑀸 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀁 𑀳𑁄𑀢𑀺, 𑀧𑀭𑀢𑁄 𑀘 𑀲𑀩𑁆𑀩𑁂𑀲𑀽𑀢𑀺 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀑𑀴𑀸𑀭𑀺𑀓𑀲𑁆𑀲 𑀧𑀸𑀓𑀝𑀲𑁆𑀲 𑀭𑀽𑀧𑀥𑀫𑁆𑀫𑀲𑀫𑀼𑀤𑀸𑀬𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂’’𑀢𑀺 𑀯𑀼𑀢𑁆𑀢𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀘 𑀓𑀸𑀡𑀸𑀤𑀓𑀸𑀧𑀺𑀮𑁂𑀳𑀺 𑀧𑀝𑀺𑀜𑁆𑀜𑀸𑀬𑀫𑀸𑀦𑀸 𑀆𑀓𑀸𑀲𑀓𑀸𑀮𑀸𑀤𑀺𑀲𑀢𑁆𑀢𑀧𑀓𑀢𑀺𑀧𑀼𑀭𑀺𑀲𑀸 𑀯𑀺𑀬 𑀧𑀭𑀯𑀸𑀤𑀺𑀦𑀸 𑀧𑀝𑀺𑀜𑁆𑀜𑀸𑀬𑀫𑀸𑀦𑀁 𑀲𑀩𑁆𑀩𑀁 𑀲𑀩𑁆𑀩𑀩𑁆𑀬𑀸𑀧𑀻𑀢𑀺 𑀆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. ‘‘𑀲𑀩𑁆𑀩𑀢𑁆𑀣 𑀲𑀭𑀻𑀭𑁂’’𑀢𑀺 𑀘 ‘‘𑀢𑀺𑀮𑁂 𑀢𑁂𑀮’’𑀦𑁆𑀢𑀺 𑀯𑀺𑀬 𑀩𑁆𑀬𑀸𑀧𑀦𑁂 𑀪𑀼𑀫𑁆𑀫𑀦𑁆𑀢𑀺 𑀲𑀭𑀻𑀭𑀧𑀭𑀺𑀬𑀸𑀧𑀦𑁆𑀦𑁂𑀦 𑀲𑀩𑁆𑀩𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀺𑀭𑀲𑀺 𑀧𑀸𑀤𑀸…𑀧𑁂… 𑀅𑀢𑁆𑀣𑁄’’𑀢𑀺.

𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀫𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂𑀬𑁂𑀯𑀲𑁆𑀲 𑀅𑀜𑁆𑀜𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸 ‘‘𑀬𑀁 𑀅𑀢𑁆𑀣𑀺, 𑀅𑀢𑁆𑀣𑁂𑀯 𑀢𑀁, 𑀬𑀁 𑀦𑀢𑁆𑀣𑀺, 𑀦𑀢𑁆𑀣𑁂𑀯 𑀢𑀁, 𑀅𑀲𑀢𑁄 𑀦𑀢𑁆𑀣𑀺 𑀲𑀫𑁆𑀪𑀯𑁄, 𑀲𑀢𑁄 𑀦𑀢𑁆𑀣𑀺 𑀯𑀺𑀦𑀸𑀲𑁄’’𑀢𑀺. 𑀏𑀯𑀁 𑀲𑀩𑁆𑀩𑁂𑀦𑀸𑀓𑀸𑀭𑁂𑀦 𑀲𑀩𑁆𑀩𑀁 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀳𑀺 𑀧𑀦 𑀧𑀓𑁆𑀔𑁂𑀳𑀺 ‘‘𑀲𑀩𑁆𑀩𑀁 𑀲𑀩𑁆𑀩𑀲𑀪𑀸𑀯𑀁, 𑀅𑀦𑁂𑀓𑀲𑀢𑁆𑀢𑀺𑀦𑀺𑀘𑀺𑀢𑀸𑀪𑀸𑀯𑀸 𑀅𑀲𑀢𑁄 𑀦𑀢𑁆𑀣𑀺 𑀲𑀫𑁆𑀪𑀯𑁄’’𑀢𑀺 𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀬𑁄𑀕𑀭𑀳𑀺𑀢𑀦𑁆𑀢𑀺 𑀓𑁂𑀦𑀘𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀮𑀓𑁆𑀔𑀡𑀲𑀁𑀬𑁄𑀕𑀭𑀳𑀺𑀢𑀁. 𑀢𑀁 𑀧𑀦 𑀏𑀓𑀲𑀪𑀸𑀯𑀦𑁆𑀢𑀺 𑀲𑀁𑀬𑁄𑀕𑀭𑀳𑀺𑀢𑀁 𑀦𑀸𑀫 𑀅𑀢𑁆𑀣𑀢𑁄 𑀏𑀓𑀲𑀪𑀸𑀯𑀁, 𑀏𑀓𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀤𑁂𑀯𑀯𑀸𑀤𑀻𑀦𑀁 𑀩𑁆𑀭𑀳𑁆𑀫𑀤𑀲𑁆𑀲𑀦𑀁 𑀅𑀢𑁆𑀣𑁂𑀯𑀸𑀢𑀺𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀻𑀢𑀺 𑀬𑀤𑀺 𑀲𑀩𑁆𑀩𑀫𑀢𑁆𑀣𑀻𑀢𑀺 𑀢𑀯 𑀯𑀸𑀤𑁄, 𑀬𑀣𑀸𑀯𑀼𑀢𑁆𑀢𑀸𑀬 𑀫𑀫 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑁄 𑀅𑀢𑁆𑀣𑀻𑀢𑀺 𑀏𑀓𑀦𑁆𑀢𑁂𑀦 𑀢𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀓𑀺𑀁 𑀲𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀮𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑁨𑁮𑁫. 𑀅𑀢𑀻𑀢𑀸 ¶ …𑀧𑁂… 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀢𑀻𑀢𑀁 𑀅𑀦𑀸𑀕𑀢𑀦𑁆𑀢𑀺 𑀭𑀽𑀧𑀲𑁆𑀲 𑀇𑀫𑀁 𑀯𑀺𑀲𑁂𑀲𑀁, 𑀏𑀯𑀁 𑀯𑀺𑀲𑁂𑀲𑀁 𑀯𑀸 𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀭𑀽𑀧𑀫𑁂𑀯 𑀅𑀧𑁆𑀧𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀪𑀸𑀯𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀏𑀢𑀲𑁆𑀫𑀺𑀁𑀬𑁂𑀯 ¶ 𑀯𑀺𑀲𑀬𑁂 𑀅𑀧𑁆𑀧𑁂𑀢𑀩𑁆𑀩𑀁, 𑀯𑀘𑀻𑀕𑁄𑀘𑀭𑀁 𑀧𑀸𑀧𑁂𑀢𑀩𑁆𑀩𑀁 𑀲𑀢𑀺𑀧𑀺 𑀦𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁂 𑀯𑀺𑀪𑀸𑀕𑁂 𑀢𑀣𑀸𑀧𑀺 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀢𑁆𑀯𑀸𑀢𑀺. 𑀬𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀭𑀽𑀧𑀦𑁆𑀢𑀺 𑀯𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀲𑀤𑁆𑀤𑁂𑀳𑀺 𑀢𑀤𑀢𑁆𑀣𑀲𑁆𑀲 𑀯𑀢𑁆𑀢𑀩𑁆𑀩𑀸𑀓𑀸𑀭𑁄 𑀇𑀢𑀺𑀲𑀤𑁆𑀤𑁂𑀳𑀺 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀦…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀭𑀽𑀧𑀧𑀜𑁆𑀜𑀢𑁆𑀢𑀻𑀢𑀺 𑀭𑀽𑀧𑀸𑀬𑀢𑀦𑀧𑀜𑁆𑀜𑀢𑁆𑀢𑀺. 𑀲𑀸 𑀳𑀺 𑀲𑀪𑀸𑀯𑀥𑀫𑁆𑀫𑀼𑀧𑀸𑀤𑀸𑀦𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀭𑀽𑀧𑀲𑀫𑀽𑀳𑀁 𑀉𑀧𑀸𑀤𑀸𑀬𑀸𑀢𑀺 𑀢𑀁𑀢𑀁𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀸𑀦𑀁 𑀅𑀪𑀸𑀯𑀯𑀺𑀪𑀸𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀽𑀳𑀁 𑀉𑀧𑀸𑀤𑀸𑀬. 𑀉𑀧𑀸𑀤𑀸𑀦𑀼𑀧𑀸𑀤𑀸𑀦𑀫𑁆𑀧𑀺 𑀳𑀺 𑀉𑀧𑀸𑀤𑀸𑀦𑀫𑁂𑀯𑀸𑀢𑀺. 𑀢𑀲𑁆𑀫𑀸𑀢𑀺 𑀲𑀫𑀽𑀳𑀼𑀧𑀸𑀤𑀸𑀬𑀸𑀥𑀻𑀦𑀢𑀸𑀬 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀢𑁄. 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸𑀢𑀺 𑀯𑀺𑀕𑀫𑀲𑁆𑀲 𑀯𑀢𑁆𑀣𑀪𑀸𑀯𑀸𑀧𑀕𑀫𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸. 𑀦 𑀳𑀺 𑀑𑀤𑀸𑀢𑀢𑀸𑀯𑀺𑀕𑀫𑁂𑀦 𑀅𑀯𑀢𑁆𑀣𑀁 𑀳𑁄𑀢𑀺. 𑀦 𑀧𑀦 𑀬𑀼𑀢𑁆𑀢𑀸 𑀭𑀽𑀧𑀪𑀸𑀯𑀲𑁆𑀲 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸𑀢𑀺 𑀬𑁄𑀚𑀦𑀸. 𑀭𑀽𑀧𑀪𑀸𑀯𑁄𑀢𑀺 𑀘 𑀭𑀽𑀧𑀸𑀬𑀢𑀦𑀲𑀪𑀸𑀯𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄. 𑀦 𑀳𑀺 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀯𑀺𑀕𑀫𑁂 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸 𑀬𑀼𑀢𑁆𑀢𑀸.

𑀓𑀸𑀮𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁨𑁮𑁮. 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄 𑀬𑀣𑀸 ‘‘𑀔𑀤𑀺𑀭𑁂 𑀯𑀸 𑀩𑀦𑁆𑀥𑀺𑀢𑀩𑁆𑀩𑀁 𑀧𑀮𑀸𑀲𑁂 𑀯𑀸’’𑀢𑀺. 𑀢𑀲𑁆𑀫𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀳𑁄𑀢𑀺-𑀲𑀤𑁆𑀤𑁄 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀥𑀸𑀦𑀁 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀁 𑀮𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀕𑀢𑀁…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀸𑀬𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀮𑀪𑀦𑁆𑀢𑀁. 𑀢𑁂𑀦𑀸𑀳 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦𑀸’’𑀢𑀺. 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀬𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀺𑀬𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀢𑀤𑀧𑀺 𑀧𑀼𑀦 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀩𑁆𑀪𑀸𑀯𑀸𑀯𑀺𑀕𑀫𑀢𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀢𑁄 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀕𑀫𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀅𑀪𑀸𑀯𑀢𑁄.

𑀯𑀘𑀦𑀁 ¶ ¶ 𑀅𑀭𑀳𑀢𑀻𑀢𑀺 𑀇𑀫𑀺𑀦𑀸 𑀯𑀘𑀦𑀫𑀢𑁆𑀢𑁂 𑀦 𑀓𑁄𑀘𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺𑀧𑀺 𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀦𑀢𑁆𑀣𑀺, 𑀧𑀼𑀦𑀧𑁆𑀧𑀼𑀦𑀁 𑀜𑀸𑀧𑁂𑀢𑀩𑁆𑀩𑀢𑀸𑀬 𑀧𑀦 𑀤𑀼𑀢𑀺𑀬𑀁 𑀢𑀢𑁄 𑀧𑀭𑀫𑁆𑀧𑀺 𑀢𑀣𑀸 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺. 𑀥𑀫𑁆𑀫𑁂𑀢𑀺 𑀲𑀪𑀸𑀯𑀥𑀫𑁆𑀫𑁂. 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀥𑀫𑁆𑀫𑁂 𑀅𑀪𑀸𑀯𑀥𑀫𑁆𑀫𑁂. 𑀢𑁂𑀦𑀸𑀳 ‘‘𑀲𑀲𑀯𑀺𑀲𑀸𑀡𑁂’’𑀢𑀺.

𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀺, 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀬𑀤𑁂𑀢𑀁 𑀢𑀬𑀸 ‘‘𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀯𑀤𑀢𑀸 ‘‘𑀢𑀁𑀬𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀮𑀤𑁆𑀥𑀺𑀯𑀲𑁂𑀦 ‘‘𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀬𑁄 𑀧𑀭𑀯𑀸𑀤𑀺𑀦𑀸 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀅𑀪𑀸𑀯𑀢𑁄 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦. 𑀲𑁆𑀯𑀸𑀬𑀁 𑀬𑀤𑁂𑀯 𑀭𑀽𑀧𑀸𑀤𑀺 𑀅𑀦𑀸𑀕𑀢𑀁, 𑀢𑀤𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀢𑀺𑀧𑀺 𑀅𑀢𑁆𑀣𑀸𑀪𑁂𑀤𑁂 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀦 𑀅𑀢𑁆𑀣𑁂𑀯 𑀓𑀸𑀮𑀪𑁂𑀤𑁄𑀢𑀺 𑀢𑀁𑀓𑀸𑀮𑀪𑁂𑀤𑀯𑀺𑀭𑁄𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 𑀓𑀸𑀮𑀦𑀸𑀦𑀢𑁆𑀢𑁂𑀦𑀸’’𑀢𑀺. 𑀢𑁂𑀦 𑀳𑀺 𑀲𑁄 𑀅𑀬𑀜𑁆𑀘 𑀧𑀝𑀺𑀓𑁆𑀔𑁂𑀧𑁄 𑀦𑀻𑀢𑁄 𑀧𑀯𑀢𑁆𑀢𑀺𑀢𑁄𑀢𑀺. 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑀸𑀢𑀺 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀓𑁆𑀔𑁂𑀧𑀸𑀦𑀦𑁆𑀢𑀭𑀁 𑀬𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀲𑀦𑁆𑀥𑀸𑀬𑀸𑀳. 𑀬𑀣𑀸 𑀳𑀺 𑀲𑀸 𑀧𑀝𑀺𑀜𑁆𑀜𑀸 𑀅𑀢𑁆𑀣𑀸𑀪𑁂𑀤𑁂𑀦 𑀦𑀻𑀢𑀸 𑀧𑀯𑀢𑁆𑀢𑀺𑀢𑀸, 𑀢𑀣𑀸𑀬𑀫𑁆𑀧𑀺. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦𑀸’’𑀢𑀺, 𑀅𑀦𑀸𑀕𑀢𑀸𑀤𑀺𑀧𑁆𑀧𑀪𑁂𑀤𑀸𑀬 𑀓𑀸𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑁂𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀉𑀧𑀸𑀤𑀸𑀦𑀪𑀽𑀢𑀭𑀽𑀧𑀸𑀤𑀺𑀅𑀢𑁆𑀣𑀸𑀪𑁂𑀤𑁂𑀧𑀺 𑀢𑁂𑀲𑀁 𑀔𑀡𑀢𑁆𑀢𑀬𑀸𑀦𑀸𑀯𑀢𑁆𑀢𑀺 𑀢𑀁𑀲𑀫𑀗𑁆𑀕𑀺𑀢𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀸𑀯𑀢𑁆𑀢𑀺𑀢𑀸, 𑀢𑀣𑀸 𑀢𑀢𑁆𑀣 𑀯𑀼𑀘𑁆𑀘𑀫𑀸𑀦𑀸 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀲𑀼 𑀧𑀯𑀢𑁆𑀢𑀺𑀢𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀺𑀭𑀺𑀬𑀸𑀢𑀺 𑀓𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑀁…𑀧𑁂… 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀢𑁆𑀣𑀸𑀦𑀸𑀦𑀢𑁆𑀢𑀫𑁂𑀯 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯 𑀅𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀬𑀣𑀸 𑀧𑀦 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀚𑀻𑀯𑁄𑀯 𑀲𑀭𑀻𑀭𑀁, 𑀲𑀭𑀻𑀭𑀫𑁂𑀯 𑀚𑀻𑀯𑁄𑀢𑀺 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀁 ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀘 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀆𑀧𑀦𑁆𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑁂𑀲𑀼 𑀯𑀼𑀢𑁆𑀢𑀸 𑀳𑁄𑀢𑀺𑀪𑀸𑀯𑀳𑀼𑀢𑁆𑀯𑀸𑀪𑀸𑀯𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀢𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫𑀸’’𑀢𑀺.

𑀅𑀦𑀼𑀜𑁆𑀜𑀸𑀢𑀧𑀜𑁆𑀳𑀲𑁆𑀲𑀸𑀢𑀺 ¶ ‘‘𑀢𑀜𑁆𑀜𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀅𑀢𑁆𑀣𑀸𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀅𑀦𑀼𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀧𑀜𑁆𑀳𑁄. 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀧𑀼𑀦 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀤𑁄𑀲𑁄 𑀯𑀼𑀢𑁆𑀢𑁄 𑀧𑀼𑀭𑀺𑀫𑀦𑀬𑁂 ¶ . 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀦𑁆𑀢𑀺 ‘‘𑀢𑀁𑀬𑁂𑀯 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀏𑀯𑀁 𑀓𑀸𑀮𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁. 𑀢𑁂𑀦𑀸𑀢𑀺 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀳𑁄𑀢𑀺𑀳𑀼𑀢𑁆𑀯𑀸𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦. 𑀘𑁄𑀤𑁂𑀢𑀻𑀢𑀺 𑀅𑀦𑀸𑀕𑀢𑀁 𑀢𑁂𑀦 𑀳𑁄𑀢𑀺 𑀦𑀸𑀫, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑁂𑀦 𑀳𑀼𑀢𑁆𑀯𑀸 𑀦𑀸𑀫, 𑀉𑀪𑀬𑀫𑁆𑀧𑀺 𑀅𑀦𑀜𑁆𑀜𑀢𑁆𑀢𑀸 𑀉𑀪𑀬𑀲𑀪𑀸𑀯𑀦𑁆𑀢𑀺 𑀘𑁄𑀤𑁂𑀢𑀺. 𑀏𑀢𑁆𑀣𑀸𑀢𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂 𑀓𑀣𑀁 𑀳𑁄𑀢𑀺 𑀤𑁄𑀲𑁄𑀢𑀺 𑀘𑁄𑀤𑁂𑀢𑀻𑀢𑀺. ‘‘𑀢𑀲𑁆𑀲𑁂𑀯𑀸’’𑀢𑀺 𑀧𑀭𑀺𑀳𑀭𑀢𑀺. 𑀓𑀣𑀁 𑀓𑀢𑁆𑀯𑀸 𑀘𑁄𑀤𑀦𑀸, 𑀓𑀣𑀜𑁆𑀘 𑀓𑀢𑁆𑀯𑀸 𑀧𑀭𑀺𑀳𑀸𑀭𑁄? 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀸𑀦𑀁 𑀪𑀺𑀦𑁆𑀦𑀯𑀺𑀲𑀬𑀢𑀸𑀬 𑀘𑁄𑀤𑀦𑀸, 𑀅𑀢𑁆𑀣𑀸𑀪𑁂𑀤𑀓𑀸𑀮𑀪𑁂𑀤𑀯𑀺𑀲𑀬𑀢𑁆𑀢𑀸 𑀅𑀪𑀺𑀦𑁆𑀦𑀸𑀥𑀸𑀭𑀢𑀸𑀬 𑀢𑁂𑀲𑀁 𑀧𑀭𑀺𑀳𑀸𑀭𑁄. 𑀢𑀲𑁆𑀲𑁂𑀯𑀸𑀢𑀺 𑀳𑀺 𑀧𑀭𑀯𑀸𑀤𑀺𑀦𑁄 𑀏𑀯𑀸𑀢𑀺 𑀅𑀢𑁆𑀣𑁄.

𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀢𑀁 𑀅𑀦𑀸𑀕𑀢𑀁 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀉𑀪𑀬𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸. 𑀏𑀓𑁂𑀓𑀦𑁆𑀢𑀺 𑀢𑁂𑀲𑀼 𑀏𑀓𑁂𑀓𑀁. 𑀏𑀓𑁂𑀓𑀫𑁂𑀯𑀸𑀢𑀺 𑀉𑀪𑀬𑀁 𑀏𑀓𑀚𑁆𑀛𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑁂𑀓𑀫𑁂𑀯 𑀯𑀺𑀲𑀼𑀁 𑀯𑀺𑀲𑀼𑀁 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀢𑀣𑀸 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄𑀢𑀺 𑀅𑀢𑀺𑀤𑁂𑀲𑀁 𑀓𑀢𑁆𑀯𑀸 𑀲𑀁𑀔𑀺𑀢𑁆𑀢𑀢𑁆𑀢𑀸 𑀢𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑁆𑀢𑀺 ‘‘𑀅𑀦𑀸𑀕𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀧𑀝𑀺𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀬𑀣𑀸𑀓𑁆𑀓𑀫𑀁 𑀳𑁄𑀢𑀺𑀳𑀼𑀢𑁆𑀯𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀤𑁂𑀢𑀁 𑀢𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄 𑀧𑀼𑀭𑀺𑀫𑀦𑀬𑁄, 𑀢𑀢𑁆𑀣 𑀳𑀺 ‘‘𑀬𑀤𑀺 𑀢𑁂 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀘𑁄𑀤𑀺𑀢𑁄. ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀓𑁄 𑀤𑀼𑀢𑀺𑀬𑀦𑀬𑁄. 𑀢𑀢𑁆𑀣 𑀳𑀺 ‘‘𑀅𑀦𑀸𑀕𑀢𑀲𑁆𑀲…𑀧𑁂… 𑀳𑀼𑀢𑁆𑀯𑀸𑀳𑁄𑀢𑀺𑀬𑁂𑀯 𑀦𑀸𑀫𑀸’’𑀢𑀺 𑀅𑀦𑀸𑀕𑀢𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀦𑀸𑀫𑀢𑀸 𑀘𑁄𑀤𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀓𑀣𑀁 ¶ 𑀯𑀼𑀘𑁆𑀘𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀳𑀺 𑀇𑀫𑀺𑀦𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 ‘‘𑀅𑀢𑀻𑀢𑀁 𑀜𑀸𑀡’’𑀦𑁆𑀢𑀺 𑀇𑀤𑀁 𑀧𑀘𑁆𑀘𑀸𑀫𑀝𑁆𑀞𑀁, 𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀅𑀢𑀻𑀢𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀅𑀢𑀻𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀦 𑀧𑀼𑀝𑁆𑀞𑁄 𑀅𑀢𑀻𑀢𑀸𑀭𑀫𑁆𑀫𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡’’𑀦𑁆𑀢𑀺𑀆𑀤𑀺.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁧. ‘‘𑀅𑀭𑀳𑀁 ¶ 𑀔𑀻𑀡𑀸𑀲𑀯𑁄’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀯𑀺𑀭𑁄𑀥𑁄 𑀧𑀸𑀓𑀝𑁄𑀢𑀺 𑀇𑀤𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀼𑀢𑁆𑀢𑀺𑀯𑀺𑀭𑁄𑀥𑁄…𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳. 𑀢𑀢𑁆𑀣 𑀅𑀦𑀸𑀦𑀢𑁆𑀢𑀦𑁆𑀢𑀺 𑀅𑀯𑀺𑀲𑁂𑀲𑁄. 𑀏𑀯𑀫𑀸𑀤𑀺𑀓𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀢𑀓𑀺𑀘𑁆𑀘𑀢𑀸𑀪𑀸𑀯𑁄 𑀅𑀦𑁄𑀳𑀺𑀢𑀪𑀸𑀭𑀢𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀭𑀳𑀦𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀬𑁄 𑀅𑀢𑀻𑀢𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄, 𑀲𑁄 𑀅𑀢𑁆𑀣𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄𑀢𑀺 𑀤𑁆𑀯𑁂𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀣𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀅𑀢𑁆𑀣𑀺𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸’’𑀢𑀺, 𑀦, 𑀅𑀢𑀻𑀢𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑁆𑀲𑁂𑀯 𑀅𑀢𑁆𑀣𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀢𑁆𑀣𑀺𑀲𑀤𑁆𑀤𑀢𑁆𑀣𑀲𑁆𑀲 𑀘 𑀦𑁆𑀯𑀸𑀢𑀻𑀢𑀪𑀸𑀯𑀢𑁄’’𑀢𑀺. 𑀢𑁂𑀦 𑀓𑀺𑀁 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀅𑀢𑀻𑀢𑀁 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀜𑁆𑀘 𑀅𑀢𑀻𑀢𑀁 𑀳𑁄𑀢𑀻’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀢𑀯 𑀫𑀢𑁂𑀦 𑀅𑀢𑀻𑀢𑀁 𑀅𑀢𑁆𑀣𑀺, 𑀅𑀢𑁆𑀣𑀺 𑀘 𑀦𑁆𑀯𑀸𑀢𑀻𑀢𑀦𑁆𑀢𑀺 𑀅𑀢𑀻𑀢𑀜𑁆𑀘 𑀦𑁄 𑀅𑀢𑀻𑀢𑀁 𑀲𑀺𑀬𑀸, 𑀢𑀣𑀸 𑀅𑀢𑁆𑀣𑀺 𑀦𑁄 𑀅𑀢𑀻𑀢𑀁 𑀅𑀢𑀻𑀢𑀜𑁆𑀘 𑀦𑁄 𑀅𑀢𑀻𑀢𑀁 𑀅𑀢𑀻𑀢𑀁 𑀲𑀺𑀬𑀸𑀢𑀺, 𑀬𑀣𑀸 ‘‘𑀅𑀢𑀻𑀢𑀁 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀅𑀢𑀻𑀢𑀫𑁂𑀯 𑀅𑀢𑁆𑀣𑀻𑀢𑀺 𑀦𑀸𑀬𑀁 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄 𑀅𑀦𑀢𑀻𑀢𑀲𑁆𑀲𑀧𑀺 𑀅𑀢𑁆𑀣𑀺𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑀺 𑀲𑀺𑀬𑀸 𑀅𑀢𑀻𑀢𑀁, 𑀲𑀺𑀬𑀸 𑀦𑁆𑀯𑀸𑀢𑀻𑀢’’𑀦𑁆𑀢𑀺. 𑀬𑁂𑀦 𑀳𑀺 𑀆𑀓𑀸𑀭𑁂𑀦 𑀅𑀢𑀻𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀧𑀭𑀯𑀸𑀤𑀺𑀦𑀸 𑀇𑀘𑁆𑀙𑀺𑀢𑁄, 𑀢𑁂𑀦𑀸𑀓𑀸𑀭𑁂𑀦 𑀅𑀦𑀢𑀻𑀢𑀲𑁆𑀲 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀲𑁄 𑀇𑀘𑁆𑀙𑀺𑀢𑁄. 𑀓𑁂𑀦 𑀧𑀦 𑀆𑀓𑀸𑀭𑁂𑀦 𑀇𑀘𑁆𑀙𑀺𑀢𑁄𑀢𑀺 ¶ ? 𑀲𑀗𑁆𑀔𑀢𑀸𑀓𑀸𑀭𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦𑀸𑀢𑀻𑀢𑀁 𑀦𑁆𑀯𑀸𑀢𑀻𑀢𑀁, 𑀦𑁆𑀯𑀸𑀢𑀻𑀢𑀁 𑀅𑀢𑀻𑀢’’𑀦𑁆𑀢𑀺. 𑀢𑀲𑁆𑀫𑀸 𑀅𑀢𑀻𑀢𑀁 𑀅𑀢𑁆𑀣𑀺𑀬𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀣𑀺𑀪𑀸𑀯𑁂 𑀳𑀺 𑀅𑀢𑀻𑀢𑀁 𑀦𑀺𑀬𑀫𑀺𑀢𑀁, 𑀦 𑀅𑀢𑀻𑀢𑁂 𑀅𑀢𑁆𑀣𑀺𑀪𑀸𑀯𑁄 𑀦𑀺𑀬𑀫𑀺𑀢𑁄, ‘‘𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀲𑀫𑁆𑀪𑀯𑀢𑀻𑀢𑀺 𑀲𑁄 𑀏𑀯 𑀕𑀳𑁂𑀢𑀩𑁆𑀩𑁄. 𑀬𑀤𑀺𑀧𑀺 𑀳𑀺 𑀦𑀺𑀩𑁆𑀩𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀁 𑀉𑀧𑀸𑀤𑀸𑀬 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀮𑀩𑁆𑀪𑀢𑀺 𑀢𑀤𑀜𑁆𑀜𑀲𑁆𑀲𑀧𑀺 𑀅𑀪𑀸𑀯𑀢𑁄, 𑀢𑀣𑀸𑀧𑀺 𑀅𑀲𑀗𑁆𑀔𑀢𑀸𑀓𑀸𑀭𑁂𑀦 𑀅𑀜𑁆𑀜𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀢𑀣𑀸 𑀦𑀺𑀩𑁆𑀩𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑁂 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 ‘‘𑀅𑀢𑁆𑀣𑀺 𑀲𑀺𑀬𑀸 𑀦𑀺𑀩𑁆𑀩𑀸𑀦𑀁, 𑀲𑀺𑀬𑀸 𑀦𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸. 𑀅𑀢𑀻𑀢𑀸𑀤𑀻𑀲𑀼 𑀧𑀦 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀁 𑀧𑀭𑀯𑀸𑀤𑀺𑀦𑀸 𑀦 𑀕𑀳𑀺𑀢𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀅𑀢𑀺𑀧𑁆𑀧𑀲𑀗𑁆𑀕𑁄. 𑀅𑀕𑁆𑀕𑀳𑀡𑀜𑁆𑀘𑀲𑁆𑀲 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑁂𑀢𑁆𑀣 ¶ 𑀅𑀢𑀻𑀢𑀸𑀤𑀻𑀦𑀁 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑀲𑁆𑀲 𑀧𑀭𑀯𑀸𑀤𑀺𑀲𑁆𑀲𑁂𑀯𑀸𑀬𑀁 𑀇𑀝𑁆𑀞𑀯𑀺𑀖𑀸𑀢𑀤𑁄𑀲𑀸𑀧𑀢𑁆𑀢𑀺, 𑀦 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑀲𑁆𑀲 𑀲𑀓𑀯𑀸𑀤𑀺𑀲𑁆𑀲𑀸𑀢𑀺. 𑀧𑀝𑀺𑀧𑀸𑀤𑀦𑀸 𑀧𑀢𑀺𑀝𑁆𑀞𑀸𑀧𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣𑀸𑀳 ‘‘𑀅𑀢𑀻𑀢𑀁 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀓𑀺𑀁 𑀧𑀦𑀸𑀬𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀦 𑀧𑀭𑀫𑀢𑁆𑀣𑀢𑁄. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀧𑀭𑀫𑀢𑁆𑀣𑀢𑁄, 𑀲𑀩𑁆𑀩𑀓𑀸𑀮𑀁 𑀅𑀢𑁆𑀣𑀺𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀁 𑀲𑀲𑁆𑀲𑀢𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀬𑀼𑀢𑁆𑀢𑀁 𑀆𑀕𑀫𑀯𑀺𑀭𑁄𑀥𑀢𑁄 𑀬𑀼𑀢𑁆𑀢𑀺𑀯𑀺𑀭𑁄𑀥𑀢𑁄 𑀘. 𑀅𑀣 𑀦 𑀧𑀭𑀫𑀢𑁆𑀣𑀢𑁄, ‘‘𑀲𑀩𑁆𑀩𑀫𑀢𑁆𑀣𑀻’’𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀸, 𑀦 𑀦𑀺𑀭𑀢𑁆𑀣𑀺𑀓𑀸. 𑀲𑁄 𑀳𑀺 𑀧𑀭𑀯𑀸𑀤𑀻 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀫𑁆𑀧𑀺 𑀔𑀦𑁆𑀥𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀲𑀢𑀺 𑀘 𑀅𑀢𑀻𑀢𑁂 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀨𑀮𑀁 𑀓𑀣𑀁 𑀪𑀯𑁂𑀬𑁆𑀬, 𑀢𑀢𑁆𑀣 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀺 𑀅𑀦𑀸𑀕𑀢𑁂 𑀘 𑀅𑀦𑀸𑀕𑀢𑀁𑀲𑀜𑀸𑀡𑀸𑀤𑀺 𑀓𑀣𑀁 𑀧𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀅𑀢𑁆𑀣𑁂𑀯 𑀧𑀭𑀫𑀢𑁆𑀣𑀢𑁄 𑀅𑀢𑀻𑀢𑀸𑀦𑀸𑀕𑀢𑀦𑁆𑀢𑀺 𑀬𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀅𑀬𑀁 𑀓𑀢𑀸𑀢𑀺. 𑀏𑀓𑀦𑁆𑀢𑁂𑀦 𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀬𑁂𑀧𑀺 ‘‘𑀲𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘, 𑀢𑁂 𑀲𑀩𑁆𑀩𑀢𑁆𑀣𑀺𑀯𑀸𑀤𑀸𑀢𑀺.

𑀘𑀢𑀼𑀩𑁆𑀩𑀺𑀥𑀸 𑀘𑁂𑀢𑁂 𑀢𑁂 𑀲𑀩𑁆𑀩𑀢𑁆𑀣𑀺𑀯𑀸𑀤𑀸. 𑀢𑀢𑁆𑀣 𑀓𑁂𑀘𑀺 𑀪𑀸𑀯𑀜𑁆𑀜𑀢𑁆𑀢𑀺𑀓𑀸. 𑀢𑁂 𑀳𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀪𑀸𑀚𑀦𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀣𑀸 𑀓𑀭𑀺𑀬𑀫𑀸𑀦𑀲𑁆𑀲 𑀲𑀡𑁆𑀞𑀸𑀦𑀲𑁆𑀲𑁂𑀯 𑀅𑀜𑁆𑀜𑀣𑀢𑁆𑀢𑀁, 𑀦 𑀯𑀡𑁆𑀡𑀸𑀤𑀻𑀦𑀁, 𑀬𑀣𑀸 𑀘 𑀔𑀻𑀭𑀁 𑀤𑀥𑀺𑀪𑀸𑀯𑁂𑀦 𑀧𑀭𑀺𑀡𑀫𑀦𑁆𑀢𑀁 𑀭𑀲𑀯𑀻𑀭𑀺𑀬𑀯𑀺𑀧𑀸𑀓𑁂 𑀧𑀭𑀺𑀘𑁆𑀘𑀚𑀢𑀺, 𑀦 𑀯𑀡𑁆𑀡𑀁, 𑀏𑀯𑀁 𑀥𑀫𑁆𑀫𑀸𑀧𑀺 𑀅𑀦𑀸𑀕𑀢𑀤𑁆𑀥𑀼𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀁 𑀲𑀗𑁆𑀓𑀫𑀦𑁆𑀢𑀸 𑀅𑀦𑀸𑀕𑀢𑀪𑀸𑀯𑀫𑁂𑀯 𑀚𑀳𑀦𑁆𑀢𑀺, 𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁. 𑀢𑀣𑀸 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀼𑀦𑁄 𑀅𑀢𑀻𑀢𑀤𑁆𑀥𑀁 𑀲𑀗𑁆𑀓𑀫𑁂’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀮𑀓𑁆𑀔𑀡𑀜𑁆𑀜𑀢𑁆𑀢𑀺𑀓𑀸, 𑀢𑁂 𑀧𑀦 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀅𑀢𑀻𑀢𑁄 𑀅𑀢𑀻𑀢𑀮𑀓𑁆𑀔𑀡𑀬𑀼𑀢𑁆𑀢𑁄, 𑀇𑀢𑀭𑀮𑀓𑁆𑀔𑀡𑁂𑀳𑀺 𑀅𑀬𑀼𑀢𑁆𑀢𑁄. 𑀢𑀣𑀸 𑀅𑀦𑀸𑀕𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘. 𑀬𑀣𑀸 𑀧𑀼𑀭𑀺𑀲𑁄 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀭𑀢𑁆𑀢𑁄 𑀅𑀜𑁆𑀜𑀸𑀲𑀼 𑀅𑀭𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀅𑀯𑀢𑁆𑀣𑀜𑁆𑀜𑀢𑁆𑀢𑀺𑀓𑀸, 𑀢𑁂 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀢𑀁 𑀢𑀁 𑀅𑀯𑀢𑁆𑀣𑀁 𑀧𑀢𑁆𑀯𑀸 𑀅𑀜𑁆𑀜𑁄 𑀅𑀜𑁆𑀜𑀁 𑀦𑀺𑀤𑁆𑀤𑀺𑀲𑀻𑀬𑀢𑀺 𑀅𑀯𑀢𑁆𑀣𑀦𑁆𑀢𑀭𑀢𑁄, 𑀦 𑀲𑀪𑀸𑀯𑀢𑁄. 𑀬𑀣𑀸 𑀏𑀓𑀁 𑀅𑀓𑁆𑀔𑀁 𑀏𑀓𑀗𑁆𑀕𑁂 𑀦𑀺𑀓𑁆𑀔𑀺𑀢𑁆𑀢𑀁 𑀏𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀢𑀗𑁆𑀕𑁂 𑀲𑀢𑀦𑁆𑀢𑀺, 𑀲𑀳𑀲𑁆𑀲𑀗𑁆𑀕𑁂 𑀲𑀳𑀲𑁆𑀲𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤’’𑀦𑁆𑀢𑀺. 𑀅𑀧𑀭𑁂 𑀅𑀜𑁆𑀜𑀣𑀜𑁆𑀜𑀢𑁆𑀢𑀺𑀓𑀸, 𑀢𑁂 𑀧𑀦 ‘‘𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀢𑀁 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀜𑁆𑀜𑀲𑀪𑀸𑀯𑁂𑀦 𑀯𑀼𑀘𑁆𑀘𑀢𑀺. 𑀬𑀣𑀸 𑀢𑀁 𑀏𑀓𑀸 𑀇𑀢𑁆𑀣𑀻 𑀫𑀸𑀢𑀸𑀢𑀺 𑀘 𑀯𑀼𑀘𑁆𑀘𑀢𑀺 𑀥𑀻𑀢𑀸’’𑀢𑀺 𑀘. 𑀏𑀯𑀫𑁂𑀢𑁂 𑀘𑀢𑁆𑀢𑀸𑀭𑁄 𑀲𑀩𑁆𑀩𑀢𑁆𑀣𑀺𑀯𑀸𑀤𑀸.

𑀢𑁂𑀲𑀼 𑀧𑀞𑀫𑁄 𑀧𑀭𑀺𑀡𑀸𑀫𑀯𑀸𑀤𑀺𑀢𑀸𑀬 𑀓𑀸𑀧𑀺𑀮𑀧𑀓𑁆𑀔𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺. 𑀤𑀼𑀢𑀺𑀬𑀲𑁆𑀲𑀧𑀺 𑀓𑀸𑀮𑀲𑀗𑁆𑀓𑀭𑁄 𑀆𑀧𑀚𑁆𑀚𑀢𑀺 𑀲𑀩𑁆𑀩𑀲𑁆𑀲 𑀲𑀩𑁆𑀩𑀮𑀓𑁆𑀔𑀡𑀬𑁄𑀕𑀢𑁄. 𑀘𑀢𑀼𑀢𑁆𑀣𑀲𑁆𑀲𑀧𑀺 𑀲𑀗𑁆𑀓𑀭𑁄𑀯. 𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 ¶ 𑀧𑀯𑀢𑁆𑀢𑀺𑀓𑁆𑀔𑀡𑁂 𑀢𑀬𑁄𑀧𑀺 𑀓𑀸𑀮𑀸 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑁆𑀔𑀡𑀸 𑀳𑀺 𑀅𑀢𑀻𑀢𑀸𑀦𑀸𑀕𑀢𑀸, 𑀫𑀚𑁆𑀛𑀺𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺. 𑀢𑀢𑀺𑀬𑀲𑁆𑀲 𑀧𑀦 𑀅𑀯𑀢𑁆𑀣𑀜𑁆𑀜𑀢𑁆𑀢𑀺𑀓𑀲𑁆𑀲 𑀦𑀢𑁆𑀣𑀺 𑀲𑀗𑁆𑀓𑀭𑁄 𑀥𑀫𑁆𑀫𑀓𑀺𑀘𑁆𑀘𑁂𑀦 𑀓𑀸𑀮𑀯𑀯𑀢𑁆𑀣𑀸𑀦𑀢𑁄. 𑀥𑀫𑁆𑀫𑁄 𑀳𑀺 𑀲𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄, 𑀧𑀘𑁆𑀙𑀸 𑀅𑀢𑀻𑀢𑁄𑀢𑀺.

𑀢𑀢𑁆𑀣 𑀬𑀤𑀺 𑀅𑀢𑀻𑀢𑀫𑁆𑀧𑀺 𑀥𑀭𑀫𑀸𑀦𑀲𑀪𑀸𑀯𑀢𑀸𑀬 𑀅𑀢𑁆𑀣𑀺 𑀅𑀦𑀸𑀕𑀢𑀫𑁆𑀧𑀺, 𑀓𑀲𑁆𑀫𑀸 𑀢𑀁 𑀅𑀢𑀻𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀦𑁆𑀢𑀺 𑀯𑀸, 𑀦𑀦𑀼 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀓𑀺𑀘𑁆𑀘𑁂𑀦 𑀓𑀸𑀮𑀯𑀯𑀢𑁆𑀣𑀸𑀦𑀢𑁄’’𑀢𑀺. 𑀬𑀤𑀺 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑀓𑁆𑀔𑀼𑀲𑁆𑀲 𑀓𑀺𑀁 𑀓𑀺𑀘𑁆𑀘𑀁, 𑀅𑀦𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀨𑀮𑀼𑀧𑁆𑀧𑀸𑀤𑀦𑀁. 𑀏𑀯𑀁 𑀲𑀢𑀺 𑀅𑀦𑀸𑀕𑀢𑀲𑁆𑀲𑀧𑀺 𑀘𑀲𑁆𑀲 𑀢𑁂𑀦 𑀪𑀯𑀺𑀢𑀩𑁆𑀩𑀁 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀮𑀓𑁆𑀔𑀡𑀲𑀗𑁆𑀓𑀭𑁄 𑀲𑀺𑀬𑀸. 𑀇𑀤𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑀢𑁄 𑀥𑀫𑁆𑀫𑀲𑁆𑀲 𑀓𑀺𑀘𑁆𑀘𑀁, 𑀓𑀺𑀘𑁆𑀘𑀓𑀭𑀡𑁂 𑀓𑁄 𑀯𑀺𑀩𑀦𑁆𑀥𑁄, 𑀬𑁂𑀦 𑀓𑀤𑀸𑀘𑀺 𑀓𑀭𑁄𑀢𑀺 𑀓𑀤𑀸𑀘𑀺 𑀦 𑀓𑀭𑁄𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑀪𑀸𑀯𑀢𑁄, 𑀓𑀺𑀘𑁆𑀘𑀲𑁆𑀲 𑀲𑀫𑀯𑀸𑀬𑀸𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀦𑀺𑀘𑁆𑀘𑀁 𑀅𑀢𑁆𑀣𑀺𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀢𑁄 𑀏𑀯 𑀘 𑀅𑀤𑁆𑀥𑀼𑀦𑀁 𑀅𑀯𑀯𑀢𑁆𑀣𑀸𑀦𑀁. 𑀥𑀫𑁆𑀫𑁄 𑀳𑀺 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑁄 𑀓𑀲𑁆𑀫𑀸 𑀓𑀤𑀸𑀘𑀺 𑀅𑀢𑀻𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀤𑀸𑀘𑀺 𑀅𑀦𑀸𑀕𑀢𑁄𑀢𑀺 𑀓𑀸𑀮𑀲𑁆𑀲 𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑁄 𑀳𑀺 𑀥𑀫𑁆𑀫𑁄 𑀅𑀚𑀸𑀢𑁄, 𑀲𑁄 𑀅𑀦𑀸𑀕𑀢𑁄. 𑀬𑁄 𑀚𑀸𑀢𑁄 𑀦 𑀘 𑀦𑀺𑀭𑀼𑀤𑁆𑀥𑁄, 𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀦𑀺𑀭𑀼𑀤𑁆𑀥𑁄, 𑀲𑁄 𑀅𑀢𑀻𑀢𑁄. 𑀇𑀤𑀫𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀬𑀣𑀸 𑀯𑀢𑁆𑀢𑀫𑀸𑀦𑀁 𑀅𑀢𑁆𑀣𑀺 ¶ , 𑀢𑀣𑀸 𑀅𑀢𑀻𑀢𑀁 𑀅𑀦𑀸𑀕𑀢𑀜𑁆𑀘 𑀅𑀢𑁆𑀣𑀺, 𑀢𑀲𑁆𑀲 𑀢𑀣𑀸 𑀲𑀢𑁄 𑀅𑀚𑀸𑀢𑀢𑀸 𑀦𑀺𑀭𑀼𑀤𑁆𑀥𑀢𑀸 𑀘 𑀓𑁂𑀦 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀳𑀺 𑀲𑀪𑀸𑀯𑁂𑀦 𑀲𑀢𑁄 𑀥𑀫𑁆𑀫𑀲𑁆𑀲 𑀓𑀣𑀫𑀺𑀤𑀁 𑀲𑀺𑀚𑁆𑀛𑀢𑀺 𑀅𑀚𑀸𑀢𑁄𑀢𑀺 𑀯𑀸 𑀦𑀺𑀭𑀼𑀤𑁆𑀥𑁄𑀢𑀺 𑀯𑀸. 𑀓𑀺𑀁 𑀢𑀲𑁆𑀲 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺, 𑀬𑀲𑁆𑀲 𑀅𑀪𑀸𑀯𑀢𑁄 𑀅𑀚𑀸𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀜𑁆𑀘 𑀧𑀘𑁆𑀙𑀸 𑀦𑀢𑁆𑀣𑀺, 𑀬𑀲𑁆𑀲 𑀅𑀪𑀸𑀯𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 𑀅𑀤𑁆𑀥𑀢𑁆𑀢𑀬𑀁 𑀦 𑀲𑀺𑀚𑁆𑀛𑀢𑀺, 𑀬𑀤𑀺 𑀅𑀳𑀼𑀢𑁆𑀯𑀸 𑀲𑀗𑁆𑀕𑀢𑀺 𑀳𑀼𑀢𑁆𑀯𑀸 𑀘 𑀯𑀺𑀦𑀲𑁆𑀲𑀢𑀻𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀢𑀮𑀓𑁆𑀔𑀡𑀬𑁄𑀕𑀢𑁄 𑀦 𑀲𑀲𑁆𑀲𑀢𑀪𑀸𑀯𑀧𑁆𑀧𑀲𑀗𑁆𑀕𑁄’’𑀢𑀺, 𑀢𑀬𑀺𑀤𑀁 𑀓𑁂𑀯𑀮𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀁 𑀉𑀤𑀬𑀯𑀬𑀸𑀲𑀫𑁆𑀪𑀯𑀢𑁄, 𑀅𑀢𑁆𑀣𑀺 𑀘 𑀦𑀸𑀫 𑀲𑀩𑁆𑀩𑀤𑀸 𑀲𑁄 𑀥𑀫𑁆𑀫𑁄, 𑀦 𑀘 𑀦𑀺𑀘𑁆𑀘𑁄𑀢𑀺 𑀓𑀼𑀢𑁄𑀬𑀁 𑀯𑀸𑀘𑀸𑀬𑀼𑀢𑁆𑀢𑀺.

𑀲𑀪𑀸𑀯𑁄 𑀲𑀩𑁆𑀩𑀤𑀸 𑀅𑀢𑁆𑀣𑀺, 𑀦𑀺𑀘𑁆𑀘𑁄 𑀥𑀫𑁆𑀫𑁄 𑀦 𑀯𑀼𑀘𑁆𑀘𑀢𑀺;

𑀥𑀫𑁆𑀫𑁄 𑀲𑀪𑀸𑀯𑀢𑁄 𑀦𑀸𑀜𑁆𑀜𑁄, 𑀅𑀳𑁄 𑀥𑀫𑁆𑀫𑁂𑀲𑀼 𑀓𑁄𑀲𑀮𑀁.

𑀬𑀜𑁆𑀘 ¶ 𑀯𑀼𑀢𑁆𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀔𑀦𑁆𑀥𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑁂𑀯𑀸𑀢𑀺, 𑀯𑀤𑀸𑀫. 𑀅𑀢𑀻𑀢𑀁 𑀪𑀽𑀢𑀧𑀼𑀩𑁆𑀩𑀁, 𑀅𑀦𑀸𑀕𑀢𑀁 𑀬𑀁 𑀲𑀢𑀺 𑀧𑀘𑁆𑀘𑀬𑁂 𑀪𑀯𑀺𑀲𑁆𑀲𑀢𑀺, 𑀢𑀤𑀼𑀪𑀬𑀲𑁆𑀲𑀧𑀺 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀬𑀣𑀸𑀥𑀫𑁆𑀫𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀅𑀢𑀻𑀢𑀸 𑀥𑀫𑁆𑀫𑀸 𑀅𑀦𑀸𑀕𑀢𑀸 𑀥𑀫𑁆𑀫𑀸𑀢𑀺, 𑀦 𑀥𑀭𑀫𑀸𑀦𑀲𑀪𑀸𑀯𑀢𑀸𑀬. 𑀓𑁄 𑀘 𑀏𑀯𑀫𑀸𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀢𑀁 𑀅𑀢𑁆𑀣𑀻’’𑀢𑀺. 𑀓𑀣𑀁 𑀧𑀦𑁂𑀢𑀁 𑀅𑀢𑁆𑀣𑀻𑀢𑀺? 𑀅𑀢𑀻𑀢𑀸𑀦𑀸𑀕𑀢𑀲𑀪𑀸𑀯𑁂𑀦. 𑀇𑀤𑀁 𑀧𑀦 𑀢𑀯𑁂𑀯 𑀉𑀧𑀝𑁆𑀞𑀺𑀢𑀁, 𑀓𑀣𑀁 𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀜𑁆𑀘 𑀯𑀼𑀘𑁆𑀘𑀢𑀺, 𑀬𑀤𑀺 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀻𑀢𑀺.

𑀬𑀁 𑀧𑀦 ‘‘𑀦 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁, 𑀢𑀁 𑀬𑀲𑁆𑀫𑀺𑀜𑁆𑀘 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀓𑀢𑀽𑀧𑀘𑀺𑀢𑀁, 𑀢𑀢𑁆𑀣 𑀢𑁂𑀦𑀸𑀳𑀺𑀢𑀁 𑀢𑀁𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀢𑀻𑀢𑀲𑁆𑀲 𑀓𑀫𑁆𑀫𑀲𑁆𑀲 𑀥𑀭𑀫𑀸𑀦𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀲𑀢𑀺 𑀲𑀓𑁂𑀦 𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀁 𑀓𑀣𑀁 𑀢𑀁 𑀅𑀢𑀻𑀢𑀁 𑀦𑀸𑀫 𑀲𑀺𑀬𑀸. 𑀇𑀢𑁆𑀣𑀜𑁆𑀘𑁂𑀢𑀁 𑀏𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀬𑀁 𑀲𑀗𑁆𑀔𑀸𑀭𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀢𑀺𑀯𑁂𑀦𑁆𑀢𑀺 𑀢𑁂𑀲𑀁 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀯𑀬𑀢𑁄 𑀘 𑀧𑀘𑁆𑀙𑀸 𑀦 𑀓𑀸𑀘𑀺 𑀞𑀺𑀢𑀺 𑀦𑀸𑀫 𑀅𑀢𑁆𑀣𑀺, 𑀬𑀢𑁄 𑀅𑀢𑀻𑀢𑀸𑀦𑀸𑀕𑀢𑀁 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀉𑀧𑁆𑀧𑀦𑁆𑀦𑀸 𑀬𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸’’𑀢𑀺. (𑀫𑀳𑀸𑀦𑀺. 𑁧𑁦, 𑁩𑁯);

𑀬𑀤𑀺 ¶ 𑀘𑀸𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀲𑀺𑀬𑀸, 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀘𑁂? 𑀦, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑁆𑀢𑀸 𑀓𑀸𑀮𑀲𑁆𑀲. 𑀅𑀣 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀻𑀢𑀺, 𑀲𑀺𑀤𑁆𑀥𑀫𑁂𑀢𑀁 𑀅𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀅𑀲𑀢𑀺 𑀅𑀢𑀻𑀢𑁂 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀨𑀮𑀁 𑀓𑀣𑀁 𑀪𑀯𑁂𑀬𑁆𑀬𑀸’’𑀢𑀺, 𑀦 𑀔𑁄 𑀧𑀦𑁂𑀢𑁆𑀣 𑀅𑀢𑀻𑀢𑀓𑀫𑁆𑀫𑀢𑁄 𑀨𑀮𑀼𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀸, 𑀅𑀣 𑀔𑁄 𑀢𑀲𑁆𑀲 𑀓𑀢𑀢𑁆𑀢𑀸 𑀢𑀤𑀸𑀳𑀺𑀢𑀯𑀺𑀲𑁂𑀲𑀢𑁄 𑀲𑀦𑁆𑀢𑀸𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀥. 𑀲. 𑁪𑁩𑁧). 𑀬𑀲𑁆𑀲 𑀧𑀦 𑀅𑀢𑀻𑀢𑀸𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀨𑀮𑀁 𑀦𑀺𑀘𑁆𑀘𑀫𑁂𑀯 𑀅𑀢𑁆𑀣𑀻𑀢𑀺 𑀓𑀺𑀁 𑀢𑀢𑁆𑀣 𑀓𑀫𑁆𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑀁. 𑀉𑀧𑁆𑀧𑀸𑀤𑀦𑁂 𑀘𑁂, 𑀲𑀺𑀤𑁆𑀥𑀫𑀺𑀤𑀁 𑀅𑀳𑀼𑀢𑁆𑀯𑀸 𑀪𑀯𑀢𑀻𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀲𑀢𑀺 𑀅𑀢𑀻𑀢𑀸𑀦𑀸𑀕𑀢𑁂 𑀓𑀣𑀁 𑀢𑀢𑁆𑀣 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺, 𑀬𑀣𑀸 𑀢𑀁 𑀆𑀮𑀫𑁆𑀩𑀡𑀁, 𑀢𑀁 𑀢𑀣𑀸 𑀅𑀢𑁆𑀣𑀺, 𑀓𑀣𑀜𑁆𑀘 𑀢𑀁 𑀆𑀮𑀫𑁆𑀩𑀡𑀁, 𑀅𑀳𑁄𑀲𑀺 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺. 𑀦 𑀳𑀺 𑀓𑁄𑀘𑀺 𑀅𑀢𑀻𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀢𑁆𑀣𑀻𑀢𑀺 𑀅𑀦𑀼𑀲𑁆𑀲𑀭𑀢𑀺, 𑀅𑀣 𑀔𑁄 𑀅𑀳𑁄𑀲𑀻𑀢𑀺. 𑀬𑀣𑀸 𑀧𑀦 𑀯𑀢𑁆𑀢𑀫𑀸𑀦𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀽𑀢𑀁, 𑀢𑀣𑀸 𑀢𑀁 𑀅𑀢𑀻𑀢𑀁 ¶ 𑀅𑀦𑀼𑀲𑁆𑀲𑀭𑀢𑀺. 𑀬𑀣𑀸 𑀘 𑀯𑀢𑁆𑀢𑀫𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀩𑀼𑀤𑁆𑀥𑀸𑀤𑀻𑀳𑀺 𑀕𑀬𑁆𑀳𑀢𑀺. 𑀬𑀤𑀺 𑀘 𑀢𑀁 𑀢𑀣𑁂𑀯 𑀅𑀢𑁆𑀣𑀺, 𑀯𑀢𑁆𑀢𑀫𑀸𑀦𑀫𑁂𑀯 𑀢𑀁 𑀲𑀺𑀬𑀸. 𑀅𑀣 𑀦𑀢𑁆𑀣𑀺, 𑀲𑀺𑀤𑁆𑀥𑀁 ‘‘𑀅𑀲𑀦𑁆𑀢𑀁 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺. 𑀯𑀺𑀚𑁆𑀚𑀫𑀸𑀦𑀁 𑀯𑀸 𑀳𑀺 𑀘𑀺𑀢𑁆𑀢𑀲𑀜𑁆𑀜𑀸𑀢𑀁 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸, 𑀦 𑀯𑀺𑀚𑁆𑀚𑀫𑀸𑀦𑀁𑀬𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀥𑀭𑀫𑀸𑀦𑀲𑀪𑀸𑀯𑀁 𑀦 𑀅𑀢𑀻𑀢𑀸𑀦𑀸𑀕𑀢𑀦𑁆𑀢𑀺 𑀦 𑀢𑀺𑀝𑁆𑀞𑀢𑀺 𑀲𑀩𑁆𑀩𑀢𑁆𑀣𑀺𑀯𑀸𑀤𑁄. 𑀓𑁂𑀘𑀺 𑀧𑀦 ‘‘𑀦 𑀅𑀢𑀻𑀢𑀸𑀤𑀻𑀦𑀁 𑀅𑀢𑁆𑀣𑀺𑀢𑀸𑀧𑀝𑀺𑀜𑁆𑀜𑀸𑀬 𑀲𑀩𑁆𑀩𑀢𑁆𑀣𑀺𑀯𑀸𑀤𑀸, 𑀅𑀣 𑀔𑁄 𑀆𑀬𑀢𑀦𑀲𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀲𑀩𑁆𑀩𑁂𑀯 𑀲𑀸𑀲𑀦𑀺𑀓𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀲𑀺𑀬𑀼𑀦𑁆𑀢𑀺.

𑀧𑀤𑀲𑁄𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀢𑀻𑀢𑀓𑁆𑀔𑀦𑁆𑀥𑀸𑀤𑀺𑀓𑀣𑀸

𑁧. 𑀦𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁭. ‘‘𑀅𑀢𑀻𑀢𑀁 ¶ 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀅𑀬𑀁 𑀓𑀸𑀮𑀯𑀺𑀪𑀸𑀕𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑁄𑀳𑀸𑀭𑁄 𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄. 𑀥𑀫𑁆𑀫𑁄 𑀳𑀺 𑀲𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄, 𑀧𑀘𑁆𑀙𑀸 𑀅𑀢𑀻𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀢𑁆𑀣 𑀬𑀤𑀺𑀧𑀺 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀬 𑀅𑀦𑀯𑀝𑁆𑀞𑀺𑀢𑀸, 𑀅𑀯𑀢𑁆𑀣𑀸 𑀧𑀦 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸 𑀯𑀯𑀢𑁆𑀣𑀺𑀢𑀸𑀢𑀺 𑀢𑀤𑀼𑀧𑀸𑀤𑀸𑀦𑀸 𑀓𑀸𑀮𑀧𑀜𑁆𑀜𑀢𑁆𑀢𑀺𑀧𑀺 𑀯𑀯𑀢𑁆𑀣𑀺𑀢𑀸 𑀏𑀯. 𑀦 𑀳𑀺 𑀅𑀢𑀻𑀢𑀸𑀤𑀺 𑀅𑀦𑀸𑀕𑀢𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺, 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺 𑀧𑀦 𑀅𑀦𑀧𑁂𑀓𑁆𑀔𑀺𑀢𑀓𑀸𑀮𑀯𑀺𑀲𑁂𑀲𑀸. 𑀢𑀻𑀲𑀼𑀧𑀺 𑀳𑀺 𑀓𑀸𑀮𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁄𑀯, 𑀢𑀣𑀸 𑀲𑁂𑀲𑀸 𑀔𑀦𑁆𑀥𑀸 𑀆𑀬𑀢𑀦𑀥𑀸𑀢𑀼𑀬𑁄 𑀘. 𑀏𑀯𑀫𑀯𑀝𑁆𑀞𑀺𑀢𑁂 𑀬𑀲𑁆𑀫𑀸 𑀧𑀭𑀯𑀸𑀤𑀻 ‘‘𑀅𑀢𑁆𑀣𑀻’’𑀢𑀺 𑀇𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀬𑀢𑀁 𑀯𑁄𑀳𑀸𑀭𑀁 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀺 𑀆𑀭𑁄𑀧𑁂𑀢𑀺, 𑀢𑀲𑁆𑀫𑀸 𑀲𑁄 𑀅𑀤𑁆𑀥𑀲𑀗𑁆𑀓𑀭𑀁 𑀓𑀭𑁄𑀢𑀺. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀯𑀺𑀚𑁆𑀚𑀫𑀸𑀦𑁂 𑀓𑀢𑁆𑀯𑀸 𑀯𑁄𑀳𑀭𑀢𑀻𑀢𑀺 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 ‘‘𑀅𑀢𑀻𑀢𑀁 𑀔𑀦𑁆𑀥𑀸’’𑀢𑀺𑀆𑀤𑀺𑀓𑀸 𑀅𑀬𑀁 𑀓𑀣𑀸 𑀆𑀭𑀤𑁆𑀥𑀸.

𑀬𑀲𑁆𑀫𑀸 𑀧𑀦 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑁂 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀭𑀸𑀲𑀝𑁆𑀞𑀁 𑀉𑀧𑀸𑀤𑀸𑀬 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀓𑀸𑀭𑀡𑀸𑀤𑀺𑀅𑀢𑁆𑀣𑀁 𑀲𑀼𑀜𑁆𑀜𑀢𑀝𑁆𑀞𑀜𑁆𑀘 𑀉𑀧𑀸𑀤𑀸𑀬 𑀆𑀬𑀢𑀦𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀧𑀜𑁆𑀜𑀢𑁆𑀢𑀺 ¶ 𑀘, 𑀢𑀲𑁆𑀫𑀸 𑀲𑀸 𑀅𑀤𑁆𑀥𑀢𑁆𑀢𑀬𑀲𑀸𑀥𑀸𑀭𑀡𑀸, 𑀦 𑀅𑀢𑀻𑀢𑀸𑀤𑀺𑀧𑀜𑁆𑀜𑀢𑁆𑀢𑀺 𑀯𑀺𑀬 𑀅𑀤𑁆𑀥𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀸𑀢𑀺 𑀆𑀳 ‘‘𑀔𑀦𑁆𑀥𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀢𑁄 𑀅𑀢𑀻𑀢𑀸𑀦𑀸𑀕𑀢𑀸𑀦’’𑀦𑁆𑀢𑀺. 𑀢𑁂 𑀧𑀦𑁂𑀢𑁂 𑀅𑀢𑀻𑀢𑀸𑀤𑀺𑀓𑁂 𑀔𑀦𑁆𑀥𑀸𑀤𑀺𑀓𑁂 𑀯𑀺𑀬 𑀲𑀪𑀸𑀯𑀥𑀫𑁆𑀫𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀧𑀭𑀯𑀸𑀤𑀻 ‘‘𑀅𑀢𑁆𑀣𑀻’’𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀦𑀺𑀭𑀼𑀢𑁆𑀢𑀺𑀧𑀣𑀸’’𑀢𑀺 𑀲𑀼𑀢𑁆𑀢𑀁 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀅𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀅𑀢𑀻𑀢𑀸𑀦𑀸𑀕𑀢𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺𑀢𑀸𑀬 𑀯𑀸𑀭𑀺𑀢𑀢𑁆𑀢𑀸’’𑀢𑀺. 𑀬𑀤𑀺 𑀏𑀯𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀢𑀁 𑀲𑀩𑁆𑀩𑀤𑀸 𑀉𑀧𑀮𑀤𑁆𑀥𑀺𑀢𑁄 𑀯𑀼𑀢𑁆𑀢𑀁 𑀦𑀺𑀘𑁆𑀘𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀅𑀲𑀗𑁆𑀔𑀢𑀥𑀫𑁆𑀫𑀲𑁆𑀲, 𑀇𑀥 𑀧𑀦 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀸𑀬 𑀅𑀢𑁆𑀣𑀺𑀪𑀸𑀯𑁄 𑀦 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘𑀸𑀢𑀺 𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁…𑀧𑁂… 𑀦 𑀢𑀲𑁆𑀲 𑀲𑀗𑁆𑀔𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 ‘‘𑀅𑀢𑁆𑀣𑀻’’𑀢𑀺 𑀲𑀫𑀜𑁆𑀜𑀸𑀬 𑀅𑀦𑀼𑀧𑀸𑀤𑀸𑀦𑀢𑁄 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 ¶ 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀫𑀺𑀦𑀸𑀯𑀽𑀧𑀸𑀬𑁂𑀦𑀸𑀢𑀺 ‘‘𑀔𑀦𑁆𑀥𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀳𑁂𑀢𑀼𑀦𑀸. 𑀉𑀧𑀧𑀢𑁆𑀢𑀺𑀲𑀸𑀥𑀦𑀬𑀼𑀢𑁆𑀢𑀺 𑀳𑀺 𑀇𑀥 ‘‘𑀉𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀸.

𑀦𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁮. 𑀏𑀢𑁂 𑀥𑀫𑁆𑀫𑀸𑀢𑀺 𑀏𑀢𑁂 𑀔𑀦𑁆𑀥𑀆𑀬𑀢𑀦𑀥𑀸𑀢𑀼𑀥𑀫𑁆𑀫𑀸. 𑀲𑀼𑀢𑁆𑀢𑀸𑀳𑀭𑀡𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀸𑀳𑀭𑀡𑀁. 𑀦𑁂𑀲𑀦𑁆𑀢𑀺 𑀅𑀢𑀻𑀢𑀸𑀦𑀸𑀕𑀢𑀸𑀦𑀁.

𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀓𑁆𑀔𑀦𑁆𑀥𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸

𑁧. 𑀅𑀢𑀻𑀢𑀸𑀤𑀺𑀏𑀓𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀬𑁂 ¶ 𑀓𑀢𑀽𑀧𑀘𑀺𑀢𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀧𑀸𑀓𑀤𑀸𑀦𑀸𑀬 𑀅𑀓𑀢𑁄𑀓𑀸𑀲𑀸, 𑀓𑀢𑁄𑀓𑀸𑀲𑀸 𑀘 𑀬𑁂 ‘‘𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁂 𑀘 𑀯𑀺𑀧𑁆𑀧𑀓𑀢𑀯𑀺𑀧𑀸𑀓𑀸, 𑀢𑁂 𑀲𑀩𑁆𑀩𑁂𑀧𑀺 ‘‘𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀯𑀺𑀧𑀸𑀓𑀤𑀸𑀦𑀲𑀸𑀫𑀢𑁆𑀣𑀺𑀬𑀁 𑀅𑀦𑀧𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀭𑀯𑀸𑀤𑀻 𑀅𑀢𑁆𑀣𑀺𑀢𑀁 𑀇𑀘𑁆𑀙𑀢𑀺. 𑀬𑁂 𑀧𑀦 𑀧𑀭𑀯𑀸𑀤𑀻 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀅𑀧𑀕𑀢𑀦𑁆𑀢𑀺 𑀦𑀢𑁆𑀣𑀺𑀢𑀁 𑀇𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀣𑀻𑀢𑀺 𑀏𑀓𑀘𑁆𑀘𑀁 𑀅𑀢𑁆𑀣𑀺 𑀏𑀓𑀘𑁆𑀘𑀁 𑀦𑀢𑁆𑀣𑀻’’𑀢𑀺𑀆𑀤𑀺. 𑀏𑀯𑀁 𑀇𑀘𑁆𑀙𑀦𑁆𑀢𑀲𑁆𑀲 𑀧𑀦 𑀧𑀭𑀯𑀸𑀤𑀺𑀦𑁄 𑀬𑀣𑀸 𑀅𑀯𑀺𑀧𑀸𑀓𑁂𑀲𑀼𑀧𑀺 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑁂𑀲𑀼 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑁂𑀲𑀼 𑀘 𑀆𑀧𑀚𑁆𑀚𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀘𑁆𑀘𑁂’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀧𑀯𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀯𑀲𑁂𑀦𑀸’’𑀢𑀺𑀆𑀤𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀨𑀮𑀲𑁆𑀲 𑀅𑀦𑀼𑀧𑀭𑀫𑀯𑁄𑀳𑀸𑀭𑀯𑀲𑁂𑀦, 𑀳𑁂𑀢𑀼𑀓𑀺𑀘𑁆𑀘𑀁 𑀧𑀦 𑀅𑀦𑀼𑀧𑀭𑀢𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀁 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺𑀬𑀁 𑀞𑀺𑀢𑀢𑁆𑀢𑀸 𑀘𑁄𑀤𑁂𑀢𑀩𑁆𑀩𑁄𑀯. 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀜𑁆𑀳𑀺 𑀨𑀮𑀲𑁆𑀲 𑀧𑀩𑀦𑁆𑀥𑀯𑁄𑀳𑀸𑀭𑀁 𑀧𑀭𑀯𑀸𑀤𑀻 𑀯𑁄𑀳𑀸𑀭𑀢𑁄 𑀅𑀢𑁆𑀣𑀻𑀢𑀺 𑀇𑀘𑁆𑀙𑀢𑀺, 𑀳𑁂𑀢𑀼 𑀧𑀦𑀲𑁆𑀲 𑀓𑀫𑁆𑀫𑀁 𑀧𑀭𑀫𑀢𑁆𑀣𑀢𑁄 𑀘 𑀓𑀫𑁆𑀫𑀽𑀧𑀘𑀬𑀯𑀸𑀤𑀺𑀪𑀸𑀯𑀢𑁄 𑀧𑀢𑁆𑀢𑀺𑀅𑀧𑁆𑀧𑀢𑁆𑀢𑀺𑀲𑀪𑀸𑀯𑀢𑀸𑀤𑀬𑁄 ¶ 𑀯𑀺𑀬 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀓𑀫𑁆𑀫𑀽𑀧𑀘𑀬𑁄 𑀦𑀸𑀫 𑀏𑀓𑁄 𑀲𑀗𑁆𑀔𑀸𑀭𑀥𑀫𑁆𑀫𑁄 𑀅𑀯𑀺𑀧𑀦𑁆𑀦𑁄, 𑀲𑁄𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 𑀧𑀭𑀯𑀸𑀤𑀻. 𑀬𑀁 𑀲𑀦𑁆𑀥𑀸𑀬𑀸𑀳 𑁋

‘‘𑀦𑀧𑁆𑀧𑀘𑀬𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀅𑀧𑀺 𑀓𑀧𑁆𑀧𑀲𑀳𑀲𑁆𑀲𑀢𑁄;

𑀧𑀢𑁆𑀯𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁, 𑀓𑀸𑀮𑁂 𑀧𑀘𑁆𑀘𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀬𑀜𑁆𑀘 𑀲𑀦𑁆𑀥𑀸𑀬 𑀧𑀭𑀢𑁄 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀬 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀦 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀓𑁆𑀔𑀢𑀺.

𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁧. 𑀧𑀭𑀫𑀢𑁆𑀣𑀲𑀢𑀺𑀧𑀝𑁆𑀞𑀸𑀦𑀢𑁆𑀢𑀸𑀢𑀺 𑀏𑀢𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀏𑀯 𑀲𑀫𑁆𑀫𑀸𑀲𑀢𑀺𑀬𑀸 𑀢𑀢𑁆𑀣𑀸𑀧𑀺 𑀫𑀕𑁆𑀕𑀪𑀽𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ¶ 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑁄 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀇𑀢𑀭𑀸𑀬 𑀧𑀭𑀺𑀬𑀸𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀨𑀮𑀲𑀫𑁆𑀫𑀸𑀲𑀢𑀺𑀬𑀸 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀪𑀸𑀯𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀢𑀺𑀧𑀝𑁆𑀞𑀸𑀦𑀲𑀫𑀼𑀤𑀸𑀬𑀪𑀽𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀦 𑀲𑀢𑀺𑀕𑁄𑀘𑀭𑀪𑀽𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺𑀕𑁄𑀘𑀭𑀲𑁆𑀲 𑀳𑀺 𑀲𑀢𑀺𑀧𑀝𑁆𑀞𑀸𑀦𑀢𑀁 𑀘𑁄𑀤𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀘𑀓𑁆𑀔𑀸𑀬𑀢𑀦𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀆𑀭𑀤𑁆𑀥𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀪𑁂𑀤𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀲𑀼𑀢𑁆𑀢𑀲𑀸𑀥𑀦𑀸𑀬𑀁 𑀧𑀦 𑀧𑀞𑀫𑀁 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦, 𑀤𑀼𑀢𑀺𑀬𑀁 𑀫𑀺𑀲𑁆𑀲𑀓𑀯𑀲𑁂𑀦, 𑀢𑀢𑀺𑀬𑀁 𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑀺𑀧𑀝𑁆𑀞𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀳𑁂𑀯𑀢𑁆𑀣𑀺𑀓𑀣𑀸𑀬𑀁 ‘‘𑀲𑀩𑁆𑀩𑁄 𑀥𑀫𑁆𑀫𑁄 𑀲𑀓𑀪𑀸𑀯𑁂𑀦 𑀅𑀢𑁆𑀣𑀺 𑀧𑀭𑀪𑀸𑀯𑁂𑀦 𑀦𑀢𑁆𑀣𑀻’’𑀢𑀺 𑀧𑀯𑀢𑁆𑀢𑁄 𑀧𑀭𑀯𑀸𑀤𑀻𑀯𑀸𑀤𑁄 𑀬𑀣𑀸 𑀯𑀺𑀪𑀚𑁆𑀚 𑀧𑀝𑀺𑀧𑀼𑀘𑁆𑀙𑀸 𑀯𑀸 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄, 𑀏𑀯𑀁 𑀏𑀓𑀁𑀲𑀢𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄 𑀯𑀺𑀲𑁂𑀲𑀸𑀪𑀸𑀯𑀢𑁄, 𑀓𑁂𑀯𑀮𑀁 𑀞𑀧𑀦𑀻𑀬𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑁂𑀦𑀸’’𑀢𑀺. 𑀬𑀣𑀸 𑀳𑀺 𑀲𑀩𑁆𑀩𑁂 ¶ 𑀯𑀸𑀤𑀸 𑀲𑀧𑁆𑀧𑀝𑀺𑀯𑀸𑀤𑀸𑀯𑀸𑀢𑀺 𑀧𑀝𑀺𑀜𑁆𑀜𑀸 𑀪𑀽𑀢𑀓𑀣𑀦𑀢𑁆𑀢𑀸 𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑀸 𑀉𑀧𑁂𑀓𑁆𑀔𑀺𑀢𑀩𑁆𑀩𑀸, 𑀏𑀯𑀫𑀬𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀉𑀧𑁂𑀓𑁆𑀔𑀺𑀢𑀩𑁆𑀩𑁂𑀦𑀸’’𑀢𑀺. 𑀅𑀣 𑀯𑀸 𑀅𑀯𑀢𑁆𑀢𑀩𑁆𑀩𑀁 𑀉𑀢𑁆𑀢𑀭𑀁 𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑀁. 𑀬𑀣𑀸 𑀅𑀦𑀺𑀘𑁆𑀘𑀯𑀸𑀤𑀺𑀦𑀁 𑀧𑀢𑀺 𑀅𑀦𑀺𑀘𑁆𑀘𑁄 𑀲𑀤𑁆𑀤𑁄 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑁄𑀢𑀺, 𑀉𑀢𑁆𑀢𑀭𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀤𑁆𑀥𑀲𑀸𑀥𑀦𑀪𑀸𑀯𑀢𑁄, 𑀏𑀯𑀁 𑀇𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀺𑀤𑁆𑀥𑀲𑀸𑀥𑀦𑀜𑁆𑀳𑀺 𑀤𑀟𑁆𑀠𑀲𑁆𑀲 𑀟𑀳𑀦𑀲𑀤𑀺𑀲𑀢𑁆𑀢𑀸 𑀦𑀺𑀭𑀢𑁆𑀣𑀓𑀫𑁂𑀯 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀧𑀭𑀯𑀸𑀤𑀺𑀦𑀸 𑀬𑁂𑀦 𑀲𑀪𑀸𑀯𑁂𑀦 𑀬𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑁄 𑀯𑀺𑀦𑀸 𑀓𑀸𑀮𑀪𑁂𑀤𑀸𑀤𑀺𑀧𑀭𑀸𑀫𑀲𑀦𑁂𑀦 𑀦𑀢𑁆𑀣𑀻𑀢𑀺 𑀧𑀢𑀺𑀝𑁆𑀞𑀸𑀧𑀻𑀬𑀢𑀺, 𑀢𑀲𑁆𑀫𑀸 ‘‘𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀳𑁂𑀯𑀢𑁆𑀣𑀺, 𑀳𑁂𑀯𑀁 𑀦𑀢𑁆𑀣𑀻’’𑀢𑀺 𑀧𑀝𑀺𑀚𑀸𑀦𑀦𑁆𑀢𑁂𑀦 𑀧𑀭𑀯𑀸𑀤𑀺𑀦𑀸 𑀬𑀣𑀸 𑀲𑀧𑀭𑀪𑀸𑀯𑁂𑀳𑀺 𑀭𑀽𑀧𑀸𑀤𑀻𑀦𑀁 𑀅𑀢𑁆𑀣𑀺𑀢𑀸 𑀧𑀝𑀺𑀜𑁆𑀜𑀸𑀢𑀸, 𑀏𑀯𑀁 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑁂𑀳𑀺𑀧𑀺 𑀲𑀸 𑀧𑀝𑀺𑀜𑁆𑀜𑀸𑀢𑀸 𑀏𑀯. 𑀢𑁂𑀦𑁂𑀯𑀸𑀳 ‘‘𑀅𑀢𑀻𑀢𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦, 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀻’’𑀢𑀺. 𑀏𑀯𑀁 𑀲𑀢𑀺 𑀦𑀺𑀕𑀡𑁆𑀞𑀸𑀘𑁂𑀮𑀓𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀢𑁂 𑀳𑀺 ‘‘𑀲𑀺𑀬𑀸 𑀅𑀢𑁆𑀣𑀺, 𑀲𑀺𑀬𑀸 𑀦𑀢𑁆𑀣𑀺, 𑀲𑀺𑀬𑀸 𑀅𑀢𑁆𑀣𑀺 𑀘 ¶ 𑀦𑀢𑁆𑀣𑀺 𑀘𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑀢𑁆𑀣𑁂𑀲𑀼 𑀧𑀢𑁆𑀢𑀪𑀸𑀕𑁂 𑀧𑀝𑀺𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀬𑀤𑀺 𑀯𑀢𑁆𑀣𑀼𑀦𑁄 𑀲𑀪𑀸𑀯𑁂𑀦𑁂𑀯, 𑀤𑁂𑀲𑀓𑀸𑀮𑀲𑀦𑁆𑀢𑀸𑀦𑀯𑀲𑁂𑀦 𑀯𑀸 𑀦𑀢𑁆𑀣𑀺𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀁 𑀲𑀺𑀤𑁆𑀥𑀲𑀸𑀥𑀦𑀁 𑀲𑀓𑀯𑀸𑀤𑀺𑀦𑁄𑀧𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀬𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀬𑁄 𑀲𑀪𑀸𑀯𑁄, 𑀦 𑀲𑁄 𑀢𑀢𑁄 𑀅𑀜𑁆𑀜𑀣𑀸 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀉𑀧𑀮𑀩𑁆𑀪𑁂𑀬𑁆𑀬, 𑀅𑀜𑁆𑀜𑁄 𑀏𑀯 𑀲𑁄 𑀲𑀺𑀬𑀸. 𑀦 𑀘𑁂𑀢𑁆𑀣 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀁 𑀲𑀮𑀓𑁆𑀔𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀘 𑀧𑀭𑀪𑀸𑀯𑁂𑀦 𑀦𑀢𑁆𑀣𑀺𑀢𑀸𑀬 𑀦 𑀯𑀺𑀯𑀸𑀤𑁄, 𑀏𑀯𑀁 𑀤𑁂𑀲𑀓𑀸𑀮𑀦𑁆𑀢𑀭𑁂𑀲𑀼𑀧𑀺 𑀇𑀢𑁆𑀢𑀭𑀓𑀸𑀮𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁. 𑀦 𑀳𑀺 𑀲𑀗𑁆𑀔𑀸𑀭𑀸 𑀤𑁂𑀲𑀦𑁆𑀢𑀭𑀁, 𑀓𑀸𑀮𑀦𑁆𑀢𑀭𑀁 𑀯𑀸 𑀲𑀗𑁆𑀓𑀫𑀦𑁆𑀢𑀺 𑀔𑀡𑀺𑀓𑀪𑀸𑀯𑀢𑁄. 𑀏𑀢𑁂𑀦𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀦𑀢𑁆𑀣𑀺𑀢𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀅𑀢𑁆𑀣𑀺𑀢𑀸, 𑀦𑀢𑁆𑀣𑀺𑀢𑀸 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀢𑁆𑀢𑀸, 𑀏𑀯𑀁 𑀲𑀩𑁆𑀩𑀤𑀸𑀧𑀺 𑀦𑀺𑀘𑁆𑀘𑀢𑁆𑀢𑀸.

𑀬𑀁 𑀧𑀦 𑀢𑁂 𑀯𑀤𑀦𑁆𑀢𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀁 𑀓𑀝𑀓𑀸𑀤𑀺𑀭𑀽𑀧𑁂𑀦 𑀞𑀺𑀢𑀁 𑀭𑀼𑀘𑀓𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑀁. 𑀢𑀜𑁆𑀳𑀺 𑀲𑀼𑀯𑀡𑁆𑀡𑀪𑀸𑀯𑀸𑀯𑀺𑀚𑀳𑀦𑀢𑁄 𑀦𑀺𑀘𑁆𑀘𑀁 𑀓𑀝𑀓𑀸𑀤𑀺𑀪𑀸𑀯𑀳𑀸𑀦𑀺𑀢𑁄 𑀅𑀦𑀺𑀘𑁆𑀘𑀁, 𑀏𑀯𑀁 𑀲𑀩𑁆𑀩𑀥𑀫𑁆𑀫𑀸’’𑀢𑀺. 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 ‘‘𑀓𑀺𑀁 𑀓𑀝𑀓𑀪𑀸𑀯𑁄 𑀓𑀝𑀓𑀲𑁆𑀲, 𑀉𑀤𑀸𑀳𑀼 𑀲𑀼𑀯𑀡𑁆𑀡𑀲𑁆𑀲𑀸’’𑀢𑀺. 𑀬𑀤𑀺 𑀓𑀝𑀓𑀲𑁆𑀲, 𑀲𑀼𑀯𑀡𑁆𑀡𑀦𑀺𑀭𑀧𑁂𑀓𑁆𑀔𑁄 𑀲𑀺𑀬𑀸 𑀢𑀤𑀜𑁆𑀜𑀪𑀸𑀯𑁄 𑀯𑀺𑀬. 𑀅𑀣 𑀲𑀼𑀯𑀡𑁆𑀡𑀲𑁆𑀲, 𑀦𑀺𑀘𑁆𑀘𑀓𑀸𑀮𑀁 𑀢𑀢𑁆𑀣 𑀉𑀧𑀮𑀩𑁆𑀪𑁂𑀬𑁆𑀬 𑀲𑀼𑀯𑀡𑁆𑀡𑀪𑀸𑀯𑁄 𑀯𑀺𑀬. 𑀦 𑀘 𑀲𑀓𑁆𑀓𑀸 𑀉𑀪𑀺𑀦𑁆𑀦𑀁 𑀏𑀓𑀪𑀸𑀯𑁄𑀢𑀺 𑀯𑀢𑁆𑀢𑀼𑀁 𑀓𑀝𑀓𑀯𑀺𑀦𑀸𑀲𑁂𑀧𑀺 𑀲𑀼𑀯𑀡𑁆𑀡𑀸𑀯𑀺𑀦𑀸𑀲𑀢𑁄. 𑀅𑀣 𑀫𑀢𑀁, 𑀲𑀼𑀯𑀡𑁆𑀡𑀓𑀝𑀓𑀸𑀤𑀻𑀦𑀁 𑀧𑀭𑀺𑀬𑀸𑀬𑀻𑀧𑀭𑀺𑀬𑀸𑀬𑀪𑀸𑀯𑀢𑁄 ¶ 𑀦𑀸𑀬𑀁 𑀤𑁄𑀲𑁄𑀢𑀺. 𑀬𑀣𑀸 𑀳𑀺 𑀓𑀝𑀓𑀧𑀭𑀺𑀬𑀸𑀬𑀦𑀺𑀭𑁄𑀥𑁂𑀦 𑀭𑀼𑀘𑀓𑀧𑀭𑀺𑀬𑀸𑀬𑀼𑀧𑁆𑀧𑀸𑀤𑁂𑀧𑀺 𑀧𑀭𑀺𑀬𑀸𑀬𑀻 𑀢𑀣𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀁 𑀫𑀦𑀼𑀲𑁆𑀲𑀧𑀭𑀺𑀬𑀸𑀬𑀦𑀺𑀭𑁄𑀥𑁂 𑀤𑁂𑀯𑀧𑀭𑀺𑀬𑀸𑀬𑀼𑀧𑁆𑀧𑀸𑀤𑁂𑀧𑀺 𑀧𑀭𑀺𑀬𑀸𑀬𑀻 𑀚𑀻𑀯𑀤𑁆𑀭𑀩𑁆𑀬𑀁 𑀢𑀺𑀝𑁆𑀞𑀢𑀻𑀢𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑀁, 𑀢𑀣𑀸 𑀲𑀩𑁆𑀩𑀤𑁆𑀭𑀩𑁆𑀬𑀸𑀦𑀻𑀢𑀺. 𑀢𑀬𑀺𑀤𑀁 𑀅𑀫𑁆𑀩𑀁 𑀧𑀼𑀝𑁆𑀞𑀲𑁆𑀲 𑀮𑀩𑀼𑀚𑀩𑁆𑀬𑀸𑀓𑀭𑀡𑀁. 𑀬𑀁 𑀲𑁆𑀯𑁂𑀯 𑀦𑀺𑀘𑁆𑀘𑁄 𑀅𑀦𑀺𑀘𑁆𑀘𑁄𑀢𑀺 𑀯𑀸 𑀯𑀤𑀦𑁆𑀢𑁄 𑀅𑀜𑁆𑀜𑀢𑁆𑀣 𑀦𑀺𑀘𑁆𑀘𑀢𑀁 𑀅𑀜𑁆𑀜𑀢𑁆𑀣 𑀅𑀦𑀺𑀘𑁆𑀘𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀅𑀣 𑀧𑀭𑀺𑀬𑀸𑀬𑀧𑀭𑀺𑀬𑀸𑀬𑀻𑀦𑀁 𑀅𑀦𑀜𑁆𑀜𑀢𑀸 𑀇𑀘𑁆𑀙𑀺𑀢𑀸, 𑀏𑀯𑀁 𑀲𑀢𑀺 𑀧𑀭𑀺𑀬𑀸𑀬𑁄𑀧𑀺 𑀦𑀺𑀘𑁆𑀘𑁄 𑀲𑀺𑀬𑀸 𑀧𑀭𑀺𑀬𑀸𑀬𑀺𑀦𑁄 𑀅𑀦𑀜𑁆𑀜𑀢𑁆𑀢𑀸 𑀧𑀭𑀺𑀬𑀸𑀬𑀲𑀭𑀽𑀧𑀁 𑀯𑀺𑀬, 𑀧𑀭𑀺𑀬𑀸𑀬𑀻 𑀯𑀸 𑀅𑀦𑀺𑀘𑁆𑀘𑁄 𑀧𑀭𑀺𑀬𑀸𑀬𑀢𑁄 𑀅𑀦𑀜𑁆𑀜𑀢𑁆𑀢𑀸 𑀧𑀭𑀺𑀬𑀸𑀬𑀲𑀭𑀽𑀧𑀁 𑀯𑀺𑀬𑀸𑀢𑀺. 𑀅𑀣 𑀦𑁂𑀲𑀁 𑀅𑀜𑁆𑀜𑀸 𑀅𑀦𑀜𑁆𑀜𑀢𑀸, 𑀏𑀯𑀜𑁆𑀘 𑀲𑀢𑀺 𑀯𑀼𑀢𑁆𑀢𑀤𑁄𑀲𑀤𑁆𑀯𑀬𑀸𑀦𑀢𑀺𑀯𑀢𑁆𑀢𑀺. 𑀅𑀧𑀺𑀘 𑀓𑁄𑀬𑀁 𑀧𑀭𑀺𑀬𑀸𑀬𑁄 𑀦𑀸𑀫, 𑀬𑀤𑀺 𑀲𑀡𑁆𑀞𑀸𑀦𑀁, 𑀲𑀼𑀯𑀡𑁆𑀡𑁄 𑀢𑀸𑀯 𑀳𑁄𑀢𑀼, 𑀓𑀣𑀁 𑀚𑀻𑀯𑀤𑁆𑀭𑀩𑁆𑀬𑁂 𑀅𑀭𑀽𑀧𑀺𑀪𑀸𑀯𑀢𑁄. 𑀬𑀤𑀺 𑀢𑀲𑁆𑀲𑀧𑀺 𑀲𑀡𑁆𑀞𑀸𑀦𑀯𑀦𑁆𑀢𑀁 𑀇𑀘𑁆𑀙𑀺𑀢𑀁, 𑀢𑀣𑀸 𑀲𑀢𑀺𑀲𑁆𑀲 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀩𑀳𑀼𑀢𑀸 𑀆𑀧𑀚𑁆𑀚𑀢𑀺 𑀲𑀭𑀽𑀧𑀢𑀸 𑀘 𑀲𑀡𑁆𑀞𑀸𑀦𑀯𑀦𑁆𑀢𑁂𑀲𑀼𑀧𑀺 𑀧𑀻𑀴𑀓𑀸𑀤𑀻𑀲𑀼 𑀢𑀣𑀸𑀤𑀲𑁆𑀲𑀦𑀢𑁄. 𑀅𑀣 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀏𑀯𑀫𑁆𑀧𑀺 𑀩𑀳𑀼𑀢𑀸 𑀔𑀡𑀺𑀓𑀢𑀸 𑀘 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀭𑀺𑀬𑀸𑀬𑀲𑀭𑀽𑀧𑀫𑁂𑀯 𑀢𑀸𑀯 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀁.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀼𑀯𑀡𑁆𑀡𑀁 𑀓𑀝𑀓𑀸𑀤𑀺𑀭𑀽𑀧𑁂𑀦 𑀞𑀺𑀢’’𑀦𑁆𑀢𑀺, 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀬𑁄𑀕𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑁂𑀲𑀼 𑀯𑀺𑀲𑀺𑀝𑁆𑀞𑁂𑀲𑀼 ¶ 𑀭𑀽𑀧𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀲𑀼 𑀓𑀺𑀁 𑀏𑀓𑀁, 𑀉𑀤𑀸𑀳𑀼 𑀢𑁂𑀲𑀁 𑀲𑀫𑀼𑀤𑀸𑀬𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀯𑀸 𑀥𑀫𑁆𑀫𑀦𑁆𑀢𑀭𑀁 𑀲𑀼𑀯𑀡𑁆𑀡𑀦𑁆𑀢𑀺? 𑀢𑀢𑁆𑀣 𑀦 𑀢𑀸𑀯 𑀭𑀽𑀧𑀸𑀤𑀻𑀲𑀼 𑀏𑀓𑁂𑀓𑀁 𑀲𑀼𑀯𑀡𑁆𑀡𑀁 𑀢𑁂𑀦 𑀲𑀼𑀯𑀡𑁆𑀡𑀓𑀺𑀘𑁆𑀘𑀸𑀲𑀺𑀤𑁆𑀥𑀺𑀢𑁄, 𑀦𑀸𑀧𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀥𑀫𑁆𑀫𑀦𑁆𑀢𑀭𑀁 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀢𑁄. 𑀅𑀣 𑀲𑀫𑀼𑀤𑀸𑀬𑁄, 𑀢𑀁 𑀧𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀦 𑀢𑀲𑁆𑀲 𑀦𑀺𑀘𑁆𑀘𑀢𑀸, 𑀦𑀸𑀧𑀺 𑀅𑀦𑀺𑀘𑁆𑀘𑀢𑀸 𑀲𑀫𑁆𑀪𑀯𑀢𑀺. 𑀬𑀣𑀸 𑀘 𑀲𑀼𑀯𑀡𑁆𑀡𑀲𑁆𑀲, 𑀏𑀯𑀁 𑀓𑀝𑀓𑀲𑁆𑀲𑀧𑀺 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁆𑀢𑀸𑀢𑀺. 𑀢𑀬𑀺𑀤𑀁 𑀦𑀺𑀤𑀲𑁆𑀲𑀦𑀁 𑀧𑀭𑀯𑀸𑀤𑀺𑀦𑁄 𑀚𑀻𑀯𑀤𑁆𑀭𑀩𑁆𑀬𑀲𑁆𑀲𑀧𑀺 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀢𑀲𑁆𑀲𑁂𑀯 𑀲𑀸𑀥𑁂𑀢𑀻𑀢𑀺 𑀓𑀼𑀢𑁄 𑀢𑀲𑁆𑀲 𑀦𑀺𑀘𑁆𑀘𑀸𑀦𑀺𑀘𑁆𑀘𑀢𑀸𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀭𑀽𑀧𑀳𑀸𑀭𑀯𑀡𑁆𑀡𑀦𑀸

𑁩𑁦𑁭. 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀸𑀯 𑀅𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀸𑀦𑀁 𑀅𑀥𑀺𑀫𑀸𑀦𑀺𑀓𑀢𑀸𑀬 𑀅𑀲𑀫𑁆𑀪𑀯𑀢𑁄𑀢𑀺 𑀬𑀸𑀯 𑀅𑀥𑀺𑀫𑀸𑀦𑀺𑀓𑀁, 𑀢𑀸𑀯 𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀥𑀺𑀫𑀸𑀦𑀺𑀓𑀸𑀦’’𑀦𑁆𑀢𑀺 ¶ 𑀇𑀤𑀁 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀥𑀺𑀫𑀸𑀦𑀺𑀓𑀧𑀼𑀩𑁆𑀩𑀸 𑀅𑀥𑀺𑀧𑁆𑀧𑁂𑀢𑀸 𑀲𑀺𑀬𑀼’’𑀦𑁆𑀢𑀺.

𑁩𑁦𑁮. 𑀬𑀁 𑀯𑀺𑀫𑀢𑀺𑀕𑀸𑀳𑀓𑀸𑀭𑀡𑀁 𑀯𑀼𑀘𑁆𑀘𑀫𑀸𑀦𑀁, 𑀢𑀁 ‘‘𑀳𑀦𑁆𑀤 𑀳𑀻’’𑀢𑀺 𑀧𑀭𑀁 𑀚𑁄𑀢𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀓𑀸𑀭𑀡𑀢𑁆𑀣𑁂𑀢𑀺 𑀬𑀼𑀢𑁆𑀢’’𑀦𑁆𑀢𑀺. 𑀯𑀺𑀫𑀢𑀺𑀕𑀸𑀳𑀲𑁆𑀲 𑀧𑀦 𑀦𑀺𑀘𑁆𑀙𑀺𑀢𑀢𑀁 ‘‘𑀳𑀦𑁆𑀤 𑀳𑀻’’𑀢𑀺 𑀧𑀭𑀁 𑀚𑁄𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀘𑀲𑀸𑀬𑀢𑁆𑀣𑁂’’𑀢𑀺.

𑀧𑀭𑀽𑀧𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁩𑁨𑁬. 𑀲𑁄𑀢𑀺 ¶ 𑀧𑀞𑀫𑀫𑀕𑁆𑀕𑀝𑁆𑀞𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’’𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀅𑀜𑁆𑀜𑀣𑀸 𑀕𑀳𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁂𑀦 𑀫𑀕𑁆𑀕𑀓𑁆𑀔𑀡𑁂𑀧𑀺 𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀲𑁆𑀲𑀦𑀸 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 ‘‘𑀲𑁄 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀯𑀸𑀘𑀁 𑀪𑀸𑀲𑀢𑀻’’𑀢𑀺 𑀯𑀤𑀦𑁆𑀢𑀺.

𑁩𑁨𑁮. 𑀇𑀘𑁆𑀙𑀺𑀢𑁂𑀢𑀺 𑀧𑀭𑀯𑀸𑀤𑀺𑀦𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁂. 𑀆𑀭𑁄𑀧𑀺𑀢𑁂𑀢𑀺 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑁂𑀦 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑀺𑀢𑁂 𑀬𑀼𑀚𑁆𑀚𑀢𑀺, 𑀯𑀘𑀻𑀲𑀫𑀼𑀝𑁆𑀞𑀸𑀧𑀦𑀓𑁆𑀔𑀡𑀢𑁄 𑀧𑀦 𑀧𑀘𑁆𑀙𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀇𑀘𑁆𑀙𑀺𑀢𑁂 𑀦 𑀬𑀼𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀅𑀢𑁆𑀢𑀦𑀸 𑀦𑀺𑀘𑁆𑀙𑀸𑀭𑀺𑀢𑀁 𑀲𑀤𑁆𑀤𑀁 𑀅𑀢𑁆𑀢𑀦𑀸𑀧𑀺 𑀲𑀼𑀡𑀸𑀢𑀺, 𑀢𑀲𑁆𑀫𑀸 𑀲𑁄𑀢𑀯𑀺𑀜𑁆𑀜𑀸𑀡𑀁 ‘‘𑀬𑁂𑀦 𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁩𑁨. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀲𑁆𑀲 𑀧𑀞𑀫𑀫𑀕𑁆𑀕𑀲𑁆𑀲 𑀔𑀡𑁂. 𑀅𑀪𑀺𑀪𑀽𑀲𑀼𑀢𑁆𑀢𑀸𑀳𑀭𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀏𑀢𑁂𑀦 𑀢𑀤𑀸𑀳𑀭𑀡𑀲𑁆𑀲 𑀅𑀲𑀫𑁆𑀩𑀦𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀅𑀲𑀸𑀥𑀓’’𑀦𑁆𑀢𑀺.

𑀯𑀘𑀻𑀪𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁩𑁫. 𑀏𑀯𑀦𑁆𑀢𑀺 ‘‘𑀏𑀓𑀘𑀺𑀢𑁆𑀢𑀁 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀭𑀽𑀧𑀪𑀯𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀏𑀢𑁂𑀦𑀸𑀢𑀺 ‘‘𑀏𑀓𑀫𑁂𑀯 𑀘𑀺𑀢𑁆𑀢𑀁 𑀆𑀭𑀼𑀧𑁆𑀧𑁂 𑀢𑀺𑀝𑁆𑀞𑀢𑀺 ¶ , 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀁𑀯𑀸𑀤𑀺𑀦𑀸 𑀤𑀼𑀢𑀺𑀬𑀸𑀧𑀺 𑀅𑀟𑁆𑀠𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸 𑀧𑀞𑀫𑀓𑀣𑀸𑀬 𑀘𑀺𑀭𑀓𑀸𑀮𑀸𑀯𑀝𑁆𑀞𑀸𑀦𑀯𑀘𑀦𑀲𑁆𑀲 𑀅𑀜𑁆𑀜𑀤𑀢𑁆𑀣𑀼 𑀪𑀸𑀯𑀯𑀺𑀪𑀸𑀯𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀭𑀺𑀫𑀸𑀬𑀸𑀢𑀺 ‘‘𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀢𑀻’’𑀢𑀺 𑀧𑀜𑁆𑀳𑀢𑁄 𑀧𑀼𑀭𑀺𑀫𑀸𑀬. 𑀢𑀢𑁆𑀣 𑀳𑀺 ‘‘𑀯𑀲𑁆𑀲𑀲𑀢𑀁 𑀢𑀺𑀝𑁆𑀞𑀢𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀅𑀦𑀼𑀜𑁆𑀜𑀸 𑀓𑀢𑀸, 𑀧𑀘𑁆𑀙𑀺𑀫𑀸𑀬𑀁 𑀧𑀦 ‘‘𑀫𑀦𑀼𑀲𑁆𑀲𑀸𑀦𑀁 𑀏𑀓𑀁 𑀘𑀺𑀢𑁆𑀢𑀁 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀢𑀻’’𑀢𑀺 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. 𑀅𑀯𑀺𑀭𑁄𑀥𑁄 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀬𑀢𑁄 𑀢𑀢𑁆𑀣𑁂𑀯 𑀅𑀦𑀼𑀜𑁆𑀜𑀸 𑀓𑀢𑀸, 𑀦 𑀧𑀘𑁆𑀙𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀯𑀲𑁆𑀲𑀲𑀢𑀸𑀤𑀻𑀢𑀺 𑀘 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 ‘‘𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀻’’𑀢𑀺 𑀏𑀯𑀫𑀸𑀤𑀺𑀬𑁂𑀯 𑀲𑀗𑁆𑀕𑀳𑀺𑀢𑀁, 𑀅𑀣 𑀔𑁄 ‘‘𑀏𑀓𑀁 𑀘𑀺𑀢𑁆𑀢𑀁 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀫𑀸𑀤𑀺𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀫𑀼𑀳𑀼𑀢𑁆𑀢𑀁 𑀫𑀼𑀳𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀜𑁆𑀳𑁄 𑀲𑀓𑀯𑀸𑀤𑀺𑀦𑀸 𑀧𑀼𑀘𑁆𑀙𑀺𑀢𑁄 𑀯𑀺𑀬 𑀯𑀼𑀢𑁆𑀢𑁄’’𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. ‘‘𑀫𑀼𑀳𑀼𑀢𑁆𑀢𑀁 𑀫𑀼𑀳𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀜𑁆𑀳𑁄 𑀧𑀭𑀯𑀸𑀤𑀺𑀲𑁆𑀲. ‘‘𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄’’𑀢𑀺𑀆𑀤𑀺𑀲𑀼𑀢𑁆𑀢𑀢𑁆𑀣𑀯𑀲𑁂𑀦 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀳𑀺 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸

𑁩𑁩𑁯. ‘‘𑀢𑀸𑀦𑀺 𑀯𑀸 𑀘𑀢𑁆𑀢𑀸𑀭𑀺𑀧𑀺 𑀜𑀸𑀡𑀸𑀦𑀺 𑀏𑀓𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀬𑁂𑀯𑀸𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀇𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀦𑁆𑀢𑀺 𑀤𑀼𑀓𑁆𑀔𑁂𑀜𑀸𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁. 𑀏𑀓𑀫𑀕𑁆𑀕𑀪𑀸𑀯𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀆𑀤𑀺𑀏𑀓𑀫𑀕𑁆𑀕𑀪𑀸𑀯𑀢𑁄. 𑀓𑀫𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺 𑀳𑀺 𑀢𑀸𑀦𑀺 𑀜𑀸𑀡𑀸𑀦𑀺 𑀢𑀁𑀢𑀁𑀫𑀕𑁆𑀕𑀓𑀺𑀘𑁆𑀘𑀲𑁆𑀲 𑀲𑀸𑀥𑀦𑀢𑁄 𑀏𑀓𑁄𑀬𑁂𑀯 𑀫𑀕𑁆𑀕𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀏𑀓𑀫𑀕𑁆𑀕𑀲𑁆𑀲…𑀧𑁂… 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑁩𑁪𑁪. 𑀤𑀲𑁆𑀲𑀦𑁂𑀢𑀺 𑀫𑀕𑁆𑀕𑀤𑀲𑁆𑀲𑀦𑁂.

𑁩𑁪𑁫. 𑀥𑀫𑁆𑀫𑀢𑁆𑀣𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀲𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀳𑁂𑀢𑀼𑀢𑀸, 𑀢𑀤𑀪𑀸𑀯𑀢𑁄 𑀦 𑀇𑀢𑀭𑀧𑀝𑀺𑀲𑀫𑁆𑀪𑀺𑀤𑀸𑀦𑀦𑁆𑀢𑀺 𑀆𑀳 ‘‘𑀦𑀺𑀭𑀼𑀢𑁆𑀢𑀺…𑀧𑁂… 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺. 𑀲𑀩𑁆𑀩𑀸𑀲𑀫𑁆𑀧𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀞𑀫𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀸 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀮𑀤𑁆𑀥𑀩𑁆𑀩𑀢𑁆𑀢𑀸 𑀨𑀮𑀸𑀦𑀁 𑀯𑀺𑀬, 𑀢𑀲𑁆𑀫𑀸 ‘‘𑀅𑀝𑁆𑀞𑀳𑀺 𑀜𑀸𑀡𑁂𑀳𑀻’’𑀢𑀺 𑀏𑀢𑁆𑀣 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀆𑀕𑀢𑀦𑀬𑁂𑀦 𑀤𑀼𑀓𑁆𑀔𑀸𑀤𑀺𑀜𑀸𑀡𑀸𑀦𑀁 𑀧𑀼𑀩𑁆𑀩𑀦𑁆𑀢𑀸𑀤𑀺𑀜𑀸𑀡𑀸𑀦𑀜𑁆𑀘 𑀯𑀲𑁂𑀦 ‘‘𑀅𑀝𑁆𑀞𑀳𑀺 𑀜𑀸𑀡𑁂𑀳𑀻’’𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁪𑁭. 𑀯𑀺𑀲𑀬𑀯𑀺𑀲𑀬𑀻𑀲𑀽𑀢𑀺 ¶ ¶ 𑀭𑀽𑀧𑀘𑀓𑁆𑀔𑀸𑀤𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑀦𑁆𑀢𑁂𑀦 𑀮𑁄𑀓𑀺𑀬𑀸. 𑀯𑀺𑀲𑀬𑀲𑁆𑀲𑁂𑀯𑀸𑀢𑀺 𑀲𑀤𑁆𑀤𑀲𑁆𑀲𑁂𑀯. 𑀲𑁄 𑀳𑀺 𑀯𑁄𑀳𑀭𑀺𑀢𑀩𑁆𑀩𑀢𑁄 𑀯𑁄𑀳𑀸𑀭𑀓𑀭𑀡𑀢𑀸𑀬 𑀘 ‘‘𑀯𑁄𑀳𑀸𑀭𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀦𑀢𑁆𑀣𑁂𑀢𑁆𑀣 𑀓𑀸𑀭𑀡𑀁 𑀯𑀺𑀲𑀬𑀻𑀦𑀁 𑀯𑀺𑀲𑀬𑀲𑁆𑀲𑀧𑀺 𑀆𑀲𑀯𑀸𑀤𑀺𑀅𑀦𑀸𑀭𑀫𑁆𑀫𑀡𑀢𑀸𑀪𑀸𑀯𑀢𑁄. 𑀅𑀲𑀺𑀤𑁆𑀥𑀮𑁄𑀓𑀼𑀢𑁆𑀢𑀭𑀪𑀸𑀯𑀲𑁆𑀲 𑀏𑀓𑀦𑁆𑀢𑀲𑀸𑀲𑀯𑀢𑁆𑀢𑀸 𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀬𑀣𑀸 𑀮𑁄𑀓𑀼𑀢𑁆𑀢𑀭𑀢𑀸 𑀢𑀯 𑀫𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑀺𑀳𑀜𑁆𑀜𑁂𑀬𑁆𑀬𑀸𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀯𑀘𑀦𑀁. 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀘 𑀅𑀬𑀸𑀣𑀸𑀯𑀦𑁆𑀢𑀺 𑀆𑀳 ‘‘𑀦 𑀳𑀺…𑀧𑁂… 𑀅𑀢𑁆𑀣𑀻’’𑀢𑀺. 𑀦 𑀳𑀺 𑀚𑀮𑀁 𑀅𑀦𑀮𑀦𑁆𑀢𑀺 𑀧𑀭𑀺𑀓𑀧𑁆𑀧𑀺𑀢𑀁 𑀤𑀳𑀢𑀺 𑀧𑀘𑀢𑀺 𑀯𑀸. 𑀓𑀺𑀁 𑀮𑁄𑀓𑀺𑀬𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀢𑁄 𑀮𑁄𑀓𑀺𑀬𑁄 𑀭𑀽𑀧𑀸𑀬𑀢𑀦𑀸𑀤𑀺 𑀯𑀺𑀬, 𑀉𑀤𑀸𑀳𑀼 𑀮𑁄𑀓𑀼𑀢𑁆𑀢𑀭𑁄 𑀧𑀘𑁆𑀘𑀯𑁂𑀓𑁆𑀔𑀺𑀬𑀫𑀸𑀦𑀫𑀕𑁆𑀕𑀸𑀤𑀺 𑀯𑀺𑀬𑀸𑀢𑀺 𑀏𑀯𑀫𑁂𑀢𑁆𑀣 𑀳𑁂𑀢𑀼𑀲𑁆𑀲 𑀅𑀦𑁂𑀓𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀮𑁄𑀓𑀺𑀬𑁂 𑀮𑁄𑀓𑀼𑀢𑁆𑀢𑀭𑁂 𑀘 𑀲𑀫𑁆𑀪𑀯𑀢𑁄’’𑀢𑀺.

𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁩𑁫𑁩. 𑀬𑁂𑀲𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀬𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀔𑀲𑀘𑁆𑀘𑀸𑀦𑀁. 𑀤𑁆𑀯𑀻𑀳𑀺 𑀦𑀺𑀭𑁄𑀥𑁂𑀳𑀻𑀢𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀧𑀝𑀺𑀲𑀗𑁆𑀔𑀸𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀦𑀺𑀭𑁄𑀥𑁂𑀳𑀺. 𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀦𑀁 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸, 𑀧𑀜𑁆𑀜𑀸𑀯𑀺𑀲𑁂𑀲𑁄. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑀦𑀺𑀭𑁄𑀥𑁄 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄. 𑀬𑁄 𑀲𑀸𑀲𑀯𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀲𑀁𑀬𑁄𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀬𑁄 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀲𑁆𑀲 𑀅𑀘𑁆𑀘𑀦𑁆𑀢𑀯𑀺𑀩𑀦𑁆𑀥𑀪𑀽𑀢𑁄 𑀦𑀺𑀭𑁄𑀥𑁄, 𑀲𑁄 𑀧𑀝𑀺𑀲𑀗𑁆𑀔𑀸𑀬 𑀦𑀯𑀢𑁆𑀢𑀩𑁆𑀩𑀢𑁄 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄 𑀦𑀸𑀫𑀸𑀢𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺. 𑀧𑀝𑀺𑀲𑀗𑁆𑀔𑀸𑀬 𑀯𑀺𑀦𑀸 𑀦𑀺𑀭𑀼𑀤𑁆𑀥𑀸𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀗𑁆𑀕𑀸’’𑀢𑀺. 𑀅𑀦𑀼𑀧𑁆𑀧𑀸𑀤𑁄𑀧𑀺 𑀳𑀺 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺 𑀬𑀢𑁄 ‘‘𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀮𑀓𑁆𑀔𑀡𑀼𑀤𑁆𑀤𑁂𑀲𑀲𑁆𑀲 𑀧𑀝𑀺𑀮𑁄𑀫𑁂 ‘‘𑀇𑀫𑀲𑁆𑀲 ¶ 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀤𑀲𑁆𑀲𑀺𑀢𑁄. 𑀢𑁂𑀦𑀸𑀢𑀺 𑀧𑀝𑀺𑀲𑀗𑁆𑀔𑀸𑀬 𑀦𑀺𑀭𑁄𑀥𑀲𑁆𑀲 𑀔𑀡𑀺𑀓𑀦𑀺𑀭𑁄𑀥𑀲𑁆𑀲 𑀘 𑀇𑀥 𑀦𑀸𑀥𑀺𑀧𑁆𑀧𑁂𑀢𑀢𑁆𑀢𑀸.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀩𑀮𑀓𑀣𑀸𑀯𑀡𑁆𑀡𑀦𑀸

𑁩𑁫𑁪. 𑀦𑀺𑀤𑁆𑀤𑁂𑀲𑀢𑁄𑀢𑀺 ¶ ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀧𑁆𑀧𑀓𑀸𑀭𑀢𑁄. 𑀲𑁄 𑀧𑀦 𑀬𑀲𑁆𑀫𑀸 𑀯𑀺𑀢𑁆𑀣𑀸𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀺𑀢𑁆𑀣𑀸𑀭𑀢𑁄’’𑀢𑀺. 𑀲𑀩𑁆𑀩𑀁 𑀓𑀺𑀮𑁂𑀲𑀸𑀯𑀭𑀡𑀸𑀤𑀺𑀁, 𑀢𑀫𑁂𑀯 𑀧𑀘𑁆𑀘𑁂𑀓𑀁 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄 𑀲𑀩𑁆𑀩𑀸𑀓𑀸𑀭𑀁. ‘‘𑀲𑀩𑁆𑀩’’𑀦𑁆𑀢𑀺 𑀳𑀺 𑀇𑀤𑀁 𑀲𑀭𑀽𑀧𑀢𑁄 𑀕𑀳𑀡𑀁, ‘‘𑀲𑀩𑁆𑀩𑀸𑀓𑀸𑀭𑀢𑁄’’𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄. 𑀪𑀕𑀯𑀸 𑀳𑀺 𑀥𑀫𑁆𑀫𑁂 𑀚𑀸𑀦𑀦𑁆𑀢𑁄 𑀢𑁂𑀲𑀁 𑀆𑀓𑀸𑀭𑀪𑁂𑀤𑁂 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀚𑀸𑀦𑀸𑀢𑀺. 𑀬𑀣𑀸𑀳 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫). 𑀉𑀤𑁆𑀤𑁂𑀲𑀢𑁄𑀢𑀺 𑀏𑀓𑀤𑁂𑀲𑀢𑁄. 𑀏𑀓𑀤𑁂𑀲𑁄 𑀘 𑀯𑀺𑀢𑁆𑀣𑀸𑀭𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁄’’𑀢𑀺. 𑀬𑀣𑀸 𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀧𑀻𑀢𑀺 𑀤𑀺𑀝𑁆𑀞𑀺𑀕𑀢𑀬𑀣𑀸𑀪𑀽𑀢𑀜𑀸𑀡𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀆𑀲𑀬𑀸𑀤𑀻𑀦𑀁 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀧𑀺. 𑀢𑁂𑀦𑀸𑀳 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀚𑀸𑀦𑀦𑀫𑀢𑁆𑀢𑀁 𑀲𑀦𑁆𑀥𑀸𑀬𑀸’’𑀢𑀺. 𑀣𑁂𑀭𑁂𑀦𑀸𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦. 𑀏𑀯𑀫𑁂𑀯𑀸𑀢𑀺 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀸𑀓𑀸𑀭𑁂𑀦𑁂𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀓𑀯𑀸𑀤𑀺𑀦𑀸𑀧𑀺 𑀇𑀘𑁆𑀙𑀺𑀢𑁄𑀬𑁂𑀯𑀸𑀢𑀺 𑀆𑀳 ‘‘𑀓𑀣𑀫𑀬𑀁 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸’’𑀢𑀺.

𑁩𑁫𑁬. 𑀲𑁂𑀲𑁂𑀲𑀽𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀢𑁄 𑀲𑁂𑀲𑁂𑀲𑀼. 𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀲𑀸𑀥𑀸𑀭𑀡𑀢𑀸𑀧𑀝𑀺𑀓𑁆𑀔𑁂𑀧𑁄. 𑀦𑀦𑀼 𑀘 𑀲𑁂𑀲𑀸𑀦𑀁 𑀅𑀲𑀸𑀥𑀸𑀭𑀡𑀢𑀸𑀧𑀺 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀞𑀸𑀦𑀸…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀩𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀲𑀗𑁆𑀔𑀸𑀭𑁂 ¶ 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁂𑀦 𑀲𑀢𑁆𑀢𑁂𑀦 𑀲𑀼𑀜𑁆𑀜𑁂 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 ‘‘𑀲𑀼𑀜𑁆𑀜𑀢𑀜𑁆𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀲𑀫𑁄𑀥𑀸𑀦𑀁 𑀓𑀣𑀁 𑀆𑀧𑀚𑁆𑀚𑀢𑀺 𑀞𑀸𑀦𑀸𑀞𑀸𑀦𑀪𑀽𑀢𑁂 𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁂𑀦 𑀲𑀢𑁆𑀢𑁂𑀦 𑀲𑀼𑀜𑁆𑀜𑀸 ¶ 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀧𑀓𑀸𑀭𑁂𑀦 𑀦𑀬𑁂𑀦. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀞𑀸𑀦𑀸𑀞𑀸𑀦𑀫𑀦𑀲𑀺𑀓𑀸𑀭𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄, 𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦. ‘‘𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀲𑀫𑁄𑀥𑀸𑀦𑀁 𑀓𑀣𑀁 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀲𑀢𑁆𑀢𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀢𑁆𑀢𑁂𑀧𑀺 𑀲𑀗𑁆𑀔𑀸𑀭𑀸𑀦𑀁 𑀅𑀜𑁆𑀜𑁄𑀯 𑀞𑀸𑀦𑀸𑀞𑀸𑀦𑀫𑀦𑀲𑀺𑀓𑀸𑀭𑁄, 𑀅𑀜𑁆𑀜𑁄 𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁄𑀢𑀺 𑀬𑀼𑀚𑁆𑀚𑀢𑁂𑀯 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀲𑀫𑁄𑀥𑀸𑀦𑀸𑀧𑀢𑁆𑀢𑀺𑀘𑁄𑀤𑀦𑀸, 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀧𑀦 𑀓𑀣𑀁 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺 𑀞𑀸𑀦𑀸𑀞𑀸𑀦𑀜𑀸𑀡𑀸𑀤𑀻𑀦𑀦𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀓𑀺𑀁 𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬. 𑀉𑀫𑁆𑀫𑀢𑁆𑀢𑀓𑀧𑀘𑁆𑀙𑀺𑀲𑀤𑀺𑀲𑁄 𑀳𑀺 𑀧𑀭𑀯𑀸𑀤𑀺𑀯𑀸𑀤𑁄. 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀈𑀤𑀺𑀲𑁂𑀲𑀼 𑀏𑀲𑁂𑀯 𑀦𑀬𑁄. 𑀆𑀭𑁄𑀧𑁂𑀢𑁆𑀯𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀁, 𑀲𑀢𑁆𑀢𑀸𑀓𑀸𑀭𑀫𑁂𑀯 𑀯𑀸 𑀅𑀲𑀦𑁆𑀢𑀁 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁂 𑀆𑀭𑁄𑀧𑁂𑀢𑁆𑀯𑀸. 𑀅𑀪𑀽𑀢𑀸𑀭𑁄𑀧𑀦𑀜𑁆𑀳𑁂𑀢𑁆𑀣 𑀧𑀡𑀺𑀤𑀳𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀧𑀭𑀺𑀓𑀧𑁆𑀧𑀦𑀯𑀲𑁂𑀦𑀸’’𑀢𑀺. 𑀲𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀧𑀡𑀺𑀥𑀺. 𑀏𑀓𑀲𑁆𑀫𑀺𑀫𑁆𑀧𑀺 𑀔𑀦𑁆𑀥𑁂.

𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀫𑀕𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀏𑀓𑀤𑁂𑀲𑁂𑀦 𑀯𑀺𑀫𑀼𑀢𑁆𑀢𑀁 𑀏𑀓𑀤𑁂𑀲𑁂𑀦 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀬𑀁 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀤𑁄𑀲𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀜𑁆𑀳𑀺 𑀢𑀤𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁂𑀓𑀤𑁂𑀲𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺𑀲𑁆𑀲 𑀮𑀤𑁆𑀥𑀻’’𑀢𑀺 𑀤𑀲𑁆𑀲𑀺𑀢𑁄𑀯𑀸𑀬𑀫𑀢𑁆𑀣𑁄. 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁂𑀢𑀺 𑀯𑀺𑀫𑀼𑀘𑁆𑀘𑀦𑀓𑀺𑀭𑀺𑀬𑀸𑀬 𑀅𑀧𑀭𑀺𑀬𑁄𑀲𑀺𑀢𑀢𑀸𑀦𑀺𑀤𑁆𑀤𑁂𑀲𑁂. 𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺 𑀯𑀺𑀧𑁆𑀧𑀓𑀢𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦𑀸𑀢𑀺 𑀧𑀭𑀯𑀸𑀤𑀺𑀦𑀸. 𑀯𑀺𑀫𑀼𑀘𑁆𑀘…𑀧𑁂… 𑀯𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀲𑁆𑀲 𑀯𑀺𑀫𑀼𑀢𑁆𑀢𑀪𑀸𑀯𑀸𑀪𑀸𑀯𑀢𑁄, 𑀯𑀺𑀫𑀼𑀢𑁆𑀢𑀪𑁂𑀤𑁂𑀦 𑀧𑀦 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺 𑀘 ¶ 𑀤𑁄𑀲𑁂 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁂𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀤𑁂𑀲𑁄 𑀯𑀺𑀲𑁂𑀲𑀦𑀁 𑀳𑁄𑀢𑀺 𑀦𑀺𑀧𑁆𑀧𑀤𑁂𑀲𑀯𑀺𑀫𑀼𑀢𑁆𑀢𑀺𑀬𑀸 𑀅𑀯𑀺𑀘𑁆𑀙𑀺𑀦𑁆𑀦𑀢𑁄. 𑀨𑀮𑀘𑀺𑀢𑁆𑀢𑁂𑀦𑀸𑀢𑀺 𑀧𑀞𑀫𑀨𑀮𑀘𑀺𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑁂𑀦.

𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸

𑁩𑁬𑁮. 𑀧𑀳𑀻𑀦𑀸 ¶ 𑀦𑀸𑀫 𑀪𑀯𑁂𑀬𑁆𑀬𑀼𑀁, 𑀦 𑀧𑀳𑀺𑀬𑁆𑀬𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁭𑁧. 𑀮𑁄𑀓𑀼𑀢𑁆𑀢𑀭𑀸𑀦𑀁𑀬𑁂𑀯 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑁄, 𑀦 𑀮𑁄𑀓𑀺𑀬𑀸𑀦𑀦𑁆𑀢𑀺 𑀧𑀭𑀯𑀸𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑀸𑀳 ‘‘𑀅𑀧𑁆𑀧𑀝𑀺𑀮𑀤𑁆𑀥𑀺𑀦𑁆𑀤𑁆𑀭𑀺𑀬𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀬𑁆𑀬𑀸𑀦𑀺𑀓𑀸𑀦𑀺 𑀪𑀸𑀯𑁂𑀦𑁆𑀢𑁄𑀢𑀺 𑀬𑀣𑀸 𑀦𑀺𑀬𑁆𑀬𑀸𑀦𑀺𑀓𑀸 𑀳𑁄𑀦𑁆𑀢𑀺, 𑀏𑀯𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀩𑁆𑀭𑀽𑀳𑁂𑀦𑁆𑀢𑁄 𑀯𑀸. 𑀇𑀦𑁆𑀤𑁆𑀭𑀺𑀬𑀪𑀸𑀯𑀁 𑀧𑀦 𑀧𑀢𑁆𑀢𑁂𑀲𑀼 𑀢𑁂𑀲𑀼 𑀧𑀼𑀦 𑀪𑀸𑀯𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀦𑁆𑀢𑁄’’𑀢𑀺.

𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸

𑁩𑁭𑁩. 𑀯𑀺𑀲𑀺𑀦𑁄𑀢𑀺 𑀯𑀺𑀲𑁂𑀲𑁂𑀦 𑀩𑀦𑁆𑀥𑀢𑀺 𑀯𑀺𑀲𑀬𑀻𑀦𑀁 𑀅𑀢𑁆𑀢𑀧𑀝𑀺𑀩𑀦𑁆𑀥𑀁 𑀓𑀭𑁄𑀢𑀻𑀢𑀺 𑀯𑀺𑀲𑀬𑁄, 𑀆𑀭𑀫𑁆𑀫𑀡𑀁 ¶ , 𑀅𑀦𑀼𑀪𑀯𑀢𑀺 𑀏𑀢𑁂𑀦𑀸𑀢𑀺 𑀆𑀦𑀼𑀪𑀸𑀯𑁄, 𑀲𑀸𑀫𑀢𑁆𑀣𑀺𑀬𑀁, 𑀩𑀮𑀦𑁆𑀢𑀺 𑀅𑀢𑁆𑀣𑁄, 𑀕𑁄𑀘𑀭𑀓𑀭𑀡𑀁 𑀕𑁄𑀘𑀭𑁄, 𑀯𑀺𑀲𑀬𑁂 𑀆𑀦𑀼𑀪𑀸𑀯𑀕𑁄𑀘𑀭𑀸 𑀯𑀺𑀲𑀬…𑀧𑁂… 𑀘𑀭𑀸𑀢𑀺. 𑀢𑁂𑀳𑀺 𑀬𑀣𑀸 𑀯𑀺𑀲𑀺𑀝𑁆𑀞𑀁 𑀯𑀺𑀲𑁂𑀲𑀁 𑀳𑁄𑀢𑀺, 𑀢𑀣𑀸 𑀧𑀘𑁆𑀘𑀬𑀪𑀽𑀢𑁂𑀦 𑀛𑀸𑀦𑀥𑀫𑁆𑀫𑁂𑀦 𑀆𑀳𑀺𑀢𑀩𑀮𑀁 𑀓𑀢𑀩𑀮𑀸𑀥𑀸𑀦𑀁. 𑀯𑀺𑀲𑀬𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀆𑀦𑀼𑀪𑀸𑀯𑀕𑁄𑀘𑀭𑀓𑀭𑀡𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁 𑀬𑀢𑁆𑀣𑀲𑁆𑀲 𑀢𑁂𑀳𑀺 𑀉𑀧𑀢𑁆𑀣𑀤𑁆𑀥𑀢𑁆𑀢𑀸 𑀩𑀮𑀸𑀥𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀸𑀤𑀺𑀲𑁂 𑀯𑀺𑀲𑀬𑁂’’𑀢𑀺𑀆𑀤𑀺. 𑀩𑀮𑀸𑀥𑀸𑀦𑀜𑁆𑀘 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀫𑀳𑀕𑁆𑀕𑀢𑀥𑀫𑁆𑀫𑀯𑀺𑀲𑁂𑀲𑀢𑁄 𑀉𑀧𑁆𑀧𑀦𑁆𑀦𑁂𑀳𑀺 𑀧𑀡𑀻𑀢𑁂𑀳𑀺 𑀘𑀺𑀢𑁆𑀢𑀚𑀭𑀽𑀧𑁂𑀳𑀺 𑀯𑀺𑀲𑁂𑀲𑀸𑀧𑀢𑁆𑀢𑀺. 𑀬𑀁 𑀦𑀺𑀲𑁆𑀲𑀸𑀬 𑀧𑀭𑀸𑀯𑀼𑀢𑁆𑀢𑀻𑀢𑀺 𑀏𑀓𑁂 𑀯𑀤𑀦𑁆𑀢𑀺. 𑀧𑀼𑀭𑀺𑀫𑀁 𑀫𑀁𑀲𑀘𑀓𑁆𑀔𑀼𑀫𑀢𑁆𑀢𑀫𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀩𑀮𑀸𑀥𑀸𑀦𑀢𑁄 𑀧𑀼𑀭𑀺𑀫𑀁 𑀫𑀁𑀲𑀘𑀓𑁆𑀔𑀼𑀫𑀢𑁆𑀢𑀫𑁂𑀯. 𑀯𑀤𑀦𑁆𑀢𑁄 𑀲𑀗𑁆𑀕𑀳𑀓𑀸𑀭𑁄. 𑀯𑀺𑀲𑀬𑀕𑁆𑀕𑀳𑀡𑀁 𑀧𑀸𑀴𑀺𑀬𑀁 𑀓𑀢𑀁. 𑀦 𑀯𑀺𑀲𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀦 𑀯𑀺𑀲𑀬𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀬𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀭𑀽𑀧𑀸𑀬𑀢𑀦𑀫𑁂𑀯 𑀯𑀺𑀲𑀬𑁄𑀢𑀺 𑀯𑀺𑀲𑀬𑀲𑁆𑀲 𑀲𑀤𑀺𑀲𑀢𑀁 𑀅𑀯𑀺𑀲𑁂𑀲𑀁 𑀆𑀳, 𑀲𑀤𑀺𑀲𑀲𑁆𑀲 𑀯𑀸 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀬𑁄𑀚𑀦𑀸.

𑀥𑀫𑁆𑀫𑀼𑀧𑀢𑁆𑀣𑀤𑁆𑀥 ¶ …𑀧𑁂… 𑀅𑀥𑀺𑀧𑁆𑀧𑀸𑀬𑁄, 𑀅𑀜𑁆𑀜𑀣𑀸 𑀮𑀤𑁆𑀥𑀺𑀬𑁂𑀯 𑀦 𑀲𑀺𑀬𑀸𑀢𑀺 𑀪𑀸𑀯𑁄. 𑀫𑀕𑁆𑀕𑁄𑀢𑀺 𑀉𑀧𑀸𑀬𑁄, 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀓𑀢𑀺𑀘𑀓𑁆𑀔𑀼𑀫𑀢𑁄 𑀏𑀯 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀓𑀲𑀺𑀡𑀸𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀦𑀁, 𑀲𑁄 𑀘 𑀓𑀲𑀺𑀡𑀫𑀡𑁆𑀟𑀮𑁂 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀁𑀲𑀘𑀓𑁆𑀔𑀼𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀢𑁂𑀦𑀸𑀢𑀺 ‘‘𑀫𑀕𑁆𑀕𑁄’’𑀢𑀺 𑀯𑀘𑀦𑁂𑀦. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀧𑀘𑁆𑀘𑀬𑁂𑀦𑀸𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀦 𑀧𑀘𑁆𑀘𑀬𑀪𑀽𑀢𑁂𑀦 𑀉𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀦𑀺. 𑀛𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀲 𑀳𑁂𑀲𑀸 𑀮𑀤𑁆𑀥𑀺.

𑁩𑁭𑁪. 𑀬𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀪𑀸𑀯𑀲𑁆𑀲 𑀇𑀘𑁆𑀙𑀦𑁂𑀦 𑀧𑀝𑀺𑀚𑀸𑀦𑀦𑁂𑀦. 𑀢𑀻𑀡𑀺 𑀘𑀓𑁆𑀔𑀽𑀦𑀺 𑀫𑀁𑀲𑀤𑀺𑀩𑁆𑀩𑀧𑀜𑁆𑀜𑀸𑀘𑀓𑁆𑀔𑀽𑀦𑀺 𑀘𑀓𑁆𑀔𑀼𑀦𑁆𑀢𑀭𑀪𑀸𑀯𑀁 𑀯𑀤𑀢𑁄 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀁 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁩𑁭𑁭. 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀢𑁆𑀢𑀸 ‘‘𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, 𑀦 𑀬𑀣𑀸𑀓𑀫𑁆𑀫𑀽𑀧𑀕𑀢𑀚𑀸𑀦𑀦𑀓𑀺𑀘𑁆𑀘𑀓𑁂 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀺 𑀢𑀲𑁆𑀲 𑀢𑀁𑀓𑀺𑀘𑁆𑀘𑀓𑀢𑀸𑀪𑀸𑀯𑀢𑁄. 𑀬𑀢𑁄 𑀬𑀁 𑀅𑀦𑀜𑁆𑀜𑀁, 𑀢𑀫𑁆𑀧𑀺 ¶ 𑀢𑀢𑁄 𑀅𑀦𑀜𑁆𑀜𑀫𑁂𑀯𑀸𑀢𑀺 𑀆𑀳 ‘‘𑀇𑀫𑀺𑀦𑀸…𑀧𑁂… 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀦𑁆𑀢𑀭𑀪𑀸𑀯𑀁 𑀦𑀺𑀯𑀸𑀭𑁂𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀓𑁆𑀔𑀺𑀓𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀲𑁆𑀲 𑀢𑀢𑁄 𑀅𑀢𑁆𑀣𑀦𑁆𑀢𑀭𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀲 𑀳𑀺 𑀢𑀁 𑀧𑀭𑀺𑀪𑀡𑁆𑀟𑀜𑀸𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀢𑁄 𑀅𑀢𑁆𑀣𑀦𑁆𑀢𑀭𑀪𑀸𑀯𑀁 𑀦 𑀦𑀺𑀯𑀸𑀭𑁂𑀢𑀺 𑀅𑀢𑀧𑁆𑀧𑀓𑁆𑀔𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀺𑀘𑁆𑀘𑀢𑀸 𑀧𑀭𑀯𑀸𑀤𑀺𑀦𑀸 𑀇𑀘𑁆𑀙𑀺𑀢𑀸, 𑀦 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀢𑀸𑀢𑀺 𑀢𑀫𑀢𑁆𑀣𑀁 ‘‘𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼’’𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯-𑀲𑀤𑁆𑀤𑁄 𑀘𑀸’’𑀢𑀺𑀆𑀤𑀺𑀫𑀸𑀳.

𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 ¶ ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀓𑁆𑀔𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀅𑀧𑁆𑀧𑀝𑀺𑀯𑀺𑀭𑀢𑀸’’𑀢𑀺 (𑀤𑀻. 𑀦𑀺. 𑁩.𑁨𑁭𑁬, 𑁨𑁮𑁬) 𑀆𑀕𑀢𑀢𑁆𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀁𑀯𑀭𑀸𑀲𑀁𑀯𑀭𑀲𑀩𑁆𑀪𑀸𑀯𑁄 𑀅𑀯𑀺𑀯𑀸𑀤𑀲𑀺𑀤𑁆𑀥𑁄. 𑀬𑀢𑁆𑀣 𑀧𑀦 𑀯𑀺𑀯𑀸𑀤𑁄, 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀢𑀸𑀯𑀢𑀺𑀁𑀲𑀸𑀤𑀬𑁄 𑀕𑀳𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀢𑀸𑀯𑀢𑀺𑀁𑀲𑁂𑀲𑀼 𑀲𑀁𑀯𑀭𑀸𑀲𑀁𑀯𑀭𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂. 𑀲𑀼𑀭𑀸𑀧𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀼𑀬𑁆𑀬𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀓𑀣𑀁 𑀲𑀼𑀬𑁆𑀬𑀢𑀻𑀢𑀺? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀼𑀫𑁆𑀪𑀚𑀸𑀢𑀓𑁂 𑁋

‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀧𑀼𑀩𑁆𑀩𑀤𑁂𑀯𑀸 𑀧𑀫𑀢𑁆𑀢𑀸,

𑀢𑀺𑀤𑀺𑀯𑀸 𑀘𑀼𑀢𑀸 𑀲𑀲𑁆𑀲𑀢𑀺𑀬𑀸 𑀲𑀫𑀸𑀬𑀸;

𑀢𑀁 𑀢𑀸𑀤𑀺𑀲𑀁 𑀫𑀚𑁆𑀚𑀫𑀺𑀫𑀁 𑀦𑀺𑀭𑀢𑁆𑀣𑀁,

𑀚𑀸𑀦𑀁 𑀫𑀳𑀸𑀭𑀸𑀚 𑀓𑀣𑀁 𑀧𑀺𑀯𑁂𑀬𑁆𑀬𑀸’’𑀢𑀺. (𑀚𑀸. 𑁧.𑁧𑁬.𑁫𑁮);

𑀢𑀢𑁆𑀣 𑀧𑀼𑀩𑁆𑀩𑀤𑁂𑀯𑀸 𑀦𑀸𑀫 𑀅𑀲𑀼𑀭𑀸. 𑀢𑁂 𑀳𑀺 𑀢𑀸𑀯𑀢𑀺𑀁𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑀤𑁂𑀯𑀸𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀧𑀫𑀢𑁆𑀢𑀸𑀢𑀺 𑀲𑀼𑀭𑀸𑀧𑀸𑀦𑁂𑀦 𑀧𑀫𑀸𑀤𑀁 𑀆𑀧𑀦𑁆𑀦𑀸. 𑀢𑀺𑀤𑀺𑀯𑀸𑀢𑀺 𑀫𑀦𑀼𑀲𑁆𑀲𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀮𑁄𑀓𑁂 𑀉𑀧𑀸𑀤𑀸𑀬 𑀢𑀢𑀺𑀬𑀮𑁄𑀓𑀪𑀽𑀢𑀸 𑀤𑁂𑀯𑀝𑁆𑀞𑀸𑀦𑀸, 𑀦𑀸𑀫𑀫𑁂𑀯 𑀯𑀸 𑀏𑀢𑀁 𑀢𑀲𑁆𑀲 𑀤𑁂𑀯𑀝𑁆𑀞𑀸𑀦𑀲𑁆𑀲. 𑀲𑀲𑁆𑀲𑀢𑀺𑀬𑀸𑀢𑀺 𑀓𑁂𑀯𑀮𑀁 𑀤𑀻𑀖𑀸𑀬𑀼𑀓𑀢𑀁 ¶ 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑀸𑀬𑀸 𑀲𑀳 𑀅𑀢𑁆𑀢𑀦𑁄 𑀅𑀲𑀼𑀭𑀫𑀸𑀬𑀸𑀬, 𑀅𑀲𑀼𑀭𑀫𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀼𑀢𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸𑀢𑀺 𑀦𑁂𑀯𑀸𑀲𑀺𑀓𑀸 𑀕𑀦𑁆𑀥𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀲𑀓𑀧𑀭𑀺𑀲𑀸𑀬 𑀲𑀜𑁆𑀜𑀫𑀤𑀸𑀲𑀻’’𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀲𑀼𑀭𑀸𑀧𑀸𑀦𑀁 𑀅𑀲𑀁𑀯𑀭𑁄 𑀦 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻’’𑀢𑀺. 𑀏𑀢𑁆𑀣 𑀘 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀼𑀭𑀸𑀧𑀸𑀦𑀫𑁆𑀧𑀺 𑀢𑀢𑁆𑀣 𑀦𑀸𑀳𑁄𑀲𑀺, 𑀧𑀕𑁂𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄𑀢𑀺 𑀯𑀺𑀭𑀫𑀺𑀢𑀩𑁆𑀩𑀸𑀪𑀸𑀯𑀢𑁄 𑀏𑀯 𑀢𑀸𑀯𑀢𑀺𑀁𑀲𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺 𑀤𑁂𑀯𑀮𑁄𑀓𑁂𑀲𑀼 𑀲𑀫𑀸𑀤𑀸𑀦𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦 𑀧𑀼𑀭𑁂𑀢𑀩𑁆𑀩𑀸 𑀲𑀁𑀯𑀭𑀸 𑀦 𑀲𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀲𑀦𑁆𑀢𑀺𑀬𑁂𑀯. 𑀢𑀣𑀸 𑀢𑁂𑀳𑀺 𑀧𑀳𑀸𑀢𑀩𑁆𑀩𑀸 𑀅𑀲𑀁𑀯𑀭𑀸. 𑀦 𑀳𑀺 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀸𑀦𑀁 𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀻𑀢𑀺.

𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁮𑁭. 𑀕𑀺𑀳𑀺𑀙𑀦𑁆𑀤𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑀸𑀢𑀺 ¶ 𑀕𑀺𑀳𑀺𑀪𑀸𑀯𑁂 𑀓𑀸𑀫𑀪𑁄𑀕𑀺𑀪𑀸𑀯𑁂 𑀙𑀦𑁆𑀤𑀭𑀸𑀕𑀲𑀳𑀺𑀢𑀢𑀸𑀬.

𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁩𑁯𑁩. 𑀧𑀢𑁆𑀢𑀺𑀦𑁆𑀢𑀺 𑀅𑀥𑀺𑀕𑀫𑁄. 𑀅𑀥𑀺𑀕𑀫𑁄 𑀦𑀸𑀫 𑀲𑀫𑀦𑁆𑀦𑀸𑀕𑀫𑁄 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 𑀘𑀢𑀽𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀫𑁄 𑀘𑁄𑀤𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁩𑁯𑁭. 𑀲𑀩𑁆𑀩𑀁 ¶ 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀤𑀺 𑀢𑁂 𑀅𑀭𑀳𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀯𑀺𑀬 𑀙𑀳𑀺 𑀉𑀧𑁂𑀓𑁆𑀔𑀸𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀯𑀁 𑀲𑀦𑁆𑀢𑁂 𑀙 𑀉𑀧𑁂𑀓𑁆𑀔𑀸 𑀧𑀘𑁆𑀘𑁂𑀓𑀁 𑀨𑀲𑁆𑀲𑀸𑀤𑀺𑀲𑀳𑀺𑀢𑀸𑀢𑀺 ‘‘𑀙𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀩𑁄𑀥𑀺𑀬𑀸𑀩𑀼𑀤𑁆𑀥𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁯𑁮. 𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦𑀸𑀢𑀺 ‘‘𑀧𑀢𑁆𑀢𑀺𑀥𑀫𑁆𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦. ‘‘𑀩𑁄𑀥𑀺𑀬𑀸 𑀩𑀼𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀸. ‘‘𑀩𑁄𑀥𑀺𑀬𑀸 𑀦𑀺𑀭𑀼𑀤𑁆𑀥𑀸𑀬 𑀯𑀺𑀕𑀢𑀸𑀬 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀬 𑀅𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀅𑀦𑀼𑀬𑁄𑀕𑁄. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀧𑀼𑀘𑁆𑀙𑀸𑀦𑀼𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸.

𑀩𑁄𑀥𑀺𑀬𑀸𑀩𑀼𑀤𑁆𑀥𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀅𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀘𑀭𑀺𑀫𑀪𑀯𑀢𑁄 𑀅𑀜𑁆𑀜𑀢𑁆𑀣 𑀅𑀲𑀫𑀦𑁆𑀦𑀸𑀕𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑁄𑀯𑀸𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀅𑀲𑀸𑀥𑀓𑀁. 𑀢𑁂𑀦𑀸𑀳 ‘‘𑀆𑀪𑀢𑀫𑁆𑀧𑀺 𑀅𑀦𑀸𑀪𑀢𑀲𑀤𑀺𑀲𑀫𑁂𑀯𑀸’’𑀢𑀺.

𑀮𑀓𑁆𑀔𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁦𑁩. 𑀧𑀸𑀭𑀫𑀻𑀧𑀽𑀭𑀡𑀦𑁆𑀢𑀺 ¶ 𑀇𑀤𑀁 𑀩𑁄𑀥𑀺𑀘𑀭𑀺𑀬𑀸𑀬 𑀉𑀧𑀮𑀓𑁆𑀔𑀡𑀁, 𑀦 𑀧𑀸𑀭𑀫𑀻𑀦𑀁 𑀧𑀼𑀡𑁆𑀡𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦 𑀢𑁂𑀲𑀁 𑀆𑀭𑀫𑁆𑀪𑀲𑀫𑀸𑀤𑀸𑀦𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀫𑀳𑀸𑀲𑀢𑁆𑀢𑀸 𑀦𑀺𑀬𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸’’𑀢𑀺, ‘‘𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘, 𑀦 𑀦𑀺𑀬𑀸𑀫𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀣 𑀔𑁄 𑀏𑀓𑀁𑀲𑁂𑀦𑀸𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀧𑀭𑀯𑀸𑀤𑀻𑀧𑀭𑀺𑀓𑀧𑁆𑀧𑀺𑀢𑀁 𑀥𑀫𑁆𑀫𑀦𑁆𑀢𑀭𑀁 𑀧𑀝𑀺𑀲𑁂𑀥𑁂𑀢𑀺, 𑀦 𑀩𑁄𑀥𑀺𑀬𑀸 𑀦𑀺𑀬𑀢𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑁂𑀯𑀮𑀜𑁆𑀳𑀺 𑀦’’𑀦𑁆𑀢𑀺𑀆𑀤𑀺.

𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁧𑁩. 𑀲𑀢𑀺𑀧𑀺 𑀓𑁂𑀲𑀜𑁆𑀘𑀺 𑀲𑀁𑀬𑁄𑀚𑀦𑀸𑀦𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀧𑀳𑀻𑀦𑀢𑁆𑀢𑁂 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀡𑁆𑀡𑀪𑀡𑀦𑀫𑀼𑀔𑁂𑀦 𑀅𑀦𑀯𑀲𑁂𑀲𑀢𑀜𑁆𑀘 𑀲𑀦𑁆𑀥𑀸𑀬 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀺𑀢𑁆𑀢𑀦𑀁 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀫𑀁 𑀧𑀭𑀺𑀬𑀸𑀬𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀚𑀳𑀦𑀢𑁄 𑀏𑀯𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑁄 𑀏𑀯 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀺 𑀧𑀚𑀳𑀢𑀻𑀢𑀺 𑀮𑀤𑁆𑀥𑀺𑀁 𑀕𑀡𑁆𑀳𑀸𑀢𑀻𑀢𑀺 𑀯𑀤𑀦𑁆𑀢𑀺 𑀧𑀤𑀓𑀸𑀭𑀸. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀅𑀦𑀯𑀲𑁂𑀲𑀢𑀸𑀫𑀢𑁆𑀢𑁂𑀦 𑀢𑀣𑀸 𑀧𑀝𑀺𑀚𑀸𑀦𑀸𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁧. 𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁧𑁮. 𑀨𑀮𑀜𑀸𑀡𑀁 ¶ ¶ 𑀦 𑀳𑁄𑀢𑀺, 𑀲𑁂𑀲𑀸𑀦𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀜𑀸𑀡𑁂𑀲𑀼. 𑀯𑀺𑀧𑀲𑁆𑀲𑀦𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀁 𑀫𑀕𑁆𑀕𑀸𑀤𑀺𑀓𑀺𑀘𑁆𑀘𑀯𑀺𑀤𑀽𑀭𑀓𑀺𑀘𑁆𑀘𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘.

𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁨𑁧. 𑀅𑀲𑁂𑀔𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀅𑀲𑁂𑀔𑀜𑀸𑀡𑀦𑁆𑀢𑀺 𑀧𑀭𑀲𑁆𑀲 𑀮𑀤𑁆𑀥𑀺, 𑀦 𑀅𑀲𑁂𑀔𑁂 𑀅𑀲𑁂𑀔𑀥𑀫𑁆𑀫𑁂 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀏𑀢𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺.

𑀅𑀲𑁂𑀔𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸

𑁪𑁨𑁪. 𑀅𑀲𑀺𑀯𑁂 𑀲𑀺𑀯𑀸𑀢𑀺 𑀯𑁄𑀳𑀸𑀭𑀁 𑀯𑀺𑀬 𑀅𑀜𑁆𑀜𑀸𑀡𑁂…𑀧𑁂… 𑀯𑀤𑀢𑀺.

𑀯𑀺𑀧𑀭𑀻𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁪𑁨𑁮-𑁪𑁩𑁧. 𑀬𑀦𑁆𑀢𑀺 ¶ 𑀬𑀁 𑀜𑀸𑀡𑀁. 𑀲𑀘𑁆𑀘𑀸𑀦𑀼𑀮𑁄𑀫𑀦𑁆𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀦𑀼𑀓𑀽𑀮𑀁. 𑀯𑀺𑀧𑀭𑀻𑀢𑀸𑀦𑀼𑀬𑁄𑀕𑀢𑁄 𑀧𑀪𑀼𑀢𑀺 𑀕𑀡𑁂𑀢𑁆𑀯𑀸 ‘‘𑀘𑀢𑀼𑀢𑁆𑀣’’𑀦𑁆𑀢𑀺 𑀆𑀳 𑀦 𑀅𑀦𑀺𑀬𑀢𑀲𑁆𑀲 𑀦𑀺𑀬𑀸𑀫𑀕𑀫𑀦𑀸𑀬𑀸𑀢𑀺 𑀅𑀯𑀺𑀧𑀭𑀻𑀢𑀸𑀦𑀼𑀬𑁄𑀕𑀢𑁄 𑀧𑀪𑀼𑀢𑀺 𑀕𑀡𑁂𑀢𑁆𑀯𑀸, 𑀢𑀣𑀸 𑀲𑀢𑀺 𑀧𑀜𑁆𑀘𑀫𑀪𑀸𑀯𑀢𑁄 𑀯𑀺𑀲𑁂𑀲𑀪𑀸𑀯𑀢𑁄 𑀘.

𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸

𑁪𑁩𑁨-𑁪𑁩𑁩. 𑀲𑀩𑁆𑀩𑀁 ¶ 𑀜𑀸𑀡𑀦𑁆𑀢𑀺 𑀇𑀤𑀁 ‘‘𑀅𑀭𑀺𑀬𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀦𑀭𑀺𑀬𑀸𑀦𑀫𑁆𑀧𑀺 𑀳𑀺 𑀜𑀸𑀡𑀁 𑀜𑀸𑀡𑀫𑁂𑀯𑀸’’𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀁 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀁 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀭𑀺𑀬𑀲𑁆𑀲 𑀘𑁂 𑀜𑀸𑀡𑀦𑁆𑀢𑀺, 𑀲𑁄 𑀧𑀦 𑀧𑀝𑀺𑀓𑁆𑀔𑁂𑀧𑁂𑀬𑁆𑀬𑀸𑀢𑀺 𑀆𑀳 ‘‘𑀅𑀦𑀭𑀺𑀬𑀲𑁆𑀲 𑀏𑀢𑀁 𑀜𑀸𑀡𑀁 𑀲𑀦𑁆𑀥𑀸𑀬𑀸’’𑀢𑀺.

𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁬-𑁪𑁩𑁮. 𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸𑀢𑀺 𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀢𑁆𑀢𑀩𑁆𑀩𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀝𑀺𑀜𑁆𑀜𑀸.

𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁩𑁯-𑁪𑁪𑁦. 𑀅𑀦𑀦𑁆𑀢𑀭𑀸𑀦𑀸𑀕𑀢𑁂𑀧𑀺 ¶ 𑀘𑀺𑀢𑁆𑀢𑁂 𑀜𑀸𑀡𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀧𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀺𑀬 𑀢𑀸𑀤𑀺𑀲𑁂𑀦 𑀧𑀭𑀺𑀓𑀫𑁆𑀫𑁂𑀦 𑀓𑀤𑀸𑀘𑀺 𑀜𑀸𑀡𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀢𑁂𑀦𑀸𑀳 ‘‘𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑁂𑀦𑁂𑀯 𑀜𑀸𑀡𑀁 𑀦𑀢𑁆𑀣𑀻’’𑀢𑀺.

𑀅𑀦𑀸𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁧-𑁪𑁪𑁨. ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑁂𑀲𑀽’’𑀢𑀺 𑀯𑀼𑀢𑁆𑀢𑁂 𑀬𑀁 𑀤𑀲𑁆𑀲𑀦𑀪𑀽𑀢𑀁 𑀜𑀸𑀡𑀁, 𑀢𑀫𑁆𑀧𑀺 𑀲𑀗𑁆𑀔𑀸𑀭𑀲𑀪𑀸𑀯𑀢𑁆𑀢𑀸 𑀢𑀣𑀸𑀤𑀺𑀝𑁆𑀞𑀁 𑀲𑀺𑀬𑀸𑀢𑀺 𑀅𑀢𑁆𑀣𑀢𑁄 𑀆𑀧𑀚𑁆𑀚𑀢𑀺, 𑀏𑀯𑀁𑀪𑀽𑀢𑀁 𑀯𑀘𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀯𑀘𑀦’’𑀦𑁆𑀢𑀺. 𑀢𑀁 𑀧𑀦 𑀬𑀲𑁆𑀫𑀸 ‘‘𑀢𑀫𑁆𑀧𑀺 𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀁 𑀳𑁄𑀢𑀻’’𑀢𑀺 𑀧𑀝𑀺𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀲𑁆𑀫𑀸 ‘‘𑀅𑀦𑀼𑀚𑀸𑀦𑀦𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁.

𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁪𑁩-𑁪𑁪𑁪. 𑀨𑀮𑀧𑀭𑁄𑀧𑀭𑀺𑀬𑀢𑁆𑀢𑀁 ¶ 𑀨𑀮𑀲𑁆𑀲 𑀉𑀘𑁆𑀘𑀸𑀯𑀘𑀢𑀸. 𑀩𑀮𑁂𑀦𑀸𑀢𑀺 𑀜𑀸𑀡𑀩𑀮𑁂𑀦.

𑀨𑀮𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁬. 𑀙𑀝𑁆𑀞𑀯𑀕𑁆𑀕𑁄

𑁧. 𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁪𑁪𑁫-𑁪𑁪𑁭. 𑀏𑀢𑀲𑁆𑀲 ¶ 𑀅𑀭𑀺𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲.

𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀓𑀸𑀭𑀡𑀝𑁆𑀞𑁂𑀦 𑀞𑀺𑀢𑀢𑀸𑀢𑀺 𑀓𑀸𑀭𑀡𑀪𑀸𑀯𑁂𑀦 𑀩𑁆𑀬𑀪𑀺𑀘𑀭𑀡𑀸𑀪𑀸𑀯𑀫𑀸𑀳. 𑀬𑁄 𑀳𑀺 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀬𑀤𑀸 𑀓𑀸𑀭𑀡𑀁 𑀳𑁄𑀢𑀺, 𑀦 𑀢𑀲𑁆𑀲 𑀢𑀤𑀸 𑀅𑀜𑁆𑀜𑀣𑀸𑀪𑀸𑀯𑁄 𑀅𑀢𑁆𑀣𑀺, 𑀲𑀸 𑀘 𑀅𑀢𑁆𑀣𑀢𑁄 𑀓𑀸𑀭𑀡𑀪𑀸𑀯𑁄𑀬𑁂𑀯𑀸𑀢𑀺 ‘‘𑀓𑀸𑀭𑀡𑀪𑀸𑀯𑁄𑀬𑁂𑀯𑀸’’𑀢𑀺 𑀆𑀳.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁫𑁭-𑁪𑁫𑁯. 𑀲𑀪𑀸𑀯𑀥𑀫𑁆𑀫𑀢𑀁 𑀧𑀝𑀺𑀲𑁂𑀥𑁂𑀢𑀺 𑀢𑀤𑀼𑀪𑀬𑀮𑀓𑁆𑀔𑀡𑀭𑀳𑀺𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀸. ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀘𑀦𑀢𑁄 ‘‘𑀯𑁄𑀤𑀸𑀦𑀜𑁆𑀘 𑀯𑀼𑀝𑁆𑀞𑀸𑀦𑀧𑀭𑀺𑀬𑀸𑀬𑁄𑀯𑀸’’𑀢𑀺 𑀆𑀳. 𑀲𑀪𑀸𑀯𑀥𑀫𑁆𑀫𑀢𑁆𑀢𑁂 𑀲𑀺𑀤𑁆𑀥𑁂 𑀲𑀗𑁆𑀔𑀢𑀯𑀺𑀤𑀽𑀭𑀢𑀸𑀬 𑀅𑀲𑀗𑁆𑀔𑀢𑀁 𑀲𑀺𑀬𑀸𑀢𑀺 𑀆𑀳 ‘‘𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀲𑀸𑀥𑀓𑀢𑁆𑀢𑀸’’𑀢𑀺.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀯𑀕𑁆𑀕𑁄

𑁧. 𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁧-𑁪𑁭𑁨. 𑀲𑀗𑁆𑀕𑀳𑀺𑀢𑀸𑀢𑀺 ¶ ¶ 𑀲𑀗𑁆𑀕𑀳𑀡𑀸𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀕𑀳𑀺𑀢𑀸. 𑀢𑁂 𑀧𑀦 𑀬𑀲𑁆𑀫𑀸 𑀏𑀓𑀯𑀺𑀥𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀩𑀦𑁆𑀥𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀫𑁆𑀩𑀦𑁆𑀥𑀸’’𑀢𑀺.

𑀲𑀗𑁆𑀕𑀳𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁭𑁩-𑁪𑁭𑁪. 𑀅𑀦𑀼𑀧𑁆𑀧𑀯𑀺𑀲𑀺𑀢𑀩𑁆𑀩𑀸𑀦𑀼𑀧𑁆𑀧𑀯𑀺𑀲𑀦𑀪𑀸𑀯𑁄 𑀢𑁂𑀲𑀁 𑀪𑁂𑀤𑁂 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀦𑀸𑀜𑁆𑀜𑀣𑀸𑀢𑀺 𑀉𑀧𑀫𑀸𑀪𑀺𑀦𑁆𑀤𑀦𑁂𑀦 𑀉𑀧𑀫𑁂𑀬𑁆𑀬𑀲𑁆𑀲 𑀪𑀺𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀦𑀢𑁆𑀢𑀯𑀯𑀢𑁆𑀣𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺 𑀆𑀳.

𑀲𑀫𑁆𑀧𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸

𑁪𑁭𑁫-𑁪𑁭𑁭. 𑀨𑀲𑁆𑀲𑀺𑀓𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀯𑀯𑀢𑁆𑀣𑀸𑀯𑀸𑀘𑀻. 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑀁 𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀸 𑀯𑁂𑀤𑀦𑀸𑀤𑀬𑁄 𑀕𑀬𑁆𑀳𑀦𑁆𑀢𑀺, 𑀦 𑀢𑀁𑀲𑀫𑀼𑀝𑁆𑀞𑀸𑀦𑀸 𑀭𑀽𑀧𑀥𑀫𑁆𑀫𑀸𑀢𑀺 𑀆𑀳 ‘‘𑀏𑀓𑀼𑀧𑁆𑀧𑀸𑀤𑀢𑀸𑀤𑀺𑀯𑀺𑀭𑀳𑀺𑀢𑀸 𑀲𑀳𑀚𑀸𑀢𑀢𑀸 𑀦𑀢𑁆𑀣𑀻’’𑀢𑀺.

𑀘𑁂𑀢𑀲𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁭𑁯. 𑀨𑀮𑀤𑀸𑀦𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 ¶ 𑀨𑀮𑀤𑀸𑀦𑀲𑀩𑁆𑀪𑀸𑀯𑀤𑀻𑀧𑀦𑀢𑁆𑀣𑀁. 𑀨𑀮𑀤𑀸𑀦𑀁 𑀯𑀼𑀢𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀘𑀺𑀢𑁆𑀢𑁂𑀦 𑀨𑀮𑀤𑀸𑀦𑀁 𑀧𑀥𑀸𑀦𑀪𑀸𑀯𑁂 𑀯𑀼𑀢𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀤𑀸𑀦𑀪𑀸𑀯𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀤𑀸𑀦𑀪𑀸𑀯𑁄𑀧𑀺 𑀳𑀺 ‘‘𑀤𑀸𑀦𑀁 𑀅𑀦𑀺𑀝𑁆𑀞𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀬𑁂𑀯𑀸𑀢𑀺. 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺 𑀨𑀮𑀤𑀸𑀦𑀦𑀺𑀯𑀸𑀭𑀡𑀢𑁆𑀣𑀁. 𑀏𑀢𑀦𑁆𑀢𑀺 ‘‘𑀤𑀸𑀦𑀁 𑀅𑀦𑀺𑀝𑁆𑀞𑀨𑀮’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀪𑁂𑀲𑀚𑁆𑀚𑀸𑀤𑀺𑀯𑀲𑁂𑀦 𑀆𑀩𑀸𑀥𑀸𑀦𑀺𑀝𑁆𑀞𑀢𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀺𑀝𑁆𑀞𑀨𑀮𑀢𑀸𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄.

𑀓𑀣𑀁 ¶ 𑀢𑀣𑁂𑀯 𑀲𑀼𑀢𑁆𑀢𑀁 𑀲𑀓𑀯𑀸𑀤𑀺𑀧𑀭𑀯𑀸𑀤𑀺𑀯𑀸𑀤𑁂𑀲𑀼 𑀬𑀼𑀚𑁆𑀚𑀢𑀻𑀢𑀺 𑀘𑁄𑀤𑀦𑀸𑀬 ‘‘𑀦 𑀧𑀦 𑀏𑀓𑁂𑀦𑀢𑁆𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑁂𑀬𑁆𑀬𑀥𑀫𑁆𑀫𑁄𑀯 𑀤𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀯𑀢𑁆𑀢𑀦𑀧𑀓𑁆𑀔𑁂𑀬𑁂𑀯 𑀏𑀯-𑀓𑀸𑀭𑁄 𑀬𑀼𑀢𑁆𑀢𑁄, 𑀦 𑀲𑀸𑀥𑀦𑀧𑀓𑁆𑀔𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀸𑀦𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀘𑁂𑀢𑀲𑀺𑀓𑁄𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀤𑁂𑀬𑁆𑀬𑀥𑀫𑁆𑀫𑁄𑀯𑀸’’𑀢𑀺 𑀘. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀺𑀦𑁆𑀦𑀜𑁆𑀳𑀺 𑀤𑀸𑀦𑀸𑀦𑀦𑁆𑀢𑀺𑀆𑀤𑀺. 𑀲𑀗𑁆𑀓𑀭𑀪𑀸𑀯𑀫𑁄𑀘𑀦𑀢𑁆𑀣𑀦𑁆𑀢𑀺 𑀲𑀢𑀺𑀧𑀺 𑀤𑀸𑀦𑀪𑀸𑀯𑁂 𑀲𑀪𑀸𑀯𑀲𑀗𑁆𑀓𑀭𑀫𑁄𑀘𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀘𑁂𑀢𑀲𑀺𑀓𑀲𑁆𑀲𑀸’’𑀢𑀺𑀆𑀤𑀺.

𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁪𑁮𑁫. 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺𑀬𑀸. 𑀏𑀢𑁂𑀲𑀦𑁆𑀢𑀺 𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀸𑀦𑀁.

𑁪𑁮𑁬. 𑀅𑀬𑀁 𑀯𑀸𑀤𑁄 𑀳𑀻𑀬𑀢𑀺 𑀧𑀭𑀺𑀪𑁄𑀕𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀘𑀸𑀕𑀘𑁂𑀢𑀦𑀸𑀬 𑀏𑀯 𑀧𑀼𑀜𑁆𑀜𑀪𑀸𑀯𑁄, 𑀦 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦, 𑀅𑀧𑀭𑀺𑀪𑀼𑀢𑁆𑀢𑁂 𑀤𑁂𑀬𑁆𑀬𑀥𑀫𑁆𑀫𑁂 𑀧𑀼𑀜𑁆𑀜𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀪𑀼𑀢𑁆𑀢𑁂 𑀤𑁂𑀬𑁆𑀬𑀥𑀫𑁆𑀫𑁂 𑀧𑀼𑀜𑁆𑀜𑀪𑀸𑀯𑀢𑁄 𑀏𑀯 𑀳𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁂 𑀢𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑁂 𑀤𑀸𑀦𑀫𑁂𑀯𑀸𑀢𑀺 𑀦𑀺𑀘𑁆𑀙𑀺𑀢𑀁. 𑀧𑀭𑀯𑀸𑀤𑀻𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀲𑀓𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀧𑀞𑀫𑁄 𑀅𑀢𑁆𑀣𑀯𑀺𑀓𑀧𑁆𑀧𑁄, 𑀤𑀼𑀢𑀺𑀬𑁄 𑀧𑀦 𑀉𑀚𑀼𑀓𑀫𑁂𑀯 𑀲𑀓𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀇𑀢𑁄𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁪𑁮𑁮-𑁪𑁯𑁧. 𑀢𑁂𑀦𑁂𑀯 ¶ 𑀘𑀻𑀯𑀭𑀸𑀤𑀺𑀤𑀸𑀦𑁂𑀦𑀸𑀢𑀺 𑀅𑀦𑀼𑀫𑁄𑀤𑀦𑀁 𑀯𑀺𑀦𑀸 𑀤𑀸𑀬𑀓𑁂𑀦 𑀧𑀯𑀢𑁆𑀢𑀺𑀢𑀘𑀻𑀯𑀭𑀸𑀤𑀺𑀤𑀸𑀦𑁂𑀦. 𑀢𑁂𑀦𑀸𑀳 ‘‘𑀲𑀬𑀁𑀓𑀢𑁂𑀦 𑀓𑀫𑁆𑀫𑀼𑀦𑀸 𑀯𑀺𑀦𑀸𑀧𑀻’’𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀅𑀦𑀼𑀫𑁄𑀤𑀺𑀢𑀢𑁆𑀢𑀸𑀯 𑀢𑁂𑀲𑀁 𑀢𑀢𑁆𑀣 𑀪𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁂𑀦 𑀓𑀸𑀭𑀡𑁂𑀦. 𑀬𑀤𑀺 𑀬𑀦𑁆𑀢𑀺𑀆𑀤𑀺 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀬𑀤𑀺 𑀦 𑀬𑀸𑀧𑁂𑀬𑁆𑀬𑀼𑀁, 𑀓𑀣𑀁 𑀅𑀦𑀼𑀫𑁄𑀤𑁂𑀬𑁆𑀬𑀼𑀁, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀼𑀁 ¶ , 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀲𑁄𑀫𑀦𑀲𑁆𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀏𑀓𑀘𑁆𑀘𑁂 𑀅𑀜𑁆𑀜𑁂 𑀧𑁂𑀢𑁂 𑀅𑀦𑀼𑀫𑁄𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀬𑀸𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 𑀅𑀦𑀼𑀫𑁄𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑁄𑀤𑀺𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁨. 𑀅𑀢𑁆𑀢𑀯𑀚𑁆𑀚𑁂𑀳𑀻𑀢𑀺 𑀨𑀲𑁆𑀲𑀯𑀚𑁆𑀚𑁂𑀳𑀺. 𑀦 𑀳𑀺 𑀲𑁄 𑀏𑀯 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀳𑁄𑀢𑀺. 𑀲𑁄𑀢𑀺 𑀨𑀲𑁆𑀲𑀫𑁂𑀯 𑀧𑀘𑁆𑀘𑀸𑀫𑀲𑀢𑀺. 𑀲𑀸𑀯𑀚𑁆𑀚𑀦𑁂𑀢𑀺 𑀆𑀯𑀚𑁆𑀚𑀦𑀲𑀳𑀺𑀢𑁂, 𑀆𑀯𑀚𑁆𑀚𑀦𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀏𑀯 𑀧𑀯𑀢𑁆𑀢𑀦𑀓𑁂𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀪𑀽𑀢𑀫𑁂𑀯𑀸𑀢𑀺 𑀬𑁂𑀦 𑀓𑀫𑁆𑀫𑀼𑀦𑀸 𑀬𑀣𑀸𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀦𑀺𑀩𑁆𑀩𑀢𑁆𑀢𑀺𑀢𑀸, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀫𑁂𑀯. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀲𑁆𑀲. ‘‘𑀫𑀽𑀮𑀢𑀡𑁆𑀳𑀸’’𑀢𑀺 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸, 𑀢𑀣𑀸 ‘‘𑀉𑀧𑀦𑀺𑀲𑁆𑀲𑀬𑀪𑀽𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀓𑀫𑁆𑀫𑀸𑀬𑀽𑀳𑀦𑀲𑁆𑀲 𑀓𑀸𑀭𑀡𑀪𑀽𑀢𑀸 𑀧𑀼𑀭𑀺𑀫𑀲𑀺𑀤𑁆𑀥𑀸 𑀢𑀡𑁆𑀳𑀸 𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄, 𑀓𑀢𑀽𑀧𑀘𑀺𑀢𑁂 𑀓𑀫𑁆𑀫𑁂 𑀪𑀯𑀸𑀤𑀻𑀲𑀼 𑀦𑀫𑀦𑀯𑀲𑁂𑀦 𑀧𑀯𑀢𑁆𑀢𑀸 𑀳𑀺 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄.

𑁪𑁯𑁩. 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀅𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑁄 𑀲𑀓𑀲𑀫𑀬𑀯𑀲𑁂𑀦 𑀘𑁄𑀤𑀦𑀸𑀬 𑀬𑀼𑀚𑁆𑀚𑀫𑀸𑀦𑀢𑀸.

𑁪𑁯𑁪. 𑀓𑀫𑁆𑀫𑁂 𑀲𑀢𑀻𑀢𑀺 𑀇𑀫𑀺𑀦𑀸 𑀓𑀫𑁆𑀫𑀲𑁆𑀲 𑀧𑀣𑀯𑀻𑀆𑀤𑀻𑀦𑀁 𑀧𑀘𑁆𑀘𑀬𑀢𑀸𑀫𑀢𑁆𑀢𑀫𑀸𑀳, 𑀦 𑀚𑀦𑀓𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀁𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫 𑀳𑁄𑀢𑀻’’𑀢𑀺.

𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀭𑀸𑀫𑀭𑀡𑀁𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁫. 𑀏𑀓𑀸𑀭𑀫𑁆𑀫𑀡𑀸𑀢𑀺 ¶ 𑀇𑀤𑀁 𑀅𑀦𑀸𑀭𑀫𑁆𑀫𑀡𑀢𑀸𑀲𑀸𑀥𑀦𑀯𑀲𑁂𑀦 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀸𑀪𑀸𑀯𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀢𑀲𑁆𑀲𑁂𑀯 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀢𑁆𑀢𑀸.

𑁪𑁯𑁬. 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁. 𑀇𑀢𑀭𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑁪𑁯𑁭. 𑀢𑀦𑁆𑀢𑀺 ‘‘𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀢𑀸 𑀚𑀭𑀸𑀬𑁂𑀯𑀸’’𑀢𑀺 𑀯𑀘𑀦𑀁.

𑀚𑀭𑀸𑀫𑀭𑀡𑀁𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑀺𑀧𑀸𑀓𑁄𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁧. 𑀯𑀺𑀧𑀸𑀓𑁄 ¶ 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀬𑀲𑁆𑀲 𑀯𑀺𑀧𑀸𑀓𑀲𑁆𑀲 𑀯𑀺𑀧𑀸𑀓𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. ‘‘𑀢𑀧𑁆𑀧𑀘𑁆𑀘𑀬𑀸𑀧𑀺 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀬𑀸𑀢𑀺 ‘‘𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄’’𑀢𑀺 𑀧𑀝𑀺𑀜𑁆𑀜𑀸𑀬. 𑀇𑀫𑀲𑁆𑀲 𑀘𑁄𑀤𑀦𑀲𑁆𑀲𑀸𑀢𑀺 ‘‘𑀯𑀺𑀧𑀸𑀓𑁄 𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀘𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑁆𑀲 𑀘𑁄𑀤𑀦𑀲𑁆𑀲.

𑀯𑀺𑀧𑀸𑀓𑁄𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀯𑀕𑁆𑀕𑁄

𑁧. 𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁦𑁩-𑁫𑁦𑁪. 𑀯𑀡𑁆𑀡𑀸 ¶ 𑀏𑀯 𑀦𑀻𑀮𑀸𑀤𑀺𑀯𑀲𑁂𑀦 𑀦𑀺𑀪𑀸𑀢𑀻𑀢𑀺 𑀯𑀡𑁆𑀡𑀦𑀺𑀪𑀸, 𑀯𑀡𑁆𑀡𑀸𑀬𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀡𑁆𑀞𑀸𑀦𑀁 𑀤𑀻𑀖𑀸𑀤𑀺.

𑀙𑀕𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀅𑀦𑁆𑀢𑀭𑀝𑁆𑀞𑀸𑀦𑀸𑀦𑀻𑀢𑀺 𑀅𑀦𑁆𑀢𑀭𑀺𑀓𑀝𑁆𑀞𑀸𑀦𑀸𑀦𑀺. 𑀦𑀺𑀯𑀸𑀭𑀓𑀝𑁆𑀞𑀸𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀘 𑀆𑀓𑀸𑀲𑁂𑀦 𑀘 𑀕𑀫𑀦𑀢𑁄. 𑀬𑀤𑀺 𑀲𑁄 𑀪𑀯𑀸𑀦𑀁 𑀅𑀦𑁆𑀢𑀭𑀸 𑀦 𑀲𑀺𑀬𑀸𑀢𑀺 𑀲𑁄 𑀅𑀦𑁆𑀢𑀭𑀸𑀪𑀯𑁄 𑀓𑀸𑀫𑀪𑀯𑀸𑀤𑀻𑀦𑀁 𑀪𑀯𑀸𑀦𑀁 𑀅𑀦𑁆𑀢𑀭𑁂 𑀬𑀤𑀺 𑀦 𑀪𑀯𑁂𑀬𑁆𑀬. 𑀦 𑀦𑀸𑀫 𑀅𑀦𑁆𑀢𑀭𑀸𑀪𑀯𑁄𑀢𑀺 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺 𑀦𑀸𑀫 𑀅𑀦𑁆𑀢𑀭𑀸𑀪𑀯𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀲𑀓𑀯𑀸𑀤𑀺𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 𑀓𑀸𑀭𑀡𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀣 𑀔𑁄 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀓𑁂𑀯𑀮𑀁 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀢𑁆𑀣𑁄.

𑁫𑁦𑁬. 𑀚𑀸𑀢𑀻𑀢𑀺 𑀦 𑀇𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁭. 𑀏𑀯𑀁 ¶ 𑀢𑀁 𑀢𑀢𑁆𑀣 𑀦 𑀇𑀘𑁆𑀙𑀢𑀻𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀯𑀺𑀬 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀁 𑀢𑀢𑁆𑀣 𑀅𑀦𑁆𑀢𑀭𑀸𑀪𑀯𑀸𑀯𑀢𑁆𑀣𑀸𑀬 𑀦 𑀇𑀘𑁆𑀙𑀢𑀺. 𑀲𑁄 𑀳𑀺 𑀢𑀲𑁆𑀲 𑀪𑀸𑀯𑀺𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀢𑁄 𑀏𑀯 𑀧𑀯𑀢𑁆𑀢𑀺𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀅𑀦𑀺𑀘𑁆𑀘𑀢𑁄 𑀓𑀼𑀢𑁄 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸. 𑀅𑀬𑀜𑁆𑀘 𑀯𑀸𑀤𑁄 𑀅𑀦𑁆𑀢𑀭𑀸𑀪𑀯𑀯𑀸𑀤𑀻𑀦𑀁 𑀏𑀓𑀘𑁆𑀘𑀸𑀦𑀁 𑀯𑀼𑀢𑁆𑀢𑁄. 𑀬𑁂 ‘‘𑀅𑀧𑁆𑀧𑀓𑁂𑀦 𑀓𑀸𑀮𑁂𑀦 𑀲𑀢𑁆𑀢𑀸𑀳𑁂𑀦𑁂𑀯 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀤𑀦𑁆𑀢𑀺, 𑀬𑁂 𑀧𑀦 ‘‘𑀢𑀢𑁆𑀣𑁂𑀯 𑀘𑀯𑀺𑀢𑁆𑀯𑀸 𑀆𑀬𑀸𑀢𑀻𑀢𑀺 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑀸𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸𑀢𑀺 𑀢𑁂 𑀅𑀥𑀼𑀦𑀸𑀢𑀦𑀸 𑀤𑀝𑁆𑀞𑀩𑁆𑀩𑀸 𑀧𑀸𑀴𑀺𑀬𑀁 ‘‘𑀅𑀦𑁆𑀢𑀭𑀸𑀪𑀯𑁂 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀕𑀢𑀢𑁆𑀢𑀸. 𑀬𑀣𑀸 𑀘𑁂𑀢𑀁, 𑀏𑀯𑀁 𑀦𑀺𑀭𑀬𑀽𑀧𑀕𑀸𑀤𑀺𑀪𑀸𑀯𑀫𑁆𑀧𑀺𑀲𑁆𑀲 𑀅𑀥𑀼𑀦𑀸𑀢𑀦𑀸 𑀧𑀝𑀺𑀚𑀸𑀦𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀯𑀤𑀦𑁆𑀢𑀺 ‘‘𑀉𑀤𑁆𑀥𑀁𑀧𑀸𑀤𑁄 𑀢𑀼 ¶ 𑀦𑀸𑀭𑀓𑁄’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀦𑀺𑀲𑁆𑀲𑀸𑀬 𑀧𑀭𑀯𑀸𑀤𑀻 𑀅𑀦𑁆𑀢𑀭𑀸𑀪𑀯𑀁 𑀦𑀸𑀫 𑀧𑀭𑀺𑀓𑀧𑁆𑀧𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀳𑀺 ‘‘𑀅𑀯𑀺𑀳𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀯𑀲𑁂𑀲𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀲𑀼𑀢𑁆𑀢𑀧𑀤𑀲𑁆𑀲 𑀅𑀬𑀫𑀢𑁆𑀣𑁄, 𑀦 𑀅𑀦𑁆𑀢𑀭𑀸𑀪𑀯𑀪𑀽𑀢𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸’’𑀢𑀺.

𑀬𑁂 𑀧𑀦 ‘‘𑀲𑀫𑁆𑀪𑀯𑁂𑀲𑀻𑀢𑀺 𑀯𑀘𑀦𑀢𑁄 𑀅𑀢𑁆𑀣𑁂𑀯 𑀅𑀦𑁆𑀢𑀭𑀸𑀪𑀯𑁄. 𑀲𑁄 𑀳𑀺 𑀲𑀫𑁆𑀪𑀯𑀁 𑀉𑀧𑀧𑀢𑁆𑀢𑀺𑀁 𑀏𑀲𑀢𑀻𑀢𑀺 𑀲𑀫𑁆𑀪𑀯𑁂𑀲𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀧𑀺 𑀬𑁂 𑀪𑀽𑀢𑀸𑀯 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀔𑀻𑀡𑀸𑀲𑀯𑀸 ‘‘𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸’’𑀢𑀺 𑀏𑀢𑁆𑀣 ‘‘𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀸. 𑀢𑀩𑁆𑀩𑀺𑀥𑀼𑀭𑀢𑀸𑀬 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄, 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀲𑁂𑀓𑁆𑀔𑀸 𑀧𑀼𑀣𑀼𑀚𑁆𑀚𑀦𑀸. 𑀘𑀢𑀽𑀲𑀼 𑀯𑀸 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀅𑀡𑁆𑀟𑀓𑁄𑀲𑀢𑁄 𑀯𑀢𑁆𑀣𑀺𑀓𑁄𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀢𑀢𑁄 𑀧𑀭𑀁 𑀪𑀽𑀢𑀸 𑀦𑀸𑀫𑀸𑀢𑀺 𑀏𑀯𑀁 𑀉𑀚𑀼𑀓𑁂 𑀧𑀸𑀴𑀺𑀅𑀦𑀼𑀕𑀢𑁂 𑀅𑀢𑁆𑀣𑁂 𑀲𑀢𑀺 𑀓𑀺𑀁 𑀅𑀦𑀺𑀤𑁆𑀥𑀸𑀭𑀺𑀢𑀲𑁆𑀲 𑀧𑀢𑁆𑀣𑀺𑀬𑁂𑀦 𑀅𑀦𑁆𑀢𑀭𑀸𑀪𑀯𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸.

𑀬𑀁 ¶ 𑀧𑀦𑁂𑀓𑁂 ‘‘𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂𑀲𑀼 𑀧𑀸𑀢𑀼𑀪𑀸𑀯𑁄 𑀤𑀺𑀝𑁆𑀞𑁄. 𑀬𑀣𑀸 𑀢𑀁 𑀯𑀻𑀳𑀺𑀆𑀤𑀺𑀅𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂, 𑀏𑀯𑀁 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂𑀧𑀺 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂 𑀧𑀸𑀢𑀼𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀦𑀬𑁄 𑀲𑀢𑀺 𑀅𑀦𑁆𑀢𑀭𑀸𑀪𑀯𑁂 𑀬𑀼𑀚𑁆𑀚𑀢𑀺, 𑀦𑀸𑀜𑁆𑀜𑀣𑀸’’𑀢𑀺 𑀬𑀼𑀢𑁆𑀢𑀺𑀁 𑀯𑀤𑀦𑁆𑀢𑀺, 𑀢𑁂𑀳𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀔𑀡𑁂𑀦 𑀩𑁆𑀭𑀳𑁆𑀫𑀮𑁄𑀓𑀢𑁄 𑀇𑀥𑀽𑀧𑀲𑀗𑁆𑀓𑀫𑀦𑁂 𑀇𑀢𑁄 𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀦𑁂 𑀬𑀼𑀢𑁆𑀢𑀺 𑀯𑀢𑁆𑀢𑀩𑁆𑀩𑀸. 𑀬𑀤𑀺 𑀲𑀩𑁆𑀩𑀢𑁆𑀣𑁂𑀯 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀦 𑀇𑀘𑁆𑀙𑀺𑀢𑀸, 𑀬𑀤𑀺𑀧𑀺 𑀲𑀺𑀬𑀸 ‘‘𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺, 𑀢𑀁 𑀇𑀥𑀸𑀧𑀺 𑀲𑀫𑀸𑀦𑀁 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺 𑀯𑀘𑀦𑀢𑁄, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀅𑀘𑀺𑀦𑁆𑀢𑁂𑀬𑁆𑀬𑀲𑀪𑀸𑀯𑀸 𑀳𑀺 𑀲𑀪𑀸𑀯𑀥𑀫𑁆𑀫𑀸, 𑀢𑁂 𑀓𑀢𑁆𑀣𑀘𑀺 𑀧𑀘𑁆𑀘𑀬𑀯𑀲𑁂𑀦 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀢𑁆𑀣𑀘𑀺 𑀅𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀘. 𑀢𑀣𑀸 𑀳𑀺 𑀫𑀼𑀔𑀖𑁄𑀲𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀲𑁆𑀫𑀺𑀁 𑀤𑁂𑀲𑁂 𑀆𑀤𑀸𑀲𑀧𑀩𑁆𑀩𑀢𑀧𑀤𑁂𑀲𑀸𑀤𑀺𑀓𑁂 𑀧𑀝𑀺𑀩𑀺𑀫𑁆𑀩𑀧𑀝𑀺𑀖𑁄𑀲𑀸𑀤𑀺𑀓𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀝𑁆𑀞𑀦𑁆𑀢𑀺.

𑀏𑀢𑁆𑀣𑀸𑀳 ¶ 𑁋 𑀧𑀝𑀺𑀩𑀺𑀫𑁆𑀩𑀁 𑀢𑀸𑀯 𑀅𑀲𑀺𑀤𑁆𑀥𑀢𑁆𑀢𑀸 𑀅𑀲𑀤𑀺𑀲𑀢𑁆𑀢𑀸 𑀘 𑀦 𑀦𑀺𑀤𑀲𑁆𑀲𑀦𑀁. 𑀧𑀝𑀺𑀩𑀺𑀫𑁆𑀩𑀜𑁆𑀳𑀺 𑀦𑀸𑀫 𑀅𑀜𑁆𑀜𑀤𑁂𑀯 𑀭𑀽𑀧𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀺𑀤𑁆𑀥𑀫𑁂𑀢𑀁. 𑀲𑀺𑀤𑁆𑀥𑀺𑀬𑀫𑁆𑀧𑀺 𑀅𑀲𑀤𑀺𑀲𑀢𑁆𑀢𑀸 𑀦 𑀦𑀺𑀤𑀲𑁆𑀲𑀦𑀁 𑀲𑀺𑀬𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀺𑀦𑁆𑀦𑀁 𑀲𑀳𑀞𑀸𑀦𑀸𑀪𑀸𑀯𑀢𑁄. 𑀬𑀢𑁆𑀣𑁂𑀯 𑀳𑀺 𑀆𑀤𑀸𑀲𑀭𑀽𑀧𑀁 𑀧𑀝𑀺𑀩𑀺𑀫𑁆𑀩𑀭𑀽𑀧𑀜𑁆𑀘 𑀤𑀺𑀲𑁆𑀲𑀢𑀺, 𑀦 𑀘 𑀏𑀓𑀲𑁆𑀫𑀺𑀁 𑀤𑁂𑀲𑁂 𑀭𑀽𑀧𑀤𑁆𑀯𑀬𑀲𑁆𑀲 𑀲𑀳𑀪𑀸𑀯𑁄 𑀬𑀼𑀢𑁆𑀢𑁄 𑀦𑀺𑀲𑁆𑀲𑀬𑀪𑀽𑀢𑀤𑁂𑀲𑀢𑁄, 𑀅𑀲𑀤𑀺𑀲𑀜𑁆𑀘𑁂𑀢𑀁 𑀲𑀦𑁆𑀥𑀸𑀦𑀢𑁄. 𑀦 𑀳𑀺 𑀫𑀼𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀲𑀦𑁆𑀥𑀸𑀦𑀪𑀽𑀢𑀁 𑀆𑀤𑀸𑀲𑀲𑀦𑁆𑀥𑀸𑀦𑀲𑀫𑁆𑀩𑀦𑁆𑀥𑀢𑁆𑀢𑀸 𑀲𑀦𑁆𑀥𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂 𑀧𑀸𑀢𑀼𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀦 𑀅𑀲𑀦𑁆𑀢𑀸𑀦𑀦𑁆𑀢𑀺 𑀅𑀲𑀫𑀸𑀦𑀫𑁂𑀯 𑀢𑀦𑁆𑀢𑀺.

𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀧𑀝𑀺𑀩𑀺𑀫𑁆𑀩𑀁 𑀦𑀸𑀫 𑀅𑀜𑁆𑀜𑀤𑁂𑀯 𑀭𑀽𑀧𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀺𑀤𑁆𑀥𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀺𑀦𑁆𑀦𑀁 𑀲𑀳𑀞𑀸𑀦𑀪𑀸𑀯𑀢𑁄’’𑀢𑀺, 𑀢𑀬𑀺𑀤𑀁 𑀅𑀲𑀦𑁆𑀢𑀸𑀦𑀫𑁂𑀯 𑀲𑀳𑀞𑀸𑀦𑀁 𑀘𑁄𑀤𑀺𑀢𑀁 𑀪𑀺𑀦𑁆𑀦𑀦𑀺𑀲𑁆𑀲𑀬𑀢𑁆𑀢𑀸. 𑀦 𑀳𑀺 𑀪𑀺𑀦𑁆𑀦𑀦𑀺𑀲𑁆𑀲𑀬𑀸𑀦𑀁 𑀲𑀳𑀞𑀸𑀦𑀁 𑀅𑀢𑁆𑀣𑀺. 𑀬𑀣𑀸 𑀅𑀦𑁂𑀓𑁂𑀲𑀁 𑀫𑀡𑀺𑀤𑀻𑀧𑀸𑀤𑀻𑀦𑀁 𑀧𑀪𑀸𑀭𑀽𑀧𑀁 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑀁 𑀅𑀘𑁆𑀙𑀺𑀢𑀫𑀸𑀦𑀢𑀸𑀬 𑀦𑀺𑀭𑀦𑁆𑀢𑀭𑀢𑀸𑀬 𑀘 𑀅𑀪𑀺𑀦𑁆𑀦𑀝𑁆𑀞𑀸𑀦𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀪𑀺𑀦𑁆𑀦𑀦𑀺𑀲𑁆𑀲𑀬𑀢𑁆𑀢𑀸 𑀧𑀦 𑀪𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀢𑀁, 𑀕𑀳𑀡𑀯𑀺𑀲𑁂𑀲𑁂𑀦 𑀢𑀣𑀸𑀅𑀪𑀺𑀦𑁆𑀦𑀝𑁆𑀞𑀸𑀦𑀫𑀢𑁆𑀢𑀁, 𑀏𑀯𑀁 𑀆𑀤𑀸𑀲𑀭𑀽𑀧𑀧𑀝𑀺𑀩𑀺𑀫𑁆𑀩𑀭𑀽𑀧𑁂𑀲𑀼𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀤𑀺𑀲𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀳𑀺 𑀢𑀢𑁆𑀣 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀕𑀘𑁆𑀙𑀢𑀺 𑀘, 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀽𑀧𑀕𑀫𑀦𑀢𑁄. 𑀅𑀜𑁆𑀜𑀣𑀸 𑀆𑀮𑁄𑀓𑁂𑀦 𑀯𑀺𑀦𑀸𑀧𑀺 𑀧𑀜𑁆𑀜𑀸𑀬𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀦 𑀕𑁄𑀘𑀭𑁄 𑀯𑀺𑀬 𑀲𑀺𑀬𑀸. 𑀢𑀲𑁆𑀲 𑀧𑀦 𑀲𑀸𑀫𑀕𑁆𑀕𑀺𑀬𑀸 ¶ 𑀲𑁄 𑀆𑀦𑀼𑀪𑀸𑀯𑁄, 𑀬𑀁 𑀢𑀣𑀸 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀥𑀫𑁆𑀫𑀸𑀦𑀁 𑀲𑀸𑀫𑀢𑁆𑀣𑀺𑀬𑀪𑁂𑀤𑁄𑀢𑀺 𑀯𑀤𑀦𑁆𑀢𑁂𑀦𑀧𑀺 𑀅𑀬𑀫𑁂𑀯𑀢𑁆𑀣𑁄 𑀲𑀸𑀥𑀺𑀢𑁄 𑀪𑀺𑀦𑁆𑀦𑀦𑀺𑀲𑁆𑀲𑀬𑀲𑁆𑀲𑀧𑀺 𑀅𑀪𑀺𑀦𑁆𑀦𑀝𑁆𑀞𑀸𑀦𑀲𑁆𑀲 𑀯𑀺𑀬 𑀉𑀧𑀝𑁆𑀞𑀸𑀦𑀢𑁄. 𑀏𑀢𑁂𑀦𑁂𑀯 𑀉𑀤𑀓𑀸𑀤𑀻𑀲𑀼 𑀧𑀝𑀺𑀩𑀺𑀫𑁆𑀩𑀭𑀽𑀧𑀸𑀪𑀸𑀯𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀺𑀤𑁆𑀥𑁂 𑀘 𑀧𑀝𑀺𑀩𑀺𑀫𑁆𑀩𑀭𑀽𑀧𑁂 𑀢𑀲𑁆𑀲 𑀦𑀺𑀤𑀲𑁆𑀲𑀦𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺 𑀳𑁂𑀢𑀼𑀨𑀮𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀢𑀸𑀯𑀺𑀪𑀸𑀯𑀦𑀢𑁄. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀲𑀤𑀺𑀲𑀢𑁆𑀢𑀸 𑀦 𑀦𑀺𑀤𑀲𑁆𑀲𑀦’’𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀦 𑀳𑀺 𑀦𑀺𑀤𑀲𑁆𑀲𑀦𑀁 𑀦𑀸𑀫 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀲𑀩𑁆𑀩𑀤𑀸 𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀘𑀼𑀢𑀺𑀓𑁆𑀔𑀦𑁆𑀥𑀸𑀥𑀸𑀦𑀢𑁄 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑀫𑀼𑀔𑀭𑀽𑀧𑀢𑁄 𑀯𑀺𑀘𑁆𑀙𑀺𑀦𑁆𑀦𑁂 𑀞𑀸𑀦𑁂 𑀢𑀲𑁆𑀲 𑀨𑀮𑀪𑀽𑀢𑀁 𑀧𑀝𑀺𑀩𑀺𑀫𑁆𑀩𑀭𑀽𑀧𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀏𑀢𑁆𑀣 𑀢𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀢𑁂𑀦 𑀅𑀲𑀦𑁆𑀢𑀸𑀦𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀯𑀸 𑀫𑀼𑀔𑀧𑀝𑀺𑀩𑀺𑀫𑁆𑀩𑀭𑀽𑀧𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁄 𑀲𑀺𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀲𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺. 𑀳𑁂𑀢𑀼𑀨𑀮𑀪𑀸𑀯𑀲𑀫𑁆𑀩𑀦𑁆𑀥𑁂𑀲𑀼 𑀳𑀺 𑀲𑀦𑁆𑀢𑀸𑀦𑀯𑁄𑀳𑀸𑀭𑁄. 𑀬𑀣𑀸𑀯𑀼𑀢𑁆𑀢𑀤𑁆𑀯𑀻𑀳𑀺𑀓𑀸𑀭𑀡𑁂𑀳𑀺 𑀧𑀝𑀺𑀩𑀺𑀫𑁆𑀩𑀁 𑀉𑀧𑁆𑀧𑀚𑁆𑀚𑀢𑀺 𑀩𑀺𑀫𑁆𑀩𑀢𑁄 ¶ 𑀆𑀤𑀸𑀲𑀢𑁄 𑀘, 𑀦 𑀘𑁂𑀯𑀁 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀼𑀧𑁆𑀧𑀢𑁆𑀢𑀺. 𑀬𑀣𑀸 𑀘𑁂𑀢𑁆𑀣 𑀧𑀝𑀺𑀩𑀺𑀫𑁆𑀩𑀭𑀽𑀧𑀁 𑀦𑀺𑀤𑀲𑁆𑀲𑀺𑀢𑀁, 𑀏𑀯𑀁 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀬𑁄𑀧𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀬𑁄 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀇𑀤𑀁 𑀘𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘𑀸𑀬𑀁 𑀅𑀦𑁆𑀢𑀭𑀸𑀪𑀯𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀬𑀤𑀺 ‘‘𑀥𑀫𑁆𑀫𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀼𑀧𑁆𑀧𑀢𑁆𑀢𑀺 𑀦 𑀬𑀼𑀢𑁆𑀢𑀸’’𑀢𑀺 𑀅𑀦𑁆𑀢𑀭𑀸𑀪𑀯𑁄 𑀧𑀭𑀺𑀓𑀧𑁆𑀧𑀺𑀢𑁄, 𑀭𑀸𑀳𑀼𑀆𑀤𑀻𑀦𑀁 𑀲𑀭𑀻𑀭𑁂 𑀓𑀣𑀫𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑀺𑀓𑁂𑀲𑀼 𑀧𑀸𑀤𑀝𑁆𑀞𑀸𑀦𑀳𑀤𑀬𑀝𑁆𑀞𑀸𑀦𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀬𑀼𑀢𑁆𑀢𑀸. 𑀬𑀤𑀺 𑀏𑀓𑀲𑀦𑁆𑀢𑀸𑀦𑀪𑀸𑀯𑀢𑁄, 𑀇𑀥𑀸𑀧𑀺 𑀢𑀁𑀲𑀫𑀸𑀦𑀁. 𑀦 𑀘𑁂𑀢𑁆𑀣 𑀅𑀭𑀽𑀧𑀥𑀫𑁆𑀫𑀪𑀸𑀯𑀢𑁄 𑀅𑀮𑀁 𑀧𑀭𑀺𑀳𑀸𑀭𑀸𑀬 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀢𑁆𑀢𑀸. 𑀯𑀢𑁆𑀢𑀫𑀸𑀦𑁂𑀳𑀺 𑀢𑀸𑀯 𑀧𑀘𑁆𑀘𑀬𑁂𑀳𑀺 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀲𑀺𑀤𑁆𑀥𑀸, 𑀓𑀺𑀫𑀗𑁆𑀕𑀁 𑀧𑀦 𑀅𑀢𑀻𑀢𑁂𑀳𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀳𑀺. 𑀬𑀢𑁆𑀣 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀢𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀲𑀳𑀪𑀸𑀯𑀻𑀦𑀜𑁆𑀘 𑀔𑀦𑁆𑀥𑀸𑀦𑀁 𑀲𑀫𑁆𑀪𑀯𑁄𑀢𑀺 𑀮𑀤𑁆𑀥𑁄𑀓𑀸𑀲𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀲𑁆𑀲 𑀅𑀯𑀲𑁂𑀲𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑀲𑁆𑀲 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 𑀦𑀸𑀮𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀢𑀸 𑀯𑀺𑀩𑀦𑁆𑀥𑀸𑀬. 𑀬𑀣𑀸 𑀘 𑀅𑀦𑁂𑀓𑀓𑀧𑁆𑀧𑀲𑀳𑀲𑁆𑀲𑀦𑁆𑀢𑀭𑀺𑀓𑀸𑀧𑀺 𑀘𑀼𑀢𑀺𑀓𑁆𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀦 𑀓𑀸𑀮𑀤𑀽𑀭𑀢𑀸, 𑀏𑀯𑀁 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑀺𑀓𑀸𑀧𑀺 𑀢𑁂 𑀢𑁂𑀲𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀦 𑀤𑁂𑀲𑀤𑀽𑀭𑀢𑀸. 𑀏𑀯𑀁 ¶ 𑀘𑀼𑀢𑀺𑀓𑁆𑀔𑀦𑁆𑀥𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀦𑀢𑁆𑀣𑁂𑀯 𑀅𑀦𑁆𑀢𑀭𑀸𑀪𑀯𑁄. 𑀅𑀲𑀢𑀺 𑀘 𑀢𑀲𑁆𑀫𑀺𑀁 𑀬𑀁 𑀢𑀲𑁆𑀲 𑀓𑁂𑀘𑀺 ‘‘𑀪𑀸𑀯𑀺𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀼𑀦𑁄 𑀢𑀢𑁄 𑀏𑀯 𑀪𑀸𑀯𑀺𑀧𑀼𑀭𑀺𑀫𑀓𑀸𑀮𑀪𑀯𑀸𑀓𑀸𑀭𑁄 𑀲𑀚𑀸𑀢𑀺𑀲𑀼𑀤𑁆𑀥𑀤𑀺𑀩𑁆𑀩𑀘𑀓𑁆𑀔𑀼𑀕𑁄𑀘𑀭𑁄 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀕𑀫𑀦𑁄 𑀕𑀦𑁆𑀥𑀸𑀳𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀸𑀓𑀸𑀭𑀸𑀤𑀺𑀁 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀯𑀜𑁆𑀛𑀸𑀢𑀦𑀬𑀲𑁆𑀲 𑀭𑀲𑁆𑀲𑀤𑀻𑀖𑀲𑀸𑀫𑀢𑀸𑀤𑀺𑀯𑀺𑀯𑀸𑀤𑀲𑀤𑀺𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁫𑁧𑁦. 𑀲𑀩𑁆𑀩𑁂𑀧𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑁆𑀔𑀦𑁆𑀥𑀸𑀤𑀬𑁄𑀧𑀺. 𑀢𑁂𑀲𑀫𑁆𑀧𑀺 𑀳𑀺 𑀆𑀮𑀫𑁆𑀩𑀦𑀢𑁆𑀣𑀺𑀓𑀢𑀸𑀮𑀓𑁆𑀔𑀡𑀲𑁆𑀲 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀲𑁆𑀲 𑀯𑀲𑁂𑀦 𑀲𑀺𑀬𑀸 𑀓𑀫𑀦𑀝𑁆𑀞𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀸𑀢𑀼𑀓𑀣𑀸𑀬𑀁 ‘‘𑀓𑀸𑀫𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑁄? 𑀦 𑀓𑁂𑀳𑀺𑀘𑀺 ¶ 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀆𑀕𑀢𑀢𑁆𑀢𑀸 𑀆𑀳 ‘‘𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸𑀦𑀫𑁂𑀯 𑀓𑀸𑀫𑀪𑀯𑀪𑀸𑀯𑁄 𑀥𑀸𑀢𑀼𑀓𑀣𑀸𑀬𑀁 𑀤𑀲𑁆𑀲𑀺𑀢𑁄’’𑀢𑀺. 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑀤𑀜𑁆𑀜𑀕𑀡𑀦𑀦𑀺𑀯𑀢𑁆𑀢𑀦𑀢𑁆𑀣𑁄𑀢𑀺 ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺 𑀯𑀘𑀦𑀁 𑀢𑀢𑁄 𑀅𑀜𑁆𑀜𑁂𑀲𑀁 𑀢𑀩𑁆𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀻𑀢𑀺 𑀆𑀳 ‘‘𑀧𑀜𑁆𑀘𑁂𑀯 𑀓𑀸𑀫𑀓𑁄𑀝𑁆𑀞𑀸𑀲𑀸 𑀓𑀸𑀫𑁄𑀢𑀺 𑀯𑀼𑀢𑁆𑀢𑀸’’𑀢𑀺. 𑀢𑀢𑁄 𑀏𑀯 𑀓𑀸𑀫𑀥𑀸𑀢𑀽𑀢𑀺 𑀯𑀘𑀦𑀁 𑀦 𑀅𑀜𑁆𑀜𑀲𑁆𑀲 𑀦𑀸𑀫𑀁, 𑀢𑁂𑀲𑀁𑀬𑁂𑀯 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀬𑀺𑀤𑀁 𑀧𑀭𑀯𑀸𑀤𑀺𑀦𑁄 𑀫𑀢𑀺𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺. 𑀏𑀯𑀁 𑀯𑀘𑀦𑀫𑀢𑁆𑀢𑀦𑁆𑀢𑀺 𑀏𑀯𑀁 ‘‘𑀧𑀜𑁆𑀘𑀺𑀫𑁂 𑀓𑀸𑀫𑀕𑀼𑀡𑀸’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬, 𑀦 𑀧𑀦𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀫𑀕𑀼𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁫-𑁫𑁧𑁬. 𑀭𑀽𑀧𑀥𑀸𑀢𑀽𑀢𑀺 𑀯𑀘𑀦𑀢𑁄𑀢𑀺 ‘‘𑀓𑀸𑀫𑀥𑀸𑀢𑀼𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀽’’𑀢𑀺 𑀏𑀢𑁆𑀣 𑀭𑀽𑀧𑀥𑀸𑀢𑀽𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀭𑀽𑀧𑀻𑀥𑀫𑁆𑀫𑁂𑀳𑁂𑀯𑀸𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑁂𑀳𑀺𑀬𑁂𑀯 𑀥𑀫𑁆𑀫𑁂𑀳𑀺. ‘‘𑀢𑀬𑁄𑀫𑁂 𑀪𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀢𑀬𑁄𑀫𑁂 𑀪𑀯𑀸 ¶ , 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄𑀢𑀺 𑀘 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀸. ‘‘𑀥𑀸𑀢𑀼𑀬𑀸 𑀆𑀕𑀢𑀝𑁆𑀞𑀸𑀦𑁂 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀪𑀯𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀯 𑀢𑀁𑀢𑀁𑀪𑀼𑀫𑁆𑀫𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀏𑀯𑀁 𑀯𑀼𑀢𑁆𑀢𑀸.

𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁧𑁭-𑁫𑁧𑁮. 𑀧𑀼𑀭𑀺𑀫𑀓𑀣𑀸𑀬𑀦𑁆𑀢𑀺 𑀭𑀽𑀧𑀥𑀸𑀢𑀼𑀓𑀣𑀸𑀬𑀁. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸.

𑀅𑀭𑀽𑀧𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁫𑁧𑁯. 𑀑𑀓𑀸𑀲𑀪𑀸𑀯𑁂𑀦𑀸𑀢𑀺 ¶ 𑀯𑀢𑁆𑀣𑀼𑀪𑀸𑀯𑁂𑀦. 𑀢𑀣𑀸𑀯𑀺𑀥𑀦𑁆𑀢𑀺 𑀖𑀸𑀦𑀸𑀤𑀺𑀆𑀓𑀸𑀭𑀁.

𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀽𑀧𑁂𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁫𑁨𑁪-𑁫𑁨𑁬. 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀺𑀲𑁆𑀲𑀭𑀺𑀢𑀩𑁆𑀩𑁂 𑀲𑀢𑀺 𑀳𑁄𑀢𑀺, 𑀦 𑀅𑀲𑀢𑀺, 𑀢𑀲𑁆𑀫𑀸 ‘‘𑀅𑀭𑀽𑀧𑀪𑀯𑁂 𑀲𑀼𑀔𑀼𑀫𑀭𑀽𑀧𑀁 𑀅𑀢𑁆𑀣𑀺, 𑀬𑀢𑁄 𑀦𑀺𑀲𑁆𑀲𑀭𑀡𑀁 𑀢𑀁 𑀆𑀭𑀼𑀧𑁆𑀧’’𑀦𑁆𑀢𑀺 𑀆𑀳.

𑀅𑀭𑀽𑀧𑁂𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀁𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁨𑁭-𑁫𑁩𑁭. 𑀧𑀓𑀧𑁆𑀧𑀬𑀫𑀸𑀦𑀸𑀢𑀺 𑀧𑀓𑀸𑀭𑁂𑀳𑀺 𑀓𑀧𑁆𑀧𑀬𑀫𑀸𑀦𑀸 𑀅𑀢𑁆𑀢𑀦𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀓𑀺𑀘𑁆𑀘𑀁 𑀲𑀫𑀢𑁆𑀣𑀬𑀫𑀸𑀦𑀸. 𑀢𑁂𑀦𑀸𑀳 ‘‘𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀥𑀺𑀓𑀁 𑀩𑁆𑀬𑀸𑀧𑀸𑀭𑀁 𑀓𑀼𑀭𑀼𑀫𑀸𑀦𑀸’’𑀢𑀺.

𑀭𑀽𑀧𑀁𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁫𑁪𑁦. 𑀅𑀦𑁆𑀢𑀁 ¶ 𑀕𑀳𑁂𑀢𑁆𑀯𑀸 𑀯𑀤𑀢𑀻𑀢𑀺 ‘‘𑀅𑀢𑁆𑀣𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 ¶ 𑀯𑀢𑁆𑀢𑀦𑀸 𑀧𑀸𑀮𑀦𑀸, 𑀅𑀢𑁆𑀣𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀢𑀲𑁆𑀫𑀺𑀁 𑀧𑀜𑁆𑀳𑁂 ‘‘𑀅𑀢𑁆𑀣𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀫𑀁 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄 𑀲𑀫𑀼𑀤𑀸𑀬𑀲𑁆𑀲 𑀇𑀘𑁆𑀙𑀦𑁆𑀢𑁄 𑀢𑀤𑀯𑀬𑀯𑀲𑁆𑀲 𑀇𑀘𑁆𑀙𑀢𑀻𑀢𑀺. 𑀦 𑀳𑀺 𑀅𑀯𑀬𑀯𑁂𑀳𑀺 𑀯𑀺𑀦𑀸 𑀲𑀫𑀼𑀤𑀸𑀬𑁄 𑀦𑀸𑀫 𑀅𑀢𑁆𑀣𑀺.

𑁫𑁪𑁧. 𑀢𑀫𑁂𑀯𑀸𑀢𑀺 𑀅𑀭𑀽𑀧𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀫𑁂𑀯.

𑁫𑁪𑁨. 𑀢𑀤𑀸𑀧𑀻𑀢𑀺 𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀓𑀸𑀮𑁂𑀧𑀺.

𑁫𑁪𑁪-𑁫𑁪𑁫. 𑀲𑁄 𑀬𑀼𑀢𑁆𑀢𑁄 𑀤𑁆𑀯𑀺𑀦𑁆𑀦𑀁 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀓𑀲𑀫𑀬𑁂 𑀇𑀘𑁆𑀙𑀺𑀢𑀢𑁆𑀢𑀸.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁪𑁬. ‘‘𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀺𑀓𑀲𑁆𑀲 𑀧𑀭𑀺𑀳𑀸𑀦𑀺𑀓𑀣𑀸𑀬𑀁 𑀅𑀦𑀸𑀕𑀢𑀢𑁆𑀢𑀸 𑀬𑁄 𑀢𑀢𑁆𑀣 𑀆𑀕𑀢𑀦𑀬𑁄, 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀲𑀦𑁆𑀢𑀺…𑀧𑁂… 𑀯𑀤𑀢𑀻’’𑀢𑀺 𑀆𑀳. 𑀲𑀫𑁆𑀧𑀝𑀺𑀘𑁆𑀙𑀦𑀯𑀘𑀦𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑀦𑀯𑀘𑀦𑀁. 𑀢𑀁 𑀧𑀭𑀯𑀸𑀤𑀺𑀁. 𑀢𑀁𑀢𑀁𑀮𑀤𑁆𑀥𑀺𑀲𑀫𑁆𑀧𑀝𑀺𑀘𑁆𑀙𑀸𑀧𑀦𑀁 𑀯𑀸 𑀕𑀸𑀳𑀸𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑀫𑁆𑀫𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀯𑀕𑁆𑀕𑁄

𑁧. 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻𑀓𑀣𑀸𑀯𑀡𑁆𑀡𑀦𑀸

𑁫𑁪𑁭. 𑀤𑀝𑁆𑀞𑀩𑁆𑀩𑀲𑁆𑀲 𑀆𑀤𑀻𑀦𑀯𑀢𑁄 𑀆𑀦𑀺𑀲𑀁𑀲𑀢𑁄 𑀘 𑀬𑀤𑀺𑀧𑀺 𑀧𑀭𑀯𑀸𑀤𑀺𑀦𑀸 𑀧𑀘𑁆𑀙𑀸 𑀦𑀸𑀦𑀸𑀘𑀺𑀢𑁆𑀢𑀯𑀲𑁂𑀦 ¶ 𑀧𑀝𑀺𑀜𑁆𑀜𑀸𑀢𑀁, 𑀧𑀼𑀩𑁆𑀩𑁂 𑀧𑀦 𑀏𑀓𑀢𑁄 𑀓𑀢𑁆𑀯𑀸 𑀧𑀝𑀺𑀚𑀸𑀦𑀺, 𑀦 𑀘 ¶ 𑀢𑀁 𑀮𑀤𑁆𑀥𑀺𑀁 𑀧𑀭𑀺𑀘𑁆𑀘𑀚𑀺. 𑀢𑁂𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀫𑀤𑁆𑀤𑀦𑀁 𑀬𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀅𑀦𑀺𑀘𑁆𑀘…𑀧𑁂… 𑀧𑀝𑀺𑀜𑁆𑀜𑀸𑀢𑀢𑁆𑀢𑀸’’𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦, 𑀦 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀆𑀦𑀺𑀲𑀁𑀲𑀓𑀣𑀸𑀦𑀼𑀬𑀼𑀜𑁆𑀚𑀦𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑀜𑁆𑀘. 𑀜𑀸𑀡𑀁 𑀯𑀺𑀧𑀲𑁆𑀲𑀦𑀸 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀯𑀺𑀬 𑀅𑀦𑀼𑀩𑁄𑀥𑀜𑀸𑀡𑀲𑁆𑀲𑀧𑀺 𑀬𑀣𑀸𑀭𑀳𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀓𑀺𑀘𑁆𑀘𑀓𑀭𑀡𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀫𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸

𑁫𑁪𑁯. 𑀏𑀯𑀫𑀸𑀤𑀺𑀦𑀸 𑀲𑀼𑀢𑁆𑀢𑀪𑀬𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀦𑀸𑀲𑀯𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀸𑀲𑀯𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀫𑀢𑀸𑀭𑀫𑁆𑀫𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀭𑀽𑀧𑀁𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁨-𑁫𑁫𑁩. ‘‘𑀢𑀤𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀭𑀫𑁆𑀫𑀡’’𑀦𑁆𑀢𑀺𑀆𑀤𑀻𑀲𑀼 𑀧𑀘𑁆𑀘𑀬𑀢𑁆𑀣𑁄 𑀆𑀭𑀫𑁆𑀫𑀡-𑀲𑀤𑁆𑀤𑁄. ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 𑀑𑀮𑀼𑀩𑁆𑀪𑀝𑁆𑀞𑁄𑀢𑀺 𑀆𑀳 ‘‘𑀧𑀘𑁆𑀘𑀬𑀝𑁆𑀞𑁄 𑀑𑀮𑀼𑀩𑁆𑀪𑀝𑁆𑀞𑁄’’𑀢𑀺. 𑀏𑀯𑀁 𑀯𑀺𑀪𑀸𑀕𑁂 𑀯𑀺𑀚𑁆𑀚𑀫𑀸𑀦𑁂𑀢𑀺 𑀢𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀧𑀘𑁆𑀘𑀬𑀝𑁆𑀞𑁄, 𑀤𑀡𑁆𑀟𑀭𑀚𑁆𑀚𑀼𑀆𑀤𑀺 𑀯𑀺𑀬 𑀤𑀼𑀩𑁆𑀩𑀮𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀮𑀫𑁆𑀩𑀺𑀢𑀩𑁆𑀩𑀢𑀸𑀬 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁄 𑀑𑀮𑀼𑀩𑁆𑀪𑀝𑁆𑀞𑁄. 𑀯𑀺𑀲𑁂𑀲𑀸𑀪𑀸𑀯𑀁 𑀧𑀘𑁆𑀘𑀬𑀪𑀸𑀯𑀲𑀸𑀫𑀜𑁆𑀜𑁂𑀦 𑀓𑀧𑁆𑀧𑁂𑀢𑁆𑀯𑀸 𑀯𑀸.

𑀭𑀽𑀧𑀁𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀼𑀲𑀬𑀸𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁪-𑁫𑁫𑁬. ‘‘𑀇𑀫𑀲𑁆𑀫𑀺𑀁 ¶ 𑀲𑀢𑀻’’𑀢𑀺 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀅𑀦𑀺𑀭𑀼𑀤𑁆𑀥𑀢𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀅𑀧𑁆𑀧𑀳𑀻𑀦𑀢𑁆𑀢𑀸𑀯 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀦 𑀧𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀅𑀯𑀥𑀸𑀭𑀡𑁂𑀦 ¶ 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺, 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀥𑀭𑀫𑀸𑀦𑀢𑁆𑀢𑀸 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀪𑀸𑀯𑀢𑁄𑀢𑀺 𑀅𑀢𑁆𑀣𑁄.

𑀅𑀦𑀼𑀲𑀬𑀸𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀜𑀸𑀡𑀁𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁫𑁭-𑁫𑁫𑁮. 𑀬𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀅𑀭𑀳𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀅𑀦𑀯𑀲𑁂𑀲𑀢𑁄 𑀲𑀫𑁆𑀫𑁄𑀳𑁄 𑀯𑀺𑀕𑀢𑁄, 𑀢𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀫𑀕𑁆𑀕𑀜𑀸𑀡𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀢𑁄𑀓𑀸𑀭𑀺𑀢𑀸 𑀯𑀺𑀬 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸, 𑀢𑀲𑁆𑀫𑀸 𑀢𑁂𑀦 𑀜𑀸𑀡𑁂𑀦 𑀲𑁄 𑀜𑀸𑀡𑀻. 𑀲𑀢𑀺𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑀺 𑀲𑁄 𑀉𑀢𑁆𑀢𑀫𑀧𑀼𑀭𑀺𑀲𑁄.

𑀜𑀸𑀡𑀁𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀓𑀣𑀸𑀯𑀡𑁆𑀡𑀦𑀸

𑁫𑁬𑁨. 𑀤𑁆𑀯𑀻𑀳𑀺𑀧𑀻𑀢𑀺 𑀤𑁆𑀯𑀻𑀳𑀺 𑀯𑀺𑀲𑁂𑀲𑁂𑀳𑀺, 𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸𑀯𑀡𑁆𑀡𑀦𑀸

𑁫𑁬𑁩. 𑀲𑀩𑁆𑀩𑀲𑁄𑀢𑀺 ¶ 𑀲𑀩𑁆𑀩𑀧𑁆𑀧𑀓𑀸𑀭𑀢𑁄, 𑀲𑁄 𑀧𑀦 𑀧𑀓𑀸𑀭𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀓𑀸𑀮𑀯𑀲𑁂𑀦 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀯𑀸’’𑀢𑀺. 𑀢𑁂 𑀘 𑀞𑀸𑀦𑀓𑀸𑀮𑀸 ‘‘𑀯𑀺𑀢𑀓𑁆𑀓𑀬𑀢𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀘𑀺𑀢𑁆𑀢𑀯𑀺𑀲𑁂𑀲𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀽’’𑀢𑀺. ‘‘𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀫𑀢𑁆𑀢𑀁 𑀲𑀤𑁆𑀤𑁄’’𑀢𑀺 𑀆𑀳.

𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁬𑁫. 𑀫𑀼𑀲𑀸𑀯𑀸𑀤𑁄 ¶ 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸

𑁫𑁬𑁮-𑁫𑁭𑁦. 𑀲𑀫𑀦𑁆𑀦𑀸𑀕𑀢𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀲𑀫𑀗𑁆𑀕𑀺𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸. 𑀢𑁂𑀦𑁂𑀯𑀸𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀫𑀗𑁆𑀕𑀻 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀝𑀺𑀮𑀸𑀪𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀅𑀥𑀺𑀕𑀫𑀦𑀧𑀜𑁆𑀜𑀢𑁆𑀢𑀺𑀬𑀸. 𑀅𑀬𑀦𑁆𑀢𑀺 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀫𑀸𑀦𑀧𑀼𑀕𑁆𑀕𑀮𑀲𑁆𑀲 𑀬𑁄 𑀢𑀣𑀸 𑀯𑀢𑁆𑀢𑀩𑁆𑀩𑀸𑀓𑀸𑀭𑁄, 𑀅𑀬𑀁 𑀲𑀫𑀦𑁆𑀦𑀸𑀕𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀯𑀕𑁆𑀕𑁄

𑁧. 𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁫𑁭𑁧-𑁫𑁭𑁨. 𑀲𑀓𑀲𑀫𑀬𑁂 ¶ ‘‘𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀘𑁆𑀙𑀺𑀢𑀁, 𑀧𑀭𑀯𑀸𑀤𑀻 𑀧𑀦 ‘‘𑀬𑀲𑁆𑀫𑀺𑀁 𑀔𑀡𑁂 𑀪𑀯𑀗𑁆𑀕𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀢𑀺. 𑀏𑀯𑀁 𑀲𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑀺𑀢𑁆𑀢𑀸𑀦𑀁 𑀲𑀳𑀪𑀸𑀯𑁄𑀧𑀺 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀪𑀗𑁆𑀕𑀓𑁆𑀔𑀡𑁂𑀦 𑀲𑀳𑁂𑀯𑀸’’𑀢𑀺. 𑀢𑀣𑀸 𑀘 𑀲𑀢𑀺 𑀯𑀺𑀧𑀸𑀓𑀓𑀺𑀭𑀺𑀬𑀓𑁆𑀔𑀦𑁆𑀥𑀸𑀦𑀁 𑀯𑀺𑀬 𑀓𑀺𑀭𑀺𑀬𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀯𑀺𑀧𑀸𑀓𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀓𑀺𑀭𑀺𑀬𑀓𑀺𑀭𑀺𑀬𑀓𑁆𑀔𑀦𑁆𑀥𑀸𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀲𑀳𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀏𑀲𑀺𑀬𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀉𑀧𑀧𑀢𑁆𑀢𑁂𑀲𑀺𑀬𑀸 𑀯𑀺𑀧𑀸𑀓𑀓𑁆𑀔𑀦𑁆𑀥𑀸, 𑀢𑁂 𑀘 𑀬𑁂𑀪𑀼𑀬𑁆𑀬𑁂𑀦 𑀪𑀯𑀗𑁆𑀕𑀧𑀭𑀺𑀬𑀸𑀬𑀓𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀉𑀧𑀧𑀢𑁆𑀢𑁂𑀲𑀺𑀬𑀦𑁆𑀢𑀺 𑀲𑀗𑁆𑀔𑀁 𑀕𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀆𑀤𑀺𑀧𑀭𑀺𑀬𑁄𑀲𑀸𑀦𑀫𑀢𑁆𑀢𑀜𑁆𑀳𑀺 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀘𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀁 𑀪𑀯𑀗𑁆𑀕𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀓𑀺𑀭𑀺𑀬𑀸𑀯𑁂𑀫𑀚𑁆𑀛𑁂 ¶ 𑀧𑀢𑀺𑀢𑀢𑁆𑀢𑀸 𑀓𑀺𑀭𑀺𑀬𑀸𑀘𑀢𑀼𑀓𑁆𑀔𑀦𑁆𑀥𑀕𑁆𑀕𑀳𑀡𑁂𑀦 𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀦𑁆𑀢𑀺 𑀳𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁𑀬𑁂𑀯 𑀕𑀳𑀡𑀁, 𑀅𑀣 𑀔𑁄 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁫𑁭𑁬. 𑀮𑀓𑁆𑀔𑀡𑀦𑁆𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸𑀤𑀺𑀅𑀯𑀺𑀢𑀣𑁂𑀓𑀧𑁆𑀧𑀓𑀸𑀭𑀢𑀸𑀮𑀓𑁆𑀔𑀡𑀁. 𑀓𑀸𑀫𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀯𑀢𑁆𑀣𑀼𑀓𑀫𑁆𑀧𑀺 𑀳𑁄𑀢𑀺, 𑀲𑀯𑀢𑁆𑀣𑀼𑀓𑀢𑁆𑀢𑁂 𑀧𑀦 𑀢𑀫𑁆𑀧𑀺 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀫𑁂𑀯. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀞𑀧𑀦𑀸𑀬𑀁 ‘‘𑀳𑀜𑁆𑀘𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀢𑀸𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀧𑀜𑁆𑀘 𑀯𑀺𑀜𑁆𑀜𑀸𑀡𑀸’’𑀢𑀺 𑀅𑀯𑀢𑁆𑀯𑀸 ‘‘𑀙 𑀯𑀺𑀜𑁆𑀜𑀸𑀡𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙 𑀯𑀺𑀜𑁆𑀜𑀸𑀡𑀸…𑀧𑁂… 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺.

𑁫𑁭𑁭. ‘‘𑀅𑀦𑀺𑀫𑀺𑀢𑁆𑀢𑀁 ¶ 𑀲𑀼𑀜𑁆𑀜𑀢𑀁 𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀢𑁂 𑀧𑀭𑀺𑀬𑀸𑀬𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀺𑀫𑀺𑀢𑁆𑀢𑀕𑀸𑀳𑀺𑀪𑀸𑀯𑁂 𑀲𑀼𑀜𑁆𑀜𑀢𑀸𑀭𑀫𑁆𑀫𑀡𑀢𑀸𑀧𑀺 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀤𑁂𑀯 𑀲𑀼𑀜𑁆𑀜𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁪-𑁫𑁮𑁬. 𑀲𑀸 𑀧𑀦 𑀦𑀫𑀺𑀢𑁆𑀯𑀸 𑀧𑀯𑀢𑁆𑀢𑀺. 𑀆𑀭𑀫𑁆𑀫𑀡𑀧𑁆𑀧𑀓𑀸𑀭𑀕𑁆𑀕𑀳𑀡𑀦𑁆𑀢𑀺 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀧𑁆𑀧𑀓𑀸𑀭𑀲𑁆𑀲 𑀕𑀳𑀡𑀁. 𑀬𑁂𑀦 𑀆𑀭𑀫𑁆𑀫𑀡𑀧𑁆𑀧𑀓𑀸𑀭𑀕𑁆𑀕𑀳𑀡𑁂𑀦 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀮𑁄𑀪𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀮𑁄𑀪𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄 𑀳𑁄𑀢𑀺, 𑀲𑁄 𑀆𑀪𑁄𑀕𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀲𑀸𑀪𑁄𑀕𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑁆𑀯𑀻𑀳𑀺𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁮𑁭-𑁫𑁮𑁯. 𑀅𑀧𑁆𑀧𑀯𑀢𑁆𑀢𑀺𑀦𑀺𑀭𑁄𑀥𑀦𑁆𑀢𑀺 ¶ 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀁. 𑀲𑀻𑀮𑀲𑁆𑀲 𑀯𑀻𑀢𑀺𑀓𑁆𑀓𑀫𑁄𑀬𑁂𑀯 𑀦𑀺𑀭𑁄𑀥𑁄 𑀲𑀻𑀮𑀯𑀻𑀢𑀺𑀓𑁆𑀓𑀫𑀦𑀺𑀭𑁄𑀥𑁄. 𑀦𑀺𑀦𑁆𑀦𑀸𑀦𑀁 𑀔𑀡𑀺𑀓𑀦𑀺𑀭𑁄𑀥𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄.

𑀤𑁆𑀯𑀻𑀳𑀺𑀲𑀻𑀮𑁂𑀳𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁯𑁦-𑁫𑁯𑁪. 𑀞𑀺𑀢𑁂𑀦 𑀅𑀯𑀺𑀦𑀝𑁆𑀞𑁂𑀦. 𑀉𑀧𑀘𑀬𑁂𑀦𑀸𑀢𑀺 𑀲𑀻𑀮𑀪𑀽𑀢𑁂𑀦 𑀓𑀫𑁆𑀫𑀽𑀧𑀘𑀬𑁂𑀦. ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 ¶ 𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀬𑀣𑀸 ‘‘𑀦 𑀯𑀢𑁆𑀢𑀩𑁆𑀩𑀁 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑀸𑀦𑀁 𑀅𑀦𑀺𑀝𑁆𑀞𑀨𑀮𑀦𑁆𑀢𑀺…𑀧𑁂… 𑀢𑁂𑀦 𑀳𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀧𑀸𑀴𑀺 𑀧𑀯𑀢𑁆𑀢𑀸, 𑀏𑀯𑀁 𑀢𑀤𑀦𑀼𑀲𑀸𑀭𑁂𑀦 ‘‘𑀦 𑀯𑀢𑁆𑀢𑀩𑁆𑀩𑀁 𑀘𑁂𑀢𑀲𑀺𑀓𑀁 𑀲𑀻𑀮𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀻𑀮𑀁 𑀅𑀦𑀺𑀝𑁆𑀞𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀻𑀮𑀲𑁆𑀲 𑀘𑁂𑀢𑀲𑀺𑀓𑀪𑀸𑀯𑀲𑀸𑀥𑀓𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀘 𑀆𑀦𑁂𑀢𑁆𑀯𑀸 𑀢𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀅𑀘𑁂𑀢𑀲𑀺𑀓𑁄 𑀭𑀽𑀧𑀸𑀤𑀺𑀥𑀫𑁆𑀫𑁄 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀬𑀤𑀺 𑀲𑁄 𑀲𑀻𑀮𑀁 𑀪𑀯𑁂𑀬𑁆𑀬, 𑀯𑀺𑀦𑀸 𑀲𑀁𑀯𑀭𑀲𑀫𑀸𑀤𑀸𑀦𑁂𑀦 𑀯𑀺𑀦𑀸 𑀯𑀺𑀭𑀢𑀺𑀬𑀸 𑀲𑀻𑀮𑀯𑀸 𑀦𑀸𑀫 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀲𑀫𑀸𑀤𑀸𑀦𑀘𑁂𑀢𑀦𑀸 𑀯𑀺𑀭𑀢𑀺 𑀲𑀁𑀯𑀭𑁄 𑀲𑀻𑀮𑀁, 𑀢𑀲𑁆𑀫𑀸 ‘‘𑀲𑀻𑀮𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺, 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 𑀬𑀣𑀸 ‘‘𑀲𑀻𑀮𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀓𑀣𑀸 𑀆𑀕𑀢𑀸, 𑀢𑀣𑀸 ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀯𑀺𑀲𑀼𑀁 𑀆𑀕𑀢𑀸 𑀓𑀣𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀲𑀸 𑀧𑀦 𑀓𑀣𑀸 𑀫𑀕𑁆𑀕𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸

𑁫𑁯𑁮-𑁬𑁦𑁦. 𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀬𑀁 ‘‘𑀨𑀲𑁆𑀲𑁄 𑀤𑁂𑀢𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀆𑀭𑀸𑀫𑀭𑁄𑀧𑀸𑀤𑀺𑀲𑀼𑀢𑁆𑀢𑀸𑀳𑀭𑀡𑀜𑁆𑀘𑀸𑀢𑀺 𑀏𑀢𑁆𑀢𑀓𑀫𑁂𑀯 𑀧𑀭𑀺𑀪𑁄𑀕𑀓𑀣𑀸𑀬 𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀲𑀫𑀸𑀤𑀸𑀦…𑀧𑁂… 𑀤𑀝𑁆𑀞𑀩𑁆𑀩𑀸’’𑀢𑀺.

𑀲𑀫𑀸𑀤𑀸𑀦𑀳𑁂𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁦𑁩-𑁬𑁦𑁪. 𑀫𑀳𑀸𑀪𑀽𑀢𑀸𑀦𑀺 ¶ 𑀉𑀧𑀸𑀤𑀸𑀬 𑀧𑀯𑀢𑁆𑀢𑁄 𑀅𑀜𑁆𑀜𑀘𑀺𑀢𑁆𑀢𑀓𑁆𑀔𑀡𑁂𑀧𑀺 𑀮𑀩𑁆𑀪𑀫𑀸𑀦𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀼𑀩𑀦𑁆𑀥𑁄 𑀅𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀬𑀁 𑀯𑀸𑀤𑁄 ‘‘𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀧𑀼𑀜𑁆𑀜𑀽𑀧𑀘𑀬𑁄’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑀺𑀢𑁄𑀢𑀺 ¶ 𑀢𑀢𑁄 𑀅𑀜𑁆𑀜𑀸𑀦𑀼𑀩𑀦𑁆𑀥𑀸𑀬𑀁 ‘‘𑀆𑀡𑀢𑁆𑀢𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀡𑀢𑁆𑀢𑀺𑀬𑀸…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀡𑀢𑁆𑀢𑁄 𑀬𑀤𑀸 𑀆𑀡𑀢𑁆𑀢𑀪𑀸𑀯𑁂𑀦 𑀯𑀺𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀁 𑀲𑀸𑀥𑁂𑀢𑀺, 𑀢𑀤𑀸 𑀆𑀡𑀢𑁆𑀢𑀺𑀬𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀗𑁆𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀧𑀦𑀸𑀡𑀢𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀪𑀸𑀯𑁂𑀦 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀧𑀭𑀯𑀸𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀲𑁆𑀫𑀺𑀁 𑀤𑀺𑀯𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁧. 𑀏𑀓𑀸𑀤𑀲𑀫𑀯𑀕𑁆𑀕𑁄

𑁪. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁬𑁧𑁪-𑁬𑁧𑁫. ‘‘𑀅𑀦𑁆𑀥𑀓𑀸’’𑀢𑀺 𑀯𑀼𑀢𑁆𑀢𑀸 𑀧𑀼𑀩𑁆𑀩𑀲𑁂𑀮𑀺𑀬𑀅𑀧𑀭𑀲𑁂𑀮𑀺𑀬𑀭𑀸𑀚𑀕𑀺𑀭𑀺𑀓𑀲𑀺𑀤𑁆𑀥𑀢𑁆𑀣𑀺𑀓𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀫𑀳𑀸𑀲𑀗𑁆𑀖𑀺𑀓𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂…𑀧𑁂… 𑀪𑀯𑁂𑀬𑁆𑀬𑀼’’𑀦𑁆𑀢𑀺. 𑀢𑀢𑁆𑀣 𑀅𑀜𑁆𑀜𑁂𑀢𑀺 𑀯𑀘𑀦𑀁 𑀤𑁆𑀯𑀺𑀦𑁆𑀦𑀁 𑀓𑀣𑀸𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄. 𑀧𑀼𑀭𑀺𑀫𑀓𑀸𑀦𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀫𑀗𑁆𑀕𑀻 ‘‘𑀜𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀇𑀫𑁂𑀲𑀁 𑀲𑁄 𑀏𑀯 ‘‘𑀜𑀸𑀡𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄. 𑀭𑀸𑀕𑀯𑀺𑀕𑀫𑁄 𑀭𑀸𑀕𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀁, 𑀢𑀣𑀸 𑀅𑀜𑁆𑀜𑀸𑀡𑀯𑀺𑀕𑀫𑁄. 𑀬𑀣𑀸 𑀲𑀫𑀼𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑁄 ‘‘𑀜𑀸𑀡𑀻’’𑀢𑀺, 𑀧𑀝𑀺𑀧𑀓𑁆𑀔𑀢𑁄 ‘‘𑀅𑀜𑁆𑀜𑀸𑀡𑀻’’𑀢𑀺, 𑀏𑀯𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑁄 ‘‘𑀅𑀜𑁆𑀜𑀸𑀡𑀻’’𑀢𑀺, 𑀧𑀝𑀺𑀧𑀓𑁆𑀔𑀢𑁄 ‘‘𑀜𑀸𑀡𑀻’’𑀢𑀺 𑀯𑀼𑀢𑁆𑀢𑁄. 𑀅𑀜𑁆𑀜𑀸𑀡𑀲𑁆𑀲 𑀯𑀺𑀕𑀢𑀢𑁆𑀢𑀸 𑀲𑁄 ‘‘𑀜𑀸𑀡𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀦 𑀧𑀦 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸

𑁬𑁨𑁧-𑁬𑁨𑁪. 𑀬𑀲𑁆𑀫𑀺𑀁 ¶ ¶ 𑀆𑀬𑀼𑀓𑀧𑁆𑀧𑁂 𑀓𑀫𑁆𑀫𑀓𑁆𑀔𑀬𑁂𑀦 𑀫𑀭𑀡𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀲𑁂𑀦𑀸’’𑀢𑀺, 𑀬𑀲𑁆𑀫𑀺𑀁 𑀧𑀦 𑀆𑀬𑀼𑀓𑁆𑀔𑀬𑁂𑀦 𑀫𑀭𑀡𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀯𑀲𑁆𑀲𑀕𑀡𑀦𑀸𑀬𑀸’’𑀢𑀺. 𑀢𑀢𑁆𑀣 ‘‘𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦; 𑀅. 𑀦𑀺. 𑁩.𑁩𑁬) 𑀯𑀘𑀦𑀢𑁄 𑀬𑁂𑀪𑀼𑀬𑁆𑀬𑁂𑀦 𑀦𑀺𑀭𑀬𑁂 𑀓𑀫𑁆𑀫𑀓𑁆𑀔𑀬𑁂𑀦 𑀫𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀲𑁂𑀦 𑀯𑀸𑀢𑀺 𑀦𑀺𑀭𑀬𑀁𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. ‘‘𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀁 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 𑀫𑀦𑀼𑀲𑁆𑀲𑀸𑀦𑀁 𑀤𑁂𑀯𑀸𑀦𑀜𑁆𑀘 𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀘𑀦𑀢𑁄 𑀬𑁂𑀪𑀼𑀬𑁆𑀬𑁂𑀦 𑀢𑁂𑀲𑀁 𑀆𑀬𑀼𑀓𑁆𑀔𑀬𑁂𑀦 𑀫𑀭𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀲𑁆𑀲𑀕𑀡𑀦𑀸𑀬 𑀯𑀸𑀢𑀺 𑀫𑀦𑀼𑀲𑁆𑀲𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑁂 𑀘 𑀲𑀦𑁆𑀥𑀸𑀬𑀸’’𑀢𑀺. ‘‘𑀯𑀼𑀢𑁆𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀇𑀤𑁆𑀥𑀺𑀩𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁬𑁨𑁫-𑁬𑁨𑁬. 𑀲𑀫𑀁 𑀞𑀧𑀦𑀝𑁆𑀞𑁂𑀦𑀸𑀢𑀺 𑀲𑀫𑀁 𑀯𑀺𑀲𑀫𑀁 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀺𑀁 𑀧𑀝𑀺𑀩𑀸𑀳𑀺𑀢𑁆𑀯𑀸, 𑀯𑀺𑀓𑁆𑀔𑁂𑀧𑀫𑁂𑀯 𑀯𑀸 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀞𑀧𑀦𑀝𑁆𑀞𑁂𑀦. ‘‘𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀸𑀥𑀻’’𑀢𑀺 𑀯𑀤𑀦𑁆𑀢𑁂𑀦 𑀢𑀲𑁆𑀲 𑀘𑁂𑀢𑀲𑀺𑀓𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀘𑁂𑀢𑀲𑀺𑀓𑀦𑁆𑀢𑀭𑀁 𑀅𑀢𑁆𑀣𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺. 𑀪𑀸𑀯𑀦𑀸𑀬 𑀆𑀳𑀺𑀢𑀯𑀺𑀲𑁂𑀲𑀸𑀬 𑀏𑀓𑀕𑁆𑀕𑀢𑀸𑀬 𑀯𑀺𑀚𑁆𑀚𑀫𑀸𑀦𑀯𑀺𑀲𑁂𑀲𑀧𑀝𑀺𑀓𑁆𑀔𑁂𑀧𑁄 𑀙𑀮𑀁, 𑀲𑁄 𑀧𑀦𑀲𑁆𑀲 𑀅𑀦𑀸𑀳𑀺𑀢𑀯𑀺𑀲𑁂𑀲𑀸𑀬 𑀏𑀓𑀕𑁆𑀕𑀢𑀸𑀬 𑀲𑀸𑀫𑀜𑁆𑀜𑁂𑀦𑀸𑀢𑀺 𑀆𑀳 ‘‘𑀲𑀸𑀫𑀜𑁆𑀜𑀫𑀢𑁆𑀢𑁂𑀦𑀸’’𑀢𑀺.

𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁭. 𑀅𑀯𑀺𑀚𑁆𑀚𑀸𑀬 ¶ 𑀬𑀸 𑀞𑀺𑀢𑀢𑀸𑀢𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂 𑀬𑀸 𑀦𑀺𑀬𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸𑀲𑀗𑁆𑀔𑀸𑀢𑀸, 𑀬𑀸 𑀞𑀺𑀢𑀲𑀪𑀸𑀯𑀢𑀸 𑀦𑀺𑀧𑁆𑀨𑀦𑁆𑀦𑀸 ¶ , 𑀦 𑀥𑀫𑁆𑀫𑀫𑀢𑁆𑀢𑀢𑀸𑀝𑁆𑀞𑀺𑀢𑀢𑀸𑀬 𑀦𑀺𑀧𑁆𑀨𑀦𑁆𑀦𑀸𑀬 𑀯𑀲𑁂𑀦, 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀸 𑀞𑀺𑀢𑀢𑀸 𑀧𑀘𑁆𑀘𑀬𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀸𑀯𑀭𑀳𑀺𑀢𑀲𑁆𑀲𑀸𑀢𑀺 𑀇𑀤𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀸𑀦𑀁 𑀧𑀝𑀺𑀓𑁆𑀔𑁂𑀧𑀧𑀤𑀁 𑀤𑀝𑁆𑀞𑀩𑁆𑀩𑀁, 𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀫𑀢𑁆𑀢𑀲𑁆𑀲. 𑀲𑀩𑁆𑀩𑁄 𑀢𑀸𑀤𑀺𑀲𑁄𑀢𑀺 𑀇𑀫𑀺𑀦𑀸 𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲𑀧𑀺 𑀧𑀘𑁆𑀘𑀬𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀲𑁆𑀲𑀸 𑀘 𑀇𑀢𑀭𑀸’’𑀢𑀺.

𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸

𑁬𑁨𑁮. 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸 𑀭𑀽𑀧𑀸𑀤𑀺𑀓𑁂 𑀲𑀢𑀺 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀢𑀲𑁆𑀲𑀸 𑀢𑁂𑀳𑀺 𑀲𑀳 𑀉𑀧𑁆𑀧𑀸𑀤𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀉𑀧𑁆𑀧𑀸𑀤𑀸𑀤𑀻𑀲𑀼 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀅𑀦𑀺𑀘𑁆𑀘𑀢𑀸𑀯𑁄𑀳𑀸𑀭𑁄 𑀳𑁄𑀢𑀻𑀢𑀺 𑀬𑀣𑀸 𑀢𑀬𑁄 𑀤𑀡𑁆𑀟𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑁄 𑀢𑀺𑀤𑀡𑁆𑀟𑀯𑁄𑀳𑀸𑀭𑁄 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀳𑁄𑀢𑀺, 𑀏𑀯𑀁 𑀚𑀸𑀢𑀺𑀚𑀭𑀸𑀫𑀭𑀡𑀥𑀫𑁆𑀫𑁄 𑀦 𑀦𑀺𑀘𑁆𑀘𑁄 𑀅𑀦𑀺𑀘𑁆𑀘𑁄, 𑀢𑀲𑁆𑀲 𑀚𑀸𑀢𑀺𑀆𑀤𑀺𑀧𑀓𑀢𑀺𑀢𑀸 𑀅𑀦𑀺𑀘𑁆𑀘𑀢𑀸𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀉𑀧𑁆𑀧𑀸𑀤𑀸𑀤𑀻𑀲𑀼 𑀮𑀓𑁆𑀔𑀡𑁂𑀲𑀼 𑀅𑀦𑀺𑀘𑁆𑀘𑀢𑀸𑀯𑁄𑀳𑀸𑀭𑁄 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀻𑀲𑀼…𑀧𑁂… 𑀳𑁄𑀢𑀻’’𑀢𑀺. 𑀯𑀺𑀪𑀸𑀕𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦𑀸𑀢𑀺 𑀧𑀪𑁂𑀤𑀸𑀦𑀼𑀬𑀼𑀜𑁆𑀚𑀦𑀯𑀲𑁂𑀦. 𑀢𑀢𑁆𑀣 𑀬𑀣𑀸 𑀚𑀭𑀸𑀪𑀗𑁆𑀕𑀯𑀲𑁂𑀦 𑀅𑀦𑀺𑀘𑁆𑀘𑀢𑀸 𑀧𑀸𑀓𑀝𑀸 𑀳𑁄𑀢𑀺, 𑀦 𑀢𑀣𑀸 𑀚𑀸𑀢𑀺𑀯𑀲𑁂𑀦𑀸𑀢𑀺 𑀧𑀸𑀴𑀺𑀬𑀁 𑀚𑀭𑀸𑀫𑀭𑀡𑀯𑀲𑁂𑀦𑁂𑀯 𑀅𑀦𑀺𑀘𑁆𑀘𑀢𑀸𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀺𑀘𑁆𑀘𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀯𑀕𑁆𑀕𑁄

𑁧. 𑀲𑀁𑀯𑀭𑁄𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁩𑁦-𑁬𑁩𑁨. 𑀲𑀩𑁆𑀩𑀲𑁆𑀲𑀧𑀺 ¶ 𑀫𑀦𑀲𑁄 𑀫𑀦𑁄𑀤𑁆𑀯𑀸𑀭𑀪𑀸𑀯𑀢𑁄 ‘‘𑀯𑀺𑀧𑀸𑀓𑀤𑁆𑀯𑀸𑀭𑀦𑁆𑀢𑀺 𑀪𑀯𑀗𑁆𑀕𑀫𑀦𑀁 𑀯𑀤𑀢𑀻’’𑀢𑀺 𑀆𑀳.

𑀲𑀁𑀯𑀭𑁄𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁬𑁩𑁩-𑁬𑁩𑁫. 𑀲𑀯𑀺𑀧𑀸𑀓𑀸𑀧𑀺 ¶ 𑀤𑀲𑁆𑀲𑀺𑀢𑀸𑀬𑁂𑀯 𑀦𑀸𑀫 𑀳𑁄𑀢𑀺 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑀸 𑀲𑀯𑀺𑀧𑀸𑀓𑀸𑀢𑀺 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀴𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁬𑁩𑁮-𑁬𑁪𑁦. 𑀫𑀦𑀸𑀬𑀢𑀦𑁂𑀓𑀤𑁂𑀲𑀲𑁆𑀲 𑀯𑀺𑀧𑀸𑀓𑀲𑁆𑀲 𑀅𑀢𑁆𑀣𑀺𑀢𑀸𑀬 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀲𑀴𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑀣𑀸𑀯𑀡𑁆𑀡𑀦𑀸

𑁬𑁪𑁧-𑁬𑁪𑁫. 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲. 𑀢𑁂𑀦𑀸𑀳 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀪𑀸𑀯𑁂 𑀘 𑀦𑀺𑀬𑀸𑀫𑀁 ¶ 𑀇𑀘𑁆𑀙𑀲𑀻’’𑀢𑀺. 𑀬𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦. 𑀅𑀦𑁆𑀢𑀭𑀸𑀢𑀺 𑀲𑀢𑁆𑀢 𑀪𑀯𑁂 𑀅𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀅𑀦𑁆𑀢𑀭𑁂𑀬𑁂𑀯. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀅𑀧𑀭𑁂𑀢𑀺 𑀧𑀤𑀓𑀸𑀭𑀸. 𑀢𑀲𑁆𑀲𑀸𑀢𑀺 𑀬𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀯𑀸, 𑀓𑁄𑀮𑀁𑀓𑁄𑀮𑁄𑀢𑀺 𑀯𑀸, 𑀏𑀓𑀩𑀻𑀚𑀻𑀢𑀺 𑀯𑀸 𑀪𑀕𑀯𑀢𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑁆𑀬𑀸𑀓𑀢𑁄, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸 𑀅𑀦𑁆𑀢𑀭𑀸 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑁄 𑀦𑀢𑁆𑀣𑀺 𑀅𑀯𑀺𑀢𑀣𑀤𑁂𑀲𑀦𑀢𑁆𑀢𑀸. 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀢𑀲𑁆𑀲 𑀅𑀪𑀺𑀲𑀫𑀬𑁄, 𑀲𑁆𑀯𑀸𑀬𑀁 𑀯𑀺𑀪𑀸𑀕𑁄 𑀢𑁂𑀲𑀁𑀬𑁂𑀯 𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑁄 𑀪𑀯𑀦𑀺𑀬𑀸𑀫𑁂𑀦 𑀢𑀸𑀤𑀺𑀲𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀬𑀲𑁆𑀫𑀸 𑀓𑀲𑁆𑀲𑀘𑀺 𑀫𑀼𑀤𑀼𑀓𑀸𑀦𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀢𑀺𑀓𑁆𑀔𑀪𑀸𑀯𑀁 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀪𑀩𑁆𑀩𑁄𑀢𑀺 𑀯𑀼𑀘𑁆𑀘𑀢𑀺, 𑀦 𑀲𑁄 𑀅𑀪𑀩𑁆𑀩𑁄 𑀦𑀸𑀫𑀸’’𑀢𑀺 𑀘 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀦 𑀢𑀸𑀤𑀺𑀲𑀁 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺𑀆𑀤𑀺𑀦𑀸 𑀦𑀺𑀬𑀫𑁂𑀢𑁆𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀲𑁆𑀫𑀸 𑀆𑀳 ‘‘𑀦 𑀧𑀦 𑀅𑀦𑁆𑀢𑀭𑀸 𑀅𑀪𑀺𑀲𑀫𑁂𑀢𑀼𑀁 𑀪𑀩𑁆𑀩𑀢𑀸 𑀯𑀼𑀢𑁆𑀢𑀸’’𑀢𑀺. 𑀅𑀬𑀜𑁆𑀘 𑀦𑀬𑁄 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀓𑀭𑁄 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳.

𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀯𑀕𑁆𑀕𑁄

𑁧. 𑀓𑀧𑁆𑀧𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁬𑁫𑁪-𑁬𑁫𑁭. ‘‘𑀳𑁂𑀝𑁆𑀞𑀸 ¶ 𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑀫𑁂𑀯𑀸’’𑀢𑀺 𑀇𑀤𑀁 𑀇𑀤𑁆𑀥𑀺𑀩𑀮𑀓𑀣𑀸𑀬𑀁 𑀬𑀁 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀁 𑀅𑀦𑀸𑀕𑀢𑀦𑁆𑀢𑀺 𑀇𑀤𑀁 𑀅𑀯𑀺𑀲𑁂𑀲𑁂𑀦 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀘𑁄𑀤𑁂𑀢𑀻’’𑀢𑀺𑀆𑀤𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀳𑁂𑀝𑁆𑀞𑀸𑀢𑀺 𑀇𑀤𑁆𑀥𑀺𑀩𑀮𑀓𑀣𑀸𑀬’’𑀦𑁆𑀢𑀺. 𑀢𑀢𑁆𑀣 ‘‘𑀤𑁆𑀯𑁂 𑀓𑀧𑁆𑀧𑁂’’𑀢𑀺𑀆𑀤𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑀲𑀫𑀢𑁆𑀣𑀢𑀸𑀘𑁄𑀤𑀦𑀸𑀯𑀲𑁂𑀦 𑀆𑀕𑀢𑀸, 𑀇𑀥 𑀧𑀦 𑀲𑀗𑁆𑀖𑀪𑁂𑀤𑀓𑁄 𑀆𑀬𑀼𑀓𑀧𑁆𑀧𑀫𑁂𑀯 𑀅𑀝𑁆𑀞𑀢𑁆𑀯𑀸 𑀬𑀤𑀺 𑀏𑀓𑀁 𑀫𑀳𑀸𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬, 𑀬𑀣𑀸 𑀏𑀓𑀁, 𑀏𑀯𑀁 𑀅𑀦𑁂𑀓𑁂𑀧𑀺 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸.

𑀓𑀧𑁆𑀧𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁬𑁬𑁩-𑁬𑁬𑁪. 𑀅𑀧𑁆𑀧𑀢𑁆𑀢𑀦𑀺𑀬𑀸𑀫𑀸𑀦𑀦𑁆𑀢𑀺 ¶ 𑀬𑁂 𑀅𑀦𑀼𑀧𑁆𑀧𑀦𑁆𑀦𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀸 𑀧𑀼𑀕𑁆𑀕𑀮𑀸, 𑀢𑁂𑀲𑀁 𑀥𑀫𑁆𑀫𑁂. 𑀓𑁂 𑀧𑀦 𑀢𑁂? 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸. 𑀢𑁂 𑀳𑀺 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀬 ‘‘𑀢𑁂𑀪𑀽𑀫𑀓𑀸’’𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦 𑀧𑀢𑁆𑀢𑀦𑀺𑀬𑀸𑀫𑀸𑀦𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀅𑀦𑀺𑀬𑀢𑀥𑀫𑁆𑀫𑀸, 𑀦 𑀢𑁂𑀲𑀫𑁂𑀢𑁆𑀣 𑀲𑀗𑁆𑀕𑀳𑁄 𑀓𑀢𑁄. 𑀦 𑀳𑀺 𑀢𑁂𑀳𑀺 𑀲𑀫𑀦𑁆𑀦𑀸𑀕𑀫𑁂𑀦 𑀅𑀦𑀺𑀬𑀢𑀢𑀸 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀳 ‘‘𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀧𑀺 𑀅𑀦𑀺𑀬𑀢𑁄𑀬𑁂𑀯𑀸’’𑀢𑀺. 𑀇𑀫𑀁 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀸𑀫𑁄 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺, 𑀉𑀧𑀘𑀺𑀢𑀲𑀫𑁆𑀪𑀸𑀭𑀢𑀸𑀬 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑀼𑀁 𑀪𑀩𑁆𑀩𑀢𑀸𑀯 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀬𑀢𑁄𑀢𑀺 𑀯𑀘𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀉𑀪𑀬𑀲𑁆𑀲𑀧𑀻𑀢𑀺 𑀦𑀺𑀬𑀢𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻𑀢𑀺 𑀯𑀘𑀦𑀤𑁆𑀯𑀬𑀲𑁆𑀲.

𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀲𑀸𑀢𑀭𑀸𑀕𑀓𑀣𑀸𑀯𑀡𑁆𑀡𑀦𑀸

𑁬𑁭𑁪. 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄𑀢𑀺 ‘‘𑀅𑀳𑁄 𑀯𑀢 𑀫𑁂 𑀪𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑁄. 𑀅𑀜𑁆𑀜𑀣𑀸𑀢𑀺 𑀦𑀦𑁆𑀤𑀦𑀸𑀤𑀺𑀆𑀓𑀸𑀭𑁂𑀦.

𑀅𑀲𑀸𑀢𑀭𑀸𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀢𑀡𑁆𑀳𑀸𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁭𑁬-𑁬𑁮𑁦. 𑀕𑀳𑁂𑀢𑁆𑀯𑀸𑀢𑀺 ¶ 𑀏𑀢𑁂𑀦 𑀕𑀳𑀡𑀫𑀢𑁆𑀢𑀫𑁂𑀯 𑀢𑀁, 𑀦 𑀧𑀦 𑀲𑀸 𑀢𑀸𑀤𑀺𑀲𑀻 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀸𑀭𑀫𑁆𑀫𑀡𑀸 𑀅𑀩𑁆𑀬𑀸𑀓𑀢𑀸 𑀯𑀸 𑀢𑀡𑁆𑀳𑀸 𑀅𑀢𑁆𑀣𑀻𑀢𑀺. 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀓𑁄𑀝𑁆𑀞𑀸𑀲𑁂𑀳𑀺. 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀸 𑀙𑀧𑀺 𑀢𑀡𑁆𑀳𑀸.

𑀥𑀫𑁆𑀫𑀢𑀡𑁆𑀳𑀸𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀯𑀕𑁆𑀕𑁄

𑁧. 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸

𑁬𑁮𑁬-𑁬𑁯𑁦. 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁄𑀬𑁂𑀯𑁂𑀢𑁆𑀣 ¶ 𑀧𑀝𑀺𑀲𑀦𑁆𑀥𑀸𑀦𑀁 𑀖𑀝𑀦𑀜𑁆𑀘𑀸𑀢𑀺 𑀆𑀳 ‘‘𑀅𑀦𑀦𑁆𑀢𑀭𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺.

𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁯𑁧-𑁬𑁯𑁨. 𑀓𑁂𑀘𑀺 𑀯𑀸𑀤𑀺𑀦𑁄𑀢𑀺 𑀓𑀸𑀧𑀺𑀮𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀅𑀪𑀺𑀩𑁆𑀬𑀢𑁆𑀢𑀯𑀸𑀤𑀺𑀦𑁄 𑀯𑀺𑀚𑁆𑀚𑀫𑀸𑀦𑀫𑁂𑀯 𑀓𑀸𑀭𑀡𑁂 𑀨𑀮𑀁 𑀅𑀦𑀪𑀺𑀩𑁆𑀬𑀢𑁆𑀢𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀧𑀘𑁆𑀙𑀸 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀸 𑀩𑀻𑀚𑀸𑀯𑀢𑁆𑀣𑀸𑀬 𑀯𑀺𑀚𑁆𑀚𑀫𑀸𑀦𑀸𑀧𑀺 𑀭𑀼𑀓𑁆𑀔𑀸𑀤𑀻𑀦𑀁 𑀦 𑀅𑀗𑁆𑀓𑀼𑀭𑀸𑀤𑀬𑁄 𑀆𑀯𑀺𑀪𑀯𑀦𑁆𑀢𑀺, 𑀩𑀻𑀚𑀫𑀢𑁆𑀢𑀁 𑀆𑀯𑀺𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀓𑀣𑁂𑀦𑁆𑀢𑀺.

𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁬𑁯𑁩-𑁬𑁯𑁭. 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀲𑁄𑀢𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀫𑀜𑁆𑀜𑀫𑀸𑀦𑁄. 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑁂𑀦𑁂𑀯 𑀢𑀲𑁆𑀲 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀬𑀢𑀸 ¶ 𑀭𑀽𑀧𑀸𑀭𑀫𑁆𑀫𑀡𑀢𑀸 𑀘 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀧𑀝𑀺𑀜𑁆𑀜𑀸𑀢𑀸 𑀘 𑀲𑁄𑀢𑀲𑀦𑁆𑀦𑀺𑀲𑁆𑀲𑀬𑀢𑀸 𑀲𑀤𑁆𑀤𑀸𑀭𑀫𑁆𑀫𑀡𑀢𑀸 𑀘𑀸𑀢𑀺 𑀆𑀳 ‘‘𑀦 𑀲𑁄 𑀘𑀓𑁆𑀔𑀼𑀫𑁆𑀳𑀺 𑀲𑀤𑁆𑀤𑀸𑀭𑀫𑁆𑀫𑀡’’𑀦𑁆𑀢𑀺. 𑀢𑀢𑁆𑀣 𑀲𑀤𑁆𑀤𑀸𑀭𑀫𑁆𑀫𑀡𑀦𑁆𑀢𑀺 ‘‘𑀲𑁄𑀢𑀯𑀺𑀜𑁆𑀜𑀸𑀡𑀁 𑀇𑀘𑁆𑀙𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀬𑀺𑀤𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺𑀬𑀸 𑀏𑀯𑀁 𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀦𑀦𑁆𑀢𑀭𑀽𑀧𑀮𑀤𑁆𑀥𑀺𑀯𑀲𑁂𑀦 𑀆𑀧𑀦𑁆𑀦𑀢𑁆𑀢𑀸’’𑀢𑀺.

𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁬𑁯𑁮-𑁬𑁯𑁯. 𑀲𑀫𑁆𑀫𑀸𑀯𑀸𑀘𑀸𑀤𑀻𑀢𑀺 ¶ 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸 𑀲𑀤𑁆𑀤𑀲𑀪𑀸𑀯𑀸, 𑀇𑀢𑀭𑁄 𑀘 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀪𑀸𑀯𑁄, 𑀉𑀪𑀬𑀫𑁆𑀧𑀺 𑀯𑀸 𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀭𑀽𑀧𑀦𑁆𑀢𑀺𑀲𑁆𑀲 𑀮𑀤𑁆𑀥𑀺.

𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀜𑁆𑀜𑁄𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁦-𑁭𑁦𑁧. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀓𑁆𑀔𑀡𑁂. 𑀲𑁄 𑀳𑀻𑀢𑀺 𑀧𑀘𑁆𑀙𑀺𑀫𑀧𑀸𑀞𑁄.

𑀅𑀜𑁆𑀜𑁄𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀭𑀺𑀬𑀼𑀝𑁆𑀞𑀸𑀦𑀁𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁨. 𑀢𑁂𑀢𑀺 𑀭𑀸𑀕𑀸𑀤𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑁆𑀢𑀲𑁆𑀲𑀧𑀺 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸.

𑀧𑀭𑀺𑀬𑀼𑀝𑁆𑀞𑀸𑀦𑀁𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁩-𑁭𑁦𑁫. 𑀓𑀺𑀮𑁂𑀲𑀯𑀢𑁆𑀣𑀼𑀑𑀓𑀸𑀲𑀯𑀲𑁂𑀦𑀸𑀢𑀺 ¶ 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑀪𑀽𑀫𑀺𑀯𑀲𑁂𑀦. 𑀭𑀽𑀧𑀥𑀸𑀢𑀼𑀲𑀳𑀕𑀢𑀯𑀲𑁂𑀦 𑀅𑀦𑀼𑀲𑁂𑀢𑀻𑀢𑀺 𑀓𑀸𑀫𑀭𑀸𑀕𑁄 𑀬𑀣𑀸 𑀓𑀸𑀫𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀸𑀬 𑀓𑀸𑀫𑀥𑀸𑀢𑀼𑀬𑀸 𑀲𑀳 𑀧𑀘𑁆𑀘𑀬𑀲𑀫𑀯𑀸𑀬𑁂 ¶ 𑀉𑀧𑁆𑀧𑀚𑁆𑀚𑀦𑀸𑀭𑀳𑁄, 𑀢𑀫𑁂𑀯 𑀭𑀽𑀧𑀥𑀸𑀢𑀼𑀬𑀸𑀧𑀻𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀺𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸 𑀳𑀺 𑀅𑀦𑀼𑀲𑀬𑀦𑀁.

𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸

𑁭𑁦𑁬-𑁬𑁦𑁮. 𑀲𑀩𑁆𑀩𑀣𑀸𑀧𑀻𑀢𑀺 𑀅𑀯𑀺𑀧𑀸𑀓𑀪𑀸𑀯𑁂𑀦𑀧𑀺 𑀲𑀲𑁆𑀲𑀢𑀸𑀤𑀺𑀪𑀸𑀯𑁂𑀦𑀧𑀺.

𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁯-𑁭𑁧𑁦. 𑀢𑀲𑁆𑀫𑀸 𑀤𑀺𑀝𑁆𑀞𑀺 𑀮𑁄𑀓𑀺𑀬𑀧𑀭𑀺𑀬𑀸𑀧𑀦𑁆𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑁄 𑀳𑁄𑀢𑀺 𑀯𑀻𑀢𑀤𑁄𑀲𑀸𑀤𑀺𑀯𑁄𑀳𑀸𑀭𑀪𑀸𑀯𑀢𑁄𑀢𑀺. 𑀢𑀢𑁄 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀭𑀽𑀧𑀤𑀺𑀝𑁆𑀞𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀭𑀽𑀧𑀤𑀺𑀝𑁆𑀞𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀯𑀸𑀤𑀺𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀅𑀬𑀫𑀢𑁆𑀣𑀯𑀺𑀪𑀸𑀯𑀦𑀸𑀢𑀺 𑀆𑀳 ‘‘𑀬𑀤𑀺 𑀘 𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀬𑀸’’𑀢𑀺. 𑀢𑀣𑀸 𑀘 𑀲𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 ‘‘𑀯𑀻𑀢𑀤𑀺𑀝𑁆𑀞𑀺𑀓𑁄’’𑀢𑀺 𑀏𑀯𑀁 𑀯𑁄𑀳𑀸𑀭𑀸𑀪𑀸𑀯𑀢𑁄. 𑀦 𑀳𑀺 𑀲𑀸 𑀢𑀲𑁆𑀲 𑀅𑀯𑀺𑀕𑀢𑀸 𑀤𑀺𑀝𑁆𑀞𑀺, 𑀬𑀢𑁄 𑀲𑁄 𑀯𑀻𑀢𑀤𑀺𑀝𑁆𑀞𑀺𑀓𑁄𑀢𑀺 𑀦 𑀯𑀼𑀘𑁆𑀘𑀢𑀺. 𑀬𑁂𑀦𑀸𑀢𑀺 𑀓𑀸𑀫𑀤𑀺𑀝𑁆𑀞𑀺𑀪𑀸𑀯𑁂𑀦.

𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀤𑁆𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

𑁧. 𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸

𑁭𑁧𑁧-𑁭𑁧𑁭. 𑀯𑀯𑀢𑁆𑀣𑀺𑀢𑁄𑀢𑀺 ¶ ¶ 𑀅𑀲𑀁𑀓𑀺𑀡𑁆𑀡𑁄. 𑀬𑁄 𑀳𑀺 𑀥𑀫𑁆𑀫𑁄 𑀬𑁂𑀦 𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀢𑀢𑁄 𑀅𑀜𑁆𑀜𑁂𑀦𑀧𑀺 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀧𑀘𑁆𑀘𑀬𑀢𑀸 𑀲𑀁𑀓𑀺𑀡𑁆𑀡𑀸 𑀦𑀸𑀫 𑀪𑀯𑁂𑀬𑁆𑀬. 𑀯𑀺𑀭𑀼𑀤𑁆𑀥𑀸𑀲𑀫𑁆𑀪𑀯𑀻𑀦𑀁 𑀯𑀺𑀬 𑀢𑀩𑁆𑀩𑀺𑀥𑀼𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀁 𑀲𑀳𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁧𑁮-𑁭𑁧𑁯. 𑀲𑀳𑀚𑀸𑀢𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀘 𑀅𑀯𑀺𑀚𑁆𑀚𑀸𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀦𑁆𑀢𑀭𑀸𑀤𑀺𑀦𑀸𑀧𑀺 𑀳𑀺 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯. 𑀅𑀜𑁆𑀜𑀫𑀜𑁆𑀜𑀸𑀦𑀦𑁆𑀢𑀭𑀁 𑀅𑀯𑀢𑁆𑀯𑀸 𑀅𑀯𑀺𑀕𑀢𑀸𑀦𑀦𑁆𑀢𑀭𑀁 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀘𑀦𑀁 𑀓𑀫𑀪𑁂𑀤𑁄, 𑀅𑀢𑁆𑀣𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑀪𑀽𑀢𑁄𑀬𑁂𑀯 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀅𑀲𑀸𑀥𑀸𑀭𑀡𑀢𑀸𑀬𑀸𑀢𑀺 𑀧𑀤𑀦𑁆𑀢𑀭𑀸𑀲𑀸𑀥𑀸𑀭𑀡𑀢𑀸𑀬. 𑀢𑁂𑀦𑀸𑀳 ‘‘𑀯𑀓𑁆𑀔𑀢𑀺 𑀳𑀻’’𑀢𑀺𑀆𑀤𑀺.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸

𑁭𑁩𑁨. 𑀬𑀤𑀺𑀧𑀺 𑀲𑁂𑀲𑀁 𑀦𑀸𑀫 𑀕𑀳𑀺𑀢𑀢𑁄 𑀅𑀜𑁆𑀜𑀁, 𑀢𑀣𑀸𑀧𑀺 𑀧𑀓𑀭𑀡𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯𑁂𑀢𑁆𑀣 𑀢𑀁 𑀕𑀬𑁆𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀲𑀁…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀅𑀦𑀯𑀲𑁂𑀲𑀫𑁂𑀯 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀫𑁆𑀧𑀺 ¶ 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀬𑁄𑀚𑀦𑀸. 𑀧𑀸𑀡𑀺𑀲𑀫𑁆𑀨𑀲𑁆𑀲𑀸𑀧𑀺 𑀓𑀫𑀦𑁆𑀢𑀻𑀢𑀺𑀆𑀤𑀺𑀓𑀁 𑀲𑀭𑀻𑀭𑀧𑀓𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁩𑁩-𑁭𑁩𑁪. 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀘𑀯𑀢𑀺, 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀯𑀸𑀤𑀁 𑀧𑀭𑀯𑀸𑀤𑀻 𑀦𑀸𑀦𑀼𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀢…𑀧𑁂… 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁭𑁩𑁫. 𑀬𑀣𑀸 ¶ 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀯𑀺𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑀸𑀧𑀢𑁆𑀢𑀺 𑀯𑀺𑀢𑀓𑁆𑀓𑀸𑀤𑀺𑀭𑀳𑀺𑀢𑀸 𑀳𑁄𑀢𑀺, 𑀏𑀯𑀁 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀸𑀧𑀺 𑀲𑀜𑁆𑀜𑀸𑀭𑀳𑀺𑀢𑀸𑀯 𑀲𑀺𑀬𑀸𑀢𑀺 𑀢𑀲𑁆𑀲 𑀮𑀤𑁆𑀥𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀧𑀺 𑀅𑀲𑀜𑁆𑀜𑀺𑀢𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺.

𑁭𑁩𑁬. 𑀬𑀤𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀓𑀣𑀁 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 𑀅𑀲𑀜𑁆𑀜𑀺𑀢𑀸, 𑀦 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄’’𑀢𑀺.

𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁩𑁮-𑁭𑁩𑁯. ‘‘𑀓𑀫𑁆𑀫𑀽𑀧𑀘𑀬𑁄 𑀓𑀫𑁆𑀫𑁂𑀦 𑀲𑀳𑀚𑀸𑀢𑁄’’𑀢𑀺 𑀧𑀼𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀯𑀺𑀧𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀻𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲𑀧𑀺 𑀳𑀺 𑀅𑀢𑁆𑀣𑀺 𑀲𑀳𑀚𑀸𑀢𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁪𑁧. 𑀢𑀺𑀡𑁆𑀡𑀦𑁆𑀢𑀺 ¶ 𑀓𑀫𑁆𑀫𑀓𑀫𑁆𑀫𑀽𑀧𑀘𑀬𑀓𑀫𑁆𑀫𑀯𑀺𑀧𑀸𑀓𑀸𑀦𑀁.

𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀦𑁆𑀦𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁬. 𑀲𑁄𑀴𑀲𑀫𑀯𑀕𑁆𑀕𑁄

𑁩. 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁭𑁪𑁭-𑁭𑁪𑁮. 𑀦 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀢𑀁 𑀅𑀦𑀼𑀧𑁆𑀧𑀤𑀺𑀲𑁆𑀲𑀢𑀺, 𑀦 𑀢𑀲𑁆𑀲. 𑀬𑁄 𑀳𑀺 𑀅𑀦𑀼𑀧𑁆𑀧𑀤𑁂𑀢𑀺, 𑀬𑀲𑁆𑀲 𑀘 𑀅𑀦𑀼𑀧𑁆𑀧𑀤𑁂𑀢𑀺, 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀸 𑀇𑀥 𑀧𑀭𑁂𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁭𑁪𑁯-𑁭𑁫𑁩. 𑀢𑀁𑀘𑀺𑀢𑁆𑀢𑀢𑀸𑀬𑀸𑀢𑀺 ¶ 𑀏𑀢𑁆𑀣 𑀫𑀦𑀲𑀺𑀓𑀭𑁄𑀦𑁆𑀢𑁄 𑀬𑀤𑀺 𑀲𑀩𑁆𑀩𑀲𑀗𑁆𑀔𑀸𑀭𑁂 𑀏𑀓𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀬𑁂𑀦 𑀘𑀺𑀢𑁆𑀢𑁂𑀦 𑀫𑀦𑀲𑀺 𑀓𑀭𑁄𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑀦𑁆𑀢𑁄𑀕𑀥𑀢𑁆𑀢𑀸 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀁 𑀘𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀏𑀢𑀲𑁆𑀲𑀸𑀢𑀺 𑀢𑀁𑀘𑀺𑀢𑁆𑀢𑀢𑀸 𑀦𑀸𑀫 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀤𑁂𑀯 𑀆𑀭𑀫𑁆𑀫𑀡𑀪𑀽𑀢’’𑀦𑁆𑀢𑀺𑀆𑀤𑀺. 𑀏𑀢𑁂𑀦 𑀢𑀲𑁆𑀲𑁂𑀯 𑀢𑁂𑀦 𑀫𑀦𑀲𑀺𑀓𑀭𑀡𑀸𑀲𑀫𑁆𑀪𑀯𑀫𑀸𑀳, 𑀢𑀁 𑀯𑀸𑀢𑀺𑀆𑀤𑀺𑀦𑀸 𑀧𑀦 𑀲𑀲𑀁𑀯𑁂𑀤𑀦𑀸𑀯𑀸𑀤𑀸𑀧𑀢𑁆𑀢𑀺𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

𑁧. 𑀅𑀢𑁆𑀣𑀺𑀅𑀭𑀳𑀢𑁄𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁭𑁬-𑁭𑁭𑁯. 𑀓𑀺𑀭𑀺𑀬𑀘𑀺𑀢𑁆𑀢𑀁 ¶ 𑀅𑀩𑁆𑀬𑀸𑀓𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 ‘‘𑀓𑀺𑀭𑀺𑀬𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸, 𑀤𑀸𑀦𑀸𑀤𑀺𑀧𑀯𑀢𑁆𑀢𑀦𑁂𑀦 𑀤𑀸𑀦𑀫𑀬𑀸𑀤𑀺𑀧𑀼𑀜𑁆𑀜𑀢𑁆𑀢𑁂𑀦 𑀘 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀢𑁆𑀣𑀺𑀅𑀭𑀳𑀢𑁄𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀢𑁆𑀣𑀺𑀅𑀭𑀳𑀢𑁄𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁦. 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀸𑀦𑀦𑁆𑀢𑀺 𑀯𑀺𑀧𑀸𑀓𑀤𑀸𑀦𑀁 𑀧𑀢𑀺 𑀅𑀮𑀤𑁆𑀥𑁄𑀓𑀸𑀲𑀸𑀦𑀁. 𑀩𑁆𑀬𑀦𑁆𑀢𑀻𑀪𑀸𑀯𑀦𑁆𑀢𑀺 𑀯𑀺𑀕𑀢𑀦𑁆𑀢𑀢𑀁, 𑀯𑀺𑀕𑀫𑀁 𑀅𑀯𑀺𑀧𑀸𑀓𑀦𑁆𑀢𑀺 𑀅𑀢𑁆𑀣𑁄.

𑁭𑁮𑁧. 𑀢𑀢𑁄 𑀧𑀭𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑁂𑀦 𑀅𑀢𑁆𑀣𑀲𑀺𑀤𑁆𑀥𑀺, 𑀦 𑀓𑁂𑀯𑀮𑁂𑀦 𑀅𑀦𑁆𑀯𑀬𑁂𑀦𑀸𑀢𑀺 𑀆𑀳 ‘‘𑀢𑀸𑀯 𑀦 𑀓𑀫𑀢𑀺, 𑀢𑀢𑁄 𑀧𑀭𑀁 𑀓𑀫𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺. 𑀢𑀢𑁆𑀣 𑀢𑀢𑁄 𑀧𑀭𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑀕𑀫𑀦𑀢𑁄 𑀧𑀭𑀁. 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑀮𑀓𑁆𑀔𑀡𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁂𑀯 𑀮𑀓𑁆𑀔𑀡𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄𑀧𑀸𑀡𑀲𑀜𑁆𑀜𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀢𑁂𑀦𑀸𑀢𑀺 𑀬𑁄 𑀧𑀭𑁂𑀦 𑀉𑀧𑀓𑁆𑀓𑀫𑁄 𑀓𑀢𑁄 ¶ , 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀦 𑀫𑀢𑁄, 𑀥𑀫𑁆𑀫𑀢𑀸𑀫𑀭𑀡𑁂𑀦𑁂𑀯 𑀫𑀢𑁄𑀢𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀅𑀯𑀺𑀲𑁂𑀲𑀯𑀺𑀤𑀽𑀳𑀺, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀯𑀸 𑀳𑁄𑀢𑀼 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀯𑀸, 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀬𑀸𑀯 𑀧𑀸𑀡𑀸𑀢𑀺𑀧𑀸𑀢𑁄.

𑀦𑀢𑁆𑀣𑀺𑀅𑀭𑀳𑀢𑁄𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀩𑁆𑀩𑀫𑀺𑀤𑀁𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁪. 𑀅𑀩𑀻𑀚𑀢𑁄𑀢𑀺 ¶ 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀩𑀻𑀚𑀢𑁄 𑀅𑀜𑁆𑀜𑀩𑀻𑀚𑀢𑁄 𑀘. 𑀢𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁, 𑀕𑀺𑀮𑀸𑀦𑀧𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀫𑀺𑀤𑀁𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸

𑁭𑁮𑁮. 𑀯𑀺𑀦𑀸𑀧𑀺 𑀅𑀦𑀺𑀘𑁆𑀘𑀝𑁆𑀞𑁂𑀦𑀸𑀢𑀺 𑀅𑀦𑀺𑀘𑁆𑀘𑀝𑁆𑀞𑀁 𑀞𑀧𑁂𑀢𑁆𑀯𑀸𑀧𑀺 𑀅𑀝𑁆𑀞𑀧𑁂𑀢𑁆𑀯𑀸𑀧𑀻𑀢𑀺 𑀅𑀢𑁆𑀣𑁄, 𑀦 𑀅𑀦𑀺𑀘𑁆𑀘𑀝𑁆𑀞𑀯𑀺𑀭𑀳𑁂𑀦𑀸𑀢𑀺. 𑀦 𑀳𑀺 𑀅𑀦𑀺𑀘𑁆𑀘𑀝𑁆𑀞𑀯𑀺𑀭𑀳𑀺𑀢𑀁 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀅𑀢𑁆𑀣𑀺.

𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀯𑀢𑁆𑀢𑀩𑁆𑀩𑀁𑀲𑀗𑁆𑀖𑁄𑀤𑀓𑁆𑀔𑀺𑀡𑀁𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁩-𑁭𑁯𑁪. 𑀅𑀧𑁆𑀧𑀝𑀺𑀕𑁆𑀕𑀳𑀡𑀢𑁄𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄.

𑀦𑀯𑀢𑁆𑀢𑀩𑁆𑀩𑀁𑀲𑀗𑁆𑀖𑁄𑀤𑀓𑁆𑀔𑀺𑀡𑀁𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁦𑁦-𑁮𑁦𑁧. 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀕𑀼𑀡𑀯𑀺𑀲𑁂𑀲𑀦𑀺𑀭𑀧𑁂𑀓𑁆𑀔𑀸, 𑀢𑀲𑁆𑀲 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀝𑀺𑀕𑁆𑀕𑀸𑀳𑀓𑁂𑀦 ¶ 𑀧𑀘𑁆𑀘𑀬𑀪𑀽𑀢𑁂𑀦 𑀯𑀺𑀦𑀸’’𑀢𑀺. 𑀲𑀘𑁆𑀘𑀫𑁂𑀢𑀦𑁆𑀢𑀺 ¶ 𑀮𑀤𑁆𑀥𑀺𑀓𑀺𑀢𑁆𑀢𑀦𑁂𑀦 𑀯𑀼𑀢𑁆𑀢𑀪𑀸𑀯𑀫𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀁 𑀤𑀸𑀦𑀘𑁂𑀢𑀦𑀸𑀬 𑀫𑀳𑀸𑀨𑀮𑀢𑀸. 𑀧𑀘𑁆𑀘𑀬𑀪𑀸𑀯𑁄𑀬𑁂𑀯 𑀳𑀺 𑀢𑀲𑁆𑀲, 𑀦 𑀢𑀲𑁆𑀲𑀸 𑀓𑀸𑀭𑀡𑀢𑁆𑀢𑀁. 𑀢𑁂𑀦𑀸𑀳 ‘‘𑀤𑀸𑀦𑀘𑁂𑀢𑀦𑀸𑀦𑀺𑀩𑁆𑀩𑀢𑁆𑀢𑀦𑁂𑀦 𑀬𑀤𑀺 𑀪𑀯𑁂𑀬𑁆𑀬𑀸’’𑀢𑀺𑀆𑀤𑀺.

𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

𑁧. 𑀫𑀦𑀼𑀲𑁆𑀲𑀮𑁄𑀓𑀓𑀣𑀸𑀯𑀡𑁆𑀡𑀦𑀸

𑁮𑁦𑁨-𑁮𑁦𑁩. 𑀕𑀳𑀡𑀦𑁆𑀢𑀺 𑀫𑀺𑀘𑁆𑀙𑀸𑀕𑀳𑀡𑀁.

𑀫𑀦𑀼𑀲𑁆𑀲𑀮𑁄𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀥𑀫𑁆𑀫𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑁮𑁦𑁪-𑁮𑁦𑁬. 𑀢𑀲𑁆𑀲 𑀘 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀲𑁆𑀲 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀬𑀫𑁂𑀯 𑀘 𑀤𑁂𑀲𑀺𑀢𑁄.

𑀥𑀫𑁆𑀫𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁧𑁩-𑁮𑁧𑁬. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀢𑀢𑁆𑀣 𑀆𑀤𑀻𑀦𑀯𑀫𑀦𑀲𑀺𑀓𑀸𑀭𑁄, 𑀢𑀤𑀸𑀓𑀸𑀭𑁄 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁄𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀆𑀤𑀻𑀦𑀯𑀢𑁄 𑀫𑀦𑀲𑀺 𑀓𑀸𑀢𑀩𑁆𑀩𑀸, 𑀢𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀛𑀸𑀦𑀦𑁆𑀢𑀭𑀺𑀓𑀓𑀣𑀸𑀯𑀡𑁆𑀡𑀦𑀸

𑁮𑁧𑁭-𑁮𑁧𑁯. 𑀦 ¶ ¶ 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀸𑀪𑀸𑀯𑀢𑁄, 𑀦𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀯𑀺𑀘𑀸𑀭𑀲𑀩𑁆𑀪𑀸𑀯𑀢𑁄𑀢𑀺 𑀛𑀸𑀦𑀫𑁂𑀢𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀸𑀯𑀸𑀪𑀸𑀯𑀢𑁄 𑀦 𑀛𑀸𑀦’’𑀦𑁆𑀢𑀺.

𑀛𑀸𑀦𑀦𑁆𑀢𑀭𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀓𑁆𑀔𑀼𑀦𑀸𑀭𑀽𑀧𑀁𑀧𑀲𑁆𑀲𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁮𑁨𑁬-𑁮𑁨𑁭. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺 𑀇𑀫𑀺𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀚𑀸𑀦𑀦𑀲𑁆𑀲 𑀅𑀕𑁆𑀕𑀳𑀡𑁂 𑀅𑀭𑀼𑀘𑀺𑀁 𑀲𑀽𑀘𑁂𑀦𑁆𑀢𑁄 𑀆𑀳 ‘‘𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀁 𑀓𑀺𑀭 𑀲𑀦𑁆𑀥𑀸𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀁 𑀧𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀤𑀺 𑀭𑀽𑀧𑁂𑀦 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑀫𑁆𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀭𑀽𑀧𑀯𑀺𑀚𑀸𑀦𑀦𑀁 𑀳𑁄𑀢𑀺, 𑀦 𑀭𑀽𑀧𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀫𑀦𑁄𑀯𑀺𑀜𑁆𑀜𑀸𑀡𑀧𑀝𑀺𑀚𑀸𑀦𑀦𑀁 𑀧𑀦 𑀭𑀽𑀧𑀤𑀲𑁆𑀲𑀦𑀁 𑀓𑀣𑀁 𑀳𑁄𑀢𑀻’’𑀢𑀺.

𑀘𑀓𑁆𑀔𑀼𑀦𑀸𑀭𑀽𑀧𑀁𑀧𑀲𑁆𑀲𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸

𑁮𑁨𑁮-𑁮𑁩𑁧. 𑀢𑁂 𑀧𑀦𑀸𑀢𑀺 𑀬𑁂 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀺𑀮𑁂𑀲𑀸, 𑀢𑁂 𑀧𑀦. 𑀓𑀸𑀫𑀜𑁆𑀘𑁂𑀢𑁆𑀣 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑀸 𑀫𑀕𑁆𑀕𑀪𑀸𑀯𑀦𑀸𑀬 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀔𑀡𑀢𑁆𑀢𑀬𑀁 𑀦 𑀆𑀕𑀢𑀸𑀢𑀺 𑀘 𑀅𑀦𑀸𑀕𑀢𑀸 𑀦𑀸𑀫 ¶ 𑀲𑀺𑀬𑀼𑀁, 𑀬𑀲𑁆𑀫𑀸 𑀧𑀦 𑀢𑁂 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀣𑀸 𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀦𑀸𑀧𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑀓𑀺𑀮𑁂𑀲𑀧𑀚𑀳𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸

𑁮𑁩𑁨. 𑀬𑁂𑀦 ¶ 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀧𑀭𑀺𑀓𑀧𑁆𑀧𑀺𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀢𑁆𑀢𑀦𑁄 𑀯𑀺𑀲𑀬𑀦𑁆𑀢𑀺 𑀅𑀦𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸, 𑀲𑁆𑀯𑀸𑀬𑀁 𑀅𑀦𑀢𑁆𑀢𑀢𑀸𑀢𑀺 𑀆𑀳 ‘‘𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀢𑀸’’𑀢𑀺. 𑀲𑀸 𑀧𑀦𑀸𑀬𑀁 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀅𑀲𑀸𑀭𑀓𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑁂𑀓𑀤𑁂𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀢𑁄 𑀚𑀭𑀸𑀫𑀭𑀡𑀫𑁂𑀯𑀸’’𑀢𑀺 𑀆𑀳. 𑀏𑀯𑀁 𑀲𑀢𑀺 𑀮𑀓𑁆𑀔𑀡𑀲𑀗𑁆𑀓𑀭𑁄 𑀲𑀺𑀬𑀸, 𑀢𑁂𑀲𑀁 𑀧𑀦𑀺𑀤𑀁 𑀅𑀥𑀺𑀧𑁆𑀧𑀸𑀬𑀓𑀺𑀢𑁆𑀢𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀢𑀸𑀬 𑀏𑀯 𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑀸.

𑀲𑀼𑀜𑁆𑀜𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸

𑁮𑁩𑁫-𑁮𑁩𑁬. 𑀧𑀢𑁆𑀢𑀺𑀥𑀫𑁆𑀫𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀫𑀦𑁆𑀦𑀸𑀕𑀫𑀫𑀸𑀳.

𑀲𑀸𑀫𑀜𑁆𑀜𑀨𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸

𑁮𑁪𑁧-𑁮𑁪𑁩. 𑀭𑀽𑀧𑀸𑀤𑀻𑀦𑀁 𑀲𑀪𑀸𑀯𑀢𑀸𑀢𑀺 𑀏𑀢𑁂𑀦 𑀭𑀽𑀧𑀸𑀤𑀬𑁄 𑀏𑀯 𑀲𑀪𑀸𑀯𑀢𑀸𑀢𑀺 𑀇𑀫𑀫𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺 ¶ . 𑀬𑀢𑁄 𑀢𑀁 𑀧𑀭𑀯𑀸𑀤𑀻 𑀭𑀽𑀧𑀸𑀤𑀻𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀁 𑀇𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀪𑀸𑀯𑀁 𑀳𑁂𑀲 𑀢𑀣𑀢𑀸𑀢𑀺 𑀯𑀤𑀢𑀺, 𑀦 𑀪𑀸𑀯𑀬𑁄𑀕’’𑀦𑁆𑀢𑀺. 𑀢𑀢𑁆𑀣 𑀪𑀸𑀯𑀦𑁆𑀢𑀺 𑀥𑀫𑁆𑀫𑀫𑀢𑁆𑀢𑀁, 𑀧𑀓𑀢𑀻𑀢𑀺 𑀅𑀢𑁆𑀣𑁄 ‘‘𑀚𑀸𑀢𑀺𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀭𑀽𑀧𑀸𑀤𑀻𑀦𑀜𑁆𑀳𑀺 𑀭𑀼𑀧𑁆𑀧𑀦𑀸𑀤𑀺𑀧𑀓𑀢𑀺 𑀢𑀣𑀸 𑀅𑀲𑀗𑁆𑀔𑀢𑀸𑀢𑀺 𑀘 𑀧𑀭𑀯𑀸𑀤𑀺𑀦𑁄 𑀮𑀤𑁆𑀥𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀪𑀸𑀯𑀬𑁄𑀕’’𑀦𑁆𑀢𑀺. 𑀬𑁂𑀦 𑀳𑀺 𑀪𑀸𑀯𑁄 𑀲𑀪𑀸𑀯𑀥𑀫𑁆𑀫𑁄 𑀬𑀼𑀚𑁆𑀚𑀢𑀺, 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺, 𑀢𑀁 𑀭𑀼𑀧𑁆𑀧𑀦𑀸𑀤𑀺𑀮𑀓𑁆𑀔𑀡𑀁 𑀪𑀸𑀯𑀬𑁄𑀕𑁄. 𑀢𑀁 𑀧𑀦 𑀭𑀽𑀧𑀸𑀤𑀺𑀢𑁄 𑀅𑀦𑀜𑁆𑀜𑀁, 𑀢𑀢𑁄 𑀏𑀯 𑀲𑀗𑁆𑀔𑀢𑀁, 𑀅𑀯𑀺𑀧𑀭𑀻𑀢𑀝𑁆𑀞𑁂𑀦 𑀧𑀦 ‘‘𑀢𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸

𑁮𑁪𑁪-𑁮𑁪𑁬. 𑀅𑀦𑀯𑀚𑁆𑀚𑀪𑀸𑀯𑀫𑀢𑁆𑀢𑁂𑀦𑁂𑀯 ¶ 𑀓𑀼𑀲𑀮𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀯𑀚𑁆𑀚𑀭𑀳𑀺𑀢𑀁 𑀅𑀦𑀯𑀚𑁆𑀚𑀁, 𑀅𑀦𑀯𑀚𑁆𑀚𑀪𑀸𑀯𑀫𑀢𑁆𑀢𑁂𑀦𑁂𑀯 𑀘 𑀓𑀼𑀲𑀮𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀓𑀼𑀲𑀮𑀦𑁆𑀢𑀺.

𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁮𑁪𑁭. 𑀬𑀁 ‘‘𑀏𑀓𑀯𑀸𑀭𑀁 𑀦𑀺𑀫𑀼𑀕𑁆𑀕𑁄 𑀢𑀣𑀸 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀏𑀢𑀲𑁆𑀲 𑀧𑀼𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁, 𑀲𑁄 𑀧𑀦 𑀆𑀘𑀭𑀺𑀬𑀯𑀸𑀤𑁄, 𑀦 𑀅𑀝𑁆𑀞𑀓𑀣𑀸𑀦𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀬 𑀚𑀸𑀢𑀺𑀬𑀸…𑀧𑁂… 𑀫𑀜𑁆𑀜𑀫𑀸𑀦𑁄’’𑀢𑀺 𑀆𑀳. 𑀢𑀢𑁆𑀣 𑀢𑀸𑀬 𑀚𑀸𑀢𑀺𑀬𑀸𑀢𑀺 𑀬𑀲𑁆𑀲𑀁 𑀚𑀸𑀢𑀺𑀬𑀁 𑀧𑀼𑀕𑁆𑀕𑀮𑁄 𑀓𑀫𑁆𑀫𑀸𑀯𑀭𑀡𑀸𑀤𑀺𑀆𑀯𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀸𑀬 𑀚𑀸𑀢𑀺𑀬𑀸. 𑀲𑀁𑀲𑀸𑀭𑀔𑀸𑀡𑀼𑀓𑀪𑀸𑀯𑁄 𑀯𑀲𑁆𑀲𑀪𑀜𑁆𑀜𑀸𑀤𑀻𑀦𑀁 𑀯𑀺𑀬 𑀫𑀓𑁆𑀔𑀮𑀺𑀆𑀤𑀻𑀦𑀁 𑀯𑀺𑀬 𑀘 𑀤𑀝𑁆𑀞𑀩𑁆𑀩𑁄. 𑀲𑁄 𑀘 𑀅𑀳𑁂𑀢𑀼𑀓𑀸𑀤𑀺𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀨𑀮𑀪𑀸𑀯𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀅𑀢𑁆𑀣𑀺𑀪𑀸𑀯𑀢𑁄. 𑀬𑀣𑀸 𑀳𑀺 𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀓𑁄𑀘𑀺 𑀦𑀺𑀬𑀸𑀫𑁄 𑀦𑀸𑀫 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀫𑀕𑁆𑀕𑁂𑀦 𑀪𑀯𑀧𑀭𑀺𑀘𑁆𑀙𑁂𑀤𑀁, 𑀏𑀯𑀁 𑀅𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲𑀧𑀺 𑀓𑁄𑀘𑀺 𑀲𑀁𑀲𑀸𑀭𑀦𑀺𑀬𑀸𑀫𑁄 𑀦𑀸𑀫 ¶ 𑀦𑀢𑁆𑀣𑀺. 𑀢𑀸𑀤𑀺𑀲𑀲𑁆𑀲 𑀧𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀩𑀮𑀯𑀪𑀸𑀯𑁂 𑀅𑀧𑀭𑀺𑀫𑀺𑀢𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑁂 𑀘𑀺𑀭𑀢𑀭𑀁 𑀲𑀁𑀲𑀸𑀭𑀧𑁆𑀧𑀩𑀦𑁆𑀥𑁄 𑀳𑁄𑀢𑀺, 𑀅𑀧𑀸𑀬𑀽𑀧𑀧𑀢𑁆𑀢𑀺 𑀘 𑀬𑀢𑁆𑀣 𑀲𑀁𑀲𑀸𑀭𑀔𑀸𑀡𑀼𑀲𑀫𑀜𑁆𑀜𑀸.

𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀢𑁆𑀣𑁂𑀯 𑀅𑀘𑁆𑀘𑀦𑁆𑀢𑀁 𑀲𑀁𑀲𑀭𑀺𑀢𑀸 𑀅𑀦𑀦𑁆𑀢𑀢𑁆𑀢𑀸 𑀲𑀢𑁆𑀢𑀦𑀺𑀓𑀸𑀬𑀲𑁆𑀲𑀸’’𑀢𑀺, 𑀢𑀫𑁆𑀧𑀺 𑀅𑀧𑀼𑀜𑁆𑀜𑀩𑀳𑀼𑀮𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀦 𑀳𑀺 𑀫𑀸𑀢𑀼𑀖𑀸𑀢𑀓𑀸𑀤𑀻𑀦𑀁 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀦𑁆𑀢𑀭𑀸𑀬𑀪𑀽𑀢𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀲𑀢𑁆𑀢𑀸𑀦𑀁 𑀯𑀺𑀫𑀼𑀢𑁆𑀢𑀦𑁆𑀢𑀭𑀸𑀬𑀓𑀭𑁄 𑀲𑀁𑀲𑀸𑀭𑀦𑀺𑀬𑀸𑀫𑁄 𑀦𑀸𑀫 𑀦𑀢𑁆𑀣𑀺. 𑀬𑀸𑀯 𑀧𑀦 𑀦 𑀫𑀕𑁆𑀕𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀉𑀧𑀮𑀩𑁆𑀪𑀢𑀺, 𑀢𑀸𑀯 𑀲𑀁𑀲𑀸𑀭𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑁄. 𑀬𑀤𑀸 𑀘 𑀲𑁄 𑀉𑀧𑀮𑀤𑁆𑀥𑁄, 𑀢𑀤𑀸 𑀲𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀣𑀸 𑀦𑀺𑀬𑀢𑀲𑀫𑁆𑀫𑀸𑀤𑀲𑁆𑀲𑀦𑀁, 𑀏𑀯𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦𑀧𑀺 𑀲𑀯𑀺𑀲𑀬𑁂 𑀏𑀓𑀁𑀲𑀕𑀸𑀳𑀯𑀲𑁂𑀦 𑀉𑀓𑁆𑀓𑀁𑀲𑀕𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀢𑀺 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑁂 𑀓𑀣𑀁 𑀢𑀲𑁆𑀫𑀺𑀁 𑀅𑀪𑀺𑀦𑀺𑀯𑁂𑀲𑀯𑀺𑀲𑀬𑁂 𑀅𑀦𑁂𑀓𑀁𑀲𑀕𑀸𑀳𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀪𑀺𑀦𑀺𑀯𑁂𑀲𑀦𑁆𑀢𑀭𑀁 𑀯𑀸 𑀯𑀺𑀭𑀼𑀤𑁆𑀥𑀁 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑁄 𑀏𑀯 𑀦 ¶ 𑀲𑀺𑀬𑀸𑀢𑀺 𑀧𑀸𑀴𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀼𑀧𑁆𑀧𑀢𑁆𑀢𑀺𑀦𑀺𑀬𑀸𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀘𑁄𑀤𑀦𑀸 𑀓𑀢𑀸. 𑀦 𑀳𑀺 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀬 𑀲𑀫𑁆𑀫𑀢𑁆𑀢𑀦𑀺𑀬𑀢𑀧𑀼𑀕𑁆𑀕𑀮𑀸𑀦𑀁 𑀬𑀣𑀸𑀓𑁆𑀓𑀫𑀁 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀧𑀼𑀕𑁆𑀕𑀮𑀸𑀦𑀁 𑀲𑀫𑁆𑀫𑀢𑁆𑀢𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸 𑀓𑀤𑀸𑀘𑀺𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀯𑀺𑀭𑀼𑀤𑁆𑀥𑀁 𑀧𑀦 𑀦𑀺𑀬𑀸𑀫𑀦𑁆𑀢𑀭𑀫𑁂𑀯 𑀳𑁄𑀢𑀻𑀢𑀺 𑀆𑀦𑀦𑁆𑀢𑀭𑀺𑀓𑀦𑁆𑀢𑀭𑀁 𑀯𑀺𑀬 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀭𑀁 𑀲𑀫𑀸𑀦𑀚𑀸𑀢𑀺𑀓𑀁 𑀦 𑀦𑀺𑀯𑀢𑁆𑀢𑁂𑀢𑀻𑀢𑀺 𑀯𑀺𑀭𑀼𑀤𑁆𑀥𑀁𑀬𑁂𑀯 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀬 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀏𑀯 𑀉𑀤𑁆𑀥𑀝𑀸. 𑀏𑀯𑀫𑁂𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀼𑀧𑁆𑀧𑀢𑁆𑀢𑀺𑀦𑀺𑀬𑀸𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀻𑀦𑀁 𑀦𑀺𑀬𑀸𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀦𑀺𑀯𑀢𑁆𑀢𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑁄 𑀘 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀘 𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 𑀧𑀦 ‘‘𑀯𑀺𑀘𑀸𑀭𑁂𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁫𑁩-𑁮𑁫𑁬. 𑀬𑀣𑀸 𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸𑀤𑀬𑁄 𑀏𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀏𑀯𑀁 𑀮𑁄𑀓𑀺𑀬𑀸𑀧𑀺. 𑀓𑀲𑁆𑀫𑀸 ¶ ? 𑀢𑀢𑁆𑀣𑀸𑀧𑀺 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀸𑀤𑀺𑀦𑀸 𑀇𑀦𑁆𑀤𑀝𑁆𑀞𑀲𑀩𑁆𑀪𑀸𑀯𑀢𑁄. 𑀲𑀤𑁆𑀥𑁂𑀬𑁆𑀬𑀸𑀤𑀺𑀯𑀢𑁆𑀣𑀽𑀲𑀼 𑀲𑀤𑁆𑀤𑀳𑀦𑀸𑀤𑀺𑀫𑀢𑁆𑀢𑀫𑁂𑀯 𑀳𑀺 𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀸𑀦𑀁…𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺.

𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁦. 𑀯𑀻𑀲𑀢𑀺𑀫𑀯𑀕𑁆𑀕𑁄

𑁨. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁬𑁩-𑁮𑁬𑁫. 𑀓𑀸𑀫𑀁 𑀧𑀼𑀩𑁆𑀩𑀪𑀸𑀕𑁂𑀧𑀺 𑀅𑀢𑁆𑀣𑁂𑀯 𑀤𑀼𑀓𑁆𑀔𑀧𑀭𑀺𑀜𑁆𑀜𑀸, 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀸 𑀫𑀕𑁆𑀕𑀓𑁆𑀔𑀡𑀺𑀓𑀸 𑀏𑀯𑀸𑀢𑀺 𑀉𑀓𑁆𑀓𑀁𑀲𑀕𑀢𑀁 𑀤𑀼𑀓𑁆𑀔𑀧𑀭𑀺𑀜𑁆𑀜𑀁 𑀲𑀦𑁆𑀥𑀸𑀬 𑀅𑀯𑀥𑀸𑀭𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀔𑀁…𑀧𑁂… 𑀫𑀕𑁆𑀕𑀜𑀸𑀡𑀫𑁂𑀯 𑀤𑀻𑀧𑁂𑀢𑀻’’𑀢𑀺. 𑀢𑀁 𑀧𑀦 𑀅𑀯𑀥𑀸𑀭𑀡𑀁 𑀦 𑀜𑀸𑀡𑀦𑁆𑀢𑀭𑀦𑀺𑀯𑀢𑁆𑀢𑀦𑀁, 𑀅𑀣 𑀔𑁄 𑀜𑀸𑀡𑀦𑁆𑀢𑀭𑀲𑁆𑀲 𑀬𑀣𑀸𑀥𑀺𑀕𑀢𑀓𑀺𑀘𑁆𑀘𑀦𑀺𑀯𑀢𑁆𑀢𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀦 𑀢𑀲𑁆𑀲𑁂𑀯 𑀜𑀸𑀡𑀪𑀸𑀯’’𑀦𑁆𑀢𑀺𑀆𑀤𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸

𑁮𑁬𑁬-𑁮𑁬𑁮. 𑀦𑁂𑀭𑀬𑀺𑀓𑁂 ¶ 𑀦𑀺𑀭𑀬𑁂 𑀧𑀸𑀮𑁂𑀦𑁆𑀢𑀺, 𑀢𑀢𑁄 𑀦𑀺𑀕𑁆𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀭𑀬𑀧𑀸𑀮𑀸. 𑀦𑀺𑀭𑀬𑀧𑀸𑀮𑀢𑀸𑀬 𑀯𑀸 𑀦𑁂𑀭𑀬𑀺𑀓𑀸𑀦𑀁 𑀦𑀭𑀓𑀤𑀼𑀓𑁆𑀔𑁂𑀦 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀦𑀺𑀭𑀬𑀧𑀸𑀮𑀸. 𑀓𑀺𑀁 𑀧𑀦𑁂𑀢𑁂 𑀦𑀺𑀭𑀬𑀧𑀸𑀮𑀸 𑀦𑁂𑀭𑀬𑀺𑀓𑀸, 𑀉𑀤𑀸𑀳𑀼 𑀅𑀦𑁂𑀭𑀬𑀺𑀓𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀦𑁂𑀭𑀬𑀺𑀓𑀸, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀬𑀫𑁆𑀧𑀺 𑀦𑀺𑀭𑀬𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀼𑀁, 𑀢𑀣𑀸 𑀲𑀢𑀺 𑀅𑀜𑁆𑀜𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀦𑀸𑀬 𑀅𑀲𑀫𑀢𑁆𑀣𑀸 𑀲𑀺𑀬𑀼𑀁, ‘‘𑀇𑀫𑁂 𑀦𑁂𑀭𑀬𑀺𑀓𑀸, 𑀇𑀫𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀯𑀢𑁆𑀣𑀸𑀦𑀜𑁆𑀘 𑀦 𑀲𑀺𑀬𑀸. 𑀬𑁂 𑀘 𑀬𑁂 𑀬𑀸𑀢𑁂𑀦𑁆𑀢𑀺, 𑀢𑁂𑀳𑀺 𑀲𑀫𑀸𑀦𑀭𑀽𑀧𑀩𑀮𑀧𑁆𑀧𑀫𑀸𑀡𑁂𑀳𑀺 𑀇𑀢𑀭𑁂𑀲𑀁 𑀪𑀬𑀲𑀦𑁆𑀢𑀸𑀲𑀸 𑀦 ¶ 𑀲𑀺𑀬𑀼𑀁. 𑀅𑀣 𑀅𑀦𑁂𑀭𑀬𑀺𑀓𑀸, 𑀢𑁂𑀲𑀁 𑀢𑀢𑁆𑀣 𑀓𑀣𑀁 𑀲𑀫𑁆𑀪𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸 𑀅𑀦𑀺𑀭𑀬𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸. 𑀦𑀺𑀭𑀬𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀢𑁄 𑀳𑀺 𑀅𑀜𑁆𑀜𑁂𑀦𑁂𑀯 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀭𑀓𑁆𑀔𑀲𑀚𑀸𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀓𑁄𑀥𑀦𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀧𑀸𑀧𑀸𑀪𑀺𑀭𑀼𑀘𑀺𑀦𑁄 𑀢𑀣𑀸;

𑀤𑀼𑀓𑁆𑀔𑀺𑀢𑁂𑀲𑀼 𑀘 𑀦𑀦𑁆𑀤𑀦𑁆𑀢𑀺, 𑀚𑀸𑀬𑀦𑁆𑀢𑀺 𑀬𑀫𑀭𑀓𑁆𑀔𑀲𑀸’’𑀢𑀺.

𑀢𑀢𑁆𑀣 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀬𑀸𑀢𑀦𑀸𑀤𑀼𑀓𑁆𑀔𑀲𑁆𑀲 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑀢𑁄, 𑀅𑀜𑁆𑀜𑀣𑀸 𑀧𑀼𑀦 𑀅𑀜𑁆𑀜𑀫𑀜𑁆𑀜𑀁 𑀬𑀸𑀢𑁂𑀬𑁆𑀬𑀼’’𑀦𑁆𑀢𑀺 𑀘 𑀏𑀯𑀫𑀸𑀤𑀺, 𑀢𑀬𑀺𑀤𑀁 𑀆𑀓𑀸𑀲𑀭𑁄𑀫𑀝𑁆𑀞𑀦𑀁 𑀦𑀺𑀭𑀬𑀧𑀸𑀮𑀸𑀦𑀁 𑀦𑁂𑀭𑀬𑀺𑀓𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑁂 𑀧𑀦 𑀯𑀤𑁂𑀬𑁆𑀬𑀼𑀁 𑁋 𑀬𑀤𑀺𑀧𑀺 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸, 𑀅𑀬𑁄𑀫𑀬𑀸𑀬 𑀧𑀦 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀦𑀺𑀭𑀬𑀪𑀽𑀫𑀺𑀬𑀸 𑀧𑀭𑀺𑀯𑀢𑁆𑀢𑀫𑀸𑀦𑀸 𑀓𑀣𑀁 𑀦𑀸𑀫 𑀤𑀼𑀓𑁆𑀔𑀁 𑀦𑀸𑀦𑀼𑀪𑀯𑀦𑁆𑀢𑀻𑀢𑀺? 𑀓𑀫𑁆𑀫𑀸𑀦𑀼𑀪𑀸𑀯𑀢𑁄. 𑀬𑀣𑀸 𑀳𑀺 𑀇𑀤𑁆𑀥𑀺𑀫𑀦𑁆𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀦𑁂𑀭𑀬𑀺𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑀸 𑀇𑀤𑁆𑀥𑀺𑀩𑀮𑁂𑀦 𑀦𑀺𑀭𑀬𑀪𑀽𑀫𑀺𑀁 𑀉𑀧𑀕𑀢𑀸 𑀢𑀢𑁆𑀣 𑀤𑀸𑀳𑀤𑀼𑀓𑁆𑀔𑁂𑀦 𑀦 𑀩𑀸𑀥𑀻𑀬𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀇𑀤𑀫𑁆𑀧𑀺 𑀢𑀁𑀲𑀫𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀢𑀣𑀸𑀭𑀽𑀧𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀸 𑀬𑀣𑀸 𑀦𑀺𑀭𑀬𑀤𑀼𑀓𑁆𑀔𑁂𑀦 𑀅𑀩𑀸𑀥𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀦𑁂𑀭𑀬𑀺𑀓𑁂 𑀬𑀸𑀢𑁂𑀦𑁆𑀢𑀺, 𑀦 𑀘𑁂𑀢𑁆𑀢𑀓𑁂𑀦 𑀩𑀸𑀳𑀺𑀭𑀯𑀺𑀲𑀬𑀸𑀪𑀸𑀯𑁄 𑀯𑀺𑀚𑁆𑀚𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸𑀬 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀧𑀼𑀭𑀺𑀲𑁂𑀲𑀼 𑀯𑀺𑀪𑀢𑁆𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀏𑀓𑀘𑁆𑀘𑀲𑁆𑀲 𑀤𑁆𑀯𑀸𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀝𑁆𑀞𑀁 ¶ 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀁, 𑀏𑀓𑀘𑁆𑀘𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀦𑀢𑁆𑀣𑀺 𑀓𑀫𑁆𑀫𑀯𑀲𑁂𑀦 𑀢𑁂𑀚𑀲𑀸 𑀧𑀭𑀽𑀧𑀢𑀸𑀧𑀦’’𑀦𑁆𑀢𑀺𑀆𑀤𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑁂𑀭𑀬𑀺𑀓𑀸𑀦𑀁 𑀢𑁂𑀲𑀁 𑀓𑀣𑀁 𑀢𑀢𑁆𑀣 𑀲𑀫𑁆𑀪𑀯𑁄’’𑀢𑀺 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀓𑀪𑀸𑀯𑀢𑁄. 𑀦𑁂𑀭𑀬𑀺𑀓𑀲𑀢𑁆𑀢𑀬𑀸𑀢𑀦𑀸𑀬𑁄𑀕𑁆𑀕𑀜𑁆𑀳𑀺 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀓𑀫𑁆𑀫𑀁 𑀢𑀸𑀤𑀺𑀲𑀦𑀺𑀓𑀦𑁆𑀢𑀺𑀯𑀺𑀦𑀸𑀫𑀺𑀢𑀁 𑀦𑀺𑀭𑀬𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂 𑀘 𑀦𑁂𑀭𑀬𑀺𑀓𑁂𑀳𑀺 𑀅𑀥𑀺𑀓𑀢𑀭𑀩𑀮𑀸𑀭𑁄𑀳𑀧𑀭𑀺𑀡𑀸𑀳𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀲𑀦𑁆𑀢𑀸𑀲𑀓𑀼𑀭𑀽𑀭𑀢𑀭𑀧𑀬𑁄𑀕𑀸 𑀘 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀢𑀢𑁆𑀣 𑀓𑀸𑀓𑀲𑀼𑀦𑀔𑀸𑀤𑀻𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀣𑀫𑀜𑁆𑀜𑀕𑀢𑀺𑀓𑁂𑀳𑀺 𑀅𑀜𑁆𑀜𑀕𑀢𑀺𑀓𑀩𑀸𑀥𑀦𑀦𑁆𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁 𑀅𑀜𑁆𑀜𑀢𑁆𑀣𑀸𑀧𑀺 𑀢𑀣𑀸 𑀤𑀲𑁆𑀲𑀦𑀢𑁄. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀲𑀢𑁆𑀢𑀲𑀪𑀸𑀯𑀸 𑀦𑀺𑀭𑀬𑀧𑀸𑀮𑀸 𑀦𑀺𑀭𑀬𑀲𑀼𑀦𑀔𑀸𑀤𑀬𑁄 𑀘𑀸’’𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀅𑀜𑁆𑀜𑀢𑁆𑀣 ¶ 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀦 𑀳𑀺 𑀓𑀸𑀘𑀺 𑀅𑀢𑁆𑀣𑀺 𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀯𑀢𑁆𑀢𑀺, 𑀬𑀸 𑀅𑀲𑀢𑁆𑀢𑀲𑀪𑀸𑀯𑀸, 𑀲𑀫𑁆𑀧𑀢𑀺𑀲𑀢𑁆𑀢𑁂𑀳𑀺 𑀅𑀧𑁆𑀧𑀬𑁄𑀚𑀺𑀢𑀸 𑀘 𑀅𑀢𑁆𑀣𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀧𑁂𑀢𑀸𑀦𑀁 𑀧𑀸𑀦𑀻𑀬𑀦𑀺𑀯𑀸𑀭𑀓𑀸𑀦𑀁 𑀤𑀡𑁆𑀟𑀸𑀤𑀺𑀳𑀢𑁆𑀣𑀧𑀼𑀭𑀺𑀲𑀸𑀦𑀫𑁆𑀧𑀺 𑀅𑀲𑀢𑁆𑀢𑀪𑀸𑀯𑁂 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺. 𑀲𑀼𑀧𑀺𑀦𑀽𑀧𑀖𑀸𑀢𑁄𑀧𑀺 𑀅𑀢𑁆𑀣𑀓𑀺𑀘𑁆𑀘𑀲𑀫𑀢𑁆𑀣𑀢𑀸𑀬 𑀅𑀧𑁆𑀧𑀫𑀸𑀡𑀁 𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑁂𑀦𑀧𑀺 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀳𑀺 𑀲𑀼𑀧𑀺𑀦𑁂 𑀆𑀳𑀸𑀭𑀽𑀧𑀪𑁄𑀕𑀸𑀤𑀺𑀦𑀸 𑀦 𑀅𑀢𑁆𑀣𑀲𑀺𑀤𑁆𑀥𑀺 𑀅𑀢𑁆𑀣𑀺, 𑀦𑀺𑀫𑁆𑀫𑀸𑀦𑀭𑀽𑀧𑀁 𑀧𑀦𑁂𑀢𑁆𑀣 𑀮𑀤𑁆𑀥𑀧𑀭𑀺𑀳𑀸𑀭𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀇𑀥𑀸𑀧𑀺 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑁄 𑀦𑀺𑀭𑀬𑀧𑀸𑀮𑀸𑀢𑀺 𑀅𑀲𑀺𑀤𑁆𑀥𑀫𑁂𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀦𑁂𑀲𑀁 𑀲𑀢𑁆𑀢𑀪𑀸𑀯𑁄 𑀏𑀯 𑀲𑀺𑀤𑁆𑀥𑁄. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀲𑀢𑁆𑀢𑀲𑀗𑁆𑀔𑀸𑀢𑀸 𑀦𑀺𑀭𑀬𑀧𑀸𑀮𑀲𑀜𑁆𑀜𑀺𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀲𑀸𑀪𑀺𑀲𑀦𑁆𑀥𑀺𑀓𑀸 𑀧𑀭𑀽𑀧𑀖𑀸𑀢𑀺 𑀅𑀢𑁆𑀣𑀓𑀺𑀘𑁆𑀘𑀲𑀩𑁆𑀪𑀸𑀯𑀢𑁄 𑀑𑀚𑀸𑀳𑀸𑀭𑀸𑀤𑀺𑀭𑀓𑁆𑀔𑀲𑀲𑀦𑁆𑀢𑀢𑀺 𑀯𑀺𑀬𑀸𑀢𑀺. 𑀅𑀪𑀺𑀲𑀦𑁆𑀥𑀺𑀧𑀼𑀩𑁆𑀩𑀓𑀢𑀸 𑀘𑁂𑀢𑁆𑀣 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀢𑀣𑀸 𑀢𑀣𑀸 𑀅𑀪𑀺𑀲𑀦𑁆𑀥𑀺𑀬𑀸 𑀬𑀸𑀢𑀦𑀢𑁄, 𑀢𑀢𑁄 𑀏𑀯 𑀦 𑀲𑀗𑁆𑀖𑀸𑀝𑀧𑀩𑁆𑀩𑀢𑀸𑀤𑀻𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀸. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀪𑀽𑀢𑀯𑀺𑀲𑁂𑀲𑀸 𑀏𑀯 𑀢𑁂 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄 𑀪𑁂𑀭𑀯𑀸𑀓𑀸𑀭𑀸 𑀦𑀭𑀓𑀧𑀸𑀮𑀸𑀢𑀺 𑀲𑀫𑀜𑁆𑀜𑀁 𑀮𑀪𑀦𑁆𑀢𑀻’’𑀢𑀺, 𑀢𑀤𑀲𑀺𑀤𑁆𑀥𑀁. 𑀉𑀚𑀼𑀓𑀫𑁂𑀯 𑀧𑀸𑀴𑀺𑀬𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸.

𑀅𑀧𑀺𑀘 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀦𑀭𑀓𑀧𑀸𑀮𑀸𑀦𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸, 𑀢𑀣𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀯𑀸𑀤𑀺𑀦𑁄𑀧𑀺 𑀢𑁂𑀲𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸𑀯. 𑀦 𑀳𑀺 𑀢𑀲𑁆𑀲 𑀪𑀽𑀢𑀸𑀦𑀺 𑀦𑀸𑀫 𑀲𑀦𑁆𑀢𑀺. 𑀬𑀤𑀺 𑀧𑀭𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀅𑀣 𑀓𑀲𑁆𑀫𑀸 𑀯𑁂𑀤𑀦𑀸𑀤𑀺𑀓𑁂 ¶ 𑀏𑀯 𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀢𑀺𑀝𑁆𑀞𑀢𑁂𑀲𑀸 𑀅𑀦𑀯𑀝𑁆𑀞𑀺𑀢𑀢𑀓𑁆𑀓𑀸𑀦𑀁 𑀅𑀧𑁆𑀧𑀳𑀻𑀦𑀲𑀫𑁆𑀫𑁄𑀳𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀸𑀤𑀯𑀻𑀫𑀁𑀲𑀸, 𑀏𑀯𑀁 𑀅𑀢𑁆𑀣𑁂𑀯 𑀦𑀺𑀭𑀬𑀧𑀸𑀮𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀲𑀢𑀺 𑀘 𑀦𑁂𑀲𑀁 𑀲𑀩𑁆𑀪𑀸𑀯𑁂, 𑀅𑀲𑀢𑀺𑀧𑀺 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀦𑀭𑀓𑁂 𑀯𑀺𑀬 𑀤𑁂𑀲𑀸𑀤𑀺𑀦𑀺𑀬𑀫𑁄 𑀳𑁄𑀢𑀻𑀢𑀺 𑀯𑀸𑀤𑁄 𑀦 𑀲𑀺𑀚𑁆𑀛𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁬𑁯-𑁮𑁭𑁧. 𑀢𑀲𑁆𑀲𑀸𑀢𑀺 𑀏𑀭𑀸𑀯𑀡𑀦𑀸𑀫𑀓𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲. 𑀢𑀳𑀺𑀁 𑀓𑀻𑀴𑀦𑀓𑀸𑀮𑁂 𑀳𑀢𑁆𑀣𑀺𑀯𑀡𑁆𑀡𑁂𑀦 𑀯𑀺𑀓𑀼𑀩𑁆𑀩𑀦𑀁 ¶ 𑀲𑀦𑁆𑀥𑀸𑀬 ‘‘𑀳𑀢𑁆𑀣𑀺𑀦𑀸𑀕𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀬𑀸𑀦𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀏𑀓𑀦𑁆𑀢𑀲𑀼𑀔𑀧𑁆𑀧𑀘𑁆𑀘𑀬𑀝𑁆𑀞𑀸𑀦𑁂 𑀲𑀕𑁆𑀕𑁂 𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀲𑀫𑁆𑀪𑀯𑁄 𑀬𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸’’𑀢𑀺.

𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁭𑁬-𑁮𑁭𑁭. ‘‘𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀁 𑀜𑀸𑀡𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁆𑀣 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀲𑁆𑀲 𑀜𑀸𑀡𑀲𑁆𑀲 𑀮𑁄𑀓𑀼𑀢𑁆𑀢𑀭𑀢𑀸 𑀧𑀢𑀺𑀝𑁆𑀞𑀸𑀧𑀻𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀯𑀺𑀓𑀧𑁆𑀧𑀁 𑀯𑀢𑁆𑀯𑀸 𑀧𑀼𑀦 𑀮𑁄𑀓𑀼𑀢𑁆𑀢𑀭𑀜𑀸𑀡𑀲𑁆𑀲 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀢𑀸 𑀧𑀢𑀺𑀝𑁆𑀞𑀸𑀧𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀯𑀸…𑀧𑁂… 𑀅𑀢𑁆𑀣𑁄’’𑀢𑀺 𑀆𑀳. 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀭𑀺𑀬𑀸𑀬 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸 𑀦𑀺𑀩𑁆𑀩𑀢𑁆𑀢𑀺𑀢𑀢𑀸 𑀘 𑀤𑀲𑁆𑀲𑀺𑀢𑀸, 𑀦 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀢𑀸𑀢𑀺. 𑀬𑁂𑀦 𑀧𑀦 𑀲𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀜𑀸𑀡𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀘𑁆𑀘𑀜𑀸𑀡𑀦𑁆𑀢𑀺 𑀤𑀼𑀓𑁆𑀔𑀸𑀤𑀺𑀲𑀘𑁆𑀘𑀲𑀪𑀸𑀯𑀸𑀯𑀩𑁄𑀥𑀓𑀁 𑀜𑀸𑀡𑀁, 𑀬𑀁 𑀲𑀦𑁆𑀥𑀸𑀬 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀢𑀢𑁄 ¶ 𑀧𑀼𑀩𑁆𑀩𑀸𑀧𑀭𑀪𑀸𑀕𑁂𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀳𑁄𑀢𑀺 𑀅𑀲𑀫𑁆𑀫𑁄𑀳𑀢𑁄 𑀯𑀺𑀲𑀬𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸

𑁮𑁭𑁮. 𑀲𑀫𑀼𑀤𑀸𑀬𑀸𑀢𑀺 ¶ ‘‘𑀲𑀸𑀲𑀦𑀁 𑀦𑀯𑀁 𑀓𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸 𑀯𑀘𑀦𑀲𑀫𑀼𑀤𑀸𑀬𑀸. 𑀏𑀓𑀤𑁂𑀲𑀸𑀦𑀦𑁆𑀢𑀺 𑀢𑀤𑀯𑀬𑀯𑀸𑀦𑀁. ‘‘𑀢𑀻𑀲𑀼𑀧𑀺 𑀧𑀼𑀘𑁆𑀙𑀸𑀲𑀽’’𑀢𑀺 𑀏𑀯𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸.

𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁮𑁩-𑁮𑁮𑁪. 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑀸𑀢𑀺 𑀢𑀣𑀸 𑀢𑀣𑀸 𑀅𑀥𑀺𑀫𑀼𑀘𑁆𑀘𑀦𑀸𑀥𑀺𑀧𑁆𑀧𑀸𑀬𑀯𑀲𑁂𑀦.

𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁮𑁮𑁭-𑁮𑁮𑁮. 𑀭𑀽𑀧𑀲𑀪𑀸𑀯𑁄 𑀭𑀽𑀧𑀝𑁆𑀞𑁄𑀢𑀺 𑀆𑀳 ‘‘𑀭𑀽𑀧𑀝𑁆𑀞𑁄 𑀦𑀸𑀫 𑀓𑁄𑀘𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻’’𑀢𑀺. 𑀬𑀁 𑀧𑀦 𑀬𑀢𑁄 𑀅𑀜𑁆𑀜𑀁, 𑀦 𑀢𑀁 𑀢𑀁𑀲𑀪𑀸𑀯𑀦𑁆𑀢𑀺 𑀆𑀳 ‘‘𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀁 𑀭𑀽𑀧𑀜𑁆𑀘 𑀦 𑀳𑁄𑀢𑀻’’𑀢𑀺, 𑀭𑀽𑀧𑀫𑁂𑀯 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀩𑁆𑀬𑀢𑀺𑀭𑁂𑀓𑀢𑁄 𑀢𑀫𑀢𑁆𑀣𑀁 𑀲𑀸𑀥𑁂𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀽𑀧𑀢𑁄 𑀅𑀜𑁆𑀜𑁄 𑀭𑀽𑀧𑀝𑁆𑀞𑁄 𑀦𑀢𑁆𑀣𑀺, 𑀭𑀽𑀧𑀝𑁆𑀞𑀢𑁄 𑀘 𑀅𑀜𑁆𑀜𑀁 𑀭𑀽𑀧𑀁, 𑀢𑀲𑁆𑀫𑀸 𑀭𑀽𑀧𑀁 𑀭𑀽𑀧𑀫𑁂𑀯 𑀭𑀽𑀧𑀲𑀪𑀸𑀯𑀫𑁂𑀯𑀸𑀢𑀺 ¶ 𑀏𑀯-𑀓𑀸𑀭𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺 ‘‘𑀦 𑀯𑁂𑀤𑀦𑀸𑀤𑀺𑀲𑀪𑀸𑀯’’𑀦𑁆𑀢𑀺. 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀭𑀽𑀧𑀭𑀽𑀧𑀝𑁆𑀞𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀥𑀺𑀧𑁆𑀧𑀸𑀬𑁂𑀦. 𑀅𑀜𑁆𑀜𑀣𑀸𑀢𑀺 𑀢𑁂𑀲𑀁 𑀅𑀜𑁆𑀜𑀢𑁆𑀢𑁂 𑀭𑀽𑀧𑀝𑁆𑀞𑁂𑀦 𑀦𑀺𑀬𑀫𑁂𑀦 𑀭𑀽𑀧𑀁 𑀦𑀺𑀬𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀤𑀲𑁆𑀲𑀺𑀢𑁄𑀬𑁂𑀯 𑀳𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸. 𑀦 𑀳𑀺 𑀅𑀪𑀺𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀭𑀺𑀬𑀸𑀬𑀦𑁆𑀢𑀭𑀪𑁂𑀤𑀁 𑀓𑀭𑁄𑀢𑀺. 𑀅𑀜𑁆𑀜𑀢𑁆𑀢𑀦𑁆𑀢𑀺 𑀭𑀽𑀧𑀲𑀪𑀸𑀯𑀸𑀦𑀁 𑀭𑀽𑀧𑀭𑀽𑀧𑀝𑁆𑀞𑀸𑀦𑀜𑁆𑀘. 𑀲𑀲𑀸𑀫𑀺𑀦𑀺𑀤𑁆𑀤𑁂𑀲𑀲𑀺𑀤𑁆𑀥𑀸𑀪𑁂𑀤𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺 ¶ 𑀯𑀺𑀬, 𑀓𑀧𑁆𑀧𑀦𑀸𑀫𑀢𑁆𑀢𑀢𑁄 𑀘𑀸𑀬𑀁 𑀪𑁂𑀤𑁄, 𑀦 𑀧𑀭𑀫𑀢𑁆𑀣𑀢𑁄𑀢𑀺 𑀆𑀳 ‘‘𑀕𑀳𑁂𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑁄’’𑀢𑀺. 𑀯𑁂𑀤𑀦𑀸𑀤𑀻𑀳𑀺 𑀦𑀸𑀦𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀦𑀸𑀤𑀻𑀳𑀺 𑀅𑀜𑁆𑀜𑀢𑁆𑀢𑀫𑁂𑀯. 𑀲𑁄 𑀲𑀪𑀸𑀯𑁄𑀢𑀺 𑀲𑁄 𑀭𑀽𑀧𑀲𑀪𑀸𑀯𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀧𑀦𑀢𑁆𑀣𑀦𑁆𑀢𑀺 𑀭𑀽𑀧𑀲𑁆𑀲 𑀲𑀪𑀸𑀯𑁄, 𑀦 𑀯𑁂𑀤𑀦𑀸𑀤𑀻𑀦𑀦𑁆𑀢𑀺 𑀏𑀯𑀁 𑀪𑁂𑀤𑀲𑁆𑀲 𑀜𑀸𑀧𑀦𑀢𑁆𑀣𑀁. 𑀢𑀜𑁆𑀘 𑀯𑀘𑀦𑀦𑁆𑀢𑀺 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦 𑀦𑀺𑀬𑀢’’𑀦𑁆𑀢𑀺 𑀯𑀘𑀦𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 ‘‘𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀬𑀤𑀺 𑀲𑀤𑁄𑀲𑀁, 𑀅𑀣 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸.

𑀯𑀼𑀢𑁆𑀢𑀫𑁂𑀯 𑀓𑀸𑀭𑀡𑀦𑁆𑀢𑀺 ‘‘𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀫𑁂𑀯 𑀬𑀼𑀢𑁆𑀢𑀺𑀁. 𑀧𑀭𑁂𑀦 𑀘𑁄𑀤𑀺𑀢𑀦𑁆𑀢𑀺 ‘‘𑀦 𑀯𑀢𑁆𑀢𑀩𑁆𑀩𑀁 𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀯𑀸𑀤𑀺𑀦𑁄 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀫𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀢𑀫𑁂𑀯 𑀬𑀣𑀸𑀯𑀼𑀢𑁆𑀢𑀁 𑀬𑀼𑀢𑁆𑀢𑀺𑀁 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑁂𑀢𑁆𑀯𑀸. 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀻𑀢𑀺 ‘‘𑀅𑀣 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀬𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀇𑀢𑁄 𑀅𑀜𑁆𑀜𑀣𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁨. 𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑁄

𑁨. 𑀓𑀼𑀲𑀮𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁮𑁯𑁪-𑁮𑁯𑁫. 𑀧𑀼𑀭𑀺𑀫𑀚𑀯𑀦𑀓𑁆𑀔𑀡𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑀧𑀼𑀭𑀺𑀫𑀚𑀯𑀦𑀯𑀸𑀭𑀓𑁆𑀔𑀡𑁂.

𑀓𑀼𑀲𑀮𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀦𑁂𑀜𑁆𑀚𑀓𑀣𑀸𑀯𑀡𑁆𑀡𑀦𑀸

𑁮𑁯𑁬. 𑀳𑁂𑀢𑀼𑀲𑀭𑀽𑀧𑀸𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀸𑀤𑀺𑀢𑁄 ¶ ¶ 𑀪𑀯𑀗𑁆𑀕𑀲𑀤𑀺𑀲𑀢𑁆𑀢𑀸 𑀘𑀼𑀢𑀺𑀘𑀺𑀢𑁆𑀢𑀁 ‘‘𑀪𑀯𑀗𑁆𑀕𑀘𑀺𑀢𑁆𑀢’’𑀦𑁆𑀢𑀺 𑀆𑀳.

𑀆𑀦𑁂𑀜𑁆𑀚𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁭. 𑀢𑀺𑀲𑁆𑀲𑁄𑀧𑀺𑀓𑀣𑀸𑀯𑀡𑁆𑀡𑀦𑀸

𑁮𑁯𑁮-𑁯𑁦𑁦. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀧𑀺 𑀕𑀩𑁆𑀪𑁂𑀬𑁂𑀯 𑀅𑀢𑁆𑀣𑀻𑀢𑀺 𑀫𑀜𑁆𑀜𑀢𑀺. 𑀲𑀢𑁆𑀢𑀯𑀲𑁆𑀲𑀺𑀓𑀸 𑀳𑀺 𑀲𑁄𑀧𑀸𑀓𑀲𑀸𑀫𑀡𑁂𑀭𑀸𑀤𑀬𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀲𑀢𑁆𑀢𑀯𑀲𑁆𑀲𑀺𑀓𑁄𑀧𑀺 𑀕𑀩𑁆𑀪𑁄 𑀅𑀢𑁆𑀣𑀻𑀢𑀺 𑀧𑀭𑀯𑀸𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑁄. 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀲𑀼𑀧𑀺𑀦𑀁 𑀆𑀓𑀸𑀲𑀲𑀼𑀧𑀺𑀦𑀁. 𑀢𑀁 𑀅𑀪𑀺𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑀁 𑀫𑀜𑁆𑀜𑀢𑀻𑀢𑀺 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀓𑀸𑀲𑀕𑀫𑀦𑀸𑀤𑀺𑀅𑀪𑀺𑀜𑁆𑀜𑀸 𑀯𑀺𑀬𑀸’’𑀢𑀺. 𑀳𑁂𑀝𑁆𑀞𑀺𑀫𑀸𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀫𑀕𑁆𑀕𑀸𑀦𑀁 𑀅𑀥𑀺𑀕𑀫𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀕𑁆𑀕𑀨𑀮𑀸𑀥𑀺𑀕𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀲𑀼𑀧𑀺𑀦𑁂 𑀅𑀢𑁆𑀣𑀻𑀢𑀺 𑀫𑀜𑁆𑀜𑀢𑀻𑀢𑀺 𑀬𑁄𑀚𑀦𑀸.

𑀢𑀺𑀲𑁆𑀲𑁄𑀧𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀲𑁂𑀯𑀦𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁯𑁦𑁩-𑁯𑁦𑁫. 𑀩𑀻𑀚𑀁 𑀘𑀢𑀼𑀫𑀥𑀼𑀭𑀪𑀸𑀯𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀇𑀤𑀁 𑀲𑀓𑀲𑀫𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀭𑀲𑀫𑀬𑁂 𑀧𑀦 𑀭𑀽𑀧𑀥𑀫𑁆𑀫𑀸𑀧𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀲𑀫𑀸𑀦𑀓𑁆𑀔𑀡𑀸 𑀏𑀯 𑀇𑀘𑁆𑀙𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀔𑀡𑀺𑀓𑀸’’𑀢𑀺. 𑀔𑀡𑀺𑀓𑀢𑁆𑀢𑁂𑀧𑀺 𑀯𑀸 𑀅𑀘𑁂𑀢𑀦𑁂𑀲𑀼𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂𑀲𑀼 𑀪𑀸𑀯𑀦𑀸𑀯𑀺𑀲𑁂𑀲𑁄 𑀮𑀩𑁆𑀪𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀘𑁂𑀢𑀦𑁂𑀲𑀽𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀩𑀻𑀚𑀁 𑀘𑀢𑀼𑀫𑀥𑀼𑀭𑀪𑀸𑀯𑀁 𑀦 𑀕𑀡𑁆𑀳𑀸𑀢𑀻’’𑀢𑀺 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑁂𑀯𑁂𑀦𑁆𑀢𑁄 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺 𑀇𑀢𑁆𑀢𑀭𑀢𑀸𑀬 𑀅𑀦𑀯𑀝𑁆𑀞𑀸𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑁆𑀢𑀭𑀔𑀡𑀢𑀸𑀬 𑀏𑀯 𑀧𑀦 𑀆𑀲𑁂𑀯𑀦𑀁 𑀮𑀩𑁆𑀪𑀢𑀺. 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀳𑀺 𑀅𑀢𑁆𑀢𑀲𑀤𑀺𑀲𑀲𑁆𑀲 𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲 ¶ 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀧𑁆𑀧𑀯𑀢𑁆𑀢𑀦𑀁 𑀅𑀢𑁆𑀢𑀲𑀤𑀺𑀲𑀢𑀸𑀧𑀸𑀤𑀦𑀁 𑀯𑀸𑀲𑀦𑀁 𑀯𑀸 𑀆𑀲𑁂𑀯𑀦𑀁 𑀧𑀼𑀭𑁂 𑀧𑀭𑀺𑀘𑀺𑀢𑀕𑀦𑁆𑀣𑁄 𑀯𑀺𑀬 𑀧𑀘𑁆𑀙𑀺𑀫𑀲𑁆𑀲𑀸𑀢𑀺.

𑀆𑀲𑁂𑀯𑀦𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀔𑀡𑀺𑀓𑀓𑀣𑀸𑀯𑀡𑁆𑀡𑀦𑀸

𑁯𑁦𑁬-𑁯𑁦𑁭. 𑀧𑀣𑀯𑀺𑀬𑀸𑀤𑀺𑀭𑀽𑀧𑁂𑀲𑀽𑀢𑀺 ¶ 𑀅𑀦𑁂𑀓𑀓𑀮𑀸𑀧𑀲𑀫𑀼𑀤𑀸𑀬𑀪𑀽𑀢𑁂𑀲𑀼 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀺𑀭𑀽𑀧𑁂𑀲𑀼. 𑀢𑀢𑁆𑀣 𑀳𑀺 𑀓𑁂𑀲𑀼𑀘𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑁂𑀲𑀼 𑀞𑀺𑀢𑁂𑀲𑀼 𑀓𑁂𑀲𑀜𑁆𑀘𑀺 𑀢𑀤𑀜𑁆𑀜𑁂𑀲𑀁 𑀉𑀧𑁆𑀧𑀸𑀤𑁄, 𑀢𑀢𑁄 𑀧𑀼𑀭𑀺𑀫𑀦𑁆𑀢𑀭𑀼𑀧𑁆𑀧𑀦𑁆𑀦𑀸𑀦𑀁 𑀓𑁂𑀲𑀜𑁆𑀘𑀺 𑀦𑀺𑀭𑁄𑀥𑁄 𑀳𑁄𑀢𑀺 𑀏𑀓𑁂𑀓𑀓𑀮𑀸𑀧𑀭𑀽𑀧𑁂𑀲𑀼 𑀲𑀫𑀸𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀢𑁆𑀢𑀸 𑀢𑁂𑀲𑀁. 𑀏𑀯𑀁 𑀧𑀢𑀺𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀲𑀫𑀸𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀧𑀩𑀦𑁆𑀥𑁂𑀦 𑀧𑀢𑀺𑀝𑁆𑀞𑀸𑀦𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀧𑀦𑀸𑀬𑀁 𑀬𑀣𑀸𑀯𑀼𑀢𑁆𑀢𑀸 𑀧𑀯𑀢𑁆𑀢𑀺 𑀓𑀲𑁆𑀫𑀸 𑀭𑀽𑀧𑀲𑀦𑁆𑀢𑀢𑀺𑀬𑀸 𑀏𑀯𑀸𑀢𑀺 𑀆𑀳 ‘‘𑀦 𑀳𑀺 𑀭𑀽𑀧𑀸𑀦’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸 𑀲𑀫𑀸𑀦𑀓𑁆𑀔𑀡𑀸, 𑀢𑀣𑀸 𑀲𑀢𑀺 𑀅𑀭𑀽𑀧𑀲𑀦𑁆𑀢𑀢𑀺𑀬𑀸 𑀯𑀺𑀬 𑀭𑀽𑀧𑀲𑀦𑁆𑀢𑀢𑀺𑀬𑀸𑀧𑀺 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑁂𑀦 𑀯𑀺𑀥𑀺𑀦𑀸 𑀧𑀯𑀢𑁆𑀢𑀺 𑀲𑀺𑀬𑀸, 𑀦 𑀘𑁂𑀢𑀁 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀘𑀺𑀢𑁆𑀢𑀓𑁆𑀔𑀡𑁂 𑀘𑀺𑀢𑁆𑀢𑀓𑁆𑀔𑀡𑁂 𑀧𑀣𑀯𑀻𑀆𑀤𑀻𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀔𑀡𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁩. 𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸

𑁯𑁦𑁮. 𑀏𑀓-𑀲𑀤𑁆𑀤𑁄 𑀅𑀜𑁆𑀜𑀢𑁆𑀣𑁄𑀧𑀺 𑀳𑁄𑀢𑀺 ‘‘𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀅𑀜𑁆𑀜𑀢𑁆𑀢𑀜𑁆𑀘𑁂𑀢𑁆𑀣 ¶ 𑀭𑀸𑀕𑀸𑀥𑀺𑀧𑁆𑀧𑀸𑀬𑀢𑁄 𑀯𑁂𑀤𑀺𑀢𑀩𑁆𑀩𑀁, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀲𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀪𑀸𑀯𑀢𑁄 𑀆𑀳 ‘‘𑀭𑀸𑀕𑀸𑀥𑀺𑀧𑁆𑀧𑀸𑀬𑀢𑁄 𑀅𑀜𑁆𑀜𑀸𑀥𑀺𑀧𑁆𑀧𑀸𑀬𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀓𑁄 𑀧𑀦 𑀲𑁄 𑀅𑀜𑁆𑀜𑀸𑀥𑀺𑀧𑁆𑀧𑀸𑀬𑁄𑀢𑀺? 𑀓𑀭𑀼𑀡𑀸𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀭𑀼𑀡𑀸𑀥𑀺𑀧𑁆𑀧𑀸𑀬𑁂𑀦 𑀏𑀓𑀸𑀥𑀺𑀧𑁆𑀧𑀸𑀬𑁄’’𑀢𑀺. 𑀅𑀬𑀜𑁆𑀘 𑀦𑀬𑁄 𑀇𑀢𑁆𑀣𑀺𑀬𑀸 𑀚𑀻𑀯𑀺𑀢𑀭𑀓𑁆𑀔𑀡𑀢𑁆𑀣𑀁 𑀓𑀸𑀭𑀼𑀜𑁆𑀜𑁂𑀦 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀁𑀯𑀭𑀯𑀺𑀦𑀸𑀲𑁄 𑀦 𑀳𑁄𑀢𑀻𑀢𑀺 𑀏𑀯𑀁𑀯𑀸𑀤𑀺𑀦𑀁 𑀧𑀭𑀯𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀧𑀡𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑀯𑀸𑀤𑀺𑀦𑀁 𑀧𑀦 𑀲𑀦𑁆𑀥𑀸𑀬 ‘‘𑀏𑀓𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀢𑁄𑀪𑀸𑀯𑁂𑀢𑀺 𑀲𑀳𑀪𑀸𑀯𑁂.

𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁭. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁯𑁧𑁦-𑁯𑁧𑁪. 𑀇𑀲𑁆𑀲𑀭𑀺𑀬𑁂𑀦𑀸𑀢𑀺 ¶ 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦, 𑀦 𑀘𑁂𑀢𑁄𑀯𑀲𑀺𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀓𑀸𑀭𑀺𑀓𑀁 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑀁. 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀽𑀢𑀺 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀪𑀸𑀯𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀭𑀻𑀬𑀢𑀻𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦𑁂𑀯 𑀬𑀸 𑀓𑀸𑀘𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀭𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁯𑁧𑁫-𑁯𑁧𑁬. 𑀫𑁂𑀢𑁆𑀢𑀸𑀤𑀬𑁄 𑀯𑀺𑀬𑀸𑀢𑀺 𑀬𑀣𑀸 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀘 𑀲𑀺𑀦𑁂𑀳𑀲𑀪𑀸𑀯𑀸𑀧𑀺 𑀅𑀭𑀜𑁆𑀚𑀦𑀲𑀪𑀸𑀯𑀢𑁆𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀘 𑀦 𑀭𑀸𑀕𑁄, 𑀏𑀯𑀁 𑀭𑀸𑀕𑀧𑀢𑀺𑀭𑀽𑀧𑀓𑁄 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀫𑁂𑀢𑁆𑀢𑀸𑀤𑀬𑁄, 𑀅𑀜𑁆𑀜𑀘𑀺𑀢𑁆𑀢𑀲𑁆𑀲 𑀲𑀺𑀦𑀺𑀬𑁆𑀳𑀦𑀸𑀓𑀸𑀭𑁄 𑀭𑀸𑀕𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀭𑀸𑀕𑀫𑁂𑀯 𑀕𑀡𑁆𑀳𑀸𑀢𑀻’’𑀢𑀺. 𑀏𑀯𑀁 𑀤𑁄𑀲𑁂𑀧𑀻𑀢𑀺 𑀏𑀢𑁆𑀣 𑀇𑀲𑁆𑀲𑀸𑀤𑀬𑁄 𑀯𑀺𑀬 𑀦 𑀤𑁄𑀲𑁄 𑀤𑁄𑀲𑀧𑀢𑀺𑀭𑀽𑀧𑀓𑁄 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀤𑁄𑀲𑀫𑁂𑀯 𑀕𑀡𑁆𑀳𑀸𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀞𑀧𑁂𑀢𑁆𑀯𑀸 𑀳𑀺 𑀇𑀲𑁆𑀲𑀸𑀤𑀬𑁄 𑀅𑀜𑁆𑀜𑀘𑀺𑀢𑁆𑀢𑀲𑁆𑀲 𑀤𑀼𑀲𑁆𑀲𑀦𑀸𑀓𑀸𑀭𑁄 𑀤𑁄𑀲𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺.

𑀧𑀢𑀺𑀭𑀽𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁯𑁧𑁭-𑁯𑁧𑁮. 𑀅𑀦𑀺𑀘𑁆𑀘𑀸𑀤𑀺𑀓𑁄 ¶ 𑀪𑀸𑀯𑁄𑀢𑀺 𑀅𑀦𑀺𑀘𑁆𑀘𑀲𑀗𑁆𑀔𑀸𑀭𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸𑀤𑀺𑀓𑁄 𑀪𑀸𑀯𑁄 𑀥𑀫𑁆𑀫𑁄 𑀧𑀓𑀢𑀺 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺 ‘‘𑀤𑀼𑀓𑁆𑀔𑀲𑀘𑁆𑀘𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀓𑀢𑀸, 𑀦 𑀤𑀼𑀓𑁆𑀔𑀢𑀸𑀫𑀢𑁆𑀢’’𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀓𑁂𑀯𑀮𑀜𑁆𑀳𑀺 𑀧𑀞𑀫𑀲𑀘𑁆𑀘𑀫𑁂𑀯 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀦𑁂𑀦. 𑀢𑀣𑀸 𑀲𑀢𑀺 𑀧𑀭𑀯𑀸𑀤𑀺𑀦𑀸 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀭𑀺𑀓𑁆𑀔𑀓𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀦𑀸𑀦𑀼𑀚𑀸𑀦𑀺𑀢𑀩𑁆𑀩𑀸 𑀲𑀺𑀬𑀸. 𑀓𑀲𑁆𑀫𑀸? 𑀢𑁂𑀲𑀫𑁆𑀧𑀺 𑀳𑀺 𑀤𑀼𑀓𑁆𑀔𑀲𑀘𑁆𑀘𑁂𑀦 𑀲𑀗𑁆𑀕𑀳𑁄, 𑀦 𑀇𑀢𑀭𑀲𑀘𑁆𑀘𑁂𑀳𑀺. 𑀬𑀜𑁆𑀳𑀺 𑀲𑀫𑀼𑀤𑀬𑀲𑀘𑁆𑀘𑀢𑁄 𑀦𑀺𑀩𑁆𑀩𑀢𑁆𑀢𑀁, 𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀲𑀘𑁆𑀘𑀁 ¶ , 𑀇𑀢𑀭𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀻𑀢𑀺 𑀇𑀫𑀺𑀦𑀸 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀗𑁆𑀕𑀳𑀸𑀪𑀸𑀯𑀫𑀸𑀳. 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀇𑀫𑀺𑀦𑀸 𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑁂𑀳𑀺. 𑀬𑀤𑀺 𑀏𑀯𑀫𑁂𑀢𑁆𑀣 𑀬𑀼𑀢𑁆𑀢𑀺 𑀯𑀢𑁆𑀢𑀩𑁆𑀩𑀸, 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁? 𑀲𑀪𑀸𑀯𑁄 𑀳𑁂𑀲 𑀧𑀭𑀯𑀸𑀤𑀺𑀯𑀸𑀤𑀲𑁆𑀲, 𑀬𑀤𑀺𑀤𑀁 𑀧𑀼𑀩𑁆𑀩𑁂𑀦𑀸𑀧𑀭𑀫𑀲𑀁𑀲𑀦𑁆𑀤𑀦𑀁. 𑀢𑀣𑀸 𑀳𑀺 𑀲𑁄 𑀯𑀺𑀜𑁆𑀜𑀽𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀣𑀸 𑀘𑁂𑀯 𑀢𑀁 𑀅𑀫𑁆𑀳𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀁. 𑀏𑀢𑀦𑁆𑀢𑀺 ‘‘𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁, 𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀬𑀤𑁂𑀢𑀁 𑀢𑀬𑀸 𑀯𑀼𑀢𑁆𑀢𑀁, 𑀏𑀢𑀁 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂. 𑀓𑀲𑁆𑀫𑀸? 𑀭𑀽𑀧𑀲𑁆𑀲 𑀘 𑀤𑀼𑀓𑁆𑀔𑀢𑁆𑀢𑀸. 𑀭𑀽𑀧𑀜𑁆𑀳𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀜𑁆𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁. 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀘.

𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀬𑀫𑀓𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀲𑀗𑁆𑀔𑁂𑀧𑁂𑀦𑁂𑀯𑀸𑀢𑀺 ¶ ¶ 𑀉𑀤𑁆𑀤𑁂𑀲𑁂𑀦𑁂𑀯. 𑀬𑀁 ‘‘𑀫𑀸𑀢𑀺𑀓𑀸𑀞𑀧𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀲𑀽𑀢𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼 𑀓𑀼𑀲𑀮𑀸𑀤𑀺𑀥𑀫𑁆𑀫𑁂𑀲𑀼 𑀘. 𑀅𑀯𑀺𑀧𑀭𑀻𑀢𑀢𑁄 𑀕𑀳𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀽𑀮𑀬𑀫𑀓𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀤𑁂𑀲𑀦𑀸 𑀯𑁂𑀦𑁂𑀬𑁆𑀬𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀸𑀯𑀳𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑀸𑀥𑀦𑀻 𑀘 𑀳𑁄𑀢𑀺, 𑀦 𑀯𑀺𑀧𑀭𑀻𑀢𑀢𑁄𑀢𑀺 𑀆𑀳 ‘‘𑀯𑀺𑀧𑀭𑀻𑀢𑀕𑁆𑀕𑀳𑀡𑀁…𑀧𑁂… 𑀆𑀭𑀤𑁆𑀥’’𑀦𑁆𑀢𑀺. 𑀏𑀢𑁂𑀦 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀤𑁂𑀲𑀦𑀸𑀦𑀦𑁆𑀢𑀭𑀁 𑀬𑀫𑀓𑀧𑀓𑀭𑀡𑀤𑁂𑀲𑀦𑀸𑀬 𑀓𑀸𑀭𑀡𑀫𑀸𑀳. 𑀢𑀢𑁆𑀣 𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑁆𑀢𑀺 𑀧𑀼𑀕𑁆𑀕𑀮𑀧𑀭𑀺𑀕𑁆𑀕𑀳𑀡𑀸𑀤𑀺𑀫𑀺𑀘𑁆𑀙𑀸𑀕𑀸𑀳𑀁. 𑀥𑀫𑁆𑀫𑀧𑀼𑀕𑁆𑀕𑀮𑁄𑀓𑀸𑀲𑀸𑀤𑀺𑀦𑀺𑀲𑁆𑀲𑀬𑀸𑀦𑀦𑁆𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀫𑀽𑀮𑀬𑀫𑀓.𑁧) 𑀥𑀫𑁆𑀫𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀔𑀦𑁆𑀥𑀬𑀫𑀓.𑁫𑁦) 𑀧𑀼𑀕𑁆𑀕𑀮𑀁 ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀔𑀦𑁆𑀥𑀬𑀫𑀓.𑁫𑁧) 𑀑𑀓𑀸𑀲𑀁 𑀦𑀺𑀲𑁆𑀲𑀸𑀬 𑀆𑀭𑀩𑁆𑀪 𑀧𑀯𑀢𑁆𑀢𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀕𑁆𑀕𑀮𑁄𑀓𑀸𑀲𑀉𑀧𑁆𑀧𑀸𑀤𑀦𑀺𑀭𑁄𑀥𑀢𑀤𑀼𑀪𑀬𑀧𑀭𑀺𑀜𑁆𑀜𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸𑀦𑀦𑁆𑀢𑀺 ¶ 𑀧𑀸𑀴𑀺𑀕𑀢𑀺𑀧𑀝𑀺𑀯𑀘𑀦𑀲𑀭𑀽𑀧𑀤𑀲𑁆𑀲𑀦𑀧𑀝𑀺𑀓𑁆𑀔𑀺𑀧𑀦𑀧𑀝𑀺𑀲𑁂𑀥𑀦𑀦𑀬𑁂𑀳𑀺 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀘𑁆𑀙𑀬𑀓𑀭𑀡𑀁 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀢𑀤𑀪𑀸𑀯𑀢𑁄 𑀲𑀁𑀲𑀬𑀦𑀁 𑀲𑀁𑀲𑀬𑁄. 𑀢𑁂𑀲𑀁 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸𑀦𑀁.

𑀓𑀸𑀫𑀜𑁆𑀘𑁂𑀢𑁆𑀣 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀲𑀁𑀲𑀬𑀧𑀼𑀩𑁆𑀩𑀓𑀁 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀧𑀞𑀫𑀁 𑀲𑀁𑀲𑀬𑁄 𑀯𑀢𑁆𑀢𑀩𑁆𑀩𑁄, 𑀤𑁂𑀲𑁂𑀦𑁆𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀧𑀼𑀩𑁆𑀩𑀓𑁄 𑀲𑀁𑀲𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄. 𑀲𑀩𑁆𑀩𑀜𑁆𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀁 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀥𑀫𑁆𑀫𑀲𑀸𑀫𑀺𑀦𑁄 𑀦 𑀓𑀢𑁆𑀣𑀘𑀺 𑀲𑀁𑀲𑀬𑁄, 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑀢𑀸𑀬 𑀧𑀦 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀕𑀢𑀁 𑀲𑀁𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀲𑀁𑀲𑀬𑀺𑀢𑀯𑀲𑁂𑀦 𑀧𑀼𑀘𑁆𑀙𑀁 𑀓𑀭𑁄𑀢𑀻𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀧𑀼𑀘𑁆𑀙𑀦𑀯𑀲𑁂𑀦 𑀦 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀦𑀺𑀘𑁆𑀙𑀺𑀢𑀲𑀁𑀲𑀬𑀥𑀫𑁆𑀫𑀯𑀲𑁂𑀦𑁂𑀯 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀲𑀮𑁂𑀲𑀼 𑀓𑀼𑀲𑀮𑀸 𑀦𑀼 𑀔𑁄, 𑀦 𑀦𑀼 𑀔𑁄 𑀓𑀼𑀲𑀮𑀸𑀢𑀺 𑀲𑀦𑁆𑀤𑁂𑀳𑀸𑀪𑀸𑀯𑀢𑁄’’𑀢𑀺𑀆𑀤𑀺. 𑀢𑁂𑀦𑁂𑀯 𑀘 ‘‘𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸𑀦’’𑀦𑁆𑀢𑀺, ‘‘𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀯𑀲𑁂𑀦𑀸’’𑀢𑀺 𑀘 𑀧𑀞𑀫𑀁 𑀲𑀦𑁆𑀦𑀺𑀝𑁆𑀞𑀸𑀦𑀕𑁆𑀕𑀳𑀡𑀁 𑀓𑀢𑀁.

𑀢𑀦𑁆𑀢𑀺 𑀬𑀫𑀓𑀧𑀓𑀭𑀡𑀁. 𑀢𑀲𑁆𑀲 𑀬𑁂 𑀲𑀫𑀬𑀸𑀤𑀬𑁄 𑀯𑀢𑁆𑀢𑀩𑁆𑀩𑀸, 𑀢𑁂 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀤𑁂𑀲𑀦𑀸𑀦𑀦𑁆𑀢𑀭𑁄 𑀤𑁂𑀲𑀦𑀸𑀲𑀫𑀬𑁄, 𑀢𑀸𑀯𑀢𑀺𑀁𑀲𑀪𑀯𑀦𑀫𑁂𑀯 𑀤𑁂𑀲𑀦𑀸𑀤𑁂𑀲𑁄, 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀤𑀺𑀬𑀫𑀓𑀸𑀓𑀸𑀭𑁂𑀦 𑀤𑁂𑀲𑀦𑀸𑀢𑀺 𑀯𑀺𑀪𑀸𑀕𑀢𑁄 ‘‘𑀲𑀗𑁆𑀔𑁂𑀧𑁂𑀦𑁂𑀯𑀸’’𑀢𑀺𑀆𑀤𑀺𑀕𑀸𑀣𑀸𑀳𑀺 𑀯𑀺𑀪𑀸𑀯𑀺𑀢𑀸 𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀡𑁆𑀡𑀦𑀧𑀝𑀺𑀜𑁆𑀜𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀬𑀤𑁂𑀲𑀤𑁂𑀲𑀦𑀸𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑀁 𑀇𑀥 𑀲𑀁𑀯𑀡𑁆𑀡𑀦𑀸𑀬, 𑀬𑀤𑀺𑀤𑀁 𑀓𑀫𑀸𑀦𑀼𑀧𑁆𑀧𑀢𑁆𑀢𑀺 𑀆𑀕𑀢𑀪𑀸𑀭𑀯𑀸𑀳𑀺𑀢𑀸 𑀘 𑀧𑀡𑁆𑀟𑀺𑀢𑀸𑀦𑀁 𑀧𑀡𑁆𑀟𑀺𑀢𑀓𑀺𑀘𑁆𑀘𑀪𑀸𑀯𑀢𑁄. 𑀢𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑀸𑀤𑀺𑀤𑀲𑁆𑀲𑀦𑁂. 𑀬𑀫𑀦𑀁 𑀉𑀧𑀭𑀫𑀦𑀦𑁆𑀢𑀺 𑀬𑀫𑁄 𑀫𑀭𑀡𑀦𑁆𑀢𑀺 𑀆𑀳 ‘‘𑀚𑀸𑀢𑀺𑀬𑀸 𑀲𑀢𑀺 𑀫𑀭𑀡𑀁 𑀳𑁄𑀢𑀻𑀢𑀺…𑀧𑁂… 𑀯𑀺𑀲𑀬𑁄’’𑀢𑀺. 𑀢𑀢𑁆𑀣 𑀬𑀣𑀸 ‘‘𑀚𑀸𑀢𑀺𑀬𑀸 𑀲𑀢𑀺 𑀫𑀭𑀡𑀁 𑀳𑁄𑀢𑀻’’𑀢𑀺 𑀚𑀸𑀢𑀺 𑀬𑀫𑀲𑁆𑀲 𑀯𑀺𑀲𑀬𑁄, 𑀏𑀯𑀁 ‘‘𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼 𑀫𑀭𑀡𑀁 𑀳𑁄𑀢𑀻’’𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀫𑀲𑁆𑀲 𑀯𑀺𑀲𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂 𑀳𑀺 𑀫𑀭𑀡𑀥𑀫𑁆𑀫𑀺𑀦𑁄𑀢𑀺. 𑀅𑀦𑀼𑀧𑁆𑀧𑀢𑁆𑀢𑀫𑀭𑀡𑀁𑀬𑁂𑀯 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑀁 𑀧𑀼𑀕𑁆𑀕𑀮𑀁 𑀬𑀫𑀧𑀼𑀭𑀺𑀲𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑁄𑀦𑁆𑀢𑀺, 𑀦 𑀅𑀧𑁆𑀧𑀢𑁆𑀢𑀫𑀭𑀡𑀦𑁆𑀢𑀺 𑀫𑀭𑀡𑀁 𑀬𑀫𑀲𑁆𑀲 𑀯𑀺𑀲𑀬𑁄 𑀯𑀼𑀢𑁆𑀢𑁄. 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀯𑀺𑀲𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀤𑁂𑀲𑀁 𑀯𑀸𑀢𑀺 𑀓𑀸𑀫𑀸𑀤𑀺𑀥𑀸𑀢𑀼𑀢𑁆𑀢𑀬𑀤𑁂𑀲𑀁 𑀲𑀦𑁆𑀥𑀸𑀬𑀸𑀳. 𑀥𑀸𑀢𑀼𑀢𑁆𑀢𑀬𑀺𑀲𑁆𑀲𑀭𑁄 𑀳𑀺 𑀫𑀘𑁆𑀘𑀼𑀭𑀸𑀚𑀸. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀸𑀦𑀺 𑀅𑀜𑁆𑀜𑀲𑀢𑁆𑀣𑀸𑀭𑀼𑀤𑁆𑀤𑁂𑀲𑁄 𑀘, 𑀢𑁂𑀦 𑀯𑀸 𑀲𑀤𑁆𑀥𑀺𑀁 𑀧𑀜𑁆𑀘 𑀯𑁂𑀭𑀸𑀦𑀺 𑀙 𑀅𑀪𑀩𑁆𑀩𑀝𑁆𑀞𑀸𑀦𑀸𑀦𑀺. 𑀆𑀯𑀢𑁆𑀢𑀸𑀢𑀺 𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀸. 𑀢𑀦𑀼𑀭𑀼𑀳𑀸𑀢𑀺 𑀮𑁄𑀫𑀸.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀽𑀮𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀬𑀫𑀓𑀲𑀫𑀽𑀳𑀲𑁆𑀲𑀸𑀢𑀺 ¶ ¶ 𑀫𑀽𑀮𑀬𑀫𑀓𑀸𑀤𑀺𑀓𑀲𑁆𑀲 𑀬𑀫𑀓𑀲𑀫𑀽𑀳𑀲𑁆𑀲. 𑀫𑀽𑀮𑀬𑀫𑀓𑀸𑀤𑀬𑁄 𑀳𑀺 𑀧𑀓𑀭𑀡𑀸𑀧𑁂𑀓𑁆𑀔𑀸𑀬 𑀅𑀯𑀬𑀯𑀪𑀽𑀢𑀸𑀧𑀺 𑀦𑀺𑀘𑁆𑀘𑀸𑀯𑀬𑀯𑀸𑀧𑁂𑀓𑁆𑀔𑀸𑀬 𑀬𑀫𑀓𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀢𑀁𑀲𑀫𑀽𑀳𑀲𑁆𑀲 𑀘 𑀲𑀓𑀮𑀲𑁆𑀲 𑀧𑀓𑀭𑀡𑀲𑁆𑀲𑀸’’𑀢𑀺.

𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀦𑁆𑀢𑀺 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀸𑀦𑀁 𑀲𑀁𑀲𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀓𑀼𑀲𑀮𑀲𑀗𑁆𑀔𑀸𑀢𑀸𑀦𑀁, 𑀢𑀣𑀸 𑀧𑀞𑀫𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 𑀯𑀺𑀲𑁂𑀲𑀸𑀦𑀁 𑀅𑀢𑁆𑀣𑀬𑀫𑀓𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀳𑀺 𑀧𑀞𑀫𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀯𑀦𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸𑀬𑁂𑀯 𑀓𑀼𑀲𑀮𑀥𑀫𑁆𑀫𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀧𑀞𑀫𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸𑀬𑁂𑀯 𑀓𑀼𑀲𑀮𑀫𑀽𑀮𑀥𑀫𑁆𑀫𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀯𑀦𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀯𑀢𑁆𑀢𑀼𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀯𑀺𑀲𑁂𑀲𑀯𑀦𑁆𑀢𑀢𑀸𑀯𑀺𑀪𑀸𑀕𑀸 𑀳𑁄𑀦𑁆𑀢𑀻𑀢𑀺. 𑀓𑀼𑀲𑀮𑀫𑀽𑀮𑀓𑀼𑀲𑀮𑀯𑀺𑀲𑁂𑀲𑁂𑀳𑀺 𑀲𑀁𑀲𑀬𑀺𑀢𑀧𑀤𑀲𑀗𑁆𑀕𑀳𑀺𑀢𑁂𑀳𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀯𑀺𑀲𑁂𑀲𑀯𑀲𑁂𑀦 𑀧𑀞𑀫𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀧𑀦 𑀯𑀺𑀲𑁂𑀲𑀸𑀧𑁂𑀓𑁆𑀔𑀯𑀺𑀲𑁂𑀲𑀯𑀦𑁆𑀢𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀳𑀻’’𑀢𑀺𑀆𑀤𑀺.

𑀢𑀢𑁆𑀣 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀦𑁆𑀢𑀺 𑀧𑀼𑀘𑁆𑀙𑀸𑀬 𑀯𑀺𑀲𑀬𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀸𑀦𑀦𑁆𑀢𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀁. 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀸𑀦𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀼𑀲𑀮𑀲𑀗𑁆𑀔𑀸𑀢𑁂𑀳𑀺 𑀯𑀺𑀲𑁂𑀲𑀯𑀦𑁆𑀢𑁂𑀳𑀺 𑀲𑀸𑀧𑁂𑀓𑁆𑀔𑀸𑀦𑀁. 𑀯𑀺𑀲𑁂𑀲𑀯𑀢𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀼𑀲𑀮𑀸𑀦𑀁. 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀦𑀦𑁆𑀢𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑁂𑀳𑀺 𑀲𑀸𑀧𑁂𑀓𑁆𑀔𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀫𑀽𑀮𑀬𑀫𑀓𑁂. 𑀧𑀥𑀸𑀦𑀪𑀸𑀯𑁄𑀢𑀺 𑀧𑀞𑀫𑀯𑀺𑀓𑀧𑁆𑀧𑁂 𑀢𑀸𑀯 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀢𑁆𑀢𑀸 𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀸𑀦𑀁 𑀧𑀥𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀳𑀺 𑀲𑀁𑀲𑀬𑀺𑀢𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑁄𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀯𑀺𑀲𑁂𑀲𑀸 𑀦𑀸𑀫 𑀯𑀺𑀲𑁂𑀲𑀯𑀦𑁆𑀢𑀸𑀥𑀻𑀦𑀸𑀢𑀺 𑀯𑀺𑀲𑁂𑀲𑀯𑀦𑁆𑀢𑀸𑀦𑀁 𑀢𑀢𑁆𑀣 𑀧𑀥𑀸𑀦𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀺𑀦𑁆𑀦𑀁 𑀧𑀦 𑀏𑀓𑀚𑁆𑀛𑀁 𑀧𑀥𑀸𑀦𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺. 𑀲𑀢𑀺 𑀳𑀺 𑀅𑀧𑁆𑀧𑀥𑀸𑀦𑁂 𑀧𑀥𑀸𑀦𑀁 𑀦𑀸𑀫 𑀲𑀺𑀬𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀏𑀓𑁂𑀓𑁄 𑀏𑀯 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑀺𑀦𑀺𑀘𑁆𑀙𑀺𑀢𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀳𑀺 𑀇𑀥 𑀧𑀥𑀸𑀦𑀪𑀸𑀯𑁄 𑀦 𑀬𑀼𑀚𑁆𑀚𑀢𑁂𑀯𑀸𑀢𑀺. 𑀦 𑀥𑀫𑁆𑀫𑀯𑀸𑀘𑀓𑁄𑀢𑀺 𑀦 𑀲𑀪𑀸𑀯𑀥𑀫𑁆𑀫𑀯𑀸𑀘𑀓𑁄. 𑀲𑀪𑀸𑀯𑀥𑀫𑁆𑀫𑁄𑀧𑀺 ¶ 𑀳𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀕𑀫𑁆𑀪𑀻𑀭𑀧𑀜𑁆𑀜𑀁 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺’’𑀦𑁆𑀢𑀺𑀆𑀤𑀻𑀲𑀼 ¶ (𑀲𑀼. 𑀦𑀺. 𑁧𑁭𑁮). ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀅𑀢𑁆𑀣-𑀲𑀤𑁆𑀤𑀲𑁆𑀲 𑀳𑁂𑀢𑀼𑀨𑀮𑀯𑀸𑀘𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀆𑀤𑀺-𑀲𑀤𑁆𑀤𑁂𑀦𑀲𑁆𑀲 ‘‘𑀅𑀢𑁆𑀣𑀸𑀪𑀺𑀲𑀫𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁯) 𑀆𑀕𑀢𑀸 𑀳𑀺𑀢𑀸𑀤𑀺𑀯𑀸𑀘𑀓𑀢𑀸 𑀲𑀗𑁆𑀕𑀬𑁆𑀳𑀢𑀺. 𑀢𑁂𑀦𑁂𑀯𑀸𑀢𑀺 𑀧𑀸𑀴𑀺𑀅𑀢𑁆𑀣𑀯𑀸𑀘𑀓𑀢𑁆𑀢𑀸 𑀏𑀯.

𑀢𑀻𑀡𑀺𑀧𑀺 𑀧𑀤𑀸𑀦𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀲𑀫𑀼𑀘𑁆𑀘𑀬𑁄 𑀘 𑀢𑀼𑀮𑁆𑀬𑀬𑁄𑀕𑁂 𑀲𑀺𑀬𑀸. 𑀓𑀺𑀁 𑀦𑀸𑀫-𑀧𑀤𑁂𑀦 𑀅𑀦𑀯𑀲𑁂𑀲𑀢𑁄 𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺 𑀆𑀲𑀗𑁆𑀓𑀸𑀬 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀢𑀻𑀡𑀺𑀧𑀺…𑀧𑁂… 𑀲𑀗𑁆𑀕𑀸𑀳𑀓𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀦𑁆𑀢𑀺 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄𑀢𑀺. 𑀢𑁂𑀦 𑀦𑀺𑀯𑀢𑁆𑀢𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀦𑀺𑀭𑀯𑀲𑁂𑀲𑀲𑀗𑁆𑀕𑀸𑀳𑀓𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀭𑀽𑀧𑀁 𑀦𑀸𑀫-𑀧𑀤𑁂𑀦 𑀲𑀗𑁆𑀕𑀬𑁆𑀳𑀢𑀺. 𑀓𑀼𑀲𑀮𑀸𑀤𑀺𑀬𑁂𑀯 𑀦𑀸𑀫𑀦𑁆𑀢𑀺 𑀦𑀺𑀬𑀫𑁄 𑀤𑀝𑁆𑀞𑀩𑁆𑀩𑁄, 𑀦 𑀦𑀸𑀫𑀁𑀬𑁂𑀯 𑀓𑀼𑀲𑀮𑀸𑀤𑀻𑀢𑀺 𑀇𑀫𑀫𑁂𑀯 𑀘 𑀦𑀺𑀬𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀬𑀤𑀺𑀧𑀺 𑀦𑀸𑀫-𑀧𑀤𑀁 𑀦 𑀦𑀺𑀭𑀯𑀲𑁂𑀲𑀓𑀼𑀲𑀮𑀸𑀤𑀺𑀲𑀗𑁆𑀕𑀸𑀳𑀓𑀁, 𑀓𑀼𑀲𑀮𑀸𑀤𑀺𑀲𑀗𑁆𑀕𑀸𑀳𑀓𑀁 𑀧𑀦 𑀳𑁄𑀢𑀺, 𑀢𑀤𑀢𑁆𑀣𑀫𑁂𑀯 𑀘 𑀢𑀁 𑀕𑀳𑀺𑀢𑀦𑁆𑀢𑀺 𑀦𑀸𑀫𑀲𑁆𑀲 𑀓𑀼𑀲𑀮𑀢𑁆𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀲𑀮𑀸𑀤𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑀬𑀫𑀓𑁂𑀢𑀺 𑀏𑀓𑀫𑀽𑀮𑀬𑀫𑀓𑁂. 𑀏𑀯𑀫𑀺𑀥𑀸𑀧𑀻𑀢𑀺 𑀬𑀣𑀸 𑀏𑀓𑀫𑀽𑀮𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀆𑀭𑀤𑁆𑀥𑀸, 𑀏𑀯𑀁 𑀇𑀥𑀸𑀧𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑁂𑀧𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀆𑀭𑀪𑀺𑀢𑀩𑁆𑀩𑀸 𑀲𑀺𑀬𑀸. 𑀓𑀲𑁆𑀫𑀸? 𑀧𑀼𑀭𑀺𑀫𑀬𑀫𑀓…𑀧𑁂… 𑀅𑀧𑁆𑀧𑀯𑀢𑁆𑀢𑀢𑁆𑀢𑀸𑀢𑀺. 𑀇𑀤𑀜𑁆𑀘 𑀤𑀼𑀢𑀺𑀬𑀬𑀫𑀓𑀲𑁆𑀲 𑀢𑀣𑀸 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀢𑀺𑀬𑀬𑀫𑀓𑀁 𑀧𑀦 𑀢𑀣𑁂𑀯 𑀧𑀯𑀢𑁆𑀢𑀁. 𑀓𑁂𑀘𑀻𑀢𑀺 𑀧𑀤𑀓𑀸𑀭𑀸. 𑀢𑁂 𑀳𑀺 𑀬𑀣𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 𑀧𑀼𑀭𑀺𑀫𑀧𑀼𑀘𑁆𑀙𑀸 𑀏𑀯 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀓𑀢𑀸𑀢𑀺 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 𑀧𑀼𑀭𑀺𑀫𑀧𑀼𑀘𑁆𑀙𑀸 𑀲𑀫𑀸𑀦𑀸 𑀞𑀧𑁂𑀢𑁆𑀯𑀸 𑀧𑀝𑀺𑀮𑁄𑀫𑀪𑀸𑀯𑀁, 𑀦 𑀢𑀣𑀸 𑀅𑀜𑁆𑀜𑀫𑀜𑁆𑀜𑀬𑀫𑀓𑁂. 𑀢𑀢𑁆𑀣 𑀳𑀺 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀸. 𑀬𑀤𑀺 𑀢𑀢𑁆𑀣𑀸𑀧𑀺 𑀤𑁆𑀯𑀻𑀳𑀺𑀧𑀺 𑀧𑀼𑀘𑁆𑀙𑀸𑀳𑀺 𑀲𑀤𑀺𑀲𑀸𑀳𑀺 𑀪𑀯𑀺𑀢𑀩𑁆𑀩𑀁 ¶ , ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀞𑀫𑀧𑀼𑀘𑁆𑀙𑀸 𑀆𑀭𑀪𑀺𑀢𑀩𑁆𑀩𑀸, 𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀯𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 ¶ 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀏𑀯𑀁 𑀧𑀦 𑀅𑀯𑀢𑁆𑀯𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 𑀯𑀺𑀬 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀲𑀤𑀺𑀲𑀸 𑀅𑀓𑀢𑁆𑀯𑀸 𑀢𑀢𑀺𑀬𑀬𑀫𑀓𑁂 𑀢𑀸𑀲𑀁 𑀯𑀺𑀲𑀤𑀺𑀲𑀢𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀅𑀦𑀸𑀭𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸𑀬 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀢𑁆𑀣𑀯𑀲𑁂𑀦𑀸𑀢𑀺 𑀲𑀫𑁆𑀪𑀯𑀦𑁆𑀢𑀸𑀦𑀁 𑀦𑀺𑀘𑁆𑀙𑀺𑀢𑀲𑀁𑀲𑀬𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦. 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀢𑀲𑁆𑀲𑀸 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀦𑀼𑀘𑁆𑀙𑀯𑀺𑀓𑀸𑀬. 𑀧𑀼𑀭𑀺𑀫𑀜𑁆𑀳𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀺𑀫𑀸𑀬 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀬𑀲𑁆𑀫𑀸 𑀅𑀦𑀼𑀮𑁄𑀫𑁂 𑀲𑀁𑀲𑀬𑀘𑁆𑀙𑁂𑀤𑁂 𑀚𑀸𑀢𑁂𑀧𑀺 𑀧𑀝𑀺𑀮𑁄𑀫𑁂 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀬𑀤𑀺 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀬 𑀧𑀬𑁄𑀚𑀦𑀫𑁂𑀯 𑀦 𑀲𑀺𑀬𑀸, 𑀢𑀲𑁆𑀫𑀸 𑀦 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸 𑀧𑀼𑀭𑀺𑀫𑀧𑀼𑀘𑁆𑀙𑀸, 𑀅𑀣 𑀔𑁄 𑀯𑀼𑀢𑁆𑀢𑀦𑀬𑁂𑀦 𑀧𑀼𑀭𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸 𑀧𑀘𑁆𑀙𑀺𑀫𑀧𑀼𑀘𑁆𑀙𑀸, 𑀢𑀸𑀬 𑀘 𑀅𑀦𑀼𑀭𑀽𑀧𑀢𑀸𑀬 𑀅𑀢𑁆𑀣𑀸𑀤𑀺𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀢𑁆𑀢𑀸 𑀅𑀢𑁆𑀣𑀸𑀤𑀺𑀬𑀫𑀓𑀢𑀸 𑀯𑀼𑀢𑁆𑀢𑀸. 𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀢𑁆𑀣 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀯𑁂𑀤𑀺𑀢𑀩𑁆𑀩𑀸 ‘‘𑀓𑀼𑀲𑀮𑀸 𑀓𑀼𑀲𑀮𑀫𑀽𑀮𑀸’’𑀢𑀺 𑀯𑀢𑁆𑀯𑀸 ‘‘𑀓𑀼𑀲𑀮𑀫𑀽𑀮𑀸 𑀓𑀼𑀲𑀮𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀬𑀫𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑀯𑀦𑁆𑀢𑀯𑀺𑀲𑁂𑀲, 𑀯𑀺𑀲𑁂𑀲𑀯𑀺𑀲𑁂𑀲𑀯𑀦𑁆𑀢𑀕𑁆𑀕𑀳𑀡𑀢𑁄 𑀯𑀸 𑀇𑀥 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀧𑀼𑀘𑁆𑀙𑀸𑀬𑀜𑁆𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀲𑁂𑀲𑀯𑀦𑁆𑀢𑁄, 𑀢𑁂 𑀦𑀺𑀘𑁆𑀙𑀬𑀸𑀥𑀺𑀝𑁆𑀞𑀸𑀦𑁂 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀼 𑀬𑀲𑁆𑀫𑀺𑀁 𑀯𑀺𑀲𑁂𑀲𑁄 𑀲𑀁𑀲𑀬𑀸𑀥𑀺𑀝𑁆𑀞𑀸𑀦𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀧𑀦 𑀢𑀧𑁆𑀧𑀝𑀺𑀮𑁄𑀫𑀢𑁄 𑀬𑁂𑀦 𑀯𑀺𑀲𑁂𑀲𑁂𑀦 𑀢𑁂 𑀯𑀺𑀲𑁂𑀲𑀯𑀦𑁆𑀢𑁄, 𑀢𑀁 𑀯𑀺𑀲𑁂𑀲𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸’’𑀢𑀺 𑀯𑀢𑁆𑀯𑀸 𑀢𑁂 𑀯𑀺𑀲𑁂𑀲𑀯𑀦𑁆𑀢𑁂 𑀲𑀁𑀲𑀬𑀸𑀥𑀺𑀝𑁆𑀞𑀸𑀦𑀪𑀽𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀅𑀦𑀺𑀬𑀢𑀯𑀢𑁆𑀣𑀼𑀓𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸 𑀅𑀦𑁂𑀓𑀚𑁆𑀛𑀸𑀲𑀬𑀢𑁆𑀢𑀸 𑀲𑀢𑁆𑀢𑀸𑀦𑀁.

𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀇𑀫𑀺𑀦𑀸𑀧𑀺 𑀯𑀸𑀓𑁆𑀬𑁂𑀦. 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀫𑁂𑀯𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘‘𑀦 𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑁂𑀦𑁂𑀯𑀸𑀢𑀺 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀪𑀺𑀦𑁆𑀦𑀢𑁆𑀢𑀸 𑀏𑀯. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀺𑀪𑀚𑀦𑀁 ¶ . 𑀇𑀢𑀭𑀣𑀸𑀢𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑁂𑀦 𑀧𑀼𑀘𑁆𑀙𑀸𑀬 𑀓𑀢𑀸𑀬. 𑀢𑀸𑀦𑀺 𑀯𑀘𑀦𑀸𑀦𑀻𑀢𑀺 𑀓𑀼𑀲𑀮𑀯𑀘𑀦𑀁 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀯𑀘𑀦𑀜𑁆𑀘. 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀘𑀲𑁆𑀲 𑀅𑀩𑁆𑀬𑀸𑀓𑀢𑀤𑀻𑀧𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣𑀸𑀢𑀺 ‘‘𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄’’𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁂 𑀓𑁂𑀘𑀺 𑀓𑀼𑀲𑀮𑀸…𑀧𑁂… 𑀲𑀫𑁆𑀪𑀯𑀢𑁄𑀢𑀺 𑀏𑀢𑁂𑀦 𑀓𑀼𑀲𑀮𑀸𑀦𑀁 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀢𑀸𑀬 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺…𑀧𑁂… 𑀲𑀦𑁆𑀢𑀻’’𑀢𑀺. 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲𑁂𑀯 ¶ 𑀲𑀫𑁆𑀪𑀯𑀢𑁄𑀢𑀺 𑀳𑀺 𑀇𑀫𑀺𑀦𑀸 𑀅𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀲𑀫𑁆𑀪𑀯𑀸𑀪𑀸𑀯𑀯𑀘𑀦𑁂𑀦 𑀲𑁆𑀯𑀸𑀬𑀫𑀥𑀺𑀧𑁆𑀧𑀸𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄. 𑀬𑀣𑀸 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑁄 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑀁 𑀩𑁆𑀬𑀪𑀺𑀘𑀭𑀢𑀺, 𑀦 𑀏𑀯𑀁 𑀢𑀁 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑁄. 𑀓𑀣𑀁 𑀓𑀢𑁆𑀯𑀸 𑀘𑁄𑀤𑀦𑀸, 𑀓𑀣𑀜𑁆𑀘 𑀓𑀢𑁆𑀯𑀸 𑀧𑀭𑀺𑀳𑀸𑀭𑁄? 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀓𑀼𑀲𑀮𑀸 𑀏𑀯𑀸𑀢𑀺 𑀘𑁄𑀤𑀦𑀸 𑀓𑀢𑀸, 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀏𑀯 𑀓𑀼𑀲𑀮𑀸𑀢𑀺 𑀧𑀦 𑀧𑀭𑀺𑀳𑀸𑀭𑁄 𑀧𑀯𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀬𑀫𑀓𑁂 𑀯𑀺𑀬 𑀅𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸. 𑀓𑀼𑀲𑀮𑀫𑀽𑀮𑁂𑀳𑀻𑀢𑀺 𑀓𑀼𑀲𑀮𑁂𑀳𑀺 𑀫𑀽𑀮𑁂𑀳𑀺. 𑀢𑁂𑀢𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸.

𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀓𑀼𑀲𑀮𑀫𑀽𑀮𑀸𑀦𑀺 𑀏𑀓𑀫𑀽𑀮𑀸𑀦𑀺 𑀘𑁂𑀯 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀘𑀸’’𑀢𑀺𑀆𑀤𑀺𑀧𑀸𑀴𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸𑀢𑀺 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀢𑀫𑁆𑀧𑀻𑀢𑀺 ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺𑀆𑀤𑀺 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺. 𑀢𑀣𑀸𑀢𑀺 𑀢𑁂𑀦 𑀧𑀓𑀸𑀭𑁂𑀦, 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀓𑀸𑀭𑀡𑁂𑀦 ‘‘𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀯𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸𑀬𑀁 𑀯𑀺𑀬 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀺𑀢𑁂𑀧𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀮𑀩𑁆𑀪𑀢𑀺, 𑀦 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀲𑀭𑀽𑀧𑀤𑀲𑁆𑀲𑀦𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀬𑁂 𑀳𑀺 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀦 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀯. 𑀬𑁂 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀯. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄 𑀪𑀯𑁂𑀬𑁆𑀬𑀸’’𑀢𑀺.

𑀢𑀢𑁆𑀣 ¶ 𑀬𑁂𑀦𑀸𑀢𑀺 𑀬𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀏𑀓𑀫𑀽𑀮𑀲𑁆𑀲 𑀅𑀪𑀸𑀯𑁂𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂. 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀢𑁆𑀢𑀸 𑀏𑀓𑀫𑀽𑀮𑀓𑀢𑁆𑀢𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀜𑁆𑀳𑀺 𑀏𑀓𑁂𑀓𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀢𑁆𑀢𑁂 𑀯𑀼𑀢𑁆𑀢𑁂 𑀢𑁂𑀲𑀁 𑀏𑀓𑁂𑀓𑁂𑀦 𑀏𑀓𑀫𑀽𑀮𑀓𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺 𑀲𑀫𑀸𑀦𑀢𑁆𑀣𑁄 𑀏𑀓𑀲𑀤𑁆𑀤𑁄𑀢𑀺 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀬𑀢𑁆𑀣 𑀧𑀦…𑀧𑁂… 𑀦 𑀏𑀓𑀫𑀽𑀮𑀸𑀦𑀻’’𑀢𑀺. 𑀢𑀬𑀺𑀤𑀁 𑀫𑀺𑀘𑁆𑀙𑀸, 𑀤𑁆𑀯𑀻𑀲𑀼𑀧𑀺 𑀏𑀓𑁂𑀓𑁂𑀦 𑀇𑀢𑀭𑀲𑁆𑀲 𑀏𑀓𑀫𑀽𑀮𑀓𑀢𑁆𑀢𑀁 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀕𑀳𑀡𑀲𑁆𑀲 𑀦𑀺𑀯𑀸𑀭𑀡𑀢𑁆𑀣’’𑀦𑁆𑀢𑀺𑀆𑀤𑀺. ‘‘𑀬𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁂𑀦 𑀇𑀥 ‘‘𑀆𑀫𑀦𑁆𑀢𑀸’’𑀢𑀺 𑀧𑀤𑁂𑀦 𑀬𑀢𑁆𑀣 𑀤𑁆𑀯𑁂 𑀫𑀽𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀏𑀓𑁂𑀓𑁂𑀦 𑀇𑀢𑀭𑀲𑁆𑀲 𑀏𑀓𑀫𑀽𑀮𑀓𑀢𑁆𑀢𑀁 𑀧𑀓𑀸𑀲𑀺𑀢𑀫𑁂𑀯𑀸𑀢𑀺 𑀆𑀳 ‘‘𑀆𑀫𑀦𑁆𑀢𑀸𑀢𑀺 𑀇𑀫𑀺𑀦𑀸𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀢𑀁𑀕𑀳𑀡𑀦𑀺𑀯𑀸𑀭𑀡𑀢𑁄’’𑀢𑀺 ¶ . 𑀦𑀺𑀘𑁆𑀙𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀢𑀺𑀡𑁆𑀡𑀦𑁆𑀦𑀁 𑀢𑀸𑀯 𑀫𑀽𑀮𑀸𑀦𑀁 𑀦𑀺𑀘𑁆𑀙𑀺𑀢𑀁 𑀳𑁄𑀢𑀼 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀓𑀢𑁆𑀢𑀁, 𑀤𑁆𑀯𑀺𑀦𑁆𑀦𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀁 𑀳𑀻’’𑀢𑀺𑀆𑀤𑀺. 𑀲𑀫𑀸𑀦𑀫𑀽𑀮𑀢𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀫𑀽𑀮𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀁 𑀲𑀫𑀸𑀦𑀫𑀽𑀮𑀢𑀸𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀬 𑀏𑀓𑀫𑀽𑀮𑀕𑁆𑀕𑀳𑀡𑀁, 𑀦 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀯𑀺𑀲𑀺𑀝𑁆𑀞𑀲𑀫𑀸𑀦𑀫𑀽𑀮𑀢𑀸𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑁆𑀯𑀺𑀦𑁆𑀦𑀁 𑀫𑀽𑀮𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀏𑀓𑀫𑀽𑀮𑀸𑀦𑀁 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁. 𑀬𑀣𑀸 𑀢𑁂𑀲𑀁 𑀲𑀫𑀸𑀦𑀫𑀽𑀮𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁𑀫𑀽𑀮𑁂𑀳𑀺 𑀅𑀜𑁆𑀜𑁂𑀳𑀻𑀢𑀺 𑀇𑀢𑀭𑀫𑀽𑀮𑁂𑀳𑀺 𑀫𑀽𑀮𑀤𑁆𑀯𑀬𑀢𑁄 𑀅𑀜𑁆𑀜𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀳𑀺.

𑀇𑀤𑀸𑀦𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀮𑁄𑀫𑁂 ‘‘𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀓𑀢𑀸, 𑀦 ‘‘𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀧𑀦…𑀧𑁂… 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀓𑀺𑀜𑁆𑀘𑀺 𑀏𑀓𑀫𑀽𑀮𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀦 𑀫𑀽𑀮𑁂𑀳𑀺 𑀅𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀢𑁂𑀦𑁂𑀯𑀸𑀢𑀺 𑀫𑀽𑀮𑀬𑀼𑀢𑁆𑀢𑀢𑀸𑀬 𑀏𑀯 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸 𑀏𑀓𑀫𑀽𑀮𑀸𑀢𑀺 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼. ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀼𑀲𑀮𑀫𑀽𑀮𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀬𑀤𑀺 𑀉𑀪𑀬𑀫𑁆𑀧𑀺 𑀯𑀘𑀦𑀁 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀅𑀣 𑀓𑀲𑁆𑀫𑀸 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀫𑁂𑀯 𑀏𑀓𑀫𑀽𑀮𑀕𑁆𑀕𑀳𑀡𑀁 𑀓𑀢𑀁, 𑀦 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀬𑀦𑁆𑀢𑀺 𑀉𑀪𑀬𑀢𑁆𑀣𑀸𑀧𑀺 𑀢𑀁 𑀕𑀳𑁂𑀢𑀩𑁆𑀩𑀁 𑀦 𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀫𑀽𑀮𑁂𑀓𑀫𑀽𑀮𑀬𑀫𑀓𑀤𑁂𑀲𑀦𑀸𑀳𑀺 𑀅𑀬𑀁 𑀅𑀜𑁆𑀜𑀫𑀜𑁆𑀜𑀬𑀫𑀓𑀤𑁂𑀲𑀦𑀸 𑀲𑀫𑀸𑀦𑀭𑀲𑀸 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀢𑀢𑁆𑀣 ¶ 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀜𑁆𑀜𑀫𑀜𑁆𑀜𑀬𑀫𑀓𑁂. 𑀬𑀤𑀺𑀧𑀺 𑀏𑀓𑀫𑀽𑀮𑀸 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀢𑀺 𑀇𑀤𑀁 𑀧𑀤𑀤𑁆𑀯𑀬𑀁 𑀯𑀼𑀢𑁆𑀢𑀦𑀬𑁂𑀦 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀢𑀣𑀸𑀧𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑁂 𑀅𑀢𑁆𑀣𑁂𑀯 𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀽𑀮𑀓𑀸𑀦𑀁 𑀲𑀫𑀸𑀦𑀫𑀽𑀮𑀢𑀸 𑀏𑀓𑀫𑀽𑀮𑀢𑁆𑀢𑀦𑁆𑀢𑀺 𑀏𑀓𑀫𑀽𑀮𑀯𑀘𑀦𑀁 𑀢𑁂𑀲𑀼 𑀅𑀯𑀺𑀲𑁂𑀲𑀢𑁄 𑀫𑀽𑀮𑀲𑀩𑁆𑀪𑀸𑀯𑀫𑀢𑁆𑀢𑀁 𑀯𑀤𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀲𑀤𑁆𑀤𑁄 𑀯𑀺𑀬 𑀫𑀽𑀮𑁂𑀲𑀼 𑀮𑀩𑁆𑀪𑀫𑀸𑀦𑀁 𑀯𑀺𑀲𑁂𑀲𑀁, 𑀦 𑀘 𑀲𑀸𑀫𑀜𑁆𑀜𑁂 𑀦𑀺𑀘𑁆𑀙𑀬𑁄 𑀯𑀺𑀲𑁂𑀲𑁂 𑀲𑀁𑀲𑀬𑀁 𑀯𑀺𑀥𑀫𑀢𑀻𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂…𑀧𑁂… 𑀧𑀯𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀯𑀺𑀲𑁂𑀲𑁂 𑀧𑀦 𑀦𑀺𑀘𑁆𑀙𑀬𑁄 𑀲𑀸𑀫𑀜𑁆𑀜𑁂 𑀲𑀁𑀲𑀬𑀁 𑀯𑀺𑀥𑀫𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀫𑀽𑀮𑀬𑁄𑀕𑀯𑀺𑀲𑁂𑀲𑁂 𑀧𑀦…𑀧𑁂… 𑀦𑀺𑀘𑁆𑀙𑀺𑀢𑀫𑁂𑀯 𑀳𑁄𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀢𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀭𑀸𑀫𑀲𑀦𑀁, 𑀯𑀺𑀲𑁂𑀲𑀦𑀺𑀘𑁆𑀙𑀬𑁂𑀦𑁂𑀯 𑀅𑀯𑀺𑀦𑀸𑀪𑀸𑀯𑀢𑁄, 𑀲𑀸𑀫𑀜𑁆𑀜𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸 𑀢𑀢𑁆𑀣 𑀯𑀸 𑀲𑀁𑀲𑀬𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀫𑀽𑀮𑀸𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸’’𑀢𑀺. 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑀲𑁆𑀲𑁂𑀯 ¶ 𑀤𑀻𑀧𑀓𑀁 𑀦 𑀳𑁄𑀢𑀺 𑀢𑀤𑀜𑁆𑀜𑀚𑀸𑀢𑀺𑀓𑀲𑁆𑀲𑀧𑀺 𑀤𑀻𑀧𑀦𑀢𑁄. 𑀢𑁂𑀦𑀸𑀳 ‘‘𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸’’𑀢𑀺. 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀦𑁆𑀢𑀺 𑀓𑁂𑀯𑀮𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑀸𑀥𑀺𑀓𑀸𑀭𑀲𑁆𑀲 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀓𑀼𑀲𑀮𑀕𑁆𑀕𑀳𑀡𑁂 𑀓𑀸𑀭𑀡𑀫𑀸𑀳. 𑀏𑀓𑀫𑀽𑀮𑀕𑁆𑀕𑀳𑀡𑁂 𑀳𑀺 𑀧𑀬𑁄𑀚𑀦𑀸𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀓𑀼𑀲𑀮𑀲𑁆𑀲 𑀯𑀲𑁂𑀦 𑀘𑀸𑀬𑀁 𑀤𑁂𑀲𑀦𑀸𑀢𑀺.

𑁫𑁩-𑁬𑁧. 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀅𑀢𑁆𑀣𑁂𑀢𑀺 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀓𑀼𑀲𑀮𑀸𑀤𑀺𑀥𑀫𑁆𑀫𑁂. 𑀓𑀼𑀲𑀮𑀸𑀤𑀬𑁄 𑀳𑀺 𑀲𑀪𑀸𑀯𑀥𑀫𑁆𑀫𑀸 𑀇𑀥 𑀧𑀸𑀴𑀺𑀅𑀢𑁆𑀣𑀢𑀸𑀬 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄. 𑀓𑀼𑀲𑀮𑀫𑀽𑀮𑀪𑀸𑀯𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁. 𑀓𑀼𑀲𑀮𑀫𑀽𑀮𑀪𑀽𑀢𑀸 𑀫𑀽𑀮𑀸 𑀓𑀼𑀲𑀮𑀫𑀽𑀮𑀫𑀽𑀮𑀸𑀢𑀺 𑀲𑀫𑀸𑀲𑀬𑁄𑀚𑀦𑀸. 𑀫𑀽𑀮𑀯𑀘𑀦𑀜𑁆𑀳𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀁. 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀧𑀺 𑀫𑀽𑀮𑀥𑀫𑁆𑀫𑀸 𑀅𑀢𑁆𑀣𑀻𑀢𑀺 𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀥𑀫𑁆𑀫𑀸 𑀯𑀺𑀲𑁂𑀲𑀺𑀢𑀸. 𑀫𑀽𑀮𑀕𑁆𑀕𑀳𑀡𑁂𑀦 𑀘 𑀫𑀽𑀮𑀯𑀦𑁆𑀢𑀸𑀦𑀁 𑀫𑀽𑀮𑀬𑁄𑀕𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀫𑀸𑀦𑁂𑀦 𑀫𑀽𑀮𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁 ‘‘𑀏𑀓𑀫𑀽𑀮𑀫𑀽𑀮𑀸’’𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑁂𑀦 𑀫𑀽𑀮𑀪𑀸𑀯𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸’’𑀢𑀺 𑀫𑀽𑀮𑀫𑀽𑀮𑀦𑀬𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀢𑀻𑀲𑀼𑀧𑀺 𑀬𑀫𑀓𑁂𑀲𑀼 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀦𑀫𑁂𑀯𑁂𑀢𑁆𑀣 𑀧𑀭𑀺𑀬𑀸𑀬𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑀁.

𑀫𑀽𑀮𑀬𑁄𑀕𑀁 ¶ 𑀤𑀻𑀧𑁂𑀢𑀼𑀦𑁆𑀢𑀺 𑀫𑀽𑀮𑀬𑁄𑀕𑀫𑁂𑀯 𑀧𑀥𑀸𑀦𑀁 𑀲𑀸𑀢𑀺𑀲𑀬𑀜𑁆𑀘 𑀓𑀢𑁆𑀯𑀸 𑀤𑀻𑀧𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀳𑀺 𑀓𑀼𑀲𑀮𑀸𑀦𑀺 𑀫𑀽𑀮𑀸𑀦𑀺 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀸𑀦𑀻𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁂 𑀫𑀽𑀮𑀬𑁄𑀕𑁄 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄 𑀳𑁄𑀢𑀺, 𑀦 𑀏𑀯𑀁 ‘‘𑀓𑀼𑀲𑀮𑀲𑀗𑁆𑀔𑀸𑀢𑀸 𑀫𑀽𑀮𑀸 𑀓𑀼𑀲𑀮𑀫𑀽𑀮𑀸’’𑀢𑀺 𑀓𑁂𑀯𑀮𑀁, ‘‘𑀓𑀼𑀲𑀮𑀫𑀽𑀮𑀫𑀽𑀮𑀸’’𑀢𑀺 𑀲𑀯𑀺𑀲𑁂𑀲𑀦𑀁 𑀯𑀸 𑀯𑀼𑀢𑁆𑀢𑁂 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀲𑀫𑀸𑀲𑁂. 𑀢𑁂𑀦𑀸𑀳 ‘‘𑀅𑀜𑁆𑀜𑀧𑀤𑀢𑁆𑀣…𑀧𑁂… 𑀤𑀻𑀧𑁂𑀢𑀼’’𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀯𑀸𑀢𑀺 ‘‘𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀫𑀽𑀮𑀦𑀬𑁂 𑀘, ‘‘𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀦𑁆𑀢𑁂𑀦 𑀓-𑀓𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀓𑀦𑀬𑁂 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀏𑀯. 𑀯𑀘𑀦𑀧𑀭𑀺𑀬𑀸𑀬𑁄 𑀫𑀽𑀮𑀫𑀽𑀮𑀓𑀦𑀬𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄.

𑁭𑁪-𑁮𑁫. 𑀦 𑀏𑀓𑀫𑀽𑀮𑀪𑀸𑀯𑀁 𑀮𑀪𑀫𑀸𑀦𑁂𑀳𑀻𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮𑀓𑀁 𑀢𑀣𑀸𑀯𑀢𑁆𑀢𑀩𑁆𑀩𑀢𑀁 𑀮𑀪𑀫𑀸𑀦𑁂𑀳𑀺 𑀅𑀝𑁆𑀞𑀸𑀭𑀲𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀏𑀓𑀢𑁄 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀬𑀣𑀸 𑀳𑀺 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀬𑁄 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑀺𑀢𑀸 𑀅𑀳𑁂𑀢𑀼𑀓𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀦 𑀏𑀯𑀁 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀢𑁂𑀦𑀸𑀳 ‘‘𑀅𑀳𑁂𑀢𑀼𑀓𑀯𑁄𑀳𑀸𑀭𑀭𑀳𑀺𑀢𑀁 𑀓𑀢𑁆𑀯𑀸’’𑀢𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼𑀓𑀫𑁂𑀯, 𑀅𑀳𑁂𑀢𑀼𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀭𑀽𑀧𑀁 𑀅𑀳𑁂𑀢𑀼𑀓𑀁, ‘‘𑀅𑀩𑁆𑀬𑀸𑀓𑀢𑁄 ¶ 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁩) 𑀧𑀦 𑀯𑀘𑀦𑀢𑁄 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑁂𑀦 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀅𑀳𑁂𑀢𑀼𑀓𑀯𑁄𑀳𑀸𑀭𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀲𑀳𑁂𑀢𑀼𑀓𑀯𑁄𑀳𑀸𑀭𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸 𑀅𑀜𑁆𑀜𑀣𑀸 ‘𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀫𑁂𑀯 𑀅𑀳𑁂𑀢𑀼𑀓𑀯𑁄𑀳𑀸𑀭𑀸𑀪𑀸𑀯𑁂𑀦 𑀲𑀳𑁂𑀢𑀼𑀓𑀢𑀸𑀧𑀭𑀺𑀬𑀸𑀬𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀅𑀧𑀺𑀘 𑀳𑁂𑀢𑀼𑀧𑀘𑁆𑀘𑀬𑀲𑀩𑁆𑀪𑀸𑀯𑀢𑁄 𑀢𑀲𑁆𑀲 𑀲𑀳𑁂𑀢𑀼𑀓𑀢𑀸𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀦 𑀯𑀸 𑀲𑀳𑁂𑀢𑀼𑀓𑀤𑀼𑀓𑁂 𑀯𑀺𑀬…𑀧𑁂… 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢’’𑀦𑁆𑀢𑀺. 𑀏𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀏𑀓𑀫𑀽𑀮𑀓𑀤𑀼𑀓𑁂. 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑀸𑀬𑁄𑀕𑀯𑀲𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀬𑁄𑀕𑀸𑀬𑁄𑀕𑀯𑀲𑁂𑀦, 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀲𑀩𑁆𑀪𑀸𑀯𑀸𑀲𑀩𑁆𑀪𑀸𑀯𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀳𑁂𑀢𑀼𑀓𑀯𑁄𑀳𑀸𑀭𑀫𑁂𑀯 𑀮𑀪𑀢𑀺 𑀧𑀘𑁆𑀘𑀬𑀪𑀽𑀢𑀳𑁂𑀢𑀼𑀲𑀩𑁆𑀪𑀸𑀯𑀢𑁄.

𑀅𑀧𑀭𑁂 ¶ 𑀧𑀦 𑀪𑀡𑀦𑁆𑀢𑀺 ‘‘𑀲𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀫𑁆𑀧𑀺 𑀲𑀫𑀽𑀮𑀓𑀢𑁆𑀢𑀸 ‘𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀲𑀢𑀺𑀧𑀺 𑀲𑀫𑀽𑀮𑀓𑀢𑁆𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀳𑁂𑀢𑀼𑀓𑀁 𑀦 𑀳𑁄𑀢𑀻𑀢𑀺 ‘𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮𑀁, 𑀲𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼 𑀅𑀦𑀯𑀭𑁄𑀥𑀢𑁄 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀲𑀳𑁂𑀢𑀼𑀓𑀅𑀩𑁆𑀬𑀸𑀓𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀁 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀢𑀲𑁆𑀲 𑀏𑀓𑀫𑀽𑀮𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁬-𑁯𑁭. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀭𑀸𑀲𑀺𑀢𑁄 𑀦𑀫𑀦𑀦𑀸𑀫𑀦𑀲𑀗𑁆𑀔𑀸𑀢𑁂𑀦 𑀯𑀺𑀲𑁂𑀲𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀕𑀳𑀡𑀁 𑀦𑀺𑀤𑁆𑀥𑀸𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀸𑀫𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸’’𑀢𑀺. 𑀢𑁂𑀦 𑀢𑁂𑀲𑀁 𑀅𑀥𑀺𑀓𑀪𑀸𑀯𑀫𑀸𑀳 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯 𑀧𑀓𑀭𑀡𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀁 𑀲𑀳𑁂𑀢𑀼𑀓𑀁 𑀦𑀸𑀫’’𑀦𑁆𑀢𑀺 𑀧𑀸𑀞𑀦𑁆𑀢𑀭𑁂 𑀓𑀲𑁆𑀫𑀸 𑀦𑀸𑀫𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀲𑀼𑀧𑀸𑀓𑀝𑀪𑀸𑀯𑀢𑁆𑀣’’𑀦𑁆𑀢𑀺, 𑀧𑀭𑀺𑀩𑁆𑀬𑀢𑁆𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀔𑀦𑁆𑀥𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨-𑁩. 𑀔𑀦𑁆𑀥𑀬𑀫𑀓𑁂 ¶ …𑀧𑁂… 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸𑀢𑀺 𑀇𑀤𑀁 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀤𑀲𑁆𑀲𑀦𑀁. 𑀅𑀪𑀺𑀜𑁆𑀜𑁂𑀬𑁆𑀬𑀓𑀣𑀸 𑀳𑀺 𑀅𑀪𑀺𑀥𑀫𑁆𑀫𑁄, 𑀲𑀸 𑀘 𑀬𑀸𑀯𑀤𑁂𑀯 𑀧𑀭𑀺𑀜𑁆𑀜𑀢𑁆𑀢𑀸𑀢𑀺 𑀧𑀭𑀺𑀜𑁆𑀜𑀸𑀲𑀼 𑀘 𑀦 𑀯𑀺𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀢𑀻𑀭𑀡𑀜𑁆𑀘 𑀲𑀫𑁆𑀧𑀼𑀡𑁆𑀡𑀧𑀭𑀸𑀦𑀼𑀕𑁆𑀕𑀳𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀓𑀸𑀮𑀧𑀼𑀕𑁆𑀕𑀮𑁄𑀓𑀸𑀲𑀯𑀺𑀪𑀸𑀕𑀫𑀼𑀔𑁂𑀦 𑀔𑀦𑁆𑀥𑀸𑀦𑀁 𑀯𑀺𑀲𑀼𑀁 𑀲𑀳 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀯𑀲𑁂𑀦 𑀲𑀸𑀢𑀺𑀲𑀬𑀁 𑀲𑀫𑁆𑀪𑀯𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀲𑀼 𑀓𑀸𑀮𑀪𑁂𑀤𑁂𑀲𑀼…𑀧𑁂… 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸’’𑀢𑀺 𑀧𑀥𑀸𑀦𑀁 𑀯𑀢𑁆𑀢𑀩𑁆𑀩𑀁 𑀉𑀤𑁆𑀥𑀭𑀢𑀺. 𑀢𑀢𑁆𑀣 𑀧𑀦 𑀬𑀣𑀸 𑀦 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀺𑀦𑀸 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀏𑀯𑀁 𑀢𑀻𑀭𑀡𑀧𑀭𑀺𑀜𑁆𑀜𑀸 𑀯𑀺𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀬. 𑀲𑀸 ¶ 𑀘 𑀲𑀼𑀢𑀫𑀬𑀜𑀸𑀡𑀫𑀽𑀮𑀺𑀓𑀸𑀢𑀺 𑀤𑁂𑀲𑀦𑀸𑀓𑀼𑀲𑀮𑁄 𑀲𑀢𑁆𑀣𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀫𑀼𑀤𑀸𑀬𑀸𑀯𑀬𑀯𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦 𑀔𑀦𑁆𑀥𑁂𑀲𑀼 𑀧𑀭𑀺𑀜𑁆𑀜𑀸𑀧𑁆𑀧𑀪𑁂𑀤𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀧𑀦 𑀔𑀦𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀳𑀺 𑀧𑀤𑁂𑀳𑀻𑀢𑀺 𑀧𑀜𑁆𑀘𑀳𑀺 𑀲𑀫𑀼𑀤𑀸𑀬𑀧𑀤𑁂𑀳𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀫𑀼𑀤𑀸𑀬𑀸𑀯𑀬𑀯𑀧𑀤𑁂𑀲𑀼. 𑀥𑀫𑁆𑀫𑁄𑀢𑀺 𑀭𑀼𑀧𑁆𑀧𑀦𑀸𑀤𑀺𑀓𑁄 𑀜𑁂𑀬𑁆𑀬𑀥𑀫𑁆𑀫𑁄. 𑀲𑀫𑀼𑀤𑀸𑀬𑀧𑀤𑀲𑁆𑀲𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀧𑀤𑀲𑁆𑀲. 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀧𑀭𑀫𑀢𑁆𑀣𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀦𑀢𑁆𑀣𑀺, 𑀬𑀣𑀸 𑀧𑀦 𑀅𑀯𑀬𑀯𑁄 𑀲𑀫𑀼𑀤𑀸𑀬𑁄 𑀦 𑀳𑁄𑀢𑀺, 𑀏𑀯𑀁 𑀦 𑀲𑀫𑀼𑀤𑀸𑀬𑁄𑀧𑀺 𑀅𑀯𑀬𑀯𑁄𑀢𑀺 𑀲𑀢𑀺𑀧𑀺 𑀲𑀫𑀼𑀤𑀸𑀬𑀸𑀯𑀬𑀯𑀸𑀦𑀁 𑀪𑁂𑀤𑁂 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄 𑀅𑀢𑁆𑀣𑁂𑀯𑀸𑀪𑁂𑀤𑁄𑀢𑀺 𑀧𑀤𑀤𑁆𑀯𑀬𑀲𑁆𑀲 𑀲𑀫𑀸𑀦𑀢𑁆𑀣𑀢𑀸𑀬 𑀲𑀺𑀬𑀸 𑀆𑀲𑀗𑁆𑀓𑀸𑀢𑀺 𑀆𑀳 ‘‘𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂’’𑀢𑀺. ‘‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀻𑀲𑀼 𑀏𑀓𑀤𑁂𑀲𑁄 𑀲𑀫𑀼𑀤𑀸𑀬𑀧𑀤𑀢𑁆𑀣𑁄 𑀯𑀼𑀢𑁆𑀢𑁄, ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨) 𑀧𑀦 𑀲𑀓𑀮𑁄𑀢𑀺 𑀆𑀳 ‘‘𑀭𑀽𑀧𑀸𑀤𑀺…𑀧𑁂… 𑀅𑀢𑁆𑀣𑁄’’𑀢𑀺. 𑀅𑀯𑀬𑀯𑀧𑀤𑀸𑀦𑀜𑁆𑀘𑁂𑀢𑁆𑀣 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀯𑀺𑀲𑀬𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀲𑀫𑀼𑀤𑀸𑀬𑀧𑀤𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀢𑀢𑁄 𑀏𑀯 𑀲𑀫𑀼𑀤𑀸𑀬𑀧𑀤𑀸𑀦𑀫𑁆𑀧𑀺 𑀅𑀯𑀬𑀯𑀧𑀤𑀢𑁆𑀣𑀢𑀸. 𑀦 𑀳𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀅𑀘𑁆𑀘𑀦𑁆𑀢𑀁 𑀪𑁂𑀤𑁄 𑀅𑀪𑁂𑀤𑁄 𑀯𑀸 𑀇𑀘𑁆𑀙𑀺𑀢𑁄, 𑀅𑀣 𑀔𑁄 𑀪𑁂𑀤𑀸𑀪𑁂𑀤𑁄, 𑀢𑀲𑁆𑀫𑀸 ¶ 𑀅𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄, 𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀤𑀼𑀢𑀺𑀬𑀦𑀬𑁄. 𑀬𑁄 𑀳𑀺 𑀭𑀼𑀧𑁆𑀧𑀦𑀸𑀤𑀺𑀲𑀗𑁆𑀔𑀸𑀢𑁄 𑀭𑀸𑀲𑀝𑁆𑀞𑁄 𑀅𑀯𑀬𑀯𑀧𑀤𑁂𑀳𑀺 𑀭𑀽𑀧𑀸𑀤𑀺𑀲𑀤𑁆𑀤𑁂𑀳𑀺 𑀘 𑀔𑀦𑁆𑀥𑀲𑀤𑁆𑀤𑁂𑀦 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁄, 𑀲𑁆𑀯𑀸𑀬𑀁 𑀅𑀢𑁆𑀣𑀢𑁄 𑀭𑀸𑀲𑀺𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑁄 𑀭𑀼𑀧𑁆𑀧𑀦𑀸𑀤𑀺𑀅𑀢𑁆𑀣𑁄 𑀏𑀯𑀸𑀢𑀺.

𑀬𑀣𑀸 𑀅𑀯𑀬𑀯𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀲𑀫𑀼𑀤𑀸𑀬𑀧𑀤𑀲𑁆𑀲 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀁 𑀲𑀫𑀼𑀤𑀸𑀬𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀅𑀯𑀬𑀯𑀧𑀤𑀲𑁆𑀲 𑀅𑀢𑁆𑀣𑁄𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀸 𑀓𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺…𑀧𑁂… 𑀧𑀤𑀲𑁄𑀥𑀦𑀯𑀸𑀭𑁄 𑀯𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀏𑀓𑀘𑁆𑀘𑀲𑁆𑀲 𑀅𑀯𑀬𑀯𑀧𑀤𑀲𑁆𑀲 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀺𑀬𑀸 𑀅𑀯𑀬𑀯𑀧𑀤𑀢𑁆𑀣𑀲𑁆𑀲 𑀲𑀫𑀼𑀤𑀸𑀬𑀧𑀤𑀢𑁆𑀣𑀢𑀸𑀬 𑀲𑀺𑀬𑀸 𑀅𑀦𑁂𑀓𑀦𑁆𑀢𑀺𑀓𑀢𑀸, 𑀲𑀫𑀼𑀤𑀸𑀬𑀧𑀤𑀲𑁆𑀲 𑀧𑀦 𑀢𑀁 𑀦𑀢𑁆𑀣𑀻𑀢𑀺 𑀲𑀫𑀼𑀤𑀸𑀬𑀧𑀤𑀢𑁆𑀣𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀢𑀸𑀬 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑁄 ¶ ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀧𑀸𑀴𑀺𑀬𑀸 𑀧𑀓𑀸𑀲𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀤𑀺…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺.

‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀔𑀦𑁆𑀥𑀢𑁆𑀣𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀥𑀸𑀦𑀪𑀽𑀢𑀲𑁆𑀲 𑀔𑀦𑁆𑀥𑀧𑀤𑀲𑁆𑀲𑀸’’𑀢𑀺. 𑀯𑁂𑀤𑀦𑀸𑀤𑀺𑀉𑀧𑀧𑀤𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼. 𑀭𑀽𑀧𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲𑀸𑀢𑀺 𑀭𑀽𑀧𑀲𑀗𑁆𑀔𑀸𑀢𑁂𑀦 𑀅𑀯𑀬𑀯𑀧𑀤𑁂𑀦 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀔𑀦𑁆𑀥𑀢𑁆𑀣𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑀓𑁆𑀔𑀦𑁆𑀥𑀧𑀤𑁂. 𑀧𑀥𑀸𑀦𑀪𑀽𑀢𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀭𑀼𑀧𑁆𑀧𑀦𑀝𑁆𑀞𑀲𑁆𑀲 𑀓𑀺𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀫𑀸𑀦𑁂 𑀅𑀯𑀬𑀯𑀧𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂 𑀅𑀧𑁆𑀧𑀥𑀸𑀦𑁂𑀦 𑀧𑀤𑁂𑀦 𑀬𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀲𑁄 𑀓𑀲𑁆𑀫𑀸 𑀧𑀥𑀸𑀦𑁂𑀦 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄𑀢𑀺 𑀭𑀸𑀲𑀝𑁆𑀞𑀫𑀸𑀳. 𑀢𑀢𑁆𑀣 𑀓𑁄𑀘𑀻𑀢𑀺 𑀭𑀼𑀧𑁆𑀧𑀦𑀝𑁆𑀞𑁄. 𑀓𑁂𑀦𑀘𑀺 𑀲𑀫𑀼𑀤𑀸𑀬𑀧𑀤𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀧𑀤𑁂𑀦, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦. 𑀢𑁂𑀦𑀸𑀳 ‘‘𑀦 𑀲𑀩𑁆𑀩𑁄 𑀲𑀩𑁆𑀩𑁂𑀦𑀸’’𑀢𑀺. 𑀏𑀲 𑀦𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀭𑀽𑀧𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑀧𑀤𑀲𑁄𑀥𑀦𑀫𑀼𑀔𑁂𑀦 𑀢𑀢𑁆𑀣 𑀘 𑀘𑀢𑀼𑀓𑁆𑀔𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀸 𑀧𑀸𑀴𑀺𑀕𑀢𑀺 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄. 𑀏𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦𑀸𑀢𑀺 𑀇𑀫𑀺𑀦𑀸 𑀬𑁆𑀯𑀸𑀬𑀁 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀧𑀤𑁂𑀳𑀺 𑀘 𑀤𑀲𑁆𑀲𑀺𑀢𑀸𑀓𑀸𑀭𑁄 𑀅𑀢𑁆𑀣𑀯𑀺𑀲𑁂𑀲𑁄, 𑀢𑀁 𑀧𑀘𑁆𑀘𑀸𑀫𑀲𑀢𑀺. 𑀯𑀺𑀲𑁂𑀲𑀦𑀪𑀸𑀯𑁄 𑀪𑁂𑀤𑀓𑀢𑀸𑀬 𑀲𑀸𑀫𑀜𑁆𑀜𑀢𑁄 𑀅𑀯𑀘𑁆𑀙𑁂𑀤𑀓𑀢𑁆𑀢𑀸, 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀅𑀪𑁂𑀤𑀬𑁄𑀕𑁂𑀦 𑀪𑁂𑀤𑀦𑁆𑀢𑀭𑀢𑁄 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸, 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀢𑁂𑀲𑀁 𑀪𑁂𑀤𑀸𑀪𑁂𑀤𑀸𑀦𑀁 𑀏𑀓𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸.

𑀢𑁂𑀦𑀸𑀢𑀺 ¶ 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑁂. 𑀢𑁂𑀦𑀸𑀢𑀺 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦. 𑀏𑀢𑁆𑀣𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀧𑀤𑁂. 𑀬𑀣𑀸 𑀦𑀻𑀮𑀼𑀧𑁆𑀧𑀮𑀧𑀤𑁂 𑀉𑀧𑁆𑀧𑀮𑀯𑀺𑀲𑁂𑀲𑀦𑀪𑀽𑀢𑀁 𑀦𑀻𑀮𑀁 𑀯𑀺𑀲𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀦 𑀬𑀁 𑀓𑀺𑀜𑁆𑀘𑀺, 𑀏𑀯𑀫𑀺𑀥𑀸𑀧𑀺 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀁 𑀭𑀽𑀧𑀫𑁆𑀧𑀺 𑀯𑀺𑀲𑀺𑀝𑁆𑀞𑀫𑁂𑀯 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀔𑀦𑁆𑀥𑀢𑁄…𑀧𑁂… 𑀳𑁄𑀢𑀻’’𑀢𑀺 𑀆𑀳. 𑀢𑀣𑀸 ‘‘𑀭𑀽𑀧𑀜𑁆𑀘 𑀢𑀁 𑀔𑀦𑁆𑀥𑁄 𑀘𑀸’’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦𑁂𑀯 𑀬𑀁 𑀭𑀽𑀧𑀁, 𑀲𑁄 𑀔𑀦𑁆𑀥𑁄. 𑀬𑁄 𑀔𑀦𑁆𑀥𑁄, 𑀢𑀁 𑀭𑀽𑀧𑀦𑁆𑀢𑀺 𑀅𑀬𑀫𑁆𑀧𑀺 𑀆𑀧𑀦𑁆𑀦𑁄 𑀏𑀯𑀸𑀢𑀺 𑀆𑀳 ‘‘𑀲𑀩𑁆𑀩𑁂𑀯…𑀧𑁂… 𑀯𑀺𑀲𑁂𑀲𑀺𑀢𑀩𑁆𑀩𑀸’’𑀢𑀺. 𑀯𑀺𑀲𑁂𑀲𑀦𑁂𑀦 𑀘 𑀦𑀸𑀫 𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀁 𑀅𑀯𑀘𑁆𑀙𑁂𑀤𑀓𑀢𑁆𑀢𑀸, 𑀦 𑀅𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑁂𑀦𑀸𑀢𑀺 𑀆𑀳 ‘‘𑀓𑀺𑀁 𑀧𑀦 𑀢’’𑀦𑁆𑀢𑀺𑀆𑀤𑀺, 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀦 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 ¶ 𑀳𑀺 𑀢𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁 𑀢𑀲𑁆𑀲𑁂𑀯𑀸𑀢𑀺 𑀬𑁄𑀚𑀦𑀸. 𑀦 𑀔𑀦𑁆𑀥𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀭𑀼𑀧𑁆𑀧𑀦𑀝𑁆𑀞𑁄 𑀭𑀽𑀧𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀳𑀺 𑀲𑁄 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀲𑁆𑀲 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑁂𑀦𑁂𑀯. ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀤𑀲𑁆𑀲𑁂𑀦𑁆𑀢𑁂𑀦𑀧𑁆𑀧𑀓’’𑀦𑁆𑀢𑀺 𑀘 𑀆𑀤𑀻𑀲𑀼 𑀅𑀢𑀤𑀢𑁆𑀣𑀲𑁆𑀲 𑀭𑀽𑀧𑀲𑀤𑁆𑀤𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀢𑁂𑀦 𑀭𑀽𑀧𑀲𑀤𑁆𑀤𑁂𑀦𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀼𑀘𑁆𑀘𑀫𑀸𑀦𑀁 𑀪𑀽𑀢𑀼𑀧𑀸𑀤𑀸𑀬𑀫𑁆𑀧𑀺 𑀪𑁂𑀤𑀁 𑀥𑀫𑁆𑀫𑀚𑀸𑀢𑀁. 𑀲𑀼𑀤𑁆𑀥𑁂𑀦𑀸𑀢𑀺 𑀓𑁂𑀯𑀮𑁂𑀦, 𑀭𑀽𑀧𑀲𑀤𑁆𑀤𑁂𑀦 𑀯𑀺𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀢𑀬𑀺𑀤𑀁 𑀧𑀓𑀭𑀡𑀸𑀤𑀺𑀅𑀯𑀘𑁆𑀙𑀺𑀦𑁆𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀯𑀸. 𑀬𑁄 𑀳𑀺 𑀭𑀽𑀧𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄 𑀔𑀦𑁆𑀥𑀲𑀤𑁆𑀤𑁄, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀭𑀽𑀧𑀲𑀤𑁆𑀤𑁂𑀦 𑀯𑀺𑀬 𑀢𑀤𑀢𑁆𑀣𑁄 𑀯𑀼𑀘𑁆𑀘𑀢𑁂𑀯. 𑀢𑁂𑀦𑀸𑀳 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀬𑀤𑀺𑀧𑀺 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀁 𑀔𑀦𑁆𑀥𑁄 𑀏𑀯 𑀘, 𑀔𑀦𑁆𑀥𑁄 𑀧𑀦 𑀦 𑀭𑀽𑀧𑀫𑁂𑀯𑀸𑀢𑀺 𑀆𑀳 ‘‘𑀦 𑀘 𑀲𑀩𑁆𑀩𑁂…𑀧𑁂… 𑀯𑀺𑀲𑁂𑀲𑀺𑀢𑀩𑁆𑀩𑀸’’𑀢𑀺. 𑀢𑁂𑀦𑁂𑀯𑀸𑀢𑀺 𑀅𑀭𑀽𑀧𑀲𑀪𑀸𑀯𑀲𑁆𑀲 𑀔𑀦𑁆𑀥𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦𑁂𑀯. 𑀢𑁂𑀢𑀺 𑀔𑀦𑁆𑀥𑀸. 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑁄 𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀅𑀯𑀲𑁂𑀲𑀸 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀩𑁆𑀩𑀸.

𑀔𑀦𑁆𑀥𑀸𑀦𑀁 𑀭𑀽𑀧𑀯𑀺𑀲𑁂𑀲𑀦…𑀧𑁂… 𑀲𑀁𑀲𑀬𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀺𑀁 𑀔𑀦𑁆𑀥𑀢𑁄 𑀅𑀜𑁆𑀜𑀸𑀧𑀺 𑀯𑁂𑀤𑀦𑀸 𑀅𑀢𑁆𑀣𑀺, 𑀬𑀢𑁄 𑀯𑀺𑀦𑀺𑀯𑀢𑁆𑀢𑀸 𑀯𑁂𑀤𑀦𑀸 𑀔𑀦𑁆𑀥𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀲𑀩𑁆𑀩𑁂 𑀘 𑀔𑀦𑁆𑀥𑀸 𑀓𑀺𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀸𑀬 𑀯𑁂𑀤𑀦𑀸𑀬 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀻𑀢𑀺 𑀅𑀦𑀼𑀪𑀯𑀦𑀸𑀤𑀺𑀧𑁆𑀧𑀓𑀸𑀭𑀸. 𑀓𑁂𑀦𑀘𑀺 𑀯𑀺𑀲𑁂𑀲𑀦𑁂𑀦𑀸𑀢𑀺 𑀯𑁂𑀤𑀦𑀸𑀤𑀺𑀦𑀸 𑀯𑀺𑀲𑁂𑀲𑀦𑁂𑀦.

𑀏𑀢𑁆𑀣 𑀘 𑀭𑀽𑀧𑀸𑀤𑀺𑀧𑀡𑁆𑀡𑀢𑁆𑀢𑀺 𑀔𑀦𑁆𑀥𑀧𑀡𑁆𑀡𑀢𑁆𑀢𑀺 𑀘 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀲𑀳 𑀘 𑀭𑀼𑀧𑁆𑀧𑀦𑀸𑀤𑀺𑀓𑁂 𑀅𑀢𑁆𑀣𑁂 𑀧𑀯𑀢𑁆𑀢𑀫𑀸𑀦𑀸 𑀓𑀤𑀸𑀘𑀺 𑀅𑀯𑀬𑀯𑀪𑀽𑀢𑁂 𑀧𑀯𑀢𑁆𑀢𑀢𑀺, 𑀓𑀤𑀸𑀘𑀺 𑀲𑀫𑀼𑀤𑀸𑀬𑀪𑀽𑀢𑁂, 𑀢𑀲𑁆𑀲𑀸 𑀧𑀦 𑀢𑀣𑀸 𑀧𑀯𑀢𑁆𑀢𑀦𑀸𑀓𑀸𑀭𑁂 𑀦𑀺𑀤𑁆𑀥𑀸𑀭𑀺𑀢𑁂 𑀬𑀲𑁆𑀫𑀸 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑀸 𑀧𑀤𑀢𑁄 𑀅𑀢𑁆𑀣𑀢𑁄 𑀘 ¶ 𑀯𑀺𑀲𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺 𑀢𑀩𑁆𑀩𑀺𑀲𑀬𑀓𑀗𑁆𑀔𑀸𑀧𑀦𑁄𑀤𑀦𑀢𑁄, 𑀢𑀲𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀞𑀫𑀯𑀸𑀭𑁂𑀦 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀅𑀯𑀬𑀯𑀢𑁆𑀣𑁄 𑀯𑀺𑀬 𑀲𑀫𑀼𑀤𑀸𑀬𑀢𑁆𑀣𑁄𑀧𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀲𑀫𑀼𑀤𑀸𑀬𑀧𑀤𑁂𑀳𑀺𑀧𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀦 𑀤𑀼𑀢𑀺𑀬𑀯𑀸𑀭𑁂𑀦 𑀯𑀺𑀲𑁂𑀲𑀯𑀸𑀘𑀻 𑀯𑀺𑀬 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀲𑀸𑀫𑀜𑁆𑀜𑀪𑀽𑀢𑁂𑀦𑀧𑀺 𑀢𑀁𑀢𑀁𑀯𑀺𑀲𑀺𑀝𑁆𑀞𑁂𑀦 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀲𑁄 ¶ 𑀲𑁄 𑀏𑀯 𑀲𑀫𑀼𑀤𑀸𑀬𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀦 𑀲𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀪𑀸𑀯𑀸 𑀬𑀤𑀺𑀧𑀺 𑀔𑀦𑁆𑀥𑁄𑀬𑁂𑀯 𑀭𑀽𑀧𑀁, 𑀲𑁄 𑀧𑀦 𑀦 𑀲𑀩𑁆𑀩𑁄 𑀭𑀽𑀧𑀁, 𑀅𑀣 𑀔𑁄 𑀢𑀤𑁂𑀓𑀤𑁂𑀲𑁄, 𑀢𑀣𑀸 𑀯𑁂𑀤𑀦𑀸𑀤𑀬𑁄𑀧𑀻𑀢𑀺 𑀅𑀬𑀫𑀢𑁆𑀣𑁄 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀢𑀢𑀺𑀬𑀯𑀸𑀭𑁂𑀦 𑀤𑀲𑁆𑀲𑀺𑀢𑁄. ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀦 𑀘𑀢𑀼𑀢𑁆𑀣𑀯𑀸𑀭𑁂𑀦 ‘‘𑀭𑀽𑀧𑀁 𑀔𑀦𑁆𑀥𑁄’’𑀢𑀺 𑀭𑀽𑀧𑀲𑁆𑀲 𑀔𑀦𑁆𑀥𑀪𑀸𑀯𑁂 𑀦𑀺𑀘𑁆𑀙𑀺𑀢𑁂 𑀔𑀦𑁆𑀥𑁄 𑀦𑀸𑀫𑀸𑀬𑀁 𑀦 𑀓𑁂𑀯𑀮𑀁 𑀭𑀽𑀧𑀫𑁂𑀯, 𑀅𑀣 𑀔𑁄 𑀯𑁂𑀤𑀦𑀸𑀤𑀺 𑀘𑀸𑀢𑀺 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀔𑀦𑁆𑀥𑀪𑀸𑀯𑀧𑁆𑀧𑀓𑀸𑀲𑀦𑁂 𑀦 𑀲𑀩𑁆𑀩𑁂 𑀔𑀦𑁆𑀥𑀸 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄, 𑀓𑁂𑀘𑀺𑀤𑁂𑀯 𑀧𑀦 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀏𑀯𑀁 𑀤𑀲𑁆𑀲𑁂𑀦𑁆𑀢𑀻 𑀘𑁂𑀲𑀸 𑀧𑀸𑀴𑀺 𑀔𑀦𑁆𑀥𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀼𑀔𑁂𑀦 𑀲𑀭𑀽𑀧𑀸𑀯𑀥𑀸𑀭𑀡𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀜𑁆𑀘 𑀢𑁂𑀲𑀁 𑀬𑀸𑀯𑀤𑁂𑀯 𑀉𑀧𑁆𑀧𑀸𑀤𑀸𑀤𑀺𑀦𑀺𑀘𑁆𑀙𑀬𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀬𑁂𑀲𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳.

𑀏𑀓𑀤𑁂𑀲𑁂𑀧𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺 𑀬𑀣𑀸 𑀧𑀝𑁄 𑀤𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀘𑀓𑁆𑀓𑀸𑀯𑀬𑀯𑀪𑀸𑀯𑀢𑁄 𑀘𑀓𑁆𑀓𑀸𑀦𑀻𑀢𑀺 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀫𑀓𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸, 𑀬𑀫𑀓𑀫𑀽𑀮𑀪𑀸𑀯𑁂𑀦𑁂𑀯 𑀯𑀸. 𑀫𑀽𑀮𑀪𑀸𑀯𑁂𑀦 𑀕𑀳𑀡𑀁 𑀲𑀫𑁆𑀩𑀦𑁆𑀥𑀪𑀸𑀯𑁄, 𑀢𑀁𑀲𑀫𑁆𑀩𑀦𑁆𑀥𑀢𑀸 𑀘 𑀫𑀽𑀮𑀧𑀤𑀸𑀤𑀻𑀦𑀁 𑀦𑀸𑀪𑀺𑀆𑀤𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀧𑀼𑀩𑁆𑀩𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀬𑀺𑀥 𑀤𑁂𑀲𑀦𑀸 𑀫𑀡𑁆𑀟𑀮𑀪𑀸𑀯𑁂𑀦𑁂𑀯 𑀲𑀫𑁆𑀩𑀚𑁆𑀛𑀢𑀻𑀢𑀺 𑀆𑀳 ‘‘𑀦 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀦𑀢𑁄’’𑀢𑀺. 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑁂𑀲𑀼 𑀧𑀦 𑀲𑀜𑁆𑀜𑀸𑀤𑀺𑀫𑀼𑀔𑁂𑀦 𑀤𑁂𑀲𑀦𑀧𑁆𑀧𑀯𑀢𑁆𑀢𑀺𑀬𑀁 𑀅𑀧𑀼𑀩𑁆𑀩𑀯𑀲𑁂𑀦𑁂𑀯 𑀕𑀢𑁄 𑀲𑀺𑀬𑀸 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄, 𑀦 𑀢𑀣𑀸 𑀧𑀸𑀞𑁄 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥…𑀧𑁂… 𑀲𑀫𑁆𑀩𑀦𑁆𑀥𑁂𑀦𑀸’’𑀢𑀺. 𑀧𑀘𑁆𑀙𑀺𑀫𑀲𑁆𑀲 𑀧𑀼𑀭𑀺𑀫𑁂𑀦 𑀅𑀲𑀫𑁆𑀩𑀚𑁆𑀛𑀦𑀫𑁂𑀯 𑀳𑀺 𑀳𑁂𑀝𑁆𑀞𑀺𑀫𑀲𑁄𑀥𑀦𑀁. 𑀲𑀼𑀤𑁆𑀥𑀓𑁆𑀔𑀦𑁆𑀥𑀮𑀸𑀪𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸𑀢𑀺 ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀔𑀦𑁆𑀥𑀸𑀢𑀺 𑀔𑀦𑁆𑀥𑀲𑀤𑁆𑀤𑁂𑀦 𑀮𑀩𑁆𑀪𑀫𑀸𑀦𑀁 𑀭𑀽𑀧𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀔𑀦𑁆𑀥𑀝𑁆𑀞𑀫𑀢𑁆𑀢𑀫𑁂𑀯 𑀉𑀤𑁆𑀤𑁂𑀲𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀬𑀤𑀺𑀧𑀺 𑀉𑀤𑁆𑀤𑁂𑀲𑁂 𑀔𑀦𑁆𑀥𑀯𑀺𑀲𑁂𑀲𑀦𑀁 𑀭𑀽𑀧𑀸𑀤𑀺 ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀫𑁂𑀯 𑀕𑀳𑀺𑀢𑀁, 𑀢𑀣𑀸𑀧𑀺 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀢𑀢𑁆𑀣 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀢𑀸𑀬 𑀅𑀝𑁆𑀞𑀢𑁆𑀯𑀸. 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑀲𑀗𑁆𑀔𑀸𑀢𑀦𑁆𑀢𑀺 𑀬𑀣𑀸𑀥𑀺𑀕𑀢𑀁 𑀔𑀦𑁆𑀥𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀓𑀣𑀺𑀢𑀁 𑀭𑀼𑀧𑁆𑀧𑀦𑀸𑀤𑀺𑀓𑀁 ¶ 𑀯𑀺𑀲𑁂𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁. 𑀓𑁂𑀯𑀮𑀫𑁂𑀯 𑀢𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀔𑀦𑁆𑀥𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑁆𑀯𑀸…𑀧𑁂… 𑀯𑀺𑀪𑀢𑁆𑀢𑀢𑁆𑀢𑀸 𑀲𑀼𑀤𑁆𑀥𑀓𑁆𑀔𑀦𑁆𑀥𑀯𑀸𑀭𑁄𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁬. 𑀏𑀯𑀁 ¶ 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀤𑁆𑀯𑀸𑀭𑀸𑀮𑀫𑁆𑀩𑀦𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀺𑀬𑀲𑀪𑀸𑀯𑀁 𑀧𑀺𑀬𑀚𑀸𑀢𑀺𑀓𑀁 ‘‘𑀓𑀣𑀁 𑀭𑀽𑀧𑁂𑀦 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀺𑀬𑀲𑀪𑀸𑀯𑀝𑁆𑀞𑁂𑀦 𑀭𑀽𑀧𑀁, 𑀦 𑀭𑀼𑀧𑁆𑀧𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀺𑀬𑀭𑀽𑀧𑀁…𑀧𑁂… 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀘𑀓𑁆𑀔𑀸𑀤𑀺 𑀧𑀺𑀬𑀲𑀪𑀸𑀯𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀧𑀺𑀬𑀭𑀽𑀧𑀫𑁂𑀯 𑀅𑀦𑀼𑀧𑁆𑀧𑀯𑀺𑀲𑀢𑀺, 𑀦 𑀭𑀽𑀧𑀓𑁆𑀔𑀦𑁆𑀥𑀦𑁆𑀢𑀺 𑀆𑀳 ‘‘𑀧𑀺𑀬𑀲𑀪𑀸𑀯…𑀧𑁂… 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺. ‘‘𑀬𑁄 𑀧𑀦 𑀬𑀢𑁆𑀣 𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑁄 𑀯𑀺𑀲𑁂𑀲𑀲𑀤𑁆𑀤𑁄 𑀦𑀸𑀦𑀼𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀘𑀦𑀲𑁂𑀲𑁄’’𑀢𑀺. 𑀦 𑀳𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀫𑀸𑀦𑀲𑁆𑀲 𑀅𑀚𑁆𑀛𑀸𑀳𑀭𑀡𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀤𑀺𑀝𑁆𑀞𑀺𑀲𑀜𑁆𑀜𑀸𑀢𑀺 𑀯𑀸 𑀧𑀤𑀼𑀤𑁆𑀥𑀸𑀭𑁄𑀬𑀁 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁂𑀲𑀢𑀸 𑀧𑀦𑀲𑁆𑀲𑀸 ‘‘𑀯𑀺𑀲𑁂𑀲𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀸𑀬 𑀏𑀯 𑀧𑀸𑀓𑀝𑀸. ‘‘𑀅𑀯𑀲𑁂𑀲𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀁𑀬𑁄𑀚𑀦𑀯𑀲𑁂𑀦 𑀚𑀸𑀦𑀸𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀲𑀜𑁆𑀜𑀸 𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀺 𑀏𑀯 𑀲𑀜𑁆𑀜𑀸’’𑀢𑀺. 𑀤𑀺𑀝𑁆𑀞𑀺 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀅𑀯𑀲𑀺𑀝𑁆𑀞𑀁 𑀧𑀧𑀜𑁆𑀘𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸’’𑀢𑀺 𑀏𑀢𑁆𑀣 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁦𑁧) 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀦𑀸𑀫𑁂𑀦 𑀯𑀸 𑀧𑀧𑀜𑁆𑀘𑀸 𑀏𑀯 𑀯𑀼𑀢𑁆𑀢𑀸’’𑀢𑀺.

𑁨𑁮. ‘‘𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀦𑀼𑀮𑁄𑀫𑁂 𑀬𑀣𑀸 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀮𑀩𑁆𑀪𑀢𑀺, 𑀦 𑀏𑀯𑀁 ‘‘𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺 𑀧𑀝𑀺𑀮𑁄𑀫𑁂, 𑀇𑀥 𑀧𑀦 𑀧𑀝𑀺𑀯𑀘𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀪𑀸𑀯𑁄’’𑀢𑀺 𑀆𑀳. 𑀢𑁂𑀦 𑀲𑀢𑁆𑀢𑀸𑀧𑀝𑀺𑀲𑁂𑀥𑁂 𑀅𑀬𑀁 𑀦-𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀤𑁆𑀤𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀤𑁆𑀤𑀦𑀺𑀩𑀦𑁆𑀥𑀦𑀢𑁆𑀢𑀸 ¶ 𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀤𑀲𑀪𑀸𑀕𑀢𑀁 𑀯𑀸 𑀲𑀦𑁆𑀥𑀸𑀬 𑀓𑀢𑀁. 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀜𑁆𑀳𑁂𑀢𑀁. 𑀢𑁂𑀦𑀸𑀳 ‘‘𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀻’’𑀢𑀺. 𑀢𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀯𑀼𑀢𑁆𑀢𑀁 ‘‘𑀦 𑀅𑀜𑁆𑀜𑀥𑀫𑁆𑀫𑀲𑀩𑁆𑀪𑀸𑀯𑁄 𑀏𑀯𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀞𑀦𑁆𑀢𑀭𑁂𑀦 𑀲𑀫𑀢𑁆𑀣𑁂𑀢𑀺. 𑀓𑀸𑀫𑀁 𑀓𑀢𑁆𑀣𑀘𑀺 𑀲𑀢𑀺𑀧𑀺 𑀔𑀦𑁆𑀥𑁂 𑀦𑀢𑁆𑀣𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀅𑀔𑀦𑁆𑀥𑀢𑁆𑀢𑀲𑀪𑀸𑀯𑀸 𑀧𑀦 𑀦𑀢𑁆𑀣𑀺 𑀯𑁂𑀤𑀦𑀸𑀢𑀺 ‘‘𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸’’𑀢𑀺𑀆𑀤𑀺.

𑁩𑁯. ‘‘𑀭𑀽𑀧𑀢𑁄 𑀅𑀜𑁆𑀜𑁂’’𑀢𑀺 𑀏𑀢𑁆𑀣 𑀪𑀽𑀢𑀼𑀧𑀸𑀤𑀸𑀬 𑀥𑀫𑁆𑀫𑁄 𑀯𑀺𑀬 𑀧𑀺𑀬𑀲𑀪𑀸𑀯𑁄𑀧𑀺 𑀭𑀽𑀧𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀸 𑀯𑁂𑀤𑀦𑀸𑀤𑀬𑁄 ¶ 𑀤𑀝𑁆𑀞𑀩𑁆𑀩𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀔𑀦𑁆𑀥𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂 𑀭𑀽𑀧𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀪𑀸𑀯𑁄𑀢𑀺 𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀢𑁆𑀢𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀢𑀣𑀸 𑀘𑀸𑀳 ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀘𑀓𑁆𑀔𑀼𑀢𑁄 𑀅𑀜𑁆𑀜𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀲𑀪𑀸𑀯𑀥𑀫𑁆𑀫𑀲𑁆𑀲 𑀆𑀬𑀢𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀓𑁂𑀯𑀮𑀁 𑀧𑀜𑁆𑀜𑀢𑁆𑀢𑀺𑀲𑁄𑀥𑀦𑀢𑁆𑀣𑀁 𑀢𑀫𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀜𑁆𑀘 𑀆𑀬𑀢𑀦𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀘𑀓𑁆𑀔𑀼 𑀦 𑀘 𑀆𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀢𑀤𑀢𑁆𑀣𑀫𑁂𑀯 𑀉𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀜𑁆𑀘 𑀔𑀦𑁆𑀥𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀭𑀽𑀧𑀁 𑀦 𑀘 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀯𑀺𑀲𑀫𑁄𑀧𑀜𑁆𑀜𑀸𑀲𑁄. ‘‘𑀘𑀓𑁆𑀔𑀼𑀜𑁆𑀘 𑀆𑀬𑀢𑀦𑁂 𑀘 𑀞𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀳𑀺 𑀅𑀯𑀲𑁂𑀲𑀕𑁆𑀕𑀳𑀡𑁂𑀦 𑀕𑀬𑁆𑀳𑀫𑀸𑀦𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀆𑀬𑀢𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀸. 𑀢𑁂𑀦𑀸𑀳 ‘‘𑀬𑀤𑀺 𑀲𑀺𑀬𑀸’’𑀢𑀺. ‘‘𑀭𑀽𑀧𑀜𑁆𑀘 𑀔𑀦𑁆𑀥𑁂 𑀘 𑀞𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀦 𑀦 𑀢𑀣𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀬𑀤𑀺 𑀧𑀦 𑀢𑀸𑀤𑀺𑀲𑀁 𑀔𑀦𑁆𑀥𑀕𑀢𑀁 𑀥𑀫𑁆𑀫𑀚𑀸𑀢𑀁 𑀦𑀢𑁆𑀣𑀻𑀢𑀺 𑀏𑀯𑀫𑀺𑀤𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁 𑀲𑀺𑀬𑀸. 𑀢𑀣𑀸 𑀳𑀺 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀫𑁂𑀯 𑀉𑀤𑁆𑀥𑀭𑀻𑀬𑀢𑀺. 𑀢𑀡𑁆𑀳𑀸𑀯𑀢𑁆𑀣𑀼 𑀘 𑀦 𑀲𑀺𑀬𑀸 𑀅𑀯𑀲𑁂𑀲𑀕𑁆𑀕𑀳𑀡𑁂𑀦 𑀕𑀬𑁆𑀳𑀫𑀸𑀦𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀔𑀦𑁆𑀥𑁄 𑀘 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁫𑁦-𑁨𑁦𑁫. 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 ¶ 𑀬𑀫𑀓𑁂𑀲𑀼 𑀧𑀤𑀸𑀦𑀁 𑀪𑀺𑀦𑁆𑀦𑀓𑀸𑀮𑀢𑁆𑀢𑀸 𑀲𑀺𑀬𑀸 𑀅𑀢𑁆𑀣𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀯𑀸𑀭𑁂𑀲𑀼 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄’’𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 ‘‘𑀧𑀼𑀭𑀺𑀫𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑁂𑀦𑀸𑀢𑀺 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀯𑀢𑁆𑀢𑀺𑀯𑀸𑀭𑀧𑀸𑀞𑁂, 𑀏𑀢𑀺𑀲𑁆𑀲𑀁 𑀯𑀸 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸𑀬𑀁. 𑀙 𑀏𑀯 𑀯𑀼𑀢𑁆𑀢𑀸, 𑀦 𑀦𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀢𑀻𑀢𑁂𑀦𑀸’’𑀢𑀺𑀆𑀤𑀺. 𑀏𑀢𑁂 𑀧𑀦 𑀢𑀬𑁄𑀢𑀺 𑀅𑀢𑁆𑀢𑀦𑀸 𑀯𑀺𑀲𑀼𑀁 𑀅𑀦𑀦𑁆𑀢𑀭𑀁 𑀤𑀲𑁆𑀲𑀺𑀢𑁂 𑀲𑀦𑁆𑀥𑀸𑀬𑀸𑀳. 𑀬𑀣𑀸𑀤𑀲𑁆𑀲𑀺𑀢𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀩𑁆𑀩𑀸𑀓𑀸𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀢𑀻𑀢𑀸𑀤𑀬𑁄 𑀬𑁂 𑀧𑀸𑀴𑀺𑀬𑀁 𑀉𑀚𑀼𑀓𑀫𑁂𑀯 𑀆𑀕𑀢𑀸. ‘‘𑀦 𑀯𑀺𑀲𑀼𑀁 𑀯𑀺𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀢𑀢𑁆𑀣 𑀢𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀳𑀻𑀢𑀺 ‘‘𑀬𑀲𑁆𑀲 𑀯𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 ¶ 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀸𑀳𑀺 𑀧𑀞𑀫𑀧𑀤𑁂 𑀯𑀼𑀢𑁆𑀢𑀲𑁆𑀲 𑀧𑀝𑀺𑀮𑁄𑀫𑀯𑀲𑁂𑀦 𑀧𑀯𑀢𑁆𑀢𑀸𑀳𑀺. 𑀢𑁂𑀦𑁂𑀯𑀸𑀢𑀺 𑀦𑀬𑀢𑁄 𑀬𑁄𑀚𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀏𑀯. 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀘𑀸𑀢𑀺 𑀦 𑀓𑁂𑀯𑀮𑀁 𑀅𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼𑀬𑁂𑀯, 𑀅𑀣 𑀔𑁄 𑀫𑀺𑀲𑁆𑀲𑀓𑀓𑀸𑀮𑀪𑁂𑀤𑁂𑀲𑀼 𑀘𑀸𑀢𑀺 𑀅𑀢𑁆𑀣𑁄. 𑀦 𑀬𑁄𑀚𑀦𑀸𑀲𑀼𑀓𑀭𑀢𑀸𑀬 𑀏𑀯 𑀧𑀼𑀭𑀺𑀫𑁂 𑀅𑀬𑁄𑀚𑀦𑀸, 𑀅𑀣 𑀔𑁄 𑀲𑀼𑀔𑀕𑁆𑀕𑀳𑀡𑀢𑁆𑀣𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀫𑀺𑀲𑁆𑀲𑀓…𑀧𑁂… 𑀯𑀼𑀢𑁆𑀢𑀸𑀦𑀻’’𑀢𑀺.

𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑁂𑀦 𑀏𑀓𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀲𑁆𑀲 𑀦𑀺𑀭𑁄𑀥𑀲𑁆𑀲 𑀮𑀸𑀪𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀬𑀣𑀸𑀓𑁆𑀓𑀫𑀁 𑀧𑀼𑀭𑁂𑀧𑀜𑁆𑀳𑁄 𑀧𑀘𑁆𑀙𑀸𑀧𑀜𑁆𑀳𑁄𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀁. 𑀘-𑀲𑀤𑁆𑀤𑁂𑀦 𑀧𑀼𑀭𑁂𑀧𑀘𑁆𑀙𑀸𑀧𑀜𑁆𑀳𑁄𑀢𑀺 𑀘 𑀦𑀸𑀫𑀁 𑀯𑀼𑀢𑁆𑀢𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀦 ‘‘𑀏𑀓𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀸𑀦’’𑀦𑁆𑀢𑀺 𑀇𑀤𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀫𑁂𑀯𑀢𑁆𑀣𑀫𑁆𑀧𑀺 𑀯𑀺𑀯𑀭𑀢𑀺 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀜𑁆𑀳𑀲𑁆𑀲. ‘‘𑀧𑀜𑁆𑀳𑁄’’𑀢𑀺 𑀘𑁂𑀢𑁆𑀣 𑀧𑀼𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀁 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀧𑀭𑀺𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁆𑀣𑀲𑀗𑁆𑀕𑀡𑁆𑀳𑀦𑀢𑁄’’𑀢𑀺. 𑀢𑀁 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀢𑀁𑀯𑀺𑀲𑁆𑀲𑀚𑁆𑀚𑀦𑀁, 𑀢𑀁 𑀯𑀸 𑀬𑀣𑀸𑀯𑀼𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀢𑀲𑁆𑀲𑀸𑀢𑀺 𑀢𑀁𑀯𑀺𑀲𑁆𑀲𑀚𑁆𑀚𑀦𑁄, 𑀢𑀲𑁆𑀲 𑀢𑀁𑀯𑀺𑀲𑁆𑀲𑀚𑁆𑀚𑀦𑀲𑁆𑀲. 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀧𑀼𑀭𑀺𑀫𑁂𑀦 𑀉𑀤𑁆𑀤𑁂𑀲𑀧𑀤𑁂𑀦. 𑀢𑁂𑀦 𑀳𑀺 𑀯𑀺𑀲𑁆𑀲𑀚𑁆𑀚𑀦𑀧𑀤𑀲𑁆𑀲 𑀲𑀫𑀸𑀦𑀢𑁆𑀣𑀢𑀸 𑀇𑀥 𑀲𑀤𑀺𑀲𑀢𑁆𑀣𑀢𑀸. 𑀏𑀓𑁂𑀦 𑀧𑀤𑁂𑀦𑀸𑀢𑀺 𑀏𑀓𑁂𑀦 𑀧𑀥𑀸𑀦𑀸𑀧𑁆𑀧𑀥𑀸𑀦𑁂𑀦 𑀬𑀫𑀓𑀧𑀤𑁂𑀦, 𑀦 𑀧𑀞𑀫𑀧𑀤𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀦𑀺𑀭𑁄𑀥𑀮𑀸𑀪𑀲𑀸𑀫𑀜𑁆𑀜𑀫𑀢𑁆𑀢𑁂𑀦𑀸𑀢𑀺 𑀉𑀧𑁆𑀧𑀸𑀤𑀲𑁆𑀲 𑀯𑀸 𑀦𑀺𑀭𑁄𑀥𑀲𑁆𑀲 𑀯𑀸 𑀮𑀩𑁆𑀪𑀫𑀸𑀦𑀢𑀸𑀬 𑀲𑀫𑀸𑀦𑀢𑀸𑀫𑀢𑁆𑀢𑁂𑀦. 𑀲𑀦𑁆𑀦𑀺𑀝𑁆𑀞𑀸𑀦𑀧𑀤…𑀧𑁂… 𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀭𑁂𑀧𑀜𑁆𑀳𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺𑀧𑀺 𑀢𑀢𑁆𑀣 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁, 𑀬𑁄 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑁄 ¶ 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀅𑀦𑀼𑀧𑁆𑀧𑀸𑀤𑁄 𑀧𑀸𑀴𑀺𑀬𑀁 𑀅𑀦𑀼𑀜𑁆𑀜𑀸𑀢𑀭𑀽𑀧𑁂𑀦 𑀞𑀺𑀢𑁄, 𑀢𑀲𑁆𑀲 𑀯𑀲𑁂𑀦 𑀧𑀼𑀭𑁂𑀧𑀜𑁆𑀳𑁄 𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂𑀦 𑀲𑀤𑀺𑀲𑀢𑁆𑀣𑀢𑀸 𑀳𑁄𑀢𑀺.

‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀏𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑀸𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀇𑀢𑀭𑀲𑁆𑀲 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀧𑀝𑀺𑀓𑁆𑀔𑁂𑀧𑁄 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀽𑀢𑀺 𑀆𑀳 ‘‘𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀧𑀦𑀁 𑀧𑀝𑀺𑀓𑁆𑀔𑁂𑀧𑁄’’𑀢𑀺 ¶ . ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀧𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑀮𑀓𑁆𑀔𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀧𑀼𑀘𑁆𑀙𑀻𑀬𑀢𑀻𑀢𑀺 𑀲𑁄 𑀏𑀯 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑀻𑀬𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀽𑀢𑀺 𑀯𑀼𑀢𑁆𑀢𑀁 ‘‘𑀲𑀁𑀲𑀬𑀢𑁆𑀣𑀦𑀺𑀯𑀸𑀭𑀡𑀁 𑀧𑀝𑀺𑀲𑁂𑀥𑁄’’𑀢𑀺. ‘‘𑀦-𑀓𑀸𑀭𑀯𑀺𑀭𑀳𑀺𑀢’’𑀦𑁆𑀢𑀺 𑀏𑀢𑁂𑀦 𑀧𑀝𑀺𑀲𑁂𑀥𑀲𑁆𑀲 𑀧𑀝𑀺𑀲𑁂𑀥𑀺𑀢𑀫𑀸𑀳. 𑀬𑀤𑀺 𑀏𑀯𑀁 𑀧𑀸𑀴𑀺𑀕𑀢𑀺𑀧𑀝𑀺𑀲𑁂𑀥𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀢𑀢𑁆𑀣 𑀉𑀧𑁆𑀧𑀢𑁆𑀢𑀻’’𑀢𑀺𑀆𑀤𑀺.

𑀢𑀤𑁂𑀓𑀤𑁂𑀲𑀧𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀜𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀏𑀓𑀤𑁂𑀲𑀲𑁆𑀲 𑀧𑀓𑁆𑀔𑀺𑀧𑀦𑀯𑀲𑁂𑀦. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀞𑀫𑁂 𑀞𑀸𑀦𑁂 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀲𑁆𑀲 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀲𑀭𑀽𑀧𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺. 𑀬𑁄 𑀧𑀦𑁂𑀢𑁆𑀣 𑀧𑀜𑁆𑀳𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘 𑀲𑀢𑁆𑀢𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀓𑁆𑀔𑁂𑀧𑀁 𑀮𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑁄 𑀏𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀸𑀤𑀺𑀢𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀘𑁆𑀙𑀸𑀯𑀺𑀪𑀗𑁆𑀕𑁄 𑀯𑀺𑀲𑁆𑀲𑀚𑁆𑀚𑀦𑀸𑀞𑀸𑀦𑀸𑀦𑀺 𑀏𑀓𑀲𑁆𑀫𑀺𑀁 𑀧𑀜𑁆𑀳𑁂 𑀬𑁄𑀚𑀦𑀸𑀦𑀬𑁄𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀲𑀼𑀤𑁆𑀥𑀸𑀯𑀸𑀲𑀸𑀦𑀦𑁆𑀢𑀺𑀆𑀤𑀺 𑀧𑀸𑀴𑀺𑀬𑀸 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀇𑀫𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺 ‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀢𑁂𑀲𑀁 𑀢𑀢𑁆𑀣𑀸’’𑀢𑀺. 𑀢𑀢𑁆𑀣 𑀏𑀓𑀪𑀽𑀫𑀺𑀬𑀁 𑀤𑀼𑀢𑀺𑀬𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀏𑀓𑀺𑀲𑁆𑀲𑀸 𑀪𑀽𑀫𑀺𑀬𑀸 𑀏𑀓𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀤𑀼𑀢𑀺𑀬𑀯𑀸𑀭𑀁 𑀧𑀝𑀺𑀲𑀦𑁆𑀥𑀺𑀕𑁆𑀕�