📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑁧.

𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜𑀁 ¶ ¶ ¶ , 𑀢𑀣𑀸𑀕𑀢𑀫𑀦𑀼𑀢𑁆𑀢𑀭𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀸𑀥𑀼𑀕𑀡𑀫𑁆𑀧𑀺 𑀘.

𑁨.

𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀸𑀬, 𑀲𑀺𑀮𑀸𑀬𑀸𑀢𑀼𑀮𑀯𑀺𑀓𑁆𑀓𑀫𑁄;

𑀦𑀺𑀲𑀺𑀦𑁆𑀦𑁄 𑀤𑁂𑀯𑀭𑀸𑀚𑀲𑁆𑀲, 𑀯𑀺𑀫𑀮𑁂 𑀲𑀻𑀢𑀮𑁂 𑀢𑀮𑁂.

𑁩.

𑀬𑀁 𑀤𑁂𑀯𑀤𑁂𑀯𑁄 𑀤𑁂𑀯𑀸𑀦𑀁, 𑀤𑁂𑀯𑀤𑁂𑀯𑁂𑀳𑀺 𑀧𑀽𑀚𑀺𑀢𑁄;

𑀤𑁂𑀲𑁂𑀲𑀺 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀥𑀫𑁆𑀫𑀁 𑀤𑁂𑀯𑀧𑀼𑀭𑀓𑁆𑀔𑀢𑁄.

𑁪.

𑀢𑀢𑁆𑀣𑀸𑀳𑀁 ¶ 𑀧𑀸𑀝𑀯𑀢𑁆𑀣𑀸𑀬, 𑀪𑀺𑀓𑁆𑀔𑀽𑀦𑀁 𑀧𑀺𑀝𑀓𑀼𑀢𑁆𑀢𑀫𑁂;

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀦𑁆𑀢𑀼, 𑀫𑀥𑀼𑀭𑀁 𑀫𑀢𑀺𑀯𑀟𑁆𑀠𑀦𑀁.

𑁫.

𑀢𑀸𑀴𑀁 𑀫𑁄𑀳𑀓𑀯𑀸𑀝𑀲𑁆𑀲, 𑀯𑀺𑀖𑀸𑀝𑀦𑀫𑀦𑀼𑀢𑁆𑀢𑀭𑀁;

𑀪𑀺𑀓𑁆𑀔𑀽𑀦𑀁 𑀧𑀯𑀺𑀲𑀦𑁆𑀢𑀸𑀦𑀁, 𑀅𑀪𑀺𑀥𑀫𑁆𑀫𑀫𑀳𑀸𑀧𑀼𑀭𑀁.

𑁬.

𑀲𑀼𑀤𑀼𑀢𑁆𑀢𑀭𑀁 𑀢𑀭𑀦𑁆𑀢𑀸𑀦𑀁, 𑀅𑀪𑀺𑀥𑀫𑁆𑀫𑀫𑀳𑁄𑀤𑀥𑀺𑀁;

𑀲𑀼𑀤𑀼𑀢𑁆𑀢𑀭𑀁 𑀢𑀭𑀦𑁆𑀢𑀸𑀦𑀁, 𑀢𑀭𑀁𑀯 𑀫𑀓𑀭𑀸𑀓𑀭𑀁.

𑁭.

𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁, 𑀳𑀢𑁆𑀣𑀲𑀸𑀭𑀫𑀦𑀼𑀢𑁆𑀢𑀭𑀁;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸.

𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁄

𑁮.

𑀘𑀺𑀢𑁆𑀢𑀁 ¶ 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑁄;

𑀘𑀢𑀼𑀥𑀸 𑀤𑁂𑀲𑀬𑀻 𑀥𑀫𑁆𑀫𑁂, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄.

𑀢𑀢𑁆𑀣 𑀘𑀺𑀢𑁆𑀢𑀦𑁆𑀢𑀺 𑀯𑀺𑀲𑀬𑀯𑀺𑀚𑀸𑀦𑀦𑀁 𑀘𑀺𑀢𑁆𑀢𑀁, 𑀢𑀲𑁆𑀲 𑀧𑀦 𑀓𑁄 𑀯𑀘𑀦𑀢𑁆𑀣𑁄? 𑀯𑀼𑀘𑁆𑀘𑀢𑁂 𑁋 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀅𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀘𑀺𑀦𑁄𑀢𑀻𑀢𑀺𑀧𑀺 𑀘𑀺𑀢𑁆𑀢𑀁.

𑁯.

𑀯𑀺𑀘𑀺𑀢𑁆𑀢𑀓𑀭𑀡𑀸 ¶ 𑀘𑀺𑀢𑁆𑀢𑀁, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀢𑀸𑀬 𑀯𑀸;

𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀯𑀺𑀜𑁆𑀜𑀸𑀡𑁂, 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀫𑁆𑀫𑀓𑁂;

𑀘𑀺𑀢𑁆𑀢𑀲𑀫𑁆𑀫𑀼𑀢𑀺 𑀤𑀝𑁆𑀞𑀩𑁆𑀩𑀸, 𑀯𑀺𑀜𑁆𑀜𑀸𑀡𑁂 𑀇𑀥 𑀯𑀺𑀜𑁆𑀜𑀼𑀦𑀸.

𑀢𑀁 𑀧𑀦 𑀲𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀁, 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀯𑀺𑀧𑀸𑀓𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢𑀁. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀸𑀢𑀺𑀪𑁂𑀤𑀢𑁄 𑀢𑀺𑀯𑀺𑀥𑀁.

𑀢𑀢𑁆𑀣 ¶ 𑀓𑀼𑀲𑀮𑀦𑁆𑀢𑀺 𑀧𑀦𑁂𑀢𑀲𑁆𑀲 𑀓𑁄 𑀯𑀘𑀦𑀢𑁆𑀣𑁄?

𑁧𑁦.

𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀢𑁄, 𑀓𑀼𑀲𑀸𑀦𑀁 𑀮𑀯𑀦𑁂𑀦 𑀯𑀸;

𑀓𑀼𑀲𑁂𑀦 𑀮𑀸𑀢𑀩𑁆𑀩𑀢𑁆𑀢𑀸 𑀯𑀸, 𑀓𑀼𑀲𑀮𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁧.

𑀙𑁂𑀓𑁂 𑀓𑀼𑀲𑀮𑀲𑀤𑁆𑀤𑁄𑀬𑀁, 𑀆𑀭𑁄𑀕𑁆𑀬𑁂 𑀅𑀦𑀯𑀚𑁆𑀚𑀓𑁂;

𑀤𑀺𑀝𑁆𑀞𑁄 𑀇𑀝𑁆𑀞𑀯𑀺𑀧𑀸𑀓𑁂𑀧𑀺, 𑀅𑀦𑀯𑀚𑁆𑀚𑀸𑀤𑀺𑀓𑁂 𑀇𑀥.

𑀢𑀲𑁆𑀫𑀸 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀯𑀚𑁆𑀚𑀮𑀓𑁆𑀔𑀡𑀁 𑀯𑀸 𑀓𑀼𑀲𑀮𑀁, 𑀯𑁄𑀤𑀸𑀦𑀪𑀸𑀯𑀭𑀲𑀁, 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀫𑀓𑀼𑀲𑀮𑀁. 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀫𑀩𑁆𑀬𑀸𑀓𑀢𑀁, 𑀅𑀯𑀺𑀧𑀸𑀓𑀸𑀭𑀳𑀁 𑀯𑀸.

𑀢𑀢𑁆𑀣 ¶ 𑀓𑀼𑀲𑀮𑀘𑀺𑀢𑁆𑀢𑀁 𑀏𑀓𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺, 𑀢𑀤𑀺𑀤𑀁 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺 𑁋 𑀓𑀸𑀫𑀸𑀯𑀘𑀭𑀁, 𑀭𑀽𑀧𑀸𑀯𑀘𑀭𑀁, 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀪𑀽𑀫𑀺𑀢𑁄 𑀏𑀓𑀯𑀺𑀥𑀁, 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀤𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫.

𑁧𑁨.

𑀉𑀤𑁆𑀤𑀸𑀦𑀢𑁄 𑀤𑀼𑀯𑁂 𑀓𑀸𑀫𑀸, 𑀓𑁆𑀮𑁂𑀲𑀯𑀢𑁆𑀣𑀼𑀯𑀲𑀸 𑀧𑀦;

𑀓𑀺𑀮𑁂𑀲𑁄 𑀙𑀦𑁆𑀤𑀭𑀸𑀕𑁄𑀯, 𑀯𑀢𑁆𑀣𑀼 𑀢𑁂𑀪𑀽𑀫𑀯𑀝𑁆𑀝𑀓𑀁.

𑁧𑁩.

𑀓𑀺𑀮𑁂𑀲𑀓𑀸𑀫𑁄 ¶ 𑀓𑀸𑀫𑁂𑀢𑀺, 𑀯𑀢𑁆𑀣𑀼 𑀓𑀸𑀫𑀻𑀬𑀢𑀻𑀢𑀺 𑀘;

𑀲𑀺𑀚𑁆𑀛𑀢𑀺 𑀤𑀼𑀯𑀺𑀥𑁄𑀧𑁂𑀲, 𑀓𑀸𑀫𑁄 𑀯𑁄 𑀓𑀸𑀭𑀓𑀤𑁆𑀯𑀬𑁂.

𑁧𑁪.

𑀬𑀲𑁆𑀫𑀺𑀁 ¶ 𑀧𑀦 𑀧𑀤𑁂𑀲𑁂 𑀲𑁄, 𑀓𑀸𑀫𑁄𑀬𑀁 𑀤𑀼𑀯𑀺𑀥𑁄𑀧𑀺 𑀘;

𑀲𑀫𑁆𑀧𑀢𑁆𑀢𑀻𑀦𑀁 𑀯𑀲𑁂𑀦𑀸𑀯-𑀘𑀭𑀢𑀻𑀢𑀺 𑀘 𑀲𑁄 𑀧𑀦.

𑁧𑁫.

𑀧𑀤𑁂𑀲𑁄 𑀘𑀢𑀼𑀧𑀸𑀬𑀸𑀦𑀁, 𑀙𑀦𑁆𑀦𑀁 𑀤𑁂𑀯𑀸𑀦𑀫𑁂𑀯 𑀘;

𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦𑁂𑀯, 𑀏𑀓𑀸𑀤𑀲𑀯𑀺𑀥𑁄 𑀧𑀦.

𑁧𑁬.

𑀓𑀸𑀫𑁄𑀯𑀘𑀭𑀢𑀻𑀢𑁂𑀢𑁆𑀣, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄;

𑀅𑀲𑁆𑀲𑀸𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀳𑀺, 𑀲𑀲𑀢𑁆𑀣𑀸𑀯𑀘𑀭𑁄 𑀯𑀺𑀬.

𑁧𑁭.

𑀲𑁆𑀯𑀸𑀬𑀁 𑀭𑀽𑀧𑀪𑀯𑁄 𑀭𑀽𑀧𑀁, 𑀏𑀯𑀁 𑀓𑀸𑀫𑁄𑀢𑀺 𑀲𑀜𑁆𑀜𑀺𑀢𑁄;

𑀉𑀢𑁆𑀢𑀭𑀲𑁆𑀲 𑀧𑀤𑀲𑁆𑀲𑁂𑀯, 𑀮𑁄𑀧𑀁 𑀓𑀢𑁆𑀯𑀸 𑀉𑀤𑀻𑀭𑀺𑀢𑁄.

𑁧𑁮.

𑀢𑀲𑁆𑀫𑀺𑀁 ¶ 𑀓𑀸𑀫𑁂 𑀇𑀤𑀁 𑀘𑀺𑀢𑁆𑀢𑀁, 𑀲𑀤𑀸𑀯𑀘𑀭𑀢𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀫𑀺𑀘𑁆𑀘𑁂𑀯𑀁, 𑀓𑀣𑀺𑀢𑀁 𑀓𑀸𑀫𑀖𑀸𑀢𑀺𑀦𑀸.

𑁧𑁯.

𑀧𑀝𑀺𑀲𑀦𑁆𑀥𑀺𑀁 𑀪𑀯𑁂 𑀓𑀸𑀫𑁂, 𑀅𑀯𑀘𑀸𑀭𑀬𑀢𑀻𑀢𑀺 𑀯𑀸;

𑀓𑀸𑀫𑀸𑀯𑀘𑀭𑀫𑀺𑀘𑁆𑀘𑁂𑀯𑀁, 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀢𑀢𑁆𑀭 𑀯𑀸.

𑁨𑁦.

𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼-𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺.

𑁨𑁧.

𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀧𑀢𑁆𑀢𑀺𑀤𑀸𑀦𑀁,

𑀯𑁂𑀬𑁆𑀬𑀸𑀯𑀘𑁆𑀘𑀁 𑀤𑁂𑀲𑀦𑀸 𑀘𑀸𑀦𑀼𑀫𑁄𑀤𑁄;

𑀤𑀺𑀝𑁆𑀞𑀺𑀚𑁆𑀚𑀼𑀢𑁆𑀢𑀁 𑀲𑀁𑀲𑀼𑀢𑀺𑀘𑁆𑀘𑀸𑀧𑀘𑀸𑀬𑁄,

𑀜𑁂𑀬𑁆𑀬𑁄 𑀏𑀯𑀁 𑀧𑀼𑀜𑁆𑀜𑀯𑀢𑁆𑀣𑀼𑀧𑁆𑀧𑀪𑁂𑀤𑁄.

𑁨𑁨.

𑀕𑀘𑁆𑀙𑀦𑁆𑀢𑀺 𑀲𑀗𑁆𑀕𑀳𑀁 𑀤𑀸𑀦𑁂, 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸;

𑀢𑀣𑀸 𑀲𑀻𑀮𑀫𑀬𑁂 𑀧𑀼𑀜𑁆𑀜𑁂, 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸.

𑁨𑁩.

𑀤𑁂𑀲𑀦𑀸 𑀲𑀯𑀦𑀁 𑀤𑀺𑀝𑁆𑀞𑀺-𑀉𑀚𑀼𑀓𑀸 𑀪𑀸𑀯𑀦𑀸𑀫𑀬𑁂;

𑀧𑀼𑀦 𑀢𑀻𑀡𑁂𑀯 𑀲𑀫𑁆𑀪𑁄𑀦𑁆𑀢𑀺, 𑀤𑀲 𑀧𑀼𑀜𑁆𑀜𑀓𑁆𑀭𑀺𑀬𑀸𑀧𑀺 𑀘.

𑁨𑁪.

𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀜𑁆𑀘, 𑀧𑀲𑀁𑀲𑀸 𑀲𑀭𑀡𑀢𑁆𑀢𑀬𑀁;

𑀬𑀦𑁆𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑁆𑀫𑀺𑀁, 𑀲𑀗𑁆𑀕𑀳𑀁 𑀦𑀢𑁆𑀣𑀺 𑀲𑀁𑀲𑀬𑁄.

𑁨𑁫.

𑀧𑀼𑀭𑀺𑀫𑀸 ¶ 𑀫𑀼𑀜𑁆𑀘𑀦𑀸 𑀘𑁂𑀯, 𑀧𑀭𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸;

𑀳𑁄𑀢𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁, 𑀏𑀯𑀁 𑀲𑁂𑀲𑁂𑀲𑀼 𑀤𑀻𑀧𑀬𑁂.

𑀇𑀤𑀸𑀦𑀺 𑀅𑀲𑁆𑀲 𑀧𑀦𑀝𑁆𑀞𑀯𑀺𑀥𑀲𑁆𑀲𑀸𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 𑀬𑁄 𑀤𑁂𑀬𑁆𑀬𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁, 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀁 𑀆𑀕𑀫𑁆𑀫 𑀳𑀝𑁆𑀞𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 ¶ 𑀅𑀲𑀗𑁆𑀔𑀸𑀭𑀺𑀓𑀁 ¶ 𑀧𑀞𑀫𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀝𑁆𑀞𑀧𑀳𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀫𑁂𑀯 𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀗𑁆𑀔𑀸𑀭𑁄𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀧𑀯𑀢𑁆𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲𑀸𑀥𑀺𑀯𑀘𑀦𑀁. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑁂𑀲𑀁 𑀢𑀢𑀺𑀬𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀢𑁂 ‘‘𑀤𑁂𑀣 𑀯𑀦𑁆𑀤𑀣, 𑀅𑀬𑁆𑀬𑁂’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀜𑀸𑀢𑀺𑀚𑀦𑁂𑀦 𑀉𑀲𑁆𑀲𑀸𑀳𑀺𑀢𑀸 𑀳𑀼𑀢𑁆𑀯𑀸 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑁂𑀲𑀁 𑀘𑀢𑀼𑀢𑁆𑀣𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀁 𑀅𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁬.

𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀸𑀤𑀻𑀦𑀁, 𑀯𑀲𑁂𑀦 𑀘 𑀩𑀳𑀽𑀦𑀺𑀧𑀺;

𑀏𑀢𑀸𑀦𑀺 𑀧𑀦 𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑁨𑁭.

𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺, 𑀤𑁆𑀯𑁂 𑀲𑀢𑀸𑀦𑀺 𑀅𑀲𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑀢𑀁 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺.

𑀇𑀢𑀭𑁂𑀲𑀼 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀲𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑁆𑀧𑀳𑀻𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 ¶ 𑀧𑀞𑀫𑀁, 𑀯𑀺𑀢𑀓𑁆𑀓𑀯𑀺𑀧𑁆𑀧𑀳𑀻𑀦𑀁 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 ¶ 𑀤𑀼𑀢𑀺𑀬𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀧𑁆𑀧𑀳𑀻𑀦𑀁 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀯𑀺𑀧𑁆𑀧𑀳𑀻𑀦𑀁 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀯𑀺𑀧𑁆𑀧𑀳𑀻𑀦𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀤𑀁 𑀧𑀜𑁆𑀘𑀯𑀺𑀥𑀁 ¶ 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫.

𑀢𑀁 𑀧𑀦 𑀬𑀣𑀸𑀲𑀫𑁆𑀪𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀁 𑀧𑀦𑁂𑀢𑀁 𑀭𑀽𑀧𑀸𑀯𑀘𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀬𑀣𑀸𑀦𑀼𑀭𑀽𑀧𑀁 𑀭𑀽𑀧𑀸𑀯𑀘𑀭𑀽𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺. 𑀏𑀯𑀁 𑀢𑀸𑀯 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀲𑁂𑀲𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀢𑀸𑀯 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑀪𑁂𑀤𑀢𑁄 𑀏𑀓𑀯𑀺𑀥𑀁, 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀅𑀧𑀕𑀫𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀤𑀫𑀲𑁆𑀲 𑀘𑀢𑀼𑀩𑁆𑀩𑀺𑀥𑀫𑀸𑀭𑀫𑁆𑀫𑀡𑀁. 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀏𑀢𑀲𑁆𑀲𑀸𑀭𑀫𑁆𑀫𑀡𑀲𑁆𑀲 𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫. 𑀲𑀩𑁆𑀩𑀁 𑀧𑀦𑁂𑀢𑀁 𑀅𑀭𑀽𑀧𑀸𑀯𑀘𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀭𑀽𑀧𑀽𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺. 𑀏𑀯𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀭𑀁 𑀧𑀦 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀁, 𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀧𑀢𑁆𑀢𑀩𑁆𑀩𑀢𑁄 𑀢𑀺𑀯𑀺𑀥𑀁, 𑀘𑀢𑀼𑀫𑀕𑁆𑀕𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 ¶ . 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀜𑁆𑀜𑁄𑀚𑀦𑀧𑁆𑀧𑀳𑀸𑀦𑀓𑀭𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀓𑀭𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀓𑀭𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀧𑀳𑀸𑀦𑀓𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫. 𑀏𑀓𑁂𑀓𑀁 𑀧𑀦𑁂𑀢𑁆𑀣 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀁 𑀧𑀦𑁂𑀢𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀫𑀕𑁆𑀕𑀸𑀦𑀼𑀭𑀽𑀧𑀨𑀮𑀧𑁆𑀧𑀯𑀢𑁆𑀢𑀺𑀬𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀧𑀼𑀕𑁆𑀕𑀮𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁮.

𑀓𑀸𑀫𑁂 ¶ ¶ 𑀅𑀝𑁆𑀞𑁂𑀯 𑀭𑀽𑀧𑁂 𑀘, 𑀧𑀜𑁆𑀘 𑀘𑀢𑁆𑀢𑀸𑀭𑀺𑀭𑀽𑀧𑀺𑀲𑀼;

𑀘𑀢𑁆𑀢𑀸𑀭𑀸𑀦𑀼𑀢𑁆𑀢𑀭𑀸𑀦𑁂𑀯𑀁, 𑀓𑀼𑀲𑀮𑀸𑀦𑁂𑀓𑀯𑀻𑀲𑀢𑀺.

𑁨𑁯.

𑀓𑀼𑀲𑀮𑀸𑀓𑀼𑀲𑀮𑀸𑀧𑀕𑀢𑁂𑀦 𑀲𑀢𑀸,

𑀓𑀼𑀲𑀮𑁂 𑀓𑀼𑀲𑀮𑁂𑀦 𑀘 𑀬𑀁 𑀓𑀼𑀲𑀮𑀁;

𑀘𑀢𑀼𑀪𑀽𑀫𑀺𑀕𑀢𑀁 𑀫𑀼𑀦𑀺𑀦𑀸 𑀯𑀲𑀺𑀦𑀸,

𑀮𑀧𑀺𑀢𑀁 𑀮𑀧𑀺𑀢𑀁 𑀲𑀓𑀮𑀫𑁆𑀧𑀺 𑀫𑀬𑀸.

𑀅𑀓𑀼𑀲𑀮𑀁 𑀧𑀦 𑀪𑀽𑀫𑀺𑀢𑁄 𑀏𑀓𑀯𑀺𑀥𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀯𑀲𑁂𑀦 𑀘 𑀏𑀓𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀯𑀲𑁂𑀦 𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀚𑀦𑀓𑀯𑀲𑁂𑀦 𑀘 𑀤𑀼𑀯𑀺𑀥𑀁, 𑀢𑀻𑀳𑀺 𑀯𑁂𑀤𑀦𑀸𑀳𑀺 𑀬𑁄𑀕𑀢𑁄 𑀘 𑀮𑁄𑀪𑀫𑀽𑀮𑀁 𑀤𑁄𑀲𑀫𑀽𑀮𑀁 𑀫𑁄𑀳𑀫𑀽𑀮𑀦𑁆𑀢𑀺 𑀫𑀽𑀮𑀢𑁄 𑀘 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀮𑁄𑀪𑀫𑀽𑀮𑀁 𑀧𑀦 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺.

𑀬𑀤𑀸 ¶ 𑀳𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸𑀲𑁆𑀲 𑀧𑀞𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀤𑀼𑀢𑀺𑀬𑀁. 𑀬𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀲𑁆𑀲 𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀢𑀢𑀺𑀬𑀁. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀮𑁄𑀪𑀫𑀽𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀤𑁄𑀲𑀫𑀽𑀮𑀁 𑀧𑀦 𑀏𑀓𑀦𑁆𑀢𑀲𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀪𑁂𑀤𑀢𑁄 𑀤𑀼𑀯𑀺𑀥𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀦𑁆𑀢𑀺. 𑀅𑀲𑁆𑀲 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑁄𑀳𑀫𑀽𑀮𑀫𑁆𑀧𑀺 ¶ ¶ 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀬𑁄𑀕𑀢𑁄 𑀤𑀼𑀯𑀺𑀥𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺. 𑀢𑀲𑁆𑀲 𑀅𑀲𑀦𑁆𑀦𑀺𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑀓𑀸𑀮𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀏𑀯𑀁 𑀢𑀸𑀯 𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀩𑁆𑀩𑀁 𑀧𑀦𑁂𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀧𑀸𑀬𑁂𑀲𑀼 𑀉𑀧𑀧𑀢𑁆𑀢𑀺𑀬𑀸, 𑀲𑀼𑀕𑀢𑀺𑀬𑀫𑁆𑀧𑀺 𑀤𑀼𑀓𑁆𑀔𑀯𑀺𑀲𑁂𑀲𑀲𑁆𑀲 𑀅𑀪𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺.

𑁩𑁦.

𑀮𑁄𑀪𑀫𑀽𑀮𑀯𑀲𑁂𑀦𑀝𑁆𑀞, 𑀤𑁄𑀲𑀫𑀽𑀮𑀯𑀲𑀸 𑀤𑀼𑀯𑁂;

𑀫𑁄𑀳𑀫𑀽𑀮𑀯𑀲𑁂𑀦 𑀤𑁆𑀯𑁂, 𑀏𑀯𑀁 𑀤𑁆𑀯𑀸𑀤𑀲𑀥𑀸 𑀲𑀺𑀬𑀼𑀁.

𑁩𑁧.

𑀧𑀸𑀧𑀸𑀧𑀸𑀧𑁂𑀲𑁆𑀯𑀧𑀸𑀧𑁂𑀦 ¶ , 𑀬𑀁 𑀯𑀼𑀢𑁆𑀢𑀁 𑀧𑀸𑀧𑀫𑀸𑀦𑀲𑀁;

𑀧𑀸𑀧𑀸𑀧𑀸𑀧𑀧𑁆𑀧𑀳𑀻𑀦𑁂𑀦, 𑀢𑀁 𑀫𑀬𑀸 𑀲𑀫𑀼𑀤𑀸𑀳𑀝𑀁.

𑀇𑀢𑀭𑀁 𑀧𑀦 𑀅𑀩𑁆𑀬𑀸𑀓𑀢𑀫𑀯𑀺𑀧𑀸𑀓𑀸𑀭𑀳𑀢𑁄 𑀏𑀓𑀯𑀺𑀥𑀁 𑀳𑁄𑀢𑀺, 𑀚𑀸𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀯𑀺𑀧𑀸𑀓𑀘𑀺𑀢𑁆𑀢𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑁆𑀢𑀺. 𑀓𑀼𑀲𑀮𑀯𑀺𑀧𑀸𑀓𑀁 𑀤𑀼𑀯𑀺𑀥𑀁 𑀲𑀳𑁂𑀢𑀼𑀓𑀫𑀳𑁂𑀢𑀼𑀓𑀜𑁆𑀘𑁂𑀢𑀺.

𑀢𑀢𑁆𑀣 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀲𑀓𑀓𑀼𑀲𑀮𑀁 𑀯𑀺𑀬 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀦𑁆𑀢𑀺 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀲𑀳𑁂𑀢𑀼𑀓𑀯𑀺𑀧𑀸𑀓𑀁 𑀦𑀸𑀫.

𑀬𑀣𑀸 𑀧𑀦𑀲𑁆𑀲 𑀓𑀼𑀲𑀮𑀁 𑀤𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀇𑀤𑀁 𑀢𑀣𑀸. 𑀇𑀤𑀁 𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀲𑀼𑀬𑁂𑀯 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑁂 𑀅𑀲𑀢𑀺𑀧𑀺 𑀆𑀤𑀸𑀲𑀢𑀮𑀸𑀤𑀻𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀧𑀸𑀓𑀁, 𑀫𑀼𑀔𑀁 𑀯𑀺𑀬 𑀲𑀉𑀲𑁆𑀲𑀸𑀳𑀁 𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀁 𑀧𑀦 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀦𑀺 𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀸𑀦𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀺.

𑁩𑁨.

𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 ¶ , 𑀫𑀦𑀼𑀲𑁆𑀲𑀸𑀦𑀁 𑀇𑀫𑁂 𑀧𑀦;

𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀽𑀦𑀁, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁩𑁩.

𑀢𑀢𑁄 𑀧𑀯𑀢𑁆𑀢𑀺𑀬𑀁 𑀳𑀼𑀢𑁆𑀯𑀸, 𑀪𑀯𑀗𑁆𑀕𑀁 𑀬𑀸𑀯𑀢𑀸𑀬𑀼𑀓𑀁;

𑀩𑀮𑀯𑀸𑀭𑀫𑁆𑀫𑀡𑁂 𑀳𑀼𑀢𑁆𑀯𑀸, 𑀢𑀤𑀸𑀭𑀫𑁆𑀫𑀡𑀫𑁂𑀯 𑀘.

𑁩𑁪.

𑀢𑀢𑁄 ¶ ¶ 𑀫𑀭𑀡𑀓𑀸𑀮𑀲𑁆𑀫𑀺𑀁, 𑀘𑀼𑀢𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀭𑁂;

𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼, 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑁂.

𑁩𑁫.

𑀲𑀪𑀽𑀫𑀺𑀓𑀼𑀲𑀮𑁂𑀳𑁂𑀯, 𑀫𑀳𑀸𑀧𑀸𑀓𑀸 𑀲𑀫𑀸 𑀯𑀺𑀦𑀸;

𑀓𑀫𑁆𑀫𑀤𑁆𑀯𑀸𑀭𑀜𑁆𑀘 𑀓𑀫𑁆𑀫𑀜𑁆𑀘, 𑀧𑀼𑀜𑁆𑀜𑀸𑀦𑀁 𑀓𑁆𑀭𑀺𑀬𑀯𑀢𑁆𑀣𑀼𑀓𑀁.

𑁩𑁬.

𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀢𑁆𑀢𑀸 𑀳𑀺, 𑀅𑀯𑀺𑀧𑀸𑀓𑀲𑀪𑀸𑀯𑀢𑁄;

𑀅𑀧𑁆𑀧𑀯𑀢𑁆𑀢𑀦𑀢𑁄 𑀘𑁂𑀯, 𑀧𑀸𑀓𑀸 𑀧𑀼𑀜𑁆𑀜𑁂𑀳𑀺 𑀦𑁄 𑀲𑀫𑀸.

𑁩𑁭.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀢𑁂𑀲𑀫𑁂𑀓𑀦𑁆𑀢𑀢𑁄 𑀧𑀦;

𑀓𑀭𑀼𑀡𑀸𑀫𑀼𑀤𑀺𑀢𑀸 𑀢𑁂𑀲𑀼, 𑀦 𑀚𑀸𑀬𑀦𑁆𑀢𑀺 𑀓𑀤𑀸𑀘𑀺𑀧𑀺.

𑁩𑁮.

𑀢𑀣𑀸 𑀯𑀺𑀭𑀢𑀺𑀬𑁄 𑀢𑀺𑀲𑁆𑀲𑁄, 𑀦 𑀧𑀦𑁂𑀢𑁂𑀲𑀼 𑀚𑀸𑀬𑀭𑁂;

𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀯𑀼𑀢𑁆𑀢𑀸, 𑀓𑀼𑀲𑀮𑀸𑀢𑀺 𑀳𑀺 𑀲𑀢𑁆𑀣𑀼𑀦𑀸.

𑁩𑁯.

𑀢𑀣𑀸𑀥𑀺𑀧𑀢𑀺𑀦𑁄𑀧𑁂𑀢𑁆𑀣, 𑀦 𑀲𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀙𑀦𑁆𑀤𑀸𑀤𑀻𑀦𑀺 𑀥𑀼𑀭𑀁 𑀓𑀢𑁆𑀯𑀸, 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀦.

𑁪𑁦.

𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭-𑀯𑀺𑀥𑀸𑀦𑀁 𑀧𑀦 𑀧𑀼𑀜𑁆𑀜𑀢𑁄;

𑀜𑁂𑀬𑁆𑀬𑀁 𑀧𑀘𑁆𑀘𑀬𑀢𑁄 𑀘𑁂𑀯, 𑀯𑀺𑀧𑀸𑀓𑁂𑀲𑀼 𑀘 𑀯𑀺𑀜𑁆𑀜𑀼𑀦𑀸.

𑁪𑁧.

𑀳𑀻𑀦𑀸𑀤𑀻𑀦𑀁 𑀯𑀺𑀧𑀸𑀓𑀢𑁆𑀢𑀸, 𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀸𑀤𑀺𑀦𑀸;

𑀳𑀻𑀦𑀸𑀤𑀬𑁄 𑀪𑀯𑀦𑁆𑀢𑀻𑀢𑀺, 𑀯𑀺𑀧𑀸𑀓𑀸 𑀧𑀭𑀺𑀤𑀻𑀧𑀺𑀢𑀸.

𑁪𑁨.

𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁, 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀁;

𑀚𑀸𑀬𑀢𑁂 𑀓𑀸𑀫𑀮𑁄𑀓𑀲𑁆𑀫𑀺𑀁, 𑀦 𑀧𑀦𑀜𑁆𑀜𑀢𑁆𑀣 𑀚𑀸𑀬𑀢𑁂.

𑀏𑀯𑀁 𑀢𑀸𑀯 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 ¶ 𑀧𑀦 𑀅𑀮𑁄𑀪𑀸𑀤𑀺𑀳𑁂𑀢𑀼𑀯𑀺𑀭𑀳𑀺𑀢𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀁 ¶ , 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀦𑁆𑀢𑀺 𑀇𑀤𑀁 𑀧𑀦 𑀅𑀝𑁆𑀞𑀯𑀺𑀥𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀦𑀸𑀫.

𑀇𑀤𑀁 𑀧𑀦 𑀅𑀝𑁆𑀞𑀯𑀺𑀥𑀁 𑀦𑀺𑀬𑀢𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀦𑀺𑀬𑀢𑀸𑀦𑀺𑀬𑀢𑀸𑀭𑀫𑁆𑀫𑀡𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀧𑀜𑁆𑀘𑀓𑀁 𑀦𑀺𑀬𑀢𑀸𑀭𑀫𑁆𑀫𑀡𑀁, 𑀲𑁂𑀲𑀢𑁆𑀢𑀬𑀁 𑀅𑀦𑀺𑀬𑀢𑀸𑀭𑀫𑁆𑀫𑀡𑀁. 𑀲𑀼𑀔𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑀢𑁄 𑀢𑀺𑀯𑀺𑀥𑀁. 𑀢𑀢𑁆𑀣 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀲𑀦𑁆𑀢𑀻𑀭𑀡𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀁, 𑀲𑁂𑀲𑀫𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀦𑁆𑀢𑀺.

𑀤𑀺𑀝𑁆𑀞𑀸𑀭𑀫𑁆𑀫𑀡𑀲𑀼𑀢𑀸𑀭𑀫𑁆𑀫𑀡𑀫𑀼𑀢𑀸𑀭𑀫𑁆𑀫𑀡𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀭𑀫𑁆𑀫𑀡𑀤𑀺𑀝𑁆𑀞-𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 𑀤𑀺𑀝𑁆𑀞𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀼𑀢𑀸𑀭𑀫𑁆𑀫𑀡𑀁 ¶ 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀫𑀼𑀢𑀸𑀭𑀫𑁆𑀫𑀡𑀁 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀢𑁆𑀢𑀬𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀭𑀫𑁆𑀫𑀡𑀁 𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁 𑀲𑁂𑀲𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀦𑁆𑀢𑀺.

𑀯𑀢𑁆𑀣𑀼𑀢𑁄 𑀙𑀩𑁆𑀩𑀺𑀥𑀁. 𑀓𑀣𑀁? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀘𑀓𑁆𑀔𑀼𑀫𑁂𑀯 𑀯𑀢𑁆𑀣𑀼, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼, 𑀅𑀯𑀲𑁂𑀲𑀢𑁆𑀢𑀬𑀲𑁆𑀲 𑀳𑀤𑀬𑀯𑀢𑁆𑀣𑀼𑀫𑁂𑀯𑀸𑀢𑀺.

𑀆𑀭𑀫𑁆𑀫𑀡𑀢𑁄 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺. 𑀓𑀣𑀁? 𑀭𑀽𑀧𑀸𑀭𑀫𑁆𑀫𑀡𑀫𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀸 𑀫𑀦𑁄𑀥𑀸𑀢𑀼, 𑀲𑁂𑀲𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀙𑀴𑀸𑀭𑀫𑁆𑀫𑀡𑀦𑁆𑀢𑀺.

𑀢𑀁 𑀲𑀩𑁆𑀩𑀁 𑀧𑀦 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀓𑀺𑀘𑁆𑀘𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀓𑀣𑀁? 𑀤𑀲𑁆𑀲𑀦𑀓𑀺𑀘𑁆𑀘𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀅𑀯𑀲𑁂𑀲𑀸𑀦𑀺.

𑀢𑀢𑁆𑀣 ¶ 𑀘𑀓𑁆𑀔𑀼𑀢𑁄 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀫𑁆𑀳𑀺 𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 ¶ , 𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀁, 𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑀧𑀤𑀝𑁆𑀞𑀸𑀦𑀁. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀲𑁄𑀢𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑁆𑀤𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸𑀦𑀺, 𑀲𑀤𑁆𑀤𑀸𑀤𑀺𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀸𑀦𑀺, 𑀲𑀤𑁆𑀤𑀸𑀤𑀻𑀲𑀼 𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺, 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀽𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀸𑀦𑀺. 𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀭𑀽𑀧𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑀭𑀲𑀁, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀁.

𑀲𑁂𑀲𑀸 𑀧𑀦 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀲𑀦𑁆𑀢𑀻𑀭𑀡𑀸𑀤𑀺𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀞𑀫𑀸 𑀏𑀓𑀦𑁆𑀢𑀫𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸𑀯 𑀳𑀼𑀢𑁆𑀯𑀸 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀞𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀙𑀲𑀼 𑀧𑀦 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀤𑀼𑀢𑀺𑀬𑀸 ¶ 𑀧𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀓𑀣𑀁? 𑀫𑀦𑀼𑀲𑁆𑀲𑀮𑁄𑀓𑁂 𑀢𑀸𑀯 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀚𑀴𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀦𑀧𑀼𑀁𑀲𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 𑀧𑀯𑀢𑁆𑀢𑀺𑀬𑀁 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀧𑀜𑁆𑀘𑀸𑀭𑀫𑁆𑀫𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺 𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀻𑀢𑀺. 𑀏𑀯𑀁 𑀢𑀸𑀯 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁩.

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀲𑁆𑀲 ¶ , 𑀯𑀺𑀧𑀸𑀓𑀸 𑀳𑁄𑀦𑁆𑀢𑀺 𑀲𑁄𑀴𑀲;

𑀢𑀁 𑀢𑀺𑀳𑁂𑀢𑀼𑀓𑀧𑀼𑀜𑁆𑀜𑀲𑁆𑀲, 𑀯𑀲𑁂𑀦 𑀧𑀭𑀺𑀤𑀻𑀧𑀬𑁂.

𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀦𑀺𑀬𑀢𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀸𑀦𑀺, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀸𑀦𑀺. 𑀓𑀣𑀁? 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀁, 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑀧𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑀇𑀤𑀸𑀦𑀺 ¶ 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀲𑀓𑀓𑀼𑀲𑀮𑀸𑀦𑀺 𑀯𑀺𑀬 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺.

𑁪𑁪.

𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑁆𑀯𑀸, 𑀪𑀸𑀚𑀺𑀢𑀁 𑀓𑀺𑀁 𑀫𑀳𑀕𑁆𑀕𑀢𑀁;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯, 𑀦𑀸𑀲𑀫𑀸𑀦𑀨𑀮𑀁 𑀬𑀢𑁄.

𑁪𑁫.

𑀅𑀢𑁆𑀢𑀦𑁄 𑀓𑀼𑀲𑀮𑁂𑀳𑁂𑀯, 𑀲𑀫𑀸𑀦𑀁 𑀲𑀩𑁆𑀩𑀣𑀸 𑀇𑀤𑀁;

𑀕𑀚𑀸𑀤𑀻𑀦𑀁 𑀬𑀣𑀸 𑀙𑀸𑀬𑀸, 𑀕𑀚𑀸𑀤𑀺𑀲𑀤𑀺𑀲𑀸 𑀢𑀣𑀸.

𑁪𑁬.

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯, 𑀦𑀸𑀧𑀭𑀸𑀧𑀭𑀺𑀬𑀯𑁂𑀤𑀦𑀁;

𑀛𑀸𑀦𑀸 𑀅𑀧𑀭𑀺𑀳𑀻𑀦𑀲𑁆𑀲, 𑀲𑀢𑁆𑀢𑀲𑁆𑀲 𑀪𑀯𑀕𑀸𑀫𑀺𑀦𑁄.

𑁪𑁭.

𑀓𑀼𑀲𑀮𑀸𑀦𑀦𑁆𑀢𑀭𑀁𑀬𑁂𑀯 ¶ , 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘;

𑀜𑀸𑀧𑀦𑀢𑁆𑀣𑀁 𑀧𑀦𑁂𑀢𑀲𑁆𑀲, 𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑀁.

𑁪𑁮.

𑀧𑀝𑀺𑀧𑁆𑀧𑀤𑀸𑀓𑁆𑀓𑀫𑁄 𑀘𑁂𑀯, 𑀳𑀻𑀦𑀸𑀤𑀻𑀦𑀜𑁆𑀘 𑀪𑁂𑀤𑀢𑁄;

𑀛𑀸𑀦𑀸𑀕𑀫𑀦𑀢𑁄 𑀘𑁂𑀢𑁆𑀣, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁪𑁯.

𑀅𑀪𑀸𑀯𑁄𑀥𑀺𑀧𑀢𑀻𑀦𑀜𑁆𑀘 ¶ , 𑀅𑀬𑀫𑁂𑀯 𑀯𑀺𑀲𑁂𑀲𑀓𑁄;

𑀲𑁂𑀲𑀁 𑀲𑀩𑁆𑀩𑀁 𑀘 𑀲𑁂𑀲𑁂𑀦, 𑀓𑀼𑀲𑀮𑁂𑀦 𑀲𑀫𑀁 𑀫𑀢𑀁. 𑁋

𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀘𑀢𑀼𑀫𑀕𑁆𑀕𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀏𑀓𑁂𑀓𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁, 𑀧𑀼𑀦 𑀫𑀕𑁆𑀕𑀯𑀻𑀣𑀺𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀤𑀼𑀯𑀺𑀥𑀁. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁦.

𑀲𑀼𑀜𑁆𑀜𑀢𑀁 ¶ 𑀅𑀦𑀺𑀫𑀺𑀢𑁆𑀢𑀦𑁆𑀢𑀺, 𑀢𑀣𑀸𑀧𑀡𑀺𑀳𑀺𑀢𑀦𑁆𑀢𑀺𑀧𑀺;

𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺, 𑀫𑀕𑁆𑀕𑀲𑁆𑀲𑀸𑀦𑀦𑁆𑀢𑀭𑁂 𑀨𑀮𑁂.

𑁫𑁧.

𑀮𑀩𑁆𑀪𑀦𑁆𑀢𑀺 𑀧𑀭𑀪𑀸𑀕𑀲𑁆𑀫𑀺𑀁, 𑀯𑀴𑀜𑁆𑀚𑀦𑀨𑀮𑁂𑀲𑀼 𑀦;

𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯, 𑀢𑀸𑀦𑀺 𑀦𑀸𑀫𑀸𑀦𑀺 𑀮𑀩𑁆𑀪𑀭𑁂.

𑁫𑁨.

𑀳𑁄𑀦𑁆𑀢𑀺 𑀲𑀸𑀥𑀺𑀧𑀢𑀻𑀦𑁂𑀯, 𑀮𑁄𑀓𑀼𑀢𑁆𑀢𑀭𑀨𑀮𑀸𑀦𑀺 𑀢𑀼;

𑀯𑀺𑀧𑀸𑀓𑁂𑀥𑀺𑀧𑀢𑀻 𑀦𑀢𑁆𑀣𑀺, 𑀞𑀧𑁂𑀢𑁆𑀯𑀸 𑀢𑀼 𑀅𑀦𑀸𑀲𑀯𑁂.

𑁫𑁩.

𑀅𑀢𑁆𑀢𑀦𑁄 𑀫𑀕𑁆𑀕𑀪𑀸𑀯𑁂𑀦, 𑀫𑀕𑁆𑀕𑁄 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺;

𑀨𑀮𑀁 𑀫𑀕𑁆𑀕𑀫𑀼𑀧𑀸𑀤𑀸𑀬, 𑀫𑀕𑁆𑀕𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑁋

𑀏𑀯𑀁 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀲𑀢𑁆𑀢𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺.

𑀏𑀢𑁆𑀣 ¶ 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀓𑀸𑀤𑀲𑀯𑀺𑀥𑁂𑀦𑀸𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 ¶ 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑀁 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸, 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀏𑀯𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀓𑁂𑀯𑀮𑀁 𑀳𑀺 𑀢𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺, 𑀇𑀫𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺. 𑀅𑀬𑀫𑀺𑀫𑁂𑀲𑀁, 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄.

𑁫𑁪.

𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀯𑀢𑁆𑀢𑀭𑁂 𑀇𑀫𑁂;

𑀲𑀼𑀔𑀸𑀤𑀺𑀢𑁆𑀢𑀬𑀬𑀼𑀢𑁆𑀢𑀸 𑀢𑁂, 𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀬𑀼𑀢𑀸 𑀇𑀫𑁂.

𑀏𑀯𑀁 ¶ 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀳𑁂𑀢𑀼𑀓𑀫𑀝𑁆𑀞𑀯𑀺𑀥𑀁, 𑀅𑀳𑁂𑀢𑀼𑀓𑀫𑀝𑁆𑀞𑀯𑀺𑀥𑀁, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀜𑁆𑀘𑀯𑀺𑀥𑀁, 𑀆𑀭𑀫𑁆𑀫𑀡𑀪𑁂𑀤𑀢𑁄 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀪𑁂𑀤𑀢𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑀢𑁄 𑀅𑀓𑀼𑀲𑀮𑀯𑀺𑀧𑀸𑀓𑀁 𑀲𑀢𑁆𑀢𑀯𑀺𑀥𑀦𑁆𑀢𑀺 𑀙𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁫𑁫.

𑀏𑀯𑀁 𑀙𑀢𑁆𑀢𑀺𑀁𑀲𑀥𑀸 𑀧𑀸𑀓𑀁, 𑀧𑀸𑀓𑀲𑀸𑀲𑀦𑀧𑀽𑀚𑀺𑀢𑁄;

𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑁂𑀲𑀼, 𑀓𑀼𑀲𑀮𑁄 𑀲𑀼𑀕𑀢𑁄𑀩𑁆𑀭𑀯𑀺.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀁 𑀧𑀦 𑀅𑀯𑀺𑀧𑀸𑀓𑀢𑁄 𑀏𑀓𑀯𑀺𑀥𑀁, 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀢𑁄 𑀤𑀼𑀯𑀺𑀥𑀁, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀪𑁂𑀤𑀢𑁄 𑀢𑀺𑀯𑀺𑀥𑀁. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀲𑀳𑁂𑀢𑀼𑀓𑀫𑀳𑁂𑀢𑀼𑀓𑀦𑁆𑀢𑀺. 𑀢𑀢𑁆𑀣 𑀲𑀳𑁂𑀢𑀼𑀓𑀁 𑀏𑀓𑀯𑀺𑀥𑀁 𑀅𑀭𑀳𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 ¶ 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀏𑀢𑀸𑀦𑀺 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀤𑀸𑀦𑀸𑀤𑀺𑀯𑀲𑁂𑀦 𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀁 𑀧𑀦 𑀢𑀺𑀯𑀺𑀥𑀁 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯𑀚𑁆𑀚𑀦𑀘𑀺𑀢𑁆𑀢𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑁄𑀝𑁆𑀞𑀩𑁆𑀩𑀦𑀘𑀺𑀢𑁆𑀢𑀦𑁆𑀢𑀺 ¶ .

𑀢𑀢𑁆𑀣 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑁂𑀘𑀸𑀭𑀻 𑀳𑀼𑀢𑁆𑀯𑀸 𑀪𑀯𑀗𑁆𑀕𑀁 𑀆𑀯𑀝𑁆𑀝𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀭𑀸 𑀧𑀦 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀢𑀺 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀲𑀸𑀥𑀸𑀭𑀡𑀸 𑀧𑀦 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀔𑀻𑀡𑀸𑀲𑀯𑀲𑁆𑀲𑁂𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀙𑀲𑀼 𑀅𑀦𑀼𑀴𑀸𑀭𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀓𑀺𑀘𑁆𑀘𑀸 𑀦𑀺𑀬𑀢𑀯𑀢𑁆𑀣𑀼𑀓𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸𑀥𑀸𑀭𑀡𑀸 𑀧𑀦 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸 ¶ , 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸 𑀢𑀻𑀲𑀼 𑀪𑀯𑁂𑀲𑀼 𑀲𑀩𑁆𑀩𑁂𑀲𑀁 𑀲𑀘𑀺𑀢𑁆𑀢𑀓𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸, 𑀦 𑀓𑀲𑁆𑀲𑀘𑀺 𑀧𑀦 𑀲𑀘𑀺𑀢𑁆𑀢𑀓𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀦𑀸𑀬𑀁 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀓𑀺𑀘𑁆𑀘𑀸 𑀉𑀧𑁆𑀧𑀚𑁆𑀚𑀢𑀺. 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺𑀧𑀺 𑀏𑀢𑀸𑀬 𑀕𑀳𑀺𑀢𑀸𑀭𑀫𑁆𑀫𑀡𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑀸𑀭𑀫𑁆𑀫𑀡𑀕𑀳𑀡𑀲𑀫𑀢𑁆𑀣𑀢𑀸𑀬 ¶ 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀇𑀥 𑀞𑀢𑁆𑀯𑀸 𑀳𑀲𑀦𑀘𑀺𑀢𑁆𑀢𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸𑀦𑀺. 𑀢𑁂𑀭𑀲 𑀳𑀲𑀦𑀘𑀺𑀢𑁆𑀢𑀸𑀦𑀺. 𑀓𑀼𑀲𑀮𑀢𑁄 𑀘𑀢𑀽𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺, 𑀅𑀓𑀼𑀲𑀮𑀢𑁄 𑀘𑀢𑀽𑀳𑀻𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀧𑀼𑀣𑀼𑀚𑁆𑀚𑀦𑀸 𑀳𑀲𑀦𑁆𑀢𑀺, 𑀲𑁂𑀔𑀸 𑀧𑀦 𑀓𑀼𑀲𑀮𑀢𑁄 𑀘𑀢𑀽𑀳𑀺, 𑀅𑀓𑀼𑀲𑀮𑀢𑁄 𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀻𑀢𑀺 𑀙𑀳𑀺 𑀳𑀲𑀦𑁆𑀢𑀺, 𑀔𑀻𑀡𑀸𑀲𑀯𑀸 𑀓𑀺𑀭𑀺𑀬𑀢𑁄 𑀧𑀜𑁆𑀘𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺 𑀳𑀲𑀦𑁆𑀢𑀻𑀢𑀺.

𑁫𑁬.

𑀲𑁄𑀫𑀦𑀲𑁆𑀲𑀬𑀼𑀢𑀸𑀦𑀝𑁆𑀞, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘;

𑀓𑁆𑀭𑀺𑀬𑀢𑁄 𑀧𑀦 𑀧𑀜𑁆𑀘𑁂𑀯𑀁, 𑀳𑀸𑀲𑀘𑀺𑀢𑁆𑀢𑀸𑀦𑀺 𑀢𑁂𑀭𑀲.

𑁫𑁭.

𑀧𑀼𑀣𑀼𑀚𑁆𑀚𑀦𑀸 𑀳𑀲𑀦𑁆𑀢𑁂𑀢𑁆𑀣, 𑀘𑀺𑀢𑁆𑀢𑁂𑀳𑀺 𑀧𑀦 𑀅𑀝𑁆𑀞𑀳𑀺;

𑀙𑀳𑀺 𑀲𑁂𑀔𑀸 𑀅𑀲𑁂𑀔𑀸 𑀘, 𑀳𑀲𑀦𑁆𑀢𑀺 𑀧𑀦 𑀧𑀜𑁆𑀘𑀳𑀺.

𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀁, 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀇𑀤𑀸𑀦𑀺 ¶ 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀇𑀫𑀸𑀦𑀺 𑀧𑀦 𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀲𑀓𑀲𑀓𑀪𑀽𑀫𑀺𑀓𑀼𑀲𑀮𑀲𑀤𑀺𑀲𑀸𑀦𑀺. 𑀓𑁂𑀯𑀮𑀁 𑀧𑀦𑁂𑀢𑀸𑀦𑀺 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀸𑀦𑀺 𑀧𑀦 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁. 𑀇𑀫𑀸𑀦𑀺 𑀘 𑀔𑀻𑀡𑀸𑀲𑀯𑀸𑀦𑀁 𑀪𑀸𑀯𑀦𑀸𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀦 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀯 𑀇𑀫𑁂𑀲𑀁, 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄.

𑁫𑁮.

𑀬𑀸 ¶ ¶ 𑀧𑀼𑀣𑀼𑀚𑁆𑀚𑀦𑀓𑀸𑀮𑀲𑁆𑀫𑀺𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀸 𑀧𑀦;

𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺, 𑀲𑀸 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀦𑁄.

𑁫𑁯.

𑀬𑀸𑀯 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼, 𑀦 𑀲𑀫𑀸𑀧𑀚𑁆𑀚𑀢𑁂𑀯 𑀦𑀁;

𑀢𑀸𑀯 𑀢𑀸 𑀓𑀼𑀲𑀮𑀸 𑀏𑀯, 𑀲𑀫𑀸𑀧𑀦𑁆𑀦𑀸 𑀲𑀘𑁂 𑀓𑁆𑀭𑀺𑀬𑀸.

𑀏𑀯𑀁 𑀲𑁄𑀫𑀦𑀲𑁆𑀲𑀸𑀤𑀺𑀪𑁂𑀤𑀢𑁄 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀫𑀝𑁆𑀞𑀯𑀺𑀥𑀁, 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀪𑁂𑀤𑀢𑁄 𑀅𑀳𑁂𑀢𑀼𑀓𑀁 𑀢𑀺𑀯𑀺𑀥𑀁, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀭𑀽𑀧𑀸𑀯𑀘𑀭𑀁 𑀧𑀜𑁆𑀘𑀯𑀺𑀥𑀁, 𑀆𑀭𑀫𑁆𑀫𑀡𑀪𑁂𑀤𑀢𑁄 𑀅𑀭𑀽𑀧𑀸𑀯𑀘𑀭𑀁 𑀘𑀢𑀼𑀩𑁆𑀩𑀺𑀥𑀁, 𑀏𑀯𑀁 𑀪𑀽𑀫𑀺𑀯𑀲𑁂𑀦 𑀯𑀻𑀲𑀢𑀺𑀯𑀺𑀥𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁬𑁦.

𑀏𑀓𑀸𑀤𑀲𑀯𑀺𑀥𑀁 𑀓𑀸𑀫𑁂, 𑀭𑀽𑀧𑁂 𑀧𑀜𑁆𑀘 𑀅𑀭𑀽𑀧𑀺𑀲𑀼;

𑀘𑀢𑁆𑀢𑀸𑀭𑀻𑀢𑀺 𑀘 𑀲𑀩𑁆𑀩𑀸𑀦𑀺, 𑀓𑁆𑀭𑀺𑀬𑀸𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁬𑁧.

𑀮𑁄𑀓𑀼𑀢𑁆𑀢𑀭𑀓𑁆𑀭𑀺𑀬𑀘𑀺𑀢𑁆𑀢𑀁, 𑀧𑀦 𑀓𑀲𑁆𑀫𑀸 𑀦 𑀯𑀺𑀚𑁆𑀚𑀢𑀺;

𑀏𑀓𑀘𑀺𑀢𑁆𑀢𑀓𑁆𑀔𑀡𑀢𑁆𑀢𑀸 𑀳𑀺, 𑀫𑀕𑁆𑀕𑀲𑁆𑀲𑀸𑀢𑀺 𑀦 𑀯𑀺𑀚𑁆𑀚𑀢𑀺.

𑁬𑁨.

𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑁂𑀲𑀓𑁄,

𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀘𑀺𑀢𑁆𑀢𑀫𑀯𑁄𑀘 𑀬𑀁 𑀚𑀺𑀦𑁄;

𑀳𑀺𑀢𑀸𑀳𑀺𑀢𑀸𑀦𑀁 𑀲𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀭𑀢𑁄,

𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀢𑀦𑁆𑀢𑀼 𑀫𑀬𑀸 𑀲𑀫𑀻𑀭𑀺𑀢𑀁.

𑀏𑀢𑁆𑀢𑀸𑀯𑀢𑀸 𑀏𑀓𑀯𑀻𑀲𑀢𑀺𑀯𑀺𑀥𑀁 𑀓𑀼𑀲𑀮𑀁, 𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀁 𑀙𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀁, 𑀯𑀻𑀲𑀢𑀺𑀯𑀺𑀥𑀁 𑀓𑀺𑀭𑀺𑀬𑀘𑀺𑀢𑁆𑀢𑀦𑁆𑀢𑀺 𑀆𑀤𑀺𑀫𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁 𑀏𑀓𑀽𑀦𑀦𑀯𑀼𑀢𑀺𑀧𑁆𑀧𑀪𑁂𑀤𑁂𑀦 𑀯𑀺𑀥𑀺𑀦𑀸 𑀧𑀓𑀸𑀲𑀺𑀢𑀁 𑀳𑁄𑀢𑀻𑀢𑀺.

𑁬𑁩.

𑀏𑀓𑀯𑀻𑀲𑀢𑀺 ¶ 𑀧𑀼𑀜𑁆𑀜𑀸𑀦𑀺, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺 𑀘;

𑀙𑀢𑁆𑀢𑀺𑀁𑀲𑁂𑀯 𑀯𑀺𑀧𑀸𑀓𑀸𑀦𑀺, 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁬𑁪.

𑀏𑀓𑀽𑀦𑀦𑀯𑀼𑀢𑀺 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑁂𑀲𑀺𑀦𑀸;

𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑁂 𑀓𑀢𑁆𑀯𑀸, 𑀦𑀺𑀤𑁆𑀤𑀺𑀝𑁆𑀞𑀸 𑀳𑀺 𑀲𑀫𑀸𑀲𑀢𑁄.

𑁬𑁫.

𑀧𑀺𑀝𑀓𑁂 ¶ ¶ 𑀅𑀪𑀺𑀥𑀫𑁆𑀫𑀲𑁆𑀫𑀺𑀁, 𑀬𑁂 𑀪𑀺𑀓𑁆𑀔𑀽 𑀧𑀸𑀝𑀯𑀢𑁆𑀣𑀺𑀦𑁄;

𑀢𑁂𑀳𑀸𑀬𑀁 𑀉𑀕𑁆𑀕𑀳𑁂𑀢𑀩𑁆𑀩𑁄, 𑀘𑀺𑀦𑁆𑀢𑁂𑀢𑀩𑁆𑀩𑁄 𑀧𑀼𑀦𑀧𑁆𑀧𑀼𑀦𑀁.

𑁬𑁬.

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂𑀦, 𑀅𑀪𑀺𑀥𑀫𑁆𑀫𑀫𑀳𑁄𑀤𑀥𑀺𑀁;

𑀬𑁂 𑀢𑀭𑀦𑁆𑀢𑀺 𑀇𑀫𑀁 𑀮𑁄𑀓𑀁, 𑀧𑀭𑀜𑁆𑀘𑁂𑀯 𑀢𑀭𑀦𑁆𑀢𑀺 𑀢𑁂𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑁄

𑁬𑁭.

𑀘𑀺𑀢𑁆𑀢𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀸 ¶ , 𑀬𑁂 𑀘 𑀘𑁂𑀢𑀲𑀺𑀓𑀸 𑀫𑀬𑀸;

𑀢𑁂𑀲𑀁 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀪𑀸𑀚𑀦𑀫𑀺𑀢𑁄 𑀧𑀭𑀁.

𑀢𑀢𑁆𑀣 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀘𑀺𑀢𑁆𑀢𑁂 𑀪𑀯𑀸 𑀯𑀸 𑀘𑁂𑀢𑀲𑀺𑀓𑀸. 𑀢𑁂𑀧𑀺 𑀘𑀺𑀢𑁆𑀢𑀁 𑀯𑀺𑀬 𑀲𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀸, 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀤𑀼𑀯𑀺𑀥𑀸, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑁂𑀤𑀢𑁄 𑀢𑀺𑀯𑀺𑀥𑀸, 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀓𑀸𑀫𑀸𑀯𑀘𑀭𑀸. 𑀢𑁂𑀲𑀼 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀏𑀓𑀽𑀦𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀤𑁆𑀥𑀸 𑀲𑀢𑀺 𑀯𑀻𑀭𑀺𑀬𑀁 𑀧𑀜𑁆𑀜𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺. 𑀧𑀼𑀦 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑁄, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸, 𑀫𑀦𑀲𑀺𑀓𑀸𑀭𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀦𑀺𑀬𑀢𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀢𑁂𑀢𑁆𑀢𑀺𑀁𑀲 𑀳𑁄𑀦𑁆𑀢𑀺 ¶ . 𑀧𑀼𑀦 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 ¶ 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺 𑀘𑁂𑀢𑀺 𑀇𑀫𑁂 𑀧𑀜𑁆𑀘 𑀅𑀦𑀺𑀬𑀢𑀸. 𑀇𑀫𑁂 𑀧𑀦 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀇𑀫𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦 𑀪𑀸𑀯𑀦𑀸𑀓𑀸𑀮𑁂 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀯𑀸 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄 𑀯𑀸 𑀏𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀦𑁂𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀸 𑀧𑀦 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸𑀤𑀻𑀳𑀺 𑀯𑀺𑀭𑀫𑀢𑀺, 𑀢𑀤𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀏𑀓𑀸 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀭𑀼𑀡𑀸𑀫𑀼𑀤𑀺𑀢𑀸𑀳𑀺 𑀲𑀳, 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀼 𑀏𑀓𑁂𑀦 𑀲𑀳 𑀘𑀢𑀼𑀢𑁆𑀢𑀺𑀁𑀲𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺.

𑁬𑁮.

𑀆𑀤𑀺𑀦𑀸 ¶ 𑀧𑀼𑀜𑁆𑀜𑀘𑀺𑀢𑁆𑀢𑁂𑀦, 𑀢𑁂𑀢𑁆𑀢𑀺𑀁𑀲 𑀦𑀺𑀬𑀢𑀸 𑀫𑀢𑀸;

𑀓𑀭𑀼𑀡𑀸𑀫𑀼𑀤𑀺𑀢𑁂𑀓𑁂𑀦, 𑀘𑀢𑀼𑀢𑁆𑀢𑀺𑀁𑀲 𑀪𑀯𑀦𑁆𑀢𑀺 𑀢𑁂.

𑁬𑁯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀸 𑀘, 𑀉𑀧𑁂𑀓𑁆𑀔𑀸 𑀘 𑀦 𑀉𑀤𑁆𑀥𑀝𑀸;

𑀬𑁂𑀯𑀸𑀧𑀦𑀓𑀥𑀫𑁆𑀫𑁂𑀲𑀼, 𑀥𑀫𑁆𑀫𑀭𑀸𑀚𑁂𑀦 𑀲𑀢𑁆𑀣𑀼𑀦𑀸.

𑁭𑁦.

𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸𑀧𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀘;

𑀉𑀧𑁂𑀓𑁆𑀔𑀸 𑀕𑀳𑀺𑀢𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀦 𑀕𑀳𑀺𑀢𑀸 𑀉𑀪𑁄.

𑁭𑁧.

𑀓𑀲𑁆𑀫𑀸 𑀬𑁂𑀯𑀸𑀧𑀦𑀸 𑀥𑀫𑁆𑀫𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀲𑀭𑀽𑀧𑁂𑀦𑁂𑀯 𑀲𑀩𑁆𑀩𑁂𑀢𑁂, 𑀧𑀸𑀴𑀺𑀬𑀁 𑀦 𑀘 𑀉𑀤𑁆𑀥𑀝𑀸.

𑁭𑁨.

𑀬𑀲𑁆𑀫𑀸 𑀅𑀦𑀺𑀬𑀢𑀸 𑀓𑁂𑀘𑀺, 𑀬𑀲𑁆𑀫𑀸 𑀭𑀸𑀲𑀺𑀁 𑀪𑀚𑀦𑁆𑀢𑀺 𑀦;

𑀬𑀲𑁆𑀫𑀸 𑀘 𑀤𑀼𑀩𑁆𑀩𑀮𑀸 𑀓𑁂𑀘𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀸 𑀦 𑀧𑀸𑀴𑀺𑀬𑀁.

𑁭𑁩.

𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀫𑀼𑀤𑀺𑀢𑀸 𑀫𑀦𑀲𑀺 𑀘 𑀓𑀸𑀭𑁄,

𑀫𑀚𑁆𑀛𑀢𑁆𑀢𑀢𑀸 𑀘 𑀓𑀭𑀼𑀡𑀸 𑀯𑀺𑀭𑀢𑀺𑀢𑁆𑀢𑀬𑀁 𑀘;

𑀧𑀼𑀜𑁆𑀜𑁂𑀲𑀼 𑀢𑁂𑀦 𑀦𑀺𑀬𑀢𑀸𑀦𑀺𑀬𑀢𑀸 𑀘 𑀲𑀩𑁆𑀩𑁂,

𑀬𑁂𑀯𑀸𑀧𑀦𑀸 𑀫𑀼𑀦𑀺𑀯𑀭𑁂𑀦 𑀦 𑀘𑁂𑀯 𑀯𑀼𑀢𑁆𑀢𑀸.

𑁭𑁪.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄𑀯, 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄;

𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸, 𑀘𑀺𑀢𑁆𑀢𑀲𑁆𑀲𑀸𑀭𑀫𑁆𑀫𑀡𑁂 𑀓𑀺𑀭.

𑁭𑁫.

𑀨𑀼𑀲𑀺𑀢𑁆𑀯𑀸 ¶ ¶ 𑀧𑀦 𑀨𑀲𑁆𑀲𑁂𑀦, 𑀯𑁂𑀤𑀦𑀸𑀬 𑀘 𑀯𑁂𑀤𑀬𑁂;

𑀲𑀜𑁆𑀚𑀸𑀦𑀸𑀢𑀺 𑀘 𑀲𑀜𑁆𑀜𑀸𑀬, 𑀘𑁂𑀢𑀦𑀸𑀬 𑀘 𑀘𑁂𑀢𑀬𑁂.

𑁭𑁬.

𑀩𑀮𑀯𑀧𑀘𑁆𑀘𑀬𑀢𑁆𑀢𑀸 𑀘, 𑀲𑀳𑀚𑀸𑀢𑀸𑀦𑀫𑁂𑀯 𑀳𑀺;

𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀥 𑀫𑀳𑁂𑀲𑀺𑀦𑀸.

𑁭𑁭.

𑀅𑀓𑀸𑀭𑀡𑀫𑀺𑀤𑀁 𑀲𑀩𑁆𑀩𑀁, 𑀘𑀺𑀢𑁆𑀢𑀸𑀦𑀁 𑀢𑀼 𑀲𑀳𑁂𑀯 𑀘;

𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦, 𑀘𑀺𑀢𑁆𑀢𑀚𑀸𑀦𑀁 𑀧𑀯𑀢𑁆𑀢𑀺𑀢𑁄.

𑁭𑁮.

𑀅𑀬𑀁 𑀢𑀼 𑀧𑀞𑀫𑀼𑀧𑁆𑀧𑀦𑁆𑀦𑁄, 𑀅𑀬𑀁 𑀧𑀘𑁆𑀙𑀸𑀢𑀺 𑀦𑀢𑁆𑀣𑀺𑀤𑀁;

𑀩𑀮𑀯𑀧𑀘𑁆𑀘𑀬𑀢𑁆𑀢𑁂𑀧𑀺, 𑀓𑀸𑀭𑀡𑀜𑁆𑀘 𑀦 𑀤𑀺𑀲𑁆𑀲𑀢𑀺.

𑁭𑁯.

𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀯, 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄;

𑀇𑀘𑁆𑀘𑁂𑀯𑀁 𑀧𑀦 𑀯𑀺𑀜𑁆𑀜𑁂𑀬𑁆𑀬𑀁, 𑀯𑀺𑀜𑁆𑀜𑀼𑀦𑀸 𑀦 𑀯𑀺𑀲𑁂𑀲𑀢𑁄.

𑁮𑁦.

𑀦 𑀘 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀬𑀁, 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄;

𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀺, 𑀥𑀫𑁆𑀫𑀸 𑀏𑀯 𑀯𑀺𑀚𑀸𑀦𑀢𑀸.

𑀬𑀲𑁆𑀫𑀸 𑀧𑀦 𑀇𑀫𑁂 𑀥𑀫𑁆𑀫𑀸 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀦𑀺 𑀧𑀯𑀓𑁆𑀔𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀮𑀝𑁆𑀞𑁂𑀦 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂𑀲𑀼 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 ¶ 𑀧𑀯𑀢𑁆𑀢𑀢𑀺, 𑀲𑁄 𑀤𑁆𑀯𑀺𑀦𑁆𑀦𑀁 𑀫𑁂𑀡𑁆𑀟𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀲𑀼𑀦𑁆𑀤𑀭𑀁 𑀫𑀦𑁄𑀢𑀺 𑀲𑀼𑀫𑀦𑁄, 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁, 𑀲𑁄𑀫𑀦𑀲𑁆𑀲𑀫𑁂𑀯 𑀯𑁂𑀤𑀦𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀭𑀲𑀸 𑀭𑀸𑀚𑀸 𑀯𑀺𑀬 𑀲𑀼𑀪𑁄𑀚𑀦𑀭𑀲𑀁, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸.

𑀦𑀻𑀮𑀸𑀤𑀺𑀪𑁂𑀤𑀁 ¶ 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀓𑀭𑀡𑀭𑀲𑀸 𑀯𑀟𑁆𑀠𑀓𑀺𑀲𑁆𑀲 𑀅𑀪𑀺𑀜𑁆𑀜𑀸𑀡𑀓𑀭𑀡𑀫𑀺𑀯, 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀬𑀣𑁄𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸.

𑀘𑁂𑀢𑀬𑀢𑀻𑀢𑀺 ¶ 𑀘𑁂𑀢𑀦𑀸. 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀓𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬.

𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑁄. 𑀯𑀺𑀢𑀓𑁆𑀓𑀦𑀁 𑀯𑀸 𑀯𑀺𑀢𑀓𑁆𑀓𑁄. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄, 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄. 𑀯𑀺𑀘𑀭𑀡𑀁 𑀯𑀸 𑀯𑀺𑀘𑀸𑀭𑁄. 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀩𑀦𑁆𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀧𑀺𑀦𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁄 𑀅𑀯𑀺𑀲𑀸𑀭𑀮𑀓𑁆𑀔𑀡𑁄, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸, 𑀲𑀳𑀚𑀸𑀢𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀯𑀺𑀲𑁂𑀲𑀢𑁄 𑀲𑀼𑀔𑀧𑀤𑀝𑁆𑀞𑀸𑀦𑁄.

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀧𑀦𑁂𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸.

𑀲𑀭𑀦𑁆𑀢𑀺 ¶ 𑀏𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸.

𑀯𑀻𑀭𑀪𑀸𑀯𑁄 ¶ 𑀯𑀻𑀭𑀺𑀬𑀁. 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀁 𑀯𑀻𑀭𑀺𑀬𑀁. 𑀢𑀁 𑀧𑀦𑁂𑀢𑀁 𑀉𑀲𑁆𑀲𑀸𑀳𑀦𑀮𑀓𑁆𑀔𑀡𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁.

𑀧𑀚𑀸𑀦𑀸𑀢𑀻𑀢𑀺 ¶ 𑀧𑀜𑁆𑀜𑀸. 𑀲𑀸 𑀧𑀦𑁂𑀲𑀸 𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬.

𑀚𑀻𑀯𑀦𑁆𑀢𑀺 𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀚𑀻𑀯𑀺𑀢𑀁. 𑀢𑀁 𑀧𑀦 𑀅𑀢𑁆𑀢𑀦𑀸 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀁𑀬𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀲𑀦𑁆𑀢𑁂𑀧𑀺 𑀘 𑀢𑁂𑀲𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭𑀁, 𑀲𑀬𑀁𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬, 𑀦 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀬𑀢𑀺 𑀅𑀢𑁆𑀢𑀦𑁄 𑀘 𑀧𑀯𑀢𑁆𑀢𑀬𑀺𑀢𑀩𑁆𑀩𑀸𑀦𑀜𑁆𑀘 𑀅𑀪𑀸𑀯𑀸, 𑀦 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑀺 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸 𑀔𑀻𑀬𑀫𑀸𑀦𑁄 𑀯𑀺𑀬 𑀯𑀢𑁆𑀢𑀺𑀲𑁆𑀦𑁂𑀳𑁄𑀯 𑀧𑀤𑀻𑀧𑀲𑀺𑀔𑀦𑁆𑀢𑀺.

𑀦 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀲𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬, 𑀅𑀧𑀭𑀺𑀕𑁆𑀕𑀳𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬, 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬.

𑀦 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀦 𑀤𑀼𑀲𑁆𑀲𑀢𑀺, 𑀅𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀤𑁄𑀲𑁄. 𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬, 𑀆𑀖𑀸𑀢𑀯𑀺𑀦𑀬𑀦𑀭𑀲𑁄, 𑀧𑀭𑀺𑀴𑀸𑀳𑀯𑀺𑀦𑀬𑀦𑀭𑀲𑁄 ¶ 𑀯𑀸 𑀘𑀦𑁆𑀤𑀦𑀁 𑀯𑀺𑀬, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻. 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁. 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀑𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀉𑀪𑁄𑀧𑀺 𑀧𑀸𑀧𑀸𑀦𑀁 𑀅𑀓𑀭𑀡𑀭𑀲𑀸, 𑀧𑀸𑀧𑀢𑁄 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀢𑁆𑀢𑀕𑀸𑀭𑀯𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸. 𑀇𑀫𑁂 𑀥𑀫𑁆𑀫𑀸 𑀮𑁄𑀓𑀧𑀸𑀮𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 ¶ , 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀽𑀧𑀲𑀫𑀢𑀸𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀮𑀳𑀼𑀪𑀸𑀯𑁄 ¶ 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀫𑀼𑀤𑀼𑀪𑀸𑀯𑁄 𑀓𑀸𑀬𑀫𑀼𑀤𑀼𑀢𑀸. 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑁄 𑀘𑀺𑀢𑁆𑀢𑀫𑀼𑀤𑀼𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀸𑀬𑀓𑀫𑁆𑀫𑀜𑁆𑀜𑀢𑀸. 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀁, 𑀓𑀸𑀬𑀘𑀺𑀢𑁆𑀢𑀸𑀦𑀁 ¶ 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀅𑀯𑀲𑁂𑀲𑀦𑀻𑀯𑀭𑀡𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀧𑀸𑀕𑀼𑀜𑁆𑀜𑀪𑀸𑀯𑁄 𑀓𑀸𑀬𑀧𑀸𑀕𑀼𑀜𑁆𑀜𑀢𑀸. 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀪𑀸𑀯𑀓𑀭𑀅𑀲𑁆𑀲𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀉𑀚𑀼𑀓𑀪𑀸𑀯𑁄 𑀓𑀸𑀬𑀼𑀚𑀼𑀓𑀢𑀸. 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀪𑀸𑀯𑁄 𑀘𑀺𑀢𑁆𑀢𑀼𑀚𑀼𑀓𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀼𑀝𑀺𑀮𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸 𑀯𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀮𑀓𑁆𑀔𑀡𑁄 𑀙𑀦𑁆𑀤𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑁄.

𑀅𑀥𑀺𑀫𑀼𑀘𑁆𑀘𑀦𑀁 ¶ 𑀅𑀥𑀺𑀫𑁄𑀓𑁆𑀔𑁄. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀢𑁂𑀲𑀼 ¶ 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀪𑀸𑀯𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀺𑀭𑀺𑀬𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀘 𑀫𑀦𑀲𑀺𑀓𑀸𑀭𑁄.

𑀲𑁆𑀯𑀸𑀬𑀁 ¶ 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄, 𑀯𑀻𑀣𑀺𑀧𑀝𑀺𑀧𑀸𑀤𑀓𑁄, 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀲𑀁𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀓𑀭𑀼𑀡𑀸𑀢𑀺 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀦𑀸𑀢𑀺 𑀯𑀺𑀦𑀸𑀲𑁂𑀢𑀺 𑀯𑀸 𑀧𑀭𑀤𑀼𑀓𑁆𑀔𑀦𑁆𑀢𑀺 𑀓𑀭𑀼𑀡𑀸. 𑀲𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸.

𑀫𑁄𑀤𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑁄𑀤𑀢𑀻𑀢𑀺 𑀫𑀼𑀤𑀺𑀢𑀸. 𑀲𑀸 𑀧𑀫𑁄𑀤𑀦𑀮𑀓𑁆𑀔𑀡𑀸, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀓𑁂𑀘𑀺 𑀧𑀦 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀬𑁄𑀧𑀺 𑀅𑀦𑀺𑀬𑀢𑁂 𑀇𑀘𑁆𑀙𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀣𑀢𑁄 𑀳𑀺 𑀅𑀤𑁄𑀲𑁄 𑀏𑀯 𑀫𑁂𑀢𑁆𑀢𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬𑁂𑀯 𑀉𑀧𑁂𑀓𑁆𑀔𑀸𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀤𑁆𑀯𑀻𑀲𑀼. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀏𑀢𑀸 𑀢𑀺𑀲𑁆𑀲𑁄𑀧𑀺 𑀯𑀺𑀭𑀢𑀺𑀬𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀭𑀲𑀸, 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑀺𑀑𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸. 𑀓𑁂𑀘𑀺 𑀧𑀦 𑀇𑀫𑀸𑀲𑀼 𑀏𑀓𑁂𑀓𑀁 𑀦𑀺𑀬𑀢𑀁 𑀯𑀺𑀭𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀏𑀯𑀁 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑁂𑀦 𑀇𑀫𑁂 𑀢𑁂𑀢𑁆𑀢𑀺𑀁𑀲 𑀯𑀸 𑀘𑀢𑀼𑀢𑁆𑀢𑀺𑀁𑀲 𑀯𑀸 𑀥𑀫𑁆𑀫𑀸 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 ¶ ¶ ¶ 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄. 𑀧𑀼𑀦 𑀢𑀢𑀺𑀬𑁂𑀦 𑀜𑀸𑀡𑀯𑀺𑀧𑁆𑀧𑀬𑁄𑀕𑀢𑁄 𑀞𑀧𑁂𑀢𑁆𑀯𑀸 𑀅𑀫𑁄𑀳𑀁 𑀅𑀯𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀢𑁂𑀢𑁆𑀢𑀺𑀁𑀲 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀘𑀢𑀼𑀢𑁆𑀣𑁂𑀦𑀸𑀧𑀺 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄, 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀧𑀦 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸. 𑀬𑀣𑀸 𑀘 𑀧𑀜𑁆𑀘𑀫𑁂𑀦, 𑀏𑀯𑀁 𑀙𑀝𑁆𑀞𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯 𑀳𑁄𑀢𑀺 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀧𑀦 𑀞𑀧𑁂𑀢𑁆𑀯𑀸 𑀧𑀜𑁆𑀜𑀁 𑀅𑀯𑀲𑁂𑀲𑀸 𑀏𑀓𑀢𑀺𑀁𑀲 𑀯𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀝𑁆𑀞𑀫𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁧.

𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼, 𑀦 𑀤𑀼𑀓𑁆𑀔𑀲𑀼𑀔𑀧𑀻𑀢𑀺𑀬𑁄;

𑀚𑀸𑀬𑀦𑁆𑀢𑁂𑀯 𑀯𑀺𑀲𑀼𑀁 𑀧𑀜𑁆𑀘, 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀬𑁄.

𑀅𑀯𑀲𑁂𑀲𑁂𑀲𑀼 𑀧𑀦 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀭𑀽𑀧𑀸𑀯𑀘𑀭𑀸, 𑀢𑀢𑁆𑀣 𑀧𑀞𑀫𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀓𑀸𑀫𑀸𑀯𑀘𑀭𑀧𑀞𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀭𑀢𑀺𑀬𑁄 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀮𑁄𑀓𑀼𑀢𑁆𑀢𑀭𑁂𑀲𑁆𑀯𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀼. 𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀚𑁆𑀚𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀢𑁂𑀢𑁆𑀢𑀺𑀁𑀲 𑀯𑀸. 𑀢𑀢𑀺𑀬𑁂𑀦 𑀯𑀺𑀘𑀸𑀭𑀯𑀚𑁆𑀚𑀸 𑀏𑀓𑀢𑀺𑀁𑀲 𑀯𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸. 𑀘𑀢𑀼𑀢𑁆𑀣𑁂𑀦 𑀢𑀢𑁄 𑀧𑀻𑀢𑀺𑀯𑀚𑁆𑀚𑀸 𑀢𑀺𑀁𑀲 𑀯𑀸 𑀏𑀓𑀢𑀺𑀁𑀲 𑀯𑀸. 𑀧𑀜𑁆𑀘𑀫𑁂𑀦 𑀢𑀢𑁄 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀚𑁆𑀚𑀸 𑀢𑀺𑀁𑀲 𑀳𑁄𑀦𑁆𑀢𑀺, 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀉𑀧𑁂𑀓𑁆𑀔𑀸 𑀧𑀯𑀺𑀝𑁆𑀞𑀸. 𑀏𑀯𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸, 𑀢𑁂 𑀧𑀦 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀯𑁂𑀢𑁆𑀣 𑀯𑀺𑀲𑁂𑀲𑁄.

𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 ¶ 𑀮𑁄𑀓𑀼𑀢𑁆𑀢𑀭𑀸, 𑀢𑁂 𑀧𑀦 𑀧𑀞𑀫𑀚𑁆𑀛𑀸𑀦𑀺𑀓𑁂 𑀫𑀕𑁆𑀕𑀘𑀺𑀢𑁆𑀢𑁂 𑀧𑀞𑀫𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀪𑁂𑀤𑁂𑀧𑀺 𑀫𑀕𑁆𑀕𑀘𑀺𑀢𑁆𑀢𑁂 𑀤𑀼𑀢𑀺𑀬𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀫𑀪𑀸𑀯𑁄 𑀘 𑀦𑀺𑀬𑀢𑀯𑀺𑀭𑀢𑀺𑀪𑀸𑀯𑁄 𑀘 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀘𑁂𑀢𑁆𑀣 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀓𑀼𑀲𑀮𑀸 𑀧𑀦 𑀘𑁂𑀢𑀲𑀺𑀓𑀸 𑀪𑀽𑀫𑀺𑀢𑁄 𑀏𑀓𑀯𑀺𑀥𑀸 𑀓𑀸𑀫𑀸𑀯𑀘𑀭𑀸𑀬𑁂𑀯, 𑀢𑁂𑀲𑀼 𑀮𑁄𑀪𑀫𑀽𑀮𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 ¶ 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀧𑀦𑁆𑀦𑀭𑀲, 𑀬𑁂𑀯𑀸𑀧𑀦𑀓𑀸 𑀦𑀺𑀬𑀢𑀸 𑀘𑀢𑁆𑀢𑀸𑀭𑁄𑀢𑀺 ¶ 𑀏𑀓𑀽𑀦𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀅𑀦𑀺𑀬𑀢𑀸 𑀙 𑀬𑁂𑀯𑀸𑀧𑀦𑀓𑀸𑀢𑀺 𑀲𑀩𑁆𑀩𑁂 𑀧𑀜𑁆𑀘𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄 𑀫𑁄𑀳𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀲𑀭𑀽𑀧𑁂𑀦𑀸𑀕𑀢𑀸 𑀧𑀦𑁆𑀦𑀭𑀲, 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀺𑀬𑀢𑀬𑁂𑀯𑀸𑀧𑀦𑀓𑀸, 𑀇𑀫𑁂 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀤𑀲𑀲𑀼 𑀘𑀺𑀢𑁆𑀢𑁂𑀲𑀼 𑀦𑀺𑀬𑀢𑀸 𑀳𑁄𑀦𑁆𑀢𑀺, 𑀫𑀸𑀦𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀇𑀫𑁂 𑀙𑀬𑁂𑀯 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑀸.

𑁮𑁨.

𑀏𑀯𑀁 𑀬𑁂𑀯𑀸𑀧𑀦𑀸 𑀲𑀩𑁆𑀩𑁂, 𑀦𑀺𑀬𑀢𑀸𑀦𑀺𑀬𑀢𑀸 𑀤𑀲;

𑀦𑀺𑀤𑁆𑀤𑀺𑀝𑁆𑀞𑀸 𑀧𑀸𑀧𑀘𑀺𑀢𑁆𑀢𑁂𑀲𑀼, 𑀳𑀢𑀧𑀸𑀧𑁂𑀦 𑀢𑀸𑀤𑀺𑀦𑀸.

𑀢𑀢𑁆𑀣 𑀨𑀲𑁆𑀲𑁄𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦 𑀳𑀺𑀭𑀻𑀬𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀦 𑀑𑀢𑁆𑀢𑀧𑁆𑀧𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀢𑀢𑁆𑀣 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀮𑀚𑁆𑀚𑀸𑀮𑀓𑁆𑀔𑀡𑀁 𑀯𑀸 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀦𑀮𑀓𑁆𑀔𑀡𑀁, 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀁 𑀯𑀸.

𑀮𑀼𑀩𑁆𑀪𑀦𑁆𑀢𑀺 ¶ 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀲𑁄 𑀆𑀭𑀫𑁆𑀫𑀡𑀕𑀳𑀡𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬, 𑀅𑀪𑀺𑀲𑀗𑁆𑀕𑀭𑀲𑁄 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀫𑀁𑀲𑀧𑁂𑀲𑀺 𑀯𑀺𑀬, 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬, 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄.

𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀲𑁄 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑀮𑀓𑁆𑀔𑀡𑁄, 𑀅𑀜𑁆𑀜𑀸𑀡𑀮𑀓𑁆𑀔𑀡𑁄 𑀯𑀸, 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄, 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄 𑀯𑀸, 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑁄.

𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 𑀅𑀬𑁄𑀦𑀺𑀲𑁄𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸, 𑀧𑀭𑀸𑀫𑀸𑀲𑀭𑀲𑀸, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀧𑀤𑀝𑁆𑀞𑀸𑀦𑀸.

𑀉𑀤𑁆𑀥𑀢𑀪𑀸𑀯𑁄 ¶ 𑀉𑀤𑁆𑀥𑀘𑁆𑀘𑀁. 𑀢𑀁 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀚𑀮𑀁 𑀯𑀺𑀬, 𑀅𑀦𑀯𑀝𑁆𑀞𑀸𑀦𑀭𑀲𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀥𑀚𑀧𑀝𑀸𑀓𑀸 𑀯𑀺𑀬, 𑀪𑀦𑁆𑀢𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀸𑀲𑀸𑀡𑀸𑀪𑀺𑀖𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀁 𑀯𑀺𑀬, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁.

𑀫𑀜𑁆𑀜𑀢𑀻𑀢𑀺 ¶ 𑀫𑀸𑀦𑁄. 𑀲𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄, 𑀲𑀫𑁆𑀧𑀕𑁆𑀕𑀳𑀡𑀭𑀲𑁄, 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄.

𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀸. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸, 𑀢𑀢𑁆𑀣𑁂𑀯 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸.

𑀫𑀘𑁆𑀙𑀭𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀢𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑀼𑀳𑀡𑀮𑀓𑁆𑀔𑀡𑀁, 𑀢𑀸𑀲𑀁𑀬𑁂𑀯 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀓𑁆𑀔𑀫𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁.

𑀓𑀼𑀘𑁆𑀙𑀺𑀢𑀁 ¶ 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁.

𑀣𑀺𑀦𑀢𑀸 𑀣𑀺𑀦𑀁. 𑀫𑀺𑀤𑁆𑀥𑀢𑀸 𑀫𑀺𑀤𑁆𑀥𑀁. 𑀅𑀦𑀼𑀲𑁆𑀲𑀸𑀳𑀦𑀲𑀁𑀲𑀻𑀤𑀦𑀢𑀸, 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀢𑀢𑁆𑀣 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀦𑀮𑀓𑁆𑀔𑀡𑀁, 𑀯𑀻𑀭𑀺𑀬𑀯𑀺𑀦𑁄𑀤𑀦𑀭𑀲𑀁, 𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀫𑀺𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀑𑀦𑀳𑀦𑀭𑀲𑀁, 𑀮𑀻𑀦𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀉𑀪𑀬𑀫𑁆𑀧𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀲𑁂𑀲𑀸 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀧𑀦 𑀯𑀺𑀢𑀓𑁆𑀓𑀯𑀻𑀭𑀺𑀬𑀲𑀫𑀸𑀥𑀻𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀫𑀸𑀥𑀬𑁄 𑀯𑀺𑀲𑁂𑀲𑀓𑀸. 𑀇𑀢𑀺 𑀇𑀫𑁂 𑀏𑀓𑀽𑀦𑀯𑀻𑀲𑀢𑀺 𑀘𑁂𑀢𑀲𑀺𑀓𑀸 𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑁄 𑀘𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀬𑀢𑀪𑀸𑀯𑁄 𑀘 𑀯𑀺𑀲𑁂𑀲𑁄. 𑀢𑀢𑀺𑀬𑁂𑀦 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀲𑁂𑀲𑀸 𑀅𑀝𑁆𑀞𑀸𑀭𑀲 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀲𑀳 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀘𑀢𑀼𑀢𑁆𑀣𑁂𑀦 𑀤𑀼𑀢𑀺𑀬𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀘 𑀫𑀸𑀦𑁄 𑀅𑀦𑀺𑀬𑀢𑁄 𑀳𑁄𑀢𑀺. 𑀧𑀜𑁆𑀘𑀫𑁂𑀦 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀧𑀦𑁂𑀢𑁆𑀣 𑀉𑀧𑁂𑀓𑁆𑀔𑀸 𑀧𑀯𑀺𑀝𑁆𑀞𑀸. 𑀙𑀝𑁆𑀞𑁂𑀦𑀸𑀧𑀺 𑀧𑀜𑁆𑀘𑀫𑁂 𑀯𑀼𑀢𑁆𑀢𑀲𑀤𑀺𑀲𑀸 𑀏𑀯. 𑀲𑀲𑀗𑁆𑀔𑀸𑀭𑀢𑀸 ¶ , 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀬𑀢𑀪𑀸𑀯𑁄 𑀘 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀧𑀜𑁆𑀘𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄. 𑀅𑀝𑁆𑀞𑀫𑁂𑀦 𑀙𑀝𑁆𑀞𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀫𑀸𑀦𑁄 ¶ 𑀅𑀦𑀺𑀬𑀢𑁄 𑀳𑁄𑀢𑀺. 𑀏𑀯𑀁 𑀮𑁄𑀪𑀫𑀽𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑁄𑀲𑀫𑀽𑀮𑁂𑀲𑀼 𑀤𑁆𑀯𑀻𑀲𑀼 𑀧𑀞𑀫𑁂𑀦 𑀅𑀲𑀗𑁆𑀔𑀸𑀭𑀺𑀓𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀦𑀺𑀬𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 ¶ 𑀢𑁂𑀭𑀲. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀤𑁄𑀲𑁄 𑀫𑁄𑀳𑁄 𑀘𑁂𑀢𑀺 𑀇𑀫𑁂 𑀢𑁂𑀭𑀲 𑀥𑀫𑁆𑀫𑀸 𑀙𑀦𑁆𑀤𑀸𑀤𑀻𑀳𑀺 𑀘𑀢𑀽𑀳𑀺 𑀦𑀺𑀬𑀢𑀬𑁂𑀯𑀸𑀧𑀦𑀓𑁂𑀳𑀺 𑀲𑀢𑁆𑀢𑀭𑀲 𑀳𑁄𑀦𑁆𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑁂𑀲𑀼 𑀅𑀦𑀺𑀬𑀢𑁂𑀲𑀼 𑀢𑀻𑀲𑀼 𑀏𑀓𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀏𑀢𑁂𑀧𑀺 𑀢𑀬𑁄 𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀣 𑀤𑀼𑀝𑁆𑀞𑀼 𑀫𑀦𑁄𑀢𑀺 𑀤𑀼𑀫𑀦𑁄, 𑀤𑀼𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀲𑀳𑀕𑀢𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀢𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁, 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁.

𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄. 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀢𑀸𑀲𑀻𑀯𑀺𑀲𑁄 𑀯𑀺𑀬, 𑀯𑀺𑀲𑀧𑁆𑀧𑀦𑀭𑀲𑁄 𑀯𑀺𑀲𑀦𑀺𑀧𑀸𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸 𑀤𑀸𑀯𑀕𑁆𑀕𑀺 𑀯𑀺𑀬, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄. 𑀅𑀯𑀲𑁂𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯. 𑀇𑀢𑀺 𑀇𑀫𑁂 𑀲𑀢𑁆𑀢𑀭𑀲 𑀯𑀸 𑀅𑀝𑁆𑀞𑀸𑀭𑀲 𑀯𑀸 𑀦𑀯𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀦𑀯𑀫𑁂𑀦, 𑀏𑀯𑀁 𑀤𑀲𑀫𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀢𑀸, 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑀫𑁆𑀪𑀯𑁄 𑀘 𑀯𑀺𑀲𑁂𑀲𑁄.

𑀤𑁆𑀯𑀻𑀲𑀼 𑀧𑀦 𑀫𑁄𑀳𑀫𑀽𑀮𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀦 𑀏𑀓𑀸𑀤𑀲𑀫𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀨𑀲𑁆𑀲𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀘𑀺𑀢𑁆𑀢𑀝𑁆𑀞𑀺𑀢𑀺 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀫𑁄𑀳𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀢𑁂𑀭𑀲, 𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄𑀢𑀺 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸 𑀦𑀺𑀬𑀢𑀸. 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀦𑁆𑀦𑀭𑀲 𑀳𑁄𑀦𑁆𑀢𑀺.

𑀢𑀢𑁆𑀣 ¶ 𑀧𑀯𑀢𑁆𑀢𑀝𑁆𑀞𑀺𑀢𑀺𑀫𑀢𑁆𑀢𑀸 𑀏𑀓𑀕𑁆𑀕𑀢𑀸. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 ¶ 𑀏𑀢𑀸𑀬 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸. 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑀤𑁆𑀯𑀸𑀤𑀲𑀫𑁂𑀦 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 ¶ 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀯𑀼𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀳𑀻𑀦𑀸 𑀉𑀤𑁆𑀥𑀘𑁆𑀘𑀁 𑀲𑀭𑀽𑀧𑁂𑀦 𑀆𑀕𑀢𑀁, 𑀢𑀲𑁆𑀫𑀸 𑀢𑁂𑀭𑀲𑁂𑀯 𑀳𑁄𑀦𑁆𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀧𑀦𑁂𑀢𑁆𑀣 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀅𑀥𑀺𑀫𑁄𑀓𑁆𑀔𑀲𑀫𑁆𑀪𑀯𑀢𑁄 𑀲𑀫𑀸𑀥𑀺 𑀩𑀮𑀯𑀸 𑀳𑁄𑀢𑀺, 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀸 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸, 𑀢𑁂𑀳𑀺 𑀲𑀳 𑀧𑀦𑁆𑀦𑀭𑀲𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀢𑀸𑀯 𑀅𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀩𑁆𑀬𑀸𑀓𑀢𑀸 𑀯𑀼𑀘𑁆𑀘𑀦𑁆𑀢𑀺, 𑀅𑀩𑁆𑀬𑀸𑀓𑀢𑀸 𑀧𑀦 𑀤𑀼𑀯𑀺𑀥𑀸 𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄. 𑀢𑀢𑁆𑀣 𑀯𑀺𑀧𑀸𑀓𑀸 𑀓𑀼𑀲𑀮𑀸 𑀯𑀺𑀬 𑀪𑀽𑀫𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀢𑁆𑀣 𑀲𑀳𑁂𑀢𑀼𑀓𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀸 𑀲𑀳𑁂𑀢𑀼𑀓𑀸. 𑀢𑁂 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀲𑀤𑀺𑀲𑀸. 𑀬𑀸 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀅𑀦𑀺𑀬𑀢𑀸, 𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀧𑀸𑀓𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣 𑀏𑀓𑀦𑁆𑀢𑀓𑀼𑀲𑀮𑀢𑁆𑀢𑀸 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀪𑀗𑁆𑀕𑁂 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁩.

𑀢𑁂𑀢𑁆𑀢𑀺𑀁𑀲𑀸𑀤𑀺𑀤𑁆𑀯𑀬𑁂 𑀥𑀫𑁆𑀫𑀸, 𑀤𑁆𑀯𑀢𑁆𑀢𑀺𑀁𑀲𑁂𑀯 𑀢𑀢𑁄 𑀧𑀭𑁂;

𑀩𑀸𑀢𑁆𑀢𑀺𑀁𑀲 𑀧𑀜𑁆𑀘𑀫𑁂 𑀙𑀝𑁆𑀞𑁂, 𑀏𑀓𑀢𑀺𑀁𑀲 𑀢𑀢𑁄 𑀧𑀭𑁂.

𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 ¶ 𑀧𑀦 𑀅𑀳𑁂𑀢𑀼𑀓𑀸. 𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀨𑀲𑁆𑀲𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀚𑀻𑀯𑀺𑀢𑀁 𑀘𑀺𑀢𑁆𑀢𑀝𑁆𑀞𑀺𑀢𑀻𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀙, 𑀫𑀦𑀲𑀺𑀓𑀸𑀭𑁂𑀦 𑀘 𑀲𑀢𑁆𑀢 𑀳𑁄𑀦𑁆𑀢𑀺. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀲𑀢𑁆𑀢 𑀲𑀢𑁆𑀢𑁂𑀯 𑀘𑁂𑀢𑀲𑀺𑀓𑀸. 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀦 𑀉𑀧𑁂𑀓𑁆𑀔𑀸𑀞𑀸𑀦𑁂 𑀲𑀼𑀔𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀓𑀸𑀬𑀺𑀓𑀲𑀸𑀢𑀮𑀓𑁆𑀔𑀡𑀸, 𑀧𑀻𑀡𑀦𑀭𑀲𑀸, 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑁮𑁪.

𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀺𑀲𑀼;

𑀲𑀢𑀺 𑀓𑀲𑁆𑀫𑀸 𑀉𑀧𑁂𑀓𑁆𑀔𑀸𑀯, 𑀯𑀼𑀢𑁆𑀢𑀸 𑀘𑀢𑀽𑀲𑀼 𑀲𑀢𑁆𑀣𑀼𑀦𑀸.

𑁮𑁫.

𑀉𑀧𑀸𑀤𑀸𑀬 ¶ 𑀘 𑀭𑀽𑀧𑁂𑀦, 𑀉𑀧𑀸𑀤𑀸𑀭𑀽𑀧𑀓𑁂 𑀧𑀦;

𑀲𑀗𑁆𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲, 𑀤𑀼𑀩𑁆𑀩𑀮𑀢𑁆𑀢𑀸𑀢𑀺 𑀤𑀻𑀧𑀬𑁂.

𑁮𑁬.

𑀧𑀲𑀸𑀤𑀁 𑀧𑀦𑀢𑀺𑀓𑁆𑀓𑀫𑁆𑀫, 𑀓𑀽𑀝𑀁𑀯 𑀧𑀺𑀘𑀼𑀧𑀺𑀡𑁆𑀟𑀓𑀁;

𑀪𑀽𑀢𑀭𑀽𑀧𑁂𑀦 𑀪𑀽𑀢𑀸𑀦𑀁, 𑀖𑀝𑁆𑀝𑀦𑀸𑀬 𑀲𑀼𑀔𑀸𑀤𑀺𑀓𑀁.

𑀢𑀲𑁆𑀫𑀸 ¶ 𑀓𑀸𑀬𑀯𑀺𑀜𑁆𑀜𑀸𑀡𑀁 𑀲𑀼𑀔𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑁄𑀥𑀸𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀸 𑀙, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀲𑀳 𑀅𑀝𑁆𑀞, 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑁂𑀳𑀺 𑀤𑁆𑀯𑀻𑀳𑀺 𑀬𑁂𑀯𑀸𑀧𑀦𑀓𑁂𑀳𑀺 𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦. 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀦 𑀧𑀻𑀢𑀺𑀅𑀥𑀺𑀓𑀸 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀜𑁆𑀘 𑀦𑀸𑀦𑀢𑁆𑀢𑀁. 𑀢𑀲𑁆𑀫𑀸𑀯𑁂𑀢𑁆𑀣 𑀏𑀓𑀸𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀏𑀯𑀁 𑀅𑀳𑁂𑀢𑀼𑀓𑀸𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀲𑀤𑀺𑀲𑀸𑀬𑁂𑀯𑀸𑀢𑀺.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 ¶ 𑀮𑁄𑀓𑀼𑀢𑁆𑀢𑀭𑀸. 𑀢𑁂 𑀲𑀩𑁆𑀩𑁂 𑀢𑁂𑀲𑀁𑀬𑁂𑀯 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀲𑀤𑀺𑀲𑀸 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘𑁂𑀢𑀲𑀺𑀓𑁂𑀳𑀺 𑀲𑀤𑀺𑀲𑀸. 𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀦𑀸𑀫. 𑀢𑁂 𑀧𑀦 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀯𑀼𑀢𑁆𑀢𑀘𑁂𑀢𑀲𑀺𑀓𑀲𑀤𑀺𑀲𑀸. 𑀏𑀢𑁆𑀣 𑀧𑀦 𑀓𑀸𑀬𑀯𑀺𑀜𑁆𑀜𑀸𑀡𑁂 𑀤𑀼𑀓𑁆𑀔𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀓𑀸𑀬𑀺𑀓𑀸𑀩𑀸𑀥𑀮𑀓𑁆𑀔𑀡𑀸. 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸𑀬𑁂𑀯𑀸𑀢𑀺. 𑀏𑀯𑀁 𑀙𑀢𑁆𑀢𑀺𑀁𑀲 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀘 𑀘𑁂𑀢𑀲𑀺𑀓𑀸 𑀪𑀽𑀫𑀺𑀢𑁄 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀸 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀲𑀳𑁂𑀢𑀼𑀓𑀸, 𑀢𑁂 𑀧𑀦 𑀅𑀝𑁆𑀞𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀸, 𑀢𑁂 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂 ¶ 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀓𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑁆𑀪𑀯𑀢𑁄 𑀧𑀦𑁂𑀢𑁆𑀣 𑀩𑀮𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀳𑁄𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀧𑀻𑀢𑀺𑀬𑀸 𑀲𑀳. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀲𑀓𑀲𑀓𑀪𑀽𑀫𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸𑀢𑀺. 𑀏𑀯𑀁 𑀯𑀻𑀲𑀢𑀺 𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘 𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 ¶ ¶ 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀪𑀺𑀦𑁆𑀦𑁂𑀦 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺.

𑁮𑁭.

𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀺𑀧𑀸𑀓𑀓𑁆𑀭𑀺𑀬𑀸-

𑀳𑀤𑀬𑁂𑀳𑀺 𑀬𑀼𑀢𑀸 𑀧𑀦 𑀘𑁂𑀢𑀲𑀺𑀓𑀸;

𑀲𑀓𑀮𑀸𑀧𑀺 𑀘 𑀲𑀸𑀥𑀼 𑀫𑀬𑀸 𑀓𑀣𑀺𑀢𑀸,

𑀲𑀼𑀕𑀢𑁂𑀦 𑀫𑀳𑀸𑀫𑀼𑀦𑀺𑀦𑀸 𑀓𑀣𑀺𑀢𑀸.

𑁮𑁮.

𑀅𑀯𑀕𑀘𑁆𑀙𑀢𑀺 𑀬𑁄 𑀇𑀫𑀁 𑀅𑀦𑀼𑀦𑀁,

𑀧𑀭𑀫𑀁 𑀢𑀲𑁆𑀲 𑀲𑀫𑀦𑁆𑀢𑀢𑁄 𑀫𑀢𑀺;

𑀅𑀪𑀺𑀥𑀫𑁆𑀫𑀦𑀬𑁂 𑀤𑀽𑀭𑀸𑀲𑀤𑁂,

𑀅𑀢𑀺𑀕𑀫𑁆𑀪𑀻𑀭𑀞𑀸𑀦𑁂 𑀯𑀺𑀚𑀫𑁆𑀪𑀢𑁂.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁄

𑁮𑁯.

𑀲𑀩𑁆𑀩𑁂 ¶ ¶ 𑀘𑁂𑀢𑀲𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀦𑀸𑀫𑀲𑀸𑀫𑀜𑁆𑀜𑀢𑁄𑀬𑁂𑀯, 𑀤𑁆𑀯𑁂𑀧𑀜𑁆𑀜𑀸𑀲 𑀪𑀯𑀦𑁆𑀢𑀺 𑀢𑁂.

𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀺 𑀙 𑀬𑀼𑀕𑀸𑀦𑀺, 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀉𑀤𑁆𑀥𑀘𑁆𑀘𑀁 𑀫𑀸𑀦𑁄 𑀤𑀺𑀝𑁆𑀞𑀺 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀁 𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀜𑁆𑀘𑀸𑀢𑀺.

𑁯𑁦.

𑀘𑀢𑀼𑀧𑀜𑁆𑀜𑀸𑀲𑀥𑀸 ¶ 𑀓𑀸𑀫𑁂, 𑀭𑀽𑀧𑁂 𑀧𑀜𑁆𑀘𑀤𑀲𑁂𑀭𑀺𑀢𑀸;

𑀢𑁂 𑀳𑁄𑀦𑁆𑀢𑀺 𑀤𑁆𑀯𑀸𑀤𑀲𑀸𑀭𑀽𑀧𑁂, 𑀘𑀢𑁆𑀢𑀸𑀮𑀻𑀲𑀫𑀦𑀸𑀲𑀯𑀸.

𑁯𑁧.

𑀏𑀓𑀯𑀻𑀲𑀲𑀢𑀁 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀫𑀸𑀲𑀢𑁄;

𑀏𑀢𑁂𑀲𑀼 𑀢𑁂𑀲𑀫𑀼𑀧𑁆𑀧𑀢𑁆𑀢𑀺𑀁, 𑀉𑀤𑁆𑀥𑀭𑀺𑀢𑁆𑀯𑀸 𑀧𑀦𑁂𑀓𑀓𑀁.

𑁯𑁨.

𑀨𑀲𑁆𑀲𑀸𑀤𑀻𑀦𑀁 𑀢𑀼 𑀥𑀫𑁆𑀫𑀸𑀦𑀁, 𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁;

𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑁆𑀯𑀳𑀁.

𑁯𑁩.

𑀏𑀓𑀕𑁆𑀕𑀢𑀸 𑀫𑀦𑀓𑁆𑀓𑀸𑀭𑁄, 𑀚𑀻𑀯𑀺𑀢𑀁 𑀨𑀲𑁆𑀲𑀧𑀜𑁆𑀘𑀓𑀁;

𑀅𑀝𑁆𑀞𑁂𑀢𑁂 𑀅𑀯𑀺𑀦𑀺𑀩𑁆𑀪𑁄𑀕𑀸, 𑀏𑀓𑀼𑀧𑁆𑀧𑀸𑀤𑀸 𑀲𑀳𑀓𑁆𑀔𑀬𑀸.

𑁯𑁪.

𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀏𑀓𑀕𑁆𑀕𑀢𑀸 𑀫𑀦𑀓𑁆𑀓𑀸𑀭𑁄, 𑀲𑀩𑁆𑀩𑀲𑀸𑀥𑀸𑀭𑀡𑀸 𑀇𑀫𑁂.

𑁯𑁫.

𑀯𑀺𑀢𑀓𑁆𑀓𑁄 𑀧𑀜𑁆𑀘𑀧𑀜𑁆𑀜𑀸𑀲-𑀘𑀺𑀢𑁆𑀢𑁂𑀲𑀼 𑀲𑀫𑀼𑀤𑀻𑀭𑀺𑀢𑁄;

𑀘𑀸𑀭𑁄 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼, 𑀚𑀸𑀬𑀢𑁂 𑀦𑀢𑁆𑀣𑀺 𑀲𑀁𑀲𑀬𑁄.

𑁯𑁬.

𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 ¶ , 𑀧𑀻𑀢𑀺 𑀢𑁂𑀲𑀝𑁆𑀞𑀺𑀬𑀸 𑀲𑀼𑀔𑀁;

𑀉𑀧𑁂𑀓𑁆𑀔𑀸 𑀧𑀜𑁆𑀘𑀧𑀜𑁆𑀜𑀸𑀲-𑀘𑀺𑀢𑁆𑀢𑁂 𑀤𑀼𑀓𑁆𑀔𑀁 𑀢𑀼 𑀢𑀻𑀲𑀼 𑀳𑀺.

𑁯𑁭.

𑀳𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀦;

𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀓𑀲𑁆𑀫𑀺𑀁, 𑀢𑀣𑁂𑀓𑀫𑁆𑀳𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁.

𑁯𑁮.

𑀧𑀜𑁆𑀘𑀼𑀢𑁆𑀢𑀭𑀲𑀢𑁂 ¶ 𑀘𑀺𑀢𑁆𑀢𑁂, 𑀯𑀻𑀭𑀺𑀬𑀁 𑀆𑀳 𑀦𑀸𑀬𑀓𑁄;

𑀘𑀢𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑀩𑁆𑀭𑀯𑀺.

𑁯𑁯.

𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀘𑁂𑀓𑀳𑁂𑀢𑀼𑀓𑁂;

𑀏𑀓𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂, 𑀙𑀦𑁆𑀤𑀲𑁆𑀲𑀼𑀧𑁆𑀧𑀢𑁆𑀢𑀺𑀫𑀼𑀤𑁆𑀤𑀺𑀲𑁂.

𑁧𑁦𑁦.

𑀞𑀧𑁂𑀢𑁆𑀯𑀸 𑀤𑀲 𑀯𑀺𑀜𑁆𑀜𑀸𑀡𑁂, 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑀫𑁆𑀧𑀺 𑀘;

𑀤𑀲𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂, 𑀅𑀥𑀺𑀫𑁄𑀓𑁆𑀔𑁄 𑀉𑀤𑀻𑀭𑀺𑀢𑁄.

𑁧𑁦𑁧.

𑀲𑀤𑁆𑀥𑀸 ¶ 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀅𑀮𑁄𑀪𑀸𑀤𑁄𑀲𑀫𑀚𑁆𑀛𑀢𑀸;

𑀙𑀴𑁂𑀯 𑀬𑀼𑀕𑀴𑀸 𑀘𑀸𑀢𑀺, 𑀥𑀫𑁆𑀫𑀸 𑀏𑀓𑀽𑀦𑀯𑀻𑀲𑀢𑀺.

𑁧𑁦𑁨.

𑀏𑀓𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂, 𑀚𑀸𑀬𑀦𑁆𑀢𑀺 𑀦𑀺𑀬𑀢𑀸 𑀇𑀫𑁂;

𑀅𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑁂𑀲𑀼, 𑀅𑀧𑀼𑀜𑁆𑀜𑁂𑀲𑀼 𑀦 𑀚𑀸𑀬𑀭𑁂.

𑁧𑁦𑁩.

𑀏𑀓𑀽𑀦𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂, 𑀧𑀜𑁆𑀜𑀸 𑀚𑀸𑀬𑀢𑀺 𑀲𑀩𑁆𑀩𑀤𑀸;

𑀅𑀝𑁆𑀞𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀺𑀬𑀼𑀁.

𑁧𑁦𑁪.

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑁂𑀲𑀼, 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁂𑀲𑀼 𑀘;

𑀘𑀢𑁆𑀢𑀸𑀮𑀻𑀲𑀯𑀺𑀥𑁂 𑀘𑀺𑀢𑁆𑀢𑁂, 𑀲𑀸𑀝𑁆𑀞𑀓𑁂 𑀯𑀺𑀭𑀢𑀺𑀢𑁆𑀢𑀬𑀁.

𑁧𑁦𑁫.

𑀲𑀤𑁆𑀥𑀸 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀅𑀮𑁄𑀪𑀸𑀤𑀺𑀢𑁆𑀢𑀬𑀫𑁆𑀧𑀺 𑀘;

𑀬𑀼𑀕𑀴𑀸𑀦𑀺 𑀙 𑀫𑀚𑁆𑀛𑀢𑁆𑀢𑀁, 𑀓𑀭𑀼𑀡𑀸𑀫𑀼𑀤𑀺𑀢𑀸𑀧𑀺 𑀘.

𑁧𑁦𑁬.

𑀢𑀣𑀸 𑀯𑀺𑀭𑀢𑀺𑀬𑁄 𑀢𑀺𑀲𑁆𑀲𑁄, 𑀲𑀩𑁆𑀩𑁂 𑀢𑁂 𑀧𑀜𑁆𑀘𑀯𑀻𑀲𑀢𑀺;

𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘𑀸𑀧𑀺, 𑀓𑀼𑀲𑀮𑁂𑀦 𑀧𑀓𑀸𑀲𑀺𑀢𑀸.

𑁧𑁦𑁭.

𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀫𑁄𑀳𑁄 𑀉𑀤𑁆𑀥𑀘𑁆𑀘𑀫𑁂𑀯 𑀘;

𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑁂𑀲𑀼, 𑀦𑀺𑀬𑀢𑀸𑀬𑁂𑀯 𑀚𑀸𑀬𑀭𑁂.

𑁧𑁦𑁮.

𑀮𑁄𑀪𑁄 ¶ 𑀤𑁄𑀲𑁄 𑀘 𑀫𑁄𑀳𑁄 𑀘, 𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄;

𑀫𑀺𑀤𑁆𑀥𑀫𑀼𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀣𑀺𑀦𑀁 𑀫𑀘𑁆𑀙𑀭𑀺𑀬𑀫𑁆𑀧𑀺 𑀘.

𑁧𑁦𑁯.

𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀇𑀲𑁆𑀲𑀸 𑀘 𑀤𑁄𑀫𑀦𑀲𑁆𑀲𑀓𑀁;

𑀏𑀢𑁂 𑀅𑀓𑀼𑀲𑀮𑀸 𑀯𑀼𑀢𑁆𑀢𑀸, 𑀏𑀓𑀦𑁆𑀢𑁂𑀦 𑀫𑀳𑁂𑀲𑀺𑀦𑀸.

𑁧𑁧𑁦.

𑀮𑁄𑀪𑁄 𑀅𑀝𑁆𑀞𑀲𑀼 𑀦𑀺𑀤𑁆𑀤𑀺𑀝𑁆𑀞𑁄, 𑀯𑀼𑀢𑁆𑀢𑀸 𑀘𑀢𑀽𑀲𑀼 𑀤𑀺𑀝𑁆𑀞𑀺𑀢𑀼;

𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑁂𑀲𑀼, 𑀤𑁄𑀲𑁄𑀤𑁆𑀯𑀻𑀲𑁆𑀯𑁂𑀯 𑀚𑀸𑀬𑀢𑁂.

𑁧𑁧𑁧.

𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀸, 𑀤𑁆𑀯𑀻𑀲𑀼 𑀚𑀸𑀬𑀦𑁆𑀢𑀺 𑀦𑁄 𑀲𑀳;

𑀯𑀺𑀘𑀺𑀓𑀺𑀘𑁆𑀙𑀸 𑀧𑀦𑁂𑀓𑀲𑁆𑀫𑀺𑀁, 𑀣𑀺𑀦𑀫𑀺𑀤𑁆𑀥𑀁 𑀢𑀼 𑀧𑀜𑁆𑀘𑀲𑀼.

𑁧𑁧𑁨.

𑀨𑀲𑁆𑀲𑁄 ¶ 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀚𑀻𑀯𑀺𑀢𑀁 𑀫𑀦𑁄;

𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀧𑀻𑀢𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘.

𑁧𑁧𑁩.

𑀙𑀦𑁆𑀤𑁄 𑀘𑁂𑀯𑀸𑀥𑀺𑀫𑁄𑀓𑁆𑀔𑁄 𑀘, 𑀫𑀦𑀲𑀺𑀓𑀸𑀭𑁄 𑀘 𑀘𑀼𑀤𑁆𑀤𑀲;

𑀓𑀼𑀲𑀮𑀸𑀓𑀼𑀲𑀮𑀸 𑀘𑁂𑀯, 𑀳𑁄𑀦𑁆𑀢𑀺 𑀅𑀩𑁆𑀬𑀸𑀓𑀢𑀸𑀧𑀺 𑀘.

𑁧𑁧𑁪.

𑀏𑀓𑀽𑀦𑀢𑀺𑀁𑀲𑀘𑀺𑀢𑁆𑀢𑁂𑀲𑀼, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀫𑀢𑀁;

𑀘𑀢𑀼𑀛𑀸𑀦𑀗𑁆𑀕𑀬𑀼𑀢𑁆𑀢𑀸𑀦𑀺, 𑀲𑀢𑁆𑀢𑀢𑀺𑀁𑀲𑀸𑀢𑀺 𑀦𑀺𑀤𑁆𑀤𑀺𑀲𑁂.

𑁧𑁧𑁫.

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀢𑀺𑀯𑀗𑁆𑀕𑀺𑀓𑀫𑀼𑀤𑀻𑀭𑀺𑀢𑀁;

𑀘𑀢𑀼𑀢𑀺𑀁𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀤𑀼𑀯𑀗𑁆𑀕𑀺𑀓𑀫𑀼𑀤𑀻𑀭𑀺𑀢𑀁.

𑁧𑁧𑁬.

𑀲𑀪𑀸𑀯𑁂𑀦𑀸𑀯𑀺𑀢𑀓𑁆𑀓𑁂𑀲𑀼 ¶ , 𑀛𑀸𑀦𑀗𑁆𑀕𑀸𑀦𑀺 𑀦 𑀉𑀤𑁆𑀥𑀭𑁂;

𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀉𑀤𑁆𑀥𑀭𑁂.

𑁧𑁧𑁭.

𑀢𑀻𑀡𑀺 𑀲𑁄𑀴𑀲𑀘𑀺𑀢𑁆𑀢𑁂𑀲𑀼, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀤𑁂 𑀩𑀼𑀥𑁄;

𑀏𑀓𑀲𑁆𑀫𑀺𑀁 𑀧𑀦 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀢𑁂𑀭𑀲𑀲𑀼𑀤𑁆𑀥𑀭𑁂.

𑁧𑁧𑁮.

𑀲𑀢𑁆𑀢 𑀤𑁆𑀯𑀸𑀤𑀲𑀘𑀺𑀢𑁆𑀢𑁂𑀲𑀼, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀺𑀦𑁄𑀩𑁆𑀭𑀯𑀺;

𑀏𑀓𑁂𑀦𑀽𑀦𑁂𑀲𑀼 𑀅𑀝𑁆𑀞𑁂𑀯, 𑀘𑀢𑁆𑀢𑀸𑀮𑀻𑀲𑀫𑀦𑁂𑀲𑀼 𑀘.

𑁧𑁧𑁯.

𑀘𑀢𑁆𑀢𑀸𑀮𑀻𑀲𑀸𑀬 ¶ 𑀘𑀺𑀢𑁆𑀢𑁂𑀲𑀼, 𑀦𑀯𑀓𑀁 𑀦𑀸𑀬𑀓𑁄𑀩𑁆𑀭𑀯𑀺;

𑀏𑀯𑀁 𑀇𑀦𑁆𑀤𑁆𑀭𑀺𑀬𑀬𑁄𑀕𑁄𑀧𑀺, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁧𑁨𑁦.

𑀅𑀫𑀕𑁆𑀕𑀗𑁆𑀕𑀸𑀦𑀺 𑀦𑀸𑀫𑁂𑀢𑁆𑀣, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸;

𑀛𑀸𑀦𑀗𑁆𑀕𑀸𑀦𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀯𑀺𑀜𑁆𑀜𑀸𑀡𑁂𑀲𑀼 𑀤𑁆𑀯𑀺𑀧𑀜𑁆𑀘𑀲𑀼.

𑁧𑁨𑁧.

𑀏𑀓𑀁 𑀘𑀺𑀢𑁆𑀢𑀁 𑀤𑀼𑀫𑀕𑁆𑀕𑀗𑁆𑀕𑀁, 𑀢𑀺𑀫𑀕𑁆𑀕𑀗𑁆𑀕𑀸𑀦𑀺 𑀲𑀢𑁆𑀢𑀲𑀼;

𑀘𑀢𑁆𑀢𑀸𑀮𑀻𑀲𑀸𑀬 𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑁄 𑀲𑁄 𑀘𑀢𑀼𑀭𑀗𑁆𑀕𑀺𑀓𑁄.

𑁧𑁨𑁨.

𑀧𑀜𑁆𑀘𑀤𑁆𑀤𑀲𑀲𑀼 𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄 𑀫𑀢𑁄;

𑀯𑀼𑀢𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑁄 𑀲𑀢𑁆𑀢𑀗𑁆𑀕𑀺𑀓𑁄𑀧𑀺 𑀘.

𑁧𑁨𑁩.

𑀫𑀕𑁆𑀕𑁄 ¶ 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼, 𑀫𑀢𑁄 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀳𑀺;

𑀏𑀯𑀁 𑀢𑀼 𑀲𑀩𑁆𑀩𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑀼𑀤𑁆𑀥𑀭𑁂.

𑁧𑁨𑁪.

𑀩𑀮𑀸𑀦𑀺 𑀤𑁆𑀯𑁂 𑀤𑁆𑀯𑀺𑀘𑀺𑀢𑁆𑀢𑁂𑀲𑀼, 𑀏𑀓𑀲𑁆𑀫𑀺𑀁 𑀢𑀻𑀡𑀺 𑀤𑀻𑀧𑀬𑁂;

𑀏𑀓𑀸𑀤𑀲𑀲𑀼 𑀘𑀢𑁆𑀢𑀸𑀭𑀺, 𑀙 𑀤𑁆𑀯𑀸𑀤𑀲𑀲𑀼 𑀦𑀺𑀤𑁆𑀤𑀺𑀲𑁂.

𑁧𑁨𑁫.

𑀏𑀓𑀽𑀦𑀸𑀲𑀻𑀢𑀺𑀬𑀸 𑀲𑀢𑁆𑀢, 𑀲𑁄𑀴𑀲𑁂𑀯𑀸𑀩𑀮𑀸𑀦𑀺 𑀢𑀼;

𑀘𑀺𑀢𑁆𑀢𑀫𑁂𑀯𑀁 𑀢𑀼 𑀯𑀺𑀜𑁆𑀜𑁂𑀬𑁆𑀬𑀁, 𑀲𑀩𑀮𑀁 𑀅𑀩𑀮𑀫𑁆𑀧𑀺 𑀘.

𑁧𑁨𑁬.

𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑀮𑀺𑀦𑁆𑀤𑁆𑀭𑀺𑀬𑀸𑀦𑀺,

𑀘𑀺𑀢𑁆𑀢𑁂𑀲𑀼 𑀚𑀸𑀬𑀦𑁆𑀢𑀺 𑀳𑀺 𑀬𑁂𑀲𑀼 𑀬𑀸𑀦𑀺;

𑀫𑀬𑀸 𑀲𑀫𑀸𑀲𑁂𑀦 𑀲𑀫𑀼𑀤𑁆𑀥𑀭𑀺𑀢𑁆𑀯𑀸,

𑀯𑀼𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀢𑁂𑀲𑀼.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑁄

𑁧𑁨𑁭.

𑀇𑀢𑁄 ¶ ¶ 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀦𑀬𑀫𑁂𑀓𑀯𑀺𑀥𑀸𑀤𑀺𑀓𑀁;

𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁, 𑀩𑀼𑀤𑁆𑀥𑀺𑀬𑀸 𑀧𑀦 𑀯𑀼𑀤𑁆𑀥𑀺𑀬𑀸.

𑁧𑁨𑁮.

𑀲𑀩𑁆𑀩𑀫𑁂𑀓𑀯𑀺𑀥𑀁 𑀘𑀺𑀢𑁆𑀢𑀁, 𑀯𑀺𑀚𑀸𑀦𑀦𑀲𑀪𑀸𑀯𑀢𑁄;

𑀤𑀼𑀯𑀺𑀥𑀜𑁆𑀘 𑀪𑀯𑁂 𑀘𑀺𑀢𑁆𑀢𑀁, 𑀅𑀳𑁂𑀢𑀼𑀓𑀲𑀳𑁂𑀢𑀼𑀢𑁄.

𑁧𑁨𑁯.

𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀺𑀧𑀸𑀓𑀸 𑀳𑀺, 𑀓𑀸𑀫𑁂 𑀤𑀲 𑀘 𑀧𑀜𑁆𑀘 𑀘;

𑀓𑁆𑀭𑀺𑀬𑀸 𑀢𑀺𑀲𑁆𑀲𑁄𑀢𑀺 𑀲𑀩𑁆𑀩𑁂𑀧𑀺, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸.

𑁧𑁩𑁦.

𑀏𑀓𑀲𑀢𑁆𑀢𑀢𑀺 𑀲𑁂𑀲𑀸𑀦𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑁂𑀲𑀺𑀦𑀸;

𑀲𑀳𑁂𑀢𑀼𑀓𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀸𑀤𑀺𑀦𑀸 𑀳𑁂𑀢𑀼𑀯𑀸𑀤𑀺𑀦𑀸.

𑁧𑁩𑁧.

𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀢𑁄 ¶ , 𑀢𑀣𑁄𑀪𑀬𑀯𑀲𑁂𑀦 𑀘;

𑀲𑀩𑁆𑀩𑀁 𑀯𑀼𑀢𑁆𑀢𑀧𑀓𑀸𑀭𑀁 𑀢𑀼, 𑀢𑀺𑀯𑀺𑀥𑀁 𑀳𑁄𑀢𑀺 𑀫𑀸𑀦𑀲𑀁.

𑁧𑁩𑁨.

𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘, 𑀭𑀽𑀧𑁂 𑀧𑀜𑁆𑀘𑀤𑀲𑀸𑀧𑀺 𑀘;

𑀆𑀤𑀺𑀫𑀕𑁆𑀕𑁄 𑀲𑀺𑀢𑀼𑀧𑁆𑀧𑀸𑀤𑁄, 𑀫𑀦𑁄𑀥𑀸𑀢𑀼 𑀓𑁆𑀭𑀺𑀬𑀸𑀧𑀺 𑀘.

𑁧𑁩𑁩.

𑀤𑁄𑀫𑀦𑀲𑁆𑀲𑀤𑁆𑀯𑀬𑀜𑁆𑀘𑀸𑀧𑀺, 𑀢𑁂𑀘𑀢𑁆𑀢𑀸𑀮𑀻𑀲 𑀫𑀸𑀦𑀲𑀸;

𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀦𑀸 𑀯𑀢𑁆𑀣𑀼𑀁, 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀸.

𑁧𑁩𑁪.

𑀅𑀭𑀽𑀧𑀸𑀯𑀘𑀭𑀧𑀸𑀓𑀸 𑀘, 𑀏𑀓𑀦𑁆𑀢𑁂𑀦 𑀅𑀯𑀢𑁆𑀣𑀼𑀓𑀸;

𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀺, 𑀘𑀺𑀢𑁆𑀢𑀸𑀦𑀼𑀪𑀬𑀣𑀸 𑀲𑀺𑀬𑀼𑀁.

𑁧𑁩𑁫.

𑀏𑀓𑁂𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀧𑀜𑁆𑀘𑀸𑀭𑀫𑁆𑀫𑀡𑀫𑁂𑀯 𑀘;

𑀙𑀴𑀸𑀭𑀫𑁆𑀫𑀡𑀓𑀜𑁆𑀘𑁂𑀢𑀺, 𑀏𑀯𑀫𑁆𑀧𑀺 𑀢𑀺𑀯𑀺𑀥𑀁 𑀲𑀺𑀬𑀸.

𑁧𑁩𑁬.

𑀯𑀺𑀜𑁆𑀜𑀸𑀡𑀸𑀦𑀺 𑀘 𑀤𑁆𑀯𑁂𑀧𑀜𑁆𑀘, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘;

𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯, 𑀞𑀧𑁂𑀢𑁆𑀯𑀸𑀪𑀺𑀜𑁆𑀜𑀫𑀸𑀦𑀲𑀁.

𑁧𑁩𑁭.

𑀢𑁂𑀘𑀢𑁆𑀢𑀸𑀮𑀻𑀲 ¶ 𑀯𑀺𑀜𑁆𑀜𑁂𑀬𑁆𑀬𑀸, 𑀏𑀓𑁂𑀓𑀸𑀭𑀫𑁆𑀫𑀡𑀸 𑀧𑀦;

𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀢𑀢𑁆𑀣, 𑀧𑀜𑁆𑀘𑀸𑀭𑀫𑁆𑀫𑀡𑀫𑀻𑀭𑀺𑀢𑀁.

𑁧𑁩𑁮.

𑀢𑁂𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀺, 𑀙𑀴𑀸𑀭𑀫𑁆𑀫𑀡𑀺𑀓𑀸 𑀫𑀢𑀸;

𑀢𑀣𑀸 𑀘 𑀢𑀺𑀯𑀺𑀥𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄.

𑁧𑁩𑁯.

𑀅𑀳𑁂𑀢𑀼𑀁 𑀏𑀓𑀳𑁂𑀢𑀼𑀜𑁆𑀘, 𑀤𑁆𑀯𑀺𑀳𑁂𑀢𑀼𑀜𑁆𑀘 𑀢𑀺𑀳𑁂𑀢𑀼𑀓𑀁;

𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁧𑁪𑁦.

𑀳𑁂𑀝𑁆𑀞𑀸 𑀫𑀬𑀸𑀧𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸;

𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀁𑀬𑀼𑀢𑁆𑀢𑀁, 𑀏𑀓𑀳𑁂𑀢𑀼𑀫𑀼𑀤𑀻𑀭𑀺𑀢𑀁.

𑁧𑁪𑁧.

𑀓𑀸𑀫𑁂 ¶ 𑀤𑁆𑀯𑀸𑀤𑀲𑀥𑀸 𑀧𑀼𑀜𑁆𑀜-𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀧𑀦;

𑀤𑀲𑀥𑀸𑀓𑀼𑀲𑀮𑀸 𑀘𑀸𑀢𑀺, 𑀩𑀸𑀯𑀻𑀲𑀢𑀺 𑀤𑀼𑀳𑁂𑀢𑀼𑀓𑀸.

𑁧𑁪𑁨.

𑀓𑀸𑀫𑁂 ¶ 𑀤𑁆𑀯𑀸𑀤𑀲𑀥𑀸 𑀧𑀼𑀜𑁆𑀜-𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀧𑀦;

𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯, 𑀅𑀧𑁆𑀧𑀫𑀸𑀡𑀁 𑀢𑀺𑀳𑁂𑀢𑀼𑀓𑀁.

𑁧𑁪𑁩.

𑀭𑀽𑀧𑀻𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺-𑀚𑀦𑀓𑀸𑀚𑀦𑀓𑀸𑀤𑀺𑀢𑁄;

𑀏𑀯𑀜𑁆𑀘𑀸𑀧𑀺 𑀳𑀺 𑀢𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀲𑀩𑁆𑀩𑀁 𑀘𑀢𑀼𑀩𑁆𑀩𑀺𑀥𑀁.

𑁧𑁪𑁪.

𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀢𑀢𑁆𑀣, 𑀓𑀼𑀲𑀮𑀸 𑀓𑀸𑀫𑀥𑀸𑀢𑀼𑀬𑀸;

𑀢𑀣𑀸 𑀤𑀲 𑀓𑁆𑀭𑀺𑀬𑀸 𑀓𑀸𑀫𑁂, 𑀅𑀪𑀺𑀜𑁆𑀜𑀸𑀫𑀸𑀦𑀲𑀁 𑀤𑁆𑀯𑀬𑀁.

𑁧𑁪𑁫.

𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀺, 𑀓𑀧𑁆𑀧𑁂𑀦𑁆𑀢𑀺 𑀇𑀭𑀺𑀬𑀸𑀧𑀣𑀁;

𑀚𑀦𑀬𑀦𑁆𑀢𑀺 𑀘 𑀯𑀺𑀜𑁆𑀜𑀢𑁆𑀢𑀺𑀁, 𑀇𑀫𑁂 𑀤𑁆𑀯𑀢𑁆𑀢𑀺𑀁𑀲 𑀫𑀸𑀦𑀲𑀸.

𑁧𑁪𑁬.

𑀓𑀼𑀲𑀮𑀸 𑀘 𑀓𑁆𑀭𑀺𑀬𑀸 𑀘𑁂𑀯, 𑀢𑁂 𑀫𑀳𑀕𑁆𑀕𑀢𑀫𑀸𑀦𑀲𑀸;

𑀅𑀝𑁆𑀞𑀸𑀦𑀸𑀲𑀯𑀘𑀺𑀢𑁆𑀢𑀸𑀦𑀺, 𑀙𑀩𑁆𑀩𑀻𑀲𑀢𑀺 𑀘 𑀫𑀸𑀦𑀲𑀸.

𑁧𑁪𑁭.

𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀺, 𑀓𑀧𑁆𑀧𑁂𑀦𑁆𑀢𑀺 𑀇𑀭𑀺𑀬𑀸𑀧𑀣𑀁;

𑀘𑁄𑀧𑀦𑀁 𑀦 𑀘 𑀧𑀸𑀧𑁂𑀦𑁆𑀢𑀺, 𑀤𑁆𑀯𑀺𑀓𑀺𑀘𑁆𑀘𑀸 𑀦𑀺𑀬𑀢𑀸 𑀇𑀫𑁂.

𑁧𑁪𑁮.

𑀞𑀧𑁂𑀢𑁆𑀯𑀸 𑀤𑀲 𑀯𑀺𑀜𑁆𑀜𑀸𑀡𑁂, 𑀯𑀺𑀧𑀸𑀓𑀸 𑀤𑁆𑀯𑀻𑀲𑀼 𑀪𑀽𑀫𑀺𑀲𑀼;

𑀓𑁆𑀭𑀺𑀬𑀸 𑀘𑁂𑀯 𑀫𑀦𑁄𑀥𑀸𑀢𑀼, 𑀇𑀫𑀸𑀦𑁂𑀓𑀽𑀦𑀯𑀻𑀲𑀢𑀺.

𑁧𑁪𑁯.

𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 ¶ 𑀭𑀽𑀧𑀸𑀦𑀺, 𑀦 𑀓𑀭𑁄𑀦𑁆𑀢𑀺𑀢𑀭𑀤𑁆𑀯𑀬𑀁;

𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀯𑀺𑀧𑀸𑀓𑀸 𑀘 𑀅𑀭𑀽𑀧𑀺𑀲𑀼.

𑁧𑁫𑁦.

𑀲𑀩𑁆𑀩𑁂𑀲𑀁 𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘, 𑀘𑀼𑀢𑀺𑀘𑀺𑀢𑁆𑀢𑀜𑁆𑀘𑀸𑀭𑀳𑀢𑁄;

𑀦 𑀓𑀭𑁄𑀦𑁆𑀢𑀺 𑀢𑀺𑀓𑀺𑀘𑁆𑀘𑀸𑀦𑀺, 𑀇𑀫𑁂 𑀲𑁄𑀴𑀲 𑀫𑀸𑀦𑀲𑀸.

𑁧𑁫𑁧.

𑀏𑀓𑀤𑁆𑀯𑀺𑀢𑀺𑀘𑀢𑀼𑀝𑁆𑀞𑀸𑀦-𑀧𑀜𑁆𑀘𑀝𑁆𑀞𑀸𑀦𑀧𑀪𑁂𑀤𑀢𑁄;

𑀧𑀜𑁆𑀘𑀥𑀸 𑀘𑀺𑀢𑁆𑀢𑀫𑀓𑁆𑀔𑀸𑀲𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄.

𑁧𑁫𑁨.

𑀓𑀼𑀲𑀮𑀸𑀓𑀼𑀲𑀮𑀸 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑀸𑀓𑁆𑀭𑀺𑀬𑀸;

𑀫𑀳𑀕𑁆𑀕𑀢𑀸 𑀓𑁆𑀭𑀺𑀬𑀸 𑀘𑁂𑀯, 𑀘𑀢𑁆𑀢𑀸𑀭𑁄 𑀨𑀮𑀫𑀸𑀦𑀲𑀸.

𑁧𑁫𑁩.

𑀲𑀩𑁆𑀩𑁂𑀯 ¶ 𑀧𑀜𑁆𑀘𑀧𑀜𑁆𑀜𑀸𑀲, 𑀦𑀺𑀧𑁆𑀧𑀧𑀜𑁆𑀘𑁂𑀦 𑀲𑀢𑁆𑀣𑀼𑀦𑀸;

𑀚𑀯𑀦𑀝𑁆𑀞𑀸𑀦𑀢𑁄𑀬𑁂𑀯, 𑀏𑀓𑀝𑁆𑀞𑀸𑀦𑁂 𑀦𑀺𑀬𑀸𑀫𑀺𑀢𑀸.

𑁧𑁫𑁪.

𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀤𑀲𑁆𑀲𑀦𑁂 𑀲𑀯𑀦𑁂 𑀢𑀣𑀸;

𑀖𑀸𑀬𑀦𑁂 𑀲𑀸𑀬𑀦𑁂 𑀞𑀸𑀦𑁂, 𑀨𑀼𑀲𑀦𑁂 𑀧𑀝𑀺𑀧𑀸𑀝𑀺𑀬𑀸.

𑁧𑁫𑁫.

𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀞𑀸𑀦𑁂, 𑀆𑀯𑀚𑁆𑀚𑀦𑁂 𑀧𑀝𑀺𑀘𑁆𑀙𑀦𑁂;

𑀅𑀝𑁆𑀞𑀲𑀝𑁆𑀞𑀺 𑀪𑀯𑀦𑁆𑀢𑁂𑀢𑁂, 𑀏𑀓𑀝𑁆𑀞𑀸𑀦𑀺𑀓𑀢𑀁 𑀕𑀢𑀸.

𑁧𑁫𑁬.

𑀧𑀼𑀦 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫, 𑀘𑀺𑀢𑁆𑀢𑀤𑁆𑀯𑀬𑀫𑀼𑀤𑀻𑀭𑀺𑀢𑀁;

𑀲𑁄𑀫𑀦𑀲𑁆𑀲𑀬𑀼𑀢𑀁 𑀧𑀜𑁆𑀘-𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀁 𑀲𑀺𑀬𑀸.

𑁧𑁫𑁭.

𑀢𑀤𑀸𑀭𑀫𑁆𑀫𑀡𑀁 𑀙𑀤𑁆𑀯𑀸𑀭𑁂, 𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀺;

𑀢𑀣𑀸 𑀯𑁄𑀝𑁆𑀞𑀩𑁆𑀩𑀦𑀁 𑀳𑁄𑀢𑀺, 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁄.

𑁧𑁫𑁮.

𑀫𑀦𑁄𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑁂𑀲𑀁, 𑀳𑁄𑀢𑀺 𑀆𑀯𑀚𑁆𑀚𑀦𑀁 𑀧𑀦;

𑀇𑀤𑀁 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫, 𑀳𑁄𑀢𑀺 𑀘𑀺𑀢𑁆𑀢𑀤𑁆𑀯𑀬𑀁 𑀧𑀦.

𑁧𑁫𑁯.

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀲𑁆𑀲, 𑀘𑀼𑀢𑀺𑀬𑀸 𑀞𑀸𑀦𑀢𑁄 𑀧𑀦;

𑀫𑀳𑀕𑁆𑀕𑀢𑀯𑀺𑀧𑀸𑀓𑀸 𑀢𑁂, 𑀦𑀯 𑀢𑀺𑀝𑁆𑀞𑀸𑀦𑀺𑀓𑀸 𑀫𑀢𑀸.

𑁧𑁬𑁦.

𑀅𑀝𑁆𑀞 ¶ 𑀓𑀸𑀫𑀸 𑀫𑀳𑀸𑀧𑀸𑀓𑀸, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀢𑁄;

𑀢𑀤𑀸𑀭𑀫𑁆𑀫𑀡𑀢𑁄 𑀘𑁂𑀯, 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘.

𑁧𑁬𑁧.

𑀘𑀢𑀼𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀸𑀦𑀺 ¶ , 𑀅𑀝𑁆𑀞 𑀳𑁄𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑁂;

𑀓𑀼𑀲𑀮𑀸𑀓𑀼𑀲𑀮𑀧𑀸𑀓𑀁 𑀢𑀼-𑀧𑁂𑀓𑁆𑀔𑀸𑀲𑀳𑀕𑀢𑀤𑁆𑀯𑀬𑀁.

𑁧𑁬𑁨.

𑀲𑀦𑁆𑀢𑀻𑀭𑀡𑀁 𑀪𑀯𑁂 𑀧𑀜𑁆𑀘-𑀤𑁆𑀯𑀸𑀭𑁂 𑀙𑀤𑁆𑀯𑀸𑀭𑀺𑀓𑁂𑀲𑀼 𑀘;

𑀢𑀤𑀸𑀭𑀫𑁆𑀫𑀡𑀢𑀁 𑀬𑀸𑀢𑀺, 𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀺.

𑁧𑁬𑁩.

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘;

𑀧𑀜𑁆𑀘𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀦𑁆𑀢𑀺, 𑀇𑀤𑀁 𑀤𑁆𑀯𑀬𑀫𑀼𑀤𑀻𑀭𑀺𑀢𑀁.

𑁧𑁬𑁪.

𑀧𑀜𑁆𑀘𑀓𑀺𑀘𑁆𑀘𑀁 ¶ 𑀤𑁆𑀯𑀬𑀁 𑀘𑀺𑀢𑁆𑀢𑀁, 𑀘𑀢𑀼𑀓𑀺𑀘𑁆𑀘𑀁 𑀧𑀦𑀝𑁆𑀞𑀓𑀁;

𑀢𑀺𑀓𑀺𑀘𑁆𑀘𑀁 𑀦𑀯𑀓𑀁 𑀤𑁆𑀯𑁂 𑀢𑀼, 𑀤𑁆𑀯𑀺𑀓𑀺𑀘𑁆𑀘𑀸 𑀲𑁂𑀲𑀫𑁂𑀓𑀓𑀁.

𑁧𑁬𑁫.

𑀪𑀯𑀗𑁆𑀕𑀸𑀯𑀚𑁆𑀚𑀦𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀚𑀯𑀦𑀁 𑀪𑀯𑀢𑀺 𑀲𑀢𑁆𑀢𑀫𑀁.

𑁧𑁬𑁬.

𑀙𑀩𑁆𑀩𑀺𑀥𑀁 𑀳𑁄𑀢𑀺 𑀢𑀁 𑀙𑀦𑁆𑀦𑀁, 𑀯𑀺𑀜𑁆𑀜𑀸𑀡𑀸𑀦𑀁 𑀧𑀪𑁂𑀤𑀢𑁄;

𑀲𑀢𑁆𑀢𑀥𑀸 𑀲𑀢𑁆𑀢𑀯𑀺𑀜𑁆𑀜𑀸𑀡-𑀥𑀸𑀢𑀽𑀦𑀁 𑀢𑀼 𑀧𑀪𑁂𑀤𑀢𑁄.

𑁧𑁬𑁭.

𑀏𑀓𑁂𑀓𑀸𑀭𑀫𑁆𑀫𑀡𑀁 𑀙𑀓𑁆𑀓𑀁, 𑀧𑀜𑁆𑀘𑀸𑀭𑀫𑁆𑀫𑀡𑀪𑁂𑀤𑀢𑁄;

𑀙𑀴𑀸𑀭𑀫𑁆𑀫𑀡𑀢𑁄 𑀘𑁂𑀯, 𑀳𑁄𑀢𑀺 𑀅𑀝𑁆𑀞𑀯𑀺𑀥𑀁 𑀫𑀦𑁄.

𑁧𑁬𑁮.

𑀢𑀢𑁆𑀣 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀳𑁄𑀦𑁆𑀢𑀺 𑀏𑀓𑁂𑀓𑀕𑁄𑀘𑀭𑀸;

𑀭𑀽𑀧𑀸𑀭𑀫𑁆𑀫𑀡𑀺𑀓𑀸 𑀤𑁆𑀯𑁂 𑀢𑀼, 𑀤𑁆𑀯𑁂 𑀤𑁆𑀯𑁂 𑀲𑀤𑁆𑀤𑀸𑀤𑀺𑀕𑁄𑀘𑀭𑀸.

𑁧𑁬𑁯.

𑀲𑀩𑁆𑀩𑀁 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁, 𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀺𑀯𑀚𑁆𑀚𑀺𑀢𑀁;

𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺, 𑀏𑀓𑁂𑀓𑀸𑀭𑀫𑁆𑀫𑀡𑀁 𑀪𑀯𑁂.

𑁧𑁭𑁦.

𑀏𑀓𑁂𑀓𑀸𑀭𑀫𑁆𑀫𑀡𑀁 𑀙𑀓𑁆𑀓-𑀫𑀺𑀤𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸;

𑀧𑀜𑁆𑀘𑀸𑀭𑀫𑁆𑀫𑀡𑀺𑀓𑀁 𑀦𑀸𑀫, 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀪𑀯𑁂.

𑁧𑁭𑁧.

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓𑀁;

𑀅𑀪𑀺𑀜𑁆𑀜𑀸𑀦𑀺 𑀘 𑀲𑀩𑁆𑀩𑀸𑀦𑀺, 𑀙𑀴𑀸𑀭𑀫𑁆𑀫𑀡𑀺𑀓𑀸𑀦𑀺𑀢𑀺.

𑁧𑁭𑁨.

𑀘𑀺𑀢𑁆𑀢𑀁 𑀦𑀯𑀯𑀺𑀥𑀁 𑀳𑁄𑀢𑀺, 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀼;

𑀧𑀘𑁆𑀙𑀺𑀫𑀜𑁆𑀘 𑀢𑀺𑀥𑀸 𑀓𑀢𑁆𑀯𑀸, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄.

𑁧𑁭𑁩.

𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦𑁂𑀯 ¶ , 𑀯𑀺𑀧𑀸𑀓𑀓𑁆𑀭𑀺𑀬𑀪𑁂𑀤𑀢𑁄;

𑀙𑀲𑀢𑁆𑀢𑀢𑀺𑀯𑀺𑀥𑁄 𑀪𑁂𑀤𑁄, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸.

𑁧𑁭𑁪.

𑀫𑀦𑁄𑀥𑀸𑀢𑀼𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸, 𑀯𑀺𑀧𑀸𑀓𑀓𑁆𑀭𑀺𑀬𑀪𑁂𑀤𑀢𑁄;

𑀦𑀯𑀥𑀸 𑀧𑀼𑀩𑁆𑀩𑀯𑀼𑀢𑁆𑀢𑁂𑀳𑀺, 𑀤𑀲𑀥𑀸 𑀳𑁄𑀢𑀺 𑀫𑀸𑀦𑀲𑀁.

𑁧𑁭𑁫.

𑀥𑀸𑀢𑀼𑀤𑁆𑀯𑀬𑀁 ¶ 𑀢𑀺𑀥𑀸 𑀓𑀢𑁆𑀯𑀸, 𑀧𑀘𑁆𑀙𑀺𑀫𑀁 𑀧𑀼𑀦 𑀧𑀡𑁆𑀟𑀺𑀢𑁄;

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁭𑁬.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑁆𑀧𑀺, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄;

𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸𑀦, 𑀯𑀤𑁂 𑀤𑁆𑀯𑀸𑀤𑀲𑀥𑀸 𑀞𑀺𑀢𑀁.

𑁧𑁭𑁭.

𑀪𑀯𑁂 ¶ 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀁, 𑀘𑀼𑀤𑁆𑀤𑀲𑀝𑁆𑀞𑀸𑀦𑀪𑁂𑀤𑀢𑁄;

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀲𑁆𑀲, 𑀘𑀼𑀢𑀺𑀬𑀸𑀯𑀚𑁆𑀚𑀦𑀲𑁆𑀲 𑀘.

𑁧𑁭𑁮.

𑀧𑀜𑁆𑀘𑀦𑁆𑀦𑀁 𑀤𑀲𑁆𑀲𑀦𑀸𑀤𑀻𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀘𑁂𑀢𑀲𑁄;

𑀲𑀦𑁆𑀢𑀻𑀭𑀡𑀲𑁆𑀲 𑀯𑁄𑀝𑁆𑀞𑀩𑁆𑀩-𑀚𑀯𑀦𑀸𑀦𑀁 𑀯𑀲𑁂𑀦 𑀘.

𑁧𑁭𑁯.

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲, 𑀢𑀣𑁂𑀯 𑀞𑀸𑀦𑀪𑁂𑀤𑀢𑁄;

𑀏𑀯𑀁 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁮𑁦.

𑀪𑀽𑀫𑀺𑀧𑀼𑀕𑁆𑀕𑀮𑀦𑀸𑀦𑀸𑀢𑁆𑀢-𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑁄;

𑀩𑀳𑀼𑀥𑀸 𑀧𑀦𑀺𑀤𑀁 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀘 𑀯𑀺𑀪𑀸𑀯𑀬𑁂.

𑁧𑁮𑁧.

𑀏𑀓𑀯𑀺𑀥𑀸𑀤𑀺𑀦𑀬𑁂 𑀧𑀦𑀺𑀫𑀲𑁆𑀫𑀺𑀁,

𑀬𑁄 𑀓𑀼𑀲𑀮𑁄 𑀫𑀢𑀺𑀫𑀸 𑀇𑀥 𑀪𑀺𑀓𑁆𑀔𑀼;

𑀢𑀲𑁆𑀲𑀪𑀺𑀥𑀫𑁆𑀫𑀕𑀢𑀸 𑀧𑀦 𑀅𑀢𑁆𑀣𑀸,

𑀳𑀢𑁆𑀣𑀕𑀢𑀸𑀫𑀮𑀓𑀸 𑀯𑀺𑀬 𑀳𑁄𑀦𑁆𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑁫. 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄

𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑁄

𑁧𑁮𑁨.

𑀇𑀢𑁄 ¶ ¶ 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀩𑀼𑀤𑁆𑀥𑀺𑀯𑀼𑀤𑁆𑀥𑀺𑀓𑀭𑀁 𑀦𑀬𑀁;

𑀘𑀺𑀢𑁆𑀢𑀸𑀦𑀁 𑀪𑀽𑀫𑀻𑀲𑀼𑀧𑁆𑀧𑀢𑁆𑀢𑀺𑀁, 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘.

𑁧𑁮𑁩.

𑀤𑁂𑀯𑀸𑀘𑁂𑀯 ¶ 𑀫𑀦𑀼𑀲𑁆𑀲𑀸 𑀘, 𑀢𑀺𑀲𑁆𑀲𑁄 𑀯𑀸𑀧𑀸𑀬𑀪𑀽𑀫𑀺𑀬𑁄;

𑀕𑀢𑀺𑀬𑁄 𑀧𑀜𑁆𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀢𑁆𑀣𑀼𑀦𑀸 𑀢𑀼 𑀢𑀬𑁄 𑀪𑀯𑀸.

𑁧𑁮𑁪.

𑀪𑀽𑀫𑀺𑀬𑁄 𑀢𑀢𑁆𑀣 𑀢𑀺𑀁𑀲𑁂𑀯, 𑀢𑀸𑀲𑀼 𑀢𑀺𑀁𑀲𑁂𑀯 𑀧𑀼𑀕𑁆𑀕𑀮𑀸;

𑀪𑀽𑀫𑀻𑀲𑁆𑀯𑁂𑀢𑀸𑀲𑀼 𑀉𑀧𑁆𑀧𑀦𑁆𑀦𑀸, 𑀲𑀩𑁆𑀩𑁂 𑀘 𑀧𑀦 𑀧𑀼𑀕𑁆𑀕𑀮𑀸.

𑁧𑁮𑁫.

𑀧𑀝𑀺𑀲𑀦𑁆𑀥𑀺𑀓𑀘𑀺𑀢𑁆𑀢𑀸𑀦𑀁, 𑀯𑀲𑁂𑀦𑁂𑀓𑀽𑀦𑀯𑀻𑀲𑀢𑀺;

𑀧𑀝𑀺𑀲𑀦𑁆𑀥𑀺 𑀘 𑀦𑀸𑀫𑁂𑀲𑀸, 𑀤𑀼𑀯𑀺𑀥𑀸 𑀲𑀫𑀼𑀤𑀻𑀭𑀺𑀢𑀸.

𑁧𑁮𑁬.

𑀅𑀘𑀺𑀢𑁆𑀢𑀓𑀸 𑀲𑀘𑀺𑀢𑁆𑀢𑀸 𑀘, 𑀅𑀲𑀜𑁆𑀜𑀻𑀦𑀫𑀘𑀺𑀢𑁆𑀢𑀓𑀸;

𑀲𑁂𑀲𑀸 𑀲𑀘𑀺𑀢𑁆𑀢𑀓𑀸 𑀜𑁂𑀬𑁆𑀬𑀸, 𑀲𑀸 𑀧𑀦𑁂𑀓𑀽𑀦𑀯𑀻𑀲𑀢𑀺.

𑁧𑁮𑁭.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯, 𑀳𑁄𑀦𑁆𑀢𑀺 𑀯𑀻𑀲𑀢𑀺 𑀧𑀼𑀕𑁆𑀕𑀮𑀸;

𑀇𑀥 𑀘𑀺𑀢𑁆𑀢𑀸𑀥𑀺𑀓𑀸𑀭𑀢𑁆𑀢𑀸, 𑀅𑀘𑀺𑀢𑁆𑀢𑀸 𑀦 𑀘 𑀉𑀤𑁆𑀥𑀝𑀸.

𑁧𑁮𑁮.

𑀅𑀳𑁂𑀢𑀼𑀤𑁆𑀯𑀺𑀢𑀺𑀳𑁂𑀢𑀽𑀢𑀺, 𑀧𑀼𑀕𑁆𑀕𑀮𑀸 𑀢𑀺𑀯𑀺𑀥𑀸 𑀲𑀺𑀬𑀼𑀁;

𑀅𑀭𑀺𑀬𑀸 𑀧𑀦 𑀅𑀝𑁆𑀞𑀸𑀢𑀺, 𑀲𑀩𑁆𑀩𑁂 𑀏𑀓𑀸𑀤𑀲𑁂𑀭𑀺𑀢𑀸.

𑁧𑁮𑁯.

𑀏𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀁, 𑀧𑀼𑀕𑁆𑀕𑀮𑀸𑀦𑀁 𑀧𑀪𑁂𑀤𑀢𑁄;

𑀘𑀺𑀢𑁆𑀢𑀸𑀦𑀁 𑀪𑀽𑀫𑀻𑀲𑀼𑀧𑁆𑀧𑀢𑁆𑀢𑀺𑀁, 𑀪𑀡𑀢𑁄 𑀫𑁂 𑀦𑀺𑀩𑁄𑀥𑀣.

𑁧𑁯𑁦.

𑀢𑀺𑀁𑀲𑀪𑀽𑀫𑀻𑀲𑀼 𑀘𑀺𑀢𑁆𑀢𑀸𑀦𑀺, 𑀓𑀢𑀺 𑀚𑀸𑀬𑀦𑁆𑀢𑀺 𑀫𑁂 𑀯𑀤;

𑀘𑀼𑀤𑁆𑀤𑀲𑁂𑀯 𑀢𑀼 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀲𑀩𑁆𑀩𑀸𑀲𑀼 𑀪𑀽𑀫𑀺𑀲𑀼.

𑁧𑁯𑁧.

𑀲𑀤𑀸 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺, 𑀓𑀸𑀫𑁂𑀬𑁂𑀯 𑀪𑀯𑁂 𑀲𑀺𑀬𑀼𑀁;

𑀧𑀜𑁆𑀘 𑀭𑀽𑀧𑀪𑀯𑁂𑀬𑁂𑀯, 𑀘𑀢𑁆𑀢𑀸𑀭𑁂𑀯 𑀅𑀭𑀽𑀧𑀺𑀲𑀼.

𑁧𑁯𑁨.

𑀓𑀸𑀫𑀭𑀽𑀧𑀪𑀯𑁂𑀲𑁆𑀯𑁂𑀯 ¶ , 𑀅𑀝𑁆𑀞𑀸𑀭𑀲 𑀪𑀯𑀦𑁆𑀢𑀺 𑀳𑀺;

𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀢𑀻𑀲𑀼 𑀪𑀯𑁂𑀲𑀼𑀧𑀺.

𑁧𑁯𑁩.

𑀞𑀧𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀲𑀁, 𑀘𑀢𑀲𑁆𑀲𑁄𑀧𑀸𑀬𑀪𑀽𑀫𑀺𑀬𑁄;

𑀢𑁂𑀭𑀲𑁂𑀯 𑀘 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀙𑀩𑁆𑀩𑀻𑀲𑀪𑀽𑀫𑀺𑀲𑀼.

𑁧𑁯𑁪.

𑀅𑀧𑀭𑀸𑀦𑀺 ¶ 𑀘𑀢𑀲𑁆𑀲𑁄𑀧𑀺, 𑀞𑀧𑁂𑀢𑁆𑀯𑀸𑀭𑀼𑀧𑁆𑀧𑀪𑀽𑀫𑀺𑀬𑁄;

𑀘𑀺𑀢𑁆𑀢𑀸𑀦𑀺 𑀧𑀦 𑀚𑀸𑀬𑀦𑁆𑀢𑀺, 𑀙 𑀘 𑀙𑀩𑁆𑀩𑀻𑀲𑀪𑀽𑀫𑀺𑀲𑀼.

𑁧𑁯𑁫.

𑀲𑀼𑀤𑁆𑀥𑀸𑀯𑀸𑀲𑀺𑀓𑀤𑁂𑀯𑀸𑀦𑀁 ¶ , 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀪𑀽𑀫𑀺𑀬𑁄;

𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑁂, 𑀧𑀜𑁆𑀘𑀯𑀻𑀲𑀢𑀺𑀪𑀽𑀫𑀺𑀲𑀼.

𑁧𑁯𑁬.

𑀅𑀧𑀭𑀸𑀦𑀺 𑀤𑀼𑀯𑁂 𑀳𑁄𑀦𑁆𑀢𑀺, 𑀧𑀜𑁆𑀘𑀯𑀻𑀲𑀢𑀺𑀪𑀽𑀫𑀺𑀲𑀼;

𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀜𑁆𑀘, 𑀘𑀢𑀲𑁆𑀲𑁄𑀧𑀸𑀬𑀪𑀽𑀫𑀺𑀬𑁄.

𑁧𑁯𑁭.

𑀤𑁆𑀯𑁂𑀧𑀺 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑀺, 𑀘𑀢𑀼𑀯𑀻𑀲𑀢𑀺𑀪𑀽𑀫𑀺𑀲𑀼;

𑀆𑀓𑀺𑀜𑁆𑀘𑀜𑁆𑀜𑀁 𑀦𑁂𑀯𑀲𑀜𑁆𑀜𑀜𑁆𑀘, 𑀞𑀧𑁂𑀢𑁆𑀯𑀸𑀧𑀸𑀬𑀪𑀽𑀫𑀺𑀬𑁄.

𑁧𑁯𑁮.

𑀅𑀧𑀸𑀬𑀪𑀽𑀫𑀺𑀬𑁄 𑀳𑀺𑀢𑁆𑀯𑀸, 𑀢𑀺𑀲𑁆𑀲𑁄 𑀆𑀭𑀼𑀧𑁆𑀧𑀪𑀽𑀫𑀺𑀬𑁄;

𑀤𑁆𑀯𑁂𑀬𑁂𑀯 𑀧𑀦 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀢𑁂𑀯𑀻𑀲𑀪𑀽𑀫𑀺𑀲𑀼.

𑁧𑁯𑁯.

𑀅𑀭𑀽𑀧𑁂 𑀘 𑀅𑀧𑀸𑀬𑁂 𑀘, 𑀞𑀧𑁂𑀢𑁆𑀯𑀸 𑀅𑀝𑁆𑀞 𑀪𑀽𑀫𑀺𑀬𑁄;

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀳𑁄𑀦𑁆𑀢𑀺 𑀤𑁆𑀯𑀸𑀯𑀻𑀲𑀪𑀽𑀫𑀺𑀲𑀼.

𑁨𑁦𑁦.

𑀲𑀼𑀤𑁆𑀥𑀸𑀯𑀸𑀲𑁂 𑀅𑀧𑀸𑀬𑁂 𑀘, 𑀞𑀧𑁂𑀢𑁆𑀯𑀸 𑀦𑀯 𑀪𑀽𑀫𑀺𑀬𑁄;

𑀏𑀓𑀯𑀻𑀲𑀸𑀲𑀼 𑀦𑀺𑀘𑁆𑀘𑀫𑁆𑀧𑀺, 𑀘𑀢𑁆𑀢𑀸𑀭𑁄𑀯 𑀪𑀯𑀦𑁆𑀢𑀺 𑀳𑀺.

𑁨𑁦𑁧.

𑀏𑀓𑀁 𑀲𑀢𑁆𑀢𑀭𑀲𑀲𑁆𑀯𑁂𑀯, 𑀘𑀺𑀢𑁆𑀢𑀁 𑀚𑀸𑀬𑀢𑀺 𑀪𑀽𑀫𑀺𑀲𑀼;

𑀲𑀼𑀤𑁆𑀥𑀸𑀯𑀸𑀲𑁂 𑀞𑀧𑁂𑀢𑁆𑀯𑀸 𑀢𑀼, 𑀅𑀧𑀸𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑁄.

𑁨𑁦𑁨.

𑀤𑁆𑀯𑀸𑀤𑀲𑁂𑀯 𑀢𑀼 𑀚𑀸𑀬𑀦𑁆𑀢𑁂, 𑀏𑀓𑀸𑀤𑀲𑀲𑀼 𑀪𑀽𑀫𑀺𑀲𑀼;

𑀞𑀧𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀧𑀺, 𑀪𑀽𑀫𑀺𑀬𑁄 𑀳𑀺 𑀫𑀳𑀕𑁆𑀕𑀢𑀸.

𑁨𑁦𑁩.

𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁, 𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 𑀢𑀼;

𑀅𑀝𑁆𑀞 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑁂, 𑀲𑀤𑀸 𑀲𑀢𑁆𑀢𑀲𑀼 𑀪𑀽𑀫𑀺𑀲𑀼.

𑁨𑁦𑁪.

𑀧𑀜𑁆𑀘𑀫𑀚𑁆𑀛𑀸𑀦𑀧𑀸𑀓𑁂𑀓𑁄 ¶ , 𑀚𑀸𑀬𑀢𑁂 𑀙𑀲𑀼 𑀪𑀽𑀫𑀺𑀲𑀼;

𑀘𑀢𑁆𑀢𑀸𑀭𑀺 𑀧𑀦 𑀘𑀺𑀢𑁆𑀢𑀸𑀦𑀺, 𑀢𑀻𑀲𑀼 𑀢𑀻𑀲𑁆𑀯𑁂𑀯 𑀪𑀽𑀫𑀺𑀲𑀼.

𑁨𑁦𑁫.

𑀘𑀢𑁆𑀢𑀸𑀭𑀺 ¶ 𑀧𑀦 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀏𑀓𑁂𑀓𑀪𑀽𑀫𑀺𑀲𑀼;

𑀅𑀭𑀽𑀧𑀸𑀯𑀘𑀭𑀧𑀸𑀓𑀸𑀦𑀁, 𑀯𑀲𑁂𑀦 𑀧𑀭𑀺𑀤𑀻𑀧𑀬𑁂.

𑁨𑁦𑁬.

𑀓𑀼𑀲𑀮𑀸𑀓𑀼𑀲𑀮𑀸 𑀓𑀸𑀫𑁂,

𑀢𑁂𑀲𑀁 𑀧𑀸𑀓𑀸 𑀅𑀳𑁂𑀢𑀼𑀓𑀸;

𑀆𑀯𑀚𑁆𑀚𑀦𑀤𑁆𑀯𑀬𑀜𑁆𑀘𑀸𑀢𑀺,

𑀲𑀢𑁆𑀢𑀢𑀺𑀁𑀲𑁂𑀯 𑀫𑀸𑀦𑀲𑀸.

𑁨𑁦𑁭.

𑀦𑀭𑀓𑀸𑀤𑀻𑀲𑁆𑀯𑀧𑀸𑀬𑁂𑀲𑀼, 𑀘𑀢𑀽𑀲𑀼𑀧𑀺 𑀘 𑀚𑀸𑀬𑀭𑁂;

𑀤𑁆𑀯𑁂𑀧𑀜𑁆𑀜𑀸𑀲𑀸𑀯𑀲𑁂𑀲𑀸𑀦𑀺, 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀓𑀤𑀸𑀘𑀺𑀧𑀺.

𑁨𑁦𑁮.

𑀓𑀸𑀫𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀦𑀯 𑀧𑀸𑀓𑀸 𑀫𑀳𑀕𑁆𑀕𑀢𑀸;

𑀦𑁂𑀯 𑀚𑀸𑀬𑀦𑁆𑀢𑀺 𑀚𑀸𑀬𑀦𑁆𑀢𑀺, 𑀅𑀲𑀻𑀢𑀺 𑀳𑀤𑀬𑀸 𑀲𑀤𑀸.

𑁨𑁦𑁯.

𑀓𑀸𑀫𑁂 𑀅𑀝𑁆𑀞 𑀫𑀳𑀸𑀧𑀸𑀓𑀸, 𑀤𑁄𑀫𑀦𑀲𑁆𑀲𑀤𑁆𑀯𑀬𑀫𑁆𑀧𑀺 𑀘;

𑀢𑀣𑀸 𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡-𑀢𑁆𑀢𑀬𑀁 𑀧𑀸𑀓𑀸 𑀅𑀧𑀼𑀜𑁆𑀜𑀚𑀸.

𑁨𑁧𑁦.

𑀦𑀢𑁆𑀣𑀺 𑀆𑀭𑀼𑀧𑁆𑀧𑀧𑀸𑀓𑀸 𑀘, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀇𑀫𑁂𑀳𑀺 𑀲𑀳 𑀘𑀺𑀢𑁆𑀢𑁂𑀳𑀺, 𑀢𑀬𑁄 𑀫𑀕𑁆𑀕𑀸 𑀨𑀮𑀤𑁆𑀯𑀬𑀁.

𑁨𑁧𑁧.

𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑀫𑁆𑀧𑀺 𑀘;

𑀘𑀢𑁆𑀢𑀸𑀭𑁄 𑀳𑁂𑀝𑁆𑀞𑀺𑀫𑀸 𑀧𑀸𑀓𑀸, 𑀲𑀼𑀤𑁆𑀥𑀸𑀯𑀸𑀲𑁂 𑀦 𑀮𑀩𑁆𑀪𑀭𑁂.

𑁨𑁧𑁨.

𑀲𑁂𑀲𑀸𑀦𑀺 𑀏𑀓𑀧𑀜𑁆𑀜𑀸𑀲, 𑀘𑀺𑀢𑁆𑀢𑀸𑀦𑀺 𑀧𑀦 𑀮𑀩𑁆𑀪𑀭𑁂;

𑀭𑀽𑀧𑀸𑀯𑀘𑀭𑀺𑀓𑀸 𑀲𑀩𑁆𑀩𑁂, 𑀯𑀺𑀧𑀸𑀓𑀸 𑀓𑀸𑀫𑀥𑀸𑀢𑀼𑀬𑀸.

𑁨𑁧𑁩.

𑀤𑁄𑀫𑀦𑀲𑁆𑀲𑀸𑀤𑀺𑀫𑀕𑁆𑀕𑁄 𑀘, 𑀓𑁆𑀭𑀺𑀬𑀸 𑀘 𑀤𑁆𑀯𑁂 𑀅𑀳𑁂𑀢𑀼𑀓𑀸;

𑀢𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺, 𑀦𑀢𑁆𑀣𑀺 𑀆𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁧𑁪.

𑀏𑀯𑀁 ¶ 𑀪𑀽𑀫𑀺𑀯𑀲𑁂𑀦𑁂𑀯, 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑀬𑁂;

𑀢𑀣𑀸 𑀏𑀓𑀸𑀤𑀲𑀦𑁆𑀦𑀫𑁆𑀧𑀺, 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘.

𑁨𑁧𑁫.

𑀓𑀼𑀲𑀮𑀸𑀓𑀼𑀲𑀮𑀸 ¶ ¶ 𑀓𑀸𑀫𑁂,

𑀢𑁂𑀲𑀁 𑀧𑀸𑀓𑀸 𑀅𑀳𑁂𑀢𑀼𑀓𑀸;

𑀆𑀯𑀚𑁆𑀚𑀦𑀤𑁆𑀯𑀬𑀜𑁆𑀘𑀸𑀢𑀺,

𑀲𑀢𑁆𑀢𑀢𑀺𑀁𑀲𑁂𑀯 𑀫𑀸𑀦𑀲𑀸.

𑁨𑁧𑁬.

𑀅𑀳𑁂𑀢𑀼𑀓𑀲𑁆𑀲 𑀲𑀢𑁆𑀢𑀲𑁆𑀲, 𑀚𑀸𑀬𑀦𑁆𑀢𑁂 𑀧𑀜𑁆𑀘𑀪𑀽𑀫𑀺𑀲𑀼;

𑀤𑁆𑀯𑁂𑀧𑀜𑁆𑀜𑀸𑀲𑀸𑀯𑀲𑁂𑀲𑀸𑀦𑀺, 𑀦 𑀚𑀸𑀬𑀦𑁆𑀢𑀺 𑀓𑀤𑀸𑀘𑀺𑀧𑀺.

𑁨𑁧𑁭.

𑀅𑀳𑁂𑀢𑀼𑀓𑀲𑁆𑀲 𑀯𑀼𑀢𑁆𑀢𑁂𑀳𑀺, 𑀓𑀸𑀫𑀧𑀸𑀓𑀸 𑀤𑀼𑀳𑁂𑀢𑀼𑀓𑀸;

𑀤𑀼𑀳𑁂𑀢𑀼𑀓𑀲𑁆𑀲 𑀚𑀸𑀬𑀦𑁆𑀢𑁂, 𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓𑀁.

𑁨𑁧𑁮.

𑀲𑀩𑁆𑀩𑁂 𑀫𑀳𑀕𑁆𑀕𑀢𑀸 𑀘𑁂𑀯, 𑀲𑀩𑁆𑀩𑁂𑀧𑀺 𑀘 𑀅𑀦𑀸𑀲𑀯𑀸;

𑀢𑀺𑀳𑁂𑀢𑀼𑀓𑀸 𑀯𑀺𑀧𑀸𑀓𑀸 𑀘, 𑀓𑀸𑀫𑁂 𑀦𑀯 𑀓𑁆𑀭𑀺𑀬𑀸𑀧𑀺 𑀘.

𑁨𑁧𑁯.

𑀤𑀼𑀳𑁂𑀢𑀼𑀦𑁄 𑀦 𑀚𑀸𑀬𑀦𑁆𑀢𑀺, 𑀘𑀢𑁆𑀢𑀸𑀮𑀻𑀲𑀁 𑀢𑀣𑀸𑀝𑁆𑀞 𑀘;

𑀓𑀸𑀫𑀸𑀯𑀘𑀭𑀲𑀢𑁆𑀢𑀲𑁆𑀲, 𑀢𑀺𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀦𑁄.

𑁨𑁨𑁦.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑁂, 𑀘𑀢𑀼𑀧𑀜𑁆𑀜𑀸𑀲 𑀫𑀸𑀦𑀲𑀸;

𑀤𑁆𑀯𑀺𑀳𑁂𑀢𑀼𑀓𑀲𑁆𑀲 𑀯𑀼𑀢𑁆𑀢𑀸𑀦𑀺, 𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓𑀁.

𑁨𑁨𑁧.

𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀯𑀺𑀧𑀸𑀓𑀸 𑀓𑀸𑀫𑀥𑀸𑀢𑀼𑀬𑀸;

𑀭𑀽𑀧𑀸𑀭𑀽𑀧𑁂𑀲𑀼 𑀧𑀼𑀜𑁆𑀜𑀸𑀦𑀺, 𑀘𑀢𑀼𑀧𑀜𑁆𑀜𑀸𑀲 𑀫𑀸𑀦𑀲𑀸.

𑁨𑁨𑁨.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑁂, 𑀧𑀜𑁆𑀘𑀢𑀺𑀁𑀲 𑀦 𑀚𑀸𑀬𑀭𑁂;

𑀙𑀤𑁂𑀯𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑁂𑀳𑀺𑀦𑁄.

𑁨𑁨𑁩.

𑀧𑀜𑁆𑀜𑀸𑀲𑁂𑀯𑀲𑁆𑀲 𑀘𑀺𑀢𑁆𑀢𑀸𑀦𑀺, 𑀚𑀸𑀬𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀦𑀯𑀢𑀺𑀁𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀻𑀧𑀬𑁂.

𑁨𑁨𑁪.

𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮𑀁;

𑀅𑀢𑁆𑀢𑀦𑁄𑀯 𑀨𑀮𑁂𑀦𑀲𑁆𑀲, 𑀲𑀓𑀤𑀸𑀕𑀸𑀫𑀺𑀦𑁄 𑀲𑀺𑀬𑀼𑀁.

𑁨𑁨𑁫.

𑀲𑁄𑀢𑀸𑀧𑀦𑁆𑀦𑀲𑁆𑀲 ¶ ¶ 𑀯𑀼𑀢𑁆𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀧𑀝𑀺𑀖𑀤𑁆𑀯𑀬𑀁;

𑀤𑀼𑀢𑀺𑀬𑀁 𑀘 𑀨𑀮𑀁 𑀳𑀺𑀢𑁆𑀯𑀸, 𑀬𑀸𑀦𑀺 𑀘𑀺𑀢𑁆𑀢𑀸𑀦𑀺 𑀢𑀸𑀦𑀺𑀢𑀺;

𑀅𑀦𑀸𑀕𑀸𑀫𑀺𑀲𑁆𑀲 𑀲𑀢𑁆𑀢𑀲𑁆𑀲, 𑀚𑀸𑀬𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁨𑁬.

𑀓𑀢𑀺 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑁂, 𑀓𑀸𑀫𑁂 𑀅𑀭𑀳𑀢𑁄 𑀧𑀦;

𑀘𑀢𑁆𑀢𑀸𑀭𑀻𑀲𑀜𑁆𑀘 𑀘𑀢𑁆𑀢𑀸𑀭𑀺, 𑀓𑀸𑀫𑁂 𑀅𑀭𑀳𑀢𑁄 𑀲𑀺𑀬𑀼𑀁.

𑁨𑁨𑁭.

𑀫𑀕𑁆𑀕𑀝𑁆𑀞𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀧𑀼𑀕𑁆𑀕𑀮𑀸𑀦𑀁 𑀲𑀓𑀁 𑀲𑀓𑀁;

𑀫𑀕𑁆𑀕𑀘𑀺𑀢𑁆𑀢𑀁 𑀲𑀺𑀬𑀸 𑀢𑁂𑀲𑀁, 𑀏𑀓𑀘𑀺𑀢𑁆𑀢𑀓𑁆𑀔𑀡𑀸 𑀳𑀺 𑀢𑁂.

𑁨𑁨𑁮.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀻𑀲𑁆𑀯𑁂𑀯, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀲𑀼;

𑀧𑀜𑁆𑀘𑀢𑀺𑀁𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀚𑀸𑀬𑀦𑁆𑀢𑁂𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁨𑁯.

𑀖𑀸𑀦𑀸𑀤𑀻𑀲𑀼 𑀘 𑀯𑀺𑀜𑁆𑀜𑀸𑀡-𑀢𑁆𑀢𑀬𑀁 𑀲𑀢𑁆𑀢 𑀅𑀧𑀼𑀜𑁆𑀜𑀚𑀸;

𑀫𑀳𑀸𑀧𑀸𑀓𑀸 𑀢𑀣𑀸 𑀧𑀸𑀓𑀸, 𑀉𑀧𑀭𑀺𑀚𑁆𑀛𑀸𑀦𑀪𑀽𑀫𑀺𑀓𑀸.

𑁨𑁩𑁦.

𑀯𑀺𑀧𑀸𑀓𑀸𑀧𑀺 𑀘 𑀆𑀭𑀼𑀧𑁆𑀧𑀸, 𑀤𑁄𑀫𑀦𑀲𑁆𑀲𑀤𑁆𑀯𑀬𑀫𑁆𑀧𑀺 𑀘;

𑀅𑀝𑁆𑀞𑀸𑀭𑀲 𑀓𑁆𑀭𑀺𑀬𑀸 𑀘𑁂𑀯, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘.

𑁨𑁩𑁧.

𑀧𑀞𑀫𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢-𑀧𑀼𑀣𑀼𑀚𑁆𑀚𑀦𑀲𑀭𑀻𑀭𑀺𑀦𑁄;

𑀏𑀢𑀸𑀦𑀺 𑀘𑀢𑀼𑀧𑀜𑁆𑀜𑀸𑀲, 𑀘𑀺𑀢𑁆𑀢𑀸𑀦𑀺 𑀦 𑀘 𑀮𑀩𑁆𑀪𑀭𑁂.

𑁨𑁩𑁨.

𑀲𑁄𑀢𑀸𑀧𑀦𑁆𑀦𑀲𑁆𑀲 ¶ 𑀘𑀺𑀢𑁆𑀢𑀸𑀦𑀺, 𑀢𑀢𑁆𑀣𑁂𑀓𑀢𑀺𑀁𑀲 𑀚𑀸𑀬𑀭𑁂;

𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼, 𑀳𑀺𑀢𑁆𑀯𑀸 𑀘𑀸𑀧𑀼𑀜𑁆𑀜𑀧𑀜𑁆𑀘𑀓𑀁.

𑁨𑁩𑁩.

𑀲𑀓𑀤𑀸𑀕𑀸𑀫𑀺𑀦𑁄 𑀢𑀢𑁆𑀣, 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮𑀁;

𑀏𑀓𑀢𑀺𑀁𑀲𑁂𑀯 𑀚𑀸𑀬𑀦𑁆𑀢𑁂, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀓𑀁 𑀨𑀮𑀁.

𑁨𑁩𑁪.

𑀅𑀦𑀸𑀕𑀸𑀫𑀺𑀲𑁆𑀲 𑀢𑀢𑁆𑀣𑁂𑀯, 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀨𑀮𑀁;

𑀏𑀓𑀢𑀺𑀁𑀲𑁂𑀯 𑀚𑀸𑀬𑀦𑁆𑀢𑁂, 𑀨𑀮𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄.

𑁨𑁩𑁫.

𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀲𑁄𑀢𑀸𑀦𑀁, 𑀧𑀼𑀜𑁆𑀜𑀚𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀤𑁆𑀯𑀬𑀜𑁆𑀘𑁂𑀯, 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁨𑁩𑁬.

𑀅𑀭𑀳𑀢𑁆𑀢𑀨𑀮𑀁 ¶ ¶ 𑀧𑀸𑀓𑁄, 𑀧𑀞𑀫𑀚𑁆𑀛𑀸𑀦𑀲𑀫𑁆𑀪𑀯𑁄;

𑀲𑀢𑁆𑀢𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺, 𑀅𑀭𑀳𑀦𑁆𑀢𑀲𑁆𑀲 𑀚𑀸𑀬𑀭𑁂.

𑁨𑁩𑁭.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀻𑀲𑁆𑀯𑁂𑀯, 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀲𑀼;

𑀙𑀢𑁆𑀢𑀺𑀁𑀲 𑀤𑀼𑀢𑀺𑀬𑀚𑁆𑀛𑀸𑀦-𑀢𑀢𑀺𑀬𑀚𑁆𑀛𑀸𑀦𑀧𑀸𑀓𑀢𑁄.

𑁨𑁩𑁮.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼, 𑀳𑀺𑀢𑁆𑀯𑀸 𑀯𑀸𑀧𑀼𑀜𑁆𑀜𑀧𑀜𑁆𑀘𑀓𑀁;

𑀲𑁄𑀢𑀸𑀧𑀦𑁆𑀦𑀲𑁆𑀲 𑀩𑀸𑀢𑁆𑀢𑀺𑀁𑀲, 𑀨𑀮𑁂𑀦 𑀲𑀳 𑀅𑀢𑁆𑀢𑀦𑁄.

𑁨𑁩𑁯.

𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑁂𑀲𑀼, 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮𑀁;

𑀩𑀸𑀢𑁆𑀢𑀺𑀁𑀲 𑀨𑀮𑀘𑀺𑀢𑁆𑀢𑁂𑀦, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀅𑀢𑁆𑀢𑀦𑁄.

𑁨𑁪𑁦.

𑀲𑀓𑀤𑀸𑀕𑀸𑀫𑀻𑀲𑀼 𑀯𑀼𑀢𑁆𑀢𑁂𑀲𑀼, 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀨𑀮𑀁;

𑀅𑀦𑀸𑀕𑀸𑀫𑀺𑀨𑀮𑁂𑀦𑀲𑁆𑀲, 𑀩𑀸𑀢𑁆𑀢𑀺𑀁𑀲𑁂𑀯 𑀪𑀯𑀦𑁆𑀢𑀺 𑀳𑀺.

𑁨𑁪𑁧.

𑀅𑀭𑀳𑀦𑁆𑀢𑀲𑁆𑀲 𑀢𑀻𑀲𑁆𑀯𑁂𑀯, 𑀅𑀝𑁆𑀞𑀯𑀻𑀲𑀢𑀺 𑀅𑀢𑁆𑀢𑀦𑁄;

𑀨𑀮𑁂𑀦 𑀤𑀼𑀢𑀺𑀬𑀚𑁆𑀛𑀸𑀦-𑀢𑀢𑀺𑀬𑀚𑁆𑀛𑀸𑀦𑀧𑀸𑀓𑀢𑁄.

𑁨𑁪𑁨.

𑀧𑀭𑀺𑀢𑁆𑀢𑀓𑀲𑀼𑀪𑀸𑀤𑀻𑀦𑀁, 𑀤𑁂𑀯𑀸𑀦𑀁 𑀢𑀻𑀲𑀼 𑀪𑀽𑀫𑀺𑀲𑀼;

𑀧𑀜𑁆𑀘𑀢𑀺𑀁𑀲𑁂𑀯 𑀚𑀸𑀬𑀦𑁆𑀢𑁂, 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀓𑀢𑁄.

𑁨𑁪𑁩.

𑀲𑁄𑀢𑀸𑀧𑀦𑁆𑀦𑀲𑁆𑀲 𑀢𑀢𑁆𑀣𑁂𑀓-𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀚𑀸𑀬𑀭𑁂;

𑀲𑀓𑀤𑀸𑀕𑀸𑀫𑀺𑀦𑁄 𑀏𑀯𑀁, 𑀢𑀣𑀸𑀦𑀸𑀕𑀸𑀫𑀺𑀦𑁄𑀧𑀺 𑀘.

𑁨𑁪𑁪.

𑀔𑀻𑀡𑀸𑀲𑀯𑀲𑁆𑀲 𑀢𑀢𑁆𑀣𑁂𑀯, 𑀲𑀢𑁆𑀢𑀯𑀻𑀲𑀢𑀺 𑀫𑀸𑀦𑀲𑀸;

𑀢𑀣𑀸 𑀯𑁂𑀳𑀧𑁆𑀨𑀮𑁂 𑀘𑀸𑀧𑀺, 𑀲𑀩𑁆𑀩𑁂𑀲𑀁 𑀳𑁄𑀦𑁆𑀢𑀺 𑀫𑀸𑀦𑀲𑀸.

𑁨𑁪𑁫.

𑀏𑀓𑀢𑀺𑀁𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀲𑀼𑀤𑁆𑀥𑀸𑀯𑀸𑀲𑀺𑀓𑀪𑀽𑀫𑀺𑀲𑀼;

𑀅𑀦𑀸𑀕𑀸𑀫𑀺𑀓𑀲𑀢𑁆𑀢𑀲𑁆𑀲, 𑀳𑁄𑀦𑁆𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁨𑁪𑁬.

𑀅𑀭𑀳𑀢𑁄 𑀧𑀦 𑀢𑀢𑁆𑀣𑁂𑀯, 𑀫𑀸𑀦𑀲𑀸 𑀲𑀢𑁆𑀢𑀯𑀻𑀲𑀢𑀺;

𑀏𑀯𑀁 𑀭𑀽𑀧𑀻𑀲𑀼 𑀘𑀺𑀢𑁆𑀢𑀸𑀦𑀺, 𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀯𑀺𑀪𑀸𑀯𑀺𑀦𑀸.

𑁨𑁪𑁭.

𑀘𑀢𑀼𑀯𑀻𑀲𑀢𑀺 ¶ 𑀘𑀺𑀢𑁆𑀢𑀸𑀦𑀺, 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀚𑀸𑀬𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁪𑁮.

𑀲𑁄𑀢𑀸𑀧𑀦𑁆𑀦𑀲𑁆𑀲 ¶ 𑀢𑀢𑁆𑀣𑁂𑀯, 𑀞𑀧𑁂𑀢𑁆𑀯𑀸𑀧𑀼𑀜𑁆𑀜𑀧𑀜𑁆𑀘𑀓𑀁;

𑀲𑀫𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺, 𑀨𑀮𑁂𑀦 𑀲𑀳 𑀅𑀢𑁆𑀢𑀦𑁄.

𑁨𑁪𑁯.

𑀲𑀓𑀤𑀸𑀕𑀸𑀫𑀺𑀦𑁄 𑀢𑀢𑁆𑀣, 𑀢𑀣𑀸𑀦𑀸𑀕𑀸𑀫𑀺𑀦𑁄𑀧𑀺 𑀘;

𑀚𑀸𑀬𑀦𑁆𑀢𑀺 𑀯𑀻𑀲 𑀘𑀺𑀢𑁆𑀢𑀸𑀦𑀺, 𑀧𑀼𑀩𑁆𑀩𑀧𑀼𑀩𑁆𑀩𑀨𑀮𑀁 𑀯𑀺𑀦𑀸.

𑁨𑁫𑁦.

𑀔𑀻𑀡𑀸𑀲𑀯𑀲𑁆𑀲 𑀢𑀢𑁆𑀣𑁂𑀯, 𑀤𑀲𑀧𑀜𑁆𑀘 𑀘 𑀫𑀸𑀦𑀲𑀸;

𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁫𑁧.

𑀳𑁄𑀦𑁆𑀢𑀺 ¶ 𑀢𑁂𑀯𑀻𑀲 𑀘𑀺𑀢𑁆𑀢𑀸𑀦𑀺, 𑀇𑀢𑀺 𑀯𑀢𑁆𑀯𑀸 𑀯𑀺𑀪𑀸𑀯𑀬𑁂;

𑀢𑀺𑀡𑁆𑀡𑀦𑁆𑀦𑀫𑁆𑀧𑁂𑀢𑁆𑀣 𑀲𑁂𑀔𑀸𑀦𑀁, 𑀘𑀺𑀢𑁆𑀢𑀸𑀦𑁂𑀓𑀽𑀦𑀯𑀻𑀲𑀢𑀺.

𑁨𑁫𑁨.

𑀘𑀼𑀤𑁆𑀤𑀲𑁂𑀯 𑀢𑀼 𑀘𑀺𑀢𑁆𑀢𑀸𑀦𑀺, 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀓𑁆𑀭𑀺𑀬𑀸𑀤𑁆𑀯𑀸𑀤𑀲 𑀧𑀸𑀓𑁂𑀓𑁄, 𑀨𑀮𑀁 𑀔𑀻𑀡𑀸𑀲𑀯𑀲𑁆𑀲 𑀢𑀼.

𑁨𑁫𑁩.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀩𑀸𑀯𑀻𑀲𑀢𑀺 𑀘 𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑁨𑁫𑁪.

𑀅𑀝𑁆𑀞𑀸𑀭𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀚𑀸𑀬𑀭𑁂;

𑀲𑀓𑀤𑀸𑀕𑀸𑀫𑀺𑀦𑁄 𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮𑀁.

𑁨𑁫𑁫.

𑀲𑀓𑀤𑀸𑀕𑀸𑀫𑀺𑀯𑀼𑀢𑁆𑀢𑁂𑀲𑀼, 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀨𑀮𑀁;

𑀅𑀝𑁆𑀞𑀸𑀭𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀚𑀸𑀬𑀭𑁂.

𑁨𑁫𑁬.

𑀢𑁂𑀭𑀲𑁂𑀯 𑀘 𑀘𑀺𑀢𑁆𑀢𑀸𑀦𑀺, 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀔𑀻𑀡𑀸𑀲𑀯𑀲𑁆𑀲 𑀲𑀢𑁆𑀢𑀲𑁆𑀲, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁫𑁭.

𑀏𑀓𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀚𑀸𑀬𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁫𑁮.

𑀲𑁄𑀢𑀸𑀧𑀦𑁆𑀦𑀲𑁆𑀲 ¶ 𑀲𑀢𑁆𑀢𑀲𑁆𑀲, 𑀲𑀢𑁆𑀢𑀭𑀲 𑀧𑀓𑀸𑀲𑀬𑁂;

𑀲𑀓𑀤𑀸𑀕𑀸𑀫𑀺𑀦𑁄 𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮𑀁.

𑁨𑁫𑁯.

𑀲𑀓𑀤𑀸𑀕𑀸𑀫𑀺𑀯𑀼𑀢𑁆𑀢𑁂𑀲𑀼, 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀨𑀮𑀁;

𑀳𑁄𑀦𑁆𑀢𑀺 𑀲𑀢𑁆𑀢𑀭𑀲𑁂𑀯𑀲𑁆𑀲, 𑀅𑀦𑀸𑀕𑀸𑀫𑀺𑀲𑁆𑀲 𑀫𑀸𑀦𑀲𑀸.

𑁨𑁬𑁦.

𑀤𑁆𑀯𑀸𑀤𑀲𑁂𑀯 ¶ 𑀢𑀼 𑀘𑀺𑀢𑁆𑀢𑀸𑀦𑀺, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀚𑀸𑀬𑀦𑁆𑀢𑀺 𑀅𑀭𑀳𑀦𑁆𑀢𑀲𑁆𑀲, 𑀇𑀢𑀺 𑀯𑀢𑁆𑀯𑀸 𑀯𑀺𑀪𑀸𑀯𑀬𑁂.

𑁨𑁬𑁧.

𑀳𑁂𑀝𑁆𑀞𑀺𑀫𑀸𑀦𑀁 𑀅𑀭𑀽𑀧𑀻𑀦𑀁, 𑀩𑁆𑀭𑀳𑁆𑀫𑀸𑀦𑀁 𑀉𑀧𑀭𑀽𑀧𑀭𑀺;

𑀅𑀭𑀽𑀧𑀓𑀼𑀲𑀮𑀸 𑀘𑁂𑀯, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑁆𑀭𑀺𑀬𑀸𑀧𑀺 𑀘.

𑁨𑁬𑁨.

𑀉𑀤𑁆𑀥𑀫𑀼𑀤𑁆𑀥𑀫𑀭𑀽𑀧𑀻𑀦𑀁, 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀧𑀦;

𑀆𑀭𑀼𑀧𑁆𑀧𑀸𑀦𑁂𑀯 𑀚𑀸𑀬𑀦𑁆𑀢𑁂, 𑀤𑀺𑀝𑁆𑀞𑀸𑀤𑀻𑀦𑀯𑀢𑁄 𑀓𑀺𑀭.

𑁨𑁬𑁩.

𑀞𑀧𑁂𑀢𑁆𑀯𑀸 𑀧𑀞𑀫𑀁 𑀫𑀕𑁆𑀕𑀁, 𑀓𑀼𑀲𑀮𑀸𑀦𑀼𑀢𑁆𑀢𑀭𑀸 𑀢𑀬𑁄;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀅𑀧𑀼𑀜𑁆𑀜𑀸𑀦𑀺 𑀢𑀣𑀸 𑀤𑀲.

𑁨𑁬𑁪.

𑀘𑀢𑁆𑀢𑀸𑀭𑀸𑀭𑀼𑀧𑁆𑀧𑀧𑀼𑀜𑁆𑀜𑀸𑀦𑀺, 𑀲𑀩𑁆𑀩𑁂 𑀧𑀸𑀓𑀸 𑀅𑀦𑀼𑀢𑁆𑀢𑀭𑀸;

𑀧𑀞𑀫𑀸𑀭𑀼𑀧𑁆𑀧𑀧𑀸𑀓𑁄 𑀘, 𑀦𑀯 𑀓𑀸𑀫𑀓𑁆𑀭𑀺𑀬𑀸𑀧𑀺 𑀘.

𑁨𑁬𑁫.

𑀆𑀭𑀼𑀧𑁆𑀧𑀸𑀧𑀺 𑀓𑁆𑀭𑀺𑀬𑀸 𑀲𑀩𑁆𑀩𑀸, 𑀢𑁂𑀘𑀢𑁆𑀢𑀸𑀮𑀻𑀲 𑀫𑀸𑀦𑀲𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀦𑁂𑀢𑀸𑀦𑀺, 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁬𑁬.

𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘, 𑀲𑀩𑁆𑀩𑁄 𑀭𑀽𑀧𑁄𑀫𑀳𑀕𑁆𑀕𑀢𑁄;

𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀫𑀦𑁄𑀥𑀸𑀢𑀼, 𑀤𑁄𑀫𑀦𑀲𑁆𑀲𑀤𑁆𑀯𑀬𑀫𑁆𑀧𑀺 𑀘.

𑁨𑁬𑁭.

𑀆𑀤𑀺𑀫𑀕𑁆𑀕𑁄 𑀢𑀬𑁄 𑀧𑀸𑀓𑀸, 𑀆𑀭𑀼𑀧𑁆𑀧𑀸 𑀘 𑀢𑀣𑀽𑀧𑀭𑀺;

𑀙𑀘𑀢𑁆𑀢𑀸𑀮𑀻𑀲 𑀦𑀢𑁆𑀣𑁂𑀢𑁆𑀣, 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁬𑁮.

𑀯𑀼𑀢𑁆𑀢𑁂𑀲𑀼 𑀧𑀦 𑀘𑀺𑀢𑁆𑀢𑁂𑀲𑀼, 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀞𑀧𑁂𑀢𑁆𑀯𑀸 𑀧𑀞𑀫𑀸𑀭𑀼𑀧𑁆𑀧-𑀢𑁆𑀢𑀬𑀁 𑀧𑀸𑀓𑁄 𑀘 𑀅𑀢𑁆𑀢𑀦𑁄.

𑁨𑁬𑁯.

𑀢𑀸𑀮𑀻𑀲𑁂𑀢𑀸𑀦𑀺 ¶ 𑀚𑀸𑀬𑀦𑁆𑀢𑁂, 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀏𑀯𑀁 𑀲𑁂𑀲𑀤𑁆𑀯𑀬𑁂 𑀜𑁂𑀬𑁆𑀬𑀸, 𑀳𑀺𑀢𑁆𑀯𑀸 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀁.

𑁨𑁭𑁦.

𑀅𑀢𑁆𑀢𑀦𑁄 ¶ 𑀅𑀢𑁆𑀢𑀦𑁄 𑀧𑀸𑀓𑀸, 𑀘𑀢𑁆𑀢𑀸𑀭𑁄 𑀘 𑀅𑀦𑀸𑀲𑀯𑀸;

𑀯𑀺𑀧𑀸𑀓𑀸 𑀳𑁄𑀦𑁆𑀢𑀺 𑀲𑀩𑁆𑀩𑁂𑀯, 𑀘𑀢𑀽𑀲𑁆𑀯𑀸𑀭𑀼𑀧𑁆𑀧𑀪𑀽𑀫𑀺𑀲𑀼.

𑁨𑁭𑁧.

𑀯𑁄𑀝𑁆𑀞𑀩𑁆𑀩𑀦𑁂𑀦 𑀘𑀺𑀢𑁆𑀢𑁂𑀦, 𑀓𑀸𑀫𑁂 𑀅𑀝𑁆𑀞 𑀫𑀳𑀸𑀓𑁆𑀭𑀺𑀬𑀸;

𑀘𑀢𑀲𑁆𑀲𑁄𑀧𑀺 𑀘 𑀆𑀭𑀼𑀧𑁆𑀧𑀸, 𑀢𑁂𑀭𑀲𑁂𑀯 𑀓𑁆𑀭𑀺𑀬𑀸 𑀲𑀺𑀬𑀼𑀁.

𑁨𑁭𑁨.

𑀔𑀻𑀡𑀸𑀲𑀯𑀲𑁆𑀲 ¶ 𑀚𑀸𑀬𑀦𑁆𑀢𑁂, 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀤𑁆𑀯𑀸𑀤𑀲𑁂𑀯 𑀓𑁆𑀭𑀺𑀬𑀸 𑀳𑁄𑀦𑁆𑀢𑀺, 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁭𑁩.

𑀏𑀓𑀸𑀤𑀲 𑀓𑁆𑀭𑀺𑀬𑀸 𑀳𑁄𑀦𑁆𑀢𑀺, 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁;

𑀤𑀲𑁂𑀯 𑀘 𑀓𑁆𑀭𑀺𑀬𑀸 𑀜𑁂𑀬𑁆𑀬𑀸, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀁.

𑁨𑁭𑁪.

𑀅𑀭𑀳𑀢𑁄 𑀧𑀦 𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺;

𑀅𑀭𑀳𑀢𑁆𑀢𑀁 𑀓𑁆𑀭𑀺𑀬𑀸 𑀲𑀩𑁆𑀩𑀸, 𑀞𑀧𑁂𑀢𑁆𑀯𑀸𑀯𑀚𑁆𑀚𑀦𑀤𑁆𑀯𑀬𑀁.

𑁨𑁭𑁫.

𑀘𑀢𑀼𑀦𑁆𑀦𑀜𑁆𑀘 𑀨𑀮𑀝𑁆𑀞𑀸𑀦𑀁, 𑀢𑀺𑀳𑁂𑀢𑀼𑀓𑀧𑀼𑀣𑀼𑀚𑁆𑀚𑀦𑁂;

𑀢𑁂𑀭𑀲𑁂𑀯 𑀘 𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑁨𑁭𑁬.

𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀫𑀳𑀸𑀧𑀸𑀓𑀸 𑀢𑀣𑀸 𑀦𑀯;

𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀸 𑀘, 𑀢𑁂𑀭𑀲𑁂𑀯 𑀪𑀯𑀦𑁆𑀢𑀺𑀫𑁂.

𑁨𑁭𑁭.

𑀘𑀢𑀼𑀦𑁆𑀦𑀜𑁆𑀘 𑀨𑀮𑀝𑁆𑀞𑀸𑀦𑀁, 𑀤𑀼𑀳𑁂𑀢𑀼𑀓𑀧𑀼𑀣𑀼𑀚𑁆𑀚𑀦𑁂;

𑀜𑀸𑀡𑀳𑀻𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀯𑀺𑀧𑀸𑀓𑀸 𑀏𑀯 𑀚𑀸𑀬𑀭𑁂.

𑁨𑁭𑁮.

𑀧𑀼𑀣𑀼𑀚𑁆𑀚𑀦𑀸𑀦𑀁 𑀢𑀺𑀡𑁆𑀡𑀫𑁆𑀧𑀺, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀤𑁂𑀳𑀺𑀦𑀁;

𑀲𑀢𑁆𑀢𑀭𑀲𑁂𑀯 𑀘𑀺𑀢𑁆𑀢𑀸𑀦𑀺, 𑀲𑀢𑁆𑀢𑀦𑁆𑀦𑀫𑁆𑀧𑀺 𑀪𑀯𑀦𑁆𑀢𑀺 𑀳𑀺.

𑁨𑁭𑁯.

𑀯𑀺𑀜𑁆𑀜𑀸𑀡𑀸𑀦𑀺 𑀤𑀼𑀯𑁂 𑀧𑀜𑁆𑀘, 𑀫𑀦𑁄𑀥𑀸𑀢𑀼𑀢𑁆𑀢𑀬𑀫𑁆𑀧𑀺 𑀘;

𑀲𑀦𑁆𑀢𑀻𑀭𑀡𑀸𑀦𑀺 𑀯𑁄𑀝𑁆𑀞𑀩𑁆𑀩𑀁, 𑀳𑁄𑀦𑁆𑀢𑀺 𑀲𑀢𑁆𑀢𑀭𑀲𑁂𑀯𑀺𑀫𑁂.

𑁨𑁮𑁦.

𑀳𑁂𑀝𑁆𑀞𑀸 𑀢𑀺𑀡𑁆𑀡𑀁 𑀨𑀮𑀝𑁆𑀞𑀸𑀦𑀁, 𑀢𑀺𑀳𑁂𑀢𑀼𑀓𑀧𑀼𑀣𑀼𑀚𑁆𑀚𑀦𑁂;

𑀦𑀯𑁂𑀯 𑀓𑀼𑀲𑀮𑀸 𑀳𑁄𑀦𑁆𑀢𑀺, 𑀘𑀢𑀼𑀦𑁆𑀦𑀫𑁆𑀧𑀺 𑀫𑀳𑀕𑁆𑀕𑀢𑀸.

𑁨𑁮𑁧.

𑀢𑀺𑀡𑁆𑀡𑀁 ¶ 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘, 𑀢𑀺𑀡𑁆𑀡𑀫𑀭𑀺𑀬𑀸𑀦𑀫𑀸𑀤𑀺𑀢𑁄;

𑀢𑁂𑀭𑀲𑁂𑀯 𑀢𑀼 𑀘𑀺𑀢𑁆𑀢𑀸𑀦𑀺, 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑁂.

𑁨𑁮𑁨.

𑀅𑀝𑁆𑀞𑁂𑀯 𑀓𑀸𑀫𑀧𑀼𑀜𑁆𑀜𑀸𑀦𑀺, 𑀤𑀺𑀝𑁆𑀞𑀺𑀳𑀻𑀦𑀸 𑀅𑀧𑀼𑀜𑁆𑀜𑀢𑁄;

𑀘𑀢𑁆𑀢𑀸𑀭𑁄𑀧𑀺 𑀘 𑀉𑀤𑁆𑀥𑀘𑁆𑀘-𑀲𑀁𑀬𑀼𑀢𑁆𑀢𑀜𑁆𑀘𑀸𑀢𑀺 𑀢𑁂𑀭𑀲.

𑁨𑁮𑁩.

𑀳𑁂𑀝𑁆𑀞𑀸 𑀤𑁆𑀯𑀺𑀦𑁆𑀦𑀁 𑀨𑀮𑀝𑁆𑀞𑀸𑀦𑀁, 𑀢𑀣𑀸 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑁂;

𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀘𑀺𑀢𑁆𑀢𑀁, 𑀤𑁆𑀯𑀬𑀫𑁂𑀯 𑀢𑀼 𑀚𑀸𑀬𑀢𑁂.

𑁨𑁮𑁪.

𑀢𑀺𑀡𑁆𑀡𑀁 ¶ 𑀧𑀼𑀣𑀼𑀚𑁆𑀚𑀦𑀸𑀦𑀁 𑀢𑀼, 𑀧𑀜𑁆𑀘𑁂𑀯 𑀧𑀦 𑀚𑀸𑀬𑀭𑁂;

𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀬𑀼𑀢𑁆𑀢𑀸𑀦𑀺, 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑀫𑁆𑀧𑀺 𑀘.

𑁨𑁮𑁫.

𑀫𑀕𑁆𑀕𑀝𑁆𑀞𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀫𑀕𑁆𑀕𑀘𑀺𑀢𑁆𑀢𑀁 𑀲𑀓𑀁 𑀲𑀓𑀁;

𑀏𑀓𑀫𑁂𑀯 𑀪𑀯𑁂 𑀢𑁂𑀲𑀁, 𑀇𑀢𑀺 𑀯𑀢𑁆𑀯𑀸 𑀯𑀺𑀪𑀸𑀯𑀬𑁂.

𑁨𑁮𑁬.

𑀫𑀬𑀸 𑀪𑀯𑁂𑀲𑀼 𑀘𑀺𑀢𑁆𑀢𑀸𑀦𑀁, 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘;

𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬, 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑁨𑁮𑁭.

𑀏𑀯𑀁 𑀲𑀩𑁆𑀩𑀫𑀺𑀤𑀁 𑀘𑀺𑀢𑁆𑀢𑀁, 𑀪𑀽𑀫𑀺𑀧𑀼𑀕𑁆𑀕𑀮𑀪𑁂𑀤𑀢𑁄;

𑀩𑀳𑀼𑀥𑀸𑀧𑀺 𑀘 𑀳𑁄𑀢𑀻𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁨𑁮𑁮.

𑀲𑀓𑁆𑀓𑀸 ¶ 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀪𑁂𑀤𑁄 𑀜𑀸𑀢𑀼𑀁 𑀯𑀺𑀪𑀸𑀯𑀺𑀦𑀸;

𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀻𑀢𑁂𑀦, 𑀲𑀁𑀔𑀺𑀢𑁆𑀢𑀁 𑀧𑀦𑀺𑀤𑀁 𑀫𑀬𑀸.

𑁨𑁮𑁯.

𑀧𑀼𑀩𑁆𑀩𑀸𑀧𑀭𑀁 𑀯𑀺𑀮𑁄𑀓𑁂𑀢𑁆𑀯𑀸, 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀧𑀼𑀦𑀧𑁆𑀧𑀼𑀦𑀁;

𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀕𑀳𑁂𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁨𑁯𑁦.

𑀇𑀫𑀜𑁆𑀘𑀸𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀲𑀼𑀲𑀸𑀭𑀁,

𑀯𑀭𑀁 𑀲𑀢𑁆𑀢𑀫𑁄𑀳𑀦𑁆𑀥𑀓𑀸𑀭𑀧𑁆𑀧𑀤𑀻𑀧𑀁;

𑀲𑀤𑀸 𑀲𑀸𑀥𑀼 𑀘𑀺𑀦𑁆𑀢𑁂𑀢𑀺 𑀯𑀸𑀘𑁂𑀢𑀺 𑀬𑁄 𑀢𑀁,

𑀦𑀭𑀁 𑀭𑀸𑀕𑀤𑁄𑀲𑀸 𑀘𑀺𑀭𑀁 𑀦𑁄𑀧𑀬𑀦𑁆𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀪𑀽𑀫𑀺𑀧𑀼𑀕𑁆𑀕𑀮𑀯𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁬. 𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄

𑀆𑀭𑀫𑁆𑀫𑀡𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁄

𑁨𑁯𑁧.

𑀏𑀢𑁂𑀲𑀁 ¶ ¶ ¶ 𑀧𑀦 𑀘𑀺𑀢𑁆𑀢𑀸𑀦𑀁, 𑀆𑀭𑀫𑁆𑀫𑀡𑀫𑀺𑀢𑁄 𑀧𑀭𑀁;

𑀤𑀲𑁆𑀲𑀬𑀺𑀲𑁆𑀲𑀸𑀫𑀳𑀁 𑀢𑁂𑀦, 𑀯𑀺𑀦𑀸 𑀦𑀢𑁆𑀣𑀺 𑀳𑀺 𑀲𑀫𑁆𑀪𑀯𑁄.

𑁨𑁯𑁨.

𑀭𑀽𑀧𑀁 𑀲𑀤𑁆𑀤𑀁 𑀕𑀦𑁆𑀥𑀁 𑀭𑀲𑀁, 𑀨𑁄𑀝𑁆𑀞𑀩𑁆𑀩𑀁 𑀥𑀫𑁆𑀫𑀫𑁂𑀯 𑀘;

𑀙𑀥𑀸 𑀆𑀭𑀫𑁆𑀫𑀡𑀁 𑀆𑀳𑀼, 𑀙𑀴𑀸𑀭𑀫𑁆𑀫𑀡𑀓𑁄𑀯𑀺𑀤𑀸.

𑁨𑁯𑁩.

𑀢𑀢𑁆𑀣 𑀪𑀽𑀢𑁂 𑀉𑀧𑀸𑀤𑀸𑀬, 𑀯𑀡𑁆𑀡𑁄 𑀘𑀢𑀼𑀲𑀫𑀼𑀝𑁆𑀞𑀺𑀢𑁄;

𑀲𑀦𑀺𑀤𑀲𑁆𑀲𑀦𑀧𑀝𑀺𑀖𑁄, 𑀭𑀽𑀧𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁄.

𑁨𑁯𑁪.

𑀤𑀼𑀯𑀺𑀥𑁄 𑀳𑀺 𑀲𑀫𑀼𑀤𑁆𑀤𑀺𑀝𑁆𑀞𑁄, 𑀲𑀤𑁆𑀤𑁄 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑁄;

𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄𑀯, 𑀳𑁄𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁄.

𑁨𑁯𑁫.

𑀅𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀬𑁄,

𑀲𑁄 𑀳𑁄𑀢𑀽𑀢𑀼𑀲𑀫𑀼𑀝𑁆𑀞𑀺𑀢𑁄;

𑀤𑀼𑀯𑀺𑀥𑁄𑀧𑀺 𑀅𑀬𑀁 𑀲𑀤𑁆𑀤𑁄,

𑀲𑀤𑁆𑀤𑀸𑀭𑀫𑁆𑀫𑀡𑀢𑀁 𑀕𑀢𑁄.

𑁨𑁯𑁬.

𑀥𑀭𑀻𑀬𑀢𑀻𑀢𑀺 𑀕𑀘𑁆𑀙𑀦𑁆𑀢𑁄, 𑀕𑀦𑁆𑀥𑁄 𑀲𑀽𑀘𑀦𑀢𑁄𑀧𑀺 𑀯𑀸;

𑀅𑀬𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑁄, 𑀕𑀦𑁆𑀥𑀸𑀭𑀫𑁆𑀫𑀡𑀲𑀫𑁆𑀫𑀢𑁄.

𑁨𑁯𑁭.

𑀭𑀲𑀫𑀸𑀦𑀸 𑀭𑀲𑀦𑁆𑀢𑀻𑀢𑀺, 𑀭𑀲𑁄𑀢𑀺 𑀧𑀭𑀺𑀓𑀺𑀢𑁆𑀢𑀺𑀢𑁄;

𑀲𑁄𑀯 𑀘𑀢𑀼𑀲𑀫𑀼𑀝𑁆𑀞𑀸𑀦𑁄, 𑀭𑀲𑀸𑀭𑀫𑁆𑀫𑀡𑀦𑀸𑀫𑀓𑁄.

𑁨𑁯𑁮.

𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁, 𑀧𑀣𑀯𑀻𑀢𑁂𑀚𑀯𑀸𑀬𑀯𑁄;

𑀨𑁄𑀝𑁆𑀞𑀩𑁆𑀩𑀁 𑀘𑀢𑀼𑀲𑀫𑁆𑀪𑀽𑀢𑀁, 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀫𑀢𑀁.

𑁨𑁯𑁯.

𑀲𑀩𑁆𑀩𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀳𑀺𑀢𑁆𑀯𑀸 𑀭𑀽𑀧𑀸𑀤𑀺𑀧𑀜𑁆𑀘𑀓𑀁;

𑀮𑀓𑁆𑀔𑀡𑀸𑀦𑀺 𑀘 𑀧𑀜𑁆𑀜𑀢𑁆𑀢𑀺-𑀥𑀫𑁆𑀫𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁.

𑁩𑁦𑁦.

𑀙𑀸𑀭𑀫𑁆𑀫𑀡𑀸𑀦𑀺 ¶ 𑀮𑀩𑁆𑀪𑀦𑁆𑀢𑀺, 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁;

𑀢𑀻𑀡𑀺 𑀭𑀽𑀧𑁂 𑀧𑀦𑀸𑀭𑀽𑀧𑁂, 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀓𑀓𑀁.

𑁩𑁦𑁧.

𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸 ¶ , 𑀆𑀧𑀸𑀣𑀁 𑀦 𑀯𑀚𑀦𑁆𑀢𑀺 𑀬𑁂;

𑀢𑁂 𑀥𑀫𑁆𑀫𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀬𑁂𑀲𑀁 𑀭𑀽𑀧𑀸𑀤𑀬𑁄 𑀓𑀺𑀭.

𑁩𑁦𑁨.

𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀯, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀁;

𑀦𑁂𑀯 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁, 𑀫𑀦𑁄 𑀢𑁂𑀲𑀁 𑀢𑀼 𑀕𑁄𑀘𑀭𑀁.

𑁩𑁦𑁩.

𑀢𑀜𑁆𑀘 ¶ ‘‘𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺, 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀲𑀢𑁆𑀣𑀼𑀦𑀸;

𑀭𑀽𑀧𑀸𑀤𑀸𑀭𑀫𑁆𑀫𑀡𑀸𑀦𑁂𑀯, 𑀳𑁄𑀦𑁆𑀢𑀺 𑀭𑀽𑀧𑀸𑀤𑀬𑁄 𑀧𑀦.

𑁩𑁦𑁪.

𑀤𑀺𑀩𑁆𑀩𑀘𑀓𑁆𑀔𑀸𑀤𑀺𑀜𑀸𑀡𑀸𑀦𑀁, 𑀭𑀽𑀧𑀸𑀤𑀻𑀦𑁂𑀯 𑀕𑁄𑀘𑀭𑀸;

𑀅𑀦𑀸𑀧𑀸𑀣𑀕𑀢𑀸𑀦𑁂𑀯, 𑀢𑀸𑀦𑀻𑀢𑀺𑀧𑀺 𑀦 𑀬𑀼𑀚𑁆𑀚𑀢𑀺.

𑁩𑁦𑁫.

𑀬𑀁 𑀭𑀽𑀧𑀸𑀭𑀫𑁆𑀫𑀡𑀁 𑀳𑁄𑀦𑁆𑀢𑀁, 𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀓𑀣𑀁;

𑀏𑀯𑀁 𑀲𑀢𑀺 𑀧𑀦𑁂𑀢𑁂𑀲𑀁, 𑀦𑀺𑀬𑀫𑁄𑀢𑀺 𑀓𑀣𑀁 𑀪𑀯𑁂.

𑁩𑁦𑁬.

𑀲𑀩𑁆𑀩𑀁 𑀆𑀭𑀫𑁆𑀫𑀡𑀁 𑀏𑀢𑀁, 𑀙𑀩𑁆𑀩𑀺𑀥𑀁 𑀲𑀫𑀼𑀤𑀻𑀭𑀺𑀢𑀁;

𑀢𑀁 𑀧𑀭𑀺𑀢𑁆𑀢𑀢𑁆𑀢𑀺𑀓𑀸𑀤𑀻𑀦𑀁, 𑀯𑀲𑁂𑀦 𑀩𑀳𑀼𑀥𑀸 𑀫𑀢𑀁.

𑁩𑁦𑁭.

𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘, 𑀓𑁆𑀭𑀺𑀬𑀸𑀳𑁂𑀢𑀼𑀤𑁆𑀯𑀬𑀫𑁆𑀧𑀺 𑀘;

𑀧𑀜𑁆𑀘𑀯𑀻𑀲𑀢𑀺 𑀏𑀓𑀦𑁆𑀢𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀺𑀬𑀼𑀁.

𑁩𑁦𑁮.

𑀇𑀝𑁆𑀞𑀸𑀤𑀺𑀪𑁂𑀤𑀸 𑀧𑀜𑁆𑀘𑁂𑀯, 𑀭𑀽𑀧𑀲𑀤𑁆𑀤𑀸𑀤𑀬𑁄 𑀧𑀦;

𑀯𑀺𑀜𑁆𑀜𑀸𑀡𑀸𑀦𑀁 𑀤𑁆𑀯𑀺𑀧𑀜𑁆𑀘𑀦𑁆𑀦𑀁, 𑀕𑁄𑀘𑀭𑀸 𑀧𑀝𑀺𑀧𑀸𑀝𑀺𑀬𑀸.

𑁩𑁦𑁯.

𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀲𑀩𑁆𑀩𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀢𑀼;

𑀢𑁂𑀭𑀲𑀦𑁆𑀦𑀁 𑀧𑀦𑁂𑀢𑁂𑀲𑀁, 𑀭𑀽𑀧𑀓𑁆𑀔𑀦𑁆𑀥𑁄𑀯 𑀕𑁄𑀘𑀭𑁄.

𑁩𑁧𑁦.

𑀦𑀸𑀭𑀽𑀧𑀁 𑀦 𑀘 𑀧𑀜𑁆𑀜𑀢𑁆𑀢𑀺𑀁, 𑀦𑀸𑀢𑀻𑀢𑀁 𑀦 𑀘𑀦𑀸𑀕𑀢𑀁;

𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁂 𑀘, 𑀯𑀢𑁆𑀢𑀫𑀸𑀦𑁄 𑀳𑀺 𑀕𑁄𑀘𑀭𑁄.

𑁩𑁧𑁧.

𑀢𑁂𑀭𑀲𑁂𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀚𑀸𑀬𑀦𑁆𑀢𑁂 𑀓𑀸𑀫𑀥𑀸𑀢𑀼𑀬𑀁;

𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑁂, 𑀦𑁂𑀯 𑀓𑀺𑀜𑁆𑀘𑀺 𑀅𑀭𑀽𑀧𑀺𑀲𑀼.

𑁩𑁧𑁨.

𑀫𑀳𑀸𑀧𑀸𑀓𑀸𑀦𑀫𑀝𑁆𑀞𑀦𑁆𑀦𑀁 ¶ ¶ , 𑀲𑀦𑁆𑀢𑀻𑀭𑀡𑀢𑁆𑀢𑀬𑀲𑁆𑀲𑀧𑀺;

𑀙𑀲𑀼 𑀤𑁆𑀯𑀸𑀭𑁂𑀲𑀼 𑀭𑀽𑀧𑀸𑀤𑀺𑀙𑀧𑀭𑀺𑀢𑁆𑀢𑀸𑀦𑀺 𑀕𑁄𑀘𑀭𑀸.

𑁩𑁧𑁩.

𑀭𑀽𑀧𑀸𑀤𑀬𑁄 𑀧𑀭𑀺𑀢𑁆𑀢𑀸 𑀙, 𑀳𑀲𑀺𑀢𑀼𑀧𑁆𑀧𑀸𑀤𑀕𑁄𑀘𑀭𑀸;

𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀼𑀧𑁆𑀧𑀦𑁆𑀦𑀸, 𑀫𑀦𑁄𑀤𑁆𑀯𑀸𑀭𑁂 𑀢𑀺𑀓𑀸𑀮𑀺𑀓𑀸.

𑁩𑁧𑁪.

𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁;

𑀙𑀩𑁆𑀩𑀺𑀥𑀁 𑀦𑀺𑀬𑀢𑀁 𑀳𑁄𑀢𑀺, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁩𑁧𑁫.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀏𑀓𑀦𑁆𑀢𑁂𑀦 𑀅𑀦𑀜𑁆𑀜𑀢𑁄;

𑀅𑀝𑁆𑀞𑀸𑀦𑀸𑀲𑀯𑀘𑀺𑀢𑁆𑀢𑀸𑀦𑀁, 𑀅𑀧𑁆𑀧𑀫𑀸𑀡𑁄𑀯 𑀕𑁄𑀘𑀭𑁄.

𑁩𑁧𑁬.

𑀘𑀢𑁆𑀢𑀸𑀭𑁄 𑀜𑀸𑀡𑀳𑀻𑀦𑀸 𑀘, 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀢𑁄;

𑀓𑁆𑀭𑀺𑀬𑀢𑁄𑀧𑀺 𑀘 𑀘𑀢𑁆𑀢𑀸𑀭𑁄, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺 𑀘.

𑁩𑁧𑁭.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀘𑁂𑀯, 𑀢𑁂 𑀫𑀳𑀕𑁆𑀕𑀢𑀕𑁄𑀘𑀭𑀸;

𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀦𑀯𑀢𑁆𑀢𑀩𑁆𑀩𑀸𑀯 𑀳𑁄𑀦𑁆𑀢𑀺 𑀢𑁂.

𑁩𑁧𑁮.

𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀧𑀼𑀜𑁆𑀜𑀢𑁄 𑀓𑁆𑀭𑀺𑀬𑀢𑁄𑀧𑀺 𑀘;

𑀢𑀣𑀸𑀪𑀺𑀜𑁆𑀜𑀸𑀤𑁆𑀯𑀬𑀜𑁆𑀘𑁂𑀯, 𑀓𑁆𑀭𑀺𑀬𑀸𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘.

𑁩𑁧𑁯.

𑀏𑀓𑀸𑀤𑀲𑀦𑁆𑀦𑀫𑁂𑀢𑁂𑀲𑀁, 𑀢𑀺𑀯𑀺𑀥𑁄 𑀳𑁄𑀢𑀺 𑀕𑁄𑀘𑀭𑁄;

𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀦𑀯𑀢𑁆𑀢𑀩𑁆𑀩𑀸𑀧𑀺 𑀳𑁄𑀦𑁆𑀢𑀺𑀫𑁂.

𑁩𑁨𑁦.

𑀬𑀸𑀦𑀺 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺, 𑀘𑀺𑀢𑁆𑀢𑀸𑀦𑀺 𑀧𑀦 𑀢𑀸𑀦𑀺 𑀳𑀺;

𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀻𑀢𑀺, 𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀯𑀺𑀪𑀸𑀯𑀺𑀦𑀸.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁 𑀲𑀫𑀢𑁆𑀢𑀁.

𑁩𑁨𑁧.

𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘 ¶ , 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁;

𑀙𑀩𑁆𑀩𑀺𑀥𑀁 𑀧𑀦 𑀏𑀓𑀦𑁆𑀢-𑀅𑀢𑀻𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁩𑁨𑁨.

𑀯𑀺𑀜𑁆𑀜𑀸𑀡𑀸𑀦𑀁 𑀤𑁆𑀯𑀺𑀧𑀜𑁆𑀘𑀦𑁆𑀦𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀘;

𑀧𑀜𑁆𑀘 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀕𑁄𑀘𑀭𑀸.

𑁩𑁨𑁩.

𑀅𑀝𑁆𑀞 ¶ ¶ 𑀓𑀸𑀫𑀫𑀳𑀸𑀧𑀸𑀓𑀸, 𑀲𑀦𑁆𑀢𑀻𑀭𑀡𑀢𑁆𑀢𑀬𑀫𑁆𑀧𑀺 𑀘;

𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀦𑁆𑀢𑀺, 𑀤𑁆𑀯𑀸𑀤𑀲𑁂𑀢𑁂 𑀢𑀼 𑀫𑀸𑀦𑀲𑀸.

𑁩𑁨𑁪.

𑀲𑀺𑀬𑀸𑀢𑀻𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀦𑀸𑀕𑀢𑀕𑁄𑀘𑀭𑀸;

𑀓𑀼𑀲𑀮𑀸𑀓𑀼𑀲𑀮𑀸 𑀓𑀸𑀫𑁂, 𑀓𑁆𑀭𑀺𑀬𑀢𑁄 𑀦𑀯 𑀫𑀸𑀦𑀲𑀸.

𑁩𑁨𑁫.

𑀅𑀪𑀺𑀜𑁆𑀜𑀸𑀫𑀸𑀦𑀲𑀸 𑀤𑁆𑀯𑁂𑀧𑀺, 𑀲𑀺𑀬𑀸𑀢𑀻𑀢𑀸𑀤𑀺𑀕𑁄𑀘𑀭𑀸;

𑀲𑀦𑁆𑀢𑀧𑀜𑁆𑀜𑀢𑁆𑀢𑀺𑀓𑀸𑀮𑁂𑀧𑀺, 𑀦𑀯𑀢𑁆𑀢𑀩𑁆𑀩𑀸 𑀪𑀯𑀦𑁆𑀢𑀺𑀫𑁂.

𑁩𑁨𑁬.

𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺;

𑀦𑀯𑀢𑁆𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑁂𑀯, 𑀅𑀢𑀻𑀢𑀸𑀭𑀫𑁆𑀫𑀡𑀸𑀤𑀺𑀦𑀸.

𑁩𑁨𑁭.

𑀓𑀸𑀫𑀢𑁄 𑀘 𑀓𑁆𑀭𑀺𑀬𑀸 𑀧𑀜𑁆𑀘, 𑀭𑀽𑀧𑀢𑁄 𑀧𑀜𑁆𑀘𑀫𑀻 𑀓𑁆𑀭𑀺𑀬𑀸;

𑀘𑀺𑀢𑁆𑀢𑀸𑀦𑀁 𑀙𑀦𑁆𑀦𑀫𑁂𑀢𑁂𑀲𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀕𑁄𑀘𑀭𑀁.

𑁩𑁨𑁮.

𑀦𑀺𑀩𑁆𑀩𑀸𑀦𑀜𑁆𑀘 𑀨𑀮𑀁 𑀫𑀕𑁆𑀕𑀁, 𑀭𑀽𑀧𑀜𑁆𑀘𑀸𑀭𑀽𑀧𑀫𑁂𑀯 𑀘;

𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁 𑀓𑀸𑀢𑀼𑀁, 𑀓𑀢𑀺 𑀘𑀺𑀢𑁆𑀢𑀸𑀦𑀺 𑀫𑁂 𑀯𑀤.

𑁩𑁨𑁯.

𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸,

𑀧𑀼𑀜𑁆𑀜𑀢𑁄 𑀓𑁆𑀭𑀺𑀬𑀢𑁄 𑀢𑀣𑀸;

𑀅𑀪𑀺𑀜𑁆𑀜𑀸𑀳𑀤𑀬𑀸 𑀤𑁆𑀯𑁂𑀧𑀺,

𑀓𑁆𑀭𑀺𑀬𑀸 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘.

𑁩𑁩𑁦.

𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁 𑀓𑀸𑀢𑀼𑀁, 𑀘𑀺𑀢𑁆𑀢𑀸𑀦𑁂𑀓𑀸𑀤𑀲𑀸𑀧𑀺 𑀘;

𑀦𑀺𑀩𑁆𑀩𑀸𑀦𑀜𑁆𑀘 𑀨𑀮𑀁 𑀫𑀕𑁆𑀕𑀁, 𑀭𑀽𑀧𑀜𑁆𑀘𑀸𑀭𑀽𑀧𑀫𑁂𑀯 𑀘.

𑁩𑁩𑁧.

𑀘𑀺𑀢𑁆𑀢𑁂𑀲𑀼 𑀧𑀦 𑀲𑀩𑁆𑀩𑁂𑀲𑀼, 𑀓𑀢𑀺 𑀘𑀺𑀢𑁆𑀢𑀸𑀦𑀺 𑀫𑁂 𑀯𑀤;

𑀅𑀭𑀳𑀢𑁆𑀢𑀨𑀮𑀁 𑀫𑀕𑁆𑀕𑀁, 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁.

𑁩𑁩𑁨.

𑀲𑀩𑁆𑀩𑁂𑀲𑀼 𑀧𑀦 𑀘𑀺𑀢𑁆𑀢𑁂𑀲𑀼, 𑀙 𑀘 𑀘𑀺𑀢𑁆𑀢𑀸𑀦𑀺 𑀫𑁂 𑀲𑀼𑀡;

𑀅𑀭𑀳𑀢𑁆𑀢𑀨𑀮𑀁 𑀫𑀕𑁆𑀕𑀁, 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁.

𑁩𑁩𑁩.

𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀓𑁆𑀭𑀺𑀬𑀸 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘;

𑀓𑁆𑀭𑀺𑀬𑀸𑀪𑀺𑀜𑁆𑀜𑀸 𑀫𑀦𑁄𑀥𑀸𑀢𑀼, 𑀙 𑀘 𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁.

𑁩𑁩𑁪.

𑀘𑀢𑁆𑀢𑀸𑀭𑁄 ¶ ¶ 𑀜𑀸𑀡𑀲𑀁𑀬𑀼𑀢𑁆𑀢𑀸-𑀪𑀺𑀜𑁆𑀜𑀸𑀘𑀺𑀢𑁆𑀢𑀜𑁆𑀘 𑀧𑀼𑀜𑁆𑀜𑀢𑁄;

𑀦𑀸𑀭𑀳𑀢𑁆𑀢𑀁 𑀨𑀮𑀁 𑀫𑀕𑁆𑀕𑀁, 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀕𑁄𑀘𑀭𑀁.

𑁩𑁩𑁫.

𑀓𑀲𑁆𑀫𑀸 𑀅𑀭𑀳𑀢𑁄 𑀫𑀕𑁆𑀕-𑀘𑀺𑀢𑁆𑀢𑀁 𑀯𑀸 𑀨𑀮𑀫𑀸𑀦𑀲𑀁;

𑀧𑀼𑀣𑀼𑀚𑁆𑀚𑀦𑀸 𑀯𑀸 𑀲𑁂𑀓𑁆𑀔𑀸 𑀯𑀸, 𑀦 𑀲𑀓𑁆𑀓𑁄𑀦𑁆𑀢𑀺 𑀳𑀺 𑀚𑀸𑀦𑀺𑀢𑀼𑀁.

𑁩𑁩𑁬.

𑀧𑀼𑀣𑀼𑀚𑁆𑀚𑀦𑁄 𑀦 𑀚𑀸𑀦𑀸𑀢𑀺,

𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀸𑀦𑀲𑀁;

𑀲𑁄𑀢𑀸𑀧𑀦𑁆𑀦𑁄 𑀦 𑀚𑀸𑀦𑀸𑀢𑀺,

𑀲𑀓𑀤𑀸𑀕𑀸𑀫𑀺𑀲𑁆𑀲 𑀫𑀸𑀦𑀲𑀁.

𑁩𑁩𑁭.

𑀲𑀓𑀤𑀸𑀕𑀸𑀫𑀻 𑀦 𑀚𑀸𑀦𑀸𑀢𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀫𑀸𑀦𑀲𑀁;

𑀅𑀦𑀸𑀕𑀸𑀫𑀻 𑀦 𑀚𑀸𑀦𑀸𑀢𑀺, 𑀅𑀭𑀳𑀦𑁆𑀢𑀲𑁆𑀲 𑀫𑀸𑀦𑀲𑀁.

𑁩𑁩𑁮.

𑀳𑁂𑀝𑁆𑀞𑀺𑀫𑁄 ¶ 𑀳𑁂𑀝𑁆𑀞𑀺𑀫𑁄 𑀦𑁂𑀯, 𑀚𑀸𑀦𑀸𑀢𑀺 𑀉𑀧𑀭𑀽𑀧𑀭𑀺;

𑀉𑀧𑀭𑀽𑀧𑀭𑀺 𑀚𑀸𑀦𑀸𑀢𑀺, 𑀳𑁂𑀝𑁆𑀞𑀺𑀫𑀲𑁆𑀲 𑀘 𑀫𑀸𑀦𑀲𑀁.

𑁩𑁩𑁯.

𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲,

𑀳𑁄𑀢𑀺 𑀆𑀭𑀫𑁆𑀫𑀡𑀁 𑀧𑀦;

𑀢𑀫𑀼𑀤𑁆𑀥𑀭𑀺𑀢𑁆𑀯𑀸 𑀏𑀓𑁂𑀓𑀁,

𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁.

𑁩𑁪𑁦.

𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑁂, 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀘;

𑀅𑀪𑀺𑀜𑁆𑀜𑀸𑀫𑀸𑀦𑀲𑀲𑁆𑀲𑀸𑀧𑀺, 𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲 𑀘.

𑁩𑁪𑁧.

𑀓𑀸𑀫𑀸𑀯𑀘𑀭𑀧𑀸𑀓𑀲𑁆𑀲, 𑀢𑀣𑀸 𑀓𑀸𑀫𑀓𑁆𑀭𑀺𑀬𑀲𑁆𑀲 𑀘;

𑀏𑀢𑁂𑀲𑀁 𑀧𑀦 𑀭𑀸𑀲𑀻𑀦𑀁, 𑀙𑀦𑁆𑀦𑀁 𑀆𑀭𑀫𑁆𑀫𑀡𑀁 𑀲𑀺𑀬𑀸.

𑁩𑁪𑁨.

𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀓𑀸𑀫𑀧𑀸𑀓𑀁 𑀢𑀢𑁄 𑀯𑀺𑀦𑀸;

𑀧𑀜𑁆𑀘𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁, 𑀳𑁄𑀦𑁆𑀢𑀺 𑀆𑀭𑀫𑁆𑀫𑀡𑀸𑀦𑀺 𑀳𑀺.

𑁩𑁪𑁩.

𑀆𑀭𑀼𑀧𑁆𑀧𑀓𑀼𑀲𑀮𑀜𑁆𑀘𑀸𑀧𑀺, 𑀢𑁂𑀪𑀽𑀫𑀓𑀼𑀲𑀮𑀲𑁆𑀲 𑀘;

𑀢𑁂𑀪𑀽𑀫𑀓𑀓𑁆𑀭𑀺𑀬𑀲𑁆𑀲𑀸𑀧𑀺, 𑀢𑀣𑁂𑀯𑀸𑀓𑀼𑀲𑀮𑀲𑁆𑀲𑀧𑀺.

𑁩𑁪𑁪.

𑀅𑀭𑀽𑀧𑀸𑀯𑀘𑀭𑀧𑀸𑀓𑀸𑀦𑀁 ¶ ¶ , 𑀤𑁆𑀯𑀺𑀦𑁆𑀦𑀁 𑀧𑀦 𑀘𑀢𑀼𑀢𑁆𑀣𑀤𑀼;

𑀇𑀫𑁂𑀲𑀁 𑀅𑀝𑁆𑀞𑀭𑀸𑀲𑀻𑀦𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁪𑁫.

𑀅𑀧𑀭𑀺𑀬𑀸𑀧𑀦𑁆𑀦𑀧𑀼𑀜𑁆𑀜𑀫𑁆𑀧𑀺, 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘;

𑀭𑀽𑀧𑀢𑁄 𑀧𑀜𑁆𑀘𑀫𑀲𑁆𑀲𑀸𑀧𑀺, 𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲 𑀘.

𑁩𑁪𑁬.

𑀘𑀢𑀼𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀲𑀤𑀸;

𑀢𑀣𑁂𑀯𑀸𑀓𑀼𑀲𑀮𑀁 𑀓𑀸𑀫-𑀭𑀽𑀧𑀸𑀯𑀘𑀭𑀢𑁄 𑀧𑀦.

𑁩𑁪𑁭.

𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲𑀸𑀧𑀺, 𑀢𑀣𑁂𑀯𑀸𑀓𑀼𑀲𑀮𑀲𑁆𑀲 𑀘;

𑀓𑀸𑀫𑀸𑀯𑀘𑀭𑀧𑀸𑀓𑀸𑀦𑀁, 𑀙𑀦𑁆𑀦𑀁 𑀭𑀸𑀲𑀻𑀦𑀫𑀻𑀭𑀺𑀢𑀁.

𑁩𑁪𑁮.

𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑁂, 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘;

𑀭𑀽𑀧𑀸𑀯𑀘𑀭𑀢𑁄 𑀘𑁂𑀯, 𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲 𑀘.

𑁩𑁪𑁯.

𑀓𑀸𑀫𑀸𑀯𑀘𑀭𑀧𑀸𑀓𑀸𑀦𑀁, 𑀢𑀣𑁂𑀯𑀸𑀓𑀼𑀲𑀮𑀲𑁆𑀲 𑀘;

𑀙𑀦𑁆𑀦𑀜𑁆𑀘 𑀧𑀦 𑀭𑀸𑀲𑀻𑀦𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁫𑁦.

𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀭𑀽𑀧𑁂, 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘;

𑀭𑀽𑀧𑀸𑀯𑀘𑀭𑀢𑁄 𑀘𑁂𑀯, 𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲 𑀘.

𑁩𑁫𑁧.

𑀅𑀧𑀼𑀜𑁆𑀜𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁, 𑀭𑀸𑀲𑀻𑀦𑀁 𑀳𑁄𑀢𑀺 𑀕𑁄𑀘𑀭𑁄;

𑀅𑀭𑀽𑀧𑀸𑀯𑀘𑀭𑀧𑀸𑀓𑁂𑀲𑀼, 𑀅𑀬𑀫𑁂𑀯 𑀦𑀬𑁄 𑀫𑀢𑁄.

𑁩𑁫𑁨.

𑀅𑀧𑀭𑀺𑀬𑀸𑀧𑀦𑁆𑀦𑀧𑀸𑀓𑀫𑁆𑀧𑀺, 𑀓𑀸𑀫𑀢𑁄 𑀭𑀽𑀧𑀢𑁄𑀧𑀺 𑀘;

𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀧𑀦.

𑁩𑁫𑁩.

𑀓𑁆𑀭𑀺𑀬𑀘𑀺𑀢𑁆𑀢𑀫𑀺𑀤𑀁 𑀓𑀸𑀫𑁂, 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘;

𑀭𑀽𑀧𑀸𑀯𑀘𑀭𑀢𑁄 𑀘𑁂𑀯, 𑀓𑀼𑀲𑀮𑀲𑁆𑀲 𑀓𑁆𑀭𑀺𑀬𑀲𑁆𑀲 𑀘.

𑁩𑁫𑁪.

𑀓𑀸𑀫𑀸𑀯𑀘𑀭𑀧𑀸𑀓𑀲𑁆𑀲, 𑀢𑀣𑁂𑀯𑀸𑀓𑀼𑀲𑀮𑀲𑁆𑀲 𑀘;

𑀙𑀦𑁆𑀦𑀁 𑀭𑀸𑀲𑀻𑀦𑀫𑁂𑀢𑁂𑀲𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁫𑁫.

𑀬𑀁 ¶ 𑀓𑁆𑀭𑀺𑀬𑀸𑀫𑀸𑀦𑀲𑀁 𑀭𑀽𑀧𑁂, 𑀓𑀸𑀫𑀧𑀸𑀓𑀁 𑀢𑀢𑁄 𑀯𑀺𑀦𑀸;

𑀧𑀜𑁆𑀘𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀧𑀦.

𑁩𑁫𑁬.

𑀓𑁆𑀭𑀺𑀬𑀸𑀘𑀺𑀢𑁆𑀢𑀁 ¶ ¶ 𑀧𑀦𑀸𑀭𑀼𑀧𑁆𑀧𑁂, 𑀢𑁂𑀲𑀁 𑀧𑀜𑁆𑀘𑀦𑁆𑀦𑀫𑁂𑀯 𑀘;

𑀆𑀭𑀼𑀧𑁆𑀧𑀲𑁆𑀲 𑀓𑁆𑀭𑀺𑀬𑀲𑁆𑀲𑀸𑀧𑀺, 𑀙𑀦𑁆𑀦𑀁 𑀳𑁄𑀢𑁂𑀯 𑀕𑁄𑀘𑀭𑁄.

𑁩𑁫𑁭.

𑀭𑀽𑀧𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀲𑁆𑀲, 𑀢𑀣𑁂𑀯 𑀓𑀼𑀲𑀮𑀲𑁆𑀲 𑀘.

𑁩𑁫𑁮.

𑀅𑀪𑀺𑀜𑁆𑀜𑀸𑀤𑁆𑀯𑀬𑀘𑀺𑀢𑁆𑀢𑀲𑁆𑀲, 𑀓𑀸𑀫𑀧𑀸𑀓𑀓𑁆𑀭𑀺𑀬𑀲𑁆𑀲 𑀘;

𑀙𑀦𑁆𑀦𑀁 𑀭𑀸𑀲𑀻𑀦𑀫𑁂𑀢𑁂𑀲𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁫𑁯.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀸𑀫-𑀭𑀽𑀧𑀸𑀯𑀘𑀭𑀢𑁄 𑀧𑀦;

𑀓𑀼𑀲𑀮𑀲𑁆𑀲𑀼𑀪𑀬𑀲𑁆𑀲𑀸𑀧𑀺, 𑀓𑀸𑀫𑀭𑀽𑀧𑀓𑁆𑀭𑀺𑀬𑀲𑁆𑀲 𑀘.

𑁩𑁬𑁦.

𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘𑁂𑀯, 𑀨𑀮𑀲𑁆𑀲 𑀓𑀼𑀲𑀮𑀲𑁆𑀲 𑀘;

𑀙𑀦𑁆𑀦𑀁 𑀭𑀸𑀲𑀻𑀦𑀫𑁂𑀢𑁂𑀲𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁬𑁧.

𑀦𑀸𑀦𑀧𑁆𑀧𑀓𑀸𑀭𑀓𑀁 𑀲𑀩𑁆𑀩𑀁, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀁 𑀧𑀦;

𑀢𑁂𑀪𑀽𑀫𑀓𑀲𑁆𑀲 𑀧𑀼𑀜𑁆𑀜𑀲𑁆𑀲, 𑀢𑀣𑁂𑀯𑀸𑀓𑀼𑀲𑀮𑀲𑁆𑀲 𑀘.

𑁩𑁬𑁨.

𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀲𑁆𑀲, 𑀢𑁂𑀪𑀽𑀫𑀓𑀓𑁆𑀭𑀺𑀬𑀲𑁆𑀲 𑀘;

𑀦𑀯𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁, 𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁬𑁩.

𑀭𑀽𑀧𑀸𑀭𑀫𑁆𑀫𑀡𑀺𑀓𑀸 𑀤𑁆𑀯𑁂 𑀢𑀼, 𑀤𑁆𑀯𑁂 𑀤𑁆𑀯𑁂 𑀲𑀤𑁆𑀥𑀸𑀤𑀺𑀕𑁄𑀘𑀭𑀸;

𑀧𑀜𑁆𑀘𑀸𑀭𑀫𑁆𑀫𑀡𑀺𑀓𑀸 𑀦𑀸𑀫, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀬𑁄 𑀫𑀢𑀸.

𑁩𑁬𑁪.

𑀇𑀥𑁂𑀓𑀘𑀢𑁆𑀢𑀸𑀮𑀻𑀲𑁂𑀯, 𑀙𑀴𑀸𑀭𑀫𑁆𑀫𑀡𑀺𑀓𑀸 𑀫𑀢𑀸;

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦-𑀫𑀬𑀫𑀸𑀭𑀫𑁆𑀫𑀡𑀓𑁆𑀓𑀫𑁄.

𑁩𑁬𑁫.

𑀧𑀜𑁆𑀘𑀸𑀪𑀺𑀜𑁆𑀜𑀸 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀭𑀽𑀧𑀸𑀭𑀽𑀧𑀸 𑀅𑀦𑀸𑀲𑀯𑀸;

𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀇𑀫𑁂 𑀲𑀩𑁆𑀩𑁂, 𑀥𑀫𑁆𑀫𑀸𑀭𑀫𑁆𑀫𑀡𑀕𑁄𑀘𑀭𑀸.

𑁩𑁬𑁬.

𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄;

𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲, 𑀓𑁆𑀭𑀺𑀬𑀲𑁆𑀲𑀸𑀭𑀫𑁆𑀫𑀡𑀁 𑀪𑀯𑁂.

𑁩𑁬𑁭.

𑀧𑀞𑀫𑀸𑀭𑀼𑀧𑁆𑀧𑀧𑀸𑀓𑁄𑀬𑀁 ¶ , 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄;

𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲, 𑀓𑁆𑀭𑀺𑀬𑀲𑁆𑀲𑀸𑀭𑀫𑁆𑀫𑀡𑀁 𑀦 𑀳𑀺.

𑁩𑁬𑁮.

𑀧𑀞𑀫𑀁 ¶ 𑀢𑀼 𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄;

𑀦 𑀧𑀼𑀜𑁆𑀜𑀲𑁆𑀲 𑀦 𑀧𑀸𑀓𑀲𑁆𑀲, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀧𑀦.

𑁩𑁬𑁯.

𑀧𑀞𑀫𑀁 𑀢𑀼 𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄;

𑀓𑁆𑀭𑀺𑀬𑀲𑁆𑀲𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀇𑀢𑀺 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁩𑁭𑁦.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲, 𑀅𑀭𑀽𑀧𑀸𑀭𑀫𑁆𑀫𑀡𑀁 𑀤𑁆𑀯𑀺𑀥𑀸;

𑀓𑀼𑀲𑀮𑀁 𑀓𑀼𑀲𑀮𑀲𑁆𑀲𑀸𑀧𑀺, 𑀯𑀺𑀧𑀸𑀓𑀲𑁆𑀲 𑀘 𑀢𑀁 𑀲𑀺𑀬𑀸.

𑁩𑁭𑁧.

𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁;

𑀆𑀭𑀫𑁆𑀫𑀡𑀁 𑀢𑀺𑀥𑀸 𑀳𑁄𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

𑁩𑁭𑁨.

𑀓𑁆𑀭𑀺𑀬𑀲𑁆𑀲𑀸𑀧𑀺 𑀓𑁆𑀭𑀺𑀬𑀸 𑀳𑁄𑀢𑀺, 𑀓𑀼𑀲𑀮𑀫𑁆𑀧𑀺 𑀓𑁆𑀭𑀺𑀬𑀲𑁆𑀲 𑀘;

𑀓𑀼𑀲𑀮𑀁 𑀢𑀼 𑀯𑀺𑀧𑀸𑀓𑀲𑁆𑀲, 𑀏𑀯𑀁 𑀳𑁄𑀢𑀺 𑀢𑀺𑀥𑀸 𑀧𑀦.

𑁩𑁭𑁩.

𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀫𑁆𑀧𑀺, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑁂𑀢𑀲𑁄;

𑀏𑀯𑀫𑁂𑀯 𑀤𑁆𑀯𑀺𑀥𑀸 𑀘𑁂𑀯, 𑀢𑀺𑀥𑀸 𑀘𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁩𑁭𑁪.

𑀬𑀁 𑀬𑀁 𑀧𑀦 𑀇𑀥𑀸𑀭𑀩𑁆𑀪,

𑀬𑁂 𑀬𑁂 𑀚𑀸𑀬𑀦𑁆𑀢𑀺 𑀕𑁄𑀘𑀭𑀁;

𑀲𑁄 𑀲𑁄 𑀢𑁂𑀲𑀜𑁆𑀘 𑀢𑁂𑀲𑀜𑁆𑀘,

𑀳𑁄𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑁄.

𑁩𑁭𑁫.

𑀬𑁄 ¶ 𑀧𑀦𑀺𑀫𑀲𑁆𑀲 𑀦𑀭𑁄 𑀓𑀺𑀭 𑀧𑀸𑀭𑀁,

𑀤𑀼𑀢𑁆𑀢𑀭𑀫𑀼𑀢𑁆𑀢𑀭𑀫𑀼𑀢𑁆𑀢𑀭𑀢𑀻𑀥;

𑀲𑁄 𑀅𑀪𑀺𑀥𑀫𑁆𑀫𑀫𑀳𑀡𑁆𑀡𑀯𑀧𑀸𑀭𑀁,

𑀤𑀼𑀢𑁆𑀢𑀭𑀫𑀼𑀢𑁆𑀢𑀭𑀫𑀼𑀢𑁆𑀢𑀭𑀢𑁂𑀯.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀆𑀭𑀫𑁆𑀫𑀡𑀯𑀺𑀪𑀸𑀕𑁄 𑀦𑀸𑀫

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.

𑁭. 𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑁄

𑁩𑁭𑁬.

𑀅𑀦𑀦𑁆𑀢𑀜𑀸𑀡𑁂𑀦 ¶ ¶ ¶ 𑀦𑀺𑀭𑀗𑁆𑀕𑀡𑁂𑀦,

𑀕𑀼𑀡𑁂𑀲𑀺𑀦𑀸 𑀓𑀸𑀭𑀼𑀡𑀺𑀓𑁂𑀦 𑀢𑁂𑀦;

𑀯𑀼𑀢𑁆𑀢𑁂 𑀯𑀺𑀧𑀸𑀓𑁂 𑀫𑀢𑀺𑀧𑀸𑀝𑀯𑀢𑁆𑀣𑀁,

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀪𑀯𑀁 𑀲𑀼𑀡𑀸𑀣.

𑁩𑁭𑁭.

𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀺, 𑀧𑀸𑀓𑀸 𑀤𑁆𑀯𑀢𑁆𑀢𑀺𑀁𑀲 𑀤𑀲𑁆𑀲𑀺𑀢𑀸;

𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀓𑀫𑁆𑀫𑀸𑀦𑀺, 𑀯𑀺𑀧𑀸𑀓𑀸 𑀙𑀲𑀼 𑀤𑀺𑀲𑁆𑀲𑀭𑁂.

𑁩𑁭𑁮.

𑀓𑀼𑀲𑀮𑀁 𑀓𑀸𑀫𑀮𑁄𑀓𑀲𑁆𑀫𑀺𑀁, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁;

𑀢𑀁 𑀢𑀁 𑀧𑀘𑁆𑀘𑀬𑀫𑀸𑀕𑀫𑁆𑀫, 𑀤𑀤𑀸𑀢𑀺 𑀯𑀺𑀯𑀺𑀥𑀁 𑀨𑀮𑀁.

𑁩𑁭𑁯.

𑀏𑀓𑀸𑀬 𑀘𑁂𑀢𑀦𑀸𑀬𑁂𑀓𑀸, 𑀧𑀝𑀺𑀲𑀦𑁆𑀥𑀺 𑀧𑀓𑀸𑀲𑀺𑀢𑀸;

𑀦𑀸𑀦𑀸𑀓𑀫𑁆𑀫𑁂𑀳𑀺 𑀦𑀸𑀦𑀸 𑀘, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁩𑁮𑁦.

𑀢𑀺𑀳𑁂𑀢𑀼𑀓𑀁 𑀢𑀼 𑀬𑀁 𑀓𑀫𑁆𑀫𑀁, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀢𑀺𑀳𑁂𑀢𑀼𑀓𑀁 𑀤𑀼𑀳𑁂𑀢𑀼𑀜𑁆𑀘, 𑀯𑀺𑀧𑀸𑀓𑀁 𑀤𑁂𑀢𑁆𑀬𑀳𑁂𑀢𑀼𑀓𑀁.

𑁩𑁮𑁧.

𑀤𑀼𑀳𑁂𑀢𑀼𑀓𑀁 𑀢𑀼 𑀬𑀁 𑀓𑀫𑁆𑀫𑀁, 𑀢𑀁 𑀦 𑀤𑁂𑀢𑀺 𑀢𑀺𑀳𑁂𑀢𑀼𑀓𑀁;

𑀤𑀼𑀳𑁂𑀢𑀼𑀓𑀫𑀳𑁂𑀢𑀼𑀜𑁆𑀘, 𑀯𑀺𑀧𑀸𑀓𑀁 𑀤𑁂𑀢𑀺 𑀅𑀢𑁆𑀢𑀦𑁄.

𑁩𑁮𑁨.

𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦,

𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸;

𑀤𑀼𑀳𑁂𑀢𑀼𑀓𑀸𑀧𑀺 𑀳𑁄𑀢𑁂𑀯,

𑀦 𑀘 𑀳𑁄𑀢𑀺 𑀅𑀳𑁂𑀢𑀼𑀓𑀸.

𑁩𑁮𑁩.

𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦,

𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑀸;

𑀅𑀳𑁂𑀢𑀼𑀓𑀸𑀧𑀺 ¶ 𑀳𑁄𑀢𑁂𑀯,

𑀦 𑀘 𑀳𑁄𑀢𑀺 𑀢𑀺𑀳𑁂𑀢𑀼𑀓𑀸.

𑁩𑁮𑁪.

𑀅𑀲𑀗𑁆𑀔𑀸𑀭𑀫𑀲𑀗𑁆𑀔𑀸𑀭𑀁 ¶ , 𑀲𑀲𑀗𑁆𑀔𑀸𑀭𑀫𑁆𑀧𑀺 𑀤𑁂𑀢𑀺 𑀳𑀺;

𑀲𑀲𑀗𑁆𑀔𑀸𑀭𑀫𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁 𑀨𑀮𑀁 𑀢𑀣𑀸.

𑁩𑁮𑁫.

𑀏𑀓𑀸𑀬 𑀘𑁂𑀢𑀦𑀸𑀬𑁂𑀢𑁆𑀣, 𑀓𑀼𑀲𑀮𑀲𑁆𑀲 𑀘 𑀲𑁄𑀴𑀲;

𑀯𑀺𑀥𑀸 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑁩𑁮𑁬.

𑀆𑀭𑀫𑁆𑀫𑀡𑁂𑀦 𑀳𑁄𑀢𑁂𑀯, 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀁;

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀫𑁆𑀧𑀺, 𑀚𑀯𑀦𑁂𑀦 𑀦𑀺𑀬𑀸𑀫𑀺𑀢𑀁.

𑁩𑁮𑁭.

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦, 𑀓𑀼𑀲𑀮𑁂𑀦𑀸𑀤𑀺𑀦𑀸 𑀧𑀦;

𑀢𑀼𑀮𑁆𑀬𑁂𑀦 𑀧𑀸𑀓𑀘𑀺𑀢𑁆𑀢𑁂𑀦, 𑀕𑀳𑀺𑀢𑀸 𑀧𑀝𑀺𑀲𑀦𑁆𑀥𑀺 𑀘𑁂.

𑁩𑁮𑁮.

𑀩𑀮𑀯𑀸𑀭𑀫𑁆𑀫𑀡𑁂 ¶ 𑀇𑀝𑁆𑀞𑁂, 𑀘𑀓𑁆𑀔𑀼𑀲𑁆𑀲𑀸𑀧𑀸𑀣𑀫𑀸𑀕𑀢𑁂;

𑀫𑀦𑁄𑀥𑀸𑀢𑀼 𑀪𑀯𑀗𑁆𑀕𑀲𑁆𑀫𑀺𑀁, 𑀢𑀸𑀬 𑀆𑀯𑀝𑁆𑀝𑀺𑀢𑁂 𑀧𑀦.

𑁩𑁮𑁯.

𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀚𑀸𑀢𑁂𑀲𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀺𑀲𑀼;

𑀚𑀸𑀬𑀢𑁂 𑀚𑀯𑀦𑀁 𑀳𑀼𑀢𑁆𑀯𑀸, 𑀧𑀞𑀫𑀁 𑀓𑀸𑀫𑀫𑀸𑀦𑀲𑀁.

𑁩𑁯𑁦.

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀺𑀢𑁆𑀯𑀸𑀦, 𑀧𑀞𑀫𑁂 𑀓𑀼𑀲𑀮𑁂 𑀕𑀢𑁂;

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀢𑁂𑀦𑁂𑀯 𑀲𑀤𑀺𑀲𑀁 𑀧𑀼𑀦.

𑁩𑁯𑁧.

𑀯𑀺𑀧𑀸𑀓𑀁 𑀚𑀸𑀬𑀢𑁂 𑀘𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁;

𑀲𑀦𑁆𑀥𑀺𑀬𑀸 𑀢𑀼𑀮𑁆𑀬𑀢𑁄 𑀫𑀽𑀮-𑀪𑀯𑀗𑁆𑀕𑀦𑁆𑀢𑀺 𑀧𑀯𑀼𑀘𑁆𑀘𑀢𑁂.

𑁩𑁯𑁨.

𑀢𑀜𑁆𑀘 𑀲𑀦𑁆𑀢𑀻𑀭𑀡𑀁 𑀏𑀢𑁆𑀣, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑁂𑀯 𑀪𑀯𑀦𑁆𑀢𑀺 𑀳𑀺.

𑁩𑁯𑁩.

𑀬𑀤𑀸 𑀳𑀺 𑀤𑀼𑀢𑀺𑀬𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀁 𑀚𑀯𑀦𑀁 𑀢𑀤𑀸;

𑀢𑁂𑀦 𑀢𑀼𑀮𑁆𑀬𑀯𑀺𑀧𑀸𑀓𑀫𑁆𑀧𑀺, 𑀢𑀤𑀸𑀭𑀫𑁆𑀫𑀡𑀓𑀁 𑀲𑀺𑀬𑀸.

𑁩𑁯𑁪.

𑀲𑀦𑁆𑀥𑀺𑀬𑀸 𑀅𑀲𑀫𑀸𑀦𑀢𑁆𑀢𑀸, 𑀤𑁆𑀯𑁂 𑀦𑀸𑀫𑀸𑀦𑀺𑀲𑁆𑀲 𑀮𑀩𑁆𑀪𑀭𑁂;

‘‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕’’𑀦𑁆𑀢𑀺, ‘‘𑀢𑀤𑀸𑀭𑀫𑁆𑀫𑀡𑀓’’𑀦𑁆𑀢𑀺 𑀘.

𑁩𑁯𑁫.

𑀬𑀤𑀸 ¶ ¶ 𑀳𑀺 𑀢𑀢𑀺𑀬𑀁 𑀧𑀼𑀜𑁆𑀜𑀁, 𑀚𑀯𑀦𑀁 𑀳𑁄𑀢𑀺 𑀢𑁂𑀦 𑀘;

𑀲𑀤𑀺𑀲𑀁 𑀢𑀢𑀺𑀬𑀁 𑀧𑀸𑀓𑀁, 𑀢𑀤𑀸𑀭𑀫𑁆𑀫𑀡𑀓𑀁 𑀲𑀺𑀬𑀸.

𑁩𑁯𑁬.

‘‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕’’𑀦𑁆𑀢𑀺, 𑀇𑀤𑀫𑁆𑀧𑀺 𑀘 𑀧𑀯𑀼𑀘𑁆𑀘𑀢𑀺;

𑀇𑀫𑀺𑀦𑀸 𑀧𑀦 𑀲𑀤𑁆𑀥𑀺𑀁 𑀙, 𑀧𑀼𑀭𑀺𑀫𑀸𑀦𑀺 𑀘 𑀧𑀜𑁆𑀘𑀧𑀺.

𑁩𑁯𑁭.

𑀬𑀤𑀸 𑀘𑀢𑀼𑀢𑁆𑀣𑀁 𑀓𑀼𑀲𑀮𑀁, 𑀚𑀯𑀦𑀁 𑀳𑁄𑀢𑀺 𑀢𑁂𑀦 𑀘;

𑀢𑀼𑀮𑁆𑀬𑀁 𑀘𑀢𑀼𑀢𑁆𑀣𑀁 𑀧𑀸𑀓𑀁 𑀢𑀼, 𑀢𑀤𑀸𑀭𑀫𑁆𑀫𑀡𑀢𑀁 𑀯𑀚𑁂.

𑁩𑁯𑁮.

𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀢𑀼, 𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀁;

𑀧𑀼𑀭𑀺𑀫𑀸𑀦𑀺 𑀙 𑀧𑀸𑀓𑀸𑀦𑀺, 𑀇𑀫𑀺𑀦𑀸 𑀳𑁄𑀦𑁆𑀢𑀺 𑀲𑀢𑁆𑀢 𑀢𑀼.

𑁩𑁯𑁯.

𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀬𑀤𑀸 𑀇𑀝𑁆𑀞-𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀧𑀦;

𑀆𑀕𑀘𑁆𑀙𑀢𑀺 𑀢𑀤𑀸𑀧𑀸𑀣𑀁, 𑀢𑀤𑀸 𑀯𑀼𑀢𑁆𑀢𑀦𑀬𑁂𑀦𑀺𑀥.

𑁪𑁦𑁦.

𑀆𑀭𑀫𑁆𑀫𑀡𑀯𑀲𑁂𑀦𑁂𑀯, 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀢𑀺;

𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀲𑁆𑀫𑀸, 𑀳𑁄𑀢𑀺 𑀲𑀦𑁆𑀢𑀻𑀭𑀡𑀁 𑀫𑀦𑁄.

𑁪𑁦𑁧.

𑀉𑀧𑁂𑀓𑁆𑀔𑀸𑀲𑀳𑀺𑀢𑁂𑀲𑁆𑀯𑁂𑀯, 𑀚𑀯𑀦𑁂𑀲𑀼 𑀘𑀢𑀽𑀲𑀼𑀧𑀺;

𑀢𑁂𑀳𑀺 𑀢𑀼𑀮𑁆𑀬𑀸𑀦𑀺 𑀘𑀢𑁆𑀢𑀸𑀭𑀺, 𑀧𑀸𑀓𑀘𑀺𑀢𑁆𑀢𑀸𑀦𑀺 𑀚𑀸𑀬𑀭𑁂.

𑁪𑁦𑁨.

𑀯𑁂𑀤𑀦𑀸𑀬𑀸𑀲𑀫𑀸𑀦𑀢𑁆𑀢𑀸, 𑀅𑀘𑁆𑀘𑀦𑁆𑀢𑀁 𑀧𑀼𑀭𑀺𑀫𑁂𑀳𑀺 𑀢𑀼;

𑀳𑁄𑀦𑁆𑀢𑀺 𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀺, 𑀘𑀢𑁆𑀢𑀸𑀭𑀻𑀢𑀺 𑀘 𑀦𑀸𑀫𑀢𑁄.

𑁪𑁦𑁩.

𑀧𑀜𑁆𑀘𑀺𑀫𑀸𑀦𑀺 𑀯𑀺𑀧𑀸𑀓𑀸𑀦𑀺, 𑀧𑀼𑀭𑀺𑀫𑁂𑀳𑀺 𑀘 𑀲𑀢𑁆𑀢𑀳𑀺;

𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀧𑀸𑀓𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁪𑁦𑁪.

𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀣𑀸 𑀏𑀯𑀁, 𑀲𑁄𑀢𑀸𑀤𑀻𑀲𑁆𑀯𑀧𑀺 𑀦𑀺𑀤𑁆𑀤𑀺𑀲𑁂;

𑀤𑁆𑀯𑀸𑀤𑀲 𑀤𑁆𑀯𑀸𑀤𑀲 𑀧𑀸𑀓𑀸, 𑀲𑀫𑀲𑀝𑁆𑀞𑀺 𑀪𑀯𑀦𑁆𑀢𑀺𑀫𑁂.

𑁪𑁦𑁫.

𑀏𑀓𑀸𑀬 𑀘𑁂𑀢𑀦𑀸𑀬𑁂𑀯, 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀦;

𑀲𑀫𑀲𑀝𑁆𑀞𑀺 𑀯𑀺𑀧𑀸𑀓𑀸𑀦𑀺, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦 𑀲𑀁𑀲𑀬𑁄.

𑁪𑁦𑁬.

𑀕𑀳𑀺𑀢𑀸𑀕𑀳𑀡𑁂𑀦𑁂𑀢𑁆𑀣 ¶ ¶ , 𑀘𑀓𑁆𑀔𑀼𑀤𑁆𑀯𑀸𑀭𑁂𑀲𑀼 𑀤𑁆𑀯𑀸𑀤𑀲;

𑀲𑁄𑀢𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀺, 𑀘𑀢𑁆𑀢𑀸𑀭𑀻𑀢𑀺 𑀘 𑀲𑁄𑀴𑀲.

𑁪𑁦𑁭.

𑀏𑀯𑀫𑁂𑀯 ¶ 𑀲𑀲𑀗𑁆𑀔𑀸𑀭-𑀢𑀺𑀳𑁂𑀢𑀼𑀓𑀼𑀲𑀮𑁂𑀦𑀧𑀺;

𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀼-𑀧𑁂𑀓𑁆𑀔𑀸𑀲𑀳𑀕𑀢𑁂𑀳𑀺𑀧𑀺.

𑁪𑁦𑁮.

𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀢𑁂𑀲𑀁, 𑀯𑀺𑀧𑀸𑀓𑁂𑀳𑀺 𑀘 𑀢𑀻𑀳𑀺𑀧𑀺;

𑀏𑀲𑁂𑀯 𑀘 𑀦𑀬𑁄 𑀢𑁂𑀳𑀺, 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸.

𑁪𑁦𑁯.

𑀧𑀞𑀫𑀁 𑀇𑀝𑁆𑀞𑀫𑀚𑁆𑀛𑀢𑁆𑀢-𑀕𑁄𑀘𑀭𑀲𑁆𑀲 𑀯𑀲𑁂𑀦𑀺𑀥;

𑀧𑀯𑀢𑁆𑀢𑀺𑀁 𑀧𑀦 𑀤𑀲𑁆𑀲𑁂𑀢𑁆𑀯𑀸, 𑀉𑀧𑁂𑀓𑁆𑀔𑀸𑀲𑀳𑀺𑀢𑀤𑁆𑀯𑀬𑁂.

𑁪𑁧𑁦.

𑀤𑀲𑁆𑀲𑁂𑀢𑀩𑁆𑀩𑀸 𑀢𑀧𑁆𑀧𑀘𑁆𑀙𑀸 𑀢𑀼, 𑀇𑀝𑁆𑀞𑀲𑁆𑀫𑀺𑀁 𑀕𑁄𑀘𑀭𑁂 𑀇𑀥;

𑀏𑀓𑁂𑀓𑀲𑁆𑀫𑀺𑀁 𑀧𑀦 𑀤𑁆𑀯𑀸𑀭𑁂, 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲𑁂𑀯 𑀢𑀼.

𑁪𑁧𑁧.

𑀕𑀳𑀺𑀢𑀸𑀕𑀳𑀡𑁂𑀦𑁂𑀢𑁆𑀣, 𑀧𑀸𑀓𑀘𑀺𑀢𑁆𑀢𑀸𑀦𑀺 𑀲𑁄𑀴𑀲;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀜𑁂𑀬𑁆𑀬𑀁 𑀲𑀩𑁆𑀩𑀫𑀲𑁂𑀲𑀢𑁄.

𑁪𑁧𑁨.

𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸;

𑀪𑀯𑀢𑀻𑀢𑀺 𑀅𑀬𑀁 𑀯𑀸𑀭𑁄, 𑀯𑀼𑀢𑁆𑀢𑁄 𑀏𑀢𑁆𑀢𑀸𑀯𑀢𑀸 𑀫𑀬𑀸.

𑁪𑁧𑁩.

𑀲𑀦𑁆𑀥𑀺𑀫𑁂𑀓𑀁 𑀢𑀼 𑀓𑀫𑁆𑀫𑁂𑀓𑀁, 𑀚𑀦𑁂𑀢𑀺 𑀦 𑀢𑀢𑁄 𑀧𑀭𑀁;

𑀅𑀦𑁂𑀓𑀸𑀦𑀺 𑀯𑀺𑀧𑀸𑀓𑀸𑀦𑀺, 𑀲𑀜𑁆𑀚𑀦𑁂𑀢𑀺 𑀧𑀯𑀢𑁆𑀢𑀺𑀬𑀁.

𑁪𑁧𑁪.

𑀏𑀓𑀲𑁆𑀫𑀸 𑀳𑀺 𑀬𑀣𑀸 𑀩𑀻𑀚𑀸, 𑀚𑀸𑀬𑀢𑁂 𑀏𑀓𑀫𑀗𑁆𑀓𑀼𑀭𑀁;

𑀲𑀼𑀩𑀳𑀽𑀦𑀺 𑀨𑀮𑀸𑀦𑀺𑀲𑁆𑀲, 𑀳𑁄𑀦𑁆𑀢𑀺 𑀳𑁂𑀢𑀼𑀧𑀯𑀢𑁆𑀢𑀺𑀢𑁄.

𑁪𑁧𑁫.

𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑀸;

𑀳𑁄𑀢𑀻𑀢𑀺 𑀳𑀺 𑀅𑀬𑀁 𑀯𑀸𑀭𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀆𑀕𑀢𑁄.

𑁪𑁧𑁬.

𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀲𑁄𑀫𑀦𑀲𑁆𑀲𑀬𑀼𑀢𑁂𑀦𑀺𑀥;

𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦, 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀦.

𑁪𑁧𑁭.

𑀢𑁂𑀦 ¶ 𑀢𑀼𑀮𑁆𑀬𑁂𑀦 𑀧𑀸𑀓𑁂𑀦, 𑀕𑀳𑀺𑀢𑀸 𑀧𑀝𑀺𑀲𑀦𑁆𑀥𑀺 𑀘𑁂;

𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀘𑀓𑁆𑀔𑀼-𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑁂.

𑁪𑁧𑁮.

𑀲𑁄𑀫𑀦𑀲𑁆𑀲𑀬𑀼𑀢𑁂 𑀜𑀸𑀡-𑀳𑀻𑀦𑁂 𑀓𑀼𑀲𑀮𑀫𑀸𑀦𑀲𑁂;

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀺𑀢𑁆𑀯𑀸𑀦, 𑀕𑀢𑁂 𑀢𑀲𑁆𑀫𑀺𑀁 𑀤𑀼𑀳𑁂𑀢𑀼𑀓𑁂.

𑁪𑁧𑁯.

𑀢𑀤𑁂𑀯𑀸𑀭𑀫𑁆𑀫𑀡𑀁 ¶ 𑀓𑀢𑁆𑀯𑀸, 𑀚𑀸𑀬𑀢𑁂 𑀢𑀤𑀦𑀦𑁆𑀢𑀭𑀁;

𑀢𑀁𑀲𑀭𑀺𑀓𑁆𑀔𑀓𑀫𑁂𑀓𑀁 𑀢𑀼, 𑀅𑀲𑀗𑁆𑀔𑀸𑀭𑀺𑀓𑀫𑀸𑀦𑀲𑀁.

𑁪𑁨𑁦.

𑀢𑀁 𑀳𑀺 𑀫𑀽𑀮𑀪𑀯𑀗𑁆𑀕𑀦𑁆𑀢𑀺, 𑀢𑀤𑀸𑀭𑀫𑁆𑀫𑀡𑀫𑀺𑀘𑁆𑀘𑀧𑀺;

𑀉𑀪𑀬𑀫𑁆𑀧𑀺 𑀘 𑀢𑀲𑁆𑀲𑁂𑀯, 𑀦𑀸𑀫𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁪𑁨𑁧.

𑀤𑀼𑀳𑁂𑀢𑀼𑀓𑀲𑀲𑀗𑁆𑀔𑀸𑀭𑁂, 𑀚𑀯𑀺𑀢𑁂𑀧𑀺 𑀘 𑀢𑀁𑀲𑀫𑀁;

𑀳𑁄𑀢𑀸𑀕𑀦𑁆𑀢𑀼𑀓𑀲𑀗𑁆𑀔𑀸𑀢𑀁, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁.

𑁪𑁨𑁨.

𑀢𑀣𑁂𑀯 𑀘 𑀤𑀼𑀳𑁂𑀢𑀽𑀦𑀁, 𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂;

𑀤𑁆𑀯𑀺𑀦𑁆𑀦𑀁 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀦𑀁, 𑀚𑀯𑀦𑀸𑀦𑀫𑀦𑀦𑁆𑀢𑀭𑀁.

𑁪𑁨𑁩.

𑀤𑁆𑀯𑁂 𑀢𑀸𑀤𑀺𑀲𑀸𑀦𑀺 𑀚𑀸𑀬𑀦𑁆𑀢𑁂, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸;

𑀢𑁂𑀲𑀁 ‘‘𑀧𑀺𑀝𑁆𑀞𑀺𑀪𑀯𑀗𑁆𑀕’’𑀦𑁆𑀢𑀺, 𑀦𑀸𑀫𑀁 ‘‘𑀆𑀕𑀦𑁆𑀢𑀼𑀓’’𑀦𑁆𑀢𑀺 𑀘.

𑁪𑁨𑁪.

𑀲𑀦𑁆𑀢𑀻𑀭𑀡𑀤𑁆𑀯𑀬𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀇𑀫𑀸𑀦𑀺 𑀘 𑀪𑀯𑀗𑁆𑀕𑀸𑀦𑀺, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦𑀝𑁆𑀞 𑀳𑀺.

𑁪𑁨𑁫.

𑀏𑀯𑀫𑀝𑁆𑀞𑀝𑁆𑀞 ¶ 𑀓𑀢𑁆𑀯𑀸𑀦, 𑀤𑁆𑀯𑀸𑀭𑁂𑀲𑀼𑀧𑀺 𑀘 𑀧𑀜𑁆𑀘𑀲𑀼;

𑀘𑀢𑁆𑀢𑀸𑀮𑀻𑀲 𑀯𑀺𑀧𑀸𑀓𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀯𑀢𑁆𑀢𑀺𑀬𑀁.

𑁪𑁨𑁬.

𑀕𑀳𑀺𑀢𑀸𑀕𑀳𑀡𑁂𑀦𑁂𑀢𑁆𑀣, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦𑀝𑁆𑀞 𑀘;

𑀲𑁄𑀢𑀖𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀤𑁆𑀯𑀸𑀤𑀲𑁂𑀯 𑀪𑀯𑀦𑁆𑀢𑀺 𑀳𑀺.

𑁪𑁨𑁭.

𑀏𑀓𑀸𑀬 𑀘𑁂𑀢𑀦𑀸𑀬𑁂𑀯𑀁, 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀦;

𑀤𑁆𑀯𑀸𑀤𑀲𑁂𑀯 𑀯𑀺𑀧𑀸𑀓𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀁.

𑁪𑁨𑁮.

𑀤𑀼𑀳𑁂𑀢𑀼𑀓𑀢𑁆𑀢𑀬𑁂𑀦𑀸𑀧𑀺 ¶ , 𑀲𑁂𑀲𑁂𑀦 𑀲𑀤𑀺𑀲𑁂𑀦 𑀢𑀼;

𑀧𑀸𑀓𑁂𑀦𑀸𑀤𑀺𑀦𑁆𑀦𑀲𑀦𑁆𑀥𑀺𑀬𑀸, 𑀅𑀬𑀫𑁂𑀯 𑀦𑀬𑁄 𑀫𑀢𑁄.

𑁪𑁨𑁯.

𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑀸;

𑀳𑁄𑀢𑀻𑀢𑀺𑀧𑀺 𑀅𑀬𑀁 𑀯𑀸𑀭𑁄, 𑀯𑀼𑀢𑁆𑀢𑁄 𑀏𑀢𑁆𑀢𑀸𑀯𑀢𑀸 𑀫𑀬𑀸.

𑁪𑁩𑁦.

𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀅𑀳𑁂𑀢𑀼𑀓𑀸;

𑀳𑁄𑀢𑀻𑀢𑀺 𑀘 𑀅𑀬𑀁 𑀯𑀸𑀭𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀆𑀕𑀢𑁄.

𑁪𑁩𑁧.

𑀤𑀼𑀳𑁂𑀢𑀼𑀓𑁂𑀲𑀼 ¶ 𑀘𑀺𑀢𑁆𑀢𑁂𑀲𑀼, 𑀓𑀼𑀲𑀮𑁂𑀲𑀼 𑀘𑀢𑀽𑀲𑀼𑀧𑀺;

𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑁂𑀯, 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀦.

𑁪𑁩𑁨.

𑀢𑀲𑁆𑀲𑁂𑀯 𑀧𑀸𑀓𑀪𑀽𑀢𑀸𑀬, 𑀆𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑁄;

𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸.

𑁪𑁩𑁩.

𑀧𑀝𑀺𑀲𑀦𑁆𑀥𑀺 𑀦 𑀯𑀢𑁆𑀢𑀩𑁆𑀩𑀸, 𑀲𑀸 𑀓𑀫𑁆𑀫𑀲𑀤𑀺𑀲𑀸𑀢𑀺 𑀳𑀺;

𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀁 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺 𑀅𑀳𑁂𑀢𑀼𑀓𑀸.

𑁪𑁩𑁪.

𑀢𑀲𑁆𑀲 𑀩𑀼𑀤𑁆𑀥𑀺𑀫𑀼𑀧𑁂𑀢𑀲𑁆𑀲, 𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂;

𑀆𑀧𑀸𑀣𑀫𑀸𑀕𑀢𑁂 𑀘𑀓𑁆𑀔𑀼-𑀤𑁆𑀯𑀸𑀭𑁂 𑀧𑀼𑀦 𑀘 𑀤𑁂𑀳𑀺𑀦𑁄.

𑁪𑁩𑁫.

𑀤𑀼𑀳𑁂𑀢𑀽𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀧𑀼𑀜𑁆𑀜𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀚𑀯𑀦𑀲𑁆𑀲𑀸𑀯𑀲𑀸𑀦𑀲𑁆𑀫𑀺𑀁, 𑀅𑀳𑁂𑀢𑀼𑀓𑀫𑀺𑀤𑀁 𑀫𑀦𑁄.

𑁪𑁩𑁬.

𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦, 𑀚𑀸𑀬𑀢𑁂 𑀦𑀢𑁆𑀣𑀺 𑀲𑀁𑀲𑀬𑁄;

𑀢𑀁 𑀢𑀼 𑀫𑀽𑀮𑀪𑀯𑀗𑁆𑀕𑀜𑁆𑀘, 𑀢𑀤𑀸𑀭𑀫𑁆𑀫𑀡𑀫𑁂𑀯 𑀘.

𑁪𑁩𑁭.

𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀚𑀸𑀢𑁂𑀲𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀺𑀲𑀼;

𑀉𑀧𑁂𑀓𑁆𑀔𑀸𑀲𑀳𑀺𑀢𑀁𑀬𑁂𑀯, 𑀳𑁄𑀢𑀺 𑀲𑀦𑁆𑀢𑀻𑀭𑀡𑀫𑁆𑀧𑀺 𑀘.

𑁪𑁩𑁮.

𑀢𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸𑀦, 𑀕𑀳𑀺𑀢𑀸𑀕𑀳𑀡𑁂𑀦𑀺𑀥;

𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺, 𑀢𑀻𑀡𑀺𑀬𑁂𑀯 𑀪𑀯𑀦𑁆𑀢𑀺 𑀳𑀺.

𑁪𑁩𑁯.

𑀇𑀝𑁆𑀞𑁂 ¶ 𑀆𑀭𑀫𑁆𑀫𑀡𑁂 𑀘𑀓𑁆𑀔𑀼-𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑁂;

𑀢𑀤𑀸 𑀲𑀦𑁆𑀢𑀻𑀭𑀡𑀜𑁆𑀘𑁂𑀯, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁.

𑁪𑁪𑁦.

𑀲𑁄𑀫𑀦𑀲𑁆𑀲𑀬𑀼𑀢𑀁𑀬𑁂𑀯, 𑀕𑀳𑁂𑀢𑁆𑀯𑀸 𑀢𑁂𑀲𑀼 𑀏𑀓𑀓𑀁;

𑀧𑀼𑀭𑀺𑀫𑀸𑀦𑀺 𑀘 𑀢𑀻𑀡𑀻𑀢𑀺, 𑀘𑀢𑁆𑀢𑀸𑀭𑁄𑀯 𑀪𑀯𑀦𑁆𑀢𑀺 𑀳𑀺.

𑁪𑁪𑁧.

𑀏𑀯𑀁 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺, 𑀤𑁆𑀯𑀸𑀭𑁂𑀲𑀼𑀧𑀺 𑀘 𑀧𑀜𑁆𑀘𑀲𑀼;

𑀳𑁄𑀦𑁆𑀢𑀺 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺, 𑀯𑀺𑀧𑀸𑀓𑀸𑀦𑀺 𑀧𑀯𑀢𑁆𑀢𑀺𑀬𑀁.

𑁪𑁪𑁨.

𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀼 𑀘𑀢𑁆𑀢𑀸𑀭𑀺, 𑀕𑀳𑀺𑀢𑀸𑀕𑀳𑀡𑁂𑀦𑀺𑀥;

𑀲𑁄𑀢𑀖𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀳𑁄𑀢𑁂𑀯𑀸𑀳𑁂𑀢𑀼𑀓𑀝𑁆𑀞𑀓𑀁.

𑁪𑁪𑁩.

𑀅𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀲𑁆𑀲 ¶ , 𑀦 𑀢𑀤𑀸𑀭𑀫𑁆𑀫𑀡𑀁 𑀪𑀯𑁂;

𑀤𑀼𑀳𑁂𑀢𑀼𑀓𑀁 𑀢𑀺𑀳𑁂𑀢𑀼𑀁 𑀯𑀸, 𑀤𑀼𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀦𑁄.

𑁪𑁪𑁪.

𑀚𑀸𑀢𑀸 ¶ 𑀲𑀼𑀕𑀢𑀺𑀬𑀁 𑀬𑁂𑀦, 𑀧𑀸𑀓𑁂𑀦 𑀧𑀝𑀺𑀲𑀦𑁆𑀥𑀺 𑀢𑀼;

𑀢𑁂𑀦 𑀢𑀼𑀮𑁆𑀬𑀫𑁆𑀧𑀺 𑀳𑀻𑀦𑀁 𑀯𑀸, 𑀢𑀤𑀸𑀭𑀫𑁆𑀫𑀡𑀓𑀁 𑀪𑀯𑁂.

𑁪𑁪𑁫.

𑀫𑀦𑀼𑀲𑁆𑀲𑀮𑁄𑀓𑀁 𑀲𑀦𑁆𑀥𑀸𑀬, 𑀯𑀼𑀢𑁆𑀢𑀜𑁆𑀘𑀸𑀳𑁂𑀢𑀼𑀓𑀝𑁆𑀞𑀓𑀁;

𑀘𑀢𑀽𑀲𑀼𑀧𑀺 𑀅𑀧𑀸𑀬𑁂𑀲𑀼, 𑀧𑀯𑀢𑁆𑀢𑁂 𑀧𑀦 𑀮𑀩𑁆𑀪𑀢𑀺.

𑁪𑁪𑁬.

𑀣𑁂𑀭𑁄 𑀦𑁂𑀭𑀬𑀺𑀓𑀸𑀦𑀁 𑀢𑀼, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀯𑀲𑁆𑀲𑀢𑀺;

𑀕𑀦𑁆𑀥𑀁 𑀯𑀸𑀬𑀼𑀜𑁆𑀘 𑀫𑀸𑀧𑁂𑀢𑀺, 𑀬𑀤𑀸 𑀢𑁂𑀲𑀁 𑀢𑀤𑀸 𑀧𑀦.

𑁪𑁪𑁭.

𑀣𑁂𑀭𑀁 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘, 𑀥𑀫𑁆𑀫𑀁 𑀕𑀦𑁆𑀥𑀜𑁆𑀘 𑀖𑀸𑀬𑀢𑀁;

𑀧𑀺𑀯𑀢𑀜𑁆𑀘 𑀚𑀮𑀁 𑀯𑀸𑀬𑀼𑀁, 𑀨𑀼𑀲𑀢𑀁 𑀫𑀼𑀤𑀼𑀫𑁂𑀯 𑀘.

𑁪𑁪𑁮.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀺, 𑀧𑀼𑀜𑁆𑀜𑀚𑀸𑀦𑁂𑀯 𑀧𑀜𑁆𑀘𑀧𑀺;

𑀲𑀦𑁆𑀢𑀻𑀭𑀡𑀤𑁆𑀯𑀬𑀁 𑀏𑀓𑀸, 𑀫𑀦𑁄𑀥𑀸𑀢𑀽𑀢𑀺 𑀅𑀝𑁆𑀞𑀓𑀁.

𑁪𑁪𑁯.

𑀅𑀬𑀁 𑀢𑀸𑀯 𑀓𑀣𑀸 𑀇𑀝𑁆𑀞-𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀁, 𑀚𑀯𑀦𑀸𑀦𑀁 𑀯𑀲𑁂𑀦𑀺𑀥.

𑁪𑁫𑁦.

𑀦𑀺𑀬𑀫𑀢𑁆𑀣𑀁 ¶ 𑀢𑀼 𑀬𑀁 𑀯𑀼𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀘𑁂𑀢𑀲𑁄;

𑀓𑀼𑀲𑀮𑀁 𑀧𑀦 𑀲𑀦𑁆𑀥𑀸𑀬, 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀳𑀺 𑀤𑀻𑀧𑀺𑀢𑀁.

𑁪𑁫𑁧.

𑀇𑀥𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼, 𑀲𑁄𑀫𑀦𑀲𑁆𑀲𑀬𑀼𑀢𑁂𑀲𑀼𑀧𑀺;

𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀢𑁂𑀲𑀼, 𑀚𑀯𑀺𑀢𑁂𑀲𑀼 𑀘𑀢𑀽𑀲𑀼𑀧𑀺.

𑁪𑁫𑁨.

𑀲𑁄𑀫𑀦𑀲𑁆𑀲𑀬𑀼𑀢𑀸𑀳𑁂𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑀺;

𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦, 𑀚𑀸𑀬𑀢𑁂 𑀢𑀤𑀦𑀦𑁆𑀢𑀭𑀁.

𑁪𑁫𑁩.

𑀙𑀲𑁆𑀯𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼, 𑀉𑀧𑁂𑀓𑁆𑀔𑀸𑀬 𑀬𑀼𑀢𑁂𑀲𑀼 𑀳𑀺;

𑀕𑁄𑀘𑀭𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑁂, 𑀚𑀯𑀺𑀢𑁂𑀲𑀼 𑀅𑀦𑀦𑁆𑀢𑀭𑀁.

𑁪𑁫𑁪.

𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑀺;

𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦, 𑀚𑀸𑀬𑀢𑁂 𑀧𑀦 𑀧𑀼𑀜𑁆𑀜𑀚𑀸.

𑁪𑁫𑁫.

𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺𑀁 ¶ , 𑀓𑀗𑁆𑀔𑀢𑁄 𑀉𑀤𑁆𑀥𑀢𑀲𑁆𑀲 𑀯𑀸;

𑀲𑁄𑀫𑀦𑀲𑁆𑀲𑀬𑀼𑀢𑀁 𑀳𑁄𑀢𑀺, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁.

𑁪𑁫𑁬.

𑀲𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂, 𑀚𑀯𑀦𑁂 𑀚𑀯𑀺𑀢𑁂 𑀧𑀦;

𑀕𑀯𑁂𑀲𑀺𑀢𑀩𑁆𑀩𑀸 𑀧𑀜𑁆𑀘𑁂𑀯, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸.

𑁪𑁫𑁭.

𑀉𑀧𑁂𑀓𑁆𑀔𑀸𑀲𑀳𑀺𑀢𑁂 𑀘𑀺𑀢𑁆𑀢𑁂, 𑀚𑀯𑀦𑁂 𑀚𑀯𑀺𑀢𑁂 𑀧𑀦;

𑀙𑀴𑁂𑀯 𑀕𑀯𑁂𑀲𑀺𑀢𑀩𑁆𑀩𑀸, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸.

𑁪𑁫𑁮.

𑀢𑀺𑀳𑁂𑀢𑀼𑀲𑁄𑀫𑀦𑀲𑁆𑀲𑁂𑀦, 𑀆𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑁄;

𑀛𑀸𑀦𑀢𑁄 𑀧𑀭𑀺𑀳𑀻𑀦𑀲𑁆𑀲, 𑀢𑀁 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄.

𑁪𑁫𑁯.

𑀤𑁄𑀫𑀦𑀲𑁆𑀲𑀬𑀼𑀢𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄;

𑀢𑀲𑁆𑀲 𑀓𑀺𑀁 𑀚𑀸𑀬𑀢𑁂 𑀩𑁆𑀭𑀽𑀳𑀺, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁.

𑁪𑁬𑁦.

𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀸 𑀳𑀺, 𑀤𑁄𑀫𑀦𑀲𑁆𑀲𑀅𑀦𑀦𑁆𑀢𑀭𑀁;

𑀲𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀤𑁄𑀫𑀦𑀲𑁆𑀲𑀲𑁆𑀲 𑀘𑀲𑁆𑀲 𑀯𑀸.

𑁪𑁬𑁧.

𑀫𑀳𑀕𑁆𑀕𑀢𑀁 ¶ 𑀧𑀦𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘;

𑀢𑀢𑁆𑀣𑁂𑀯 𑀧𑀝𑀺𑀲𑀺𑀤𑁆𑀥𑀁 𑀢𑀼, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁.

𑁪𑁬𑁨.

𑀢𑀲𑁆𑀫𑀸 ¶ 𑀪𑀯𑀗𑁆𑀕𑀧𑀸𑀢𑁄𑀯, 𑀢𑀤𑀸𑀭𑀫𑁆𑀫𑀡𑀫𑁂𑀯 𑀯𑀸;

𑀦 𑀳𑁄𑀢𑀺 𑀓𑀺𑀁 𑀦𑀼 𑀓𑀸𑀢𑀩𑁆𑀩𑀁, 𑀯𑀤 𑀢𑁆𑀯𑀁 𑀆𑀪𑀺𑀥𑀫𑁆𑀫𑀺𑀓.

𑁪𑁬𑁩.

𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀼;

𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀺𑀧𑀸𑀓𑀸 𑀳𑀺, 𑀢𑀤𑀸𑀭𑀫𑁆𑀫𑀡𑀺𑀓𑀸 𑀲𑀺𑀬𑀸.

𑁪𑁬𑁪.

𑀆𑀯𑀚𑁆𑀚𑀦𑀁 𑀓𑀺𑀫𑀲𑁆𑀲𑀸𑀢𑀺, 𑀦𑀢𑁆𑀣𑀺 𑀢𑀁 𑀚𑀸𑀬𑀢𑁂 𑀓𑀣𑀁;

𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦𑀁 𑀓𑀺𑀁, 𑀫𑀕𑁆𑀕𑀲𑁆𑀲𑀸𑀦𑀦𑁆𑀢𑀭𑀲𑁆𑀲 𑀘.

𑁪𑁬𑁫.

𑀨𑀮𑀲𑁆𑀲𑀧𑀺 𑀦𑀺𑀭𑁄𑀥𑀸 𑀘, 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀨𑀮𑀘𑀺𑀢𑁆𑀢𑀲𑁆𑀲 𑀯𑀸 𑀏𑀯𑀁, 𑀦𑀢𑁆𑀣𑀺 𑀆𑀯𑀚𑁆𑀚𑀦𑀁 𑀓𑀺𑀭.

𑁪𑁬𑁬.

𑀯𑀺𑀦𑀸 𑀆𑀯𑀚𑁆𑀚𑀦𑁂𑀦𑀸𑀧𑀺, 𑀳𑁄𑀢𑀺 𑀚𑀸𑀬𑀢𑀼 𑀫𑀸𑀦𑀲𑀁;

𑀓𑀺𑀫𑀲𑁆𑀲𑀸𑀭𑀫𑁆𑀫𑀡𑀁 𑀩𑁆𑀭𑀽𑀳𑀺, 𑀬𑀤𑀺 𑀚𑀸𑀦𑀸𑀲𑀺 𑀧𑀡𑁆𑀟𑀺𑀢.

𑁪𑁬𑁭.

𑀯𑀺𑀦𑀸 ¶ 𑀆𑀭𑀫𑁆𑀫𑀡𑁂𑀦𑁂𑀯, 𑀦 𑀳𑀺 𑀚𑀸𑀬𑀢𑀺 𑀫𑀸𑀦𑀲𑀁;

𑀭𑀽𑀧𑀸𑀤𑀻𑀲𑀼 𑀧𑀭𑀺𑀢𑁆𑀢𑁂𑀲𑀼, 𑀬𑀁 𑀓𑀺𑀜𑁆𑀘𑀸𑀭𑀩𑁆𑀪 𑀚𑀸𑀬𑀢𑁂.

𑁪𑁬𑁮.

𑀉𑀢𑀼𑀩𑀻𑀚𑀦𑀺𑀬𑀸𑀫𑁄 𑀘, 𑀓𑀫𑁆𑀫𑀥𑀫𑁆𑀫𑀦𑀺𑀬𑀸𑀫𑀢𑀸;

𑀘𑀺𑀢𑁆𑀢𑀲𑁆𑀲 𑀘 𑀦𑀺𑀬𑀸𑀫𑁄𑀢𑀺, 𑀜𑁂𑀬𑁆𑀬𑀸 𑀧𑀜𑁆𑀘 𑀦𑀺𑀬𑀸𑀫𑀢𑀸.

𑁪𑁬𑁯.

𑀢𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀨𑀮𑀧𑀼𑀧𑁆𑀨𑀸𑀤𑀺𑀥𑀸𑀭𑀡𑀁;

𑀭𑀼𑀓𑁆𑀔𑀸𑀦𑀁 𑀧𑀦 𑀲𑀩𑁆𑀩𑁂𑀲𑀁, 𑀅𑀬𑀁 𑀉𑀢𑀼𑀦𑀺𑀬𑀸𑀫𑀢𑀸.

𑁪𑁭𑁦.

𑀢𑁂𑀲𑀁 𑀢𑁂𑀲𑀁 𑀢𑀼 𑀩𑀻𑀚𑀸𑀦𑀁, 𑀢𑀁𑀢𑀁𑀢𑀼𑀮𑁆𑀬𑀨𑀮𑀼𑀩𑁆𑀪𑀯𑁄;

𑀫𑀢𑁆𑀣𑀓𑁂 𑀦𑀸𑀴𑀺𑀓𑁂𑀭𑀲𑁆𑀲, 𑀙𑀺𑀤𑁆𑀤𑀢𑁆𑀢𑀁 𑀩𑀻𑀚𑀚𑁄 𑀅𑀬𑀁.

𑁪𑁭𑁧.

𑀢𑀺𑀳𑁂𑀢𑀼𑀓𑀁 𑀢𑀺𑀳𑁂𑀢𑀼𑀜𑁆𑀘, 𑀤𑀼𑀳𑁂𑀢𑀼𑀜𑁆𑀘 𑀅𑀳𑁂𑀢𑀼𑀓𑀁;

𑀯𑀺𑀧𑀸𑀓𑀁 𑀢𑀼 𑀬𑀢𑁄 𑀤𑁂𑀢𑀺, 𑀅𑀬𑀁 𑀓𑀫𑁆𑀫𑀦𑀺𑀬𑀸𑀫𑀢𑀸.

𑁪𑁭𑁨.

𑀚𑀸𑀢𑀺𑀬𑀁 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀫𑁂𑀤𑀦𑀻𑀓𑀫𑁆𑀧𑀦𑀸𑀤𑀺𑀓𑀁;

𑀯𑀺𑀲𑁂𑀲𑀢𑁆𑀢𑀫𑀦𑁂𑀓𑀫𑁆𑀧𑀺, 𑀅𑀬𑀁 𑀥𑀫𑁆𑀫𑀦𑀺𑀬𑀸𑀫𑀢𑀸.

𑁪𑁭𑁩.

𑀕𑁄𑀘𑀭𑁂𑀦 𑀧𑀲𑀸𑀤𑀲𑁆𑀫𑀺𑀁, 𑀖𑀝𑁆𑀝𑀺𑀢𑁂 𑀧𑀦 𑀢𑁂𑀦𑀺𑀥;

𑀉𑀧𑁆𑀧𑀢𑁆𑀢𑀸𑀯𑀚𑁆𑀚𑀦𑀸𑀤𑀻𑀦𑀁, 𑀅𑀬𑀁 𑀘𑀺𑀢𑁆𑀢𑀦𑀺𑀬𑀸𑀫𑀢𑀸.

𑁪𑁭𑁪.

𑀅𑀦𑁆𑀥𑀚𑁆𑀚𑀦𑀸𑀦𑀁 𑀳𑀤𑀬𑀦𑁆𑀥𑀓𑀸𑀭𑀁,

𑀯𑀺𑀤𑁆𑀥𑀁𑀲𑀦𑀁 𑀤𑀻𑀧𑀫𑀺𑀫𑀁 𑀚𑀮𑀦𑁆𑀢𑀁;

𑀲𑀺𑀓𑁆𑀔𑁂𑀣 𑀥𑀻𑀭𑁄 𑀲𑀢𑀢𑀁 𑀧𑀬𑀼𑀢𑁆𑀢𑁄,

𑀫𑁄𑀳𑀦𑁆𑀥𑀓𑀸𑀭𑀸𑀧𑀕𑀫𑀁 𑀬𑀤𑀺𑀘𑁆𑀙𑁂𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁮. 𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄

𑁪𑁭𑁫.

𑀇𑀤𑀸𑀦𑀺 ¶ ¶ 𑀧𑀦 𑀲𑀩𑁆𑀩𑁂𑀲𑀁, 𑀏𑀢𑁂𑀲𑀁 𑀫𑀸𑀦𑀲𑀁 𑀫𑀬𑀸;

𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁, 𑀓𑀣𑀻𑀬𑀢𑀺 𑀧𑀓𑀺𑀡𑁆𑀡𑀓𑀁.

𑁪𑁭𑁬.

𑀧𑀦𑁆𑀣𑀫𑀓𑁆𑀓𑀝𑀓𑁄 𑀦𑀸𑀫, 𑀤𑀺𑀲𑀸𑀲𑀼 𑀧𑀦 𑀧𑀜𑁆𑀘𑀲𑀼;

𑀢𑀢𑁆𑀣 𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸, 𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀢𑀺.

𑁪𑁭𑁭.

𑀧𑀞𑀫𑀸𑀬 𑀤𑀺𑀲𑀸𑀬𑁂𑀢𑁆𑀣, 𑀲𑀼𑀢𑁆𑀢𑁂 𑀧𑀦 𑀧𑀲𑀸𑀭𑀺𑀢𑁂;

𑀧𑀸𑀡𑀓𑁂𑀦 𑀧𑀝𑀗𑁆𑀕𑁂𑀦, 𑀖𑀝𑁆𑀝𑀺𑀢𑁂 𑀫𑀓𑁆𑀔𑀺𑀓𑀸𑀬 𑀯𑀸.

𑁪𑁭𑁮.

𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀓𑀺𑀜𑁆𑀘𑀺, 𑀘𑀮𑀺𑀢𑁆𑀯𑀸 𑀉𑀡𑁆𑀡𑀦𑀸𑀪𑀺 𑀢𑀼;

𑀕𑀦𑁆𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀬𑀽𑀲𑀁 𑀧𑀺𑀯𑀢𑀺 𑀢𑀲𑁆𑀲 𑀲𑀸.

𑁪𑁭𑁯.

𑀧𑀼𑀦𑀸𑀕𑀦𑁆𑀢𑁆𑀯𑀸𑀦 𑀢𑀢𑁆𑀣𑁂𑀯, 𑀦𑀺𑀧𑀚𑁆𑀚𑀢𑀺 𑀬𑀣𑀸𑀲𑀼𑀔𑀁;

𑀏𑀯𑀫𑁂𑀯 𑀓𑀭𑁄𑀢𑁂𑀯, 𑀤𑀺𑀲𑀸𑀲𑀼 𑀤𑀼𑀢𑀺𑀬𑀸𑀤𑀺𑀲𑀼.

𑁪𑁮𑁦.

𑀧𑀲𑀸𑀤𑀸 ¶ 𑀧𑀜𑁆𑀘 𑀤𑀝𑁆𑀞𑀩𑁆𑀩𑀸, 𑀲𑀼𑀢𑁆𑀢𑀁 𑀧𑀜𑁆𑀘𑀤𑀺𑀲𑀸𑀲𑁆𑀯𑀺𑀯;

𑀘𑀺𑀢𑁆𑀢𑀁 𑀧𑀦 𑀘 𑀤𑀝𑁆𑀞𑀩𑁆𑀩𑀁, 𑀫𑀚𑁆𑀛𑁂 𑀫𑀓𑁆𑀓𑀝𑀓𑁄 𑀯𑀺𑀬.

𑁪𑁮𑁧.

𑀧𑀸𑀡𑀓𑀸𑀤𑀻𑀳𑀺 𑀲𑀼𑀢𑁆𑀢𑀲𑁆𑀲, 𑀢𑀲𑁆𑀲 𑀲𑀗𑁆𑀖𑀝𑁆𑀝𑀦𑀸 𑀯𑀺𑀬;

𑀧𑀲𑀸𑀤𑀸𑀦𑀁 𑀢𑀼 𑀤𑀝𑁆𑀞𑀩𑁆𑀩𑀸, 𑀖𑀝𑁆𑀝𑀦𑀸𑀭𑀫𑁆𑀫𑀡𑁂𑀦 𑀳𑀺.

𑁪𑁮𑁨.

𑀘𑀮𑀦𑀁 𑀯𑀺𑀬 𑀢𑀁𑀫𑀚𑁆𑀛𑁂, 𑀦𑀺𑀧𑀦𑁆𑀦𑀸𑀬𑀼𑀡𑁆𑀡𑀦𑀸𑀪𑀺𑀬𑀸;

𑀧𑀲𑀸𑀤𑀖𑀝𑁆𑀝𑀦𑀁 𑀢𑀢𑁆𑀣, 𑀕𑀳𑁂𑀢𑁆𑀯𑀸𑀭𑀫𑁆𑀫𑀡𑀁 𑀧𑀦.

𑁪𑁮𑁩.

𑀫𑀦𑁄𑀥𑀸𑀢𑀼𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀫𑀢𑀁;

𑀢𑀲𑁆𑀲𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑀁𑀯, 𑀯𑀻𑀣𑀺𑀘𑀺𑀢𑁆𑀢𑀧𑀯𑀢𑁆𑀢𑀦𑀁.

𑁪𑁮𑁪.

𑀲𑀻𑀲𑁂 𑀧𑀦𑀲𑁆𑀲 𑀯𑀺𑀚𑁆𑀛𑀺𑀢𑁆𑀯𑀸, 𑀬𑀽𑀲𑀧𑀸𑀦𑀁𑀯 𑀘𑁂𑀢𑀲𑁄;

𑀆𑀭𑀫𑁆𑀫𑀡𑁂𑀲𑀼 𑀤𑀝𑁆𑀞𑀩𑁆𑀩𑀁, 𑀚𑀯𑀦𑀲𑁆𑀲 𑀧𑀯𑀢𑁆𑀢𑀦𑀁.

𑁪𑁮𑁫.

𑀧𑀼𑀦𑀸𑀕𑀦𑁆𑀢𑁆𑀯𑀸 ¶ 𑀬𑀣𑀸 𑀲𑀼𑀢𑁆𑀢-𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀦𑀁;

𑀯𑀢𑁆𑀣𑀼𑀁𑀬𑁂𑀯 𑀘 𑀦𑀺𑀲𑁆𑀲𑀸𑀬, 𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀦𑀁.

𑁪𑁮𑁬.

𑀇𑀤𑀁 𑀢𑀼 𑀧𑀦 𑀑𑀧𑀫𑁆𑀫𑀁, 𑀅𑀢𑁆𑀣𑀁 𑀤𑀻𑀧𑁂𑀢𑀺 𑀓𑀺𑀁 𑀢𑀼 𑀳𑀺;

𑀆𑀭𑀫𑁆𑀫𑀡𑁂𑀦 𑀧𑀞𑀫𑀁, 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀧𑀦.

𑁪𑁮𑁭.

𑀧𑀲𑀸𑀤𑀯𑀢𑁆𑀣𑀼𑀢𑁄 𑀘𑀺𑀢𑁆𑀢𑀸, 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀫𑀦𑁄;

𑀢𑀢𑁄 𑀳𑀺 𑀧𑀞𑀫𑀁𑀬𑁂𑀯, 𑀚𑀸𑀬𑀢𑀻𑀢𑀺 𑀳𑀺 𑀤𑀻𑀧𑀺𑀢𑀁.

𑁪𑁮𑁮.

𑀏𑀓𑁂𑀓𑀸𑀭𑀫𑁆𑀫𑀡𑀁 ¶ 𑀤𑁆𑀯𑀻𑀲𑀼, 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀲𑁄;

𑀆𑀕𑀘𑁆𑀙𑀢𑀺 𑀢𑁂𑀦𑀸𑀧𑀸𑀣𑀁, 𑀅𑀬𑀫𑀢𑁆𑀣𑁄𑀧𑀺 𑀤𑀻𑀧𑀺𑀢𑁄.

𑁪𑁮𑁯.

𑀭𑀽𑀧𑀁 𑀘𑀓𑁆𑀔𑀼𑀧𑀲𑀸𑀤𑀫𑁆𑀳𑀺, 𑀖𑀝𑁆𑀝𑀺𑀢𑁆𑀯𑀸 𑀢𑀗𑁆𑀔𑀡𑁂 𑀧𑀦;

𑀫𑀦𑁄𑀤𑁆𑀯𑀸𑀭𑁂 𑀢𑀣𑀸𑀧𑀸𑀣-𑀫𑀸𑀕𑀘𑁆𑀙𑀢𑀺 𑀦𑀺𑀲𑀁𑀲𑀬𑁄.

𑁪𑁯𑁦.

𑀔𑀕𑁄 𑀬𑀣𑀸 𑀳𑀺 𑀭𑀼𑀓𑁆𑀔𑀕𑁆𑀕𑁂, 𑀦𑀺𑀮𑀻𑀬𑀦𑁆𑀢𑁄𑀯 𑀲𑀸𑀔𑀺𑀦𑁄;

𑀲𑀸𑀔𑀁 𑀖𑀝𑁆𑀝𑁂𑀢𑀺 𑀢𑀲𑁆𑀲𑀻𑀥, 𑀙𑀸𑀬𑀸 𑀨𑀭𑀢𑀺 𑀪𑀽𑀫𑀺𑀬𑀁.

𑁪𑁯𑁧.

𑀲𑀸𑀔𑀸𑀬 ¶ 𑀖𑀝𑁆𑀝𑀦𑀘𑁆𑀙𑀸𑀬𑀸, 𑀨𑀭𑀡𑀸𑀦𑀺 𑀘 𑀲𑀩𑁆𑀩𑀲𑁄;

𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀏𑀓-𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀚𑀸𑀬𑀭𑁂.

𑁪𑁯𑁨.

𑀏𑀯𑀫𑁂𑀯 𑀘 𑀭𑀽𑀧𑀲𑁆𑀲, 𑀧𑀲𑀸𑀤𑀲𑁆𑀲 𑀘 𑀖𑀝𑁆𑀝𑀦𑀁;

𑀪𑀯𑀗𑁆𑀕𑀘𑀮𑀦𑀲𑁆𑀲𑀸𑀧𑀺, 𑀧𑀘𑁆𑀘𑀬𑀢𑁆𑀢𑁂𑀦 𑀅𑀢𑁆𑀣𑀢𑁄.

𑁪𑁯𑁩.

𑀢𑀣𑁂𑀯 𑀘 𑀫𑀦𑁄𑀤𑁆𑀯𑀸𑀭𑁂, 𑀆𑀧𑀸𑀣𑀕𑀫𑀦𑀫𑁆𑀧𑀺 𑀘;

𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀏𑀓-𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀳𑁄𑀢𑀺𑀢𑀺.

𑁪𑁯𑁪.

𑀢𑀢𑁄 𑀪𑀯𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀬𑀣𑀸𑀓𑁆𑀓𑀫𑀁;

𑀆𑀯𑀚𑁆𑀚𑀦𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀤𑀲𑁆𑀲𑀦𑁂 𑀲𑀫𑁆𑀧𑀝𑀺𑀘𑁆𑀙𑀦𑁂.

𑁪𑁯𑁫.

𑀲𑀦𑁆𑀢𑀻𑀭𑀡𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀢𑀢𑁄 𑀯𑁄𑀝𑁆𑀞𑀩𑁆𑀩𑀦𑁂𑀧𑀺 𑀘;

𑀓𑀼𑀲𑀮𑀁 𑀚𑀯𑀦𑀁 𑀘𑀺𑀢𑁆𑀢𑀁, 𑀢𑀣𑀸𑀓𑀼𑀲𑀮𑀫𑁂𑀯 𑀯𑀸.

𑁪𑁯𑁬.

𑀏𑀲𑁄 𑀏𑀯 𑀦𑀬𑁄 𑀲𑁄𑀢-𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀯𑀺𑀜𑁆𑀜𑀼𑀦𑀸;

𑀅𑀯𑀺𑀲𑁂𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑁄, 𑀲𑀤𑁆𑀤𑀸𑀤𑀻𑀦𑀁 𑀢𑀼 𑀖𑀝𑁆𑀝𑀦𑁂.

𑁪𑁯𑁭.

𑀤𑁄𑀯𑀸𑀭𑀺𑀓𑁄𑀧𑀫𑀸𑀤𑀻𑀦𑀺 ¶ , 𑀏𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑁂;

𑀉𑀤𑁆𑀥𑀭𑀺𑀢𑁆𑀯𑀸𑀦 𑀢𑀸𑀦𑁂𑀢𑁆𑀣, 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸.

𑁪𑁯𑁮.

𑀅𑀲𑀫𑁆𑀪𑁂𑀤𑁂𑀦 𑀘𑀓𑁆𑀔𑀼𑀲𑁆𑀲, 𑀭𑀽𑀧𑀸𑀧𑀸𑀣𑀕𑀫𑁂𑀦 𑀘;

𑀆𑀮𑁄𑀓𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁪𑁯𑁯.

𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁦.

𑀅𑀲𑀫𑁆𑀪𑁂𑀤𑁂𑀦 𑀲𑁄𑀢𑀲𑁆𑀲, 𑀲𑀤𑁆𑀤𑀸𑀧𑀸𑀣𑀕𑀫𑁂𑀦 𑀘;

𑀆𑀓𑀸𑀲𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁧.

𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁨.

𑀅𑀲𑀫𑁆𑀪𑁂𑀤𑁂𑀦 ¶ 𑀖𑀸𑀦𑀲𑁆𑀲, 𑀕𑀦𑁆𑀥𑀸𑀧𑀸𑀣𑀕𑀫𑁂𑀦 𑀘;

𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁩.

𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁪.

𑀅𑀲𑀫𑁆𑀪𑁂𑀤𑁂𑀦 𑀚𑀺𑀯𑁆𑀳𑀸𑀬, 𑀭𑀲𑀸𑀧𑀸𑀣𑀕𑀫𑁂𑀦 𑀘;

𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁫.

𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁬.

𑀅𑀲𑀫𑁆𑀪𑁂𑀤𑁂𑀦 ¶ 𑀓𑀸𑀬𑀲𑁆𑀲, 𑀨𑁄𑀝𑁆𑀞𑀩𑁆𑀩𑀸𑀧𑀸𑀣𑀲𑀗𑁆𑀕𑀫𑀸;

𑀧𑀣𑀯𑀻𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁭.

𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁮.

𑀅𑀲𑀫𑁆𑀪𑁂𑀤𑀸 𑀫𑀦𑀲𑁆𑀲𑀸𑀧𑀺, 𑀥𑀫𑁆𑀫𑀸𑀧𑀸𑀣𑀕𑀫𑁂𑀦 𑀘;

𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁯.

𑀧𑀘𑁆𑀘𑀬𑁂𑀳𑀺 ¶ 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯𑀁 𑀢𑀼, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀚𑀸𑀬𑀢𑁂.

𑁫𑁧𑁦.

𑀫𑀦𑁄 𑀪𑀯𑀗𑁆𑀕𑀘𑀺𑀢𑁆𑀢𑀦𑁆𑀢𑀺, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸;

𑀆𑀯𑀚𑁆𑀚𑀦𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀲𑀫𑀦𑀓𑁆𑀓𑀸𑀭𑁄𑀢𑀺 𑀲𑀜𑁆𑀜𑀺𑀢𑀁.

𑁫𑁧𑁧.

𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺, 𑀦𑀸𑀬𑀁 𑀲𑀩𑁆𑀩𑀢𑁆𑀣 𑀕𑀘𑁆𑀙𑀢𑀺;

𑀪𑀯𑀁 𑀢𑀼 𑀧𑀜𑁆𑀘𑀯𑁄𑀓𑀸𑀭𑀁, 𑀲𑀦𑁆𑀥𑀸𑀬 𑀓𑀣𑀺𑀢𑁄 𑀧𑀦.

𑁫𑁧𑁨.

𑀧𑀝𑀺𑀲𑀦𑁆𑀥𑀸𑀤𑀺𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑁂𑀓𑀽𑀦𑀯𑀻𑀲𑀢𑀺;

𑀓𑀸𑀫𑁂 𑀤𑀲 𑀘 𑀭𑀽𑀧𑁂𑀲𑀼, 𑀧𑀜𑁆𑀘 𑀘𑀢𑁆𑀢𑀸𑀭𑀺𑀭𑀽𑀧𑀺𑀲𑀼.

𑁫𑁧𑁩.

𑀓𑀫𑁆𑀫𑀁 ¶ 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸 𑀕𑀢𑀺𑀦𑀺𑀫𑀺𑀢𑁆𑀢𑀓𑀁;

𑀇𑀤𑀁 𑀳𑀺 𑀢𑀺𑀯𑀺𑀥𑀁 𑀢𑁂𑀲𑀁, 𑀆𑀭𑀫𑁆𑀫𑀡𑀫𑀼𑀤𑀻𑀭𑀺𑀢𑀁.

𑁫𑁧𑁪.

𑀓𑀸𑀫𑀸𑀯𑀘𑀭𑀲𑀦𑁆𑀥𑀻𑀦𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀯𑀸, 𑀳𑁄𑀢𑀺 𑀦𑀢𑁆𑀣𑀺 𑀅𑀦𑀸𑀕𑀢𑀁.

𑁫𑁧𑁫.

𑀅𑀝𑁆𑀞𑁂𑀯 𑀘 𑀫𑀳𑀸𑀧𑀸𑀓𑀸, 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀺 𑀘;

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁.

𑁫𑁧𑁬.

𑀏𑀓𑀸𑀤𑀲𑀯𑀺𑀥𑁂 𑀘𑀺𑀢𑁆𑀢𑁂, 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁂;

𑀤𑀲 𑀧𑀼𑀜𑁆𑀜𑀯𑀺𑀧𑀸𑀓𑀸𑀦𑀺, 𑀏𑀓𑀁 𑀳𑁄𑀢𑀺 𑀅𑀧𑀼𑀜𑁆𑀜𑀚𑀁.

𑁫𑁧𑁭.

𑀫𑀳𑀸𑀧𑀸𑀓𑀸 𑀦 𑀚𑀸𑀬𑀦𑁆𑀢𑁂, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂;

𑀓𑀸𑀫𑁂 𑀭𑀽𑀧𑁂 𑀪𑀯𑁂 𑀘𑁂𑀯, 𑀳𑁄𑀢𑀺 𑀲𑀦𑁆𑀢𑀻𑀭𑀡𑀢𑁆𑀢𑀬𑀁.

𑁫𑁧𑁮.

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀢𑁆𑀣𑀼𑀦𑀸;

𑀢𑁂𑀲𑀼 𑀘𑀺𑀢𑁆𑀢𑀁 𑀧𑀦𑁂𑀓𑀫𑁆𑀧𑀺, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂.

𑁫𑁧𑁯.

𑀦 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀢𑀺 𑀓𑀤𑀸𑀘𑀺𑀧𑀺;

𑀓𑀲𑁆𑀫𑀸 𑀦 𑀳𑁄𑀢𑀺 𑀘𑁂 𑀢𑀢𑁆𑀣, 𑀩𑀻𑀚𑀲𑁆𑀲𑀸𑀪𑀸𑀯𑀢𑁄 𑀧𑀦.

𑁫𑁨𑁦.

𑀧𑀝𑀺𑀲𑀦𑁆𑀥𑀺𑀩𑀻𑀚𑀁 𑀦𑀢𑁆𑀣𑁂𑀢𑁆𑀣, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀭𑀽𑀧𑀸𑀤𑀺𑀕𑁄𑀘𑀭𑁂 𑀢𑀲𑁆𑀲, 𑀪𑀯𑁂𑀬𑁆𑀬 𑀚𑀦𑀓𑀁 𑀢𑀼 𑀬𑀁.

𑁫𑁨𑁧.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀁 ¶ , 𑀦𑀢𑁆𑀣𑀺𑀢𑀸𑀧𑀚𑁆𑀚𑀢𑀻𑀢𑀺 𑀘𑁂;

𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀯𑀢𑁆𑀢𑀸𑀦𑀼-𑀪𑀸𑀯𑀢𑁄 𑀘𑀺𑀢𑁆𑀢𑀲𑀫𑁆𑀪𑀯𑁄.

𑁫𑁨𑁨.

𑀏𑀓𑀦𑁆𑀢𑁂𑀦 𑀬𑀣𑀸 𑀘𑁂𑀢𑀁, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁;

𑀦𑀧𑁆𑀧𑀯𑀢𑁆𑀢𑀢𑀺 𑀲𑀩𑁆𑀩𑀫𑁆𑀧𑀺, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂.

𑁫𑁨𑁩.

𑀅𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀧𑀺, 𑀢𑀤𑁂𑀢𑀁 𑀦𑀸𑀦𑀼𑀩𑀦𑁆𑀥𑀢𑀺;

𑀓𑀲𑁆𑀫𑀸 𑀅𑀚𑀦𑀓𑀢𑁆𑀢𑀸 𑀳𑀺, 𑀚𑀦𑀓𑀲𑁆𑀲𑀸𑀲𑀫𑀸𑀦𑀢𑁄.

𑁫𑁨𑁪.

𑀚𑀦𑀓𑀁 ¶ 𑀢𑁂𑀦 𑀢𑀼𑀮𑁆𑀬𑀁 𑀯𑀸, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀁 𑀢𑀼, 𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀺.

𑁫𑁨𑁫.

𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀺 ¶ , 𑀬𑁂 𑀫𑀳𑀕𑁆𑀕𑀢𑀕𑁄𑀘𑀭𑀸;

𑀳𑀼𑀢𑁆𑀯𑀸 𑀯𑀢𑁆𑀢𑀦𑁆𑀢𑀺 𑀢𑁂 𑀘𑀸𑀧𑀺, 𑀇𑀤𑀁 𑀦𑁂𑀯𑀸𑀦𑀼𑀩𑀦𑁆𑀥𑀢𑀺.

𑁫𑁨𑁬.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘, 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀳𑀺;

𑀢𑀣𑀸𑀧𑀭𑀺𑀘𑀺𑀢𑀢𑁆𑀢𑀸 𑀘, 𑀦𑀸𑀦𑀼𑀩𑀦𑁆𑀥𑀢𑀺 𑀲𑀩𑁆𑀩𑀤𑀸.

𑁫𑁨𑁭.

𑀓𑀺𑀁 𑀢𑁂𑀦 𑀬𑀼𑀢𑁆𑀢𑀺𑀯𑀸𑀤𑁂𑀦, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑀳𑀺;

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀏𑀓𑀸𑀤𑀲𑀧𑀺 𑀲𑀩𑁆𑀩𑀲𑁄.

𑁫𑁨𑁮.

𑀦𑀸𑀫𑀕𑁄𑀢𑁆𑀢𑀁 𑀧𑀦𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘;

𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀯𑀸.

𑁫𑁨𑁯.

𑀬𑀤𑀸 𑀧𑀜𑁆𑀜𑀢𑁆𑀢𑀺𑀫𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀯𑀸;

𑀢𑀣𑀸 𑀯𑀺𑀧𑀲𑁆𑀲𑀦𑀸𑀬𑀸𑀧𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀘.

𑁫𑁩𑁦.

𑀢𑀤𑀸𑀭𑀫𑁆𑀫𑀡𑀸 𑀦 𑀮𑀩𑁆𑀪𑀦𑁆𑀢𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺;

𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀧𑀺, 𑀆𑀭𑀩𑁆𑀪 𑀚𑀯𑀦𑁂 𑀕𑀢𑁂.

𑁫𑁩𑁧.

𑀢𑀣𑀸 𑀫𑀳𑀕𑁆𑀕𑀢𑁂 𑀥𑀫𑁆𑀫𑁂, 𑀆𑀭𑀩𑁆𑀪 𑀚𑀯𑀦𑁂 𑀧𑀦;

𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺, 𑀆𑀭𑀩𑁆𑀪 𑀚𑀯𑀺𑀢𑁂𑀧𑀺 𑀘.

𑁫𑁩𑁨.

𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑀩𑁆𑀩𑁂𑀲𑀁, 𑀚𑀯𑀦𑀸𑀦𑀫𑀦𑀦𑁆𑀢𑀭𑀁;

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀢𑁄.

𑁫𑁩𑁩.

𑀦 ¶ 𑀯𑀺𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑁂, 𑀖𑀝𑁆𑀝𑀦𑀸𑀭𑀫𑁆𑀫𑀡𑀲𑁆𑀲 𑀳𑀺;

𑀓𑀣𑀁 𑀪𑀯𑀗𑁆𑀕𑀢𑁄 𑀳𑁄𑀢𑀺, 𑀯𑀼𑀝𑁆𑀞𑀸𑀦𑀁 𑀧𑀦 𑀘𑁂𑀢𑀲𑁄.

𑁫𑁩𑁪.

𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀣-𑀫𑀸𑀕𑀘𑁆𑀙𑀦𑁆𑀢𑁂𑀯 𑀕𑁄𑀘𑀭𑀸;

𑀖𑀝𑁆𑀝𑀦𑀸𑀬 𑀯𑀺𑀦𑀸 𑀢𑀲𑁆𑀫𑀸, 𑀘𑀺𑀢𑁆𑀢𑀸𑀦𑀁 𑀳𑁄𑀢𑀺 𑀲𑀫𑁆𑀪𑀯𑁄.

𑁫𑁩𑁫.

𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑀸𑀦𑀁 ¶ , 𑀯𑀺𑀧𑀸𑀓𑀸 𑀲𑀢𑁆𑀢𑀲𑀢𑁆𑀢𑀢𑀺;

𑀪𑀯𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺, 𑀧𑀸𑀧𑀧𑀸𑀓𑀸 𑀧𑀯𑀢𑁆𑀢𑀺𑀬𑀁.

𑁫𑁩𑁬.

𑀏𑀓𑀸𑀤𑀲𑀯𑀺𑀥𑀸𑀦𑀁 𑀢𑀼, 𑀳𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀫𑀸𑀦𑀲𑀁;

𑀏𑀓𑀸𑀤𑀲𑀯𑀺𑀥𑀸 𑀘𑁂𑀯, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁫𑁩𑁭.

𑀓𑁆𑀭𑀺𑀬𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼, 𑀚𑀯𑀦𑀁 𑀦 𑀘 𑀳𑁄𑀢𑀺 𑀬𑀁;

𑀢𑀁 𑀯𑁂 𑀓𑀭𑀡𑀫𑀢𑁆𑀢𑀢𑁆𑀢𑀸, 𑀯𑀸𑀢𑀧𑀼𑀧𑁆𑀨𑀲𑀫𑀁 𑀫𑀢𑀁.

𑁫𑁩𑁮.

𑀚𑀯𑀦𑀢𑁆𑀢𑀁 𑀢𑀼 𑀲𑀫𑁆𑀧𑀢𑁆𑀢𑀁, 𑀓𑀺𑀘𑁆𑀘𑀲𑀸𑀥𑀦𑀢𑁄 𑀧𑀦;

𑀙𑀺𑀦𑁆𑀦𑀫𑀽𑀮𑀲𑁆𑀲 𑀭𑀼𑀓𑁆𑀔𑀲𑁆𑀲, 𑀧𑀼𑀧𑁆𑀨𑀁𑀯 𑀅𑀨𑀮𑀁 𑀲𑀺𑀬𑀸.

𑁫𑁩𑁯.

𑀧𑀝𑀺𑀘𑁆𑀘 𑀧𑀦 𑀏𑀢𑀲𑁆𑀫𑀸, 𑀨𑀮𑀫𑁂𑀢𑀻𑀢𑀺 𑀧𑀘𑁆𑀘𑀬𑁄;

𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲, 𑀞𑀺𑀢𑀺𑀬𑀼𑀧𑁆𑀧𑀢𑁆𑀢𑀺𑀬𑀸𑀧𑀺 𑀯𑀸.

𑁫𑁪𑁦.

𑀉𑀧𑀓𑀸𑀭𑁄 𑀳𑀺 𑀲𑁄 𑀢𑀲𑁆𑀲, 𑀧𑀘𑁆𑀘𑀬𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀲𑀫𑁆𑀪𑀯𑁄𑀧𑀪𑀯𑁄 𑀳𑁂𑀢𑀼, 𑀓𑀸𑀭𑀡𑀁 𑀧𑀘𑁆𑀘𑀬𑁄 𑀫𑀢𑁄.

𑁫𑁪𑁧.

𑀮𑁄𑀪𑀸𑀤𑀺 𑀧𑀦 𑀬𑁄 𑀥𑀫𑁆𑀫𑁄, 𑀫𑀽𑀮𑀝𑁆𑀞𑁂𑀦𑀼𑀧𑀓𑀸𑀭𑀓𑁄;

𑀳𑁂𑀢𑀽𑀢𑀺 𑀧𑀦 𑀲𑁄 𑀥𑀫𑁆𑀫𑁄, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁫𑁪𑁨.

𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀢𑀣𑀸𑀮𑁄𑀪𑀸𑀤𑀬𑁄 𑀢𑀬𑁄;

𑀙𑀴𑁂𑀯 𑀳𑁂𑀢𑀼𑀬𑁄 𑀳𑁄𑀦𑁆𑀢𑀺,

𑀚𑀸𑀢𑀺𑀢𑁄 𑀦𑀯𑀥𑀸 𑀲𑀺𑀬𑀼𑀁.

𑁫𑁪𑁩.

𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀻𑀦𑀁, 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀯𑀤𑀦𑁆𑀢𑁂𑀯𑀁, 𑀏𑀓𑁂 𑀆𑀘𑀭𑀺𑀬𑀸 𑀧𑀦.

𑁫𑁪𑁪.

𑀏𑀯𑀁 ¶ ¶ 𑀲𑀦𑁆𑀢𑁂 𑀢𑀼 𑀳𑁂𑀢𑀽𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀺𑀲𑀼;

𑀳𑁂𑀢𑀼𑀧𑀘𑁆𑀘𑀬𑀢𑀸 𑀦𑁂𑀯, 𑀲𑀫𑁆𑀧𑀚𑁆𑀚𑀢𑀺 𑀓𑀤𑀸𑀘𑀺𑀧𑀺.

𑁫𑁪𑁫.

𑀦 𑀳𑀺 𑀢𑁂 𑀧𑀦 𑀭𑀽𑀧𑀸𑀦𑀁, 𑀲𑀸𑀥𑁂𑀦𑁆𑀢𑀺 𑀓𑀼𑀲𑀮𑀸𑀤𑀺𑀓𑀁;

𑀦 𑀢𑁂𑀲𑀁 𑀧𑀦 𑀭𑀽𑀧𑀸𑀦𑀁, 𑀧𑀘𑁆𑀘𑀬𑀸 𑀦 𑀘 𑀳𑁄𑀦𑁆𑀢𑀺 𑀢𑁂.

𑁫𑁪𑁬.

𑀢𑀲𑁆𑀫𑀸 ¶ 𑀳𑀺 𑀓𑀼𑀲𑀮𑀸𑀤𑀻𑀦𑀁, 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀦 𑀕𑀦𑁆𑀢𑀩𑁆𑀩𑁄, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑁫𑁪𑁭.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲, 𑀲𑀸𑀥𑀦𑁂𑀦𑀼𑀧𑀓𑀸𑀭𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀘 𑀳𑁂𑀢𑀽𑀦𑀁, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁫𑁪𑁮.

𑀓𑀼𑀲𑀮𑀸𑀓𑀼𑀲𑀮𑀸 𑀳𑁂𑀢𑀽, 𑀓𑁆𑀭𑀺𑀬𑀸𑀳𑁂𑀢𑀽 𑀘 𑀲𑀩𑁆𑀩𑀲𑁄;

𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀺𑀦𑀁.

𑁫𑁪𑁯.

𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁;

𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯𑁂𑀢𑁂, 𑀘𑀢𑀼𑀯𑁄𑀓𑀸𑀭𑀪𑀽𑀫𑀺𑀬𑀁.

𑁫𑁫𑁦.

𑀓𑀸𑀫𑁂 𑀯𑀺𑀧𑀸𑀓𑀳𑁂𑀢𑀽𑀧𑀺, 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁;

𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀦.

𑁫𑁫𑁧.

𑀓𑀝𑀢𑁆𑀢𑀸𑀭𑀽𑀧𑀚𑀸𑀢𑀸𑀦𑀁, 𑀢𑀣𑁂𑀯 𑀘 𑀧𑀯𑀢𑁆𑀢𑀺𑀬𑀁;

𑀘𑀺𑀢𑁆𑀢𑀚𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀳𑁂𑀢𑀼𑀧𑀘𑁆𑀘𑀬𑀢𑀁 𑀕𑀢𑀸.

𑁫𑁫𑁨.

𑀭𑀽𑀧𑁂 𑀯𑀺𑀧𑀸𑀓𑀳𑁂𑀢𑀼 𑀘, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀢𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁, 𑀳𑁄𑀦𑁆𑀢𑀺 𑀢𑁂 𑀳𑁂𑀢𑀼𑀧𑀘𑁆𑀘𑀬𑀸.

𑁫𑁫𑁩.

𑀳𑁂𑀢𑀼𑀬𑁄 𑀧𑀜𑁆𑀘𑀯𑁄𑀓𑀸𑀭𑁂, 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀚𑀸;

𑀘𑀺𑀢𑁆𑀢𑀚𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯 𑀘.

𑁫𑁫𑁪.

𑀢𑁂 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀘𑀢𑀼𑀯𑁄𑀓𑀸𑀭𑀪𑀽𑀫𑀺𑀬𑀁;

𑀪𑀯𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀇𑀢𑀭𑁂 𑀘 𑀲𑀪𑀽𑀫𑀺𑀬𑀁.

𑁫𑁫𑁫.

𑀳𑁂𑀢𑀼𑀢𑁆𑀣𑁄 𑀳𑁂𑀢𑀼𑀬𑁄 𑀘𑁂𑀯, 𑀳𑁂𑀢𑀼𑀧𑀘𑁆𑀘𑀬𑀲𑀫𑁆𑀪𑀯𑁄;

𑀏𑀯𑀫𑁂𑀯 𑀘 𑀯𑀺𑀜𑁆𑀜𑁂𑀬𑁆𑀬𑁄, 𑀲𑀜𑁆𑀚𑀸𑀢𑀲𑀼𑀔𑀳𑁂𑀢𑀼𑀦𑀸.

𑁫𑁫𑁬.

𑀙𑀦𑁆𑀤𑁄 ¶ 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀁, 𑀯𑀻𑀫𑀁𑀲𑀸 𑀘𑀸𑀢𑀺 𑀲𑀢𑁆𑀣𑀼𑀦𑀸;

𑀮𑁄𑀓𑀸𑀥𑀺𑀧𑀢𑀺𑀦𑀸 𑀯𑀼𑀢𑁆𑀢𑀸, 𑀘𑀢𑀼𑀥𑀸𑀥𑀺𑀧𑀢𑀻 𑀲𑀺𑀬𑀼𑀁.

𑁫𑁫𑁭.

𑀙𑀦𑁆𑀤𑀁 ¶ 𑀢𑀼 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸, 𑀙𑀦𑁆𑀤𑀁 𑀓𑀢𑁆𑀯𑀸 𑀥𑀼𑀭𑀁 𑀧𑀦;

𑀘𑀺𑀢𑁆𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀮𑀲𑁆𑀫𑀺𑀁, 𑀙𑀦𑁆𑀤𑀸𑀥𑀺𑀧𑀢𑀺 𑀦𑀸𑀫𑀲𑁄.

𑁫𑁫𑁮.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀲𑁂𑀲𑁂𑀲𑀼𑀧𑀺 𑀘 𑀢𑀻𑀲𑀼𑀧𑀺;

𑀅𑀥𑀺𑀧𑁆𑀧𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄, 𑀚𑁂𑀝𑁆𑀞𑀝𑁆𑀞𑁂𑀦𑀼𑀧𑀓𑀸𑀭𑀓𑁄.

𑁫𑁫𑁯.

𑀲𑀼𑀫𑀢𑀺𑀫𑀢𑀺𑀯𑀺𑀩𑁄𑀥𑀦𑀁 𑀯𑀺𑀘𑀺𑀢𑁆𑀢𑀁,

𑀓𑀼𑀫𑀢𑀺𑀫𑀢𑀺𑀦𑁆𑀥𑀦𑀧𑀸𑀯𑀓𑀁 𑀧𑀥𑀸𑀦𑀁;

𑀇𑀫𑀫𑀢𑀺𑀫𑀥𑀼𑀭𑀁 𑀅𑀯𑁂𑀤𑀺 𑀬𑁄 𑀬𑁄,

𑀚𑀺𑀦𑀯𑀘𑀦𑀁 𑀲𑀓𑀮𑀁 𑀅𑀯𑁂𑀤𑀺 𑀲𑁄 𑀲𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄 𑀦𑀸𑀫

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁯. 𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁫𑁬𑁦.

𑀩𑀸𑀢𑁆𑀢𑀺𑀁𑀲 ¶ 𑀧𑀸𑀓𑀘𑀺𑀢𑁆𑀢𑀸𑀦𑀺, 𑀮𑁄𑀓𑀺𑀓𑀸𑀦𑁂𑀯 𑀬𑀸𑀦𑀺 𑀳𑀺;

𑀏𑀢𑁂𑀲𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼.

𑁫𑁬𑁧.

𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸;

𑀪𑀯𑀸𑀤𑀻𑀲𑀼 𑀢𑀣𑀸 𑀢𑁂𑀧𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁫𑁬𑁨.

𑀢𑀬𑁄 𑀪𑀯𑀸 𑀘𑀢𑀲𑁆𑀲𑁄 𑀘, 𑀬𑁄𑀦𑀺𑀬𑁄 𑀕𑀢𑀺𑀧𑀜𑁆𑀘𑀓𑀁;

𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀢𑁆𑀢, 𑀲𑀢𑁆𑀢𑀸𑀯𑀸𑀲𑀸 𑀦𑀯𑁂𑀭𑀺𑀢𑀸.

𑁫𑁬𑁩.

𑀓𑀸𑀫𑁂 ¶ 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭-𑀲𑀜𑁆𑀜𑀺𑀢𑀸 𑀅𑀝𑁆𑀞 𑀘𑁂𑀢𑀦𑀸;

𑀦𑀯𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀧𑀦.

𑁫𑁬𑁪.

𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀽𑀧-𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀘;

𑀤𑁆𑀯𑁂𑀥𑀸 𑀳𑀺 𑀧𑀘𑁆𑀘𑀬𑀸 𑀢𑁂𑀲𑀁, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁫.

𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 ¶ ;

𑀯𑀺𑀦𑀸 𑀧𑀭𑀺𑀢𑁆𑀢𑀧𑀸𑀓𑀸𑀦𑀁, 𑀳𑁄𑀦𑁆𑀢𑀺 𑀤𑁆𑀯𑁂𑀥𑀸 𑀧𑀯𑀢𑁆𑀢𑀺𑀬𑀁.

𑁫𑁬𑁬.

𑀢𑀸𑀬𑁂𑀯 𑀘𑁂𑀢𑀦𑀸 𑀭𑀽𑀧-𑀪𑀯𑁂 𑀤𑁆𑀯𑁂𑀥𑀸𑀯 𑀧𑀘𑁆𑀘𑀬𑀸;

𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀪𑀯𑀦𑁆𑀢𑀺 𑀳𑀺 𑀧𑀯𑀢𑁆𑀢𑀺𑀬𑀁.

𑁫𑁬𑁭.

𑀅𑀝𑁆𑀞𑀦𑁆𑀦𑀁 𑀢𑀼 𑀧𑀭𑀺𑀢𑁆𑀢𑀸𑀦𑀁, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀢𑀣𑀸;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁮.

𑀳𑁄𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑀣𑀸;

𑀲𑁄𑀴𑀲𑀦𑁆𑀦𑀁 𑀯𑀺𑀧𑀸𑀓𑀸𑀦𑀁, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁯.

𑀭𑀽𑀧𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀘𑁆𑀘𑀬𑀸 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁦.

𑀳𑁄𑀦𑁆𑀢𑀺𑀫𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀤𑁆𑀯𑀺𑀥𑀸;

𑀯𑀺𑀜𑁆𑀜𑀸𑀡𑀲𑁆𑀲 𑀧𑀦𑁂𑀓𑀲𑁆𑀲, 𑀧𑀘𑁆𑀘𑀬𑀸 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁧.

𑀙𑀦𑁆𑀦𑀁 𑀧𑀦 𑀧𑀯𑀢𑁆𑀢𑁂𑀯, 𑀳𑁄𑀦𑁆𑀢𑀺 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁;

𑀲𑀢𑁆𑀢𑀦𑁆𑀦𑀫𑁆𑀧𑀺 𑀪𑀯𑀦𑁆𑀢𑁂𑀯, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁨.

𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑁂𑀲𑀁, 𑀲𑀢𑁆𑀢𑀦𑁆𑀦𑀫𑁆𑀧𑀺 𑀢𑀣𑁂𑀯 𑀘;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁩.

𑀯𑀺𑀜𑁆𑀜𑀸𑀡𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀢𑁂𑀲𑀁 𑀭𑀽𑀧𑀪𑀯𑁂 𑀢𑀣𑀸;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁪.

𑀲𑁄 ¶ 𑀘 𑀓𑀸𑀫𑀪𑀯𑁂𑀦𑀺𑀝𑁆𑀞-𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬𑀁;

𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀧𑀦, 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀭𑁂.

𑁫𑁭𑁫.

𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄 ¶ , 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀘𑀢𑀼𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁬.

𑀏𑀯𑀁 ¶ 𑀢𑀸𑀯 𑀪𑀯𑁂𑀲𑁆𑀯𑁂𑀢𑁂, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼;

𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸.

𑁫𑁭𑁭.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀬𑁄𑀦𑀺𑀆𑀤𑀻𑀲𑀼 𑀢𑀢𑁆𑀭𑀺𑀤𑀁;

𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬, 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑁫𑁭𑁮.

𑀅𑀯𑀺𑀲𑁂𑀲𑁂𑀦 𑀧𑀼𑀜𑁆𑀜𑀸𑀪𑀺-𑀲𑀗𑁆𑀔𑀸𑀭𑁄 𑀤𑁆𑀯𑀺𑀪𑀯𑁂𑀲𑀼𑀧𑀺;

𑀤𑀢𑁆𑀯𑀸𑀦 𑀧𑀝𑀺𑀲𑀦𑁆𑀥𑀺𑀁 𑀢𑀼, 𑀲𑀩𑁆𑀩𑀧𑀸𑀓𑀁 𑀚𑀦𑁂𑀢𑀺 𑀲𑁄.

𑁫𑁭𑁯.

𑀢𑀣𑀸 𑀘𑀢𑀽𑀲𑀼 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀡𑁆𑀟𑀚𑀸𑀤𑀻𑀲𑀼 𑀬𑁄𑀦𑀺𑀲𑀼;

𑀩𑀳𑀼𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀕𑀢𑀻𑀲𑀼 𑀤𑁆𑀯𑀻𑀲𑀼 𑀏𑀯 𑀘.

𑁫𑁮𑁦.

𑀢𑀣𑀸 𑀦𑀸𑀦𑀢𑁆𑀢𑀓𑀸𑀬𑀸𑀤𑀺-𑀯𑀺𑀜𑁆𑀜𑀸𑀡𑀸𑀦𑀁 𑀞𑀺𑀢𑀻𑀲𑀼𑀧𑀺;

𑀢𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀫𑀺𑀁, 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀩𑁆𑀩𑀺𑀥𑁂.

𑁫𑁮𑁧.

𑀏𑀯𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀪𑀯𑀸𑀤𑀻𑀲𑀼 𑀬𑀣𑀸𑀭𑀳𑀁;

𑀏𑀓𑀯𑀻𑀲𑀢𑀺𑀧𑀸𑀓𑀸𑀦𑀁, 𑀧𑀘𑁆𑀘𑀬𑁄 𑀳𑁄𑀢𑀺 𑀘 𑀤𑁆𑀯𑀺𑀥𑀸.

𑁫𑁮𑁨.

𑀓𑀸𑀫𑁂 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑁄, 𑀪𑀯𑁂 𑀘𑀢𑀽𑀲𑀼 𑀬𑁄𑀦𑀺𑀲𑀼;

𑀢𑀻𑀲𑀼 𑀕𑀢𑀻𑀲𑀼 𑀏𑀓𑀺𑀲𑁆𑀲𑀸, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸𑀧𑀺 𑀘.

𑁫𑁮𑁩.

𑀲𑀢𑁆𑀢𑀸𑀯𑀸𑀲𑁂 𑀧𑀦𑁂𑀓𑀲𑁆𑀫𑀺𑀁,

𑀉𑀳𑁄𑀢𑀺 𑀲𑁄 𑀧𑀘𑁆𑀘𑀬𑁄 𑀤𑁆𑀯𑀺𑀥𑀸;

𑀲𑀢𑁆𑀢𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁,

𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁮𑁪.

𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄, 𑀏𑀓𑀸𑀭𑀽𑀧𑀪𑀯𑁂 𑀧𑀼𑀦;

𑀏𑀓𑀺𑀲𑁆𑀲𑀸 𑀬𑁄𑀦𑀺𑀬𑀸 𑀘𑁂𑀯, 𑀏𑀓𑀺𑀲𑁆𑀲𑀸 𑀕𑀢𑀺𑀬𑀸𑀧𑀺 𑀘.

𑁫𑁮𑁫.

𑀢𑀻𑀲𑀼 𑀘𑀺𑀢𑁆𑀢𑀝𑁆𑀞𑀺𑀢𑀻𑀲𑁆𑀯𑁂𑀯, 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀩𑁆𑀩𑀺𑀥𑁂;

𑀘𑀢𑀼𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀤𑁆𑀯𑁂𑀥𑀸 𑀲𑁄 𑀳𑁄𑀢𑀺 𑀧𑀘𑁆𑀘𑀬𑁄.

𑁫𑁮𑁬.

𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 ¶ , 𑀯𑀲𑁂𑀦𑁂𑀯 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸.

𑁫𑁮𑁭.

𑀦 ¶ 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁, 𑀲𑀗𑁆𑀓𑀦𑁆𑀢𑀺 𑀧𑀦 𑀯𑀺𑀚𑁆𑀚𑀢𑀺;

𑀲𑀗𑁆𑀓𑀦𑁆𑀢𑀺𑀪𑀸𑀯𑁂 𑀅𑀲𑀢𑀺, 𑀧𑀝𑀺𑀲𑀦𑁆𑀥𑀺 𑀓𑀣𑀁 𑀲𑀺𑀬𑀸.

𑁫𑁮𑁮.

𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑀦𑁆𑀢𑀺, 𑀅𑀢𑀻𑀢𑀪𑀯𑀢𑁄 𑀇𑀥;

𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀢𑀲𑁆𑀲, 𑀧𑀸𑀢𑀼𑀪𑀸𑀯𑁄 𑀦 𑀯𑀺𑀚𑁆𑀚𑀢𑀺.

𑁫𑁮𑁯.

𑀲𑀼𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀸-𑀭𑀽𑀧𑀫𑀢𑁆𑀢𑀁 𑀢𑀼 𑀚𑀸𑀬𑀢𑀺;

𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯𑀁 𑀢𑀼, 𑀮𑀪𑀺𑀢𑁆𑀯𑀸 𑀧𑀘𑁆𑀘𑀬𑀁 𑀧𑀦.

𑁫𑁯𑁦.

𑀪𑀯𑀦𑁆𑀢𑀭𑀫𑀼𑀧𑁂𑀢𑀻𑀢𑀺, 𑀲𑀫𑀜𑁆𑀜𑀸𑀬 𑀧𑀯𑀼𑀘𑁆𑀘𑀢𑀺;

𑀦 𑀘 𑀲𑀢𑁆𑀢𑁄 𑀦 𑀘 𑀚𑀻𑀯𑁄, 𑀦 𑀅𑀢𑁆𑀢𑀸 𑀯𑀸𑀧𑀺 𑀯𑀺𑀚𑁆𑀚𑀢𑀺.

𑁫𑁯𑁧.

𑀢𑀬𑀺𑀤𑀁 𑀧𑀸𑀓𑀝𑀁 𑀓𑀢𑁆𑀯𑀸, 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀧𑀦;

𑀤𑀲𑁆𑀲𑀬𑀺𑀲𑁆𑀲𑀸𑀫𑀳𑀁 𑀲𑀸𑀥𑀼, 𑀦𑀺𑀩𑁄𑀥𑀣 𑀲𑀼𑀤𑀼𑀩𑁆𑀩𑀼𑀥𑀁.

𑁫𑁯𑁨.

𑀅𑀢𑀻𑀢𑀲𑁆𑀫𑀺𑀁 ¶ 𑀪𑀯𑁂 𑀢𑀲𑁆𑀲, 𑀆𑀲𑀦𑁆𑀦𑀫𑀭𑀡𑀲𑁆𑀲 𑀳𑀺;

𑀳𑀭𑀺𑀢𑀁 𑀢𑀸𑀮𑀧𑀡𑁆𑀡𑀁𑀯, 𑀧𑀓𑁆𑀔𑀺𑀢𑁆𑀢𑀁 𑀆𑀢𑀧𑁂 𑀧𑀦.

𑁫𑁯𑁩.

𑀲𑀼𑀲𑁆𑀲𑀫𑀸𑀦𑁂 𑀲𑀭𑀻𑀭𑀲𑁆𑀫𑀺𑀁, 𑀦𑀝𑁆𑀞𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀓𑁂;

𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀲𑁆𑀫𑀺𑀁, 𑀞𑀺𑀢𑁂 𑀓𑀸𑀬𑀧𑁆𑀧𑀲𑀸𑀤𑀺𑀓𑁂.

𑁫𑁯𑁪.

𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀢𑀲𑁆𑀫𑀺𑀁 𑀔𑀡𑁂𑀧𑀺 𑀘;

𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢𑀁 𑀓𑀫𑁆𑀫𑀁, 𑀧𑀼𑀜𑁆𑀜𑀁 𑀯𑀸𑀧𑀼𑀜𑁆𑀜𑀫𑁂𑀯 𑀯𑀸.

𑁫𑁯𑁫.

𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸, 𑀆𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀢𑀺;

𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀢𑀁, 𑀯𑀺𑀜𑁆𑀜𑀸𑀡𑀁 𑀮𑀤𑁆𑀥𑀧𑀘𑁆𑀘𑀬𑀁.

𑁫𑁯𑁬.

𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀸-𑀤𑀻𑀦𑀯𑁂 𑀯𑀺𑀲𑀬𑁂 𑀧𑀦;

𑀢𑀡𑁆𑀳𑀸 𑀦𑀫𑁂𑀢𑀺 𑀲𑀗𑁆𑀔𑀸𑀭𑀸, 𑀔𑀺𑀧𑀦𑁆𑀢𑀺 𑀲𑀳𑀚𑀸 𑀧𑀦.

𑁫𑁯𑁭.

𑀦 𑀫𑀻𑀬𑀫𑀸𑀦𑀁 𑀢𑀡𑁆𑀳𑀸𑀬, 𑀢𑀁 𑀲𑀦𑁆𑀢𑀢𑀺𑀯𑀲𑀸 𑀧𑀦;

𑀑𑀭𑀺𑀫𑀸 𑀧𑀦 𑀢𑀻𑀭𑀫𑁆𑀳𑀸, 𑀆𑀮𑀫𑁆𑀩𑀺𑀢𑁆𑀯𑀸𑀦 𑀭𑀚𑁆𑀚𑀼𑀓𑀁.

𑁫𑁯𑁮.

𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑁄𑀯𑁂𑀢𑀁 ¶ ¶ , 𑀧𑀼𑀭𑀺𑀫𑀁 𑀚𑀳𑀢𑀺 𑀦𑀺𑀲𑁆𑀲𑀬𑀁;

𑀅𑀧𑀭𑀁 𑀓𑀫𑁆𑀫𑀲𑀫𑁆𑀪𑀽𑀢𑀁, 𑀮𑀫𑁆𑀩𑀺𑀢𑁆𑀯𑀸 𑀯𑀸𑀧𑀺 𑀦𑀺𑀲𑁆𑀲𑀬𑀁.

𑁫𑁯𑁯.

𑀢𑀁 𑀧𑀦𑀸𑀭𑀫𑁆𑀫𑀡𑀸𑀤𑀻𑀳𑀺, 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀺;

𑀧𑀼𑀭𑀺𑀫𑀁 𑀘𑀯𑀦𑀁 𑀏𑀢𑁆𑀣, 𑀧𑀘𑁆𑀙𑀺𑀫𑀁 𑀧𑀝𑀺𑀲𑀦𑁆𑀥𑀺 𑀢𑀼.

𑁬𑁦𑁦.

𑀢𑀤𑁂𑀢𑀁 𑀦𑀸𑀧𑀺 𑀧𑀼𑀭𑀺𑀫𑀸, 𑀪𑀯𑀢𑁄𑀧𑀺 𑀇𑀥𑀸𑀕𑀢𑀁;

𑀓𑀫𑁆𑀫𑀸𑀤𑀺𑀜𑁆𑀘 𑀯𑀺𑀦𑀸 𑀳𑁂𑀢𑀼𑀁, 𑀧𑀸𑀢𑀼𑀪𑀽𑀢𑀁 𑀦 𑀘𑁂𑀯 𑀢𑀁.

𑁬𑁦𑁧.

𑀏𑀢𑁆𑀣 𑀘𑁂𑀢𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀧𑀼𑀭𑀺𑀫𑀸 𑀪𑀯𑀢𑁄 𑀧𑀦;

𑀇𑀥𑀸𑀦𑀸𑀕𑀫𑀦𑁂𑀢𑀻𑀢-𑀪𑀯𑀳𑁂𑀢𑀽𑀳𑀺 𑀲𑀫𑁆𑀪𑀯𑁂.

𑁬𑁦𑁨.

𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀻, 𑀪𑀯𑀦𑁆𑀢𑁂𑀢𑁆𑀣 𑀦𑀺𑀤𑀲𑁆𑀲𑀦𑀸;

𑀬𑀣𑀸 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀭, 𑀳𑁄𑀦𑁆𑀢𑀺 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸.

𑁬𑁦𑁩.

𑀏𑀯𑀫𑁂𑀯 𑀘 𑀯𑀺𑀜𑁆𑀜𑀸𑀡𑀁, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸;

𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺, 𑀏𑀓𑀢𑀸 𑀯𑀸𑀧𑀺 𑀦𑀸𑀦𑀢𑀸.

𑁬𑁦𑁪.

𑀲𑀢𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀢𑀼, 𑀏𑀓𑀦𑁆𑀢𑁂𑀦𑁂𑀓𑀢𑀸 𑀲𑀺𑀬𑀸;

𑀔𑀻𑀭𑀢𑁄 𑀤𑀥𑀺𑀲𑀫𑁆𑀪𑀽𑀢𑀁, 𑀦 𑀪𑀯𑁂𑀬𑁆𑀬 𑀓𑀤𑀸𑀘𑀺𑀧𑀺.

𑁬𑁦𑁫.

𑀅𑀣𑀸𑀧𑀺 𑀧𑀦 𑀏𑀓𑀦𑁆𑀢-𑀦𑀸𑀦𑀢𑀸 𑀲𑀸 𑀪𑀯𑁂𑀬𑁆𑀬 𑀘𑁂;

𑀔𑀻𑀭𑀲𑀸𑀫𑀻 𑀦𑀭𑁄 𑀦𑁂𑀯, 𑀤𑀥𑀺𑀲𑀸𑀫𑀻 𑀪𑀯𑁂𑀬𑁆𑀬 𑀲𑁄.

𑁬𑁦𑁬.

𑀢𑀲𑁆𑀫𑀸 𑀏𑀢𑁆𑀣 𑀧𑀦𑁂𑀓𑀦𑁆𑀢-𑀏𑀓𑀢𑀸𑀦𑀸𑀦𑀢𑀸𑀧𑀺 𑀯𑀸;

𑀦 𑀘𑁂𑀯 𑀉𑀧𑀕𑀦𑁆𑀢𑀩𑁆𑀩𑀸, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑁬𑁦𑁭.

𑀦𑀦𑀼 𑀏𑀯𑀫𑀲𑀗𑁆𑀓𑀦𑁆𑀢𑀺-𑀧𑀸𑀢𑀼𑀪𑀸𑀯𑁂 𑀢𑀲𑁆𑀲 𑀲𑀢𑀺;

𑀬𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢-𑀪𑀸𑀯𑁂 𑀔𑀦𑁆𑀥𑀸𑀪𑀺𑀲𑀫𑁆𑀪𑀯𑀸.

𑁬𑁦𑁮.

𑀢𑁂𑀲𑀁 𑀇𑀥 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀓𑀫𑁆𑀫𑀲𑁆𑀲 𑀨𑀮𑀳𑁂𑀢𑀼𑀦𑁄;

𑀧𑀭𑀢𑁆𑀣𑀸𑀕𑀫𑀢𑁄 𑀘𑁂𑀯, 𑀇𑀥 𑀢𑀲𑁆𑀲 𑀓𑀢𑀲𑁆𑀲 𑀳𑀺.

𑁬𑁦𑁯.

𑀅𑀜𑁆𑀜𑀲𑁆𑀲 ¶ 𑀅𑀜𑁆𑀜𑀢𑁄 𑀘𑁂𑀯, 𑀓𑀫𑁆𑀫𑀢𑁄 𑀢𑀁 𑀨𑀮𑀁 𑀲𑀺𑀬𑀸;

𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀁 𑀏𑀢𑀁, 𑀯𑀺𑀥𑀸𑀦𑀁 𑀲𑀩𑁆𑀩𑀫𑁂𑀯 𑀘.

𑀏𑀢𑁆𑀣𑀸𑀳 ¶ 𑁋

𑁬𑁧𑁦.

𑀲𑀦𑁆𑀢𑀸𑀦𑁂 ¶ 𑀬𑀁 𑀨𑀮𑀁 𑀏𑀢𑀁, 𑀦𑀸𑀜𑁆𑀜𑀲𑁆𑀲 𑀦 𑀘 𑀅𑀜𑁆𑀜𑀢𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄.

𑁬𑁧𑁧.

𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂, 𑀯𑀢𑁆𑀢𑀫𑀸𑀦𑀁 𑀨𑀮𑀁 𑀧𑀦;

𑀅𑀜𑁆𑀜𑀲𑁆𑀲𑀸𑀢𑀺𑀧𑀺 𑀯𑀸 𑀦𑁂𑀯, 𑀅𑀜𑁆𑀜𑀢𑁄 𑀯𑀸 𑀦 𑀳𑁄𑀢𑀺 𑀢𑀁.

𑁬𑁧𑁨.

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀸, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁂, 𑀓𑀢𑁂 𑀢𑀼 𑀫𑀥𑀼𑀆𑀤𑀺𑀦𑀸.

𑁬𑁧𑁩.

𑀢𑀲𑁆𑀲 𑀩𑀻𑀚𑀲𑁆𑀲 𑀲𑀦𑁆𑀢𑀸𑀦𑁂, 𑀧𑀞𑀫𑀁 𑀮𑀤𑁆𑀥𑀧𑀘𑁆𑀘𑀬𑁄;

𑀫𑀥𑀼𑀭𑁄 𑀨𑀮𑀲𑁄 𑀢𑀲𑁆𑀲, 𑀳𑁄𑀢𑀺 𑀓𑀸𑀮𑀦𑁆𑀢𑀭𑁂 𑀧𑀦.

𑁬𑁧𑁪.

𑀦 𑀳𑀺 𑀢𑀸𑀦𑀺 𑀳𑀺 𑀩𑀻𑀚𑀸𑀦𑀺, 𑀅𑀪𑀺𑀲𑀗𑁆𑀔𑀭𑀡𑀫𑁆𑀧𑀺 𑀯𑀸;

𑀧𑀸𑀧𑀼𑀡𑀦𑁆𑀢𑀺 𑀨𑀮𑀝𑁆𑀞𑀸𑀦𑀁, 𑀏𑀯𑀁 𑀜𑁂𑀬𑁆𑀬𑀫𑀺𑀤𑀫𑁆𑀧𑀺 𑀘.

𑁬𑁧𑁫.

𑀩𑀸𑀮𑀓𑀸𑀮𑁂 𑀧𑀬𑀼𑀢𑁆𑀢𑁂𑀦, 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸𑀤𑀺𑀦𑀸;

𑀤𑀻𑀧𑁂𑀢𑀩𑁆𑀩𑁄 𑀅𑀬𑀁 𑀯𑀼𑀤𑁆𑀥-𑀓𑀸𑀮𑀲𑁆𑀫𑀺𑀁 𑀨𑀮𑀤𑀸𑀬𑀺𑀦𑀸.

𑁬𑁧𑁬.

𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀓𑀫𑁆𑀫𑀁, 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀸 𑀧𑀦;

𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀯𑀸𑀯𑀺𑀚𑁆𑀚𑀫𑀸𑀦𑀓𑀁.

𑁬𑁧𑁭.

𑀯𑀺𑀚𑁆𑀚𑀫𑀸𑀦𑀁 𑀲𑀘𑁂 𑀳𑁄𑀢𑀺, 𑀢𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀦;

𑀪𑀯𑀺𑀢𑀩𑁆𑀩𑀁 𑀯𑀺𑀧𑀸𑀓𑁂𑀦, 𑀲𑀤𑁆𑀥𑀺𑀫𑁂𑀯 𑀘 𑀳𑁂𑀢𑀼𑀦𑀸.

𑁬𑁧𑁮.

𑀅𑀣 𑀯𑀸𑀯𑀺𑀚𑁆𑀚𑀫𑀸𑀦𑀁 𑀢𑀁, 𑀦𑀺𑀭𑀼𑀤𑁆𑀥𑀁 𑀧𑀘𑁆𑀘𑀬𑁄 𑀪𑀯𑁂;

𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀦𑀺𑀘𑁆𑀘𑀨𑀮𑀁 𑀲𑀺𑀬𑀸.

𑀯𑀼𑀘𑁆𑀘𑀢𑁂 ¶ 𑁋

𑁬𑁧𑁯.

𑀓𑀝𑀢𑁆𑀢𑀸 𑀧𑀘𑁆𑀘𑀬𑁄 𑀓𑀫𑁆𑀫𑀁, 𑀢𑀲𑁆𑀫𑀸 𑀦𑀺𑀘𑁆𑀘𑀨𑀮𑀁 𑀦 𑀘;

𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀓𑀫𑁆𑀫𑀁, 𑀯𑁂𑀤𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦𑀁.

𑁬𑁨𑁦.

𑀓𑀝𑀢𑁆𑀢𑀸𑀬𑁂𑀯 ¶ 𑀢𑀁 𑀓𑀫𑁆𑀫𑀁, 𑀨𑀮𑀲𑁆𑀲 𑀧𑀦 𑀧𑀘𑁆𑀘𑀬𑁄;

𑀦 𑀘𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀢𑀲𑁆𑀲 𑀯𑀸𑀯𑀺𑀚𑁆𑀚𑀫𑀸𑀦𑀢𑀸.

𑁬𑁨𑁧.

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄𑀬𑀁, 𑀧𑀭𑀫𑀢𑁆𑀣𑀧𑀓𑀸𑀲𑀦𑁄;

𑀲𑁄𑀢𑀩𑁆𑀩𑁄 𑀧𑀦 𑀲𑁄𑀢𑀽𑀦𑀁, 𑀧𑀻𑀢𑀺𑀩𑀼𑀤𑁆𑀥𑀺𑀯𑀺𑀯𑀟𑁆𑀠𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄 𑀦𑀸𑀫

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁦. 𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁄

𑁬𑁨𑁨.

𑀯𑀼𑀢𑁆𑀢𑀫𑀸𑀤𑀺𑀫𑁆𑀳𑀺 ¶ 𑀬𑀁 𑀭𑀽𑀧𑀁, 𑀘𑀺𑀢𑁆𑀢𑀚𑀸𑀦𑀫𑀦𑀦𑁆𑀢𑀭𑀁;

𑀢𑀲𑁆𑀲 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀲𑀫𑀸𑀲𑁂𑀦 𑀯𑀺𑀪𑀸𑀯𑀦𑀁.

𑁬𑁨𑁩.

𑀬𑀁 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀦𑁆𑀢𑀺, 𑀢𑀣𑀸 𑀭𑀽𑀧𑀬𑀢𑀻𑀢𑀺 𑀯𑀸;

𑀭𑀽𑀧𑀸𑀭𑀽𑀧𑀪𑀯𑀸𑀢𑀻𑀢𑁄, 𑀲𑀼𑀭𑀽𑀧𑁄 𑀭𑀽𑀧𑀫𑀩𑁆𑀭𑀯𑀺.

𑁬𑁨𑁪.

𑀢𑀁 𑀭𑀽𑀧𑀁 𑀤𑀼𑀯𑀺𑀥𑀁 𑀳𑁄𑀢𑀺, 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄;

𑀘𑀢𑀼𑀩𑁆𑀩𑀺𑀥𑀸 𑀫𑀳𑀸𑀪𑀽𑀢𑀸, 𑀉𑀧𑀸𑀤𑀸 𑀘𑀢𑀼𑀯𑀻𑀲𑀢𑀺.

𑁬𑁨𑁫.

𑀧𑀣𑀯𑀻𑀥𑀸𑀢𑀼 𑀆𑀧𑁄 𑀘,

𑀢𑁂𑀚𑁄 𑀯𑀸𑀬𑁄 𑀢𑀣𑁂𑀯 𑀘;

𑀘𑀢𑁆𑀢𑀸𑀭𑁄𑀫𑁂 𑀫𑀳𑀸𑀪𑀽𑀢𑀸,

𑀫𑀳𑀸𑀪𑀽𑀢𑁂𑀦 𑀤𑁂𑀲𑀺𑀢𑀸.

𑁬𑁨𑁬.

𑀫𑀳𑀦𑁆𑀢𑀸 𑀧𑀸𑀢𑀼𑀪𑀽𑀢𑀸𑀢𑀺, 𑀫𑀳𑀸𑀪𑀽𑀢𑀲𑀫𑀸𑀢𑀺 𑀯𑀸;

𑀯𑀜𑁆𑀘𑀓𑀢𑁆𑀢𑀸 𑀅𑀪𑀽𑀢𑁂𑀦, 𑀫𑀳𑀸𑀪𑀽𑀢𑀸𑀢𑀺 𑀲𑀜𑁆𑀜𑀺𑀢𑀸.

𑁬𑁨𑁭.

𑀘𑀓𑁆𑀔𑀼 ¶ ¶ 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀘 𑀭𑀽𑀧𑀢𑀸;

𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀇𑀢𑁆𑀣𑀺-𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀁.

𑁬𑁨𑁮.

𑀯𑀢𑁆𑀣𑀼𑀫𑀸𑀳𑀸𑀭𑀢𑀸 𑀓𑀸𑀬-𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀤𑀼𑀯𑁂;

𑀆𑀓𑀸𑀲𑁄 𑀘𑁂𑀯 𑀭𑀽𑀧𑀲𑁆𑀲, 𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀘.

𑁬𑁨𑁯.

𑀉𑀧𑀘𑀬𑁄 𑀲𑀦𑁆𑀢𑀢𑀺𑀭𑀽𑀧𑀁, 𑀚𑀭𑀢𑀸𑀦𑀺𑀘𑁆𑀘𑀢𑀸𑀧𑀺 𑀘;

𑀉𑀧𑀸𑀤𑀸𑀢𑀺 𑀧𑀯𑀼𑀘𑁆𑀘𑀦𑁆𑀢𑀺, 𑀇𑀫𑀸𑀦𑀺 𑀘𑀢𑀼𑀯𑀻𑀲𑀢𑀺.

𑁬𑁩𑁦.

𑀫𑀳𑀸𑀪𑀽𑀢𑀸𑀦𑀺 𑀦𑀺𑀲𑁆𑀲𑀸𑀬, 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁄;

𑀉𑀧𑀸𑀤𑀸𑀭𑀽𑀧𑀫𑀺𑀘𑁆𑀘𑀸𑀳, 𑀦𑀺𑀭𑀼𑀧𑀸𑀤𑀸𑀦𑀫𑀸𑀦𑀲𑁄.

𑁬𑁩𑁧.

𑀧𑀣𑀯𑀻 𑀧𑀢𑁆𑀣𑀝𑀢𑁆𑀢𑀸 𑀘, 𑀯𑀸𑀬𑁄 𑀯𑀸𑀬𑀦𑀢𑁄 𑀪𑀯𑁂;

𑀢𑁂𑀚𑁄 𑀢𑁂𑀚𑁂𑀢𑀺 𑀭𑀽𑀧𑀸𑀦𑀺, 𑀆𑀧𑁄 𑀆𑀧𑁂𑀢𑀺 𑀧𑀸𑀮𑀦𑀸.

𑁬𑁩𑁨.

𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀭𑀽𑀧𑀸𑀦𑀁 𑀮𑀓𑁆𑀔𑀡𑀸𑀤𑀺𑀓𑀁;

𑀮𑀓𑁆𑀔𑀡𑀸𑀤𑀻𑀲𑀼 𑀜𑀸𑀢𑁂𑀲𑀼, 𑀥𑀫𑁆𑀫𑀸 𑀆𑀯𑀺 𑀪𑀯𑀦𑁆𑀢𑀺 𑀳𑀺.

𑁬𑁩𑁩.

𑀲𑀸𑀫𑀜𑁆𑀜𑀁 𑀯𑀸 𑀲𑀪𑀸𑀯𑁄 𑀯𑀸, 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁 𑀫𑀢𑀁;

𑀓𑀺𑀘𑁆𑀘𑀁 𑀯𑀸 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺, 𑀭𑀲𑁄𑀢𑀺 𑀧𑀭𑀺𑀤𑀻𑀧𑀺𑀢𑁄.

𑁬𑁩𑁪.

𑀨𑀮𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀦𑀦𑀬𑁄𑀧𑀺 𑀯𑀸;

𑀆𑀲𑀦𑁆𑀦𑀓𑀸𑀭𑀡𑀁 𑀬𑀁 𑀢𑀼, 𑀢𑀁 𑀧𑀤𑀝𑁆𑀞𑀸𑀦𑀲𑀜𑁆𑀜𑀺𑀢𑀁.

𑀢𑀢𑁆𑀣 ¶ 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼, 𑀧𑀢𑀺𑀝𑁆𑀞𑀸𑀦𑀭𑀲𑀸, 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀼, 𑀉𑀧𑀩𑁆𑀭𑀽𑀳𑀦𑀭𑀲𑀸, 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀢𑁂𑀚𑁄𑀥𑀸𑀢𑀼, 𑀧𑀭𑀺𑀧𑀸𑀘𑀦𑀭𑀲𑀸, 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸 𑀯𑀸𑀬𑁄𑀥𑀸𑀢𑀼, 𑀲𑀫𑀼𑀤𑀻𑀭𑀡𑀭𑀲𑀸, 𑀅𑀪𑀺𑀦𑀻𑀳𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀓𑁂𑀓𑀸𑀬 𑀘𑁂𑀢𑁆𑀣 𑀲𑁂𑀲𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀭𑀽𑀧𑀁 𑀯𑀺𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄.

𑁬𑁩𑁫.

𑀢𑀢𑁆𑀣 ¶ ¶ 𑀘𑀓𑁆𑀔𑀼 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁, 𑀧𑀜𑁆𑀜𑀸𑀫𑀁𑀲𑀧𑁆𑀧𑀪𑁂𑀤𑀢𑁄;

𑀢𑀢𑁆𑀣 𑀧𑀜𑁆𑀜𑀸𑀫𑀬𑀁 𑀘𑀓𑁆𑀔𑀼, 𑀳𑁄𑀢𑀺 𑀧𑀜𑁆𑀘𑀯𑀺𑀥𑀁 𑀧𑀦.

𑁬𑁩𑁬.

𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀢𑁂𑀳𑀺, 𑀜𑀸𑀡𑀤𑀺𑀩𑁆𑀩𑁂𑀳𑀺 𑀦𑀸𑀫𑀢𑁄;

𑀬𑀣𑀸𑀦𑀼𑀓𑁆𑀓𑀫𑀢𑁄 𑀢𑁂𑀲𑀁, 𑀦𑀸𑀦𑀢𑁆𑀢𑀁 𑀫𑁂 𑀦𑀺𑀩𑁄𑀥𑀣.

𑁬𑁩𑁭.

𑀆𑀲𑀬𑀸𑀦𑀼𑀲𑀬𑁂 𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑁂;

𑀩𑀼𑀤𑁆𑀥𑀘𑀓𑁆𑀔𑀼𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀼𑀦𑀺𑀦𑀸 𑀮𑁄𑀓𑀘𑀓𑁆𑀔𑀼𑀦𑀸.

𑁬𑁩𑁮.

𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂 𑀜𑀸𑀡𑀁, 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀲𑀜𑁆𑀜𑀺𑀢𑀁;

𑀜𑁂𑀬𑁆𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀦𑁆𑀢𑀺, 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀸 𑀧𑀦.

𑁬𑁩𑁯.

𑀬𑀁 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺, 𑀆𑀕𑀢𑀁 𑀜𑀸𑀡𑀘𑀓𑁆𑀔𑀼 𑀢𑀁;

𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀚𑀸 𑀧𑀜𑁆𑀜𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁬𑁪𑁦.

𑀫𑀁𑀲𑀘𑀓𑁆𑀔𑀼𑀧𑀺 𑀤𑀼𑀯𑀺𑀥𑀁, 𑀲𑀲𑀫𑁆𑀪𑀸𑀭𑀧𑀲𑀸𑀤𑀢𑁄;

𑀲𑀲𑀫𑁆𑀪𑀸𑀭𑀜𑁆𑀘 𑀦𑀸𑀫𑁂𑀢𑁆𑀣, 𑀅𑀓𑁆𑀔𑀺𑀓𑀽𑀧𑁂 𑀧𑀢𑀺𑀝𑁆𑀞𑀺𑀢𑀁.

𑁬𑁪𑁧.

𑀅𑀓𑁆𑀔𑀺𑀓𑀽𑀧𑀝𑁆𑀞𑀺𑀦𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀜𑁆𑀘 𑀪𑀫𑀼𑀓𑀝𑁆𑀞𑀺𑀦𑀸;

𑀉𑀪𑀢𑁄 𑀅𑀓𑁆𑀔𑀺𑀓𑀽𑀝𑁂𑀳𑀺, 𑀫𑀢𑁆𑀣𑀮𑀼𑀗𑁆𑀕𑁂𑀦 𑀅𑀦𑁆𑀢𑀢𑁄.

𑁬𑁪𑁨.

𑀩𑀳𑀺𑀤𑁆𑀥𑀸 𑀅𑀓𑁆𑀔𑀺𑀮𑁄𑀫𑁂𑀳𑀺, 𑀧𑀭𑀺𑀘𑁆𑀙𑀺𑀦𑁆𑀦𑁄 𑀘 𑀬𑁄 𑀧𑀦;

𑀦𑁆𑀳𑀸𑀭𑀼𑀲𑀼𑀢𑁆𑀢𑁂𑀦 𑀆𑀩𑀦𑁆𑀥𑁄, 𑀫𑀁𑀲𑀧𑀺𑀡𑁆𑀟𑁄 𑀧𑀯𑀼𑀘𑁆𑀘𑀢𑀺.

𑁬𑁪𑁩.

𑀲𑀓𑀮𑁄𑀧𑀺 𑀘 𑀮𑁄𑀓𑁄𑀬𑀁, 𑀓𑀫𑀮𑀲𑁆𑀲 𑀤𑀮𑀁 𑀯𑀺𑀬;

𑀧𑀼𑀣𑀼𑀮𑀁 𑀯𑀺𑀧𑀼𑀮𑀁 𑀦𑀻𑀮𑀁, 𑀇𑀢𑀺 𑀚𑀸𑀦𑀸𑀢𑀺 𑀮𑁄𑀘𑀦𑀁.

𑁬𑁪𑁪.

𑀘𑀓𑁆𑀔𑀼 𑀦𑀸𑀫 𑀦 𑀢𑀁 𑀳𑁄𑀢𑀺, 𑀯𑀢𑁆𑀣𑀼 𑀢𑀲𑁆𑀲𑀸𑀢𑀺 𑀯𑀼𑀘𑁆𑀘𑀢𑀺;

𑀇𑀤𑀁 𑀧𑀦 𑀲𑀲𑀫𑁆𑀪𑀸𑀭-𑀘𑀓𑁆𑀔𑀼𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁬𑁪𑁫.

𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸,

𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄;

𑀪𑀸𑀯𑀲𑀫𑁆𑀪𑀯𑀲𑀡𑁆𑀞𑀸𑀦𑀁,

𑀚𑀻𑀯𑀺𑀢𑀸𑀦𑀺 𑀢𑀣𑁂𑀯 𑀘.

𑁬𑁪𑁬.

𑀓𑀸𑀬𑀘𑀓𑁆𑀔𑀼𑀧𑀲𑀸𑀤𑀸𑀢𑀺 ¶ ¶ ,

𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑀘𑀼𑀤𑁆𑀤𑀲;

𑀢𑀣𑀸 𑀯𑀺𑀢𑁆𑀣𑀸𑀭𑀢𑁄 𑀘𑁂𑀢𑀁,

𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄.

𑁬𑁪𑁭.

𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸,

𑀲𑀡𑁆𑀞𑀸𑀦𑀲𑀫𑁆𑀪𑀯𑁄 𑀢𑀣𑀸;

𑀤𑀲𑁂𑀢𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀸,

𑀘𑀢𑁆𑀢𑀸𑀮𑀻𑀲 𑀪𑀯𑀦𑁆𑀢𑀺 𑀢𑁂.

𑁬𑁪𑁮.

𑀘𑀓𑁆𑀔𑀼 ¶ 𑀓𑀸𑀬𑀧𑁆𑀧𑀲𑀸𑀤𑁄 𑀘, 𑀪𑀸𑀯𑁄 𑀚𑀻𑀯𑀺𑀢𑀫𑁂𑀯 𑀘;

𑀘𑀢𑁆𑀢𑀸𑀮𑀻𑀲𑀜𑁆𑀘 𑀭𑀽𑀧𑀸𑀦𑀺, 𑀘𑀢𑁆𑀢𑀸𑀭𑀺 𑀢𑀼 𑀪𑀯𑀦𑁆𑀢𑀺 𑀳𑀺.

𑁬𑁪𑁯.

𑀇𑀫𑁂𑀲𑀁 𑀧𑀦 𑀭𑀽𑀧𑀸𑀦𑀁, 𑀯𑀲𑁂𑀦 𑀧𑀭𑀺𑀧𑀺𑀡𑁆𑀟𑀺𑀢𑀁;

𑀇𑀤𑀁 𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁆𑀢𑀺, 𑀧𑀡𑁆𑀟𑀺𑀢𑁂𑀳𑀺 𑀧𑀓𑀸𑀲𑀺𑀢𑀁.

𑁬𑁫𑁦.

𑀬𑁄 𑀧𑀦𑁂𑀢𑁆𑀣 𑀲𑀺𑀢𑁄 𑀅𑀢𑁆𑀣𑀺, 𑀧𑀭𑀺𑀩𑀦𑁆𑀥𑁄 𑀧𑀭𑀺𑀢𑁆𑀢𑀓𑁄;

𑀘𑀢𑀼𑀦𑁆𑀦𑀁 𑀧𑀦 𑀪𑀽𑀢𑀸𑀦𑀁, 𑀧𑀲𑀸𑀤𑁄 𑀓𑀫𑁆𑀫𑀲𑀫𑁆𑀪𑀯𑁄.

𑁬𑁫𑁧.

𑀇𑀤𑀁 𑀧𑀲𑀸𑀤𑀘𑀓𑁆𑀔𑀼𑀦𑁆𑀢𑀺, 𑀅𑀓𑁆𑀔𑀸𑀢𑀁 𑀧𑀜𑁆𑀘𑀘𑀓𑁆𑀔𑀼𑀦𑀸;

𑀢𑀤𑁂𑀢𑀁 𑀢𑀲𑁆𑀲 𑀫𑀚𑁆𑀛𑁂 𑀢𑀼, 𑀲𑀲𑀫𑁆𑀪𑀸𑀭𑀲𑁆𑀲 𑀘𑀓𑁆𑀔𑀼𑀦𑁄.

𑁬𑁫𑁨.

𑀲𑁂𑀢𑁂𑀦 𑀫𑀡𑁆𑀟𑀮𑁂𑀦𑀲𑁆𑀲, 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀩𑁆𑀩𑀲𑁄;

𑀓𑀡𑁆𑀳𑀫𑀡𑁆𑀟𑀮𑀫𑀚𑁆𑀛𑁂 𑀯𑀸, 𑀦𑀺𑀯𑀺𑀝𑁆𑀞𑁂 𑀤𑀺𑀝𑁆𑀞𑀫𑀡𑁆𑀟𑀮𑁂.

𑁬𑁫𑁩.

𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑀸𑀳𑀺, 𑀥𑀸𑀢𑀽𑀳𑀺 𑀘 𑀘𑀢𑀽𑀳𑀺𑀧𑀺;

𑀓𑀢𑀽𑀧𑀓𑀸𑀭𑀁 𑀳𑀼𑀢𑁆𑀯𑀸𑀦, 𑀉𑀢𑀼𑀘𑀺𑀢𑁆𑀢𑀸𑀤𑀺𑀦𑀸 𑀧𑀦.

𑁬𑁫𑁪.

𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀢𑀁, 𑀆𑀬𑀼𑀦𑀸 𑀓𑀢𑀧𑀸𑀮𑀦𑀁;

𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀻𑀳𑀺, 𑀭𑀽𑀧𑁂𑀳𑀺 𑀧𑀭𑀺𑀯𑀸𑀭𑀺𑀢𑀁.

𑁬𑁫𑁫.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀁, 𑀯𑀢𑁆𑀣𑀼𑀤𑁆𑀯𑀸𑀭𑀜𑁆𑀘 𑀲𑀸𑀥𑀬𑀁;

𑀊𑀓𑀸𑀲𑀺𑀭𑀲𑀫𑀸𑀦𑁂𑀦, 𑀧𑀫𑀸𑀡𑁂𑀦𑁂𑀯 𑀢𑀺𑀝𑁆𑀞𑀢𑀺.

𑀯𑀼𑀢𑁆𑀢𑀁 ¶ ¶ 𑀳𑁂𑀢𑀁 𑁋

𑁬𑁫𑁬.

‘‘𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺𑀫𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀏𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫’’𑀦𑁆𑀢𑀺.

𑁬𑁫𑁭.

𑀲𑁄𑀢𑀸𑀤𑀻𑀲𑀼 𑀘 𑀏𑀲𑁂𑀯, 𑀦𑀬𑁄 𑀜𑁂𑀬𑁆𑀬𑁄 𑀯𑀺𑀪𑀸𑀯𑀺𑀦𑀸;

𑀯𑀺𑀲𑁂𑀲𑀫𑀢𑁆𑀢𑀫𑁂𑀯𑁂𑀢𑁆𑀣, 𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁.

𑀲𑀼𑀡𑀸𑀢𑀻𑀢𑀺 𑀲𑁄𑀢𑀁, 𑀢𑀁 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀆𑀬𑀼𑀦𑀸 𑀧𑀭𑀺𑀧𑀸𑀮𑀺𑀬𑀫𑀸𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀖𑀸𑀬𑀢𑀻𑀢𑀺 𑀖𑀸𑀦𑀁, 𑀢𑀁 𑀲𑀲𑀫𑁆𑀪𑀸𑀭𑀖𑀸𑀦𑀩𑀺𑀮𑀲𑁆𑀲 𑀅𑀦𑁆𑀢𑁄 𑀅𑀚𑀧𑀤𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀲𑀸𑀬𑀢𑀻𑀢𑀺 𑀚𑀺𑀯𑁆𑀳𑀸, 𑀚𑀻𑀯𑀺𑀢𑀫𑀯𑁆𑀳𑀸𑀬𑀢𑀻𑀢𑀺 𑀯𑀸 𑀚𑀺𑀯𑁆𑀳𑀸, 𑀲𑀸 𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸𑀫𑀚𑁆𑀛𑀲𑁆𑀲 𑀉𑀧𑀭𑀺 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀓𑀼𑀘𑁆𑀙𑀺𑀢𑀸𑀦𑀁 𑀫𑀮𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀬𑀸𑀯𑀢𑀸 𑀧𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀦𑁆𑀦𑀓𑀁 𑀭𑀽𑀧𑀁 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀓𑀸𑀬𑀧𑀲𑀸𑀤𑁄 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀏𑀢𑁆𑀣 𑀧𑀦𑁂𑀢𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀺 𑀧𑀯𑀓𑁆𑀔𑀸𑀫𑀺 𑁋 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀁 ¶ 𑀘𑀓𑁆𑀔𑀼, 𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀁 ¶ 𑀲𑁄𑀢𑀁, 𑀲𑀤𑁆𑀤𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀁 𑀖𑀸𑀦𑀁, 𑀕𑀦𑁆𑀥𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀸𑀚𑀺𑀯𑁆𑀳𑀸 ¶ , 𑀭𑀲𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀸.

𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑁄 𑀓𑀸𑀬𑁄, 𑀨𑁄𑀝𑁆𑀞𑀩𑁆𑀩𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑁄, 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑁄.

𑀓𑁂𑀘𑀺 𑀧𑀦𑀸𑀳𑀼 𑁋

𑁬𑁫𑁮.

𑀢𑁂𑀚𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁, 𑀧𑀲𑀸𑀤𑁄 𑀧𑀦 𑀘𑀓𑁆𑀔𑀼𑀢𑀺;

𑀆𑀓𑀸𑀲𑀸𑀦𑀺𑀮𑀢𑁄𑀬𑀼𑀩𑁆𑀩𑀺𑀅𑀥𑀺𑀓𑀸𑀦𑀁 𑀢𑀼 𑀲𑁂𑀲𑀓𑀸.

𑁬𑁫𑁯.

𑀢𑁂 𑀧𑀦𑁂𑀯𑀁 𑀢𑀼 𑀯𑀢𑁆𑀢𑀩𑁆𑀩𑀸, ‘‘𑀲𑀼𑀢𑁆𑀢𑀁 𑀆𑀳𑀭𑀣𑀸’’𑀢𑀺 𑀳𑀺;

𑀲𑀼𑀢𑁆𑀢𑀫𑁂𑀯 𑀘 𑀢𑁂 𑀅𑀤𑁆𑀥𑀸, 𑀦 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀓𑀺𑀜𑁆𑀘𑀺𑀧𑀺.

𑁬𑁬𑁦.

𑀯𑀺𑀲𑁂𑀲𑁂 𑀲𑀢𑀺 𑀪𑀽𑀢𑀸𑀦𑀁, 𑀧𑀲𑀸𑀤𑁄 𑀳𑀺 𑀓𑀣𑀁 𑀪𑀯𑁂;

𑀲𑀫𑀸𑀦𑀸𑀦𑀁 𑀳𑀺 𑀪𑀽𑀢𑀸𑀦𑀁, 𑀧𑀲𑀸𑀤𑁄 𑀧𑀭𑀺𑀤𑀻𑀧𑀺𑀢𑁄.

𑁬𑁬𑁧.

𑀢𑀲𑁆𑀫𑀸 𑀦𑀺𑀲𑁆𑀲𑀬𑀪𑀽𑀢𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀩𑁆𑀩𑀲𑁄 𑀧𑀦;

𑀧𑀳𑀸𑀬𑁂𑀯 𑀧𑀦𑁂𑀢𑁂𑀲𑀁, 𑀯𑀺𑀲𑁂𑀲𑀧𑀭𑀺𑀓𑀧𑁆𑀧𑀦𑀁.

𑁬𑁬𑁨.

𑀜𑁂𑀬𑁆𑀬𑀸 𑀓𑀫𑁆𑀫𑀯𑀺𑀲𑁂𑀲𑁂𑀦, 𑀧𑀲𑀸𑀤𑀸𑀦𑀁 𑀯𑀺𑀲𑁂𑀲𑀢𑀸;

𑀦 𑀳𑀺 𑀪𑀽𑀢𑀯𑀺𑀲𑁂𑀲𑁂𑀦, 𑀳𑁄𑀢𑀺 𑀢𑁂𑀲𑀁 𑀯𑀺𑀲𑁂𑀲𑀢𑀸.

𑁬𑁬𑁩.

𑀏𑀯𑀫𑁂𑀢𑁂𑀲𑀼 ¶ 𑀘𑀓𑁆𑀔𑀼𑀜𑁆𑀘, 𑀲𑁄𑀢𑀁 𑀅𑀧𑀢𑁆𑀢𑀕𑀸𑀳𑀓𑀁;

𑀲𑁂𑀲𑀁 𑀢𑀼 𑀧𑀦 𑀖𑀸𑀦𑀸𑀤𑀺𑀢𑁆𑀢𑀬𑀁 𑀲𑀫𑁆𑀧𑀢𑁆𑀢𑀕𑀸𑀳𑀓𑀁.

𑀭𑀽𑀧𑀦𑁆𑀢𑀺 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀯𑀡𑁆𑀡𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑀁, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀢𑀼𑀫𑀳𑀸𑀪𑀽𑀢𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀘𑁂𑀢𑀁, 𑀢𑀣𑀸 𑀲𑀩𑁆𑀩𑀸𑀦𑀺𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀻𑀢𑀺 ¶ .

𑀲𑀤𑁆𑀤𑁄𑀢𑀺 ¶ 𑀲𑀤𑁆𑀤𑀬𑀢𑀻𑀢𑀺 𑀲𑀤𑁆𑀤𑁄, 𑀲𑁄 𑀧𑀦 𑀲𑁄𑀢𑀧𑀝𑀺𑀳𑀦𑀦𑀮𑀓𑁆𑀔𑀡𑁄, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀭𑀲𑁄𑀢𑀺 𑀭𑀲𑀦𑁆𑀢𑀺 𑀢𑁂𑀦𑀸𑀢𑀺 𑀭𑀲𑁄, 𑀲𑁄 𑀚𑀺𑀯𑁆𑀳𑀸𑀧𑀝𑀺𑀳𑀦𑀦𑀮𑀓𑁆𑀔𑀡𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀕𑀦𑁆𑀥𑁄𑀢𑀺 𑀅𑀢𑁆𑀢𑀸𑀦𑀁 𑀕𑀦𑁆𑀥𑀬𑀢𑀺 𑀲𑀽𑀘𑀬𑀢𑀻𑀢𑀺 𑀕𑀦𑁆𑀥𑁄, 𑀲𑁄 𑀖𑀸𑀦𑀧𑀝𑀺𑀳𑀦𑀦𑀮𑀓𑁆𑀔𑀡𑁄, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑁋

𑁬𑁬𑁪.

𑀓𑀫𑁆𑀫𑀚𑁄 𑀇𑀢𑁆𑀣𑀺𑀪𑀸𑀯𑁄𑀬𑀁, 𑀧𑀝𑀺𑀲𑀦𑁆𑀥𑀺𑀲𑀫𑀼𑀝𑁆𑀞𑀺𑀢𑁄;

𑀬𑀜𑁆𑀘𑁂𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺, 𑀦 𑀢𑀼 𑀢𑀁 𑀇𑀦𑁆𑀤𑁆𑀭𑀺𑀬𑀁 𑀲𑀺𑀬𑀸.

𑁬𑁬𑁫.

𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘𑁂𑀯, 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀬𑁄 𑀧𑀦;

𑀧𑀯𑀢𑁆𑀢𑁂𑀬𑁂𑀯 𑀚𑀸𑀬𑀦𑁆𑀢𑁂, 𑀦 𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁬𑁬𑁬.

𑀦 𑀘 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀫𑁂𑀯 𑀢𑀁;

𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺 𑀯𑀸 𑀦 𑀯𑀸.

𑁬𑁬𑁭.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀲𑁂𑀲𑁂𑀧𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂;

𑀇𑀤𑀁 𑀧𑀞𑀫𑀓𑀧𑁆𑀧𑀸𑀦𑀁, 𑀉𑀪𑀬𑀁 𑀢𑀼 𑀧𑀯𑀢𑁆𑀢𑀺𑀬𑀁.

𑁬𑁬𑁮.

𑀲𑀫𑀼𑀝𑁆𑀞𑀸𑀢𑀻𑀢𑀺 ¶ 𑀯𑀺𑀜𑁆𑀜𑁂𑀬𑁆𑀬𑀁, 𑀧𑀭𑀢𑁄 𑀧𑀝𑀺𑀲𑀦𑁆𑀥𑀺𑀬𑀁;

𑀧𑀯𑀢𑁆𑀢𑁂𑀧𑀺 𑀲𑀫𑀼𑀝𑁆𑀞𑀸𑀬, 𑀧𑀯𑀢𑁆𑀢𑁂 𑀧𑀭𑀺𑀯𑀢𑁆𑀢𑀢𑀺.

𑁬𑁬𑁯.

𑀫𑀳𑀢𑀸 𑀧𑀸𑀧𑀓𑀫𑁆𑀫𑁂𑀦, 𑀧𑀼𑀭𑀺𑀲𑀢𑁆𑀢𑀁 𑀯𑀺𑀦𑀲𑁆𑀲𑀢𑀺;

𑀫𑀳𑀢𑀸 𑀓𑀼𑀲𑀮𑁂𑀦𑁂𑀯, 𑀚𑀸𑀬𑀢𑁂 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑁬𑁭𑁦.

𑀤𑀼𑀩𑁆𑀩𑀮𑀸𑀓𑀼𑀲𑀮𑁂𑀦𑁂𑀯, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀺𑀦𑀲𑁆𑀲𑀢𑀺;

𑀤𑀼𑀩𑁆𑀩𑀮𑁂𑀦𑁂𑀯 𑀧𑀼𑀜𑁆𑀜𑁂𑀦, 𑀇𑀢𑁆𑀣𑀺𑀪𑀸𑀯𑁄 𑀳𑀺 𑀚𑀸𑀬𑀢𑁂.

𑁬𑁭𑁧.

𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲𑀸𑀧𑀺 ¶ , 𑀏𑀓𑀫𑁂𑀯𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸;

𑀏𑀯𑀁 𑀲𑀦𑁆𑀢𑁂 𑀅𑀪𑀸𑀯𑁄 𑀘, 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀲𑁆𑀲 𑀢𑀼.

𑁬𑁭𑁨.

𑀦 𑀘𑀸𑀪𑀸𑀯𑁄 𑀲𑀺𑀬𑀸 𑀓𑀲𑁆𑀫𑀸, 𑀦 𑀢𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀁;

𑀢𑀲𑁆𑀲 𑀓𑀫𑁆𑀫𑀲𑀳𑀸𑀬𑀁 𑀳𑀺, 𑀭𑀸𑀕𑀘𑀺𑀢𑁆𑀢𑀁 𑀢𑀼 𑀓𑀸𑀭𑀡𑀁.

𑀉𑀪𑀬𑀲𑁆𑀲 𑀧𑀦𑁂𑀢𑀲𑁆𑀲 𑀮𑀓𑁆𑀔𑀡𑀸𑀤𑀻𑀦𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, ‘‘𑀇𑀢𑁆𑀣𑀻’’𑀢𑀺 𑀧𑀓𑀸𑀲𑀦𑀭𑀲𑀁, 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀧𑀼𑀭𑀺𑀲𑀪𑀸𑀯𑀮𑀓𑁆𑀔𑀡𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, ‘‘𑀧𑀼𑀭𑀺𑀲𑁄’’𑀢𑀺 𑀧𑀓𑀸𑀲𑀦𑀭𑀲𑀁, 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀚𑀻𑀯𑀺𑀢𑀦𑁆𑀢𑀺 𑁋

𑁬𑁭𑁩.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂, 𑀯𑀢𑁆𑀢𑀩𑁆𑀩𑀁 𑀬𑀁 𑀲𑀺𑀬𑀸 𑀇𑀥;

𑀅𑀭𑀽𑀧𑀚𑀻𑀯𑀺𑀢𑁂 𑀯𑀼𑀢𑁆𑀢-𑀦𑀬𑁂𑀦𑁂𑀯 𑀘 𑀢𑀁 𑀯𑀤𑁂.

𑀮𑀓𑁆𑀔𑀡𑀸𑀤𑀻𑀦𑀺 ¶ 𑀧𑀦𑀲𑁆𑀲 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀳𑀚𑀭𑀽𑀧𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀫𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀪𑀽𑀢𑀧𑀤𑀝𑁆𑀞𑀸𑀦𑀦𑁆𑀢𑀺.

𑀯𑀢𑁆𑀣𑀽𑀢𑀺 𑀳𑀤𑀬𑀯𑀢𑁆𑀣𑀼.

𑁬𑁭𑁪.

𑀬𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄;

𑀯𑀢𑁆𑀢𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑁂, 𑀢𑀁 ‘‘𑀯𑀢𑁆𑀣𑀽’’𑀢𑀺 𑀧𑀯𑀼𑀘𑁆𑀘𑀢𑀺.

𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 ¶ 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀳𑀤𑀬𑀯𑀢𑁆𑀣𑀼, 𑀢𑀸𑀲𑀜𑁆𑀘𑁂𑀯 𑀥𑀸𑀢𑀽𑀦𑀁 𑀆𑀥𑀸𑀭𑀡𑀭𑀲𑀁, 𑀉𑀩𑁆𑀩𑀸𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀆𑀳𑀸𑀭𑀢𑀸𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄.

𑁬𑁭𑁫.

𑀬𑀸𑀬 ¶ 𑀑𑀚𑀸𑀬 𑀬𑀸𑀧𑁂𑀦𑁆𑀢𑀺, 𑀬𑀢𑁆𑀣 𑀬𑀢𑁆𑀣 𑀘 𑀧𑀸𑀡𑀺𑀦𑁄;

𑀅𑀬𑀁 𑀢𑀼 ‘‘𑀓𑀩𑀴𑀻𑀓𑀸𑀭𑁄, 𑀆𑀳𑀸𑀭𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑁬𑁭𑁬.

𑀅𑀦𑁆𑀦𑀧𑀸𑀦𑀸𑀤𑀺𑀓𑀁 𑀯𑀢𑁆𑀣𑀼, 𑀅𑀕𑁆𑀕𑀺𑀁 𑀳𑀭𑀢𑀺 𑀓𑀫𑁆𑀫𑀚𑀁;

𑀓𑁂𑀯𑀮𑀁 𑀦 𑀘 𑀲𑀓𑁆𑀓𑁄𑀢𑀺, 𑀧𑀸𑀮𑁂𑀢𑀼𑀁 𑀚𑀻𑀯𑀺𑀢𑀁 𑀧𑀦.

𑁬𑁭𑁭.

𑀑𑀚𑀸 𑀲𑀓𑁆𑀓𑁄𑀢𑀺 𑀧𑀸𑀮𑁂𑀢𑀼𑀁, 𑀳𑀭𑀺𑀢𑀼𑀁 𑀦 𑀘 𑀧𑀸𑀘𑀓𑀁;

𑀳𑀭𑀺𑀢𑀼𑀫𑁆𑀧𑀺 𑀘 𑀧𑀸𑀮𑁂𑀢𑀼𑀁, 𑀉𑀪𑁄 𑀲𑀓𑁆𑀓𑁄𑀦𑁆𑀢𑀺 𑀏𑀓𑀢𑁄.

𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑀲𑁆𑀲 𑀑𑀚𑀸𑀮𑀓𑁆𑀔𑀡𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀸𑀳𑀭𑀡𑀭𑀲𑁄, 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀓𑀸𑀬𑁂𑀦 𑀅𑀢𑁆𑀢𑀦𑁄 𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀦𑀁 𑀓𑀸𑀬𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀏𑀢𑀸𑀬 𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀲𑀬𑀁 𑀯𑀸 𑀓𑀸𑀬𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺𑀧𑀺 𑀯𑀺𑀜𑁆𑀜𑀢𑁆𑀢𑀺. ‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄’’𑀢𑀺 𑀆𑀕𑀢𑁄 𑀘𑁄𑀧𑀦𑀲𑀗𑁆𑀔𑀸𑀢𑁄 𑀓𑀸𑀬𑁄𑀯 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸 𑀲𑀬𑀜𑁆𑀘 𑀢𑀣𑀸 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺.

𑁬𑁭𑁮.

𑀢𑀢𑁆𑀣 𑀬𑀸 𑀲𑀳𑀚𑀸𑀢𑀲𑁆𑀲, 𑀘𑀺𑀢𑁆𑀢𑀚𑀸𑀦𑀺𑀮𑀥𑀸𑀢𑀼𑀬𑀸;

𑀭𑀽𑀧𑀲𑁆𑀲 𑀘𑀮𑀦𑁂 𑀳𑁂𑀢𑀼, 𑀏𑀓𑀸𑀓𑀸𑀭𑀯𑀺𑀓𑀸𑀭𑀢𑀸.

𑁬𑁭𑁯.

𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫𑀸𑀬𑀁, 𑀓𑀸𑀬𑀤𑁆𑀯𑀸𑀭𑀦𑁆𑀢𑀺 𑀲𑀸 𑀫𑀢𑀸;

𑀢𑀢𑁆𑀣 𑀬𑀸 𑀘𑁂𑀢𑀦𑀸𑀲𑀺𑀤𑁆𑀥𑀸, 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑀸 𑀧𑀦.

𑁬𑁮𑁦.

𑀓𑀸𑀬𑀓𑀫𑁆𑀫𑀦𑁆𑀢𑀺 ¶ 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀢𑁆𑀣𑀼𑀦𑀸 𑀲𑀸 𑀳𑀺𑀢𑁂𑀲𑀺𑀦𑀸;

𑀲𑀫𑁆𑀧𑀯𑀢𑁆𑀢𑀺 𑀧𑀦𑁂𑀢𑀺𑀲𑁆𑀲𑀸, 𑀯𑀘𑀻𑀤𑁆𑀯𑀸𑀭𑁂𑀧𑀺 𑀚𑀸𑀬𑀢𑁂.

𑁬𑁮𑁧.

𑀮𑀪𑀺𑀢𑁆𑀯𑀸 ¶ 𑀧𑀦𑀼𑀧𑀢𑁆𑀣𑀫𑁆𑀪𑀁, 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁;

𑀳𑁂𑀝𑁆𑀞𑀸𑀳𑀺 𑀙𑀳𑀺 𑀘𑀺𑀢𑁆𑀢𑁂𑀳𑀺, 𑀯𑀸𑀬𑁄𑀥𑀸𑀢𑀼𑀲𑀫𑀼𑀝𑁆𑀞𑀺𑀢𑀁.

𑁬𑁮𑁨.

𑀲𑀢𑁆𑀢𑀫𑁂𑀦 𑀢𑀼 𑀘𑀺𑀢𑁆𑀢𑁂𑀦, 𑀯𑀸𑀬𑁄𑀥𑀸𑀢𑀼𑀲𑀫𑀼𑀝𑁆𑀞𑀺𑀢𑀸;

𑀘𑀸𑀮𑁂𑀢𑀺 𑀲𑀳𑀚𑀁 𑀭𑀽𑀧𑀁, 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀢𑁆𑀢𑀦𑀸.

𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑁂 ¶ 𑀧𑀦 𑁋

𑁬𑁮𑁩.

𑀧𑀘𑁆𑀘𑀬𑁄 𑀘𑀺𑀢𑁆𑀢𑀚𑀸𑀢𑀸𑀬, 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑁂;

𑀬𑁄 𑀆𑀓𑀸𑀭𑀯𑀺𑀓𑀸𑀭𑁂𑀓𑁄, 𑀅𑀬𑀁 𑀧𑀣𑀯𑀺𑀥𑀸𑀢𑀼𑀬𑀸.

𑁬𑁮𑁪.

𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀳 𑀲𑀤𑁆𑀤𑀯𑀲𑀸 𑀧𑀦;

𑀯𑀘𑀻𑀤𑁆𑀯𑀸𑀭𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀸𑀯 𑀲𑀓𑁆𑀬𑀓𑀼𑀮𑀺𑀦𑁆𑀤𑀼𑀦𑀸.

𑁬𑁮𑁫.

𑀲𑀤𑁆𑀤𑁄 𑀦 𑀘𑀺𑀢𑁆𑀢𑀚𑁄 𑀅𑀢𑁆𑀣𑀺, 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀁;

𑀥𑀸𑀢𑀼𑀲𑀗𑁆𑀖𑀝𑁆𑀝𑀦𑁂𑀦𑁂𑀯, 𑀲𑀳 𑀲𑀤𑁆𑀤𑁄 𑀳𑀺 𑀚𑀸𑀬𑀢𑀺.

𑁬𑁮𑁬.

𑀲𑀸 𑀯𑀺𑀜𑁆𑀜𑀸𑀧𑀦𑀢𑁄 𑀘𑁂𑀯, 𑀅𑀬𑀁 𑀯𑀺𑀜𑁆𑀜𑁂𑀬𑁆𑀬𑀢𑁄𑀧𑀺 𑀘;

𑀯𑀺𑀜𑁆𑀜𑀢𑁆𑀢𑀻𑀢𑀺 𑀲𑀺𑀬𑀸 𑀢𑀲𑁆𑀲𑀸, 𑀲𑀫𑁆𑀪𑀯𑁄 𑀓𑀸𑀭𑀓𑀤𑁆𑀯𑀬𑁂.

𑁬𑁮𑁭.

𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀅𑀝𑁆𑀞, 𑀭𑀽𑀧𑀸𑀦𑀺 𑀯𑀺𑀬 𑀘𑀺𑀢𑁆𑀢𑀚𑀁;

𑀘𑀺𑀢𑁆𑀢𑀚𑀸𑀦𑀁 𑀯𑀺𑀓𑀸𑀭𑀢𑁆𑀢𑀸, 𑀘𑀺𑀢𑁆𑀢𑀚𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀅𑀥𑀺𑀧𑁆𑀧𑀸𑀬𑀧𑀓𑀸𑀲𑀦𑀭𑀲𑀸, 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀧𑀤𑀝𑁆𑀞𑀸𑀦𑀸. 𑀢𑀣𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀅𑀥𑀺𑀧𑁆𑀧𑀸𑀬𑀧𑀓𑀸𑀲𑀦𑀭𑀲𑀸, 𑀯𑀘𑀻𑀖𑁄𑀲𑀲𑁆𑀲 𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀧𑀤𑀝𑁆𑀞𑀸𑀦𑀸.

𑁬𑁮𑁮.

𑀦 𑀓𑀲𑁆𑀲𑀢𑀻𑀢𑀺 𑀆𑀓𑀸𑀲𑁄, 𑀭𑀽𑀧𑀸𑀦𑀁 𑀯𑀺𑀯𑀭𑁄 𑀧𑀦;

𑀬𑁄 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀲𑁆𑀯𑀸𑀓𑀸𑀲𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀲𑁄 ¶ 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑁄, 𑀭𑀽𑀧𑀧𑀭𑀺𑀬𑀦𑁆𑀢𑀧𑀓𑀸𑀲𑀦𑀭𑀲𑁄, 𑀭𑀽𑀧𑀫𑀭𑀺𑀬𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑁄.

𑀭𑀽𑀧𑀲𑁆𑀲 𑀮𑀳𑀼𑀢𑀸𑀤𑀺𑀢𑁆𑀢𑀬𑀦𑀺𑀤𑁆𑀤𑁂𑀲𑁂 𑁋

𑁬𑁮𑁯.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀭𑀽𑀧𑀲𑁆𑀲 𑀮𑀳𑀼𑀢𑀸𑀤𑀺𑀲𑀼;

𑀢𑀺𑀲𑁆𑀲𑁄 𑀭𑀽𑀧𑀯𑀺𑀓𑀸𑀭𑀸𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁬𑁯𑁦.

𑀏𑀢𑀸𑀲𑀁 ¶ 𑀧𑀦 𑀢𑀺𑀲𑁆𑀲𑀦𑁆𑀦𑀁, 𑀓𑀫𑀢𑁄 𑀘 𑀧𑀯𑀢𑁆𑀢𑀺𑀬𑀁;

𑀅𑀭𑁄𑀕𑀻 𑀫𑀤𑁆𑀤𑀺𑀢𑀁 𑀘𑀫𑁆𑀫𑀁, 𑀥𑀦𑁆𑀢𑀳𑁂𑀫𑀁 𑀦𑀺𑀤𑀲𑁆𑀲𑀦𑀁.

𑁬𑁯𑁧.

𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀧𑀦;

𑀆𑀳𑀸𑀭𑀸𑀤𑀺𑀢𑁆𑀢𑀬𑀁𑀬𑁂𑀯, 𑀢𑀁 𑀓𑀭𑁄𑀢𑀺 𑀢𑀢𑁄 𑀢𑀺𑀚𑀁.

𑀢𑀢𑁆𑀣 ¶ 𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀸𑀦𑀁 𑀕𑀭𑀼𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸.

𑀅𑀣𑀤𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀸𑀦𑀁 𑀣𑀤𑁆𑀥𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀼𑀤𑀼𑀭𑀽𑀧𑀧𑀤𑀝𑁆𑀞𑀸𑀦𑀸.

𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸, 𑀅𑀓𑀫𑁆𑀫𑀜𑁆𑀜𑀢𑀸𑀯𑀺𑀦𑁄𑀤𑀦𑀭𑀲𑀸, 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀜𑁆𑀜𑀢𑀸𑀭𑀽𑀧𑀧𑀤𑀝𑁆𑀞𑀸𑀦𑀸. 𑀏𑀢𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑀳𑀦𑁆𑀢𑀺.

𑀉𑀧𑀘𑀬𑀲𑀦𑁆𑀢𑀢𑀺𑀦𑀺𑀤𑁆𑀤𑁂𑀲𑁂 𑁋

𑁬𑁯𑁨.

𑀭𑀽𑀧𑀸𑀦𑀫𑀸𑀘𑀬𑁄 𑀬𑁄 𑀳𑀺, 𑀯𑀼𑀢𑁆𑀢𑁄 𑀉𑀧𑀘𑀬𑁄𑀢𑀺 𑀲𑁄;

𑀅𑀦𑀼𑀧𑁆𑀧𑀩𑀦𑁆𑀥𑀢𑀸 𑀢𑁂𑀲𑀁, 𑀲𑀦𑁆𑀢𑀢𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁬𑁯𑁩.

𑀅𑀢𑁆𑀣𑀢𑁄 ¶ 𑀉𑀪𑀬𑀫𑁆𑀧𑁂𑀢𑀁, 𑀚𑀸𑀢𑀺𑀭𑀽𑀧𑀦𑁆𑀢𑀺 𑀤𑀻𑀧𑀺𑀢𑀁;

𑀯𑀼𑀢𑁆𑀢𑀫𑀸𑀓𑀸𑀭𑀦𑀸𑀦𑀢𑁆𑀢𑀸, 𑀯𑁂𑀦𑁂𑀬𑁆𑀬𑀸𑀦𑀁 𑀯𑀲𑁂𑀦 𑀯𑀸.

𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀆𑀘𑀬𑀮𑀓𑁆𑀔𑀡𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀧𑀼𑀩𑁆𑀩𑀦𑁆𑀢𑀢𑁄 𑀭𑀽𑀧𑀸𑀦𑀁 𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄, 𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄.

𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸, 𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑀼𑀧𑁆𑀧𑀩𑀦𑁆𑀥𑀭𑀽𑀧𑀧𑀤𑀝𑁆𑀞𑀸𑀦𑀸.

𑀚𑀭𑀸𑀦𑀺𑀤𑁆𑀤𑁂𑀲𑁂 ¶ 𑀚𑀻𑀭𑀡𑀁 𑀚𑀭𑀸.

𑁬𑁯𑁪.

𑀤𑀼𑀯𑀺𑀥𑀸𑀬𑀁 𑀚𑀭𑀸 𑀦𑀸𑀫, 𑀧𑀸𑀓𑀝𑀸𑀧𑀸𑀓𑀝𑀸𑀢𑀺 𑀘;

𑀧𑀸𑀓𑀝𑀸 𑀭𑀽𑀧𑀥𑀫𑁆𑀫𑁂𑀲𑀼, 𑀅𑀭𑀽𑀧𑁂𑀲𑀼 𑀅𑀧𑀸𑀓𑀝𑀸.

𑀭𑀽𑀧𑀲𑁆𑀲 𑀧𑀭𑀺𑀧𑀸𑀓𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀚𑀭𑀢𑀸, 𑀉𑀧𑀦𑀬𑀦𑀭𑀲𑀸, 𑀲𑀪𑀸𑀯𑀸𑀦𑀁 𑀅𑀧𑀕𑀫𑁂𑀧𑀺 𑀦𑀲𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬, 𑀧𑀭𑀺𑀧𑀘𑁆𑀘𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸.

𑀧𑀭𑀺𑀪𑁂𑀤𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀲𑀁𑀲𑀻𑀤𑀦𑀭𑀲𑀸, 𑀔𑀬𑀯𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀺𑀪𑀺𑀚𑁆𑀚𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀏𑀯𑀁 𑀘𑀢𑀼𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬𑁯𑁫.

𑀪𑀽𑀢𑀭𑀽𑀧𑀸𑀦𑀺 𑀘𑀢𑁆𑀢𑀸𑀭𑀺, 𑀉𑀧𑀸𑀤𑀸 𑀘𑀢𑀼𑀯𑀻𑀲𑀢𑀺;

𑀅𑀝𑁆𑀞𑀯𑀻𑀲𑀢𑀺 𑀭𑀽𑀧𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀪𑀯𑀦𑁆𑀢𑀺 𑀳𑀺.

𑁬𑁯𑁬.

𑀇𑀫𑁂𑀲𑀼 𑀧𑀦 𑀭𑀽𑀧𑁂𑀲𑀼, 𑀅𑀲𑀫𑁆𑀫𑁄𑀳𑀢𑁆𑀣𑀫𑁂𑀯 𑀢𑀁;

𑀲𑀫𑁄𑀥𑀸𑀦𑀁 𑀲𑀫𑀼𑀝𑁆𑀞𑀸𑀦𑀁, 𑀦𑀺𑀧𑁆𑀨𑀦𑁆𑀦𑀁 𑀲𑀗𑁆𑀔𑀢𑀫𑁆𑀧𑀺 𑀘.

𑁬𑁯𑁭.

𑀘𑁄𑀤𑀦𑀁 ¶ 𑀧𑀭𑀺𑀳𑀸𑀭𑀜𑁆𑀘, 𑀦𑀬𑀫𑁂𑀓𑀯𑀺𑀥𑀸𑀤𑀺𑀓𑀁;

𑀲𑀗𑁆𑀔𑁂𑀧𑁂𑀦 𑀧𑀯𑀓𑁆𑀔𑀸𑀫𑀺, 𑀧𑀓𑀺𑀡𑁆𑀡𑀓𑀫𑀺𑀤𑀁 𑀲𑀼𑀡.

𑀢𑀢𑁆𑀣 ¶ 𑀲𑀫𑁄𑀥𑀸𑀦𑀦𑁆𑀢𑀺 𑀲𑀩𑁆𑀩𑀫𑁂𑀯 𑀇𑀤𑀁 𑀭𑀽𑀧𑀁 𑀲𑀩𑁆𑀩𑀲𑀫𑁄𑀥𑀸𑀦𑀢𑁄 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀘 𑀳𑁄𑀢𑀺, 𑀇𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀓𑁂𑀘𑀺 𑀧𑀦 𑀫𑀺𑀤𑁆𑀥𑀯𑀸𑀤𑀺𑀦𑁄 ‘‘𑀫𑀺𑀤𑁆𑀥𑀭𑀽𑀧𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 ‘‘𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺 𑀘 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀜𑁆𑀘 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀯𑀘𑀦𑀢𑁄 𑀘 𑀫𑀳𑀸𑀧𑀓𑀭𑀡𑀧𑀝𑁆𑀞𑀸𑀦𑁂 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀅𑀭𑀽𑀧𑁂𑀧𑀺 ‘‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀧𑀸𑀴𑀻𑀳𑀺 𑀯𑀺𑀭𑀼𑀚𑁆𑀛𑀦𑀢𑁄 𑀘 𑀅𑀭𑀽𑀧𑀫𑁂𑀯 𑀫𑀺𑀤𑁆𑀥𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸.

𑁬𑁯𑁮.

𑀅𑀭𑀽𑀧𑁂𑀧𑀺 ¶ 𑀧𑀦𑁂𑀢𑀲𑁆𑀲, 𑀫𑀺𑀤𑁆𑀥𑀲𑁆𑀲𑀼𑀧𑁆𑀧𑀢𑁆𑀢𑀺 𑀧𑀸𑀞𑀢𑁄;

𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀸, 𑀅𑀭𑀽𑀧𑀦𑁆𑀢𑀺 𑀘 𑀯𑀺𑀜𑁆𑀜𑀼𑀦𑀸.

𑀅𑀧𑀭𑁂 ‘‘𑀩𑀮𑀭𑀽𑀧𑁂𑀦 𑀲𑀤𑁆𑀥𑀺𑀁 𑀏𑀓𑀽𑀦𑀢𑀺𑀁𑀲, 𑀲𑀫𑁆𑀪𑀯𑀭𑀽𑀧𑁂𑀦 𑀲𑀤𑁆𑀥𑀺𑀁 𑀢𑀺𑀁𑀲, 𑀚𑀸𑀢𑀺𑀭𑀽𑀧𑁂𑀦 𑀲𑀤𑁆𑀥𑀺𑀁 𑀏𑀓𑀢𑀺𑀁𑀲, 𑀭𑁄𑀕𑀭𑀽𑀧𑁂𑀦 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲 𑀭𑀽𑀧𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀧𑀺 𑀢𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀯𑀸𑀬𑁄𑀥𑀸𑀢𑀼𑀬𑀸 𑀕𑀳𑀺𑀢𑀸𑀬 𑀩𑀮𑀭𑀽𑀧𑀁 𑀕𑀳𑀺𑀢𑀫𑁂𑀯, 𑀅𑀜𑁆𑀜𑀁 𑀩𑀮𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺. 𑀆𑀧𑁄𑀥𑀸𑀢𑀼𑀬𑀸 𑀲𑀫𑁆𑀪𑀯𑀭𑀽𑀧𑀁, 𑀉𑀧𑀘𑀬𑀲𑀦𑁆𑀢𑀢𑀻𑀢𑀺 𑀚𑀸𑀢𑀺𑀭𑀽𑀧𑀁, 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀤𑀻𑀳𑀺 𑀭𑁄𑀕𑀭𑀽𑀧𑀁 𑀕𑀳𑀺𑀢𑀁, 𑀅𑀜𑁆𑀜𑀁 𑀭𑁄𑀕𑀭𑀽𑀧𑀁 𑀦𑀸𑀫 𑀦𑀢𑁆𑀣𑀻𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸𑀦𑁂𑀯 𑀭𑀽𑀧𑀸𑀦𑀻𑀢𑀺.

𑀏𑀯𑀁 𑀲𑀫𑁄𑀥𑀸𑀦𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀓𑀫𑁆𑀫𑀸𑀦𑀻𑀢𑀺.

𑁬𑁯𑁯.

𑀓𑀫𑁆𑀫𑀁 ¶ 𑀉𑀢𑀼 𑀘 𑀘𑀺𑀢𑁆𑀢𑀜𑁆𑀘, 𑀆𑀳𑀸𑀭𑁄 𑀭𑀽𑀧𑀳𑁂𑀢𑀼𑀬𑁄;

𑀏𑀢𑁂𑀳𑁂𑀯 𑀘 𑀭𑀽𑀧𑀸𑀦𑀺, 𑀚𑀸𑀬𑀦𑁆𑀢𑀺 𑀦 𑀧𑀦𑀜𑁆𑀜𑀢𑁄.

𑁭𑁦𑁦.

𑀢𑀲𑁆𑀫𑀸 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀏𑀓𑀸𑀤𑀲 𑀪𑀯𑀦𑁆𑀢𑀺 𑀳𑀺;

𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀢𑁆𑀣𑀼𑀜𑁆𑀘, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀫𑁂𑀯 𑀘.

𑁭𑁦𑁧.

𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀢𑁆𑀣𑀼𑀜𑁆𑀘, 𑀏𑀓𑀦𑁆𑀢𑁂𑀦𑁂𑀯 𑀓𑀫𑁆𑀫𑀚𑀸;

𑀘𑀺𑀢𑁆𑀢𑀚𑀁𑀬𑁂𑀯 𑀯𑀺𑀜𑁆𑀜𑀢𑁆𑀢𑀺-𑀤𑁆𑀯𑀬𑀁 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

𑁭𑁦𑁨.

𑀘𑀺𑀢𑁆𑀢𑁂𑀦 𑀉𑀢𑀼𑀦𑀸 𑀘𑁂𑀯, 𑀲𑀤𑁆𑀤𑁄 𑀤𑁆𑀯𑀻𑀳𑀺 𑀲𑀫𑀼𑀝𑁆𑀞𑀺𑀢𑁄;

𑀉𑀢𑀼𑀆𑀳𑀸𑀭𑀘𑀺𑀢𑁆𑀢𑁂𑀳𑀺, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀓𑀢𑀁.

𑁭𑁦𑁩.

𑀯𑀡𑁆𑀡𑁄 ¶ 𑀕𑀦𑁆𑀥𑁄 𑀭𑀲𑁄 𑀑𑀚𑀸,

𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄;

𑀲𑀦𑁆𑀢𑀢𑁆𑀬𑀼𑀧𑀘𑀬𑀸𑀓𑀸𑀲𑀸,

𑀏𑀓𑀸𑀤𑀲 𑀘𑀢𑀼𑀩𑁆𑀪𑀯𑀸.

𑁭𑁦𑁪.

𑀏𑀓𑀸𑀤𑀲𑁂𑀓𑀢𑁄 ¶ 𑀚𑀸𑀢𑀸,

𑀤𑁆𑀯𑀺𑀚𑁂𑀓𑁄𑀯 𑀢𑀺𑀚𑀸 𑀢𑀬𑁄;

𑀘𑀢𑀼𑀚𑁂𑀓𑀸𑀤𑀲𑀓𑁆𑀔𑀸𑀢𑀸,

𑀤𑁆𑀯𑁂 𑀦 𑀓𑁂𑀦𑀘𑀺 𑀚𑀸𑀬𑀭𑁂.

𑁭𑁦𑁫.

𑀓𑀫𑁆𑀫𑁂𑀦 𑀯𑀻𑀲𑀢𑀺 𑀭𑀽𑀧𑀸, 𑀲𑀢𑁆𑀢𑀭𑀲 𑀢𑀼 𑀘𑁂𑀢𑀲𑀸;

𑀉𑀢𑀼𑀦𑀸 𑀤𑀲𑀧𑀜𑁆𑀘𑁂𑀯, 𑀘𑀼𑀤𑁆𑀤𑀲𑀸𑀳𑀸𑀭𑀢𑁄 𑀧𑀦.

𑁭𑁦𑁬.

𑀙𑀲𑀝𑁆𑀞𑀺 𑀲𑀩𑁆𑀩𑀸𑀦𑁂𑀢𑀸𑀦𑀺, 𑀲𑀫𑀼𑀝𑁆𑀞𑀸𑀦𑀯𑀺𑀪𑀸𑀕𑀢𑁄;

𑀅𑀝𑁆𑀞𑀲𑀝𑁆𑀞𑀺 𑀘 𑀳𑁄𑀦𑁆𑀢𑁂𑀯, 𑀚𑀭𑀢𑀸𑀦𑀺𑀘𑁆𑀘𑀢𑀸𑀳𑀺 𑀢𑁂.

𑁭𑁦𑁭.

𑀚𑀭𑀢𑀸𑀦𑀺𑀘𑁆𑀘𑀢𑀸 𑀘𑁂𑀯, 𑀦 𑀓𑁂𑀦𑀘𑀺 𑀲𑀫𑀼𑀝𑁆𑀞𑀺𑀢𑀸;

𑀚𑀸𑀢𑀲𑁆𑀲 𑀧𑀸𑀓𑀪𑁂𑀤𑀢𑁆𑀢𑀸, 𑀚𑀸𑀬𑁂𑀬𑁆𑀬𑀼𑀁 𑀬𑀤𑀺 𑀢𑀸𑀦𑀺𑀧𑀺.

𑁭𑁦𑁮.

𑀏𑀯𑀁 𑀲𑀦𑁆𑀢𑁂 𑀢𑀼 𑀢𑁂𑀲𑀫𑁆𑀧𑀺, 𑀧𑀸𑀓𑀪𑁂𑀤𑀸 𑀲𑀺𑀬𑀼𑀁 𑀦 𑀳𑀺;

𑀧𑀸𑀓𑁄 𑀧𑀘𑁆𑀘𑀢𑀺 𑀪𑁂𑀤𑁄 𑀯𑀸, 𑀦 𑀘 𑀪𑀺𑀚𑁆𑀚𑀢𑀺 𑀦𑀢𑁆𑀣𑀺 𑀢𑀁.

𑁭𑁦𑁯.

𑀚𑀸𑀢𑀲𑁆𑀲 ¶ 𑀧𑀸𑀓𑀪𑁂𑀤𑀢𑁆𑀢𑀸, 𑀤𑁆𑀯𑀬𑀫𑁂𑀢𑀁 𑀦 𑀚𑀸𑀬𑀢𑀺;

𑀲𑀺𑀬𑀸 𑀓𑀢𑁆𑀣𑀘𑀺 𑀩𑀼𑀤𑁆𑀥𑁂𑀢𑁆𑀣, ‘‘𑀭𑀽𑀧𑀲𑁆𑀲𑀼𑀧𑀘𑀬𑁄’’𑀢𑀺 𑀳𑀺.

𑁭𑁧𑁦.

𑀯𑀘𑀦𑁂𑀦 𑀬𑀣𑀸 ‘‘𑀚𑀸𑀢𑀺, 𑀚𑀸𑀬𑀢𑀻’’𑀢𑀺 𑀘 𑀤𑀻𑀧𑀺𑀢𑀁;

𑀧𑀸𑀓𑁄𑀧𑀺 𑀧𑀘𑁆𑀘𑀢𑁂𑀯𑀁 𑀢𑀼, 𑀪𑁂𑀤𑁄𑀧𑀺 𑀧𑀭𑀺𑀪𑀺𑀚𑁆𑀚𑀢𑀼.

𑁭𑁧𑁧.

𑀦 𑀘𑁂𑀯 𑀚𑀸𑀬𑀢𑁂 𑀚𑀸𑀢𑀺, 𑀇𑀢𑀺 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸;

𑀚𑀸𑀬𑀫𑀸𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀦𑀺𑀩𑁆𑀩𑀢𑁆𑀢𑀻𑀢𑀺 𑀧𑀓𑀸𑀲𑀺𑀢𑀸.

𑁭𑁧𑁨.

𑀢𑀢𑁆𑀣 𑀬𑀣𑀸 𑀲𑀺𑀬𑀸 𑀚𑀸𑀢𑀺, 𑀬𑁂𑀲𑀁 𑀥𑀫𑁆𑀫𑀸𑀦𑀫𑁂𑀯 𑀲𑀸;

𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀫𑀼𑀢𑀺𑀁.

𑁭𑁧𑁩.

𑀮𑀪𑀢𑁂𑀯 𑀢𑀣𑀸 𑀢𑁂𑀲𑀁, 𑀧𑀸𑀓𑀪𑁂𑀤𑀸 𑀮𑀩𑁆𑀪𑀦𑁆𑀢𑀺 𑀢𑁂;

𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀫𑀼𑀢𑀺𑀁.

𑁭𑁧𑁪.

𑀏𑀯𑀁 𑀇𑀤𑀁 𑀤𑁆𑀯𑀬𑀜𑁆𑀘𑀸𑀧𑀺, 𑀳𑁄𑀢𑀺 𑀓𑀫𑁆𑀫𑀸𑀤𑀺𑀲𑀫𑁆𑀪𑀯𑀁;

𑀦 𑀧𑀸𑀓𑀪𑁂𑀤𑀸 𑀯𑁄𑀳𑀸𑀭𑀁, 𑀢𑀁 𑀮𑀪𑀦𑁆𑀢𑀺 𑀓𑀤𑀸𑀘𑀺𑀧𑀺.

𑁭𑁧𑁫.

𑀓𑀲𑁆𑀫𑀸 ¶ 𑀳𑀺 𑀚𑀦𑀓𑀸𑀦𑀁 𑀢𑀼, 𑀧𑀘𑁆𑀘𑀬𑀸𑀦𑀫𑀪𑀸𑀯𑀢𑁄;

𑀆𑀦𑀼𑀪𑀸𑀯𑀔𑀡𑀼𑀧𑁆𑀧𑀸𑀤𑁂, 𑀚𑀸𑀢𑀺𑀬𑀸 𑀧𑀦 𑀮𑀩𑁆𑀪𑀢𑀺.

𑁭𑁧𑁬.

𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀫𑀼𑀢𑀺𑀁;

𑀢𑀲𑁆𑀫𑀸 𑀮𑀪𑀢𑀺 𑀚𑀸𑀢𑀺 𑀘, 𑀮𑀪𑀢𑀻 𑀦𑁂𑀢𑀭𑀤𑁆𑀯𑀬𑀁.

𑁭𑁧𑁭.

𑀚𑀺𑀬𑁆𑀬𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑁆𑀯𑀬𑀁 𑀪𑀺𑀚𑁆𑀚𑀢𑀻𑀢𑀺 𑀯𑀸;

𑀆𑀦𑀼𑀪𑀸𑀯𑀔𑀡𑁂 𑀢𑀲𑁆𑀲, 𑀧𑀘𑁆𑀘𑀬𑀸𑀦𑀫𑀪𑀸𑀯𑀢𑁄.

𑁭𑁧𑁮.

‘‘𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀜𑁆𑀘𑁂𑀢𑀁, 𑀚𑀭𑀸𑀫𑀭𑀡’’𑀫𑀺𑀘𑁆𑀘𑀧𑀺;

𑀯𑀼𑀢𑁆𑀢𑀢𑁆𑀢𑀸 𑀚𑀸𑀬𑀢𑀺𑀘𑁆𑀘𑁂𑀢𑀁, 𑀅𑀣 𑀫𑀜𑁆𑀜𑀲𑀺 𑀘𑁂 𑀢𑀼𑀯𑀁.

𑁭𑁧𑁯.

𑀏𑀯𑀫𑁆𑀧𑀺 𑀘 𑀦 𑀯𑀢𑁆𑀢𑀩𑁆𑀩𑀁, 𑀲𑀸 𑀳𑀺 𑀧𑀭𑀺𑀬𑀸𑀬𑀤𑁂𑀲𑀦𑀸;

𑀅𑀦𑀺𑀘𑁆𑀘𑀸𑀦𑀁 𑀢𑀼 𑀥𑀫𑁆𑀫𑀸𑀦𑀁, 𑀚𑀭𑀸𑀫𑀭𑀡𑀢𑁄 𑀢𑀣𑀸.

𑁭𑁨𑁦.

𑀅𑀦𑀺𑀘𑁆𑀘𑀁 ¶ 𑀲𑀗𑁆𑀔𑀢𑀜𑁆𑀘𑀸𑀢𑀺, 𑀯𑀼𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀺𑀬;

𑀬𑀤𑀺 𑀏𑀯𑀁 𑀢𑀬𑀫𑁂𑀢𑀁, 𑀅𑀚𑀸𑀢𑀢𑁆𑀢𑀸 𑀘 𑀲𑀩𑁆𑀩𑀣𑀸.

𑁭𑁨𑁧.

𑀦𑀢𑁆𑀣𑀻𑀢𑀺 ¶ 𑀘𑁂 𑀔𑀁𑀧𑀼𑀧𑁆𑀨𑀁𑀯, 𑀦𑀺𑀘𑁆𑀘𑀁 𑀯𑀸𑀲𑀗𑁆𑀔𑀢𑀁 𑀯𑀺𑀬;

𑀦𑁄𑀪𑀬𑀁 𑀧𑀦𑀺𑀤𑀁 𑀓𑀲𑁆𑀫𑀸, 𑀦𑀺𑀲𑁆𑀲𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄.

𑁭𑁨𑁨.

𑀪𑀸𑀯𑁂 𑀧𑀣𑀯𑀺𑀬𑀸𑀤𑀻𑀦𑀁, 𑀦𑀺𑀲𑁆𑀲𑀬𑀸𑀦𑀁 𑀢𑀼 𑀪𑀸𑀯𑀢𑁄;

𑀢𑀲𑁆𑀫𑀸 𑀳𑀺 𑀘 𑀔𑀁𑀧𑀼𑀧𑁆𑀨𑀁𑀯, 𑀦 𑀦𑀢𑁆𑀣𑀺 𑀧𑀦 𑀢𑀁 𑀢𑀬𑀁.

𑁭𑁨𑁩.

𑀬𑀲𑁆𑀫𑀸 𑀧𑀣𑀯𑀺𑀬𑀸𑀤𑀻𑀦𑀁, 𑀅𑀪𑀸𑀯𑁂𑀦 𑀘 𑀮𑀩𑁆𑀪𑀢𑀺;

𑀢𑀲𑁆𑀫𑀸 𑀦 𑀧𑀦 𑀦𑀺𑀘𑁆𑀘𑀁 𑀯𑀸, 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀢𑀁 𑀢𑀬𑀁.

𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀇𑀢𑁆𑀣𑀺𑀧𑀼𑀭𑀺𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀩𑀴𑀻𑀓𑀸𑀭𑀸𑀳𑀸𑀭𑀳𑀤𑀬𑀯𑀢𑁆𑀣𑀽𑀢𑀺 𑀅𑀝𑁆𑀞𑀸𑀭𑀲 𑀭𑀽𑀧𑀸𑀦𑀺 𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀲𑁂𑀲𑀸𑀦𑀺 𑀤𑀲 𑀅𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫.

𑁭𑁨𑁪.

𑀅𑀝𑁆𑀞𑀸𑀭𑀲 𑀦𑀺𑀧𑁆𑀨𑀦𑁆𑀦𑀸𑀦𑀺, 𑀅𑀦𑀺𑀧𑁆𑀨𑀦𑁆𑀦𑀸𑀯𑀲𑁂𑀲𑀓𑀸;

𑀬𑀤𑀺 𑀳𑁄𑀦𑁆𑀢𑀺 𑀅𑀦𑀺𑀧𑁆𑀨𑀦𑁆𑀦𑀸, 𑀪𑀯𑁂𑀬𑁆𑀬𑀼𑀁 𑀢𑁂 𑀅𑀲𑀗𑁆𑀔𑀢𑀸.

𑁭𑁨𑁫.

𑀢𑁂𑀲𑀫𑁂𑀯 ¶ 𑀘 𑀭𑀽𑀧𑀸𑀦𑀁, 𑀯𑀺𑀓𑀸𑀭𑀢𑁆𑀢𑀸 𑀅𑀲𑀗𑁆𑀔𑀢𑀸;

𑀓𑀣𑀁 𑀦𑀸𑀫 𑀪𑀯𑁂𑀬𑁆𑀬𑀼𑀁 𑀢𑁂, 𑀦𑀺𑀧𑁆𑀨𑀦𑁆𑀦𑀸 𑀘𑁂𑀯 𑀲𑀗𑁆𑀔𑀢𑀸.

𑀏𑀯𑀁 𑀦𑀺𑀧𑁆𑀨𑀦𑁆𑀦𑀲𑀗𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀘𑁄𑀤𑀦𑀸𑀧𑀭𑀺𑀳𑀸𑀭𑀦𑁆𑀢𑀺 𑀏𑀢𑁆𑀣 𑁋

𑁭𑁨𑁬.

𑀇𑀢𑁆𑀣𑀺𑀪𑀸𑀯𑁄 𑀧𑀼𑀫𑀢𑁆𑀢𑀜𑁆𑀘, 𑀚𑀻𑀯𑀺𑀢𑀁 𑀲𑀫𑁆𑀪𑀯𑁄𑀧𑀺 𑀘;

𑀢𑀣𑀸 𑀓𑀸𑀬𑀧𑁆𑀧𑀲𑀸𑀤𑁄𑀢𑀺, 𑀲𑀩𑁆𑀩𑀝𑁆𑀞𑀸𑀦𑀸𑀢𑀺 𑀯𑀡𑁆𑀡𑀺𑀢𑀸.

𑁭𑁨𑁭.

𑀏𑀯𑀁 𑀲𑀦𑁆𑀢𑁂 𑀢𑀼 𑀥𑀫𑁆𑀫𑀸𑀦𑀁, 𑀳𑁄𑀢𑀺 𑀲𑀗𑁆𑀓𑀭𑀤𑁄𑀲𑀢𑀸;

𑀘𑀓𑁆𑀔𑀼𑀓𑀸𑀬𑀧𑀲𑀸𑀤𑀸𑀦𑀁, 𑀏𑀓𑀢𑁆𑀢𑀁 𑀉𑀧𑀧𑀚𑁆𑀚𑀢𑀺.

𑁭𑁨𑁮.

𑀅𑀜𑁆𑀜𑀁 𑀧𑀦 𑀘 𑀅𑀜𑁆𑀜𑀲𑁆𑀫𑀺𑀁, 𑀦 𑀘𑀢𑁆𑀣𑀺 𑀧𑀭𑀫𑀢𑁆𑀣𑀢𑁄;

𑀢𑀲𑁆𑀫𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼-𑀧𑀲𑀸𑀤𑁂𑀦 𑀦 𑀲𑀗𑁆𑀓𑀭𑀁.

𑁭𑁨𑁯.

𑀅𑀜𑁆𑀜𑀫𑀜𑁆𑀜𑀸𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 ¶ 𑀢𑀼 𑀧𑀯𑀢𑁆𑀢𑀺𑀢𑁄;

𑀢𑁂𑀲𑀁 𑀞𑀸𑀦𑀦𑁆𑀢𑀭𑀁 𑀯𑀢𑁆𑀢𑀼𑀁, 𑀦 𑀲𑀓𑁆𑀓𑀸 𑀲𑀫𑀬𑀜𑁆𑀜𑀼𑀦𑀸.

𑁭𑁩𑁦.

𑀬𑀸𑀯𑀢𑀸 𑀅𑀦𑀼𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑀁 𑀅𑀢𑁆𑀣𑀺 𑀢𑀢𑁆𑀣 𑀲𑁄;

𑀅𑀢𑁆𑀣𑀺 𑀓𑀸𑀬𑀧𑀲𑀸𑀤𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀼𑀤𑀻𑀭𑀺𑀢𑀁.

𑁭𑁩𑁧.

𑀮𑀓𑁆𑀔𑀡𑀸𑀤𑀺𑀯𑀲𑁂𑀦𑀸𑀧𑀺, 𑀦𑀸𑀦𑀢𑁆𑀢𑀁 𑀲𑀫𑀼𑀧𑀸𑀕𑀢𑀁;

𑀥𑀚𑀸𑀦𑀁 𑀧𑀜𑁆𑀘𑀯𑀡𑁆𑀡𑀸𑀦𑀁, 𑀙𑀸𑀬𑀸 𑀉𑀧𑀫𑀢𑀁 𑀕𑀢𑀸.

𑁭𑁩𑁨.

𑀢𑀲𑁆𑀫𑀸 ¶ 𑀳𑀺 𑀧𑀦 𑀥𑀫𑁆𑀫𑀸𑀦𑀁, 𑀅𑀜𑁆𑀜𑀫𑀜𑁆𑀜𑀁 𑀯𑀺𑀫𑀺𑀲𑁆𑀲𑀢𑀸;

𑀦 𑀳𑁄𑀢𑁂𑀯𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑀏𑀯𑀁 𑀦𑀺𑀧𑁆𑀨𑀦𑁆𑀦𑀸𑀦𑀺𑀧𑁆𑀨𑀦𑁆𑀦𑀪𑀸𑀯𑁄, 𑀘𑁄𑀤𑀦𑀸𑀧𑀭𑀺𑀳𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀦𑀬𑀫𑁂𑀓𑀯𑀺𑀥𑀸𑀤𑀺𑀓𑀦𑁆𑀢𑀺 𑁋

𑁭𑁩𑁩.

𑀮𑁄𑀓𑀺𑀓𑀢𑁆𑀢𑀸 ¶ 𑀦𑀳𑁂𑀢𑀼𑀢𑁆𑀢𑀸, 𑀲𑀗𑁆𑀔𑀢𑀢𑁆𑀢𑀸 𑀘 𑀲𑀸𑀲𑀯𑀸;

𑀲𑀩𑁆𑀩𑀫𑁂𑀓𑀯𑀺𑀥𑀁 𑀭𑀽𑀧𑀁, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄.

𑁭𑁩𑁪.

𑀅𑀚𑁆𑀛𑀢𑁆𑀢𑀺𑀓𑀩𑀳𑀺𑀤𑁆𑀥𑀸 𑀘, 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀸𑀧𑀺 𑀘;

𑀲𑀼𑀔𑀼𑀫𑁄𑀴𑀸𑀭𑀺𑀓𑀸 𑀘𑁂𑀯, 𑀉𑀧𑀸𑀤𑀺𑀦𑁆𑀦𑀸𑀤𑀺𑀢𑁄 𑀤𑁆𑀯𑀺𑀥𑀸.

𑁭𑁩𑁫.

𑀘𑀓𑁆𑀔𑀼𑀆𑀬𑀢𑀦𑀸𑀤𑀻𑀦𑀺, 𑀧𑀜𑁆𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀢𑀼;

𑀢𑁂𑀯𑀻𑀲𑀢𑀺𑀯𑀺𑀥𑀁 𑀲𑁂𑀲𑀁, 𑀩𑀸𑀳𑀺𑀭𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁩𑁬.

𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀦𑀝𑁆𑀞 𑀢𑀼;

𑀲𑁂𑀲𑀜𑁆𑀘 𑀢𑀼 𑀯𑀻𑀲𑀁 𑀭𑀽𑀧𑀁, 𑀅𑀦𑀺𑀦𑁆𑀤𑁆𑀭𑀺𑀬𑀫𑀼𑀤𑀻𑀭𑀺𑀢𑀁.

𑁭𑁩𑁭.

𑀘𑀓𑁆𑀔𑀼𑀆𑀬𑀢𑀦𑀸𑀤𑀻𑀦𑀺, 𑀦𑀯 𑀨𑁄𑀝𑁆𑀞𑀩𑁆𑀩𑀫𑁂𑀯 𑀘;

𑀢𑀁 𑀩𑀸𑀭𑀲𑀯𑀺𑀥𑀁 𑀭𑀽𑀧𑀁, 𑀑𑀴𑀸𑀭𑀺𑀓𑀫𑀼𑀤𑀻𑀭𑀺𑀢𑀁.

𑁭𑁩𑁮.

𑀲𑁂𑀲𑀸𑀦𑀺 𑀧𑀦 𑀭𑀽𑀧𑀸𑀦𑀺, 𑀲𑀼𑀔𑀼𑀫𑀸𑀦𑀺 𑀢𑀼 𑀲𑁄𑀴𑀲;

𑀓𑀫𑁆𑀫𑀚𑀁 𑀢𑀼 𑀉𑀧𑀸𑀤𑀺𑀦𑁆𑀦𑀁, 𑀅𑀦𑀼𑀧𑀸𑀤𑀺𑀦𑁆𑀦𑀫𑀜𑁆𑀜𑀣𑀸.

𑀏𑀯𑀜𑁆𑀘 𑀤𑀼𑀯𑀺𑀥𑀁 𑀳𑁄𑀢𑀺.

𑀧𑀼𑀦 ¶ 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖- 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀪𑁂𑀤𑀢𑁄 𑀘, 𑀓𑀫𑁆𑀫𑀚𑀸𑀓𑀫𑁆𑀫𑀚𑀦𑁂𑀯𑀓𑀫𑁆𑀫𑀚𑀸𑀦𑀸𑀓𑀫𑁆𑀫𑀚𑀪𑁂𑀤𑀢𑁄 𑀘 𑀢𑀺𑀯𑀺𑀥𑀁. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀏𑀓𑀸𑀤𑀲𑀯𑀺𑀥𑀁 𑀲𑁂𑀲𑁄𑀴𑀸𑀭𑀺𑀓𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑁂𑀲𑀁 𑀲𑁄𑀴𑀲𑀯𑀺𑀥𑀁 𑀲𑀼𑀔𑀼𑀫𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁. 𑀓𑀫𑁆𑀫𑀢𑁄 𑀚𑀸𑀢𑀁 𑀓𑀫𑁆𑀫𑀚𑀁, 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺, 𑀯𑀢𑁆𑀣𑀼 𑀘 𑀓𑀫𑁆𑀫𑀚𑀁, 𑀢𑀤𑀜𑁆𑀜𑀧𑁆𑀧𑀘𑁆𑀘𑀬𑀸 𑀚𑀸𑀢𑀁 𑀅𑀓𑀫𑁆𑀫𑀚𑀁, 𑀦𑀓𑀼𑀢𑁄𑀘𑀺 𑀚𑀸𑀢𑀁 𑀦𑁂𑀯𑀓𑀫𑁆𑀫𑀚𑀸𑀦𑀸𑀓𑀫𑁆𑀫𑀚𑀁 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀘. 𑀏𑀯𑀁 𑀢𑀺𑀯𑀺𑀥𑀁 𑀳𑁄𑀢𑀺.

𑀧𑀼𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀘, 𑀤𑁆𑀯𑀸𑀭𑀜𑁆𑀘𑁂𑀯 𑀯𑀢𑁆𑀣𑀼 𑀘, 𑀤𑁆𑀯𑀸𑀭𑀫𑁂𑀯 𑀳𑀼𑀢𑁆𑀯𑀸 𑀦 𑀯𑀢𑁆𑀣𑀼 𑀘, 𑀯𑀢𑁆𑀣𑀼𑀫𑁂𑀯 𑀳𑀼𑀢𑁆𑀯𑀸 𑀦 𑀤𑁆𑀯𑀸𑀭𑀜𑁆𑀘, 𑀦𑁂𑀯 𑀤𑁆𑀯𑀸𑀭𑀜𑁆𑀘 𑀦 𑀯𑀢𑁆𑀣𑀼 𑀘𑀸𑀢𑀺 𑀏𑀯𑀁 𑀪𑁂𑀤𑀢𑁄 𑀘, 𑀤𑁆𑀯𑀸𑀭𑀜𑁆𑀘𑁂𑀯𑀺𑀦𑁆𑀤𑁆𑀭𑀺𑀬𑀜𑁆𑀘, 𑀤𑁆𑀯𑀸𑀭𑀁𑀬𑁂𑀯 𑀳𑀼𑀢𑁆𑀯𑀸 𑀦𑁂𑀯𑀺𑀦𑁆𑀤𑁆𑀭𑀺𑀬𑀜𑁆𑀘, 𑀇𑀦𑁆𑀤𑁆𑀭𑀺𑀬𑀫𑁂𑀯 𑀳𑀼𑀢𑁆𑀯𑀸 𑀦 𑀤𑁆𑀯𑀸𑀭𑀜𑁆𑀘, 𑀦𑁂𑀯 𑀤𑁆𑀯𑀸𑀭𑀜𑁆𑀘 𑀦𑁂𑀯𑀺𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀏𑀯𑀁 ¶ 𑀪𑁂𑀤𑀢𑁄 𑀘, 𑀯𑀢𑁆𑀣𑀼 𑀘𑁂𑀯 𑀇𑀦𑁆𑀤𑁆𑀭𑀺𑀬𑀜𑁆𑀘, 𑀇𑀦𑁆𑀤𑁆𑀭𑀺𑀬𑀫𑁂𑀯 𑀳𑀼𑀢𑁆𑀯𑀸 𑀦 𑀯𑀢𑁆𑀣𑀼 𑀘, 𑀯𑀢𑁆𑀣𑀼𑀫𑁂𑀯 𑀳𑀼𑀢𑁆𑀯𑀸 𑀦𑁂𑀯𑀺𑀦𑁆𑀤𑁆𑀭𑀺𑀬𑀜𑁆𑀘, 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀦 𑀯𑀢𑁆𑀣𑀼 𑀘𑁂𑀢𑀺 𑀏𑀯𑀁 𑀪𑁂𑀤𑀢𑁄 𑀘 𑀘𑀢𑀼𑀩𑁆𑀩𑀺𑀥𑀁.

𑀢𑀢𑁆𑀣 ¶ 𑀤𑀺𑀝𑁆𑀞𑀁 𑀦𑀸𑀫 𑀭𑀽𑀧𑀸𑀬𑀢𑀦𑀁, 𑀲𑀼𑀢𑀁 𑀦𑀸𑀫 𑀲𑀤𑁆𑀤𑀸𑀬𑀢𑀦𑀁, 𑀫𑀼𑀢𑀁 𑀦𑀸𑀫 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀢𑁆𑀢𑀬𑀁, 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀅𑀯𑀲𑁂𑀲𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑀜𑁆𑀘𑀓𑀁, 𑀲𑁄𑀴𑀲𑀯𑀺𑀥𑀁 𑀲𑀼𑀔𑀼𑀫𑀭𑀽𑀧𑀜𑁆𑀘. 𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑀜𑁆𑀘𑀓𑀁 𑀤𑁆𑀯𑀸𑀭𑀜𑁆𑀘𑁂𑀯 𑀯𑀢𑁆𑀣𑀼 𑀘, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀤𑁆𑀯𑀸𑀭𑀫𑁂𑀯 𑀳𑁄𑀢𑀺, 𑀦 𑀯𑀢𑁆𑀣𑀼, 𑀳𑀤𑀬𑀯𑀢𑁆𑀣𑀼 𑀯𑀢𑁆𑀣𑀼𑀫𑁂𑀯 𑀳𑁄𑀢𑀺, 𑀦 𑀤𑁆𑀯𑀸𑀭𑀁, 𑀲𑁂𑀲𑀁 𑀲𑀩𑁆𑀩𑀁 𑀭𑀽𑀧𑀁 𑀦𑁂𑀯 𑀤𑁆𑀯𑀸𑀭𑀁 𑀦 𑀯𑀢𑁆𑀣𑀼 𑀘. 𑀢𑀢𑀺𑀬𑀘𑀢𑀼𑀓𑁆𑀓𑁂 𑀇𑀦𑁆𑀤𑁆𑀭𑀺𑀬𑀫𑁂𑀯 𑀳𑀼𑀢𑁆𑀯𑀸 𑀦 𑀤𑁆𑀯𑀸𑀭𑀦𑁆𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺. 𑀇𑀫𑀸𑀦𑀺 𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀤𑁆𑀯𑀸𑀭𑀸𑀦𑀺, 𑀲𑁂𑀲𑀫𑀦𑀦𑁆𑀢𑀭𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀢𑀢𑀺𑀬𑀧𑀤𑀁 𑀳𑀤𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀦 𑀏𑀓𑀚𑀤𑁆𑀯𑀺𑀚𑀢𑀺𑀚𑀘𑀢𑀼𑀚𑀦𑀓𑀼𑀢𑁄𑀘𑀺𑀚𑀸𑀢𑀪𑁂𑀤𑀢𑁄, 𑀤𑁆𑀯𑀸𑀭𑀺𑀦𑁆𑀤𑁆𑀭𑀺𑀬𑀁 𑀯𑀢𑁆𑀣𑀼 𑀘, 𑀤𑁆𑀯𑀸𑀭𑀫𑁂𑀯 𑀳𑀼𑀢𑁆𑀯𑀸 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀦 𑀯𑀢𑁆𑀣𑀼 𑀘, 𑀯𑀢𑁆𑀣𑀼𑀫𑁂𑀯 𑀳𑀼𑀢𑁆𑀯𑀸 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀦 𑀤𑁆𑀯𑀸𑀭𑀜𑁆𑀘, 𑀇𑀦𑁆𑀤𑁆𑀭𑀺𑀬𑀫𑁂𑀯 𑀳𑀼𑀢𑁆𑀯𑀸 𑀦 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀜𑁆𑀘, 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 ¶ 𑀦 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀜𑁆𑀘𑀸𑀢𑀺 𑀏𑀯𑀁 𑀧𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁.

𑀢𑀢𑁆𑀣 𑁋

𑁭𑁩𑁯.

𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀢𑁆𑀣𑀼𑀜𑁆𑀘, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀫𑁂𑀯 𑀘;

𑀏𑀓𑀸𑀤𑀲𑀯𑀺𑀥𑀁 𑀭𑀽𑀧𑀁, 𑀏𑀓𑀚𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁪𑁦.

𑀲𑀤𑁆𑀤𑁄 𑀏𑀓𑁄 𑀤𑁆𑀯𑀺𑀚𑁄 𑀦𑀸𑀫, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀢𑀺𑀚𑀁;

𑀏𑀓𑀸𑀤𑀲𑀯𑀺𑀥𑀁 𑀲𑁂𑀲𑀁, 𑀘𑀢𑀼𑀚𑀦𑁆𑀢𑀺 𑀧𑀓𑀸𑀲𑀺𑀢𑀁.

𑁭𑁪𑁧.

𑀚𑀭𑀢𑀸𑀦𑀺𑀘𑁆𑀘𑀢𑀸 𑀘𑁂𑀯, 𑀦𑀓𑀼𑀢𑁄𑀘𑀺 𑀪𑀯𑁂 𑀧𑀦;

𑀘𑀓𑁆𑀔𑀸𑀤𑀺𑀧𑀜𑁆𑀘𑀓𑀁 𑀤𑁆𑀯𑀸𑀭𑀁, 𑀇𑀦𑁆𑀤𑁆𑀭𑀺𑀬𑀁 𑀯𑀢𑁆𑀣𑀼𑀫𑁂𑀯 𑀘.

𑁭𑁪𑁨.

𑀯𑀺𑀜𑁆𑀜𑀢𑁆𑀢𑀻𑀦𑀁 𑀤𑁆𑀯𑀬𑀁 𑀤𑁆𑀯𑀸𑀭𑀁, 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀦 𑀯𑀢𑁆𑀣𑀼 𑀘;

𑀳𑀤𑀬𑀯𑀢𑁆𑀣𑀼 𑀯𑀢𑁆𑀣𑀽𑀯, 𑀦 𑀤𑁆𑀯𑀸𑀭𑀁 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀧𑀦.

𑀇𑀢𑁆𑀣𑀺𑀧𑀼𑀭𑀺𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 ¶ 𑀇𑀦𑁆𑀤𑁆𑀭𑀺𑀬𑀫𑁂𑀯 𑀦 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀜𑁆𑀘, 𑀲𑁂𑀲𑀁 𑀧𑀦 𑀭𑀽𑀧𑀁 𑀦𑁂𑀯𑀺𑀦𑁆𑀤𑁆𑀭𑀺𑀬𑀁 𑀦 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀦𑁆𑀢𑀺. 𑀏𑀯𑀁 𑀧𑀜𑁆𑀘𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀦 𑀓𑀫𑁆𑀫𑀚𑀘𑀺𑀢𑁆𑀢𑀚𑀉𑀢𑀼𑀘𑀺𑀢𑁆𑀢𑀚𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀘𑀢𑀼𑀚𑀦𑀓𑀼𑀢𑁄𑀘𑀺𑀚𑀸𑀢𑀪𑁂𑀤𑀢𑁄, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 𑀙𑀩𑁆𑀩𑀺𑀥𑀁.

𑀢𑀢𑁆𑀣 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀢𑁆𑀣𑀼 𑀘 𑀓𑀫𑁆𑀫𑀚𑀫𑁂𑀯, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀘𑀺𑀢𑁆𑀢𑀚𑀫𑁂𑀯, 𑀲𑀤𑁆𑀤𑁄 𑀉𑀢𑀼𑀘𑀺𑀢𑁆𑀢𑀚𑁄, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀫𑁂𑀯, 𑀲𑁂𑀲𑀁 𑀏𑀓𑀸𑀤𑀲𑀯𑀺𑀥𑀁 𑀘𑀢𑀼𑀚𑀁 𑀦𑀸𑀫, 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀦𑀓𑀼𑀢𑁄𑀘𑀺𑀚𑀸𑀢𑀁 𑀦𑀸𑀫. 𑀤𑀼𑀢𑀺𑀬𑀙𑀓𑁆𑀓𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 ¶ 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀸𑀬𑀢𑀦𑀁…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫 𑀲𑁂𑀲𑀸 𑀧𑀜𑁆𑀘 𑀑𑀴𑀸𑀭𑀺𑀓𑀸 𑀘 𑀲𑁄𑀴𑀲 𑀲𑀼𑀔𑀼𑀫𑀭𑀽𑀧𑀸𑀦𑀺 𑀘𑀸𑀢𑀺 𑀏𑀓𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀯𑀁 𑀙𑀩𑁆𑀩𑀺𑀥𑀁 𑀳𑁄𑀢𑀺.

𑀧𑀼𑀦 𑀙𑀯𑀢𑁆𑀣𑀼𑀅𑀯𑀢𑁆𑀣𑀼𑀪𑁂𑀤𑀢𑁄 𑀘, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁 𑀫𑀦𑁄𑀥𑀸𑀢𑀼𑀯𑀺𑀜𑁆𑀜𑁂𑀬𑁆𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺.

𑀢𑀢𑁆𑀣 ¶ 𑀘𑀓𑁆𑀔𑀸𑀤𑀺𑀧𑀜𑁆𑀘𑀯𑀢𑁆𑀣𑀽𑀦𑀺 𑀳𑀤𑀬𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀙 𑀯𑀢𑁆𑀣𑀽𑀦𑀺, 𑀲𑁂𑀲𑀁 𑀩𑀸𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁 𑀅𑀯𑀢𑁆𑀣𑀼 𑀦𑀸𑀫, 𑀤𑀼𑀢𑀺𑀬𑀲𑀢𑁆𑀢𑀓𑀫𑀼𑀢𑁆𑀢𑀸𑀦𑀫𑁂𑀯. 𑀏𑀯𑀁 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺.

𑀧𑀼𑀦 𑀲𑀢𑁆𑀢𑀤𑁆𑀯𑀸𑀭𑀸𑀤𑁆𑀯𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀧𑀜𑁆𑀘 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀤𑁆𑀯𑀸𑀭𑀸𑀦𑀺, 𑀲𑁂𑀲𑀫𑀤𑁆𑀯𑀸𑀭𑀦𑁆𑀢𑀺 𑀏𑀯𑀁 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺.

𑀧𑀼𑀦 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀪𑁂𑀤𑀢𑁄 𑀧𑀦 𑀦𑀯𑀯𑀺𑀥𑀁.

𑀧𑀼𑀦 𑀦𑀯𑀓𑀫𑁆𑀫𑀚𑀸𑀓𑀫𑁆𑀫𑀚𑀪𑁂𑀤𑀢𑁄 𑀤𑀲𑀯𑀺𑀥𑀁.

𑀧𑀼𑀦 𑀆𑀬𑀢𑀦𑀪𑁂𑀤𑀢𑁄 𑀏𑀓𑀸𑀤𑀲𑀯𑀺𑀥𑀁.

𑀪𑀯𑁂𑀲𑀼 𑀭𑀽𑀧𑀓𑀮𑀸𑀧𑀧𑀯𑀢𑁆𑀢𑀺𑀪𑁂𑀤𑀢𑁄 𑀩𑀳𑀼𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭𑁪𑁩.

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀓𑀸𑀫𑀭𑀽𑀧𑀪𑀯𑀤𑁆𑀯𑀬𑁂;

𑀉𑀧𑁆𑀧𑀢𑁆𑀢𑀺𑀁 𑀧𑀦 𑀭𑀽𑀧𑀸𑀦𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼.

𑁭𑁪𑁪.

𑀪𑀼𑀫𑁆𑀫𑀯𑀚𑁆𑀚𑁂𑀲𑀼 ¶ 𑀤𑁂𑀯𑁂𑀲𑀼, 𑀦𑀺𑀭𑀬𑁂 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁂;

𑀬𑁄𑀦𑀺𑀬𑁄 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄, 𑀦 𑀲𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁭𑁪𑁫.

𑀲𑁂𑀲𑁂 𑀕𑀢𑀺𑀢𑁆𑀢𑀬𑁂 𑀪𑀼𑀫𑁆𑀫-𑀤𑁂𑀯𑁂𑀲𑀼𑀧𑀺 𑀘 𑀬𑁄𑀦𑀺𑀬𑁄;

𑀘𑀢𑀲𑁆𑀲𑁄 𑀘 𑀪𑀯𑀦𑁆𑀢𑀻𑀢𑀺, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁭𑁪𑁬.

𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀲𑁆𑀲, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀦;

𑀢𑀺𑀁𑀲 𑀭𑀽𑀧𑀸𑀦𑀺 𑀚𑀸𑀬𑀦𑁆𑀢𑁂, 𑀲𑀪𑀸𑀯𑀲𑁆𑀲𑁂𑀯 𑀤𑁂𑀳𑀺𑀦𑁄.

𑁭𑁪𑁭.

𑀅𑀪𑀸𑀯𑀕𑀩𑁆𑀪𑀲𑁂𑀬𑁆𑀬𑀸𑀦𑀁, 𑀅𑀡𑁆𑀟𑀚𑀸𑀦𑀜𑁆𑀘 𑀯𑀻𑀲𑀢𑀺;

𑀪𑀯𑀦𑁆𑀢𑀺 𑀧𑀦 𑀭𑀽𑀧𑀸𑀦𑀺, 𑀓𑀸𑀬𑀯𑀢𑁆𑀣𑀼𑀯𑀲𑁂𑀦 𑀢𑀼.

𑁭𑁪𑁮.

𑀕𑀳𑀺𑀢𑀸𑀕𑀳𑀡𑁂𑀦𑁂𑀢𑁆𑀣, 𑀏𑀓𑀸𑀤𑀲 𑀪𑀯𑀦𑁆𑀢𑀺 𑀢𑁂;

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀲𑀩𑁆𑀩𑁂𑀲𑀼 𑀤𑀲𑀓𑁂𑀲𑀼𑀧𑀺.

𑁭𑁪𑁯.

𑀚𑀻𑀯𑀺𑀢𑁂𑀦 𑀬𑀤𑀸 𑀲𑀤𑁆𑀥𑀺𑀁, 𑀚𑀸𑀢𑁂 𑀲𑀼𑀤𑁆𑀥𑀓𑀫𑀝𑁆𑀞𑀓𑀁;

𑀚𑀻𑀯𑀺𑀢𑀦𑀯𑀓𑀁 𑀦𑀸𑀫, 𑀳𑁄𑀢𑀻𑀢𑀺 𑀲𑀫𑀼𑀤𑀻𑀭𑀺𑀢𑀁.

𑁭𑁫𑁦.

𑀚𑀻𑀯𑀺𑀢𑀦𑀯𑀓𑀁 ¶ 𑀓𑀸𑀬𑀧𑀲𑀸𑀤𑁂𑀦𑁂𑀓𑀢𑁄 𑀲𑀺𑀬𑀸;

𑀢𑀁 𑀓𑀸𑀬𑀤𑀲𑀓𑀁 𑀦𑀸𑀫, 𑀳𑁄𑀢𑀻𑀢𑀺 𑀧𑀭𑀺𑀬𑀸𑀧𑀼𑀝𑀁.

𑁭𑁫𑁧.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀲𑀤𑁆𑀥𑀺𑀁 𑀪𑀸𑀯𑁂𑀦 𑀯𑀢𑁆𑀣𑀼𑀦𑀸;

𑀘𑀓𑁆𑀔𑀸𑀤𑀻𑀳𑀺 𑀘 𑀬𑁄𑀚𑁂𑀢𑁆𑀯𑀸, 𑀤𑀲𑀓𑀸 𑀲𑀢𑁆𑀢 𑀯𑀺𑀜𑁆𑀜𑀼𑀦𑀸.

𑁭𑁫𑁨.

𑀑𑀧𑀧𑀸𑀢𑀺𑀓𑀲𑀢𑁆𑀢𑀸𑀦𑀁, 𑀫𑀦𑀼𑀲𑁆𑀲𑁂𑀲𑀽𑀧𑀧𑀢𑁆𑀢𑀺𑀬𑀁;

𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁, 𑀦𑀺𑀘𑁆𑀘𑀁 𑀭𑀽𑀧𑀸𑀦𑀺 𑀲𑀢𑁆𑀢𑀢𑀺.

𑁭𑁫𑁩.

𑀘𑀓𑁆𑀔𑀼 ¶ 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀘 𑀯𑀢𑁆𑀣𑀼 𑀘;

𑀪𑀸𑀯𑁄 𑀘𑀸𑀢𑀺 𑀳𑀺 𑀲𑀢𑁆𑀢𑀦𑁆𑀦𑀁, 𑀤𑀲𑀓𑀸𑀦𑀁 𑀯𑀲𑀸 𑀧𑀦.

𑁭𑁫𑁪.

𑀩𑁆𑀭𑀳𑁆𑀫𑀸𑀦𑀁 𑀭𑀽𑀧𑀺𑀦𑀁 𑀘𑀓𑁆𑀔𑀼-𑀲𑁄𑀢𑀯𑀢𑁆𑀣𑀼𑀯𑀲𑀸 𑀧𑀦;

𑀤𑀲𑀓𑀸𑀦𑀺 𑀘 𑀢𑀻𑀡𑁂𑀯, 𑀦𑀯𑀓𑀁 𑀚𑀻𑀯𑀺𑀢𑀲𑁆𑀲 𑀘.

𑁭𑁫𑁫.

𑀘𑀢𑀼𑀦𑁆𑀦𑀁 𑀢𑀼 𑀓𑀮𑀸𑀧𑀸𑀦𑀁, 𑀯𑀲𑁂𑀦 𑀧𑀦 𑀭𑀽𑀧𑀺𑀦𑀁;

𑀘𑀢𑁆𑀢𑀸𑀮𑀻𑀲𑁂𑀯 𑀭𑀽𑀧𑀸𑀦𑀺, 𑀏𑀓𑀽𑀦𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑁭𑁫𑁬.

𑀚𑀻𑀯𑀺𑀢𑀦𑀯𑀓𑁂𑀦𑁂𑀯 ¶ , 𑀅𑀲𑀜𑁆𑀜𑀼𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸;

𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀖𑀸𑀦-𑀭𑀳𑀺𑀢𑁂 𑀢𑀼 𑀦𑀧𑀼𑀁𑀲𑀓𑁂.

𑁭𑁫𑁭.

𑀯𑀢𑁆𑀣𑀼𑀦𑁄 𑀓𑀸𑀬𑀚𑀺𑀯𑁆𑀳𑀸𑀦𑀁, 𑀯𑀲𑀸 𑀢𑀺𑀁𑀲𑀸𑀯𑀓𑀁𑀲𑀢𑁄;

𑀉𑀓𑁆𑀓𑀁𑀲𑀲𑁆𑀲𑀸𑀯𑀓𑀁𑀲𑀲𑁆𑀲, 𑀅𑀦𑁆𑀢𑀭𑁂 𑀅𑀦𑀼𑀭𑀽𑀧𑀢𑁄.

𑁭𑁫𑁮.

𑀧𑀭𑀺𑀧𑀼𑀡𑁆𑀡𑀸𑀦𑀁 𑀭𑀽𑀧𑀸𑀦𑀁, 𑀯𑀲𑁂𑀦 𑀧𑀦 𑀧𑀸𑀡𑀺𑀦𑀁;

𑀭𑀽𑀧𑀸𑀦𑀁 𑀢𑀼 𑀲𑀫𑀼𑀧𑁆𑀧𑀢𑁆𑀢𑀺, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁭𑁫𑁯.

𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀦𑀺, 𑀓𑀸𑀫𑀸𑀯𑀘𑀭𑀤𑁂𑀳𑀺𑀦𑁄;

𑀅𑀧𑁆𑀧𑀯𑀢𑁆𑀢𑀦𑀢𑁄 𑀳𑁄𑀦𑁆𑀢𑀺, 𑀤𑁆𑀯𑀺𑀦𑁆𑀦𑀁 𑀪𑀸𑀯𑀸𑀦𑀫𑁂𑀓𑀢𑁄.

𑁭𑁬𑁦.

𑀖𑀸𑀦𑀁 𑀚𑀺𑀯𑁆𑀳𑀸 𑀘 𑀓𑀸𑀬𑁄 𑀘, 𑀢𑀣𑀸 𑀪𑀸𑀯𑀤𑁆𑀯𑀬𑀫𑁆𑀧𑀺 𑀘;

𑀩𑁆𑀭𑀳𑁆𑀫𑀸𑀦𑀁 𑀧𑀦 𑀭𑀽𑀧𑀻𑀦𑀁, 𑀧𑀜𑁆𑀘 𑀭𑀽𑀧𑀸 𑀦 𑀯𑀺𑀚𑁆𑀚𑀭𑁂.

𑁭𑁬𑁧.

𑀘𑀢𑀼𑀲𑀦𑁆𑀢𑀢𑀺 𑀓𑀸𑀫𑀲𑁆𑀫𑀺𑀁, 𑀭𑀽𑀧𑁂 𑀳𑁄𑀦𑁆𑀢𑀺 𑀢𑀺𑀲𑀦𑁆𑀢𑀢𑀺;

𑀤𑁆𑀯𑀺𑀲𑀦𑁆𑀢𑀢𑀺 𑀅𑀲𑀜𑁆𑀜𑁂𑀲𑀼, 𑀩𑀳𑀺𑀤𑁆𑀥𑀸 𑀏𑀓𑀲𑀦𑁆𑀢𑀢𑀺.

𑁭𑁬𑁨.

𑀭𑀽𑀧𑀁 ¶ 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀢𑀼, 𑀲𑀩𑁆𑀩𑁂𑀲𑀁 𑀧𑀦 𑀧𑀸𑀡𑀺𑀦𑀁;

𑀧𑀞𑀫𑀁 𑀓𑀫𑁆𑀫𑀢𑁄𑀬𑁂𑀯, 𑀦𑀺𑀩𑁆𑀩𑀢𑁆𑀢𑀢𑀺 𑀦 𑀲𑀁𑀲𑀬𑁄.

𑁭𑁬𑁩.

𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀦;

𑀢𑀜𑁆𑀘 𑀔𑁄 𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲, 𑀉𑀧𑁆𑀧𑀸𑀤𑁂𑀬𑁂𑀯 𑀚𑀸𑀬𑀭𑁂.

𑁭𑁬𑁪.

𑀬𑀣𑁂𑀯 𑀢𑀲𑁆𑀲 𑀉𑀧𑁆𑀧𑀸𑀤𑁂, 𑀢𑀺𑀁𑀲 𑀭𑀽𑀧𑀸𑀦𑀺 𑀚𑀸𑀬𑀭𑁂;

𑀢𑀣𑁂𑀯 𑀞𑀺𑀢𑀺𑀪𑀗𑁆𑀕𑁂𑀲𑀼, 𑀢𑀺𑀁𑀲 𑀢𑀺𑀁𑀲𑁂𑀯 𑀚𑀸𑀬𑀭𑁂.

𑁭𑁬𑁫.

𑀲𑀩𑁆𑀩𑀸𑀦𑁂𑀢𑀸𑀦𑀺 𑀭𑀽𑀧𑀸𑀦𑀺, 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀲𑀜𑁆𑀜𑀺𑀢𑁄;

𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄𑀦𑀢𑁆𑀢𑀸, 𑀤𑀼𑀓𑁆𑀔𑀓𑁆𑀔𑀦𑁆𑀥𑁄𑀯 𑀓𑁂𑀯𑀮𑁄.

𑁭𑁬𑁬.

𑀭𑁄𑀕𑀢𑁄 𑀕𑀡𑁆𑀟𑀢𑁄 𑀭𑀽𑀧𑀁, 𑀧𑀭𑀢𑁄 𑀘 𑀧𑀮𑁄𑀓𑀢𑁄;

𑀤𑀺𑀲𑁆𑀯𑀸𑀦 𑀤𑀼𑀓𑁆𑀔𑀢𑁄 𑀭𑀽𑀧𑀁, 𑀭𑀽𑀧𑁂 𑀙𑀦𑁆𑀤𑀁 𑀯𑀺𑀭𑀸𑀚𑀬𑁂.

𑁭𑁬𑁭.

𑀕𑀦𑁆𑀢𑀼𑀁 𑀧𑀦𑀺𑀘𑁆𑀙𑁂 𑀧𑀺𑀝𑀓𑁂𑀪𑀺𑀥𑀫𑁆𑀫𑁂,

𑀬𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀫𑀢𑁆𑀢𑀁;

𑀳𑀺𑀢𑀢𑁆𑀣𑀺𑀦𑀸 ¶ 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸𑀬𑀁,

𑀲𑀓𑁆𑀓𑀘𑁆𑀘 𑀲𑀫𑁆𑀫𑀸 𑀧𑀦 𑀲𑀺𑀓𑁆𑀔𑀺𑀢𑀩𑁆𑀩𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀭𑀽𑀧𑀯𑀺𑀪𑀸𑀕𑁄 𑀦𑀸𑀫

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁧. 𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑁄

𑁭𑁬𑁮.

𑀭𑀽𑀧𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀁 ¶ , 𑀦𑀺𑀩𑁆𑀩𑀸𑀦𑀁 𑀬𑀁 𑀧𑀦𑀸𑀤𑀺𑀢𑁄;

𑀢𑀲𑁆𑀲𑀺𑀤𑀸𑀦𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀯𑀺𑀪𑀸𑀯𑀦𑀦𑀬𑀓𑁆𑀓𑀫𑁄.

𑁭𑁬𑁯.

𑀢𑀲𑁆𑀫𑀸𑀳𑀁 𑀢𑀲𑁆𑀲 𑀤𑀲𑁆𑀲𑁂𑀢𑀼𑀁, 𑀤𑀼𑀓𑁆𑀓𑀭𑀲𑁆𑀲 𑀬𑀣𑀸𑀩𑀮𑀁;

𑀤𑀼𑀩𑁆𑀩𑁄𑀥𑀲𑁆𑀲 𑀧𑀯𑀓𑁆𑀔𑀸𑀫𑀺, 𑀯𑀺𑀪𑀸𑀯𑀦𑀫𑀺𑀢𑁄 𑀧𑀭𑀁.

𑀢𑀢𑁆𑀣 ¶ 𑀦𑀺𑀩𑁆𑀩𑀸𑀦𑀦𑁆𑀢𑀺 𑀪𑀯𑀸𑀪𑀯𑀁 𑀯𑀺𑀦𑀦𑀢𑁄 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘 𑀧𑀯𑀼𑀘𑁆𑀘𑀢𑀺 𑀅𑀫𑀢𑀁 𑀅𑀲𑀗𑁆𑀔𑀢𑀁 𑀧𑀭𑀫𑀁 𑀲𑀼𑀔𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑁭𑁭𑁦.

𑀬𑀲𑁆𑀲 𑀘𑀸𑀥𑀺𑀕𑀫𑀸 𑀲𑀩𑁆𑀩-𑀓𑀺𑀮𑁂𑀲𑀸𑀦𑀁 𑀔𑀬𑁄 𑀪𑀯𑁂;

𑀦𑀺𑀩𑁆𑀩𑀸𑀦𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀦𑀺𑀩𑁆𑀩𑀸𑀦𑀓𑀼𑀲𑀮𑁂𑀦 𑀢𑀁.

𑀏𑀢𑀁 𑀘 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀢𑀬𑀺𑀤𑀁 𑀲𑀦𑁆𑀢𑀺𑀮𑀓𑁆𑀔𑀡𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀲𑁆𑀲𑀸𑀲𑀓𑀭𑀡𑀭𑀲𑀁 𑀯𑀸, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀺𑀲𑁆𑀲𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 𑀦 𑀧𑀭𑀫𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀲𑀪𑀸𑀯𑁄 𑀅𑀢𑁆𑀣𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀯𑀺𑀬, 𑀲𑀲𑀯𑀺𑀲𑀸𑀡𑀁 ¶ 𑀯𑀺𑀬 𑀘 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄𑀢𑀺? 𑀦, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸𑀦𑀁 𑀳𑀺𑀢𑀕𑀯𑁂𑀲𑀻𑀦𑀁 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀮𑀩𑁆𑀪𑀦𑀻𑀬𑀢𑁄. 𑀬𑀁 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀦𑁄𑀧𑀮𑀩𑁆𑀪𑀦𑁆𑀢𑀺, 𑀢𑀁 ‘‘𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣𑀸𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘‘𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀼𑀝𑁆𑀞𑁂𑀦 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀭𑀸𑀕𑀸𑀤𑀻𑀦𑀁 𑀔𑀬𑁄𑀯 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀭𑀸𑀕𑀸𑀤𑀻𑀦𑀁 ¶ 𑀔𑀬𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂? 𑀢𑀁 𑀦. 𑀓𑀲𑁆𑀫𑀸? 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀧𑀲𑀗𑁆𑀕𑀤𑁄𑀲𑀸𑀧𑀢𑁆𑀢𑀺𑀢𑁄. 𑀓𑀣𑀁? 𑀦𑀺𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀦𑁆𑀢𑀭𑀫𑁂𑀯 ‘‘𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀅𑀭𑀳𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁂𑀦 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀭𑀸𑀕𑀸𑀤𑀻𑀦𑀁 𑀔𑀬𑁄𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀯 𑀫𑀢𑁂𑀦 𑀅𑀭𑀳𑀢𑁆𑀢𑀨𑀮𑀲𑁆𑀲𑀸𑀧𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀢𑀸 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀅𑀦𑀼𑀢𑁆𑀢𑀭𑀲𑁆𑀲 𑀮𑁄𑀓𑀼𑀢𑁆𑀢𑀭𑀨𑀮𑀘𑀺𑀢𑁆𑀢𑀲𑁆𑀲 𑀭𑀸𑀕𑀸𑀦𑀁 𑀔𑀬𑀫𑀢𑁆𑀢𑀢𑀸𑀧𑀚𑁆𑀚𑀦𑀁, 𑀢𑀲𑁆𑀫𑀸 𑀫𑀸 ¶ 𑀏𑀯𑀁 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀯𑀤𑁂𑀲𑀺, 𑀉𑀪𑀺𑀦𑁆𑀦𑀁 𑀧𑀦 𑀲𑀼𑀢𑁆𑀢𑀸𑀦𑀁 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄.

𑀬𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲𑀸𑀥𑀺𑀕𑀫𑁂𑀦 𑀭𑀸𑀕𑀸𑀤𑀻𑀦𑀁 𑀔𑀬𑁄 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀅𑀓𑁆𑀔𑀬𑁄𑀧𑀺 𑀲𑀫𑀸𑀦𑁄 ‘‘𑀭𑀸𑀕𑀸𑀤𑀻𑀦𑀁 𑀔𑀬𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀔𑀬𑁄𑀧𑀘𑀸𑀭𑁂𑀦 𑀯𑀼𑀢𑁆𑀢𑁄, ‘‘𑀢𑀺𑀧𑀼𑀲𑀁 𑀚𑀭𑁄 𑀕𑀼𑀴𑁄 𑀲𑁂𑀫𑁆𑀳𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀳𑀢𑁆𑀢𑀁 𑀧𑀦 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀧𑀺 𑀲𑀫𑀥𑀺𑀕𑀢𑀦𑀺𑀩𑁆𑀩𑀸𑀦𑀸 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸 𑀪𑀯𑁂𑀬𑁆𑀬𑀼𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀢𑁆𑀢𑀸𑀤𑀺𑀤𑁄𑀲𑀸𑀧𑀢𑁆𑀢𑀺𑀢𑁄 𑀘. 𑀏𑀯𑀜𑁆𑀳𑀺 𑀲𑀢𑀺 𑀭𑀸𑀕𑀸𑀤𑀺𑀓𑁆𑀔𑀬𑀸𑀦𑀁 𑀩𑀳𑀼𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀲𑁆𑀲𑀸𑀧𑀺 𑀩𑀳𑀼𑀪𑀸𑀯𑁄 𑀪𑀯𑁂𑀬𑁆𑀬, 𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀲𑀗𑁆𑀔𑀢𑀮𑀓𑁆𑀔𑀡𑀢𑁆𑀢𑀸 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀜𑁆𑀘, 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬𑀸𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀤𑀺 𑀔𑀬𑁄 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀫𑀕𑁆𑀕𑀨𑀮𑀘𑀺𑀢𑁆𑀢𑀸𑀦𑀁 𑀓𑀺𑀁 𑀦𑀼 𑀆𑀭𑀫𑁆𑀫𑀡𑀁 𑀯𑀤𑁂𑀲𑀺, 𑀯𑀤 𑀪𑀤𑁆𑀭𑀫𑀼𑀔𑀸𑀢𑀺? 𑀭𑀸𑀕𑀸𑀤𑀻𑀦𑀁 𑀔𑀬𑀫𑁂𑀯 𑀯𑀤𑀸𑀫𑀻𑀢𑀺. 𑀓𑀺𑀁 𑀧𑀦 𑀭𑀸𑀕𑀸𑀤𑀬𑁄 𑀕𑁄𑀢𑁆𑀭𑀪𑀼𑀆𑀤𑀻𑀦𑀁 𑀔𑀡𑁂 𑀔𑀻𑀬𑀦𑁆𑀢𑀺, 𑀉𑀤𑀸𑀳𑀼 𑀔𑀻𑀬𑀺𑀲𑁆𑀲𑀦𑁆𑀢𑀺, 𑀅𑀣 𑀔𑀻𑀡𑀸𑀢𑀺? 𑀓𑀺𑀁 𑀧𑀦𑁂𑀢𑁆𑀣 ‘‘𑀔𑀻𑀡𑁂𑀲𑁆𑀯𑁂𑀯 𑀔𑀬𑀁 𑀯𑀤𑀸𑀫𑀻’’𑀢𑀺. 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀢𑁆𑀯𑀸 𑀯𑀤 𑀪𑀤𑁆𑀭𑀫𑀼𑀔𑀸𑀢𑀺, 𑀬𑀤𑀺 𑀔𑀻𑀡𑁂𑀲𑁆𑀯𑁂𑀯 𑀔𑀬𑀁 𑀯𑀤𑁂𑀲𑀺, 𑀦 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀸𑀤𑀻𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀲𑀺𑀚𑁆𑀛𑀢𑀻𑀢𑀺. 𑀓𑀺𑀁 𑀓𑀸𑀭𑀡𑀁? 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀭𑀸𑀕𑀸𑀤𑀬𑁄 𑀔𑀻𑀬𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀯𑁄𑀤𑀸𑀦𑀓𑁆𑀔𑀡𑁂, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀔𑀻𑀬𑀦𑁆𑀢𑀺, 𑀦 𑀔𑀻𑀡𑀸, 𑀨𑀮𑀓𑁆𑀔𑀡𑁂 𑀔𑀻𑀡𑀸. 𑀏𑀯𑀁 𑀲𑀦𑁆𑀢𑁂 𑀪𑀯𑀢𑁄 𑀫𑀢𑁂𑀦 𑀨𑀮𑀫𑁂𑀯 𑀔𑀬𑀸𑀭𑀫𑁆𑀫𑀡𑀁, 𑀦 𑀇𑀢𑀭𑁂, 𑀇𑀢𑀭𑁂𑀲𑀁 𑀧𑀦 𑀓𑀺𑀫𑀸𑀭𑀫𑁆𑀫𑀡𑀁 𑀯𑀤𑁂𑀲𑀻𑀢𑀺 ¶ ? 𑀅𑀤𑁆𑀥𑀸 𑀲𑁄 𑀆𑀭𑀫𑁆𑀫𑀡𑀁 𑀅𑀧𑀲𑁆𑀲𑀦𑁆𑀢𑁄 𑀦𑀺𑀭𑀼𑀢𑁆𑀢𑀭𑁄 ¶ 𑀪𑀯𑀺𑀲𑁆𑀲𑀢𑀺. 𑀅𑀧𑀺𑀘 𑀓𑀺𑀮𑁂𑀲𑀓𑁆𑀔𑀬𑁄 𑀦𑀸𑀫 𑀲𑀧𑁆𑀧𑀼𑀭𑀺𑀲𑁂𑀳𑀺 𑀓𑀭𑀻𑀬𑀢𑀺, 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑁆𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀦 𑀓𑁂𑀦𑀘𑀺 𑀓𑀭𑀻𑀬𑀢𑀺 𑀦 𑀉𑀧𑁆𑀧𑀸𑀤𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀫𑀫𑀢𑀫𑀲𑀗𑁆𑀔𑀢𑀁. 𑀢𑀫𑀓𑀢𑀁 ¶ 𑀚𑀸𑀦𑀸𑀢𑀻𑀢𑀺 𑀅𑀭𑀺𑀬𑀲𑀸𑀯𑀓𑁄 ‘‘𑀅𑀓𑀢𑀜𑁆𑀜𑀽’’𑀢𑀺 𑀧𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

𑁭𑁭𑁧.

‘‘𑀅𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘,

𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄,

𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺.

𑀅𑀧𑀺𑀘 ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀘. ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀣𑀸𑀳 ‘‘𑀢𑀬𑁄 𑀔𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸. 𑀓𑀢𑀫𑁂 𑀢𑀬𑁄 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸? 𑀢𑀺𑀲𑁆𑀲𑁄 𑀦𑀺𑀲𑁆𑀲𑀭𑀡𑀥𑀸𑀢𑀼𑀬𑁄. 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁. 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀅𑀭𑀽𑀧𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑀧𑀢𑁆𑀢𑀺𑀤𑁄𑀲𑀢𑁄 𑀧𑀞𑀫𑀚𑁆𑀛𑀸𑀦𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀦𑀫𑁆𑀧𑀺 𑀅𑀪𑀸𑀯𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀬𑀼𑀢𑁆𑀢𑀁 𑀅𑀓𑁆𑀔𑀬𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀔𑀬𑀤𑁄𑀲𑀸𑀧𑀚𑁆𑀚𑀦𑀦𑁆𑀢𑀺, 𑀦 𑀢𑀼 𑀔𑀬𑁄 𑀦𑀺𑀩𑁆𑀩𑀸𑀦𑀁.

‘‘𑀅𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀧𑀜𑁆𑀜𑀸𑀬 𑀫𑁂 𑀲𑀼𑀨𑀼𑀲𑀺𑀢’’𑀦𑁆𑀢𑀺 𑀘 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀘 𑀥𑀫𑁆𑀫𑀲𑀸𑀫𑀺𑀦𑀸 𑀢𑀣𑀸𑀕𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀭𑀫𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀢𑁆𑀣𑀺 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀥𑀫𑁆𑀫𑁄’’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀅𑀧𑀺𑀘 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸’’𑀢𑀺 𑀧𑀤𑀫𑀼𑀤𑁆𑀥𑀭𑀺𑀢𑁆𑀯𑀸 𑁋 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀅𑀧𑁆𑀧𑀫𑀸𑀡𑀢𑁆𑀢𑀁 𑀓𑀣𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀬𑁂𑀯 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀲𑀪𑀸𑀯𑁄𑀢𑀺. 𑀢𑀁 ¶ 𑀧𑀦 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀯𑀺𑀬 𑀘 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀘 𑀦𑀸𑀯𑀺𑀚𑁆𑀚𑀫𑀸𑀦𑀁.

𑀅𑀣 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂, 𑀢𑀫𑁆𑀧𑀺 𑀅𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸. 𑀓𑀣𑀁? 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀘 𑀧𑀦 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 ¶ 𑀧𑀤𑀫𑀼𑀤𑁆𑀥𑀭𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 ¶ , 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦𑁂𑀢𑁂𑀲𑀁 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀁 𑀲𑀺𑀬𑀸, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀦 𑀬𑀼𑀚𑁆𑀚𑁂𑀬𑁆𑀬, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀧𑀓𑁆𑀔𑀁 𑀪𑀚𑁂𑀬𑁆𑀬𑀼𑀁. ‘‘𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀧𑀦 𑀭𑀽𑀧𑀸𑀯𑀘𑀭𑀢𑁆𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘, 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁. 𑀬𑀲𑁆𑀫𑀸 𑀘 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀦𑀺𑀩𑁆𑀩𑀸𑀦𑀲𑁆𑀲 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀕𑁆𑀕𑀨𑀮𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀉𑀧𑁆𑀧𑀸𑀤𑀸𑀤𑀻𑀦𑀫𑀪𑀸𑀯𑀢𑁄 𑀦𑀺𑀘𑁆𑀘𑀁, 𑀭𑀽𑀧𑀲𑀪𑀸𑀯𑀸𑀪𑀸𑀯𑀢𑁄 𑀅𑀭𑀽𑀧𑀁, 𑀧𑀧𑀜𑁆𑀘𑀸𑀪𑀸𑀯𑀢𑁄 𑀦𑀺𑀧𑁆𑀧𑀧𑀜𑁆𑀘𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺.

𑁭𑁭𑁨.

𑀅𑀘𑁆𑀘𑀦𑁆𑀢𑀫𑀦𑀦𑁆𑀢𑀁 𑀲𑀦𑁆𑀢𑀁, 𑀅𑀫𑀢𑀁 𑀅𑀧𑀮𑁄𑀓𑀺𑀢𑀁;

𑀧𑀡𑀻𑀢𑀁 𑀲𑀭𑀡𑀁 𑀔𑁂𑀫𑀁, 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀁.

𑁭𑁭𑁩.

𑀲𑀺𑀯𑀜𑁆𑀘 𑀦𑀺𑀧𑀼𑀡𑀁 𑀲𑀘𑁆𑀘𑀁, 𑀤𑀼𑀓𑁆𑀔𑀓𑁆𑀔𑀬𑀫𑀦𑀸𑀲𑀯𑀁;

𑀲𑀼𑀤𑀼𑀤𑁆𑀤𑀲𑀁 𑀧𑀭𑀁 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀫𑀦𑀺𑀤𑀲𑁆𑀲𑀦𑀁.

𑁭𑁭𑁪.

𑀢𑀡𑁆𑀳𑀸𑀓𑁆𑀔𑀬𑀁 𑀥𑀼𑀯𑀁 𑀤𑀻𑀧𑀁, 𑀅𑀩𑁆𑀬𑀸𑀧𑀚𑁆𑀛𑀫𑀦𑀻𑀢𑀺𑀓𑀁;

𑀅𑀦𑀸𑀮𑀬𑀫𑀭𑀽𑀧𑀜𑁆𑀘, 𑀧𑀤𑀫𑀘𑁆𑀘𑀼𑀢𑀫𑀓𑁆𑀔𑀭𑀁.

𑁭𑁭𑁫.

𑀯𑀺𑀭𑀸𑀕𑀜𑁆𑀘 𑀦𑀺𑀭𑁄𑀥𑀜𑁆𑀘, 𑀯𑀺𑀫𑀼𑀢𑁆𑀢𑀺 𑀫𑁄𑀓𑁆𑀔𑀫𑁂𑀯 𑀘;

𑀇𑀫𑁂𑀳𑀺 𑀧𑀦 𑀦𑀸𑀫𑁂𑀳𑀺, 𑀦𑀺𑀩𑁆𑀩𑀸𑀦𑀁 𑀢𑀼 𑀓𑀣𑀻𑀬𑀢𑀺.

𑁭𑁭𑁬.

𑀏𑀯𑀜𑁆𑀘 ¶ 𑀧𑀦 𑀯𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀘 𑀅𑀘𑁆𑀘𑀼𑀢𑀁;

𑀢𑀲𑁆𑀲 𑀘𑀸𑀥𑀺𑀕𑀫𑀽𑀧𑀸𑀬𑁄, 𑀓𑀢𑁆𑀢𑀩𑁆𑀩𑁄 𑀯𑀺𑀜𑁆𑀜𑀼𑀦𑀸 𑀲𑀤𑀸.

𑁭𑁭𑁭.

𑀲𑀤𑁆𑀥𑀸𑀩𑀼𑀤𑁆𑀥𑀺𑀓𑀭𑀁 𑀢𑀣𑀸𑀕𑀢𑀫𑀢𑁂 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀁,

𑀧𑀜𑁆𑀜𑀸𑀲𑀫𑁆𑀪𑀯𑀲𑀫𑁆𑀧𑀲𑀸𑀤𑀦𑀓𑀭𑀁 𑀚𑀸𑀦𑀸𑀢𑀺 𑀬𑁄 𑀘𑁂 𑀇𑀫𑀁;

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀸𑀮𑀺𑀦𑀁 𑀲𑀼𑀫𑀥𑀼𑀭𑀁 𑀲𑀸𑀭𑀜𑁆𑀜𑀼𑀯𑀺𑀫𑁆𑀳𑀸𑀧𑀦𑀁,

𑀕𑀫𑁆𑀪𑀻𑀭𑁂 𑀦𑀺𑀧𑀼𑀡𑀸𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑁄 𑀬𑀸𑀪𑀺𑀦𑀺𑀝𑁆𑀞𑀁 𑀧𑀤𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁨. 𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑁄

𑀏𑀢𑁆𑀣𑀸𑀳 ¶ ¶ 𑁋 ‘‘𑀓𑀺𑀁 𑀏𑀢𑁆𑀢𑀓𑀫𑁂𑀯 𑀜𑁂𑀬𑁆𑀬𑀁, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻’’𑀢𑀺? 𑀅𑀢𑁆𑀣𑀺 𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺. 𑀲𑀸 𑀧𑀦𑁂𑀲𑀸 𑀧𑀜𑁆𑀜𑀧𑁂𑀢𑀩𑁆𑀩𑀢𑁄, 𑀧𑀜𑁆𑀜𑀸𑀧𑀦𑀢𑁄 𑀘 ‘‘𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄’’𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀬𑀢𑀻𑀢𑀺 𑀲𑀗𑁆𑀔𑀸, 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀓𑀣𑀻𑀬𑀢𑀺? ‘‘𑀅𑀳’’𑀦𑁆𑀢𑀺 ‘‘𑀫𑀫’’𑀦𑁆𑀢𑀺 ‘‘𑀧𑀭𑁄’’𑀢𑀺 ‘‘𑀧𑀭𑀲𑁆𑀲𑀸’’𑀢𑀺 ‘‘𑀫𑀜𑁆𑀘𑁄’’𑀢𑀺 ‘‘𑀧𑀻𑀞’’𑀦𑁆𑀢𑀺 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀓𑀣𑀻𑀬𑀢𑀻𑀢𑀺 𑀲𑀗𑁆𑀔𑀸. 𑀲𑀫𑀜𑁆𑀜𑀸𑀬𑀢𑀻𑀢𑀺 𑀲𑀫𑀜𑁆𑀜𑀸. 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀺. 𑀯𑁄𑀳𑀭𑀻𑀬𑀢𑀻𑀢𑀺 𑀯𑁄𑀳𑀸𑀭𑁄. 𑀓𑀺𑀦𑁆𑀢𑀺 𑀯𑁄𑀳𑀭𑀻𑀬𑀢𑀺? ‘‘𑀅𑀳’’𑀦𑁆𑀢𑀺 ‘‘𑀫𑀫’’𑀦𑁆𑀢𑀺 ‘‘𑀧𑀭𑁄’’𑀢𑀺 ‘‘𑀧𑀭𑀲𑁆𑀲𑀸’’𑀢𑀺 ‘‘𑀫𑀜𑁆𑀘𑁄’’𑀢𑀺 ‘‘𑀧𑀻𑀞’’𑀦𑁆𑀢𑀺. 𑀏𑀯𑀁 𑀢𑀸𑀯 𑀧𑀜𑁆𑀜𑀧𑁂𑀢𑀩𑁆𑀩𑀢𑁄 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀸. ‘‘𑀅𑀳’’𑀦𑁆𑀢𑀺 𑀳𑀺 𑀭𑀽𑀧𑀸𑀤𑀬𑁄 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀝𑀺𑀘𑁆𑀘 𑀓𑀸𑀭𑀡𑀁 𑀓𑀢𑁆𑀯𑀸 𑀬𑀣𑀸 𑀢𑁂 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑁄, 𑀦 𑀏𑀯𑀁𑀯𑀺𑀥𑀸, 𑀓𑁂𑀯𑀮𑀁 𑀮𑁄𑀓𑀲𑀗𑁆𑀓𑁂𑀢𑁂𑀦 ¶ 𑀲𑀺𑀤𑁆𑀥𑀸 𑀬𑀸 𑀅𑀬𑀁 ‘‘𑀅𑀳’’𑀦𑁆𑀢𑀺 𑀓𑀣𑀻𑀬𑀢𑀺 𑀘𑁂𑀯 𑀧𑀜𑁆𑀜𑀸𑀧𑀻𑀬𑀢𑀺 𑀘, 𑀏𑀲𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺𑀁 𑀧𑀓𑀸𑀲𑁂𑀢𑀼𑀁 ‘‘𑀦𑀸𑀫𑀁 𑀦𑀸𑀫𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀢𑀁 𑀢𑀁 𑀥𑀫𑁆𑀫𑀁 ‘‘𑀏𑀲 𑀇𑀢𑁆𑀣𑀦𑁆𑀦𑀸𑀫𑁄 𑀦𑀸𑀫𑀸’’𑀢𑀺 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀢𑀁 𑀧𑀜𑁆𑀜𑀢𑁆𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀦𑀸𑀫𑀓𑀫𑁆𑀫𑀦𑁆𑀢𑀺𑀆𑀤𑀻𑀦𑀺 𑀢𑀲𑁆𑀲𑀸 𑀏𑀯 𑀯𑁂𑀯𑀘𑀦𑀸𑀦𑀺. 𑀅𑀬𑀁 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀲𑀸 𑀧𑀦𑁂𑀲𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀻𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀦𑀸𑀫 𑀘𑀓𑁆𑀔𑀼𑀲𑁄𑀢𑀭𑀽𑀧𑀲𑀤𑁆𑀤𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀧𑀦 𑀲𑀫𑀽𑀳𑀸𑀲𑀫𑀽𑀳𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀲𑀫𑀽𑀳𑀧𑀜𑁆𑀜𑀢𑁆𑀢𑀺 𑀦𑀸𑀫 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀏𑀓𑀲𑁆𑀲 𑀯𑀸 𑀩𑀳𑀽𑀦𑀁 𑀯𑀸 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀫𑀽𑀳𑀫𑁂𑀯𑁄𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀓𑀣𑀁? 𑀅𑀘𑁆𑀙𑀢𑀭𑀘𑁆𑀙𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑀸. 𑀅𑀬𑀁 𑀲𑀫𑀽𑀳𑀧𑀜𑁆𑀜𑀢𑁆𑀢𑀺 ¶ 𑀦𑀸𑀫. 𑀅𑀲𑀫𑀽𑀳𑀧𑀜𑁆𑀜𑀢𑁆𑀢𑀺 𑀧𑀦 𑀤𑀺𑀲𑀸𑀓𑀸𑀲𑀓𑀸𑀮𑀦𑀺𑀫𑀺𑀢𑁆𑀢𑀸𑀪𑀸𑀯𑀦𑀺𑀭𑁄𑀥𑀸𑀤𑀺𑀪𑁂𑀤𑀸.

𑀬𑀤𑀸 𑀧𑀦 𑀲𑀸 𑀯𑀺𑀚𑁆𑀚𑀫𑀸𑀦𑀁 𑀧𑀭𑀫𑀢𑁆𑀣𑀁 𑀚𑁄𑀢𑀬𑀢𑀺, 𑀢𑀤𑀸 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀯𑀼𑀘𑁆𑀘𑀢𑀺. 𑀬𑀤𑀸 𑀅𑀯𑀺𑀚𑁆𑀚𑀫𑀸𑀦𑀁 𑀲𑀫𑀽𑀳𑀸𑀲𑀫𑀽𑀳𑀪𑁂𑀤𑀁 𑀦𑀸𑀫𑀫𑀢𑁆𑀢𑀁 𑀚𑁄𑀢𑀬𑀢𑀺, 𑀢𑀤𑀸 ‘‘𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀯𑀼𑀘𑁆𑀘𑀢𑀺 ¶ . 𑀤𑀼𑀯𑀺𑀥𑀸𑀧𑀺 𑀧𑀦𑁂𑀲𑀸 𑀲𑁄𑀢𑀤𑁆𑀯𑀸𑀭𑀚𑀯𑀦𑀸𑀦𑀦𑁆𑀢𑀭𑀁 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀬𑀸𑀬 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀦 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀺𑀜𑁆𑀜𑀸𑀡𑁂𑀦 𑀧𑀜𑁆𑀜𑀸𑀧𑀻𑀬𑀢𑀺. 𑀬𑀁 𑀲𑀦𑁆𑀥𑀸𑀬 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀙𑀓𑁆𑀓𑀦𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀁 𑀭𑀽𑀧𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑀺𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀯𑀘𑀦𑀢𑁆𑀣𑀁 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀦𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀻𑀦𑀁, 𑀢𑀺𑀢𑁆𑀣𑀺𑀬𑀧𑀭𑀺𑀓𑀧𑁆𑀧𑀺𑀢𑀸𑀦𑀁 𑀯𑀸 𑀧𑀓𑀢𑀺𑀧𑀼𑀭𑀺𑀲𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸𑀧𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯 ¶ . ‘‘𑀢𑁂𑀯𑀺𑀚𑁆𑀚𑁄, 𑀙𑀴𑀪𑀺𑀜𑁆𑀜𑁄’’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀇𑀢𑁆𑀣𑀺𑀲𑀤𑁆𑀤𑁄, 𑀧𑀼𑀭𑀺𑀲𑀲𑀤𑁆𑀤𑁄’’𑀢𑀺 𑀏𑀯𑀫𑀸𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. ‘‘𑀔𑀢𑁆𑀢𑀺𑀬𑀓𑀼𑀫𑀸𑀭𑁄, 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄, 𑀪𑀺𑀓𑁆𑀔𑀼𑀓𑀼𑀫𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀓𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀙 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀧𑀺 𑀏𑀢𑀺𑀲𑁆𑀲𑀸 𑀏𑀯 𑀧𑀪𑁂𑀤𑀸, 𑀲𑀸 𑀧𑀦 ‘‘𑀤𑀻𑀖𑀁 𑀉𑀧𑀦𑀺𑀥𑀸𑀬 𑀭𑀲𑁆𑀲𑁄, 𑀭𑀲𑁆𑀲𑀁 𑀉𑀧𑀦𑀺𑀥𑀸𑀬 𑀤𑀻𑀖𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 ‘‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀲𑀼𑀔𑀁 𑀉𑀧𑀦𑀺𑀥𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀓𑀸 𑀘, 𑀢𑀲𑁆𑀫𑀸 𑀧𑀜𑁆𑀜𑀧𑁂𑀢𑀩𑁆𑀩𑀢𑁄 𑀘 𑀧𑀜𑁆𑀜𑀸𑀧𑀦𑀢𑁄 𑀘 𑀧𑀜𑁆𑀜𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀜𑁆𑀜𑀸 𑀲𑀫𑀢𑁆𑀢𑀸.

𑁭𑁭𑁮.

𑀧𑀭𑀫𑀢𑁆𑀣𑀢𑁄 𑀘 𑀧𑀜𑁆𑀜𑀢𑁆𑀢𑀺, 𑀢𑀢𑀺𑀬𑀸 𑀓𑁄𑀝𑀺 𑀦 𑀯𑀺𑀚𑁆𑀚𑀢𑀺;

𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀲𑀮𑁄, 𑀧𑀭𑀯𑀸𑀤𑁂𑀲𑀼 𑀦 𑀓𑀫𑁆𑀧𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁩. 𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀸𑀭𑀓𑀧𑀝𑀺𑀯𑁂𑀥𑀦𑀺𑀤𑁆𑀤𑁂𑀲𑁄

𑀏𑀢𑁆𑀣𑀸𑀳 ¶ ¶ 𑁋 𑀦𑀺𑀤𑁆𑀤𑀺𑀝𑁆𑀞𑀸 𑀓𑀼𑀲𑀮𑀸𑀤𑀬𑁄 𑀦𑀸𑀫 𑀥𑀫𑁆𑀫𑀸, 𑀦 𑀧𑀦𑁂𑀢𑁂𑀲𑀁 𑀓𑀸𑀭𑀓𑁄 𑀅𑀢𑁆𑀢𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀲 𑀳𑀺 𑀓𑀸𑀭𑀓𑀲𑁆𑀲 𑀯𑁂𑀤𑀓𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑁂 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑁄 𑀲𑀺𑀬𑀸, 𑀢𑁂𑀲𑀫𑀪𑀸𑀯𑁂 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀻𑀦𑀁 𑀢𑁂𑀲𑀁 𑀯𑀺𑀧𑀸𑀓𑀸𑀦𑀫𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸 𑀦𑀺𑀭𑀢𑁆𑀣𑀺𑀓𑀸𑀢𑀺? 𑀅𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀦𑀸𑀬𑀁 ¶ 𑀦𑀺𑀭𑀢𑁆𑀣𑀺𑀓𑀸, 𑀲𑀸𑀢𑁆𑀣𑀺𑀓𑀸𑀯𑀸𑀬𑀁 𑀤𑁂𑀲𑀦𑀸. 𑀬𑀤𑀺 𑀓𑀸𑀭𑀓𑀲𑁆𑀲𑀸𑀪𑀸𑀯𑀸 𑀓𑀼𑀲𑀮𑀸𑀤𑀻𑀦𑀫𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀲 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑀲𑁆𑀲𑀸𑀪𑀸𑀯𑀢𑁄. 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀢𑁆𑀢𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀘𑁂? 𑀢𑀣𑀸 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀅𑀲𑀢𑀺𑀧𑀺 𑀓𑀢𑁆𑀢𑀭𑀺 𑀅𑀢𑁆𑀣𑀺𑀢𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀓𑀼𑀢𑁄𑀬𑀁 𑀢𑀯 𑀢𑀢𑁆𑀣𑀸𑀦𑀼𑀭𑁄𑀥𑁄, 𑀇𑀥 𑀯𑀺𑀭𑁄𑀥𑁄𑀢𑀺. 𑀅𑀣𑀸𑀧𑀺 𑀬𑀣𑀸 𑀧𑀦 𑀮𑁄𑀓𑁂 𑀓𑀸𑀭𑀓𑀸𑀪𑀸𑀯𑁂𑀧𑀺 𑀧𑀣𑀯𑀻𑀆𑀧𑀢𑁂𑀚𑀉𑀢𑀼𑀆𑀤𑀬𑁄 𑀧𑀝𑀺𑀘𑁆𑀘 𑀅𑀗𑁆𑀓𑀼𑀭𑀸𑀤𑀻𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀤𑀺𑀲𑁆𑀲𑀢𑀺, 𑀢𑀣𑀸 𑀏𑀢𑁂𑀲𑀫𑁆𑀧𑀺 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣𑀸𑀧𑀺 𑀘𑁂𑀢𑁆𑀣 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀧𑀭𑀺𑀓𑀧𑁆𑀧𑀺𑀢𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀓𑀼𑀲𑀮𑀸𑀤𑀻𑀦𑀁 𑀓𑀢𑁆𑀢𑀸 𑀅𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀻𑀢𑀺 𑀘𑁂? 𑀢𑀫𑀼𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫 𑀢𑀸𑀯, 𑀲𑁄 𑀧𑀦 𑀢𑀸𑀯 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄 𑀓𑀺𑀁 𑀲𑀘𑁂𑀢𑀦𑁄 𑀯𑀸, 𑀉𑀤𑀸𑀳𑀼 𑀅𑀘𑁂𑀢𑀦𑁄 𑀯𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀅𑀘𑁂𑀢𑀦𑁄 𑀲𑀺𑀬𑀸, 𑀧𑀸𑀓𑀸𑀭𑀢𑀭𑀼𑀧𑀸𑀲𑀸𑀡𑀲𑀤𑀺𑀲𑁄 𑀲𑀺𑀬𑀸. 𑀢𑀲𑁆𑀲 𑀓𑀸𑀭𑀓𑀯𑁂𑀤𑀓𑀢𑁆𑀢𑀸𑀪𑀸𑀯𑁄 𑀲𑀺𑀬𑀸. 𑀬𑀤𑀺 𑀲𑀘𑁂𑀢𑀦𑁄, 𑀲𑁄 𑀘𑁂𑀢𑀦𑀸𑀬 𑀅𑀜𑁆𑀜𑁄 𑀯𑀸 𑀲𑀺𑀬𑀸, 𑀅𑀦𑀜𑁆𑀜𑁄 𑀯𑀸. 𑀅𑀣𑀸𑀦𑀜𑁆𑀜𑁄, 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄𑀧𑀺 𑀦𑀸𑀲𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀦𑀜𑁆𑀜𑀢𑁆𑀢𑀸.

𑀅𑀣𑀸𑀧𑀺 𑀪𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀏𑀯𑀁 𑀲𑀺𑀬𑀸, 𑀅𑀢𑁆𑀢𑀦𑁄 𑀧𑀦 𑀦𑀸𑀲𑁄 ¶ 𑀦 𑀪𑀯𑀢𑀺 𑀦𑀺𑀘𑁆𑀘𑀢𑁆𑀢𑀸, 𑀘𑁂𑀢𑀦𑀸𑀬𑀬𑁂𑀯 𑀦𑀸𑀲𑁄 𑀪𑀯𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀲𑀢𑀺 𑀘𑁂𑀢𑀦𑀸𑀬𑀧𑀺 𑀦𑀸𑀲𑁄 𑀦 𑀪𑀯𑀢𑀺. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀦𑀜𑁆𑀜𑀢𑁆𑀢𑀸. 𑀘𑁂𑀢𑀦𑀢𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀘𑁂𑀢𑀦𑀸𑀬𑀬𑁂𑀯 𑀦𑀸𑀲𑁄 𑀪𑀯𑀢𑀺, 𑀦 𑀅𑀢𑁆𑀢𑀦𑁄𑀢𑀺 𑀅𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀘𑁂𑀢𑀦𑀸𑀬𑀬𑁂𑀯 𑀯𑀺𑀦𑀸𑀲𑁂 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀅𑀢𑁆𑀢𑀸𑀯 𑀦𑀲𑁆𑀲𑀢𑀼, 𑀢𑀺𑀝𑁆𑀞𑀢𑀼 𑀘𑁂𑀢𑀦𑀸. 𑀅𑀣 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄 𑀦𑀸𑀲𑁄 ¶ 𑀦 𑀪𑀯𑀢𑀻𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀢𑁆𑀢𑀸 𑀅𑀜𑁆𑀜𑁄 𑀲𑀺𑀬𑀸. 𑀅𑀣 𑀅𑀜𑁆𑀜𑀲𑁆𑀲 𑀅𑀢𑁆𑀢𑀲𑁆𑀲 𑀦𑀸𑀲𑁂 𑀲𑀢𑀺 𑀲𑀬𑀁 𑀦𑀸𑀲𑁄 𑀦 𑀪𑀯𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀘𑁂𑀢𑀦𑀸𑀬 ¶ 𑀅𑀦𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣𑀸𑀧𑀺 𑀘𑁂𑀢𑀦𑀢𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀅𑀢𑁆𑀢𑀦𑁄 𑀅𑀦𑀸𑀲𑁄 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄 𑀪𑀯𑀢𑀼. 𑀅𑀣 𑀦 𑀪𑀯𑀢𑀺, 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁 𑀯𑀸 𑀲𑀺𑀬𑀸, 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼. 𑀅𑀣 𑀧𑀦 𑀏𑀯𑀁 𑀦 𑀪𑀯𑀢𑀻𑀢𑀺 𑀘𑁂? 𑀅𑀦𑀜𑁆𑀜𑀢𑁆𑀢𑀧𑀓𑁆𑀔𑀁 𑀧𑀭𑀺𑀘𑁆𑀘𑀚. 𑀅𑀣 𑀧𑀦 𑀦 𑀧𑀭𑀺𑀘𑁆𑀘𑀚𑀲𑀺, 𑀧𑀝𑀺𑀜𑁆𑀜𑀸𑀳𑀻𑀦𑁄 𑀪𑀯𑀲𑀺.

𑀅𑀣𑀸𑀬𑀁 𑀪𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀦𑀸𑀬𑀁 𑀫𑀫 𑀅𑀢𑁆𑀢𑀸 𑀘𑁂𑀢𑀦𑀸𑀬 𑀅𑀦𑀜𑁆𑀜𑁄, 𑀅𑀜𑁆𑀜𑁄𑀬𑁂𑀯𑀸’’𑀢𑀺? 𑀢𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀇𑀥 𑀧𑀦 𑀅𑀜𑁆𑀜𑀢𑁆𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀜𑁆𑀘 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀜𑁆𑀘𑀸𑀢𑀺. 𑀢𑀢𑁆𑀣 𑀓𑀺𑀁 𑀢𑁆𑀯𑀁 𑀘𑁂𑀢𑀦𑀢𑁆𑀢𑀸𑀦𑀁 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑁂𑀲𑀺, 𑀉𑀤𑀸𑀳𑀼 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀦𑁆𑀢𑀺? 𑀅𑀳𑀁 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑀸𑀫𑀻𑀢𑀺. 𑀬𑀣𑀸 𑀳𑀺 𑀭𑀽𑀧𑀭𑀲𑀕𑀦𑁆𑀥𑀸𑀤𑀻𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀘𑁂𑀢𑀦𑀢𑁆𑀢𑀸𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑀸𑀫𑀻𑀢𑀺. 𑀢𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀬𑀣𑀸 𑀳𑀺 𑀚𑀸𑀢𑀯𑁂𑀤𑀲𑁆𑀲 𑀟𑀬𑁆𑀳𑀫𑀸𑀦𑁂 𑀆𑀫𑀓𑀲𑀗𑁆𑀖𑀝𑁂 𑀆𑀫𑀓𑀯𑀡𑁆𑀡𑀯𑀺𑀦𑀸𑀲𑁂 𑀭𑀲𑀸𑀤𑀻𑀦𑀁 𑀯𑀺𑀦𑀸𑀲𑁄 𑀪𑀯𑀢𑀺, 𑀢𑀣𑁂𑀯 𑀘𑁂𑀢𑀦𑀸𑀬 𑀯𑀺𑀦𑀸𑀲𑁂 𑀅𑀢𑁆𑀢𑀦𑁄𑀧𑀺 𑀯𑀺𑀦𑀸𑀲𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀏𑀓𑀤𑁂𑀲𑀢𑁆𑀢𑀸𑀢𑀺.

𑀅𑀣𑁂𑀯𑀁 𑀪𑀯𑀢𑁄 𑀫𑀢𑀺 𑀲𑀺𑀬𑀸 ‘‘𑀏𑀓𑀤𑁂𑀲𑀢𑁆𑀢𑁂 𑀲𑀢𑀺𑀧𑀺 𑀅𑀢𑁆𑀢𑀦𑁄 𑀧𑀦 𑀦𑀸𑀲𑁄 𑀦 𑀪𑀯𑀢𑀺, 𑀘𑁂𑀢𑀦𑀸𑀬𑀬𑁂𑀯 𑀯𑀺𑀦𑀸𑀲𑁄 𑀪𑀯𑀢𑀻’’𑀢𑀺? 𑀅𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄𑀯 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀅𑀯𑀺𑀦𑀺𑀩𑁆𑀪𑁄𑀕𑀢𑁄. 𑀅𑀣 𑀲𑀫𑀸𑀦𑁂 𑀏𑀓𑀤𑁂𑀲𑀢𑁆𑀢𑁂 𑀅𑀯𑀺𑀦𑀺𑀩𑁆𑀪𑁄𑀕𑀪𑀸𑀯𑁂𑀧𑀺 ¶ 𑀓𑁂𑀦 𑀳𑁂𑀢𑀼𑀦𑀸 𑀘𑁂𑀢𑀦𑀸𑀬 𑀏𑀯 𑀦𑀸𑀲𑁄 𑀪𑀯𑀢𑀺, 𑀦 𑀧𑀦 𑀅𑀢𑁆𑀢𑀦𑁄. 𑀅𑀣 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀯 𑀮𑀤𑁆𑀥𑀺𑀬𑀸 𑀅𑀢𑁆𑀢𑀸𑀯 𑀦𑀲𑁆𑀲𑀢𑀼, 𑀢𑀺𑀝𑁆𑀞𑀢𑀼 𑀘𑁂𑀢𑀦𑀸. 𑀅𑀣 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄 𑀦𑀸𑀲𑁄 ¶ 𑀦 𑀪𑀯𑀢𑀺, 𑀉𑀪𑀺𑀦𑁆𑀦𑀁 𑀏𑀓𑀤𑁂𑀲𑀢𑀸 𑀦𑀢𑁆𑀣𑀺. 𑀏𑀯𑀜𑁆𑀘 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀘𑁂? 𑀬𑀁 𑀧𑀦 𑀢𑀬𑀸 𑀯𑀼𑀢𑁆𑀢𑀁, 𑀬𑀣𑀸 𑀭𑀽𑀧𑀭𑀲𑀕𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁, 𑀢𑀣𑀸 𑀘𑁂𑀢𑀦𑀢𑁆𑀢𑀸𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀦𑁆𑀢𑀺? 𑀢𑀫𑀬𑀼𑀢𑁆𑀢𑀦𑁆𑀢𑀺 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀲𑀫𑀸𑀦𑁂𑀧𑀺 𑀏𑀓𑀤𑁂𑀲𑀢𑁆𑀢𑁂 𑀬𑀤𑀺 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄 𑀦 𑀪𑀯𑀢𑀺, 𑀧𑀝𑀺𑀜𑁆𑀜𑀸𑀳𑀻𑀦𑁄 𑀅𑀲𑀺. 𑀅𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁 𑀯𑀸 𑀲𑀺𑀬𑀸, 𑀢𑀯 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼. 𑀅𑀣𑁂𑀯𑀁 𑀦 𑀪𑀯𑀢𑀻𑀢𑀺 𑀘𑁂? 𑀏𑀓𑀤𑁂𑀲𑀢𑀸𑀯 𑀦𑀢𑁆𑀣𑀻𑀢𑀺.

𑀅𑀣 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑁂𑀲𑀺, 𑀘𑁂𑀢𑀦𑀢𑁆𑀢𑀸𑀦𑀁 𑀅𑀜𑁆𑀜𑀢𑁆𑀢𑁂 𑀲𑀢𑀺 𑀖𑀝𑀧𑀝𑀲𑀓𑀝𑀕𑁂𑀳𑀸𑀤𑀻𑀦𑀁 𑀯𑀺𑀬 𑀅𑀜𑁆𑀜𑀢𑁆𑀢𑀁 𑀲𑀺𑀬𑀸. 𑀘𑁂𑀢𑀦𑀸𑀬 𑀯𑀺𑀦𑀸 𑀅𑀦𑀜𑁆𑀜𑀢𑀸 𑀢𑁂 𑀅𑀢𑁆𑀢𑀸 𑀦 𑀖𑀝𑁂𑀦 𑀯𑀺𑀦𑀸 𑀧𑀝𑁄 𑀯𑀺𑀬 𑀅𑀜𑁆𑀜𑁄 𑀲𑀺𑀬𑀸 ¶ . 𑀅𑀜𑁆𑀜𑁄 𑀘 𑀳𑀺 𑀖𑀝𑁄 𑀅𑀜𑁆𑀜𑁄 𑀘 𑀧𑀝𑁄𑀢𑀺? 𑀦, 𑀏𑀯𑀜𑁆𑀘 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀘𑁂? ‘‘𑀅𑀘𑁂𑀢𑀦𑁄 𑀅𑀢𑁆𑀢𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺. 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀦 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀯𑁂𑀤𑀓𑁄 𑀯𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑁋

𑁭𑁭𑁯.

‘‘𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁,

𑀲𑁄 𑀘 𑀲𑀦𑁆𑀥𑀸𑀯𑀢𑀻 𑀦𑀭𑁄;

𑀲𑁄 𑀘 𑀓𑀭𑁄𑀢𑀺 𑀯𑁂𑀤𑁂𑀢𑀺,

𑀲𑀼𑀔𑀤𑀼𑀓𑁆𑀔𑀁 𑀲𑀬𑀁𑀓𑀢’’𑀦𑁆𑀢𑀺 𑀘.

𑁭𑁮𑁦.

‘‘𑀲𑀢𑁆𑀢𑁄 ¶ 𑀲𑀁𑀲𑀸𑀭𑀫𑀸𑀧𑀦𑁆𑀦𑁄,

𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁;

𑀅𑀢𑁆𑀣𑀺 𑀫𑀸𑀢𑀸 𑀅𑀢𑁆𑀣𑀺 𑀧𑀺𑀢𑀸,

𑀅𑀢𑁆𑀣𑀺 𑀲𑀢𑁆𑀢𑁄𑀧𑀧𑀸𑀢𑀺𑀓𑁄’’𑀢𑀺 𑀘.

𑁭𑁮𑁧.

‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸,

𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀓𑁆𑀔𑀁 𑀮𑁄𑀓𑁂,

𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔’’𑀦𑁆𑀢𑀺 𑀘.

𑁭𑁮𑁨.

‘‘𑀬𑀜𑁆𑀳𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄,

𑀓𑀸𑀬𑁂𑀦 𑀯𑀸𑀘𑀸 𑀉𑀤 𑀘𑁂𑀢𑀲𑀸;

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺,

𑀢𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺 𑀘.

𑁭𑁮𑁩.

‘‘𑀏𑀓𑀲𑁆𑀲𑁂𑀓𑁂𑀦 𑀓𑀧𑁆𑀧𑁂𑀦,

𑀧𑀼𑀕𑁆𑀕𑀮𑀲𑁆𑀲𑀝𑁆𑀞𑀺𑀲𑀜𑁆𑀘𑀬𑁄;

𑀲𑀺𑀬𑀸 𑀧𑀩𑁆𑀩𑀢𑀲𑀫𑁄 𑀭𑀸𑀲𑀺,

𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺 𑀘.

𑁭𑁮𑁪.

‘‘𑀅𑀲𑀤𑁆𑀥𑁄 ¶ 𑀅𑀓𑀢𑀜𑁆𑀜𑀽 𑀘,

𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄,

𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺 𑀘. 𑁋

𑀯𑀼𑀢𑁆𑀢𑀦𑁆𑀢𑀺. 𑀲𑀘𑁆𑀘𑀁 𑀏𑀯𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀢𑀜𑁆𑀘 𑀔𑁄 𑀲𑀫𑁆𑀫𑀼𑀢𑀺𑀯𑀲𑁂𑀦, 𑀦 𑀧𑀭𑀫𑀢𑁆𑀣𑀢𑁄. 𑀦𑀦𑀼 𑀪𑀕𑀯𑀢𑀸 𑀇𑀤𑀫𑁆𑀧𑀺 𑀯𑀼𑀢𑁆𑀢𑀁 𑁋

𑁭𑁮𑁫.

‘‘𑀓𑀺𑀁 ¶ 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀻’’𑀢𑀺 𑀘.

𑁭𑁮𑁬.

‘‘𑀬𑀣𑀸𑀧𑀺 ¶ 𑀅𑀗𑁆𑀕𑀲𑀫𑁆𑀪𑀸𑀭𑀸,

𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼,

𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺 𑀘.

𑀢𑀲𑁆𑀫𑀸 𑀦 𑀯𑀘𑀦𑀫𑀢𑁆𑀢𑀫𑁂𑀯𑀸𑀯𑀮𑀫𑁆𑀩𑀺𑀢𑀩𑁆𑀩𑀁, 𑀦 𑀘 𑀤𑀴𑁆𑀳𑀫𑀽𑀴𑁆𑀳𑀕𑀸𑀳𑀺𑀦𑀸 𑀘 𑀪𑀯𑀺𑀢𑀩𑁆𑀩𑀁, 𑀕𑀭𑀼𑀓𑀼𑀮𑀫𑀼𑀧𑀲𑁂𑀯𑀺𑀢𑁆𑀯𑀸 𑀲𑀼𑀢𑁆𑀢𑀧𑀤𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀚𑀸𑀦𑀺𑀢𑀩𑁆𑀩𑁄, 𑀲𑀼𑀢𑁆𑀢𑀧𑀤𑁂𑀲𑀼 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸𑀦𑀺 𑁋 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀁, 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘𑀸’’𑀢𑀺. 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀅𑀲𑀗𑁆𑀓𑀭𑀢𑁄 𑀜𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀅𑀲𑀗𑁆𑀓𑀭𑀢𑁄 𑀜𑀢𑁆𑀯𑀸 𑀓𑁄𑀘𑀺 𑀓𑀸𑀭𑀓𑁄 𑀯𑀸 𑀯𑁂𑀤𑀓𑁄 𑀯𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀅𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀡𑁆𑀟𑀺𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀅𑀢𑁆𑀣𑀓𑀸𑀫𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺.

𑁭𑁮𑁭.

𑀬𑁄 𑀇𑀫𑀁 𑀕𑀦𑁆𑀣𑀁 𑀅𑀘𑁆𑀘𑀦𑁆𑀢𑀁, 𑀘𑀺𑀦𑁆𑀢𑁂𑀢𑀺 𑀲𑀢𑀢𑀫𑁆𑀧𑀺 𑀲𑁄;

𑀓𑀫𑁂𑀦 𑀧𑀭𑀫𑀸 𑀧𑀜𑁆𑀜𑀸, 𑀢𑀲𑁆𑀲 𑀕𑀘𑁆𑀙𑀢𑀺 𑀯𑁂𑀧𑀼𑀮𑀁.

𑁭𑁮𑁮.

𑀅𑀢𑀺𑀫𑀢𑀺𑀓𑀭𑀫𑀸𑀥𑀺𑀦𑀻𑀳𑀭𑀁,

𑀯𑀺𑀫𑀢𑀺𑀯𑀺𑀦𑀸𑀲𑀓𑀭𑀁 𑀧𑀺𑀬𑀓𑁆𑀓𑀭𑀁;

𑀧𑀞𑀢𑀺 ¶ 𑀲𑀼𑀡𑀢𑀺 𑀬𑁄 𑀲𑀤𑀸 𑀇𑀫𑀁,

𑀯𑀺𑀓𑀲𑀢𑀺 𑀢𑀲𑁆𑀲 𑀫𑀢𑀻𑀥 𑀪𑀺𑀓𑁆𑀔𑀼𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀓𑀸𑀭𑀓𑀧𑀝𑀺𑀯𑁂𑀥𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁪. 𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄

𑁭𑁮𑁯.

𑀪𑀸𑀯𑀦𑀸𑀦𑀬𑀫𑀳𑀁 ¶ ¶ 𑀳𑀺𑀢𑀸𑀦𑀬𑀁,

𑀫𑀸𑀦𑀬𑀜𑁆𑀘 𑀲𑀼𑀕𑀢𑀁 𑀲𑀼𑀔𑀸𑀦𑀬𑀁;

𑀩𑁆𑀬𑀸𑀓𑀭𑁄𑀫𑀺 𑀧𑀭𑀫𑀁 𑀇𑀢𑁄 𑀧𑀭𑀁,

𑀢𑀁 𑀲𑀼𑀡𑀸𑀣 𑀫𑀥𑀼𑀭𑀢𑁆𑀣𑀯𑀡𑁆𑀡𑀦𑀁.

𑁭𑁯𑁦.

𑀉𑀢𑁆𑀢𑀭𑀁 𑀢𑀼 𑀫𑀦𑀼𑀲𑁆𑀲𑀸𑀦𑀁, 𑀥𑀫𑁆𑀫𑀢𑁄 𑀜𑀸𑀡𑀤𑀲𑁆𑀲𑀦𑀁;

𑀧𑀢𑁆𑀢𑀼𑀓𑀸𑀫𑁂𑀦 𑀓𑀸𑀢𑀩𑁆𑀩𑀁, 𑀆𑀤𑀺𑀢𑁄 𑀲𑀻𑀮𑀲𑁄𑀥𑀦𑀁.

𑁭𑁯𑁧.

𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁂, 𑀤𑀼𑀲𑁆𑀲𑀻𑀮𑁂 𑀲𑀻𑀮𑀯𑀚𑁆𑀚𑀺𑀢𑁂;

𑀦𑀢𑁆𑀣𑀺 𑀛𑀸𑀦𑀁 𑀓𑀼𑀢𑁄 𑀫𑀕𑁆𑀕𑁄, 𑀢𑀲𑁆𑀫𑀸 𑀲𑀻𑀮𑀁 𑀯𑀺𑀲𑁄𑀥𑀬𑁂.

𑁭𑁯𑁨.

𑀲𑀻𑀮𑀁 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀁 𑀫𑀢𑀁;

𑀢𑀁 𑀧𑀦𑀸𑀘𑁆𑀙𑀺𑀤𑁆𑀤𑀫𑀓𑁆𑀔𑀡𑁆𑀟𑀫𑀓𑀫𑁆𑀫𑀸𑀲𑀫𑀦𑀺𑀦𑁆𑀤𑀺𑀢𑀁.

𑁭𑁯𑁩.

𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀓𑀸𑀫𑁂𑀦, 𑀯𑀺𑀯𑁂𑀓𑀲𑀼𑀔𑀫𑀺𑀘𑁆𑀙𑀢𑀸;

𑀲𑀻𑀮𑀜𑁆𑀘 𑀦𑀸𑀫 𑀪𑀺𑀓𑁆𑀔𑀽𑀦𑀁, 𑀅𑀮𑀗𑁆𑀓𑀸𑀭𑁄 𑀅𑀦𑀼𑀢𑁆𑀢𑀭𑁄.

𑁭𑁯𑁪.

𑀭𑀢𑀦𑀁 𑀲𑀭𑀡𑀁 𑀔𑁂𑀫𑀁, 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀁;

𑀘𑀺𑀦𑁆𑀢𑀸𑀫𑀡𑀺 𑀧𑀡𑀻𑀢𑁄 𑀘, 𑀲𑀻𑀮𑀁 𑀬𑀸𑀦𑀫𑀦𑀼𑀢𑁆𑀢𑀭𑀁.

𑁭𑁯𑁫.

𑀲𑀻𑀢𑀮𑀁 ¶ 𑀲𑀮𑀺𑀮𑀁 𑀲𑀻𑀮𑀁, 𑀓𑀺𑀮𑁂𑀲𑀫𑀮𑀥𑁄𑀯𑀦𑀁;

𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀜𑁆𑀘, 𑀤𑁄𑀲𑀸𑀦𑀁 𑀩𑀮𑀖𑀸𑀢𑀺 𑀘.

𑁭𑁯𑁬.

𑀢𑀺𑀤𑀺𑀯𑀸𑀭𑁄𑀳𑀡𑀜𑁆𑀘𑁂𑀢𑀁, 𑀲𑁄𑀧𑀸𑀦𑀁 𑀧𑀭𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀔𑁂𑀫𑁄 𑀘 𑀦𑀺𑀩𑁆𑀩𑀸𑀦𑀦𑀕𑀭𑀲𑁆𑀲 𑀧𑀯𑁂𑀲𑀦𑁂.

𑁭𑁯𑁭.

𑀢𑀲𑁆𑀫𑀸 𑀲𑀼𑀧𑀭𑀺𑀲𑀼𑀤𑁆𑀥𑀁 𑀢𑀁, 𑀲𑀻𑀮𑀁 𑀤𑀼𑀯𑀺𑀥𑀮𑀓𑁆𑀔𑀡𑀁;

𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀓𑀸𑀫𑁂𑀦, 𑀧𑀺𑀬𑀲𑀻𑀮𑁂𑀦 𑀪𑀺𑀓𑁆𑀔𑀼𑀦𑀸.

𑁭𑁯𑁮.

𑀓𑀸𑀢𑀩𑁆𑀩𑁄 𑀧𑀦 𑀲𑀻𑀮𑀲𑁆𑀫𑀺𑀁, 𑀧𑀭𑀺𑀲𑀼𑀤𑁆𑀥𑁂 𑀞𑀺𑀢𑁂𑀦𑀺𑀥;

𑀧𑀮𑀺𑀩𑁄𑀥𑀲𑁆𑀲𑀼𑀧𑀘𑁆𑀙𑁂𑀤𑁄, 𑀧𑀮𑀺𑀩𑁄𑀥𑀸 𑀤𑀲𑀸𑀳𑀼 𑀘.

𑁭𑁯𑁯.

‘‘𑀆𑀯𑀸𑀲𑁄 ¶ 𑀘 𑀓𑀼𑀮𑀁 𑀮𑀸𑀪𑁄,

𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄,

𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺.

𑁮𑁦𑁦.

𑀧𑀮𑀺𑀩𑁄𑀥𑀲𑁆𑀲𑀼𑀧𑀘𑁆𑀙𑁂𑀤𑀁, 𑀓𑀢𑁆𑀯𑀸 𑀤𑀲𑀯𑀺𑀥𑀲𑁆𑀲𑀧𑀺;

𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀲𑁄, 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀤𑀸𑀬𑀓𑁄.

𑁮𑁦𑁧.

𑀧𑀺𑀬𑁄 ¶ 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄.

𑁮𑁦𑁨.

𑀏𑀯𑀫𑀸𑀤𑀺𑀕𑀼𑀡𑁄𑀧𑁂𑀢𑀫𑀼𑀧𑀕𑀦𑁆𑀢𑁆𑀯𑀸 𑀳𑀺𑀢𑁂𑀲𑀺𑀦𑀁;

𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀓𑀸𑀮𑁂𑀦, 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀤𑀸𑀬𑀓𑀁.

𑁮𑁦𑁩.

𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀩𑁆𑀩𑀁, 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀦𑀲𑁆𑀲 𑀢𑀼;

𑀢𑁂𑀦𑀸𑀧𑀺 𑀘𑀭𑀺𑀢𑀁 𑀜𑀢𑁆𑀯𑀸, 𑀤𑀸𑀢𑀩𑁆𑀩𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁮𑁦𑁪.

𑀘𑀭𑀺𑀢𑀁 𑀧𑀦𑀺𑀤𑀁 𑀭𑀸𑀕𑀤𑁄𑀲𑀫𑁄𑀳𑀯𑀲𑁂𑀦 𑀘;

𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀸𑀦𑀁, 𑀯𑀲𑁂𑀦 𑀙𑀩𑁆𑀩𑀺𑀥𑀁 𑀫𑀢𑀁.

𑁮𑁦𑁫.

𑀯𑁄𑀫𑀺𑀲𑁆𑀲𑀓𑀦𑀬𑀸 𑀢𑁂𑀲𑀁, 𑀘𑀢𑀼𑀲𑀝𑁆𑀞𑀺 𑀪𑀯𑀦𑁆𑀢𑀺 𑀢𑁂;

𑀢𑁂𑀳𑀺 𑀅𑀢𑁆𑀣𑁄 𑀦 𑀘𑀢𑁆𑀣𑀻𑀢𑀺, 𑀦 𑀫𑀬𑀸 𑀇𑀥 𑀤𑀲𑁆𑀲𑀺𑀢𑀸.

𑁮𑁦𑁬.

𑀅𑀲𑀼𑀪𑀸 ¶ 𑀘 𑀤𑀲𑁂𑀯𑁂𑀢𑁆𑀣, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺;

𑀏𑀓𑀸𑀤𑀲 𑀇𑀫𑁂 𑀭𑀸𑀕-𑀘𑀭𑀺𑀢𑀲𑁆𑀲𑀸𑀦𑀼𑀓𑀽𑀮𑀢𑀸.

𑁮𑁦𑁭.

𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀲𑀯𑀡𑁆𑀡𑀓𑀲𑀺𑀡𑀸 𑀇𑀫𑁂;

𑀅𑀝𑁆𑀞𑁂𑀯 𑀘 𑀲𑀤𑀸 𑀤𑁄𑀲-𑀘𑀭𑀺𑀢𑀲𑁆𑀲𑀸𑀦𑀼𑀓𑀽𑀮𑀢𑀸.

𑁮𑁦𑁮.

𑀢𑀁 𑀫𑁄𑀳𑀘𑀭𑀺𑀢𑀲𑁆𑀲𑁂𑀢𑁆𑀣, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘;

𑀅𑀦𑀼𑀓𑀽𑀮𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀆𑀦𑀸𑀧𑀸𑀦𑀁 𑀧𑀦𑁂𑀓𑀓𑀁.

𑁮𑁦𑁯.

𑀧𑀼𑀭𑀺𑀫𑀸𑀦𑀼𑀲𑁆𑀲𑀢𑀺𑀙𑀓𑁆𑀓𑀁, 𑀲𑀤𑁆𑀥𑀸𑀘𑀭𑀺𑀢𑀤𑁂𑀳𑀺𑀦𑁄;

𑀫𑀭𑀡𑀽𑀧𑀲𑀫𑀸𑀬𑀼𑀢𑁆𑀢𑀸, 𑀲𑀢𑀺𑀫𑀸𑀳𑀸𑀭𑀦𑀺𑀲𑁆𑀲𑀺𑀢𑀸.

𑁮𑁧𑁦.

𑀲𑀜𑁆𑀜𑀸 ¶ 𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀩𑀼𑀤𑁆𑀥𑀺𑀧𑁆𑀧𑀓𑀢𑀺𑀚𑀦𑁆𑀢𑀼𑀦𑁄;

𑀇𑀫𑁂 𑀧𑀦 𑀘 𑀘𑀢𑁆𑀢𑀸𑀭𑁄, 𑀅𑀦𑀼𑀓𑀽𑀮𑀸𑀢𑀺 𑀤𑀻𑀧𑀺𑀢𑀸.

𑁮𑁧𑁧.

𑀘𑀢𑁆𑀢𑀸𑀭𑁄𑀧𑀺 𑀘 𑀆𑀭𑀼𑀧𑁆𑀧𑀸, 𑀲𑁂𑀲𑀸𑀦𑀺 𑀓𑀲𑀺𑀡𑀸𑀦𑀺 𑀘;

𑀅𑀦𑀼𑀓𑀽𑀮𑀸 𑀇𑀫𑁂 𑀲𑀩𑁆𑀩-𑀘𑀭𑀺𑀢𑀸𑀦𑀦𑁆𑀢𑀺 𑀯𑀡𑁆𑀡𑀺𑀢𑀸.

𑁮𑁧𑁨.

𑀇𑀤𑀁 𑀲𑀩𑁆𑀩𑀁 𑀧𑀦𑁂𑀓𑀦𑁆𑀢-𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄;

𑀅𑀢𑀺𑀲𑀧𑁆𑀧𑀸𑀬𑀢𑁄 𑀯𑀼𑀢𑁆𑀢-𑀫𑀺𑀢𑀺 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁮𑁧𑁩.

𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀺, 𑀘𑀢𑁆𑀢𑀸𑀮𑀻𑀲𑀸𑀢𑀺 𑀦𑀺𑀤𑁆𑀤𑀺𑀲𑁂;

𑀓𑀲𑀺𑀡𑀸𑀦𑀺 𑀤𑀲 𑀘𑁂𑀯, 𑀅𑀲𑀼𑀪𑀸𑀦𑀼𑀲𑁆𑀲𑀢𑀻 𑀤𑀲.

𑁮𑁧𑁪.

𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀘𑀢𑁆𑀢𑀸𑀭𑁄 𑀘 𑀅𑀭𑀽𑀧𑀺𑀦𑁄;

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀲𑀜𑁆𑀜𑀸 𑀘𑀸𑀳𑀸𑀭𑀢𑀸 𑀇𑀢𑀺.

𑁮𑁧𑁫.

𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀢𑁂𑀲𑀼, 𑀉𑀧𑀘𑀸𑀭𑀯𑀳𑀸 𑀓𑀢𑀺;

𑀆𑀦𑀸𑀧𑀸𑀦𑀲𑀢𑀺𑀁 𑀓𑀸𑀬-𑀕𑀢𑀁 𑀳𑀺𑀢𑁆𑀯𑀸 𑀧𑀦𑀝𑁆𑀞𑀧𑀺.

𑁮𑁧𑁬.

𑀲𑁂𑀲𑀸𑀦𑀼𑀲𑁆𑀲𑀢𑀺𑀬𑁄 𑀲𑀜𑁆𑀜𑀸, 𑀯𑀯𑀢𑁆𑀣𑀸𑀦𑀦𑁆𑀢𑀺 𑀢𑁂𑀭𑀲;

𑀉𑀧𑀘𑀸𑀭𑀯𑀳𑀸 𑀯𑀼𑀢𑁆𑀢𑀸, 𑀲𑁂𑀲𑀸 𑀢𑁂 𑀅𑀧𑁆𑀧𑀦𑀸𑀯𑀳𑀸.

𑁮𑁧𑁭.

𑀅𑀧𑁆𑀧𑀦𑀸𑀬𑀸𑀯𑀳𑁂𑀲𑁆𑀯𑁂𑀢𑁆𑀣, 𑀓𑀲𑀺𑀡𑀸𑀦𑀺 𑀤𑀲𑀸𑀧𑀺 𑀘;

𑀆𑀦𑀸𑀧𑀸𑀦𑀲𑀢𑀻 𑀘𑁂𑀯, 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀇𑀫𑁂.

𑁮𑁧𑁮.

𑀅𑀲𑀼𑀪𑀸𑀦𑀺 ¶ 𑀤𑀲 𑀘𑁂𑀢𑁆𑀣, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺;

𑀏𑀓𑀸𑀤𑀲 𑀇𑀫𑁂 𑀥𑀫𑁆𑀫𑀸, 𑀧𑀞𑀫𑀚𑁆𑀛𑀸𑀦𑀺𑀓𑀸 𑀲𑀺𑀬𑀼𑀁.

𑁮𑁧𑁯.

𑀆𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀢𑀺 ¶ , 𑀢𑀺𑀓𑀚𑁆𑀛𑀸𑀦𑀯𑀳𑀸 𑀢𑀬𑁄;

𑀘𑀢𑀼𑀢𑁆𑀣𑀸𑀧𑀺 𑀘 𑀆𑀭𑀼𑀧𑁆𑀧𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀫𑀢𑀸.

𑁮𑁨𑁦.

𑀯𑀲𑁂𑀦𑀸𑀭𑀫𑁆𑀫𑀡𑀗𑁆𑀕𑀸𑀦𑀁, 𑀤𑀼𑀯𑀺𑀥𑁄 𑀲𑀫𑀢𑀺𑀓𑁆𑀓𑀫𑁄;

𑀕𑁄𑀘𑀭𑀸𑀢𑀺𑀓𑁆𑀓𑀫𑀸𑀭𑀽𑀧𑁂, 𑀭𑀽𑀧𑁂 𑀛𑀸𑀦𑀗𑁆𑀕𑀢𑀺𑀓𑁆𑀓𑀫𑁄.

𑁮𑁨𑁧.

𑀤𑀲𑁂𑀯 𑀓𑀲𑀺𑀡𑀸𑀦𑁂𑀢𑁆𑀣, 𑀯𑀟𑁆𑀠𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺 𑀳𑀺;

𑀦 𑀘 𑀯𑀟𑁆𑀠𑀦𑀺𑀬𑀸 𑀲𑁂𑀲𑀸, 𑀪𑀯𑀦𑁆𑀢𑀺 𑀅𑀲𑀼𑀪𑀸𑀤𑀬𑁄.

𑁮𑁨𑁨.

𑀤𑀲𑁂𑀯 𑀓𑀲𑀺𑀡𑀸𑀦𑁂𑀢𑁆𑀣, 𑀅𑀲𑀼𑀪𑀸𑀦𑀺 𑀤𑀲𑀸𑀧𑀺 𑀘;

𑀆𑀦𑀸𑀧𑀸𑀦𑀲𑀢𑀻 𑀘𑁂𑀯, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺.

𑁮𑁨𑁩.

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀺 ¶ , 𑀳𑁄𑀦𑁆𑀢𑀺 𑀆𑀭𑀫𑁆𑀫𑀡𑀸𑀦𑀺 𑀳𑀺;

𑀲𑁂𑀲𑀸𑀦𑁂𑀯 𑀧𑀝𑀺𑀪𑀸𑀕-𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀺𑀬𑀼𑀁.

𑁮𑁨𑁪.

𑀅𑀲𑀼𑀪𑀸𑀦𑀺 𑀤𑀲𑀸𑀳𑀸𑀭-𑀲𑀜𑁆𑀜𑀸 𑀓𑀸𑀬𑀕𑀢𑀸𑀲𑀢𑀺;

𑀤𑁂𑀯𑁂𑀲𑀼 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀤𑁆𑀯𑀸𑀤𑀲𑁂𑀢𑀸𑀦𑀺 𑀲𑀩𑁆𑀩𑀤𑀸.

𑁮𑁨𑁫.

𑀢𑀸𑀦𑀺 𑀤𑁆𑀯𑀸𑀤𑀲 𑀘𑁂𑀢𑀸𑀦𑀺, 𑀆𑀦𑀸𑀧𑀸𑀦𑀲𑀢𑀻𑀧𑀺 𑀘;

𑀢𑁂𑀭𑀲𑁂𑀯 𑀧𑀦𑁂𑀢𑀸𑀦𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀭𑁂.

𑁮𑁨𑁬.

𑀞𑀧𑁂𑀢𑁆𑀯𑀸 𑀘𑀢𑀼𑀭𑀸𑀭𑀽𑀧𑁂, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀭𑀽𑀧𑀺𑀲𑀼;

𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑀸𑀦𑀺, 𑀧𑀯𑀢𑁆𑀢𑀦𑁆𑀢𑀺 𑀦 𑀲𑀁𑀲𑀬𑁄.

𑁮𑁨𑁭.

𑀘𑀢𑀼𑀢𑁆𑀣𑀁 𑀓𑀲𑀺𑀡𑀁 𑀳𑀺𑀢𑁆𑀯𑀸, 𑀓𑀲𑀺𑀡𑀸 𑀅𑀲𑀼𑀪𑀸𑀦𑀺 𑀘;

𑀤𑀺𑀝𑁆𑀞𑁂𑀦𑁂𑀯 𑀕𑀳𑁂𑀢𑀩𑁆𑀩𑀸, 𑀇𑀫𑁂 𑀏𑀓𑀽𑀦𑀯𑀻𑀲𑀢𑀺.

𑁮𑁨𑁮.

𑀲𑀢𑀺𑀬𑀫𑁆𑀧𑀺 𑀘 𑀓𑀸𑀬𑀫𑁆𑀳𑀺, 𑀤𑀺𑀝𑁆𑀞𑁂𑀦 𑀢𑀘𑀧𑀜𑁆𑀘𑀓𑀁;

𑀲𑁂𑀲𑀫𑁂𑀢𑁆𑀣 𑀲𑀼𑀢𑁂𑀦𑁂𑀯, 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑀺𑀢𑀁.

𑁮𑁨𑁯.

𑀆𑀦𑀸𑀧𑀸𑀦𑀲𑀢𑀻 𑀏𑀢𑁆𑀣, 𑀨𑀼𑀝𑁆𑀞𑁂𑀦 𑀧𑀭𑀺𑀤𑀻𑀧𑀺𑀢𑀸;

𑀯𑀸𑀬𑁄𑀓𑀲𑀺𑀡𑀫𑁂𑀯𑁂𑀢𑁆𑀣, 𑀤𑀺𑀝𑁆𑀞𑀨𑀼𑀝𑁆𑀞𑁂𑀦 𑀕𑀬𑁆𑀳𑀢𑀺.

𑁮𑁩𑁦.

𑀲𑀼𑀢𑁂𑀦𑁂𑀯 ¶ 𑀕𑀳𑁂𑀢𑀩𑁆𑀩𑀸, 𑀲𑁂𑀲𑀸 𑀅𑀝𑁆𑀞𑀸𑀭𑀲𑀸𑀧𑀺 𑀘;

𑀉𑀧𑁂𑀓𑁆𑀔𑀸 𑀅𑀧𑁆𑀧𑀫𑀜𑁆𑀜𑀸 𑀘, 𑀅𑀭𑀽𑀧𑀸 𑀘𑁂𑀯 𑀧𑀜𑁆𑀘𑀺𑀫𑁂.

𑁮𑁩𑁧.

𑀆𑀤𑀺𑀢𑁄𑀯 𑀕𑀳𑁂𑀢𑀩𑁆𑀩𑀸, 𑀦 𑀳𑁄𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀸;

𑀧𑀜𑁆𑀘𑀢𑀺𑀁𑀲𑀸𑀯𑀲𑁂𑀲𑀸𑀦𑀺, 𑀕𑀳𑁂𑀢𑀩𑁆𑀩𑀸𑀦𑀺 𑀆𑀤𑀺𑀢𑁄.

𑁮𑁩𑁨.

𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀳𑁂𑀢𑁂𑀲𑀼, 𑀆𑀓𑀸𑀲𑀓𑀲𑀺𑀡𑀁 𑀯𑀺𑀦𑀸;

𑀓𑀲𑀺𑀡𑀸 𑀦𑀯 𑀳𑁄𑀦𑁆𑀢𑁂 𑀘, 𑀅𑀭𑀽𑀧𑀸𑀦𑀁 𑀢𑀼 𑀧𑀘𑁆𑀘𑀬𑀸.

𑁮𑁩𑁩.

𑀤𑀲𑀸𑀧𑀺 𑀓𑀲𑀺𑀡𑀸 𑀳𑁄𑀦𑁆𑀢𑀺, 𑀅𑀪𑀺𑀜𑁆𑀜𑀸𑀦𑀁 𑀢𑀼 𑀧𑀘𑁆𑀘𑀬𑀸;

𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀧𑀺, 𑀘𑀢𑀼𑀓𑁆𑀓𑀲𑁆𑀲 𑀪𑀯𑀦𑁆𑀢𑀺 𑀢𑀼.

𑁮𑁩𑁪.

𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀁, 𑀉𑀧𑀭𑀽𑀧𑀭𑀺𑀫𑀲𑁆𑀲 𑀳𑀺;

𑀢𑀣𑀸 𑀘𑀢𑀼𑀢𑁆𑀣𑀫𑀸𑀭𑀼𑀧𑁆𑀧𑀁, 𑀦𑀺𑀭𑁄𑀥𑀲𑁆𑀲𑀸𑀢𑀺 𑀤𑀻𑀧𑀺𑀢𑀁.

𑁮𑁩𑁫.

𑀲𑀩𑁆𑀩𑀸𑀦𑀺 𑀘 𑀧𑀦𑁂𑀢𑀸𑀦𑀺, 𑀘𑀢𑁆𑀢𑀸𑀮𑀻𑀲𑀯𑀺𑀥𑀸𑀦𑀺 𑀢𑀼;

𑀯𑀺𑀧𑀲𑁆𑀲𑀦𑀸𑀪𑀯𑀲𑀫𑁆𑀧𑀢𑁆𑀢𑀺-𑀲𑀼𑀔𑀸𑀦𑀁 𑀧𑀘𑁆𑀘𑀬𑀸 𑀲𑀺𑀬𑀼𑀁.

𑁮𑁩𑁬.

𑀓𑀫𑁆𑀫𑀝𑁆𑀞𑀸𑀦𑀁 ¶ 𑀕𑀳𑁂𑀢𑁆𑀯𑀸𑀦, 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂;

𑀯𑀲𑀦𑁆𑀢𑀲𑁆𑀲 𑀓𑀣𑁂𑀢𑀩𑁆𑀩𑀁, 𑀆𑀕𑀢𑀲𑁆𑀲𑀸𑀕𑀢𑀓𑁆𑀔𑀡𑁂.

𑁮𑁩𑁭.

𑀉𑀕𑁆𑀕𑀳𑁂𑀢𑁆𑀯𑀸 ¶ 𑀧𑀦𑀜𑁆𑀜𑀢𑁆𑀭, 𑀕𑀦𑁆𑀢𑀼𑀓𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀁, 𑀓𑀣𑁂𑀢𑀩𑁆𑀩𑀁 𑀢𑀼 𑀢𑁂𑀦𑀧𑀺.

𑁮𑁩𑁮.

𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀦, 𑀲𑀫𑁆𑀫𑀝𑁆𑀞𑀸𑀦𑀁 𑀫𑀦𑁄𑀪𑀼𑀦𑁄;

𑀅𑀝𑁆𑀞𑀸𑀭𑀲𑀳𑀺 𑀤𑁄𑀲𑁂𑀳𑀺, 𑀦𑀺𑀘𑁆𑀘𑀁 𑀧𑀦 𑀯𑀺𑀯𑀚𑁆𑀚𑀺𑀢𑁂.

𑁮𑁩𑁯.

𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑀲𑁆𑀫𑀺𑀁, 𑀯𑀺𑀳𑀸𑀢𑀩𑁆𑀩𑀁 𑀢𑀼 𑀕𑀸𑀫𑀢𑁄;

𑀦𑀸𑀢𑀺𑀤𑀽𑀭𑁂 𑀦𑀘𑁆𑀘𑀸𑀲𑀦𑁆𑀦𑁂, 𑀲𑀺𑀯𑁂 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑁂.

𑁮𑁪𑁦.

𑀔𑀼𑀤𑁆𑀤𑀓𑁄 𑀧𑀮𑀺𑀩𑁄𑀥𑁄𑀧𑀺, 𑀙𑀺𑀦𑁆𑀤𑀺𑀢𑀩𑁆𑀩𑁄 𑀧𑀦𑀢𑁆𑀣𑀺 𑀘𑁂;

𑀤𑀻𑀖𑀸 𑀓𑁂𑀲𑀸 𑀦𑀔𑀸 𑀮𑁄𑀫𑀸, 𑀙𑀺𑀦𑁆𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁮𑁪𑁧.

𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀢𑀁, 𑀓𑀺𑀮𑀺𑀝𑁆𑀞𑀁 𑀢𑀼 𑀲𑀘𑁂 𑀲𑀺𑀬𑀸;

𑀲𑀘𑁂 𑀧𑀢𑁆𑀢𑁂 𑀫𑀮𑀁 𑀳𑁄𑀢𑀺, 𑀧𑀘𑀺𑀢𑀩𑁆𑀩𑁄𑀯 𑀲𑀼𑀝𑁆𑀞𑀼 𑀲𑁄.

𑁮𑁪𑁨.

𑀅𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 ¶ , 𑀧𑀘𑁆𑀙𑀸 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸;

𑀧𑀯𑀺𑀯𑀺𑀢𑁆𑀢𑁂 𑀧𑀦𑁄𑀓𑀸𑀲𑁂, 𑀯𑀲𑀦𑁆𑀢𑁂𑀦 𑀬𑀣𑀸𑀲𑀼𑀔𑀁.

𑁮𑁪𑁩.

𑀯𑀚𑁆𑀚𑁂𑀢𑁆𑀯𑀸 𑀫𑀢𑁆𑀢𑀺𑀓𑀁 𑀦𑀻𑀮𑀁, 𑀧𑀻𑀢𑀁 𑀲𑁂𑀢𑀜𑁆𑀘 𑀮𑁄𑀳𑀺𑀢𑀁;

𑀲𑀡𑁆𑀳𑀸𑀬𑀸𑀭𑀼𑀡𑀯𑀡𑁆𑀡𑀸𑀬, 𑀫𑀢𑁆𑀢𑀺𑀓𑀸𑀬 𑀫𑀦𑁄𑀭𑀫𑀁.

𑁮𑁪𑁪.

𑀓𑀢𑁆𑀢𑀩𑁆𑀩𑀁 𑀓𑀲𑀺𑀡𑀚𑁆𑀛𑀸𑀦𑀁, 𑀧𑀢𑁆𑀢𑀼𑀓𑀸𑀫𑁂𑀦 𑀥𑀻𑀫𑀢𑀸;

𑀲𑁂𑀦𑀸𑀲𑀦𑁂 𑀯𑀺𑀯𑀺𑀢𑁆𑀢𑀲𑁆𑀫𑀺𑀁, 𑀩𑀳𑀺𑀤𑁆𑀥𑀸 𑀯𑀸𑀧𑀺 𑀢𑀸𑀤𑀺𑀲𑁂.

𑁮𑁪𑁫.

𑀧𑀝𑀺𑀘𑁆𑀙𑀦𑁆𑀦𑁂 𑀧𑀦𑀝𑁆𑀞𑀸𑀦𑁂, 𑀧𑀩𑁆𑀪𑀸𑀭𑁂 𑀯𑀸 𑀕𑀼𑀳𑀦𑁆𑀢𑀭𑁂;

𑀲𑀁𑀳𑀸𑀭𑀺𑀫𑀁 𑀯𑀸 𑀓𑀸𑀢𑀩𑁆𑀩𑀁, 𑀢𑀁 𑀢𑀢𑁆𑀭𑀝𑁆𑀞𑀓𑀫𑁂𑀯 𑀯𑀸.

𑁮𑁪𑁬.

𑀲𑀁𑀳𑀸𑀭𑀺𑀫𑀁 𑀓𑀭𑁄𑀦𑁆𑀢𑁂𑀦, 𑀤𑀡𑁆𑀟𑀓𑁂𑀲𑀼 𑀘𑀢𑀽𑀲𑁆𑀯𑀧𑀺;

𑀘𑀫𑁆𑀫𑀁 𑀯𑀸 𑀓𑀝𑀲𑀸𑀭𑀁 𑀯𑀸, 𑀤𑀼𑀲𑁆𑀲𑀧𑀢𑁆𑀢𑀫𑁆𑀧𑀺 𑀯𑀸 𑀢𑀣𑀸.

𑁮𑁪𑁭.

𑀩𑀦𑁆𑀥𑀺𑀢𑁆𑀯𑀸 𑀢𑀣𑀸 𑀓𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸𑀬 𑀧𑀫𑀸𑀡𑀢𑁄;

𑀪𑀽𑀫𑀺𑀬𑀁 𑀧𑀢𑁆𑀣𑀭𑀺𑀢𑁆𑀯𑀸 𑀘, 𑀑𑀮𑁄𑀓𑁂𑀢𑀩𑁆𑀩𑀫𑁂𑀯 𑀢𑀁.

𑁮𑁪𑁮.

𑀢𑀢𑁆𑀭𑀝𑁆𑀞𑀁 𑀪𑀽𑀫𑀺𑀬𑀁 𑀯𑀝𑁆𑀝𑀁, 𑀆𑀓𑁄𑀝𑀺𑀢𑁆𑀯𑀸𑀦 𑀔𑀸𑀡𑀼𑀓𑁂;

𑀯𑀮𑁆𑀮𑀻𑀳𑀺 𑀢𑀁 𑀯𑀺𑀦𑀦𑁆𑀥𑀺𑀢𑁆𑀯𑀸, 𑀓𑀸𑀢𑀩𑁆𑀩𑀁 𑀓𑀡𑁆𑀡𑀺𑀓𑀁 𑀲𑀫𑀁.

𑁮𑁪𑁯.

𑀯𑀺𑀢𑁆𑀣𑀸𑀭𑀢𑁄 ¶ 𑀧𑀫𑀸𑀡𑁂𑀦, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁;

𑀯𑀝𑁆𑀝𑀁 𑀯𑀢𑁆𑀢𑀢𑀺 𑀢𑀁 𑀓𑀸𑀢𑀼𑀁, 𑀯𑀺𑀯𑀝𑁆𑀝𑀁 𑀧𑀦 𑀫𑀺𑀘𑁆𑀙𑀢𑀸.

𑁮𑁫𑁦.

𑀪𑁂𑀭𑀻𑀢𑀮𑀲𑀫𑀁 𑀲𑀸𑀥𑀼, 𑀓𑀢𑁆𑀯𑀸 𑀓𑀲𑀺𑀡𑀫𑀡𑁆𑀟𑀮𑀁;

𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀞𑀸𑀦𑀁, 𑀦𑁆𑀳𑀢𑁆𑀯𑀸 𑀆𑀕𑀫𑁆𑀫 𑀧𑀡𑁆𑀟𑀺𑀢𑁄.

𑁮𑁫𑁧.

𑀳𑀢𑁆𑀣𑀧𑀸𑀲𑀧𑀫𑀸𑀡𑀲𑁆𑀫𑀺𑀁, 𑀢𑀫𑁆𑀳𑀸 𑀓𑀲𑀺𑀡𑀫𑀡𑁆𑀟𑀮𑀸;

𑀧𑀤𑁂𑀲𑁂 𑀢𑀼 𑀲𑀼𑀧𑀜𑁆𑀜𑀢𑁆𑀢𑁂, 𑀆𑀲𑀦𑀲𑁆𑀫𑀺𑀁 𑀲𑀼𑀅𑀢𑁆𑀣𑀢𑁂.

𑁮𑁫𑁨.

𑀉𑀘𑁆𑀘𑁂 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑁂;

𑀉𑀚𑀼𑀓𑀸𑀬𑀁 𑀧𑀡𑀺𑀥𑀸𑀬, 𑀓𑀢𑁆𑀯𑀸 𑀧𑀭𑀺𑀫𑀼𑀔𑀁 𑀲𑀢𑀺𑀁.

𑁮𑁫𑁩.

𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀧𑀭𑀫𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀚𑀦𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑁂.

𑁮𑁫𑁪.

‘‘𑀪𑀸𑀕𑀻 ¶ 𑀅𑀲𑁆𑀲𑀫𑀳𑀁 𑀅𑀤𑁆𑀥𑀸, 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸;

𑀧𑀯𑀺𑀯𑁂𑀓𑀲𑀼𑀔𑀲𑁆𑀲𑀸’’𑀢𑀺, 𑀓𑀢𑁆𑀯𑀸 𑀉𑀲𑁆𑀲𑀸𑀳𑀫𑀼𑀢𑁆𑀢𑀫𑀁.

𑁮𑁫𑁫.

𑀆𑀓𑀸𑀭𑁂𑀦 ¶ 𑀲𑀫𑁂𑀦𑁂𑀯, 𑀉𑀫𑁆𑀫𑀻𑀮𑀺𑀢𑁆𑀯𑀸𑀦 𑀮𑁄𑀘𑀦𑀁;

𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀢𑀸 𑀲𑀸𑀥𑀼, 𑀪𑀸𑀯𑁂𑀢𑀩𑁆𑀩𑀁 𑀧𑀼𑀦𑀧𑁆𑀧𑀼𑀦𑀁.

𑁮𑁫𑁬.

𑀦 𑀯𑀡𑁆𑀡𑁄 𑀧𑁂𑀓𑁆𑀔𑀺𑀢𑀩𑁆𑀩𑁄 𑀲𑁄, 𑀤𑀝𑁆𑀞𑀩𑁆𑀩𑀁 𑀦 𑀘 𑀮𑀓𑁆𑀔𑀡𑀁;

𑀯𑀡𑁆𑀡𑀁 𑀧𑀦 𑀅𑀫𑀼𑀜𑁆𑀘𑀺𑀢𑁆𑀯𑀸, 𑀉𑀲𑁆𑀲𑀤𑀲𑁆𑀲 𑀯𑀲𑁂𑀦 𑀳𑀺.

𑁮𑁫𑁭.

𑀘𑀺𑀢𑁆𑀢𑀁 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑀲𑁆𑀫𑀺𑀁, 𑀞𑀧𑁂𑀢𑁆𑀯𑁂𑀓𑀕𑁆𑀕𑀫𑀸𑀦𑀲𑁄;

‘‘𑀧𑀣𑀯𑀻 𑀧𑀣𑀯𑀺’’𑀘𑁆𑀘𑁂𑀯𑀁, 𑀯𑀢𑁆𑀯𑀸 𑀪𑀸𑀯𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁮𑁫𑁮.

𑀧𑀣𑀯𑀻 𑀫𑁂𑀤𑀦𑀻 𑀪𑀽𑀫𑀺, 𑀯𑀲𑀼𑀥𑀸 𑀘 𑀯𑀲𑀼𑀦𑁆𑀥𑀭𑀸;

𑀏𑀯𑀁 𑀧𑀣𑀯𑀺𑀦𑀸𑀫𑁂𑀲𑀼, 𑀏𑀓𑀁 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑁮𑁫𑁯.

𑀉𑀫𑁆𑀫𑀻𑀮𑀺𑀢𑁆𑀯𑀸 𑀦𑀺𑀫𑀻𑀮𑀺𑀢𑁆𑀯𑀸, 𑀆𑀯𑀚𑁆𑀚𑁂𑀬𑁆𑀬 𑀧𑀼𑀦𑀧𑁆𑀧𑀼𑀦𑀁;

𑀬𑀸𑀯𑀼𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀢𑀼, 𑀦𑀼𑀧𑁆𑀧𑀚𑁆𑀚𑀢𑀺 𑀘 𑀢𑀸𑀯 𑀲𑁄.

𑁮𑁬𑁦.

𑀏𑀯𑀁 𑀪𑀸𑀯𑀬𑀢𑁄 𑀢𑀲𑁆𑀲, 𑀧𑀼𑀦 𑀏𑀓𑀕𑁆𑀕𑀘𑁂𑀢𑀲𑁄;

𑀬𑀤𑀸 𑀧𑀦 𑀦𑀺𑀫𑀻𑀮𑁂𑀢𑁆𑀯𑀸, 𑀆𑀯𑀚𑁆𑀚𑀦𑁆𑀢𑀲𑁆𑀲 𑀬𑁄𑀕𑀺𑀦𑁄.

𑁮𑁬𑁧.

𑀬𑀣𑀸 𑀉𑀫𑁆𑀫𑀻𑀮𑀺𑀢𑁂𑀓𑀸𑀮𑁂, 𑀢𑀣𑀸𑀧𑀸𑀣𑀁 𑀢𑀼 𑀬𑀸𑀢𑀺 𑀘𑁂;

𑀢𑀤𑀼𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀢-𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁮𑁬𑁨.

𑀦𑀺𑀫𑀺𑀢𑁆𑀢𑁂 ¶ 𑀧𑀦 𑀲𑀜𑁆𑀚𑀸𑀢𑁂, 𑀢𑀢𑁄 𑀧𑀪𑀼𑀢𑀺 𑀬𑁄𑀕𑀺𑀦𑀸;

𑀦𑀺𑀲𑀻𑀤𑀺𑀢𑀩𑁆𑀩𑀁 𑀦𑁄 𑀘𑁂𑀯𑀁, 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀺𑀚𑀸𑀦𑀢𑀸.

𑁮𑁬𑁩.

𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁, 𑀧𑀯𑀺𑀲𑀺𑀢𑁆𑀯𑀸𑀦 𑀥𑀻𑀫𑀢𑀸;

𑀢𑁂𑀦 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀦, 𑀪𑀸𑀯𑁂𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑁮𑁬𑁪.

𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁, 𑀧𑀸𑀤𑀸𑀦𑀁 𑀧𑀦 𑀥𑁄𑀯𑀦𑁂;

𑀢𑀲𑁆𑀲𑁂𑀓𑀢𑀮𑀺𑀓𑀸 𑀤𑁆𑀯𑁂 𑀘, 𑀇𑀘𑁆𑀙𑀺𑀢𑀩𑁆𑀩𑀸 𑀉𑀧𑀸𑀳𑀦𑀸.

𑁮𑁬𑁫.

𑀲𑀫𑀸𑀥𑀺𑀢𑀭𑀼𑀡𑁄 𑀢𑀲𑁆𑀲, 𑀅𑀲𑀧𑁆𑀧𑀸𑀬𑁂𑀦 𑀓𑁂𑀦𑀘𑀺;

𑀲𑀘𑁂 𑀦𑀲𑁆𑀲𑀢𑀺 𑀢𑀁 𑀞𑀸𑀦𑀁, 𑀕𑀦𑁆𑀢𑁆𑀯𑀸𑀯𑀸𑀤𑀸𑀬 𑀢𑀁 𑀧𑀦.

𑁮𑁬𑁬.

𑀧𑀻𑀞𑁂 ¶ 𑀲𑀼𑀔𑀦𑀺𑀲𑀺𑀦𑁆𑀦𑁂𑀦, 𑀪𑀸𑀯𑁂𑀢𑀩𑁆𑀩𑀁 𑀧𑀼𑀦𑀧𑁆𑀧𑀼𑀦𑀁;

𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀜𑁆𑀘, 𑀓𑀭𑁂 𑀢𑀓𑁆𑀓𑀸𑀳𑀢𑀫𑁆𑀧𑀺 𑀘.

𑁮𑁬𑁭.

𑀦𑀺𑀫𑀺𑀢𑁆𑀢𑀁 𑀧𑀦 𑀢𑀁 𑀳𑀺𑀢𑁆𑀯𑀸, 𑀘𑀺𑀢𑁆𑀢𑀁 𑀥𑀸𑀯𑀢𑀺 𑀘𑁂 𑀩𑀳𑀺;

𑀦𑀺𑀯𑀸𑀭𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀞𑀧𑁂𑀢𑀩𑁆𑀩𑀁 𑀢𑀼 𑀫𑀸𑀦𑀲𑀁.

𑁮𑁬𑁮.

𑀬𑀢𑁆𑀣 𑀬𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀫𑀺𑀘𑁆𑀙𑀢𑀺 𑀢𑀧𑁄𑀥𑀦𑁄;

𑀢𑀢𑁆𑀣 𑀢𑀢𑁆𑀣 𑀤𑀺𑀯𑀸𑀭𑀢𑁆𑀢𑀺𑀁, 𑀢𑀲𑁆𑀲𑀼𑀧𑀝𑁆𑀞𑀸𑀢𑀺 𑀘𑁂𑀢𑀲𑁄.

𑁮𑁬𑁯.

𑀏𑀯𑀁 𑀢𑀲𑁆𑀲 𑀓𑀭𑁄𑀦𑁆𑀢𑀲𑁆𑀲, 𑀅𑀦𑀼𑀧𑀼𑀩𑁆𑀩𑁂𑀦 𑀬𑁄𑀕𑀺𑀦𑁄;

𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀘 𑀲𑀩𑁆𑀩𑀸𑀦𑀺, 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺𑀧𑀺.

𑁮𑁭𑁦.

𑀲𑀫𑀸𑀥𑀺𑀬𑀢𑀺 𑀘𑀺𑀢𑁆𑀢𑀫𑁆𑀧𑀺, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸;

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺, 𑀉𑀧𑁆𑀧𑀚𑁆𑀚𑀢𑀺 𑀘 𑀬𑁄𑀕𑀺𑀦𑁄.

𑁮𑁭𑁧.

𑀓𑁄 𑀧𑀦𑀸𑀬𑀁 𑀯𑀺𑀲𑁂𑀲𑁄 𑀳𑀺, 𑀇𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀯𑀸;

𑀣𑀯𑀺𑀓𑀸 𑀦𑀻𑀳𑀢𑀸𑀤𑀸𑀲-𑀫𑀡𑁆𑀟𑀮𑀁 𑀯𑀺𑀬 𑀫𑀚𑁆𑀚𑀺𑀢𑀁.

𑁮𑁭𑁨.

𑀫𑁂𑀖𑀢𑁄 𑀯𑀺𑀬 𑀦𑀺𑀓𑁆𑀔𑀦𑁆𑀢𑀁, 𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁;

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀢𑀁, 𑀩𑀮𑀸𑀓𑀸 𑀯𑀺𑀬 𑀢𑁄𑀬𑀤𑁂.

𑁮𑁭𑁩.

𑀢𑀤𑀼𑀕𑁆𑀕𑀳𑀦𑀺𑀫𑀺𑀢𑁆𑀢𑀁 ¶ 𑀢𑀁, 𑀧𑀤𑀸𑀮𑁂𑀢𑁆𑀯𑀸𑀯 𑀦𑀺𑀕𑁆𑀕𑀢𑀁;

𑀢𑀢𑁄𑀥𑀺𑀓𑀢𑀭𑀁 𑀲𑀼𑀤𑁆𑀥𑀁, 𑀳𑀼𑀢𑁆𑀯𑀸𑀧𑀝𑁆𑀞𑀸𑀢𑀺 𑀢𑀲𑁆𑀲 𑀢𑀁.

𑁮𑁭𑁪.

𑀢𑀦𑀼𑀲𑀡𑁆𑀞𑀸𑀦𑀯𑀦𑁆𑀢𑀜𑁆𑀘, 𑀯𑀡𑁆𑀡𑀯𑀦𑁆𑀢𑀁 𑀦 𑀘𑁂𑀯 𑀢𑀁;

𑀉𑀧𑀝𑁆𑀞𑀸𑀓𑀸𑀭𑀫𑀢𑁆𑀢𑀁 𑀢𑀁, 𑀧𑀜𑁆𑀜𑀚𑀁 𑀪𑀸𑀯𑀦𑀸𑀫𑀬𑀁.

𑁮𑁭𑁫.

𑀧𑀝𑀺𑀪𑀸𑀕𑁂 ¶ 𑀲𑀫𑀼𑀧𑁆𑀧𑀦𑁆𑀦𑁂, 𑀦𑀺𑀫𑀺𑀢𑁆𑀢𑁂 𑀪𑀸𑀯𑀦𑀸𑀫𑀬𑁂;

𑀳𑁄𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯, 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺𑀧𑀺.

𑁮𑁭𑁬.

𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁𑀬𑁂𑀯, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸.

𑁮𑁭𑁭.

𑀆𑀓𑀸𑀭𑁂𑀳𑀺 𑀧𑀦 𑀤𑁆𑀯𑀻𑀳𑀺, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁;

𑀉𑀧𑀘𑀸𑀭𑀓𑁆𑀔𑀡𑁂 𑀢𑀲𑁆𑀲, 𑀧𑀝𑀺𑀮𑀸𑀪𑁂 𑀲𑀫𑀸𑀥𑀺𑀦𑁄.

𑁮𑁭𑁮.

𑀦𑀻𑀯𑀸𑀭𑀡𑀧𑁆𑀧𑀳𑀸𑀦𑁂𑀦 ¶ , 𑀉𑀧𑀘𑀸𑀭𑀓𑁆𑀔𑀡𑁂 𑀢𑀣𑀸;

𑀅𑀗𑁆𑀕𑀸𑀦𑀁 𑀧𑀸𑀢𑀼𑀪𑀸𑀯𑁂𑀦, 𑀧𑀝𑀺𑀮𑀸𑀪𑀓𑁆𑀔𑀡𑁂 𑀧𑀦.

𑁮𑁭𑁯.

𑀤𑁆𑀯𑀺𑀦𑁆𑀦𑀁 𑀧𑀦 𑀲𑀫𑀸𑀥𑀻𑀦𑀁, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀧𑀦;

𑀅𑀗𑁆𑀕𑀸𑀦𑀺 𑀣𑀸𑀫𑀚𑀸𑀢𑀸𑀦𑀺, 𑀉𑀧𑀘𑀸𑀭𑀓𑁆𑀔𑀡𑁂𑀦 𑀘.

𑁮𑁮𑁦.

𑀅𑀧𑁆𑀧𑀦𑀸𑀬 𑀧𑀦𑀗𑁆𑀕𑀸𑀦𑀺, 𑀣𑀸𑀫𑀚𑀸𑀢𑀸𑀦𑀺 𑀚𑀸𑀬𑀭𑁂;

𑀢𑀲𑁆𑀫𑀸 𑀢𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁, 𑀤𑀺𑀯𑀲𑀫𑁆𑀧𑀺 𑀧𑀯𑀢𑁆𑀢𑀢𑀺.

𑁮𑁮𑁧.

𑀧𑀮𑁆𑀮𑀗𑁆𑀓𑁂𑀦 𑀘 𑀢𑁂𑀦𑁂𑀯, 𑀯𑀟𑁆𑀠𑁂𑀢𑁆𑀯𑀸 𑀢𑀁 𑀦𑀺𑀫𑀺𑀢𑁆𑀢𑀓𑀁;

𑀅𑀧𑁆𑀧𑀦𑀁 𑀅𑀥𑀺𑀕𑀦𑁆𑀢𑀼𑀁 𑀲𑁄, 𑀲𑀓𑁆𑀓𑁄𑀢𑀺 𑀬𑀤𑀺 𑀲𑀼𑀦𑁆𑀤𑀭𑀁.

𑁮𑁮𑁨.

𑀦𑁄 𑀘𑁂 𑀲𑀓𑁆𑀓𑁄𑀢𑀺 𑀲𑁄 𑀢𑁂𑀦,

𑀢𑀁 𑀦𑀺𑀫𑀺𑀢𑁆𑀢𑀁 𑀢𑀼 𑀬𑁄𑀕𑀺𑀦𑀸;

𑀘𑀓𑁆𑀓𑀯𑀢𑁆𑀢𑀺𑀬 𑀕𑀩𑁆𑀪𑁄𑀯,

𑀭𑀢𑀦𑀁 𑀯𑀺𑀬 𑀤𑀼𑀮𑁆𑀮𑀪𑀁.

𑁮𑁮𑁩.

𑀲𑀢𑀢𑀁 𑀅𑀧𑁆𑀧𑀫𑀢𑁆𑀢𑁂𑀦, 𑀭𑀓𑁆𑀔𑀺𑀢𑀩𑁆𑀩𑀁 𑀲𑀢𑀻𑀫𑀢𑀸;

𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀢𑁄 𑀮𑀤𑁆𑀥𑀁, 𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀺.

𑁮𑁮𑁪.

𑀆𑀭𑀓𑁆𑀔𑀡𑁂 𑀅𑀲𑀦𑁆𑀢𑀫𑁆𑀳𑀺, 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀲𑁆𑀲𑀢𑀺;

𑀭𑀓𑁆𑀔𑀺𑀢𑀩𑁆𑀩𑀁 𑀳𑀺 𑀢𑀲𑁆𑀫𑀸 𑀢𑀁, 𑀢𑀢𑁆𑀭𑀸𑀬𑀁 𑀭𑀓𑁆𑀔𑀡𑀸𑀯𑀺𑀥𑀺.

𑁮𑁮𑁫.

𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼;

𑀇𑀭𑀺𑀬𑀸𑀧𑀣𑁄𑀢𑀺 𑀲𑀢𑁆𑀢𑁂𑀢𑁂, 𑀅𑀲𑀧𑁆𑀧𑀸𑀬𑁂 𑀯𑀺𑀯𑀚𑁆𑀚𑀬𑁂.

𑁮𑁮𑁬.

𑀲𑀧𑁆𑀧𑀸𑀬𑁂 ¶ 𑀲𑀢𑁆𑀢 𑀲𑁂𑀯𑁂𑀬𑁆𑀬, 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀳𑁄𑀢𑀺 𑀪𑀺𑀓𑁆𑀔𑀼𑀲𑁆𑀲 𑀅𑀧𑁆𑀧𑀦𑀸.

𑁮𑁮𑁭.

𑀬𑀲𑁆𑀲𑀧𑁆𑀧𑀦𑀸 𑀦 𑀳𑁄𑀢𑁂𑀯, 𑀏𑀯𑀫𑁆𑀧𑀺 𑀧𑀝𑀺𑀧𑀚𑁆𑀚𑀢𑁄;

𑀅𑀧𑁆𑀧𑀦𑀸𑀬 𑀘 𑀓𑁄𑀲𑀮𑁆𑀮𑀁, 𑀲𑀫𑁆𑀫𑀸 𑀲𑀫𑁆𑀧𑀸𑀤𑀬𑁂 𑀩𑀼𑀥𑁄.

𑁮𑁮𑁮.

𑀅𑀧𑁆𑀧𑀦𑀸𑀬 𑀳𑀺 𑀓𑁄𑀲𑀮𑁆𑀮-𑀫𑀺𑀤𑀁 𑀤𑀲𑀯𑀺𑀥𑀁 𑀇𑀥;

𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀻𑀢𑁂𑀦, 𑀫𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀘.

𑁮𑁮𑁯.

𑀏𑀯𑀜𑁆𑀳𑀺 ¶ 𑀲𑀫𑁆𑀧𑀸𑀤𑀬𑀢𑁄, 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀧𑀦;

𑀧𑀝𑀺𑀮𑀤𑁆𑀥𑁂 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀅𑀧𑁆𑀧𑀦𑀸 𑀲𑀫𑁆𑀧𑀯𑀢𑁆𑀢𑀢𑀺.

𑁮𑁯𑁦.

𑀏𑀯𑀫𑁆𑀧𑀺 𑀧𑀝𑀺𑀧𑀦𑁆𑀦𑀲𑁆𑀲, 𑀲𑀘𑁂 𑀲𑀸 𑀦𑀧𑁆𑀧𑀯𑀢𑁆𑀢𑀢𑀺;

𑀢𑀣𑀸𑀧𑀺 𑀦 𑀚𑀳𑁂 𑀬𑁄𑀕𑀁, 𑀯𑀸𑀬𑀫𑁂𑀣𑁂𑀯 𑀧𑀡𑁆𑀟𑀺𑀢𑁄.

𑁮𑁯𑁧.

𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁 ¶ , 𑀢𑀲𑁆𑀫𑀸 𑀲𑀮𑁆𑀮𑀓𑁆𑀔𑀬𑀁 𑀩𑀼𑀥𑁄;

𑀲𑀫𑀢𑀁 𑀯𑀻𑀭𑀺𑀬𑀲𑁆𑀲𑁂𑀯, 𑀬𑁄𑀚𑀬𑁂𑀣 𑀧𑀼𑀦𑀧𑁆𑀧𑀼𑀦𑀁.

𑁮𑁯𑁨.

𑀈𑀲𑀓𑀫𑁆𑀧𑀺 𑀮𑀬𑀁 𑀬𑀦𑁆𑀢𑀁, 𑀧𑀕𑁆𑀕𑀡𑁆𑀳𑁂𑀣𑁂𑀯 𑀫𑀸𑀦𑀲𑀁;

𑀅𑀘𑁆𑀘𑀸𑀭𑀤𑁆𑀥𑀁 𑀦𑀺𑀲𑁂𑀥𑁂𑀢𑁆𑀯𑀸, 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂.

𑁮𑁯𑁩.

𑀮𑀻𑀦𑀢𑀼𑀤𑁆𑀥𑀢𑀪𑀸𑀯𑁂𑀳𑀺, 𑀫𑁄𑀘𑀬𑀺𑀢𑁆𑀯𑀸𑀦 𑀫𑀸𑀦𑀲𑀁;

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀪𑀺-𑀫𑀼𑀔𑀁 𑀢𑀁 𑀧𑀝𑀺𑀧𑀸𑀤𑀬𑁂.

𑁮𑁯𑁪.

𑀏𑀯𑀁 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁, 𑀧𑀝𑀺𑀧𑀸𑀤𑀬𑀢𑁄 𑀧𑀦;

𑀇𑀤𑀸𑀦𑁂𑀯𑀧𑁆𑀧𑀦𑀸 𑀢𑀲𑁆𑀲, 𑀲𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀘.

𑁮𑁯𑁫.

𑀪𑀯𑀗𑁆𑀕𑀁 𑀧𑀦 𑀧𑀘𑁆𑀙𑀺𑀚𑁆𑀚, 𑀧𑀣𑀯𑀻𑀓𑀲𑀺𑀡𑀁 𑀢𑀣𑀸;

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀬𑁄𑀕𑀺𑀦𑁄.

𑁮𑁯𑁬.

𑀚𑀸𑀬𑀢𑁂𑀯𑀚𑁆𑀚𑀦𑀁 𑀘𑀺𑀢𑁆𑀢𑀁, 𑀢𑀢𑁆𑀭𑁂𑀯𑀸𑀭𑀫𑁆𑀫𑀡𑁂 𑀢𑀢𑁄;

𑀚𑀯𑀦𑀸𑀦𑀺 𑀘 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁮𑁯𑁭.

𑀅𑀯𑀲𑀸𑀦𑁂 𑀧𑀦𑁂𑀓𑀁 𑀢𑀼, 𑀭𑀽𑀧𑀸𑀯𑀘𑀭𑀺𑀓𑀁 𑀪𑀯𑁂;

𑀢𑀓𑁆𑀓𑀸𑀤𑀬𑁄 𑀧𑀦𑀜𑁆𑀜𑁂𑀳𑀺, 𑀪𑀯𑀦𑁆𑀢𑀺 𑀩𑀮𑀯𑀢𑁆𑀢𑀭𑀸.

𑁮𑁯𑁮.

𑀅𑀧𑁆𑀧𑀦𑀸𑀘𑁂𑀢𑀲𑁄 𑀢𑀸𑀦𑀺, 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀢𑁄;

𑀯𑀼𑀘𑁆𑀘𑀦𑁆𑀢𑀺 𑀧𑀭𑀺𑀓𑀫𑁆𑀫𑀸𑀦𑀺, 𑀉𑀧𑀘𑀸𑀭𑀸𑀦𑀺 𑀘𑀸𑀢𑀺𑀧𑀺.

𑁮𑁯𑁯.

𑀅𑀧𑁆𑀧𑀦𑀸𑀬𑀸𑀦𑀼𑀮𑁄𑀫𑀢𑁆𑀢𑀸 ¶ , 𑀅𑀦𑀼𑀮𑁄𑀫𑀸𑀦𑀺 𑀏𑀯 𑀘;

𑀬𑀁 𑀢𑀁 𑀲𑀩𑁆𑀩𑀦𑁆𑀢𑀺𑀫𑀁 𑀏𑀢𑁆𑀣, 𑀕𑁄𑀢𑁆𑀭𑀪𑀽𑀢𑀺 𑀧𑀯𑀼𑀘𑁆𑀘𑀢𑀺.

𑁯𑁦𑁦.

𑀕𑀳𑀺𑀢𑀸𑀕𑀳𑀡𑁂𑀦𑁂𑀢𑁆𑀣, 𑀧𑀭𑀺𑀓𑀫𑁆𑀫𑀧𑁆𑀧𑀦𑀸𑀤𑀺𑀓𑀁;

𑀤𑀼𑀢𑀺𑀬𑀁 𑀉𑀧𑀘𑀸𑀭𑀁 𑀢𑀁, 𑀢𑀢𑀺𑀬𑀁 𑀅𑀦𑀼𑀮𑁄𑀫𑀓𑀁.

𑁯𑁦𑁧.

𑀘𑀢𑀼𑀢𑁆𑀣𑀁 ¶ 𑀕𑁄𑀢𑁆𑀭𑀪𑀼 𑀤𑀺𑀝𑁆𑀞𑀁, 𑀧𑀜𑁆𑀘𑀫𑀁 𑀅𑀧𑁆𑀧𑀦𑀸𑀫𑀦𑁄;

𑀧𑀞𑀫𑀁 𑀉𑀧𑀘𑀸𑀭𑀁 𑀯𑀸, 𑀤𑀼𑀢𑀺𑀬𑀁 𑀅𑀦𑀼𑀮𑁄𑀫𑀓𑀁.

𑁯𑁦𑁨.

𑀢𑀢𑀺𑀬𑀁 𑀕𑁄𑀢𑁆𑀭𑀪𑀼 𑀤𑀺𑀝𑁆𑀞𑀁, 𑀘𑀢𑀼𑀢𑁆𑀣𑀁 𑀅𑀧𑁆𑀧𑀦𑀸𑀫𑀦𑁄;

𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀢𑀺, 𑀅𑀧𑁆𑀧𑁂𑀢𑀺 𑀦 𑀢𑀢𑁄 𑀧𑀭𑀁.

𑁯𑁦𑁩.

𑀙𑀝𑁆𑀞𑁂 𑀯𑀸 𑀲𑀢𑁆𑀢𑀫𑁂 𑀯𑀸𑀧𑀺, 𑀅𑀧𑁆𑀧𑀦𑀸 𑀦𑁂𑀯 𑀚𑀸𑀬𑀢𑀺;

𑀆𑀲𑀦𑁆𑀦𑀢𑁆𑀢𑀸 𑀪𑀯𑀗𑁆𑀕𑀲𑁆𑀲, 𑀚𑀯𑀦𑀁 𑀧𑀢𑀺 𑀢𑀸𑀯𑀤𑁂.

𑁯𑁦𑁪.

𑀧𑀼𑀭𑀺𑀫𑁂𑀳𑀸𑀲𑁂𑀯𑀦𑀁 𑀮𑀤𑁆𑀥𑀸, 𑀙𑀝𑁆𑀞𑀁 𑀯𑀸 𑀲𑀢𑁆𑀢𑀫𑀫𑁆𑀧𑀺 𑀯𑀸;

𑀅𑀧𑁆𑀧𑁂𑀢𑀻𑀢𑀺 𑀧𑀦𑁂𑀢𑁆𑀣𑀸𑀳, 𑀕𑁄𑀤𑀢𑁆𑀢𑁄 𑀆𑀪𑀺𑀥𑀫𑁆𑀫𑀺𑀓𑁄.

𑁯𑁦𑁫.

𑀥𑀸𑀯𑀦𑁆𑀢𑁄 𑀳𑀺 𑀬𑀣𑀸 𑀓𑁄𑀘𑀺,

𑀦𑀭𑁄 𑀙𑀺𑀦𑁆𑀦𑀢𑀝𑀸𑀫𑀼𑀔𑁄;

𑀞𑀸𑀢𑀼𑀓𑀸𑀫𑁄 𑀧𑀭𑀺𑀬𑀦𑁆𑀢𑁂,

𑀞𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦𑁂𑀯 𑀲𑁄.

𑁯𑁦𑁬.

𑀏𑀯𑀫𑁂𑀯 𑀧𑀦𑀘𑁆𑀙𑀝𑁆𑀞𑁂, 𑀲𑀢𑁆𑀢𑀫𑁂 𑀯𑀸𑀧𑀺 𑀫𑀸𑀦𑀲𑁄;

𑀦 𑀲𑀓𑁆𑀓𑁄𑀢𑀻𑀢𑀺 𑀅𑀧𑁆𑀧𑁂𑀢𑀼𑀁, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁯𑁦𑁭.

𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑁂𑀯, 𑀳𑁄𑀢𑀸𑀬𑀁 𑀅𑀧𑁆𑀧𑀦𑀸 𑀧𑀦;

𑀢𑀢𑁄 𑀪𑀯𑀗𑁆𑀕𑀧𑀸𑀢𑁄𑀯, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁯𑁦𑁮.

𑀢𑀢𑁄 𑀪𑀯𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁;

𑀆𑀯𑀚𑁆𑀚𑀦𑀁 𑀢𑀢𑁄 𑀛𑀸𑀦-𑀧𑀘𑁆𑀘𑀯𑁂𑀓𑁆𑀔𑀡𑀫𑀸𑀦𑀲𑀁.

𑁯𑁦𑁯.

𑀓𑀸𑀫𑀘𑁆𑀙𑀦𑁆𑀤𑁄 ¶ 𑀘 𑀩𑁆𑀬𑀸𑀧𑀸𑀤𑁄, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀉𑀤𑁆𑀥𑀢𑁄;

𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘, 𑀧𑀳𑀻𑀦𑀸 𑀧𑀜𑁆𑀘𑀺𑀫𑁂 𑀧𑀦.

𑁯𑁧𑁦.

𑀯𑀺𑀢𑀓𑁆𑀓𑁂𑀦 𑀯𑀺𑀘𑀸𑀭𑁂𑀦, 𑀧𑀻𑀢𑀺𑀬𑀸 𑀘 𑀲𑀼𑀔𑁂𑀦 𑀘;

𑀏𑀓𑀕𑁆𑀕𑀢𑀸𑀬 𑀲𑀁𑀬𑀼𑀢𑁆𑀢𑀁, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀇𑀤𑀁.

𑁯𑁧𑁧.

𑀦𑀸𑀦𑀸𑀯𑀺𑀲𑀬𑀮𑀼𑀤𑁆𑀥𑀲𑁆𑀲 ¶ , 𑀓𑀸𑀫𑀘𑁆𑀙𑀦𑁆𑀤𑀯𑀲𑀸 𑀧𑀦;

𑀇𑀢𑁄 𑀘𑀺𑀢𑁄 𑀪𑀫𑀦𑁆𑀢𑀲𑁆𑀲, 𑀯𑀦𑁂 𑀫𑀓𑁆𑀓𑀝𑀓𑁄 𑀯𑀺𑀬.

𑁯𑁧𑁨.

𑀏𑀓𑀲𑁆𑀫𑀺𑀁 ¶ 𑀯𑀺𑀲𑀬𑁂𑀬𑁂𑀯, 𑀲𑀫𑀸𑀥𑀸𑀦𑁂𑀯 𑀘𑁂𑀢𑀲𑁄;

‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀧𑀝𑀺𑀧𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺.

𑁯𑁧𑁩.

𑀧𑀸𑀫𑁄𑀚𑁆𑀚𑀪𑀸𑀯𑀢𑁄 𑀘𑁂𑀯, 𑀲𑀻𑀢𑀮𑀢𑁆𑀢𑀸 𑀲𑀪𑀸𑀯𑀢𑁄;

‘‘𑀩𑁆𑀬𑀸𑀧𑀸𑀤𑀲𑁆𑀲 𑀢𑀢𑁄 𑀧𑀻𑀢𑀺, 𑀧𑀝𑀺𑀧𑀓𑁆𑀔𑀸’’𑀢𑀺 𑀪𑀸𑀲𑀺𑀢𑀸.

𑁯𑁧𑁪.

𑀲𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁂𑀦, 𑀦𑁂𑀓𑁆𑀔𑀫𑁆𑀫𑀸𑀤𑀺𑀧𑀯𑀢𑁆𑀢𑀺𑀢𑁄;

‘‘𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀧𑀝𑀺𑀧𑀓𑁆𑀔𑁄’’𑀢𑀺 𑀯𑀡𑁆𑀡𑀺𑀢𑁄.

𑁯𑁧𑁫.

𑀅𑀯𑀽𑀧𑀲𑀦𑁆𑀢𑀪𑀸𑀯𑀲𑁆𑀲, 𑀲𑀬𑀜𑁆𑀘𑁂𑀯𑀸𑀢𑀺𑀲𑀦𑁆𑀢𑀢𑁄;

‘‘𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘-𑀤𑁆𑀯𑀬𑀲𑁆𑀲 𑀧𑀝𑀺𑀧𑀓𑁆𑀔𑀓𑀁’’.

𑁯𑁧𑁬.

𑀫𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸, ‘‘𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄;

𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬, 𑀧𑀝𑀺𑀧𑀓𑁆𑀔𑁄’’𑀢𑀺 𑀤𑀻𑀧𑀺𑀢𑁄.

𑁯𑁧𑁭.

𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀁 𑀢𑀁, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑀁;

𑀲𑀺𑀯𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀤𑀲𑀮𑀓𑁆𑀔𑀡𑀲𑀁𑀬𑀼𑀢𑀁.

𑁯𑁧𑁮.

𑀏𑀯𑀜𑁆𑀘𑀸𑀥𑀺𑀕𑀢𑀁 𑀳𑁄𑀢𑀺, 𑀧𑀞𑀫𑀁 𑀢𑁂𑀦 𑀬𑁄𑀕𑀺𑀦𑀸;

𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦, 𑀢𑀲𑁆𑀲 𑀛𑀸𑀦𑀲𑁆𑀲 𑀲𑀩𑁆𑀩𑀲𑁄.

𑁯𑁧𑁯.

𑀢𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀢𑀼, 𑀯𑀺𑀲𑁄𑀥𑁂𑀢𑁆𑀯𑀸𑀦 𑀧𑀸𑀧𑀓𑁂;

𑀢𑀁 𑀲𑀫𑀸𑀧𑀚𑁆𑀚𑀢𑁄 𑀢𑀲𑁆𑀲, 𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀁 𑀪𑀯𑁂.

𑁯𑁨𑁦.

𑀘𑀺𑀢𑁆𑀢𑀪𑀸𑀯𑀦𑀯𑁂𑀧𑀼𑀮𑁆𑀮𑀁, 𑀧𑀢𑁆𑀣𑀬𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀢𑀁, 𑀯𑀟𑁆𑀠𑁂𑀢𑀩𑁆𑀩𑀁 𑀬𑀣𑀸𑀓𑁆𑀓𑀫𑀁.

𑁯𑁨𑁧.

𑀯𑀟𑁆𑀠𑀦𑀸𑀪𑀽𑀫𑀺𑀬𑁄 𑀤𑁆𑀯𑁂 𑀘, 𑀉𑀧𑀘𑀸𑀭𑀜𑁆𑀘 𑀅𑀧𑁆𑀧𑀦𑀸;

𑀉𑀧𑀘𑀸𑀭𑀫𑁆𑀧𑀺 𑀯𑀸 𑀧𑀢𑁆𑀯𑀸, 𑀯𑀟𑁆𑀠𑁂𑀢𑀼𑀁 𑀢𑀜𑁆𑀘 𑀯𑀢𑁆𑀢𑀢𑀺.

𑁯𑁨𑁨.

𑀅𑀧𑁆𑀧𑀦𑀁 𑀧𑀦 𑀧𑀢𑁆𑀯𑀸 𑀯𑀸, 𑀢𑀢𑁆𑀭𑀸𑀬𑀁 𑀯𑀟𑁆𑀠𑀦𑀓𑁆𑀓𑀫𑁄;

𑀓𑀲𑀺𑀢𑀩𑁆𑀩𑀁 𑀬𑀣𑀸𑀞𑀸𑀦𑀁, 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀓𑀲𑁆𑀲𑀓𑁄.

𑁯𑁨𑁩.

𑀬𑁄𑀕𑀺𑀦𑀸 𑀏𑀯𑀫𑁂𑀯𑀫𑁆𑀧𑀺, 𑀅𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀤𑀺𑀦𑀸;

𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚, 𑀯𑀟𑁆𑀠𑁂𑀢𑀩𑁆𑀩𑀁 𑀬𑀣𑀺𑀘𑁆𑀙𑀓𑀁.

𑁯𑁨𑁪.

𑀧𑀢𑁆𑀢𑁂𑀧𑀺 ¶ ¶ 𑀧𑀞𑀫𑁂 𑀛𑀸𑀦𑁂, 𑀆𑀓𑀸𑀭𑁂𑀳𑀺𑀧𑀺 𑀧𑀜𑁆𑀘𑀳𑀺;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀢𑁂𑀦, 𑀪𑀯𑀺𑀢𑀩𑁆𑀩𑀁 𑀢𑀧𑀲𑁆𑀲𑀺𑀦𑀸.

𑁯𑁨𑁫.

𑀆𑀯𑀚𑁆𑀚𑀦𑀁 𑀲𑀫𑀸𑀧𑀢𑁆𑀢𑀺, 𑀅𑀥𑀺𑀝𑁆𑀞𑀸𑀦𑁂𑀲𑀼 𑀢𑀻𑀲𑀼 𑀘;

𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀸𑀲𑀼, 𑀯𑀲𑀺𑀢𑀸 𑀧𑀜𑁆𑀘 𑀪𑀸𑀲𑀺𑀢𑀸.

𑁯𑁨𑁬.

𑀆𑀯𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀺𑀢𑁆𑀯𑀸, 𑀲𑀫𑀸𑀧𑀚𑁆𑀚 𑀧𑀼𑀦𑀧𑁆𑀧𑀼𑀦𑀁;

𑀯𑀼𑀝𑁆𑀞𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀯𑀲𑀺𑀢𑀸 𑀧𑀜𑁆𑀘 𑀲𑀸𑀥𑀬𑁂.

𑁯𑁨𑁭.

𑀧𑀞𑀫𑁂 ¶ 𑀅𑀯𑀲𑀺𑀧𑀢𑁆𑀢𑁂, 𑀤𑀼𑀢𑀺𑀬𑀁 𑀬𑁄 𑀧𑀦𑀺𑀘𑁆𑀙𑀢𑀺;

𑀉𑀪𑀢𑁄 𑀪𑀝𑁆𑀞𑁄𑀪𑀯𑁂 𑀬𑁄𑀕𑀻, 𑀧𑀞𑀫𑀸 𑀤𑀼𑀢𑀺𑀬𑀸𑀧𑀺 𑀘.

𑁯𑁨𑁮.

𑀓𑀸𑀫𑀲𑁆𑀲𑀳𑀕𑀢𑀸 𑀲𑀜𑁆𑀜𑀸, 𑀫𑀦𑀓𑁆𑀓𑀸𑀭𑀸 𑀘𑀭𑀦𑁆𑀢𑀺 𑀘𑁂;

𑀧𑀫𑀸𑀤𑀬𑁄𑀕𑀺𑀦𑁄 𑀛𑀸𑀦𑀁, 𑀳𑁄𑀢𑀺 𑀢𑀁 𑀳𑀸𑀦𑀪𑀸𑀕𑀺𑀬𑀁.

𑁯𑁨𑁯.

𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑁂 𑀢𑀲𑁆𑀫𑀺𑀁, 𑀲𑀦𑁆𑀢𑀸 𑀢𑀤𑀦𑀼𑀥𑀫𑁆𑀫𑀢𑀸;

𑀫𑀦𑁆𑀤𑀲𑁆𑀲 𑀬𑁄𑀕𑀺𑀦𑁄 𑀛𑀸𑀦𑀁, 𑀳𑁄𑀢𑀺 𑀢𑀁 𑀞𑀺𑀢𑀺𑀪𑀸𑀕𑀺𑀬𑀁.

𑁯𑁩𑁦.

𑀅𑀢𑀓𑁆𑀓𑀲𑀳𑀺𑀢𑀸 𑀲𑀜𑁆𑀜𑀸, 𑀫𑀦𑀓𑁆𑀓𑀸𑀭𑀸 𑀘𑀭𑀦𑁆𑀢𑀺 𑀘𑁂;

𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑀁 𑀛𑀸𑀦𑀁, 𑀯𑀺𑀲𑁂𑀲𑀪𑀸𑀕𑀺𑀬𑀁 𑀲𑀺𑀬𑀸.

𑁯𑁩𑁧.

𑀦𑀺𑀩𑁆𑀩𑀺𑀤𑀸𑀲𑀁𑀬𑀼𑀢𑀸 𑀲𑀜𑁆𑀜𑀸, 𑀫𑀦𑀓𑁆𑀓𑀸𑀭𑀸 𑀘𑀭𑀦𑁆𑀢𑀺 𑀘𑁂;

𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀛𑀸𑀦𑀁, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁯𑁩𑁨.

𑀢𑀲𑁆𑀫𑀸 𑀧𑀜𑁆𑀘𑀲𑀼 𑀏𑀢𑁂𑀲𑀼, 𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀧𑀦;

𑀧𑀞𑀫𑀸 𑀧𑀕𑀼𑀡𑀢𑁄 𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀯𑀺𑀥𑀺𑀦𑀸 𑀢𑀢𑁄.

𑁯𑁩𑁩.

𑀬𑀲𑁆𑀫𑀸 𑀅𑀬𑀁 𑀲𑀫𑀸𑀧𑀢𑁆𑀢𑀺, 𑀆𑀲𑀦𑁆𑀦𑀸𑀓𑀼𑀲𑀮𑀸𑀭𑀺𑀓𑀸;

𑀣𑀽𑀮𑀢𑁆𑀢𑀸 𑀢𑀓𑁆𑀓𑀘𑀸𑀭𑀸𑀦𑀁, 𑀢𑀢𑁄𑀬𑀁 𑀅𑀗𑁆𑀕𑀤𑀼𑀩𑁆𑀩𑀮𑀸.

𑁯𑁩𑁪.

𑀇𑀢𑀺 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀧𑀞𑀫𑁂 𑀧𑀦 𑀬𑁄𑀕𑀺𑀦𑀸;

𑀤𑀼𑀢𑀺𑀬𑀁 𑀲𑀦𑁆𑀢𑀢𑁄 𑀛𑀸𑀦𑀁, 𑀘𑀺𑀦𑁆𑀢𑀬𑀺𑀢𑁆𑀯𑀸𑀦 𑀥𑀻𑀫𑀢𑀸.

𑁯𑁩𑁫.

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀛𑀸𑀦𑀲𑁆𑀫𑀺𑀁 𑀧𑀞𑀫𑁂 𑀧𑀼𑀦;

𑀤𑀼𑀢𑀺𑀬𑀸𑀥𑀺𑀕𑀫𑀢𑁆𑀣𑀸𑀬, 𑀓𑀸𑀢𑀩𑁆𑀩𑁄 𑀪𑀸𑀯𑀦𑀓𑁆𑀓𑀫𑁄.

𑁯𑁩𑁬.

𑀅𑀣𑀲𑁆𑀲 ¶ 𑀧𑀞𑀫𑀚𑁆𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀯𑀺𑀥𑀺𑀦𑀸 𑀬𑀤𑀸;

𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲, 𑀛𑀸𑀦𑀗𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄.

𑁯𑁩𑁭.

𑀣𑀽𑀮𑀢𑁄 ¶ 𑀢𑀓𑁆𑀓𑀘𑀸𑀭𑀸 𑀳𑀺, 𑀉𑀧𑀢𑀺𑀝𑁆𑀞𑀦𑁆𑀢𑀺 𑀬𑁄𑀕𑀺𑀦𑁄;

𑀲𑁂𑀲𑀫𑀗𑁆𑀕𑀢𑁆𑀢𑀬𑀁 𑀢𑀲𑁆𑀲, 𑀲𑀦𑁆𑀢𑀫𑁂𑀯𑁄𑀧𑀢𑀺𑀝𑁆𑀞𑀢𑀺.

𑁯𑁩𑁮.

𑀣𑀽𑀮𑀗𑁆𑀕𑀸𑀦𑀁 𑀧𑀳𑀸𑀦𑀸𑀬, 𑀢𑀤𑀸 𑀢𑀲𑁆𑀲 𑀘 𑀬𑁄𑀕𑀺𑀦𑁄;

𑀲𑀦𑁆𑀢𑀗𑁆𑀕𑀧𑀝𑀺𑀮𑀸𑀪𑀸𑀬, 𑀦𑀺𑀫𑀺𑀢𑁆𑀢𑀁 𑀢𑀼 𑀢𑀤𑁂𑀯 𑀘.

𑁯𑁩𑁯.

‘‘𑀧𑀣𑀯𑀻 𑀧𑀣𑀯𑀺’’𑀘𑁆𑀘𑁂𑀯𑀁, 𑀓𑀭𑁄𑀢𑁄 𑀫𑀦𑀲𑀸 𑀧𑀼𑀦;

𑀇𑀤𑀸𑀦𑀺 𑀤𑀼𑀢𑀺𑀬𑀚𑁆𑀛𑀸𑀦-𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀇𑀢𑀺.

𑁯𑁪𑁦.

𑀪𑀯𑀗𑁆𑀕𑀁 𑀧𑀦 𑀧𑀘𑁆𑀙𑀺𑀚𑁆𑀚, 𑀧𑀣𑀯𑀻𑀓𑀲𑀺𑀡𑀁 𑀧𑀦;

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀬𑁄𑀕𑀺𑀦𑁄.

𑁯𑁪𑁧.

𑀚𑀸𑀬𑀢𑀸𑀯𑀚𑁆𑀚𑀦𑀁 𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀢𑁄;

𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁯𑁪𑁨.

𑀅𑀯𑀲𑀸𑀦𑁂 𑀧𑀦𑁂𑀓𑀫𑁆𑀧𑀺, 𑀢𑁂𑀲𑀁 𑀚𑀯𑀦𑀘𑁂𑀢𑀲𑀁;

𑀭𑀽𑀧𑀸𑀯𑀘𑀭𑀺𑀓𑀁 𑀳𑁄𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑀫𑀸𑀦𑀲𑀁.

𑁯𑁪𑁩.

𑀲𑀫𑁆𑀧𑀲𑀸𑀤𑀦𑀫𑀚𑁆𑀛𑀢𑁆𑀢𑀁, 𑀧𑀻𑀢𑀺𑀬𑀸 𑀘 𑀲𑀼𑀔𑁂𑀦 𑀘;

𑀏𑀓𑀕𑁆𑀕𑀢𑀸𑀬 𑀲𑀁𑀬𑀼𑀢𑁆𑀢𑀁, 𑀛𑀸𑀦𑀁 𑀳𑁄𑀢𑀺 𑀢𑀺𑀯𑀗𑁆𑀕𑀺𑀓𑀁.

𑁯𑁪𑁪.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀲𑀫𑀼𑀧𑀮𑀓𑁆𑀔𑀬𑁂;

𑀏𑀯𑀁 𑀤𑀼𑀯𑀗𑁆𑀕𑀳𑀻𑀦𑀁 𑀢𑀼, 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀁𑀬𑀼𑀢𑀁.

𑁯𑁪𑁫.

𑀛𑀸𑀦𑀁 ¶ 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀤𑀲𑀮𑀓𑁆𑀔𑀡𑀲𑀁𑀬𑀼𑀢𑀁;

𑀤𑀼𑀢𑀺𑀬𑀸𑀥𑀺𑀕𑀢𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀸 𑀪𑀸𑀯𑀦𑀸𑀫𑀬𑀁.

𑁯𑁪𑁬.

𑀤𑀼𑀢𑀺𑀬𑀸𑀥𑀺𑀕𑀢𑁂 𑀛𑀸𑀦𑁂, 𑀆𑀓𑀸𑀭𑁂𑀳𑀺 𑀘 𑀧𑀜𑁆𑀘𑀳𑀺;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀤𑀼𑀢𑀺𑀬𑁂𑀧𑀺 𑀲𑀢𑀻𑀫𑀢𑀸.

𑁯𑁪𑁭.

𑀢𑀲𑁆𑀫𑀸 𑀧𑀕𑀼𑀡𑀢𑁄 𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀤𑀼𑀢𑀺𑀬𑀸 𑀧𑀼𑀦;

𑀆𑀲𑀦𑁆𑀦𑀢𑀓𑁆𑀓𑀘𑀸𑀭𑀸𑀭𑀺, 𑀲𑀫𑀸𑀧𑀢𑁆𑀢𑀺 𑀅𑀬𑀁 𑀇𑀢𑀺.

𑁯𑁪𑁮.

𑀧𑀻𑀢𑀺𑀬𑀸 ¶ 𑀧𑀺𑀬𑀢𑁄 𑀢𑀲𑁆𑀲, 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀧𑀦𑀁;

𑀧𑀻𑀢𑀺𑀬𑀸 𑀧𑀦 𑀣𑀽𑀮𑀢𑁆𑀢𑀸, 𑀢𑀢𑁄𑀬𑀁 𑀅𑀗𑁆𑀕𑀤𑀼𑀩𑁆𑀩𑀮𑀸.

𑁯𑁪𑁯.

𑀢𑀢𑁆𑀣 ¶ 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀢𑀢𑀺𑀬𑁂 𑀲𑀦𑁆𑀢𑀢𑁄 𑀧𑀦;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀛𑀸𑀦𑀲𑁆𑀫𑀺𑀁 𑀤𑀼𑀢𑀺𑀬𑁂 𑀧𑀼𑀦.

𑁯𑁫𑁦.

𑀢𑀢𑀺𑀬𑀸𑀥𑀺𑀕𑀫𑀢𑁆𑀣𑀸𑀬, 𑀓𑀸𑀢𑀩𑁆𑀩𑁄 𑀪𑀸𑀯𑀦𑀓𑁆𑀓𑀫𑁄;

𑀅𑀣𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀘 𑀬𑀤𑀸 𑀧𑀦.

𑁯𑁫𑁧.

𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲, 𑀛𑀸𑀦𑀗𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄;

𑀣𑀽𑀮𑀢𑁄 𑀧𑀻𑀢𑀼𑀧𑀝𑁆𑀞𑀸𑀢𑀺, 𑀲𑀼𑀔𑀸𑀤𑀺 𑀲𑀦𑁆𑀢𑀢𑁄 𑀧𑀦.

𑁯𑁫𑁨.

𑀣𑀽𑀮𑀗𑁆𑀕𑀸𑀦𑀁 𑀧𑀳𑀸𑀦𑀸𑀬, 𑀢𑀤𑀸 𑀢𑀲𑁆𑀲 𑀘 𑀬𑁄𑀕𑀺𑀦𑁄;

𑀲𑀦𑁆𑀢𑀗𑁆𑀕𑀧𑀝𑀺𑀮𑀸𑀪𑀸𑀬, 𑀦𑀺𑀫𑀺𑀢𑁆𑀢𑀁 𑀢𑀼 𑀢𑀤𑁂𑀯 𑀘.

𑁯𑁫𑁩.

‘‘𑀧𑀣𑀯𑀻 𑀧𑀣𑀯𑀺’’𑀘𑁆𑀘𑁂𑀯𑀁, 𑀓𑀭𑁄𑀢𑁄 𑀫𑀦𑀲𑀸 𑀧𑀼𑀦;

𑀇𑀤𑀸𑀦𑀺 𑀢𑀢𑀺𑀬𑀁 𑀛𑀸𑀦-𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀇𑀢𑀺.

𑁯𑁫𑁪.

𑀪𑀯𑀗𑁆𑀕𑀁 𑀫𑀦𑀼𑀧𑀘𑁆𑀙𑀺𑀚𑁆𑀚, 𑀧𑀣𑀯𑀻𑀓𑀲𑀺𑀡𑀁 𑀧𑀦;

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀬𑁄𑀕𑀺𑀦𑁄.

𑁯𑁫𑁫.

𑀚𑀸𑀬𑀢𑀸𑀯𑀚𑁆𑀚𑀦𑀁 𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀢𑁄;

𑀚𑀯𑀦𑀸𑀦𑀺 𑀘 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁯𑁫𑁬.

𑀅𑀯𑀲𑀸𑀦𑁂 𑀧𑀦𑁂𑀓𑀁 𑀢𑀼, 𑀢𑁂𑀲𑀁 𑀚𑀯𑀦𑀘𑁂𑀢𑀲𑀁;

𑀭𑀽𑀧𑀸𑀯𑀘𑀭𑀺𑀓𑀁 𑀳𑁄𑀢𑀺, 𑀢𑀢𑀺𑀬𑀚𑁆𑀛𑀸𑀦𑀫𑀸𑀦𑀲𑀁.

𑁯𑁫𑁭.

𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂𑀦, 𑀲𑀫𑁆𑀧𑀦𑁆𑀦𑀁 𑀢𑀼 𑀲𑀼𑀔𑁂𑀦 𑀘;

𑀏𑀓𑀕𑁆𑀕𑀢𑀸𑀬 𑀲𑀁𑀬𑀼𑀢𑁆𑀢𑀁, 𑀤𑀼𑀯𑀗𑁆𑀕𑀁 𑀢𑀢𑀺𑀬𑀁 𑀫𑀢𑀁.

𑁯𑁫𑁮.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀲𑀫𑀼𑀧𑀮𑀓𑁆𑀔𑀬𑁂;

𑀏𑀯𑀫𑁂𑀓𑀗𑁆𑀕𑀳𑀻𑀦𑀁 𑀢𑀼, 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀁𑀬𑀼𑀢𑀁.

𑁯𑁫𑁯.

𑀛𑀸𑀦𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀤𑀲𑀮𑀓𑁆𑀔𑀡𑀲𑀁𑀬𑀼𑀢𑀁;

𑀢𑀢𑀺𑀬𑀸𑀥𑀺𑀕𑀢𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀸 𑀪𑀸𑀯𑀦𑀸𑀫𑀬𑀁.

𑁯𑁬𑁦.

𑀢𑀢𑀺𑀬𑀸𑀥𑀺𑀕𑀢𑁂 ¶ 𑀛𑀸𑀦𑁂, 𑀆𑀓𑀸𑀭𑁂𑀳𑀺 𑀘 𑀧𑀜𑁆𑀘𑀳𑀺;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀢𑀲𑁆𑀫𑀺𑀁 𑀧𑀦 𑀲𑀢𑀻𑀫𑀢𑀸.

𑁯𑁬𑁧.

𑀢𑀲𑁆𑀫𑀸 𑀧𑀕𑀼𑀡𑀢𑁄 𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀢𑀢𑀺𑀬𑀸 𑀧𑀼𑀦;

𑀆𑀲𑀦𑁆𑀦𑀧𑀻𑀢𑀺𑀤𑁄𑀲𑀸 𑀳𑀺, 𑀲𑀫𑀸𑀧𑀢𑁆𑀢𑀺 𑀅𑀬𑀦𑁆𑀢𑀺 𑀘.

𑁯𑁬𑁨.

𑀬𑀤𑁂𑀯𑀘𑁂𑀢𑁆𑀣 ¶ 𑀆𑀪𑁄𑀕𑁄, 𑀲𑀼𑀔𑀫𑀺𑀘𑁆𑀘𑁂𑀯 𑀘𑁂𑀢𑀲𑁄;

𑀏𑀯𑀁 𑀲𑀼𑀔𑀲𑁆𑀲 𑀣𑀽𑀮𑀢𑁆𑀢𑀸, 𑀳𑁄𑀢𑀸𑀬𑀁 𑀅𑀗𑁆𑀕𑀤𑀼𑀩𑁆𑀩𑀮𑀸.

𑁯𑁬𑁩.

𑀇𑀢𑀺 ¶ 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀛𑀸𑀦𑀲𑁆𑀫𑀺𑀁 𑀢𑀢𑀺𑀬𑁂 𑀧𑀼𑀦;

𑀘𑀢𑀼𑀢𑁆𑀣𑀁 𑀲𑀦𑁆𑀢𑀢𑁄 𑀤𑀺𑀲𑁆𑀯𑀸, 𑀘𑁂𑀢𑀲𑀸 𑀧𑀦 𑀬𑁄𑀕𑀺𑀦𑀸.

𑁯𑁬𑁪.

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀛𑀸𑀦𑀲𑁆𑀫𑀺𑀁 𑀢𑀢𑀺𑀬𑁂 𑀧𑀼𑀦;

𑀘𑀢𑀼𑀢𑁆𑀣𑀸𑀥𑀺𑀕𑀫𑀢𑁆𑀣𑀸𑀬, 𑀓𑀸𑀢𑀩𑁆𑀩𑁄 𑀪𑀸𑀯𑀦𑀓𑁆𑀓𑀫𑁄.

𑁯𑁬𑁫.

𑀅𑀣𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀳𑀺 𑀬𑀤𑀸 𑀧𑀦;

𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲, 𑀛𑀸𑀦𑀗𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄.

𑁯𑁬𑁬.

𑀣𑀽𑀮𑀢𑁄 𑀢𑀲𑁆𑀲𑀼𑀧𑀝𑁆𑀞𑀸𑀢𑀺, 𑀲𑀼𑀔𑀁 𑀢𑀁 𑀫𑀸𑀦𑀲𑀁 𑀢𑀢𑁄;

𑀉𑀧𑁂𑀓𑁆𑀔𑀸 𑀲𑀦𑁆𑀢𑀢𑁄 𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀧𑀺 𑀘.

𑁯𑁬𑁭.

𑀣𑀽𑀮𑀗𑁆𑀕𑀲𑁆𑀲 𑀧𑀳𑀸𑀦𑀸𑀬, 𑀲𑀦𑁆𑀢𑀗𑁆𑀕𑀲𑁆𑀲𑀽𑀧𑀮𑀤𑁆𑀥𑀺𑀬𑀸;

𑀢𑀤𑁂𑀯 𑀘 𑀦𑀺𑀫𑀺𑀢𑁆𑀢𑀜𑁆𑀳𑀺, ‘‘𑀧𑀣𑀯𑀻 𑀧𑀣𑀯𑀻’’𑀢𑀺 𑀘.

𑁯𑁬𑁮.

𑀓𑀭𑁄𑀢𑁄 𑀫𑀦𑀲𑀸 𑀏𑀯, 𑀧𑀼𑀦𑀧𑁆𑀧𑀼𑀦𑀜𑁆𑀘 𑀬𑁄𑀕𑀺𑀦𑁄;

𑀘𑀢𑀼𑀢𑁆𑀣𑀁 𑀧𑀦𑀺𑀤𑀁 𑀛𑀸𑀦𑀁, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀇𑀢𑀺.

𑁯𑁬𑁯.

𑀪𑀯𑀗𑁆𑀕𑀁 𑀧𑀦𑀼𑀧𑀘𑁆𑀙𑀺𑀚𑁆𑀚, 𑀧𑀣𑀯𑀻𑀓𑀲𑀺𑀡𑀁 𑀢𑀣𑀸;

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀬𑁄𑀕𑀺𑀦𑁄.

𑁯𑁭𑁦.

𑀚𑀸𑀬𑀢𑀸𑀯𑀚𑁆𑀚𑀦𑀁 𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀢𑁄;

𑀚𑀯𑀦𑀸𑀦𑀺 𑀘 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁯𑁭𑁧.

𑀅𑀯𑀲𑀸𑀦𑁂 𑀧𑀦𑁂𑀓𑀁 𑀢𑀼, 𑀢𑁂𑀲𑀁 𑀚𑀯𑀦𑀘𑁂𑀢𑀲𑀁;

𑀭𑀽𑀧𑀸𑀯𑀘𑀭𑀺𑀓𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀸𑀦𑀲𑀁.

𑁯𑁭𑁨.

𑀏𑀓𑀗𑁆𑀕𑀯𑀺𑀧𑁆𑀧𑀳𑀻𑀦𑀁 ¶ 𑀢𑀼, 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀬𑁄𑀕𑀢𑁄;

𑀘𑀢𑀼𑀢𑁆𑀣𑀁 𑀧𑀦𑀺𑀤𑀁 𑀛𑀸𑀦𑀁, 𑀤𑀼𑀯𑀗𑁆𑀕𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁯𑁭𑁩.

𑀏𑀯𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀤𑀲𑀮𑀓𑁆𑀔𑀡𑀲𑀁𑀬𑀼𑀢𑀁;

𑀘𑀢𑀼𑀢𑁆𑀣𑀸𑀥𑀺𑀕𑀢𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀸 𑀪𑀸𑀯𑀦𑀸𑀫𑀬𑀁.

𑁯𑁭𑁪.

𑀬𑀲𑁆𑀫𑀸 𑀲𑀼𑀔𑀫𑀼𑀧𑁂𑀓𑁆𑀔𑀸𑀬, 𑀦 𑀳𑁄𑀢𑀸𑀲𑁂𑀯𑀦𑀁 𑀧𑀦;

𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯, 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺 𑀘.

𑁯𑁭𑁫.

𑀉𑀧𑁂𑀓𑁆𑀔𑀸𑀲𑀳𑀕𑀢𑀁 ¶ 𑀢𑀲𑁆𑀫𑀸, 𑀘𑀢𑀼𑀢𑁆𑀣𑀁 𑀲𑀫𑀼𑀤𑀻𑀭𑀺𑀢𑀁;

𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀳𑀺, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀁 𑀧𑀦.

𑁯𑁭𑁬.

𑀬𑀁 𑀘𑀢𑀼𑀓𑁆𑀓𑀦𑀬𑁂 𑀛𑀸𑀦𑀁, 𑀤𑀼𑀢𑀺𑀬𑀁 𑀢𑀁 𑀤𑁆𑀯𑀺𑀥𑀸 𑀧𑀦;

𑀓𑀢𑁆𑀯𑀸𑀦 𑀧𑀜𑁆𑀘𑀓𑀦𑀬𑁂, 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀓𑀢𑀁.

𑁯𑁭𑁭.

𑀢𑀢𑀺𑀬𑀁 𑀢𑀁 𑀘𑀢𑀼𑀢𑁆𑀣𑀜𑁆𑀘, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀇𑀥;

𑀧𑀞𑀫𑀁 𑀧𑀞𑀫𑀁𑀬𑁂𑀯, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑀢𑀸.

𑁯𑁭𑁮.

𑀏𑀯𑀫𑁂𑀢𑁆𑀢𑀸𑀯𑀢𑀸 𑀯𑀼𑀢𑁆𑀢𑀸, 𑀦𑀸𑀢𑀺𑀲𑀗𑁆𑀔𑁂𑀧𑀢𑁄 𑀫𑀬𑀸;

𑀦𑀸𑀢𑀺𑀯𑀺𑀢𑁆𑀣𑀸𑀭𑀢𑁄 𑀘𑀸𑀬𑀁, 𑀭𑀽𑀧𑀸𑀯𑀘𑀭𑀪𑀸𑀯𑀦𑀸.

𑁯𑁭𑁯.

𑀲𑀼𑀫𑀥𑀼𑀭𑀯𑀭𑀢𑀭𑀯𑀘𑀦𑁄, 𑀓𑀁 𑀦𑀼 𑀚𑀦𑀁 𑀦𑁂𑀯 𑀭𑀜𑁆𑀚𑀬𑀢𑀺;

𑀅𑀢𑀺𑀦𑀺𑀲𑀺𑀢𑀯𑀺𑀲𑀤𑀩𑀼𑀤𑁆𑀥𑀺-𑀧𑀲𑀸𑀤𑀚𑀦 𑀯𑁂𑀤𑀦𑀻𑀬𑁄𑀬𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄

𑀦𑀸𑀫 𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁫. 𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄

𑁯𑁮𑁦.

𑀭𑀽𑀧𑀸𑀭𑀽𑀧𑀫𑀢𑀻𑀢𑁂𑀦 ¶ ¶ , 𑀭𑀽𑀧𑀸𑀭𑀽𑀧𑀸𑀤𑀺𑀯𑁂𑀤𑀺𑀦𑀸;

𑀬𑀸𑀦𑀺 𑀘𑀸𑀭𑀽𑀧𑀧𑀼𑀜𑁆𑀜𑀸𑀦𑀺, 𑀲𑀭𑀽𑀧𑁂𑀦𑀻𑀭𑀺𑀢𑀸𑀦𑀺 𑀢𑀼.

𑁯𑁮𑁧.

𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀪𑀸𑀯𑀦𑀸𑀦𑀬𑀫𑀼𑀢𑁆𑀢𑀫𑀁;

𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀁, 𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄.

𑁯𑁮𑁨.

‘‘𑀭𑀽𑀧𑁂 𑀔𑁄 𑀯𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀤𑀡𑁆𑀟𑀸𑀤𑀸𑀦𑀸𑀤𑀬𑁄 𑀲𑀺𑀬𑀼𑀁;

𑀅𑀦𑁂𑀓𑀸𑀧𑀺 𑀧𑀦𑀸𑀩𑀸𑀥𑀸, 𑀘𑀓𑁆𑀔𑀼𑀭𑁄𑀕𑀸𑀤𑀬𑁄’’𑀇𑀢𑀺.

𑁯𑁮𑁩.

𑀭𑀽𑀧𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀭𑀽𑀧𑁂 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀲𑁄;

𑀢𑀲𑁆𑀲𑀸𑀢𑀺𑀓𑁆𑀓𑀫𑀦𑀢𑁆𑀣𑀸𑀬, 𑀅𑀭𑀽𑀧𑀁 𑀧𑀝𑀺𑀧𑀚𑁆𑀚𑀢𑀺.

𑁯𑁮𑁪.

𑀢𑀫𑁆𑀳𑀸 ¶ 𑀓𑀲𑀺𑀡𑀭𑀽𑀧𑀸𑀧𑀺, 𑀲𑁄 𑀦𑀺𑀩𑁆𑀩𑀺𑀚𑁆𑀚 𑀯𑀺𑀲𑀸𑀭𑀤𑁄;

𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀘, 𑀲𑀽𑀓𑀭𑀸𑀪𑀺𑀳𑀢𑁄𑀯 𑀲𑀸.

𑁯𑁮𑁫.

𑀘𑀢𑀼𑀢𑁆𑀣𑁂 𑀧𑀦 𑀛𑀸𑀦𑀲𑁆𑀫𑀺𑀁, 𑀳𑀼𑀢𑁆𑀯𑀸 𑀘𑀺𑀡𑁆𑀡𑀯𑀲𑀻 𑀯𑀲𑀻;

𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀥𑀻𑀫𑀸, 𑀯𑀼𑀝𑁆𑀞𑀸𑀬 𑀯𑀺𑀥𑀺𑀦𑀸 𑀧𑀼𑀦.

𑁯𑁮𑁬.

𑀓𑀭𑁄𑀢𑀺 𑀧𑀦𑀺𑀤𑀁 𑀘𑀺𑀢𑁆𑀢𑀁, 𑀭𑀽𑀧𑀫𑀸𑀭𑀫𑁆𑀫𑀡𑀁 𑀬𑀢𑁄;

𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀜𑁆𑀘, 𑀣𑀽𑀮𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑁄.

𑁯𑁮𑁭.

𑀇𑀢𑀺 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀘𑀢𑀼𑀢𑁆𑀣𑁂 𑀢𑀢𑁆𑀣 𑀲𑀩𑁆𑀩𑀲𑁄;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀧𑀞𑀫𑀸𑀭𑀼𑀧𑁆𑀧𑀜𑁆𑀘 𑀲𑀦𑁆𑀢𑀢𑁄.

𑁯𑁮𑁮.

𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀬𑀢𑁆𑀢𑀓𑀁 𑀯𑀸 𑀧𑀦𑀺𑀘𑁆𑀙𑀢𑀺;

𑀢𑀢𑁆𑀢𑀓𑀁 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀨𑀼𑀝𑁆𑀞𑁄𑀓𑀸𑀲𑀜𑁆𑀘 𑀢𑁂𑀦 𑀢𑀁.

𑁯𑁮𑁯.

𑀆𑀓𑀸𑀲𑁄 ¶ 𑀇𑀢𑀺 𑀯𑀸𑀦𑀦𑁆𑀢𑁄,

𑀆𑀓𑀸𑀲𑁄 𑀇𑀢𑀺 𑀯𑀸 𑀧𑀼𑀦;

𑀫𑀦𑀲𑀸 𑀳𑀺 𑀓𑀭𑁄𑀦𑁆𑀢𑁄𑀯,

𑀉𑀕𑁆𑀖𑀸𑀝𑁂𑀢𑀺 𑀧𑀯𑀼𑀘𑁆𑀘𑀢𑀺.

𑁯𑁯𑁦.

𑀉𑀕𑁆𑀖𑀸𑀝𑁂𑀦𑁆𑀢𑁄 𑀳𑀺 𑀓𑀲𑀺𑀡𑀁, 𑀦 𑀲𑀁𑀯𑁂𑀮𑁆𑀮𑁂𑀢𑀺 𑀢𑀁 𑀧𑀦;

𑀦 𑀘𑀼𑀤𑁆𑀥𑀭𑀢𑀺 𑀲𑁄 𑀬𑁄𑀕𑀻, 𑀧𑀽𑀯𑀁 𑀯𑀺𑀬 𑀓𑀧𑀸𑀮𑀢𑁄.

𑁯𑁯𑁧.

𑀓𑁂𑀯𑀮𑀁 𑀧𑀦 𑀢𑀁 𑀦𑁂𑀯, 𑀆𑀯𑀚𑁆𑀚𑀢𑀺 𑀦 𑀧𑁂𑀓𑁆𑀔𑀢𑀺;

𑀦𑀸𑀯𑀚𑁆𑀚𑀦𑁆𑀢𑁄 𑀦𑀧𑁂𑀓𑁆𑀔𑀦𑁆𑀢𑁄, 𑀉𑀕𑁆𑀖𑀸𑀝𑁂𑀢𑀺 𑀳𑀺 𑀦𑀸𑀫𑀲𑁄.

𑁯𑁯𑁨.

𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 ¶ , 𑀦𑀺𑀫𑀺𑀢𑁆𑀢𑀁 𑀧𑀦 𑀢𑀁𑀯 𑀲𑁄;

𑀆𑀓𑀸𑀲𑁄 𑀇𑀢𑀺 𑀘𑀺𑀢𑁆𑀢𑁂𑀦, 𑀆𑀯𑀚𑁆𑀚𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁯𑁯𑁩.

𑀆𑀯𑀚𑁆𑀚𑀢𑁄 𑀳𑀺 𑀢𑀲𑁆𑀲𑁂𑀯𑀁,

𑀓𑀭𑁄𑀢𑁄 𑀢𑀓𑁆𑀓𑀸𑀳𑀢𑀫𑁆𑀧𑀺 𑀘;

𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀲,

𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀳𑀺 𑀲𑀩𑁆𑀩𑀲𑁄.

𑁯𑁯𑁪.

𑀆𑀲𑁂𑀯𑀢𑀺 ¶ 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀓𑀭𑁄𑀢𑁄 𑀧𑀦 𑀢𑀲𑁆𑀲𑁂𑀯, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀬𑁄𑀕𑀺𑀦𑁄.

𑁯𑁯𑁫.

𑀢𑀢𑁆𑀭𑀸𑀓𑀸𑀲𑁂 𑀧𑀦𑀸𑀧𑁆𑀧𑁂𑀢𑀺, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁;

𑀇𑀥𑀸𑀧𑀺 𑀧𑀼𑀭𑀺𑀫𑁂 𑀪𑀸𑀕𑁂, 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀦.

𑁯𑁯𑁬.

𑀚𑀯𑀦𑀸𑀦𑀺 𑀉𑀧𑁂𑀓𑁆𑀔𑀸𑀬, 𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀳𑀺;

𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀧𑀺, 𑀳𑁄𑀢𑀺 𑀆𑀭𑀼𑀧𑁆𑀧𑀫𑀸𑀦𑀲𑀁.

𑁯𑁯𑁭.

𑀧𑀼𑀦 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑁂.

𑁯𑁯𑁮.

𑀆𑀲𑀦𑁆𑀦𑀭𑀽𑀧𑀸𑀯𑀘𑀭-𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁯𑁯𑁯.

𑀏𑀯𑀫𑀸𑀤𑀻𑀦𑀯𑀁 ¶ 𑀤𑀺𑀲𑁆𑀯𑀸, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀤𑀼𑀢𑀺𑀬𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁦𑁦.

𑀢𑀫𑀸𑀓𑀸𑀲𑀁 𑀨𑀭𑀺𑀢𑁆𑀯𑀸𑀦, 𑀧𑀯𑀢𑁆𑀢𑀫𑀸𑀦𑀲𑀁 𑀧𑀦;

𑀢𑀜𑁆𑀘 𑀯𑀺𑀜𑁆𑀜𑀸𑀡𑀫𑀺𑀘𑁆𑀘𑁂𑀯𑀁, 𑀓𑀢𑁆𑀢𑀩𑁆𑀩𑀁 𑀫𑀦𑀲𑀸 𑀩𑀳𑀼𑀁.

𑁧𑁦𑁦𑁧.

𑀆𑀯𑀚𑁆𑀚𑀦𑀜𑁆𑀘 𑀓𑀢𑁆𑀢𑀩𑁆𑀩𑀁, 𑀢𑀣𑀸 𑀢𑀓𑁆𑀓𑀸𑀳𑀢𑀫𑁆𑀧𑀺 𑀘;

‘‘𑀅𑀦𑀦𑁆𑀢’’𑀦𑁆𑀢𑀺 ‘‘𑀅𑀦𑀦𑁆𑀢’’𑀦𑁆𑀢𑀺, 𑀓𑀸𑀢𑀩𑁆𑀩𑀁 𑀫𑀦𑀲𑀸 𑀦𑀺𑀥.

𑁧𑁦𑁦𑁨.

𑀢𑀲𑁆𑀫𑀺𑀁 𑀧𑀦 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀉𑀧𑀘𑀸𑀭𑁂𑀦 𑀢𑀁 𑀘𑀺𑀢𑁆𑀢𑀁, 𑀲𑀫𑀸𑀥𑀺𑀬𑀢𑀺 𑀬𑁄𑀕𑀺𑀦𑁄.

𑁧𑁦𑁦𑁩.

𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁦𑁪.

𑀆𑀓𑀸𑀲𑀁 𑀨𑀼𑀲𑀯𑀺𑀜𑁆𑀜𑀸𑀡𑁂, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀅𑀧𑁆𑀧𑁂𑀢𑀺 𑀅𑀧𑁆𑀧𑀦𑀸 𑀬𑀲𑁆𑀫𑀺𑀁, 𑀦𑀬𑁄 𑀯𑀼𑀢𑁆𑀢𑀦𑀬𑁄𑀯 𑀲𑁄.

𑁧𑁦𑁦𑁫.

𑀆𑀓𑀸𑀲𑁄𑀬𑀫𑀦𑀦𑁆𑀢𑁄𑀢𑀺, 𑀏𑀯𑀫𑀸𑀓𑀸𑀲𑀫𑁂𑀯 𑀢𑀁;

𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁, ‘‘𑀯𑀺𑀜𑁆𑀜𑀸𑀡𑀜𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁦𑁬.

𑀫𑀦𑀓𑁆𑀓𑀸𑀭𑀯𑀲𑁂𑀦𑀸𑀧𑀺, 𑀅𑀦𑀦𑁆𑀢𑀁 𑀧𑀭𑀺𑀤𑀻𑀧𑀺𑀢𑀁;

‘‘𑀯𑀺𑀜𑁆𑀜𑀸𑀡𑀸𑀦𑀦𑁆𑀢’’𑀫𑀺𑀘𑁆𑀘𑁂𑀯, 𑀯𑀢𑁆𑀢𑀩𑁆𑀩𑀁 𑀧𑀦𑀺𑀤𑀁 𑀲𑀺𑀬𑀸.

𑁧𑁦𑁦𑁭.

𑀅𑀣 ¶ 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂.

𑁧𑁦𑁦𑁮.

𑀆𑀲𑀦𑁆𑀦𑀧𑀞𑀫𑀸𑀭𑀼𑀧𑁆𑀧-𑀘𑀺𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁧𑁦𑁦𑁯.

𑀏𑀯𑀫𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀢𑀢𑀺𑀬𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁧𑁦.

𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀦, 𑀓𑀸𑀢𑀩𑁆𑀩𑁄 𑀫𑀦𑀲𑀸 𑀧𑀼𑀦;

𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸-𑀪𑀸𑀯𑁄 𑀢𑀲𑁆𑀲𑁂𑀯 𑀲𑀼𑀜𑁆𑀜𑀢𑁄.

𑁧𑁦𑁧𑁧.

𑀢𑀁 ¶ ¶ 𑀧𑀦𑀸𑀓𑀸𑀲𑀯𑀺𑀜𑁆𑀜𑀸𑀡𑀁, 𑀅𑀓𑀢𑁆𑀯𑀸 𑀫𑀦𑀲𑀸 𑀧𑀼𑀦;

‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀯𑀸𑀢𑁂𑀦, ‘‘𑀲𑀼𑀜𑁆𑀜𑀁 𑀲𑀼𑀜𑁆𑀜’’𑀦𑁆𑀢𑀺 𑀯𑀸 𑀢𑀢𑁄.

𑁧𑁦𑁧𑁨.

𑀆𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀜𑁆𑀳𑀺, 𑀓𑀢𑁆𑀢𑀩𑁆𑀩𑀁 𑀫𑀦𑀲𑀸𑀧𑀺 𑀘;

𑀢𑀓𑁆𑀓𑀸𑀳𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀧𑀼𑀦𑀧𑁆𑀧𑀼𑀦𑀁𑀯 𑀥𑀻𑀫𑀢𑀸.

𑁧𑁦𑁧𑁩.

𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀢𑀲𑁆𑀲𑁂𑀯𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀲𑀢𑀺 𑀢𑀺𑀝𑁆𑀞𑀢𑀺 𑀪𑀺𑀬𑁆𑀬𑁄𑀧𑀺, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁.

𑁧𑁦𑁧𑁪.

𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁧𑁫.

𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀨𑀭𑀺𑀢𑁆𑀯𑀸𑀦 𑀲𑀫𑀦𑁆𑀢𑀢𑁄;

𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀲𑁆𑀲, 𑀦𑀢𑁆𑀣𑀺𑀪𑀸𑀯𑁂 𑀅𑀪𑀸𑀯𑀓𑁂.

𑁧𑁦𑁧𑁬.

𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁,

𑀢𑀁 𑀧𑀦𑀸𑀧𑁆𑀧𑁂𑀢𑀺 𑀬𑁄𑀕𑀺𑀦𑁄;

𑀅𑀧𑁆𑀧𑀦𑀸𑀬 𑀦𑀬𑁄𑀧𑁂𑀢𑁆𑀣,

𑀳𑁄𑀢𑀺 𑀯𑀼𑀢𑁆𑀢𑀦𑀬𑁄𑀯 𑀲𑁄.

𑁧𑁦𑁧𑁭.

𑀆𑀓𑀸𑀲𑀕𑀢𑀯𑀺𑀜𑁆𑀜𑀸𑀡𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀓𑁆𑀔𑀼𑀦𑀸;

𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀺𑀢𑁆𑀯𑀸𑀦, ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸.

𑁧𑁦𑁧𑁮.

𑀧𑀭𑀺𑀓𑀫𑁆𑀫𑀫𑀦𑀓𑁆𑀓𑀸𑀭𑁂 ¶ , 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀧𑀦;

𑀢𑀲𑁆𑀲𑀸𑀧𑀕𑀫𑀫𑀢𑁆𑀢𑀁𑀯, 𑀧𑀲𑁆𑀲𑀦𑁆𑀢𑁄 𑀯𑀲𑀢𑀻 𑀘 𑀲𑁄.

𑁧𑁦𑁧𑁯.

𑀲𑀦𑁆𑀦𑀺𑀧𑀸𑀢𑀁 𑀬𑀣𑀸 𑀓𑁄𑀘𑀺, 𑀤𑀺𑀲𑁆𑀯𑀸 𑀲𑀗𑁆𑀖𑀲𑁆𑀲 𑀓𑀢𑁆𑀣𑀘𑀺;

𑀕𑀢𑁂 𑀲𑀗𑁆𑀖𑁂 𑀢𑀼 𑀢𑀁 𑀞𑀸𑀦𑀁, 𑀲𑀼𑀜𑁆𑀜𑀫𑁂𑀯𑀸𑀦𑀼𑀧𑀲𑁆𑀲𑀢𑀺.

𑁧𑁦𑁨𑁦.

𑀧𑀼𑀦 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂.

𑁧𑁦𑁨𑁧.

𑀆𑀲𑀦𑁆𑀦𑀤𑀼𑀢𑀺𑀬𑀸𑀭𑀼𑀧𑁆𑀧-𑀘𑀺𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁧𑁦𑁨𑁨.

𑀏𑀯𑀫𑀸𑀤𑀻𑀦𑀯𑀁 ¶ 𑀤𑀺𑀲𑁆𑀯𑀸, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀘𑀢𑀼𑀢𑁆𑀣𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁨𑁩.

𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀦, 𑀧𑀼𑀦 𑀢𑀢𑁆𑀣𑁂𑀯 𑀥𑀻𑀫𑀢𑀸;

𑀅𑀪𑀸𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀲𑀫𑁆𑀧𑀯𑀢𑁆𑀢𑀫𑀺𑀤𑀁 𑀫𑀦𑁄.

𑁧𑁦𑁨𑁪.

‘‘𑀲𑀦𑁆𑀢𑀁 𑀲𑀦𑁆𑀢𑀫𑀺𑀤𑀁 𑀘𑀺𑀢𑁆𑀢’’-𑀫𑀺𑀘𑁆𑀘𑁂𑀯𑀁 𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀳𑁄𑀢𑀺 𑀆𑀯𑀚𑁆𑀚𑀺𑀢𑀩𑁆𑀩𑀜𑁆𑀘, 𑀓𑀸𑀢𑀩𑁆𑀩𑀁 𑀫𑀦𑀲𑀸𑀧𑀺 𑀘.

𑁧𑁦𑁨𑁫.

𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀢𑀲𑁆𑀲𑁂𑀯𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀲𑀢𑀺 𑀢𑀺𑀝𑁆𑀞𑀢𑀺 𑀪𑀺𑀬𑁆𑀬𑁄𑀧𑀺, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁.

𑁧𑁦𑁨𑁬.

𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁨𑁭.

𑀢𑀢𑀺𑀬𑀸𑀭𑀼𑀧𑁆𑀧𑀲𑀗𑁆𑀔𑀸𑀢-𑀔𑀦𑁆𑀥𑁂𑀲𑀼 𑀘 𑀘𑀢𑀽𑀲𑀼𑀧𑀺;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁, 𑀢𑀁 𑀧𑀦𑀸𑀧𑁆𑀧𑁂𑀢𑀺 𑀬𑁄𑀕𑀺𑀦𑁄.

𑁧𑁦𑁨𑁮.

𑀅𑀧𑁆𑀧𑀦𑀸𑀬 ¶ 𑀦𑀬𑁄𑀧𑁂𑀢𑁆𑀣, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀽𑀧𑀫𑁄;

𑀅𑀧𑀺𑀘𑁂𑀢𑁆𑀣 𑀯𑀺𑀲𑁂𑀲𑁄𑀬𑀁, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁧𑁦𑁨𑁯.

‘‘𑀅𑀳𑁄 𑀲𑀦𑁆𑀢𑀸 𑀯𑀢𑀸𑀬’’𑀦𑁆𑀢𑀺, 𑀲𑀫𑀸𑀧𑀢𑁆𑀢𑀺 𑀧𑀤𑀺𑀲𑁆𑀲𑀢𑀺;

𑀬𑀸 𑀧𑀦𑀸𑀪𑀸𑀯𑀫𑀢𑁆𑀢𑀫𑁆𑀧𑀺, 𑀓𑀢𑁆𑀯𑀸 𑀞𑀲𑁆𑀲𑀢𑀺 𑀕𑁄𑀘𑀭𑀁.

𑁧𑁦𑁩𑁦.

𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬𑁂𑀯, ‘‘𑀲𑀦𑁆𑀢𑀸𑀬’’𑀦𑁆𑀢𑀺 𑀯𑀺𑀧𑀲𑁆𑀲𑀢𑀺;

𑀲𑀦𑁆𑀢𑀢𑁄 𑀘𑁂 𑀫𑀦𑀓𑁆𑀓𑀸𑀭𑁄, 𑀓𑀣𑀜𑁆𑀘 𑀲𑀫𑀢𑀺𑀓𑁆𑀓𑀫𑁄.

𑁧𑁦𑁩𑁧.

𑀅𑀦𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑁆𑀢𑀸 ¶ , 𑀳𑁄𑀢𑁂𑀯 𑀲𑀫𑀢𑀺𑀓𑁆𑀓𑀫𑁄;

‘‘𑀲𑀫𑀸𑀧𑀚𑁆𑀚𑀸𑀫𑀳𑀫𑁂𑀢’’-𑀫𑀺𑀘𑁆𑀘𑀸𑀪𑁄𑀕𑁄 𑀦 𑀯𑀺𑀚𑁆𑀚𑀢𑀺.

𑁧𑁦𑁩𑁨.

𑀲𑀦𑁆𑀢𑀢𑁄 𑀢𑀁 𑀓𑀭𑁄𑀦𑁆𑀢𑁄 𑀳𑀺, 𑀫𑀦𑀲𑀸 𑀲𑀼𑀔𑀼𑀫𑀁 𑀧𑀭𑀁;

𑀅𑀲𑀜𑁆𑀜𑀁 𑀧𑀦 𑀤𑀼𑀩𑁆𑀩𑀮𑁆𑀬𑀁, 𑀧𑀸𑀧𑀼𑀡𑀸𑀢𑀺 𑀫𑀳𑀕𑁆𑀕𑀢𑀁.

𑁧𑁦𑁩𑁩.

𑀦𑁂𑀯𑀲𑀜𑁆𑀜𑀻 𑀘 𑀦𑀸𑀲𑀜𑁆𑀜𑀻,

𑀬𑀸𑀬 𑀲𑀜𑁆𑀜𑀸𑀬 𑀳𑁄𑀢𑀺 𑀲𑁄;

𑀦 ¶ 𑀓𑁂𑀯𑀮𑀁 𑀢𑀼 𑀲𑀜𑁆𑀜𑀸𑀯,

𑀏𑀤𑀺𑀲𑀻 𑀅𑀣 𑀔𑁄 𑀧𑀦.

𑁧𑁦𑁩𑁪.

𑀏𑀯𑀫𑁂𑀯 𑀪𑀯𑀦𑁆𑀢𑁂𑀢𑁆𑀣, 𑀲𑀼𑀔𑀼𑀫𑀸 𑀯𑁂𑀤𑀦𑀸𑀤𑀬𑁄;

𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑁂𑀦, 𑀫𑀕𑁆𑀕𑀲𑁆𑀫𑀺𑀁 𑀉𑀤𑀓𑁂𑀦 𑀘.

𑁧𑁦𑁩𑁫.

𑀲𑀸𑀯𑁂𑀢𑀩𑁆𑀩𑁄 𑀅𑀬𑀁 𑀅𑀢𑁆𑀣𑁄, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀩𑁄𑀥𑀦𑁂;

𑀧𑀝𑀼𑀲𑀜𑁆𑀜𑀸𑀬 𑀓𑀺𑀘𑁆𑀘𑀲𑁆𑀲, 𑀦𑁂𑀯𑀓𑁆𑀓𑀭𑀡𑀢𑁄 𑀅𑀬𑀁.

𑁧𑁦𑁩𑁬.

‘‘𑀦𑁂𑀯𑀲𑀜𑁆𑀜𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑁆𑀪𑀯𑀸;

𑀧𑀝𑀼𑀲𑀜𑁆𑀜𑀸𑀬 𑀓𑀺𑀘𑁆𑀘𑀁 𑀲𑀸, 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦𑁂𑀯 𑀘.

𑁧𑁦𑁩𑁭.

𑀬𑀣𑀸 𑀤𑀳𑀦𑀓𑀺𑀘𑁆𑀘𑀁 𑀢𑀼, 𑀢𑁂𑀚𑁄𑀥𑀸𑀢𑀼 𑀲𑀼𑀔𑁄𑀤𑀓𑁂;

𑀲𑀸 𑀲𑀗𑁆𑀔𑀸𑀭𑀸𑀯𑀲𑁂𑀲𑀢𑁆𑀢𑀸, 𑀲𑀼𑀔𑀼𑀫𑀢𑁆𑀢𑁂𑀦 𑀯𑀺𑀚𑁆𑀚𑀢𑀺;

𑀢𑀲𑁆𑀫𑀸 𑀧𑀦 𑀘 𑀲𑀸 𑀲𑀜𑁆𑀜𑀸, ‘‘𑀦𑀸𑀲𑀜𑁆𑀜𑀸’’𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁩𑁮.

𑀏𑀢𑀸 𑀳𑀺 𑀭𑀽𑀧𑀫𑀸𑀓𑀸𑀲𑀁,

𑀯𑀺𑀜𑁆𑀜𑀸𑀡𑀁 𑀢𑀤𑀪𑀸𑀯𑀓𑀁;

𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀫𑀢𑁄,

𑀘𑀢𑀲𑁆𑀲𑁄 𑀳𑁄𑀦𑁆𑀢𑀺 𑀆𑀳 𑀘.

𑁧𑁦𑁩𑁯.

‘‘𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄, 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸;

𑀅𑀗𑁆𑀕𑀸𑀢𑀺𑀓𑁆𑀓𑀫𑀫𑁂𑀢𑀸𑀲𑀁, 𑀦 𑀇𑀘𑁆𑀙𑀦𑁆𑀢𑀺 𑀯𑀺𑀪𑀸𑀯𑀺𑀦𑁄.

𑁧𑁦𑁪𑁦.

𑀲𑀼𑀧𑀡𑀻𑀢𑀢𑀭𑀸 ¶ 𑀳𑁄𑀦𑁆𑀢𑀺,

𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥;

𑀉𑀧𑀫𑀸 𑀢𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀸,

𑀧𑀸𑀲𑀸𑀤𑀢𑀮𑀲𑀸𑀝𑀺𑀓𑀸’’𑀢𑀺.

𑁧𑁦𑁪𑁧.

𑀲𑀗𑁆𑀔𑁂𑀧𑁂𑀦 𑀫𑀬𑀸𑀭𑀼𑀧𑁆𑀧-𑀲𑀫𑀸𑀧𑀢𑁆𑀢𑀺𑀦𑀬𑁄 𑀅𑀬𑀁;

𑀤𑀲𑁆𑀲𑀺𑀢𑁄 𑀤𑀲𑁆𑀲𑀺𑀢𑁄 𑀲𑀼𑀤𑁆𑀥-𑀤𑀲𑁆𑀲𑀺𑀦𑀸 𑀧𑀺𑀬𑀤𑀲𑁆𑀲𑀺𑀦𑀸.

𑁧𑁦𑁪𑁨.

𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀥𑀸𑀦𑀁 ¶ ,

𑀚𑀸𑀦𑀸𑀢𑀺𑀫𑀁 𑀲𑀸𑀭𑀢𑀭𑀁 𑀬𑁄 𑀧𑀦 𑀪𑀺𑀓𑁆𑀔𑀼;

𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀤𑀓𑁆𑀔𑁄,

𑀭𑀽𑀧𑀸𑀭𑀽𑀧𑀁 𑀬𑀸𑀢𑀺 𑀪𑀯𑀁 𑀲𑁄 𑀅𑀪𑀺𑀪𑀼𑀬𑁆𑀬.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁬. 𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄

𑁧𑁦𑁪𑁩.

𑀇𑀢𑁄 ¶ 𑀧𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀜𑁆𑀜𑀸𑀲𑀼𑀤𑁆𑀥𑀺𑀓𑀭𑀁 𑀧𑀭𑀁;

𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁, 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑁧𑁦𑁪𑁪.

𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻,

𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀦𑀝𑁆𑀞𑀧𑀺;

𑀮𑁄𑀓𑀺𑀓𑀸𑀧𑀺 𑀅𑀪𑀺𑀜𑁆𑀜𑀸𑀬𑁄,

𑀪𑀸𑀯𑁂𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁧𑁦𑁪𑁫.

𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂𑀧𑀺, 𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀲𑀢𑀸;

𑀅𑀦𑀼𑀬𑁄𑀕𑀫𑀪𑀺𑀜𑁆𑀜𑀸𑀲𑀼, 𑀓𑀸𑀢𑀼𑀁 𑀯𑀢𑁆𑀢𑀢𑀺 𑀬𑁄𑀕𑀺𑀦𑁄.

𑁧𑁦𑁪𑁬.

𑀅𑀪𑀺𑀜𑁆𑀜𑀸 ¶ 𑀦𑀸𑀫 𑀪𑀺𑀓𑁆𑀔𑀽𑀦𑀁, 𑀲𑀸𑀪𑀺𑀜𑁆𑀜𑀸𑀦𑀁 𑀅𑀦𑀼𑀢𑁆𑀢𑀭𑁄;

𑀅𑀮𑀗𑁆𑀓𑀸𑀭𑁄 𑀳𑀺 𑀢𑀸𑀡𑀦𑁆𑀢𑀺, 𑀲𑀢𑁆𑀣𑀦𑁆𑀢𑀺 𑀘 𑀧𑀯𑀼𑀘𑁆𑀘𑀢𑀺.

𑁧𑁦𑁪𑁭.

𑀦𑀺𑀩𑁆𑀩𑀢𑁆𑀢𑀺𑀢𑀸𑀲𑁆𑀯𑀪𑀺𑀜𑁆𑀜𑀸𑀲𑀼, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼𑀦𑀸;

𑀲𑀫𑀸𑀥𑀺𑀪𑀸𑀯𑀦𑀸 𑀳𑀺𑀲𑁆𑀲, 𑀢𑀤𑀸 𑀦𑀺𑀝𑁆𑀞𑀗𑁆𑀕𑀢𑀸 𑀲𑀺𑀬𑀸.

𑁧𑁦𑁪𑁮.

𑀤𑀺𑀩𑁆𑀩𑀸𑀦𑀺 ¶ 𑀘𑀓𑁆𑀔𑀼𑀲𑁄𑀢𑀸𑀦𑀺, 𑀇𑀤𑁆𑀥𑀺𑀘𑀺𑀢𑁆𑀢𑀯𑀺𑀚𑀸𑀦𑀦𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀦𑁆𑀢𑀺, 𑀧𑀜𑁆𑀘𑀸𑀪𑀺𑀜𑁆𑀜𑀸 𑀇𑀫𑀸 𑀲𑀺𑀬𑀼𑀁.

𑁧𑁦𑁪𑁯.

𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀻𑀳𑀺, 𑀘𑀢𑀼𑀤𑁆𑀤𑀲𑀦𑀬𑁂𑀳𑀺 𑀘;

𑀤𑀫𑁂𑀢𑀩𑁆𑀩𑀫𑀪𑀺𑀜𑁆𑀜𑀸𑀬𑁄, 𑀧𑀢𑁆𑀢𑀼𑀓𑀸𑀫𑁂𑀦 𑀫𑀸𑀦𑀲𑀁.

𑁧𑁦𑁫𑁦.

𑀤𑀦𑁆𑀢𑁂 𑀲𑀫𑀸𑀳𑀺𑀢𑁂 𑀲𑀼𑀤𑁆𑀥𑁂, 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂;

𑀦𑀼𑀧𑀓𑁆𑀮𑁂𑀲𑁂 𑀫𑀼𑀤𑀼𑀪𑀽𑀢𑁂, 𑀓𑀫𑁆𑀫𑀦𑀻𑀬𑁂 𑀞𑀺𑀢𑀸𑀘𑀮𑁂.

𑁧𑁦𑁫𑁧.

𑀇𑀢𑀺 𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑁂, 𑀘𑀺𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘;

𑀅𑀪𑀺𑀦𑀻𑀳𑀭𑀢𑀺 𑀘𑁂 𑀘𑀺𑀢𑁆𑀢𑀁, 𑀲𑀺𑀚𑁆𑀛𑀢𑀺𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁.

𑁧𑁦𑁫𑁨.

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀦;

𑀯𑀼𑀝𑁆𑀞𑀸𑀬 𑀳𑀺 𑀲𑀢𑀁 𑀯𑀸𑀧𑀺, 𑀲𑀳𑀲𑁆𑀲𑀁 𑀯𑀸 𑀬𑀤𑀺𑀘𑁆𑀙𑀢𑀺.

𑁧𑁦𑁫𑁩.

‘‘𑀲𑀢𑀁 𑀳𑁄𑀫𑀺 𑀲𑀢𑀁 𑀳𑁄𑀫𑀻’’-𑀘𑁆𑀘𑁂𑀯𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀦.

𑁧𑁦𑁫𑁪.

𑀯𑀼𑀝𑁆𑀞𑀸𑀬 𑀧𑀼𑀦𑀥𑀺𑀝𑁆𑀞𑀸𑀢𑀺,

𑀲𑀳𑀸𑀥𑀺𑀝𑁆𑀞𑀸𑀦𑀘𑁂𑀢𑀲𑀸;

𑀲𑀢𑀁 𑀳𑁄𑀢𑀺 𑀳𑀺 𑀲𑁄 𑀬𑁄𑀕𑀻,

𑀲𑀳𑀲𑁆𑀲𑀸𑀤𑀻𑀲𑁆𑀯𑀬𑀁 𑀦𑀬𑁄.

𑁧𑁦𑁫𑁫.

𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀢𑀼, 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀧𑀭𑀺𑀓𑀫𑁆𑀫𑀫𑀦𑀸𑀦𑁂𑀢𑁆𑀣, 𑀲𑀢𑀸𑀭𑀫𑁆𑀫𑀡𑀺𑀓𑀸𑀦𑀺 𑀢𑀼.

𑁧𑁦𑁫𑁬.

𑀢𑀤𑀸𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺 ¶ , 𑀲𑀢𑀸𑀭𑀫𑁆𑀫𑀡𑀫𑁂𑀯 𑀢𑀁;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀦𑀸𑀘𑀺𑀢𑁆𑀢𑀁, 𑀯𑀺𑀬 𑀕𑁄𑀢𑁆𑀭𑀪𑀼𑀦𑀦𑁆𑀢𑀭𑀁.

𑁧𑁦𑁫𑁭.

𑀢𑀫𑁂𑀓𑀁 ¶ 𑀚𑀸𑀬𑀢𑁂 𑀢𑀢𑁆𑀣, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀫𑀦𑁄;

𑀧𑀭𑀺𑀓𑀫𑁆𑀫𑀯𑀺𑀲𑁂𑀲𑁄𑀯, 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁 𑀇𑀥.

𑀇𑀤𑁆𑀥𑀺𑀯𑀺𑀥𑀜𑀸𑀡𑀁.

𑁧𑁦𑁫𑁮.

𑀤𑀺𑀩𑁆𑀩𑀲𑁄𑀢𑀫𑀺𑀤𑀁 ¶ 𑀢𑀢𑁆𑀣, 𑀪𑀸𑀯𑁂𑀢𑀩𑁆𑀩𑀁 𑀓𑀣𑀁 𑀲𑀺𑀬𑀸;

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀼𑀦.

𑁧𑁦𑁫𑁯.

𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑁂𑀦, 𑀓𑀸𑀫𑀸𑀯𑀘𑀭𑀘𑁂𑀢𑀲𑀸;

𑀲𑀤𑁆𑀤𑁄 𑀆𑀯𑀚𑁆𑀚𑀺𑀢𑀩𑁆𑀩𑁄𑀯, 𑀫𑀳𑀦𑁆𑀢𑁄 𑀲𑀼𑀔𑀼𑀫𑁄𑀧𑀺 𑀘.

𑁧𑁦𑁬𑁦.

𑀢𑀲𑁆𑀲𑁂𑀯𑀁 𑀧𑀦 𑀲𑀤𑁆𑀤𑀲𑁆𑀲, 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀼𑀩𑁆𑀩𑀢𑁄;

𑀤𑀺𑀩𑁆𑀩𑀲𑁄𑀢𑀫𑀺𑀤𑀸𑀦𑀺𑀲𑁆𑀲, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀇𑀢𑀺.

𑁧𑁦𑁬𑁧.

𑀲𑀤𑁆𑀤𑁂𑀲𑁆𑀯𑀜𑁆𑀜𑀢𑀭𑀁 𑀲𑀤𑁆𑀤𑀁, 𑀓𑀢𑁆𑀯𑀸 𑀆𑀭𑀫𑁆𑀫𑀡𑀁 𑀢𑀢𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀼, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂 𑀧𑀼𑀦.

𑁧𑁦𑁬𑁨.

𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀧𑀼𑀭𑀺𑀫𑀸𑀦𑁂𑀢𑁆𑀣 𑀘𑀺𑀢𑁆𑀢𑁂𑀲𑀼, 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀦.

𑁧𑁦𑁬𑁩.

𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼-𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑀓𑀸;

𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀧𑀺, 𑀅𑀧𑁆𑀧𑀦𑀸𑀘𑀺𑀢𑁆𑀢𑀫𑀻𑀭𑀺𑀢𑀁.

𑁧𑁦𑁬𑁪.

𑀲𑀳𑀚𑀸𑀢𑀁 𑀢𑀼 𑀬𑀁 𑀜𑀸𑀡𑀁, 𑀅𑀧𑁆𑀧𑀦𑀸𑀫𑀸𑀦𑀲𑁂𑀦 𑀳𑀺;

𑀢𑀁 𑀜𑀸𑀡𑀁 𑀤𑀺𑀩𑁆𑀩𑀲𑁄𑀢𑀦𑁆𑀢𑀺, 𑀯𑀤𑀦𑁆𑀢𑀺 𑀲𑀼𑀢𑀓𑁄𑀯𑀺𑀤𑀸.

𑁧𑁦𑁬𑁫.

𑀣𑀸𑀫𑀚𑀸𑀢𑀁 𑀓𑀭𑁄𑀦𑁆𑀢𑁂𑀦, 𑀢𑀁 𑀜𑀸𑀡𑀁 𑀢𑁂𑀦 𑀬𑁄𑀕𑀺𑀦𑀸;

‘‘𑀏𑀢𑁆𑀣𑀦𑁆𑀢𑀭𑀕𑀢𑀁 𑀲𑀤𑁆𑀤𑀁, 𑀲𑀼𑀡𑀸𑀫𑀻’’𑀢𑀺 𑀘 𑀘𑁂𑀢𑀲𑀸.

𑁧𑁦𑁬𑁬.

𑀅𑀗𑁆𑀕𑀼𑀮𑀁 𑀤𑁆𑀯𑀗𑁆𑀕𑀼𑀮𑀁 𑀪𑀺𑀬𑁆𑀬𑁄,

𑀯𑀺𑀤𑀢𑁆𑀣𑀺 𑀭𑀢𑀦𑀁 𑀢𑀣𑀸;

𑀕𑀸𑀫𑁄 𑀤𑁂𑀲𑁄 𑀢𑀢𑁄 𑀬𑀸𑀯,

𑀘𑀓𑁆𑀓𑀯𑀸𑀴𑀸 𑀢𑀢𑁄 𑀧𑀭𑀁.

𑁧𑁦𑁬𑁭.

𑀇𑀘𑁆𑀘𑁂𑀯𑀁 𑀢𑀼 𑀧𑀭𑀺𑀘𑁆𑀙𑀺𑀚𑁆𑀚, 𑀯𑀟𑁆𑀠𑁂𑀢𑀩𑁆𑀩𑀁 𑀬𑀣𑀸𑀓𑁆𑀓𑀫𑀁;

𑀏𑀲𑁄 𑀅𑀥𑀺𑀕𑀢𑀸𑀪𑀺𑀜𑁆𑀜𑁄, 𑀧𑀸𑀤𑀓𑀸𑀭𑀫𑁆𑀫𑀡𑁂𑀦 𑀢𑀼.

𑁧𑁦𑁬𑁮.

𑀨𑀼𑀝𑁆𑀞𑁄𑀓𑀸𑀲𑀕𑀢𑁂 ¶ 𑀲𑀤𑁆𑀤𑁂, 𑀲𑀩𑁆𑀩𑁂 𑀧𑀦 𑀲𑀼𑀡𑀸𑀢𑀺 𑀲𑁄;

𑀲𑀼𑀡𑀦𑁆𑀢𑁄 𑀧𑀸𑀝𑀺𑀬𑁂𑀓𑁆𑀓𑀫𑁆𑀧𑀺, 𑀲𑀮𑁆𑀮𑀓𑁆𑀔𑁂𑀢𑀼𑀁 𑀧𑀳𑁄𑀢𑀺 𑀲𑁄.

𑀤𑀺𑀩𑁆𑀩𑀲𑁄𑀢𑀜𑀸𑀡𑀁.

𑁧𑁦𑁬𑁯.

𑀓𑀣𑀁 ¶ 𑀧𑀦𑀼𑀧𑁆𑀧𑀸𑀤𑁂𑀢𑀩𑁆𑀩𑀁, 𑀘𑁂𑀢𑁄𑀧𑀭𑀺𑀬𑀫𑀸𑀦𑀲𑀁;

𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯, 𑀇𑀤𑀁 𑀜𑀸𑀡𑀁 𑀧𑀦𑀺𑀚𑁆𑀛𑀢𑀺.

𑁧𑁦𑁭𑁦.

𑀆𑀮𑁄𑀓𑀁 𑀧𑀦 𑀯𑀟𑁆𑀠𑁂𑀢𑁆𑀯𑀸, 𑀢𑀲𑁆𑀫𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸;

𑀳𑀤𑀬𑀁 𑀧𑀦 𑀦𑀺𑀲𑁆𑀲𑀸𑀬, 𑀯𑀢𑁆𑀢𑀫𑀸𑀦𑀁 𑀢𑀼 𑀮𑁄𑀳𑀺𑀢𑀁.

𑁧𑁦𑁭𑁧.

𑀤𑀺𑀲𑁆𑀯𑀸 𑀧𑀭𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀁,

𑀳𑁄𑀢𑀺 𑀘𑀺𑀢𑁆𑀢𑀁 𑀢𑀼 𑀪𑀺𑀓𑁆𑀔𑀼𑀦𑀸;

𑀲𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂,

𑀮𑁄𑀳𑀺𑀢𑀁 𑀮𑁄𑀳𑀺𑀢𑀁 𑀲𑀺𑀬𑀸.

𑁧𑁦𑁭𑁨.

𑀤𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂, 𑀯𑀢𑁆𑀢𑀫𑀸𑀦𑁂 𑀢𑀼 𑀓𑀸𑀴𑀓𑀁;

𑀉𑀧𑁂𑀓𑁆𑀔𑀸𑀲𑀳𑀺𑀢𑁂 𑀘𑀺𑀢𑁆𑀢𑁂, 𑀢𑀺𑀮𑀢𑁂𑀮𑀽𑀧𑀫𑀁 𑀲𑀺𑀬𑀸.

𑁧𑁦𑁭𑁩.

𑀢𑀲𑁆𑀫𑀸 ¶ 𑀧𑀭𑀲𑁆𑀲 𑀲𑀢𑁆𑀢𑀲𑁆𑀲, 𑀤𑀺𑀲𑁆𑀯𑀸 𑀳𑀤𑀬𑀮𑁄𑀳𑀺𑀢𑀁;

𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀢𑀁, 𑀓𑀸𑀢𑀩𑁆𑀩𑀁 𑀣𑀸𑀫𑀢𑀁 𑀕𑀢𑀁.

𑁧𑁦𑁭𑁪.

𑀏𑀯𑀁 𑀣𑀸𑀫𑀕𑀢𑁂 𑀢𑀲𑁆𑀫𑀺𑀁, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀧𑀦;

𑀘𑀺𑀢𑁆𑀢𑀫𑁂𑀯 𑀯𑀺𑀚𑀸𑀦𑀸𑀢𑀺, 𑀯𑀺𑀦𑀸 𑀮𑁄𑀳𑀺𑀢𑀤𑀲𑁆𑀲𑀦𑀁.

𑁧𑁦𑁭𑁫.

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀜𑁆𑀘, 𑀭𑀽𑀧𑀸𑀭𑀽𑀧𑁂𑀲𑀼 𑀫𑀸𑀦𑀲𑀁;

𑀲𑀩𑁆𑀩𑀫𑁂𑀯 𑀯𑀺𑀚𑀸𑀦𑀸𑀢𑀺, 𑀲𑀭𑀸𑀕𑀸𑀤𑀺𑀧𑁆𑀧𑀪𑁂𑀤𑀓𑀁.

𑀘𑁂𑀢𑁄𑀧𑀭𑀺𑀬𑀜𑀸𑀡𑀁.

𑁧𑁦𑁭𑁬.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦, 𑀓𑀢𑁆𑀢𑀩𑁆𑀩𑀸 𑀢𑀤𑀦𑀼𑀲𑁆𑀲𑀢𑀺;

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦, 𑀆𑀤𑀺𑀓𑀫𑁆𑀫𑀺𑀓𑀪𑀺𑀓𑁆𑀔𑀼𑀦𑀸;

𑀛𑀸𑀦𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺, 𑀲𑀫𑀸𑀧𑀚𑁆𑀚𑀸𑀦𑀼𑀧𑀼𑀩𑁆𑀩𑀢𑁄.

𑁧𑁦𑁭𑁭.

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀳𑀺 𑀢𑀢𑁄 𑀧𑀼𑀦;

𑀪𑀺𑀓𑁆𑀔𑀼𑀦𑀸 𑀯𑀚𑁆𑀚𑀺𑀢𑀩𑁆𑀩𑀸𑀯, 𑀦𑀺𑀲𑀚𑁆𑀚𑀸 𑀲𑀩𑁆𑀩𑀧𑀘𑁆𑀙𑀺𑀫𑀸.

𑁧𑁦𑁭𑁮.

𑀢𑀢𑁄 ¶ ¶ 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺, 𑀧𑀝𑀺𑀮𑁄𑀫𑀓𑁆𑀓𑀫𑀸 𑀧𑀦;

𑀲𑀩𑁆𑀩𑀫𑀸𑀯𑀚𑁆𑀚𑀺𑀢𑀩𑁆𑀩𑀁 𑀢𑀁, 𑀤𑀺𑀯𑀲𑁂 𑀭𑀢𑁆𑀢𑀺𑀬𑀁 𑀓𑀢𑀁.

𑁧𑁦𑁭𑁯.

𑀧𑀝𑀺𑀮𑁄𑀫𑀓𑁆𑀓𑀫𑁂𑀦𑁂𑀯, 𑀤𑀼𑀢𑀺𑀬𑁂 𑀢𑀢𑀺𑀬𑁂𑀧𑀺 𑀘;

𑀤𑀺𑀯𑀲𑁂 𑀧𑀓𑁆𑀔𑀫𑀸𑀲𑁂𑀲𑀼, 𑀢𑀣𑀸 𑀲𑀁𑀯𑀘𑁆𑀙𑀭𑁂𑀲𑀼𑀧𑀺.

𑁧𑁦𑁮𑁦.

𑀬𑀸𑀯 𑀅𑀲𑁆𑀫𑀺𑀁 𑀪𑀯𑁂 𑀲𑀦𑁆𑀥𑀺, 𑀢𑀸𑀯 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸;

𑀓𑀢𑀫𑀸𑀯𑀚𑁆𑀚𑀺𑀢𑀩𑁆𑀩𑀁 𑀢𑀁, 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂𑀧𑀺 𑀘.

𑁧𑁦𑁮𑁧.

𑀘𑀼𑀢𑀺𑀓𑁆𑀔𑀡𑁂𑀧𑀺 𑀦𑀺𑀩𑁆𑀩𑀢𑁆𑀢𑀁, 𑀦𑀸𑀫𑀭𑀽𑀧𑀜𑁆𑀘 𑀲𑀸𑀥𑀼𑀓𑀁;

𑀏𑀯𑀫𑀸𑀯𑀚𑁆𑀚𑀺𑀢𑁂 𑀢𑀲𑁆𑀫𑀺𑀁, 𑀦𑀸𑀫𑀭𑀽𑀧𑁂 𑀬𑀤𑀸 𑀧𑀦.

𑁧𑁦𑁮𑁨.

𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀦𑀸𑀫𑀭𑀽𑀧𑀁 𑀘𑀼𑀢𑀺𑀓𑁆𑀔𑀡𑁂;

𑀫𑀦𑁄𑀤𑁆𑀯𑀸𑀭𑁂 𑀫𑀦𑀓𑁆𑀓𑀸𑀭𑁄, 𑀉𑀧𑁆𑀧𑀚𑁆𑀚𑀢𑀺 𑀢𑀤𑀸 𑀧𑀦.

𑁧𑁦𑁮𑁩.

𑀆𑀯𑀚𑁆𑀚𑀦𑁂 𑀦𑀺𑀭𑀼𑀤𑁆𑀥𑀲𑁆𑀫𑀺𑀁, 𑀢𑀤𑁂𑀯𑀸𑀭𑀫𑁆𑀫𑀡𑀁 𑀧𑀦;

𑀓𑀢𑁆𑀯𑀸 𑀚𑀯𑀦𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁧𑁦𑁮𑁪.

𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀸𑀦𑀺, 𑀧𑀼𑀭𑀺𑀫𑀸𑀦𑀺 𑀪𑀯𑀦𑁆𑀢𑀺 𑀢𑀼;

𑀧𑀘𑁆𑀙𑀺𑀫𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁, 𑀭𑀽𑀧𑀸𑀯𑀘𑀭𑀺𑀓𑀁 𑀪𑀯𑁂.

𑁧𑁦𑁮𑁫.

𑀢𑁂𑀦 𑀘𑀺𑀢𑁆𑀢𑁂𑀦 𑀬𑀁 𑀜𑀸𑀡𑀁, 𑀲𑀁𑀬𑀼𑀢𑁆𑀢𑀁 𑀢𑁂𑀦 𑀬𑀸 𑀧𑀦;

𑀲𑀁𑀬𑀼𑀢𑁆𑀢𑀸 𑀲𑀢𑀺 𑀲𑀸 𑀧𑀼𑀩𑁆𑀩𑁂-𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀭𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁.

𑁧𑁦𑁮𑁬.

𑀭𑀽𑀧𑀁 𑀧𑀲𑁆𑀲𑀺𑀢𑀼𑀓𑀸𑀫𑁂𑀦, 𑀪𑀺𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸;

𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀧𑀦.

𑁧𑁦𑁮𑁭.

𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸, 𑀢𑁂𑀚𑁄𑀓𑀲𑀺𑀡𑀫𑁂𑀯 𑀯𑀸;

𑀑𑀤𑀸𑀢𑀓𑀲𑀺𑀡𑀁 𑀯𑀸𑀧𑀺, 𑀆𑀮𑁄𑀓𑀓𑀲𑀺𑀡𑀫𑁆𑀧𑀺 𑀯𑀸.

𑁧𑁦𑁮𑁮.

𑀇𑀫𑁂𑀲𑀼 ¶ 𑀓𑀢𑀧𑀼𑀜𑁆𑀜𑁂𑀳𑀺, 𑀓𑀲𑀺𑀡𑁂𑀲𑀼 𑀘 𑀢𑀻𑀲𑀼𑀧𑀺;

𑀆𑀮𑁄𑀓𑀓𑀲𑀺𑀡𑀁 𑀏𑀢𑁆𑀣, 𑀲𑁂𑀝𑁆𑀞𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁧𑁦𑁮𑁯.

𑀢𑀲𑁆𑀫𑀸 ¶ ¶ 𑀢𑀫𑀺𑀢𑀭𑀁 𑀯𑀸𑀧𑀺, 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁;

𑀉𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯, 𑀞𑀢𑁆𑀯𑀸 𑀢𑀁 𑀧𑀦 𑀧𑀡𑁆𑀟𑀺𑀢𑁄.

𑁧𑁦𑁯𑁦.

𑀯𑀟𑁆𑀠𑁂𑀢𑁆𑀯𑀸𑀦 𑀞𑀧𑁂𑀢𑀩𑁆𑀩𑀁, 𑀦 𑀉𑀧𑁆𑀧𑀸𑀤𑁂𑀬𑁆𑀬 𑀅𑀧𑁆𑀧𑀦𑀁;

𑀉𑀧𑁆𑀧𑀸𑀤𑁂𑀢𑀺 𑀲𑀘𑁂 𑀳𑁄𑀢𑀺, 𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀺𑀢𑀁.

𑁧𑁦𑁯𑁧.

𑀛𑀸𑀦𑀲𑁆𑀲 𑀯𑀟𑁆𑀠𑀺𑀢𑀲𑁆𑀲𑀦𑁆𑀢𑁄-𑀕𑀢𑀁 𑀭𑀽𑀧𑀁 𑀢𑀼 𑀬𑁄𑀕𑀺𑀦𑀸;

𑀧𑀲𑁆𑀲𑀺𑀢𑀩𑁆𑀩𑀁 𑀪𑀯𑁂 𑀭𑀽𑀧𑀁, 𑀧𑀲𑁆𑀲𑀢𑁄 𑀧𑀦 𑀢𑀲𑁆𑀲 𑀢𑀁.

𑁧𑁦𑁯𑁨.

𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀳𑀺, 𑀅𑀢𑀺𑀓𑁆𑀓𑀫𑀢𑀺 𑀢𑀸𑀯𑀤𑁂;

𑀆𑀮𑁄𑀓𑁄𑀧𑀺 𑀢𑀢𑁄 𑀢𑀲𑁆𑀲, 𑀔𑀺𑀧𑁆𑀧𑀫𑀦𑁆𑀢𑀭𑀥𑀸𑀬𑀢𑀺.

𑁧𑁦𑁯𑁩.

𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧-𑀕𑀢𑀫𑁆𑀧𑀺 𑀘 𑀦 𑀤𑀺𑀲𑁆𑀲𑀢𑀺;

𑀢𑁂𑀦𑀸𑀣 𑀧𑀸𑀤𑀓𑀚𑁆𑀛𑀸𑀦𑀁, 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀧𑀼𑀦.

𑁧𑁦𑁯𑁪.

𑀯𑀼𑀝𑁆𑀞𑀸𑀬 𑀧𑀦 𑀆𑀮𑁄𑀓𑁄, 𑀨𑀭𑀺𑀢𑀩𑁆𑀩𑁄𑀯 𑀪𑀺𑀓𑁆𑀔𑀼𑀦𑀸;

𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑁂𑀯, 𑀆𑀮𑁄𑀓𑁄 𑀣𑀸𑀫𑀯𑀸 𑀲𑀺𑀬𑀸.

𑁧𑁦𑁯𑁫.

‘‘𑀆𑀮𑁄𑀓𑁄 𑀏𑀢𑁆𑀣 𑀳𑁄𑀢𑀽’’𑀢𑀺,

𑀬𑀢𑁆𑀢𑀓𑀁 𑀞𑀸𑀦𑀫𑁂𑀯 𑀲𑁄;

𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀢𑀢𑁆𑀣𑁂𑀯,

𑀆𑀮𑁄𑀓𑁄 𑀧𑀦 𑀢𑀺𑀝𑁆𑀞𑀢𑀺.

𑁧𑁦𑁯𑁬.

𑀤𑀺𑀯𑀲𑀫𑁆𑀧𑀺 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀲𑁆𑀲𑀢𑁄 𑀳𑁄𑀢𑀺 𑀤𑀲𑁆𑀲𑀦𑀁;

𑀢𑀺𑀡𑀼𑀓𑁆𑀓𑀸𑀬 𑀕𑀢𑁄 𑀫𑀕𑁆𑀕𑀁, 𑀧𑀼𑀭𑀺𑀲𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑁧𑁦𑁯𑁭.

𑀉𑀧𑁆𑀧𑀸𑀤𑀦𑀓𑁆𑀓𑀫𑁄𑀧𑀺𑀲𑁆𑀲, 𑀢𑀢𑁆𑀭𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑁄;

𑀯𑀼𑀢𑁆𑀢𑀧𑁆𑀧𑀓𑀸𑀭𑀭𑀽𑀧𑀁 𑀢𑀁, 𑀓𑀢𑁆𑀯𑀸 𑀆𑀭𑀫𑁆𑀫𑀡𑀁 𑀧𑀦.

𑁧𑁦𑁯𑁮.

𑀫𑀦𑁄𑀤𑁆𑀯𑀸𑀭𑁂 𑀫𑀦𑀓𑁆𑀓𑀸𑀭𑁂, 𑀚𑀸𑀢𑁂 𑀬𑀸𑀦𑀺 𑀢𑀤𑁂𑀯 𑀘;

𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀚𑀸𑀬𑀦𑁆𑀢𑀺 𑀚𑀯𑀦𑀸𑀦𑀺 𑀳𑀺.

𑁧𑁦𑁯𑁯.

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 ¶ , 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁧𑁧𑁦𑁦.

𑀅𑀢𑁆𑀣𑀲𑀸𑀥𑀓𑀘𑀺𑀢𑁆𑀢𑀁 𑀢𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀫𑀢𑀁;

𑀢𑀁𑀘𑀺𑀢𑁆𑀢𑀲𑀁𑀬𑀼𑀢𑀁 𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁦𑁧.

𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 ¶ , 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲 𑀘;

𑀧𑀭𑀺𑀓𑀫𑁆𑀫𑀁 𑀯𑀺𑀲𑀼𑀁 𑀦𑀢𑁆𑀣𑀺, 𑀇𑀚𑁆𑀛𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸.

𑁧𑁧𑁦𑁨.

𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑁆𑀧𑀺, 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀯𑀸 𑀧𑀦;

𑀅𑀢𑁆𑀣𑀢𑁄 𑀏𑀓𑀫𑁂𑀯𑁂𑀤𑀁, 𑀩𑁆𑀬𑀜𑁆𑀚𑀦𑁂 𑀧𑀦 𑀦𑀸𑀦𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁.

𑁧𑁧𑁦𑁩.

𑀬𑁄𑀥 𑀲𑀼𑀡𑀸𑀢𑀺 𑀓𑀭𑁄𑀢𑀺 𑀘 𑀘𑀺𑀢𑁆𑀢𑁂,

𑀕𑀦𑁆𑀣𑀫𑀺𑀫𑀁 𑀧𑀭𑀫𑀁 𑀧𑀦 𑀪𑀺𑀓𑁆𑀔𑀼;

𑀲𑁄 𑀅𑀪𑀺𑀥𑀫𑁆𑀫𑀫𑀳𑀡𑁆𑀡𑀯𑀧𑀸𑀭𑀁,

𑀬𑀸𑀢𑀺 𑀅𑀦𑁂𑀦 𑀢𑀭𑁂𑀦 𑀢𑀭𑀺𑀢𑁆𑀯𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁭. 𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁄

𑁧𑁧𑁦𑁪.

𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘 ¶ , 𑀬𑀣𑀸𑀓𑀫𑁆𑀫𑀼𑀧𑀕𑀫𑁆𑀧𑀺 𑀘;

𑀧𑀜𑁆𑀘 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀺, 𑀲𑀢𑁆𑀢𑀸𑀪𑀺𑀜𑁆𑀜𑀸 𑀇𑀫𑀸 𑀧𑀦.

𑁧𑁧𑁦𑁫.

𑀏𑀢𑀸𑀲𑀁 ¶ 𑀧𑀦 𑀲𑀢𑁆𑀢𑀦𑁆𑀦𑀁, 𑀅𑀪𑀺𑀜𑁆𑀜𑀸𑀦𑀫𑀺𑀢𑁄 𑀧𑀭𑀁;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀆𑀭𑀫𑁆𑀫𑀡𑀯𑀺𑀦𑀺𑀘𑁆𑀙𑀬𑀁.

𑁧𑁧𑁦𑁬.

𑀆𑀭𑀫𑁆𑀫𑀡𑀢𑁆𑀢𑀺𑀓𑀸 𑀯𑀼𑀢𑁆𑀢𑀸, 𑀬𑁂 𑀘𑀢𑁆𑀢𑀸𑀭𑁄 𑀫𑀳𑁂𑀲𑀺𑀦𑀸;

𑀲𑀢𑁆𑀢𑀦𑁆𑀦𑀫𑁂𑀢𑁆𑀣 𑀜𑀸𑀡𑀸𑀦𑀁, 𑀲𑀫𑁆𑀧𑀯𑀢𑁆𑀢𑀺𑀁 𑀲𑀼𑀡𑀸𑀣 𑀫𑁂.

𑁧𑁧𑁦𑁭.

𑀢𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑀁, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁦𑁮.

𑀓𑀸𑀬𑁂𑀦𑀸𑀤𑀺𑀲𑁆𑀲𑀫𑀸𑀦𑁂𑀦, 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸𑀪𑀯𑁂;

𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸, 𑀓𑀸𑀬𑀁 𑀘𑀺𑀢𑁆𑀢𑀯𑀲𑁂𑀦 𑀢𑀁.

𑁧𑁧𑁦𑁯.

𑀫𑀳𑀕𑁆𑀕𑀢𑁂 ¶ 𑀘 𑀘𑀺𑀢𑁆𑀢𑀲𑁆𑀫𑀺𑀁, 𑀲𑀫𑀸𑀭𑁄𑀧𑁂𑀢𑀺 𑀲𑁄 𑀢𑀤𑀸;

𑀓𑀸𑀬𑀸𑀭𑀫𑁆𑀫𑀡𑀢𑁄 𑀜𑀸𑀡𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁧𑁦.

𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦, 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸 𑀪𑀯𑁂;

𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸, 𑀘𑀺𑀢𑁆𑀢𑀁 𑀓𑀸𑀬𑀯𑀲𑁂𑀦 𑀢𑀁.

𑁧𑁧𑁧𑁧.

𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀢𑀁, 𑀓𑀸𑀬𑁂 𑀭𑁄𑀧𑁂𑀢𑀺 𑀲𑁄 𑀢𑀤𑀸;

𑀛𑀸𑀦𑀸𑀭𑀫𑁆𑀫𑀡𑀢𑁄 𑀜𑀸𑀡𑀁, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁧𑁨.

𑀅𑀦𑀸𑀕𑀢𑀫𑀢𑀻𑀢𑀜𑁆𑀘, 𑀓𑀭𑁄𑀢𑀺 𑀯𑀺𑀲𑀬𑀁 𑀬𑀤𑀸;

𑀅𑀢𑀻𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁧𑁩.

𑀓𑀸𑀬𑁂𑀦 𑀤𑀺𑀲𑁆𑀲𑀫𑀸𑀦𑁂𑀦, 𑀕𑀫𑀦𑁂 𑀧𑀦 𑀪𑀺𑀓𑁆𑀔𑀼𑀦𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀪𑀯𑁂 𑀢𑀲𑁆𑀲, 𑀕𑁄𑀘𑀭𑁄𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧𑁧𑁪.

𑀓𑀸𑀬𑀁 𑀘𑀺𑀢𑁆𑀢𑀯𑀲𑁂𑀦𑀸𑀧𑀺, 𑀘𑀺𑀢𑁆𑀢𑀁 𑀓𑀸𑀬𑀯𑀲𑁂𑀦 𑀯𑀸;

𑀧𑀭𑀺𑀡𑀸𑀫𑀦𑀓𑀸𑀮𑀲𑁆𑀫𑀺𑀁, 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁧𑁫.

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸𑀭𑀽𑀧𑀤𑀲𑁆𑀲𑀦𑁂;

𑀏𑀯𑀫𑀺𑀤𑁆𑀥𑀺𑀯𑀺𑀥𑀁 𑀜𑀸𑀡𑀁, 𑀲𑀫𑁆𑀧𑀯𑀢𑁆𑀢𑀢𑀺 𑀲𑀢𑁆𑀢𑀲𑀼.

𑁧𑁧𑁧𑁬.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀭𑀺𑀢𑁆𑀢𑁂 𑀘, 𑀩𑀳𑀺𑀤𑁆𑀥𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀤𑀺𑀩𑁆𑀩𑀲𑁄𑀢𑀁 𑀧𑀯𑀢𑁆𑀢𑀢𑀺.

𑁧𑁧𑁧𑁭.

𑀧𑀘𑁆𑀘𑀼𑀧𑁆𑀧𑀦𑁆𑀦𑁄 ¶ ¶ 𑀧𑀭𑀺𑀢𑁆𑀢𑁄 𑀘, 𑀲𑀤𑁆𑀤𑁄 𑀆𑀭𑀫𑁆𑀫𑀡𑀁 𑀬𑀢𑁄;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀁 𑀕𑀢𑀁.

𑁧𑁧𑁧𑁮.

𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀲𑀤𑁆𑀤𑀲𑁆𑀲, 𑀲𑀯𑀦𑁂𑀧𑀺 𑀧𑀭𑀲𑁆𑀲 𑀘;

𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀜𑁆𑀘𑁂𑀯, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁆𑀧𑀺 𑀘.

𑁧𑁧𑁧𑁯.

𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁨𑁦.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀭𑀺𑀢𑁆𑀢𑀸𑀦𑀁 𑀧𑀚𑀸𑀦𑀦𑁂;

𑀚𑀸𑀦𑀦𑁂 𑀫𑀚𑁆𑀛𑀺𑀫𑀸𑀦𑀁 𑀢𑀼, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁨𑁧.

𑀚𑀸𑀦𑀦𑁂 𑀧𑀦 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲𑀸𑀧𑀺 𑀧𑀚𑀸𑀦𑀦𑁂;

𑀢𑀤𑀸 𑀧𑀦𑀲𑁆𑀲 𑀜𑀸𑀡𑀲𑁆𑀲, 𑀅𑀧𑁆𑀧𑀫𑀸𑀡𑁄𑀯 𑀕𑁄𑀘𑀭𑁄.

𑁧𑁧𑁨𑁨.

𑀢𑀁 ¶ 𑀫𑀕𑁆𑀕𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑁂;

𑀧𑀭𑀺𑀬𑀸𑀬𑁂𑀦𑁂𑀯𑁂𑀢𑀲𑁆𑀲, 𑀫𑀕𑁆𑀕𑀸𑀭𑀫𑁆𑀫𑀡𑀢𑀸 𑀫𑀢𑀸.

𑁧𑁧𑁨𑁩.

𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲-𑀩𑁆𑀪𑀦𑁆𑀢𑀭𑁂 𑀘 𑀬𑀤𑀸 𑀧𑀦;

𑀅𑀦𑀸𑀕𑀢𑁂 𑀢𑀣𑀸 𑀲𑀢𑁆𑀢-𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀧𑀺 𑀘.

𑁧𑁧𑁨𑁪.

𑀧𑀭𑁂𑀲𑀁 𑀧𑀦 𑀘𑀺𑀢𑁆𑀢𑀲𑁆𑀲, 𑀚𑀸𑀦𑀦𑁂 𑀲𑀫𑀼𑀤𑀻𑀭𑀺𑀢𑀁;

𑀅𑀢𑀻𑀢𑀸𑀭𑀫𑁆𑀫𑀡𑀜𑁆𑀘𑁂𑀯, 𑀢𑀤𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁨𑁫.

𑀓𑀣𑀜𑁆𑀘 𑀧𑀦 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁄𑀘𑀭𑀢𑀁 𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀺𑀥𑀸 𑀯𑀼𑀢𑁆𑀢𑀁, 𑀔𑀡𑀲𑀦𑁆𑀢𑀢𑀺𑀅𑀤𑁆𑀥𑀢𑁄.

𑁧𑁧𑁨𑁬.

𑀢𑀢𑁆𑀣 𑀢𑀺𑀓𑁆𑀔𑀡𑀲𑀫𑁆𑀧𑀢𑁆𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀡𑀸𑀤𑀺𑀓𑀁;

𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀫𑀺𑀤𑀁 𑀧𑀦.

𑁧𑁧𑁨𑁭.

𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺, 𑀆𑀳𑀼 𑀲𑀦𑁆𑀢𑀢𑀺𑀓𑁄𑀯𑀺𑀤𑀸;

𑀏𑀓𑀩𑁆𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫𑀁.

𑁧𑁧𑁨𑁮.

𑀔𑀡𑀸𑀤𑀺𑀓𑀢𑁆𑀢𑀬𑀁 𑀧𑀘𑁆𑀘𑀼-𑀧𑁆𑀧𑀦𑁆𑀦𑀁 𑀢𑀫𑀸𑀳𑀼 𑀓𑁂𑀘𑀺𑀥;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀇𑀢𑀺.

𑁧𑁧𑁨𑁯.

𑀬𑀣𑀸 ¶ 𑀘 𑀧𑀼𑀧𑁆𑀨𑀫𑀼𑀝𑁆𑀞𑀺𑀫𑁆𑀳𑀺, 𑀉𑀓𑁆𑀔𑀺𑀢𑁆𑀢𑁂 𑀕𑀕𑀦𑁂 𑀧𑀦;

𑀅𑀯𑀲𑁆𑀲𑀁 𑀏𑀓𑀫𑁂𑀓𑀲𑁆𑀲, 𑀯𑀡𑁆𑀝𑀁 𑀯𑀡𑁆𑀝𑁂𑀦 𑀯𑀺𑀚𑁆𑀛𑀢𑀺.

𑁧𑁧𑁩𑁦.

𑀏𑀯𑀁 𑀫𑀳𑀸𑀚𑀦𑀲𑁆𑀲𑀸𑀧𑀺, 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂 𑀧𑀦;

𑀏𑀓𑀲𑁆𑀲 𑀘𑀺𑀢𑁆𑀢𑀫𑁂𑀓𑁂𑀦, 𑀅𑀯𑀲𑁆𑀲𑀁 𑀧𑀦 𑀯𑀺𑀚𑁆𑀛𑀢𑀺.

𑁧𑁧𑁩𑁧.

𑀬𑁂𑀦𑀸𑀯𑀚𑁆𑀚𑀢𑀺 𑀘𑀺𑀢𑁆𑀢𑁂𑀦, 𑀬𑁂𑀦 𑀚𑀸𑀦𑀸𑀢𑀺 𑀘𑁂𑀢𑀲𑀸;

𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀳𑀝𑁆𑀞𑀸𑀦𑀸-𑀪𑀸𑀯𑀢𑁄 𑀢𑀁 𑀦 𑀬𑀼𑀚𑁆𑀚𑀢𑀺.

𑁧𑁧𑁩𑁨.

𑀚𑀯𑀦𑀸𑀯𑀚𑁆𑀚𑀦𑀸𑀦𑀁 𑀢𑀼, 𑀦𑀸𑀦𑀸𑀭𑀫𑁆𑀫𑀡𑀧𑀢𑁆𑀢𑀺𑀢𑁄;

𑀅𑀦𑀺𑀝𑁆𑀞𑁂 𑀧𑀦 𑀳𑀺 𑀞𑀸𑀦𑁂, 𑀅𑀬𑀼𑀢𑁆𑀢𑀦𑁆𑀢𑀺 𑀧𑀓𑀸𑀲𑀺𑀢𑀁.

𑁧𑁧𑁩𑁩.

𑀢𑀲𑁆𑀫𑀸 𑀲𑀦𑁆𑀢𑀢𑀺𑀅𑀤𑁆𑀥𑀸𑀦-𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀫𑁂𑀯 𑀢𑀼;

𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀇𑀤𑀁.

𑁧𑁧𑁩𑁪.

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀤𑁆𑀥𑀸𑀔𑁆𑀬𑀁, 𑀇𑀤𑀁 𑀚𑀯𑀦𑀯𑀸𑀭𑀢𑁄;

𑀤𑀻𑀧𑁂𑀢𑀩𑁆𑀩𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀢𑁆𑀭𑀸𑀬𑀁 𑀤𑀻𑀧𑀦𑀸𑀦𑀬𑁄.

𑁧𑁧𑁩𑁫.

𑀬𑀤𑀸 ¶ ¶ 𑀧𑀭𑀲𑁆𑀲 𑀘𑀺𑀢𑁆𑀢𑀜𑁆𑀳𑀺, 𑀜𑀸𑀢𑀼𑀫𑀸𑀯𑀚𑁆𑀚𑀢𑀺𑀤𑁆𑀥𑀺𑀫𑀸;

𑀆𑀯𑀚𑁆𑀚𑀦𑀫𑀦𑁄 𑀢𑀲𑁆𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀡𑀯𑁆𑀳𑀬𑀁.

𑁧𑁧𑁩𑁬.

𑀆𑀭𑀫𑁆𑀫𑀡𑀁 𑀢𑀤𑀸 𑀓𑀢𑁆𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺;

𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁧𑁧𑁩𑁭.

𑀏𑀢𑁂𑀲𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀇𑀤𑁆𑀥𑀺𑀘𑀺𑀢𑁆𑀢𑀫𑀼𑀤𑀻𑀭𑀺𑀢𑀁;

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀲𑁂𑀲𑀸𑀦𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧𑁩𑁮.

𑀏𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀁, 𑀦𑀺𑀭𑀼𑀤𑁆𑀥𑀁 𑀢𑀼 𑀢𑀤𑁂𑀯 𑀘;

𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺𑀧𑀺.

𑁧𑁧𑁩𑁯.

𑀏𑀓𑀸𑀭𑀫𑁆𑀫𑀡𑀢𑀁 𑀬𑀦𑁆𑀢𑀺, 𑀦 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑀺;

𑀅𑀤𑁆𑀥𑀸𑀯𑀲𑀸 𑀪𑀯𑁂 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁄 𑀧𑀦.

𑁧𑁧𑁪𑁦.

𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀧𑀺, 𑀇𑀤𑁆𑀥𑀺𑀫𑀸𑀦𑀲𑀫𑁂𑀯 𑀘;

𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦𑁂𑀢𑀭𑀸𑀦𑀺 𑀬𑀣𑀸 𑀧𑀦.

𑁧𑁧𑁪𑁧.

𑀘𑀓𑁆𑀔𑀼𑀤𑁆𑀯𑀸𑀭𑁂 ¶ 𑀢𑀼 𑀯𑀺𑀜𑁆𑀜𑀸𑀡𑀁, 𑀭𑀽𑀧𑀁 𑀧𑀲𑁆𑀲𑀢𑀺 𑀦𑁂𑀢𑀭𑀁;

𑀏𑀯𑀫𑁂𑀯 𑀘 𑀢𑀁 𑀇𑀤𑁆𑀥𑀺-𑀘𑀺𑀢𑁆𑀢𑀫𑁂𑀯 𑀘 𑀚𑀸𑀦𑀸𑀢𑀺.

𑁧𑁧𑁪𑁨.

𑀧𑀭𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺, 𑀅𑀝𑁆𑀞𑀲𑁆𑀯𑁂𑀯 𑀧𑀯𑀢𑁆𑀢𑀢𑀺.

𑁧𑁧𑁪𑁩.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁪𑁪.

𑀓𑀸𑀫𑀸𑀯𑀘𑀭𑀔𑀦𑁆𑀥𑀸𑀦𑀁, 𑀲𑀫𑀦𑀼𑀲𑁆𑀲𑀭𑀡𑁂 𑀧𑀦;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁𑀬𑁂𑀯, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁧𑁪𑁫.

𑀭𑀽𑀧𑀸𑀯𑀘𑀭𑀺𑀓𑀸𑀭𑀼𑀧𑁆𑀧𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀧𑀦;

𑀪𑀯𑀢𑀻𑀢𑀺 𑀳𑀺 𑀜𑀸𑀢𑀩𑁆𑀩𑀁, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁪𑁬.

𑀅𑀢𑀻𑀢𑁂 𑀅𑀢𑁆𑀢𑀦𑀸 𑀫𑀕𑁆𑀕𑀁, 𑀪𑀸𑀯𑀺𑀢𑀁 𑀢𑀼 𑀨𑀮𑀫𑁆𑀧𑀺 𑀯𑀸;

𑀲𑀫𑀦𑀼𑀲𑁆𑀲𑀭𑀢𑁄 𑀏𑀯-𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁪𑁭.

𑀲𑀫𑀦𑀼𑀲𑁆𑀲𑀭𑀢𑁄 𑀫𑀕𑁆𑀕𑀁, 𑀫𑀕𑁆𑀕𑀸𑀭𑀫𑁆𑀫𑀡𑀫𑁂𑀯 𑀢𑀁;

𑀅𑀢𑀻𑀢𑀸𑀭𑀫𑁆𑀫𑀡𑀁𑀬𑁂𑀯, 𑀳𑁄𑀢𑀺 𑀏𑀓𑀦𑁆𑀢𑀢𑁄 𑀇𑀤𑀁.

𑁧𑁧𑁪𑁮.

𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺 ¶ , 𑀬𑀣𑀸𑀓𑀫𑁆𑀫𑀼𑀧𑀕𑀫𑁆𑀧𑀺 𑀘;

𑀅𑀢𑀻𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀅𑀣 𑀔𑁄 𑀧𑀦.

𑁧𑁧𑁪𑁯.

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀲𑀢𑁆𑀢𑀤𑁆𑀤𑀺𑀯𑀲𑀩𑁆𑀪𑀦𑁆𑀢𑀭𑀁;

𑀅𑀢𑀻𑀢𑀁 𑀘𑀺𑀢𑁆𑀢𑀫𑁂𑀯𑀲𑁆𑀲, 𑀆𑀭𑀫𑁆𑀫𑀡𑀫𑀼𑀤𑀻𑀭𑀺𑀢𑀁.

𑁧𑁧𑁫𑁦.

𑀅𑀢𑀻𑀢𑁂 𑀘𑁂𑀢𑀦𑀸𑀫𑀢𑁆𑀢𑀁, 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲𑀧𑀺;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀕𑁄𑀘𑀭𑀁.

𑁧𑁧𑁫𑁧.

𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀅𑀢𑁆𑀢-𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀲𑀺𑀬𑀸;

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀅𑀜𑁆𑀜-𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀪𑀯𑁂.

𑁧𑁧𑁫𑁨.

𑀲𑀭𑀡𑁂 𑀦𑀸𑀫𑀕𑁄𑀢𑁆𑀢𑀲𑁆𑀲, 𑀢𑀁 𑀦𑀯𑀢𑁆𑀢𑀩𑁆𑀩𑀕𑁄𑀘𑀭𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑁆𑀧𑀺, 𑀅𑀝𑁆𑀞𑀲𑁆𑀯𑁂𑀯 𑀧𑀯𑀢𑁆𑀢𑀢𑀺.

𑁧𑁧𑁫𑁩.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ¶ 𑀧𑀭𑀺𑀢𑁆𑀢𑁂 𑀘, 𑀩𑀳𑀺𑀤𑁆𑀥𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀤𑀺𑀩𑁆𑀩𑀘𑀓𑁆𑀔𑀼 𑀧𑀯𑀢𑁆𑀢𑀢𑀺.

𑁧𑁧𑁫𑁪.

𑀤𑀺𑀩𑁆𑀩𑀲𑁄𑀢𑀲𑀫𑀁 ¶ 𑀤𑀺𑀩𑁆𑀩-𑀘𑀓𑁆𑀔𑀼𑀆𑀭𑀫𑁆𑀫𑀡𑀓𑁆𑀓𑀫𑁂;

𑀭𑀽𑀧𑀁 𑀲𑀤𑁆𑀤𑁄𑀢𑀺 𑀤𑁆𑀯𑀺𑀦𑁆𑀦𑀁 𑀢𑀼, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑁧𑁧𑁫𑁫.

𑀅𑀦𑀸𑀕𑀢𑀁𑀲𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁫𑁬.

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀬𑀁 𑀓𑀸𑀫𑀸-𑀯𑀘𑀭𑁂𑀢𑀺 𑀧𑀚𑀸𑀦𑀢𑁄;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀭𑀽𑀧𑀸𑀭𑀽𑀧𑁂𑀲𑁆𑀯𑀦𑀸𑀕𑀢𑁂.

𑁧𑁧𑁫𑁭.

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀬𑀜𑁆𑀘𑀸𑀧𑀺, 𑀲𑀺𑀬𑀸 𑀫𑀳𑀕𑁆𑀕𑀢𑀕𑁄𑀘𑀭𑀁;

𑀪𑀸𑀯𑁂𑀲𑁆𑀲𑀢𑀺 𑀅𑀬𑀁 𑀫𑀕𑁆𑀕𑀁, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺.

𑁧𑁧𑁫𑁮.

𑀏𑀯𑀁 𑀧𑀚𑀸𑀦𑀦𑁂 𑀅𑀧𑁆𑀧-𑀫𑀸𑀡𑀸𑀭𑀫𑁆𑀫𑀡𑀢𑀁 𑀪𑀯𑁂;

𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺𑀘𑁆𑀘𑁂𑀯, 𑀚𑀸𑀦𑀦𑁂 𑀫𑀕𑁆𑀕𑀕𑁄𑀘𑀭𑀁.

𑁧𑁧𑁫𑁯.

𑀏𑀓𑀦𑁆𑀢𑁂𑀦 𑀇𑀤𑀁 𑀜𑀸𑀡𑀁, 𑀳𑁄𑀢𑀸𑀦𑀸𑀕𑀢𑀕𑁄𑀘𑀭𑀁;

𑀘𑁂𑀢𑁄𑀧𑀭𑀺𑀬𑀁 𑀢𑀼 𑀓𑀺𑀜𑁆𑀘𑀸𑀧𑀺, 𑀳𑁄𑀢𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁬𑁦.

𑀅𑀣 𑀔𑁄 𑀧𑀦 𑀢𑀁 𑀲𑀢𑁆𑀢-𑀤𑀺𑀯𑀲𑀩𑁆𑀪𑀦𑁆𑀢𑀭𑀁 𑀧𑀦;

𑀘𑀺𑀢𑁆𑀢𑀫𑁂𑀯 𑀘 𑀚𑀸𑀦𑀸𑀢𑀺, 𑀦 𑀳𑀺 𑀢𑀁 𑀅𑀜𑁆𑀜𑀕𑁄𑀘𑀭𑀁.

𑁧𑁧𑁬𑁧.

𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 ¶ , 𑀅𑀦𑀸𑀕𑀢𑀁𑀲𑀕𑁄𑀘𑀭𑀁;

‘‘𑀅𑀳𑀁 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀺’’-𑀘𑁆𑀘𑁂𑀯𑀫𑀚𑁆𑀛𑀢𑁆𑀢𑀕𑁄𑀘𑀭𑀁.

𑁧𑁧𑁬𑁨.

‘‘𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀅𑀫𑀼𑀢𑁆𑀭𑀸𑀬𑀁,

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺𑀦𑀸𑀕𑀢𑁂’’;

𑀇𑀘𑁆𑀘𑁂𑀯𑀁 𑀚𑀸𑀦𑀦𑁂 𑀢𑀲𑁆𑀲,

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁬𑁩.

𑀚𑀸𑀦𑀦𑁂 𑀦𑀸𑀫𑀕𑁄𑀢𑁆𑀢𑀲𑁆𑀲, 𑀬𑀲𑁆𑀲 𑀓𑀲𑁆𑀲𑀘𑀺𑀦𑀸𑀕𑀢𑁂;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁𑀯, 𑀢𑀁 𑀦𑀯𑀢𑁆𑀢𑀩𑁆𑀩𑀕𑁄𑀘𑀭𑀁.

𑁧𑁧𑁬𑁪.

𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 ¶ , 𑀧𑀭𑀺𑀢𑁆𑀢𑀸𑀤𑀻𑀲𑀼 𑀧𑀜𑁆𑀘𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁬𑁫.

𑀚𑀸𑀦𑀦𑁂 𑀓𑀸𑀫𑀓𑀫𑁆𑀫𑀲𑁆𑀲, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀢𑀣𑀸 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁬𑁬.

𑀅𑀢𑀻𑀢𑀫𑁂𑀯 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀘𑀸𑀢𑀻𑀢𑀕𑁄𑀘𑀭𑀁;

𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀢𑁆𑀢𑀦𑁄 𑀓𑀫𑁆𑀫𑀚𑀸𑀦𑀦𑁂.

𑁧𑁧𑁬𑁭.

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀭𑀓𑀫𑁆𑀫𑀧𑀚𑀸𑀦𑀦𑁂;

𑀏𑀯𑀁 𑀧𑀯𑀢𑁆𑀢𑀺 𑀜𑀸𑀢𑀩𑁆𑀩𑀸, 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲𑀧𑀺.

𑁧𑁧𑁬𑁮.

𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁, 𑀯𑀼𑀢𑁆𑀢𑁄 𑀆𑀭𑀫𑁆𑀫𑀡𑀓𑁆𑀓𑀫𑁄;

𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁧𑁧𑁬𑁯.

𑀯𑀺𑀯𑀺𑀥𑀢𑁆𑀣𑀯𑀡𑁆𑀡𑀧𑀤𑁂𑀳𑀺 𑀲𑀫𑁆𑀧𑀦𑁆𑀦𑀁,

𑀫𑀥𑀼𑀭𑀢𑁆𑀣𑀫𑀢𑀺𑀦𑀻𑀳𑀭𑀁 𑀕𑀦𑁆𑀣𑀁;

𑀲𑁄𑀢𑀼𑀚𑀦𑀲𑁆𑀲 𑀳𑀤𑀬𑀧𑀻𑀢𑀺𑀓𑀭𑀁,

𑀲𑀼𑀡𑁂𑀬𑁆𑀬 𑀓𑁄𑀘𑀺 𑀫𑀦𑀼𑀚𑁄 𑀲𑀘𑁂𑀢𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁮. 𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁧𑁭𑁦.

𑀲𑀫𑀸𑀥𑀺𑀁 ¶ ¶ 𑀧𑀦 𑀲𑀸𑀪𑀺𑀜𑁆𑀜𑀁, 𑀪𑀸𑀯𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁;

𑀪𑀸𑀯𑁂𑀢𑀩𑁆𑀩𑀸 𑀬𑀢𑁄 𑀧𑀜𑁆𑀜𑀸, 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀥𑀻𑀫𑀢𑀸.

𑁧𑁧𑁭𑁧.

𑀢𑀢𑁄𑀳𑀁 ¶ 𑀤𑀸𑀦𑀺 𑀯𑀓𑁆𑀔𑀸𑀫𑀺, 𑀧𑀜𑁆𑀜𑀸𑀪𑀸𑀯𑀦𑀫𑀼𑀢𑁆𑀢𑀫𑀁;

𑀲𑀫𑀸𑀲𑁂𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀧𑀭𑀁 𑀧𑀻𑀢𑀺𑀲𑀼𑀔𑀸𑀯𑀳𑀁.

𑁧𑁧𑁭𑁨.

𑀓𑀸 𑀧𑀜𑁆𑀜𑀸 𑀧𑀦 𑀓𑁄 𑀘𑀢𑁆𑀣𑁄,

𑀓𑀺𑀫𑀲𑁆𑀲𑀸 𑀮𑀓𑁆𑀔𑀡𑀸𑀤𑀺𑀓𑀁;

𑀓𑀢𑀺𑀥𑀸 𑀲𑀸 𑀓𑀣𑀁 𑀢𑁂𑀦,

𑀪𑀸𑀯𑁂𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀢𑁂. 𑁋

𑁧𑁧𑁭𑁩.

𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀧𑀼𑀜𑁆𑀜𑀘𑀺𑀢𑁆𑀢𑀲𑀫𑀸𑀬𑀼𑀢𑀸;

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸 𑀲𑀸, 𑀚𑀸𑀦𑀦𑀸 𑀯𑀸 𑀧𑀓𑀸𑀭𑀢𑁄.

𑁧𑁧𑁭𑁪.

𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁, 𑀓𑁄 𑀯𑀺𑀲𑁂𑀲𑁄 𑀓𑀺𑀫𑀦𑁆𑀢𑀭𑀁;

𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁, 𑀚𑀸𑀦𑀦𑀢𑁆𑀢𑁂 𑀲𑀫𑁂𑀧𑀺 𑀘.

𑁧𑁧𑁭𑁫.

𑀬𑀸 𑀲𑀜𑁆𑀚𑀸𑀦𑀦𑀫𑀢𑁆𑀢𑀁𑀯, 𑀲𑀜𑁆𑀜𑀸 𑀦𑀻𑀮𑀸𑀤𑀺𑀢𑁄 𑀧𑀦;

𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀁 𑀢𑀼, 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦𑁂𑀯 𑀲𑀸.

𑁧𑁧𑁭𑁬.

𑀯𑀺𑀜𑁆𑀜𑀸𑀡𑀁 𑀧𑀦 𑀚𑀸𑀦𑀸𑀢𑀺, 𑀦𑀻𑀮𑀧𑀻𑀢𑀸𑀤𑀺𑀕𑁄𑀘𑀭𑀁;

𑀲𑀓𑁆𑀓𑁄𑀢𑀺𑀧𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁.

𑁧𑁧𑁭𑁭.

𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑀁 𑀧𑀸𑀧𑁂𑀢𑀼𑀫𑁂𑀯 𑀢𑀁;

𑀧𑀜𑁆𑀜𑀸 𑀯𑀼𑀢𑁆𑀢𑀦𑀬𑀁 𑀓𑀸𑀢𑀼𑀁, 𑀲𑀓𑁆𑀓𑁄𑀢𑀺 𑀢𑀺𑀯𑀺𑀥𑀫𑁆𑀧𑀺 𑀢𑀁.

𑁧𑁧𑁭𑁮.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀯𑀺𑀲𑁂𑀲𑁄 𑀲𑀫𑀼𑀤𑀻𑀭𑀺𑀢𑁄;

𑀲𑀩𑁆𑀩𑁂𑀲𑀁 𑀧𑀦 𑀥𑀫𑁆𑀫𑀸𑀦𑀁, 𑀲𑀪𑀸𑀯𑀧𑀝𑀺𑀯𑁂𑀥𑀦𑀁.

𑁧𑁧𑁭𑁯.

𑀮𑀓𑁆𑀔𑀡𑀁 𑀧𑀦 𑀧𑀜𑁆𑀜𑀸𑀬, 𑀮𑀓𑁆𑀔𑀡𑀜𑁆𑀜𑀽𑀳𑀺 𑀤𑀻𑀧𑀺𑀢𑀁;

𑀲𑀫𑁆𑀫𑁄𑀳𑀦𑀦𑁆𑀥𑀓𑀸𑀭𑀲𑁆𑀲, 𑀯𑀺𑀤𑁆𑀥𑀁𑀲𑀦𑀭𑀲𑀸 𑀫𑀢𑀸.

𑁧𑁧𑁮𑁦.

𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 ¶ , 𑀲𑀫𑀸𑀥𑀸𑀲𑀦𑁆𑀦𑀓𑀸𑀭𑀡𑀸;

𑀏𑀯𑀫𑁂𑀢𑁆𑀣 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀜𑁆𑀜𑀸𑀬 𑀮𑀓𑁆𑀔𑀡𑀸𑀤𑀺𑀓𑀸.

𑀓𑀢𑀺𑀥𑀸𑀢𑀺 ¶ 𑀏𑀢𑁆𑀣 𑁋

𑁧𑁧𑁮𑁧.

𑀮𑀓𑁆𑀔𑀡𑁂𑀦𑁂𑀓𑀥𑀸 𑀯𑀼𑀢𑁆𑀢𑀸,

𑀮𑁄𑀓𑀺𑀓𑀸𑀮𑁄𑀓𑀺𑀓𑀸 𑀤𑁆𑀯𑀺𑀥𑀸;

𑀮𑁄𑀓𑀺𑀬𑁂𑀦𑁂𑀢𑁆𑀣 𑀫𑀕𑁆𑀕𑁂𑀦,

𑀬𑀼𑀢𑁆𑀢𑀸 𑀲𑀸 𑀮𑁄𑀓𑀺𑀓𑀸 𑀲𑀺𑀬𑀸.

𑁧𑁧𑁮𑁨.

𑀮𑁄𑀓𑀼𑀢𑁆𑀢𑀭𑁂𑀦 ¶ 𑀫𑀕𑁆𑀕𑁂𑀦, 𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸 𑀫𑀢𑀸;

𑀢𑀺𑀯𑀺𑀥𑀸𑀧𑀺 𑀲𑀺𑀬𑀸 𑀧𑀜𑁆𑀜𑀸, 𑀘𑀺𑀦𑁆𑀢𑀸𑀲𑀼𑀢𑀫𑀬𑀸𑀤𑀺𑀢𑁄.

𑁧𑁧𑁮𑁩.

𑀢𑀢𑁆𑀣𑀢𑁆𑀢𑀦𑁄𑀯 𑀘𑀺𑀦𑁆𑀢𑀸𑀬, 𑀦𑀺𑀧𑁆𑀨𑀦𑁆𑀦𑀢𑁆𑀢𑀸𑀢𑀺 𑀢𑀲𑁆𑀲 𑀲𑀸;

𑀳𑁄𑀢𑀺 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸, 𑀪𑀽𑀭𑀺𑀧𑀜𑁆𑀜𑁂𑀦 𑀤𑁂𑀲𑀺𑀢𑀸.

𑁧𑁧𑁮𑁪.

𑀧𑀭𑀢𑁄 𑀧𑀦 𑀲𑀼𑀢𑁆𑀯𑀸𑀦, 𑀮𑀤𑁆𑀥𑀸 𑀧𑀜𑁆𑀜𑀸 𑀅𑀬𑀁 𑀇𑀥;

𑀲𑀼𑀢𑁂𑀦𑁂𑀯 𑀘 𑀦𑀺𑀧𑁆𑀨𑀦𑁆𑀦𑀸, 𑀧𑀜𑁆𑀜𑀸 𑀲𑀼𑀢𑀫𑀬𑀸 𑀫𑀢𑀸.

𑁧𑁧𑁮𑁫.

𑀬𑀣𑀸 𑀯𑀸𑀧𑀺 𑀢𑀣𑀸 𑀘𑁂𑀢𑁆𑀣, 𑀪𑀸𑀯𑀦𑀸𑀬 𑀯𑀲𑁂𑀦 𑀢𑀼;

𑀦𑀺𑀧𑁆𑀨𑀦𑁆𑀦𑀸 𑀅𑀧𑁆𑀧𑀦𑀸𑀧𑀢𑁆𑀢𑀸, 𑀧𑀜𑁆𑀜𑀸 𑀲𑀸 𑀪𑀸𑀯𑀦𑀸𑀫𑀬𑀸.

𑁧𑁧𑁮𑁬.

𑀧𑀝𑀺𑀲𑀫𑁆𑀪𑀺𑀤𑀸𑀘𑀢𑀼𑀓𑁆𑀓𑀲𑁆𑀲, 𑀯𑀲𑁂𑀦 𑀘𑀢𑀼𑀥𑀸 𑀲𑀺𑀬𑀸;

𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀜𑀸𑀡𑀁 𑀜𑀸𑀡𑁂𑀲𑀼 𑀢𑀻𑀲𑀼𑀧𑀺.

𑁧𑁧𑁮𑁭.

𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀯𑀺𑀧𑀸𑀓𑀸 𑀘 𑀓𑁆𑀭𑀺𑀬𑀸 𑀢𑀣𑀸;

𑀦𑀺𑀩𑁆𑀩𑀸𑀦𑀁 𑀪𑀸𑀲𑀺𑀢𑀢𑁆𑀣𑁄 𑀘, 𑀧𑀜𑁆𑀘𑁂𑀢𑁂 𑀅𑀢𑁆𑀣𑀲𑀜𑁆𑀜𑀺𑀢𑀸.

𑁧𑁧𑁮𑁮.

𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄 𑀘 𑀪𑀸𑀲𑀺𑀢𑀁;

𑀓𑀼𑀲𑀮𑀸𑀓𑀼𑀲𑀮𑀜𑁆𑀘𑁂𑀢𑀺, 𑀧𑀜𑁆𑀘𑁂𑀢𑁂 𑀥𑀫𑁆𑀫𑀲𑀜𑁆𑀜𑀺𑀢𑀸.

𑁧𑁧𑁮𑁯.

𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀢𑀼;

𑀦𑀺𑀭𑀼𑀢𑁆𑀢𑀻𑀢𑀺 𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁂𑀦 𑀲𑀸.

𑁧𑁧𑁯𑁦.

𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀢𑁄;

𑀢𑁂𑀲𑀼 𑀜𑀸𑀡𑁂𑀲𑀼 𑀬𑀁 𑀜𑀸𑀡𑀁, 𑀧𑀝𑀺𑀪𑀸𑀦𑀦𑁆𑀢𑀺 𑀢𑀁 𑀫𑀢𑀁.

𑁧𑁧𑁯𑁧.

𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀳𑀺 ¶ ¶ , 𑀲𑀯𑀦𑀸𑀥𑀺𑀕𑀫𑁂𑀳𑀺 𑀘;

𑀧𑀼𑀩𑁆𑀩𑀬𑁄𑀕𑁂𑀦 𑀕𑀘𑁆𑀙𑀦𑁆𑀢𑀺, 𑀧𑀪𑁂𑀤𑀁 𑀧𑀝𑀺𑀲𑀫𑁆𑀪𑀺𑀤𑀸.

𑀓𑀣𑀁 𑀪𑀸𑀯𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑁋

𑁧𑁧𑁯𑁨.

𑀔𑀦𑁆𑀥𑀸𑀤𑀻𑀲𑀼 𑀳𑀺 𑀥𑀫𑁆𑀫𑁂𑀲𑀼, 𑀪𑀽𑀫𑀺𑀪𑀽𑀢𑁂𑀲𑀼 𑀬𑁄𑀕𑀺𑀦𑀸;

𑀉𑀕𑁆𑀕𑀳𑀸𑀤𑀺𑀯𑀲𑁂𑀦𑁂𑀢𑁆𑀣, 𑀓𑀢𑁆𑀯𑀸 𑀧𑀭𑀺𑀘𑀬𑀁 𑀧𑀦.

𑁧𑁧𑁯𑁩.

𑀲𑀻𑀮𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀜𑁆𑀘, 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁄 𑀧𑀭𑀁;

𑀤𑀺𑀝𑁆𑀞𑀺𑀲𑀼𑀤𑁆𑀥𑀸𑀤𑀬𑁄 𑀧𑀜𑁆𑀘, 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀲𑀼𑀤𑁆𑀥𑀺𑀬𑀸.

𑁧𑁧𑁯𑁪.

𑀢𑀸𑀬 𑀧𑀜𑁆𑀜𑀸𑀬 𑀬𑀼𑀢𑁆𑀢𑁂𑀦, 𑀪𑀻𑀢𑁂𑀦 𑀚𑀦𑀦𑀸𑀤𑀺𑀢𑁄;

𑀪𑀸𑀯𑁂𑀢𑀩𑁆𑀩𑀸 𑀪𑀯𑀸𑀪𑀸𑀯𑀁, 𑀧𑀢𑁆𑀣𑀬𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸.

𑁧𑁧𑁯𑁫.

𑀭𑀽𑀧𑀜𑁆𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀘𑁂𑀯 𑀲𑀩𑁆𑀩𑀲𑁄;

𑀯𑀺𑀜𑁆𑀜𑀸𑀡𑀜𑁆𑀘𑁂𑀢𑀺 𑀧𑀜𑁆𑀘𑁂𑀢𑁂, 𑀔𑀦𑁆𑀥𑀸 𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀸.

𑁧𑁧𑁯𑁬.

𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀢𑀁, 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀓𑀁;

𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀲𑀼𑀔𑀼𑀫𑁄𑀴𑀸𑀭𑀺𑀓𑀫𑁆𑀧𑀺 𑀯𑀸.

𑁧𑁧𑁯𑁭.

𑀳𑀻𑀦𑀁 𑀯𑀸𑀧𑀺 𑀧𑀡𑀻𑀢𑀁 𑀯𑀸, 𑀬𑀁 𑀤𑀽𑀭𑁂 𑀬𑀜𑁆𑀘 𑀲𑀦𑁆𑀢𑀺𑀓𑁂;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁯𑁮.

𑀇𑀢𑀭𑁂𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺, 𑀢𑀁 𑀯𑁂𑀤𑀬𑀺𑀢𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁧𑁯𑁯.

𑀘𑀺𑀢𑁆𑀢𑀚𑀁 ¶ 𑀧𑀦 𑀬𑀁 𑀓𑀺𑀜𑁆𑀘𑀺, 𑀢𑀁 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁨𑁦𑁦.

𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀲𑀫𑁆𑀪𑀽𑀢𑀁, 𑀅𑀪𑀺𑀲𑀗𑁆𑀔𑀸𑀭𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁨𑁦𑁧.

𑀢𑀢𑁆𑀣 𑀘𑀺𑀢𑁆𑀢𑀁 𑀢𑀼 𑀬𑀁 𑀓𑀺𑀜𑁆𑀘𑀺, 𑀢𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁨𑁦𑁨.

𑀘𑀢𑁆𑀢𑀸𑀭𑁄 ¶ 𑀘 𑀫𑀳𑀸𑀪𑀽𑀢𑀸, 𑀉𑀧𑀸𑀤𑀸 𑀘𑀢𑀼𑀯𑀻𑀲𑀢𑀺;

𑀅𑀝𑁆𑀞𑀯𑀻𑀲𑀢𑀺𑀥𑀸 𑀘𑁂𑀢𑀁, 𑀭𑀽𑀧𑀁 𑀭𑀽𑀧𑀦𑁆𑀢𑀺 𑀕𑀡𑁆𑀳𑀢𑀺.

𑁧𑁨𑁦𑁩.

𑀏𑀓𑀸𑀲𑀻𑀢𑀺𑀬𑀸 ¶ 𑀘𑀺𑀢𑁆𑀢𑁂𑀦, 𑀲𑀁𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄;

𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭-𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑀸.

𑁧𑁨𑁦𑁪.

𑀘𑀢𑁆𑀢𑀸𑀭𑁄𑀭𑀽𑀧𑀺𑀦𑁄 𑀔𑀦𑁆𑀥𑁂, 𑀦𑀸𑀫𑀦𑁆𑀢𑀺 𑀧𑀭𑀺𑀕𑀡𑁆𑀳𑀢𑀺;

𑀭𑀽𑀧𑀓𑁆𑀔𑀦𑁆𑀥𑁄 𑀪𑀯𑁂 𑀭𑀽𑀧𑀁, 𑀦𑀸𑀫𑀓𑁆𑀔𑀦𑁆𑀥𑀸 𑀅𑀭𑀽𑀧𑀺𑀦𑁄.

𑁧𑁨𑁦𑁫.

𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀦𑀸𑀫𑀁 𑀦𑀫𑀦𑀮𑀓𑁆𑀔𑀡𑀁;

𑀇𑀢𑀺 𑀲𑀗𑁆𑀔𑁂𑀧𑀢𑁄 𑀦𑀸𑀫-𑀭𑀽𑀧𑀁 𑀲𑁄 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁦𑁬.

𑀨𑀸𑀮𑁂𑀦𑁆𑀢𑁄 𑀯𑀺𑀬 𑀢𑀸𑀮𑀲𑁆𑀲, 𑀓𑀦𑁆𑀤𑀁 𑀢𑀼 𑀬𑀫𑀓𑀁 𑀤𑁆𑀯𑀺𑀥𑀸;

𑀯𑀯𑀢𑁆𑀣𑀧𑁂𑀢𑀺 𑀦𑀸𑀫𑀜𑁆𑀘, 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑀺𑀥𑀸 𑀧𑀦.

𑁧𑁨𑁦𑁭.

𑀦𑀸𑀫𑀢𑁄 𑀭𑀽𑀧𑀢𑁄 𑀅𑀜𑁆𑀜𑁄,

𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄𑀧𑀺 𑀯𑀸;

𑀅𑀢𑁆𑀢𑀸 𑀯𑀸 𑀓𑁄𑀘𑀺 𑀦𑀢𑁆𑀣𑀻𑀢𑀺,

𑀦𑀺𑀝𑁆𑀞𑀁 𑀕𑀘𑁆𑀙𑀢𑀺 𑀲𑀩𑁆𑀩𑀤𑀸.

𑁧𑁨𑁦𑁮.

𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑁄, 𑀦𑀸𑀫𑀭𑀽𑀧𑀁 𑀲𑀪𑀸𑀯𑀢𑁄;

𑀲𑀢𑁆𑀢𑀲𑀫𑁆𑀫𑁄𑀳𑀖𑀸𑀢𑀢𑁆𑀣𑀁, 𑀩𑀳𑀼𑀲𑀼𑀢𑁆𑀢𑀯𑀲𑁂𑀦𑀺𑀥.

𑁧𑁨𑁦𑁯.

𑀦𑀸𑀫𑀭𑀽𑀧𑀫𑀢𑁆𑀢𑀜𑁆𑀜𑁂𑀯, 𑀦𑀢𑁆𑀣𑀺 𑀓𑁄𑀘𑀺𑀥 𑀧𑀼𑀕𑁆𑀕𑀮𑁄;

𑀏𑀯𑀫𑁂𑀢𑁆𑀣 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀯𑀯𑀢𑁆𑀣𑀧𑁂𑀢𑀺 𑀢𑀁 𑀧𑀦.

𑀯𑀼𑀢𑁆𑀢𑀁 𑀳𑁂𑀢𑀁 𑁋

𑁧𑁨𑁧𑁦.

‘‘𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸,

𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼,

𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺.

𑁧𑁨𑁧𑁧.

𑀬𑀣𑀸𑀧𑀺 ¶ 𑀤𑀸𑀭𑀼𑀬𑀦𑁆𑀢𑀫𑁆𑀧𑀺, 𑀦𑀺𑀚𑁆𑀚𑀻𑀯𑀜𑁆𑀘 𑀦𑀺𑀭𑀻𑀳𑀓𑀁;

𑀤𑀸𑀭𑀼𑀭𑀚𑁆𑀚𑀼𑀲𑀫𑀸𑀬𑁄𑀕𑁂, 𑀢𑀁 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺.

𑁧𑁨𑁧𑁨.

𑀢𑀣𑁂𑀤𑀁 𑀦𑀸𑀫𑀭𑀽𑀧𑀫𑁆𑀧𑀺, 𑀦𑀺𑀚𑁆𑀚𑀻𑀯𑀜𑁆𑀘 𑀦𑀺𑀭𑀻𑀳𑀓𑀁;

𑀅𑀜𑁆𑀜𑀫𑀜𑁆𑀜𑀲𑀫𑀸𑀬𑁄𑀕𑁂, 𑀢𑀁 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁧𑁩.

‘‘𑀦𑀸𑀫𑀜𑁆𑀘 ¶ 𑀭𑀽𑀧𑀜𑁆𑀘 𑀇𑀥𑀢𑁆𑀣𑀺 𑀲𑀘𑁆𑀘𑀢𑁄,

𑀦 𑀳𑁂𑀢𑁆𑀣 𑀲𑀢𑁆𑀢𑁄 𑀫𑀦𑀼𑀚𑁄 𑀘 𑀯𑀺𑀚𑁆𑀚𑀢𑀺;

𑀲𑀼𑀜𑁆𑀜𑀁 𑀇𑀤𑀁 𑀬𑀦𑁆𑀢𑀫𑀺𑀯𑀸𑀪𑀺𑀲𑀗𑁆𑀔𑀢𑀁,

𑀤𑀼𑀓𑁆𑀔𑀲𑁆𑀲 𑀧𑀼𑀜𑁆𑀚𑁄 𑀢𑀺𑀡𑀓𑀝𑁆𑀞𑀲𑀸𑀤𑀺𑀲𑁄’’𑀢𑀺.

𑁧𑁨𑁧𑁪.

𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀸𑀬 ¶ , 𑀤𑀡𑁆𑀟𑀓𑁂𑀲𑀼 𑀞𑀺𑀢𑁂𑀲𑀼 𑀳𑀺;

𑀏𑀓𑀲𑁆𑀫𑀺𑀁 𑀧𑀢𑀫𑀸𑀦𑁂 𑀢𑀼, 𑀢𑀣𑁂𑀯 𑀧𑀢𑀢𑀻𑀢𑀭𑁄.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁧𑁫.

‘‘𑀬𑀫𑀓𑀁 𑀦𑀸𑀫𑀭𑀽𑀧𑀜𑁆𑀘, 𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸;

𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺 𑀧𑀘𑁆𑀘𑀬𑀸’’𑀢𑀺.

𑁧𑁨𑁧𑁬.

𑀉𑀢𑀺𑀦𑁆𑀦𑀁 𑀦𑀸𑀫𑀭𑀽𑀧𑀸𑀦𑀁, 𑀦𑀸𑀫𑀁 𑀦𑀺𑀢𑁆𑀢𑁂𑀚𑀫𑁂𑀢𑁆𑀣 𑀢𑀁;

𑀲𑀓𑁂𑀦𑁂𑀯 𑀳𑀺 𑀢𑁂𑀚𑁂𑀦, 𑀦 𑀲𑀓𑁆𑀓𑁄𑀢𑀺 𑀧𑀯𑀢𑁆𑀢𑀺𑀢𑀼𑀁.

𑁧𑁨𑁧𑁭.

𑀦 𑀩𑁆𑀬𑀸𑀳𑀭𑀢𑀺 𑀦𑁄 𑀲𑁂𑀢𑀺, 𑀦 𑀢𑀺𑀝𑁆𑀞𑀢𑀺 𑀦 𑀕𑀘𑁆𑀙𑀢𑀺;

𑀦 𑀪𑁂𑀤𑁂𑀢𑀺 𑀦 𑀘𑁄𑀭𑁂𑀢𑀺, 𑀦 𑀪𑀼𑀜𑁆𑀚𑀢𑀺 𑀦 𑀔𑀸𑀤𑀢𑀺.

𑁧𑁨𑁧𑁮.

𑀢𑀣𑀸 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚𑀁, 𑀯𑀺𑀦𑀸 𑀦𑀸𑀫𑀜𑁆𑀘 𑀲𑀩𑁆𑀩𑀣𑀸;

𑀲𑀓𑁂𑀦𑁂𑀯 𑀳𑀺 𑀢𑁂𑀚𑁂𑀦, 𑀦 𑀲𑀓𑁆𑀓𑁄𑀢𑀺 𑀧𑀯𑀢𑁆𑀢𑀺𑀢𑀼𑀁.

𑁧𑁨𑁧𑁯.

𑀪𑀼𑀜𑁆𑀚𑀸𑀫𑀻𑀢𑀺 𑀧𑀺𑀯𑀸𑀫𑀻𑀢𑀺, 𑀔𑀸𑀤𑀸𑀫𑀻𑀢𑀺 𑀢𑀣𑁂𑀯 𑀘;

𑀭𑁄𑀤𑀸𑀫𑀻𑀢𑀺 𑀳𑀲𑀸𑀫𑀻𑀢𑀺, 𑀭𑀽𑀧𑀲𑁆𑀲𑁂𑀢𑀁 𑀦 𑀯𑀺𑀚𑁆𑀚𑀢𑀺.

𑁧𑁨𑁨𑁦.

𑀦𑀸𑀫𑀁 ¶ 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀢𑀼, 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀦𑀸𑀫𑀓𑀁;

𑀧𑀯𑀢𑁆𑀢𑀢𑀺 𑀲𑀤𑀸 𑀲𑀩𑁆𑀩𑀁, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁.

𑁧𑁨𑁨𑁧.

𑀇𑀫𑀲𑁆𑀲 𑀧𑀦 𑀅𑀢𑁆𑀣𑀲𑁆𑀲, 𑀆𑀯𑀺𑀪𑀸𑀯𑀢𑁆𑀣𑀫𑁂𑀯 𑀘;

𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀻𑀦𑀁, 𑀯𑀢𑁆𑀢𑀩𑁆𑀩𑀸 𑀉𑀧𑀫𑀸 𑀇𑀥.

𑁧𑁨𑁨𑁨.

𑀬𑀣𑀸 𑀳𑀺 𑀦𑀸𑀯𑀁 𑀦𑀺𑀲𑁆𑀲𑀸𑀬, 𑀫𑀦𑀼𑀲𑁆𑀲𑀸 𑀬𑀦𑁆𑀢𑀺 𑀅𑀡𑁆𑀡𑀯𑁂;

𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀲𑁆𑀲𑀸𑀬, 𑀦𑀸𑀫𑀓𑀸𑀬𑁄 𑀧𑀯𑀢𑁆𑀢𑀢𑀺.

𑁧𑁨𑁨𑁩.

𑀬𑀣𑀸 ¶ 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬, 𑀦𑀸𑀯𑀸 𑀕𑀘𑁆𑀙𑀢𑀺 𑀅𑀡𑁆𑀡𑀯𑁂;

𑀏𑀯𑀁 𑀦𑀸𑀫𑀫𑁆𑀧𑀺 𑀦𑀺𑀲𑁆𑀲𑀸𑀬, 𑀭𑀽𑀧𑀓𑀸𑀬𑁄 𑀧𑀯𑀢𑁆𑀢𑀢𑀺.

𑁧𑁨𑁨𑁪.

𑀲𑀢𑁆𑀢𑀲𑀜𑁆𑀜𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀦𑀸𑀫𑀭𑀽𑀧𑀲𑁆𑀲 𑀲𑀩𑁆𑀩𑀣𑀸;

𑀬𑀸𑀣𑀸𑀯𑀤𑀲𑁆𑀲𑀦𑀁 𑀏𑀢𑀁, ‘‘𑀤𑀺𑀝𑁆𑀞𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑁧𑁨𑁨𑁫.

𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀘, 𑀤𑀼𑀓𑁆𑀔𑀢𑁄 𑀚𑀸𑀢𑀺𑀆𑀤𑀺𑀢𑁄;

𑀅𑀦𑁆𑀢𑀤𑁆𑀯𑀬𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀪𑀸𑀯𑀬𑁂 𑀧𑀦 𑀧𑀡𑁆𑀟𑀺𑀢𑁄.

𑁧𑁨𑁨𑁬.

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀫𑀺𑀫𑀁 𑀧𑀭𑀺𑀲𑀼𑀤𑁆𑀥𑀁,

𑀲𑀼𑀝𑁆𑀞𑀼𑀢𑀭𑀁 𑀢𑀼 𑀓𑀭𑁄𑀢𑀺 𑀦𑀭𑁄 𑀬𑁄;

𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑀮𑀸𑀦𑀺 𑀅𑀲𑁂𑀲𑀁,

𑀦𑀸𑀲𑀫𑀼𑀧𑁂𑀦𑁆𑀢𑀺 𑀳𑀺 𑀢𑀲𑁆𑀲 𑀦𑀭𑀲𑁆𑀲.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁨𑁨𑁭.

𑀏𑀢𑀲𑁆𑀲 ¶ ¶ 𑀦𑀸𑀫𑀭𑀽𑀧𑀲𑁆𑀲, 𑀚𑀸𑀦𑀺𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑁂;

𑀓𑀗𑁆𑀔𑀸 𑀢𑀻𑀲𑀼 𑀧𑀦𑀤𑁆𑀥𑀸𑀲𑀼, 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀁 𑀧𑀦.

𑁧𑁨𑁨𑁮.

𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫, 𑀜𑀸𑀡𑀁 𑀢𑀁 𑀲𑀫𑀼𑀤𑀻𑀭𑀺𑀢𑀁;

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦, 𑀅𑀢𑁆𑀣𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸.

𑁧𑁨𑁨𑁯.

𑀦𑀸𑀫𑀭𑀽𑀧𑀲𑁆𑀲 𑀓𑁄 𑀳𑁂𑀢𑀼, 𑀓𑁄𑀦𑀼 𑀯𑀸 𑀧𑀘𑁆𑀘𑀬𑁄 𑀪𑀯𑁂;

𑀆𑀯𑀚𑁆𑀚𑀺𑀢𑁆𑀯𑀸 𑀢𑀫𑀺𑀘𑁆𑀘𑁂𑀯𑀁, 𑀭𑀽𑀧𑀓𑀸𑀬𑀲𑁆𑀲 𑀢𑀸𑀯𑀤𑁂.

𑁧𑁨𑁩𑁦.

𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸, 𑀢𑀘𑁄 𑀫𑀁𑀲𑀁 𑀦𑀳𑀸𑀭𑀼 𑀘;

𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀯𑀓𑁆𑀓𑀜𑁆𑀘, 𑀳𑀤𑀬𑀁 𑀬𑀓𑀦𑀫𑁆𑀧𑀺 𑀘.

𑁧𑁨𑁩𑁧.

𑀇𑀘𑁆𑀘𑁂𑀯𑀫𑀸𑀤𑀺𑀩𑀸𑀢𑁆𑀢𑀺𑀁𑀲-𑀓𑁄𑀝𑁆𑀞𑀸𑀲𑀧𑀘𑁆𑀘𑀬𑀲𑁆𑀲 𑀳𑀺;

𑀧𑀭𑀺𑀕𑁆𑀕𑀡𑁆𑀳𑀢𑀺 𑀓𑀸𑀬𑀲𑁆𑀲, 𑀫𑀦𑀲𑀸 𑀳𑁂𑀢𑀼𑀧𑀘𑁆𑀘𑀬𑁂.

𑁧𑁨𑁩𑁨.

𑀅𑀯𑀺𑀚𑁆𑀚𑀸 ¶ 𑀢𑀡𑁆𑀳𑀼𑀧𑀸𑀤𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼 𑀘𑀢𑀼𑀩𑁆𑀩𑀺𑀥𑁄;

𑀏𑀢𑀲𑁆𑀲 𑀭𑀽𑀧𑀓𑀸𑀬𑀲𑁆𑀲, 𑀆𑀳𑀸𑀭𑁄 𑀧𑀘𑁆𑀘𑀬𑁄 𑀫𑀢𑁄.

𑁧𑁨𑁩𑁩.

𑀚𑀦𑀓𑁄 𑀳𑁂𑀢𑀼 𑀅𑀓𑁆𑀔𑀸𑀢𑁄,

𑀧𑀘𑁆𑀘𑀬𑁄 𑀅𑀦𑀼𑀧𑀸𑀮𑀓𑁄;

𑀳𑁂𑀢𑁆𑀯𑀗𑁆𑀓𑀼𑀭𑀲𑁆𑀲 𑀩𑀻𑀚𑀁 𑀢𑀼,

𑀧𑀘𑁆𑀘𑀬𑀸 𑀧𑀣𑀯𑀸𑀤𑀬𑁄.

𑁧𑁨𑁩𑁪.

𑀇𑀢𑀺𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀳𑀺, 𑀳𑁂𑀢𑀼𑀧𑀘𑁆𑀘𑀬𑀢𑀁 𑀕𑀢𑀸;

𑀅𑀯𑀺𑀚𑁆𑀚𑀸𑀤𑀬𑁄 𑀢𑀬𑁄 𑀢𑀢𑁆𑀣, 𑀫𑀸𑀢𑀸𑀯 𑀉𑀧𑀦𑀺𑀲𑁆𑀲𑀬𑀸.

𑁧𑁨𑁩𑁫.

𑀚𑀦𑀓𑀁 𑀧𑀦 𑀓𑀫𑁆𑀫𑀁 𑀢𑀼, 𑀧𑀼𑀢𑁆𑀢𑀲𑁆𑀲 𑀳𑀺 𑀧𑀺𑀢𑀸 𑀯𑀺𑀬;

𑀥𑀸𑀢𑀻 𑀯𑀺𑀬 𑀓𑀼𑀫𑀸𑀭𑀲𑁆𑀲, 𑀆𑀳𑀸𑀭𑁄 𑀥𑀸𑀭𑀓𑁄 𑀪𑀯𑁂.

𑁧𑁨𑁩𑁬.

𑀇𑀘𑁆𑀘𑁂𑀯𑀁 ¶ 𑀭𑀽𑀧𑀓𑀸𑀬𑀲𑁆𑀲, 𑀲𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁;

𑀓𑀢𑁆𑀯𑀸 𑀧𑀼𑀦𑀧𑀺 ‘‘𑀘𑀓𑁆𑀔𑀼𑀜𑁆𑀘, 𑀭𑀽𑀧𑀫𑀸𑀮𑁄𑀓𑀫𑁂𑀯 𑀘.

𑁧𑁨𑁩𑁭.

𑀧𑀝𑀺𑀘𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀳𑁄𑀢𑀺’’𑀇𑀘𑁆𑀘𑁂𑀯𑀫𑀸𑀤𑀺𑀦𑀸;

𑀦𑀬𑁂𑀦 𑀦𑀸𑀫𑀓𑀸𑀬𑀲𑁆𑀲, 𑀧𑀘𑁆𑀘𑀬𑀁 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁩𑁮.

𑀲𑁄 𑀏𑀯𑀁 𑀦𑀸𑀫𑀭𑀽𑀧𑀲𑁆𑀲, 𑀯𑀼𑀢𑁆𑀢𑀺𑀁 𑀤𑀺𑀲𑁆𑀯𑀸𑀦 𑀧𑀘𑁆𑀘𑀬𑀸;

𑀬𑀣𑀸 𑀏𑀢𑀭𑀳𑀺𑀤𑀁 𑀢𑀼, 𑀅𑀢𑀻𑀢𑁂𑀧𑀺 𑀢𑀣𑁂𑀯𑀺𑀤𑀁.

𑁧𑁨𑁩𑁯.

𑀧𑀘𑁆𑀘𑀬𑀸 𑀘 𑀧𑀯𑀢𑁆𑀢𑀺𑀢𑁆𑀣, 𑀢𑀣𑁂𑀯𑀸𑀦𑀸𑀕𑀢𑁂𑀧𑀺 𑀘;

𑀧𑀯𑀢𑁆𑀢𑀺𑀲𑁆𑀲𑀢𑀺 𑀅𑀤𑁆𑀥𑀸𑀲𑀼, 𑀢𑀻𑀲𑁆𑀯𑁂𑀯𑀁 𑀅𑀦𑀼𑀧𑀲𑁆𑀲𑀢𑀺.

𑁧𑁨𑁪𑁦.

𑀢𑀲𑁆𑀲𑁂𑀯𑀁 ¶ 𑀧𑀲𑁆𑀲𑀢𑁄 𑀬𑀸 𑀲𑀸, 𑀧𑀼𑀩𑁆𑀩𑀦𑁆𑀢𑁂 𑀧𑀜𑁆𑀘𑀥𑀸 𑀢𑀣𑀸;

𑀅𑀧𑀭𑀦𑁆𑀢𑁂 𑀲𑀺𑀬𑀸 𑀓𑀗𑁆𑀔𑀸, 𑀧𑀜𑁆𑀘𑀥𑀸 𑀲𑀫𑀼𑀤𑀻𑀭𑀺𑀢𑀸.

𑁧𑁨𑁪𑁧.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀸𑀦𑁂, 𑀙𑀩𑁆𑀩𑀺𑀥𑀸 𑀧𑀭𑀺𑀓𑀺𑀢𑁆𑀢𑀺𑀢𑀸;

𑀲𑀩𑁆𑀩𑀸 𑀘𑀸𑀦𑀯𑀲𑁂𑀲𑀸𑀯, 𑀬𑁄𑀕𑀺𑀦𑁄 𑀲𑀸 𑀧𑀳𑀺𑀬𑁆𑀬𑀢𑀺.

𑁧𑁨𑁪𑁨.

𑀏𑀓𑁄 𑀓𑀫𑁆𑀫𑀯𑀺𑀧𑀸𑀓𑀸𑀦𑀁, 𑀯𑀲𑁂𑀦𑀸𑀧𑀺 𑀘 𑀧𑀡𑁆𑀟𑀺𑀢𑁄;

𑀏𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲, 𑀧𑀘𑁆𑀘𑀬𑀁 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁪𑁩.

𑀓𑀫𑁆𑀫𑀁 𑀘𑀢𑀼𑀩𑁆𑀩𑀺𑀥𑀁 𑀤𑀺𑀝𑁆𑀞-𑀥𑀫𑁆𑀫𑀯𑁂𑀤𑀦𑀺𑀬𑀁 𑀢𑀣𑀸;

𑀉𑀧𑀧𑀚𑁆𑀚𑀸𑀧𑀭𑀸𑀧𑀭𑀺𑀬𑀸-𑀳𑁄𑀲𑀺𑀓𑀫𑁆𑀫𑀯𑀲𑀸 𑀧𑀦.

𑀢𑀢𑁆𑀣 ¶ 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀧𑀦 ‘‘𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀇𑀫𑀲𑁆𑀲 𑀢𑀺𑀓𑀲𑁆𑀲 𑀯𑀲𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀫𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀯𑀼𑀢𑁆𑀢𑀦𑀬𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀜𑁆𑀘𑀚𑀯𑀦𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀫𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺, 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺.

𑁧𑁨𑁪𑁪.

𑀅𑀧𑀭𑀁 ¶ 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁, 𑀕𑀭𑀼𑀓𑀁 𑀩𑀳𑀼𑀮𑀫𑁆𑀧𑀺 𑀘;

𑀆𑀲𑀦𑁆𑀦𑀜𑁆𑀘 𑀓𑀝𑀢𑁆𑀢𑀸 𑀘, 𑀓𑀫𑁆𑀫𑀦𑁆𑀢𑀺 𑀲𑀫𑀼𑀤𑀻𑀭𑀺𑀢𑀁.

𑁧𑁨𑁪𑁫.

𑀅𑀜𑁆𑀜𑀁 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁, 𑀚𑀦𑀓𑀁 𑀉𑀧𑀣𑀫𑁆𑀪𑀓𑀁;

𑀢𑀣𑀽𑀧𑀧𑀻𑀴𑀓𑀁 𑀓𑀫𑁆𑀫-𑀫𑀼𑀧𑀖𑀸𑀢𑀓𑀫𑁂𑀯 𑀘.

𑀢𑀢𑁆𑀣 𑀚𑀦𑀓𑀁 𑀦𑀸𑀫 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑁂𑀧𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀚𑀦𑁂𑀢𑀺. 𑀉𑀧𑀢𑁆𑀣𑀫𑁆𑀪𑀓𑀁 𑀧𑀦 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀉𑀧𑀧𑀻𑀴𑀓𑀁 𑀧𑀦 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀲𑀬𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀸𑀦𑀁 ¶ 𑀅𑀜𑁆𑀜𑀁 𑀤𑀼𑀩𑁆𑀩𑀮𑀓𑀫𑁆𑀫𑀁 𑀖𑀸𑀢𑁂𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀑𑀓𑀸𑀲𑁂 𑀓𑀢𑁂 𑀢𑀁𑀯𑀺𑀧𑀸𑀓𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀇𑀢𑀺 𑀇𑀫𑀁 𑀤𑁆𑀯𑀸𑀤𑀲𑀯𑀺𑀥𑀁 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ¶ 𑀏𑀯𑀫𑁂𑀓𑁄 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺.

𑀇𑀢𑀺 𑀏𑀯𑀁 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀫𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀇𑀢𑀺 𑀓𑀫𑁆𑀫𑀜𑁆𑀘𑁂𑀯 𑀯𑀺𑀧𑀸𑀓𑁄 𑀘𑀸𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀲𑀩𑁆𑀩𑀸 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸 𑀧𑀳𑀺𑀬𑁆𑀬𑀢𑀺.

𑁧𑁨𑁪𑁬.

𑀳𑁂𑀢𑀼𑀨𑀮𑀲𑁆𑀲 𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺;

𑀓𑁂𑀯𑀮𑀁 𑀦𑀸𑀫𑀭𑀽𑀧𑀦𑁆𑀢𑀺, 𑀲𑀫𑁆𑀫𑀸 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁪𑁭.

𑀏𑀯𑀁 𑀓𑀸𑀭𑀡𑀢𑁄 𑀉𑀤𑁆𑀥𑀁, 𑀓𑀸𑀭𑀡𑀁 𑀦 𑀘 𑀧𑀲𑁆𑀲𑀢𑀺;

𑀧𑀸𑀓𑀧𑀯𑀢𑁆𑀢𑀺𑀢𑁄 𑀉𑀤𑁆𑀥𑀁, 𑀦 𑀧𑀸𑀓𑀧𑀝𑀺𑀯𑁂𑀤𑀓𑀁.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁪𑁮.

‘‘𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀺, 𑀯𑀺𑀧𑀸𑀓𑀲𑁆𑀲 𑀘 𑀯𑁂𑀤𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀏𑀯𑁂𑀢𑀁 𑀲𑀫𑁆𑀫𑀤𑀲𑁆𑀲𑀦𑀁.

𑁧𑁨𑁪𑁯.

𑀏𑀯𑀁 ¶ 𑀓𑀫𑁆𑀫𑁂 𑀯𑀺𑀧𑀸𑀓𑁂 𑀘, 𑀯𑀢𑁆𑀢𑀫𑀸𑀦𑁂 𑀲𑀳𑁂𑀢𑀼𑀓𑁂;

𑀩𑀻𑀚𑀭𑀼𑀓𑁆𑀔𑀸𑀤𑀺𑀓𑀸𑀦𑀁𑀯, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀦𑀸𑀬𑀢𑀺.

𑁧𑁨𑁫𑁦.

𑀅𑀦𑀸𑀕𑀢𑁂𑀧𑀺 𑀲𑀁𑀲𑀸𑀭𑁂, 𑀅𑀧𑁆𑀧𑀯𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺;

𑀏𑀢𑀫𑀢𑁆𑀣𑀫𑀦𑀜𑁆𑀜𑀸𑀬, 𑀢𑀺𑀢𑁆𑀣𑀺𑀬𑀸 𑀅𑀲𑀬𑀁𑀯𑀲𑀻.

𑁧𑁨𑁫𑁧.

𑀲𑀢𑁆𑀢𑀲𑀜𑁆𑀜𑀁 𑀕𑀳𑁂𑀢𑁆𑀯𑀸𑀦, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀲𑁆𑀲𑀺𑀦𑁄;

𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀦𑁄.

𑁧𑁨𑁫𑁨.

𑀤𑀺𑀝𑁆𑀞𑀺𑀩𑀦𑁆𑀥𑀦𑀩𑀤𑁆𑀥𑀸 𑀢𑁂, 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀭𑁂;

𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀸, 𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂.

𑁧𑁨𑁫𑁩.

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀲𑀼𑀜𑁆𑀜𑀁, 𑀧𑀘𑁆𑀘𑀬𑀁 𑀧𑀝𑀺𑀯𑀺𑀚𑁆𑀛𑀢𑀺.

𑁧𑁨𑁫𑁪.

𑀓𑀫𑁆𑀫𑀁 ¶ 𑀦𑀢𑁆𑀣𑀺 𑀯𑀺𑀧𑀸𑀓𑀫𑁆𑀳𑀺, 𑀧𑀸𑀓𑁄 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀉𑀪𑁄 𑀲𑀼𑀜𑁆𑀜𑀸, 𑀦 𑀘 𑀓𑀫𑁆𑀫𑀁 𑀯𑀺𑀦𑀸 𑀨𑀮𑀁.

𑁧𑁨𑁫𑁫.

𑀬𑀣𑀸 𑀦 𑀲𑀽𑀭𑀺𑀬𑁂 𑀅𑀕𑁆𑀕𑀺, 𑀦 𑀫𑀡𑀺𑀫𑁆𑀳𑀺 𑀦 𑀕𑁄𑀫𑀬𑁂;

𑀦 𑀢𑁂𑀲𑀁 𑀩𑀳𑀺 𑀲𑁄 𑀅𑀢𑁆𑀣𑀺, 𑀲𑀫𑁆𑀪𑀸𑀭𑁂𑀳𑀺 𑀘 𑀚𑀸𑀬𑀢𑀺.

𑁧𑁨𑁫𑁬.

𑀢𑀣𑀸 𑀦 𑀅𑀦𑁆𑀢𑁄 𑀓𑀫𑁆𑀫𑀲𑁆𑀲, 𑀯𑀺𑀧𑀸𑀓𑁄 𑀉𑀧𑀮𑀩𑁆𑀪𑀢𑀺;

𑀩𑀳𑀺𑀤𑁆𑀥𑀸𑀧𑀺 𑀦 𑀓𑀫𑁆𑀫𑀲𑁆𑀲, 𑀦 𑀓𑀫𑁆𑀫𑀁 𑀢𑀢𑁆𑀣 𑀯𑀺𑀚𑁆𑀚𑀢𑀺.

𑁧𑁨𑁫𑁭.

𑀨𑀮𑁂𑀦 ¶ 𑀲𑀼𑀜𑁆𑀜𑀁 𑀢𑀁 𑀓𑀫𑁆𑀫𑀁, 𑀨𑀮𑀁 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀓𑀫𑁆𑀫𑀜𑁆𑀘 𑀔𑁄 𑀉𑀧𑀸𑀤𑀸𑀬, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

𑁧𑁨𑁫𑁮.

𑀦 𑀳𑁂𑀢𑁆𑀣 𑀤𑁂𑀯𑁄 𑀩𑁆𑀭𑀳𑁆𑀫𑀸 𑀯𑀸,

𑀲𑀁𑀲𑀸𑀭𑀲𑁆𑀲𑀢𑁆𑀣𑀺 𑀓𑀸𑀭𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺,

𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸’’𑀢𑀺.

𑁧𑁨𑁫𑁯.

𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺, 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀁;

𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀤𑁆𑀥𑀸𑀲𑀼, 𑀢𑀭𑀺𑀢𑁆𑀯𑀸 𑀓𑀗𑁆𑀔𑀫𑀼𑀝𑁆𑀞𑀺𑀢𑀁.

𑁧𑁨𑁬𑁦.

𑀓𑀗𑁆𑀔𑀸𑀯𑀺𑀢𑀭𑀡𑀁 ¶ 𑀦𑀸𑀫, 𑀜𑀸𑀡𑀁 𑀢𑀁 𑀲𑀫𑀼𑀤𑀻𑀭𑀺𑀢𑀁;

𑀥𑀫𑁆𑀫𑀝𑁆𑀞𑀺𑀢𑀺 𑀬𑀣𑀸𑀪𑀽𑀢𑀁, 𑀢𑀁 𑀲𑀫𑁆𑀫𑀸𑀤𑀲𑁆𑀲𑀦𑀦𑁆𑀢𑀺𑀧𑀺.

𑁧𑁨𑁬𑁧.

𑀇𑀫𑀺𑀦𑀸 𑀧𑀦 𑀜𑀸𑀡𑁂𑀦,

𑀲𑀁𑀬𑀼𑀢𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀳𑁄𑀢𑀺 𑀮𑀤𑁆𑀥𑀧𑀢𑀺𑀝𑁆𑀞𑁄𑀯,

𑀲𑁄𑀢𑀸𑀧𑀦𑁆𑀦𑁄 𑀳𑀺 𑀘𑀽𑀴𑀓𑁄.

𑁧𑁨𑁬𑁨.

𑀢𑀲𑁆𑀫𑀸 𑀲𑀧𑀜𑁆𑀜𑁄 𑀧𑀦 𑀅𑀢𑁆𑀣𑀓𑀸𑀫𑁄,

𑀬𑁄 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀸𑀦𑀺;

𑀧𑀭𑀺𑀕𑁆𑀕𑀳𑀁 𑀲𑀸𑀥𑀼 𑀓𑀭𑁄𑀢𑀺 𑀥𑀻𑀭𑁄,

𑀔𑀺𑀧𑁆𑀧𑀁 𑀲 𑀦𑀺𑀩𑁆𑀩𑀸𑀦𑀧𑀼𑀭𑀁 𑀉𑀧𑁂𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁦. 𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁨𑁬𑁩.

𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯 ¶ ¶ ,

𑀬𑁄𑀕𑁄 𑀓𑀭𑀡𑀺𑀬𑁄 𑀲𑀺𑀬𑀸;

𑀫𑀕𑁆𑀕𑀸𑀫𑀕𑁆𑀕𑁂 𑀢𑀼 𑀜𑀸𑀡𑀁 𑀢-

𑀫𑀥𑀺𑀕𑀦𑁆𑀢𑀼𑀁 𑀧𑀦𑀺𑀘𑁆𑀙𑀢𑀸.

𑁧𑁨𑁬𑁪.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀦𑀺𑀩𑁆𑀩𑀢𑁆𑀢𑀺 𑀉𑀤𑀬𑁄 𑀫𑀢𑁄;

𑀯𑀬𑁄 𑀯𑀺𑀧𑀭𑀺𑀡𑀸𑀫𑁄𑀢𑀺, 𑀢𑀲𑁆𑀲𑁂𑀯 𑀲𑀫𑀼𑀤𑀻𑀭𑀺𑀢𑀸.

𑁧𑁨𑁬𑁫.

𑀅𑀦𑀼𑀧𑀲𑁆𑀲𑀦𑀸𑀧𑀺 ¶ 𑀜𑀸𑀡𑀦𑁆𑀢𑀺, 𑀯𑀭𑀜𑀸𑀡𑁂𑀦 𑀤𑁂𑀲𑀺𑀢𑀁;

𑀲𑁄 𑀧𑀦𑁂𑀯𑀁 𑀧𑀚𑀸𑀦𑀸𑀢𑀺, 𑀬𑁄𑀕𑀸𑀯𑀘𑀭𑀫𑀸𑀡𑀯𑁄.

𑁧𑁨𑁬𑁬.

𑀇𑀫𑀲𑁆𑀲 𑀦𑀸𑀫𑀭𑀽𑀧𑀲𑁆𑀲, 𑀧𑀼𑀩𑁆𑀩𑁂 𑀉𑀧𑁆𑀧𑀢𑁆𑀢𑀺𑀢𑁄 𑀧𑀦;

𑀦𑀺𑀘𑀬𑁄 𑀭𑀸𑀲𑀺 𑀯𑀸 𑀦𑀢𑁆𑀣𑀺, 𑀢𑀣𑀸 𑀉𑀧𑁆𑀧𑀚𑁆𑀚𑀢𑁄𑀧𑀺 𑀘.

𑁧𑁨𑁬𑁭.

𑀭𑀸𑀲𑀺𑀢𑁄 𑀦𑀺𑀘𑀬𑀸 𑀯𑀸𑀧𑀺, 𑀦𑀢𑁆𑀣𑀺 𑀆𑀕𑀫𑀦𑀦𑁆𑀢𑀺 𑀘;

𑀢𑀣𑀸 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲, 𑀦 𑀤𑀺𑀲𑀸𑀕𑀫𑀦𑀦𑁆𑀢𑀺 𑀘.

𑁧𑁨𑁬𑁮.

𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁, 𑀞𑀸𑀦𑁂 𑀦𑀢𑁆𑀣𑀺 𑀘𑀬𑁄𑀢𑀺 𑀘;

𑀏𑀢𑁆𑀣 𑀯𑀻𑀡𑀽𑀧𑀫𑀸 𑀯𑀼𑀢𑁆𑀢𑀸, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑁂.

𑁧𑁨𑁬𑁯.

𑀉𑀤𑀩𑁆𑀩𑀬𑀫𑀦𑀓𑁆𑀓𑀸𑀭𑀫𑁂𑀯𑀁 𑀲𑀗𑁆𑀔𑁂𑀧𑀢𑁄 𑀧𑀦;

𑀓𑀢𑁆𑀯𑀸 𑀢𑀲𑁆𑀲𑁂𑀯 𑀜𑀸𑀡𑀲𑁆𑀲, 𑀯𑀺𑀪𑀗𑁆𑀕𑀲𑁆𑀲 𑀯𑀲𑁂𑀦 𑀢𑀼.

𑁧𑁨𑁭𑁦.

‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 𑀳𑀺 𑀆𑀤𑀺𑀦𑀸;

𑀦𑀬𑁂𑀦𑁂𑀓𑁂𑀓𑀔𑀦𑁆𑀥𑀲𑁆𑀲, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂.

𑁧𑁨𑁭𑁧.

𑀤𑀲 𑀤𑀲𑀸𑀢𑀺 𑀓𑀢𑁆𑀯𑀸𑀦, 𑀯𑀼𑀢𑁆𑀢𑀸 𑀧𑀜𑁆𑀜𑀸𑀲𑀮𑀓𑁆𑀔𑀡𑀸;

𑀢𑁂𑀲𑀁 𑀧𑀦 𑀯𑀲𑁂𑀦𑀸𑀧𑀺, 𑀥𑀫𑁆𑀫𑁂 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁭𑁨.

𑀏𑀯𑀁 𑀭𑀽𑀧𑀼𑀤𑀬𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀯𑀬𑁄 𑀇𑀢𑀺;

𑀉𑀤𑁂𑀢𑀺 𑀏𑀯𑀁 𑀭𑀽𑀧𑀫𑁆𑀧𑀺, 𑀏𑀯𑀁 𑀭𑀽𑀧𑀁 𑀢𑀼 𑀯𑁂𑀢𑀺 𑀘.

𑁧𑁨𑁭𑁩.

𑀏𑀯𑀁 ¶ 𑀧𑀘𑁆𑀘𑀬𑀢𑁄𑀧𑁂𑀢𑁆𑀣, 𑀔𑀡𑀢𑁄 𑀉𑀤𑀬𑀩𑁆𑀩𑀬𑀁;

𑀧𑀲𑁆𑀲𑀢𑁄 𑀲𑀩𑁆𑀩𑀥𑀫𑁆𑀫𑀸 𑀘, 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀢𑀲𑁆𑀲 𑀢𑁂.

𑁧𑁨𑁭𑁪.

𑀉𑀤𑀓𑁂 𑀤𑀡𑁆𑀟𑀭𑀸𑀚𑀻𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀯 𑀥𑀫𑁆𑀫𑀸 𑀢𑁂, 𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀦𑁄 𑀲𑀺𑀬𑀼𑀁.

𑁧𑁨𑁭𑁫.

𑀓𑀤𑀮𑀻𑀲𑀼𑀧𑀺𑀦𑀸𑀮𑀸𑀢𑀘𑀓𑁆𑀓𑀫𑀸𑀬𑀼𑀧𑀫𑀸 𑀇𑀫𑁂;

𑀅𑀲𑀸𑀭𑀸 𑀧𑀦 𑀦𑀺𑀲𑁆𑀲𑀸𑀭𑀸, 𑀳𑀼𑀢𑁆𑀯𑀸 𑀔𑀸𑀬𑀦𑁆𑀢𑀺 𑀬𑁄𑀕𑀺𑀦𑁄.

𑁧𑁨𑁭𑁬.

𑀏𑀯𑀫𑁂𑀢𑁆𑀢𑀸𑀯𑀢𑀸 ¶ 𑀢𑁂𑀦, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀮𑀓𑁆𑀔𑀡𑀸𑀦𑀺 𑀘 𑀧𑀜𑁆𑀜𑀸𑀲, 𑀧𑀝𑀺𑀯𑀺𑀚𑁆𑀛 𑀞𑀺𑀢𑀁 𑀧𑀦.

𑁧𑁨𑁭𑁭.

𑀜𑀸𑀡𑀁 ¶ 𑀅𑀥𑀺𑀕𑀢𑀁 𑀳𑁄𑀢𑀺, 𑀢𑀭𑀼𑀡𑀁 𑀧𑀞𑀫𑀁 𑀧𑀦;

𑀬𑀲𑁆𑀲 𑀘𑀸𑀥𑀺𑀕𑀫𑀸 𑀬𑁄𑀕𑀻, 𑀳𑁄𑀢𑀸𑀭𑀤𑁆𑀥𑀯𑀺𑀧𑀲𑁆𑀲𑀓𑁄.

𑁧𑁨𑁭𑁮.

𑀯𑀺𑀧𑀲𑁆𑀲𑀦𑀸𑀬 𑀳𑁂𑀢𑀸𑀬,

𑀓𑀭𑀼𑀡𑀸𑀬𑀸𑀣 𑀬𑁄𑀕𑀺𑀦𑁄;

𑀯𑀺𑀧𑀲𑁆𑀲𑀓𑀲𑁆𑀲 𑀚𑀸𑀬𑀦𑁆𑀢𑁂,

𑀉𑀧𑀓𑁆𑀮𑁂𑀲𑀸 𑀤𑀲𑁂𑀯𑀺𑀫𑁂.

𑁧𑁨𑁭𑁯.

𑀑𑀪𑀸𑀲𑁄 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺, 𑀜𑀸𑀡𑀁 𑀲𑀤𑁆𑀥𑀸 𑀲𑀢𑀻 𑀲𑀼𑀔𑀁;

𑀉𑀧𑁂𑀓𑁆𑀔𑀸 𑀯𑀻𑀭𑀺𑀬𑀁 𑀦𑀺𑀓𑀦𑁆𑀢𑀻𑀢𑀺, 𑀉𑀧𑀓𑁆𑀮𑁂𑀲𑀸 𑀤𑀲𑁂𑀯𑀺𑀫𑁂.

𑁧𑁨𑁮𑁦.

𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑀲𑁆𑀲, 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑁄𑀧𑀺 𑀘;

𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲, 𑀉𑀧𑀓𑁆𑀮𑁂𑀲𑀸 𑀦 𑀚𑀸𑀬𑀭𑁂.

𑁧𑁨𑁮𑁧.

𑀲𑀫𑁆𑀫𑀸𑀯 𑀧𑀝𑀺𑀧𑀦𑁆𑀦𑀲𑁆𑀲, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀤𑀸 𑀯𑀺𑀧𑀲𑁆𑀲𑀓𑀲𑁆𑀲𑁂𑀯, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀺𑀭𑀲𑁆𑀲𑀼 𑀢𑁂.

𑁧𑁨𑁮𑁨.

𑀯𑀺𑀧𑀲𑁆𑀲𑀦𑀸𑀬 𑀑𑀪𑀸𑀲𑁄, 𑀑𑀪𑀸𑀲𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀧𑁆𑀧𑀦𑁆𑀦𑁂, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼 𑀲𑁄.

𑁧𑁨𑁮𑁩.

𑀫𑀕𑁆𑀕𑀧𑁆𑀧𑀢𑁆𑀢𑁄 𑀨𑀮𑀧𑁆𑀧𑀢𑁆𑀢𑁄, 𑀅𑀳𑀫𑀲𑁆𑀫𑀻𑀢𑀺 𑀕𑀡𑁆𑀳𑀢𑀺;

𑀅𑀫𑀕𑁆𑀕𑀁𑀬𑁂𑀯 𑀫𑀕𑁆𑀕𑁄𑀢𑀺, 𑀢𑀲𑁆𑀲𑁂𑀯𑀁 𑀧𑀦 𑀕𑀡𑁆𑀳𑀢𑁄.

𑁧𑁨𑁮𑁪.

𑀏𑀯𑀁 ¶ 𑀯𑀺𑀧𑀲𑁆𑀲𑀦𑀸𑀯𑀻𑀣𑀺,

𑀑𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺 𑀲𑀸;

𑀑𑀪𑀸𑀲𑀫𑁂𑀯 𑀲𑁄 𑀪𑀺𑀓𑁆𑀔𑀼,

𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺.