📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀸𑀴𑀺

𑀏𑀓𑀁 ¶ ¶ 𑀲𑀫𑀬𑀁 𑀪𑀕𑀯𑀸 𑀤𑁂𑀯𑁂𑀲𑀼 𑀯𑀺𑀳𑀭𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺.

𑁧. 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸

𑀢𑀺𑀓𑀫𑀸𑀢𑀺𑀓𑀸

𑀓𑀼𑀲𑀮𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧-𑁨𑁨), 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀯𑀺𑀧𑀸𑀓𑀸 𑀥𑀫𑁆𑀫𑀸, 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸 ¶ 𑀥𑀫𑁆𑀫𑀸, 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸, 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸. 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸, 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸, 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀥𑀫𑁆𑀫𑀸, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀥𑀫𑁆𑀫𑀸. 𑀧𑀻𑀢𑀺𑀲𑀳𑀕𑀢𑀸 𑀥𑀫𑁆𑀫𑀸, 𑀲𑀼𑀔𑀲𑀳𑀕𑀢𑀸 𑀥𑀫𑁆𑀫𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀥𑀫𑁆𑀫𑀸. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸 ¶ . 𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸, 𑀅𑀧𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸, 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸. 𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸 𑀥𑀫𑁆𑀫𑀸. 𑀧𑀭𑀺𑀢𑁆𑀢𑀸 𑀥𑀫𑁆𑀫𑀸, 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀥𑀫𑁆𑀫𑀸. 𑀳𑀻𑀦𑀸 𑀥𑀫𑁆𑀫𑀸, 𑀫𑀚𑁆𑀛𑀺𑀫𑀸 𑀥𑀫𑁆𑀫𑀸, 𑀧𑀡𑀻𑀢𑀸 𑀥𑀫𑁆𑀫𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸, 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸, 𑀅𑀦𑀺𑀬𑀢𑀸 𑀥𑀫𑁆𑀫𑀸. 𑀫𑀕𑁆𑀕𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀫𑀕𑁆𑀕𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸. 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸. 𑀅𑀢𑀻𑀢𑀸 𑀥𑀫𑁆𑀫𑀸, 𑀅𑀦𑀸𑀕𑀢𑀸 𑀥𑀫𑁆𑀫𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸. 𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸 𑀥𑀫𑁆𑀫𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀥𑀫𑁆𑀫𑀸. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸. 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸, 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧-𑁨𑁨).

𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑀁.

𑀤𑀼𑀓𑀫𑀸𑀢𑀺𑀓𑀸

𑀳𑁂𑀢𑀼𑀕𑁄𑀘𑁆𑀙𑀓𑀁

𑀳𑁂𑀢𑀽 𑀥𑀫𑁆𑀫𑀸, 𑀦 𑀳𑁂𑀢𑀽 𑀥𑀫𑁆𑀫𑀸. 𑀲𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀅𑀳𑁂𑀢𑀼𑀓𑀸 𑀥𑀫𑁆𑀫𑀸. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘, 𑀲𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽. 𑀳𑁂𑀢𑀽 𑀘𑁂𑀯 ¶ 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽. 𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀺. 𑀳𑁂𑀢𑀼𑀕𑁄𑀘𑁆𑀙𑀓𑀁.

𑀘𑀽𑀴𑀦𑁆𑀢𑀭𑀤𑀼𑀓𑀁

𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸. 𑀲𑀗𑁆𑀔𑀢𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸. 𑀲𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸, 𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸. 𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸, 𑀅𑀧𑁆𑀧𑀝𑀺𑀖𑀸 ¶ 𑀥𑀫𑁆𑀫𑀸. 𑀭𑀽𑀧𑀺𑀦𑁄 𑀥𑀫𑁆𑀫𑀸, 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸. 𑀮𑁄𑀓𑀺𑀬𑀸 𑀥𑀫𑁆𑀫𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸. 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀘𑀽𑀴𑀦𑁆𑀢𑀭𑀤𑀼𑀓𑀁.

𑀆𑀲𑀯𑀕𑁄𑀘𑁆𑀙𑀓𑀁

𑀆𑀲𑀯𑀸 𑀥𑀫𑁆𑀫𑀸, 𑀦𑁄 𑀆𑀲𑀯𑀸 𑀥𑀫𑁆𑀫𑀸. 𑀲𑀸𑀲𑀯𑀸 𑀥𑀫𑁆𑀫𑀸, 𑀅𑀦𑀸𑀲𑀯𑀸 𑀥𑀫𑁆𑀫𑀸. 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀆𑀲𑀯𑀸 𑀘𑁂𑀯 𑀥𑀫𑁆𑀫𑀸 𑀲𑀸𑀲𑀯𑀸 𑀘, 𑀲𑀸𑀲𑀯𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀆𑀲𑀯𑀸. 𑀆𑀲𑀯𑀸 𑀘𑁂𑀯 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀆𑀲𑀯𑀸. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸𑀧𑀺, 𑀅𑀦𑀸𑀲𑀯𑀸𑀧𑀺. 𑀆𑀲𑀯𑀕𑁄𑀘𑁆𑀙𑀓𑀁.

𑀲𑀜𑁆𑀜𑁄𑀚𑀦𑀕𑁄𑀘𑁆𑀙𑀓𑀁

𑀲𑀜𑁆𑀜𑁄𑀚𑀦𑀸 𑀥𑀫𑁆𑀫𑀸, 𑀦𑁄 𑀲𑀜𑁆𑀜𑁄𑀚𑀦𑀸 𑀥𑀫𑁆𑀫𑀸. 𑀲𑀜𑁆𑀜𑁄𑀚𑀦𑀺𑀬𑀸 𑀥𑀫𑁆𑀫𑀸, 𑀅𑀲𑀜𑁆𑀜𑁄𑀚𑀦𑀺𑀬𑀸 𑀥𑀫𑁆𑀫𑀸. 𑀲𑀜𑁆𑀜𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀲𑀜𑁆𑀜𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀲𑀜𑁆𑀜𑁄𑀚𑀦𑀸 𑀘𑁂𑀯 𑀥𑀫𑁆𑀫𑀸 𑀲𑀜𑁆𑀜𑁄𑀚𑀦𑀺𑀬𑀸 𑀘, 𑀲𑀜𑁆𑀜𑁄𑀚𑀦𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀲𑀜𑁆𑀜𑁄𑀚𑀦𑀸. 𑀲𑀜𑁆𑀜𑁄𑀚𑀦𑀸 𑀘𑁂𑀯 𑀥𑀫𑁆𑀫𑀸 𑀲𑀜𑁆𑀜𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀲𑀜𑁆𑀜𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀲𑀜𑁆𑀜𑁄𑀚𑀦𑀸. 𑀲𑀜𑁆𑀜𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀜𑁆𑀜𑁄𑀚𑀦𑀺𑀬𑀸𑀧𑀺, 𑀅𑀲𑀜𑁆𑀜𑁄𑀚𑀦𑀺𑀬𑀸𑀧𑀺. 𑀲𑀜𑁆𑀜𑁄𑀚𑀦𑀕𑁄𑀘𑁆𑀙𑀓𑀁.

𑀕𑀦𑁆𑀣𑀕𑁄𑀘𑁆𑀙𑀓𑀁

𑀕𑀦𑁆𑀣𑀸 𑀥𑀫𑁆𑀫𑀸, 𑀦𑁄 𑀕𑀦𑁆𑀣𑀸 𑀥𑀫𑁆𑀫𑀸. 𑀕𑀦𑁆𑀣𑀦𑀺𑀬𑀸 𑀥𑀫𑁆𑀫𑀸, 𑀅𑀕𑀦𑁆𑀣𑀦𑀺𑀬𑀸 𑀥𑀫𑁆𑀫𑀸. 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀕𑀦𑁆𑀣𑀸 𑀘𑁂𑀯 𑀥𑀫𑁆𑀫𑀸 𑀕𑀦𑁆𑀣𑀦𑀺𑀬𑀸 𑀘, 𑀕𑀦𑁆𑀣𑀦𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀕𑀦𑁆𑀣𑀸 ¶ . 𑀕𑀦𑁆𑀣𑀸 𑀘𑁂𑀯 𑀥𑀫𑁆𑀫𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀕𑀦𑁆𑀣𑀸. 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀕𑀦𑁆𑀣𑀦𑀺𑀬𑀸𑀧𑀺, 𑀅𑀕𑀦𑁆𑀣𑀦𑀺𑀬𑀸𑀧𑀺. 𑀕𑀦𑁆𑀣𑀕𑁄𑀘𑁆𑀙𑀓𑀁.

𑀑𑀖𑀕𑁄𑀘𑁆𑀙𑀓𑀁

𑀑𑀖𑀸 ¶ 𑀥𑀫𑁆𑀫𑀸, 𑀦𑁄 𑀑𑀖𑀸 𑀥𑀫𑁆𑀫𑀸. 𑀑𑀖𑀦𑀺𑀬𑀸 𑀥𑀫𑁆𑀫𑀸, 𑀅𑀦𑁄𑀖𑀦𑀺𑀬𑀸 𑀥𑀫𑁆𑀫𑀸. 𑀑𑀖𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀑𑀖𑀸 𑀘𑁂𑀯 𑀥𑀫𑁆𑀫𑀸 𑀑𑀖𑀦𑀺𑀬𑀸 𑀘, 𑀑𑀖𑀦𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀑𑀖𑀸. 𑀑𑀖𑀸 𑀘𑁂𑀯 𑀥𑀫𑁆𑀫𑀸 𑀑𑀖𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀑𑀖𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀑𑀖𑀸. 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀑𑀖𑀦𑀺𑀬𑀸𑀧𑀺, 𑀅𑀦𑁄𑀖𑀦𑀺𑀬𑀸𑀧𑀺. 𑀑𑀖𑀕𑁄𑀘𑁆𑀙𑀓𑀁.

𑀬𑁄𑀕𑀕𑁄𑀘𑁆𑀙𑀓𑀁

𑀬𑁄𑀕𑀸 𑀥𑀫𑁆𑀫𑀸, 𑀦𑁄 𑀬𑁄𑀕𑀸 𑀥𑀫𑁆𑀫𑀸. 𑀬𑁄𑀕𑀦𑀺𑀬𑀸 𑀥𑀫𑁆𑀫𑀸, 𑀅𑀬𑁄𑀕𑀦𑀺𑀬𑀸 𑀥𑀫𑁆𑀫𑀸. 𑀬𑁄𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀬𑁄𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀬𑁄𑀕𑀸 𑀘𑁂𑀯 𑀥𑀫𑁆𑀫𑀸 𑀬𑁄𑀕𑀦𑀺𑀬𑀸 𑀘, 𑀬𑁄𑀕𑀦𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀬𑁄𑀕𑀸. 𑀬𑁄𑀕𑀸 𑀘𑁂𑀯 𑀥𑀫𑁆𑀫𑀸 𑀬𑁄𑀕𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀬𑁄𑀕𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀬𑁄𑀕𑀸. 𑀬𑁄𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀬𑁄𑀕𑀦𑀺𑀬𑀸𑀧𑀺, 𑀅𑀬𑁄𑀕𑀦𑀺𑀬𑀸𑀧𑀺. 𑀬𑁄𑀕𑀕𑁄𑀘𑁆𑀙𑀓𑀁.

𑀦𑀻𑀯𑀭𑀡𑀕𑁄𑀘𑁆𑀙𑀓𑀁

𑀦𑀻𑀯𑀭𑀡𑀸 𑀥𑀫𑁆𑀫𑀸, 𑀦𑁄 𑀦𑀻𑀯𑀭𑀡𑀸 𑀥𑀫𑁆𑀫𑀸. 𑀦𑀻𑀯𑀭𑀡𑀺𑀬𑀸 𑀥𑀫𑁆𑀫𑀸, 𑀅𑀦𑀻𑀯𑀭𑀡𑀺𑀬𑀸 𑀥𑀫𑁆𑀫𑀸. 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀦𑀻𑀯𑀭𑀡𑀸 𑀘𑁂𑀯 𑀥𑀫𑁆𑀫𑀸 𑀦𑀻𑀯𑀭𑀡𑀺𑀬𑀸 𑀘, 𑀦𑀻𑀯𑀭𑀡𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀦𑀻𑀯𑀭𑀡𑀸. 𑀦𑀻𑀯𑀭𑀡𑀸 𑀘𑁂𑀯 𑀥𑀫𑁆𑀫𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀦𑀻𑀯𑀭𑀡𑀸. 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀦𑀻𑀯𑀭𑀡𑀺𑀬𑀸𑀧𑀺, 𑀅𑀦𑀻𑀯𑀭𑀡𑀺𑀬𑀸𑀧𑀺. 𑀦𑀻𑀯𑀭𑀡𑀕𑁄𑀘𑁆𑀙𑀓𑀁.

𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑀁

𑀧𑀭𑀸𑀫𑀸𑀲𑀸 𑀥𑀫𑁆𑀫𑀸, 𑀦𑁄 𑀧𑀭𑀸𑀫𑀸𑀲𑀸 𑀥𑀫𑁆𑀫𑀸. 𑀧𑀭𑀸𑀫𑀝𑁆𑀞𑀸 𑀥𑀫𑁆𑀫𑀸, 𑀅𑀧𑀭𑀸𑀫𑀝𑁆𑀞𑀸 𑀥𑀫𑁆𑀫𑀸. 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀧𑀭𑀸𑀫𑀸𑀲𑀸 𑀘𑁂𑀯 𑀥𑀫𑁆𑀫𑀸 ¶ 𑀧𑀭𑀸𑀫𑀝𑁆𑀞𑀸 𑀘, 𑀧𑀭𑀸𑀫𑀝𑁆𑀞𑀸𑀘𑁂𑀯 ¶ 𑀥𑀫𑁆𑀫𑀸 𑀦𑁄 𑀘 𑀧𑀭𑀸𑀫𑀸𑀲𑀸. 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀧𑀭𑀸𑀫𑀝𑁆𑀞𑀸𑀧𑀺, 𑀅𑀧𑀭𑀸𑀫𑀝𑁆𑀞𑀸𑀧𑀺. 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑀁.

𑀫𑀳𑀦𑁆𑀢𑀭𑀤𑀼𑀓𑀁

𑀲𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀸 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀸 𑀥𑀫𑁆𑀫𑀸. 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀥𑀫𑁆𑀫𑀸, 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀳𑀪𑀼𑀦𑁄 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄 𑀥𑀫𑁆𑀫𑀸. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄 𑀥𑀫𑁆𑀫𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸, 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸. 𑀅𑀚𑁆𑀛𑀢𑁆𑀢𑀺𑀓𑀸 𑀥𑀫𑁆𑀫𑀸, 𑀩𑀸𑀳𑀺𑀭𑀸 𑀥𑀫𑁆𑀫𑀸. 𑀉𑀧𑀸𑀤𑀸 𑀥𑀫𑁆𑀫𑀸, 𑀦𑁄 𑀉𑀧𑀸𑀤𑀸 𑀥𑀫𑁆𑀫𑀸. 𑀉𑀧𑀸𑀤𑀺𑀡𑁆𑀡𑀸 𑀥𑀫𑁆𑀫𑀸, 𑀅𑀦𑀼𑀧𑀸𑀤𑀺𑀡𑁆𑀡𑀸 𑀥𑀫𑁆𑀫𑀸. 𑀫𑀳𑀦𑁆𑀢𑀭𑀤𑀼𑀓𑀁.

𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀁

𑀉𑀧𑀸𑀤𑀸𑀦𑀸 𑀥𑀫𑁆𑀫𑀸, 𑀦𑁄 𑀉𑀧𑀸𑀤𑀸𑀦𑀸 𑀥𑀫𑁆𑀫𑀸. 𑀉𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸, 𑀅𑀦𑀼𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸. 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀉𑀧𑀸𑀤𑀸𑀦𑀸 𑀘𑁂𑀯 𑀥𑀫𑁆𑀫𑀸 𑀉𑀧𑀸𑀤𑀸𑀦𑀺𑀬𑀸 𑀘, 𑀉𑀧𑀸𑀤𑀸𑀦𑀺𑀬𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀉𑀧𑀸𑀤𑀸𑀦𑀸. 𑀉𑀧𑀸𑀤𑀸𑀦𑀸 𑀘𑁂𑀯 𑀥𑀫𑁆𑀫𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀉𑀧𑀸𑀤𑀸𑀦𑀸. 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀉𑀧𑀸𑀤𑀸𑀦𑀺𑀬𑀸𑀧𑀺, 𑀅𑀦𑀼𑀧𑀸𑀤𑀸𑀦𑀺𑀬𑀸𑀧𑀺. 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀁.

𑀓𑀺𑀮𑁂𑀲𑀕𑁄𑀘𑁆𑀙𑀓𑀁

𑀓𑀺𑀮𑁂𑀲𑀸 𑀥𑀫𑁆𑀫𑀸, 𑀦𑁄 𑀓𑀺𑀮𑁂𑀲𑀸 𑀥𑀫𑁆𑀫𑀸. 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸, 𑀅𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸. 𑀲𑀁𑀓𑀺𑀮𑀺𑀝𑁆𑀞𑀸 𑀥𑀫𑁆𑀫𑀸, 𑀅𑀲𑀁𑀓𑀺𑀮𑀺𑀝𑁆𑀞𑀸 𑀥𑀫𑁆𑀫𑀸. 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀓𑀺𑀮𑁂𑀲𑀸 ¶ 𑀘𑁂𑀯 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀘, 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀓𑀺𑀮𑁂𑀲𑀸. 𑀓𑀺𑀮𑁂𑀲𑀸 𑀘𑁂𑀯 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀸 𑀘, 𑀲𑀁𑀓𑀺𑀮𑀺𑀝𑁆𑀞𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀓𑀺𑀮𑁂𑀲𑀸. 𑀓𑀺𑀮𑁂𑀲𑀸 𑀘𑁂𑀯 𑀥𑀫𑁆𑀫𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 ¶ 𑀘, 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀓𑀺𑀮𑁂𑀲𑀸. 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸𑀧𑀺, 𑀅𑀲𑀁𑀓𑀺𑀮𑁂𑀲𑀺𑀓𑀸𑀧𑀺. 𑀓𑀺𑀮𑁂𑀲𑀕𑁄𑀘𑁆𑀙𑀓𑀁.

𑀧𑀺𑀝𑁆𑀞𑀺𑀤𑀼𑀓𑀁

𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸. 𑀲𑀯𑀺𑀢𑀓𑁆𑀓𑀸 𑀥𑀫𑁆𑀫𑀸, 𑀅𑀯𑀺𑀢𑀓𑁆𑀓𑀸 𑀥𑀫𑁆𑀫𑀸. 𑀲𑀯𑀺𑀘𑀸𑀭𑀸 𑀥𑀫𑁆𑀫𑀸, 𑀅𑀯𑀺𑀘𑀸𑀭𑀸 𑀥𑀫𑁆𑀫𑀸. 𑀲𑀧𑁆𑀧𑀻𑀢𑀺𑀓𑀸 𑀥𑀫𑁆𑀫𑀸, 𑀅𑀧𑁆𑀧𑀻𑀢𑀺𑀓𑀸 𑀥𑀫𑁆𑀫𑀸. 𑀧𑀻𑀢𑀺𑀲𑀳𑀕𑀢𑀸 𑀥𑀫𑁆𑀫𑀸, 𑀦 𑀧𑀻𑀢𑀺𑀲𑀳𑀕𑀢𑀸 𑀥𑀫𑁆𑀫𑀸. 𑀲𑀼𑀔𑀲𑀳𑀕𑀢𑀸 𑀥𑀫𑁆𑀫𑀸, 𑀦 𑀲𑀼𑀔𑀲𑀳𑀕𑀢𑀸 𑀥𑀫𑁆𑀫𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀥𑀫𑁆𑀫𑀸, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀥𑀫𑁆𑀫𑀸. 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀦 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸. 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀦 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸. 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀦 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸. 𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸. 𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸, 𑀅𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸. 𑀦𑀺𑀬𑀢𑀸 𑀥𑀫𑁆𑀫𑀸, 𑀅𑀦𑀺𑀬𑀢𑀸 𑀥𑀫𑁆𑀫𑀸. 𑀲𑀉𑀢𑁆𑀢𑀭𑀸 𑀥𑀫𑁆𑀫𑀸, 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸. 𑀲𑀭𑀡𑀸 𑀥𑀫𑁆𑀫𑀸, 𑀅𑀭𑀡𑀸 𑀥𑀫𑁆𑀫𑀸. 𑀧𑀺𑀝𑁆𑀞𑀺𑀤𑀼𑀓𑀁.

𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀸.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸

𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸, 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸. 𑀯𑀺𑀚𑁆𑀚𑀽𑀧𑀫𑀸 𑀥𑀫𑁆𑀫𑀸, 𑀯𑀚𑀺𑀭𑀽𑀧𑀫𑀸 𑀥𑀫𑁆𑀫𑀸. 𑀩𑀸𑀮𑀸 𑀥𑀫𑁆𑀫𑀸, 𑀧𑀡𑁆𑀟𑀺𑀢𑀸 𑀥𑀫𑁆𑀫𑀸. 𑀓𑀡𑁆𑀳𑀸 𑀥𑀫𑁆𑀫𑀸 ¶ , 𑀲𑀼𑀓𑁆𑀓𑀸 𑀥𑀫𑁆𑀫𑀸. 𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀢𑀧𑀦𑀻𑀬𑀸 𑀥𑀫𑁆𑀫𑀸. 𑀅𑀥𑀺𑀯𑀘𑀦𑀸 𑀥𑀫𑁆𑀫𑀸, 𑀅𑀥𑀺𑀯𑀘𑀦𑀧𑀣𑀸 𑀥𑀫𑁆𑀫𑀸. 𑀦𑀺𑀭𑀼𑀢𑁆𑀢𑀺 𑀥𑀫𑁆𑀫𑀸, 𑀦𑀺𑀭𑀼𑀢𑁆𑀢𑀺𑀧𑀣𑀸 𑀥𑀫𑁆𑀫𑀸. 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀸, 𑀧𑀜𑁆𑀜𑀢𑁆𑀢𑀺𑀧𑀣𑀸 𑀥𑀫𑁆𑀫𑀸. 𑀦𑀸𑀫𑀜𑁆𑀘, 𑀭𑀽𑀧𑀜𑁆𑀘. 𑀅𑀯𑀺𑀚𑁆𑀚𑀸 𑀘, 𑀪𑀯𑀢𑀡𑁆𑀳𑀸 𑀘. 𑀪𑀯𑀤𑀺𑀝𑁆𑀞𑀺 𑀘, 𑀯𑀺𑀪𑀯𑀤𑀺𑀝𑁆𑀞𑀺 𑀘. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘. 𑀅𑀦𑁆𑀢𑀯𑀸 𑀤𑀺𑀝𑁆𑀞𑀺 𑀘, 𑀅𑀦𑀦𑁆𑀢𑀯𑀸 𑀤𑀺𑀝𑁆𑀞𑀺 𑀘. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘, 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘. 𑀅𑀳𑀺𑀭𑀺𑀓𑀜𑁆𑀘, 𑀅𑀦𑁄𑀢𑁆𑀢𑀧𑁆𑀧𑀜𑁆𑀘. 𑀳𑀺𑀭𑀻 𑀘, 𑀑𑀢𑁆𑀢𑀧𑁆𑀧𑀜𑁆𑀘. 𑀤𑁄𑀯𑀘𑀲𑁆𑀲𑀢𑀸 𑀘, 𑀧𑀸𑀧𑀫𑀺𑀢𑁆𑀢𑀢𑀸 𑀘. 𑀲𑁄𑀯𑀘𑀲𑁆𑀲𑀢𑀸 𑀘, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘. 𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀘, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀘. 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸 𑀘, 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀘. 𑀥𑀸𑀢𑀼𑀓𑀼𑀲𑀮𑀢𑀸 𑀘, 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸 ¶ 𑀘. 𑀆𑀬𑀢𑀦𑀓𑀼𑀲𑀮𑀢𑀸 𑀘, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸 𑀘. 𑀞𑀸𑀦𑀓𑀼𑀲𑀮𑀢𑀸 𑀘, 𑀅𑀝𑁆𑀞𑀸𑀦𑀓𑀼𑀲𑀮𑀢𑀸 𑀘. 𑀅𑀚𑁆𑀚𑀯𑁄 𑀘, 𑀫𑀤𑁆𑀤𑀯𑁄 𑀘. 𑀔𑀦𑁆𑀢𑀺 𑀘, 𑀲𑁄𑀭𑀘𑁆𑀘𑀜𑁆𑀘. 𑀲𑀸𑀔𑀮𑁆𑀬𑀜𑁆𑀘, 𑀧𑀝𑀺𑀲𑀦𑁆𑀣𑀸𑀭𑁄 𑀘. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀘, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑀘. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀘, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀘. 𑀫𑀼𑀝𑁆𑀞𑀲𑁆𑀲𑀘𑁆𑀘𑀜𑁆𑀘, 𑀅𑀲𑀫𑁆𑀧𑀚𑀜𑁆𑀜𑀜𑁆𑀘. 𑀲𑀢𑀺 𑀘, 𑀲𑀫𑁆𑀧𑀚𑀜𑁆𑀜𑀜𑁆𑀘. 𑀧𑀝𑀺𑀲𑀗𑁆𑀔𑀸𑀦𑀩𑀮𑀜𑁆𑀘, 𑀪𑀸𑀯𑀦𑀸𑀩𑀮𑀜𑁆𑀘. 𑀲𑀫𑀣𑁄 𑀘, 𑀯𑀺𑀧𑀲𑁆𑀲𑀦𑀸 𑀘. 𑀲𑀫𑀣𑀦𑀺𑀫𑀺𑀢𑁆𑀢𑀜𑁆𑀘, 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑀜𑁆𑀘. 𑀧𑀕𑁆𑀕𑀸𑀳𑁄 𑀘, 𑀅𑀯𑀺𑀓𑁆𑀔𑁂𑀧𑁄 𑀘. 𑀲𑀻𑀮𑀯𑀺𑀧𑀢𑁆𑀢𑀺 𑀘, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀘. 𑀲𑀻𑀮𑀲𑀫𑁆𑀧𑀤𑀸 𑀘, 𑀤𑀺𑀝𑁆𑀞𑀺𑀲𑀫𑁆𑀧𑀤𑀸 𑀘. 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀘. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦, 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀁. 𑀲𑀁𑀯𑁂𑀕𑁄 𑀘 𑀲𑀁𑀯𑁂𑀚𑀦𑀺𑀬𑁂𑀲𑀼 𑀞𑀸𑀦𑁂𑀲𑀼, 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄 𑀧𑀥𑀸𑀦𑀁. 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀧𑁆𑀧𑀝𑀺𑀯𑀸𑀦𑀺𑀢𑀸 𑀘 𑀧𑀥𑀸𑀦𑀲𑁆𑀫𑀺𑀁. 𑀯𑀺𑀚𑁆𑀚𑀸 𑀘, 𑀯𑀺𑀫𑀼𑀢𑁆𑀢𑀺 𑀘. 𑀔𑀬𑁂 𑀜𑀸𑀡𑀁, 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸.

𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀪𑀗𑁆𑀕𑀫𑀸𑀢𑀺𑀓𑀸

𑀔𑀦𑁆𑀥𑀯𑀺𑀪𑀗𑁆𑀕𑁄

𑀧𑀜𑁆𑀘𑀓𑁆𑀔𑀦𑁆𑀥𑀸 ¶ 𑁋 (𑀯𑀺𑀪. 𑁧) 𑀭𑀽𑀧𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀔𑀦𑁆𑀥𑀯𑀺𑀪𑀗𑁆𑀕𑀁.

𑀆𑀬𑀢𑀦𑀯𑀺𑀪𑀗𑁆𑀕𑁄

𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 (𑀯𑀺𑀪. 𑁧𑁫𑁪) 𑁋 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀆𑀬𑀢𑀦𑀯𑀺𑀪𑀗𑁆𑀕𑀁.

𑀥𑀸𑀢𑀼𑀯𑀺𑀪𑀗𑁆𑀕𑁄

𑀅𑀝𑁆𑀞𑀸𑀭𑀲 ¶ 𑀥𑀸𑀢𑀼𑀬𑁄 (𑀯𑀺𑀪. 𑁧𑁮𑁩) 𑁋 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼 𑀭𑀲𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺. 𑀥𑀸𑀢𑀼𑀯𑀺𑀪𑀗𑁆𑀕𑀁.

𑀲𑀘𑁆𑀘𑀯𑀺𑀪𑀗𑁆𑀕𑁄

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 (𑀯𑀺𑀪. 𑁧𑁮𑁯) 𑁋 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀲𑀘𑁆𑀘𑀯𑀺𑀪𑀗𑁆𑀕𑀁.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁄

𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 (𑀯𑀺𑀪. 𑁨𑁧𑁯) 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 ¶ 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀁.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁄

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 (𑀯𑀺𑀪. 𑁨𑁨𑁫), 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀁.

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄

𑀘𑀢𑁆𑀢𑀸𑀭𑁄 ¶ 𑀲𑀢𑀺𑀧𑀝𑁆𑀞𑀸𑀦𑀸 (𑀯𑀺𑀪. 𑁩𑁫𑁫) 𑁋 𑀇𑀥 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁.

𑀅𑀚𑁆𑀛𑀢𑁆𑀢𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁.

𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁.

𑀅𑀚𑁆𑀛𑀢𑁆𑀢𑀁 ¶ 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀁.

𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁄

𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 (𑀯𑀺𑀪. 𑁩𑁯𑁦) 𑁋 𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺.

𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺.

𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺.

𑀉𑀧𑁆𑀧𑀦𑁆𑀦𑀸𑀦𑀁 ¶ 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑀁.

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁄

𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 (𑀯𑀺𑀪. 𑁪𑁩𑁦) 𑁋 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀁.

𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁄

𑀲𑀢𑁆𑀢 ¶ 𑀩𑁄𑀚𑁆𑀛𑀗𑁆𑀕𑀸 (𑀯𑀺𑀪. 𑁪𑁬𑁬) 𑁋 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑀁.

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁄

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 (𑀯𑀺𑀪. 𑁪𑁮𑁬). 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀁.

𑀛𑀸𑀦𑀯𑀺𑀪𑀗𑁆𑀕𑁄

𑀇𑀥 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 (𑀯𑀺𑀪. 𑁫𑁦𑁮) 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑀸𑀢𑀘𑁆𑀘𑀁 𑀦𑁂𑀧𑀓𑁆𑀓𑀁 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

𑀲𑁄 ¶ 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺.

𑀲𑁄 ¶ 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀯𑀺𑀚𑀦𑀯𑀸𑀢𑀁 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁.

𑀲𑁄 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

𑀲𑀩𑁆𑀩𑀲𑁄 ¶ ¶ 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀛𑀸𑀦𑀯𑀺𑀪𑀗𑁆𑀕𑀁.

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄

𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 (𑀯𑀺𑀪. 𑁬𑁪𑁨) 𑁋 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 ¶ 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀁.

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄

𑀧𑀜𑁆𑀘 ¶ 𑀲𑀺𑀓𑁆𑀔𑀸𑀧𑀤𑀸𑀦𑀺 (𑀯𑀺𑀪. 𑁭𑁦𑁩) 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀁.

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄

𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 (𑀯𑀺𑀪. 𑁭𑁧𑁮) 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀁.

𑀜𑀸𑀡𑀯𑀺𑀪𑀗𑁆𑀕𑁄

𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 (𑀯𑀺𑀪. 𑁭𑁫𑁧) 𑁋 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸 𑀦 𑀳𑁂𑀢𑀽, 𑀅𑀳𑁂𑀢𑀼𑀓𑀸, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸, 𑀲𑀧𑁆𑀧𑀘𑁆𑀘𑀬𑀸, 𑀲𑀗𑁆𑀔𑀢𑀸, 𑀅𑀭𑀽𑀧𑀸, 𑀮𑁄𑀓𑀺𑀬𑀸, 𑀲𑀸𑀲𑀯𑀸, 𑀲𑀁𑀬𑁄𑀚𑀦𑀺𑀬𑀸, 𑀕𑀦𑁆𑀣𑀦𑀺𑀬𑀸, 𑀑𑀖𑀦𑀺𑀬𑀸, 𑀬𑁄𑀕𑀦𑀺𑀬𑀸, 𑀦𑀻𑀯𑀭𑀡𑀺𑀬𑀸, 𑀧𑀭𑀸𑀫𑀝𑁆𑀞𑀸, 𑀉𑀧𑀸𑀤𑀸𑀦𑀺𑀬𑀸, 𑀲𑀁𑀓𑀺𑀮𑁂𑀲𑀺𑀓𑀸, 𑀅𑀩𑁆𑀬𑀸𑀓𑀢𑀸, 𑀲𑀸𑀭𑀫𑁆𑀫𑀡𑀸, 𑀅𑀘𑁂𑀢𑀲𑀺𑀓𑀸, 𑀯𑀺𑀧𑀸𑀓𑀸, 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀦 𑀧𑀻𑀢𑀺𑀲𑀳𑀕𑀢𑀸, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸, 𑀧𑀭𑀺𑀢𑁆𑀢𑀸, 𑀓𑀸𑀫𑀸𑀯𑀘𑀭𑀸, 𑀦 ¶ 𑀭𑀽𑀧𑀸𑀯𑀘𑀭𑀸, 𑀦 𑀅𑀭𑀽𑀧𑀸𑀯𑀘𑀭𑀸, 𑀧𑀭𑀺𑀬𑀸𑀧𑀦𑁆𑀦𑀸, 𑀦𑁄 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀅𑀦𑀺𑀬𑀢𑀸, 𑀅𑀦𑀺𑀬𑁆𑀬𑀸𑀦𑀺𑀓𑀸.

𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸, 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀸, 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸, 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸, 𑀩𑀸𑀳𑀺𑀭𑀸𑀭𑀫𑁆𑀫𑀡𑀸, 𑀅𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸, 𑀅𑀲𑀫𑁆𑀪𑀺𑀦𑁆𑀦𑀸𑀭𑀫𑁆𑀫𑀡𑀸, 𑀦𑀸𑀦𑀸𑀯𑀢𑁆𑀣𑀼𑀓𑀸, 𑀦𑀸𑀦𑀸𑀭𑀫𑁆𑀫𑀡𑀸, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀦 𑀅𑀲𑀫𑀦𑁆𑀦𑀸𑀳𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀫𑀦𑀲𑀺𑀓𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀩𑁆𑀩𑁄𑀓𑀺𑀡𑁆𑀡𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀧𑀜𑁆𑀘 𑀯𑀺𑀜𑁆𑀜𑀸𑀡𑀸 𑀅𑀦𑀸𑀪𑁄𑀕𑀸, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀜𑁆𑀜𑀢𑁆𑀭 ¶ 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀸𑀬𑀓𑀫𑁆𑀫𑀁 𑀦 𑀯𑀘𑀻𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀓𑀸𑀬𑀓𑀫𑁆𑀫𑀁 𑀦 𑀯𑀘𑀻𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀺𑀬𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀺𑀬𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀲𑀫𑀸𑀧𑀚𑁆𑀚𑀢𑀺 𑀦 𑀯𑀼𑀝𑁆𑀞𑀸𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀲𑀫𑀸𑀧𑀚𑁆𑀚𑀢𑀺 𑀦 𑀯𑀼𑀝𑁆𑀞𑀸𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀘𑀯𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀘𑀯𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀲𑀼𑀧𑀢𑀺 𑀦 𑀧𑀝𑀺𑀩𑀼𑀚𑁆𑀛𑀢𑀺 𑀦 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀺 𑀦 𑀲𑀼𑀧𑀢𑀺 𑀦 𑀧𑀝𑀺𑀩𑀼𑀚𑁆𑀛𑀢𑀺 𑀦 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸. 𑀏𑀯𑀁 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀤𑀼𑀯𑀺𑀥𑁂𑀦 ¶ 𑀜𑀸𑀡𑀯𑀢𑁆𑀣𑀼 𑁋 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸. 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀧𑀜𑁆𑀜𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸 𑀧𑀜𑁆𑀜𑀸. 𑀲𑀸𑀲𑀯𑀸 𑀧𑀜𑁆𑀜𑀸, 𑀅𑀦𑀸𑀲𑀯𑀸 𑀧𑀜𑁆𑀜𑀸. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀧𑀜𑁆𑀜𑀸, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸 𑀧𑀜𑁆𑀜𑀸. 𑀲𑀁𑀬𑁄𑀚𑀦𑀺𑀬𑀸 𑀧𑀜𑁆𑀜𑀸, 𑀅𑀲𑀁𑀬𑁄𑀚𑀦𑀺𑀬𑀸 𑀧𑀜𑁆𑀜𑀸. 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀁𑀬𑁄𑀚𑀦𑀺𑀬𑀸 𑀧𑀜𑁆𑀜𑀸, 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀲𑀁𑀬𑁄𑀚𑀦𑀺𑀬𑀸 𑀧𑀜𑁆𑀜𑀸. 𑀕𑀦𑁆𑀣𑀦𑀺𑀬𑀸 𑀧𑀜𑁆𑀜𑀸, 𑀅𑀕𑀦𑁆𑀣𑀦𑀺𑀬𑀸 𑀧𑀜𑁆𑀜𑀸. 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀕𑀦𑁆𑀣𑀦𑀺𑀬𑀸 𑀧𑀜𑁆𑀜𑀸, 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀕𑀦𑁆𑀣𑀦𑀺𑀬𑀸 𑀧𑀜𑁆𑀜𑀸.

𑀑𑀖𑀦𑀺𑀬𑀸 𑀧𑀜𑁆𑀜𑀸, 𑀅𑀦𑁄𑀖𑀦𑀺𑀬𑀸 𑀧𑀜𑁆𑀜𑀸. 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀸 𑀑𑀖𑀦𑀺𑀬𑀸 𑀧𑀜𑁆𑀜𑀸, 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑁄𑀖𑀦𑀺𑀬𑀸 𑀧𑀜𑁆𑀜𑀸. 𑀬𑁄𑀕𑀦𑀺𑀬𑀸 𑀧𑀜𑁆𑀜𑀸, 𑀅𑀬𑁄𑀕𑀦𑀺𑀬𑀸 𑀧𑀜𑁆𑀜𑀸. 𑀬𑁄𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀬𑁄𑀕𑀦𑀺𑀬𑀸 𑀧𑀜𑁆𑀜𑀸, 𑀬𑁄𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀬𑁄𑀕𑀦𑀺𑀬𑀸 𑀧𑀜𑁆𑀜𑀸. 𑀦𑀻𑀯𑀭𑀡𑀺𑀬𑀸 𑀧𑀜𑁆𑀜𑀸, 𑀅𑀦𑀻𑀯𑀭𑀡𑀺𑀬𑀸 𑀧𑀜𑁆𑀜𑀸. 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀻𑀯𑀭𑀡𑀺𑀬𑀸 𑀧𑀜𑁆𑀜𑀸, 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀻𑀯𑀭𑀡𑀺𑀬𑀸 𑀧𑀜𑁆𑀜𑀸. 𑀧𑀭𑀸𑀫𑀝𑁆𑀞𑀸 𑀧𑀜𑁆𑀜𑀸, 𑀅𑀧𑀭𑀸𑀫𑀝𑁆𑀞𑀸 𑀧𑀜𑁆𑀜𑀸. 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀧𑀭𑀸𑀫𑀝𑁆𑀞𑀸 𑀧𑀜𑁆𑀜𑀸, 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸 𑀧𑀜𑁆𑀜𑀸. 𑀉𑀧𑀸𑀤𑀺𑀡𑁆𑀡𑀸 𑀧𑀜𑁆𑀜𑀸, 𑀅𑀦𑀼𑀧𑀸𑀤𑀺𑀡𑁆𑀡𑀸 𑀧𑀜𑁆𑀜𑀸. 𑀉𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸, 𑀅𑀦𑀼𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸. 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀉𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸, 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀼𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸.

𑀲𑀁𑀓𑀺𑀮𑁂𑀲𑀺𑀓𑀸 𑀧𑀜𑁆𑀜𑀸, 𑀅𑀲𑀁𑀓𑀺𑀮𑁂𑀲𑀺𑀓𑀸 𑀧𑀜𑁆𑀜𑀸. 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑀜𑁆𑀜𑀸, 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸 ¶ 𑀅𑀲𑀁𑀓𑀺𑀮𑁂𑀲𑀺𑀓𑀸 𑀧𑀜𑁆𑀜𑀸. 𑀲𑀯𑀺𑀢𑀓𑁆𑀓𑀸 𑀧𑀜𑁆𑀜𑀸, 𑀅𑀯𑀺𑀢𑀓𑁆𑀓𑀸 𑀧𑀜𑁆𑀜𑀸. 𑀲𑀯𑀺𑀘𑀸𑀭𑀸 𑀧𑀜𑁆𑀜𑀸, 𑀅𑀯𑀺𑀘𑀸𑀭𑀸 𑀧𑀜𑁆𑀜𑀸. 𑀲𑀧𑁆𑀧𑀻𑀢𑀺𑀓𑀸 𑀧𑀜𑁆𑀜𑀸, 𑀅𑀧𑁆𑀧𑀻𑀢𑀺𑀓𑀸 𑀧𑀜𑁆𑀜𑀸. 𑀧𑀻𑀢𑀺𑀲𑀳𑀕𑀢𑀸 𑀧𑀜𑁆𑀜𑀸, 𑀦 𑀧𑀻𑀢𑀺𑀲𑀳𑀕𑀢𑀸 𑀧𑀜𑁆𑀜𑀸. 𑀲𑀼𑀔𑀲𑀳𑀕𑀢𑀸 𑀧𑀜𑁆𑀜𑀸, 𑀦 𑀲𑀼𑀔𑀲𑀳𑀕𑀢𑀸 𑀧𑀜𑁆𑀜𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀜𑀸, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀜𑀸 ¶ . 𑀓𑀸𑀫𑀸𑀯𑀘𑀭𑀸 𑀧𑀜𑁆𑀜𑀸, 𑀦 𑀓𑀸𑀫𑀸𑀯𑀘𑀭𑀸 𑀧𑀜𑁆𑀜𑀸. 𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸, 𑀦 𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸. 𑀅𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸, 𑀦 𑀅𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸. 𑀧𑀭𑀺𑀬𑀸𑀧𑀦𑁆𑀦𑀸 𑀧𑀜𑁆𑀜𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀧𑀜𑁆𑀜𑀸. 𑀦𑀺𑀬𑁆𑀬𑀸𑀦𑀺𑀓𑀸 𑀧𑀜𑁆𑀜𑀸, 𑀅𑀦𑀺𑀬𑁆𑀬𑀸𑀦𑀺𑀓𑀸 𑀧𑀜𑁆𑀜𑀸. 𑀦𑀺𑀬𑀢𑀸 𑀧𑀜𑁆𑀜𑀸, 𑀅𑀦𑀺𑀬𑀢𑀸 𑀧𑀜𑁆𑀜𑀸. 𑀲𑀉𑀢𑁆𑀢𑀭𑀸 𑀧𑀜𑁆𑀜𑀸, 𑀅𑀦𑀼𑀢𑁆𑀢𑀭𑀸 𑀧𑀜𑁆𑀜𑀸. 𑀅𑀢𑁆𑀣𑀚𑀸𑀧𑀺𑀓𑀸 𑀧𑀜𑁆𑀜𑀸, 𑀚𑀸𑀧𑀺𑀢𑀢𑁆𑀣𑀸 𑀧𑀜𑁆𑀜𑀸. 𑀏𑀯𑀁 𑀤𑀼𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀢𑀺𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸, 𑀲𑀼𑀢𑀫𑀬𑀸 𑀧𑀜𑁆𑀜𑀸, 𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸. 𑀤𑀸𑀦𑀫𑀬𑀸 𑀧𑀜𑁆𑀜𑀸, 𑀲𑀻𑀮𑀫𑀬𑀸 𑀧𑀜𑁆𑀜𑀸, 𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸. 𑀅𑀥𑀺𑀲𑀻𑀮𑁂 𑀧𑀜𑁆𑀜𑀸, 𑀅𑀥𑀺𑀘𑀺𑀢𑁆𑀢𑁂 𑀧𑀜𑁆𑀜𑀸, 𑀅𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀸. 𑀆𑀬𑀓𑁄𑀲𑀮𑁆𑀮𑀁, 𑀅𑀧𑀸𑀬𑀓𑁄𑀲𑀮𑁆𑀮𑀁, 𑀉𑀧𑀸𑀬𑀓𑁄𑀲𑀮𑁆𑀮𑀁.

𑀯𑀺𑀧𑀸𑀓𑀸 𑀧𑀜𑁆𑀜𑀸, 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀧𑀜𑁆𑀜𑀸, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀧𑀜𑁆𑀜𑀸. 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸, 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸, 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸 𑀧𑀜𑁆𑀜𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀧𑀜𑁆𑀜𑀸, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀧𑀜𑁆𑀜𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀜𑁆𑀜𑀸. 𑀧𑀻𑀢𑀺𑀲𑀳𑀕𑀢𑀸 𑀧𑀜𑁆𑀜𑀸, 𑀲𑀼𑀔𑀲𑀳𑀕𑀢𑀸 𑀧𑀜𑁆𑀜𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀜𑀸. 𑀆𑀘𑀬𑀕𑀸𑀫𑀺𑀦𑀻 𑀧𑀜𑁆𑀜𑀸, 𑀅𑀧𑀘𑀬𑀕𑀸𑀫𑀺𑀦𑀻 𑀧𑀜𑁆𑀜𑀸, 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻 𑀧𑀜𑁆𑀜𑀸. 𑀲𑁂𑀓𑁆𑀔𑀸 𑀧𑀜𑁆𑀜𑀸, 𑀅𑀲𑁂𑀓𑁆𑀔𑀸 𑀧𑀜𑁆𑀜𑀸, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸 𑀧𑀜𑁆𑀜𑀸. 𑀧𑀭𑀺𑀢𑁆𑀢𑀸 𑀧𑀜𑁆𑀜𑀸, 𑀫𑀳𑀕𑁆𑀕𑀢𑀸 𑀧𑀜𑁆𑀜𑀸, 𑀅𑀧𑁆𑀧𑀫𑀸𑀡𑀸 𑀧𑀜𑁆𑀜𑀸. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀧𑀜𑁆𑀜𑀸. 𑀫𑀕𑁆𑀕𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀫𑀕𑁆𑀕𑀳𑁂𑀢𑀼𑀓𑀸 𑀧𑀜𑁆𑀜𑀸, 𑀫𑀕𑁆𑀕𑀸𑀥𑀺𑀧𑀢𑀺𑀦𑀻 𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀸 𑀧𑀜𑁆𑀜𑀸, 𑀅𑀦𑀼𑀧𑁆𑀧𑀦𑁆𑀦𑀸 𑀧𑀜𑁆𑀜𑀸, 𑀉𑀧𑁆𑀧𑀸𑀤𑀺𑀦𑀻 𑀧𑀜𑁆𑀜𑀸. 𑀅𑀢𑀻𑀢𑀸 𑀧𑀜𑁆𑀜𑀸, 𑀅𑀦𑀸𑀕𑀢𑀸 𑀧𑀜𑁆𑀜𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀧𑀜𑁆𑀜𑀸. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀜𑁆𑀜𑀸. 𑀅𑀚𑁆𑀛𑀢𑁆𑀢𑀸 𑀧𑀜𑁆𑀜𑀸, 𑀩𑀳𑀺𑀤𑁆𑀥𑀸 𑀧𑀜𑁆𑀜𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀧𑀜𑁆𑀜𑀸. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀧𑀜𑁆𑀜𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀧𑀜𑁆𑀜𑀸.

𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 ¶ 𑀧𑀜𑁆𑀜𑀸 𑀅𑀢𑁆𑀣𑀺 𑀯𑀺𑀧𑀸𑀓𑀸, 𑀅𑀢𑁆𑀣𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀺 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸 ¶ . 𑀅𑀢𑁆𑀣𑀺 𑀧𑀻𑀢𑀺𑀲𑀳𑀕𑀢𑀸, 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀸, 𑀅𑀢𑁆𑀣𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀅𑀢𑁆𑀣𑀺 𑀆𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀅𑀧𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻. 𑀅𑀢𑁆𑀣𑀺 𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀅𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑀻. 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀅𑀦𑀼𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀉𑀧𑁆𑀧𑀸𑀤𑀺𑀦𑀻. 𑀅𑀢𑁆𑀣𑀺 𑀅𑀢𑀻𑀢𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀢𑁆𑀣𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀧𑀜𑁆𑀜𑀸 𑀅𑀢𑁆𑀣𑀺 𑀯𑀺𑀧𑀸𑀓𑀸, 𑀅𑀢𑁆𑀣𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀺 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸. 𑀅𑀢𑁆𑀣𑀺 𑀆𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀅𑀧𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻. 𑀅𑀢𑁆𑀣𑀺 𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀅𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀅𑀦𑀼𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀉𑀧𑁆𑀧𑀸𑀤𑀺𑀦𑀻. 𑀅𑀢𑁆𑀣𑀺 𑀅𑀢𑀻𑀢𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸.

𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀜𑁆𑀜𑀸 𑀅𑀢𑁆𑀣𑀺 𑀯𑀺𑀧𑀸𑀓𑀸, 𑀅𑀢𑁆𑀣𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀺 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸. 𑀅𑀢𑁆𑀣𑀺 𑀧𑀻𑀢𑀺𑀲𑀳𑀕𑀢𑀸, 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀸, 𑀅𑀢𑁆𑀣𑀺 ¶ 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀅𑀢𑁆𑀣𑀺 𑀆𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀅𑀧𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻. 𑀅𑀢𑁆𑀣𑀺 𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀅𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑀻. 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀅𑀦𑀼𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀉𑀧𑁆𑀧𑀸𑀤𑀺𑀦𑀻. 𑀅𑀢𑁆𑀣𑀺 𑀅𑀢𑀻𑀢𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀢𑁆𑀣𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑀧𑀻𑀢𑀺𑀲𑀳𑀕𑀢𑀸 𑀧𑀜𑁆𑀜𑀸, 𑀲𑀼𑀔𑀲𑀳𑀕𑀢𑀸 𑀧𑀜𑁆𑀜𑀸 𑀅𑀢𑁆𑀣𑀺 𑀯𑀺𑀧𑀸𑀓𑀸, 𑀅𑀢𑁆𑀣𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀺 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 ¶ . 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸. 𑀅𑀢𑁆𑀣𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀅𑀢𑁆𑀣𑀺 𑀆𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀅𑀧𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻. 𑀅𑀢𑁆𑀣𑀺 𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀅𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑀻. 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀅𑀦𑀼𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀉𑀧𑁆𑀧𑀸𑀤𑀺𑀦𑀻. 𑀅𑀢𑁆𑀣𑀺 𑀅𑀢𑀻𑀢𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀢𑁆𑀣𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀜𑀸 𑀅𑀢𑁆𑀣𑀺 𑀯𑀺𑀧𑀸𑀓𑀸, 𑀅𑀢𑁆𑀣𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀺 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀅𑀢𑁆𑀣𑀺 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸 ¶ , 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸, 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸. 𑀅𑀢𑁆𑀣𑀺 𑀆𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀅𑀧𑀘𑀬𑀕𑀸𑀫𑀺𑀦𑀻, 𑀅𑀢𑁆𑀣𑀺 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑀻. 𑀅𑀢𑁆𑀣𑀺 𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀅𑀲𑁂𑀓𑁆𑀔𑀸, 𑀅𑀢𑁆𑀣𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸. 𑀅𑀢𑁆𑀣𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀅𑀢𑁆𑀣𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑀻. 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀅𑀦𑀼𑀧𑁆𑀧𑀦𑁆𑀦𑀸, 𑀅𑀢𑁆𑀣𑀺 𑀉𑀧𑁆𑀧𑀸𑀤𑀺𑀦𑀻. 𑀅𑀢𑁆𑀣𑀺 𑀅𑀢𑀻𑀢𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀢𑁆𑀣𑀺 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀏𑀯𑀁 𑀢𑀺𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀘𑀢𑀼𑀩𑁆𑀩𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁, 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁, 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁, 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁. 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀓𑀸𑀫𑀸𑀯𑀘𑀭𑀸 𑀧𑀜𑁆𑀜𑀸, 𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸, 𑀅𑀭𑀽𑀧𑀸𑀯𑀘𑀭𑀸 𑀧𑀜𑁆𑀜𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀧𑀜𑁆𑀜𑀸. 𑀥𑀫𑁆𑀫𑁂 𑀜𑀸𑀡𑀁, 𑀅𑀦𑁆𑀯𑀬𑁂 𑀜𑀸𑀡𑀁, 𑀧𑀭𑀺𑀘𑁆𑀘𑁂 𑀜𑀸𑀡𑀁, 𑀲𑀫𑁆𑀫𑀼𑀢𑀺 𑀜𑀸𑀡𑀁. 𑀅𑀢𑁆𑀣𑀺 𑀧𑀜𑁆𑀜𑀸 𑀆𑀘𑀬𑀸𑀬, 𑀦𑁄 𑀅𑀧𑀘𑀬𑀸𑀬, 𑀅𑀢𑁆𑀣𑀺 𑀧𑀜𑁆𑀜𑀸 𑀅𑀧𑀘𑀬𑀸𑀬, 𑀦𑁄 𑀆𑀘𑀬𑀸𑀬, 𑀅𑀢𑁆𑀣𑀺 𑀧𑀜𑁆𑀜𑀸 𑀆𑀘𑀬𑀸𑀬 𑀘𑁂𑀯, 𑀅𑀧𑀘𑀬𑀸𑀬 𑀘, 𑀅𑀢𑁆𑀣𑀺 𑀧𑀜𑁆𑀜𑀸 𑀦𑁂𑀯𑀸𑀘𑀬𑀸𑀬, 𑀦𑁄 𑀅𑀧𑀘𑀬𑀸𑀬. 𑀅𑀢𑁆𑀣𑀺 𑀧𑀜𑁆𑀜𑀸 𑀦𑀺𑀩𑁆𑀩𑀺𑀤𑀸𑀬, 𑀦𑁄 𑀧𑀝𑀺𑀯𑁂𑀥𑀸𑀬, 𑀅𑀢𑁆𑀣𑀺 𑀧𑀜𑁆𑀜𑀸 𑀧𑀝𑀺𑀯𑁂𑀥𑀸𑀬, 𑀦𑁄 𑀦𑀺𑀩𑁆𑀩𑀺𑀤𑀸𑀬 ¶ , 𑀅𑀢𑁆𑀣𑀺 𑀧𑀜𑁆𑀜𑀸 𑀦𑀺𑀩𑁆𑀩𑀺𑀤𑀸𑀬 𑀘𑁂𑀯, 𑀧𑀝𑀺𑀯𑁂𑀥𑀸𑀬 𑀘, 𑀅𑀢𑁆𑀣𑀺 𑀧𑀜𑁆𑀜𑀸 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬, 𑀦𑁄 𑀧𑀝𑀺𑀯𑁂𑀥𑀸𑀬. 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸, 𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸, 𑀯𑀺𑀲𑁂𑀲𑀪𑀸𑀕𑀺𑀦𑀻 𑀧𑀜𑁆𑀜𑀸, 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻 𑀧𑀜𑁆𑀜𑀸.

𑀘𑀢𑀲𑁆𑀲𑁄 ¶ 𑀧𑀝𑀺𑀲𑀫𑁆𑀪𑀺𑀤𑀸. 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸. 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀺. 𑀚𑀭𑀸𑀫𑀭𑀡𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀚𑀸𑀢𑀺𑀬𑀸 𑀜𑀸𑀡𑀁…𑀧𑁂… 𑀪𑀯𑁂 𑀜𑀸𑀡𑀁…𑀧𑁂… 𑀉𑀧𑀸𑀤𑀸𑀦𑁂 𑀜𑀸𑀡𑀁…𑀧𑁂… 𑀢𑀡𑁆𑀳𑀸𑀬 𑀜𑀸𑀡𑀁…𑀧𑁂… 𑀯𑁂𑀤𑀦𑀸𑀬 𑀜𑀸𑀡𑀁…𑀧𑁂… 𑀨𑀲𑁆𑀲𑁂 𑀜𑀸𑀡𑀁…𑀧𑁂… 𑀲𑀴𑀸𑀬𑀢𑀦𑁂 𑀜𑀸𑀡𑀁…𑀧𑁂… 𑀦𑀸𑀫𑀭𑀽𑀧𑁂 𑀜𑀸𑀡𑀁…𑀧𑁂… 𑀯𑀺𑀜𑁆𑀜𑀸𑀡𑁂 𑀜𑀸𑀡𑀁…𑀧𑁂… 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁, 𑀲𑀗𑁆𑀔𑀸𑀭𑀲𑀫𑀼𑀤𑀬𑁂 𑀜𑀸𑀡𑀁, 𑀲𑀗𑁆𑀔𑀸𑀭𑀦𑀺𑀭𑁄𑀥𑁂 𑀜𑀸𑀡𑀁, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀏𑀯𑀁 𑀘𑀢𑀼𑀩𑁆𑀩𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀧𑀜𑁆𑀘𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺. 𑀏𑀯𑀁 𑀧𑀜𑁆𑀘𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀙𑀩𑁆𑀩𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀧𑀜𑁆𑀜𑀸. 𑀏𑀯𑀁 𑀙𑀩𑁆𑀩𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀲𑀢𑁆𑀢𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺. 𑀏𑀯𑀁 𑀲𑀢𑁆𑀢𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀅𑀝𑁆𑀞𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀘𑀢𑀽𑀲𑀼 𑀨𑀮𑁂𑀲𑀼 𑀧𑀜𑁆𑀜𑀸. 𑀏𑀯𑀁 𑀅𑀝𑁆𑀞𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀦𑀯𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀦𑀯𑀲𑀼 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 𑀧𑀜𑁆𑀜𑀸. 𑀏𑀯𑀁 𑀦𑀯𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀤𑀲𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑁋 𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀓𑀢𑀫𑀸𑀦𑀺 𑀤𑀲? 𑀇𑀥 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 ¶ 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 ¶ 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀧𑀭𑀲𑀢𑁆𑀢𑀸𑀦𑀁 ¶ 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ¶ , 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺. 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺.

𑀇𑀫𑀸𑀦𑀺 ¶ 𑀤𑀲 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀺. 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀏𑀯𑀁 𑀤𑀲𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼.

𑀜𑀸𑀡𑀯𑀺𑀪𑀗𑁆𑀕𑀁.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄

𑀏𑀓𑀓𑀁

𑀚𑀸𑀢𑀺𑀫𑀤𑁄 (𑀯𑀺𑀪. 𑁮𑁩𑁨), 𑀕𑁄𑀢𑁆𑀢𑀫𑀤𑁄, 𑀆𑀭𑁄𑀕𑁆𑀬𑀫𑀤𑁄, 𑀬𑁄𑀩𑁆𑀩𑀦𑀫𑀤𑁄, 𑀚𑀻𑀯𑀺𑀢𑀫𑀤𑁄, 𑀮𑀸𑀪𑀫𑀤𑁄, 𑀲𑀓𑁆𑀓𑀸𑀭𑀫𑀤𑁄, 𑀕𑀭𑀼𑀓𑀸𑀭𑀫𑀤𑁄, 𑀧𑀼𑀭𑁂𑀓𑁆𑀔𑀸𑀭𑀫𑀤𑁄, 𑀧𑀭𑀺𑀯𑀸𑀭𑀫𑀤𑁄, 𑀪𑁄𑀕𑀫𑀤𑁄, 𑀯𑀡𑁆𑀡𑀫𑀤𑁄, 𑀲𑀼𑀢𑀫𑀤𑁄 ¶ , 𑀧𑀝𑀺𑀪𑀸𑀦𑀫𑀤𑁄, 𑀭𑀢𑁆𑀢𑀜𑁆𑀜𑀼𑀫𑀤𑁄, 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑁄, 𑀅𑀦𑀯𑀜𑁆𑀜𑀸𑀢𑀫𑀤𑁄, 𑀇𑀭𑀺𑀬𑀸𑀧𑀣𑀫𑀤𑁄, 𑀇𑀤𑁆𑀥𑀺𑀫𑀤𑁄, 𑀬𑀲𑀫𑀤𑁄, 𑀲𑀻𑀮𑀫𑀤𑁄, 𑀛𑀸𑀦𑀫𑀤𑁄, 𑀲𑀺𑀧𑁆𑀧𑀫𑀤𑁄, 𑀆𑀭𑁄𑀳𑀫𑀤𑁄, 𑀧𑀭𑀺𑀡𑀸𑀳𑀫𑀤𑁄, 𑀲𑀡𑁆𑀞𑀸𑀦𑀫𑀤𑁄, 𑀧𑀸𑀭𑀺𑀧𑀽𑀭𑀺𑀫𑀤𑁄, 𑀫𑀤𑁄, 𑀧𑀫𑀸𑀤𑁄, 𑀣𑀫𑁆𑀪𑁄, 𑀲𑀸𑀭𑀫𑁆𑀪𑁄, 𑀅𑀢𑁆𑀭𑀺𑀘𑁆𑀙𑀢𑀸, 𑀫𑀳𑀺𑀘𑁆𑀙𑀢𑀸, 𑀧𑀸𑀧𑀺𑀘𑁆𑀙𑀢𑀸, 𑀲𑀺𑀗𑁆𑀕𑀁, 𑀢𑀺𑀦𑁆𑀢𑀺𑀡𑀁, 𑀘𑀸𑀧𑀮𑁆𑀬𑀁, 𑀅𑀲𑀪𑀸𑀕𑀯𑀼𑀢𑁆𑀢𑀺, 𑀅𑀭𑀢𑀺, 𑀢𑀦𑁆𑀤𑀻, 𑀯𑀺𑀚𑀫𑁆𑀪𑀺𑀢𑀸, 𑀪𑀢𑁆𑀢𑀲𑀫𑁆𑀫𑀤𑁄, 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁, 𑀓𑀼𑀳𑀦𑀸, 𑀮𑀧𑀦𑀸, 𑀦𑁂𑀫𑀺𑀢𑁆𑀢𑀺𑀓𑀢𑀸, 𑀦𑀺𑀧𑁆𑀧𑁂𑀲𑀺𑀓𑀢𑀸, 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸, ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄. 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ¶ ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀅𑀥𑀺𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄, 𑀜𑀸𑀢𑀺𑀯𑀺𑀢𑀓𑁆𑀓𑁄, 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀫𑀭𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 (𑀯𑀺𑀪. 𑁮𑁩𑁨). 𑀏𑀓𑀓𑀁.

𑀤𑀼𑀓𑀁

𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘, 𑀫𑀓𑁆𑀔𑁄 𑀘 𑀧𑀴𑀸𑀲𑁄 𑀘, 𑀇𑀲𑁆𑀲𑀸 𑀘 𑀫𑀘𑁆𑀙𑀭𑀺𑀬𑀜𑁆𑀘, 𑀫𑀸𑀬𑀸 𑀘 𑀲𑀸𑀞𑁂𑀬𑁆𑀬𑀜𑁆𑀘, 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘, 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀅𑀦𑁆𑀢𑀯𑀸𑀤𑀺𑀝𑁆𑀞𑀺 𑀘 𑀅𑀦𑀦𑁆𑀢𑀯𑀸𑀤𑀺𑀝𑁆𑀞𑀺 𑀘, 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘, 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘, 𑀤𑁄𑀯𑀘𑀲𑁆𑀲𑀢𑀸 𑀘 𑀧𑀸𑀧𑀫𑀺𑀢𑁆𑀢𑀢𑀸 𑀘, 𑀅𑀦𑀚𑁆𑀚𑀯𑁄 𑀘 𑀅𑀫𑀤𑁆𑀤𑀯𑁄 𑀘, 𑀅𑀓𑁆𑀔𑀦𑁆𑀢𑀺 𑀘 𑀅𑀲𑁄𑀭𑀘𑁆𑀘𑀜𑁆𑀘, 𑀅𑀲𑀸𑀔𑀮𑁆𑀬𑀜𑁆𑀘 𑀅𑀧𑁆𑀧𑀝𑀺𑀲𑀦𑁆𑀣𑀸𑀭𑁄 𑀘, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀘 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑀘, 𑀫𑀼𑀝𑁆𑀞𑀲𑁆𑀲𑀘𑁆𑀘𑀜𑁆𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘, 𑀲𑀻𑀮𑀯𑀺𑀧𑀢𑁆𑀢𑀺 𑀘 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀘, 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘. 𑀤𑀼𑀓𑀁.

𑀢𑀺𑀓𑀁

𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸, 𑀢𑀺𑀲𑁆𑀲𑁄 𑀅𑀓𑀼𑀲𑀮𑀲𑀜𑁆𑀜𑀸, 𑀢𑀺𑀲𑁆𑀲𑁄 𑀅𑀓𑀼𑀲𑀮𑀥𑀸𑀢𑀼𑀬𑁄, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀢𑀬𑁄 𑀆𑀲𑀯𑀸, 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺, 𑀢𑀺𑀲𑁆𑀲𑁄 𑀢𑀡𑁆𑀳𑀸, 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸, 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸, 𑀢𑀺𑀲𑁆𑀲𑁄 𑀏𑀲𑀦𑀸, 𑀢𑀺𑀲𑁆𑀲𑁄 𑀯𑀺𑀥𑀸, 𑀢𑀻𑀡𑀺 𑀪𑀬𑀸𑀦𑀺 ¶ , 𑀢𑀻𑀡𑀺 𑀢𑀫𑀸𑀦𑀺, 𑀢𑀻𑀡𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺, 𑀢𑀬𑁄 𑀓𑀺𑀜𑁆𑀘𑀦𑀸, 𑀢𑀻𑀡𑀺 𑀅𑀗𑁆𑀕𑀡𑀸𑀦𑀺, 𑀢𑀻𑀡𑀺 𑀫𑀮𑀸𑀦𑀺, 𑀢𑀻𑀡𑀺 𑀯𑀺𑀲𑀫𑀸𑀦𑀺, 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀯𑀺𑀲𑀫𑀸𑀦𑀺, 𑀢𑀬𑁄 𑀅𑀕𑁆𑀕𑀻, 𑀢𑀬𑁄 𑀓𑀲𑀸𑀯𑀸, 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸.

𑀅𑀲𑁆𑀲𑀸𑀤𑀤𑀺𑀝𑁆𑀞𑀺 ¶ 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀭𑀢𑀺 𑀯𑀺𑀳𑁂𑀲𑀸 𑀅𑀥𑀫𑁆𑀫𑀘𑀭𑀺𑀬𑀸, 𑀤𑁄𑀯𑀘𑀲𑁆𑀲𑀢𑀸 𑀧𑀸𑀧𑀫𑀺𑀢𑁆𑀢𑀢𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀉𑀤𑁆𑀥𑀘𑁆𑀘𑀁 𑀓𑁄𑀲𑀚𑁆𑀚𑀁 𑀧𑀫𑀸𑀤𑁄, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀅𑀲𑀫𑁆𑀧𑀚𑀜𑁆𑀜𑀢𑀸 𑀫𑀳𑀺𑀘𑁆𑀙𑀢𑀸, 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀧𑀫𑀸𑀤𑁄, 𑀅𑀦𑀸𑀤𑀭𑀺𑀬𑀁 𑀤𑁄𑀯𑀘𑀲𑁆𑀲𑀢𑀸 𑀧𑀸𑀧𑀫𑀺𑀢𑁆𑀢𑀢𑀸, 𑀅𑀲𑁆𑀲𑀤𑁆𑀥𑀺𑀬𑀁 𑀅𑀯𑀤𑀜𑁆𑀜𑀼𑀢𑀸 𑀓𑁄𑀲𑀚𑁆𑀚𑀁, 𑀉𑀤𑁆𑀥𑀘𑁆𑀘𑀁 𑀅𑀲𑀁𑀯𑀭𑁄 𑀤𑀼𑀲𑁆𑀲𑀻𑀮𑁆𑀬𑀁, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀸 𑀲𑀤𑁆𑀥𑀫𑁆𑀫𑀁 𑀅𑀲𑁄𑀢𑀼𑀓𑀫𑁆𑀬𑀢𑀸 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀸, 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀅𑀲𑀫𑁆𑀧𑀚𑀜𑁆𑀜𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀸 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁. 𑀢𑀺𑀓𑀁.

𑀘𑀢𑀼𑀓𑁆𑀓𑀁

𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸, 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸, 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸, 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀅𑀧𑀭𑀸𑀧𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺, (𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺,) 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄. 𑀘𑀢𑀼𑀓𑁆𑀓𑀁.

𑀧𑀜𑁆𑀘𑀓𑀁

𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺, 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺, 𑀧𑀜𑁆𑀘 𑀲𑀗𑁆𑀕𑀸, 𑀧𑀜𑁆𑀘 𑀲𑀮𑁆𑀮𑀸, 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸, 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸, 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀧𑀜𑁆𑀘 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀓𑀸𑀦𑀺, 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑁂𑀭𑀸, 𑀧𑀜𑁆𑀘 𑀩𑁆𑀬𑀲𑀦𑀸, 𑀧𑀜𑁆𑀘 𑀅𑀓𑁆𑀔𑀦𑁆𑀢𑀺𑀬𑀸 𑀆𑀤𑀻𑀦𑀯𑀸, 𑀧𑀜𑁆𑀘 𑀪𑀬𑀸𑀦𑀺, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸. 𑀧𑀜𑁆𑀘𑀓𑀁.

𑀙𑀓𑁆𑀓𑀁

𑀙 𑀯𑀺𑀯𑀸𑀤𑀫𑀽𑀮𑀸𑀦𑀺, 𑀙 𑀙𑀦𑁆𑀤𑀭𑀸𑀕𑀸 𑀥𑀫𑁆𑀫𑀸, 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺, 𑀙 𑀢𑀡𑁆𑀳𑀸𑀓𑀸𑀬𑀸, 𑀙 𑀅𑀕𑀸𑀭𑀯𑀸, 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀅𑀧𑀭𑁂𑀧𑀺 ¶ 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀙 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸, 𑀙 ¶ 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸, 𑀙 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸, 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀤𑀺𑀝𑁆𑀞𑀺𑀬𑁄. 𑀙𑀓𑁆𑀓𑀁.

𑀲𑀢𑁆𑀢𑀓𑀁

𑀲𑀢𑁆𑀢 𑀅𑀦𑀼𑀲𑀬𑀸, 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺, 𑀲𑀢𑁆𑀢 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺, 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸, 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀲𑀢𑁆𑀢 𑀫𑀸𑀦𑀸, 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄. 𑀲𑀢𑁆𑀢𑀓𑀁.

𑀅𑀝𑁆𑀞𑀓𑀁

𑀅𑀝𑁆𑀞 𑀓𑀺𑀮𑁂𑀲𑀯𑀢𑁆𑀣𑀽𑀦𑀺, 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺, 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀝𑀺𑀖𑀸𑀢𑁄, 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑀸, 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸, 𑀅𑀝𑁆𑀞 𑀧𑀼𑀭𑀺𑀲𑀤𑁄𑀲𑀸, 𑀅𑀝𑁆𑀞 𑀅𑀲𑀜𑁆𑀜𑀺𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀯𑀸𑀤𑀸. 𑀅𑀝𑁆𑀞𑀓𑀁.

𑀦𑀯𑀓𑀁

𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺, 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺, 𑀦𑀯𑀯𑀺𑀥𑀸 𑀫𑀸𑀦𑀸, 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀇𑀜𑁆𑀚𑀺𑀢𑀸𑀦𑀺, 𑀦𑀯 𑀫𑀜𑁆𑀜𑀺𑀢𑀸𑀦𑀺, 𑀦𑀯 𑀨𑀦𑁆𑀤𑀺𑀢𑀸𑀦𑀺, 𑀦𑀯 𑀧𑀧𑀜𑁆𑀘𑀺𑀢𑀸𑀦𑀺, 𑀦𑀯 𑀲𑀗𑁆𑀔𑀢𑀸𑀦𑀺. 𑀦𑀯𑀓𑀁.

𑀤𑀲𑀓𑀁

𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺, 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀁𑀬𑁄𑀚𑀦𑀸𑀦𑀺, 𑀤𑀲 𑀫𑀺𑀘𑁆𑀙𑀢𑁆𑀢𑀸, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀲𑀓𑀁.

𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬, 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺 ¶ , 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞 𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀺, 𑀬𑀸𑀦𑀺 𑀘 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑁂𑀬𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀁.

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄

𑀓𑀢𑀺 ¶ 𑀔𑀦𑁆𑀥𑀸, 𑀓𑀢𑀺 𑀆𑀬𑀢𑀦𑀸𑀦𑀺, 𑀓𑀢𑀺 𑀥𑀸𑀢𑀼𑀬𑁄, 𑀓𑀢𑀺 𑀲𑀘𑁆𑀘𑀸𑀦𑀺, 𑀓𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀓𑀢𑀺 𑀳𑁂𑀢𑀽, 𑀓𑀢𑀺 𑀆𑀳𑀸𑀭𑀸, 𑀓𑀢𑀺 𑀨𑀲𑁆𑀲𑀸, 𑀓𑀢𑀺 𑀯𑁂𑀤𑀦𑀸, 𑀓𑀢𑀺 𑀲𑀜𑁆𑀜𑀸, 𑀓𑀢𑀺 𑀘𑁂𑀢𑀦𑀸, 𑀓𑀢𑀺 𑀘𑀺𑀢𑁆𑀢𑀸𑀦𑀺 (𑀯𑀺𑀪. 𑁯𑁭𑁮)?

𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀘𑁂𑀢𑀦𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺 (𑀯𑀺𑀪. 𑁯𑁭𑁮).

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀁.

𑀯𑀺𑀪𑀗𑁆𑀕𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸

𑀦𑀬𑀫𑀸𑀢𑀺𑀓𑀸

𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄 (𑀥𑀸𑀢𑀼. 𑁧). 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁. 𑀅𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁. 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁. 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁. 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄. 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁. 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 ¶ 𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢𑀁. 𑀅𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢𑀁.

𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸

𑀧𑀜𑁆𑀘𑀓𑁆𑀔𑀦𑁆𑀥𑀸. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 ¶ . 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀧𑀜𑁆𑀘 𑀩𑀮𑀸𑀦𑀺. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄.

𑀦𑀬𑀫𑀼𑀔𑀫𑀸𑀢𑀺𑀓𑀸

𑀢𑀻𑀳𑀺 𑀲𑀗𑁆𑀕𑀳𑁄. 𑀢𑀻𑀳𑀺 𑀅𑀲𑀗𑁆𑀕𑀳𑁄. 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄. 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄.

𑀮𑀓𑁆𑀔𑀡𑀫𑀸𑀢𑀺𑀓𑀸

𑀲𑀪𑀸𑀕𑁄. 𑀯𑀺𑀲𑀪𑀸𑀕𑁄.

𑀩𑀸𑀳𑀺𑀭𑀫𑀸𑀢𑀺𑀓𑀸

𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀢𑀺.

𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸

𑀙 𑀧𑀜𑁆𑀜𑀢𑁆𑀢𑀺𑀬𑁄 (𑀧𑀼. 𑀧. 𑀫𑀸𑀢𑀺𑀓𑀸 𑁧) 𑁋 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀧𑀜𑁆𑀜𑀢𑁆𑀢𑀺 𑀲𑀘𑁆𑀘𑀧𑀜𑁆𑀜𑀢𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸

𑀧𑀼𑀕𑁆𑀕𑀮𑀓𑀣𑀸

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁

𑀧𑀼𑀕𑁆𑀕𑀮𑁄 ¶ ¶ 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 (𑀓𑀣𑀸. 𑁧), 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀅𑀦𑀼𑀮𑁄𑀫𑀧𑀜𑁆𑀘𑀓𑀁.

𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 ¶ 𑀧𑀝𑀺𑀓𑀫𑁆𑀫𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 ¶ 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀁.

𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺. 𑀢𑁂𑀦 𑀢𑀯 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀁 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂, 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫, 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀲𑀺 𑁋

𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 ¶ 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸.

𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀁.

𑀏𑀲𑁂 ¶ 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂 𑀳𑁂𑀯𑀫𑁂𑀯𑀁 𑀢𑀢𑁆𑀣 𑀤𑀓𑁆𑀔, ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀸, 𑀅𑀣 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺, 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫 𑁋

𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸.

𑀉𑀧𑀦𑀬𑀦𑀘𑀢𑀼𑀓𑁆𑀓𑀁.

𑀦 ¶ 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂, 𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺 ¶ , 𑀇𑀤𑀁 𑀢𑁂 𑀫𑀺𑀘𑁆𑀙𑀸. 𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂, 𑀲𑁂 𑀦𑀺𑀕𑁆𑀕𑀳𑁂 𑀤𑀼𑀓𑁆𑀓𑀝𑁂. 𑀲𑀼𑀓𑀢𑁂 𑀧𑀝𑀺𑀓𑀫𑁆𑀫𑁂. 𑀲𑀼𑀓𑀢𑀸 𑀧𑀝𑀺𑀧𑀸𑀤𑀦𑀸𑀢𑀺.

𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀁.

𑀧𑀞𑀫𑁄 𑀦𑀺𑀕𑁆𑀕𑀳𑁄.

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀁

𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 ¶ 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀁.

𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 ¶ 𑀧𑀝𑀺𑀓𑀫𑁆𑀫𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀁.

𑀢𑁆𑀯𑀁 ¶ 𑀘𑁂 𑀧𑀦 𑀫𑀜𑁆𑀜𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺. 𑀢𑁂𑀦 𑀢𑀯 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀁 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂, 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫, 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀲𑀺 𑁋

𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸.

𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀁.

𑀏𑀲𑁂 ¶ 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂 𑀳𑁂𑀯𑀫𑁂𑀯𑀁 𑀢𑀢𑁆𑀣 𑀤𑀓𑁆𑀔, ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀸, 𑀅𑀣 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺, 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫 𑁋

𑀳𑀜𑁆𑀘𑀺 ¶ 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸.

𑀉𑀧𑀦𑀬𑀦𑀘𑀢𑀼𑀓𑁆𑀓𑀁.

𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂, 𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺 ¶ , 𑀇𑀤𑀁 𑀢𑁂 𑀫𑀺𑀘𑁆𑀙𑀸, 𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂 ¶ , 𑀲𑁂 𑀦𑀺𑀕𑁆𑀕𑀳𑁂 𑀤𑀼𑀓𑁆𑀓𑀝𑁂. 𑀲𑀼𑀓𑀢𑁂 𑀧𑀝𑀺𑀓𑀫𑁆𑀫𑁂, 𑀲𑀼𑀓𑀢𑀸 𑀧𑀝𑀺𑀧𑀸𑀤𑀦𑀸𑀢𑀺.

𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀁.

𑀤𑀼𑀢𑀺𑀬𑁄 𑀦𑀺𑀕𑁆𑀕𑀳𑁄.

𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁

𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀢𑀢𑀺𑀬𑁄 𑀦𑀺𑀕𑁆𑀕𑀳𑁄.

𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁

𑀧𑀼𑀕𑁆𑀕𑀮𑁄 ¶ 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 ¶ 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀘𑀢𑀼𑀢𑁆𑀣𑁄 𑀦𑀺𑀕𑁆𑀕𑀳𑁄.

𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁

𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺? 𑀫𑀺𑀘𑁆𑀙𑀸.

𑀦𑁄 ¶ 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀧𑀜𑁆𑀘𑀫𑁄 𑀦𑀺𑀕𑁆𑀕𑀳𑁄.

𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀁

𑀧𑀼𑀕𑁆𑀕𑀮𑁄 ¶ 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀙𑀝𑁆𑀞𑁄 𑀦𑀺𑀕𑁆𑀕𑀳𑁄.

𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀁

𑀧𑀼𑀕𑁆𑀕𑀮𑁄 ¶ 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 ¶ 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑀤𑀸 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀲𑀢𑁆𑀢𑀫𑁄 𑀦𑀺𑀕𑁆𑀕𑀳𑁄.

𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀁

𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑁋 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸.

𑀦𑁄 ¶ 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 ‘𑀲𑀩𑁆𑀩𑁂𑀲𑀼 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’’𑀢𑀺, 𑀫𑀺𑀘𑁆𑀙𑀸…𑀧𑁂….

𑀅𑀝𑁆𑀞𑀫𑁄 𑀦𑀺𑀕𑁆𑀕𑀳𑁄.

𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁬. 𑀬𑀫𑀓𑀫𑀸𑀢𑀺𑀓𑀸

𑀫𑀽𑀮𑀬𑀫𑀓𑀁

𑀓𑀼𑀲𑀮𑀧𑀤𑀦𑀬𑀘𑀢𑀼𑀓𑁆𑀓𑀁

𑀬𑁂 ¶ 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸 (𑀬𑀫. 𑁧.𑀫𑀽𑀮𑀬𑀫𑀓.𑁧 𑀆𑀤𑀬𑁄), 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 ¶ 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 ¶ 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑀅𑀓𑀼𑀲𑀮𑀧𑀤𑀦𑀬𑀘𑀢𑀼𑀓𑁆𑀓𑀁

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 ¶ 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 ¶ 𑀓𑁂𑀘𑀺 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 ¶ 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀬𑁂 𑀓𑁂𑀘𑀺 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀅𑀩𑁆𑀬𑀸𑀓𑀢𑀧𑀤𑀦𑀬𑀘𑀢𑀼𑀓𑁆𑀓𑀁

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 ¶ 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 ¶ 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 ¶ 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀦𑀸𑀫𑀧𑀤𑀦𑀬𑀘𑀢𑀼𑀓𑁆𑀓𑀁

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 ¶ 𑀓𑁂𑀘𑀺 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 ¶ 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 ¶ 𑀓𑁂𑀘𑀺 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸. 𑀬𑁂 𑀯𑀸 𑀧𑀦 𑀦𑀸𑀫𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀦𑀸𑀫𑀸.

𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀳𑁂𑀢𑀽…𑀧𑁂… 𑀓𑀼𑀲𑀮𑀦𑀺𑀤𑀸𑀦𑀸…𑀧𑁂… 𑀓𑀼𑀲𑀮𑀲𑀫𑁆𑀪𑀯𑀸…𑀧𑁂… 𑀓𑀼𑀲𑀮𑀧𑁆𑀧𑀪𑀯𑀸…𑀧𑁂… 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀸…𑀧𑁂… 𑀓𑀼𑀲𑀮𑀸𑀳𑀸𑀭𑀸…𑀧𑁂… 𑀓𑀼𑀲𑀮𑀸𑀭𑀫𑁆𑀫𑀡𑀸…𑀧𑁂… 𑀓𑀼𑀲𑀮𑀧𑀘𑁆𑀘𑀬𑀸…𑀧𑁂… 𑀓𑀼𑀲𑀮𑀲𑀫𑀼𑀤𑀬𑀸…𑀧𑁂….

𑀫𑀽𑀮𑀁 𑀳𑁂𑀢𑀼 𑀦𑀺𑀤𑀸𑀦𑀜𑁆𑀘, 𑀲𑀫𑁆𑀪𑀯𑁄 𑀧𑀪𑀯𑁂𑀦 𑀘;

𑀲𑀫𑀼𑀝𑁆𑀞𑀸𑀦𑀸𑀳𑀸𑀭𑀸𑀭𑀫𑁆𑀫𑀡𑀸, 𑀧𑀘𑁆𑀘𑀬𑁄 𑀲𑀫𑀼𑀤𑀬𑁂𑀦 𑀘𑀸𑀢𑀺.

𑀫𑀽𑀮𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀧𑀜𑁆𑀘𑀓𑁆𑀔𑀦𑁆𑀥𑀸 (𑀬𑀫. 𑁧.𑀔𑀦𑁆𑀥𑀬𑀫𑀓.𑁧 𑀆𑀤𑀬𑁄) 𑁋 𑀭𑀽𑀧𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀭𑀽𑀧𑀁 ¶ 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀁.

𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑁂𑀤𑀦𑀸.

𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸.

𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀸.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀁.

𑀧𑀘𑁆𑀘𑀦𑀻𑀓𑀁

𑀦 ¶ 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀭𑀽𑀧𑀁.

𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀯𑁂𑀤𑀦𑀸.

𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦 𑀲𑀜𑁆𑀜𑀸.

𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦 𑀲𑀗𑁆𑀔𑀸𑀭𑀸.

𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦 𑀯𑀺𑀜𑁆𑀜𑀸𑀡𑀁.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄.

𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀲𑀜𑁆𑀜𑀸 ¶ 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄.

𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀲𑀗𑁆𑀔𑀸𑀭𑀸 ¶ 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄.

𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀧𑀘𑁆𑀘𑀦𑀻𑀓𑀁

𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄.

𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄.

𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀦 ¶ ¶ 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄.

𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄.

𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄.

𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄.

𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄.

𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄

𑀅𑀦𑀼𑀮𑁄𑀫𑀁

𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁.

𑀯𑁂𑀤𑀦𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸.

𑀲𑀜𑁆𑀜𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸.

𑀲𑀗𑁆𑀔𑀸𑀭𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸.

𑀯𑀺𑀜𑁆𑀜𑀸𑀡𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀁.

𑀧𑀘𑁆𑀘𑀦𑀻𑀓𑀁

𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀁.

𑀦 𑀯𑁂𑀤𑀦𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸.

𑀦 𑀲𑀜𑁆𑀜𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸.

𑀦 𑀲𑀗𑁆𑀔𑀸𑀭𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸.

𑀦 𑀯𑀺𑀜𑁆𑀜𑀸𑀡𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀁.

𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀭𑀽𑀧𑀁 ¶ 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸.

𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸.

𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸.

𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀁.

𑀯𑁂𑀤𑀦𑀸 ¶ 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁.

𑀯𑁂𑀤𑀦𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸.

𑀯𑁂𑀤𑀦𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸.

𑀯𑁂𑀤𑀦𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀁.

𑀲𑀜𑁆𑀜𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁.

𑀲𑀜𑁆𑀜𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸.

𑀲𑀜𑁆𑀜𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸.

𑀲𑀜𑁆𑀜𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀁.

𑀲𑀗𑁆𑀔𑀸𑀭𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁.

𑀲𑀗𑁆𑀔𑀸𑀭𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸.

𑀲𑀗𑁆𑀔𑀸𑀭𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸.

𑀲𑀗𑁆𑀔𑀸𑀭𑀸 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑀺𑀜𑁆𑀜𑀸𑀡𑀁.

𑀯𑀺𑀜𑁆𑀜𑀸𑀡𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀁.

𑀯𑀺𑀜𑁆𑀜𑀸𑀡𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸.

𑀯𑀺𑀜𑁆𑀜𑀸𑀡𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀜𑁆𑀜𑀸.

𑀯𑀺𑀜𑁆𑀜𑀸𑀡𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀲𑀗𑁆𑀔𑀸𑀭𑀸.

𑀧𑀘𑁆𑀘𑀦𑀻𑀓𑀁

𑀦 ¶ 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸.

𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸.

𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸.

𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀁.

𑀦 𑀯𑁂𑀤𑀦𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀁.

𑀦 𑀯𑁂𑀤𑀦𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸.

𑀦 𑀯𑁂𑀤𑀦𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸.

𑀦 𑀯𑁂𑀤𑀦𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀁.

𑀦 ¶ 𑀲𑀜𑁆𑀜𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀁.

𑀦 𑀲𑀜𑁆𑀜𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸.

𑀦 𑀲𑀜𑁆𑀜𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸.

𑀦 𑀲𑀜𑁆𑀜𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀁.

𑀦 𑀲𑀗𑁆𑀔𑀸𑀭𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀁.

𑀦 𑀲𑀗𑁆𑀔𑀸𑀭𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸.

𑀦 𑀲𑀗𑁆𑀔𑀸𑀭𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸.

𑀦 𑀲𑀗𑁆𑀔𑀸𑀭𑀸 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑀺𑀜𑁆𑀜𑀸𑀡𑀁.

𑀦 𑀯𑀺𑀜𑁆𑀜𑀸𑀡𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧𑀁.

𑀦 𑀯𑀺𑀜𑁆𑀜𑀸𑀡𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸.

𑀦 𑀯𑀺𑀜𑁆𑀜𑀸𑀡𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀜𑁆𑀜𑀸.

𑀦 𑀯𑀺𑀜𑁆𑀜𑀸𑀡𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸.

𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 ¶ (𑀬𑀫. 𑁧.𑀆𑀬𑀢𑀦𑀬𑀫𑀓.𑁧 𑀆𑀤𑀬𑁄) 𑁋 𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀁.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼.

𑀲𑁄𑀢𑀁 𑀲𑁄𑀢𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁 𑀲𑁄𑀢𑀁.

𑀖𑀸𑀦𑀁 𑀖𑀸𑀦𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁 𑀖𑀸𑀦𑀁.

𑀚𑀺𑀯𑁆𑀳𑀸 ¶ 𑀚𑀺𑀯𑁆𑀳𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁 𑀚𑀺𑀯𑁆𑀳𑀸.

𑀓𑀸𑀬𑁄 𑀓𑀸𑀬𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁 𑀓𑀸𑀬𑁄.

𑀭𑀽𑀧𑀁 𑀭𑀽𑀧𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁 𑀭𑀽𑀧𑀁.

𑀲𑀤𑁆𑀤𑁄 𑀲𑀤𑁆𑀤𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁 𑀲𑀤𑁆𑀤𑁄.

𑀕𑀦𑁆𑀥𑁄 𑀕𑀦𑁆𑀥𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁 𑀕𑀦𑁆𑀥𑁄.

𑀭𑀲𑁄 𑀭𑀲𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁 𑀭𑀲𑁄.

𑀨𑁄𑀝𑁆𑀞𑀩𑁆𑀩𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑁄.

𑀫𑀦𑁄 𑀫𑀦𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁 𑀫𑀦𑁄.

𑀥𑀫𑁆𑀫𑁄 𑀥𑀫𑁆𑀫𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑁄.

𑀧𑀘𑁆𑀘𑀦𑀻𑀓𑀁

𑀦 ¶ 𑀘𑀓𑁆𑀔𑀼 𑀦 𑀘𑀓𑁆𑀔𑀸𑀬𑀢𑀦𑀁, 𑀦 𑀘𑀓𑁆𑀔𑀸𑀬𑀢𑀦𑀁 𑀦 𑀘𑀓𑁆𑀔𑀼.

𑀦 𑀲𑁄𑀢𑀁 𑀦 𑀲𑁄𑀢𑀸𑀬𑀢𑀦𑀁, 𑀦 𑀲𑁄𑀢𑀸𑀬𑀢𑀦𑀁 𑀦 𑀲𑁄𑀢𑀁.

𑀦 𑀖𑀸𑀦𑀁 𑀦 𑀖𑀸𑀦𑀸𑀬𑀢𑀦𑀁, 𑀦 𑀖𑀸𑀦𑀸𑀬𑀢𑀦𑀁 𑀦 𑀖𑀸𑀦𑀁.

𑀦 𑀚𑀺𑀯𑁆𑀳𑀸 𑀦 𑀚𑀺𑀯𑁆𑀳𑀸𑀬𑀢𑀦𑀁, 𑀦 𑀚𑀺𑀯𑁆𑀳𑀸𑀬𑀢𑀦𑀁 𑀦 𑀚𑀺𑀯𑁆𑀳𑀸.

𑀦 𑀓𑀸𑀬𑁄 𑀦 𑀓𑀸𑀬𑀸𑀬𑀢𑀦𑀁, 𑀦 𑀓𑀸𑀬𑀸𑀬𑀢𑀦𑀁 𑀦 𑀓𑀸𑀬𑁄.

𑀦 𑀭𑀽𑀧𑀁 𑀦 𑀭𑀽𑀧𑀸𑀬𑀢𑀦𑀁, 𑀦 𑀭𑀽𑀧𑀸𑀬𑀢𑀦𑀁 𑀦 𑀭𑀽𑀧𑀁.

𑀦 𑀲𑀤𑁆𑀤𑁄 𑀦 𑀲𑀤𑁆𑀤𑀸𑀬𑀢𑀦𑀁, 𑀦 𑀲𑀤𑁆𑀤𑀸𑀬𑀢𑀦𑀁 𑀦 𑀲𑀤𑁆𑀤𑁄.

𑀦 𑀕𑀦𑁆𑀥𑁄 𑀦 𑀕𑀦𑁆𑀥𑀸𑀬𑀢𑀦𑀁, 𑀦 𑀕𑀦𑁆𑀥𑀸𑀬𑀢𑀦𑀁 𑀦 𑀕𑀦𑁆𑀥𑁄.

𑀦 𑀭𑀲𑁄 𑀦 𑀭𑀲𑀸𑀬𑀢𑀦𑀁, 𑀦 𑀭𑀲𑀸𑀬𑀢𑀦𑀁 𑀦 𑀭𑀲𑁄.

𑀦 𑀨𑁄𑀝𑁆𑀞𑀩𑁆𑀩𑁄 𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀦 𑀨𑁄𑀝𑁆𑀞𑀩𑁆𑀩𑁄.

𑀦 𑀫𑀦𑁄 𑀦 𑀫𑀦𑀸𑀬𑀢𑀦𑀁, 𑀦 𑀫𑀦𑀸𑀬𑀢𑀦𑀁 𑀦 𑀫𑀦𑁄.

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀸𑀬𑀢𑀦𑀁, 𑀦 𑀥𑀫𑁆𑀫𑀸𑀬𑀢𑀦𑀁 𑀦 𑀥𑀫𑁆𑀫𑁄.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ 𑀘𑀓𑁆𑀔𑀸𑀬𑀢𑀦𑀁, 𑀆𑀬𑀢𑀦𑀸 𑀲𑁄𑀢𑀸𑀬𑀢𑀦𑀁.

𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀆𑀬𑀢𑀦𑀸 𑀖𑀸𑀦𑀸𑀬𑀢𑀦𑀁.

𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀆𑀬𑀢𑀦𑀸 𑀚𑀺𑀯𑁆𑀳𑀸𑀬𑀢𑀦𑀁…𑀧𑁂….

𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑀸𑀬𑀢𑀦𑀁.

𑀲𑁄𑀢𑀁 𑀲𑁄𑀢𑀸𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀸𑀬𑀢𑀦𑀁.

𑀲𑁄𑀢𑀁 𑀲𑁄𑀢𑀸𑀬𑀢𑀦𑀁, 𑀆𑀬𑀢𑀦𑀸 𑀖𑀸𑀦𑀸𑀬𑀢𑀦𑀁…𑀧𑁂….

𑀲𑁄𑀢𑀁 𑀲𑁄𑀢𑀸𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑀸𑀬𑀢𑀦𑀁.

𑀖𑀸𑀦𑀁 ¶ 𑀖𑀸𑀦𑀸𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀸𑀬𑀢𑀦𑀁…𑀧𑁂….

𑀖𑀸𑀦𑀁 𑀖𑀸𑀦𑀸𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑀸𑀬𑀢𑀦𑀁…𑀧𑁂….

𑀥𑀫𑁆𑀫𑁄 𑀥𑀫𑁆𑀫𑀸𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀸𑀬𑀢𑀦𑀁.

𑀥𑀫𑁆𑀫𑁄 𑀥𑀫𑁆𑀫𑀸𑀬𑀢𑀦𑀁, 𑀆𑀬𑀢𑀦𑀸 𑀲𑁄𑀢𑀸𑀬𑀢𑀦𑀁…𑀧𑁂….

𑀥𑀫𑁆𑀫𑁄 𑀥𑀫𑁆𑀫𑀸𑀬𑀢𑀦𑀁, 𑀆𑀬𑀢𑀦𑀸 𑀫𑀦𑀸𑀬𑀢𑀦𑀁. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑁄𑀢𑀸𑀬𑀢𑀦𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀖𑀸𑀦𑀸𑀬𑀢𑀦𑀁…𑀧𑁂….

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑀸𑀬𑀢𑀦𑀁.

𑀦 𑀲𑁄𑀢𑀁 𑀦 𑀲𑁄𑀢𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀸𑀬𑀢𑀦𑀁…𑀧𑁂….

𑀦 𑀲𑁄𑀢𑀁 𑀦 𑀲𑁄𑀢𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑀸𑀬𑀢𑀦𑀁.

𑀦 𑀖𑀸𑀦𑀁 𑀦 𑀖𑀸𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀸𑀬𑀢𑀦𑀁…𑀧𑁂….

𑀦 𑀖𑀸𑀦𑀁 𑀦 𑀖𑀸𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑀸𑀬𑀢𑀦𑀁…𑀧𑁂….

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀸𑀬𑀢𑀦𑀁.

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑁄𑀢𑀸𑀬𑀢𑀦𑀁…𑀧𑁂….

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀫𑀦𑀸𑀬𑀢𑀦𑀁. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀲𑀼𑀤𑁆𑀥𑀸𑀬𑀢𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ ¶ 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀼.

𑀲𑁄𑀢𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀲𑁄𑀢𑀁.

𑀖𑀸𑀦𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀖𑀸𑀦𑀁.

𑀚𑀺𑀯𑁆𑀳𑀸 𑀆𑀬𑀢𑀦𑀁, 𑀆𑀬𑀢𑀦𑀸 𑀚𑀺𑀯𑁆𑀳𑀸.

𑀓𑀸𑀬𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀓𑀸𑀬𑁄.

𑀭𑀽𑀧𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀭𑀽𑀧𑀁.

𑀲𑀤𑁆𑀤𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀲𑀤𑁆𑀤𑁄.

𑀕𑀦𑁆𑀥𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀕𑀦𑁆𑀥𑁄.

𑀭𑀲𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀭𑀲𑁄.

𑀨𑁄𑀝𑁆𑀞𑀩𑁆𑀩𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀨𑁄𑀝𑁆𑀞𑀩𑁆𑀩𑁄.

𑀫𑀦𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀫𑀦𑁄.

𑀥𑀫𑁆𑀫𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑁄.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀼.

𑀦 𑀲𑁄𑀢𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑁄𑀢𑀁.

𑀦 𑀖𑀸𑀦𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀖𑀸𑀦𑀁.

𑀦 𑀚𑀺𑀯𑁆𑀳𑀸 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀚𑀺𑀯𑁆𑀳𑀸.

𑀦 𑀓𑀸𑀬𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀓𑀸𑀬𑁄.

𑀦 𑀭𑀽𑀧𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀭𑀽𑀧𑀁.

𑀦 𑀲𑀤𑁆𑀤𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑀤𑁆𑀤𑁄.

𑀦 𑀕𑀦𑁆𑀥𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀕𑀦𑁆𑀥𑁄.

𑀦 𑀭𑀲𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀭𑀲𑁄.

𑀦 ¶ 𑀨𑁄𑀝𑁆𑀞𑀩𑁆𑀩𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀨𑁄𑀝𑁆𑀞𑀩𑁆𑀩𑁄.

𑀦 𑀫𑀦𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀫𑀦𑁄.

𑀦 𑀥𑀫𑁆𑀫𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑁄.

𑀲𑀼𑀤𑁆𑀥𑀸𑀬𑀢𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ 𑀆𑀬𑀢𑀦𑀁, 𑀆𑀬𑀢𑀦𑀸 𑀲𑁄𑀢𑀁…𑀧𑁂….

𑀘𑀓𑁆𑀔𑀼 𑀆𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑁄.

𑀲𑁄𑀢𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀼…𑀧𑁂….

𑀲𑁄𑀢𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑁄.

𑀖𑀸𑀦𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀼…𑀧𑁂….

𑀖𑀸𑀦𑀁 𑀆𑀬𑀢𑀦𑀁, 𑀆𑀬𑀢𑀦𑀸 𑀥𑀫𑁆𑀫𑁄…𑀧𑁂….

𑀥𑀫𑁆𑀫𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀘𑀓𑁆𑀔𑀼.

𑀥𑀫𑁆𑀫𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀲𑁄𑀢𑀁…𑀧𑁂….

𑀥𑀫𑁆𑀫𑁄 𑀆𑀬𑀢𑀦𑀁, 𑀆𑀬𑀢𑀦𑀸 𑀫𑀦𑁄. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑁄𑀢𑀁…𑀧𑁂….

𑀦 𑀘𑀓𑁆𑀔𑀼 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑁄.

𑀦 𑀲𑁄𑀢𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀼…𑀧𑁂….

𑀦 𑀲𑁄𑀢𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑁄.

𑀦 ¶ 𑀖𑀸𑀦𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀼…𑀧𑁂….

𑀦 𑀖𑀸𑀦𑀁 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀥𑀫𑁆𑀫𑁄…𑀧𑁂….

𑀦 𑀥𑀫𑁆𑀫𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀘𑀓𑁆𑀔𑀼.

𑀦 𑀥𑀫𑁆𑀫𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀲𑁄𑀢𑀁…𑀧𑁂….

𑀦 𑀥𑀫𑁆𑀫𑁄 𑀦𑀸𑀬𑀢𑀦𑀁, 𑀦𑀸𑀬𑀢𑀦𑀸 𑀦 𑀫𑀦𑁄. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀅𑀝𑁆𑀞𑀸𑀭𑀲 ¶ 𑀥𑀸𑀢𑀼𑀬𑁄 (𑀬𑀫. 𑁧.𑀥𑀸𑀢𑀼𑀭𑀫𑀓.𑁧 𑀆𑀤𑀬𑁄) 𑁋 𑀘𑀓𑁆𑀔𑀼𑀥𑀸𑀢𑀼 𑀲𑁄𑀢𑀥𑀸𑀢𑀼 𑀖𑀸𑀦𑀥𑀸𑀢𑀼 𑀚𑀺𑀯𑁆𑀳𑀸𑀥𑀸𑀢𑀼 𑀓𑀸𑀬𑀥𑀸𑀢𑀼 𑀭𑀽𑀧𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀭𑀲𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀥𑀫𑁆𑀫𑀥𑀸𑀢𑀼.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼, 𑀘𑀓𑁆𑀔𑀼𑀥𑀸𑀢𑀼 𑀘𑀓𑁆𑀔𑀼.

𑀲𑁄𑀢𑀁 𑀲𑁄𑀢𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑁄𑀢𑀁…𑀧𑁂….

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂….

𑀫𑀦𑁄 𑀫𑀦𑁄𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀫𑀦𑁄.

𑀫𑀦𑁄𑀯𑀺𑀜𑁆𑀜𑀸𑀡𑀁 ¶ 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀁.

𑀥𑀫𑁆𑀫𑁄 𑀥𑀫𑁆𑀫𑀥𑀸𑀢𑀼, 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑁄.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀥𑀸𑀢𑀼, 𑀦 𑀘𑀓𑁆𑀔𑀼𑀥𑀸𑀢𑀼 𑀦 𑀘𑀓𑁆𑀔𑀼.

𑀦 𑀲𑁄𑀢𑀁 𑀦 𑀲𑁄𑀢𑀥𑀸𑀢𑀼, 𑀦 𑀲𑁄𑀢𑀥𑀸𑀢𑀼 𑀦 𑀲𑁄𑀢𑀁…𑀧𑁂….

𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂….

𑀦 𑀫𑀦𑁄 𑀦 𑀫𑀦𑁄𑀥𑀸𑀢𑀼, 𑀦 𑀫𑀦𑁄𑀥𑀸𑀢𑀼 𑀦 𑀫𑀦𑁄.

𑀦 ¶ 𑀫𑀦𑁄𑀯𑀺𑀜𑁆𑀜𑀸𑀡𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦 𑀫𑀦𑁄𑀯𑀺𑀜𑁆𑀜𑀸𑀡𑀁.

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀥𑀸𑀢𑀼, 𑀦 𑀥𑀫𑁆𑀫𑀥𑀸𑀢𑀼 𑀦 𑀥𑀫𑁆𑀫𑁄.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼, 𑀥𑀸𑀢𑀽 𑀲𑁄𑀢𑀥𑀸𑀢𑀼…𑀧𑁂….

𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼, 𑀥𑀸𑀢𑀽 𑀥𑀫𑁆𑀫𑀥𑀸𑀢𑀼. (𑀬𑀣𑀸 𑀆𑀬𑀢𑀦𑀬𑀫𑀓𑁂 𑀘𑀓𑁆𑀓𑀁 𑀩𑀦𑁆𑀥𑀺𑀢𑀁, 𑀏𑀯𑀫𑀺𑀥 𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀥𑀸𑀢𑀼, 𑀦 𑀥𑀸𑀢𑀽 𑀦 𑀲𑁄𑀢𑀥𑀸𑀢𑀼.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀥𑀸𑀢𑀼, 𑀦 𑀥𑀸𑀢𑀽 𑀦 𑀖𑀸𑀦𑀥𑀸𑀢𑀼…𑀧𑁂….

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀥𑀸𑀢𑀼, 𑀦 𑀥𑀸𑀢𑀽 𑀦 𑀥𑀫𑁆𑀫𑀥𑀸𑀢𑀼…𑀧𑁂….

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀥𑀸𑀢𑀼, 𑀦 𑀥𑀸𑀢𑀽 𑀦 𑀘𑀓𑁆𑀔𑀼𑀥𑀸𑀢𑀼…𑀧𑁂….

𑀦 𑀥𑀫𑁆𑀫𑁄 𑀦 𑀥𑀫𑁆𑀫𑀥𑀸𑀢𑀼, 𑀦 𑀥𑀸𑀢𑀽 𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀲𑀼𑀤𑁆𑀥𑀥𑀸𑀢𑀼𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ 𑀥𑀸𑀢𑀼, 𑀥𑀸𑀢𑀽 𑀘𑀓𑁆𑀔𑀼…𑀧𑁂….

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀥𑀸𑀢𑀼, 𑀥𑀸𑀢𑀽 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂….

𑀫𑀦𑁄𑀯𑀺𑀜𑁆𑀜𑀸𑀡𑀁 𑀥𑀸𑀢𑀼, 𑀥𑀸𑀢𑀽 𑀫𑀦𑁄𑀯𑀺𑀜𑁆𑀜𑀸𑀡𑀁.

𑀥𑀫𑁆𑀫𑁄 𑀥𑀸𑀢𑀼, 𑀥𑀸𑀢𑀽 𑀥𑀫𑁆𑀫𑁄.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀘𑀓𑁆𑀔𑀼…𑀧𑁂….

𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂….

𑀦 ¶ 𑀫𑀦𑁄𑀯𑀺𑀜𑁆𑀜𑀸𑀡𑀁 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀫𑀦𑁄𑀯𑀺𑀜𑁆𑀜𑀸𑀡𑀁.

𑀦 𑀥𑀫𑁆𑀫𑁄 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀥𑀫𑁆𑀫𑁄.

𑀲𑀼𑀤𑁆𑀥𑀥𑀸𑀢𑀼𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 𑀥𑀸𑀢𑀼, 𑀥𑀸𑀢𑀽 𑀲𑁄𑀢𑀁…𑀧𑁂….

𑀘𑀓𑁆𑀔𑀼 𑀥𑀸𑀢𑀼, 𑀥𑀸𑀢𑀽 𑀥𑀫𑁆𑀫𑁄…𑀧𑁂….

𑀥𑀫𑁆𑀫𑁄 𑀥𑀸𑀢𑀼, 𑀥𑀸𑀢𑀽 𑀘𑀓𑁆𑀔𑀼…𑀧𑁂….

𑀥𑀫𑁆𑀫𑁄 𑀥𑀸𑀢𑀼, 𑀥𑀸𑀢𑀽 𑀫𑀦𑁄𑀯𑀺𑀜𑁆𑀜𑀸𑀡𑀁. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.)

𑀧𑀘𑁆𑀘𑀦𑀻𑀓𑀁

𑀦 ¶ 𑀘𑀓𑁆𑀔𑀼 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀲𑁄𑀢𑀁…𑀧𑁂….

𑀦 𑀘𑀓𑁆𑀔𑀼 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀥𑀫𑁆𑀫𑁄…𑀧𑁂….

𑀦 𑀥𑀫𑁆𑀫𑁄 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀘𑀓𑁆𑀔𑀼…𑀧𑁂….

𑀦 𑀥𑀫𑁆𑀫𑁄 𑀦 𑀥𑀸𑀢𑀼, 𑀦 𑀥𑀸𑀢𑀽 𑀦 𑀫𑀦𑁄𑀯𑀺𑀜𑁆𑀜𑀸𑀡𑀁. (𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁. )

𑀥𑀸𑀢𑀼𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁧 𑀆𑀤𑀬𑁄) 𑁋 𑀤𑀼𑀓𑁆𑀔𑀲𑀘𑁆𑀘𑀁 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑁄𑀥𑀲𑀘𑁆𑀘𑀁 𑀫𑀕𑁆𑀕𑀲𑀘𑁆𑀘𑀁.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀤𑀼𑀓𑁆𑀔𑀁 ¶ 𑀤𑀼𑀓𑁆𑀔𑀲𑀘𑁆𑀘𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀤𑀼𑀓𑁆𑀔𑀁.

𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀫𑀼𑀤𑀬𑀲𑀘𑁆𑀘𑀁 𑀲𑀫𑀼𑀤𑀬𑁄.

𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀦𑀺𑀭𑁄𑀥𑁄.

𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁, 𑀫𑀕𑁆𑀕𑀲𑀘𑁆𑀘𑀁 𑀫𑀕𑁆𑀕𑁄.

𑀧𑀘𑁆𑀘𑀦𑀻𑀓𑀁

𑀦 ¶ 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀦 𑀤𑀼𑀓𑁆𑀔𑀲𑀘𑁆𑀘𑀁 𑀦 𑀤𑀼𑀓𑁆𑀔𑀁.

𑀦 𑀲𑀫𑀼𑀤𑀬𑁄 𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀲𑀫𑀼𑀤𑀬𑁄.

𑀦 𑀦𑀺𑀭𑁄𑀥𑁄 𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀦 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀦𑀺𑀭𑁄𑀥𑁄.

𑀦 𑀫𑀕𑁆𑀕𑁄 𑀦 𑀫𑀕𑁆𑀕𑀲𑀘𑁆𑀘𑀁, 𑀦 𑀫𑀕𑁆𑀕𑀲𑀘𑁆𑀘𑀁 𑀦 𑀫𑀕𑁆𑀕𑁄.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑀲𑀘𑁆𑀘𑀁.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑀲𑀘𑁆𑀘𑀁.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀘𑁆𑀘𑀸 𑀫𑀕𑁆𑀕𑀲𑀘𑁆𑀘𑀁.

𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀲𑀘𑁆𑀘𑀁.

𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑀲𑀘𑁆𑀘𑀁.

𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀘𑁆𑀘𑀸 𑀫𑀕𑁆𑀕𑀲𑀘𑁆𑀘𑀁.

𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀲𑀘𑁆𑀘𑀁.

𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑀲𑀘𑁆𑀘𑀁.

𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀲𑀘𑁆𑀘𑀸 𑀫𑀕𑁆𑀕𑀲𑀘𑁆𑀘𑀁.

𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀲𑀘𑁆𑀘𑀁.

𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑀲𑀘𑁆𑀘𑀁.

𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑀲𑀘𑁆𑀘𑀁.

𑀧𑀘𑁆𑀘𑀦𑀻𑀓𑀁

𑀦 ¶ ¶ 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑀲𑀘𑁆𑀘𑀁.

𑀦 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑀲𑀘𑁆𑀘𑀁.

𑀦 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑀲𑀘𑁆𑀘𑀁.

𑀦 𑀲𑀫𑀼𑀤𑀬𑁄 𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀲𑀘𑁆𑀘𑀁.

𑀦 𑀲𑀫𑀼𑀤𑀬𑁄 𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑀲𑀘𑁆𑀘𑀁.

𑀦 𑀲𑀫𑀼𑀤𑀬𑁄 𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑀲𑀘𑁆𑀘𑀁.

𑀦 𑀦𑀺𑀭𑁄𑀥𑁄 𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀲𑀘𑁆𑀘𑀁.

𑀦 𑀦𑀺𑀭𑁄𑀥𑁄 𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑀲𑀘𑁆𑀘𑀁.

𑀦 𑀦𑀺𑀭𑁄𑀥𑁄 𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑀲𑀘𑁆𑀘𑀁.

𑀦 𑀫𑀕𑁆𑀕𑁄 𑀦 𑀫𑀕𑁆𑀕𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀲𑀘𑁆𑀘𑀁.

𑀦 𑀫𑀕𑁆𑀕𑁄 𑀦 𑀫𑀕𑁆𑀕𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑀲𑀘𑁆𑀘𑀁.

𑀦 𑀫𑀕𑁆𑀕𑁄 𑀦 𑀫𑀕𑁆𑀕𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑀲𑀘𑁆𑀘𑀁.

𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁄

𑀅𑀦𑀼𑀮𑁄𑀫𑀁

𑀤𑀼𑀓𑁆𑀔𑀁 𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀁.

𑀲𑀫𑀼𑀤𑀬𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑁄.

𑀦𑀺𑀭𑁄𑀥𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑁄.

𑀫𑀕𑁆𑀕𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀫𑀕𑁆𑀕𑁄.

𑀧𑀘𑁆𑀘𑀦𑀻𑀓𑀁

𑀦 ¶ 𑀤𑀼𑀓𑁆𑀔𑀁 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀁.

𑀦 𑀲𑀫𑀼𑀤𑀬𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑁄.

𑀦 𑀦𑀺𑀭𑁄𑀥𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑁄.

𑀦 𑀫𑀕𑁆𑀕𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑁄.

𑀲𑀼𑀤𑁆𑀥𑀲𑀘𑁆𑀘𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀤𑀼𑀓𑁆𑀔𑀁 ¶ 𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑁄.

𑀤𑀼𑀓𑁆𑀔𑀁 𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑁄.

𑀤𑀼𑀓𑁆𑀔𑀁 𑀲𑀘𑁆𑀘𑀁, 𑀲𑀘𑁆𑀘𑀸 𑀫𑀕𑁆𑀕𑁄.

𑀲𑀫𑀼𑀤𑀬𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀁…𑀧𑁂… 𑀲𑀘𑁆𑀘𑀸 𑀫𑀕𑁆𑀕𑁄.

𑀦𑀺𑀭𑁄𑀥𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀁…𑀧𑁂… 𑀲𑀘𑁆𑀘𑀸 𑀫𑀕𑁆𑀕𑁄.

𑀫𑀕𑁆𑀕𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀤𑀼𑀓𑁆𑀔𑀁.

𑀫𑀕𑁆𑀕𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀲𑀫𑀼𑀤𑀬𑁄.

𑀫𑀕𑁆𑀕𑁄 𑀲𑀘𑁆𑀘𑀁, 𑀲𑀘𑁆𑀘𑀸 𑀦𑀺𑀭𑁄𑀥𑁄.

𑀧𑀘𑁆𑀘𑀦𑀻𑀓𑀁

𑀦 𑀤𑀼𑀓𑁆𑀔𑀁 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑁄.

𑀦 𑀤𑀼𑀓𑁆𑀔𑀁 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑁄.

𑀦 𑀤𑀼𑀓𑁆𑀔𑀁 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑁄.

𑀦 ¶ 𑀲𑀫𑀼𑀤𑀬𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀁…𑀧𑁂… 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑁄.

𑀦 𑀦𑀺𑀭𑁄𑀥𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀁…𑀧𑁂… 𑀦 𑀲𑀘𑁆𑀘𑀸 𑀦 𑀫𑀕𑁆𑀕𑁄.

𑀦 𑀫𑀕𑁆𑀕𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀤𑀼𑀓𑁆𑀔𑀁.

𑀦 𑀫𑀕𑁆𑀕𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀲𑀫𑀼𑀤𑀬𑁄.

𑀦 𑀫𑀕𑁆𑀕𑁄 𑀦 𑀲𑀘𑁆𑀘𑀁, 𑀦 𑀲𑀘𑁆𑀘𑀸 𑀦 𑀦𑀺𑀭𑁄𑀥𑁄.

𑀲𑀘𑁆𑀘𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀢𑀬𑁄 ¶ 𑀲𑀗𑁆𑀔𑀸𑀭𑀸 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧 𑀆𑀤𑀬𑁄) 𑁋 𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀞𑀧𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀓𑀸𑀬𑀲𑀗𑁆𑀔𑀸𑀭𑁄 𑀓𑀸𑀬𑁄.

𑀯𑀘𑀻 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀯𑀘𑀻.

𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀁.

𑀧𑀘𑁆𑀘𑀦𑀻𑀓𑀁

𑀦 ¶ 𑀓𑀸𑀬𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄, 𑀦 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀓𑀸𑀬𑁄.

𑀦 𑀯𑀘𑀻 𑀦 𑀯𑀘𑀻𑀲𑀗𑁆𑀔𑀸𑀭𑁄, 𑀦 𑀯𑀘𑀻𑀲𑀗𑁆𑀔𑀸𑀭𑁄 𑀦 𑀯𑀘𑀻.

𑀦 𑀘𑀺𑀢𑁆𑀢𑀁 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦 𑀘𑀺𑀢𑁆𑀢𑀁.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄.

𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀯𑀘𑀻 𑀯𑀘𑀻𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑀲𑀗𑁆𑀔𑀸𑀭𑁄.

𑀯𑀘𑀻 𑀯𑀘𑀻𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀘𑀺𑀢𑁆𑀢𑀁 ¶ 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑀲𑀗𑁆𑀔𑀸𑀭𑁄.

𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄.

𑀧𑀘𑁆𑀘𑀦𑀻𑀓𑀁

𑀦 𑀓𑀸𑀬𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀯𑀘𑀻𑀲𑀗𑁆𑀔𑀸𑀭𑁄.

𑀦 𑀓𑀸𑀬𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀦 𑀯𑀘𑀻 𑀦 𑀯𑀘𑀻𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀓𑀸𑀬𑀲𑀗𑁆𑀔𑀸𑀭𑁄.

𑀦 𑀯𑀘𑀻 𑀦 𑀯𑀘𑀻𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀦 𑀘𑀺𑀢𑁆𑀢𑀁 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀓𑀸𑀬𑀲𑀗𑁆𑀔𑀸𑀭𑁄.

𑀦 𑀘𑀺𑀢𑁆𑀢𑀁 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀯𑀘𑀻𑀲𑀗𑁆𑀔𑀸𑀭𑁄.

𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀸𑀬𑀲𑀗𑁆𑀔𑀸𑀭𑁄 ¶ 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄.

𑀓𑀸𑀬𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄.

𑀯𑀘𑀻𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄.

𑀧𑀘𑁆𑀘𑀦𑀻𑀓𑀁

𑀦 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀯𑀘𑀻𑀲𑀗𑁆𑀔𑀸𑀭𑁄, 𑀦 𑀯𑀘𑀻𑀲𑀗𑁆𑀔𑀸𑀭𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄.

𑀦 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄.

𑀦 𑀯𑀘𑀻𑀲𑀗𑁆𑀔𑀸𑀭𑁄 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦 𑀯𑀘𑀻𑀲𑀗𑁆𑀔𑀸𑀭𑁄.

𑀲𑀗𑁆𑀔𑀸𑀭𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀲𑀬𑀬𑀫𑀓𑀁

𑀲𑀢𑁆𑀢𑀸𑀦𑀼𑀲𑀬𑀸 ¶ (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧) 𑁋 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄 𑀫𑀸𑀦𑀸𑀦𑀼𑀲𑀬𑁄 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄.

𑀅𑀦𑀼𑀲𑀬𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀬𑀫𑀓𑀁

𑀲𑀼𑀤𑁆𑀥𑀘𑀺𑀢𑁆𑀢𑀲𑀸𑀫𑀜𑁆𑀜𑀁

𑀧𑀼𑀕𑁆𑀕𑀮𑀯𑀸𑀭𑁄

𑁧. 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁧 𑀆𑀤𑀬𑁄), 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺.

𑁨. 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁩. 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑁪. 𑀉𑀧𑁆𑀧𑀸𑀤𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁫. 𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 ¶ ¶ 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣.

𑁬. 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁭. 𑀉𑀧𑁆𑀧𑀚𑁆𑀚𑀫𑀸𑀦𑀦𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁮. 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁.

𑁯. 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁.

𑁧𑁦. 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁧. 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁧𑁨. 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄

𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀁.

𑀦 𑀉𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁩. 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄

𑀦𑀺𑀭𑀼𑀤𑁆𑀥𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀤𑁆𑀥𑀁.

𑀦 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀦𑀺𑀭𑀼𑀤𑁆𑀥𑀁.

𑁧𑁪. 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀘𑀺𑀢𑁆𑀢𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀘𑀺𑀢𑁆𑀢𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀘𑀺𑀢𑁆𑀢𑀁. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀘𑀺𑀢𑁆𑀢𑀁.

𑀲𑀼𑀤𑁆𑀥𑀘𑀺𑀢𑁆𑀢𑀲𑀸𑀫𑀜𑁆𑀜𑀁

𑀥𑀫𑁆𑀫𑀯𑀸𑀭𑁄

𑁧. 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀁 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺.

𑁨. 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁩. 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑁪. 𑀉𑀧𑁆𑀧𑀸𑀤𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀁 ¶ ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁫. 𑀦𑀺𑀭𑁄𑀥𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣.

𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣.

𑁬. 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀁 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁭. 𑀉𑀧𑁆𑀧𑀚𑁆𑀚𑀫𑀸𑀦𑀦𑀦𑀺𑀭𑁄𑀥𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁮. 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁.

𑀬𑀁 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁.

𑁯. 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁.

𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁.

𑁧𑁦. 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑀬𑀁 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁧. 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀁 ¶ 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁧𑁨. 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄

𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀁.

𑀦 𑀉𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁩. 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄

𑀦𑀺𑀭𑀼𑀤𑁆𑀥𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀤𑁆𑀥𑀁.

𑀦 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀦𑀺𑀭𑀼𑀤𑁆𑀥𑀁.

𑁧𑁪. 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀁. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀁.

𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀁. 𑀬𑀁 𑀯𑀸 ¶ 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀁.

𑀲𑀼𑀤𑁆𑀥𑀘𑀺𑀢𑁆𑀢𑀲𑀸𑀫𑀜𑁆𑀜𑀁

𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄

𑁧. 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺.

𑁨. 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁩. 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑁪. 𑀉𑀧𑁆𑀧𑀸𑀤𑀯𑀸𑀭𑁄

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁫. 𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣.

𑁬. 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁭. 𑀉𑀧𑁆𑀧𑀚𑁆𑀚𑀫𑀸𑀦𑀦𑀦𑀺𑀭𑁄𑀥𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑁮. 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁.

𑁯. 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁.

𑁧𑁦. 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄

𑀬𑀲𑁆𑀲 ¶ 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁧. 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣.

𑁧𑁨. 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄

𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀁.

𑀦 𑀉𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀉𑀧𑁆𑀧𑀦𑁆𑀦𑀁.

𑁧𑁩. 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄

𑀦𑀺𑀭𑀼𑀤𑁆𑀥𑀁 ¶ ¶ 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀤𑁆𑀥𑀁.

𑀦 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀦𑀺𑀭𑀼𑀤𑁆𑀥𑀁.

𑁧𑁪. 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁.

𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁. 𑀬𑀲𑁆𑀲 𑀯𑀸 𑀧𑀦 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁.

𑀲𑀼𑀢𑁆𑀢𑀦𑁆𑀢𑀘𑀺𑀢𑁆𑀢𑀫𑀺𑀲𑁆𑀲𑀓𑀯𑀺𑀲𑁂𑀲𑁄

𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀲𑁆𑀲 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀤𑁄𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀫𑁄𑀳𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀪𑀺𑀥𑀫𑁆𑀫𑀘𑀺𑀢𑁆𑀢𑀫𑀺𑀲𑁆𑀲𑀓𑀯𑀺𑀲𑁂𑀲𑁄

𑀬𑀲𑁆𑀲 ¶ ¶ 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀲𑁆𑀲 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀅𑀩𑁆𑀬𑀸𑀓𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

(𑀏𑀢𑁂𑀦 𑀉𑀧𑀸𑀬𑁂𑀦 𑀬𑀸𑀯 𑀲𑀭𑀡𑀅𑀭𑀡𑀸 𑀉𑀤𑁆𑀥𑀭𑀺𑀢𑀩𑁆𑀩𑀸.)

𑀬𑀲𑁆𑀲 𑀅𑀭𑀡𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀅𑀭𑀡𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦 𑀅𑀭𑀡𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀅𑀭𑀡𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺.

𑀘𑀺𑀢𑁆𑀢𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀼𑀲𑀮𑀸 𑀓𑀼𑀲𑀮𑀸 𑀥𑀫𑁆𑀫𑀸 (𑀬𑀫. 𑁩.𑀥𑀫𑁆𑀫𑀬𑀫𑀓.𑁧 𑀆𑀤𑀬𑁄). 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀸.

𑀅𑀓𑀼𑀲𑀮𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀧𑀘𑁆𑀘𑀦𑀻𑀓𑀁

𑀦 ¶ 𑀓𑀼𑀲𑀮𑀸 𑀦 𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀓𑀼𑀲𑀮𑀸.

𑀦 ¶ 𑀅𑀓𑀼𑀲𑀮𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀼𑀲𑀮𑀸 𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸.

𑀓𑀼𑀲𑀮𑀸 𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸.

𑀅𑀓𑀼𑀲𑀮𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸.

𑀅𑀓𑀼𑀲𑀮𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸.

𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸.

𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸.

𑀧𑀘𑁆𑀘𑀦𑀻𑀓𑀁

𑀦 𑀓𑀼𑀲𑀮𑀸 𑀦 𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸.

𑀦 𑀓𑀼𑀲𑀮𑀸 𑀦 𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸.

𑀦 𑀅𑀓𑀼𑀲𑀮𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀓𑀼𑀲𑀮𑀸 𑀥𑀫𑁆𑀫𑀸.

𑀦 𑀅𑀓𑀼𑀲𑀮𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀓𑀼𑀲𑀮𑀸 𑀥𑀫𑁆𑀫𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸.

𑀲𑀼𑀤𑁆𑀥𑀥𑀫𑁆𑀫𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀼𑀲𑀮𑀸 ¶ ¶ 𑀥𑀫𑁆𑀫𑀸. 𑀥𑀫𑁆𑀫𑀸 𑀓𑀼𑀲𑀮𑀸.

𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀧𑀘𑁆𑀘𑀦𑀻𑀓𑀁

𑀦 𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀓𑀼𑀲𑀮𑀸.

𑀦 𑀅𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸.

𑀲𑀼𑀤𑁆𑀥𑀥𑀫𑁆𑀫𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀓𑀼𑀲𑀮𑀸.

𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀓𑀼𑀲𑀮𑀸.

𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑀧𑀘𑁆𑀘𑀦𑀻𑀓𑀁

𑀦 ¶ 𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸.

𑀦 𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸.

𑀦 𑀅𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀓𑀼𑀲𑀮𑀸.

𑀦 𑀅𑀓𑀼𑀲𑀮𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀩𑁆𑀬𑀸𑀓𑀢𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀓𑀼𑀲𑀮𑀸.

𑀦 𑀅𑀩𑁆𑀬𑀸𑀓𑀢𑀸 𑀦 𑀥𑀫𑁆𑀫𑀸. 𑀦 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸.

𑀥𑀫𑁆𑀫𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀬𑀫𑀓𑀁

𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 ¶ (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧 𑀆𑀤𑀬𑁄) 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀧𑀤𑀲𑁄𑀥𑀦𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼.

𑀲𑁄𑀢𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀲𑁄𑀢𑀁.

𑀖𑀸𑀦𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀁.

𑀚𑀺𑀯𑁆𑀳𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀸.

𑀓𑀸𑀬𑁄 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑁄.

𑀫𑀦𑁄 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄.

𑀇𑀢𑁆𑀣𑀻 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀻.

𑀧𑀼𑀭𑀺𑀲𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑁄.

𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀁.

𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀁.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀁.

𑀲𑁄𑀫𑀦𑀲𑁆𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀁.

𑀤𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀁.

𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀸.

𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀸.

𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀁.

𑀲𑀢𑀺 ¶ 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺.

𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺.

𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸.

𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀅𑀜𑁆𑀜𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀁.

𑀅𑀜𑁆𑀜𑀸𑀢𑀸𑀯𑀻 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀻.

𑀧𑀘𑁆𑀘𑀦𑀻𑀓𑀁

𑀦 ¶ 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀘𑀓𑁆𑀔𑀼.

𑀦 𑀲𑁄𑀢𑀁 𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀦 𑀲𑁄𑀢𑀁.

𑀦 𑀖𑀸𑀦𑀁 𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀦 𑀖𑀸𑀦𑀁.

𑀦 𑀚𑀺𑀯𑁆𑀳𑀸 𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀦 𑀚𑀺𑀯𑁆𑀳𑀸.

𑀦 𑀓𑀸𑀬𑁄 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀦 𑀓𑀸𑀬𑁄.

𑀦 𑀫𑀦𑁄 𑀦 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑀦 𑀫𑀦𑁄.

𑀦 𑀇𑀢𑁆𑀣𑀻 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀇𑀢𑁆𑀣𑀻.

𑀦 𑀧𑀼𑀭𑀺𑀲𑁄 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦 𑀧𑀼𑀭𑀺𑀲𑁄.

𑀦 𑀚𑀻𑀯𑀺𑀢𑀁 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀚𑀻𑀯𑀺𑀢𑀁.

𑀦 𑀲𑀼𑀔𑀁 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀦 𑀲𑀼𑀔𑀁.

𑀦 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀦 𑀤𑀼𑀓𑁆𑀔𑀁.

𑀦 𑀲𑁄𑀫𑀦𑀲𑁆𑀲𑀁 𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀲𑁄𑀫𑀦𑀲𑁆𑀲𑀁.

𑀦 𑀤𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀤𑁄𑀫𑀦𑀲𑁆𑀲𑀁.

𑀦 𑀉𑀧𑁂𑀓𑁆𑀔𑀸 𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁂𑀓𑁆𑀔𑀸.

𑀦 𑀲𑀤𑁆𑀥𑀸 𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀦 𑀲𑀤𑁆𑀥𑀸.

𑀦 𑀯𑀻𑀭𑀺𑀬𑀁 𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀦 𑀯𑀻𑀭𑀺𑀬𑀁.

𑀦 𑀲𑀢𑀺 𑀦 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀲𑀢𑀺𑀦𑁆𑀤𑁆𑀭𑀺𑀬𑀁 𑀦 𑀲𑀢𑀺.

𑀦 𑀲𑀫𑀸𑀥𑀺 𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀦 𑀲𑀫𑀸𑀥𑀺.

𑀦 ¶ 𑀧𑀜𑁆𑀜𑀸 𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦 𑀧𑀜𑁆𑀜𑀸.

𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀦 𑀅𑀜𑁆𑀜𑀁 𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦 𑀅𑀜𑁆𑀜𑀁.

𑀦 𑀅𑀜𑁆𑀜𑀸𑀢𑀸𑀯𑀻 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀦 𑀅𑀜𑁆𑀜𑀸𑀢𑀸𑀯𑀻.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀼𑀔𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀢𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀘𑀓𑁆𑀔𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑁄𑀢𑀁 ¶ ¶ 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑁄𑀢𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀖𑀸𑀦𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀖𑀸𑀦𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀚𑀺𑀯𑁆𑀳𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀚𑀺𑀯𑁆𑀳𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀓𑀸𑀬𑁄 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀓𑀸𑀬𑁄 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀫𑀦𑁄 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀫𑀦𑁄 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀇𑀢𑁆𑀣𑀻 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀇𑀢𑁆𑀣𑀻 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀧𑀼𑀭𑀺𑀲𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀧𑀼𑀭𑀺𑀲𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀤𑀼𑀓𑁆𑀔𑀁 ¶ 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀤𑀼𑀓𑁆𑀔𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑁄𑀫𑀦𑀲𑁆𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑁄𑀫𑀦𑀲𑁆𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀤𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀤𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑀤𑁆𑀥𑀸 ¶ 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 ¶ 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀅𑀜𑁆𑀜𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀅𑀜𑁆𑀜𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀅𑀜𑁆𑀜𑀸𑀢𑀸𑀯𑀻 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂….

𑀅𑀜𑁆𑀜𑀸𑀢𑀸𑀯𑀻 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑀦 ¶ 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀢𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁.

𑀦 ¶ 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀲𑁄𑀢𑀁 𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀖𑀸𑀦𑀁 𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀚𑀺𑀯𑁆𑀳𑀸 𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀓𑀸𑀬𑁄 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀫𑀦𑁄 𑀦 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀇𑀢𑁆𑀣𑀻 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 ¶ 𑀧𑀼𑀭𑀺𑀲𑁄 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀚𑀻𑀯𑀺𑀢𑀁 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 ¶ 𑀲𑀼𑀔𑀁 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀤𑀼𑀓𑁆𑀔𑀁 𑀦 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀲𑁄𑀫𑀦𑀲𑁆𑀲𑀁 𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀤𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀉𑀧𑁂𑀓𑁆𑀔𑀸 𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀲𑀤𑁆𑀥𑀸 𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀯𑀻𑀭𑀺𑀬𑀁 𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀲𑀢𑀺 𑀦 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀲𑀫𑀸𑀥𑀺 𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀧𑀜𑁆𑀜𑀸 𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 ¶ ¶ 𑀅𑀜𑁆𑀜𑀁 𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀦 𑀅𑀜𑁆𑀜𑀸𑀢𑀸𑀯𑀻 𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼.

𑀲𑁄𑀢𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀢𑀁.

𑀖𑀸𑀦𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀖𑀸𑀦𑀁.

𑀚𑀺𑀯𑁆𑀳𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀺𑀯𑁆𑀳𑀸.

𑀓𑀸𑀬𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀓𑀸𑀬𑁄.

𑀫𑀦𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀫𑀦𑁄.

𑀇𑀢𑁆𑀣𑀻 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀇𑀢𑁆𑀣𑀻.

𑀧𑀼𑀭𑀺𑀲𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀼𑀭𑀺𑀲𑁄.

𑀚𑀻𑀯𑀺𑀢𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀻𑀯𑀺𑀢𑀁.

𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀼𑀔𑀁.

𑀤𑀼𑀓𑁆𑀔𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑀼𑀓𑁆𑀔𑀁.

𑀲𑁄𑀫𑀦𑀲𑁆𑀲𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀫𑀦𑀲𑁆𑀲𑀁.

𑀤𑁄𑀫𑀦𑀲𑁆𑀲𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑁄𑀫𑀦𑀲𑁆𑀲𑀁.

𑀉𑀧𑁂𑀓𑁆𑀔𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀉𑀧𑁂𑀓𑁆𑀔𑀸.

𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀤𑁆𑀥𑀸.

𑀯𑀻𑀭𑀺𑀬𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀯𑀻𑀭𑀺𑀬𑀁.

𑀲𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀢𑀺.

𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀫𑀸𑀥𑀺.

𑀧𑀜𑁆𑀜𑀸 ¶ 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀜𑁆𑀜𑀸.

𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀅𑀜𑁆𑀜𑀁 ¶ 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀁.

𑀅𑀜𑁆𑀜𑀸𑀢𑀸𑀯𑀻 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼.

𑀦 𑀲𑁄𑀢𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀢𑀁.

𑀦 𑀖𑀸𑀦𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀖𑀸𑀦𑀁.

𑀦 𑀚𑀺𑀯𑁆𑀳𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀺𑀯𑁆𑀳𑀸.

𑀦 𑀓𑀸𑀬𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀓𑀸𑀬𑁄.

𑀦 𑀫𑀦𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀫𑀦𑁄.

𑀦 𑀇𑀢𑁆𑀣𑀻 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀇𑀢𑁆𑀣𑀻.

𑀦 𑀧𑀼𑀭𑀺𑀲𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀼𑀭𑀺𑀲𑁄.

𑀦 𑀚𑀻𑀯𑀺𑀢𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀻𑀯𑀺𑀢𑀁.

𑀦 𑀲𑀼𑀔𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀼𑀔𑀁.

𑀦 𑀤𑀼𑀓𑁆𑀔𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑀼𑀓𑁆𑀔𑀁.

𑀦 𑀲𑁄𑀫𑀦𑀲𑁆𑀲𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀫𑀦𑀲𑁆𑀲𑀁.

𑀦 𑀤𑁄𑀫𑀦𑀲𑁆𑀲𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑁄𑀫𑀦𑀲𑁆𑀲𑀁.

𑀦 𑀉𑀧𑁂𑀓𑁆𑀔𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀉𑀧𑁂𑀓𑁆𑀔𑀸.

𑀦 𑀲𑀤𑁆𑀥𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀤𑁆𑀥𑀸.

𑀦 𑀯𑀻𑀭𑀺𑀬𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀯𑀻𑀭𑀺𑀬𑀁.

𑀦 𑀲𑀢𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀢𑀺.

𑀦 𑀲𑀫𑀸𑀥𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀫𑀸𑀥𑀺.

𑀦 𑀧𑀜𑁆𑀜𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀜𑁆𑀜𑀸.

𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀦 𑀅𑀜𑁆𑀜𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀁.

𑀦 𑀅𑀜𑁆𑀜𑀸𑀢𑀸𑀯𑀻 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑀫𑀽𑀮𑀘𑀓𑁆𑀓𑀯𑀸𑀭𑁄

𑀅𑀦𑀼𑀮𑁄𑀫𑀁

𑀘𑀓𑁆𑀔𑀼 ¶ ¶ 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀢𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀖𑀸𑀦𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀺𑀯𑁆𑀳𑀸.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀓𑀸𑀬𑁄.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀫𑀦𑁄.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀇𑀢𑁆𑀣𑀻.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀼𑀭𑀺𑀲𑁄.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀚𑀻𑀯𑀺𑀢𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀼𑀔𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑀼𑀓𑁆𑀔𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑁄𑀫𑀦𑀲𑁆𑀲𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀤𑁄𑀫𑀦𑀲𑁆𑀲𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀉𑀧𑁂𑀓𑁆𑀔𑀸.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀤𑁆𑀥𑀸.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀯𑀻𑀭𑀺𑀬𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀢𑀺.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀲𑀫𑀸𑀥𑀺.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀧𑀜𑁆𑀜𑀸.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀁.

𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑁄𑀢𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀖𑀸𑀦𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀚𑀺𑀯𑁆𑀳𑀸 ¶ 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀓𑀸𑀬𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀫𑀦𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀇𑀢𑁆𑀣𑀻 ¶ 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀧𑀼𑀭𑀺𑀲𑁄 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀚𑀻𑀯𑀺𑀢𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀤𑀼𑀓𑁆𑀔𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑁄𑀫𑀦𑀲𑁆𑀲𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀤𑁄𑀫𑀦𑀲𑁆𑀲𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀉𑀧𑁂𑀓𑁆𑀔𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀯𑀻𑀭𑀺𑀬𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀧𑀜𑁆𑀜𑀸 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀅𑀜𑁆𑀜𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀸𑀢𑀸𑀯𑀻.

𑀅𑀜𑁆𑀜𑀸𑀢𑀸𑀯𑀻 𑀇𑀦𑁆𑀤𑁆𑀭𑀺𑀬𑀁, 𑀇𑀦𑁆𑀤𑁆𑀭𑀺𑀬𑀸 𑀘𑀓𑁆𑀔𑀼…𑀧𑁂… 𑀇𑀦𑁆𑀤𑁆𑀭𑀺𑀬𑀸 𑀅𑀜𑁆𑀜𑀁.

𑀧𑀘𑁆𑀘𑀦𑀻𑀓𑀁

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀢𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀖𑀸𑀦𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀺𑀯𑁆𑀳𑀸.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀓𑀸𑀬𑁄.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀫𑀦𑁄.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀇𑀢𑁆𑀣𑀻.

𑀦 ¶ 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀼𑀭𑀺𑀲𑁄.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀚𑀻𑀯𑀺𑀢𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀼𑀔𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑀼𑀓𑁆𑀔𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑁄𑀫𑀦𑀲𑁆𑀲𑀁.

𑀦 ¶ 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀤𑁄𑀫𑀦𑀲𑁆𑀲𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀉𑀧𑁂𑀓𑁆𑀔𑀸.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀤𑁆𑀥𑀸.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀯𑀻𑀭𑀺𑀬𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀢𑀺.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀲𑀫𑀸𑀥𑀺.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀧𑀜𑁆𑀜𑀸.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀁.

𑀦 𑀘𑀓𑁆𑀔𑀼 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑁄𑀢𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀖𑀸𑀦𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀚𑀺𑀯𑁆𑀳𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀓𑀸𑀬𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀫𑀦𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀇𑀢𑁆𑀣𑀻 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀧𑀼𑀭𑀺𑀲𑁄 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀚𑀻𑀯𑀺𑀢𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑀼𑀔𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 ¶ 𑀤𑀼𑀓𑁆𑀔𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑁄𑀫𑀦𑀲𑁆𑀲𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 ¶ 𑀤𑁄𑀫𑀦𑀲𑁆𑀲𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀉𑀧𑁂𑀓𑁆𑀔𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑀤𑁆𑀥𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀯𑀻𑀭𑀺𑀬𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑀢𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀲𑀫𑀸𑀥𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀧𑀜𑁆𑀜𑀸 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀅𑀜𑁆𑀜𑀁 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀸𑀢𑀸𑀯𑀻.

𑀦 𑀅𑀜𑁆𑀜𑀸𑀢𑀸𑀯𑀻 𑀦 𑀇𑀦𑁆𑀤𑁆𑀭𑀺𑀬𑀁, 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀘𑀓𑁆𑀔𑀼…𑀧𑁂… 𑀦 𑀇𑀦𑁆𑀤𑁆𑀭𑀺𑀬𑀸 𑀦 𑀅𑀜𑁆𑀜𑀁.

𑀇𑀦𑁆𑀤𑁆𑀭𑀺𑀬𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀝𑁆𑀞𑀸𑀦𑀫𑀸𑀢𑀺𑀓𑀸

𑀳𑁂𑀢𑀼𑀧𑀘𑁆𑀘𑀬𑁄 ¶ 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀆𑀳𑀸𑀭𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀛𑀸𑀦𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀕𑀢𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 (𑀧𑀝𑁆𑀞𑀸. 𑁧.𑁧.𑀧𑀘𑁆𑀘𑀬𑀼𑀤𑁆𑀤𑁂𑀲).

𑀧𑀝𑁆𑀞𑀸𑀦𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀁

𑀲𑀢𑁆𑀢𑀧𑁆𑀧𑀓𑀭𑀡𑀦𑀸𑀫𑀢𑁄 ¶ ¶ , 𑀅𑀪𑀺𑀥𑀫𑁆𑀫𑀫𑀤𑁂𑀲𑀬𑀺;

𑀤𑁂𑀯𑀸𑀢𑀺𑀤𑁂𑀯𑁄 𑀤𑁂𑀯𑀸𑀦𑀁, 𑀤𑁂𑀯𑀮𑁄𑀓𑀫𑁆𑀳𑀺 𑀢𑀁 𑀧𑀼𑀭𑁂.

𑀢𑀲𑁆𑀲𑀸𑀬𑀁 𑀫𑀸𑀢𑀺𑀓𑀸 𑀲𑀩𑁆𑀩𑀸, 𑀲𑀓𑀮𑀲𑁆𑀲𑀸𑀧𑀺 𑀉𑀤𑁆𑀥𑀭𑀸;

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀢𑀁 𑀧𑀕𑁆𑀕𑀡𑁆𑀳𑀦𑁆𑀢𑀼 𑀲𑀸𑀥𑀯𑁄.

𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀘𑁂𑀯, 𑀢𑀣𑁂𑀯 𑀳𑁂𑀢𑀼𑀕𑁄𑀘𑁆𑀙𑀓𑀁;

𑀘𑀽𑀴𑀦𑁆𑀢𑀭𑀤𑀼𑀓𑀸 𑀲𑀢𑁆𑀢, 𑀕𑁄𑀘𑁆𑀙𑀓𑀸 𑀘 𑀢𑀢𑁄 𑀧𑀭𑀁.

𑀫𑀳𑀦𑁆𑀢𑀭𑀤𑀼𑀓𑀸 𑀘𑀸𑀧𑀺, 𑀢𑀢𑁄 𑀘𑀼𑀤𑁆𑀤𑀲 𑀦𑀺𑀤𑁆𑀤𑀺𑀲𑁂;

𑀕𑁄𑀘𑁆𑀙𑀓𑀸𑀦𑀺 𑀤𑀼𑀯𑁂 𑀧𑀺𑀝𑁆𑀞𑀺-𑀤𑀼𑀓𑀸𑀦𑀺𑀝𑁆𑀞𑀸𑀭𑀲𑁂𑀤𑀺𑀲𑀸.

𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑀼𑀢𑁆𑀢𑀦𑁆𑀢-𑀤𑀼𑀓𑀸 𑀢𑁂𑀯𑀦𑁆𑀢𑀺 𑀧𑀜𑁆𑀘𑀥𑀸;

𑀲𑀢𑁆𑀢𑀧𑁆𑀧𑀓𑀭𑀡𑀺𑀓𑀸 𑀪𑀺𑀦𑁆𑀦𑀸, 𑀥𑀫𑁆𑀫𑀲𑀗𑁆𑀕𑀡𑀺𑀫𑀸𑀢𑀺𑀓𑀸.

𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑁄𑀳𑀯𑀺𑀘𑁆𑀙𑁂𑀤𑀦𑀻

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑁧. 𑀓𑀸𑀭𑀼𑀜𑁆𑀜𑀪𑀸𑀯𑀺𑀢𑀁 ¶ ¶ 𑀬𑀲𑁆𑀲, 𑀜𑀸𑀡𑀘𑀓𑁆𑀔𑀼 𑀫𑀳𑁄𑀤𑀬𑀁.

𑀅𑀦𑁆𑀥𑀪𑀽𑀢𑀲𑁆𑀲 𑀮𑁄𑀓𑀲𑁆𑀲, 𑀚𑀸𑀢𑀁 𑀲𑀸𑀫𑀜𑁆𑀜𑀮𑁄𑀘𑀦𑀁.

𑁨. 𑀢𑀁 𑀩𑀼𑀤𑁆𑀥𑀁 𑀲𑀼𑀕𑀢𑀁 𑀥𑀻𑀭𑀁, 𑀲𑀲𑀤𑁆𑀥𑀫𑁆𑀫𑀁 𑀲𑀲𑀸𑀯𑀓𑀁.

𑀯𑀦𑁆𑀤𑀺𑀢𑁆𑀯𑀸𑀦𑀼𑀲𑁆𑀲𑀭𑀺𑀢𑁆𑀯𑀸 𑀘, 𑀣𑁄𑀫𑁂𑀢𑁆𑀯𑀸 𑀘 𑀯𑀺𑀦𑀸𑀬𑀓𑀁.

𑁩. 𑀣𑁂𑀭𑁂 𑀘 𑀣𑀺𑀭𑀲𑀻𑀮𑀸𑀤𑀺-𑀕𑀼𑀡𑀸𑀮𑀗𑁆𑀓𑀸𑀭𑀲𑁄𑀪𑀺𑀢𑁂.

𑀲𑀸𑀲𑀦𑀼𑀚𑁆𑀚𑁄𑀢𑀓𑁂 𑀥𑀻𑀭𑁂, 𑀧𑀼𑀩𑁆𑀩𑀓𑁂 𑀯𑀁𑀲𑀧𑀸𑀮𑀓𑁂.

𑁪. 𑀯𑀺𑀲𑀼𑀤𑁆𑀥𑀺𑀤𑁂𑀯𑀤𑁂𑀯𑁄 ¶ 𑀬𑀁, 𑀤𑁂𑀯𑀸𑀦𑀁 𑀢𑀺𑀤𑀲𑀸𑀮𑀬𑁂.

𑀧𑀜𑁆𑀜𑀸𑀬 𑀤𑁂𑀲𑀬𑀻 𑀢𑀲𑁆𑀲, 𑀅𑀪𑀺𑀥𑀫𑁆𑀫𑀲𑁆𑀲 𑀫𑀸𑀢𑀺𑀓𑀸.

𑁫. 𑀬𑀸 𑀢𑀲𑁆𑀲𑀸 𑀯𑀺𑀧𑀼𑀮𑀢𑁆𑀣𑀸𑀬, 𑀥𑀫𑁆𑀫𑀲𑀗𑁆𑀕𑀡𑀺𑀆𑀤𑀺𑀳𑀺.

𑀅𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺, 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀘.

𑁬. 𑀅𑀢𑁆𑀣𑁄 𑀯𑀺𑀦𑀺𑀘𑁆𑀙𑀬𑁄 𑀘𑁂𑀯,

𑀯𑀺𑀪𑀢𑁆𑀢𑁄 𑀲𑀸𑀕𑀭𑀽𑀧𑀫𑁄;

𑀅𑀦𑀦𑁆𑀢𑀦𑀬𑀯𑁄𑀓𑀺𑀡𑁆𑀡𑁄,

𑀤𑀼𑀓𑁆𑀔𑁄𑀕𑀸𑀳𑁄 𑀬𑀢𑁄 𑀢𑀢𑁄.

𑁭. 𑀲𑀫𑀸𑀲𑁂𑀦𑀸𑀪𑀺𑀥𑀫𑁆𑀫𑀢𑁆𑀣𑀁, 𑀫𑀸𑀢𑀺𑀓𑀸𑀫𑀼𑀔𑀢𑁄𑀔𑀺𑀮𑀁.

𑀜𑀸𑀢𑀼𑀓𑀸𑀫𑁂𑀳𑀺 𑀲𑀼𑀤𑁆𑀥𑁂𑀳𑀺, 𑀅𑀦𑁆𑀢𑁂𑀯𑀸𑀲𑀻𑀳𑀺 𑀬𑀸𑀘𑀺𑀢𑁄.

𑁮. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀦 ¶ 𑀦𑀬𑀢𑁄, 𑀧𑀸𑀴𑀺𑀅𑀝𑁆𑀞𑀓𑀣𑀸𑀕𑀢𑀁.

𑀅𑀢𑁆𑀣𑀁 𑀯𑀺𑀦𑀺𑀘𑁆𑀙𑀬𑀜𑁆𑀘𑁂𑀯, 𑀲𑀫𑀸𑀲𑁂𑀦 𑀦𑀺𑀭𑀸𑀓𑀼𑀮𑀁.

𑁯. 𑀲𑀸𑀫𑀢𑁆𑀣𑀺𑀬𑀕𑀢𑀁 𑀅𑀢𑁆𑀣𑀁, 𑀦𑀺𑀓𑀸𑀬𑀦𑁆𑀢𑀭𑀦𑀺𑀲𑁆𑀲𑀝𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀓𑀫𑀸𑀪𑀢𑀦𑀬𑀸𑀦𑀼𑀕𑀁.

𑁧𑁦. 𑀤𑀻𑀧𑀬𑀦𑁆𑀢𑁄 𑀦𑀬𑀜𑁆𑀜𑀽𑀦𑀁, 𑀲𑀤𑀸 𑀲𑀫𑁆𑀫𑁄𑀤𑀓𑀸𑀭𑀺𑀦𑀺𑀁.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀁 𑀦𑀸𑀫, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀦𑁆𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧. 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸

𑀢𑀺𑀓𑀧𑀤𑀢𑁆𑀣𑀯𑀡𑁆𑀡𑀦𑀸

𑀢𑀢𑁆𑀣 ¶ ¶ 𑀅𑀪𑀺𑀥𑀫𑁆𑀫𑀲𑁆𑀲 𑀫𑀸𑀢𑀺𑀓𑀸𑀢𑀺 𑀏𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄? 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦. 𑀅𑀢𑀺𑀭𑁂𑀓𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄 𑀳𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 ‘‘𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺 (𑀲𑀁. 𑀦𑀺. 𑁪.𑁮𑁭; 𑁫.𑁧𑁯𑁫, 𑁧𑁦𑁨𑁨; 𑀫. 𑀦𑀺. 𑁩.𑁩𑁮𑁪, 𑁩𑁮𑁯), 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧; 𑀔𑀼. 𑀧𑀸. 𑁫.𑁧; 𑀲𑀼. 𑀦𑀺. 𑀫𑀗𑁆𑀕𑀮𑀲𑀼𑀢𑁆𑀢; 𑀯𑀺. 𑀯. 𑁮𑁫𑁭) 𑀯𑀺𑀬, 𑀢𑀲𑁆𑀫𑀸 𑀬𑀣𑀸 𑀲𑀫𑀼𑀲𑁆𑀲𑀺𑀢𑁂𑀲𑀼 𑀩𑀳𑀽𑀲𑀼 𑀙𑀢𑁆𑀢𑁂𑀲𑀼 𑀘𑁂𑀯 𑀥𑀚𑁂𑀲𑀼 𑀘 𑀬𑀁 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁, 𑀯𑀺𑀲𑁂𑀲𑀯𑀡𑁆𑀡𑀲𑀡𑁆𑀞𑀸𑀦𑀜𑁆𑀘 𑀙𑀢𑁆𑀢𑀁, 𑀢𑀁 𑀅𑀢𑀺𑀘𑁆𑀙𑀢𑁆𑀢𑀁, 𑀬𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄, 𑀯𑀺𑀲𑁂𑀲𑀯𑀡𑁆𑀡𑀲𑀡𑁆𑀞𑀸𑀦𑁄 𑀘 𑀥𑀚𑁄, 𑀲𑁄 𑀅𑀢𑀺𑀤𑁆𑀥𑀚𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑀸 𑀳𑀺 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀓𑀸𑀭𑀸𑀤𑀬𑁄 𑀥𑀫𑁆𑀫𑀸 𑀏𑀓𑀤𑁂𑀲𑁂𑀦 𑀯𑀺𑀪𑀢𑁆𑀢𑀸, 𑀦 𑀦𑀺𑀧𑁆𑀧𑀤𑁂𑀲𑁂𑀦, 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 𑀅𑀦𑁂𑀓𑁂𑀳𑀺 𑀦𑀬𑀯𑀺𑀲𑁂𑀲𑁂𑀳𑀺 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀸. 𑀏𑀯𑀁 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑁂𑀦𑀝𑁆𑀞𑁂𑀦 𑀫𑀸𑀢𑀺𑀓𑀸? 𑀫𑀸𑀢𑀼𑀲𑀫𑀝𑁆𑀞𑁂𑀦. 𑀫𑀸𑀢𑀸 𑀯𑀺𑀬𑀸𑀢𑀺 𑀳𑀺 𑀫𑀸𑀢𑀺𑀓𑀸 𑀬𑀣𑀸 𑀧𑀤𑀼𑀫𑀺𑀓𑀁 𑀫𑀼𑀔𑀦𑁆𑀢𑀺. 𑀬𑀣𑀸 𑀳𑀺 𑀫𑀸𑀢𑀸 𑀦𑀸𑀦𑀸𑀯𑀺𑀥𑁂 𑀧𑀼𑀢𑁆𑀢𑁂 𑀧𑀲𑀯𑀢𑀺, 𑀢𑁂 𑀧𑀸𑀮𑁂𑀢𑀺, 𑀧𑁄𑀲𑁂𑀢𑀺 𑀘, 𑀏𑀯𑀫𑀬𑀫𑁆𑀧𑀺 𑀦𑀸𑀦𑀸𑀯𑀺𑀥𑁂 𑀥𑀫𑁆𑀫𑁂, 𑀅𑀢𑁆𑀣𑁂 𑀘 𑀧𑀲𑀯𑀢𑀺, 𑀢𑁂 𑀘 𑀅𑀯𑀺𑀦𑀲𑁆𑀲𑀫𑀸𑀦𑁂 𑀧𑀸𑀮𑁂𑀢𑀺, 𑀧𑁄𑀲𑁂𑀢𑀺 𑀘, 𑀢𑀲𑁆𑀫𑀸 ‘‘𑀫𑀸𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀫𑀸𑀢𑀺𑀓𑀁 𑀳𑀺 𑀦𑀺𑀲𑁆𑀲𑀸𑀬 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀺𑀲𑀢𑁆𑀢𑀧𑁆𑀧𑀓𑀭𑀡𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸 𑀥𑀫𑁆𑀫𑀸, 𑀅𑀢𑁆𑀣𑀸 𑀘 𑀢𑀸𑀬 𑀧𑀲𑀼𑀢𑀸, 𑀧𑀸𑀮𑀺𑀢𑀸, 𑀧𑁄𑀲𑀺𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀧𑁆𑀧𑀓𑀭𑀡𑁂 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀭𑀽𑀧𑀯𑀺𑀪𑀢𑁆𑀢𑀺 𑀦𑀺𑀓𑁆𑀔𑁂𑀧𑀭𑀸𑀲𑀺 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 ¶ . 𑀢𑀢𑁆𑀣 𑀦𑀸𑀦𑀸𑀦𑀬𑁂𑀳𑀺 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀯𑀺𑀪𑀸𑀯𑀺𑀦𑀻 ¶ 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀏𑀓𑀯𑀺𑀥𑀸𑀤𑀺𑀦𑀸 𑀭𑀽𑀧𑀯𑀺𑀪𑀸𑀯𑀺𑀦𑀻 𑀭𑀽𑀧𑀯𑀺𑀪𑀢𑁆𑀢𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀫𑀽𑀮𑀔𑀦𑁆𑀥𑀤𑁆𑀯𑀸𑀭𑀸𑀤𑀻𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑁄 𑀦𑀺𑀓𑁆𑀔𑁂𑀧𑀭𑀸𑀲𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑁄 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀝𑁆𑀞𑀓𑀣𑀸𑀪𑀽𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑁄 𑀳𑁄𑀢𑀺. 𑀏𑀯𑀫𑀺𑀤𑀁 𑀥𑀫𑁆𑀫𑀲𑀗𑁆𑀕𑀡𑀺𑀧𑁆𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀢𑁂𑀭𑀲𑀫𑀢𑁆𑀢𑀪𑀸𑀡𑀯𑀸𑀭𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀅𑀧𑁆𑀧𑀫𑀜𑁆𑀜𑀸𑀲𑀺𑀓𑁆𑀔𑀸𑀧𑀤𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀔𑀼𑀤𑁆𑀤𑀓𑀯𑀢𑁆𑀣𑀼𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀸𑀢𑀺 𑀅𑀝𑁆𑀞𑀸𑀭𑀲 𑀯𑀺𑀪𑀗𑁆𑀕𑀸 𑀯𑀺𑀪𑀢𑁆𑀢𑀸, 𑀢𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀸𑀤𑀺𑀦𑀸𑀦𑀸𑀦𑀬𑁂𑀳𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀧𑀘𑁆𑀘𑁂𑀓𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀦𑁆𑀢𑀺. 𑀏𑀯𑀫𑀺𑀤𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀜𑁆𑀘𑀢𑀺𑀁𑀲𑀫𑀢𑁆𑀢𑀪𑀸𑀡𑀯𑀸𑀭𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀥𑀸𑀢𑀼𑀓𑀣𑀸𑀧𑀓𑀭𑀡𑀁 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀦𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀙𑀪𑀸𑀡𑀯𑀸𑀭𑀫𑀢𑁆𑀢𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑁆𑀧𑀓𑀭𑀡𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀙𑀩𑁆𑀩𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀧𑀜𑁆𑀘𑀪𑀸𑀡𑀯𑀸𑀭𑀫𑀢𑁆𑀢𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 ¶ 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺, 𑀧𑀭𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀲𑀗𑁆𑀕𑀻𑀢𑀺𑀆𑀭𑁄𑀧𑀺𑀢𑀦𑀬𑁂𑀦 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀬𑀫𑀓𑀧𑁆𑀧𑀓𑀭𑀡𑀁 𑀫𑀽𑀮𑀬𑀫𑀓𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀲𑀗𑁆𑀔𑀸𑀭𑀅𑀦𑀼𑀲𑀬𑀘𑀺𑀢𑁆𑀢𑀥𑀫𑁆𑀫𑀇𑀦𑁆𑀤𑁆𑀭𑀺𑀬𑀬𑀫𑀓𑀦𑁆𑀢𑀺 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀯𑀻𑀲𑀪𑀸𑀡𑀯𑀸𑀭𑀲𑀢𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑀁 ¶ 𑀳𑁂𑀢𑀼𑀧𑀘𑁆𑀘𑀬𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑁂 𑀕𑀳𑁂𑀢𑁆𑀯𑀸 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀘𑀢𑀼𑀯𑀻𑀲𑀢𑀺𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀧𑀘𑁆𑀘𑁂𑀓𑀁 𑀓𑀢𑀺𑀧𑀬𑀪𑀸𑀡𑀯𑀸𑀭𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺. 𑀏𑀯𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀢𑁆𑀣𑀸𑀦𑀜𑁆𑀘 𑀧𑀲𑀯𑀦𑀢𑁄, 𑀧𑀸𑀮𑀦𑀢𑁄, 𑀧𑁄𑀲𑀦𑀢𑁄 𑀘 ‘‘𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀮𑀦𑀧𑁄𑀲𑀦𑀜𑁆𑀘𑁂𑀢𑁆𑀣 𑀲𑀫𑁆𑀫𑀼𑀝𑁆𑀞𑀸𑀦𑀁, 𑀯𑀺𑀭𑀤𑁆𑀥𑀸𑀦𑀜𑁆𑀘 𑀧𑀸𑀴𑀺𑀅𑀢𑁆𑀣𑀸𑀦𑀁 𑀫𑀸𑀢𑀺𑀓𑀸𑀦𑀼𑀲𑀸𑀭𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑀸𑀦𑀬𑀦𑀢𑁄, 𑀭𑀓𑁆𑀔𑀡𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀧𑀦𑀸𑀬𑀁 𑀧𑀭𑀺𑀘𑁆𑀙𑁂𑀤𑀢𑁄 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸 𑀯𑀺𑀪𑀗𑁆𑀕𑀫𑀸𑀢𑀺𑀓𑀸 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸 𑀬𑀫𑀓𑀫𑀸𑀢𑀺𑀓𑀸 𑀧𑀝𑁆𑀞𑀸𑀦𑀫𑀸𑀢𑀺𑀓𑀸𑀢𑀺 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑀸 𑀲𑀢𑁆𑀢𑀯𑀺𑀥𑀸 𑀳𑁄𑀢𑀺.

𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸 𑀆𑀤𑀺, 𑀲𑀸𑀧𑀺 𑀢𑀺𑀓𑀫𑀸𑀢𑀺𑀓𑀸 𑀤𑀼𑀓𑀫𑀸𑀢𑀺𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀢𑀺𑀓𑀫𑀸𑀢𑀺𑀓𑀸 𑀦𑀸𑀫. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀲𑀢𑀤𑀼𑀓𑀸 𑀤𑀼𑀓𑀫𑀸𑀢𑀺𑀓𑀸 𑀦𑀸𑀫, 𑀲𑀸 𑀧𑀼𑀦 𑀆𑀳𑀘𑁆𑀘𑀪𑀸𑀲𑀺𑀢𑀸 𑀲𑀸𑀯𑀓𑀪𑀸𑀲𑀺𑀢𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀘𑁂𑀯, ‘‘𑀳𑁂𑀢𑀽 𑀥𑀫𑁆𑀫𑀸 𑀦 𑀳𑁂𑀢𑀽 𑀥𑀫𑁆𑀫𑀸…𑀧𑁂… 𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸’’𑀢𑀺 𑀇𑀫𑁂 𑀘 𑀲𑀢𑀁 ¶ 𑀤𑀼𑀓𑀸𑀢𑀺 𑀅𑀬𑀁 𑀆𑀳𑀘𑁆𑀘𑀪𑀸𑀲𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀸 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀫𑀸𑀢𑀺𑀓𑀸 𑀦𑀸𑀫, 𑀢𑀤𑀦𑀦𑁆𑀢𑀭𑀸 ‘‘𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸…𑀧𑁂… 𑀔𑀬𑁂𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂𑀜𑀸𑀡’’𑀦𑁆𑀢𑀺 𑀇𑀫𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀞𑀧𑀺𑀢𑀢𑁆𑀢𑀸 𑀲𑀸𑀯𑀓𑀪𑀸𑀲𑀺𑀢𑀸 𑀦𑀸𑀫. 𑀇𑀫𑁂 𑀞𑀧𑁂𑀦𑁆𑀢𑁄 𑀧𑀦 𑀣𑁂𑀭𑁄 𑀦 𑀲𑀸𑀫𑀼𑀓𑁆𑀓𑀁𑀲𑀺𑀓𑁂𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀞𑀧𑁂𑀲𑀺, 𑀏𑀓𑀼𑀢𑁆𑀢𑀭𑀺𑀬𑀁 𑀧𑀦 𑀏𑀓𑀓𑀦𑀺𑀧𑀸𑀢𑀤𑀼𑀓𑀦𑀺𑀧𑀸𑀢𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂𑀳𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸𑀦𑀁 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀅𑀓𑀺𑀮𑀫𑀦𑀢𑁆𑀣𑀁 𑀞𑀧𑁂𑀲𑀺.

𑀲𑀸 𑀧𑀼𑀦 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀳𑀺 𑀦𑀯 𑀢𑀺𑀓𑀸, 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀲𑀧𑁆𑀧𑀤𑁂𑀲𑀸𑀦𑀁 𑀲𑀸𑀯𑀲𑁂𑀲𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀧𑁆𑀧𑀤𑁂𑀲𑀸 𑀦𑀸𑀫, 𑀅𑀯𑀲𑁂𑀲𑀸 𑀢𑁂𑀭𑀲 𑀢𑀺𑀓𑀸, 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀦𑀺𑀧𑁆𑀧𑀤𑁂𑀲𑀸𑀦𑀁 𑀦𑀺𑀭𑀯𑀲𑁂𑀲𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀕𑀳𑀺𑀢𑀢𑁆𑀢𑀸 𑀦𑀺𑀧𑁆𑀧𑀤𑁂𑀲𑀸 𑀦𑀸𑀫. 𑀢𑁂𑀲𑀁 𑀯𑀺𑀪𑀸𑀕𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀣𑀸 𑀦𑀸𑀫𑀮𑀸𑀪𑀯𑀲𑁂𑀦 𑀤𑁆𑀯𑀺𑀥𑀸. 𑀲𑀩𑁆𑀩𑁂𑀯 𑀳𑀺 𑀏𑀢𑁂 𑀢𑀺𑀓𑀤𑀼𑀓𑀸 𑀆𑀤𑀺𑀧𑀤𑀯𑀲𑁂𑀦, 𑀲𑀩𑁆𑀩𑀧𑀤𑀯𑀲𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀦𑀸𑀫𑀁 𑀮𑀪𑀦𑁆𑀢𑀺. 𑀢𑀢𑁆𑀣 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀢𑀸𑀯 𑀆𑀤𑀺𑀧𑀤𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀓𑀼𑀲𑀮𑀢𑁆𑀢𑀺𑀓𑁄 𑀦𑀸𑀫. ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸…𑀧𑁂… 𑀥𑀫𑁆𑀫𑀸’’𑀢𑀺 𑀅𑀬𑀁 𑀲𑀩𑁆𑀩𑀧𑀤𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀯𑁂𑀤𑀦𑀸𑀢𑁆𑀢𑀺𑀓𑁄 𑀦𑀸𑀫. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀓𑀤𑀼𑀓𑀸𑀦𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸 𑀧𑀦𑁂𑀲𑀸 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸. 𑀢𑀺𑀓𑀸𑀦𑀁 𑀳𑀺 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄, 𑀤𑀼𑀓𑀸𑀦𑀁 𑀘𑀼𑀤𑁆𑀤𑀲 ¶ . ‘‘𑀳𑁂𑀢𑀽 𑀥𑀫𑁆𑀫𑀸 𑀦𑀳𑁂𑀢𑀽 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀳𑀺 𑀙 𑀤𑀼𑀓𑀸 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀓𑀡𑁆𑀡𑀺𑀓𑀸 𑀯𑀺𑀬, 𑀖𑀝𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀳𑁂𑀢𑀼𑀕𑁄𑀘𑁆𑀙𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀅𑀧𑀭𑁂 ‘‘𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀲𑀢𑁆𑀢 𑀤𑀼𑀓𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀩𑀦𑁆𑀥𑀸 ¶ 𑀓𑁂𑀯𑀮𑀁 𑀤𑀼𑀓𑀲𑀸𑀫𑀜𑁆𑀜𑁂𑀦 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑁄𑀘𑁆𑀙𑀓𑀦𑁆𑀢𑀭𑁂 𑀞𑀧𑀺𑀢𑀢𑁆𑀢𑀸, 𑀅𑀜𑁆𑀜𑁂𑀳𑀺 𑀘 𑀅𑀦𑁆𑀢𑀭𑀤𑀼𑀓𑁂𑀳𑀺 𑀘𑀽𑀴𑀓𑀢𑁆𑀢𑀸 ‘‘𑀘𑀽𑀴𑀦𑁆𑀢𑀭𑀤𑀼𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀭𑀁 𑀆𑀲𑀯𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀤𑀼𑀓𑀸𑀦𑀁 𑀯𑀲𑁂𑀦 𑀆𑀲𑀯𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀲𑀁𑀬𑁄𑀚𑀦𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀯𑀲𑁂𑀦 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀣𑀸 𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁂𑀦 𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀕𑁄𑀘𑁆𑀙𑀓𑀸 𑀦𑀸𑀫. 𑀧𑀭𑀸𑀫𑀸𑀲𑀤𑀼𑀓𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀲𑁂𑀦 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀧𑀭𑀁 𑀲𑀸𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀘𑀢𑀼𑀤𑁆𑀤𑀲 𑀤𑀼𑀓𑀸 𑀫𑀳𑀦𑁆𑀢𑀭𑀤𑀼𑀓𑀸 𑀦𑀸𑀫. 𑀢𑀢𑁄 𑀧𑀭𑀁 𑀉𑀧𑀸𑀤𑀸𑀦𑀤𑀼𑀓𑀸𑀤𑀬𑁄 𑀙 𑀤𑀼𑀓𑀸 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀓𑀺𑀮𑁂𑀲𑀤𑀼𑀓𑀸𑀤𑀬𑁄 𑀅𑀝𑁆𑀞𑀤𑀼𑀓𑀸 𑀓𑀺𑀮𑁂𑀲𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀧𑀭𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀤𑀼𑀓𑀸𑀤𑀬𑁄 𑀅𑀝𑁆𑀞𑀸𑀭𑀲 𑀤𑀼𑀓𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬 𑀧𑀭𑀺𑀬𑁄𑀲𑀸𑀦𑁂 𑀞𑀧𑀺𑀢𑀢𑁆𑀢𑀸 𑀧𑀺𑀝𑁆𑀞𑀺𑀤𑀼𑀓𑀸 𑀦𑀸𑀫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀤𑀼𑀓𑀸𑀤𑀬𑁄 𑀧𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀤𑀼𑀓𑀸 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀦𑀸𑀫. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸𑀬 𑀢𑀸𑀯 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀺.

𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀢𑀺𑀓𑀫𑀸𑀢𑀺𑀓𑀸 𑀆𑀤𑀺, 𑀢𑀢𑁆𑀣𑀸𑀧𑀺 𑀓𑀼𑀲𑀮𑀢𑁆𑀢𑀺𑀓𑁄 𑀆𑀤𑀺, 𑀢𑀲𑁆𑀫𑀸 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀢𑀸𑀯 𑁋

𑀅𑀢𑁆𑀣𑀢𑁄 𑀪𑀽𑀫𑀺𑀪𑁂𑀤𑀸 𑀘, 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄;

𑀉𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀸𑀦𑀁, 𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄.

𑀲𑀗𑁆𑀕𑀳𑀸 𑀲𑀼𑀜𑁆𑀜𑀢𑁄 𑀘𑁂𑀯, 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄;

𑀬𑀣𑀸𑀦𑀼𑀭𑀽𑀧𑀁 𑀲𑀩𑁆𑀩𑀢𑁆𑀣, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀅𑀢𑁆𑀣𑀢𑁄 𑀢𑀸𑀯 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀓𑀼𑀲𑀮𑀲𑀤𑁆𑀤𑁄 𑀆𑀭𑁄𑀕𑁆𑀬𑀸𑀦𑀯𑀚𑁆𑀚𑀙𑁂𑀓𑀲𑀼𑀔𑀯𑀺𑀧𑀸𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ¶ ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁨𑁪𑁬; 𑁨.𑁨𑁦.𑁧𑁨𑁯) 𑀆𑀭𑁄𑀕𑁆𑀬𑁂 𑀤𑀺𑀲𑁆𑀲𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀫𑀸𑀘𑀸𑀭𑁄 𑀓𑀼𑀲𑀮𑁄 ¶ ? 𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁬𑁧) 𑀅𑀦𑀯𑀚𑁆𑀚𑁂. ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁮𑁭) 𑀙𑁂𑀓𑁂. ‘‘𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁩𑁧) 𑀲𑀼𑀔𑀯𑀺𑀧𑀸𑀓𑁂. 𑀲𑁆𑀯𑀸𑀬𑀫𑀺𑀥 𑀆𑀭𑁄𑀕𑁆𑀬𑁂𑀧𑀺 𑀅𑀦𑀯𑀚𑁆𑀚𑁂𑀧𑀺 𑀲𑀼𑀔𑀯𑀺𑀧𑀸𑀓𑁂𑀧𑀺 𑀯𑀢𑁆𑀢𑀢𑀺. 𑀬𑀣𑁂𑀯 𑀳𑀺 𑀭𑀽𑀧𑀓𑀸𑀬𑁂 𑀦𑀺𑀩𑁆𑀬𑀸𑀥𑀺𑀢𑀸𑀬 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀭𑀽𑀧𑀥𑀫𑁆𑀫𑁂𑀧𑀺 𑀓𑀺𑀮𑁂𑀲𑀩𑁆𑀬𑀸𑀥𑀺𑀦𑁄 𑀅𑀪𑀸𑀯𑁂𑀦 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀯𑀚𑁆𑀚𑀲𑁆𑀲 𑀧𑀦 𑀅𑀪𑀸𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁.

𑀥𑀫𑁆𑀫-𑀲𑀤𑁆𑀤𑁄 𑀧𑀦𑀸𑀬𑀁 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀕𑀼𑀡𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ‘‘𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁨) 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀳𑁂𑀢𑀼𑀫𑁆𑀳𑀺. ‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁩𑁦𑁪) 𑀕𑀼𑀡𑁂. ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩) 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀁, 𑀲𑁆𑀯𑀸𑀬𑀫𑀺𑀥𑀸𑀧𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀫𑁂𑀯 𑀯𑀝𑁆𑀝𑀢𑀺.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀘𑀮𑀬𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀢𑁂 𑀓𑀼𑀲𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀓𑀼𑀲𑀮𑀸. 𑀅𑀣 𑀯𑀸 𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀢𑁄 𑀓𑁄𑀲𑀮𑁆𑀮𑀢𑁄 𑀲𑀫𑁆𑀪𑀽𑀢𑀢𑁆𑀢𑀸 𑀓𑀼𑀲𑀮𑀸. 𑀇𑀤𑀁 𑀧𑀦 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀜𑁆𑀘𑀸𑀢𑀺 𑀦𑀺𑀩𑁆𑀩𑀘𑀦𑀤𑁆𑀯𑀬𑀁 𑀓𑀺𑀜𑁆𑀘𑀸𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯 ¶ 𑀬𑀼𑀚𑁆𑀚𑀢𑀺, 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀯𑀸 𑀓𑀼𑀲𑀸 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑁆𑀧𑀤𑁂𑀲𑀁 𑀮𑀼𑀦𑀦𑁆𑀢𑀺, 𑀏𑀯𑀫𑀺𑀫𑁂𑀧𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀅𑀢𑁆𑀢𑀦𑁄 𑀧𑀦 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸, 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀧𑀘𑁆𑀘𑀬𑁂𑀳𑀺, 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀬𑀣𑀸𑀲𑀪𑀸𑀯𑀢𑁄 𑀆𑀥𑀸𑀭𑀻𑀬𑀦𑁆𑀢𑀻𑀢𑀺𑀧𑀺 𑀥𑀫𑁆𑀫𑀸. 𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀩𑁆𑀬𑀸𑀓𑀢𑀸, 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀓𑀼𑀲𑀮𑀸, 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀓𑀼𑀲𑀮𑀸, 𑀅𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀁 𑀧𑀦𑁂𑀢𑀸𑀦𑀺 𑀓𑀼𑀲𑀮𑀸𑀢𑀺 𑀯𑀸 𑀥𑀫𑁆𑀫𑀸𑀢𑀺 𑀯𑀸𑀢𑀺𑀆𑀤𑀻𑀦𑀺 𑀏𑀓𑀢𑁆𑀣𑀸𑀦𑀺, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸𑀦𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣 ¶ 𑀬𑀤𑀺 𑀢𑀸𑀯 𑀏𑀓𑀢𑁆𑀣𑀸𑀦𑀺, ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀇𑀤𑀁 ‘‘𑀓𑀼𑀲𑀮𑀸 𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀅𑀣 𑀦𑀸𑀦𑀢𑁆𑀣𑀸𑀦𑀺, 𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄 ‘‘𑀓𑀼𑀲𑀮𑀸 𑀭𑀽𑀧𑀁 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀻𑀦𑀁 𑀯𑀺𑀬. 𑀅𑀣𑀸𑀧𑀺 𑀬𑀤𑀺 𑀏𑀢𑀸𑀦𑀺 𑀏𑀓𑀢𑁆𑀣𑀸𑀦𑀺, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀤𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀥𑀫𑁆𑀫𑀸𑀦𑀁 𑀥𑀫𑁆𑀫𑀲𑀪𑀸𑀯𑁂𑀦 𑀏𑀓𑀢𑁆𑀢𑀸 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀅𑀣 ‘‘𑀓𑀼𑀲𑀮𑀧𑀤𑀢𑁄 𑀅𑀓𑀼𑀲𑀮𑀸𑀤𑀺𑀧𑀤𑀲𑁆𑀲 𑀅𑀜𑁆𑀜𑀢𑁆𑀢𑀁 𑀲𑀺𑀬𑀸’’𑀢𑀺 𑀯𑀤𑀣, 𑀦 𑀏𑀢𑀸𑀦𑀺 𑀏𑀓𑀢𑁆𑀣𑀸𑀦𑀺. 𑀢𑀤𑀸 𑀥𑀫𑁆𑀫𑁄 𑀦𑀸𑀫 𑀪𑀸𑀯𑁄. 𑀪𑀸𑀯𑀢𑁄 𑀘 𑀅𑀜𑁆𑀜𑁄 𑀅𑀪𑀸𑀯𑁄𑀢𑀺. 𑀏𑀯𑀁 𑀅𑀜𑁆𑀜𑁄𑀜𑁆𑀜𑀸𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁆𑀢𑀫𑀸𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀬𑁄𑀧𑀺 𑀅𑀪𑀸𑀯𑀸 𑀏𑀯 𑀲𑀺𑀬𑀼𑀦𑁆𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁, 𑀓𑀲𑁆𑀫𑀸? 𑀬𑀣𑀸𑀦𑀼𑀫𑀢𑀺𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄, 𑀦 𑀳𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀬𑀣𑀸 𑀓𑀼𑀲𑀮𑀸 𑀓𑀼𑀲𑀮𑀸𑀢𑀺, 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀦 𑀧𑀡𑁆𑀟𑀺𑀢𑁂𑀳𑀺 ¶ 𑀅𑀦𑀼𑀫𑀢𑀸𑀦𑀺, 𑀦𑀸𑀧𑀺 𑀓𑀼𑀲𑀮𑀸 𑀭𑀽𑀧𑀁 𑀘𑀓𑁆𑀔𑀼𑀫𑀸-𑀲𑀤𑁆𑀤𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀮𑁄𑀓𑀺𑀢𑀢𑁆𑀣𑀪𑀸𑀯𑁂𑀦, 𑀅𑀣 𑀔𑁄 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀢𑁆𑀢𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲, 𑀲𑀪𑀸𑀯𑀲𑀸𑀥𑀸𑀭𑀡𑀸𑀤𑀺𑀅𑀢𑁆𑀣𑀲𑀸𑀫𑀜𑁆𑀜𑀲𑁆𑀲 𑀘 𑀚𑁄𑀢𑀓𑀢𑁆𑀢𑁂𑀦 𑀬𑀣𑀸𑀓𑁆𑀓𑀫𑀁 𑀅𑀦𑀼𑀫𑀢𑀸𑀦𑀺. 𑀓𑀼𑀲𑀮-𑀲𑀤𑁆𑀤𑁄 𑀳𑀺 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀧𑀼𑀭𑀢𑁄 𑀯𑀼𑀘𑁆𑀘𑀫𑀸𑀦𑁄 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀲𑀩𑁆𑀩𑀲𑀸𑀥𑀸𑀭𑀡𑀲𑀸𑀫𑀜𑁆𑀜𑀢𑁆𑀣𑀤𑀻𑀧𑀓𑀁 𑀥𑀫𑁆𑀫-𑀲𑀤𑁆𑀤𑀁 𑀅𑀓𑀼𑀲𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀢𑁆𑀣𑀤𑀻𑀧𑀓𑀁 𑀓𑀭𑁄𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀁 𑀪𑀺𑀦𑁆𑀦𑀯𑀺𑀲𑀬𑀸𑀦𑀫𑁆𑀧𑀺 𑀦𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁 𑀏𑀓𑀢𑁆𑀣𑀢𑀸𑀬 𑀧𑀡𑁆𑀟𑀺𑀢𑀸𑀦𑀼𑀫𑀢𑀢𑀸𑀬 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀭𑁄𑀧𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀏𑀯𑀁 𑀢𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀢𑁄 𑀜𑀸𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀼𑀲𑀮𑀧𑀤𑀢𑁆𑀣𑁄

𑀪𑀽𑀫𑀺𑀪𑁂𑀤𑀸𑀢𑀺 𑀢𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀼𑀲𑀮𑀸 𑀢𑀸𑀯 𑀥𑀫𑁆𑀫𑀸 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑁋 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀮𑁄𑀓𑀼𑀢𑁆𑀢𑀭𑀸𑀢𑀺. 𑀅𑀬𑀁 𑀪𑀽𑀫𑀺𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀫𑁆𑀧𑀬𑁄𑀕𑀢𑁄𑀢𑀺 𑀏𑀯𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀫𑁆𑀧𑀺 𑀦𑁂𑀲𑀁 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀸 𑀢𑀸𑀯 𑀲𑀫𑁆𑀧𑀬𑁄𑀕𑀢𑁄 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁? 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀦𑁆𑀢𑀺. 𑀢𑀢𑁆𑀣 𑀇𑀝𑁆𑀞𑀸𑀭𑀫𑁆𑀫𑀡𑀢𑀸, 𑀲𑀤𑁆𑀥𑀸𑀩𑀸𑀳𑀼𑀮𑁆𑀮𑀢𑀸, 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸, 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸 𑀘 𑀏𑀓𑀸𑀤𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀓𑀸𑀭𑀡𑀸𑀦𑀺 𑀘𑀸𑀢𑀺 ¶ 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀜𑀸𑀡𑀲𑀫𑁆𑀧𑀢𑁆𑀢𑀺𑀁 𑀧𑀦 ¶ 𑀧𑀢𑁆𑀣𑁂𑀢𑁆𑀯𑀸 𑀓𑀢𑀓𑀫𑁆𑀫𑀢𑁄, 𑀩𑁆𑀭𑀳𑁆𑀫𑀸𑀤𑀺𑀉𑀧𑀧𑀢𑁆𑀢𑀺𑀢𑁄, 𑀧𑀜𑁆𑀜𑀸𑀤𑀲𑀓𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄, 𑀯𑀺𑀓𑁆𑀔𑀫𑁆𑀪𑀦𑁂𑀦 𑀓𑀺𑀮𑁂𑀲𑀤𑀽𑀭𑀺𑀪𑀸𑀯𑀢𑁄 𑀘 𑀲𑀢𑁆𑀢𑀯𑀺𑀥𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀓𑀸𑀭𑀡𑀢𑁄 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀯𑀲𑁂𑀦 𑀧𑀯𑀢𑁆𑀢𑁄 𑀧𑀼𑀩𑁆𑀩𑀧𑀬𑁄𑀕𑁄 𑀲𑀗𑁆𑀔𑀸𑀭𑁄 𑀦𑀸𑀫.

𑀢𑁂𑀦 𑀉𑀧𑁆𑀧𑀦𑁆𑀦𑀁 𑀲𑀲𑀗𑁆𑀔𑀸𑀭𑀁, 𑀢𑀤𑀪𑀸𑀯𑀸 𑀅𑀲𑀗𑁆𑀔𑀸𑀭𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀳𑀺 𑀬𑀣𑀸𑀯𑀼𑀢𑁆𑀢𑀲𑁄𑀫𑀦𑀲𑁆𑀲𑀜𑀸𑀡𑀳𑁂𑀢𑀼𑀁 𑀆𑀕𑀫𑁆𑀫 𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀲𑀁𑀲𑀻𑀤𑀦𑁆𑀢𑁄, 𑀧𑀭𑁂𑀳𑀺 𑀘 𑀅𑀦𑀼𑀲𑁆𑀲𑀸𑀳𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀫𑀼𑀢𑁆𑀢𑀘𑀸𑀕𑀺𑀢𑀸𑀤𑀺𑀯𑀲𑁂𑀦 𑀲𑀁𑀲𑀻𑀤𑀫𑀸𑀦𑁄, 𑀅𑀢𑁆𑀢𑀦𑁄 𑀧𑀝𑀺𑀲𑀗𑁆𑀔𑀸𑀭𑁂𑀦 𑀯𑀸 𑀧𑀭𑁂𑀳𑀺 𑀯𑀸 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀤𑁂𑀯 𑀲𑀲𑀗𑁆𑀔𑀸𑀭𑀁 𑀤𑀼𑀢𑀺𑀬𑀁 𑀓𑀼𑀲𑀮𑀁 𑀳𑁄𑀢𑀺. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀤𑀸𑀭𑀓𑀸𑀤𑀬𑁄 𑀪𑀺𑀓𑁆𑀔𑀼𑀆𑀤𑀺𑀤𑀲𑁆𑀲𑀦𑁂𑀦 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀤𑀸𑀦𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀤𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀜𑀸𑀢𑀺𑀆𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀢𑀤𑁂𑀯 𑀘𑀢𑀼𑀢𑁆𑀣𑀁 𑀲𑀲𑀗𑁆𑀔𑀸𑀭𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀤𑀸 𑀧𑀦 𑀲𑁄𑀫𑀦𑀲𑁆𑀲𑀳𑁂𑀢𑀼𑀦𑁄 𑀅𑀪𑀸𑀯𑁂𑀦 𑀯𑀺𑀲𑀼𑀁 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀓𑀼𑀲𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀸𑀦𑀦𑁆𑀢𑀺 𑀏𑀯𑀁 𑀲𑀫𑁆𑀧𑀬𑁄𑀕𑀢𑁄 𑀅𑀝𑁆𑀞𑀯𑀺𑀥𑁂𑀲𑀼 𑀓𑀼𑀲𑀮𑁂𑀲𑀼 𑀧𑀘𑁆𑀘𑁂𑀓𑀁 𑀥𑀫𑁆𑀫𑀸𑀦𑀁 𑀉𑀤𑁆𑀤𑁂𑀲𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑀓𑀼𑀲𑀮𑁂 𑀢𑀸𑀯 𑀧𑀸𑀴𑀺𑀬𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲 𑀥𑀫𑁆𑀫𑀸, 𑀬𑁂𑀯𑀸𑀧𑀦𑀓𑀸 𑀦𑀯𑀸𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 ¶ 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀯𑀻𑀭𑀺𑀬𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀁 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺 𑀇𑀫𑁂 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲𑀥𑀫𑁆𑀫𑀸. 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀻𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀦𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑁂 ¶ 𑀧𑀦 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀩𑀮𑀁 𑀲𑀢𑀺𑀩𑀮𑀁 𑀲𑀫𑀸𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀁 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧) 𑁋

𑀏𑀯𑀁 𑀲𑀭𑀽𑀧𑀢𑁄 𑀉𑀤𑁆𑀤𑀺𑀝𑁆𑀞𑀸 𑀙𑀧𑀜𑁆𑀜𑀸𑀲 𑀥𑀫𑁆𑀫𑀸 ‘‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 ¶ (𑀥. 𑀲. 𑁧) 𑀏𑀯𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀉𑀤𑁆𑀤𑀺𑀝𑁆𑀞𑀸, 𑀅𑀝𑁆𑀞𑀓𑀣𑀸𑀬𑀁 𑀘𑀲𑁆𑀲𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀆𑀕𑀢𑁂 𑀕𑀳𑁂𑀢𑁆𑀯𑀸 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀝𑁆𑀞𑀸 𑀙𑀦𑁆𑀤𑀸𑀤𑀬𑁄 𑀦𑀯𑀸𑀢𑀺 𑀧𑀜𑁆𑀘𑀲𑀝𑁆𑀞𑀺 𑀥𑀫𑁆𑀫𑀸 𑀆𑀕𑀢𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀼 𑀲𑀭𑀽𑀧𑁂𑀦 𑀆𑀕𑀢𑀸 𑀛𑀸𑀦𑀗𑁆𑀕𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀗𑁆𑀕𑀩𑀮𑀫𑀽𑀮𑀸𑀤𑀻𑀦𑀁 𑀯𑀲𑁂𑀦 𑀏𑀓𑀲𑁆𑀲𑁂𑀯 𑀩𑀳𑀼𑀓𑀺𑀘𑁆𑀘𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀙𑀧𑀜𑁆𑀜𑀸𑀲𑀯𑀺𑀥𑁂𑀦 𑀤𑁂𑀲𑀺𑀢𑀸𑀧𑀺 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀬𑀣𑀸𑀯𑀼𑀢𑁆𑀢𑀸 𑀲𑀫𑀢𑀺𑀁𑀲𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑁂 𑀧𑀦 𑀲𑀯𑀺𑀪𑀢𑁆𑀢𑀺𑀓𑀸 𑀅𑀯𑀺𑀪𑀢𑁆𑀢𑀺𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀨𑀲𑁆𑀲𑀸𑀤𑀬𑁄 𑀅𑀝𑁆𑀞𑀸𑀭𑀲 𑀏𑀓𑀓𑀢𑁆𑀢𑀸 𑀅𑀯𑀺𑀪𑀢𑁆𑀢𑀺𑀓𑀸. 𑀯𑁂𑀤𑀦𑀸𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀅𑀝𑁆𑀞𑀢𑀺𑀁𑀲𑀧𑁆𑀧𑀪𑁂𑀤𑁂𑀦 𑀬𑀣𑀸𑀬𑁄𑀕𑀁 𑀯𑀺𑀪𑀢𑁆𑀢𑀢𑁆𑀢𑀸 𑀲𑀯𑀺𑀪𑀢𑁆𑀢𑀺𑀓𑀸, 𑀬𑁂𑀯𑀸𑀧𑀦𑀓𑀸 𑀧𑀦 𑀅𑀯𑀺𑀪𑀢𑁆𑀢𑀺𑀓𑀸 𑀏𑀯. 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸𑀯 𑀳𑁄𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

𑀨𑀲𑁆𑀲𑀸𑀤𑀺𑀧𑀜𑁆𑀘𑀓𑀁 𑀧𑀜𑁆𑀘𑀛𑀸𑀦𑀗𑁆𑀕𑀸𑀦𑀺𑀦𑁆𑀤𑁆𑀭𑀺𑀬𑀝𑁆𑀞𑀓𑀁;

𑀫𑀕𑁆𑀕𑀗𑁆𑀕𑀧𑀜𑁆𑀘𑀓𑀁 𑀲𑀢𑁆𑀢𑀩𑀮𑀁 𑀫𑀽𑀮𑀢𑁆𑀢𑀺𑀓𑀫𑁆𑀧𑀺 𑀘.

𑀓𑀫𑁆𑀫𑀧𑀣𑀢𑁆𑀢𑀺𑀓𑀜𑁆𑀘𑁂𑀯 ¶ , 𑀮𑁄𑀓𑀧𑀸𑀮𑀤𑀼𑀓𑀁 𑀢𑀣𑀸;

𑀧𑀲𑁆𑀲𑀤𑁆𑀥𑀺𑀆𑀤𑀻 𑀙 𑀤𑀼𑀓𑀸, 𑀢𑀻𑀡𑀺 𑀧𑀺𑀝𑁆𑀞𑀺𑀤𑀼𑀓𑀸𑀦𑀺𑀢𑀺.

𑀲𑀢𑁆𑀢𑀭𑀲𑀳𑀺 𑀭𑀸𑀲𑀻𑀳𑀺, 𑀙𑀧𑀜𑁆𑀜𑀸𑀲𑁂𑀯 𑀧𑀸𑀴𑀺𑀬𑀁;

𑀯𑀼𑀢𑁆𑀢𑀸 𑀲𑀪𑀸𑀯𑀢𑁄 𑀢𑀺𑀁𑀲, 𑀥𑀫𑁆𑀫𑀸 𑀅𑀕𑀳𑀺𑀢𑀕𑁆𑀕𑀳𑁂.

𑀨𑀲𑁆𑀲𑁄 𑀚𑀻𑀯𑀺𑀢𑀲𑀜𑁆𑀜𑀸 𑀘, 𑀘𑁂𑀢𑀦𑀸 𑀘𑀸𑀭𑀧𑀻𑀢𑀺𑀬𑁄;

𑀙 𑀤𑀼𑀓𑀸 𑀓𑀸𑀬𑀧𑀲𑁆𑀲𑀤𑁆𑀥𑀺-𑀧𑀫𑀼𑀔𑀸𑀝𑁆𑀞𑀸𑀭𑀲𑁂𑀓𑀓𑀸.

𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀲𑀤𑁆𑀥𑀸 𑀘, 𑀳𑀺𑀭𑀺𑀑𑀢𑁆𑀢𑀧𑁆𑀧𑀺𑀬𑀫𑁆𑀧𑀺 𑀘;

𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘, 𑀲𑀢𑁆𑀢 𑀤𑁆𑀯𑀺𑀥𑀸 𑀯𑀺𑀪𑀸𑀯𑀺𑀢𑀸.

𑀯𑁂𑀤𑀦𑀸 𑀢𑀺𑀯𑀺𑀥𑀸 𑀯𑀻𑀭𑀺𑀬𑀁, 𑀲𑀢𑀺 𑀘 𑀘𑀢𑀼𑀥𑀸 𑀫𑀢𑀸;

𑀙𑀤𑁆𑀥𑀸 𑀏𑀓𑀕𑁆𑀕𑀢𑀸 𑀧𑀜𑁆𑀜𑀸, 𑀲𑀢𑁆𑀢𑀥𑀸𑀯 𑀯𑀺𑀪𑀸𑀯𑀺𑀢𑀸.

𑀯𑀺𑀭𑀢𑀻 ¶ 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀫𑀦𑀓𑁆𑀓𑀸𑀭𑁄 𑀙𑀦𑁆𑀤𑀫𑀚𑁆𑀛𑀢𑁆𑀢𑀸;

𑀥𑀺𑀫𑁄𑀓𑁆𑀔𑁄 𑀬𑁂𑀯𑀸𑀧𑀦𑀓𑀸, 𑀦𑀯𑁂𑀢𑁂 𑀧𑀞𑀫𑁂 𑀫𑀦𑁂.

𑀧𑀜𑁆𑀘𑀲𑀝𑁆𑀞𑀺𑀯𑀺𑀥𑁂𑀦𑁂𑀯, 𑀧𑀭𑀺𑀬𑀸𑀬𑁂𑀦 𑀤𑁂𑀲𑀺𑀢𑀸;

𑀦𑀯𑀸𑀥𑀺𑀓𑀸 𑀘 𑀢𑁂𑀢𑁆𑀢𑀺𑀁𑀲, 𑀥𑀫𑁆𑀫𑀸𑀯 𑀧𑀭𑀫𑀢𑁆𑀣𑀢𑁄𑀢𑀺.

𑀏𑀢𑁆𑀣 𑀘 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲 𑀥𑀫𑁆𑀫𑀸, 𑀬𑁂𑀯𑀸𑀧𑀦𑀓𑁂𑀲𑀼 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸 𑀏𑀓𑀓𑁆𑀔𑀡𑁂 𑀦𑀺𑀬𑀢𑀸 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀧𑀦 𑀓𑀭𑀼𑀡𑀸𑀤𑀬𑁄 𑀧𑀜𑁆𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑀯𑀲𑁂𑀦, 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑀺𑀘𑁆𑀙𑀸𑀚𑀻𑀯𑁂𑀳𑀺 𑀯𑀺𑀭𑀫𑀡𑀯𑀲𑁂𑀦 𑀘 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑀣𑀸𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀦𑀺𑀬𑀢𑀸. 𑀢𑁂 𑀘 𑀬𑀲𑁆𑀫𑀸 𑀤𑀼𑀓𑁆𑀔𑀺𑀢𑀲𑀼𑀔𑀺𑀢𑀲𑀢𑁆𑀢𑀯𑀲𑁂𑀦, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁆𑀢𑀬𑀯𑀲𑁂𑀦 𑀘 𑀧𑀘𑁆𑀘𑁂𑀓𑀁 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀘𑀺𑀢𑁆𑀢𑀓𑁆𑀔𑀡𑁂𑀲𑀼 𑀦𑀺𑀬𑀢𑀸 𑀘𑀢𑀼𑀢𑁆𑀢𑀺𑀁𑀲, 𑀓𑀭𑀼𑀡𑀸𑀤𑀻𑀲𑀼 ¶ 𑀏𑀓𑀦𑁆𑀢𑀺 𑀧𑀜𑁆𑀘𑀢𑀺𑀁𑀲 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀦𑀺𑀬𑀢𑀸 𑀘𑀢𑀼𑀢𑁆𑀢𑀺𑀁𑀲𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀭𑀲𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀸 𑀘𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀅𑀫𑁆𑀩𑀺𑀮𑀸𑀤𑀺𑀤𑀲𑁆𑀲𑀦𑁂 𑀔𑁂𑀴𑀼𑀧𑁆𑀧𑀸𑀤𑀸𑀤𑀺𑀦𑀸 𑀜𑀸𑀢𑀩𑁆𑀩𑀸. 𑀏𑀓𑀤𑁂𑀲𑁂𑀦 𑀧𑀦 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀭𑀲𑁄. 𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀧𑀦𑁂𑀲 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀦𑀸𑀫 𑀳𑁄𑀢𑀺. 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁂𑀦 𑀘𑁂𑀯 ¶ 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦𑁂𑀲 𑀦𑀺𑀘𑁆𑀘𑀫𑁆𑀫𑀸 𑀕𑀸𑀯𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀮𑀓𑁆𑀔𑀡𑀸𑀤𑀻𑀲𑀼 𑀘 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀯𑀸 𑀲𑀸𑀫𑀜𑁆𑀜𑀁 𑀯𑀸 𑀮𑀓𑁆𑀔𑀡𑀁 𑀦𑀸𑀫, 𑀓𑀺𑀘𑁆𑀘𑀁 𑀯𑀸 𑀲𑀫𑁆𑀧𑀢𑁆𑀢𑀺 𑀯𑀸 𑀭𑀲𑁄 𑀦𑀸𑀫, 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀯𑀸 𑀨𑀮𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀦𑀸𑀫, 𑀆𑀲𑀦𑁆𑀦𑀓𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸, 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀪𑀸𑀯𑀪𑁂𑀤𑀢𑁄 𑀧𑀦𑁂𑀲𑀸 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺 𑁋 𑀲𑀼𑀔𑀁 𑀤𑀼𑀓𑁆𑀔𑀁 𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁 𑀉𑀧𑁂𑀓𑁆𑀔𑀸𑀢𑀺. 𑀢𑀢𑁆𑀣 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀓𑀸𑀬𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁. 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀺𑀮𑀸𑀧𑀦𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁. 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁 𑀯𑀸, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀇𑀝𑁆𑀞𑀸𑀓𑀸𑀭𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀁. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀺𑀮𑀸𑀧𑀦𑀭𑀲𑀁 𑀯𑀸, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. 𑀫𑀚𑁆𑀛𑀢𑁆𑀢𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀸𑀢𑀺𑀉𑀧𑀩𑁆𑀭𑀽𑀳𑀦𑀫𑀺𑀮𑀸𑀧𑀦𑀭𑀲𑀸, 𑀲𑀦𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀦𑀺𑀧𑁆𑀧𑀻𑀢𑀺𑀓𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀏𑀢𑁆𑀣 𑀘 𑀲𑀼𑀔𑀁, 𑀤𑀼𑀓𑁆𑀔𑀜𑁆𑀘 𑀏𑀓𑀦𑁆𑀢𑀫𑀩𑁆𑀬𑀸𑀓𑀢𑀁, 𑀤𑁄𑀫𑀦𑀲𑁆𑀲𑀫𑁂𑀓𑀦𑁆𑀢𑀫𑀓𑀼𑀲𑀮𑀁, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸 𑀧𑀦 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀇𑀥 𑀧𑀦 𑀓𑀼𑀲𑀮𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸.

𑀦𑀻𑀮𑀸𑀤𑀺𑀪𑁂𑀤𑀁 ¶ 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸, 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸 𑀯𑀸 𑀤𑀸𑀭𑀼𑀆𑀤𑀻𑀲𑀼 𑀢𑀘𑁆𑀙𑀓𑀸𑀤𑀬𑁄 𑀯𑀺𑀬, 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 ¶ 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬, 𑀆𑀭𑀫𑁆𑀫𑀡𑁂 𑀅𑀦𑁄𑀕𑀸𑀴𑁆𑀳𑀯𑀼𑀢𑁆𑀢𑀺𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸 𑀯𑀺𑀚𑁆𑀚𑀼 𑀯𑀺𑀬, 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸 𑀢𑀺𑀡𑀧𑀼𑀭𑀺𑀲𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 𑀧𑀼𑀭𑀺𑀲𑀸𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬.

𑀘𑁂𑀢𑁂𑀢𑀻𑀢𑀺 𑀘𑁂𑀢𑀦𑀸, 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀦𑀸𑀪𑀸𑀯𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀲𑀸 𑀘 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀯 𑀳𑁄𑀢𑀺. 𑀇𑀢𑀭𑁂𑀲𑀼 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀧𑀦𑀸𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀉𑀲𑁆𑀲𑀸𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺.

𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦𑀲𑁆𑀲 𑀯𑀘𑀦𑀢𑁆𑀣𑁄 𑀘𑀺𑀢𑁆𑀢𑀤𑀼𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑁂𑀢𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀢𑁄 𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁.

𑀯𑀺𑀢𑀓𑁆𑀓𑁂𑀢𑀺 𑀊𑀳𑁂𑀢𑀺, 𑀯𑀺𑀢𑀓𑁆𑀓𑀦𑀫𑀢𑁆𑀢𑀫𑁂𑀯 𑀯𑀸 𑀲𑁄𑀢𑀺 𑀯𑀺𑀢𑀓𑁆𑀓𑁄. 𑀲𑁆𑀯𑀸𑀬𑀫𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄, 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀺, 𑀯𑀺𑀘𑀭𑀡𑀫𑀢𑁆𑀢𑀫𑁂𑀯 𑀯𑀸 𑀲𑁄𑀢𑀺 𑀯𑀺𑀘𑀸𑀭𑁄. 𑀲𑁆𑀯𑀸𑀬𑀫𑀸𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀦𑁂𑀲𑀁 𑀬𑀣𑀸𑀓𑁆𑀓𑀫𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀬 𑀖𑀡𑁆𑀝𑀸𑀪𑀺𑀖𑀸𑀢𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀖𑀡𑁆𑀝𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬, 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀆𑀓𑀸𑀲𑁂 ¶ 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑀲𑀸𑀭𑀡𑀁 𑀯𑀺𑀬. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀉𑀪𑁄𑀧𑀺 𑀧𑀦𑁂𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀸.

𑀧𑀺𑀡𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸.

𑀯𑀻𑀭𑀸𑀦𑀁 ¶ 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀯𑀻𑀭𑀺𑀬𑀁, 𑀯𑀺𑀯𑀺𑀥𑁂𑀦 𑀯𑀸 𑀉𑀧𑀸𑀬𑁂𑀦 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀜𑁆𑀘 𑀉𑀲𑁆𑀲𑀸𑀳𑀮𑀓𑁆𑀔𑀡𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 (𑀅. 𑀦𑀺. 𑁪.𑁧𑁧𑁩) 𑀯𑀘𑀦𑀢𑁄 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁 𑀯𑀸. 𑀇𑀤𑀁 𑀧𑀦 𑀓𑀼𑀲𑀮𑀧𑀓𑁆𑀔𑁂 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀸𑀤𑀺𑀧𑀓𑁆𑀔𑁂 𑀧𑀦 𑀲𑀸𑀥𑀸𑀭𑀡𑀯𑀲𑁂𑀦 𑀬𑀣𑀸 𑀢𑀣𑀸 𑀯𑀸 𑀤𑀼𑀓𑁆𑀔𑀯𑀺𑀦𑁄𑀤𑀦𑀓𑀸𑀫𑀢𑀸𑀧𑀤𑀝𑁆𑀞𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀁 𑀯𑀸. 𑀢𑀁 𑀲𑀫𑀸𑀭𑀤𑁆𑀥𑀁 𑀲𑀩𑁆𑀩𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓𑁄 𑀅𑀕𑁆𑀕𑁄 𑀯𑀺𑀲𑀬𑁄 𑀅𑀲𑁆𑀲𑀸𑀢𑀺 𑀏𑀓𑀕𑁆𑀕𑀁, 𑀘𑀺𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸, 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀸 𑀅𑀯𑀺𑀲𑀸𑀭𑀡𑀮𑀓𑁆𑀔𑀡𑀸, 𑀲𑀳𑀚𑀸𑀢𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑀸 𑀦𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀼𑀔𑀧𑀤𑀝𑁆𑀞𑀸𑀦𑀸, 𑀅𑀓𑀼𑀲𑀮𑀸𑀤𑀺𑀲𑀸𑀥𑀸𑀭𑀡𑀯𑀲𑁂𑀦 𑀧𑀦𑁂𑀢𑁆𑀣𑀸𑀧𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑀸𑀦𑀺. 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀆𑀭𑀫𑁆𑀫𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀦𑁆𑀢𑀸 𑀯𑀺𑀬 𑀓𑀼𑀲𑀮𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑀲𑀤𑁆𑀥𑀸 𑀲𑀢𑀺 𑀏𑀓𑀕𑁆𑀕𑀢𑀸 𑀧𑀜𑁆𑀜𑀸𑀢𑀺, 𑀢𑁂𑀦𑁂𑀯 𑀲𑀤𑁆𑀥𑀸 ‘‘𑀑𑀓𑀧𑁆𑀧𑀦𑀸’’𑀢𑀺 𑀯𑀼𑀢𑁆𑀢𑀸, 𑀲𑀢𑀺 𑀘 ‘‘𑀅𑀧𑀺𑀮𑀸𑀧𑀦𑀸’’𑀢𑀺, 𑀏𑀓𑀕𑁆𑀕𑀢𑀸 ‘‘𑀅𑀯𑀝𑁆𑀞𑀺𑀢𑀻’’𑀢𑀺, 𑀧𑀜𑁆𑀜𑀸 ¶ ‘‘𑀧𑀭𑀺𑀬𑁄𑀕𑀸𑀳𑀦𑀸’’𑀢𑀺 𑀘 𑀯𑀼𑀢𑁆𑀢𑀸. 𑀅𑀓𑀼𑀲𑀮𑀧𑀓𑁆𑀔𑁂 𑀘 𑀢𑀬𑁄 𑀢𑀡𑁆𑀳𑀸 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸𑀢𑀺. 𑀢𑁂𑀦 𑀢𑁂 𑀏𑀯 ‘‘𑀑𑀖𑀸’’𑀢𑀺 𑀯𑀼𑀢𑁆𑀢𑀸. 𑀢𑀣𑀸𑀧𑀺 𑀦𑁂𑀲𑀁 𑀮𑀓𑁆𑀔𑀡𑀸𑀤𑀺𑀢𑁄 𑀦𑀸𑀦𑀢𑁆𑀢𑀫𑁆𑀧𑀺 𑀲𑀺𑀤𑁆𑀥𑀫𑁂𑀯. 𑀅𑀓𑀼𑀲𑀮𑀧𑀓𑁆𑀔𑁂 𑀧𑀦 𑀏𑀓𑀕𑁆𑀕𑀢𑀸 𑀉𑀤𑁆𑀥𑀘𑁆𑀘𑀲𑀫𑀸𑀕𑀢𑀢𑁆𑀢𑀸 ‘‘𑀑𑀕𑀸𑀳𑀦𑀸’’𑀢𑀺 𑀦 𑀯𑀼𑀢𑁆𑀢𑀸. 𑀅𑀓𑀼𑀲𑀮𑀥𑀫𑁆𑀫𑀸 𑀳𑀺 𑀏𑀓𑀯𑀺𑀲𑀬𑁂 𑀲𑀫𑁆𑀧𑀺𑀡𑁆𑀟𑀦𑀓𑀺𑀘𑁆𑀘𑁂𑀦 𑀲𑀫𑀸𑀥𑀺𑀦𑀸 𑀬𑀼𑀢𑁆𑀢𑀸𑀧𑀺 𑀉𑀤𑀓𑀲𑀺𑀢𑁆𑀢𑀭𑀚𑀼𑀝𑁆𑀞𑀸𑀦𑀁 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀯𑀺𑀓𑀺𑀭𑀡𑀲𑀪𑀸𑀯𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀳𑁂𑀢𑁆𑀣 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀺 𑀦 𑀳𑁄𑀢𑀺, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀬𑀲𑁆𑀫𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀆𑀲𑀺𑀜𑁆𑀘𑀺𑀢𑁆𑀯𑀸 𑀆𑀓𑁄𑀝𑀦𑀫𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀉𑀧𑀮𑀺𑀢𑁆𑀢𑀝𑁆𑀞𑀸𑀦𑀁 𑀯𑀺𑀬 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀦𑀺𑀘𑁆𑀘𑀮𑀧𑀯𑀢𑁆𑀢𑀦𑀲𑀫𑀢𑁆𑀣𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀑𑀕𑀸𑀳𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀚𑀻𑀯𑀦𑁆𑀢𑀺 𑀢𑁂𑀦, 𑀚𑀻𑀯𑀦𑀫𑀢𑁆𑀢𑀁 𑀯𑀸 𑀢𑀦𑁆𑀢𑀺 𑀚𑀻𑀯𑀺𑀢𑀁, 𑀢𑀁 𑀲𑀳𑀚𑀸𑀢𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀜𑁆𑀜𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀘𑁂𑀢𑀁 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀦 𑀪𑀗𑁆𑀕𑀓𑁆𑀔𑀡𑁂. 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀬𑀁 𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀤𑁆𑀤𑀳𑀦𑁆𑀢𑀺 ¶ 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀁 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸 𑀑𑀖𑀼𑀢𑁆𑀢𑀸𑀭𑀓𑀯𑀻𑀭𑀧𑀼𑀭𑀺𑀲𑁄 𑀯𑀺𑀬, 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸, 𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀺𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸 𑀯𑀸, 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀲𑀭𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀯𑀸. 𑀆𑀭𑀫𑁆𑀫𑀡𑁂 ¶ 𑀤𑀴𑁆𑀳𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀧𑀦 𑀏𑀲𑀺𑀓𑀸 𑀯𑀺𑀬, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀭𑀓𑁆𑀔𑀡𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻, 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀉𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀦𑀸𑀓𑀸𑀭𑁂𑀦 𑀧𑀸𑀧𑀓𑀸𑀦𑀁 𑀅𑀓𑀭𑀡𑀭𑀲𑀸 𑀳𑀺𑀭𑀻, 𑀉𑀢𑁆𑀢𑀸𑀲𑀸𑀓𑀸𑀭𑁂𑀦 𑀑𑀢𑁆𑀢𑀧𑁆𑀧𑀁. 𑀅𑀲𑀼𑀘𑀺𑀫𑀓𑁆𑀔𑀺𑀢𑀲𑁆𑀲, 𑀅𑀕𑁆𑀕𑀺𑀲𑀦𑁆𑀢𑀢𑁆𑀢𑀲𑁆𑀲 𑀘 𑀅𑀬𑁄𑀕𑀼𑀴𑀲𑁆𑀲 𑀕𑀳𑁂𑀢𑀼𑀁 𑀅𑀯𑀺𑀲𑀳𑀦𑀁 𑀯𑀺𑀬 𑀏𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀚𑀺𑀕𑀼𑀘𑁆𑀙𑀦𑀲𑀦𑁆𑀢𑀸𑀲𑀸𑀓𑀸𑀭𑁂𑀳𑀺 𑀧𑀸𑀧𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀸𑀓𑀸𑀭𑁂𑀦𑁂𑀯 𑀘 𑀧𑀸𑀧𑀢𑁄 𑀲𑀁𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀏𑀢𑀸𑀦𑀺, 𑀅𑀢𑁆𑀢𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸𑀦𑀺 𑀓𑀼𑀮𑀯𑀥𑀽𑀯𑁂𑀲𑀺𑀬𑀸 𑀪𑀸𑀯𑁄 𑀯𑀺𑀬, 𑀮𑁄𑀓𑀧𑀸𑀮𑀓𑀸𑀦𑀺 𑀘𑀸𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦𑁂𑀲𑀁 𑀲𑀫𑀼𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀲𑀪𑀸𑀯𑁄 𑀮𑀓𑁆𑀔𑀡𑁂𑀦 𑀘𑀸𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀢𑀸, 𑀅𑀢𑁆𑀢𑀮𑁄𑀓𑀸𑀥𑀺𑀧𑀢𑀺𑀢𑀸, 𑀮𑀚𑁆𑀚𑀸𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀢𑀸, 𑀲𑀧𑁆𑀧𑀢𑀺𑀲𑁆𑀲𑀯𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀢𑀸𑀮𑀓𑁆𑀔𑀡𑀢𑀸 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧 𑀩𑀮𑀭𑀸𑀲𑀺𑀯𑀡𑁆𑀡𑀦𑀸) 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸, 𑀅𑀢𑁆𑀣𑀺𑀓𑁂𑀳𑀺 𑀢𑀁 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀁.

𑀦 𑀮𑀼𑀩𑁆𑀪𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀅𑀤𑁄𑀲𑀸𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀮𑁄𑀪𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀕𑁂𑀥𑀮𑀓𑁆𑀔𑀡𑁄, 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬, 𑀅𑀧𑀭𑀺𑀕𑁆𑀕𑀳𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬, 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬.

𑀅𑀤𑁄𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬, 𑀆𑀖𑀸𑀢𑀯𑀺𑀦𑀬𑀦𑀭𑀲𑁄, 𑀧𑀭𑀺𑀴𑀸𑀳𑀯𑀺𑀦𑀬𑀦𑀭𑀲𑁄 𑀯𑀸 𑀘𑀦𑁆𑀤𑀦𑀁 𑀯𑀺𑀬, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬.

𑀅𑀫𑁄𑀳𑁄 ¶ ¶ 𑀬𑀣𑀸𑀲𑀪𑀸𑀯𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑁄, 𑀅𑀓𑁆𑀔𑀮𑀺𑀢𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑁄 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀓𑁆𑀔𑀺𑀢𑁆𑀢𑀉𑀲𑀼𑀧𑁆𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑁄 𑀅𑀦𑀼𑀤𑁆𑀥𑀝𑁄 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬. 𑀢𑀬𑁄𑀧𑀺 𑀘𑁂𑀢𑁂 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀧𑀺𑀘 𑀅𑀮𑁄𑀪𑁄 𑀘𑁂𑀢𑁆𑀣 𑀤𑀸𑀦𑀳𑁂𑀢𑀼, 𑀅𑀤𑁄𑀲𑁄 𑀲𑀻𑀮𑀳𑁂𑀢𑀼, 𑀅𑀫𑁄𑀳𑁄 𑀪𑀸𑀯𑀦𑀸𑀳𑁂𑀢𑀼. 𑀢𑀻𑀳𑀺𑀧𑀺 𑀘𑁂𑀢𑁂𑀳𑀺 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀥𑀺𑀓𑀊𑀦𑀯𑀺𑀧𑀭𑀻𑀢𑀕𑁆𑀕𑀳𑀡𑀸𑀦𑀁 𑀅𑀪𑀸𑀯𑁄, 𑀢𑀣𑀸 𑀧𑀺𑀬𑀯𑀺𑀧𑁆𑀧𑀬𑁄𑀕𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀇𑀘𑁆𑀙𑀺𑀢𑀸𑀮𑀸𑀪𑀤𑀼𑀓𑁆𑀔𑀸𑀦𑀁, 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀸𑀦𑀁, 𑀧𑁂𑀢𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀕𑀢𑀺𑀤𑀼𑀓𑁆𑀔𑀸𑀦𑀜𑁆𑀘 𑀅𑀪𑀸𑀯𑁄, 𑀢𑀣𑀸 𑀪𑁄𑀕𑀫𑀺𑀢𑁆𑀢𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁄, 𑀢𑀣𑀸 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑀅𑀢𑁆𑀢𑀓𑀺𑀮𑀫𑀣𑀧𑀭𑀺𑀘𑁆𑀘𑀸𑀕𑀫𑀚𑁆𑀛𑀺𑀫𑀧𑀝𑀺𑀧𑀢𑁆𑀢𑀻𑀦𑀁 𑀲𑀫𑁆𑀪𑀯𑁄, 𑀢𑀣𑀸 𑀅𑀲𑀼𑀪𑀅𑀧𑁆𑀧𑀫𑀸𑀡𑀥𑀸𑀢𑀼𑀲𑀜𑁆𑀜𑀸𑀦𑀁, 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀲𑀜𑁆𑀜𑀸𑀦𑀁, 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑀸𑀦𑀜𑁆𑀘 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀅𑀫𑁄𑀳𑁄 𑀦𑀸𑀫 𑀧𑀜𑁆𑀜𑀸, 𑀲𑀸 𑀧𑀚𑀸𑀦𑀦𑀮𑀓𑁆𑀔𑀡𑀸. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁. 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸. 𑀓𑀺𑀁 𑀧𑀦𑁂𑀢𑀸𑀲𑀁 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀦𑁆𑀢𑀺? 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀧𑀚𑀸𑀦𑀦𑀫𑁂𑀯. 𑀏𑀢𑀸𑀲𑀁 𑀳𑀺 𑀲𑀫𑀸𑀦𑁂𑀧𑀺 𑀚𑀸𑀦𑀦𑀪𑀸𑀯𑁂 𑀲𑀜𑁆𑀜𑀸𑀬 ‘‘𑀦𑀻𑀮𑀁 𑀧𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀦 𑀲𑀜𑁆𑀜𑀼𑀧𑁆𑀧𑀸𑀤𑀓𑀫𑀢𑁆𑀢𑁂𑀦 𑀆𑀓𑀸𑀭𑁂𑀦 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑀲𑁆𑀲 𑀯𑀺𑀬 𑀘𑀺𑀢𑁆𑀢𑀯𑀝𑁆𑀝𑀸𑀤𑀺𑀪𑀸𑀯𑀫𑀢𑁆𑀢𑀸𑀓𑀸𑀭𑁂𑀦 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁, 𑀦 𑀢𑀢𑁄 𑀉𑀤𑁆𑀥𑀁. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀘 𑀢𑀢𑁄 𑀯𑀺𑀲𑀺𑀝𑁆𑀞𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀦𑀸 𑀆𑀓𑀸𑀭𑁂𑀦 𑀚𑀸𑀦𑀦𑀁 𑀳𑁄𑀢𑀺, 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀯𑀺𑀬 𑀬𑀣𑀸𑀯𑀼𑀢𑁆𑀢𑁂𑀦 𑀘𑁂𑀯 𑀉𑀧𑀪𑁄𑀕𑀸𑀭𑀳𑀢𑀸𑀤𑀺𑀦𑀸 𑀘 𑀆𑀓𑀸𑀭𑁂𑀦 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁, 𑀦 𑀢𑀢𑁄 𑀉𑀤𑁆𑀥𑀁. 𑀧𑀜𑁆𑀜𑀸𑀬 𑀧𑀦 𑀢𑁂𑀳𑀺 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀘 ¶ 𑀫𑀕𑁆𑀕𑀧𑀸𑀢𑀼𑀪𑀸𑀯𑀸𑀤𑀺𑀳𑁂𑀢𑀽𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀧𑀚𑀸𑀦𑀦𑀁 𑀳𑁄𑀢𑀺, 𑀳𑁂𑀭𑀜𑁆𑀜𑀺𑀓𑀲𑁆𑀲 𑀯𑀺𑀬 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘𑁂𑀯 𑀙𑁂𑀓𑀓𑀽𑀝𑀅𑀤𑁆𑀥𑀲𑀸𑀭𑀸𑀤𑀺𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀘 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁. 𑀧𑀜𑁆𑀜𑀸𑀬 𑀳𑀺 𑀅𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀧𑀚𑀸𑀦𑀦𑀸𑀓𑀸𑀭𑁂𑀳𑀺 𑀏𑀢𑀸𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀢𑀓𑁆𑀓𑀯𑀻𑀭𑀺𑀬𑀸𑀤𑀺𑀲𑀳𑀚𑀸𑀢𑀧𑀘𑁆𑀘𑀬𑀯𑀺𑀭𑀳𑀢𑁄 𑀭𑀽𑀧𑀸𑀤𑀻𑀲𑀼 𑀲𑀜𑁆𑀜𑀸𑀓𑀺𑀘𑁆𑀘𑀢𑁄 𑀅𑀥𑀺𑀓𑀯𑀺𑀚𑀸𑀦𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀩𑀮𑀧𑀭𑀺𑀡𑀸𑀬𑀓𑀸𑀦𑀺 𑀯𑀺𑀬 𑀲𑁂𑀦𑀗𑁆𑀕𑀸𑀦𑀺 𑀧𑀜𑁆𑀜𑀸𑀦𑀼𑀯𑀢𑁆𑀢𑀓𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺𑀆𑀤𑀺 (𑀯𑀺𑀪. 𑁭𑁬𑁬).

𑀓𑀸𑀬𑀧𑀲𑁆𑀲𑀫𑁆𑀪𑀦𑀁 ¶ 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀧𑀦𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀜𑁆𑀘 𑀅𑀯𑀽𑀧𑀲𑀫𑀓𑀭𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀏𑀯𑀁 𑀉𑀧𑀭𑀺𑀧𑀺 𑀧𑀤𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀮𑀳𑀼𑀢𑀸, 𑀘𑀺𑀢𑁆𑀢𑀮𑀳𑀼𑀢𑀸 𑀘, 𑀢𑁂𑀲𑀁 𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀢𑁂𑀲𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀫𑀼𑀤𑀼𑀢𑀸, 𑀘𑀺𑀢𑁆𑀢𑀫𑀼𑀤𑀼𑀢𑀸 𑀘, 𑀢𑁂𑀲𑀁 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀢𑁂𑀲𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 ¶ 𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸, 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀘, 𑀢𑁂𑀲𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀸𑀯𑀲𑁂𑀲𑀦𑀻𑀯𑀭𑀡𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸, 𑀳𑀺𑀢𑀓𑀺𑀭𑀺𑀬𑀸𑀲𑀼 𑀯𑀺𑀦𑀺𑀬𑁄𑀕𑀓𑁆𑀔𑀫𑀪𑀸𑀯𑀸𑀯𑀳𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸, 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀘, 𑀢𑁂𑀲𑀁 𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀕𑁂𑀮𑀜𑁆𑀜𑀓𑀭𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸 𑀓𑀸𑀬𑀼𑀚𑀼𑀓𑀢𑀸, 𑀘𑀺𑀢𑁆𑀢𑀼𑀚𑀼𑀓𑀢𑀸 𑀘, 𑀢𑁂𑀲𑀁 𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑁂𑀧𑁂𑀢𑁂 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀥𑀫𑁆𑀫𑀸 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 𑀧𑀦𑁂𑀢𑁆𑀣 𑀧𑀲𑁆𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀸𑀤𑀺𑀁 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀬𑁂𑀦 𑀇𑀫𑁂 𑀧𑀲𑁆𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀢𑀺? 𑀦𑁄 𑀦 𑀲𑀓𑁆𑀓𑁄𑀦𑁆𑀢𑀺, 𑀇𑀫𑁂 𑀧𑀦 𑀲𑀳𑀺𑀢𑀸 𑀏𑀯 𑀲𑀓𑁆𑀓𑁄𑀦𑁆𑀢𑀺, 𑀇𑀢𑀭𑀣𑀸 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀅𑀲𑀫𑁆𑀪𑀯𑀢𑁄. 𑀬𑀣𑀸 𑀯𑀸 𑀧𑀲𑁆𑀲𑀤𑁆𑀥𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀫𑁄𑀳𑀸𑀳𑀺𑀭𑀺𑀓𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑁂𑀦 ¶ 𑀅𑀫𑁄𑀳𑀳𑀺𑀭𑀺𑀆𑀤𑀬𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀉𑀤𑁆𑀥𑀘𑁆𑀘𑀸𑀤𑀺𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀬𑀲𑁆𑀫𑀸 𑀘𑁂𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀏𑀯 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀸 𑀳𑀭𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀢𑁂 𑀏𑀢𑁂 𑀏𑀯 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸, 𑀦 𑀅𑀫𑁄𑀳𑀸𑀤𑀬𑁄𑀢𑀺 𑀜𑀸𑀢𑀩𑁆𑀩𑀸.

𑀬𑁂𑀯𑀸𑀧𑀦𑀓𑁂𑀲𑀼 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀤𑁂𑀯𑀲𑁆𑀲 ¶ 𑀧𑀤𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑀸𑀬𑀁 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀬𑀜𑁆𑀘 𑀬𑀲𑁆𑀫𑀸 𑀯𑀺𑀭𑀚𑁆𑀚𑀺𑀢𑀩𑁆𑀩𑀸𑀤𑀻𑀲𑀼𑀧𑀺 𑀦𑁂𑀓𑁆𑀔𑀫𑁆𑀫𑀸𑀤𑀺𑀦𑀸 𑀲𑀳 𑀮𑁄𑀪𑀯𑀺𑀲𑀤𑀺𑀲𑁂𑀦 𑀓𑀢𑁆𑀢𑀼𑀓𑀸𑀫𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀲𑁂𑀔𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀮𑁄𑀪𑁄 𑀧𑀦 𑀲𑀼𑀪𑀲𑀼𑀔𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑀼𑀩𑁆𑀩𑀓𑁂𑀦 𑀅𑀪𑀺𑀲𑀗𑁆𑀕𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀏𑀯𑀁 𑀫𑁂𑀢𑁆𑀢𑀸𑀓𑀭𑀼𑀡𑀸𑀤𑀻𑀦𑀫𑁆𑀧𑀺 𑀮𑁄𑀪𑀸𑀤𑀻𑀳𑀺 𑀯𑀺𑀲𑁂𑀲𑁄 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄.

𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀦𑁆𑀦𑀺𑀝𑁆𑀞𑀸𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘 𑀲𑀤𑁆𑀥𑀸𑀧𑀺 𑀅𑀥𑀺𑀫𑁄𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀲𑀘𑁆𑀘𑀁, 𑀲𑀸 𑀘 𑀔𑁄 𑀲𑀫𑁆𑀧𑀲𑀸𑀤𑀦𑀪𑀸𑀯𑁂𑀦 𑀅𑀥𑀺𑀫𑁄𑀓𑁆𑀔𑁄, 𑀅𑀬𑀁 𑀧𑀦 𑀬𑀣𑀸 𑀢𑀣𑀸 𑀯𑀸 𑀦𑀺𑀘𑁆𑀙𑀬𑀪𑀸𑀯𑁂𑀦𑀸𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀓𑀺𑀭𑀺𑀬𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄, 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺𑀧𑀺 𑀫𑀦𑀲𑀺𑀓𑀸𑀭𑁄, 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀯𑀻𑀣𑀺𑀧𑀝𑀺𑀧𑀸𑀤𑀓𑁄 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄, 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀇𑀥 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀧𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲, 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀏𑀢𑁆𑀣 𑀘𑀸𑀬𑀁 𑀫𑀦𑀲𑀺𑀓𑀸𑀭𑁄 𑀲𑀫𑀦𑁆𑀦𑀸𑀳𑀸𑀭𑀫𑀢𑁆𑀢𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀬𑁄𑀚𑀓𑁄, 𑀘𑁂𑀢𑀦𑀸 𑀘𑁂𑀢𑁄𑀓𑀺𑀭𑀺𑀬𑀸𑀪𑀸𑀯𑁂𑀦, 𑀯𑀺𑀢𑀓𑁆𑀓𑁄 𑀧𑀦 𑀲𑀗𑁆𑀓𑀧𑁆𑀧𑀸𑀓𑀸𑀭𑁂𑀦, 𑀉𑀧𑀦𑀺𑀚𑁆𑀛𑀸𑀬𑀦𑀸𑀓𑀸𑀭𑁂𑀦 𑀘 𑀅𑀪𑀺𑀦𑀺𑀭𑁄𑀧𑀓𑁄. 𑀢𑁂𑀦𑁂𑀯 𑀳𑁂𑀢𑁆𑀣 𑀧𑀤𑀪𑀸𑀚𑀦𑀻𑀬𑁂 ‘‘𑀢𑀓𑁆𑀓𑁄 ¶ 𑀲𑀗𑁆𑀓𑀧𑁆𑀧𑁄𑀢𑀺 𑀘, 𑀛𑀸𑀦𑀗𑁆𑀕’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑁂𑀲𑀼 ¶ 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀫𑀧𑁆𑀧𑀯𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀡𑁂𑀦 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀆𑀚𑀸𑀦𑀻𑀬𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀓𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀭𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀺 𑀘, 𑀓𑀺𑀭𑀻𑀬𑀢𑀺 𑀯𑀸 𑀤𑀼𑀓𑁆𑀔𑀺𑀢𑁂𑀲𑀼 𑀧𑀲𑀸𑀭𑀻𑀬𑀢𑀻𑀢𑀺 𑀓𑀭𑀼𑀡𑀸. 𑀲𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀫𑁄𑀤𑀦𑁆𑀢𑀺 𑀢𑀸𑀬 𑀢𑀁𑀲𑀫𑀗𑁆𑀕𑀺𑀦𑁄, 𑀲𑀬𑀁 𑀯𑀸 𑀫𑁄𑀤𑀢𑀺, 𑀫𑁄𑀤𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑀼𑀤𑀺𑀢𑀸. 𑀲𑀸 𑀧𑀫𑁄𑀤𑀮𑀓𑁆𑀔𑀡𑀸, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀼𑀧𑁂𑀓𑁆𑀔𑀸 𑀦 𑀯𑀼𑀢𑁆𑀢𑀸𑀢𑀺? 𑀧𑀼𑀩𑁆𑀩𑁂 𑀕𑀳𑀺𑀢𑀢𑁆𑀢𑀸. 𑀅𑀤𑁄𑀲𑁄 𑀏𑀯 𑀳𑀺 𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀫𑁂𑀢𑁆𑀢𑀸. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀏𑀯 𑀘 𑀇𑀝𑁆𑀞𑀸𑀦𑀺𑀝𑁆𑀞𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀁 𑀉𑀧𑁂𑀓𑁆𑀔𑀸. 𑀢𑁂 𑀘 𑀥𑀫𑁆𑀫𑀸 𑀦𑀺𑀬𑀢𑀸, 𑀓𑁂𑀯𑀮𑀁 𑀧𑀦 𑀦𑁂𑀲𑀁 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀪𑀸𑀯𑁂𑀦 𑀧𑀯𑀢𑁆𑀢𑀺 𑀅𑀦𑀺𑀬𑀢𑀸𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑀸 𑀢𑀺𑀲𑁆𑀲𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸, 𑀢𑀢𑁄 𑀲𑀁𑀓𑁄𑀘𑀦𑀭𑀲𑀸, 𑀢𑁂𑀲𑀁 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸, 𑀧𑀸𑀧𑀓𑀺𑀭𑀺𑀬𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀔𑀪𑀸𑀯𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀕𑀳𑀸𑀢𑀺 ¶ 𑀏𑀯𑀁 𑀬𑁂 𑀇𑀫𑁂 𑀇𑀫𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀺𑀪𑀢𑁆𑀢𑀸 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸, 𑀲𑀩𑁆𑀩𑁂𑀢𑁂 𑀔𑀦𑁆𑀥𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀢𑀢𑁆𑀣 𑀭𑀸𑀲𑀝𑁆𑀞𑁂𑀦 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑀣𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀅𑀯𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀙𑀢𑁆𑀢𑀺𑀁𑀲 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 𑀘 𑀬𑀤𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁄, 𑀨𑀲𑁆𑀲𑀸𑀤𑀻𑀦𑀁 𑀢𑀸𑀯 𑀅𑀦𑁂𑀓𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑀸 𑀬𑀼𑀢𑁆𑀢𑀸, 𑀓𑀣𑀁 𑀧𑀦 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀢𑀸𑀢𑀺? 𑀉𑀧𑀘𑀸𑀭𑀢𑁄. 𑀧𑀘𑁆𑀘𑁂𑀓𑀁 𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀲𑀼 𑀦𑀺𑀭𑀼𑀴𑁆𑀳𑁄𑀧𑀺 𑀔𑀦𑁆𑀥-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀲𑀼 𑀏𑀓𑁂𑀓𑀯𑁂𑀤𑀦𑀸𑀤𑀻𑀲𑀼𑀧𑀺 𑀲𑀫𑀼𑀤𑀸𑀬𑁄𑀧𑀘𑀸𑀭𑁂𑀦 ¶ 𑀯𑁄𑀳𑀭𑀻𑀬𑀢𑀻𑀢𑀺 𑀢𑀤𑁂𑀓𑀤𑁂𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄, 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬 𑀙𑀺𑀚𑁆𑀚𑀫𑀸𑀦𑀸𑀬 ‘‘𑀭𑀼𑀓𑁆𑀔𑁄 𑀙𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺. 𑀏𑀯𑀁 𑀔𑀦𑁆𑀥𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺.

𑀢𑁂 𑀧𑀼𑀦 𑀆𑀬𑀢𑀦𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑁋 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀳𑁂𑀢𑁆𑀣 𑀘𑀺𑀢𑁆𑀢𑀁 𑀫𑀦𑀸𑀬𑀢𑀦𑀁, 𑀲𑁂𑀲𑀸 𑀧𑀦 𑀅𑀝𑁆𑀞𑀢𑀺𑀁𑀲 𑀥𑀫𑁆𑀫𑀸 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀏𑀯𑀁 𑀆𑀬𑀢𑀦𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂 𑀧𑀼𑀦 𑀥𑀸𑀢𑀼𑀯𑀲𑁂𑀦 𑀤𑀼𑀯𑀺𑀥𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀥𑀫𑁆𑀫𑀥𑀸𑀢𑀽𑀢𑀺. 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀳𑁂𑀢𑁆𑀣 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁂𑀲𑀸 𑀥𑀫𑁆𑀫𑀥𑀸𑀢𑀽𑀢𑀺. 𑀏𑀯𑀁 𑀥𑀸𑀢𑀼𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀆𑀳𑀸𑀭𑀸𑀦𑀸𑀳𑀸𑀭𑀯𑀲𑁂𑀦. 𑀢𑀢𑁆𑀣 𑀨𑀲𑁆𑀲𑁄 𑀘𑁂𑀢𑀦𑀸 𑀘𑀺𑀢𑁆𑀢𑀦𑁆𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀯𑀲𑁂𑀲𑀸 𑀦 𑀆𑀳𑀸𑀭𑀸𑀢𑀺. 𑀓𑀺𑀁 𑀧𑀦𑁂𑀢𑁂 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀬𑁂 𑀦 𑀆𑀳𑀸𑀭𑀸𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺? 𑀦𑁄 𑀦 𑀳𑁄𑀦𑁆𑀢𑀺, 𑀯𑀺𑀲𑁂𑀲𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺, 𑀨𑀲𑁆𑀲𑀸𑀤𑀬𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀯𑁂𑀤𑀦𑀸𑀤𑀬𑁄 ¶ 𑀘 𑀆𑀳𑀭𑀦𑁆𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀳𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸𑀬𑁄 𑀆𑀳𑀭𑀢𑀺, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁. 𑀦𑀦𑀼 𑀘 𑀲𑁄 𑀯𑀺𑀧𑀸𑀓𑁄, 𑀇𑀤𑀁 𑀧𑀦 𑀓𑀼𑀲𑀮𑀯𑀺𑀜𑁆𑀜𑀸𑀡𑀦𑁆𑀢𑀺? 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀢𑀁𑀲𑀭𑀺𑀓𑁆𑀔𑀢𑀸𑀬 𑀧𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀇𑀫𑁂 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫) 𑀯𑀘𑀦𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀦𑀸𑀫𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀫𑁂𑀯 ‘‘𑀆𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀆𑀳𑀸𑀭𑀸𑀦𑀸𑀳𑀸𑀭𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀢𑁄. 𑀢𑀢𑁆𑀣 𑀲𑀤𑁆𑀥𑀸 𑀯𑀻𑀭𑀺𑀬𑀁 𑀲𑀢𑀺 𑀏𑀓𑀕𑁆𑀕𑀢𑀸 𑀅𑀫𑁄𑀳𑁄 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀚𑀻𑀯𑀺𑀢𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀯𑀲𑁂𑀲𑀸 𑀦 ‘‘𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀢𑁄 𑀤𑀼𑀯𑀺𑀥𑀸.

𑀢𑀣𑀸 𑀛𑀸𑀦𑀗𑁆𑀕𑀸𑀛𑀸𑀦𑀗𑁆𑀕𑀯𑀲𑁂𑀦. 𑀢𑀢𑁆𑀣 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑁄𑀫𑀦𑀲𑁆𑀲𑀁 𑀏𑀓𑀕𑁆𑀕𑀢𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 ‘‘𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀛𑀸𑀦𑀗𑁆𑀕𑀸𑀦𑀻’’𑀢𑀺. 𑀏𑀯𑀁 𑀛𑀸𑀦𑀗𑁆𑀕𑀸𑀛𑀸𑀦𑀗𑁆𑀕𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 ¶ 𑀫𑀕𑁆𑀕𑀗𑁆𑀕𑀸𑀫𑀕𑁆𑀕𑀗𑁆𑀕𑀯𑀲𑁂𑀦. 𑀢𑀢𑁆𑀣 𑀅𑀫𑁄𑀳𑁄 𑀯𑀺𑀢𑀓𑁆𑀓𑁄 𑀯𑀺𑀭𑀢𑀺𑀢𑁆𑀢𑀬𑀁 𑀯𑀻𑀭𑀺𑀬𑀁 𑀲𑀢𑀺 𑀏𑀓𑀕𑁆𑀕𑀢𑀸𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦, 𑀯𑀺𑀫𑁄𑀓𑁆𑀔𑀝𑁆𑀞𑁂𑀦 𑀘 𑀬𑀣𑀸𑀓𑁆𑀓𑀫𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀦𑀸𑀫𑁂𑀦 ‘‘𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺. 𑀧𑀸𑀴𑀺𑀬𑀁 𑀧𑀦 𑀮𑁄𑀓𑀺𑀬𑀘𑀺𑀢𑁆𑀢𑁂 𑀯𑀺𑀭𑀢𑀻𑀦𑀁 ¶ 𑀅𑀦𑀺𑀬𑀢𑀢𑁆𑀢𑀸, 𑀬𑁂𑀯𑀸𑀧𑀦𑀓𑀢𑁆𑀢𑀸 𑀘 𑀢𑀸 𑀯𑀚𑁆𑀚𑁂𑀢𑁆𑀯𑀸 ‘‘𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀥. 𑀲. 𑁫𑁮, 𑁧𑁨𑁧) 𑀯𑀼𑀘𑁆𑀘𑀢𑀺. 𑀏𑀯𑀁 𑀫𑀕𑁆𑀕𑀗𑁆𑀕𑀸𑀫𑀕𑁆𑀕𑀗𑁆𑀕𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀩𑀮𑀸𑀩𑀮𑀯𑀲𑁂𑀦. 𑀢𑀢𑁆𑀣 𑀲𑀤𑁆𑀥𑀸𑀯𑀻𑀭𑀺𑀬𑀁 𑀲𑀢𑀺 𑀲𑀫𑀸𑀥𑀺 𑀧𑀜𑁆𑀜𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀲𑀢𑁆𑀢 𑀥𑀫𑁆𑀫𑀸 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀅𑀩𑀮𑀸𑀦𑀻𑀢𑀺. 𑀏𑀯𑀁 𑀩𑀮𑀸𑀩𑀮𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀳𑁂𑀢𑀼𑀦𑀳𑁂𑀢𑀼𑀯𑀲𑁂𑀦. 𑀢𑀢𑁆𑀣 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀫𑀽𑀮𑀝𑁆𑀞𑁂𑀦 𑀳𑁂𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀦𑀳𑁂𑀢𑀽𑀢𑀺. 𑀏𑀯𑀁 𑀳𑁂𑀢𑀼𑀦𑀳𑁂𑀢𑀼𑀯𑀲𑁂𑀦 𑀤𑀼𑀯𑀺𑀥𑀸. 𑀏𑀯𑀁 𑀨𑀲𑁆𑀲𑀸𑀨𑀲𑁆𑀲𑀯𑁂𑀤𑀦𑀸𑀯𑁂𑀤𑀦𑀸 𑀲𑀜𑁆𑀜𑀸𑀲𑀜𑁆𑀜𑀸𑀘𑀺𑀢𑁆𑀢𑀸𑀘𑀺𑀢𑁆𑀢𑀸𑀤𑀺𑀯𑀲𑁂𑀦𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀬𑁄𑀕𑀁 𑀲𑀗𑁆𑀕𑀳𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀤𑀪𑀸𑀚𑀦𑀻𑀬𑀲𑀗𑁆𑀕𑀳𑀯𑀸𑀭𑁂 (𑀥. 𑀲. 𑁧𑁦𑁩 𑀆𑀤𑀬𑁄), 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 (𑀥. 𑀲. 𑀅𑀝𑁆𑀞. 𑁫𑁮-𑁧𑁨𑁦) 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀲𑀗𑁆𑀕𑀳𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀜𑁆𑀜𑀢𑁄 𑀘𑁂𑀯𑀸𑀢𑀺 𑀏𑀯𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑀸𑀭𑀓𑀯𑁂𑀤𑀓𑀸𑀤𑀺𑀲𑀪𑀸𑀯𑁄 𑀅𑀢𑁆𑀢𑀸 𑀯𑀸 𑀲𑀲𑁆𑀲𑀢𑁄 𑀯𑀸 𑀪𑀸𑀯𑁄 𑀦 𑀉𑀧𑀮𑀩𑁆𑀪𑀢𑀺. 𑀲𑀼𑀜𑁆𑀜𑀸 𑀢𑁂 𑀥𑀫𑁆𑀫𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀓𑁂𑀯𑀮𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸, 𑀲𑀮𑀓𑁆𑀔𑀡𑀥𑀸𑀭𑀡𑀢𑁄 𑀥𑀫𑁆𑀫𑀫𑀢𑁆𑀢𑀸, 𑀦𑀺𑀘𑁆𑀘𑀲𑀼𑀔𑀸𑀤𑀺𑀲𑀸𑀭𑀯𑀺𑀭𑀳𑀢𑁄 𑀅𑀲𑀸𑀭𑀸, 𑀧𑀯𑀢𑁆𑀢𑀓𑀦𑀺𑀬𑀸𑀫𑀓𑀸𑀪𑀸𑀯𑀢𑁄 𑀅𑀧𑀭𑀺𑀡𑀸𑀬𑀓𑀸 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀦𑀺𑀬𑀸 𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀤𑀪𑀸𑀚𑀦𑀻𑀬𑀲𑀼𑀜𑁆𑀜𑀢𑀯𑀸𑀭𑁂, 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀼𑀜𑁆𑀜𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀝𑁆𑀞𑀺𑀢𑀸 𑀧𑀞𑀫𑀓𑀼𑀲𑀮𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀤𑀼𑀢𑀺𑀬𑀸𑀤𑀻𑀲𑀼𑀧𑀺 ¶ 𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀦𑀸 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀣𑁂𑀯, 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀸𑀦𑀁 𑀧𑀤𑀸𑀦𑀁, 𑀥𑀫𑁆𑀫𑀸𑀦𑀜𑁆𑀘 𑀅𑀢𑁆𑀣𑁄, 𑀲𑀩𑁆𑀩𑁄 𑀘 𑀯𑀺𑀦𑀺𑀘𑁆𑀙𑀬𑁄 ¶ 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀧𑀦 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀤𑀼𑀢𑀺𑀬𑀘𑀺𑀢𑁆𑀢𑁂 𑀢𑀸𑀯 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀧𑀞𑀫𑀘𑀺𑀢𑁆𑀢𑀢𑁄 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀤𑀼𑀢𑀺𑀬𑀓𑀼𑀲𑀮𑀁.

𑀢𑀢𑀺𑀬𑁂𑀧𑀺 𑀥𑀫𑁆𑀫𑀼𑀤𑁆𑀤𑁂𑀲𑁂 𑀅𑀫𑁄𑀳𑀸𑀪𑀸𑀯𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀗𑁆𑀕𑀩𑀮𑀫𑀽𑀮𑀲𑀗𑁆𑀕𑀳𑁂𑀲𑀼 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀕𑁆𑀕𑀗𑁆𑀕𑀧𑀜𑁆𑀜𑀸𑀩𑀮𑀅𑀫𑁄𑀳𑀫𑀽𑀮𑀸𑀦𑀁 𑀧𑀭𑀺𑀳𑀸𑀦𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀪𑀸𑀯𑁄𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀢𑀣𑀸 𑀘𑀢𑀼𑀢𑁆𑀣𑁂 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀧𑀦 𑀲𑀼𑀔𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂𑀲𑀼 𑀉𑀧𑁂𑀓𑁆𑀔𑀸𑀪𑀸𑀯𑁄, 𑀧𑀻𑀢𑀺𑀬𑀸 𑀘 𑀅𑀪𑀸𑀯𑁄. 𑀢𑁂𑀦𑁂𑀯 𑀛𑀸𑀦𑀗𑁆𑀕𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀘𑀺𑀢𑁆𑀢𑀲𑀤𑀺𑀲𑀫𑁂𑀯. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼 𑀘𑁂𑀢𑁆𑀣 𑀘𑀢𑀽𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀧𑀭𑀺𑀓𑀫𑁆𑀫𑀪𑀽𑀢𑀸𑀦𑀁 𑀧𑀦𑁂𑀢𑁆𑀣 𑀢𑀸𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀸 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀇𑀢𑀭𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄𑀢𑀺 𑀏𑀯𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀦𑀸 𑀯𑀺𑀪𑀢𑁆𑀢𑀸𑀦𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀆𑀭𑀫𑁆𑀫𑀡𑀯𑀺𑀪𑀸𑀕𑀢𑁄 𑀧𑀘𑁆𑀘𑁂𑀓𑀁 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺. 𑀢𑀢𑁆𑀣 𑀦𑀻𑀮𑀸𑀤𑀺𑀪𑁂𑀤𑀪𑀺𑀦𑁆𑀦𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀘 𑀯𑀡𑁆𑀡𑀥𑀸𑀢𑀼 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 ¶ 𑀘 𑀨𑁄𑀝𑁆𑀞𑀩𑁆𑀩𑀦𑁆𑀢𑀺 𑀆𑀧𑁄𑀥𑀸𑀢𑀼𑀯𑀚𑁆𑀚𑀺𑀢𑀪𑀽𑀢𑀢𑁆𑀢𑀬𑀁, 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸 𑀭𑀽𑀧𑀸𑀭𑀽𑀧𑀧𑀜𑁆𑀜𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑀸𑀧𑀸𑀣𑀕𑀢𑀸𑀦𑀺 𑀏𑀢𑀸𑀦𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀅𑀦𑀸𑀧𑀸𑀣𑀕𑀢𑀸𑀦𑀺 𑀧𑀦 𑀅𑀢𑀻𑀢𑀸𑀦𑀸𑀕𑀢𑀤𑀽𑀭𑀲𑀼𑀔𑀼𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀤𑀺𑀩𑁆𑀩𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀭𑀫𑁆𑀫𑀡𑀢𑀸𑀤𑀺𑀯𑀘𑀦𑀢𑁄.

𑀅𑀦𑀸𑀧𑀸𑀣𑀕𑀢𑀸 𑀏𑀯 𑀳𑀺 𑀢𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀻𑀦𑀁 𑀆𑀭𑀫𑁆𑀫𑀡𑀁, 𑀦 𑀘 𑀢𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺. 𑀭𑀽𑀧𑀸𑀤𑀬𑁄 𑀳𑀺 𑀧𑀜𑁆𑀘 𑀧𑀘𑁆𑀘𑁂𑀓𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑀲𑁆𑀫𑀺𑀁 𑀔𑀡𑁂 𑀆𑀧𑀸𑀣𑀫𑀸𑀕𑀦𑁆𑀢𑁆𑀯𑀸 𑀢𑀁𑀢𑀁𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁, 𑀢𑀤𑀦𑀦𑁆𑀢𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀸𑀦𑀜𑁆𑀘 𑀅𑀧𑀭𑀪𑀸𑀕𑁂 𑀘 𑀤𑀺𑀝𑁆𑀞𑀲𑀼𑀢𑀸𑀤𑀺𑀯𑀲𑁂𑀦𑀸𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑀺𑀓𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀦𑀸𑀦𑀸𑀯𑀡𑁆𑀡𑀯𑀺𑀘𑀺𑀢𑁆𑀢𑀘𑁂𑀢𑀺𑀬𑀸𑀤𑀺𑀤𑀲𑁆𑀲𑀦𑀁 𑀓𑀭𑁄𑀦𑁆𑀢𑀲𑁆𑀲, 𑀥𑀫𑁆𑀫𑀁 ¶ 𑀲𑀼𑀡𑀦𑁆𑀢𑀲𑁆𑀲, 𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺 𑀯𑀸 𑀧𑀽𑀚𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀖𑀸𑀬𑀺𑀢𑁆𑀯𑀸, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀜𑁆𑀘 𑀲𑀸𑀬𑀺𑀢𑁆𑀯𑀸, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀘 𑀨𑀼𑀲𑀺𑀢𑁆𑀯𑀸 𑀫𑀦𑀸𑀧𑀪𑀸𑀯𑀁 𑀜𑀢𑁆𑀯𑀸 𑀢𑁂𑀳𑀺 𑀘𑁂𑀢𑀺𑀬𑀧𑀽𑀚𑀁 𑀓𑀭𑁄𑀦𑁆𑀢𑀲𑁆𑀲, 𑀢𑀢𑁆𑀣 𑀢𑀢𑁆𑀣 𑀅𑀓𑀼𑀲𑀮𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀕𑀬𑁆𑀳𑀫𑀸𑀦𑀸𑀦𑀺 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀲𑀸𑀔𑀸𑀬 𑀅𑀓𑁆𑀓𑀫𑀦𑀁, 𑀧𑀣𑀯𑀺𑀬𑀁 𑀙𑀸𑀬𑀸𑀨𑀭𑀡𑀜𑁆𑀘 𑀏𑀓𑀓𑁆𑀔𑀡𑁂 𑀓𑀼𑀭𑀼𑀫𑀸𑀦𑀁 𑀭𑀼𑀓𑁆𑀔𑀕𑁆𑀕𑁂 𑀦𑀺𑀮𑀻𑀬𑀫𑀸𑀦𑀁 𑀧𑀓𑁆𑀔𑀺𑀦𑁄 𑀲𑀭𑀻𑀭𑀁 𑀯𑀺𑀬 𑀬𑀣𑀸𑀲𑀓𑀁 𑀧𑀲𑀸𑀤𑀜𑁆𑀘 𑀖𑀝𑁆𑀝𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀯𑀗𑁆𑀕𑀘𑀮𑀦𑀧𑀘𑁆𑀘𑀬𑀪𑀸𑀯𑁂𑀦 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀣𑀫𑀸𑀕𑀦𑁆𑀢𑁆𑀯𑀸 𑀢𑀢𑁄 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀆𑀯𑀚𑁆𑀚𑀦𑀸𑀤𑀺𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀁, 𑀯𑀻𑀣𑀺𑀘𑀺𑀢𑁆𑀢𑀸𑀦𑀁, 𑀢𑀤𑀦𑀦𑁆𑀢𑀭𑀸𑀦𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀢𑀤𑀦𑀦𑁆𑀢𑀭𑀸𑀲𑀼 𑀫𑀦𑁄𑀤𑁆𑀯𑀸𑀭𑀯𑀻𑀣𑀻𑀲𑀼 𑀘 𑀅𑀧𑀭𑀪𑀸𑀕𑁂 𑀢𑀣𑀸𑀭𑀽𑀧𑀁 𑀧𑀘𑁆𑀘𑀬𑀁 𑀆𑀕𑀫𑁆𑀫 𑀅𑀢𑁆𑀢𑀦𑀸 𑀧𑀽𑀚𑀸𑀤𑀺𑀓𑀭𑀡𑀓𑀸𑀮𑁂𑀲𑀼, 𑀤𑀺𑀝𑁆𑀞𑀲𑀼𑀢𑀖𑀸𑀬𑀺𑀢𑀲𑀸𑀬𑀺𑀢𑀨𑀼𑀝𑁆𑀞𑀯𑀲𑁂𑀦𑀸𑀦𑀼𑀲𑁆𑀲𑀭𑀦𑁆𑀢𑀲𑁆𑀲, 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀼𑀬𑁆𑀬𑀫𑀸𑀦𑀸𑀦𑀺 𑀯𑀺𑀬 𑀫𑀦𑁄𑀤𑁆𑀯𑀸𑀭𑁂 𑀘 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺.

𑀅𑀣𑀸𑀧𑀺 ¶ 𑀧𑀜𑁆𑀘𑀳𑀺 𑀤𑁆𑀯𑀸𑀭𑁂𑀳𑀺 𑀅𑀕𑀳𑀺𑀢𑀧𑀼𑀩𑁆𑀩𑀸𑀦𑀺 𑀩𑀼𑀤𑁆𑀥𑀭𑀽𑀧𑀸𑀤𑀻𑀦𑀺, 𑀤𑀺𑀩𑁆𑀩𑀭𑀽𑀧𑀸𑀤𑀻𑀦𑀺 𑀘 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀲𑀯𑀦𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀯𑀦𑀓𑁆𑀔𑀡𑁂 𑀯𑀸 𑀅𑀧𑀭𑀪𑀸𑀕𑁂 𑀲𑀼𑀢𑀯𑀲𑁂𑀦𑁂𑀯 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀯𑀸 𑀧𑀲𑀸𑀤𑀁, 𑀓𑀫𑁆𑀫𑀨𑀮𑀲𑀤𑁆𑀥𑀸𑀤𑀺𑀁, 𑀮𑁄𑀪𑀸𑀤𑀺𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀅𑀪𑀺𑀜𑁆𑀜𑀸𑀦𑀁 𑀧𑀦 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀏𑀯, 𑀢𑀲𑁆𑀫𑀸 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑁂, 𑀫𑀦𑁄𑀤𑁆𑀯𑀸𑀭𑁂, 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀘 𑀆𑀧𑀸𑀣𑀕𑀢𑀸𑀦𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀓𑀤𑀸𑀘𑀺𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀢𑀤𑀺𑀢𑀭𑀸 𑀦𑀸𑀫𑀭𑀽𑀧𑀧𑀜𑁆𑀜𑀢𑁆𑀢𑀺𑀬𑁄 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀦𑀼 𑀘𑁂𑀢𑀸𑀦𑀺 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀮𑁄𑀪𑀲𑁆𑀲 𑀯𑀢𑁆𑀣𑀼, 𑀓𑀣𑀫𑁂𑀢𑁆𑀣 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑀺𑀬𑀫𑀸𑀤𑀺𑀓𑀸𑀭𑀡𑀢𑁄. 𑀘𑀺𑀢𑁆𑀢𑀁 𑀳𑀺 ‘‘𑀓𑀼𑀲𑀮𑀫𑁂𑀯 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀬𑀫𑀺𑀢𑀯𑀲𑁂𑀦 𑀲𑀩𑁆𑀩𑀢𑁆𑀣 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑁂 𑀧𑀭𑀺𑀡𑀸𑀫𑀦𑀯𑀲𑁂𑀦 𑀘 𑀅𑀪𑀺𑀡𑁆𑀳𑀁 𑀆𑀲𑁂𑀯𑀺𑀢𑀓𑀼𑀲𑀮𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀘 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀬𑁄𑀦𑀺𑀲𑁄𑀆𑀪𑀼𑀚𑀺𑀢𑀯𑀲𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀺𑀫𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀧𑀘𑁆𑀘𑁂𑀓𑀁 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀓𑀣𑀸.

𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀪𑀺𑀦𑁆𑀦𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀢𑀸𑀯 𑀓𑀼𑀲𑀮𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀤𑀲𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑁂𑀓𑀁 𑀧𑀦 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀁. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀫𑀦𑁄𑀓𑀫𑁆𑀫𑀁. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀯𑀘𑀻𑀤𑁆𑀯𑀸𑀭𑀦𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀢𑀸𑀲𑀁 𑀯𑀺𑀪𑀸𑀕𑁄 𑀭𑀽𑀧𑀯𑀺𑀪𑀢𑁆𑀢𑀺𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 ¶ 𑀲𑀩𑁆𑀩𑀁 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀯𑀺𑀲𑁂𑀲𑀢𑁄 𑀓𑀼𑀲𑀮𑀸𑀓𑀼𑀲𑀮𑀁. 𑀢𑀁 𑀳𑀺 𑀲𑀳𑀚𑀸𑀢𑀸𑀦𑀁 𑀘𑁂𑀢𑀦𑀸𑀦𑀁, 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑁄𑀧𑀦𑀁 𑀅𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀧𑀯𑀢𑁆𑀢𑀸𑀦𑀁 𑀲𑀼𑀤𑁆𑀥𑀫𑀦𑁄𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑀢𑁄 𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀫𑁂𑀲𑀼 𑀧𑀦 𑀢𑀻𑀲𑀼 ¶ 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀸𑀤𑀬𑁄 𑀦𑀸𑀫. 𑀅𑀧𑀺𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄, 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀬𑁄 𑀘 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀫𑀼𑀲𑀸𑀯𑀸𑀤𑀸𑀤𑀬𑁄, 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀬𑁄 𑀘 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀅𑀪𑀺𑀚𑁆𑀛𑀸𑀤𑀬𑁄, 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀓𑀼𑀲𑀮𑀧𑀓𑁆𑀔𑁂 𑀧𑀦 𑀤𑀸𑀦𑀸𑀤𑀺𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀘 𑀬𑀣𑀸𑀭𑀳𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀢𑁄 𑀘𑁂𑀲 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀫𑁆𑀧𑀺 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄 𑀓𑁂𑀲𑀜𑁆𑀘𑀺 𑀧𑀼𑀭𑀺𑀲𑀸𑀦𑀁 𑀯𑀦𑀘𑀭𑀓𑀸𑀤𑀺𑀪𑀸𑀯𑁄 𑀯𑀺𑀬, 𑀤𑁆𑀯𑀸𑀭𑀸𑀦𑀜𑁆𑀘 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀓𑁂𑀲𑀜𑁆𑀘𑀺 𑀕𑀸𑀫𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀺𑀪𑀸𑀯𑁄 𑀯𑀺𑀬. 𑀅𑀓𑀼𑀲𑀮𑁂 𑀢𑀸𑀯 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂, 𑀯𑀘𑀻𑀤𑁆𑀯𑀸𑀭𑁂 𑀘 𑀬𑀣𑀸𑀭𑀳𑀁 𑀲𑀫𑀼𑀝𑁆𑀞𑀸𑀢𑀺, 𑀦𑁄 𑀫𑀦𑁄𑀤𑁆𑀯𑀸𑀭𑁂. 𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀘𑀻𑀓𑀫𑁆𑀫𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀳𑀺 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀩𑁆𑀬𑀸𑀧𑀸𑀤𑀸𑀤𑀻𑀲𑀼 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑁂𑀲𑀼 𑀯𑀸 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑁂𑀲𑀼 𑀯𑀸 𑀫𑀦𑁄𑀓𑀫𑁆𑀫𑁂𑀲𑀼 𑀏𑀯 𑀧𑀯𑀺𑀲𑀦𑀢𑁄 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀦 𑀧𑀸𑀧𑀼𑀡𑀸𑀢𑀺. 𑀦𑀦𑀼 𑀯𑀺𑀚𑁆𑀚𑀸𑀫𑀬𑁂𑀦𑀸𑀧𑀺 𑀓𑁂𑀯𑀮𑀁 𑀫𑀦𑁄𑀓𑀫𑁆𑀫𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀦𑁆𑀢𑀻𑀢𑀺? 𑀦 𑀅𑀮𑁄𑀡𑀪𑁄𑀚𑀦𑀤𑀩𑁆𑀪𑀲𑀬𑀦𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀸𑀤𑀺𑀓𑀸𑀬𑀯𑀘𑀻𑀧𑀬𑁄𑀕𑀁 𑀯𑀺𑀦𑀸 𑀢𑀲𑁆𑀲𑀸𑀲𑀺𑀚𑁆𑀛𑀦𑀢𑁄. 𑀅𑀪𑀺𑀚𑁆𑀛𑀸𑀤𑀺𑀫𑀦𑁄𑀓𑀫𑁆𑀫𑀁 𑀧𑀦 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀺. 𑀅𑀪𑀺𑀚𑁆𑀛𑀸𑀬 𑀳𑀺 𑀓𑀸𑀬𑁂𑀦 𑀧𑀭𑀪𑀡𑁆𑀟𑀕𑁆𑀕𑀸𑀳𑀸𑀤𑀻𑀦𑀁, 𑀩𑁆𑀬𑀸𑀧𑀸𑀤𑁂𑀦 𑀤𑀡𑁆𑀟𑀧𑀭𑀸𑀫𑀲𑀦𑀸𑀤𑀻𑀦𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀢𑀺𑀢𑁆𑀣𑀺𑀬𑀯𑀦𑁆𑀤𑀦𑀸𑀤𑀻𑀦𑀁 𑀓𑀭𑀡𑀓𑀸𑀮𑁂, 𑀯𑀸𑀘𑀸𑀬 𑀧𑀭𑀲𑀫𑁆𑀧𑀢𑁆𑀢𑀺𑀧𑀢𑁆𑀣𑀦𑀸𑀬 ‘‘𑀳𑀜𑁆𑀜𑀦𑁆𑀢𑀼 𑀩𑀚𑁆𑀛𑀦𑁆𑀢𑀽’’𑀢𑀺 𑀅𑀦𑀢𑁆𑀣𑀧𑀢𑁆𑀣𑀦𑀸𑀬 𑀘 𑀢𑀺𑀢𑁆𑀣𑀺𑀬𑀢𑁆𑀣𑀼𑀢𑀺𑀢𑀤𑀢𑁆𑀣𑀤𑀻𑀧𑀦𑀸𑀤𑀻𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀧𑀯𑀢𑁆𑀢𑀺𑀓𑀸𑀮𑁂 𑀘 𑀢𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀓𑀸𑀬𑀯𑀸𑀘𑀸𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀓𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀢𑁆𑀢𑀬𑁂𑀧𑀺 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 ¶ 𑀲𑀫𑁆𑀨𑀧𑁆𑀧𑀮𑀸𑀧𑀧𑀭𑀺𑀬𑁄𑀲𑀸𑀦𑁂𑀳𑀺 𑀲𑀢𑁆𑀢𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀢𑀸𑀯 𑀳𑀢𑁆𑀣𑀫𑀼𑀤𑁆𑀤𑀸𑀬, 𑀯𑀘𑀻𑀪𑁂𑀤𑁂𑀦 𑀘 𑀲𑀫𑀸𑀤𑀺𑀬𑀦𑀓𑀸𑀮𑁂, 𑀫𑀦𑀲𑀸 𑀯𑀺𑀭𑀫𑀡𑀓𑀸𑀮𑁂 𑀘 𑀢𑁂𑀲𑀁 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀲𑀳𑀕𑀢𑁂𑀦 𑀘𑁂𑀢𑀲𑀸 𑀢𑀚𑁆𑀚𑀲𑁆𑀲 𑀓𑀸𑀬𑀧𑀬𑁄𑀕𑀲𑁆𑀲, ‘‘𑀧𑀭𑀯𑀺𑀢𑁆𑀢𑀼𑀧𑀓𑀭𑀡𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀼, 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀘𑀻𑀧𑀬𑁄𑀕𑀲𑁆𑀲, 𑀓𑁂𑀯𑀮𑀁 𑀫𑀦𑁄𑀧𑀬𑁄𑀕𑀲𑁆𑀲 𑀘 𑀓𑀭𑀡𑀓𑀸𑀮𑁂 𑀫𑀦𑁄𑀓𑀫𑁆𑀫𑀲𑁆𑀲 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀚𑀯𑀦𑀸𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 ¶ 𑀦 𑀳𑁄𑀦𑁆𑀢𑀺, 𑀫𑀦𑁄𑀓𑀫𑁆𑀫𑀸𑀦𑀺 𑀏𑀯. 𑀢𑀸𑀦𑀺 𑀘 𑀦 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀺, 𑀓𑁂𑀯𑀮𑀁 𑀓𑀼𑀲𑀮𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀝𑀼𑀢𑀭𑀧𑁆𑀧𑀯𑀢𑁆𑀢𑀸𑀦𑀺 𑀏𑀯 𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀺 𑀫𑀦𑁄𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺, 𑀭𑀽𑀧𑀸𑀭𑀽𑀧𑀚𑀯𑀦𑀸𑀦𑀺 𑀧𑀦 𑀏𑀓𑀦𑁆𑀢𑀁 𑀪𑀸𑀯𑀦𑀸𑀫𑀬𑀁 𑀫𑀦𑁄𑀓𑀫𑁆𑀫𑀫𑁂𑀯 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀘 𑀧𑀯𑀢𑁆𑀢𑀦𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀚𑀦𑀓𑀸𑀦𑀺, 𑀢𑀣𑀸𑀧𑀺 𑀓𑀸𑀬𑀯𑀘𑀻𑀓𑀫𑁆𑀫𑀯𑁄𑀳𑀸𑀭𑀁 𑀦 𑀮𑀪𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀧𑀦 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀸𑀭𑀻𑀦𑀁 𑀯𑀺𑀭𑀢𑀻𑀦𑀁 𑀯𑀲𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑀫𑁆𑀧𑀺 𑀳𑁄𑀢𑀺, 𑀢𑀤𑀺𑀢𑀭𑀫𑀕𑁆𑀕𑀗𑁆𑀕𑀯𑀲𑁂𑀦 𑀫𑀦𑁄𑀓𑀫𑁆𑀫𑀫𑁆𑀧𑀻𑀢𑀺 𑀏𑀓𑀓𑁆𑀔𑀡𑁂 𑀢𑀻𑀡𑀺𑀧𑀺 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺, 𑀢𑀜𑁆𑀘 𑀪𑀸𑀯𑀦𑀸𑀫𑀬𑀁, 𑀤𑁆𑀯𑀸𑀭𑀁 𑀧𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀬𑀣𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀬𑀸𑀤𑀻𑀦𑀁 𑀯𑀲𑁂𑀦 𑀓𑀼𑀲𑀮𑀲𑁆𑀲 𑀤𑁆𑀯𑀸𑀭𑀢𑁆𑀢𑀬𑁂 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸, 𑀏𑀯𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀫𑁆𑀧𑀺 𑀯𑀲𑁂𑀦 𑀯𑀢𑁆𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀦 𑀯𑀺𑀘𑀸𑀭𑀺𑀢𑀸, 𑀢𑀣𑀸𑀧𑀺 𑀦𑀬𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀼 𑀤𑀸𑀦𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀯𑀸. 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁, 𑀅𑀩𑁆𑀪𑀦𑀼𑀫𑁄𑀤𑀦𑀁, 𑀤𑁂𑀲𑀦𑀸 𑀯𑀘𑀻𑀓𑀫𑁆𑀫𑀫𑁂𑀯. 𑀲𑀻𑀮𑀁 𑀅𑀧𑀘𑀺𑀢𑀺𑀲𑀳𑀕𑀢𑀁, 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀜𑁆𑀘 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺. 𑀢𑀢𑁆𑀣 𑀲𑀻𑀮𑀲𑁆𑀲 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄 𑀏𑀯. 𑀅𑀧𑀘𑀺𑀢𑀺𑀬𑀸 𑀧𑀦 ¶ 𑀧𑀼𑀧𑁆𑀨𑀧𑀽𑀚𑀸𑀤𑀺𑀦𑀸, 𑀯𑀦𑁆𑀤𑀦𑀸𑀤𑀺𑀦𑀸 𑀯𑀸 𑀧𑀯𑀢𑁆𑀢𑀺𑀓𑀸𑀮𑁂 𑀓𑀸𑀬𑀓𑀫𑁆𑀫𑀪𑀸𑀯𑁄, 𑀣𑀼𑀢𑀺𑀫𑀬𑀧𑀽𑀚𑀸𑀤𑀺𑀦𑀸 𑀧𑀯𑀢𑁆𑀢𑀺𑀓𑀸𑀮𑁂 𑀯𑀘𑀻𑀓𑀫𑁆𑀫𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲𑀸𑀧𑀺 𑀲𑀳𑀢𑁆𑀣𑀸 𑀓𑀭𑀡𑀓𑀸𑀮𑁂 𑀓𑀸𑀬𑀓𑀫𑁆𑀫𑀪𑀸𑀯𑁄, 𑀕𑀺𑀮𑀸𑀦𑀸𑀤𑀻𑀦𑀁 𑀘𑀢𑀼𑀧𑀘𑁆𑀘𑀬𑀲𑀫𑀸𑀤𑀸𑀧𑀦𑀸𑀤𑀺𑀯𑀲𑁂𑀦, 𑀕𑀭𑀽𑀳𑀺 𑀆𑀡𑀢𑁆𑀢𑀲𑀤𑁆𑀤𑁂𑀦 𑀆𑀭𑁄𑀘𑀦𑀧𑀓𑁆𑀓𑁄𑀲𑀦𑀸𑀤𑀺𑀯𑀲𑁂𑀦 𑀯𑀘𑀻𑀓𑀫𑁆𑀫𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀦𑀸, 𑀲𑀯𑀦𑀁, 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀜𑁆𑀘 𑀫𑀦𑁄𑀓𑀫𑁆𑀫𑀫𑁂𑀯, 𑀅𑀩𑁆𑀪𑀦𑀼𑀫𑁄𑀤𑀦𑀫𑁆𑀧𑀻𑀢𑀺 𑀓𑁂𑀘𑀺. 𑀲𑀯𑀦𑀫𑁆𑀧𑀺 𑀳𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀥𑀫𑁆𑀫𑀢𑁆𑀣𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀫𑀦𑁄𑀓𑀫𑁆𑀫𑀫𑁂𑀯.

𑀢𑀢𑁆𑀣 𑀤𑀸𑀦𑀁 𑀅𑀧𑀘𑀺𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁 𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀏𑀯 𑀧𑀯𑀢𑁆𑀢𑀦𑁆𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂. 𑀏𑀢𑁆𑀣 𑀘 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀤𑁂𑀲𑀦𑀸𑀦𑀁 𑀓𑀸𑀬𑀯𑀺𑀓𑀸𑀭𑁂𑀦 𑀧𑀢𑁆𑀢𑀺𑀁 𑀤𑁂𑀦𑁆𑀢𑀲𑁆𑀲, 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘 𑀓𑀸𑀬𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀮𑀁 𑀪𑀸𑀯𑀦𑀸 𑀅𑀩𑁆𑀪𑀦𑀼𑀫𑁄𑀤𑀦𑀁 𑀲𑀯𑀦𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, ‘‘𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁆𑀣 𑀫𑀦𑀲𑀸𑀯 𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀦𑁆𑀢𑀲𑁆𑀲, 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑀲𑁆𑀲 𑀘 𑀯𑀲𑁂𑀦 𑀲𑀻𑀮𑀩𑁆𑀪𑀦𑀼𑀫𑁄𑀤𑀦𑀸𑀦𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀤𑀸𑀦𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀯𑀺𑀥𑀁 ¶ 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀯. 𑀢𑁂𑀦𑁂𑀯 𑀳𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 ‘‘𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀳𑀺 ‘𑀤𑀲𑁆𑀲𑀸𑀫𑀺 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻𑀢𑀺. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀤𑀸𑀦𑀁 𑀦𑀸𑀫 𑀳𑁄𑀢𑀺, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀧𑀦 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀆𑀭𑀩𑁆𑀪 𑀫𑀦𑀲𑀸 𑀘𑀺𑀦𑁆𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀼𑀲𑀮𑀁 𑀳𑁄𑀢𑀺. 𑀅𑀧𑀭𑀪𑀸𑀕𑁂 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧). 𑀇𑀢𑀭𑀣𑀸 ‘‘𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀦𑀸𑀧𑀺 𑀤𑀸𑀦𑀁 ¶ 𑀦𑀸𑀫 𑀪𑀯𑁂𑀬𑁆𑀬, 𑀢𑀣𑀸 𑀘 𑀢𑀸𑀤𑀺𑀲𑀁 𑀯𑀢𑁆𑀣𑀼𑀁 𑀬𑀣𑀸𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦 𑀅𑀤𑁂𑀦𑁆𑀢𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑀫𑁆𑀧𑀺 𑀲𑀺𑀬𑀸. 𑀏𑀯𑀁 𑀫𑀦𑀲𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄𑀧𑀺 𑀲𑀺𑀬𑀼𑀁, 𑀢𑀜𑁆𑀘 𑀦 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀣 𑀯𑀸 ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀤𑀺𑀦𑁆𑀦𑀜𑁆𑀜𑁂𑀯 𑀳𑀭𑀢𑀽’’𑀢𑀺 𑀧𑀭𑀺𑀘𑁆𑀘𑀚𑀦𑀲𑀫𑁆𑀪𑀯𑀢𑁄 𑀤𑀸𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 𑀤𑀸𑀦𑀲𑀻𑀮𑀸𑀤𑀺𑀓𑀸𑀬𑀓𑀫𑁆𑀫𑀸𑀦𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯. 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀫𑀦𑁄𑀤𑁆𑀯𑀸𑀭𑀁. 𑀤𑁂𑀲𑀦𑀸𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀦𑀁 𑀯𑀘𑀻𑀓𑀫𑁆𑀫𑀸𑀦𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀫𑁆𑀧𑀺 𑀯𑀘𑀻𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀫𑀦𑁄𑀤𑁆𑀯𑀸𑀭𑀁. 𑀪𑀸𑀯𑀦𑀸𑀤𑀺𑀫𑀦𑁄𑀓𑀫𑁆𑀫𑀸𑀦𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀫𑁆𑀧𑀺 𑀫𑀦𑁄𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁, 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀦𑀜𑁆𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁, 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑁆𑀯𑀸 𑀅𑀲𑀗𑁆𑀓𑀭𑀢𑁄 𑀜𑀸𑀢𑀩𑁆𑀩𑀁.

𑀤𑁆𑀯𑀸𑀭𑀓𑀫𑁆𑀫𑀯𑀯𑀢𑁆𑀣𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 𑀬𑀲𑁆𑀫𑀸 𑀤𑀲𑀯𑀺𑀥𑀸𑀦𑀺 𑀘𑁂𑀢𑀸𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀢𑀻𑀲𑀼 𑀏𑀯𑀁 𑀲𑀗𑁆𑀕𑀬𑁆𑀳𑀦𑁆𑀢𑀺 𑀤𑀸𑀦𑀫𑀬𑁂 𑀲𑀻𑀮𑀫𑀬𑁂 𑀪𑀸𑀯𑀦𑀸𑀫𑀬𑁂𑀢𑀺. 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁 𑀳𑀺 𑀤𑀸𑀦𑀫𑀬𑁂 𑀲𑀗𑁆𑀕𑀬𑁆𑀳𑀢𑀺, ‘‘𑀅𑀩𑁆𑀪𑀦𑀼𑀫𑁄𑀤𑀦𑀫𑁆𑀧𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁫𑁬-𑁧𑁫𑁯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀸𑀤𑀺𑀓𑀣𑀸) 𑀅𑀝𑁆𑀞𑀓𑀣𑀸𑀬𑀁. 𑀅𑀧𑀘𑀺𑀢𑀺𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀲𑀻𑀮𑀫𑀬𑁂. 𑀤𑁂𑀲𑀦𑀸𑀲𑀯𑀦𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀸𑀦𑀺 𑀪𑀸𑀯𑀦𑀸𑀫𑀬𑁂, 𑀢𑀲𑁆𑀫𑀸 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 ¶ 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫. 𑀢𑀤𑀦𑀼𑀲𑀸𑀭𑁂𑀦𑁂𑀯 𑀇𑀢𑀭𑁂𑀲𑀁 𑀯𑀲𑁂𑀦𑀸𑀧𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀓𑀼𑀲𑀮𑀁 𑀳𑀺 𑀯𑀡𑁆𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦𑁂𑀯 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 ¶ 𑀧𑀯𑀢𑁆𑀢𑀢𑀺. 𑀓𑀣𑀁? 𑀬𑀤𑀸 𑀳𑀺 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀯𑀺𑀘𑀺𑀢𑁆𑀢𑀁 𑀧𑀼𑀧𑁆𑀨𑀯𑀢𑁆𑀣𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 ‘‘𑀯𑀡𑁆𑀡𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 𑀘𑁂𑀢𑀺𑀬𑀸𑀤𑀻𑀲𑀼 𑀲𑀳𑀢𑁆𑀣𑁂𑀦 𑀧𑀽𑀚𑁂𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀧𑀼𑀩𑁆𑀩𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸 𑀅𑀧𑀭𑀘𑁂𑀢𑀦𑀸𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀧𑀦 𑀢𑀤𑁂𑀯 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀁 𑀯𑀸𑀘𑀸𑀬 𑀆𑀡𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀤𑀸𑀧𑁂𑀢𑀺, 𑀢𑀤𑀸𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀢𑀤𑁂𑀯 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 ‘‘𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺, 𑀧𑀘𑁆𑀘𑀸𑀲𑀻𑀲𑀢𑀺, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺, 𑀢𑀤𑀸 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀸𑀦𑀫𑀬𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺 𑀦𑀸𑀫. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀡𑁆𑀡𑀁 𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 ‘‘𑀏𑀯𑀁 𑀫𑀦𑀸𑀧𑀯𑀡𑁆𑀡𑀸𑀦𑀁 𑀧𑀭𑀺𑀘𑁆𑀘𑀚𑀦𑀁 𑀦𑀸𑀫 𑀫𑀬𑁆𑀳𑀁 𑀓𑀼𑀮𑀯𑀁𑀲𑀸𑀕𑀢𑀯𑀢𑁆𑀢𑀫𑁂𑀢’’𑀦𑁆𑀢𑀺 𑀲𑀳𑀢𑁆𑀣𑀸 𑀧𑀽𑀚𑁂𑀢𑀺, 𑀢𑀸𑀤𑀺𑀲𑀯𑀡𑁆𑀡𑀯𑀦𑁆𑀢𑀁 𑀯𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀓𑀸𑀬𑀤𑁆𑀯𑀸𑀭𑁂 𑀘 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀡𑁆𑀡𑀁 𑀤𑁂𑀬𑁆𑀬𑀥𑀫𑁆𑀫𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 𑀯𑀸𑀘𑀸𑀬 𑀆𑀡𑀸𑀧𑁂𑀢𑁆𑀯𑀸 𑀧𑀭𑁂𑀳𑀺 𑀤𑀸𑀧𑁂𑀢𑀺, 𑀢𑀸𑀤𑀺𑀲𑀁 𑀯𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀁 𑀯𑀸𑀘𑀸𑀬 𑀅𑀧𑀦𑁂𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀢𑀸𑀤𑀺𑀲𑀁 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺, 𑀢𑀸𑀤𑀺𑀲𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀘𑀺𑀦𑁆𑀢𑁂𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 ¶ 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀡𑁆𑀡𑀯𑀦𑁆𑀢𑀁 𑀤𑀢𑁆𑀯𑀸 𑀢𑀤𑁂𑀯 𑀯𑀡𑁆𑀡𑀁, 𑀲𑀩𑁆𑀩𑀁 𑀯𑀸 𑀭𑀽𑀧𑀸𑀬𑀢𑀦𑀁 𑀘𑀗𑁆𑀓𑀫𑀦𑁆𑀢𑁄 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀢𑀤𑁂𑀯 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀢𑀤𑁂𑀯 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀇𑀢𑀺 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀲𑀼 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑀸𑀧𑀺 𑀢𑀺𑀁𑀲𑀸𑀬 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀬𑀣𑀸 𑀘 𑀭𑀽𑀧𑀸𑀭𑀫𑁆𑀫𑀡𑀲𑁆𑀲, 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀫𑁆𑀧𑀺 𑀧𑀜𑁆𑀘𑀦𑁆𑀦𑀁 𑀓𑀼𑀲𑀮𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀤𑁆𑀯𑀸𑀭𑁂𑀳𑀺 𑀯𑀺𑀪𑀸𑀕𑁄, 𑀬𑁄𑀚𑀦𑀸𑀦𑀬𑁄 𑀘 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄.

𑀅𑀧𑀺𑀘 ¶ 𑀲𑀤𑁆𑀤𑀁 𑀦𑀸𑀫 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑀸. 𑀬𑀤𑀸 𑀧𑀦 ‘‘𑀲𑀤𑁆𑀤𑀤𑀸𑀦𑀁 𑀫𑁂’’𑀢𑀺 𑀆𑀪𑀼𑀚𑀺𑀢𑁆𑀯𑀸 𑀪𑁂𑀭𑀺𑀆𑀤𑀺𑀢𑀽𑀭𑀺𑀬𑁂 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀤𑁂𑀢𑀺, 𑀢𑁂𑀳𑀺 𑀉𑀧𑀳𑀸𑀭𑀁 𑀯𑀸 𑀓𑀭𑁄𑀢𑀺, 𑀥𑀫𑁆𑀫𑀓𑀣𑀺𑀓𑀸𑀤𑀻𑀦𑀁 𑀲𑀭𑀪𑁂𑀲𑀚𑁆𑀚𑀸𑀤𑀺𑀁 𑀤𑁂𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺, 𑀲𑀭𑀪𑀜𑁆𑀜𑀥𑀫𑁆𑀫𑀓𑀣𑀸𑀤𑀺𑀁 𑀯𑀸 𑀓𑀭𑁄𑀢𑀺, 𑀢𑀤𑀸 𑀓𑀼𑀲𑀮𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁 𑀕𑀦𑁆𑀥𑀸𑀤𑀺𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀧𑀺 𑀕𑀦𑁆𑀥𑀸𑀤𑀺𑀆𑀭𑀫𑁆𑀫𑀡𑀁. 𑀥𑀫𑁆𑀫𑀸𑀭𑀫𑁆𑀫𑀡𑀁 𑀧𑀦 𑀑𑀚𑀸𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑀤𑀸𑀬𑀢𑁆𑀢𑀸𑀦𑀁 𑀯𑀲𑁂𑀦 𑀜𑀸𑀢𑀩𑁆𑀩𑀁. 𑀬𑀤𑀸 𑀳𑀺 𑀑𑀚𑀯𑀦𑁆𑀢𑀸𑀦𑀺 𑀅𑀦𑁆𑀦𑀧𑀸𑀦𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 ‘‘𑀑𑀚𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀢𑀺, 𑀕𑀺𑀮𑀸𑀦𑀸𑀦𑀁 𑀪𑁂𑀲𑀚𑁆𑀚𑀁 𑀯𑀸 𑀯𑁂𑀚𑁆𑀚𑀁 𑀯𑀸 𑀉𑀧𑀦𑁂𑀢𑁆𑀯𑀸, 𑀧𑀸𑀡𑁄𑀧𑀭𑁄𑀥𑀓𑀁 𑀆𑀯𑀼𑀥𑀚𑀸𑀮𑀓𑀼𑀫𑀺𑀦𑀸𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸 𑀯𑀸, 𑀯𑀚𑁆𑀛𑀧𑁆𑀧𑀢𑁆𑀢𑁂 𑀧𑀸𑀡𑀺𑀦𑁄 𑀫𑁄𑀘𑁂𑀢𑁆𑀯𑀸 𑀯𑀸 ‘‘𑀚𑀻𑀯𑀺𑀢𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀚𑀻𑀯𑀺𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬, 𑀧𑀜𑁆𑀘𑀧𑀲𑀸𑀤𑀲𑁄𑀴𑀲𑀲𑀼𑀔𑀼𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀯𑀲𑁂𑀦 𑀧𑀲𑀸𑀤𑀸𑀤𑀺𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀘 𑀫𑀦𑀲𑀺 𑀓𑀭𑁄𑀢𑀺, 𑀢𑀤𑀸 𑀓𑀼𑀲𑀮𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀅𑀬𑀁 ¶ 𑀦𑀸𑀦𑀸𑀯𑀢𑁆𑀣𑀽𑀲𑀼 𑀞𑀺𑀢𑀸𑀭𑀫𑁆𑀫𑀡𑀸𑀦𑀁 𑀬𑁄𑀚𑀦𑀸. 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀙𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑁂𑀯. 𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁 𑀳𑀺 𑀫𑀦𑀸𑀧𑁄 𑀯𑀡𑁆𑀡𑁄, 𑀔𑀸𑀤𑀦𑀓𑀸𑀮𑁂 𑀫𑀼𑀭𑀼𑀫𑀼𑀭𑀸𑀬𑀦𑀲𑀤𑁆𑀤𑁄, 𑀕𑀦𑁆𑀥𑁄, 𑀭𑀲𑁄, 𑀨𑁄𑀝𑁆𑀞𑀩𑁆𑀩𑀁, 𑀑𑀚𑀸, 𑀢𑀤𑀸𑀬𑀢𑁆𑀢𑀸 𑀯𑀸 𑀚𑀻𑀯𑀺𑀢𑀧𑀲𑀸𑀤𑀸𑀤𑀬𑁄, 𑀢𑀩𑁆𑀩𑀺𑀲𑀬𑀸𑀦𑀺 𑀘 𑀯𑀺𑀜𑁆𑀜𑀸𑀡𑀸𑀤𑀻𑀦𑀻𑀢𑀺 𑀙𑀸𑀭𑀫𑁆𑀫𑀡𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀘𑀻𑀯𑀭𑀸𑀤𑀻𑀲𑀼 𑀘𑁂𑀯 𑀯𑀢𑁆𑀣𑀸𑀤𑀻𑀲𑀼 𑀘 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀏𑀢𑁆𑀣𑀧𑀺 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀬𑀢𑀸, 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀪𑀸𑀯𑁄 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀓𑀼𑀲𑀮𑀸𑀦𑀁, 𑀏𑀯𑀁 𑀅𑀓𑀼𑀲𑀮𑀸𑀦𑀫𑁆𑀧𑀺 𑀆𑀭𑀫𑁆𑀫𑀡𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁, 𑀅𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀬𑁄𑀚𑀦𑀸𑀦𑀬𑁄 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀬𑁄𑀕𑀁 𑀜𑀸𑀢𑀩𑁆𑀩𑁄.

𑀏𑀯𑀁 𑀆𑀭𑀫𑁆𑀫𑀡𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀢𑁄, 𑀓𑀫𑁆𑀫𑀢𑁄, 𑀤𑁆𑀯𑀸𑀭𑀢𑁄 𑀘 𑀅𑀦𑁂𑀓𑀲𑀳𑀲𑁆𑀲𑀧𑁆𑀧𑀪𑁂𑀤𑁂𑀲𑀼 𑀘𑁂𑀢𑁂𑀲𑀼 𑀓𑀼𑀲𑀮𑁂𑀲𑀼 𑀉𑀧𑀟𑁆𑀠𑀸𑀦𑀺 𑀧𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸𑀦𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀧𑀦 𑀉𑀧𑀟𑁆𑀠𑀸𑀦𑀺 𑀯𑀻𑀫𑀁𑀲𑀸𑀥𑀺𑀧𑀢𑀺𑀯𑀚𑁆𑀚𑀺𑀢𑀸𑀥𑀺𑀧𑀢𑀺𑀢𑁆𑀢𑀬𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸𑀦𑀺, 𑀢𑀤𑀼𑀪𑀬𑀸𑀦𑀺 𑀧𑀼𑀦 𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸𑀦𑀺, 𑀢𑀸𑀦𑀺 𑀧𑀼𑀦 𑀅𑀧𑀭𑀺𑀫𑀸𑀡𑁂𑀲𑀼 𑀧𑀦 𑀘𑀓𑁆𑀓𑀯𑀸𑀴𑁂𑀲𑀼 𑀧𑀘𑁆𑀘𑁂𑀓𑀁 𑀅𑀧𑀭𑀺𑀫𑀸𑀡𑁂𑀲𑀼 𑀲𑀢𑁆𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀤𑀻𑀳𑀺 𑀅𑀦𑀦𑁆𑀢𑁂𑀳𑀺 𑀧𑀓𑀸𑀭𑁂𑀳𑀺 𑀉𑀧𑁆𑀧𑀚𑁆𑀚𑀦𑀢𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀫𑁆𑀩𑀼𑀤𑁆𑀥𑁄 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀫𑀳𑀸𑀢𑀼𑀮𑀸𑀬 𑀢𑀼𑀮𑀬𑀫𑀸𑀦𑁄 𑀯𑀺𑀬, 𑀫𑀳𑀸𑀢𑀼𑀫𑁆𑀩𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀦𑀬𑀫𑀸𑀦𑁄 𑀯𑀺𑀬 𑀲𑀩𑁆𑀩𑀸𑀓𑀸𑀭𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀓𑀸𑀫𑀸𑀯𑀘𑀭𑀝𑁆𑀞𑁂𑀦 𑀲𑀭𑀺𑀓𑁆𑀔𑀢𑀸𑀬 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸, 𑀧𑀼𑀦 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀝𑁆𑀞𑁂𑀦, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀝𑁆𑀞𑁂𑀦, 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀝𑁆𑀞𑁂𑀦 ¶ 𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁂𑀲𑁂𑀲𑀺, 𑀬𑀣𑀸 𑀢𑀁 𑀮𑁄𑀓𑀯𑀺𑀤𑀽 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀲𑀗𑁆𑀕𑀡𑀺𑀬𑀸 (𑀥. 𑀲. 𑁧), 𑀢𑀤𑀝𑁆𑀞𑀓𑀣𑀸𑀬 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 (𑀥. 𑀲. 𑀅𑀝𑁆𑀞. 𑁧) 𑀲𑀩𑁆𑀩𑀸𑀓𑀸𑀭𑀢𑁄 ¶ 𑀜𑀸𑀢𑀩𑁆𑀩𑁄𑀢𑀺. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀧𑀦 𑀓𑀼𑀲𑀮𑀸 𑀛𑀸𑀦𑀗𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀯𑀺𑀘𑀸𑀭𑀁 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀯𑀺𑀭𑀢𑁆𑀢𑀧𑀻𑀢𑀺𑀓𑀁 𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑁆𑀣𑀗𑁆𑀕𑀢𑀲𑀼𑀔𑀁 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀧𑀞𑀫𑀚𑁆𑀛𑀸𑀦𑁂 𑀢𑀸𑀯 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀲𑁂𑀲𑀸 𑀙𑀢𑁆𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀓𑀭𑀼𑀡𑀸, 𑀫𑀼𑀤𑀺𑀢𑀸 𑀘𑀸𑀢𑀺 𑀙 𑀬𑁂𑀯𑀸𑀧𑀦𑀓𑀸. 𑀲𑁂𑀲𑀁 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀳𑀺 𑀯𑀺𑀭𑀢𑀻𑀦𑀁 𑀅𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀧𑀜𑁆𑀘𑀫𑀕𑁆𑀕𑀗𑁆𑀕𑀪𑀸𑀯𑁄, 𑀪𑀽𑀫𑀦𑁆𑀢𑀭𑀯𑀲𑁂𑀦 𑀭𑀽𑀧𑀸𑀯𑀘𑀭𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀧𑀞𑀫𑀚𑁆𑀛𑀸𑀦𑀁.

𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀢𑀓𑁆𑀓𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀓𑁆𑀓𑀚𑁆𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑁂𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀘𑀸𑀭𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀢𑀺𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀤𑀼𑀢𑀺𑀬𑀲𑀤𑀺𑀲𑀫𑁂𑀯. 𑀢𑀢𑀺𑀬𑀁.

𑀢𑀣𑀸 ¶ 𑀘𑀢𑀼𑀢𑁆𑀣𑁂 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀻𑀢𑀺𑀬𑀸 𑀅𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀤𑀼𑀯𑀗𑁆𑀕𑀺𑀓𑀚𑁆𑀛𑀸𑀦𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀢𑀣𑀸 ¶ 𑀧𑀜𑁆𑀘𑀫𑁂 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀻𑀦𑀁 𑀅𑀪𑀸𑀯𑁄, 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀉𑀧𑁂𑀓𑁆𑀔𑀸𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀛𑀸𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀉𑀧𑁂𑀓𑁆𑀔𑀸𑀛𑀸𑀦𑀗𑁆𑀕𑀪𑀸𑀯𑁄, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀘𑀢𑀼𑀢𑁆𑀣𑀲𑀫𑀫𑁂𑀯. 𑀧𑀜𑁆𑀘𑀫𑀁.

𑀧𑀤𑀪𑀸𑀚𑀦𑀻𑀬𑁂 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀤𑀼𑀢𑀺𑀬𑀁, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀢𑀢𑀺𑀬𑀁, 𑀲𑁄𑀫𑀦𑀲𑁆𑀲𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀸 𑀘𑀢𑀼𑀢𑁆𑀣𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁄𑀧𑀺 𑀆𑀕𑀢𑁄, 𑀲𑁄 𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀤𑀼𑀢𑀺𑀬𑀸𑀤𑀻𑀦𑀁 𑀲𑀩𑁆𑀩𑀲𑁄 𑀧𑀜𑁆𑀘𑀓𑀦𑀬𑁂 𑀢𑀢𑀺𑀬𑀸𑀤𑀺𑀲𑀫𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑀢𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑀪𑀸𑀯𑁄 𑀘𑀸𑀢𑀺. 𑀘𑀢𑀼𑀓𑁆𑀓𑀦𑀬𑁄.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦 𑀯𑀺𑀦𑀺𑀘𑁆𑀙𑀬𑀁 𑀧𑀜𑁆𑀘𑀓𑀦𑀬𑁂𑀦𑁂𑀯 𑀯𑀓𑁆𑀔𑀸𑀫, 𑀢𑀤𑀦𑀼𑀲𑀸𑀭𑀢𑁄 𑀏𑀯 𑀘𑀢𑀼𑀓𑁆𑀓𑀦𑀬𑀯𑀲𑁂𑀦𑀸𑀧𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀏𑀯𑀁 𑀉𑀧𑀭𑀺 𑀮𑁄𑀓𑀼𑀢𑁆𑀢𑀭𑁂𑀧𑀺. 𑀧𑀜𑁆𑀘𑀯𑀺𑀥𑀸𑀧𑀺 𑀘𑁂𑀢𑁂 𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀓𑀲𑀺𑀡𑀸𑀭𑀫𑁆𑀫𑀡𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀢𑁂𑀚𑁄𑀯𑀸𑀬𑁄𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀓𑀲𑀺𑀡𑀜𑁆𑀘𑀸𑀢𑀺, 𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑁂𑀳𑀺 𑀲𑀤𑁆𑀥𑀺𑀁 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀧𑀤𑀪𑀸𑀚𑀦𑀻𑀬𑁂 (𑀥. 𑀲. 𑁨𑁦𑁨) 𑀧𑀦 𑀆𑀮𑁄𑀓𑀓𑀲𑀺𑀡𑀲𑁆𑀲 𑀑𑀤𑀸𑀢𑀓𑀲𑀺𑀡𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀆𑀓𑀸𑀲𑀓𑀲𑀺𑀡𑀲𑁆𑀲 𑀧𑀦 𑀉𑀕𑁆𑀖𑀸𑀝𑀦𑀸𑀲𑀫𑁆𑀪𑀯𑀢𑁄 𑀅𑀦𑀸𑀭𑀼𑀧𑁆𑀧𑀚𑁆𑀛𑀸𑀦𑀺𑀓𑀢𑁆𑀢𑀸. 𑀢𑀁 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀕𑁆𑀖𑀸𑀝𑀺𑀬𑀫𑀸𑀦𑀫𑁆𑀧𑀺 𑀆𑀓𑀸𑀲𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀁 𑀪𑀯𑀯𑀺𑀲𑁂𑀲𑀸𑀬, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀅𑀪𑀺𑀜𑁆𑀜𑀸𑀬, 𑀯𑀺𑀧𑀲𑁆𑀲𑀦𑀸𑀬 𑀘 𑀧𑀸𑀤𑀓𑀫𑁆𑀧𑀺 𑀳𑁄𑀢𑀺, 𑀅𑀦𑀸𑀭𑀼𑀧𑁆𑀧𑀢𑁆𑀢𑀸 𑀧𑀦 ¶ 𑀦𑀺𑀭𑁄𑀥𑀧𑀸𑀤𑀓𑀁 𑀦 𑀳𑁄𑀢𑀺. 𑀲𑁂𑀲𑀸𑀦𑀺 𑀧𑀦 𑀦𑀯 𑀓𑀲𑀺𑀡𑀸𑀦𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺𑀧𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀆𑀦𑀸𑀧𑀸𑀦𑀚𑁆𑀛𑀸𑀦𑀲𑁆𑀲𑀸𑀧𑀺 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀓𑀲𑀺𑀡𑀓𑀣𑀸.

𑀏𑀯𑀁 𑀓𑀲𑀺𑀡𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀘𑁂𑀢𑁂 𑀅𑀪𑀺𑀪𑀸𑀬𑀢𑀦𑀯𑀲𑁂𑀦 𑀧𑀦 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺. 𑀪𑀕𑀯𑀢𑀸 𑀳𑀺 𑁋

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬…𑀧𑁂… 𑀅𑀧𑁆𑀧𑀫𑀸𑀡𑀸𑀦𑀺. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 ¶ …𑀧𑁂… 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺…𑀧𑁂… 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀁 𑀦𑀻𑀮𑀁 𑀧𑀻𑀢𑀁 𑀮𑁄𑀳𑀺𑀢𑀁 𑀑𑀤𑀸𑀢’’𑀦𑁆𑀢𑀺 (𑀥. 𑀲. 𑁨𑁧𑁧 𑀆𑀤𑀬𑁄) 𑁋

𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀢𑀸𑀦𑀺 𑀘 𑀓𑀲𑀺𑀡𑁂𑀲𑁆𑀯𑁂𑀯 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄, 𑀅𑀦𑀸𑀭𑀫𑁆𑀫𑀡𑀯𑀺𑀲𑁂𑀲𑀢𑁄. 𑀢𑀢𑁆𑀣 𑀳𑀺 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀓𑀲𑀺𑀡𑀯𑀲𑁂𑀦 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄𑀯. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀅𑀝𑁆𑀞 𑀓𑀲𑀺𑀡𑀭𑀽𑀧𑀸𑀦𑀺 𑀧𑀭𑀺𑀓𑀫𑁆𑀫𑀯𑀲𑁂𑀦 𑀘𑁂𑀯 𑀅𑀧𑁆𑀧𑀦𑀸𑀯𑀲𑁂𑀦 𑀘 𑀧𑀲𑁆𑀲𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀧𑀭𑀺𑀫𑀸𑀡𑀸𑀦𑀺, 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀧𑀲𑁆𑀲𑀦𑁆𑀢𑁄 𑀘 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀁 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 ‘‘𑀓𑀺𑀫𑁂𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀢𑀁 𑀛𑀸𑀦𑀁 ‘‘𑀅𑀪𑀺𑀪𑀸𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀫𑀳𑀦𑁆𑀢𑀸𑀦𑀺. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀫𑀳𑀕𑁆𑀖𑀲𑁄 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀮𑀪𑀺𑀢𑁆𑀯𑀸 𑀯𑀺𑀬 𑀜𑀸𑀡𑀼𑀢𑁆𑀢𑀭𑁄 𑀅𑀧𑁆𑀧𑀫𑀸𑀡𑀁 𑀮𑀪𑀺𑀢𑁆𑀯𑀸 ‘‘𑀏𑀢𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀓𑀺𑀫𑁂𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀺 ¶ . 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑀺 𑀦𑀻𑀮𑀸𑀤𑀻𑀦𑀺, 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀘 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀏𑀢𑀸𑀦𑀺𑀧𑀺 ‘‘𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀅𑀪𑀺𑀪𑀸𑀬𑀢𑀦𑀸𑀦𑀻’’𑀢𑀺 𑀆𑀕𑀫𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀝. 𑁨.𑁧𑁭𑁩; 𑀫. 𑀦𑀺. 𑀅𑀝𑁆𑀞. 𑁨.𑁨𑁪𑁯; 𑀅. 𑀦𑀺. 𑀅𑀝𑁆𑀞. 𑁩.𑁮.𑁬𑁫) 𑀯𑀡𑁆𑀡𑀺𑀢𑀸𑀦𑀺. 𑀯𑀡𑁆𑀡𑀸𑀪𑁄𑀕𑀲𑁆𑀲 𑀳𑀺 𑀅𑀢𑁆𑀣𑀺𑀢𑀸𑀬 𑀧𑀼𑀭𑀺𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀲𑀳𑀺𑀢𑀢𑀸𑀬 𑀏𑀢𑁆𑀣 𑀓𑁂𑀯𑀮𑀢𑁄 𑀯𑀺𑀲𑁂𑀲𑀲𑀩𑁆𑀪𑀸𑀯𑀸 𑀘𑀢𑀼𑀥𑀸 𑀯𑀼𑀢𑁆𑀢𑀸𑀦𑀺, 𑀦𑀻𑀮𑀸𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀲𑀼𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦 𑀲𑀼𑀔𑀸𑀭𑁄𑀳𑀢𑀸𑀬 𑀜𑀸𑀡𑀼𑀢𑁆𑀢𑀭𑀺𑀓𑁄 𑀅𑀪𑀺𑀪𑀯𑀺𑀢𑁆𑀯𑀸 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀪𑀸𑀬𑀢𑀦𑀓𑀣𑀸.

𑀢𑀸𑀦𑀺 𑀧𑀼𑀦 𑀬𑀣𑀸 𑀘 𑀅𑀪𑀺𑀪𑀸𑀬𑀢𑀦𑀯𑀲𑁂𑀦, 𑀏𑀯𑀁 𑀯𑀺𑀫𑁄𑀓𑁆𑀔𑀯𑀲𑁂𑀦𑀸𑀧𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀪𑀕𑀯𑀢𑀸 𑀳𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 (𑀥. 𑀲. 𑁨𑁪𑁦 𑀆𑀤𑀬𑁄; 𑀤𑀻. 𑀦𑀺. 𑁩.𑁩𑁩𑁯, 𑁩𑁫𑁮; 𑀅. 𑀦𑀺. 𑁮.𑁬𑁬) 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀤𑁂𑀲𑀺𑀢𑀸. 𑀢𑁂 𑀘 𑀓𑀲𑀺𑀡𑁂𑀲𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄, 𑀪𑀸𑀯𑀦𑀸𑀭𑀫𑁆𑀫𑀡𑀯𑀺𑀲𑁂𑀲𑀢𑁄 𑀓𑀺𑀫𑀺𑀤𑀁 𑀅𑀥𑀺𑀫𑀼𑀘𑁆𑀘𑀦𑀁 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 ¶ 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀁, 𑀆𑀭𑀫𑁆𑀫𑀡𑁂𑀲𑀼 𑀘 𑀲𑀼𑀝𑁆𑀞𑀼 𑀅𑀪𑀺𑀭𑀢𑀺, 𑀧𑀺𑀢𑀼 𑀫𑀸𑀢𑀼 𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀻𑀢𑀺 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁 𑀦𑀸𑀫, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻. 𑀅𑀚𑁆𑀛𑀢𑁆𑀢𑀫𑁆𑀧𑀺 𑀳𑀺 𑀓𑁂𑀲𑀸𑀤𑀻𑀲𑀼 𑀦𑀻𑀮𑀁, 𑀫𑁂𑀤𑀸𑀤𑀻𑀲𑀼 𑀧𑀻𑀢𑀁, 𑀫𑀁𑀲𑀸𑀤𑀻𑀲𑀼 𑀮𑁄𑀳𑀺𑀢𑀁, 𑀤𑀦𑁆𑀢𑀸𑀤𑀻𑀲𑀼 𑀑𑀤𑀸𑀢𑀜𑁆𑀘 𑀯𑀡𑁆𑀡𑀓𑀲𑀺𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀚𑁆𑀛𑀸𑀦𑀸𑀦𑀺, 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 ¶ . 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺, 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀛𑀸𑀦𑀧𑁆𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄, 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀢𑀸 𑀤𑀲𑁆𑀲𑀺𑀢𑀸. 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀺𑀯𑀡𑁆𑀡𑀓𑀲𑀺𑀡𑁂𑀲𑀼 ‘‘𑀲𑀼𑀪’’𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀆𑀭𑀫𑁆𑀫𑀡𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀺𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀫𑁄𑀓𑁆𑀔𑀓𑀣𑀸.

𑀬𑀣𑀸 𑀘 𑀯𑀺𑀫𑁄𑀓𑁆𑀔𑀢𑁄, 𑀏𑀯𑀁 𑀧𑀝𑀺𑀧𑀤𑀸𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀛𑀸𑀦𑀪𑀸𑀯𑀦𑀸 ‘‘𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀸 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑀳𑀦𑀢𑀸𑀬 𑀅𑀲𑀼𑀔𑀲𑁂𑀯𑀦𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀢𑀤𑀪𑀸𑀯𑀢𑁄 𑀲𑀼𑀔𑀸. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘‘𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀏𑀓𑀘𑁆𑀘𑀲𑁆𑀲 𑀤𑀦𑁆𑀥𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺𑀦𑀻, 𑀏𑀓𑀘𑁆𑀘𑀲𑁆𑀲 𑀔𑀺𑀧𑁆𑀧𑀸. 𑀅𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸, 𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀔𑀺𑀧𑁆𑀧𑀸 𑀘 𑀅𑀪𑀺𑀜𑁆𑀜𑀸. 𑀧𑀼𑀩𑁆𑀩𑀸𑀧𑀭𑀓𑀸𑀮𑁂𑀲𑀼 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀲𑁂𑀯𑀦𑀯𑀲𑁂𑀦 𑀯𑁄𑀫𑀺𑀲𑁆𑀲𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸. 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀸. 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀸 𑀢𑀺𑀓𑁆𑀔𑀫𑀼𑀤𑀼𑀢𑀸𑀬 𑀧𑀞𑀫𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀘𑀢𑀼𑀢𑁆𑀣𑀸, 𑀯𑁄𑀫𑀺𑀲𑁆𑀲𑀢𑀸𑀬 𑀫𑀚𑁆𑀛𑀺𑀫𑀸 𑀤𑁆𑀯𑁂𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀸𑀯𑀺𑀚𑁆𑀚𑀸𑀪𑀺𑀪𑀯𑀦𑀸𑀦𑀪𑀺𑀪𑀯𑀦𑀯𑀲𑁂𑀦 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀢𑀸𑀥𑀺𑀓𑀸𑀭𑀸𑀓𑀢𑀸𑀥𑀺𑀓𑀸𑀭𑀢𑀸𑀯𑀲𑁂𑀦 𑀯𑀸𑀧𑀺 ¶ 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑀸𑀤𑀺𑀆𑀕𑀫𑀦𑀯𑀲𑁂𑀦𑀸𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀪𑁂𑀤𑁄 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀤𑀸𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀤𑀸𑀓𑀣𑀸.

𑀬𑀣𑀸 ¶ 𑀘 𑀧𑀝𑀺𑀧𑀤𑀸𑀳𑀺, 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄𑀧𑀺 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺. 𑀢𑀢𑁆𑀣 𑀬𑀁 𑀅𑀧𑁆𑀧𑀕𑀼𑀡𑀁, 𑀉𑀧𑀭𑀺𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑀁 𑀧𑀭𑀺𑀢𑁆𑀢𑀁. 𑀬𑀁 𑀧𑀦 𑀅𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀁, 𑀢𑀁 𑀧𑀭𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀯𑀺𑀧𑀭𑀺𑀬𑀸𑀬𑀢𑁄 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀢𑀸𑀬 𑀫𑀚𑁆𑀛𑁂 𑀇𑀢𑀭𑀤𑁆𑀯𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀫𑁆𑀫𑀡𑀓𑀣𑀸.

𑀬𑀣𑀸 𑀘 𑀧𑀝𑀺𑀧𑀤𑀸𑀭𑀫𑁆𑀫𑀡𑁂𑀳𑀺, 𑀏𑀯𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀢𑀸, 𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀼𑀦 𑀢𑀺𑀯𑀺𑀥𑀢𑀸 𑀘 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀤𑀲𑀓𑀲𑀺𑀡𑀫𑀽𑀮𑀯𑀺𑀪𑀸𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑀣𑀸 𑀓𑀲𑀺𑀡𑀫𑀽𑀮𑁂𑀲𑀼, 𑀏𑀯𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀽𑀮𑁂𑀲𑀼𑀧𑀺 𑀬𑀣𑀸𑀬𑁄𑀕𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦 𑀳𑀺 𑀆𑀤𑀺𑀢𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀓𑀭𑀼𑀡𑀸𑀲𑀳𑀕𑀢𑀁, 𑀫𑀼𑀤𑀺𑀢𑀸𑀲𑀳𑀕𑀢𑀦𑁆𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀁 𑀧𑀦 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀏𑀓𑀯𑀺𑀥𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺. 𑀧𑀼𑀭𑀺𑀫𑁂𑀲𑀼 𑀳𑀺 𑀢𑀻𑀲𑀼 𑀧𑀜𑁆𑀘𑀫𑀚𑁆𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑁄𑀫𑀦𑀲𑁆𑀲𑀸𑀯𑀺𑀧𑁆𑀧𑀬𑁄𑀕𑀢𑁄, 𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀸𑀦𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀭𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀦𑀺𑀲𑁆𑀲𑀭𑀡𑀢𑁆𑀢𑀸, 𑀧𑀘𑁆𑀙𑀺𑀫𑁂 𑀘 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀢𑁄, 𑀢𑀲𑁆𑀲𑀸 𑀘 𑀧𑀝𑀺𑀖𑀸𑀦𑀼𑀦𑀬𑀦𑀺𑀲𑁆𑀲𑀭𑀡𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁄, 𑀢𑀸𑀦𑀺 𑀧𑀼𑀦 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀪𑁂𑀤𑁂𑀳𑀺 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀅𑀧𑁆𑀧𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀩𑀳𑀼𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀘 𑀏𑀓𑀲𑁆𑀫𑀺𑀁 𑀲𑀢𑁆𑀢𑁂 𑀅𑀧𑁆𑀧𑀦𑀁 𑀧𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀏𑀓𑀸𑀯𑀸𑀲𑀏𑀓𑀯𑀻𑀣𑀺𑀕𑀸𑀫𑀸𑀤𑀺𑀕𑀢𑀲𑀢𑁆𑀢𑁂𑀲𑀼 𑀧𑀸𑀧𑀦𑀯𑀲𑁂𑀦 𑀯𑀟𑁆𑀠𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀦𑁂𑀢𑁆𑀣 𑀓𑀭𑀼𑀡𑀸𑀲𑀳𑀕𑀢𑁂 𑀫𑀼𑀤𑀺𑀢𑀸𑀯𑀺𑀭𑀳𑀺𑀢𑀸 𑀧𑀜𑁆𑀘𑀢𑀺𑀁𑀲 𑀥𑀫𑁆𑀫𑀸, 𑀢𑁂𑀲𑀼 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀓𑀭𑀼𑀡𑀸 𑀘𑀸𑀢𑀺 𑀧𑀜𑁆𑀘𑁂𑀯 𑀬𑁂𑀯𑀸𑀧𑀦𑀓𑀸, 𑀓𑀭𑀼𑀡𑀸 𑀘 𑀦𑀺𑀬𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀧𑀺. 𑀓𑁂𑀯𑀮𑀁 𑀓𑀭𑀼𑀡𑀸𑀯𑀺𑀭𑀳𑀺𑀢𑀸 𑀫𑀼𑀤𑀺𑀢𑀸 𑀦𑀺𑀬𑀢𑀸 𑀧𑀯𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀅𑀯𑀲𑁂𑀲𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑁆𑀯𑀬𑁂, 𑀧𑀦 𑀓𑀲𑀺𑀡𑀸𑀲𑀼𑀪𑀸𑀤𑀻𑀲𑀼 𑀘 𑀲𑀩𑁆𑀩𑀢𑁆𑀣 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀺𑀭𑀳𑀺𑀢𑀸 𑀘 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸, 𑀢𑀢𑁆𑀣 𑀘 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄𑀯 𑀬𑁂𑀯𑀸𑀧𑀦𑀓𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀽𑀮𑀯𑀺𑀪𑀸𑀕𑀓𑀣𑀸.

𑀅𑀲𑀼𑀪𑀪𑁂𑀤𑀢𑁄 ¶ 𑀧𑀦 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀓𑀁 𑀤𑀲𑀯𑀺𑀥𑀁 𑀳𑁄𑀢𑀺 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀲𑀳𑀕𑀢𑀁 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀯𑀺𑀘𑁆𑀙𑀺𑀤𑁆𑀤𑀓𑀯𑀺𑀓𑁆𑀔𑀸𑀬𑀺𑀢𑀓𑀯𑀺𑀓𑁆𑀔𑀺𑀢𑁆𑀢𑀓𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀮𑁄𑀳𑀺𑀢𑀓𑀧𑀼𑀴𑀯𑀓𑀅𑀝𑁆𑀞𑀺𑀓𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺, 𑀤𑀲𑀯𑀺𑀥𑁂𑀧𑀺 𑀘𑁂𑀢𑀲𑁆𑀫𑀺𑀁 𑀅𑀲𑀼𑀪𑁂 𑀧𑀝𑀺𑀓𑀽𑀮𑀢𑁆𑀢𑀸, 𑀤𑀼𑀩𑁆𑀩𑀮𑀢𑁆𑀢𑀸 𑀘 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀛𑀸𑀦𑀁 𑀢𑀺𑀝𑁆𑀞𑀢𑀺, 𑀦 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦𑁂𑀯 𑀦𑀸𑀯𑀸 𑀯𑀺𑀬, 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬, 𑀧𑀦𑁂𑀢𑁆𑀣 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀯𑁂𑀢𑀦𑀮𑀸𑀪𑀤𑀲𑁆𑀲𑀦𑁂𑀦 𑀧𑀼𑀧𑁆𑀨𑀙𑀟𑁆𑀟𑀓𑀲𑁆𑀲 𑀕𑀽𑀣𑀭𑀸𑀲𑀺𑀫𑁆𑀳𑀺 𑀯𑀺𑀬, 𑀉𑀧𑀲𑀦𑁆𑀢𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀘 𑀭𑁄𑀕𑀺𑀦𑁄 𑀯𑀫𑀦𑀯𑀺𑀭𑁂𑀘𑀦𑀧𑁆𑀧𑀯𑀢𑁆𑀢𑀺𑀬𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀤𑀲𑀯𑀺𑀥𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀁 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀲𑀼𑀪𑀸𑀭𑀫𑁆𑀫𑀡𑀲𑁆𑀲 𑀅𑀯𑀟𑁆𑀠𑀦𑀻𑀬𑀢𑀸𑀬 𑀔𑀼𑀤𑁆𑀤𑀓𑁂 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀦𑀺𑀫𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀫𑀳𑀦𑁆𑀢𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀧𑀦 ¶ 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀲𑀸𑀫𑀜𑁆𑀜𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦, 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀸𑀬𑀕𑀢𑀸𑀲𑀢𑀺 𑀲𑀗𑁆𑀕𑀳𑀺𑀢𑀸, 𑀯𑀡𑁆𑀡𑀓𑀲𑀺𑀡𑁂𑀲𑀼 𑀘 𑀓𑁂𑀲𑀸𑀤𑀻𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀦𑀻𑀮𑀸𑀤𑀺𑀯𑀡𑁆𑀡𑀸𑀭𑀫𑁆𑀫𑀡𑀸, 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀓𑀸𑀬𑀕𑀢𑀸𑀲𑀢𑀺 𑀘 𑀲𑀗𑁆𑀕𑀳𑀺𑀢𑀸. 𑀧𑀤𑀪𑀸𑀚𑀦𑀻𑀬𑁂 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦𑀸𑀧𑀺 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀼𑀪𑀫𑀽𑀮𑀯𑀺𑀪𑀸𑀕𑀓𑀣𑀸.

𑀏𑀯𑀁 𑀆𑀭𑀫𑁆𑀫𑀡𑀸𑀤𑀺𑀪𑁂𑀤𑀢𑁄 𑀘 𑀪𑀺𑀦𑁆𑀦𑀸𑀦𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑁂𑀦 𑀅𑀦𑀦𑁆𑀢𑀢𑀸, 𑀪𑀕𑀯𑀢𑀸 𑀘 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀤𑁂𑀲𑀺𑀢𑀪𑀸𑀯𑁄, 𑀯𑀺𑀢𑁆𑀣𑀸𑀭𑀦𑀬𑀸𑀢𑀺𑀤𑁂𑀲𑁄 𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀅𑀭𑀽𑀧𑀸𑀯𑀘𑀭𑀸𑀤𑀻𑀲𑀼𑀧𑀺 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀸 𑀧𑀦 𑀓𑀼𑀲𑀮𑀥𑀫𑁆𑀫𑀸 𑀲𑀫𑁆𑀧𑀬𑁄𑀕𑀢𑁄 𑀦 𑀪𑀺𑀦𑁆𑀦𑀸, 𑀲𑀩𑁆𑀩𑁂𑀧𑀺 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀸𑀯, 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄𑀧𑀺 𑀲𑀩𑁆𑀩𑀲𑁄 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀲𑀤𑀺𑀲𑀸. 𑀅𑀭𑀽𑀧𑀸𑀯𑀘𑀭𑀪𑀸𑀯𑁄 𑀏𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀦 𑀆𑀭𑀫𑁆𑀫𑀡𑀢𑁄 𑀢𑁂 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺. 𑀢𑀢𑁆𑀣 𑀳𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀧𑀯𑀢𑁆𑀢𑀁 𑀧𑀞𑀫𑀁, 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀯𑀢𑁆𑀢𑀁 𑀤𑀼𑀢𑀺𑀬𑀁, 𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑁂 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀯𑀢𑁆𑀢𑀁 ¶ 𑀢𑀢𑀺𑀬𑀁, 𑀢𑀲𑁆𑀫𑀺𑀁 𑀢𑀢𑀺𑀬𑁂 ‘‘𑀲𑀦𑁆𑀢𑀫𑁂𑀢𑀁 𑀧𑀡𑀻𑀢𑀫𑁂𑀢’’𑀦𑁆𑀢𑀺 𑀧𑀯𑀢𑁆𑀢𑀁 𑀘𑀢𑀼𑀢𑁆𑀣𑀁. 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀁 𑀲𑀦𑁆𑀢𑀲𑀦𑁆𑀢𑀢𑀭𑀲𑀦𑁆𑀢𑀢𑀫𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 ¶ 𑀭𑀽𑀧𑀸𑀯𑀘𑀭𑁂𑀲𑀼 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑀢𑁄 𑀉𑀧𑀭𑀽𑀧𑀭𑀺𑀛𑀸𑀦𑀸𑀦𑀁 𑀲𑀦𑁆𑀢𑀢𑀭𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀅𑀗𑁆𑀕𑀸𑀢𑀺𑀓𑁆𑀓𑀫𑀭𑀳𑀺𑀢𑁂𑀲𑀼 𑀧𑀦 𑀆𑀭𑀼𑀧𑁆𑀧𑁂𑀲𑀼 𑀓𑀣𑀦𑁆𑀢𑀺? 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄. 𑀏𑀢𑁂𑀲𑀼 𑀳𑀺 𑀓𑀲𑀺𑀡𑀭𑀽𑀧𑀲𑀫𑀢𑀺𑀓𑁆𑀓𑀫𑀢𑁄 𑀧𑀞𑀫𑀁 𑀛𑀸𑀦𑀁 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀲𑀦𑁆𑀢𑀁, 𑀢𑀢𑁄𑀧𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀢𑀺𑀓𑁆𑀓𑀫𑀢𑁄 𑀤𑀼𑀢𑀺𑀬𑀁, 𑀢𑀢𑁄𑀧𑀺 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀁, 𑀢𑀢𑁄𑀧𑀺 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀢𑀺𑀓𑁆𑀓𑀫𑀢𑁄 𑀘𑀢𑀼𑀢𑁆𑀣𑀦𑁆𑀢𑀺. 𑀏𑀯𑀁 𑀅𑀗𑁆𑀕𑀲𑀫𑀢𑁆𑀢𑁂𑀧𑀺 𑀣𑀽𑀮𑀣𑀽𑀮𑀸𑀢𑀺𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀼𑀔𑀼𑀫𑀸𑀭𑀫𑁆𑀫𑀡𑀢𑀸𑀬 𑀉𑀧𑀭𑀽𑀧𑀭𑀺𑀚𑁆𑀛𑀸𑀦𑀸𑀦𑀁 𑀲𑀦𑁆𑀢𑀢𑀭𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀲𑀫𑀸𑀬𑀸𑀫𑀯𑀺𑀢𑁆𑀣𑀸𑀭𑀸𑀦𑀫𑁆𑀧𑀺 𑀯𑀢𑁆𑀣𑀸𑀦𑀁 𑀲𑀼𑀢𑁆𑀢𑀲𑀼𑀔𑀼𑀫𑀢𑀭𑀸𑀤𑀺𑀪𑀸𑀯𑁄 𑀯𑀺𑀬. 𑀦𑀦𑀼 𑀅𑀪𑀸𑀯𑀸𑀭𑀫𑁆𑀫𑀡𑀢𑀸𑀬 𑀢𑀢𑀺𑀬𑀸𑀭𑀼𑀧𑁆𑀧𑀁 𑀲𑀦𑁆𑀢𑀧𑀡𑀻𑀢𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑁆𑀲 𑀓𑀣𑀁 𑀢𑀢𑁆𑀣 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁, 𑀓𑀣𑀁 𑀘 𑀲𑀫𑀢𑀺𑀓𑁆𑀓𑀫𑁄 𑀯𑀸 𑀳𑁄𑀢𑀻𑀢𑀺? 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀬, 𑀲𑀸 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀧𑀡𑀻𑀢𑀢𑀸𑀬. 𑀬𑀣𑀸 𑀳𑀺 𑀭𑀸𑀚𑀸 𑀤𑀦𑁆𑀢𑀓𑀸𑀭𑀸𑀤𑀺𑀲𑀺𑀧𑁆𑀧𑀺𑀓𑀸𑀦𑀁 𑀅𑀢𑀺𑀲𑀼𑀔𑀼𑀫𑀫𑀦𑀸𑀧𑀲𑀺𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀙𑁂𑀓𑀸 𑀯𑀢𑀺𑀫𑁂 𑀆𑀘𑀭𑀺𑀬𑀸’’𑀢𑀺 𑀢𑁂𑀲𑀁 𑀙𑁂𑀓𑀢𑀸𑀬 𑀢𑀼𑀲𑁆𑀲𑀦𑁆𑀢𑁄𑀧𑀺 𑀦 𑀢𑀁 𑀲𑀺𑀧𑁆𑀧𑀺𑀓𑀪𑀸𑀯𑀁 𑀧𑀢𑁆𑀣𑁂𑀢𑀺, 𑀢𑀁 𑀲𑀫𑀢𑀺𑀓𑁆𑀓𑀫𑁆𑀫 𑀭𑀸𑀚𑀪𑀸𑀯𑁂 𑀏𑀯 𑀢𑀺𑀝𑁆𑀞𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀫𑁆𑀧𑁂𑀢𑁂𑀲𑀁 𑀧𑀼𑀦 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀪𑁂𑀤𑁂𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑁂𑀓𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀓𑀦𑁆𑀢𑀺 𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀧𑀞𑀫𑀸𑀭𑀼𑀧𑁆𑀧𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀤𑀼𑀢𑀺𑀬𑀸𑀭𑀼𑀧𑁆𑀧𑀸𑀤𑀻𑀦𑀜𑁆𑀘 𑀤𑀼𑀓𑁆𑀔𑀧𑀝𑀺𑀧𑀤𑀢𑀸, 𑀧𑀭𑀺𑀬𑀸𑀤𑀺𑀡𑁆𑀡𑀦𑀺𑀓𑀦𑁆𑀢𑀺𑀓𑀲𑁆𑀲 𑀢𑀤𑀧𑁆𑀧𑀦𑀸𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀫𑀽𑀮𑀓𑀸𑀦𑀁 𑀧𑀦 𑀘𑀢𑀼𑀦𑁆𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀯𑀺𑀧𑀭𑀺𑀬𑀸𑀬𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀧𑀦𑁂𑀢𑁆𑀣 𑀅𑀥𑀺𑀧𑀢𑀺𑀲𑀳𑀺𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀯𑀺𑀦𑀸 𑀅𑀥𑀺𑀧𑀢𑀻𑀳𑀺. 𑀓𑀸𑀫𑀸𑀯𑀘𑀭𑀸 𑀢𑀼 𑀅𑀥𑀺𑀧𑀢𑀺𑀭𑀳𑀺𑀢𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ , 𑀢𑁂 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀻𑀢𑀺 𑀤𑁆𑀯𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀧𑀦 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁂𑀯, 𑀦𑁂𑀢𑀭𑀁. 𑀢𑀢𑁆𑀣 𑀘 𑀙𑀦𑁆𑀤𑀸𑀥𑀺𑀧𑀢𑀺𑀦𑀸 𑀲𑀳𑀚𑀸𑀢𑀸 𑀥𑀫𑁆𑀫𑀸 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸, 𑀙𑀦𑁆𑀤𑁄 𑀧𑀦 𑀅𑀥𑀺𑀧𑀢𑀺 𑀏𑀯, 𑀦 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑁄. 𑀇𑀢𑀭𑁂 𑀧𑀦 𑀅𑀥𑀺𑀧𑀢𑁂𑀬𑁆𑀬𑀸𑀯, 𑀦𑀸𑀥𑀺𑀧𑀢𑀬𑁄 𑀅𑀜𑁆𑀜𑀲𑁆𑀲 𑀅𑀢𑁆𑀢𑀦𑀸 𑀲𑀳𑀚𑀸𑀢𑀲𑁆𑀲 𑀙𑀦𑁆𑀤𑀲𑁆𑀲, 𑀇𑀢𑀭𑁂𑀲𑀜𑁆𑀘 𑀅𑀥𑀺𑀧𑀢𑀺𑀬𑀢𑁆𑀣𑀲𑁆𑀲 𑀅𑀪𑀸𑀯𑀸. 𑀏𑀓𑀲𑁆𑀫𑀺𑀁 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀦𑁆𑀤𑀸𑀤𑀻𑀲𑀼 𑀘𑀢𑀽𑀲𑀼𑀧𑀺 𑀯𑀺𑀚𑁆𑀚𑀫𑀸𑀦𑁂𑀲𑀼 𑀬𑀣𑀸𑀧𑀘𑁆𑀘𑀬𑀁 𑀲𑀳𑀚𑀸𑀢𑀸𑀥𑀺𑀧𑀢𑀺 ¶ 𑀏𑀓𑁄𑀯 𑀮𑀩𑁆𑀪𑀢𑀺. 𑀏𑀯𑀁 𑀯𑀻𑀭𑀺𑀬𑀸𑀥𑀺𑀧𑀢𑀺𑀬𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀜𑀸𑀢𑀩𑁆𑀩𑁄.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀸 𑀧𑀦 𑀓𑀼𑀲𑀮𑀸 𑀫𑀕𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀘𑀢𑀽𑀲𑀼𑀧𑀺 𑀘𑁂𑀢𑁂𑀲𑀼 𑀫𑀕𑁆𑀕𑀲𑀫𑁆𑀧𑀬𑁄𑀕𑁄 𑀲𑀫𑀸𑀦𑁄 𑀅𑀝𑁆𑀞𑀦𑁆𑀦𑀫𑁆𑀧𑀺 𑀫𑀕𑁆𑀕𑀗𑁆𑀕𑀸𑀦𑀁 𑀲𑀩𑁆𑀩𑀢𑁆𑀣 𑀉𑀧𑁆𑀧𑀢𑁆𑀢𑀺𑀢𑁄 𑀓𑀣𑀁 𑀢𑀢𑁆𑀣 𑀪𑁂𑀤𑁄𑀢𑀺? 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀓𑀺𑀘𑁆𑀘𑀲𑁆𑀲 𑀪𑁂𑀤𑀢𑁄. 𑀅𑀦𑀼𑀲𑀬𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀳𑀺 𑀫𑀕𑁆𑀕𑁄. 𑀫𑀕𑁆𑀕𑀸 𑀳𑀺 𑀬𑀣𑀸𑀲𑀓𑀁 𑀅𑀦𑀼𑀲𑀬𑁂 𑀧𑀚𑀳𑀦𑁆𑀢𑀺 𑀏𑀯, 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀧𑀯𑀢𑁆𑀢𑀜𑁆𑀘 𑀙𑀺𑀦𑁆𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀧𑀯𑀢𑁆𑀢𑀦𑁆𑀢𑀺𑀧𑀺 𑀢𑁂 𑀏𑀯. 𑀢𑀁 𑀤𑀼𑀯𑀺𑀥𑀁 𑀉𑀧𑀸𑀤𑀺𑀦𑁆𑀦𑀓𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑀜𑁆𑀘.

𑀢𑀢𑁆𑀣𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀺𑀝𑁆𑀞𑀸𑀦𑀼𑀲𑀬𑀁, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂, 𑀢𑀁𑀲𑀳𑀚𑀸𑀢𑀸𑀦𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸𑀢𑀺 𑀧𑀜𑁆𑀘𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀅𑀧𑀸𑀬𑀪𑀯𑀢𑁄 𑀘𑁂𑀯 𑀲𑀼𑀕𑀢𑀺𑀪𑀯𑀢𑁄 𑀘 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀢𑀤𑀯𑀲𑁂𑀲𑀢𑁄 𑀯𑀼𑀝𑁆𑀞𑀸𑀢𑀺 ¶ . 𑀢𑀢𑁆𑀣 𑀬𑀤𑁂𑀢𑀁 𑀧𑀞𑀫𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁, 𑀢𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀢𑀸𑀦𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀇𑀢𑀭𑁂 𑀢𑀬𑁄 𑀔𑀦𑁆𑀥𑀸. 𑀇𑀫𑁂 𑀅𑀦𑀼𑀧𑀸𑀤𑀺𑀦𑁆𑀦𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀁, 𑀅𑀦𑀼𑀧𑀸𑀤𑀺𑀦𑁆𑀦𑀧𑁆𑀧𑀯𑀢𑁆𑀢𑀁 𑀦𑀸𑀫. 𑀢𑀢𑁄 𑀧𑀞𑀫𑀫𑀕𑁆𑀕𑁄 𑀯𑀼𑀝𑁆𑀞𑀸𑀢𑀺, 𑀢𑀁 𑀙𑀺𑀦𑁆𑀤𑀢𑀺 𑀦𑀸𑀫. 𑀬𑀤𑁂𑀢𑀁 𑀅𑀧𑀸𑀬𑀪𑀯𑁂, 𑀲𑀼𑀕𑀢𑀺𑀬𑀜𑁆𑀘 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀢𑀤𑀯𑀲𑁂𑀲𑁂 𑀘 𑀧𑀞𑀫𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀬𑀁 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀁 𑀓𑀫𑁆𑀫𑀚𑀓𑁆𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀉𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀁, 𑀉𑀧𑀸𑀤𑀺𑀦𑁆𑀦𑀧𑁆𑀧𑀯𑀢𑁆𑀢𑀁 𑀦𑀸𑀫. 𑀢𑀢𑁄 𑀧𑀞𑀫𑀫𑀕𑁆𑀕𑁄 𑀯𑀼𑀝𑁆𑀞𑀸𑀢𑀺, 𑀢𑀜𑁆𑀘 𑀙𑀺𑀦𑁆𑀤𑀢𑀺 𑀦𑀸𑀫. 𑀢𑀢𑁄𑀯 𑀧𑀞𑀫𑀫𑀕𑁆𑀕𑁄 𑀅𑀦𑀼𑀲𑀬𑀁 𑀧𑀚𑀳𑀦𑁆𑀢𑁄𑀯 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀢𑀺, 𑀧𑀯𑀢𑁆𑀢𑀜𑁆𑀘 𑀙𑀺𑀦𑁆𑀤𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀇𑀢𑀭𑀫𑀕𑁆𑀕𑁂𑀲𑀼𑀧𑀺 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀧𑁆𑀧𑀯𑀢𑁆𑀢𑀁 𑀯𑀼𑀝𑁆𑀞𑀸𑀦𑀁 𑀙𑀺𑀦𑁆𑀤𑀦𑀁 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁.

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀧𑀦 𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀸𑀦𑀼𑀲𑀬𑀁, 𑀧𑀝𑀺𑀖𑀸𑀦𑀼𑀲𑀬𑀁, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂, 𑀢𑀁𑀲𑀳𑀚𑀸𑀢𑀸𑀦𑀺 𑀘 𑀢𑀣𑀸 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀤𑁆𑀯𑁂 𑀘 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀻𑀢𑀺 𑀙 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 ¶ 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀓𑀸𑀫𑀲𑀼𑀕𑀢𑀺𑀢𑁄 𑀞𑀧𑁂𑀢𑁆𑀯𑀸 𑀏𑀓𑀪𑀯𑀁 𑀢𑀤𑀯𑀲𑁂𑀲𑀢𑁄 𑀯𑀼𑀝𑁆𑀞𑀸𑀢𑀺, 𑀧𑀢𑀦𑀼𑀪𑀽𑀢𑀸𑀯 𑀢𑀁𑀲𑀫𑀗𑁆𑀕𑀺𑀦𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀅𑀥𑀺𑀫𑀢𑁆𑀢𑀸, 𑀢𑁂 𑀘 𑀓𑀤𑀸𑀘𑀺 𑀯𑀺𑀭𑀴𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀸𑀕𑀸𑀫𑀺𑀫𑀕𑁆𑀕𑁄𑀧𑀺 𑀢𑀸𑀦𑁂𑀯 𑀢𑀦𑀼𑀲𑀳𑀕𑀢𑀓𑀸𑀫𑀭𑀸𑀕𑀧𑁆𑀧𑀝𑀺𑀖𑀸𑀦𑀼𑀲𑀬𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀦𑀺 𑀙 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀓𑀸𑀫𑀪𑀯𑀢𑁄 𑀯𑀼𑀝𑁆𑀞𑀸𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀦 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀸𑀯𑀺𑀚𑁆𑀚𑀸𑀦𑀼𑀲𑀬𑁂, 𑀉𑀤𑁆𑀥𑀘𑁆𑀘𑀁, 𑀢𑀤𑁂𑀓𑀝𑁆𑀞𑁂 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀘 𑀢𑀁𑀲𑀳𑀚𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀭𑀽𑀧𑀸𑀭𑀽𑀧𑀢𑁄, 𑀲𑀩𑁆𑀩𑀪𑀯𑀢𑁄𑀧𑀺 ¶ 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀧𑀞𑀫𑀫𑀕𑁆𑀕𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀓𑀺𑀘𑁆𑀘𑀪𑁂𑀤𑀢𑁄 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀤𑁂𑀯𑀁 𑀫𑀕𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁, 𑀧𑀼𑀦 𑀛𑀸𑀦𑀗𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁? 𑀧𑀞𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀢𑀸𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀺𑀓𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀜𑁆𑀘𑀸𑀢𑀺 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀏𑀯𑀁 𑀤𑀼𑀢𑀺𑀬𑀫𑀕𑁆𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀏𑀢𑁆𑀣 𑀘 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀲𑁄𑀴𑀲𑀯𑀺𑀥𑀢𑀸𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀓𑀺𑀁 𑀧𑀦𑁂𑀢𑁆𑀣 𑀏𑀯𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀲𑁆𑀲 𑀦𑀺𑀬𑀸𑀫𑀓𑀁 𑀓𑀸𑀭𑀡𑀦𑁆𑀢𑀺? 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀢𑀲𑁆𑀫𑀺𑀁 𑀳𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀪𑀽𑀢𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑁂 𑀅𑀭𑀺𑀬𑀫𑀕𑁆𑀕𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀘 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀦𑀦𑀼 𑀘𑁂𑀢𑁆𑀣 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀢𑁆𑀢𑀸 𑀘𑀢𑀼𑀓𑁆𑀓𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑀲𑁆𑀲 𑀦𑀺𑀬𑀸𑀫𑀓𑀳𑁂𑀢𑀼, 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑀢𑁄 𑀧𑀦 𑀦𑁂𑀲𑀁 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀪𑀸𑀯𑀲𑁆𑀲 𑀦𑀺𑀬𑀸𑀫𑀓𑁂𑀦 𑀅𑀜𑁆𑀜𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀯𑀺𑀢𑀓𑁆𑀓𑀸𑀤𑀺𑀯𑀺𑀓𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀦 𑀢𑀁 𑀦𑀺𑀬𑀸𑀫𑀓𑀁 𑀪𑀯𑁂𑀬𑁆𑀬, 𑀓𑀺𑀁 𑀢𑀁 𑀦𑀺𑀬𑀸𑀫𑀓𑀓𑀸𑀭𑀡𑀦𑁆𑀢𑀺? 𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸. 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼 𑀳𑀺 𑀬𑀁 𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑀼𑀝𑁆𑀞𑀸𑀬 𑀬𑁂 𑀓𑁂𑀘𑀺 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀬𑁂 𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀢𑀺, 𑀢𑁂 𑀲𑀩𑁆𑀩𑁂 𑀢𑀁𑀢𑀁𑀛𑀸𑀦𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀬𑀁 ¶ 𑀬𑀁 𑀯𑀸 𑀧𑀦 𑀛𑀸𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀬𑁂 ¶ 𑀬𑁂 𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀢𑀺, 𑀢𑁂 𑀘 𑀢𑀁𑀢𑀁𑀛𑀸𑀦𑀲𑀤𑀺𑀲𑀸𑀯 𑀳𑁄𑀦𑁆𑀢𑀺 𑀪𑀽𑀫𑀺𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀸 𑀕𑁄𑀥𑀸 𑀯𑀺𑀬. 𑀢𑀢𑁆𑀣 𑀘 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑀸𑀧𑀺, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀛𑀸𑀦𑀁 𑀧𑀸𑀤𑀓𑀁 𑀅𑀓𑀢𑁆𑀯𑀸 𑀅𑀲𑀫𑁆𑀫𑀲𑀺𑀢𑁆𑀯𑀸𑀯 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸𑀧𑀺 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀢𑀁 𑀢𑀁 𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸𑀧𑀺 𑀲𑀩𑁆𑀩𑁂 𑀏𑀓𑀲𑀤𑀺𑀲𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀅𑀢𑁆𑀣𑀺. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀯𑀸 𑀢𑀢𑁆𑀣 𑀕𑀢𑁂 𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸 𑀬𑀣𑀸𑀓𑁆𑀓𑀫𑀁 𑀘𑀢𑀼𑀭𑀗𑁆𑀕𑀺𑀓𑀸, 𑀢𑀺𑀯𑀗𑁆𑀕𑀺𑀓𑀸, 𑀤𑀼𑀯𑀗𑁆𑀕𑀺𑀓𑀸 𑀘 𑀳𑁄𑀦𑁆𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀁, 𑀧𑀦 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀸 𑀢𑀢𑁆𑀣 𑀕𑀢𑁂 𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀸𑀯 𑀳𑁄𑀦𑁆𑀢𑀺. 𑀏𑀢𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀛𑀸𑀦𑀺𑀓𑀸𑀦𑀫𑁆𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑁄𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯𑀸𑀢𑀺 𑀢𑀤𑁂𑀯 𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸 𑀦𑀺𑀬𑀸𑀫𑀓𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀧𑀞𑀫𑀚𑁆𑀛𑀸𑀦𑀺𑀓𑁂𑀲𑀼 𑀢𑀸𑀯 𑀘𑀢𑀽𑀲𑀼 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀥𑀫𑁆𑀫𑁂𑀲𑀼 𑀞𑀧𑁂𑀢𑁆𑀯𑀸 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣 𑀦𑀺𑀬𑀢𑀸, 𑀧𑀸𑀴𑀺𑀬𑀜𑁆𑀘 (𑀥. 𑀲. 𑁨𑁭𑁭) 𑀭𑀽𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀙𑀦𑁆𑀤𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀬𑁂𑀯𑀸𑀧𑀦𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀕𑀳𑀯𑀸𑀭𑁂 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀧𑀼𑀩𑁆𑀩𑁂 𑀲𑀗𑁆𑀕𑀳𑀺𑀢𑀸𑀯𑀲𑁂𑀲𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀲𑁂𑀦 𑀅𑀢𑀺𑀭𑁂𑀓𑀸 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑀺 𑀥𑀫𑁆𑀫𑁂𑀲𑀼 𑀲𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀸 𑀯𑀺𑀲𑀬𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀸, 𑀇𑀢𑀭𑁂 𑀅𑀲𑁆𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀩𑁆𑀩𑁂𑀯 ¶ 𑀢𑁂 𑀤𑁆𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀣𑀸 𑀯𑀻𑀭𑀺𑀬𑀁 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀢𑀁 𑀓𑀺𑀘𑁆𑀘𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀇𑀢𑀭𑁂 𑀅𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺. 𑀢𑀣𑀸 𑀙𑀦𑁆𑀤𑁄 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁 𑀅𑀫𑁄𑀳𑁄𑀢𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀇𑀚𑁆𑀛𑀦𑀓𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 𑀦𑀸𑀫𑁂𑀦 ‘‘𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀦𑀺𑀤𑁆𑀥𑀺𑀧𑀸𑀤𑀸’’𑀢𑀺. 𑀢𑀣𑀸 𑀲𑀢𑀺 𑀅𑀫𑁄𑀳𑁄 𑀯𑀻𑀭𑀺𑀬𑀁 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀫𑀸𑀥𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀇𑀫𑁂 𑀲𑀢𑁆𑀢 𑀥𑀫𑁆𑀫𑀸 𑀩𑀼𑀚𑁆𑀛𑀦𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀅𑀩𑁄𑀚𑁆𑀛𑀗𑁆𑀕𑀸𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸.

𑀲𑁂𑀲𑀁 𑀲𑀩𑁆𑀩𑀁 𑀮𑀓𑁆𑀔𑀡𑀸𑀤𑀺𑀢𑁄 𑀧𑀝𑁆𑀞𑀸𑀬 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 ¶ , 𑀓𑁂𑀯𑀮𑀁 𑀧𑀦 𑀫𑀕𑁆𑀕𑀗𑁆𑀕𑀲𑀗𑁆𑀕𑀳𑁂 ‘‘𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀥. 𑀲. 𑁩𑁩𑁭) 𑀧𑀤𑀪𑀸𑀚𑀦𑀻𑀬𑁂 𑀲𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀲𑀗𑁆𑀕𑀳𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀝𑁆𑀞𑀸𑀦𑁂 𑀧𑀞𑀫𑀫𑀕𑁆𑀕𑀲𑁆𑀲 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀕𑀳𑁂𑀢𑁆𑀯𑀸 𑀇𑀢𑀭𑀫𑀕𑁆𑀕𑀸𑀦𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀕𑀳𑁂𑀢𑁆𑀯𑀸𑀯 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀢𑀸, 𑀲𑀩𑁆𑀩𑀢𑁆𑀣 𑀮𑁄𑀓𑀼𑀢𑁆𑀢𑀭𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀧𑀞𑀫𑀚𑁆𑀛𑀸𑀦𑀺𑀓𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸.

𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀢𑀓𑁆𑀓𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸, 𑀲𑀢𑁆𑀢𑀗𑁆𑀕𑀫𑀕𑁆𑀕𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀘𑀸𑀭𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀢𑀺𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀢𑀢𑀺𑀬𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀻𑀢𑀺𑀬𑀸 𑀅𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀤𑀼𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸, 𑀙𑀴𑀗𑁆𑀕𑀺𑀓𑀩𑁄𑀚𑁆𑀛𑀗𑁆𑀕𑀢𑀸 ¶ 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀲𑀩𑁆𑀩𑀢𑁆𑀣 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀫𑁂𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑀸. 𑀏𑀯𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀯, 𑀢𑀲𑁆𑀫𑀸 𑀦 𑀢𑀢𑁄 𑀦𑁂𑀲𑀁 𑀪𑁂𑀤𑁄, 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀘𑁂𑀓𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀬𑁄 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀓𑀺𑀮𑀫𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀬𑁄 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁄, 𑀲𑁄 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀸𑀲𑁂𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄𑀧𑀺 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄, 𑀏𑀯𑀁 𑀯𑀺𑀫𑁄𑀓𑁆𑀔𑀪𑁂𑀤𑀢𑁄𑀧𑀺 𑀧𑀘𑁆𑀘𑁂𑀓𑀁 𑀤𑁆𑀯𑀺𑀥𑀸 𑀳𑁄𑀦𑁆𑀢𑀺 𑁋 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄𑀢𑀺.

𑀢𑀢𑁆𑀣 𑀲𑀼𑀜𑁆𑀜𑀢𑀦𑁆𑀢𑀺, 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀘 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀦𑀸𑀫𑀁. 𑀲𑁄 𑀳𑀺 𑀆𑀕𑀫𑀦𑀢𑁄 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀯𑀺𑀥𑀁 𑀅𑀦𑀼𑀧𑀲𑁆𑀲𑀦𑀁 𑀆𑀭𑁄𑀧𑁂𑀢𑁆𑀯𑀸 ¶ 𑀲𑀫𑁆𑀫𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀲𑀘𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀬𑀁 𑀅𑀢𑁆𑀢𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀝𑁆𑀞𑁂𑀦 𑀲𑀼𑀜𑁆𑀜𑀢𑀸 𑀦𑀸𑀫 𑀳𑁄𑀢𑀺. 𑀲𑀘𑁂 𑀤𑀼𑀓𑁆𑀔𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀬𑀁 𑀢𑀡𑁆𑀳𑀸𑀧𑀡𑀺𑀥𑀺𑀭𑀳𑀺𑀢𑀝𑁆𑀞𑁂𑀦 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫 𑀳𑁄𑀢𑀺, 𑀢𑀸 𑀉𑀪𑁄𑀧𑀺 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀬𑀣𑀸𑀓𑁆𑀓𑀫𑀁 𑀲𑀼𑀜𑁆𑀜𑀢𑀫𑀕𑁆𑀕𑁄 ¶ 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑁄𑀢𑀺 𑀦𑀸𑀫𑀁 𑀤𑁂𑀦𑁆𑀢𑀺. 𑀏𑀯𑀁 𑀆𑀕𑀫𑀦𑀢𑁄 𑀦𑀸𑀫𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀦𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀲𑀘𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀓𑀣𑀺𑀢𑀸𑀢𑀺? 𑀲𑀘𑁆𑀘𑀁, 𑀅𑀧𑀺 𑀘 𑀔𑁄 𑀧𑀭𑀺𑀬𑀸𑀬𑀢𑁄 𑀓𑀣𑀺𑀢𑀸, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀲𑀬𑀫𑁆𑀧𑀺 𑀲𑀦𑀺𑀫𑀺𑀢𑁆𑀢𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑁆𑀯𑁂 𑀏𑀯 𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀻𑀢𑀺. 𑀢𑀺𑀲𑁆𑀲𑁄𑀧𑀺 𑀳𑀺 𑀯𑀺𑀧𑀲𑁆𑀲𑀦𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁, 𑀲𑀼𑀔𑀦𑀺𑀫𑀺𑀢𑁆𑀢𑀜𑁆𑀘 𑀉𑀕𑁆𑀖𑀸𑀝𑀦𑁂𑀦 𑀅𑀦𑀺𑀫𑀺𑀢𑁆𑀢𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀢𑀺𑀲𑁆𑀲𑁄𑀧𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀔𑀦𑁆𑀥𑁂𑀲𑀼 𑀘𑀭𑀡𑀢𑁄 𑀲𑀦𑀺𑀫𑀺𑀢𑁆𑀢𑀸𑀯, 𑀢𑀲𑁆𑀫𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁄 𑀲𑀬𑀁 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑁄, 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀧𑀡𑀺𑀥𑀺𑀭𑀳𑀺𑀢𑁄 𑀘, 𑀢𑀲𑁆𑀫𑀸 𑀲𑀕𑀼𑀡𑁂𑀦𑁂𑀯 𑀲𑀼𑀜𑁆𑀜𑀢𑀦𑀸𑀫𑀁, 𑀅𑀧𑁆𑀧𑀡𑀺𑀳𑀺𑀢𑀦𑀸𑀫𑀜𑁆𑀘 𑀮𑀪𑀢𑀺. 𑀏𑀯𑀫𑀲𑁆𑀲 𑀲𑀕𑀼𑀡𑀢𑁄 𑀦𑀸𑀫𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺, 𑀲𑀗𑁆𑀔𑀸𑀭𑁂𑀳𑀺 𑀘 𑀲𑀼𑀜𑁆𑀜𑀢𑁆𑀢𑀸, 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀧𑀡𑀺𑀥𑀺𑀭𑀳𑀺𑀢𑀢𑁆𑀢𑀸 𑀘 ‘‘𑀲𑀼𑀜𑁆𑀜𑀢𑀁, 𑀅𑀦𑀺𑀫𑀺𑀢𑁆𑀢𑀁, 𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑁄𑀧𑀺 ‘‘𑀲𑀼𑀜𑁆𑀜𑀢𑁄, 𑀅𑀦𑀺𑀫𑀺𑀢𑁆𑀢𑁄, 𑀅𑀧𑁆𑀧𑀡𑀺𑀳𑀺𑀢𑁄’’𑀢𑀺 𑀘 𑀦𑀸𑀫𑀁 𑀮𑀪𑀢𑀺. 𑀏𑀯𑀁 𑀆𑀭𑀫𑁆𑀫𑀡𑀢𑁄 𑀦𑀸𑀫𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀼 𑀇𑀥 𑀆𑀕𑀫𑀦𑀢𑁄𑀯 𑀫𑀕𑁆𑀕𑁄 𑀦𑀸𑀫𑀁 𑀮𑀪𑀢𑀺, 𑀦 𑀲𑀕𑀼𑀡𑀢𑁄, 𑀦𑀸𑀧𑀺 𑀆𑀭𑀫𑁆𑀫𑀡𑀢𑁄, 𑀲𑀕𑀼𑀡𑀸𑀭𑀫𑁆𑀫𑀡𑀢𑁄 𑀦𑀸𑀫𑀮𑀸𑀪𑀲𑁆𑀲 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀭𑀺𑀬𑀸𑀬𑀤𑁂𑀲𑀺𑀢𑀢𑁆𑀢𑀸. 𑀢𑁂𑀦𑁂𑀯 𑀳𑁂𑀢𑁆𑀣 𑀫𑀕𑁆𑀕𑀸𑀦𑀁 𑀲𑀕𑀼𑀡𑀸𑀭𑀫𑁆𑀫𑀡𑀢𑁄𑀧𑀺 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀢𑀸𑀯 𑀆𑀕𑀫𑀦𑀢𑁄 𑀯𑀼𑀢𑁆𑀢𑀸, 𑀢𑀜𑁆𑀘𑀸𑀕𑀫𑀦𑀁 𑀤𑀼𑀯𑀺𑀥𑀁 𑀯𑀺𑀧𑀲𑁆𑀲𑀦𑀸𑀕𑀫𑀦𑀁, 𑀫𑀕𑁆𑀕𑀸𑀕𑀫𑀦𑀜𑁆𑀘. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀕𑀫𑀦𑀢𑁄 𑀫𑀕𑁆𑀕𑁄 𑀘 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀁 𑀮𑀪𑀢𑀺, 𑀫𑀕𑁆𑀕𑀸𑀕𑀫𑀦𑀢𑁄 𑀘 𑀮𑀪𑀢𑁂𑀯, 𑀇𑀥 𑀧𑀦 𑀫𑀕𑁆𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ¶ 𑀯𑀺𑀧𑀲𑁆𑀲𑀦𑀸𑀕𑀫𑀦𑀢𑁄𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀯𑀺𑀫𑁄𑀓𑁆𑀔𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀤𑁆𑀯𑀺𑀥𑀸 𑀳𑁄𑀦𑁆𑀢𑀺. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀬

‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀓𑀼𑀲𑀮𑀧𑀤𑀢𑁆𑀣𑁄

𑀮𑁄𑀪𑀫𑀽𑀮𑀯𑀡𑁆𑀡𑀦𑀸

𑀅𑀓𑀼𑀲𑀮𑀸 ¶ 𑀧𑀦 𑀥𑀫𑁆𑀫𑀸 𑀪𑀽𑀫𑀺𑀢𑁄 𑀏𑀓𑀯𑀺𑀥𑀸 𑀓𑀸𑀫𑀸𑀯𑀘𑀭𑀸𑀯, 𑀲𑀫𑁆𑀧𑀬𑁄𑀕𑀢𑁄 𑀧𑀦 𑀫𑀽𑀮𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀮𑁄𑀪𑀫𑀽𑀮𑀸 𑀤𑁄𑀲𑀫𑀽𑀮𑀸 𑀫𑁄𑀳𑀫𑀽𑀮𑀸𑀢𑀺. 𑀢𑀢𑁆𑀣 𑀮𑁄𑀪𑀫𑀽𑀮𑀸 𑀅𑀝𑁆𑀞𑀯𑀺𑀥𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀦𑁆𑀢𑀺.

𑀢𑀢𑁆𑀣 𑀇𑀝𑁆𑀞𑀸𑀭𑀫𑁆𑀫𑀡𑁂 𑀮𑁄𑀪𑀩𑀳𑀼𑀮𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸, 𑀅𑀲𑀤𑁆𑀥𑀫𑁆𑀫𑀲𑀯𑀦𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀻𑀳𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀳𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀧𑀞𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀤𑀼𑀢𑀺𑀬𑀁. 𑀬𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀯𑀸 𑀲𑁂𑀯𑀢𑀺, 𑀧𑀭𑀲𑀫𑁆𑀧𑀢𑁆𑀢𑀺𑀁 ¶ 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑀸𑀦𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀢𑀢𑀺𑀬𑀁. 𑀬𑀤𑀸 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫, 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀢𑀸 𑀳𑁄𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀬𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀧𑀦 𑀧𑀞𑀫𑀸𑀓𑀼𑀲𑀮𑁂 𑀢𑀸𑀯 𑀦𑀺𑀬𑀢𑀸 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦𑀸𑀕𑀢𑀸 𑀲𑁄𑀴𑀲, 𑀬𑁂𑀯𑀸𑀧𑀦𑀓𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀯𑀻𑀲𑀢𑀺 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀓𑀣𑀁? 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀯𑀻𑀭𑀺𑀬𑀁 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄 𑀫𑁄𑀳𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀲𑀭𑀽𑀧𑁂𑀦𑀸𑀕𑀢𑀸 𑀲𑁄𑀴𑀲 𑀥𑀫𑁆𑀫𑀸, 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄𑀢𑀺. 𑀧𑀤𑀪𑀸𑀚𑀦𑀻𑀬𑁂 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀨𑀲𑁆𑀲𑀧𑀜𑁆𑀘𑀓𑀁 𑀛𑀸𑀦𑀗𑁆𑀕𑀧𑀜𑁆𑀘𑀓𑀁 𑀯𑀻𑀭𑀺𑀬𑀲𑀫𑀸𑀥𑀺𑀫𑀦𑁄𑀲𑁄𑀫𑀦𑀲𑁆𑀲𑀚𑀻𑀯𑀺𑀢𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀫𑀸𑀥𑀺𑀯𑀲𑁂𑀦 𑀫𑀕𑁆𑀕𑀗𑁆𑀕𑀸𑀦𑀺 𑀘𑀢𑁆𑀢𑀸𑀭𑀺, 𑀯𑀻𑀭𑀺𑀬𑀲𑀫𑀸𑀥𑀺𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀯𑀲𑁂𑀦 𑀩𑀮𑀸𑀦𑀺 𑀘𑀢𑁆𑀢𑀸𑀭𑀺, 𑀮𑁄𑀪𑁄 𑀫𑁄𑀳𑁄𑀢𑀺 𑀤𑁆𑀯𑁂 𑀫𑀽𑀮𑀸𑀦𑀺, 𑀅𑀪𑀺𑀚𑁆𑀛𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀤𑁆𑀯𑁂 𑀓𑀫𑁆𑀫𑀧𑀣𑀸𑀦𑀺, 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 ¶ 𑀮𑁄𑀓𑀦𑀸𑀲𑀤𑀼𑀓𑀁, 𑀲𑀫𑀣𑁄 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄 𑀘𑀸𑀢𑀺 𑀏𑀯𑀁 𑀲𑀭𑀽𑀧𑁂𑀦𑀸𑀕𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀥𑀫𑁆𑀫𑀸𑀦𑀁 𑀲𑁄𑀴𑀲𑀲𑀼 𑀏𑀯 𑀲𑀫𑀯𑀭𑁄𑀥𑁄, 𑀲𑀯𑀺𑀪𑀢𑁆𑀢𑀺𑀓𑀸𑀯𑀺𑀪𑀢𑁆𑀢𑀺𑀓𑀪𑁂𑀤𑁄 𑀘 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀜𑀸𑀢𑀩𑁆𑀩𑁄. 𑀅𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄 𑀧𑀦 𑀦 𑀳𑀺𑀭𑀻𑀬𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑁆𑀓𑀁, 𑀦 𑀑𑀢𑁆𑀢𑀧𑁆𑀧𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀢𑁂𑀲𑀼 𑀅𑀳𑀺𑀭𑀺𑀓𑁆𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀮𑀚𑁆𑀚𑀸𑀮𑀓𑁆𑀔𑀡𑀁 𑀯𑀸, 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀦𑀮𑀓𑁆𑀔𑀡𑀁, 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀁 ¶ 𑀯𑀸, 𑀲𑁂𑀲𑀁 𑀳𑀺𑀭𑀺𑀑𑀢𑁆𑀢𑀧𑁆𑀧𑀸𑀦𑀁 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀮𑀼𑀩𑁆𑀪𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀲𑁄 𑀆𑀭𑀫𑁆𑀫𑀡𑀕𑀳𑀡𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬, 𑀅𑀪𑀺𑀲𑀗𑁆𑀕𑀭𑀲𑁄 𑀢𑀢𑁆𑀢𑀓𑀧𑀸𑀮𑁂 𑀔𑀺𑀢𑁆𑀢𑀫𑀁𑀲𑀧𑁂𑀲𑀺 𑀯𑀺𑀬, 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬, 𑀲𑀜𑁆𑀜𑁄𑀚𑀦𑀻𑀬𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄. 𑀢𑀡𑁆𑀳𑀸𑀦𑀤𑀺𑀪𑀸𑀯𑁂𑀦 𑀯𑀟𑁆𑀠𑀫𑀸𑀦𑁄 𑀲𑀻𑀖𑀲𑁄𑀢𑀸 𑀦𑀤𑀻 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀲𑁄 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀓𑀸𑀭𑀮𑀓𑁆𑀔𑀡𑁄, 𑀅𑀜𑁆𑀜𑀸𑀡𑀮𑀓𑁆𑀔𑀡𑁄 𑀯𑀸, 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄, 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄 𑀯𑀸, 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑁄, 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀫𑀽𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑁄.

𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸, 𑀧𑀭𑀸𑀫𑀸𑀲𑀭𑀲𑀸, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀧𑀤𑀝𑁆𑀞𑀸𑀦𑀸, 𑀧𑀭𑀫𑀁 𑀯𑀚𑁆𑀚𑀦𑁆𑀢𑀺 𑀤𑀝𑁆𑀞𑀩𑁆𑀩𑀸.

𑀉𑀤𑁆𑀥𑀢𑀪𑀸𑀯𑁄 𑀉𑀤𑁆𑀥𑀘𑁆𑀘𑀁. 𑀢𑀁 𑀅𑀯𑀽𑀧𑀲𑀫𑀮𑀓𑁆𑀔𑀡𑀁, 𑀅𑀦𑀯𑀝𑁆𑀞𑀸𑀦𑀭𑀲𑀁, 𑀪𑀦𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁, 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁂𑀲𑁄 𑀧𑀦𑁂𑀢𑁆𑀣 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑁄 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀓𑀼𑀲𑀮𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀲𑀗𑁆𑀕𑀳𑀯𑀸𑀭𑁂 𑀧𑀸𑀴𑀺𑀬𑀁 𑀆𑀕𑀢𑀯𑀲𑁂𑀦 ¶ 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀢𑀸, 𑀘𑀢𑀼𑀭𑀗𑁆𑀕𑀫𑀕𑁆𑀕𑀢𑀸, 𑀘𑀢𑀼𑀩𑁆𑀩𑀺𑀥𑀩𑀮𑀢𑀸, 𑀤𑁆𑀯𑁂𑀳𑁂𑀢𑀼𑀢𑀸, 𑀲𑀩𑁆𑀩𑀢𑁆𑀣 𑀅𑀓𑀼𑀲𑀮𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀧𑀞𑀫𑀸𑀓𑀼𑀲𑀮𑀁 𑀦𑀺𑀝𑁆𑀞𑀺𑀢𑀁.

𑀬𑀣𑀸 ¶ 𑀘 𑀧𑀞𑀫𑁂, 𑀏𑀯𑀁 𑀤𑀼𑀢𑀺𑀬𑁂𑀧𑀺 𑀲𑀲𑀗𑁆𑀔𑀸𑀭𑀢𑀸, 𑀬𑁂𑀯𑀸𑀧𑀦𑀓𑁂𑀲𑀼 𑀣𑀺𑀦𑀫𑀺𑀤𑁆𑀥𑀸𑀦𑀁 𑀲𑀫𑁆𑀪𑀯𑁄, 𑀦𑀺𑀬𑀢𑀢𑀸 𑀘 𑀯𑀺𑀲𑁂𑀲𑁄. 𑀢𑀢𑁆𑀣 𑀣𑀺𑀦𑀦𑀢𑀸 𑀣𑀺𑀦𑀁, 𑀫𑀺𑀤𑁆𑀥𑀦𑀢𑀸 𑀫𑀺𑀤𑁆𑀥𑀁, 𑀅𑀦𑀼𑀲𑁆𑀲𑀸𑀳𑀦𑀲𑀁𑀲𑀻𑀤𑀦𑀢𑀸, 𑀲𑀢𑁆𑀢𑀺𑀯𑀺𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀮𑀓𑁆𑀔𑀡𑀁, 𑀯𑀻𑀭𑀺𑀬𑀯𑀺𑀦𑁄𑀤𑀦𑀭𑀲𑀁, 𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀫𑀺𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀑𑀦𑀳𑀦𑀭𑀲𑀁, 𑀮𑀻𑀦𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀉𑀪𑀬𑀫𑁆𑀧𑀺 𑀅𑀭𑀢𑀺𑀢𑀦𑁆𑀤𑀺𑀯𑀺𑀚𑀫𑁆𑀪𑀺𑀓𑀸𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀤𑀼𑀢𑀺𑀬𑀁.

𑀢𑀢𑀺𑀬𑁂 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀧𑀞𑀫𑀸𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁄𑀯. 𑀓𑁂𑀯𑀮𑀁 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑁄, 𑀬𑁂𑀯𑀸𑀧𑀦𑀓𑁂𑀲𑀼 𑀫𑀸𑀦𑀲𑁆𑀲 𑀲𑀫𑁆𑀪𑀯𑁄, 𑀅𑀦𑀺𑀬𑀢𑀢𑀸 𑀘, 𑀲𑀗𑁆𑀕𑀳𑀯𑀸𑀭𑁂 𑀢𑀺𑀯𑀗𑁆𑀕𑀺𑀓𑀫𑀕𑁆𑀕𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀢𑀢𑁆𑀣 𑀫𑀜𑁆𑀜𑀢𑀻𑀢𑀺 𑀫𑀸𑀦𑁄. 𑀲𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄, 𑀲𑀫𑁆𑀧𑀕𑁆𑀕𑀳𑀭𑀲𑁄, 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄, 𑀉𑀫𑁆𑀫𑀸𑀤𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀢𑀢𑀺𑀬𑀁.

𑀬𑀣𑀸 𑀘 𑀢𑀢𑀺𑀬𑁂, 𑀏𑀯𑀁 𑀘𑀢𑀼𑀢𑁆𑀣𑁂𑀧𑀺. 𑀣𑀺𑀦𑀫𑀺𑀤𑁆𑀥𑀜𑁆𑀘𑁂𑀢𑁆𑀣 𑀲𑀲𑀗𑁆𑀔𑀸𑀭𑀢𑀸 𑀘 𑀅𑀥𑀺𑀓𑀸, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀉𑀧𑁂𑀓𑁆𑀔𑀸𑀲𑀫𑁆𑀪𑀯𑁄, 𑀧𑀻𑀢𑀺𑀬𑀸 𑀘 𑀅𑀪𑀸𑀯𑁄, 𑀢𑀢𑁄 𑀏𑀯 𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀲𑀩𑁆𑀩𑀁 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀘𑀺𑀢𑁆𑀢𑀲𑀤𑀺𑀲𑀫𑁂𑀯.

𑀮𑁄𑀪𑀫𑀽𑀮𑀸 𑀦𑀺𑀝𑁆𑀞𑀺𑀢𑀸.

𑀤𑁄𑀲𑀫𑀽𑀮𑀯𑀡𑁆𑀡𑀦𑀸

𑀤𑁄𑀲𑀫𑀽𑀮𑀸 𑀧𑀦 𑀤𑁆𑀯𑀺𑀥𑀸 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀏𑀯𑀁 𑀲𑀫𑁆𑀧𑀬𑁄𑀕𑀢𑁄. 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀧𑀞𑀫𑁂 𑀢𑀸𑀯 𑀧𑀞𑀫𑀸𑀓𑀼𑀲𑀮𑁂 𑀯𑀼𑀢𑁆𑀢𑁂𑀲𑀼 𑀧𑀻𑀢𑀺𑀮𑁄𑀪𑀤𑀺𑀝𑁆𑀞𑀺𑀬𑁄 𑀯𑀚𑁆𑀚𑁂𑀢𑁆𑀯𑀸 𑀤𑁄𑀲𑀁 ¶ , 𑀬𑁂𑀯𑀸𑀧𑀦𑀓𑁂𑀲𑀼 𑀅𑀦𑀺𑀬𑀢𑀸𑀦𑀺 ¶ 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺, 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀤𑁄𑀫𑀦𑀲𑁆𑀲𑀜𑁆𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀯𑀻𑀲𑀢𑀺 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀬𑁂𑀯𑀸𑀧𑀦𑀓𑀸 𑀘𑁂𑀢𑁆𑀣 𑀲𑀢𑁆𑀢. 𑀢𑀢𑁆𑀣 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄. 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀝𑀸𑀲𑀻𑀯𑀺𑀲𑁄 𑀯𑀺𑀬, 𑀯𑀺𑀲𑀧𑁆𑀧𑀦𑀭𑀲𑁄 𑀯𑀺𑀲𑀦𑀺𑀧𑀸𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸 𑀤𑀸𑀯𑀕𑁆𑀕𑀺 𑀯𑀺𑀬, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄, 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀇𑀲𑁆𑀲𑀸𑀬𑀦𑀸 𑀇𑀲𑁆𑀲𑀸. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸, 𑀢𑀢𑁆𑀣𑁂𑀯 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸, 𑀲𑀜𑁆𑀜𑁄𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀘𑁆𑀙𑁂𑀭𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀢𑀁 𑀮𑀤𑁆𑀥𑀸𑀦𑀁 𑀯𑀸 𑀮𑀪𑀺𑀢𑀩𑁆𑀩𑀸𑀦𑀁 𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑀽𑀳𑀦𑀮𑀓𑁆𑀔𑀡𑀁, 𑀢𑀸𑀲𑀜𑁆𑀜𑁂𑀯 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀓𑁆𑀔𑀫𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀝𑀼𑀓𑀜𑁆𑀘𑀼𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁, 𑀘𑁂𑀢𑀲𑁄 𑀯𑀺𑀭𑀽𑀧𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁, 𑀤𑀸𑀲𑀩𑁆𑀬𑀫𑀺𑀯 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀕𑀳𑀯𑀸𑀭𑁂 𑀤𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸, 𑀤𑁄𑀫𑀦𑀲𑁆𑀲𑁂𑀦 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀢𑀸, 𑀢𑀺𑀯𑀗𑁆𑀕𑀺𑀓𑀫𑀕𑁆𑀕𑀢𑀸, 𑀤𑁄𑀲𑀫𑁄𑀳𑀯𑀲𑁂𑀦 𑀤𑁆𑀯𑀺𑀳𑁂𑀢𑀼𑀓𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑁄 𑀧𑀦 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀧𑀞𑀫𑀸𑀓𑀼𑀲𑀮𑁂 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯. 𑀬𑀣𑀸 𑀘 𑀧𑀞𑀫𑁂, 𑀏𑀯𑀁 𑀤𑀼𑀢𑀺𑀬𑁂𑀧𑀺, 𑀲𑀲𑀗𑁆𑀔𑀸𑀭𑀢𑀸 𑀧𑀦 𑀣𑀺𑀦𑀫𑀺𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀦𑀯𑀬𑁂𑀯𑀸𑀧𑀦𑀓𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀤𑁄𑀲𑀫𑀽𑀮𑀸 𑀦𑀺𑀝𑁆𑀞𑀺𑀢𑀸.

𑀫𑁄𑀳𑀫𑀽𑀮𑀯𑀡𑁆𑀡𑀦𑀸

𑀫𑁄𑀳𑀫𑀽𑀮𑀸𑀧𑀺 𑀤𑁆𑀯𑀺𑀥𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁, 𑀢𑀣𑀸 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀧𑀞𑀫𑁂 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀢𑀸𑀯 𑀨𑀲𑁆𑀲𑀧𑀜𑁆𑀘𑀓𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀁 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀫𑁄𑀳𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀘𑀼𑀤𑁆𑀤𑀲 ¶ , 𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄𑀢𑀺 𑀬𑁂𑀯𑀸𑀧𑀦𑀓𑀸 𑀤𑁆𑀯𑁂 𑀘𑀸𑀢𑀺 𑀲𑁄𑀴𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀏𑀓𑀕𑁆𑀕𑀢𑀸 𑀘𑁂𑀢𑁆𑀣 𑀘𑀺𑀢𑁆𑀢𑀝𑁆𑀞𑀺𑀢𑀺𑀫𑀢𑁆𑀢𑀸, 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀩𑀮𑀪𑀸𑀯𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀏𑀯 𑀲𑀗𑁆𑀕𑀳𑀯𑀸𑀭𑁂 𑀲𑀫𑀸𑀥𑀺𑀁 𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀸𑀬 𑀲𑀤𑁆𑀥𑀺𑀁 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀤𑁆𑀯𑁂 ¶ 𑀫𑀕𑁆𑀕𑀗𑁆𑀕𑀸𑀦𑀺, 𑀢𑀻𑀡𑀺 𑀩𑀮𑀸𑀦𑀺 𑀳𑁄𑀦𑁆𑀢𑀺. 𑀫𑁄𑀳𑁄 𑀧𑀦𑁂𑀢𑁆𑀣 𑀏𑀓𑁄𑀯 𑀳𑁂𑀢𑀼. 𑀲𑁂𑀲𑁄 𑀧𑀦𑁂𑀢𑁆𑀣 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁄 𑀏𑀯.

𑀢𑀢𑁆𑀣 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀏𑀢𑀺𑀲𑁆𑀲𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑁂𑀓𑀁𑀲𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂, 𑀏𑀯𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂𑀧𑀺. 𑀓𑁂𑀯𑀮𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑁄, 𑀅𑀥𑀺𑀫𑁄𑀓𑁆𑀔𑀲𑁆𑀲 𑀘 𑀪𑀸𑀯𑁄, 𑀢𑀢𑁄 𑀏𑀯 𑀩𑀮𑀯𑀢𑀭𑀲𑀫𑀸𑀥𑀺𑀢𑀸, 𑀢𑁂𑀦𑁂𑀯 𑀲𑀗𑁆𑀕𑀳𑀯𑀸𑀭𑁂 𑀲𑀫𑀸𑀥𑀺𑀦𑀸 𑀲𑀤𑁆𑀥𑀺𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀢𑀸, 𑀢𑀺𑀯𑀗𑁆𑀕𑀺𑀓𑀫𑀕𑁆𑀕𑀢𑀸, 𑀘𑀢𑀼𑀩𑁆𑀩𑀮𑀢𑀸 𑀘 𑀳𑁄𑀢𑀺. 𑀉𑀤𑁆𑀥𑀘𑁆𑀘𑀜𑁆𑀘𑁂𑀢𑁆𑀣 𑀲𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀸 𑀤𑁆𑀯𑁂 𑀬𑁂𑀯𑀸𑀧𑀦𑀓𑀯𑀲𑁂𑀦𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀇𑀫𑀸𑀦𑀺 𑀧𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀦𑀸𑀦𑀸𑀯𑀺𑀲𑀬𑁂, 𑀏𑀓𑀯𑀺𑀲𑀬𑁂 𑀘 𑀅𑀲𑀡𑁆𑀞𑀳𑀦𑀢𑁄 𑀧𑀯𑀝𑁆𑀝𑀦𑀓𑀸𑀦𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀳𑀺 𑀮𑀤𑁆𑀥𑀸𑀥𑀺𑀫𑁄𑀓𑁆𑀔𑀢𑀸𑀬 𑀮𑀤𑁆𑀥𑀧𑀢𑀺𑀝𑁆𑀞𑀁 𑀏𑀓𑀸𑀭𑀫𑁆𑀫𑀡𑁂𑀬𑁂𑀯 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀬 𑀧𑀯𑀝𑁆𑀝𑀢𑀺 𑀘𑀢𑀼𑀭𑀲𑁆𑀲𑀫𑀡𑀺 𑀯𑀺𑀬, 𑀇𑀢𑀭𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀝𑁆𑀝𑀫𑀡𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀏𑀓𑀸𑀤𑀲 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦𑁂𑀢𑁂 𑀤𑁆𑀯𑀸𑀤𑀲𑀧𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀢𑀸𑀯 𑀙𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀮𑁄𑀪𑀫𑁄𑀳𑀫𑀽𑀮𑀸 𑀧𑀦 𑀤𑀲 𑀧𑀜𑁆𑀘𑀤𑁆𑀯𑀸𑀭𑁂 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑁂𑀯, 𑀫𑀦𑁄𑀤𑁆𑀯𑀸𑀭𑁂 𑀦𑀺𑀲𑁆𑀲𑀸𑀬 𑀯𑀸 𑀅𑀦𑀺𑀲𑁆𑀲𑀸𑀬 𑀯𑀸 𑀚𑀯𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀙𑀩𑁆𑀩𑀺𑀥𑀸. 𑀢𑀣𑀸 𑀤𑁄𑀲𑀫𑀽𑀮𑀸 𑀦𑀺𑀲𑁆𑀲𑀸𑀬𑁂𑀯 𑀧𑀦 𑀧𑀯𑀢𑁆𑀢𑀦𑁆𑀢𑀺. 𑀮𑁄𑀪𑀫𑀽𑀮𑀸 𑀧𑀦 ¶ 𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀫𑀫𑀺𑀘𑁆𑀙𑀸𑀘𑀸𑀭𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀲𑀫𑁆𑀨𑀧𑁆𑀧𑀮𑀸𑀧𑀸𑀪𑀺𑀚𑁆𑀛𑀸𑀲𑀗𑁆𑀔𑀸𑀢𑀸𑀦𑀁 𑀙𑀦𑁆𑀦𑀁 𑀓𑀫𑁆𑀫𑀧𑀣𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑀸. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀧𑀦𑁂𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀧𑀻𑀢𑀺 𑀲𑀢𑁆𑀢𑀯𑀺𑀥𑀸 𑀳𑁄𑀦𑁆𑀢𑀺. 𑀤𑁄𑀲𑀫𑀽𑀮𑀸 𑀧𑀦 𑀧𑀸𑀡𑀸𑀪𑀺𑀧𑀸𑀢𑀸𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀨𑀭𑀼𑀲𑀲𑀫𑁆𑀨𑀧𑁆𑀧𑀮𑀸𑀧𑀩𑁆𑀬𑀸𑀧𑀸𑀤𑀯𑀲𑁂𑀦 𑀲𑀢𑁆𑀢𑀯𑀺𑀥𑀸 𑀳𑁄𑀦𑁆𑀢𑀺. 𑀤𑀲𑀦𑁆𑀦𑀫𑁆𑀧𑀺 𑀧𑀦𑁂𑀲𑀁 𑀤𑁆𑀯𑀸𑀭𑀓𑀫𑁆𑀫𑀯𑀲𑁂𑀦 𑀘𑁂𑀯 𑀯𑀻𑀫𑀁𑀲𑀸𑀯𑀚𑁆𑀚𑀺𑀢𑀸𑀥𑀺𑀧𑀢𑀺𑀢𑁆𑀢𑀬𑀯𑀲𑁂𑀦 𑀘 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀦𑁆𑀢𑀳𑀻𑀦𑀢𑁆𑀢𑀸 𑀳𑀻𑀦𑀢𑁆𑀢𑀺𑀓𑀪𑁂𑀤𑁄 𑀦𑀢𑁆𑀣𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀧𑀦𑁂𑀢𑁆𑀣 𑀮𑁄𑀪𑀫𑀽𑀮𑁂𑀲𑀼 𑀏𑀯, 𑀦 𑀇𑀢𑀭𑁂𑀲𑀼, 𑀫𑁄𑀳𑀫𑀽𑀮𑁂𑀲𑀼 𑀧𑀦 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀺 𑀦𑀢𑁆𑀣𑀺, 𑀢𑀣𑀸 𑀓𑀫𑁆𑀫𑀧𑀣𑀪𑁂𑀤𑁄𑀧𑀺. 𑀦 𑀳𑀺 𑀧𑀯𑀝𑁆𑀝𑀫𑀸𑀦𑀁 𑀓𑀜𑁆𑀘𑀺 𑀅𑀥𑀺𑀧𑀢𑀺𑀁 𑀓𑀭𑁄𑀢𑀺. 𑀤𑁄𑀲𑁄 𑀯𑀸 𑀲𑀯𑀺𑀲𑀬𑀁, 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑀜𑁆𑀘 𑀧𑀝𑀺𑀧𑀢𑁆𑀢𑀺𑀫𑀦𑁆𑀢𑀭𑀸𑀬𑀓𑀭𑀢𑁆𑀢𑁂𑀦 𑀤𑀼𑀘𑁆𑀘𑀭𑀺𑀢𑀳𑁂𑀢𑀼𑀪𑀽𑀢𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀤𑁄𑀲𑀮𑁄𑀪𑀫𑀽𑀮𑀘𑀺𑀢𑁆𑀢𑁂𑀳𑁂𑀯 𑀲𑀦𑁆𑀦𑀺𑀝𑁆𑀞𑀸𑀧𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑁂𑀤𑀁 𑀦 𑀕𑀘𑁆𑀙𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀏𑀯 𑀧𑀦 𑀳𑁂𑀢𑀼 𑀳𑁄𑀢𑀺. 𑀢𑁂𑀦𑁂𑀯𑀲𑁆𑀲 𑀅𑀧𑀸𑀬𑀳𑁂𑀢𑀼𑀢𑀸 𑀧𑀞𑀫𑀫𑀕𑁆𑀕𑀯𑀚𑁆𑀛𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀧𑀦 𑀤𑁆𑀯𑀸𑀤𑀲𑀦𑁆𑀦𑀁 𑀧𑀘𑁆𑀘𑁂𑀓𑀫𑀦𑀦𑁆𑀢𑀢𑀸, 𑀲𑁂𑀲𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀓𑀼𑀲𑀮𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀧𑀤𑀢𑁆𑀣𑁄

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸

𑀅𑀩𑁆𑀬𑀸𑀓𑀢𑀸 ¶ 𑀧𑀦 𑀥𑀫𑁆𑀫𑀸 𑀚𑀸𑀢𑀺𑀢𑁄 𑀘𑀢𑀼𑀩𑁆𑀩𑀺𑀥𑀸 𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦. 𑀢𑀢𑁆𑀣 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀚𑀸𑀢𑀺𑀢𑁄 𑀘 𑀤𑁆𑀯𑀺𑀥𑀸 𑀳𑁄𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦. 𑀢𑀢𑁆𑀣 𑀓𑀼𑀲𑀮𑀯𑀺𑀧𑀸𑀓𑀸 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀸 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀯𑀲𑁂𑀦. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀅𑀳𑁂𑀢𑀼𑀓𑀸 𑀲𑀳𑁂𑀢𑀼𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀅𑀮𑁄𑀪𑀸𑀤𑀺𑀲𑀳𑀚𑀸𑀢𑀳𑁂𑀢𑀼𑀯𑀺𑀭𑀳𑀺𑀢𑀸 𑀅𑀳𑁂𑀢𑀼𑀓𑀸. 𑀢𑁂 𑀲𑀫𑁆𑀧𑀬𑁄𑀕𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀪𑁂𑀤𑀢𑁄 ¶ 𑀅𑀝𑁆𑀞𑀯𑀺𑀥𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀥𑀸𑀢𑀼, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀣𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀘𑀸𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀘𑀓𑁆𑀔𑀼𑀧𑀲𑀸𑀤𑀸𑀤𑀻𑀲𑀼 𑀘𑀢𑀽𑀲𑀼 𑀉𑀧𑀸𑀤𑀸𑀬𑀭𑀽𑀧𑁂𑀲𑀼 𑀉𑀧𑀸𑀤𑀸𑀬𑀭𑀽𑀧𑀸𑀦𑀁 𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀧𑀺𑀘𑀼𑀧𑀺𑀡𑁆𑀟𑁂 𑀧𑀺𑀘𑀼𑀧𑀺𑀡𑁆𑀟𑀲𑁆𑀲𑁂𑀯𑀸𑀢𑀺𑀤𑀼𑀩𑁆𑀩𑀮𑀢𑀸𑀬 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀓𑀸𑀬𑀯𑀺𑀜𑁆𑀜𑀸𑀡𑀁 𑀧𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑁂 𑀨𑁄𑀝𑁆𑀞𑀩𑁆𑀩𑀪𑀽𑀢𑀢𑁆𑀢𑀬𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀅𑀥𑀺𑀓𑀭𑀡𑀺𑀫𑀢𑁆𑀣𑀓𑁂 𑀞𑀧𑀺𑀢𑀧𑀺𑀘𑀼𑀧𑀺𑀡𑁆𑀟𑁂 𑀓𑀽𑀝𑀧𑀳𑀸𑀭𑀲𑁆𑀲𑁂𑀯 𑀩𑀮𑀯𑀢𑀸𑀬 𑀧𑀲𑀸𑀤𑀦𑀺𑀲𑁆𑀲𑀬𑁂𑀲𑀼𑀧𑀺 𑀪𑀽𑀢𑁂𑀲𑀼 𑀧𑀝𑀺𑀖𑀸𑀢𑀲𑀫𑁆𑀪𑀯𑀢𑁄 𑀲𑀼𑀔𑀲𑀳𑀕𑀢𑀁 𑀳𑁄𑀢𑀺, 𑀫𑀦𑁄𑀥𑀸𑀢𑀼 𑀅𑀢𑁆𑀢𑀦𑁄 𑀕𑀳𑀡𑀤𑀼𑀩𑁆𑀩𑀮𑀢𑀸𑀬 𑀅𑀢𑀺𑀇𑀝𑁆𑀞𑁂𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀅𑀢𑀺𑀇𑀝𑁆𑀞𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀅𑀬𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀢𑀸𑀯 𑀨𑀲𑁆𑀲𑀧𑀜𑁆𑀘𑀓𑀁, 𑀏𑀓𑀕𑁆𑀕𑀢𑀸, 𑀚𑀻𑀯𑀺𑀢𑀦𑁆𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀲𑀢𑁆𑀢, 𑀬𑁂𑀯𑀸𑀧𑀦𑀓𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀏𑀓𑁄 𑀘𑀸𑀢𑀺 𑀅𑀝𑁆𑀞 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑀗𑁆𑀕𑀳𑀢𑁄 𑀧𑀦𑁂𑀢𑁆𑀣 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀧𑀜𑁆𑀘𑁂𑀯𑀲𑀗𑁆𑀕𑀳𑀸. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀥𑀸𑀢𑀼𑀲𑀗𑁆𑀕𑀳𑁄, 𑀫𑀦𑁄 𑀉𑀧𑁂𑀓𑁆𑀔𑀸𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀗𑁆𑀕𑀳𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀯𑀺𑀚𑁆𑀚𑀫𑀸𑀦𑀸𑀧𑀺 𑀯𑁂𑀤𑀦𑀸 𑀛𑀸𑀦𑀗𑁆𑀕𑀢𑀁 𑀦 𑀕𑀘𑁆𑀙𑀢𑀺, 𑀇𑀦𑁆𑀤𑁆𑀭𑀺𑀬𑀁 𑀧𑀦 𑀳𑁄𑀢𑀺. 𑀏𑀓𑀕𑁆𑀕𑀢𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀗𑁆𑀕𑀩𑀮𑀪𑀸𑀯𑀫𑁆𑀧𑀺 𑀦 𑀕𑀘𑁆𑀙𑀢𑀺 𑀅𑀢𑀺𑀤𑀼𑀩𑁆𑀩𑀮𑀢𑁆𑀢𑀸. 𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀁 𑀳𑀺 𑀛𑀸𑀦𑀁, 𑀳𑁂𑀢𑀼𑀧𑀘𑁆𑀙𑀺𑀫𑀓𑁄 𑀫𑀕𑁆𑀕𑁄, 𑀩𑀮𑀜𑁆𑀘. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑁂𑀲𑀼𑀧𑀺. 𑀓𑁂𑀯𑀮𑀁 𑀧𑀦 𑀲𑀗𑁆𑀕𑀳𑀯𑀸𑀭𑁂 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀺𑀯𑀲𑁂𑀦 𑀥𑀸𑀢𑀼𑀲𑀗𑁆𑀕𑀳𑁄, 𑀓𑀸𑀬𑀯𑀺𑀜𑁆𑀜𑀸𑀡𑁂 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀜𑁆𑀘 𑀯𑀺𑀲𑁂𑀲𑁄. 𑀬𑀣𑀸 ¶ 𑀘𑁂𑀢𑁆𑀣, 𑀏𑀯𑀁 𑀫𑀦𑁄𑀥𑀸𑀢𑀼𑀬𑀸𑀧𑀺. 𑀓𑁂𑀯𑀮𑀁 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸 𑀘 𑀅𑀥𑀺𑀫𑁄𑀓𑁆𑀔𑁄𑀢𑀺 𑀢𑀬𑁄 𑀥𑀫𑁆𑀫𑀸 𑀅𑀥𑀺𑀓𑀸. 𑀲𑀗𑁆𑀕𑀳𑀯𑀸𑀭𑁂 𑀫𑀦𑁄𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀥𑀸𑀢𑀼𑀲𑀗𑁆𑀕𑀳𑁄, 𑀯𑀺𑀢𑀓𑁆𑀓𑀯𑀺𑀘𑀸𑀭𑀼𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀳𑀺 𑀘𑀢𑀽𑀳𑀺 𑀛𑀸𑀦𑀗𑁆𑀕𑀲𑀗𑁆𑀕𑀳𑁄 𑀘 𑀯𑀺𑀲𑁂𑀲𑁄. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀛𑀸𑀦𑀗𑁆𑀕𑀲𑀗𑁆𑀕𑀳𑁄 ¶ 𑀦 𑀉𑀤𑁆𑀥𑀝𑁄, 𑀢𑀣𑀸𑀧𑀺 𑀲𑀯𑀺𑀢𑀓𑁆𑀓𑁂𑀲𑀼 𑀦𑀺𑀬𑀫𑁂𑀦 𑀛𑀸𑀦𑀗𑁆𑀕𑀢𑀸𑀲𑀫𑁆𑀪𑀯𑀢𑁄 𑀕𑀳𑁂𑀢𑀩𑁆𑀩𑁄𑀯. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂𑀧𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸𑀬 𑀧𑀦𑁂𑀢𑁆𑀣 𑀧𑀻𑀢𑀺 𑀅𑀥𑀺𑀓𑀸, 𑀲𑀗𑁆𑀕𑀳𑀯𑀸𑀭𑁂 𑀘 𑀧𑀜𑁆𑀘𑀗𑁆𑀕𑀚𑁆𑀛𑀸𑀦𑀢𑀸, 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀁, 𑀉𑀪𑀬𑀢𑁆𑀣𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀥𑀸𑀢𑀼𑀲𑀗𑁆𑀕𑀳𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀸𑀤𑀺𑀏𑀓𑁂𑀓𑀫𑁂𑀯 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀇𑀝𑁆𑀞𑁂 𑀘 𑀭𑀽𑀧𑀸𑀤𑀺𑀏𑀓𑁂𑀓𑀸𑀭𑀫𑁆𑀫𑀡𑁂 𑀏𑀯 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀁 𑀆𑀮𑁄𑀓𑀸𑀓𑀸𑀲𑀯𑀸𑀬𑀼𑀚𑀮𑀧𑀣𑀯𑀻𑀲𑀳𑀓𑀸𑀭𑀻𑀦𑀺 𑀧𑀲𑀸𑀤𑀓𑀸𑀤𑀻𑀦𑀺 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀏𑀯 𑀯𑀺𑀧𑀘𑁆𑀘𑀦𑁆𑀢𑀺. 𑀏𑀯𑀫𑁂𑀢𑁂𑀲𑀁 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀯𑀺𑀲𑀼𑀁 𑀦𑀺𑀬𑀢𑀸𑀦𑀺. 𑀞𑀸𑀦𑀁 𑀧𑀦 𑀢𑁂𑀲𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀏𑀓𑀫𑁂𑀯, 𑀢𑁂𑀦 𑀦𑁂𑀲𑀁 𑀦 𑀪𑁂𑀤𑁄. 𑀫𑀦𑁄𑀥𑀸𑀢𑀼 𑀧𑀦 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑁂𑀯 𑀅𑀢𑀺𑀇𑀝𑁆𑀞𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀜𑁆𑀘𑀸𑀭𑀫𑁆𑀫𑀡𑁂 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀙𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀙𑀲𑀼 𑀩𑀮𑀯𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂𑀲𑀼 𑀅𑀢𑀻𑀢𑀸𑀤𑀻𑀲𑀼 𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀜𑁆𑀘 𑀲𑀸𑀥𑀬𑀫𑀸𑀦𑀸 𑀯𑀺𑀧𑀘𑁆𑀘𑀢𑀺. 𑀏𑀯𑀫𑁂𑀢𑀺𑀲𑁆𑀲𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺 𑀅𑀦𑀺𑀩𑀤𑁆𑀥𑀸𑀦𑀺, 𑀢𑀢𑁄 𑀢𑁂𑀳𑀺 𑀪𑁂𑀤𑁄 𑀳𑁄𑀢𑀺, 𑀯𑀢𑁆𑀣𑀼 𑀧𑀦 𑀢𑀢𑁆𑀣𑁂𑀯 𑀦𑀺𑀩𑀤𑁆𑀥𑀁, 𑀢𑀢𑁄 𑀦 𑀪𑁂𑀤𑁄, 𑀏𑀯𑀫𑀼𑀧𑁂𑀓𑁆𑀔𑀸𑀲𑀳𑀕𑀢𑀸𑀬𑀧𑀺. 𑀓𑁂𑀯𑀮𑀁 ¶ 𑀧𑀦𑁂𑀲𑀸 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸𑀧𑀺 𑀳𑀼𑀢𑁆𑀯𑀸 𑀲𑀼𑀕𑀢𑀺𑀬𑀁 𑀚𑀘𑁆𑀘𑀦𑁆𑀥𑀩𑀥𑀺𑀭𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀧𑀼𑀭𑀺𑀫𑀘𑀼𑀢𑀺𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀓𑀫𑁆𑀫𑀩𑀮𑁂𑀦𑁄𑀧𑀝𑁆𑀞𑀺𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀅𑀢𑀻𑀢𑀸𑀤𑀺𑀪𑁂𑀤𑀁 𑀙𑀩𑁆𑀩𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑀁, 𑀢𑀤𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘, 𑀯𑀼𑀢𑁆𑀢𑀦𑀬𑁂𑀦 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀘 𑀲𑀸𑀥𑀬𑀫𑀸𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀏𑀢𑁆𑀣 𑀘 𑀯𑀥𑀩𑀦𑁆𑀥𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀔𑀦𑁆𑀢𑀺𑀧𑀝𑀺𑀲𑀗𑁆𑀔𑀸𑀦𑀸𑀤𑀺𑀯𑀲𑁂𑀦 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀢𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀆𑀤𑀺𑀯𑀺𑀜𑁆𑀜𑀸𑀡𑀸𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘𑁂 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀦𑀺𑀝𑁆𑀞𑁂𑀦𑁂𑀯 𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀇𑀝𑁆𑀞𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀓𑀫𑁆𑀫𑀕𑀢𑀺𑀦𑀺𑀫𑀺𑀢𑁆𑀢𑀫𑁂𑀯 𑀢𑁂𑀲𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀯𑀺𑀘𑀸𑀭𑁂𑀢𑁆𑀯𑀸 𑀬𑀣𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀇𑀝𑁆𑀞𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀓𑀼𑀲𑀮𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀆𑀤𑀺𑀯𑀺𑀜𑁆𑀜𑀸𑀡𑀸𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀬 ¶ 𑀅𑀯𑀺𑀭𑁄𑀥𑁄 𑀜𑀸𑀢𑀩𑁆𑀩𑁄. 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀧𑀦 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀘𑁆𑀘𑁂𑀓𑀫𑀦𑀦𑁆𑀢𑀭𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀸.

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀲𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸

𑀅𑀮𑁄𑀪𑀸𑀤𑀺𑀯𑀺𑀧𑀸𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀳𑁂𑀢𑀼𑀓𑀸, 𑀢𑁂 𑀲𑀫𑁆𑀧𑀬𑁄𑀕𑀢𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀸 𑀯𑀺𑀬 𑀅𑀝𑁆𑀞𑀯𑀺𑀥𑀸. 𑀲𑁄𑀫𑀦𑀲𑁆𑀲𑀜𑀸𑀡𑀸𑀤𑀺𑀲𑀫𑁆𑀧𑀬𑁄𑀕𑁄 𑀧𑀦𑁂𑀢𑁆𑀣 𑀆𑀕𑀫𑀦𑀸𑀤𑀺𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀳𑁂𑀢𑀼𑀓𑀁 𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀢𑀺𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑁄 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀤𑁂𑀢𑀺, 𑀤𑀼𑀳𑁂𑀢𑀼𑀓𑀁 𑀧𑀦 𑀓𑀼𑀲𑀮𑀁 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑁄 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀺𑀳𑁂𑀢𑀼𑀓𑀭𑀳𑀺𑀢𑀸𑀦𑀺 ¶ 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀤𑁂𑀢𑀺. 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀧𑀦𑁂𑀢𑁆𑀣 𑀧𑀘𑁆𑀘𑀬𑀯𑀺𑀲𑁂𑀲𑀢𑁄𑀧𑀺 𑀳𑁄𑀢𑀺. 𑀩𑀮𑀯𑀧𑀘𑁆𑀘𑀬𑁂𑀦𑀸𑀧𑀺 𑀳𑀺 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺, 𑀤𑀼𑀩𑁆𑀩𑀮𑁂𑀦𑀸𑀧𑀺 𑀇𑀢𑀭𑀁. 𑀓𑁂𑀘𑀺 𑀧𑀦 𑀅𑀲𑀗𑁆𑀔𑀸𑀭𑀺𑀓𑁂𑀦 𑀲𑀲𑀗𑁆𑀔𑀸𑀭𑀯𑀺𑀧𑀸𑀓𑀸𑀦𑀁, 𑀲𑀲𑀗𑁆𑀔𑀸𑀭𑀺𑀓𑁂𑀦 𑀘 𑀅𑀲𑀗𑁆𑀔𑀸𑀭𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀦 𑀇𑀘𑁆𑀙𑀦𑁆𑀢𑀺. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀢𑁄 𑀅𑀜𑁆𑀜𑁂𑀦𑀸𑀧𑀺 𑀓𑀫𑁆𑀫𑁂𑀦 𑀧𑀯𑀢𑁆𑀢𑁂 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀧𑀝𑁆𑀞𑀸𑀦𑁂 𑀘 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀕𑀢𑀺𑀬𑀁 𑀧𑀯𑀢𑁆𑀢𑁂 𑀲𑀳𑁂𑀢𑀼𑀓𑀸𑀦𑀺𑀧𑀺 𑀯𑀺𑀧𑀸𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀤𑀼𑀕𑁆𑀕𑀢𑀺𑀬𑀁, 𑀧𑀦 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀜𑁆𑀘 𑀅𑀳𑁂𑀢𑀼𑀓𑀸𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀲𑀼𑀧𑀺 𑀅𑀢𑀺𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀻𑀢𑀺 𑀏𑀯𑀁 𑀆𑀕𑀫𑀦𑀸𑀤𑀺𑀢𑁄 𑀲𑀫𑁆𑀧𑀬𑁄𑀕𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀬𑀸𑀯 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀤𑀺𑀲𑁄𑀯 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄, 𑀓𑁂𑀯𑀮𑀜𑁆𑀘𑁂𑀢𑁆𑀣 𑀬𑁂𑀯𑀸𑀧𑀦𑀓𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦 𑀲𑀦𑁆𑀢𑀺 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀳𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸. 𑀯𑀺𑀭𑀢𑀺𑀬𑁄𑀧𑁂𑀢𑁆𑀣 𑀮𑁄𑀓𑀺𑀬𑁂𑀲𑀼 𑀏𑀓𑀦𑁆𑀢𑀓𑀼𑀲𑀮𑀲𑀪𑀸𑀯𑀢𑁆𑀢𑀸 𑀦 𑀲𑀦𑁆𑀢𑀺. ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸 𑀏𑀯𑀸’’𑀢𑀺 (𑀯𑀺𑀪. 𑁭𑁧𑁫 𑀆𑀤𑀬𑁄) 𑀳𑀺 𑀯𑀼𑀢𑁆𑀢𑀁. 𑀨𑀲𑁆𑀲𑀸𑀤𑀬𑁄 𑀘𑁂𑀢𑁆𑀣 ¶ 𑀯𑀺𑀧𑀸𑀓𑀢𑁆𑀢𑀸 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀸, 𑀓𑀼𑀲𑀮𑀸 𑀧𑀦 𑀫𑀼𑀔𑀁 𑀯𑀺𑀬 𑀲𑀉𑀲𑁆𑀲𑀸𑀳𑀸. 𑀲𑀗𑁆𑀕𑀳𑀯𑀸𑀭𑁂 𑀘 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺, 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦 𑀬𑁆𑀯𑀸𑀬𑀁 𑀓𑀼𑀲𑀮𑁂𑀲𑀼 𑀓𑀫𑁆𑀫𑀤𑁆𑀯𑀸𑀭𑀧𑀼𑀜𑁆𑀜𑀓𑀺𑀭𑀺𑀬𑀸𑀥𑀺𑀧𑀢𑀻𑀳𑀺 𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀇𑀥 𑀦𑀢𑁆𑀣𑀺 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁄, 𑀅𑀯𑀺𑀧𑀸𑀓𑀥𑀫𑁆𑀫𑀢𑁄, 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘. 𑀳𑀻𑀦𑀢𑁆𑀢𑀺𑀓𑀪𑁂𑀤𑁄 𑀧𑀦 𑀅𑀢𑁆𑀣𑀺 𑀳𑀻𑀦𑀫𑀚𑁆𑀛𑀺𑀫𑀧𑁆𑀧𑀡𑀻𑀢𑀸𑀦𑀁 𑀓𑀼𑀲𑀮𑀸𑀦𑀁 𑀯𑀺𑀧𑀸𑀓𑀢𑁆𑀢𑀸 ¶ , 𑀢𑀣𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀤𑀺𑀪𑁂𑀤𑁄. 𑀏𑀢𑁂 𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀳𑀼𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸𑀦𑀺, 𑀙𑀤𑁆𑀯𑀸𑀭𑁂 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀜𑁆𑀘 𑀲𑀸𑀥𑀬𑀫𑀸𑀦𑀸 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺. 𑀏𑀯𑀫𑁂𑀢𑁂𑀲𑀁 𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺 𑀅𑀦𑀺𑀩𑀤𑁆𑀥𑀸𑀦𑀺, 𑀢𑀢𑁄 𑀢𑁂𑀳𑀺 𑀪𑁂𑀤𑁄 𑀳𑁄𑀢𑀺. 𑀯𑀢𑁆𑀣𑀼 𑀧𑀦 𑀢𑀢𑁆𑀣𑁂𑀯 𑀦𑀺𑀩𑀤𑁆𑀥𑀁, 𑀢𑀢𑁄 𑀦 𑀪𑁂𑀤𑁄. 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀧𑀦𑁂𑀢𑁆𑀣𑀸𑀧𑀺 𑀅𑀦𑀦𑁆𑀢𑀢𑀸 𑀯𑀼𑀢𑁆𑀢𑀦𑀬𑀸 𑀏𑀯𑀸𑀢𑀺.

𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑀡𑁆𑀡𑀦𑀸

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀧𑀺 𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀅𑀢𑁆𑀢𑀦𑁄 𑀓𑀼𑀲𑀮𑀸 𑀯𑀺𑀬 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀲𑀩𑁆𑀩𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀪𑁂𑀤𑁄 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁄 𑀏𑀯. 𑀯𑀺𑀧𑀸𑀓𑀪𑀸𑀯𑀢𑁄 𑀧𑀦𑁂𑀢𑁆𑀣 𑀬𑀣𑀸 𑀳𑀢𑁆𑀣𑀺𑀆𑀤𑀻𑀦𑀁 𑀙𑀸𑀬𑀸 𑀢𑀁𑀲𑀤𑀺𑀲𑀸, 𑀏𑀯𑀁 𑀓𑀼𑀲𑀮𑀸𑀕𑀫𑀦𑀢𑁄 𑀘 𑀛𑀸𑀦𑀗𑁆𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀸𑀬𑁄𑀕𑁄, 𑀧𑀝𑀺𑀧𑀤𑀸𑀤𑀺𑀪𑁂𑀤𑁄 𑀘 𑀳𑁄𑀢𑀺. 𑀅𑀧𑀺𑀘𑁂𑀢𑁆𑀣 𑀢𑀺𑀯𑀺𑀥𑀸𑀬 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀸 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀸, 𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀸 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀸 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀸 𑀘, 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀸, 𑀯𑁂𑀳𑀧𑁆𑀨𑀮𑀧𑀜𑁆𑀘𑀲𑀼𑀤𑁆𑀥𑀸𑀯𑀸𑀲𑀯𑀲𑁂𑀦 𑀙𑀩𑁆𑀩𑀺𑀥𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑀸 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀧𑀸𑀓𑀸 𑀘 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸𑀯 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑀡𑁆𑀡𑀦𑀸

𑀏𑀯𑀁 ¶ 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀧𑀺 𑀆𑀭𑀫𑁆𑀫𑀡𑀪𑁂𑀤𑀢𑁄 𑀅𑀢𑁆𑀢𑀦𑁄 𑀓𑀼𑀲𑀮𑀸 𑀯𑀺𑀬 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀘 𑀲𑀩𑁆𑀩𑁄 𑀓𑀼𑀲𑀮𑁂 ¶ 𑀯𑀼𑀢𑁆𑀢𑀦𑀬𑁄𑀯. 𑀓𑀼𑀲𑀮𑀢𑁄 𑀘𑁂𑀢𑁆𑀣 𑀯𑀺𑀲𑁂𑀲𑁄 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀓𑀫𑁆𑀫𑀦𑀺𑀫𑀺𑀢𑁆𑀢𑀪𑀽𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑁄 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁, 𑀢𑀣𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑁄 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀪𑀽𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑁄 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀔𑀺𑀬𑀁, 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑁄 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀜𑁆𑀘 𑀅𑀯𑀢𑁆𑀣𑀼𑀓𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀯𑀡𑁆𑀡𑀦𑀸

𑀢𑀣𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀧𑀺 𑀅𑀢𑁆𑀢𑀦𑁄 𑀓𑀼𑀲𑀮𑀸 𑀯𑀺𑀬 𑀢𑀁𑀢𑀁𑀫𑀕𑁆𑀕𑀨𑀮𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀻𑀲𑀢𑀺𑀯𑀺𑀥𑀸𑀯 𑀳𑁄𑀦𑁆𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀘𑁂𑀢𑁆𑀣 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁄𑀯. 𑀓𑁂𑀯𑀮𑀁 𑀲𑀗𑁆𑀕𑀳𑀯𑀸𑀭𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀨𑀮𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀨𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀭𑀳𑀢𑁆𑀢𑀨𑀮𑀲𑁆𑀲 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀝𑁆𑀞𑀸𑀦𑁂 𑀕𑀳𑁂𑀢𑁆𑀯𑀸 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀢𑀸, 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀺𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸, 𑀧𑀝𑀺𑀧𑀤𑀸𑀤𑀺𑀪𑁂𑀤𑁄 𑀘 𑀫𑀕𑁆𑀕𑀸𑀕𑀫𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀥𑀺𑀧𑀢𑀺𑀪𑁂𑀤𑁄𑀧𑁂𑀢𑁆𑀣 𑀮𑀩𑁆𑀪𑀢𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸 𑀳𑀺 𑀅𑀢𑁆𑀢𑀦𑁄 𑀨𑀮𑀸𑀦𑀁 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀢𑁄, 𑀚𑀯𑀦𑀯𑀼𑀢𑁆𑀢𑀺𑀢𑁄 𑀘 𑀅𑀥𑀺𑀧𑀢𑀺𑀁 𑀯𑀺𑀥𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀮𑁄𑀓𑀺𑀬𑀸 𑀧𑀦 𑀯𑀺𑀧𑀭𑀻𑀢𑀢𑁄 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀯𑀺𑀧𑀸𑀓𑁂 𑀅𑀥𑀺𑀧𑀢𑀻 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁫𑁦𑁫). 𑀯𑀺𑀫𑁄𑀓𑁆𑀔𑀪𑁂𑀤𑀢𑁄 𑀧𑀦𑁂𑀢𑁂 𑀫𑀕𑁆𑀕𑀸𑀕𑀫𑀦𑀢𑁄 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀯𑀲𑁂𑀦. 𑀫𑀕𑁆𑀕𑀸 𑀳𑀺 𑀯𑀺𑀧𑀲𑁆𑀲𑀦𑀸𑀕𑀫𑀦𑀢𑁄 ‘‘𑀲𑀼𑀜𑁆𑀜𑀢𑁄 𑀅𑀧𑁆𑀧𑀡𑀺𑀳𑀺𑀢𑁄’’𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀺𑀢𑁆𑀯𑀸 𑀲𑀕𑀼𑀡𑀸𑀭𑀫𑁆𑀫𑀡𑀢𑁄 𑀧𑀭𑀺𑀬𑀸𑀬𑁂𑀦 ¶ 𑀅𑀦𑀺𑀫𑀺𑀢𑁆𑀢𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀨𑀮𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑀻𑀡𑀺𑀧𑀺 𑀦𑀸𑀫𑀸𑀦𑀺 𑀤𑁂𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀪𑀽𑀢𑀸𑀦𑀁 𑀦 𑀤𑁂𑀦𑁆𑀢𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀕𑀫𑀦𑀢𑁄𑀯 𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 ¶ 𑀤𑀼𑀯𑀺𑀥𑁄 𑀦𑀸𑀫𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀘 𑀦 𑀫𑀕𑁆𑀕𑀸 𑀯𑀺𑀬 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸, 𑀫𑀕𑁆𑀕𑀯𑀻𑀣𑀺𑀬𑀁 𑀧𑀦 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀅𑀧𑁆𑀧𑀦𑀸𑀚𑀯𑀦𑀯𑀲𑁂𑀦𑁂𑀯 𑀦𑀺𑀭𑀦𑁆𑀢𑀭𑀁 𑀫𑀳𑀕𑁆𑀕𑀢𑀚𑀯𑀦𑀸𑀦𑀺 𑀯𑀺𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀯𑀺𑀧𑀸𑀓𑀸 𑀧𑀦 𑀓𑀸𑀫𑀸𑀯𑀘𑀭𑀸𑀯, 𑀮𑁄𑀪𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼 𑀅𑀪𑀸𑀯𑀢𑁄 𑀅𑀳𑁂𑀢𑀼𑀓𑀸 𑀏𑀯 𑀘 𑀳𑁄𑀦𑁆𑀢𑀺. 𑀢𑁂 𑀲𑀫𑁆𑀧𑀬𑁄𑀕𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀸𑀦𑀺, 𑀢𑀣𑀸 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀥𑀸𑀢𑀼, 𑀢𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀲𑀢𑁆𑀢𑀯𑀺𑀥𑀸. 𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀲 𑀲𑀩𑁆𑀩𑀢𑁆𑀣 𑀢𑀸𑀤𑀺𑀲𑀸𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀯𑀼𑀢𑁆𑀢𑀦𑀬𑁄 𑀏𑀯. 𑀓𑁂𑀯𑀮𑀁 𑀧𑀦𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀢𑀸, 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀤𑀼𑀓𑁆𑀔𑀲𑀳𑀕𑀢𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀉𑀤𑁆𑀥𑀘𑁆𑀘𑀯𑀚𑁆𑀚𑀺𑀢𑀸𑀓𑀼𑀲𑀮𑀧𑀘𑁆𑀘𑀬𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸𑀦𑀺, 𑀲𑀼𑀕𑀢𑀺𑀬𑀜𑁆𑀘 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀘 𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀺 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀅𑀓𑀼𑀲𑀮𑀯𑀺𑀧𑀸𑀓𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸.

𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀯𑀡𑁆𑀡𑀦𑀸

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀧𑀦 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸 𑀅𑀳𑁂𑀢𑀼𑀓𑀸 𑀲𑀳𑁂𑀢𑀼𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀲𑀳𑀚𑀸𑀢𑀳𑁂𑀢𑀼𑀯𑀺𑀭𑀳𑀺𑀢𑀸 𑀅𑀳𑁂𑀢𑀼𑀓𑀸. 𑀢𑀸 ¶ 𑀲𑀫𑁆𑀧𑀬𑁄𑀕𑀸𑀤𑀺𑀢𑁄 𑀢𑀺𑀯𑀺𑀥𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀥𑀸𑀢𑀼, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀣𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺. 𑀓𑀺𑀭𑀺𑀬𑀸𑀢𑀺 𑀓𑀭𑀡𑀫𑀢𑁆𑀢𑀁, 𑀓𑀺𑀘𑁆𑀘𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀼𑀬𑁂𑀯 𑀳𑀺 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀬𑀁 𑀆𑀯𑀚𑁆𑀚𑀦𑀓𑀺𑀘𑁆𑀘𑀤𑁆𑀯𑀬𑀁, 𑀢𑀁 𑀅𑀚𑀯𑀦𑀯𑀼𑀢𑁆𑀢𑀺𑀢𑁄 𑀫𑁄𑀖𑀧𑀼𑀧𑁆𑀨𑀁 𑀯𑀺𑀬. 𑀬𑀁 𑀚𑀯𑀦𑀯𑀼𑀢𑁆𑀢𑀺𑀓𑀁, 𑀢𑀁 𑀦𑀺𑀭𑀸𑀦𑀼𑀲𑀬𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀢𑁄 𑀙𑀺𑀦𑁆𑀦𑀫𑀽𑀮𑀭𑀼𑀓𑁆𑀔𑀧𑀼𑀧𑁆𑀨𑀁 𑀯𑀺𑀬 𑀅𑀨𑀮𑀁 𑀳𑁄𑀢𑀺. 𑀢𑀁𑀢𑀁𑀆𑀯𑀚𑁆𑀚𑀦𑀚𑀯𑀦𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀦 𑀓𑀺𑀘𑁆𑀘𑀫𑀢𑁆𑀢𑀢𑀁 𑀉𑀧𑀸𑀤𑀸𑀬 ‘‘𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑁄𑀥𑀸𑀢𑀼𑀬𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀁 𑀯𑀼𑀢𑁆𑀢𑀦𑀬𑁂𑀦 ¶ 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀇𑀝𑁆𑀞𑁂𑀲𑀼 𑀯𑀸 𑀅𑀦𑀺𑀝𑁆𑀞𑁂𑀲𑀼 𑀯𑀸 𑀧𑀜𑁆𑀘𑀸𑀭𑀫𑁆𑀫𑀡𑁂𑀲𑀼 𑀧𑀜𑁆𑀘𑀧𑀲𑀸𑀤𑁂 𑀖𑀝𑁆𑀝𑀺𑀢𑁂𑀲𑀼 𑀉𑀧𑁆𑀧𑀦𑁆𑀦𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀸𑀦𑀦𑁆𑀢𑀭𑀁 𑀢𑀫𑁂𑀯 𑀧𑀜𑁆𑀘𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑁂𑀯𑀸𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀲𑀤𑀺𑀲𑀁, 𑀯𑀻𑀭𑀺𑀬𑀁 𑀧𑀦𑁂𑀢𑁆𑀣 𑀅𑀥𑀺𑀓𑀁, 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑁄𑀯 𑀲𑀫𑀸𑀥𑀺 𑀩𑀮𑀯𑀸 𑀳𑁄𑀢𑀺. 𑀢𑀢𑁄 𑀏𑀯𑁂𑀢𑁆𑀣 𑀲𑀗𑁆𑀕𑀳𑀯𑀸𑀭𑁂 𑀯𑀻𑀭𑀺𑀬𑀲𑀫𑀸𑀥𑀺𑀫𑀦𑁄𑀲𑁄𑀫𑀦𑀲𑁆𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀗𑁆𑀕𑀳𑁄 𑀳𑁄𑀢𑀺, 𑀇𑀥𑀸𑀧𑀺 𑀩𑀮𑀲𑀗𑁆𑀕𑀳𑁄 𑀦𑀢𑁆𑀣𑁂𑀯. 𑀬𑀁 𑀧𑀦𑁂𑀢𑁆𑀣 𑀧𑀤𑀪𑀸𑀚𑀦𑀻𑀬𑁂 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀦𑀺𑀤𑁆𑀤𑁂𑀲𑁂 ‘‘𑀲𑀫𑀸𑀥𑀺𑀩𑀮𑀁 𑀯𑀻𑀭𑀺𑀬𑀩𑀮’’𑀦𑁆𑀢𑀺 (𑀥. 𑀲. 𑁫𑁭𑁦-𑁫𑁭𑁨) 𑀩𑀮𑀯𑁂𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀇𑀢𑀭𑀸𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀇𑀫𑁂𑀲𑀁 𑀩𑀮𑀯𑀢𑀭𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀢𑀢𑁄 𑀏𑀯 𑀳𑀺 𑀲𑀗𑁆𑀕𑀳𑀯𑀸𑀭𑁂 ‘‘𑀤𑁆𑀯𑁂 𑀩𑀮𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀳𑁂𑀢𑀼𑀓𑁂𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀩𑀮𑀁 𑀦𑀢𑁆𑀣𑀺 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀢𑀸𑀯 𑀳𑀤𑀬𑀯𑀢𑁆𑀣𑀼𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀸𑀬 𑀘, 𑀫𑀦𑁄𑀤𑁆𑀯𑀸𑀭𑁂 𑀅𑀦𑀼𑀴𑀸𑀭𑁂𑀲𑀼 𑀙𑀲𑀼 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂𑀲𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀸𑀬 ¶ 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀚𑀯𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀔𑀻𑀡𑀸𑀲𑀯𑀸𑀦𑀜𑁆𑀜𑁂𑀯 𑀳𑀲𑀺𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀳𑀲𑀺𑀢𑀁 𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀸𑀫𑀸𑀯𑀘𑀭𑁂𑀳𑁂𑀯 𑀚𑀯𑀦𑁂𑀳𑀺, 𑀢𑁂𑀲𑀼 𑀅𑀲𑁂𑀔𑀸𑀦𑀁 𑀧𑀜𑁆𑀘𑀳𑀺 𑀓𑀺𑀭𑀺𑀬𑀸𑀚𑀯𑀦𑁂𑀳𑀺, 𑀲𑁂𑀔𑀸𑀦𑀁 𑀧𑀦 𑀓𑀼𑀲𑀮𑁂𑀳𑀺 𑀘𑁂𑀯 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀫𑀽𑀮𑁂𑀳𑀺 𑀘𑀸𑀢𑀺 𑀙𑀳𑀺, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘𑀸𑀢𑀺 𑀅𑀝𑁆𑀞𑀳𑀻𑀢𑀺 𑀢𑁂𑀭𑀲𑀳𑀺 𑀘𑀺𑀢𑁆𑀢𑁂𑀳𑀺 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀳𑀤𑀬𑀯𑀢𑁆𑀣𑀼𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁, 𑀫𑀦𑁄𑀤𑁆𑀯𑀸𑀭𑁂 𑀲𑀩𑁆𑀩𑁂𑀲𑀼 𑀙𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀲𑀯𑀢𑁆𑀣𑀼𑀓𑀸, 𑀅𑀯𑀢𑁆𑀣𑀼𑀓𑀸 𑀯𑀸 𑀪𑀯𑀗𑁆𑀕𑀘𑀮𑀦𑀸𑀦𑀦𑁆𑀢𑀭𑀁 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀅𑀬𑀁 𑀳𑀺 𑀢𑀻𑀲𑀼 𑀪𑀯𑁂𑀲𑀼 𑀓𑀲𑁆𑀲𑀘𑀺 𑀲𑀘𑀺𑀢𑁆𑀢𑀓𑀧𑀼𑀕𑁆𑀕𑀮𑀲𑁆𑀲 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀲𑀬𑁂 𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀤𑀺𑀲𑀁 𑀫𑀳𑀸𑀕𑀫𑀦𑀁 𑀦𑀸𑀫𑁂𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀅𑀳𑁂𑀢𑀼𑀓𑀓𑀺𑀭𑀺𑀬𑀸 𑀦𑀺𑀝𑁆𑀞𑀺𑀢𑀸.

𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀡𑁆𑀡𑀦𑀸

𑀅𑀮𑁄𑀪𑀸𑀤𑀺𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 ¶ 𑀧𑀦 𑀲𑀳𑁂𑀢𑀼𑀓𑀸, 𑀢𑁂 𑀲𑀫𑁆𑀧𑀬𑁄𑀕𑀢𑁄 𑀓𑀼𑀲𑀮𑀸 𑀯𑀺𑀬 𑀅𑀝𑁆𑀞𑀯𑀺𑀥𑀸. 𑀲𑀩𑁆𑀩𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀓𑀼𑀲𑀮𑁂𑀲𑀼 𑀯𑀼𑀢𑁆𑀢𑀦𑀬𑁄 𑀏𑀯. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀯𑀺𑀭𑀢𑀺𑀬𑁄 𑀦 𑀲𑀦𑁆𑀢𑀺, 𑀓𑀼𑀲𑀮𑀸 𑀘 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀯𑀸 𑀅𑀦𑀺𑀲𑁆𑀲𑀸𑀬 𑀯𑀸 𑀚𑀯𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀇𑀫𑁂 𑀧𑀦 𑀅𑀲𑁂𑀔𑀸𑀦𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀯𑀡𑁆𑀡𑀦𑀸

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀘 𑀓𑀼𑀲𑀮𑀸 𑀯𑀺𑀬 𑀧𑀜𑁆𑀘𑀯𑀺𑀥𑀸. 𑀯𑀺𑀦𑀺𑀘𑁆𑀙𑀬𑁄 𑀘 𑀢𑀢𑁆𑀣 𑀯𑀼𑀢𑁆𑀢𑀦𑀬𑁄 𑀏𑀯. 𑀓𑁂𑀯𑀮𑀁 𑀳𑀺 𑀓𑀼𑀲𑀮𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸 ¶ , 𑀅𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀲𑀩𑁆𑀩𑀸𑀭𑀫𑁆𑀫𑀡𑀜𑁆𑀘 𑀳𑀼𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀳𑀤𑀬𑀯𑀢𑁆𑀣𑀼𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀚𑀯𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀇𑀫𑁂 𑀧𑀦 𑀅𑀲𑁂𑀔𑀸𑀦𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸.

𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀯𑀡𑁆𑀡𑀦𑀸

𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀘 𑀓𑀼𑀲𑀮𑀸 𑀯𑀺𑀬 𑀘𑀢𑀼𑀩𑁆𑀩𑀺𑀥𑀸. 𑀯𑀺𑀦𑀺𑀘𑁆𑀙𑀬𑁄 𑀘 𑀢𑀢𑁆𑀣 𑀯𑀼𑀢𑁆𑀢𑀦𑀬𑁄 𑀏𑀯. 𑀓𑁂𑀯𑀮𑀁 𑀳𑀺 𑀓𑀼𑀲𑀮𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀯𑀢𑁆𑀣𑀼𑀓𑀸, 𑀅𑀯𑀢𑁆𑀣𑀼𑀓𑀸 𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀬𑁄𑀕𑀁 𑀧𑀜𑁆𑀜𑀢𑁆𑀢𑀺𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀫𑀦𑁄𑀤𑁆𑀯𑀸𑀭𑁂 𑀚𑀯𑀦𑀓𑀺𑀘𑁆𑀘𑀁 𑀲𑀸𑀬𑁂𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀇𑀫𑁂 𑀧𑀦 𑀅𑀲𑁂𑀔𑀸𑀦𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀏𑀢𑁆𑀣 ¶ 𑀞𑀢𑁆𑀯𑀸 𑀲𑀩𑁆𑀩𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂 𑀚𑀸𑀢𑀺𑀲𑀗𑁆𑀕𑀳𑀸𑀤𑀺𑀢𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀓𑀺𑀡𑁆𑀡𑀓𑀓𑀣𑀸 𑀯𑀢𑁆𑀢𑀩𑁆𑀩𑀸. 𑀬𑀣𑀸𑀯𑀼𑀢𑁆𑀢𑀸𑀦𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀓𑀼𑀲𑀮𑀸𑀦𑀺 𑀏𑀓𑀯𑀻𑀲𑀢𑀺, 𑀅𑀓𑀼𑀲𑀮𑀸𑀦𑀺 𑀤𑁆𑀯𑀸𑀤𑀲, 𑀯𑀺𑀧𑀸𑀓𑀸𑀦𑀺 𑀙𑀢𑁆𑀢𑀺𑀁𑀲, 𑀓𑀺𑀭𑀺𑀬𑀸𑀦𑀺 𑀯𑀻𑀲𑀢𑀺 𑀘𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀸𑀦𑀺, 𑀮𑁄𑀓𑀼𑀢𑁆𑀢𑀭𑀸𑀦𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀘𑀢𑁆𑀢𑀸𑀮𑀻𑀲𑀯𑀺𑀥𑀢𑁆𑀢𑀸 𑀏𑀓𑀯𑀻𑀲𑀲𑀢𑀁 𑀯𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀓𑀸𑀫𑀸𑀯𑀘𑀭𑀸𑀦𑀺 𑀘𑀢𑀼𑀧𑀜𑁆𑀜𑀸𑀲, 𑀭𑀽𑀧𑀸𑀯𑀘𑀭𑀸𑀦𑀺 𑀧𑀦𑁆𑀦𑀭𑀲, 𑀅𑀭𑀽𑀧𑀸𑀯𑀘𑀭𑀸𑀦𑀺 𑀤𑁆𑀯𑀸𑀤𑀲, 𑀮𑁄𑀓𑀼𑀢𑁆𑀢𑀭𑀸𑀦𑀺 𑀅𑀝𑁆𑀞, 𑀘𑀢𑁆𑀢𑀸𑀮𑀻𑀲𑀁 𑀯𑀸. 𑀓𑀸𑀫𑀸𑀯𑀘𑀭𑁂𑀲𑀼 𑀘 𑀓𑀼𑀲𑀮𑀸𑀦𑀺 𑀅𑀝𑁆𑀞, 𑀯𑀺𑀧𑀸𑀓𑀸𑀦𑀺 𑀢𑁂𑀯𑀻𑀲𑀢𑀺, 𑀓𑀺𑀭𑀺𑀬𑀸𑀦𑀺 𑀏𑀓𑀸𑀤𑀲, 𑀅𑀳𑁂𑀢𑀼𑀓𑀸𑀦𑀺 𑀅𑀝𑁆𑀞𑀸𑀭𑀲. 𑀲𑁂𑀲𑀸𑀦𑀺 𑀧𑀦 𑀘𑀢𑀼𑀪𑀽𑀫𑀓𑀸𑀦𑀺𑀧𑀺 𑀲𑀳𑁂𑀢𑀼𑀓𑀸𑀦𑀺. 𑀢𑁂𑀲𑀼 𑀘 𑀚𑀸𑀢𑀺𑀢𑁄 𑀘𑀺𑀢𑁆𑀢𑀕𑀡𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀯 ¶ . 𑀘𑁂𑀢𑀲𑀺𑀓𑀸 𑀧𑀦 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀓𑀸𑀬𑀧𑀲𑁆𑀲𑀤𑁆𑀥𑀸𑀤𑀬𑁄 𑀤𑁆𑀯𑀸𑀤𑀲, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀅𑀫𑁄𑀳𑁄 𑀅𑀧𑁆𑀧𑀫𑀜𑁆𑀜𑀸𑀤𑁆𑀯𑀬𑀁, 𑀯𑀺𑀭𑀢𑀺𑀢𑁆𑀢𑀬𑀜𑁆𑀘 𑀫𑁄𑀳𑁄 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀉𑀤𑁆𑀥𑀘𑁆𑀘𑀜𑁆𑀘 𑀮𑁄𑀪𑁄 𑀤𑀺𑀝𑁆𑀞𑀺 𑀤𑁄𑀲𑁄 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀫𑀸𑀦𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀁 𑀫𑀺𑀤𑁆𑀥𑀜𑁆𑀘 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀫𑀦𑀲𑀺𑀓𑀸𑀭𑁄 𑀘 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀯𑀻𑀭𑀺𑀬𑀁 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀘𑀸𑀢𑀺 𑀤𑁆𑀯𑁂𑀧𑀜𑁆𑀜𑀸𑀲 𑀳𑁄𑀦𑁆𑀢𑀺.

𑀢𑀢𑁆𑀣 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸, 𑀅𑀧𑁆𑀧𑀫𑀜𑁆𑀜𑀸𑀤𑁆𑀯𑀬𑀁, 𑀫𑀸𑀦𑀸𑀤𑀻𑀦𑀺 𑀙, 𑀫𑀦𑀲𑀺𑀓𑀸𑀭𑁄 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀘𑀸𑀢𑀺 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀬𑀣𑀸𑀞𑀸𑀦𑁂 𑀬𑁂𑀯𑀸𑀧𑀦𑀓𑀸 𑀏𑀯, 𑀯𑀺𑀭𑀢𑀺𑀢𑁆𑀢𑀬𑀁, 𑀉𑀤𑁆𑀥𑀘𑁆𑀘𑀜𑁆𑀘 𑀓𑀢𑁆𑀣𑀘𑀺 𑀬𑁂𑀯𑀸𑀧𑀦𑀓𑀸. 𑀢𑁂𑀲𑀼 𑀘 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀫𑀦𑀲𑀺𑀓𑀸𑀭𑁄 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀉𑀤𑁆𑀥𑀘𑁆𑀘𑀁 𑀯𑀺𑀭𑀢𑀺𑀬𑁄𑀢𑀺 𑀇𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀝𑁆𑀞 𑀬𑀣𑀸𑀞𑀸𑀦𑁂 𑀅𑀦𑀺𑀬𑀢𑀸 𑀏𑀯, 𑀯𑀺𑀭𑀢𑀺𑀬𑁄 𑀧𑀦 𑀓𑀢𑁆𑀣𑀘𑀺 𑀅𑀦𑀺𑀬𑀢𑀸, 𑀇𑀫𑁂 𑀧𑀦 𑀏𑀓𑀸𑀤𑀲 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀏𑀓𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀦𑀺𑀬𑀢𑀸 𑀏𑀯. 𑀢𑀢𑁆𑀣 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘𑀯𑀻𑀲𑀢𑀺 𑀥𑀫𑁆𑀫𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀬𑁂𑀯, 𑀫𑁄𑀳𑀸𑀤𑀬𑁄 𑀘𑀼𑀤𑁆𑀤𑀲 𑀅𑀓𑀼𑀲𑀮𑀸 𑀏𑀯, 𑀨𑀲𑁆𑀲𑀸𑀤𑀬𑁄 𑀢𑁂𑀭𑀲 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀢𑀺𑀚𑀸𑀢𑀺𑀓𑀸. 𑀏𑀓𑀦𑁆𑀢𑀢𑁄 𑀳𑀺 𑀓𑀼𑀲𑀮𑀸 𑀯𑀸 𑀅𑀩𑁆𑀬𑀸𑀓𑀢𑀸 𑀯𑀸 𑀥𑀫𑁆𑀫𑀸 𑀦𑀢𑁆𑀣𑀺, 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑀫𑀬𑁂 𑀧𑀦 𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑀫𑀬𑁂 𑀅𑀩𑁆𑀬𑀸𑀓𑀢𑀸 𑀘 𑀳𑁄𑀦𑁆𑀢𑀺. 𑀫𑁄𑀳𑀸𑀤𑀬𑁄 𑀧𑀦 𑀲𑀭𑀽𑀧𑁂𑀦𑁂𑀯 𑀅𑀓𑀼𑀲𑀮𑀸, 𑀇𑀢𑀭𑁂 𑀘 𑀢𑀁𑀲𑀫𑁆𑀧𑀬𑁄𑀕𑁂𑀦 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀅𑀢𑁆𑀣𑀦𑀸 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀪𑁂𑀤𑁂𑀦 𑀪𑁂𑀤𑀯𑀦𑁆𑀢𑁄𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀼 𑀳𑀺 𑀲𑀤𑁆𑀥𑀸𑀤𑀬𑁄 𑀏𑀓𑀽𑀦𑀯𑀻𑀲𑀢𑀺 𑀲𑀩𑁆𑀩𑁂𑀲𑀼 𑀓𑀼𑀲𑀮𑁂𑀲𑀼 𑀘𑁂𑀯 𑀲𑀳𑁂𑀢𑀼𑀓𑀸𑀩𑁆𑀬𑀸𑀓𑀢𑁂𑀲𑀼 𑀘𑀸𑀢𑀺 𑀏𑀓𑀽𑀦𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀧𑀘𑁆𑀘𑁂𑀓𑀁 𑀏𑀓𑀽𑀦𑀲𑀝𑁆𑀞𑀺𑀧𑁆𑀧𑀪𑁂𑀤𑀸 𑀘 𑀳𑁄𑀦𑁆𑀢𑀺. 𑀏𑀯𑀫𑀜𑁆𑀜𑁂𑀧𑀺 𑀜𑀸𑀢𑀩𑁆𑀩𑀸 ¶ . 𑀅𑀫𑁄𑀳𑁄 𑀢𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 ¶ 𑀞𑀧𑁂𑀢𑁆𑀯𑀸 𑀲𑁂𑀲𑁂𑀲𑀼, 𑀅𑀧𑁆𑀧𑀫𑀜𑁆𑀜𑀸 𑀧𑀦 𑀓𑀸𑀫𑀸𑀯𑀘𑀭𑁂𑀲𑀼 𑀲𑀳𑁂𑀢𑀼𑀓𑀓𑀺𑀭𑀺𑀬𑀓𑀼𑀲𑀮𑁂𑀲𑀼 𑀘𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑀭𑀽𑀧𑀸𑀯𑀘𑀭𑁂𑀲𑀼 𑀘𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀘𑀺𑀢𑁆𑀢𑁂𑀲𑀼, 𑀯𑀺𑀭𑀢𑀺𑀬𑁄 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼, 𑀮𑁄𑀓𑀼𑀢𑁆𑀢𑀭𑁂𑀲𑀼 𑀘𑀸𑀢𑀺 𑀲𑁄𑀴𑀲𑀲𑀼. 𑀏𑀯𑀫𑁂𑀢𑁂 𑀧𑀜𑁆𑀘𑀯𑀻𑀲𑀢𑀺 𑀥𑀫𑁆𑀫𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦𑀸𑀫 𑀚𑀸𑀢𑀸. 𑀅𑀓𑀼𑀲𑀮𑁂𑀲𑀼 𑀧𑀦 𑀫𑁄𑀳𑀸𑀤𑀬𑁄 𑀘𑀢𑁆𑀢𑀸𑀭𑁄 𑀤𑁆𑀯𑀸𑀤𑀲𑀲𑀼𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀮𑁄𑀪𑁄 𑀅𑀝𑁆𑀞𑀲𑀼 𑀮𑁄𑀪𑀫𑀽𑀮𑁂𑀲𑀼, 𑀤𑀺𑀝𑁆𑀞𑀺 𑀢𑀢𑁆𑀣 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼, 𑀤𑁄𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀣𑀺𑀦𑀫𑀺𑀤𑁆𑀥𑀁 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀏𑀯𑀸𑀢𑀺. 𑀏𑀯𑀫𑁂𑀢𑁂 𑀘𑀼𑀤𑁆𑀤𑀲𑀧𑀺 𑀲𑀬𑀁 𑀅𑀓𑀼𑀲𑀮𑀢𑁆𑀢𑀸, 𑀅𑀓𑀼𑀲𑀮𑁂𑀲𑁆𑀯𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀘 𑀅𑀓𑀼𑀲𑀮𑀸 𑀦𑀸𑀫.

𑀇𑀢𑀭𑁂𑀲𑀼 𑀘 𑀨𑀲𑁆𑀲𑀸𑀤𑀬𑁄 𑀲𑀢𑁆𑀢 𑀥𑀫𑁆𑀫𑀸 𑀲𑀩𑁆𑀩𑀘𑀺𑀢𑁆𑀢𑁂𑀲𑀼, 𑀦 𑀳𑀺 𑀢𑀁 𑀘𑀺𑀢𑁆𑀢𑀫𑀢𑁆𑀣𑀺, 𑀬𑀁 𑀇𑀫𑁂𑀲𑀼 𑀏𑀓𑁂𑀦𑀸𑀧𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑀢𑁆𑀣𑀓𑀸 𑀳𑀺 𑀏𑀢𑁂. 𑀯𑀺𑀢𑀓𑁆𑀓𑀸𑀤𑀬𑁄 𑀧𑀦 𑀬𑀣𑀸𑀬𑁄𑀕𑀺𑀓𑀸. 𑀢𑁂𑀲𑀼 𑀳𑀺 𑀯𑀺𑀢𑀓𑁆𑀓𑁄 𑀢𑀸𑀯 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀓𑀸𑀫𑀸𑀯𑀘𑀭𑁂𑀲𑀼 𑀘𑁂𑀯 𑀏𑀓𑀸𑀤𑀲𑀲𑀼 𑀧𑀞𑀫𑀚𑁆𑀛𑀸𑀦𑀺𑀓𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑁂𑀲𑀼 𑀘𑀸𑀢𑀺 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀸𑀭𑁄 𑀧𑀦 𑀢𑁂𑀲𑀼 𑀘𑁂𑀯 𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼. 𑀧𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀯𑀚𑁆𑀚𑀺𑀢𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼. 𑀯𑀻𑀭𑀺𑀬𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀲𑀦𑁆𑀢𑀻𑀭𑀡𑀢𑁆𑀢𑀺𑀓𑀯𑀚𑁆𑀚𑀺𑀢𑁂𑀲𑀼. 𑀙𑀦𑁆𑀤𑁄 𑀅𑀳𑁂𑀢𑀼𑀓𑀫𑁄𑀫𑀽𑀳𑀯𑀚𑁆𑀚𑀺𑀢𑁂𑀲𑀼. 𑀅𑀥𑀺𑀫𑁄𑀓𑁆𑀔𑁄 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑀯𑀚𑁆𑀚𑀺𑀢𑁂𑀲𑀼. 𑀏𑀯𑀫𑁂𑀢𑁂 𑀢𑁂𑀭𑀲 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀢𑀺𑀚𑀸𑀢𑀺𑀓𑀸 𑀦𑀸𑀫 𑀚𑀸𑀢𑀸. 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀪𑁂𑀤𑁂𑀦 𑀘𑁂𑀲𑀁 𑀧𑀘𑁆𑀘𑁂𑀓𑀁 𑀕𑀡𑀦𑀸𑀪𑁂𑀤𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑀘𑀺𑀢𑁆𑀢𑀁 𑀲𑀮𑀓𑁆𑀔𑀡𑀢𑁄 𑀏𑀓𑀯𑀺𑀥𑀫𑁆𑀧𑀺 𑀲𑀫𑁆𑀧𑀬𑁄𑀕𑀸𑀯𑀢𑁆𑀣𑀸𑀤𑀺𑀪𑁂𑀤𑁂𑀦𑁂𑀯 𑀪𑀺𑀦𑁆𑀦𑀁, 𑀢𑀣𑀸 𑀘𑁂𑀢𑀲𑀺𑀓𑀸𑀧𑀺 𑀧𑀘𑁆𑀘𑁂𑀓𑀦𑁆𑀢𑀺 𑀜𑀸𑀢𑀩𑁆𑀩𑀸, 𑀯𑀺𑀲𑁂𑀲𑀁 𑀧𑀦 𑀦𑁂𑀲𑀁 𑀯𑀓𑁆𑀔𑀸𑀫.

𑀯𑀢𑁆𑀣𑀼𑀲𑀗𑁆𑀕𑀳𑁂 ¶ 𑀧𑀦 𑀦𑁂𑀲𑀁 𑀘𑀺𑀢𑁆𑀢𑁂𑀲𑀼 𑀢𑀸𑀯 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀳𑀲𑀺𑀢𑀸𑀦𑀺, 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀧𑀝𑀺𑀖𑀭𑀽𑀧𑀸𑀯𑀘𑀭𑀧𑀞𑀫𑀫𑀕𑁆𑀕𑀸𑀦𑀺 𑀘𑀸𑀢𑀺 𑀢𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀲𑀓𑀁 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀺 𑀧𑀦 𑀅𑀦𑀺𑀲𑁆𑀲𑀸𑀬𑁂𑀯, 𑀲𑁂𑀲𑀸𑀦𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬𑀧𑀺, 𑀆𑀭𑀼𑀧𑁆𑀧𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑀢𑁄 𑀅𑀦𑀺𑀲𑁆𑀲𑀸𑀬𑀧𑀺. 𑀅𑀭𑀽𑀧𑀻𑀦𑀁 𑀳𑀺 𑀙𑀧𑀺 𑀯𑀢𑁆𑀣𑀽𑀦𑀺 𑀦 𑀲𑀦𑁆𑀢𑀺, 𑀭𑀽𑀧𑀻𑀦𑀁 𑀧𑀦 𑀖𑀸𑀦𑀸𑀤𑀻𑀦𑀺 𑀢𑀻𑀡𑀺, 𑀲𑀩𑁆𑀩𑀢𑁆𑀣 𑀘 𑀢𑀁𑀢𑀁𑀯𑀢𑁆𑀣𑀼𑀭𑀳𑀺𑀢𑀸𑀦𑀁 𑀲𑀩𑁆𑀩𑀢𑁆𑀣 𑀦𑀺𑀬𑀢𑀯𑀺𑀜𑁆𑀜𑀸𑀡𑀸𑀦𑀺𑀧𑀺, 𑀅𑀲𑀜𑁆𑀜𑀻𑀦𑀁 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀯𑀢𑁆𑀣𑀼𑀯𑀺𑀜𑁆𑀜𑀸𑀡𑀸𑀦𑀺 𑀦 𑀲𑀦𑁆𑀢𑀺. 𑀢𑁂𑀲𑀁 𑀳𑀺 𑀚𑀻𑀯𑀺𑀢𑀦𑀯𑀓𑀫𑁂𑀯 𑀭𑀽𑀧𑀁 𑀧𑀝𑀺𑀲𑀦𑁆𑀥𑀺, 𑀧𑀯𑀢𑁆𑀢𑀺𑀬𑀁 𑀪𑀯𑀗𑁆𑀕𑀁, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀬𑀣𑀸 𑀘𑁂𑀢𑁆𑀣 𑀘𑀺𑀢𑁆𑀢𑀸𑀦𑀁, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸𑀦𑀫𑁆𑀧𑀺 𑀯𑀢𑁆𑀣𑀼𑀢𑁄 𑀲𑀗𑁆𑀕𑀳𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑁂𑀲𑀼 𑀳𑀺 𑀤𑁄𑀲𑁄 𑀇𑀲𑁆𑀲𑀸 ¶ 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀸𑀫𑀮𑁄𑀓𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀭𑀼𑀡𑀸𑀫𑀼𑀤𑀺𑀢𑀸 𑀧𑀦 𑀭𑀽𑀧𑀮𑁄𑀓𑁂𑀧𑀺, 𑀦 𑀅𑀭𑀽𑀧𑁂. 𑀢𑀢𑁆𑀣 𑀳𑀺 𑀭𑀽𑀧𑀸𑀯𑀘𑀭𑀧𑀼𑀩𑁆𑀩𑀪𑀸𑀕𑀸𑀦𑀺𑀧𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁂𑀲𑀸 𑀧𑀦 𑀲𑀩𑁆𑀩𑁂 𑀦𑀺𑀲𑁆𑀲𑀸𑀬𑀧𑀺 𑀅𑀦𑀺𑀲𑁆𑀲𑀸𑀬𑀧𑀺 𑀢𑀻𑀲𑀼𑀧𑀺 𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀳𑀺 𑀨𑀲𑁆𑀲𑀸𑀤𑀬𑁄 𑀲𑀢𑁆𑀢 𑀙𑀧𑀺 𑀯𑀢𑁆𑀣𑀽𑀦𑀺, 𑀇𑀢𑀭𑁂 𑀧𑀦 𑀳𑀤𑀬𑀫𑁂𑀯𑀸𑀢𑀺, 𑀲𑁂𑀲𑀁 𑀘𑀺𑀢𑁆𑀢𑀲𑀫𑀁.

𑀓𑀺𑀘𑁆𑀘𑀤𑁆𑀯𑀸𑀭𑀲𑀗𑁆𑀕𑀳𑁂 𑀧𑀦 𑀦𑁂𑀲𑀁 𑀘𑀺𑀢𑁆𑀢𑀁 𑀬𑀣𑀸 𑀘 𑀘𑀼𑀤𑁆𑀤𑀲𑀳𑀺 𑀓𑀺𑀘𑁆𑀘𑁂𑀳𑀺 𑀙𑀤𑁆𑀯𑀸𑀭𑀺𑀓𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀪𑀸𑀯𑁂𑀦, 𑀏𑀯𑀁 𑀧𑀯𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 𑀓𑀼𑀲𑀮𑀸𑀓𑀼𑀲𑀮𑀩𑀮𑁂𑀦 𑀢𑀻𑀲𑀼 𑀪𑀽𑀫𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀤𑀸 𑀢𑁂𑀲𑀁 𑀫𑀭𑀡𑀓𑀸𑀮𑁂 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀫𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀫𑀜𑁆𑀜𑀢𑀭𑀁 𑀕𑀳𑁂𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀜𑁆𑀘𑁂𑀯 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸𑀦𑀺, 𑀦𑀯 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀸𑀦𑀺 𑀘𑁂𑀢𑀺 𑀏𑀓𑀽𑀦𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀲𑀓𑀪𑀽𑀫𑀻𑀲𑀼 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑁂𑀯 𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀫𑀭𑀡𑀓𑀸𑀮𑁂 𑀳𑀺 ¶ 𑀲𑀢𑁆𑀢𑀸𑀦𑀁 𑀅𑀲𑀜𑁆𑀜𑀺𑀲𑀢𑁆𑀢𑀯𑀺𑀭𑀳𑀺𑀢𑀸𑀦𑀁 𑀪𑀯𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀅𑀢𑀻𑀢𑀁 𑀓𑀫𑁆𑀫𑀁 𑀯𑀸 𑀢𑀁𑀓𑀫𑁆𑀫𑀓𑀭𑀡𑀓𑀸𑀮𑁂 𑀯𑀺𑀲𑀬𑁄𑀧𑀓𑀭𑀡𑀸𑀤𑀺𑀪𑀽𑀢𑀁 𑀭𑀽𑀧𑀸𑀤𑀺𑀙𑀩𑁆𑀩𑀺𑀥𑀫𑁆𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑀁 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀉𑀧𑀧𑀚𑁆𑀚𑀫𑀸𑀦𑀪𑀯𑀸𑀦𑀼𑀭𑀽𑀧𑀁 𑀓𑀧𑁆𑀧𑀭𑀼𑀓𑁆𑀔𑀫𑀸𑀢𑀼𑀓𑀼𑀘𑁆𑀙𑀺𑀦𑀺𑀭𑀬𑀕𑁆𑀕𑀺𑀚𑀸𑀮𑀸𑀤𑀺𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀓𑀫𑁆𑀫𑀩𑀮𑁂𑀦 𑀬𑀣𑀸𑀭𑀳𑀁 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀫𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀬𑀦𑁆𑀳𑁂 𑀧𑀩𑁆𑀩𑀢𑀘𑁆𑀙𑀸𑀬𑀸 𑀧𑀣𑀯𑀺𑀬𑀁 𑀯𑀺𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀮𑁆𑀮𑀻𑀬𑀫𑀸𑀦𑀁 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀉𑀧𑀝𑁆𑀞𑀺𑀢𑁂 𑀘 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀓𑀫𑁆𑀫𑀩𑀮𑁂𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀆𑀬𑀼𑀓𑁆𑀔𑀬𑀓𑀫𑁆𑀫𑀓𑁆𑀔𑀬𑀉𑀪𑀬𑀓𑁆𑀔𑀬𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀸𑀦𑀫𑀜𑁆𑀜𑀢𑀭𑁂𑀦 𑀧𑀘𑁆𑀘𑀸𑀲𑀦𑁆𑀦𑀫𑀭𑀡𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀯𑀻𑀣𑀺𑀘𑀺𑀢𑁆𑀢𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀘𑀼𑀢𑀺𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀬𑀣𑀸𑀕𑀳𑀺𑀢𑀁 𑀆𑀭𑀩𑁆𑀪 𑀬𑀣𑀸𑀭𑀳𑀁 𑀢𑀻𑀲𑀼 𑀪𑀯𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀪𑀯𑀦𑁆𑀢𑀭𑁂 𑀧𑀞𑀫𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀣 𑀘 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀘𑀼𑀢𑀺𑀬𑀸𑀦𑀦𑁆𑀢𑀭𑀁 𑀤𑀲 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑁄𑀯 𑀳𑁄𑀦𑁆𑀢𑀺, 𑀦 𑀇𑀢𑀭𑀸, 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀸𑀬 𑀘𑀼𑀢𑀺𑀬𑀸 𑀲𑀩𑁆𑀩𑀸𑀧𑀺 𑀳𑁄𑀦𑁆𑀢𑀺, 𑀭𑀽𑀧𑀸𑀯𑀘𑀭𑀸𑀬 𑀧𑀦 𑀘𑀼𑀢𑀺𑀬𑀸𑀧𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀭𑀳𑀺𑀢𑀸, 𑀅𑀭𑀽𑀧𑀸𑀯𑀘𑀭𑀸𑀬 𑀘𑀼𑀢𑀺𑀬𑀸 𑀳𑁂𑀝𑁆𑀞𑀺𑀫𑀯𑀚𑁆𑀚𑀺𑀢𑀸𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺𑀬𑁄 𑀘𑁂𑀯 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑁄 𑀘, 𑀅𑀲𑀜𑁆𑀜𑀻𑀦𑀁 𑀧𑀦 𑀭𑀽𑀧𑀘𑀼𑀢𑀺𑀢𑁄 𑀪𑀯𑀦𑁆𑀢𑀭𑁂 𑀕𑀳𑀺𑀢𑀧𑀼𑀩𑁆𑀩𑀁 𑀓𑀫𑁆𑀫𑀸𑀤𑀺𑀫𑁂𑀯𑀸𑀭𑀩𑁆𑀪 𑀅𑀳𑁂𑀢𑀼𑀓𑀭𑀳𑀺𑀢𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑁄𑀯 𑀳𑁄𑀦𑁆𑀢𑀺, 𑀦 𑀇𑀢𑀭𑀸. 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀧𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀜𑁆𑀘 𑀘𑀼𑀢𑀺𑀬𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀺, 𑀲𑁂𑀔𑀸𑀦𑀁 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀲𑀜𑁆𑀜𑀺𑀧𑀝𑀺𑀲𑀦𑁆𑀥𑀺𑀬𑁄, 𑀅𑀲𑁂𑀔𑀸𑀦𑀁 𑀧𑀦 𑀲𑀩𑁆𑀩𑀸𑀧𑀺 𑀧𑀝𑀺𑀲𑀦𑁆𑀥𑀺𑀬𑁄 𑀦 𑀳𑁄𑀦𑁆𑀢𑀺. 𑀢𑁂 𑀳𑀺 𑀘𑀼𑀢𑀺𑀢𑁄 ¶ 𑀦𑀺𑀭𑀼𑀧𑀥𑀺𑀲𑁂𑀲𑀦𑀺𑀩𑁆𑀩𑀸𑀦𑁂𑀦 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀏𑀯𑀁 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀦𑀺𑀭𑁄𑀥𑀢𑁄 𑀧𑀭𑀁 𑀢𑀤𑁂𑀯 𑀘𑀺𑀢𑁆𑀢𑀁 𑀢𑀲𑁆𑀫𑀺𑀜𑁆𑀜𑁂𑀯𑀸𑀭𑀫𑁆𑀫𑀡𑁂 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀅𑀲𑀢𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀼𑀧𑀺𑀦𑀫𑁆𑀧𑀺 𑀅𑀤𑀺𑀲𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑀸𑀤𑀻𑀲𑀼 ¶ 𑀅𑀧𑀭𑀺𑀫𑀸𑀡𑀲𑀗𑁆𑀔𑀫𑁆𑀧𑀺 𑀦𑀤𑀻𑀲𑁄𑀢𑀁 𑀯𑀺𑀬 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀦 𑀯𑀢𑁆𑀢𑀫𑀸𑀦𑁂 𑀪𑀯𑀗𑁆𑀕𑀲𑀦𑁆𑀢𑀸𑀦𑁂 𑀬𑀤𑀸 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀫𑀸𑀕𑀫𑁆𑀫 𑀲𑀪𑀸𑀕𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑀁 𑀅𑀢𑀺𑀫𑀳𑀦𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀖𑀝𑁆𑀝𑁂𑀢𑀺, 𑀢𑀤𑀸 𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀢𑁆𑀣 𑀪𑀯𑀗𑁆𑀕𑀘𑀮𑀦𑀁 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀯𑁄𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀫𑀺𑀁 𑀭𑀽𑀧𑀸𑀭𑀫𑁆𑀫𑀡𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀢𑀤𑀦𑀦𑁆𑀢𑀭𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀬𑁂 𑀬𑀣𑀸𑀭𑀳𑀫𑁂𑀓𑀁 𑀤𑀲𑁆𑀲𑀦𑀓𑀺𑀘𑁆𑀘𑀁, 𑀢𑀤𑀦𑀦𑁆𑀢𑀭𑀁 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀤𑁆𑀯𑀬𑀸 𑀅𑀜𑁆𑀜𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁, 𑀢𑀤𑀦𑀦𑁆𑀢𑀭𑀁 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑁆𑀢𑀬𑀸 𑀅𑀜𑁆𑀜𑀢𑀭𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀢𑀤𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁, 𑀢𑀤𑀦𑀦𑁆𑀢𑀭𑀁 𑀏𑀓𑀽𑀦𑀢𑀺𑀁𑀲𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀬𑀣𑀸𑀭𑀳𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀙𑀓𑁆𑀔𑀢𑁆𑀢𑀼𑀁, 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀓𑁆𑀔𑀢𑁆𑀢𑀼𑀫𑁂𑀯 𑀯𑀸 𑀚𑀯𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁, 𑀢𑀤𑀦𑀦𑁆𑀢𑀭𑀁 𑀏𑀓𑀸𑀤𑀲𑀲𑀼 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑁂𑀲𑀼 𑀫𑀳𑀸𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑁂𑀲𑀼 𑀬𑀣𑀸𑀭𑀳𑀫𑁂𑀓𑀁 𑀲𑀓𑀺𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀲𑀦𑁆𑀢𑀢𑀺 𑀏𑀯 𑀧𑀯𑀢𑁆𑀢𑀢𑀺. 𑀏𑀯𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀲𑀢𑁆𑀢𑀓𑀺𑀘𑁆𑀘𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀦𑁆𑀢𑀺.

𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀺 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀖𑀝𑁆𑀝𑁂𑀦𑁆𑀢𑀺, 𑀢𑀤𑀸𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀺𑀬 𑀧𑀘𑁆𑀘𑁂𑀓𑀜𑁆𑀘 𑀙𑀘𑀢𑁆𑀢𑀸𑀮𑀻𑀲𑁂𑀯 𑀪𑀯𑀦𑁆𑀢𑀺. 𑀓𑁂𑀯𑀮𑀁 𑀳𑁂𑀢𑁆𑀣 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀝𑁆𑀞𑀸𑀦𑁂 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀤𑁆𑀯𑀬𑀸𑀦𑀺 𑀬𑀣𑀸𑀓𑁆𑀓𑀫𑀁 𑀲𑀯𑀦𑀸𑀤𑀺𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑁂 𑀅𑀢𑀺𑀫𑀳𑀦𑁆𑀢𑁂 𑀧𑀜𑁆𑀘𑀸𑀭𑀫𑁆𑀫𑀡𑁂 𑀘𑀢𑀼𑀧𑀜𑁆𑀜𑀸𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑁂𑀯 𑀲𑀫𑁆𑀪𑀯𑀦𑁆𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀲𑀲𑀗𑁆𑀔𑀸𑀭𑀺𑀓𑀚𑀯𑀦𑀸𑀦𑀺 𑀧𑀜𑁆𑀘𑀤𑁆𑀯𑀸𑀭𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀼𑀩𑁆𑀩𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀸, 𑀫𑀦𑁄𑀤𑁆𑀯𑀸𑀭𑁂𑀬𑁂𑀯𑁂𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀫𑀳𑀦𑁆𑀢𑁂 ¶ 𑀧𑀦 𑀢𑀤𑀸𑀭𑀫𑁆𑀫𑀡𑀯𑀚𑁆𑀚𑀺𑀢𑀸𑀦𑀺. 𑀯𑀺𑀲𑀬𑀲𑁆𑀲 𑀚𑀯𑀦𑀲𑀫𑀓𑀸𑀮𑀫𑁂𑀯 𑀅𑀢𑀻𑀢𑀢𑁆𑀢𑀸 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀁 𑀳𑁄𑀢𑀺. 𑀧𑀭𑀺𑀢𑁆𑀢𑁂 𑀧𑀦 𑀚𑀯𑀦𑀫𑁆𑀧𑀺 𑀦𑀢𑁆𑀣𑀺. 𑀯𑁄𑀝𑁆𑀞𑀩𑁆𑀩𑀦𑀁 𑀳𑁂𑀢𑁆𑀣 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀁 𑀳𑁄𑀢𑀺. 𑀅𑀬𑀁 𑀧𑀦 𑀯𑀸𑀭𑁄 ‘‘𑀤𑀺𑀝𑁆𑀞𑀁 𑀯𑀺𑀬 𑀫𑁂 ¶ , 𑀲𑀼𑀢𑀁 𑀯𑀺𑀬 𑀫𑁂’’𑀢𑀺𑀆𑀤𑀺𑀓𑀣𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀅𑀢𑀺𑀧𑀭𑀺𑀢𑁆𑀢𑁂 𑀧𑀦 𑀯𑁄𑀝𑁆𑀞𑀩𑁆𑀩𑀦𑀧𑁆𑀧𑀸𑀤𑀸 𑀅𑀲𑀡𑁆𑀞𑀳𑀦𑀢𑁄 𑀪𑀯𑀗𑁆𑀕𑀘𑀮𑀦𑀫𑀢𑁆𑀢𑀫𑁂𑀯, 𑀦 𑀆𑀯𑀚𑁆𑀚𑀦𑀸𑀤𑀻𑀦𑀺. 𑀆𑀯𑀚𑁆𑀚𑀦𑁂𑀦 𑀳𑀺 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀯𑁄𑀝𑁆𑀞𑀩𑁆𑀩𑀦𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀦𑀸𑀧𑀺 𑀅𑀧𑁆𑀧𑀯𑀢𑁆𑀢𑀫𑀸𑀦𑁂 𑀯𑀺𑀲𑀬𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀅𑀬𑀁 𑀧𑀜𑁆𑀘𑀤𑁆𑀯𑀸𑀭𑁂 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀪𑁂𑀤𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀬𑀫𑁄.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀪𑀯𑀗𑁆𑀕𑀘𑀮𑀦𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀓𑀼𑀲𑀮𑀸𑀓𑀼𑀲𑀮𑀨𑀮𑀦𑀸𑀯𑀚𑁆𑀚𑀦𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀧𑀜𑁆𑀜𑀸𑀲𑀚𑀯𑀦𑀓𑀺𑀘𑁆𑀘𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀢𑀢𑁄 𑀧𑀪𑀼𑀢𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀧𑁆𑀧𑀦𑀸𑀚𑀯𑀦𑁂 𑀅𑀬𑀁 𑀧𑀯𑀢𑁆𑀢𑀺𑀓𑁆𑀓𑀫𑁄 𑁋 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀺𑀓𑀸𑀦𑀁 𑀳𑀺 𑀬𑀣𑀸𑀲𑀓𑀯𑀺𑀲𑀬𑁂 𑀉𑀧𑁆𑀧𑀸𑀤𑀺𑀢𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀦𑀁 ‘‘𑀇𑀤𑀸𑀦𑀺 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀪𑀯𑀗𑁆𑀕𑀘𑀮𑀦𑀸𑀯𑀚𑁆𑀚𑀦𑀸𑀯𑀲𑀸𑀦𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀬𑀣𑀸𑀭𑀳𑀁 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑁂𑀦 𑀘𑀢𑀼𑀓𑁆𑀔𑀢𑁆𑀢𑀼𑀁, 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀫𑀳𑀕𑁆𑀕𑀢𑀚𑀯𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀞𑀫𑀓𑀧𑁆𑀧𑀦𑀸𑀪𑀺𑀜𑁆𑀜𑀸𑀪𑀽𑀢𑀁 𑀏𑀓𑀯𑀸𑀭𑀫𑁂𑀯, 𑀛𑀸𑀦𑀲𑀫𑀸𑀧𑀢𑁆𑀢𑀺𑀪𑀽𑀢𑀁 𑀅𑀦𑀦𑁆𑀢𑀯𑀸𑀭𑀫𑁆𑀧𑀺 𑀚𑀯𑀢𑀺. 𑀮𑁄𑀓𑀼𑀢𑁆𑀢𑀭𑀚𑀯𑀦𑁂𑀲𑀼 𑀧𑀦 𑀓𑀼𑀲𑀮𑀸𑀦𑀺 𑀏𑀓𑀲𑀦𑁆𑀢𑀸𑀦𑁂 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀬𑀣𑀸𑀲𑀓𑀁 𑀨𑀮𑀘𑀺𑀢𑁆𑀢𑀜𑁆𑀘 𑀤𑁆𑀯𑀢𑁆𑀢𑀺𑀯𑀸𑀭𑀁, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀨𑀮𑀫𑁂𑀯 𑀅𑀦𑀦𑁆𑀢𑀯𑀸𑀭𑀫𑁆𑀧𑀺 𑀚𑀯𑀢𑀺, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀧𑀦 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 ¶ 𑀧𑀞𑀫𑀚𑁆𑀛𑀸𑀦𑀢𑁄 𑀬𑀸𑀯𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸 𑀬𑀣𑀸𑀓𑁆𑀓𑀫𑀁 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀤𑀺𑀯𑀲𑁂𑀦𑁂𑀯 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀕𑁄𑀢𑁆𑀭𑀪𑀼𑀢𑁄 𑀅𑀦𑀦𑁆𑀢𑀭𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀜𑁆𑀘 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀸𑀦𑀓𑀸𑀮𑁂 𑀘 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀦𑀺𑀬𑀸𑀫𑁂𑀦 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀬𑀣𑀸𑀭𑀳𑀫𑁂𑀓𑀯𑀸𑀭𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀘 𑀓𑀼𑀲𑀮𑀕𑁄𑀢𑁆𑀭𑀪𑀼𑀢𑁄 𑀅𑀦𑀦𑁆𑀢𑀭𑀁 𑀓𑀼𑀲𑀮𑀜𑁆𑀘𑁂𑀯 𑀆𑀤𑀺𑀢𑁄 𑀨𑀮𑀢𑁆𑀢𑀬𑀜𑁆𑀘 𑀅𑀧𑁆𑀧𑁂𑀢𑀺, 𑀓𑀺𑀭𑀺𑀬𑀸𑀕𑁄𑀢𑁆𑀭𑀪𑀼𑀢𑁄 𑀓𑀺𑀭𑀺𑀬𑀁, 𑀅𑀭𑀳𑀢𑁆𑀢𑀨𑀮𑀜𑁆𑀘. 𑀢𑀢𑁆𑀣𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁂𑀯, 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑁄 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯 𑀅𑀧𑁆𑀧𑁂𑀢𑀺. 𑀅𑀲𑁂𑀔𑀸𑀦𑀫𑁂𑀯 𑀘𑁂𑀢𑁆𑀣 𑀅𑀭𑀳𑀢𑁆𑀢𑀨𑀮𑀓𑀺𑀭𑀺𑀬𑀸𑀚𑀯𑀦𑀸𑀦𑀺, 𑀬𑀣𑀸𑀲𑀓𑀁 𑀲𑁂𑀔𑀸𑀦𑀫𑁂𑀯 𑀲𑁂𑀲𑀮𑁄𑀓𑀼𑀢𑁆𑀢𑀭𑀸𑀦𑀺, 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀯 𑀓𑀼𑀲𑀮𑀸𑀓𑀼𑀲𑀮𑀸𑀦𑀺, 𑀢𑀺𑀳𑁂𑀢𑀼𑀓𑀸𑀦𑀫𑁂𑀯 𑀅𑀧𑁆𑀧𑀦𑀸 𑀳𑁄𑀦𑁆𑀢𑀺, 𑀅𑀬𑀁 𑀚𑀯𑀦𑀦𑀺𑀬𑀫𑁄.

𑀅𑀧𑁆𑀧𑀦𑀸𑀚𑀯𑀦𑀢𑁄 𑀧𑀭𑀁 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀦𑀢𑁆𑀣𑀺. 𑀚𑀯𑀦𑀸𑀭𑀫𑁆𑀫𑀡𑁂𑀲𑀼 𑀳𑀺 𑀓𑀸𑀫𑀸𑀯𑀘𑀭𑀪𑀽𑀢𑁂𑀲𑁆𑀯𑁂𑀯 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀓𑀸𑀦𑀫𑁂𑀯 𑀅𑀢𑀺𑀫𑀳𑀦𑁆𑀢𑁂, 𑀯𑀺𑀪𑀽𑀢𑁂 𑀘 𑀯𑀺𑀲𑀬𑁂 𑀢𑀤𑀸𑀭𑀫𑁆𑀫𑀡𑀫𑀼𑀧𑁆𑀧𑀚𑁆𑀚𑀢𑀺. 𑀅𑀢𑀺𑀇𑀝𑁆𑀞𑁂 𑀧𑀦𑀸𑀭𑀫𑁆𑀫𑀡𑁂 ¶ 𑀲𑀦𑁆𑀢𑀻𑀭𑀡𑀓𑀺𑀭𑀺𑀬𑀸𑀚𑀯𑀦𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂, 𑀅𑀦𑀺𑀝𑁆𑀞𑁂 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀤𑀸 𑀧𑀦 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀝𑁆𑀞𑀸𑀦𑁂 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀅𑀢𑀺𑀇𑀝𑁆𑀞𑀸𑀤𑀻𑀲𑀼 𑀧𑀝𑀺𑀖𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀅𑀜𑁆𑀜𑀁 𑀧𑀭𑀺𑀘𑀺𑀢𑀧𑀼𑀩𑁆𑀩𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀅𑀦𑀸𑀯𑀚𑁆𑀚𑀦𑀫𑁆𑀧𑀺 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀲𑀸𑀫𑀜𑁆𑀜𑀨𑀮𑀁 𑀯𑀺𑀬 𑀅𑀦𑁆𑀢𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑀦𑀦𑁆𑀢𑀭𑀺𑀢𑁆𑀯𑀸 𑀪𑀯𑀗𑁆𑀕𑀁 𑀳𑁄𑀢𑀻𑀢𑀺 𑀅𑀬𑀁 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄.

𑀏𑀯𑀁 𑀧𑀦 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀙𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺. 𑀇𑀢𑀺 𑀬𑀸𑀯𑀢𑀸𑀬𑀼𑀓𑀁 𑀇𑀫𑀺𑀦𑀸𑀯 𑀓𑀫𑁂𑀦 𑀘𑀺𑀢𑁆𑀢𑀦𑀺𑀬𑀸𑀫𑀢𑁄 𑀯𑀺𑀜𑁆𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀯𑀻𑀣𑀺𑀘𑀺𑀢𑁆𑀢𑀸𑀦𑀦𑁆𑀢𑀭𑀁, 𑀧𑀦 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀯𑀸 𑀲𑀩𑁆𑀩𑀧𑀘𑁆𑀙𑀺𑀫𑀁 ¶ 𑀢𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀪𑀯𑀗𑁆𑀕𑀫𑁂𑀯 𑀢𑀲𑁆𑀫𑀺𑀜𑁆𑀜𑁂𑀯𑀸𑀭𑀫𑁆𑀫𑀡𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘 𑀲𑀸𑀥𑀬𑀫𑀸𑀦𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀲𑀢𑁆𑀢𑁄 𑀘𑀼𑀢𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀺 𑀘𑀼𑀢𑀺𑀢𑁄 𑀧𑀼𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀻𑀣𑀺𑀘𑀼𑀢𑀺𑀬𑁄𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀬𑀦𑁆𑀢𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀪𑀯𑀸𑀤𑀻𑀲𑀼 𑀬𑀸𑀯𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀦 𑀯𑀺𑀫𑀼𑀘𑁆𑀘𑀢𑀺, 𑀢𑀸𑀯𑀸𑀯𑀺𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀺 𑀏𑀯. 𑀏𑀯𑀁 𑀧𑀯𑀢𑁆𑀢𑀫𑀸𑀦𑁂 𑀘 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 ‘‘𑀢𑁆𑀯𑀁 𑀪𑀯𑀗𑁆𑀕𑀁 𑀦𑀸𑀫 𑀳𑁄𑀢𑀺, 𑀢𑁆𑀯𑀁 𑀢𑀤𑀦𑀦𑁆𑀢𑀭𑀁 𑀆𑀯𑀚𑁆𑀚𑀦𑀁…𑀧𑁂… 𑀢𑁆𑀯𑀁 𑀢𑀤𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫 𑀳𑁄𑀢𑀺, 𑀢𑁆𑀯𑀁 𑀧𑀦 𑀪𑀯𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀬𑀸𑀫𑀓𑁄 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀘𑀺𑀢𑁆𑀢𑀦𑀺𑀬𑀸𑀫𑁂𑀦𑁂𑀯𑁂𑀢𑀁 𑀧𑀯𑀢𑁆𑀢𑀢𑀺.

𑀧𑀜𑁆𑀘𑀯𑀺𑀥𑁄 𑀳𑀺 𑀦𑀺𑀬𑀸𑀫𑁄 𑁋 𑀩𑀻𑀚𑀦𑀺𑀬𑀸𑀫𑁄 𑀉𑀢𑀼𑀦𑀺𑀬𑀸𑀫𑁄 𑀓𑀫𑁆𑀫𑀦𑀺𑀬𑀸𑀫𑁄 𑀥𑀫𑁆𑀫𑀦𑀺𑀬𑀸𑀫𑁄 𑀘𑀺𑀢𑁆𑀢𑀦𑀺𑀬𑀸𑀫𑁄𑀢𑀺, 𑀢𑀢𑁆𑀣 𑀅𑀗𑁆𑀓𑀼𑀭𑀧𑀡𑁆𑀡𑀤𑀡𑁆𑀟𑀧𑀼𑀧𑁆𑀨𑀨𑀮𑀸𑀤𑀺𑀓𑁆𑀓𑀫𑁂𑀦 𑀢𑁂𑀲𑀁 𑀢𑁂𑀲𑀁 𑀩𑀻𑀚𑀸𑀦𑀁 𑀅𑀜𑁆𑀜𑁄𑀜𑁆𑀜𑀯𑀺𑀲𑀤𑀺𑀲𑀭𑀼𑀓𑁆𑀔𑀢𑀺𑀡𑀕𑀘𑁆𑀙𑀮𑀢𑀸𑀤𑀺𑀲𑀦𑁆𑀢𑀸𑀦𑁂 𑀅𑀢𑁆𑀢𑀦𑀸 𑀲𑀤𑀺𑀲𑀨𑀮𑀤𑀸𑀦𑀁 𑀩𑀻𑀚𑀦𑀺𑀬𑀸𑀫𑁄 𑀦𑀸𑀫. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑁂𑀲𑀁 𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀦𑀁 𑀕𑀳𑀡𑀁 𑀉𑀢𑀼𑀦𑀺𑀬𑀸𑀫𑁄 𑀦𑀸𑀫. 𑀢𑀲𑁆𑀲 𑀢𑀲𑁆𑀲 𑀯𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑁆𑀲 𑀢𑀁𑀢𑀁𑀲𑀤𑀺𑀲𑀸𑀲𑀤𑀺𑀲𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀤𑀸𑀦𑀁, 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀸𑀦𑀜𑁆𑀘 𑀓𑀫𑁆𑀫𑀦𑀺𑀬𑀸𑀫𑁄 𑀦𑀸𑀫. 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂, 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀪𑀺𑀦𑀺𑀓𑁆𑀔𑀫𑀦𑁂, 𑀅𑀪𑀺𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸𑀤𑀻𑀲𑀼 𑀘 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀥𑀫𑁆𑀫𑀦𑀺𑀬𑀸𑀫𑁄 𑀦𑀸𑀫. 𑀬𑀣𑀸𑀯𑀼𑀢𑁆𑀢𑁂𑀦 𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀤𑀺𑀓𑀺𑀘𑁆𑀘𑀓𑁆𑀓𑀫𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀘𑀺𑀢𑁆𑀢𑀦𑀺𑀬𑀸𑀫𑁄 𑀦𑀸𑀫. 𑀇𑀫𑀺𑀦𑀸 𑀧𑀦 𑀘𑀺𑀢𑁆𑀢𑀦𑀺𑀬𑀸𑀫𑁂𑀦 𑀬𑀣𑀸𑀓𑁆𑀓𑀫𑀁 𑀓𑀺𑀘𑁆𑀘𑀯𑀦𑁆𑀢𑁂𑀲𑀼 𑀘𑁂𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀚𑀯𑀦𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀏𑀓𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺, 𑀲𑁂𑀲𑀸𑀦𑀺 𑀧𑀦 𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺, 𑀢𑀸𑀦𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺, 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀘. 𑀏𑀯𑀁 𑀏𑀓𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀘. 𑀬𑀣𑀸 𑀘 𑀘𑀺𑀢𑁆𑀢𑀸𑀦𑀁, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸𑀦𑀫𑁆𑀧𑀺 ¶ 𑀓𑀺𑀘𑁆𑀘𑀤𑁆𑀯𑀸𑀭𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀓𑀺𑀘𑁆𑀘𑀢𑁄 𑀳𑀺 𑀲𑀩𑁆𑀩𑀢𑁆𑀣𑀓𑀸 𑀢𑀸𑀯 𑀲𑀢𑁆𑀢 𑀘𑀺𑀢𑁆𑀢𑀁 𑀯𑀺𑀬 𑀘𑀼𑀤𑁆𑀤𑀲 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀥𑀺𑀫𑁄𑀓𑁆𑀔𑀸 ¶ 𑀧𑀦 𑀢𑀬𑁄 𑀤𑀲𑁆𑀲𑀦𑀸𑀤𑀺𑀧𑀜𑁆𑀘𑀓𑀺𑀘𑁆𑀘𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀦𑀯, 𑀯𑀻𑀭𑀺𑀬𑀁 𑀢𑀢𑁄 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀢, 𑀧𑀻𑀢𑀺 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀺𑀧𑀺 𑀯𑀚𑁆𑀚𑁂𑀢𑁆𑀯𑀸 𑀲𑀦𑁆𑀢𑀻𑀭𑀡𑁂𑀦 𑀲𑀤𑁆𑀥𑀺𑀁 𑀙, 𑀯𑀺𑀭𑀢𑀺𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀺𑀢𑀸 𑀧𑀦 𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘𑁂𑀯 𑀙𑀦𑁆𑀤𑁄 𑀘 𑀲𑀦𑁆𑀢𑀻𑀭𑀡𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘, 𑀢𑀢𑁄 𑀅𑀧𑁆𑀧𑀫𑀜𑁆𑀜𑀸 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀘𑀢𑁆𑀢𑀸𑀭𑀺, 𑀯𑀺𑀭𑀢𑀺𑀬𑁄 𑀧𑀦 𑀓𑀼𑀲𑀮𑀸 𑀚𑀯𑀦𑀓𑀺𑀘𑁆𑀘𑀫𑁂𑀯 𑀓𑀭𑁄𑀦𑁆𑀢𑀺. 𑀤𑁆𑀯𑀸𑀭𑀢𑁄 𑀘 𑀯𑀺𑀭𑀢𑀺𑀬𑁄 𑀫𑀦𑁄𑀤𑁆𑀯𑀸𑀭𑀺𑀓𑀸 𑀏𑀯, 𑀢𑀣𑀸 𑀓𑀭𑀼𑀡𑀸𑀫𑀼𑀤𑀺𑀢𑀸, 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀘 𑀧𑀦 𑀳𑁄𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀳𑀺 𑀤𑀼𑀘𑁆𑀘𑀭𑀺𑀢𑀯𑀺𑀭𑀫𑀡𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀜𑁆𑀘 𑀳𑁄𑀢𑀺. 𑀅𑀓𑀼𑀲𑀮𑀸 𑀧𑀦 𑀙𑀤𑁆𑀯𑀸𑀭𑀺𑀓𑀸, 𑀢𑀢𑁆𑀣𑀸𑀧𑀺 𑀫𑀸𑀦𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀫𑀦𑁄𑀤𑁆𑀯𑀸𑀭𑀺𑀓𑀸𑀦𑁂𑀯𑀸𑀢𑀺 𑀓𑁂𑀘𑀺. 𑀅𑀯𑀲𑁂𑀲𑀸 𑀙𑀤𑁆𑀯𑀸𑀭𑀺𑀓𑀸 𑀘𑁂𑀯 𑀤𑁆𑀯𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀘. 𑀲𑁂𑀲𑀁 𑀘𑀺𑀢𑁆𑀢𑀲𑀤𑀺𑀲𑀫𑁂𑀯. 𑀆𑀭𑀫𑁆𑀫𑀡𑀲𑀗𑁆𑀕𑀳𑁄 𑀧𑀦 𑀦𑁂𑀲𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀬𑀁 𑀧𑀓𑀺𑀡𑁆𑀡𑀓𑀓𑀣𑀸.

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀧𑀤𑀁 𑀧𑀦 𑀦𑁂𑀯 𑀢𑀸𑀯 𑀦𑀺𑀝𑁆𑀞𑀺𑀢𑀁. 𑀅𑀩𑁆𑀬𑀸𑀓𑀢𑁂𑀲𑀼 𑀳𑀺 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁, 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀜𑁆𑀘 𑀯𑀺𑀪𑀢𑁆𑀢𑀁, 𑀭𑀽𑀧𑀸𑀩𑁆𑀬𑀸𑀓𑀢𑀁, 𑀧𑀦 𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑀜𑁆𑀘 𑀅𑀯𑀲𑀺𑀝𑁆𑀞𑀁. 𑀢𑀢𑁆𑀣 𑀭𑀽𑀧𑀸𑀩𑁆𑀬𑀸𑀓𑀢𑀁 𑀢𑀸𑀯 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀫𑁂𑀯, 𑀦 𑀪𑀺𑀦𑁆𑀦𑀁, 𑀢𑀣𑀸 𑀲𑀫𑁆𑀧𑀬𑁄𑀕𑀢𑁄𑀧𑀺 𑀅𑀲𑀫𑁆𑀪𑀯𑁄 𑀏𑀯. 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀫𑁂𑀯, 𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑁄𑀕𑁄, 𑀦 𑀇𑀢𑀭𑁂𑀲𑀦𑁆𑀢𑀺. 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀧𑀦𑁂𑀢𑀁 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑀤𑀬𑀯𑀢𑁆𑀣𑀼 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀆𑀓𑀸𑀲𑁄 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀲𑀦𑁆𑀢𑀢𑀺 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺. 𑀧𑀤𑀪𑀸𑀚𑀦𑀻𑀬𑁂 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀳𑀤𑀬𑀯𑀢𑁆𑀣𑀼 𑀦 𑀆𑀕𑀢𑀁, 𑀉𑀧𑀭𑀺 𑀧𑀦 𑀧𑀝𑁆𑀞𑀸𑀦𑀧𑀸𑀴𑀺𑀬𑀁 ¶ ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁮) 𑀲𑀭𑀽𑀧𑁂𑀦𑁂𑀯 𑀆𑀕𑀫𑀺𑀲𑁆𑀲𑀢𑀻𑀢𑀺 𑀢𑀁 𑀇𑀥 𑀕𑀳𑀺𑀢𑀁. 𑀓𑁂𑀘𑀺 𑀧𑀦 𑀫𑀺𑀤𑁆𑀥𑀭𑀽𑀧𑀁 𑀩𑀮𑀭𑀽𑀧𑀁 𑀲𑀫𑁆𑀪𑀯𑀭𑀽𑀧𑀁 𑀚𑀸𑀢𑀺𑀭𑀽𑀧𑀁 𑀭𑁄𑀕𑀭𑀽𑀧𑀦𑁆𑀢𑀺 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀢𑁂𑀢𑁆𑀢𑀺𑀁𑀲 𑀭𑀽𑀧𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 𑀢𑁂𑀲𑀁 𑀅𑀪𑀸𑀯𑀁, 𑀅𑀦𑁆𑀢𑁄𑀕𑀥𑀪𑀸𑀯𑀜𑁆𑀘 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀇𑀫𑁂𑀲𑀼 𑀳𑀺 𑀫𑀺𑀤𑁆𑀥𑀁 𑀭𑀽𑀧𑀫𑁂𑀯 𑀦 𑀳𑁄𑀢𑀺 𑀅𑀭𑀽𑀧𑀥𑀫𑁆𑀫𑀢𑁆𑀢𑀸 𑀦𑀻𑀯𑀭𑀡𑀸𑀦𑀁. 𑀫𑀺𑀤𑁆𑀥𑁂𑀦𑁂𑀯 𑀳𑀺 𑀧𑀘𑀮𑀸𑀬𑀺𑀓𑀸𑀓𑀸𑀭𑁂𑀦 𑀭𑀽𑀧𑀧𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀩𑀮𑀭𑀽𑀧𑀁 𑀧𑀦 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑁆𑀢𑁄𑀕𑀥𑀁 𑀢𑀁𑀲𑀪𑀸𑀯𑀢𑁆𑀢𑀸, 𑀲𑀫𑁆𑀪𑀯𑀭𑀽𑀧𑀁 𑀆𑀧𑁄𑀥𑀸𑀢𑀼𑀬𑀸, 𑀚𑀸𑀢𑀺𑀭𑀽𑀧𑀁 ¶ 𑀉𑀧𑀘𑀬𑀲𑀦𑁆𑀢𑀢𑀻𑀲𑀼, 𑀭𑁄𑀕𑀭𑀽𑀧𑀜𑁆𑀘 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀲𑀼 𑀧𑀯𑀺𑀲𑀢𑀺 𑀲𑀧𑁆𑀧𑀘𑁆𑀘𑀬𑀲𑀫𑀼𑀝𑁆𑀞𑀺𑀢𑀭𑀽𑀧𑀯𑀺𑀓𑀸𑀭𑀪𑁂𑀤𑁂𑀲𑀼 𑀭𑁄𑀕𑀩𑁆𑀬𑀧𑀤𑁂𑀲𑀢𑁄𑀢𑀺 𑀲𑀩𑁆𑀩𑀁 𑀭𑀽𑀧𑀁 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀫𑁂𑀯 𑀳𑁄𑀢𑀺. 𑀅𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑁆𑀣 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼, 𑀧𑀢𑀺𑀝𑁆𑀞𑀸𑀦𑀭𑀲𑀸, 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀼, 𑀩𑁆𑀭𑀽𑀳𑀦𑀭𑀲𑀸, 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀢𑁂𑀚𑁄𑀥𑀸𑀢𑀼, 𑀧𑀭𑀺𑀧𑀸𑀘𑀦𑀭𑀲𑀸, 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸 𑀯𑀸𑀬𑁄𑀥𑀸𑀢𑀼, 𑀲𑀫𑀼𑀤𑀻𑀭𑀡𑀭𑀲𑀸, 𑀅𑀪𑀺𑀦𑀻𑀳𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸 𑀲𑁂𑀲𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸. 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀘𑀓𑁆𑀔𑀼, 𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀬𑀤𑁂𑀢𑀁 𑀅𑀓𑁆𑀔𑀺𑀓𑀽𑀧𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀳𑀸𑀭𑀼𑀲𑀼𑀢𑁆𑀢𑀓𑁂𑀦 𑀫𑀢𑁆𑀣𑀮𑀼𑀗𑁆𑀕𑁂𑀦 𑀆𑀩𑀤𑁆𑀥𑀫𑀁𑀲𑀬𑀼𑀢𑁆𑀢𑀁, 𑀬𑀢𑁆𑀣 𑀲𑁂𑀢𑀫𑁆𑀧𑀺 𑀅𑀢𑁆𑀣𑀺 𑀓𑀡𑁆𑀳𑀫𑁆𑀧𑀺 𑀮𑁄𑀳𑀺𑀢𑀫𑁆𑀧𑀺 𑀘𑀢𑁆𑀢𑀸𑀭𑀺𑀧𑀺 𑀫𑀳𑀸𑀪𑀽𑀢𑀸𑀦𑀺, 𑀬𑀜𑁆𑀘 𑀲𑁂𑀫𑁆𑀳𑀼𑀲𑁆𑀲𑀤𑀢𑁆𑀢𑀸 𑀲𑁂𑀢𑀁, 𑀧𑀺𑀢𑁆𑀢𑀼𑀲𑁆𑀲𑀤𑀢𑁆𑀢𑀸 𑀓𑀡𑁆𑀳𑀁, 𑀭𑀼𑀳𑀺𑀭𑀼𑀲𑁆𑀲𑀤𑀢𑁆𑀢𑀸 𑀮𑁄𑀳𑀺𑀢𑀓𑀁, 𑀧𑀣𑀯𑀼𑀲𑁆𑀲𑀤𑀢𑁆𑀢𑀸 𑀧𑀢𑁆𑀣𑀺𑀡𑁆𑀡𑀁 𑀳𑁄𑀢𑀺, 𑀆𑀧𑀼𑀲𑁆𑀲𑀤𑀢𑁆𑀢𑀸 𑀧𑀕𑁆𑀖𑀭𑀢𑀺, 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 ¶ 𑀧𑀭𑀺𑀤𑀬𑁆𑀳𑀢𑀺, 𑀯𑀸𑀬𑀼𑀲𑁆𑀲𑀤𑀢𑁆𑀢𑀸 𑀧𑀭𑀺𑀩𑁆𑀪𑀫𑀢𑀺, 𑀬𑀜𑁆𑀘 𑀮𑁄𑀓𑁂 𑀦𑀻𑀮𑀧𑀔𑀼𑀫𑀲𑀫𑀸𑀓𑀺𑀡𑁆𑀡𑀁 𑀓𑀡𑁆𑀳𑀲𑀼𑀓𑁆𑀓𑀫𑀡𑁆𑀟𑀮𑀯𑀺𑀘𑀺𑀢𑁆𑀢𑀁 𑀦𑀻𑀮𑀼𑀧𑁆𑀧𑀮𑀤𑀮𑀲𑀦𑁆𑀦𑀺𑀪𑀁 𑀤𑀻𑀖𑀁 𑀧𑀼𑀣𑀼𑀮𑀁 𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁄 𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑁂 𑀲𑀢𑁆𑀢𑀲𑀼 𑀧𑀺𑀘𑀼𑀧𑀝𑀮𑁂𑀲𑀼 𑀆𑀲𑀺𑀢𑁆𑀢𑀢𑁂𑀮𑀁 𑀧𑀺𑀘𑀼𑀧𑀝𑀮𑀸𑀦𑀺 𑀯𑀺𑀬 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀥𑀸𑀭𑀡𑀦𑀳𑀸𑀧𑀦𑀫𑀡𑁆𑀟𑀦𑀩𑀻𑀚𑀦𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀻𑀳𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬 𑀲𑀦𑁆𑀥𑀸𑀭𑀡𑀸𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁 𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀻𑀳𑀺 𑀧𑀭𑀺𑀯𑀼𑀢𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀧𑀫𑀸𑀡𑀢𑁄 𑀊𑀓𑀸𑀲𑀺𑀭𑀫𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀏𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫’’𑀦𑁆𑀢𑀺.

𑀲𑀤𑁆𑀤𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀲𑁄𑀢𑀁, 𑀲𑀤𑁆𑀤𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁 ¶ . 𑀇𑀤𑀁 𑀧𑀦 𑀲𑀲𑀫𑁆𑀪𑀸𑀭𑀲𑁄𑀢𑀩𑀺𑀮𑀲𑁆𑀲 𑀅𑀦𑁆𑀢𑁄 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀳𑀺 𑀥𑀸𑀢𑀼𑀆𑀤𑀻𑀳𑀺 𑀓𑀢𑀽𑀧𑀓𑀸𑀭𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑁄𑀧𑀢𑁆𑀣𑀫𑁆𑀪𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀕𑀦𑁆𑀥𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁, 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀖𑀸𑀦𑀁, 𑀕𑀦𑁆𑀥𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁 ¶ . 𑀇𑀤𑀜𑁆𑀘 𑀲𑀲𑀫𑁆𑀪𑀸𑀭𑀖𑀸𑀦𑀩𑀺𑀮𑀲𑁆𑀲 𑀅𑀦𑁆𑀢𑁄 𑀅𑀚𑀧𑀤𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀧𑀓𑀸𑀭𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑁄𑀧𑀢𑁆𑀣𑀫𑁆𑀪𑀁 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀭𑀲𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀯𑀸 𑀚𑀺𑀯𑁆𑀳𑀸, 𑀭𑀲𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀸. 𑀏𑀲𑀸 𑀘 𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸𑀫𑀚𑁆𑀛𑀲𑁆𑀲 𑀉𑀧𑀭𑀺 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀧𑀓𑀸𑀭𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑁄𑀧𑀢𑁆𑀣𑀫𑁆𑀪𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀢𑀺𑀝𑁆𑀞𑀢𑀺.

𑀨𑁄𑀝𑁆𑀞𑀩𑁆𑀩𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄 𑀯𑀸 𑀓𑀸𑀬𑁄, 𑀨𑁄𑀝𑁆𑀞𑀩𑁆𑀩𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑁄, 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀧𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀬𑀸𑀯𑀢𑀸 𑀉𑀧𑀸𑀤𑀺𑀦𑁆𑀦𑀸 𑀧𑀣𑀯𑀻𑀆𑀧𑁄𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬 𑀅𑀦𑀼𑀕𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀧𑀓𑀸𑀭𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑁄𑀧𑀢𑁆𑀣𑀫𑁆𑀪𑁄 𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑁄 𑀢𑀺𑀝𑁆𑀞𑀢𑀺. 𑀓𑁂𑀘𑀺 (𑀥. 𑀲. 𑀅𑀝𑁆𑀞. 𑁬𑁦𑁦) 𑀧𑀦 ‘‘𑀢𑁂𑀚𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀘𑀓𑁆𑀔𑀼, 𑀯𑀺𑀯𑀭𑀯𑀸𑀬𑀼𑀆𑀧𑀧𑀣𑀯𑀺𑀅𑀥𑀺𑀓𑀸𑀦𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 (𑀥. 𑀲. 𑀅. 𑁬𑁦𑁦) ‘‘𑀢𑁂𑀚𑁄𑀲𑀪𑀸𑀯𑀁 𑀘𑀓𑁆𑀔𑀼, 𑀆𑀓𑀸𑀲𑀧𑀣𑀯𑀺𑀆𑀧𑀯𑀸𑀬𑀼𑀲𑀪𑀸𑀯𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸’’𑀢𑀺 𑀯𑀤𑀦𑁆𑀢𑀺. ‘‘𑀢𑁂𑀚𑀸𑀤𑀺𑀲𑀳𑀓𑀸𑀭𑀺𑀢𑁆𑀢𑀸, 𑀢𑁂𑀚𑀸𑀤𑀺𑀕𑀼𑀡𑀭𑀽𑀧𑀸𑀤𑀺𑀯𑀺𑀲𑀬𑀢𑁆𑀢𑀸 𑀘𑀸’’𑀢𑀺 𑀓𑀸𑀭𑀡𑀜𑁆𑀘 𑀬𑀣𑀸𑀓𑁆𑀓𑀫𑀁 𑀯𑀤𑀦𑁆𑀢𑀺. 𑀢𑁂 𑀘 𑀯𑀢𑁆𑀢𑀩𑁆𑀩𑀸 𑁋 𑀓𑁄 𑀧𑀦𑁂𑀯𑀫𑀸𑀳 ‘‘𑀲𑀳𑀓𑀸𑀭𑀺𑀲𑀪𑀸𑀯𑁂𑀳𑁂𑀯 𑀇𑀦𑁆𑀤𑁆𑀭𑀺𑀬𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺, ‘‘𑀭𑀽𑀧𑀸𑀤𑀬𑁄 𑀯𑀸 𑀢𑁂𑀚𑀸𑀤𑀻𑀦𑀁 ¶ 𑀕𑀼𑀡𑀸’’𑀢𑀺. 𑀅𑀯𑀺𑀦𑀺𑀩𑁆𑀪𑁄𑀕𑁂𑀲𑀼 𑀳𑀺 𑀪𑀽𑀢𑁂𑀲𑀼 ‘‘𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄, 𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄’’𑀢𑀺 𑀦 𑀮𑀩𑁆𑀪𑀸 𑀯𑀢𑁆𑀢𑀼𑀦𑁆𑀢𑀺. 𑀅𑀣𑀸𑀧𑀺 𑀯𑀤𑁂𑀬𑁆𑀬𑀼𑀁 ‘‘𑀢𑁂𑀚𑀸𑀤𑀺𑀅𑀥𑀺𑀓𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀭𑀽𑀧𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑀤𑀲𑁆𑀲𑀦𑀢𑁄 ¶ 𑀇𑀘𑁆𑀙𑀺𑀢𑀩𑁆𑀩𑀫𑁂𑀢𑀁 ‘𑀭𑀽𑀧𑀸𑀤𑀬𑁄 𑀢𑁂𑀚𑀸𑀤𑀻𑀦𑀁 𑀕𑀼𑀡𑀸’’’𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑀇𑀘𑁆𑀙𑁂𑀬𑁆𑀬𑀸𑀫, 𑀬𑀤𑀺 𑀆𑀧𑀸𑀥𑀺𑀓𑀲𑁆𑀲 𑀆𑀲𑀯𑀲𑁆𑀲 𑀕𑀦𑁆𑀥𑀢𑁄 𑀧𑀣𑀯𑀺𑀅𑀥𑀺𑀓𑁂 𑀓𑀧𑁆𑀧𑀸𑀲𑁂 𑀕𑀦𑁆𑀥𑁄 𑀅𑀥𑀺𑀓𑀢𑀭𑁄 𑀲𑀺𑀬𑀸, 𑀢𑁂𑀚𑀸𑀥𑀺𑀓𑀲𑁆𑀲 𑀘 𑀉𑀡𑁆𑀳𑁄𑀤𑀓𑀲𑁆𑀲 𑀯𑀡𑁆𑀡𑀢𑁄𑀧𑀺 𑀲𑀻𑀢𑀽𑀤𑀓𑀲𑁆𑀲 𑀯𑀡𑁆𑀡𑁄 𑀧𑀭𑀺𑀳𑀸𑀬𑁂𑀣. 𑀬𑀲𑁆𑀫𑀸 𑀧𑀦𑁂𑀢𑀁 𑀉𑀪𑀬𑀫𑁆𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀳𑀸𑀬𑁂𑀣 𑀢𑀫𑁂𑀢𑁂𑀲𑀁 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀯𑀺𑀲𑁂𑀲𑀓𑀧𑁆𑀧𑀦𑀁. 𑀬𑀣𑀸 𑀅𑀯𑀺𑀲𑁂𑀲𑁂𑀧𑀺 𑀏𑀓𑀓𑀮𑀸𑀧𑁂 𑀪𑀽𑀢𑀸𑀦𑀁 𑀭𑀽𑀧𑀭𑀲𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄𑀧𑀻𑀢𑀺 𑀕𑀳𑁂𑀢𑀩𑁆𑀩𑀫𑁂𑀢𑀁. 𑀓𑀺𑀁 𑀧𑀦𑁂𑀲𑀁 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀓𑀫𑁆𑀫𑀫𑁂𑀯 𑀦𑁂𑀲𑀁 𑀅𑀲𑀸𑀥𑀸𑀭𑀡𑀁 𑀓𑀸𑀭𑀡𑀁 𑀚𑀦𑀓𑀢𑀡𑁆𑀳𑀸𑀚𑀦𑀺𑀢𑀸𑀦𑀁 𑀪𑀽𑀢𑀸𑀦𑀁 𑀯𑀺𑀲𑁂𑀲𑀢𑁄. 𑀪𑀽𑀢𑀯𑀺𑀲𑁂𑀲𑁂 𑀳𑀺 𑀲𑀢𑀺 𑀧𑀲𑀸𑀤𑁄𑀯 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀫𑀸𑀦𑀸𑀦𑀁 𑀳𑀺 𑀪𑀽𑀢𑀸𑀦𑀁 𑀧𑀲𑀸𑀤𑁄, 𑀦 𑀯𑀺𑀲𑀫𑀸𑀦𑀸𑀦𑀦𑁆𑀢𑀺 𑀧𑁄𑀭𑀸𑀡𑀸. 𑀏𑀯𑀁 𑀓𑀫𑁆𑀫𑀯𑀺𑀲𑁂𑀲𑀢𑁄 𑀯𑀺𑀲𑁂𑀲𑀯𑀦𑁆𑀢𑁂𑀲𑀼 𑀘𑁂𑀢𑁂𑀲𑀼 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸𑀦𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀦𑀮𑁆𑀮𑀻𑀦𑀦𑀺𑀲𑁆𑀲𑀬𑁂𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸 𑀧𑀦 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸 𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯 𑀲𑀬𑀜𑁆𑀘 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀮𑁆𑀮𑀻𑀦𑁂 𑀏𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸.

𑀓𑁂𑀘𑀺 𑀧𑀦 ‘‘𑀘𑀓𑁆𑀔𑀼𑀲𑁄𑀢𑀸𑀦𑀺𑀧𑀺 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸𑀦𑁂𑀯, 𑀤𑀽𑀭𑁂 𑀞𑀺𑀢𑁂𑀲𑀼𑀧𑀺 𑀘𑀦𑁆𑀤𑀭𑀽𑀧𑀸𑀤𑀻𑀲𑀼 𑀲𑀻𑀖𑀬𑀸𑀬𑀺𑀦𑀬𑀦𑀭𑀁𑀲𑀺𑀲𑀜𑁆𑀜𑁄𑀕𑁂𑀦, 𑀲𑀤𑁆𑀤𑀸𑀦𑀜𑁆𑀘 𑀧𑀭𑀫𑁆𑀧𑀭𑀸𑀬𑀸𑀕𑀦𑁆𑀢𑁆𑀯𑀸 𑀲𑁄𑀢𑀩𑀺𑀮𑁂 𑀖𑀝𑁆𑀝𑀦𑁂𑀦 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄. 𑀢𑁂𑀦𑁂𑀯 𑀳𑀺 𑀓𑀼𑀝𑁆𑀝𑀸𑀤𑀺𑀅𑀦𑁆𑀢𑀭𑀺𑀢𑁂𑀲𑀼, 𑀯𑀺𑀘𑁆𑀙𑀺𑀤𑁆𑀤𑀧𑀩𑁆𑀩𑀢𑀮𑁂𑀡𑀸𑀤𑀺𑀕𑀢𑁂𑀲𑀼 𑀘 𑀭𑀽𑀧𑀲𑀤𑁆𑀤𑁂𑀲𑀼 𑀯𑀺𑀜𑁆𑀜𑀸𑀡𑀁 𑀦 ¶ 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀘𑀓𑁆𑀔𑀼𑀦𑁄 𑀤𑀽𑀭𑀸𑀲𑀦𑁆𑀦𑁂𑀲𑀼 𑀘𑀦𑁆𑀤𑀭𑀼𑀓𑁆𑀔𑀸𑀤𑀻𑀲𑀼 𑀅𑀦𑀼𑀧𑀮𑀓𑁆𑀔𑀺𑀢𑀓𑀸𑀮𑀪𑁂𑀤𑁂𑀦 𑀭𑀁𑀲𑀺𑀲𑀫𑀸𑀬𑁄𑀚𑀦𑀲𑀸𑀫𑀢𑁆𑀣𑀺𑀬𑀁, 𑀲𑀤𑁆𑀤𑀸𑀦𑀫𑁆𑀧𑀺 𑀤𑀽𑀭𑀸𑀲𑀦𑁆𑀦𑀸𑀦𑀁 𑀅𑀯𑀺𑀤𑀺𑀢𑀢𑀸𑀪𑁂𑀤𑀁 𑀆𑀕𑀦𑁆𑀢𑁆𑀯𑀸 𑀲𑁄𑀢𑀩𑀺𑀮𑀖𑀝𑁆𑀝𑀦𑀲𑀸𑀫𑀢𑁆𑀣𑀺𑀬𑀁 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀢𑀢𑁆𑀣𑁂𑀯 𑀞𑀺𑀢𑀸𑀦𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀲𑀸𑀫𑀢𑁆𑀣𑀺𑀬𑁄𑀧𑀕𑀫𑀦𑀁. 𑀓𑀼𑀝𑁆𑀝𑀮𑁂𑀡𑀸𑀤𑀺𑀅𑀦𑁆𑀢𑀭𑀺𑀢𑀸𑀦𑀜𑁆𑀘 𑀭𑀽𑀧𑀲𑀤𑁆𑀤𑀸𑀦𑀁 𑀲𑀳𑀓𑀸𑀭𑀺𑀧𑀘𑁆𑀘𑀬𑀯𑀺𑀭𑀳𑀢𑁄 𑀅𑀦𑀸𑀧𑀸𑀣𑀕𑀫𑀦𑀁. 𑀇𑀢𑀭𑀣𑀸 𑀢𑁂𑀲𑀫𑁆𑀧𑀺 𑀢𑀸𑀤𑀺𑀲𑁂𑀲𑀼 𑀇𑀦𑁆𑀤𑁆𑀭𑀺𑀬𑀲𑀜𑁆𑀜𑁄𑀕𑀁 𑀦 𑀥𑀸𑀯𑀺𑀢𑀩𑁆𑀩𑀁. 𑀕𑀫𑀦𑀦𑀺𑀯𑀸𑀭𑀡𑀫𑁆𑀧𑀺 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀫𑁂𑀯, 𑀢𑀣𑁂𑀯 𑀲𑀳𑀓𑀸𑀭𑀺𑀧𑀘𑁆𑀘𑀬𑀯𑀺𑀭𑀳𑀢𑁄 𑀬𑀸𑀤𑀺𑀲𑁂𑀯 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀲𑀜𑁆𑀜𑁄𑀕𑁄 𑀳𑁄𑀢𑀺, 𑀢𑀸𑀤𑀺𑀲𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀘𑀓𑁆𑀔𑀼 𑀢𑀸𑀯 𑀤𑀽𑀭𑁂 𑀞𑀺𑀢𑀸𑀦𑀁 𑀘𑀦𑁆𑀤𑀸𑀤𑀻𑀦𑀫𑁆𑀧𑀺 𑀕𑀳𑀡𑀢𑁄 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀳𑁄𑀢𑀼, 𑀲𑁄𑀢𑀁 𑀧𑀦 𑀤𑀽𑀭𑁂 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀸𑀦𑀁, 𑀯𑀢𑁆𑀣𑀁 𑀥𑁄𑀯𑀦𑁆𑀢𑀸𑀦𑀜𑁆𑀘 𑀤𑀽𑀭𑀢𑁄𑀯 𑀧𑀜𑁆𑀜𑀸𑀬𑀫𑀸𑀦𑀓𑀸𑀬𑀯𑀺𑀓𑀸𑀭𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀤𑁆𑀤𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀓𑀣𑀁 𑀲𑀡𑀺𑀓𑀁 𑀯𑀯𑀢𑁆𑀣𑀸𑀧𑀬𑀫𑀸𑀦𑀁 𑀢𑀁 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀳𑁄𑀢𑀻𑀢𑀺? 𑀢𑀢𑁆𑀣𑀸𑀧𑀺 𑀘 𑀓𑀼𑀞𑀸𑀭𑀺𑀯𑀢𑁆𑀣𑀸𑀤𑀻𑀦𑀁 𑀧𑀞𑀫𑀦𑀺𑀧𑀸𑀢𑀲𑀤𑁆𑀤𑀸𑀦𑀁 𑀫𑀦𑁆𑀤𑀢𑀸𑀬 𑀬𑀣𑀸 𑀳𑀢𑁆𑀣𑀙𑀺𑀚𑁆𑀚𑀫𑀸𑀦𑀲𑀸𑀔𑀸𑀧𑀮𑀸𑀲𑀘𑀮𑀦𑀸𑀤𑀺𑀲𑀫𑀼𑀝𑁆𑀞𑀺𑀢𑀫𑀦𑁆𑀤𑀲𑀤𑁆𑀤𑀸𑀦𑀁 𑀧𑀭𑀫𑁆𑀧𑀭𑀸𑀬𑀸𑀕𑀫𑀦𑀁 𑀦𑀢𑁆𑀣𑀺, 𑀢𑀣𑀸 𑀅𑀦𑀸𑀧𑀸𑀣𑀕𑀫𑀦𑀫𑁆𑀧𑀺, 𑀧𑀘𑁆𑀙𑀸 𑀧𑀦 𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀩𑀮𑀯𑀢𑀸𑀬 ¶ 𑀉𑀧𑁆𑀧𑀦𑁆𑀦𑀫𑀳𑀸𑀲𑀤𑁆𑀤𑀸𑀦𑀁 𑀆𑀕𑀫𑀦𑀁 𑀯𑀺𑀬 𑀢𑀢𑁆𑀣𑁂𑀯 𑀞𑀺𑀢𑀸𑀦𑀜𑁆𑀜𑁂𑀯 𑀆𑀧𑀸𑀣𑀕𑀫𑀦𑀁 𑀳𑁄𑀢𑀺, 𑀇𑀢𑀭𑀣𑀸 𑀤𑀽𑀭𑀸𑀲𑀦𑁆𑀦𑀸𑀤𑀺𑀯𑀯𑀢𑁆𑀣𑀸𑀦𑀸𑀦𑀺 𑀦 𑀲𑀺𑀬𑀼𑀁 𑀕𑀦𑁆𑀥𑀸𑀤𑀻𑀦𑀁 𑀯𑀺𑀬, 𑀢𑀲𑁆𑀫𑀸 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀸𑀦𑁂𑀯𑁂𑀢𑀸𑀦𑀺, 𑀖𑀸𑀦𑀸𑀤𑀻𑀦𑀺 𑀘 𑀲𑀫𑁆𑀧𑀢𑁆𑀢𑀕𑁄𑀘𑀭𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀳𑀺𑀲𑀼𑀁𑀲𑀼𑀫𑀸𑀭𑀧𑀓𑁆𑀔𑀺𑀓𑀼𑀓𑁆𑀓𑀼𑀭𑀲𑀺𑀗𑁆𑀕𑀸𑀮𑀲𑀤𑀺𑀲𑀸𑀦𑀺 𑀘𑁂𑀢𑀸𑀦𑀺. 𑀬𑀣𑀸 𑀳𑀺 𑀅𑀳𑀺 𑀦𑀸𑀫 𑀩𑀳𑀺𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀦𑀸𑀪𑀺𑀭𑀫𑀢𑀺, 𑀢𑀁 𑀯𑀺𑀳𑀸𑀬 𑀢𑀺𑀡𑀧𑀡𑁆𑀡𑀕𑀳𑀦𑀯𑀫𑁆𑀫𑀺𑀓𑀸𑀤𑀺𑀯𑀺𑀲𑀫𑀚𑁆𑀛𑀸𑀲𑀬𑁄𑀯 𑀳𑁄𑀢𑀺, 𑀏𑀯𑀁 ¶ 𑀘𑀓𑁆𑀔𑀼𑀧𑀺 𑀲𑀫𑁆𑀫𑀝𑁆𑀞𑀪𑀺𑀢𑁆𑀢𑀺𑀆𑀤𑀺𑀁 𑀯𑀺𑀳𑀸𑀬 𑀇𑀢𑁆𑀣𑀺𑀧𑀼𑀭𑀺𑀲𑀧𑀼𑀧𑁆𑀨𑀮𑀢𑀸𑀘𑀺𑀢𑁆𑀢𑀸𑀤𑀺𑀯𑀺𑀲𑀫𑀚𑁆𑀛𑀸𑀲𑀬𑀁 𑀳𑁄𑀢𑀺. 𑀬𑀣𑀸 𑀘 𑀲𑀼𑀁𑀲𑀼𑀫𑀸𑀭𑁄𑀧𑀺 𑀩𑀳𑀺 𑀘𑀭𑀡𑀁 𑀯𑀺𑀳𑀸𑀬 𑀉𑀤𑀓𑁂 𑀩𑀺𑀮𑀚𑁆𑀛𑀸𑀲𑀬𑁄 𑀳𑁄𑀢𑀺, 𑀏𑀯𑀁 𑀲𑁄𑀢𑀫𑁆𑀧𑀺 𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑀸𑀤𑀺𑀩𑀺𑀮𑀚𑁆𑀛𑀸𑀲𑀬𑀁 𑀳𑁄𑀢𑀺. 𑀬𑀣𑀸 𑀳𑀺 𑀕𑀺𑀚𑁆𑀛𑀸𑀤𑀺𑀧𑀓𑁆𑀔𑀻𑀧𑀺 𑀪𑀽𑀫𑀺𑀭𑀼𑀓𑁆𑀔𑀸𑀤𑀺𑀁 𑀯𑀺𑀳𑀸𑀬 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑀚𑁆𑀛𑀸𑀲𑀬𑁄 𑀳𑁄𑀢𑀺, 𑀏𑀯𑀁 𑀖𑀸𑀦𑀫𑁆𑀧𑀺 𑀉𑀤𑁆𑀥𑀕𑁆𑀕𑀁 𑀳𑀼𑀢𑁆𑀯𑀸 𑀕𑀦𑁆𑀥𑀧𑀯𑁂𑀲𑀓𑀯𑀸𑀢𑀸𑀓𑀟𑁆𑀠𑀦𑀢𑁆𑀣𑀁 𑀆𑀓𑀸𑀲𑀚𑁆𑀛𑀸𑀲𑀬𑀁 𑀳𑁄𑀢𑀺. 𑀬𑀣𑀸 𑀓𑀼𑀓𑁆𑀓𑀼𑀭𑁄 𑀩𑀳𑀺𑀕𑀸𑀫𑀘𑀸𑀭𑀁 𑀯𑀺𑀳𑀸𑀬 𑀆𑀫𑀺𑀲𑀕𑀯𑁂𑀲𑀻 𑀕𑀸𑀫𑀚𑁆𑀛𑀸𑀲𑀬𑁄 𑀫𑀳𑀸𑀦𑀲𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀚𑀺𑀯𑁆𑀳𑀸𑀧𑀺 𑀆𑀧𑀚𑁆𑀛𑀸𑀲𑀬𑀸 𑀳𑁄𑀢𑀺. 𑀬𑀣𑀸 𑀘 𑀲𑀺𑀗𑁆𑀕𑀸𑀮𑁄 𑀩𑀳𑀺𑀲𑀼𑀲𑀸𑀦𑀘𑀸𑀭𑀁 𑀯𑀺𑀳𑀸𑀬 𑀫𑀁𑀲𑀕𑀯𑁂𑀲𑀻 𑀲𑀼𑀲𑀸𑀦𑀚𑁆𑀛𑀸𑀲𑀬𑁄 𑀳𑁄𑀢𑀺, 𑀏𑀯𑀁 𑀓𑀸𑀬𑁄𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀁 𑀲𑀼𑀔𑀲𑀫𑁆𑀨𑀲𑁆𑀲𑀲𑀬𑀦𑀸𑀤𑀺𑀁 𑀮𑀪𑀺𑀢𑁆𑀯𑀸𑀧𑀺 𑀉𑀧𑀸𑀤𑀺𑀦𑁆𑀦𑀚𑁆𑀛𑀸𑀲𑀬𑁄 𑀳𑁄𑀢𑀺. 𑀅𑀜𑁆𑀜𑀁 𑀳𑀺 𑀉𑀧𑀸𑀤𑀺𑀦𑁆𑀦𑀓𑀁 𑀅𑀮𑀪𑀫𑀸𑀦𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀚𑀡𑁆𑀡𑀼𑀓𑀸𑀦𑀺 𑀉𑀭𑀦𑁆𑀢𑀭𑀁 𑀧𑀯𑁂𑀲𑁂𑀢𑁆𑀯𑀸 𑀳𑀢𑁆𑀣𑀢𑀮𑁂 𑀲𑀻𑀲𑀁 𑀓𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀦𑁆𑀢𑀺. 𑀆𑀮𑁄𑀓𑀯𑀺𑀯𑀭𑀯𑀸𑀬𑀼𑀚𑀮𑀧𑀣𑀯𑀺𑀧𑀘𑁆𑀘𑀬𑀸𑀦𑀺 𑀘𑁂𑀢𑀸𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀓𑀸𑀦𑀺. 𑀏𑀯𑀫𑁂𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀲𑀸𑀤𑀸𑀦𑀁 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑁂𑀲𑀦𑀺𑀲𑁆𑀲𑀬𑀕𑁄𑀘𑀭𑀚𑁆𑀛𑀸𑀲𑀬𑀧𑁆𑀧𑀘𑁆𑀘𑀬𑀪𑁂𑀤𑁂𑀦 𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑀁, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀢𑀼𑀫𑀳𑀸𑀪𑀽𑀢𑀧𑀤𑀝𑁆𑀞𑀸𑀦𑀁, 𑀬𑀣𑀸 𑀘𑁂𑀢𑀲𑁆𑀲, 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀁 𑀧𑀤𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀲𑁂𑀲𑀁 𑀧𑀦 𑀯𑀓𑁆𑀔𑀸𑀫. 𑀢𑀬𑀺𑀤𑀁 𑀭𑀽𑀧𑀁 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀓𑀸𑀴𑀫𑀜𑁆𑀚𑀺𑀝𑁆𑀞𑀲𑀸𑀫𑀙𑀸𑀬𑀸𑀢𑀧𑀆𑀮𑁄𑀓𑀦𑁆𑀥𑀓𑀸𑀭𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀓𑁂𑀘𑀺 𑀧𑀦 ‘‘𑀅𑀦𑁆𑀥𑀓𑀸𑀭𑁄 𑀦𑀸𑀫 𑀆𑀮𑁄𑀓𑀸𑀪𑀸𑀯𑀫𑀢𑁆𑀢𑁄 𑀏𑀯, 𑀢𑀢𑁄 𑀏𑀯 𑀢𑀢𑁆𑀣 𑀕𑀢𑀭𑀽𑀧𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀬𑀣𑀸 𑀳𑀺 𑀦𑀻𑀮𑀫𑁂𑀖𑀫𑀡𑀺𑀆𑀤𑀻𑀦𑀁 𑀙𑀸𑀬𑀸 𑀆𑀮𑁄𑀓𑀯𑀺𑀲𑀤𑀺𑀲𑀸 𑀯𑀡𑁆𑀡𑀸𑀬𑀢𑀦𑀪𑀽𑀢𑀸 𑀳𑁄𑀢𑀺, 𑀏𑀯𑀁 𑀪𑀺𑀢𑁆𑀢𑀺𑀘𑁆𑀙𑀤𑀦𑀪𑀽𑀫𑀺𑀧𑀩𑁆𑀩𑀢𑀸𑀤𑀺𑀘𑁆𑀙𑀸𑀬𑀸 𑀘 𑀖𑀦𑀻𑀪𑀽𑀢𑀸 𑀖𑀝𑀭𑀽𑀧𑀸𑀤𑀺𑀘𑁆𑀙𑀸𑀤𑀦𑀢𑁄 𑀆𑀮𑁄𑀓𑀯𑀺𑀲𑀤𑀺𑀲𑁄 𑀅𑀦𑁆𑀥𑀓𑀸𑀭𑁄𑀢𑀺 ¶ 𑀤𑀝𑁆𑀞𑀩𑁆𑀩𑁄, 𑀲𑁄𑀢𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀲𑀤𑁆𑀤𑁄, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁄 𑀕𑀻𑀢𑀪𑁂𑀭𑀺𑀲𑀤𑁆𑀤𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄. 𑀖𑀸𑀦𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀕𑀦𑁆𑀥𑁄, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁄 𑀫𑀽𑀮𑀕𑀦𑁆𑀥𑀲𑀸𑀭𑀕𑀦𑁆𑀥𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄 ¶ . 𑀚𑀺𑀯𑁆𑀳𑀸𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀭𑀲𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁄 𑀫𑀽𑀮𑀭𑀲𑀢𑀘𑀭𑀲𑀸𑀤𑀻𑀦𑀁 𑀯𑀲𑁂𑀦 𑀅𑀦𑁂𑀓𑀯𑀺𑀥𑁄.

𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀻𑀢𑀺 𑀧𑀓𑀸𑀲𑀦𑀭𑀲𑀁, 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀼𑀭𑀺𑀲𑀪𑀸𑀯𑀮𑀓𑁆𑀔𑀡𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑁄𑀢𑀺 𑀧𑀓𑀸𑀲𑀦𑀭𑀲𑀁, 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀉𑀪𑀺𑀦𑁆𑀦𑀫𑁆𑀧𑁂𑀲𑀁 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀁 𑀓𑀸𑀭𑀡𑀪𑀸𑀯𑁄 𑀦 𑀲𑀭𑀲𑀢𑁄 𑀅𑀢𑁆𑀣𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀦𑁂𑀲𑀁 𑀧𑀘𑁆𑀘𑀬𑀪𑀸𑀯𑀲𑁆𑀲 𑀧𑀝𑁆𑀞𑀸𑀦𑁂 𑀅𑀦𑀸𑀕𑀢𑀢𑁆𑀢𑀸, 𑀅𑀢𑁆𑀢𑀦𑁄 𑀧𑀦 𑀚𑀦𑀓𑀧𑀘𑁆𑀘𑀬𑀪𑀽𑀢𑀆𑀕𑀫𑀦𑀢𑁄𑀯. 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀧𑀝𑀺𑀦𑀺𑀬𑀢𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀪𑀸𑀯𑀸𑀦𑀼𑀕𑀼𑀡𑀭𑀽𑀧𑀸𑀦𑀫𑁆𑀧𑀺 𑀦𑀺𑀬𑀫𑁂𑀦 𑀉𑀧𑁆𑀧𑀚𑁆𑀚𑀦𑀢𑁄, 𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸𑀤𑀺𑀯𑁄𑀳𑀸𑀭𑀸𑀦𑀜𑁆𑀘 𑀢𑀧𑁆𑀧𑀥𑀸𑀦𑀢𑁄 𑀧𑀘𑁆𑀘𑀬𑀪𑀸𑀯𑁄, 𑀇𑀦𑁆𑀤𑁆𑀭𑀺𑀬𑀪𑀸𑀯𑁄 𑀘 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀳𑀺 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀪𑀸𑀯𑁂𑀧𑀺 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸𑀤𑀺𑀩𑁆𑀬𑀜𑁆𑀚𑀦𑀁, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀪𑀸𑀯𑁂𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀘 𑀧𑀼𑀭𑀺𑀫𑀓𑀫𑁆𑀫𑀢𑁄 𑀏𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀳𑀺 𑀦𑁂𑀲𑀁 𑀢𑀁𑀢𑀁𑀇𑀦𑁆𑀤𑁆𑀭𑀺𑀬𑁂𑀦𑁂𑀯 𑀧𑀝𑀺𑀦𑀺𑀬𑀢𑀩𑁆𑀬𑀜𑁆𑀚𑀦𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀲𑁆𑀲 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀦 𑀳𑀺 𑀢𑁂𑀲𑀁 𑀪𑀸𑀯𑀤𑁆𑀯𑀬𑀁 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀲𑀩𑁆𑀩𑀤𑀸𑀧𑀺 𑀩𑁆𑀬𑀜𑁆𑀚𑀦𑀤𑁆𑀯𑀬𑀲𑁆𑀲 𑀪𑀸𑀯𑀧𑁆𑀧𑀲𑀗𑁆𑀕𑁄 𑀲𑀺𑀬𑀸. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀳𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀫𑁂𑀯 𑀯𑀺𑀚𑁆𑀚𑀢𑀺, 𑀦 𑀇𑀢𑀭𑀁. 𑀢𑀲𑁆𑀲 𑀧𑀦 𑀬𑀤𑀸 𑀇𑀢𑁆𑀣𑀺𑀬𑀁 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀢𑀼𑀪𑀯𑀢𑀺, 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺. 𑀢𑀣𑀸 𑀇𑀢𑀭𑀲𑁆𑀲 𑀇𑀢𑀭𑀁. 𑀬𑀲𑁆𑀫𑀸 𑀧𑀦𑁂𑀲𑀁 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀦𑀺𑀬𑀢𑀁 ¶ , 𑀢𑀲𑁆𑀫𑀸 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀫𑁆𑀧𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀫𑁆𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀭𑀁 𑀕𑀡𑁆𑀳𑀸𑀧𑁂𑀢𑀺, 𑀲𑀬𑀁 𑀧𑀦 𑀦 𑀕𑀡𑁆𑀳𑀸𑀢𑀺. 𑀬𑀣𑀸 𑀢𑁂𑀲𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀓𑀫𑁆𑀫𑀲𑀳𑀸𑀬𑀁 𑀭𑀸𑀕𑀘𑀺𑀢𑁆𑀢𑀫𑁂𑀯 𑀩𑁆𑀬𑀜𑁆𑀚𑀦𑀓𑀸𑀭𑀡𑀁, 𑀦 𑀪𑀸𑀯𑁄, 𑀏𑀯𑀁 𑀧𑀓𑀢𑀺𑀢𑁆𑀣𑀺𑀧𑀼𑀭𑀺𑀲𑀸𑀦𑀫𑁆𑀧𑀺 𑀪𑀸𑀯𑀤𑁆𑀯𑀬𑀚𑀦𑀓𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁄 𑀏𑀯 𑀢𑀁𑀢𑀁𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸𑀤𑀺𑀓𑀸𑀭𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀸𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀧𑀝𑀺𑀲𑀦𑁆𑀥𑀺𑀬𑀫𑁂𑀯, 𑀲𑀩𑁆𑀩𑁂𑀲𑀁 𑀧𑀦 𑀧𑀯𑀢𑁆𑀢𑁂 𑀏𑀯 𑀧𑀭𑀺𑀯𑀢𑁆𑀢𑀢𑀺. 𑀇𑀫𑁂𑀲𑀼 𑀘 𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀢𑁆𑀢𑀫𑀁, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀳𑀻𑀦𑀁, 𑀢𑀲𑁆𑀫𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀤𑀼𑀩𑁆𑀩𑀮𑀸𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑀭𑀁 𑀩𑀮𑀯𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀁 𑀉𑀪𑀬𑀫𑁆𑀧𑀺 𑀲𑀼𑀕𑀢𑀺𑀬𑀁 𑀅𑀓𑀼𑀲𑀮𑁂𑀦𑁂𑀯 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀼𑀲𑀮𑁂𑀦𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀓𑀸𑀬𑀧𑁆𑀧𑀲𑀸𑀤𑁄 𑀯𑀺𑀬 𑀘 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀓𑀫𑁂𑀯, 𑀦 𑀘 𑀓𑀸𑀬𑀧𑁆𑀧𑀲𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑁂 𑀢𑀺𑀝𑁆𑀞𑀢𑀺.

𑀬𑀤𑀺 𑀏𑀯𑀁 𑀦 𑀲𑀩𑁆𑀩𑀢𑁆𑀣 𑀓𑀸𑀬𑀪𑀸𑀯𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺? 𑀦𑁂𑀯𑀁 𑀧𑀭𑀫𑀢𑁆𑀣𑀢𑁄 𑀲𑀩𑁆𑀩𑀢𑁆𑀣, 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀧𑀦𑁂𑀲𑀁 ¶ 𑀑𑀓𑀸𑀲𑀪𑁂𑀤𑀁 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀭𑀽𑀧𑁂 𑀭𑀲𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀭𑀽𑀧𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀁 𑀓𑀸𑀬𑀪𑀸𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀫𑀢𑁆𑀣𑀢𑁄 𑀦 𑀲𑀩𑁆𑀩𑀢𑁆𑀣, 𑀦 𑀘 𑀲𑀩𑁆𑀩𑀢𑁆𑀣 𑀦𑀢𑁆𑀣𑀺 𑀯𑀺𑀯𑁂𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀯𑀯𑀢𑁆𑀣𑀸𑀦𑀢𑁄𑀧𑀺 𑀘𑁂𑀲𑀁 𑀅𑀲𑀫𑁆𑀫𑀺𑀲𑁆𑀲𑀢𑀸 𑀤𑁂𑀲𑀢𑁄 𑀦 𑀯𑀺𑀯𑁂𑀓𑀸𑀪𑀸𑀯𑁂𑀧𑀺. 𑀦 𑀓𑁂𑀯𑀮𑀜𑁆𑀘 𑀇𑀫𑀸𑀦𑁂𑀯, 𑀲𑀩𑁆𑀩𑀸𑀦𑀺𑀧𑀺 𑀭𑀽𑀧𑀸𑀦𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯 𑀳𑁄𑀦𑁆𑀢𑀺. 𑀬𑀣𑀸 𑀳𑀺 𑀧𑀜𑁆𑀘𑀯𑀡𑁆𑀡𑁂𑀦 𑀓𑀧𑁆𑀧𑀸𑀲𑁂𑀦 𑀯𑀝𑁆𑀝𑀺𑀁 𑀓𑀢𑁆𑀯𑀸 𑀤𑀻𑀧𑁂 𑀚𑀮𑀺𑀢𑁂 𑀓𑀺𑀜𑁆𑀘𑀸𑀧𑀺 𑀚𑀸𑀮𑀸 𑀏𑀓𑀸𑀩𑀤𑁆𑀥𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀦 𑀅𑀁𑀲𑀼𑀦𑁄 𑀧𑀸𑀝𑀺𑀬𑁂𑀓𑁆𑀓𑀁 𑀚𑀸𑀮𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀫𑀺𑀲𑁆𑀲𑀸𑀯. 𑀏𑀯𑀁 𑀓𑀸𑀬𑀪𑀸𑀯𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀲𑀝𑀸𑀦𑀺𑀧𑀺 𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀳𑁂𑀝𑁆𑀞𑀼𑀧𑀭𑀺𑀬𑀸𑀤𑀺𑀯𑀲𑁂𑀦 𑀦𑀢𑁆𑀣𑀺, 𑀢𑀸𑀦𑀺𑀧𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑁂𑀯 𑀳𑁄𑀦𑁆𑀢𑀺.

𑀲𑀳𑀚𑀭𑀽𑀧𑀸𑀦𑀁 ¶ 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀁𑀬𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀅𑀢𑁆𑀣𑀺𑀓𑁆𑀔𑀡𑁂 𑀏𑀯 𑀘𑁂𑀢𑀁 𑀲𑀳𑀚𑀭𑀽𑀧𑀸𑀦𑀺 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀦 𑀪𑀗𑁆𑀕𑀓𑁆𑀔𑀡𑁂 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸, 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀧𑀸𑀮𑁂𑀢𑀺 𑀥𑀸𑀢𑀻 𑀯𑀺𑀬 𑀓𑀼𑀫𑀸𑀭𑀁, 𑀲𑀬𑀁𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀘 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀳𑀤𑀬𑀯𑀢𑁆𑀣𑀼, 𑀢𑀸𑀲𑀜𑁆𑀜𑁂𑀯 𑀥𑀸𑀢𑀽𑀦𑀁 𑀥𑀸𑀭𑀡𑀭𑀲𑀁, 𑀉𑀩𑁆𑀩𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀳𑀤𑀬𑀯𑀢𑁆𑀣𑀼 𑀬𑀤𑁂𑀢𑀁 𑀅𑀦𑁆𑀢𑁄𑀲𑀭𑀻𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀫𑀚𑁆𑀛𑁂 𑀩𑀸𑀳𑀺𑀭𑀧𑀢𑁆𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀭𑀢𑁆𑀢𑀧𑀤𑀼𑀫𑀫𑀓𑀼𑀮𑀲𑀡𑁆𑀞𑀸𑀦𑀁 𑀩𑀳𑀺 𑀫𑀝𑁆𑀞𑀁, 𑀅𑀦𑁆𑀢𑁄 𑀓𑁄𑀲𑀸𑀢𑀓𑀻𑀨𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀤𑀺𑀲𑀁, 𑀧𑀜𑁆𑀜𑀯𑀦𑁆𑀢𑀸𑀦𑀁 𑀣𑁄𑀓𑀁 𑀯𑀺𑀓𑀲𑀺𑀢𑀁, 𑀫𑀦𑁆𑀤𑀧𑀜𑁆𑀜𑀸𑀦𑀁 𑀫𑀓𑀼𑀴𑀺𑀢𑀁, 𑀳𑀤𑀬𑀫𑀁𑀲𑀬𑀫𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀓𑁆𑀓𑀬𑀓𑀦𑀓𑀺𑀮𑁄𑀫𑀓𑀧𑀺𑀳𑀓𑀸𑀤𑀬𑁄 𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀲 𑀲𑀲𑀫𑁆𑀪𑀸𑀭𑀳𑀤𑀬𑀫𑀁𑀲𑀲𑁆𑀲 𑀅𑀦𑁆𑀢𑁄 𑀧𑀼𑀦𑁆𑀦𑀸𑀕𑀝𑁆𑀞𑀺𑀧𑀢𑀺𑀝𑁆𑀞𑀸𑀦𑀫𑀢𑁆𑀢𑁂 𑀆𑀯𑀸𑀝𑀓𑁂 𑀲𑀡𑁆𑀞𑀺𑀢𑀁 𑀅𑀤𑁆𑀥𑀧𑀲𑀢𑀫𑀢𑁆𑀢𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺. 𑀢𑀜𑁆𑀘 𑀭𑀸𑀕𑀘𑀭𑀺𑀢𑀲𑁆𑀲 𑀭𑀢𑁆𑀢𑀁, 𑀤𑁄𑀲𑀘𑀭𑀺𑀢𑀲𑁆𑀲 𑀓𑀸𑀴𑀓𑀁, 𑀫𑁄𑀳𑀘𑀭𑀺𑀢𑀲𑁆𑀲 𑀫𑀁𑀲𑀥𑁄𑀯𑀦𑀉𑀤𑀓𑀲𑀤𑀺𑀲𑀁, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀓𑀼𑀮𑀢𑁆𑀣𑀬𑀽𑀲𑀯𑀡𑁆𑀡𑀁, 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁, 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁 𑀧𑀡𑁆𑀟𑀭𑀁 𑀧𑀭𑀺𑀲𑀼𑀤𑁆𑀥𑀁 𑀦𑀺𑀤𑁆𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬 𑀚𑀼𑀢𑀺𑀫𑀦𑁆𑀢𑀁 𑀳𑁄𑀢𑀺, 𑀩𑁆𑀬𑀸𑀧𑁂𑀢𑁆𑀯𑀸 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑁂𑀳𑀺 𑀪𑀽𑀢𑁂𑀳𑀺 𑀓𑀢𑀽𑀧𑀓𑀸𑀭𑀁 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁 𑀯𑀡𑁆𑀡𑀸𑀤𑀺𑀧𑀭𑀺𑀯𑀼𑀢𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀜𑁆𑀘𑁂𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀯𑀢𑁆𑀣𑀼𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀅𑀪𑀺𑀓𑁆𑀓𑀫𑀸𑀤𑀺𑀧𑁆𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸 𑀲𑀳𑀚𑀭𑀽𑀧𑀓𑀸𑀬𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀯𑀺𑀓𑀸𑀭𑀮𑀓𑁆𑀔𑀡𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀭𑀲𑀸, 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 ¶ , 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀧𑀤𑀝𑁆𑀞𑀸𑀦𑀸. 𑀯𑀘𑀻𑀪𑁂𑀤𑀧𑁆𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 ¶ 𑀧𑀘𑁆𑀘𑀬𑀸𑀓𑀸𑀭𑀯𑀺𑀓𑀸𑀭𑀮𑀓𑁆𑀔𑀡𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀭𑀲𑀸, 𑀯𑀘𑀻𑀖𑁄𑀲𑀲𑁆𑀲 𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀧𑀤𑀝𑁆𑀞𑀸𑀦𑀸. 𑀉𑀪𑁄𑀧𑁂𑀢𑀸 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀯𑀘𑀻𑀖𑁄𑀲𑁂𑀳𑀺 𑀲𑀬𑀁 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄 𑀘 ‘‘𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀘𑀓𑁆𑀔𑀼𑀲𑁄𑀢𑀧𑀣𑀲𑁆𑀫𑀺𑀁 𑀳𑀺 𑀞𑀢𑁆𑀯𑀸 𑀓𑁂𑀦𑀘𑀺 𑀳𑀢𑁆𑀣𑀯𑀺𑀓𑀸𑀭𑀲𑀻𑀲𑀼𑀓𑁆𑀔𑀺𑀧𑀦𑀸𑀤𑀺𑀓𑀸𑀬𑀯𑀺𑀓𑀸𑀭𑁂, 𑀲𑀤𑁆𑀤𑁂 𑀯𑀸 𑀓𑀢𑁂 𑀢𑀣𑀸𑀧𑀯𑀢𑁆𑀢𑀭𑀽𑀧𑀲𑀤𑁆𑀤𑀸𑀬𑀢𑀦𑀸𑀦𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀺, 𑀦 𑀢𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀬𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀓𑀮𑀸𑀧𑀕𑀢𑀸𑀬 𑀧𑀦 𑀯𑀸𑀬𑁄𑀥𑀸𑀢𑀼𑀬𑀸 𑀲𑀳𑀚𑀸𑀢𑀭𑀽𑀧𑀓𑀸𑀬𑀲𑀦𑁆𑀥𑀸𑀭𑀡𑀘𑀮𑀦𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑁄 𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀢𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀆𑀓𑀸𑀭𑀯𑀺𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀦 𑀘 𑀢𑀸 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀢𑀸 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀢𑀸𑀮𑀧𑀡𑁆𑀡𑀸𑀤𑀺𑀲𑀜𑁆𑀜𑀸𑀬 𑀉𑀤𑀧𑀸𑀦𑀸𑀤𑀻𑀦𑀺 𑀯𑀺𑀬 𑀬𑀣𑀸𑀕𑀳𑀺𑀢𑀓𑀸𑀬𑀯𑀺𑀓𑀸𑀭𑀯𑀘𑀻𑀖𑁄𑀲𑀸𑀦𑀼𑀲𑀸𑀭𑁂𑀦 𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀢𑀤𑀦𑀼𑀲𑀸𑀭𑁂𑀦𑁂𑀯 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺, 𑀯𑀤𑀢𑀺 𑀘𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀬𑀁 𑀯𑀺𑀜𑁆𑀜𑁂𑀬𑁆𑀬𑀢𑁄, 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄 𑀘 ‘‘𑀯𑀺𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀢𑁆𑀣 𑀘 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑁂𑀲𑀼 𑀧𑀼𑀭𑀺𑀫𑁂𑀳𑀺 𑀙𑀳𑀺 𑀚𑀯𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀬𑁄 𑀉𑀧𑀢𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀓𑀺𑀘𑁆𑀘𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀪𑀺𑀓𑁆𑀓𑀫𑀸𑀤𑀺𑀁 𑀧𑀦 𑀦𑀺𑀧𑁆𑀨𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸 𑀧𑀦 𑀳𑁂𑀝𑁆𑀞𑀸 𑀙𑀳𑀺 𑀚𑀯𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀬𑁄𑀧𑀢𑁆𑀣𑀫𑁆𑀪𑀁 𑀮𑀪𑀺𑀢𑁆𑀯𑀸 𑀲𑀢𑁆𑀢𑀳𑀺 𑀬𑀼𑀕𑁂𑀳𑀺 𑀆𑀓𑀟𑁆𑀠𑀺𑀢𑀩𑁆𑀩𑀪𑀸𑀭𑀁 𑀲𑀓𑀝𑀁 𑀲𑀢𑁆𑀢𑀫𑀬𑀼𑀕𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀇𑀢𑀭𑀙𑀬𑀼𑀕𑀬𑀼𑀢𑁆𑀢𑀕𑁄𑀡𑁄𑀧𑀢𑁆𑀣𑀫𑁆𑀪𑀁 𑀮𑀪𑀺𑀢𑁆𑀯𑀸 𑀭𑀽𑀧𑀓𑀸𑀬𑀲𑁆𑀲 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀺𑀁 𑀓𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑁂𑀧𑀺 𑀲𑀢𑁆𑀢𑀫𑀚𑀯𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀸𑀬 𑀧𑀣𑀯𑀻𑀥𑀸𑀢𑀼𑀬𑀸𑀧𑀺 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 ¶ 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀧𑀼𑀭𑀺𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸𑀬 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁, 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸𑀬 𑀘𑀮𑀦𑀧𑀘𑁆𑀘𑀬𑀢𑁆𑀢𑀜𑁆𑀘 𑀦𑀢𑁆𑀣𑀺 𑀢𑁂𑀲𑀁 𑀯𑀸𑀬𑁄𑀥𑀸𑀢𑀼𑀓𑀺𑀘𑁆𑀘𑀢𑁆𑀢𑀸, 𑀧𑀼𑀭𑀺𑀫𑀲𑀳𑀕𑀢𑀸 𑀧𑀦 𑀧𑀘𑁆𑀙𑀺𑀫𑀸 𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑀫𑀢𑁆𑀣𑀸 𑀳𑁄𑀢𑀺, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀓𑀸𑀬𑁂 𑀧𑀦 𑀯𑀸𑀬𑁄𑀥𑀸𑀢𑀼𑀬𑀸 𑀘𑀮𑀦𑁆𑀢𑁂 𑀢𑀤𑀼𑀧𑀢𑁆𑀣𑀫𑁆𑀪𑀺𑀢𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸𑀦𑀫𑁆𑀧𑀺 𑀘𑀮𑀦𑀢𑁄 𑀲𑀓𑀮𑀓𑀸𑀬𑀲𑁆𑀲 𑀅𑀪𑀺𑀓𑁆𑀓𑀫𑀸𑀤𑀬𑁄 𑀳𑁄𑀦𑁆𑀢𑀺 𑀉𑀤𑀓𑁂 𑀕𑀘𑁆𑀙𑀦𑁆𑀢𑁂 𑀢𑀢𑁆𑀣 𑀧𑀢𑀺𑀢𑀢𑀺𑀡𑀧𑀡𑁆𑀡𑀸𑀦𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀸 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀧𑀭𑀺𑀬𑀦𑁆𑀢𑀧𑁆𑀧𑀓𑀸𑀲𑀦𑀭𑀲𑀸, 𑀭𑀽𑀧𑀫𑀭𑀺𑀬𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑀸, 𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀽𑀧𑁂𑀲𑀼 ‘‘𑀇𑀤𑀫𑀺𑀢𑁄 𑀉𑀤𑁆𑀥𑀁, 𑀅𑀥𑁄, 𑀢𑀺𑀭𑀺𑀬’’𑀦𑁆𑀢𑀺 𑀘 𑀳𑁄𑀢𑀺.

𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸 ¶ 𑀭𑀽𑀧𑀲𑁆𑀲𑀮𑀳𑀼𑀢𑀸, 𑀭𑀽𑀧𑀸𑀦𑀁 𑀕𑀭𑀼𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀅𑀣𑀤𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲𑀫𑀼𑀤𑀼𑀢𑀸, 𑀭𑀽𑀧𑀸𑀦𑀁 𑀣𑀤𑁆𑀥𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀼𑀤𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀭𑀽𑀧𑀲𑁆𑀲𑀓𑀫𑁆𑀫𑀜𑁆𑀜𑀢𑀸, 𑀅𑀓𑀫𑁆𑀫𑀜𑁆𑀜𑀢𑀸𑀯𑀺𑀦𑁄𑀤𑀦𑀭𑀲𑀸, 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀜𑁆𑀜𑀢𑀸𑀭𑀽𑀧𑀧𑀤𑀝𑁆𑀞𑀸𑀦𑀸. 𑀏𑀢𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀚𑀳𑀦𑁆𑀢𑀺, 𑀕𑀭𑀼𑀣𑀤𑁆𑀥𑀅𑀓𑀫𑁆𑀫𑀜𑁆𑀜𑀭𑀽𑀧𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀘 𑀲𑀫𑀼𑀝𑁆𑀞𑀺𑀢𑀸𑀦𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀸𑀦𑀁 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀽𑀢𑀸𑀦𑀁 𑀭𑀽𑀧𑀸𑀦𑀁 𑀯𑀺𑀓𑀸𑀭𑀢𑀸𑀬 𑀘 𑀧𑀭𑀺𑀬𑀸𑀬𑀢𑁄 𑀕𑀭𑀼𑀣𑀤𑁆𑀥𑀸𑀓𑀫𑁆𑀫𑀜𑁆𑀜𑀪𑀸𑀯𑀯𑀺𑀦𑁄𑀤𑀦𑀓𑀺𑀘𑁆𑀘𑀸 𑀯𑀼𑀢𑁆𑀢𑀸, 𑀦 𑀧𑀦 𑀲𑀪𑀸𑀯𑀢𑁄 𑀲𑀬𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸.

𑀆𑀘𑀬𑀮𑀓𑁆𑀔𑀡𑁄 𑀭𑀽𑀧𑀲𑁆𑀲𑀉𑀧𑀘𑀬𑁄, 𑀧𑀼𑀩𑁆𑀩𑀦𑁆𑀢𑀢𑁄 𑀭𑀽𑀧𑀸𑀦𑀁 𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄, 𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄. 𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧𑀲𑁆𑀲𑀲𑀦𑁆𑀢𑀢𑀺, 𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸, 𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑀼𑀧𑁆𑀧𑀩𑀦𑁆𑀥𑀓𑀭𑀽𑀧𑀧𑀤𑀝𑁆𑀞𑀸𑀦𑀸 ¶ . 𑀉𑀪𑀬𑀫𑁆𑀧𑁂𑀢𑀁 𑀚𑀸𑀢𑀺𑀭𑀽𑀧𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀁 𑀳𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁 𑀧𑀞𑀫𑀼𑀧𑁆𑀧𑀢𑁆𑀢𑀺 𑀉𑀧𑀘𑀬𑁄 𑀦𑀸𑀫, 𑀉𑀧𑀭𑀽𑀧𑀭𑀼𑀧𑁆𑀧𑀢𑁆𑀢𑀺 𑀲𑀦𑁆𑀢𑀢𑀺 𑀦𑀸𑀫. 𑀢𑁂𑀦𑁂𑀯 𑀢𑀸𑀲𑀁 𑀧𑀤𑀪𑀸𑀚𑀦𑀻𑀬𑁂 ‘‘𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑁬𑁪𑁨) 𑀯𑀼𑀢𑁆𑀢𑀁, 𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀧𑀦 𑀯𑀺𑀲𑀼𑀁 𑀉𑀤𑁆𑀤𑀺𑀝𑁆𑀞𑀸.

𑀭𑀽𑀧𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀭𑀽𑀧𑀲𑁆𑀲𑀚𑀭𑀢𑀸, 𑀉𑀧𑀦𑀬𑀦𑀭𑀲𑀸, 𑀲𑀪𑀸𑀯𑀸𑀦𑀧𑀕𑀫𑁂𑀧𑀺 𑀦𑀯𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬, 𑀧𑀭𑀺𑀧𑀘𑁆𑀘𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸. 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀫𑀸𑀦𑀸𑀧𑀺 𑀘𑁂𑀲𑀸 𑀉𑀧𑀸𑀤𑀺𑀦𑁆𑀦𑁂𑀲𑀼 𑀔𑀡𑁆𑀟𑀤𑀦𑁆𑀢𑀸𑀤𑀺𑀢𑁄, 𑀅𑀦𑀼𑀧𑀸𑀤𑀺𑀦𑁆𑀦𑁂𑀲𑀼 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀯𑀡𑁆𑀡𑀯𑀺𑀓𑀸𑀭𑀸𑀤𑀺𑀢𑁄 𑀘 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀓𑀸𑀭𑀢𑁆𑀢𑀸 ‘‘𑀧𑀸𑀓𑀝𑀚𑀭𑀸, 𑀲𑀯𑀻𑀘𑀺𑀚𑀭𑀸’’𑀢𑀺 𑀘 𑀯𑀼𑀘𑁆𑀘𑀢𑀺, 𑀫𑀡𑀺𑀓𑀦𑀓𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀲𑀼 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀦𑀺𑀭𑀦𑁆𑀢𑀭𑀢𑁆𑀢𑀸 𑀘 ‘‘𑀅𑀧𑀸𑀓𑀝𑀚𑀭𑀸, 𑀅𑀯𑀻𑀘𑀺𑀚𑀭𑀸’’𑀢𑀺 𑀯𑀼𑀘𑁆𑀘𑀢𑀺. 𑀈𑀤𑀺𑀲𑁂𑀲𑀼 𑀳𑀺 𑀓𑀧𑁆𑀧𑀯𑀺𑀦𑀸𑀲𑀸𑀤𑀺𑀓𑀸𑀮𑁂 𑀯𑀺𑀓𑀸𑀭𑀢𑁄 𑀚𑀭𑀸 𑀧𑀜𑁆𑀜𑀸𑀬𑁂𑀬𑁆𑀬. 𑀲𑀩𑁆𑀩𑀤𑀸𑀧𑀺 𑀧𑀦 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀓𑀸𑀭𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫. 𑀦 𑀘 𑀢𑀢𑁆𑀣 𑀯𑀡𑁆𑀡𑀯𑀺𑀓𑀸𑀭𑀸𑀤𑀬𑁄 𑀚𑀭𑀸 𑀢𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑁄. 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀧𑀦 𑀳𑁄𑀢𑀺. 𑀬𑀣𑀸 𑀑𑀖𑁂𑀦 𑀧𑀭𑀺𑀪𑀺𑀦𑁆𑀦𑀪𑀽𑀫𑀺𑀆𑀤𑀺𑀤𑀲𑁆𑀲𑀦𑁂𑀦 𑀅𑀤𑀺𑀝𑁆𑀞𑁄𑀧𑀺 𑀑𑀖𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺, 𑀏𑀯𑀁 𑀯𑀺𑀓𑀸𑀭𑀤𑀲𑁆𑀲𑀦𑁂𑀦 𑀚𑀭𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀭𑀺𑀪𑁂𑀤𑀮𑀓𑁆𑀔𑀡𑀸 𑀭𑀽𑀧𑀲𑁆𑀲𑀅𑀦𑀺𑀘𑁆𑀘𑀢𑀸, 𑀲𑀁𑀲𑀻𑀤𑀦𑀭𑀲𑀸, 𑀔𑀬𑀯𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀺𑀪𑀺𑀚𑁆𑀚𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸. 𑀦 𑀓𑁂𑀯𑀮𑀜𑁆𑀘𑁂𑀢𑀸𑀦𑀺 𑀉𑀧𑀘𑀬𑀸𑀤𑀺𑀘𑀢𑀽𑀳𑀺 𑀕𑀳𑀺𑀢𑀸𑀦𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀫𑁂𑀯 ¶ , 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀏𑀢𑀸𑀦𑀺 𑀘 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀭𑀜𑁆𑀜𑀧𑁆𑀧𑀯𑁂𑀲𑀓𑀧𑀯𑀺𑀝𑁆𑀞𑀧𑀭𑀺𑀧𑀸𑀢𑀓𑀧𑀢𑀺𑀢𑀖𑀸𑀢𑀓𑀘𑁄𑀭𑁂𑀳𑀺 𑀬𑀣𑀸𑀓𑁆𑀓𑀫𑀁 𑀲𑀤𑀺𑀲𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀑𑀚𑀸𑀮𑀓𑁆𑀔𑀡𑁄 ¶ 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀸𑀳𑀭𑀡𑀭𑀲𑁄, 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀓𑀩𑀴𑀁 𑀓𑀢𑁆𑀯𑀸 𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀕𑀳𑀢𑁄 𑀧𑀦 𑀲𑀩𑁆𑀩𑀫𑁆𑀧𑁂𑀢𑀁 𑀭𑀽𑀧𑀁 𑀔𑀦𑁆𑀥𑀢𑁄 𑀏𑀓𑀯𑀺𑀥𑀁 𑀭𑀽𑀧𑀓𑁆𑀔𑀦𑁆𑀥𑁄𑀯 𑀳𑁄𑀢𑀺, 𑀢𑀣𑀸 𑀅𑀳𑁂𑀢𑀼𑀓𑀁 𑀲𑀧𑁆𑀧𑀘𑁆𑀘𑀬𑀁 𑀲𑀗𑁆𑀔𑀢𑀁 𑀮𑁄𑀓𑀺𑀬𑀁 𑀲𑀸𑀲𑀯𑀁 𑀲𑀜𑁆𑀜𑁄𑀚𑀦𑀻𑀬𑀁 𑀑𑀖𑀦𑀻𑀬𑀁 𑀬𑁄𑀕𑀦𑀻𑀬𑀁 𑀦𑀻𑀯𑀭𑀡𑀻𑀬𑀁 𑀧𑀭𑀸𑀫𑀝𑁆𑀞𑀁 𑀲𑀁𑀓𑀺𑀮𑁂𑀲𑀺𑀓𑀁 𑀅𑀦𑀸𑀭𑀫𑁆𑀫𑀡𑀁 𑀅𑀧𑁆𑀧𑀳𑀸𑀢𑀩𑁆𑀩𑀦𑁆𑀢𑀺𑀆𑀤𑀺𑀦𑀸 𑀘 𑀏𑀓𑀯𑀺𑀥𑀁, 𑀢𑀁 𑀧𑀼𑀦 𑀪𑀽𑀢𑁄𑀧𑀸𑀤𑀸𑀬𑀯𑀲𑁂𑀦 𑀤𑀼𑀯𑀺𑀥𑀁, 𑀢𑀣𑀸 𑀦𑀺𑀧𑁆𑀨𑀦𑁆𑀦𑀸𑀦𑀺𑀧𑁆𑀨𑀦𑁆𑀦𑀸𑀤𑀺𑀯𑀲𑁂𑀦 𑀘. 𑀢𑀢𑁆𑀣 𑀧𑀣𑀯𑀻𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀪𑀽𑀢𑀭𑀽𑀧𑀁 𑀦𑀸𑀫, 𑀲𑁂𑀲𑀁 𑀉𑀧𑀸𑀤𑀸𑀭𑀽𑀧𑀁 𑀦𑀸𑀫. 𑀧𑀣𑀯𑀻𑀆𑀤𑀬𑁄 𑀲𑀢𑁆𑀢𑀭𑀲, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀘𑁂𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑀺 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀦𑀸𑀫. 𑀘𑀓𑁆𑀔𑀸𑀤𑀬𑁄 𑀧𑀜𑁆𑀘 𑀧𑀲𑀸𑀤𑀸, 𑀪𑀸𑀯𑀤𑁆𑀯𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀝𑁆𑀞𑀯𑀺𑀥𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀅𑀦𑀺𑀦𑁆𑀤𑁆𑀭𑀺𑀬𑀁. 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀯 𑀳𑀤𑀬𑀜𑁆𑀘𑀸𑀢𑀺 𑀦𑀯𑀯𑀺𑀥𑀫𑁆𑀧𑀺 𑀉𑀧𑀸𑀤𑀺𑀦𑁆𑀦𑀁, 𑀇𑀢𑀭𑀁 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀧𑀜𑁆𑀘 𑀧𑀲𑀸𑀤𑀸, 𑀘𑀢𑁆𑀢𑀸𑀭𑁄 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸, 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀪𑀽𑀢𑀢𑁆𑀢𑀬𑀜𑁆𑀘𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀑𑀴𑀸𑀭𑀺𑀓𑀭𑀽𑀧𑀁, 𑀲𑀦𑁆𑀢𑀺𑀓𑁂𑀭𑀽𑀧𑀁, 𑀲𑀧𑁆𑀧𑀝𑀺𑀖𑀭𑀽𑀧𑀜𑁆𑀘, 𑀲𑁂𑀲𑀁 𑀲𑀼𑀔𑀼𑀫𑀭𑀽𑀧𑀁, 𑀤𑀽𑀭𑁂𑀭𑀽𑀧𑀁, 𑀅𑀧𑁆𑀧𑀝𑀺𑀖𑀭𑀽𑀧𑀜𑁆𑀘. 𑀧𑀲𑀸𑀤𑀸, 𑀳𑀤𑀬𑀜𑁆𑀘 𑀯𑀢𑁆𑀣𑀼𑀭𑀽𑀧𑀁, 𑀇𑀢𑀭𑀁 𑀅𑀯𑀢𑁆𑀣𑀼𑀭𑀽𑀧𑀁. 𑀧𑀲𑀸𑀤𑀸, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀜𑁆𑀘 𑀤𑁆𑀯𑀸𑀭𑀭𑀽𑀧𑀁, 𑀇𑀢𑀭𑀁 𑀅𑀤𑁆𑀯𑀸𑀭𑀁. 𑀧𑀲𑀸𑀤𑀸 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁, 𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀜𑁆𑀘, 𑀇𑀢𑀭𑀁 𑀩𑀸𑀳𑀺𑀭𑀁, 𑀅𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀜𑁆𑀘. 𑀘𑀢𑁆𑀢𑀸𑀭𑀺 𑀪𑀽𑀢𑀭𑀽𑀧𑀸𑀦𑀺, 𑀭𑀽𑀧𑀕𑀦𑁆𑀥𑀭𑀲𑀑𑀚𑀸 𑀘𑀸𑀢𑀺 𑀇𑀤𑀁 𑀲𑀼𑀤𑁆𑀥𑀝𑁆𑀞𑀓𑀁 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁.

𑀘𑀓𑁆𑀔𑀼 𑀦𑀘𑀓𑁆𑀔𑀽𑀢𑀺 𑀏𑀯𑀫𑀸𑀤𑀺𑀯𑀲𑁂𑀦 𑀘 𑀤𑀼𑀯𑀺𑀥𑀁 𑀳𑁄𑀢𑀺. 𑀧𑀼𑀦 𑀢𑀁 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑁂𑀲𑀫𑁄𑀴𑀸𑀭𑀺𑀓𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑀩𑁆𑀩𑀫𑁆𑀧𑀺 𑀲𑀼𑀔𑀼𑀫𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁. 𑀢𑀣𑀸 𑀓𑀫𑁆𑀫𑀚𑀸𑀤𑀺𑀢𑁆𑀢𑀺𑀓𑀯𑀲𑁂𑀦. 𑀢𑀢𑁆𑀣 𑀦𑀯𑀯𑀺𑀥𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀁, 𑀲𑀼𑀤𑁆𑀥𑀝𑁆𑀞𑀓𑀁, 𑀆𑀓𑀸𑀲𑁄 𑀘 𑀓𑀫𑁆𑀫𑀚𑀁 𑀦𑀸𑀫, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁, 𑀮𑀳𑀼𑀢𑀸𑀤𑀺𑀢𑁆𑀢𑀬𑀜𑁆𑀘 𑀲𑀤𑁆𑀤𑁄 ¶ 𑀘 𑀅𑀓𑀫𑁆𑀫𑀚𑀁 𑀦𑀸𑀫, 𑀉𑀧𑀘𑀬𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀮𑀓𑁆𑀔𑀡𑀭𑀽𑀧𑀁 𑀅𑀚𑀁 𑀦𑀸𑀫. 𑀲𑀼𑀤𑁆𑀥𑀝𑁆𑀞𑀓𑀁, 𑀆𑀓𑀸𑀲𑁄, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀲𑀤𑁆𑀤𑁄 𑀘 𑀘𑀺𑀢𑁆𑀢𑀚𑀁 𑀦𑀸𑀫, 𑀢𑀤𑀯𑀲𑁂𑀲𑀁 𑀮𑀓𑁆𑀔𑀡𑀭𑀽𑀧𑀯𑀺𑀭𑀳𑀺𑀢𑀁 𑀅𑀘𑀺𑀢𑁆𑀢𑀚𑀁 𑀦𑀸𑀫, 𑀮𑀓𑁆𑀔𑀡𑀭𑀽𑀧𑀁 𑀅𑀚𑀁 𑀦𑀸𑀫. 𑀲𑀼𑀤𑁆𑀥𑀝𑁆𑀞𑀓𑀁, 𑀆𑀓𑀸𑀲𑁄, 𑀮𑀳𑀼𑀢𑀸𑀤𑀺𑀢𑁆𑀢𑀬𑀜𑁆𑀘 𑀆𑀳𑀸𑀭𑀚𑀁 𑀦𑀸𑀫, 𑀲𑁂𑀲𑀁 𑀮𑀓𑁆𑀔𑀡𑀯𑀚𑁆𑀚𑀺𑀢𑀁 ¶ 𑀅𑀦𑀸𑀳𑀸𑀭𑀚𑀁 𑀦𑀸𑀫, 𑀮𑀓𑁆𑀔𑀡𑀁 𑀅𑀚𑀁 𑀦𑀸𑀫. 𑀲𑀼𑀤𑁆𑀥𑀝𑁆𑀞𑀓𑀁, 𑀆𑀓𑀸𑀲𑁄, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀲𑀤𑁆𑀤𑁄 𑀘 𑀉𑀢𑀼𑀚𑀁 𑀦𑀸𑀫, 𑀲𑁂𑀲𑀁 𑀮𑀓𑁆𑀔𑀡𑀯𑀺𑀭𑀳𑀺𑀢𑀁 𑀅𑀦𑀼𑀢𑀼𑀚𑀁 𑀦𑀸𑀫, 𑀮𑀓𑁆𑀔𑀡𑀁 𑀅𑀚𑀁 𑀦𑀸𑀫. 𑀮𑀓𑁆𑀔𑀡𑀸𑀦𑀺 𑀳𑀺 𑀚𑀸𑀬𑀫𑀸𑀦𑀚𑀻𑀬𑀫𑀸𑀦𑀧𑀭𑀺𑀪𑀺𑀚𑁆𑀚𑀫𑀸𑀦𑀥𑀫𑁆𑀫𑀸𑀦𑀁 𑀲𑀪𑀸𑀯𑀢𑀸𑀬 𑀓𑀼𑀢𑁄𑀘𑀺 𑀚𑀸𑀢𑀺𑀯𑁄𑀳𑀸𑀭𑀁 𑀦 𑀮𑀪𑀦𑁆𑀢𑀺 𑀪𑁂𑀲𑀫𑁆𑀧𑀺 𑀚𑀸𑀢𑀺𑀆𑀤𑀺𑀧𑁆𑀧𑀲𑀗𑁆𑀕𑀢𑁄. 𑀦 𑀳𑀺 ‘‘𑀚𑀸𑀢𑀺 𑀚𑀸𑀬𑀢𑀺, 𑀚𑀭𑀸 𑀚𑀻𑀭𑀢𑀺, 𑀫𑀭𑀡𑀁 𑀫𑀻𑀬𑀢𑀻’’𑀢𑀺 𑀯𑁄𑀳𑀭𑀺𑀢𑀼𑀁 𑀬𑀼𑀢𑁆𑀢𑀁 𑀅𑀦𑀯𑀝𑁆𑀞𑀸𑀦𑀢𑁄. 𑀢𑀤𑀯𑀲𑁂𑀲𑀸𑀦𑀁 𑀧𑀦 𑀆𑀓𑀸𑀲𑀯𑀺𑀜𑁆𑀜𑀢𑁆𑀢𑀸𑀤𑀺𑀅𑀦𑀺𑀧𑁆𑀨𑀦𑁆𑀦𑀸𑀦𑀁 𑀬𑀤𑀺𑀧𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑀸𑀬 𑀦 𑀓𑀼𑀢𑁄𑀘𑀺 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀣𑀸𑀧𑀺 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀭𑀽𑀧𑀁 𑀉𑀧𑀸𑀤𑀸𑀬 𑀦𑁂𑀲𑀁 𑀯𑀺𑀚𑁆𑀚𑀫𑀸𑀦𑀯𑁄𑀳𑀸𑀭𑀲𑁆𑀲𑁂𑀯 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀯𑁄𑀳𑀸𑀭𑀲𑁆𑀲𑀸𑀧𑀺 𑀯𑀺𑀭𑁄𑀥𑀸𑀪𑀸𑀯𑀢𑁄 𑀲𑀳𑁂𑀢𑀼𑀓𑀢𑀸 𑀯𑀼𑀢𑁆𑀢𑀸. 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀭𑀽𑀧𑀸𑀬𑀢𑀦𑀁…𑀧𑁂… 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀇𑀫𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁦𑁨) 𑀚𑀸𑀢𑀺𑀬𑀸𑀧𑀺 𑀓𑀼𑀢𑁄𑀘𑀺 𑀚𑀸𑀢𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀚𑀦𑀓𑀧𑀘𑁆𑀘𑀬𑀸𑀦𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀮𑀓𑁆𑀔𑀡𑁂 𑀤𑀺𑀝𑁆𑀞𑀢𑁆𑀢𑀸 𑀭𑀽𑀧𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀚𑀭𑀸𑀫𑀭𑀡𑀸𑀦𑀁 𑀧𑀦 𑀭𑀽𑀧𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀅𑀪𑀸𑀯𑀢𑁄 𑀦 𑀯𑀼𑀢𑁆𑀢𑀁. ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀇𑀤𑀁 𑀧𑀦 𑀚𑀭𑀸𑀫𑀭𑀡𑀲𑀻𑀲𑁂𑀦 𑀢𑀣𑀸𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀤𑀻𑀦𑀫𑁂𑀯 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀢𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀢𑀁 𑀉𑀧𑀸𑀤𑀸, 𑀬𑀁 𑀢𑀁 𑀭𑀽𑀧𑀁 𑀩𑀸𑀳𑀺𑀭𑀁, 𑀢𑀁 𑀅𑀢𑁆𑀣𑀺 𑀉𑀧𑀸𑀤𑀸, 𑀅𑀢𑁆𑀣𑀺 𑀦𑁄 𑀉𑀧𑀸𑀤𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑀸𑀧𑀺 𑀢𑀺𑀯𑀺𑀥𑀁 𑀳𑁄𑀢𑀺.

𑀧𑀼𑀦 ¶ 𑀢𑀁 𑀲𑀩𑁆𑀩𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀦𑀸𑀫, 𑀲𑀤𑁆𑀤𑁄 𑀲𑀼𑀢𑀁 𑀦𑀸𑀫, 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀺 𑀧𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑀢𑁄 𑀫𑀼𑀢𑀁 𑀦𑀸𑀫, 𑀲𑁂𑀲𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑁄 𑀯𑀺𑀜𑁆𑀜𑀸𑀢𑀁 𑀦𑀸𑀫. 𑀢𑀣𑀸 𑀭𑀽𑀧𑀭𑀽𑀧𑀘𑀢𑀼𑀓𑁆𑀓𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀢𑀢𑁆𑀣 𑀅𑀝𑁆𑀞𑀸𑀭𑀲𑀯𑀺𑀥𑀁 𑀦𑀺𑀧𑁆𑀨𑀦𑁆𑀦𑀁 𑀭𑀽𑀧𑀭𑀽𑀧𑀁 𑀦𑀸𑀫, 𑀆𑀓𑀸𑀲𑁄 𑀧𑀭𑀺𑀘𑁆𑀙𑁂𑀤𑀭𑀽𑀧𑀁 𑀦𑀸𑀫, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁, 𑀮𑀳𑀼𑀢𑀸𑀤𑀺𑀢𑁆𑀢𑀬𑀜𑁆𑀘 𑀯𑀺𑀓𑀸𑀭𑀭𑀽𑀧𑀁 𑀦𑀸𑀫, 𑀉𑀧𑀘𑀬𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀮𑀓𑁆𑀔𑀡𑀭𑀽𑀧𑀁 𑀦𑀸𑀫. 𑀢𑀣𑀸 𑀳𑀤𑀬𑀯𑀢𑁆𑀣𑀼 𑀯𑀢𑁆𑀣𑀼, 𑀦 𑀤𑁆𑀯𑀸𑀭𑀁 𑀦𑀸𑀫, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀤𑁆𑀯𑀸𑀭𑀁, 𑀦 𑀯𑀢𑁆𑀣𑀼 𑀦𑀸𑀫, 𑀘𑀓𑁆𑀔𑀸𑀤𑀬𑁄 𑀧𑀜𑁆𑀘 𑀧𑀲𑀸𑀤𑀸 𑀯𑀢𑁆𑀣𑀼 𑀘𑁂𑀯 𑀤𑁆𑀯𑀸𑀭𑀜𑁆𑀘 𑀦𑀸𑀫, 𑀲𑁂𑀲𑀁 𑀦𑁂𑀯 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀢𑀁 𑀧𑀼𑀦 𑀏𑀓𑀚𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀦𑀯𑀯𑀺𑀥𑀁 𑀳𑀺 𑀉𑀧𑀸𑀤𑀺𑀦𑁆𑀦𑀭𑀽𑀧𑀁 𑀓𑀫𑁆𑀫𑁂𑀦𑁂𑀯, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀜𑁆𑀘 𑀘𑀺𑀢𑁆𑀢𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀏𑀓𑀚𑀁 𑀦𑀸𑀫, 𑀲𑀤𑁆𑀤𑁄 𑀉𑀢𑀼𑀘𑀺𑀢𑁆𑀢𑁂𑀳𑀺 𑀉𑀧𑁆𑀧𑀚𑁆𑀚𑀦𑀢𑁄 𑀤𑁆𑀯𑀺𑀚𑀁 𑀦𑀸𑀫, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑁆𑀧𑀚𑁆𑀚𑀦𑀢𑁄 𑀢𑀺𑀚𑀁 𑀦𑀸𑀫, 𑀲𑀼𑀤𑁆𑀥𑀝𑁆𑀞𑀓𑀁, 𑀆𑀓𑀸𑀲𑁄 𑀘 𑀘𑀢𑀽𑀳𑀺𑀧𑀺 𑀉𑀧𑁆𑀧𑀚𑁆𑀚𑀦𑀢𑁄 𑀘𑀢𑀼𑀚𑁆𑀚𑀁 𑀦𑀸𑀫, 𑀮𑀓𑁆𑀔𑀡𑀸𑀦𑀺 𑀅𑀚𑀁 𑀦𑀸𑀫. 𑀏𑀯𑀫𑀸𑀤𑀺𑀦𑀸 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺.

𑀢𑀁 𑀧𑀼𑀦 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑀇𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 𑀙𑀩𑁆𑀩𑀺𑀥𑀁. 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 ¶ 𑀲𑀢𑁆𑀢𑀯𑀺𑀥𑀁. 𑀢𑀤𑁂𑀯 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀜𑁆𑀜𑁂𑀬𑁆𑀬𑀁 𑀪𑀽𑀢𑁄𑀧𑀸𑀤𑀸𑀬𑀯𑀲𑁂𑀦 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀺 𑀆𑀧𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑁂𑀯 𑀯𑀺𑀜𑁆𑀜𑁂𑀬𑁆𑀬𑀁 𑀪𑀽𑀢𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀧𑀲𑀸𑀤𑀲𑀳𑀺𑀢𑀲𑀼𑀔𑀼𑀫𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑁄𑀧𑀸𑀤𑀸𑀬𑀭𑀽𑀧𑀁 𑀦𑀸𑀫. 𑀢𑀤𑁂𑀯 𑀧𑀼𑀦 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑁄𑀧𑀸𑀤𑀸𑀬𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀦𑀯𑀯𑀺𑀥𑀁 𑀳𑁄𑀢𑀺. 𑀢𑀁 𑀧𑀼𑀦 𑀧𑀲𑀸𑀤𑀯𑀺𑀲𑀬𑀆𑀧𑁄𑀥𑀸𑀢𑀼𑀪𑀸𑀯𑀳𑀤𑀬𑀚𑀻𑀯𑀺𑀢𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀮𑀓𑁆𑀔𑀡𑀆𑀳𑀸𑀭𑀯𑀲𑁂𑀦 𑀤𑀲𑀯𑀺𑀥𑀁 𑀳𑁄𑀢𑀺.

𑀢𑀤𑁂𑀯 𑀧𑀼𑀦 𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 ¶ 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀏𑀯𑀁 𑀆𑀬𑀢𑀦𑀢𑁄 𑀏𑀓𑀸𑀤𑀲𑀯𑀺𑀥𑀁 𑀳𑁄𑀢𑀺, 𑀢𑀣𑀸 𑀥𑀸𑀢𑀼𑀯𑀲𑁂𑀦. 𑀢𑀢𑁆𑀣 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀪𑀽𑀢𑀢𑁆𑀢𑀬𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 ‘‘𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁, 𑀓𑀸𑀬𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑀼𑀔𑀼𑀫𑀭𑀽𑀧𑀁 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀽𑀢𑀺, 𑀢𑀤𑁂𑀯 𑀧𑀲𑀸𑀤𑀲𑀳𑀺𑀢𑀁 ‘‘𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁, 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀸𑀦𑀜𑁆𑀜𑁂𑀯 𑀪𑀽𑀢𑀸𑀦𑀁 𑀨𑁄𑀝𑁆𑀞𑀩𑁆𑀩𑀢𑀸 𑀯𑀼𑀢𑁆𑀢𑀸, 𑀦𑀦𑀼 𑀆𑀧𑁄𑀥𑀸𑀢𑀼𑀧𑀺 𑀲𑀻𑀢𑀯𑀲𑁂𑀦 𑀨𑀼𑀲𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀢𑀺? 𑀦 𑀲𑀻𑀢𑀲𑁆𑀲𑀸𑀧𑀺 𑀢𑁂𑀚𑁄𑀥𑀸𑀢𑀼𑀢𑁆𑀢𑀸. 𑀉𑀡𑁆𑀳𑀫𑁂𑀯 𑀳𑀺 𑀲𑀻𑀢𑀦𑁆𑀢𑀺 𑀩𑁆𑀬𑀧𑀤𑀺𑀲𑁆𑀲𑀢𑀺. 𑀓𑀞𑀺𑀦𑀸𑀓𑀞𑀺𑀦𑀢𑀁 𑀉𑀧𑀸𑀤𑀸𑀬 𑀭𑀼𑀓𑁆𑀔𑀸𑀤𑀺𑀯𑀺𑀭𑀴𑀘𑁆𑀙𑀸𑀬𑀸 𑀯𑀺𑀬, 𑀢𑀁 𑀯𑀸 𑀉𑀧𑀸𑀤𑀸𑀬 𑀲𑀦𑁆𑀤𑀘𑁆𑀙𑀸𑀬𑀸𑀤𑀺, 𑀅𑀜𑁆𑀜𑀣𑀸 𑀓𑀲𑁆𑀲𑁂𑀢𑀁 𑀲𑀻𑀢𑀢𑁆𑀢𑀁 𑀲𑀪𑀸𑀯𑀁 𑀲𑀺𑀬𑀸. ‘‘𑀆𑀧𑁄𑀥𑀸𑀢𑀼𑀬𑀸’’ 𑀇𑀢𑀺 𑀘𑁂. 𑀬𑀤𑀺 𑀏𑀯𑀁 𑀉𑀡𑁆𑀳𑁄𑀤𑀓𑀸𑀤𑀻𑀲𑀼 𑀆𑀧𑀢𑁆𑀢𑀁 𑀦 𑀲𑀺𑀬𑀸 𑀆𑀧𑁄𑀢𑁂𑀚𑀸𑀦𑀜𑁆𑀘 𑀲𑀳𑀧𑀯𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀮𑀓𑁆𑀔𑀡𑀢𑁆𑀢𑀸, 𑀦 𑀘 𑀲𑀸 𑀢𑁂𑀚𑁄𑀲𑀦𑁆𑀦𑀺𑀥𑀸𑀦𑁂 𑀲𑀻𑀢𑀢𑁆𑀢𑀁 𑀯𑀺𑀳𑀸𑀬 𑀢𑀺𑀝𑁆𑀞𑀢𑀺. 𑀦 𑀳𑀺 𑀲𑀪𑀸𑀯𑀸 𑀓𑁂𑀦𑀘𑀺 𑀲𑀳𑀪𑀸𑀯𑁂𑀦 𑀢𑀁𑀲𑀪𑀸𑀯𑀁 𑀚𑀳𑀦𑁆𑀢𑀺 𑀅𑀪𑀸𑀯𑀸𑀧𑀢𑁆𑀢𑀺𑀢𑁄, 𑀦𑀸𑀧𑀺𑀲𑁆𑀲𑀸 𑀲𑀻𑀢𑀪𑀸𑀯𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀧𑀭𑀲𑀪𑀸𑀯𑁄 𑀅𑀢𑁆𑀣𑀺, 𑀬𑁂𑀦 𑀲𑀳𑀪𑀸𑀯𑁄 𑀬𑀼𑀚𑁆𑀚𑁂𑀬𑁆𑀬. 𑀬𑀤𑀺 𑀲𑀺𑀬𑀸 ‘‘𑀆𑀧𑁄 𑀲𑀻𑀢𑀢𑁆𑀢’’𑀦𑁆𑀢𑀺, 𑀪𑀸𑀯𑀤𑁆𑀯𑀬𑀁 𑀲𑀺𑀬𑀸 𑀅𑀜𑁆𑀜𑁄𑀜𑁆𑀜𑀯𑀺𑀮𑀓𑁆𑀔𑀡𑀲𑀪𑀸𑀯𑀢𑁆𑀢𑀸 𑀪𑀸𑀯𑀲𑁆𑀲, 𑀅𑀣𑀸𑀧𑀺 𑀦 𑀲𑀻𑀢𑀢𑁆𑀢𑀁, 𑀆𑀧𑁄𑀥𑀸𑀢𑀼𑀬𑀸 𑀲𑀭𑀽𑀧𑀁 𑀲𑀻𑀢𑀕𑀼𑀡𑁄, 𑀲𑁄 𑀘 𑀉𑀡𑁆𑀳𑀲𑀦𑁆𑀦𑀺𑀥𑀸𑀦𑁂 𑀯𑀺𑀕𑀘𑁆𑀙𑀢𑀺, 𑀕𑀼𑀡𑀻𑀭𑀽𑀧𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀘𑁂? 𑀢𑀤𑀸 𑀢𑀳𑀺𑀁 𑀲𑀬𑀁 𑀅𑀨𑁄𑀝𑁆𑀞𑀩𑁆𑀩𑀸𑀯 𑀆𑀧𑁄𑀥𑀸𑀢𑀼, 𑀦 𑀦𑀺𑀬𑀢𑀨𑀲𑁆𑀲𑀯𑀢𑀻𑀢𑀺 𑀘 𑀲𑀺𑀬𑀸, 𑀬𑁄 𑀘 𑀲𑀻𑀢𑀨𑀲𑁆𑀲𑁄 𑀕𑀼𑀡𑁄𑀢𑀺 𑀲𑀼𑀯𑀼𑀢𑁆𑀢𑁄, 𑀲𑁄 𑀅𑀫𑁆𑀳𑁂𑀳𑀺 𑀢𑁂𑀚𑁄𑀥𑀸𑀢𑀼𑀯𑀺𑀲𑁂𑀲𑁄𑀢𑀺.

𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺 𑀘𑁂, 𑀦𑀦𑀼 𑀲𑀻𑀢𑀢𑁆𑀢𑀁, 𑀉𑀡𑁆𑀳𑀢𑁆𑀢𑀜𑁆𑀘 𑀅𑀜𑁆𑀜𑁄𑀜𑁆𑀜𑀯𑀺𑀭𑀼𑀤𑁆𑀥𑀁, 𑀓𑀣𑀁 𑀢𑁂𑀚𑁄𑀥𑀸𑀢𑀼𑀬𑀸 𑀲𑀪𑀸𑀯𑀁 𑀲𑀺𑀬𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀏𑀓𑀓𑀮𑀸𑀧𑁂 𑀢𑁂𑀲𑀁 𑀲𑀫𑁆𑀪𑀯𑀸𑀪𑀸𑀯𑀢𑁄, 𑀪𑀺𑀦𑁆𑀦𑀓𑀮𑀸𑀧𑁂𑀲𑀼 ¶ 𑀧𑀦 𑀧𑀯𑀢𑁆𑀢𑀺𑀬𑀁 𑀆𑀮𑁄𑀓𑀦𑁆𑀥𑀓𑀸𑀭𑀦𑀻𑀮𑀧𑀻𑀢𑀸𑀤𑀻𑀦𑀁 𑀯𑀡𑁆𑀡𑀸𑀬𑀢𑀦𑀢𑀸 𑀯𑀺𑀬 𑀢𑁂𑀚𑁄𑀥𑀸𑀢𑀼𑀢𑁆𑀢𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀬𑀤𑀺 𑀆𑀧𑁄𑀥𑀸𑀢𑀼𑀬𑀸 𑀦 𑀲𑀻𑀢𑀢𑁆𑀢𑀁 𑀲𑀭𑀽𑀧𑀁, 𑀓𑀺𑀁 𑀧𑀦𑀲𑁆𑀲𑀸 𑀲𑀭𑀽𑀧𑀦𑁆𑀢𑀺? 𑀤𑁆𑀭𑀯𑀢𑀸. 𑀬𑀤𑀺 𑀏𑀯𑀁 𑀤𑁆𑀭𑀯𑀢𑀸𑀧𑀺 𑀨𑀼𑀲𑀺𑀢𑁆𑀯𑀸 ¶ 𑀜𑀸𑀢𑀩𑁆𑀩𑀢𑁄 𑀨𑁄𑀝𑁆𑀞𑀩𑁆𑀩𑀁 𑀲𑀺𑀬𑀸𑀢𑀺? 𑀦 𑀲𑀻𑀢𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀫𑀦𑀲𑀸𑀯 𑀯𑀡𑁆𑀡𑀁 𑀤𑀺𑀲𑁆𑀯𑀸 𑀜𑀸𑀢𑀩𑁆𑀩𑀢𑁄. 𑀅𑀦𑁆𑀥𑀓𑀸𑀭𑁂 𑀲𑀬𑀦𑁆𑀢𑀸 𑀳𑀺 𑀅𑀢𑀺𑀲𑀻𑀢𑀮𑀢𑀸𑀬 𑀧𑀢𑁆𑀢𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 ‘‘𑀉𑀤𑀓𑀁 𑀏𑀢𑁆𑀣𑀸’’𑀢𑀺 𑀆𑀲𑀗𑁆𑀓𑀺𑀢𑀸 𑀳𑁄𑀦𑁆𑀢𑀺, 𑀉𑀤𑀓𑀁 𑀯𑀸 𑀨𑀼𑀲𑀺𑀢𑁆𑀯𑀸 𑀲𑀧𑁆𑀧𑀸𑀤𑀺𑀲𑀜𑁆𑀜𑀺𑀦𑁄, 𑀢𑀲𑁆𑀫𑀸 𑀅𑀨𑁄𑀝𑁆𑀞𑀩𑁆𑀩𑀫𑁂𑀯 𑀆𑀧𑁄𑀥𑀸𑀢𑀼, 𑀇𑀢𑀭𑀪𑀽𑀢𑀢𑁆𑀢𑀬𑀫𑁂𑀯 𑀨𑁄𑀝𑁆𑀞𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀺𑀁 𑀧𑀦𑁂𑀢𑀁 𑀪𑀽𑀢𑀢𑁆𑀢𑀬𑀁 𑀏𑀓𑀢𑁄 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀲𑀓𑁆𑀓𑁄𑀢𑀻𑀢𑀺? 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀆𑀪𑀼𑀚𑀺𑀢𑀯𑀲𑁂𑀦 𑀯𑀸 𑀉𑀲𑁆𑀲𑀤𑀯𑀲𑁂𑀦 𑀯𑀸 𑀢𑁂𑀲𑀼 𑀏𑀓𑀫𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀢𑁄. 𑀆𑀪𑀼𑀚𑀺𑀢𑀯𑀲𑁂𑀦 𑀳𑀺 𑀑𑀤𑀦𑀣𑀸𑀮𑀺𑀬𑀁 𑀲𑀺𑀢𑁆𑀣𑀁 𑀕𑀳𑁂𑀢𑁆𑀯𑀸 𑀣𑀤𑁆𑀥𑀫𑀼𑀤𑀼𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑀲𑁆𑀲, 𑀉𑀡𑁆𑀳𑁄𑀤𑀓𑀪𑀸𑀚𑀦𑁂 𑀯𑀸 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀉𑀡𑁆𑀳𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑀲𑁆𑀲, 𑀉𑀡𑁆𑀳𑀲𑀫𑀬𑁂 𑀯𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸𑀢𑁂𑀦 𑀲𑀭𑀻𑀭𑀁 𑀧𑀳𑀭𑀸𑀧𑁂𑀦𑁆𑀢𑀲𑁆𑀲 𑀘 𑀢𑀢𑁆𑀣 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀢𑀭𑀁 𑀪𑀽𑀢𑀢𑁆𑀢𑀬𑀫𑁆𑀧𑀺 𑀅𑀢𑁆𑀣𑀺, 𑀬𑀣𑀸𑀪𑀼𑀚𑀺𑀢𑀁 𑀧𑀦 𑀢𑀁𑀢𑀁𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀫𑁂𑀯 𑀬𑀣𑀸𑀓𑁆𑀓𑀫𑀁 𑀆𑀭𑀩𑁆𑀪 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀆𑀪𑀼𑀚𑀺𑀢𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺 𑀦𑀸𑀫. 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀪𑀼𑀜𑁆𑀚𑀦𑀲𑀫𑀬𑁂 𑀲𑀓𑁆𑀔𑀭𑀁 𑀟𑀁𑀲𑀦𑁆𑀢𑀲𑁆𑀲, 𑀫𑀕𑁆𑀕𑁂 𑀯𑀸 𑀅𑀕𑁆𑀕𑀺𑀁 𑀅𑀓𑁆𑀓𑀫𑀦𑁆𑀢𑀲𑁆𑀲, 𑀩𑀮𑀯𑀯𑀸𑀢𑁂𑀦 𑀯𑀸 𑀓𑀡𑁆𑀡𑀲𑀓𑁆𑀔𑀮𑀺𑀬𑀫𑁆𑀧𑀺 𑀧𑀳𑀭𑀦𑁆𑀢𑀲𑁆𑀲 𑀘 𑀢𑀢𑁆𑀣 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀢𑀭𑀪𑀽𑀢𑀢𑁆𑀢𑀬𑀫𑁆𑀧𑀺 𑀅𑀢𑁆𑀣𑀺, 𑀬𑀣𑀸𑀉𑀲𑁆𑀲𑀤𑀁 𑀧𑀦 𑀢𑀁𑀢𑀁𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀫𑁂𑀯𑀸𑀭𑀩𑁆𑀪 𑀬𑀣𑀸𑀓𑁆𑀓𑀫𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀕𑁆𑀕𑀺𑀫𑁆𑀳𑀺 𑀯𑀸 𑀦𑀺𑀫𑀼𑀕𑁆𑀕𑀲𑀓𑀮𑀲𑀭𑀻𑀭𑀲𑁆𑀲 𑀬𑀤𑀺𑀧𑀺 𑀏𑀓𑀧𑁆𑀧𑀳𑀸𑀭𑁂𑀦 𑀅𑀕𑁆𑀕𑀺𑀦𑀸 𑀓𑀸𑀬𑁄 𑀖𑀝𑁆𑀝𑀻𑀬𑀢𑀺, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀸𑀬𑀧𑁆𑀧𑀲𑀸𑀤𑁄 𑀉𑀲𑁆𑀲𑀦𑁆𑀦𑁄 𑀳𑁄𑀢𑀺, 𑀬𑀢𑁆𑀣 𑀬𑀢𑁆𑀣 𑀯𑀸 𑀧𑀦 𑀯𑀺𑀲𑀬𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀞𑀫𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 ¶ 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀇𑀢𑀭𑀝𑁆𑀞𑀸𑀦𑁂𑀲𑀼. 𑀔𑀡𑀧𑀭𑀺𑀢𑁆𑀢𑀢𑀸𑀬 𑀧𑀦 𑀲𑀳𑀲𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑁂𑀦 𑀲𑀓𑀮𑀲𑀭𑀻𑀭𑀁 𑀟𑀬𑁆𑀳𑀫𑀸𑀦𑀁 𑀯𑀺𑀬 𑀔𑀸𑀬𑀢𑀺. 𑀦 𑀳𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀩𑀳𑀽𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀩𑁆𑀬𑀸𑀧𑁂𑀢𑁆𑀯𑀸 𑀯𑀸 𑀏𑀓𑀁. 𑀏𑀓𑁂𑀓𑀲𑁆𑀫𑀺𑀁 𑀧𑀦 𑀅𑀯𑀺𑀦𑀺𑀩𑁆𑀪𑁄𑀕𑁂 𑀓𑀸𑀬𑀤𑀲𑀓𑁂 𑀏𑀓𑀫𑁂𑀯 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀲𑁆𑀲𑀤𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀇𑀢𑀭𑀯𑀢𑁆𑀣𑀽𑀲𑀼𑀧𑀺 𑀯𑀺𑀜𑁆𑀜𑀸𑀡𑀸𑀦𑀁 𑀅𑀯𑀺𑀦𑀺𑀩𑁆𑀪𑁄𑀕𑁂 𑀧𑀤𑁂𑀲𑁂 𑀏𑀓𑁂𑀓𑀸𑀦𑀫𑁂𑀯 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀉𑀲𑁆𑀲𑀤𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺 𑀦𑀸𑀫.

𑀓𑁂𑀦 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺 𑀳𑁄𑀢𑀻𑀢𑀺? 𑀅𑀚𑁆𑀛𑀸𑀲𑀬𑀢𑁄, 𑀯𑀺𑀲𑀬𑀸𑀥𑀺𑀫𑀢𑁆𑀢𑀢𑁄 𑀯𑀸. 𑀦𑀸𑀦𑀸𑀞𑀸𑀦𑁂𑀲𑀼 𑀳𑀺 𑀘𑀺𑀢𑁆𑀢𑀧𑀝𑀺𑀫𑀸𑀤𑀻𑀦𑀺 𑀧𑀲𑁆𑀲𑀺𑀢𑀼𑀓𑀸𑀫𑀲𑁆𑀲 𑀧𑀞𑀫𑀁 𑀏𑀓𑀝𑁆𑀞𑀸𑀦𑁂 𑀤𑀺𑀲𑁆𑀯𑀸 𑀢𑀢𑁄 𑀇𑀢𑀭𑀝𑁆𑀞𑀸𑀦𑁂𑀲𑀼 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀺𑀢𑀼𑀁 𑀲𑀭𑀲𑁂𑀦𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀅𑀚𑁆𑀛𑀸𑀲𑀬𑀢𑁄 𑀲𑀗𑁆𑀓𑀦𑁆𑀢𑀺 𑀳𑁄𑀢𑀺. 𑀭𑀽𑀧𑀸𑀭𑀫𑁆𑀫𑀡𑀁 𑀧𑀦 𑀫𑀳𑀦𑁆𑀢𑀫𑁆𑀧𑀺 𑀧𑀲𑁆𑀲𑀦𑁆𑀢𑀲𑁆𑀲 𑀲𑀩𑁆𑀩𑀢𑀽𑀭𑀺𑀬𑀦𑀺𑀕𑁆𑀖𑁄𑀲𑁂 𑀉𑀝𑁆𑀞𑀺𑀢𑁂 𑀢𑀁 𑀯𑀸 𑀲𑀼𑀡𑀦𑁆𑀢𑀲𑁆𑀲 𑀫𑀦𑀼𑀜𑁆𑀜𑀸𑀫𑀦𑀼𑀜𑁆𑀜𑁂 𑀅𑀥𑀺𑀫𑀢𑁆𑀢𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂 ¶ 𑀇𑀦𑁆𑀤𑁆𑀭𑀺𑀬𑁂𑀲𑀼 𑀖𑀝𑁆𑀝𑀺𑀢𑁂 𑀇𑀢𑀭𑀺𑀢𑀭𑁂 𑀘𑀺𑀢𑁆𑀢𑀁 𑀲𑀗𑁆𑀓𑀫𑀢𑀺, 𑀏𑀯𑀁 𑀯𑀺𑀲𑀬𑀸𑀥𑀺𑀫𑀢𑁆𑀢𑀢𑁄 𑀲𑀗𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀕𑀳𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀲𑀼𑀜𑁆𑀜𑀢𑁄, 𑀧𑀦 𑀅𑀢𑀻𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑁂𑀓𑀁 𑀅𑀦𑀦𑁆𑀢𑀧𑁆𑀧𑀪𑁂𑀤𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀘𑀺𑀢𑁆𑀢𑀯𑀺𑀪𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀼𑀝𑁆𑀞𑀸𑀦𑀢𑁄, 𑀧𑀦𑁂𑀢𑁆𑀣 𑀪𑀯𑀬𑁄𑀦𑀻𑀲𑀼 𑀧𑀯𑀢𑁆𑀢𑀺𑀓𑁆𑀓𑀫𑀢𑁄 𑀘 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸𑀦𑀺 𑀳𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀤𑀲𑀓𑀸𑀤𑀺𑀓𑀮𑀸𑀧𑀯𑀲𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀧𑁆𑀧𑀯𑀢𑁆𑀢𑀻𑀲𑀼 𑀬𑀣𑀸𑀲𑀫𑁆𑀪𑀯𑀁 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀚𑁂𑀲𑀼 𑀢𑀸𑀯 𑀯𑀻𑀲𑀢𑀺𑀬𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀓𑀸𑀫𑀮𑁄𑀓𑁂𑀬𑁂𑀯 𑀲𑀁𑀲𑁂𑀤𑀚𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀜𑁆𑀘 𑀙 𑀯𑀢𑁆𑀣𑀽𑀦𑀺, 𑀪𑀸𑀯𑀤𑁆𑀯𑀬𑁂 𑀅𑀜𑁆𑀜𑀢𑀭𑀁, 𑀚𑀻𑀯𑀺𑀢𑀜𑁆𑀘𑀸𑀢𑀺 𑀅𑀝𑁆𑀞 𑀭𑀽𑀧𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀸𑀦𑀺 𑀘 𑀲𑀼𑀤𑁆𑀥𑀝𑁆𑀞𑀓𑀁, 𑀚𑀻𑀯𑀺𑀢𑀜𑁆𑀘 𑀚𑀻𑀯𑀺𑀢𑀦𑀯𑀓𑀁, 𑀢𑀤𑁂𑀯 𑀦𑀯𑀓𑀁 𑀘𑀓𑁆𑀔𑀼𑀦𑀸 𑀲𑀳 ¶ 𑀘𑀓𑁆𑀔𑀼𑀤𑀲𑀓𑀁, 𑀲𑁄𑀢𑁂𑀦 𑀲𑁄𑀢𑀤𑀲𑀓𑀁, 𑀖𑀸𑀦𑁂𑀦 𑀖𑀸𑀦𑀤𑀲𑀓𑀁, 𑀚𑀺𑀯𑁆𑀳𑀸𑀬 𑀚𑀺𑀯𑁆𑀳𑀸𑀤𑀲𑀓𑀁, 𑀓𑀸𑀬𑁂𑀦 𑀓𑀸𑀬𑀤𑀲𑀓𑀁, 𑀳𑀤𑀬𑀯𑀢𑁆𑀣𑀼𑀦𑀸 𑀯𑀢𑁆𑀣𑀼𑀤𑀲𑀓𑀁, 𑀪𑀸𑀯𑀜𑁆𑀜𑀢𑀭𑁂𑀦 𑀪𑀸𑀯𑀤𑀲𑀓𑀜𑁆𑀘𑀸𑀢𑀺 𑀦𑀯 𑀓𑀮𑀸𑀧𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑀧𑀼𑀁𑀲𑀓𑀸𑀦𑀁 𑀧𑀦𑁂𑀢𑁆𑀣 𑀪𑀸𑀯𑀤𑀲𑀓𑀁 𑀦𑀢𑁆𑀣𑀺, 𑀢𑀣𑀸 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀤𑀲𑀓𑀸𑀦𑀺. 𑀏𑀯𑀁 𑀅𑀡𑁆𑀟𑀚𑀚𑀮𑀸𑀩𑀼𑀚𑀸𑀦𑀫𑁆𑀧𑀺, 𑀢𑁂𑀲𑀁 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀸𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀧𑀯𑀢𑁆𑀢𑀺𑀓𑀸𑀮𑁂 𑀚𑀻𑀯𑀺𑀢𑀦𑀯𑀓𑀘𑀓𑁆𑀔𑀼𑀤𑀲𑀓𑀸𑀤𑀻𑀦𑀺 𑀬𑀣𑀸𑀦𑀼𑀭𑀽𑀧𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀽𑀧𑀪𑀯𑁂 𑀧𑀦 𑀖𑀸𑀦𑀤𑀲𑀓𑀸𑀤𑀺𑀢𑁆𑀢𑀬𑀁, 𑀪𑀸𑀯𑀤𑀲𑀓𑀤𑁆𑀯𑀬𑀁, 𑀉𑀤𑀭𑀕𑁆𑀕𑀺𑀦𑀯𑀓𑀜𑁆𑀘 𑀦𑀢𑁆𑀣𑀺, 𑀲𑁂𑀲𑀸𑀦𑀺 𑀧𑀜𑁆𑀘𑀳𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀫𑁆𑀫𑁂𑀳𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀜𑁆𑀜𑀜𑁆𑀜𑀻𑀦𑀁 𑀧𑀦 𑀧𑀜𑁆𑀘𑀫𑀚𑁆𑀛𑀸𑀦𑀓𑀼𑀲𑀮𑁂𑀦 𑀚𑀻𑀯𑀺𑀢𑀦𑀯𑀓𑀫𑁂𑀯. 𑀏𑀯𑀁 𑀓𑀸𑀫𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀸 𑀦𑀯 𑀭𑀽𑀧𑀓𑀮𑀸𑀧𑀸 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀬𑀣𑀸𑀲𑀫𑁆𑀪𑀯𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀼𑀢𑀺𑀘𑀺𑀢𑁆𑀢𑁄𑀧𑀭𑀺𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀞𑀺𑀢𑀺, 𑀢𑀸𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀞𑀺𑀢𑀺𑀪𑀗𑁆𑀕𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀔𑀡𑁂𑀲𑀼 𑀦𑀺𑀭𑀦𑁆𑀢𑀭𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀧𑀪𑀼𑀢𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀘𑀺𑀢𑁆𑀢𑀚𑀸𑀦𑀺 𑀧𑀦 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀆𑀭𑀼𑀧𑁆𑀧𑀯𑀺𑀧𑀸𑀓𑀯𑀚𑁆𑀚𑀺𑀢𑀧𑀜𑁆𑀘𑀲𑀢𑁆𑀢𑀢𑀺𑀘𑀺𑀢𑁆𑀢𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀏𑀯 𑀲𑀫𑀼𑀝𑁆𑀞𑀸𑀧𑀺𑀢𑀸𑀦𑀺 𑀧𑀞𑀫𑀪𑀯𑀗𑁆𑀕𑀫𑀼𑀧𑀸𑀤𑀸𑀬 𑀘𑀼𑀢𑀺𑀘𑀺𑀢𑁆𑀢𑀧𑀭𑀺𑀬𑁄𑀲𑀸𑀦𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀏𑀯 𑀲𑀼𑀤𑁆𑀥𑀝𑁆𑀞𑀓𑀁, 𑀢𑀤𑁂𑀯 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀯𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑁂𑀳𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑀲𑀓𑀁, 𑀮𑀳𑀼𑀢𑀸𑀤𑀺𑀢𑁆𑀢𑀬𑁂𑀦 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀻𑀳𑀺 𑀤𑁆𑀯𑀸𑀤𑀲𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀮𑀳𑀼𑀢𑀸𑀤𑀻𑀳𑀺 𑀢𑁂𑀭𑀲𑀓𑀜𑁆𑀘𑀸𑀢𑀺 𑀙 𑀓𑀮𑀸𑀧𑀸 𑀳𑀼𑀢𑁆𑀯𑀸 𑀬𑀣𑀸𑀬𑁄𑀕𑀁 𑀧𑀯𑀢𑁆𑀢𑀦𑁆𑀢𑀺. 𑀭𑀽𑀧𑀚𑀦𑀓𑀘𑀺𑀢𑁆𑀢𑁂𑀲𑀼 𑀘𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀇𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀳𑀲𑀦𑀲𑀳𑀺𑀢𑀁 ¶ 𑀲𑀩𑁆𑀩𑀁 𑀘𑀺𑀢𑁆𑀢𑀚𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀲𑁂𑀲𑀓𑀸𑀫𑀸𑀯𑀘𑀭𑀚𑀯𑀦𑀸𑀪𑀺𑀜𑁆𑀜𑀸𑀯𑁄𑀝𑁆𑀞𑀩𑁆𑀩𑀦𑀸𑀦𑀺 𑀳𑀲𑀦𑀯𑀚𑁆𑀚𑀁, 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀘 𑀇𑀭𑀺𑀬𑀸𑀧𑀣𑀸𑀤𑀺𑀯𑀺𑀭𑀳𑀺𑀢𑀫𑁂𑀯, 𑀬𑀣𑀸𑀧𑀯𑀢𑁆𑀢𑀁 𑀧𑀦 𑀇𑀭𑀺𑀬𑀸𑀧𑀣𑀁 ¶ 𑀅𑀯𑀺𑀦𑀲𑁆𑀲𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺. 𑀲𑁂𑀲𑀸𑀦𑀺 𑀧𑀦 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀢𑀤𑀸𑀭𑀫𑁆𑀫𑀡𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺, 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀤𑁆𑀤𑀦𑀯𑀓𑀁, 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀲𑀤𑁆𑀤𑀮𑀳𑀼𑀢𑀸𑀤𑀺𑀤𑁆𑀯𑀸𑀤𑀲𑀓𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑁄 𑀓𑀮𑀸𑀧𑁂 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺, 𑀅𑀭𑀳𑀦𑁆𑀢𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀸𑀦𑀺, 𑀅𑀭𑀽𑀧𑀪𑀯𑀽𑀧𑀧𑀦𑁆𑀦𑀸𑀦𑀺 𑀘 𑀦 𑀓𑀺𑀜𑁆𑀘𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀆𑀭𑀼𑀧𑁆𑀧𑀯𑀺𑀧𑀸𑀓𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀲𑀩𑁆𑀩𑀣𑀸 𑀦 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺.

𑀆𑀳𑀸𑀭𑀚𑀸𑀦𑀺 𑀧𑀦 𑀓𑀸𑀫𑀪𑀯𑁂 𑀏𑀯 𑀅𑀚𑁆𑀛𑁄𑀳𑀝𑀸𑀳𑀸𑀭𑁂 𑀞𑀺𑀢𑁂𑀦 𑀞𑀺𑀢𑀺𑀧𑁆𑀧𑀢𑁆𑀢𑁂𑀦 𑀑𑀚𑀸𑀲𑀗𑁆𑀔𑀸𑀢𑁂𑀦 𑀆𑀳𑀸𑀭𑁂𑀦 𑀲𑀫𑀼𑀝𑁆𑀞𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀏𑀯 𑀲𑀼𑀤𑁆𑀥𑀝𑁆𑀞𑀓𑀁, 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀜𑁆𑀘𑀸𑀢𑀺 𑀤𑁆𑀯𑁂 𑀓𑀮𑀸𑀧𑀸 𑀳𑀼𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀧𑀯𑀢𑁆𑀢𑀦𑁆𑀢𑀺, 𑀦 𑀭𑀽𑀧𑀪𑀽𑀫𑀺𑀬𑀁. 𑀉𑀢𑀼𑀚𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀦 𑀢𑁂𑀚𑁄𑀥𑀸𑀢𑀼𑀲𑀗𑁆𑀔𑀸𑀢𑁂𑀦 𑀞𑀺𑀢𑀺𑀧𑁆𑀧𑀢𑁆𑀢𑁂𑀦 𑀉𑀢𑀼𑀦𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀲𑀫𑀼𑀝𑁆𑀞𑀺𑀢𑀸𑀦𑀺 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀤𑁆𑀤𑀦𑀯𑀓𑀁, 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀲𑀤𑁆𑀤𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀲𑀤𑁆𑀤𑀮𑀳𑀼𑀢𑀸𑀤𑀺𑀤𑁆𑀯𑀸𑀤𑀲𑀓𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑁄 𑀓𑀮𑀸𑀧𑀸 𑀳𑀼𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁, 𑀩𑀳𑀺𑀤𑁆𑀥𑀸 𑀧𑀦 𑀧𑀣𑀯𑀻𑀧𑀩𑁆𑀩𑀢𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀸𑀤𑀻𑀲𑀼 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀫𑀼𑀤𑁆𑀤𑀖𑁄𑀲𑀸𑀤𑀺𑀲𑀤𑁆𑀤𑀦𑀯𑀓𑀜𑁆𑀘𑀸𑀢𑀺 𑀤𑁆𑀯𑁂 𑀓𑀮𑀸𑀧𑀸𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀆𑀓𑀸𑀲𑀮𑀓𑁆𑀔𑀡𑀸𑀦𑀺 𑀘𑁂𑀢𑁆𑀣 𑀲𑀩𑁆𑀩𑀓𑀮𑀸𑀧𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀓𑀮𑀸𑀧𑀲𑀗𑁆𑀕𑀳𑁂 𑀯𑁄𑀳𑀸𑀭𑀸𑀪𑀸𑀯𑀸 𑀦 𑀕𑀡𑀻𑀬𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑁂𑀢𑁆𑀣 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀸𑀦𑀺 𑀦 𑀳𑁄𑀦𑁆𑀢𑀺, 𑀦 𑀲𑀩𑁆𑀩𑀢𑁆𑀣𑀸𑀧𑀺 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀚𑀭𑀸𑀫𑀭𑀡𑀸𑀦𑀻𑀢𑀺 𑀏𑀯𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀪𑀯𑀬𑁄𑀦𑀻𑀲𑀼, 𑀧𑀝𑀺𑀲𑀦𑁆𑀥𑀺𑀧𑁆𑀧𑀯𑀢𑁆𑀢𑀻𑀲𑀼 𑀘 𑀧𑀯𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦𑀸𑀧𑀺 𑀘𑁂𑀢𑁆𑀣 𑀢𑀲𑁆𑀲 𑀅𑀚𑁆𑀛𑀢𑁆𑀢𑀁, 𑀫𑀳𑀸𑀪𑀽𑀢𑀸𑀤𑀺𑀯𑀲𑁂𑀦 𑀩𑀳𑀺𑀤𑁆𑀥𑀸 𑀘 𑀧𑀯𑀢𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀚𑁆𑀛𑀢𑁆𑀢𑀺𑀓𑀸 𑀳𑀺 𑀓𑁂𑀲𑀸 𑀮𑁄𑀫𑀸…𑀧𑁂… 𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 𑀇𑀫𑁂 𑀯𑀻𑀲𑀢𑀺 𑀧𑀣𑀯𑀸𑀥𑀺𑀓𑀓𑁄𑀝𑁆𑀞𑀸𑀲𑀸, 𑀧𑀺𑀢𑁆𑀢𑀁…𑀧𑁂… 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂 𑀤𑁆𑀯𑀸𑀤𑀲 𑀆𑀧𑀸𑀥𑀺𑀓𑀓𑁄𑀝𑁆𑀞𑀸𑀲𑀸, 𑀬𑁂𑀦 𑀘 𑀲𑀦𑁆𑀢𑀧𑁆𑀧𑀢𑀺, 𑀬𑁂𑀦 ¶ 𑀘 𑀚𑀻𑀭𑀢𑀺, 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀢𑁂𑀚𑀸𑀥𑀺𑀓𑀓𑁄𑀝𑁆𑀞𑀸𑀲𑀸, 𑀉𑀤𑁆𑀥𑀁𑀕𑀫𑁄 𑀅𑀥𑁄𑀕𑀫𑁄 𑀓𑀼𑀘𑁆𑀙𑀺𑀲𑀬𑁄 𑀓𑁄𑀝𑁆𑀞𑀸𑀲𑀬𑁄 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀻 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀘𑀸𑀢𑀺 𑀇𑀫𑁂 𑀙 𑀯𑀸𑀬𑀼𑀅𑀥𑀺𑀓𑀓𑁄𑀝𑁆𑀞𑀸𑀲𑀸𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀼𑀩𑁆𑀩𑁄 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀉𑀢𑀼𑀚𑀸. 𑀏𑀯𑀫𑁂𑀢𑁂𑀲𑀼 𑀏𑀓𑁂𑀓𑀁 𑀉𑀢𑀼𑀚𑀝𑁆𑀞𑀓𑀫𑁂𑀯 𑀳𑁄𑀢𑀺, 𑀲𑁂𑀤𑁄 𑀅𑀲𑁆𑀲𑀼 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀉𑀢𑀼𑀘𑀺𑀢𑁆𑀢𑀚𑀸, 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑁂 𑀤𑁆𑀯𑁂 𑀅𑀝𑁆𑀞𑀓𑀸 𑀳𑁄𑀦𑁆𑀢𑀺. 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁄 ¶ 𑀢𑁂𑀚𑁄 𑀓𑀫𑁆𑀫𑀚𑁄𑀯, 𑀢𑀢𑁆𑀣 𑀚𑀻𑀯𑀺𑀢𑀦𑀯𑀓𑀫𑁂𑀯. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀧𑀦 𑀘𑀺𑀢𑁆𑀢𑀚𑁄𑀯, 𑀢𑀢𑁆𑀣 𑀘𑀺𑀢𑁆𑀢𑀚𑀲𑀤𑁆𑀤𑀦𑀯𑀓𑀫𑁂𑀯. 𑀇𑀫𑁂 𑀤𑀲 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀚𑀸.

𑀢𑀢𑁆𑀣 𑀅𑀝𑁆𑀞𑀲𑀼 𑀢𑁂𑀚𑁄𑀯𑀸𑀬𑁄𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀯 𑀢𑀻𑀡𑀺 𑀘 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀝𑁆𑀞𑀓𑀸𑀦𑀺 𑀳𑁄𑀦𑁆𑀢𑀺, 𑀯𑀸𑀬𑁄𑀓𑁄𑀝𑁆𑀞𑀸𑀲𑁂𑀲𑀼 𑀘𑁂𑀢𑁆𑀣 𑀉𑀢𑀼𑀘𑀺𑀢𑁆𑀢𑀚𑀲𑀤𑁆𑀤𑀦𑀯𑀓𑀫𑁆𑀧𑀺 𑀳𑁄𑀢𑀺, 𑀲𑁂𑀲𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀤𑁆𑀯𑁂 𑀓𑀸𑀬𑀪𑀸𑀯𑀤𑀲𑀓𑀸𑀦𑀺, 𑀢𑀻𑀡𑀺 𑀘 𑀅𑀝𑁆𑀞𑀓𑀸𑀦𑀺, 𑀫𑀁𑀲𑀫𑀼𑀢𑁆𑀢𑁂𑀲𑀼 𑀧𑀦 𑀓𑁂𑀲𑀸𑀤𑀻𑀲𑀼 𑀉𑀢𑀼𑀚𑀝𑁆𑀞𑀓𑀫𑁂𑀯 𑀳𑁄𑀢𑀺. 𑀢𑀸𑀦𑀺 𑀘 𑀬𑀣𑀸𑀯𑀼𑀢𑁆𑀢𑀤𑀲𑀓𑀦𑀯𑀓𑀝𑁆𑀞𑀓𑀸𑀦𑀺 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀻𑀲𑀼 𑀢𑀘𑀫𑀁𑀲𑀭𑀼𑀳𑀺𑀭𑀸𑀤𑀻𑀲𑀼, 𑀅𑀩𑁆𑀬𑀸𑀧𑀻𑀲𑀼 𑀘 𑀓𑁂𑀲𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀅𑀯𑀺𑀦𑀺𑀩𑁆𑀪𑁄𑀕𑁂 𑀏𑀓𑀲𑁆𑀫𑀺𑀁 𑀅𑀡𑀼𑀧𑀤𑁂𑀲𑁂 𑀳𑁄𑀦𑁆𑀢𑀻𑀢𑀺 𑀧𑀘𑁆𑀘𑁂𑀓𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸, 𑀅𑀦𑀦𑁆𑀢𑀥𑀸𑀢𑀼𑀧𑀘𑁆𑀘𑀬𑀢𑁆𑀢𑀸 𑀢𑁂𑀲𑀁 𑀲𑀭𑀻𑀭𑀲𑁆𑀫𑀺𑀁 𑀳𑀺 𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑀸𑀦𑀺 𑀅𑀦𑀦𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑁂𑀯 𑀲𑀉𑀧𑀸𑀤𑀸𑀭𑀽𑀧𑀸𑀦𑀺 𑀘 𑀅𑀜𑁆𑀜𑁄𑀜𑁆𑀜𑀧𑀘𑁆𑀘𑀬𑀪𑀽𑀢𑀸𑀦𑀺 𑀅𑀚𑁆𑀛𑀢𑁆𑀢𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀓𑁄𑀝𑁆𑀞𑀸𑀲𑀲𑀭𑀻𑀭𑀸𑀭𑁄𑀳𑀧𑀭𑀺𑀡𑀸𑀳𑀲𑀡𑁆𑀞𑀸𑀦𑀸𑀤𑀺𑀦𑀸, 𑀩𑀳𑀺𑀤𑁆𑀥𑀸 𑀘 𑀧𑀣𑀯𑀻𑀧𑀩𑁆𑀩𑀢𑀸𑀤𑀺𑀦𑀸 𑀘 𑀆𑀓𑀸𑀭𑁂𑀦 𑀬𑀣𑀸𑀧𑀘𑁆𑀘𑀬𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀺. 𑀫𑀸𑀬𑀸𑀓𑀸𑀭𑀸𑀤𑀬𑁄 𑀯𑀺𑀬 𑀦 𑀩𑀸𑀮𑀚𑀦𑀧𑁆𑀧𑀩𑁄𑀥𑀓𑀸𑀦𑀺 𑀳𑁄𑀦𑁆𑀢𑀺.

𑀧𑀣𑀯𑀻𑀥𑀸𑀢𑀼 ¶ 𑀘𑁂𑀢𑁆𑀣 𑀲𑀼𑀔𑀼𑀫𑀲𑀜𑁆𑀘𑀼𑀡𑁆𑀡𑀸 𑀭𑀚𑀪𑀽𑀢𑀸 𑀏𑀯 𑀆𑀧𑁄𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀧𑀸𑀮𑀺𑀢𑀸, 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀢𑁆𑀣𑀫𑁆𑀪𑀺𑀢𑀸, 𑀯𑀡𑁆𑀡𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑀸 𑀦 𑀯𑀺𑀓𑀺𑀭𑀺𑀬𑀫𑀸𑀦𑀸 𑀅𑀚𑁆𑀛𑀢𑁆𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀫𑀺𑀕𑀧𑀓𑁆𑀔𑀺𑀤𑁂𑀯𑀩𑁆𑀭𑀳𑁆𑀫𑀸𑀤𑀺𑀲𑀭𑀻𑀭𑀪𑀸𑀯𑀁, 𑀩𑀳𑀺𑀤𑁆𑀥𑀸 𑀘 𑀧𑀣𑀯𑀻𑀧𑀩𑁆𑀩𑀢𑀭𑀼𑀓𑁆𑀔𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀘𑀦𑁆𑀤𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀫𑀡𑀺𑀓𑀦𑀓𑀸𑀤𑀺𑀪𑀸𑀯𑀜𑁆𑀘 𑀉𑀧𑀕𑀘𑁆𑀙𑀢𑀺, 𑀬𑀽𑀲𑀕𑀢𑀸 𑀩𑀦𑁆𑀥𑀦𑀪𑀽𑀢𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸. 𑀅𑀯𑀲𑁂𑀲𑀸𑀦𑀼𑀧𑀸𑀮𑀦𑀯𑀺𑀢𑁆𑀣𑀫𑁆𑀪𑀦𑀧𑀭𑀺𑀧𑀸𑀘𑀦𑀧𑀭𑀺𑀯𑀸𑀭𑀺𑀢𑀸 𑀦 𑀧𑀕𑁆𑀖𑀭𑀢𑀺, 𑀅𑀧𑀕𑁆𑀖𑀭𑀫𑀸𑀦𑀸 𑀧𑀻𑀡𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀉𑀲𑀼𑀫𑀢𑁆𑀢𑀕𑀢𑀸 𑀢𑁂𑀚𑁄𑀥𑀸𑀢𑀼 𑀲𑁂𑀲𑀥𑀸𑀢𑀼𑀧𑀢𑀺𑀝𑁆𑀞𑀸𑀦𑀲𑀗𑁆𑀕𑀳𑀯𑀺𑀢𑁆𑀣𑀫𑁆𑀪𑀦𑀧𑀭𑀺𑀯𑀸𑀭𑀺𑀢𑀸 𑀇𑀫𑀁 𑀓𑀸𑀬𑀁 𑀧𑀭𑀺𑀧𑀸𑀘𑁂𑀢𑀺, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀅𑀧𑀽𑀢𑀺𑀪𑀸𑀯𑀜𑁆𑀘 𑀲𑀸𑀥𑁂𑀢𑀺, 𑀯𑀸𑀬𑁄𑀥𑀸𑀢𑀼 𑀯𑀺𑀢𑁆𑀣𑀫𑁆𑀪𑀦𑀲𑀫𑀼𑀤𑀻𑀭𑀡𑀲𑀪𑀸𑀯𑀸 𑀲𑁂𑀲𑀥𑀸𑀢𑀼𑀧𑀢𑀺𑀝𑁆𑀞𑀸𑀦𑀲𑀗𑁆𑀕𑀳𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀺𑀢𑀸 𑀯𑀺𑀢𑁆𑀣𑀫𑁆𑀪𑁂𑀢𑀺 𑀘𑀸𑀮𑁂𑀢𑀺, 𑀲𑀭𑀻𑀭𑀯𑀺𑀫𑀸𑀦𑀸𑀤𑀻𑀦𑀁 𑀕𑀫𑀦𑀸𑀤𑀺𑀧𑀤𑀯𑀻𑀢𑀺𑀳𑀭𑀡𑀸𑀤𑀻𑀦𑀁 𑀞𑀺𑀢𑀺𑀜𑁆𑀘 𑀲𑀫𑁆𑀧𑀸𑀤𑁂𑀢𑀺. 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸 𑀲𑀫𑁆𑀪𑀽𑀬 𑀧𑀣𑀯𑀻𑀅𑀥𑀺𑀓𑀢𑀸𑀬 𑀓𑁂𑀲𑀸𑀤𑀺𑀪𑀸𑀯𑀁, 𑀧𑀣𑀯𑀻𑀧𑀩𑁆𑀩𑀢𑀸𑀤𑀺𑀪𑀸𑀯𑀜𑁆𑀘, 𑀆𑀧𑀸𑀥𑀺𑀓𑀢𑀸𑀬 𑀧𑀺𑀢𑁆𑀢𑀸𑀤𑀺𑀪𑀸𑀯𑀁, 𑀲𑀫𑀼𑀤𑁆𑀤𑀚𑀮𑀸𑀤𑀺𑀪𑀸𑀯𑀜𑁆𑀘, 𑀯𑀸𑀬𑀼𑀅𑀥𑀺𑀓𑀢𑀸𑀬 𑀉𑀤𑁆𑀥𑀗𑁆𑀕𑀫𑀯𑀸𑀢𑀸𑀤𑀺𑀪𑀸𑀯𑀁, 𑀧𑀣𑀯𑀻𑀲𑀦𑁆𑀥𑀸𑀭𑀓𑀯𑀸𑀢𑀸𑀤𑀺𑀪𑀸𑀯𑀜𑁆𑀘, 𑀢𑁂𑀚𑀸𑀥𑀺𑀓𑀢𑀸𑀬 𑀧𑀭𑀺𑀧𑀸𑀘𑀓𑀕𑁆𑀕𑀺𑀆𑀤𑀺𑀪𑀸𑀯𑀁, 𑀦𑀭𑀓𑀕𑁆𑀕𑀺𑀆𑀤𑀺𑀪𑀸𑀯𑀜𑁆𑀘 𑀲𑀸𑀥𑁂𑀦𑁆𑀢𑀺, 𑀬𑀸𑀲𑀁 𑀧𑀓𑁄𑀧𑁂𑀦 𑀭𑁄𑀕𑀚𑀭𑀸𑀫𑀭𑀡𑀜𑁆𑀘𑁂𑀯 𑀓𑀧𑁆𑀧𑀯𑀺𑀦𑀸𑀲𑀸𑀤𑀬𑁄 𑀘 𑀳𑁄𑀦𑁆𑀢𑀺. 𑀏𑀯𑀫𑁂𑀢𑀸𑀲𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀦𑀁 𑀥𑀸𑀢𑀽𑀦𑀁 𑀲𑀜𑁆𑀘𑀬𑀢𑁆𑀢𑀸 𑀧𑀘𑁆𑀘𑁂𑀓𑀁 ¶ 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸 𑀓𑀮𑀸𑀧𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀣𑀸 𑀩𑀸𑀳𑀺𑀭𑀸𑀦𑀺 𑀭𑀽𑀧𑀸𑀦𑀺. 𑀢𑀸𑀦𑀺 𑀘 𑀢𑁂𑀦 𑀢𑁂𑀦 𑀧𑀘𑁆𑀘𑀬𑁂𑀦 𑀢𑀣𑀸𑀢𑀣𑀸𑀓𑀸𑀭𑁂𑀦 𑀲𑀫𑀼𑀤𑀺𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀘.

𑀬𑀤𑀺 𑀧𑀞𑀫𑀁 𑀥𑀸𑀢𑀼𑀬𑁄 𑀅𑀡𑀼𑀭𑀽𑀧𑁂𑀦 𑀞𑀢𑁆𑀯𑀸 𑀧𑀘𑁆𑀙𑀸 𑀲𑀁𑀬𑀼𑀚𑁆𑀚𑀦𑁆𑀢𑀺, 𑀢𑀣𑀸 𑀞𑀸𑀦𑁂 𑀯𑀺𑀦𑀺𑀬𑁄𑀕𑀸𑀪𑀸𑀯𑀢𑁄 𑀅𑀧𑀭𑁂𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀘𑁂𑀢𑁆𑀣 𑀓𑀫𑁆𑀫𑀚𑀁 𑀓𑀫𑁆𑀫𑀧𑀘𑁆𑀘𑀬𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀚𑀁 ¶ 𑀆𑀳𑀸𑀭𑀧𑀘𑁆𑀘𑀬𑀁 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀚𑀁 𑀉𑀢𑀼𑀧𑀘𑁆𑀘𑀬𑀁 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀚𑀁 𑀘𑀺𑀢𑁆𑀢𑀧𑀘𑁆𑀘𑀬𑀁 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀲𑀫𑀼𑀝𑁆𑀞𑀸𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀉𑀧𑀸𑀤𑀺𑀦𑁆𑀦𑀭𑀽𑀧𑀁 𑀓𑀫𑁆𑀫𑀚𑀁 𑀦𑀸𑀫, 𑀫𑀁𑀲𑀫𑀼𑀢𑁆𑀢𑀓𑁂𑀲𑀮𑁄𑀫𑀤𑀦𑁆𑀢𑀲𑀺𑀗𑁆𑀖𑀸𑀡𑀺𑀓𑀸𑀤𑀺 𑀓𑀫𑁆𑀫𑀧𑀘𑁆𑀘𑀬𑀁 𑀦𑀸𑀫, 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀧𑀣𑀯𑀻𑀧𑀩𑁆𑀩𑀢𑀸𑀤𑀺, 𑀘𑀓𑁆𑀓𑀭𑀢𑀦𑀤𑁂𑀯𑀯𑀺𑀫𑀸𑀦𑀸𑀤𑀺 𑀘 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀆𑀳𑀸𑀭𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀁 𑀆𑀳𑀸𑀭𑀚𑀁 𑀦𑀸𑀫, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀚𑀲𑁆𑀲 𑀚𑀦𑀓𑁄 𑀳𑀼𑀢𑁆𑀯𑀸 𑀓𑀫𑁆𑀫𑀚𑀲𑁆𑀲 𑀅𑀦𑀼𑀧𑀸𑀮𑀓𑁄 𑀳𑁄𑀢𑀻𑀢𑀺 𑀢𑀤𑀦𑀼𑀧𑀸𑀮𑀺𑀢𑀁 𑀓𑀫𑁆𑀫𑀚𑀭𑀽𑀧𑀁 𑀆𑀳𑀸𑀭𑀧𑀘𑁆𑀘𑀬𑀁 𑀦𑀸𑀫, 𑀯𑀺𑀲𑀪𑀸𑀕𑀸𑀳𑀸𑀭𑀁 𑀲𑁂𑀯𑀺𑀢𑁆𑀯𑀸 𑀆𑀢𑀧𑁂 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀴𑀓𑀼𑀝𑁆𑀞𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀤𑀁 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀓𑀫𑁆𑀫𑀚𑀉𑀢𑀼𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀁 𑀉𑀢𑀼𑀚𑀁 𑀦𑀸𑀫, 𑀢𑀲𑁆𑀫𑀺𑀁 𑀉𑀢𑀼 𑀅𑀜𑁆𑀜𑀁 𑀅𑀝𑁆𑀞𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀤𑀁 𑀉𑀢𑀼𑀧𑀘𑁆𑀘𑀬𑀁 𑀦𑀸𑀫, 𑀢𑀲𑁆𑀫𑀺𑀫𑁆𑀧𑀺 𑀉𑀢𑀼 𑀅𑀜𑁆𑀜𑀁 𑀅𑀝𑁆𑀞𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀤𑀁 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀏𑀯𑀁 𑀉𑀧𑀸𑀤𑀺𑀦𑁆𑀦𑀓𑁂 𑀢𑀺𑀲𑁆𑀲𑁄 𑀏𑀯 𑀲𑀦𑁆𑀢𑀢𑀺𑀬𑁄 𑀖𑀝𑁆𑀝𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂 𑀧𑀦 𑀯𑀮𑀸𑀳𑀓𑁄 𑀉𑀢𑀼𑀚𑀁 𑀦𑀸𑀫, 𑀯𑀼𑀝𑁆𑀞𑀺𑀥𑀸𑀭𑀸 𑀉𑀢𑀼𑀧𑀘𑁆𑀘𑀬𑀁 𑀦𑀸𑀫, 𑀤𑁂𑀯𑁂 𑀧𑀦 𑀯𑀼𑀝𑁆𑀞𑁂 𑀧𑀣𑀯𑀻 𑀕𑀦𑁆𑀥𑀁 𑀫𑀼𑀜𑁆𑀘𑀢𑀺, 𑀩𑀻𑀚𑀸𑀦𑀺 𑀯𑀺𑀭𑀼𑀳𑀦𑁆𑀢𑀻𑀢𑀺 𑀏𑀯𑀁 𑀬𑀁 𑀅𑀦𑀦𑁆𑀢𑀁 𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀏𑀢𑀁 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀺𑀢𑀁 𑀲𑀼𑀤𑁆𑀥𑀝𑁆𑀞𑀓𑀸𑀤𑀺 𑀘𑀺𑀢𑁆𑀢𑀚𑀁 𑀦𑀸𑀫, 𑀘𑀺𑀢𑁆𑀢𑁂𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀓𑀸𑀬𑁄 𑀘𑀺𑀢𑁆𑀢𑀧𑀘𑁆𑀘𑀬𑀁 𑀦𑀸𑀫, 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀩𑀳𑀺𑀤𑁆𑀥𑀸 𑀲𑀫𑀼𑀝𑁆𑀞𑀸𑀧𑀺𑀢𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑀁 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀧𑀓𑀺𑀡𑁆𑀡𑀓𑀓𑀣𑀸.

𑀭𑀽𑀧𑀸𑀩𑁆𑀬𑀸𑀓𑀢𑀁 𑀦𑀺𑀝𑁆𑀞𑀺𑀢𑀁.

𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑀯𑀡𑁆𑀡𑀦𑀸

𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑀁 𑀧𑀦 𑀪𑀽𑀫𑀺𑀢𑁄 𑀮𑁄𑀓𑀼𑀢𑁆𑀢𑀭𑀫𑁂𑀯, 𑀥𑀫𑁆𑀫𑀢𑁄𑀧𑀺 𑀘 𑀏𑀓𑀫𑁂𑀯, 𑀪𑁂𑀤𑁄 𑀦𑀢𑁆𑀣𑀺, 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀲𑀦𑁆𑀢𑀺𑀮𑀓𑁆𑀔𑀡𑀁 ¶ 𑀦𑀺𑀩𑁆𑀩𑀸𑀦𑀁, 𑀦𑀺𑀯𑀢𑁆𑀢𑀺𑀮𑀓𑁆𑀔𑀡𑀁, 𑀅𑀲𑀗𑁆𑀔𑀢𑀮𑀓𑁆𑀔𑀡𑀁 𑀯𑀸, 𑀅𑀘𑁆𑀘𑀼𑀢𑀺𑀭𑀲𑀁 ¶ , 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀲𑀗𑁆𑀔𑀢𑀢𑀸𑀬 𑀧𑀦𑀲𑁆𑀲 𑀓𑀸𑀭𑀓𑀳𑁂𑀢𑀼𑀯𑀺𑀭𑀳𑀢𑁄 𑀧𑀤𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀧𑀸𑀧𑀓𑀳𑁂𑀢𑀼𑀯𑀲𑁂𑀦 𑀧𑀦𑁂𑀢𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁨𑁦𑁬) ‘‘𑀅𑀭𑀺𑀬𑀫𑀕𑁆𑀕𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀗𑁆𑀕𑀳𑀢𑁄 𑀧𑀦 𑀪𑁂𑀤𑀸𑀪𑀸𑀯𑀸 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺, 𑀆𑀬𑀢𑀦𑀸𑀤𑀻𑀲𑀼 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀲𑀼𑀜𑁆𑀜𑀢𑁄 𑀧𑀦 𑀅𑀢𑁆𑀢𑀲𑀼𑀜𑁆𑀜𑀁, 𑀲𑀮𑀓𑁆𑀔𑀡𑀥𑀸𑀭𑀡𑀢𑁄 𑀅𑀦𑀢𑁆𑀢𑀓𑀁 𑀥𑀫𑁆𑀫𑀫𑀢𑁆𑀢𑀁, 𑀅𑀲𑀗𑁆𑀔𑀢𑀢𑀸𑀬 𑀯𑀸 𑀅𑀘𑁆𑀘𑀦𑁆𑀢𑀢𑁆𑀢𑀸 𑀘 𑀅𑀦𑀺𑀘𑁆𑀘𑀢𑀸𑀲𑀼𑀜𑁆𑀜𑀁, 𑀤𑀼𑀓𑁆𑀔𑀢𑀸𑀲𑀼𑀜𑁆𑀜𑀁, 𑀭𑀸𑀕𑀸𑀤𑀺𑀲𑀼𑀜𑁆𑀜𑀁, 𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀦𑁆𑀢𑀺 𑀧𑀯𑀢𑁆𑀢𑀁 𑀲𑀼𑀜𑁆𑀜𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀪𑁂𑀤𑀢𑁄 𑀧𑀦 𑀲𑀦𑁆𑀢𑀺𑀮𑀓𑁆𑀔𑀡𑀸𑀤𑀺𑀲𑀪𑀸𑀯𑀢𑁄 𑀏𑀓𑀯𑀺𑀥𑀫𑁆𑀧𑀺 𑀓𑀸𑀭𑀡𑀧𑀭𑀺𑀬𑀸𑀬𑀢𑁄 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀘𑁂𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀲𑀭𑀲𑀯𑀲𑁂𑀦 𑀧𑀦 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀪𑁂𑀤𑀢𑁄 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀲𑀗𑁆𑀔𑀢𑀥𑀫𑁆𑀫𑀪𑁂𑀤𑀫𑀼𑀧𑀸𑀤𑀸𑀬 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀓𑀸𑀭𑀢𑁄 𑀦 𑀘𑀺𑀢𑁆𑀢𑀁, 𑀦 𑀘𑁂𑀢𑀲𑀺𑀓𑀁, 𑀦 𑀭𑀽𑀧𑀁, 𑀦 𑀅𑀢𑀻𑀢𑀁, 𑀦 𑀅𑀦𑀸𑀕𑀢𑀁, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀦 𑀫𑀕𑁆𑀕𑁄, 𑀦 𑀨𑀮𑀦𑁆𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀧𑁆𑀧𑀓𑀸𑀭𑀁 𑀳𑁄𑀢𑀺.

𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑀁 𑀦𑀺𑀝𑁆𑀞𑀺𑀢𑀁.

𑀏𑀯𑀁 𑀇𑀫𑀲𑁆𑀫𑀺𑀁 𑀓𑀼𑀲𑀮𑀢𑁆𑀢𑀺𑀓𑁂 𑀅𑀯𑀼𑀢𑁆𑀢𑁄 𑀲𑀪𑀸𑀯𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀅𑀲𑀪𑀸𑀯𑀥𑀫𑁆𑀫𑁂𑀲𑀼 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀭𑀽𑀧𑀥𑀫𑁆𑀫𑀸𑀦𑀁 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑀮𑀓𑁆𑀔𑀡𑀸𑀦𑀺 𑀏𑀯 𑀯𑀼𑀢𑁆𑀢𑀸𑀦𑀺, 𑀓𑀲𑀺𑀡𑀸𑀤𑀺𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀺 𑀧𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄, 𑀯𑀺𑀜𑁆𑀜𑀸𑀡𑀸𑀪𑀸𑀯𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀢𑀺𑀲𑁆𑀲𑁄 𑀦𑀸𑀫𑀧𑀼𑀕𑁆𑀕𑀮𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑁄, 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀸𑀤𑀬𑁄 𑀘 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀢𑁂𑀲𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀩𑁆𑀬𑀢𑀺𑀭𑁂𑀓𑀸𑀪𑀸𑀯𑀢𑁄 𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀢𑀺𑀓𑁄 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 ¶ . 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀺𑀓𑀤𑀼𑀓𑁂𑀲𑀼 𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀸𑀪𑀸𑀯𑁂𑀧𑀺 𑀦𑀺𑀭𑀯𑀲𑁂𑀲𑀧𑀭𑀫𑀢𑁆𑀣𑀕𑁆𑀕𑀳𑀡𑁂𑀦𑁂𑀯 𑀦𑀺𑀧𑁆𑀧𑀤𑁂𑀲𑀢𑀸, 𑀯𑀺𑀧𑀭𑀺𑀬𑀸𑀬𑀢𑁄 𑀲𑀧𑁆𑀧𑀤𑁂𑀲𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀣 𑀧𑀦 𑀲𑀫𑁆𑀫𑀼𑀢𑀺𑀕𑁆𑀕𑀳𑀡𑀁 𑀅𑀢𑁆𑀣𑀺, 𑀢𑀢𑁆𑀣 𑀯𑀓𑁆𑀔𑀸𑀫.

𑀭𑀽𑀧𑀦𑀺𑀩𑁆𑀩𑀸𑀦𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑀇𑀢𑀺 𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸

𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀬

𑀓𑀼𑀲𑀮𑀢𑁆𑀢𑀺𑀓𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ 𑀓𑀼𑀲𑀮𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀬𑀲𑁆𑀫𑀸 𑀧𑀦 𑀬𑁆𑀯𑀸𑀬𑀁 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑁋

‘‘𑀅𑀢𑁆𑀣𑀢𑁄 𑀪𑀽𑀫𑀺𑀪𑁂𑀤𑀸 𑀘, 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄;

𑀉𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀸𑀦𑀁, 𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄’’𑀢𑀺. 𑁋

𑀆𑀤𑀺𑀦𑀸 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀼𑀲𑀮𑀸 𑀢𑀸𑀯 𑀥𑀫𑁆𑀫𑀸 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑀓𑀸𑀫𑀸𑀯𑀘𑀭𑀸…𑀧𑁂… 𑀮𑁄𑀓𑀼𑀢𑁆𑀢𑀭𑀸’’𑀢𑀺𑀏𑀯𑀫𑀸𑀤𑀺𑀦𑀸 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀼𑀢𑁆𑀢𑁄, 𑀲𑁄 𑀏𑀯 𑀲𑁂𑀲𑀢𑁆𑀢𑀺𑀓𑀤𑀼𑀓𑀸𑀦𑀫𑁆𑀧𑀺 𑀬𑀣𑀸𑀬𑁄𑀕𑀁 𑀳𑁄𑀢𑀺. 𑀬𑀣𑀸 𑀳𑀺 𑀏𑀢𑁆𑀣, 𑀏𑀯𑀁 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀥𑀫𑁆𑀫𑀸 𑀪𑀽𑀫𑀺𑀢𑁄 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀮𑁄𑀓𑀼𑀢𑁆𑀢𑀭𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀢𑁆𑀢𑀺𑀓𑀤𑀼𑀓𑀸𑀦𑀫𑁆𑀧𑀺 𑀧𑀡𑁆𑀟𑀺𑀢𑁂𑀳𑀺 𑀲𑀓𑁆𑀓𑀸 𑀯𑀺𑀦𑀺𑀘𑁆𑀙𑀬𑀦𑀬𑀁 𑀲𑀮𑁆𑀮𑀓𑁆𑀔𑁂𑀢𑀼𑀁, 𑀢𑀲𑁆𑀫𑀸 𑀢𑀁 𑀯𑀺𑀢𑁆𑀣𑀸𑀭𑀦𑀬𑀁 𑀯𑀚𑁆𑀚𑁂𑀢𑁆𑀯𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑁂, 𑀅𑀢𑁆𑀣𑀼𑀤𑁆𑀥𑀸𑀭𑀓𑀡𑁆𑀟𑁂 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀦𑀁 𑀢𑀺𑀓𑀤𑀼𑀓𑀸𑀦𑀁 𑁋

𑀧𑀤𑀢𑁆𑀣𑀸 𑀢𑀁𑀲𑀭𑀽𑀧𑀸 𑀘, 𑀦𑀯𑀢𑁆𑀢𑀩𑁆𑀩𑀯𑀺𑀪𑀸𑀕𑀢𑁄;

𑀯𑀺𑀦𑀺𑀘𑁆𑀙𑀬𑁄 𑀯𑀺𑀚𑀸𑀦𑀻𑀬𑁄, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁.

𑀢𑀢𑁆𑀣 ¶ 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀤𑀢𑁆𑀣𑀢𑁄 𑀢𑀸𑀯 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀼𑀔-𑀲𑀤𑁆𑀤𑁄 𑀲𑀼𑀔𑀯𑁂𑀤𑀦𑀸𑀲𑀼𑀔𑀫𑀽𑀮𑀲𑀼𑀔𑀸𑀭𑀫𑁆𑀫𑀡𑀲𑀼𑀔𑀳𑁂𑀢𑀼𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑀅𑀩𑁆𑀬𑀸𑀩𑀚𑁆𑀛𑀦𑀺𑀩𑁆𑀩𑀸𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁨; 𑀥. 𑀲. 𑁧𑁬𑁫; 𑀯𑀺𑀪. 𑁫𑁯𑁪) 𑀲𑀼𑀔𑀯𑁂𑀤𑀦𑀸𑀬 𑀤𑀺𑀲𑁆𑀲𑀢𑀺. ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁯𑁪) 𑀲𑀼𑀔𑀫𑀽𑀮𑁂. ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦) 𑀲𑀼𑀔𑀸𑀭𑀫𑁆𑀫𑀡𑁂. ‘‘𑀲𑀼𑀔𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 𑀧𑀼𑀜𑁆𑀜𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁨; 𑀇𑀢𑀺𑀯𑀼. 𑁨𑁨) 𑀲𑀼𑀔𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁, 𑀬𑀸𑀯 𑀲𑀼𑀔𑀸 𑀲𑀕𑁆𑀕𑀸 (𑀫. 𑀦𑀺. 𑁩.𑁨𑁫𑁫). 𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁧) 𑀆𑀤𑀻𑀲𑀼 𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑁂. ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 ¶ 𑀏𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁮𑁨) 𑀅𑀩𑁆𑀬𑀸𑀩𑀚𑁆𑀛𑁂. ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁨𑁦𑁩-𑁨𑁦𑁪; 𑀫. 𑀦𑀺. 𑁨𑁧𑁫, 𑁨𑁧𑁭) 𑀦𑀺𑀩𑁆𑀩𑀸𑀦𑁂. 𑀇𑀥 𑀧𑀦𑀸𑀬𑀁 𑀲𑀼𑀔𑀯𑁂𑀤𑀦𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑁂𑀤𑀦𑀸-𑀲𑀤𑁆𑀤𑁄 ‘‘𑀯𑀺𑀤𑀺𑀢𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁦𑁮) 𑀯𑁂𑀤𑀬𑀺𑀢𑀲𑁆𑀫𑀺𑀁 𑀬𑁂𑀯 𑀯𑀢𑁆𑀢𑀢𑀺. 𑀤𑀼𑀓𑁆𑀔-𑀲𑀤𑁆𑀤𑁄 𑀤𑀼𑀓𑁆𑀔𑀯𑁂𑀤𑀦𑀸𑀤𑀼𑀓𑁆𑀔𑀯𑀢𑁆𑀣𑀼𑀤𑀼𑀓𑁆𑀔𑀸𑀭𑀫𑁆𑀫𑀡𑀤𑀼𑀓𑁆𑀔𑀧𑀘𑁆𑀘𑀬𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ‘‘𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁨; 𑀥. 𑀲. 𑁧𑁬𑁫; 𑀯𑀺𑀪. 𑁫𑁯𑁪) 𑀤𑀼𑀓𑁆𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁮𑁭; 𑀯𑀺𑀪. 𑁧𑁯𑁦) 𑀤𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁. ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦) 𑀤𑀼𑀓𑁆𑀔𑀸𑀭𑀫𑁆𑀫𑀡𑁂. ‘‘𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁧𑁭) 𑀤𑀼𑀓𑁆𑀔𑀧𑀘𑁆𑀘𑀬𑁂. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁, 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦) 𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑁂. 𑀇𑀥 𑀧𑀦𑀸𑀬𑀁 𑀤𑀼𑀓𑁆𑀔𑀯𑁂𑀤𑀦𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀘𑀦𑀢𑁆𑀣𑁄 ¶ 𑀧𑀦𑁂𑀢𑁆𑀣 𑁋 𑀲𑀼𑀔𑀬𑀢𑀺 𑀲𑀢𑁆𑀢𑀁, 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀸, 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸, 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀤𑀼𑀓𑁆𑀔𑀸 𑀦 𑀲𑀼𑀔𑀸𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀉𑀧𑁂𑀓𑁆𑀔𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀏𑀯𑀁 𑀢𑀻𑀳𑀺 𑀧𑀤𑁂𑀳𑀺 𑀧𑀜𑁆𑀘𑀯𑀺𑀥𑀸𑀧𑀺 𑀯𑁂𑀤𑀦𑀸 𑀕𑀳𑀺𑀢𑀸. 𑀲𑀩𑁆𑀩𑀸𑀧𑀺 𑀆𑀭𑀫𑁆𑀫𑀡𑀭𑀲𑀁 𑀯𑁂𑀤𑀺𑀬𑀦𑁆𑀢𑀺 𑀅𑀦𑀼𑀪𑀯𑀦𑁆𑀢𑀻𑀢𑀺 𑀯𑁂𑀤𑀦𑀸. 𑀬𑁄 𑀧𑀦𑀸𑀬𑀁 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀲𑀫𑁆𑀧𑀬𑀼𑀢𑁆𑀢-𑀲𑀤𑁆𑀤𑁄, 𑀢𑀲𑁆𑀲𑀢𑁆𑀣𑁄 𑁋 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀓𑀢𑀭𑁂𑀳𑀺 𑀧𑀓𑀸𑀭𑁂𑀳𑀻𑀢𑀺? ‘‘𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸’’𑀢𑀺 (𑀓𑀣𑀸. 𑁪𑁭𑁩) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀘𑀢𑀽𑀳𑀺 𑀧𑀓𑀸𑀭𑁂𑀳𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀘𑁂𑀲. 𑀆𑀭𑀼𑀧𑁆𑀧𑁂 𑀳𑀺 𑀯𑀺𑀦𑀸𑀧𑀺 𑀏𑀓𑀯𑀢𑁆𑀣𑀼𑀓𑀪𑀸𑀯𑀁 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀁𑀲𑀭𑀽𑀧𑀸𑀢𑀺 𑀢𑀲𑁆𑀲 𑀧𑀤𑀢𑁆𑀣𑀲𑁆𑀲 𑀲𑀭𑀽𑀧𑀫𑀢𑁆𑀢𑀤𑀲𑁆𑀲𑀦𑀢𑁄. 𑀢𑀢𑁆𑀣 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀅𑀝𑁆𑀞𑀸𑀭𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀦𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀢𑁂𑀲𑀝𑁆𑀞𑀺 𑀘𑀺𑀢𑁆𑀢𑀸𑀦𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫 ¶ . 𑀢𑀣𑀸 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀘𑀸𑀢𑀺 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀬𑀣𑀸 𑀘 𑀘𑀺𑀢𑁆𑀢𑀸𑀦𑀁 𑀲𑀼𑀔𑀸𑀤𑀺𑀲𑀫𑁆𑀧𑀬𑁄𑀕𑁄, 𑀏𑀯𑀁 𑀢𑀁𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀫𑁆𑀧𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀣𑁂𑀯, 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀺𑀓𑀤𑀼𑀓𑁂𑀲𑀼 𑀘𑀺𑀢𑁆𑀢𑀯𑀲𑁂𑀦𑁂𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀳𑁄𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫. 𑀇𑀥 𑀧𑀦 𑀘𑁂𑀢𑀲𑀺𑀓𑁂𑀲𑀼 𑀲𑀧𑁆𑀧𑀻𑀢𑀺𑀓𑀸𑀦𑀺 𑀯𑁂𑀤𑀦𑀸𑀯𑀚𑁆𑀚𑀺𑀢𑀸𑀦𑀺 𑀙 𑀘𑁂𑀢𑀲𑀺𑀓𑀸𑀦𑀺 𑀏𑀯 𑀧𑀜𑁆𑀘𑀳𑀺𑀧𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀇𑀢𑀭𑀸𑀦𑀺 𑀧𑀦 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀯𑀚𑁆𑀚𑀺𑀢𑀸𑀳𑀺 𑀢𑀻𑀳𑁂𑀯. 𑀢𑁂𑀲𑀼 𑀘 𑀧𑀻𑀢𑀺𑀯𑀚𑁆𑀚𑀺𑀢𑀸 𑀧𑀜𑁆𑀘 𑀬𑀣𑀸𑀬𑁄𑀕𑀺𑀓𑀸 𑀘𑁂𑀯 𑀫𑁄𑀳𑁄 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀉𑀤𑁆𑀥𑀘𑁆𑀘𑀁 𑀣𑀺𑀦𑀁 𑀫𑀺𑀤𑁆𑀥𑀜𑁆𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲 𑀬𑀣𑀸𑀬𑁄𑀕𑀁 𑀢𑀻𑀳𑀺𑀧𑀺. 𑀢𑀢𑁆𑀣𑀸𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀪𑀽𑀢𑀸𑀬 𑀲𑀼𑀔𑀸𑀬 𑀏𑀯, 𑀧𑀻𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀲𑀼𑀔𑀸𑀬 𑀏𑀯, 𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀤𑀼𑀓𑁆𑀔𑀸𑀬 𑀏𑀯, 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁂𑀓𑁆𑀔𑀸𑀬 𑀏𑀯, 𑀲𑁂𑀲𑀸𑀦𑀺 𑀅𑀝𑁆𑀞𑀯𑀻𑀲𑀢𑀺𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀳𑀺 𑀏𑀯 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀢𑀢𑁆𑀣𑀸𑀧𑀺 𑀓𑀭𑀼𑀡𑀸𑀫𑀼𑀤𑀺𑀢𑀸 𑀫𑀳𑀕𑁆𑀕𑀢𑀪𑀽𑀢𑀸𑀬 𑀲𑀼𑀔𑀸𑀬 𑀏𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀲𑀤𑀺𑀲𑀁. 𑀅𑀬𑀁 𑀲𑀭𑀽𑀧𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀦𑀯𑀢𑁆𑀢𑀩𑁆𑀩𑀯𑀺𑀪𑀸𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀲𑀩𑁆𑀩𑀸 𑀯𑁂𑀤𑀦𑀸 𑀲𑀩𑁆𑀩𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀫𑀼𑀢𑀺𑀬𑁄𑀢𑀺 𑀇𑀫𑁂 𑀥𑀫𑁆𑀫𑀸 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀸 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀸 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀯𑁂𑀤𑀦𑀸 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀢𑀺 𑀭𑀽𑀧𑀸𑀤𑀬𑁄 𑀯𑀸, 𑀢𑀲𑁆𑀫𑀸 𑀇𑀫𑁂 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀦 𑀮𑀩𑁆𑀪𑀦𑁆𑀢𑀺. 𑀅𑀬𑀜𑁆𑀘 𑀲𑀧𑁆𑀧𑀤𑁂𑀲𑀢𑁆𑀢𑀺𑀓𑁄 𑀳𑁄𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀺𑀓𑀤𑀼𑀓𑁂𑀲𑀼 𑀦𑀯𑀢𑁆𑀢𑀩𑁆𑀩𑀬𑁄𑀚𑀦𑀸. 𑀬𑀁 𑀬𑀲𑁆𑀫𑀺𑀜𑁆𑀘 𑀦 𑀯𑀼𑀢𑁆𑀢𑀁 𑀅𑀢𑁆𑀣𑀺, 𑀢𑀲𑁆𑀲 𑀲𑀧𑁆𑀧𑀤𑁂𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀧𑀦 𑀬𑀢𑁆𑀣 𑀅𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀢𑁂𑀲𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑁂 𑀦𑀯𑀢𑁆𑀢𑀩𑁆𑀩𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀓𑁆𑀔𑀸𑀫, 𑀢𑁂𑀦𑀲𑁆𑀲 𑀲𑀧𑁆𑀧𑀤𑁂𑀲𑀢𑀸𑀧𑀺 𑀜𑀸𑀢𑀩𑁆𑀩𑀸. 𑀬𑀢𑁆𑀣 𑀧𑀦 𑀅𑀲𑀗𑁆𑀕𑀳𑀺𑀢𑀸 𑀦𑀢𑁆𑀣𑀺, 𑀢𑀁 𑀦𑀺𑀧𑁆𑀧𑀤𑁂𑀲𑀦𑁆𑀢𑀺 𑀯𑀓𑁆𑀔𑀸𑀫. 𑀢𑁂𑀦 𑀢𑀢𑁆𑀣 𑀦𑀯𑀢𑁆𑀢𑀩𑁆𑀩𑀸𑀪𑀸𑀯𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀧𑀦 𑀫𑀸𑀢𑀺𑀓𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀧𑀤𑀢𑁆𑀣𑀁, 𑀢𑀁𑀲𑀭𑀽𑀧𑀯𑀺𑀪𑀸𑀕𑀜𑁆𑀘 𑀯𑀓𑁆𑀔𑀸𑀫. 𑀅𑀬𑀁 𑀦𑀯𑀢𑁆𑀢𑀩𑁆𑀩𑀯𑀺𑀪𑀸𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀯𑁂𑀤𑀦𑀸𑀢𑁆𑀢𑀺𑀓𑀁 𑀦𑀺𑀝𑁆𑀞𑀺𑀢𑀁.

𑀯𑀺𑀧𑀸𑀓𑀢𑁆𑀢𑀺𑀓𑁂 ¶ 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀸𑀓𑀸𑀢𑀺 𑀯𑀺𑀧𑀸𑀓𑀸, 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀺𑀜𑁆𑀘𑀸𑀧𑀺 𑀅𑀭𑀽𑀧𑀥𑀫𑁆𑀫𑀸 𑀯𑀺𑀬 𑀭𑀽𑀧𑀥𑀫𑁆𑀫𑀸𑀧𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 ¶ 𑀅𑀢𑁆𑀣𑀺, 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀢𑁂 𑀓𑀫𑁆𑀫𑀲𑀭𑀺𑀓𑁆𑀔𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀲𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸𑀯 𑀓𑀫𑁆𑀫𑀲𑀭𑀺𑀓𑁆𑀔𑀢𑁆𑀢𑀸 𑀯𑀺𑀧𑀸𑀓𑀸𑀢𑀺 𑀯𑀼𑀢𑁆𑀢𑀸 𑀩𑀻𑀚𑀲𑀭𑀺𑀓𑁆𑀔𑀓𑀁 𑀨𑀮𑀁 𑀯𑀺𑀬. 𑀬𑀣𑀸 𑀳𑀺 𑀲𑀸𑀮𑀺𑀩𑀻𑀚𑀢𑁄 𑀦𑀺𑀓𑁆𑀔𑀦𑁆𑀢𑀲𑀻𑀲𑀫𑁂𑀯 𑀲𑀸𑀮𑀺𑀨𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀅𑀗𑁆𑀓𑀼𑀭𑀸𑀤𑀻𑀦𑀺, 𑀢𑀸𑀦𑀺 𑀧𑀦 ‘‘𑀲𑀸𑀮𑀺𑀚𑀸𑀢𑀸𑀦𑀺, 𑀲𑀸𑀮𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀘𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀓𑀫𑁆𑀫𑀲𑀤𑀺𑀲𑀸 𑀅𑀭𑀽𑀧𑀥𑀫𑁆𑀫𑀸𑀯 ‘‘𑀯𑀺𑀧𑀸𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀭𑀽𑀧𑀥𑀫𑁆𑀫𑀸 𑀧𑀦 𑀓𑀫𑁆𑀫𑀚𑀸 ‘‘𑀉𑀧𑀸𑀤𑀺𑀦𑁆𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀯𑀺𑀧𑀸𑀓𑀲𑀪𑀸𑀯𑀸 𑀥𑀫𑁆𑀫𑀸. 𑀬𑀣𑀸 𑀳𑀺 𑀚𑀸𑀢𑀺𑀚𑀭𑀸𑀲𑀪𑀸𑀯𑀸 𑀲𑀢𑁆𑀢𑀸 ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀯𑀺𑀧𑀸𑀓𑀚𑀦𑀓𑀝𑁆𑀞𑁂𑀦 𑀯𑀺𑀧𑀸𑀓𑀲𑀪𑀸𑀯𑀸 𑀯𑀺𑀧𑀸𑀓𑀧𑀓𑀢𑀺𑀓𑀸 𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀧𑀤𑀁 𑀉𑀪𑀬𑀲𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀬𑀁 𑀧𑀤𑀢𑁆𑀣𑁄.

𑀢𑀢𑁆𑀣 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀙𑀢𑁆𑀢𑀺𑀁𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑀺𑀧𑀸𑀓𑀸 𑀦𑀸𑀫, 𑀢𑀣𑀸 𑀏𑀓𑀯𑀻𑀲𑀢𑀺 𑀓𑀼𑀲𑀮𑀸𑀦𑀺, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺 𑀘𑀸𑀢𑀺 𑀢𑁂𑀢𑁆𑀢𑀺𑀁𑀲 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀦𑀸𑀫, 𑀢𑀻𑀲𑀼 𑀪𑀽𑀫𑀻𑀲𑀼 𑀯𑀻𑀲𑀢𑀺 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀇𑀫𑁂 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀘𑀼𑀤𑁆𑀤𑀲 𑀅𑀓𑀼𑀲𑀮𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀏𑀯, 𑀯𑀺𑀭𑀢𑀺𑀬𑁄 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀢𑀤𑀯𑀲𑁂𑀲𑀸 𑀧𑀦 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀘𑀺𑀢𑁆𑀢𑀁 𑀯𑀺𑀬 𑀢𑀺𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀘𑀺𑀢𑁆𑀢𑀲𑀫𑀁, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀧𑀸𑀓𑀢𑁆𑀢𑀺𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀆𑀤𑀺𑀦𑁆𑀦𑀸 𑀨𑀮𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀉𑀧𑀸𑀤𑀺𑀦𑁆𑀦𑀸, 𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀉𑀧𑀸𑀤𑀸𑀦𑀲𑀫𑁆𑀩𑀦𑁆𑀥𑁂𑀦 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑀸𑀢𑀺 𑀉𑀧𑀸𑀤𑀸𑀦𑀺𑀬𑀸, 𑀉𑀧𑀸𑀤𑀸𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀧𑀸𑀤𑀺𑀦𑁆𑀦𑀸 𑀘 ¶ 𑀢𑁂 𑀉𑀧𑀸𑀤𑀸𑀦𑀺𑀬𑀸 𑀘𑀸𑀢𑀺 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀸𑀲𑀯𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀧𑀝𑀺𑀲𑁂𑀥𑀲𑀳𑀺𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀤𑁆𑀯𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀦𑀯 𑀓𑀫𑁆𑀫𑀚𑀓𑀮𑀸𑀧𑀸 𑀘 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀦𑀸𑀫. 𑀅𑀯𑀲𑁂𑀲𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺 𑀘𑁂𑀯 𑀅𑀓𑀫𑁆𑀫𑀚𑀭𑀽𑀧𑀓𑀮𑀸𑀧𑀸 𑀘 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸 𑀦𑀸𑀫. 𑀓𑀺𑀜𑁆𑀘𑀸𑀧𑀺 𑀔𑀻𑀡𑀸𑀲𑀯𑀸𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 ¶ ‘‘𑀅𑀫𑁆𑀳𑀸𑀓𑀁 𑀫𑀸𑀢𑀼𑀮𑀢𑁆𑀣𑁂𑀭𑁄’’𑀢𑀺𑀆𑀤𑀺𑀦𑀸 𑀯𑀤𑀦𑁆𑀢𑀸𑀦𑀁 𑀧𑀭𑁂𑀲𑀁 𑀉𑀧𑀸𑀤𑀸𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑀅𑀬𑁄𑀕𑀼𑀴𑁄 𑀯𑀺𑀬 𑀫𑀓𑁆𑀔𑀺𑀓𑀸𑀳𑀺 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑁂𑀯. 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀼𑀲𑀮𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀏𑀯, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀯𑀺𑀭𑀢𑀺𑀬𑁄 𑀧𑀦 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸, 𑀲𑁂𑀲𑀸 𑀘𑀺𑀢𑁆𑀢𑀁 𑀯𑀺𑀬 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀢𑁆𑀢𑀺𑀓𑀁.

𑀲𑀁𑀓𑀺𑀮𑁂𑀲𑁂𑀢𑀻𑀢𑀺 𑀲𑀁𑀓𑀺𑀮𑁂𑀲𑁄, 𑀯𑀺𑀩𑀸𑀥𑀢𑀺 𑀉𑀧𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑁂𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀲𑀁𑀓𑀺𑀮𑀺𑀝𑁆𑀞𑀸, 𑀲𑀁𑀓𑀺𑀮𑁂𑀲𑀲𑀳𑀕𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁂𑀦 𑀲𑀁𑀓𑀺𑀮𑁂𑀲𑀁 𑀅𑀭𑀳𑀦𑁆𑀢𑀺, 𑀲𑀁𑀓𑀺𑀮𑁂𑀲𑁂 𑀯𑀸 𑀦𑀺𑀬𑀼𑀢𑁆𑀢𑀸 𑀢𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀁 𑀅𑀦𑀢𑀺𑀓𑁆𑀓𑀫𑀦𑀢𑁄𑀢𑀺 𑀲𑀁𑀓𑀺𑀮𑁂𑀲𑀺𑀓𑀸, 𑀲𑀁𑀓𑀺𑀮𑁂𑀲𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀁𑀓𑀺𑀮𑀺𑀝𑁆𑀞𑀸 𑀘 𑀢𑁂 𑀲𑀁𑀓𑀺𑀮𑁂𑀲𑀺𑀓𑀸 𑀘𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸. 𑀲𑁂𑀲𑀧𑀤𑀤𑁆𑀯𑀬𑀁 𑀧𑀼𑀭𑀺𑀫𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸 𑀦𑀸𑀫. 𑀲𑁂𑀲𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺 𑀘𑁂𑀯 𑀲𑀩𑁆𑀩𑀁 𑀭𑀽𑀧𑀜𑁆𑀘 ¶ 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸𑀯, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸𑀯, 𑀲𑁂𑀲𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀺𑀓𑀁.

𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀢𑁆𑀢𑀫𑀸𑀦𑁂𑀦 𑀲𑀳 𑀯𑀺𑀢𑀓𑁆𑀓𑁂𑀦 𑀲𑀯𑀺𑀢𑀓𑁆𑀓𑀸, 𑀢𑀣𑀸 𑀲𑀳 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑀸, 𑀲𑀯𑀺𑀢𑀓𑁆𑀓𑀸 𑀘 𑀢𑁂 𑀲𑀯𑀺𑀘𑀸𑀭𑀸 𑀘𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸. 𑀉𑀪𑀬𑀭𑀳𑀺𑀢𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀘𑀸𑀭𑁄𑀯 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀯𑀺𑀘𑀸𑀭𑀫𑀢𑁆𑀢𑀸, 𑀯𑀺𑀘𑀸𑀭𑀢𑁄 𑀉𑀢𑁆𑀢𑀭𑀺𑀁 𑀯𑀺𑀢𑀓𑁆𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀢𑀓𑁆𑀓𑀸 𑀘 𑀢𑁂 𑀯𑀺𑀘𑀸𑀭𑀫𑀢𑁆𑀢𑀸 𑀘𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸.

𑀢𑀢𑁆𑀣 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀘𑁂𑀯 𑀏𑀓𑀸𑀤𑀲 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑀸𑀦𑀺 ¶ 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀦𑀸𑀫. 𑀢𑁂𑀲𑀼 𑀯𑀺𑀢𑀓𑁆𑀓𑁄 𑀏𑀓𑀸𑀤𑀲 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀦𑀺 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀺𑀘𑀸𑀭𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀦𑀸𑀫. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼 𑀯𑀺𑀘𑀸𑀭𑁄, 𑀲𑁂𑀲𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀦𑀸𑀫. 𑀅𑀧𑀺𑀘 𑀓𑀼𑀲𑀮𑀘𑁂𑀢𑀲𑀺𑀓𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀯, 𑀯𑀺𑀢𑀓𑁆𑀓𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄𑀯, 𑀯𑀺𑀘𑀸𑀭𑁄 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄, 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄, 𑀅𑀯𑀲𑁂𑀲𑀸 𑀧𑀦 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀢𑀺𑀓𑁂 𑀯𑀺𑀢𑀓𑁆𑀓𑀲𑀳𑀚𑀸𑀢𑁄 𑀯𑀺𑀘𑀸𑀭𑁄𑀯 𑀦 𑀯𑀢𑁆𑀢𑀩𑁆𑀩𑁄. 𑀯𑀺𑀢𑀓𑁆𑀓𑀢𑁆𑀢𑀺𑀓𑀁.

𑀧𑀻𑀢𑀺𑀬𑀸 ¶ 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑀸𑀢𑀺 𑀧𑀻𑀢𑀺𑀲𑀳𑀕𑀢𑀸, 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸𑀢𑀺 𑀘𑁂𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀲𑀸 𑀳𑀺 𑀲𑀼𑀔𑀤𑀼𑀓𑁆𑀔𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀁 𑀉𑀧𑁂𑀓𑁆𑀔𑀢𑀺 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀡𑁆𑀞𑀺𑀢𑀢𑁆𑀢𑀸 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀇𑀢𑀺 𑀯𑁂𑀤𑀦𑀸𑀢𑁆𑀢𑀺𑀓𑀢𑁄 𑀧𑀤𑀤𑁆𑀯𑀬𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀻𑀢𑀺𑀓𑀲𑀼𑀔𑀲𑁆𑀲 𑀲𑀧𑁆𑀧𑀻𑀢𑀺𑀓𑀲𑀼𑀔𑀢𑁄 𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄.

𑀢𑀢𑁆𑀣 𑀧𑀻𑀢𑀺 𑀧𑀜𑁆𑀘𑀯𑀺𑀥𑀸 𑀔𑀼𑀤𑁆𑀤𑀺𑀓𑀸 𑀔𑀡𑀺𑀓𑀸 𑀑𑀓𑁆𑀓𑀦𑁆𑀢𑀺𑀓𑀸 𑀉𑀩𑁆𑀩𑁂𑀕𑀸 𑀨𑀭𑀡𑀸𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺 𑀲𑀭𑀻𑀭𑁂 𑀮𑁄𑀫𑀳𑀁𑀲𑀦𑀫𑀢𑁆𑀢𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀡𑀺𑀓𑀸 𑀧𑀻𑀢𑀺 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀳𑁄𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺 𑀲𑀫𑀼𑀤𑁆𑀤𑀢𑀻𑀭𑀁 𑀯𑀻𑀘𑀺 𑀯𑀺𑀬 𑀓𑀸𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑀸 𑀧𑀻𑀢𑀺 𑀩𑀮𑀯𑀢𑀻 𑀳𑁄𑀢𑀺 𑀓𑀸𑀬𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀧𑁆𑀧𑀢𑁆𑀢𑀸. 𑀨𑀭𑀡𑀸𑀬 𑀧𑀻𑀢𑀺𑀬𑀸 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀲𑀓𑀮𑀲𑀭𑀻𑀭𑀁 𑀥𑀫𑀺𑀢𑁆𑀯𑀸 𑀧𑀽𑀭𑀺𑀢𑀯𑀢𑁆𑀣𑀺 𑀯𑀺𑀬, 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀓𑁆𑀔𑀦𑁆𑀤𑀧𑀩𑁆𑀩𑀢𑀓𑀼𑀘𑁆𑀙𑀺 𑀯𑀺𑀬 𑀘 𑀅𑀦𑀼𑀧𑀭𑀺𑀧𑁆𑀨𑀼𑀝𑀁 𑀳𑁄𑀢𑀺. 𑀢𑀢𑁆𑀣 𑀨𑀭𑀡𑀸 𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀸𑀯, 𑀲𑁂𑀲𑀸 𑀓𑀸𑀫𑀸𑀯𑀘𑀭𑀸𑀯.

𑀲𑀼𑀔𑀁 𑀧𑀦 𑀓𑀸𑀬𑀺𑀓𑀁, 𑀘𑁂𑀢𑀲𑀺𑀓𑀜𑁆𑀘𑁂𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀲𑀢𑀺𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺, 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺, 𑀢𑀢𑁆𑀣 𑀲𑀼𑀔𑀁. 𑀬𑀢𑁆𑀣 𑀲𑀼𑀔𑀁, 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺, 𑀯𑀦𑀘𑁆𑀙𑀸𑀬𑀸𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ¶ 𑀲𑀼𑀔𑀲𑀳𑀕𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀘 𑀯𑁂𑀤𑀦𑀸𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀯, 𑀲𑀼𑀔𑀲𑀳𑀕𑀢𑀁 𑀧𑀦 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂 𑀘 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑀸 𑀧𑀻𑀢𑀺𑀲𑀳𑀕𑀢𑀸 𑀦𑀸𑀫, 𑀢𑀢𑁆𑀣 𑀧𑀻𑀢𑀺 𑀦 𑀧𑀻𑀢𑀺𑀲𑀳𑀕𑀢𑀸, 𑀲𑀼𑀔𑀲𑀳𑀕𑀢𑀸𑀯 𑀳𑁄𑀢𑀺 ¶ , 𑀲𑀼𑀔𑀁 𑀧𑀦 𑀧𑀻𑀢𑀺𑀲𑀳𑀕𑀢𑀁 𑀦𑀸𑀫 𑀲𑀺𑀬𑀸 𑀦 𑀧𑀻𑀢𑀺𑀲𑀼𑀔𑀲𑀳𑀕𑀢𑀸. 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀧𑀻𑀢𑀺 𑀲𑀼𑀔𑀲𑀳𑀕𑀢𑀸𑀯, 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯, 𑀮𑁄𑀪𑀤𑀺𑀝𑁆𑀞𑀺𑀫𑀸𑀦𑀸, 𑀧𑀜𑁆𑀘𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀘𑁂𑀢𑀲𑀺𑀓𑀲𑀼𑀔𑀁 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀁, 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁂𑀲𑀼 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀁, 𑀓𑀸𑀬𑀺𑀓𑀁 𑀧𑀦 𑀲𑀼𑀔𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀲𑀩𑁆𑀩𑀸 𑀘 𑀉𑀧𑁂𑀓𑁆𑀔𑀸 𑀤𑁄𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀦𑀯𑀢𑁆𑀢𑀩𑁆𑀩𑀸𑀯, 𑀲𑁂𑀲𑀸 𑀲𑀢𑁆𑀢𑀭𑀲 𑀥𑀫𑁆𑀫𑀸 𑀲𑀺𑀬𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸𑀧𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀻𑀢𑀺𑀢𑁆𑀢𑀺𑀓𑀁.

𑀤𑀲𑁆𑀲𑀦𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀲𑁄 𑀳𑀺 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀕𑁄𑀢𑁆𑀭𑀪𑀼 𑀧𑀦 𑀓𑀺𑀜𑁆𑀘𑀸𑀧𑀺 𑀧𑀞𑀫𑀢𑀭𑀁 𑀧𑀲𑁆𑀲𑀢𑀺, 𑀬𑀣𑀸 𑀧𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀆𑀕𑀢𑁄 𑀧𑀼𑀭𑀺𑀲𑁄 𑀤𑀽𑀭𑀢𑁄𑀯 𑀭𑀣𑀺𑀓𑀸𑀬 𑀘𑀭𑀦𑁆𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 ‘‘𑀤𑀺𑀝𑁆𑀞𑁄 𑀢𑁂 𑀭𑀸𑀚𑀸’’𑀢𑀺 𑀧𑀼𑀝𑁆𑀞𑁄 𑀤𑀺𑀲𑁆𑀯𑀸𑀧𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 ‘‘𑀦 𑀧𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀏𑀯𑀫𑁂𑀯 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀅𑀪𑀸𑀯𑀸 ‘‘𑀤𑀲𑁆𑀲𑀦’’𑀦𑁆𑀢𑀺 𑀦 𑀯𑀼𑀘𑁆𑀘𑀢𑀺. 𑀢𑀁 𑀳𑀺 𑀜𑀸𑀡𑀁 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀪𑀸𑀯𑀦𑀸𑀬𑀸𑀢𑀺 𑀲𑁂𑀲𑀫𑀕𑁆𑀕𑀢𑁆𑀢𑀬𑁂𑀦. 𑀲𑁂𑀲𑀫𑀕𑁆𑀕𑀢𑁆𑀢𑀬𑀁 𑀳𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀪𑀸𑀯𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁.

𑀢𑀢𑁆𑀣 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀘𑀸𑀢𑀺 𑀧𑀜𑁆𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀯, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀪𑀸𑀯𑀦𑀸𑀬 𑀏𑀯 𑀧𑀳𑀸𑀢𑀩𑁆𑀩𑁄, 𑀅𑀯𑀲𑁂𑀲𑀸 𑀙 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀧𑀸𑀬𑀳𑁂𑀢𑀼𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁄, 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸, 𑀅𑀓𑀼𑀲𑀮𑀯𑀚𑁆𑀚𑀺𑀢𑀸 ¶ 𑀧𑀦 𑀲𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀯, 𑀲𑁂𑀲𑀸 𑀅𑀓𑀼𑀲𑀮𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀢𑀺 𑀢𑀺𑀚𑀸𑀢𑀺𑀓𑀸 𑀢𑁂𑀭𑀲𑀯𑀺𑀥𑀸 𑀳𑁄𑀦𑁆𑀢𑀺, 𑀯𑀼𑀢𑁆𑀢𑀸𑀯𑀲𑁂𑀲𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀯. 𑀬𑀁 𑀧𑀦 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 ¶ 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬) 𑀦𑀬𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀧𑀳𑀸𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀢𑁂𑀲𑀁 𑀫𑀕𑁆𑀕𑀸𑀦𑀁 𑀅𑀪𑀸𑀯𑀺𑀢𑀢𑁆𑀢𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀳𑀻𑀦𑀸𑀢𑀺 𑀇𑀫𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑀁.

𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀺𑀬𑀧𑀤𑁂 𑀧𑀦 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀪𑀯𑁂𑀬𑁆𑀬. 𑀳𑁂𑀢𑀼 𑀏𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀺, 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸. 𑀲𑀳𑁂𑀢𑀼𑀓𑁂𑀲𑀼𑀧𑀺 𑀳𑁂𑀢𑀼𑀯𑀚𑁆𑀚𑀸𑀦𑀁 𑀧𑀳𑀸𑀦𑀁 𑀆𑀧𑀚𑁆𑀚𑀢𑀺, 𑀦 𑀳𑁂𑀢𑀽𑀦𑀁. 𑀳𑁂𑀢𑀼𑀬𑁂𑀯 𑀳𑀺 𑀏𑀢𑁂𑀲𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄, 𑀦 𑀢𑁂 𑀥𑀫𑁆𑀫𑀸. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀅𑀦𑀦𑁆𑀢𑀭𑀢𑁆𑀢𑀺𑀓𑀲𑀤𑀺𑀲𑁄𑀯. 𑀓𑁂𑀯𑀮𑀁 𑀘𑁂𑀢𑀲𑀺𑀓𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁄 𑀫𑁄𑀳𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 𑀦 𑀧𑀯𑀺𑀲𑀢𑀺 𑀲𑀳𑀚𑀸𑀢𑀲𑁆𑀲 𑀅𑀜𑁆𑀜𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸, 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 ¶ 𑀧𑀦 𑀧𑀯𑀺𑀲𑀢𑀺. 𑀮𑁄𑀪𑀤𑁄𑀲𑀫𑀽𑀮𑀘𑀺𑀢𑁆𑀢𑁂𑀲𑀼 𑀧𑀦 𑀳𑁂𑀢𑀽𑀲𑀼 𑀫𑁄𑀳𑁄 𑀮𑁄𑀪𑁂𑀦 𑀘𑁂𑀯 𑀤𑁄𑀲𑁂𑀦 𑀘 𑀲𑀳𑁂𑀢𑀼𑀓𑁄, 𑀮𑁄𑀪𑀤𑁄𑀲𑀸 𑀘 𑀫𑁄𑀳𑁂𑀦𑁂𑀯𑀸𑀢𑀺 𑀇𑀫𑁂 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑁂 𑀧𑀯𑀺𑀝𑁆𑀞𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀢𑁆𑀢𑀺𑀓𑀁.

𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀆𑀘𑀻𑀬𑀢𑀻𑀢𑀺 𑀆𑀘𑀬𑁄, 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀕𑀢𑀺𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀲 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀦𑀺𑀧𑁆𑀨𑀸𑀤𑀦𑀪𑀸𑀯𑁂𑀦 𑀢𑀁 𑀆𑀘𑀬𑀁 𑀕𑀘𑁆𑀙𑀦𑁆𑀢𑀺, 𑀬𑀲𑁆𑀲 𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀬𑀣𑀸𑀯𑀼𑀢𑁆𑀢𑀫𑁂𑀯 𑀆𑀘𑀬𑀁 𑀕𑀫𑁂𑀦𑁆𑀢𑀻𑀢𑀺 𑀆𑀘𑀬𑀕𑀸𑀫𑀺𑀦𑁄. 𑀢𑀢𑁄 𑀏𑀯 𑀆𑀘𑀬𑀲𑀗𑁆𑀔𑀸𑀢𑀸 𑀘𑀬𑀸 𑀅𑀧𑁂𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀅𑀧𑁂𑀢𑀁 𑀘𑀬𑀸𑀢𑀺 𑀅𑀧𑀘𑀬𑁄, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀅𑀧𑀘𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄. 𑀅𑀧𑀺𑀘 𑀧𑀸𑀓𑀸𑀭𑀁 𑀇𑀝𑁆𑀞𑀓𑀯𑀟𑁆𑀠𑀓𑀻 𑀯𑀺𑀬 𑀧𑀯𑀢𑁆𑀢𑀁 𑀆𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀆𑀘𑀬𑀕𑀸𑀫𑀺𑀦𑁄. 𑀢𑁂𑀦𑁂𑀯 𑀯𑀟𑁆𑀠𑀓𑀺𑀦𑀸 𑀘𑀺𑀢𑀁 𑀘𑀺𑀢𑀁 𑀯𑀺𑀤𑁆𑀥𑀁𑀲𑀬𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀢𑀤𑁂𑀯 𑀧𑀯𑀢𑁆𑀢𑀁 𑀅𑀧𑀘𑀺𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁.

𑀢𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀆𑀘𑀬𑀕𑀸𑀫𑀺𑀦𑁄 𑀦𑀸𑀫, 𑀘𑀢𑁆𑀢𑀸𑀭𑀺 𑀫𑀕𑁆𑀕𑀸𑀦𑀺 𑀅𑀧𑀘𑀬𑀕𑀸𑀫𑀺𑀦𑁄 𑀦𑀸𑀫 ¶ , 𑀲𑀩𑁆𑀩𑀸𑀦𑀺 𑀯𑀺𑀧𑀸𑀓𑀨𑀮𑀓𑀺𑀭𑀺𑀬𑀸𑀦𑀺, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑁂𑀯𑀆𑀘𑀬𑀕𑀸𑀫𑀺𑀦𑁄 𑀦 𑀅𑀧𑀘𑀬𑀕𑀸𑀫𑀺𑀦𑁄 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀆𑀘𑀬𑀕𑀸𑀫𑀺𑀦𑁄 𑀏𑀯, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀲𑀺𑀬𑀸 𑀆𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑁄 𑀦 𑀅𑀧𑀘𑀬𑀕𑀸𑀫𑀺𑀦𑁄 𑀦𑀸𑀫, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀆𑀘𑀬𑀕𑀸𑀫𑀺𑀢𑁆𑀢𑀺𑀓𑀁.

𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸, 𑀲𑀢𑁆𑀢𑀦𑁆𑀦𑀁 𑀯𑀸 𑀲𑁂𑀔𑀸𑀦𑀁 𑀏𑀢𑁂𑀢𑀺𑀧𑀺 𑀲𑁂𑀔𑀸, 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀲𑀬𑀫𑁂𑀯 𑀲𑀺𑀓𑁆𑀔𑀦𑁆𑀢𑀻𑀢𑀺𑀧𑀺 𑀲𑁂𑀔𑀸. 𑀉𑀧𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀢𑁄 𑀦 𑀲𑁂𑀔𑀸𑀢𑀺 𑀅𑀲𑁂𑀔𑀸, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀯𑀸 𑀲𑁂𑀔𑀸𑀢𑀺𑀧𑀺 𑀅𑀲𑁂𑀔𑀸. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀺, 𑀳𑁂𑀝𑁆𑀞𑀺𑀫𑀸𑀦𑀺 𑀘 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀲𑀢𑁆𑀢 𑀲𑁂𑀔𑀸 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀁 𑀅𑀲𑁂𑀔𑀸 𑀦𑀸𑀫, 𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑁂𑀯𑀲𑁂𑀔𑀸 𑀦𑀸𑀲𑁂𑀔𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀘 𑀅𑀧𑁆𑀧𑀫𑀜𑁆𑀜𑀸 𑀘 𑀦𑁂𑀯𑀲𑁂𑀔𑀸 𑀦𑀸𑀲𑁂𑀔𑀸 𑀏𑀯, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀲𑁂𑀔𑀢𑁆𑀢𑀺𑀓𑀁.

𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀓𑀁 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀧𑀭𑀺𑀢𑁆𑀢𑀁 𑀕𑁄𑀫𑀬𑀧𑀺𑀡𑁆𑀟’’𑀦𑁆𑀢𑀺 (𑀲𑀁. 𑀦𑀺. 𑁩.𑁯𑁬) 𑀆𑀤𑀻𑀲𑀼 𑀯𑀺𑀬. 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀳𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀢𑁆𑀢𑀸 𑀯𑀺𑀬𑀸𑀢𑀺 𑀧𑀭𑀺𑀢𑁆𑀢𑀸. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬, 𑀫𑀳𑀦𑁆𑀢𑀯𑀺𑀧𑀼𑀮𑀨𑀮𑀢𑀸𑀬, 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀘 𑀫𑀳𑀦𑁆𑀢𑀪𑀸𑀯𑀁 𑀕𑀢𑀸, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀧𑀜𑁆𑀜𑁂𑀳𑀺 𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺𑀧𑀺 𑀫𑀳𑀕𑁆𑀕𑀢𑀸. 𑀧𑀫𑀸𑀡𑀓𑀭𑀸 𑀥𑀫𑁆𑀫𑀸 𑀭𑀸𑀕𑀸𑀤𑀬𑁄 𑀧𑀫𑀸𑀡𑀁 𑀦𑀸𑀫, 𑀆𑀭𑀫𑁆𑀫𑀡𑀢𑁄 𑀯𑀸 𑀲𑀫𑁆𑀧𑀬𑁄𑀕𑀢𑁄 𑀯𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀧𑀫𑀸𑀡𑀁, 𑀧𑀫𑀸𑀡𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸𑀢𑀺 𑀅𑀧𑁆𑀧𑀫𑀸𑀡𑀸.

𑀢𑀢𑁆𑀣 𑀘𑀢𑀼𑀧𑀜𑁆𑀜𑀸𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀭𑀽𑀧𑀜𑁆𑀘 𑀧𑀭𑀺𑀢𑁆𑀢𑀸 𑀦𑀸𑀫, 𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀫𑀳𑀕𑁆𑀕𑀢𑀸 𑀦𑀸𑀫, 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀅𑀧𑁆𑀧𑀫𑀸𑀡𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀧𑀭𑀺𑀢𑁆𑀢𑀸 𑀏𑀯, 𑀅𑀧𑁆𑀧𑀫𑀜𑁆𑀜𑀸 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸 𑀏𑀯, 𑀯𑀺𑀭𑀢𑀺𑀬𑁄 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀸 𑀏𑀯, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀧𑀭𑀺𑀢𑁆𑀢𑀢𑁆𑀢𑀺𑀓𑀁.

𑀧𑀭𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀬𑀁 𑀧𑀭𑀺𑀢𑁆𑀢𑀸 𑀯𑀸 𑀳𑁄𑀦𑁆𑀢𑀼 𑀫𑀳𑀕𑁆𑀕𑀢𑀸 𑀯𑀸, 𑀧𑀭𑀺𑀢𑁆𑀢𑀸𑀤𑀺𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀢𑁆𑀣 ¶ 𑀢𑁂𑀯𑀻𑀲𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀅𑀳𑁂𑀢𑀼𑀓𑀚𑀯𑀦𑀜𑁆𑀘 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀯, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀯, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀯, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 ¶ 𑀘 𑀅𑀝𑁆𑀞 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀚𑀯𑀦𑀸𑀦𑀺 𑀘 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑀸𑀬 𑀦 𑀯𑀢𑁆𑀢𑀩𑁆𑀩𑀸, 𑀦 𑀓𑀤𑀸𑀘𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀅𑀝𑁆𑀞 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺, 𑀅𑀪𑀺𑀜𑁆𑀜𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘𑀸𑀢𑀺 𑀏𑀓𑀸𑀤𑀲 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸𑀧𑀺. 𑀢𑁂𑀲𑀼 𑀘 𑀓𑀼𑀲𑀮𑀸𑀦𑀺 𑀧𑀜𑁆𑀘 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀯𑀚𑁆𑀚𑀺𑀢𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺. 𑀢𑀢𑁆𑀣𑀸𑀧𑀺 𑀢𑀁𑀢𑀁𑀲𑁂𑀔𑀸𑀦𑀫𑁂𑀯 𑀬𑀣𑀸𑀲𑀓𑀁 𑀫𑀕𑁆𑀕𑀨𑀮𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀓𑀺𑀭𑀺𑀬𑀸𑀦𑀺 𑀙 𑀲𑀩𑁆𑀩𑀣𑀸𑀧𑀺 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺, 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀭𑀽𑀧𑀸𑀯𑀘𑀭𑀸𑀦𑀺 𑀘𑁂𑀯 𑀙 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀸𑀦𑀺 𑀘 𑀦𑀺𑀬𑀫𑁂𑀦 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑀸𑀬, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀜𑁆𑀘 𑀅𑀦𑀸𑀭𑀫𑁆𑀫𑀡𑀢𑀸𑀬 𑀲𑀩𑁆𑀩𑀣𑀸 𑀦𑀯𑀢𑁆𑀢𑀩𑁆𑀩𑀸𑀢𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑀤𑀺𑀲𑀸𑀯, 𑀯𑀺𑀭𑀢𑀺𑀬𑁄 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦𑀯𑀢𑁆𑀢𑀩𑁆𑀩𑀸𑀯, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁.

𑀳𑀻𑀦𑀸𑀢𑀺 𑀮𑀸𑀫𑀓𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀳𑀻𑀦𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀸𑀢𑀺 𑀫𑀚𑁆𑀛𑀺𑀫𑀸, 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀯. 𑀉𑀢𑁆𑀢𑀫𑀝𑁆𑀞𑁂𑀦, 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀸, 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀳𑀻𑀦𑀸𑀯, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀫𑀚𑁆𑀛𑀺𑀫𑀸𑀯, 𑀲𑁂𑀲𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀫𑀚𑁆𑀛𑀺𑀫𑀧𑀡𑀻𑀢𑀸𑀯, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀳𑀻𑀦𑀢𑁆𑀢𑀺𑀓𑀁.

‘‘𑀳𑀺𑀢𑀲𑀼𑀔𑀸𑀯𑀳𑀸 𑀫𑁂 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀆𑀲𑀻𑀲𑀺𑀢𑀸𑀧𑀺 𑀢𑀣𑀸 𑀅𑀪𑀸𑀯𑀢𑁄, 𑀅𑀲𑀼𑀪𑀸𑀤𑀻𑀲𑀼𑀬𑁂𑀯 𑀲𑀼𑀪𑀦𑁆𑀢𑀺𑀆𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀢𑁄 𑀘 𑀫𑀺𑀘𑁆𑀙𑀸 𑀲𑀪𑀸𑀯𑀸𑀢𑀺 𑀫𑀺𑀘𑁆𑀙𑀢𑁆𑀢𑀸, 𑀯𑀺𑀧𑀸𑀓𑀤𑀸𑀦𑁂 𑀲𑀢𑀺 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀫𑁂𑀯 𑀯𑀺𑀧𑀸𑀓𑀤𑀸𑀦𑀢𑁄 𑀦𑀺𑀬𑀢𑀸, 𑀫𑀺𑀘𑁆𑀙𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸. 𑀯𑀼𑀢𑁆𑀢𑀯𑀺𑀧𑀭𑀻𑀢𑁂𑀦 𑀅𑀢𑁆𑀣𑁂𑀦 𑀲𑀫𑁆𑀫𑀸 𑀲𑀪𑀸𑀯𑀸𑀢𑀺 𑀲𑀫𑁆𑀫𑀢𑁆𑀢𑀸, 𑀲𑀫𑁆𑀫𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀢𑀸. 𑀉𑀪𑀬𑀣𑀸𑀧𑀺 𑀦 𑀦𑀺𑀬𑀢𑀸𑀢𑀺 𑀅𑀦𑀺𑀬𑀢𑀸.

𑀆𑀦𑀦𑁆𑀢𑀭𑀺𑀓𑀪𑀸𑀯𑁂𑀦 ¶ 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀅𑀦𑀺𑀬𑀢𑀸. 𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀦𑀢𑁆𑀣𑀺𑀓𑀤𑀺𑀝𑁆𑀞𑀻𑀲𑀼 𑀳𑀺 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀬𑀲𑁆𑀲 𑀦𑀺𑀬𑀢𑀸, 𑀢𑀁 𑀩𑀼𑀤𑁆𑀥𑀲𑀢𑀫𑁆𑀧𑀺 𑀯𑀺𑀩𑁄𑀥𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀢𑀺. 𑀬𑁂𑀦 𑀘 𑀅𑀦𑀦𑁆𑀢𑀭𑁂 𑀏𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀦𑀢𑁄 𑀆𑀦𑀦𑁆𑀢𑀭𑀺𑀓𑁂𑀲𑀼 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀲𑀗𑁆𑀖𑀪𑁂𑀤𑀓𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀓𑀫𑁆𑀫𑁂𑀲𑀼 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀧𑀝𑀺𑀖𑀘𑀺𑀢𑁆𑀢𑁂𑀦 𑀓𑀢𑀁 𑀳𑁄𑀢𑀺, 𑀲𑁄 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁂𑀧𑀺 𑀲𑀼𑀯𑀡𑁆𑀡𑀣𑀽𑀧𑁂 𑀓𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀬𑀸𑀯𑀚𑀻𑀯𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀢𑁆𑀯𑀸𑀧𑀺 𑀢𑁂𑀦 𑀓𑀼𑀲𑀮𑁂𑀦 𑀆𑀦𑀦𑁆𑀢𑀭𑀺𑀓𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀆𑀦𑀦𑁆𑀢𑀭𑀺𑀓𑁂𑀦 𑀧𑀦 𑀅𑀥𑀺𑀓𑁂𑀦 𑀆𑀦𑀦𑁆𑀢𑀭𑀺𑀓𑀁 𑀧𑀝𑀺𑀩𑀸𑀳𑀢𑀺, 𑀢𑀲𑁆𑀫𑀸 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀆𑀦𑀦𑁆𑀢𑀭𑀺𑀓𑀸 𑀘 𑀫𑀕𑁆𑀕𑀨𑀮𑀸𑀦𑀁, 𑀫𑀳𑀕𑁆𑀕𑀢𑀸𑀦𑀜𑁆𑀘 𑀧𑀝𑀺𑀩𑀸𑀳𑀓𑀢𑀸𑀬 𑀅𑀦𑀦𑁆𑀢𑀭𑀫𑁂𑀯 𑀦𑀺𑀭𑀬𑁂 𑀯𑀺𑀧𑀸𑀓𑀤𑀸𑀦𑀢𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀘 𑀚𑀸𑀢𑀸, 𑀘𑀢𑁆𑀢𑀸𑀭𑁄 𑀧𑀦 𑀫𑀕𑁆𑀕𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀦𑀸𑀫, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀺𑀬𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑁄𑀳𑁄 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀉𑀤𑁆𑀥𑀘𑁆𑀘𑀁 𑀮𑁄𑀪𑁄 𑀤𑀺𑀝𑁆𑀞𑀺 𑀤𑁄𑀲𑁄 𑀣𑀺𑀦𑀁 𑀫𑀺𑀤𑁆𑀥𑀦𑁆𑀢𑀺 𑀇𑀫𑁂 𑀦𑀯 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸, 𑀲𑁂𑀲𑀅𑀓𑀼𑀲𑀮𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸 𑀘 𑀅𑀦𑀺𑀬𑀢𑀸 𑀏𑀯, 𑀲𑁂𑀲𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀲𑀺𑀬𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸, 𑀢𑀺𑀚𑀸𑀢𑀺𑀓𑀸 𑀧𑀦 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀦𑁆𑀢𑀺. 𑀫𑀺𑀘𑁆𑀙𑀢𑁆𑀢𑀢𑁆𑀢𑀺𑀓𑀁.

𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄, 𑀅𑀭𑀺𑀬𑀫𑀕𑁆𑀕𑁄, 𑀲𑁄 𑀆𑀭𑀫𑁆𑀫𑀡𑀫𑁂𑀢𑁂𑀲𑀦𑁆𑀢𑀺 𑀫𑀕𑁆𑀕𑀸𑀭𑀫𑁆𑀫𑀡𑀸. 𑀮𑁄𑀓𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀧𑀘𑁆𑀘𑀬𑀝𑁆𑀞𑁂𑀦 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀫𑀕𑁆𑀕𑁂 𑀯𑀸 𑀳𑁂𑀢𑀽𑀢𑀺 𑀫𑀕𑁆𑀕𑀳𑁂𑀢𑀽, 𑀅𑀮𑁄𑀪𑀸𑀤𑀬𑁄. 𑀢𑁂 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀫𑀕𑁆𑀕𑀳𑁂𑀢𑀼𑀓𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀬𑀁 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘, 𑀇𑀢𑀺 𑀫𑀕𑁆𑀕𑀪𑀽𑀢𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀫𑀕𑁆𑀕𑀳𑁂𑀢𑀼𑀓𑀸, 𑀮𑁄𑀓𑀼𑀢𑁆𑀢𑀭𑀸𑀯 ¶ . 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀆𑀭𑀫𑁆𑀫𑀡𑀪𑀽𑀢𑁄, 𑀲𑀳𑀚𑀸𑀢𑁄 𑀯𑀸 𑀏𑀢𑁂𑀲𑀦𑁆𑀢𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀢𑀤𑀼𑀪𑀬𑀁.

𑀢𑀢𑁆𑀣 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀼𑀲𑀮𑀓𑀺𑀭𑀺𑀬𑀸 𑀘 𑀅𑀪𑀺𑀜𑁆𑀜𑀸𑀪𑀽𑀢𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀲𑀺𑀬𑀸 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸, 𑀅𑀭𑀺𑀬𑀸𑀦𑀁 𑀳𑀺 𑀘𑁂𑀢𑁄𑀧𑀭𑀺𑀬𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀺 𑀧𑀭𑁂𑀲𑀜𑁆𑀜𑁂𑀯 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸𑀦𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀺 𑀧𑀦 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘𑀸𑀧𑀺 𑀢𑀤𑀜𑁆𑀜𑀸𑀭𑀫𑁆𑀫𑀡𑀓𑀸𑀮𑁂 𑀧𑀦 𑀦𑀯𑀢𑁆𑀢𑀩𑁆𑀩𑀸𑀦𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀦 𑀦𑀺𑀬𑀫𑁂𑀦 𑀧𑀭𑀘𑀺𑀢𑁆𑀢𑀯𑀺𑀲𑀬𑀢𑁆𑀢𑀸 𑀢𑁂𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀁 𑀅𑀭𑀺𑀬𑀸 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀧𑀦 𑀅𑀢𑁆𑀢𑀦𑁄 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀉𑀧𑀭𑀺𑀫𑀕𑁆𑀕𑀲𑁆𑀲 𑀅𑀯𑀺𑀲𑀬𑀢𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀭𑀺𑀬𑀸 𑀳𑀺 𑀬𑀣𑀸𑀲𑀓𑀁, 𑀳𑁂𑀝𑁆𑀞𑀺𑀫𑀜𑁆𑀘 𑀫𑀕𑁆𑀕𑀨𑀮𑀁 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀉𑀧𑀭𑀺𑀫𑀁. 𑀢𑀸𑀦𑀺 𑀧𑀦 𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀺 𑀫𑀕𑁆𑀕𑁂𑀦 𑀅𑀲𑀳𑀚𑀸𑀢𑀢𑁆𑀢𑀸 𑀦 𑀫𑀕𑁆𑀕𑀳𑁂𑀢𑀼𑀓𑀸𑀦𑀺. 𑀫𑀕𑁆𑀕𑀁 𑀕𑀭𑀼𑀁𑀓𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀦𑀢𑁄 ¶ 𑀦 𑀫𑀕𑁆𑀕𑀸𑀥𑀺𑀧𑀢𑀻𑀦𑀺. 𑀦 𑀳𑀺 𑀢𑀸𑀦𑀺 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀅𑀥𑀺𑀧𑀢𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀮𑁄𑀓𑀼𑀢𑁆𑀢𑀭𑀫𑀧𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀫𑀳𑀕𑁆𑀕𑀢𑀢𑀸𑀬 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀦 𑀅𑀢𑁆𑀢𑀦𑁄 𑀅𑀳𑁂𑀢𑀼𑀓𑀢𑀸𑀬 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀔𑀼𑀚𑁆𑀚𑀘𑁂𑀝𑀓𑀸𑀤𑀬𑁄 𑀯𑀺𑀬. 𑀘𑀢𑁆𑀢𑀸𑀭𑀺 𑀫𑀕𑁆𑀕𑀝𑁆𑀞𑀘𑀺𑀢𑁆𑀢𑀸𑀦𑀺 𑀲𑀩𑁆𑀩𑀤𑀸 𑀫𑀕𑁆𑀕𑀳𑁂𑀢𑀼𑀓𑀸 𑀏𑀯, 𑀢𑀸𑀦𑁂𑀯 𑀘 𑀯𑀻𑀫𑀁𑀲𑀸𑀯𑀻𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀇𑀢𑀭𑁂𑀲𑀁 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸, 𑀅𑀝𑁆𑀞 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀲𑀺𑀬𑀸 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸. 𑀢𑀸𑀦𑀺 𑀳𑀺 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀘 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀅𑀢𑁆𑀢𑀦𑁄 𑀫𑀕𑁆𑀕𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀘 𑀢𑀣𑀸𑀅𑀧𑁆𑀧𑀯𑀢𑁆𑀢𑀺𑀬𑀁 𑀦𑀯𑀢𑁆𑀢𑀩𑁆𑀩𑀸 𑀘 𑀳𑁄𑀦𑁆𑀢𑀺. 𑀅𑀭𑀺𑀬𑀸 𑀳𑀺 𑀧𑀭𑁂𑀲𑀁 𑀫𑀕𑁆𑀕𑀨𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸 ¶ 𑀕𑀭𑀼𑀁 𑀓𑀭𑁄𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀫𑀕𑁆𑀕𑀨𑀮𑀸𑀦𑀺 𑀯𑀺𑀬 𑀕𑀭𑀼𑀁 𑀦 𑀓𑀭𑁄𑀦𑁆𑀢𑀺, 𑀅𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁. 𑀢𑁂𑀲𑀼 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑀸𑀦𑀫𑁂𑀯 𑀫𑀕𑁆𑀕𑀨𑀮𑀸𑀦𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦𑀸𑀜𑁆𑀜𑁂𑀲𑀁, 𑀲𑀓𑀤𑀸𑀕𑀸𑀫𑀻 𑀧𑀦 𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺, 𑀦 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀁, 𑀅𑀦𑀸𑀕𑀸𑀫𑀻 𑀧𑀦 𑀅𑀦𑀸𑀕𑀸𑀫𑀻𑀦𑀫𑁆𑀧𑀺, 𑀦 𑀅𑀭𑀳𑀦𑁆𑀢𑀸𑀦𑀁, 𑀅𑀭𑀳𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀫𑀕𑁆𑀕𑀨𑀮𑀸𑀦𑀺 𑀚𑀸𑀦𑀸𑀢𑀺, 𑀲𑁄𑀪𑀦𑀮𑁄𑀓𑀺𑀬𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑀯𑀢𑁆𑀢𑀩𑁆𑀩𑀸𑀦𑁂𑀯. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀯𑀺𑀭𑀢𑀺𑀬𑁄 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂 𑀫𑀕𑁆𑀕𑀲𑀤𑀺𑀲𑀸𑀯, 𑀅𑀜𑁆𑀜𑀢𑁆𑀣 𑀦𑀯𑀢𑁆𑀢𑀩𑁆𑀩𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀅𑀓𑀼𑀲𑀮𑀸 𑀘 𑀦𑀯𑀢𑁆𑀢𑀩𑁆𑀩𑀸, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸 𑀘. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑀁.

𑀉𑀧𑁆𑀧𑀦𑁆𑀦𑀸𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑀑𑀓𑀸𑀲𑀓𑀢𑀪𑀽𑀫𑀺𑀮𑀤𑁆𑀥𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀅𑀦𑁂𑀓𑀧𑁆𑀧𑀪𑁂𑀤𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀫𑁆𑀧𑀺 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀻𑀲𑀗𑁆𑀔𑀸𑀢𑀁 𑀲𑀗𑁆𑀔𑀢𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫, 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀦𑀼𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀉𑀧𑁆𑀧𑀸𑀤𑀸𑀤𑀺𑀢𑁆𑀢𑀬𑀁 𑀅𑀦𑀼𑀧𑁆𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁, 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀦𑀸𑀫, ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂𑀓𑀢𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀁 𑀅𑀢𑀻𑀢𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸, 𑀢𑀣𑀸𑀓𑀢𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀏𑀓𑀁𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫, 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀽𑀳𑀢𑀁 𑀅𑀓𑀼𑀲𑀮𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀏𑀢𑁆𑀣 𑀘 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀪𑀽𑀫𑀺 𑀦𑀸𑀫, 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀉𑀧𑁆𑀧𑀢𑁆𑀢𑀸𑀭𑀳𑀓𑀺𑀮𑁂𑀲𑀚𑀸𑀢𑀸 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫, 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀸 𑀪𑀽𑀫𑀺 𑀮𑀤𑁆𑀥𑀸 𑀳𑁄𑀢𑀻𑀢𑀺 𑀏𑀯𑀫𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀇𑀥 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀸 𑀅𑀥𑀺𑀧𑁆𑀧𑁂𑀢𑀸.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀧𑀼𑀩𑁆𑀩𑀦𑁆𑀢𑀢𑁄 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀧𑀦𑁆𑀦𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀉𑀧𑁆𑀧𑀦𑁆𑀦𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺 ¶ 𑀅𑀢𑁆𑀣𑁄 ¶ . 𑀦 𑀉𑀧𑁆𑀧𑀦𑁆𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸. 𑀧𑀭𑀺𑀦𑀺𑀝𑁆𑀞𑀺𑀢𑀓𑀸𑀭𑀡𑁂𑀓𑀤𑁂𑀲𑀢𑁆𑀢𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀺𑀦𑁄, 𑀉𑀪𑀬𑁂𑀦𑀸𑀧𑀺 𑀅𑀦𑀸𑀕𑀢𑀸𑀯 𑀤𑀲𑁆𑀲𑀺𑀢𑀸. 𑀅𑀬𑀁 𑀳𑀺 𑀢𑀺𑀓𑁄 𑀤𑁆𑀯𑀺𑀦𑁆𑀦𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀮𑀤𑁆𑀥𑁄𑀓𑀸𑀲𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀉𑀧𑁆𑀧𑀸𑀤𑀻 𑀦𑀸𑀫. 𑀬𑀤𑀺 𑀧𑀦 𑀆𑀬𑀽𑀳𑀺𑀢𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀲𑀩𑁆𑀩𑀁 𑀯𑀺𑀧𑀸𑀓𑀁 𑀤𑀤𑁂𑀬𑁆𑀬, 𑀅𑀲𑁆𑀲 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬. 𑀢𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑀥𑀼𑀯𑀯𑀺𑀧𑀸𑀓𑀁, 𑀅𑀤𑁆𑀥𑀼𑀯𑀯𑀺𑀧𑀸𑀓𑀜𑁆𑀘. 𑀢𑀢𑁆𑀣 𑀧𑀜𑁆𑀘𑀸𑀦𑀦𑁆𑀢𑀭𑀺𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀢𑀼𑀢𑁆𑀣𑀫𑀕𑁆𑀕𑀸𑀤𑀺 𑀥𑀼𑀯𑀯𑀺𑀧𑀸𑀓𑀁 𑀦𑀸𑀫. 𑀢𑀁 𑀧𑀦 𑀓𑀫𑁆𑀫𑀁 𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺 𑀅𑀧𑁆𑀧𑀢𑁆𑀢𑀫𑁆𑀧𑀺. 𑀢𑀢𑁆𑀣 𑀔𑀡𑀧𑁆𑀧𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫, 𑀅𑀧𑁆𑀧𑀢𑁆𑀢𑀁 𑀅𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀘 𑀯𑀺𑀧𑀸𑀓𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀔𑀡𑀧𑁆𑀧𑀢𑁆𑀢𑁄 𑀘 𑀅𑀧𑁆𑀧𑀢𑁆𑀢𑁄 𑀘. 𑀢𑀢𑁆𑀣 𑀔𑀡𑀧𑁆𑀧𑀢𑁆𑀢𑁄 𑀉𑀧𑁆𑀧𑀦𑁆𑀦𑁄 𑀦𑀸𑀫, 𑀅𑀧𑁆𑀧𑀢𑁆𑀢𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑁂 𑀯𑀸 𑀉𑀧𑁆𑀧𑀚𑁆𑀚𑀢𑀼, 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂 𑀯𑀸 𑀥𑀼𑀯𑀧𑀘𑁆𑀘𑀬𑀝𑁆𑀞𑁂𑀦 𑀉𑀧𑁆𑀧𑀸𑀤𑀻 𑀦𑀸𑀫 𑀳𑁄𑀢𑀺. 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀕𑁆𑀕𑁄 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀨𑀮𑀁 𑀉𑀧𑁆𑀧𑀸𑀤𑀻 𑀦𑀸𑀫. 𑀢𑀢𑁆𑀣 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄, 𑀓𑀫𑁆𑀫𑀚𑀭𑀽𑀧𑀜𑁆𑀘 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀸 𑀦𑀸𑀫, 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀉𑀧𑁆𑀧𑀸𑀤𑀺𑀦𑁄 𑀦𑀸𑀫, 𑀦 𑀧𑀦 𑀯𑀢𑁆𑀢𑀩𑁆𑀩𑀸 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸, 𑀓𑀫𑁆𑀫𑀚𑀭𑀽𑀧𑀜𑁆𑀘 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀦 𑀧𑀦 𑀯𑀢𑁆𑀢𑀩𑁆𑀩𑀸 ‘‘𑀉𑀧𑁆𑀧𑀸𑀤𑀺𑀦𑁄’’𑀢𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑀤𑀺𑀲𑀸𑀯, 𑀲𑁂𑀲𑀸 𑀤𑀼𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀅𑀢𑀻𑀢𑀸, 𑀧𑀦𑁂𑀢𑁆𑀣 𑀦𑀺𑀩𑁆𑀩𑀸𑀦𑀜𑁆𑀘 𑀦𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺. 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑀁.

𑀅𑀢𑁆𑀢𑀦𑁄 𑀲𑀪𑀸𑀯𑀁, 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀁 𑀯𑀸 𑀧𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀢𑀸 𑀕𑀢𑀸 𑀧𑀢𑁆𑀢𑀸𑀢𑀺 𑀅𑀢𑀻𑀢𑀸. 𑀢𑀤𑀼𑀪𑀬𑀫𑁆𑀧𑀺 𑀦 𑀆𑀕𑀢𑀸𑀢𑀺 𑀅𑀦𑀸𑀕𑀢𑀸. 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀲𑀩𑁆𑀩𑁂 𑀲𑀗𑁆𑀔𑀢𑀸 𑀦𑀸𑀫𑀭𑀽𑀧𑀥𑀫𑁆𑀫𑀸. 𑀦 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀢𑁂𑀓𑀸𑀮𑀺𑀓𑀪𑀸𑀯𑀁 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀢𑁂 𑀢𑀺𑀥𑀸 𑀳𑁄𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀦𑁂𑀢𑁆𑀣 𑀦𑀯𑀢𑁆𑀢𑀩𑁆𑀩𑀦𑁆𑀢𑀺. 𑀅𑀢𑀻𑀢𑀢𑁆𑀢𑀺𑀓𑀁.

𑀅𑀢𑀻𑀢𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 ¶ 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀙𑀩𑁆𑀩𑀺𑀥𑀸𑀦𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀺 𑀳𑁂𑀝𑁆𑀞𑀸 𑀅𑀢𑀻𑀢𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀺, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯, 𑀲𑁂𑀲𑀸 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸, 𑀅𑀳𑁂𑀢𑀼𑀓𑀳𑀲𑀦𑀘𑀺𑀢𑁆𑀢𑀜𑁆𑀘 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀲𑁂𑀲𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀓𑀼𑀲𑀮𑀸𑀓𑀼𑀲𑀮𑀸 𑀘 𑀅𑀪𑀺𑀜𑁆𑀜𑀸𑀪𑀽𑀢𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀼𑀲𑀮𑀓𑀺𑀭𑀺𑀬𑀸 𑀘 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸 𑀘. 𑀢𑁂𑀲𑀼 𑀓𑀸𑀫𑀸𑀯𑀘𑀭𑀸𑀦𑀁 𑀅𑀢𑀻𑀢𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀦𑀯𑀢𑁆𑀢𑀩𑁆𑀩𑀢𑀸 𑀧𑀦 𑀢𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀚𑀯𑀦𑀓𑀼𑀲𑀮𑀸𑀦𑀁 ¶ 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦𑁂𑀯, 𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀯𑀲𑁂𑀦, 𑀢𑁂𑀲𑀼𑀧𑀺 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀚𑁆𑀚𑀦𑀸𑀦𑀁 𑀫𑀕𑁆𑀕𑀨𑀮𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁, 𑀧𑀼𑀭𑁂𑀘𑀸𑀭𑀺𑀓𑀪𑀸𑀯𑁂𑀦𑀸𑀧𑀺 𑀦𑀺𑀩𑁆𑀩𑀸𑀦𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀺𑀲𑀬𑀸𑀦𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀪𑀸𑀯𑁂𑀦𑀸𑀧𑀺 𑀦𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀪𑀺𑀜𑁆𑀜𑀸𑀦𑀁 𑀧𑀦 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀢𑀸𑀯 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀢𑀻𑀢𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀅𑀢𑀻𑀢𑀸𑀭𑀫𑁆𑀫𑀡𑀁, ‘‘𑀅𑀦𑀸𑀕𑀢𑁂𑀲𑀼 𑀭𑀽𑀧𑀸𑀦𑀺 𑀏𑀯𑀁 𑀳𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀦𑀸𑀕𑀢𑀸𑀭𑀫𑁆𑀫𑀡𑀁, 𑀓𑀸𑀬𑀁 𑀧𑀦 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀫𑀦𑀓𑀸𑀮𑁂, 𑀅𑀚𑁆𑀛𑀢𑁆𑀢𑀁 𑀓𑀼𑀫𑀸𑀭𑀯𑀡𑁆𑀡𑀸𑀤𑀻𑀦𑀁, 𑀩𑀳𑀺𑀤𑁆𑀥𑀸𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀫𑁆𑀫𑀸𑀦𑀓𑀸𑀮𑁂 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀜𑁆𑀘 𑀢𑀸𑀯 𑀳𑁄𑀢𑀻𑀢𑀺 𑀏𑀯𑀁 𑀇𑀤𑁆𑀥𑀺𑀯𑀺𑀥𑀲𑁆𑀲 𑀙𑀩𑁆𑀩𑀺𑀥𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀜𑁆𑀘 𑀢𑁂𑀓𑀸𑀮𑀺𑀓𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀺𑀩𑁆𑀩𑀲𑁄𑀢𑀲𑁆𑀲 𑀓𑀼𑀘𑁆𑀙𑀺𑀕𑀢𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀬𑀢𑀦𑀫𑁂𑀯𑀸𑀭𑀫𑁆𑀫𑀡𑀁. 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂, 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀘 𑀧𑀭𑁂𑀲𑀜𑁆𑀜𑁂𑀯 𑀘𑀺𑀢𑁆𑀢𑀁 𑀅𑀢𑀻𑀢𑀜𑁆𑀘 𑀅𑀦𑀸𑀕𑀢𑀜𑁆𑀘𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀲𑀢𑁆𑀢𑀤𑀺𑀯𑀲𑀸𑀢𑀺𑀓𑁆𑀓𑀫𑁂 𑀧𑀦𑁂𑀢𑀁 𑀧𑀭𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀢𑀻𑀢𑀁𑀲𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀁 ¶ 𑀳𑀺 𑀏𑀲 𑀯𑀺𑀲𑀬𑁄, 𑀦 𑀏𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀧𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀦𑀸𑀫𑁂𑀢𑀁 𑀢𑀺𑀯𑀺𑀥𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀧𑁆𑀧𑀢𑁆𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀤𑀼𑀯𑀺𑀥𑀁 𑀭𑀽𑀧𑀸𑀭𑀽𑀧𑀯𑀲𑁂𑀦. 𑀢𑀢𑁆𑀣 𑀆𑀢𑀧𑀝𑁆𑀞𑀸𑀦𑀸 𑀆𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀲𑁆𑀲 𑀬𑀸𑀯 𑀅𑀦𑁆𑀥𑀓𑀸𑀭𑀪𑀸𑀯𑁄 𑀦 𑀯𑀺𑀕𑀘𑁆𑀙𑀢𑀺, 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀯𑀲𑀺𑀢𑁆𑀯𑀸 𑀤𑀺𑀯𑀸 𑀆𑀢𑀧𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀬𑀸𑀯 𑀅𑀓𑁆𑀔𑀻𑀦𑀁 𑀨𑀦𑁆𑀤𑀦𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀭𑀽𑀧𑀲𑀦𑁆𑀢𑀢𑀺 𑀦𑀸𑀫. 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀅𑀭𑀽𑀧𑀲𑀦𑁆𑀢𑀢𑀺 𑀦𑀸𑀫, 𑀢𑀤𑀼𑀪𑀬𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀯𑀺𑀲𑀬𑁂 𑀓𑀢𑀺𑀧𑀬𑀚𑀯𑀦𑀯𑀸𑀭𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀢𑁆𑀣 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺 𑀆𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀢𑁄. 𑀦 𑀳𑀺 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀏𑀢𑁆𑀣 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸 𑀬𑀼𑀢𑁆𑀢𑀸. 𑀭𑀽𑀧𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀓𑀢𑀺𑀧𑀬𑀚𑀯𑀦𑀯𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀤𑁆𑀥𑀺𑀫𑀸 𑀳𑀺 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀆𑀯𑀚𑁆𑀚𑁂𑀢𑀺, 𑀢𑀁 𑀆𑀯𑀚𑁆𑀚𑀺𑀢𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀫𑀸𑀮𑀫𑁆𑀩𑀺𑀢𑁆𑀯𑀸 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 ¶ . 𑀢𑁂𑀲𑀜𑁆𑀘 𑀏𑀓𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀇𑀤𑁆𑀥𑀺𑀘𑀺𑀢𑁆𑀢𑀫𑁂𑀯 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑀸𑀦𑀺. 𑀬𑀣𑀸 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀇𑀢𑀭𑀸𑀦𑀺, 𑀢𑁂𑀲𑀼 𑀘 𑀆𑀯𑀚𑁆𑀚𑀦𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀇𑀢𑀭𑀸𑀦𑀺 𑀧𑀦 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦 𑀧𑀭𑀺𑀬𑀸𑀬𑀢𑁄𑀢𑀺 𑀕𑀳𑁂𑀢𑀩𑁆𑀩𑀁, 𑀏𑀯𑀫𑁂𑀢𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀫𑁂𑀯𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀜𑁆𑀘 𑀔𑁄 𑀧𑀭𑀲𑁆𑀲𑁂𑀯, 𑀦 𑀅𑀢𑁆𑀢𑀦𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀧𑀦 𑀦𑀸𑀫𑀕𑁄𑀢𑁆𑀢𑀓𑀲𑀺𑀡𑀧𑀜𑁆𑀜𑀢𑁆𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑁂, 𑀦𑀺𑀩𑁆𑀩𑀸𑀦𑀸𑀦𑀼𑀲𑁆𑀲𑀭𑀡𑁂 𑀘 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁, 𑀲𑀗𑁆𑀔𑀢𑀥𑀫𑁆𑀫𑀸𑀦𑀼𑀲𑁆𑀲𑀭𑀡𑁂 ¶ 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯. 𑀢𑀲𑁆𑀲 𑀳𑀺 𑀅𑀢𑀻𑀢𑁂𑀲𑀼 𑀲𑀸𑀲𑀯𑀸𑀦𑀸𑀲𑀯𑁂𑀲𑀼, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀦𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑀕𑀢𑀺𑀓𑀁 𑀳𑁄𑀢𑀺. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀜𑁆𑀘 𑀅𑀢𑀻𑀢𑀁 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀫𑀢𑁆𑀢𑀫𑁂𑀯. ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀘𑀺𑀢𑁆𑀢𑀫𑁂𑀯𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀧𑀝𑁆𑀞𑀸𑀦𑁂 𑀧𑀦 ‘‘𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀸𑀦𑀁 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀦 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀡𑁆𑀡𑀸𑀬𑀢𑀦𑀫𑁂𑀯𑀸𑀭𑀫𑁆𑀫𑀡𑀁. 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀙𑀩𑁆𑀩𑀺𑀥𑀫𑁆𑀧𑀺 𑀅𑀦𑀸𑀕𑀢𑀫𑁂𑀯 𑀅𑀚𑁆𑀛𑀢𑁆𑀢𑀜𑁆𑀘 𑀩𑀸𑀳𑀺𑀭𑀜𑁆𑀘𑀸𑀭𑀫𑁆𑀫𑀡𑀁, 𑀇𑀤𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀯𑀺𑀬 𑀅𑀦𑀸𑀕𑀢𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀤𑀺𑀲𑀦𑁆𑀢𑀺. 𑀏𑀯𑀁 𑀅𑀪𑀺𑀜𑁆𑀜𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼, 𑀦𑀯𑀢𑁆𑀢𑀩𑁆𑀩𑁂𑀲𑀼 𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀬𑁄𑀕𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀸𑀦𑀺 𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀺, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦𑀯𑀢𑁆𑀢𑀩𑁆𑀩𑀸𑀦𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀧𑁆𑀧𑀫𑀜𑁆𑀜𑀸 𑀦𑀯𑀢𑁆𑀢𑀩𑁆𑀩𑀸𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁.

‘‘𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀫𑀬𑀁 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀢𑀺 𑀅𑀚𑁆𑀛𑀢𑁆𑀢𑀸. 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀧𑀦𑀸𑀬𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀬𑀓𑀚𑁆𑀛𑀢𑁆𑀢𑁂 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂 𑀯𑀺𑀲𑀬𑀚𑁆𑀛𑀢𑁆𑀢𑁂𑀢𑀺 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀛𑀢𑁆𑀢𑀭𑀢𑁄 ¶ 𑀲𑀫𑀸𑀳𑀺𑀢𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁬𑁨) 𑀳𑀺 𑀅𑀬𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 ¶ (𑀤𑀻. 𑀦𑀺. 𑁨.𑁩𑁭𑁩) 𑀦𑀺𑀬𑀓𑀚𑁆𑀛𑀢𑁆𑀢𑁂. ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁦𑁪) 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂. ‘‘𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁮𑁭) 𑀯𑀺𑀲𑀬𑀚𑁆𑀛𑀢𑁆𑀢𑁂, 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁 𑀦𑀸𑀫. 𑀇𑀥 𑀧𑀦𑀸𑀬𑀁 𑀦𑀺𑀬𑀓𑀚𑁆𑀛𑀢𑁆𑀢𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀇𑀥 𑀅𑀚𑁆𑀛𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀩𑀳𑀺𑀪𑀽𑀢𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀭𑀽𑀧𑀸𑀭𑀽𑀧𑀧𑀜𑁆𑀜𑀢𑁆𑀢𑀺𑀬𑁄 𑀩𑀳𑀺𑀤𑁆𑀥𑀸 𑀦𑀸𑀫, 𑀢𑀢𑀺𑀬𑀧𑀤𑀁 𑀢𑀤𑀼𑀪𑀬𑀯𑀲𑁂𑀦 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁 𑀢𑀺𑀥𑀸 𑀳𑁄𑀦𑁆𑀢𑀺, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁, 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀬𑁄 𑀘 𑀩𑀳𑀺𑀤𑁆𑀥𑀸𑀯. 𑀇𑀫𑀲𑁆𑀫𑀺𑀁 𑀳𑀺 𑀢𑀺𑀓𑁂 𑀓𑀼𑀲𑀮𑀢𑁆𑀢𑀺𑀓𑁂 𑀅𑀮𑀩𑁆𑀪𑀫𑀸𑀦𑀸 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀮𑀩𑁆𑀪𑀦𑁆𑀢𑀺 𑀞𑀧𑁂𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀁, 𑀢𑀤𑁂𑀯 𑀇𑀥 𑀦𑀯𑀢𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀪𑀕𑀯𑀢𑀸 𑀅𑀦𑀦𑁆𑀢𑀭𑀢𑁆𑀢𑀺𑀓𑁂 ‘‘𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀓𑀸𑀫𑀭𑀽𑀧𑀸𑀯𑀘𑀭𑀸𑀤𑀺𑀘𑀺𑀢𑁆𑀢𑀸𑀦𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀜𑁆𑀘 𑀦𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀁. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀁.

𑀬𑀣𑀸𑀯𑀼𑀢𑁆𑀢𑁂 𑀅𑀚𑁆𑀛𑀢𑁆𑀢𑀸𑀤𑀺𑀓𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀦𑀁 𑀯𑀲𑁂𑀦 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀙𑀩𑁆𑀩𑀺𑀥𑀸𑀦𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀸𑀦𑀺 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀢𑁆𑀢𑀬𑀁, 𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑁂𑀯, 𑀯𑁄𑀝𑁆𑀞𑀩𑁆𑀩𑀦𑀯𑀚𑁆𑀚𑀺𑀢𑀸 𑀅𑀳𑁂𑀢𑀼𑀓𑀫𑀳𑀸𑀯𑀺𑀧𑀸𑀓𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀅𑀯𑀲𑁂𑀲𑀸 𑀧𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺 𑀆𑀯𑀚𑁆𑀚𑀦𑀚𑀯𑀦𑀸𑀦𑀺, 𑀅𑀪𑀺𑀜𑁆𑀜𑀸 𑀘 𑀲𑀺𑀬𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀲𑁆𑀲 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀪𑀸𑀯𑀧𑁆𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀢𑀺. 𑀢𑁂𑀲𑀁 ¶ 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀸 𑀅𑀦𑀦𑁆𑀢𑀭𑀢𑁆𑀢𑀺𑀓𑁂, 𑀳𑁂𑀝𑁆𑀞𑀸 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀸, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁆𑀢𑀬𑀁, 𑀧𑀦 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦𑀯𑀢𑁆𑀢𑀩𑁆𑀩𑀸𑀯. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀧𑁆𑀧𑀫𑀜𑁆𑀜𑀸𑀯𑀺𑀭𑀢𑀻 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀯, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸 𑀘. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁.

𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑀸, 𑀧𑀝𑀺𑀳𑀦𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀧𑀝𑀺𑀖𑁂𑀦𑀸𑀢𑀺 𑀲𑀧𑁆𑀧𑀝𑀺𑀖𑀸, 𑀲𑀦𑀺𑀤𑀲𑁆𑀲𑀦𑀸 𑀘 𑀢𑁂 𑀲𑀧𑁆𑀧𑀝𑀺𑀖𑀸 𑀘𑀸𑀢𑀺 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, 𑀭𑀽𑀧𑀸𑀬𑀢𑀦𑀫𑁂𑀯. 𑀦𑀻𑀮𑀸𑀤𑀺𑀪𑁂𑀤𑀫𑀼𑀧𑀸𑀤𑀸𑀬 𑀧𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀦𑀢𑁆𑀣𑀺 𑀏𑀢𑁂𑀲𑀁 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀸, 𑀅𑀦𑀺𑀤𑀲𑁆𑀲𑀦𑀸 𑀘 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀲𑀧𑁆𑀧𑀝𑀺𑀖𑀸 𑀘𑀸𑀢𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, ¶ 𑀲𑁂𑀲𑀸𑀦𑀺 𑀑𑀴𑀸𑀭𑀺𑀓𑀭𑀽𑀧𑀸𑀦𑀺. 𑀢𑀢𑀺𑀬𑀧𑀤𑀁 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀯𑀼𑀢𑁆𑀢𑀁, 𑀲𑀼𑀔𑀼𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸 𑀦𑀸𑀫, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁆𑀢𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀁.

𑀢𑀺𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀤𑀼𑀓𑀫𑀸𑀢𑀺𑀓𑀸𑀬 𑀧𑀦 𑀳𑁂𑀝𑁆𑀞𑀸 𑀅𑀦𑀸𑀕𑀢𑀧𑀤𑀢𑁆𑀣𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫. 𑀳𑁂𑀢𑀼𑀕𑁄𑀘𑁆𑀙𑀓𑁂 𑀢𑀸𑀯 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀳𑁂𑀢𑀼𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀼 𑀉𑀢𑁆𑀢𑀫𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀽𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁂𑀢𑀽. 𑀢𑀢𑁆𑀣 𑀅𑀮𑁄𑀪𑀸𑀤𑀬𑁄 𑀙 𑀥𑀫𑁆𑀫𑀸 𑀳𑁂𑀢𑀼𑀳𑁂𑀢𑀽 𑀦𑀸𑀫, 𑀉𑀧𑀸𑀤𑀸𑀭𑀽𑀧𑀸𑀤𑀻𑀦𑀁 𑀫𑀳𑀸𑀪𑀽𑀢𑀸𑀤𑀬𑁄 𑀧𑀘𑁆𑀘𑀬𑀳𑁂𑀢𑀽 𑀦𑀸𑀫, 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀜𑁆𑀘 𑀉𑀢𑁆𑀢𑀫𑀳𑁂𑀢𑀽 𑀦𑀸𑀫, 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀬𑁄 𑀲𑀸𑀥𑀸𑀭𑀡𑀳𑁂𑀢𑀽 𑀦𑀸𑀫. 𑀇𑀥 𑀧𑀦 𑀳𑁂𑀢𑀼𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄. 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼𑀲𑀗𑁆𑀔𑀸𑀢𑀸 𑀥𑀫𑁆𑀫𑀸, ‘‘𑀳𑁂𑀢𑀼𑀥𑀫𑁆𑀫𑀸’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀦 𑀳𑁂𑀢𑀽𑀢𑀺 𑀢𑁂𑀲𑀜𑁆𑀜𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁.

𑀢𑀢𑁆𑀣 ¶ 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀢𑀬𑁄, 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀢𑀺 𑀅𑀓𑀼𑀲𑀮𑀸 𑀢𑀬𑁄 𑀘𑀸𑀢𑀺 𑀇𑀫𑁂 𑀙 𑀥𑀫𑁆𑀫𑀸 𑀳𑁂𑀢𑀽 𑀦𑀸𑀫. 𑀇𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀘𑁂𑀢𑀲𑀺𑀓𑀸, 𑀲𑀩𑁆𑀩𑀸𑀦𑀺 𑀘 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀦𑀸𑀫, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑁂𑀢𑀼𑀤𑀼𑀓𑀁 𑀧𑀞𑀫𑀁.

𑀲𑀫𑁆𑀧𑀬𑁄𑀕𑀢𑁄 𑀧𑀯𑀢𑁆𑀢𑁂𑀦 𑀲𑀳 𑀳𑁂𑀢𑀼𑀦𑀸𑀢𑀺 𑀲𑀳𑁂𑀢𑀼𑀓𑀸. 𑀢𑀣𑁂𑀯 𑀧𑀯𑀢𑁆𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀅𑀳𑁂𑀢𑀼𑀓𑀸.

𑀢𑀢𑁆𑀣 𑀅𑀳𑁂𑀢𑀼𑀓𑀘𑀺𑀢𑁆𑀢𑀯𑀚𑁆𑀚𑀺𑀢𑀸𑀦𑀺 𑀏𑀓𑀲𑀢𑁆𑀢𑀢𑀺 𑀘𑀺𑀢𑁆𑀢𑀸𑀦𑀺 𑀲𑀳𑁂𑀢𑀼𑀓𑀸 𑀦𑀸𑀫. 𑀢𑁂𑀲𑀼 𑀤𑁆𑀯𑁂 𑀫𑁄𑀳𑀫𑀽𑀮𑀸𑀦𑀺 𑀫𑁄𑀳𑁂𑀦𑁂𑀯 𑀲𑀳𑁂𑀢𑀼𑀓𑀸𑀦𑀺, 𑀅𑀝𑁆𑀞 𑀮𑁄𑀪𑀫𑀽𑀮𑀸𑀦𑀺 𑀮𑁄𑀪𑀫𑁄𑀳𑁂𑀳𑀺 𑀤𑁆𑀯𑀻𑀳𑀺, 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺 𑀤𑁄𑀲𑀫𑁄𑀳𑁂𑀳𑀺, 𑀤𑁆𑀯𑀸𑀤𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀅𑀮𑁄𑀪𑀸𑀤𑁄𑀲𑁂𑀳𑀺, 𑀲𑁂𑀲𑀸𑀦𑀺 𑀲𑀢𑁆𑀢𑀘𑀢𑁆𑀢𑀸𑀮𑀻𑀲 𑀅𑀮𑁄𑀪𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀳𑁂𑀢𑀼𑀓𑀸𑀦𑀻𑀢𑀺, 𑀫𑁄𑀳𑀫𑀽𑀮𑁂𑀲𑀼 𑀧𑀦 𑀫𑁄𑀳𑁄, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀲𑀦𑁆𑀢𑀻𑀭𑀡𑀢𑁆𑀢𑀬𑀁, 𑀯𑁄𑀝𑁆𑀞𑀩𑁆𑀩𑀦𑀁, 𑀳𑀲𑀺𑀢𑀼𑀧𑁆𑀧𑀸𑀤𑀓𑀸𑀦𑀺 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀮𑁄𑀪𑀤𑁄𑀲𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀫𑁄𑀳𑁂𑀦𑁂𑀯 𑀲𑀳𑁂𑀢𑀼𑀓𑀸, 𑀤𑀺𑀝𑁆𑀞𑀺𑀫𑀸𑀦𑁄 ¶ 𑀮𑁄𑀪𑀫𑁄𑀳𑁂𑀳𑀺 𑀤𑁆𑀯𑀻𑀳𑀺, 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀤𑁄𑀲𑀫𑁄𑀳𑁂𑀳𑀺, 𑀫𑁄𑀳𑁄 𑀧𑀦 𑀲𑀺𑀬𑀸 𑀮𑁄𑀪𑁂𑀦, 𑀲𑀺𑀬𑀸 𑀤𑁄𑀲𑁂𑀦𑀸𑀢𑀺 𑀤𑁆𑀯𑀻𑀳𑀺 𑀲𑀳𑁂𑀢𑀼𑀓𑁄𑀧𑀺 𑀫𑁄𑀳𑀫𑀽𑀮𑁂𑀲𑀼 𑀅𑀳𑁂𑀢𑀼𑀓𑁄𑀧𑀺, 𑀣𑀺𑀦𑀫𑀺𑀤𑁆𑀥𑀸𑀦𑀺 𑀲𑀺𑀬𑀸 𑀮𑁄𑀪𑀫𑁄𑀳𑁂𑀳𑀺, 𑀲𑀺𑀬𑀸 𑀤𑁄𑀲𑀫𑁄𑀳𑁂𑀳𑀻𑀢𑀺 𑀢𑀻𑀳𑀺𑀧𑀺 𑀲𑀳𑁂𑀢𑀼𑀓𑀸𑀦𑀺, 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀸𑀦𑀺 𑀢𑀣𑀸 𑀘 𑀓𑁂𑀯𑀮𑀫𑁄𑀳𑁂𑀦 𑀘, 𑀅𑀫𑁄𑀳𑁄 𑀧𑀦 𑀅𑀮𑁄𑀪𑀸𑀤𑁄𑀲𑁂𑀳𑁂𑀯 𑀤𑁆𑀯𑀻𑀳𑀺, 𑀅𑀮𑁄𑀪𑁄 𑀲𑀺𑀬𑀸 𑀅𑀤𑁄𑀲𑀸𑀫𑁄𑀳𑁂𑀳𑀺, 𑀲𑀺𑀬𑀸 𑀅𑀤𑁄𑀲𑁂𑀦𑀸𑀢𑀺 ¶ 𑀤𑁆𑀯𑀻𑀳𑀺, 𑀅𑀤𑁄𑀲𑁄 𑀲𑀺𑀬𑀸 𑀅𑀮𑁄𑀪𑀸𑀫𑁄𑀳𑁂𑀳𑀺, 𑀲𑀺𑀬𑀸 𑀅𑀮𑁄𑀪𑁂𑀦𑀸𑀢𑀺 𑀤𑁆𑀯𑀻𑀳𑀺, 𑀲𑁂𑀲𑀸 𑀧𑀦 𑀤𑁆𑀯𑀸𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀲𑀺𑀬𑀸 𑀢𑀻𑀳𑀺, 𑀲𑀺𑀬𑀸 𑀤𑁆𑀯𑀻𑀳𑀺𑀧𑀺 𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀸, 𑀙𑀦𑁆𑀤𑁄 𑀧𑀦 𑀬𑀣𑀸𑀬𑁄𑀕𑀁 𑀢𑀻𑀳𑀺, 𑀧𑀻𑀢𑀺𑀤𑁄𑀲𑀯𑀚𑁆𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀲𑀺𑀬𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀲𑁂𑀲𑀸 𑀏𑀓𑀸𑀤𑀲 𑀢𑀺𑀚𑀸𑀢𑀺𑀓𑀸 𑀙𑀳𑀺 𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀯𑁂𑀤𑀦𑀸 𑀘𑁂𑀢𑁆𑀣 𑀤𑁄𑀫𑀦𑀲𑁆𑀲𑀪𑀽𑀢𑀸 𑀤𑁆𑀯𑀺𑀳𑁂𑀢𑀼𑀓𑀸𑀯, 𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸 𑀬𑀣𑀸𑀬𑁄𑀕𑀁 𑀤𑁄𑀲𑀯𑀚𑁆𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀲𑀼𑀔𑀤𑀼𑀓𑁆𑀔𑀪𑀽𑀢𑀸 𑀅𑀳𑁂𑀢𑀼𑀓𑀸𑀯, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀦𑁆𑀢𑀺. 𑀤𑀼𑀢𑀺𑀬𑀁.

𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸. 𑀅𑀬𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀲𑀳𑁂𑀢𑀼𑀓𑀤𑀼𑀓𑁂𑀦 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑁄. 𑀲𑀳𑁂𑀢𑀼𑀓𑀤𑀼𑀓𑁄 𑀏𑀯 𑀳𑀺 𑀪𑀕𑀯𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦, 𑀢𑀣𑀸 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀸𑀦𑀁 𑀯𑀸 𑀅𑀚𑁆𑀛𑀸𑀲𑀬𑀯𑀲𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀪𑀸𑀯𑁂𑀦𑀸𑀧𑀺 𑀯𑀼𑀢𑁆𑀢𑁄. 𑀏𑀯𑀁 𑀉𑀧𑀭𑀺𑀧𑀺 𑀲𑀫𑀸𑀦𑀢𑁆𑀣𑀤𑀼𑀓𑀸𑀦𑀁 𑀯𑀘𑀦𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑀺𑀬𑀁.

𑀘𑀢𑀼𑀢𑁆𑀣𑀸𑀤𑀬𑁄 𑀧𑀦 𑀬𑀲𑁆𑀫𑀸 𑀧𑀞𑀫𑀤𑀼𑀓𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀲𑀼 𑀧𑀞𑀫𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑁆𑀯𑁂 𑀤𑀼𑀓𑀸, 𑀧𑀞𑀫𑀤𑀼𑀓𑁂 𑀘 𑀧𑀘𑁆𑀙𑀺𑀫𑀧𑀤𑀁 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀏𑀓𑀁 𑀤𑀼𑀓𑀦𑁆𑀢𑀺 𑀢𑀬𑁄 𑀤𑀼𑀓𑀸 𑀤𑁂𑀲𑀺𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀧𑀤𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯.

𑀢𑀢𑁆𑀣 𑀘 𑀬𑀣𑁂𑀯 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘, 𑀲𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀅𑀬𑀁 𑀤𑀼𑀓𑁄 𑀲𑀫𑁆𑀪𑀯𑀢𑀺, 𑀢𑀣𑀸 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘, 𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀅𑀬𑀫𑁆𑀧𑀺 𑀲𑀫𑁆𑀪𑀯𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀦 𑀬𑁄𑀚𑀦𑀸𑀬𑀧𑀺 𑀏𑀓𑁄 ¶ 𑀮𑀩𑁆𑀪𑀢𑀺. 𑀬𑀣𑀸 𑀘 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀁 𑀮𑀩𑁆𑀪𑀢𑀺, 𑀢𑀣𑀸 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀫𑁆𑀧𑀺. 𑀬𑀣𑀸 𑀘𑁂𑀢𑁆𑀣 𑀲𑀳𑁂𑀢𑀼𑀓𑀤𑀼𑀓𑁂 𑀤𑁆𑀯𑁂 𑀤𑀼𑀓𑀸, 𑀏𑀯𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀧𑀺 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀘 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀘 𑀤𑁆𑀯𑁂 𑀤𑀼𑀓𑀸 𑀮𑀩𑁆𑀪𑀦𑁆𑀢𑀻𑀢𑀺 𑀅𑀧𑀭𑁂𑀧𑀺 𑀧𑀜𑁆𑀘 𑀤𑀼𑀓𑀸 𑀳𑁂𑀢𑀼𑀕𑁄𑀘𑁆𑀙𑀓𑁂 𑀬𑁄𑀚𑁂𑀢𑀼𑀁 𑀲𑀓𑁆𑀓𑀸. 𑀢𑁂 𑀧𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀙𑀲𑀼 𑀏𑀯 ¶ 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑁂 𑀢𑀸𑀯 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀤𑁆𑀯𑁂 𑀢𑀬𑁄 𑀳𑁂𑀢𑀽 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀳𑁂𑀢𑀽 𑀘𑁂𑀯 𑀅𑀜𑁆𑀜𑁄𑀜𑁆𑀜𑀸𑀧𑁂𑀓𑁆𑀔𑀸𑀬 𑀲𑀳𑁂𑀢𑀼𑀓𑀸 𑀘 𑀦𑀸𑀫. 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀧𑀦 𑀳𑁂𑀢𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽 𑀦𑀸𑀫. 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀩𑁆𑀩𑁂 𑀅𑀳𑁂𑀢𑀼𑀓𑀥𑀫𑁆𑀫𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀳𑁂𑀢𑀼𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸 𑀘𑁂𑀯 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘, 𑀙𑀦𑁆𑀤𑁄 𑀘 𑀲𑀳𑁂𑀢𑀼𑀓𑁄 𑀘𑁂𑀯 𑀦 𑀳𑁂𑀢𑀼 𑀏𑀯, 𑀲𑁂𑀲𑀸 𑀢𑀺𑀚𑀸𑀢𑀺𑀓𑀸, 𑀢𑀣𑀸 𑀦𑀯𑀢𑁆𑀢𑀩𑁆𑀩𑀸 𑀘, 𑀫𑁄𑀳𑁄 𑀧𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘 𑀦𑀯𑀢𑁆𑀢𑀩𑁆𑀩𑁄 𑀘. 𑀘𑀢𑀼𑀢𑁆𑀣𑀁.

𑀅𑀦𑀦𑁆𑀢𑀭𑀤𑀼𑀓𑁄𑀧𑀺 𑀇𑀫𑀺𑀦𑀸 𑀤𑀼𑀓𑁂𑀦 𑀲𑀩𑁆𑀩𑀣𑀸𑀧𑀺 𑀲𑀤𑀺𑀲𑁄𑀯𑀸𑀢𑀺. 𑀧𑀜𑁆𑀘𑀫𑀁.

𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀳𑁂𑀢𑀼𑀯𑀚𑁆𑀚𑀺𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀳𑁂𑀢𑀽 𑀲𑀳𑁂𑀢𑀽 𑀦𑀸𑀫, 𑀅𑀳𑁂𑀢𑀼𑀓𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑀳𑁂𑀢𑀽 𑀅𑀳𑁂𑀢𑀼𑀓𑀸 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀤𑀼𑀓𑁂 𑀙 𑀳𑁂𑀢𑀽 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺. 𑀙𑀝𑁆𑀞𑀁.

𑀳𑁂𑀢𑀼𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀢𑁆𑀢𑀲𑀼 ¶ 𑀘𑀽𑀴𑀦𑁆𑀢𑀭𑀤𑀼𑀓𑁂𑀲𑀼 𑀅𑀢𑁆𑀢𑀦𑁄 𑀦𑀺𑀧𑁆𑀨𑀸𑀤𑀓𑁂𑀦 𑀲𑀳 𑀧𑀘𑁆𑀘𑀬𑁂𑀦𑀸𑀢𑀺 𑀲𑀧𑁆𑀧𑀘𑁆𑀘𑀬𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀸𑀦𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀧𑁆𑀧𑀸𑀤𑁂 𑀯𑀸 𑀞𑀺𑀢𑀺𑀬𑀁 𑀯𑀸 𑀧𑀘𑁆𑀘𑀬𑁄 𑀅𑀳𑀼𑀢𑁆𑀯𑀸 𑀪𑀯𑀦𑀲𑁆𑀲𑁂𑀯𑀸𑀪𑀸𑀯𑀸𑀢𑀺 𑀅𑀧𑁆𑀧𑀘𑁆𑀘𑀬𑀸, 𑀦𑀺𑀩𑁆𑀩𑀸𑀦𑀫𑁂𑀯. 𑀤𑁂𑀲𑀦𑀸𑀬 𑀧𑀦𑁂𑀢𑁆𑀣 𑀧𑀭𑀫𑀢𑀸𑀬 𑀲𑁄𑀢𑀧𑀢𑀺𑀢𑀯𑀲𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀁 𑀲𑀦𑀺𑀤𑀲𑁆𑀲𑀦𑀸𑀤𑀻𑀲𑀼𑀧𑀺. 𑀇𑀤𑀜𑁆𑀘 𑀇𑀢𑁄 𑀧𑀭𑀸𑀦𑀺 𑀙 𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁄 𑀧𑀭𑀜𑁆𑀘 𑀬𑀢𑁆𑀣 ‘‘𑀇𑀫𑁂 𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀦 𑀯𑀓𑁆𑀔𑀸𑀫, 𑀢𑀁 𑀦𑀺𑀧𑁆𑀧𑀤𑁂𑀲𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀧𑁆𑀧𑀘𑁆𑀘𑀬𑀤𑀼𑀓𑀁.

𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸𑀢𑀺 𑀲𑀗𑁆𑀔𑀢𑀸. 𑀦 𑀲𑀗𑁆𑀔𑀢𑀸𑀢𑀺 𑀅𑀲𑀗𑁆𑀔𑀢𑀸. 𑀇𑀤𑀜𑁆𑀘 𑀲𑀩𑁆𑀩𑀣𑀸 𑀲𑀧𑁆𑀧𑀘𑁆𑀘𑀬𑀤𑀼𑀓𑀲𑀤𑀺𑀲𑀫𑁂𑀯. 𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀢𑀉𑀪𑀬𑀤𑀼𑀓𑀁 𑀲𑀩𑁆𑀩𑀣𑀸 𑀲𑀤𑀺𑀲𑀫𑁂𑀯. 𑀲𑀗𑁆𑀔𑀢𑀤𑀼𑀓𑀁.

𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀁 𑀦𑀸𑀫. 𑀲𑁂𑀲𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀸 𑀦𑀸𑀫. 𑀲𑀦𑀺𑀤𑀲𑁆𑀲𑀦𑀤𑀼𑀓𑀁.

𑀧𑀲𑀸𑀤𑀯𑀺𑀲𑀬𑀭𑀽𑀧𑀸𑀦𑀺 ¶ 𑀤𑁆𑀯𑀸𑀤𑀲 𑀲𑀧𑁆𑀧𑀝𑀺𑀖𑀸 𑀦𑀸𑀫. 𑀲𑁂𑀲𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺 𑀅𑀧𑁆𑀧𑀝𑀺𑀖𑀸 𑀦𑀸𑀫. 𑀲𑀧𑁆𑀧𑀝𑀺𑀖𑀤𑀼𑀓𑀁.

𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 𑀭𑀽𑀧𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀯𑀸 𑀭𑀽𑀧𑀁, 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄, 𑀪𑀽𑀢𑁄𑀧𑀸𑀤𑀸𑀬𑀭𑀽𑀧𑀫𑁂𑀯. 𑀦 𑀭𑀽𑀧𑀺𑀦𑁄 𑀅𑀭𑀽𑀧𑀺𑀦𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺. 𑀭𑀽𑀧𑀺𑀤𑀼𑀓𑀁.

𑀮𑁄𑀓𑁄 𑀯𑀼𑀘𑁆𑀘𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀯𑀝𑁆𑀝𑀁, 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑁂 𑀦𑀺𑀬𑀼𑀢𑁆𑀢𑀸𑀢𑀺 𑀮𑁄𑀓𑀺𑀬𑀸, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑀢𑁄 𑀮𑁄𑀓𑀢𑁄 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀉𑀢𑁆𑀢𑀺𑀡𑁆𑀡𑀸𑀢𑀺 𑀮𑁄𑀓𑀼𑀢𑁆𑀢𑀭𑀸, 𑀅𑀭𑀺𑀬𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀲𑁂𑀔𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀺𑀬𑀤𑀼𑀓𑀁.

𑀓𑁂𑀦𑀘𑀺 ¶ 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑁂𑀦𑀘𑀺 𑀏𑀓𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀯𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑁂𑀦𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀯𑀸 𑀦 𑀓𑁂𑀦𑀘𑀺 𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀳𑀺 𑀲𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀺. 𑀧𑀤𑀪𑀸𑀚𑀦𑀻𑀬𑀲𑁆𑀫𑀺𑀫𑁆𑀧𑀺 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 (𑀥. 𑀲. 𑁧𑁧𑁦𑁧) 𑀏𑀢𑁆𑀢𑀓𑀁 𑀏𑀓𑀤𑀼𑀓𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 (𑀥. 𑀲. 𑁧𑁧𑁦𑁧) 𑀅𑀬𑀫𑁂𑀓𑁄 𑀤𑀼𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀧𑀦 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀲𑀤𑁆𑀤𑁄 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀬𑀫𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀤𑀼𑀓𑀧𑀭𑀺𑀘𑁆𑀙𑁂𑀤𑁄 𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀦𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫. 𑀲𑁂𑀲𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑁂𑀦𑁂𑀯 𑀘𑀓𑁆𑀔𑀼𑀦𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀢𑀩𑁆𑀩𑀺𑀜𑁆𑀜𑀸𑀡𑀫𑀽𑀮𑀺𑀓𑀸𑀲𑀼𑀧𑀺 𑀘𑀢𑀽𑀲𑀼 𑀬𑁄𑀚𑀦𑀸𑀲𑀼 𑀯𑀺𑀪𑀸𑀕𑁄 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄. 𑀭𑀽𑀧𑀸𑀤𑀬𑁄 𑀧𑀦 𑀧𑀜𑁆𑀘𑀯𑀺𑀲𑀬𑀸 𑀫𑀦𑁄𑀥𑀸𑀢𑀼𑀢𑁆𑀢𑀬𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸. 𑀲𑁂𑀲𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑁂𑀦𑁂𑀯 𑀫𑀦𑁄𑀥𑀸𑀢𑀼𑀢𑁆𑀢𑀬𑁂𑀦 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀓𑀺𑀜𑁆𑀘𑀸𑀧𑀺 𑀲𑀸𑀫𑀜𑁆𑀜𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀧𑀸𑀴𑀺𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 𑀤𑀼𑀓𑁄 𑀦 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀯𑀺𑀲𑁂𑀲𑀢𑁄 𑀯𑀢𑁆𑀢𑀩𑁆𑀩𑁄𑀯. 𑀢𑀣𑀸 𑀳𑀺 𑀙𑀩𑁆𑀩𑀺𑀥𑀸𑀧𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀤𑀺𑀦𑀸 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀭𑀽𑀧𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀢𑁆𑀢𑀺𑀬𑁄 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀢𑀣𑀸 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀧𑀜𑁆𑀜𑀢𑁆𑀢𑀺𑀬𑁄 𑀅𑀓𑀼𑀲𑀮𑀸𑀤𑀺𑀦𑀸 ¶ 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀮𑁄𑀓𑀼𑀢𑁆𑀢𑀭𑀸 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀢𑀣𑀸 𑀦𑀺𑀩𑁆𑀩𑀸𑀦𑀁 𑀮𑁄𑀓𑀼𑀢𑁆𑀢𑀭𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀁 ¶ , 𑀲𑁂𑀲𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸𑀯𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀲𑀩𑁆𑀩𑁂 𑀥𑀫𑁆𑀫𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. 𑀇𑀫𑀲𑁆𑀫𑀺𑀜𑁆𑀘 𑀤𑀼𑀓𑁂 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀓𑁂𑀦𑀘𑀺𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀁.

𑀘𑀽𑀴𑀦𑁆𑀢𑀭𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀕𑁄𑀘𑁆𑀙𑀓𑁂 𑀆𑀲𑀫𑀦𑁆𑀢𑀢𑁄 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀺 𑀲𑀯𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯𑀕𑁄𑀢𑁆𑀭𑀪𑀼𑀁, 𑀑𑀓𑀸𑀲𑀢𑁄 𑀬𑀸𑀯𑀪𑀯𑀕𑁆𑀕𑀸 𑀲𑀯𑀦𑁆𑀢𑀻𑀢𑀺 𑀯𑀸 𑀆𑀲𑀯𑀸, 𑀏𑀢𑁂 𑀥𑀫𑁆𑀫𑁂, 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀓𑀭𑀡𑀢𑁆𑀣𑁄 𑀳𑀺 𑀅𑀬𑀁 𑀆-𑀓𑀸𑀭𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀺𑀆𑀲𑀯𑀸 𑀯𑀺𑀬𑀸𑀢𑀺𑀧𑀺 𑀆𑀲𑀯𑀸. 𑀬𑀤𑀺 𑀘 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸, 𑀏𑀢𑁂 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀺. 𑀅𑀦𑀸𑀤𑀺𑀢𑁆𑀢𑀸 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺 𑀆𑀲𑀯𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀆𑀲𑀯𑀸 𑀦𑀸𑀫.

𑀢𑀢𑁆𑀣 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀦𑀸𑀫. 𑀢𑀢𑁆𑀣 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁨) 𑀘, ‘‘𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀺, 𑀤𑀺𑀝𑁆𑀞𑀺𑀭𑀸𑀕𑁄 𑀦𑀸𑀫 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁫) 𑀘, ‘‘𑀬𑁄 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀪𑀭𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀲𑁆𑀲 𑀭𑀸𑀕𑀲𑁆𑀲 𑀇𑀥𑁂𑀯 𑀧𑀳𑀻𑀦𑀢𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀓𑀸𑀫𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 ¶ 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑁧𑁪𑁬𑁫) 𑀘, ‘‘𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧) 𑀘 𑀯𑀼𑀢𑁆𑀢𑀢𑁆𑀢𑀸 𑀪𑀯𑀸𑀲𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀸𑀲𑀯𑁄𑀢𑀺 𑀧𑀜𑁆𑀜𑀸𑀬𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀲𑁆𑀲, 𑀩𑁆𑀭𑀳𑁆𑀫𑀸𑀦𑀁 𑀯𑀢𑁆𑀣𑀸𑀪𑀭𑀡𑀸𑀤𑀻𑀲𑀼 𑀭𑀸𑀕𑀲𑁆𑀲 𑀘 𑀪𑀯𑀸𑀲𑀯𑀢𑁆𑀢𑀸𑀪𑀸𑀯𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀭𑀸𑀕𑁄 𑀏𑀯 𑀳𑀺 𑀭𑀽𑀧𑀸𑀭𑀽𑀧𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀪𑀯𑀸𑀲𑀯𑁄 𑀳𑁄𑀢𑀺 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁨), 𑀦 𑀘 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑁄 𑀮𑁄𑀪𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, ‘‘𑀮𑁄𑀪𑁄 𑀲𑀺𑀬𑀸 𑀆𑀲𑀯𑁄, 𑀲𑀺𑀬𑀸 𑀦𑁄 𑀆𑀲𑀯𑁄’’𑀢𑀺 𑀧𑀸𑀴𑀺𑀬𑀁 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬, ‘‘𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 ¶ 𑀅𑀯𑀺𑀚𑁆𑀚𑀸𑀲𑀯𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀧𑀤𑀪𑀸𑀚𑀦𑀻𑀬𑁂 𑀘 𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 𑀆𑀕𑀢𑀲𑁆𑀲 ‘‘𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁧𑁦𑁩) 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑀅. 𑁧𑁧𑁦𑁩) 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁄𑀢𑀺𑀧𑀺 𑀅𑀢𑁆𑀣𑀬𑁄𑀚𑀦𑀸 𑀲𑀓𑁆𑀓𑀸 𑀓𑀸𑀢𑀼𑀁 𑀢𑁂𑀪𑀼𑀫𑀓𑀲𑁆𑀲 𑀥𑀫𑁆𑀫𑀲𑁆𑀲 𑀯𑀢𑁆𑀣𑀼𑀓𑀸𑀫𑀢𑁆𑀢𑀸, 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀭𑀸𑀕𑀲𑁆𑀲 𑀘 𑀓𑀺𑀮𑁂𑀲𑀓𑀸𑀫𑀢𑁆𑀢𑀸. 𑀯𑀼𑀢𑁆𑀢𑀁 𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀫𑀳𑀸𑀦𑀺𑀤𑁆𑀤𑁂𑀲𑁂 𑁋

‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸…𑀧𑁂… 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

‘‘𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄…𑀧𑁂… 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 ¶ 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧).

𑀅𑀧𑀺𑀘𑁂𑀢𑁆𑀣 ‘‘𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄’’𑀢𑀺𑀆𑀤𑀺𑀦𑀸 𑀓𑀺𑀮𑁂𑀲𑀓𑀸𑀫𑀲𑁆𑀲 𑀓𑀸𑀫𑁄𑀖𑀸𑀤𑀺𑀪𑀸𑀯𑀁 𑀯𑀤𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀢𑁆𑀣𑀼𑀓𑀸𑀫𑀢𑁆𑀢𑀯𑀺𑀲𑀬𑀲𑁆𑀲 𑀭𑀸𑀕𑀲𑁆𑀲 𑀆𑀲𑀯𑀸𑀤𑀺𑀪𑀸𑀯𑁄 𑀅𑀦𑀼𑀜𑁆𑀜𑀸𑀢𑁄, 𑀦 𑀧𑀜𑁆𑀘𑀓𑀆𑀫𑀕𑀼𑀡𑀺𑀓𑀲𑁆𑀲𑁂𑀯 𑀭𑀸𑀕𑀲𑁆𑀲. 𑀦 𑀘 𑀑𑀖𑀸𑀲𑀯𑁂𑀲𑀼 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁆𑀧𑀺 𑀳𑀺 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀲𑁆𑀲 𑀧𑀤𑀪𑀸𑀚𑀦𑀻𑀬𑁂 ‘‘𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁨𑁨𑁦) 𑀇𑀫𑀲𑁆𑀲 ‘‘𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑀅. 𑁧𑁨𑁨𑁦) 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀳𑁂𑀢𑀼𑀕𑀦𑁆𑀣𑀓𑀺𑀮𑁂𑀲𑀕𑁄𑀘𑁆𑀙𑀓𑁂𑀲𑀼 𑀮𑁄𑀪𑀲𑁆𑀲𑁂𑀯 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑀼𑀢𑁆𑀢𑀁, 𑀦 𑀇𑀢𑀭𑀕𑁄𑀘𑁆𑀙𑀓𑁂𑀲𑀼. 𑀢𑁂𑀲𑀼 𑀘 𑀮𑁄𑀪𑀲𑁆𑀲 𑀧𑀸𑀴𑀺𑀅𑀦𑀼𑀲𑀸𑀭𑀢𑁄 𑀑𑀮𑁄𑀓𑀺𑀬𑀫𑀸𑀦𑁂 𑀓𑀺𑀮𑁂𑀲𑀓𑀸𑀫𑀫𑀢𑁆𑀢𑀓𑁄. 𑀅𑀦𑀯𑀲𑁂𑀲𑀮𑁄𑀪𑀧𑀭𑀺𑀬𑀸𑀤𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀘𑀢𑀽𑀲𑀼 𑀧𑀦 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀪𑀸𑀯𑁂𑀦, 𑀓𑀸𑀫𑀚𑁆𑀛𑁄𑀲𑀸𑀦𑀦𑀺𑀓𑀦𑁆𑀢𑀺𑀪𑀸𑀯𑁂𑀦 ¶ 𑀘 𑀧𑀯𑀢𑁆𑀢𑁄 𑀮𑁄𑀪𑁄 𑀪𑀯𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀪𑀯𑀸𑀲𑀯𑁄’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁨) 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑁂𑀲𑀽’’𑀢𑀺 (𑀥. 𑀲. 𑁧𑁪𑁬𑁫) 𑀦𑀺𑀬𑀫𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁, 𑀅𑀥𑀺𑀧𑁆𑀧𑀸𑀬𑁄 𑀧𑀦 𑀕𑀯𑁂𑀲𑀺𑀢𑀩𑁆𑀩𑁄. 𑀤𑁆𑀯𑀸𑀲𑀝𑁆𑀞𑀺𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀯𑀢𑁆𑀣𑀼𑀓𑁄 𑀲𑀩𑁆𑀩𑁄𑀧𑀺 𑀫𑁄𑀳𑁄 𑀅𑀯𑀺𑀚𑁆𑀚𑀸𑀲𑀯𑁄 𑀦𑀸𑀫. 𑀢𑁂𑀲𑀼 𑀤𑀺𑀝𑁆𑀞𑀸𑀲𑀯𑁄 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀓𑀸𑀫𑀸𑀲𑀯𑁄 ¶ 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄 𑀘 𑀘𑀢𑀼𑀢𑁆𑀣𑁂𑀦 𑀧𑀳𑀻𑀬𑀢𑀺. 𑀇𑀫𑁂𑀲𑀜𑁆𑀘 𑀓𑀸𑀫𑀸𑀲𑀯𑀪𑀯𑀸𑀲𑀯𑀸𑀦𑀁 𑀮𑁄𑀪𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀢𑁄 𑀢𑀬𑁄 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀆𑀲𑀯𑀸 𑀦𑀸𑀫. 𑀆𑀲𑀯𑀤𑀼𑀓𑀁 𑀧𑀞𑀫𑀁.

𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸, 𑀲𑀩𑁆𑀩𑁂 𑀮𑁄𑀓𑀺𑀬𑀥𑀫𑁆𑀫𑀸. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀆𑀲𑀯𑀸𑀢𑀺 𑀅𑀦𑀸𑀲𑀯𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀯. 𑀘𑁂𑀢𑀲𑀺𑀓𑀸 𑀧𑀦𑁂𑀢𑁆𑀣 𑀮𑁄𑀓𑀺𑀬𑀤𑀼𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀯. 𑀲𑀸𑀲𑀯𑀤𑀼𑀓𑀁 𑀤𑀼𑀢𑀺𑀬𑀁.

𑀢𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀤𑀼𑀓𑀸𑀦𑀁 𑀧𑀤𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯. 𑀲𑁂𑀲𑀫𑁂𑀢𑁆𑀣 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀁 𑀑𑀲𑀸𑀦𑀤𑀼𑀓𑁄 𑀧𑀞𑀫𑀤𑀼𑀓𑁂 𑀤𑀼𑀢𑀺𑀬𑀧𑀤𑀁 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀏𑀯𑀫𑀺𑀥 ‘‘𑀦𑁄 𑀆𑀲𑀯𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸𑀧𑀺, 𑀅𑀦𑀸𑀲𑀯𑀸𑀧𑀻’’𑀢𑀺 𑀦 𑀯𑀼𑀢𑁆𑀢𑁄. 𑀅𑀬𑀜𑁆𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀇𑀳 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀜𑁆𑀜𑁄𑀚𑀦𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁.

𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀤𑁄𑀲𑀫𑁄𑀳𑀫𑀽𑀮𑀘𑀺𑀢𑁆𑀢𑁂𑀲𑀼 𑀫𑁄𑀳𑁄, 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑁄𑀳𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀓𑀼𑀲𑀮𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸𑀯, 𑀫𑁄𑀳𑁄 𑀧𑀦 𑀢𑀺𑀚𑀸𑀢𑀺𑀓𑁄 𑀘 𑀤𑁆𑀯𑀺𑀥𑀸𑀧𑀺 𑀳𑁄𑀢𑀺, 𑀲𑁂𑀲𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯𑀸𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑁄 ¶ 𑀆𑀲𑀯𑀸 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀥𑀫𑁆𑀫𑀸 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀆𑀲𑀯𑀸𑀢𑀺 𑀯𑀼𑀢𑁆𑀢𑁂𑀳𑀺 ¶ 𑀲𑁂𑀲𑀸 𑀅𑀓𑀼𑀲𑀮𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀘 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀏𑀯, 𑀲𑁂𑀲𑀸 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀘𑀢𑀼𑀢𑁆𑀣𑀁.

𑀬𑁂 𑀧𑀦 𑀮𑁄𑀪𑀫𑀽𑀮𑁂𑀲𑀼 𑀮𑁄𑀪𑀫𑁄𑀳𑀸, 𑀮𑁄𑀪𑀤𑀺𑀝𑁆𑀞𑀺𑀫𑁄𑀳𑁄 𑀘𑀸𑀢𑀺 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑁂𑀯 𑀆𑀲𑀯𑀯𑀚𑁆𑀚𑀺𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀦𑀸𑀫. 𑀇𑀥 𑀧𑀦 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀆𑀲𑀯𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀏𑀯, 𑀫𑁄𑀳𑁄 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄, 𑀢𑀺𑀚𑀸𑀢𑀺𑀓𑀸 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸 𑀦𑀸𑀫. 𑀇𑀥 𑀧𑀦 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀏𑀯, 𑀫𑁄𑀳𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀲𑁂𑀲𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀤𑁆𑀯𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸𑀯, 𑀫𑁄𑀳𑀯𑀚𑁆𑀚𑀺𑀢𑀸 𑀧𑀦 𑀅𑀓𑀼𑀲𑀮𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀙𑀝𑁆𑀞𑀁.

𑀆𑀲𑀯𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁂 ¶ 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀲𑀁𑀬𑁄𑀚𑀦𑀸.

𑀢𑀢𑁆𑀣 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀪𑀯𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑁂 𑀤𑀲 𑀥𑀫𑁆𑀫𑀸 𑀲𑀁𑀬𑁄𑀚𑀦𑀸 𑀦𑀸𑀫. 𑀢𑁂𑀲𑀼 𑀓𑀸𑀫𑀪𑀯𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀸𑀦𑀺 𑀆𑀲𑀯𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑀸𑀦𑁂𑀯. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀧𑀺𑀬𑀲𑁆𑀲 𑀫𑁂 𑀅𑀦𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀻’’𑀢𑀺 (𑀥. 𑀲. 𑁧𑁦𑁬𑁬) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀲𑀢𑁆𑀢𑁂𑀲𑀼, 𑀅𑀝𑁆𑀞𑀸𑀦𑀓𑁄𑀧𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑁄𑀧𑀺 𑀤𑁄𑀲𑁄 𑀧𑀝𑀺𑀖𑀲𑀁𑀬𑁄𑀚𑀦𑀁 𑀦𑀸𑀫.

‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀺 ¶ , 𑀲𑀤𑀺𑀲𑁄𑀳𑀫𑀲𑁆𑀫𑀺, 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀏𑀯𑀁 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑁄 𑀲𑀩𑁆𑀩𑁄 𑀫𑀸𑀦𑁄 𑀫𑀸𑀦𑀲𑀁𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀣 𑀲𑁂𑀬𑁆𑀬𑀲𑁆𑀲𑁂𑀯 𑀲𑀢𑁄 𑀧𑀼𑀕𑁆𑀕𑀮𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀺, 𑀲𑀤𑀺𑀲𑁄, 𑀳𑀻𑀦𑁄’’𑀢𑀺 𑀘 𑀢𑀺𑀥𑀸 𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀲𑀤𑀺𑀲𑀳𑀻𑀦𑀸𑀦𑀫𑁆𑀧𑀺. 𑀢𑀢𑁆𑀣 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄. 𑀢𑀣𑀸 𑀲𑀤𑀺𑀲𑀲𑁆𑀲 𑀲𑀤𑀺𑀲𑀫𑀸𑀦𑁄, 𑀳𑀻𑀦𑀲𑁆𑀲 𑀳𑀻𑀦𑀫𑀸𑀦𑁄 𑀘. 𑀢𑀺𑀡𑁆𑀡𑀫𑁆𑀧𑀺 𑀇𑀢𑀭𑁂 𑀤𑁆𑀯𑁂 𑀤𑁆𑀯𑁂 𑀫𑀸𑀦𑀸 𑀅𑀬𑀸𑀣𑀸𑀯𑀫𑀸𑀦𑀸𑀢𑀺 𑀜𑀸𑀢𑀩𑁆𑀩𑀸.

𑀲𑀢𑁆𑀣𑀼𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀢𑀤𑀼𑀪𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀘 𑀓𑀗𑁆𑀔𑀢𑀸𑀯𑀲𑁂𑀦 𑀧𑀯𑀢𑁆𑀢𑀸 𑀲𑀩𑁆𑀩𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁 𑀦𑀸𑀫.

𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀳𑀺 𑀲𑀼𑀤𑁆𑀥𑀻𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀏𑀯 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁 𑀦𑀸𑀫.

𑀢𑀤𑀯𑀲𑁂𑀲𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀤𑀻𑀲𑀼 ¶ 𑀅𑀲𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀇𑀲𑁆𑀲𑀸 𑀇𑀲𑁆𑀲𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀓𑀼𑀮𑀮𑀸𑀪𑀯𑀡𑁆𑀡𑀥𑀫𑁆𑀫𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁 𑀦𑀸𑀫. 𑀲𑀓𑀮𑀸𑀭𑀸𑀫𑁂𑀧𑀺 𑀳𑀺 𑀧𑀭𑀺𑀯𑁂𑀡𑁄𑀯𑀭𑀓𑀸𑀤𑀻𑀲𑀼 𑀯𑀸 𑀯𑀲𑀦𑁆𑀢𑁄 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀁 𑀦 𑀇𑀘𑁆𑀙𑀢𑀺, 𑀆𑀕𑀢𑀲𑁆𑀲𑀸𑀧𑀺 𑀔𑀺𑀧𑁆𑀧𑀁 𑀕𑀫𑀦𑀜𑁆𑀜𑁂𑀯 𑀇𑀘𑁆𑀙𑀢𑀺, 𑀇𑀤𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫. 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀦𑀁 𑀧𑀦 𑀢𑀢𑁆𑀣 𑀯𑀸𑀲𑀁 𑀅𑀦𑀺𑀘𑁆𑀙𑀢𑁄 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀳𑁄𑀢𑀺.

𑀅𑀢𑁆𑀢𑀦𑁄 𑀧𑀦 𑀉𑀧𑀝𑁆𑀞𑀸𑀓𑀓𑀼𑀮𑁂 𑀯𑀸 𑀜𑀸𑀢𑀺𑀓𑀼𑀮𑁂 𑀯𑀸 𑀅𑀜𑁆𑀜𑀲𑁆𑀲 𑀧𑁂𑀲𑀮𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄 𑀓𑀼𑀮𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀅𑀦𑀺𑀘𑁆𑀙𑀢𑁄 𑀧𑀦 𑀦 𑀳𑁄𑀢𑀺. 𑀲𑁄 𑀳𑀺 𑀢𑁂𑀲𑀁 𑀧𑀲𑀸𑀤𑀪𑁂𑀤𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀅𑀢𑁆𑀢𑀦𑀸 𑀮𑀪𑀦𑀝𑁆𑀞𑀸𑀦𑁂 𑀘𑀢𑀼𑀧𑀘𑁆𑀘𑀬𑀁 𑀮𑀪𑀦𑁆𑀢𑁂 𑀲𑀻𑀮𑀯𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀸 𑀮𑀪𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀮𑀸𑀪𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀬𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀧𑀽𑀢𑀺𑀪𑀸𑀯𑀫𑁆𑀧𑀺 𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀲𑁆𑀲 𑀦 𑀤𑁂𑀢𑀺 ¶ , 𑀢𑀁 𑀮𑀪𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀇𑀫𑀁 𑀅𑀜𑁆𑀜𑁄 𑀲𑀻𑀮𑀯𑀸 𑀮𑀪𑁂𑀬𑁆𑀬, 𑀧𑀭𑀺𑀪𑁄𑀕𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀯𑀡𑁆𑀡𑁄 𑀦𑀸𑀫 𑀅𑀢𑁆𑀢𑀦𑀸 𑀲𑀤𑀺𑀲𑁄 𑀲𑀭𑀻𑀭𑀯𑀡𑁆𑀡𑁄𑀧𑀺 𑀕𑀼𑀡𑀯𑀡𑁆𑀡𑁄𑀧𑀺. 𑀢𑀢𑁆𑀣 ‘‘𑀭𑀽𑀧𑀯𑀸 𑀧𑀸𑀲𑀸𑀤𑀺𑀓𑁄’’𑀢𑀺 𑀧𑀭𑀲𑁆𑀲 𑀲𑀭𑀻𑀭𑀯𑀡𑁆𑀡𑀁, ‘‘𑀲𑀻𑀮𑀯𑀸, 𑀥𑀼𑀢𑀯𑀸’’𑀢𑀺𑀆𑀤𑀺𑀦𑀸 𑀕𑀼𑀡𑀯𑀡𑁆𑀡𑀜𑁆𑀘 𑀅𑀢𑁆𑀢𑀦𑁄 𑀯𑀡𑁆𑀡𑀪𑀡𑀦𑀝𑁆𑀞𑀸𑀦𑁂 𑀯𑀼𑀘𑁆𑀘𑀫𑀸𑀦𑀁 𑀅𑀲𑀳𑀦𑁆𑀢𑀲𑁆𑀲 𑀤𑀼𑀯𑀺𑀥𑀁 𑀯𑀡𑁆𑀡𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺, 𑀅𑀧𑁂𑀲𑀮𑀁 𑀧𑀦 𑀯𑀺𑀧𑀦𑁆𑀦𑀁 𑀧𑀲𑀁𑀲𑀺𑀢𑁆𑀯𑀸 𑀧𑀭𑀺𑀲𑀸𑀲𑀼 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀸𑀧𑀕𑀭𑀳𑀺𑀢𑀸𑀬 𑀅𑀲𑀳𑀦𑁆𑀢𑀲𑁆𑀲 𑀦 𑀳𑁄𑀢𑀺.

𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀬𑁂𑀯, 𑀦 𑀧𑀝𑀺𑀯𑁂𑀥𑁄 𑀅𑀭𑀺𑀬𑀸𑀦𑀁 𑀢𑀢𑁆𑀣 𑀫𑀘𑁆𑀙𑀭𑀺𑀬𑀸𑀪𑀸𑀯𑀸. 𑀧𑀭𑀺𑀬𑀢𑁆𑀢𑀺𑀁 𑀧𑀦 𑀕𑀼𑀴𑁆𑀳𑀕𑀦𑁆𑀣𑀁 𑀅𑀜𑁆𑀜𑁂𑀲𑀁 𑀅𑀓𑀣𑁂𑀢𑀼𑀓𑀸𑀫𑀲𑁆𑀲 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀧𑀦 𑀮𑁄𑀮𑀲𑁆𑀲 ¶ , 𑀓𑀸𑀮𑁂𑀦 𑀲𑀫𑀡𑁄, 𑀓𑀸𑀮𑁂𑀦 𑀦𑀺𑀕𑀡𑁆𑀞𑀸𑀤𑀺 𑀘 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀧𑀯𑁂𑀡𑀺𑀆𑀕𑀢𑀁 𑀢𑀦𑁆𑀢𑀺𑀁 ‘‘𑀲𑀡𑁆𑀳𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀮𑀼𑀴𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀫𑀬𑀁 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀘 𑀦 𑀤𑁂𑀦𑁆𑀢𑀲𑁆𑀲, 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀯𑀸 𑀧𑀓𑀢𑀺𑀬𑀸 𑀲𑀞𑀲𑁆𑀲 𑀫𑀸𑀬𑀸𑀯𑀺𑀦𑁄 ‘‘𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀦 𑀤𑁂𑀦𑁆𑀢𑀲𑁆𑀲 𑀘 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀺. 𑀬𑀣𑀸 𑀘 𑀪𑀺𑀓𑁆𑀔𑀽𑀦𑀁, 𑀏𑀯𑀁 𑀕𑀳𑀝𑁆𑀞𑀸𑀦𑀫𑁆𑀧𑀺 𑀧𑀜𑁆𑀘𑀯𑀺𑀥𑀁 𑀫𑀘𑁆𑀙𑀭𑀺𑀬𑀁 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀲𑀗𑁆𑀔𑁂𑀧𑀢𑁄 𑀧𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀇𑀫𑁂𑀲𑀼 𑀘 𑀲𑀁𑀬𑁄𑀚𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀧𑀝𑀺𑀖𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀓𑀸𑀫𑀭𑀸𑀕𑁄 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀫𑀸𑀦𑀪𑀯𑀭𑀸𑀕𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀢𑀢𑁆𑀣 𑀘 𑀅𑀬𑀸𑀣𑀸𑀯𑀫𑀸𑀦𑁄 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀇𑀫𑁂𑀲𑀁 𑀓𑀸𑀫𑀭𑀸𑀕𑀪𑀯𑀭𑀸𑀕𑀸𑀦𑀁 𑀮𑁄𑀪𑀲𑀪𑀸𑀯𑀢𑁆𑀢𑀸 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀢𑁄 𑀅𑀝𑁆𑀞𑁂𑀯 𑀥𑀫𑁆𑀫𑀸 𑀤𑀲 𑀲𑀁𑀬𑁄𑀚𑀦𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀤𑀲 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦𑁄 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀁 𑀆𑀲𑀯𑀤𑀼𑀓𑀲𑀤𑀺𑀲𑀁. 𑀲𑀁𑀬𑁄𑀚𑀦𑀤𑀼𑀓𑀁 𑀧𑀞𑀫𑀁.

𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀲𑀁𑀬𑁄𑀚𑀦𑀲𑀁𑀯𑀟𑁆𑀠𑀦𑁂𑀦 𑀲𑀁𑀬𑁄𑀚𑀦𑀸𑀦𑀁 𑀳𑀺𑀢𑀸𑀢𑀺 𑀲𑀁𑀬𑁄𑀚𑀦𑀺𑀬𑀸, 𑀲𑀸𑀲𑀯𑀥𑀫𑁆𑀫𑀸 𑀏𑀯. 𑀢𑀣𑀸 𑀦𑀻𑀯𑀭𑀡𑀺𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀦 𑀲𑀁𑀬𑁄𑀚𑀦𑀺𑀬𑀸 𑀅𑀲𑀁𑀬𑁄𑀚𑀦𑀺𑀬𑀸, 𑀅𑀦𑀸𑀲𑀯𑀸. 𑀲𑁂𑀲𑀁 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀢𑀢𑀺𑀬𑀸𑀤𑀬𑁄𑀧𑀺 ¶ 𑀆𑀲𑀯𑀕𑁄𑀘𑁆𑀙𑀓𑁂 𑀢𑀢𑀺𑀬𑀸𑀤𑀺𑀲𑀤𑀺𑀲𑀸 𑀏𑀯, 𑀯𑀺𑀲𑁂𑀲𑀫𑀢𑁆𑀢𑀫𑁂𑀯𑁂𑀢𑁆𑀣 𑀯𑀓𑁆𑀔𑀸𑀫. 𑀢𑀢𑁆𑀣 𑀳𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀁 𑀲𑀫𑀫𑁂𑀯. 𑀢𑀢𑀺𑀬𑀁.

𑀤𑀲 ¶ 𑀲𑀁𑀬𑁄𑀚𑀦𑀸𑀦𑀺 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀮𑁄𑀓𑀺𑀬𑀥𑀫𑁆𑀫𑀸 𑀲𑀁𑀬𑁄𑀚𑀦𑀺𑀬𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀬𑁂 𑀧𑀦 𑀉𑀤𑁆𑀥𑀘𑁆𑀘𑀯𑀺𑀭𑀳𑀺𑀢𑁂𑀲𑀼 𑀏𑀓𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀫𑁄𑀳𑀸 𑀤𑁄𑀲𑀫𑁄𑀳𑀸 𑀤𑁄𑀲𑀇𑀲𑁆𑀲𑀸𑀫𑁄𑀳𑀸 𑀤𑁄𑀲𑀫𑀘𑁆𑀙𑀭𑀺𑀬𑀫𑁄𑀳𑀸 𑀮𑁄𑀪𑀫𑀸𑀦𑀫𑁄𑀳𑀸 𑀮𑁄𑀪𑀤𑀺𑀝𑁆𑀞𑀺𑀫𑁄𑀳𑀸 𑀘𑀸𑀢𑀺 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑁂𑀯 𑀲𑀁𑀬𑁄𑀚𑀦𑀯𑀚𑁆𑀚𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀫𑀺𑀥 𑀅𑀦𑀦𑁆𑀢𑀭𑀤𑀼𑀓𑀜𑁆𑀘 𑀆𑀲𑀯𑀕𑁄𑀘𑁆𑀙𑀓𑁂 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀆𑀲𑀯𑀧𑀤𑀝𑁆𑀞𑀸𑀦𑁂 𑀲𑀁𑀬𑁄𑀚𑀦𑀧𑀤𑀫𑁂𑀯 𑀯𑀺𑀲𑁂𑀲𑁄. 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀸𑀦𑀺.

𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀕𑀦𑁆𑀣𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀕𑀦𑁆𑀣𑀸.

𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀕𑀦𑁆𑀣𑀸 𑀦𑀸𑀫. 𑀢𑀢𑁆𑀣 𑀅𑀪𑀺𑀚𑁆𑀛𑀸 𑀏𑀯 𑀦𑀸𑀫𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀦𑁆𑀣𑁂𑀢𑀻𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀦𑀢𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀯𑀺𑀭𑀳𑀺𑀢𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀦𑀸𑀫. 𑀲𑁂𑀲𑀸 𑀯𑀼𑀢𑁆𑀢𑀢𑁆𑀣𑀸𑀯. 𑀇𑀫𑁂𑀲𑀼 𑀘 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀕𑀦𑁆𑀣𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀩𑁆𑀬𑀸𑀧𑀸𑀤𑁄 𑀢𑀢𑀺𑀬𑁂𑀦, 𑀅𑀪𑀺𑀚𑁆𑀛𑀸 𑀘𑀢𑀽𑀳𑀺𑀧𑀺. 𑀇𑀫𑁂 𑀘 𑀲𑀪𑀸𑀯𑀢𑁄 𑀢𑀬𑁄 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 ¶ 𑀕𑀦𑁆𑀣𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀕𑀦𑁆𑀣𑀸 𑀦𑀸𑀫. 𑀕𑀦𑁆𑀣𑀤𑀼𑀓𑀁 𑀧𑀞𑀫𑀁.

𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 ¶ 𑀕𑀦𑁆𑀣𑁂𑀳𑀺 𑀕𑀦𑁆𑀣𑀺𑀢𑀩𑁆𑀩𑀸𑀢𑀺 𑀕𑀦𑁆𑀣𑀦𑀺𑀬𑀸. 𑀦 𑀕𑀦𑁆𑀣𑀦𑀺𑀬𑀸 𑀅𑀕𑀦𑁆𑀣𑀦𑀺𑀬𑀸. 𑀲𑁂𑀲𑀁 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀫𑁄𑀳𑀫𑀽𑀮𑀯𑀚𑁆𑀚𑀺𑀢𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀮𑁄𑀪𑀁, 𑀤𑁄𑀲𑀫𑀽𑀮𑁂𑀲𑀼 𑀘 𑀤𑁄𑀲𑀁 𑀞𑀧𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀬𑀣𑀸𑀯𑀼𑀢𑁆𑀢𑁄 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑀫𑀽𑀮𑀸𑀦𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑀺𑀝𑁆𑀞𑀺𑀫𑀸𑀦𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀏𑀯. 𑀤𑁄𑀲𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀸 𑀕𑀦𑁆𑀣𑀦𑀺𑀬𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀦𑀸𑀫. 𑀢𑀣𑀸 𑀘𑁂𑀢𑀲𑀺𑀓𑁂𑀲𑀼 𑀕𑀦𑁆𑀣𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸, 𑀅𑀧𑁆𑀧𑀫𑀜𑁆𑀜𑀸 𑀘, 𑀲𑁂𑀲𑀸 𑀘𑁂𑀢𑀲𑀺𑀓𑀸 𑀧𑀦 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑀢𑀼𑀢𑁆𑀣𑀁.

𑀤𑀺𑀝𑁆𑀞𑀺 𑀕𑀦𑁆𑀣𑀸𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀮𑁄𑀪𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀕𑀦𑁆𑀣𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀦𑀸𑀫. 𑀇𑀥 𑀧𑀦 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑀸𑀦𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀸𑀦𑀺 𑀢𑀺𑀚𑀸𑀢𑀺𑀓𑀸 𑀘 𑀲𑀺𑀬𑀸, 𑀢𑀣𑀸 𑀦𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀕𑀦𑁆𑀣𑀦𑀺𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀕𑀦𑁆𑀣𑀦𑀺𑀬𑀸 𑀦𑀸𑀫. 𑀇𑀥 𑀧𑀦 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑁄𑀲𑁄 𑀯𑀺𑀘𑀺𑀓𑀺𑀘𑁆𑀙𑀸 ¶ 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀕𑀦𑁆𑀣𑀦𑀺𑀬𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀮𑁄𑀪𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀧𑀦 𑀤𑁆𑀯𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀅𑀓𑀼𑀲𑀮𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘. 𑀙𑀝𑁆𑀞𑀁.

𑀕𑀦𑁆𑀣𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀑𑀖𑀬𑁄𑀕𑀕𑁄𑀘𑁆𑀙𑀓𑀸𑀦𑀺 𑀲𑀩𑁆𑀩𑀣𑀸 𑀆𑀲𑀯𑀕𑁄𑀘𑁆𑀙𑀓𑀲𑀤𑀺𑀲𑀸𑀦𑀺. 𑀧𑀤𑀢𑁆𑀣𑀫𑀢𑁆𑀢𑀫𑁂𑀯, 𑀳𑁂𑀢𑁆𑀣 𑀦𑀸𑀫𑀫𑀢𑁆𑀢𑀜𑁆𑀘 𑀯𑀺𑀲𑁂𑀲𑁄 ¶ . 𑀢𑀢𑁆𑀣 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸. 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑀺𑀓𑁆𑀓𑀫𑀦𑀻𑀬𑀢𑁄 𑀑𑀖𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀑𑀖𑀦𑀺𑀬𑀸. 𑀢𑀣𑀸 𑀬𑁄𑀕𑀦𑀺𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀑𑀖𑀬𑁄𑀕𑀕𑁄𑀘𑁆𑀙𑀓𑀸𑀦𑀺 𑀦𑀺𑀝𑁆𑀞𑀺𑀢𑀸𑀦𑀺.

𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘𑀺𑀢𑁆𑀢𑀁 𑀦𑀻𑀯𑀭𑀦𑁆𑀢𑀺 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺 𑀇𑀫𑁂 𑀙 𑀦𑀻𑀯𑀭𑀡𑀸 𑀦𑀸𑀫. 𑀢𑀢𑁆𑀣 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀘𑀺𑀢𑁆𑀢𑀲𑁆𑀲 𑀖𑀦𑀪𑀸𑀯𑁄, 𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀫𑁂𑀥𑀢𑀻𑀢𑀺 𑀫𑀺𑀤𑁆𑀥𑀁, 𑀅𑀓𑀫𑁆𑀫𑀜𑁆𑀜𑀪𑀸𑀯𑁄, 𑀧𑀘𑀮𑀸𑀬𑀺𑀓𑀪𑀸𑀯𑀓𑀭𑁄𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀤𑁆𑀤𑀸𑀬 𑀧𑀼𑀩𑁆𑀩𑀪𑀸𑀕𑁂, 𑀅𑀧𑀭𑀪𑀸𑀕𑁂 𑀘 𑀧𑀘𑀮𑀸𑀬𑀦𑀳𑁂𑀢𑀼𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑁂. 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀳𑀺 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂𑀦 𑀅𑀲𑀫𑁆𑀫𑀺𑀲𑁆𑀲𑀪𑀯𑀗𑁆𑀕𑀲𑀦𑁆𑀢𑀢𑀺𑀯𑀲𑁂𑀦 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀳𑁄𑀢𑀺, 𑀢𑀁 𑀧𑀦 𑀢𑁂𑀲𑀁 𑀣𑀺𑀦𑀫𑀺𑀤𑁆𑀥𑀳𑁂𑀢𑀼𑀓𑀁 𑀦 𑀳𑁄𑀢𑀺, 𑀇𑀢𑀭𑁂𑀲𑀫𑁂𑀯 𑀳𑁄𑀢𑀺.

𑀓𑁂𑀘𑀺 ¶ 𑀧𑀦 𑀭𑀽𑀧𑀫𑁂𑀯 ‘‘𑀫𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑁄𑀕𑀯𑀘𑀦𑀢𑁄 𑀅𑀭𑀽𑀧𑀫𑁂𑀯. 𑀅𑀓𑀼𑀲𑀮𑀜𑁆𑀘 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀧𑀳𑀻𑀦𑀢𑁆𑀢𑀸’’𑀢𑀺𑀆𑀤𑀺𑀧𑀳𑀸𑀦𑀯𑀘𑀦𑀢𑁄. 𑀅𑀓𑀼𑀲𑀮𑀸 𑀏𑀯 𑀳𑀺 𑀧𑀳𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀆𑀭𑀼𑀧𑁆𑀧𑁂𑀧𑀺 𑀘𑁂𑀢𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. ‘‘𑀲𑁄𑀧𑁆𑀧𑀁 𑀧𑀘𑀮𑀸𑀬𑀺𑀓𑀸’’𑀢𑀺 (𑀥. 𑀲. 𑁧𑁧𑁬𑁩) 𑀧𑀤𑀪𑀸𑀚𑀦𑀻𑀬𑁂 𑀧𑀦𑀲𑁆𑀲 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀣𑀺𑀦𑀁 𑀫𑀺𑀤𑁆𑀥𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀦𑀻𑀯𑀭𑀡𑀝𑁆𑀞𑀸𑀦𑁂 𑀏𑀓𑀦𑀻𑀯𑀭𑀡𑀁 𑀯𑀼𑀢𑁆𑀢𑀁, 𑀢𑀣𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁. 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀓𑀢𑀁 𑀧𑀸𑀧’’𑀦𑁆𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑀻𑀬𑁂 ‘‘𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄’’𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸’’𑀢𑀺𑀆𑀤𑀺 𑀧𑀦 𑀓𑀼𑀓𑁆𑀓𑀼𑀘𑁆𑀘𑀫𑀽𑀮𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁𑀲𑀜𑁆𑀜𑀺𑀢𑀸𑀬 𑀳𑀺 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀧𑀘𑁆𑀙𑀸 ‘‘𑀤𑀼𑀝𑁆𑀞𑀼 𑀫𑀬𑀸 𑀓𑀢’’𑀦𑁆𑀢𑀺 𑀲𑀼𑀤𑀺𑀦𑁆𑀦𑀸𑀤𑀻𑀦𑀁 𑀯𑀺𑀬 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀧𑀦 𑀯𑀺𑀦𑀬𑁂 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄…𑀧𑁂… 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀘𑀺. 𑁨𑁦𑁪) 𑀓𑀼𑀓𑁆𑀓𑀼𑀘𑁆𑀘𑀁 𑀆𑀕𑀢𑀁, 𑀢𑀁 𑀦𑀻𑀯𑀭𑀡𑀓𑀼𑀓𑁆𑀓𑀼𑀘𑁆𑀘𑀁 ¶ . 𑀦 𑀳𑀺 𑀅𑀭𑀳𑀢𑁄 𑀦𑀻𑀯𑀭𑀡𑀁 𑀅𑀢𑁆𑀣𑀺, 𑀦𑀻𑀯𑀭𑀡𑀯𑀢𑀺𑀭𑀽𑀧𑀓𑀁 𑀧𑀦 ‘‘𑀓𑀧𑁆𑀧𑀢𑀺, 𑀦 𑀓𑀧𑁆𑀧𑀢𑀻’’𑀢𑀺 𑀯𑀻𑀫𑀁𑀲𑀦𑀲𑀗𑁆𑀔𑀸𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀦𑀻𑀯𑀭𑀡𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑀺 𑀏𑀯. 𑀇𑀫𑁂𑀲𑀼 𑀘 𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀩𑁆𑀬𑀸𑀧𑀸𑀤𑁄 𑀢𑀢𑀺𑀬𑁂𑀦, 𑀣𑀺𑀦𑀫𑀺𑀤𑁆𑀥𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸 𑀘𑀢𑀼𑀢𑁆𑀣𑁂𑀦, 𑀓𑀸𑀫𑀘𑁆𑀙𑀦𑁆𑀤𑁄 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀇𑀫𑁂 𑀘 𑀲𑀪𑀸𑀯𑀢𑁄 𑀅𑀝𑁆𑀞 𑀥𑀫𑁆𑀫𑀸 𑀙 𑀦𑀻𑀯𑀭𑀡𑀸 𑀦𑀸𑀫 𑀚𑀸𑀢𑀸, 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀦𑁄 𑀦𑀻𑀯𑀭𑀡𑀸 𑀦𑀸𑀫. 𑀦𑀻𑀯𑀭𑀡𑀤𑀼𑀓𑀁 𑀧𑀞𑀫𑀁.

𑀤𑀼𑀢𑀺𑀬𑀁 ¶ 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀅𑀓𑀼𑀲𑀮𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀙 𑀦𑀻𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀺𑀬𑀸 𑀘 𑀦𑀸𑀫. 𑀲𑁂𑀲𑀸 𑀮𑁄𑀓𑀺𑀬𑀸 𑀦𑀻𑀯𑀭𑀡𑀺𑀬𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀆𑀲𑀯𑀕𑁄𑀘𑁆𑀙𑀓𑁂 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀙 𑀦𑀻𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀢𑀤𑀜𑁆𑀜𑁂 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸 𑀦𑀸𑀫. 𑀢𑀣𑀸 𑀘𑁂𑀢𑀲𑀺𑀓𑁂𑀲𑀼 𑀦𑀻𑀯𑀭𑀡𑀯𑀺𑀭𑀳𑀺𑀢𑀸 𑀅𑀓𑀼𑀲𑀮𑀸, 𑀢𑀺𑀚𑀸𑀢𑀺𑀓𑀸 𑀧𑀦 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀇𑀥 𑀧𑀦 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀩𑁆𑀩𑁂 𑀦 𑀯𑀢𑁆𑀢𑀩𑁆𑀩𑀸. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀻𑀯𑀭𑀡𑀺𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀻𑀯𑀭𑀡𑀺𑀬𑀸 𑀦𑀸𑀫. 𑀇𑀥 𑀧𑀦 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀻𑀯𑀭𑀡𑀺𑀬𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀅𑀓𑀼𑀲𑀮𑀸 𑀧𑀦 𑀦 𑀯𑀢𑁆𑀢𑀩𑁆𑀩𑀸𑀯. 𑀙𑀝𑁆𑀞𑀁.

𑀦𑀻𑀯𑀭𑀡𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁂 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀯𑀲𑁂𑀦 ¶ 𑀧𑀯𑀢𑁆𑀢𑀫𑀸𑀦𑀸 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀤𑀜𑁆𑀜𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀧𑀭𑀸𑀫𑀸𑀲𑀸 𑀦𑀸𑀫. 𑀧𑀭𑀸𑀫𑀸𑀲𑀤𑀼𑀓𑀁 𑀧𑀞𑀫𑀁.

𑀧𑀭𑀸𑀫𑀸𑀲𑁂𑀳𑀺 ¶ 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀭𑀸𑀫𑀝𑁆𑀞𑀢𑁆𑀢𑀸 𑀧𑀭𑀸𑀫𑀝𑁆𑀞𑀸. 𑀲𑁂𑀲𑀁 𑀆𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀸 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀇𑀥 𑀧𑀦 𑀤𑀺𑀝𑁆𑀞𑀺 𑀦 𑀯𑀢𑁆𑀢𑀩𑁆𑀩𑀸, 𑀲𑁂𑀲𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑀸𑀦𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀤𑀺𑀝𑁆𑀞𑀺 𑀏𑀯 𑀧𑀭𑀸𑀫𑀸𑀲𑀸 𑀘𑁂𑀯 𑀧𑀭𑀸𑀫𑀝𑁆𑀞𑀸 𑀘 𑀦𑀸𑀫. 𑀲𑁂𑀲𑀮𑁄𑀓𑀺𑀬𑀸 𑀧𑀭𑀸𑀫𑀝𑁆𑀞𑀸 𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀇𑀫𑀲𑁆𑀫𑀺𑀁 𑀧𑀦 𑀕𑁄𑀘𑁆𑀙𑀓𑁂 ‘‘𑀧𑀭𑀸𑀫𑀸𑀲𑀸 𑀘𑁂𑀯 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺 𑀅𑀬𑀁 𑀤𑀼𑀓𑁄 𑀦 𑀮𑀩𑁆𑀪𑀢𑀺. 𑀦 𑀳𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀬𑀼𑀚𑁆𑀚𑀢𑀺. 𑀧𑀘𑁆𑀙𑀺𑀫𑀤𑀼𑀓𑁂 𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀧𑀭𑀸𑀫𑀝𑁆𑀞𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸 𑀦𑀸𑀫. 𑀇𑀥 𑀧𑀦 𑀧𑀭𑀸𑀫𑀸𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀦𑁆𑀢𑀭𑀤𑀼𑀓𑁂𑀲𑀼 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀲𑀳 𑀆𑀭𑀫𑁆𑀫𑀡𑁂𑀦𑀸𑀢𑀺 𑀲𑀸𑀭𑀫𑁆𑀫𑀡𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸. 𑀦𑀢𑁆𑀣𑀺 𑀆𑀭𑀫𑁆𑀫𑀡𑀫𑁂𑀢𑁂𑀲𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀸, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺. 𑀲𑀸𑀭𑀫𑁆𑀫𑀡𑀤𑀼𑀓𑀁.

𑀘𑀺𑀦𑁆𑀢𑀦𑀝𑁆𑀞𑁂𑀦 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀁. 𑀢𑀁 𑀳𑀺 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀤𑀺𑀪𑁂𑀤𑀢𑁄, 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀘 𑀅𑀢𑁆𑀢𑀦𑁄 𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀓𑀭𑀡𑀢𑀸𑀬 𑀯𑀸. 𑀮𑁄𑀓𑀲𑁆𑀫𑀺𑀁 𑀳𑀺 𑀘𑀺𑀢𑁆𑀢𑀓𑀫𑁆𑀫𑀢𑁄 𑀉𑀢𑁆𑀢𑀭𑀺𑀢𑀭𑀁 𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀺𑀫𑁆𑀧𑀺 𑀘𑀭𑀡𑀁 ¶ 𑀦𑀸𑀫 𑀘𑀺𑀢𑁆𑀢𑀁 𑀅𑀢𑀺𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀮𑁄𑀓𑁂 𑀲𑀺𑀧𑁆𑀧𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀘𑀺𑀢𑁆𑀢𑁂𑀦𑁂𑀯 𑀓𑀭𑀻𑀬𑀢𑀺. 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀧𑁆𑀨𑀸𑀤𑀓𑀁 ¶ 𑀘𑀺𑀢𑁆𑀢𑀫𑁆𑀧𑀺 𑀢𑀣𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀘𑀺𑀦𑁆𑀢𑀺𑀢𑀲𑁆𑀲 𑀯𑀸 𑀅𑀦𑀯𑀲𑁂𑀲𑀲𑁆𑀲 𑀅𑀦𑀺𑀧𑁆𑀨𑀚𑁆𑀚𑀦𑀢𑁄 𑀢𑀢𑁄𑀧𑀺 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁, 𑀢𑀣𑀸 𑀬𑀤𑁂𑀢𑀁 𑀤𑁂𑀯𑀫𑀦𑀼𑀲𑁆𑀲𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀪𑁂𑀤𑀸𑀲𑀼 𑀕𑀢𑀻𑀲𑀼 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀦𑀸𑀦𑀢𑁆𑀢𑀁, 𑀢𑁂𑀦 𑀢𑀸𑀲𑀼 𑀕𑀢𑀻𑀲𑀼 𑀅𑀧𑀤𑀤𑁆𑀯𑀺𑀧𑀤𑀸𑀤𑀺𑀉𑀘𑁆𑀘𑀢𑁆𑀢𑀦𑀻𑀘𑀢𑁆𑀢𑀸𑀤𑀺𑀦𑀸𑀦𑀢𑁆𑀢𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀤𑀻𑀖𑀭𑀲𑁆𑀲𑀣𑀽𑀮𑀸𑀣𑀽𑀮𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀮𑀸𑀪𑀸𑀮𑀸𑀪𑀸𑀤𑀺 𑀘𑀸𑀢𑀺 𑀏𑀯𑀫𑀸𑀤𑀺 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀘 𑀧𑀣𑀯𑀻𑀧𑀩𑁆𑀩𑀢𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀪𑀽𑀢𑀁 𑀓𑀫𑁆𑀫𑀧𑀘𑁆𑀘𑀬𑀁 𑀘𑀺𑀢𑁆𑀢𑀁, 𑀢𑀫𑁆𑀧𑀺 𑀘𑀺𑀢𑁆𑀢𑁂𑀦𑁂𑀯 𑀓𑀢𑀁, 𑀢𑀢𑁄 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦 𑀲𑀩𑁆𑀩𑀸𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀏𑀯𑀁 𑀘𑀺𑀦𑁆𑀢𑀦𑀝𑁆𑀞𑁂𑀦, 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦, 𑀘𑀺𑀢𑁆𑀢𑀓𑀭𑀡𑀝𑁆𑀞𑁂𑀦 𑀘 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁 𑀦𑀸𑀫. 𑀘𑁂𑀢𑀲𑀺𑀓𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑁄 𑀘𑀺𑀢𑁆𑀢𑀸 𑀦𑀸𑀫. 𑀘𑀺𑀢𑁆𑀢𑀤𑀼𑀓𑀁.

𑀅𑀯𑀺𑀧𑁆𑀧𑀬𑁄𑀕𑀯𑀲𑁂𑀦 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸, 𑀨𑀲𑁆𑀲𑀸𑀤𑀬𑁄 𑀤𑁆𑀯𑀺𑀧𑀜𑁆𑀜𑀸𑀲 𑀥𑀫𑁆𑀫𑀸. 𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀅𑀘𑁂𑀢𑀲𑀺𑀓𑀸 𑀦𑀸𑀫. 𑀘𑁂𑀢𑀲𑀺𑀓𑀤𑀼𑀓𑀁.

𑀘𑁂𑀢𑀲𑀺𑀓𑀸 𑀏𑀯 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫, 𑀇𑀥 𑀧𑀦 𑀘𑀺𑀢𑁆𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀁.

𑀦𑀺𑀭𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀢𑀸𑀬 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸𑀘𑀺𑀢𑁆𑀢𑁂𑀦 𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀸. 𑀏𑀓𑀢𑁄 𑀯𑀢𑁆𑀢𑀫𑀸𑀦𑀸𑀧𑀺 𑀦𑀺𑀭𑀦𑁆𑀢𑀭𑀪𑀸𑀯𑀁 𑀅𑀦𑀼𑀧𑀕𑀫𑀦𑀢𑀸𑀬 𑀘𑀺𑀢𑁆𑀢𑁂𑀦 𑀯𑀺𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸. 𑀲𑁂𑀲𑀁 𑀅𑀦𑀦𑁆𑀢𑀭𑀤𑀼𑀓𑀲𑀤𑀺𑀲𑀫𑁂𑀯. 𑀘𑀺𑀢𑁆𑀢𑀲𑀁𑀲𑀝𑁆𑀞𑀤𑀼𑀓𑀁.

𑀲𑀫𑀼𑀝𑁆𑀞𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀘𑁂𑀢𑀲𑀺𑀓𑀸𑀦𑀺 𑀘𑁂𑀯 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸 𑀘 ¶ . 𑀘𑀺𑀢𑁆𑀢𑀁, 𑀧𑀦 𑀅𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸, 𑀦𑀺𑀩𑁆𑀩𑀸𑀦𑀜𑁆𑀘 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑀁.

𑀲𑀳 𑀪𑀯𑀦𑁆𑀢𑀻𑀢𑀺 𑀲𑀳𑀪𑀼𑀦𑁄, 𑀘𑀺𑀢𑁆𑀢𑁂𑀦 𑀲𑀳𑀪𑀼𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄, 𑀘𑁂𑀢𑀲𑀺𑀓𑀸𑀦𑀺 𑀘𑁂𑀯 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀘. 𑀘𑀺𑀢𑁆𑀢𑀁, 𑀧𑀦 𑀯𑀺𑀜𑁆𑀜𑀢𑁆𑀢𑀺𑀯𑀚𑁆𑀚𑀺𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄 𑀦𑀸𑀫. 𑀘𑀺𑀢𑁆𑀢𑀲𑀳𑀪𑀼𑀤𑀼𑀓𑀁.

𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 ¶ 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄, 𑀓𑀺𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺? 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀲𑁂𑀲𑀁 𑀅𑀦𑀦𑁆𑀢𑀭𑀤𑀼𑀓𑀲𑀤𑀺𑀲𑀫𑁂𑀯. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑀁.

𑀇𑀢𑁄 𑀧𑀭𑁂 𑀧𑀦 𑀢𑀬𑁄 𑀤𑀼𑀓𑀸 𑀘𑁂𑀢𑀲𑀺𑀓𑀤𑀼𑀓𑀲𑀤𑀺𑀲𑀸𑀯, 𑀓𑁂𑀯𑀮𑀁 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀲𑀳𑀪𑀼𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄, 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑀤𑀦𑀦𑁆𑀢𑀭𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑁂 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀯𑀼𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀸. 𑀧𑀲𑀸𑀤𑀭𑀽𑀧𑀘𑀺𑀢𑁆𑀢𑀲𑀗𑁆𑀔𑀸𑀢𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀢𑀢𑁄 𑀩𑀳𑀺𑀪𑀽𑀢𑀸 𑀩𑀸𑀳𑀺𑀭𑀸. 𑀲𑁂𑀲𑀭𑀽𑀧𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀺 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺, 𑀇𑀥 𑀧𑀦 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑀁.

𑀉𑀧𑀸𑀤𑀺𑀬𑀦𑁆𑀢𑁂𑀯 𑀪𑀽𑀢𑀸𑀦𑀺, 𑀦 𑀪𑀽𑀢𑀸 𑀯𑀺𑀬 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸, 𑀘𑀢𑀼𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀏𑀯. 𑀦 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀦𑁄 𑀉𑀧𑀸𑀤𑀸, 𑀘𑀢𑀼𑀫𑀳𑀸𑀪𑀽𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺. 𑀉𑀧𑀸𑀤𑀸𑀤𑀼𑀓𑀁.

𑀤𑁆𑀯𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀓𑀫𑁆𑀫𑀚𑀭𑀽𑀧𑀜𑁆𑀘 𑀉𑀧𑀸𑀤𑀺𑀦𑁆𑀦𑀸 𑀦𑀸𑀫. 𑀲𑁂𑀲𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀅𑀦𑀼𑀧𑀸𑀤𑀺𑀦𑁆𑀦𑀸 𑀦𑀸𑀫 ¶ . 𑀲𑁂𑀲𑀁 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀉𑀧𑀸𑀤𑀺𑀦𑁆𑀦𑀤𑀼𑀓𑀁.

𑀫𑀳𑀦𑁆𑀢𑀭𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀪𑀼𑀲𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸, 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀴𑁆𑀳𑀢𑁆𑀣𑁄 𑀳𑀺 𑀏𑀢𑁆𑀣 𑀉𑀧-𑀲𑀤𑁆𑀤𑁄 ‘‘𑀉𑀧𑀸𑀬𑀸𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀢𑁄 𑀅𑀜𑁆𑀜𑁂 𑀦𑁄 𑀉𑀧𑀸𑀤𑀸𑀦𑀸. 𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀇𑀫𑁂 𑀉𑀧𑀸𑀤𑀸𑀦𑀸 𑀦𑀸𑀫. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀓𑀸𑀫𑁄𑀯 𑀯𑀼𑀢𑁆𑀢𑀦𑀬𑁂𑀦 𑀉𑀧𑀸𑀤𑀸𑀦𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦𑀸𑀫. 𑀲𑁂𑀲𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑁂𑀯. 𑀧𑀘𑁆𑀙𑀺𑀫𑀸𑀦𑀺 𑀧𑀦𑁂𑀢𑁆𑀣 𑀢𑀻𑀡𑀺 𑀉𑀧𑀸𑀤𑀸𑀦𑀸𑀦𑀺 𑀢𑀣𑀸𑀧𑀯𑀢𑁆𑀢𑀤𑀺𑀝𑁆𑀞𑀺 𑀏𑀯. 𑀢𑀸𑀦𑀺 𑀘 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀓𑀸𑀫𑀼𑀧𑀸𑀤𑀸𑀦𑀁 𑀘𑀢𑀽𑀳𑀺𑀧𑀺 ¶ . 𑀇𑀫𑁂 𑀘 𑀲𑀪𑀸𑀯𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀘𑀢𑀼𑀭𑀼𑀧𑀸𑀤𑀸𑀦𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀉𑀧𑀸𑀤𑀸𑀦𑀸 𑀦𑀸𑀫. 𑀉𑀧𑀸𑀤𑀸𑀦𑀤𑀼𑀓𑀁 𑀧𑀞𑀫𑀁.

𑀉𑀧𑀸𑀤𑀸𑀦𑀺𑀬𑀤𑀼𑀓𑁄 𑀲𑀁𑀬𑁄𑀚𑀦𑀺𑀬𑀤𑀼𑀓𑀲𑀤𑀺𑀲𑁄𑀯. 𑀤𑀼𑀢𑀺𑀬𑀁.

𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀤𑁄𑀲𑀫𑁄𑀳𑀫𑀽𑀮𑀸𑀦𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀘 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑀺𑀝𑁆𑀞𑀺𑀫𑀸𑀦𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸𑀯, 𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯. 𑀲𑁂𑀲𑀸 𑀤𑀼𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀸 𑀉𑀧𑀸𑀤𑀸𑀦𑀺𑀬𑀸 𑀘𑁂𑀯 𑀦𑁄 𑀘 ¶ 𑀉𑀧𑀸𑀤𑀸𑀦𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀸 𑀧𑀸𑀞𑀢𑁄 𑀕𑀦𑁆𑀣𑀕𑁄𑀘𑁆𑀙𑀓𑁂 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀸𑀯, 𑀓𑁂𑀯𑀮𑀁 𑀧𑀜𑁆𑀘𑀫𑀤𑀼𑀓𑁂 ‘‘𑀘𑁂𑀢𑀲𑀺𑀓𑁂𑀲𑀼 𑀫𑀸𑀦𑁄 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑁄 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑁄 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀢𑀺𑀚𑀸𑀢𑀺𑀓𑀸𑀦𑀺 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘𑀸’’𑀢𑀺 𑀇𑀤𑀜𑁆𑀘, 𑀙𑀝𑁆𑀞𑀤𑀼𑀓𑁂 ‘‘𑀘𑁂𑀢𑀲𑀺𑀓𑁂𑀲𑀼 𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀅𑀧𑁆𑀧𑀫𑀜𑁆𑀜𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀉𑀧𑀸𑀤𑀸𑀦𑀺𑀬𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀮𑁄𑀪𑀣𑀺𑀦𑀫𑀺𑀤𑁆𑀥𑀸𑀦𑀺 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀘𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀧𑀸𑀞𑀢𑁄 𑀯𑀺𑀲𑁂𑀲𑁄, 𑀅𑀢𑁆𑀣𑀢𑁄 𑀧𑀦 𑀦𑀸𑀫𑀫𑀢𑁆𑀢𑀓𑁄𑀯 𑀯𑀺𑀲𑁂𑀲𑁄. 𑀲𑁂𑀲𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀤𑀲 𑀥𑀫𑁆𑀫𑀸 𑀓𑀺𑀮𑁂𑀲𑀸 𑀦𑀸𑀫. 𑀇𑀫𑁂 𑀘 𑀯𑀼𑀢𑁆𑀢𑀢𑁆𑀣𑀸 𑀏𑀯, 𑀇𑀥 𑀧𑀦 𑀮𑁄𑀪𑁄, 𑀳𑁂𑀢𑀼𑀕𑀦𑁆𑀣𑀦𑀻𑀯𑀭𑀡𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀲𑀼 𑀮𑁄𑀪𑁄 𑀘 𑀦𑀺𑀧𑁆𑀧𑀤𑁂𑀲𑀢𑁄 𑀘𑀢𑀼𑀫𑀕𑁆𑀕𑀯𑀚𑁆𑀛𑁄𑀧𑀺 𑀏𑀓𑁂𑀦𑁂𑀯 𑀓𑁄𑀝𑁆𑀞𑀸𑀲𑁂𑀦 𑀞𑀺𑀢𑁄, 𑀲𑁂𑀲𑀕𑁄𑀘𑁆𑀙𑀓𑁂𑀲𑀼 𑀲𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 ‘‘𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄’’𑀢𑀺𑀆𑀤𑀺𑀦𑀸 ¶ 𑀤𑁆𑀯𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀞𑀺𑀢𑁄, 𑀇𑀫𑀺𑀦𑀸 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑀸𑀧𑀺 𑀪𑀯𑀸𑀲𑀯𑀸𑀤𑀺𑀩𑁆𑀬𑀢𑀺𑀭𑀺𑀢𑁆𑀢𑁄 𑀲𑀩𑁆𑀩𑁄 𑀘𑀢𑀼𑀫𑀕𑁆𑀕𑀯𑀚𑁆𑀛𑁄𑀧𑀺 𑀭𑀸𑀕𑁄 𑀓𑀸𑀫𑀸𑀲𑀯𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑁄. 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀦 𑀪𑀯𑀭𑀸𑀕𑁄𑀧𑀺 𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀫𑀢𑁆𑀢𑁄𑀯𑀸𑀢𑀺 𑀧𑀜𑁆𑀜𑀸𑀬𑀢𑀺, ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡’’𑀦𑁆𑀢𑀺𑀆𑀤𑀺𑀧𑀸𑀴𑀺𑀢𑁄 (𑀧𑀝𑁆𑀞𑀸. 𑁩.𑁮.𑁮) 𑀘𑁂𑀢𑀁 𑀤𑀝𑁆𑀞𑀩𑁆𑀩𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀇𑀫𑁂𑀲𑀼 ¶ 𑀘 𑀓𑀺𑀮𑁂𑀲𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀤𑁄𑀲𑁄 𑀢𑀢𑀺𑀬𑁂𑀦, 𑀮𑁄𑀪𑀸𑀤𑀬𑁄 𑀘𑀢𑀽𑀳𑀺𑀧𑀺. 𑀇𑀫𑁂 𑀧𑀦 𑀤𑀲 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀦𑁄 𑀓𑀺𑀮𑁂𑀲𑀸 𑀦𑀸𑀫. 𑀓𑀺𑀮𑁂𑀲𑀤𑀼𑀓𑀁 𑀧𑀞𑀫𑀁.

𑀲𑀁𑀓𑀺𑀮𑁂𑀲𑀺𑀓𑀤𑀼𑀓𑁄 𑀲𑀸𑀲𑀯𑀤𑀼𑀓𑀲𑀤𑀺𑀲𑁄𑀯. 𑀤𑀼𑀢𑀺𑀬𑀁.

𑀲𑀁𑀓𑀺𑀮𑀺𑀝𑁆𑀞𑀤𑀼𑀓𑁄, 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀘𑀸𑀢𑀺 𑀤𑁆𑀯𑁂𑀧𑀺 𑀲𑀫𑀸𑀦𑀢𑁆𑀣𑀸𑀯. 𑀢𑁂 𑀘 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀢𑀢𑀺𑀬𑀤𑀼𑀓𑀲𑀤𑀺𑀲𑀸𑀯. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑀤𑀲 𑀓𑀺𑀮𑁂𑀲𑀸 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀦𑀸𑀫. 𑀲𑁂𑀲𑀸 𑀮𑁄𑀓𑀺𑀬𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘𑀢𑀼𑀢𑁆𑀣𑀤𑀼𑀓𑀲𑀤𑀺𑀲𑀫𑁂𑀯. 𑀧𑀜𑁆𑀘𑀫𑀁.

𑀙𑀝𑁆𑀞𑀲𑀢𑁆𑀢𑀫𑀤𑀼𑀓𑀸𑀦𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑁆𑀣𑀸𑀦𑁂𑀯. 𑀢𑀸𑀦𑀺 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀬𑀣𑀸𑀓𑁆𑀓𑀫𑀁 𑀧𑀸𑀞𑀢𑁄 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀸𑀦𑀺, 𑀅𑀢𑁆𑀣𑀢𑁄 𑀧𑀦 𑀦𑀸𑀫𑀫𑀢𑁆𑀢𑀓𑁄𑀯 𑀯𑀺𑀲𑁂𑀲𑁄. 𑀲𑁂𑀲𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄. 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺.

𑀓𑀺𑀮𑁂𑀲𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀺𑀝𑁆𑀞𑀺𑀤𑀼𑀓𑁂𑀲𑀼 𑀆𑀤𑀺𑀢𑁄 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀲𑀼 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀧𑀞𑀫𑀤𑀼𑀓𑀲𑁆𑀲 𑀤𑀼𑀢𑀺𑀬𑀧𑀤𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀧𑀯𑀺𑀲𑀦𑁆𑀢𑀺, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀤𑀼𑀢𑀺𑀬𑀤𑀼𑀓𑁂 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁂𑀲𑀼 𑀧𑀯𑀺𑀲𑀦𑁆𑀢𑀺. 𑀢𑀢𑁆𑀣 𑀘 𑀤𑀼𑀢𑀺𑀬𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀲𑀼 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀞𑀧𑁂𑀢𑁆𑀯𑀸 ¶ 𑀲𑁂𑀲𑀸 𑀇𑀥 𑀢𑀢𑀺𑀬𑀤𑀼𑀓𑁂 𑀦𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀘 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀘𑀢𑀼𑀢𑁆𑀣𑀤𑀼𑀓𑁂 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 𑀧𑀯𑀺𑀲𑀦𑁆𑀢𑀺.

𑀧𑀤𑀢𑁆𑀣𑁄 ¶ 𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀏𑀯𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀳𑀺 𑀲𑀢𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀲𑀺𑀬𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀢𑀺𑀓𑀤𑁆𑀯𑀬𑀫𑁂𑀯 𑀳𑀺 𑀪𑀕𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘𑀢𑁆𑀢𑀸𑀭𑁄 𑀤𑀼𑀓𑁂 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀧𑀜𑁆𑀜𑀸𑀲𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑀯𑀺𑀭𑀳𑀺𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀯𑀺𑀢𑀓𑁆𑀓𑀸 𑀦𑀸𑀫. 𑀯𑀺𑀢𑀓𑁆𑀓𑁄, 𑀧𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀯𑀺𑀢𑀓𑁆𑀓𑀸 𑀦𑀸𑀫. 𑀧𑀜𑁆𑀘𑀫𑀁.

𑀙𑀲𑀝𑁆𑀞𑀺𑀬𑀸 𑀲𑀯𑀺𑀘𑀸𑀭𑀘𑀺𑀢𑁆𑀢𑁂𑀲𑀼 𑀯𑀺𑀘𑀸𑀭𑀯𑀺𑀭𑀳𑀺𑀢𑀸 𑀥𑀫𑁆𑀫𑀸 𑀲𑀯𑀺𑀘𑀸𑀭𑀸 𑀦𑀸𑀫. 𑀯𑀺𑀘𑀸𑀭𑁄, 𑀧𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀯𑀺𑀘𑀸𑀭𑀸 𑀦𑀸𑀫. 𑀲𑁂𑀲𑀁 𑀇𑀥, 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀤𑀼𑀓𑁂 𑀘 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀙𑀝𑁆𑀞𑀁.

𑀇𑀢𑁄 𑀧𑀭𑁂𑀲𑀼 𑀲𑀧𑁆𑀧𑀻𑀢𑀺𑀓𑀤𑀼𑀓𑁄, 𑀧𑀻𑀢𑀺𑀲𑀳𑀕𑀢𑀤𑀼𑀓𑁄 𑀘 𑀲𑀫𑀸𑀦𑀢𑁆𑀣𑀸𑀯, 𑀢𑁂 𑀘 𑀲𑀼𑀔𑀲𑀳𑀕𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑀼𑀓𑀸 𑀘𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀤𑀼𑀓𑀸 𑀧𑀻𑀢𑀺𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑀸𑀯. 𑀓𑁂𑀯𑀮𑀁 𑀧𑀦𑁂𑀢𑁂𑀲𑀁 𑀤𑀼𑀓𑀸𑀦𑀁 𑀧𑀞𑀫𑀁 𑀧𑀤𑀁 𑀢𑀢𑁆𑀣 𑀧𑀯𑀺𑀲𑀢𑀺, 𑀧𑀻𑀢𑀺𑀢𑁆𑀢𑀺𑀓𑁂 𑀇𑀢𑀭𑀻𑀢𑀭𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀸, 𑀅𑀲𑀗𑁆𑀕𑀳𑀺𑀢𑀸 𑀘 𑀲𑀩𑁆𑀩𑁂 𑀅𑀢𑁆𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀤𑀼𑀓𑀸𑀦𑀁 𑀤𑀼𑀢𑀺𑀬𑀧𑀤𑁂𑀲𑀼 𑀅𑀢𑁆𑀣𑀢𑁄 𑀲𑀗𑁆𑀕𑀳𑀺𑀢𑀸, 𑀇𑀫𑁂 𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀤𑀲𑀫𑀸.

𑀢𑀤𑀦𑀦𑁆𑀢𑀭𑁂𑀲𑀼 𑀓𑀸𑀫𑀸𑀯𑀘𑀭𑀸𑀢𑀺 𑀏𑀢𑁆𑀣 ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀏𑀯𑀁 (𑀥. 𑀲. 𑁧𑁨𑁮𑁭) 𑀧𑀸𑀴𑀺𑀬𑀁 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁, 𑀫𑀦𑀼𑀲𑁆𑀲𑀸𑀦𑀁, 𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀜𑁆𑀘 𑀯𑀲𑁂𑀦 𑀑𑀓𑀸𑀲𑀢𑁄 𑀏𑀓𑀸𑀤𑀲𑀯𑀺𑀥𑁄 𑀓𑀸𑀫𑀪𑀯𑁄 ¶ ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 𑀭𑀽𑀧𑀪𑀯𑁄 ‘‘𑀭𑀽𑀧’’𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀸𑀫𑁂 𑀅𑀯𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸. 𑀬𑁂𑀪𑀼𑀬𑁆𑀬𑀢𑁄 𑀘𑁂𑀢𑀁 𑀯𑀼𑀢𑁆𑀢𑀁 𑀭𑀽𑀧𑀸𑀭𑀽𑀧𑁂𑀲𑀼 𑀘𑁂𑀢𑁂𑀲𑀜𑁆𑀘 𑀇𑀥 𑀧𑀯𑀢𑁆𑀢𑀺𑀢𑁄 ‘‘𑀣𑀮𑀘𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀯𑀸 𑀓𑀸𑀫𑁂 𑀧𑀝𑀺𑀲𑀦𑁆𑀥𑀺𑀁 𑀅𑀯𑀘𑀸𑀭𑁂𑀦𑁆𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀸, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 ¶ . 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀁 𑀧𑀦 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀤𑀺𑀲𑀁. 𑀢𑀤𑀸𑀬𑀢𑁆𑀢𑀢𑀸𑀬, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀓𑀺𑀮𑁂𑀲𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫𑀜𑁆𑀘𑁂𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀭𑀼𑀴𑁆𑀳𑀺𑀢𑁄 𑀧𑀦 ‘‘𑀯𑀤𑀢𑀻𑀢𑀺 𑀯𑀘𑁆𑀙𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀇𑀫𑁂 𑀏𑀯 ‘‘𑀓𑀸𑀫𑀸𑀯𑀘𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀢𑁄 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀸. 𑀏𑀯𑀁 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀪𑀭𑀡𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑀲𑁆𑀲𑀸𑀧𑀺 𑀓𑀸𑀫𑀢𑀡𑁆𑀳𑀸𑀪𑀸𑀯𑁄 𑀲𑀺𑀤𑁆𑀥𑁄, 𑀭𑀽𑀧𑀢𑀡𑁆𑀳𑀸𑀯𑀺𑀲𑀬𑀸𑀦𑀫𑁆𑀧𑀺 𑀘 𑀩𑁆𑀭𑀳𑁆𑀫𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀤𑀻𑀦𑀁 𑀓𑀸𑀫𑀢𑀡𑁆𑀳𑀸𑀬𑀧𑀺 𑀯𑀺𑀲𑀬𑀢𑀸𑀬 𑀓𑀸𑀫𑀸𑀯𑀘𑀭𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀢𑀤𑀪𑀸𑀯𑀢𑁄 𑀢𑀤𑀜𑁆𑀜𑁂 𑀦 𑀓𑀸𑀫𑀸𑀯𑀘𑀭𑀸. 𑀇𑀫𑀺𑀦𑀸 𑀦𑀬𑁂𑀦 𑀭𑀽𑀧𑀸𑀯𑀘𑀭𑀸𑀤𑀺𑀤𑀼𑀓𑀸𑀦𑀫𑁆𑀧𑀺 𑀧𑀤𑀢𑁆𑀣𑁄 𑀬𑀣𑀸𑀭𑀳𑀁 𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀘𑀢𑀼𑀧𑀜𑁆𑀜𑀸𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀓𑀸𑀫𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀺 𑀦 𑀓𑀸𑀫𑀸𑀯𑀘𑀭𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀯𑀢𑁆𑀢𑀩𑁆𑀩𑀁 𑀧𑀭𑀺𑀬𑀸𑀧𑀦𑁆𑀦𑀤𑀼𑀓𑁂 𑀏𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀸𑀤𑀲𑀫𑀁.

𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦 𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀤𑁆𑀯𑀸𑀤𑀲𑀫𑀁.

𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀅𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦 𑀅𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀢𑁂𑀭𑀲𑀫𑀁.

𑀢𑁂𑀪𑀽𑀫𑀓𑀯𑀝𑁆𑀝𑁂 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀕𑀥𑀸𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀮𑁄𑀓𑀺𑀬𑀥𑀫𑁆𑀫𑀸𑀯. 𑀢𑀢𑁆𑀣 𑀦 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀮𑁄𑀓𑀼𑀢𑁆𑀢𑀭𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀸𑀫𑀸𑀯𑀘𑀭𑀸𑀤𑀺𑀤𑀼𑀓𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 ¶ 𑀲𑀸𑀥𑀸𑀭𑀡𑁄 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀓𑀼𑀲𑀮𑀘𑁂𑀢𑀲𑀺𑀓𑀸 𑀓𑀸𑀫𑀸𑀯𑀘𑀭𑀸𑀯, 𑀅𑀧𑁆𑀧𑀫𑀜𑁆𑀜𑀸 𑀓𑀸𑀫𑀭𑀽𑀧𑀸𑀯𑀘𑀭𑀸, 𑀯𑀺𑀭𑀢𑀺𑀬𑁄 𑀧𑀦 𑀓𑀸𑀫𑀸𑀯𑀘𑀭𑀧𑀭𑀺𑀬𑀸𑀧𑀦𑁆𑀦𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀬𑁄 𑀧𑀦 𑀓𑀸𑀫𑀭𑀽𑀧𑀸𑀯𑀘𑀭𑀧𑀭𑀺𑀬𑀸𑀧𑀦𑁆𑀦𑀸, 𑀲𑁂𑀲𑀸 𑀘𑀢𑀼𑀪𑀽𑀫𑀓𑀸𑀢𑀺. 𑀘𑀼𑀤𑁆𑀤𑀲𑀫𑀁.

𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀦𑁆𑀢𑀸 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀝𑁆𑀝𑀢𑁄 𑀦𑀻𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀘𑀺𑀢𑁆𑀢𑀸𑀦𑀺. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀤𑀲𑀫𑀁.

𑀘𑀼𑀢𑀺𑀬𑀸 ¶ 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀨𑀮𑀤𑀸𑀦𑁂 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀘. 𑀢𑀣𑀸 𑀅𑀦𑀺𑀬𑀢𑀢𑁆𑀢𑀸 𑀅𑀦𑀺𑀬𑀢𑀸, 𑀲𑁂𑀲𑀥𑀫𑁆𑀫𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁄𑀴𑀲𑀫𑀁.

𑀅𑀜𑁆𑀜𑁂 𑀥𑀫𑁆𑀫𑁂 𑀉𑀢𑁆𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀉𑀢𑁆𑀢𑀭𑀸, 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑁂𑀳𑀺 𑀲𑀳 𑀉𑀢𑁆𑀢𑀭𑁂𑀳𑀻𑀢𑀺 𑀲𑀉𑀢𑁆𑀢𑀭𑀸, 𑀮𑁄𑀓𑀺𑀬𑀸𑀯. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀢𑁆𑀢𑀭𑀸𑀢𑀺 𑀅𑀦𑀼𑀢𑁆𑀢𑀭𑀸, 𑀮𑁄𑀓𑀼𑀢𑁆𑀢𑀭𑀸. 𑀲𑀢𑁆𑀢𑀭𑀲𑀫𑀁.

𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸, 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀭𑀺𑀤𑁂𑀯𑀦𑁆𑀢𑀺, 𑀢𑁂𑀲𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀳𑀺 𑀲𑀫𑁆𑀧𑀬𑁄𑀕𑀯𑀲𑁂𑀦, 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦 𑀘 𑀲𑀳 𑀭𑀡𑁂𑀳𑀻𑀢𑀺 𑀲𑀭𑀡𑀸. 𑀏𑀢𑁂𑀦𑀸𑀓𑀸𑀭𑁂𑀦 𑀦𑀢𑁆𑀣𑀺 𑀏𑀢𑁂𑀲𑀁 𑀭𑀡𑀸𑀢𑀺 𑀅𑀭𑀡𑀸.

𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀭𑀡𑀸 𑀦𑀸𑀫. 𑀲𑀭𑀡𑀥𑀫𑁆𑀫𑁂𑀲𑀼 𑀘𑁂𑀢𑁆𑀣 𑀮𑁄𑀪𑀤𑁄𑀲𑀫𑁄𑀳𑀸 𑀭𑀡𑀸 𑀘𑁂𑀯 𑀲𑀭𑀡𑀸 𑀘, 𑀢𑁂𑀲𑀼 𑀮𑁄𑀪𑀤𑁄𑀲𑀸 𑀫𑁄𑀳𑁂𑀦𑁂𑀯 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑀸, 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘. 𑀫𑁄𑀳𑁄 𑀧𑀦 𑀢𑁂𑀲𑀼 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑁄, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑁂𑀦, 𑀧𑀦 𑀪𑀯𑀭𑀸𑀕𑁂𑀦 𑀘 𑀭𑀡𑀪𑀽𑀢𑁂𑀦 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦𑁂𑀯 𑀲𑀭𑀡𑁄 ¶ . 𑀮𑁄𑀪𑀤𑁄𑀲𑀫𑁄𑀳𑀫𑀽𑀮𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀦 𑀫𑁄𑀳𑁄 𑀮𑁄𑀪𑁂𑀦 𑀘𑁂𑀯 𑀤𑁄𑀲𑁂𑀦 𑀘, 𑀲𑁂𑀲𑀸 𑀮𑁄𑀪𑀫𑁄𑀳𑁂𑀦 𑀘𑁂𑀯 𑀤𑁄𑀲𑀫𑁄𑀳𑁂𑀦 𑀘 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀸𑀦𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀭𑀡𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀲𑀭𑀡𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀭𑀡𑀸𑀯, 𑀢𑀺𑀚𑀸𑀢𑀺𑀓𑀸 𑀧𑀦 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀻𑀢𑀺. 𑀅𑀝𑁆𑀞𑀸𑀭𑀲𑀫𑀁.

𑀧𑀺𑀝𑁆𑀞𑀺𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑁂𑀲𑀼 𑀯𑁂𑀤𑁂𑀢𑀺, 𑀯𑀺𑀯𑀺𑀥𑁂𑀦 𑀯𑀸 𑀆𑀓𑀸𑀭𑁂𑀦 𑀚𑀸𑀦𑀸𑀢𑀻𑀢𑀺 𑀯𑀺𑀚𑁆𑀚𑀸, 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀺𑀙𑀅𑀪𑀺𑀜𑁆𑀜𑀸𑀯𑀲𑀧𑁆𑀧𑀯𑀢𑁆𑀢𑀸 𑀧𑀜𑁆𑀜𑀸, 𑀢𑀲𑁆𑀫𑀺𑀁 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀺𑀚𑁆𑀚𑀸𑀲𑀪𑀸𑀯𑁂 ¶ 𑀯𑀢𑁆𑀢𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀢𑀸 𑀏𑀯 𑀯𑀺𑀚𑁆𑀚𑀸, 𑀢𑀁 𑀯𑀸 𑀯𑀺𑀚𑁆𑀚𑀁 𑀲𑀫𑁆𑀧𑀬𑁄𑀕𑀯𑀲𑁂𑀦 𑀪𑀚𑀦𑁆𑀢𑀻𑀢𑀺𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄, 𑀅𑀝𑁆𑀞𑀯𑀺𑀥𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸 𑀯𑀺𑀚𑁆𑀚𑀸 𑀯𑀺𑀚𑁆𑀚𑀸, 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑀺 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀇𑀥 𑀧𑀦 𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀘𑀢𑀼𑀲𑀘𑁆𑀘𑀘𑁆𑀙𑀸𑀤𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀫𑁄𑀳𑁄, 𑀢𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀪𑀸𑀕𑁂 𑀅𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀅𑀯𑀺𑀚𑁆𑀚𑀸𑀲𑀪𑀸𑀯𑁂 𑀯𑀢𑁆𑀢𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄. 𑀢𑀸 𑀏𑀯 𑀅𑀯𑀺𑀚𑁆𑀚𑀸, 𑀢𑀁 𑀯𑀸 𑀅𑀯𑀺𑀚𑁆𑀚𑀁 𑀲𑀫𑁆𑀧𑀬𑁄𑀕𑀯𑀲𑁂𑀦 𑀪𑀚𑀦𑁆𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄, 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀏𑀯𑀁 𑀅𑀯𑀺𑀚𑁆𑀚𑀸𑀧𑀺 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀇𑀥 𑀧𑀦 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀯 𑀅𑀥𑀺𑀧𑁆𑀧𑁂𑀢𑀸.

𑀢𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀁, 𑀧𑀜𑁆𑀜𑀸𑀯𑀺𑀭𑀳𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺, 𑀜𑀸𑀡𑀯𑀺𑀭𑀳𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 ¶ 𑀘 𑀯𑀺𑀧𑀲𑁆𑀲𑀦𑀸𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁 𑀯𑀺𑀚𑁆𑀚𑀸𑀪𑀸𑀕𑀺𑀦𑁄, 𑀅𑀜𑁆𑀜𑀤𑀸 𑀦 𑀯𑀢𑁆𑀢𑀩𑁆𑀩𑀸. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀚𑀯𑀦𑀘𑀺𑀢𑁆𑀢𑀸𑀦𑀺, 𑀧𑀜𑁆𑀜𑀸𑀯𑀺𑀭𑀳𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀫𑀦𑁄𑀫𑀬𑀺𑀤𑁆𑀥𑀺𑀪𑀸𑀯𑁂𑀦 𑀘 𑀧𑀜𑁆𑀘𑀸𑀪𑀺𑀜𑁆𑀜𑀸𑀪𑀸𑀯𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀯𑀺𑀚𑁆𑀚𑀸𑀪𑀸𑀕𑀺𑀦𑁄, 𑀅𑀜𑁆𑀜𑀤𑀸 𑀦 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀅𑀯𑀺𑀚𑁆𑀚𑀸𑀯𑀺𑀭𑀳𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄𑀯, 𑀇𑀥 𑀧𑀦 𑀅𑀯𑀺𑀚𑁆𑀚𑀸, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦 𑀯𑀢𑁆𑀢𑀩𑁆𑀩𑀸𑀯. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑁄𑀳𑀅𑀧𑁆𑀧𑀫𑀜𑁆𑀜𑀸 𑀦 𑀯𑀢𑁆𑀢𑀩𑁆𑀩𑀸𑀯, 𑀲𑁂𑀲𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀲𑀺𑀬𑀸 𑀯𑀺𑀚𑁆𑀚𑀸𑀪𑀸𑀕𑀺𑀦𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀢𑀺𑀚𑀸𑀢𑀺𑀓𑀸 𑀤𑁆𑀯𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀞𑀫𑀁.

𑀧𑀼𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑀯𑀲𑁂𑀦 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀯𑀺𑀚𑁆𑀚𑀼 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀯𑀺𑀚𑁆𑀚𑀽𑀧𑀫𑀸, 𑀆𑀤𑀺𑀢𑁄 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁𑀯. 𑀦𑀺𑀲𑁆𑀲𑁂𑀲𑀁 𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀢𑀸𑀬 𑀯𑀚𑀺𑀭𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀯𑀚𑀺𑀭𑀽𑀧𑀫𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀜𑀸𑀡𑀁. 𑀬𑀣𑀸 𑀳𑀺 𑀫𑁂𑀖𑀦𑁆𑀥𑀓𑀸𑀭𑁂 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀯𑀺𑀚𑁆𑀚𑀼𑀬𑀸 𑀉𑀧𑁆𑀧𑀦𑁆𑀦𑀓𑁆𑀔𑀡𑁂 𑀘𑀸𑀢𑀼𑀤𑀺𑀲𑀸 𑀫𑀕𑁆𑀕𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀯𑀺𑀚𑁆𑀚𑀼𑀬𑀸 𑀦𑀺𑀭𑀼𑀤𑁆𑀥𑀸𑀬 𑀧𑀼𑀦 𑀅𑀦𑁆𑀥𑀓𑀸𑀭𑁄 𑀑𑀢𑁆𑀣𑀭𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 𑀬𑀣𑀸𑀲𑀓𑀁 𑀲𑀘𑁆𑀘𑀘𑁆𑀙𑀸𑀤𑀓𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀦𑁆𑀦𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀦𑀺𑀭𑀼𑀤𑁆𑀥𑁂𑀲𑀼 𑀧𑀼𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀦𑁆𑀥𑀓𑀸𑀭𑁄 𑀘𑀢𑀼𑀲𑀘𑁆𑀘𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀫𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀧𑀜𑁆𑀜𑀸 𑀯𑀺𑀚𑁆𑀚𑀽𑀧𑀫𑀸 𑀯𑀼𑀢𑁆𑀢𑀸. 𑀬𑀣𑀸 𑀧𑀦 𑀯𑀚𑀺𑀭𑀲𑁆𑀲 𑀅𑀪𑁂𑀚𑁆𑀚𑁄 𑀧𑀸𑀲𑀸𑀡𑁄 𑀦𑀸𑀫 𑀦𑀢𑁆𑀣𑀺, 𑀢𑀜𑁆𑀘 𑀦𑀺𑀲𑁆𑀲𑁂𑀲𑀢𑁄 𑀯𑀚𑀺𑀭𑀁 𑀔𑁂𑀧𑁂𑀢𑀺, 𑀯𑀚𑀺𑀭𑁂𑀦 𑀘 𑀕𑀢𑀫𑀕𑁆𑀕𑁂 𑀧𑀸𑀲𑀸𑀡𑀲𑁆𑀲 𑀧𑀼𑀦 ¶ 𑀧𑀸𑀓𑀢𑀺𑀓𑀪𑀸𑀯𑁄 𑀦𑀢𑁆𑀣𑀺, 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀅𑀯𑀚𑁆𑀛𑀓𑀺𑀮𑁂𑀲𑁄 𑀦𑀸𑀫 𑀦𑀢𑁆𑀣𑀺, 𑀢𑀜𑁆𑀘 𑀦𑀺𑀲𑁆𑀲𑁂𑀲𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀔𑁂𑀧𑁂𑀢𑀺, 𑀢𑁂𑀦 𑀘 𑀔𑁂𑀧𑀺𑀢𑁂 𑀓𑀺𑀮𑁂𑀲𑁂 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀪𑀸𑀯𑀢𑁄 𑀢𑀲𑁆𑀲 𑀧𑀼𑀦 𑀧𑀘𑁆𑀘𑀼𑀤𑀸𑀯𑀢𑁆𑀢𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ¶ 𑀘𑀢𑀼𑀢𑁆𑀣𑀫𑀕𑁆𑀕𑁂 𑀧𑀜𑁆𑀜𑀸 𑀯𑀚𑀺𑀭𑀽𑀧𑀫𑀸 𑀯𑀼𑀢𑁆𑀢𑀸. 𑀧𑀜𑁆𑀜𑀸 𑀏𑀯 𑀳𑁂𑀢𑁆𑀣 𑀲𑀺𑀬𑀸 𑀯𑀺𑀚𑁆𑀚𑀽𑀧𑀫𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀘 𑀳𑁄𑀢𑀺. 𑀲𑁂𑀲𑀘𑁂𑀢𑀲𑀺𑀓𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑁂𑀯. 𑀤𑀼𑀢𑀺𑀬𑀁.

𑀩𑀸𑀮𑁂𑀲𑀼 𑀞𑀺𑀢𑀢𑁆𑀢𑀸, 𑀬𑀢𑁆𑀣 𑀞𑀺𑀢𑀸 𑀢𑀤𑀼𑀧𑀘𑀸𑀭𑁂𑀦 𑀩𑀸𑀮𑀸, 𑀩𑀸𑀮𑀓𑀭𑀢𑁆𑀢𑀸 𑀯𑀸 𑀩𑀸𑀮𑀸, 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀇𑀥 𑀧𑀦 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀩𑀸𑀮𑀸 𑀦𑀸𑀫. 𑀧𑀡𑁆𑀟𑀺𑀢𑁂𑀲𑀼 𑀞𑀺𑀢𑀢𑁆𑀢𑀸 𑀧𑀡𑁆𑀟𑀺𑀢𑀸, 𑀧𑀡𑁆𑀟𑀺𑀢𑀓𑀭𑀢𑁆𑀢𑀸 𑀯𑀸 𑀧𑀡𑁆𑀟𑀺𑀢𑀸, 𑀏𑀓𑀯𑀻𑀲𑀢𑀺 𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀇𑀥 𑀧𑀦 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘 𑀧𑀡𑁆𑀟𑀺𑀢𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀢𑀺𑀬𑀁.

𑀓𑀡𑁆𑀳𑀸𑀢𑀺 𑀓𑀸𑀴𑀓𑀸, 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀲𑀼𑀓𑁆𑀓𑀸𑀢𑀺 𑀑𑀤𑀸𑀢𑀸, 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀲𑁂𑀲𑀁 𑀲𑀩𑁆𑀩𑀁 𑀩𑀸𑀮𑀤𑀼𑀓𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀢𑀧𑁂𑀦𑁆𑀢𑀻𑀢𑀺 𑀢𑀧𑀦𑀻𑀬𑀸. 𑀦 𑀢𑀧𑀦𑀻𑀬𑀸 𑀅𑀢𑀧𑀦𑀻𑀬𑀸. 𑀲𑁂𑀲𑀁 𑀩𑀸𑀮𑀤𑀼𑀓𑀲𑀤𑀺𑀲𑀫𑁂𑀯. 𑀧𑀜𑁆𑀘𑀫𑀁.

‘‘𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄’’𑀢𑀺𑀆𑀤𑀬𑁄 𑀯𑀺𑀬 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸 𑀦𑀸𑀫. 𑀦𑀸𑀫𑀥𑁂𑀬𑁆𑀬𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀦𑀸𑀫𑀸𑀦𑀺. 𑀢𑀸𑀦𑀺 𑀘𑀢𑀼𑀩𑁆𑀩𑀺𑀥𑀸𑀦𑀺 𑀲𑀸𑀫𑀜𑁆𑀜𑀦𑀸𑀫𑀁 𑀕𑀼𑀡𑀦𑀸𑀫𑀁 𑀓𑀺𑀢𑁆𑀢𑀺𑀫𑀦𑀸𑀫𑀁 𑀑𑀧𑀧𑀸𑀢𑀺𑀓𑀦𑀸𑀫𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀫𑀳𑀸𑀚𑀦𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀭𑀜𑁆𑀜𑁄 𑀦𑀸𑀫𑀦𑁆𑀢𑀺 𑀏𑀯𑀭𑀽𑀧𑀁 𑀲𑀸𑀫𑀜𑁆𑀜𑀦𑀸𑀫𑀁 𑀦𑀸𑀫. ‘‘𑀥𑀫𑁆𑀫𑀓𑀣𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀓𑀸𑀴𑁄 𑀭𑀲𑁆𑀲𑁄’’𑀢𑀺 𑀏𑀯𑀭𑀽𑀧𑀁 𑀕𑀼𑀡𑀢𑁄 𑀆𑀕𑀢𑀁, ‘‘𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀻𑀦𑀺𑀧𑀺 𑀢𑀣𑀸𑀕𑀢𑀲𑁆𑀲 𑀅𑀦𑁂𑀓𑀸𑀦𑀺 𑀦𑀸𑀫𑀲𑀢𑀸𑀦𑀺 𑀕𑀼𑀡𑀦𑀸𑀫𑀁 𑀦𑀸𑀫. 𑀬𑀁 𑀧𑀦 𑀚𑀸𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀜𑀸𑀢𑀓𑀸 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 ‘‘𑀅𑀬𑀁 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀦𑀸𑀫𑀁 𑀓𑀭𑁄𑀦𑁆𑀢𑀺, 𑀇𑀤𑀁 𑀓𑀺𑀢𑁆𑀢𑀺𑀫𑀦𑀸𑀫𑀁 ¶ 𑀦𑀸𑀫. 𑀬𑀸 𑀧𑀦 𑀧𑀼𑀭𑀺𑀫𑀧𑀜𑁆𑀜𑀢𑁆𑀢𑀺 𑀅𑀧𑀭𑀧𑀜𑁆𑀜𑀢𑁆𑀢𑀺𑀬𑀁 𑀦𑀺𑀧𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀼𑀭𑀺𑀫𑀓𑀧𑁆𑀧𑁂𑀧𑀺 𑀘𑀦𑁆𑀤𑁄 𑀘𑀦𑁆𑀤𑁄 𑀏𑀯, 𑀏𑀢𑀭𑀳𑀺𑀧𑀺 𑀅𑀦𑀸𑀕𑀢𑁂𑀧𑀺 𑀘𑀦𑁆𑀤𑁄 𑀏𑀯. 𑀢𑀣𑀸 ‘‘𑀲𑀽𑀭𑀺𑀬𑁄 𑀲𑀫𑀼𑀤𑁆𑀤𑁄 𑀧𑀣𑀯𑀻 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀏𑀯𑀫𑀸𑀤𑀺 𑀑𑀧𑀧𑀸𑀢𑀺𑀓𑀦𑀸𑀫𑀁 𑀦𑀸𑀫. 𑀢𑀸𑀦𑀺 𑀧𑀼𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 ¶ 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀫𑀸𑀦𑀸 𑀬𑀣𑀸𑀯𑀼𑀢𑁆𑀢𑀤𑁆𑀯𑀸𑀲𑀢𑁆𑀢𑀢𑀺𑀯𑀺𑀥𑀸 𑀦𑀸𑀫𑀭𑀽𑀧𑀥𑀫𑁆𑀫𑀸 𑀯𑀺𑀚𑁆𑀚𑀫𑀸𑀦𑀸 𑀦𑀸𑀫, 𑀢𑁂𑀲𑀁 𑀧𑀓𑀸𑀭𑁂𑀳𑀺 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫, ‘‘𑀘𑀺𑀢𑁆𑀢𑀁 𑀨𑀲𑁆𑀲𑁄 𑀧𑀣𑀯𑀻 𑀭𑀽𑀧𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀬𑁄 𑀧𑀭𑀫𑀢𑁆𑀣𑀯𑀸𑀘𑀓𑀸 𑀲𑀤𑁆𑀤𑀸. 𑀉𑀧𑀸𑀤𑀺𑀦𑁆𑀦𑀦𑀸𑀫𑀭𑀽𑀧𑀥𑀫𑁆𑀫𑁂 𑀧𑀦 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀲𑀢𑁆𑀢𑀧𑀼𑀕𑁆𑀕𑀮𑀇𑀢𑁆𑀣𑀺𑀧𑀼𑀭𑀺𑀲𑀤𑁂𑀯𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀺𑀪𑁂𑀤𑀸, 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀪𑀽𑀫𑀺𑀧𑀩𑁆𑀩𑀢𑀭𑀼𑀓𑁆𑀔𑀲𑀓𑀝𑀘𑀦𑁆𑀤𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀤𑀺𑀲𑀸𑀓𑀸𑀮𑀓𑀲𑀺𑀡𑀸𑀤𑀺𑀪𑁂𑀤𑀸 𑀘 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀸 𑀅𑀯𑀺𑀚𑁆𑀚𑀫𑀸𑀦𑀸 𑀦𑀸𑀫, 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀣𑀸 ‘‘𑀅𑀢𑁆𑀢𑀸 𑀪𑀽𑀫𑀻’’𑀢𑀺𑀆𑀤𑀬𑁄 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀯𑀸𑀘𑀓𑀸 𑀲𑀤𑁆𑀤𑀸 𑀘 𑀘𑀺𑀢𑁆𑀢𑀲𑀦𑁆𑀢𑀢𑀺𑀯𑀡𑁆𑀡𑀼𑀧𑀕𑀦𑁆𑀢𑀺𑀆𑀤𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀸𑀘𑀓𑀸 𑀲𑀤𑁆𑀤𑀸 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁, 𑀫𑁂𑀖𑀯𑀡𑁆𑀡𑁄’’𑀢𑀺𑀆𑀤𑀻𑀲𑀼 𑀅𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀘𑀺𑀢𑁆𑀢𑀮𑀳𑀼𑀢𑀸 𑀧𑀣𑀯𑀻𑀕𑀦𑁆𑀥𑁄’’𑀢𑀺𑀆𑀤𑀺 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀫𑀦𑀼𑀲𑁆𑀲𑀲𑀭𑀻𑀭𑀁 𑀭𑀼𑀓𑁆𑀔𑀲𑀸𑀔𑀸’’𑀢𑀺𑀆𑀤𑀺 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀏𑀯𑀁 𑀙𑀩𑁆𑀩𑀺𑀥𑀸𑀧𑀺 𑀘𑁂𑀢𑀸 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀧𑀺𑀢𑀲𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀜𑀸𑀢𑀲𑀗𑁆𑀓𑁂𑀢𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑁂𑀳𑀺 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 ‘‘𑀇𑀫𑀲𑁆𑀲𑁂𑀤𑀁 𑀦𑀸𑀫’’𑀦𑁆𑀢𑀺 𑀅𑀦𑁂𑀓𑀲𑀤𑁆𑀤𑁂𑀲𑀼 𑀏𑀓𑀢𑁆𑀢𑀫𑀸𑀭𑁄𑀧𑁂𑀢𑁆𑀯𑀸 𑀯𑀯𑀢𑁆𑀣𑀸𑀧𑀺𑀢𑀸 𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀧𑀓𑀸𑀭𑁂𑀳𑀺 𑀅𑀢𑁆𑀣𑀲𑁆𑀲 𑀜𑀸𑀧𑀦𑀢𑁄 ‘‘𑀦𑀸𑀫𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 ¶ 𑀅𑀥𑀺𑀯𑀘𑀦𑀸𑀦𑀁 𑀧𑀣𑀸 𑀅𑀢𑁆𑀣𑀸 𑀅𑀥𑀺𑀯𑀘𑀦𑀧𑀣𑀸, 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀤𑁆𑀤𑀯𑀘𑀦𑀻𑀬𑀲𑀪𑀸𑀯𑀸. 𑀙𑀝𑁆𑀞𑀁.

𑀇𑀢𑁄 𑀧𑀭𑀁 𑀤𑁆𑀯𑁂 𑀤𑀼𑀓𑀸 𑀅𑀥𑀺𑀯𑀘𑀦𑀤𑀼𑀓𑀲𑀤𑀺𑀲𑀸𑀯, 𑀓𑁂𑀯𑀮𑀁 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫, ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀬𑀣𑀸𑀯𑀼𑀢𑁆𑀢𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁄𑀯. 𑀦 𑀳𑀺 𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀧𑀜𑁆𑀜𑀢𑁆𑀢𑀻𑀲𑀼 𑀅𑀢𑁆𑀣𑀢𑁄 𑀓𑁄𑀘𑀺𑀧𑀺 𑀪𑁂𑀤𑁄 𑀅𑀢𑁆𑀣𑀺, 𑀦𑀺𑀩𑁆𑀩𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀧𑀦 𑀦𑁂𑀲𑀁 𑀯𑀺𑀪𑀸𑀕𑁂𑀦 𑀧𑀤𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀇𑀫𑁂𑀲𑀼 𑀘 𑀢𑀻𑀲𑀼 𑀤𑀼𑀓𑁂𑀲𑀼 𑀧𑀜𑁆𑀜𑀢𑁆𑀢𑀺𑀲𑀳𑀺𑀢𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀺, 𑀅𑀦𑀦𑁆𑀢𑀭𑁂 𑀦𑀸𑀫𑀭𑀽𑀧𑀤𑀼𑀓𑁂 𑀧𑀜𑁆𑀜𑀢𑁆𑀢𑀺𑀭𑀳𑀺𑀢𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀇𑀫𑁂𑀲𑀼 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑁂𑀲𑀼 𑀦𑀺𑀧𑁆𑀧𑀤𑁂𑀲𑀸, 𑀲𑁂𑀲𑀸 𑀧𑀦 𑀅𑀝𑁆𑀞𑀢𑀺𑀁𑀲𑀸𑀧𑀺 𑀲𑀧𑁆𑀧𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑀦𑀸𑀫𑀓𑀭𑀡𑀝𑁆𑀞𑁂𑀦, 𑀦𑀫𑀦𑀝𑁆𑀞𑁂𑀦, 𑀦𑀸𑀫𑀦𑀝𑁆𑀞𑁂𑀦 𑀘 𑀦𑀸𑀫𑀁, 𑀅𑀭𑀽𑀧𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀸𑀦𑀺. 𑀢𑀸𑀦𑀺 𑀳𑀺 𑀲𑀩𑁆𑀩𑀤𑀸𑀧𑀺 ¶ 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀑𑀧𑀧𑀸𑀢𑀺𑀓𑀦𑀸𑀫𑀯𑀲𑁂𑀦 𑀅𑀢𑁆𑀢𑀦𑁄 𑀦𑀸𑀫𑀁 𑀓𑀭𑁄𑀦𑁆𑀢𑀸𑀯 𑀧𑀯𑀢𑁆𑀢𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀤𑀬𑁄 𑀯𑀺𑀬. 𑀦 𑀳𑀺 𑀢𑁂𑀲𑀁 𑀲𑀸𑀫𑀜𑁆𑀜𑀕𑀼𑀡𑀓𑀺𑀢𑁆𑀢𑀺𑀫𑀯𑀲𑁂𑀦 𑀦𑀸𑀫𑀓𑀭𑀡𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺. 𑀏𑀯𑀁 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀧𑀦 𑀦𑀫𑀦𑀝𑁆𑀞𑁂𑀦, 𑀅𑀜𑁆𑀜𑀫𑀜𑁆𑀜𑀁 𑀢𑀢𑁆𑀣 𑀦𑀸𑀫𑀦𑀝𑁆𑀞𑁂𑀦 𑀘 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀯 𑀦𑀸𑀫𑀁. 𑀦𑀺𑀩𑁆𑀩𑀸𑀦𑀁 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬 𑀅𑀢𑁆𑀢𑀦𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀦𑀸𑀫𑀦𑀝𑁆𑀞𑁂𑀦𑁂𑀯 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁, 𑀭𑀽𑀧𑀓𑁆𑀔𑀦𑁆𑀥𑁄. 𑀦𑀯𑀫𑀁.

𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑁄 𑀲𑀩𑁆𑀩𑁄 𑀫𑁄𑀳𑁄. 𑀪𑀯𑀢𑀡𑁆𑀳𑀸𑀢𑀺 𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀪𑁄. 𑀢𑀣𑀸 𑀅𑀧𑁆𑀧𑀯𑀢𑁆𑀢𑁄 𑀧𑀦𑁂𑀢𑁆𑀣 𑀮𑁄𑀪𑁄, 𑀲𑁂𑀲𑀘𑁂𑀢𑀲𑀺𑀓𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀇𑀢𑁄 𑀧𑀭𑀁 𑀧𑀦 𑀏𑀯𑀁 𑀦𑀯𑀢𑁆𑀢𑀩𑁆𑀩𑀯𑀺𑀪𑀸𑀕𑀁 𑀅𑀤𑀲𑁆𑀲𑁂𑀢𑁆𑀯𑀸 𑀧𑀤𑀢𑁆𑀣𑀲𑀭𑀽𑀧𑀫𑀢𑁆𑀢𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀤𑀲𑁆𑀲𑀺𑀢𑀸𑀯𑀲𑁂𑀲𑀸 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀤𑀲𑀫𑀁.

𑀪𑀯𑁄 ¶ 𑀯𑀼𑀘𑁆𑀘𑀢𑀺 𑀲𑀲𑁆𑀲𑀢𑀁. ‘‘𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀲𑀲𑁆𑀲𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺 𑀪𑀯𑀤𑀺𑀝𑁆𑀞𑀺 𑀦𑀸𑀫. 𑀯𑀺𑀪𑀯𑁄 𑀯𑀼𑀘𑁆𑀘𑀢𑀺 𑀉𑀘𑁆𑀙𑁂𑀤𑁄. ‘‘𑀦 𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀉𑀘𑁆𑀙𑁂𑀤𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺 𑀯𑀺𑀪𑀯𑀤𑀺𑀝𑁆𑀞𑀺 𑀦𑀸𑀫. 𑀉𑀪𑀬𑁂𑀦𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀕𑀳𑀺𑀢𑀸. 𑀢𑀣𑀸 𑀅𑀦𑀦𑁆𑀢𑀭𑁂𑀲𑀼𑀧𑀺 𑀢𑀻𑀲𑀼 𑀤𑀼𑀓𑁂𑀲𑀼. 𑀏𑀓𑀸𑀤𑀲𑀫𑀁.

𑀔𑀦𑁆𑀥𑀧𑀜𑁆𑀘𑀓𑀁 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀕𑀳𑁂𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦𑀸𑀫. 𑀢𑀣𑀸 ‘‘𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀸𑀫. ‘‘𑀅𑀦𑁆𑀢𑀯𑀸’’𑀢𑀺 𑀧𑀯𑀢𑁆𑀢𑀸 𑀅𑀦𑁆𑀢𑀯𑀸𑀤𑀺𑀝𑁆𑀞𑀺 𑀦𑀸𑀫. ‘‘𑀅𑀦𑀦𑁆𑀢𑀯𑀸’’𑀢𑀺 𑀧𑀯𑀢𑁆𑀢𑀸 𑀅𑀦𑀦𑁆𑀢𑀯𑀸𑀤𑀺𑀝𑁆𑀞𑀺 𑀦𑀸𑀫. 𑀧𑀼𑀩𑁆𑀩𑀦𑁆𑀢𑀁 𑀅𑀦𑀼𑀕𑀢𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑀻𑀢𑀓𑁄𑀝𑁆𑀞𑀸𑀲𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀝𑁆𑀞𑀸𑀭𑀲𑀯𑀺𑀥𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀫. 𑀅𑀧𑀭𑀦𑁆𑀢𑀁 𑀅𑀦𑀼𑀕𑀢𑀸 𑀢𑀢𑁆𑀣𑁂𑀯 𑀆𑀕𑀢𑀦𑀬𑁂𑀦 𑀅𑀦𑀸𑀕𑀢𑀓𑁄𑀝𑁆𑀞𑀸𑀲𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀘𑀢𑀼𑀘𑀢𑁆𑀢𑀸𑀮𑀻𑀲𑀯𑀺𑀥𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀫. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁨𑁮), 𑀢𑀤𑀝𑁆𑀞𑀓𑀣𑀸𑀬 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁮) 𑀘 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀸𑀤𑀲𑀫𑀢𑁂𑀭𑀲𑀫𑀘𑀼𑀤𑁆𑀤𑀲𑀫𑀸𑀦𑀺.

𑀅𑀳𑀺𑀭𑀺𑀓𑀤𑀼𑀓𑀁, 𑀳𑀺𑀭𑀺𑀤𑀼𑀓𑀜𑁆𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀤𑀲𑀫𑀲𑁄𑀴𑀲𑀫𑀸𑀦𑀺.

𑀤𑀼𑀓𑁆𑀔𑀁 ¶ 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀓𑀽𑀮𑀕𑀸𑀳𑀺𑀫𑁆𑀳𑀺 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂 𑀅𑀦𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄, 𑀲𑀳𑀥𑀫𑁆𑀫𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀺𑀬𑀫𑀸𑀦𑁂 𑀅𑀦𑀸𑀤𑀭𑀓𑀸𑀭𑀓𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀓𑀫𑁆𑀫𑀁 𑀤𑁄𑀯𑀘𑀲𑁆𑀲𑀁, 𑀢𑀲𑁆𑀲 𑀪𑀸𑀯𑁄 𑀤𑁄𑀯𑀘𑀲𑁆𑀲𑀢𑀸, 𑀅𑀦𑀸𑀤𑀭𑀯𑀲𑁂𑀦 𑀧𑀯𑀢𑁆𑀢𑀸 𑀤𑁆𑀯𑁂 𑀧𑀝𑀺𑀖𑀘𑀺𑀢𑁆𑀢𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘. 𑀧𑀸𑀧𑀸 𑀅𑀲𑁆𑀲𑀤𑁆𑀥𑀸𑀤𑀬𑁄 𑀧𑀼𑀕𑁆𑀕𑀮𑀸 𑀏𑀢𑀲𑁆𑀲 𑀫𑀺𑀢𑁆𑀢𑀸𑀢𑀺 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸, 𑀧𑀸𑀧𑀧𑀼𑀕𑁆𑀕𑀮𑁂𑀲𑀼 𑀤𑀴𑁆𑀳𑀪𑀢𑁆𑀢𑀺𑀯𑀲𑁂𑀦, 𑀓𑀸𑀬𑀘𑀺𑀢𑁆𑀢𑁂𑀳𑀺 𑀢𑀁𑀲𑁂𑀯𑀦𑀸𑀢𑀦𑁆𑀦𑀺𑀦𑁆𑀦𑀢𑀸𑀯𑀲𑁂𑀦 𑀘 𑀧𑀯𑀢𑁆𑀢𑀸𑀦𑀺 𑀅𑀝𑁆𑀞 𑀮𑁄𑀪𑀘𑀺𑀢𑁆𑀢𑀸𑀦𑀺. 𑀲𑀢𑁆𑀢𑀭𑀲𑀫𑀁.

𑀲𑁄𑀯𑀘𑀲𑁆𑀲𑀢𑀸 ¶ , 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀢𑁄 𑀧𑀦 𑀢𑀣𑀸𑀧𑀯𑀢𑁆𑀢𑀸𑀦𑀺 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀅𑀝𑁆𑀞𑀸𑀭𑀲𑀫𑀁.

𑀧𑀜𑁆𑀘𑀲𑀼, 𑀲𑀢𑁆𑀢𑀲𑀼 𑀯𑀸 𑀆𑀧𑀢𑁆𑀢𑀻𑀲𑀼 𑀓𑀼𑀲𑀮𑀪𑀸𑀯𑁄 𑀆𑀧𑀢𑁆𑀢𑀺𑀓𑀼𑀲𑀮𑀢𑀸, 𑀲𑀳 𑀯𑀢𑁆𑀣𑀼𑀦𑀸 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀆𑀧𑀚𑁆𑀚𑀦𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀸𑀯𑀘𑀭𑀚𑀯𑀦𑀧𑀜𑁆𑀜𑀸. 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸, 𑀯𑀼𑀝𑁆𑀞𑀸𑀦𑀯𑀺𑀥𑀸𑀦𑁂𑀦 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸𑀯. 𑀏𑀓𑀽𑀦𑀯𑀻𑀲𑀢𑀺𑀫𑀁.

𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀲𑀫𑀸𑀧𑀢𑁆𑀢𑀺, 𑀢𑀸𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀲𑀼 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀓𑀼𑀲𑀮𑀢𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸, 𑀲𑀳 𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸. 𑀲𑀫𑀸𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀢𑀸𑀳𑀺 𑀯𑀼𑀝𑁆𑀞𑀸𑀦𑀓𑀧𑀜𑁆𑀜𑀸 𑀓𑀸𑀫𑀸𑀯𑀘𑀭𑀚𑀯𑀦𑀧𑀜𑁆𑀜𑀸𑀯. 𑀯𑀻𑀲𑀢𑀺𑀫𑀁.

𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀓𑀼𑀲𑀮𑀪𑀸𑀯𑁄 𑀥𑀸𑀢𑀼𑀓𑀼𑀲𑀮𑀢𑀸, 𑀲𑀯𑀦𑀥𑀸𑀭𑀡𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸. 𑀢𑀸𑀲𑀜𑁆𑀜𑁂𑀯 𑀥𑀸𑀢𑀽𑀦𑀁 𑀫𑀦𑀲𑀺𑀓𑀸𑀭𑁂 𑀓𑀼𑀲𑀮𑀪𑀸𑀯𑁄 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸, 𑀢𑀸𑀲𑀁 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸. 𑀏𑀲 𑀦𑀬𑁄 𑀆𑀬𑀢𑀦𑀓𑀼𑀲𑀮𑀢𑀸𑀬𑀧𑀺. 𑀢𑀢𑁆𑀣 𑀳𑀺 𑀲𑀯𑀦𑀥𑀸𑀭𑀡𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀫𑀸𑀯𑀘𑀭𑀸𑀯, 𑀧𑀝𑀺𑀯𑁂𑀥𑁄 𑀮𑁄𑀓𑀼𑀢𑁆𑀢𑀭𑁄𑀯, 𑀲𑀫𑁆𑀫𑀲𑀦𑀁 𑀓𑀸𑀫𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀁. 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀘𑁆𑀘 𑀲𑀳𑀺𑀢𑀁 𑀨𑀮𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀅𑀯𑀺𑀚𑁆𑀚𑀸𑀤𑀻𑀳𑀺 𑀦𑀺𑀤𑁆𑀤𑀺𑀝𑁆𑀞𑁄 𑀧𑀘𑁆𑀘𑀬𑀲𑀫𑀽𑀳𑁄, 𑀢𑀲𑁆𑀫𑀺𑀁 𑀤𑁆𑀯𑀸𑀤𑀲𑀗𑁆𑀕𑁂 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀓𑀼𑀲𑀮𑀪𑀸𑀯𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸, ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀇𑀤𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸 𑀮𑁄𑀓𑀺𑀬𑀚𑀯𑀦𑀧𑀜𑁆𑀜𑀸𑀯. 𑀏𑀓𑀯𑀻𑀲𑀢𑀺𑀫𑀤𑁆𑀯𑀸𑀯𑀻𑀲𑀢𑀺𑀫𑀸𑀦𑀺.

𑀢𑀺𑀝𑁆𑀞𑀢𑀺 ¶ ¶ 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀓𑀸𑀭𑀡𑀁, 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀼𑀲𑀮𑀢𑀸 𑀞𑀸𑀦𑀓𑀼𑀲𑀮𑀢𑀸. 𑀦 𑀞𑀸𑀦𑁂 𑀓𑀼𑀲𑀮𑀢𑀸 𑀅𑀝𑁆𑀞𑀸𑀦𑀓𑀼𑀲𑀮𑀢𑀸. 𑀢𑁂𑀯𑀻𑀲𑀢𑀺𑀫𑀁.

𑀉𑀚𑀼𑀪𑀸𑀯𑁄 𑀅𑀚𑁆𑀚𑀯𑁄. 𑀫𑀼𑀤𑀼𑀪𑀸𑀯𑁄 𑀫𑀤𑁆𑀤𑀯𑁄. 𑀓𑀸𑀬𑀘𑀺𑀢𑁆𑀢𑀼𑀚𑀼𑀓𑀢𑀸𑀫𑀼𑀤𑀼𑀓𑀢𑀸𑀤𑁆𑀯𑀬𑀁. 𑀘𑀢𑀼𑀯𑀻𑀲𑀢𑀺𑀫𑀁.

𑀅𑀥𑀺𑀯𑀸𑀲𑀦𑀲𑀗𑁆𑀔𑀸𑀢𑀸 𑀔𑀫𑀦𑀁 𑀔𑀦𑁆𑀢𑀺, 𑀢𑀣𑀸𑀧𑀯𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺. 𑀧𑀸𑀧𑀢𑁄 𑀲𑀼𑀝𑁆𑀞𑀼 𑀑𑀭𑀢𑁄 𑀯𑀺𑀭𑀢𑁄𑀢𑀺 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁. 𑀓𑀸𑀬𑀯𑀘𑀻𑀫𑀦𑁄𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺. 𑀧𑀜𑁆𑀘𑀯𑀻𑀲𑀢𑀺𑀫𑀁.

𑀲𑀫𑁆𑀫𑁄𑀤𑀓𑀧𑀺𑀬𑀯𑀸𑀤𑀺𑀢𑀸𑀲𑀗𑁆𑀔𑀸𑀢𑁄 𑀲𑀔𑀺𑀮𑀪𑀸𑀯𑁄 𑀲𑀸𑀔𑀮𑁆𑀬𑀁, 𑀬𑀣𑀸 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀙𑀺𑀤𑁆𑀤𑀁 𑀯𑀺𑀯𑀭𑀁 𑀦 𑀳𑁄𑀢𑀺, 𑀏𑀯𑀁 𑀥𑀫𑁆𑀫𑀸𑀫𑀺𑀲𑁂𑀳𑀺 𑀧𑀝𑀺𑀲𑀦𑁆𑀣𑀭𑀡𑀁 𑀧𑀝𑀺𑀘𑁆𑀙𑀸𑀤𑀦𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀆𑀕𑀦𑁆𑀢𑀼𑀓𑀲𑁆𑀲 𑀳𑀺 𑀧𑀘𑁆𑀘𑀼𑀕𑁆𑀕𑀫𑀦𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀆𑀲𑀦𑀤𑀸𑀦𑀩𑀻𑀚𑀦𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀺𑀦𑀸, 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀦𑁂𑀦, 𑀓𑀸𑀮𑁂 𑀆𑀕𑀢𑀲𑁆𑀲 𑀬𑀸𑀕𑀼𑀆𑀤𑀻𑀦𑀁, 𑀯𑀺𑀓𑀸𑀮𑁂 𑀧𑀸𑀦𑀓𑀸𑀤𑀻𑀦𑀜𑁆𑀘 𑀤𑀸𑀦𑁂𑀦, 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀡𑀝𑁆𑀞𑀸𑀦𑀤𑀲𑁆𑀲𑀦𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀓𑀸𑀮𑀸𑀭𑁄𑀘𑀦𑀸𑀤𑀺𑀦𑀸 𑀘 𑀧𑀩𑁆𑀩𑀚𑀺𑀢𑀸, 𑀕𑀳𑀝𑁆𑀞𑀸𑀦𑀜𑁆𑀘 𑀯𑀺𑀦𑀬𑁂 𑀆𑀕𑀢𑀦𑀬𑁂𑀦 𑀬𑀣𑀸𑀦𑀼𑀭𑀽𑀧𑀁 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄. 𑀆𑀕𑀦𑁆𑀢𑀼𑀓𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑀢𑀭𑀪𑀸𑀡𑀓𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑁄 𑀓𑀢𑀭𑀁 𑀕𑀦𑁆𑀣𑀁 𑀯𑀴𑀜𑁆𑀚𑁂𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀬𑁂 𑀧𑀜𑁆𑀳𑀧𑀼𑀘𑁆𑀙𑀦𑁂𑀦 𑀲𑀘𑁂 𑀦 𑀲𑀓𑁆𑀓𑁄𑀢𑀺, 𑀲𑀬𑀁 𑀓𑀣𑁂𑀢𑁆𑀯𑀸 𑀤𑀸𑀦𑁂𑀦, 𑀥𑀫𑁆𑀫𑀓𑀣𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀓𑀼𑀓𑁆𑀓𑀼𑀘𑁆𑀘𑀤𑀺𑀝𑁆𑀞𑀺𑀯𑀺𑀦𑁄𑀤𑀦𑀸𑀤𑀺𑀦𑀸, 𑀧𑀭𑀺𑀯𑀸𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑀓𑀭𑀡𑁂𑀦, 𑀧𑀩𑁆𑀩𑀸𑀚𑀦𑀉𑀧𑀲𑀫𑁆𑀧𑀤𑀸𑀤𑀺𑀦𑀸 𑀘 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑀸𑀬𑀁 𑀲𑀤𑁆𑀥𑀺𑀁 𑀆𑀦𑀺𑀲𑀁𑀲𑀤𑀻𑀧𑀓𑀯𑀢𑁆𑀣𑀽𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧𑁩𑁫𑁧) 𑀜𑀸𑀢𑀩𑁆𑀩𑁄. 𑀏𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀧𑀝𑀺𑀲𑀦𑁆𑀣𑀸𑀭𑁂 𑀓𑀼𑀲𑀮𑀪𑀸𑀯𑁄 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑀢𑀸, 𑀢𑀣𑀸𑀧𑀯𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀏𑀯. 𑀙𑀩𑁆𑀩𑀻𑀲𑀢𑀺𑀫𑀁.

𑀇𑀦𑁆𑀤𑁆𑀭𑀺𑀬𑁂𑀲𑀼 ¶ 𑀫𑀦𑀘𑁆𑀙𑀝𑁆𑀞𑁂𑀲𑀼 𑀆𑀧𑀸𑀣𑀕𑀢𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀦𑀺𑀫𑀺𑀢𑁆𑀢𑀕𑀳𑀡𑀸𑀤𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀪𑁂𑀤𑀲𑀗𑁆𑀔𑀸𑀢𑁄 𑀅𑀕𑀼𑀢𑁆𑀢𑀤𑁆𑀯𑀸𑀭𑀪𑀸𑀯𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸. 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀪𑁄𑀚𑀦𑁂 𑀫𑀢𑁆𑀢𑀁 𑀅𑀚𑀸𑀦𑀦𑀪𑀸𑀯𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀢𑀣𑀸𑀧𑀯𑀢𑁆𑀢𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀲𑀢𑁆𑀢𑀯𑀻𑀲𑀢𑀺𑀫𑀁.

𑀅𑀦𑀦𑁆𑀢𑀭𑀤𑀼𑀓𑁂𑀧𑀺 ¶ 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀝𑁆𑀞𑀯𑀻𑀲𑀢𑀺𑀫𑀁.

𑀲𑀢𑀺𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁄 𑀫𑀼𑀝𑁆𑀞𑀲𑀢𑀺𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀲𑀫𑁆𑀧𑀚𑀸𑀦𑀦𑀪𑀸𑀯𑁄 𑀅𑀲𑀫𑁆𑀧𑀚𑀜𑁆𑀜𑀁, 𑀫𑁄𑀳𑁄. 𑀏𑀓𑀽𑀦𑀢𑀺𑀁𑀲𑀢𑀺𑀫𑀁.

𑀅𑀦𑀦𑁆𑀢𑀭𑀤𑀼𑀓𑁂 𑀘𑀢𑀼𑀪𑀽𑀫𑀺𑀓𑀸 𑀲𑀢𑀺𑀧𑀜𑁆𑀜𑀸𑀯 𑀯𑀼𑀢𑁆𑀢𑀸. 𑀢𑀺𑀁𑀲𑀢𑀺𑀫𑀁.

𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀅𑀧𑁆𑀧𑀝𑀺𑀯𑀸𑀦𑀲𑀗𑁆𑀔𑀸𑀢𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀬𑁄𑀦𑀺𑀲𑁄𑀤𑀲𑁆𑀲𑀦𑀲𑀗𑁆𑀔𑀸𑀢𑀁 𑀧𑀝𑀺𑀲𑀗𑁆𑀔𑀸𑀦𑀫𑁂𑀯 𑀩𑀮𑀦𑁆𑀢𑀺 𑀧𑀝𑀺𑀲𑀗𑁆𑀔𑀸𑀦𑀩𑀮𑀁, 𑀓𑀸𑀫𑀸𑀯𑀘𑀭𑀧𑀜𑁆𑀜𑀸𑀯. 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸𑀤𑀺𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀘𑀢𑀼𑀪𑀽𑀫𑀓𑀥𑀫𑁆𑀫𑀸 𑀪𑀸𑀯𑀦𑀸𑀩𑀮𑀁. 𑀏𑀓𑀢𑀺𑀁𑀲𑀢𑀺𑀫𑀁.

𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄, 𑀲𑁄 𑀢𑀺𑀯𑀺𑀥𑁄 𑀘𑀺𑀢𑁆𑀢𑀲𑀫𑀣𑁄 𑀅𑀥𑀺𑀓𑀭𑀡𑀲𑀫𑀣𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺. 𑀢𑀢𑁆𑀣 𑀘 𑀧𑀼𑀩𑁆𑀩𑀪𑀸𑀕𑀸𑀲𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑀕𑁆𑀕𑀢𑀸 𑀘𑀺𑀢𑁆𑀢𑀲𑀫𑀣𑁄 𑀦𑀸𑀫, 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀺 𑀲𑀢𑁆𑀢𑀯𑀺𑀥𑁄 𑀅𑀥𑀺𑀓𑀭𑀡𑀲𑀫𑀣𑁄 𑀦𑀸𑀫, 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀦𑀸𑀫. 𑀇𑀥 𑀧𑀦 𑀘𑀢𑀼𑀪𑀽𑀫𑀓𑁄 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯. 𑀩𑀸𑀢𑁆𑀢𑀺𑀁𑀲𑀢𑀺𑀫𑀁.

𑀲𑀫𑀣𑁄𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀫𑀣𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀪𑀽𑀫𑀓𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀏𑀯. 𑀢𑁂𑀢𑁆𑀢𑀺𑀁𑀲𑀢𑀺𑀫𑀁.

𑀅𑀦𑀦𑁆𑀢𑀭𑀤𑀼𑀓𑁂𑀧𑀺 ¶ 𑀯𑀻𑀭𑀺𑀬𑀲𑀫𑀸𑀥𑀻 𑀏𑀯 𑀯𑀼𑀢𑁆𑀢𑀸. 𑀘𑀢𑀼𑀢𑁆𑀢𑀺𑀁𑀲𑀢𑀺𑀫𑀁.

𑀲𑀻𑀮𑀯𑀺𑀦𑀸𑀲𑀺𑀓𑀸 𑀅𑀲𑀁𑀯𑀭𑀲𑀗𑁆𑀔𑀸𑀢𑀸 𑀲𑀻𑀮𑀲𑁆𑀲 𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀯𑀺𑀧𑀢𑁆𑀢𑀺, 𑀢𑀣𑀸𑀧𑀯𑀢𑁆𑀢𑀸 𑀅𑀓𑀼𑀲𑀮𑀥𑀫𑁆𑀫𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀧𑀢𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀏𑀯. 𑀧𑀜𑁆𑀘𑀢𑀺𑀁𑀲𑀢𑀺𑀫𑀁.

𑀲𑁄𑀭𑀘𑁆𑀘𑀫𑁂𑀯 𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑀢𑁄 𑀲𑀻𑀮𑀧𑀭𑀺𑀧𑀽𑀭𑀡𑀢𑁄 𑀲𑀻𑀮𑀲𑁆𑀲 𑀲𑀫𑁆𑀧𑀤𑀸𑀢𑀺 𑀲𑀻𑀮𑀲𑀫𑁆𑀧𑀤𑀸. 𑀤𑀺𑀝𑁆𑀞𑀺𑀧𑀸𑀭𑀺𑀧𑀽𑀭𑀺𑀪𑀽𑀢𑀁 ¶ 𑀜𑀸𑀡𑀫𑁂𑀯 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀤𑀸𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀤𑀸. 𑀘𑀢𑀼𑀪𑀽𑀫𑀓𑀸 𑀲𑀻𑀮𑀧𑀜𑁆𑀜𑀸𑀯. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑁂𑀧𑀺. 𑀙𑀢𑁆𑀢𑀺𑀁𑀲𑀢𑀺𑀫𑀁.

𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀲𑀫𑁆𑀧𑀢𑁆𑀢𑀸 𑀲𑀻𑀮𑀲𑀗𑁆𑀔𑀸𑀢𑀸 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺 𑀲𑀻𑀮𑀯𑀺𑀲𑀼𑀤𑁆𑀥𑀺. 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀸 𑀤𑀲𑁆𑀲𑀦𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀬𑀸 𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀲𑀢𑁆𑀢𑀢𑁆𑀢𑀺𑀁𑀲𑀢𑀺𑀫𑀁.

𑀓𑀫𑁆𑀫𑀲𑁆𑀲𑀓𑀢𑀸𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸 𑀤𑀺𑀝𑁆𑀞𑀺 𑀯𑀺𑀲𑀼𑀤𑁆𑀥𑀺 𑀦𑀸𑀫. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀢𑀤𑀦𑀼𑀭𑀽𑀧𑀁 𑀧𑀥𑀸𑀦𑀁 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀁 𑀦𑀸𑀫. 𑀅𑀝𑁆𑀞𑀢𑀺𑀁𑀲𑀢𑀺𑀫𑀁.

𑀲𑀁𑀯𑁂𑀕𑀚𑀦𑀓𑀸𑀦𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑀗𑁆𑀔𑀸𑀢𑀸𑀦𑀺 𑀓𑀸𑀭𑀡𑀸𑀦𑀺 𑀲𑀁𑀯𑁂𑀚𑀦𑀻𑀬𑀝𑁆𑀞𑀸𑀦𑀸𑀦𑀺 𑀦𑀸𑀫, 𑀢𑁂𑀲𑀼 𑀚𑀸𑀢𑀺𑀆𑀤𑀺𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀬𑀲𑀗𑁆𑀔𑀸𑀢𑀁 𑀲𑀁𑀯𑀺𑀚𑀦𑀁 𑀲𑀁𑀯𑁂𑀕𑁄 𑀦𑀸𑀫, 𑀢𑀣𑀸𑀧𑀯𑀢𑁆𑀢𑀓𑀼𑀲𑀮𑀸𑀤𑀺 𑀏𑀯. 𑀏𑀯𑀁 𑀲𑀁𑀯𑁂𑀕𑀚𑀸𑀢𑀲𑁆𑀲 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀧𑀥𑀸𑀦𑀁 𑀲𑀁𑀯𑀺𑀕𑁆𑀕𑀲𑁆𑀲 𑀬𑁄𑀦𑀺𑀲𑁄 𑀧𑀥𑀸𑀦𑀁, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀻𑀭𑀺𑀬𑀫𑁂𑀯. 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀢𑀺𑀫𑀁.

𑀓𑀼𑀲𑀮𑀥𑀫𑁆𑀫𑀧𑀽𑀭𑀡𑁂 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑁄 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀬𑁄 𑀧𑀦 𑀤𑀸𑀦𑀁 𑀤𑀢𑁆𑀯𑀸 𑀢𑀢𑁄 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀲𑀭𑀡𑀕𑀫𑀦𑀁 𑀆𑀓𑀗𑁆𑀔𑀢𑀺, 𑀢𑀢𑁄 𑀧𑀜𑁆𑀘𑀲𑀻𑀮𑀸𑀤𑀺𑀁, 𑀧𑀩𑁆𑀩𑀚𑁆𑀚𑀁, 𑀩𑀼𑀤𑁆𑀥𑀯𑀘𑀦𑀸𑀦𑀁 𑀉𑀕𑁆𑀕𑀡𑁆𑀳𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀁, 𑀢𑀢𑁄 𑀢𑁂𑀦𑀸𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀅𑀬𑀁 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀥𑀺𑀓𑀼𑀲𑀮𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀉𑀓𑁆𑀓𑀡𑁆𑀞𑀫𑀸𑀦𑁄 𑀧𑀥𑀸𑀦𑀁 𑀧𑀝𑀺𑀯𑀸𑀧𑁂𑀢𑀺 𑀦𑀺𑀯𑀢𑁆𑀢𑀸𑀧𑁂𑀢𑀻𑀢𑀺 𑀧𑀝𑀺𑀯𑀸𑀦𑀺, 𑀦 𑀧𑀝𑀺𑀯𑀸𑀦𑀺 ¶ 𑀅𑀧𑁆𑀧𑀝𑀺𑀯𑀸𑀦𑀺, 𑀢𑀲𑁆𑀲 𑀪𑀯𑁄 𑀅𑀧𑁆𑀧𑀝𑀺𑀯𑀸𑀦𑀺𑀢𑀸. 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀧𑀥𑀸𑀦𑀲𑁆𑀫𑀺𑀁 𑀅𑀦𑀺𑀯𑀢𑁆𑀢𑀦𑀢𑀸 𑀅𑀦𑁄𑀲𑀓𑁆𑀓𑀦𑀢𑀸, 𑀢𑀣𑀸𑀧𑀯𑀢𑁆𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸 𑀥𑀫𑁆𑀫𑀸. 𑀘𑀢𑁆𑀢𑀸𑀮𑀻𑀲𑀢𑀺𑀫𑀁.

𑀯𑀺𑀚𑀸𑀦𑀦𑀢𑁄 𑀯𑀺𑀚𑁆𑀚𑀸, 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑀼𑀢𑀽𑀧𑀧𑀸𑀢𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀺. 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑀼𑀢𑁆𑀢𑀺, 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀦𑀺𑀩𑁆𑀩𑀸𑀦𑀜𑁆𑀘. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀳𑀺 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀢𑁄, 𑀲𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀘 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸, 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀘𑁆𑀘𑀦𑁆𑀢𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫𑀁.

𑀓𑀺𑀮𑁂𑀲𑀓𑁆𑀔𑀬𑀓𑀭𑁂𑀲𑀼 ¶ 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼 𑀜𑀸𑀡𑀁 𑀔𑀬𑁂 𑀜𑀸𑀡𑀁 𑀦𑀸𑀫. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀪𑀽𑀢𑁂 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑀅𑀭𑀺𑀬𑀨𑀮𑁂 𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀦𑀸𑀫. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀢𑀺𑀫𑀁.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀪𑀗𑁆𑀕𑀫𑀸𑀢𑀺𑀓𑀸

𑀇𑀤𑀸𑀦𑀺 ¶ ¶ 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸𑀦𑀦𑁆𑀢𑀭𑀁 𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀅𑀢𑁆𑀣𑀯𑀡𑁆𑀡𑀦𑀸 𑀅𑀦𑀼𑀧𑁆𑀧𑀢𑁆𑀢𑀸. 𑀢𑀲𑁆𑀲𑀸 𑀧𑀦 𑁋

𑀅𑀢𑁆𑀣𑀢𑁄 𑀥𑀫𑁆𑀫𑀪𑁂𑀤𑁂𑀦, 𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀸;

𑀧𑀸𑀴𑀺𑀫𑀼𑀢𑁆𑀢𑀦𑀬𑀸 𑀘𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀸 𑀧𑀦𑁂𑀲𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀺𑀪𑀗𑁆𑀕𑀸𑀦𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑀸 𑀅𑀝𑁆𑀞𑀸𑀭𑀲𑀯𑀺𑀥𑀸 𑀳𑁄𑀢𑀺 𑁋 𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀸-𑀆𑀬𑀢𑀦-𑀥𑀸𑀢𑀼-𑀲𑀘𑁆𑀘-𑀇𑀦𑁆𑀤𑁆𑀭𑀺𑀬-𑀧𑀘𑁆𑀘𑀬𑀸𑀓𑀸𑀭-𑀲𑀢𑀺𑀧𑀝𑁆𑀞𑀸𑀦-𑀲𑀫𑁆𑀫𑀧𑁆𑀧𑀥𑀸𑀦-𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕-𑀫𑀕𑁆𑀕𑀗𑁆𑀕𑀛𑀸𑀦-𑀅𑀧𑁆𑀧𑀫𑀜𑁆𑀜𑀸-𑀲𑀺𑀓𑁆𑀔𑀸𑀧𑀤-𑀧𑀝𑀺𑀲𑀫𑁆𑀪𑀺𑀤𑀸-𑀜𑀸𑀡-𑀔𑀼𑀤𑁆𑀤𑀓𑀯𑀢𑁆𑀣𑀼-𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀫𑀸𑀢𑀺

𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀢𑀢𑁆𑀣 𑀆𑀤𑀺𑀪𑀽𑀢𑀸𑀬 𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀅𑀢𑁆𑀣𑀢𑁄 𑀢𑀸𑀯 𑁋 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀏𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀢𑁆𑀭𑀸𑀬𑀁 𑀔𑀦𑁆𑀥-𑀲𑀤𑁆𑀤𑁄 𑀲𑀫𑁆𑀩𑀳𑀼𑀮𑁂𑀲𑀼 𑀞𑀸𑀦𑁂𑀲𑀼 𑀦𑀺𑀧𑀢𑀢𑀺 𑀭𑀸𑀲𑀺𑀫𑁆𑀳𑀺 𑀕𑀼𑀡𑁂 𑀧𑀡𑁆𑀡𑀢𑁆𑀢𑀺𑀬𑀁 𑀭𑀼𑀴𑁆𑀳𑀺𑀬𑀦𑁆𑀢𑀺. 𑀢𑀢𑁆𑀣 ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁦𑁩𑁭; 𑀅. 𑀦𑀺. 𑁪.𑁫𑁧; 𑁫.𑁪𑁫; 𑁬.𑁩𑁭) 𑀳𑀺 𑀭𑀸𑀲𑀺𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀕𑀼𑀡𑀢𑁄. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀧𑀡𑁆𑀡𑀢𑁆𑀢𑀺𑀢𑁄. ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁬𑁩) 𑀏𑀓𑀫𑁆𑀧𑀺 𑀘𑀺𑀢𑁆𑀢𑀁 𑀭𑀼𑀴𑁆𑀳𑀺𑀢𑁄 𑀔𑀦𑁆𑀥𑁄 𑀦𑀸𑀫, 𑀲𑁆𑀯𑀸𑀬𑀫𑀺𑀥 𑀭𑀸𑀲𑀺𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀸𑀲𑀝𑁆𑀞𑁄 𑀳𑀺 𑀔𑀦𑁆𑀥-𑀲𑀤𑁆𑀤𑁄, 𑀓𑁄𑀝𑁆𑀞𑀸𑀲𑀝𑁆𑀞𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀮𑁄𑀓𑀲𑁆𑀫𑀺𑀁 𑀳𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀘𑁄𑀤𑀺𑀬𑀫𑀸𑀦𑀸 ‘‘𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫 ¶ , 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀔𑀦𑁆𑀥𑁄𑀢𑀺 𑀓𑁄𑀝𑁆𑀞𑀸𑀲𑁄𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀧𑀲𑀺𑀤𑁆𑀥𑀸𑀓𑀸𑀭𑁂𑀦 𑀭𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺, 𑀧𑀻𑀴𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁭𑁯).

𑀭𑀽𑀧𑀜𑁆𑀘 𑀢𑀁 𑀔𑀦𑁆𑀥𑁄 𑀘𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀭𑀸𑀲𑀺 𑀭𑀽𑀧𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀓𑀼𑀲𑀮𑀢𑁆𑀢𑀺𑀓𑁂 𑀯𑀺𑀪𑀢𑁆𑀢𑀸 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫. 𑀢𑀣𑀸 𑀘𑀢𑀼𑀪𑀽𑀫𑀓𑀸 𑀯𑁂𑀤𑀦𑀸𑀲𑀜𑁆𑀜𑀸𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀸𑀫, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀸𑀫. 𑀯𑁂𑀤𑀦𑀸𑀲𑀜𑁆𑀜𑀸 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀧𑀜𑁆𑀜𑀸𑀲 𑀘𑁂𑀢𑀲𑀺𑀓𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦𑀸𑀫. 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀦𑀺𑀩𑁆𑀩𑀸𑀦𑀫𑁂𑀯 𑀅𑀲𑀗𑁆𑀕𑀳𑀺𑀢𑀁, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀧𑀦 𑀲𑀩𑁆𑀩𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀅𑀬𑀫𑁂𑀯 𑀳𑀺 𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀯𑀺𑀲𑁂𑀲𑁄. 𑀔𑀦𑁆𑀥𑀸 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀸, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀲𑀯𑁄𑀧𑀸𑀤𑀸𑀦𑀺𑀬𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸. 𑀇𑀥 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀬𑀁 𑀥𑀫𑁆𑀫𑀪𑁂𑀤𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀸𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀆𑀕𑀢𑀅𑀢𑁆𑀣𑀦𑀬𑀤𑀲𑁆𑀲𑀦𑀢𑁄. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑁆𑀢𑀺 𑀢𑀻𑀳𑀺 𑀦𑀬𑁂𑀳𑀺 𑀔𑀦𑁆𑀥𑀯𑀺𑀪𑀗𑁆𑀕𑁄 𑀯𑀺𑀪𑀢𑁆𑀢𑁄. 𑀢𑀣𑀸 𑀆𑀬𑀢𑀦𑀯𑀺𑀪𑀗𑁆𑀕𑀸𑀤𑀬𑁄. 𑀓𑁂𑀯𑀮𑀁 𑀳𑀺 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂, 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺. 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑁂 𑀧𑀜𑁆𑀳𑀸𑀧𑀼𑀘𑁆𑀙𑀓𑀁 𑀦𑀢𑁆𑀣𑀺. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀢𑀬𑁄𑀧𑀺 𑀦𑀬𑀸 ¶ 𑀦 𑀲𑀦𑁆𑀢𑀺. 𑀢𑁂𑀲𑀼 𑀳𑀺 𑀜𑀸𑀡𑀯𑀺𑀪𑀗𑁆𑀕𑁄 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀯𑀺𑀥𑀸 𑀯𑀺𑀪𑀢𑁆𑀢𑁄, 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁆𑀯𑀸𑀲𑀝𑁆𑀞𑀺𑀧𑀪𑁂𑀤𑀸 𑀯𑀺𑀪𑀢𑁆𑀢𑁄, 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄 𑀧𑀦 𑀲𑀩𑁆𑀩𑀲𑀗𑁆𑀕𑀳𑀸𑀤𑀻𑀳𑀺 𑀤𑀲𑀳𑀺 𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀦𑀬𑀸𑀦𑀁 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀭𑀽𑀧𑀓𑁆𑀔𑀦𑁆𑀥𑁄 𑁋

‘‘𑀢𑀢𑁆𑀣 ¶ 𑀓𑀢𑀫𑁄 𑀭𑀽𑀧𑀓𑁆𑀔𑀦𑁆𑀥𑁄? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁨) 𑁋

𑀏𑀯𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑁄, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺. 𑀢𑀢𑁆𑀣 𑀦𑀺𑀬𑀓𑀚𑁆𑀛𑀢𑁆𑀢𑀁 𑀦𑀸𑀫 𑀅𑀚𑁆𑀛𑀢𑁆𑀢𑀭𑀽𑀧𑀁 𑀅𑀚𑁆𑀛𑀢𑁆𑀢𑀁 𑀦𑀸𑀫, 𑀢𑀢𑁄 𑀅𑀜𑁆𑀜𑀁 𑀧𑀭𑀧𑀼𑀕𑁆𑀕𑀮𑀕𑀢𑀁, 𑀅𑀯𑀺𑀜𑁆𑀜𑀸𑀡𑀜𑁆𑀘 𑀩𑀳𑀺𑀤𑁆𑀥𑀸 𑀦𑀸𑀫, 𑀢𑀣𑀸 𑀯𑁂𑀤𑀦𑀸𑀤𑀬𑁄𑀧𑀺. 𑀧𑀲𑀸𑀤𑀯𑀺𑀲𑀬𑀭𑀽𑀧𑀁 𑀧𑀦 𑀑𑀴𑀸𑀭𑀺𑀓𑀁 𑀦𑀸𑀫, 𑀲𑁂𑀲𑀁 𑀲𑀼𑀔𑀼𑀫𑀁 𑀦𑀸𑀫. 𑀅𑀦𑀺𑀝𑁆𑀞𑀭𑀽𑀧𑀁 𑀳𑀻𑀦𑀁 𑀦𑀸𑀫, 𑀇𑀝𑁆𑀞𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫.

𑀦𑀦𑀼 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀏𑀓𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺 𑀫𑀦𑀸𑀧𑀁, 𑀢𑀤𑁂𑀯 𑀅𑀜𑁆𑀜𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀳𑁄𑀢𑀺. 𑀯𑀢𑁆𑀣𑀸𑀤𑀻𑀦𑀺 𑀳𑀺 𑀲𑀽𑀓𑀭𑀸𑀤𑀻𑀦𑀁 𑀦𑀧𑁆𑀧𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦 𑀫𑀦𑀼𑀲𑁆𑀲𑀸𑀤𑀻𑀦𑀁, 𑀢𑁂𑀲𑀜𑁆𑀘 𑀯𑀢𑁆𑀣𑀸𑀪𑀭𑀡𑀸𑀤𑀻𑀦𑀺 𑀧𑀺𑀬𑀸𑀦𑀺, 𑀦 𑀲𑀽𑀓𑀭𑀸𑀤𑀻𑀦𑀦𑁆𑀢𑀺, 𑀢𑀲𑁆𑀫𑀸 𑀭𑀼𑀘𑀺𑀯𑀲𑁂𑀦𑁂𑀯 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀕𑀳𑁂𑀢𑀩𑁆𑀩𑀸? 𑀦, 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀧𑀸𑀝𑁂𑀓𑁆𑀓𑀁 𑀯𑀺𑀪𑀢𑁆𑀢𑀢𑁆𑀢𑀸. 𑀓𑀼𑀲𑀮𑀓𑀫𑁆𑀫𑀚𑀁 𑀳𑀺 𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑀬𑁄𑀯 𑀇𑀝𑁆𑀞𑀁 𑀦𑀸𑀫, 𑀅𑀓𑀼𑀲𑀮𑀓𑀫𑁆𑀫𑀚𑀁 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑀬𑁄𑀯 𑀅𑀦𑀺𑀝𑁆𑀞𑀁 𑀦𑀸𑀫, 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀧𑀦 𑀓𑁄𑀘𑀺 ¶ 𑀇𑀝𑁆𑀞𑀫𑁂𑀯 𑀩𑀼𑀤𑁆𑀥𑀭𑀽𑀧𑀸𑀤𑀺𑀁 𑀚𑀯𑀦𑀓𑁆𑀔𑀡𑁂 𑀅𑀦𑀺𑀝𑁆𑀞𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀦𑀺𑀝𑁆𑀞𑀜𑁆𑀘 𑀦𑀺𑀭𑀬𑀕𑁆𑀕𑀺𑀲𑀢𑁆𑀣𑀯𑀺𑀲𑀸𑀤𑀺𑀁 𑀇𑀝𑁆𑀞𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀚𑀯𑀦𑁂𑀳𑀺 𑀏𑀯 𑀯𑀺𑀧𑀮𑁆𑀮𑀸𑀲𑀪𑀸𑀯𑁄, 𑀦 𑀯𑀺𑀧𑀸𑀓𑁂𑀳𑀻𑀢𑀺 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀺𑀬𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀧𑀦 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑁋

‘‘𑀲𑀼𑀔𑀲𑀫𑁆𑀨𑀲𑁆𑀲𑀁 𑀳𑀺 𑀕𑀽𑀣𑀓𑀮𑀮𑀁 𑀘𑀓𑁆𑀔𑀼𑀤𑁆𑀯𑀸𑀭𑀖𑀸𑀦𑀤𑁆𑀯𑀸𑀭𑁂𑀲𑀼 𑀅𑀦𑀺𑀝𑁆𑀞𑀁, 𑀓𑀸𑀬𑀤𑁆𑀯𑀸𑀭𑁂 𑀇𑀝𑁆𑀞𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑁂𑀦 𑀧𑁄𑀣𑀺𑀬𑀫𑀸𑀦𑀲𑁆𑀲, 𑀲𑀼𑀯𑀡𑁆𑀡𑀲𑀽𑀮𑁂 𑀉𑀢𑁆𑀢𑀸𑀲𑀺𑀬𑀫𑀸𑀦𑀲𑁆𑀲 𑀘 𑀫𑀡𑀺𑀭𑀢𑀦𑀲𑀼𑀯𑀡𑁆𑀡𑀲𑀽𑀮𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀓𑀸𑀬𑀤𑁆𑀯𑀸𑀭𑁂 𑀅𑀦𑀺𑀝𑁆𑀞𑀸𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁬) 𑁋

𑀏𑀯𑀁 𑀤𑁆𑀯𑀸𑀭𑀯𑀲𑁂𑀦 𑀏𑀓𑀲𑁆𑀲𑁂𑀯 𑀯𑀢𑁆𑀣𑀼𑀦𑁄 𑀇𑀝𑁆𑀞𑀢𑀸, 𑀅𑀦𑀺𑀝𑁆𑀞𑀢𑀸 𑀘 𑀯𑀼𑀢𑁆𑀢𑀸. 𑀲𑀸 𑀘 𑀏𑀓𑀓𑁆𑀔𑀡𑁂 𑀦 𑀬𑀼𑀢𑁆𑀢𑀸 𑀏𑀓𑀓𑀮𑀸𑀧𑀕𑀢𑀪𑀽𑀢𑁄𑀧𑀸𑀤𑀸𑀬𑀭𑀽𑀧𑀸𑀦𑀁 𑀏𑀓𑀲𑀸𑀫𑀕𑁆𑀕𑀺𑀬𑀫𑀼𑀧𑁆𑀧𑀢𑁆𑀢𑀺𑀢𑁄. 𑀦 𑀳𑀺 𑀪𑀽𑀢𑁂𑀲𑀼 𑀅𑀓𑀼𑀲𑀮𑀯𑀲𑁂𑀦 𑀅𑀦𑀺𑀝𑁆𑀞𑁂𑀲𑀼 ¶ 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀢𑀤𑀼𑀧𑀸𑀤𑀸𑀬𑀭𑀽𑀧𑀸𑀤𑀺𑀓𑀼𑀲𑀮𑁂𑀦 𑀇𑀝𑁆𑀞𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀪𑀺𑀦𑁆𑀦𑀓𑁆𑀔𑀡𑁂 𑀧𑀦 𑀇𑀝𑁆𑀞𑀸𑀦𑀺 𑀫𑀡𑀺𑀭𑀢𑀦𑀸𑀤𑀻𑀦𑀺 𑀢𑁂𑀳𑀺 𑀧𑁄𑀣𑀺𑀬𑀫𑀸𑀦𑀲𑁆𑀲 𑀅𑀓𑀼𑀲𑀮𑀧𑀘𑁆𑀘𑀬𑁂𑀦 𑀉𑀢𑀼𑀦𑀸 𑀅𑀦𑀺𑀝𑁆𑀞𑀸𑀦𑀺 𑀯𑀺𑀧𑀭𑀺𑀡𑀫𑀦𑁆𑀢𑀺, 𑀓𑀼𑀲𑀮𑀧𑀘𑁆𑀘𑀬𑁂𑀦 𑀅𑀦𑀺𑀝𑁆𑀞𑀸𑀦𑀺 𑀕𑀽𑀣𑀓𑀮𑀮𑀸𑀤𑀻𑀦𑀺 𑀇𑀝𑁆𑀞𑀸𑀦𑀻𑀢𑀺, 𑀅𑀬𑀁 𑀦𑁄 𑀅𑀢𑁆𑀢𑀦𑁄𑀫𑀢𑀺. 𑀏𑀯𑀁 𑀯𑀺𑀪𑀢𑁆𑀢𑁂𑀲𑀼 𑀘 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀁, 𑀧𑀡𑀻𑀢𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀲𑀼𑀔𑀼𑀫𑀁 𑀧𑀦 𑀭𑀽𑀧𑀁 𑀤𑀽𑀭𑁂𑀭𑀽𑀧𑀁 𑀦𑀸𑀫, 𑀑𑀴𑀸𑀭𑀺𑀓𑀁 𑀲𑀦𑁆𑀢𑀺𑀓𑁂𑀭𑀽𑀧𑀁 𑀦𑀸𑀫. 𑀢𑀁 𑀢𑀁 𑀯𑀸 𑀧𑀦 𑀭𑀽𑀧𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀭𑀽𑀧𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑁂𑀤𑀦𑀸𑀤𑀻𑀲𑀼 𑀧𑀦 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀲𑀼𑀔𑀼𑀫𑀸. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀲𑀼𑀔𑀤𑀼𑀓𑁆𑀔𑀸 𑀯𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀼𑀫𑀸. 𑀲𑀸𑀲𑀯𑀸 𑀑𑀴𑀸𑀭𑀺𑀓𑀸 ¶ , 𑀅𑀦𑀸𑀲𑀯𑀸 𑀲𑀼𑀔𑀼𑀫𑀸. 𑀢𑀁 𑀢𑀁 𑀯𑀸 𑀧𑀦 𑀯𑁂𑀤𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀤𑀽𑀭𑁂, 𑀢𑀸 𑀘 𑀢𑀸𑀬 𑀤𑀽𑀭𑁂𑀢𑀺 𑀏𑀯𑀁 𑀚𑀸𑀢𑀺𑀲𑀪𑀸𑀯𑀧𑀼𑀕𑁆𑀕𑀮𑀪𑀽𑀫𑀺𑀪𑁂𑀤𑀢𑁄 𑀯𑀼𑀢𑁆𑀢𑀦𑀬𑁂𑀦 𑀤𑀽𑀭𑁂𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸, 𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀬 𑀲𑀦𑁆𑀢𑀺𑀓𑁂𑀢𑀺 𑀏𑀯𑀁 𑀚𑀸𑀢𑀺𑀆𑀤𑀺𑀲𑀸𑀫𑀜𑁆𑀜𑀢𑁄 𑀲𑀦𑁆𑀢𑀺𑀓𑁂𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸. 𑀢𑀁 𑀢𑀁 𑀯𑀸 𑀧𑀦 𑀯𑁂𑀤𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑁂𑀤𑀦𑀸 𑀤𑀽𑀭𑁂𑀲𑀦𑁆𑀢𑀺𑀓𑁂 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀪𑀗𑁆𑀕𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀯𑀺𑀪. 𑁮 𑀆𑀤𑀬𑁄; 𑀯𑀺𑀪. 𑀅𑀝𑁆𑀞. 𑁮 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀸𑀯 𑀏𑀓𑀯𑀺𑀥𑀸𑀤𑀺𑀢𑁄 𑀬𑀸𑀯 𑀏𑀓𑀸𑀤𑀲𑀯𑀺𑀥𑀸 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀧𑀦 𑀏𑀓𑀯𑀺𑀥𑁄 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄, 𑀤𑀼𑀯𑀺𑀥𑁄 𑀲𑀳𑁂𑀢𑀼𑀓𑀤𑀼𑀓𑀯𑀲𑁂𑀦, 𑀢𑀺𑀯𑀺𑀥𑁄 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦, 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀪𑀽𑀫𑀓𑀯𑀲𑁂𑀦, 𑀧𑀜𑁆𑀘𑀯𑀺𑀥𑁄 𑀲𑀪𑀸𑀯𑀪𑁂𑀤𑁂𑀦, 𑀙𑀩𑁆𑀩𑀺𑀥𑁄 𑀙𑀤𑁆𑀯𑀸𑀭𑀺𑀓𑀯𑀲𑁂𑀦, 𑀲𑀢𑁆𑀢𑀯𑀺𑀥𑁄 𑀲𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑁄𑀕𑀯𑀲𑁂𑀦, 𑀅𑀝𑁆𑀞𑀯𑀺𑀥𑁄 𑀢𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀦𑀯𑀯𑀺𑀥𑁄 𑀢𑁂𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀤𑀲𑀯𑀺𑀥𑁄 𑀢𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀯𑀺𑀥𑀸, 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀫𑀽𑀮𑀁 𑀧𑀞𑀫𑀯𑀸𑀭𑀁 𑀯𑀢𑁆𑀯𑀸 𑀧𑀼𑀦 𑀓𑀼𑀲𑀮𑀢𑁆𑀢𑀺𑀓𑀝𑁆𑀞𑀸𑀦𑁂 𑀯𑁂𑀤𑀦𑀸𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀯𑀚𑁆𑀚𑀺𑀢𑁂 𑀲𑀩𑁆𑀩𑀢𑁆𑀢𑀺𑀓𑁂 𑀬𑁄𑀚𑁂𑀢𑁆𑀯𑀸 𑀬𑀸𑀯 𑀤𑀲𑀯𑀺𑀥𑀸, 𑀅𑀧𑀭𑁂𑀧𑀺 𑀅𑀝𑁆𑀞𑀸𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀲𑀳𑁂𑀢𑀼𑀓𑀤𑀼𑀓𑀫𑀽𑀮𑀺𑀓𑀸 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸, 𑀏𑀯𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀤𑀻𑀲𑀼 𑀅𑀦𑀼𑀭𑀽𑀧𑀤𑀼𑀓𑀫𑀽𑀮𑀺𑀓𑀸𑀧𑀺 𑀲𑀭𑀡𑀤𑀼𑀓𑀧𑀭𑀺𑀬𑁄𑀲𑀸𑀦𑀸 𑀧𑀘𑁆𑀘𑁂𑀓𑀁 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 ¶ 𑀅𑀬𑀁 𑀤𑀼𑀓𑀫𑀽𑀮𑀓𑁄 𑀬𑁄𑀚𑀦𑀸𑀦𑀬𑁄. 𑀬𑀣𑀸 𑀘 𑀏𑀓𑁂𑀓𑀤𑀼𑀓𑁂𑀦 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸𑀯𑀲𑁂𑀦 𑀤𑀼𑀓𑀫𑀽𑀮𑀓𑁄 ¶ 𑀦𑀬𑁄 𑀯𑀼𑀢𑁆𑀢𑁄, 𑀏𑀯𑀁 𑀏𑀓𑁂𑀓𑀢𑁆𑀢𑀺𑀓𑁂𑀦 𑀬𑀣𑀸𑀦𑀼𑀭𑀽𑀧𑀁 𑀲𑀩𑁆𑀩𑀤𑀼𑀓𑀬𑁄𑀚𑀦𑀸𑀯𑀲𑁂𑀦 𑀢𑀺𑀓𑀫𑀽𑀮𑀓𑁄, 𑀢𑀤𑀼𑀪𑀬𑀫𑀺𑀲𑁆𑀲𑀓𑀯𑀲𑁂𑀦 𑀉𑀪𑀢𑁄𑀯𑀟𑁆𑀠𑀦𑀓𑁄 𑀘 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁂, 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀤𑀼𑀓𑀫𑀽𑀮𑀓𑀸𑀤𑀺𑀦𑀬𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸, 𑀓𑀢𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀓𑀢𑀺 𑀲𑀭𑀡𑀸, 𑀓𑀢𑀺 𑀅𑀭𑀡𑀸𑀢𑀺? 𑀭𑀽𑀧𑀓𑁆𑀔𑀦𑁆𑀥𑁄 𑀅𑀩𑁆𑀬𑀸𑀓𑀢𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀭𑀽𑀧𑀁, 𑀯𑁂𑀤𑀦𑀸 𑀘 𑀯𑁂𑀤𑀦𑀸𑀢𑁆𑀢𑀺𑀓𑁂 𑀦 𑀯𑀢𑁆𑀢𑀩𑁆𑀩𑀸, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀭𑀽𑀧𑀁 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁, 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀁, 𑀲𑁂𑀲𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀢𑀻𑀳𑀺 𑀢𑀺𑀓𑁂𑀳𑀺 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀭𑀽𑀧𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀢𑀬𑁄 𑀔𑀦𑁆𑀥𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀁, 𑀯𑁂𑀤𑀦𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀦 𑀯𑀢𑁆𑀢𑀩𑁆𑀩𑀸, 𑀢𑀬𑁄 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀁, 𑀦𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁, 𑀦𑁂𑀯𑀸𑀘𑀬𑀕𑀸𑀫𑀺𑀦𑀅𑀧𑀘𑀬𑀕𑀸𑀫𑀺, 𑀦𑁂𑀯𑀲𑁂𑀔𑀁𑀦𑀸𑀲𑁂𑀔𑀁, 𑀧𑀭𑀺𑀢𑁆𑀢𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀫𑀚𑁆𑀛𑀺𑀫𑀁, 𑀅𑀦𑀺𑀬𑀢𑀁, 𑀲𑁂𑀲𑀸 𑀢𑀺𑀥𑀸𑀧𑀺. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀘 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑀸𑀢𑀻𑀢𑀢𑁆𑀢𑀺𑀓𑁂𑀲𑀼 𑀧𑀜𑁆𑀘𑀧𑀺 𑀢𑀺𑀥𑀸 𑀳𑁄𑀦𑁆𑀢𑀺. 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀧𑀜𑁆𑀘𑀧𑀺 𑀢𑀺𑀥𑀸 𑀳𑁄𑀦𑁆𑀢𑀺. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸, 𑀭𑀽𑀧𑀓𑁆𑀔𑀦𑁆𑀥𑁄 𑀢𑀺𑀥𑀸𑀧𑀺 𑀳𑁄𑀢𑀺.

𑀘𑀢𑁆𑀢𑀸𑀭𑁄 ¶ 𑀔𑀦𑁆𑀥𑀸 𑀦𑀳𑁂𑀢𑀽, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀲𑀺𑀬𑀸 𑀳𑁂𑀢𑀼, 𑀲𑀺𑀬𑀸 𑀦 𑀳𑁂𑀢𑀼. 𑀭𑀽𑀧𑀁 𑀅𑀳𑁂𑀢𑀼𑀓𑀁, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀢𑀬𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑁂𑀧𑀺. 𑀭𑀽𑀧𑀁 𑀦𑀳𑁂𑀢𑀼𑀅𑀳𑁂𑀢𑀼𑀓𑀁, 𑀢𑀬𑁄 𑀤𑁆𑀯𑀺𑀥𑀸𑀧𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀧𑀜𑁆𑀘𑀧𑀺 𑀲𑀧𑁆𑀧𑀘𑁆𑀘𑀬𑀸, 𑀲𑀗𑁆𑀔𑀢𑀸, 𑀘𑀢𑁆𑀢𑀸𑀭𑁄 𑀅𑀦𑀺𑀤𑀲𑁆𑀲𑀦𑀸, 𑀅𑀧𑁆𑀧𑀝𑀺𑀖𑀸, 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀭𑀽𑀧𑀁 𑀭𑀽𑀧𑀻, 𑀲𑁂𑀲𑀸 𑀅𑀭𑀽𑀧𑀺𑀦𑁄. 𑀭𑀽𑀧𑀁 𑀮𑁄𑀓𑀺𑀬𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀧𑀜𑁆𑀘𑀧𑀺 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀘 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀘. 𑀘𑀢𑁆𑀢𑀸𑀭𑁄 𑀦𑁄 𑀆𑀲𑀯𑀸, 𑀲𑀗𑁆𑀔𑀸𑀭𑀸 𑀤𑁆𑀯𑀺𑀥𑀸𑀧𑀺, 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀲𑀸𑀲𑀯𑁄, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄 ¶ , 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀭𑀽𑀧𑀁 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀢𑀬𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀫𑁂𑀯, 𑀢𑀬𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀸𑀲𑀯𑀜𑁆𑀘, 𑀲𑁂𑀲𑀸 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀁 𑀳𑀺 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂 𑀭𑀽𑀧𑀁 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁, 𑀢𑀬𑁄 𑀤𑁆𑀯𑀺𑀥𑀸𑀧𑀺, 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸𑀧𑀺, 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀯𑀢𑁆𑀢𑀩𑁆𑀩𑁄 𑀘. 𑀢𑀢𑀺𑀬𑁂 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀲𑀸𑀭𑀫𑁆𑀫𑀡𑀸. 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁, 𑀲𑁂𑀲𑀸 𑀦𑁄 𑀘𑀺𑀢𑁆𑀢𑀸. 𑀢𑀬𑁄 𑀘𑁂𑀢𑀲𑀺𑀓𑀸, 𑀤𑁆𑀯𑁂 𑀅𑀘𑁂𑀢𑀲𑀺𑀓𑀸. 𑀢𑀬𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀭𑀽𑀧𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀤𑀼𑀓𑁂𑀧𑀺. 𑀢𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀯𑀺𑀜𑁆𑀜𑀸𑀡𑀁 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑀤𑁆𑀯𑀬𑁂𑀧𑀺. 𑀢𑀬𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸, 𑀤𑁆𑀯𑁂 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑀤𑁆𑀯𑀬𑁂𑀧𑀺. 𑀯𑀺𑀜𑁆𑀜𑀸𑀡𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀢𑀬𑁄 𑀩𑀸𑀳𑀺𑀭𑀸, 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀘𑀢𑁆𑀢𑀸𑀭𑁄 𑀦𑁄 𑀉𑀧𑀸𑀤𑀸. 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀧𑀜𑁆𑀘𑀧𑀺 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀸, 𑀦𑁄 𑀉𑀧𑀸𑀤𑀸𑀦𑀸.

𑀓𑀺𑀮𑁂𑀲𑀕𑁄𑀘𑁆𑀙𑀓𑁄 ¶ 𑀯𑀼𑀢𑁆𑀢𑀦𑀬𑁄𑀯. 𑀭𑀽𑀧𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀏𑀯𑀁 𑀬𑀸𑀯𑀧𑀻𑀢𑀺𑀤𑀼𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀁 𑀦 𑀯𑁂𑀤𑀦𑀸, 𑀦 𑀲𑀼𑀔𑀸, 𑀦 𑀲𑀼𑀔𑀲𑀳𑀕𑀢𑀸, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑁂𑀧𑀺. 𑀭𑀽𑀧𑀁 𑀓𑀸𑀫𑀸𑀯𑀘𑀭𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀏𑀯𑀁 𑀬𑀸𑀯 𑀲𑀭𑀡𑀤𑀼𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀫𑁂 𑀧𑀦 𑀦𑀬𑀸 𑀯𑀺𑀢𑁆𑀣𑀸𑀭𑀢𑁄 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀜𑀸𑀢𑀩𑁆𑀩𑀸. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀘 𑀦𑁂𑀲𑀁 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀅𑀢𑀺𑀭𑁂𑀓𑀁 𑀅𑀯𑀢𑁆𑀯𑀸 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀬𑀁 𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀇𑀤𑀸𑀦𑀺 𑀧𑀦𑁂𑀢𑁆𑀣 𑁋

𑀓𑀫𑀢𑁄𑀦𑀽𑀦𑀸𑀥𑀺𑀓𑀢𑁄, 𑀤𑀝𑁆𑀞𑀩𑁆𑀩𑀲𑀫𑀪𑁂𑀤𑀢𑁄;

𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀜𑁂𑀬𑁆𑀬𑁄, 𑀔𑀦𑁆𑀥𑀓𑁄𑀲𑀮𑁆𑀮𑀫𑀺𑀘𑁆𑀙𑀢𑀸.

𑀢𑀢𑁆𑀣 ¶ 𑀓𑀫𑀢𑁄𑀢𑀺 𑀏𑀢𑁆𑀣 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀪𑀽𑀫𑀺𑀓𑁆𑀓𑀫𑁄 𑀤𑁂𑀲𑀦𑀸𑀓𑁆𑀓𑀫𑁄𑀢𑀺 𑀩𑀳𑀼𑀯𑀺𑀥𑁂𑀲𑀼 𑀓𑀫𑁂𑀲𑀼 𑀔𑀦𑁆𑀥𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺, 𑀦 𑀇𑀢𑀭𑁂, 𑀅𑀲𑀫𑁆𑀪𑀯𑀸. 𑀅𑀪𑁂𑀤𑁂𑀦 𑀳𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑀧𑀢𑀺𑀢𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀽𑀳𑀖𑀦𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑁂𑀦 𑀅𑀢𑁆𑀢𑀕𑁆𑀕𑀸𑀳𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀪𑀕𑀯𑀸 𑀳𑀺𑀢𑀓𑀸𑀫𑁄 𑀢𑀲𑁆𑀲 𑀢𑀲𑁆𑀲 𑀚𑀦𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀘𑀓𑁆𑀔𑀼𑀆𑀤𑀻𑀦𑀁 𑀯𑀺𑀲𑀬𑀪𑀽𑀢𑀁 𑀑𑀴𑀸𑀭𑀺𑀓𑀁 𑀧𑀞𑀫𑀁 𑀭𑀽𑀧𑀓𑁆𑀔𑀦𑁆𑀥𑀁 𑀤𑁂𑀲𑁂𑀲𑀺, 𑀢𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀁𑀯𑁂𑀤𑀓𑀁 𑀑𑀴𑀸𑀭𑀺𑀓𑀁 𑀯𑁂𑀤𑀦𑀁, 𑀬𑀁 𑀯𑁂𑀤𑁂𑀢𑀺, 𑀢𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀏𑀯𑀁 𑀯𑁂𑀤𑀦𑀸𑀯𑀺𑀲𑀬𑀲𑁆𑀲 𑀆𑀓𑀸𑀭𑀕𑁆𑀕𑀸𑀳𑀺𑀓𑀁 𑀲𑀜𑁆𑀜𑀁, 𑀲𑀜𑁆𑀜𑀸𑀯𑀲𑁂𑀦𑀸𑀪𑀺𑀲𑀗𑁆𑀔𑀸𑀭𑀓𑁂 𑀲𑀗𑁆𑀔𑀸𑀭𑁂, 𑀢𑁂𑀲𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀲𑁆𑀲𑀬𑀸𑀥𑀺𑀧𑀢𑀺𑀪𑀽𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀅𑀦𑀽𑀦𑀸𑀥𑀺𑀓𑀢𑁄𑀢𑀺 ¶ 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄, 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑁆𑀧𑀭𑀫𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀯𑀭𑁄𑀥𑀢𑁄. 𑀅𑀦𑁂𑀓𑀧𑁆𑀧𑀪𑁂𑀤𑁂𑀲𑀼 𑀳𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀲𑀪𑀸𑀕𑀯𑀲𑁂𑀦 𑀲𑀗𑁆𑀕𑀬𑁆𑀳𑀫𑀸𑀦𑁂𑀲𑀼 𑀭𑀽𑀧𑀁 𑀭𑀽𑀧𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺, 𑀯𑁂𑀤𑀦𑀸 𑀯𑁂𑀤𑀦𑀸𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀜𑁆𑀜𑀸𑀤𑀻𑀲𑀼𑀧𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀏𑀢𑀧𑀭𑀫𑀜𑁆𑀘𑁂𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼, 𑀬𑀤𑀺𑀤𑀁 𑀭𑀽𑀧𑀸𑀤𑀬𑁄 𑀧𑀜𑁆𑀘, 𑀢𑀲𑁆𑀫𑀸 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀬𑁂𑀧𑀺 𑀘𑀜𑁆𑀜𑁂 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀢𑁆𑀣𑁂𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀢𑀤𑀯𑀭𑁄𑀥𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀅𑀦𑀽𑀦𑀸𑀥𑀺𑀓𑀢𑁄.

𑀤𑀝𑁆𑀞𑀩𑁆𑀩𑀲𑀫𑀪𑁂𑀤𑀢𑁄𑀢𑀺 𑀤𑀝𑁆𑀞𑀩𑁆𑀩𑀪𑁂𑀤𑀢𑁄, 𑀉𑀧𑀫𑀸𑀪𑁂𑀤𑀢𑁄 𑀘. 𑀢𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑀢𑁄 𑀢𑀸𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀫𑀜𑁆𑀜𑀢𑁄 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀢𑁄, 𑀪𑀸𑀭𑀢𑁄, 𑀔𑀸𑀤𑀓𑀢𑁄, 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀲𑀗𑁆𑀔𑀸𑀢𑀯𑀥𑀓𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦 𑀨𑁂𑀡𑀧𑀺𑀡𑁆𑀟𑀁 𑀯𑀺𑀬 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀉𑀤𑀓𑀩𑀼𑀩𑁆𑀩𑀼𑀴𑀫𑀭𑀻𑀘𑀺𑀓𑀓𑀤𑀮𑀺𑀓𑁆𑀔𑀦𑁆𑀥𑀫𑀸𑀬𑀸 𑀯𑀺𑀬 𑀬𑀣𑀸𑀓𑁆𑀓𑀫𑀁 𑀯𑁂𑀤𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀳𑀺 𑀨𑁂𑀡𑀧𑀺𑀡𑁆𑀟𑁄 𑀯𑀺𑀫𑀤𑁆𑀤𑀸𑀲𑀳𑁄, 𑀲𑁄 𑀘 𑀧𑀢𑁆𑀢𑀣𑀸𑀮𑀓𑀸𑀤𑀺𑀅𑀢𑁆𑀣𑀁 𑀕𑀳𑀺𑀢𑁄𑀧𑀺 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺, 𑀪𑀺𑀚𑁆𑀚𑀢𑀺, 𑀏𑀯𑀁 𑀭𑀽𑀧𑀫𑁆𑀧𑀺 𑀯𑀺𑀫𑀤𑁆𑀤𑀸𑀲𑀳𑀁, 𑀢𑀜𑁆𑀘 𑀲𑀼𑀪𑀸𑀤𑀺𑀯𑀲𑁂𑀦 𑀕𑀳𑀺𑀢𑀫𑁆𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺, 𑀅𑀲𑀼𑀪𑀸𑀤𑀺𑀬𑁂𑀯 𑀳𑁄𑀢𑀺.

𑀬𑀣𑀸 𑀯𑀸 𑀨𑁂𑀡𑀧𑀺𑀡𑁆𑀟𑁄 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑁄 𑀩𑀳𑀼𑀦𑁆𑀦𑀁 𑀉𑀤𑀓𑀲𑀧𑁆𑀧𑀸𑀤𑀺𑀧𑀸𑀡𑀓𑀸𑀦𑀁 𑀆𑀯𑀸𑀲𑁄, 𑀆𑀤𑀺𑀢𑁄 𑀘𑁂𑀲 𑀩𑀤𑀭𑀧𑀓𑁆𑀓𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀯𑀟𑁆𑀠𑀦𑀓𑁄 𑀉𑀝𑁆𑀞𑀺𑀢𑀫𑀢𑁆𑀢𑁄𑀧𑀺 𑀘𑁂𑀲 𑀪𑀺𑀚𑁆𑀚𑀢𑀺, 𑀣𑁄𑀓𑀁 𑀕𑀦𑁆𑀢𑁆𑀯𑀸𑀧𑀺, 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀧𑀦 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺 ¶ , 𑀏𑀯𑀁 𑀭𑀽𑀧𑀫𑁆𑀧𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑀁 ¶ 𑀅𑀲𑀻𑀢𑀺𑀓𑀺𑀫𑀺𑀓𑀼𑀮𑀯𑁄𑀓𑀺𑀡𑁆𑀡𑀁, 𑀆𑀤𑀺𑀢𑁄 𑀘𑁂𑀢𑀁 𑀓𑀮𑀮𑀫𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀯𑀟𑁆𑀠𑀦𑀓𑀁, 𑀓𑀮𑀮𑀫𑀢𑁆𑀢𑁂𑀧𑀺 𑀘𑁂𑀢𑀁 𑀪𑀺𑀚𑁆𑀚𑀢𑀺, 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑁂𑀧𑀺 𑀆𑀬𑀼𑀓𑁆𑀔𑀬𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺. 𑀏𑀯𑀁 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁.

𑀬𑀣𑀸 𑀧𑀦 𑀩𑀼𑀩𑁆𑀩𑀼𑀴𑁄 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑁄 𑀅𑀕𑀬𑁆𑀳𑀼𑀧𑀕𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄𑀯, 𑀏𑀯𑀁 𑀯𑁂𑀤𑀦𑀸𑀧𑀺. 𑀬𑀣𑀸 𑀘 𑀩𑀼𑀩𑁆𑀩𑀼𑀴𑁄 𑀉𑀤𑀓𑀢𑀮𑀁, 𑀉𑀤𑀓𑀩𑀺𑀦𑁆𑀤𑀼𑀁, 𑀉𑀤𑀓𑀚𑀮𑁆𑀮𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀕𑀳𑀡𑀯𑀸𑀢𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀯𑀢𑁆𑀣𑀼𑀁, 𑀆𑀭𑀫𑁆𑀫𑀡𑀁, 𑀓𑀺𑀮𑁂𑀲𑀚𑀮𑁆𑀮𑀁, 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀸 𑀩𑀼𑀩𑁆𑀩𑀼𑀴𑀲𑀤𑀺𑀲𑀸 𑀤𑀝𑁆𑀞𑀩𑁆𑀩𑀸.

𑀬𑀣𑀸 𑀧𑀦 𑀫𑀭𑀻𑀘𑀺𑀓𑀸 𑀚𑀮𑀸𑀲𑀬𑀸𑀤𑀺𑀪𑀸𑀯𑁂𑀦 𑀯𑀺𑀧𑁆𑀧𑀮𑀫𑁆𑀪𑀺𑀓𑀸, 𑀏𑀯𑀁 𑀲𑀜𑁆𑀜𑀸𑀧𑀺 𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦𑀸𑀢𑀺 𑀫𑀭𑀻𑀘𑀺𑀲𑀤𑀺𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀦 𑀓𑀤𑀮𑀺𑀓𑁆𑀔𑀦𑁆𑀥𑁄 𑀅𑀕𑀬𑁆𑀳𑀼𑀧𑀕𑁄 𑀩𑀳𑀼𑀯𑀝𑁆𑀝𑀺𑀲𑀫𑁄𑀥𑀸𑀦𑁄, 𑀏𑀯𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 𑀅𑀕𑀬𑁆𑀳𑀼𑀧𑀕𑁄𑀦𑀺𑀘𑁆𑀘𑀸𑀤𑀺𑀲𑀸𑀭𑀯𑀺𑀭𑀳𑀺𑀢𑁄, 𑀨𑀲𑁆𑀲𑀸𑀤𑀺𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑁄 𑀘 𑀳𑁄𑀢𑀻𑀢𑀺 𑀲𑁄 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀦 𑀫𑀸𑀬𑀸 𑀅𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀭𑀽𑀧𑀸𑀦𑀺𑀧𑀺 𑀢𑀣𑀸 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀭𑀽𑀧𑀁 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀆𑀕𑀘𑁆𑀙𑀦𑁆𑀢𑀁 𑀯𑀺𑀬 𑀦𑀺𑀘𑁆𑀘𑀸𑀤𑀺𑀢𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀯𑀜𑁆𑀘𑁂𑀢𑀻𑀢𑀺 𑀢𑀁 𑀫𑀸𑀬𑀸𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀭𑀽𑀧𑀁, 𑀯𑁂𑀤𑀦𑀸 𑀩𑀼𑀩𑁆𑀩𑀼𑀴𑀽𑀧𑀫𑀸;

𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀓𑀤𑀮𑀽𑀧𑀫𑀸;

𑀫𑀸𑀬𑀽𑀧𑀫𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸’’𑀢𑀺. (𑀲𑀁. 𑀦𑀺. 𑁩.𑁯𑁫);

𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑁄.

𑀉𑀧𑀫𑀸𑀪𑁂𑀤𑀢𑁄 𑀘 𑀧𑀦 𑀕𑀺𑀮𑀸𑀦𑀲𑀸𑀮𑀽𑀧𑀫𑁄 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑁂𑀮𑀜𑁆𑀜𑀽𑀧𑀫𑁄 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑁂𑀮𑀜𑁆𑀜𑀲𑀫𑀼𑀝𑁆𑀞𑀸𑀦𑀽𑀧𑀫𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀅𑀲𑀧𑁆𑀧𑀸𑀬𑀲𑁂𑀯𑀦𑀽𑀧𑀫𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 ¶ , 𑀕𑀺𑀮𑀸𑀦𑀽𑀧𑀫𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀅𑀧𑀺𑀘 𑀘𑀸𑀭𑀓𑀓𑀸𑀭𑀡𑀅𑀧𑀭𑀸𑀥𑀓𑀸𑀭𑀡𑀓𑀸𑀭𑀓𑀅𑀧𑀭𑀸𑀥𑀺𑀓𑀽𑀧𑀫𑀸 𑀏𑀢𑁂 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀧𑀭𑀺𑀯𑁂𑀲𑀓𑀪𑀼𑀜𑁆𑀚𑀓𑀽𑀧𑀫𑀸 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀉𑀧𑀫𑀸𑀪𑁂𑀤𑁄. 𑀏𑀯𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀦𑀬𑁄 𑀜𑁂𑀬𑁆𑀬𑁄.

𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀏𑀢𑁆𑀣 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀸𑀦𑀺. 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀧𑀝𑁆𑀞𑀳𑀦𑁆𑀢𑀺 𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀢𑁂 𑀘 𑀧𑀦 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀇𑀤𑀜𑁆𑀘 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀦𑀬𑀦𑁆𑀢𑁂𑀯, 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀪𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦 𑀘 𑀲𑀸𑀲𑀦𑁂, 𑀮𑁄𑀓𑁂 𑀘 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀘𑀓𑁆𑀔𑀼𑀆𑀤𑀻𑀲𑀼 𑀳𑀺 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀦𑀺𑀯𑀲𑀦𑁆𑀢𑀺, 𑀢𑁂𑀲𑀼 𑀘 𑀆𑀓𑀭𑀪𑀽𑀢𑁂𑀲𑀼 𑀆𑀓𑀺𑀡𑁆𑀡𑀸 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀘 𑀲𑀫𑁄𑀲𑀭𑀦𑁆𑀢𑀺, 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀓𑀸𑀭𑀡𑀜𑁆𑀘, 𑀢𑀲𑁆𑀫𑀸 𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀺𑀦𑀸 𑀅𑀢𑁆𑀣𑁂𑀦 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺, 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 ¶ 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄, 𑀉𑀤𑀸𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄, 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀲𑁄, 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄, 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀫𑀦𑀢𑀻𑀢𑀺 𑀫𑀦𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀘𑀓𑁆𑀔𑀼 𑀘 𑀢𑀁 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸𑀢𑀺 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀦𑀸𑀬𑀢𑀦𑀁 𑀦𑀸𑀫. 𑀘𑁂𑀢𑀲𑀺𑀓𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀲𑁂𑀲𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀇𑀫𑁂𑀲𑀼 𑀘 𑀆𑀬𑀢𑀦𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸, 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀸 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀩𑁆𑀩𑁂 𑀦𑀸𑀫𑀭𑀽𑀧𑀥𑀫𑁆𑀫𑀸, 𑀧𑀜𑁆𑀜𑀢𑁆𑀢𑀺𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀥𑀸𑀢𑀼. 𑁭𑁧) 𑀳𑀺 ¶ 𑀭𑀽𑀧𑀸𑀭𑀽𑀧𑀮𑀓𑁆𑀔𑀡𑀸𑀦𑀁 𑀚𑀸𑀢𑀺𑀚𑀭𑀸𑀪𑀗𑁆𑀕𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀢𑀭𑀸𑀲𑀫𑁆𑀧𑀺 𑀧𑀜𑁆𑀜𑀢𑁆𑀢𑀻𑀦𑀁 𑀬𑀣𑀸𑀭𑀳𑀁 𑀢𑀢𑁆𑀣 𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸…𑀧𑁂… 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 (𑀯𑀺𑀪. 𑁧𑁫𑁪) 𑀏𑀯𑀁 𑀯𑀺𑀲𑀬𑀺𑀯𑀺𑀲𑀬𑀸𑀬𑀢𑀦𑀯𑀲𑁂𑀦 𑀆𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀧𑀲𑀸𑀤𑀯𑀺𑀲𑀬𑀸𑀬𑀢𑀦𑀸𑀦𑀺 𑀢𑀸𑀯 ‘‘𑀢𑀢𑁆𑀣 𑀓𑀢𑀫𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 ¶ 𑀧𑀲𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁫𑁬) 𑀭𑀽𑀧𑀓𑀡𑁆𑀟𑁂 (𑀥. 𑀲. 𑁫𑁯𑁭) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀸𑀦𑀺. 𑀫𑀦𑀸𑀬𑀢𑀦𑀁 𑀧𑀦 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯𑀤𑀲𑀯𑀺𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀁. 𑀥𑀫𑁆𑀫𑀸𑀬𑀢𑀦𑀁 𑀧𑀦 ‘‘𑀢𑀢𑁆𑀣 𑀓𑀢𑀫𑀁 𑀥𑀫𑁆𑀫𑀸𑀬𑀢𑀦𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽’’𑀢𑀺 (𑀯𑀺𑀪. 𑁧𑁬𑁭) 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁬𑁭) 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀁. 𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑀁 𑀧𑀦 𑀇𑀢𑁄 𑀧𑀭𑀁 𑀯𑀺𑀢𑁆𑀣𑀸𑀭𑀢𑁄 𑀅𑀤𑀲𑁆𑀲𑁂𑀢𑁆𑀯𑀸 𑀢𑀺𑀓𑀤𑀼𑀓𑀸𑀦𑀁 𑀆𑀤𑀺𑀅𑀦𑁆𑀢𑁂𑀳𑀺 𑀘𑁂𑀯 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁂𑀳𑀺 𑀘 𑀢𑀺𑀓𑀤𑀼𑀓𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀲𑁂𑀲𑁂𑀳𑀺𑀧𑀺 𑀢𑀺𑀓𑀤𑀼𑀓𑁂𑀳𑀺 𑀬𑁄𑀚𑀦𑀸𑀦𑀬𑁄 𑀔𑀦𑁆𑀥𑁂 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀓𑀣𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀤𑀲𑀸𑀬𑀢𑀦𑀸 𑀅𑀩𑁆𑀬𑀸𑀓𑀢𑀸, 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀤𑀲𑀸𑀬𑀢𑀦𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀫𑀦𑀸𑀬𑀢𑀦𑀁 𑀢𑀺𑀥𑀸𑀧𑀺, 𑀥𑀫𑁆𑀫𑀸𑀬𑀢𑀦𑀁 𑀢𑀺𑀥𑀸 𑀦 𑀯𑀢𑁆𑀢𑀩𑁆𑀩𑀜𑁆𑀘…𑀧𑁂… 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀦𑀯𑀸𑀬𑀢𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑀺, 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀦 𑀳𑁂𑀢𑀽, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀳𑁂𑀢𑀼, 𑀲𑀺𑀬𑀸 𑀦 𑀳𑁂𑀢𑀼…𑀧𑁂… 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀲𑀧𑁆𑀧𑀘𑁆𑀘𑀬𑀸𑀦𑀺, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀧𑁆𑀧𑀘𑁆𑀘𑀬𑀁, 𑀲𑀺𑀬𑀸 𑀅𑀧𑁆𑀧𑀘𑁆𑀘𑀬𑀁…𑀧𑁂… 𑀤𑀲𑀸𑀬𑀢𑀦𑀸𑀦𑀺 𑀭𑀽𑀧𑀁, 𑀫𑀦𑀸𑀬𑀢𑀦𑀁 𑀅𑀭𑀽𑀧𑀁, 𑀥𑀫𑁆𑀫𑀸𑀬𑀢𑀦𑀁 𑀤𑁆𑀯𑀺𑀥𑀸𑀧𑀺…𑀧𑁂… 𑀤𑀲𑀸𑀬𑀢𑀦𑀸𑀦𑀺 𑀅𑀭𑀡𑀸𑀦𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀲𑀺𑀬𑀸 𑀲𑀭𑀡𑀸𑀦𑀺, 𑀲𑀺𑀬𑀸 𑀅𑀭𑀡𑀸𑀦𑀻𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀤𑀸𑀦𑀺 ¶ 𑀧𑀦 𑁋

𑀓𑀫𑀢𑁄 𑀢𑀸𑀯𑀢𑁆𑀢𑀢𑁄 𑀘, 𑀢𑁂𑀲𑀁 𑀤𑀝𑁆𑀞𑀩𑁆𑀩𑀪𑁂𑀤𑀢𑁄;

𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀦𑁂𑀢𑁆𑀣, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ¶ 𑀓𑀫𑀢𑁄𑀢𑀺 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀺 𑀆𑀬𑀢𑀦𑁂𑀲𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀢𑁆𑀢𑀸 𑀘𑀓𑁆𑀔𑀸𑀬𑀢𑀦𑀁 𑀧𑀸𑀓𑀝𑀦𑁆𑀢𑀺 𑀧𑀞𑀫𑀁 𑀤𑁂𑀲𑀺𑀢𑀁, 𑀢𑀢𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀸𑀦𑀺 𑀲𑁄𑀢𑀸𑀬𑀢𑀦𑀸𑀤𑀻𑀦𑀺. 𑀅𑀣 𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑀢𑁄 𑀩𑀳𑀽𑀧𑀓𑀸𑀭𑀢𑁆𑀢𑀸 𑀘𑀓𑁆𑀔𑀼𑀲𑁄𑀢𑀸𑀬𑀢𑀦𑀸𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺, 𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀺 𑀢𑀻𑀡𑀺, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀧𑀦 𑀕𑁄𑀘𑀭𑀯𑀺𑀲𑀬𑀢𑁆𑀢𑀸 𑀅𑀦𑁆𑀢𑁂 𑀫𑀦𑀸𑀬𑀢𑀦𑀁, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀕𑁄𑀘𑀭𑀢𑁆𑀢𑀸 𑀢𑁂𑀲𑀁 𑀅𑀦𑀦𑁆𑀢𑀭𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀺. 𑀅𑀧𑀺𑀘 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀧𑀺 𑀅𑀬𑀫𑁂𑀢𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁪𑁨𑁧; 𑀲𑀁. 𑀦𑀺. 𑁪.𑁬𑁦, 𑁧𑁧𑁩; 𑀫𑀳𑀸𑀦𑀺. 𑁧𑁦𑁭) 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀢𑀸𑀯𑀢𑁆𑀢𑀢𑁄𑀢𑀺 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀓𑁆𑀔𑀸𑀤𑀬𑁄𑀧𑀺 𑀳𑀺 𑀥𑀫𑁆𑀫𑀸 𑀏𑀯, 𑀏𑀯𑀁 𑀲𑀢𑀺 𑀥𑀫𑁆𑀫𑀸𑀬𑀢𑀦𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀙𑀯𑀺𑀜𑁆𑀜𑀸𑀡𑀓𑀸𑀬𑀼𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀅𑀬𑀫𑁂𑀢𑁂𑀲𑀁 𑀪𑁂𑀤𑁄 𑀳𑁄𑀢𑀻𑀢𑀺 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀭𑀽𑀧𑀸𑀬𑀢𑀦𑀫𑁂𑀯𑀸𑀭𑀫𑁆𑀫𑀡𑀁. 𑀢𑀣𑀸 𑀇𑀢𑀭𑀸𑀦𑀺 𑀇𑀢𑀭𑁂𑀲𑀁. 𑀙𑀝𑁆𑀞𑀲𑁆𑀲 𑀧𑀦 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄 𑀫𑀦𑀸𑀬𑀢𑀦𑁂𑀓𑀤𑁂𑀲𑁄𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀅𑀲𑀸𑀥𑀸𑀭𑀡𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀆𑀭𑀫𑁆𑀫𑀡𑀦𑁆𑀢𑀺. 𑀇𑀢𑀺 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀢𑀸𑀯𑀢𑁆𑀢𑀢𑀸.

𑀤𑀝𑁆𑀞𑀩𑁆𑀩𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀆𑀬𑀢𑀦𑀸𑀦𑀺 𑀅𑀦𑀸𑀕𑀫𑀦𑀢𑁄, 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀳𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀉𑀤𑀬𑀸 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦𑀧𑀺 𑀉𑀤𑁆𑀥𑀁 𑀯𑀬𑀸 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺 ¶ , 𑀅𑀣 𑀔𑁄 𑀧𑀼𑀩𑁆𑀩𑁂 𑀉𑀤𑀬𑀸 𑀅𑀧𑁆𑀧𑀝𑀺𑀮𑀤𑁆𑀥𑀲𑀪𑀸𑀯𑀸𑀦𑀺 𑀉𑀤𑁆𑀥𑀁 𑀯𑀬𑀸 𑀧𑀭𑀺𑀪𑀺𑀦𑁆𑀦𑀲𑀪𑀸𑀯𑀸𑀦𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑁂𑀫𑀚𑁆𑀛𑁂 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀯𑀲𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀫𑀦𑀢𑁄, 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀣𑀸 𑀦𑀺𑀭𑀻𑀳𑀢𑁄, 𑀅𑀩𑁆𑀬𑀸𑀧𑀸𑀭𑀢𑁄 𑀘. 𑀦 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀺 ¶ ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀲𑀸𑀫𑀕𑁆𑀕𑀺𑀬𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺, 𑀦 𑀘 𑀢𑀸𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀭𑀪𑀸𑀯𑁂𑀦, 𑀯𑀢𑁆𑀣𑀼𑀪𑀸𑀯𑁂𑀦, 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀥𑀫𑁆𑀫𑀢𑀸𑀯𑁂𑀲𑀸 𑀬𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀲𑀸𑀫𑀕𑁆𑀕𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀭𑀻𑀳𑀢𑁄, 𑀅𑀩𑁆𑀬𑀸𑀧𑀸𑀭𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀲𑀼𑀜𑁆𑀜𑁄 𑀕𑀸𑀫𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁆𑀢𑀸, 𑀩𑀸𑀳𑀺𑀭𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬. 𑀢𑀣𑀸 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙𑀧𑀸𑀡𑀓𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺, 𑀩𑀸𑀳𑀺𑀭𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸 𑀯𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑁄. 𑀏𑀯𑀁 𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣 𑀯𑀺𑀤𑀳𑀢𑀺, 𑀥𑀻𑀬𑀢𑁂, 𑀯𑀺𑀥𑀸𑀦𑀁, 𑀯𑀺𑀥𑀻𑀬𑀢𑁂 𑀏𑀢𑀸𑀬, 𑀏𑀢𑁆𑀣 𑀯𑀸 𑀥𑀻𑀬𑀢𑀻𑀢𑀺 𑀥𑀸𑀢𑀼. 𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸. 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀢𑁆𑀢𑁂𑀳𑀺 𑀘 𑀥𑀻𑀬𑀦𑁆𑀢𑁂 𑀥𑀸𑀭𑀻𑀬𑀦𑁆𑀢𑀺, 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀢𑀸, 𑀏𑀢𑀸𑀳𑀺 𑀘 𑀓𑀸𑀭𑀡𑀪𑀽𑀢𑀸𑀳𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺, 𑀬𑀣𑀸𑀯𑀺𑀳𑀺𑀢𑀜𑁆𑀘 𑀤𑀼𑀓𑁆𑀔𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀏𑀢𑁂𑀳𑀺 𑀅𑀢𑁆𑀣𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀬𑀣𑀸 ¶ 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑁂𑀲𑀼 𑀭𑀲𑀲𑁄𑀡𑀺𑀢𑀸𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸, 𑀏𑀯𑀫𑁂𑀢𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀘𑀓𑁆𑀔𑀸𑀤𑀻𑀲𑀼 𑀥𑀸𑀢𑀼𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀸𑀥𑀸𑀭𑀡𑀢𑁆𑀣𑀯𑀲𑁂𑀦 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀦𑀺𑀚𑁆𑀚𑀻𑀯𑀫𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀥𑀸𑀢𑀼 𑀘𑀸𑀢𑀺 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀆𑀬𑀢𑀦𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀯𑀺𑀜𑁆𑀜𑀸𑀡𑀁 ¶ 𑀫𑀦𑁄𑀥𑀸𑀢𑀼 𑀦𑀸𑀫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀯𑀚𑁆𑀚𑀺𑀢𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑁋 ‘‘𑀧𑀣𑀯𑀻𑀥𑀸𑀢𑀼 𑀆𑀧𑁄 𑀢𑁂𑀚𑁄 𑀯𑀸𑀬𑁄 𑀆𑀓𑀸𑀲𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀤𑀺𑀢𑁄 𑀧𑀜𑁆𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦, 𑀧𑀘𑁆𑀙𑀺𑀫𑀸 𑀘 𑀙 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀺𑀪𑀢𑁆𑀢𑀸, 𑀅𑀧𑀭𑀸𑀧𑀺 ‘‘𑀲𑀼𑀔𑀥𑀸𑀢𑀼 𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀅𑀯𑀺𑀚𑁆𑀚𑀸𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀣𑀸 𑀢𑀣𑀸 𑀯𑀺𑀪𑀢𑁆𑀢𑀸, 𑀧𑀼𑀦 𑀅𑀧𑀭𑀸𑀧𑀺 ‘‘𑀓𑀸𑀫𑀥𑀸𑀢𑀼 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀦𑁂𑀓𑁆𑀔𑀫𑁆𑀫𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸, 𑀏𑀯𑀁 𑀢𑀻𑀳𑀺 𑀙𑀓𑁆𑀓𑁂𑀳𑀺 𑀧𑀘𑁆𑀘𑁂𑀓𑀁 𑀢𑁂𑀪𑀽𑀫𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀲𑀭𑀽𑀧𑀢𑁄, 𑀮𑀓𑁆𑀔𑀡𑀸𑀳𑀸𑀭𑀢𑁄, 𑀦𑀺𑀲𑁆𑀲𑀬𑀯𑀺𑀲𑀬𑀧𑀬𑁄𑀕𑀯𑀺𑀦𑀸𑀪𑀸𑀯𑀸𑀤𑀺𑀢𑁄 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀲𑀭𑀽𑀧𑁂𑀦𑁂𑀯 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀲𑀸𑀤𑀯𑀺𑀲𑀬𑀥𑀸𑀢𑀼𑀬𑁄 𑀆𑀬𑀢𑀦𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀸, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀦 𑁋

‘‘𑀢𑀢𑁆𑀣 𑀓𑀢𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼? 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼.

‘‘𑀢𑀢𑁆𑀣 ¶ 𑀓𑀢𑀫𑀸 𑀫𑀦𑁄𑀥𑀸𑀢𑀼? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄𑀥𑀸𑀢𑀼.

‘‘𑀢𑀢𑁆𑀣 𑀓𑀢𑀫𑀸 𑀥𑀫𑁆𑀫𑀥𑀸𑀢𑀼? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀥𑀫𑁆𑀫𑀥𑀸𑀢𑀼.

‘‘𑀢𑀢𑁆𑀣 𑀓𑀢𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 ¶ 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁪) 𑁋

𑀏𑀯𑀁 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀲𑀬𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀏𑀯𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁆𑀣 𑀧𑀦 𑀧𑀺-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼𑀬𑀸𑀧𑀺 𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀸𑀤𑀺𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀫𑀦𑀜𑁆𑀘 𑀧𑀝𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀫𑀦𑁄𑀤𑁆𑀯𑀸𑀭𑁂 𑀪𑀯𑀗𑁆𑀕𑀫𑀦𑀜𑁆𑀘𑁂𑀯 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘 𑀧𑀝𑀺𑀘𑁆𑀘 𑀲𑀳𑀸𑀯𑀚𑁆𑀚𑀦𑀓𑀚𑀯𑀦𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀲𑁄𑀴𑀲 𑀥𑀸𑀢𑀼𑀬𑁄 𑀅𑀩𑁆𑀬𑀸𑀓𑀢𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺…𑀧𑁂… 𑀤𑀲 𑀥𑀸𑀢𑀼𑀬𑁄 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀧𑀜𑁆𑀘 𑀥𑀸𑀢𑀼𑀬𑁄 𑀯𑀺𑀧𑀸𑀓𑀸, 𑀫𑀦𑁄𑀥𑀸𑀢𑀼 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺 ¶ 𑀳𑁄𑀦𑁆𑀢𑀺. 𑀤𑀲 𑀥𑀸𑀢𑀼𑀬𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀤𑁆𑀤𑀥𑀸𑀢𑀼𑀬𑁄 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀧𑀜𑁆𑀘 𑀥𑀸𑀢𑀼𑀬𑁄 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺…𑀧𑁂… 𑀤𑀲 𑀥𑀸𑀢𑀼𑀬𑁄 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄, 𑀲𑀤𑁆𑀤𑀥𑀸𑀢𑀼 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀉𑀧𑁆𑀧𑀸𑀤𑀺𑀦𑁄𑀢𑀺, 𑀙 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺. 𑀥𑀫𑁆𑀫𑀥𑀸𑀢𑀼 𑀢𑀺𑀥𑀸𑀯…𑀧𑁂… 𑀭𑀽𑀧𑀥𑀸𑀢𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, 𑀦𑀯 𑀥𑀸𑀢𑀼𑀬𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, 𑀅𑀝𑁆𑀞 𑀥𑀸𑀢𑀼𑀬𑁄 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸. 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄 𑀦 𑀳𑁂𑀢𑀽, 𑀥𑀫𑁆𑀫𑀥𑀸𑀢𑀼 𑀤𑁆𑀯𑀺𑀥𑀸𑀯…𑀧𑁂… 𑀲𑁄𑀴𑀲 𑀥𑀸𑀢𑀼𑀬𑁄 𑀅𑀭𑀡𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀤𑁆𑀯𑀺𑀥𑀸𑀧𑀻𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀤𑀸𑀦𑀺 𑀧𑀦𑁂𑀢𑀸𑀲𑀁 𑁋

𑀓𑀫𑀢𑀸𑀯𑀢𑁆𑀢𑀢𑁄 𑀤𑀝𑁆𑀞𑀩𑁆𑀩𑀸, 𑀧𑀘𑁆𑀘𑀬𑀸𑀦𑀁 𑀯𑀺𑀪𑀸𑀕𑀢𑁄;

𑀥𑀸𑀢𑀽𑀦𑀫𑀺𑀥 𑀯𑀺𑀜𑁆𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀲𑁄 𑀘 𑀧𑀦𑀸𑀬𑀁 𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦 ¶ 𑀯𑀼𑀢𑁆𑀢𑁄. 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽𑀢𑀺 𑀇𑀤𑀁 𑀳𑀺 𑀤𑁆𑀯𑀬𑀁 𑀳𑁂𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀤𑀁 𑀨𑀮𑀁. 𑀏𑀯𑀁 𑀲𑀩𑁆𑀩𑀢𑁆𑀣. 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀢𑀸𑀯𑀢𑁆𑀢𑀢𑁄 𑀧𑀦 𑀬𑀸 𑀇𑀥 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀻𑀳𑀺 𑀙𑀓𑁆𑀓𑁂𑀳𑀺 𑀯𑀼𑀢𑁆𑀢𑀸 𑀥𑀸𑀢𑀼𑀬𑁄 𑀘𑁂𑀯, 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼 ‘‘𑀆𑀪𑀸𑀥𑀸𑀢𑀼…𑀧𑁂… 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸 𑀘𑀸𑀢𑀺 𑀅𑀜𑁆𑀜𑀸𑀧𑀺 𑀩𑀳𑀼𑀥𑀸𑀢𑀼𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀸𑀲𑀫𑁆𑀧𑀺 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺? 𑀢𑀸𑀲𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀢𑁆𑀢𑀸.

𑀅𑀧𑀺𑀘 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀻𑀦𑀁 𑀢𑀲𑁆𑀲𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀢𑀁, 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀜𑁆𑀘 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 ¶ 𑁋 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀘. 𑀯𑁂𑀦𑁂𑀬𑁆𑀬𑀸 𑀳𑀺 𑀅𑀭𑀽𑀧𑀫𑀽𑀴𑁆𑀳𑁄 𑀭𑀽𑀧𑀫𑀽𑀴𑁆𑀳𑁄 𑀉𑀪𑀬𑀫𑀽𑀴𑁆𑀳𑁄𑀢𑀺 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄 𑀅𑀭𑀽𑀧𑀪𑁂𑀤𑀯𑀺𑀪𑀸𑀯𑀺𑀦𑀻 𑀔𑀦𑁆𑀥𑀤𑁂𑀲𑀦𑀸, 𑀭𑀽𑀧𑀪𑁂𑀤𑀯𑀺𑀪𑀸𑀯𑀺𑀦𑀻 𑀆𑀬𑀢𑀦𑀤𑁂𑀲𑀦𑀸, 𑀢𑀤𑀼𑀪𑀬𑀪𑁂𑀤𑀯𑀺𑀪𑀸𑀯𑀺𑀦𑀻 𑀥𑀸𑀢𑀼𑀤𑁂𑀲𑀦𑀸 𑀲𑀧𑁆𑀧𑀸𑀬𑀸𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀢𑀣𑀸 𑀢𑀣𑀸 𑀳𑀺,

𑀥𑀫𑁆𑀫𑀁 𑀧𑀓𑀸𑀲𑀬𑀢𑀺 𑀏𑀲 𑀬𑀣𑀸 𑀬𑀣𑀸𑀲𑁆𑀲;

𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦,

𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄 𑀧𑀬𑀸𑀢𑀻’’𑀢𑀺. (𑀯𑀺𑀪. 𑀅𑀝𑁆𑀞. 𑁧𑁮𑁩);

𑀅𑀬𑀫𑁂𑀢𑁆𑀣 𑀢𑀸𑀯𑀢𑁆𑀢𑀢𑀸.

𑀤𑀝𑁆𑀞𑀩𑁆𑀩𑀢𑁄 𑀧𑀦𑁂𑀢𑀸 𑀲𑀩𑁆𑀩𑀸𑀧𑀺 𑀲𑀗𑁆𑀔𑀢𑀸 𑀥𑀸𑀢𑀼𑀬𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄, 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀼𑀜𑁆𑀜𑀢𑁄, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀤𑀡𑁆𑀟𑁄 𑀯𑀺𑀬 𑀭𑀽𑀧𑀥𑀸𑀢𑀼, 𑀲𑀤𑁆𑀤𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀬𑀣𑀸𑀓𑁆𑀓𑀫𑀁 𑀆𑀤𑀸𑀲𑀢𑀮𑀫𑀼𑀔𑀫𑀼𑀔𑀦𑀺𑀫𑀺𑀢𑁆𑀢𑀸𑀦𑀺 𑀯𑀺𑀬. 𑀢𑀣𑀸 𑀢𑀺𑀮𑀬𑀦𑁆𑀢𑀘𑀓𑁆𑀓𑀢𑁂𑀮𑀸𑀦𑀺 𑀯𑀺𑀬, 𑀅𑀥𑀭𑀸𑀭𑀡𑀻𑀉𑀢𑁆𑀢𑀭𑀸𑀭𑀡𑀻𑀅𑀕𑁆𑀕𑀻 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. 𑀏𑀲 𑀦𑀬𑁄 𑀲𑁄𑀢𑀥𑀸𑀢𑀼𑀆𑀤𑀻𑀲𑀼𑀧𑀺. 𑀫𑀦𑁄𑀥𑀸𑀢𑀼 𑀧𑀦 𑀬𑀣𑀸𑀲𑀫𑁆𑀪𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑀥𑀸𑀢𑀼𑀬𑀁 𑀧𑀦 𑀯𑁂𑀤𑀦𑀸 𑀲𑀮𑁆𑀮𑀲𑀽𑀮𑀫𑀺𑀯 ¶ , 𑀲𑀜𑁆𑀜𑀸 𑀭𑀺𑀢𑁆𑀢𑀫𑀼𑀝𑁆𑀞𑀺 𑀯𑀺𑀬, 𑀲𑀗𑁆𑀔𑀸𑀭𑀸 𑀯𑀺𑀲𑀭𑀼𑀓𑁆𑀔𑀫𑀺𑀯, 𑀲𑀼𑀔𑀼𑀫𑀭𑀽𑀧𑀁 𑀔𑀼𑀭𑀘𑀓𑁆𑀓𑀁 𑀯𑀺𑀬, 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀔𑁂𑀫𑀦𑁆𑀢𑀪𑀽𑀫𑀺 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀫𑀓𑁆𑀓𑀝𑁄 𑀯𑀺𑀬, 𑀅𑀲𑁆𑀲𑀔𑀴𑀼𑀗𑁆𑀓𑁄 𑀯𑀺𑀬, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀢𑁄 𑀯𑁂𑀳𑀸𑀲𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀯𑀺𑀬, 𑀭𑀗𑁆𑀕𑀦𑀝𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀢𑀸.

𑀧𑀘𑁆𑀘𑀬𑀸𑀦𑀁 ¶ 𑀯𑀺𑀪𑀸𑀕𑀢𑁄 𑀧𑀦𑁂𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀦 𑀫𑀦𑁄𑀥𑀸𑀢𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀥𑀫𑁆𑀫𑀥𑀸𑀢𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀲𑀫𑁆𑀧𑀬𑀼𑀢𑁆𑀢𑀦𑀺𑀲𑁆𑀲𑀬𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄𑀢𑀺 𑀅𑀬𑀁 𑀧𑀘𑁆𑀘𑀬𑀯𑀺𑀪𑀸𑀕𑁄. 𑀏𑀯𑀁 𑀯𑀺𑀜𑁆𑀜𑁂𑀬𑁆𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀏𑀢𑁆𑀣𑀸𑀬𑀁 𑀲𑀘𑁆𑀘-𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀏𑀓𑀁 𑀳𑀺 𑀲𑀘𑁆𑀘𑀁, 𑀦 𑀤𑀼𑀢𑀺𑀬𑀫𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦) 𑀧𑀭𑀫𑀢𑁆𑀣𑀲𑀘𑁆𑀘𑁂, 𑀦𑀺𑀩𑁆𑀩𑀸𑀦𑁂 𑀘𑁂𑀯 𑀫𑀕𑁆𑀕𑁂 𑀘. ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀅𑀭𑀺𑀬𑀲𑀘𑁆𑀘𑁂 𑀯𑀢𑁆𑀢𑀢𑀺. 𑀓𑁂𑀦𑀝𑁆𑀞𑁂𑀦 𑀲𑀘𑁆𑀘𑀸𑀦𑀺? 𑀢𑀣𑀝𑁆𑀞𑁂𑀦. 𑀓𑁄𑀬𑀁 𑀢𑀣𑀝𑁆𑀞𑁄 𑀦𑀸𑀫? 𑀬𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀫𑀸𑀬𑀸𑀯 𑀯𑀺𑀧𑀭𑀻𑀢𑁄, 𑀫𑀭𑀻𑀘𑀻𑀯 𑀯𑀺𑀲𑀁𑀯𑀸𑀤𑀓𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀣𑀸 𑀯𑀺𑀬 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀪𑀸𑀯𑁄 𑀘 𑀦 𑀳𑁄𑀢𑀺, 𑀅𑀣 𑀔𑁄 𑀩𑀸𑀥𑀦𑀧𑁆𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀪𑀽𑀢𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀦 𑀅𑀭𑀺𑀬𑀜𑀸𑀡𑀲𑁆𑀲 𑀕𑁄𑀘𑀭𑁄 𑀳𑁄𑀢𑀺. 𑀅𑀬𑀁 𑀢𑀣𑀝𑁆𑀞𑁄 𑀲𑀘𑁆𑀘𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀇𑀢𑀺 ¶ ¶ 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀪𑀽𑀢𑀪𑀸𑀯𑀁 𑀘𑀢𑀽𑀲𑀼𑀧𑀺;

𑀤𑀼𑀓𑁆𑀔𑀸𑀤𑀻𑀲𑁆𑀯𑀯𑀺𑀲𑁂𑀲𑁂𑀦, 𑀲𑀘𑁆𑀘𑀝𑁆𑀞𑀁 𑀆𑀳𑀼 𑀧𑀡𑁆𑀟𑀺𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁮𑁯; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪).

𑀅𑀭𑀺𑀬𑀸𑀦𑀺 𑀘 𑀢𑀸𑀦𑀺 𑀲𑀘𑁆𑀘𑀸𑀦𑀺 𑀘𑀸𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀭𑀺𑀬𑀸𑀦𑀻𑀢𑀺 𑀉𑀢𑁆𑀢𑀫𑀸𑀦𑀺, 𑀅𑀯𑀺𑀲𑀁𑀯𑀸𑀤𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺, 𑀅𑀭𑀺𑀬𑀲𑁆𑀲 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀓𑀸𑀦𑀺 𑀲𑀘𑁆𑀘𑀸𑀦𑀺 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸, 𑀧𑀓𑀸𑀲𑀺𑀢𑀢𑁆𑀢𑀸 𑀘, 𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀯𑀸 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀤𑀼-𑀇𑀢𑀺 𑀅𑀬𑀁 𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑁂 𑀤𑀺𑀲𑁆𑀲𑀢𑀺. 𑀓𑀼𑀘𑁆𑀙𑀺𑀢𑀁 𑀳𑀺 𑀧𑀼𑀢𑁆𑀢𑀁 ‘‘𑀤𑀼𑀧𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀔𑀁-𑀲𑀤𑁆𑀤𑁄 𑀧𑀦 𑀢𑀼𑀘𑁆𑀙𑁂. 𑀢𑀼𑀘𑁆𑀙𑀁 𑀳𑀺 𑀆𑀓𑀸𑀲𑀁 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀧𑀞𑀫𑀲𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀅𑀦𑁂𑀓𑁄𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑁄, 𑀢𑀼𑀘𑁆𑀙𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁄, 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀢𑁆𑀢𑀸, 𑀢𑀼𑀘𑁆𑀙𑀢𑁆𑀢𑀸 𑀘 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀁-𑀇𑀢𑀺 𑀘 𑀅𑀬𑀁 𑀲𑀤𑁆𑀤𑁄 ‘‘𑀲𑀫𑀸𑀕𑀫𑁄, 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺. 𑀉-𑀇𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀁. 𑀅𑀬-𑀲𑀤𑁆𑀤𑁄 𑀧𑀦 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀇𑀤𑀜𑁆𑀘 𑀤𑀼𑀢𑀺𑀬𑀲𑀘𑁆𑀘𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀦𑁆𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑀢𑀺𑀬𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀦𑀺-𑀲𑀤𑁆𑀤𑁄 𑀅𑀪𑀸𑀯𑀁, 𑀭𑁄𑀥-𑀲𑀤𑁆𑀤𑁄 𑀘𑀸𑀭𑀓𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀪𑀸𑀯𑁄 𑀏𑀢𑁆𑀣, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀘𑀸𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸. 𑀘𑀢𑀼𑀢𑁆𑀣𑀁 𑀧𑀦 𑀬𑀲𑁆𑀫𑀸 𑀏𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀲𑀢𑁆𑀢𑀁 𑀯𑀸 𑀢𑀁 𑀕𑀫𑀬𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀢𑁆𑀢𑀸, 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 ¶ 𑀤𑀼𑀓𑁆𑀔𑀸𑀤𑀻𑀦𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀺𑀪𑀢𑁆𑀢𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀬𑁂 𑀤𑀼𑀓𑁆𑀔𑀸𑀤𑀻𑀦𑀺 𑀅𑀪𑀺𑀲𑀫𑁂𑀦𑁆𑀢𑁂𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄 ¶ …𑀧𑁂… 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄…𑀧𑁂… 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑁆𑀯𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄…𑀧𑁂… 𑀅𑀦𑀜𑁆𑀜𑀣𑀸’’𑀢𑀺 (𑀧𑀝𑀺. 𑀫. 𑁨.𑁮).

𑀏𑀯𑀁 𑀯𑀺𑀪𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦 𑀢𑀡𑁆𑀳𑀸𑀯𑀚𑁆𑀚𑀺𑀢𑀸 𑀲𑀩𑁆𑀩𑀮𑁄𑀓𑀺𑀬𑀥𑀫𑁆𑀫𑀸, 𑀲𑀁𑀓𑀺𑀮𑁂𑀲𑀺𑀓𑀯𑀚𑁆𑀚𑀺𑀢𑀸 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫, 𑀢𑀡𑁆𑀳𑀸 𑀧𑀦 𑀲𑀩𑁆𑀩𑀸 𑀅𑀓𑀼𑀲𑀮𑀸 𑀯𑀸 𑀮𑁄𑀓𑀺𑀬𑀓𑀼𑀲𑀮𑀸 𑀯𑀸 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫, 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀁 𑀦𑀸𑀫, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀅𑀝𑁆𑀞𑀫𑀕𑁆𑀕𑀗𑁆𑀕𑀸𑀦𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫. 𑀇𑀫𑁂𑀳𑀺 𑀧𑀦 𑀫𑀕𑁆𑀕𑀗𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑁂𑀯 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑁂𑀢𑁆𑀣 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑀗𑁆𑀕𑀳𑀺𑀢𑀸𑀦𑀺𑀧𑀺. 𑀬𑀸𑀬 𑀧𑀭𑀺𑀜𑁆𑀜𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦 𑀦 𑀳𑁄𑀦𑁆𑀢𑀺, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀬𑀁 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀤𑀼𑀓𑁆𑀔𑀲𑀘𑁆𑀘𑀁 𑀢𑀸𑀯 𑁋

‘‘𑀢𑀢𑁆𑀣 ¶ 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀯𑀺𑀪. 𑁧𑁯𑁦) 𑁋

𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑀁 𑀢𑀺𑀯𑀺𑀥𑀁 𑀳𑁄𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑁆𑀢𑀺. 𑀢𑀢𑁆𑀣 𑀤𑀼𑀓𑁆𑀔𑀤𑀼𑀓𑁆𑀔𑀁 𑀤𑀼𑀯𑀺𑀥𑀁 𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺. 𑀢𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀸𑀫, 𑀢𑀤𑀯𑀲𑁂𑀲𑀸 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀸𑀫. 𑀲𑀼𑀔𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀦𑀸𑀫. 𑀲𑀩𑁆𑀩𑁂 𑀧𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀲𑀩𑁆𑀩𑀲𑀗𑁆𑀔𑀢𑀸 𑀯𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀦𑀸𑀫. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀤𑀼𑀓𑁆𑀔𑀸𑀦𑀁 𑀯𑀲𑁂𑀦 𑀬𑀣𑀸𑀬𑁄𑀕𑀁 𑀢𑀻𑀲𑀼 ¶ 𑀪𑀯𑁂𑀲𑀼 𑀚𑀸𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀪𑀯𑀲𑁆𑀫𑀺𑀁 𑀳𑀺 𑀚𑀸𑀢𑀺 𑀢𑀸𑀯 𑀲𑀬𑀁 𑀦 𑀤𑀼𑀓𑁆𑀔𑀸, 𑀅𑀧𑀸𑀬𑀕𑀢𑀺𑀫𑀦𑀼𑀲𑁆𑀲𑀕𑀢𑀺𑀆𑀤𑀻𑀲𑀼 𑀧𑀦 𑀦𑀺𑀭𑀬𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀫𑀽𑀮𑀓𑀁, 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀓𑀸𑀤𑀺𑀫𑀽𑀮𑀓𑀁, 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀤𑀺𑀫𑀽𑀮𑀓𑀜𑁆𑀘 𑀤𑀼𑀓𑁆𑀔𑀁 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑁂𑀦 𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀦𑁆𑀢𑀺. 𑀢𑀣𑀸 𑀚𑀭𑀸𑀫𑀭𑀡𑀸𑀤𑀬𑁄𑀧𑀺. 𑀓𑁂𑀯𑀮𑀁 𑀚𑀭𑀸 𑀓𑀸𑀬𑀤𑀼𑀩𑁆𑀩𑀮𑀢𑀸𑀫𑀽𑀮𑀲𑁆𑀲, 𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀪𑀯𑀫𑀽𑀮𑀲𑁆𑀲 𑀘, 𑀫𑀭𑀡𑀁 𑀧𑀦 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀸𑀪𑀽𑀢𑀲𑁆𑀲, 𑀦𑀺𑀭𑀬𑀸𑀤𑀺𑀕𑀢𑀺𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀫𑀽𑀮𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄, 𑀲𑁄𑀓𑀸𑀤𑀬𑁄 𑀲𑁄𑀓𑀸𑀤𑀺𑀫𑀽𑀮𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁆𑀢𑀸 𑀘𑁂𑀯 𑀲𑀬𑀁 𑀤𑀼𑀓𑁆𑀔𑀢𑁆𑀢𑀸 𑀘 𑀤𑀼𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀘𑁂𑀲𑀁 𑀧𑀲𑀺𑀤𑁆𑀥𑀸𑀬𑁂𑀯. 𑀏𑀯𑀁 𑀓𑀸𑀫𑀪𑀯𑁂 𑀚𑀸𑀢𑀺𑀆𑀤𑀻𑀦𑀁 𑀢𑀻𑀳𑀺𑀧𑀺 𑀤𑀼𑀓𑁆𑀔𑁂𑀳𑀺 𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀦 𑀬𑀲𑁆𑀫𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦 𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀚𑀸𑀢𑀺𑀆𑀤𑀻𑀦𑀁 ¶ 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀲𑁂𑀦 𑀘 𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀤𑀼𑀓𑁆𑀔𑀤𑀼𑀓𑁆𑀔𑀯𑀲𑁂𑀦𑀸𑀢𑀺 𑀅𑀬𑀁 𑀤𑀼𑀓𑁆𑀔𑀲𑀘𑁆𑀘𑁂 𑀦𑀬𑁄.

𑀲𑀫𑀼𑀤𑀬𑀲𑀘𑁆𑀘𑀁 𑀧𑀦 ‘‘𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸’’𑀢𑀺 (𑀯𑀺𑀪. 𑁨𑁦𑁩) 𑀢𑀢𑁆𑀢𑀓𑀫𑁂𑀯 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀪. 𑁨𑁦𑁩) 𑀧𑀼𑀘𑁆𑀙𑀺𑀢𑁆𑀯𑀸 𑀙𑀦𑁆𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀢𑀡𑁆𑀳𑀸𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀺𑀲𑀬𑀪𑀽𑀢𑀸𑀦𑀁 𑀯𑀲𑁂𑀦 𑀢𑀡𑁆𑀳𑀸𑀬 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀢𑁆𑀢𑀺𑀁 𑀧𑀓𑀸𑀲𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁.

𑀦𑀺𑀭𑁄𑀥𑀲𑀘𑁆𑀘𑀁 𑀧𑀦 ‘‘𑀢𑀲𑁆𑀲𑀸 𑀏𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 (𑀯𑀺𑀪. 𑁨𑁦𑁪) 𑀯𑀢𑁆𑀯𑀸 𑀧𑀼𑀦 ‘‘𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑁨𑁦𑁪) 𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑁂 𑀯𑀼𑀢𑁆𑀢𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀲𑁂𑀦 𑀧𑀝𑀺𑀮𑁄𑀫𑀢𑁄 𑀢𑀡𑁆𑀳𑀸𑀬 𑀦𑀺𑀭𑁄𑀥𑀁 𑀧𑀓𑀸𑀲𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺. 𑀦𑀺𑀩𑁆𑀩𑀸𑀦𑀁 𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀅𑀲𑁂𑀲𑀸 𑀯𑀺𑀭𑀚𑁆𑀚𑀢𑀺, 𑀦𑀺𑀭𑀼𑀚𑁆𑀛𑀢𑀺, 𑀘𑀚𑀻𑀬𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀢𑀺, 𑀫𑀼𑀘𑁆𑀘𑀢𑀺, 𑀦 𑀅𑀮𑁆𑀮𑀻𑀬𑀢𑀺, 𑀢𑀲𑁆𑀫𑀸 ‘‘𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀫𑁂𑀯 𑀳𑀺 𑀦𑀺𑀩𑁆𑀩𑀸𑀦𑀁, 𑀦𑀸𑀫𑀸𑀦𑀺 𑀧𑀦𑀲𑁆𑀲 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀦𑀸𑀫𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑁂𑀓𑀸𑀦𑀺 𑀳𑁄𑀦𑁆𑀢𑀺.

𑀦𑀦𑀼 𑀧𑀸𑀝𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑁂𑀦𑁂𑀯 𑀘 𑀢𑀸𑀲𑀼 𑀢𑀸𑀲𑀼 ¶ 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀤𑁂𑀲𑀦𑀸𑀲𑀼 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁧𑁪) 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀅𑀭𑀳𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀁 𑀏𑀓𑀢𑀸𑀧𑀚𑁆𑀚𑀦𑀢𑁄. 𑀅𑀭𑀳𑀢𑁆𑀢𑀫𑁆𑀧𑀺 𑀳𑀺 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁧𑁪) 𑀭𑀸𑀕𑀸𑀤𑀻𑀦𑀁 𑀧𑀭𑀺𑀓𑁆𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀉𑀧𑀘𑀸𑀭𑁂𑀦 ¶ 𑀅𑀭𑀳𑀢𑁆𑀢𑀁 𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀢𑀣𑀸 𑀭𑀸𑀕𑀸𑀤𑀻𑀦𑀁 𑀔𑀬𑀳𑁂𑀢𑀼𑀢𑁆𑀢𑀸 𑀦𑀺𑀩𑁆𑀩𑀸𑀦𑀫𑁆𑀧𑀺 𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀢𑁆𑀢𑀁 𑀆𑀧𑀚𑁆𑀚𑀢𑀺 𑀭𑀸𑀕𑀸𑀤𑀻𑀦𑀁 𑀩𑀳𑀼𑀦𑁆𑀦𑀁 𑀔𑀬𑀲𑁆𑀲𑀸𑀧𑀺 𑀩𑀳𑀼𑀢𑁆𑀢𑀸. 𑀲𑀩𑁆𑀩𑀓𑀺𑀮𑁂𑀲𑀸𑀦𑀫𑁆𑀧𑀺 𑀔𑀬𑀲𑁆𑀲 𑀏𑀓𑀢𑁆𑀢𑁂𑀦 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀆𑀤𑀻𑀦𑀁 𑀔𑀬𑁂 𑀲𑀩𑁆𑀩𑀓𑀺𑀮𑁂𑀲𑀓𑁆𑀔𑀬𑁄 𑀆𑀧𑀚𑁆𑀚𑀢𑀺, 𑀑𑀴𑀸𑀭𑀺𑀓𑀢𑁆𑀢𑀜𑁆𑀘𑀲𑁆𑀲 𑀲𑀺𑀬𑀸 𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀉𑀧𑁆𑀧𑀦𑁆𑀦𑀭𑀸𑀕𑀓𑁆𑀔𑀬𑀲𑁆𑀲 𑀧𑀸𑀓𑀝𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄, 𑀕𑁄𑀢𑁆𑀭𑀪𑀽𑀓𑁆𑀔𑀡𑁂𑀧𑀺 𑀘 𑀭𑀸𑀕𑀸𑀤𑀺𑀓𑁆𑀔𑀬𑁄 𑀳𑁄𑀢𑀺 𑀕𑁄𑀢𑁆𑀭𑀪𑀼𑀦𑁄 𑀦𑀺𑀩𑁆𑀩𑀸𑀦𑀯𑀺𑀲𑀬𑀢𑁆𑀢𑀸, 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀅𑀧𑁆𑀧𑀲𑀗𑁆𑀕𑁄. 𑀦 𑀳𑀺 𑀅𑀢𑁆𑀢𑀦𑀸 𑀔𑁂𑀧𑀺𑀬𑀫𑀸𑀦𑀓𑀺𑀮𑁂𑀲𑀓𑁆𑀔𑀬𑀫𑀸𑀭𑀩𑁆𑀪 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀪𑀸𑀯𑁄 𑀘𑀲𑁆𑀲 𑀆𑀧𑀚𑁆𑀚𑀢𑀺 𑀭𑀸𑀕𑀸𑀤𑀺𑀓𑁆𑀔𑀬𑀪𑀽𑀢𑀲𑁆𑀲 𑀧𑀦 𑀅𑀪𑀸𑀯𑀲𑁆𑀲 𑀧𑀓𑁆𑀔𑀯𑀲𑁂𑀦 𑀢𑀼𑀘𑁆𑀙𑀭𑀽𑀧𑀢𑁆𑀢𑀸, 𑀢𑀲𑁆𑀲𑀸𑀧𑀺 𑀪𑀸𑀯𑀢𑁆𑀢𑀸𑀪𑀸𑀯𑀸𑀯 𑀯𑀺𑀯𑁂𑀓𑀮𑀓𑁆𑀔𑀡𑀁 𑀦 𑀲𑀺𑀬𑀸, 𑀲𑀗𑁆𑀔𑀢𑀢𑀸 𑀘𑀲𑁆𑀲 𑀲𑀺𑀬𑀸. 𑀦 𑀳𑀺 𑀓𑀤𑀸𑀘𑀺 𑀉𑀧𑀮𑀩𑁆𑀪𑀫𑀸𑀦𑀁 𑀅𑀲𑀗𑁆𑀔𑀢𑀁 𑀪𑀯𑀺𑀢𑀼𑀫𑀭𑀳𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀅𑀳𑁂𑀢𑀼𑀓𑀢𑁆𑀢𑀸𑀧𑀢𑁆𑀢𑀺𑀢𑁄, 𑀲𑀗𑁆𑀔𑀢𑀢𑁆𑀢𑁂𑀧𑀺 𑀘𑀲𑁆𑀲 𑀦 𑀦𑀺𑀩𑁆𑀩𑀸𑀦𑀢𑁆𑀢𑀁 𑀉𑀧𑁆𑀧𑀢𑁆𑀢𑀺𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀺𑀢𑀸𑀬 𑀤𑀼𑀓𑁆𑀔𑀢𑁆𑀢𑀸, 𑀢𑀣𑀸 𑀘 𑀅𑀪𑀸𑀯𑀲𑁆𑀲𑀸𑀧𑀺 𑀅𑀪𑀸𑀯𑁄, 𑀅𑀦𑀯𑀝𑁆𑀞𑀸𑀦𑀜𑁆𑀘 𑀔𑀻𑀡𑀸𑀦𑀫𑁆𑀧𑀺 𑀭𑀸𑀕𑀸𑀤𑀻𑀦𑀁 𑀧𑀼𑀦 𑀉𑀧𑁆𑀧𑀚𑁆𑀚𑀦𑀁 𑀬𑁂𑀲𑀁 𑀢𑁂𑀲𑀫𑁂𑀯 𑀅𑀪𑀸𑀯𑁄 𑀅𑀪𑀸𑀯𑀲𑁆𑀲 𑀯𑀺𑀦𑀝𑁆𑀞𑀢𑁆𑀢𑀸.

𑀅𑀧𑀺𑀘 𑀓𑀸𑀭𑀡𑀦𑁆𑀢𑀭𑁂𑀦 𑀯𑀸 𑀪𑀸𑀯𑁂 𑀉𑀧𑁆𑀧𑀦𑁆𑀦𑁂 𑀭𑀸𑀕𑀸𑀤𑀻𑀦𑀁 𑀦 𑀓𑀸𑀘𑀺 𑀳𑀸𑀦𑀺 𑀳𑁄𑀢𑀺. 𑀦 𑀳𑀺 𑀅𑀜𑁆𑀜𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀁 𑀅𑀜𑁆𑀜𑀁 𑀯𑀺𑀕𑀘𑁆𑀙𑀢𑀺. 𑀅𑀪𑀸𑀯𑁄 𑀪𑀸𑀯𑀲𑁆𑀲 𑀯𑀺𑀭𑁄𑀥𑀺, 𑀯𑀺𑀭𑁄𑀥𑀺𑀲𑀦𑁆𑀦𑀺𑀥𑀸𑀦𑁂 𑀘 𑀇𑀢𑀭𑀁 𑀯𑀺𑀕𑀘𑁆𑀙𑀢𑀻𑀢𑀺 𑀘𑁂? 𑀓𑀺𑀫𑀺𑀤𑀁 𑀯𑀺𑀕𑀫𑀦𑀁 𑀦𑀸𑀫. 𑀬𑀤𑀺 𑀢𑀫𑁆𑀧𑀺 𑀪𑀸𑀯𑀭𑀽𑀧𑀁, 𑀲𑀫𑀸𑀦𑀤𑁄𑀲𑀢𑀸 𑀘𑀲𑁆𑀲 𑀲𑀺𑀬𑀸 𑀅𑀦𑀯𑀝𑁆𑀞𑀸𑀦𑀜𑁆𑀘, 𑀦 𑀘 𑀅𑀢𑁆𑀣𑀲𑀺𑀤𑁆𑀥𑀺. 𑀬𑀤𑀺 𑀢𑀼𑀘𑁆𑀙𑀭𑀽𑀧𑀁, 𑀓𑀺𑀁 𑀧𑀞𑀫𑀫𑁂𑀯𑀲𑁆𑀲 𑀢𑀼𑀘𑁆𑀙𑀭𑀽𑀧𑀢𑀸𑀬 𑀉𑀧𑀕𑀢𑀸𑀬 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀲𑀺𑀤𑁆𑀥𑀸, 𑀭𑀸𑀕𑀸𑀤𑀺𑀓𑁆𑀔𑀬𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀢𑀼𑀘𑁆𑀙𑀭𑀽𑀧𑀢𑀸𑀬 𑀅𑀪𑀸𑀯𑁄, 𑀦 𑀘 𑀅𑀪𑀸𑀯𑁄 𑀏𑀯 𑀦𑀺𑀩𑁆𑀩𑀸𑀦𑀁. 𑀅𑀢𑀻𑀢𑀸𑀦𑀸𑀕𑀢𑀤𑁄𑀲𑀸𑀦𑀫𑀪𑀸𑀯𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀯𑀢𑁆𑀢𑀫𑀸𑀦𑀸𑀦𑀜𑁆𑀘 ¶ 𑀅𑀪𑀸𑀯𑁄 𑀦𑀸𑀫. 𑀅𑀪𑀸𑀯𑁄 𑀦𑀸𑀫 𑀦 𑀓𑀺𑀮𑁂𑀲𑀯𑀺𑀕𑀫𑀫𑀢𑁆𑀢𑁄, 𑀅𑀧𑀺 𑀢𑀼 𑀅𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦. 𑀅𑀘𑁆𑀘𑀦𑁆𑀢𑀯𑀺𑀕𑀫𑁄 𑀦𑀺𑀩𑁆𑀩𑀸𑀦𑁂𑀦𑀸𑀧𑀺 𑀲𑀫𑁆𑀧𑀸𑀤𑀻𑀬𑀢𑀻𑀢𑀺 𑀘𑁂? 𑀦, 𑀢𑀲𑁆𑀲 𑀓𑀸𑀭𑀡𑀪𑀸𑀯𑀸. 𑀯𑀺𑀧𑀲𑁆𑀲𑀦𑀸 𑀓𑀸𑀭𑀡𑀫𑀺𑀢𑀺 𑀘𑁂? 𑀦, 𑀅𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀚𑀦𑀓𑀲𑀗𑁆𑀔𑀢𑀥𑀫𑁆𑀫𑀤𑀲𑁆𑀲𑀦𑁂𑀦 𑀯𑀺𑀦𑀸 𑀅𑀦𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀸𑀬 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀯𑀺𑀫𑀼𑀢𑁆𑀢𑀸 𑀏𑀯 𑀲𑀺𑀬𑀼𑀁, 𑀦𑁄 𑀘 𑀓𑀤𑀸𑀘𑀺 𑀦 𑀧𑀼𑀘𑁆𑀙𑁂𑀬𑁆𑀬 𑀯𑀺𑀭𑀼𑀤𑁆𑀥𑀥𑀫𑁆𑀫𑀤𑀲𑁆𑀲𑀦𑀸𑀪𑀸𑀯𑀸. 𑀦 𑀳𑀺 𑀤𑀲𑁆𑀲𑀦𑀁 𑀯𑀺𑀦𑀸 𑀯𑀺𑀓𑀧𑁆𑀧𑁄 𑀲𑀫𑁆𑀪𑀯𑀢𑀺, 𑀦 𑀘 𑀅𑀢𑁆𑀢𑀸𑀢𑀺 𑀯𑀺𑀓𑀧𑁆𑀧𑀚𑀦𑀓𑀭𑀽𑀧𑀸𑀤𑀺𑀤𑀲𑁆𑀲𑀦𑀫𑁂𑀯 𑀢𑀩𑁆𑀩𑀺𑀭𑀼𑀤𑁆𑀥𑀯𑀺𑀓𑀧𑁆𑀧𑀚𑀦𑀓𑀁 ¶ 𑀳𑁄𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀧𑀭𑀫𑁆𑀧𑀭𑁄𑀧𑀤𑁂𑀲𑁂𑀦 𑀭𑀽𑀧𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀯𑀺𑀭𑀼𑀤𑁆𑀥𑀤𑀲𑁆𑀲𑀦𑀸𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑀸𑀦𑀼𑀧𑁆𑀧𑀢𑁆𑀢𑀺𑀢𑁄. 𑀦 𑀳𑀺 𑀬𑀸𑀤𑀺𑀲𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀬𑀸𑀤𑀺𑀲𑀁 𑀓𑀸𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀸𑀬 𑀏𑀯 𑀢𑀩𑁆𑀩𑀺𑀭𑀼𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺 𑀅𑀳𑁂𑀢𑀼𑀓𑀢𑁆𑀢𑀧𑁆𑀧𑀲𑀗𑁆𑀕𑀢𑁄. 𑀦 𑀘 𑀯𑀺𑀭𑀼𑀤𑁆𑀥𑀤𑀲𑁆𑀲𑀦𑀸𑀪𑀸𑀯𑁂𑀦 𑀏𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑀚𑀦𑀓𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑀢𑁄 𑀢𑀸𑀤𑀺𑀲𑀸𑀦𑀁 𑀧𑀭𑀫𑁆𑀧𑀭𑀸𑀬𑀧𑀺 𑀢𑀩𑁆𑀪𑀸𑀯𑁄, 𑀢𑀤𑀼𑀧𑀤𑁂𑀲𑁄 𑀘 𑀲𑀫𑁆𑀪𑀯𑀢𑀺. 𑀢𑀺𑀮𑀓𑁆𑀔𑀡𑀽𑀧𑀤𑁂𑀲𑀦𑀸𑀦𑀦𑁆𑀢𑀭𑀺𑀓𑀢𑀸𑀬 𑀧𑀦 𑀩𑀼𑀤𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 𑀲𑀺𑀤𑁆𑀥𑀺, 𑀢𑁂𑀦𑁂𑀯𑀲𑁆𑀲 𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀲𑁆𑀲, 𑀯𑀺𑀧𑀲𑁆𑀲𑀦𑁄𑀧𑀤𑁂𑀲𑀲𑀸𑀫𑀢𑁆𑀣𑀺𑀬𑀲𑁆𑀲 𑀘 𑀲𑀺𑀤𑁆𑀥𑀻𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀢𑀤𑀼𑀪𑀬𑀓𑀸𑀭𑀡𑀁, 𑀦𑀸𑀜𑁆𑀜𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑁂𑀦 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁, 𑀢𑀺𑀮𑀓𑁆𑀔𑀡𑀜𑁆𑀘 𑀳𑁄𑀢𑀺. 𑀦 𑀳𑀺 𑀅𑀜𑁆𑀜𑀲𑁆𑀲 𑀤𑀲𑁆𑀲𑀦𑁂𑀦 𑀇𑀢𑀭𑀭𑀸𑀕𑀧𑁆𑀧𑀳𑀸𑀦𑀁, 𑀢𑀺𑀮𑀓𑁆𑀔𑀡𑀜𑀸𑀡𑀜𑁆𑀘 𑀬𑀼𑀢𑁆𑀢𑀦𑁆𑀢𑀺? 𑀦, 𑀅𑀲𑀗𑁆𑀔𑀢𑀤𑀲𑁆𑀲𑀦𑁂𑀦 𑀲𑀗𑁆𑀔𑀢𑀲𑁆𑀲 𑀯𑀸 𑀤𑁄𑀲𑀲𑁆𑀲 𑀯𑀸 𑀧𑀸𑀓𑀝𑀢𑁆𑀢𑀸. 𑀤𑀺𑀝𑁆𑀞𑀅𑀘𑁆𑀘𑀦𑁆𑀢𑀲𑀼𑀔𑀸𑀦𑀁 𑀳𑀺 𑀯𑀝𑁆𑀝𑀲𑀼𑀔𑁂, 𑀢𑀦𑁆𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀤𑀻𑀲𑀼 𑀘 𑀲𑀼𑀔𑀸𑀪𑀺𑀫𑀸𑀦𑁄, 𑀯𑀝𑁆𑀝𑀸𑀪𑀺𑀭𑀢𑀺 𑀘 𑀧𑀳𑀻𑀬𑀢𑀺 𑀤𑀺𑀝𑁆𑀞𑀧𑀭𑀢𑀻𑀭𑀲𑁆𑀲 𑀦𑀸𑀯𑀺𑀓𑀲𑁆𑀲 𑀦𑀸𑀯𑀸𑀬𑁂𑀓𑀤𑁂𑀲𑁂 𑀲𑀼𑀔𑀸𑀪𑀺𑀫𑀸𑀦𑀸𑀪𑀺𑀭𑀢𑀺𑀬𑁄 𑀯𑀺𑀬. 𑀅𑀧𑀺𑀘 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀅𑀮𑁆𑀮𑀺𑀦𑀸 𑀭𑀸𑀕𑀸𑀤𑀬𑁄 𑀅𑀲𑀗𑁆𑀔𑀢𑀥𑀫𑁆𑀫𑁂 𑀲𑀡𑁆𑀞𑀸𑀢𑀼𑀁 𑀦 ¶ 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀯𑀺𑀬 𑀫𑀓𑁆𑀔𑀺𑀓𑀸, 𑀣𑀮𑁂 𑀯𑀺𑀬 𑀘 𑀚𑀮𑀘𑀭𑀸, 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑁂𑀦 𑀧𑀳𑀻𑀦𑀤𑁄𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀬𑀸𑀣𑀸𑀯𑀢𑁄 𑀢𑁂𑀲𑀼 𑀲𑀗𑁆𑀔𑀢𑁂𑀲𑀼 𑀢𑀺𑀮𑀓𑁆𑀔𑀡𑀤𑀲𑁆𑀲𑀦𑀁 𑀲𑀫𑁆𑀪𑀯𑀢𑀺 𑀪𑁂𑀲𑀚𑁆𑀚𑀸𑀮𑁂𑀧𑁂𑀦 𑀯𑀺𑀳𑀢𑀓𑀸𑀘𑀢𑀺𑀫𑀺𑀭𑀸𑀤𑀺𑀤𑁄𑀲𑀲𑁆𑀲 𑀘𑀓𑁆𑀔𑀼𑀦𑁄 𑀖𑀝𑀸𑀤𑀺𑀭𑀽𑀧𑀤𑀲𑁆𑀲𑀦𑀁 𑀯𑀺𑀬, 𑀤𑀺𑀝𑁆𑀞𑀤𑁄𑀲𑁂𑀲𑀼 𑀘𑀲𑁆𑀲 𑀲𑀗𑁆𑀔𑀸𑀭𑁂𑀲𑀼 𑀦 𑀧𑀼𑀦 𑀭𑀸𑀕𑀸𑀤𑀻𑀦𑀫𑀼𑀧𑁆𑀧𑀢𑁆𑀢𑀺 𑀜𑀸𑀢𑀸 𑀲𑀼𑀘𑀺𑀪𑀸𑀯𑁂 𑀯𑀺𑀬 𑀯𑀘𑁆𑀘𑀓𑀽𑀧𑁂𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀓𑁂𑀲𑀜𑁆𑀘𑀺 𑀲𑀢𑁆𑀢𑀸𑀦𑀁 𑀏𑀯 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀪𑀯𑁄, 𑀦 𑀲𑀩𑁆𑀩𑁂𑀲𑀦𑁆𑀢𑀺? 𑀅𑀦𑀸𑀤𑀺𑀩𑀼𑀤𑁆𑀥𑀧𑀭𑀫𑁆𑀧𑀭𑁄𑀧𑀤𑁂𑀲𑀲𑀸𑀧𑁂𑀓𑁆𑀔𑀢𑁆𑀢𑀸, 𑀢𑁂𑀲𑀜𑁆𑀘 𑀉𑀧𑀤𑁂𑀲𑀓𑀸𑀦𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀅𑀪𑀸𑀯𑀢𑁄, 𑀲𑁄𑀢𑀽𑀦𑀜𑁆𑀘 𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑀤𑀼𑀮𑁆𑀮𑀪𑀢𑁆𑀢𑀸, 𑀘𑀓𑁆𑀓𑀯𑀸𑀴𑀸𑀦𑀜𑁆𑀘 𑀅𑀦𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀓𑁂𑀘𑀺 𑀏𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂 𑀢𑀺𑀮𑀓𑁆𑀔𑀡𑁄𑀧𑀤𑁂𑀲𑀮𑀸𑀪𑁂𑀦 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀦 𑀲𑀩𑁆𑀩𑁂𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀣𑀁 𑀧𑀦𑁂𑀢𑁆𑀣 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀯𑀺𑀕𑀫𑁄 𑀦𑀺𑀩𑁆𑀩𑀸𑀦𑁂𑀦 𑀲𑀸𑀥𑀻𑀬𑀢𑀻𑀢𑀺? 𑀦 𑀢𑀸𑀯 𑀲𑁄, 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀢𑁂𑀲𑀫𑀺𑀤𑀸𑀦𑀺 𑀅𑀪𑀸𑀯𑀸, 𑀧𑀼𑀩𑁆𑀩𑁂 𑀘 𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀢𑁆𑀢𑀫𑀸𑀦𑀸𑀦𑀁 𑀲𑀭𑀲𑀦𑀺𑀭𑁄𑀥𑀢𑁄. 𑀓𑀣𑀜𑁆𑀘𑀲𑁆𑀲 𑀢𑀼𑀘𑁆𑀙𑀭𑀽𑀧𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀳𑁂𑀢𑀼𑀢𑁆𑀢𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀫𑀯𑀲𑀭𑁄𑀢𑀺 𑀘𑁂? 𑀦, 𑀢𑀲𑁆𑀲 𑀪𑀸𑀯𑀭𑀽𑀧𑀢𑁆𑀢𑀸. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸 𑀳𑀺 𑀦𑀺𑀩𑁆𑀩𑀸𑀦𑀫𑀸𑀭𑀩𑁆𑀪 𑀅𑀦𑀼𑀲𑀬𑀸𑀚𑀦𑀦𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀫𑀕𑁆𑀕𑀸 𑀏𑀯 ¶ 𑀓𑀺𑀮𑁂𑀲𑀸𑀦𑀫𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀅𑀕𑁆𑀕𑀺𑀲𑀦𑁆𑀦𑀺𑀥𑀸𑀦𑁂 𑀅𑀗𑁆𑀓𑀼𑀭𑀸𑀚𑀦𑀓𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀲𑀸𑀮𑀺𑀓𑁆𑀔𑀦𑁆𑀥𑀲𑁆𑀲 𑀩𑀻𑀚𑀢𑀸𑀪𑀸𑀯𑀭𑀽𑀧𑀢𑀸 𑀯𑀺𑀬. 𑀦 𑀳𑀺 𑀅𑀪𑀸𑀯𑁄 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑁄 𑀓𑀸𑀭𑀡𑁂𑀦 𑀚𑀦𑀻𑀬𑀢𑀺 𑀢𑀩𑁆𑀩𑀺𑀭𑀼𑀤𑁆𑀥𑀓𑁆𑀔𑀡𑀼𑀧𑁆𑀧𑀸𑀤𑀦𑀪𑀸𑀯𑁄𑀯𑀼𑀧𑁆𑀧𑀸𑀤𑀦𑀁 𑀅𑀦𑁂𑀓𑀓𑁆𑀔𑀡𑀼𑀧𑁆𑀧𑀸𑀤𑀦𑁂𑀦 𑀔𑀦𑁆𑀥𑀓𑀸𑀭𑀸𑀪𑀸𑀯𑀼𑀧𑁆𑀧𑀸𑀤𑀦𑀁 𑀯𑀺𑀬, 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀉𑀧𑀦𑀺𑀲𑁆𑀲𑀬𑁄𑀧𑀘𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 ‘‘𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀲𑀭𑀽𑀧𑁂𑀦𑁂𑀯 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀪𑀺𑀲𑀼𑀔𑀼𑀫𑀢𑁆𑀢𑀸, 𑀅𑀦𑀼𑀧𑀮𑀤𑁆𑀥𑀧𑀼𑀩𑁆𑀩𑀢𑁆𑀢𑀸 𑀘, 𑀲𑀼𑀔𑀼𑀫𑀢𑀸 𑀘𑀲𑁆𑀲 𑀪𑀕𑀯𑀢𑁄 ¶ 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀯𑀘𑀦𑀢𑁄, 𑀅𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀧𑀦 𑀧𑀭𑀯𑀸𑀤𑀻 𑀆𑀳 𑁋 ‘‘𑀦𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄’’𑀢𑀺. 𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀁 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀉𑀧𑀮𑀩𑁆𑀪𑀢𑀺 𑀳𑀺 𑀢𑀁 𑀢𑀤𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑁂𑀳𑀺. 𑀅𑀧𑀺𑀘 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀥𑀫𑁆𑀫𑀸𑀦𑀁 𑀪𑀸𑀯𑁂𑀦 𑀅𑀧𑀯𑀕𑁆𑀕𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀦 𑀘 𑀢𑀁 𑀬𑀼𑀢𑁆𑀢𑀁 𑀉𑀡𑁆𑀳𑀸𑀤𑀺𑀧𑀝𑀺𑀧𑀓𑁆𑀔𑀲𑁆𑀲 𑀲𑀻𑀢𑀸𑀤𑀺𑀦𑁄 𑀯𑀺𑀬 𑀪𑀯𑀧𑀝𑀺𑀧𑀓𑁆𑀔𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀅𑀯𑀲𑁆𑀲𑀁𑀪𑀸𑀯𑀸. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀓’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁧) 𑁋

𑀆𑀤𑀺. 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀳𑁂𑀢𑀼𑀦𑁄 𑀯𑀺𑀧𑀲𑁆𑀲𑀦𑁄𑀧𑀤𑁂𑀲𑀲𑁆𑀲 𑀤𑀲𑁆𑀲𑀦𑀢𑁄 𑀘 𑀅𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁 𑀢𑀁 𑀯𑀺𑀦𑀸 𑀢𑀲𑁆𑀲𑀸𑀲𑀫𑁆𑀪𑀯𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀤𑁂𑀢𑀁 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀅𑀧𑁆𑀧𑀪𑀯𑀁, 𑀢𑀢𑁄𑀯 𑀅𑀚𑀭𑀸𑀫𑀭𑀡𑀁, 𑀦𑀺𑀘𑁆𑀘𑀜𑁆𑀘 𑀳𑁄𑀢𑀻𑀢𑀺 𑀅𑀡𑀼𑀆𑀤𑀻𑀦𑀫𑁆𑀧𑀺 𑀦𑀺𑀘𑁆𑀘𑀪𑀸𑀯𑀧𑀢𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀺𑀘𑁆𑀘𑀢𑁆𑀢𑀸𑀢𑀺 𑀘𑁂? 𑀦, 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑁆𑀢𑁂𑀦 𑀳𑁂𑀢𑀼𑀮𑀓𑁆𑀔𑀡𑀲𑁆𑀲𑀸𑀦𑀼𑀧𑀧𑀢𑁆𑀢𑀺𑀢𑁄. 𑀅𑀡𑀼𑀆𑀤𑀻𑀦𑀫𑁆𑀧𑀺 𑀅𑀲𑀗𑁆𑀔𑀢𑀢𑀸 𑀇𑀢𑀺 𑀘𑁂? 𑀦, 𑀅𑀲𑀗𑁆𑀔𑀢𑀢𑀸𑀲𑀺𑀤𑁆𑀥𑀺𑀢𑁄 𑀅𑀲𑀗𑁆𑀔𑀢𑀸𑀦𑀜𑁆𑀘𑀸𑀦𑁂𑀓𑀢𑁆𑀢𑀸𑀦𑀼𑀧𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀅𑀲𑀗𑁆𑀔𑀢𑀁 𑀦𑀸𑀫 𑀪𑀯𑁂𑀬𑁆𑀬, 𑀏𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀤𑁂𑀲𑀓𑀸𑀮𑀲𑀪𑀸𑀯𑀪𑁂𑀤𑀲𑁆𑀲 𑀓𑀸𑀭𑀡𑀪𑁂𑀤𑀓𑀢𑁆𑀢𑀸, 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀅𑀳𑁂𑀢𑀼𑀓𑀢𑁆𑀢𑁂 𑀅𑀢𑀺𑀧𑁆𑀧𑀲𑀗𑁆𑀕𑀢𑁄.

𑀲𑀗𑁆𑀔𑀢𑁂𑀳𑀺 𑀲𑀪𑀸𑀯𑀪𑀺𑀦𑁆𑀦𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀓𑀣𑀁 𑀅𑀳𑁂𑀢𑀼𑀓𑀢𑀸𑀢𑀺 𑀘𑁂? 𑀅𑀲𑀗𑁆𑀔𑀢𑀲𑀪𑀸𑀯𑁂𑀦 𑀲𑀗𑁆𑀔𑀢𑀲𑀪𑀸𑀯𑁂𑀳𑀺 𑀪𑀺𑀦𑁆𑀦𑀲𑁆𑀲 𑀓𑀸𑀭𑀡𑀸𑀦𑀧𑁂𑀓𑁆𑀔𑀢𑁆𑀢𑀸. 𑀅𑀲𑀗𑁆𑀔𑀢𑀢𑁆𑀢𑁂 𑀳𑀺 𑀲𑀫𑀸𑀦𑁂 𑀪𑀯𑀲𑀪𑀸𑀯𑀪𑁂𑀤𑁄 ¶ 𑀓𑀸𑀭𑀡𑀪𑁂𑀤𑀁 𑀲𑀽𑀘𑀬𑀢𑀺 ¶ , 𑀢𑀲𑁆𑀫𑀸 𑀏𑀓𑀫𑁂𑀯 𑀦𑀺𑀘𑁆𑀘𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀢𑁄, 𑀲𑀩𑁆𑀩𑀜𑁆𑀜𑀼𑀯𑀘𑀦𑀢𑁄 𑀘 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀇𑀢𑀺𑀯𑀼. 𑁪𑁩). 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀘𑁆𑀘𑁂 𑀦𑀬𑁄.

𑀇𑀢𑀭𑀁 𑀧𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁. 𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀢𑀢𑁆𑀣 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀅𑀯𑀲𑁂𑀲𑀸 𑀲𑀸𑀲𑀯𑀥𑀫𑁆𑀫𑀸…𑀧𑁂… 𑀤𑀼𑀓𑁆𑀔𑀁. 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 (𑀯𑀺𑀪. 𑁨𑁦𑁬) 𑁋

𑀯𑀢𑁆𑀯𑀸 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 ‘‘𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀯𑀺𑀪. 𑁨𑁦𑁬 𑀆𑀤𑀬𑁄) 𑀏𑀯𑀁 𑀧𑀞𑀫𑀯𑀸𑀭𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀼𑀦 𑀅𑀧𑀭𑁂𑀳𑀺𑀧𑀺 ‘‘𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀲𑀯𑀸𑀦𑀺 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀓𑀼𑀲𑀮𑀥𑀫𑁆𑀫𑀸 𑀲𑀫𑀼𑀤𑀬𑁄. 𑀅𑀯𑀲𑁂𑀲𑀸 𑀲𑀸𑀲𑀯𑀥𑀫𑁆𑀫𑀸 𑀤𑀼𑀓𑁆𑀔𑀁, 𑀢𑀲𑁆𑀲 𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀁 𑀦𑀺𑀭𑁄𑀥𑁄, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀧𑀝𑀺𑀧𑀤𑀸’’𑀢𑀺 ¶ 𑀇𑀫𑁂𑀳𑀺 𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀦𑀺𑀧𑁆𑀧𑀤𑁂𑀲𑀢𑁄 𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀲𑀘𑁆𑀘𑁂𑀲𑀼 𑀳𑀺 𑀢𑀡𑁆𑀳𑀸𑀯 𑀲𑀫𑀼𑀤𑀬𑁄, 𑀦 𑀇𑀢𑀭𑁂. 𑀦 𑀘 𑀓𑁂𑀯𑀮𑀁 𑀢𑀡𑁆𑀳𑀸𑀯 𑀤𑀼𑀓𑁆𑀔𑀁 𑀲𑀫𑀼𑀤𑀸𑀦𑁂𑀢𑀺, 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀧𑀺 𑀧𑀘𑁆𑀘𑀬𑀁 𑀲𑀫𑀼𑀤𑀸𑀦𑁂𑀦𑁆𑀢𑀺𑀬𑁂𑀯𑀸𑀢𑀺 𑀢𑁂𑀧𑀺 𑀲𑀫𑀼𑀤𑀬𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀸𑀦𑀺’’𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀬𑀲𑁆𑀫𑀸 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀯 𑀧𑀝𑀺𑀧𑀤𑀸𑀢𑀺. 𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀨𑀲𑁆𑀲𑀸𑀤𑀬𑁄 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀧𑀝𑀺𑀧𑀤𑀸 𑀏𑀯, 𑀢𑀲𑁆𑀫𑀸 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁂𑀧𑀺 𑀲𑀩𑁆𑀩𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 ¶ . 𑀏𑀢𑁆𑀣 𑀳𑀺 𑀅𑀭𑀺𑀬𑀥𑀦𑀸𑀦𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀲𑁂𑀲𑀁 𑀲𑀤𑀺𑀲𑀫𑁂𑀯𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸? 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀢𑀺𑀥𑀸𑀧𑀺. 𑀲𑀫𑀼𑀤𑀬𑁄 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄, 𑀦𑀺𑀭𑁄𑀥𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄, 𑀫𑀕𑁆𑀕𑁄 𑀢𑀺𑀥𑀸𑀧𑀺, 𑀤𑀼𑀓𑁆𑀔𑀁 𑀢𑀺𑀥𑀸𑀧𑀺, 𑀦 𑀯𑀢𑁆𑀢𑀩𑁆𑀩𑀁 𑀘. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑀺, 𑀤𑀼𑀓𑁆𑀔𑀁 𑀢𑀺𑀥𑀸𑀧𑀺. 𑀲𑀫𑀼𑀤𑀬𑁄 𑀳𑁂𑀢𑀼, 𑀦𑀺𑀭𑁄𑀥𑁄 𑀦 𑀳𑁂𑀢𑀼, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀮𑁄𑀓𑀺𑀬𑀸𑀦𑀺, 𑀫𑀕𑁆𑀕𑀦𑀺𑀭𑁄𑀥𑀸 𑀮𑁄𑀓𑀼𑀢𑁆𑀢𑀭𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀭𑀡𑀁, 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀅𑀭𑀡𑀸𑀦𑀺, 𑀤𑀼𑀓𑁆𑀔𑀁 𑀤𑀼𑀯𑀺𑀥𑀸𑀧𑀺. 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄. 𑀇𑀤𑀸𑀦𑀺 𑀧𑀦𑁂𑀢𑁆𑀣 𑁋

𑀓𑀫𑀢𑁄𑀦𑀽𑀦𑀸𑀥𑀺𑀓𑀢𑁄, 𑀮𑀓𑁆𑀔𑀡𑀸𑀤𑀻𑀳𑀺 𑀲𑀼𑀜𑁆𑀜𑀢𑁄;

𑀜𑀸𑀡𑀓𑀺𑀘𑁆𑀘𑁄𑀧𑀫𑀸 𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀏𑀢𑁆𑀣 𑀑𑀴𑀸𑀭𑀺𑀓𑀢𑁆𑀢𑀸, 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀧𑀞𑀫𑀁 𑀯𑀼𑀢𑁆𑀢𑀁, 𑀢𑀢𑁄 𑀢𑀲𑁆𑀲𑁂𑀯 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀢𑁄 ‘‘𑀳𑁂𑀢𑀼𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺 𑀜𑀸𑀧𑀦𑀢𑁆𑀣𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀢𑀤𑀥𑀺𑀕𑀫𑀼𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀫𑀕𑁆𑀕𑀲𑀘𑁆𑀘𑀁. 𑀪𑀯𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀧𑀞𑀫𑀁 𑀤𑀼𑀓𑁆𑀔𑀫𑀸𑀳, 𑀢𑀢𑁄 ‘‘𑀪𑀯𑀁 ¶ 𑀦𑁂𑀯 𑀅𑀳𑁂𑀢𑀼𑀓𑀁 𑀆𑀕𑀘𑁆𑀙𑀢𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀦𑀸 𑀳𑁄𑀢𑀺, 𑀇𑀢𑁄 𑀧𑀦 𑀳𑁄𑀢𑀻’’𑀢𑀺 𑀜𑀸𑀧𑀦𑀢𑁆𑀣𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀢𑁄 𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀦𑀁 𑀢𑀦𑁆𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀦𑀺𑀭𑁄𑀥𑀁, 𑀢𑀢𑁄 𑀦𑀺𑀭𑁄𑀥𑀲𑀫𑁆𑀧𑀸𑀧𑀓𑀁 𑀫𑀕𑁆𑀕𑀦𑁆𑀢𑀺 𑀅𑀬𑀫𑁂𑀢𑁆𑀣 𑀓𑀫𑁄.

𑀅𑀦𑀽𑀦𑀸𑀥𑀺𑀓𑀢𑁄 𑀧𑀦 𑀓𑀲𑁆𑀫𑀸 𑀘𑀢𑁆𑀢𑀸𑀭𑀺 𑀏𑀯 𑀲𑀘𑁆𑀘𑀸𑀦𑀻𑀢𑀺 𑀘𑁂? 𑀢𑀢𑁄 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀅𑀜𑁆𑀜𑀢𑀭𑀲𑁆𑀲 𑀘 𑀅𑀦𑀧𑀦𑁂𑀬𑁆𑀬𑀢𑁄. 𑀅𑀧𑀺𑀘 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀦𑁆𑀢𑁄 𑀪𑀕𑀯𑀸 𑀲𑀳𑁂𑀢𑀼𑀓𑀁 𑀆𑀘𑀺𑀓𑁆𑀔𑀢𑀺, 𑀦𑀺𑀯𑀢𑁆𑀢𑀺𑀜𑁆𑀘 𑀲𑀉𑀧𑀸𑀬𑀁. 𑀇𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀽𑀦𑀁 𑀏𑀢𑀧𑀭𑀫𑀢𑁄 𑀘𑀢𑁆𑀢𑀸𑀭𑀺 𑀏𑀯 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀢𑁆𑀣𑀸𑀦𑀽𑀦𑀸𑀥𑀺𑀓𑀢𑁄.

𑀮𑀓𑁆𑀔𑀡𑀸𑀤𑀻𑀳𑀺 𑀧𑀦𑁂𑀢𑁆𑀣 𑀮𑀓𑁆𑀔𑀡𑀢𑁄 𑀩𑀸𑀥𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀦𑁆𑀢𑀸𑀧𑀦𑀭𑀲𑀁, 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀮𑀓𑁆𑀔𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀁, 𑀧𑀮𑀺𑀩𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀦𑁆𑀢𑀺𑀮𑀓𑁆𑀔𑀡𑀁 ¶ 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀺𑀮𑁂𑀲𑀧𑀳𑀸𑀦𑀓𑀭𑀡𑀭𑀲𑀁, 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀧𑀺𑀘 𑀧𑀯𑀢𑁆𑀢𑀺𑀧𑀯𑀢𑁆𑀢𑀓𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀓𑀮𑀓𑁆𑀔𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸, 𑀢𑀣𑀸 𑀲𑀗𑁆𑀔𑀢𑀢𑀡𑁆𑀳𑀸𑀅𑀲𑀗𑁆𑀔𑀢𑀤𑀲𑁆𑀲𑀦𑀮𑀓𑁆𑀔𑀡𑀸𑀦𑀺 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀮𑀓𑁆𑀔𑀡𑀸𑀦𑀺.

𑀲𑀼𑀜𑁆𑀜𑀢𑁄 𑀧𑀦𑁂𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀯𑁂𑀤𑀓𑀓𑀸𑀭𑀓𑀦𑀺𑀩𑁆𑀩𑀼𑀢𑀕𑀫𑀓𑀸𑀪𑀸𑀯𑀢𑁄 𑀲𑀼𑀜𑁆𑀜𑀸𑀦𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀤𑀼𑀓𑁆𑀔𑀫𑁂𑀯 𑀳𑀺, 𑀦 𑀓𑁄𑀘𑀺 𑀤𑀼𑀓𑁆𑀔𑀺𑀢𑁄,

𑀓𑀸𑀭𑀓𑁄 𑀦, 𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀺;

𑀅𑀢𑁆𑀣𑀺 𑀦𑀺𑀩𑁆𑀩𑀼𑀢𑀺, 𑀦 𑀦𑀺𑀩𑁆𑀩𑀼𑀢𑁄 𑀧𑀼𑀫𑀸,

𑀫𑀕𑁆𑀕𑀫𑀢𑁆𑀣𑀺, 𑀕𑀫𑀓𑁄 𑀦 𑀯𑀺𑀚𑁆𑀚𑀢𑀻’’𑀢𑀺. (𑀯𑀺𑀪. 𑀅𑀝𑁆𑀞. 𑁧𑁮𑁯);

𑀅𑀣 ¶ 𑀯𑀸 𑁋

𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀲𑀼𑀜𑁆𑀜𑀁,

𑀧𑀼𑀭𑀺𑀫𑀤𑁆𑀯𑀬𑀫𑀢𑁆𑀢𑀲𑀼𑀜𑁆𑀜𑀫𑀫𑀢𑀧𑀤𑀁;

𑀥𑀼𑀯𑀲𑀼𑀪𑀲𑀼𑀔𑀅𑀢𑁆𑀢𑀯𑀺𑀭𑀳𑀺𑀢𑁄,

𑀫𑀕𑁆𑀕𑁄 𑀇𑀢𑀺 𑀲𑀼𑀜𑁆𑀜𑀢𑁄 𑀢𑁂𑀲𑀼. (𑀯𑀺𑀪. 𑀅𑀝𑁆𑀞. 𑁧𑁮𑁯);

𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 𑀯𑀸 𑀢𑀻𑀡𑀺. 𑀦𑀺𑀭𑁄𑀥𑁄 𑀘 𑀲𑁂𑀲𑀢𑁆𑀢𑀬𑀲𑀼𑀜𑁆𑀜𑁄. 𑀨𑀮𑀲𑀼𑀜𑁆𑀜𑁄 𑀯𑀸 𑀳𑁂𑀢𑁆𑀣 𑀳𑁂𑀢𑀼 𑀲𑀫𑀼𑀤𑀬𑀫𑀕𑁆𑀕𑁂𑀲𑀼 𑀤𑀼𑀓𑁆𑀔𑀦𑀺𑀭𑁄𑀥𑀸𑀦𑀁 𑀅𑀪𑀸𑀯𑀸 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬. 𑀳𑁂𑀢𑀼𑀲𑀼𑀜𑁆𑀜𑀜𑁆𑀘 𑀨𑀮𑀁 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁, 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸, 𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮𑀁. 𑀳𑁂𑀢𑀼𑀨𑀮𑀲𑀫𑀯𑀸𑀬𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀸𑀤𑀻𑀦𑀺 𑀯𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀲𑀼𑀜𑁆𑀜𑀢𑀸.

𑀜𑀸𑀡𑀓𑀺𑀘𑁆𑀘𑀢𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀲𑀘𑁆𑀘𑀜𑀸𑀡𑀁 𑀅𑀦𑀼𑀩𑁄𑀥𑀜𑀸𑀡𑀁, 𑀧𑀝𑀺𑀯𑁂𑀥𑀜𑀸𑀡𑀜𑁆𑀘. 𑀢𑀢𑁆𑀣 𑀅𑀦𑀼𑀩𑁄𑀥𑀜𑀸𑀡𑀁 𑀮𑁄𑀓𑀺𑀬𑀁, 𑀢𑀁 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀦𑀺𑀭𑁄𑀥𑁂, 𑀫𑀕𑁆𑀕𑁂 𑀘 𑀧𑀯𑀢𑁆𑀢𑀢𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀢𑀁 𑀲𑀘𑁆𑀘𑀸𑀯𑀩𑁄𑀥𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑀁 𑀦𑀺𑀭𑁄𑀥𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀢𑁄 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀬𑀁 𑀧𑀦𑁂𑀢𑀁 𑀮𑁄𑀓𑀺𑀬𑀁, 𑀢𑀢𑁆𑀣 𑀤𑀼𑀓𑁆𑀔𑀜𑀸𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺, 𑀲𑀫𑀼𑀤𑀬𑀜𑀸𑀡𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁, 𑀫𑀕𑁆𑀕𑀜𑀸𑀡𑀁 ¶ 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁. 𑀤𑀼𑀓𑁆𑀔𑀜𑀸𑀡𑀁 𑀯𑀸 𑀢𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀭𑀳𑀺𑀢𑁂𑀲𑀼 𑀔𑀦𑁆𑀥𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀜𑁆𑀜𑀸𑀲𑀗𑁆𑀔𑀸𑀢𑀁 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀲𑀫𑀼𑀤𑀬𑀜𑀸𑀡𑀁 ‘‘𑀇𑀲𑁆𑀲𑀭𑀧𑀥𑀸𑀦𑀓𑀸𑀮𑀲𑀪𑀸𑀯𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀻’’𑀢𑀺 𑀅𑀓𑀸𑀭𑀡𑁂 𑀓𑀸𑀭𑀡𑀸𑀪𑀺𑀫𑀸𑀦𑀧𑁆𑀧𑀯𑀢𑁆𑀢𑀁 𑀳𑁂𑀢𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀅𑀭𑀽𑀧𑀮𑁄𑀓𑀸𑀤𑀻𑀲𑀼 𑀅𑀧𑀯𑀕𑁆𑀕𑀕𑁆𑀕𑀸𑀳𑀪𑀽𑀢𑀁 𑀦𑀺𑀭𑁄𑀥𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀫𑀕𑁆𑀕𑀜𑀸𑀡𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑁂 𑀅𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀕𑁆𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀁 𑀉𑀧𑀸𑀬𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀇𑀤𑀫𑁂𑀢𑁆𑀣 𑀜𑀸𑀡𑀓𑀺𑀘𑁆𑀘𑀁.

𑀉𑀧𑀫𑀸𑀢𑁄 ¶ 𑀧𑀦𑁂𑀢𑁆𑀣 𑀪𑀸𑀭𑁄 𑀯𑀺𑀬 𑀳𑀺 𑀤𑀼𑀓𑁆𑀔𑀲𑀘𑁆𑀘𑀁 𑀤𑀝𑁆𑀞𑀩𑁆𑀩𑀁, 𑀪𑀸𑀭𑀸𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀼𑀧𑀸𑀬𑁄 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁. 𑀅𑀧𑀺𑀘 𑀭𑁄𑀕𑀢𑀦𑁆𑀦𑀺𑀤𑀸𑀦𑀢𑀤𑀼𑀧𑀲𑀫𑀪𑁂𑀲𑀚𑁆𑀚𑁂𑀳𑀺, 𑀑𑀭𑀺𑀫𑀢𑀻𑀭𑀫𑀳𑁄𑀖𑀧𑀸𑀭𑀺𑀫𑀢𑀻𑀭𑀢𑀁𑀲𑀫𑁆𑀧𑀸𑀧𑀓𑁄𑀧𑀸𑀬𑁂𑀳𑀺 𑀘𑀸𑀢𑀺 𑀏𑀯𑀫𑀸𑀤𑀻𑀳𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑁆𑀯𑀸𑀧𑀺 𑀏𑀢𑀸𑀦𑀺 𑀉𑀧𑀫𑀸𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀫𑁂𑀢𑁆𑀣 𑀉𑀧𑀫𑀸. 𑀏𑀯𑀁 𑀜𑁂𑀬𑁆𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀤𑁆𑀯𑀸𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀏𑀢𑁆𑀣 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑁄 𑀧𑀦𑁂𑀲 𑀇𑀦𑁆𑀤𑁆𑀭𑀺𑀬𑀝𑁆𑀞𑁄 𑀦𑀸𑀫𑀸𑀢𑀺? 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄, 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁄, 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁄, 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁄, 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁄 𑀘, 𑀲𑁄 𑀲𑀩𑁆𑀩𑁄𑀧𑀺 𑀇𑀥 𑀬𑀣𑀸𑀬𑁄𑀕𑀁 𑀬𑀼𑀚𑁆𑀚𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀇𑀦𑁆𑀤𑁄 𑀦𑀸𑀫 𑀓𑀫𑁆𑀫𑁂𑀲𑀼 𑀓𑀲𑁆𑀲𑀘𑀺 𑀇𑀲𑁆𑀲𑀭𑀺𑀬𑀸𑀪𑀸𑀯𑀢𑁄, 𑀢𑁂𑀦𑁂𑀯𑁂𑀢𑁆𑀣 𑀓𑀫𑁆𑀫𑀲𑀜𑁆𑀚𑀦𑀺𑀢𑀸𑀦𑀺 𑀢𑀸𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑁆𑀢𑀦𑁄 𑀚𑀦𑀓𑀓𑀫𑁆𑀫𑀁 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺, 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁂𑀦, 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀢𑁄 𑀇𑀦𑁆𑀤𑁄, 𑀢𑀢𑁄 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀕𑀯𑀢𑀸 𑀬𑀣𑀸𑀪𑀽𑀢𑀢𑁄 𑀧𑀓𑀸𑀲𑀺𑀢𑀸𑀦𑀺, 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀦𑀺 𑀘𑀸𑀢𑀺 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁂𑀦, 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀦𑁂𑀯 𑀪𑀕𑀯𑀢𑀸 𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬, 𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑀸𑀦𑀻𑀢𑀺 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁂𑀦𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀧𑀺𑀘 𑀆𑀥𑀺𑀧𑀘𑁆𑀘𑀲𑀗𑁆𑀔𑀸𑀢𑁂𑀦 𑀇𑀲𑁆𑀲𑀭𑀺𑀬𑀝𑁆𑀞𑁂𑀦𑀸𑀧𑀺 𑀏𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺.

𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀻𑀲𑀼 ¶ 𑀘𑀓𑁆𑀔𑀸𑀤𑀻𑀦𑀁 𑀧𑀤𑀢𑁆𑀣𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄. 𑀧𑀘𑁆𑀙𑀺𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 ¶ , 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀆𑀚𑀸𑀦𑀦𑀢𑁄 𑀅𑀜𑁆𑀜𑀸 𑀏𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑀸𑀡𑀓𑀺𑀘𑁆𑀘𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀘 𑀧𑀲𑀸𑀤𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀁 𑀭𑀽𑀧𑀸𑀤𑀻𑀦𑀁 𑀦𑀺𑀬𑀢𑀪𑀸𑀯𑀲𑁆𑀲, 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀢𑀸𑀦𑀼𑀯𑀺𑀥𑀸𑀦𑀲𑁆𑀲 𑀘 𑀆𑀧𑀸𑀤𑀦𑀢𑁄 𑀆𑀥𑀺𑀧𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀚𑀸𑀦𑀦𑀸𑀤𑀺𑀮𑀓𑁆𑀔𑀡𑁂 𑀆𑀥𑀺𑀧𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑁆𑀯𑀺𑀥𑀸. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀯𑁂𑀤𑀦𑀸𑀪𑀸𑀯𑀢𑁄 𑀏𑀓𑀥𑀫𑁆𑀫𑁄, 𑀢𑀣𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀫𑁄𑀳𑀪𑀸𑀯𑀢𑁄. 𑀲𑁂𑀲𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀓𑁂𑀓𑀥𑀫𑁆𑀫𑀸 𑀏𑀯𑀸𑀢𑀺 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀲𑁄𑀴𑀲 𑀥𑀫𑁆𑀫𑀸𑀯 𑀤𑁆𑀯𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀪𑀸𑀯𑁂𑀦 𑀤𑁂𑀲𑀺𑀢𑀸𑀦𑀺. 𑀲𑁂𑀲𑀸𑀦𑀺 𑀧𑀦𑁂𑀢𑁆𑀣 𑀘𑁂𑀢𑀲𑀺𑀓𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀅𑀬𑀁 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀸𑀫 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀲𑀼𑀢𑁆𑀢𑀦𑁆𑀢𑁂 𑀇𑀫𑀸𑀬 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀁 𑀳𑀺 𑀓𑀢𑁆𑀣𑀘𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀧𑀜𑁆𑀘, 𑀏𑀯𑀁 𑀧𑀦 𑀦𑀺𑀭𑀦𑁆𑀢𑀭𑀁 𑀤𑁆𑀯𑀸𑀯𑀻𑀲𑀢𑀺 𑀆𑀕𑀢𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀤𑁆𑀯𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀓𑀼𑀲𑀮𑀁, 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀢𑁆𑀢𑀸𑀭𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺, 𑀫𑀦𑀚𑀻𑀯𑀺𑀢𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑀻𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀙 𑀢𑀺𑀥𑀸𑀧𑀺, 𑀲𑁂𑀲𑀸𑀦𑀺 𑀤𑀲 𑀅𑀩𑁆𑀬𑀸𑀓𑀢𑀸𑀦𑀺. 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀢𑀺, 𑀢𑀻𑀡𑀺 𑀢𑀺𑀥𑀸𑀧𑀺, 𑀚𑀻𑀯𑀺𑀢𑀁 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀜𑁆𑀘, 𑀤𑁆𑀯𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺 ¶ 𑀏𑀯. 𑀢𑀻𑀡𑀺 𑀯𑀺𑀧𑀸𑀓𑀸𑀦𑀺, 𑀤𑁆𑀯𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀺, 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑁆𑀢 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀺, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀯𑀺𑀧𑀸𑀓𑀁, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁, 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀥𑀸𑀧𑀺. 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸𑀦𑀺, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀢𑀻𑀡𑀺 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀦𑀺, 𑀦𑀯 𑀢𑀺𑀥𑀸𑀧𑀺. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 ¶ 𑀢𑀣𑀸 𑀘 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀜𑁆𑀘, 𑀦𑀯 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀺, 𑀏𑀓𑀸𑀤𑀲 𑀢𑀺𑀥𑀸𑀧𑀺. 𑀲𑀢𑁆𑀢 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀯 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀢𑀺 𑀤𑀲 𑀧𑀭𑀺𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀅𑀧𑁆𑀧𑀫𑀸𑀡𑀸𑀦𑀺, 𑀲𑁂𑀲𑀸𑀦𑀺 𑀦𑀯 𑀢𑀺𑀥𑀸𑀯. 𑀢𑀢𑁆𑀣 𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀯𑀘𑀭𑀯𑀲𑁂𑀦𑁂𑀯 𑀫𑀳𑀕𑁆𑀕𑀢𑀁, 𑀢𑀤𑀯𑀲𑁂𑀲𑀸𑀦𑀺 𑀅𑀭𑀽𑀧𑀸𑀯𑀘𑀭𑀯𑀲𑁂𑀦𑀸𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺, 𑀲𑀢𑁆𑀢𑀭𑀲 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑁂𑀯.

𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀳𑁂𑀢𑀽, 𑀲𑁂𑀲𑀸 𑀦 𑀳𑁂𑀢𑀽…𑀧𑁂… 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀭𑀡𑀁, 𑀫𑀦𑀚𑀻𑀯𑀺𑀢𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑀻𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀺𑀥𑀸𑀧𑀺, 𑀲𑁂𑀲𑀸𑀦𑀺 𑀧𑀦𑁆𑀦𑀭𑀲 𑀅𑀭𑀡𑀸𑀦𑁂𑀯𑀸𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀦𑁂𑀢𑁂𑀲𑀼, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄;

𑀓𑀫𑀢𑁄 𑀤𑀸𑀦𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀢𑀢𑁆𑀣 𑀓𑁄𑀲𑀮𑁆𑀮𑀫𑀺𑀘𑁆𑀙𑀢𑀸.

𑀓𑀫𑀢𑁄𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀬 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀳𑁄𑀢𑀻𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺. 𑀲𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄 𑀬𑀁 𑀥𑀫𑁆𑀫𑀁 𑀉𑀧𑀸𑀤𑀸𑀬 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀺, ‘‘𑀅𑀬𑀁 𑀲𑁄’’𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀲𑁄 𑀤𑀼𑀯𑀺𑀥𑁄𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀬𑀸𑀯 𑀢𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀯 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀺. 𑀬𑀜𑁆𑀘 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀦𑁆𑀦𑀺𑀭𑁄𑀥𑀢𑁆𑀣𑀁 𑀧𑀦 𑀏𑀢𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀲𑀤𑁆𑀥𑀸𑀤𑀻𑀦𑀺. ‘‘𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀏𑀲 𑀥𑀫𑁆𑀫𑁄 𑀧𑀞𑀫𑀁 𑀅𑀢𑁆𑀢𑀦𑀺 𑀧𑀸𑀢𑀼𑀪𑀯𑀢𑀻’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 ¶ 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲𑁂𑀯 𑀨𑀮𑀢𑁆𑀢𑀸, 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸 𑀘 𑀢𑀢𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀢𑁄 𑀧𑀭𑀁 𑀪𑀸𑀯𑀦𑀸𑀬 𑀇𑀫𑀲𑁆𑀲 𑀅𑀥𑀺𑀕𑀫𑁄, 𑀅𑀥𑀺𑀕𑀢𑁂 𑀘 𑀧𑀦 𑀇𑀫𑀲𑁆𑀫𑀺𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀅𑀦𑁆𑀢𑁂 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀦𑁆𑀢𑀺 𑀏𑀯𑀁 𑀓𑀫𑀢𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑁂𑀬𑁆𑀬𑁄.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀅𑀯𑀺𑀦𑁆𑀤𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀯𑀺𑀦𑁆𑀤𑀺𑀬𑀁 𑀯𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀺, 𑀥𑀫𑁆𑀫𑀸𑀦𑀁 𑀯𑀸 𑀬𑀣𑀸𑀲𑀪𑀸𑀯𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀺, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀯𑀸 𑀲𑀁𑀲𑀸𑀭𑁂 𑀲𑀢𑁆𑀢𑁂 𑀚𑀯𑀸𑀧𑁂𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀧𑀝𑀺𑀘𑁆𑀘 𑀨𑀮𑀫𑁂𑀢𑀺 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄, 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸, 𑀞𑀺𑀢𑀺𑀬𑀸 𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸. 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸.

𑀇𑀢𑁄 𑀧𑀭𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀼𑀢𑁆𑀢𑁂𑀲𑀼 𑀧𑀦 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀦𑀫𑀢𑀻𑀢𑀺 𑀦𑀸𑀫𑀁, 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀆𑀬𑁂 𑀢𑀦𑁄𑀢𑀺, 𑀆𑀬𑀢𑀜𑁆𑀘 𑀦𑀬𑀢𑀻𑀢𑀺 𑀆𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀁. 𑀪𑀯𑀢𑀺, 𑀪𑀸𑀯𑀬𑀢𑀺 𑀘𑀸𑀢𑀺 𑀪𑀯𑁄. 𑀚𑀦𑀦𑀁 𑀚𑀸𑀢𑀺. 𑀚𑀻𑀭𑀡𑀁 𑀚𑀭𑀸. 𑀫𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 ¶ 𑀫𑀭𑀡𑀁. 𑀲𑁄𑀘𑀦𑀁 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀬𑀢𑀺, 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀯𑀲𑁂𑀦 𑀤𑁆𑀯𑀺𑀥𑀸 𑀔𑀡𑀢𑀻𑀢𑀺𑀧𑀺 𑀤𑀼𑀓𑁆𑀔𑀁. 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀲𑀫𑁆𑀪𑀯𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀸𑀤𑀻𑀳𑁂𑀯, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑁂𑀳𑀺𑀧𑀺 𑀲𑀫𑁆𑀪𑀯𑀦𑁆𑀢𑀺-𑀲𑀤𑁆𑀤𑀲𑁆𑀲 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀳𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀦𑀬𑀦𑀺𑀤𑀲𑁆𑀲𑀦𑀁, 𑀢𑁂𑀦 𑀅𑀯𑀺𑀚𑁆𑀚𑀸𑀤𑀻𑀳𑁂𑀯 𑀓𑀸𑀭𑀡𑁂𑀳𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲, 𑀲𑀓𑀮𑀲𑁆𑀲 𑀯𑀸, 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑀽𑀳𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀦 𑀲𑀼𑀔𑀲𑀼𑀪𑀸𑀤𑀻𑀦𑀁. 𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺, 𑀳𑁄𑀢𑀻𑀢𑀺 𑀲𑀫𑁆𑀪𑀯𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀘𑀢𑀽𑀲𑀼, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀼𑀩𑁆𑀩𑀦𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀲𑀼 𑀯𑀸 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁. 𑀲𑀗𑁆𑀔𑀸𑀭𑀸 𑀧𑀦 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀢𑀬𑁄, 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀢𑀬𑁄 𑀘𑀸𑀢𑀺 𑀙𑀩𑁆𑀩𑀺𑀥𑀸. 𑀢𑀢𑁆𑀣 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 ¶ 𑀘𑁂𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀏𑀯 𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀲𑀗𑁆𑀔𑀸𑀭𑀸𑀤𑀺𑀢𑁆𑀢𑀺𑀓𑁄 𑀯𑀼𑀢𑁆𑀢𑁄.

𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑁂𑀯 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸 𑀘 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀯𑀘𑀻𑀲𑀗𑁆𑀔𑀸𑀭𑁄, 𑀏𑀢𑀸 𑀘𑁂𑀯 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁, 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀧𑀯𑀢𑁆𑀢𑀦𑀓𑀸 𑀭𑀽𑀧𑀸𑀭𑀽𑀧𑀓𑀼𑀲𑀮𑀘𑁂𑀢𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀧𑀦𑁂𑀢𑁆𑀣 𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀘 𑀧𑀭𑀢𑁄 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸𑀧𑀺 ¶ 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀫𑁆𑀪𑀯𑀢𑁄 𑀇𑀥 𑀕𑀳𑁂𑀢𑀩𑁆𑀩𑀸𑀯𑀸𑀢𑀺 𑀅𑀬𑀁 𑀢𑀺𑀓𑁄 𑀧𑀼𑀭𑀺𑀫𑀢𑁆𑀢𑀺𑀓𑀫𑁂𑀯 𑀧𑀯𑀺𑀲𑀢𑀻𑀢𑀺 𑀅𑀢𑁆𑀣𑀢𑁄 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀜𑁆𑀘 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂𑀦 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀤𑁆𑀯𑀸𑀤𑀲𑀗𑁆𑀕𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀕𑀳𑀡𑀢𑁄 𑀲𑀩𑁆𑀩𑀸𑀧𑀺 𑀘𑁂𑀢𑀦𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀤𑀻𑀲𑀼𑀧𑀺 𑀲𑀩𑁆𑀩𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀘 𑀥𑀫𑁆𑀫𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦𑁂𑀯 𑀧𑀦 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀙𑀩𑁆𑀩𑀺𑀥𑀁 𑀩𑀸𑀢𑁆𑀢𑀺𑀁𑀲𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀯𑀝𑁆𑀝𑀓𑀣𑀸𑀬 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀧𑀦 𑀲𑀩𑁆𑀩𑀮𑁄𑀓𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀁 𑀲𑀩𑁆𑀩𑀸𑀦𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀺. 𑀲𑀴𑀸𑀬𑀢𑀦𑀁 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀙𑀯𑀺𑀧𑀸𑀓𑀨𑀲𑁆𑀲𑁄, 𑀢𑀣𑀸 𑀯𑁂𑀤𑀦𑀸𑀧𑀺. 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀢𑁄 𑀙𑀩𑁆𑀩𑀺𑀥𑁄 𑀮𑁄𑀪𑁄. 𑀉𑀧𑀸𑀤𑀸𑀦𑀁 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀢𑁄 𑀘𑀢𑀼𑀩𑁆𑀩𑀺𑀥𑀸 𑀮𑁄𑀪𑀤𑀺𑀝𑁆𑀞𑀺𑀬𑁄𑀯. 𑀪𑀯𑁄 𑀧𑀦 𑀤𑀼𑀯𑀺𑀥𑁄 𑀓𑀫𑁆𑀫𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑁄𑀢𑀺. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀘. 𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀜𑁆𑀘𑀧𑀺 𑀔𑀦𑁆𑀥𑀸. 𑀲𑁄 𑀧𑀪𑁂𑀤𑀢𑁄 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀸 𑀢𑀬𑁄, 𑀲𑀜𑁆𑀜𑀸 𑀅𑀲𑀜𑁆𑀜𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀪𑀯𑀸 𑀢𑀬𑁄, 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀢𑀬𑁄𑀢𑀺 𑀦𑀯𑀯𑀺𑀥𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀚𑀸𑀢𑀺𑀆𑀤𑀻𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀚𑀸𑀢𑀺𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀯 𑀕𑀳𑀺𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀣𑀸 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦𑀸𑀧𑀺 𑀢𑁂𑀲𑀜𑁆𑀜𑁂𑀯 𑀧𑀸𑀓𑀪𑁂𑀤𑀢𑁆𑀢𑀸. 𑀲𑁄𑀓𑀸𑀤𑀬𑁄 𑀧𑀦 𑀚𑀭𑀸𑀫𑀭𑀡𑁂𑀦 𑀤𑁆𑀯𑀸𑀤𑀲𑀫𑁂𑀦 𑀅𑀗𑁆𑀕𑁂𑀦 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦. 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁. 𑀲𑁄𑀓𑀸𑀤𑀺𑀢𑁄 ¶ 𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸 𑀳𑁄𑀢𑀺 𑀅𑀯𑀺𑀚𑁆𑀚𑀸𑀯𑀺𑀧𑁆𑀧𑀬𑁄𑀕𑀢𑁄 ¶ , 𑀅𑀯𑀺𑀚𑁆𑀚𑀸𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀘. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲𑁂𑀯 𑀢𑁂 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀳𑀺 𑀘 𑀅𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀸𑀬 𑀧𑀼𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀪𑀯𑀘𑀓𑁆𑀓𑀁 𑀅𑀯𑀺𑀘𑁆𑀙𑀺𑀦𑁆𑀦𑀁, 𑀅𑀦𑀸𑀤𑀺𑀓𑀁, 𑀅𑀧𑀭𑀺𑀬𑀦𑁆𑀢𑀁, 𑀅𑀧𑀭𑀺𑀬𑁄𑀲𑀸𑀦𑀜𑁆𑀘 𑀳𑁄𑀢𑀺.

𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀅𑀯𑀺𑀚𑁆𑀚𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸𑀢𑀺? 𑀧𑀥𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀦 𑀆𑀤𑀺𑀢𑁄 𑀯𑀼𑀢𑁆𑀢𑀸. 𑀢𑀺𑀡𑁆𑀡𑀁 𑀳𑀺 𑀯𑀝𑁆𑀝𑀸𑀦𑀁 𑀅𑀯𑀺𑀚𑁆𑀚𑀸 𑀧𑀥𑀸𑀦𑁄 𑀳𑁂𑀢𑀼 𑀢𑀲𑁆𑀲𑀸 𑀪𑀸𑀯𑁂 𑀪𑀸𑀯𑀢𑁄, 𑀦𑀺𑀭𑁄𑀥𑁂𑀦 𑀘 𑀦𑀺𑀭𑀼𑀚𑁆𑀛𑀦𑀢𑁄. 𑀏𑀯𑀁 𑀅𑀯𑀺𑀚𑁆𑀚𑀸𑀤𑀻𑀳𑀺 𑀤𑁆𑀯𑀸𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦 𑀲𑀩𑁆𑀩𑁂 𑀮𑁄𑀓𑀺𑀬𑀥𑀫𑁆𑀫𑀸𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀦 𑀮𑁄𑀓𑀼𑀢𑁆𑀢𑀭𑀸𑀧𑀻𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄 𑀦𑀢𑁆𑀣𑀺, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑀸𑀧𑀺 𑀥𑀫𑁆𑀫𑀪𑁂𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄…𑀧𑁂… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸…𑀧𑁂… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ …𑀧𑁂… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁪𑁩) 𑁋

𑀏𑀯𑀁 𑀧𑀘𑁆𑀘𑀬𑀘𑀢𑀼𑀓𑁆𑀓𑀁, 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁪𑁪) 𑀯𑀼𑀢𑁆𑀢𑀦𑀬𑁂𑀦𑁂𑀯 ¶ 𑀳𑁂𑀢𑀼𑀘𑀢𑀼𑀓𑁆𑀓𑀁, 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁪𑁫) 𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀓𑁆𑀓𑀁, 𑀧𑀼𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁪𑁬) 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀘𑀢𑀼𑀓𑁆𑀓𑀦𑁆𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀁 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀭𑀸𑀤𑀺𑀫𑀽𑀮𑀓𑀸𑀤𑀺𑀉𑀧𑀸𑀤𑀸𑀦𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀸𑀦𑀺 𑀅𑀝𑁆𑀞𑀲𑀼 𑀧𑀤𑁂𑀲𑀼 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀻𑀢𑀺 𑀩𑀸𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺 𑀫𑀸𑀢𑀺𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀅𑀓𑀼𑀲𑀮𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑁂𑀳𑀺 𑀙𑀢𑁆𑀢𑀺𑀁𑀲𑀩𑀸𑀢𑁆𑀢𑀺𑀁𑀲𑀫𑀸𑀢𑀺𑀓𑀸𑀘𑀢𑀼𑀓𑁆𑀓𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀬𑀣𑀸𑀦𑀼𑀭𑀽𑀧𑀁 𑀧𑀘𑁆𑀘𑀬𑀸𑀓𑀸𑀭𑁄 𑀯𑀺𑀪𑀢𑁆𑀢𑁄. 𑀇𑀤𑀜𑁆𑀘 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀅𑀬𑀁 𑀧𑀘𑁆𑀘𑀬𑀸𑀓𑀸𑀭𑁄 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀏𑀯 𑀳𑁄𑀢𑀺, 𑀏𑀓𑀘𑀺𑀢𑁆𑀢𑁂𑀧𑀺 𑀳𑁄𑀢𑀺𑀬𑁂𑀯. 𑀦𑀸𑀧𑀺 𑀯𑀝𑁆𑀝𑀘𑀺𑀢𑁆𑀢𑁂 𑀏𑀯 𑀳𑁄𑀢𑀺, 𑀢𑀡𑁆𑀳𑀸𑀪𑀸𑀯𑀢𑁄 𑀯𑀺𑀯𑀝𑁆𑀝𑀘𑀺𑀢𑁆𑀢𑁂𑀧𑀺, 𑀢𑀲𑁆𑀫𑀸 𑀢𑀁 𑀦𑀺𑀧𑁆𑀧𑀤𑁂𑀲𑀢𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑁂𑀢𑁆𑀣 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀩𑀳𑀼𑀘𑁂𑀢𑀦𑀸𑀪𑀸𑀯𑀸. 𑀢𑀢𑁆𑀣 𑀬𑀤𑁂𑀢𑀁 𑀧𑀞𑀫𑀘𑀢𑀼𑀓𑁆𑀓𑀁, 𑀢𑀢𑁆𑀣 𑀧𑀞𑀫𑀯𑀸𑀭𑁄 𑀦𑀸𑀫𑀭𑀽𑀧𑀝𑁆𑀞𑀸𑀦𑁂 𑀦𑀸𑀫𑀁, 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀙𑀝𑁆𑀞𑀸𑀬𑀢𑀦𑀜𑁆𑀘 𑀕𑀳𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀸𑀤𑀺𑀲𑀩𑁆𑀩𑀪𑀯𑀲𑀸𑀥𑀸𑀭𑀡𑀯𑀲𑁂𑀦, 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀕𑁆𑀕𑀳𑀡𑀯𑀲𑁂𑀦 𑀘 𑀭𑀽𑀧𑀁 𑀙𑀟𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑁄 𑀭𑀽𑀧𑀲𑁆𑀲 𑀲𑀩𑁆𑀩𑀪𑀯𑀸𑀲𑀸𑀥𑀸𑀭𑀡𑀢𑁆𑀢𑀸, 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀘. 𑀤𑀼𑀢𑀺𑀬𑁄 𑀦𑀸𑀫𑀭𑀽𑀧𑀝𑁆𑀞𑀸𑀦𑁂 𑀦𑀸𑀫𑀁, ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀨𑀲𑁆𑀲𑀫𑁂𑀯 ¶ 𑀕𑀳𑁂𑀢𑁆𑀯𑀸 𑀨𑀲𑁆𑀲𑀲𑁆𑀲 𑀲𑀴𑀸𑀬𑀢𑀦𑀁 𑀯𑀺𑀦𑀸𑀧𑀺 𑀧𑀘𑁆𑀘𑀬𑀯𑀺𑀲𑁂𑀲𑀲𑀫𑁆𑀪𑀯𑀤𑀲𑁆𑀲𑀦𑀯𑀲𑁂𑀦 𑀘𑁂𑀯 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑀬𑀤𑀲𑁆𑀲𑀦𑀯𑀲𑁂𑀦 (𑀤𑀻. 𑀦𑀺. 𑁨.𑁯𑁫 𑀆𑀤𑀬𑁄) 𑀘 𑀯𑀼𑀢𑁆𑀢𑁄. 𑀢𑀢𑀺𑀬𑁄 𑀲𑀴𑀸𑀬𑀢𑀦𑀝𑁆𑀞𑀸𑀦𑁂 𑀙𑀝𑁆𑀞𑀸𑀬𑀢𑀦𑀫𑁂𑀯 𑀕𑀳𑁂𑀢𑁆𑀯𑀸 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁, 𑀭𑀽𑀧𑀪𑀯𑀺𑀓𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑁄. 𑀘𑀢𑀼𑀢𑁆𑀣𑁄 ‘‘𑀦𑀸𑀫𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀏𑀯𑀁 𑀇𑀢𑀭𑀸𑀬𑀢𑀦𑁂𑀳𑀺𑀧𑀺 𑀲𑀴𑀸𑀬𑀢𑀦𑀲𑁆𑀲 𑀯𑀺𑀲𑁂𑀲𑀢𑁄 𑀨𑀲𑁆𑀲𑀧𑀘𑁆𑀘𑀬𑀢𑀁𑀯 𑀤𑀲𑁆𑀲𑁂𑀢𑁆𑀯𑀸 𑀑𑀧𑀧𑀸𑀢𑀺𑀓𑀸𑀦𑀁, 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀓𑀸𑀫𑀪𑀯𑀺𑀓𑀸𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑁄. 𑀏𑀯𑀁 𑀤𑀼𑀢𑀺𑀬𑀘𑀢𑀼𑀓𑁆𑀓𑀸𑀤𑀻𑀲𑀼𑀧𑀺.

𑀲𑀩𑁆𑀩𑀢𑁆𑀣𑀸𑀧𑀺 𑀘𑁂𑀢𑁆𑀣 𑀬𑀲𑁆𑀫𑀸 𑀲𑁄𑀓𑀸𑀤𑀬𑁄 𑀲𑀩𑁆𑀩𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀦 𑀲𑀫𑁆𑀪𑀯𑀦𑁆𑀢𑀺, 𑀲𑀩𑁆𑀩𑀲𑁆𑀫𑀺𑀜𑁆𑀘 𑀘𑀺𑀢𑁆𑀢𑁂, 𑀪𑀯𑁂 𑀘 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀸. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀧𑀦𑁂𑀢𑁆𑀣 𑀅𑀭𑀽𑀧𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀫𑀢𑁆𑀢𑀸𑀦𑀺, 𑀢𑀸𑀦𑀺 𑀘 𑀅𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀸𑀦𑀺𑀧𑀺 𑀲𑀫𑀸𑀦𑀸𑀦𑀺 𑀘𑀺𑀢𑁆𑀢𑀓𑁆𑀔𑀡𑁂 𑀅𑀦𑁆𑀢𑁄𑀕𑀥𑀢𑁆𑀢𑀸 𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀓𑀢𑁆𑀯𑀸 𑀅𑀗𑁆𑀕𑀧𑀭𑀺𑀧𑀽𑀭𑀡𑀢𑁆𑀣𑀁 𑀕𑀳𑀺𑀢𑀸𑀦𑀺. 𑀪𑀯𑁄𑀢𑀺 𑀘𑁂𑀢𑁆𑀣 𑀉𑀧𑀸𑀤𑀸𑀦𑀸𑀤𑀺𑀧𑀘𑁆𑀘𑀬𑀯𑀺𑀭𑀳𑀺𑀢𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀢𑀻𑀡𑀺 𑀉𑀧𑀸𑀤𑀸𑀦𑀸𑀦𑀺 𑀏𑀯 𑀕𑀳𑁂𑀢𑀩𑁆𑀩𑀸𑀦𑀺 ¶ . 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀅𑀲𑀫𑁆𑀪𑀯𑀸 𑀮𑁄𑀪𑀫𑀽𑀮𑀯𑀺𑀭𑀳𑀺𑀢𑁂𑀲𑀼 𑀤𑁄𑀲𑀫𑁄𑀳𑀫𑀽𑀮𑁂𑀲𑀼 𑀘𑁂𑀯 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀘 𑀘𑀺𑀢𑁆𑀢𑁂𑀲𑀼 𑀯𑁂𑀤𑀦𑀸𑀧𑀘𑁆𑀘𑀬𑀸 𑀧𑀝𑀺𑀖𑀁 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑁆𑀥𑀘𑁆𑀘𑀦𑁆𑀢𑀺 𑀏𑀯𑀁 𑀢𑀡𑁆𑀳𑀸𑀞𑀸𑀦𑁂 𑀬𑀣𑀸𑀬𑁄𑀕𑀁 𑀧𑀝𑀺𑀖𑀸𑀤𑀬𑁄 𑀢𑀬𑁄. 𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀯𑀚𑁆𑀚𑀺𑀢𑁂𑀲𑀼 𑀘𑁂𑀯 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀘 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀅𑀥𑀺𑀫𑁄𑀓𑁆𑀔𑁄 𑀕𑀳𑀺𑀢𑁄. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀦 𑀲𑀤𑁆𑀥𑀺𑀁 𑀅𑀥𑀺𑀫𑁄𑀓𑁆𑀔𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀧𑀘𑁆𑀘𑀬𑀸 𑀪𑀯𑁄𑀢𑀺 𑀘 𑀕𑀳𑀺𑀢𑁄. 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀘 𑀅𑀥𑀺𑀫𑁄𑀓𑁆𑀔𑁄 𑀘 𑀕𑀳𑀺𑀢𑁄. 𑀮𑁄𑀓𑀺𑀬𑀸𑀦𑀜𑁆𑀘𑁂𑀢𑁆𑀣 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀸𑀦𑀁 𑀧𑀦 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑁄 𑀅𑀯𑀺𑀚𑁆𑀚𑀸𑀬 𑀧𑀳𑀸𑀦𑀢𑁆𑀣𑀁, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁆𑀣𑀜𑁆𑀘 𑀮𑁄𑀓𑀼𑀢𑁆𑀢𑀭𑀁 ¶ 𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀲𑀫𑀢𑀺𑀓𑁆𑀓𑀫𑀦𑀯𑀲𑁂𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸, 𑀦 𑀲𑀳𑀚𑀸𑀢𑀯𑀲𑁂𑀦. 𑀢𑁂𑀦𑁂𑀯 𑀢𑁂𑀲𑀁 𑀦𑀺𑀤𑁆𑀤𑁂𑀲𑀯𑀸𑀭𑁂𑀲𑀼 ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸’’𑀢𑀺 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺 (𑀯𑀺𑀪. 𑁨𑁪𑁦) 𑀯𑀺𑀪𑀢𑁆𑀢𑀁. 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀧𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀁 𑀦𑀢𑁆𑀣𑀻𑀢𑀺 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀭𑀫𑀽𑀮𑀓𑀸𑀤𑀺𑀓𑁄 𑀦𑀬𑁄 𑀯𑀼𑀢𑁆𑀢𑁄, 𑀦 𑀅𑀯𑀺𑀚𑁆𑀚𑀸𑀫𑀽𑀮𑀓𑁄. 𑀅𑀧𑀺𑀘 𑀮𑁄𑀓𑀺𑀬𑀓𑀼𑀲𑀮𑀸𑀤𑀻𑀲𑀼 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁨𑁫) 𑀏𑀯𑀁 𑀅𑀧𑁆𑀧𑀦𑀸 𑀓𑀢𑀸, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀤𑀻𑀲𑀼 ‘‘𑀏𑀯𑀫𑁂𑀢𑁂𑀲𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀅𑀬𑀁 𑀮𑁄𑀓𑀺𑀬𑀢𑁄 𑀮𑁄𑀓𑀼𑀢𑁆𑀢𑀭𑀸𑀦𑀁 𑀤𑁂𑀲𑀦𑀸𑀬 𑀯𑀺𑀲𑁂𑀲𑁄𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀦𑀬𑁄.

𑀇𑀤𑀸𑀦𑀺 𑀧𑀘𑁆𑀘𑀬𑀦𑀬𑀸, 𑀓𑀸𑀭𑀓𑀸𑀤𑀻𑀳𑀺 𑀲𑀼𑀜𑁆𑀜𑀢𑁄;

𑀫𑀽𑀮𑀤𑁆𑀥𑀲𑀦𑁆𑀥𑀺𑀲𑀗𑁆𑀔𑁂𑀧𑀸𑀓𑀸𑀭𑀯𑀝𑁆𑀝𑀯𑀺𑀪𑀸𑀕𑀢𑁄.

𑀯𑀸𑀭𑀡𑁄𑀧𑀫𑀢𑁄𑀧𑁂𑀢𑁆𑀣, 𑀕𑀫𑁆𑀪𑀻𑀭𑀦𑀬𑀪𑁂𑀤𑀢𑁄;

𑀬𑀣𑀸𑀭𑀳𑀁 𑀯𑀺𑀚𑀸𑀦𑀻𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀧𑀘𑁆𑀘𑀬𑀦𑀬𑁄 𑀲𑀸𑀫𑀜𑁆𑀜𑀢𑁄, 𑀯𑀺𑀲𑁂𑀲𑀢𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀢𑀩𑁆𑀪𑀸𑀯𑀪𑀸𑀯𑀺𑀫𑀢𑁆𑀢𑀢𑀸𑀧𑀓𑀸𑀲𑀓𑁄 𑀲𑀸𑀫𑀜𑁆𑀜𑀢𑁄 𑀧𑀘𑁆𑀘𑀬𑀦𑀬𑁄. 𑀯𑀺𑀲𑁂𑀲𑀢𑁄 𑀧𑀦 𑀧𑀝𑁆𑀞𑀸𑀦𑁂 𑀆𑀕𑀢𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀧𑀘𑁆𑀘𑀬𑀯𑀺𑀲𑁂𑀲𑀼𑀧𑁆𑀧𑀦𑁆𑀦𑀫𑀢𑁆𑀢𑀢𑀸𑀧𑀓𑀸𑀲𑀓𑁄. 𑀲𑀸 𑀘 𑀦𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀺𑀪𑀸𑀕𑀢𑀸 𑀧𑀝𑁆𑀞𑀸𑀦𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀣 𑀲𑀸𑀫𑀜𑁆𑀜𑀢𑁄 𑀲𑀗𑁆𑀔𑀸𑀭𑀸𑀤𑀬𑁄 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀪𑀸𑀯𑁂 𑀏𑀯 𑀪𑀸𑀯𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀲 𑀳𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼, 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀯𑀺𑀚𑁆𑀚𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 ¶ 𑀢𑀻𑀲𑀼 ¶ 𑀪𑀯𑁂𑀲𑀼 𑀚𑀸𑀢𑀺𑀚𑀭𑀸𑀭𑁄𑀕𑀫𑀭𑀡𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀯𑁄𑀓𑀺𑀡𑁆𑀡𑀁 𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀤𑀼𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀲𑀼𑀔𑀲𑀜𑁆𑀜𑀸𑀬 𑀧𑀢𑁆𑀣𑁂𑀢𑁆𑀯𑀸 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂 𑀆𑀭𑀪𑀢𑀺. 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁂𑀲𑀼𑀧𑀺 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂𑀲𑀼 𑀤𑀼𑀓𑁆𑀔𑀳𑁂𑀢𑀼𑀓𑀁 𑀆𑀧𑀸𑀬𑀺𑀓𑀸𑀤𑀺𑀤𑀼𑀓𑁆𑀔𑀁, 𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁂𑀲𑀼 𑀓𑀸𑀫𑀽𑀧𑀲𑁂𑀯𑀦𑀸𑀤𑀻𑀲𑀼 𑀘 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀲𑀼𑀔𑀳𑁂𑀢𑀼𑀲𑀜𑁆𑀜𑀸𑀬 𑀘𑁂𑀯 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀘 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺. 𑀦𑀺𑀭𑁄𑀥𑁂, 𑀧𑀦 𑀫𑀕𑁆𑀕𑁂 𑀘 𑀅𑀜𑁆𑀜𑀸𑀡𑁂𑀦 𑀅𑀦𑀺𑀭𑁄𑀥𑀪𑀽𑀢𑁂 𑀕𑀢𑀺𑀯𑀺𑀲𑁂𑀲𑁂 𑀦𑀺𑀭𑁄𑀥𑀲𑀜𑁆𑀜𑀻, 𑀦𑀺𑀭𑁄𑀥𑀲𑁆𑀲 𑀘 𑀯𑀸 𑀅𑀫𑀕𑁆𑀕𑀪𑀽𑀢𑁂𑀲𑀼𑀧𑀺 𑀬𑀜𑁆𑀜𑀸𑀫𑀭𑀢𑀧𑀸𑀤𑀻𑀲𑀼𑀧𑀺 𑀦𑀺𑀭𑁄𑀥𑀫𑀕𑁆𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑁂𑀦 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀭𑀁 𑀫𑀭𑀡𑀸’’𑀢𑀺 𑀯𑀸 ‘‘𑀅𑀢𑁆𑀢𑀸𑀯 𑀚𑀸𑀦𑀸𑀢𑀺 𑀯𑀸 𑀦 𑀚𑀸𑀦𑀸𑀢𑀺 𑀯𑀸, 𑀲𑁄𑀯 𑀲𑀗𑁆𑀔𑀸𑀭𑁂 𑀲𑀗𑁆𑀔𑀭𑁄𑀢𑀺, 𑀲𑁄𑀯 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀡𑀼𑀇𑀲𑁆𑀲𑀭𑀸𑀤𑀬𑁄 𑀓𑀮𑀮𑀸𑀤𑀺𑀪𑀸𑀯𑁂𑀦 𑀲𑀭𑀻𑀭𑀁 𑀲𑀡𑁆𑀞𑀸𑀧𑁂𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀲𑁄𑀯 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄 𑀨𑀼𑀲𑀢𑀺, 𑀯𑁂𑀤𑀬𑀢𑀺, 𑀢𑀡𑁆𑀳𑀺𑀬𑀢𑀺, 𑀉𑀧𑀸𑀤𑀸𑀦𑀸𑀤𑀻𑀦𑀺 𑀘 𑀓𑀭𑁄𑀢𑀻’’𑀢𑀺 𑀯𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀯𑀧𑀭𑀺𑀡𑀢𑀸’’𑀢𑀺 𑀯𑀸 𑀯𑀺𑀓𑀧𑁆𑀧𑁂𑀢𑀺. 𑀲𑁄 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑁄 𑁋

‘‘𑀬𑀣𑀸𑀧𑀺 𑀦𑀸𑀫 𑀚𑀘𑁆𑀘𑀦𑁆𑀥𑁄, 𑀦𑀭𑁄 𑀅𑀧𑀭𑀺𑀡𑀸𑀬𑀓𑁄;

𑀏𑀓𑀤𑀸 𑀬𑀸𑀢𑀺 𑀫𑀕𑁆𑀕𑁂𑀦, 𑀉𑀫𑁆𑀫𑀕𑁆𑀕𑁂𑀦𑀸𑀧𑀺 𑀏𑀓𑀤𑀸.

‘‘𑀲𑀁𑀲𑀸𑀭𑁂 𑀲𑀁𑀲𑀭𑀁 𑀩𑀸𑀮𑁄, 𑀢𑀣𑀸 𑀅𑀧𑀭𑀺𑀡𑀸𑀬𑀓𑁄;

𑀓𑀭𑁄𑀢𑀺 𑀏𑀓𑀤𑀸 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀫𑀧𑀺 𑀏𑀓𑀤𑀸’’𑀢𑀺. (𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀕𑀸𑀭𑀧𑀤𑀦𑀺𑀤𑁆𑀤𑁂𑀲) 𑁋

𑀯𑀼𑀢𑁆𑀢𑀦𑀬𑁂𑀦 𑀢𑀺𑀯𑀺𑀥𑁂 𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀏𑀓𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀦𑀼 𑀏𑀓𑀲𑁆𑀫𑀸 ¶ 𑀓𑀸𑀭𑀡𑀸 𑀏𑀓𑀁𑀯 𑀓𑀸𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁂𑀓𑀁 𑀓𑀸𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁂𑀓𑀲𑁆𑀫𑀸 𑀯𑀸 𑀏𑀓𑀦𑁆𑀢𑀺, 𑀅𑀦𑁂𑀓𑀲𑁆𑀫𑀸 𑀓𑀸𑀭𑀡𑀸 𑀅𑀦𑁂𑀓𑀁 𑀓𑀸𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀘𑁆𑀘𑀁, 𑀧𑀥𑀸𑀦𑀢𑁆𑀢𑀧𑀸𑀓𑀝𑀢𑁆𑀢𑀅𑀲𑀸𑀥𑀸𑀭𑀡𑀢𑁆𑀢𑀤𑀻𑀧𑀦𑀢𑁆𑀣𑀁 𑀧𑀦𑁂𑀢𑁆𑀣 𑀅𑀦𑁂𑀓𑁂𑀲𑀼 𑀓𑀸𑀭𑀡𑁂𑀲𑀼𑀧𑀺 𑀏𑀓𑀸 𑀅𑀯𑀺𑀚𑁆𑀚𑀸 𑀏𑀯 𑀧𑀘𑁆𑀘𑀬𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 (𑀉𑀤𑀸. 𑁩), 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁬𑁦; 𑀫𑀳𑀸𑀦𑀺. 𑁫; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑀯𑀺𑀬. 𑀅𑀯𑀺𑀚𑁆𑀚𑀸 𑀳𑀺 𑀧𑀥𑀸𑀦𑁄 𑀳𑁂𑀢𑀼, 𑀲𑀗𑁆𑀔𑀸𑀭𑀸𑀦𑀁 𑀧𑀸𑀓𑀝𑁄, 𑀅𑀲𑀸𑀥𑀸𑀭𑀡𑁄 𑀘 𑀢𑀡𑁆𑀳𑀸𑀤𑀺𑀳𑁂𑀢𑀽𑀦𑀫𑁆𑀧𑀺 𑀳𑁂𑀢𑀼𑀢𑁆𑀢𑀸, 𑀦 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀺 ¶ 𑀔𑀻𑀡𑀸𑀲𑀯𑀲𑁆𑀲 𑀢𑁂𑀲𑀁 𑀲𑀫𑁆𑀪𑀯𑁂𑀧𑀺 𑀲𑀗𑁆𑀔𑀸𑀭𑀸𑀦𑀁 𑀅𑀪𑀸𑀯𑀸𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀯𑀝𑁆𑀝𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀬 𑀏𑀯 𑀪𑀸𑀯𑁂 𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀅𑀪𑀸𑀯𑀢𑁄, 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀜𑁆𑀘 𑀲𑀩𑁆𑀩𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀏𑀯 𑀪𑀸𑀯𑁂 𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺𑀧𑀺 𑀦𑀸𑀫𑀭𑀽𑀧𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀤𑀺𑀪𑀸𑀯𑁂 𑀪𑀸𑀯𑁄 𑀬𑀣𑀸𑀦𑀼𑀭𑀽𑀧𑀁 𑀅𑀦𑀼𑀪𑀯𑀬𑀼𑀢𑁆𑀢𑀻𑀳𑀺 𑀜𑀸𑀢𑀩𑁆𑀩𑁄𑀢𑀺 𑀅𑀬𑀁 𑀲𑀸𑀫𑀜𑁆𑀜𑀢𑁄 𑀧𑀘𑁆𑀘𑀬𑀦𑀬𑁄.

𑀯𑀺𑀲𑁂𑀲𑀢𑁄 𑀧𑀦 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀢𑀸𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀳𑀺 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀁 𑀓𑀸𑀫𑀸𑀯𑀘𑀭𑀸𑀦𑀁, 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀲𑀫𑁄𑀳𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑀓𑀸𑀮𑁂 𑀭𑀽𑀧𑀸𑀯𑀘𑀭𑀸𑀦𑀜𑁆𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀢𑀸𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀧𑀦 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑀸𑀬 𑀓𑀸𑀫𑀭𑀽𑀧𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑁂𑀢𑁆𑀯𑀸𑀯 𑀓𑀸𑀫𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀦𑁂𑀲𑀸 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁂𑀦 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦, 𑀤𑀼𑀢𑀺𑀬𑀚𑀯𑀦𑀸𑀤𑀻𑀦𑀁 ¶ 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀬𑀁 𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀻𑀢𑀺 𑀏𑀯𑀁 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀦 𑀏𑀓𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀧𑀤𑁂 𑀧𑀦 𑀢𑀬𑁄𑀧𑀺 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀲𑁆𑀲 𑀬𑀣𑀸𑀭𑀳𑀁 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂𑀦 𑀲𑀳𑀚𑀸𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀧𑀤𑁂 𑀧𑀦 𑀯𑀺𑀜𑁆𑀜𑀸𑀡𑀁 𑀯𑀺𑀧𑀸𑀓𑀪𑀽𑀢𑀁, 𑀅𑀯𑀺𑀧𑀸𑀓𑀪𑀽𑀢𑀜𑁆𑀘 𑀦𑀸𑀫𑀲𑁆𑀲 𑀓𑁂𑀯𑀮𑀲𑁆𑀲 𑀯𑀸 𑀭𑀽𑀧𑀫𑀺𑀲𑁆𑀲𑀓𑀲𑁆𑀲 𑀯𑀸 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀬𑀣𑀸𑀭𑀳𑀁 𑀦𑀯𑀥𑀸, 𑀅𑀝𑁆𑀞𑀥𑀸 𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀯𑀢𑁆𑀣𑀼𑀭𑀽𑀧𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺 𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀯𑀢𑁆𑀣𑀼𑀭𑀽𑀧𑀁 𑀲𑁂𑀲𑀭𑀽𑀧𑀲𑁆𑀲 𑀢𑁂𑀳𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀭𑀳𑀺𑀢𑁂𑀳𑀺 𑀅𑀝𑁆𑀞𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀦 𑀏𑀓𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 ¶ 𑀓𑀫𑁆𑀫𑀚𑀭𑀽𑀧𑀲𑁆𑀲 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀯𑀢𑁆𑀢𑀺𑀬𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀭𑀽𑀧𑀪𑀯𑁂 𑀯𑀺𑀜𑁆𑀜𑀸𑀡𑀁 𑀦𑀸𑀫𑀲𑁆𑀲𑁂𑀯, 𑀅𑀲𑀜𑁆𑀜𑀺𑀪𑀯𑁂 𑀭𑀽𑀧𑀲𑁆𑀲𑁂𑀯, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀓𑀢𑀦𑁆𑀢𑀺.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸 ¶ 𑀲𑀴𑀸𑀬𑀢𑀦𑀧𑀤𑁂 𑀧𑀦 𑀦𑀸𑀫𑀁 𑀯𑀺𑀧𑀸𑀓𑀪𑀽𑀢𑀁, 𑀅𑀯𑀺𑀧𑀸𑀓𑀪𑀽𑀢𑀜𑁆𑀘 𑀅𑀭𑀽𑀧𑀪𑀯𑁂 𑀙𑀝𑁆𑀞𑀸𑀬𑀢𑀦𑀲𑁆𑀲 𑀅𑀯𑀓𑀁𑀲𑀢𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀬𑀣𑀸𑀭𑀳𑀁 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀭𑁂𑀲𑀁 𑀧𑀦𑁂𑀢𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀺𑀬𑀁 𑀘𑀢𑀼𑀫𑀳𑀸𑀪𑀽𑀢𑀲𑀳𑀸𑀬𑀁 𑀳𑀼𑀢𑁆𑀯𑀸 𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦 𑀘𑀸𑀢𑀺 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀯𑀢𑁆𑀢𑁂 𑀧𑀦 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀺𑀧𑀸𑀓𑀫𑀯𑀺𑀧𑀸𑀓𑀫𑁆𑀧𑀺 𑀦𑀸𑀫𑀁 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯 𑀦𑀸𑀫𑀫𑁂𑀯 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀁 𑀧𑀦 𑀯𑀢𑁆𑀣𑀼𑀪𑀽𑀢𑀁 𑀧𑀝𑀺𑀲𑀦𑁆𑀥𑀺𑀬𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀫𑀳𑀸𑀪𑀽𑀢𑀭𑀽𑀧𑀁 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀣𑀸 𑀆𑀳𑀸𑀭𑁄 𑀆𑀳𑀸𑀭𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦. 𑀲𑁄 𑀘 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀧𑀯𑀢𑁆𑀢𑁂𑀬𑁂𑀯, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀸𑀦𑀺 𑀧𑀦 𑀧𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀯𑀢𑁆𑀢𑁂𑀬𑁂𑀯, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀣𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀭𑀳𑀺𑀢𑀫𑀦𑀸𑀬𑀢𑀦𑀲𑁆𑀲 𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀁 𑀭𑀽𑀧𑀫𑁂𑀯 𑀙𑀝𑁆𑀞𑀸𑀬𑀢𑀦𑀲𑁆𑀲, 𑀲𑀴𑀸𑀬𑀢𑀦𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀦𑁆𑀥𑀢𑁆𑀢𑀬𑀯𑀢𑁆𑀣𑀼𑀭𑀽𑀧𑀲𑀗𑁆𑀔𑀸𑀢𑀁 𑀧𑀦 𑀦𑀸𑀫𑀭𑀽𑀧𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀯𑀲𑁂𑀦 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀁 ¶ 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀬𑀣𑀸𑀭𑀳𑀁 𑀙𑀝𑁆𑀞𑀸𑀬𑀢𑀦𑀲𑁆𑀲, 𑀲𑀴𑀸𑀬𑀢𑀦𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑀧𑀤𑁂 𑀧𑀦 𑀙𑀝𑁆𑀞𑀸𑀬𑀢𑀦𑀁 𑀯𑀺𑀧𑀸𑀓𑀁, 𑀅𑀯𑀺𑀧𑀸𑀓𑀜𑁆𑀘 𑀲𑀩𑁆𑀩𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀲𑁆𑀲 ¶ 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀦𑀯𑀥𑀸, 𑀅𑀝𑁆𑀞𑀥𑀸 𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀬𑀣𑀸𑀓𑁆𑀓𑀫𑀁 𑀧𑀯𑀢𑁆𑀢𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸, 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀢𑁂𑀲𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀢𑀺𑀥𑀸. 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀧𑀦 𑀢𑀸𑀦𑀺, 𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘 𑀢𑀣𑀸 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑀢𑁆𑀢𑁂𑀦 𑀘𑀸𑀢𑀺 𑀩𑀳𑀼𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀙𑀩𑁆𑀩𑀺𑀥𑀲𑁆𑀲𑀸𑀧𑀺 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀧𑀤𑁂 𑀲𑀩𑁆𑀩𑁄𑀧𑀺 𑀨𑀲𑁆𑀲𑁄 𑀲𑀳𑀚𑀸𑀢𑀸𑀦𑀁 𑀯𑁂𑀤𑀦𑀸𑀦𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀅𑀝𑁆𑀞𑀥𑀸, 𑀲𑀢𑁆𑀢𑀥𑀸 𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀲𑀳𑀚𑀸𑀢𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯𑀸𑀢𑀺.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀧𑀤𑁂 𑀯𑀺𑀧𑀸𑀓𑀯𑁂𑀤𑀦𑀸 𑀅𑀦𑀼𑀲𑀬𑀧𑀢𑀺𑀢𑀸𑀬 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑀯𑀲𑁂𑀦, 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑁋

𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀺, 𑀲𑀼𑀔𑀻 𑀪𑀺𑀬𑁆𑀬𑁄𑀧𑀺 𑀇𑀘𑁆𑀙𑀢𑀺;

𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸;

𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀢𑀲𑁆𑀫𑀸, 𑀳𑁄𑀦𑁆𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪);

𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀧𑀤𑁂 𑀢𑀡𑁆𑀳𑀸 𑀅𑀲𑀳𑀚𑀸𑀢𑀸 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦 𑀘, 𑀲𑀳𑀚𑀸𑀢𑀸 𑀧𑀦 𑀓𑀸𑀫𑀼𑀧𑀸𑀤𑀸𑀦𑀯𑀚𑁆𑀚𑀺𑀢𑀸𑀦𑀁 𑀢𑀺𑀡𑁆𑀡𑀁 𑀳𑁂𑀢𑀼𑀲𑀳𑀚𑀸𑀢 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀉𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀪𑀯𑀧𑀤𑁂 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁 𑀅𑀲𑀳𑀚𑀸𑀢𑀲𑁆𑀲 𑀲𑀩𑁆𑀩𑀓𑀫𑁆𑀫𑀪𑀯𑀲𑁆𑀲 𑀘𑁂𑀯 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀳𑀚𑀸𑀢𑀲𑁆𑀲 𑀧𑀦 𑀓𑀫𑁆𑀫𑀪𑀯𑀲𑁆𑀲 𑀳𑁂𑀢𑀼𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺.

𑀪𑀯𑀧𑀘𑁆𑀘𑀬𑀸 ¶ 𑀚𑀸𑀢𑀺𑀧𑀤𑁂 𑀪𑀯𑁄𑀢𑀺 𑀓𑀫𑁆𑀫𑀪𑀯𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀚𑀸𑀢𑀺𑀬𑀸 𑀓𑀫𑁆𑀫𑀧𑀘𑁆𑀘𑀬𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀸𑀤𑀺𑀧𑀤𑁂 𑀚𑀸𑀢𑀺 𑀧𑀦 𑀚𑀭𑀸𑀫𑀭𑀡𑀸𑀦𑀁, 𑀲𑁄𑀓𑀸𑀤𑀻𑀦𑀜𑁆𑀘 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑀫𑀢𑁆𑀢𑀢𑁄 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀘𑁆𑀘𑀬𑀦𑀬𑁄.

𑀓𑀸𑀭𑀓𑀸𑀤𑀻𑀳𑀺 𑀲𑀼𑀜𑁆𑀜𑀢𑁄 𑀧𑀦𑁂𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀬𑀲𑁆𑀫𑀸 𑀏𑀯𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀸 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀅𑀯𑀺𑀘𑁆𑀙𑀺𑀦𑁆𑀦𑀸 𑀅𑀦𑀸𑀤𑀺𑀓𑀸 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁄 𑀅𑀜𑁆𑀜𑁂𑀦 𑀩𑁆𑀭𑀳𑁆𑀫𑀸𑀤𑀺𑀦𑀸 𑀓𑀸𑀭𑀓𑁂𑀦, 𑀧𑀓𑀢𑀺𑀅𑀡𑀼𑀓𑀸𑀮𑀸𑀤𑀺𑀳𑁂𑀢𑀼𑀦𑀸 𑀯𑀸 𑀓𑀸𑀭𑀓𑀯𑁂𑀤𑀓𑀭𑀽𑀧𑁂𑀦 𑀧𑀭𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀦𑀸 𑀯𑀸 𑀭𑀳𑀺𑀢𑀸. 𑀦 𑀘𑁂𑀢𑁂 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑀺, 𑀦 𑀅𑀢𑁆𑀢𑀯𑀦𑁆𑀢𑁄, 𑀲𑀼𑀜𑁆𑀜𑀸 𑀏𑀢𑁂 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀥𑀼𑀯𑀪𑀸𑀯𑁂𑀦 𑀯𑀸 𑀲𑀼𑀪𑀪𑀸𑀯𑁂𑀦 𑀯𑀸 𑀲𑀼𑀔𑀪𑀸𑀯𑁂𑀦 𑀯𑀸𑀢𑀺 𑀅𑀬𑀁 𑀓𑀸𑀭𑀓𑀸𑀤𑀻𑀳𑀺 𑀲𑀼𑀜𑁆𑀜𑀢𑀸.

𑀫𑀽𑀮𑀤𑁆𑀥𑀲𑀦𑁆𑀥𑀺𑀲𑀗𑁆𑀔𑁂𑀧𑀸𑀓𑀸𑀭𑀯𑀝𑁆𑀝𑀯𑀺𑀪𑀸𑀕𑀢𑁄𑀢𑀺 𑀏𑀢𑁆𑀣 𑀫𑀽𑀮𑀢𑁄 𑀢𑀸𑀯 𑀅𑀯𑀺𑀚𑁆𑀚𑀸, 𑀢𑀡𑁆𑀳𑀸 𑀘𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀤𑁆𑀥𑀢𑁄 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸, 𑀲𑀗𑁆𑀔𑀸𑀭𑀸𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀅𑀢𑀻𑀢𑁄 𑀅𑀤𑁆𑀥𑀸, 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀪𑀯𑀸𑀯𑀲𑀸𑀦𑀸𑀦𑀺 𑀅𑀝𑁆𑀞 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸, 𑀚𑀸𑀢𑀺 𑀘𑁂𑀯 𑀚𑀭𑀸𑀫𑀭𑀡𑀜𑁆𑀘𑀸𑀢𑀺 𑀤𑁆𑀯𑁂 𑀅𑀦𑀸𑀕𑀢𑁄 𑀅𑀤𑁆𑀥𑀸𑀢𑀺 𑀢𑀬𑁄 𑀅𑀤𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀥𑀺𑀢𑁄 𑀧𑀦 𑀲𑀗𑁆𑀔𑀸𑀭𑀸𑀦𑀁, 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺, 𑀯𑁂𑀤𑀦𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀦𑁆𑀢𑀭𑀸 𑀏𑀓𑁄 𑀨𑀮𑀳𑁂𑀢𑀼𑀲𑀦𑁆𑀥𑀺, 𑀪𑀯𑀲𑁆𑀲 ¶ 𑀘 𑀚𑀸𑀢𑀺𑀬𑀸 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺 𑀘𑀸𑀢𑀺 𑀢𑀬𑁄 𑀲𑀦𑁆𑀥𑀻 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀔𑁂𑀧𑀢𑁄 𑀧𑀦 𑀲𑀦𑁆𑀥𑀻𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀯𑀯𑀢𑁆𑀣𑀺𑀢𑀸 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀏𑀓𑁄 𑀲𑀗𑁆𑀔𑁂𑀧𑁄, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀤𑀼𑀢𑀺𑀬𑁄, 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀢𑀢𑀺𑀬𑁄, 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀘𑀢𑀼𑀢𑁆𑀣𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀯𑁂𑀤𑀺𑀢𑀩𑁆𑀩𑀸.

𑀆𑀓𑀸𑀭𑀢𑁄 𑀧𑀦𑁂𑀢𑁆𑀣 𑁋

𑀅𑀢𑀻𑀢𑁂 𑀳𑁂𑀢𑀼𑀬𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁;

𑀇𑀤𑀸𑀦𑀺 𑀳𑁂𑀢𑀼𑀬𑁄 𑀧𑀜𑁆𑀘, 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺. 𑁋

𑀏𑀯𑀁 ¶ 𑀯𑀻𑀲𑀢𑀺 𑀆𑀓𑀸𑀭𑀸 𑀳𑁄𑀦𑁆𑀢𑀺.

𑀏𑀢𑁆𑀣 𑀳𑀺 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸, 𑀢𑁂𑀲𑀁 𑀕𑀳𑀡𑁂𑀦 𑀢𑀤𑀯𑀺𑀦𑀸𑀪𑀸𑀯𑀢𑁄 𑀕𑀳𑀺𑀢𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑀻𑀢𑁂 𑀳𑁂𑀢𑀼𑀬𑁄 𑀦𑀸𑀫, 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁 𑀦𑀸𑀫, 𑀲𑀭𑀽𑀧𑀢𑁄 𑀧𑀦 𑀯𑀼𑀢𑁆𑀢𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸, 𑀢𑁂𑀲𑀁 𑀕𑀳𑀡𑁂𑀦 𑀢𑀤𑀯𑀺𑀦𑀸𑀪𑀸𑀯𑀢𑁄 𑀕𑀳𑀺𑀢𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀢𑀺 𑀇𑀫𑁂 𑀧𑀜𑁆𑀘 𑀇𑀤𑀸𑀦𑀺 𑀳𑁂𑀢𑀼𑀬𑁄 𑀦𑀸𑀫. 𑀚𑀸𑀢𑀺𑀆𑀤𑀺𑀅𑀧𑀤𑁂𑀲𑁂𑀦 𑀯𑀼𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀁 𑀦𑀸𑀫𑀸𑀢𑀺 𑀏𑀯𑀁 𑀯𑀻𑀲𑀢𑀺 𑀆𑀓𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀝𑁆𑀝𑀢𑁄 𑀧𑀦𑁂𑀢𑁆𑀣 𑀲𑀗𑁆𑀔𑀸𑀭𑀪𑀯𑀸 𑀓𑀫𑁆𑀫𑀯𑀝𑁆𑀝𑀁, 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸 𑀓𑀺𑀮𑁂𑀲𑀯𑀝𑁆𑀝𑀁, 𑀲𑁂𑀲𑀸𑀦𑀺 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀢𑀻𑀡𑀺 𑀯𑀝𑁆𑀝𑀸𑀦𑀺 𑀳𑁄𑀦𑁆𑀢𑀺. 𑀬𑀸𑀯 𑀘 𑀢𑁂𑀲𑀼 𑀓𑀺𑀮𑁂𑀲𑀯𑀝𑁆𑀝𑀁 𑀅𑀭𑀺𑀬𑀫𑀕𑁆𑀕𑁂𑀦 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀇𑀤𑀁 𑀪𑀯𑀘𑀓𑁆𑀓𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀢𑁆𑀣 𑀫𑀽𑀮𑀤𑁆𑀥𑀲𑀦𑁆𑀥𑀺𑀲𑀗𑁆𑀔𑁂𑀧𑀸𑀓𑀸𑀭𑀯𑀝𑁆𑀝𑀯𑀺𑀪𑀸𑀕𑁄.

𑀯𑀸𑀭𑀡𑁄𑀧𑀫𑀢𑁄𑀢𑀺 ¶ 𑀏𑀢𑁆𑀣 𑀯𑀸𑀭𑀡𑀢𑁄 𑀢𑀸𑀯 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀇𑀤𑀫𑀳𑁂𑀢𑀼𑀓𑀯𑀺𑀲𑀫𑀳𑁂𑀢𑀼𑀓𑀤𑀲𑁆𑀲𑀦𑀦𑀺𑀯𑀸𑀭𑀡𑀁, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀉𑀘𑁆𑀙𑁂𑀤𑀅𑀢𑁆𑀢𑀲𑀗𑁆𑀓𑀦𑁆𑀢𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀁, ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀅𑀢𑁆𑀢𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀯𑀢𑁆𑀣𑀼𑀪𑁂𑀤𑀤𑀲𑁆𑀲𑀦𑀢𑁄 𑀖𑀦𑀲𑀜𑁆𑀜𑀸𑀦𑀺𑀯𑀸𑀭𑀡𑀁, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀺 𑀅𑀢𑁆𑀢𑀸 𑀧𑀲𑁆𑀲𑀢𑀺…𑀧𑁂… 𑀯𑀺𑀚𑀸𑀦𑀸𑀢𑀺 𑀨𑀼𑀲𑀢𑀺, 𑀯𑁂𑀤𑀬𑀢𑀺, 𑀢𑀡𑁆𑀳𑀺𑀬𑀢𑀺, 𑀉𑀧𑀸𑀤𑀺𑀬𑀢𑀺, 𑀪𑀯𑀢𑀺, 𑀚𑀸𑀬𑀢𑀺, 𑀚𑀻𑀬𑀢𑀺, 𑀫𑀻𑀬𑀢𑀻𑀢𑀺 𑀏𑀯𑀫𑀸𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀦𑁆𑀢𑀺 𑀇𑀤𑀫𑁂𑀢𑁆𑀣 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑀺𑀯𑀸𑀭𑀡𑀁.

𑀉𑀧𑀫𑀸𑀢𑁄 𑀧𑀦𑁂𑀢𑁆𑀣 𑀅𑀦𑁆𑀥𑁄 𑀯𑀺𑀬 𑀅𑀯𑀺𑀚𑁆𑀚𑀸, 𑀢𑀲𑁆𑀲 𑀉𑀧𑀓𑁆𑀔𑀮𑀦𑀁 𑀯𑀺𑀬 𑀲𑀗𑁆𑀔𑀸𑀭𑀸, 𑀧𑀢𑀦𑀁 𑀯𑀺𑀬 𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀕𑀡𑁆𑀟𑀧𑀸𑀢𑀼𑀪𑀸𑀯𑁄 𑀯𑀺𑀬 𑀦𑀸𑀫𑀭𑀽𑀧𑀁, 𑀢𑀲𑁆𑀲 𑀕𑀡𑁆𑀟𑀪𑁂𑀤𑀧𑀻𑀴𑀓𑀸 𑀯𑀺𑀬 𑀲𑀴𑀸𑀬𑀢𑀦𑀁, 𑀢𑀲𑁆𑀲 𑀲𑀗𑁆𑀖𑀝𑁆𑀝𑀦𑀁 𑀯𑀺𑀬 𑀨𑀲𑁆𑀲𑁄, 𑀢𑀚𑁆𑀚𑀦𑀺𑀢𑀤𑀼𑀓𑁆𑀔𑀁 𑀯𑀺𑀬 𑀯𑁂𑀤𑀦𑀸, 𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁄 𑀯𑀺𑀬 𑀢𑀡𑁆𑀳𑀸, 𑀅𑀲𑀧𑁆𑀧𑀸𑀬𑀕𑁆𑀕𑀳𑀡𑀁 𑀯𑀺𑀬 𑀉𑀧𑀸𑀤𑀸𑀦𑀁, 𑀅𑀲𑀧𑁆𑀧𑀸𑀬𑀸𑀮𑁂𑀧𑀦𑀁 𑀯𑀺𑀬 𑀪𑀯𑁄, 𑀢𑁂𑀦 𑀕𑀡𑁆𑀟𑀯𑀺𑀓𑀸𑀭𑀧𑀸𑀢𑀼𑀪𑀸𑀯𑁄 𑀯𑀺𑀬 𑀚𑀸𑀢𑀺, 𑀢𑀩𑁆𑀩𑀺𑀓𑀸𑀭𑀪𑁂𑀤𑁄 𑀯𑀺𑀬 𑀚𑀭𑀸𑀫𑀭𑀡𑀁. 𑀬𑀣𑀸𑀲𑀪𑀸𑀯𑀤𑀲𑁆𑀲𑀦𑀦𑀺𑀯𑀸𑀭𑀡𑀸𑀤𑀺𑀢𑁄 𑀯𑀸 𑀏𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀅𑀓𑁆𑀔𑀺𑀧𑀝𑀮𑀸𑀤𑀺 𑀉𑀧𑀫𑀸𑀳𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀉𑀧𑀫𑀸.

𑀕𑀫𑁆𑀪𑀻𑀭𑀦𑀬𑀪𑁂𑀤𑀢𑁄𑀢𑀺 𑀏𑀢𑁆𑀣 𑀕𑀫𑁆𑀪𑀻𑀭𑀪𑁂𑀤𑁄 𑀢𑀸𑀯 𑀇𑀫𑁂𑀲𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂 𑀳𑀺 𑀅𑀯𑀺𑀚𑁆𑀚𑀸𑀤𑀬𑁄 𑀥𑀫𑁆𑀫𑀸 𑀬𑁂𑀦𑀸𑀓𑀸𑀭𑁂𑀦 𑀬𑀤𑀯𑀢𑁆𑀣𑀸 𑀘 𑀲𑀗𑁆𑀔𑀸𑀭𑀸𑀤𑀻𑀦𑀁 ¶ 𑀨𑀮𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑁄 𑀦𑁂𑀲𑀁 𑀧𑀘𑁆𑀘𑀬𑀝𑁆𑀞𑁄 𑀤𑀼𑀭𑀯𑀩𑁄𑀥𑀢𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀕𑀫𑁆𑀪𑀻𑀭𑀢𑀸. 𑀥𑀫𑁆𑀫𑁄𑀢𑀺 𑀳𑁂𑀢𑀼 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦) 𑀯𑀘𑀦𑀢𑁄. 𑀚𑀭𑀸𑀫𑀭𑀡𑀸𑀤𑀻𑀦𑀁 𑀨𑀮𑀸𑀦𑀁 𑀚𑀸𑀢𑀺𑀆𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀤𑀼𑀭𑀯𑀩𑁄𑀥𑀢𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀁 𑀅𑀢𑁆𑀣𑀕𑀫𑁆𑀪𑀻𑀭𑀢𑀸. 𑀅𑀢𑁆𑀣𑁄𑀢𑀺 𑀨𑀮𑀁 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 ¶ 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦) 𑀯𑀘𑀦𑀢𑁄. 𑀢𑁂𑀲𑀁 𑀧𑀦 𑀳𑁂𑀢𑀽𑀦𑀁, 𑀨𑀮𑀸𑀦𑀜𑁆𑀘 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀅𑀯𑀺𑀧𑀭𑀻𑀢𑀢𑁄 𑀤𑁂𑀲𑀦𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀕𑁄𑀘𑀭𑀢𑁄 𑀕𑀫𑁆𑀪𑀻𑀭𑀸𑀢𑀺 𑀅𑀬𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸. 𑀬𑁄 𑀧𑀦𑁂𑀲𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀤𑀲𑁆𑀲𑀦𑀸𑀬𑀽𑀳𑀦𑀸𑀤𑀺𑀲𑀪𑀸𑀯𑁄, 𑀲𑁄 𑀫𑀦𑁆𑀤𑀧𑀜𑁆𑀜𑁂𑀳𑀺 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑁄𑀢𑀺 𑀅𑀬𑀁 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀢𑀺 𑀅𑀬𑀫𑁂𑀢𑁆𑀣 𑀕𑀫𑁆𑀪𑀻𑀭𑀪𑁂𑀤𑁄.

𑀦𑀬𑀪𑁂𑀤𑁄 𑀧𑀦𑁂𑀢𑁆𑀣 𑀏𑀓𑀢𑁆𑀢𑀦𑀬𑁄 𑀦𑀸𑀦𑀢𑁆𑀢𑀦𑀬𑁄 𑀅𑀩𑁆𑀬𑀸𑀧𑀸𑀭𑀦𑀬𑁄 𑀏𑀯𑀁𑀥𑀫𑁆𑀫𑀢𑀸𑀦𑀬𑁄𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀦𑀬𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀪𑀸𑀯𑁂𑀦 𑀭𑀼𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺 𑀯𑀺𑀬 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀏𑀓𑀢𑁆𑀢𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀸𑀯𑀩𑁄𑀥𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀏𑀓𑀢𑁆𑀢𑀕𑁆𑀕𑀳𑀡𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀦 𑀬𑀣𑀸𑀲𑀓𑀁 𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁 𑀦𑀸𑀦𑀢𑁆𑀢𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀦𑀯𑀦𑀯𑀸𑀦𑀁 𑀉𑀧𑁆𑀧𑀸𑀤𑀤𑀲𑁆𑀲𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀏𑀓𑀲𑀦𑁆𑀢𑀸𑀦𑀧𑀢𑀺𑀢𑀲𑁆𑀲 𑀪𑀺𑀦𑁆𑀦𑀲𑀦𑁆𑀢𑀸𑀦𑀲𑁆𑀲𑁂𑀯 𑀦𑀸𑀦𑀢𑁆𑀢𑀕𑁆𑀕𑀳𑀡𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀬 𑀧𑀦 ‘‘𑀲𑀗𑁆𑀔𑀸𑀭𑀸 𑀫𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸, 𑀲𑀗𑁆𑀔𑀸𑀭𑀸𑀦𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀅𑀫𑁆𑀳𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀩𑁆𑀬𑀸𑀧𑀸𑀭𑀸𑀪𑀸𑀯𑁄 𑀅𑀩𑁆𑀬𑀸𑀧𑀸𑀭𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄𑀓𑀸𑀭𑀓𑀲𑁆𑀲 𑀅𑀪𑀸𑀯𑀸𑀯𑀩𑁄𑀥𑀢𑁄 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀬𑁄 𑀅𑀲𑀢𑀺𑀧𑀺 𑀩𑁆𑀬𑀸𑀧𑀸𑀭𑁂 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑀦𑀺𑀬𑀫𑀲𑀺𑀤𑁆𑀥𑁄 𑀳𑁂𑀢𑀼𑀪𑀸𑀯𑁄, 𑀢𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀳𑀺 ¶ 𑀧𑀦 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁𑀬𑁂𑀯 𑀲𑀫𑁆𑀪𑀯𑁄 𑀔𑀻𑀭𑀸𑀤𑀻𑀳𑀺 𑀤𑀥𑀺𑀆𑀤𑀻𑀦𑀁 𑀯𑀺𑀬, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀅𑀬𑀁 𑀏𑀯𑀁𑀥𑀫𑁆𑀫𑀢𑀸𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀢𑁄 𑀨𑀮𑀸𑀯𑀩𑁄𑀥𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁, 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀜𑁆𑀘 𑀧𑀚𑀳𑀢𑀺, 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀁 𑀨𑀮𑀧𑁆𑀧𑀯𑀢𑁆𑀢𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 ¶ 𑀬𑀢𑁄 𑀓𑀼𑀢𑁄𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀲𑀫𑁆𑀪𑀯𑀕𑁆𑀕𑀳𑀡𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁 𑀘𑁂𑀯 𑀦𑀺𑀬𑀢𑀯𑀸𑀤𑀜𑁆𑀘 𑀉𑀧𑀸𑀤𑀺𑀬𑀢𑀻𑀢𑀺 𑀅𑀬𑀫𑁂𑀢𑁆𑀣 𑀦𑀬𑀪𑁂𑀤𑁄𑀢𑀺 𑀏𑀯𑀁 𑀯𑀺𑀚𑀸𑀦𑀻𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥𑀦𑁆𑀢𑀺 𑀤𑀻𑀧𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀏𑀢𑁆𑀣 𑀤𑁆𑀯𑁂 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑀺𑀕𑁄𑀘𑀭𑁄𑀧𑀺 𑀲𑀢𑀺𑀧𑀺. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁦𑁮) 𑀳𑀺 𑀲𑀢𑀺𑀕𑁄𑀘𑀭𑁄 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀢𑁆𑀣𑁄 𑀧𑀢𑀺𑀝𑁆𑀞𑀸𑀢𑀺 𑀢𑀲𑁆𑀫𑀺𑀦𑁆𑀢𑀺 𑀧𑀝𑁆𑀞𑀸𑀦𑀁, 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀧𑀥𑀸𑀦𑀁 𑀞𑀸𑀦𑀦𑁆𑀢𑀺 𑀯𑀸 𑀧𑀝𑁆𑀞𑀸𑀦𑀁, 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁪𑁭) 𑀧𑀦 𑀲𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀢𑀺 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀢𑁆𑀣𑁂𑀦 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀲𑀸 𑀘 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀁, 𑀇𑀤𑀫𑀺𑀥 𑀅𑀥𑀺𑀧𑁆𑀧𑁂𑀢𑀁. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁? 𑀲𑀢𑀺𑀬𑀸 𑀩𑀳𑀼𑀢𑁆𑀢𑀸. 𑀆𑀭𑀫𑁆𑀫𑀡𑀪𑁂𑀤𑁂𑀦 𑀳𑀺 𑀩𑀳𑀼𑀓𑀸 𑀢𑀸 𑀲𑀢𑀺𑀬𑁄.

𑀇𑀥𑀸𑀢𑀺 ¶ 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀢𑁂𑀦 𑀅𑀚𑁆𑀛𑀢𑁆𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑀘𑀢𑀼𑀘𑀢𑁆𑀢𑀸𑀮𑀻𑀲𑀯𑀺𑀥𑀲𑀢𑀺𑀧𑀝𑁆𑀞𑀸𑀦𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀁 𑀲𑀸𑀲𑀦𑀫𑁂𑀯, 𑀦𑀸𑀜𑁆𑀜𑀁 𑀲𑀸𑀲𑀦𑀦𑁆𑀢𑀺 𑀤𑀻𑀧𑁂𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀳𑀺 𑀅𑀜𑁆𑀜𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪; 𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧).

𑀪𑀺𑀓𑁆𑀔𑀽𑀢𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑀓𑁄. 𑀢𑁂𑀦 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑁄 𑀤𑁂𑀯𑀮𑁄𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑀺𑀧𑀝𑁆𑀞𑀸𑀦𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀯𑀕𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀧𑀺 𑀦𑀺𑀲𑀺𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀧𑀺 𑀤𑁂𑀯𑁄 𑀯𑀸 𑀳𑁄𑀢𑀼 𑀫𑀦𑀼𑀲𑁆𑀲𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸, 𑀲𑀁𑀲𑀸𑀭𑁂 𑀪𑀬𑀦𑁆𑀢𑀺 𑀲𑀫𑁆𑀫𑀸 𑀇𑀓𑁆𑀔𑀫𑀸𑀦𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 ¶ 𑀧𑀝𑀺𑀧𑀚𑁆𑀚𑀫𑀸𑀦𑁄𑀯 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀺, 𑀦𑀸𑀜𑁆𑀜𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀳 ‘‘𑀅𑀮𑀗𑁆𑀓𑀢𑁄 𑀘𑁂𑀧𑀻’’𑀢𑀺 (𑀥. 𑀧. 𑁧𑁪𑁨).

𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁. 𑀓𑀸𑀬𑁂𑀢𑀺 𑀏𑀢𑁆𑀣 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄. 𑀓𑁂 𑀆𑀬𑀦𑁆𑀢𑀺? 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄, 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀅𑀣 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁, 𑀓𑁂𑀲𑀸𑀤𑀻𑀦𑀜𑁆𑀘 𑀲𑀫𑀽𑀳𑀝𑁆𑀞𑁂𑀦𑀧𑀺 𑀓𑀸𑀬𑁄, 𑀭𑀽𑀧𑀓𑀸𑀬𑁄, 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀓𑀸𑀬𑁂𑀢𑀺 𑀅𑀢𑁆𑀣𑁄. 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑁄. ‘‘𑀓𑀸𑀬𑁂’’𑀢𑀺 𑀘 𑀯𑀢𑁆𑀯𑀸 𑀧𑀼𑀦 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀤𑀼𑀢𑀺𑀬𑀓𑀸𑀬-𑀕𑁆𑀕𑀳𑀡𑀁 ‘‘𑀏𑀯𑀁 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀻, 𑀦 𑀘 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀦𑀕𑀭𑀸𑀯𑀬𑀯𑀓𑀤𑀮𑀺𑀓𑁆𑀔𑀦𑁆𑀥𑀯𑀺𑀪𑀸𑀕𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀬𑀣𑀸𑀓𑁆𑀓𑀫𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀻 𑀏𑀯𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑀣𑀸 𑀳𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑁄, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀦 𑀤𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂𑀬𑁂𑀯 𑀧𑀦 𑀩𑀸𑀮𑀸 𑀢𑀣𑀸 𑀢𑀣𑀸 𑀲𑀼𑀪𑀸𑀤𑀺𑀢𑁄 𑀘 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀅𑀬𑀁 ¶ 𑀧𑀦 𑀬𑁄𑀕𑀻 𑀢𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀻 𑀏𑀯 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀸𑀲𑀼𑀪𑀸𑀦𑀼𑀧𑀲𑁆𑀲𑀻 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑁆𑀯𑀸𑀬𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑁄 𑀘𑀼𑀤𑁆𑀤𑀲𑀯𑀺𑀥𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀢𑁄 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺, 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑁂𑀦𑀸𑀕𑀢𑀁 𑀲𑀭𑀻𑀭𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀢𑀫𑀸𑀦𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀺𑀤𑁆𑀥𑀸 𑀓𑀸𑀬𑁂𑀢𑀺 𑀧𑀭𑀲𑁆𑀲 𑀓𑀸𑀬𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀬𑁂𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀧𑀭𑀲𑁆𑀲 𑀓𑀸𑀬𑁂. 𑀓𑀸𑀮𑁂𑀦 𑀳𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀓𑀸𑀬𑁂𑀲𑀼𑀧𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀸𑀮𑁄 𑀏𑀢𑁆𑀣 𑀓𑀣𑀺𑀢𑁄. 𑀆𑀢𑀸𑀧𑀻𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸. 𑀲𑁄 𑀳𑀺 𑀬𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀢𑁄 𑀆𑀢𑀸𑀧𑁄 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁, 𑀲𑁄 𑀘𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀆𑀢𑀸𑀧𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀧𑀚𑀸𑀦𑁄𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀺𑀫𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀯𑀻𑀭𑀺𑀬𑁂𑀦 𑀘 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸 𑀯𑀺𑀦𑀬𑀺𑀢𑁆𑀯𑀸. 𑀮𑁄𑀓𑁂𑀢𑀺 𑀬𑁆𑀯𑀸𑀬𑀁 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀲𑁆𑀯𑁂𑀯 𑀇𑀥 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀦𑀸𑀫. 𑀯𑀺𑀪𑀗𑁆𑀕𑁂 𑀧𑀦 𑀬𑀲𑁆𑀫𑀸 𑀭𑀽𑀧𑀓𑀸𑀬𑁂 ¶ 𑀧𑀳𑀻𑀦𑀅𑀪𑀺𑀚𑁆𑀛𑀸𑀤𑀬𑁄 𑀯𑁂𑀤𑀦𑀸𑀤𑀻𑀲𑀼𑀧𑀺 𑀧𑀳𑀻𑀬𑀦𑁆𑀢𑀺 𑀏𑀯, 𑀢𑀲𑁆𑀫𑀸 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 ‘‘𑀮𑁄𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀁 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀁 𑀯𑀺𑀦𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀲 𑀘 𑀦𑀻𑀯𑀭𑀡𑁂𑀲𑀼 𑀩𑀮𑀯𑀥𑀫𑁆𑀫𑀤𑁆𑀯𑀬𑀲𑁆𑀲 𑀧𑀳𑀸𑀦𑀤𑀲𑁆𑀲𑀦𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀫𑁆𑀧𑀺 𑀧𑀳𑀸𑀦𑀁 𑀯𑀼𑀢𑁆𑀢𑀁𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁂𑀦 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀬𑀣𑀸𑀓𑁆𑀓𑀫𑀁 𑀓𑀸𑀬𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀫𑀽𑀮𑀸𑀦𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀸𑀦𑀁, 𑀅𑀢𑁆𑀢𑀅𑀪𑀺𑀭𑀢𑀺𑀢𑀤𑀲𑀼𑀪𑀸𑀓𑀸𑀭𑀸𑀤𑀺𑀪𑀸𑀯𑀦𑀸𑀦𑀪𑀺𑀭𑀢𑀻𑀦𑀁, 𑀅𑀪𑀽𑀢𑀕𑀼𑀡𑀧𑀓𑁆𑀔𑁂𑀧𑀪𑀽𑀢𑀤𑁄𑀲𑀸𑀧𑀦𑀬𑀦𑀸𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀢𑁂𑀦 𑀬𑁄𑀕𑀸𑀯𑀘𑀭𑀲𑁆𑀲 𑀬𑁄𑀕𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀨𑀮𑀁, 𑀬𑁄𑀕𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺.

𑀅𑀚𑁆𑀛𑀢𑁆𑀢𑀁 𑀯𑁂𑀤𑀦𑀸𑀲𑀽𑀢𑀺𑀆𑀤𑀻𑀲𑀼𑀧𑀺 𑀅𑀚𑁆𑀛𑀢𑁆𑀢𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀧𑀦 𑀯𑁂𑀤𑀦𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀮𑁄𑀓𑀺𑀬𑀸, 𑀢𑀣𑀸 𑀘𑀺𑀢𑁆𑀢𑀁, 𑀥𑀫𑁆𑀫𑀸 𑀘, 𑀢𑁂𑀲𑀁 𑀯𑀺𑀪𑀸𑀕𑁄 𑀯𑀺𑀪𑀗𑁆𑀕𑀦𑀬𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀬𑀣𑀸 𑀯𑁂𑀤𑀦𑀸𑀤𑀬𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺, 𑀲𑁄 𑀦𑀬𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑁂𑀤𑀦𑀸𑀲𑀼 𑀢𑀸𑀯 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄, 𑀤𑀼𑀓𑁆𑀔𑀸 𑀲𑀮𑁆𑀮𑀢𑁄, 𑀇𑀢𑀭𑀸 𑀘 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄’’𑀢𑀺 (𑀲𑀁. 𑀦𑀺. 𑁪.𑁨𑁫𑁩; 𑀇𑀢𑀺𑀯𑀼. 𑁫𑁩).

𑀲𑀩𑁆𑀩𑀸 𑀏𑀯 𑀏𑀢𑀸 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯) 𑀯𑀘𑀦𑀢𑁄. 𑀏𑀯𑀁 𑀅𑀦𑀼𑀧𑀲𑁆𑀲𑀦𑁆𑀢𑁄 𑀧𑀦 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀅𑀦𑀼𑀧𑀲𑁆𑀲𑀦𑁆𑀢𑁄𑀧𑀺 ‘‘𑀇𑀫𑀁 𑀯𑁂𑀤𑀦𑀁 𑀓𑁄 𑀯𑁂𑀤𑀬𑀢𑀺, 𑀓𑀲𑁆𑀲𑀸𑀬𑀁 𑀯𑁂𑀤𑀦𑀸, 𑀓𑀺𑀁 𑀓𑀸𑀭𑀡𑀸𑀬𑀁 𑀯𑁂𑀤𑀦𑀸’’𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀦 𑀓𑁄𑀘𑀺 𑀲𑀢𑁆𑀢𑀸𑀤𑀺𑀓𑁄 𑀯𑁂𑀤𑀬𑀢𑀺, 𑀦 𑀓𑁂𑀲𑀜𑁆𑀘𑀺 𑀲𑀢𑁆𑀢𑀸𑀤𑀻𑀦𑀁 𑀯𑁂𑀤𑀦𑀸, 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀓𑀸𑀭𑀡𑀸 ¶ 𑀧𑀦𑀸𑀬𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺. 𑀅𑀣 𑀯𑀸 𑀲𑀼𑀔𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀤𑀼𑀓𑁆𑀔𑀸𑀤𑀻𑀦𑀁 𑀅𑀲𑀫𑁆𑀪𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 ¶ 𑀲𑁂𑀲𑀘𑀺𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀅𑀦𑀼𑀧𑀲𑁆𑀲𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀘𑀺𑀢𑁆𑀢𑁂𑀲𑀼 𑀅𑀦𑀺𑀘𑁆𑀘𑀢𑀸𑀯𑀲𑁂𑀦, 𑀥𑀫𑁆𑀫𑁂𑀲𑀼 𑀅𑀦𑀢𑁆𑀢𑀢𑀸𑀯𑀲𑁂𑀦 𑀘 𑀅𑀦𑀼𑀧𑀲𑁆𑀲𑀦𑁆𑀢𑁄 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻, 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀘 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦𑁂𑀢𑁆𑀣 𑀦𑀢𑁆𑀣𑀺, 𑀲𑀭𑀡𑀯𑀲𑁂𑀦 𑀘 𑀏𑀓𑀸𑀯 𑀲𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀸𑀢𑀺.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀤𑀼𑀪𑀬𑀓𑀸𑀬𑁂 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀪𑀸𑀯𑀦𑀸𑀯𑀲𑁂𑀦 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑀺𑀢𑀁. 𑀢𑀣𑀸 𑀅𑀚𑁆𑀛𑀢𑁆𑀢𑀸𑀤𑀻𑀲𑀼 𑀧𑀘𑁆𑀘𑁂𑀓𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀯𑀲𑁂𑀦 𑀤𑀼𑀯𑀺𑀥𑀸𑀦𑀁 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀦𑀁 𑀯𑀲𑁂𑀦 𑀤𑀼𑀢𑀺𑀬𑀁, 𑀲𑀭𑀸𑀕𑀯𑀻𑀢𑀭𑀸𑀕𑀲𑀤𑁄𑀲𑀯𑀻𑀢𑀤𑁄𑀲𑀲𑀫𑁄𑀳𑀯𑀻𑀢𑀫𑁄𑀳𑀲𑀁𑀔𑀺𑀢𑁆𑀢𑀯𑀺𑀓𑁆𑀔𑀺𑀢𑁆𑀢𑀫𑀳𑀕𑁆𑀕𑀢𑀅𑀫𑀳𑀕𑁆𑀕𑀢𑀲𑀉𑀢𑁆𑀢𑀭𑀸𑀦𑀼𑀢𑁆𑀢𑀭𑀲𑀫𑀸𑀳𑀺𑀢𑀸𑀲𑀫𑀸𑀳𑀺𑀢𑀯𑀺𑀫𑀼𑀢𑁆𑀢𑀸𑀯𑀺𑀫𑀼𑀢𑁆𑀢𑀪𑁂𑀤𑀢𑁄 𑀲𑁄𑀴𑀲𑀯𑀺𑀥𑁂𑀳𑀺 𑀘𑀺𑀢𑁆𑀢𑀧𑀚𑀸𑀦𑀦𑀯𑀲𑁂𑀦 𑀢𑀢𑀺𑀬𑀁, 𑀧𑀜𑁆𑀘𑀦𑀻𑀯𑀭𑀡𑀸𑀦𑀁, 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸𑀦𑀜𑁆𑀘 𑀲𑀫𑁆𑀪𑀯𑀸𑀲𑀫𑁆𑀪𑀯𑀉𑀧𑁆𑀧𑀸𑀤𑀧𑀳𑀸𑀦𑀧𑀳𑀻𑀦𑀸𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀚𑁆𑀛𑀸𑀦𑀯𑀲𑁂𑀦 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑀺𑀢𑀁. 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀢𑀸𑀯 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀇𑀥 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀯𑁂𑀤𑀦𑀸𑀲𑀼…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁩𑁮𑁦) 𑀏𑀯𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀼𑀢𑁆𑀢𑀦𑀬𑀲𑁆𑀲 𑀯𑀺𑀢𑁆𑀣𑀸𑀭𑁂𑀲𑀼 𑀅𑀝𑁆𑀞𑀲𑀼 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀲𑀢𑀺𑀯𑀲𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂𑀧𑀺 ¶ 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸? 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸…𑀧𑁂… 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀯, 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸𑀯…𑀧𑁂… 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀯. 𑀦 𑀳𑁂𑀢𑀽 𑀅𑀳𑁂𑀢𑀼𑀓𑀸𑀯…𑀧𑁂… 𑀅𑀦𑀼𑀢𑁆𑀢𑀭𑀸 𑀅𑀭𑀡𑀸𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀫𑀺𑀜𑁆𑀜𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀸𑀬𑁂𑀯. 𑀢𑁂𑀲𑀼 𑀘 𑀮𑁄𑀓𑀺𑀬𑀸 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀏𑀯 𑀮𑀩𑁆𑀪𑀦𑁆𑀢𑀺. 𑀅𑀜𑁆𑀜𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀓𑀸𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑁂𑀦 𑀯𑁂𑀤𑀦𑀸𑀤𑀬𑁄𑀢𑀺. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀏𑀓𑀸𑀯 𑀲𑀢𑀺 𑀓𑀸𑀬𑀸𑀤𑀻𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑀲𑀫𑀼𑀘𑁆𑀙𑁂𑀤𑀓𑀢𑀸𑀬 ¶ 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑀺𑀧𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁄.

𑀓𑀫𑀢𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀅𑀦𑀽𑀦𑀸𑀥𑀺𑀓𑀢𑁄𑀧𑀺 𑀘;

𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀜𑁂𑀬𑁆𑀬𑁄, 𑀢𑀢𑁆𑀣 𑀓𑁄𑀲𑀮𑁆𑀮𑀫𑀺𑀘𑁆𑀙𑀢𑀸.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯, 𑀲𑁄𑀧𑀺 𑀧𑀸𑀓𑀝𑀸𑀧𑀸𑀓𑀝𑀯𑀲𑁂𑀦 𑀯𑀼𑀢𑁆𑀢𑁄. 𑀇𑀫𑀸𑀲𑀼 𑀳𑀺 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀦𑁆𑀢𑀺 𑀧𑀞𑀫𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀯𑀼𑀢𑁆𑀢𑀸. 𑀢𑀢𑁄 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁. 𑀢𑀢𑁆𑀣𑀸𑀧𑀺 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑁂𑀤𑀦𑀸 𑀧𑀸𑀓𑀝𑀸𑀢𑀺 𑀅𑀦𑀦𑁆𑀢𑀭𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸, 𑀢𑀢𑁄 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀦𑁆𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀘𑀺𑀢𑁆𑀢𑁂 𑀧𑀸𑀓𑀝𑁂 𑀢𑀦𑁆𑀦𑀺𑀲𑁆𑀲𑀺𑀢𑀸 𑀲𑀼𑀔𑀼𑀫𑀸𑀧𑀺 𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀅𑀦𑁆𑀢𑁂 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀯𑀼𑀢𑁆𑀢𑀸. 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀅𑀦𑀽𑀦𑀸𑀥𑀺𑀓𑀢𑁄𑀢𑀺 𑀏𑀢𑁆𑀣 𑀧𑀦 𑀓𑀲𑁆𑀫𑀸 𑀪𑀕𑀯𑀢𑀸 𑀘𑀢𑁆𑀢𑀸𑀭𑁄𑀯 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀲𑀫𑀣𑀬𑀸𑀦𑀺𑀓𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸𑀦𑀁 𑀫𑀦𑁆𑀤𑀢𑀺𑀓𑁆𑀔𑀯𑀲𑁂𑀦 𑀤𑁆𑀯𑀺𑀥𑀸 𑀧𑀯𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀲𑁂𑀦. 𑀫𑀦𑁆𑀤𑀲𑁆𑀲 𑀳𑀺 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀑𑀴𑀸𑀭𑀺𑀓𑀁 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀲𑀼𑀔𑀼𑀫𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲𑀸𑀧𑀺 𑀫𑀦𑁆𑀤𑀲𑁆𑀲 𑀦𑀸𑀢𑀺𑀧𑁆𑀧𑀪𑁂𑀤𑀕𑀢𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀢𑀺𑀓𑁆𑀔𑀲𑁆𑀲 𑀅𑀢𑀺𑀧𑁆𑀧𑀪𑁂𑀤𑀕𑀢𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀘 𑀫𑀦𑁆𑀤𑀲𑁆𑀲 𑀅𑀓𑀺𑀘𑁆𑀙𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀤𑀼𑀢𑀺𑀬𑀁, 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲𑀸𑀧𑀺 𑀫𑀦𑁆𑀤𑀲𑁆𑀲 𑀢𑀢𑀺𑀬𑀁, 𑀢𑀺𑀓𑁆𑀔𑀲𑁆𑀲 𑀘𑀢𑀼𑀢𑁆𑀣𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸. 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀁 𑀯𑀸 𑀘𑀢𑀼𑀭𑁄𑀖𑀬𑁄𑀕𑀸𑀲𑀯𑀕𑀦𑁆𑀣𑀉𑀧𑀸𑀤𑀸𑀦𑀅𑀕𑀢𑀺𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣𑀜𑁆𑀘 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺 𑀅𑀬𑀫𑁂𑀢𑁆𑀣 𑀅𑀦𑀽𑀦𑀸𑀥𑀺𑀓𑀢𑀸. 𑀏𑀯𑀁 𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀜𑁂𑀬𑁆𑀬𑁄.

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀓𑀸𑀭𑀡𑀧𑁆𑀧𑀥𑀸𑀦𑀸 𑀉𑀧𑀸𑀬𑀧𑁆𑀧𑀥𑀸𑀦𑀸. 𑀬𑁄𑀦𑀺𑀲𑁄 𑀧𑀤𑀳𑀦𑀢𑁄 𑀧𑀭𑀫𑀁 𑀥𑀸𑀦𑀁 𑀧𑀥𑀸𑀦𑀁, 𑀧𑀥𑀸𑀦𑀯𑀻𑀭𑀺𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀝𑀺𑀧𑀦𑁆𑀦𑀓𑁄 𑀪𑀺𑀓𑁆𑀔𑀼. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀦 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑁆𑀙𑀦𑁆𑀤𑀁 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑁂𑀦𑁂𑀯 𑀲𑀳𑀚𑀸𑀢𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀧𑀝𑀺𑀧𑀸𑀝𑀺𑀬𑀸 𑀧𑀦𑁂𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀧𑀤𑀸𑀦𑀺 𑀯𑀻𑀭𑀺𑀬𑀲𑁆𑀲𑁂𑀯 𑀆𑀲𑁂𑀯𑀦𑀸𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 ¶ 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀸𑀬. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀉𑀧𑁆𑀧𑀸𑀤𑀸𑀬𑀸𑀢𑀺 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀸𑀬. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀦𑀲𑁆𑀲𑀦𑀢𑁆𑀣𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀯𑀦𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀯𑀟𑁆𑀠𑀺𑀬𑀸. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀧𑀽𑀭𑀡𑀢𑁆𑀣𑀸𑀬. 𑀲𑁂𑀲𑀁 𑀧𑀤𑀢𑁄 𑀉𑀢𑁆𑀢𑀸𑀦𑀫𑁂𑀯.

𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀅𑀓𑀼𑀲𑀮𑀥𑀫𑁆𑀫𑀸 𑀦𑀸𑀫 𑀦𑀢𑁆𑀣𑀺. 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀦 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀯𑀺𑀧𑀲𑁆𑀲𑀦𑀸𑀤𑀺𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀓𑀼𑀲𑀮𑀸𑀤𑀺𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀧𑀺 𑀅𑀢𑁆𑀣𑀺. 𑀢𑁂𑀲𑀫𑁆𑀧𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑁂 𑀲𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀇𑀢𑁄 𑀧𑀼𑀩𑁆𑀩𑁂 𑀘 𑀆𑀲𑀯𑀓𑁆𑀔𑀬𑀧𑁆𑀧𑀲𑀗𑁆𑀕𑀢𑁄. 𑀏𑀓𑀦𑁆𑀢𑀧𑁆𑀧𑀯𑀢𑁆𑀢𑀲𑀸𑀥𑀓𑀸 𑀢𑁂𑀲𑀁. 𑀢𑀢𑁆𑀣 𑀏𑀓𑀘𑁆𑀘𑀲𑁆𑀲 𑀯𑀢𑁆𑀢𑀕𑀦𑁆𑀣𑀥𑀼𑀢𑀗𑁆𑀕𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀦𑀯𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀘𑁆𑀘𑀧𑁆𑀧𑀬𑀼𑀢𑁆𑀢𑀲𑁆𑀲, 𑀖𑀝𑀢𑁄, 𑀯𑀸𑀬𑀫𑀢𑁄 𑀘 𑀩𑁆𑀭𑀳𑁆𑀫𑀮𑁄𑀓𑀸 𑀆𑀕𑀢𑀢𑁆𑀢𑀸 𑀪𑀯𑀯𑀲𑁂𑀦 𑀓𑀺𑀮𑁂𑀲𑁂𑀲𑀼 𑀅𑀮𑀤𑁆𑀥𑀸𑀲𑁂𑀯𑀦𑀲𑁆𑀲 𑀲𑀢𑁆𑀢𑀲𑁆𑀲 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀢𑁆𑀢𑀸𑀤𑀻𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀼𑀲𑀻𑀢𑀲𑁆𑀲 𑀘𑀭𑀢𑁄 𑀘𑁂𑀯 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀢𑁄 𑀓𑀺𑀮𑁂𑀲𑁂𑀲𑀼 𑀮𑀤𑁆𑀥𑀸𑀲𑁂𑀯𑀦𑀲𑁆𑀲 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁, 𑀲𑀢𑀺𑀯𑁄𑀲𑁆𑀲𑀕𑁆𑀕𑀜𑁆𑀘 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀢𑀸𑀯 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀓𑀘𑁆𑀘𑀲𑁆𑀲 ¶ 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀤𑀺𑀩𑁆𑀩𑀸𑀤𑀺𑀪𑁂𑀤𑀁 𑀫𑀦𑀸𑀧𑀺𑀬𑀁 𑀆𑀭𑀫𑁆𑀫𑀡𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀮𑀪𑀺𑀢𑁆𑀯𑀸 𑀏𑀯𑀁 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀉𑀧𑁆𑀧𑀦𑁆𑀦𑀸𑀦𑀁 ¶ 𑀧𑀸𑀧𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑀑𑀓𑀸𑀲𑀓𑀢𑀪𑀽𑀫𑀺𑀮𑀤𑁆𑀥𑀯𑀲𑁂𑀦, 𑀢𑁂𑀲𑀁 𑀯𑀺𑀪𑀸𑀕𑁄 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀯𑀼𑀢𑁆𑀢𑁄𑀯. 𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀤𑀸𑀘𑀸𑀭𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀅𑀯𑀺𑀓𑁆𑀔𑀫𑁆𑀪𑀺𑀢𑀅𑀲𑀫𑀼𑀕𑁆𑀖𑀸𑀢𑀺𑀢𑀯𑀲𑁂𑀦. 𑀢𑀢𑁆𑀣 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑀑𑀓𑀸𑀲𑀓𑀢𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀦 𑀫𑀕𑁆𑀕𑀸𑀤𑀺𑀯𑀚𑁆𑀛𑀁, 𑀢𑀲𑁆𑀫𑀸 𑀪𑀽𑀫𑀺𑀮𑀤𑁆𑀥𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀅𑀲𑀫𑀼𑀕𑁆𑀖𑀸𑀢𑀺𑀢𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬𑁂𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀓𑀣𑀁 𑀧𑀦 𑀫𑀕𑁆𑀕𑀓𑁆𑀔𑀡𑁂 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀸𑀬 𑀯𑀸𑀬𑀸𑀫𑁄 𑀳𑁄𑀢𑀺, 𑀓𑀣𑀜𑁆𑀘 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀺𑀬𑀸𑀢𑀺? 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀏𑀯. 𑀫𑀕𑁆𑀕𑁄 𑀳𑀺 𑀧𑀯𑀢𑁆𑀢𑀫𑀸𑀦𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀬𑀸 𑀘𑀲𑁆𑀲 𑀧𑀯𑀢𑁆𑀢𑀺, 𑀅𑀬𑀫𑁂𑀯 𑀞𑀺𑀢𑀺 𑀦𑀸𑀫𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦𑁂𑀢𑁆𑀣𑀸𑀧𑀺 𑀏𑀓𑀲𑁆𑀲𑁂𑀯 𑀯𑀻𑀭𑀺𑀬𑀲𑁆𑀲 𑀓𑀺𑀘𑁆𑀘𑀪𑁂𑀤𑀢𑁄 𑀘𑀢𑀼𑀥𑀸 𑀯𑀼𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀯𑀲𑁂𑀦 𑀅𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀲𑀤𑁆𑀥𑀺𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀲𑀼 𑀧𑀦𑁂𑀢𑁂 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀨𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀦 𑀕𑀳𑀺𑀢𑀸. 𑀢𑁂𑀦𑁂𑀯 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 ‘‘𑀓𑀼𑀲𑀮𑀸 𑀏𑀯, 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀏𑀯, 𑀅𑀧𑀘𑀬𑀕𑀸𑀫𑀺𑀦𑁄𑀯, 𑀲𑁂𑀔𑀸𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸. 𑀲𑁂𑀲𑁄 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ ¶ 𑀧𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺 𑀏𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄, 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺𑀧𑀺 𑀇𑀤𑁆𑀥𑀺, 𑀧𑀚𑁆𑀚𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄, 𑀧𑀢𑀺𑀝𑁆𑀞𑀸 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀅𑀢𑁆𑀣𑁄, 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄. 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀏𑀢𑁆𑀣 𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺, 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸, 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀢𑁂𑀦 𑀙𑀦𑁆𑀤𑀲𑀫𑀸𑀥𑀺𑀦𑀸, 𑀧𑀥𑀸𑀦𑀲𑀗𑁆𑀔𑀸𑀭𑁂𑀦 𑀘 𑀉𑀧𑁂𑀢𑀁. 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀦 ‘‘𑀇𑀤𑁆𑀥𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀦𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀁. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀯𑀻𑀫𑀁𑀲𑀸𑀢𑀺 𑀧𑀜𑁆𑀜𑀸. 𑀲𑁂𑀲𑀁 𑀧𑀤𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 𑀢𑁂𑀦 𑀓𑀺𑀁 𑀓𑀣𑀺𑀢𑀁? 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁. 𑀬𑀣𑀸 𑀳𑀺 𑀘𑀢𑀽𑀲𑀼 𑀅𑀫𑀘𑁆𑀘𑀧𑀼𑀢𑁆𑀢𑁂𑀲𑀼 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁂𑀲𑀼 𑀏𑀓𑁄 𑀉𑀧𑀝𑁆𑀞𑀸𑀦𑁂𑀦, 𑀏𑀓𑁄 𑀲𑀽𑀭𑀪𑀸𑀯𑁂𑀦, 𑀏𑀓𑁄 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸, 𑀏𑀓𑁄 𑀫𑀦𑁆𑀢𑀩𑀮𑁂𑀦𑀸𑀢𑀺 𑀏𑀯𑀁 𑀢𑁂 𑀧𑀘𑁆𑀘𑁂𑀓𑀓𑀸𑀭𑀡𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀁 𑀪𑀺𑀓𑁆𑀔𑀽𑀧𑀺 𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀲𑀼 𑀏𑀓𑁂𑀓𑀁 𑀚𑁂𑀝𑁆𑀞𑀁 𑀥𑀼𑀭𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀙𑀦𑁆𑀤𑁄 𑀲𑀫𑀸𑀥𑀺 𑀧𑀥𑀸𑀦𑀲𑀗𑁆𑀔𑀸𑀭𑁄𑀢𑀺 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺, 𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸 𑀏𑀯. 𑀏𑀯𑀁 𑀲𑁂𑀲𑀸𑀥𑀺𑀧𑀢𑀺𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼𑀧𑀺 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 ¶ 𑀛𑀸𑀦𑀯𑀺𑀧𑀲𑁆𑀲𑀦𑀸𑀲𑀼 𑀧𑀼𑀩𑁆𑀩𑀪𑀸𑀕𑁄 𑀇𑀤𑁆𑀥𑀺𑀧𑀸𑀤𑁄. 𑀬𑁄 𑀧𑀝𑀺𑀮𑀸𑀪𑁄, 𑀲𑀸 𑀇𑀤𑁆𑀥𑀺. 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀳𑀺 𑀧𑀼𑀩𑁆𑀩𑀪𑀸𑀕𑀧𑀭𑀺𑀓𑀫𑁆𑀫𑀸𑀦𑀺 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀧𑀞𑀫𑀚𑁆𑀛𑀸𑀦𑀸𑀤𑀬𑁄 𑀇𑀤𑁆𑀥𑀺 𑀦𑀸𑀫. 𑀧𑀞𑀫𑀫𑀕𑁆𑀕𑀸𑀤𑀻𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀧𑀞𑀫𑀫𑀕𑁆𑀕𑀸𑀤𑀬𑁄 𑀇𑀤𑁆𑀥𑀺 𑀦𑀸𑀫. 𑀧𑀝𑀺𑀮𑀸𑀪𑀯𑀲𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀞𑀫𑀚𑁆𑀛𑀸𑀦𑀸𑀤𑀬𑁄 𑀳𑀺 𑀧𑀞𑀫𑀫𑀕𑁆𑀕𑀸𑀤𑀬𑁄 𑀘 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀬𑁄, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄 𑀘 𑀇𑀤𑁆𑀥𑀺 𑀦𑀸𑀫𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 ¶ 𑀧𑀦𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁂𑀦𑁂𑀯 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀣 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀙𑀦𑁆𑀤𑀸𑀤𑀻𑀦𑀁 𑀧𑀤𑀸𑀦𑀁 𑀯𑀺𑀪𑀗𑁆𑀕𑀁 𑀯𑀢𑁆𑀯𑀸 𑀅𑀦𑁆𑀢𑁂 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻𑀢𑀺 𑀢𑁂 𑀥𑀫𑁆𑀫𑁂 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻’’𑀢𑀺 (𑀯𑀺𑀪. 𑁪𑁩𑁪) 𑀏𑀯𑀁 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀤𑁄𑀢𑀺 𑀯𑀼𑀢𑁆𑀢𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀙𑀦𑁆𑀤𑀸𑀤𑀻𑀦𑀺 𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀅𑀦𑁆𑀢𑁂 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀨𑀲𑁆𑀲𑁄…𑀧𑁂… 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄’’𑀢𑀺 (𑀯𑀺𑀪. 𑁪𑁪𑁭) 𑀏𑀯𑀁 𑀲𑀩𑁆𑀩𑁂 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁄 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 (𑀯𑀺𑀪. 𑁪𑁫𑁭) 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺…𑀧𑁂… 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀙𑀦𑁆𑀤𑁄 𑀙𑀦𑁆𑀤𑀺𑀓𑀢𑀸…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸 𑀏𑀯 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺 𑀓𑀼𑀲𑀮𑀸 𑀏𑀯, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸 𑀏𑀯, 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄 𑀳𑁂𑀢𑀼, 𑀲𑁂𑀲𑀸 𑀦 𑀳𑁂𑀢𑀽…𑀧𑁂… 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄 𑀦 𑀯𑀢𑁆𑀢𑀩𑁆𑀩𑁄, 𑀲𑁂𑀲𑀸 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀅𑀦𑀼𑀢𑁆𑀢𑀭𑀸𑀯, 𑀅𑀭𑀡𑀸𑀯𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁄 𑀧𑀦𑁂𑀢𑁆𑀣𑀸𑀧𑀺 𑀦 𑀉𑀤𑁆𑀥𑀝𑁄𑀢𑀺.

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀏𑀢𑁆𑀣 𑀩𑁄𑀥𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀬 𑀏𑀯 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀺𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀸𑀤𑀺𑀲𑀢𑁆𑀢𑀯𑀺𑀥𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀺, 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀲𑀘𑁆𑀘𑀸𑀦𑀺 𑀯𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀯𑀺𑀬. 𑀬𑁄 𑀧𑀦𑁂𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀅𑀧𑀺𑀘 ‘‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀺𑀦𑀸 ¶ 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀲𑀢𑁆𑀣𑁄, 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀥𑀫𑁆𑀫𑁂 𑀯𑀺𑀘𑀺𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀭𑀺𑀯𑀻𑀫𑀁𑀲𑀢𑀺 𑀚𑀸𑀦𑀸𑀢𑀺, 𑀥𑀫𑁆𑀫𑁂 𑀯𑀸 𑀏𑀢𑁂𑀦 𑀲𑀢𑁆𑀢𑀸 𑀯𑀺𑀘𑀺𑀦𑀦𑁆𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄, 𑀧𑀜𑁆𑀜𑀸. 𑀉𑀧𑁂𑀓𑁆𑀔𑀢𑀺 𑀲𑀫𑀭𑀲𑀸𑀦𑀁 𑀥𑀫𑁆𑀫𑀸𑀦𑀁 𑀳𑀸𑀧𑀦𑀯𑀟𑁆𑀠𑀦𑁂 𑀅𑀯𑀸𑀯𑀝𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀸𑀓𑀸𑀭𑁂𑀦 𑀫𑀚𑁆𑀛𑀢𑁆𑀢𑀸 𑀳𑁄𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑁄 𑀳𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄. 𑀥𑀫𑁆𑀫𑀪𑁂𑀤𑁄𑀧𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀲𑁂𑀲𑁂𑀲𑀼 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀦 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄𑀯, 𑀲𑁂𑀲𑀸 𑀤𑁆𑀯𑀻𑀳𑀺…𑀧𑁂… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀼𑀔𑀲𑀳𑀕𑀢𑁄𑀯, 𑀲𑁂𑀲𑀸 𑀢𑀺𑀥𑀸𑀧𑀺, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 ¶ 𑀳𑁂𑀢𑀼, 𑀲𑁂𑀲𑀸 𑀦 𑀳𑁂𑀢𑀽…𑀧𑁂… 𑀭𑀽𑀧𑀸𑀯𑀘𑀭𑀸𑀯, 𑀅𑀭𑀡𑀸𑀯𑀸𑀢𑀺. 𑀲𑁂𑀲𑀁 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁄.

𑀇𑀤𑀸𑀦𑀺 𑀧𑀦 𑁋

𑀓𑀫𑀢𑁄 𑀢𑀸𑀯𑀢𑁆𑀢𑀢𑁄 𑀘, 𑀳𑁂𑀢𑀼𑀪𑀽𑀫𑀺𑀯𑀺𑀪𑀸𑀕𑀢𑁄;

𑀯𑀺𑀯𑁂𑀓𑀢𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀲𑀩𑁆𑀩𑁂𑀲𑀁 𑀳𑀺 𑀩𑁄𑀚𑁆𑀛𑀗𑁆𑀕𑀸𑀦𑀁 𑀉𑀧𑀓𑀸𑀭𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀞𑀫𑀁 𑀯𑀼𑀢𑁆𑀢𑁄, 𑀢𑀢𑁄 𑀬𑀲𑁆𑀫𑀸 𑀉𑀧𑀝𑁆𑀞𑀺𑀢𑀲𑀢𑀺𑀓𑁄 𑀥𑀫𑁆𑀫𑁂 𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀸𑀢𑀺, 𑀧𑀯𑀺𑀘𑀺𑀢𑀥𑀫𑁆𑀫𑁄 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀢𑀁 𑀘𑀺𑀢𑁆𑀢𑀁 𑀲𑀸𑀥𑀼𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀬𑀣𑀸𑀓𑁆𑀓𑀫𑀁 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀢𑀸𑀯𑀢𑁆𑀢𑀢𑁄 𑀧𑀦 𑀓𑀲𑁆𑀫𑀸 𑀢𑁂 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀮𑀻𑀦𑀼𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀢𑁄, 𑀲𑀩𑁆𑀩𑀢𑁆𑀢𑀺𑀓𑀢𑁄 𑀘. 𑀏𑀢𑁆𑀣 𑀳𑀺 𑀢𑀬𑁄 𑀩𑁄𑀚𑁆𑀛𑀗𑁆𑀕𑀸 𑀮𑀻𑀦𑀲𑁆𑀲 𑀧𑀝𑀺𑀧𑀓𑁆𑀔𑀸. 𑀬𑀣𑀸𑀳 𑁋 ‘‘𑀬𑀲𑁆𑀫𑀺𑀁 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 ¶ 𑀯𑀻𑀭𑀺𑀬…𑀧𑁂… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀢𑀬𑁄 𑀉𑀤𑁆𑀥𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑀸. 𑀬𑀣𑀸𑀳 𑁋 ‘‘𑀬𑀲𑁆𑀫𑀺𑀁 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀏𑀓𑁄 𑀧𑀦𑁂𑀢𑁆𑀣 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼 𑀲𑀩𑁆𑀩𑀩𑁄𑀚𑁆𑀛𑀗𑁆𑀕𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀲𑀢𑀺𑀜𑁆𑀘 ¶ 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀏𑀯𑀁 𑀮𑀻𑀦𑀼𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀘 𑀲𑀩𑁆𑀩𑀢𑁆𑀣𑀺𑀓𑀢𑁄 𑀘 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀢𑀸𑀯𑀢𑁆𑀢𑀢𑁄.

𑀳𑁂𑀢𑀼𑀪𑀽𑀫𑀺𑀯𑀺𑀪𑀸𑀕𑀢𑁄𑀢𑀺 𑀏𑀢𑁆𑀣 𑀳𑁂𑀢𑀼𑀯𑀺𑀪𑀸𑀕𑀢𑁄 𑀢𑀸𑀯 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀣𑀸 𑀲𑀢𑁆𑀢 𑀥𑀫𑁆𑀫𑀸 𑀤𑀼𑀢𑀺𑀬𑀲𑁆𑀲 𑀧𑀭𑀺𑀧𑀼𑀘𑁆𑀙𑀓𑀢𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀲𑀭𑀻𑀭𑀧𑀭𑀺𑀓𑁆𑀔𑀸𑀭𑀪𑀽𑀢𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀦𑀸𑀫. 𑀢𑀣𑀸 𑀏𑀓𑀸𑀤𑀲 𑀥𑀫𑁆𑀫𑀸 𑀢𑀢𑀺𑀬𑀲𑁆𑀲 𑀅𑀧𑀸𑀬𑀪𑀬𑀕𑀫𑀦𑀯𑀻𑀣𑀺𑀤𑀸𑀬𑀚𑁆𑀚𑀫𑀳𑀢𑁆𑀢𑀲𑀢𑁆𑀣𑀼𑀫𑀳𑀢𑁆𑀢𑀚𑀸𑀢𑀺𑀫𑀳𑀢𑁆𑀢𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀢𑀸 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 ‘‘𑀩𑀼𑀤𑁆𑀥𑀸𑀤𑀻𑀳𑀺 𑀕𑀢𑀫𑀕𑁆𑀕𑁄 𑀫𑀬𑀸 𑀕𑀦𑁆𑀢𑀩𑁆𑀩𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫. ‘‘𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀲𑁆𑀲 𑀫𑀳𑀧𑁆𑀨𑀮𑀢𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀤𑀫𑀦𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀦𑀸𑀫. 𑀢𑀣𑀸 𑀏𑀓𑀸𑀤𑀲 𑀥𑀫𑁆𑀫𑀸 𑀘𑀢𑀼𑀢𑁆𑀣𑀲𑁆𑀲 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑁄𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑁄 𑀲𑀢𑁆𑀢, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀣𑀸 𑀲𑀢𑁆𑀢 𑀥𑀫𑁆𑀫𑀸 𑀧𑀜𑁆𑀘𑀫𑀲𑁆𑀲 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸 𑀤𑁆𑀯𑁂 𑀫𑀚𑁆𑀛𑀢𑁆𑀢𑀧𑁆𑀧𑀬𑁄𑀕𑀢𑀸 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀲𑀦𑁆𑀢𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀏𑀓𑀸𑀤𑀲 𑀥𑀫𑁆𑀫𑀸 𑀙𑀝𑁆𑀞𑀲𑁆𑀲 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑀚𑁆𑀛𑀼𑀧𑁂𑀓𑁆𑀔𑀦𑀸 𑀘𑀢𑀲𑁆𑀲𑁄 ¶ , 𑀅𑀲𑀫𑀸𑀳𑀺𑀢𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀸𑀦𑀁 𑀧𑀭𑀺𑀯𑀚𑁆𑀚𑀦𑀲𑁂𑀯𑀦𑀢𑀸 𑀤𑁆𑀯𑁂, 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀓𑀲𑀺𑀡𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀁 𑀉𑀕𑁆𑀕𑀳𑀡𑀓𑀼𑀲𑀮𑀢𑀸 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫. 𑀧𑀜𑁆𑀘 𑀥𑀫𑁆𑀫𑀸 𑀲𑀢𑁆𑀢𑀫𑀲𑁆𑀲 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀧𑀭𑀺𑀯𑀚𑁆𑀚𑀦𑀲𑁂𑀯𑀦𑀢𑀸 ¶ 𑀤𑁆𑀯𑁂 𑀤𑁆𑀯𑁂, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀳𑁂𑀢𑀼𑀯𑀺𑀪𑀸𑀕𑁄.

𑀪𑀽𑀫𑀺𑀯𑀺𑀪𑀸𑀕𑀢𑁄 𑀧𑀦𑁂𑀢𑁂 𑀓𑀸𑀫𑀸𑀯𑀘𑀭𑀸, 𑀮𑁄𑀓𑀼𑀢𑁆𑀢𑀭𑀸 𑀯𑀸 𑀳𑁄𑀦𑁆𑀢𑀺, 𑀓𑀸𑀫𑀸𑀯𑀘𑀭𑁂𑀲𑀼 𑀩𑀮𑀯𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀏𑀯 𑀩𑁄𑀚𑁆𑀛𑀗𑁆𑀕𑀸 𑀮𑀩𑁆𑀪𑀦𑁆𑀢𑀺, 𑀦 𑀇𑀢𑀭𑁂𑀲𑀼. 𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀦𑁆𑀢𑀺, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑀣𑀸 𑀦 𑀮𑀩𑁆𑀪𑀦𑁆𑀢𑀺 𑀅𑀩𑁄𑀥𑀺𑀧𑀓𑁆𑀔𑀺𑀓𑀢𑁆𑀢𑀸. 𑀓𑁂𑀘𑀺 𑀧𑀦 𑀣𑁂𑀭𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑁂𑀲𑀼 𑀓𑀲𑀺𑀡𑀸𑀲𑀼𑀪𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂𑀲𑀼𑀧𑀺 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺, 𑀦 𑀘 𑀢𑁂 𑀧𑀝𑀺𑀲𑀺𑀤𑁆𑀥𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀭𑀽𑀧𑀸𑀯𑀘𑀭𑀸𑀧𑀺 𑀳𑁄𑀦𑁆𑀢𑀺, 𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀭𑀽𑀧𑀸𑀯𑀘𑀭𑀸𑀢𑀺 𑀅𑀬𑀫𑁂𑀢𑁆𑀣 𑀪𑀽𑀫𑀺𑀯𑀺𑀪𑀸𑀕𑁄.

𑀯𑀺𑀯𑁂𑀓𑀢𑁄𑀢𑀺 𑀏𑀢𑁆𑀣 𑀯𑀺𑀯𑁂𑀓𑁄𑀢𑀺 𑀯𑀺𑀯𑀺𑀢𑁆𑀢𑀢𑀸, 𑀲𑁆𑀯𑀸𑀬𑀁 𑀧𑀜𑁆𑀘𑀯𑀺𑀥𑁄 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀯𑀲𑁂𑀦. 𑀢𑀤𑀗𑁆𑀕𑀯𑀺𑀯𑁂𑀓𑁄𑀢𑀺 𑀯𑀺𑀧𑀲𑁆𑀲𑀦𑀸, 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄𑀢𑀺 𑀫𑀕𑁆𑀕𑁄, 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄𑀢𑀺 𑀨𑀮𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄𑀢𑀺 𑀲𑀩𑁆𑀩𑀦𑀺𑀫𑀺𑀢𑁆𑀢𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀭𑀺𑀫𑁂 𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑁂𑀢𑁂 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸. 𑀫𑀕𑁆𑀕𑀓𑀸𑀮𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸, 𑀨𑀮𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸. 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸 ¶ 𑀘 𑀳𑁄𑀦𑁆𑀢𑀺. 𑀓𑁂𑀲𑀜𑁆𑀘𑀺 𑀣𑁂𑀭𑀸𑀦𑀁 𑀫𑀢𑁂 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀓𑁆𑀔𑀡𑁂 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸𑀯𑀸𑀢𑀺 𑀧𑀜𑁆𑀘𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀯𑁂𑀓𑁄. 𑀏𑀯𑀁 𑀯𑀺𑀜𑁆𑀜𑁂𑀬𑁆𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀅𑀭𑀺𑀬𑁄𑀢𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 ¶ , 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀘 𑀅𑀭𑀺𑀬𑁄, 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑁄, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀫𑀕𑁆𑀕𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀲𑁄 𑀓𑀢𑀫𑁄𑀢𑀺 𑀘𑁂, 𑀇𑀤𑀸𑀦𑀺 𑀲𑁆𑀯𑀸𑀬𑀁 𑀫𑀕𑁆𑀕𑁄 𑀘𑀢𑀼𑀭𑀗𑁆𑀕𑀺𑀦𑀻 𑀯𑀺𑀬 𑀲𑁂𑀦𑀸 𑀅𑀗𑁆𑀕𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀆𑀳. 𑀢𑀢𑁆𑀣 𑀲𑀫𑁆𑀫𑀸 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀜𑁆𑀜𑀸. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀢𑀺 𑀢𑀓𑁆𑀓𑁂𑀢𑀻𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀯𑀺𑀢𑀓𑁆𑀓𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀢𑁄 𑀥𑀫𑁆𑀫𑀪𑁂𑀤𑁄𑀧𑀺 𑀯𑀺𑀪𑀗𑁆𑀕𑀦𑀬𑁄𑀧𑀺 𑀩𑁄𑀚𑁆𑀛𑀗𑁆𑀕𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀯𑀺𑀭𑀢𑀺𑀢𑁆𑀢𑀬𑀯𑀚𑁆𑀚𑀺𑀢𑁄 𑀧𑀜𑁆𑀘𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀯𑀺𑀪𑀢𑁆𑀢𑁄, 𑀢𑀜𑁆𑀘 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀓𑀺𑀘𑁆𑀘𑀸𑀥𑀺𑀓𑀢𑀁, 𑀯𑀺𑀭𑀢𑀻𑀦𑀜𑁆𑀘 𑀅𑀯𑀼𑀢𑁆𑀢𑀲𑀺𑀤𑁆𑀥𑀢𑀁 𑀲𑀦𑁆𑀥𑀸𑀬, 𑀯𑀺𑀭𑀢𑀺𑀯𑀚𑁆𑀚𑀺𑀢𑀲𑁆𑀲 𑀧𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀪𑀸𑀯𑀸 𑀲𑁄𑀧𑀺 𑀅𑀝𑁆𑀞𑀗𑁆𑀕𑀺𑀓𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑁂𑀧𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄𑀯, 𑀲𑁂𑀲𑀸 𑀤𑁆𑀯𑀻𑀳𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀧𑀻𑀢𑀺𑀲𑀳𑀕𑀢𑁄 𑀲𑀼𑀔𑀲𑀳𑀕𑀢𑁄𑀯, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑁄, 𑀲𑁂𑀲𑀸 𑀢𑀺𑀥𑀸𑀧𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁂𑀢𑀼, 𑀲𑁂𑀲𑀸 𑀦𑀳𑁂𑀢𑀽𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀲𑀫𑀫𑁂𑀯. 𑀇𑀤𑀸𑀦𑀺 𑀧𑀦 𑁋

𑀓𑀫𑀢𑁄 ¶ 𑀓𑀺𑀘𑁆𑀘𑀪𑁂𑀤𑀢𑁄, 𑀪𑀽𑀫𑀺𑀪𑁂𑀤𑀯𑀺𑀯𑁂𑀓𑀢𑁄;

𑀫𑀕𑁆𑀕𑀗𑁆𑀕𑁂𑀲𑀼 𑀯𑀺𑀚𑀸𑀦𑀻𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀪𑀕𑀯𑀢𑀸 𑀳𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀜𑁆𑀜𑀸𑀧𑀚𑁆𑀚𑁄𑀢𑀧𑀜𑁆𑀜𑀸𑀲𑀢𑁆𑀣𑀢𑀸𑀬 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀩𑀳𑀽𑀧𑀓𑀸𑀭𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑁂𑀲𑀺𑀢𑀸. 𑀢𑀢𑁄 𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀧𑀭𑀺𑀯𑀢𑁆𑀢𑀓𑀳𑀢𑁆𑀣𑁄 𑀯𑀺𑀬 𑀬𑀣𑀸𑀲𑀪𑀸𑀯𑀤𑀲𑁆𑀲𑀦𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀩𑀳𑀽𑀧𑀓𑀸𑀭𑀢𑁆𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁆𑀯𑀸𑀬𑀁 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀏𑀯𑀁 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄. 𑀬𑀣𑀸𑀳 ‘‘𑀧𑀼𑀩𑁆𑀩𑁂 𑀔𑁄, 𑀕𑀳𑀧𑀢𑀺, 𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁩), 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀘𑀸. 𑀬𑀲𑁆𑀫𑀸 𑀧𑀦 𑀯𑀸𑀘𑀸𑀬 𑀲𑀁𑀯𑀺𑀤𑀳𑀺𑀢𑁆𑀯𑀸 𑀮𑁄𑀓𑁂 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀉𑀪𑀬𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲𑁂𑀯 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀁 𑀲𑀻𑀮𑀁 𑀧𑀽𑀭𑀢𑀺, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 𑀢𑀤𑀼𑀪𑀬𑀸𑀦𑀦𑁆𑀢𑀭𑀁 𑀲𑀫𑁆𑀫𑀸𑀆𑀚𑀻𑀯𑁄 𑀯𑀼𑀢𑁆𑀢𑁄. 𑀏𑀯𑀁 ‘‘𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑀻𑀮𑁂𑀦𑀸𑀧𑀺 𑀏𑀢𑁆𑀢𑀸𑀯𑀢𑀸 𑀧𑀭𑀺𑀢𑁄𑀲𑀁 𑀅𑀓𑀢𑁆𑀯𑀸 𑀇𑀤𑀁 𑀯𑀻𑀭𑀺𑀬𑀁 𑀆𑀭𑀪𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀧𑀺 𑀓𑀸𑀬𑀸𑀤𑀻𑀲𑀼 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 ¶ 𑀲𑀫𑁆𑀫𑀸𑀲𑀢𑀺. 𑀲𑀽𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀸𑀥𑀸𑀢𑀼𑀁 𑀲𑀓𑁆𑀓𑀸𑀢𑀺 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀲𑀫𑀸𑀥𑀺 𑀯𑀼𑀢𑁆𑀢𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀓𑀺𑀘𑁆𑀘𑀢𑁄 𑀧𑀦𑁂𑀲𑀁 𑀏𑀓𑁂𑀓𑀲𑁆𑀲 𑀢𑀻𑀡𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀸𑀯 𑀅𑀜𑁆𑀜𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀆𑀭𑀫𑁆𑀫𑀡𑀢𑁄 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀲𑀫𑁆𑀫𑁄𑀳𑀢𑁄 𑀲𑁂𑀲𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀏𑀯𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀚𑀳𑀦𑀸𑀤𑀺𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀲𑀫𑁆𑀫𑀸𑀯𑀸𑀘𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 ¶ , 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀯𑁄𑀤𑀸𑀧𑁂𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑀸𑀤𑀳𑀢𑀻𑀢𑀺 𑀇𑀤𑀫𑁂𑀢𑁆𑀣 𑀓𑀺𑀘𑁆𑀘𑀁.

𑀪𑁂𑀤𑀢𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀜𑀸𑀡𑀯𑀲𑁂𑀦 𑀦𑀸𑀦𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀦𑀸𑀦𑀸𑀦𑀸𑀫𑀸 𑀳𑁄𑀢𑀺, 𑀤𑀼𑀢𑀺𑀬𑁄 𑀧𑀦 𑀦𑁂𑀓𑁆𑀔𑀫𑁆𑀫𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑀯𑀲𑁂𑀦, 𑀯𑀺𑀭𑀢𑀺𑀬𑁄 𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀫𑀡𑀲𑀗𑁆𑀔𑀸𑀢𑀘𑁂𑀢𑀦𑀸𑀯𑀲𑁂𑀦𑀧𑀺 𑀯𑀺𑀭𑀢𑀺𑀯𑀲𑁂𑀦𑀧𑀺, 𑀙𑀝𑁆𑀞𑀲𑀢𑁆𑀢𑀫𑀸 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀦𑀸𑀦𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀦𑀸𑀦𑀸𑀦𑀸𑀫𑀸 𑀳𑁄𑀦𑁆𑀢𑀺. 𑀫𑀕𑁆𑀕𑀓𑀸𑀮𑁂 𑀧𑀦𑁂𑀢𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀓𑀺𑀘𑁆𑀘𑀢𑁄 𑀧𑀦 𑀢𑀸𑀦𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀦𑀸𑀫𑀸𑀦𑀺 𑀮𑀪𑀦𑁆𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦 𑀦𑀸𑀦𑀓𑁆𑀔𑀡𑁄 𑀦𑀸𑀦𑀸𑀦𑀸𑀫𑁄, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀏𑀓𑀸𑀭𑀫𑁆𑀫𑀡𑁄 𑀳𑁄𑀢𑀺. 𑀏𑀓𑀲𑁆𑀲 𑀳𑀺 𑀧𑀞𑀫𑀫𑀕𑁆𑀕𑁄 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀦𑀺𑀬𑀫𑀢𑁄 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑁄 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄 𑀯𑀸, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄𑀧𑀺𑀲𑁆𑀲 𑀧𑀞𑀫𑀫𑀕𑁆𑀕𑀲𑀤𑀺𑀲𑀚𑁆𑀛𑀸𑀦𑀺𑀓𑀸 𑀯𑀸 𑀯𑀺𑀲𑀤𑀺𑀲𑀚𑁆𑀛𑀸𑀦𑀺𑀓𑀸 𑀯𑀸𑀢𑀺 𑀲𑁄 𑀫𑀕𑁆𑀕𑀓𑀸𑀮𑁂𑀧𑀺 𑀦𑀸𑀦𑀓𑁆𑀔𑀡𑁄 𑀦𑀸𑀦𑀸𑀦𑀸𑀫𑁄 𑀯𑀸𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀪𑀽𑀫𑀺𑀢𑁄 𑀘 𑀯𑀺𑀯𑁂𑀓𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀩𑁄𑀚𑁆𑀛𑀗𑁆𑀕𑁂𑀲𑀼 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀁 𑀯𑀺𑀚𑀸𑀦𑀻𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀛𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺𑀆𑀤𑀻𑀲𑀼 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀁 𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 ¶ 𑀤𑀼𑀓𑁆𑀔𑁂𑀳𑀺, 𑀢𑀲𑁆𑀫𑀸 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀭𑀡𑀁, 𑀲𑀁𑀯𑀭𑀦𑁆𑀢𑀺 𑀯𑀸 𑀢𑁂𑀦𑀸𑀢𑀺 𑀲𑀁𑀯𑀭𑁄, 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀇𑀚𑁆𑀛𑀦𑀓𑀲𑁆𑀲 𑀅𑀢𑁆𑀣𑀢𑁄 𑀘𑁂𑀢𑀦𑀸𑀤𑀺𑀭𑀽𑀧𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀲𑀁𑀯𑀼𑀢𑁄 𑀧𑀺𑀳𑀺𑀢𑀓𑀸𑀬𑀯𑀘𑀻𑀧𑀬𑁄𑀕𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀧𑀯𑀢𑁆𑀢𑁂𑀢𑀺. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀆𑀘𑀭𑀺𑀢𑀩𑁆𑀩𑀢𑁄 𑀆𑀘𑀸𑀭𑁄, 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑀼𑀦𑁆𑀦𑀁 𑀘𑀭𑀡𑀝𑁆𑀞𑀸𑀦𑀁. 𑀢𑀁𑀲𑀤𑀺𑀲𑀢𑀸𑀬 𑀧𑀦 𑀲𑀩𑁆𑀩𑁄𑀧𑀺 𑀧𑀯𑀢𑁆𑀢𑀺𑀯𑀺𑀲𑀬𑁄 𑀕𑁄𑀘𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀁 𑀯𑀺𑀪𑀸𑀕𑁄 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀤𑁆𑀤𑁂𑀲𑁂 𑀳𑀺 𑁋

‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑀺 𑀆𑀘𑀸𑀭𑁄, 𑀅𑀢𑁆𑀣𑀺 𑀅𑀦𑀸𑀘𑀸𑀭𑁄. 𑀢𑀢𑁆𑀣 𑀓𑀢𑀫𑁄 𑀅𑀦𑀸𑀘𑀸𑀭𑁄? 𑀓𑀸𑀬𑀺𑀓𑁄 𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀸𑀘𑀸𑀭𑁄, 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀅𑀦𑀸𑀘𑀸𑀭𑁄, 𑀇𑀥𑁂𑀓𑀘𑁆𑀘𑁄 𑀯𑁂𑀴𑀼𑀤𑀸𑀦𑁂𑀦 𑀯𑀸 𑀧𑀢𑁆𑀢…𑀧𑁂… 𑀧𑀼𑀧𑁆𑀨𑀨𑀮𑀲𑀺𑀦𑀸𑀦𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀯𑀸 𑀘𑀸𑀝𑀼𑀓𑀫𑁆𑀬𑀢𑀸𑀬 𑀯𑀸 𑀫𑀼𑀕𑁆𑀕𑀲𑀼𑀧𑁆𑀬𑀢𑀸𑀬 𑀯𑀸 𑀧𑀸𑀭𑀺𑀪𑀝𑀼𑀢𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀩𑀼𑀤𑁆𑀥𑀧𑀢𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀸𑀘𑀸𑀭𑁄.

‘‘𑀢𑀢𑁆𑀣 𑀓𑀢𑀫𑁄 𑀆𑀘𑀸𑀭𑁄? 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁩) 𑁋

𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀆𑀘𑀸𑀭𑁄 𑀦𑀺𑀤𑁆𑀤𑀺𑀝𑁆𑀞𑁄.

‘‘𑀕𑁄𑀘𑀭𑁄𑀢𑀺 ¶ 𑀅𑀢𑁆𑀣𑀺 𑀕𑁄𑀘𑀭𑁄, 𑀅𑀢𑁆𑀣𑀺 𑀅𑀕𑁄𑀘𑀭𑁄. 𑀢𑀢𑁆𑀣 𑀓𑀢𑀫𑁄 𑀅𑀕𑁄𑀘𑀭𑁄? 𑀇𑀥𑁂𑀓𑀘𑁆𑀘𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀯𑀺𑀥𑀯𑀸…𑀧𑁂… 𑀣𑀼𑀮𑁆𑀮𑀓𑀼𑀫𑀸𑀭𑀻𑀧𑀡𑁆𑀟𑀓𑀪𑀺𑀓𑁆𑀔𑀼𑀦𑀻𑀧𑀸𑀦𑀸𑀕𑀸𑀭𑀕𑁄𑀘𑀭𑁄 ¶ 𑀯𑀸, 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦, 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺…𑀧𑁂… 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

‘‘𑀢𑀢𑁆𑀣 𑀓𑀢𑀫𑁄 𑀕𑁄𑀘𑀭𑁄? 𑀇𑀥𑁂𑀓𑀘𑁆𑀘𑁄 𑀦 𑀯𑁂𑀲𑀺𑀬𑀸𑀕𑁄𑀘𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁪) 𑁋

𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀕𑁄𑀘𑀭𑁄 𑀦𑀺𑀤𑁆𑀤𑀺𑀝𑁆𑀞𑁄.

𑀅𑀧𑀺𑀘𑁂𑀢𑁆𑀣 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀕𑀫𑀦𑀦𑀺𑀲𑀻𑀤𑀦𑀘𑀗𑁆𑀓𑀫𑀦𑀖𑀝𑁆𑀝𑀦𑀸𑀪𑀺𑀪𑀯𑀦𑀸𑀤𑀺𑀓𑀸𑀬𑀺𑀓𑀸𑀘𑀺𑀢𑁆𑀢𑀻𑀓𑀸𑀭𑀓𑀺𑀭𑀺𑀬𑀸𑀦𑀜𑁆𑀘𑁂𑀯 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀸 𑀥𑀫𑁆𑀫𑀓𑀣𑀦𑀔𑀼𑀁𑀲𑀦𑀸𑀤𑀺𑀯𑀸𑀘𑀲𑀺𑀓𑀸𑀘𑀺𑀢𑁆𑀢𑀻𑀓𑀸𑀭𑀓𑀺𑀭𑀺𑀬𑀸𑀦𑀜𑁆𑀘 𑀅𑀦𑀸𑀘𑀸𑀭𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀆𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀪𑀺𑀓𑁆𑀔𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀤𑀺𑀦𑀸 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄. 𑀕𑁄𑀘𑀭𑁄 𑀧𑀦 𑀢𑀺𑀯𑀺𑀥𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺. 𑀢𑀢𑁆𑀣 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀦𑀸𑀫. 𑀅𑀦𑁆𑀢𑀭𑀖𑀭𑀸𑀤𑀻𑀲𑀼 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸𑀤𑀻𑀳𑀺 𑀤𑀺𑀲𑀸 𑀯𑀺𑀤𑀺𑀲𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀕𑀫𑀦𑀁 𑀆𑀭𑀓𑁆𑀔𑀕𑁄𑀘𑀭𑁄 𑀦𑀸𑀫. 𑀘𑀢𑁆𑀢𑀸𑀭𑁄 𑀧𑀦 𑀲𑀢𑀺𑀧𑀝𑁆𑀞𑀸𑀦𑀸 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄 𑀦𑀸𑀫. 𑀬𑀢𑁆𑀣 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀅𑀬𑀁 𑀢𑀺𑀯𑀺𑀥𑁄𑀧𑁂𑀢𑁆𑀣 ¶ 𑀕𑁄𑀘𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀆𑀘𑀸𑀭𑁂𑀦, 𑀕𑁄𑀘𑀭𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀦𑀸𑀫.

𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀽𑀢𑀺 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀤𑁄𑀲𑁂𑀲𑀼. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀦𑀲𑀻𑀮𑁄, 𑀅𑀡𑀼𑀫𑀢𑁆𑀢𑀁 𑀭𑁂𑀡𑀼𑀁 𑀲𑀺𑀦𑁂𑀭𑀼𑀲𑀤𑀺𑀲𑀁 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀲𑀩𑁆𑀩𑀮𑀳𑀼𑀓𑀫𑁆𑀧𑀺 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀁 𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀯𑀚𑁆𑀚𑀢𑁄 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀼𑀝𑁆𑀞𑀼 𑀆𑀤𑀸𑀬 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀢𑀺.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀕𑁆𑀕𑀳𑀡𑀲𑀗𑁆𑀔𑀸𑀢𑀲𑀢𑀺𑀲𑀁𑀯𑀭𑁂𑀦 ¶ 𑀧𑀺𑀳𑀺𑀢𑀤𑁆𑀯𑀸𑀭𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀧𑀺𑀡𑁆𑀟𑀧𑀸𑀢𑁂 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀯𑀲𑁂𑀦 𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 𑀘 𑀫𑀢𑁆𑀢𑀚𑀸𑀦𑀦𑀓𑁄, 𑀧𑀺𑀡𑁆𑀟𑀧𑀸𑀢𑀯𑀲𑁂𑀦 𑀘𑁂𑀢𑁆𑀣 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀪𑁄𑀚𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀟𑁆𑀠𑀭𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀧𑀼𑀩𑁆𑀩𑀭𑀢𑁆𑀢𑀁, 𑀇𑀫𑀺𑀦𑀸 𑀧𑀞𑀫𑀬𑀸𑀫𑀜𑁆𑀘𑁂𑀯 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀕𑀡𑁆𑀳𑀸𑀢𑀺. 𑀭𑀢𑁆𑀢𑀺𑀬𑀸 𑀧𑀘𑁆𑀙𑀸 𑀅𑀧𑀭𑀭𑀢𑁆𑀢𑀁, 𑀇𑀫𑀺𑀦𑀸 𑀧𑀘𑁆𑀙𑀺𑀫𑀬𑀸𑀫𑀜𑁆𑀘𑁂𑀯 𑀧𑀼𑀭𑁂𑀪𑀢𑁆𑀢𑀜𑁆𑀘 𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑀬𑀸𑀫𑁄 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀤𑁆𑀤𑀸𑀓𑀺𑀮𑀫𑀣𑀯𑀺𑀦𑁄𑀤𑀦𑁄𑀓𑀸𑀲𑁄𑀢𑀺 𑀦 𑀕𑀳𑀺𑀢𑁄.

𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄𑀢𑀺 𑀅𑀲𑀼𑀪𑀪𑀸𑀯𑀦𑀸𑀲𑀗𑁆𑀔𑀸𑀢𑀲𑁆𑀲 𑀪𑀸𑀯𑀦𑀸𑀭𑀸𑀫𑀲𑁆𑀲 𑀅𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀆𑀲𑁂𑀯𑀦𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄 𑀘𑀗𑁆𑀓𑀫𑀦𑀦𑀺𑀲𑀚𑁆𑀚𑀸𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀸𑀢𑀘𑁆𑀘𑀁 𑀦𑁂𑀧𑀓𑁆𑀓𑀦𑁆𑀢𑀺 𑀲𑀢𑀢𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄 𑀲𑀸𑀢𑀘𑁆𑀘𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁, 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀦𑁂𑀧𑀓𑁆𑀓𑀲𑀗𑁆𑀔𑀸𑀢𑀜𑁆𑀘 𑀧𑀜𑁆𑀜𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀯𑀻𑀭𑀺𑀬𑀧𑀜𑁆𑀜𑀸𑀳𑀺 𑀬𑀼𑀢𑁆𑀢𑀲𑁆𑀲𑁂𑀯 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 ¶ 𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀸𑀯𑀩𑁄𑀥𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁 𑀘𑀢𑀼𑀲𑀘𑁆𑀘𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀲𑀢𑁆𑀢𑀢𑀺𑀁𑀲𑀥𑀫𑁆𑀫𑀸𑀦𑀁. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 𑀮𑁄𑀓𑀺𑀬𑀪𑀸𑀯𑀦𑀸𑀬 𑀯𑀺𑀲𑁂𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀏𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀢𑁂𑀲𑀁 𑀕𑀳𑀡𑁂𑀦 𑀧𑀦 𑀲𑁂𑀲𑀸𑀦𑀫𑁆𑀧𑀺 𑀢𑀢𑁆𑀣 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺𑀆𑀤𑀻𑀲𑀼 𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀧𑀼𑀭𑀢𑁄 𑀕𑀫𑀦𑀁, 𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦𑀁, 𑀢𑀤𑀼𑀪𑀬𑀜𑁆𑀘 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑁂𑀲𑀼𑀧𑀺 𑀧𑀼𑀭𑀢𑁄, 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀪𑀺𑀕𑀫𑀦𑀅𑀧𑀕𑀫𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻, 𑀲𑀫𑁆𑀧𑀚𑀜𑁆𑀜𑀲𑁆𑀲𑁂𑀯 𑀯𑀸 𑀓𑀸𑀭𑀻, 𑀲𑀫𑁆𑀧𑀚𑀜𑁆𑀜-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀅𑀯𑀺𑀧𑁆𑀧𑀬𑁄𑀕𑀢𑁄 𑀲𑀢𑀺𑀧𑀺 𑀕𑀳𑀺𑀢𑀸𑀯 𑀳𑁄𑀢𑀺. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀪𑀺𑀓𑁆𑀓𑀫𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀆𑀮𑁄𑀓𑀺𑀢𑁂𑀢𑀺𑀆𑀤𑀻𑀲𑀼 𑀆𑀮𑁄𑀓𑀺𑀢𑀁 𑀦𑀸𑀫 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁. 𑀇𑀫𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀕𑀳𑀡𑁂𑀦 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀘𑁆𑀙𑀢𑁄 𑀧𑁂𑀓𑁆𑀔𑀦𑀲𑀗𑁆𑀔𑀸𑀢𑀸𑀦𑀺 𑀑𑀮𑁄𑀓𑀺𑀢𑀼𑀮𑁆𑀮𑁄𑀓𑀺𑀢𑀸𑀧𑀮𑁄𑀓𑀺𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀫𑀺𑀜𑁆𑀚𑀺𑀢𑁂 ¶ 𑀧𑀲𑀸𑀭𑀺𑀢𑁂𑀢𑀺 𑀧𑀩𑁆𑀩𑀸𑀦𑀁 𑀲𑀫𑀺𑀜𑁆𑀚𑀦𑁂, 𑀧𑀲𑀸𑀭𑀡𑁂 𑀘. 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂𑀢𑀺 𑀏𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦, 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀘 𑀧𑀭𑀺𑀪𑁄𑀕𑁄 𑀥𑀸𑀭𑀡𑀁 𑀦𑀸𑀫. 𑀅𑀲𑀺𑀢𑁂𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀺𑀪𑁄𑀚𑀦𑁂. 𑀧𑀻𑀢𑁂𑀢𑀺 𑀬𑀸𑀕𑀼𑀆𑀤𑀺𑀧𑀸𑀦𑁂. 𑀔𑀸𑀬𑀺𑀢𑁂𑀢𑀺 𑀧𑀺𑀝𑁆𑀞𑀔𑀚𑁆𑀚𑀸𑀤𑀺𑀔𑀸𑀤𑀦𑁂. 𑀲𑀸𑀬𑀺𑀢𑁂𑀢𑀺 𑀫𑀥𑀼𑀨𑀸𑀡𑀺𑀢𑀸𑀤𑀺𑀲𑀸𑀬𑀺𑀢𑁂. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀢𑀺 𑀉𑀘𑁆𑀘𑀸𑀭𑀲𑁆𑀲 𑀘 𑀧𑀲𑁆𑀲𑀸𑀯𑀲𑁆𑀲 𑀘 𑀓𑀭𑀡𑁂. 𑀕𑀢𑁂𑀢𑀺 𑀕𑀫𑀦𑁂. 𑀞𑀺𑀢𑁂𑀢𑀺 𑀞𑀸𑀦𑁂. 𑀦𑀺𑀲𑀺𑀦𑁆𑀦𑁂𑀢𑀺 𑀦𑀺𑀲𑀚𑁆𑀚𑀸𑀬. 𑀲𑀼𑀢𑁆𑀢𑁂𑀢𑀺 𑀲𑀬𑀦𑁂. 𑀚𑀸𑀕𑀭𑀺𑀢𑁂𑀢𑀺 𑀚𑀸𑀕𑀭𑀡𑁂. 𑀏𑀢𑁆𑀣 𑀘 𑀪𑀺𑀓𑁆𑀔𑀸𑀘𑀸𑀭𑀕𑀫𑀦𑀸𑀤𑀺𑀯𑀲𑁂𑀦 ¶ ‘‘𑀅𑀪𑀺𑀓𑁆𑀓𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀳𑀸𑀭𑁂 𑀧𑀦 𑀘𑀗𑁆𑀓𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀯𑀲𑁂𑀦𑁂𑀯 ‘‘𑀕𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀸𑀲𑀺𑀢𑁂𑀢𑀺 𑀓𑀣𑀦𑁂. 𑀢𑀼𑀡𑁆𑀳𑀻𑀪𑀸𑀯𑁂𑀢𑀺 𑀅𑀓𑀣𑀦𑁂.

𑀲𑀩𑁆𑀩𑁂𑀲𑀼 𑀧𑀦 𑀢𑁂𑀲𑀼 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀧𑀘𑁆𑀘𑁂𑀓𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀪𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑀸𑀤𑀺𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀕𑀫𑀦𑀸𑀤𑀺𑀁 𑀅𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀫𑁂 𑀢𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑁂𑀢𑀺𑀬𑀤𑀲𑁆𑀲𑀦𑀸𑀤𑀺𑀦𑁄 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀦𑀸𑀫. 𑀲𑀸𑀢𑁆𑀣𑀓𑁂𑀲𑀼 𑀧𑀦𑁂𑀢𑁂𑀲𑀼 𑀕𑀫𑀦𑀸𑀤𑀻𑀲𑀼 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀸𑀦𑀜𑁆𑀘𑁂𑀯 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀯𑀺𑀖𑀸𑀢𑀓𑀭𑀸𑀦𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀧𑀭𑀺𑀓𑁆𑀓𑀺𑀮𑁂𑀲𑀸𑀦𑀜𑁆𑀘 𑀲𑀩𑁆𑀩𑁂𑀲𑀸𑀦𑀁 𑀲𑀩𑁆𑀪𑀸𑀯𑀸𑀪𑀸𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀦𑀸𑀫. 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑀸𑀢𑁆𑀣𑀓𑀲𑀧𑁆𑀧𑀸𑀬𑀲𑁆𑀲 𑀧𑀦 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼, 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀪𑀺𑀓𑁆𑀓𑀫𑀸𑀤𑀻𑀦𑀁 𑀓𑀭𑀡𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀦𑀸𑀫. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀦 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸 ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀓𑀭𑁄𑀢𑀺, 𑀅𑀳𑀁 𑀓𑀭𑁄𑀫𑀻’’𑀢𑀺 𑀯𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀺𑀢𑁆𑀯𑀸 ‘‘𑀅𑀪𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑀸𑀤𑀺𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼 𑀯𑀺𑀧𑁆𑀨𑀸𑀭𑀸𑀤𑀺𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀅𑀬𑀁 𑀓𑀸𑀬𑀲𑀗𑁆𑀔𑀸𑀢𑁄 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀢𑁄 𑀅𑀜𑁆𑀜𑁄 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀯𑀸 𑀲𑀢𑁆𑀢𑁄 𑀯𑀸 𑀅𑀪𑀺𑀓𑁆𑀓𑀫𑀦𑁆𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁄 𑀯𑀸…𑀧𑁂… 𑀢𑀼𑀡𑁆𑀳𑀻 𑀪𑀯𑀦𑁆𑀢𑁄 𑀯𑀸 𑀦𑀢𑁆𑀣𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀬𑀸𑀣𑀸𑀯𑀢𑁄 𑀚𑀸𑀦𑀦𑀯𑀲𑁂𑀦 𑀧𑀜𑁆𑀜𑀸𑀬 𑀧𑀯𑀢𑁆𑀢𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀦𑀸𑀫. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁫𑁦𑁮) 𑀕𑀳𑁂𑀢𑀩𑁆𑀩𑁄.

𑀇𑀤𑀸𑀦𑀺 𑀬𑀲𑁆𑀫𑀸 𑀬𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀬𑀣𑀸𑀯𑀼𑀢𑁆𑀢𑀸 𑀏𑀢𑁆𑀢𑀓𑀸 𑀕𑀼𑀡𑀸 𑀦𑀢𑁆𑀣𑀺, 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀧𑀦 𑀫𑀓𑁆𑀓𑀝𑀸𑀤𑀻𑀦𑀁 𑀯𑀺𑀬 𑀅𑀦𑀼𑀘𑁆𑀙𑀯𑀺𑀓𑁄 ¶ 𑀦 𑀳𑁄𑀢𑀺, 𑀉𑀧𑀘𑀸𑀭𑀫𑀢𑁆𑀢𑀫𑁆𑀧𑀺𑀲𑁆𑀲 𑀛𑀸𑀦𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀧𑀦 𑀲𑀦𑁆𑀢𑀺, 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀅𑀦𑀼𑀘𑁆𑀙𑀯𑀺𑀓𑁄 𑀳𑁄𑀢𑀺. 𑀲𑁄 𑀳𑀺 𑀢𑀢𑁆𑀣 𑀲𑀩𑁆𑀩𑀧𑁆𑀧𑀓𑀸𑀭𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 ¶ 𑀲𑀓𑁆𑀓𑁄𑀢𑀺, 𑀅𑀭𑀜𑁆𑀜𑀯𑀸𑀲𑀜𑁆𑀘𑁂𑀯 𑀆𑀭𑀜𑁆𑀜𑀓𑁂 𑀘 𑀉𑀧𑀲𑁄𑀪𑁂𑀢𑀺, 𑀲𑀓𑀮𑀜𑁆𑀘 𑀲𑀸𑀲𑀦𑀁 𑀧𑀲𑀸𑀤𑁂𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀸𑀲𑀦𑀝𑁆𑀞𑀸𑀦𑀬𑁄𑀕𑀧𑀣𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀼𑀜𑁆𑀜𑀁. 𑀲𑁂𑀢𑀺 𑀘𑁂𑀯 𑀆𑀲𑀢𑀺 𑀘 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀁, 𑀫𑀜𑁆𑀘𑀸𑀤𑀺, 𑀯𑀺𑀳𑀸𑀭𑀸𑀤𑀺 𑀘. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀫𑀜𑁆𑀘𑁄 𑀧𑀻𑀞’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀅𑀜𑁆𑀜𑀫𑁆𑀧𑀺𑀲𑁆𑀲 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀜𑁆𑀜’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀭𑀜𑁆𑀜𑀦𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀸𑀯 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘 𑀆𑀭𑀜𑁆𑀜𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫𑀁 𑀅𑀭𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀦 𑀕𑀸𑀫𑀤𑁆𑀯𑀸𑀭𑀲𑁆𑀲 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀲𑀩𑁆𑀩𑀁 ‘‘𑀅𑀭𑀜𑁆𑀜’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸’’𑀢𑀺 (𑀯𑀺𑀪. 𑁫𑁨𑁯) 𑀳𑀺 𑀯𑀼𑀢𑁆𑀢𑀁. 𑀓𑀦𑁆𑀤𑀭𑀦𑁆𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀭𑀺𑀢𑀁 𑀉𑀤𑀓𑁂𑀦 𑀪𑀺𑀦𑁆𑀦𑀁 𑀧𑀩𑁆𑀩𑀢𑀧𑀤𑁂𑀲𑀁, 𑀬𑀁 ‘‘𑀦𑀺𑀢𑀼𑀫𑁆𑀩’’𑀦𑁆𑀢𑀺𑀧𑀺 ‘‘𑀦𑀤𑀻𑀓𑀼𑀜𑁆𑀚’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀯𑀸𑀮𑀺𑀓𑀸𑀧𑀼𑀮𑀺𑀦𑁂 𑀫𑀡𑀺𑀯𑀺𑀢𑀸𑀦𑀲𑀤𑀺𑀲𑁂 𑀲𑀦𑁆𑀤𑀘𑁆𑀙𑀸𑀬𑁂 𑀯𑀦𑀕𑀳𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀲𑀤𑀺𑀲𑁂 𑀉𑀤𑀓𑁂 𑀲𑀦𑁆𑀤𑀫𑀸𑀦𑁂 𑀲𑀻𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀕𑀺𑀭𑀺𑀕𑀼𑀳𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀫𑀦𑁆𑀢𑀭𑀁, 𑀏𑀓𑀲𑁆𑀫𑀺𑀜𑁆𑀜𑁂𑀯 𑀯𑀸 𑀉𑀫𑀗𑁆𑀕𑀲𑀤𑀺𑀲𑀁 𑀫𑀳𑀸𑀯𑀺𑀯𑀭𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀩𑁆𑀪𑁄𑀓𑀸𑀲𑀦𑁆𑀢𑀺 𑀅𑀘𑁆𑀙𑀦𑁆𑀦𑀁. 𑀆𑀓𑀗𑁆𑀔𑀫𑀸𑀦𑁄 𑀧𑀦𑁂𑀢𑁆𑀣 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀢𑀺. 𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀧𑀮𑀸𑀮𑀭𑀸𑀲𑀺𑀁. 𑀫𑀳𑀸𑀧𑀮𑀸𑀮𑀧𑀼𑀜𑁆𑀚𑀢𑁄 ¶ 𑀳𑀺 𑀧𑀮𑀸𑀮𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀮𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀦𑀺𑀲𑀻𑀤𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀧𑁆𑀧𑀲𑀤𑁆𑀤𑀦𑁆𑀢𑀺𑀆𑀤𑀻𑀲𑀼 𑀯𑀘𑀦𑀲𑀤𑁆𑀤𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀲𑀤𑁆𑀤𑀁. 𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁂𑀦 𑀘𑁂𑀯 𑀫𑀺𑀕𑀧𑀓𑁆𑀔𑀺𑀦𑀺𑀕𑁆𑀖𑁄𑀲𑁂𑀦 𑀘 𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀦𑀺𑀕𑁆𑀖𑁄𑀲𑀁. 𑀯𑀺𑀚𑀦𑀯𑀸𑀢𑀦𑁆𑀢𑀺 𑀅𑀦𑀼𑀲𑀜𑁆𑀘𑀭𑀓𑀚𑀦𑀲𑁆𑀲 𑀲𑀭𑀻𑀭𑀯𑀸𑀢𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 𑀯𑀺𑀚𑀦𑀯𑀸𑀢𑀁, ‘‘𑀯𑀺𑀚𑀦𑀯𑀸𑀤’’𑀦𑁆𑀢𑀺𑀧𑀺 𑀧𑀸𑀞𑁄. 𑀲𑁂𑀦𑀸𑀲𑀦𑀲𑁆𑀲 𑀅𑀦𑁆𑀢𑁄 𑀚𑀦𑀯𑀸𑀤𑀲𑀤𑁆𑀤𑁂𑀦 𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸𑀦𑀁 𑀭𑀳𑀲𑁆𑀲 𑀓𑀺𑀭𑀺𑀬𑀸𑀭𑀳𑀢𑁆𑀢𑀸 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁, 𑀢𑀢𑁄 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑁂 𑀘𑀺𑀢𑁆𑀢𑀲𑁆𑀲 𑀮𑀻𑀬𑀦𑀢𑁄 𑀧𑀝𑀺𑀲𑀮𑁆𑀮𑀸𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀯𑁂𑀓𑀲𑁆𑀲 𑀪𑀸𑀯𑀦𑀸𑀭𑀸𑀫𑀲𑁆𑀲 𑀅𑀦𑀼𑀭𑀽𑀧𑀢𑁆𑀢𑀸 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁. 𑀪𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀜𑁆𑀜𑀕𑀢𑁄𑀢𑀺𑀆𑀤𑀻𑀲𑀼 𑀅𑀭𑀜𑁆𑀜𑀁, 𑀭𑀼𑀓𑁆𑀔𑀫𑀽𑀮𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀲𑁂𑀦𑀸𑀲𑀦𑀁 𑀲𑀼𑀜𑁆𑀜𑀸𑀕𑀸𑀭𑁂𑀦 𑀲𑀗𑁆𑀕𑀳𑀺𑀢𑀁.

𑀧𑀮𑁆𑀮𑀗𑁆𑀓𑀁 ¶ 𑀆𑀪𑀼𑀚𑀺𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀓𑀸𑀬𑀁 𑀉𑀚𑀼𑀁 𑀞𑀧𑁂𑀢𑁆𑀯𑀸, 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀁 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀘𑀫𑁆𑀫𑀫𑀁𑀲𑀦𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺, 𑀅𑀣𑀲𑁆𑀲 𑀢𑁂𑀲𑀁 𑀅𑀧𑀡𑀫𑀦𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀤𑁆𑀥𑀺𑀁 𑀉𑀧𑀕𑀘𑁆𑀙𑀢𑀺. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀽𑀧𑀝𑁆𑀞𑀺𑀢𑀸, 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸’’𑀢𑀺 (𑀯𑀺𑀪. 𑁫𑁩𑁭) 𑀯𑀼𑀢𑁆𑀢𑀁. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀉𑀢𑁆𑀢𑀭𑁄𑀝𑁆𑀞𑀲𑁆𑀲 𑀯𑁂𑀫𑀚𑁆𑀛𑀧𑀤𑁂𑀲𑁄, 𑀬𑀢𑁆𑀣 𑀦𑀸𑀲𑀺𑀓𑀸𑀯𑀸𑀢𑁄 𑀧𑀝𑀺𑀳𑀜𑁆𑀜𑀢𑀺. 𑀅𑀣 𑀯𑀸 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁬𑁪) 𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸’’𑀢𑀺.

𑀅𑀪𑀺𑀚𑁆𑀛𑀁 ¶ 𑀮𑁄𑀓𑁂𑀢𑀺𑀆𑀤𑀻𑀲𑀼 𑀅𑀪𑀺𑀫𑀼𑀔𑀁 𑀛𑀸𑀬𑀢𑀺 𑀘𑀺𑀦𑁆𑀢𑁂𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀭𑀸𑀕𑁄. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀯𑀺𑀕𑀢𑀸𑀪𑀺𑀚𑁆𑀛𑁂𑀦, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦, 𑀇𑀢𑁆𑀣𑀫𑁆𑀪𑀽𑀢𑁄 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀚𑁆𑀛𑀸𑀬𑀸𑀢𑀺 𑀅𑀪𑀺𑀚𑁆𑀛𑀸𑀢𑁄. 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻𑀢𑀺 𑀬𑀣𑀸 𑀦𑀁 𑀲𑀸 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀧𑀼𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀧𑀭𑀺𑀫𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀁 𑀧𑀽𑀢𑀺𑀓𑀼𑀫𑁆𑀫𑀸𑀲𑀸𑀤𑀬𑁄 𑀯𑀺𑀬 𑀧𑀓𑀢𑀺𑀁 𑀚𑀳𑀸𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀬𑀸 𑀧𑀤𑀼𑀲𑁆𑀲𑀢𑀺, 𑀧𑀭𑀁 𑀯𑀸 𑀧𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀧𑀤𑁄𑀲𑁄, 𑀉𑀪𑀬𑀫𑁆𑀧𑁂𑀢𑀁 𑀓𑁄𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀬𑀲𑁆𑀫𑀸 𑀘𑁂𑀢𑀁 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀲𑀸𑀥𑀸𑀭𑀡𑀯𑀲𑁂𑀦 𑀤𑁂𑀲𑀻𑀬𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻’’𑀢𑀺 𑀏𑀯𑀁 𑀫𑁂𑀢𑁆𑀢𑀸𑀯𑀲𑁂𑀦 𑀅𑀯𑀢𑁆𑀯𑀸 ‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀣𑀺𑀦𑀁 𑀘𑀺𑀢𑁆𑀢𑀲𑁆𑀲 𑀕𑁂𑀮𑀜𑁆𑀜𑀁, 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀸𑀦𑀁. 𑀆𑀮𑁄𑀓𑀲𑀜𑁆𑀜𑀻𑀢𑀺 𑀭𑀢𑁆𑀢𑀺𑀬𑀫𑁆𑀧𑀺 𑀤𑀺𑀯𑀸𑀧𑀺 𑀤𑀺𑀝𑁆𑀞𑀆𑀮𑁄𑀓𑀲𑀜𑁆𑀚𑀸𑀦𑀦𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀢𑀸𑀬 𑀧𑀦 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀲𑁆𑀲 𑀯𑀺𑀲𑁂𑀲𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺.

𑀅𑀦𑀼𑀤𑁆𑀥𑀢𑁄𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑁄 𑀢𑀣𑀸 𑀏𑀯 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄. 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼 ‘‘𑀓𑀣𑀁 𑀇𑀫𑁂, 𑀓𑀣𑀁 𑀇𑀫𑁂’’𑀢𑀺 𑀏𑀯𑀁 𑀧𑀯𑀢𑁆𑀢𑀦𑀢𑁄 𑀓𑀣𑀁𑀓𑀣𑀻𑀲𑀗𑁆𑀔𑀸𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀺𑀭𑀳𑀺𑀢𑁄. 𑀏𑀯𑀁 𑀧𑀜𑁆𑀘𑀦𑀻𑀯𑀭𑀡𑀧𑁆𑀧𑀳𑀸𑀦𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀦𑀻𑀯𑀭𑀡𑀲𑁆𑀲 𑀛𑀸𑀦𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀦𑀸𑀦𑀸𑀯𑀺𑀲𑀬𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀁 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀬𑀢𑀺, 𑀦 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀸𑀬 𑀯𑀸 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀲𑁄𑀢𑀺 𑀬𑁄 𑀬𑀣𑀸𑀯𑀼𑀢𑁆𑀢𑀲𑀻𑀮𑀸𑀤𑀺𑀕𑀼𑀡𑁂 𑀧𑀢𑀺𑀝𑁆𑀞𑀸𑀬 𑀅𑀭𑀜𑁆𑀜𑀸𑀤𑀺𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀕𑀢𑁄 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀼𑀮𑀓𑀫𑁆𑀫𑀝𑁆𑀞𑀸𑀦𑁂 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑀸𑀬 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀉𑀧𑁆𑀧𑀸𑀤𑀺𑀢𑀼𑀧𑀘𑀸𑀭𑀚𑁆𑀛𑀸𑀦𑁂𑀦 𑀧𑀳𑀻𑀦𑀧𑀜𑁆𑀘𑀦𑀻𑀯𑀭𑀡𑁄 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀸𑀬 𑀯𑀸𑀬𑀫𑀢𑀺, 𑀲𑁄𑀢𑀺 𑀅𑀢𑁆𑀣𑁄.

𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑁂. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀬𑀲𑁆𑀫𑀸 𑀇𑀫𑁂 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀬 𑀧𑀦 𑀮𑁄𑀓𑀺𑀬𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑀸, 𑀅𑀪𑀺𑀜𑁆𑀜𑀸𑀪𑀽𑀢𑀸𑀬 𑀯𑀸 𑀫𑀽𑀮𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀻𑀲𑀼 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺. 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸, 𑀅𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀬𑀫𑀢𑁆𑀣𑁂𑀦 𑀧𑀦𑁂𑀢𑁆𑀣 𑀏𑀯-𑀓𑀸𑀭𑁂𑀦 𑀛𑀸𑀦𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀓𑀸𑀫𑀸𑀦𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑁄, 𑀅𑀦𑁆𑀥𑀓𑀸𑀭𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀤𑀻𑀧𑀧𑁆𑀧𑀯𑀢𑁆𑀢𑀺 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀭𑀧𑀤𑁂𑀧𑀺 𑀘𑁂𑀲 𑀏𑀯-𑀓𑀸𑀭𑁄 𑀆𑀦𑁂𑀢𑁆𑀯𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀓𑀸𑀫𑀢𑁄 𑀅𑀜𑁆𑀜𑁂𑀳𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀧𑀤𑀤𑁆𑀯𑀬𑁂𑀧𑀺 𑀧𑀦 ‘‘𑀯𑀺𑀯𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑀯𑀺𑀯𑁂𑀓𑀸𑀤𑀻𑀲𑀼, 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀻𑀲𑀼 𑀘 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀯𑀚𑁆𑀚𑀺𑀢𑀸 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀯𑀢𑁆𑀣𑀼𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄 𑀳𑀺 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄, 𑀓𑀺𑀮𑁂𑀲𑀓𑀸𑀫𑁂𑀳𑀺 𑀧𑀦 𑀲𑁂𑀲𑀸𑀓𑀼𑀲𑀮𑁂𑀳𑀺 𑀘 𑀯𑀺𑀯𑁂𑀓𑀯𑀘𑀦𑀢𑁄 𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸, 𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀯𑀺𑀯𑁂𑀓𑀸 𑀘 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁂𑀢𑁂𑀦 𑀧𑀤𑀤𑁆𑀯𑀬𑁂𑀦 𑀬𑀣𑀸𑀓𑁆𑀓𑀫𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁂𑀲𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀓𑁄 𑀯𑀼𑀢𑁆𑀢𑁄. 𑀏𑀯𑀁 𑀑𑀖𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁 ¶ . 𑀢𑀢𑁆𑀣 𑀯𑀺𑀢𑀓𑁆𑀓𑁂𑀦 𑀘 𑀯𑀺𑀘𑀸𑀭𑁂𑀦 𑀘 𑀲𑀳 𑀯𑀢𑁆𑀢𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦, 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑁂𑀓𑀚𑀦𑁆𑀢𑀺 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀯𑀺𑀯𑁂𑀓𑀢𑁄, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀻𑀢𑀻𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀨𑀭𑀡𑀸𑀧𑀻𑀢𑀺, 𑀲𑀼𑀔𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀁, 𑀇𑀢𑀺 𑀅𑀬𑀜𑁆𑀘 𑀧𑀻𑀢𑀺 ¶ 𑀇𑀤𑀜𑁆𑀘 𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 ‘‘𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀅𑀲𑁆𑀲, 𑀅𑀲𑁆𑀫𑀺𑀁 𑀯𑀸𑀢𑀺 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁, 𑀏𑀯𑀁 𑀏𑀓𑀧𑀤𑀯𑀲𑁂𑀦 ‘‘𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀁 𑀓𑀢𑁆𑀯𑀸 ‘‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀬𑀣𑁂𑀯 𑀳𑀺 𑀛𑀸𑀦𑀁, 𑀏𑀯𑀁 𑀧𑀻𑀢𑀺𑀲𑀼𑀔𑀫𑁆𑀧𑀺 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀻𑀢𑀺. 𑀧𑀞𑀫𑀁 𑀛𑀸𑀦𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀧𑀞𑀫𑀁, 𑀧𑀞𑀫𑀁 𑀉𑀧𑁆𑀧𑀢𑁆𑀢𑀺𑀢𑁄𑀧𑀺 𑀧𑀞𑀫𑀁. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄, 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀯𑀸 𑀛𑀸𑀦𑀁, 𑀇𑀫𑀺𑀦𑀸 𑀦𑀬𑁂𑀦 𑀉𑀧𑀭𑀺 ‘‘𑀤𑀼𑀢𑀺𑀬𑀁 𑀛𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀁 𑀛𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀓𑀺𑀜𑁆𑀘𑀸𑀧𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸𑀧𑀺 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁬𑁯) 𑀯𑀼𑀢𑁆𑀢𑀢𑁆𑀢𑀸 𑀅𑀗𑁆𑀕𑀫𑁂𑀯.

𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀧𑀞𑀫𑀚𑁆𑀛𑀸𑀦𑀲𑁆𑀲 𑀢𑀁 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑀸𑀳𑀺 𑀧𑀜𑁆𑀘𑀳𑀺 𑀯𑀲𑀻𑀳𑀺 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀆𑀲𑀦𑁆𑀦𑀦𑀻𑀯𑀭𑀡𑀧𑀘𑁆𑀘𑀢𑁆𑀣𑀺𑀓𑀢𑀸𑀬 𑀘𑁂𑀯 𑀑𑀴𑀸𑀭𑀺𑀓𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀲𑀫𑀗𑁆𑀕𑀺𑀢𑀸𑀬 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀯𑀺𑀢𑀓𑁆𑀓𑀸𑀤𑀺𑀪𑁂𑀤𑁄𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀸𑀬, 𑀧𑀻𑀢𑀺𑀆𑀤𑀺𑀲𑀦𑁆𑀢𑀗𑁆𑀕𑀧𑀝𑀺𑀮𑀸𑀪𑀸𑀬 ¶ 𑀘 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀧𑁆𑀧𑀸𑀤𑀓𑀜𑁆𑀘 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀽𑀧𑀲𑀫𑀸𑀢𑀺 𑀲𑀫𑀢𑀺𑀓𑁆𑀓𑀫𑀸, 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑀺 𑀚𑀸𑀢𑀁, 𑀅𑀢𑁆𑀢𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀤𑁆𑀥𑀸𑀲𑀗𑁆𑀔𑀸𑀢𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀏𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀼𑀴𑁆𑀳𑀢𑁆𑀢𑀸 𑀏𑀓𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀲𑀫𑀸𑀥𑀺. 𑀢𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀓𑁄𑀤𑀺𑀪𑀸𑀯𑀁. 𑀲𑁄 𑀧𑀦𑀸𑀬𑀁 𑀏𑀓𑁄𑀤𑀺 𑀬𑀲𑁆𑀫𑀸 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲, 𑀦 𑀚𑀻𑀯𑀲𑁆𑀲, 𑀢𑀲𑁆𑀫𑀸 𑀏𑀢𑀁 ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀅𑀬𑀜𑁆𑀘 𑀏𑀓𑁄𑀤𑀺𑀦𑀸𑀫𑀓𑁄 𑀲𑀫𑀸𑀥𑀺, 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀫𑀲𑁆𑀫𑀺𑀜𑁆𑀳𑀺 𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀸𑀪𑀸𑀯𑁂𑀦 𑀩𑀮𑀯𑀢𑀻 𑀲𑀤𑁆𑀥𑀸, 𑀲𑀫𑀸𑀥𑀺 𑀘, 𑀢𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 ¶ 𑀏𑀢𑀲𑁆𑀫𑀺𑀁, 𑀏𑀢𑀲𑁆𑀲 𑀯𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄, 𑀦 𑀢𑀢𑀺𑀬𑀚𑁆𑀛𑀸𑀦𑀸𑀤𑀺 𑀯𑀺𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀯𑀺𑀬 𑀘 𑀅𑀪𑀸𑀯𑀧𑁆𑀧𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀇𑀫𑀲𑁆𑀲 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀇𑀤𑀁 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀸𑀥𑀺𑀚𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄, 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀯𑀸 𑀚𑀸𑀢𑀁, 𑀯𑀺𑀢𑀓𑁆𑀓𑀸𑀤𑀺𑀓𑁆𑀔𑁄𑀪𑀸𑀪𑀸𑀯𑁂𑀦 𑀘𑁂𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀫𑁂𑀯 ‘‘𑀲𑀫𑀸𑀥𑀺𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀯𑀁 𑀤𑀼𑀯𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀢𑀺𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀸𑀤𑀺𑀬𑀼𑀢𑁆𑀢𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁆𑀣 ¶ 𑀆𑀲𑀦𑁆𑀦𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀢𑁆𑀣𑀺𑀓𑀢𑀸𑀬 𑀘𑁂𑀯 𑀑𑀴𑀸𑀭𑀺𑀓𑀧𑀻𑀢𑀗𑁆𑀕𑀲𑀫𑀗𑁆𑀕𑀺𑀢𑀸𑀬 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀢𑀤𑁄𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀸𑀬 𑀲𑁂𑀲𑀲𑀦𑁆𑀢𑀗𑁆𑀕𑀧𑀝𑀺𑀮𑀸𑀪𑀸𑀬 𑀢𑀤𑁂𑀯𑀸𑀭𑀫𑁆𑀫𑀡𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀢𑀢𑀺𑀬𑀁 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀧𑁆𑀧𑀸𑀤𑀓𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀭𑀚𑁆𑀚𑀦𑀁 𑀯𑀺𑀭𑀸𑀕𑁄, 𑀲𑀫𑀢𑀺𑀓𑁆𑀓𑀫𑁄, 𑀢𑀲𑁆𑀫𑀸 𑀯𑀺𑀭𑀸𑀕𑀸. 𑀘-𑀓𑀸𑀭𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺 ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’’𑀢𑀺. 𑀇𑀤𑀜𑁆𑀘𑁂𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁, 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀅𑀧𑀓𑁆𑀔𑀧𑀢𑀺𑀢𑀸 𑀳𑀼𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀢𑀸𑀬 𑀯𑀺𑀲𑀤𑀸𑀬 𑀧𑀻𑀢𑀺𑀯𑀺𑀭𑀸𑀕𑀧𑀤𑀝𑁆𑀞𑀸𑀦𑀸𑀬 𑀣𑀸𑀫𑀕𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻 ‘‘𑀉𑀧𑁂𑀓𑁆𑀔𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀢𑀓𑁆𑀓𑀸𑀤𑀺𑀓𑁆𑀔𑁄𑀪𑀸𑀪𑀸𑀯𑁂𑀦 𑀧𑀦𑁂𑀲𑀸 𑀏𑀢𑁆𑀣𑁂𑀯 𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸 𑀚𑀸𑀢𑀸, 𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀽𑀢𑀺. 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦𑁂𑀯 𑀞𑀺𑀢𑀁 𑀢𑀁𑀧𑀻𑀢𑀺𑀲𑀳𑀘𑀭𑀺𑀢𑀁 𑀲𑀼𑀔𑀁, 𑀢𑀢𑁄 𑀅𑀧𑀦𑀻𑀢𑀁 𑀯𑀘𑁆𑀙𑁄 𑀯𑀺𑀬 𑀩𑀦𑁆𑀥𑀦𑀩𑀮𑁂𑀦 𑀥𑁂𑀦𑀼𑀁 𑀧𑀻𑀢𑀺𑀁 𑀦 𑀉𑀧𑀕𑀘𑁆𑀙𑀢𑀺, 𑀇𑀫𑀲𑁆𑀫𑀺𑀜𑁆𑀘 𑀲𑀢𑀺 𑀅𑀢𑀺𑀫𑀥𑀼𑀭𑁂 𑀲𑀼𑀔𑁂 𑀬𑁄𑀕𑀺𑀦𑁄 𑀦 𑀲𑀸𑀭𑀚𑁆𑀚𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸𑀪𑁄𑀕𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀅𑀢𑀺𑀧𑀡𑀻𑀢𑀁 𑀲𑀼𑀔𑀁, 𑀢𑀁𑀲𑀫𑀼𑀝𑁆𑀞𑀺𑀢𑁂𑀦 𑀢𑀲𑁆𑀲 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀭𑀽𑀧𑀓𑀸𑀬𑁄 𑀨𑀼𑀝𑁆𑀞𑁄, 𑀬𑀲𑁆𑀲 𑀨𑀼𑀝𑁆𑀞𑀢𑁆𑀢𑀸 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀓𑀸𑀬𑀺𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀆𑀳. 𑀬𑀁 𑀢𑀦𑁆𑀢𑀺𑀆𑀤𑀻𑀲𑀼 𑀬𑀦𑁆𑀢𑀺 𑀬𑀲𑁆𑀫𑀸, 𑀬𑀁 ¶ 𑀛𑀸𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀁 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀓𑀺𑀦𑁆𑀢𑀺? ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺. 𑀏𑀯𑀁 𑀏𑀓𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀸𑀤𑀺𑀬𑀼𑀢𑁆𑀢𑀁 ¶ 𑀢𑀢𑀺𑀬𑀁 𑀛𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀦 𑀛𑀸𑀦𑀁 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁯𑁧) 𑀯𑀼𑀢𑁆𑀢𑀁, 𑀢𑀁 𑀲𑀧𑀭𑀺𑀓𑁆𑀔𑀸𑀭𑀁 𑀛𑀸𑀦𑀁 𑀤𑀲𑁆𑀲𑁂𑀢𑀼𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀉𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀸𑀦𑀁 𑀧𑀦 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀻’’𑀢𑀺𑀆𑀤𑀺 (𑀯𑀺𑀪. 𑁬𑁨𑁪).

𑀏𑀯𑀁 𑀢𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀢𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀗𑁆𑀕𑀧𑁆𑀧𑀳𑀸𑀦𑀸𑀬, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀲𑁂𑀲𑀲𑀦𑁆𑀢𑀗𑁆𑀕𑀧𑀝𑀺𑀮𑀸𑀪𑀸𑀬 𑀘 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀧𑁆𑀧𑀸𑀤𑀓𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀢𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲, 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸. 𑀧𑀼𑀩𑁆𑀩𑁂𑀯𑀸𑀢𑀺 𑀢𑀜𑁆𑀘 𑀔𑁄 𑀧𑀼𑀩𑁆𑀩𑁂𑀯, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑁂𑀢𑀺 𑀅𑀢𑁆𑀣𑁄. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑁂𑀢𑀲𑀺𑀓𑀲𑁆𑀲 𑀲𑀼𑀔𑀲𑁆𑀲, 𑀤𑀼𑀓𑁆𑀔𑀲𑁆𑀲 𑀘 𑀧𑀼𑀩𑁆𑀩𑁂𑀯 𑀧𑀳𑀸𑀦𑀸. 𑀓𑀤𑀸 𑀧𑀦 𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀻𑀢𑀺? 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀺 𑀳𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀸𑀤𑀺𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂 𑀏𑀯 𑀧𑀳𑀻𑀬𑀦𑁆𑀢𑀺. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀧𑀦𑁂𑀲 ‘‘𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁦) 𑀏𑀯𑀁 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺? 𑀅𑀢𑀺𑀲𑀬𑀦𑀺𑀭𑁄𑀥𑀲𑁆𑀲 ¶ 𑀯𑀼𑀢𑁆𑀢𑀢𑁆𑀢𑀸. 𑀉𑀧𑀘𑀸𑀭𑀓𑁆𑀔𑀡𑁂𑀲𑀼 𑀳𑀺 𑀬𑁄 𑀦𑀺𑀭𑁄𑀥𑁄, 𑀲𑁄 𑀦𑀺𑀭𑁄𑀥𑁄 𑀏𑀯, 𑀦𑀸𑀢𑀺𑀲𑀬𑀦𑀺𑀭𑁄𑀥𑁄, 𑀲𑁄 𑀧𑀦 𑀛𑀸𑀦𑀓𑁆𑀔𑀡𑁂𑀲𑀼 𑀏𑀯. 𑀢𑀢𑁄 𑀏𑀯 𑀳𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀦 𑀧𑀳𑀻𑀦𑀸𑀧𑀺 𑀏𑀢𑀸 𑀯𑁂𑀤𑀦𑀸 𑀏𑀢𑁆𑀣 𑀤𑀼𑀯𑀺𑀜𑁆𑀜𑁂𑀬𑁆𑀬𑀮𑀓𑁆𑀔𑀡𑀸𑀬 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀤𑀼𑀓𑁆𑀔𑀸𑀤𑀺𑀩𑁆𑀬𑀢𑀺𑀭𑁂𑀓𑁂𑀦 𑀲𑀼𑀔𑀕𑁆𑀕𑀳𑀡𑀢𑁆𑀣𑀁, 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘𑀲𑁆𑀲 𑀛𑀸𑀦𑀲𑁆𑀲 𑀲𑀫𑀸𑀳𑀝𑀸, 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑀲𑁆𑀲. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸, 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁫𑁮).

𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀲𑀗𑁆𑀔𑀸𑀢𑀸𑀬 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺. 𑀦𑀺𑀭𑀼𑀧𑀓𑁆𑀮𑁂𑀲𑀢𑀸𑀬 𑀳𑀺 𑀢𑀁 𑀧𑀭𑀺𑀲𑀼𑀤𑁆𑀥𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀧𑀭𑀺𑀲𑀼𑀤𑁆𑀥𑀸, 𑀅𑀧𑀺𑀘 𑀔𑁄 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀢𑀺𑀲𑀻𑀲𑁂𑀦 𑀧𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀯𑀁 𑀏𑀓𑀗𑁆𑀕𑀯𑀺𑀧𑁆𑀧𑀳𑀻𑀦𑀁 ¶ 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀸𑀤𑀺𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀬𑀁 𑀢𑀢𑁆𑀣 𑀧𑀞𑀫𑀁, 𑀏𑀯𑀁 𑀅𑀥𑀺𑀕𑀢𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀓𑀭𑀚𑀭𑀽𑀧𑁂 𑀤𑀡𑁆𑀟𑀸𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀘𑀓𑁆𑀔𑀼𑀭𑁄𑀕𑀸𑀤𑀺𑀆𑀩𑀸𑀥𑀸𑀦𑀜𑁆𑀘 𑀯𑀲𑁂𑀦 𑀤𑀺𑀝𑁆𑀞𑀸𑀤𑀻𑀦𑀯𑀲𑁆𑀲 𑀓𑀭𑀚𑀭𑀽𑀧𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀆𑀓𑀸𑀲𑀓𑀲𑀺𑀡𑀯𑀺𑀭𑀳𑀺𑀢𑁂𑀲𑀼 𑀦𑀯𑀲𑀼 𑀓𑀲𑀺𑀡𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀲𑀸𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀧𑀝𑀺𑀪𑀸𑀕𑀭𑀽𑀧𑀫𑁆𑀧𑀺 𑀓𑀭𑀚𑀭𑀽𑀧𑀧𑀝𑀺𑀪𑀸𑀕𑀢𑀸𑀬, 𑀅𑀭𑀜𑁆𑀜𑁂 𑀲𑀧𑁆𑀧𑀸𑀦𑀼𑀩𑀦𑁆𑀥𑀲𑁆𑀲 𑀪𑀬𑁂𑀦 𑀧𑀮𑀸𑀬𑀢𑁄 𑀭𑀚𑁆𑀚𑀼𑀢𑀸𑀮𑀧𑀡𑁆𑀡𑀸𑀤𑀺𑀁 𑀲𑀧𑁆𑀧𑀧𑀝𑀺𑀪𑀸𑀕𑀢𑀸𑀬 𑀯𑀺𑀬 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀲𑁆𑀲 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀁 𑀛𑀸𑀦𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀢𑀢𑁆𑀣 ¶ 𑀦𑀺𑀩𑁆𑀩𑁂𑀚𑀦𑀻𑀬𑀭𑀽𑀧𑀧𑀝𑀺𑀪𑀸𑀕𑀸𑀭𑀫𑁆𑀫𑀡𑀢𑀸𑀬, 𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀧𑀘𑁆𑀘𑀢𑁆𑀣𑀺𑀓𑀢𑀸𑀬 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀅𑀗𑁆𑀕𑁂𑀲𑀼 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀪𑀸𑀯𑁂𑀦 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀪𑀽𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀯𑀸 𑀬𑀢𑁆𑀢𑀓𑀁 𑀯𑀸 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀓𑀲𑀺𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀯𑀸 𑀓𑀲𑀺𑀡𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀯𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀯𑀸 𑀫𑀦𑀲𑀺𑀓𑀸𑀭𑁂𑀦 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀸 𑀢𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀦𑀺𑀫𑀺𑀢𑁆𑀢𑀁 ‘‘𑀆𑀓𑀸𑀲𑁄’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦, 𑀲𑀩𑁆𑀩𑀸𑀲𑀁 𑀯𑀸 𑀅𑀦𑀯𑀲𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘. 𑀭𑀽𑀧𑀚𑁆𑀛𑀸𑀦𑀫𑁆𑀧𑀺 𑀳𑀺 ‘‘𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸’’𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀘𑁆𑀘𑀢𑀺, 𑀢𑀤𑀸𑀭𑀫𑁆𑀫𑀡𑀓𑀲𑀺𑀡𑀫𑁆𑀧𑀺 𑀭𑀽𑀧𑀦𑁆𑀢𑀺 𑀲𑀜𑁆𑀜𑀸 𑀦𑀸𑀫𑀫𑀲𑁆𑀲𑀸𑀢𑀺 ‘‘𑀭𑀽𑀧𑀲𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀢𑀺𑀓𑁆𑀓𑀫𑀸𑀢𑀺 𑀯𑀺𑀭𑀸𑀕𑀸, 𑀦𑀺𑀭𑁄𑀥𑀸 𑀘. 𑀯𑀺𑀪𑀗𑁆𑀕𑁂 𑀧𑀦 𑀲𑀜𑁆𑀜𑀸𑀲𑀼 𑀲𑀫𑀢𑀺𑀓𑁆𑀓𑀦𑁆𑀢𑀸𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁬𑁦𑁨) 𑀲𑀜𑁆𑀜𑀸𑀦𑀫𑁂𑀯 𑀲𑀫𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀦𑀢𑁆𑀣𑁂𑀯𑀸𑀢𑀺 𑀢𑀁 𑀲𑀫𑀢𑀺𑀓𑁆𑀓𑀫𑀯𑀲𑁂𑀦𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸𑀯.

𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁, 𑀭𑀽𑀧𑀸𑀤𑀻𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀁 𑀧𑀝𑀺𑀖𑀸𑀢𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 ¶ 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸, 𑀢𑀸𑀲𑀁 𑀅𑀢𑁆𑀣𑀗𑁆𑀕𑀫𑀸. 𑀓𑀺𑀜𑁆𑀘𑀸𑀧𑀺 𑀢𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀦 𑀲𑀦𑁆𑀢𑀺, 𑀅𑀣 𑀔𑁄 𑀦 𑀧𑀳𑀻𑀦𑀢𑁆𑀢𑀸 𑀦 𑀲𑀦𑁆𑀢𑀺. 𑀦 𑀳𑀺 𑀭𑀽𑀧𑀯𑀺𑀭𑀸𑀕𑀸𑀬 𑀭𑀽𑀧𑀸𑀯𑀘𑀭𑀪𑀸𑀯𑀦𑀸 𑀲𑀁𑀯𑀢𑁆𑀢𑀢𑀺, 𑀭𑀽𑀧𑀸𑀬𑀢𑁆𑀢𑀸𑀯 𑀏𑀢𑀸𑀲𑀁 ¶ 𑀧𑀯𑀢𑁆𑀢𑀺, 𑀅𑀬𑀁 𑀧𑀦 𑀪𑀸𑀯𑀦𑀸 𑀭𑀽𑀧𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀸 𑀏𑀢𑁆𑀣 𑀧𑀳𑀻𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀦𑀸𑀦𑀢𑁆𑀢𑁂 𑀕𑁄𑀘𑀭𑁂 𑀧𑀯𑀢𑁆𑀢𑀸𑀦𑀁, 𑀦𑀸𑀦𑀢𑁆𑀢𑀸𑀦𑀁 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀧𑀯𑀢𑁆𑀢𑀸𑀦𑀜𑁆𑀘 𑀘𑀢𑀼𑀘𑀢𑁆𑀢𑀸𑀮𑀻𑀲𑀓𑀸𑀫𑀸𑀯𑀘𑀭𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀸𑀯𑀚𑁆𑀚𑀦𑀸. 𑀏𑀢𑁆𑀣 𑀘 𑀭𑀽𑀧𑀧𑀝𑀺𑀖𑀲𑀜𑁆𑀜𑀸𑀦𑀁 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀪𑀯𑁂𑀧𑀺 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 ‘‘𑀲𑀫𑀢𑀺𑀓𑁆𑀓𑀫𑀸 𑀅𑀢𑁆𑀣𑀗𑁆𑀕𑀫𑀸’’𑀢𑀺 𑀏𑀯𑀁 𑀅𑀪𑀸𑀯𑁄 𑀏𑀯 𑀯𑀼𑀢𑁆𑀢𑁄. ‘‘𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀁 𑀦𑀯𑀓𑀺𑀭𑀺𑀬𑀸𑀦𑀁 𑀤𑀲𑀸𑀓𑀼𑀲𑀮𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀻𑀲𑀢𑀺𑀲𑀜𑁆𑀜𑀸𑀦𑀁 𑀅𑀭𑀽𑀧𑀪𑀯𑁂𑀧𑀺 𑀫𑀦𑀲𑀺𑀓𑀸𑀭𑁂𑀦 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀉𑀧𑁆𑀧𑀸𑀤𑀦𑁆𑀢𑁄 𑀯𑀸 𑀯𑀬𑀦𑁆𑀢𑁄 𑀯𑀸 𑀧𑀜𑁆𑀜𑀸𑀬𑀢𑀻𑀢𑀺 𑀅𑀦𑀦𑁆𑀢𑁄. 𑀆𑀓𑀸𑀲𑁄𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄 𑀯𑀼𑀘𑁆𑀘𑀢𑀺, 𑀫𑀦𑀲𑀺𑀓𑀸𑀭𑀯𑀲𑁂𑀦𑀧𑁂𑀢𑁆𑀣 𑀅𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀆𑀓𑀸𑀲𑁂 𑀘𑀺𑀢𑁆𑀢𑀁 𑀞𑀧𑁂𑀢𑀺…𑀧𑁂… 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 (𑀯𑀺𑀪. 𑁬𑁦𑁫). 𑀇𑀤𑀁 𑀧𑀦𑀲𑁆𑀲 𑀪𑀸𑀯𑀦𑀸𑀓𑀸𑀭𑀤𑀲𑁆𑀲𑀦𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁 𑀆𑀓𑀸𑀲𑀫𑁂𑀯 𑀅𑀦𑀦𑁆𑀢𑀁 𑀆𑀓𑀸𑀲𑀸𑀦𑀦𑁆𑀢𑀁, 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁, 𑀢𑀤𑁂𑀯 𑀆𑀓𑀸𑀲𑀸𑀦𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁, 𑀢𑀁 𑀆𑀭𑀫𑁆𑀫𑀡𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀼𑀢𑁆𑀢𑀦𑀬𑁂𑀦 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀢𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀆𑀲𑀦𑁆𑀦𑀭𑀽𑀧𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀢𑀸𑀬, 𑀭𑀽𑀧𑀧𑀝𑀺𑀪𑀸𑀕𑀸𑀓𑀸𑀲𑀸𑀭𑀫𑁆𑀫𑀡𑀢𑀸𑀬 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀢𑀁 𑀲𑀫𑀢𑀺𑀓𑁆𑀓𑀫𑀸𑀬 𑀆𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 ¶ 𑀫𑀦𑀲𑀺𑀓𑀭𑁄𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀛𑀸𑀦𑀫𑁆𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀭𑀫𑁆𑀫𑀡𑀫𑁆𑀧𑀺. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀧𑀼𑀭𑀺𑀫𑀦𑀬𑁂𑀦 𑀆𑀓𑀸𑀲𑀸𑀦𑀜𑁆𑀘𑀜𑁆𑀘 𑀢𑀁 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀆𑀭𑀫𑁆𑀫𑀡𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀉𑀪𑀬𑀲𑁆𑀲𑀸𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦, 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀁 ¶ 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀜𑁆𑀜𑁂𑀯 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀆𑀓𑀸𑀲𑀁 𑀅𑀦𑀦𑁆𑀢𑀢𑁄 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀁 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀅𑀦𑀦𑁆𑀢𑀁. 𑀯𑀺𑀪𑀗𑁆𑀕𑁂𑀧𑀺 𑀳𑀺 ‘‘𑀅𑀦𑀦𑁆𑀢𑀁 𑀨𑀭𑀢𑀻’’𑀢𑀺 (𑀯𑀺𑀪. 𑁬𑁧𑁦) 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀦𑀦𑁆𑀢𑀫𑁂𑀯 𑀆𑀦𑀜𑁆𑀘𑀁, 𑀯𑀺𑀜𑁆𑀜𑀸𑀡𑀜𑁆𑀘 𑀢𑀁 𑀆𑀦𑀜𑁆𑀘𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀭𑀼𑀴𑁆𑀳𑀺𑀢𑁄 ‘‘𑀯𑀺𑀜𑁆𑀜𑀸𑀡𑀜𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀆𑀬𑀢𑀦𑀫𑀸𑀭𑀫𑁆𑀫𑀡𑀫𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀤𑀼𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀢𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀆𑀲𑀦𑁆𑀦𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀢𑀸𑀬, 𑀢𑀤𑀸𑀭𑀫𑁆𑀫𑀡𑀢𑀸𑀬 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀢𑀁 𑀲𑀫𑀢𑀺𑀓𑁆𑀓𑀫𑀸𑀬 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀁 ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀯𑀸 ‘‘𑀲𑀼𑀜𑁆𑀜𑀁 𑀲𑀼𑀜𑁆𑀜’’𑀦𑁆𑀢𑀺 𑀯𑀸 ‘‘𑀯𑀺𑀯𑀺𑀢𑁆𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 𑀯𑀸 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑁄’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀛𑀸𑀦𑀲𑁆𑀲, 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀲𑀫𑀢𑀺𑀓𑁆𑀓𑀫𑁄𑀯 𑀯𑁂𑀤𑀺𑀢𑀩𑁆𑀩𑁄. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 ‘‘𑀦𑀢𑁆𑀣𑀺 𑀦𑀢𑁆𑀣𑀺, 𑀲𑀼𑀜𑁆𑀜𑀁 𑀲𑀼𑀜𑁆𑀜𑀁, 𑀯𑀺𑀯𑀺𑀢𑁆𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄𑀢𑀺 𑀅𑀢𑁆𑀣𑁄.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 ¶ 𑀏𑀢𑁆𑀣 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀆𑀓𑀺𑀜𑁆𑀘𑀜𑁆𑀜𑀁 𑀆𑀬𑀢𑀦𑀫𑀸𑀭𑀫𑁆𑀫𑀡𑀫𑀲𑁆𑀲𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀤𑀦𑀦𑁆𑀢𑀭𑀁 𑀅𑀥𑀺𑀕𑀢𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀢𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀆𑀲𑀦𑁆𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀘𑁆𑀘𑀢𑁆𑀣𑀺𑀓𑀢𑀸𑀬 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀢𑀁 𑀲𑀫𑀢𑀺𑀓𑁆𑀓𑀫𑀸𑀬 𑀢𑀤𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 ‘‘𑀲𑀦𑁆𑀢𑀁 𑀲𑀦𑁆𑀢’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄, 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀢𑁄 𑀦𑁂𑀯𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀁, 𑀢𑀤𑁂𑀯 𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀆𑀬𑀢𑀦𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁.

𑀅𑀣 𑀯𑀸 𑀬𑀸𑀬𑀫𑁂𑀢𑁆𑀣 𑀲𑀜𑁆𑀜𑀸, 𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁂𑀯𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 ¶ 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀘 𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀲𑀜𑁆𑀜𑀸𑀯 𑀏𑀤𑀺𑀲𑀻, 𑀅𑀧𑀺 𑀢𑀼 𑀨𑀲𑁆𑀲𑁄𑀧𑀺 𑀦𑁂𑀯𑀨𑀲𑁆𑀲𑁄 𑀦𑀸𑀨𑀲𑁆𑀲𑁄, 𑀘𑀺𑀢𑁆𑀢𑀫𑁆𑀧𑀺 𑀦𑁂𑀯𑀘𑀺𑀢𑁆𑀢𑀁 𑀦𑀸𑀘𑀺𑀢𑁆𑀢𑀁, 𑀏𑀯𑀁 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺, 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦𑀸𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀲𑀗𑁆𑀔𑀸𑀭𑀪𑀸𑀯𑁂𑀦. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀬𑀁 𑀧𑀦𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀺𑀡𑁆𑀟𑀢𑁆𑀣𑀧𑁆𑀧𑀓𑀸𑀲𑀦𑀸 𑁋 ‘‘𑀇𑀥 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺𑀦𑀸 𑀲𑀸𑀲𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑀧𑀼𑀕𑁆𑀕𑀮𑀲𑁆𑀲 ¶ 𑀧𑀢𑀺𑀝𑁆𑀞𑀸𑀪𑀽𑀢𑀲𑀻𑀮𑁂𑀲𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀉𑀧𑀤𑀺𑀲𑀢𑀺. ‘‘𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀺𑀪𑀸𑀯𑀁. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀢𑀤𑀼𑀧𑀓𑀸𑀭𑀓𑁂 𑀘 𑀥𑀫𑁆𑀫𑁂. ‘‘𑀅𑀡𑀼𑀫𑀢𑁆𑀢𑁂𑀲𑀽’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑀻𑀮𑁂𑀳𑀺 𑀅𑀘𑀯𑀦𑀁, 𑀢𑁂𑀲𑀜𑁆𑀘 𑀅𑀦𑀯𑀲𑁂𑀲𑀢𑁄 𑀲𑀫𑀸𑀤𑀸𑀦𑀁. ‘‘𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽’’𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁, 𑀲𑀦𑁆𑀢𑁄𑀲𑀸𑀤𑀺𑀕𑀼𑀡𑀜𑁆𑀘. ‘‘𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀻𑀮𑀥𑀼𑀢𑀗𑁆𑀕𑁂𑀲𑀼 𑀧𑀢𑀺𑀝𑁆𑀞𑀺𑀢𑀲𑁆𑀲 𑀪𑀸𑀯𑀦𑀸𑀭𑀸𑀫𑀲𑁆𑀲 𑀢𑀤𑀼𑀧𑀓𑀸𑀭𑀓𑁂 𑀥𑀫𑁆𑀫𑁂. ‘‘𑀩𑁄𑀥𑀺𑀧𑀓𑁆𑀔𑀺𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀁. ‘‘𑀲𑁄 𑀅𑀪𑀺𑀓𑁆𑀓𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀸𑀦𑀁 𑀅𑀧𑀭𑀺𑀳𑀸𑀦𑀸𑀬, 𑀯𑀓𑁆𑀔𑀫𑀸𑀦𑀸𑀦𑀜𑁆𑀘 𑀧𑀝𑀺𑀮𑀸𑀪𑀸𑀬 𑀲𑀢𑀺𑀲𑀫𑁆𑀧𑀬𑁄𑀕𑀁. ‘‘𑀲𑁄 𑀯𑀺𑀯𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀁. ‘‘𑀲𑁄 𑀅𑀭𑀜𑁆𑀜𑀕𑀢𑁄’’𑀢𑀺𑀆𑀤𑀺𑀦𑀸 𑀛𑀸𑀦𑀪𑀸𑀯𑀦𑀸𑀭𑀫𑁆𑀪𑀧𑁆𑀧𑀓𑀸𑀭𑀁. ‘‘𑀲𑁄 𑀅𑀪𑀺𑀚𑁆𑀛’’𑀦𑁆𑀢𑀺𑀆𑀤𑀺𑀦𑀸 𑀛𑀸𑀦𑀪𑀸𑀯𑀦𑀸𑀪𑀺𑀬𑁄𑀕𑁂𑀦 𑀧𑀳𑀻𑀦𑀧𑀜𑁆𑀘𑀦𑀻𑀯𑀭𑀡𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀼𑀧𑁆𑀧𑀢𑁆𑀢𑀺𑀁. ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀉𑀧𑀭𑀽𑀧𑀭𑀺 𑀯𑀸𑀬𑀫𑀢𑁄 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑀁 𑀉𑀧𑀤𑀺𑀲𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁂 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀢𑀻𑀲𑀼 𑀳𑀺 𑀦𑀬𑁂𑀲𑀼 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀉𑀧𑁂𑀓𑁆𑀔𑀸𑀏𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀸 𑀛𑀸𑀦𑀥𑀫𑁆𑀫𑀸 𑀦𑀸𑀦𑀸𑀦𑀬𑁂𑀳𑀺 𑀯𑀺𑀪𑀢𑁆𑀢𑀸, 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑁂𑀲𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀯 𑀇𑀥 𑀲𑀗𑁆𑀕𑀳𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀧𑀦𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸𑀤𑀬𑁄𑀧𑀺 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀢𑁂 𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀘𑁂𑀯 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀘 𑀯𑀼𑀢𑁆𑀢𑀸, 𑀇𑀥 𑀧𑀦 𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀦 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀢𑀻𑀡𑀺 𑀛𑀸𑀦𑀸𑀦𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀘𑀢𑀼𑀢𑁆𑀣𑀁 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 ¶ 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀉𑀧𑁂𑀓𑁆𑀔𑀸 𑀧𑀦𑁂𑀢𑁆𑀣 𑀯𑁂𑀤𑀦𑀸 𑀦 𑀯𑀢𑁆𑀢𑀩𑁆𑀩𑀸, 𑀲𑀺𑀬𑀸 ¶ 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀚𑁆𑀚𑀺𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀯𑀺𑀢𑀓𑁆𑀓𑁄 𑀧𑀦𑁂𑀢𑁆𑀣 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀯𑀺𑀘𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄, 𑀢𑀻𑀡𑀺 𑀛𑀸𑀦𑀸𑀦𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀤𑁆𑀯𑁂 𑀛𑀸𑀦𑀸𑀦𑀺 𑀧𑀻𑀢𑀺𑀯𑀚𑁆𑀚𑀺𑀢𑀸𑀦𑀺 𑀧𑀻𑀢𑀺𑀲𑀳𑀕𑀢𑀸𑀦𑀺, 𑀢𑀻𑀡𑀺 𑀲𑀼𑀔𑀯𑀚𑁆𑀚𑀺𑀢𑀸𑀦𑀺 𑀲𑀼𑀔𑀲𑀳𑀕𑀢𑀸𑀦𑀺, 𑀘𑀢𑀼𑀢𑁆𑀣𑀁 𑀉𑀧𑁂𑀓𑁆𑀔𑀸𑀯𑀚𑁆𑀚𑀺𑀢𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀢𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀁, 𑀉𑀧𑁂𑀓𑁆𑀔𑀸 𑀘 𑀇𑀥 𑀦 𑀯𑀢𑁆𑀢𑀩𑁆𑀩𑀁…𑀧𑁂… 𑀲𑀺𑀬𑀸 𑀫𑀳𑀕𑁆𑀕𑀢𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸, 𑀢𑀻𑀡𑀺 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀘𑀢𑀼𑀢𑁆𑀣𑀁 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀜𑁆𑀘, 𑀢𑀻𑀡𑀺 𑀲𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀘𑀢𑀼𑀢𑁆𑀣𑀁 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀜𑁆𑀘…𑀧𑁂… 𑀧𑀻𑀢𑀺 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺, 𑀘𑀢𑀼𑀢𑁆𑀣𑀁 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀜𑁆𑀘…𑀧𑁂… 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸 𑀦 𑀳𑁂𑀢𑀽…𑀧𑁂… 𑀦𑁄𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀅𑀭𑀡𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀧𑀦𑁂𑀢𑁆𑀣 𑀦𑀢𑁆𑀣𑀺, 𑀇𑀢𑁄 𑀧𑀭𑀁 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑁂 𑀏𑀯 𑀯𑀓𑁆𑀔𑀸𑀫.

𑀛𑀸𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺𑀆𑀤𑀻𑀲𑀼 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀏𑀢𑀸 𑀳𑀺 𑀆𑀭𑀫𑁆𑀫𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑁂 𑀯𑀸 𑀲𑀢𑁆𑀢𑁂 𑀨𑀭𑀦𑁆𑀢𑀺, 𑀏𑀓𑀲𑀢𑁆𑀢𑀫𑁆𑀳𑀺 𑀯𑀸 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀢𑁄 𑀨𑀭𑀦𑁆𑀢𑀻𑀢𑀺 𑀏𑀯𑀁 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 ‘‘𑀅𑀧𑁆𑀧𑀫𑀜𑁆𑀜𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀢𑁆𑀢 𑀅𑀧𑁆𑀧𑀫𑀸𑀡𑀯𑀲𑁂𑀦𑀸𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁂𑀦. 𑀏𑀓𑀁 𑀤𑀺𑀲𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀤𑀺𑀲𑀁, 𑀢𑀁𑀤𑀺𑀲𑀸𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀨𑀭𑀡𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 ¶ 𑀓𑀢𑁆𑀯𑀸. 𑀯𑀺𑀳𑀭𑀢𑀻𑀢𑀺 𑀧𑀯𑀢𑁆𑀢𑁂𑀢𑀺. 𑀢𑀣𑀸 𑀤𑀼𑀢𑀺𑀬𑀦𑁆𑀢𑀺𑀆𑀤𑀻𑀲𑀼. 𑀬𑀣𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸, 𑀢𑀣𑁂𑀯 𑀢𑀤𑀦𑀦𑁆𑀢𑀭𑀁 𑀤𑀼𑀢𑀺𑀬𑀁, 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀦𑁆𑀢𑀺 𑀏𑀢𑁂𑀦𑁂𑀯 𑀦𑀬𑁂𑀦 𑀉𑀧𑀭𑀺𑀫𑀁 𑀤𑀺𑀲𑀁, 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁, 𑀅𑀦𑀼𑀤𑀺𑀲𑀜𑁆𑀘 𑀅𑀦𑀼𑀓𑁆𑀓𑀫𑁂𑀦 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀏𑀓𑀫𑁂𑀓𑀁 𑀤𑀺𑀲𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀑𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀢𑀁 𑀤𑀲𑁆𑀲𑀺𑀢𑀁.

𑀲𑀩𑁆𑀩𑀥𑀻𑀢𑀺𑀆𑀤𑀺 ¶ 𑀧𑀦 𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀲𑀼 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀫𑀺𑀢𑁆𑀢𑀲𑀧𑀢𑁆𑀢𑀫𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑁂𑀲𑀼 𑀅𑀢𑁆𑀢𑀢𑀸𑀬, 𑀢𑁂𑀲𑀼 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀢𑁆𑀢𑀲𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀦 𑀘𑀺𑀢𑁆𑀢𑀪𑀸𑀯𑁂𑀦, 𑀈𑀲𑀓𑀫𑁆𑀧𑀺 𑀩𑀳𑀺 𑀅𑀯𑀺𑀓𑁆𑀔𑁂𑀧𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸’’𑀢𑀺 𑀇𑀤𑀁 ‘‘𑀯𑀺𑀧𑀼𑀮𑁂𑀦𑀸’’𑀢𑀺𑀆𑀤𑀻𑀳𑀺 𑀯𑀺𑀲𑁂𑀲𑀦𑁂𑀳𑀺 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀯𑀲𑁂𑀦 𑀯𑀸 𑀯𑀼𑀢𑁆𑀢𑀁, 𑀦𑀺𑀕𑀫𑀦𑀯𑀲𑁂𑀦 𑀯𑀸. 𑀢𑀢𑁆𑀣 𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀽𑀫𑀺𑀯𑀲𑁂𑀦 𑀧𑀦 𑀫𑀳𑀕𑁆𑀕𑀢𑀢𑀸. 𑀧𑀕𑀼𑀡𑀯𑀲𑁂𑀦, 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀢𑀸. 𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦 𑀅𑀯𑁂𑀭𑀢𑀸. 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑁂𑀦 𑀦𑀺𑀤𑁆𑀤𑀼𑀓𑁆𑀔𑀢𑀸, 𑀲𑀗𑁆𑀔𑀢𑀢𑀸, 𑀅𑀩𑁆𑀬𑀸𑀧𑀚𑁆𑀚𑀢𑀸 𑀘 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀓𑀭𑀼𑀡𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀯𑀺𑀪𑀗𑁆𑀕𑀦𑀬𑁂𑀦 𑀧𑀦 𑀢𑀻𑀲𑀼 𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀘𑀺𑀢𑁆𑀢𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀽𑀢𑀸 𑀅𑀤𑁄𑀲𑁄 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀦𑀸𑀦𑀸𑀦𑀬𑁂𑀳𑀺 𑀯𑀺𑀪𑀢𑁆𑀢𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀓𑀸𑀫𑀸𑀯𑀘𑀭𑀪𑀽𑀢𑀸 𑀘 𑀏𑀢𑀸 𑀇𑀥 𑀦 𑀕𑀳𑀺𑀢𑀸. 𑀅𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀦𑁂𑀢𑀸 𑀅𑀧𑁆𑀧𑀫𑀜𑁆𑀜𑀸 𑀦𑀢𑁆𑀣𑁂𑀯𑀸𑀢𑀺. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀦𑁂𑀢𑀸 𑀢𑀸𑀯 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 ¶ 𑀅𑀩𑁆𑀬𑀸𑀓𑀢𑀸. 𑀢𑀺𑀲𑁆𑀲𑁄 𑀲𑀼𑀔𑀸𑀬, 𑀘𑀢𑀼𑀢𑁆𑀣𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀯𑀺𑀧𑀸𑀓𑀢𑁆𑀢𑀺𑀓𑁂 𑀢𑀺𑀥𑀸𑀧𑀺, 𑀉𑀧𑁂𑀓𑁆𑀔𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀲𑁂𑀲𑀸 𑀢𑀺𑀥𑀸𑀧𑀺, 𑀫𑀳𑀕𑁆𑀕𑀢𑀸𑀯, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼 𑀦 𑀯𑀢𑁆𑀢𑀩𑁆𑀩𑀸𑀯, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀯, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀯, 𑀫𑁂𑀢𑁆𑀢𑀸 𑀳𑁂𑀢𑀼, 𑀲𑁂𑀲𑀸 𑀦 𑀳𑁂𑀢𑀽, 𑀦𑁄 𑀘𑀺𑀢𑁆𑀢𑀸, 𑀘𑁂𑀢𑀲𑀺𑀓𑀸, 𑀭𑀽𑀧𑀸𑀯𑀘𑀭𑀸, 𑀲𑀉𑀢𑁆𑀢𑀭𑀸𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀧𑀤𑀸𑀦𑀺, 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸, 𑀢𑀸𑀲𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 ¶ 𑀧𑀤𑀁, 𑀧𑀜𑁆𑀘𑀲𑀼 𑀧𑀦 𑀲𑀻𑀮𑀗𑁆𑀕𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀗𑁆𑀕𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀧𑀸𑀡𑀲𑁆𑀲 𑀅𑀢𑀻𑀯 𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄𑀢𑀺 𑀅𑀢𑁆𑀣𑁄. 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸. 𑀯𑁂𑀭𑀫𑀡𑀻𑀢𑀺 𑀯𑀺𑀭𑀢𑀺, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁. 𑀅𑀤𑀺𑀦𑁆𑀦𑀦𑁆𑀢𑀺 𑀦 𑀤𑀺𑀦𑁆𑀦𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀧𑀭𑀲𑁆𑀲 𑀳𑀭𑀡𑀁 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀢𑀣𑀸𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀫𑀺𑀘𑁆𑀙𑀸𑀘𑀸𑀭𑀸𑀢𑀺 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀮𑀸𑀫𑀓𑀸𑀘𑀸𑀭𑀸, 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀺𑀲𑀗𑁆𑀔𑀸𑀢𑀸𑀲𑀼, 𑀇𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 ¶ 𑀦𑀺𑀬𑀫𑀺𑀢𑀧𑀼𑀭𑀺𑀲𑀢𑁄 𑀧𑀭𑀧𑀼𑀭𑀺𑀲𑀲𑀗𑁆𑀔𑀸𑀢𑁂𑀲𑀼 𑀘 𑀅𑀕𑀫𑀦𑀻𑀬𑀝𑁆𑀞𑀸𑀦𑁂𑀲𑀼 𑀯𑀻𑀢𑀺𑀓𑁆𑀓𑀫𑀸𑀘𑀸𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦 𑀅𑀕𑀫𑀦𑀻𑀬𑀯𑀢𑁆𑀣𑀽𑀲𑀼 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀸𑀤𑀦𑁄𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸, 𑀅𑀥𑀺𑀯𑀸𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀯𑀸 𑀫𑁂𑀣𑀼𑀦𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄. 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼, 𑀯𑀸𑀤𑁄𑀢𑀺 𑀢𑀲𑁆𑀲 𑀅𑀪𑀽𑀢𑀢𑀁 𑀜𑀢𑁆𑀯𑀸𑀯 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀜𑀢𑁆𑀯𑀸 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀪𑀜𑁆𑀚𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑀼𑀭𑀸𑀢𑀺 𑀧𑀺𑀝𑁆𑀞𑀲𑀼𑀭𑀸 𑀧𑀽𑀯𑀲𑀼𑀭𑀸 𑀑𑀤𑀦𑀲𑀼𑀭𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘 𑀲𑀼𑀭𑀸. 𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀸𑀲𑀯𑁄 𑀨𑀮𑀸𑀲𑀯𑁄 𑀕𑀼𑀴𑀸𑀲𑀯𑁄 𑀫𑀥𑁆𑀯𑀸𑀲𑀯𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘 𑀆𑀲𑀯𑀸. 𑀢𑀤𑀼𑀪𑀬𑀫𑁆𑀧𑀺 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀁, 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀫𑀚𑁆𑀚𑀁 𑀧𑀺𑀯𑀢𑀺, 𑀲𑀸 𑀧𑀫𑀸𑀤𑀓𑀸𑀭𑀡𑀢𑁆𑀢𑀸 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦 𑀯𑀺𑀪𑀗𑁆𑀕𑀦𑀬𑁂 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀉𑀧𑀭𑀺𑀧𑀺. 𑀯𑀺𑀪𑀗𑁆𑀕𑀦𑀬𑁂𑀲𑀼 𑀘𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦𑁂𑀢𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀺𑀭𑀢𑀻𑀦𑀁 𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀞𑀫𑀯𑀸𑀭𑁂 𑀯𑀺𑀪𑀢𑁆𑀢𑀸𑀦𑀺, 𑀢𑀣𑀸 𑀤𑀼𑀢𑀺𑀬𑀯𑀸𑀭𑁂 𑀘𑁂𑀢𑀦𑀸𑀯𑀲𑁂𑀦, 𑀯𑀺𑀭𑀢𑀺𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀦𑁂𑀢𑁆𑀣 𑀥𑀫𑁆𑀫𑀸 𑀦 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀲𑀺𑀓𑁆𑀔𑀸𑀧𑀤𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀳𑁄𑀦𑁆𑀢𑀺, 𑀢𑀣𑀸 𑀢𑀢𑀺𑀬𑀦𑀬𑁂 𑀨𑀲𑁆𑀲𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑀸𑀢𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀦 𑀘𑁂𑀢𑀦𑀸𑀬, 𑀨𑀲𑁆𑀲𑀸𑀤𑀻𑀦𑀜𑁆𑀘 𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀢𑁆𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀪𑀽𑀢𑀸𑀦𑀁 𑀯𑀺𑀭𑀢𑀻𑀦𑀁 𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀳𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀼𑀲𑀮𑀸 𑀏𑀯, 𑀲𑀺𑀬𑀸 ¶ 𑀲𑀼𑀔𑀸𑀬, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀯, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀯, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀯, 𑀦 𑀳𑁂𑀢𑀽, 𑀲𑀳𑁂𑀢𑀼𑀓𑀸, 𑀦𑁄 𑀘𑀺𑀢𑁆𑀢𑀸, 𑀘𑁂𑀢𑀲𑀺𑀓𑀸, 𑀓𑀸𑀫𑀸𑀯𑀘𑀭𑀸 ¶ , 𑀲𑀉𑀢𑁆𑀢𑀭𑀸𑀯, 𑀅𑀭𑀡𑀸𑀯𑀸𑀢𑀺. 𑀏𑀢𑁆𑀣 𑀘 𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀘 𑀯𑀺𑀭𑀢𑀺𑀲𑀪𑀸𑀯𑀢𑁆𑀢𑀸 𑀬𑀲𑁆𑀫𑀸 ‘‘𑀲𑀢𑁆𑀢𑁄’’𑀢𑀺 𑀲𑀗𑁆𑀔𑀁 𑀕𑀢𑁂 𑀧𑀭𑀺𑀢𑁆𑀢𑀥𑀫𑁆𑀫𑁂 𑀏𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀏𑀯 𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀸𑀦𑀺 𑀯𑀺𑀭𑀫𑀺𑀢𑀩𑁆𑀩𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑁋

𑀥𑀫𑁆𑀫𑀓𑀫𑁆𑀫𑀧𑀣𑀸𑀮𑀫𑁆𑀩-𑀯𑁂𑀤𑀦𑀸𑀫𑀽𑀮𑀓𑀫𑁆𑀫𑀢𑁄;

𑀲𑀸𑀯𑀚𑁆𑀚𑀗𑁆𑀕𑀸𑀤𑀺𑀢𑁄 𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀥𑀫𑁆𑀫𑀢𑁄 𑀢𑀸𑀯 𑁋 𑀧𑀜𑁆𑀘𑀧𑁂𑀢𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀘𑁂𑀢𑀦𑀸𑀲𑀪𑀸𑀯𑀸𑀯 𑀳𑁄𑀦𑁆𑀢𑀺. 𑀓𑀫𑁆𑀫𑀧𑀣𑀢𑁄 𑀧𑀜𑁆𑀘 𑀓𑀫𑁆𑀫𑀧𑀣𑀸𑀯. 𑀆𑀭𑀫𑁆𑀫𑀡𑀢𑁄 𑀧𑀦 𑀧𑀸𑀡𑀸𑀢𑀺𑀧𑀸𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀁, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸, 𑀢𑀣𑀸 𑀫𑀼𑀲𑀸𑀯𑀸𑀤𑁄, 𑀫𑀺𑀘𑁆𑀙𑀸𑀘𑀸𑀭𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀭𑀫𑁆𑀫𑀡𑁄, 𑀲𑀼𑀭𑀸𑀧𑀸𑀦𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁. 𑀯𑁂𑀤𑀦𑀸𑀢𑁄 𑀧𑀦 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀺𑀯𑁂𑀤𑀦𑀁, 𑀢𑀣𑀸 𑀫𑀼𑀲𑀸𑀯𑀸𑀤𑁄, 𑀫𑀺𑀘𑁆𑀙𑀸𑀘𑀸𑀭𑁄 𑀧𑀦 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑁄, 𑀢𑀣𑀸 𑀲𑀼𑀭𑀸𑀧𑀸𑀦𑀁. 𑀫𑀽𑀮𑀢𑁄 𑀧𑀦 𑀧𑀞𑀫𑁄 𑀤𑁄𑀲𑀫𑁄𑀳𑀫𑀽𑀮𑁄, 𑀤𑀼𑀢𑀺𑀬𑀁 𑀲𑀺𑀬𑀸 𑀮𑁄𑀪𑀫𑁄𑀳𑀫𑀽𑀮𑀁, 𑀲𑀺𑀬𑀸 𑀤𑁄𑀲𑀫𑁄𑀳𑀫𑀽𑀮𑀁, 𑀢𑀣𑀸 𑀫𑀼𑀲𑀸𑀯𑀸𑀤𑁄, 𑀫𑀺𑀘𑁆𑀙𑀸𑀘𑀸𑀭𑁄 𑀧𑀦 𑀮𑁄𑀪𑀫𑁄𑀳𑀫𑀽𑀮𑁄𑀯, 𑀢𑀣𑀸 𑀲𑀼𑀭𑀸𑀧𑀸𑀦𑀁. 𑀓𑀫𑁆𑀫𑀢𑁄 𑀧𑀦𑁂𑀢𑁆𑀣 𑀫𑀼𑀲𑀸𑀯𑀸𑀤𑁄 𑀯𑀘𑀻𑀓𑀫𑁆𑀫𑀁, 𑀲𑁂𑀲𑀸 𑀓𑀸𑀬𑀓𑀫𑁆𑀫𑀫𑁂𑀯.

𑀲𑀸𑀯𑀚𑁆𑀚𑀢𑁄 𑀧𑀦 𑀧𑀸𑀡𑀸𑀢𑀺𑀧𑀸𑀢𑁄 𑀢𑀸𑀯 𑀅𑀫𑀦𑀼𑀲𑁆𑀲𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀦𑀼𑀲𑁆𑀲𑀓𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑁂𑀲𑀼 𑀘 𑀔𑀼𑀤𑁆𑀤𑀓𑀲𑀭𑀻𑀭𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬. 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀅𑀧𑁆𑀧𑀕𑀼𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁, 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀺𑀩𑁆𑀩𑀢𑀸𑀬 𑀅𑀧𑁆𑀧𑀫𑀳𑀸𑀲𑀸𑀯𑀚𑁆𑀚𑁄 𑀳𑁄𑀢𑀺, 𑀔𑀻𑀡𑀸𑀲𑀯𑁂 𑀧𑀦 𑀫𑀳𑀸𑀲𑀸𑀯𑀚𑁆𑀚𑀢𑀭𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀢𑁆𑀣𑀼𑀦𑁄 𑀳𑀻𑀦𑀧𑁆𑀧𑀡𑀻𑀢𑀢𑀸𑀬 𑀘𑁂𑀯 𑀕𑀼𑀡𑀯𑀺𑀭𑀳𑀺𑀢𑀢𑀩𑁆𑀩𑀦𑁆𑀢𑀲𑀦𑁆𑀢𑀓𑀢𑀸𑀬 ¶ 𑀘. 𑀢𑀢𑁆𑀣𑀸𑀧𑀺 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀘 𑀅𑀧𑁆𑀧𑀫𑀳𑀸𑀲𑀸𑀯𑀚𑁆𑀚𑀁, 𑀔𑀻𑀡𑀸𑀲𑀯𑀲𑀦𑁆𑀢𑀓𑁂 𑀫𑀳𑀸𑀲𑀸𑀯𑀚𑁆𑀚𑀢𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀺𑀘𑁆𑀙𑀸𑀘𑀸𑀭𑁄 𑀤𑀼𑀲𑁆𑀲𑀻𑀮𑀲𑀻𑀮𑀯𑀦𑁆𑀢𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀦𑁂𑀦. 𑀢𑀢𑁆𑀣𑀸𑀧𑀺 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀘 𑀅𑀧𑁆𑀧𑀫𑀳𑀸𑀲𑀸𑀯𑀚𑁆𑀚𑁄, 𑀔𑀻𑀡𑀸𑀲𑀯𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀦𑁂 𑀫𑀳𑀸𑀲𑀸𑀯𑀚𑁆𑀚𑀢𑀭𑁄𑀢𑀺 𑀘 𑀯𑁂𑀤𑀺𑀢𑀩𑁆𑀩𑁄. 𑀫𑀼𑀲𑀸𑀯𑀸𑀤𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀫𑀳𑀦𑁆𑀢𑀢𑀁, 𑀯𑀢𑁆𑀣𑀼𑀲𑀸𑀫𑀺𑀦𑁄 𑀕𑀼𑀡𑀯𑀺𑀭𑀳𑀺𑀢𑀢𑀁, 𑀢𑀩𑁆𑀩𑀦𑁆𑀢𑀢𑀜𑁆𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀅𑀧𑁆𑀧𑀫𑀳𑀸𑀲𑀸𑀯𑀚𑁆𑀚𑁄 𑀳𑁄𑀢𑀺. 𑀅𑀧𑀺𑀘 𑀅𑀢𑁆𑀢𑀦𑁄 ¶ 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬, 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 ‘‘𑀦𑀢𑁆𑀣𑁂𑀢’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁 ‘‘𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀓𑀽𑀝𑀲𑀓𑁆𑀔𑀺𑀆𑀤𑀺𑀪𑀸𑀯𑁂𑀦 𑀯𑀸 𑀧𑀯𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄, 𑀫𑀼𑀲𑀸 𑀯𑀢𑁆𑀯𑀸 𑀧𑀦 𑀲𑀗𑁆𑀖𑀪𑁂𑀤𑀦𑁂 𑀫𑀳𑀸𑀲𑀸𑀯𑀚𑁆𑀚𑀢𑀭𑁄. 𑀲𑀼𑀭𑀸𑀧𑀸𑀦𑀁 𑀩𑀺𑀦𑁆𑀤𑀼𑀫𑀢𑁆𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀩𑀳𑀼𑀓𑁂 𑀫𑀳𑀸𑀲𑀸𑀯𑀚𑁆𑀚𑀁, 𑀓𑀸𑀬𑀯𑀺𑀓𑀸𑀭𑀚𑀦𑀦𑀧𑀳𑁄𑀦𑀓𑀧𑀸𑀦𑁂 𑀧𑀦 𑀫𑀳𑀸𑀲𑀸𑀯𑀚𑁆𑀚𑀢𑀭𑀫𑁂𑀯.

𑀅𑀗𑁆𑀕𑀸𑀤𑀺𑀢𑁄 𑀧𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑀺𑀢𑁆𑀢𑀁 𑀉𑀧𑀓𑁆𑀓𑀫𑁄 𑀢𑁂𑀦 𑀫𑀭𑀡𑀦𑁆𑀢𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀓𑁄 𑀣𑀸𑀯𑀭𑁄 𑀯𑀺𑀚𑁆𑀚𑀸𑀫𑀬𑁄 𑀇𑀤𑁆𑀥𑀺𑀫𑀬𑁄𑀢𑀺 𑀙 𑀧𑀬𑁄𑀕𑀸. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀭𑀧𑀭𑀺𑀕𑁆𑀕𑀳𑀺𑀢𑀢𑀸 𑀢𑀣𑀸𑀲𑀜𑁆𑀜𑀺𑀢𑀸 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑀓𑁆𑀓𑀫𑁄 𑀢𑁂𑀦 𑀳𑀭𑀡𑀦𑁆𑀢𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀸𑀳𑀢𑁆𑀣𑀺𑀓𑀸𑀤𑀬𑁄 𑀙 𑀏𑀯 𑀧𑀬𑁄𑀕𑀸. 𑀢𑁂 𑀘 𑀔𑁄 𑀬𑀣𑀸𑀦𑀼𑀭𑀽𑀧𑀁 𑀣𑁂𑀬𑁆𑀬𑀸𑀯𑀳𑀸𑀭𑀸𑀤𑀻𑀦𑀁 𑀯𑀲𑁂𑀦 𑀧𑀯𑀢𑁆𑀢𑀸. 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀅𑀕𑀫𑀦𑀻𑀬𑀯𑀢𑁆𑀣𑀼𑀢𑀸 𑀲𑁂𑀯𑀦𑀘𑀺𑀢𑁆𑀢𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀸𑀳𑀢𑁆𑀣𑀺𑀓𑁄 𑀏𑀓𑁄𑀯 𑀧𑀬𑁄𑀕𑁄. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀼𑀲𑀸𑀯𑀸𑀤𑀲𑁆𑀲 𑀅𑀢𑀣𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀼𑀭𑀸𑀧𑀸𑀦𑀲𑁆𑀲 𑀲𑀼𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑀸 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀻𑀢𑀺.

𑀏𑀯𑀁 ¶ 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀥𑀫𑁆𑀫𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑁋

𑀥𑀫𑁆𑀫𑀓𑀫𑁆𑀫𑀧𑀣𑀸𑀮𑀫𑁆𑀩-𑀲𑀫𑀸𑀤𑀸𑀦𑀧𑀬𑁄𑀕𑀢𑁄;

𑀔𑀡𑁆𑀟𑀢𑁄 𑀘 𑀯𑀺𑀚𑀸𑀦𑀻𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀥𑀫𑁆𑀫𑀓𑀫𑁆𑀫𑀧𑀣𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁄𑀯. 𑀆𑀭𑀫𑁆𑀫𑀡𑀢𑁄 𑀧𑀦𑁂𑀢𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑀁𑀢𑀁𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺. 𑀲𑀫𑀸𑀤𑀸𑀦𑀢𑁄 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸 𑀲𑀬𑀫𑁂𑀯 𑀯𑀸 ‘‘𑀧𑀜𑁆𑀘 𑀲𑀻𑀮𑀸𑀦𑀺 𑀅𑀥𑀺𑀝𑁆𑀞𑀳𑀸𑀫𑀻’’𑀢𑀺 𑀏𑀓𑀢𑁄 𑀯𑀸 𑀧𑀸𑀝𑀺𑀏𑀓𑁆𑀓𑀁 𑀯𑀸 𑀲𑀫𑀸𑀤𑀺𑀬𑀦𑁆𑀢𑁂𑀦 𑀏𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺. 𑀧𑀬𑁄𑀕𑀢𑁄 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑀸𑀦𑁂𑀯. 𑀔𑀡𑁆𑀟𑀢𑁄 𑀕𑀳𑀝𑁆𑀞𑀸 𑀬𑀁 𑀬𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀢𑀁 𑀢𑀤𑁂𑀯 𑀔𑀡𑁆𑀟𑀁 𑀳𑁄𑀢𑀺, 𑀦𑁂𑀢𑀭𑁂. 𑀕𑀳𑀝𑁆𑀞𑀸 𑀅𑀦𑀺𑀩𑀤𑁆𑀥𑀲𑀻𑀮𑀸 𑀳𑁄𑀦𑁆𑀢𑀺, 𑀬𑀁 𑀬𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀕𑁄𑀧𑁂𑀦𑁆𑀢𑀺. 𑀲𑀸𑀫𑀡𑁂𑀭𑀸𑀦𑀁 𑀧𑀦 𑀏𑀓𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑀺𑀢𑁂 𑀲𑀩𑁆𑀩𑀸𑀦𑀺𑀧𑀺 𑀪𑀺𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀯𑀺𑀚𑀸𑀦𑀻𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀅𑀢𑁆𑀣𑀢𑁄 𑀢𑀸𑀯 𑁋 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀘𑀢𑁆𑀢𑀸𑀭𑁄 𑀧𑀪𑁂𑀤𑀸. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑁆𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁭𑁧𑁮) 𑀜𑀸𑀡𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀜𑀸𑀡𑀲𑁆𑀲𑁂𑀯, 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀢𑁆𑀣𑀯𑀺𑀲𑀬𑀜𑀸𑀡𑀧𑁆𑀧𑀪𑁂𑀤𑀸, 𑀅𑀢𑁆𑀣𑀧𑁆𑀧𑀪𑁂𑀤𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀢𑀸𑀯𑀲𑁂𑀦 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀅𑀢𑁆𑀣𑁄𑀢𑀺 𑀳𑁂𑀢𑀼𑀨𑀮𑀁. 𑀲𑁄 𑀳𑀺 𑀳𑁂𑀢𑀼𑀯𑀲𑁂𑀦 𑀅𑀭𑀡𑀻𑀬𑀢𑁄 𑀕𑀦𑁆𑀢𑀩𑁆𑀩𑀢𑁄, 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀘 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 ¶ 𑀧𑀦𑁂𑀲𑁄𑀧𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺.

𑀥𑀫𑁆𑀫𑁄𑀢𑀺 𑀧𑀘𑁆𑀘𑀬𑁄, 𑀲𑁄 𑀳𑀺 𑀨𑀮𑀁 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘𑀸𑀢𑀺 ‘‘𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦𑁂𑀲𑁄𑀧𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄, 𑀪𑀸𑀲𑀺𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮𑀦𑁆𑀢𑀺.

𑀦𑀺𑀭𑀼𑀢𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀢𑁆𑀣𑀸𑀦𑀜𑁆𑀘 𑀯𑀸𑀘𑀓𑁄 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀗𑁆𑀔𑀸𑀢𑁄 𑀲𑀤𑁆𑀤𑁄. 𑀇𑀫𑀸 𑀥𑀫𑁆𑀫𑀢𑁆𑀣𑀦𑀺𑀭𑀼𑀢𑁆𑀢𑀺𑀬𑁄 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫.

𑀏𑀢𑁆𑀣 𑀘 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸, 𑀦 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸, 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑀺 ‘‘𑀨𑀲𑁆𑀲𑁄 𑀯𑁂𑀤𑀦𑀸’’𑀢𑀺𑀆𑀤𑀺𑀓𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, ‘‘𑀨𑀲𑁆𑀲𑀸 𑀯𑁂𑀤𑀦𑁄’’𑀢𑀺𑀆𑀤𑀺𑀓𑀁 𑀧𑀦 ‘‘𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀘 𑀫𑀸𑀕𑀥𑀺𑀓𑀸 𑀪𑀸𑀲𑀸, 𑀬𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀢𑀦𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑀺, 𑀩𑁆𑀭𑀳𑁆𑀫𑀸𑀦𑁄 𑀘 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀓𑀺𑀜𑁆𑀘𑀺 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀯𑀟𑁆𑀠𑀺𑀢𑀤𑀸𑀭𑀓𑀸 𑀘 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀪𑀸𑀲𑀦𑁆𑀢𑀺, 𑀬𑀸 𑀘 𑀅𑀧𑀸𑀬𑁂𑀲𑀼 𑀫𑀦𑀼𑀲𑁆𑀲𑁂 𑀤𑁂𑀯𑀮𑁄𑀓𑁂 𑀘𑁂𑀯 𑀫𑀸𑀕𑀥𑀪𑀸𑀲𑀸 𑀉𑀲𑁆𑀲𑀦𑁆𑀦𑀸, 𑀧𑀘𑁆𑀙𑀸 𑀘 𑀢𑀢𑁄 𑀅𑀦𑁆𑀥𑀓𑀬𑁄𑀦𑀓𑀤𑀫𑀺𑀴𑀸𑀤𑀺𑀤𑁂𑀲𑀪𑀸𑀲𑀸 𑀘𑁂𑀯 𑀲𑀓𑁆𑀓𑀢𑀸𑀤𑀺𑀅𑀝𑁆𑀞𑀸𑀭𑀲𑀫𑀳𑀸𑀪𑀸𑀲𑀸 𑀘 𑀦𑀺𑀩𑁆𑀩𑀢𑁆𑀢𑀸, 𑀲𑀸 𑀳𑀺 𑀬𑀲𑁆𑀫𑀸 𑀇𑀢𑀭𑀸𑀲𑀼 𑀪𑀸𑀲𑀸𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑀸𑀲𑀼𑀧𑀺 𑀦 𑀧𑀭𑀺𑀯𑀢𑁆𑀢𑀢𑀺, 𑀲𑀩𑁆𑀩𑀓𑀸𑀮𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂 𑀏𑀯 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀩𑁆𑀭𑀳𑁆𑀫𑀯𑁄𑀳𑀸𑀭𑁄, 𑀅𑀭𑀺𑀬𑀯𑁄𑀳𑀸𑀭𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀸𑀬 𑀧𑀦 𑀫𑀸𑀕𑀥𑀪𑀸𑀲𑀸𑀬 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀲𑁄𑀢𑀧𑀣𑀸𑀕𑀫𑀦𑀫𑁂𑀯 𑀧𑀧𑀜𑁆𑀘𑁄 ¶ ¶ . 𑀲𑁄𑀢𑁂 𑀧𑀦 𑀲𑀗𑁆𑀖𑀝𑁆𑀝𑀺𑀢𑀫𑀢𑁆𑀢𑁂 𑀏𑀯 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀺. 𑀅𑀜𑁆𑀜𑀸𑀬 𑀧𑀦 𑀪𑀸𑀲𑀸𑀬 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀁 𑀢𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀲𑀳𑀲𑀸 𑀦𑀸𑀭𑁄𑀳𑀢𑀺, 𑀓𑀺𑀘𑁆𑀙𑁂𑀦 𑀉𑀕𑁆𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀅𑀭𑀺𑀬𑀲𑀸𑀯𑀓𑁄 𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀅𑀜𑁆𑀜𑀁 𑀲𑀤𑁆𑀤𑀁 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀦𑀺𑀧𑀸𑀢𑀪𑁂𑀤𑀢𑁄 𑀚𑀸𑀦𑀸𑀢𑀺, 𑀦 𑀚𑀸𑀦𑀸𑀢𑀻𑀢𑀺? 𑀬𑀤𑀕𑁆𑀕𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑀤𑀕𑁆𑀕𑁂𑀦 𑀏𑀢𑀫𑁆𑀧𑀺 𑀚𑀸𑀦𑀺𑀲𑁆𑀲𑀢𑀺, 𑀦 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀪𑀸𑀦𑀦𑁆𑀢𑀺 𑀥𑀫𑁆𑀫𑀢𑁆𑀣𑀸𑀤𑀺𑀯𑀺𑀲𑀬𑀁 𑀲𑀩𑁆𑀩𑀢𑁆𑀣𑀓𑀜𑀸𑀡𑀁, 𑀢𑀁 𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫, 𑀇𑀫𑀸 𑀘𑀢𑀲𑁆𑀲𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀫𑁂𑀦 𑀧𑀭𑀺𑀬𑀢𑁆𑀢𑀺𑀉𑀕𑁆𑀕𑀳𑀡𑁂𑀦 𑀲𑀓𑁆𑀓𑀘𑁆𑀘𑀥𑀫𑁆𑀫𑀲𑁆𑀲𑀯𑀦𑁂𑀦 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀬 𑀧𑀼𑀩𑁆𑀩𑀬𑁄𑀕𑁂𑀦𑀸𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑀤𑀸 𑀳𑁄𑀦𑁆𑀢𑀺, 𑀲𑁂𑀔𑀪𑀽𑀫𑀺𑀬𑀁, 𑀅𑀲𑁂𑀔𑀪𑀽𑀫𑀺𑀬𑀜𑁆𑀘𑀸𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑁄 𑀧𑀦𑁂𑀢𑁆𑀣𑀸𑀧𑀺 𑀯𑀺𑀪𑀗𑁆𑀕𑀦𑀬𑁂 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀯𑀺𑀪𑀗𑁆𑀕𑀦𑀬𑁂𑀲𑀼 𑀳𑀺 𑀢𑀻𑀲𑀼𑀧𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀢𑀺𑀲𑁆𑀲𑁄𑀧𑀺 𑀓𑀸𑀫𑀸𑀯𑀘𑀭𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀸𑀦𑀁 𑀯𑀲𑁂𑀦 𑀢𑀩𑁆𑀩𑀺𑀲𑀬𑀧𑁆𑀧𑀪𑁂𑀤𑁂𑀦 𑀲𑀤𑁆𑀥𑀺𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑀸. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀧𑀦 𑀢𑁂𑀲𑀁 𑀜𑀸𑀡𑀸𑀦𑀜𑁆𑀘𑁂𑀯 𑀅𑀝𑁆𑀞𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀯𑀲𑁂𑀦 𑀢𑀩𑁆𑀩𑀺𑀲𑀬𑀧𑁆𑀧𑀪𑁂𑀤𑁂𑀦 𑀲𑀤𑁆𑀥𑀺𑀁. 𑀮𑁄𑀓𑀼𑀢𑁆𑀢𑀭𑀜𑀸𑀡𑀸𑀦𑀺𑀧𑀺 𑀳𑀺 𑀫𑀕𑁆𑀕𑀧𑁆𑀧𑀢𑁆𑀢𑀩𑁆𑀩𑀢𑀸𑀬 𑀅𑀢𑁆𑀣𑀪𑀽𑀢𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀯𑀼𑀘𑁆𑀘𑀢𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀧𑀦 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀢𑀺𑀥𑀸𑀧𑀺, 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸 ¶ , 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀘, 𑀲𑁂𑀲𑀸 𑀢𑀺𑀥𑀸𑀧𑀺, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸, 𑀳𑁂𑀢𑀽, 𑀲𑀳𑁂𑀢𑀼𑀓𑀸, 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀉𑀢𑁆𑀢𑀭𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀤𑁆𑀯𑀺𑀥𑀸𑀧𑀺, 𑀅𑀭𑀡𑀸 𑀘𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀜𑀸𑀡𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀜𑀸𑀡𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀏𑀓𑀯𑀺𑀥𑁂𑀦𑀸𑀢𑀺 𑀏𑀓𑀧𑁆𑀧𑀓𑀸𑀭𑁂𑀦, 𑀏𑀓𑀓𑁄𑀝𑁆𑀞𑀸𑀲𑁂𑀦 𑀯𑀸. 𑀜𑀸𑀡𑀯𑀢𑁆𑀣𑀽𑀢𑀺 𑀏𑀢𑁆𑀣 𑀧𑀦 𑀜𑀸𑀡𑀜𑁆𑀘 𑀢𑀁 𑀯𑀢𑁆𑀣𑀼 𑀘 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀫𑁆𑀧𑀢𑁆𑀢𑀻𑀦𑀦𑁆𑀢𑀺 𑀜𑀸𑀡𑀯𑀢𑁆𑀣𑀼. 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘. 𑀦 𑀳𑁂𑀢𑀽 𑀅𑀳𑁂𑀢𑀼𑀓𑀸𑀢𑀺𑀆𑀤𑀻𑀲𑀼 𑀳𑁂𑀝𑁆𑀞𑀸 𑀳𑁂𑀢𑀼𑀤𑀼𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀳𑁂𑀢𑀼𑀤𑀼𑀓𑀸𑀤𑀻𑀲𑀼 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀯𑀸 𑀲𑀳𑁂𑀢𑀼𑀓𑀸 𑀥𑀫𑁆𑀫𑀸𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸, 𑀏𑀓𑀦𑁆𑀢𑁂𑀦 𑀧𑀦 𑀦 𑀳𑁂𑀢𑀽 𑀏𑀯, 𑀅𑀳𑁂𑀢𑀼𑀓𑀸 𑀏𑀯𑀸𑀢𑀺. 𑀏𑀯𑀁 ‘‘𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸’’𑀢𑀺 𑀇𑀫𑀺𑀦𑀸 𑀉𑀧𑀭𑀺 𑀏𑀓𑀯𑀺𑀥𑀧𑀭𑀺𑀘𑁆𑀙𑁂𑀤𑀸𑀯𑀲𑀸𑀦𑁂 𑀯𑀓𑁆𑀔𑀫𑀸𑀦𑁂𑀦 𑀲𑀫𑁆𑀩𑀦𑁆𑀥𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀘 𑀅𑀘𑁂𑀢𑀲𑀺𑀓𑀸𑀢𑀺 𑀘𑀺𑀢𑁆𑀢𑀸𑀦𑀺 𑀏𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀇𑀥 𑀅𑀧𑀭𑀸𑀫𑀝𑁆𑀞𑀢𑁆𑀢𑀸.

𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀸 𑀉𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀅𑀦𑀸𑀕𑀢𑀧𑀝𑀺𑀓𑁆𑀔𑁂𑀧𑁄. 𑀦 𑀳𑀺 𑀢𑀸𑀦𑀺 𑀅𑀦𑀸𑀕𑀢𑁂𑀲𑀼 𑀧𑀜𑁆𑀘𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀸 𑀧𑀼𑀭𑁂𑀚𑀸𑀢𑀸𑀭𑀫𑁆𑀫𑀡𑀸𑀢𑀺 𑀲𑀳𑀼𑀧𑁆𑀧𑀢𑁆𑀢𑀺𑀧𑀝𑀺𑀓𑁆𑀔𑁂𑀧𑁄. 𑀦 𑀳𑀺 𑀢𑀸𑀦𑀺 𑀲𑀳𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀢𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀪𑀽𑀢𑁂 𑀧𑀜𑁆𑀘 𑀧𑀲𑀸𑀤𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀸. 𑀏𑀢𑁆𑀣 𑀘 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸 𑀲𑀬𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀸, 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸 𑀘, 𑀫𑀦𑁄𑀯𑀺𑀜𑁆𑀜𑀸𑀡𑀁 ¶ 𑀳𑀤𑀬𑀦𑀺𑀲𑁆𑀲𑀺𑀢𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀯𑀢𑁆𑀣𑀼𑀓𑀁, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀩𑀸𑀳𑀺𑀭𑀸, 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸, 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀩𑀸𑀳𑀺𑀭𑀸, 𑀩𑀸𑀳𑀺𑀭𑀯𑀢𑁆𑀣𑀼𑀓𑀸𑀢𑀺 𑀏𑀯𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸 𑀅𑀲𑀫𑁆𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀅𑀦𑀺𑀭𑀼𑀤𑁆𑀥𑀯𑀢𑁆𑀣𑀸𑀭𑀫𑁆𑀫𑀡𑀸. 𑀦 𑀳𑀺 𑀢𑀸𑀦𑀺 𑀦𑀺𑀭𑀼𑀤𑁆𑀥𑀯𑀢𑁆𑀣𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑀸𑀦𑀸𑀯𑀢𑁆𑀣𑀼𑀓𑀸 𑀦𑀸𑀦𑀸𑀭𑀫𑁆𑀫𑀡𑀸𑀢𑀺 𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀦𑀺𑀬𑀢𑁂𑀓𑁂𑀓𑀯𑀢𑁆𑀣𑀸𑀭𑀫𑁆𑀫𑀡𑀢𑀸𑀬 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀦𑀯𑀢𑁆𑀣𑀼𑀓𑀸, 𑀪𑀺𑀦𑁆𑀦𑀸𑀭𑀫𑁆𑀫𑀡𑀸 𑀘. 𑀦 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑁄𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀭𑀽𑀧𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀤𑁆𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀦 𑀇𑀢𑀭𑀸𑀦𑀺 𑀘𑁂𑀢𑀭𑀸𑀦𑀺. 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀘 𑀦𑁂𑀲𑀁 𑀦𑀸𑀦𑀸𑀭𑀫𑁆𑀫𑀡𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀦 𑀅𑀲𑀫𑀦𑁆𑀦𑀸𑀳𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀸𑀯𑀚𑁆𑀚𑀦𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦 𑀅𑀦𑀸𑀯𑀚𑁆𑀚𑀺𑀢𑁂 𑀯𑀺𑀲𑀬𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀅𑀫𑀦𑀲𑀺𑀓𑀸𑀭𑀸𑀢𑀺 𑀢𑀫𑁂𑀯𑁂𑀢𑁆𑀣 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀺. 𑀦 𑀅𑀩𑁆𑀩𑁄𑀓𑀺𑀡𑁆𑀡𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀭𑀦𑁆𑀢𑀭𑀸 𑀳𑀼𑀢𑁆𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀓𑀓𑁆𑀔𑀡𑁂𑀧𑀺 𑀲𑀳 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 ¶ 𑀓𑁂𑀯𑀮𑀜𑁆𑀘 𑀏𑀢𑀸𑀦𑀺, 𑀅𑀜𑁆𑀜𑀸𑀦𑀺𑀧𑀺 𑀯𑀺𑀜𑁆𑀜𑀸𑀡𑀸𑀦𑀺 𑀤𑁆𑀯𑁂 𑀯𑀸 𑀢𑀤𑀼𑀢𑁆𑀢𑀭𑀺𑀁 𑀯𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑁂𑀓𑀫𑁂𑀯 𑀧𑀦 𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁯; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁬𑁮; 𑀯𑀺𑀪. 𑀅𑀝𑁆𑀞. 𑁫𑁨𑁩). 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀦𑀦𑁆𑀢𑀭𑀸𑀢𑀺 𑀇𑀫𑀺𑀦𑀸 𑀅𑀦𑀩𑁆𑀩𑁄𑀓𑀺𑀡𑁆𑀡𑀢𑀸𑀬 𑀏𑀯 𑀯𑀺𑀪𑀸𑀯𑀦𑀸.

𑀅𑀦𑀸𑀪𑁄𑀕𑀸𑀢𑀺 𑀅𑀦𑀸𑀯𑀚𑁆𑀚𑀦𑀪𑀽𑀢𑀸 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀓𑁄𑀘𑀺𑀧𑀺 𑀧𑀼𑀕𑁆𑀕𑀮𑁄 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀢𑁂𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 ¶ 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸𑀢𑀺 𑀞𑀧𑁂𑀢𑁆𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀁 𑀆𑀧𑀸𑀣𑀕𑀫𑀦𑀫𑀢𑁆𑀢𑀁, 𑀩𑁆𑀬𑀢𑁆𑀢𑀢𑀭𑁄𑀧𑀺 𑀧𑀼𑀕𑁆𑀕𑀮𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀆𑀧𑀸𑀣𑀕𑀢𑀸𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀫𑀢𑁆𑀢𑀢𑁄 𑀅𑀜𑁆𑀜𑀁 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀯𑀺𑀚𑀸𑀦𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀦𑀦𑁆𑀢𑀭𑀸𑀧𑀻𑀢𑀺 𑀫𑀦𑁄𑀥𑀸𑀢𑀼𑀬𑀸𑀧𑀺. 𑀅𑀧𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀫𑀦𑁄𑀥𑀸𑀢𑀼𑀬𑀸𑀯, 𑀢𑀢𑁄 𑀧𑀭𑁂𑀳𑀺𑀧𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀺 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸𑀧𑀺 𑀢𑀸𑀦𑀺 𑀫𑁄𑀖𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀕𑀫𑀦𑀸𑀤𑀻𑀲𑀼 𑀓𑀜𑁆𑀘𑀺 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀦 𑀓𑀸𑀬𑀯𑀘𑀻𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑀺, 𑀦 𑀯𑀺𑀜𑁆𑀜𑀢𑁆𑀢𑀺𑀁 𑀯𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀦 𑀓𑀼𑀲𑀮𑀸𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀺𑀬𑀢𑀺, 𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀦 𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀦 𑀪𑀯𑀢𑁄 𑀘𑀯𑀢𑀺, 𑀦 𑀪𑀯𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀓𑀺𑀘𑁆𑀘𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺. 𑀬𑀣𑀸 𑀘𑁂𑀢𑁂𑀲𑀁 𑀏𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀦𑀢𑁆𑀣𑀺, 𑀏𑀯𑀁 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀤𑀻𑀦𑀺𑀧𑀺. 𑀦 𑀳𑀺 𑀓𑁄𑀘𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀯𑀸 𑀑𑀓𑁆𑀓𑀫𑀢𑀺, 𑀦 𑀘𑁂𑀢𑀸𑀦𑀺 𑀦𑀸𑀫𑀕𑁄𑀢𑁆𑀢𑀁 𑀯𑀸 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀯𑀸 𑀢𑀺𑀮𑀓𑁆𑀔𑀡𑀸𑀤𑀺𑀁 𑀯𑀸 𑀆𑀭𑀩𑁆𑀪 𑀪𑀯𑀦𑁆𑀢𑀺. 𑀦 𑀲𑀼𑀧𑀢𑀻𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀳𑀺 𑀦 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀦 𑀓𑀺𑀜𑁆𑀘𑀺 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀫𑀳𑀸𑀧𑀤𑀻𑀧𑀢𑀼𑀭𑀺𑀬𑀲𑀤𑁆𑀤𑀸𑀤𑀺𑀑𑀴𑀸𑀭𑀺𑀓𑁂𑀳𑀺𑀧𑀺 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑁂𑀳𑀺 𑀖𑀝𑁆𑀝𑀺𑀢𑁂𑀲𑀼 𑀧𑀞𑀫𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀚𑁆𑀚𑀦𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀉𑀧𑁆𑀧𑀦𑁆𑀦𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 ¶ 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀧𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀬𑀣𑀸𑀭𑀳𑀁 ¶ 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀢𑀢𑁄 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀺 𑀢𑀁𑀢𑀁𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀯𑀢𑁆𑀢𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀦𑁆𑀢𑀺. 𑀢𑀢𑀺𑀬𑀯𑀸𑀭𑁂 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀸𑀯𑀚𑁆𑀚𑀦𑀚𑀯𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀲𑀢𑁆𑀢𑁄 𑀘 𑀦𑀺𑀤𑁆𑀤𑀸𑀬 𑀧𑀝𑀺𑀩𑀼𑀤𑁆𑀥𑁄𑀢𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺.

𑀲𑀼𑀧𑀺𑀦𑀫𑁆𑀧𑀺 𑀳𑀺 𑀢𑁂𑀦𑁂𑀯 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦, 𑀢𑀜𑁆𑀘 𑀧𑀦𑁂𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸. 𑀇𑀫𑁂𑀲𑀁 𑀧𑀦 𑀲𑀁𑀲𑀕𑁆𑀕𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀢𑀢𑁆𑀣 𑀬𑀁 𑀯𑀸𑀢𑀧𑀺𑀢𑁆𑀢𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀢𑁄, 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀲𑀘𑁆𑀘𑀁. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺, 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀺𑀓𑀁 𑀯𑀸. 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺, 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀩𑁄𑀥𑀺𑀲𑀢𑁆𑀢𑀓𑁄𑀲𑀮𑀭𑀸𑀚𑀸𑀤𑀻𑀦𑀁 𑀧𑀜𑁆𑀘𑀲𑁄𑀴𑀲𑀫𑀳𑀸𑀲𑀼𑀧𑀺𑀦𑀸𑀦𑀺 𑀯𑀺𑀬. 𑀢𑀜𑁆𑀘 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀼𑀧𑀺𑀦𑀁 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺, 𑀦 𑀅𑀲𑁂𑀔𑀸 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸. 𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀧𑀝𑀺𑀩𑀼𑀤𑁆𑀥𑁄 𑀯𑀸? 𑀓𑀺𑀜𑁆𑀘𑁂𑀢𑁆𑀣, 𑀬𑀤𑀺 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀲𑀼𑀧𑀺𑀦𑀲𑁆𑀲 𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑁄, 𑀪𑀯𑀗𑁆𑀕𑀲𑁆𑀲 𑀘 𑀢𑀤𑀪𑀸𑀯𑀸 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀓𑀢𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀲𑁆𑀲𑀸𑀧𑀺 𑀯𑀻𑀢𑀺𑀓𑁆𑀓𑀫𑀲𑁆𑀲 𑀲𑀩𑁆𑀩𑁄𑀳𑀸𑀭𑀺𑀓𑀲𑁆𑀲𑁂𑀯 𑀏𑀓𑀦𑁆𑀢𑀲𑀸𑀯𑀚𑁆𑀚𑀢𑁆𑀢𑀸 𑀅𑀦𑀸𑀧𑀢𑁆𑀢𑀺 𑀦 𑀲𑀺𑀬𑀸𑀢𑀺 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀧𑀓𑀸𑀭𑀦𑁆𑀢𑀭𑁄 𑀘 𑀦𑀢𑁆𑀣𑀺, 𑀬𑁂𑀦 𑀲𑀼𑀧𑀺𑀦𑀁 𑀧𑀲𑁆𑀲𑁂𑀬𑁆𑀬𑀸𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁫.𑁩.𑁫) 𑀯𑀘𑀦𑀢𑁄, 𑀬𑀸 𑀧𑀦 𑀦𑀺𑀤𑁆𑀤𑀸 𑀫𑀓𑁆𑀓𑀝𑀦𑀺𑀤𑁆𑀤𑀸 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸, 𑀢𑀁 𑀓𑀧𑀺𑀫𑀺𑀤𑁆𑀥𑀁, 𑀢𑁂𑀦 ¶ 𑀲𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺, 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀩𑁆𑀬𑀸𑀓𑀢𑁄𑀧𑀺, 𑀲𑀼𑀧𑀺𑀦𑁂 𑀘 𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀤𑀼𑀩𑁆𑀩𑀮𑀢𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀯𑀢𑁆𑀢𑁂 𑀯𑁂𑀤𑀦𑀻𑀬𑀁 𑀧𑀦 𑀳𑁄𑀢𑀺. ‘‘𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸’’𑀢𑀺 𑀏𑀢𑁆𑀣 𑀬𑁄 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀬𑀣𑀸𑀯𑀼𑀢𑁆𑀢𑁄 𑀦 𑀳𑁂𑀢𑀼𑀓𑀝𑁆𑀞𑁄, 𑀅𑀳𑁂𑀢𑀼𑀓𑀝𑁆𑀞𑁄…𑀧𑁂… 𑀦 𑀲𑀼𑀧𑀺𑀦𑀁 𑀧𑀲𑁆𑀲𑀦𑀝𑁆𑀞𑁄, 𑀲𑁄 𑀬𑀸𑀣𑀸𑀯𑀝𑁆𑀞𑁄, 𑀢𑀁𑀢𑀁𑀬𑀸𑀣𑀸𑀯𑀢𑁆𑀣𑀼𑀁 𑀯𑀺𑀪𑀸𑀯𑁂𑀢𑀻𑀢𑀺 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀧𑀜𑁆𑀜𑀸. 𑀏𑀯𑀁 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀏𑀓𑁂𑀦 𑀧𑀓𑀸𑀭𑁂𑀦 𑀏𑀓𑁂𑀦 𑀆𑀓𑀸𑀭𑁂𑀦, 𑀏𑀓𑀓𑁄𑀝𑁆𑀞𑀸𑀲𑁂𑀦 𑀜𑀸𑀡𑀯𑀢𑁆𑀣𑀼 𑀳𑁄𑀢𑀻𑀢𑀺.

𑀏𑀓𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀓𑁂𑀲𑀼 ¶ 𑀅𑀢𑁆𑀣𑀚𑀸𑀧𑀺𑀓𑀸𑀢𑀺 𑀏𑀢𑁆𑀣 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸, 𑀘𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀘𑁂𑀯 𑀅𑀲𑁂𑀔𑀸𑀦𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀦𑀁 𑀧𑀭𑀺𑀓𑀫𑁆𑀫𑀸𑀤𑀺𑀪𑀽𑀢𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀘𑀺𑀢𑁆𑀢𑁂𑀲𑀼 𑀘 𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸. 𑀢𑀸𑀲𑀼 𑀳𑀺 𑀬𑀲𑁆𑀫𑀸 𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸𑀯 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀺. 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀧𑀭𑀺𑀓𑀫𑁆𑀫𑀸𑀤𑀺𑀪𑀽𑀢𑀸 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀓𑀺𑀭𑀺𑀬𑀸 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀧𑁂𑀢𑀺 𑀚𑀦𑁂𑀢𑀺, 𑀢𑀲𑁆𑀫𑀸 𑀏𑀢𑀸 𑀅𑀢𑁆𑀣𑀚𑀸𑀧𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀸𑀧𑀺 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀚𑀯𑀦𑀧𑀜𑁆𑀜𑀸 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀓𑀺𑀭𑀺𑀬𑀢𑁆𑀣𑀁 𑀚𑀸𑀧𑁂𑀢𑀻𑀢𑀺 ‘‘𑀅𑀢𑁆𑀣𑀚𑀸𑀧𑀺𑀓𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀚𑀸𑀧𑀺𑀢𑀢𑁆𑀣𑀸 𑀧𑀜𑁆𑀜𑀸𑀢𑀺 𑀲𑀳𑀚𑀸𑀢𑀁 𑀯𑀺𑀧𑀸𑀓𑀢𑁆𑀣𑀁 𑀚𑀸𑀧𑁂𑀢𑁆𑀯𑀸 𑀞𑀺𑀢𑀸, 𑀅𑀢𑁆𑀢𑀦𑁄 𑀯𑀸 𑀓𑀸𑀭𑀡𑁂𑀳𑀺 𑀚𑀸𑀧𑀺𑀢𑀸 𑀚𑀦𑀺𑀢𑀸 𑀧𑀯𑀢𑁆𑀢𑀺𑀢𑀸 𑀲𑀬𑀫𑁆𑀧𑀺 𑀅𑀢𑁆𑀣𑀪𑀽𑀢𑀸𑀢𑀺 𑀚𑀸𑀧𑀺𑀢𑀢𑁆𑀣𑀸. 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑁂𑀲𑀼 𑀘 𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀲𑀼 𑀘 𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀸 𑀲𑁂𑀲𑀓𑀺𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀧𑀜𑁆𑀜𑀸 𑀬𑀣𑀸𑀲𑀓𑀁 𑀓𑀸𑀭𑀡𑁂𑀳𑀺 𑀚𑀸𑀧𑀺𑀢𑀸, 𑀲𑀬𑀜𑁆𑀘 𑀅𑀢𑁆𑀣𑀪𑀽𑀢𑀸𑀢𑀺 ¶ ‘‘𑀚𑀸𑀧𑀺𑀢𑀢𑁆𑀣𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀓𑀁 𑀦𑀺𑀝𑁆𑀞𑀺𑀢𑀁.

𑀢𑀺𑀓𑁂𑀲𑀼 𑀧𑀦 𑀘𑀺𑀦𑁆𑀢𑀸𑀫𑀬𑀢𑁆𑀢𑀺𑀓𑁂 𑀧𑀭𑀢𑁄 𑀅𑀤𑀺𑀲𑁆𑀯𑀸 𑀅𑀲𑀼𑀢𑁆𑀯𑀸𑀯 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ‘‘𑀏𑀯𑀁 𑀲𑀢𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑀸𑀫𑀬𑀅𑀦𑀼𑀩𑀼𑀤𑁆𑀥𑀺𑀬𑀸 𑀉𑀧𑁆𑀧𑀸𑀤𑀺𑀢𑀸 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀧𑀜𑁆𑀜𑀸 𑀘𑁂𑀯 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁, 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀜𑁆𑀘 𑀘𑀺𑀦𑁆𑀢𑀸𑀫𑀬𑀸 𑀦𑀸𑀫 𑀧𑀜𑁆𑀜𑀸. 𑀢𑀢𑁆𑀣 𑀯𑀟𑁆𑀠𑀓𑀺𑀓𑀫𑁆𑀫𑀧𑀼𑀧𑁆𑀨𑀙𑀟𑁆𑀟𑀓𑀓𑀫𑁆𑀫𑀸𑀤𑀺 𑀳𑀻𑀦𑀜𑁆𑀘𑁂𑀯 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁. 𑀦𑀴𑀓𑀸𑀭𑀧𑁂𑀲𑀓𑀸𑀭𑀲𑀺𑀧𑁆𑀧𑀸𑀤𑀺 𑀳𑀻𑀦𑀜𑁆𑀘𑁂𑀯 𑀫𑀼𑀤𑁆𑀤𑀸𑀕𑀡𑀦𑀸𑀮𑁂𑀔𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁. 𑀦𑀸𑀕𑀫𑀡𑁆𑀟𑀮𑀧𑀭𑀺𑀢𑁆𑀢𑀸𑀤𑀺 𑀥𑀫𑁆𑀫𑀺𑀓𑀯𑀺𑀚𑁆𑀚𑀸𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁. 𑀢𑁂𑀲𑀼 𑀘𑀺𑀦𑁆𑀢𑀸𑀩𑀮𑁂𑀦𑁂𑀯 𑀉𑀧𑁆𑀧𑀦𑁆𑀦𑀸 𑀧𑀜𑁆𑀜𑀸. 𑀩𑁄𑀥𑀺𑀲𑀢𑁆𑀢𑀸𑀤𑀬𑁄 𑀳𑀺 𑀲𑀢𑁆𑀢𑀳𑀺𑀢𑀸𑀬 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀢𑀁𑀢𑀁𑀅𑀦𑀯𑀚𑁆𑀚𑀓𑀫𑁆𑀫𑀲𑀺𑀧𑁆𑀧𑀢𑀤𑀼𑀧𑀓𑀭𑀡𑀓𑀭𑀡𑀧𑁆𑀧𑀓𑀸𑀭𑀜𑁆𑀘 𑀜𑀸𑀡𑀩𑀮𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀦𑀸𑀕𑀫𑀡𑁆𑀟𑀮𑀧𑀭𑀺𑀢𑁆𑀢𑀸𑀤𑀺𑀯𑀺𑀚𑁆𑀚𑀫𑁆𑀧𑀺 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀏𑀯𑀁 𑀓𑀢𑀸𑀦𑀺𑀧𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀭𑁄𑀦𑁆𑀢𑁂𑀳𑀺 𑀓𑀢𑀲𑀺𑀧𑁆𑀧𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀺. 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀦𑀸𑀫 𑀓𑀼𑀲𑀮𑀓𑀫𑁆𑀫𑀁 𑀲𑀢𑁆𑀢𑀸𑀦𑀁 𑀲𑀓𑀁, 𑀅𑀓𑀼𑀲𑀮𑀁 𑀦𑁄 𑀲𑀓𑀦𑁆𑀢𑀺 𑀏𑀯𑀁 𑀚𑀸𑀦𑀦𑀧𑀜𑁆𑀜𑀸. 𑀅𑀣 𑀯𑀸 𑀓𑀼𑀲𑀮𑀓𑀫𑁆𑀫𑀫𑁂𑀯 𑀲𑀢𑁆𑀢𑀸𑀦𑀁 𑀲𑀓𑀁 𑀢𑀤𑀸𑀬𑀢𑁆𑀣𑀯𑀼𑀢𑁆𑀢𑀺𑀢𑀸𑀬, 𑀦𑀸𑀜𑁆𑀜𑀦𑁆𑀢𑀺 𑀏𑀯𑀁 𑀚𑀸𑀦𑀦𑀧𑀜𑁆𑀜𑀸𑀧𑀺. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀁 𑀳𑀺 𑀫𑀕𑁆𑀕𑀲𑀘𑁆𑀘𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 ‘‘𑀲𑀘𑁆𑀘𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀳𑀺 𑀜𑀸𑀡𑀤𑁆𑀯𑀬𑀁 𑀧𑀭𑀢𑁄 𑀅𑀲𑀼𑀢𑁆𑀯𑀸 𑀘𑀺𑀦𑁆𑀢𑀸𑀩𑀮𑁂𑀦 𑀉𑀧𑁆𑀧𑀸𑀤𑀺𑀢𑀁 𑀘𑀺𑀦𑁆𑀢𑀸𑀫𑀬𑀜𑀸𑀡𑀫𑁂𑀯 𑀳𑁄𑀢𑀺. 𑀇𑀤𑀜𑁆𑀘 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀪𑀺𑀜𑁆𑀜𑀸𑀢𑀸𑀦𑀁 𑀧𑀦 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀫𑀳𑀸𑀲𑀢𑁆𑀢𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣𑀸𑀧𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀜𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀢𑀫𑀬𑀸 𑀧𑀜𑁆𑀜𑀸𑀢𑀺 𑀧𑀭𑀢𑁄 𑀲𑀼𑀢𑁆𑀯𑀸 𑀲𑀼𑀢𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀸 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀸𑀬𑀢𑀦𑀸𑀤𑀺𑀧𑀜𑁆𑀜𑀸𑀯. 𑀧𑀭𑀢𑁄 𑀅𑀲𑀼𑀢𑁆𑀯𑀸 ¶ 𑀧𑀦 𑀓𑀫𑁆𑀫𑀸𑀬𑀢𑀦𑀸𑀤𑀺 𑀧𑀭𑁂𑀦 𑀓𑀬𑀺𑀭𑀫𑀸𑀦𑀁, 𑀓𑀢𑀁 𑀯𑀸 𑀤𑀺𑀲𑁆𑀯𑀸 ¶ 𑀉𑀕𑁆𑀕𑀳𑁂𑀢𑁆𑀯𑀸 𑀯𑀸 𑀧𑀝𑀺𑀮𑀤𑁆𑀥𑀸𑀧𑀺 𑀧𑀜𑁆𑀜𑀸 ‘‘𑀲𑀼𑀢𑀫𑀬𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀤𑀼𑀪𑀬𑀸𑀧𑀺 𑀘𑀺𑀦𑁆𑀢𑀸𑀫𑀬𑀸, 𑀲𑀼𑀢𑀫𑀬𑀸 𑀘 𑀓𑀸𑀫𑀸𑀯𑀘𑀭𑀸𑀯. 𑀪𑀸𑀯𑀦𑀸𑀫𑀬𑀸 𑀧𑀦 𑀧𑀜𑁆𑀜𑀸 𑀘𑀺𑀦𑁆𑀢𑀸𑀫𑀬𑀯𑀲𑁂𑀦, 𑀲𑀼𑀢𑀫𑀬𑀯𑀲𑁂𑀦 𑀯𑀸 𑀧𑀯𑀢𑁆𑀢𑀺𑀢𑀓𑀸𑀫𑀸𑀯𑀘𑀭𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀫𑀼𑀧𑁆𑀧𑀦𑁆𑀦𑀸 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀧𑀜𑁆𑀜𑀸.

𑀤𑀸𑀦𑀫𑀬𑀢𑁆𑀢𑀺𑀓𑁂 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀧𑀯𑀢𑁆𑀢𑀸 𑀤𑀸𑀦𑀫𑀬𑀸, 𑀲𑀻𑀮𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀻𑀮𑀫𑀬𑀸, 𑀢𑀤𑀼𑀪𑀬𑀸𑀧𑀺 𑀓𑀸𑀫𑀸𑀯𑀘𑀭𑀸𑀯. 𑀪𑀸𑀯𑀦𑀸𑀫𑀬𑀸 𑀧𑀦𑁂𑀢𑁆𑀣 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀘𑀢𑀼𑀪𑀽𑀫𑀓𑀧𑀜𑁆𑀜𑀸. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 𑀓𑀺𑀜𑁆𑀘𑀸𑀧𑀺 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁬𑁮) 𑀏𑀯𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀯 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀢𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀫𑀸𑀯𑀘𑀭𑀸𑀦𑀁 𑀧𑀦 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀦𑀁, 𑀅𑀦𑀼𑀲𑁆𑀲𑀢𑀺𑀉𑀧𑀘𑀸𑀭𑀪𑀸𑀯𑀦𑀸𑀦𑀜𑁆𑀘 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀢𑁆𑀢𑀺𑀓𑁂 𑀧𑀦𑁂𑀢𑀸𑀲𑀁 𑀘𑀺𑀦𑁆𑀢𑀸𑀫𑀬𑁂 𑀲𑀗𑁆𑀕𑀳𑀺𑀢𑀢𑁆𑀢𑀸 𑀪𑀸𑀯𑀦𑀸𑀫𑀬𑁂 𑀅𑀲𑀗𑁆𑀕𑀳𑁄, 𑀢𑀢𑁆𑀣𑀸𑀧𑀺 𑀪𑀸𑀯𑀦𑀸𑀩𑀮𑀦𑀺𑀧𑁆𑀨𑀦𑁆𑀦𑀸𑀦𑀫𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑀺𑀲𑀻𑀮𑀢𑁆𑀢𑀺𑀓𑁂 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀺𑀧𑀲𑁆𑀲𑀦𑀸𑀳𑁂𑀢𑀼𑀢𑁆𑀢𑀸 𑀲𑁂𑀲𑀲𑀻𑀮𑀢𑁄 𑀅𑀥𑀺𑀓𑀁 𑀲𑀻𑀮𑀦𑁆𑀢𑀺 𑀅𑀥𑀺𑀲𑀻𑀮𑀁, 𑀢𑀲𑁆𑀫𑀺𑀁 𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸 𑀅𑀥𑀺𑀲𑀻𑀮𑁂 𑀧𑀜𑁆𑀜𑀸. 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑁂𑀲𑀘𑀺𑀢𑁆𑀢𑁂𑀳𑀺 𑀅𑀥𑀺𑀓𑀢𑁆𑀢𑀸 𑀅𑀥𑀺𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀧𑀜𑁆𑀜𑀸 𑀅𑀥𑀺𑀘𑀺𑀢𑁆𑀢𑁂 𑀧𑀜𑁆𑀜𑀸, 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑀯𑀺𑀧𑀲𑁆𑀲𑀦𑀸 𑀧𑀦 𑀫𑀕𑁆𑀕𑀨𑀮𑀧𑀜𑁆𑀜𑀸 𑀲𑁂𑀲𑀸𑀳𑀺 𑀅𑀥𑀺𑀓𑀢𑁆𑀢𑀸 𑀅𑀥𑀺𑀧𑀜𑁆𑀜𑀸 𑀦𑀸𑀫. 𑀲𑀸 𑀘 𑀅𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀸𑀢𑀺 𑀤𑁂𑀲𑀦𑀸𑀬 𑀲𑀫𑀭𑀲𑀢𑀸𑀬 𑀯𑀼𑀢𑁆𑀢𑀸. 𑀲𑀻𑀮𑀸𑀤𑀬𑁄 ‘‘𑀲𑀻𑀮𑀁 𑀘𑀺𑀢𑁆𑀢𑀁 𑀧𑀜𑁆𑀜𑀸, 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀸’’𑀢𑀺 𑀧𑀘𑁆𑀘𑁂𑀓𑀁 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀼𑀭𑀺𑀫𑀸 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀦𑀺, 𑀯𑀝𑁆𑀝𑀧𑀸𑀤𑀺𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸 𑀘 𑀬𑀣𑀸𑀓𑁆𑀓𑀫𑀁 𑀳𑁄𑀦𑁆𑀢𑀺. 𑀢𑁂 𑀘 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀢𑀣𑀸𑀕𑀢𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀤𑀻𑀦𑀜𑁆𑀘 ¶ 𑀓𑀸𑀮𑁂 𑀧𑀯𑀢𑁆𑀢𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀧𑀦 𑀯𑀼𑀢𑁆𑀢𑀸𑀯𑀲𑁂𑀲𑀸 𑀉𑀧𑁆𑀧𑀦𑁆𑀦𑁂 𑀏𑀯 𑀢𑀣𑀸𑀕𑀢𑁂 𑀯𑀺𑀢𑁆𑀣𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀦𑁄 𑀅𑀦𑀼𑀧𑁆𑀧𑀦𑁆𑀦𑁂𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀭𑀢𑀦𑀢𑁆𑀢𑀬𑁂 𑀤𑀸𑀦𑀸𑀧𑀘𑀸𑀬𑀦𑀸𑀤𑀺𑀯𑀲𑁂𑀦, 𑀲𑀭𑀡𑀕𑀫𑀦𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀽𑀢𑀸 𑀓𑀼𑀲𑀮𑀥𑀫𑁆𑀫𑀸𑀧𑀺 𑀅𑀥𑀺𑀲𑀻𑀮𑀅𑀥𑀺𑀧𑀜𑁆𑀜𑀸𑀲𑀼 𑀕𑀳𑀺𑀢𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀸.

𑀆𑀬𑀓𑁄𑀲𑀮𑁆𑀮𑀢𑁆𑀢𑀺𑀓𑁂 ¶ 𑀆𑀬𑁄𑀢𑀺 𑀯𑀟𑁆𑀠𑀺, 𑀲𑀸 𑀅𑀓𑀼𑀲𑀮𑀸𑀤𑀺𑀅𑀦𑀢𑁆𑀣𑀳𑀸𑀦𑀺𑀢𑁄, 𑀓𑀼𑀲𑀮𑀸𑀤𑀺𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸. 𑀅𑀧𑀸𑀬𑁄𑀢𑀺 𑀅𑀯𑀟𑁆𑀠𑀺, 𑀲𑀸𑀧𑀺 𑀓𑀼𑀲𑀮𑀸𑀤𑀺𑀅𑀢𑁆𑀣𑀳𑀸𑀦𑀺𑀢𑁄, 𑀅𑀓𑀼𑀲𑀮𑀸𑀤𑀺𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸. 𑀢𑁂𑀲𑀼 𑀓𑁄𑀲𑀮𑁆𑀮𑀁, 𑀓𑀼𑀲𑀮𑀲𑀪𑀸𑀯𑀸 𑀧𑀜𑁆𑀜𑀸. 𑀅𑀧𑀸𑀬𑀓𑁄𑀲𑀮𑁆𑀮𑀁 𑀧𑀜𑁆𑀜𑀯𑀢𑁄 𑀏𑀯 ‘‘𑀏𑀯𑀁 𑀫𑀦𑀲𑀺𑀓𑀸𑀭𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀁 𑀅𑀯𑀟𑁆𑀠𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀟𑁆𑀠𑀺 𑀧𑀭𑀺𑀳𑀸𑀬𑀢𑀻’’𑀢𑀺 𑀜𑀢𑁆𑀯𑀸 𑀢𑀤𑀼𑀪𑀬𑀧𑀝𑀺𑀧𑀢𑁆𑀢𑀺𑀲𑀫𑁆𑀪𑀯𑀢𑁄. 𑀉𑀧𑀸𑀬𑀓𑁄𑀲𑀮𑁆𑀮𑀦𑁆𑀢𑀺 𑀅𑀢𑁆𑀭 𑀉𑀧𑀸𑀬𑁄 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑀸𑀤𑀻𑀲𑀼 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀉𑀧𑀸𑀬𑀚𑀸𑀦𑀦𑀧𑀜𑁆𑀜𑀸, 𑀢𑀺𑀯𑀺𑀥𑀸𑀧𑀺 𑀘𑁂𑀢𑀸 𑀓𑀸𑀫𑀸𑀯𑀘𑀭𑀧𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑀺𑀓𑀁 𑀦𑀺𑀝𑁆𑀞𑀺𑀢𑀁.

𑀘𑀢𑀼𑀓𑁆𑀓𑁂𑀲𑀼 𑀧𑀦 𑀧𑀞𑀫𑁂 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀜𑁆𑀘 𑀯𑀼𑀢𑁆𑀢𑀫𑁂𑀯, 𑀇𑀥 𑀧𑀦 𑀞𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀨𑀮𑁂𑀲𑀼 𑀘 𑀧𑀜𑁆𑀜𑀸𑀯 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁, 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀜𑁆𑀘𑀸𑀢𑀺.

𑀲𑀘𑁆𑀘𑀘𑀢𑀼𑀓𑁆𑀓𑁂 𑀅𑀭𑀺𑀬𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀕𑀳𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀓𑀸𑀫𑀸𑀯𑀘𑀭𑀜𑀸𑀡𑀫𑁆𑀧𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀧𑀝𑀺𑀯𑁂𑀥𑀓𑀺𑀘𑁆𑀘𑀯𑀲𑁂𑀦 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀸𑀴𑀺𑀬𑀁 𑀢𑀁 𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀘𑀢𑀼𑀓𑁆𑀓𑁂 𑀫𑀕𑁆𑀕𑀨𑀮𑁂𑀲𑀼 𑀧𑀜𑁆𑀜𑀸 𑀥𑀫𑁆𑀫𑁂 𑀜𑀸𑀡𑀁 𑀦𑀸𑀫. 𑀢𑁂𑀲𑀼 𑀳𑀺 𑀫𑀕𑁆𑀕𑀜𑀸𑀡𑀁 𑀢𑀸𑀯 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 𑀚𑀸𑀦𑀦𑀢𑁄 ‘‘𑀥𑀫𑁆𑀫𑁂 ¶ 𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀮𑀜𑀸𑀡𑀁 𑀧𑀦 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦 𑀥𑀫𑁆𑀫𑁂 𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀕𑁆𑀕𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀁 𑀧𑀦 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀘𑁆𑀘𑀧𑀝𑀺𑀯𑁂𑀥𑀦𑀬𑀲𑀗𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀅𑀦𑁆𑀯𑀬𑁂 𑀜𑀸𑀡𑀁 𑀦𑀸𑀫. 𑀢𑀲𑁆𑀲 𑀘 𑀬𑁂𑀳𑀺 𑀦𑀬𑁂𑀳𑀺 𑀅𑀭𑀺𑀬𑀸 𑀅𑀢𑀻𑀢𑀫𑀤𑁆𑀥𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀺𑀁𑀲𑀼, 𑀢𑁂𑀧𑀺 𑀇𑀫𑀜𑁆𑀜𑁂𑀯 𑀘𑀢𑀼𑀲𑀘𑁆𑀘𑀁 𑀏𑀯𑀫𑁂𑀯 𑀚𑀸𑀦𑀺𑀁𑀲𑀼, 𑀅𑀦𑀸𑀕𑀢𑀫𑀤𑁆𑀥𑀸𑀦𑀫𑁆𑀧𑀺 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀺 𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀭𑀸𑀕𑀸𑀤𑀺𑀯𑀲𑁂𑀦 𑀧𑀭𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑀸𑀡𑀁 𑀧𑀭𑀺𑀬𑁂 𑀜𑀸𑀡𑀁 𑀦𑀸𑀫. 𑀥𑀫𑁆𑀫𑀦𑁆𑀯𑀬𑀧𑀭𑀺𑀬𑀜𑀸𑀡𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀲𑀩𑁆𑀩𑀮𑁄𑀓𑀺𑀬𑀧𑀜𑁆𑀜𑀸𑀜𑀸𑀡𑀦𑁆𑀢𑀺 𑀲𑀫𑁆𑀫𑀢𑀢𑁆𑀢𑀸 𑀲𑀫𑁆𑀫𑀼𑀢𑀺𑀫𑁆𑀳𑀺 𑀜𑀸𑀡𑀦𑁆𑀢𑀺 𑀲𑀫𑁆𑀫𑀼𑀢𑀺𑀜𑀸𑀡𑀁 𑀦𑀸𑀫.

𑀆𑀘𑀬𑀘𑀢𑀼𑀓𑁆𑀓𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀧𑀜𑁆𑀜𑀸 𑀆𑀘𑀬𑀸𑀬 𑀦𑁄 𑀅𑀧𑀘𑀬𑀸𑀬. 𑀲𑀸 𑀳𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 ¶ 𑀆𑀘𑀺𑀦𑁄𑀢𑀺 𑀏𑀯, 𑀦𑁄 𑀅𑀧𑀘𑀺𑀦𑁄𑀢𑀺. 𑀫𑀕𑁆𑀕𑀧𑀜𑁆𑀜𑀸 𑀧𑀦 𑀅𑀧𑀘𑀬𑀸𑀬 𑀦𑁄 𑀆𑀘𑀬𑀸𑀬. 𑀭𑀽𑀧𑀸𑀭𑀽𑀧𑀓𑀼𑀲𑀮𑀧𑀜𑁆𑀜𑀸 𑀆𑀘𑀬𑀸𑀬 𑀘𑁂𑀯 𑀅𑀧𑀘𑀬𑀸𑀬 𑀘. 𑀲𑀸 𑀳𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑁂 𑀘 𑀢𑀫𑁆𑀫𑀽𑀮𑀓𑁂 𑀘 𑀯𑀺𑀧𑀸𑀓𑀥𑀫𑁆𑀫𑁂 𑀅𑀧𑀘𑀺𑀦𑁄𑀢𑀺. 𑀲𑁂𑀲𑀸 𑀅𑀩𑁆𑀬𑀸𑀓𑀢𑀸 𑀧𑀜𑁆𑀜𑀸 𑀦𑁂𑀯𑀸𑀘𑀬𑀸𑀬 𑀦𑁄 𑀅𑀧𑀘𑀬𑀸𑀬.

𑀦𑀺𑀩𑁆𑀩𑀺𑀤𑀸𑀘𑀢𑀼𑀓𑁆𑀓𑁂 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀦𑀺𑀩𑁆𑀩𑀺𑀤𑀸𑀬 𑀦𑁄 𑀧𑀝𑀺𑀯𑁂𑀥𑀸𑀬. 𑀲𑀸 𑀳𑀺 𑀓𑀸𑀫𑀯𑀺𑀯𑁂𑀓𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀓𑀺𑀮𑁂𑀲𑀦𑀺𑀩𑁆𑀩𑀺𑀤𑀸𑀬 𑀧𑀯𑀢𑁆𑀢𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀓𑀪𑀸𑀯𑀁 𑀧𑀦 𑀅𑀧𑁆𑀧𑀢𑁆𑀢𑀢𑀸𑀬 𑀦𑁂𑀯𑀸𑀪𑀺𑀜𑁆𑀜𑀸𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀜𑀸 𑀧𑀝𑀺𑀯𑁂𑀥𑀸𑀬 𑀦𑁄 𑀦𑀺𑀩𑁆𑀩𑀺𑀤𑀸𑀬. 𑀲𑀸 𑀳𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀪𑀸𑀯𑁂𑀦𑀸𑀧𑀺 𑀅𑀪𑀺𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀧𑀺 𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀧𑀞𑀫𑀚𑁆𑀛𑀸𑀦𑀓𑁆𑀔𑀡𑁂 𑀏𑀯 𑀦𑀻𑀯𑀭𑀡𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀢𑀸 𑀦𑁄 𑀦𑀺𑀩𑁆𑀩𑀺𑀤𑀸𑀬. 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀧𑀜𑁆𑀜𑀸 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸𑀬 𑀧𑀞𑀫𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑀸 𑀅𑀯𑀺𑀢𑀓𑁆𑀓𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑀸 𑀓𑀸𑀢𑀩𑁆𑀩𑀸. 𑀫𑀕𑁆𑀕𑀧𑀜𑁆𑀜𑀸 𑀧𑀦 𑀦𑀺𑀩𑁆𑀩𑀺𑀤𑀸𑀬 𑀘𑁂𑀯 𑀧𑀝𑀺𑀯𑁂𑀥𑀸𑀬 𑀘. 𑀏𑀢𑁆𑀣 𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀯𑀲𑁂𑀦 𑀦𑀺𑀩𑁆𑀩𑀺𑀤𑀸𑀬 𑀘𑁂𑀯𑁂𑀢𑀸𑀲𑀁 𑀙𑀴𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀯𑁂𑀥𑀸𑀬 𑀘 𑀲𑀁𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 ¶ 𑀧𑀜𑁆𑀜𑀸 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦𑁄 𑀧𑀝𑀺𑀯𑁂𑀥𑀸𑀬.

𑀳𑀸𑀦𑀪𑀸𑀕𑀺𑀬𑀘𑀢𑀼𑀓𑁆𑀓𑁂 𑀳𑀸𑀦𑀁 𑀪𑀚𑀢𑀻𑀢𑀺 𑀳𑀸𑀦𑀪𑀸𑀕𑀺𑀦𑀻, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀦𑀺𑀩𑁆𑀩𑁂𑀥𑁄𑀢𑀺 𑀘𑁂𑀢𑁆𑀣 𑀅𑀭𑀺𑀬𑀫𑀕𑁆𑀕𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸. 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻𑀢𑀺 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀓𑀼𑀲𑀮𑀧𑀜𑁆𑀜𑀸𑀯 𑀯𑀼𑀢𑁆𑀢𑀸. 𑀢𑀸𑀦𑀺 𑀳𑀺 𑀅𑀢𑁆𑀢𑀦𑁄 𑀲𑀪𑀸𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀳𑁂𑀝𑁆𑀞𑀸 𑀑𑀭𑁄𑀳𑀡𑀧𑀘𑁆𑀘𑀬𑀪𑀽𑀢𑀸 𑀳𑀸𑀦𑀪𑀸𑀕𑀺𑀦𑀻. 𑀉𑀧𑀦𑀺𑀚𑁆𑀛𑀸𑀦𑀧𑀘𑁆𑀘𑀬𑀪𑀽𑀢𑀸 𑀯𑀺𑀲𑁂𑀲𑀪𑀸𑀕𑀺𑀦𑀻, 𑀢𑀁 𑀧𑀦 𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀩𑀮𑀯𑀢𑀸𑀬 𑀯𑀺𑀲𑁂𑀲𑀁, 𑀳𑀸𑀦𑀺𑀁 𑀯𑀸 𑀅𑀦𑀼𑀲𑁆𑀲𑀼𑀓𑁆𑀓𑀺𑀢𑁆𑀯𑀸 𑀞𑀺𑀢𑀺𑀓𑁄𑀝𑁆𑀞𑀸𑀲𑀺𑀓𑀸 𑀞𑀺𑀢𑀺𑀪𑀸𑀕𑀺𑀦𑀻, 𑀅𑀭𑀺𑀬𑀫𑀕𑁆𑀕𑀧𑀤𑀝𑁆𑀞𑀸𑀦𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀪𑀽𑀢𑀸𑀯 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻 𑀘 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯. 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀯. 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀻𑀢𑀺 𑀧𑀭𑀺𑀢𑁆𑀢𑀸, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺𑀆𑀤𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯. 𑀚𑀭𑀸𑀫𑀭𑀡𑀸𑀤𑀺𑀘𑀢𑀼𑀓𑁆𑀓𑁂𑀲𑀼𑀧𑀺 𑀫𑀕𑁆𑀕𑀜𑀸𑀡𑀯𑀲𑁂𑀦𑁂𑀯 𑀘𑀢𑀲𑁆𑀲𑁄 𑀬𑁄𑀚𑀦𑀸 𑀯𑀼𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀜𑁆𑀘𑀓𑁂𑀲𑀼 ¶ 𑀧𑀦 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀜𑀸𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀫𑀸𑀥𑀺. 𑀢𑀢𑁆𑀣 𑀧𑀻𑀢𑀺𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸 𑀦𑀸𑀫, 𑀲𑀼𑀔𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸 𑀦𑀸𑀫. 𑀧𑀭𑁂𑀲𑀁 𑀘𑁂𑀢𑁄𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀘𑁂𑀢𑁄𑀨𑀭𑀡𑀢𑀸 𑀦𑀸𑀫. 𑀆𑀮𑁄𑀓𑀨𑀭𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀮𑁄𑀓𑀨𑀭𑀡𑀢𑀸 𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀏𑀢𑁆𑀣 𑀘 𑀧𑀻𑀢𑀺𑀨𑀭𑀡𑀢𑀸, 𑀲𑀼𑀔𑀨𑀭𑀡𑀢𑀸 𑀘 𑀤𑁆𑀯𑁂 𑀧𑀸𑀤𑀸 𑀯𑀺𑀬, 𑀘𑁂𑀢𑁄𑀨𑀭𑀡𑀢𑀸, 𑀆𑀮𑁄𑀓𑀨𑀭𑀡𑀢𑀸 𑀘 𑀤𑁆𑀯𑁂 ¶ 𑀳𑀢𑁆𑀣𑀸 𑀯𑀺𑀬, 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀲𑀻𑀲𑀁 𑀯𑀺𑀬, 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀫𑀚𑁆𑀛𑀺𑀫𑀓𑀸𑀬𑁄 𑀯𑀺𑀬. 𑀇𑀢𑀺 𑀪𑀕𑀯𑀸 𑀧𑀜𑁆𑀘𑀗𑁆𑀕𑀺𑀓𑀁 𑀲𑀫𑁆𑀫𑀸𑀲𑀫𑀸𑀥𑀺𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀁 𑀧𑀼𑀭𑀺𑀲𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀘 𑀲𑀫𑀸𑀥𑀺𑀦𑀸 𑀅𑀗𑁆𑀕𑀸𑀦𑀺 𑀧𑀜𑁆𑀘 𑀜𑀸𑀡𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑁋

‘‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄’𑀢𑀺 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, ‘𑀅𑀬𑀁 𑀲𑀫𑀸𑀥𑀺 𑀅𑀭𑀺𑀬𑁄 𑀦𑀺𑀭𑀸𑀫𑀺𑀲𑁄’𑀢𑀺…𑀧𑁂… ‘𑀫𑀳𑀸𑀧𑀼𑀭𑀺𑀲𑀲𑁂𑀯𑀺𑀢𑁄’𑀢𑀺…𑀧𑁂… ‘𑀲𑀦𑁆𑀢𑁄 𑀧𑀡𑀻𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄’𑀢𑀺…𑀧𑁂… ‘𑀲𑁄 𑀔𑁄 𑀧𑀦𑀸𑀳𑀁 𑀇𑀫𑀁 𑀲𑀫𑀸𑀥𑀺𑀁 𑀲𑀢𑁄𑀯 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀢𑁄 𑀯𑀼𑀝𑁆𑀞𑀳𑀸𑀫𑀻’𑀢𑀺 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀪. 𑁮𑁦𑁪) 𑁋

𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀬𑀼𑀢𑁆𑀢𑁄 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀲𑀫𑀸𑀧𑀢𑁆𑀢𑀺𑀨𑀮𑀲𑀫𑀸𑀥𑀺. 𑀲𑁄 𑀏𑀯𑀁 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄, 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀲𑀫𑀸𑀥𑀺𑀲𑀼𑀔𑀲𑁆𑀲 𑀘𑁂𑀯 𑀅𑀢𑁆𑀢𑀦𑀸 𑀲𑀫𑀼𑀝𑁆𑀞𑀸𑀧𑀺𑀢𑀫𑁆𑀧𑀺 𑀧𑀡𑀻𑀢𑀭𑀽𑀧𑁂𑀦 𑀨𑀼𑀝𑁆𑀞𑀲𑀓𑀮𑀓𑀸𑀬𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁂 𑀅𑀢𑀺𑀧𑀡𑀻𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑀼𑀔𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄𑀢𑀺 𑀏𑀓𑀁 𑀅𑀗𑁆𑀕𑀁, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀸 𑀦𑀺𑀭𑀸𑀫𑀺𑀲𑁄𑀢𑀺 𑀏𑀓𑀁, 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀲𑁄𑀢𑀺 𑀏𑀓𑀁, 𑀅𑀗𑁆𑀕𑀸𑀭𑀫𑁆𑀫𑀡𑁂 𑀲𑀦𑁆𑀢𑀢𑀸𑀬, 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁄 𑀅𑀢𑀧𑁆𑀧𑀦𑀻𑀬𑀝𑁆𑀞𑁂𑀦 𑀧𑀡𑀻𑀢𑁄 ¶ 𑀓𑀺𑀮𑁂𑀲𑀧𑀝𑀺𑀧𑀲𑁆𑀲𑀤𑁆𑀥𑀺𑀪𑀸𑀯𑀲𑁆𑀲 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀮𑀤𑁆𑀥𑁄 ¶ 𑀏𑀓𑁄𑀤𑀺𑀪𑀸𑀯𑁂𑀦 𑀘 𑀅𑀥𑀺𑀕𑀢𑁄 𑀅𑀧𑁆𑀧𑀕𑀼𑀡𑀲𑀸𑀲𑀯𑀲𑀫𑀸𑀥𑀺 𑀯𑀺𑀬 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀧𑀼𑀕𑁆𑀕𑀮𑀲𑁆𑀲𑀸𑀬𑀁 𑀲𑀫𑀸𑀥𑀻𑀢𑀺 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀇𑀫𑀁 𑀲𑀫𑀸𑀥𑀺𑀁 𑀲𑀢𑁄𑀯 𑀲𑀫𑀸𑀧𑀚𑁆𑀚𑀢𑀺, 𑀉𑀝𑁆𑀞𑀳𑀢𑀺 𑀘𑀸𑀢𑀺 𑀏𑀓𑀫𑀗𑁆𑀕𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀩𑁆𑀩𑀸𑀓𑀸𑀭𑀢𑁄 𑀬𑀼𑀢𑁆𑀢𑀢𑁆𑀢𑀸 ‘‘𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑀧𑀜𑁆𑀘𑀓𑀁 𑀦𑀺𑀝𑁆𑀞𑀺𑀢𑀁.

𑀙𑀓𑁆𑀓𑁂 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀧𑀜𑁆𑀜𑀸𑀢𑀺 𑀇𑀤𑁆𑀥𑀺𑀯𑀺𑀥𑁂 𑀜𑀸𑀡𑀁, 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀜𑀸𑀡𑀁, 𑀘𑁂𑀢𑁄𑀧𑀭𑀺𑀬𑁂 𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀁 𑀜𑀸𑀡𑀁, 𑀘𑀼𑀢𑀽𑀧𑀧𑀸𑀢𑁂 𑀜𑀸𑀡𑀁, 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀙𑀴𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀜𑀸𑀡𑀸𑀦𑀺. 𑀢𑁂𑀲𑀼 𑀧𑀘𑁆𑀙𑀺𑀫𑀁 𑀮𑁄𑀓𑀼𑀢𑁆𑀢𑀭𑀁, 𑀲𑁂𑀲𑀸𑀦𑀺 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀻𑀢𑀺.

𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀢𑁆𑀢𑀓𑁂 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀏𑀓𑀁, ‘‘𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸’’𑀢𑀺 𑀏𑀓𑀦𑁆𑀢𑀺 𑀤𑁆𑀯𑁂 𑀜𑀸𑀡𑀸𑀦𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀤𑁆𑀯𑁂, 𑀅𑀦𑀸𑀕𑀢𑁂𑀧𑀺 𑀤𑁆𑀯𑁂𑀢𑀺 𑀙, 𑀢𑀁 𑀙𑀩𑁆𑀩𑀺𑀥𑀫𑁆𑀧𑀺 𑀜𑀸𑀡𑀁 ‘‘𑀔𑀬𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀜𑀸𑀡𑀸𑀦𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀚𑀸𑀢𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀘𑀸𑀢𑀺 𑀏𑀯𑀁 𑀏𑀓𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀓𑀸𑀮𑀢𑁆𑀢𑀬𑁂𑀧𑀺 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀜𑀸𑀡𑀁 𑀢𑁂𑀲𑀁 𑀯𑀬𑀤𑀲𑁆𑀲𑀦𑀜𑀸𑀡𑀲𑁆𑀲 𑀘 𑀯𑀲𑁂𑀦 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀺.

𑀲𑀢𑁆𑀢𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀓𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀯𑀓𑁂 𑀦𑀯𑀲𑀼 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 𑀧𑀜𑁆𑀜𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀯𑀺𑀳𑀸𑀢𑀩𑁆𑀩𑀢𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀗𑁆𑀔𑀸𑀢𑀸𑀲𑀼 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼 ¶ 𑀲𑀫𑁆𑀧𑀬𑀼𑀢𑁆𑀢𑀸 ¶ 𑀅𑀝𑁆𑀞 𑀧𑀜𑁆𑀜𑀸 𑀘𑁂𑀯 𑀢𑀤𑀦𑀦𑁆𑀢𑀭𑀁 𑀦𑀺𑀭𑁄𑀥𑀁 𑀨𑀼𑀲𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀦𑀺𑀭𑁄𑀥𑀁 𑀲𑀦𑁆𑀢𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀜𑁆𑀘𑀸𑀢𑀺 𑀦𑀯.

𑀦𑀯𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀲𑀓𑁂 𑀢𑀣𑀸𑀕𑀢𑀲𑁆𑀲𑀸𑀢𑀺 𑀬𑀣𑀸 𑀯𑀺𑀧𑀲𑁆𑀲𑀻𑀆𑀤𑀬𑁄 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀆𑀕𑀢𑀸, 𑀢𑀣𑀸 𑀆𑀕𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺, 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀸𑀦𑀺 𑀩𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀲𑁆𑀲 𑀩𑀮𑀁 𑀓𑀸𑀬𑀩𑀮𑀁, 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺. (𑀯𑀺𑀪. 𑀅𑀝𑁆𑀞. 𑁭𑁬𑁦; 𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁨𑁨; 𑀅. 𑀦𑀺. 𑁧𑁦.𑁨𑁧; 𑀉𑀤𑀸. 𑀅𑀝𑁆𑀞. 𑁭𑁫; 𑀩𑀼. 𑀯𑀁. 𑀅𑀝𑁆𑀞. 𑁧.𑁩𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪; 𑀘𑀽𑀴𑀦𑀺. 𑀅𑀝𑁆𑀞. 𑁮𑁧);

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀴𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁, 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀳𑀢𑁆𑀣𑀺𑀦𑁄 𑀩𑀮𑀁, 𑀬𑀁 𑀢𑁂𑀲𑀁 𑀤𑀲𑀦𑁆𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀢𑀫𑁆𑀩𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀺𑀦𑁄, 𑀢𑁂𑀲𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀳𑁂𑀫𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀲𑁆𑀲, 𑀢𑁂𑀲𑀁 𑀤𑀲𑀦𑁆𑀦𑀁 𑀩𑀮𑀁 𑀙𑀤𑁆𑀤𑀦𑁆𑀢𑀲𑁆𑀲, 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀁, 𑀢𑀁 𑀢𑀣𑀸𑀕𑀢𑀲𑁆𑀲 𑀦𑀸𑀭𑀸𑀬𑀡𑀩𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁. 𑀬𑀸𑀦𑀺 𑀧𑀦 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀜𑀸𑀡𑀲𑀳𑀲𑁆𑀲𑀸𑀦𑀺, 𑀏𑀢𑀁 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦, 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀬𑁂𑀳𑀺 ¶ 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀳𑀺 𑀤𑀲𑀳𑀺 𑀜𑀸𑀡𑀩𑀮𑁂𑀳𑀺 𑀉𑀧𑁂𑀢𑁄. 𑀆𑀲𑀪𑀡𑁆𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀅𑀧𑀺𑀘 ¶ 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀦𑀺𑀲𑀪𑁄, 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀓𑀫𑁆𑀧𑀦𑀻𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀢𑀲𑁆𑀲 𑀦𑀺𑀲𑀪𑀩𑀮𑀲𑀫𑀦𑁆𑀦𑀸𑀕𑀢𑀲𑁆𑀲 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑀁, 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀳𑀺 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀅𑀧𑁆𑀧𑀥𑀁𑀲𑀺𑀬𑁄 𑀅𑀘𑀮𑁂𑀦 𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀢𑀜𑁆𑀘𑁂𑀲 𑀧𑀝𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺 (𑀯𑀺𑀪. 𑁭𑁬𑁦).

𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀘 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄, 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀦𑀸𑀤𑀁 𑀦𑀤𑀢𑀺.

𑀩𑁆𑀭𑀳𑁆𑀫𑀘𑀓𑁆𑀓𑀦𑁆𑀢𑀺𑀆𑀤𑀻𑀲𑀼 𑀩𑁆𑀭𑀳𑁆𑀫𑀦𑁆𑀢𑀺 𑀉𑀢𑁆𑀢𑀫𑀁 𑀯𑀺𑀲𑀼𑀤𑁆𑀥𑀁. 𑀘𑀓𑁆𑀓-𑀲𑀤𑁆𑀤𑁄 𑀧𑀦𑀸𑀬𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 ¶ 𑀚𑀸𑀢𑀸𑀦𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁫; 𑁩.𑁨𑁦𑁪; 𑀫. 𑀦𑀺. 𑁨.𑁩𑁮𑁬) 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀘𑀓𑁆𑀓𑀁 𑀧𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑁩.𑁮𑁫) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀉𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. 𑀇𑀥 𑀧𑀦 𑀥𑀫𑁆𑀫𑀘𑀓𑁆𑀓𑁂 𑀧𑀯𑀢𑁆𑀢𑀢𑀺.

𑀥𑀫𑁆𑀫𑀘𑀓𑁆𑀓𑀜𑁆𑀘 ¶ 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀮𑁄𑀓𑀼𑀢𑁆𑀢𑀭𑀁 𑀧𑀝𑀺𑀯𑁂𑀥𑀜𑀸𑀡𑀁, 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀓𑀸𑀫𑀸𑀯𑀘𑀭𑀁 𑀤𑁂𑀲𑀦𑀸𑀜𑀸𑀡𑀁, 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀜𑁆𑀜𑁂𑀯 𑀑𑀭𑀲𑀜𑀸𑀡𑀁, 𑀢𑀁 𑀧𑀯𑀢𑁆𑀢𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀺𑀪𑀸𑀯𑁂𑀢𑀺 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀸𑀦𑀺 𑀤𑀲 𑀜𑀸𑀡𑀸𑀦𑀺 𑀆𑀤𑀺𑀢𑁄 ‘‘𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀓𑀢𑀫𑀸𑀦𑀺 𑀤𑀲? 𑀇𑀥 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀁 𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄𑀢𑀺 𑀅𑀓𑀸𑀭𑀡𑀜𑁆𑀘 𑀅𑀓𑀸𑀭𑀡𑀢𑁄. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺 𑀞𑀸𑀦𑀸𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦𑁂𑀢𑁆𑀣 𑀪𑀕𑀯𑀸 𑀞𑀸𑀦𑀜𑁆𑀘 𑀞𑀸𑀦𑀢𑁄, 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 ¶ 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺? 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬…𑀧𑁂… 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀺𑀢𑀭𑀁…𑀧𑁂… 𑀅𑀭𑀳𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀧𑀦𑁂𑀢𑀁 𑀲𑀩𑁆𑀩𑀁 𑀓𑀭𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀧𑀚𑀸𑀦𑀸𑀢𑀺, 𑀢𑀣𑀸 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀣𑀸 𑀤𑁆𑀯𑁂 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀻 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀏𑀓𑁄 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀧𑀚𑀸𑀦𑀸𑀢𑀺, 𑀢𑀣𑀸 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀇𑀝𑁆𑀞𑁄 𑀯𑀺𑀧𑀸𑀓𑁄, 𑀲𑀼𑀘𑀭𑀺𑀢𑀸𑀦𑀜𑁆𑀘 𑀅𑀦𑀺𑀝𑁆𑀞𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀩𑁆𑀩𑀺𑀧𑀭𑀻𑀢𑁄 𑀧𑀦 𑀦𑁂𑀲𑀁 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺, 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁, 𑀇𑀢𑀭𑁂 𑀅𑀝𑁆𑀞𑀸𑀦𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀣 𑀧𑀦𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄. ‘‘𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀇𑀤𑀁 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁭) 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄𑀧𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀺𑀪𑀽𑀢𑁄 𑀫𑀢𑁆𑀢𑀳𑀢𑁆𑀣𑀺𑀧𑀭𑀺𑀢𑀸𑀲𑀺𑀢𑁄 𑀯𑀺𑀬, 𑀲𑀼𑀘𑀺𑀓𑀸𑀫𑁄 𑀕𑀽𑀣𑀓𑀽𑀧𑀁 𑀯𑀺𑀬 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺, 𑀅𑀢𑁆𑀢𑀢𑁄 𑀉𑀧𑀕𑀫𑀦𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀬𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀲𑀗𑁆𑀔𑀸𑀭’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀜𑁆𑀘𑀺 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 ¶ 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀲𑀸𑀯𑀓𑁄 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀧𑀸𑀡𑀸𑀢𑀺𑀧𑀸𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀯𑀸 𑀬𑀁𑀓𑀺𑀜𑁆𑀘𑀺 𑀤𑀼𑀘𑁆𑀘𑀭𑀺𑀢𑀁 𑀅𑀧𑀸𑀬𑀳𑁂𑀢𑀼𑀪𑀽𑀢𑀁 𑀓𑀸𑀢𑀼𑀁 𑀪𑀯𑀦𑁆𑀢𑀭𑁂𑀧𑀺 ¶ 𑀦 𑀲𑀓𑁆𑀓𑁄𑀢𑀺, 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀢𑁆𑀣 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀸𑀦𑁂𑀯 𑀉𑀤𑁆𑀥𑀝𑀸𑀦𑀺. 𑀲𑀸𑀯𑀚𑁆𑀚𑁄 𑀳𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀆𑀦𑀦𑁆𑀢𑀭𑀺𑀬𑀸𑀦𑀺𑀧𑀺 𑀓𑀭𑀺𑀲𑁆𑀲𑀢𑀻𑀢𑀺. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀪𑀽𑀢𑀁 𑀚𑀦𑀺𑀓𑀁 𑀫𑀸𑀢𑀭𑀁, 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀧𑀦 𑀫𑀸𑀢𑀭𑀁, 𑀧𑀺𑀢𑀭𑀁 𑀯𑀸 𑀲𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁, 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀅𑀭𑀳𑀦𑁆𑀢𑀫𑁆𑀧𑀺 𑀫𑀦𑀼𑀲𑁆𑀲𑀪𑀽𑀢𑀫𑁂𑀯 𑀖𑀸𑀢𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺. 𑀢𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀳𑀸𑀭𑀁 𑀤𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀲𑁆𑀫𑀺𑀁 𑀢𑁂𑀦𑁂𑀯 𑀭𑁄𑀕𑁂𑀦 𑀫𑀢𑁂𑀧𑀺 𑀅𑀭𑀳𑀦𑁆𑀢𑀖𑀸𑀢𑀓𑁄 𑀳𑁄𑀢𑀺, 𑀦 𑀬𑀓𑁆𑀔𑀪𑀽𑀢𑀁 𑀅𑀭𑀳𑀦𑁆𑀢𑀁, 𑀲𑁂𑀲𑀅𑀭𑀺𑀬𑀧𑀼𑀕𑁆𑀕𑀮𑁂 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀧𑀺 𑀖𑀸𑀢𑁂𑀦𑁆𑀢𑁄, 𑀓𑀫𑁆𑀫𑀁 𑀧𑀦 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀳𑁄𑀢𑀺. 𑀬𑀁 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑁂𑀲𑀅𑀭𑀺𑀬𑀧𑀼𑀕𑁆𑀕𑀮𑁂 𑀫𑀸𑀭𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀦𑀢𑁆𑀣𑀺, 𑀓𑀫𑁆𑀫𑀁 𑀧𑀦 𑀕𑀭𑀼𑀓𑀁 𑀳𑁄𑀢𑀺. 𑀏𑀢𑁆𑀣 𑀘 𑀏𑀴𑀓𑀸𑀤𑀺𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀳𑀺 𑀅𑀪𑀺𑀲𑀦𑁆𑀥𑀺𑀦𑀸 𑀏𑀴𑀓𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑀁 𑀫𑀸𑀢𑀭𑀁, 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺, 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸 𑀯𑀸 𑀫𑀸𑀢𑀸𑀤𑀺𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺, 𑀫𑀸𑀢𑀸𑀤𑀺𑀅𑀪𑀺𑀲𑀦𑁆𑀥𑀺𑀦𑀸 𑀢𑁂 𑀏𑀯 𑀫𑀸𑀭𑁂𑀦𑁆𑀢𑁄 𑀨𑀼𑀲𑀢𑁂𑀯. 𑀏𑀲 𑀦𑀬𑁄 𑀘𑁄𑀭𑀘𑀢𑀼𑀓𑁆𑀓𑀸𑀤𑀻𑀲𑀼𑀧𑀺.

𑀮𑁄𑀳𑀺𑀢𑀼𑀧𑁆𑀧𑀸𑀤𑁂 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀓𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀭𑀲𑁆𑀲 𑀉𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑁄, 𑀮𑁄𑀳𑀺𑀢𑀧𑀕𑁆𑀖𑀭𑀡𑀁 𑀯𑀸 𑀦𑀢𑁆𑀣𑀺, 𑀤𑁂𑀯𑀤𑀢𑁆𑀢𑁂𑀦 𑀧𑀦 𑀧𑀯𑀺𑀤𑁆𑀥𑀲𑀺𑀮𑀸𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀲𑀓𑁆𑀔𑀮𑀺𑀓𑀧𑁆𑀧𑀳𑀸𑀭𑁂𑀦 𑀯𑀺𑀬 𑀲𑀭𑀻𑀭𑀲𑁆𑀲 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀬𑀣𑀸 𑀔𑀼𑀤𑁆𑀤𑀺𑀓𑀫𑀓𑁆𑀔𑀺𑀓𑀸𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀯𑀺𑀲𑀫𑀁 𑀲𑀫𑁄𑀲𑀭𑀢𑀺, 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺, 𑀦 𑀧𑀦 𑀚𑀻𑀯𑀓𑀲𑁆𑀲𑁂𑀯 𑀫𑀼𑀤𑀼𑀘𑀺𑀢𑁆𑀢𑁂𑀦 𑀤𑀼𑀝𑁆𑀞𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀓𑀁 𑀓𑀭𑁄𑀦𑁆𑀢𑀲𑁆𑀲 ¶ , 𑀧𑀼𑀜𑁆𑀜𑀫𑁂𑀯 𑀧𑀦𑀲𑁆𑀲 𑀳𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀘𑁂𑀢𑀺𑀬𑀁 𑀪𑀺𑀦𑁆𑀤𑀦𑁆𑀢𑀲𑁆𑀲, 𑀩𑁄𑀥𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲, 𑀥𑀸𑀢𑀽𑀲𑀼 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀘 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀳𑁄𑀢𑀺. 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀧𑀦 𑀣𑀽𑀧𑀁 𑀯𑀸 𑀲𑀥𑀸𑀢𑀼𑀓𑀁 𑀧𑀝𑀺𑀫𑀁 𑀯𑀸 𑀩𑀸𑀥𑀬𑀫𑀸𑀦𑀁 𑀲𑀸𑀔𑀁, 𑀘𑁂𑀢𑀺𑀬𑀯𑀢𑁆𑀣𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀫𑀽𑀮𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀲𑀸𑀔𑀸𑀬 𑀦𑀺𑀮𑀻𑀦𑀸 𑀲𑀓𑀼𑀡𑀸 𑀘𑁂𑀢𑀺𑀬𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀺, 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀳𑀺 𑀲𑀭𑀻𑀭𑀘𑁂𑀢𑀺𑀬𑀫𑁂𑀯 𑀫𑀳𑀦𑁆𑀢𑀢𑀭𑀁. 𑀥𑀸𑀢𑀼𑀦𑀺𑀥𑀸𑀦𑀭𑀳𑀺𑀢𑀁 𑀧𑀝𑀺𑀫𑀸𑀖𑀭𑀁 𑀯𑀸 𑀩𑁄𑀥𑀺𑀖𑀭𑀁 𑀯𑀸 𑀩𑀸𑀥𑁂𑀦𑁆𑀢𑀁 ¶ 𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀑𑀚𑁄𑀳𑀭𑀡𑀲𑀸𑀔𑀁, 𑀧𑀦𑀲𑁆𑀲 𑀧𑀽𑀢𑀺𑀝𑁆𑀞𑀸𑀦𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁂 𑀯𑀺𑀬 𑀧𑀼𑀜𑁆𑀜𑀫𑁂𑀯 𑀳𑁄𑀢𑀺.

𑀲𑀗𑁆𑀖𑀪𑁂𑀤𑁂 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀲𑀫𑀸𑀦𑀲𑀁𑀯𑀸𑀲𑀓𑁂 𑀲𑀗𑁆𑀖𑁂 𑀏𑀓𑀢𑁄 𑀞𑀺𑀢𑁂 𑀯𑀺𑀲𑀼𑀁 𑀯𑀕𑁆𑀕𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑀦𑁆𑀢𑀲𑁆𑀲 𑀲𑀗𑁆𑀖𑀪𑁂𑀤𑁄 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀧𑀜𑁆𑀘𑀳𑀺, 𑀉𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮). 𑀢𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄 𑀓𑀣𑀬𑀦𑁆𑀢𑁄 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀩𑀳𑀼𑀲𑁆𑀲𑀼𑀢𑀸𑀤𑀺𑀪𑀸𑀯𑀁, 𑀓𑀣𑀁 𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀕𑀸𑀳𑁂𑀬𑁆𑀬, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑁂𑀳𑀺 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀁 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 ¶ 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀢𑁂𑀲𑀼 𑀦𑀺𑀧𑁆𑀨𑀦𑁆𑀦𑁂𑀲𑀼𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑁂𑀳𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑁂 𑀯𑀸 𑀪𑀺𑀓𑁆𑀔𑀽 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀯𑀕𑁆𑀕𑀁 𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀯𑀺𑀲𑀼𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀅𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀦 𑀲𑀫𑀕𑁆𑀕𑀲𑀜𑁆𑀜𑀸𑀬 𑀯𑀝𑁆𑀝𑀢𑀺. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀳𑀺 𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀪𑁂𑀤𑁄 𑀳𑁄𑀢𑀺, 𑀦 𑀆𑀦𑀦𑁆𑀢𑀭𑀺𑀬𑀁, 𑀢𑀣𑀸 𑀢𑀢𑁄 𑀊𑀦𑀧𑀭𑀺𑀲𑀸𑀬 𑀓𑀭𑁄𑀦𑁆𑀢𑀲𑁆𑀲. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀏𑀓𑀢𑁄, 𑀉𑀧𑀸𑀮𑀺, 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀻’’𑀢𑀺𑀆𑀤𑀺 (𑀘𑀽𑀴𑀯. 𑁩𑁫𑁧).

𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀲𑀗𑁆𑀖𑀪𑁂𑀤𑁄 𑀯𑀘𑀻𑀓𑀫𑁆𑀫𑀁, 𑀲𑁂𑀲𑀸𑀦𑀺 𑀓𑀸𑀬𑀓𑀫𑁆𑀫𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀔𑁄 𑀢𑀸𑀦𑀺 𑀓𑀸𑀬𑀤𑁆𑀯𑀸𑀭𑀢𑁄𑀧𑀺 𑀯𑀘𑀻𑀤𑁆𑀯𑀸𑀭𑀢𑁄𑀧𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀲𑀗𑁆𑀖𑀪𑁂𑀤𑁄𑀧𑀺 𑀳𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀤𑁆𑀯𑀸𑀭𑀢𑁄𑀧𑀺 𑀲𑀫𑀼𑀝𑁆𑀞𑀸𑀢𑀺, 𑀲𑀗𑁆𑀖𑀪𑁂𑀤𑁄 𑀘𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑁄. 𑀓𑀧𑁆𑀧𑀯𑀺𑀦𑀸𑀲𑁂 𑀏𑀯 𑀳𑀺 𑀲𑀗𑁆𑀖𑀪𑁂𑀤𑀢𑁄 𑀫𑀼𑀘𑁆𑀘𑀢𑀺, 𑀲𑁂𑀲𑀸𑀦𑀁 𑀧𑀦 𑀢𑀣𑀸 𑀦𑀺𑀬𑀫𑁄 𑀦𑀢𑁆𑀣𑀺. 𑀬𑁂𑀦 𑀘 𑀧𑀜𑁆𑀘𑀧𑁂𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀖𑀪𑁂𑀤𑁄𑀯 𑀦𑀺𑀭𑀬𑁂 𑀯𑀺𑀧𑀘𑁆𑀘𑀢𑀺, 𑀲𑁂𑀲𑀸𑀦𑀺 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀲𑀗𑁆𑀖𑀪𑁂𑀤𑀸𑀪𑀸𑀯𑁂 𑀮𑁄𑀳𑀺𑀢𑀼𑀧𑁆𑀧𑀸𑀤𑁄, 𑀢𑀤𑀪𑀸𑀯𑁂 𑀅𑀭𑀳𑀦𑁆𑀢𑀖𑀸𑀢𑁄 ¶ , 𑀢𑀤𑀪𑀸𑀯𑁂 𑀫𑀸𑀢𑀼𑀖𑀸𑀢𑁄, 𑀧𑀺𑀢𑀼𑀖𑀸𑀢𑁄 𑀯𑀸, 𑀢𑀲𑁆𑀫𑀺𑀫𑁆𑀧𑀺 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑁂. 𑀧𑀼𑀭𑀺𑀫𑀸𑀦𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀩𑁆𑀩𑁂𑀲𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀦𑀺, 𑀲𑀗𑁆𑀖𑀪𑁂𑀤𑁄 𑀧𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀯, 𑀅𑀲𑀸𑀥𑀸𑀭𑀡𑁄 𑀅𑀜𑁆𑀜𑁂𑀲𑀁, 𑀪𑀺𑀓𑁆𑀔𑀼𑀦𑀻𑀧𑀺 𑀳𑀺 𑀲𑀗𑁆𑀖𑀁 𑀦 𑀪𑀺𑀦𑁆𑀤𑀢𑀺, 𑀧𑀕𑁂𑀯 𑀇𑀢𑀭𑁂. 𑀧𑀜𑁆𑀘𑀧𑀺 𑀘𑁂𑀢𑀸𑀦𑀺 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀤𑁄𑀲𑀫𑀽𑀮𑀸𑀦𑀺 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑀏𑀢𑁆𑀣 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀝𑁆𑀞𑀫𑀪𑀯𑀸𑀕𑀳𑀡𑀁 𑀓𑁂𑀦 𑀦𑀺𑀬𑀸𑀫𑀺𑀢𑀦𑁆𑀢𑀺? 𑀯𑀺𑀧𑀲𑁆𑀲𑀦𑀸𑀬. 𑀬𑀲𑁆𑀲 𑀳𑀺 𑀲𑀸 ¶ 𑀢𑀺𑀓𑁆𑀔𑀸, 𑀲𑁄 𑀏𑀓𑀁 𑀏𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀫𑀦𑁆𑀤𑀸, 𑀲𑁄 𑀤𑀼𑀢𑀺𑀬𑁂…𑀧𑁂… 𑀙𑀝𑁆𑀞𑁂 𑀯𑀸 𑀪𑀯𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑁄𑀮𑀁𑀓𑁄𑀮𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀅𑀢𑀺𑀫𑀦𑁆𑀤𑀸, 𑀲𑁄 𑀲𑀢𑁆𑀢𑀫𑀁 𑀪𑀯𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀦𑀺𑀬𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺. 𑀲𑀘𑁂𑀧𑀺 𑀳𑀺𑀲𑁆𑀲 𑀲𑀢𑁆𑀢𑀫𑁂 𑀪𑀯𑁂 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀲𑁆𑀲 𑀫𑀢𑁆𑀣𑀓𑁂 𑀅𑀲𑀦𑀺 𑀯𑀸 𑀧𑀩𑁆𑀩𑀢𑀓𑀽𑀝𑁄 𑀯𑀸 𑀧𑀢𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀉𑀢𑁆𑀢𑀫𑀓𑁄𑀝𑀺𑀬𑀸 𑀳𑀺 𑀲𑀢𑁆𑀢𑀫𑀪𑀯𑀸𑀦𑀢𑀺𑀓𑁆𑀓𑀫𑀦𑀜𑁆𑀜𑁂𑀯 𑀲𑀦𑁆𑀥𑀸𑀬𑁂𑀯 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺 (𑀫. 𑀦𑀺. 𑁧.𑁬𑁬; 𑁨.𑁧𑁬𑁯; 𑀲𑀁. 𑀦𑀺. 𑁫.𑁯𑁯𑁮) 𑀯𑀼𑀢𑁆𑀢𑁄𑀢𑀺.

𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺𑀆𑀤𑀻𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑀁 𑀚𑀸𑀢𑀺𑀔𑁂𑀢𑁆𑀢𑀁 𑀏𑀓𑀸 𑀮𑁄𑀓𑀥𑀸𑀢𑀼 𑀦𑀸𑀫 𑀆𑀡𑀸𑀯𑀺𑀲𑀬𑀔𑁂𑀢𑁆𑀢𑁂𑀲𑀼 𑀩𑀼𑀤𑁆𑀥𑀼𑀧𑁆𑀧𑀢𑁆𑀢𑀺𑀲𑀗𑁆𑀓𑀸𑀬 𑀏𑀯𑀸𑀪𑀸𑀯𑀢𑁄. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀁 𑀅𑀓𑀢𑁆𑀯𑀸 𑀚𑀸𑀢𑀺𑀔𑁂𑀢𑁆𑀢𑁂 𑀏𑀯 𑀓𑀢𑁄. 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀼𑀤𑁆𑀥𑀢𑁆𑀢𑀳𑁂𑀢𑀽𑀦𑀁 𑀅𑀦𑀸𑀤𑀺𑀩𑀼𑀤𑁆𑀥𑀧𑀭𑀫𑁆𑀧𑀭𑀸𑀤𑀻𑀦𑀁 𑀢𑀣𑀸𑀪𑀸𑀯𑀸. 𑀢𑀢𑁄 𑀏𑀯 𑀳𑀺 𑀲𑀢𑁆𑀢𑀸 𑀦𑀺𑀭𑀯𑀲𑁂𑀲𑀢𑁄 𑀦𑀺𑀩𑁆𑀩𑀼𑀢𑀺𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀬𑀤𑀺 𑀳𑀺 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀲𑀩𑁆𑀩𑁂 𑀲𑀢𑁆𑀢𑀸 𑀇𑀢𑁄 𑀧𑀼𑀩𑁆𑀩𑁂 𑀦𑀺𑀭𑀯𑀲𑁂𑀲𑀢𑁄 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑁂𑀬𑁆𑀬𑀼𑀁, 𑀦 𑀘 𑀢𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀦𑀸𑀤𑀺𑀩𑀼𑀤𑁆𑀥𑀧𑀭𑀫𑁆𑀧𑀭𑀸𑀬 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀦𑀺𑀯𑀸𑀲𑀪𑀽𑀢𑁂 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘𑁂𑀢𑁆𑀣𑀸𑀧𑀺 𑀤𑀼𑀮𑁆𑀮𑀪𑀸, 𑀢𑁂𑀲𑀁 𑀤𑀼𑀮𑁆𑀮𑀪𑀢𑁆𑀢𑀸 𑀏𑀯𑁂𑀢𑁆𑀣 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀭𑀳𑀺𑀢𑀁 𑀳𑁄𑀢𑀺. 𑀬𑀤𑀺 𑀘 𑀢𑁂 𑀲𑀼𑀮𑀪𑀸 𑀪𑀯𑁂𑀬𑁆𑀬𑀼𑀁, 𑀏𑀓𑀲𑁆𑀫𑀺𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀘𑀢𑀼𑀲𑀝𑁆𑀞𑀺𑀩𑀼𑀤𑁆𑀥𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀅𑀦𑁆𑀢𑀭𑀓𑀧𑁆𑀧𑀲𑁆𑀲 𑀩𑀼𑀤𑁆𑀥𑀦𑁆𑀢𑀭𑀢𑁆𑀢𑀸. 𑀪𑀤𑁆𑀤𑀓𑀧𑁆𑀧𑁂𑀲𑀼 𑀘𑁂𑀢𑁆𑀣 𑀧𑀜𑁆𑀘 𑀩𑀼𑀤𑁆𑀥𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀣𑀁 𑀧𑀦𑁂𑀢𑁆𑀣𑀸𑀧𑀺 𑀤𑀼𑀮𑁆𑀮𑀪𑀢𑀭𑀸 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀩𑀼𑀤𑁆𑀥𑀸𑀦𑀜𑁆𑀘 𑀤𑀼𑀮𑁆𑀮𑀪𑀢𑀸 𑀓𑀸𑀭𑀡𑀤𑀼𑀮𑁆𑀮𑀪𑀢𑀸𑀬, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀜𑁆𑀜𑁂𑀯 ¶ 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀦 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁂𑀲𑀼, 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑁂𑀯 𑀲𑀩𑁆𑀩𑀲𑁄 𑀢𑀺𑀯𑀺𑀥𑀲𑀤𑁆𑀥𑀫𑁆𑀫𑀸𑀥𑀸𑀭𑀲𑁆𑀲 𑀲𑀗𑁆𑀖𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑀢𑁄, 𑀇𑀢𑀭𑀮𑁄𑀓𑁂𑀲𑀼 𑀦𑀺𑀭𑀯𑀲𑁂𑀲𑀢𑁄 𑀧𑀓𑀸𑀭𑀸𑀲𑀫𑁆𑀪𑀯𑀢𑁄 𑀘.

𑀬𑀤𑀺 ¶ 𑀳𑀺 𑀩𑀼𑀤𑁆𑀥𑀸 𑀤𑁂𑀯𑀮𑁄𑀓𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀫𑀦𑀼𑀲𑁆𑀲𑀸 𑀪𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀫𑁂𑀯 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀕𑁂𑀯 𑀥𑀫𑁆𑀫𑀲𑀯𑀦𑀧𑀩𑁆𑀩𑀚𑁆𑀚𑀸𑀤𑀺𑀁 𑀓𑀸𑀢𑀼𑀁, 𑀢𑁂𑀦𑁂𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀸𑀦𑀼𑀪𑀸𑀯𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑁆𑀧𑀦𑁆𑀦𑀅𑀫𑀦𑀼𑀲𑁆𑀲𑀲𑀗𑁆𑀓𑀸𑀓𑀼𑀢𑀽𑀳𑀮𑀁 𑀚𑀦𑀁 𑀦𑀺𑀚𑁆𑀛𑀸𑀧𑁂𑀢𑀼𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀤𑀺𑀦𑀺𑀬𑀸𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀤𑀸𑀭𑀧𑀭𑀺𑀕𑁆𑀕𑀳𑀸𑀤𑀺𑀁 𑀅𑀓𑀸𑀲𑀺, 𑀏𑀯𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑀫𑁆𑀧𑀺 𑀦𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀧𑀲𑁆𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀩𑀺𑀫𑁆𑀩𑀺𑀲𑀸𑀭𑁄 𑀦𑀸𑀦𑀧𑁆𑀧𑀓𑀸𑀭𑀢𑁄 𑀫𑀦𑀼𑀲𑁆𑀲𑀪𑀸𑀯𑀁 𑀯𑀺𑀘𑀺𑀦𑀺𑀢𑁆𑀯𑀸𑀯 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀺𑀲𑀳𑀺, 𑀦𑁄 𑀅𑀜𑁆𑀜𑀣𑀸. 𑀮𑁄𑀓𑀦𑀺𑀢𑁆𑀣𑀸𑀭𑀡𑀢𑁆𑀣𑀸𑀬 𑀳𑀺 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀸𑀤𑀺𑀅𑀢𑁆𑀣𑀸𑀬, 𑀢𑀲𑁆𑀫𑀸 𑀫𑀦𑀼𑀲𑁆𑀲𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀸𑀧𑀺 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀏𑀯, 𑀢𑀢𑁆𑀣𑀸𑀧𑀺 𑀇𑀫𑀲𑁆𑀫𑀺𑀁 𑀫𑀚𑁆𑀛𑀺𑀫𑀧𑀤𑁂𑀲𑁂 𑀏𑀯. 𑀦 𑀓𑁂𑀯𑀮𑀜𑁆𑀘 𑀩𑀼𑀤𑁆𑀥𑀸𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀸 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀬𑁄 𑀘 𑀅𑀜𑁆𑀜𑁂𑀧𑀺 𑀧𑀼𑀜𑁆𑀜𑀯𑀦𑁆𑀢𑀲𑀢𑁆𑀢𑀸 𑀏𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀼𑀭𑁂 𑀧𑀼𑀩𑁆𑀩𑀁 𑀦𑀸𑀫, 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀢𑁄 𑀧𑀘𑁆𑀙𑀸 𑀘𑀭𑀺𑀫𑀁 𑀦𑀸𑀫, 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦𑀸𑀫. 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸, 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑁂 𑀧𑀦 𑀚𑀸𑀢𑁂 𑀅𑀜𑁆𑀜𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀦 𑀦𑀺𑀯𑀸𑀭𑀺𑀢𑀸, 𑀅𑀦𑁆𑀢𑀭𑀓𑀧𑁆𑀧𑀁 𑀧𑀦 𑀔𑁂𑀧𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀜𑁆𑀘 𑀳𑀺 𑀅𑀦𑁆𑀢𑀭𑀥𑀸𑀦𑀸𑀦𑀺 𑀦𑀸𑀫 𑀅𑀥𑀺𑀕𑀫𑀅𑀦𑁆𑀢𑀭𑀥𑀸𑀦𑀁 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀮𑀺𑀗𑁆𑀕𑀅𑀦𑁆𑀢𑀭𑀥𑀸𑀦𑀁 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀥𑀺𑀕𑀫𑁄𑀢𑀺 𑀫𑀕𑁆𑀕𑀨𑀮𑀸𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀬𑁄, 𑀲𑁄 ¶ 𑀧𑀭𑀺𑀳𑀸𑀬𑀫𑀸𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀳𑀺 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀅𑀪𑀺𑀜𑁆𑀜𑀸, 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀸 𑀳𑁄𑀦𑁆𑀢𑀺, 𑀢𑀢𑁄 𑀅𑀦𑀸𑀕𑀸𑀫𑀺𑀦𑁄, 𑀢𑀢𑁄 𑀲𑀓𑀤𑀸𑀕𑀸𑀫𑀺𑀦𑁄, 𑀲𑁄𑀢𑀸𑀧𑀦𑁆𑀦𑀸 𑀘 𑀳𑁄𑀦𑁆𑀢𑀺, 𑀢𑁂𑀲𑀼 𑀥𑀭𑀦𑁆𑀢𑁂𑀲𑀼𑀧𑀺 𑀅𑀥𑀺𑀕𑀫𑁄 𑀅𑀦𑀦𑁆𑀢𑀭𑀳𑀺𑀢𑁄𑀯 𑀳𑁄𑀢𑀺, 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀲𑁄𑀢𑀸𑀧𑀦𑁆𑀦𑀲𑁆𑀲 𑀚𑀻𑀯𑀺𑀢𑀓𑁆𑀔𑀬𑁂𑀦 𑀅𑀥𑀺𑀕𑀫𑁄 𑀅𑀦𑁆𑀢𑀭𑀳𑀺𑀢𑁄 𑀦𑀸𑀫 𑀳𑁄𑀢𑀺. 𑀇𑀤𑀁 𑀅𑀥𑀺𑀕𑀫𑀅𑀦𑁆𑀢𑀭𑀥𑀸𑀦𑀁.

𑀢𑀢𑁄 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀦𑁄 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑁄’’𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀲𑀼 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀢𑁆𑀯𑀸 𑀓𑁄𑀲𑀚𑁆𑀚𑀩𑀳𑀼𑀮𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀢𑁆𑀢𑀁 𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀁 𑀦 𑀘𑁄𑀤𑁂𑀦𑁆𑀢𑀺, 𑀦 𑀲𑀸𑀭𑁂𑀦𑁆𑀢𑀺, 𑀅𑀓𑀼𑀓𑁆𑀓𑀼𑀘𑁆𑀘𑀓𑀸 𑀳𑁄𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀫𑀤𑁆𑀤𑀦𑁆𑀢𑀺, 𑀢𑀢𑁄 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀧𑀸𑀭𑀸𑀚𑀺𑀓𑀫𑀢𑁆𑀢𑀫𑁂𑀯 𑀭𑀓𑁆𑀔𑀦𑁆𑀢𑀺, 𑀢𑁂𑀲𑀼 𑀥𑀭𑀦𑁆𑀢𑁂𑀲𑀼𑀧𑀺 𑀧𑀝𑀺𑀧𑀢𑁆𑀢𑀺 ¶ 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺, 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀲𑀻𑀮𑀪𑁂𑀤𑁂𑀦 𑀯𑀸 𑀚𑀻𑀯𑀺𑀢𑀓𑁆𑀔𑀬𑁂𑀦 𑀯𑀸 𑀧𑀝𑀺𑀧𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀇𑀤𑀁 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀧𑀭𑀺𑀬𑀢𑁆𑀢𑀻𑀢𑀺 𑀲𑀸𑀝𑁆𑀞𑀓𑀣𑀁 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀅𑀥𑀫𑁆𑀫𑀺𑀓𑁂𑀳𑀺 𑀓𑀮𑀺𑀬𑀼𑀕𑀭𑀸𑀚𑀸𑀤𑀻𑀳𑀺 𑀯𑀺𑀧𑀦𑁆𑀦𑀲𑀲𑁆𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀢𑀸𑀬 𑀧𑀘𑁆𑀘𑀬𑀤𑀸𑀬𑀓𑀸 𑀤𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽 𑀘 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁄 𑀅𑀝𑁆𑀞𑀓𑀣𑀸 𑀧𑀭𑀺𑀳𑀸𑀬𑀢𑀺, 𑀧𑀸𑀴𑀺𑀯𑀲𑁂𑀦𑁂𑀯 𑀧𑀭𑀺𑀬𑀢𑁆𑀢𑀺𑀁 𑀥𑀸𑀭𑁂𑀦𑁆𑀢𑀺, 𑀢𑀢𑁄 𑀧𑀸𑀴𑀺𑀁 𑀲𑀓𑀮𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺, 𑀢𑀜𑁆𑀘𑀲𑁆𑀲 𑀧𑀭𑀺𑀳𑀸𑀬𑀦𑀁 𑀫𑀢𑁆𑀣𑀓𑀢𑁄 𑀧𑀞𑀸𑀬. 𑀧𑀞𑀫𑀫𑁂𑀯 𑀳𑀺 𑀫𑀳𑀸𑀧𑀓𑀭𑀡𑀁 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀬𑀫𑀓𑀁 𑀓𑀣𑀸𑀯𑀢𑁆𑀣𑀼 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀓𑀣𑀸 𑀯𑀺𑀪𑀗𑁆𑀕𑁄 𑀥𑀫𑁆𑀫𑀲𑀗𑁆𑀕𑀳𑁄 𑀘 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀢𑁄 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺, 𑀧𑀞𑀫𑀁 𑀳𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 ¶ 𑀏𑀓𑀸𑀤𑀲𑀓𑀦𑀺𑀧𑀸𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀏𑀓𑀓𑀦𑀺𑀧𑀸𑀢𑀸 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀧𑀞𑀫𑀁 𑀳𑀺 𑀫𑀳𑀸𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀲𑀴𑀸𑀬𑀢𑀦𑀯𑀕𑁆𑀕𑁄 𑀔𑀦𑁆𑀥𑀓𑀯𑀕𑁆𑀕𑁄 𑀦𑀺𑀤𑀸𑀦𑀯𑀕𑁆𑀕𑁄 𑀲𑀕𑀸𑀣𑀸𑀯𑀕𑁆𑀕𑁄𑀢𑀺, 𑀏𑀯𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑀤𑀻𑀖𑀦𑀺𑀓𑀸𑀬𑀸𑀤𑀬𑁄 𑀘 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀢𑁄 𑀯𑀺𑀦𑀬𑀧𑀺𑀝𑀓𑀫𑁂𑀯 𑀢𑀺𑀝𑁆𑀞𑀢𑀺, 𑀢𑀫𑁆𑀧𑀺 𑀧𑀭𑀺𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀯𑀺𑀪𑀗𑁆𑀕𑀸 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀢𑁄 𑀫𑀸𑀢𑀺𑀓𑀸𑀫𑀢𑁆𑀢𑀫𑁂𑀯 𑀥𑀸𑀭𑁂𑀦𑁆𑀢𑀺, 𑀢𑀤𑀸𑀧𑀺 𑀬𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀧𑀺 𑀕𑀸𑀣𑀸 𑀫𑀦𑀼𑀲𑁆𑀲𑁂𑀲𑀼 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺, 𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀧𑀭𑀺𑀬𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀇𑀤𑀁 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀸𑀤𑀺𑀆𑀓𑀧𑁆𑀧𑀁 𑀦 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺, 𑀦𑀺𑀕𑀡𑁆𑀞𑀸𑀤𑀬𑁄 𑀯𑀺𑀬 𑀅𑀮𑀸𑀩𑀼𑀧𑀢𑁆𑀢𑀸𑀤𑀺𑀁 𑀅𑀕𑁆𑀕𑀩𑀸𑀳𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀑𑀮𑀫𑁆𑀩𑀺𑀢𑁆𑀯𑀸𑀧𑀺 𑀲𑀺𑀓𑁆𑀓𑀸𑀬 𑀑𑀮𑀕𑁆𑀕𑁂𑀢𑁆𑀯𑀸𑀧𑀺 𑀯𑀺𑀘𑀭𑀦𑁆𑀢𑀺, 𑀘𑀻𑀯𑀭𑀭𑀚𑀦𑀫𑁆𑀧𑀺 𑀦 𑀲𑀸𑀭𑀼𑀧𑁆𑀧𑀁, 𑀑𑀝𑁆𑀞𑀝𑁆𑀞𑀺𑀓𑀯𑀡𑁆𑀡𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑀺, 𑀢𑀢𑁄 𑀭𑀚𑀦𑀫𑁆𑀧𑀺 𑀑𑀯𑀝𑁆𑀝𑀺𑀓𑀯𑀺𑀚𑁆𑀛𑀦𑀫𑁆𑀧𑀺 𑀦 𑀳𑁄𑀢𑀺, 𑀤𑀲𑀸 𑀙𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸 𑀯𑀺𑀬 𑀓𑀸𑀲𑀸𑀯𑀫𑀢𑁆𑀢𑀫𑁂𑀯 𑀥𑀸𑀭𑁂𑀦𑁆𑀢𑀺, 𑀢𑀢𑁄 𑀧𑀭𑀺𑀓𑁆𑀔𑀻𑀡𑁂 𑀓𑀸𑀮𑁂 𑀔𑀼𑀤𑁆𑀤𑀓𑀓𑀸𑀲𑀸𑀯𑀔𑀡𑁆𑀟𑀁 𑀳𑀢𑁆𑀣𑁂 𑀯𑀸 𑀕𑀻𑀯𑀸𑀬 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀤𑀸𑀭𑀪𑀭𑀡𑀸𑀤𑀺𑀁 𑀓𑀭𑁄𑀦𑁆𑀢𑀺, 𑀢𑀤𑀸 𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁄 𑀚𑀦𑁄 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀢𑁂𑀲𑀁 𑀤𑁂𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸, 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀢𑀤𑀸𑀧𑀳𑀁, 𑀆𑀦𑀦𑁆𑀤, 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁩𑁮𑁦). 𑀢𑀢𑁄 ‘‘𑀧𑀧𑀜𑁆𑀘𑁄 𑀏𑀲, 𑀓𑀺𑀁 𑀇𑀫𑀺𑀦𑀸 𑀅𑀫𑁆𑀳𑀸𑀓’’𑀦𑁆𑀢𑀺 ¶ 𑀢𑀁 𑀓𑀸𑀲𑀸𑀯𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀦𑁆𑀢𑀺, 𑀏𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀮𑀺𑀗𑁆𑀕𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀇𑀤𑀁 𑀮𑀺𑀗𑁆𑀕𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀢𑀢𑁄 𑀢𑀢𑁆𑀣 𑀢𑀢𑁆𑀣 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀮𑀪𑀫𑀸𑀦𑀸 𑀥𑀸𑀢𑀼𑀬𑁄 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀮𑀩𑁆𑀪𑀫𑀸𑀦𑀓𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀲𑀩𑁆𑀩𑀢𑁆𑀣 𑀅𑀮𑀪𑀫𑀸𑀦𑀸 𑀲𑀩𑁆𑀩𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀫𑀡𑁆𑀟𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺. 𑀲𑀸𑀲𑀧𑀫𑀢𑁆𑀢𑀸𑀧𑀺 𑀳𑀺 𑀥𑀸𑀢𑀼 𑀦 𑀅𑀦𑁆𑀢𑀭𑀸 𑀦𑀲𑁆𑀲𑀺𑀲𑁆𑀲𑀢𑀺, 𑀢𑀸 𑀧𑀦 𑀩𑁄𑀥𑀺𑀫𑀡𑁆𑀟𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀩𑀼𑀤𑁆𑀥𑀲𑀭𑀻𑀭𑀲𑀺𑀭𑀺𑀁, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀢𑀢𑁄 𑀥𑀸𑀢𑀼𑀲𑀭𑀻𑀭𑀢𑁄 𑀢𑁂𑀚𑁄 𑀲𑀫𑀼𑀝𑁆𑀞𑀸𑀬 𑀢𑀁 𑀲𑀭𑀻𑀭𑀁 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑁂𑀢𑀺, 𑀢𑀤𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀯𑀺𑀬 𑀧𑀭𑀺𑀤𑁂𑀯𑀺𑀢𑁆𑀯𑀸 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀇𑀤𑀁 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀇𑀫𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀅𑀦𑁆𑀢𑀭𑀥𑀸𑀦𑀲𑁆𑀲 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀫𑁂𑀯 𑀫𑀽𑀮𑀁. 𑀧𑀭𑀺𑀬𑀢𑁆𑀢𑀺𑀬𑀁 𑀳𑀺 𑀲𑀢𑀺 𑀧𑀝𑀺𑀯𑁂𑀥𑀸𑀤𑀬𑁄𑀧𑀺 𑀦𑀝𑁆𑀞𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀅𑀲𑀢𑀺 𑀦𑀝𑁆𑀞𑀸𑀢𑀺. 𑀬𑀣𑀸 𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀚𑀸𑀦𑀦𑀢𑁆𑀣𑀸𑀬 𑀧𑀸𑀲𑀸𑀡𑀧𑀺𑀝𑁆𑀞𑁂 𑀉𑀧𑀦𑀺𑀩𑀤𑁆𑀥𑀅𑀓𑁆𑀔𑀭𑁂𑀲𑀼 𑀥𑀭𑀦𑁆𑀢𑁂𑀲𑀼 𑀦𑀺𑀥𑀺𑀓𑀼𑀫𑁆𑀪𑀺 𑀦𑀝𑁆𑀞𑀸 𑀦𑀸𑀫 𑀦 𑀳𑁄𑀢𑀺, 𑀅𑀓𑁆𑀔𑀭𑁂𑀲𑀼 𑀧𑀦 𑀦𑀝𑁆𑀞𑁂𑀲𑀼 𑀦𑀝𑁆𑀞𑀸, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋

‘‘𑀬𑀸𑀯 𑀢𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀸,

𑀯𑀺𑀦𑀬𑁄 𑀬𑀸𑀯 𑀤𑀺𑀧𑁆𑀧𑀢𑀺;

𑀢𑀸𑀯 𑀤𑀓𑁆𑀔𑀦𑁆𑀢𑀺 𑀆𑀮𑁄𑀓𑀁,

𑀲𑀽𑀭𑀺𑀬𑁂 𑀅𑀩𑁆𑀪𑀼𑀝𑁆𑀞𑀺𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀲𑀦𑁆𑀢𑁂𑀲𑀼,

𑀧𑀫𑀼𑀝𑁆𑀞𑁂 𑀯𑀺𑀦𑀬𑀫𑁆𑀳𑀺 𑀘;

𑀢𑀫𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂,

𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂 ¶ 𑀭𑀓𑁆𑀔𑀺𑀢𑁂 𑀲𑀦𑁆𑀢𑁂,

𑀧𑀝𑀺𑀧𑀢𑁆𑀢𑀺 𑀳𑁄𑀢𑀺 𑀭𑀓𑁆𑀔𑀺𑀢𑀸;

𑀧𑀝𑀺𑀧𑀢𑁆𑀢𑀺𑀬𑀁 ¶ 𑀞𑀺𑀢𑁄 𑀥𑀻𑀭𑁄,

𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺; (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦; 𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁩𑁮);

𑀏𑀯𑀫𑀺𑀫𑁂𑀲𑀼 𑀧𑀜𑁆𑀘𑀲𑀼 𑀅𑀦𑁆𑀢𑀭𑀥𑀸𑀦𑁂𑀲𑀼 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀢𑁄 𑀧𑀘𑁆𑀙𑀸 𑀘𑀭𑀺𑀫𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀦𑀺𑀭𑀢𑁆𑀣𑀓𑀢𑁄𑀯. 𑀏𑀓𑁄𑀯 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀦𑁆𑀢𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀬𑀤𑀺 𑀉𑀧𑀦𑀺𑀲𑁆𑀲𑀬𑁄 𑀪𑀯𑁂𑀬𑁆𑀬, 𑀏𑀓𑀓𑁆𑀔𑀡𑁂 𑀲𑀧𑀸𑀝𑀺𑀳𑀸𑀭𑀺𑀬𑀁 𑀲𑀩𑁆𑀩𑀸𑀦𑀼𑀓𑀽𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑁂 𑀯𑀺𑀦𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀦𑀸𑀦𑀓𑁆𑀔𑀡𑁂𑀲𑀼, 𑀢𑀲𑁆𑀫𑀸 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀦𑁂𑀓𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺 𑀦𑀺𑀭𑀢𑁆𑀣𑀺𑀓𑀸𑀯. 𑀅𑀦𑀢𑁆𑀣𑀓𑀢𑀸 𑀧𑀦 𑀅𑀦𑀘𑁆𑀙𑀭𑀺𑀬𑀅𑀕𑀸𑀭𑀯𑀯𑀺𑀯𑀸𑀤𑀸𑀤𑀺𑀤𑁄𑀲𑀢𑁄 𑀘𑁂𑀯 𑀫𑀳𑀸𑀧𑀣𑀯𑀺𑀬𑀸 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀥𑀸𑀭𑀡𑁂 𑀅𑀲𑀫𑀢𑁆𑀣𑀢𑀸𑀬 𑀯𑀺𑀓𑀺𑀭𑀡𑀸𑀤𑀺𑀤𑁄𑀲𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀦 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑁄𑀯 𑀉𑀧𑁆𑀧𑀚𑁆𑀚𑀢𑀺. 𑀦𑀸𑀦𑀸𑀘𑀓𑁆𑀓𑀯𑀸𑀴𑁂𑀲𑀼 𑀧𑀦 𑀩𑀳𑀽𑀧𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀳𑀺 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀏𑀢𑀲𑁆𑀲 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀜𑁆𑀘𑁂𑀢𑁆𑀣 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀅𑀦𑁆𑀢𑀭𑀥𑀸𑀦𑀸𑀦𑀁 𑀯𑁂𑀫𑀚𑁆𑀛𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁆𑀢𑀭𑀥𑀸𑀦𑀜𑁆𑀘𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑀓𑀺𑀭𑀺𑀬𑀢𑁄, 𑀧𑀩𑁆𑀩𑀚𑁆𑀚𑀸𑀢𑁄 𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑁄𑀢𑀺, 𑀢𑀲𑁆𑀲 𑀘 𑀆𑀦𑀼𑀪𑀸𑀯𑁂𑀦 𑀤𑁆𑀯𑀺𑀦𑁆𑀦𑀁 𑀏𑀓𑀢𑁆𑀣 𑀲𑀳𑀅𑀦𑀼𑀧𑁆𑀧𑀢𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀞𑀸𑀦𑀸𑀞𑀸𑀦𑀜𑀸𑀡𑀩𑀮𑀁 𑀧𑀞𑀫𑀁.

𑀤𑀼𑀢𑀺𑀬𑁂 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁, 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀲𑀗𑁆𑀔𑀸𑀢𑀓𑀸𑀭𑀡𑀢𑁄 𑀘 ¶ . 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑀸, 𑀓𑀫𑁆𑀫𑀁 𑀳𑁂𑀢𑀼. 𑀢𑀤𑀼𑀪𑀬𑀢𑁄 𑀓𑀫𑁆𑀫𑀯𑀺𑀧𑀸𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀓𑀣𑀁? 𑀪𑀕𑀯𑀸 𑀳𑀺 ‘‘𑀏𑀓𑀘𑁆𑀘𑀲𑁆𑀲 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀩𑀳𑀽𑀦𑀺 𑀓𑀮𑁆𑀬𑀸𑀡𑀓𑀫𑁆𑀫𑀸𑀦𑀺 𑀢𑁂𑀲𑀁 𑀯𑀺𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺 𑀧𑀚𑀸𑀦𑀸𑀢𑀺.

𑀢𑀢𑁆𑀣 𑀕𑀢𑀺𑀯𑀺𑀧𑀢𑁆𑀢𑀻𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸. 𑀕𑀢𑀺𑀲𑀫𑁆𑀧𑀢𑁆𑀢𑀻𑀢𑀺 𑀫𑀦𑀼𑀲𑁆𑀲𑀤𑁂𑀯𑀕𑀢𑀺𑀬𑁄. 𑀉𑀧𑀥𑀻𑀢𑀺 𑀅𑀢𑁆𑀢𑀪𑀸𑀯𑁄 ¶ . 𑀢𑀲𑁆𑀲 𑀲𑀫𑀺𑀤𑁆𑀥𑀺 𑀲𑀫𑁆𑀧𑀢𑁆𑀢𑀺 𑀦𑀸𑀫, 𑀅𑀲𑀫𑀺𑀤𑁆𑀥𑀺 𑀯𑀺𑀧𑀢𑁆𑀢𑀺 𑀦𑀸𑀫. 𑀓𑀸𑀮𑀲𑀫𑁆𑀧𑀢𑁆𑀢𑀻𑀢𑀺 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑁆𑀧𑀦𑁆𑀦𑀓𑀸𑀮𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀓𑀸𑀮𑀯𑀺𑀧𑀢𑁆𑀢𑀺 𑀦𑀸𑀫. 𑀢𑀲𑁆𑀲 𑀢𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀲𑀫𑁆𑀫𑀸𑀧𑀬𑁄𑀕𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺, 𑀫𑀺𑀘𑁆𑀙𑀸𑀧𑀬𑁄𑀕𑁄 𑀧𑀬𑁄𑀕𑀯𑀺𑀧𑀢𑁆𑀢𑀺 𑀦𑀸𑀫. 𑀢𑀢𑁆𑀣 𑀳𑀺 𑀏𑀓𑀘𑁆𑀘𑀲𑁆𑀲 𑀓𑀼𑀲𑀮𑀓𑀫𑁆𑀫𑁂𑀦 𑀤𑁂𑀯𑀕𑀢𑀺𑀆𑀤𑀻𑀲𑀼 𑀕𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀓𑀼𑀲𑀮𑀸𑀦𑀺 𑀏𑀯 𑀯𑀺𑀧𑀘𑁆𑀘𑀦𑁆𑀢𑀺. 𑀢𑀸𑀬 𑀧𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀅𑀓𑀼𑀲𑀮𑀸𑀦𑀺 𑀢𑀢𑁆𑀣 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀸𑀦𑀺 𑀧𑀼𑀦 𑀦𑀺𑀭𑀬𑀸𑀤𑀻𑀲𑀼 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀁 𑀕𑀢𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀬𑀣𑀸𑀲𑀼𑀔𑀁 𑀯𑀺𑀧𑀘𑁆𑀘𑀦𑁆𑀢𑀺. 𑀢𑀸𑀬 𑀧𑀦 𑀕𑀢𑀺𑀯𑀺𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀓𑀼𑀲𑀮𑀸𑀦𑀺 𑀢𑀢𑁆𑀣 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀤𑀲𑁆𑀲𑀦𑀻𑀬𑁂𑀦𑀸𑀪𑀺𑀭𑀽𑀧𑁂𑀦 𑀓𑀸𑀬𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀬𑀤𑀺𑀧𑀺 𑀲𑁄 𑀤𑀸𑀲𑁄 𑀯𑀸 𑀳𑁄𑀢𑀺 𑀳𑀻𑀦𑀚𑀘𑁆𑀘𑁄 𑀯𑀸, 𑀢𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀓𑀼𑀲𑀮𑀸𑀦𑀺 𑀏𑀯𑀲𑁆𑀲 𑀯𑀺𑀧𑀘𑁆𑀘𑀦𑁆𑀢𑀺. 𑀢𑀸𑀤𑀺𑀲𑀁 𑀳𑀺 𑀲𑀼𑀭𑀽𑀧𑀁 ‘‘𑀅𑀬𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀲𑁆𑀲 𑀦𑀸𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀉𑀘𑁆𑀘𑁂𑀲𑀼 𑀅𑀫𑀘𑁆𑀘𑀸𑀤𑀺𑀝𑁆𑀞𑀸𑀦𑁂𑀲𑀼 𑀞𑀧𑁂𑀦𑁆𑀢𑀺, 𑀘𑀡𑁆𑀟𑀸𑀮𑀺𑀫𑁆𑀧𑀺 𑀲𑀼𑀭𑀽𑀧𑀁 𑀅𑀕𑁆𑀕𑀫𑀳𑁂𑀲𑀺𑀆𑀤𑀺𑀝𑁆𑀞𑀸𑀦𑁂𑀲𑀼 𑀞𑀧𑁂𑀦𑁆𑀢𑀺. 𑀢𑀸𑀬 𑀧𑀦 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀅𑀓𑀼𑀲𑀮𑀸𑀦𑀲𑁆𑀲 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀸𑀦𑀺 𑀧𑀦 𑀉𑀧𑀥𑀺𑀯𑀺𑀧𑀢𑁆𑀢𑀺𑀬𑀁 𑀘 𑀞𑀺𑀢𑀲𑁆𑀲 𑀬𑀣𑀸𑀲𑀼𑀔𑀁 𑀯𑀺𑀧𑀘𑁆𑀘𑀦𑁆𑀢𑀺. 𑀭𑀸𑀚𑀓𑀼𑀮𑀸𑀤𑀻𑀲𑀼 𑀳𑀺 𑀉𑀧𑁆𑀧𑀦𑁆𑀦𑀫𑁆𑀧𑀺 𑀤𑀼𑀭𑀽𑀧𑀁 𑀳𑀻𑀦𑁂𑀲𑀼 𑀞𑀧𑁂𑀦𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀧𑀦 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀯𑀸 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀸𑀦𑀁 ¶ 𑀲𑀫𑁆𑀧𑀦𑁆𑀦𑁂 𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀁 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀓𑀼𑀲𑀮𑀸𑀦𑀺 𑀏𑀯 𑀯𑀺𑀧𑀘𑁆𑀘𑀦𑁆𑀢𑀺, 𑀦 𑀅𑀓𑀼𑀲𑀮𑀸𑀦𑀺. 𑀢𑀸𑀦𑀺 𑀧𑀼𑀦 𑀤𑀼𑀭𑀸𑀚𑀤𑀼𑀫𑀦𑀼𑀲𑁆𑀲𑀸𑀦𑀁 𑀯𑀺𑀧𑀦𑁆𑀦𑁂 𑀓𑀸𑀮𑁂 𑀢𑀁 𑀓𑀸𑀮𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺, 𑀦 𑀧𑀦 𑀓𑀼𑀲𑀮𑀸𑀦𑀺 𑀢𑀸𑀬 𑀓𑀸𑀮𑀯𑀺𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀢𑁆𑀢𑀸. 𑀏𑀓𑀘𑁆𑀘𑀲𑁆𑀲 𑀧𑀦 𑀲𑀻𑀮𑀲𑀁𑀬𑀫𑀸𑀤𑀺𑀅𑀦𑀯𑀚𑁆𑀚𑀧𑀬𑁄𑀕𑁂𑀦 𑀘𑁂𑀯 𑀲𑀸𑀯𑀚𑁆𑀚𑁂𑀦 𑀯𑀸 𑀅𑀦𑀯𑀚𑁆𑀚𑁂𑀦 𑀯𑀸 𑀤𑁂𑀲𑀓𑀸𑀮𑀸𑀦𑀼𑀲𑀸𑀭𑁂𑀦 𑀆𑀬𑀼𑀥𑀲𑀺𑀧𑁆𑀧𑀸𑀤𑀺𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲 𑀢𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀓𑀼𑀲𑀮𑀸𑀦𑀺 𑀏𑀯 𑀯𑀺𑀧𑀘𑁆𑀘𑀦𑁆𑀢𑀺, 𑀦 𑀅𑀓𑀼𑀲𑀮𑀸𑀦𑀺. 𑀢𑀸𑀦𑀺 𑀧𑀼𑀦 𑀬𑀣𑀸𑀯𑀼𑀢𑁆𑀢𑀯𑀺𑀧𑀭𑀻𑀢𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺, 𑀦 𑀧𑀦 𑀓𑀼𑀲𑀮𑀸𑀦𑀺 𑀢𑀸𑀬 𑀧𑀝𑀺𑀩𑀸𑀳𑀺𑀢𑀢𑁆𑀢𑀸. 𑀬𑀼𑀤𑁆𑀥𑀸𑀤𑀻𑀲𑀼 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀸𑀧𑀺 𑀢𑀁𑀢𑀁𑀆𑀬𑀼𑀥𑀲𑀺𑀧𑁆𑀧𑀸𑀤𑀺𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑁂𑀯 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀺𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀺, 𑀦 𑀧𑀦 𑀢𑀁 𑀅𑀓𑀼𑀲𑀮𑀁 𑀦𑀺𑀲𑁆𑀲𑀸𑀬. 𑀬𑀣𑀸 𑀤𑀸𑀦𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀲𑀼 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸𑀧𑀺 𑀅𑀥𑀺𑀫𑀢𑁆𑀢𑀯𑀸𑀬𑀸𑀫𑀸𑀤𑀺𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀦𑀬𑀩𑁆𑀬𑀲𑀦𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀦 𑀧𑀦 𑀢𑀁 𑀓𑀼𑀲𑀮𑀁 𑀦𑀺𑀲𑁆𑀲𑀸𑀬. 𑀏𑀯𑀫𑁂𑀢𑀸𑀳𑀺 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀻𑀳𑀺, 𑀯𑀺𑀧𑀢𑁆𑀢𑀻𑀳𑀺 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀺𑀧𑀘𑁆𑀘𑀦𑀸𑀯𑀺𑀧𑀘𑁆𑀘𑀦𑀯𑀺𑀪𑀸𑀕𑀁 𑀪𑀕𑀯𑀸 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁂𑀦 𑀤𑀼𑀢𑀺𑀬𑀩𑀮𑀲𑁆𑀲 𑀯𑀺𑀪𑀸𑀯𑀦𑀸.

𑀅𑀧𑀭𑁂𑀦 𑀘𑀲𑁆𑀲 𑁋

‘‘𑀅𑀳𑁄𑀲𑀺 ¶ 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄 ¶ , 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑁋

𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑁂𑀦𑀸𑀧𑀺 𑀦𑀬𑁂𑀦 𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀅𑀢𑀻𑀢𑀢𑁆𑀢𑀪𑀸𑀯𑁂 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁 𑀯𑀼𑀢𑁆𑀢𑀁, 𑀳𑁂𑀢𑀼𑀧𑀘𑁆𑀘𑀬𑀁 𑀆𑀕𑀫𑁆𑀫 𑀢𑀢𑁆𑀣𑁂𑀯 𑀯𑀺𑀧𑀸𑀓𑀁 𑀅𑀤𑀸𑀲𑀺. 𑀇𑀤𑀁 𑀲𑀦𑁆𑀥𑀸𑀬 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀧𑀞𑀫𑀁 𑀧𑀤𑀁 𑀯𑀼𑀢𑁆𑀢𑀁. 𑀬𑀁 𑀅𑀢𑀻𑀢𑁂𑀲𑀼 𑀧𑀦 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀲𑀼 𑀩𑀳𑀽𑀲𑀼 𑀏𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀮𑀤𑁆𑀥𑀧𑀘𑁆𑀘𑀬𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀏𑀓𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀧𑀦 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀏𑀓𑀁 𑀆𑀦𑀦𑁆𑀢𑀭𑀺𑀬𑀁 𑀦𑀺𑀭𑀬𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀺. 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑀸𑀬 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁂𑀲𑀸 𑀅𑀯𑀺𑀧𑀸𑀓𑀸. 𑀇𑀤𑀁 𑀲𑀦𑁆𑀥𑀸𑀬 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀤𑀼𑀢𑀺𑀬𑀁 𑀧𑀤𑀁 𑀯𑀼𑀢𑁆𑀢𑀁. 𑀬𑀁 𑀅𑀢𑀻𑀢𑀁 𑀓𑀫𑁆𑀫𑀁 𑀏𑀢𑀭𑀳𑀺 𑀯𑀺𑀧𑀸𑀓𑀁 𑀤𑁂𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀢𑀢𑀺𑀬𑀁. 𑀬𑀁 𑀧𑀼𑀭𑀺𑀫𑀦𑀬𑁂𑀦 𑀦 𑀯𑀺𑀧𑀘𑁆𑀘𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀘𑀢𑀼𑀢𑁆𑀣𑀁. 𑀬𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀧𑀜𑁆𑀘𑀫𑀁. 𑀬𑀁 𑀦 𑀯𑀺𑀧𑀘𑁆𑀘𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀙𑀝𑁆𑀞𑀁. 𑀬𑀁 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀓𑀫𑁆𑀫𑀁 𑀏𑀢𑀭𑀳𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀲𑀢𑁆𑀢𑀫𑀁. 𑀬𑀁 𑀦 𑀯𑀺𑀧𑀘𑁆𑀘𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀅𑀝𑁆𑀞𑀫𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀸𑀦𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀸𑀦𑀁 𑀬𑀣𑀸𑀪𑀽𑀢𑀢𑁄 𑀚𑀸𑀦𑀦𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀩𑀮𑀁.

𑀢𑀢𑀺𑀬𑁂 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀜𑁆𑀘 𑀅𑀕𑀢𑀺𑀕𑀸𑀫𑀺𑀦𑀺𑀜𑁆𑀘. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀏𑀓𑀫𑁂𑀯 𑀅𑀓𑀼𑀲𑀮𑀁 𑀏𑀓𑀢𑁄 𑀓𑀭𑁄𑀦𑁆𑀢𑁂𑀲𑀼 𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻, 𑀇𑀫𑀲𑁆𑀲 𑀧𑁂𑀢𑁆𑀢𑀺𑀯𑀺𑀲𑀬𑀕𑀸𑀫𑀺𑀦𑀻, 𑀦𑀺𑀭𑀬𑀸𑀤𑀻𑀲𑀼𑀧𑀺 𑀧𑀦𑁂𑀲𑀸 𑀏𑀯𑀭𑀽𑀧𑁂 𑀏𑀯𑀭𑀽𑀧𑁂 𑀞𑀸𑀦𑁂 𑀏𑀯𑀜𑁆𑀘𑁂𑀯𑀜𑁆𑀘 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺, 𑀇𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 ¶ 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑀼𑀩𑁆𑀩𑀮𑀁 𑀉𑀧𑀥𑀺𑀯𑁂𑀧𑀓𑁆𑀓𑀁 𑀪𑀯𑀺𑀲𑁆𑀲𑀢𑀺. 𑀩𑀳𑀽𑀲𑀼 𑀯𑀸 𑀏𑀓𑀢𑁄 𑀤𑀸𑀦𑀸𑀤𑀺𑀓𑀼𑀲𑀮𑀁, 𑀯𑀺𑀧𑀲𑁆𑀲𑀦𑀁 𑀯𑀸 𑀧𑀝𑁆𑀞𑀧𑁂𑀦𑁆𑀢𑁂𑀲𑀼 𑀇𑀫𑀲𑁆𑀲 ¶ 𑀘𑁂𑀢𑀦𑀸 𑀫𑀦𑀼𑀲𑁆𑀲𑀕𑀢𑀺𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀤𑁂𑀯𑀕𑀢𑀺𑀕𑀸𑀫𑀺𑀦𑀻, 𑀢𑀢𑁆𑀣𑀸𑀧𑀺 𑀏𑀯𑀜𑁆𑀘𑁂𑀯𑀜𑁆𑀘 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺, 𑀇𑀫𑀲𑁆𑀲 𑀯𑀸 𑀯𑀺𑀧𑀲𑁆𑀲𑀦𑀸 𑀏𑀓𑀁 𑀫𑀕𑁆𑀕𑀁 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀲𑀳𑀺𑀢𑁂 𑀯𑀸 𑀭𑀳𑀺𑀢𑁂 𑀯𑀸 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺, 𑀇𑀫𑀲𑁆𑀲 𑀦 𑀓𑀜𑁆𑀘𑀺 𑀧𑀝𑀺𑀯𑁂𑀥𑀁 𑀲𑀸𑀥𑁂𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀅𑀯𑀺𑀧𑀭𑀻𑀢𑀢𑁄 𑀧𑀚𑀸𑀦𑀸𑀢𑀻𑀢𑀺. 𑀢𑀢𑀺𑀬𑀩𑀮𑀁.

𑀘𑀢𑀼𑀢𑁆𑀣𑁂 𑀅𑀦𑁂𑀓𑀥𑀸𑀢𑀼𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺, 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀼𑀦𑁆𑀢𑀺 𑀢𑀸𑀲𑀜𑁆𑀜𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀁 𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀸𑀲𑀁 𑀢𑀸𑀲𑀁 𑀥𑀸𑀢𑀽𑀦𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀦𑀦𑁆𑀢𑀧𑁆𑀧𑀪𑁂𑀤𑀁 𑀦𑀸𑀦𑀢𑁆𑀢𑀁 𑀅𑀯𑀺𑀧𑀭𑀻𑀢𑀢𑁄 𑀧𑀚𑀸𑀦𑀸𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀣𑀸𑀕𑀢𑁄 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑁂𑀯 𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺, 𑀅𑀣 𑀔𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀸𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀺𑀬𑁂𑀯. 𑀢𑁂𑀳𑀺 𑀉𑀧𑀸𑀤𑀺𑀦𑁆𑀦𑀓𑀮𑁄𑀓𑀲𑁆𑀲𑀸𑀧𑀺 𑀦𑀸𑀦𑀢𑁆𑀢𑀁 𑀏𑀓𑀤𑁂𑀲𑀢𑁄𑀯 𑀚𑀸𑀦𑀦𑁆𑀢𑀺, 𑀅𑀦𑀼𑀧𑀸𑀤𑀺𑀦𑁆𑀦𑀲𑁆𑀲 𑀧𑀦 𑀦𑁂𑀯 𑀚𑀸𑀦𑀦𑁆𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑁂𑀯𑁂𑀢𑀁 𑀯𑀺𑀲𑀬𑁄. 𑀏𑀯𑀁 𑀳𑀺 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑁂𑀲𑀁 𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀤𑀻𑀦𑀁, 𑀔𑀦𑁆𑀥𑀤𑀡𑁆𑀟𑀯𑀮𑁆𑀮𑀺𑀢𑀘𑀧𑀢𑁆𑀢𑀧𑀼𑀧𑁆𑀨𑀨𑀮𑀸𑀤𑀺𑀦𑁄 𑀲𑀡𑁆𑀞𑀸𑀦𑀯𑀡𑁆𑀡𑀕𑀦𑁆𑀥𑀭𑀲𑀑𑀚𑀸𑀳𑀺, 𑀤𑁂𑀲𑀓𑀸𑀮𑁂𑀳𑀺 𑀘 𑀅𑀦𑀦𑁆𑀢𑀧𑁆𑀧𑀪𑁂𑀤𑀁 𑀦𑀸𑀦𑀢𑁆𑀢𑀁, 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀦𑀜𑁆𑀘 𑀦𑀸𑀦𑀢𑁆𑀢𑀁 𑀳𑁄𑀢𑀻𑀢𑀺 𑀅𑀦𑀦𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦𑀸𑀜𑁆𑀜𑁂𑀢𑀺. 𑀘𑀢𑀼𑀢𑁆𑀣𑀩𑀮𑀁.

𑀧𑀜𑁆𑀘𑀫𑁂 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀲𑁂𑀯𑀦𑁆𑀢𑀺, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀘 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂. 𑀢𑀢𑁆𑀣𑀸𑀧𑀺 𑀅𑀲𑁆𑀲𑀤𑁆𑀥𑀸 𑀅𑀲𑁆𑀲𑀤𑁆𑀥𑁂, 𑀤𑀼𑀲𑁆𑀲𑀻𑀮𑀸 ¶ 𑀤𑀼𑀲𑁆𑀲𑀻𑀮𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂, 𑀲𑀤𑁆𑀥𑀸 𑀲𑀤𑁆𑀥𑁂, 𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀤𑀺𑀲𑀫𑁆𑀧𑀦𑁆𑀦𑀸 𑀘 𑀢𑁂 𑀢𑁂 𑀏𑀯 𑀲𑁂𑀯𑀦𑁆𑀢𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀸𑀢𑀺. 𑀲𑀤𑁆𑀥𑀸𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑀸 𑀳𑀺 𑀢𑀩𑁆𑀩𑀺𑀭𑀳𑀺𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀧𑀺 𑀦 𑀲𑁂𑀯𑀦𑁆𑀢𑀺, 𑀢𑁂𑀧𑀺 𑀇𑀢𑀭𑁂, 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀦 𑀲𑀤𑀺𑀲𑁂 𑀏𑀯 𑀲𑁂𑀯𑀦𑁆𑀢𑀻𑀢𑀺. 𑀧𑀜𑁆𑀘𑀫𑀩𑀮𑀁.

𑀙𑀝𑁆𑀞𑁂 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀜𑁆𑀘 𑀅𑀧𑀭𑀪𑀸𑀯𑀜𑁆𑀘, 𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀽𑀢𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀻𑀳𑀺 𑀲𑀤𑁆𑀥𑀸𑀤𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺. 𑀢𑀢𑁆𑀣 𑀆𑀲𑀬𑁄𑀢𑀺 ¶ 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀬𑀢𑁆𑀣 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀦𑀺𑀘𑁆𑀘𑀁 𑀦𑀺𑀯𑀲𑀢𑀺. 𑀲𑁄 𑀤𑀼𑀯𑀺𑀥𑁄 𑀯𑀝𑁆𑀝𑀸𑀲𑀬𑁄 𑀯𑀺𑀯𑀝𑁆𑀝𑀸𑀲𑀬𑁄 𑀘. 𑀢𑀢𑁆𑀣 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀁 𑀲𑀩𑁆𑀩𑀁 𑀤𑀺𑀝𑁆𑀞𑀺𑀕𑀢𑀁 𑀯𑀝𑁆𑀝𑀸𑀲𑀬𑁄 𑀦𑀸𑀫. 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀫𑀕𑁆𑀕𑀜𑀸𑀡𑀜𑁆𑀘 𑀯𑀺𑀯𑀝𑁆𑀝𑀸𑀲𑀬𑁄 𑀦𑀸𑀫. 𑀫𑀕𑁆𑀕𑀜𑀸𑀡𑀫𑁆𑀧𑀺 𑀳𑀺 ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀯𑀸𑀲𑀸, 𑀬𑀤𑀭𑀺𑀬𑀸 𑀆𑀯𑀲𑀺𑀁𑀲𑀽’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁧𑁦.𑁧𑁯) 𑀆𑀲𑀬𑁄𑀯. 𑀇𑀫𑀁 𑀧𑀦 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀦𑁆𑀢𑁄 𑀉𑀪𑀺𑀦𑁆𑀦𑀁 𑀤𑀺𑀝𑁆𑀞𑀺𑀜𑀸𑀡𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺 𑀏𑀯. 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀥𑀺𑀫𑀼𑀢𑁆𑀢𑀜𑁆𑀜𑁂𑀯 𑀳𑀺 𑀧𑀼𑀕𑁆𑀕𑀮𑀁 𑀪𑀕𑀯𑀸 𑀢𑀣𑁂𑀯 𑀚𑀸𑀦𑀸𑀢𑀺. ‘‘𑀅𑀬𑀁 𑀦𑁂𑀓𑁆𑀔𑀫𑁆𑀫𑀸𑀤𑀺𑀅𑀪𑀺𑀭𑀢𑁄 𑀯𑀺𑀯𑀝𑁆𑀝𑀸𑀲𑀬𑁄’’𑀢𑀺 𑀦𑁂𑀓𑁆𑀔𑀫𑁆𑀫𑀸𑀤𑀺𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺, ‘‘𑀅𑀬𑀁 𑀓𑀸𑀫𑀸𑀤𑀺𑀅𑀪𑀺𑀭𑀢𑁄 𑀯𑀝𑁆𑀝𑀸𑀲𑀬𑁄’’𑀢𑀺 𑀅𑀦𑀼𑀲𑀬𑀘𑀭𑀺𑀢𑀸𑀤𑀺𑀚𑀸𑀦𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀦𑀼𑀲𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀺𑀢𑁄 𑀲𑀢𑁆𑀢𑀯𑀺𑀥𑁄. 𑀘𑀭𑀺𑀢𑀦𑁆𑀢𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀪𑀺𑀲𑀗𑁆𑀔𑀢𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀁. 𑀅𑀥𑀺𑀫𑀼𑀢𑁆𑀢𑀻𑀢𑀺 𑀅𑀚𑁆𑀛𑀸𑀲𑀬𑁄. 𑀏𑀯𑀫𑁂𑀢𑁆𑀣 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘𑀸𑀢𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀩𑀮𑀜𑀸𑀡𑀁 𑀦𑀸𑀫 𑀚𑀸𑀢𑀦𑁆𑀢𑀺. 𑀙𑀝𑁆𑀞𑀩𑀮𑀁.

𑀲𑀢𑁆𑀢𑀫𑁂 ¶ 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀁 𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀁 𑀓𑀸𑀭𑀡𑀁. 𑀢𑀁 𑀧𑀦 𑀤𑀼𑀯𑀺𑀥𑀁 𑀯𑁄𑀤𑀸𑀦𑀫𑁆𑀧𑀺 𑀪𑀯𑀗𑁆𑀕𑀫𑁆𑀧𑀺. 𑀳𑁂𑀝𑁆𑀞𑀺𑀫𑀁 𑀳𑀺 𑀧𑀕𑀼𑀡𑀁 𑀛𑀸𑀦𑀁 𑀅𑀢𑁆𑀢𑀦𑁄 𑀯𑁄𑀤𑀸𑀦𑀯𑀲𑁂𑀦 𑀉𑀧𑀭𑀺𑀫𑀲𑁆𑀲 𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀢𑁄 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀫𑁆𑀳𑀸 𑀢𑀫𑁆𑀳𑀸 𑀧𑀦 𑀲𑀫𑀸𑀥𑀺𑀫𑁆𑀳𑀸 𑀪𑀯𑀗𑁆𑀕𑀯𑀲𑁂𑀦𑁂𑀯 𑀯𑀼𑀝𑁆𑀞𑀸𑀦𑀢𑁄 𑀪𑀯𑀗𑁆𑀕𑀫𑁆𑀧𑀺. 𑀦𑀺𑀭𑁄𑀥𑀢𑁄 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀯 𑀯𑀼𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀼𑀝𑁆𑀞𑀸𑀦𑀁 𑀦𑀸𑀫, 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀬𑀣𑀸𑀪𑀽𑀢𑀁 𑀲𑀩𑁆𑀩𑀸𑀓𑀸𑀭𑁂𑀦 𑀧𑀚𑀸𑀦𑀸𑀢𑀺. 𑀲𑀢𑁆𑀢𑀫𑀩𑀮𑀁.

𑀅𑀝𑁆𑀞𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀁, 𑀢𑀁 𑀦𑀸𑀫𑀕𑁄𑀢𑁆𑀢𑀯𑀡𑁆𑀡𑀸𑀳𑀸𑀭𑀲𑀼𑀔𑀤𑀼𑀓𑁆𑀔𑀸𑀤𑀻𑀳𑀺 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂𑀳𑀺 𑀅𑀦𑀦𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺. 𑀅𑀝𑁆𑀞𑀫𑀩𑀮𑀁.

𑀦𑀯𑀫𑁂 𑀘𑀼𑀢𑀽𑀧𑀧𑀸𑀢𑀦𑁆𑀢𑀺 𑀘𑀼𑀢𑀺𑀜𑁆𑀘 𑀉𑀧𑀧𑀸𑀢𑀜𑁆𑀘, 𑀢𑀁 𑀘𑀯𑀫𑀸𑀦𑀉𑀧𑀧𑀚𑁆𑀚𑀫𑀸𑀦𑀳𑀻𑀦𑀧𑀡𑀻𑀢𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀢𑁄 𑀅𑀦𑀦𑁆𑀢𑀧𑀪𑁂𑀤𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀯𑀡𑁆𑀡𑀸𑀬𑀢𑀦𑀕𑁆𑀕𑀳𑀡𑀫𑀼𑀔𑁂𑀦 𑀤𑀺𑀲𑁆𑀯𑀸 𑀲𑀩𑁆𑀩𑀸𑀓𑀸𑀭𑀢𑁄 𑀧𑀚𑀸𑀦𑀸𑀢𑀻𑀢𑀺. 𑀦𑀯𑀫𑀩𑀮𑀁.

𑀤𑀲𑀫𑁂 ¶ 𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀆𑀲𑀯𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁, 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁄 𑀧𑀚𑀸𑀦𑀸𑀢𑀻𑀢𑀺. 𑀤𑀲𑀫𑀩𑀮𑀁.

𑀇𑀫𑀸𑀦𑀻𑀢𑀺 𑀬𑀸𑀦𑀺 𑀳𑁂𑀝𑁆𑀞𑀸 ‘‘𑀢𑀣𑀸𑀕𑀢𑀲𑁆𑀲 𑀤𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀅𑀯𑁄𑀘, 𑀇𑀫𑀸𑀦𑀺 𑀢𑀸𑀦𑀻𑀢𑀺 𑀅𑀧𑁆𑀧𑀦𑀁 𑀓𑀭𑁄𑀢𑀺. 𑀬𑀲𑁆𑀫𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀺 𑀲𑀸𑀯𑀓𑀸𑀤𑀻𑀦𑀫𑁆𑀧𑀺 𑀬𑀣𑀸𑀭𑀳𑀁 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀲𑀯𑀺𑀲𑀬𑀁 𑀓𑀺𑀜𑁆𑀘𑀺𑀤𑁂𑀯 𑀚𑀸𑀦𑀦𑁆𑀢𑀺, 𑀦 𑀘 𑀲𑀩𑁆𑀩𑀸𑀓𑀸𑀭𑀢𑁄. 𑀩𑀼𑀤𑁆𑀥𑀸𑀦𑀁 ¶ 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀩𑁆𑀩𑀥𑀫𑁆𑀫𑁂𑀲𑀼 𑀬𑀣𑀸𑀲𑀓𑀁 𑀯𑀺𑀲𑀬𑁂 𑀲𑀩𑁆𑀩𑀢𑁆𑀣 𑀲𑀩𑁆𑀩𑀸𑀓𑀸𑀭𑀢𑁄 𑀏𑀓𑀓𑁆𑀔𑀡𑁂 𑀅𑀧𑁆𑀧𑀝𑀺𑀳𑀢𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄 𑀳𑁄𑀢𑀺, 𑀓𑀲𑁆𑀫𑀸 𑀧𑀦 ‘‘𑀤𑀲𑀩𑀮𑀜𑀸𑀡𑀸𑀦𑀻’’𑀢𑀺 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀦𑀻𑀢𑀺? 𑀯𑀺𑀲𑀬𑀓𑀺𑀘𑁆𑀘𑀪𑀽𑀫𑀺𑀪𑁂𑀤𑀢𑁄 𑀦𑁂𑀲𑀁 𑀅𑀜𑁆𑀜𑀢𑁆𑀢𑀸. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺, 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀺, 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯, 𑀘𑀢𑀼𑀢𑁆𑀣𑀁 𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯, 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯, 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯, 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯, 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯, 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯, 𑀦𑀸𑀜𑁆𑀜𑀁.

𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀲𑀩𑁆𑀩𑀁 𑀅𑀢𑀻𑀢𑀸𑀤𑀺𑀪𑁂𑀤𑀁 𑀏𑀓𑀓𑁆𑀔𑀡𑁂 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺, 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀁 𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑀲𑀩𑀮𑀜𑀸𑀡𑀸𑀦𑀺 𑀧𑀦 𑀢𑀁 𑀲𑀩𑁆𑀩𑀁 𑀬𑀣𑀸𑀭𑀳𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀼 𑀘 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀏𑀯𑀁 𑀯𑀺𑀲𑀬𑀓𑀺𑀘𑁆𑀘𑀪𑀽𑀫𑀺𑀪𑁂𑀤𑀢𑁄 𑀅𑀜𑁆𑀜𑀫𑁂𑀯 𑀤𑀲𑀩𑀮𑀜𑀸𑀡𑀁. 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀥𑀫𑁆𑀫𑀪𑁂𑀤𑀸𑀤𑀺𑀢𑁄 𑀧𑀦 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀏𑀓𑀯𑀺𑀥𑀓𑁄𑀝𑁆𑀞𑀸𑀲𑀢𑁄 𑀧𑀝𑁆𑀞𑀸𑀬 𑀏𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄𑀯 𑀜𑀸𑀢𑀩𑁆𑀩𑁄, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀬𑁄 𑀳𑀺 𑀯𑀺𑀪𑀗𑁆𑀕𑀦𑀬𑀪𑁂𑀤𑀸 𑀏𑀢𑁆𑀣, 𑀇𑀢𑁄 𑀧𑀭𑁂𑀲𑀼 𑀘 𑀯𑀺𑀪𑀗𑁆𑀕𑁂𑀲𑀼 𑀦𑀢𑁆𑀣𑀻𑀢𑀺.

𑀜𑀸𑀡𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 ¶ ¶ 𑀧𑀦𑀸𑀬𑀁 𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀫𑀸𑀢𑀺𑀓𑀸𑀬 𑀳𑀺 𑀆𑀤𑀺𑀢𑁄 𑀢𑀸𑀯 𑁋 𑀚𑀸𑀢𑀺𑀫𑀤𑁄𑀢𑀺𑀆𑀤𑀬𑁄 𑀢𑁂𑀲𑀢𑁆𑀢𑀢𑀺 𑀏𑀓𑀓𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀢𑁄 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘𑀸𑀢𑀺𑀆𑀤𑀬𑁄 𑀅𑀝𑁆𑀞𑀸𑀭𑀲 𑀤𑀼𑀓𑀸, 𑀅𑀓𑀼𑀲𑀮𑀫𑀽𑀮𑀸𑀤𑀬𑁄 𑀧𑀜𑁆𑀘𑀢𑀺𑀁𑀲 𑀢𑀺𑀓𑀸, 𑀆𑀲𑀯𑀘𑀢𑀼𑀓𑁆𑀓𑀸𑀤𑀬𑁄 𑀘𑀼𑀤𑁆𑀤𑀲 𑀘𑀢𑀼𑀓𑁆𑀓𑀸, 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀤𑀬𑁄 𑀧𑀦𑁆𑀦𑀭𑀲 𑀧𑀜𑁆𑀘𑀓𑀸, 𑀯𑀺𑀯𑀸𑀤𑀫𑀽𑀮𑀸𑀤𑀬𑁄 𑀘𑀼𑀤𑁆𑀤𑀲 𑀙𑀓𑁆𑀓𑀸, 𑀅𑀦𑀼𑀲𑀬𑀸𑀤𑀬𑁄 𑀲𑀢𑁆𑀢 𑀲𑀢𑁆𑀢𑀓𑀸, 𑀓𑀺𑀮𑁂𑀲𑀯𑀢𑁆𑀣𑀼𑀆𑀤𑀬𑁄 𑀅𑀝𑁆𑀞 𑀅𑀝𑁆𑀞𑀓𑀸, 𑀆𑀖𑀸𑀢𑀯𑀢𑁆𑀣𑀼𑀆𑀤𑀬𑁄 𑀦𑀯 𑀦𑀯𑀓𑀸, 𑀓𑀺𑀮𑁂𑀲𑀯𑀢𑁆𑀣𑀼𑀆𑀤𑀬𑁄 𑀲𑀢𑁆𑀢 𑀤𑀲𑀓𑀸, 𑀙𑀦𑁆𑀦𑀁 𑀅𑀝𑁆𑀞𑀸𑀭𑀲𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀘 𑀬𑀣𑀸𑀓𑁆𑀓𑀫𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁂 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂 𑀅𑀢𑀺𑀤𑀲𑁆𑀲𑀺𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀢𑁂𑀲𑀝𑁆𑀞𑀺𑀅𑀥𑀺𑀓𑀸𑀦𑀺 𑀅𑀝𑁆𑀞𑀓𑀺𑀮𑁂𑀲𑀲𑀢𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯 𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄.

𑀅𑀢𑁆𑀣𑀢𑁄 𑀧𑀦 ‘‘𑀚𑀸𑀢𑀺𑀫𑀤𑁄’’𑀢𑀺𑀆𑀤𑀻𑀲𑀼 𑀚𑀸𑀢𑀺𑀉𑀘𑁆𑀘𑀸𑀓𑀼𑀮𑀻𑀦𑀢𑀁 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀅𑀳𑀁 𑀉𑀢𑁆𑀢𑀫𑀚𑀸𑀢𑀺𑀓𑁄, 𑀇𑀫𑁂 𑀦 𑀉𑀢𑁆𑀢𑀫𑀚𑀸𑀢𑀺𑀓𑀸’’𑀢𑀺 𑀏𑀯𑀁 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀫𑀸𑀦𑁄 𑀚𑀸𑀢𑀺𑀫𑀤𑁄 𑀦𑀸𑀫. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀆𑀤𑀺𑀘𑁆𑀘𑀕𑁄𑀢𑁆𑀢𑀓𑀲𑁆𑀲𑀧𑀕𑁄𑀢𑁆𑀢𑀸𑀤𑀺𑀉𑀢𑁆𑀢𑀫𑀕𑁄𑀢𑁆𑀢𑀁 𑀦𑀺𑀲𑁆𑀲𑀸𑀬 𑀕𑁄𑀢𑁆𑀢𑀫𑀤𑁄. 𑀦𑀺𑀭𑀸𑀩𑀸𑀥𑀢𑀁, 𑀬𑁄𑀩𑁆𑀩𑀜𑁆𑀜𑀁, ‘‘𑀘𑀺𑀭𑀁 𑀲𑀼𑀔𑀁 𑀚𑀻𑀯𑀺𑀁 𑀚𑀻𑀯𑀸𑀫𑀺 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀚𑀻𑀯𑀺𑀢𑀁, 𑀩𑀳𑀼𑀮𑀸𑀪𑀜𑁆𑀘 𑀦𑀺𑀲𑁆𑀲𑀸𑀬 𑀬𑀣𑀸𑀓𑁆𑀓𑀫𑀁 𑀆𑀭𑁄𑀕𑁆𑀬𑀫𑀤𑀸𑀤𑀬𑁄 𑀯𑀼𑀢𑁆𑀢𑀸. 𑀲𑀼𑀓𑀢𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀁, 𑀫𑀸𑀦𑀦𑀯𑀦𑁆𑀤𑀦𑀸𑀤𑀺𑀕𑀭𑀼𑀓𑀸𑀭𑀁 𑀫𑀜𑁆𑀜𑁂𑀯 𑀧𑀫𑀼𑀔𑀁 𑀓𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀁 𑀧𑀼𑀭𑁂𑀓𑁆𑀔𑀸𑀭𑀁, 𑀫𑀳𑀸𑀧𑀭𑀺𑀯𑀸𑀭𑀁, 𑀲𑀼𑀘𑀺𑀧𑀭𑀺𑀯𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀬𑀣𑀸𑀓𑁆𑀓𑀫𑀁 𑀲𑀓𑁆𑀓𑀸𑀭𑀫𑀤𑀸𑀤𑀬𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀪𑁄𑀕𑁄 𑀧𑀦 𑀓𑀺𑀜𑁆𑀘𑀸𑀧𑀺 𑀮𑀸𑀪𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄, 𑀦𑀺𑀳𑀺𑀢𑀥𑀦𑀯𑀲𑁂𑀦 𑀧𑀦𑁂𑀢𑁆𑀣 ¶ 𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄, ‘‘𑀅𑀦𑁆𑀦𑀧𑀸𑀦𑀯𑀢𑁆𑀣𑀸𑀪𑀭𑀡𑀫𑀸𑀮𑀸𑀕𑀦𑁆𑀥𑀸𑀤𑀺𑀉𑀧𑀪𑁄𑀕𑀲𑀫𑀺𑀤𑁆𑀥𑀺𑀯𑀲𑁂𑀦𑀸𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀭𑀻𑀭𑀯𑀡𑁆𑀡𑀁, 𑀕𑀼𑀡𑀯𑀡𑁆𑀡𑀜𑁆𑀘 𑀦𑀺𑀲𑁆𑀲𑀸𑀬 𑀯𑀡𑁆𑀡𑀫𑀤𑁄. 𑀩𑀸𑀳𑀼𑀲𑀘𑁆𑀘𑀁, 𑀧𑀝𑀺𑀪𑀸𑀦𑀁, ‘‘𑀯𑀡𑁆𑀡𑀁 𑀩𑀼𑀤𑁆𑀥𑀯𑀁𑀲𑀁 𑀭𑀸𑀚𑀯𑀁𑀲𑀁 𑀚𑀦𑀧𑀤𑀯𑀁𑀲𑀁 𑀕𑀸𑀫𑀯𑀁𑀲𑀁 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀬𑁄𑀕𑀁 𑀚𑀸𑀦𑀸𑀫𑀻’’𑀢𑀺 𑀏𑀯𑀁 𑀭𑀢𑁆𑀢𑀜𑁆𑀜𑀼𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀬𑀣𑀸𑀓𑁆𑀓𑀫𑀁 𑀲𑀼𑀢𑀫𑀤𑀸𑀤𑀬𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀚𑀸𑀢𑀺𑀧𑀺𑀡𑁆𑀟𑀧𑀸𑀢𑀺𑀓𑀢𑀁, 𑀅𑀦𑀯𑀜𑁆𑀜𑀸𑀢𑀢𑀁, 𑀇𑀭𑀺𑀬𑀸𑀧𑀣𑀧𑀸𑀲𑀸𑀤𑀺𑀓𑀢𑀁, 𑀫𑀳𑀺𑀤𑁆𑀥𑀺𑀓𑀢𑀜𑁆𑀘 𑀦𑀺𑀲𑁆𑀲𑀸𑀬 𑀬𑀣𑀸𑀓𑁆𑀓𑀫𑀁 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑀸𑀤𑀬𑁄. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀯𑀸𑀭-𑀕𑁆𑀕𑀳𑀡𑁂𑀦 𑀬𑀲𑁄 𑀕𑀳𑀺𑀢𑁄. 𑀧𑀭𑀺𑀯𑀸𑀭𑀲𑁆𑀲 𑀧𑀦 𑀲𑀯𑀲𑀯𑀢𑁆𑀢𑀓𑀪𑀸𑀯𑁂𑀦 𑀧𑀢𑁆𑀣𑀝𑀢𑀁 𑀓𑀺𑀢𑁆𑀢𑀺𑀬𑀲𑀜𑁆𑀜𑁂𑀯 𑀯𑀸 𑀦𑀺𑀲𑁆𑀲𑀸𑀬 𑀬𑀲𑀫𑀤𑁄. 𑀧𑀭𑀺𑀲𑀼𑀤𑁆𑀥𑀲𑀻𑀮𑀁 ¶ , 𑀉𑀧𑀘𑀸𑀭𑀧𑁆𑀧𑀦𑀸𑀛𑀸𑀦𑀁, 𑀲𑀺𑀧𑁆𑀧𑀓𑁄𑀲𑀮𑁆𑀮𑀁, 𑀲𑀭𑀻𑀭𑀲𑁆𑀲 𑀆𑀭𑁄𑀳𑀲𑀫𑁆𑀧𑀤𑀁, 𑀧𑀭𑀺𑀡𑀸𑀳𑀲𑀫𑁆𑀧𑀤𑀁, 𑀅𑀦𑀽𑀦𑀦𑀺𑀤𑁆𑀤𑁄𑀲𑀅𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀲𑀭𑀻𑀭𑀧𑀸𑀭𑀺𑀧𑀽𑀭𑀺𑀜𑁆𑀘 𑀦𑀺𑀲𑁆𑀲𑀸𑀬 𑀲𑀻𑀮𑀫𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀯𑀢𑁆𑀣𑀼𑀓𑀁 𑀫𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀢𑁆𑀣𑀼𑀓𑀫𑁂𑀯 𑀲𑀸𑀫𑀜𑁆𑀜𑀢𑁄 𑀫𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀤𑁄’’𑀢𑀺 𑀆𑀳. 𑀧𑀫𑀸𑀤𑁄𑀢𑀺𑀆𑀤𑀻𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑁄 𑀲𑀼𑀘𑀭𑀺𑀢𑀸𑀲𑁂𑀯𑀦𑀸𑀬, 𑀤𑀼𑀘𑁆𑀘𑀭𑀺𑀢𑀲𑁂𑀯𑀦𑀸𑀬 𑀘 𑀳𑁂𑀢𑀼𑀪𑀽𑀢𑁄 𑀧𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀫𑀸𑀤𑁄 𑀦𑀸𑀫, 𑀲𑁆𑀯𑀸𑀬𑀁 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁄. 𑀯𑀸𑀢𑀪𑀭𑀺𑀢𑀪𑀢𑁆𑀢𑀸 𑀯𑀺𑀬 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀅𑀦𑁄𑀡𑀢𑀪𑀸𑀯𑀲𑀗𑁆𑀔𑀸𑀢𑁄 𑀓𑀓𑁆𑀔𑀴𑀫𑀸𑀦𑁄 𑀣𑀫𑁆𑀪𑁄 𑀦𑀸𑀫, 𑀲𑁆𑀯𑀸𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀮𑀓𑁆𑀔𑀡𑁄. 𑀅𑀜𑁆𑀜𑁂𑀲𑀁 𑀕𑁂𑀳𑀸𑀤𑀺𑀉𑀧𑀓𑀭𑀡𑀲𑀫𑁆𑀧𑀤𑀁, 𑀯𑀺𑀚𑁆𑀚𑀸𑀲𑀫𑁆𑀧𑀤𑀁 𑀯𑀸 𑀤𑀺𑀲𑁆𑀯𑀸 𑀢𑀤𑁆𑀤𑀺𑀕𑀼𑀡𑀲𑀫𑀸𑀭𑀫𑁆𑀪𑀦𑀯𑀲𑀧𑁆𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀸𑀭𑀫𑁆𑀪𑁄 𑀦𑀸𑀫. 𑀕𑀦𑁆𑀣𑁄𑀧𑀺 𑀳𑀺 𑀲𑀸𑀭𑀫𑁆𑀪𑀯𑀲𑁂𑀦 𑀉𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺. 𑀲𑁆𑀯𑀸𑀬𑀁 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄.

𑀅𑀢𑁆𑀭 ¶ 𑀅𑀢𑁆𑀭 𑀯𑀺𑀲𑀬𑁂 𑀇𑀘𑁆𑀙𑀸 𑀅𑀲𑁆𑀲𑀸𑀢𑀺 𑀅𑀢𑁆𑀭𑀺𑀘𑁆𑀙𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀭𑀺𑀘𑁆𑀙𑀢𑀸. 𑀏𑀯𑀁 𑀫𑀳𑀺𑀘𑁆𑀙𑀢𑀸𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀬𑀁 𑀮𑀤𑁆𑀥𑀁, 𑀢𑁂𑀦 𑀢𑁂𑀦 𑀅𑀲𑀦𑁆𑀢𑀼𑀲𑁆𑀲𑀺𑀢𑁆𑀯𑀸 𑀅𑀧𑀭𑀲𑁆𑀲 𑀅𑀧𑀭𑀲𑁆𑀲 𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀪𑁄 𑀅𑀢𑁆𑀭𑀺𑀘𑁆𑀙𑀢𑀸. 𑀬𑀸𑀬 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀫𑁆𑀧𑀺 𑀮𑀸𑀫𑀓𑀁 𑀯𑀺𑀬 𑀔𑀸𑀬𑀢𑀺, 𑀧𑀭𑁂𑀦 𑀮𑀤𑁆𑀥𑀁 𑀮𑀸𑀫𑀓𑀫𑁆𑀧𑀺 𑀧𑀡𑀻𑀢𑀁 𑀯𑀺𑀬 𑀔𑀸𑀬𑀢𑀺. 𑀲𑀸𑀬𑀁 𑀅𑀧𑀭𑀸𑀧𑀭𑀮𑀸𑀪𑀧𑀢𑁆𑀣𑀦𑀸𑀮𑀓𑁆𑀔𑀡𑀸. 𑀲𑀦𑁆𑀢𑀕𑀼𑀡𑀯𑀺𑀪𑀸𑀯𑀦𑀸𑀯𑀲𑀧𑁆𑀧𑀯𑀢𑁆𑀢𑁄 𑀘𑁂𑀯 𑀢𑀤𑀼𑀧𑁆𑀧𑀦𑁆𑀦𑁂𑀳𑀺 𑀅𑀢𑀺𑀫𑀳𑀦𑁆𑀢𑁂𑀳𑀺𑀧𑀺 𑀯𑀢𑁆𑀣𑀽𑀳𑀺 𑀅𑀲𑀦𑁆𑀢𑀼𑀲𑁆𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘 𑀮𑁄𑀪𑁄 𑀫𑀳𑀺𑀘𑁆𑀙𑀢𑀸. 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀧𑀘𑁆𑀘𑀬𑁂𑀳𑀺 𑀤𑀼𑀧𑁆𑀧𑀽𑀭𑁄 𑀅𑀕𑁆𑀕𑀺 𑀯𑀺𑀬 𑀉𑀧𑀸𑀤𑀸𑀦𑁂𑀦, 𑀲𑀫𑀼𑀤𑁆𑀤𑁄 𑀯𑀺𑀬 𑀘 𑀉𑀤𑀓𑁂𑀦. 𑀬𑀸 𑀘𑀸𑀬𑀁 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸, 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀏𑀢𑀁 𑀫𑀳𑀺𑀘𑁆𑀙𑀢𑀸𑀮𑀓𑁆𑀔𑀡𑀁.

𑀅𑀲𑀦𑁆𑀢𑀸𑀦𑀁 𑀧𑀦 𑀲𑀤𑁆𑀥𑀸𑀲𑀻𑀮𑀸𑀦𑀁, 𑀫𑀕𑁆𑀕𑀨𑀮𑀸𑀤𑀻𑀦𑀜𑁆𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀕𑀼𑀡𑀸𑀦𑀁 𑀯𑀺𑀪𑀸𑀯𑀦𑀸𑀯𑀲𑀧𑁆𑀧𑀯𑀢𑁆𑀢𑁄 𑀘𑁂𑀯 𑀢𑀤𑀼𑀧𑁆𑀧𑀦𑁆𑀦𑁂𑀳𑀺 𑀅𑀢𑀺𑀫𑀳𑀦𑁆𑀢𑁂𑀳𑀺𑀧𑀺 𑀧𑀘𑁆𑀘𑀬𑁂𑀳𑀺 𑀅𑀲𑀦𑁆𑀢𑀼𑀲𑁆𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘 𑀮𑁄𑀪𑁄 𑀧𑀸𑀧𑀺𑀘𑁆𑀙𑀢𑀸. 𑀬𑀸 𑀘𑀸𑀬𑀁 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸, 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀏𑀢𑀁 𑀧𑀸𑀧𑀺𑀘𑁆𑀙𑀢𑀸𑀮𑀓𑁆𑀔𑀡𑀁.

𑀲𑀺𑀗𑁆𑀕𑀦𑁆𑀢𑀺 𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀺𑀗𑁆𑀕𑀁, 𑀦𑀸𑀕𑀭𑀺𑀓𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀲𑀺𑀗𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀅𑀢𑁆𑀣𑀢𑁄 𑀲𑀺𑀗𑁆𑀕𑀸𑀭𑀓𑀭𑀡𑀯𑀲𑀧𑁆𑀧𑀯𑀢𑁆𑀢𑁄 𑀮𑁄𑀪𑁄𑀯. 𑀢𑀺𑀦𑁆𑀢𑀺𑀡𑀦𑁆𑀢𑀺 𑀔𑀻𑀬𑀦𑀁, 𑀢𑀁 𑀅𑀢𑁆𑀣𑀢𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀲𑀼𑀦𑀔𑀸𑀦𑀁 ¶ 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀢𑁆𑀢𑀸𑀦𑀁 ‘‘𑀢𑀯 𑀲𑀦𑁆𑀢𑀓𑀁, 𑀫𑀫 𑀲𑀦𑁆𑀢𑀓’’𑀦𑁆𑀢𑀺 𑀔𑀺𑀬𑁆𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀤𑁄𑀲𑁄𑀯. 𑀘𑀸𑀧𑀮𑁆𑀬𑀦𑁆𑀢𑀺 𑀘𑀧𑀮𑀢𑀸, 𑀢𑀁 𑀧𑀢𑁆𑀢𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀸𑀦𑀁, 𑀅𑀢𑁆𑀢𑀪𑀸𑀯𑀲𑁆𑀲 𑀘 𑀫𑀡𑁆𑀟𑀦𑀯𑀺𑀪𑀽𑀲𑀦𑀓𑁂𑀴𑀸𑀬𑀦𑀯𑀲𑀧𑁆𑀧𑀯𑀢𑁆𑀢𑁄 𑀭𑀸𑀕𑁄𑀯, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀚𑀺𑀡𑁆𑀡𑁄𑀧𑀺 𑀤𑀳𑀭𑁄 𑀯𑀺𑀬 𑀳𑁄𑀢𑀺. 𑀅𑀲𑀪𑀸𑀕𑀯𑀼𑀢𑁆𑀢𑀻𑀢𑀺 𑀯𑀺𑀲𑀪𑀸𑀕𑀯𑀼𑀢𑁆𑀢𑀺 𑀯𑀺𑀲𑀪𑀸𑀕𑀓𑀺𑀭𑀺𑀬𑀸, 𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼𑀧𑀺 𑀅𑀦𑀸𑀤𑀭𑀯𑀲𑁂𑀦 𑀯𑀺𑀧𑀘𑁆𑀘𑀦𑀻𑀓𑀕𑁆𑀕𑀸𑀳𑀺𑀢𑀸𑀯𑀲𑀧𑁆𑀧𑀯𑀢𑁆𑀢𑁄 𑀤𑁄𑀲𑁄𑀯 ¶ , 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁂𑀧𑀺 𑀫𑀸𑀢𑀸𑀧𑀺𑀢𑀼𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀺𑀓𑁂 𑀦 𑀑𑀮𑁄𑀓𑁂𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀮𑀸𑀪𑀲𑀓𑁆𑀓𑀸𑀭𑀓𑀸𑀭𑀡𑀸 𑀓𑀮𑀳𑀁 𑀓𑀭𑁄𑀢𑀺, 𑀢𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀘𑁂𑀢𑀺𑀬𑀸𑀤𑀻𑀲𑀼 𑀘𑀺𑀢𑁆𑀢𑀻𑀓𑀸𑀭𑀜𑁆𑀘 𑀦 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺. 𑀅𑀭𑀢𑀻𑀢𑀺 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼, 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀘 𑀅𑀦𑀪𑀺𑀭𑀫𑀡𑀸 𑀉𑀓𑁆𑀓𑀡𑁆𑀞𑀺𑀢𑀢𑀸, 𑀲𑀸 𑀢𑀣𑀸𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀢𑀦𑁆𑀤𑀻𑀢𑀺 𑀆𑀮𑀲𑁆𑀬𑀁. 𑀯𑀺𑀚𑀫𑁆𑀪𑀺𑀢𑀸𑀢𑀺 𑀓𑀸𑀬𑀲𑁆𑀲 𑀆𑀦𑀫𑀦𑀸𑀤𑀺𑀆𑀓𑀸𑀭𑁂𑀦 𑀨𑀦𑁆𑀤𑀦𑀸 𑀯𑀺𑀚𑀫𑁆𑀪𑀦𑀸. 𑀪𑀢𑁆𑀢𑀲𑀫𑁆𑀫𑀤𑁄𑀢𑀺 𑀪𑀢𑁆𑀢𑀫𑀼𑀘𑁆𑀙𑀸𑀬 𑀓𑀸𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸. 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀲𑀗𑁆𑀓𑁄𑀘𑁄. 𑀅𑀢𑁆𑀣𑀢𑁄 𑀧𑀦𑁂𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀣𑀺𑀦𑀫𑀺𑀤𑁆𑀥𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀸𑀓𑀸𑀭𑁄𑀯.

𑀓𑀼𑀳𑀦𑀸𑀢𑀺𑀆𑀤𑀻𑀲𑀼 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀢𑁂𑀦 𑀢𑁂𑀦 𑀉𑀧𑀸𑀬𑁂𑀦 𑀯𑀺𑀫𑁆𑀳𑀸𑀧𑀦𑀸 𑀓𑀼𑀳𑀦𑀸 𑀦𑀸𑀫. 𑀲𑀸 𑀢𑀺𑀯𑀺𑀥𑀸 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀡𑁆𑀞𑀸𑀧𑀦𑀯𑀲𑁂𑀦. 𑀢𑀢𑁆𑀣 𑀘𑀻𑀯𑀭𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀢𑀤𑀢𑁆𑀣𑀺𑀓𑀲𑁆𑀲𑁂𑀯 𑀲𑀢𑁄 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑀺𑀧𑀦𑁂𑀦, 𑀢𑁂 𑀘 𑀕𑀳𑀧𑀢𑀺𑀓𑁂 𑀅𑀢𑁆𑀢𑀦𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁂 𑀜𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀢𑀺, 𑀲𑀼𑀮𑀤𑁆𑀥𑀁 𑀯𑀢 𑀦𑁄 𑀅𑀲𑁆𑀲, 𑀲𑀘𑁂 𑀅𑀧𑁆𑀧𑀫𑀢𑁆𑀢𑀓𑀁 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀉𑀧𑀦𑀸𑀫𑁂𑀦𑁆𑀢𑀸𑀦𑀁 𑀢𑀤𑀦𑀼𑀕𑁆𑀕𑀳𑀓𑀸𑀫𑀢𑀜𑁆𑀜𑁂𑀯 𑀆𑀯𑀺𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀢𑀢𑁄 𑀧𑀪𑀼𑀢𑀺 𑀅𑀧𑀺 𑀲𑀓𑀝𑀪𑀸𑀭𑁂𑀳𑀺 𑀉𑀧𑀦𑀸𑀫𑀦𑀳𑁂𑀢𑀼𑀪𑀽𑀢𑀁 𑀯𑀺𑀫𑁆𑀳𑀸𑀧𑀦𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀸 𑀓𑀼𑀳𑀦𑀸 𑀦𑀸𑀫. 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 ‘‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀯𑀸𑀘𑀸𑀬 𑀢𑀣𑀸 𑀢𑀣𑀸 𑀯𑀺𑀫𑁆𑀳𑀸𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀸 𑀓𑀼𑀳𑀦𑀸 𑀦𑀸𑀫. 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀲𑀫𑀸𑀳𑀺𑀢𑀲𑁆𑀲𑁂𑀯 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀓𑀢𑁂𑀦 𑀧𑀡𑀺𑀥𑀸𑀬 𑀲𑀡𑁆𑀞𑀧𑀺𑀢𑁂𑀦 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑁂𑀦 𑀯𑀺𑀫𑁆𑀳𑀸𑀧𑀦𑀁 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀲𑀗𑁆𑀔𑀸𑀢𑀸 𑀓𑀼𑀳𑀦𑀸 𑀦𑀸𑀫.

𑀆𑀮𑀧𑀦𑀸𑀢𑀺𑀆𑀤𑀺𑀦𑀸 ¶ 𑀧𑀦 𑀯𑀼𑀢𑁆𑀢𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸𑀬𑁂𑀯 𑀤𑀲𑁆𑀲𑀺𑀢𑀸. 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸, 𑀘𑀸𑀝𑀼𑀓𑀫𑁆𑀬𑀢𑀸, 𑀫𑀼𑀕𑁆𑀕𑀲𑀽𑀧𑁆𑀬𑀢𑀸, 𑀧𑀸𑀭𑀺𑀪𑀝𑀬𑀢𑀸 𑀘 𑀆𑀮𑀧𑀦𑀸 𑀦𑀸𑀫. 𑀢𑀢𑁆𑀣 𑀆𑀮𑀧𑀦𑀸𑀢𑀺𑀆𑀤𑀺𑀢𑁄𑀯 𑀮𑀧𑀦𑀸. 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸𑀢𑀺 𑀲𑀘𑁆𑀘𑀸𑀦𑀼𑀭𑀽𑀧𑀁, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀬𑀪𑀡𑀦𑀁. 𑀘𑀸𑀝𑀼𑀓𑀫𑁆𑀬𑀢𑀸𑀢𑀺 ¶ 𑀦𑀻𑀘𑀯𑀼𑀢𑁆𑀢𑀺𑀢𑀸, 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀢𑁄 𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀁. 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀢𑀺 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀢𑀸, 𑀅𑀧𑀓𑁆𑀓𑀫𑀼𑀕𑁆𑀕𑀲𑀤𑀺𑀲𑁂𑀦 𑀅𑀧𑁆𑀧𑀲𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀯𑀘𑀦𑀢𑀸. 𑀧𑀸𑀭𑀺𑀪𑀝𑀬𑀢𑀸𑀢𑀺 𑀓𑀼𑀮𑀤𑀸𑀭𑀓𑀸𑀦𑀁 𑀅𑀗𑁆𑀓𑁂𑀦 𑀧𑀭𑀺𑀳𑀭𑀡𑀸𑀤𑀺𑀓𑀁 𑀧𑀭𑀺𑀪𑀝𑀲𑁆𑀲 𑀓𑀺𑀘𑁆𑀘𑀁. 𑀏𑀯𑀫𑀬𑀁 𑀲𑀩𑁆𑀩𑁄𑀧𑀺 𑀓𑀺𑀭𑀺𑀬𑀸𑀪𑁂𑀤𑁄 ‘‘𑀮𑀧𑀦𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀦 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀸𑀚𑀦𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀸𑀫, 𑀬𑀸 ‘‘𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀓𑁆𑀓𑁄𑀲𑀦𑀯𑀫𑁆𑀪𑀦𑀕𑀭𑀳𑀡𑀸𑀤𑀻𑀳𑀺 𑀬𑀣𑀸 𑀤𑀸𑀬𑀓𑁄 𑀅𑀯𑀡𑁆𑀡𑀁 𑀪𑀸𑀬𑀢𑀺, 𑀏𑀯𑀁 𑀢𑀁 𑀦𑀺𑀧𑁆𑀧𑀻𑀴𑀦𑀁 𑀦𑀺𑀧𑁆𑀧𑁂𑀲𑀺𑀓𑀢𑀸 𑀦𑀸𑀫. 𑀅𑀬𑀁 𑀳𑀺 𑀬𑀲𑁆𑀫𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀺𑀬 𑀅𑀩𑁆𑀪𑀗𑁆𑀕𑀁 𑀇𑀫𑀸𑀬 𑀧𑀭𑀲𑁆𑀲 𑀕𑀼𑀡𑀁 𑀦𑀺𑀧𑁆𑀧𑁂𑀲𑁂𑀢𑀺 𑀦𑀺𑀧𑀼𑀜𑁆𑀙𑀢𑀺, 𑀬𑀲𑁆𑀫𑀸 𑀯𑀸 𑀕𑀦𑁆𑀥𑀚𑀸𑀢𑀁 𑀧𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀕𑁆𑀕𑀦𑀸 𑀯𑀺𑀬 𑀧𑀭𑀕𑀼𑀡𑁂 𑀦𑀺𑀧𑁆𑀧𑀺𑀲𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑁂𑀢𑁆𑀯𑀸 𑀏𑀲𑀸 𑀮𑀸𑀪𑀫𑀕𑁆𑀕𑀦𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀺𑀧𑁆𑀧𑁂𑀲𑀺𑀓𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀓𑀼𑀮𑁂 𑀮𑀤𑁆𑀥𑀸𑀫𑀺𑀲𑀁 𑀅𑀜𑁆𑀜𑀢𑁆𑀣 𑀤𑀸𑀦𑀯𑀲𑁂𑀦 𑀮𑀸𑀪𑁂𑀦 𑀮𑀸𑀪𑀲𑁆𑀲 𑀧𑀢𑁆𑀣𑀦𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀸 𑀦𑀸𑀫. 𑀇𑀫𑁂 𑀘 𑀓𑀼𑀳𑀦𑀸𑀤𑀬𑁄 𑀧𑀜𑁆𑀘𑀧𑀺 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸 𑀮𑁄𑀪𑀸𑀤𑀺𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀤𑁆𑀯𑀸𑀤𑀲 𑀫𑀸𑀦𑀸 𑀳𑁂𑀝𑁆𑀞𑀸 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯. 𑀢𑀢𑁆𑀣 𑀘 𑀆𑀤𑀺𑀢𑁄 𑀢𑀬𑁄 𑀫𑀸𑀦𑀸 𑀧𑀼𑀕𑁆𑀕𑀮𑀁 𑀅𑀦𑀺𑀲𑁆𑀲𑀸𑀬 𑀚𑀸𑀢𑀺𑀕𑁄𑀢𑁆𑀢𑀭𑀽𑀧𑀪𑁄𑀕𑀲𑀺𑀧𑁆𑀧𑀲𑀼𑀢𑀸𑀤𑀺𑀫𑀸𑀦𑀯𑀢𑁆𑀣𑀼𑀯𑀲𑁂𑀦𑁂𑀯 𑀓𑀣𑀺𑀢𑀸, 𑀢𑀢𑁄 𑀧𑀭𑀁 𑀧𑀦 𑀦𑀯 𑀫𑀸𑀦𑀸 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀓𑀣𑀺𑀢𑀸.

𑀏𑀯𑀫𑁂𑀢𑁂𑀳𑀺 𑀤𑁆𑀯𑀸𑀤𑀲𑀳𑀺 𑀧𑀤𑁂𑀳𑀺 𑀲𑀯𑀢𑁆𑀣𑀼𑀓𑁂 𑀫𑀸𑀦𑁂 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀢𑁆𑀣𑀼𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 ¶ 𑀧𑀭𑀁 𑀅𑀢𑀺𑀫𑀸𑀦𑁄𑀢𑀺𑀆𑀤𑀻𑀲𑀼 ‘‘𑀚𑀸𑀢𑀺𑀆𑀤𑀻𑀳𑀺 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀦𑀸𑀫. ‘‘𑀇𑀫𑁂 𑀫𑀬𑀸 𑀧𑀼𑀩𑁆𑀩𑁂 𑀲𑀤𑀺𑀲𑀸, 𑀇𑀤𑀸𑀦𑀺 𑀅𑀳𑀁 𑀲𑁂𑀝𑁆𑀞𑁄, 𑀇𑀫𑁂 𑀳𑀻𑀦𑀢𑀭𑀸’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀪𑀸𑀭𑀸𑀢𑀺𑀪𑀸𑀭𑁄 𑀯𑀺𑀬 𑀫𑀸𑀦𑀸𑀢𑀺𑀫𑀸𑀦𑁄 𑀦𑀸𑀫. 𑀅𑀢𑁆𑀢𑀸𑀦𑀁 𑀧𑀦 𑀅𑀯𑀫𑀜𑁆𑀜𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑁄 𑀑𑀫𑀸𑀦𑁄 𑀦𑀸𑀫, 𑀲𑁄 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀳𑀻𑀦𑀫𑀸𑀦𑀲𑀤𑀺𑀲𑁄𑀯. 𑀅𑀦𑀥𑀺𑀕𑀢𑁂𑀲𑀼 𑀅𑀭𑀺𑀬𑀥𑀫𑁆𑀫𑁂𑀲𑀼 ‘‘𑀅𑀥𑀺𑀕𑀢𑀸 𑀫𑀬𑀸’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀅𑀥𑀺𑀓𑀫𑀸𑀦𑀢𑁆𑀢𑀸 𑀅𑀥𑀺𑀫𑀸𑀦𑁄 𑀦𑀸𑀫, 𑀅𑀬𑀁 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀺𑀅𑀭𑀺𑀬𑀲𑀸𑀯𑀓𑀸𑀦𑀁 ‘‘𑀅𑀳𑀁 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀦𑀸 𑀦 𑀉𑀧𑁆𑀧𑀚𑁆𑀚𑀢𑀺 𑀢𑁂𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑀢𑁆𑀢𑀸. 𑀤𑀼𑀲𑁆𑀲𑀻𑀮𑀲𑁆𑀲 𑀧𑀦 𑀦 𑀉𑀧𑁆𑀧𑀚𑁆𑀚𑀢𑁂𑀯, 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲𑁂𑀯 𑀧𑀦 𑀲𑀼𑀤𑁆𑀥𑀲𑀫𑀣𑀮𑀸𑀪𑀺𑀦𑁄, 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀦𑁄, 𑀢𑀤𑀼𑀪𑀬𑀮𑀸𑀪𑀺𑀦𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀲𑀼 𑀢𑀤𑀼𑀪𑀬𑀮𑀸𑀪𑀻 𑀅𑀭𑀳𑀢𑁆𑀢𑁂 𑀏𑀯 𑀅𑀥𑀺𑀫𑀜𑁆𑀜𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀺 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑁆𑀢𑀸, 𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀢𑁆𑀢𑀸 𑀘, 𑀇𑀢𑀭𑁂 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀘𑀲𑀼 𑀧𑀦 𑀔𑀦𑁆𑀥𑁂𑀲𑀼 ‘‘𑀅𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀫𑀸𑀦𑁄 𑀅𑀲𑁆𑀫𑀺𑀫𑀸𑀦𑁄 ¶ 𑀦𑀸𑀫. 𑀧𑀸𑀧𑀓𑁂𑀦 𑀧𑀦 𑀧𑀭𑀽𑀧𑀖𑀸𑀢𑀓𑁂𑀦 𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀦𑀸 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀸𑀤𑀺𑀢𑁄 𑀚𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑁄 𑀫𑀺𑀘𑁆𑀙𑀸𑀫𑀸𑀦𑁄 𑀦𑀸𑀫.

𑀜𑀸𑀢𑀺𑀯𑀺𑀢𑀓𑁆𑀓𑁄𑀢𑀺𑀆𑀤𑀻𑀲𑀼 ‘‘𑀫𑀬𑁆𑀳𑀁 𑀜𑀸𑀢𑀓𑀸 𑀲𑀼𑀔𑀚𑀻𑀯𑀺𑀦𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’’𑀢𑀺 𑀏𑀯𑀁 𑀕𑁂𑀳𑀲𑀺𑀢𑀧𑁂𑀫𑁂𑀦 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀜𑀸𑀢𑀺𑀯𑀺𑀢𑀓𑁆𑀓𑁄 𑀦𑀸𑀫, ‘‘𑀜𑀸𑀢𑀓𑀸 𑀔𑀬𑀁 𑀕𑀢𑀸 𑀯𑀬𑀁 𑀕𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀧𑀦 𑀦𑁂𑀓𑁆𑀔𑀫𑁆𑀫𑀲𑀺𑀢𑁄 𑀜𑀸𑀢𑀺𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀳𑁄𑀢𑀺. 𑀏𑀯𑀁 𑀚𑀦𑀧𑀤𑀯𑀺𑀢𑀓𑁆𑀓𑁂𑀧𑀺, 𑀢𑀲𑁆𑀲 𑀧𑀦 ‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁄 𑀲𑀼𑀪𑀺𑀓𑁆𑀔𑁄 𑀲𑀼𑀦𑁆𑀤𑀭𑁄’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄, 𑀅𑀫𑀭𑁄 ¶ 𑀯𑀸 𑀯𑀺𑀢𑀓𑁆𑀓𑁄𑀢𑀺 𑀅𑀫𑀭𑀯𑀺𑀢𑀓𑁆𑀓𑁄. 𑀢𑀢𑁆𑀣 𑀬𑁄 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀤𑀼𑀓𑁆𑀔𑁂 𑀦𑀺𑀚𑁆𑀚𑀺𑀡𑁆𑀡𑁂 𑀲𑀫𑁆𑀧𑀭𑀸𑀬𑁂 𑀅𑀢𑁆𑀢𑀸 𑀲𑀼𑀔𑀻 𑀅𑀫𑀭𑁄 𑀳𑁄𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄, 𑀲𑁄 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀦𑀸𑀫. 𑀬𑁄 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀅𑀲𑀡𑁆𑀞𑀳𑀺𑀢𑁆𑀯𑀸 ‘‘𑀏𑀯𑀫𑁆𑀧𑀺 𑀫𑁂 𑀦𑁄, 𑀢𑀣𑀸𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀅𑀫𑀭𑀫𑀘𑁆𑀙𑁄 𑀯𑀺𑀬 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀯𑀢𑁆𑀢𑁄, 𑀲𑁄 𑀅𑀫𑀭𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀇𑀥 ‘‘𑀅𑀫𑀭𑀯𑀺𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑁄.

𑀅𑀦𑀼𑀤𑁆𑀤𑀬𑀢𑀸 𑀧𑀢𑀺𑀭𑀽𑀧𑀓𑁂𑀦 𑀧𑀦 𑀕𑀺𑀳𑀻𑀳𑀺 𑀲𑀳𑀲𑁄𑀓𑀺𑀲𑀳𑀦𑀦𑁆𑀤𑀺𑀢𑀸𑀤𑀺𑀯𑀲𑁂𑀦 𑀕𑁂𑀳𑀲𑀺𑀢𑀧𑁂𑀫𑁂𑀦 𑀬𑀼𑀢𑁆𑀢𑁄 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀮𑀸𑀪𑁂𑀦 𑀘𑁂𑀯 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀬𑀼𑀢𑁆𑀢𑁄 𑀕𑁂𑀳𑀲𑀺𑀢𑁄 𑀯𑀺𑀢𑀓𑁆𑀓𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫, 𑀢𑀲𑁆𑀲 𑀧𑀦 ‘‘𑀅𑀳𑁄 𑀯𑀢 𑀫𑁂 𑀮𑀸𑀪𑀸𑀤𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀉𑀧𑁆𑀧𑀦𑁆𑀦𑁄 𑀕𑁂𑀳𑀲𑀺𑀢𑁄 𑀯𑀺𑀢𑀓𑁆𑀓𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀏𑀓𑀓𑀁.

𑀤𑀼𑀓𑀸𑀤𑀻𑀲𑀼 𑀓𑁄𑀥𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑁂 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀜𑁆𑀜𑁂𑀯 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀤𑀼𑀓𑁂𑀲𑀼 𑀢𑀸𑀯 𑀉𑀧𑀦𑀸𑀳𑁄𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀓𑁄𑀥𑁄 ‘‘𑀅𑀓𑁆𑀓𑁄𑀘𑁆𑀙𑀺𑀫’’𑀦𑁆𑀢𑀺𑀆𑀤𑀺𑀦𑀸 𑀆𑀲𑁂𑀯𑀦𑁂𑀦 𑀅𑀧𑀭𑀓𑀸𑀮𑁂 𑀯𑁂𑀭𑀘𑀺𑀢𑁆𑀢𑁂 𑀤𑀴𑁆𑀳𑀢𑀭𑀁 𑀆𑀩𑀤𑁆𑀥𑁄 𑀉𑀧𑀦𑀸𑀳𑁄 𑀦𑀸𑀫, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑁂𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀲𑀸𑀢𑁂𑀮𑀫𑀓𑁆𑀔𑀺𑀢𑀧𑀺𑀮𑁄𑀢𑀺𑀓𑀸 𑀯𑀺𑀬, 𑀲𑁄𑀥𑀺𑀬𑀫𑀸𑀦𑀫𑁆𑀧𑀺𑀲𑁆𑀲 𑀘𑀺𑀢𑁆𑀢𑀁 𑀦 𑀧𑀭𑀺𑀲𑀼𑀚𑁆𑀛𑀢𑀺, 𑀲𑁆𑀯𑀸𑀬𑀁 𑀯𑁂𑀭𑀼𑀧𑀦𑀺𑀩𑀦𑁆𑀥𑀦𑀮𑀓𑁆𑀔𑀡𑁄.

𑀧𑀭𑀕𑀼𑀡𑀁 𑀧𑀦 𑀯𑀺𑀦𑀸𑀲𑁂𑀢𑁆𑀯𑀸 𑀢𑀢𑁆𑀣 𑀤𑁄𑀲𑀫𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑁄 𑀓𑁄𑀥𑁄 𑀫𑀓𑁆𑀔𑁄 𑀦𑀸𑀫. 𑀅𑀬𑀁 𑀳𑀺 𑀧𑀞𑀫𑀢𑀭𑀁 ¶ 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀕𑀽𑀣𑁄 𑀯𑀺𑀬 𑀕𑀽𑀣𑀕𑁆𑀕𑀸𑀳𑀓𑀁 𑀳𑀢𑁆𑀣𑀁 𑀫𑀓𑁆𑀔𑁂𑀢𑀺, 𑀧𑀘𑁆𑀙𑀸 ¶ 𑀧𑀭𑀦𑁆𑀢𑀺 ‘‘𑀫𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄, 𑀲𑁆𑀯𑀸𑀬𑀁 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄. 𑀧𑀴𑀸𑀲𑁂𑀢𑀻𑀢𑀺 𑀧𑀴𑀸𑀲𑁄, 𑀧𑀭𑀲𑁆𑀲 𑀕𑀼𑀡𑁂 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀧𑀯𑀢𑁆𑀢𑁄 𑀮𑁄𑀪𑁄, 𑀲𑁆𑀯𑀸𑀬𑀁 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄.

𑀤𑁆𑀯𑀸𑀭𑀢𑁆𑀢𑀬𑁂𑀧𑀺 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀤𑁄𑀲𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁄 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸 𑀯𑀺𑀬𑀸𑀢𑀺 𑀫𑀸𑀬𑀸, 𑀲𑀸 𑀓𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸. 𑀲𑀞𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀲𑀸𑀞𑁂𑀬𑁆𑀬𑀁, 𑀓𑁂𑀭𑀸𑀝𑀺𑀬𑀁, 𑀢𑀁 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑀁.

𑀅𑀦𑀚𑁆𑀚𑀯𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀅𑀚𑁆𑀚𑀯𑀸𑀤𑀺𑀧𑀝𑀺𑀧𑀓𑁆𑀔𑀅𑀓𑀼𑀲𑀮𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀦𑁆𑀢𑀺𑀆𑀤𑀻𑀲𑀼 𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄, 𑀢𑀢𑁆𑀣 𑀲𑀢𑁆𑀢𑁂 𑀩𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫. 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄. 𑀢𑀢𑁆𑀣 𑀩𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀓𑀸𑀫𑀪𑀯𑁂 𑀳𑀺 𑀲𑀢𑁆𑀢𑀸𑀦𑀁 𑀆𑀮𑀬𑁄 𑀩𑀳𑀼𑀓𑁄, 𑀦 𑀇𑀢𑀭𑁂𑀲𑀼, 𑀢𑀲𑁆𑀫𑀸 𑀲𑁄 𑀅𑀚𑁆𑀛𑀢𑁆𑀢𑀁 𑀇𑀢𑀭𑁂 𑀘 𑀩𑀳𑀺𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀓𑀁.

𑀢𑀺𑀓𑁂𑀲𑀼 𑀧𑀦 𑀮𑁄𑀪𑀸𑀤𑀻𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀦𑀸𑀫. 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀢𑀓𑁆𑀓𑀸 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀦𑀸𑀫. 𑀢𑁂 𑀏𑀯 𑀲𑀜𑁆𑀜𑀸𑀲𑀻𑀲𑁂𑀦 𑀢𑀺𑀲𑁆𑀲𑁄 𑀅𑀓𑀼𑀲𑀮𑀲𑀜𑁆𑀜𑀸. 𑀲𑀪𑀸𑀯𑀝𑁆𑀞𑁂𑀦 𑀢𑀺𑀲𑁆𑀲𑁄 𑀅𑀓𑀼𑀲𑀮𑀥𑀸𑀢𑀼𑀬𑁄𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀦𑀸𑀫, 𑀢𑀸𑀦𑀺 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁, 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀯𑀸 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀤𑀺𑀝𑁆𑀞𑀸𑀲𑀯𑀯𑀚𑁆𑀚𑀺𑀢𑀸 𑀓𑀸𑀫𑀸𑀲𑀯𑀸𑀤𑀬𑁄 𑀢𑀬𑁄 𑀆𑀲𑀯𑀸 𑀦𑀸𑀫. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀦𑀸𑀫.

𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀘 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀦𑀸𑀫. 𑀢𑀢𑁆𑀣 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀢𑀡𑁆𑀳𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 ¶ 𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀧𑀦 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸. 𑀓𑀸𑀫𑀥𑀸𑀢𑀼𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀭𑀸𑀕𑁄 𑀓𑀸𑀫𑀢𑀡𑁆𑀳𑀸, 𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀝𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀡𑁆𑀳𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀯𑀺𑀪𑀯𑀢𑀡𑁆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀘 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀦𑀸𑀫. 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀘 𑀧𑀼𑀦 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀦𑀸𑀫. 𑀢𑀢𑁆𑀣 𑀦𑀺𑀭𑁄𑀥𑀢𑀡𑁆𑀳𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄. 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀘 𑀢𑀺𑀲𑁆𑀲𑁄 𑀏𑀲𑀦𑀸 𑀦𑀸𑀫. 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀕𑀯𑁂𑀲𑀦𑀸. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 ¶ 𑀯𑀺𑀥𑀸, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀫𑀸𑀦𑀯𑀺𑀥𑀸 𑀢𑀺𑀲𑁆𑀲𑁄 𑀯𑀺𑀥𑀸 𑀦𑀸𑀫. 𑀫𑀸𑀦𑁄 𑀳𑀺 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀯𑀺𑀤𑀳𑀦𑀢𑁄 𑀫𑀜𑁆𑀜𑀦𑀢𑁄 ‘‘𑀯𑀺𑀥𑀸’’𑀢𑀺 𑀯𑀼𑀘𑁆𑀘𑀢𑀺. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀦𑀺 𑀪𑀬𑀸𑀦𑀺 𑀢𑀻𑀡𑀺 𑀪𑀬𑀸𑀦𑀺 𑀦𑀸𑀫. ‘‘𑀅𑀢𑀻𑀢𑀁 𑀯𑀸 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀢𑀻𑀡𑀺, 𑀩𑀼𑀤𑁆𑀥𑀸𑀤𑀻𑀲𑀼 𑀓𑀗𑁆𑀔𑀦𑀯𑀺𑀘𑀺𑀓𑀺𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀸 𑀢𑀺𑀲𑁆𑀲𑁄 𑀅𑀯𑀺𑀚𑁆𑀚𑀸 𑀢𑀻𑀡𑀺 𑀢𑀫𑀸𑀦𑀺 𑀦𑀸𑀫. 𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀲𑁂𑀦 𑀢𑀲𑁆𑀲 𑀯𑀺𑀪𑀗𑁆𑀕𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀯 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀏𑀯 𑀧𑀝𑀺𑀘𑁆𑀙𑀸𑀤𑀓𑀢𑁆𑀢𑁂𑀦𑀧𑀺 𑀢𑀫𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀁 𑀓𑀺𑀜𑁆𑀘𑀺 𑀧𑀦 𑀲𑀢𑁆𑀢𑀲𑁆𑀲 𑀲𑀼𑀔𑀸𑀤𑀺𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀏𑀓𑀁 𑀢𑀺𑀢𑁆𑀣𑀸𑀬𑀢𑀦𑀁, 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽𑀢𑀺 𑀤𑀼𑀢𑀺𑀬𑀁, 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸𑀢𑀺 𑀢𑀢𑀺𑀬𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺 𑀦𑀸𑀫. 𑀢𑀢𑁆𑀣 𑀧𑀞𑀫𑀯𑀸𑀤𑀻 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸𑀤𑀺𑀓𑀁, 𑀕𑀢𑀺𑀉𑀧𑀥𑀺𑀆𑀤𑀺𑀓𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑀜𑁆𑀘 𑀲𑀩𑁆𑀩𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀓𑀫𑁆𑀫𑀯𑀺𑀧𑀸𑀓𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀇𑀢𑀭𑁂 𑀧𑀦 𑀤𑁆𑀯𑁂𑀧𑀺 𑀲𑀩𑁆𑀩𑀁 𑀳𑁂𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀲𑁆𑀲𑀭𑀳𑁂𑀢𑀼𑀓𑀁, 𑀅𑀳𑁂𑀢𑀼𑀓𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀺𑀡𑁆𑀡𑀁 𑀯𑀸𑀤𑀸𑀦𑀁 𑀯𑀲𑁂𑀦𑁂𑀯 𑀧𑀬𑁄𑀚𑀦𑀸𑀪𑀸𑀯𑀸𑀤𑀺𑀢𑁄 𑀬𑀣𑀸𑀦𑀼𑀭𑀽𑀧𑀁 𑀤𑁄𑀲𑁄 𑀜𑀸𑀢𑀩𑁆𑀩𑁄. 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦𑁂𑀢𑁆𑀣 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑀭𑀸𑀕𑀤𑁄𑀲𑀫𑁄𑀳𑀸 ¶ 𑀧𑀦 𑀢𑀬𑁄 𑀧𑀮𑀺𑀩𑁄𑀥𑀝𑁆𑀞𑁂𑀦 𑀓𑀺𑀜𑁆𑀘𑀦𑀸 𑀦𑀸𑀫. 𑀢𑁂 𑀏𑀯 𑀳𑀺 𑀓𑀺𑀮𑁂𑀲𑀝𑁆𑀞𑁂𑀦 𑀅𑀗𑁆𑀕𑀡𑀸𑀦𑀺, 𑀫𑀮𑀻𑀦𑀪𑀸𑀯𑀓𑀭𑀡𑀝𑁆𑀞𑁂𑀦 𑀫𑀮𑀸𑀦𑀺, 𑀧𑀓𑁆𑀔𑀮𑀦𑀧𑀸𑀢𑀳𑁂𑀢𑀼𑀢𑁄 𑀯𑀺𑀲𑀫𑀸𑀦𑀺 𑀘 𑀳𑁄𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀸𑀬𑀯𑀘𑀻𑀫𑀦𑁄𑀯𑀺𑀲𑀫𑀸𑀦𑀺 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀯𑀺𑀲𑀫𑀸𑀦𑀺 𑀦𑀸𑀫. 𑀭𑀸𑀕𑀤𑁄𑀲𑀫𑁄𑀳𑀸 𑀅𑀦𑀼𑀤𑀳𑀦𑀝𑁆𑀞𑁂𑀦 𑀢𑀬𑁄 𑀅𑀕𑁆𑀕𑀻, 𑀓𑀲𑀝𑀦𑀺𑀭𑁄𑀚𑀝𑁆𑀞𑁂𑀦 𑀓𑀲𑀸𑀯𑀸 𑀘 𑀳𑁄𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀸𑀬𑀓𑀲𑀸𑀯𑀸𑀤𑀬𑁄 𑀧𑀦 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸 𑀦𑀸𑀫. 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀢𑁆𑀢𑀺𑀓𑁂 𑀓𑀸𑀫𑀧𑀭𑀺𑀪𑁄𑀕𑁂 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀦𑀸𑀫. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀧𑀦 𑀅𑀢𑁆𑀢𑀤𑀺𑀝𑁆𑀞𑀺 𑀅𑀢𑁆𑀢𑀸𑀦𑀁 𑀅𑀦𑀼𑀕𑀢𑀢𑁆𑀢𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀫. 𑀢𑀲𑁆𑀲𑀸 𑀧𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁂 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑁂𑀲𑀓𑁆𑀔𑀦𑁆𑀥𑁂𑀲𑀼𑀧𑀻𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀘 𑀭𑀽𑀧𑀁 𑀅𑀢𑁆𑀢𑀢𑁄𑀤𑀺𑀆𑀤𑀺𑀦𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀢𑁆𑀢𑀢𑁄 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀧𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀧𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫, 𑀮𑀸𑀫𑀓𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀅𑀭𑀢𑀺𑀢𑁆𑀢𑀺𑀓𑁂 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀲𑀢𑁆𑀢𑀸𑀦𑀁 ¶ 𑀯𑀺𑀳𑀺𑀁𑀲𑀦𑀸 𑀯𑀺𑀳𑁂𑀲𑀸 𑀦𑀸𑀫. 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀅𑀓𑀼𑀲𑀮𑀥𑀫𑁆𑀫𑀲𑁆𑀲 𑀘𑀭𑀺𑀬𑀸 𑀅𑀥𑀫𑁆𑀫𑀘𑀭𑀺𑀬𑀸 𑀦𑀸𑀫. 𑀤𑁄𑀯𑀘𑀲𑁆𑀲𑀢𑀸𑀢𑀺𑀓𑁂 𑀲𑀸𑀯 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀢𑁄, 𑀦𑀸𑀦𑀸𑀪𑀽𑀢𑀢𑁆𑀢𑀸 𑀘 𑀦𑀸𑀦𑀢𑁆𑀢𑀲𑀜𑁆𑀜𑀸 𑀦𑀸𑀫. 𑀉𑀤𑁆𑀥𑀘𑁆𑀘𑀢𑁆𑀢𑀺𑀓𑁂 𑀓𑀼𑀲𑀻𑀢𑀲𑁆𑀲 𑀪𑀸𑀯𑁄 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄𑀯. 𑀅𑀦𑀸𑀤𑀭𑀺𑀬𑀢𑁆𑀢𑀺𑀓𑁂 𑀑𑀯𑀸𑀤𑀲𑁆𑀲 𑀅𑀦𑀸𑀤𑀺𑀬𑀦𑀯𑀲𑀧𑁆𑀧𑀯𑀢𑁆𑀢𑁄 𑀓𑁄𑀥𑁄 𑀅𑀦𑀸𑀤𑀭𑀺𑀬𑀁 𑀦𑀸𑀫. 𑀅𑀲𑁆𑀲𑀤𑁆𑀥𑀺𑀬𑀢𑁆𑀢𑀺𑀓𑁂 𑀭𑀢𑀦𑀢𑁆𑀢𑀬𑀓𑀫𑁆𑀫𑀨𑀮𑀸𑀦𑀁 𑀅𑀲𑀤𑁆𑀤𑀳𑀦𑀯𑀲𑀧𑁆𑀧𑀯𑀢𑁆𑀢𑀸 𑀅𑀓𑀼𑀲𑀮𑀥𑀫𑁆𑀫𑀸 𑀅𑀲𑁆𑀲𑀤𑁆𑀥𑀺𑀬𑀁 𑀦𑀸𑀫. 𑀧𑀜𑁆𑀘𑀯𑀺𑀥𑀫𑀘𑁆𑀙𑀭𑀺𑀬𑀯𑀲𑁂𑀦 ‘‘𑀤𑁂𑀳𑀻’’𑀢𑀺 𑀯𑀘𑀦𑀲𑁆𑀲 𑀅𑀚𑀸𑀦𑀦𑀸 𑀅𑀯𑀤𑀜𑁆𑀜𑀼𑀢𑀸 𑀦𑀸𑀫.

𑀉𑀤𑁆𑀥𑀘𑁆𑀘𑀢𑁆𑀢𑀺𑀓𑁂 ¶ 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀅𑀲𑀁𑀯𑀭𑁄 𑀦𑀸𑀫. 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑁄 𑀤𑀼𑀲𑁆𑀲𑀻𑀮𑁆𑀬𑀁 𑀦𑀸𑀫. 𑀅𑀭𑀺𑀬𑀢𑁆𑀢𑀺𑀓𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀤𑀲𑁆𑀲𑀦𑁄𑀧𑀸𑀲𑀦𑀸𑀤𑀻𑀲𑀼 𑀅𑀦𑀺𑀘𑁆𑀙𑀸 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀸 𑀦𑀸𑀫. 𑀩𑁄𑀥𑀺𑀧𑀓𑁆𑀔𑀺𑀓𑀲𑀤𑁆𑀥𑀫𑁆𑀫𑀲𑁆𑀲 𑀲𑀯𑀦𑀥𑀸𑀭𑀡𑀸𑀤𑀻𑀲𑀼 𑀅𑀦𑀺𑀘𑁆𑀙𑀸 𑀲𑀤𑁆𑀥𑀫𑁆𑀫𑀁 𑀅𑀲𑁄𑀢𑀼𑀓𑀫𑁆𑀬𑀢𑀸 𑀦𑀸𑀫. 𑀧𑀭𑀲𑁆𑀲 𑀤𑁄𑀲𑀸𑀭𑁄𑀧𑀦𑁂 𑀭𑀦𑁆𑀥𑀕𑀯𑁂𑀲𑀺𑀢𑀸𑀲𑀗𑁆𑀔𑀸𑀢𑁄 𑀉𑀧𑀸𑀭𑀫𑁆𑀪𑁄𑀯 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀸 𑀦𑀸𑀫. 𑀫𑀼𑀝𑁆𑀞𑀲𑁆𑀲𑀘𑁆𑀘𑀢𑁆𑀢𑀺𑀓𑁂 𑀉𑀤𑁆𑀥𑀘𑁆𑀘𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀦𑀸𑀫. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁆𑀢𑀺𑀓𑁂 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸, 𑀲𑀘𑁆𑀘𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀁 𑀆𑀯𑀚𑁆𑀚𑀦𑀘𑀺𑀢𑁆𑀢𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀸𑀫𑀕𑁆𑀕𑀸 𑀓𑀼𑀫𑁆𑀫𑀕𑁆𑀕𑁄 𑀦𑀸𑀫, 𑀫𑀺𑀘𑁆𑀙𑀸𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀸 𑀦𑀸𑀫. 𑀣𑀺𑀦𑀫𑀺𑀤𑁆𑀥𑀁 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁 𑀦𑀸𑀫. 𑀢𑀺𑀓𑀁.

𑀘𑀢𑀼𑀓𑁆𑀓𑁂𑀲𑀼 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 ‘‘𑀓𑀢𑁆𑀣 𑀫𑀦𑀸𑀧𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑁄 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸 𑀦𑀸𑀫. 𑀦 𑀕𑀘𑁆𑀙𑀦𑁆𑀢𑀺 𑀏𑀢𑀸𑀳𑀺 𑀅𑀭𑀺𑀬𑀸𑀢𑀺 𑀅𑀕𑀢𑀺𑀬𑁄, 𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑀸. 𑀢𑀸 𑀳𑀺 𑀅𑀕𑀦𑁆𑀢𑀩𑁆𑀩𑀫𑀕𑁆𑀕𑀕𑀫𑀦𑀸𑀦𑀺 𑀅𑀓𑀢𑁆𑀢𑀩𑁆𑀩𑀓𑀭𑀡𑀸𑀦𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀦𑀸𑀫. 𑀢𑀢𑁆𑀣 𑀙𑀦𑁆𑀤𑁄𑀢𑀺 𑀧𑀓𑁆𑀔𑀧𑀸𑀢𑀭𑀸𑀕𑁄. 𑀪𑀬𑀦𑁆𑀢𑀺 𑀢𑀣𑀸𑀧𑀯𑀢𑁆𑀢𑁄 𑀤𑁄𑀲𑁄. 𑀅𑀦𑀺𑀘𑁆𑀘𑀸𑀤𑀻𑀲𑀼 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸 𑀯𑀺𑀧𑀭𑀻𑀢𑀢𑁄 𑀥𑀫𑁆𑀫𑁂 𑀏𑀲𑀦𑀢𑁄. 𑀢𑁂𑀲𑀼 𑀯𑀸 𑀆𑀲𑀦𑀢𑁄 𑀧𑀯𑀺𑀲𑀦𑀢𑁄 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸 𑀦𑀸𑀫. 𑀢𑁂 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀬𑁄 𑀢𑀬𑁄 𑀳𑀼𑀢𑁆𑀯𑀸 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀁, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑀸 𑀙, 𑀤𑀼𑀓𑁆𑀔𑁂 𑀲𑀼𑀔𑀁, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑀸 𑀤𑁆𑀯𑁂 𑀘𑀸𑀢𑀺 𑀅𑀝𑁆𑀞 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀸 𑀤𑁆𑀯𑁂 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀸 𑀤𑁆𑀯𑁂 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀤𑀺𑀝𑁆𑀞𑁂 ¶ ¶ 𑀤𑀺𑀝𑁆𑀞𑀁, 𑀅𑀲𑀼𑀢𑁂 𑀲𑀼𑀢𑀁, 𑀅𑀫𑀼𑀢𑁂 𑀫𑀼𑀢𑀁, 𑀅𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 𑀦𑀸𑀫. 𑀤𑀺𑀝𑁆𑀞𑀸𑀤𑀻𑀲𑀼 𑀧𑀦 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀫𑀼𑀢𑀁 𑀅𑀯𑀺𑀜𑁆𑀜𑀸𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 𑀦𑀸𑀫. 𑀇𑀫𑁂 𑀘 𑀧𑀼𑀭𑀺𑀫𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀫𑀼𑀲𑀸𑀯𑀸𑀤𑀸 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀦𑀸𑀫. 𑀫𑀼𑀲𑀸𑀯𑀸𑀤𑀸𑀤𑀺𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀦𑀸𑀫. 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀪𑀬𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀦𑀸𑀫. 𑀭𑀸𑀚𑀘𑁄𑀭𑀅𑀕𑁆𑀕𑀺𑀉𑀤𑀓𑀪𑀬𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀫𑀼𑀤𑁆𑀤𑀁 𑀑𑀭𑁄𑀳𑀦𑁆𑀢𑀲𑁆𑀲 𑀧𑀦 𑀉𑀧𑁆𑀧𑀚𑁆𑀚𑀦𑀓𑀸𑀦𑀺 𑀊𑀫𑀺𑀓𑀼𑀫𑁆𑀪𑀻𑀮𑀆𑀯𑀝𑁆𑀝𑀲𑀼𑀲𑀼𑀓𑀸𑀪𑀬𑀸𑀦𑀺 𑀘 𑀘𑀢𑁆𑀢𑀸𑀭𑀺, 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀦𑀺 𑀘𑀢𑁆𑀢𑀸𑀭𑀺 𑀘𑀸𑀢𑀺 𑀇𑀫𑀸𑀦𑀺 𑀯𑀸 𑀅𑀧𑀭𑀸𑀦𑀺 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀦𑀸𑀫. 𑀢𑀢𑁆𑀣 𑀲𑀼𑀲𑀼𑀓𑀸𑀢𑀺 𑀘𑀡𑁆𑀟𑀫𑀘𑁆𑀙𑀸. 𑀲𑀩𑁆𑀩𑀸𑀦𑀺𑀧𑀺 𑀘𑁂𑀢𑀸𑀦𑀺 𑀪𑀬𑀸𑀦𑀺 𑀧𑀝𑀺𑀖𑀘𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀁 𑀲𑀼𑀔𑀤𑀼𑀓𑁆𑀔𑀸𑀤𑀺𑀓𑀁 𑀲𑀬𑀁𑀓𑀢𑀁 𑀧𑀭𑀁𑀓𑀢𑀁 𑀉𑀪𑀬𑀓𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄 𑀦𑀸𑀫. 𑀘𑀢𑀼𑀓𑁆𑀓𑀁.

𑀧𑀜𑁆𑀘𑀓𑁂𑀲𑀼 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀢𑀺𑀆𑀤𑀻𑀲𑀼 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼 𑀳𑁂𑀝𑁆𑀞𑀸𑀪𑀸𑀯𑀢𑁄, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀫𑀭𑀸𑀕𑀧𑀝𑀺𑀖𑀸 𑀧𑀜𑁆𑀘 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫. 𑀉𑀤𑁆𑀥𑀦𑁆𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼 𑀉𑀧𑀭𑀺𑀪𑀸𑀯𑀢𑁄, 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀪𑀚𑀦𑁆𑀢𑀻𑀢𑀺 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫. 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀬𑁄 𑀧𑀜𑁆𑀘 𑀮𑀕𑁆𑀕𑀦𑀝𑁆𑀞𑁂𑀦 𑀲𑀗𑁆𑀕𑀸 𑀦𑀸𑀫. 𑀢𑁂 𑀏𑀯 𑀧𑀜𑁆𑀘 𑀅𑀦𑀼𑀧𑀯𑀺𑀲𑀦𑀝𑁆𑀞𑁂𑀦, 𑀢𑀼𑀤𑀦𑀝𑁆𑀞𑁂𑀦 𑀘 𑀧𑀜𑁆𑀘 𑀲𑀮𑁆𑀮𑀸 𑀦𑀸𑀫. 𑀲𑀢𑁆𑀣𑀼𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼 𑀓𑀗𑁆𑀔𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑀘𑀺𑀢𑁆𑀢𑀢𑀸 𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀓𑀘𑀯𑀭𑀔𑀸𑀡𑀼𑀓𑀪𑀸𑀯𑀓𑀭𑀡𑀢𑁆𑀢𑀸 𑀘𑁂𑀢𑁄𑀔𑀺𑀮𑀸 𑀦𑀸𑀫. 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄. 𑀓𑀸𑀬𑁂…𑀧𑁂… 𑀭𑀽𑀧𑁂…𑀧𑁂… 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 ¶ 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀜𑁆𑀘 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀳𑀡𑀢𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀦𑀸𑀫. 𑀢𑀢𑁆𑀣 𑀓𑀸𑀬𑁂𑀢𑀺 𑀅𑀚𑁆𑀛𑀢𑁆𑀢𑀺𑀓𑁂 𑀓𑀸𑀬𑁂, 𑀭𑀽𑀧𑁂𑀢𑀺 𑀩𑀳𑀺𑀤𑁆𑀥𑀸𑀭𑀽𑀧𑁂. 𑀲𑀜𑁆𑀜𑀻 𑀅𑀢𑁆𑀢𑀸, 𑀅𑀲𑀜𑁆𑀜𑀻 𑀅𑀢𑁆𑀢𑀸, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀅𑀢𑁆𑀢𑀸, 𑀲𑀁𑀯𑀺𑀚𑁆𑀚𑀫𑀸𑀦𑁄 𑀧𑀦 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀯𑀸 𑀧𑀸𑀧𑀼𑀡𑀸𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄 𑀦𑀸𑀫.

𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀫𑀚𑁆𑀚𑀧𑀸𑀦𑀧𑀭𑀺𑀬𑁄𑀲𑀸𑀦𑀸 𑀧𑀜𑁆𑀘 𑀯𑁂𑀭𑀓𑀭𑀡𑀝𑁆𑀞𑁂𑀦 𑀯𑁂𑀭𑀸 𑀦𑀸𑀫. 𑀜𑀸𑀢𑀺𑀪𑁄𑀕𑀭𑁄𑀕𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑀸𑀦𑀺 𑀧𑀜𑁆𑀘 𑀩𑁆𑀬𑀲𑀦𑀸 𑀦𑀸𑀫. 𑀢𑀢𑁆𑀣 𑀩𑁆𑀬𑀲𑀦𑀸𑀢𑀺 𑀯𑀺𑀦𑀸𑀲𑀲𑀳𑀚𑀸𑀢𑀸, 𑀢𑀢𑁄 𑀉𑀧𑁆𑀧𑀦𑁆𑀦𑀸 𑀅𑀓𑀼𑀲𑀮𑀸 ¶ . 𑀩𑀳𑀼𑀚𑀦𑀲𑁆𑀲 𑀅𑀧𑁆𑀧𑀺𑀬𑀢𑀸, 𑀯𑁂𑀭𑀩𑀳𑀼𑀮𑀢𑀸, 𑀯𑀚𑁆𑀚𑀩𑀳𑀼𑀮𑀢𑀸, 𑀲𑀫𑁆𑀫𑀽𑀴𑁆𑀳𑀫𑀭𑀡𑀁, 𑀅𑀧𑀸𑀬𑀕𑀫𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀅𑀓𑁆𑀔𑀦𑁆𑀢𑀺𑀬𑀸 𑀆𑀤𑀻𑀦𑀯𑀸, 𑀅𑀦𑀥𑀺𑀯𑀸𑀲𑀦𑀸𑀬 𑀤𑁄𑀲𑀸𑀢𑀺 𑀅𑀢𑁆𑀣𑁄. 𑀆𑀚𑀻𑀯𑀓𑀪𑀬𑀁 𑀅𑀲𑀺𑀮𑁄𑀓𑀪𑀬𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁 𑀫𑀭𑀡𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀪𑀬𑀸𑀦𑀺 𑀦𑀸𑀫. 𑀬𑀸𑀯𑀤𑀢𑁆𑀣𑀁 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀪𑁄𑀕𑁂𑀦 𑀘𑁂𑀯 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀘𑀸𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀯𑀸𑀤𑀸 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀦𑀸𑀫. 𑀧𑀜𑁆𑀘𑀓𑀁.

𑀙𑀓𑁆𑀓𑁂𑀲𑀼 𑀧𑀦 𑀓𑁄𑀥𑁄 𑀫𑀓𑁆𑀔𑁄 𑀇𑀲𑁆𑀲𑀸 𑀲𑀸𑀞𑁂𑀬𑁆𑀬𑀁 𑀧𑀸𑀧𑀺𑀘𑁆𑀙𑀢𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸𑀢𑀺 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀦𑁆𑀤𑀭𑀸𑀕𑁄𑀢𑀺 𑀇𑀫𑁂 𑀙 𑀙𑀦𑁆𑀤𑀭𑀸𑀕𑀸 𑀕𑁂𑀳𑀲𑀺𑀢𑀸 𑀥𑀫𑁆𑀫𑀸 𑀦𑀸𑀫. 𑀅𑀫𑀦𑀸𑀧𑀺𑀬𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀝𑀺𑀖𑁄 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺 𑀦𑀸𑀫. 𑀯𑀺𑀭𑁄𑀥𑁄 𑀏𑀯 𑀯𑀢𑁆𑀣𑀼 𑀯𑀺𑀭𑁄𑀥𑀯𑀢𑁆𑀣𑀼. 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀡𑁆𑀳𑀸𑀯 𑀙 𑀢𑀡𑁆𑀳𑀸𑀓𑀸𑀬𑀸 𑀦𑀸𑀫. 𑀲𑀢𑁆𑀣𑀼𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼, 𑀅𑀧𑁆𑀧𑀫𑀸𑀤𑁂, 𑀧𑀝𑀺𑀲𑀦𑁆𑀣𑀸𑀭𑁂 𑀘 𑀅𑀕𑀸𑀭𑀯𑀸 𑀙 𑀅𑀕𑀸𑀭𑀯𑀸 𑀦𑀸𑀫. 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀦𑀺𑀤𑁆𑀤𑀸𑀲𑀗𑁆𑀕𑀡𑀺𑀓𑀲𑀁𑀲𑀕𑁆𑀕𑀧𑀧𑀜𑁆𑀘𑀸𑀭𑀸𑀫𑀢𑀸 𑀘 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫, 𑀧𑀭𑀺𑀳𑀸𑀦𑀺𑀓𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀯𑀦𑀤𑀲𑁆𑀲𑀦𑀲𑀫𑀼𑀮𑁆𑀮𑀧𑀦𑀧𑀭𑀺𑀪𑁄𑀕𑀓𑀸𑀬𑀲𑀁𑀲𑀕𑁆𑀕𑁂𑀲𑀼 ¶ 𑀧𑀜𑁆𑀘𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸 𑀲𑀁𑀲𑀕𑁆𑀕𑀸𑀭𑀸𑀫𑀢𑀸. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑁂𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸 𑀧𑀧𑀜𑁆𑀘𑀸𑀭𑀸𑀫𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀫𑁆𑀫𑀪𑀲𑁆𑀲𑀦𑀺𑀤𑁆𑀤𑀸𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀘𑀢𑁆𑀢𑀸𑀭𑁄, 𑀤𑁄𑀯𑀘𑀲𑁆𑀲𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸 𑀤𑁆𑀯𑁂 𑀘𑀸𑀢𑀺 𑀇𑀫𑁂 𑀅𑀧𑀭𑁂𑀧𑀺 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫.

𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀘𑀸𑀭𑀸 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸 𑀦𑀸𑀫, 𑀯𑀺𑀢𑀓𑁆𑀓𑀸𑀤𑀬𑁄 𑀥𑀫𑁆𑀫𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀏𑀲 𑀦𑀬𑁄 𑀇𑀢𑀭𑀤𑁆𑀯𑀬𑁂𑀧𑀺. 𑀅𑀜𑁆𑀜𑀸𑀡𑀲𑀳𑀺𑀢𑀸 𑀧𑀦𑁂𑀢𑁆𑀣 𑀯𑁂𑀤𑀦𑀼𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀸 ‘‘𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸 ‘‘𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 𑀙𑀓𑁆𑀓𑀢𑁆𑀢𑀬𑁂𑀦 𑀯𑀼𑀢𑁆𑀢𑀸. ‘‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺 𑀯𑀸, ‘‘𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺 𑀯𑀸, ‘‘𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸, ‘‘𑀅𑀢𑁆𑀢𑀦𑀸 𑀯𑀸 𑀅𑀦𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸, ‘‘𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸, ‘‘𑀲𑁄 𑀫𑁂 𑀅𑀬𑀁 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄 𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀸 𑀙 𑀤𑀺𑀝𑁆𑀞𑀺𑀬𑁄 𑀦𑀸𑀫. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀦𑀢𑁆𑀣𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀧𑀜𑁆𑀘𑀧𑀺 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑁂𑀲𑀸𑀦𑀁 𑀚𑀸𑀦𑀦𑀯𑀲𑁂𑀦 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀤𑀺𑀝𑁆𑀞𑀺, 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀦 ‘‘𑀅𑀢𑁆𑀢𑀸’’𑀢𑀺, 𑀇𑀢𑀭𑁂 𑀘 ‘‘𑀅𑀦𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀯𑀸 𑀅𑀦𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀤𑀺𑀝𑁆𑀞𑀺, 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 ¶ 𑀧𑀦 ‘‘𑀅𑀦𑀢𑁆𑀢𑀸’’𑀢𑀺, 𑀇𑀢𑀭𑁂 𑀘 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀦𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀤𑀺𑀝𑁆𑀞𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀙𑀓𑁆𑀓𑀁.

𑀲𑀢𑁆𑀢𑀓𑁂𑀲𑀼 𑀧𑀦 𑀓𑀸𑀫𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀪𑀯𑀭𑀸𑀕𑀅𑀯𑀺𑀚𑁆𑀚𑀸 𑀲𑀢𑁆𑀢 𑀣𑀸𑀫𑀕𑀢𑀝𑁆𑀞𑁂𑀦, 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀘 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀦𑀢𑁄 𑀅𑀦𑀼𑀲𑀬𑀸 𑀦𑀸𑀫. 𑀢𑁂 𑀏𑀯 𑀲𑀢𑁆𑀢𑁂 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑀦𑀢𑁄 𑀲𑀁𑀬𑁄𑀚𑀦𑀸𑀦𑀺. 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀲𑁆𑀲𑀤𑁆𑀥𑀺𑀬𑀁 ¶ 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀲𑁆𑀲𑀼𑀢𑀢𑀸 𑀓𑁄𑀲𑀚𑁆𑀚𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀤𑀼𑀧𑁆𑀧𑀜𑁆𑀜𑀢𑀸𑀢𑀺 𑀇𑀫𑁂 𑀲𑀢𑁆𑀢 𑀅𑀲𑀢𑀁 𑀅𑀲𑀧𑁆𑀧𑀼𑀭𑀺𑀲𑀸𑀦𑀁, 𑀅𑀲𑀦𑁆𑀢𑀸 𑀯𑀸 𑀮𑀸𑀫𑀓𑀸 𑀥𑀫𑁆𑀫𑀸𑀢𑀺 𑀅𑀲𑀤𑁆𑀥𑀫𑁆𑀫𑀸 𑀦𑀸𑀫. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺 𑀦𑀸𑀫. 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀸𑀦𑀸𑀢𑀺𑀫𑀸𑀦𑁄 𑀑𑀫𑀸𑀦𑁄 𑀅𑀥𑀺𑀫𑀸𑀦𑁄 𑀅𑀲𑁆𑀫𑀺𑀫𑀸𑀦𑁄 𑀫𑀺𑀘𑁆𑀙𑀸𑀫𑀸𑀦𑁄𑀢𑀺 𑀇𑀫𑁂 𑀲𑀢𑁆𑀢 𑀫𑀸𑀦𑀸 𑀦𑀸𑀫. ‘‘𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺, 𑀢𑀣𑀸 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑀺𑀩𑁆𑀩𑁄 𑀓𑀩𑀴𑀻𑀓𑀸𑀭𑀪𑀓𑁆𑀔𑁄 𑀅𑀢𑁆𑀢𑀸, 𑀭𑀽𑀧𑀮𑁄𑀓𑁂 𑀭𑀽𑀧𑀻 𑀫𑀦𑁄𑀫𑀬𑁄 𑀅𑀢𑁆𑀢𑀸, 𑀘𑀢𑀽𑀲𑀼 𑀅𑀭𑀽𑀧𑀪𑀯𑁂𑀲𑀼 𑀘𑀢𑀼𑀩𑁆𑀩𑀺𑀥𑁄 𑀅𑀭𑀽𑀧𑀻 𑀅𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀢𑁆𑀢 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄 𑀦𑀸𑀫. 𑀏𑀢𑁆𑀣 𑀘 𑀆𑀤𑀺𑀢𑁄 𑀢𑀺𑀲𑁆𑀲𑁄 𑀤𑀺𑀝𑁆𑀞𑀺𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀅𑀢𑁆𑀢𑀢𑁄 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀘𑀢𑀲𑁆𑀲𑁄 𑀅𑀭𑀽𑀧𑀓𑁆𑀔𑀦𑁆𑀥𑁂𑀢𑀺 𑀜𑀸𑀢𑀩𑁆𑀩𑀸. 𑀲𑀢𑁆𑀢𑀓𑀁.

𑀅𑀝𑁆𑀞𑀓𑁂𑀲𑀼 𑀧𑀦 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀜𑁆𑀘𑀸𑀢𑀺 𑀅𑀝𑁆𑀞 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀦𑀸𑀫. ‘‘𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀫𑁂’’𑀢𑀺 𑀏𑀓𑀁, 𑀢𑀣𑀸 ‘‘𑀓𑀢𑀁 𑀫𑁂’’𑀢𑀺, ‘‘𑀫𑀕𑁆𑀕𑁄 𑀫𑁂 𑀕𑀦𑁆𑀢𑀩𑁆𑀩𑁄’’𑀢𑀺, ‘‘𑀕𑀢𑁄’’𑀢𑀺, ‘‘𑀅𑀧𑁆𑀧𑀓𑀁 𑀫𑁂 𑀪𑀼𑀢𑁆𑀢’’𑀦𑁆𑀢𑀺, ‘‘𑀲𑀼𑀪𑀼𑀢𑁆𑀢’’𑀦𑁆𑀢𑀺, ‘‘𑀆𑀩𑀸𑀥𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺, ‘‘𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸’’𑀢𑀺 𑀏𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺 𑀦𑀸𑀫, 𑀓𑀼𑀲𑀻𑀢𑀲𑁆𑀲 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀮𑀸𑀪𑁂 𑀅𑀮𑀸𑀪𑁂 𑀘 𑀬𑀲𑁂 𑀅𑀬𑀲𑁂 𑀘 𑀧𑀲𑀁𑀲𑀸𑀬 𑀦𑀺𑀦𑁆𑀤𑀸𑀬 𑀘 𑀲𑀼𑀔𑁂 𑀤𑀼𑀓𑁆𑀔𑁂 𑀘 𑀬𑀣𑀸𑀓𑁆𑀓𑀫𑀁 𑀭𑀸𑀕𑀤𑁄𑀲𑁂𑀳𑀺 𑀘𑀺𑀢𑁆𑀢𑀲𑁆𑀲 𑀧𑀝𑀺𑀳𑀦𑀦𑀁 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀝𑀺𑀖𑀸𑀢𑁄 𑀦𑀸𑀫. 𑀳𑁂𑀝𑁆𑀞𑀸 𑀤𑁆𑀯𑀻𑀳𑀺 𑀘𑀢𑀼𑀓𑁆𑀓𑁂𑀳𑀺 𑀯𑀼𑀢𑁆𑀢𑀸 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑀸 𑀦𑀸𑀫. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸 𑀦𑀸𑀫. 𑀪𑀺𑀓𑁆𑀔𑀽𑀳𑀺 𑀯𑀺𑀚𑁆𑀚𑀫𑀸𑀦𑀸𑀬 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑀲𑁆𑀲 ‘‘𑀦 𑀲𑀭𑀸𑀫𑀻’’𑀢𑀺 𑀦𑀺𑀩𑁆𑀩𑁂𑀞𑀦𑀁 𑀏𑀓𑀁, ‘‘𑀢𑁆𑀯𑀁 𑀩𑀸𑀮𑁄’’𑀢𑀺𑀆𑀤𑀺𑀦𑀸 ¶ 𑀘𑁄𑀤𑀓𑀧𑀝𑀺𑀧𑁆𑀨𑀭𑀡𑀁 𑀏𑀓𑀁, 𑀢𑀣𑀸 ‘‘𑀢𑀼𑀯𑀁 𑀘𑁂𑀢𑀫𑀸𑀧𑀦𑁆𑀦𑁄’’𑀢𑀺 𑀘𑁄𑀤𑀓𑀲𑁆𑀲 𑀧𑀘𑁆𑀘𑀸𑀭𑁄𑀧𑀦𑀁, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀁, 𑀲𑀗𑁆𑀖𑁂 𑀩𑀸𑀳𑀸𑀯𑀺𑀓𑁆𑀔𑁂𑀧𑀪𑀡𑀦𑀁, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀞𑀦𑀁, 𑀲𑀗𑁆𑀖𑀁, 𑀘𑁄𑀤𑀓𑀜𑁆𑀘 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀓𑁆𑀓𑀫𑀦𑀁, 𑀘𑁄𑀤𑀦𑀸𑀪𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀧𑀼𑀭𑀺𑀲𑀤𑁄𑀲𑀸 𑀦𑀸𑀫. 𑀅𑀲𑀜𑁆𑀜𑀻 𑀅𑀢𑁆𑀢𑀸 𑀭𑀽𑀧𑀻, 𑀅𑀭𑀽𑀧𑀻 ¶ , 𑀭𑀽𑀧𑀻 𑀘 𑀅𑀭𑀽𑀧𑀻 𑀘, 𑀦𑁂𑀯𑀭𑀽𑀧𑀻𑀦𑀸𑀭𑀽𑀧𑀻, 𑀅𑀦𑁆𑀢𑀯𑀸, 𑀅𑀦𑀦𑁆𑀢𑀯𑀸, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘, 𑀦𑁂𑀯𑀦𑁆𑀢𑀯𑀸𑀦𑀸𑀦𑀦𑁆𑀢𑀯𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀦𑀸𑀫. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀅𑀢𑁆𑀢𑀸 𑀭𑀽𑀧𑀻 𑀅𑀭𑀽𑀧𑀻𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀦𑀸𑀫. 𑀅𑀝𑁆𑀞𑀓𑀁.

𑀦𑀯𑀓𑁂𑀲𑀼 𑀧𑀦 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀧𑀺𑀬𑀲𑁆𑀲 𑀫𑁂 𑀅𑀦𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀦𑀯 𑀆𑀖𑀸𑀢𑀸 𑀏𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀦𑀸𑀫. 𑀓𑁄𑀥𑁄 𑀫𑀓𑁆𑀔𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀫𑀼𑀲𑀸𑀯𑀸𑀤𑁄 𑀧𑀸𑀧𑀺𑀘𑁆𑀙𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑀸𑀦𑀺 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺 𑀦𑀸𑀫. ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀦𑀯𑀯𑀺𑀥𑀸 𑀫𑀸𑀦𑀸 𑀦𑀸𑀫. ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀢𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀢𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀢𑀣𑀸 𑀧𑀭𑀺𑀕𑁆𑀕𑀳𑁄, 𑀫𑀘𑁆𑀙𑀭𑀺𑀬𑀁, 𑀆𑀭𑀓𑁆𑀔𑁄, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸𑀤𑀺𑀅𑀦𑁂𑀓𑁂 𑀧𑀸𑀧𑀓𑀸 𑀥𑀫𑁆𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀇𑀫𑁂 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 𑀦𑀸𑀫. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄𑀢𑀺 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀽𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼 𑀯𑀺𑀢𑀓𑁆𑀓𑀯𑀺𑀦𑀺𑀘𑁆𑀙𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀮𑀸𑀪𑀁 𑀳𑀺 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬, 𑀇𑀤𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀺𑀅𑀢𑁆𑀣𑀸𑀬𑀸’’𑀢𑀺 𑀏𑀯𑀁 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀙𑀦𑁆𑀤𑀭𑀸𑀕𑁄 𑀤𑀼𑀩𑁆𑀩𑀮𑀭𑀸𑀕𑁄, 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀲𑁆𑀫𑀻’’𑀢𑀺, ‘‘𑀅𑀳𑀫𑀲𑁆𑀫𑀻’’𑀢𑀺, ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺, ‘‘𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀅𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀅𑀲𑀜𑁆𑀜𑀻 ¶ 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀇𑀫𑀸𑀦𑀺 𑀦𑀯 𑀘𑀮𑀦𑀝𑁆𑀞𑁂𑀦 𑀇𑀜𑁆𑀚𑀺𑀢𑀸𑀦𑀺 𑀦𑀸𑀫. 𑀇𑀫𑀸𑀦𑁂𑀯 𑀫𑀜𑁆𑀜𑀦𑀝𑁆𑀞𑁂𑀦 𑀫𑀜𑁆𑀜𑀺𑀢𑀸𑀦𑀺, 𑀯𑀺𑀧𑁆𑀨𑀦𑁆𑀤𑀦𑀢𑁄 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺, 𑀧𑀧𑀜𑁆𑀘𑀦𑀢𑁄 𑀧𑀧𑀜𑁆𑀘𑀺𑀢𑀸𑀦𑀺, 𑀢𑀸𑀦𑁂𑀯 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀢𑀸𑀦𑀺 𑀘 𑀦𑀸𑀫 𑀳𑁄𑀦𑁆𑀢𑀺. 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀧𑀜𑁆𑀘𑀳𑀺 𑀦𑀯𑀓𑁂𑀳𑀺 𑀫𑀸𑀦𑁄 𑀏𑀯 𑀓𑀣𑀺𑀢𑁄. 𑀲𑁄𑀧𑀺 𑀳𑀺 ‘‘𑀅𑀲𑁆𑀫𑀻’’𑀢𑀺𑀆𑀤𑀻𑀳𑀺 𑀲𑀜𑁆𑀜𑀻𑀳𑀺 𑀘 𑀆𑀓𑀸𑀭𑁂𑀳𑀺 𑀤𑀺𑀝𑁆𑀞𑀺 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺. 𑀦𑀯𑀓𑀁.

𑀤𑀲𑀓𑁂𑀲𑀼 𑀧𑀦 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀤𑀲 𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀦𑀸𑀫. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀬𑁄 𑀦𑀯 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀲𑀼 𑀅𑀝𑁆𑀞𑀸𑀦𑀆𑀖𑀸𑀢𑁂𑀦 𑀲𑀤𑁆𑀥𑀺𑀁 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺 𑀦𑀸𑀫. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀦𑀸𑀫. 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀪𑀯𑀭𑀸𑀕𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀦𑀸𑀫. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 ¶ 𑀅𑀝𑁆𑀞, 𑀫𑀺𑀘𑁆𑀙𑀸𑀜𑀸𑀡𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀳𑀺 𑀲𑀤𑁆𑀥𑀺𑀁 𑀤𑀲 𑀫𑀺𑀘𑁆𑀙𑀢𑁆𑀢𑀸 𑀦𑀸𑀫. 𑀢𑀢𑁆𑀣 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀧𑀸𑀧𑀓𑀺𑀭𑀺𑀬𑀸𑀲𑀼 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦 𑀘𑁂𑀯 𑀧𑀸𑀧𑀓𑀁 𑀓𑀢𑁆𑀯𑀸 ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀘 𑀧𑀯𑀢𑁆𑀢𑁄 𑀫𑁄𑀳𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀯𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀢𑁄 𑀯𑀺𑀫𑀼𑀢𑁆𑀢𑀲𑀜𑁆𑀜𑀺𑀢𑀸. ‘‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺𑀆𑀤𑀻𑀳𑀺 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀁 𑀦𑀢𑁆𑀣𑀺𑀓𑀤𑀲𑁆𑀲𑀦𑀁 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀢𑀣𑀸 𑀅𑀲𑀲𑁆𑀲𑀢𑁄, 𑀅𑀦𑁆𑀢𑀯𑀸, 𑀅𑀦𑀦𑁆𑀢𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀦 𑀳𑁄𑀢𑀺…𑀧𑁂… 𑀳𑁄𑀢𑀺 𑀘 𑀦 𑀳𑁄𑀢𑀺 𑀘, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀸 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀦𑀸𑀫. 𑀢𑀢𑁆𑀣 𑀮𑁄𑀓𑁄𑀢𑀺 𑀔𑀦𑁆𑀥𑀸𑀤𑀬𑁄, ‘‘𑀅𑀦𑁆𑀢𑀯𑀸’’𑀢𑀺 𑀇𑀤𑀁 𑀧𑀭𑀺𑀢𑁆𑀢𑀁 𑀓𑀲𑀺𑀡𑀚𑁆𑀛𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀦𑀦𑁆𑀢𑀯𑀸’’𑀢𑀺 𑀇𑀤𑀁 𑀯𑀺𑀧𑀼𑀮𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄. 𑀤𑀲𑀓𑀁.

𑀅𑀝𑁆𑀞𑀸𑀭𑀲𑀓𑁂𑀲𑀼 ¶ 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀢𑀡𑁆𑀳𑀸𑀲𑀫𑀼𑀤𑀸𑀘𑀸𑀭𑀸 𑀢𑀡𑁆𑀳𑀸𑀧𑀯𑀢𑁆𑀢𑀺𑀬𑁄. 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀇𑀤𑀁 𑀳𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀢𑁆𑀣 ‘‘𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀏𑀯𑀲𑁆𑀫𑀻𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀺, 𑀢𑀣𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀢𑀣𑀸 𑀅𑀲𑁆𑀫𑀻𑀢𑀺, 𑀲𑀸𑀢𑀲𑁆𑀫𑀻𑀢𑀺 𑀳𑁄𑀢𑀺, 𑀢𑀣𑀸 𑀲𑀺𑀬𑀦𑁆𑀢𑀺, 𑀇𑀢𑁆𑀣𑀁 𑀲𑀺𑀬𑀦𑁆𑀢𑀺, 𑀏𑀯𑀁 𑀲𑀺𑀬𑀦𑁆𑀢𑀺, 𑀅𑀜𑁆𑀜𑀣𑀸 𑀲𑀺𑀬𑀦𑁆𑀢𑀺 𑀳𑁄𑀢𑀺, 𑀢𑀣𑀸 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀇𑀢𑁆𑀣𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀏𑀯𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀅𑀜𑁆𑀜𑀢𑀸 𑀲𑀺𑀬𑀦𑁆𑀢𑀺 𑀳𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀇𑀫𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀦𑀸𑀫.

𑀢𑀢𑁆𑀣 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀔𑀦𑁆𑀥𑀧𑀜𑁆𑀘𑀓𑁂𑀲𑀼 𑀲𑀫𑀽𑀳𑀢𑁄 ‘‘𑀅𑀳𑀫𑀲𑁆𑀫𑀻’’𑀢𑀺 𑀕𑀳𑀡𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦 𑀕𑀳𑀡𑁂 𑀲𑀢𑀺 𑀢𑀢𑁄 𑀧𑀭𑀁 𑀅𑀦𑀼𑀧𑀦𑀺𑀥𑀸𑀬, 𑀉𑀧𑀦𑀺𑀥𑀸𑀬 𑀯𑀸𑀢𑀺 𑀤𑁆𑀯𑀺𑀥𑀸 𑀕𑀳𑀡𑀁 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀧𑀦𑀺𑀥𑀸𑀬𑀸𑀢𑀺 𑀅𑀜𑁆𑀜𑀁 𑀆𑀓𑀸𑀭𑀁 𑀅𑀦𑀼𑀧𑀦𑀺𑀥𑀸𑀬 𑀅𑀦𑀼𑀧𑀕𑀫𑁆𑀫 𑀲𑀓𑀪𑀸𑀯𑀫𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺. 𑀢𑀲𑁆𑀲 ‘‘𑀔𑀢𑁆𑀢𑀺𑀬𑀸𑀤𑀻𑀲𑀼 𑀇𑀤𑀁𑀧𑀓𑀸𑀭𑁄 𑀅𑀳’’𑀦𑁆𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀥𑀸𑀬 𑀕𑀳𑀡𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑀲𑀫𑀢𑁄 𑀘 𑀅𑀲𑀫𑀢𑁄 𑀘. 𑀢𑀢𑁆𑀣 𑀲𑀫𑀢𑁄 𑀕𑀳𑀡𑀁 𑀏𑀯𑀲𑁆𑀫𑀻𑀢𑀺 𑀇𑀤𑀁, 𑀢𑀲𑁆𑀲 𑀬𑀣𑀸 𑀅𑀬𑀁 𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀸 𑀤𑁂𑀯𑀫𑀦𑀼𑀲𑁆𑀲𑀭𑀽𑀧𑀻𑀅𑀭𑀽𑀧𑀺𑀆𑀤𑀬𑁄 𑀯𑀸, 𑀏𑀯𑀫𑀳𑀫𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀇𑀤𑀁 𑀧𑀦 𑀅𑀲𑀫𑀢𑁄 𑀕𑀳𑀡𑀁, 𑀢𑀲𑁆𑀲 𑀬𑀣𑀸 𑀇𑀫𑁂 𑀔𑀢𑁆𑀢𑀺𑀬𑀸𑀤𑀬𑁄, 𑀢𑀢𑁄 𑀅𑀜𑁆𑀜𑀣𑀸 𑀅𑀳𑀁 𑀳𑀻𑀦𑁄 𑀯𑀸 𑀅𑀥𑀺𑀓𑁄 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀢𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀦𑀸𑀕𑀢𑀯𑀲𑁂𑀦 ¶ 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀲𑁆𑀫𑀻𑀢𑀺𑀆𑀤𑀺𑀤𑁆𑀯𑀬𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀅𑀲𑁆𑀫𑀻𑀢𑀺 𑀲𑀲𑁆𑀲𑀢𑀁, 𑀲𑀻𑀤𑀢𑀻𑀢𑀺 𑀲𑀸𑀢𑀁, 𑀅𑀲𑀲𑁆𑀲𑀢𑀁, 𑀇𑀢𑁄 𑀧𑀭𑀸𑀦𑀺 ¶ 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 ‘‘𑀅𑀧𑀺 𑀦𑀸𑀫𑀸𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀸𑀭𑀲𑀓𑀁 𑀧𑀞𑀫𑀁.

𑀤𑀼𑀢𑀺𑀬𑁂 𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬𑀸𑀢𑀺 𑀩𑀸𑀳𑀺𑀭𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀢𑀢𑁆𑀣 ‘‘𑀇𑀫𑀺𑀦𑀸 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀇𑀫𑀺𑀦𑀸’’𑀢𑀺 𑀧𑀤𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀧𑀼𑀭𑀺𑀫𑁂𑀳𑀺 𑀯𑀺𑀲𑁂𑀲𑁄. 𑀢𑀢𑁆𑀣 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑁂𑀦 𑀭𑀽𑀧𑁂𑀦 𑀯𑀸…𑀧𑁂… 𑀯𑀺𑀜𑁆𑀜𑀸𑀡𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘 𑀙𑀢𑁆𑀢𑀔𑀕𑁆𑀕𑀩𑀻𑀚𑀦𑀺𑀅𑀦𑁆𑀦𑀧𑀸𑀦𑀥𑀦𑀥𑀜𑁆𑀜𑀸𑀤𑀺𑀉𑀧𑀓𑀭𑀡𑀯𑀲𑁂𑀦 𑀩𑀸𑀳𑀺𑀭𑀁 𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. 𑀤𑀸𑀲𑀤𑀸𑀲𑀺𑀜𑀸𑀢𑀺𑀧𑀭𑀺𑀚𑀦𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀉𑀧𑀓𑀭𑀡𑀯𑀲𑁂𑀦 𑀯𑁂𑀤𑀦𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀳𑀺 𑀩𑀸𑀳𑀺𑀭𑁂𑀳𑀺 𑀭𑀽𑀧𑀸𑀤𑀻𑀳𑀺 ‘‘𑀇𑀢𑁆𑀣𑀲𑁆𑀫𑀻𑀢𑀺 𑀏𑀯𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀸𑀭𑀲𑀓𑀁 𑀤𑀼𑀢𑀺𑀬𑀁.

𑀇𑀢𑀭𑁂𑀲𑀼 𑀧𑀦 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸𑀢𑀺𑀆𑀤𑀻𑀲𑀼 𑀢𑀤𑀼𑀪𑀬𑀁 𑀅𑀝𑁆𑀞𑀸𑀭𑀲𑀓𑀁 𑀏𑀓𑀢𑁄 𑀬𑁄𑀚𑁂𑀢𑁆𑀯𑀸 𑀙𑀢𑁆𑀢𑀺𑀁𑀲𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀏𑀓𑁂𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑀻𑀢𑀓𑀸𑀮𑁂 𑀤𑁆𑀯𑀺𑀦𑁆𑀦𑀁 𑀅𑀝𑁆𑀞𑀸𑀭𑀲𑀓𑀸𑀦𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲, 𑀢𑀣𑀸 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀦 𑀏𑀓𑀲𑁆𑀲 𑀬𑀣𑀸𑀮𑀸𑀪𑀯𑀲𑁂𑀦 𑀢𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀙𑀢𑁆𑀢𑀺𑀁𑀲 𑀮𑀩𑁆𑀪𑀦𑁆𑀢𑀺. 𑀇𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀢𑀁 𑀲𑀩𑁆𑀩𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀓𑀸𑀮𑀢𑁆𑀢𑀬𑁂𑀧𑀺 𑀙𑀦𑁆𑀦𑀁 𑀅𑀝𑁆𑀞𑀸𑀭𑀲𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀦𑀺𑀝𑁆𑀞𑀺𑀢𑀸𑀦𑀺.

𑀬𑀸𑀦𑀺 𑀘𑀸𑀢𑀺𑀆𑀤𑀻𑀲𑀼 𑀬𑀸𑀦𑀺 𑀘𑁂𑀢𑁆𑀣 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑀦𑀸𑀫𑀓𑁂 𑀤𑀻𑀖𑀦𑀺𑀓𑀸𑀬𑀲𑁆𑀲 𑀧𑀞𑀫𑀲𑀼𑀢𑁆𑀢𑀦𑁆𑀢𑁂 ¶ (𑀤𑀻. 𑀦𑀺. 𑁧.𑁨𑁯 𑀆𑀤𑀬𑁄) 𑀲𑀢𑁆𑀣𑀸𑀭𑀸 𑀲𑀬𑀁 𑀆𑀳𑀘𑁆𑀘 𑀪𑀸𑀲𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀚𑀸𑀮𑁂 𑀳𑀺 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 ¶ , 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀇𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀲𑀦𑀺𑀤𑀸𑀦𑀸𑀦𑀺 𑀦𑀸𑀦𑀸𑀦𑀬𑀢𑁄 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑁂𑀲𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑀺𑀦𑀺𑀘𑁆𑀙𑀬𑁄, 𑀲𑁂𑀲𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀧𑀤𑀢𑁆𑀣𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀧𑀤𑀢𑁆𑀣𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀯. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀳𑁂𑀝𑁆𑀞𑀸 𑀦𑀸𑀦𑀸𑀦𑀬𑀢𑁄 𑀯𑀺𑀪𑀢𑁆𑀢𑀸𑀦𑀜𑁆𑀜𑁂𑀯 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀥𑀫𑁆𑀫𑀓𑁄𑀝𑁆𑀞𑀸𑀲𑀸𑀦𑀁 𑀧𑀼𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀘𑀢𑀼𑀪𑀽𑀫𑀼𑀧𑁆𑀧𑀢𑁆𑀢𑀺𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀤𑀻𑀳𑀺 𑀤𑀲𑀳𑀺 𑀯𑀸𑀭𑁂𑀳𑀺 𑀅𑀧𑀼𑀩𑁆𑀩𑀦𑀬𑀲𑀳𑀲𑁆𑀲𑀯𑀺𑀪𑀸𑀯𑀓𑁂𑀳𑀺 𑀲𑀩𑁆𑀩𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑀲𑀗𑁆𑀔𑀸𑀢𑁂𑀳𑀺 𑀥𑀫𑁆𑀫𑀳𑀤𑀬𑁂𑀳𑀺 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀬𑀁 𑀯𑀺𑀪𑀗𑁆𑀕𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀯𑀺𑀪𑀗𑁆𑀕𑀦𑀬𑀢𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀯𑀺𑀪𑀗𑁆𑀕𑁂 𑀳𑀺 𑀧𑀞𑀫𑀁 ‘‘𑀓𑀢𑀺 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀲𑀧𑀼𑀘𑁆𑀙𑀓𑀁 𑀤𑁆𑀯𑀸𑀤𑀲𑀧𑀤𑀺𑀓𑀁 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀘𑀢𑀼𑀪𑀽𑀫𑀓𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄 𑀦𑀸𑀫 𑀯𑀺𑀪𑀢𑁆𑀢𑁄, 𑀢𑀢𑁆𑀣 𑀲𑀢𑁆𑀢 𑀨𑀲𑁆𑀲𑀸𑀤𑀬𑁄 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀢𑀺𑀬𑁄 ¶ 𑀧𑀦 𑀯𑀸𑀭𑁄 𑀢𑁂𑀲𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀢𑁆𑀣 𑀧𑀞𑀫𑀓𑁄𑀝𑁆𑀞𑀸𑀲𑁂 𑀢𑀸𑀯 𑁋

‘‘𑀓𑀸𑀫𑀥𑀸𑀢𑀼𑀬𑀸 𑀓𑀢𑀺 𑀔𑀦𑁆𑀥𑀸…𑀧𑁂… 𑀓𑀢𑀺 𑀘𑀺𑀢𑁆𑀢𑀸𑀦𑀺? 𑀓𑀸𑀫𑀥𑀸𑀢𑀼𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀢𑀻𑀡𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀯𑁂𑀤𑀦𑀸, 𑀲𑀜𑁆𑀜𑀸, 𑀘𑁂𑀢𑀦𑀸, 𑀘𑀺𑀢𑁆𑀢𑀸𑀦𑀻’’𑀢𑀺 𑁋

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀼𑀪𑀽𑀫𑀓𑀸𑀧𑀺 𑀥𑀫𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ , 𑀦 𑀓𑀸𑀫𑀸𑀯𑀘𑀭𑀸𑀯. 𑀢𑁂𑀦𑁂𑀢𑁆𑀣 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀪𑀽𑀫𑀓𑀸𑀧𑀺 𑀯𑀼𑀢𑁆𑀢𑀸. 𑀢𑀢𑁆𑀣𑀼𑀧𑁆𑀧𑀚𑁆𑀚𑀦𑀓𑀥𑀫𑁆𑀫𑀸 𑀳𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸, 𑀦 𑀢𑀁𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀯. 𑀭𑀽𑀧𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀢𑁆𑀣 𑀘 𑀢𑀻𑀡𑀺 𑀲𑀘𑁆𑀘𑀸𑀦𑀻𑀢𑀺 𑀇𑀤𑀁 𑀦𑀺𑀭𑁄𑀥𑀲𑀘𑁆𑀘𑀲𑁆𑀲 𑀤𑁂𑀲𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀓𑀢𑁆𑀣𑀘𑀺 𑀤𑁂𑀲𑁂 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀭𑀡𑀲𑀸𑀧𑁂𑀓𑁆𑀔𑀸 𑀳𑀺 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀓𑀸𑀭𑀡𑀪𑀽𑀢𑀁 𑀤𑁂𑀲𑀁 𑀲𑀫𑀸𑀯𑀲𑀦𑁆𑀢𑀺 𑀅𑀓𑀸𑀭𑀡𑀲𑁆𑀲 𑀅𑀦𑀺𑀲𑁆𑀲𑀬𑀢𑁆𑀢𑀸, 𑀬𑀣𑀸 𑀯𑀸 𑀓𑀤𑀸𑀘𑀺 𑀉𑀧𑀮𑀩𑁆𑀪𑀫𑀸𑀦𑀸 𑀥𑀫𑁆𑀫𑀸 𑀓𑀸𑀮𑀦𑀺𑀬𑀢𑀢𑀸𑀬 𑀅𑀢𑁆𑀢𑀦𑁄 𑀲𑀗𑁆𑀔𑀢𑀢𑁆𑀢𑀁𑀯 𑀲𑀽𑀘𑁂𑀦𑁆𑀢𑀺. 𑀅𑀜𑁆𑀜𑀣𑀸 𑀇𑀢𑀭𑀓𑀸𑀮𑁂𑀲𑀼𑀧𑀺 𑀪𑀸𑀯𑀲𑁆𑀲 𑀘 𑀧𑀲𑀗𑁆𑀕𑀢𑁄, 𑀏𑀢𑀭𑀳𑀺𑀧𑀺 𑀯𑀸 𑀅𑀪𑀸𑀯𑀲𑁆𑀲, 𑀏𑀯𑀁 𑀓𑁆𑀯𑀘𑀺 𑀤𑁂𑀲𑁂 𑀉𑀧𑀮𑀩𑁆𑀪𑀫𑀸𑀦𑀸𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀤𑁂𑀲𑀅𑀩𑁆𑀬𑀸𑀧𑀺𑀢𑀸 𑀧𑀦 𑀅𑀲𑀗𑁆𑀔𑀢𑀲𑁆𑀲, 𑀲𑀗𑁆𑀔𑀢𑀲𑁆𑀲 𑀯𑀸 𑀅𑀲𑀫𑁆𑀪𑀯𑀢𑁄 𑀏𑀯 𑀦𑁄𑀧𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀤𑁂𑀲𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀫𑁂𑀯 𑀅𑀲𑀗𑁆𑀔𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀧𑀦 𑁋

‘‘𑀭𑀽𑀧𑀥𑀸𑀢𑀼𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀙 𑀆𑀬𑀢𑀦𑀸𑀦𑀺, 𑀦𑀯 𑀥𑀸𑀢𑀼𑀬𑁄, 𑀢𑀻𑀡𑀺 𑀲𑀘𑁆𑀘𑀸𑀦𑀺, 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀝𑁆𑀞 𑀳𑁂𑀢𑀽, 𑀢𑀬𑁄 ¶ 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀨𑀲𑁆𑀲𑀸…𑀧𑁂… 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑁋

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀭𑀽𑀧𑀻𑀦𑀁 𑀖𑀸𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀚𑁆𑀚𑁂𑀢𑁆𑀯𑀸 ‘‘𑀙 𑀆𑀬𑀢𑀦𑀸𑀦𑀺, 𑀦𑀯 𑀥𑀸𑀢𑀼𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀦 𑀢𑁂𑀲𑀁 𑀅𑀪𑀸𑀯𑀸. 𑀓𑁂𑀘𑀺 𑀧𑀦 ‘‘𑀭𑀽𑀧𑀮𑁄𑀓𑁂 𑀕𑀦𑁆𑀥𑀭𑀲𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀘 𑀫𑀳𑀸𑀪𑀽𑀢𑀸𑀦𑀜𑁆𑀘 𑀨𑁄𑀝𑁆𑀞𑀩𑁆𑀩𑀓𑀺𑀘𑁆𑀘𑀢𑀸 𑀦𑀢𑁆𑀣𑀺, 𑀢𑁂𑀦𑁂𑀯 𑀧𑀸𑀴𑀺𑀬𑀁 𑀦 𑀉𑀤𑁆𑀥𑀝𑀸’’𑀢𑀺 𑀯𑀢𑁆𑀯𑀸 𑀢𑀁 𑀲𑀸𑀥𑁂𑀢𑀼𑀁 𑀩𑀳𑀼𑀁 𑀳𑁂𑀢𑀼𑀧𑀝𑀺𑀭𑀽𑀧𑀓𑀁 𑀯𑀢𑁆𑀯𑀸 𑀧𑀧𑀜𑁆𑀘𑁂𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀕𑀦𑁆𑀥𑀸𑀤𑀻𑀦𑀁 𑀅𑀯𑀺𑀦𑀺𑀩𑁆𑀪𑁄𑀕𑀢𑁆𑀢𑀸, 𑀨𑁄𑀝𑁆𑀞𑀩𑁆𑀩𑀢𑁆𑀢𑀸, 𑀥𑀸𑀢𑀼𑀲𑀪𑀸𑀯𑀢𑁆𑀢𑀸 𑀘 𑀖𑀸𑀦𑀸𑀤𑀺𑀢𑁆𑀢𑀬𑀪𑀸𑀯𑀤𑁆𑀯𑀬𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀦 𑀤𑁄𑀫𑀦𑀲𑁆𑀲𑀳𑁂𑀢𑀼𑀓𑀩𑀴𑀻𑀓𑀸𑀭𑀸𑀳𑀸𑀭𑀖𑀸𑀦𑀸𑀤𑀺𑀢𑁆𑀢𑀬𑀲𑀫𑁆𑀨𑀲𑁆𑀲𑀸𑀤𑀻𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀧𑀦 𑁋

‘‘𑀅𑀭𑀽𑀧𑀥𑀸𑀢𑀼𑀬𑀸 ¶ 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀤𑁆𑀯𑁂 𑀆𑀬𑀢𑀦𑀸𑀦𑀺, 𑀤𑁆𑀯𑁂 𑀥𑀸𑀢𑀼𑀬𑁄, 𑀢𑀻𑀡𑀺 𑀲𑀘𑁆𑀘𑀸𑀦𑀺, 𑀏𑀓𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀝𑁆𑀞 𑀳𑁂𑀢𑀽, 𑀢𑀬𑁄 𑀆𑀳𑀸𑀭𑀸, 𑀏𑀓𑁄 𑀨𑀲𑁆𑀲𑁄…𑀧𑁂… 𑀏𑀓𑀁 𑀘𑀺𑀢𑁆𑀢’’𑀦𑁆𑀢𑀺 𑁋

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀏𑀢𑁆𑀣 𑀘 𑀘𑀓𑁆𑀔𑀼𑀲𑁄𑀢𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀅𑀪𑀸𑀯𑀸 𑀏𑀓𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑁂 𑀧𑀦 𑁋

‘‘𑀅𑀧𑀭𑀺𑀬𑀸𑀧𑀦𑁆𑀦𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀤𑁆𑀯𑁂 𑀆𑀬𑀢𑀦𑀸𑀦𑀺, 𑀤𑁆𑀯𑁂 𑀥𑀸𑀢𑀼𑀬𑁄, 𑀤𑁆𑀯𑁂 𑀲𑀘𑁆𑀘𑀸𑀦𑀺, 𑀤𑁆𑀯𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀙 𑀳𑁂𑀢𑀽, 𑀢𑀬𑁄 𑀆𑀳𑀸𑀭𑀸, 𑀏𑀓𑁄 𑀨𑀲𑁆𑀲𑁄…𑀧𑁂… 𑀏𑀓𑀁 𑀘𑀺𑀢𑁆𑀢’’𑀦𑁆𑀢𑀺 𑁋

𑀫𑀸𑀢𑀺𑀓𑀁 ¶ 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀬𑀲𑁆𑀫𑀸 𑀘 𑀑𑀓𑀸𑀲𑀯𑀲𑁂𑀦 𑀯𑀸 𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀸 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼𑀬𑀸’’𑀢𑀺 𑀅𑀯𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀬𑀸𑀧𑀦𑁆𑀦𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀤𑀼𑀢𑀺𑀬𑁄 𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑀺𑀬𑁄 𑀧𑀦 𑀯𑀸𑀭𑁄 𑁋

‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 𑁋

𑀘𑀢𑀽𑀲𑀼 𑀪𑀽𑀫𑀻𑀲𑀼 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀢𑀁𑀢𑀁𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀲𑁄 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑁄. 𑀢𑀢𑁆𑀣 𑀘 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀓𑀸𑀫𑀸𑀯𑀘𑀭𑀪𑀸𑀯𑁂𑀦 𑀢𑀢𑁆𑀣 𑀅𑀦𑁆𑀢𑁄𑀕𑀥𑁄 𑀓𑀸𑀫𑀸𑀯𑀘𑀭𑁄𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀢𑀼𑀢𑁆𑀣𑁄 𑀧𑀦 𑀯𑀸𑀭𑁄 𑀢𑀻𑀲𑀼 𑀪𑀽𑀫𑀻𑀲𑀼 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑀓𑀸𑀦𑀼𑀧𑁆𑀧𑀚𑁆𑀚𑀦𑀓𑀥𑀫𑁆𑀫𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀢𑁆𑀣 𑀧𑀞𑀫𑀓𑁄𑀝𑁆𑀞𑀸𑀲𑁂 𑀢𑀸𑀯 𑁋

‘‘𑀓𑀸𑀫𑀥𑀸𑀢𑀼𑀬𑀸 ¶ 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀲𑀩𑁆𑀩𑁂𑀲𑀁 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲, 𑀓𑀲𑁆𑀲𑀘𑀺 𑀦𑀯, 𑀓𑀲𑁆𑀲𑀘𑀺 𑀲𑀢𑁆𑀢, 𑀓𑀲𑁆𑀲𑀘𑀺 𑀏𑀓𑀸𑀤𑀲 𑀥𑀸𑀢𑀼𑀬𑁄…𑀧𑁂… 𑀲𑀢𑁆𑀢 𑀥𑀸𑀢𑀼𑀬𑁄. 𑀲𑀩𑁆𑀩𑁂𑀲𑀁 𑀏𑀓𑀁 𑀲𑀘𑁆𑀘𑀁 𑀧𑀸𑀢𑀼𑀪𑀯𑀢𑀺. 𑀓𑀲𑁆𑀲𑀘𑀺 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀓𑀲𑁆𑀲𑀘𑀺 𑀢𑁂𑀭𑀲, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀢𑁂𑀭𑀲, 𑀓𑀲𑁆𑀲𑀘𑀺 𑀤𑁆𑀯𑀸𑀤𑀲, 𑀓𑀲𑁆𑀲𑀘𑀺 𑀤𑀲, 𑀓𑀲𑁆𑀲𑀘𑀺 𑀦𑀯, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀦𑀯, 𑀓𑀲𑁆𑀲𑀘𑀺 𑀅𑀝𑁆𑀞, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀅𑀝𑁆𑀞, 𑀓𑀲𑁆𑀲𑀘𑀺 𑀲𑀢𑁆𑀢 ¶ , 𑀓𑀲𑁆𑀲𑀘𑀺 𑀧𑀜𑁆𑀘, 𑀓𑀲𑁆𑀲𑀘𑀺 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀢𑀬𑁄 𑀳𑁂𑀢𑀽 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑁆𑀯𑁂, 𑀓𑀲𑁆𑀲𑀘𑀺 𑀅𑀳𑁂𑀢𑀼𑀓𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀏𑀓𑁄 𑀨𑀲𑁆𑀲𑁄…𑀧𑁂… 𑀏𑀓𑀁 𑀘𑀺𑀢𑁆𑀢𑀁 𑀧𑀸𑀢𑀼𑀪𑀯𑀢𑀻’’𑀢𑀺 𑁋

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀸𑀫𑀸𑀯𑀘𑀭𑀸𑀦𑀁 𑀑𑀧𑀧𑀸𑀢𑀺𑀓𑀸𑀦𑀁, 𑀆𑀧𑀸𑀬𑀺𑀓𑀸𑀦𑀁, 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀸𑀦𑁂𑀯 𑀏𑀓𑀸𑀤𑀲 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀲𑀤𑁆𑀤𑁄 𑀳𑀺 𑀏𑀓𑀦𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀜𑁆𑀜𑁂𑀯 𑀧𑀦 𑀚𑀘𑁆𑀘𑀦𑁆𑀥𑀸𑀦𑀁 𑀤𑀲, 𑀚𑀘𑁆𑀘𑀩𑀥𑀺𑀭𑀸𑀦𑀁 𑀅𑀧𑀭𑀸𑀦𑀺 𑀤𑀲, 𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀦𑀁 𑀦𑀯, 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀭𑀽𑀧𑀕𑀦𑁆𑀥𑀭𑀲𑀓𑀸𑀬𑀨𑁄𑀝𑁆𑀞𑀩𑁆𑀩𑀫𑀦𑁄𑀥𑀫𑁆𑀫𑀯𑀲𑁂𑀦 𑀲𑀢𑁆𑀢 𑀆𑀬𑀢𑀦𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀑𑀧𑀧𑀸𑀢𑀺𑀓𑀸𑀦𑀁 𑀢𑀺𑀳𑁂𑀢𑀼𑀓𑀸𑀦𑀁 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀪𑀸𑀯𑀤𑁆𑀯𑀬𑁂 𑀏𑀓𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀲𑀼 𑀏𑀓𑀁, 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀸𑀢𑀺 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀲𑀁 𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀚𑁆𑀚𑁂𑀢𑁆𑀯𑀸 𑀢𑁂𑀭𑀲, 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀢𑀺𑀳𑁂𑀢𑀼𑀓𑀸𑀦𑀁 𑀪𑀸𑀯𑀺𑀦𑁆𑀤𑁆𑀭𑀺𑀬𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀭𑀸𑀦𑀺𑀧𑀺 𑀢𑁂𑀭𑀲, 𑀢𑁂𑀲𑀜𑁆𑀜𑁂𑀯 𑀤𑀼𑀳𑁂𑀢𑀼𑀓𑀸𑀦𑀁 𑀤𑁆𑀯𑀸𑀤𑀲, 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀦 𑀢𑀺𑀳𑁂𑀢𑀼𑀓𑀸𑀦𑀁 𑀧𑀼𑀭𑀺𑀫𑁂𑀲𑀼 𑀘𑀼𑀤𑁆𑀤𑀲𑀲𑀼 𑀘𑀓𑁆𑀔𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀚𑁆𑀚𑁂𑀢𑁆𑀯𑀸 𑀤𑀲, 𑀢𑁂𑀲𑀁 𑀤𑀼𑀳𑁂𑀢𑀼𑀓𑀸𑀦𑀁 𑀦𑀯, 𑀑𑀧𑀧𑀸𑀢𑀺𑀓𑀸𑀦𑀁 𑀅𑀳𑁂𑀢𑀼𑀓𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀼𑀭𑀺𑀫𑁂𑀲𑀼 𑀘𑀼𑀤𑁆𑀤𑀲𑀲𑀼 𑀲𑀤𑁆𑀤𑀸𑀤𑀻𑀦𑀺 𑀯𑀚𑁆𑀚𑁂𑀢𑁆𑀯𑀸 𑀅𑀧𑀭𑀸𑀦𑀺 𑀦𑀯, 𑀢𑁂𑀲𑀜𑁆𑀜𑁂𑀯 𑀚𑀘𑁆𑀘𑀦𑁆𑀥𑀸𑀦𑀁 𑀅𑀝𑁆𑀞, 𑀢𑀣𑀸 𑀩𑀥𑀺𑀭𑀸𑀦𑀁, 𑀅𑀦𑁆𑀥𑀩𑀥𑀺𑀭𑀸𑀦𑀁 𑀧𑀦 𑀲𑀢𑁆𑀢, 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀦 𑀅𑀳𑁂𑀢𑀼𑀓𑀸𑀦𑀁 𑀓𑀸𑀬𑀫𑀦𑁄𑀪𑀸𑀯𑀚𑀻𑀯𑀺𑀢𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘, 𑀢𑁂𑀲𑀜𑁆𑀜𑁂𑀯 𑀦𑀧𑀼𑀁𑀲𑀓𑀸𑀦𑀁 𑀘𑀢𑁆𑀢𑀸𑀭𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀳𑀺 𑀯𑀺𑀚𑁆𑀚𑀫𑀸𑀦𑀸𑀧𑀺 𑀏𑀓𑀕𑁆𑀕𑀢𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀢𑀁 𑀦 𑀕𑀘𑁆𑀙𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀧𑀦 ‘‘𑀏𑀓𑁄 𑀨𑀲𑁆𑀲𑁄’’𑀢𑀺𑀆𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 ¶ 𑀧𑀦 𑁋

‘‘𑀭𑀽𑀧𑀥𑀸𑀢𑀼𑀬𑀸 ¶ 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀧𑀜𑁆𑀘𑀸𑀬𑀢𑀦𑀸𑀦𑀺, 𑀧𑀜𑁆𑀘 𑀥𑀸𑀢𑀼𑀬𑁄, 𑀏𑀓𑀁 𑀲𑀘𑁆𑀘𑀁, 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀬𑁄 𑀳𑁂𑀢𑀽, 𑀢𑀬𑁄 𑀆𑀳𑀸𑀭𑀸, 𑀏𑀓𑁄 𑀨𑀲𑁆𑀲𑁄…𑀧𑁂… 𑀏𑀓𑀁 𑀘𑀺𑀢𑁆𑀢’’𑀦𑁆𑀢𑀺 𑁋

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀘𑀓𑁆𑀔𑀼𑀭𑀽𑀧𑀲𑁄𑀢𑀫𑀦𑁄𑀥𑀫𑁆𑀫𑀸𑀦𑀁 𑀯𑀲𑁂𑀦 𑀧𑀜𑁆𑀘𑀸𑀬𑀢𑀦𑀥𑀸𑀢𑀼𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀁 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯. 𑀘𑀓𑁆𑀔𑀼𑀲𑁄𑀢𑀫𑀦𑁄𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑀁, 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀸𑀢𑀺 𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀧𑀦 𑁋

‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀏𑀓𑁄 𑀔𑀦𑁆𑀥𑁄 𑀧𑀸𑀢𑀼𑀪𑀯𑀢𑀺 𑀭𑀽𑀧𑀓𑁆𑀔𑀦𑁆𑀥𑁄, 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀭𑀽𑀧𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀁, 𑀤𑁆𑀯𑁂 𑀥𑀸𑀢𑀼𑀬𑁄 𑀭𑀽𑀧𑀥𑀸𑀢𑀼 𑀥𑀫𑁆𑀫𑀥𑀸𑀢𑀼, 𑀏𑀓𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀏𑀓𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀅𑀲𑀜𑁆𑀜𑀲𑀢𑁆𑀢𑀸 𑀤𑁂𑀯𑀸 𑀅𑀳𑁂𑀢𑀼𑀓𑀸, 𑀅𑀦𑀸𑀳𑀸𑀭𑀸, 𑀅𑀨𑀲𑁆𑀲𑀓𑀸…𑀧𑁂… 𑀅𑀘𑀺𑀢𑁆𑀢𑀓𑀸’’𑀢𑀺 𑁋

𑀲𑀦𑀺𑀤𑁆𑀤𑁂𑀲𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸. 𑀏𑀢𑁆𑀣 𑀘 𑀭𑀽𑀧𑀫𑁆𑀧𑀺 𑀓𑀺𑀜𑁆𑀘𑀸𑀧𑀺 𑀢𑁂𑀲𑀁 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀲𑀯𑀺𑀜𑁆𑀜𑀸𑀡𑀓𑀭𑀽𑀧𑀻𑀲𑀼 𑀧𑀦 𑀕𑀳𑀺𑀢𑀢𑁆𑀢𑀸 𑀇𑀥𑀸𑀧𑀺 𑀕𑀳𑀺𑀢𑀁. 𑀕𑀦𑁆𑀥𑀸𑀤𑀬𑁄 𑀧𑀦 𑀢𑀢𑁆𑀣 𑀦 𑀕𑀳𑀺𑀢𑀢𑁆𑀢𑀸 𑀇𑀥𑀸𑀧𑀺 𑀦 𑀕𑀳𑀺𑀢𑀸, 𑀦𑁄 𑀅𑀯𑀺𑀚𑁆𑀚𑀫𑀸𑀦𑀢𑀸𑀬. 𑀏𑀓𑀢𑀮𑀯𑀸𑀲𑀺𑀓𑀸𑀦𑀁 𑀯𑀸 𑀲𑁂𑀲𑀩𑁆𑀭𑀳𑁆𑀫𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀢𑁆𑀢𑀸 𑀇𑀥𑀸𑀧𑀺 𑀭𑀽𑀧𑀸𑀬𑀢𑀦𑀁 𑀉𑀤𑁆𑀥𑀝𑀁, 𑀅𑀲𑀜𑁆𑀜𑀻𑀦𑀁 𑀧𑀦 𑀧𑀜𑁆𑀘𑀸𑀬𑀢𑀦𑀸𑀦𑀺, 𑀏𑀓𑁄 𑀆𑀳𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑁂 𑁋

‘‘𑀅𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀤𑁆𑀯𑁂 𑀆𑀬𑀢𑀦𑀸𑀦𑀺, 𑀤𑁆𑀯𑁂 𑀥𑀸𑀢𑀼𑀬𑁄, 𑀏𑀓𑀁 𑀲𑀘𑁆𑀘𑀁, 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 ¶ , 𑀢𑀬𑁄 𑀳𑁂𑀢𑀽, 𑀢𑀬𑁄 𑀆𑀳𑀸𑀭𑀸, 𑀏𑀓𑁄 𑀨𑀲𑁆𑀲𑁄…𑀧𑁂… 𑀏𑀓𑀁 𑀘𑀺𑀢𑁆𑀢’’𑀦𑁆𑀢𑀺 𑁋

𑀫𑀸𑀢𑀺𑀓𑀸𑀧𑀤𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀢𑁆𑀢𑀸. 𑀏𑀢𑁆𑀣 𑀘 𑀫𑀦𑁄𑀚𑀻𑀯𑀺𑀢𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀸𑀢𑀺 ¶ 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀯𑀁 𑀘𑀢𑀽𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀘𑀢𑀼𑀢𑁆𑀣𑁄 𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀫𑁄 𑀧𑀦 𑀯𑀸𑀭𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀪𑀽𑀫𑀦𑁆𑀢𑀭𑀯𑀲𑁂𑀦 ‘‘𑀓𑀸𑀫𑀸𑀯𑀘𑀭𑀥𑀫𑁆𑀫𑀸, 𑀦 𑀓𑀸𑀫𑀸𑀯𑀘𑀭𑀸…𑀧𑁂… 𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀘𑀢𑁆𑀢𑀸𑀭𑁄 𑀤𑀼𑀓𑁂 𑀫𑀸𑀢𑀺𑀓𑀸𑀯𑀲𑁂𑀦 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑁄𑀯.

𑀙𑀝𑁆𑀞𑁄 𑀧𑀦 𑀯𑀸𑀭𑁄 𑀲𑀫𑁆𑀫𑀼𑀢𑀺𑀤𑁂𑀯𑀉𑀧𑀧𑀢𑁆𑀢𑀺𑀤𑁂𑀯𑀯𑀺𑀲𑀼𑀤𑁆𑀥𑀺𑀤𑁂𑀯𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑀤𑁂𑀯𑀕𑀢𑀻𑀲𑀼 𑀉𑀧𑁆𑀧𑀸𑀤𑀓𑀓𑀫𑁆𑀫𑀆𑀬𑀼𑀧𑁆𑀧𑀫𑀸𑀡𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀲𑀢𑁆𑀢𑀸 𑀳𑀺 𑀤𑀸𑀦𑀲𑀻𑀮𑀸𑀤𑀺𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀺𑀓𑀼𑀮𑁂𑀲𑀼 𑀘𑁂𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀬𑀸𑀫𑀢𑀼𑀲𑀺𑀢𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀲𑀺𑀦𑁂𑀭𑀼𑀧𑀩𑁆𑀩𑀢𑀯𑁂𑀫𑀚𑁆𑀛𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀬𑀸𑀯 𑀪𑀽𑀫𑀺 𑀢𑀺𑀭𑀺𑀬𑀁 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀆𑀳𑀘𑁆𑀘 𑀏𑀢𑁆𑀣𑀦𑁆𑀢𑀭𑁂 𑀧𑀩𑁆𑀩𑀢𑀆𑀓𑀸𑀲𑀭𑀼𑀓𑁆𑀔𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀘𑀦𑁆𑀤𑀲𑀽𑀭𑀺𑀬𑀸 𑀲𑀩𑁆𑀩𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀢𑀢𑁄 𑀉𑀤𑁆𑀥𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀢𑀸𑀯𑀢𑀺𑀁𑀲𑀸𑀤𑀬𑁄 𑀬𑀣𑀸𑀓𑁆𑀓𑀫𑀁 𑀉𑀧𑀭𑀽𑀧𑀭𑀺 𑀞𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀯𑀮𑁄𑀓𑁄𑀧𑀺 𑀧𑀭𑀫𑁆𑀧𑀭𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺.

𑀧𑀞𑀫𑀚𑁆𑀛𑀸𑀦𑀁 𑀧𑀦 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼, 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑁂𑀲𑀼, 𑀇𑀫𑁂 𑀢𑀬𑁄𑀧𑀺 𑀚𑀦𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀏𑀓𑀢𑀮𑁂 ¶ 𑀯𑀲𑀦𑁆𑀢𑀺. 𑀆𑀬𑀼𑀆𑀪𑀸𑀤𑀺𑀪𑁂𑀤𑁂𑀦 𑀧𑀦𑁂𑀲𑀁 𑀪𑁂𑀤𑁄, 𑀏𑀯𑀁 𑀉𑀧𑀭𑀺𑀧𑀺.

𑀘𑀢𑀼𑀓𑁆𑀓𑀦𑀬𑁂 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀜𑁆𑀘 𑀧𑀭𑀺𑀢𑁆𑀢𑀁, 𑀫𑀚𑁆𑀛𑀺𑀫𑀁, 𑀧𑀡𑀻𑀢𑀜𑁆𑀘 𑀪𑀸𑀯𑁂𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑀸𑀅𑀧𑁆𑀧𑀫𑀸𑀡𑀸𑀪𑀸𑀆𑀪𑀲𑁆𑀲𑀭𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑀺𑀬𑀚𑁆𑀛𑀸𑀦𑀁 𑀧𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀪𑀸𑀯𑁂𑀢𑁆𑀯𑀸 𑀧𑀭𑀺𑀢𑁆𑀢𑀲𑀼𑀪𑀅𑀧𑁆𑀧𑀫𑀸𑀡𑀲𑀼𑀪𑀲𑀼𑀪𑀓𑀺𑀡𑁆𑀳𑁂𑀲𑀼. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀦 𑀪𑀸𑀯𑁂𑀢𑁆𑀯𑀸 𑀆𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀙𑀦𑁆𑀤𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀦𑀸𑀦𑀢𑁆𑀢𑀢𑁄 𑀓𑁂𑀘𑀺 𑀅𑀲𑀜𑁆𑀜𑀻𑀲𑀼, 𑀓𑁂𑀘𑀺 𑀯𑁂𑀳𑀧𑁆𑀨𑀮𑁂𑀲𑀼, 𑀓𑁂𑀘𑀺 𑀅𑀯𑀺𑀳𑁂𑀲𑀼, 𑀅𑀢𑀧𑁆𑀧𑁂𑀲𑀼, 𑀲𑀼𑀤𑀲𑁆𑀲𑁂𑀲𑀼, 𑀲𑀼𑀤𑀲𑁆𑀲𑀻𑀲𑀼, 𑀓𑁂𑀘𑀺 𑀅𑀓𑀦𑀺𑀝𑁆𑀞𑁂𑀲𑀼, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀘𑀢𑀽𑀲𑀼 𑀘 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀳𑀺 𑀏𑀓𑀘𑁆𑀘𑁂 𑀢𑀺𑀢𑁆𑀣𑀺𑀬𑀸 ‘‘𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀬𑁄, 𑀢𑀦𑁆𑀦𑀺𑀤𑀸𑀦𑀸𑀦𑀺 𑀘 𑀤𑀼𑀓𑁆𑀔𑀸𑀦𑀺 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀘𑀺𑀢𑁆𑀢𑁂 𑀤𑁄𑀲𑀁 𑀤𑀺𑀲𑁆𑀯𑀸 ‘‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀫𑁂𑀢’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀭𑀸𑀕𑀁 ¶ 𑀚𑀦𑁂𑀢𑁆𑀯𑀸 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀭𑀽𑀧𑀓𑀸𑀬𑀫𑀢𑁆𑀢𑀸 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀓𑀢𑀭𑀁 𑀛𑀸𑀦𑀁 𑀯𑀺𑀧𑀘𑁆𑀘𑀢𑀻𑀢𑀺? 𑀧𑀕𑀼𑀡𑀁, 𑀲𑀩𑁆𑀩𑁂𑀲𑀼 𑀧𑀕𑀼𑀡𑁂𑀲𑀼 𑀬𑀲𑁆𑀲 𑀯𑀺𑀧𑀸𑀓𑀪𑀽𑀫𑀺𑀁 𑀧𑀢𑁆𑀣𑁂𑀢𑀺, 𑀢𑀁𑀧𑀢𑁆𑀣𑀦𑀸𑀬 𑀘 𑀅𑀲𑀢𑀺 𑀬𑀁 𑀫𑀭𑀡𑀲𑀫𑀬𑁂 𑀲𑀫𑀸𑀧𑀚𑁆𑀚𑀢𑀺, 𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀉𑀢𑁆𑀢𑀫𑀯𑀲𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀯𑀺𑀧𑀘𑁆𑀘𑀢𑀺. 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀘 𑀅𑀯𑀺𑀳𑀸𑀤𑀻𑀲𑀼 𑀅𑀦𑀸𑀕𑀸𑀫𑀺𑀯𑀚𑁆𑀚𑀺𑀢𑀸 𑀲𑀢𑁆𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀅𑀲𑀜𑁆𑀜𑀻𑀯𑀚𑁆𑀚𑀺𑀢𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀲𑀩𑁆𑀩𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑀼𑀁 𑀮𑀪𑀦𑁆𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀘 𑀅𑀭𑀺𑀬𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀢𑁄 𑀉𑀧𑀭𑀽𑀧𑀧𑀢𑁆𑀢𑀺𑀧𑀺, 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀺. 𑀢𑁂 𑀳𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀸 𑀅𑀦𑀸𑀕𑀸𑀫𑀺𑀦𑁄 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀫𑀢𑁆𑀣𑀓𑁂 𑀯𑁂𑀳𑀧𑁆𑀨𑀮𑁂𑀲𑀼 𑀞𑀺𑀢𑀸 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀦 𑀦𑀺𑀯𑀢𑁆𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀅𑀪𑀸𑀯𑀸. 𑀯𑁂𑀳𑀧𑁆𑀨𑀮𑀅𑀓𑀦𑀺𑀝𑁆𑀞𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀯𑀸 𑀢𑀬𑁄𑀧𑀺 𑀲𑁂𑀝𑁆𑀞𑀪𑀯𑀸 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀅𑀦𑀸𑀕𑀸𑀫𑀺𑀦𑁄 𑀦𑁂𑀯 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀺, 𑀦 𑀅𑀥𑁄. 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺 ¶ . 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀲𑁂𑀔𑀸 𑀕𑀺𑀳𑀺𑀪𑀸𑀯𑁂 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀦 𑀅𑀲𑁂𑀔𑀸. 𑀢𑁂 𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀤𑀺𑀯𑀲𑁂 𑀧𑀩𑁆𑀩𑀚𑀦𑁆𑀢𑀺 𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀯𑀸. 𑀪𑀼𑀫𑁆𑀫𑀤𑁂𑀯𑁂𑀲𑀼 𑀧𑀦 𑀔𑀻𑀡𑀸𑀲𑀯𑀸𑀧𑀺 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺. 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀯 𑀢𑀺𑀝𑁆𑀞𑀦𑁆𑀢𑀺, 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀢𑀤𑀳𑁂𑀯 𑀭𑀽𑀧𑀪𑀯𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀔𑀻𑀡𑀸𑀲𑀯𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀼𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀇𑀫𑀸𑀲𑀼 𑀲𑀢𑁆𑀢𑀯𑀻𑀲𑀢𑀺𑀬𑀸 𑀪𑀽𑀫𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀢𑀸𑀯 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀯 𑀯𑀲𑁆𑀲𑀲𑀢𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀆𑀧𑀸𑀬𑀺𑀓𑀸𑀦𑀁, 𑀪𑀼𑀫𑁆𑀫𑀤𑁂𑀯𑀸𑀦𑀜𑁆𑀘 𑀓𑀤𑀸𑀘𑀺 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁. 𑀢𑁂 𑀳𑀺 𑀲𑀢𑁆𑀢𑀸𑀳𑁂𑀦𑀧𑀺 𑀫𑀭𑀦𑁆𑀢𑀺, 𑀓𑀧𑁆𑀧𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀻𑀢𑀺.

𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀧𑀦 𑀫𑀸𑀦𑀼𑀲𑀓𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀏𑀓𑀁 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲 𑀭𑀢𑁆𑀢𑀺𑀬𑁄 𑀫𑀸𑀲𑁄, 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄, 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁. 𑀢𑀸𑀦𑀺 𑀫𑀦𑀼𑀲𑁆𑀲𑀕𑀡𑀦𑀸𑀬 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀯𑀢𑀺𑀁𑀲𑀸𑀦𑀁 𑀫𑀸𑀦𑀼𑀲𑀓𑀁 𑀯𑀲𑁆𑀲𑀲𑀢𑀁 𑀏𑀓𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀓𑀢𑁆𑀯𑀸 𑀏𑀯𑀫𑀸𑀕𑀢𑀁 𑀤𑀺𑀩𑁆𑀩𑀁 𑀯𑀲𑁆𑀲𑀲𑀳𑀲𑁆𑀲𑀁. 𑀏𑀯𑀁 𑀬𑀸𑀫𑀸𑀤𑀻𑀦𑀁 𑀯𑀲𑁆𑀲𑀕𑀡𑀦𑀜𑁆𑀘 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀳𑁂𑀝𑁆𑀞𑀺𑀫𑀢𑁄 𑀤𑀺𑀕𑀼𑀡𑀘𑀢𑀼𑀕𑁆𑀕𑀼𑀡𑀁 𑀆𑀬𑀼𑀧𑁆𑀧𑀫𑀸𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀩𑁆𑀭𑀳𑁆𑀫𑁂𑀲𑀼 𑀧𑀦 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁 𑀉𑀧𑀟𑁆𑀠𑀓𑀧𑁆𑀧𑁄 ¶ , 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀓𑁄 𑀓𑀧𑁆𑀧𑁄, 𑀧𑀭𑀺𑀢𑁆𑀢𑀸𑀪𑀸𑀦𑀁 𑀤𑁆𑀯𑁂 𑀓𑀧𑁆𑀧𑀸𑀢𑀺 𑀏𑀯𑀁 𑀉𑀧𑀭𑀽𑀧𑀭𑀺 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀪𑀓𑀺𑀡𑁆𑀳𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀪𑀓𑀺𑀡𑁆𑀳𑀸𑀦𑀁 𑀳𑀺 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀅𑀲𑀜𑁆𑀜𑀻𑀦𑀁, 𑀯𑁂𑀳𑀧𑁆𑀨𑀮𑀸𑀦𑀜𑁆𑀘 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺, 𑀅𑀯𑀺𑀳𑀸𑀦𑀁 𑀓𑀧𑁆𑀧𑀲𑀳𑀲𑁆𑀲𑀦𑁆𑀢𑀺 𑀉𑀧𑀭𑀽𑀧𑀭𑀺 𑀤𑀺𑀕𑀼𑀡𑀯𑀲𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀓𑀦𑀺𑀝𑁆𑀞𑀸𑀦𑀁 𑀳𑀺 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀅𑀭𑀽𑀧𑀸𑀦𑀁 𑀘𑀢𑀼𑀦𑁆𑀦𑀁 𑀬𑀣𑀸𑀓𑁆𑀓𑀫𑀁 𑀯𑀻𑀲𑀢𑀺, 𑀘𑀢𑁆𑀢𑀸𑀭𑀺, 𑀲𑀝𑁆𑀞𑀺, 𑀘𑀢𑀼𑀭𑀸𑀲𑀻𑀢𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺.

𑀉𑀓𑁆𑀔𑀺𑀢𑁆𑀢𑀸 ¶ 𑀧𑀼𑀜𑁆𑀜𑀢𑁂𑀚𑁂𑀦, 𑀓𑀸𑀫𑀭𑀽𑀧𑀕𑀢𑀺𑀁 𑀕𑀢𑀸;

𑀪𑀯𑀕𑁆𑀕𑀢𑀫𑁆𑀧𑀺 𑀲𑀫𑁆𑀧𑀢𑁆𑀢𑀸, 𑀧𑀼𑀦𑀸𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑀢𑀸𑀯 𑀤𑀻𑀖𑀸𑀬𑀼𑀓𑀸 𑀲𑀢𑁆𑀢𑀸, 𑀘𑀯𑀦𑁆𑀢𑀺 𑀆𑀬𑀼𑀲𑀗𑁆𑀔𑀬𑀸;

𑀦𑀢𑁆𑀣𑀺 𑀓𑁄𑀘𑀺 𑀪𑀯𑁄 𑀦𑀺𑀘𑁆𑀘𑁄, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

𑀢𑀲𑁆𑀫𑀸 𑀳𑀺 𑀥𑀻𑀭𑀸 𑀦𑀺𑀧𑀓𑀸, 𑀦𑀺𑀧𑀼𑀡𑀸 𑀅𑀢𑁆𑀣𑀘𑀺𑀦𑁆𑀢𑀓𑀸;

𑀚𑀭𑀸𑀫𑀭𑀡𑀫𑁄𑀓𑁆𑀔𑀸𑀬, 𑀪𑀸𑀯𑁂𑀦𑁆𑀢𑀺 𑀫𑀕𑁆𑀕𑀫𑀼𑀢𑁆𑀢𑀫𑀁.

𑀪𑀸𑀯𑀬𑀺𑀢𑁆𑀯𑀸 𑀲𑀼𑀘𑀺𑀁 𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑁄𑀕𑀥𑀕𑀸𑀫𑀺𑀦𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸𑀢𑀺. (𑀯𑀺𑀪. 𑁧𑁦𑁨𑁯);

𑀅𑀬𑀁 𑀙𑀝𑁆𑀞𑀯𑀸𑀭𑁂 𑀦𑀬𑁄.

𑀲𑀢𑁆𑀢𑀫𑁄 𑀧𑀦 𑀯𑀸𑀭𑁄 𑀢𑁂𑀲𑀁 𑀔𑀦𑁆𑀥𑀸𑀤𑀻𑀦𑀁 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀢𑁆𑀣 𑀳𑀺 𑁋

‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄, 𑀧𑀭𑀺𑀜𑁆𑀜𑁂𑀬𑁆𑀬𑁄, 𑀦 𑀧𑀳𑀸𑀢𑀩𑁆𑀩𑁄, 𑀦 𑀪𑀸𑀯𑁂𑀢𑀩𑁆𑀩𑁄, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑁋

𑀤𑁆𑀯𑀸𑀤𑀲𑀧𑀺 𑀓𑁄𑀝𑁆𑀞𑀸𑀲𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀧𑀜𑁆𑀜𑀸𑀬 𑀔𑀦𑁆𑀥𑀸𑀤𑀬𑁄 𑀲𑀩𑁆𑀩𑁂 𑀥𑀫𑁆𑀫𑀸 ¶ 𑀅𑀪𑀺𑀜𑁆𑀜𑁂𑀬𑁆𑀬𑀸. 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀲𑀼 𑀬𑀣𑀸𑀬𑁄𑀕𑀁 𑀬𑀸𑀬 𑀓𑀸𑀬𑀘𑀺 𑀧𑀭𑀺𑀜𑁆𑀜𑀸𑀬 𑀯𑀲𑁂𑀦 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀧𑀺 𑀜𑀸𑀢𑀧𑀭𑀺𑀜𑁆𑀜𑁂𑀬𑁆𑀬𑀸𑀯. 𑀅𑀓𑀼𑀲𑀮𑀸 𑀧𑀦 𑀧𑀳𑀸𑀢𑀩𑁆𑀩𑀸. 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄, 𑀨𑀮𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀜𑀸𑀢𑀢𑀻𑀭𑀡𑀯𑀲𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑁄. 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑁂 𑀳𑀺 𑀲𑀩𑁆𑀩𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀝𑁆𑀞𑀫𑁄 ¶ 𑀧𑀦 𑀯𑀸𑀭𑁄 𑀢𑁂𑀲𑀁 𑀲𑀸𑀭𑀫𑁆𑀫𑀡𑀢𑀸𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀦𑀯𑀫𑁄 𑀧𑀦𑁂𑀲𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼 𑀲𑀗𑁆𑀕𑀳𑀤𑀲𑁆𑀲𑀦𑀯𑀲𑁂𑀦. 𑀤𑀲𑀫𑁄 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀳𑀺 𑀲𑀭𑀡𑀤𑀼𑀓𑀧𑀭𑀺𑀬𑁄𑀲𑀸𑀦𑁂𑀳𑀺 𑀢𑀺𑀓𑀤𑀼𑀓𑁂𑀳𑀺 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀢𑁂𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀢𑁆𑀣 𑀯𑀺𑀪𑀗𑁆𑀕𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀯𑀺𑀪. 𑁯𑁭𑁮 𑀆𑀤𑀬𑁄; 𑀯𑀺𑀪. 𑀅𑀝𑁆𑀞. 𑁯𑁭𑁮 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄𑀢𑀺.

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸

𑀇𑀤𑀸𑀦𑀺 ¶ ¶ 𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀦𑀦𑁆𑀢𑀭𑀁 𑁋

𑀅𑀬𑀁 𑀥𑀸𑀢𑀼𑀓𑀣𑀸𑀤𑀻𑀦𑀁, 𑀲𑀫𑁆𑀧𑀢𑁆𑀢𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀫𑀸𑀢𑀺𑀓𑀸𑀦𑀁 𑀬𑀢𑁄 𑀢𑀲𑁆𑀫𑀸, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀬𑀣𑀸𑀭𑀳𑀁.

𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀘𑁂𑀯, 𑀲𑀗𑁆𑀔𑁂𑀧𑁂𑀦𑀢𑁆𑀣𑀦𑀺𑀘𑁆𑀙𑀬𑀸;

𑀯𑀺𑀪𑀗𑁆𑀕𑀦𑀬𑀢𑁄 𑀘𑁂𑀯, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀢𑀢𑁆𑀣 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀬 𑀢𑀸𑀯 𑀲𑀁𑀯𑀡𑁆𑀡𑀦𑀸 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀦𑀺𑀓𑁆𑀔𑁂𑀧𑀢𑁄 𑀧𑀜𑁆𑀘𑀥𑀸 𑀞𑀺𑀢𑀸 𑁋 𑀦𑀬𑀫𑀸𑀢𑀺𑀓𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀬𑀫𑀼𑀔𑀫𑀸𑀢𑀺𑀓𑀸 𑀮𑀓𑁆𑀔𑀡𑀫𑀸𑀢𑀺𑀓𑀸 𑀩𑀸𑀳𑀺𑀭𑀫𑀸𑀢𑀺𑀓𑀸𑀢𑀺. 𑀢𑀢𑁆𑀣 ‘‘𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀅𑀬𑀁 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀲𑀗𑁆𑀕𑀳𑀸𑀤𑀺𑀓𑁂𑀦 𑀦𑀬𑁂𑀦 𑀥𑀸𑀢𑀼𑀓𑀣𑀸𑀬 𑀥𑀫𑁆𑀫𑀸 𑀯𑀺𑀪𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀸𑀢𑀺𑀓𑀸 𑀦𑀸𑀫, 𑀬𑀸 ‘‘𑀫𑀽𑀮𑀫𑀸𑀢𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀓𑁆𑀔𑀦𑁆𑀥𑀸…𑀧𑁂… 𑀫𑀦𑀲𑀺𑀓𑀸𑀭𑁄’’𑀢𑀺 𑀅𑀬𑀁 𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀸 𑀲𑀗𑁆𑀕𑀳𑀸𑀤𑀺𑀦𑀬𑁂𑀦 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁂𑀦 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀞𑀧𑀺𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀸𑀫, 𑀬𑀸 ‘‘𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺.

‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄, 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀅𑀬𑀁 𑀘𑀢𑀽𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀔𑀦𑁆𑀥𑀸𑀤𑀻𑀲𑀼 𑀘 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀘 𑀫𑀸𑀢𑀺𑀓𑀸𑀥𑀫𑁆𑀫𑁂𑀲𑀼 𑀢𑀻𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀤𑁂𑀳𑁂𑀯 ¶ 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄 𑀘, 𑀢𑀣𑀸 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀦𑀁 𑀦𑀬𑀸𑀦𑀁 𑀫𑀼𑀔𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀼𑀔𑀫𑀸𑀢𑀺𑀓𑀸 𑀦𑀸𑀫.

‘‘𑀲𑀪𑀸𑀕𑁄 ¶ 𑀯𑀺𑀲𑀪𑀸𑀕𑁄’’𑀢𑀺 𑀅𑀬𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀲𑀪𑀸𑀕𑀯𑀺𑀲𑀪𑀸𑀕𑀮𑀓𑁆𑀔𑀡𑀯𑀲𑁂𑀦𑁂𑀯 𑀲𑀗𑁆𑀕𑀳𑀸𑀲𑀗𑁆𑀕𑀳𑀦𑀬𑀸 𑀘𑁂𑀯 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀦𑀬𑀸 𑀘 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀮𑀓𑁆𑀔𑀡𑀫𑀸𑀢𑀺𑀓𑀸 𑀦𑀸𑀫. 𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀢𑀺 𑀅𑀬𑀁 𑀙𑀲𑀝𑁆𑀞𑀺 𑀢𑀺𑀓𑀧𑀤𑀸𑀦𑀺, 𑀤𑁆𑀯𑁂 𑀘 𑀤𑀼𑀓𑀧𑀤𑀲𑀢𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸 𑀥𑀸𑀢𑀼𑀓𑀣𑀸 𑀫𑀸𑀢𑀺𑀓𑀸𑀢𑁄 𑀩𑀳𑀺 𑀞𑀧𑀺𑀢𑀢𑁆𑀢𑀸 𑀩𑀸𑀳𑀺𑀭𑀫𑀸𑀢𑀺𑀓𑀸 𑀦𑀸𑀫. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀫𑀸𑀢𑀺𑀓𑀸𑀬 𑀅𑀬𑀫𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸.

𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀳𑀺 𑀲𑀗𑁆𑀕𑀳𑁄 𑀢𑀸𑀯 𑀚𑀸𑀢𑀺𑀲𑀜𑁆𑀚𑀸𑀢𑀺𑀓𑀺𑀭𑀺𑀬𑀸𑀕𑀡𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀩𑁆𑀩𑁂 𑀔𑀢𑁆𑀢𑀺𑀬𑀸 𑀆𑀕𑀘𑁆𑀙𑀦𑁆𑀢𑀼, 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀲𑀩𑁆𑀩𑁂 𑀓𑁄𑀲𑀮𑀓𑀸 𑀆𑀕𑀘𑁆𑀙𑀦𑁆𑀢𑀼, 𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫, 𑀏𑀓𑀝𑁆𑀞𑀸𑀦𑁂 𑀚𑀸𑀢𑀺𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑁂 𑀳𑀢𑁆𑀣𑀸𑀭𑁄𑀳𑀸 𑀆𑀕𑀘𑁆𑀙𑀦𑁆𑀢𑀼, 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀓𑀺𑀭𑀺𑀬𑀸𑀲𑀗𑁆𑀕𑀳𑁄 𑀦𑀸𑀫. ‘‘𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’’𑀦𑁆𑀢𑀺 (𑀓𑀣𑀸. 𑁪𑁭𑁧) 𑀅𑀬𑀁 𑀕𑀡𑀦𑀲𑀗𑁆𑀕𑀳𑁄 𑀦𑀸𑀫, 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀤𑀻𑀦𑀺, 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀲𑀫𑁆𑀧𑀬𑁄𑀕𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀯𑀺𑀧𑁆𑀧𑀬𑁄𑀕𑁄, 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀻𑀦𑀺, 𑀢𑀤𑀼𑀪𑀬𑀲𑀁𑀲𑀕𑁆𑀕𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀘 ¶ 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄.

𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀢𑁄 𑀧𑀦 𑀬𑀲𑁆𑀫𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀬 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺, 𑀩𑀸𑀳𑀺𑀭𑀫𑀸𑀢𑀺𑀓𑀸𑀬 𑀓𑀼𑀲𑀮𑀸𑀤𑀻𑀦𑀺 𑀘 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀓𑁂𑀳𑀺 𑀦𑀬𑀫𑀸𑀢𑀺𑀓𑀸𑀧𑀤𑁂𑀳𑀺 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀲𑁂𑀦 ¶ 𑀬𑀣𑀸𑀭𑀳𑀁 𑀦𑀺𑀤𑁆𑀤𑁂𑀲𑀢𑁆𑀣𑀸𑀬 𑀪𑀕𑀯𑀢𑀸 𑀞𑀧𑀺𑀢𑀸𑀦𑀺, 𑀢𑀲𑁆𑀫𑀸 𑀔𑀦𑁆𑀥𑀸𑀤𑀻𑀦𑀁 𑀲𑀗𑁆𑀕𑀳𑀸𑀤𑀻𑀦𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑀦𑀬𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀢𑀁 𑀯𑀺𑀲𑀼𑀁 𑀦 𑀯𑀓𑁆𑀔𑀸𑀫.

𑀢𑀢𑁆𑀣 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀸𑀭𑁂 𑀔𑀦𑁆𑀥𑀸𑀦𑀁 𑀢𑀸𑀯 𑀅𑀬𑀁 𑀦𑀺𑀤𑁆𑀤𑁂𑀲𑁂 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄. 𑀢𑀢𑁆𑀣 𑀏𑀓𑀸𑀤𑀲𑀳𑀻𑀢𑀺 𑀫𑀦𑀸𑀬𑀢𑀦𑀯𑀚𑁆𑀚𑁂𑀳𑀺. 𑀥𑀫𑁆𑀫𑀸𑀬𑀢𑀦𑁂𑀦𑀸𑀧𑀺 𑀳𑀺 𑀓𑁂𑀘𑀺 𑀭𑀽𑀧𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸. 𑀏𑀓𑀸𑀤𑀲𑀳𑀻𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀬𑀣𑀸𑀲𑀓𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑀣𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀧𑀺. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄, 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀳𑀺 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀏𑀓𑁂𑀦 𑀥𑀫𑁆𑀫𑀸𑀬𑀢𑀦𑁂𑀦 𑀘 𑀏𑀓𑀸𑀬 𑀥𑀫𑁆𑀫𑀥𑀸𑀢𑀼𑀬𑀸 𑀘 𑀲𑀗𑁆𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑁂, 𑀉𑀧𑀭𑀺 𑀆𑀬𑀢𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 ¶ 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁧𑁫) 𑀤𑁆𑀯𑀺𑀫𑀽𑀮𑀓𑀸𑀤𑀺𑀦𑀬𑁂𑀦𑀸𑀧𑀺 𑀯𑀺𑀢𑁆𑀣𑀸𑀭𑀦𑀬𑁄 𑀯𑀺𑀪𑀢𑁆𑀢𑁄, 𑀲𑁄𑀧𑀺 𑀇𑀫𑀺𑀦𑀸 𑀏𑀓𑀫𑀽𑀮𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳𑀸. 𑀅𑀬𑀁 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑀦𑀬𑁄.

𑀆𑀬𑀢𑀦𑀥𑀸𑀢𑀼𑀧𑀤𑀸𑀦𑀫𑁆𑀧𑀺 𑀔𑀦𑁆𑀥𑀧𑀤𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀅𑀲𑀗𑁆𑀔𑀢𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑀸 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁆𑀘𑁂𑀲𑀼 𑀤𑀼𑀓𑁆𑀔𑀲𑀘𑁆𑀘𑀁 𑀲𑀩𑁆𑀩𑁂𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺. 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑀸𑀦𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀏𑀯 𑀲𑀗𑁆𑀕𑀳𑀺𑀢𑀁.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀤𑁆𑀯𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 ¶ , 𑀲𑀤𑁆𑀥𑀸𑀤𑀻𑀦𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺𑀧𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑁂𑀳𑀺 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀏𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑀁. 𑀏𑀢𑁆𑀣 𑀳𑀺 𑀧𑀯𑀢𑁆𑀢𑀺𑀬𑀁 𑀦𑀸𑀫𑀭𑀽𑀧𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸 𑀲𑀤𑁆𑀤𑀸𑀬𑀢𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀴𑀸𑀬𑀢𑀦𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺, 𑀧𑀲𑀸𑀤𑀯𑀺𑀜𑁆𑀜𑀸𑀡𑀪𑀽𑀢𑁂𑀳𑀺 𑀙𑀳𑀺 𑀆𑀬𑀢𑀦𑁂𑀳𑀺, 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀁. 𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀓𑀸𑀫𑀪𑀯𑀪𑀽𑀢𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺, 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺, 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺. 𑀭𑀽𑀧𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺, 𑀲𑀤𑁆𑀤𑀸𑀤𑀺𑀘𑀢𑀼𑀓𑁆𑀓𑀖𑀸𑀦𑀸𑀤𑀺𑀢𑁆𑀢𑀬𑀢𑀩𑁆𑀩𑀺𑀜𑁆𑀜𑀸𑀡𑀯𑀚𑁆𑀚𑁂𑀳𑀺 𑀧𑀜𑁆𑀘𑀳𑀸𑀬𑀢𑀦𑁂𑀳𑀺, 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 ¶ 𑀲𑀗𑁆𑀕𑀳𑀺𑀢𑁄. 𑀅𑀲𑀜𑁆𑀜𑀻𑀪𑀯𑁄 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀭𑀽𑀧𑀥𑀫𑁆𑀫𑀯𑀲𑁂𑀦 𑀤𑁆𑀯𑀻𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀖𑀸𑀦𑀸𑀤𑀺𑀢𑁆𑀢𑀬𑀁 𑀧𑀦𑁂𑀢𑁆𑀣 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀸𑀓𑀭𑀡𑀢𑁄 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀫𑁆𑀧𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀯𑀲𑁆𑀲 𑀘 𑀏𑀓𑀦𑁆𑀢𑀫𑀼𑀧𑀸𑀤𑀺𑀦𑁆𑀦𑀢𑁆𑀢𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀕𑀳𑀡𑁂𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀬𑀢𑀦𑀲𑁆𑀲 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀅𑀭𑀽𑀧𑀪𑀯𑁄 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑀥𑀸𑀢𑀽𑀳𑀺. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀢𑁆𑀢𑀸 𑀤𑁆𑀯𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦. 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑁄. 𑀧𑀭𑀺𑀤𑁂𑀯𑁄 𑀭𑀽𑀧𑀓𑁆𑀔𑀦𑁆𑀥𑀲𑀤𑁆𑀤𑀸𑀬𑀢𑀦𑀲𑀤𑁆𑀤𑀥𑀸𑀢𑀽𑀳𑀺. 𑀲𑁂𑀲𑀸𑀦𑀺 𑀧𑀦𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺, 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀇𑀤𑁆𑀥𑀺𑀧𑀸𑀤𑀸 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀏𑀢𑁆𑀣 𑀘 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀲𑁆𑀲 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀬𑀫𑀢𑁄 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀛𑀸𑀦𑀸𑀦𑀺 𑀤𑁆𑀯𑀻𑀳𑀺 𑀯𑁂𑀤𑀦𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺, 𑀏𑀓𑁂𑀦𑀸𑀬𑀢𑀦𑁂𑀦, 𑀏𑀓𑀸𑀬 𑀥𑀸𑀢𑀼𑀬𑀸 𑀘 𑀲𑀗𑁆𑀕𑀳𑀺𑀢𑀸𑀦𑀺. 𑀅𑀧𑁆𑀧𑀫𑀜𑁆𑀜𑀸 𑀏𑀓𑁂𑀦 𑀔𑀦𑁆𑀥𑁂𑀦, 𑀏𑀓𑁂𑀦 𑀆𑀬𑀢𑀦𑁂𑀦, 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺𑀧𑀺. 𑀓𑁂𑀯𑀮𑀁 𑀧𑀦 𑀘𑀺𑀢𑁆𑀢𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀲 𑀯𑀼𑀢𑁆𑀢𑀸𑀯𑀲𑁂𑀲𑁂𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀺𑀦𑀸 𑀦𑀬𑁂𑀦 𑀩𑀸𑀳𑀺𑀭𑀫𑀸𑀢𑀺𑀓𑀸𑀬𑀧𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀅𑀩𑁆𑀬𑀸𑀓𑀢𑀸 𑀧𑀦 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀜𑀸𑀢𑀩𑁆𑀩𑁄𑀢𑀺 ¶ ¶ 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀸𑀢𑀼𑀓𑀣𑀸𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀥𑀸𑀢𑀼. 𑁭𑁭 𑀆𑀤𑀬𑁄; 𑀥𑀸𑀢𑀼. 𑀅𑀝𑁆𑀞. 𑁭𑁭) 𑀕𑀳𑁂𑀢𑀩𑁆𑀩𑁄𑀢𑀺.

𑀦𑀺𑀝𑁆𑀞𑀺𑀢𑁄 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀧𑀤𑀲𑁆𑀲

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀲𑀩𑁆𑀩𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺. 𑀬𑀸𑀦𑀺 𑀧𑀦𑁂𑀢𑁆𑀣 𑀧𑀤𑀸𑀦𑀺 𑀭𑀽𑀧𑁂𑀓𑀤𑁂𑀲𑀁, 𑀅𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀯𑀺𑀜𑁆𑀜𑀸𑀡𑁂𑀓𑀤𑁂𑀲𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑀺𑀥 𑀦𑀺𑀤𑁆𑀤𑁂𑀲𑁄. 𑀢𑀸𑀦𑀺 𑀧𑀦 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀁 𑀤𑀲𑀸𑀬𑀢𑀦𑀸𑀦𑀁, 𑀥𑀫𑁆𑀫𑀥𑀸𑀢𑀼𑀯𑀚𑁆𑀚𑀺𑀢𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀥𑀸𑀢𑀽𑀦𑀁, 𑀲𑀢𑁆𑀢𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 𑁋

‘‘𑀤𑀲𑀸𑀬𑀢𑀦𑀸 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄,

𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀲𑀜𑁆𑀜𑀸𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄;

𑀧𑀭𑀺𑀤𑁂𑀯𑁄 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁,

𑀅𑀦𑀺𑀤𑀲𑁆𑀲𑀦𑀁 𑀧𑀼𑀦𑀤𑁂𑀯 𑀲𑀧𑁆𑀧𑀝𑀺𑀖𑀁 𑀉𑀧𑀸𑀤𑀸’’𑀢𑀺. (𑀥𑀸𑀢𑀼. 𑁧𑁭𑁮) 𑁋

𑀏𑀯𑀁 𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀯. 𑀢𑁂𑀧𑀺 𑀘 𑀬𑁂𑀳𑀺 𑀓𑁂𑀳𑀺𑀘𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀢𑁂𑀲𑀁 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑀸𑀬𑀢𑀦𑀸𑀦𑀁 𑀯𑀲𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀔𑀦𑁆𑀥𑀧𑀤𑁂𑀦 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀔𑀦𑁆𑀥𑀸𑀬𑀢𑀦𑀧𑀤𑁂𑀳𑀺 𑀯𑀸 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀥𑀸𑀢𑀼𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑁄 ¶ 𑀯𑀼𑀘𑁆𑀘𑀢𑀺. 𑀓𑀣𑀁? 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀘 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 ¶ 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀭𑀽𑀧𑀸𑀬𑀢𑀦𑀸𑀤𑀻𑀲𑀼𑀧𑀺 𑀧𑀲𑀸𑀤𑀯𑀺𑀲𑀬𑀪𑀽𑀢𑁂𑀲𑀼 𑀥𑀸𑀢𑀽𑀲𑀼, 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀘 𑀬𑁄𑀚𑀦𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀭𑀽𑀧𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀘𑀓𑁆𑀔𑀼𑀥𑀸𑀢𑀼𑀬𑀸 𑀅𑀲𑀗𑁆𑀕𑀳𑀺𑀢𑀸, 𑀘𑀓𑁆𑀔𑀸𑀬𑀢𑀦𑀘𑀓𑁆𑀔𑀼𑀥𑀸𑀢𑀽𑀳𑀺 𑀏𑀓𑀲𑁆𑀲𑁂𑀯𑁂𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀯𑀺𑀲𑀼𑀁 𑀆𑀬𑀢𑀦𑀥𑀸𑀢𑀽𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑁂 𑀘𑀓𑁆𑀔𑀸𑀬𑀢𑀦𑀯𑀺𑀭𑀳𑀺𑀢𑀸 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀘𑀓𑁆𑀔𑀸𑀬𑀢𑀦𑀁 𑀫𑀦𑀸𑀬𑀢𑀦𑀦𑁆𑀢𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 𑀘𑀓𑁆𑀔𑀼𑀥𑀸𑀢𑀼 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀉𑀧𑀭𑀺 𑀭𑀽𑀧𑀸𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀳𑀺 𑀯𑀸𑀭𑁂 𑀘𑀓𑁆𑀔𑀸𑀬𑀢𑀦𑀲𑁆𑀲 𑀅𑀢𑁆𑀢𑀦𑁄 𑀢𑀻𑀳𑀺𑀧𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀢𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀏𑀯𑀁 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲𑁂𑀯 ‘‘𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀘 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀲𑀳 𑀩𑀳𑀺𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁆𑀣 𑀘𑀓𑁆𑀔𑀸𑀬𑀢𑀦𑁂𑀦 𑀉𑀧𑀮𑀓𑁆𑀔𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑀸, 𑀦 𑀘𑀓𑁆𑀔𑀸𑀬𑀢𑀦𑀲𑁆𑀲, 𑀏𑀯𑀁 𑀉𑀧𑀭𑀺 𑀭𑀽𑀧𑀸𑀬𑀢𑀦𑀸𑀤𑀻𑀳𑀺 𑀉𑀧𑀮𑀓𑁆𑀔𑀺𑀢𑀯𑀸𑀭𑁂𑀧𑀺 𑀬𑀣𑀸𑀭𑀳𑀁 𑀜𑀸𑀢𑀩𑁆𑀩𑀸.

𑀲𑁂𑀲𑁂𑀲𑀼 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 ¶ 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀲𑁂𑀲𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼𑀧𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀅𑀲𑀜𑁆𑀜𑀻𑀪𑀯𑁂𑀦 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀉𑀧𑀸𑀤𑀸𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀅𑀧𑀼𑀩𑁆𑀩𑀯𑀺𑀲𑁂𑀲𑀸 𑀲𑀫𑀸𑀬𑁂𑀯. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀸𑀭𑁂 𑀤𑁆𑀯𑀸𑀤𑀲𑀳𑀻𑀢𑀺 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸𑀳𑀺 𑀥𑀸𑀢𑀽𑀳𑀺 𑀲𑁂𑀲𑀸 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀯 𑀔𑀦𑁆𑀥𑀸𑀬𑀢𑀦𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦𑁂𑀯 𑀅𑀲𑀗𑁆𑀕𑀳𑀺𑀢𑀸. 𑀅𑀯𑀲𑁂𑀲𑀸𑀳𑀺 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺. 𑀏𑀲 𑀦𑀬𑁄 𑀲𑁂𑀲𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼𑀧𑀺.

𑀤𑀼𑀢𑀺𑀬𑁂 𑀢𑀻𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀅𑀲𑀜𑁆𑀜𑀺𑀩𑁆𑀭𑀳𑁆𑀫𑀮𑁄𑀓𑁂 𑀳𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺, 𑀢𑁂 𑀧𑀦 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺, 𑀆𑀬𑀢𑀦𑀥𑀸𑀢𑀽𑀲𑀼 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀢𑀤𑀯𑀲𑁂𑀲𑀸𑀦𑀺 𑀦𑀯 𑀭𑀽𑀧𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀢𑁂𑀳𑁂𑀯 ¶ 𑀘 𑀤𑁆𑀯𑀻𑀳𑀺 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀘 𑀅𑀲𑀗𑁆𑀕𑀳𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀦𑀯𑀳𑀺 𑀥𑀸𑀢𑀽𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀽𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺.

𑀢𑀢𑀺𑀬𑁂 𑀤𑀲𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑁂𑀳𑀺. 𑀲𑁄𑀴𑀲𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀚𑁆𑀚𑀸𑀳𑀺. 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺 𑀦𑀸𑀫 𑀦𑀯 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀢𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀘 𑀅𑀲𑀗𑁆𑀕𑀳𑀺𑀢𑀸𑀦𑀺, 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺 𑀤𑁆𑀯𑁂𑀧𑀺 𑀲𑁂𑀲𑁂𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀘𑀢𑀼𑀢𑁆𑀣𑁂 𑀏𑀓𑀸𑀤𑀲𑀳𑀻𑀢𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀯𑀚𑁆𑀚𑁂𑀳𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲 𑀉𑀧𑀸𑀤𑀸𑀥𑀫𑁆𑀫𑁂𑀳𑀺 𑀆𑀬𑀢𑀦𑀸𑀤𑀻𑀲𑀼 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑁂𑀲𑀁 ¶ 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀯𑀺𑀜𑁆𑀜𑀸𑀡𑁂𑀦 𑀯𑀸 𑀑𑀴𑀸𑀭𑀺𑀓𑀭𑀽𑀧𑁂𑀦 𑀯𑀸 𑀅𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀤𑀼𑀓𑁆𑀔𑀲𑀘𑁆𑀘𑀯𑀚𑁆𑀚𑀺𑀢𑀸𑀦𑀁 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁, 𑀧𑀲𑀸𑀤𑀫𑀦𑁄𑀯𑀚𑁆𑀚𑀺𑀢𑀸𑀦𑀁 𑀲𑁄𑀴𑀲𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀨𑀲𑁆𑀲𑀯𑁂𑀤𑀦𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀪𑀯𑀚𑀸𑀢𑀺𑀚𑀭𑀸𑀫𑀭𑀡𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀯𑀲𑁂𑀦 𑀘𑀼𑀤𑁆𑀤𑀲𑀧𑀘𑁆𑀘𑀬𑀸𑀓𑀸𑀭𑀧𑀤𑀸𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀬𑁄 𑀔𑀦𑁆𑀥𑀸 𑀢𑀣𑀸 𑀲𑀘𑁆𑀘𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀲𑁄𑀴𑀲;

𑀧𑀤𑀸𑀦𑀺 𑀧𑀘𑁆𑀘𑀬𑀸𑀓𑀸𑀭𑁂, 𑀘𑀼𑀤𑁆𑀤𑀲𑀽𑀧𑀭𑀺 𑀘𑀼𑀤𑁆𑀤𑀲.

‘‘𑀲𑀫𑀢𑀺𑀁𑀲 𑀧𑀤𑀸 𑀳𑁄𑀦𑁆𑀢𑀺, 𑀕𑁄𑀘𑁆𑀙𑀓𑁂𑀲𑀼 𑀤𑀲𑀲𑁆𑀯𑀣;

𑀤𑀼𑀯𑁂 𑀘𑀽𑀴𑀦𑁆𑀢𑀭𑀤𑀼𑀓𑀸, 𑀅𑀝𑁆𑀞 𑀳𑁄𑀦𑁆𑀢𑀺 𑀫𑀳𑀦𑁆𑀢𑀭𑀸’’𑀢𑀺. (𑀥𑀸𑀢𑀼. 𑀅𑀝𑁆𑀞. 𑁧𑁭𑁯) 𑁋

𑀏𑀯𑀁 𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀔𑀦𑁆𑀥𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀢𑀻𑀳𑀺 𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺. 𑀓𑀣𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 ¶ 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀦𑀺𑀩𑁆𑀩𑀸𑀦𑀁, 𑀲𑀼𑀔𑀼𑀫𑀭𑀽𑀧𑀁, 𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀁 𑀦 ¶ 𑀕𑀘𑁆𑀙𑀢𑀺, 𑀲𑁂𑀲𑀸 𑀢𑀻𑀳𑀺 𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀆𑀬𑀢𑀦𑀥𑀸𑀢𑀼𑀬𑁄 𑀧𑀦𑁂𑀢𑁆𑀣 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀦𑀁 𑀯𑀲𑁂𑀦𑁂𑀯 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀸 𑀇𑀢𑀭𑀸𑀲𑀁 𑀅𑀲𑀫𑁆𑀪𑀯𑀸, 𑀇𑀫𑁂𑀲𑀼 𑀘 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦𑁂𑀯 𑀳𑀺 ‘‘𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀔𑀦𑁆𑀥𑀲𑀗𑁆𑀕𑀳𑁂 𑀏𑀯 𑀅𑀲𑀗𑁆𑀔𑀢𑀁 𑀞𑀧𑁂𑀢𑁆𑀯𑀸, 𑀦 𑀇𑀢𑀭𑀲𑀗𑁆𑀕𑀳𑁂𑀲𑀽𑀢𑀺 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀤𑁆𑀯𑀻𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀩𑁆𑀩𑀸𑀦𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀼 𑀘 𑀦𑀺𑀩𑁆𑀩𑀸𑀦𑀯𑁂𑀤𑀦𑀸𑀲𑀜𑁆𑀜𑀸𑀯 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀲𑀗𑁆𑀔𑀸𑀭𑁂𑀓𑀤𑁂𑀲𑀁 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺 𑀯𑁂𑀤𑀦𑁂𑀓𑀤𑁂𑀲𑀁 𑀯𑀸 𑀲𑀼𑀔𑀼𑀫𑀭𑀽𑀧𑀁 𑀯𑀸 𑀲𑀤𑁆𑀤𑁂𑀓𑀤𑁂𑀲𑀁 𑀯𑀸, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀏𑀓𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀲𑀓𑀮𑁂𑀦 𑀕𑀳𑁂𑀢𑁆𑀯𑀸 𑀞𑀺𑀢𑀧𑀤𑀸𑀦𑀺 𑀦 𑀬𑀼𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀁, 𑀧𑀦𑁆𑀦𑀭𑀲𑀺𑀦𑁆𑀤𑁆𑀭𑀺𑀬𑀸𑀦𑀁, 𑀏𑀓𑀸𑀤𑀲𑀧𑀝𑀺𑀘𑁆𑀘𑀧𑀤𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀅𑀢𑁆𑀢𑀦𑀸 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑁂𑀳𑀺 𑀔𑀦𑁆𑀥𑀸𑀤𑀺𑀢𑁄 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀧𑀞𑀫𑀁 𑀉𑀤𑁆𑀥𑀝𑀧𑀤𑀲𑁆𑀲 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀆𑀤𑀺𑀧𑀤𑁂 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 ¶ 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸𑀢𑀺. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀳𑀺 𑀢𑀡𑁆𑀳𑀸𑀯𑀚𑁆𑀚𑀸 𑀲𑁂𑀲𑀸 𑀲𑀗𑁆𑀔𑀸𑀭𑀸 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀧𑀼𑀦 𑀢𑁂𑀳𑀺 𑀘 𑀢𑀡𑁆𑀳𑀸𑀯 𑀲𑀗𑁆𑀕𑀳𑀺𑀢𑀸, 𑀲𑀸 𑀘 𑀧𑀼𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 ¶ 𑀲𑀗𑁆𑀕𑀳𑀺𑀢𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑀕𑀸𑀳𑀓𑁂𑀳𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺, 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀼𑀔𑀼𑀫𑀭𑀽𑀧𑀕𑀸𑀳𑀓𑁂𑀳𑀺 𑀅𑀘𑁂𑀢𑀲𑀺𑀓𑀸𑀤𑀻𑀳𑀺 𑀘 𑀧𑀤𑁂𑀳𑀺 𑀯𑀺𑀯𑀚𑁆𑀚𑀺𑀢𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀧𑀞𑀫𑀁 𑀉𑀤𑁆𑀥𑀝𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦 𑀔𑀦𑁆𑀥𑀸𑀤𑀺𑀢𑁄 𑀅𑀲𑀗𑁆𑀕𑀳𑀺𑀢𑀁, 𑀬𑀁 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀏𑀓𑀧𑀤𑀬𑁄𑀚𑀦𑀸 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀦𑀺𑀩𑁆𑀩𑀸𑀦𑀜𑁆𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀸𑀤𑀻𑀳𑀺 𑀧𑀦 𑀯𑀺𑀜𑁆𑀜𑀸𑀡𑀫𑁂𑀯 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑀺𑀜𑁆𑀜𑀸𑀡𑀫𑁂𑀯 𑀢𑀻𑀳𑀺𑀧𑀺 𑀔𑀦𑁆𑀥𑀲𑀗𑁆𑀕𑀳𑀸𑀤𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫. 𑀢𑁂𑀦 𑀧𑀼𑀦 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀦𑀺𑀩𑁆𑀩𑀸𑀦𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀧𑀼𑀦 𑀯𑀺𑀜𑁆𑀜𑀸𑀡𑀪𑀽𑀢𑁂𑀦 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 ¶ 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑁂𑀦, 𑀭𑀽𑀧𑁂𑀦 𑀯𑀸 𑀫𑀺𑀲𑁆𑀲𑁂𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀏𑀓𑀸𑀬𑀧𑀺 𑀅𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀭𑀽𑀧𑀥𑀫𑁆𑀫𑁂 𑀧𑀓𑀸𑀲𑁂𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺. 𑀓𑀸𑀳𑀺𑀘𑀺 𑀧𑀦 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀭𑀽𑀧𑀫𑀺𑀲𑁆𑀲𑀸𑀭𑀽𑀧𑀥𑀫𑁆𑀫𑀸𑀦𑀁, 𑀓𑁂𑀯𑀮𑀸𑀦𑀸𑀭𑀫𑁆𑀫𑀡𑀸𑀦𑀁 𑀯𑀸 𑀲𑀓𑀮𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀸 𑀧𑀓𑀸𑀲𑀓𑀸𑀦𑀁 𑀭𑀽𑀧𑀪𑀯𑀭𑀽𑀧𑀓𑁆𑀔𑀦𑁆𑀥𑀓𑀼𑀲𑀮𑀸𑀤𑀺𑀧𑀤𑀸𑀦𑀁 𑀲𑀫𑁆𑀧𑀬𑁄𑀕𑀧𑀤𑁂 𑀏𑀯 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺, 𑀯𑀺𑀧𑁆𑀧𑀬𑁄𑀕𑀧𑀤𑁂 𑀧𑀦 𑀲𑀫𑁆𑀪𑀯𑀢𑀺. 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀦 𑀧𑀘𑁆𑀘𑁂𑀓𑀁, 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁, 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀢𑀤𑀼𑀪𑀬𑁂𑀧𑀺 𑀲𑀫𑁆𑀪𑀯𑀢𑀺. ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄, 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄’’𑀢𑀺 𑀳𑀺 𑀯𑀘𑀦𑀢𑁄 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑁂𑀯 𑀲𑀪𑀸𑀕𑀸𑀦𑀁 𑀏𑀓𑀲𑀦𑁆𑀢𑀸𑀦𑁂 𑀏𑀓𑀓𑁆𑀔𑀡𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀺. 𑀭𑀽𑀧𑀥𑀫𑁆𑀫𑀸𑀦𑀁 ¶ 𑀧𑀦 𑀭𑀽𑀧𑁂𑀦, 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺. 𑀯𑀺𑀲𑀪𑀸𑀕𑀸 𑀳𑀺 𑀢𑁂 𑀢𑁂𑀲𑀁 𑀬𑀣𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺, 𑀏𑀯𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑀺𑀓𑁂𑀳𑀺 𑀦𑀸𑀦𑀓𑁆𑀔𑀡𑀺𑀓𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺𑀧𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺𑀬𑁂𑀯. 𑀢𑁂𑀧𑀺 𑀳𑀺 𑀢𑁂𑀲𑀁 𑀲𑀦𑁆𑀢𑀸𑀦𑀓𑁆𑀔𑀡𑀯𑀺𑀲𑀪𑀸𑀕𑀢𑀸𑀬 𑀯𑀺𑀲𑀪𑀸𑀕𑀸 𑀏𑀯. 𑀅𑀬𑀁 𑀧𑀦 𑀯𑀺𑀲𑀪𑀸𑀕𑀢𑀸 𑀇𑀥 𑀲𑀸𑀫𑀜𑁆𑀜𑀢𑁄 𑀦 𑀕𑀳𑀺𑀢𑀸 𑀢𑁂𑀲𑀁 𑀅𑀯𑀺𑀲𑁂𑀲𑁂𑀦 𑀲𑀫𑁆𑀧𑀬𑁄𑀕𑀲𑁆𑀲𑀸𑀧𑀺 𑀲𑀫𑁆𑀪𑀯𑀸. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁂𑀢𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀤𑀬𑁄 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀢𑁆𑀣𑀸𑀬𑀫𑁆𑀧𑀺 𑀯𑀺𑀲𑀪𑀸𑀕𑀢𑀸 𑀕𑀳𑀺𑀢𑀸. 𑀬𑀢𑁆𑀣 𑀧𑀦 𑀬𑁂 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑀦𑀸, 𑀢𑀢𑁆𑀣𑀸𑀧𑀺 𑀲𑀩𑁆𑀩𑀣𑀸 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀁 𑀦 𑀲𑀫𑁆𑀪𑀯𑀢𑀺. 𑀲𑁄 𑀘 𑀢𑀲𑁆𑀲 𑀏𑀓𑀦𑁆𑀢𑁂𑀦 𑀯𑀺𑀲𑀪𑀸𑀕𑁄𑀢𑀺 𑀇𑀥 𑀕𑀬𑁆𑀳𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁄 𑀓𑁂𑀦𑀘𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 ¶ 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀘𑀓𑁆𑀔𑀸𑀬𑀢𑀦𑀸𑀤𑀺𑀅𑀦𑀸𑀭𑀫𑁆𑀫𑀡𑁂𑀲𑀼𑀧𑀺. 𑀲𑀸𑀭𑀫𑁆𑀫𑀡𑁂𑀲𑀼 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺.

𑀢𑀢𑁆𑀣 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀲𑀢𑁆𑀢𑀳𑀻𑀢𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀓𑁂𑀳𑀺𑀘𑀻𑀢𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺. 𑀤𑀼𑀢𑀺𑀬𑀦𑀬𑁂 𑀢𑀻𑀳𑀻𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺. 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺. 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 ‘‘𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀤𑀬𑁄 𑀏𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀅𑀥𑀺𑀫𑁄𑀓𑁆𑀔𑁄 𑀧𑀦 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀤𑁆𑀯𑀻𑀳𑁂𑀯𑀸’’𑀢𑀺. 𑀅𑀬𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀲𑀫𑁆𑀧𑀬𑁄𑀕𑀸𑀭𑀳𑀧𑀤𑁂𑀲𑀼 𑀬𑀸𑀦𑀺 𑀧𑀤𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂, 𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄. 𑀢𑀸𑀦𑀺 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀧𑀤𑀸𑀦𑀁, 𑀫𑀦𑀸𑀬𑀢𑀦𑀲𑁆𑀲, 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁, 𑀫𑀦𑁄𑀧𑁂𑀓𑁆𑀔𑀸𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀦𑀁 ¶ 𑀢𑀺𑀡𑁆𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑀸𑀦𑀁, 𑀨𑀲𑁆𑀲𑀲𑀢𑁆𑀢𑀓𑀲𑁆𑀲, 𑀅𑀤𑀼𑀓𑁆𑀔𑀫𑀲𑀼𑀔𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀢𑀺𑀓𑀧𑀤𑀸𑀦𑀁, 𑀲𑀢𑁆𑀢𑀫𑀳𑀦𑁆𑀢𑀭𑀤𑀼𑀓𑀧𑀤𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀇𑀢𑀭𑁂𑀲𑀁 𑀅𑀲𑀫𑁆𑀪𑀯𑀸. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀘𑀢𑁆𑀢𑀸𑀭𑁄 ¶ 𑀔𑀦𑁆𑀥𑀸𑀬𑀢𑀦𑀜𑁆𑀘 𑀏𑀓𑀁,

𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸 𑀥𑀸𑀢𑀼𑀧𑀤𑀸𑀦𑀺 𑀲𑀢𑁆𑀢;

𑀢𑀬𑁄 𑀧𑀝𑀺𑀘𑁆𑀘𑀸 𑀅𑀣 𑀨𑀲𑁆𑀲𑀲𑀢𑁆𑀢𑀓𑀁,

𑀢𑀺𑀓𑁂 𑀢𑀬𑁄 𑀲𑀢𑁆𑀢 𑀫𑀳𑀦𑁆𑀢𑀭𑁂 𑀘;

𑀏𑀓𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀫𑁂𑀓𑀁,

𑀬𑀼𑀢𑁆𑀢𑀁 𑀉𑀧𑁂𑀓𑁆𑀔𑀸𑀬 𑀘 𑀏𑀓𑀫𑁂𑀯𑀸’’𑀢𑀺. (𑀥𑀸𑀢𑀼. 𑀅𑀝𑁆𑀞. 𑁩𑁦𑁬) 𑁋

𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑀸𑀬𑀢𑀦𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑀸𑀬 𑀧𑀦 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀢𑁂 𑀥𑀫𑁆𑀫𑀸𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀥𑀫𑁆𑀫𑀸, 𑀢𑁂 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀤𑀼𑀢𑀺𑀬𑀦𑀬𑁂 𑀢𑁂 𑀥𑀫𑁆𑀫𑀸𑀢𑀺 𑀲𑀧𑁆𑀧𑀻𑀢𑀺𑀓𑀸 𑀢𑁂 𑀥𑀫𑁆𑀫𑀸. 𑀦 𑀓𑁂𑀳𑀺𑀘𑀻𑀢𑀺 𑀧𑀞𑀫𑀁 𑀉𑀤𑁆𑀥𑀝𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀙𑀯𑀺𑀜𑁆𑀜𑀸𑀡𑀥𑀸𑀢𑀽, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀢𑁂𑀳𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀦 𑀳𑀺 𑀲𑀬𑀁 𑀅𑀢𑁆𑀢𑀦𑀸 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀲𑀫𑁆𑀧𑀬𑀼𑀚𑁆𑀚𑀢𑀺 𑀯𑀸𑀢𑀺. 𑀏𑀓𑀸𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 ¶ ¶ 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀥𑀫𑁆𑀫𑁄 𑀦𑀢𑁆𑀣𑀺, 𑀤𑁂𑀲𑀦𑀸𑀲𑀫𑁆𑀧𑀤𑀫𑀢𑁆𑀢𑀸𑀬 𑀧𑀦 𑀫𑁄𑀖𑀫𑁆𑀧𑁂𑀢𑀁 𑀧𑀤𑀁 𑀉𑀤𑁆𑀥𑀝𑀁, 𑀢𑁂𑀦𑁂𑀯 𑀧𑀸𑀴𑀺𑀬𑀁 𑀲𑀩𑁆𑀩𑀯𑀸𑀭𑁂𑀲𑀼𑀧𑀺 ‘‘𑀦𑀢𑁆𑀣𑀺 𑀦𑀢𑁆𑀣𑀺’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀅𑀦𑀸𑀭𑀫𑁆𑀫𑀡𑀥𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀢𑁂𑀲𑀜𑁆𑀘 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀯𑁂𑀤𑀦𑀸𑀤𑀻𑀳𑀺𑀧𑀺 𑀭𑀽𑀧𑀦𑀺𑀩𑁆𑀩𑀸𑀦𑀸𑀤𑀻𑀦𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀢𑁂𑀲𑀜𑁆𑀘 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄𑀯 𑀦𑀢𑁆𑀣𑀻𑀢𑀺. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀅𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀫𑁂𑀯 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄, 𑀦 𑀭𑀽𑀧𑀸𑀭𑀽𑀧𑀲𑀫𑁆𑀫𑀺𑀲𑁆𑀲𑀸𑀦𑀁, 𑀲𑀩𑁆𑀩𑀭𑀽𑀧𑀓𑁆𑀔𑀦𑁆𑀥𑀤𑀻𑀧𑀓𑀸𑀦𑀁 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑁄𑀕𑀸𑀪𑀸𑀯𑀸. 𑀲𑀩𑁆𑀩𑀸𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀧𑀺 𑀳𑀺 𑀓𑀼𑀲𑀮𑀸𑀤𑀺𑀦𑀸 𑀅𑀜𑁆𑀜𑁄 𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀸, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀜𑁆𑀜𑁂𑀯 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦…𑀧𑁂… 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 ¶ 𑀧𑀦 𑀲𑀫𑁆𑀧𑀬𑁄𑀕𑀧𑀤𑁂 𑀯𑀼𑀢𑁆𑀢𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀧𑀼𑀦 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 ¶ 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 ¶ 𑀦 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺.

𑀢𑀢𑁆𑀣 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀓𑁂𑀳𑀺𑀘𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀢𑀡𑁆𑀳𑀸𑀬 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀢𑀡𑁆𑀳𑀸𑀯𑁂𑀤𑀦𑀸𑀲𑀜𑁆𑀜𑀸𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 ¶ 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀲𑁂𑀲𑁂𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀲𑁂𑀲𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺.

𑀢𑀢𑁆𑀣 𑀢𑀻𑀳𑀻𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺. 𑀢𑁂𑀳𑀺 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀤𑁆𑀯𑀻𑀳𑀻𑀢𑀺 𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀲𑀼𑀔𑀼𑀫𑀭𑀽𑀧𑀁 𑀅𑀯𑀺𑀜𑁆𑀜𑀸𑀡𑀁, 𑀅𑀭𑀽𑀧𑀁 𑀲𑀯𑀺𑀜𑁆𑀜𑀸𑀡𑀁 𑀯𑀸, 𑀓𑁂𑀯𑀮𑀁 𑀅𑀭𑀽𑀧𑀁 𑀯𑀸 𑀣𑀽𑀮𑀭𑀽𑀧𑀲𑁆𑀲𑀧𑀺 𑀓𑁂𑀯𑀮𑀁 𑀯𑀸, 𑀲𑀼𑀔𑀼𑀫𑀭𑀽𑀧𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄 ¶ . 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀯𑀁 𑀥𑀫𑁆𑀫𑀸𑀬𑀢𑀦𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀬𑁄𑀚𑀦𑀸.

𑀅𑀭𑀽𑀧𑀪𑀯𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀺. 𑀢𑁂 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀯𑀁 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸𑀤𑀺𑀧𑀤𑁂𑀲𑀼𑀧𑀺 𑀬𑁄𑀚𑀦𑀸.

𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀲𑁆𑀲 𑀢𑀻𑀳𑀺 𑀯𑁂𑀤𑀦𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀇𑀢𑀭𑁂𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄 𑀜𑀸𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 ¶ 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀓𑁂𑀯𑀮𑀸𑀦𑀁 𑀲𑀸𑀭𑀫𑁆𑀫𑀡𑀸𑀦𑀁, 𑀅𑀦𑀸𑀭𑀫𑁆𑀫𑀡𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀧𑀓𑀸𑀲𑀓𑀸𑀦𑀺 𑀘 𑀲𑀪𑀸𑀯𑀚𑀸𑀢𑀺𑀪𑀽𑀫𑀺𑀓𑀸𑀮𑀲𑀦𑁆𑀢𑀸𑀦𑀯𑀲𑁂𑀦 𑀪𑀺𑀦𑁆𑀦𑀢𑀸𑀬 𑀓𑁂𑀳𑀺𑀘𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀦𑀸𑀭𑀫𑁆𑀫𑀡𑀥𑀫𑁆𑀫𑀫𑀺𑀲𑁆𑀲𑀸𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀓𑀸𑀲𑀓𑀸𑀦𑀺 𑀤𑀼𑀓𑁆𑀔𑀲𑀘𑁆𑀘𑀅𑀩𑁆𑀬𑀸𑀓𑀢𑀧𑀭𑀺𑀢𑁆𑀢𑀅𑀢𑀻𑀢𑀅𑀚𑁆𑀛𑀢𑁆𑀢𑀸𑀤𑀺𑀧𑀤𑀸𑀦𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄 𑀇𑀢𑀭𑁂𑀲𑀁 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀚𑀸𑀢𑀺𑀚𑀭𑀸𑀫𑀭𑀡𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀦𑀳𑁂𑀢𑀼𑀆𑀤𑀻𑀦𑀁 𑀢𑁂𑀲𑀁 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 ¶ 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀤𑀼𑀓𑁆𑀔𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺, 𑀢𑁂 𑀘 𑀥𑀫𑁆𑀫𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑁂𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀯𑀺𑀪𑀗𑁆𑀕𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀸𑀢𑀼𑀓𑀣𑀸𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀥𑀸𑀢𑀼. 𑁧𑁨; 𑀥𑀸𑀢𑀼. 𑀅𑀝𑁆𑀞. 𑁧-𑁨) 𑀕𑀳𑁂𑀢𑀩𑁆𑀩𑁄𑀢𑀺.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸

𑀏𑀓𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀢𑀸𑀯 𑀙 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 ‘‘𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀝𑁆𑀞𑀸𑀦𑁂 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞’’𑀦𑁆𑀢𑀺 (𑀧𑀸𑀭𑀸. 𑁨𑁬𑁯) 𑀆𑀕𑀢𑀝𑁆𑀞𑀸𑀦𑁂 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀙 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀳𑀺 𑀙 𑀧𑀜𑁆𑀜𑀸𑀧𑀦𑀸 𑀙 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸𑀢𑀺𑀧𑀺, 𑀙 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁂𑀯 𑀳𑀺 𑀢𑁂 𑀢𑁂 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑁂 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀻𑀢𑀺𑀧𑀺. 𑀢𑁂𑀦 𑀢𑁂𑀦 𑀓𑁄𑀝𑁆𑀞𑀸𑀲𑁂𑀦 𑀞𑀧𑁂𑀢𑀻𑀢𑀺𑀧𑀺. 𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺 𑀧𑀦 𑀲𑀗𑁆𑀔𑁂𑀧𑀢𑁄 𑀢𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀢𑀢𑁆𑀣 𑀔𑀦𑁆𑀥𑀸𑀦𑀁 ‘‘𑀔𑀦𑁆𑀥𑀸’’𑀢𑀺 𑀧𑀜𑁆𑀜𑀸𑀧𑀦𑀸 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀘 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀘 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀦𑀸𑀫…𑀧𑁂… 𑀧𑀼𑀕𑁆𑀕𑀮𑀸𑀦𑀁 ‘‘𑀧𑀼𑀕𑁆𑀕𑀮𑀸’’𑀢𑀺 𑀧𑀜𑁆𑀜𑀸𑀧𑀦𑀸 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀘 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀘 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀇𑀫𑀸 𑀏𑀯 𑀙 𑀧𑀜𑁆𑀜𑀢𑁆𑀢𑀺𑀬𑁄 𑀯𑀺𑀚𑁆𑀚𑀦𑁆𑀢𑀺. 𑀅𑀜𑁆𑀜𑀸𑀲𑀫𑁆𑀧𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑀣𑀸𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀅𑀦𑀦𑁆𑀢𑀢𑁆𑀢𑀸, 𑀉𑀧𑀮𑀓𑁆𑀔𑀡𑀯𑀲𑁂𑀦 𑀧𑀦 𑀧𑀥𑀸𑀦𑀪𑀸𑀯𑀢𑁄 𑀘 𑀏𑀢𑀸𑀯 𑀯𑀼𑀢𑁆𑀢𑀸. 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁂𑀦 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀙 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁄 𑀅𑀝𑁆𑀞𑀓𑀣𑀸𑀲𑀼 (𑀧𑀼. 𑀧. 𑀅𑀝𑁆𑀞. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑁧) 𑀆𑀕𑀢𑀸, 𑀢𑀸 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀢𑀺 𑀇𑀥 𑀦 𑀯𑀼𑀢𑁆𑀢𑀸. 𑀢𑀸𑀲𑀼 𑀇𑀥 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀤𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀲𑁂𑀲𑁂𑀳𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀏𑀯 𑀮𑀩𑁆𑀪𑀦𑁆𑀢𑀺.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦 𑀧𑀦 𑀆𑀘𑀭𑀺𑀬𑀦𑀬𑁂𑀦 𑀅𑀧𑀭𑀸𑀧𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀻𑀢𑀺, 𑀬𑀸 ‘‘𑀅𑀢𑁆𑀣𑀧𑀜𑁆𑀜𑀢𑁆𑀢𑀻’’𑀢𑀺 ¶ 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑀸 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀲𑀫𑁆𑀫𑀢𑀸 ¶ 𑀲𑀢𑁆𑀢𑀸𑀤𑀺𑀓𑀸, 𑀅𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀭𑀣𑀸𑀤𑀺𑀓𑀸, 𑀘𑀦𑁆𑀤𑀸𑀤𑀺𑀧𑀭𑀺𑀯𑀢𑁆𑀢𑀸𑀤𑀬𑁄 𑀉𑀧𑀸𑀤𑀸𑀬 𑀓𑀸𑀮𑀤𑀺𑀲𑀸𑀤𑀺𑀓𑀸, 𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀁, 𑀪𑀸𑀯𑀦𑀸𑀯𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀓𑀲𑀺𑀡𑀸𑀤𑀺𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀤𑀺𑀓𑀸𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀲𑀪𑀸𑀯𑀥𑀫𑁆𑀫𑁂𑀳𑀺 𑀏𑀓𑀢𑁆𑀢𑁂𑀦 𑀯𑀸 𑀲𑀘𑁆𑀙𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀜𑁆𑀜𑀸𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦. 𑀬𑀸 𑀢𑀲𑁆𑀲 𑀢𑀲𑁆𑀲𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯.

𑀬𑀸 𑀧𑀦 𑀅𑀜𑁆𑀜𑀁 𑀧𑀞𑀫𑀸𑀤𑀺𑀁 𑀉𑀧𑀦𑀺𑀥𑀸𑀬 𑀅𑀧𑁂𑀓𑁆𑀔𑀺𑀢𑁆𑀯𑀸 𑀤𑀼𑀢𑀺𑀬𑀁 𑀭𑀲𑁆𑀲𑀁 𑀤𑀻𑀖𑀁 𑀤𑀽𑀭𑀁 𑀲𑀦𑁆𑀢𑀺𑀓𑀦𑁆𑀢𑀺𑀆𑀤𑀺𑀓𑀸 𑀢𑀤𑀜𑁆𑀜𑀸𑀧𑁂𑀓𑁆𑀔𑀽𑀧𑀦𑀺𑀥𑀸, 𑀙𑀢𑁆𑀢𑀧𑀸𑀡𑀻𑀢𑀺𑀆𑀤𑀺𑀓𑀸 𑀳𑀢𑁆𑀣𑀕𑀢𑀽𑀧𑀦𑀺𑀥𑀸, 𑀓𑀼𑀡𑁆𑀟𑀮𑀻𑀢𑀺𑀆𑀤𑀺𑀓𑀸 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸, 𑀥𑀜𑁆𑀜𑀲𑀓𑀝𑀦𑁆𑀢𑀺 𑀆𑀤𑀺𑀓𑀸 𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸, 𑀇𑀦𑁆𑀤𑀲𑀸𑀮𑀕𑀼𑀳𑀸𑀢𑀺𑀆𑀤𑀺𑀓𑀸 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸, 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺𑀆𑀤𑀺𑀓𑀸 𑀧𑀝𑀺𑀪𑀸𑀕𑀽𑀧𑀦𑀺𑀥𑀸, 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺𑀆𑀤𑀺𑀓𑀸 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸, 𑀫𑀡𑀺𑀓𑀝𑀓𑀦𑁆𑀢𑀺𑀆𑀤𑀺𑀓𑀸 𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸𑀢𑀺 𑀏𑀯𑀫𑀸𑀤𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀥𑀜𑁆𑀜𑀭𑀸𑀲𑀻𑀢𑀺𑀆𑀤𑀺𑀓𑀸 𑀧𑀦 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺𑀓𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀁𑀢𑀁𑀲𑀪𑀸𑀯𑀦𑀺𑀲𑁆𑀲𑀺𑀢𑀸 𑀧𑀣𑀯𑀻𑀆𑀤𑀺𑀓𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀆𑀲𑀻𑀢𑀺𑀓𑁄𑀢𑀺𑀆𑀤𑀺𑀓𑀸 𑀧𑀦 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦𑁂𑀯 𑀆𑀘𑀭𑀺𑀬𑀦𑀬𑁂𑀦 𑀅𑀧𑀭𑀸𑀧𑀺 𑀥𑀫𑁆𑀫𑀓𑀣𑀺𑀓𑀸𑀤𑀺𑀓𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺, 𑀓𑀺𑀲𑀣𑀽𑀮𑀸𑀤𑀺𑀓𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑀸 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺, 𑀓𑀸𑀫𑀸𑀯𑀘𑀭𑀸𑀤𑀺𑀓𑀸, 𑀓𑁄𑀲𑀮𑀓𑀸𑀤𑀺𑀓𑀸 𑀘 𑀪𑀽𑀫𑀺𑀧𑀜𑁆𑀜𑀢𑁆𑀢𑀺, 𑀢𑀺𑀲𑁆𑀲𑁄 𑀦𑀸𑀕𑁄𑀢𑀺𑀆𑀤𑀺𑀓𑀸 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺, 𑀦𑀺𑀭𑁄𑀥𑀸𑀤𑀺𑀓𑀸 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄.

𑀏𑀢𑀸𑀲𑀼 ¶ 𑀧𑀦 𑀤𑁆𑀯𑀸𑀤𑀲𑀲𑀼 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺, 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀢𑀤𑀜𑁆𑀜𑀸 𑀧𑀭𑀫𑀢𑁆𑀣𑀸𑀯𑀲𑁂𑀲𑀸, 𑀧𑀦 𑀅𑀢𑁆𑀣𑀧𑀜𑁆𑀜𑀢𑁆𑀢𑀻𑀢𑀺 𑀤𑀻𑀧𑀺𑀢𑀸 𑀅𑀯𑀺𑀚𑁆𑀚𑀫𑀸𑀦𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑁄 𑀘𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸.

𑀅𑀢𑁆𑀣𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣𑀸𑀧𑀺 𑀧𑀸𑀴𑀺𑀦𑀬𑁂𑀦𑁂𑀯 𑀲𑀤𑁆𑀥𑀺𑀁 𑀳𑁄𑀢𑀺, 𑀦 𑀯𑀺𑀦𑀸 𑀧𑀸𑀴𑀺𑀁 𑀢𑀲𑁆𑀲 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 ¶ . 𑀧𑀸𑀴𑀺𑀬𑀜𑁆𑀘 𑀬𑀲𑁆𑀫𑀸 𑀆𑀤𑀺𑀢𑁄 𑀧𑀜𑁆𑀘 𑀧𑀜𑁆𑀜𑀢𑁆𑀢𑀺𑀬𑁄, 𑀢𑀤𑀢𑁆𑀣𑀪𑀽𑀢𑀸 𑀔𑀦𑁆𑀥𑀸𑀤𑀬𑁄 𑀘 𑀳𑁂𑀝𑁆𑀞𑀸 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀦𑀺𑀧𑁆𑀧𑀤𑁂𑀲𑀢𑁄 𑀓𑀣𑀺𑀢𑀸𑀢𑀺 𑀢𑀸 𑀇𑀥 ‘‘𑀓𑀺𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀸 𑀘𑁂𑀢𑁆𑀣𑀸𑀧𑀺 𑀯𑀼𑀢𑁆𑀢𑀢𑁆𑀣𑀸. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀳𑁂𑀝𑁆𑀞𑀸 𑀦 𑀯𑀼𑀢𑁆𑀢𑀸𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀧𑀼𑀕𑁆𑀕𑀮𑀸𑀦𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺? 𑀲𑀫𑀬𑀯𑀺𑀫𑀼𑀢𑁆𑀢𑁄, 𑀅𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀏𑀓𑀓𑀸𑀤𑀺𑀪𑁂𑀤𑁂𑀦 𑀬𑀸𑀯 𑀤𑀲𑀓𑀸 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀲𑀸 𑀘 𑀜𑀸𑀢𑀩𑁆𑀩𑀧𑀪𑁂𑀤𑀢𑁄 𑀅𑀯𑀼𑀘𑁆𑀘𑀫𑀸𑀦𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀏𑀯 𑀘𑁂𑀢𑁆𑀣 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀦𑀺𑀘𑁆𑀙𑀬𑁄 𑀳𑁄𑀢𑀺, 𑀲𑁄 𑀘𑁂𑀢𑁆𑀣 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑁂 𑀲𑀩𑁆𑀩𑀧𑀼𑀕𑁆𑀕𑀮𑁂 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀜𑀸𑀢𑀩𑁆𑀩𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀏𑀓𑀓𑀸𑀤𑀺𑀪𑁂𑀤𑀢𑁄𑀯 𑀫𑀸𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀪𑀚𑀦𑀯𑀲𑁂𑀦 𑀲𑀗𑁆𑀔𑁂𑀧𑀢𑁄𑀯 𑀳𑁄𑀢𑀺. 𑀓𑀣𑀁? ‘‘𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑁄, 𑀓𑀼𑀧𑁆𑀧𑀥𑀫𑁆𑀫𑁄 𑀅𑀓𑀼𑀧𑁆𑀧𑀥𑀫𑁆𑀫𑁄, 𑀘𑁂𑀢𑀦𑀸𑀪𑀩𑁆𑀩𑁄 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄, 𑀪𑀬𑀽𑀧𑀭𑀢𑁄 𑀅𑀪𑀬𑀽𑀧𑀭𑀢𑁄, 𑀪𑀩𑁆𑀩𑀸𑀕𑀫𑀦𑁄 𑀅𑀪𑀩𑁆𑀩𑀸𑀕𑀫𑀦𑁄, 𑀦𑀺𑀬𑀢𑁄 𑀅𑀦𑀺𑀬𑀢𑁄, 𑀧𑀝𑀺𑀧𑀦𑁆𑀦𑀓𑁄 𑀨𑀮𑁂 𑀞𑀺𑀢𑁄, 𑀲𑀫𑀲𑀻𑀲𑀻 𑀞𑀺𑀢𑀓𑀧𑁆𑀧𑀻, 𑀲𑁄𑀢𑀸𑀧𑀦𑁆𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀓𑁄𑀮𑀁𑀓𑁄𑀮𑁄 𑀏𑀓𑀩𑀻𑀚𑀻, 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀭𑀳𑀸’’𑀢𑀺 𑀏𑀓𑀓𑀫𑀸𑀢𑀺𑀓𑀸.

𑀢𑀢𑁆𑀣 ¶ 𑀬𑁄 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀅𑀝𑁆𑀞𑀳𑀺 𑀯𑀺𑀫𑁄𑀓𑁆𑀔𑁂𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁄 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀬𑀣𑀸𑀲𑀓𑀁 𑀆𑀲𑀯𑁂 𑀔𑁂𑀧𑁂𑀢𑁆𑀯𑀸 𑀯𑀼𑀝𑁆𑀞𑀺𑀢𑁄, 𑀅𑀬𑀁 𑀲𑀫𑀬𑀯𑀺𑀫𑀼𑀢𑁆𑀢𑁄 𑀦𑀸𑀫. ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀼. 𑀧. 𑁧) 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀔𑀻𑀡𑀸𑀲𑀯𑁄 𑀯𑀸 𑀇𑀥 𑀦 𑀕𑀳𑀺𑀢𑁄, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀨𑀮𑀝𑁆𑀞𑀲𑁂𑀔𑀸𑀯 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁄, 𑀲𑀩𑁆𑀩𑁂𑀧𑀺 𑀘 𑀅𑀭𑀺𑀬𑀸 𑀫𑀕𑁆𑀕𑀯𑀺𑀫𑁄𑀓𑁆𑀔𑀁 𑀲𑀦𑁆𑀥𑀸𑀬 𑀅𑀲𑀫𑀬𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀩𑀸𑀳𑀺𑀭𑀸𑀦𑀜𑁆𑀳𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀧𑀯𑀺𑀯𑁂𑀓𑀝𑁆𑀞𑀸𑀦𑀮𑀸𑀪𑀸𑀤𑀺𑀲𑀫𑀬𑁄𑀧𑀺 𑀅𑀢𑁆𑀣𑀺, 𑀯𑀢𑁆𑀢𑀓𑀭𑀡𑀓𑀸𑀮𑀸𑀤𑀺𑀅𑀲𑀫𑀬𑁄𑀧𑀺 𑀅𑀢𑁆𑀣𑀺. 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀧𑀦 𑀢𑀸𑀤𑀺𑀲𑁄 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀺, 𑀬𑀲𑁆𑀲 𑀲𑀤𑁆𑀥𑀸 𑀩𑀮𑀯𑀢𑀻, 𑀯𑀺𑀧𑀲𑁆𑀲𑀦𑀸 𑀘 𑀆𑀭𑀤𑁆𑀥𑀸, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀸 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀅𑀭𑀺𑀬𑀸 𑀅𑀭𑀺𑀬𑀯𑀺𑀫𑁄𑀓𑁆𑀔𑁂 𑀅𑀲𑀫𑀬𑀯𑀺𑀫𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀺𑀫𑀧𑀤𑁂𑀧𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀜𑁆𑀜𑁂𑀯 𑀲𑀦𑁆𑀥𑀸𑀬 𑀲𑁂𑀔𑀸 𑀲𑀫𑀬𑀯𑀺𑀫𑀼𑀢𑁆𑀢𑀸 𑀦𑀸𑀫 𑀚𑀸𑀢𑀸.

𑀅𑀯𑀲𑀺𑀪𑀸𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀦 𑀧𑀼𑀣𑀼𑀚𑁆𑀚𑀦𑁄, 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑁂 𑀲𑁂𑀔𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀁 ¶ 𑀲𑀦𑁆𑀥𑀸𑀬 𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫. 𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺𑀧𑀺 𑀤𑀼𑀯𑀺𑀥𑀸 𑀏𑀯. 𑀅𑀦𑀸𑀕𑀸𑀫𑀺𑀆𑀤𑀬𑁄 𑀲𑀼𑀧𑁆𑀧𑀳𑀻𑀦𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀢𑁆𑀢𑀸 𑀯𑀲𑀺𑀪𑀸𑀯𑀸 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄, 𑀅𑀭𑀺𑀬𑀸 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀧𑀺 𑀲𑀦𑁆𑀥𑀸𑀬 𑀅𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫. 𑀅𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀢𑁂 𑀏𑀯. 𑀘𑁂𑀢𑀦𑀸𑀪𑀩𑁆𑀩𑁄𑀢𑀺 𑀘𑁂𑀢𑀦𑀸𑀲𑀗𑁆𑀔𑀸𑀢𑁂𑀦 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑁂𑀦 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄. 𑀬𑁄 𑀳𑀺 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑁂𑀲𑀼 𑀆𑀘𑀺𑀡𑁆𑀡𑀯𑀲𑀺𑀢𑀸𑀬 𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀬 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀯𑀴𑀜𑁆𑀚𑀫𑀸𑀦𑁄 𑀢𑁂𑀳𑀺 𑀦 𑀧𑀭𑀺𑀳𑀸𑀬𑀢𑀺, 𑀅𑀯𑀴𑀜𑁆𑀚𑀫𑀸𑀦𑁄 𑀘 𑀧𑀭𑀺𑀳𑀸𑀬𑀢𑀺, 𑀅𑀬𑀁 𑀯𑀴𑀜𑁆𑀚𑀫𑀸𑀦𑁄 𑀘𑁂𑀢𑀦𑀸𑀪𑀩𑁆𑀩𑁄 ¶ 𑀦𑀸𑀫. 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄𑀢𑀺 𑀛𑀸𑀦𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀅𑀦𑀼𑀭𑀓𑁆𑀔𑀡𑀸𑀬 𑀅𑀯𑀴𑀜𑁆𑀚𑀫𑀸𑀦𑁄𑀧𑀺 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄, 𑀏𑀲𑁄 𑀘 𑀧𑀼𑀭𑀺𑀫𑀢𑁄 𑀩𑀮𑀯𑀢𑀭𑁄, 𑀆𑀘𑀺𑀡𑁆𑀡𑀯𑀲𑀺𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀬𑀽𑀧𑀭𑀢𑁄𑀢𑀺 𑀪𑀬𑁂𑀦 𑀧𑀸𑀧𑀢𑁄 𑀉𑀧𑀭𑀢𑁄 𑀯𑀺𑀭𑀢𑁄 𑀲𑁂𑀔𑁄, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀘. 𑀢𑁂𑀲𑀼 𑀧𑀘𑁆𑀙𑀺𑀫𑁄 𑀤𑀼𑀕𑁆𑀕𑀢𑀺𑀯𑀝𑁆𑀝𑀓𑀺𑀮𑁂𑀲𑀉𑀧𑀯𑀸𑀤𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀪𑀬𑁂𑀳𑀺 𑀧𑀸𑀧𑀢𑁄 𑀑𑀭𑀫𑀢𑀺, 𑀲𑁂𑀔𑁄 𑀤𑀼𑀕𑁆𑀕𑀢𑀺𑀯𑀚𑁆𑀚𑁂𑀳𑀺, 𑀅𑀧𑀸𑀬𑁂𑀳𑀺 𑀫𑀼𑀢𑁆𑀢𑀢𑁆𑀢𑀸. 𑀔𑀻𑀡𑀸𑀲𑀯𑁄 𑀧𑀦 𑀅𑀪𑀬𑀽𑀧𑀭𑀢𑁄 𑀦𑀸𑀫 𑀲𑀫𑀼𑀘𑁆𑀙𑀺𑀦𑁆𑀦𑀪𑀬𑀢𑁆𑀢𑀸, 𑀉𑀧𑀯𑀸𑀤𑀢𑁄 𑀧𑀦 𑀑𑀭𑀫𑀺𑀢𑀩𑁆𑀩𑁄.

𑀅𑀪𑀩𑁆𑀩𑀸𑀕𑀫𑀦𑁄𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀸𑀕𑀫𑀦𑀲𑁆𑀲 𑀅𑀪𑀩𑁆𑀩𑁄, 𑀬𑁂 𑀆𑀦𑀦𑁆𑀢𑀭𑀺𑀬𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀸𑀯𑀭𑀡𑁂𑀦, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀓𑀺𑀮𑁂𑀲𑀸𑀯𑀭𑀡𑁂𑀦, 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑁂𑀦 𑀯𑀺𑀧𑀸𑀓𑀸𑀯𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸, 𑀩𑀼𑀤𑁆𑀥𑀸𑀤𑀻𑀲𑀼 𑀘 𑀲𑀤𑁆𑀥𑀸𑀭𑀳𑀺𑀢𑀸, 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀉𑀢𑁆𑀢𑀭𑀓𑀼𑀭𑀼𑀓𑀸𑀤𑀬𑁄 𑀯𑀺𑀬 𑀅𑀘𑁆𑀙𑀦𑁆𑀤𑀺𑀓𑀸, 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀸 𑀘, 𑀲𑀩𑁆𑀩𑁂𑀢𑁂 𑀅𑀪𑀩𑁆𑀩𑀸𑀕𑀫𑀦𑀸 𑀦𑀸𑀫. 𑀯𑀺𑀧𑀭𑀻𑀢𑀸 𑀪𑀩𑁆𑀩𑀸𑀕𑀫𑀦𑀸 𑀦𑀸𑀫. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀦𑀺𑀭𑀬𑀕𑀫𑀦𑁂, 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀸𑀤𑀻𑀲𑀼 𑀦𑀺𑀬𑀢𑀸 𑀦𑀸𑀫. 𑀅𑀯𑀲𑁂𑀲𑀧𑀼𑀕𑁆𑀕𑀮𑀸 𑀅𑀦𑀺𑀩𑀤𑁆𑀥𑀕𑀢𑀺𑀓𑀢𑀸𑀬 𑀅𑀦𑀺𑀬𑀢𑀸 𑀦𑀸𑀫, 𑀉𑀢𑁆𑀢𑀭𑀓𑀼𑀭𑀼𑀓𑀸 𑀧𑀦 𑀲𑀼𑀕𑀢𑀺𑀦𑀺𑀬𑀢𑀸𑀧𑀺 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑁆𑀲𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀦𑀺𑀬𑀢𑀸’’𑀢𑀺 𑀦 𑀯𑀼𑀢𑁆𑀢𑀸. 𑀫𑀕𑁆𑀕𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀫𑀕𑁆𑀕𑀓𑁆𑀔𑀡𑁂 𑀨𑀮𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀓𑁄 𑀦𑀸𑀫, 𑀨𑀮𑀲𑀫𑀗𑁆𑀕𑀻 𑀨𑀮𑀸𑀦𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀨𑀮𑁂 𑀞𑀺𑀢𑁄 𑀦𑀸𑀫.

𑀬𑀲𑁆𑀲 𑀧𑀦 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁 𑀲𑀫𑀲𑀻𑀲𑀻 𑀦𑀸𑀫. 𑀲𑁄 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀭𑁄𑀕𑀲𑀫𑀲𑀻𑀲𑀻 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑁄 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ¶ 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀇𑀭𑀺𑀬𑀸𑀧𑀣𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂 𑀏𑀯 ¶ 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀬𑀲𑁆𑀲 𑀧𑀦 𑀓𑀺𑀮𑁂𑀲𑀲𑀻𑀲𑀲𑀗𑁆𑀔𑀸𑀢𑀸 𑀅𑀯𑀺𑀚𑁆𑀚𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀯𑀢𑁆𑀢𑀲𑀻𑀲𑀲𑀗𑁆𑀔𑀸𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀫𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫. 𑀓𑀣𑀫𑀺𑀤𑀁 𑀲𑀫𑀁 𑀳𑁄𑀢𑀻𑀢𑀺? 𑀯𑀸𑀭𑀲𑀫𑀢𑀸𑀬. 𑀬𑀲𑁆𑀫𑀺𑀁 𑀳𑀺 𑀯𑀸𑀭𑁂 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑀺𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀺 𑀦𑀸𑀫, 𑀅𑀬𑀫𑁂𑀯 𑀚𑀻𑀯𑀺𑀢𑀲𑀫𑀲𑀻𑀲𑀻 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀞𑀺𑀢𑀓𑀧𑁆𑀧𑀻𑀢𑀺 𑀞𑀺𑀢𑁄 𑀓𑀧𑁆𑀧𑁄 𑀞𑀺𑀢𑀓𑀧𑁆𑀧𑁄, 𑀲𑁆𑀯𑀸𑀲𑁆𑀲 𑀅𑀢𑁆𑀣𑀻𑀢𑀺 𑀞𑀺𑀢𑀓𑀧𑁆𑀧𑀻, 𑀓𑀧𑁆𑀧𑀫𑁆𑀳𑀺 𑀯𑀺𑀦𑀲𑁆𑀲𑀫𑀸𑀦𑀫𑁆𑀳𑀺 𑀓𑀧𑁆𑀧𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄.

𑀲𑀘𑁂 𑀳𑀺 𑀬𑁂𑀲𑀁 𑀫𑀕𑁆𑀕𑀲𑀫𑀗𑁆𑀕𑀺𑀓𑁆𑀔𑀡𑁂 𑀓𑀧𑁆𑀧𑀯𑀺𑀦𑀸𑀲𑁄 𑀪𑀯𑁂𑀬𑁆𑀬, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀯𑀺𑀦𑀲𑁆𑀲𑁂𑀬𑁆𑀬, 𑀬𑀸𑀯𑀸𑀬𑀁 𑀬𑀣𑀸𑀲𑀓𑀁 𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀢𑁂 𑀯𑀺𑀦𑀲𑁆𑀲𑀫𑀸𑀦𑀫𑁆𑀧𑀺 𑀓𑀧𑁆𑀧𑀁 𑀞𑀧𑁂𑀦𑁆𑀢𑀻𑀢𑀺 𑀞𑀺𑀢𑀓𑀧𑁆𑀧𑀺𑀦𑁄 𑀦𑀸𑀫 𑀚𑀸𑀢𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀦𑀓𑀸𑀮𑁂 𑀲𑀸𑀲𑀦𑀁 𑀦𑀢𑁆𑀣𑀺, 𑀕𑀢𑀓𑁄𑀝𑀺𑀓𑁂 𑀳𑀺 𑀓𑀸𑀮𑁂 𑀓𑀧𑁆𑀧𑀯𑀺𑀦𑀸𑀲𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑁆𑀲 𑀅𑀦𑀦𑁆𑀢𑀭𑀸𑀬𑀁 𑀤𑀻𑀧𑁂𑀢𑀼𑀁 𑀇𑀤𑀁 𑀅𑀪𑀽𑀢𑀫𑁆𑀧𑀺 𑀓𑀸𑀭𑀡𑀁 𑀆𑀳𑀝𑀁.

𑀲𑁄𑀢𑀸𑀧𑀦𑁆𑀦𑁄𑀢𑀺 𑀦𑀺𑀩𑁆𑀩𑀸𑀦𑀲𑀫𑀼𑀤𑁆𑀤𑀦𑀺𑀦𑁆𑀦𑀢𑀸𑀬 𑀲𑁄𑀢𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀧𑀞𑀫𑀲𑀫𑀗𑁆𑀕𑀻 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀨𑀮𑀝𑁆𑀞𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲𑁂𑀯 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀯𑀸𑀭𑀸 𑀧𑀭𑀫𑀸 𑀅𑀲𑁆𑀲 𑀪𑀯𑀽𑀧𑀧𑀢𑁆𑀢𑀻𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀢𑀢𑁄 𑀧𑀭𑀁 𑀅𑀝𑁆𑀞𑀫𑀁 𑀪𑀯𑀁 𑀦𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀬𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼 𑀘 𑀧𑀝𑀺𑀲𑀦𑁆𑀥𑀺𑀁 ¶ 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀪𑀯𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀓𑀼𑀮𑀢𑁄 𑀓𑀼𑀮𑀁 𑀪𑀯𑀢𑁄 𑀪𑀯𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀲𑁄 𑀳𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀤𑁆𑀯𑁂 𑀕𑀢𑀺𑀬𑁄 𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀓𑀫𑁆𑀫𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀁 𑀓𑀫𑁆𑀫𑀁 𑀓𑀺𑀮𑁂𑀲𑀩𑀻𑀚𑀁 𑀅𑀲𑁆𑀲𑀸𑀢𑀺 𑀏𑀓𑀩𑀻𑀚𑀻. 𑀲𑁄 𑀳𑀺 𑀏𑀓𑀲𑁆𑀫𑀺𑀜𑁆𑀜𑁂𑀯 𑀪𑀯𑁂 𑀔𑀻𑀡𑀸𑀲𑀯𑁄 𑀳𑁄𑀢𑀺. 𑀓𑀺𑀁 𑀧𑀦𑀲𑁆𑀲 𑀪𑁂𑀤𑀲𑁆𑀲 𑀦𑀺𑀬𑀸𑀫𑀓𑀦𑁆𑀢𑀺? 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀪𑁂𑀤𑀸. 𑀲𑁄𑀢𑀸𑀧𑀦𑁆𑀦𑁂𑀲𑀼 𑀳𑀺 𑀬𑁄 𑀯𑀺𑀧𑀲𑁆𑀲𑀦𑀸𑀬 𑀧𑀫𑀢𑁆𑀢𑁄, 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀳𑁄𑀢𑀺. 𑀬𑁄 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑁄, 𑀲𑁄 𑀓𑁄𑀮𑀁𑀓𑁄𑀮𑁄. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀅𑀢𑀺𑀯𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀲𑁄 𑀏𑀓𑀩𑀻𑀚𑀻 𑀳𑁄𑀢𑀺. 𑀬𑁂 𑀧𑀦 𑀅𑀪𑀺𑀯𑀺𑀬 𑀧𑀫𑀢𑁆𑀢𑀸 𑀯𑀝𑁆𑀝𑀚𑁆𑀛𑀸𑀲𑀬𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀺𑀲𑀸𑀔𑀸𑀲𑀓𑁆𑀓𑀸𑀤𑀬𑁄, 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀦𑁆𑀢𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑁂 𑀑𑀲𑀸𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂𑀲𑀼𑀧𑀺 𑀬𑀣𑀸𑀓𑁆𑀓𑀫𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀦 𑀢𑁂 𑀇𑀥 𑀕𑀳𑀺𑀢𑀸. 𑀢𑁂 𑀳𑀺 𑀫𑀦𑀼𑀲𑁆𑀲𑀕𑀢𑀺𑀁 𑀧𑀼𑀦𑀧𑁆𑀧𑀼𑀦𑀁 ¶ 𑀆𑀤𑀺𑀬𑀦𑁆𑀢𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀕𑀢𑀺𑀬𑀫𑁆𑀧𑀺 𑀪𑀯𑀁 𑀆𑀤𑀺𑀬𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀓𑁄𑀮𑀁𑀓𑁄𑀮𑁄 𑀫𑀸𑀦𑀼𑀲𑀺𑀓𑀪𑀯𑀦𑀺𑀩𑁆𑀩𑀢𑁆𑀢𑀓𑁄 𑀏𑀯 𑀏𑀓𑀩𑀻𑀚𑀻 𑀕𑀳𑀺𑀢𑁄. 𑀢𑁂 𑀧𑀦 𑀲𑀤𑁆𑀥𑀸𑀥𑀼𑀭𑁂𑀦 𑀆𑀕𑀢𑀸 𑀢𑀬𑁄, 𑀧𑀜𑁆𑀜𑀸𑀥𑀼𑀭𑁂𑀦 𑀆𑀕𑀢𑀸 𑀢𑀬𑁄𑀢𑀺 𑀲𑁄𑀢𑀸𑀧𑀦𑁆𑀦𑁄 𑀙𑀩𑁆𑀩𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀦 𑀲𑀓𑀺𑀁 𑀇𑀫𑀁 𑀫𑀦𑀼𑀲𑁆𑀲𑀕𑀢𑀺𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻, 𑀤𑀼𑀢𑀺𑀬𑀫𑀕𑁆𑀕𑀨𑀮𑀲𑀫𑀗𑁆𑀕𑀻. 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀲𑀓𑀤𑀸𑀕𑀸𑀫𑀺𑀨𑀮𑁂 𑀞𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀪𑀯𑁂 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀤𑀼𑀢𑀺𑀬𑀪𑀯𑁂 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀫𑁂𑀓𑁄𑀯 𑀇𑀥 𑀕𑀳𑀺𑀢𑁄. 𑀇𑀫𑀲𑁆𑀲 𑀘 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄, 𑀏𑀓𑀩𑀻𑀚𑀺𑀲𑁆𑀲 𑀧𑀦 𑀏𑀓𑀸𑀯𑀸𑀢𑀺 𑀇𑀤𑀁 𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀸𑀫𑀪𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀢𑀢𑀺𑀬𑀫𑀕𑁆𑀕𑀨𑀮𑀲𑀫𑀗𑁆𑀕𑀻. 𑀢𑀲𑁆𑀲𑁂𑀯 𑀧𑀦 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀭𑀳𑀢𑁆𑀢𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄 𑀏𑀓𑁄 𑀅𑀦𑀸𑀕𑀸𑀫𑀻. 𑀲𑁄 𑀘 𑀉𑀧𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀁 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀁 𑀉𑀧𑀳𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀫𑀭𑀡𑀲𑀫𑀬𑀁 𑀯𑀸 𑀉𑀧𑀳𑀘𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀫𑀭𑀡𑀲𑀫𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑁄. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀥𑀺𑀫𑀢𑁆𑀢𑀧𑁆𑀧𑀬𑁄𑀕𑀁 𑀅𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄. 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀲𑀗𑁆𑀔𑀸𑀭𑁂𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀅𑀥𑀺𑀫𑀢𑁆𑀢𑀧𑁆𑀧𑀬𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄. 𑀉𑀤𑁆𑀥𑀁𑀲𑁄𑀢𑁄𑀢𑀺 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀜𑁆𑀘, 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀁 𑀫𑀕𑁆𑀕𑀲𑁄𑀢𑀫𑀲𑁆𑀲𑀸𑀢𑀺𑀧𑀺 𑀉𑀤𑁆𑀥𑀁𑀲𑁄𑀢𑁄. 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀇𑀫𑁂𑀲𑀁 𑀧𑀦 𑀅𑀦𑀸𑀕𑀸𑀫𑀻𑀦𑀁 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀫𑁆𑀧𑁂𑀢𑁆𑀣 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺𑀆𑀤𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑁄 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀘𑀢𑀽𑀲𑀼 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀘𑀼𑀢𑁄 𑀅𑀓𑀦𑀺𑀝𑁆𑀞𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀓𑀦𑀺𑀝𑁆𑀞𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀫𑀦𑀼𑀲𑁆𑀲𑀮𑁄𑀓𑁄 𑀅𑀓𑀦𑀺𑀝𑁆𑀞𑀫𑁂𑀯 ¶ 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫 ¶ . 𑀏𑀯𑀫𑁂𑀢𑁂 𑀅𑀦𑀸𑀕𑀸𑀫𑀺𑀦𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁? 𑀅𑀯𑀺𑀳𑁂𑀲𑀼 𑀢𑀸𑀯 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄𑀢𑀺 𑀧𑀜𑁆𑀘, 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀲𑁂𑀦 𑀤𑀲 𑀳𑁄𑀦𑁆𑀢𑀺, 𑀏𑀯𑀁 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀽𑀢𑀺 𑀘𑀢𑁆𑀢𑀸𑀮𑀻𑀲𑀁, 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀢𑀁 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀯𑀲𑁂𑀦 𑀤𑀼𑀯𑀺𑀥𑀁 𑀉𑀤𑁆𑀥𑀁𑀲𑁄𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀝𑁆𑀞 𑀘𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺.

𑀅𑀭𑀳𑀸𑀢𑀺 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸𑀤𑀺𑀦𑀸 𑀔𑀻𑀡𑀸𑀲𑀯𑁄 𑀅𑀭𑀳𑀸 𑀦𑀸𑀫. 𑀲𑁄 𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑀢𑁆𑀢𑀬𑀯𑀲𑁂𑀦 𑀢𑀺𑀯𑀺𑀥𑁄 𑀳𑀼𑀢𑁆𑀯𑀸 𑀧𑀼𑀦 𑀧𑀘𑁆𑀘𑁂𑀓𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀅𑀭𑀳𑀸 𑀤𑁆𑀯𑀸𑀤𑀲𑀯𑀺𑀥𑁄, 𑀏𑀯𑀁 𑀤𑁆𑀯𑀸𑀤𑀲𑁂𑀯 𑀲𑀓𑀤𑀸𑀕𑀸𑀫𑀺𑀦𑁄, 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄𑀯 𑀧𑀘𑁆𑀘𑁂𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂 𑀘 𑀲𑀩𑁆𑀩𑁂 𑀅𑀭𑀺𑀬𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀩𑀳𑀺𑀤𑁆𑀥𑀸𑀢𑀺. 𑀏𑀓𑀓𑀦𑀬𑁄.

𑀤𑀼𑀓𑀸𑀤𑀺𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀤𑀼𑀓𑀸𑀤𑀻𑀲𑀼 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑁋 𑀓𑁄𑀥𑀦𑁄 𑀘 𑀉𑀧𑀦𑀸𑀳𑀻 𑀘 𑀫𑀓𑁆𑀔𑀻 𑀘 𑀧𑀴𑀸𑀲𑀻 𑀘𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀜𑁆𑀘, ‘‘𑀢𑀬𑁄 𑀧𑀼𑀕𑁆𑀕𑀮𑀸 𑁋 𑀦𑀺𑀭𑀸𑀲𑁄 𑀆𑀲𑀁𑀲𑁄 𑀯𑀺𑀕𑀢𑀸𑀲𑁄’’𑀢𑀺𑀆𑀤𑀺𑀦𑀸 𑀢𑀺𑀓𑀜𑁆𑀘, ‘‘𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑁋 𑀅𑀲𑀧𑁆𑀧𑀼𑀭𑀺𑀲𑁄, 𑀅𑀲𑀧𑁆𑀧𑀼𑀭𑀺𑀲𑁂𑀦𑀅𑀲𑀧𑁆𑀧𑀼𑀭𑀺𑀲𑀢𑀭𑁄, 𑀲𑀧𑁆𑀧𑀼𑀭𑀺𑀲𑁄, 𑀲𑀧𑁆𑀧𑀼𑀭𑀺𑀲𑁂𑀦𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺𑀆𑀤𑀺𑀦𑀸 𑀘𑀢𑀼𑀓𑁆𑀓𑀜𑁆𑀘, ‘‘𑀧𑀜𑁆𑀘 𑀧𑀼𑀕𑁆𑀕𑀮𑀸 𑁋 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 ¶ 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀓𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀇𑀥 𑀧𑀦 𑀢𑁂 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀲𑀩𑁆𑀩𑁂 𑀦 𑀉𑀤𑁆𑀤𑀺𑀝𑁆𑀞𑀸, 𑀧𑀸𑀴𑀺𑀬𑀸 𑀏𑀯 𑀜𑀸𑀢𑀩𑁆𑀩𑀸𑀢𑀺.

𑀢𑀢𑁆𑀣 ¶ 𑀢𑀺𑀓𑁂 𑀦𑀺𑀭𑀸𑀲𑁄𑀢𑀺 𑀅𑀭𑀳𑀢𑁆𑀢𑀸𑀲𑀸𑀬 𑀯𑀺𑀭𑀳𑀺𑀢𑁄 𑀤𑀼𑀲𑁆𑀲𑀻𑀮𑁄. 𑀢𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀅𑀪𑀩𑁆𑀩𑀢𑀸𑀬 𑀪𑀩𑁆𑀩𑀲𑀳𑀸𑀬𑀓𑀲𑁆𑀲 𑀲𑀻𑀮𑀯𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸, 𑀘𑀡𑁆𑀟𑀸𑀮𑀧𑀼𑀢𑁆𑀢𑀲𑁆𑀲 𑀯𑀺𑀬 𑀓𑀲𑁆𑀲𑀘𑀺 𑀭𑀸𑀚𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀸𑀪𑀺𑀲𑁂𑀓𑀁 𑀲𑀼𑀢𑁆𑀯𑀸 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀁, ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀁 𑀧𑀢𑁆𑀣𑀦𑀸𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀆𑀲𑀁𑀲𑁄𑀢𑀺 𑀅𑀭𑀳𑀢𑁆𑀢𑀁 𑀆𑀲𑀻𑀲𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄 𑀲𑀻𑀮𑀯𑀸. 𑀢𑀲𑁆𑀲 𑀳𑀺 𑀅𑀭𑀳𑀢𑁆𑀢𑀧𑀢𑁆𑀣𑀦𑀸𑀬 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑀢𑁆𑀢𑀸 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸, 𑀉𑀪𑀢𑁄𑀲𑀼𑀚𑀸𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀯𑀺𑀬 𑀢𑀸𑀤𑀺𑀲𑀲𑁆𑀲 𑀓𑀲𑁆𑀲𑀘𑀺 𑀭𑀚𑁆𑀚𑀸𑀪𑀺𑀲𑁂𑀓𑀁 𑀲𑀼𑀢𑁆𑀯𑀸 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀁, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀁 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀕𑀢𑀸𑀲𑁄𑀢𑀺 𑀅𑀭𑀳𑀸. 𑀲𑁄 𑀳𑀺 𑀧𑀢𑁆𑀢𑀅𑀭𑀳𑀢𑁆𑀢𑀢𑀸𑀬 𑀢𑀢𑁆𑀣 𑀯𑀺𑀕𑀢𑀸𑀲𑁄 𑀳𑁄𑀢𑀺 𑀧𑀢𑁆𑀢𑀸𑀪𑀺𑀲𑁂𑀓𑁄 𑀯𑀺𑀬 𑀔𑀢𑁆𑀢𑀺𑀬𑁄 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀓𑁆𑀓𑁂 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀦𑀸𑀫. 𑀬𑁄 𑀧𑀦 𑀲𑀬𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀧𑀭𑀜𑁆𑀘 𑀢𑀢𑁆𑀣 𑀲𑀫𑀸𑀤𑀧𑁂𑀢𑀺, 𑀅𑀬𑀁 𑀅𑀲𑀧𑁆𑀧𑀼𑀭𑀺𑀲𑁂𑀦𑀅𑀲𑀧𑁆𑀧𑀼𑀭𑀺𑀲𑀢𑀭𑁄, 𑀅𑀲𑀧𑁆𑀧𑀼𑀭𑀺𑀲𑀢𑁄𑀧𑀺 𑀅𑀲𑀧𑁆𑀧𑀼𑀭𑀺𑀲𑀢𑀭𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀓𑀼𑀲𑀮𑀯𑀲𑁂𑀦 𑀲𑀧𑁆𑀧𑀼𑀭𑀺𑀲𑁄, 𑀲𑀧𑁆𑀧𑀼𑀭𑀺𑀲𑁂𑀦𑀲𑀧𑁆𑀧𑀼𑀭𑀺𑀲𑀢𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀓𑁂 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀏𑀢𑁆𑀣 𑀆𑀭𑀫𑁆𑀪-𑀲𑀤𑁆𑀤𑁄 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀭𑀪𑀢𑀺 𑀘𑁂𑀯 𑀢𑀧𑁆𑀧𑀘𑁆𑀘𑀬𑀸 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁. 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 ¶ 𑀬𑀣𑀸𑀲𑀪𑀸𑀯𑀢𑁄 𑀦𑀧𑁆𑀧𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁂 𑀛𑀸𑀦𑁂 𑀅𑀥𑀺𑀕𑀢𑁂 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀯𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀸𑀧𑀺 𑀢𑁂 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀧𑀦 𑀦𑀺𑀭𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀥 𑀧𑀦 𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 ‘‘𑀨𑀮𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀁 𑀧𑀦 𑀤𑁂𑀲𑁂𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀁 𑀧𑀭𑀺𑀬𑁂𑀲𑀢𑀺, 𑀯𑀼𑀝𑁆𑀞𑀸𑀧𑁂𑀢𑀺 𑀯𑀸, 𑀢𑀲𑁆𑀫𑀸 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦𑀸𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀺𑀢𑀸𑀬 𑀯𑀼𑀝𑁆𑀞𑀺𑀢𑀸𑀬𑀧𑀺 𑀢𑀁 𑀆𑀧𑀢𑁆𑀢𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀦𑀸𑀭𑀪𑀢𑀺 𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀅𑀭𑀳𑀢𑁆𑀢𑀜𑁆𑀘 ¶ 𑀦 𑀧𑀸𑀧𑀼𑀡𑀸𑀢𑀺. 𑀓𑀢𑀭𑁄 𑀧𑀦𑁂𑀲 𑀧𑀼𑀕𑁆𑀕𑀮𑁄𑀢𑀺? 𑀲𑀻𑀮𑀯𑀸 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀧𑀼𑀕𑁆𑀕𑀮𑁄. 𑀲𑁄 𑀳𑀺 ‘‘𑀓𑀺𑀁 𑀫𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀼𑀤𑁆𑀥𑀲𑀻𑀮𑁄𑀧𑀺 𑀧𑀝𑀺𑀧𑀢𑁆𑀢𑀺𑀁 𑀦 𑀧𑀽𑀭𑁂𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀸 𑀢𑀣𑀸 𑀢𑀣𑀸 𑀑𑀯𑀤𑀺𑀢𑁆𑀯𑀸 𑀆𑀲𑀯𑀓𑁆𑀔𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸. 𑀏𑀯𑀁 𑀳𑀺 𑀢𑁂𑀧𑀺 𑀬𑁆𑀯𑀸𑀬𑀁 𑀧𑀜𑁆𑀘𑀫𑁄 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀆𑀭𑀤𑁆𑀥𑀯𑀻𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑁂𑀦 𑀲𑀫𑀲𑀫𑀸𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺.

𑀙𑀓𑁆𑀓𑀸𑀤𑀻𑀲𑀼 𑁋

‘‘𑀙 𑀧𑀼𑀕𑁆𑀕𑀮𑀸 𑁋 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀁 ¶ 𑀧𑀸𑀧𑀼𑀡𑀸𑀢𑀺, 𑀦 𑀘 𑀩𑀮𑁂𑀲𑀼 𑀯𑀲𑀺𑀪𑀸𑀯𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀲𑀸𑀯𑀓𑀧𑀸𑀭𑀫𑀺𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀦 𑀘 𑀲𑀸𑀯𑀓𑀧𑀸𑀭𑀫𑀺𑀁 𑀧𑀸𑀧𑀼𑀡𑀸𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀅𑀦𑀸𑀕𑀸𑀫𑀻 𑀳𑁄𑀢𑀺 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀆𑀕𑀸𑀫𑀻 𑀳𑁄𑀢𑀺 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢’’𑀦𑁆𑀢𑀺 𑁋

𑀙𑀓𑁆𑀓𑀁, ‘‘𑀲𑀢𑁆𑀢 𑀧𑀼𑀕𑁆𑀕𑀮𑀸 𑁋 𑀲𑀢𑁆𑀢 𑀉𑀤𑀓𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑁄 𑀳𑁄𑀢𑀺 𑀧𑀸𑀭𑀗𑁆𑀕𑀢𑁄, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀓𑀁, ‘‘𑀅𑀝𑁆𑀞 𑀧𑀼𑀕𑁆𑀕𑀮𑀸 𑁋 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑀫𑀗𑁆𑀕𑀺𑀦𑁄, 𑀘𑀢𑁆𑀢𑀸𑀭𑁄 𑀨𑀮𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸’’𑀢𑀺 𑀅𑀝𑁆𑀞𑀓𑀁, ‘‘𑀦𑀯 𑀧𑀼𑀕𑁆𑀕𑀮𑀸 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀓𑀸𑀬𑀲𑀓𑁆𑀔𑀻 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺 𑀦𑀯𑀓𑀁, ‘‘𑀤𑀲 𑀧𑀼𑀕𑁆𑀕𑀮𑀸 𑁋 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺 𑀤𑀲𑀓𑀜𑁆𑀘 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀴𑀺𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣 𑀙𑀓𑁆𑀓𑁂 𑀧𑀞𑀫𑁂𑀦 𑀧𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀳𑀺 𑀅𑀦𑀸𑀘𑀭𑀺𑀬𑀓𑁄 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀸𑀓𑀸𑀭𑀢𑁄 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺, 𑀤𑀲𑀜𑀸𑀡𑀩𑀮𑁂𑀲𑀼 ¶ 𑀘 𑀯𑀲𑀺𑀪𑀸𑀯𑀦𑁆𑀢𑀺. 𑀤𑀼𑀢𑀺𑀬𑁂𑀦 𑀧𑀦 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀢𑀢𑀺𑀬𑁂𑀦 𑀅𑀕𑁆𑀕𑀲𑀸𑀯𑀓𑁄, 𑀘𑀢𑀼𑀢𑁆𑀣𑁂𑀦 𑀅𑀯𑀲𑁂𑀲𑀸 𑀅𑀭𑀳𑀦𑁆𑀢𑁄 ¶ , 𑀧𑀜𑁆𑀘𑀫𑁂𑀦 𑀅𑀦𑀸𑀕𑀸𑀫𑀻, 𑀙𑀝𑁆𑀞𑁂𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑀝𑁆𑀞𑀩𑁆𑀩𑀸. 𑀢𑁂 𑀳𑀺 ‘‘𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺.

𑀲𑀢𑁆𑀢𑀓𑁂 𑀧𑀞𑀫𑁂𑀦 𑀧𑀤𑁂𑀦 𑀲𑀸𑀲𑀦𑁂 𑀅𑀦𑀺𑀯𑀺𑀝𑁆𑀞𑀲𑀤𑁆𑀥𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑁂𑀳𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀉𑀤𑀓𑀪𑀻𑀭𑀼𑀓𑀧𑀼𑀭𑀺𑀲𑁄 𑀯𑀺𑀬 𑀲𑀁𑀲𑀸𑀭𑁂 𑀅𑀧𑀸𑀬𑁂 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀦 𑀧𑀼𑀦 𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀅𑀦𑀦𑁆𑀢𑀫𑁆𑀧𑀺 𑀓𑀸𑀮𑀁 𑀪𑀯𑁂 𑀏𑀯 𑀯𑀺𑀘𑀭𑀢𑀺 𑀲𑀸𑀲𑀦𑀲𑀫𑀸𑀬𑁄𑀕𑀸𑀪𑀸𑀯𑀸. 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄𑀧𑀺 𑀤𑁂𑀯𑀤𑀢𑁆𑀢𑀸𑀤𑀬𑁄 𑀯𑀺𑀬 𑀲𑀤𑁆𑀥𑀸𑀤𑀺𑀧𑀭𑀺𑀳𑀸𑀦𑀺𑀬𑀁 𑀞𑀺𑀢𑁄 𑀤𑀼𑀲𑁆𑀲𑀻𑀮𑁄 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀦 𑀦𑀺𑀫𑀼𑀕𑁆𑀕𑁄 𑀯𑀺𑀬 𑀲𑀸𑀲𑀦𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸𑀧𑀺 𑀅𑀧𑀸𑀬𑁂 𑀦𑀺𑀫𑀼𑀚𑁆𑀚𑀢𑀺 𑀏𑀯, 𑀅𑀬𑀁 𑀧𑀦 𑀘𑀺𑀭𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀩𑀼𑀤𑁆𑀥𑀸𑀤𑀻𑀳𑀺, 𑀅𑀢𑁆𑀢𑀦𑀸 𑀏𑀯 𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀪𑀯𑀢𑁄 𑀉𑀤𑁆𑀥𑀭𑀡𑀻𑀬𑁄 𑀳𑁄𑀢𑀺 𑀲𑀸𑀲𑀦𑁂 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸𑀬𑀧𑀺 𑀲𑀤𑁆𑀥𑀸𑀬 𑀫𑁄𑀓𑁆𑀔𑀪𑀸𑀯𑁂𑀦 𑀦𑀺𑀬𑀫𑁂𑀦 𑀦𑀺𑀩𑁆𑀩𑀸𑀦𑀸𑀯𑀳𑀢𑁆𑀢𑀸. 𑀅𑀬𑀫𑁂𑀯 𑀳𑀺𑀲𑁆𑀲 𑀧𑀼𑀭𑀺𑀫𑀧𑀼𑀕𑁆𑀕𑀮𑀢𑁄 𑀯𑀺𑀲𑁂𑀲𑁄, 𑀇𑀢𑀭𑀣𑀸 𑀢𑀲𑁆𑀲 𑀯𑀺𑀲𑀼𑀁 𑀕𑀳𑀡𑁂 𑀧𑀬𑁄𑀚𑀦𑀫𑁂𑀯 𑀦 𑀲𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑀺𑀬𑁂𑀦 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀞𑀺𑀢𑀺𑀪𑀸𑀕𑀺𑀬𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀳𑀺𑀢𑁄. 𑀲𑁄 𑀳𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀻𑀭𑀁 𑀅𑀤𑀺𑀲𑁆𑀯𑀸𑀯 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀸𑀤𑀺𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀧𑀼𑀦 𑀅𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀉𑀡𑁆𑀡𑀢𑀧𑁆𑀧𑀤𑁂𑀲𑁂 𑀞𑀺𑀢𑁄 𑀯𑀺𑀬 𑀲𑀸𑀲𑀦𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀅𑀤𑀺𑀲𑁆𑀯𑀸𑀯 𑀩𑀼𑀤𑁆𑀥𑀸𑀤𑀺𑀁 𑀑𑀮𑁄𑀓𑀬𑀫𑀸𑀦𑁄 𑀲𑀕𑁆𑀕𑁂, 𑀲𑀻𑀮𑀸𑀤𑀺𑀫𑁆𑀳𑀺 𑀞𑀺𑀢𑁄 𑀳𑁄𑀢𑀺. 𑀘𑀢𑀼𑀢𑁆𑀣𑁂𑀦 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀕𑀳𑀺𑀢𑁄. 𑀲𑁄 𑀳𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀢𑀻𑀭𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀡𑀽𑀧𑀸𑀬𑀁 𑀯𑀺𑀮𑁄𑀓𑀬𑀫𑀸𑀦𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑀻𑀭𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀡𑁄𑀧𑀸𑀬𑀁 𑀯𑀺𑀮𑁄𑀓𑁂𑀢𑀺. 𑀧𑀜𑁆𑀘𑀫𑁂𑀦 𑀲𑀓𑀤𑀸𑀕𑀸𑀫𑀻 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀢𑀻𑀭𑀁 𑀤𑀺𑀲𑁆𑀯𑀸 𑀢𑀤𑀪𑀺𑀫𑀼𑀔𑀁 ¶ 𑀧𑀢𑀭𑀫𑀸𑀦𑁄 𑀯𑀺𑀬 𑀧𑀞𑀫𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀢𑀻𑀭𑀁 𑀤𑀺𑀲𑁆𑀯𑀸 𑀢𑀤𑀪𑀺𑀫𑀼𑀔𑀁 𑀤𑀼𑀢𑀺𑀬𑀫𑀕𑁆𑀕𑁂𑀦 𑀧𑀢𑀭𑀢𑀺 𑀦𑀸𑀫. 𑀙𑀝𑁆𑀞𑁂𑀦 𑀅𑀦𑀸𑀕𑀸𑀫𑀻 𑀕𑀳𑀺𑀢𑁄. 𑀲𑁄 𑀳𑀺 𑀧𑀢𑀭𑀺𑀢𑁆𑀯𑀸 𑀢𑀻𑀭𑀁 𑀉𑀧𑀕𑁆𑀕𑀫𑁆𑀫 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀺𑀢𑁄 𑀯𑀺𑀬 𑀅𑀭𑀳𑀢𑁆𑀢𑀲𑀫𑀻𑀧𑁂 𑀲𑀢𑀺𑀓𑀯𑀸𑀝𑀧𑀢𑀺𑀢𑁆𑀣𑁂 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀢𑀢𑀺𑀬𑀫𑀕𑁆𑀕𑁂𑀦 𑀢𑀺𑀝𑁆𑀞𑀢𑀺. 𑀲𑀢𑁆𑀢𑀫𑁂𑀦 𑀧𑀦 𑀅𑀭𑀳𑀸 𑀕𑀳𑀺𑀢𑁄, 𑀲𑁄 𑀳𑀺 𑀢𑀭𑀺𑀢𑁆𑀯𑀸 𑀧𑀸𑀭𑀁 𑀧𑀢𑁆𑀯𑀸 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑁆𑀣𑀮𑁂 𑀞𑀺𑀢𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑁄𑀢𑀻𑀢𑀺.

𑀦𑀯𑀓𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀓𑀺𑀮𑁂𑀲𑀢𑁄 𑀯𑀺𑀫𑀼𑀢𑁆𑀢𑁄, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀭𑀽𑀧𑀓𑀸𑀬𑀢𑁄, 𑀫𑀕𑁆𑀕𑁂𑀦 𑀘 𑀦𑀸𑀫𑀓𑀸𑀬𑀢𑁄𑀢𑀺 𑀇𑀫𑁂𑀳𑀺 𑀉𑀪𑀢𑁄𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺𑀧𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 ¶ 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄, 𑀢𑁂𑀲𑀼 𑀧𑀘𑁆𑀙𑀺𑀫𑁄𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫, 𑀲𑁂𑀲𑀸 𑀧𑀭𑀺𑀬𑀸𑀬𑁂𑀦. 𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀓𑀺𑀮𑁂𑀲𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀫𑁆𑀧𑀺 𑀭𑀽𑀧𑀓𑀸𑀬𑀢𑁄 𑀅𑀯𑀺𑀫𑀼𑀢𑁆𑀢𑀁, 𑀅𑀭𑀽𑀧𑀸𑀯𑀘𑀭𑀁 𑀧𑀦 𑀢𑀤𑀪𑀬𑀢𑁄𑀧𑀺 𑀯𑀺𑀫𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄𑀯 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀦 𑀭𑀽𑀧𑀸𑀯𑀘𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀬 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀲𑁄 𑀳𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀘𑀢𑀽𑀳𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀯 𑀦𑀸𑀫 𑀳𑁄𑀢𑀺.

𑀓𑀸𑀬𑀲𑀓𑁆𑀔𑀻𑀢𑀺 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀅𑀭𑀺𑀬𑁄. 𑀲𑁄 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀯𑀚𑁆𑀚𑀺𑀢𑀸𑀦𑀁 𑀙𑀦𑁆𑀦𑀁 𑀲𑁂𑀔𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑁄. 𑀢𑁂𑀦𑁂𑀯 ¶ 𑀳𑀺𑀲𑁆𑀲 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀘 𑀦 𑀓𑁂𑀘𑀺𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀧𑀭𑀺𑀓𑁆𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀧𑀦 𑀯𑀢𑁆𑀢𑀩𑁆𑀩𑀸, 𑀅𑀭𑀳𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦 𑀏𑀓𑀘𑁆𑀘𑁂𑀢𑀺. 𑀲𑁄 𑀳𑀺 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻, 𑀨𑀼𑀝𑁆𑀞𑀸𑀦𑀁 𑀧𑀝𑀺𑀮𑀤𑁆𑀥𑀸𑀦𑀁 𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑀁 𑀦𑀸𑀫𑀓𑀸𑀬𑁂𑀦 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺𑀧𑀺 𑀓𑀸𑀬𑀲𑀓𑁆𑀔𑀻, 𑀓𑀸𑀬𑁂𑀦𑀸𑀢𑀺 𑀘𑁂𑀢𑁆𑀣 ‘‘𑀦𑀸𑀫𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀢𑁄 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀲𑁂𑀲𑀫𑀕𑁆𑀕𑀨𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀦 𑀓𑀸𑀬𑁂𑀦 𑀧𑀞𑀫𑀚𑁆𑀛𑀸𑀦𑀸𑀦𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁄𑀧𑀺 𑀓𑀸𑀬𑀲𑀓𑁆𑀔𑀻𑀢𑀺 𑀓𑁂𑀘𑀺. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀘 𑀬𑀣𑀸𑀯𑀼𑀢𑁆𑀢𑁄 𑀙𑀩𑁆𑀩𑀺𑀥𑁄 𑀲𑁂𑀔𑁄 𑀘, 𑀅𑀬𑀁 𑀤𑀺𑀝𑁆𑀞𑀦𑁆𑀢𑀧𑁆𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺, 𑀧𑀞𑀫𑀫𑀕𑁆𑀕𑁄, 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀧𑁆𑀧𑀢𑁆𑀢𑁄𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀼𑀦 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀘 𑀬𑀣𑀸𑀯𑀼𑀢𑁆𑀢𑁄 𑀙𑀩𑁆𑀩𑀺𑀥𑁄 𑀲𑁂𑀔𑁄 𑀘. 𑀅𑀬𑀁 𑀳𑀺 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀓𑀣𑀁 𑀧𑀦𑁂𑀢𑀲𑁆𑀲 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀢𑁄 𑀦𑀸𑀦𑀢𑁆𑀢𑀦𑁆𑀢𑀺? 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑁂 𑀅𑀧𑁆𑀧𑀤𑀼𑀓𑁆𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀆𑀕𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀧𑀦 𑀲𑀤𑁆𑀥𑀸𑀩𑀳𑀼𑀮𑀢𑀸𑀬 𑀓𑀺𑀮𑁂𑀲𑁂 𑀤𑀼𑀓𑁆𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀆𑀕𑀢𑁄. 𑀏𑀢𑀫𑁂𑀯 𑀳𑀺 𑀪𑁂𑀤𑀁 𑀲𑀦𑁆𑀥𑀸𑀬 𑀦𑀺𑀤𑁆𑀤𑁂𑀲𑁂 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁄 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺 ¶ 𑀬𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀲𑀤𑁆𑀥𑀸𑀦𑀼𑀲𑀸𑀭𑀻𑀢𑀺 𑀬𑀲𑁆𑀲 ¶ 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀲𑀤𑁆𑀥𑀸𑀬 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀳𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫, 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸 𑀦𑀸𑀫, 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀢𑀢𑁆𑀣 𑀲𑀤𑁆𑀥𑀸𑀥𑀼𑀭𑀁 𑀧𑀜𑁆𑀜𑀸𑀥𑀼𑀭𑀦𑁆𑀢𑀺 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫. 𑀏𑀓𑁄 𑀧𑀦 𑀲𑀫𑀣𑀸𑀪𑀺𑀦𑀺𑀯𑁂𑀲𑁄, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄𑀢𑀺 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸. 𑀏𑀓𑁄 𑀘 𑀅𑀭𑀳𑀢𑁆𑀢𑀁 𑀫𑀢𑁆𑀣𑀓𑀁 𑀧𑀸𑀧𑀼𑀡𑀦𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀏𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀬𑁂 𑀳𑀺 𑀓𑁂𑀘𑀺 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀤𑁆𑀯𑁂 𑀇𑀫𑁂 𑀥𑀫𑁆𑀫𑁂 𑀥𑀼𑀭𑀁 𑀓𑀢𑁆𑀯𑀸 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀢𑁂𑀲𑀼 𑀬𑁄 𑀪𑀺𑀓𑁆𑀔𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀣𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻 𑀦𑀸𑀫. 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫.

𑀅𑀧𑀭𑁄 𑀧𑀜𑁆𑀜𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫.

𑀅𑀧𑀭𑁄 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫, 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻𑀬𑁂𑀯 ¶ 𑀦𑀸𑀫. 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫. 𑀅𑀧𑀭𑁄 𑀲𑀤𑁆𑀥𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫, 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀦𑀯 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫𑀸𑀢𑀺.

𑀤𑀲𑀓𑁂 ¶ 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀓𑁄𑀮𑀁𑀓𑁄𑀮𑁄, 𑀏𑀓𑀩𑀻𑀚𑀻, 𑀲𑀓𑀤𑀸𑀕𑀸𑀫𑀻 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀓𑁄, 𑀅𑀭𑀳𑀸 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀜𑁆𑀜𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁂 𑀏𑀯 𑀳𑀺 𑀏𑀢𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦𑀸𑀜𑁆𑀜𑀲𑁆𑀫𑀺𑀁. 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸𑀢𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀓𑀸𑀫𑀸𑀯𑀘𑀭𑁂 𑀅𑀢𑁆𑀢𑀪𑀸𑀯𑀁 𑀯𑀺𑀳𑀸𑀬 𑀯𑀺𑀚𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀜𑁆𑀜𑁂𑀯 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀧𑀼. 𑀧. 𑀫𑀸𑀢𑀺𑀓𑀸 𑁧 𑀆𑀤𑀬𑁄; 𑀧𑀼. 𑀧. 𑀅𑀝𑁆𑀞. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑁧) 𑀕𑀳𑁂𑀢𑀩𑁆𑀩𑁄𑀢𑀺.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀢𑀸𑀯 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀅𑀬𑀁 𑀧𑀼𑀘𑁆𑀙𑀸, ‘‘𑀆𑀫𑀦𑁆𑀢𑀸’’𑀢𑀺 𑀅𑀬𑀁 𑀧𑀝𑀺𑀚𑀸𑀦𑀦𑀸. 𑀓𑀲𑁆𑀲 𑀧𑀦𑀸𑀬𑀁 𑀧𑀼𑀘𑁆𑀙𑀸, 𑀓𑀲𑁆𑀲 𑀧𑀝𑀺𑀚𑀸𑀦𑀦𑀸𑀢𑀺? ‘‘𑀅𑀲𑀼𑀓𑀲𑁆𑀲𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀪𑀕𑀯𑀸 𑀧𑀭𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀫𑀸𑀢𑀺𑀓𑀁 𑀞𑀧𑁂𑀲𑀺, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀤𑁂𑀲𑀦𑀸𑀤𑀺𑀁 𑀧𑀦 𑀦𑀺𑀲𑁆𑀲𑀸𑀬 ‘‘𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑁂 𑀯𑀺𑀧𑀮𑁆𑀮𑀸𑀲𑀕𑀸𑀳𑀺𑀪𑀺𑀓𑁆𑀔𑀽𑀦𑀁, 𑀧𑀭𑀯𑀸𑀤𑀻𑀦𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀤𑀺𑀝𑁆𑀞𑀺𑀝𑁆𑀞𑀸𑀦𑀯𑀺𑀲𑁄𑀥𑀦𑀢𑁆𑀣𑀁 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀸𑀤𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀯𑀸𑀤𑀫𑁂𑀢𑀁 𑀆𑀭𑀩𑁆𑀪 𑀢𑀦𑁆𑀢𑀺𑀯𑀲𑁂𑀦 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀲𑀓𑀯𑀸𑀤𑀺𑀧𑀭𑀯𑀸𑀤𑀻𑀦𑀁 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀤𑁄𑀲𑀸𑀭𑁄𑀧𑀦𑀦𑀺𑀕𑁆𑀕𑀳𑀧𑀸𑀧𑀦𑀸𑀤𑀺𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦𑁂𑀯 𑀞𑀧𑁂𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀲𑁆𑀲 𑀲𑀼𑀔𑀸𑀯𑀥𑀸𑀭𑀡𑀢𑁆𑀣𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸 𑀧𑀭𑀯𑀸𑀤𑀻𑀧𑀼𑀘𑁆𑀙𑀸 𑀲𑀓𑀯𑀸𑀤𑀻𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀻𑀧𑀝𑀺𑀜𑁆𑀜𑀸𑀢𑀺 𑀏𑀯𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀅𑀬𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸, 𑀢𑀸𑀬 𑀘 ‘‘𑀬𑁂 ‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’𑀢𑀺 𑀏𑀯𑀁𑀮𑀤𑁆𑀥𑀺𑀓𑀸 𑀧𑀼𑀕𑁆𑀕𑀮𑀯𑀸𑀤𑀺𑀦𑁄, 𑀢𑁂 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀤𑀻𑀧𑁂𑀢𑀺. 𑀓𑁂 𑀧𑀦 𑀢𑁂 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀢𑀺? 𑀲𑀸𑀲𑀦𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘𑁂𑀯 𑀲𑀫𑁆𑀫𑀺𑀢𑀺𑀬𑀸 𑀘 𑀩𑀳𑀺𑀤𑁆𑀥𑀸 𑀩𑀳𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀘. 𑀓𑀤𑀸 𑀧𑀦𑁂𑀢𑁂 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀸𑀢𑀺? 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂. 𑀪𑀕𑀯𑀢𑀺 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀳𑀺 𑀢𑀧𑁆𑀧𑀫𑀼𑀔𑁂𑀳𑀺 𑀯𑀲𑀺𑀕𑀡𑁂𑀳𑀺 𑀲𑀼𑀪𑀤𑁆𑀤𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀧𑀸𑀧𑀪𑀺𑀓𑁆𑀔𑀽𑀦𑀁 𑀧𑀯𑁂𑀲𑁄𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀦𑀁 𑀲𑀳𑀸𑀬𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀭𑀻𑀭𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀲𑀦𑁂 𑀅𑀘𑀮𑁂 𑀧𑀯𑀢𑁆𑀢𑀸𑀧𑀺𑀢𑁂 𑀢𑀢𑁄 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀯𑁂𑀲𑀸𑀮𑀺𑀬𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁂𑀳𑀺 𑀤𑀻𑀧𑀺𑀢𑀸𑀦𑀺 ¶ 𑀤𑀲 𑀯𑀢𑁆𑀣𑀽𑀦𑀺 𑀫𑀤𑁆𑀤𑀺𑀢𑁆𑀯𑀸 𑀢𑁂 𑀘 𑀪𑀺𑀓𑁆𑀔𑀽 ¶ 𑀦𑀺𑀕𑁆𑀕𑀳𑁂𑀢𑁆𑀯𑀸 𑀬𑀲𑀢𑁆𑀣𑁂𑀭𑀲𑀫𑀼𑀲𑁆𑀲𑀸𑀳𑀺𑀢𑁂𑀳𑀺 𑀯𑀲𑀺𑀕𑀡𑁂𑀳𑀺 𑀧𑀼𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀢𑁂 𑀢𑁂𑀳𑀺 𑀦𑀺𑀕𑁆𑀕𑀳𑀺𑀢𑀸 𑀤𑀲𑀲𑀳𑀲𑁆𑀲𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀓𑀜𑁆𑀘𑀺 𑀤𑀼𑀩𑁆𑀩𑀮𑀭𑀸𑀚𑀸𑀦𑀁 𑀩𑀮𑀁 𑀮𑀪𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑀸𑀦𑀼𑀓𑀽𑀮𑀯𑀘𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀲𑀗𑁆𑀕𑀻𑀢𑀻𑀳𑀺 𑀯𑀺𑀲𑀼𑀁 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀳𑀸𑀲𑀗𑁆𑀖𑀺𑀓𑀸𑀘𑀭𑀺𑀬𑀓𑀼𑀮𑀁 𑀦𑀸𑀫 𑀅𑀓𑀁𑀲𑀼. 𑀧𑀭𑀺𑀲𑀼𑀤𑁆𑀥𑀲𑀸𑀲𑀦𑀁 𑀧𑀦 𑀣𑁂𑀭𑁂𑀳𑀺 𑀧𑀭𑀺𑀧𑀸𑀮𑀺𑀢𑀢𑁆𑀢𑀸 ‘‘𑀣𑁂𑀭𑀯𑀸𑀤𑁄’’𑀢𑀺 𑀧𑀜𑁆𑀜𑀸𑀬𑀺, 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼 𑀫𑀳𑀸𑀲𑀗𑁆𑀖𑀺𑀓𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑀩𑁆𑀬𑁄𑀳𑀸𑀭𑀺𑀓𑀸, 𑀕𑁄𑀓𑀼𑀮𑀺𑀓𑀸 𑀘, 𑀢𑀢𑁄 𑀧𑀡𑁆𑀡𑀢𑁆𑀢𑀺𑀯𑀸𑀤𑀸, 𑀩𑀳𑀼𑀮𑀺𑀬𑀸, 𑀘𑁂𑀢𑀺𑀬𑀯𑀸𑀤𑀸 𑀘𑀸𑀢𑀺 𑀧𑀜𑁆𑀘 𑀯𑀸𑀤𑀸, 𑀫𑀳𑀸𑀲𑀗𑁆𑀖𑀺𑀓𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀙 𑀆𑀘𑀭𑀺𑀬𑀓𑀼𑀮𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺. 𑀢𑀣𑀸 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀫𑀳𑀺𑀲𑀸𑀲𑀓𑀸, 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘, 𑀢𑀢𑁄 𑀥𑀫𑁆𑀫𑀼𑀢𑁆𑀢𑀭𑀺𑀬𑀸, 𑀪𑀤𑁆𑀭𑀬𑀸𑀦𑀺𑀓𑀸, 𑀙𑀦𑁆𑀦𑀸𑀕𑀸𑀭𑀺𑀓𑀸, 𑀲𑀫𑁆𑀫𑀺𑀢𑀺𑀬𑀸 𑀘, 𑀫𑀳𑀺𑀲𑀸𑀲𑀓𑀢𑁄 𑀥𑀫𑁆𑀫𑀕𑀼𑀢𑁆𑀢𑀺𑀓𑀸, 𑀲𑀩𑁆𑀩𑀢𑁆𑀣𑀺𑀓𑀸 𑀘, 𑀢𑀢𑁄 𑀓𑀲𑁆𑀲𑀧𑀺𑀓𑀸, 𑀢𑀢𑁄 𑀲𑀗𑁆𑀓𑀦𑁆𑀢𑀺𑀓𑀸, 𑀢𑀢𑁄 𑀲𑀼𑀢𑁆𑀢𑀯𑀸𑀤𑀸 𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲 𑀯𑀸𑀤𑀸 𑀚𑀸𑀢𑀸. 𑀢𑁂 𑀧𑀼𑀭𑀺𑀫𑁂𑀳𑀺 𑀙𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀭𑀲 𑀪𑀺𑀦𑁆𑀦𑀯𑀸𑀤𑀸 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀉𑀧𑁆𑀧𑀦𑁆𑀦𑀸, 𑀣𑁂𑀭𑀯𑀸𑀤𑁄 𑀧𑀦 𑀏𑀓𑁄𑀯 𑀅𑀲𑀫𑁆𑀪𑀺𑀦𑁆𑀦𑀓𑁄, 𑀢𑁂𑀦 𑀲𑀤𑁆𑀥𑀺𑀁 𑀲𑀸𑀲𑀦𑁂 𑀅𑀝𑁆𑀞𑀸𑀭𑀲 𑀦𑀺𑀓𑀸𑀬𑀸 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑁂 ‘‘𑀅𑀝𑁆𑀞𑀸𑀭𑀲𑀸𑀘𑀭𑀺𑀬𑀓𑀼𑀮𑀸𑀦𑀻’’𑀢𑀺 𑀧𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂𑀲𑀁 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀆𑀘𑀭𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀆𑀬𑀢𑀺𑀁 𑀲𑀸𑀲𑀦𑀲𑁆𑀲 𑀆𑀮𑀼𑀴𑀦𑀁 𑀜𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁂𑀦 𑀅𑀲𑁄𑀓𑁂𑀦 𑀥𑀫𑁆𑀫𑀭𑀜𑁆𑀜𑀸 𑀩𑀸𑀳𑀺𑀭𑀓𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀸𑀲𑀦𑁂 𑀏𑀯 𑀮𑀸𑀪𑀲𑀓𑁆𑀓𑀸𑀭𑁂 𑀧𑀯𑀢𑁆𑀢𑀦𑁆𑀢𑁂 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀸𑀬 𑀲𑀸𑀲𑀦𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀢𑀣𑀢𑁄 𑀤𑀻𑀧𑁂𑀦𑁆𑀢𑁂𑀲𑀼 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀭𑀲𑀸𑀘𑀭𑀺𑀬𑀓𑀼𑀮𑁂𑀲𑀼 𑀘 𑀲𑀫𑀬𑀓𑀼𑀲𑀮𑀢𑀸𑀬 𑀯𑀺𑀘𑀺𑀦𑀺𑀢𑁆𑀯𑀸 𑀲𑁂𑀢𑀓𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑀺𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀬𑀸𑀦𑀺 𑀢𑀤𑀸 𑀉𑀧𑁆𑀧𑀦𑁆𑀦𑀸𑀦𑀺 𑀯𑀢𑁆𑀣𑀽𑀦𑀺, 𑀬𑀸𑀦𑀺 𑀘 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀸𑀦𑀺𑀧𑀺 ¶ 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀫𑀸𑀢𑀺𑀓𑀸𑀫𑀼𑀔𑀫𑀢𑁆𑀢𑁂𑀦 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀢𑁆𑀢𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀧𑀭𑀧𑁆𑀧𑀯𑀸𑀤𑀫𑀣𑀦𑀁 𑀆𑀬𑀢𑀺𑀮𑀓𑁆𑀔𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀫𑀸𑀢𑀺𑀓𑀸𑀯𑀺𑀪𑀚𑀦𑀯𑀲𑁂𑀦 𑀪𑀸𑀲𑀺𑀢𑁆𑀯𑀸 𑀢𑀁 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀆𑀮𑀼𑀴𑀺𑀢𑀁 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀓𑀸𑀲𑀦𑀢𑁆𑀣𑀁 𑀆𑀬𑀢𑀺𑀯𑀸𑀤𑀧𑁆𑀧𑀝𑀺𑀩𑀸𑀳𑀦𑀦𑀬𑀤𑀲𑁆𑀲𑀦𑀯𑀲𑁂𑀦 𑀇𑀫𑀁 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀁 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀑𑀓𑀸𑀲𑀁 𑀞𑀧𑁂𑀦𑁆𑀢𑁄 𑀢𑀲𑁆𑀲𑀸 𑀯𑀺𑀪𑀗𑁆𑀕𑀁 𑀦 𑀅𑀯𑁄𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀢𑀸 𑀚𑀻𑀯𑁄 𑀲𑀢𑁆𑀢𑁄. 𑀉𑀧𑀮𑀩𑁆𑀪𑀢𑀻𑀢𑀺 𑀧𑀜𑁆𑀜𑀸𑀬 𑀉𑀧𑀕𑀦𑁆𑀢𑁆𑀯𑀸 𑀮𑀩𑁆𑀪𑀢𑀺, 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀸𑀓𑀸𑀭𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀪𑀽𑀢𑀝𑁆𑀞𑁄. 𑀧𑀭𑀫𑀢𑁆𑀣𑁄𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀉𑀢𑁆𑀢𑀫𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 ¶ 𑀥𑀫𑁆𑀫𑀸 𑀪𑀽𑀢𑁂𑀦 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀢𑀸𑀯 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀝𑀺𑀚𑀸𑀦𑀦𑀜𑁆𑀳𑀺 𑀓𑀢𑁆𑀣𑀘𑀺 ‘‘𑀆𑀫 𑀪𑀦𑁆𑀢𑁂’’𑀢𑀺 𑀆𑀕𑀘𑁆𑀙𑀢𑀺, 𑀓𑀢𑁆𑀣𑀘𑀺 ‘‘𑀆𑀫𑁄’’𑀢𑀺 𑀆𑀕𑀘𑁆𑀙𑀢𑀺, 𑀇𑀥 𑀧𑀦 ‘‘𑀆𑀫𑀦𑁆𑀢𑀸’’𑀢𑀺 𑀆𑀕𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀭𑀯𑀸𑀤𑀻 𑀳𑀺 𑀬𑀲𑁆𑀫𑀸 𑀪𑀕𑀯𑀢𑀸 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁯𑁫-𑁯𑁬) 𑀧𑀼𑀕𑁆𑀕𑀮𑁄 𑀧𑀓𑀸𑀲𑀺𑀢𑁄, 𑀪𑀕𑀯𑀸 𑀘 𑀅𑀯𑀺𑀢𑀣𑀯𑀸𑀤𑀻, 𑀢𑀲𑁆𑀫𑀸 𑀲𑁄 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑁂𑀯 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺.

𑀅𑀣𑀲𑁆𑀲 𑀢𑀸𑀤𑀺𑀲𑀲𑁆𑀲 𑀮𑁂𑀲𑀯𑀘𑀦𑀲𑁆𑀲 𑀙𑀮𑀯𑀸𑀤𑀲𑁆𑀲 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄 𑀲𑀓𑀯𑀸𑀤𑀻 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀳𑁂𑀝𑁆𑀞𑀸 𑀭𑀽𑀧𑀯𑁂𑀤𑀦𑀸𑀤𑀺𑀓𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀆𑀕𑀢𑁄, 𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦, 𑀦𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀧𑀦 𑀪𑀽𑀢𑀢𑀸𑀬 𑀏𑀯 𑀲𑀘𑁆𑀘𑀺𑀓𑀝𑁆𑀞𑁄, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀘 𑀧𑀭𑀫𑀢𑁆𑀣𑁄, 𑀲𑁄 ¶ 𑀢𑀣𑀸𑀧𑀝𑀺𑀜𑁆𑀜𑀸𑀢𑁄 𑀧𑀼𑀕𑁆𑀕𑀮𑁄 𑀢𑀢𑁄 𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀬𑀣𑀸 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀦𑀸 𑀲𑀓𑀺𑀬𑁂𑀦𑀸𑀓𑀸𑀭𑁂𑀦 𑀧𑀼𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁄 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑀯 𑀧𑀼𑀕𑁆𑀕𑀮𑁄𑀧𑀺 𑀏𑀯𑀁 𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂𑀢𑀺 𑀅𑀯𑀚𑀸𑀦𑀦𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀳𑀺 𑀢𑀣𑀸𑀭𑀽𑀧𑀁 𑀧𑀼𑀕𑁆𑀕𑀮𑀁 𑀅𑀦𑀺𑀘𑁆𑀙𑀦𑁆𑀢𑁄 𑀅𑀯𑀚𑀸𑀦𑀸𑀢𑀺. 𑀦 𑀳𑀺 𑀅𑀢𑁆𑀢𑀸 𑀦𑀸𑀫 𑀔𑀦𑁆𑀥𑀸𑀤𑀺𑀯𑀺𑀫𑀼𑀢𑁆𑀢𑁄 𑀓𑁄𑀘𑀺 𑀤𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀭 𑀩𑁆𑀬𑀸𑀫𑁄𑀳𑀫𑀢𑁆𑀢𑀸. 𑀢𑀢𑁆𑀭𑀸𑀬𑀁 𑀧𑀤𑀘𑁆𑀙𑁂𑀤𑁄 𑁋 𑀦 𑀳𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂𑀢𑀺. ‘‘𑀦 𑀳 𑀏𑀯’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀯𑀁 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀲𑀓𑀯𑀸𑀤𑀺𑀯𑀘𑀦𑀁. 𑀬𑀲𑁆𑀫𑀸 𑀢𑁂 𑀧𑀼𑀭𑀺𑀫𑀸𑀬 𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸𑀬 𑀧𑀘𑁆𑀙𑀺𑀫𑀸 𑀦𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸, 𑀧𑀘𑁆𑀙𑀺𑀫𑀸𑀬 𑀘 𑀧𑀼𑀭𑀺𑀫𑀸 𑀦 𑀲𑀦𑁆𑀥𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀕𑁆𑀕𑀳𑀁 𑀧𑀢𑁆𑀢𑁄, 𑀢𑀁 𑀦𑀺𑀕𑁆𑀕𑀳𑀁 𑀤𑁄𑀲𑀁 𑀅𑀧𑀭𑀸𑀥𑀁 𑀆𑀚𑀸𑀦𑀸𑀳𑀺, 𑀲𑀫𑁆𑀧𑀝𑀺𑀘𑁆𑀙𑀸𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀦𑀺𑀕𑁆𑀕𑀳𑀁 𑀆𑀚𑀸𑀦𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀞𑀧𑀦𑀸𑀬 𑀘𑁂𑀯 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀲𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀜𑁆𑀘𑀻𑀢𑀺 𑀬𑀤𑀺, 𑀲𑀘𑁂 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀅𑀦𑀼𑀯𑀤𑀦𑁂𑀦 𑀞𑀧𑀦𑀢𑁄 𑀦𑀺𑀕𑁆𑀕𑀳𑀧𑀢𑀺𑀝𑁆𑀞𑀸𑀧𑀦𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 𑀅𑀦𑀼𑀮𑁄𑀫𑀝𑁆𑀞𑀧𑀦𑀸 𑀦𑀸𑀫. 𑀢𑁂𑀦 𑀯𑀢 𑀭𑁂𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀓𑀢𑁆𑀢𑀸 𑀅𑀦𑀼𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀢𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀯𑀢𑀸𑀢𑀺 𑀑𑀓𑀧𑁆𑀧𑀦𑀯𑀘𑀦𑀁 𑀦𑀺𑀬𑀫𑀯𑀘𑀦𑀁. 𑀭𑁂𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀯𑀢 𑀭𑁂 𑀳𑀫𑁆𑀪𑁄 𑀪𑀤𑁆𑀭𑀫𑀼𑀔 𑀢𑁂𑀦 𑀓𑀸𑀭𑀡𑁂𑀦 𑀯𑀢𑁆𑀢𑀩𑁆𑀩𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀅𑀦𑀼𑀮𑁄𑀫𑀭𑁄𑀧𑀦𑀸 𑀦𑀸𑀫. 𑀬𑀜𑁆𑀘𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀫𑀺𑀘𑁆𑀙𑀸’’𑀢𑀺 𑀧𑀤𑀁, 𑀢𑀲𑁆𑀲 𑀧𑀼𑀭𑀢𑁄 ‘‘𑀇𑀤𑀁 ¶ 𑀢𑁂’’𑀢𑀺 𑀆𑀳𑀭𑀺𑀢𑀩𑁆𑀩𑀁. 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀁 𑀉𑀧𑀭𑀺𑀧𑀺 ¶ . 𑀧𑀭𑀢𑁄 𑀧𑀸𑀴𑀺𑀬𑀫𑁆𑀧𑀺 𑀏𑀢𑀁 𑀆𑀕𑀢𑀫𑁂𑀯. 𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂𑀢𑀺𑀆𑀤𑀺 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀧𑀓𑁆𑀔𑀲𑁆𑀲 𑀅𑀦𑀼𑀯𑀤𑀦𑁂𑀦 𑀞𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 𑀧𑀝𑀺𑀮𑁄𑀫𑀝𑁆𑀞𑀧𑀦𑀸 𑀦𑀸𑀫. 𑀦𑁄 𑀘 𑀯𑀢 𑀭𑁂𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀧𑀼𑀦 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀭𑁄𑀧𑀦𑀸 𑀦𑀸𑀫.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀤𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀪𑁄 𑀲𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀁 𑀧𑀦 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺 𑀦𑁄 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀢𑀸𑀯 𑀅𑀦𑀼𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺.

𑀅𑀣 𑀦 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺, 𑀧𑀼𑀭𑀺𑀫𑀧𑀜𑁆𑀳𑁂𑀧𑀺 𑀦 𑀯𑀢𑁆𑀢𑀩𑁆𑀩𑁄𑀯. 𑀬𑀁 𑀧𑀦 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺, 𑀦𑁄 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀧𑀝𑀺𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀦𑀺𑀕𑁆𑀕𑀳𑀲𑁆𑀲 𑀘 𑀅𑀦𑀼𑀮𑁄𑀫𑀢𑁄 𑀤𑁆𑀯𑀺𑀦𑁆𑀦𑀁, 𑀧𑀝𑀺𑀮𑁄𑀫𑀢𑁄 𑀤𑁆𑀯𑀺𑀦𑁆𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀅𑀦𑀼𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄, 𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄𑀢𑀺 𑀤𑁆𑀯𑁂 𑀦𑀺𑀕𑁆𑀕𑀳𑀸 𑀓𑀢𑀸, 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀏𑀢𑀲𑁆𑀲𑁂𑀯 𑀧𑀦 𑀧𑀞𑀫𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀭𑁄𑀧𑀺𑀢𑀢𑁆𑀢𑀸 𑀏𑀓𑁄𑀯𑀸𑀬𑀁 𑀦𑀺𑀕𑁆𑀕𑀳𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀧𑀞𑀫𑁄 𑀦𑀺𑀕𑁆𑀕𑀳𑁄.

𑀇𑀤𑀸𑀦𑀺 ¶ 𑀧𑀘𑁆𑀘𑀦𑀻𑀓𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀓𑀯𑀸𑀤𑀻 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀇𑀢𑀭𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀧𑀭𑀯𑀸𑀤𑀻 𑀏𑀯𑀫𑀸𑀳. 𑀲𑀓𑀯𑀸𑀤𑀻 𑀧𑀼𑀕𑁆𑀕𑀮𑁄 𑀳𑀺 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀧𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀢𑁆𑀢𑀸𑀧𑀺 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀤𑀸𑀦𑀺 𑀓𑀺𑀜𑁆𑀘𑀸𑀧𑀺 𑀢𑁂𑀦 𑀧𑀞𑀫𑀁 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀦𑀼𑀧𑀮𑀩𑁆𑀪𑀦𑀻𑀬𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸, 𑀧𑀘𑁆𑀙𑀸 𑀧𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀯𑀸 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀭𑀯𑀸𑀤𑀻 𑀧𑀦 ¶ ‘‘𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 ‘‘𑀬𑀁 𑀢𑀬𑀸 𑀧𑀞𑀫𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀧𑀘𑁆𑀙𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀪𑀡𑁆𑀟𑀦𑀲𑁆𑀲 𑀧𑀝𑀺𑀪𑀡𑁆𑀟𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀓𑀢𑀲𑁆𑀲 𑀦𑀺𑀕𑁆𑀕𑀳𑀓𑀫𑁆𑀫𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀦𑁆𑀢𑀺 𑀆𑀳. 𑀇𑀤𑀸𑀦𑀺 𑀬𑀣𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀯𑀸𑀤𑀝𑁆𑀞𑀧𑀦𑀁 𑀓𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀧𑀭𑀯𑀸𑀤𑀺𑀦𑀺𑀕𑁆𑀕𑀳𑁄 𑀧𑀸𑀓𑀝𑁄 𑀓𑀢𑁄, 𑀏𑀯𑀁 𑀧𑀝𑀺𑀓𑀫𑁆𑀫𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀞𑀧𑀦𑀸 𑀦𑀸𑀫 𑀧𑀭𑀯𑀸𑀤𑀺𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 ‘‘𑀅𑀬𑀁 𑀢𑀯 𑀤𑁄𑀲𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀦𑀺𑀕𑁆𑀕𑀳𑀲𑁆𑀲 𑀯𑀸 𑀧𑀝𑀺𑀓𑀫𑁆𑀫𑀲𑁆𑀲 𑀯𑀸 𑀧𑀸𑀓𑀝𑀻𑀪𑀸𑀯𑀓𑀭𑀡𑀁, 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀧𑀦𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀯𑀲𑁂𑀦 𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀦𑀸𑀫𑀸𑀢𑀺 𑀏𑀓𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀧𑀝𑀺𑀓𑀫𑁆𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑀲𑁆𑀲 𑀢𑀫𑁂𑀯 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀓𑀝𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀻𑀢𑀺 𑀬𑀤𑀺 𑀢𑁆𑀯𑀁 𑀫𑀜𑁆𑀜𑀲𑀺. ‘‘𑀯𑀢𑁆𑀢𑀩𑁆𑀩𑁂 ¶ 𑀔𑁄’’𑀢𑀺 𑀇𑀤𑀁 𑀧𑀘𑁆𑀘𑀦𑀻𑀓𑁂 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀦𑁄 𑀘 𑀯𑀢𑁆𑀢𑀩𑁆𑀩𑁂’’𑀢𑀺 𑀇𑀤𑀁 𑀧𑀦 ‘‘𑀦 𑀳𑁂𑀯𑀸’’𑀢𑀺 𑀅𑀯𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀢𑀯 𑀢𑀢𑁆𑀣𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁𑀬𑁂𑀯 𑀢𑀲𑁆𑀫𑀺𑀁 ‘‘𑀬𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀓𑁆𑀔𑁂 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑁄. 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀧𑀼𑀦 ‘‘𑀦 𑀳𑁂𑀯𑀸’’𑀢𑀺 𑀅𑀯𑀚𑀸𑀦𑀦𑁆𑀢𑁄 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀅𑀣𑁂𑀯𑀁 𑀦𑀺𑀕𑁆𑀕𑀡𑁆𑀳𑀦𑀸𑀭𑀳𑀁 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫, 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀲𑀻𑀢𑀺 𑀲𑀓𑁂𑀦 𑀫𑀢𑁂𑀦 𑀦𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀪𑀯𑀲𑀺. 𑀏𑀯𑀫𑀲𑁆𑀲 𑀦𑀺𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀳𑀜𑁆𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀇𑀤𑀁 𑀢𑀯 𑀯𑀘𑀦𑀁 𑀫𑀺𑀘𑁆𑀙𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀙𑀮𑀯𑀸𑀤𑁂𑀦 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀦𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀁 𑀦𑀸𑀫.

𑀏𑀯𑀁 𑀦𑀺𑀕𑁆𑀕𑀳𑀁 𑀓𑀢𑁆𑀯𑀸𑀧𑀺 𑀇𑀤𑀸𑀦𑀺 ‘‘𑀬𑀤𑀺 𑀅𑀬𑀁 𑀫𑀬𑀸 𑀢𑀯 𑀫𑀢𑁂𑀦 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀬𑁄𑀧𑀺 𑀫𑀫 𑀢𑀬𑀸 𑀳𑁂𑀝𑁆𑀞𑀸 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀓𑀢𑁄 𑀦𑀺𑀕𑁆𑀕𑀳𑁄, 𑀲𑁄𑀧𑀺 𑀤𑀼𑀦𑁆𑀦𑀺𑀕𑁆𑀕𑀳𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂𑀢𑀺 𑀏𑀲𑁄 𑀘𑁂 𑀢𑀯 𑀯𑀸𑀤𑁄 𑀫𑀬𑀸 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁄, 𑀅𑀣 𑀯𑀸 𑀏𑀲𑁄 𑀘𑁂 𑀢𑀯 𑀫𑀬𑀸 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄. 𑀳𑁂𑀯𑀫𑁂𑀯𑀁 𑀢𑀢𑁆𑀣 𑀤𑀓𑁆𑀔𑀸𑀢𑀺 𑀢𑀢𑁆𑀣𑀸𑀧𑀺 𑀢𑀬𑀸 𑀫𑀫 𑀳𑁂𑀝𑁆𑀞𑀸 𑀓𑀢𑁂 𑀦𑀺𑀕𑁆𑀕𑀳𑁂 𑀏𑀯𑀫𑁂𑀯𑀁 𑀧𑀲𑁆𑀲. 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀳𑁂𑀝𑁆𑀞𑀸 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 ¶ 𑀓𑀢𑁄, 𑀢𑀁 ‘‘𑀯𑀢𑁆𑀢𑀩𑁆𑀩𑁂 𑀔𑁄’’𑀢𑀺𑀆𑀤𑀺𑀯𑀘𑀦𑁂𑀦 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀦𑀺𑀕𑁆𑀕𑀳𑀁 𑀅𑀦𑀺𑀕𑁆𑀕𑀳𑀪𑀸𑀯𑀁 𑀉𑀧𑀦𑁂𑀦𑁆𑀢𑁄 ‘‘𑀦𑁄 𑀘 𑀫𑀬𑀁 𑀢𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 𑀬𑀲𑁆𑀫𑀸 𑀲𑁄 𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 𑀫𑀬𑀁 𑀢𑀬𑀸 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 ‘‘𑀆𑀫𑀦𑁆𑀢𑀸’’𑀢𑀺 𑀏𑀢𑀸𑀬 𑀧𑀝𑀺𑀜𑁆𑀜𑀸𑀬 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀧𑀼𑀦 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁂 𑀓𑀢𑁂𑀧𑀺 ¶ ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀸𑀬𑁂𑀯, 𑀏𑀯𑀁 𑀅𑀦𑀺𑀕𑁆𑀕𑀳𑁂𑀢𑀩𑁆𑀩𑀫𑁆𑀧𑀺 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺, 𑀈𑀤𑀺𑀲𑁂𑀦 𑀧𑀦 𑀦𑀺𑀕𑁆𑀕𑀳𑁂𑀦 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀫𑀬𑀁 𑀳𑁄𑀫. 𑀇𑀤𑀸𑀦𑀺 𑀬𑀁 𑀦𑀺𑀕𑁆𑀕𑀳𑀁 𑀲𑀦𑁆𑀥𑀸𑀬 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫𑀸𑀢𑀺 𑀅𑀯𑁄𑀘, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸’’𑀢𑀺 𑀆𑀳. 𑀏𑀯𑀫𑀺𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑀲𑁆𑀲 𑀉𑀧𑀦𑀻𑀢𑀢𑁆𑀢𑀸 𑀉𑀧𑀦𑀬𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺.

𑀇𑀤𑀸𑀦𑀺 𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺𑀆𑀤𑀺𑀓𑀁 𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀬𑀣𑀸𑀳𑀁 𑀢𑀬𑀸 𑀦𑀺𑀕𑁆𑀕𑀳𑀺𑀢𑁄, 𑀦 𑀳𑀺 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄, 𑀏𑀢𑀲𑁆𑀲 𑀳𑀺 𑀦𑀺𑀕𑁆𑀕𑀳𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀪𑀸𑀯𑁄 𑀫𑀬𑀸 𑀲𑀸𑀥𑀺𑀢𑁄. 𑀢𑁂𑀦 𑀳𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀬𑀲𑁆𑀫𑀸 𑀏𑀲 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 𑀬𑀁 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺. 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀇𑀤𑀁 𑀦𑀺𑀕𑁆𑀕𑀡𑁆𑀳𑀦𑀁 𑀢𑀯 𑀫𑀺𑀘𑁆𑀙𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀇𑀤𑀁 𑀫𑀺𑀘𑁆𑀙𑀸, 𑀢𑁂𑀦 𑀓𑀸𑀭𑀡𑁂𑀦 𑀬𑁄 𑀢𑀬𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀲𑁄 𑀤𑀼𑀓𑁆𑀓𑀝𑁄. 𑀬𑀁 𑀫𑀬𑀸 𑀧𑀝𑀺𑀓𑀫𑁆𑀫𑀁 𑀓𑀢𑀁, 𑀢𑀤𑁂𑀯 𑀲𑀼𑀓𑀢𑀁. 𑀬𑀸𑀧𑀺 𑀘𑁂𑀲𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀺𑀯𑀲𑁂𑀦 𑀓𑀣𑀸𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀦𑀸 𑀓𑀢𑀸, 𑀲𑀸𑀧𑀺 𑀲𑀼𑀓𑀢𑀸𑀢𑀺. 𑀢𑀤𑁂𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀸𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀓𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀧𑀭𑀯𑀸𑀤𑀺𑀦𑁄 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀙𑀮𑀯𑀸𑀤𑁂𑀦 𑀚𑀬𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑀣𑀸 𑀧𑀭𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀲𑀓𑀯𑀸𑀤𑀺𑀦𑁄 𑀥𑀫𑁆𑀫𑁂𑀦𑁂𑀯 𑀢𑀣𑁂𑀦 𑀚𑀬𑁄 𑀳𑁄𑀢𑀺, 𑀢𑀣𑀸 𑀯𑀸𑀤𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀘𑁆𑀘𑀦𑀻𑀓𑁂 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀭𑀽𑀧𑀸𑀤𑀺𑀪𑁂𑀤𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀁 ¶ 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲, 𑀲𑀼𑀤𑁆𑀥𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 𑀧𑀭𑀫𑀢𑁆𑀣𑀫𑀺𑀲𑁆𑀲𑀓𑀁 𑀯𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀫𑁆𑀫𑀼𑀢𑀺𑀯𑀲𑁂𑀦 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀅𑀦𑀼𑀬𑁄𑀕𑀲𑁆𑀲 𑀲𑀁𑀓𑀺𑀡𑁆𑀡𑀢𑁆𑀢𑀸 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 ¶ 𑀤𑀼𑀢𑀺𑀬𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑁄 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑁂𑀦 𑀙𑀮𑁂𑀦 𑀦𑀺𑀕𑁆𑀕𑀳𑁄 𑀆𑀭𑁄𑀧𑀺𑀢𑁄.

𑀇𑀤𑀸𑀦𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀯𑀸𑀤𑀺𑀧𑀝𑀺𑀜𑁆𑀜𑀸𑀬 𑀅𑀢𑁆𑀢𑀦𑁄 𑀯𑀸𑀤𑁂 𑀚𑀬𑀁 𑀤𑀲𑁆𑀲𑁂𑀢𑀼𑀁 𑀅𑀦𑀼𑀮𑁄𑀫𑀦𑀬𑁂 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀸 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀦 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲, 𑀢𑀢𑁄 𑀧𑀭𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀢𑁆𑀢𑀦𑁄 𑀚𑀬𑀤𑀲𑁆𑀲𑀦𑀢𑁆𑀣𑀁 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀓𑀯𑀸𑀤𑀺𑀯𑀘𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀤𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀲𑁆𑀲 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀏𑀯𑀫𑁂𑀢𑀸𑀦𑀺 𑀧𑀞𑀫𑀲𑀘𑁆𑀘𑀺𑀓𑀝𑁆𑀞𑁂 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦𑀺𑀕𑁆𑀕𑀳𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀼𑀤𑁆𑀥𑁄 𑀧𑀞𑀫𑀧𑀜𑁆𑀘𑀓𑁂;

𑀅𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀦𑀺𑀕𑁆𑀕𑀳𑁄 𑀲𑀓𑀯𑀸𑀤𑀺𑀲𑁆𑀲, 𑀅𑀲𑀼𑀤𑁆𑀥𑁄 𑀤𑀼𑀢𑀺𑀬𑀧𑀜𑁆𑀘𑀓𑁂;

𑀯𑀺𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀢𑀲𑁆𑀫𑀸 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼, 𑀚𑀬𑁄𑀯 𑀲𑀓𑀯𑀸𑀤𑀺𑀦𑁄;

𑀥𑀫𑁆𑀫𑁂𑀦 𑀳𑀺 𑀚𑀬𑁄 𑀦𑀸𑀫, 𑀅𑀥𑀫𑁆𑀫𑁂𑀦 𑀓𑀼𑀢𑁄 𑀚𑀬𑁄.

‘‘𑀲𑀘𑁆𑀘𑀺𑀓𑀝𑁆𑀞𑁂 ¶ 𑀬𑀣𑀸 𑀘𑁂𑀢𑁆𑀣, 𑀧𑀜𑁆𑀘𑀓𑀤𑁆𑀯𑀬𑀫𑀡𑁆𑀟𑀺𑀢𑁂;

𑀥𑀫𑁆𑀫𑀸𑀥𑀫𑁆𑀫𑀯𑀲𑁂𑀦𑁂𑀯, 𑀯𑀼𑀢𑁆𑀢𑁄 𑀚𑀬𑀧𑀭𑀸𑀚𑀬𑁄.

‘‘𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀧𑀡𑁆𑀟𑀺𑀢𑁄;

𑀏𑀯𑀫𑁂𑀯 𑀯𑀺𑀪𑀸𑀯𑁂𑀬𑁆𑀬, 𑀉𑀪𑁄 𑀚𑀬𑀧𑀭𑀸𑀚𑀬𑁂’’𑀢𑀺. (𑀓𑀣𑀸. 𑀅𑀝𑁆𑀞. 𑁭-𑁧𑁦);

𑀧𑀞𑀫𑁄 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁄 𑀦𑀺𑀝𑁆𑀞𑀺𑀢𑁄.

𑀏𑀯𑀁 ¶ 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀅𑀧𑀭𑁂𑀳𑀺𑀧𑀺 𑀑𑀓𑀸𑀲𑀸𑀤𑀻𑀳𑀺 𑀦𑀬𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀧𑀼𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀲𑀩𑁆𑀩𑀢𑁆𑀣𑀸𑀢𑀺 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀤𑁄𑀲𑀜𑁆𑀘 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀆𑀧𑀚𑁆𑀚𑀦𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀞𑁄 𑀧𑀦 𑀲𑀁𑀔𑀺𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀭𑀻𑀭𑀢𑁄 𑀩𑀳𑀺 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀞𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀅𑀯𑀚𑀸𑀦𑀸𑀢𑀻𑀢𑀺 𑀙𑀮𑀯𑀸𑀤𑀲𑁆𑀲 𑀯𑀲𑁂𑀦 𑀧𑀝𑀺𑀓𑀫𑁆𑀫𑀁 𑀧𑀭𑀯𑀸𑀤𑀺𑀲𑁆𑀲, 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀤𑀼𑀢𑀺𑀬𑀦𑀬𑁂 𑀲𑀩𑁆𑀩𑀤𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀜𑁆𑀘 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀲𑁆𑀯𑁂𑀯 𑀔𑀢𑁆𑀢𑀺𑀬𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺𑀆𑀤𑀻𑀦𑀁 𑀆𑀧𑀢𑁆𑀢𑀺𑀤𑁄𑀲𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀧𑀞𑀫𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀢𑀢𑀺𑀬𑀦𑀬𑁂 𑀲𑀩𑁆𑀩𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀢𑁆𑀢𑀸𑀢𑀺𑀆𑀤𑀺𑀤𑁄𑀲𑀪𑀬𑁂𑀦 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀏𑀯𑀫𑀺𑀫𑀸𑀦𑀺 ¶ 𑀢𑀻𑀡𑀺 𑀫𑀼𑀔𑀸𑀦𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀅𑀦𑀼𑀮𑁄𑀫𑀫𑀢𑁆𑀢𑀯𑀲𑁂𑀦𑁂𑀯 𑀢𑀸𑀯 𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑁂 𑀧𑀘𑁆𑀘𑀦𑀻𑀓𑀫𑀢𑁆𑀢𑀯𑀲𑁂𑀦𑁂𑀯 𑀪𑀸𑀚𑁂𑀢𑀼𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀲𑀼𑀤𑁆𑀥𑀺𑀓𑀲𑁆𑀲 𑀘𑁂𑀯 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀺𑀓𑀝𑁆𑀞𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑀺𑀓𑀝𑁆𑀞𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀲𑁆𑀲, 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀦𑀻𑀓𑀸𑀦𑀁 𑀯𑀲𑁂𑀦 𑀅𑀬𑀁 𑀅𑀝𑁆𑀞𑀫𑀼𑀔𑀸 𑀦𑀸𑀫 𑀯𑀸𑀤𑀬𑀼𑀢𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀏𑀓𑁂𑀓𑀲𑁆𑀫𑀺𑀁 𑀫𑀼𑀔𑁂 𑀏𑀓𑁂𑀓𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀯𑀲𑁂𑀦 𑀯𑀼𑀘𑁆𑀘𑀢𑀺. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀘𑀢𑀼𑀩𑁆𑀩𑀺𑀥𑁂 𑀧𑀜𑁆𑀳𑁂, 𑀧𑀜𑁆𑀘𑀓𑀤𑁆𑀯𑀬𑀪𑁂𑀤𑀢𑁄;

𑀏𑀲𑀸 𑀅𑀝𑁆𑀞𑀫𑀼𑀔𑀸 𑀦𑀸𑀫, 𑀯𑀸𑀤𑀬𑀼𑀢𑁆𑀢𑀺 𑀧𑀓𑀸𑀲𑀺𑀢𑀸.

‘‘𑀅𑀝𑁆𑀞𑁂𑀯 ¶ 𑀦𑀺𑀕𑁆𑀕𑀳𑀸 𑀢𑀢𑁆𑀣, 𑀘𑀢𑁆𑀢𑀸𑀭𑁄 𑀢𑁂𑀲𑀼 𑀥𑀫𑁆𑀫𑀺𑀓𑀸;

𑀅𑀥𑀫𑁆𑀫𑀺𑀓𑀸 𑀘 𑀘𑀢𑁆𑀢𑀸𑀭𑁄, 𑀲𑀩𑁆𑀩𑀢𑁆𑀣 𑀲𑀓𑀯𑀸𑀤𑀺𑀦𑁄;

𑀚𑀬𑁄 𑀧𑀭𑀸𑀚𑀬𑁄 𑀘𑁂𑀯, 𑀲𑀩𑁆𑀩𑀢𑁆𑀣 𑀧𑀭𑀯𑀸𑀤𑀺𑀦𑁄’’𑀢𑀺. (𑀓𑀣𑀸. 𑀅𑀝𑁆𑀞. 𑁧𑁪);

𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣𑀸𑀧𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀓𑀢𑀦𑀺𑀤𑁆𑀤𑁂𑀲𑀲𑁆𑀲 𑀦𑀬𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀺. 𑀣𑁂𑀭𑁂𑀦 𑀳𑀺 𑀪𑀕𑀯𑀢𑀸 𑀞𑀧𑀺𑀢𑀸𑀬 𑀏𑀢𑀺𑀲𑁆𑀲𑀸 𑀫𑀸𑀢𑀺𑀓𑀸𑀬 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀪𑀕𑀯𑀢𑀸 𑀤𑀺𑀦𑁆𑀦𑀅𑀝𑁆𑀞𑀫𑀼𑀔𑀯𑀸𑀤𑀬𑀼𑀢𑁆𑀢𑀺𑀦𑀬𑁂 𑀞𑀢𑁆𑀯𑀸 𑀅𑀧𑀭𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀼𑀕𑁆𑀕𑀮𑀯𑀸𑀤𑀁, 𑀢𑀤𑀜𑁆𑀜𑀁 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀕𑀸𑀳𑀜𑁆𑀘 𑀦𑀺𑀭𑀸𑀓𑀭𑁄𑀦𑁆𑀢𑁂𑀦𑁂𑀯 𑀧𑀼𑀕𑁆𑀕𑀮𑀓𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀸𑀥𑀺𑀓𑀤𑁆𑀯𑀺𑀲𑀢𑀓𑀣𑀸𑀳𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀢𑀢𑁆𑀣 𑀧𑀼𑀕𑁆𑀕𑀮𑀯𑀸𑀤𑀦𑀺𑀭𑀸𑀓𑀭𑀡𑀢𑁆𑀣𑀁 𑀢𑀸𑀯 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀥𑀫𑁆𑀫𑁂𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦…𑀧𑁂… 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀯𑁂𑀤𑀦𑀸𑀧𑀺 ¶ 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀯𑀲𑀧𑁆𑀧𑀯𑀢𑁆𑀢𑀁 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀁, 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀲𑀢𑁆𑀢𑀧𑀜𑁆𑀜𑀸𑀲 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀸 𑀯𑀺𑀲𑀤𑀺𑀲𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀭𑀽𑀧𑀸𑀤𑀻𑀳𑀺 𑀯𑀺𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄, 𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄, 𑀅𑀜𑁆𑀜𑀢𑁆𑀭 𑀭𑀽𑀧𑀸 𑀧𑀼𑀕𑁆𑀕𑀮𑁄, 𑀧𑀼𑀕𑁆𑀕𑀮𑀲𑁆𑀫𑀺𑀁 𑀭𑀽𑀧’’𑀦𑁆𑀢𑀺 𑀏𑀯𑀁 𑀘𑀢𑀼𑀓𑁆𑀓𑀦𑀬𑁂𑀦 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀥𑀫𑁆𑀫𑁂𑀳𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀦𑁆𑀢𑀺 𑀢𑀺𑀯𑀺𑀥𑀸 𑀲𑀁𑀲𑀦𑁆𑀤𑀦𑀦𑀬𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀺𑀲𑀪𑀸𑀯𑀢𑁆𑀢𑁂 𑀦𑀺𑀘𑁆𑀘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀤𑀺𑀧𑁆𑀧𑀲𑀗𑁆𑀕𑀢𑁄 𑀬𑀣𑀸𑀦𑀼𑀭𑀽𑀧𑀁 𑀦𑀺𑀭𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦𑁂𑀢𑁆𑀣 𑀉𑀧𑀭𑀺 𑀘𑁂𑀢𑀁 𑀦 𑀯𑀺𑀢𑁆𑀣𑀸𑀭𑀻𑀬𑀢𑀺.

𑀢𑀢𑁄 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀲𑀧𑁆𑀧𑀘𑁆𑀘𑀬𑀸, 𑀅𑀧𑁆𑀧𑀘𑁆𑀘𑀬𑀸𑀤𑀬𑁄 𑀯𑀸 𑀳𑁄𑀦𑁆𑀢𑀺, 𑀏𑀯𑀁 𑀢𑀯 𑀧𑀼𑀕𑁆𑀕𑀮𑁄𑀧𑀺 𑀲𑀧𑁆𑀧𑀘𑁆𑀘𑀬𑀢𑀸𑀤𑀺𑀮𑀓𑁆𑀔𑀡𑀬𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀸 𑀮𑀓𑁆𑀔𑀡𑀬𑀼𑀢𑁆𑀢𑀺𑀓𑀣𑀸, ‘‘𑀧𑀼𑀕𑁆𑀕𑀮𑁄’’𑀢𑀺, ‘‘𑀉𑀧𑀮𑀩𑁆𑀪𑀢𑀻’’𑀢𑀺 𑀘 𑀧𑀤𑀤𑁆𑀯𑀬𑀸𑀤𑀺𑀲𑁄𑀥𑀦𑀢𑁆𑀣𑀁 ‘‘𑀬𑁄 𑀧𑀼𑀕𑁆𑀕𑀮𑁄, 𑀲𑁄 𑀉𑀧𑀮𑀩𑁆𑀪𑀢𑀺. 𑀬𑁄 𑀯𑀸 𑀉𑀧𑀮𑀩𑁆𑀪𑀢𑀺, 𑀲𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀯𑀘𑀦𑀲𑁄𑀥𑀦𑀁, ‘‘𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀻’’𑀢𑀺𑀆𑀤𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀲𑁄𑀥𑀦𑀯𑀲𑀧𑁆𑀧𑀯𑀢𑁆𑀢𑁄 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀘, ‘‘𑀲𑁄𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀅𑀜𑁆𑀜𑁄 𑀯𑀸, 𑀦 𑀅𑀜𑁆𑀜𑁄 𑀯𑀸, 𑀦𑁂𑀯 𑀅𑀜𑁆𑀜𑁄 𑀦𑀸𑀦𑀜𑁆𑀜𑁄 𑀯𑀸’’𑀢𑀺𑀆𑀤𑀺𑀦𑀸 𑀕𑀢𑀺𑀧𑀭𑀺𑀯𑀢𑁆𑀢𑀦𑀫𑀼𑀔𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀸𑀦𑀼𑀬𑁄𑀕𑁄 ¶ , ‘‘𑀭𑀼𑀓𑁆𑀔𑀁 𑀉𑀧𑀸𑀤𑀸𑀬 𑀙𑀸𑀬𑀸𑀤𑀻𑀦𑀁 𑀯𑀺𑀬 𑀔𑀦𑁆𑀥𑀸𑀤𑀺𑀁 𑀉𑀧𑀸𑀤𑀸𑀬 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀸𑀤𑁂 𑀢𑀲𑁆𑀲 𑀅𑀦𑀺𑀘𑁆𑀘𑀲𑀗𑁆𑀔𑀢𑀢𑀸𑀤𑀺𑀧𑁆𑀧𑀲𑀗𑁆𑀕𑀤𑀻𑀧𑀓𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄, ‘‘𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄’’𑀢𑀺 𑀯𑀸𑀤𑁂 𑀢𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀸𑀦𑀼𑀧𑀘𑁆𑀙𑁂𑀤𑀸𑀤𑀺𑀧𑁆𑀧𑀲𑀗𑁆𑀕𑀤𑀻𑀧𑀓𑁄 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑁄 𑀘, ‘‘𑀬𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀓𑁄, 𑀲𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀯𑀸𑀤𑀪𑁂𑀤𑀓𑁄 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑁄, ‘‘𑀫𑀸𑀢𑀸𑀧𑀺𑀢𑀸𑀤𑀬𑁄 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀧𑀼𑀕𑁆𑀕𑀮𑁄 𑀅𑀢𑁆𑀣𑀻’’𑀢𑀺 𑀯𑀸𑀤𑀪𑁂𑀤𑀓𑁄 𑀜𑀸𑀢𑀓𑀸𑀦𑀼𑀬𑁄𑀕𑁄 ¶ , ‘‘𑀏𑀯𑀁 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺 𑀚𑀸𑀢𑁆𑀬𑀸𑀦𑀼𑀬𑁄𑀕𑁄, ‘‘𑀕𑀳𑀝𑁆𑀞𑁄 𑀧𑀩𑁆𑀩𑀚𑀺𑀢𑁄’’𑀢𑀺𑀆𑀤𑀺 𑀧𑀝𑀺𑀧𑀢𑁆𑀢𑀸𑀦𑀼𑀬𑁄𑀕𑁄, ‘‘𑀤𑁂𑀯𑁄 𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺 𑀉𑀧𑀧𑀢𑁆𑀢𑀸𑀦𑀼𑀬𑁄𑀕𑁄, ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑁄, ‘‘𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺 𑀲𑀗𑁆𑀖𑀸𑀦𑀼𑀬𑁄𑀕𑁄, ‘‘𑀧𑀼𑀕𑁆𑀕𑀮𑁄 𑀲𑀗𑁆𑀔𑀢𑁄’’𑀢𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑁄 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀕𑀸𑀦𑀼𑀬𑁄𑀕𑁄, ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄’’𑀢𑀺𑀆𑀤𑀺 𑀯𑁂𑀤𑀓𑀸𑀦𑀼𑀬𑁄𑀕𑁄, ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺 𑀓𑀺𑀘𑁆𑀘𑀸𑀦𑀼𑀬𑁄𑀕𑁄, ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀲𑀪𑀸𑀯𑀲𑀸𑀥𑀓𑀲𑀼𑀢𑁆𑀢𑁂𑀲𑀼 𑀲𑀦𑁆𑀦𑀺𑀲𑁆𑀲𑀺𑀢𑁂𑀲𑀼 𑁋

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸 (𑀫. 𑀦𑀺. 𑁧.𑁩𑁫𑁩, 𑁩𑁫𑁬; 𑀥. 𑀧. 𑁨𑁭𑁯), 𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺 (𑀲𑀁. 𑀦𑀺. 𑁨.𑁧𑁫).

𑀓𑀺𑀦𑁆𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀺.

𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀺. (𑀲𑀁. 𑀦𑀺. 𑁧.𑁧𑁭𑁧);

𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸…𑀧𑁂… 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺 (𑀲𑀁. 𑀦𑀺. 𑁪.𑁮𑁫).

‘‘𑀅𑀢𑁆𑀢𑀦𑀺 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀫𑁂𑀢𑀺 𑀅𑀲𑁆𑀲𑀸𑀢𑀺…𑀧𑁂… 𑀅𑀢𑁆𑀢𑀦𑀺 𑀘 𑀪𑀺𑀓𑁆𑀔𑀯𑁂 𑀅𑀢𑁆𑀢𑀦𑀺𑀬𑁂 𑀘 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀦𑀺𑀬𑀫𑀸𑀦𑁂 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀲𑁄 𑀮𑁄𑀓𑁄, 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺, 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺 ¶ , 𑀦𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑁂𑀯𑀮𑁄 𑀧𑀭𑀺𑀧𑀽𑀭𑁄 𑀩𑀸𑀮𑀥𑀫𑁆𑀫𑁄’’𑀢𑀺 (𑀫. 𑀦𑀺. 𑁧.𑁨𑁪𑁪), ‘‘𑀢𑀢𑁆𑀭, 𑀲𑁂𑀦𑀺𑀬, 𑀬𑁆𑀯𑀸𑀬𑀁 𑀲𑀢𑁆𑀣𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑁂𑀦𑀺𑀬, 𑀲𑀢𑁆𑀣𑀸 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀪𑀸𑀯𑀤𑀻𑀧𑀓𑀲𑀼𑀢𑁆𑀢𑀲𑀦𑁆𑀤𑀲𑁆𑀲𑀦𑀯𑀲𑀧𑁆𑀧𑀯𑀢𑁆𑀢𑁄 𑀲𑀼𑀢𑁆𑀢𑀲𑀦𑁆𑀤𑀲𑁆𑀲𑀦𑀸𑀦𑀼𑀬𑁄𑀕𑁄 𑀘𑀸𑀢𑀺 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀯𑀺𑀢𑁆𑀣𑀸𑀭𑀢𑁄 𑀧𑀞𑀫𑀸 𑀧𑀼𑀕𑁆𑀕𑀮𑀓𑀣𑀸 𑀯𑀺𑀪𑀢𑁆𑀢𑀸. 𑀢𑀢𑁆𑀣 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀬𑀣𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀮𑀩𑁆𑀪𑀦𑁆𑀢𑀺, 𑀦 𑀏𑀯𑀁 𑀧𑀼𑀕𑁆𑀕𑀮𑁄, 𑀭𑀽𑀧𑀸𑀤𑀻𑀲𑀼 𑀧𑀦 𑀲𑀢𑀺 𑀮𑁄𑀓𑀯𑁄𑀳𑀸𑀭𑀫𑀢𑁆𑀢𑁂𑀦 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋 ‘‘𑀇𑀫𑀸 𑀔𑁄, 𑀘𑀺𑀢𑁆𑀢…𑀧𑁂… 𑀮𑁄𑀓𑀯𑁄𑀳𑀸𑀭𑀸 𑀮𑁄𑀓𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 (𑀤𑀻. 𑀦𑀺. 𑁧.𑁪𑁪𑁦). 𑀤𑁆𑀯𑀺𑀥𑀸𑀧𑀺 𑀩𑀼𑀤𑁆𑀥𑀸𑀦𑀁 𑀓𑀣𑀸 𑀲𑀫𑁆𑀫𑀼𑀢𑀺𑀓𑀣𑀸, 𑀧𑀭𑀫𑀢𑁆𑀣𑀓𑀣𑀸 𑀘. 𑀢𑀢𑁆𑀣 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄 𑀕𑀸𑀫𑁄 𑀧𑀩𑁆𑀩𑀢𑁄’’𑀢𑀺𑀆𑀤𑀺𑀓𑀸 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫, ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀔𑀦𑁆𑀥𑀸 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫. 𑀩𑀼𑀤𑁆𑀥𑀸 𑀳𑀺 𑀬𑁂 𑀬𑁂 𑀲𑀢𑁆𑀢𑀸 𑀬𑀣𑀸 𑀬𑀣𑀸 𑀩𑀼𑀚𑁆𑀛𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀢𑀣𑀸 𑀢𑀣𑀸 𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀧𑀭𑀫𑀢𑁆𑀣𑀯𑀲𑁂𑀦 𑀯𑀸 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀤𑁂𑀲𑁂𑀢𑁆𑀯𑀸 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦𑁂𑀯 𑀅𑀫𑀢𑀁 𑀫𑀕𑁆𑀕𑀁 𑀧𑀓𑀸𑀲𑁂𑀦𑁆𑀢𑀺. 𑀅𑀬𑀜𑁆𑀳𑀺 𑁋

𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀼𑀧𑀮𑀩𑁆𑀪𑀢𑀺.

𑀢𑀢𑁆𑀣 𑁋

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀢𑀣𑀮𑀓𑁆𑀔𑀡𑀁.

𑀢𑀲𑁆𑀫𑀸 𑀯𑀺𑀜𑁆𑀜𑀽 𑀅𑀓𑀢𑁆𑀯𑀸𑀦, 𑀩𑁆𑀬𑀜𑁆𑀚𑀦𑁂𑀪𑀺𑀦𑀺𑀯𑁂𑀲𑀦𑀁;

𑀧𑀭𑀫𑀢𑁆𑀣𑁂 𑀧𑀢𑀺𑀝𑁆𑀞𑀸𑀬, 𑀧𑀼𑀕𑁆𑀕𑀮𑀸𑀤𑀺𑀁 𑀯𑀺𑀯𑀚𑁆𑀚𑀬𑁂.

𑀧𑀜𑁆𑀜𑀢𑁆𑀢𑀺𑀁 𑀅𑀦𑀢𑀺𑀓𑁆𑀓𑀫𑁆𑀫, 𑀧𑀭𑀫𑀢𑁆𑀣𑁄 𑀧𑀓𑀸𑀲𑀺𑀢𑁄;

𑀯𑀺𑀦𑀸𑀬𑀓𑁂𑀦 𑀲𑁄 𑀬𑀲𑁆𑀫𑀸, 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀧𑀡𑁆𑀟𑀺𑀢𑁄;

𑀧𑀭𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀬𑁂𑀢𑀺. (𑀓𑀣𑀸. 𑀅𑀝𑁆𑀞. 𑁨𑁩𑁭);

𑀅𑀬𑀁 𑀧𑀼𑀕𑁆𑀕𑀮𑀓𑀣𑀸𑀦𑀬𑁄.

𑀧𑀭𑀺𑀳𑀸𑀦𑀺𑀓𑀣𑀸𑀤𑀺𑀯𑀡𑁆𑀡𑀦𑀸

𑀧𑀼𑀕𑁆𑀕𑀮𑀓𑀣𑀸𑀢𑁄 ¶ ¶ 𑀧𑀭𑀁 ‘‘𑀧𑀭𑀺𑀳𑀸𑀬𑀢𑀺 𑀅𑀭𑀳𑀸 𑀅𑀭𑀳𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀲𑁂𑀔𑀸, 𑀲𑁄𑀢𑀸𑀧𑀦𑁆𑀦𑀯𑀚𑁆𑀚𑀺𑀢𑀲𑁂𑀔𑀸 𑀘 𑀅𑀕𑁆𑀕𑀫𑀕𑁆𑀕𑀨𑀮𑀢𑁄 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀳𑀸𑀦𑀺𑀓𑀣𑀸. 𑀧𑀩𑁆𑀩𑀚𑁆𑀚𑀸 𑀯𑀺𑀬 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀯 𑀪𑀯𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀧𑀯𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀏𑀓𑀤𑁂𑀲𑀢𑁄 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀣𑀸 𑀲𑀫𑀼𑀤𑀬𑀤𑀲𑁆𑀲𑀦𑀸𑀤𑀻𑀳𑀻𑀢𑀺 𑀏𑀯𑀁 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀑𑀥𑀺𑀲𑁄 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀑𑀥𑀺𑀲𑁄𑀓𑀣𑀸. 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀚𑀳𑀢𑀺, 𑀲𑁄 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸 𑀧𑀞𑀫𑀫𑁂𑀯 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀚𑀳𑀢𑀺𑀓𑀣𑀸. 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀔𑀦𑁆𑀥𑀸𑀤𑀺𑀓𑀁 𑀓𑀸𑀮𑀢𑁆𑀢𑀬𑁂𑀧𑀺 𑀔𑀦𑁆𑀥𑀸𑀤𑀺𑀲𑀪𑀸𑀯𑁂𑀦 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸. 𑀅𑀢𑀻𑀢𑀁, 𑀅𑀦𑀸𑀕𑀢𑀜𑁆𑀘 𑀔𑀦𑁆𑀥𑀸𑀤𑀺𑀓𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀢𑀻𑀢𑀓𑁆𑀔𑀦𑁆𑀥𑀸𑀤𑀺𑀓𑀣𑀸. 𑀅𑀢𑀻𑀢𑁂𑀲𑀼 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀲𑀼 𑀏𑀓𑀘𑁆𑀘𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀫𑁂𑀯 𑀅𑀢𑁆𑀣𑀺, 𑀦 𑀇𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀏𑀓𑀘𑁆𑀘𑀫𑀢𑁆𑀣𑀻𑀢𑀺𑀓𑀣𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀧𑀯𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀓𑀣𑀸. 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀺, 𑀲𑀓𑀪𑀸𑀯𑁂𑀦 𑀯𑀸 𑀅𑀢𑁆𑀣𑀺, 𑀧𑀭𑀪𑀸𑀯𑁂𑀦 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀳𑁂𑀯𑀢𑁆𑀣𑀺𑀓𑀣𑀸. 𑀢𑀢𑁆𑀣 𑀳𑁂𑀯𑀢𑁆𑀣𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀥𑀺𑀫𑀸𑀦𑀺𑀓𑀸𑀦𑀁, 𑀓𑀼𑀳𑀓𑀸𑀦𑀁 𑀯𑀸 𑀅𑀭𑀳𑀢𑁆𑀢𑀧𑀝𑀺𑀜𑁆𑀜𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀤𑀺𑀲𑁆𑀯𑀸 𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀽𑀧𑀳𑀸𑀭𑀓𑀣𑀸. 𑀅𑀭𑀳𑀢𑁄 𑀧𑀭𑁂𑀲𑀁 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀅𑀢𑁆𑀣𑀺 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀓𑀗𑁆𑀔𑀸, 𑀧𑀭𑁂𑀳𑀺 𑀜𑀸𑀧𑀦𑀻𑀬𑀢𑁄 𑀅𑀢𑁆𑀣𑀺 𑀧𑀭𑀯𑀺𑀢𑀭𑀡𑀸𑀢𑀺 𑀢𑀺𑀲𑁆𑀲𑁄 𑀓𑀣𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀸 𑀪𑀺𑀚𑁆𑀚𑀢𑀻𑀢𑀺 𑀧𑀯𑀢𑁆𑀢𑀸 𑀯𑀘𑀻𑀪𑁂𑀤𑀓𑀣𑀸. 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀤𑀼𑀓𑁆𑀔𑁂 𑀜𑀸𑀡𑀁 𑀆𑀳𑀭𑀢𑀺, 𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀤𑀼𑀓𑁆𑀔𑀸𑀳𑀸𑀭𑀓𑀣𑀸. 𑀲𑀫𑀸𑀧𑀢𑁆𑀢𑀺𑀬𑀁, 𑀪𑀯𑀗𑁆𑀕𑁂 𑀘 𑀘𑀺𑀢𑁆𑀢𑀁 𑀘𑀺𑀭𑀁 𑀢𑀺𑀝𑁆𑀞𑀢𑀻𑀢𑀺 ¶ 𑀧𑀯𑀢𑁆𑀢𑀸 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀤𑀺𑀢𑁆𑀢𑀸 𑀓𑀼𑀓𑁆𑀓𑀼𑀴𑀦𑀺𑀭𑀬𑀲𑀤𑀺𑀲𑀸𑀢𑀺 𑀧𑀯𑀢𑁆𑀢𑀸 𑀓𑀼𑀓𑁆𑀓𑀼𑀴𑀓𑀣𑀸. 𑀧𑀘𑁆𑀘𑁂𑀓𑀁 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀏𑀓𑁂𑀓𑀲𑁆𑀲 𑀫𑀕𑁆𑀕𑀲𑁆𑀲 𑀘𑀢𑀼𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑁄𑀴𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀯𑁄𑀳𑀸𑀭𑀯𑀘𑀦𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀯𑁄𑀳𑀸𑀭𑀓𑀣𑀸. 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀫𑀕𑁆𑀕𑁂𑀦 𑀯𑀺𑀦𑀸 𑀓𑀺𑀮𑁂𑀲𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄, 𑀧𑀝𑀺𑀲𑀗𑁆𑀔𑀸𑀬 𑀢𑁂𑀦 𑀫𑀕𑁆𑀕𑁂𑀦 𑀓𑀺𑀮𑁂𑀲𑀦𑀺𑀭𑁄𑀥𑁄𑀢𑀺 𑀤𑁆𑀯𑁂 𑀦𑀺𑀭𑁄𑀥𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀓𑀣𑀸.

𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀲𑀸𑀥𑀸𑀭𑀡𑀦𑁆𑀢𑀺 𑀧𑀯𑀢𑁆𑀢𑀸 𑀩𑀮𑀓𑀣𑀸. 𑀆𑀲𑀯𑀓𑁆𑀔𑀬𑀜𑀸𑀡𑀯𑀺𑀭𑀳𑀺𑀢𑀁 𑀦𑀯𑀩𑀮𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 ¶ 𑀧𑀯𑀢𑁆𑀢𑀸 𑀅𑀭𑀺𑀬𑀦𑁆𑀢𑀺𑀓𑀣𑀸. 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀓𑀣𑀸. 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀧𑀞𑀫𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸. 𑀅𑀝𑁆𑀞𑀫𑀓𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀦𑁆𑀢𑀺 𑀦𑀸𑀫, 𑀫𑀕𑁆𑀕𑀓𑁆𑀔𑀡𑁂 𑀧𑀳𑀻𑀦𑀸 𑀦𑀸𑀫𑀸𑀢𑀺 𑀧𑀯𑀢𑁆𑀢𑀸 𑀅𑀝𑁆𑀞𑀫𑀓𑀓𑀣𑀸. 𑀅𑀝𑁆𑀞𑀫𑀓𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀝𑀺𑀮𑀪𑀦𑁆𑀢𑀺, 𑀦 𑀧𑀝𑀺𑀮𑀤𑁆𑀥𑀸𑀦𑀻𑀢𑀺 𑀧𑀯𑀢𑁆𑀢𑀸 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫𑀸𑀢𑀺 𑀧𑀯𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸. 𑀢𑀣𑀸 𑀫𑀁𑀲𑀲𑁄𑀢𑁂 𑀤𑀺𑀩𑁆𑀩𑀲𑁄𑀢𑀓𑀣𑀸. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀯𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸. 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀲𑀁𑀯𑀭𑀸𑀪𑀸𑀯𑀫𑀢𑁆𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀬𑀸 𑀅𑀪𑀸𑀯𑁂𑀧𑀺 𑀲𑀁𑀯𑀭𑁄 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀲𑀁𑀯𑀭𑀓𑀣𑀸. 𑀅𑀲𑀜𑁆𑀜𑀻𑀦𑀫𑁆𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀲𑀜𑁆𑀜𑀓𑀣𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺𑀬𑀁 𑀲𑀜𑁆𑀜𑀸 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸.

𑀅𑀭𑀳𑀸 ¶ 𑀕𑀺𑀳𑀻 𑀅𑀲𑁆𑀲𑀸𑀢𑀺 𑀧𑀯𑀢𑁆𑀢𑀸 𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸. 𑀅𑀦𑀸𑀕𑀸𑀫𑀺𑀦𑁄 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀉𑀧𑀧𑀢𑁆𑀢𑀺𑀓𑀣𑀸. 𑀅𑀭𑀳𑀢𑁄 𑀮𑁄𑀓𑀺𑀬𑀥𑀫𑁆𑀫𑀸𑀧𑀺 𑀅𑀦𑀸𑀲𑀯𑀸𑀢𑀺 𑀧𑀯𑀢𑁆𑀢𑀸 𑀅𑀦𑀸𑀲𑀯𑀓𑀣𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀲𑀫𑀗𑁆𑀕𑀺𑀪𑀸𑀯𑀲𑀫𑀦𑁆𑀦𑀸𑀕𑀫𑁄 𑀘 𑀭𑀽𑀧𑀸𑀯𑀘𑀭𑀸𑀤𑀺𑀪𑀽𑀫𑀦𑁆𑀢𑀭𑀧𑀝𑀺𑀮𑀸𑀪𑀲𑀫𑀦𑁆𑀦𑀸𑀕𑀫𑁄 𑀘𑀸𑀢𑀺 𑀤𑁆𑀯𑁂 𑀲𑀫𑀦𑁆𑀦𑀸𑀕𑀫𑀸, 𑀬𑁂𑀲𑀁 𑀧𑀦 𑀇𑀫𑁂 𑀤𑁆𑀯𑁂 𑀲𑀫𑀦𑁆𑀦𑀸𑀕𑀫𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄𑀧𑀺 𑀳𑁂𑀢𑁆𑀣 𑀉𑀧𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀏𑀓𑁄 𑀲𑀫𑀦𑁆𑀦𑀸𑀕𑀫𑁄 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀅𑀭𑀳𑀸 𑀘𑀢𑀽𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀯𑀢𑁆𑀢𑀸 𑀲𑀫𑀦𑁆𑀦𑀸𑀕𑀢𑀓𑀣𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀭𑀳𑀸 𑀙𑀳𑀺 𑀉𑀧𑁂𑀓𑁆𑀔𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀯𑀢𑁆𑀢𑀸 𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸. 𑀫𑀕𑁆𑀕𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀩𑁄𑀥𑀺𑀬𑀸 𑀲𑀤𑀸 𑀲𑀦𑁆𑀦𑀺𑀳𑀺𑀢𑀪𑀸𑀯𑁂𑀦 𑀩𑀼𑀤𑁆𑀥𑁄𑀢𑀺 𑀧𑀯𑀢𑁆𑀢𑀸 𑀩𑁄𑀥𑀺𑀬𑀸 𑀩𑀼𑀤𑁆𑀥𑁄𑀢𑀺𑀓𑀣𑀸. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀬𑀼𑀢𑁆𑀢𑀸𑀯 𑀩𑁄𑀥𑀺𑀲𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀮𑀓𑁆𑀔𑀡𑀓𑀣𑀸. 𑀩𑁄𑀥𑀺𑀲𑀢𑁆𑀢𑀸𑀦𑀫𑁆𑀧𑀺 𑀫𑀕𑁆𑀕𑀦𑀺𑀬𑀸𑀫𑁄 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸. 𑀘𑀢𑀼𑀢𑁆𑀣𑀫𑀕𑁆𑀕𑀝𑁆𑀞𑁄 𑀢𑀻𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀅𑀧𑀭𑀸𑀧𑀺 𑀲𑀫𑀦𑁆𑀦𑀸𑀕𑀢𑀓𑀣𑀸. 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀻𑀦𑁂𑀳𑀺 𑀲𑀤𑁆𑀥𑀺𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀳𑀢𑁆𑀢𑀁 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀦𑁆𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀲𑀁𑀬𑁄𑀚𑀦𑀧𑀳𑀸𑀦𑀓𑀣𑀸.

𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀨𑀮𑀁 𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀧𑀦 𑀧𑀭𑀺𑀬𑀸𑀬𑀢𑁄. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀯𑀺𑀫𑀼𑀢𑁆𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸𑀤𑀺𑀅𑀲𑁂𑀔𑀸𑀭𑀫𑁆𑀫𑀡𑀁 𑀅𑀲𑁂𑀔𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀅𑀲𑁂𑀔𑀜𑀸𑀡𑀓𑀣𑀸. 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀫𑀸𑀧𑀢𑁆𑀢𑀺𑀬𑁄 ¶ 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑁆𑀢𑀸 𑀯𑀺𑀧𑀭𑀻𑀢𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀯𑀺𑀧𑀭𑀻𑀢𑀓𑀣𑀸. 𑀢𑀢𑁆𑀣 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁄 𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀬𑀸𑀫𑀕𑀫𑀦𑀸𑀬 𑀜𑀸𑀡𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑀓𑀣𑀸. 𑀲𑀩𑁆𑀩𑀁 𑀜𑀸𑀡𑀁 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 ¶ 𑀧𑀯𑀢𑁆𑀢𑀸 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸. 𑀲𑀫𑁆𑀫𑀼𑀢𑀺𑀯𑀺𑀲𑀬𑀫𑁆𑀧𑀺 𑀜𑀸𑀡𑀁 𑀪𑀽𑀢𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀧𑀯𑀢𑁆𑀢𑀸 𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀸𑀤𑀺𑀘𑁂𑀢𑀲𑀺𑀓𑀸𑀭𑀫𑁆𑀫𑀡𑀦𑁆𑀢𑀺 𑀧𑀯𑀢𑁆𑀢𑀸 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸. 𑀲𑀩𑁆𑀩𑀲𑁆𑀫𑀺𑀁 𑀅𑀦𑀸𑀕𑀢𑀥𑀫𑁆𑀫𑁂 𑀲𑀩𑁆𑀩𑁂𑀲𑀁 𑀜𑀸𑀡𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀦𑀸𑀕𑀢𑀜𑀸𑀡𑀓𑀣𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑁄 𑀜𑀸𑀡𑁂𑀧𑀺 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸. 𑀩𑀼𑀤𑁆𑀥𑀸 𑀯𑀺𑀬 𑀲𑀸𑀯𑀓𑀸𑀧𑀺 𑀢𑁂𑀦 𑀢𑁂𑀦 𑀯𑁂𑀦𑁂𑀬𑁆𑀬𑀚𑀦𑁂𑀦 𑀧𑀢𑁆𑀢𑀩𑁆𑀩𑀨𑀮𑀁 𑀜𑀢𑁆𑀯𑀸𑀯 𑀢𑀤𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀨𑀮𑀜𑀸𑀡𑀓𑀣𑀸.

𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀦𑀺𑀬𑀫𑀢𑁄 𑀦𑀺𑀘𑁆𑀘𑀝𑁆𑀞𑁂𑀦 𑀅𑀲𑀗𑁆𑀔𑀢𑁄𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑀓𑀣𑀸. ‘‘𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺 𑀧𑀯𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸. ‘‘𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀘𑀢𑀼𑀲𑀘𑁆𑀘𑀸𑀦𑀺 𑀅𑀲𑀗𑁆𑀔𑀢𑀸𑀦𑀻𑀢𑀺 𑀧𑀯𑀢𑁆𑀢𑀸 𑀲𑀘𑁆𑀘𑀓𑀣𑀸. ‘‘𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀆𑀦𑁂𑀜𑁆𑀚𑀸’’𑀢𑀺 𑀯𑀘𑀦𑀢𑁄 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀆𑀭𑀼𑀧𑁆𑀧𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸. 𑀅𑀲𑀗𑁆𑀔𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀓𑀣𑀸. 𑀆𑀓𑀸𑀲𑁄 𑀲𑀦𑀺𑀤𑀲𑁆𑀲𑀦𑁄𑀢𑀺𑀓𑀣𑀸. 𑀧𑀣𑀯𑀻𑀥𑀸𑀢𑀼 𑀲𑀦𑀺𑀤𑀲𑁆𑀲𑀦𑀸𑀢𑀺𑀆𑀤𑀺𑀁 𑀓𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀲𑀦𑀺𑀤𑀲𑁆𑀲𑀦𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀓𑀣𑀸.

𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀦 𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄𑀢𑀺𑀆𑀤𑀺 𑀦𑀺𑀭𑀢𑁆𑀣𑀓𑀦𑁆𑀢𑀺 𑀧𑀯𑀢𑁆𑀢𑀸 𑀲𑀗𑁆𑀕𑀳𑀺𑀢𑀓𑀣𑀸. 𑀯𑁂𑀤𑀦𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀓𑀣𑀸. 𑀘𑁂𑀢𑀲𑀺𑀓𑀁 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀘𑁂𑀢𑀲𑀺𑀓𑀓𑀣𑀸. 𑀘𑁂𑀢𑀦𑀸𑀥𑀫𑁆𑀫𑁄𑀯 𑀤𑀸𑀦𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄𑀢𑀺 𑀧𑀯𑀢𑁆𑀢𑀸 𑀤𑀸𑀦𑀓𑀣𑀸. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀪𑁄𑀕𑀓𑀣𑀸. 𑀧𑁂𑀢𑀸 𑀇𑀢𑁄 𑀤𑀺𑀦𑁆𑀦𑀘𑀻𑀯𑀭𑀸𑀤𑀻𑀳𑁂𑀯 𑀬𑀸𑀧𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀇𑀢𑁄𑀤𑀺𑀦𑁆𑀦𑀓𑀣𑀸. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸 ¶ . 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸. 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀲𑀸𑀫𑀜𑁆𑀜𑀨𑀮𑀁, 𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺 𑀧𑀯𑀢𑁆𑀢𑀸 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸. 𑀅𑀜𑁆𑀜𑀫𑀜𑁆𑀜𑀸𑀤𑀺𑀧𑀘𑁆𑀘𑀬𑀢𑀸𑀬 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸.

𑀅𑀲𑀼𑀭𑀓𑀸𑀬𑁂𑀦 𑀲𑀤𑁆𑀥𑀺𑀁 𑀙 𑀕𑀢𑀺𑀬𑁄𑀢𑀺 𑀧𑀯𑀢𑁆𑀢𑀸 𑀕𑀢𑀺𑀓𑀣𑀸. 𑀫𑀢𑀲𑀢𑁆𑀢𑁄 𑀫𑀸𑀢𑀼𑀉𑀢𑀼𑀲𑀫𑀬𑀜𑁆𑀘 𑀫𑀸𑀢𑀸𑀧𑀺𑀢𑀼𑀲𑀁𑀬𑁄𑀕𑀜𑁆𑀘 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁, 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀁 𑀯𑀸 𑀬𑀲𑁆𑀫𑀺𑀁 𑀪𑀯𑁂 𑀢𑀺𑀝𑁆𑀞𑀢𑀺, 𑀲𑁄 𑀅𑀦𑁆𑀢𑀭𑀸𑀪𑀯𑁄 ¶ 𑀦𑀸𑀫 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀦𑁆𑀢𑀭𑀸𑀪𑀯𑀓𑀣𑀸. 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸𑀯 𑀓𑀸𑀫𑀥𑀸𑀢𑀼 𑀦𑀸𑀫, 𑀦 𑀢𑀼 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸𑀢𑀺 𑀧𑀯𑀢𑁆𑀢𑀸 𑀓𑀸𑀫𑀕𑀼𑀡𑀓𑀣𑀸. 𑀧𑀜𑁆𑀘𑁂𑀯𑀸𑀬𑀢𑀦𑀸𑀦𑀺 𑀓𑀸𑀫𑀸𑀢𑀺𑀓𑀣𑀸. 𑀭𑀽𑀧𑀥𑀫𑁆𑀫𑀸𑀯 𑀭𑀽𑀧𑀥𑀸𑀢𑀽𑀢𑀺𑀓𑀣𑀸. 𑀅𑀭𑀽𑀧𑀥𑀫𑁆𑀫𑀸𑀯 𑀅𑀭𑀽𑀧𑀥𑀸𑀢𑀽𑀢𑀺𑀓𑀣𑀸. 𑀭𑀽𑀧𑀥𑀸𑀢𑀼𑀬𑀸 𑀲𑀢𑁆𑀢𑀸 𑀖𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀴𑀸𑀬𑀢𑀦𑀺𑀓𑀸𑀢𑀺 𑀧𑀯𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸. 𑀆𑀭𑀼𑀧𑁆𑀧𑁂𑀧𑀺 𑀅𑀢𑁆𑀣𑀺 𑀲𑀼𑀔𑀼𑀫𑀭𑀽𑀧𑀦𑁆𑀢𑀺𑀓𑀣𑀸. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀭𑀽𑀧𑀁 𑀓𑀫𑁆𑀫𑀦𑁆𑀢𑀺𑀓𑀣𑀸. 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀭𑀽𑀧𑀥𑀫𑁆𑀫𑁄𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸. 𑀅𑀭𑀺𑀬𑀼𑀧𑀯𑀸𑀤𑀓𑀫𑁆𑀫𑁂𑀦 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀳𑁂𑀢𑀼𑀓𑀣𑀸.

𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀆𑀤𑀻𑀦𑀯𑀢𑁄 𑀅𑀧𑀲𑁆𑀲𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀦𑀺𑀲𑀁𑀲𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀓𑀣𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀫𑁆𑀧𑀺 𑀲𑀁𑀬𑁄𑀚𑀦𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀫𑀢𑀸𑀭𑀫𑁆𑀫𑀡𑀓𑀣𑀸. 𑀭𑀽𑀧𑀁 𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸. 𑀅𑀦𑀼𑀲𑀬𑀸 𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸. 𑀜𑀸𑀡𑀁 𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸. 𑀅𑀢𑀻𑀢𑀸𑀭𑀫𑁆𑀫𑀡𑀜𑁆𑀘 𑀅𑀦𑀸𑀕𑀢𑀸𑀭𑀫𑁆𑀫𑀡𑀜𑁆𑀘 𑀘𑀺𑀢𑁆𑀢𑀁 𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀤𑁆𑀯𑀬𑀁. 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀦𑁆𑀢𑀺𑀓𑀣𑀸. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑁄𑀯 𑀲𑀤𑁆𑀤𑁄, 𑀲𑁄 𑀘 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀧𑀯𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸. 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀯𑀸𑀘𑀸 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸. 𑀯𑀺𑀦𑀸𑀧𑀺 ¶ 𑀘𑀺𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀓𑀸𑀬𑀓𑀫𑁆𑀫𑀦𑁆𑀢𑀺𑀓𑀣𑀸. 𑀅𑀢𑀻𑀢𑁂𑀳𑀺𑀧𑀺 𑀛𑀸𑀦𑁂𑀳𑀺, 𑀅𑀦𑀸𑀕𑀢𑁂𑀳𑀺𑀧𑀺 𑀬𑁄𑀕𑀺𑀦𑁄 𑀲𑀫𑀦𑁆𑀦𑀸𑀕𑀢𑀸𑀢𑀺 𑀧𑀯𑀢𑁆𑀢𑀸 𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸.

𑀪𑀯𑀗𑁆𑀕𑀘𑀺𑀢𑁆𑀢𑁂 𑀅𑀦𑀺𑀭𑀼𑀤𑁆𑀥𑁂 𑀏𑀯 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀪𑀸𑀯𑁂 𑀘 𑀲𑀦𑁆𑀢𑀢𑀺𑀦𑀺𑀭𑁄𑀥𑁄 𑀲𑀺𑀬𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀓𑀣𑀸. 𑀲𑀳 𑀯𑀸𑀘𑀸𑀳𑀺 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀫𑀕𑁆𑀕𑁄𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀸𑀧𑀺 𑀫𑀕𑁆𑀕𑀪𑀸𑀯𑀦𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀸𑀧𑀺 𑀅𑀓𑀼𑀲𑀮𑀸𑀧𑀻𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸𑀢𑀺𑀓𑀣𑀸. 𑀫𑀕𑁆𑀕𑀓𑁆𑀔𑀡𑁂 𑀮𑁄𑀓𑀺𑀬𑁂𑀦, 𑀮𑁄𑀓𑀼𑀢𑁆𑀢𑀭𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀻𑀮𑁂𑀳𑀺 𑀬𑀼𑀢𑁆𑀢𑀸𑀢𑀺𑀓𑀣𑀸. 𑀲𑀻𑀮𑀁 𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸. 𑀲𑀻𑀮𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀓𑀣𑀸. 𑀲𑀫𑀸𑀤𑀸𑀦𑀳𑁂𑀢𑀼𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀼𑀜𑁆𑀜𑁄𑀧𑀘𑀬𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑀸𑀤𑀸𑀦𑀳𑁂𑀢𑀼𑀓𑀓𑀣𑀸. 𑀯𑀺𑀜𑁆𑀜𑀢𑁆𑀢𑀺 𑀲𑀻𑀮𑀦𑁆𑀢𑀺𑀓𑀣𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀁 𑀳𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀓𑀣𑀸.

𑀅𑀦𑀼𑀲𑀬𑀸 𑀅𑀩𑁆𑀬𑀸𑀓𑀢𑀸, 𑀅𑀳𑁂𑀢𑀼𑀓𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀢𑀺𑀲𑁆𑀲𑁄𑀧𑀺 𑀅𑀦𑀼𑀲𑀬𑀓𑀣𑀸. 𑀅𑀲𑁂𑀔𑀲𑁆𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑁄 𑀜𑀸𑀡𑀻𑀢𑀺 𑀦𑀯𑀢𑁆𑀢𑀩𑁆𑀩𑁄𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸. 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸 ¶ . 𑀫𑀕𑁆𑀕𑀓𑁆𑀔𑀡𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀡𑀁 𑀧𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀸 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸 𑀇𑀤𑁆𑀥𑀺𑀩𑀮𑁂𑀦 𑀆𑀬𑀼𑀓𑀧𑁆𑀧𑀁 𑀯𑀺𑀦𑀸𑀧𑀺 𑀫𑀳𑀸𑀓𑀧𑁆𑀧𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀇𑀤𑁆𑀥𑀺𑀩𑀮𑀓𑀣𑀸. 𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀸𑀥𑀺, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀢𑀺 𑀧𑀯𑀢𑁆𑀢𑀸 𑀲𑀫𑀸𑀥𑀺𑀓𑀣𑀸. 𑀅𑀯𑀺𑀚𑁆𑀚𑀸𑀤𑀺𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀳𑀺 𑀅𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀢𑀸𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸. 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀸 𑀅𑀦𑀺𑀘𑁆𑀘𑀢𑀸𑀢𑀺 𑀧𑀯𑀢𑁆𑀢𑀸 𑀅𑀦𑀺𑀘𑁆𑀘𑀢𑀸𑀓𑀣𑀸.

𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀺𑀦𑀸𑀧𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑀺 𑀧𑀯𑀢𑁆𑀢𑀸 𑀓𑀣𑀸. 𑀲𑀩𑁆𑀩𑀁 𑀓𑀫𑁆𑀫𑀁 𑀯𑀺𑀧𑀸𑀓𑀚𑀦𑀓𑀦𑁆𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀓𑀣𑀸. 𑀲𑀤𑁆𑀤𑁄 𑀯𑀺𑀧𑀸𑀓𑁄𑀢𑀺 𑀧𑀯𑀢𑁆𑀢𑀸 𑀓𑀣𑀸. 𑀲𑀴𑀸𑀬𑀢𑀦𑀁 𑀯𑀺𑀧𑀸𑀓𑁄𑀢𑀺 𑀧𑀯𑀢𑁆𑀢𑀸 ¶ 𑀓𑀣𑀸. 𑀫𑀕𑁆𑀕𑀁 𑀯𑀺𑀦𑀸𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺𑀓𑀣𑀸. 𑀢𑀣𑀸 𑀓𑁄𑀮𑀁𑀓𑁄𑀮𑀏𑀓𑀩𑀻𑀚𑀺𑀓𑀣𑀸𑀲𑀼𑀧𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺𑀓𑀣𑀸. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀅𑀧𑀸𑀬𑀤𑀼𑀕𑁆𑀕𑀢𑀺𑀬𑀸 𑀲𑀤𑁆𑀥𑀺𑀁 𑀭𑀽𑀧𑀸𑀤𑀺𑀢𑀡𑁆𑀳𑀸𑀲𑀗𑁆𑀔𑀸𑀢𑀤𑀼𑀕𑁆𑀕𑀢𑀺𑀧𑀳𑀻𑀦𑀸𑀢𑀺 𑀧𑀯𑀢𑁆𑀢𑀸 𑀤𑀼𑀕𑁆𑀕𑀢𑀺𑀓𑀣𑀸. 𑀲𑀢𑁆𑀢𑀫𑀪𑀯𑀺𑀓𑀲𑁆𑀲 𑀢𑀡𑁆𑀳𑀸𑀲𑀫𑁆𑀪𑀯𑀢𑁄 𑀤𑀼𑀕𑁆𑀕𑀢𑀺 𑀅𑀧𑁆𑀧𑀳𑀻𑀦𑀸𑀢𑀺 𑀧𑀯𑀢𑁆𑀢𑀸 𑀲𑀢𑁆𑀢𑀫𑀪𑀯𑀺𑀓𑀓𑀣𑀸.

𑀲𑀗𑁆𑀖𑀪𑁂𑀤𑀸𑀤𑀺𑀓𑀧𑁆𑀧𑀝𑁆𑀞𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀫𑀳𑀸𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑀁 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀆𑀬𑀼𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀓𑀮𑀁 𑀫𑀳𑀸𑀓𑀧𑁆𑀧𑀁 𑀧𑀘𑁆𑀘𑀦𑁆𑀢𑀺, 𑀯𑀺𑀦𑀲𑁆𑀲𑀫𑀸𑀦𑁂𑀧𑀺 𑀓𑀧𑁆𑀧𑁂 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀧𑀘𑁆𑀘𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀓𑀧𑁆𑀧𑀝𑁆𑀞𑀓𑀣𑀸. 𑀲𑀗𑁆𑀖𑀪𑁂𑀤𑀓𑁄 𑀅𑀧𑁆𑀧𑀦𑀸𑀓𑀼𑀲𑀮𑀸𑀦𑀺 𑀯𑀺𑀬 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀦 𑀧𑀝𑀺𑀮𑀪𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀧𑀝𑀺𑀮𑀸𑀪𑀓𑀣𑀸. 𑀅𑀗𑁆𑀕𑀲𑀫𑁆𑀧𑀦𑁆𑀦𑀸𑀬 𑀆𑀡𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀫𑀸𑀢𑀼𑀖𑀸𑀢𑀸𑀤𑀺𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀧𑀬𑁄𑀚𑀓𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀏𑀯𑀸𑀢𑀺 𑀧𑀯𑀢𑁆𑀢𑀸 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸. 𑀅𑀦𑀺𑀬𑀢𑀥𑀫𑁆𑀫𑁂𑀲𑀼𑀧𑀺 𑀓𑁂𑀘𑀺 𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀬𑀢𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀢𑀲𑁆𑀲 𑀦𑀺𑀬𑀸𑀫𑀓𑀣𑀸. 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁂𑀦 𑀧𑀝𑀺𑀘𑁆𑀙𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 𑀦𑀻𑀯𑀭𑀡𑀁 𑀧𑀚𑀳𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀦𑀺𑀯𑀼𑀢𑀓𑀣𑀸. 𑀲𑀫𑁆𑀫𑀼𑀔𑀻𑀪𑀽𑀢𑀁 𑀲𑀁𑀬𑁄𑀚𑀦𑀫𑁂𑀯 𑀚𑀳𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑁆𑀫𑀼𑀔𑀻𑀪𑀽𑀢𑀓𑀣𑀸. 𑀲𑀫𑀸𑀧𑀦𑁆𑀦𑁄 𑀘 𑀛𑀸𑀦𑀸𑀭𑀫𑁆𑀫𑀡𑀦𑀺𑀓𑀦𑁆𑀢𑀺𑀬𑀸 𑀛𑀸𑀦𑀁 𑀅𑀲𑁆𑀲𑀸𑀤𑁂𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀻𑀢𑀺𑀓𑀣𑀸. 𑀤𑀼𑀓𑁆𑀔𑀯𑁂𑀤𑀦𑀸𑀬𑀧𑀺 𑀭𑀸𑀕𑀲𑁆𑀲𑀸𑀤𑀯𑁂𑀤𑀦𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀅𑀲𑁆𑀲𑀸𑀢𑀭𑀸𑀕𑀓𑀣𑀸. 𑀥𑀫𑁆𑀫𑀢𑀡𑁆𑀳𑀸 𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸. 𑀥𑀫𑁆𑀫𑀢𑀡𑁆𑀳𑀸 𑀦 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺𑀓𑀣𑀸.

𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀁 𑀯𑀸 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀫𑁆𑀧𑀺 𑀩𑀻𑀚𑀫𑀢𑁆𑀢𑀁 𑀲𑀴𑀸𑀬𑀢𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀯𑀢𑁆𑀢𑀸 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ¶ 𑀧𑀯𑀢𑁆𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸. 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀭𑀺𑀬𑀭𑀽𑀧𑀦𑁆𑀢𑀺𑀓𑀣𑀸. 𑀓𑀸𑀫𑀭𑀸𑀕𑀸𑀤𑀺𑀢𑁄 ¶ 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺𑀓𑀣𑀸. 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸. 𑀬𑀣𑀸 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀬𑀁 𑀧𑀭𑀺𑀬𑀸𑀧𑀦𑁆𑀦𑁄, 𑀏𑀯𑀁 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀸 𑀭𑀽𑀧𑀸𑀭𑀽𑀧𑀪𑀽𑀫𑀺𑀬𑀁 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀧𑀭𑀺𑀬𑀸𑀧𑀦𑁆𑀦𑀓𑀣𑀸. 𑀤𑁆𑀯𑀬𑀁 𑀤𑀺𑀝𑁆𑀞𑀺𑀕𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺𑀓𑀣𑀸. 𑀤𑀺𑀝𑁆𑀞𑀺𑀕𑀢𑀁 𑀅𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺𑀓𑀣𑀸. 𑀬𑁄 𑀬𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑁄, 𑀲𑁄 𑀧𑀼𑀦 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀓𑀥𑀸𑀯 𑀏𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀧𑀘𑁆𑀘𑀬𑀢𑀸𑀓𑀣𑀸. 𑀅𑀯𑀺𑀚𑁆𑀚𑀸𑀯 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀦 𑀧𑀦 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬𑀸𑀢𑀺 𑀧𑀯𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸. 𑀓𑀸𑀮𑀤𑁆𑀥𑀸𑀦𑀸 𑀇𑀫𑁂 𑀧𑀭𑀺𑀦𑀺𑀧𑁆𑀨𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀅𑀤𑁆𑀥𑀸𑀓𑀣𑀸. 𑀏𑀯𑀁 𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸. 𑀅𑀜𑁆𑀜𑀲𑁆𑀲 𑀆𑀲𑀯𑀲𑁆𑀲 𑀅𑀪𑀸𑀯𑀸 𑀆𑀲𑀯𑀸 𑀅𑀦𑀸𑀲𑀯𑀸𑀢𑀺 𑀧𑀯𑀢𑁆𑀢𑀸 𑀆𑀲𑀯𑀓𑀣𑀸. 𑀮𑁄𑀓𑀼𑀢𑁆𑀢𑀭𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀚𑀭𑀸𑀫𑀭𑀡𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀲𑀸 𑀮𑁄𑀓𑀺𑀬𑀸𑀢𑀺 𑀧𑀯𑀢𑁆𑀢𑀸 𑀤𑀼𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄𑀧𑀺 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀧𑀯𑀢𑁆𑀢𑀸 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀢𑀺𑀓𑀣𑀸. 𑀓𑀫𑁆𑀫𑀢𑁄 𑀅𑀜𑁆𑀜𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀓𑀫𑁆𑀫𑀽𑀧𑀘𑀬𑁄𑀢𑀺𑀓𑀣𑀸.

𑀩𑀮𑀧𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀤𑀬𑁄 𑀇𑀤𑁆𑀥𑀺𑀩𑀮𑁂𑀦 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀭𑀸𑀕𑀸𑀤𑀺𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀦𑀺𑀕𑁆𑀕𑀳𑀓𑀣𑀸. 𑀏𑀯𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀘𑀺𑀢𑁆𑀢𑀧𑀕𑁆𑀕𑀳𑀦𑀓𑀣𑀸. 𑀩𑀼𑀤𑁆𑀥𑀸 𑀇𑀤𑁆𑀥𑀺𑀬𑀸 𑀧𑀭𑁂𑀲𑀁 𑀲𑀼𑀔𑀁 𑀤𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸. ‘‘𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑁂 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁄 𑀅𑀥𑀺𑀕𑀡𑁆𑀳𑀸𑀢𑀻𑀢𑀺 𑀧𑀯𑀢𑁆𑀢𑀸 𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸. 𑀭𑀽𑀧𑀁 𑀳𑁂𑀢𑀼𑀓𑀦𑁆𑀢𑀺𑀓𑀣𑀸. 𑀏𑀯𑀁 𑀭𑀽𑀧𑀁 𑀲𑀳𑁂𑀢𑀼𑀓𑀦𑁆𑀢𑀺𑀓𑀣𑀸. 𑀭𑀽𑀧𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺𑀓𑀣𑀸. 𑀭𑀽𑀧𑀁 𑀯𑀺𑀧𑀸𑀓𑁄𑀢𑀺𑀓𑀣𑀸, 𑀬𑀣𑀸 𑀓𑀸𑀫𑀸𑀯𑀘𑀭𑀓𑀫𑁆𑀫𑁂𑀦 𑀚𑀸𑀢𑀁 𑀭𑀽𑀧𑀁 𑀓𑀸𑀫𑀸𑀯𑀘𑀭𑀁, 𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂𑀳𑀺 𑀚𑀸𑀢𑀁 𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸 ¶ . 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀬𑀸, 𑀅𑀭𑀽𑀧𑀭𑀸𑀕𑁄 𑀘 𑀅𑀭𑀽𑀧𑀥𑀸𑀢𑀼𑀬𑀸 𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀓𑀣𑀸.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸. 𑀬𑀁 𑀓𑀺𑀜𑁆𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄𑀢𑀺𑀓𑀣𑀸. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁂𑀯 𑀤𑀼𑀓𑁆𑀔𑀁, 𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀧𑀯𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑁆𑀢𑀺𑀓𑀣𑀸. 𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀓𑀣𑀸. 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀻𑀢𑀺𑀓𑀣𑀸. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 ¶ 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸 𑀦 𑀓𑀺𑀜𑁆𑀘𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸. 𑀤𑀸𑀬𑀓𑀢𑁄 𑀤𑀸𑀦𑀁 𑀯𑀺𑀲𑀼𑀚𑁆𑀛𑀢𑀺, 𑀦 𑀧𑀝𑀺𑀕𑁆𑀕𑀸𑀳𑀓𑀢𑁄𑀢𑀺 𑀧𑀯𑀢𑁆𑀢𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸.

𑀩𑀼𑀤𑁆𑀥𑀸 𑀢𑀼𑀲𑀺𑀢𑀮𑁄𑀓𑁂 𑀏𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀫𑀦𑀼𑀲𑁆𑀲𑀮𑁄𑀓𑁂. 𑀏𑀢𑁆𑀣 𑀳𑀺 𑀦𑀺𑀫𑁆𑀫𑀺𑀢𑀭𑀽𑀧𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑀓𑀣𑀸. 𑀦𑀺𑀫𑁆𑀫𑀺𑀢𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦 𑀩𑀼𑀤𑁆𑀥𑁄𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀓𑀣𑀸. 𑀭𑀸𑀕𑁄𑀯 𑀓𑀭𑀼𑀡𑀸 𑀦𑀸𑀫, 𑀢𑀢𑁄 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀓𑀭𑀼𑀡𑀸𑀢𑀺𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀢𑀺𑀯𑀺𑀬 𑀅𑀥𑀺𑀕𑀡𑁆𑀳𑀸𑀢𑀻𑀢𑀺 𑀧𑀯𑀢𑁆𑀢𑀸 𑀕𑀦𑁆𑀥𑀚𑀸𑀢𑀓𑀣𑀸. 𑀩𑀼𑀤𑁆𑀥𑀸 𑀏𑀓𑁂𑀦 𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀏𑀓𑀫𑀕𑁆𑀕𑀓𑀣𑀸. 𑀧𑀭𑀺𑀓𑀫𑁆𑀫𑀸𑀤𑀺𑀁 𑀯𑀺𑀦𑀸𑀯 𑀧𑀞𑀫𑀸𑀤𑀺𑀚𑁆𑀛𑀸𑀦𑀸 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺 𑀧𑀯𑀢𑁆𑀢𑀸 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸. 𑀧𑀜𑁆𑀘𑀓𑀦𑀬𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀛𑀸𑀦𑀁 𑀯𑀺𑀲𑀼𑀁 𑀛𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀛𑀸𑀦𑀦𑁆𑀢𑀭𑀺𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀛𑀸𑀦𑀦𑁆𑀢𑀭𑀺𑀓𑀓𑀣𑀸. 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺𑀓𑀣𑀸. 𑀯𑀺𑀜𑁆𑀜𑀸𑀡𑀁 𑀯𑀺𑀦𑀸 𑀧𑀲𑀸𑀤𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺𑀓𑀣𑀸.

𑀢𑁂𑀓𑀸𑀮𑀺𑀓𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺 𑀧𑀯𑀢𑁆𑀢𑀸 𑀓𑀺𑀮𑁂𑀲𑀧𑁆𑀧𑀚𑀳𑀦𑀓𑀣𑀸. 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀧𑀺 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀲𑀼𑀜𑁆𑀜𑀢𑀓𑀣𑀸. 𑀅𑀲𑀗𑁆𑀔𑀢𑀫𑁂𑀯 𑀲𑀸𑀫𑀜𑁆𑀜𑀨𑀮𑀦𑁆𑀢𑀺𑀓𑀣𑀸 ¶ . 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀸 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀧𑀢𑁆𑀢𑀺𑀓𑀣𑀸. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀗𑁆𑀔𑀸𑀢𑀸 𑀢𑀣𑀢𑀸 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀢𑀣𑀢𑀸𑀓𑀣𑀸. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀓𑀼𑀲𑀮𑀦𑁆𑀢𑀺𑀓𑀣𑀸. 𑀆𑀦𑀦𑁆𑀢𑀭𑀺𑀬𑀸𑀤𑀺𑀁 𑀯𑀺𑀦𑀸𑀧𑀺 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺𑀓𑀣𑀸. 𑀮𑁄𑀓𑀺𑀬𑀲𑀤𑁆𑀥𑀸𑀤𑀬𑁄 𑀦 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀯𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀓𑀣𑀸.

𑀅𑀲𑀜𑁆𑀘𑀺𑀘𑁆𑀘𑀸𑀧𑀺 𑀆𑀦𑀦𑁆𑀢𑀭𑀺𑀓𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘𑀓𑀣𑀸. 𑀦𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀸𑀦𑁂𑀯 𑀦𑀺𑀭𑀬𑀧𑀸𑀮𑀭𑀽𑀧𑁂𑀦 𑀯𑀥𑁂𑀦𑁆𑀢𑀺, 𑀦 𑀦𑀺𑀭𑀬𑀧𑀸𑀮𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑀬𑀧𑀸𑀮𑀓𑀣𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀢𑀺𑀭𑀘𑁆𑀙𑀸𑀦𑀸𑀢𑀺𑀓𑀣𑀸. 𑀯𑀺𑀭𑀢𑀺𑀢𑁆𑀢𑀬𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁, 𑀧𑀜𑁆𑀘𑀗𑁆𑀕𑀺𑀓𑁄𑀯 𑀫𑀕𑁆𑀕𑁄𑀢𑀺 𑀧𑀯𑀢𑁆𑀢𑀸 𑀫𑀕𑁆𑀕𑀓𑀣𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸.

𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀩𑁆𑀪 𑀲𑀸𑀲𑀦𑀁 𑀦𑀯𑀁 𑀓𑀢𑀦𑁆𑀢𑀺 𑀧𑀯𑀢𑁆𑀢𑀸 𑀲𑀸𑀲𑀦𑀓𑀣𑀸. 𑀧𑀼𑀣𑀼𑀚𑁆𑀚𑀦𑁄 𑀏𑀓𑀓𑁆𑀔𑀡𑁂 𑀢𑁂𑀥𑀸𑀢𑀼𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺 𑀧𑀯𑀢𑁆𑀢𑀸 𑀅𑀯𑀺𑀯𑀺𑀢𑁆𑀢𑀓𑀣𑀸. 𑀜𑁂𑀬𑁆𑀬𑀸𑀯𑀭𑀡𑀳𑁂𑀢𑀼𑀓𑀁 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 ¶ 𑀅𑀧𑁆𑀧𑀳𑀸𑀬𑀧𑀺 𑀅𑀭𑀳𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀲𑀁𑀬𑁄𑀚𑀦𑀓𑀣𑀸. ‘‘𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀳𑁄𑀦𑁆𑀢𑀼, 𑀭𑀼𑀓𑁆𑀔𑀸 𑀦𑀺𑀘𑁆𑀘𑀧𑀼𑀧𑁆𑀨𑀨𑀮𑀸𑀤𑀺𑀬𑀼𑀢𑁆𑀢𑀸 𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀇𑀤𑁆𑀥𑀺 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀇𑀤𑁆𑀥𑀺𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀆𑀬𑀼𑀧𑀪𑀸𑀯𑁂𑀫𑀢𑁆𑀢𑀢𑁄 𑀅𑀜𑁆𑀜𑀸𑀧𑀺 𑀯𑁂𑀫𑀢𑁆𑀢𑀢𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀩𑀼𑀤𑁆𑀥𑀓𑀣𑀸. 𑀏𑀓𑀲𑁆𑀫𑀺𑀁 𑀔𑀡𑁂 𑀲𑀩𑁆𑀩𑀮𑁄𑀓𑀥𑀸𑀢𑀽𑀲𑀼 𑀅𑀦𑁂𑀓𑁂 𑀩𑀼𑀤𑁆𑀥𑀸 𑀲𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀤𑀺𑀲𑀸𑀓𑀣𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀓𑀣𑀸. 𑀲𑀩𑁆𑀩𑀓𑀫𑁆𑀫𑀸𑀦𑀺 𑀨𑀮𑀤𑀸𑀦𑁂 𑀦𑀺𑀬𑀢𑀸𑀦𑀻𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀓𑀣𑀸.

𑀅𑀭𑀳𑀸 𑀅𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀣𑀸. 𑀅𑀭𑀳𑀸 𑀓𑀼𑀲𑀮𑀘𑀺𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀓𑀣𑀸. 𑀅𑀭𑀳𑀸 𑀆𑀦𑁂𑀜𑁆𑀚𑁂 𑀲𑀡𑁆𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀆𑀦𑁂𑀜𑁆𑀚𑀓𑀣𑀸 ¶ . 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄, 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀲𑀼𑀧𑀺𑀦𑀦𑁆𑀢𑁂 𑀥𑀫𑁆𑀫𑀸𑀪𑀺𑀲𑀫𑀬𑁄, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘𑀸𑀢𑀺 𑀧𑀯𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀓𑀣𑀸. 𑀲𑀩𑁆𑀩𑀁 𑀲𑀼𑀧𑀺𑀦𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺𑀓𑀣𑀸. 𑀔𑀡𑀺𑀓𑀢𑀸𑀬 𑀘𑀺𑀢𑁆𑀢𑀸𑀦𑀁 𑀦𑀢𑁆𑀣𑀺 𑀆𑀲𑁂𑀯𑀦𑀧𑀘𑁆𑀘𑀬𑀢𑀸𑀢𑀺𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀢𑀺 𑀧𑀯𑀢𑁆𑀢𑀸 𑀔𑀡𑀺𑀓𑀓𑀣𑀸.

𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸𑀢𑀺 𑀧𑀽𑀚𑀸𑀤𑀺𑀁 𑀓𑀢𑁆𑀯𑀸 𑀏𑀓𑀸𑀥𑀺𑀧𑁆𑀧𑀸𑀬𑀧𑁆𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄𑀢𑀺 𑀧𑀯𑀢𑁆𑀢𑀸 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸. 𑀧𑀸𑀧𑀪𑀺𑀓𑁆𑀔𑀽𑀲𑀼 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁂𑀲𑀼 𑀅𑀭𑀳𑀦𑁆𑀢𑀸𑀦𑀁 𑀯𑀡𑁆𑀡𑁂𑀦 𑀅𑀫𑀦𑀼𑀲𑁆𑀲𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀭𑀳𑀦𑁆𑀢𑀯𑀡𑁆𑀡𑀓𑀣𑀸. 𑀓𑁂𑀘𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀓𑀸𑀫𑀓𑀸𑀭𑀺𑀓𑀸𑀯𑀲𑁂𑀦 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀦 𑀓𑀫𑁆𑀫𑀯𑀲𑁂𑀦𑀸𑀢𑀺 𑀧𑀯𑀢𑁆𑀢𑀸 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸. 𑀦 𑀭𑀸𑀕𑁄 𑀭𑀸𑀕𑀧𑀢𑀺𑀭𑀽𑀧𑀓𑁄𑀢𑀺𑀆𑀤𑀺 𑀧𑀢𑀺𑀭𑀽𑀧𑀓𑀣𑀸. 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀢𑀺 𑀲𑀸𑀥𑀺𑀓𑀤𑁆𑀯𑀺𑀲𑀢𑀓𑀣𑀸. 𑀧𑀸𑀴𑀺𑀬𑀁 𑀅𑀝𑁆𑀞𑀫𑀼𑀔𑀯𑀸𑀤𑀬𑀼𑀢𑁆𑀢𑀺𑀯𑀲𑁂𑀦𑁂𑀯 𑀲𑀫𑁆𑀫𑀺𑀢𑀺𑀬𑀸𑀤𑀻𑀦𑀁 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀁 𑀮𑀤𑁆𑀥𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑀸, 𑀢𑀸 𑀧𑀦 𑀲𑀩𑁆𑀩𑀓𑀣𑀸 𑀧𑀼𑀕𑁆𑀕𑀮𑀓𑀣𑀸𑀯. 𑀢𑀸 𑀢𑀁𑀢𑀁𑀮𑀤𑁆𑀥𑀺𑀪𑁂𑀤𑀯𑀲𑁂𑀦 𑀲𑀗𑁆𑀔𑁂𑀧𑀢𑁄𑀧𑀺 𑀯𑀼𑀘𑁆𑀘𑀫𑀸𑀦𑀸 𑀅𑀢𑀺𑀪𑀸𑀭𑀺𑀬𑀁 𑀕𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀁 𑀧𑀦 𑀦𑀬𑀁 𑀇𑀘𑁆𑀙𑀦𑁆𑀢𑁂𑀳𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀓𑀣𑀸. 𑁧 𑀆𑀤𑀬𑁄; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯 𑀯𑀺𑀢𑁆𑀣𑀸𑀭𑀢𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀬𑀫𑀓𑀫𑀸𑀢𑀺𑀓𑀸

𑀫𑀽𑀮𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑀬𑀫𑀓𑀫𑀸𑀢𑀺𑀓𑀸𑀬 𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀫𑀽𑀮𑀬𑀫𑀓𑀫𑀸𑀢𑀺𑀓𑀸 𑀔𑀦𑁆𑀥𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀲𑀗𑁆𑀔𑀸𑀭𑀅𑀦𑀼𑀲𑀬𑀘𑀺𑀢𑁆𑀢𑀥𑀫𑁆𑀫𑀇𑀦𑁆𑀤𑁆𑀭𑀺𑀬𑀬𑀫𑀓𑀫𑀸𑀢𑀺𑀓𑀸𑀢𑀺 𑀤𑀲𑀯𑀺𑀥𑀸 𑀳𑁄𑀢𑀺. 𑀓𑁂𑀦𑀝𑁆𑀞𑁂𑀦 𑀘𑁂𑀢𑁆𑀣 𑀬𑀫𑀓𑀦𑁆𑀢𑀺? 𑀬𑀼𑀕𑀴𑀝𑁆𑀞𑁂𑀦. 𑀬𑀼𑀕𑀴𑀁 𑀳𑀺 ‘‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁’’, ‘‘𑀬𑀫𑀓𑀲𑀸𑀮𑀸’’𑀢𑀺𑀆𑀤𑀻𑀲𑀼 ‘‘𑀬𑀫𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀢𑀺 𑀬𑀼𑀕𑀴𑀲𑀗𑁆𑀔𑀸𑀢𑀸𑀦𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀇𑀫𑁂𑀲𑀼 𑀤𑀲𑀲𑀼 𑀏𑀓𑁂𑀓𑀫𑁆𑀧𑀺, 𑀏𑀢𑁂𑀲𑀁 𑀯𑀺𑀪𑀚𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑁄𑀧𑀺, 𑀲𑀩𑁆𑀩𑁂𑀲𑀁 𑀲𑀫𑀽𑀳𑀢𑁆𑀢𑀸 𑀧𑀓𑀭𑀡𑀫𑁆𑀧𑀺 𑀬𑀫𑀓𑀁 𑀦𑀸𑀫. 𑀇𑀥 𑀧𑀦𑁂𑀢𑀸 𑀦𑀺𑀤𑁆𑀤𑁂𑀲𑀬𑀫𑀓𑀁 𑀉𑀧𑀸𑀤𑀸𑀬 ‘‘𑀬𑀫𑀓𑀫𑀸𑀢𑀺𑀓𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸, 𑀢𑀸𑀲𑀁 𑀧𑀦 𑀤𑀲𑀦𑁆𑀦𑀁 𑀬𑀫𑀓𑀫𑀸𑀢𑀺𑀓𑀸𑀦𑀁 𑀫𑀽𑀮𑀬𑀫𑀓𑀫𑀸𑀢𑀺𑀓𑀸 𑀆𑀤𑀺. 𑀢𑀢𑁆𑀣𑀸𑀧𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀇𑀤𑀁 𑀬𑀫𑀓𑀁 𑀆𑀤𑀺. 𑀢𑀲𑁆𑀲 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀦𑁆𑀢𑀺 𑀯𑀸, 𑀢𑁂𑀲𑀜𑁆𑀜𑁂𑀯 𑀅𑀢𑁆𑀣𑀸𑀦𑀁 𑀅𑀦𑀼𑀮𑁄𑀫𑀢𑁄 𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀧𑀸𑀴𑀺𑀥𑀫𑁆𑀫𑀯𑀲𑁂𑀦 𑀥𑀫𑁆𑀫𑀬𑀫𑀓𑀦𑁆𑀢𑀺 𑀯𑀸, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦 𑀧𑀼𑀘𑁆𑀙𑀸𑀬𑀫𑀓𑀦𑁆𑀢𑀺 𑀯𑀸 𑀢𑀺𑀥𑀸 𑀬𑀫𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀇𑀫𑁂𑀲𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀸𑀬 𑀇𑀫𑀺𑀲𑁆𑀲𑀸 𑀫𑀽𑀮𑀬𑀫𑀓𑀫𑀸𑀢𑀺𑀓𑀸𑀬 𑀢𑀸𑀯 𑀦𑀬𑀬𑀫𑀓𑀧𑀼𑀘𑁆𑀙𑀸𑀅𑀢𑁆𑀣𑀯𑀸𑀭𑀧𑁆𑀧𑀪𑁂𑀤𑀯𑀲𑁂𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀳𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀇𑀤𑀁 𑀆𑀤𑀺𑀧𑀤𑀁 𑀦𑀺𑀲𑁆𑀲𑀸𑀬 𑀫𑀽𑀮𑀦𑀬𑁄 𑀫𑀽𑀮𑀫𑀽𑀮𑀦𑀬𑁄 𑀫𑀽𑀮𑀓𑀦𑀬𑁄 𑀫𑀽𑀮𑀫𑀽𑀮𑀓𑀦𑀬𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀬𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂 𑀫𑀽𑀮𑀬𑀫𑀓𑀁 𑀏𑀓𑀫𑀽𑀮𑀬𑀫𑀓𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑀦𑁆𑀢𑀺 𑀢𑀻𑀡𑀺 𑀢𑀻𑀡𑀺 𑀬𑀫𑀓𑀸𑀦𑀻𑀢𑀺 ¶ 𑀤𑁆𑀯𑀸𑀤𑀲 𑀬𑀫𑀓𑀸𑀦𑀺. 𑀏𑀓𑁂𑀓𑀲𑁆𑀫𑀺𑀁 𑀬𑀫𑀓𑁂 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 ¶ 𑀤𑁆𑀯𑁂 𑀤𑁆𑀯𑁂 𑀧𑀼𑀘𑁆𑀙𑀸𑀢𑀺 𑀘𑀢𑀼𑀯𑀻𑀲𑀢𑀺 𑀧𑀼𑀘𑁆𑀙𑀸, 𑀏𑀓𑁂𑀓𑀧𑀼𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀢𑁆𑀣𑀸.

𑀢𑀢𑁆𑀣 𑀬𑁂 𑀓𑁂𑀘𑀺 𑀓𑀼𑀲𑀮𑀸𑀢𑀺 𑀓𑀼𑀲𑀮𑁂𑀲𑀼 ‘‘𑀓𑀼𑀲𑀮𑀸 𑀦𑀼 𑀔𑁄, 𑀦 𑀓𑀼𑀲𑀮𑀸 𑀦𑀼 𑀔𑁄’’𑀢𑀺 𑀲𑀦𑁆𑀤𑁂𑀳𑀸𑀪𑀸𑀯𑀢𑁄 𑀇𑀫𑀲𑁆𑀫𑀺𑀁 𑀧𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸𑀢𑀺 ‘‘𑀲𑀩𑁆𑀩𑁂 𑀢𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑀸 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀯𑀺𑀫𑀢𑀺𑀯𑀲𑁂𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀧𑀤𑁂 𑀲𑀁𑀲𑀬𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀯𑁂𑀦𑁂𑀬𑁆𑀬𑀸𑀦𑀁 𑀲𑀁𑀲𑀬𑀝𑁆𑀞𑀸𑀦𑁂 𑀲𑀁𑀲𑀬𑀁 𑀤𑀻𑀧𑁂𑀢𑁆𑀯𑀸 𑀢𑀁𑀯𑀺𑀦𑁄𑀤𑀦𑀢𑁆𑀣𑀁 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀁𑀲𑀬𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀧𑀤𑁂𑀲𑀼 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀓𑀼𑀲𑀮𑀧𑀤𑀁 𑀦𑀺𑀲𑁆𑀲𑀸𑀬 𑀇𑀫𑁂 𑀘𑀢𑀼𑀦𑀬𑀸𑀤𑀬𑁄 𑀳𑁄𑀦𑁆𑀢𑀺, 𑀅𑀓𑀼𑀲𑀮𑀧𑀤𑀁 𑀦𑀺𑀲𑁆𑀲𑀸𑀬𑀧𑀺 𑀢𑀣𑁂𑀯, 𑀅𑀩𑁆𑀬𑀸𑀓𑀢𑀧𑀤𑀁 𑀦𑀺𑀲𑁆𑀲𑀸𑀬𑀧𑀺 𑀢𑀣𑁂𑀯, 𑀓𑀼𑀲𑀮𑀸𑀤𑀻𑀦𑀺 𑀢𑀻𑀡𑀺𑀧𑀺 𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀁 𑀦𑀸𑀫𑀧𑀤𑀁 𑀦𑀺𑀲𑁆𑀲𑀸𑀬 𑀢𑀣𑁂𑀯𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀘𑀢𑀽𑀲𑀼 𑀧𑀤𑁂𑀲𑀼 𑀲𑀩𑁆𑀩𑁂𑀧𑀺 𑀲𑁄𑀴𑀲 𑀦𑀬𑀸, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀬𑀫𑀓𑀸𑀦𑀺, 𑀙𑀦𑁆𑀦𑀯𑀼𑀢𑀺 𑀧𑀼𑀘𑁆𑀙𑀸, 𑀤𑁆𑀯𑀸𑀦𑀯𑀼𑀢𑀺𑀲𑀢𑀁 𑀅𑀢𑁆𑀣𑀸 𑀘 𑀉𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀫𑀽𑀮𑀯𑀸𑀭𑁄 𑀳𑁂𑀢𑀼𑀯𑀸𑀭𑁄 𑀦𑀺𑀤𑀸𑀦𑀯𑀸𑀭𑁄 𑀲𑀫𑁆𑀪𑀯𑀯𑀸𑀭𑁄 𑀧𑀪𑀯𑀯𑀸𑀭𑁄 𑀲𑀫𑀼𑀝𑁆𑀞𑀸𑀦𑀯𑀸𑀭𑁄 𑀆𑀳𑀸𑀭𑀯𑀸𑀭𑁄 𑀆𑀭𑀫𑁆𑀫𑀡𑀯𑀸𑀭𑁄 𑀧𑀘𑁆𑀘𑀬𑀯𑀸𑀭𑁄 𑀲𑀫𑀼𑀤𑀬𑀯𑀸𑀭𑁄𑀢𑀺 𑀲𑀩𑁆𑀩𑁂𑀧𑀺 𑀤𑀲 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀫𑀽𑀮𑀯𑀸𑀭𑁂 𑀆𑀕𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀅𑀯𑀲𑁂𑀲𑁂𑀲𑀼𑀧𑀺 𑀦𑀬𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺 𑀧𑀦𑁂𑀢𑁆𑀣 𑀅𑀢𑀺𑀲𑀁𑀔𑀺𑀢𑁆𑀢𑀸. 𑀇𑀢𑀺 𑀲𑀩𑁆𑀩𑁂𑀲𑀼𑀧𑀺 𑀤𑀲𑀲𑀼 𑀯𑀸𑀭𑁂𑀲𑀼 𑀲𑀝𑁆𑀞𑀺𑀲𑀢𑀁 𑀦𑀬𑀸, 𑀅𑀲𑀻𑀢𑀺𑀅𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀬𑀫𑀓𑀲𑀢𑀸𑀦𑀺, 𑀲𑀝𑁆𑀞𑀺𑀅𑀥𑀺𑀓𑀸𑀦𑀺 𑀦𑀯 𑀧𑀼𑀘𑁆𑀙𑀸𑀲𑀢𑀸𑀦𑀺, 𑀯𑀻𑀲𑀸𑀥𑀺𑀓𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀅𑀢𑁆𑀣𑀲𑀢𑀸𑀦𑀺 𑀘 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀫𑁂𑀢𑁆𑀣 ¶ 𑀦𑀬𑀬𑀫𑀓𑀧𑀼𑀘𑁆𑀙𑀸 𑀅𑀢𑁆𑀣𑀯𑀸𑀭𑀧𑁆𑀧𑀪𑁂𑀤𑀯𑀲𑁂𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑀺𑀤𑀺𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀸𑀦𑀼𑀲𑀸𑀭𑁂𑀦𑁂𑀯 𑀯𑀺𑀪𑀗𑁆𑀕𑀦𑀬𑀲𑀳𑀺𑀢𑁄 𑀲𑀗𑁆𑀔𑁂𑀧𑀢𑁆𑀣𑀯𑀡𑁆𑀡𑀦𑀸𑀦𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 𑀬𑁂 𑀓𑁂𑀘𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀁. 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀦𑀺𑀲𑁆𑀲𑀢𑁆𑀢𑀲𑀪𑀸𑀯𑀸. 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸𑀢𑀺 𑀓𑀺𑀁 𑀢𑁂 𑀲𑀩𑁆𑀩𑁂𑀬𑁂𑀯 𑀓𑀼𑀲𑀮𑀫𑀽𑀮𑀸 𑀳𑁄𑀦𑁆𑀢𑀻𑀢𑀺 𑀧𑀼𑀘𑁆𑀙𑀸. 𑀇𑀫𑀸𑀦𑀺 𑀧𑀦 𑀯𑀺𑀲𑁆𑀲𑀚𑁆𑀚𑀦𑀫𑀸𑀢𑀺𑀓𑀸𑀬 𑀦𑀢𑁆𑀣𑀺. 𑀬𑀫𑀓𑀫𑀸𑀢𑀺𑀓𑀸𑀬 𑀳𑀺 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀧𑀤𑀸𑀦𑁂𑀯 𑀉𑀤𑁆𑀥𑀝𑀸𑀦𑀺, 𑀦 𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺. 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀧𑀦 𑀦𑀺𑀤𑁆𑀤𑁂𑀲𑁂𑀬𑁂𑀯 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀦𑀺𑀤𑁆𑀤𑁂𑀲𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀫𑀼𑀔𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀇𑀫𑀺𑀲𑁆𑀲𑀸𑀯 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸𑀬 𑀯𑀺𑀪𑀗𑁆𑀕𑀦𑀬𑁂𑀦 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀫𑀼𑀔𑀁. ‘‘𑀢𑀻𑀡𑁂𑀯 𑀓𑀼𑀲𑀮𑀫𑀽𑀮𑀸𑀦𑀺, 𑀅𑀯𑀲𑁂𑀲𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀓𑀼𑀲𑀮𑀫𑀽𑀮𑀸’’𑀢𑀺 𑀢𑀲𑁆𑀲𑀸 𑀘𑀸𑀬𑀫𑀢𑁆𑀣𑁄 𑁋 𑀦 𑀢𑁂 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑀸𑀦𑀺 𑀳𑁄𑀦𑁆𑀢𑀺, 𑀅𑀮𑁄𑀪𑀸𑀤𑀻𑀦𑀺 𑀧𑀦 𑀢𑀻𑀡𑁂𑀯 𑀓𑀼𑀲𑀮𑀫𑀽𑀮𑀸𑀦𑀻𑀢𑀺. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸 𑀢𑀬𑁄 𑀅𑀮𑁄𑀪𑀸𑀤𑀬𑁄 𑀓𑀼𑀲𑀮𑀸𑀦𑀁 ¶ 𑀫𑀽𑀮𑀸𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀓𑀺𑀁 𑀢𑁂 𑀲𑀩𑁆𑀩𑁂 𑀢𑀬𑁄𑀧𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀧𑀼𑀘𑁆𑀙𑀸. 𑀢𑀲𑁆𑀲𑀸 𑀦𑀺𑀤𑁆𑀤𑁂𑀲𑁂 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀲𑁆𑀲 𑀢𑁂𑀲𑀁 𑀢𑀺𑀡𑁆𑀡𑀁 𑀫𑀽𑀮𑀸𑀦𑀁 𑀓𑀼𑀲𑀮𑀪𑀸𑀯𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀫𑀽𑀮𑀦𑀬𑁂 𑀫𑀽𑀮𑀬𑀫𑀓𑀦𑀬𑁄.

𑀏𑀓𑀫𑀽𑀮𑀬𑀫𑀓𑁂 𑀧𑀦 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀢𑀺 𑀕𑀡𑀦𑀝𑁆𑀞𑁂𑀦 𑀏𑀓𑀫𑀽𑀮𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀸𑀦𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀸, 𑀅𑀬𑀁 𑀳𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀁 𑀲𑀫𑀸𑀦𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀏𑀓𑀫𑀽𑀮𑀸’’𑀢𑀺. 𑀬𑀁 𑀨𑀲𑁆𑀲𑀲𑁆𑀲 𑀫𑀽𑀮𑀁, 𑀓𑀺𑀁 𑀢𑀤𑁂𑀯 𑀯𑁂𑀤𑀦𑀸𑀤𑀻𑀦𑀦𑁆𑀢𑀺 𑀅𑀬𑀁 𑀧𑀼𑀘𑁆𑀙𑀸. 𑀅𑀣 𑀦𑁂𑀲𑀁 𑀢𑀣𑀸𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀪𑀗𑁆𑀕𑁂 𑀯𑀺𑀲𑁆𑀲𑀚𑁆𑀚𑀦𑀁. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀧𑀼𑀘𑁆𑀙𑀸. 𑀢𑀲𑁆𑀲𑀸 ¶ 𑀧𑀦 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀫𑁂𑀯, 𑀦 𑀓𑀼𑀲𑀮𑀁, 𑀨𑀲𑁆𑀲𑀸𑀤𑀺𑀥𑀫𑁆𑀫𑀚𑀸𑀢𑀁 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀜𑁆𑀘𑁂𑀯 𑀓𑀼𑀲𑀮𑀜𑁆𑀘𑀸𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀬𑀣𑁂𑀯 𑀳𑀺 𑀨𑀲𑁆𑀲𑀸𑀤𑀻𑀦𑀁 𑀅𑀮𑁄𑀪𑀸𑀤𑀬𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀸 𑀫𑀽𑀮𑀁, 𑀢𑀣𑀸 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀧𑀻𑀢𑀺 𑀢𑀁𑀭𑀽𑀧𑀫𑁆𑀧𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀦 𑀓𑀼𑀲𑀮𑀁 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀢𑁆𑀢𑀸𑀪𑀸𑀯𑀸. 𑀏𑀓𑀫𑀽𑀮𑀬𑀫𑀓𑀦𑀬𑁄.

𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑁂 𑀧𑀦 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀓𑀲𑁆𑀫𑀸? 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁, 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀧𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀜𑁆𑀘. 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀢𑀺 𑀲𑀩𑁆𑀩𑁂𑀯 𑀢𑁂 𑀓𑀺𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀼𑀘𑁆𑀙𑀸. 𑀢𑀲𑁆𑀲𑀸 𑀬𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀫𑀽𑀮𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑁂𑀯 𑀏𑀓𑀫𑀽𑀮𑀸𑀦𑀺 𑀘𑁂𑀯 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀘, 𑀅𑀯𑀲𑁂𑀲𑀸 𑀓𑀼𑀲𑀮𑀫𑀽𑀮𑀲𑀳𑀚𑀸𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀯, 𑀦 𑀘 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀲𑁆𑀲𑁂𑀯 𑀧𑀝𑀺𑀮𑁄𑀫𑀦𑀬𑁂 𑀲𑀩𑁆𑀩𑁂 𑀢𑁂 𑀅𑀜𑁆𑀜𑀫𑀜𑁆𑀜𑀫𑀽𑀮𑀸 𑀅𑀮𑁄𑀪𑀸𑀤𑀬𑁄 𑀓𑀼𑀲𑀮𑀸𑀢𑀺 𑀧𑀼𑀘𑁆𑀙𑀸. 𑀆𑀫𑀦𑁆𑀢𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀫𑀽𑀮𑀦𑀬𑁄.

𑀬𑀣𑀸 𑀘 𑀫𑀽𑀮𑀦𑀬𑁂 𑀫𑀽𑀮𑀬𑀫𑀓𑀏𑀓𑀫𑀽𑀮𑀬𑀫𑀓𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑀯𑀲𑁂𑀦 𑀙𑀩𑁆𑀩𑀺𑀥𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑀸 𑀯𑀼𑀢𑁆𑀢𑀸, 𑀏𑀯𑀁 𑀫𑀽𑀮𑀫𑀽𑀮𑀦𑀬𑀸𑀤𑀻𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀫𑀽𑀮𑀸𑀢𑀺 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸 𑀫𑀽𑀮𑀸, 𑀓𑀼𑀲𑀮𑀫𑀽𑀮𑀫𑀽𑀮𑀸𑀢𑁆𑀯𑁂𑀯 𑀅𑀢𑁆𑀣𑁄. 𑀏𑀓𑀫𑀽𑀮𑀫𑀽𑀮𑀸𑀢𑀺 𑀲𑀫𑀸𑀦𑀝𑁆𑀞𑁂𑀦 𑀏𑀓𑀫𑁂𑀯 𑀫𑀽𑀮𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀏𑀓𑀫𑀽𑀮𑀫𑀽𑀮𑀸, 𑀲𑀫𑀸𑀦𑀫𑀽𑀮𑀫𑀽𑀮𑀸𑀢𑁆𑀯𑁂𑀯 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀁, 𑀢𑀁 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸, 𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸𑀢𑁆𑀯𑁂𑀯 𑀅𑀢𑁆𑀣𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀫𑀽𑀮𑀫𑀽𑀮𑀦𑀬𑁄.

𑀫𑀽𑀮𑀓𑀦𑀬𑁂 ¶ ¶ 𑀧𑀦 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀓𑀸𑀢𑀺 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀸 𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑁂𑀦 𑀓𑀼𑀲𑀮𑀪𑀽𑀢𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀸𑀢𑀺 𑀧𑀼𑀘𑁆𑀙𑀸. 𑀆𑀫𑀦𑁆𑀢𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. ‘‘𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸. 𑀬𑀁 𑀭𑀽𑀧𑀁, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀓𑀼𑀲𑀮𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀁, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀫𑀽𑀮𑀓𑀦𑀬𑁄.

𑀫𑀽𑀮𑀫𑀽𑀮𑀓𑀦𑀬𑁂 𑀧𑀦 𑀓𑀼𑀲𑀮𑀫𑀽𑀮𑀫𑀽𑀮𑀓𑀸𑀢𑀺 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀫𑀽𑀮𑀓𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀅𑀬𑀁 𑀢𑀸𑀯 𑀓𑀼𑀲𑀮𑀧𑀤𑁂𑀲𑀼 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄. 𑀅𑀓𑀼𑀲𑀮𑀧𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀓𑀼𑀲𑀮𑀧𑀤𑀫𑀽𑀮𑁂𑀲𑀼 𑀏𑀓𑀫𑀽𑀮𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀞𑀫𑀧𑀼𑀘𑁆𑀙𑀸𑀬 ‘‘𑀅𑀳𑁂𑀢𑀼𑀓𑀁 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮’’𑀦𑁆𑀢𑀺 𑀦𑀺𑀤𑁆𑀤𑁂𑀲𑁂 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀢𑁆𑀣 𑀅𑀳𑁂𑀢𑀼𑀓𑀁 𑀅𑀓𑀼𑀲𑀮𑀦𑁆𑀢𑀺 𑀤𑁆𑀯𑀻𑀲𑀼 𑀫𑁄𑀳𑀫𑀽𑀮𑀘𑀺𑀢𑁆𑀢𑁂𑀲𑀼 𑀫𑁄𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀩𑁆𑀬𑀸𑀓𑀢𑀧𑀤𑀫𑀽𑀮𑁂𑀲𑀼 𑀏𑀓𑀫𑀽𑀮𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀓𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀲𑀳𑁂𑀢𑀼𑀓𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀫𑁂𑀯, 𑀢𑀁 𑀧𑀦 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂 𑀏𑀓𑀢𑁄 𑀮𑀩𑁆𑀪𑀫𑀸𑀦𑀓𑀯𑀲𑁂𑀦𑀧𑁂𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀫𑀧𑀤𑀫𑀽𑀮𑁂𑀲𑀼 𑀘 ‘‘𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀦𑀯𑁂𑀯 𑀦𑀸𑀫𑀫𑀽𑀮𑀸𑀦𑀺, 𑀅𑀯𑀲𑁂𑀲𑀸 𑀦𑀸𑀫𑀸 𑀥𑀫𑁆𑀫𑀸, 𑀦 𑀦𑀸𑀫𑀫𑀽𑀮𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀏𑀓𑀫𑀽𑀮𑀦𑀬𑁂 𑀧𑀦𑁂𑀢𑁆𑀣 ‘‘𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸. ‘‘𑀅𑀳𑁂𑀢𑀼𑀓𑀁 𑀦𑀸𑀫𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮’’𑀦𑁆𑀢𑀺 ¶ 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀫𑁄𑀳𑀦𑀺𑀩𑁆𑀩𑀸𑀦𑀯𑀲𑁂𑀦 𑀅𑀳𑁂𑀢𑀼𑀓𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀓𑀼𑀲𑀮𑀧𑀤𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺. 𑀅𑀬𑀁 𑀫𑀽𑀮𑀯𑀸𑀭𑁂 𑀦𑀬𑁄.

𑀇𑀢𑁄 𑀧𑀭𑁂𑀲𑀼 𑀳𑁂𑀢𑀼𑀯𑀸𑀭𑀸𑀤𑀻𑀲𑀼 𑀦𑀯𑀲𑀼 𑀯𑀸𑀭𑁂𑀲𑀼 𑀫𑀽𑀮𑀯𑀸𑀭𑀲𑀤𑀺𑀲𑁄𑀯 𑀲𑀩𑁆𑀩𑀢𑁆𑀣 𑀲𑀁𑀯𑀡𑁆𑀡𑀦𑀸𑀦𑀬𑁄. 𑀳𑁂𑀢𑀼𑀆𑀤𑀺𑀧𑀤𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄, 𑀢𑀸𑀦𑀺 𑀘 𑀫𑀽𑀮-𑀲𑀤𑁆𑀤𑀧𑀭𑀺𑀬𑀸𑀬𑀢𑁄 𑀅𑀮𑁄𑀪𑀸𑀤𑀺𑀳𑁂𑀢𑀼𑀓𑀸𑀦𑁂𑀯. 𑀅𑀮𑁄𑀪𑀸𑀤𑀬𑁄 𑀳𑀺 𑀲𑀳𑀚𑀸𑀢𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀽𑀮𑀁. 𑀢𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀳𑀺𑀦𑁄𑀢𑀺 ¶ 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼, ‘‘𑀳𑀦𑁆𑀤 𑀦𑀁 𑀕𑀡𑁆𑀳𑀣𑀸’’𑀢𑀺 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀏𑀢𑀲𑁆𑀫𑀸 𑀨𑀮𑀁 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑁄. 𑀧𑀪𑀯𑀢𑀻𑀢𑀺 𑀧𑀪𑀯𑁄. 𑀲𑀫𑀼𑀝𑁆𑀞𑀸𑀢𑀺 𑀢𑀁 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀲𑀫𑀼𑀝𑁆𑀞𑀸𑀦𑀁. 𑀢𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀅𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑁂𑀦 𑀢𑁂𑀦 𑀆𑀮𑀫𑁆𑀩𑀻𑀬𑀢𑀻𑀢𑀺 𑀆𑀮𑀫𑁆𑀩𑀡𑀁. 𑀏𑀢𑀁 𑀧𑀝𑀺𑀘𑁆𑀘 𑀢𑀁 𑀏𑀢𑀻𑀢𑀺 𑀧𑀘𑁆𑀘𑀬𑁄. 𑀏𑀢𑀲𑁆𑀫𑀸 𑀢𑀁 𑀲𑀫𑀼𑀤𑁂𑀢𑀻𑀢𑀺 𑀲𑀫𑀼𑀤𑀬𑁄. 𑀲𑀩𑁆𑀩𑀁 𑀓𑀸𑀭𑀡𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 ‘‘𑀫𑀽𑀮𑀁 𑀳𑁂𑀢𑀼 𑀦𑀺𑀤𑀸𑀦𑀜𑁆𑀘𑀸’’𑀢𑀺 𑀕𑀸𑀣𑀸 𑀤𑀲𑀦𑁆𑀦𑀫𑁆𑀧𑀺 𑀯𑀸𑀭𑀸𑀦𑀁 𑀉𑀤𑁆𑀤𑀸𑀦𑀕𑀸𑀣𑀸 𑀦𑀸𑀫. 𑀅𑀬𑀁 𑀫𑀽𑀮𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀦𑀬𑁄.

𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀔𑀦𑁆𑀥𑀬𑀫𑀓𑀧𑀸𑀴𑀺𑀬𑀸 𑀧𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘‘𑀦 𑀔𑀦𑁆𑀥𑀸 𑀦 𑀲𑀗𑁆𑀔𑀸𑀭𑀸’’𑀢𑀺 𑀧𑀤𑀁, 𑀢𑀸𑀯 𑀧𑀯𑀢𑁆𑀢𑀸 𑀅𑀬𑀁 𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀸 𑀦𑀸𑀫. 𑀲𑀸 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑁆𑀲 ‘‘𑀉𑀤𑁆𑀤𑁂𑀲𑀯𑀸𑀭𑁄’’𑀢𑀺𑀧𑀺 ‘‘𑀧𑀼𑀘𑁆𑀙𑀸𑀯𑀸𑀭𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑁄 𑀘 𑀧𑀤𑀲𑁄𑀥𑀦𑀯𑀸𑀭𑁄 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄𑀢𑀺 𑀘𑀢𑀽𑀳𑀺 𑀦𑀬𑀯𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄. 𑀢𑀢𑁆𑀣 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀫𑁂𑀯 𑀲𑁄𑀥𑁂𑀢𑁆𑀯𑀸 𑀕𑀢𑁄 𑀧𑀤𑀲𑁄𑀥𑀦𑀯𑀸𑀭𑁄 𑀦𑀸𑀫. 𑀲𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺 ¶ . 𑀢𑀲𑁆𑀲 𑀅𑀦𑀼𑀮𑁄𑀫𑀯𑀸𑀭𑁂 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘‘𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀜𑁆𑀘 𑀯𑀸𑀭𑀸.

𑀢𑀢𑁄 𑀧𑀭𑀁 𑀢𑁂𑀲𑀜𑁆𑀜𑁂𑀯 𑀧𑀤𑀲𑁄𑀥𑀦𑀯𑀸𑀭𑁂 𑀲𑁄𑀥𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀢𑁄 𑀧𑀤𑀲𑁄𑀥𑀦𑀫𑀽𑀮𑀓𑀸𑀦𑀁 𑀘𑀓𑁆𑀓𑀸𑀦𑀁 𑀅𑀢𑁆𑀣𑀺𑀢𑀸𑀬 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀸𑀫. 𑀲𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀲𑁆𑀲 𑀅𑀦𑀼𑀮𑁄𑀫𑀯𑀸𑀭𑁂 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘‘𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀦𑀺 𑀯𑀻𑀲𑀢𑀺𑀫𑁂𑀯.

𑀢𑀢𑁄 𑀧𑀭𑀁 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀤𑁆𑀥𑀔𑀦𑁆𑀥𑀯𑀲𑁂𑀦𑁂𑀯 𑀕𑀢𑁄 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄 𑀦𑀸𑀫. 𑀲𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀲𑁆𑀲 𑀅𑀦𑀼𑀮𑁄𑀫𑀯𑀸𑀭𑁂 ‘‘𑀭𑀽𑀧𑀁 𑀔𑀦𑁆𑀥𑁄 ¶ , 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘‘𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀭𑀽𑀧’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑁂𑀯.

𑀢𑀢𑁄 𑀧𑀭𑀁 𑀢𑁂𑀲𑀜𑁆𑀜𑁂𑀯 𑀲𑀼𑀤𑁆𑀥𑀔𑀦𑁆𑀥𑀸𑀦𑀁 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀢𑁄 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀓𑀸𑀦𑀁 𑀘𑀓𑁆𑀓𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁄 𑀦𑀸𑀫. 𑀲𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀲𑁆𑀲 𑀅𑀦𑀼𑀮𑁄𑀫𑀯𑀸𑀭𑁂 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸’’𑀢𑀺𑀆𑀤𑀻𑀦𑀺 𑀏𑀓𑁂𑀓𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺. 𑀧𑀝𑀺𑀮𑁄𑀫𑀯𑀸𑀭𑁂𑀧𑀺 ‘‘𑀦 𑀭𑀽𑀧𑀁 𑀦 𑀔𑀦𑁆𑀥𑁄, 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸’’𑀢𑀺𑀆𑀤𑀻𑀦𑀺 𑀯𑀻𑀲𑀢𑀺𑀫𑁂𑀯. 𑀏𑀯𑀫𑁂𑀢𑁆𑀣 𑀘𑀢𑀽𑀲𑀼 𑀦𑀬𑀯𑀸𑀭𑁂𑀲𑀼 𑀏𑀓𑀁 𑀬𑀫𑀓𑀲𑀢𑀁, 𑀤𑁆𑀯𑁂 𑀧𑀼𑀘𑁆𑀙𑀸𑀲𑀢𑀸𑀦𑀺, 𑀏𑀓𑁂𑀓𑀧𑀼𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀯𑀲𑁂𑀦 𑀤𑁆𑀯𑁂 ¶ 𑀤𑁆𑀯𑁂 𑀅𑀢𑁆𑀣𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀘 𑀅𑀢𑁆𑀣𑀲𑀢𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀫𑁂𑀢𑀺𑀲𑁆𑀲𑀸 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑀺𑀤𑀺𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑀺𑀪𑀗𑁆𑀕𑀦𑀬𑀲𑀳𑀺𑀢𑀲𑀗𑁆𑀔𑁂𑀧𑀢𑁆𑀣𑀯𑀡𑁆𑀡𑀦𑀸𑀦𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀅𑀬𑀁 𑀬𑀫𑀓𑀯𑀲𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀁 𑀔𑀦𑁆𑀥𑀸𑀦𑀁 𑀉𑀤𑁆𑀤𑁂𑀲𑁄. 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀢𑁂𑀲𑀜𑁆𑀜𑁂𑀯 𑀧𑀪𑁂𑀤𑀢𑁄 𑀦𑀸𑀫𑀯𑀯𑀢𑁆𑀣𑀸𑀦𑀁. 𑀢𑀢𑁄 𑀧𑀭𑀁 𑀧𑀤𑀲𑁄𑀥𑀦𑀯𑀸𑀭𑀸𑀤𑀬𑁄 𑀘𑀢𑁆𑀢𑀸𑀭𑁄 𑀦𑀬𑀯𑀸𑀭𑀸. 𑀢𑀢𑁆𑀣 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀬𑀁 𑀓𑀺𑀜𑁆𑀘𑀺 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀩𑁆𑀩𑀁 𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀢𑀻𑀢𑀺 𑀯𑀘𑀦𑀲𑁄𑀥𑀦𑀢𑁆𑀣𑀁 𑀧𑀼𑀘𑁆𑀙𑀸. 𑀢𑀲𑁆𑀲𑀸 𑀘 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘𑀸’’𑀢𑀺 𑀇𑀤𑀁 𑀦𑀺𑀤𑁆𑀤𑁂𑀲𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀬𑀁 ‘‘𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀫𑁂𑀯 𑀦 𑀭𑀽𑀧𑀓𑁆𑀔𑀦𑁆𑀥𑁄. 𑀬𑁄 𑀧𑀦 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 ‘‘𑀭𑀽𑀧’’𑀦𑁆𑀢𑀺𑀧𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀬𑀫𑁂𑀦 𑀭𑀽𑀧𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀜𑁆𑀜𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀧𑀧𑀜𑁆𑀘𑀲𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀆𑀕𑀢𑀸 𑀤𑀺𑀝𑁆𑀞𑀺𑀲𑀜𑁆𑀜𑀸 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸 𑀘𑁂𑀯 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀘𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 𑀆𑀕𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀢𑀢𑁄 𑀅𑀯𑀲𑁂𑀲𑀸 𑀲𑀗𑁆𑀔𑀢𑀥𑀫𑁆𑀫𑀸 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀸𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀯𑀺𑀜𑁆𑀜𑀸𑀡𑀁 ¶ 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁.

𑀧𑀝𑀺𑀮𑁄𑀫𑀯𑀸𑀭𑁂 𑀦 𑀭𑀽𑀧𑀁 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀲𑁆𑀲 𑀭𑀽𑀧-𑀲𑀤𑁆𑀤𑀯𑀘𑀦𑀻𑀬𑀸 𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 ¶ 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀭𑀽𑀧𑀦𑁆𑀢𑀺 𑀧𑀼𑀘𑁆𑀙𑀸𑀬 𑀭𑀽𑀧𑀓𑁆𑀔𑀦𑁆𑀥𑀯𑀺𑀭𑀳𑀺𑀢𑀸 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀸 𑀥𑀫𑁆𑀫𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀁, 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀭𑀽𑀧𑀓𑁆𑀔𑀦𑁆𑀥𑀯𑀺𑀭𑀳𑀺𑀢𑀸 𑀧𑀦 𑀥𑀫𑁆𑀫𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄 𑀘𑁂𑀯 𑀦 𑀭𑀽𑀧𑀜𑁆𑀘𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀯𑁂𑀤𑀦𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀯𑁂𑀤𑀦𑀸𑀢𑀺 𑀧𑀼𑀘𑁆𑀙𑀸𑀬, 𑀦 𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦 𑀲𑀜𑁆𑀜𑀸𑀢𑀺 𑀧𑀼𑀘𑁆𑀙𑀸𑀬 𑀧𑀦 𑀤𑀺𑀝𑁆𑀞𑀺𑀲𑀜𑁆𑀜𑀸 𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸, 𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑀁, 𑀲𑀜𑁆𑀜𑀸𑀓𑁆𑀔𑀦𑁆𑀥𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀲𑀜𑁆𑀜𑀸 𑀦 𑀘 𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀲𑀗𑁆𑀔𑀸𑀭𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦 𑀲𑀗𑁆𑀔𑀸𑀭𑀸𑀢𑀺 𑀧𑀼𑀘𑁆𑀙𑀸𑀬 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀲𑀗𑁆𑀔𑀢𑀥𑀫𑁆𑀫𑀸 𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀸, 𑀅𑀲𑀗𑁆𑀔𑀢𑀸 𑀧𑀦 𑀥𑀸𑀢𑀼 𑀦 𑀘𑁂𑀯 𑀲𑀗𑁆𑀔𑀸𑀭𑀸 𑀦 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬, 𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀧𑀦 𑀯𑀓𑁆𑀔𑀸𑀫.

𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁂 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑁋 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀬𑁂 𑀓𑁂𑀘𑀺 𑀔𑀦𑁆𑀥𑀸, 𑀲𑀩𑁆𑀩𑁂 𑀢𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸. 𑀢𑀲𑁆𑀲𑀸 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀔𑀦𑁆𑀥𑁄 𑀘𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘, 𑀅𑀯𑀲𑁂𑀲𑀸 𑀧𑀦 𑀔𑀦𑁆𑀥𑀸, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀮𑁄𑀫𑁂 𑀧𑀦 𑀦 𑀔𑀦𑁆𑀥𑀸 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀏𑀢𑁆𑀣 𑀘 𑀬𑁂 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀔𑀦𑁆𑀥𑀸𑀧𑀺 𑀦 𑀳𑁄𑀦𑁆𑀢𑀺, 𑀢𑁂 𑀬𑀲𑁆𑀫𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁, 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄.

𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁂 𑀧𑀦 ‘‘𑀭𑀽𑀧𑀁 𑀔𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀧𑀺𑀬𑀭𑀽𑀧𑀸𑀤𑀻𑀦𑀜𑁆𑀘 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 ¶ 𑀬𑁂 𑀓𑁂𑀘𑀺 𑀔𑀦𑁆𑀥𑀸, 𑀲𑀩𑁆𑀩𑁂 𑀢𑁂 𑀭𑀽𑀧𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀳𑀺𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀤𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 ¶ ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀯𑀲𑁂𑀦𑁂𑀯 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑁄 𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀅𑀯𑀲𑁂𑀲𑀸 𑀔𑀦𑁆𑀥𑀸, 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀯𑀘𑀦𑀲𑁄𑀥𑀦𑁂 𑀯𑀺𑀬 𑀳𑀺 𑀏𑀢𑁆𑀣 𑀦 𑀯𑀘𑀦𑀁 𑀧𑀫𑀸𑀡𑀁, 𑀬𑀣𑀸 𑀧𑀦 𑀲𑀼𑀤𑁆𑀥𑀔𑀦𑁆𑀥𑀸 𑀮𑀩𑁆𑀪𑀦𑁆𑀢𑀺, 𑀢𑀣𑀸 𑀢𑀣𑀸 𑀅𑀢𑁆𑀣𑁄𑀯 𑀧𑀫𑀸𑀡𑀁. 𑀧𑀭𑀢𑁄 𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀮𑁄𑀫𑁂 ‘‘𑀦 𑀭𑀽𑀧𑀁 𑀦 𑀔𑀦𑁆𑀥𑁄’’𑀢𑀺 𑀬𑀁 𑀥𑀫𑁆𑀫𑀚𑀸𑀢𑀁 𑀭𑀽𑀧𑀁 𑀦 𑀳𑁄𑀢𑀺, 𑀢𑀁 𑀔𑀦𑁆𑀥𑁄𑀧𑀺 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸, 𑀢𑀲𑁆𑀲𑀸 ‘‘𑀭𑀽𑀧𑀓𑁆𑀔𑀦𑁆𑀥𑀯𑀺𑀭𑀳𑀺𑀢𑀸 𑀔𑀦𑁆𑀥𑀸, 𑀦 𑀭𑀽𑀧𑀁, 𑀢𑀣𑀸 𑀦𑀺𑀩𑁆𑀩𑀸𑀦𑀁 𑀦 𑀧𑀦 𑀭𑀽𑀧𑀜𑁆𑀘𑁂𑀯 𑀦 𑀔𑀦𑁆𑀥𑁄 𑀘𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑁄.

𑀲𑀼𑀤𑁆𑀥𑀔𑀦𑁆𑀥𑀫𑀽𑀮𑀘𑀓𑁆𑀓𑀯𑀸𑀭𑁂𑀧𑀺 ‘‘𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀦𑀬𑁄.

𑀬𑀲𑁆𑀫𑀸 𑀧𑀦 𑀦𑀺𑀤𑁆𑀤𑁂𑀲𑁂 𑀇𑀫𑀺𑀲𑁆𑀲𑀸 𑀧𑀦 𑀫𑀸𑀢𑀺𑀓𑀸𑀬 𑀧𑀡𑁆𑀡𑀢𑁆𑀢𑀺𑀯𑀸𑀭𑀲𑀗𑁆𑀔𑀸𑀢𑀁 𑀦𑀺𑀤𑁆𑀤𑁂𑀲𑀁 𑀯𑀢𑁆𑀯𑀸 𑀢𑀢𑁄 𑀇𑀫𑀁 𑀫𑀸𑀢𑀺𑀓𑀸𑀓𑁆𑀓𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑁂𑀧𑀺 𑀉𑀤𑁆𑀤𑁂𑀲𑀯𑀸𑀭𑀯𑀺𑀭𑀳𑀺𑀢𑀸 ‘‘𑀧𑀯𑀢𑁆𑀢𑀺𑀯𑀸𑀭𑁄 𑀧𑀭𑀺𑀜𑁆𑀜𑀸𑀯𑀸𑀭𑁄’’𑀢𑀺 𑀤𑁆𑀯𑁂 𑀫𑀳𑀸𑀯𑀸𑀭𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀭𑀸𑀦𑀁 𑀦𑀬𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀢𑁄 𑀧𑀯𑀢𑁆𑀢𑀺𑀯𑀸𑀭𑁂 𑀢𑀸𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀧𑀼𑀩𑁆𑀩𑀺𑀓𑀸 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀸 𑁋 𑀇𑀫𑀲𑁆𑀫𑀺𑀁 𑀳𑀺 𑀉𑀧𑁆𑀧𑀸𑀤𑀯𑀸𑀭𑁄 𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄𑀢𑀺 𑀢𑀬𑁄 𑀅𑀦𑁆𑀢𑀭𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀯𑀸𑀭𑁂 𑀢𑀸𑀯 𑀢𑀺𑀡𑁆𑀡𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀙 𑀓𑀸𑀮𑀪𑁂𑀤𑀸 𑀳𑁄𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀅𑀢𑀻𑀢𑁄, 𑀅𑀦𑀸𑀕𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀢𑀻𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀦𑀸𑀕𑀢𑁄, 𑀅𑀢𑀻𑀢𑁂𑀦𑀸𑀦𑀸𑀕𑀢𑁄𑀢𑀺. 𑀏𑀯𑀫𑁂𑀢𑁂𑀲𑀼 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀬𑁆𑀯𑀸𑀬𑀁 𑀧𑀞𑀫𑁄 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀧𑀼𑀕𑁆𑀕𑀮𑀢𑁄 𑀑𑀓𑀸𑀲𑀢𑁄 𑀧𑀼𑀕𑁆𑀕𑀮𑁄𑀓𑀸𑀲𑀢𑁄𑀢𑀺 𑀢𑀬𑁄 𑀯𑀸𑀭𑀸 𑀳𑁄𑀦𑁆𑀢𑀺.

𑀢𑀢𑁆𑀣 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀽𑀧𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀢𑀲𑁆𑀲 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀲𑁆𑀲 𑀯𑀸 𑀧𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑀁 ¶ …𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀘𑀢𑁆𑀢𑀸𑀭𑀺, ‘‘𑀬𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀢𑀻𑀡𑀺, 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑀁 𑀏𑀓𑀦𑁆𑀢𑀺 𑀏𑀯𑀫𑁂𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑁂 𑀅𑀦𑀼𑀮𑁄𑀫𑀦𑀬𑁂 𑀤𑀲 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑁂𑀲𑀼 𑀘𑀢𑀽𑀲𑀼 𑀆𑀤𑀺𑀢𑁄 𑀏𑀓𑀫𑁂𑀯 𑀧𑀸𑀴𑀺𑀬𑀁 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀲𑁂𑀲𑀸𑀦𑀺 𑀢𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀢𑀦𑁆𑀢𑀺𑀬𑀸 𑀮𑀳𑀼𑀪𑀸𑀯𑀢𑁆𑀣𑀁 𑀲𑀁𑀔𑀺𑀢𑁆𑀢𑀸𑀦𑀺.

𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑁂 𑀧𑀦 𑀲𑀩𑁆𑀩𑀢𑁆𑀣 ‘‘𑀆𑀫𑀦𑁆𑀢𑀸’’𑀢𑀺 𑀏𑀓𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀯𑁂𑀤𑀦𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀦𑀺𑀬𑀫𑁂𑀦 𑀲𑀜𑁆𑀜𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀲𑀁𑀔𑀺𑀢𑁆𑀢𑀸𑀦𑀺. 𑀬𑀣𑀸 𑀘 𑀧𑀼𑀕𑁆𑀕𑀮𑀯𑀸𑀭𑁂 𑀤𑀲 𑀬𑀫𑀓𑀸𑀦𑀺, 𑀏𑀯𑀁 𑀑𑀓𑀸𑀲𑀯𑀸𑀭𑁂𑀧𑀺 ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑁂 𑀢𑀢𑁆𑀣…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀢𑀢𑁆𑀣…𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸, 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀧𑀺 ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑀁…𑀧𑁂… 𑀧𑀜𑁆𑀘𑀯𑁄𑀓𑀸𑀭𑀁…𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀢𑀻𑀲𑀼 𑀯𑀸𑀭𑁂𑀲𑀼 ¶ 𑀅𑀦𑀼𑀮𑁄𑀫𑀦𑀬𑁂 𑀢𑀺𑀁𑀲 𑀬𑀫𑀓𑀸 𑀳𑁄𑀦𑁆𑀢𑀺. 𑀬𑀣𑀸 𑀅𑀦𑀼𑀮𑁄𑀫𑀦𑀬𑁂 𑀢𑀺𑀁𑀲, 𑀏𑀯𑀁 𑀧𑀝𑀺𑀮𑁄𑀫𑀦𑀬𑁂𑀧𑀺 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀽𑀧𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑀤𑀼𑀪𑀬𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘𑀸𑀢𑀺 𑀢𑀺𑀁𑀲 𑀬𑀫𑀓𑀸. 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀲𑀝𑁆𑀞𑀺 𑀬𑀫𑀓𑀸𑀦𑀺, 𑀢𑀤𑁆𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀤𑁆𑀤𑀺𑀕𑀼𑀡𑀸 𑀘 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀇𑀫𑀺𑀦𑀸𑀯 𑀦𑀬𑁂𑀦. 𑀢𑀢𑁆𑀣 𑀅𑀲𑀜𑁆𑀜𑀲𑀢𑁆𑀢𑀦𑁆𑀢𑀺 𑀅𑀲𑀜𑁆𑀜𑀢𑁆𑀢𑀪𑀯𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀅𑀘𑀺𑀢𑁆𑀢𑀓𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 ¶ . 𑀇𑀫𑀺𑀦𑀸𑀯 𑀦𑀬𑁂𑀦 ‘‘𑀬𑀲𑁆𑀲 𑀯𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀓𑁂𑀲𑀼 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼, 𑀢𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀁 𑀧𑀦𑁂𑀢𑁆𑀣 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀦𑀺𑀬𑀫𑀮𑀓𑁆𑀔𑀡𑀁 𑁋 𑀲𑀓𑀮𑁂𑀧𑀺 𑀳𑀺 𑀇𑀫𑀲𑁆𑀫𑀺𑀁 𑀔𑀦𑁆𑀥𑀬𑀫𑀓𑁂 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑁂 𑀬𑀸𑀯 𑀫𑀭𑀡𑀸 𑀯𑀸 𑀔𑀦𑁆𑀥𑀸𑀦𑀁 𑀅𑀧𑀭𑀺𑀬𑀦𑁆𑀢𑁂𑀲𑀼 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀮𑀳𑀼𑀧𑀭𑀺𑀯𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 ¶ 𑀤𑀲𑁆𑀲𑁂𑀢𑀼𑀁 𑀦 𑀲𑀼𑀓𑀭𑀦𑁆𑀢𑀺 𑀧𑀯𑀢𑁆𑀢𑀺𑀬𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀉𑀧𑁆𑀧𑀸𑀤𑀯𑀲𑁂𑀦𑁂𑀯 𑀉𑀧𑁆𑀧𑀸𑀤𑀯𑀸𑀭𑁄, 𑀦𑀺𑀭𑁄𑀥𑀫𑀭𑀡𑀓𑀸𑀮𑁂 𑀦𑀺𑀭𑁄𑀥𑀯𑀲𑁂𑀦𑁂𑀯 𑀘 𑀦𑀺𑀭𑁄𑀥𑀯𑀸𑀭𑁄 𑀓𑀣𑀺𑀢𑁄. 𑀏𑀯𑀫𑁂𑀢𑁆𑀣 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀦𑀺𑀬𑀫𑀮𑀓𑁆𑀔𑀡𑀁 𑀯𑀺𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀉𑀧𑁆𑀧𑀸𑀤𑀫𑁂𑀯 𑀘 𑀘𑀼𑀢𑀺𑀦𑀺𑀭𑁄𑀥𑀫𑁂𑀯 𑀘 𑀕𑀳𑁂𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀆𑀕𑀢𑀸𑀦𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀮𑁄𑀫𑀦𑀬𑁂 𑀧𑀦 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀦𑁆𑀢𑀺 𑀫𑀭𑀡𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀸𑀦𑀁. 𑀢𑁂𑀲𑀁 𑀳𑀺 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀏𑀯 𑀉𑀧𑁆𑀧𑀦𑁆𑀦𑀢𑁆𑀢𑀸. ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀅𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁, 𑀅𑀦𑀦𑁆𑀢𑀭𑀧𑀼𑀘𑁆𑀙𑀸𑀬 𑀅𑀲𑀜𑁆𑀜𑀺𑀪𑀯𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀅𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀦𑀬𑁄.

𑀬𑀣𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀲𑀝𑁆𑀞𑀺 𑀬𑀫𑀓𑀸𑀤𑀻𑀦𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀧𑀜𑁆𑀘𑀲𑀼 𑀓𑀸𑀮𑀪𑁂𑀤𑁂𑀲𑀼 𑀧𑀘𑁆𑀘𑁂𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑀸𑀜𑁆𑀜𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀧𑀜𑁆𑀘𑀯𑁄𑀓𑀸𑀭𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑀸𑀜𑁆𑀜𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀘 𑀅𑀢𑀻𑀢𑀓𑀸𑀮𑁂 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀅𑀭𑀽𑀧𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑁂𑀲𑀁…𑀧𑁂… 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 ¶ 𑀢𑁂𑀲𑀁 𑀢𑀢𑁆𑀣 𑀢𑀤𑀼𑀪𑀬𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀢𑀻𑀲𑀼 𑀯𑀸𑀭𑁂𑀲𑀼 𑀧𑀝𑀺𑀮𑁄𑀫𑀦𑀬𑁂 𑀘,

‘‘𑀬𑀲𑁆𑀲 ¶ 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘 𑀅𑀦𑀸𑀕𑀢𑀓𑀸𑀮𑁂 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀬𑁂 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁂𑀢𑀭𑁄, 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑀤𑀼𑀪𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀅𑀭𑀽𑀧𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁂𑀢𑀭𑁄, 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑀤𑀼𑀪𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘,

‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀲𑀼𑀤𑁆𑀥𑀸𑀯𑀸𑀲𑀁 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀧𑀜𑁆𑀘𑀯𑁄𑀓𑀸𑀭𑁂 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀅𑀢𑀻𑀢𑀓𑀸𑀮𑁂 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺 ¶ , 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀧𑀜𑁆𑀘𑀯𑁄𑀓𑀸𑀭𑀸 𑀘𑀯𑀦𑁆𑀢𑀸𑀦𑀁 𑀅𑀭𑀽𑀧𑀸𑀦𑀜𑁆𑀘 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀲𑀼𑀤𑁆𑀥𑀸𑀯𑀸𑀲𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘,

‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀧𑀜𑁆𑀘𑀯𑁄𑀓𑀸𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀜𑁆𑀘𑀯𑁄𑀓𑀸𑀭𑁂…𑀧𑁂… 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 ¶ ? 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀧𑀜𑁆𑀘𑀯𑁄𑀓𑀸𑀭𑁂…𑀧𑁂… 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀅𑀦𑀸𑀕𑀢𑀓𑀸𑀮𑁂 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁…𑀧𑁂… 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣…𑀧𑁂… 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘,

‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀜𑁆𑀘𑀯𑁄𑀓𑀸𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀅𑀢𑀻𑀢𑁂𑀦 𑀅𑀦𑀸𑀕𑀢𑀓𑀸𑀮𑁂 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 ¶ 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘 𑀲𑀼𑀤𑁆𑀥𑀸 𑀅𑀢𑁆𑀣𑀯𑀺𑀲𑁂𑀲𑀸 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸𑀧𑀺 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀅𑀦𑀯𑀲𑁂𑀲𑀢𑁄 𑀦 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀲𑀓𑁆𑀓𑀸 𑀧𑀡𑁆𑀟𑀺𑀢𑁂𑀦 𑀜𑀸𑀢𑀼𑀦𑁆𑀢𑀺 𑀅𑀬𑀁 𑀉𑀧𑁆𑀧𑀸𑀤𑀯𑀸𑀭𑁂 𑀦𑀬𑁄.

𑀬𑀣𑀸 𑀘 𑀉𑀧𑁆𑀧𑀸𑀤𑀯𑀸𑀭𑁂 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀧𑀘𑁆𑀘𑁂𑀓𑀁 𑀧𑀼𑀕𑁆𑀕𑀮𑀸𑀤𑀺𑀪𑁂𑀤𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑀼𑀪𑀬𑁂𑀦 𑀙 𑀙 𑀯𑀸𑀭𑀸, 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀤𑀲 𑀤𑀲 𑀓𑀢𑁆𑀯𑀸 𑀲𑀝𑁆𑀞𑀺 𑀲𑀝𑁆𑀞𑀺 𑀬𑀫𑀓𑀸𑀦𑀺, 𑀲𑀩𑁆𑀩𑀸𑀦𑀺𑀧𑀺 𑀲𑀝𑁆𑀞𑀺𑀅𑀥𑀺𑀓𑀸𑀦𑀺 𑀢𑀻𑀡𑀺 𑀬𑀫𑀓𑀲𑀢𑀸𑀦𑀺, 𑀢𑀢𑁄 𑀤𑁆𑀯𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀤𑁆𑀯𑀺𑀕𑀼𑀡𑀸 𑀅𑀢𑁆𑀣𑀸 𑀘 𑀳𑁄𑀦𑁆𑀢𑀺, 𑀏𑀯𑀁 𑀦𑀺𑀭𑁄𑀥𑀯𑀸𑀭𑁂 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀘 ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑀸 𑀘𑀯𑀦𑁆𑀢𑀸𑀦𑀁…𑀧𑁂… 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺…𑀧𑁂… 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁…𑀧𑁂… 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑀯𑀸𑀭𑁂, ‘‘𑀬𑀲𑁆𑀲 ¶ 𑀭𑀽𑀧𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑁄. 𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺…𑀧𑁂… 𑀅𑀭𑀽𑀧𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀦𑀼𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄𑀢𑀺 𑀅𑀬𑀁 𑀧𑀯𑀢𑁆𑀢𑀺𑀯𑀸𑀭𑁂 𑀦𑀬𑁄.

𑀧𑀭𑀺𑀜𑁆𑀜𑀸𑀯𑀸𑀭𑁂 𑀧𑀦 𑀧𑀼𑀕𑁆𑀕𑀮𑀯𑀸𑀭𑀸𑀤𑀻𑀲𑀼 𑀢𑀻𑀲𑀼 𑀧𑀼𑀕𑁆𑀕𑀮𑀯𑀸𑀭𑁄 𑀏𑀓𑁄𑀯 𑀮𑀩𑁆𑀪𑀢𑀺, 𑀦 𑀑𑀓𑀸𑀲𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑀸 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸. 𑀬𑁄 𑀳𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀺𑀁 𑀧𑀭𑀺𑀚𑀸𑀦𑀦𑁆𑀢𑁄𑀯 ¶ , 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀭𑀼𑀤𑁆𑀥𑁄𑀧𑀺 𑀢𑀸𑀤𑀺𑀲𑁄𑀯 𑀳𑁄𑀢𑀺, 𑀢𑀲𑁆𑀫𑀸 𑀙𑀲𑀼 𑀓𑀸𑀮𑀪𑁂𑀤𑁂𑀲𑀼 𑀅𑀦𑀼𑀮𑁄𑀫𑀢𑁄 𑀧𑀼𑀕𑁆𑀕𑀮𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀯𑀸𑀭𑀸, 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀤𑀲 𑀤𑀲 𑀓𑀢𑁆𑀯𑀸 𑀯𑀻𑀲𑀢𑀺 𑀯𑀻𑀲𑀢𑀺 𑀬𑀫𑀓𑀸𑀦𑀻𑀢𑀺 𑀯𑀻𑀲𑀁 𑀬𑀫𑀓𑀲𑀢𑀁, 𑀢𑀤𑁆𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀤𑁆𑀤𑀺𑀕𑀼𑀡𑀸 𑀘 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀘 ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘, ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀆𑀤𑀺𑀦𑀸 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀆𑀤𑀺𑀢𑁄 𑀢𑀻𑀲𑀼 𑀓𑀸𑀮𑁂𑀲𑀼 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 ‘‘𑀆𑀫𑀦𑁆𑀢𑀸 𑀆𑀫𑀦𑁆𑀢𑀸’’𑀢𑁆𑀯𑁂𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀢𑀭𑁂𑀲𑀼 𑀧𑀦 𑀢𑀻𑀲𑀼 𑀫𑀺𑀲𑁆𑀲𑀓𑀓𑀸𑀮𑁂𑀲𑀼 ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺? 𑀦𑁄. 𑀬𑁄 𑀯𑀸 𑀧𑀦…𑀧𑁂… 𑀦𑁄’’𑀢𑀺 𑀏𑀯𑀁 𑀇𑀢𑀭𑀓𑀸𑀮𑀤𑁆𑀯𑀬𑁂𑀧𑀺 𑀅𑀦𑀼𑀮𑁄𑀫𑀦𑀬𑁂 ‘‘𑀦𑁄 𑀦𑁄’’𑀢𑁆𑀯𑁂𑀯 𑀯𑀺𑀲𑁆𑀲𑀚𑁆𑀚𑀦𑀁.

𑀧𑀝𑀺𑀮𑁄𑀫𑀦𑀬𑁂 𑀧𑀦 ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺? 𑀅𑀭𑀳𑀸 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺, 𑀦𑁄 𑀘 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣. 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀭𑀳𑀦𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀁𑀲𑀽’’𑀢𑀺𑀆𑀤𑀺𑀦𑀸, ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀲𑁆𑀲𑀢𑀻𑀢𑀺? 𑀬𑁂 𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀦𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀺. 𑀅𑀭𑀳𑀸 𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑁄 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀢𑁆𑀣, 𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺? 𑀬𑁂 𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 𑀭𑀽𑀧𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀁𑀲𑀼, 𑀦𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀺. 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻 𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 ¶ 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀁𑀲𑀼, 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 ¶ 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀢𑀸 𑀢𑀬𑁄 𑀅𑀤𑁆𑀥𑀸 𑀧𑀯𑀢𑁆𑀢𑀺𑀯𑀸𑀭𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀮𑀩𑁆𑀪𑀦𑁆𑀢𑀺, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦𑁂𑀯 𑀮𑀩𑁆𑀪𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑀲𑁆𑀫𑀺𑀁 𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀘𑀺𑀢𑁆𑀢𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀬𑀁 𑀓𑀜𑁆𑀘𑀺 𑀏𑀓𑀁 𑀔𑀦𑁆𑀥𑀁 𑀧𑀭𑀺𑀚𑀸𑀦𑀦𑁆𑀢𑁄 𑀇𑀢𑀭𑀫𑁆𑀧𑀺 ‘‘𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀅𑀦𑀼𑀮𑁄𑀫𑀧𑀜𑁆𑀳𑁂𑀲𑀼 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀁 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀁. ‘‘𑀦 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀧𑀝𑀺𑀮𑁄𑀫𑀧𑀜𑁆𑀳𑁂𑀲𑀼 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀭𑀺𑀚𑀸𑀦𑀺𑀢𑁆𑀣𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀅𑀢𑀻𑀢𑀓𑀸𑀮𑀯𑀸𑀭𑁂 𑀫𑀕𑁆𑀕𑀸𑀦𑀦𑁆𑀢𑀭𑁂 𑀅𑀕𑁆𑀕𑀨𑀮𑁂 𑀞𑀺𑀢𑁄𑀧𑀺 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀧𑀭𑀺𑀚𑀸𑀦𑀺𑀢𑁆𑀣𑀬𑁂𑀯 𑀦𑀸𑀫. ‘‘𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀘 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻 𑀯𑀼𑀘𑁆𑀘𑀢𑀺, ‘‘𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀬𑁄, 𑀢𑀲𑁆𑀫𑀸 𑀬𑁄 𑀦 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀧𑀭𑀺𑀚𑀸𑀦𑀺𑀢𑁆𑀣𑀸𑀢𑀺 𑀯𑀸, 𑀧𑀭𑀺𑀚𑀸𑀦𑀺𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁.

𑀧𑀝𑀺𑀮𑁄𑀫𑀦𑀬𑁂 𑀧𑀦 ‘‘𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀭𑀳𑀦𑁆𑀢𑀜𑁆𑀘 𑀞𑀧𑁂𑀢𑁆𑀯𑀸’’𑀢𑀺 𑀇𑀤𑀁 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀦𑁄 ‘‘𑀦 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀘𑀦𑀁, 𑀅𑀭𑀳𑀢𑁄 𑀘 ‘‘𑀦 𑀧𑀭𑀺𑀚𑀸𑀦𑀺𑀢𑁆𑀣𑀸’’𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, ‘‘𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀢𑀻𑀢𑁂 𑀯𑀺𑀬 𑀅𑀦𑀸𑀕𑀢𑁂𑀧𑀺 𑀅𑀦𑀦𑁆𑀢𑀓𑀸𑀮𑀁 𑀅𑀫𑀼𑀘𑁆𑀘𑀦𑀓𑀸 𑀲𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂 𑀘 𑀅𑀭𑀳𑀢𑀸 𑀦𑀺𑀝𑁆𑀞𑀺𑀢𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑁂𑀦, ‘‘𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀯𑀸 𑀆𑀧𑀦𑁆𑀦𑁂𑀦 𑀲𑀫𑀓𑀸 𑀚𑀸𑀢𑀸, 𑀲𑀩𑁆𑀩𑀢𑁆𑀣 𑀘 𑀏𑀓𑀁 𑀔𑀦𑁆𑀥𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀩𑁆𑀩𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀧𑀭𑀺𑀚𑀸𑀦𑀦𑁆𑀢𑁄𑀧𑀺 𑀘 𑀲𑀩𑁆𑀩𑀁 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀸𑀬 𑀧𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀸𑀤𑀺𑀓𑀁 𑀲𑀩𑁆𑀩𑀁 𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀅𑀜𑁆𑀜𑀢𑁆𑀭 𑀯𑀺𑀲𑁂𑀲𑀸 ¶ , 𑀢𑀢𑁆𑀭𑀸𑀬𑀁 𑀯𑀺𑀲𑁂𑀲𑁄 𑁋 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺 𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘‘𑀦𑀸𑀬𑀢𑀦𑀸 𑀦 𑀫𑀦𑁄’’𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀅𑀬𑀁 𑀆𑀬𑀢𑀦𑀫𑀸𑀢𑀺𑀓𑀸 𑀦𑀸𑀫. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀬𑀫𑀓𑀯𑀲𑁂𑀦 𑀧𑀼𑀘𑁆𑀙𑀸𑀲𑀼 𑀔𑀦𑁆𑀥𑀧𑀤𑀁 𑀞𑀧𑁂𑀢𑁆𑀯𑀸 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 ¶ 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀸 𑀭𑀽𑀧𑀸𑀤𑀺𑀧𑀜𑁆𑀘𑀩𑀸𑀳𑀺𑀭𑀸𑀬𑀢𑀦𑀸𑀦𑀺, 𑀧𑀭𑀺𑀬𑁄𑀲𑀸𑀦𑁂 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀻𑀢𑀺 𑀏𑀯𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑁂 𑀧𑀜𑁆𑀳𑁂. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 ‘‘𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀦𑁆𑀢𑀺? 𑀤𑀺𑀩𑁆𑀩𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀘𑀓𑁆𑀔𑀼𑀫𑁂𑀯, 𑀦 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼 𑀘𑁂𑀯 𑀘𑀓𑁆𑀔𑀸𑀬𑀢𑀦𑀜𑁆𑀘. 𑀲𑁄𑀢𑀁 𑀲𑁄𑀢𑀸𑀬𑀢𑀦𑀦𑁆𑀢𑀺? 𑀤𑀺𑀩𑁆𑀩𑀲𑁄𑀢𑀁 𑀢𑀡𑁆𑀳𑀸𑀲𑁄𑀢𑀁 𑀲𑁄𑀢𑀫𑁂𑀯, 𑀦 𑀲𑁄𑀢𑀸𑀬𑀢𑀦𑀁. 𑀖𑀸𑀦𑀁 𑀖𑀸𑀦𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸…𑀧𑁂… 𑀓𑀸𑀬𑁄 𑀓𑀸𑀬𑀸𑀬𑀢𑀦𑀦𑁆𑀢𑀺? 𑀦𑀸𑀫𑀓𑀸𑀬𑁄 𑀘𑀺𑀢𑁆𑀢𑀓𑀸𑀬𑁄𑀢𑀺𑀆𑀤𑀺 𑀓𑀸𑀬𑁄, 𑀦 𑀓𑀸𑀬𑀸𑀬𑀢𑀦𑀁. 𑀭𑀽𑀧𑀁 𑀭𑀽𑀧𑀸𑀬𑀢𑀦𑀦𑁆𑀢𑀺? 𑀪𑀽𑀢𑀸𑀤𑀺, 𑀧𑀺𑀬𑀭𑀽𑀧𑀸𑀤𑀺 𑀘 𑀭𑀽𑀧𑀁𑀯, 𑀦 𑀭𑀽𑀧𑀸𑀬𑀢𑀦𑀁. 𑀲𑀤𑁆𑀤𑁄 𑀲𑀤𑁆𑀤𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀕𑀦𑁆𑀥𑁄 𑀕𑀦𑁆𑀥𑀸𑀬𑀢𑀦𑀦𑁆𑀢𑀺? 𑀲𑀻𑀮𑀕𑀦𑁆𑀥𑀸𑀤𑀬𑁄 𑀕𑀦𑁆𑀥𑁄𑀯, 𑀦 𑀕𑀦𑁆𑀥𑀸𑀬𑀢𑀦𑀁. 𑀭𑀲𑁄 𑀭𑀲𑀸𑀬𑀢𑀦𑀦𑁆𑀢𑀺? 𑀅𑀢𑁆𑀣𑀭𑀲𑀸𑀤𑀬𑁄 𑀭𑀲𑁄𑀯, 𑀦 𑀭𑀲𑀸𑀬𑀢𑀦𑀁. 𑀥𑀫𑁆𑀫𑁄 𑀥𑀫𑁆𑀫𑀸𑀬𑀢𑀦𑀦𑁆𑀢𑀺? 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀤𑀬𑁄 𑀥𑀫𑁆𑀫𑁄𑀯, 𑀦 𑀥𑀫𑁆𑀫𑀸𑀬𑀢𑀦𑀁. 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸’’𑀢𑀺 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀯𑀺𑀲𑁂𑀲𑁄.

𑀧𑀯𑀢𑁆𑀢𑀺𑀯𑀸𑀭𑁂 𑀧𑀦 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀘𑀓𑁆𑀔𑀼𑀓𑀸𑀦𑀁 𑀅𑀲𑁄𑀢𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀲𑀲𑁄𑀢𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀲𑁄𑀢𑀸𑀬𑀢𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀫𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀘𑀺𑀢𑁆𑀢𑀓𑀸𑀦𑀁 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀫𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦 𑀫𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀽𑀧𑀪𑀯𑀯𑀚𑁆𑀚𑀺𑀢𑁂 𑀲𑀜𑁆𑀜𑀸𑀪𑀯𑁂 𑀉𑀧𑀧𑀚𑁆𑀚𑀦𑁆𑀢𑀸𑀦𑀁…𑀧𑁂… 𑀉𑀧𑁆𑀧𑀚𑁆𑀚𑀢𑀺 ¶ . 𑀬𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀥𑀫𑁆𑀫𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀽𑀧𑀪𑀯𑀯𑀚𑁆𑀚𑀺𑀢𑁂 𑀲𑀩𑁆𑀩𑀢𑁆𑀣 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀫𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀥𑀫𑁆𑀫𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸, 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀪𑀯𑀯𑀚𑁆𑀚𑀺𑀢𑁂 𑀲𑀩𑁆𑀩𑀢𑁆𑀣 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑀸 𑀲𑁂𑀲𑀸𑀬𑀢𑀦𑀫𑀸𑀢𑀺𑀓𑀸𑀬𑀫𑀓𑀬𑁄𑀚𑀦𑀸 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀤𑀸𑀬𑀢𑀦𑀁 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦 𑀮𑀩𑁆𑀪𑀢𑀺, 𑀅𑀬𑀁 𑀉𑀧𑁆𑀧𑀸𑀤𑀯𑀸𑀭𑁂 𑀯𑀺𑀲𑁂𑀲𑁄, 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀭𑁄𑀥𑀯𑀸𑀭𑀸𑀤𑀻𑀲𑀼, 𑀧𑀭𑀺𑀜𑁆𑀜𑀸𑀯𑀸𑀭𑁂 𑀘 𑀬𑁄𑀚𑀦𑀸𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀩𑁆𑀩𑀢𑁆𑀣 𑀘 𑀔𑀦𑁆𑀥𑀢𑁄 𑀆𑀬𑀢𑀦𑀸𑀦𑀁 𑀩𑀳𑀼𑀢𑀸 𑀘 𑀬𑀫𑀓𑀯𑀸𑀭𑀩𑀳𑀼𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺 𑀅𑀬𑀁 𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀥𑀸𑀢𑀼𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀥𑀸𑀢𑀼𑀬𑀫𑀓𑀫𑀸𑀢𑀺𑀓𑀸𑀬 ¶ 𑀧𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀲𑀩𑁆𑀩𑀁 𑀆𑀬𑀢𑀦𑀬𑀫𑀓𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀥𑀸𑀢𑀼𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀘𑁆𑀘𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀘𑁆𑀘𑀬𑀫𑀓𑀫𑀸𑀢𑀺𑀓𑀸𑀬 𑀧𑀦 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀸𑀭𑀪𑁂𑀤𑀸, 𑀓𑀸𑀮𑀸𑀤𑀺𑀪𑁂𑀤𑀸 𑀘 𑀯𑁂𑀤𑀺𑀢𑀩𑁆𑀩𑀸, 𑀧𑀸𑀴𑀺𑀯𑀯𑀢𑁆𑀣𑀸𑀦𑁂 𑀧𑀦𑁂𑀢𑁆𑀣 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀧𑀤𑀲𑁄𑀥𑀦𑀯𑀸𑀭𑁄 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁄 𑀲𑀼𑀤𑁆𑀥𑀲𑀘𑁆𑀘𑀫𑀽𑀮𑀘𑀓𑁆𑀓𑀯𑀸𑀭𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀧𑀦 ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀤𑀼𑀓𑁆𑀔𑀦𑁆𑀢𑀺? 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀦 𑀤𑀼𑀓𑁆𑀔𑀁. 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀧𑀦 𑀤𑀼𑀓𑁆𑀔𑀜𑁆𑀘𑁂𑀯 𑀤𑀼𑀓𑁆𑀔𑀲𑀘𑁆𑀘𑀜𑁆𑀘. 𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺? 𑀢𑀡𑁆𑀳𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀘𑁆𑀘𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀲𑀫𑀼𑀤𑀬𑁄, 𑀦 𑀲𑀫𑀼𑀤𑀬𑀲𑀘𑁆𑀘𑀁. 𑀢𑀡𑁆𑀳𑀸 ¶ 𑀧𑀦 𑀲𑀫𑀼𑀤𑀬𑁄 𑀘𑁂𑀯 𑀲𑀫𑀼𑀤𑀬𑀲𑀘𑁆𑀘𑀜𑁆𑀘. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀫𑀼𑀤𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺? 𑀢𑀤𑀗𑁆𑀕𑀦𑀺𑀭𑁄𑀥𑀸𑀤𑀬𑁄, 𑀔𑀡𑀺𑀓𑀦𑀺𑀭𑁄𑀥𑁄 𑀘 𑀦𑀺𑀭𑁄𑀥𑁄𑀯, 𑀦 𑀦𑀺𑀭𑁄𑀥𑀲𑀘𑁆𑀘𑀁. 𑀦𑀺𑀩𑁆𑀩𑀸𑀦𑀁 𑀧𑀦 𑀦𑀺𑀭𑁄𑀥𑁄 𑀘𑁂𑀯 𑀦𑀺𑀭𑁄𑀥𑀲𑀘𑁆𑀘𑀜𑁆𑀘. 𑀦𑀺𑀭𑁄𑀥𑀲𑀘𑁆𑀘𑀁 𑀦𑀺𑀭𑁄𑀥𑁄𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺? 𑀫𑀺𑀘𑁆𑀙𑀸𑀫𑀕𑁆𑀕𑀗𑁆𑀕𑀸𑀤𑀬𑁄 𑀫𑀕𑁆𑀕𑁄, 𑀦 𑀫𑀕𑁆𑀕𑀲𑀘𑁆𑀘𑀁. 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀫𑀕𑁆𑀕𑁄 𑀘𑁂𑀯 𑀫𑀕𑁆𑀕𑀲𑀘𑁆𑀘𑀜𑁆𑀘. 𑀫𑀕𑁆𑀕𑀲𑀘𑁆𑀘𑀁 𑀫𑀕𑁆𑀕𑁄𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑀺𑀯𑀸𑀭𑁂 𑀧𑀦 ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀧𑀜𑁆𑀘𑀯𑁄𑀓𑀸𑀭𑁂 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀜𑁆𑀘𑀯𑁄𑀓𑀸𑀭𑁂 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄, 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀯𑀸𑀭𑁂, ‘‘𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑁂 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀢𑁆𑀣 𑀢𑀤𑀜𑁆𑀜𑀁, 𑀅𑀜𑁆𑀜𑀢𑁆𑀣 ¶ 𑀢𑀤𑀼𑀪𑀬𑀫𑁆𑀧𑀺. 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀧𑀸𑀬𑁂, 𑀅𑀲𑀜𑁆𑀜𑀲𑀢𑁆𑀢𑁂 𑀘 𑀤𑀼𑀓𑁆𑀔𑀫𑁂𑀯, 𑀦𑁄 𑀘 𑀢𑀢𑁆𑀣 𑀢𑀤𑀜𑁆𑀜𑀁, 𑀅𑀜𑁆𑀜𑀢𑁆𑀣 𑀢𑀤𑀼𑀪𑀬𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀑𑀓𑀸𑀲𑀯𑀸𑀭𑁂, 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀧𑀻𑀢𑀺 𑀏𑀯𑀁 𑀅𑀦𑀼𑀮𑁄𑀫𑀦𑀬𑁂,

‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 ¶ 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸, ‘‘𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀦𑀢𑁆𑀣𑀺. 𑀬𑀢𑁆𑀣 𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀬𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀏𑀯 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑀁, 𑀲𑀩𑁆𑀩𑁂𑀲𑀁 𑀧𑀦 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀢𑀤𑀼𑀪𑀬𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘 𑀲𑀩𑁆𑀩𑀢𑁆𑀣 𑀧𑀝𑀺𑀮𑁄𑀫𑀦𑀬𑁂 𑀘,

‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀅𑀪𑀺𑀲𑀫𑁂𑀢𑀸𑀯𑀻𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦 𑀇𑀢𑀭𑁂𑀲’’𑀦𑁆𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁂𑀢𑀭𑀁, 𑀇𑀢𑀭𑁂𑀲𑀁 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀅𑀭𑀳𑀦𑁆𑀢𑀸𑀦𑀁 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁂𑀢𑀭𑀁, 𑀇𑀢𑀭𑁂𑀲𑀁 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸, 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀭𑀽𑀧𑁂 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀣 ¶ , 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘 𑀲𑁂𑀲𑀓𑀸𑀮𑀪𑁂𑀤𑁂𑀲𑀼 ¶ 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀸𑀤𑀻𑀲𑀼 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀉𑀧𑁆𑀧𑀸𑀤𑀯𑀸𑀭𑁂 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄. ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀻𑀢𑀺…𑀧𑁂… 𑀢𑀡𑁆𑀳𑀸𑀬 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀢𑀤𑀼𑀪𑀬𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑀯𑀸𑀭𑁂, 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂𑀧𑀻𑀢𑀺 𑀏𑀯𑀁 𑀧𑀯𑀢𑁆𑀢𑀺𑀯𑀸𑀭𑁂 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀢𑁄 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 ‘‘𑀬𑁄 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀲𑀫𑀼𑀤𑀬𑀲𑀘𑁆𑀘𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀜𑁆𑀜𑀸𑀯𑀸𑀭𑁂𑀧𑀻𑀢𑀺 𑀏𑀯𑀫𑁂𑀢𑁆𑀣 𑀧𑀸𑀴𑀺𑀦𑀬𑁄 𑀜𑀸𑀢𑀩𑁆𑀩𑁄.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁 𑁋 𑀧𑀯𑀢𑁆𑀢𑀺 𑀯𑀸𑀭𑁂 𑀢𑀸𑀯𑁂𑀢𑁆𑀣 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀮𑀩𑁆𑀪𑀢𑁂𑀯, 𑀲𑁂𑀲𑁂𑀲𑀼 𑀧𑀦 𑀢𑀻𑀲𑀼 𑀲𑀘𑁆𑀘𑁂𑀲𑀼 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀺 𑀏𑀓𑀦𑁆𑀢𑁂𑀦 𑀧𑀯𑀢𑁆𑀢𑀺𑀬𑀁 𑀏𑀯 𑀮𑀩𑁆𑀪𑀦𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼𑀧𑀺 𑀧𑀯𑀢𑁆𑀢𑁂𑀧𑀻𑀢𑀺 𑀏𑀯𑀫𑁂𑀢𑁆𑀣 𑀬𑀁 𑀬𑀁 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀺𑀤𑀁 𑀦𑀬𑀫𑀼𑀔𑀁 𑁋 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀲𑀼𑀤𑁆𑀥𑀸𑀯𑀸𑀲𑀸𑀦𑀫𑁆𑀧𑀺. 𑀢𑁂𑀧𑀺 𑀳𑀺 𑀤𑀼𑀓𑁆𑀔𑀲𑀘𑁆𑀘𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀤𑀼𑀓𑁆𑀔𑀲𑀘𑁆𑀘𑀲𑀫𑀼𑀤𑀬𑀲𑀘𑁆𑀘𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀘𑀢𑀼𑀯𑁄𑀓𑀸𑀭𑁂 𑀧𑀦 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀓𑀫𑁆𑀧𑀺 𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀤𑁆𑀯𑀬𑀁. 𑀢𑀲𑁆𑀫𑀺𑀁 𑀳𑀺 𑀔𑀡𑁂 𑀢𑀡𑁆𑀳𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫 𑀳𑁄𑀢𑀻𑀢𑀺 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀦 𑀭𑀽𑀧𑀫𑁂𑀯 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫, 𑀲𑁂𑀲𑀸 𑀫𑀕𑁆𑀕𑀲𑀳𑀚𑀸𑀢𑀸 𑀥𑀫𑁆𑀫𑀸 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀸𑀯. 𑀢𑁂𑀦𑁂𑀯 𑀓𑀸𑀭𑀡𑁂𑀦 ‘‘𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀫𑀕𑁆𑀕𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀢𑁂𑀲𑀁 𑀢𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀔𑀡𑀯𑀲𑁂𑀦 𑀑𑀓𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄. 𑀅𑀦𑀪𑀺𑀲𑀫𑁂𑀢𑀸𑀯𑀻𑀦𑀦𑁆𑀢𑀺 ¶ 𑀅𑀦𑀪𑀺𑀲𑀫𑀺𑀢𑀲𑀘𑁆𑀘𑀸𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀭𑀺𑀜𑁆𑀜𑀸𑀯𑀸𑀭𑁂 𑀧𑀦 𑀜𑀸𑀢𑀢𑀻𑀭𑀡𑀧𑀳𑀸𑀦𑀯𑀲𑁂𑀦 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸𑀬𑁄 𑀮𑀩𑁆𑀪𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀧𑀭𑀺𑀜𑁆𑀜𑀸𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀥 𑀤𑁆𑀯𑁂 𑀏𑀯 𑀲𑀘𑁆𑀘𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 ‘‘𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀲𑀫𑀼𑀤𑀬𑀲𑀘𑁆𑀘𑀁 𑀧𑀚𑀳𑀢𑀻’’𑀢𑀺 𑀜𑀸𑀢𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 ¶ , 𑀇𑀢𑀺 𑀇𑀫𑀸𑀲𑀁 𑀧𑀭𑀺𑀜𑁆𑀜𑀸𑀦𑀁 𑀯𑀲𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀲𑀘𑁆𑀘𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀗𑁆𑀔𑀸𑀭𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀔𑀸𑀭𑀬𑀫𑀓𑀫𑀸𑀢𑀺𑀓𑀸𑀬 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀳𑀸𑀯𑀸𑀭𑀦𑁆𑀢𑀭𑀸𑀤𑀺𑀪𑁂𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀫𑀸𑀢𑀺𑀓𑀸𑀬 𑀢𑀸𑀯 𑀬𑀣𑀸 𑀳𑁂𑀝𑁆𑀞𑀸 𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀯𑀸𑀭𑁄 𑀆𑀭𑀤𑁆𑀥𑁄, 𑀢𑀣𑀸 𑀅𑀦𑀸𑀭𑀪𑀺𑀢𑁆𑀯𑀸 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀧𑀞𑀫𑀁 𑀢𑀬𑁄𑀧𑀺 𑀲𑀗𑁆𑀔𑀸𑀭𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. ‘‘𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑀝𑀺𑀩𑀤𑁆𑀥𑀸’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮) 𑀯𑀘𑀦𑀢𑁄 𑀓𑀸𑀭𑀡𑀪𑀽𑀢𑀲𑁆𑀲 𑀓𑀭𑀚𑀓𑀸𑀬𑀲𑁆𑀲 𑀨𑀮𑀪𑀽𑀢𑁄 𑀏𑀲 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀅𑀧𑀭𑁄 𑀦𑀬𑁄 𑁋 𑀲𑀗𑁆𑀔𑀭𑀻𑀬𑀢𑀻𑀢𑀺 𑀲𑀗𑁆𑀔𑀸𑀭𑁄. 𑀓𑁂𑀦 𑀲𑀗𑁆𑀔𑀭𑀻𑀬𑀢𑀺? 𑀓𑀸𑀬𑁂𑀦. 𑀅𑀬𑀁 𑀳𑀺 𑀯𑀸𑀢𑁄 𑀯𑀺𑀬 𑀪𑀲𑁆𑀢𑀸𑀬 𑀓𑀭𑀚𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀺, 𑀏𑀯𑀫𑁆𑀧𑀺 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄, 𑀓𑀸𑀬𑁂𑀦 𑀓𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀢𑀲𑀸 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁬𑁩) 𑀯𑀘𑀦𑀢𑁄 𑀧𑀦 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀓𑀺𑀁 𑀲𑀗𑁆𑀔𑀭𑁄𑀢𑀺? 𑀯𑀘𑀺𑀁. 𑀯𑀘𑀺𑀬𑀸 𑀲𑀗𑁆𑀔𑀸𑀭𑁄𑀢𑀺 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀪𑁂𑀤𑀲𑀫𑀼𑀝𑁆𑀞𑀸𑀧𑀓𑀲𑁆𑀲 ¶ 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀲𑁆𑀲𑁂𑀢𑀁 𑀦𑀸𑀫𑀁. ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸’’𑀢𑀺 (𑀫. 𑀦𑀺. 𑁧.𑁪𑁬𑁩; 𑀲𑀁. 𑀦𑀺. 𑁪.𑁩𑁪𑁮) 𑀯𑀘𑀦𑀢𑁄𑀬𑁂𑀯 𑀧𑀦 𑀢𑀢𑀺𑀬𑀧𑀤𑁂 𑀲𑀗𑁆𑀔𑀭𑀻𑀬𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀓𑁂𑀦 𑀲𑀗𑁆𑀔𑀭𑀻𑀬𑀢𑀺? 𑀘𑀺𑀢𑁆𑀢𑁂𑀦, 𑀇𑀢𑀺 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀧𑀦 𑀯𑀘𑀻𑀲𑀗𑁆𑀔𑀸𑀭𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺 𑀧𑀤𑀲𑁄𑀥𑀦𑀯𑀸𑀭𑁄 𑀆𑀭𑀤𑁆𑀥𑁄, 𑀢𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 𑀢𑀻𑀡𑀺, 𑀧𑀝𑀺𑀮𑁄𑀫𑀦𑀬𑁂 𑀢𑀻𑀡𑀻𑀢𑀺 𑀙 𑀬𑀫𑀓𑀸𑀦𑀺. 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁂 𑀏𑀓𑁂𑀓𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀅𑀦𑀼𑀮𑁄𑀫𑀦𑀬𑁂 𑀙, 𑀧𑀝𑀺𑀮𑁄𑀫𑀦𑀬𑁂 𑀙𑀸𑀢𑀺 𑀤𑁆𑀯𑀸𑀤𑀲 𑀬𑀫𑀓𑀸𑀦𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁂 𑀧𑀦 𑀬𑀣𑀸 𑀲𑀼𑀤𑁆𑀥𑀔𑀦𑁆𑀥𑀯𑀸𑀭𑀸𑀤𑀻𑀲𑀼 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀫𑀓𑀸𑀦𑀺𑀯𑀼𑀢𑁆𑀢𑀸𑀦𑀺, 𑀏𑀯𑀁 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺 𑀅𑀯𑀢𑁆𑀯𑀸 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀬𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀯𑀘𑀻𑀲𑀗𑁆𑀔𑀸𑀭𑀫𑀽𑀮𑀓𑀁 𑀏𑀓𑀦𑁆𑀢𑀺 𑀅𑀦𑀼𑀮𑁄𑀫𑁂 𑀢𑀻𑀡𑀺, 𑀧𑀝𑀺𑀮𑁄𑀫𑁂 𑀢𑀻𑀡𑀻𑀢𑀺 𑀙 𑀬𑀫𑀓𑀸𑀦𑀺 ¶ 𑀯𑀼𑀢𑁆𑀢𑀸𑀦𑀺. 𑀓𑀺𑀁 𑀓𑀸𑀭𑀡𑀸? 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑀪𑁂𑀤𑀸𑀪𑀸𑀯𑀢𑁄, 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀧𑀦 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀏𑀓𑁄𑀯 𑀅𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄𑀯, 𑀢𑀲𑁆𑀫𑀸 𑀏𑀓𑁂𑀓𑀧𑀤𑀯𑀲𑁂𑀦 𑀦 𑀯𑀼𑀢𑁆𑀢𑀁, ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑁄𑀧𑀺 𑀦𑀬𑁄 𑀧𑀤𑀲𑁄𑀥𑀦𑀯𑀸𑀭𑁂 𑀯𑀺𑀦𑀸𑀧𑀺 𑀅𑀢𑁆𑀣𑁂𑀦 𑀯𑀘𑀦𑀁 𑀬𑀼𑀚𑁆𑀚𑀢𑀻𑀢𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑁄, 𑀇𑀥 𑀧𑀦 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀘𑀻𑀲𑀗𑁆𑀔𑀸𑀭𑀸𑀤𑀻𑀳𑀺 𑀅𑀜𑁆𑀜𑀢𑁆𑀢𑀸 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸𑀧𑀺 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀫𑀽𑀮𑀘𑀓𑁆𑀓𑀯𑀸𑀭𑁄 𑀧𑀦𑁂𑀢𑁆𑀣 𑀦 𑀕𑀳𑀺𑀢𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑁂 𑀯𑀺𑀲𑁂𑀲𑁄.

𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀲𑀼 ¶ 𑀧𑀦 ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺? 𑀦𑁄, 𑀓𑀸𑀬𑀲𑀗𑁆𑀔𑀸𑀭𑁄 𑀓𑀸𑀬𑁄𑀢𑀺? 𑀦𑁄’’𑀢𑀺 𑀯𑀸 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀝𑀺𑀲𑁂𑀥𑁄. 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀓𑀸𑀬𑀸𑀤𑀻𑀦𑀁 𑀏𑀯 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀦𑀸𑀫𑀢𑁆𑀢𑀸. 𑀦 𑀳𑀺 𑀓𑀸𑀬𑀸𑀤𑀬𑁄 𑀯𑀺𑀬 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀦𑀁 𑀦𑀸𑀫𑀁 𑀳𑁄𑀢𑀺, 𑀧𑀝𑀺𑀮𑁄𑀫𑁂 𑀧𑀦 𑀦 𑀓𑀸𑀬𑁄 𑀦 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀬𑁄 𑀓𑀸𑀬𑁄 𑀦 𑀳𑁄𑀢𑀺, 𑀲𑁄 𑀓𑀸𑀬𑀲𑀗𑁆𑀔𑀸𑀭𑁄𑀧𑀺 𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸𑀬 𑀅𑀢𑁆𑀣𑁄, 𑀢𑀲𑁆𑀲𑀸 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄 𑀓𑀸𑀬𑁄 𑀦 𑀳𑁄𑀢𑀺, 𑀓𑀸𑀬𑀲𑀗𑁆𑀔𑀸𑀭𑁄𑀬𑁂𑀯 𑀧𑀦𑁂𑀲𑁄 𑀳𑁄𑀢𑀺, 𑀓𑀸𑀬𑀜𑁆𑀘 𑀓𑀸𑀬𑀲𑀗𑁆𑀔𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀦 𑀘 𑀓𑀸𑀬𑁄, 𑀦 𑀘 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀇𑀢𑀭𑁂𑀲𑀼 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺? 𑀦𑁄, 𑀲𑀗𑁆𑀔𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄𑀢𑀺? 𑀯𑀘𑀻𑀲𑀗𑁆𑀔𑀸𑀭𑁄 𑀲𑀗𑁆𑀔𑀸𑀭𑁄 𑀘𑁂𑀯 𑀯𑀘𑀻𑀲𑀗𑁆𑀔𑀸𑀭𑁄 𑀘, 𑀅𑀯𑀲𑁂𑀲𑀸 𑀲𑀗𑁆𑀔𑀸𑀭𑀸, 𑀦 𑀯𑀘𑀻𑀲𑀗𑁆𑀔𑀸𑀭𑁄, 𑀦 𑀲𑀗𑁆𑀔𑀸𑀭𑀸 𑀦 𑀯𑀘𑀻𑀲𑀗𑁆𑀔𑀸𑀭𑁄𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑀺𑀯𑀸𑀭𑁂 𑀧𑀦 ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑁄, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀘𑀺𑀢𑁆𑀢𑀲𑀫𑀗𑁆𑀕𑀻𑀦𑀁 𑀧𑀦 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀢𑀤𑀼𑀪𑀬𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀭𑀽𑀧𑀸𑀭𑀽𑀧𑀪𑀯𑀺𑀓𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀼𑀧𑁆𑀧𑀸𑀤𑀓𑁆𑀔𑀡𑁂 𑀯𑀘𑀻𑀲𑀗𑁆𑀔𑀸𑀭𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑁄…𑀧𑁂… 𑀬𑀣𑀸𑀯𑀼𑀢𑁆𑀢𑀓𑀸𑀫𑀸𑀯𑀘𑀭𑀸𑀦𑀁 𑀧𑀦 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀬𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 ¶ ? 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑁂 𑀢𑀢𑀺𑀬𑀚𑁆𑀛𑀸𑀦𑁂 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑁄, 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀧𑀦 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀯𑀸 𑀧𑀦 ¶ …𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀓𑀸𑀫𑀸𑀯𑀘𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀬𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀭𑀽𑀧𑀸𑀭𑀽𑀧𑀪𑀯𑁂 𑀘 𑀢𑀢𑁆𑀣 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑁄, 𑀇𑀢𑀭𑀚𑁆𑀛𑀸𑀦𑀸𑀤𑀻𑀲𑀼 𑀧𑀦 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸,

‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀯𑀺𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄𑀯 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁂𑀢𑀭𑁄, 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀯𑀺𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀘 𑀢𑀤𑀼𑀪𑀬𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑁂 𑀭𑀽𑀧𑀪𑀯𑀸𑀤𑀻𑀲𑀼 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀲 𑀬𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀢𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀸𑀦𑀁 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑁄 𑀘𑀸’’𑀢𑀺𑀆𑀤𑀺𑀦𑀸 𑀘,

‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑁄𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀓𑀸𑀬𑀲𑀗𑁆𑀔𑀸𑀭𑁄 ¶ , 𑀅𑀜𑁆𑀜𑁂𑀲𑀁 𑀧𑀦 𑀢𑀤𑀼𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀻𑀦𑀁 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑁂𑀲𑀁 𑀢𑀤𑀼𑀪𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀓𑀸𑀮𑀪𑁂𑀤𑁂𑀲𑀼 𑀬𑀣𑀸𑀦𑀼𑀭𑀽𑀧𑀢𑁄 𑀉𑀧𑁆𑀧𑀸𑀤𑀯𑀸𑀭𑁂 𑀬𑁄𑀚𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺…𑀧𑁂… 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀸𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀢𑀤𑀼𑀪𑀬𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑀯𑀸𑀭𑁂, ‘‘𑀬𑀲𑁆𑀲 ¶ 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂 𑀘,

‘‘𑀬𑁄 𑀓𑀸𑀬𑀲𑀗𑁆𑀔𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀯𑀘𑀻𑀲𑀗𑁆𑀔𑀸𑀭𑀁 𑀧𑀭𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀜𑁆𑀜𑀸𑀯𑀸𑀭𑁂 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑀺𑀯𑀸𑀭𑁂 𑀧𑀦𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀼𑀕𑁆𑀕𑀮𑀯𑀸𑀭𑀲𑁆𑀲 𑀅𑀦𑀼𑀮𑁄𑀫𑀦𑀬𑁂 𑀓𑀸𑀬𑀲𑀗𑁆𑀔𑀸𑀭𑀫𑀽𑀮𑀓𑀸𑀦𑀺 𑀤𑁆𑀯𑁂, 𑀯𑀘𑀻𑀲𑀗𑁆𑀔𑀸𑀭𑀫𑀽𑀮𑀓𑀁 𑀏𑀓𑀦𑁆𑀢𑀺 𑀢𑀻𑀡𑁂𑀯 𑀬𑀫𑀓𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀢𑀲𑁆𑀲 𑀧𑀝𑀺𑀮𑁄𑀫𑀦𑀬𑁂𑀧𑀺 𑀑𑀓𑀸𑀲𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀬𑀫𑀓𑀸𑀦𑀁 𑀯𑀲𑁂𑀦 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁 𑁋 𑀇𑀫𑀲𑁆𑀫𑀺𑀁 𑀳𑀺 𑀲𑀗𑁆𑀔𑀸𑀭𑀬𑀫𑀓𑁂 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁯) 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀸𑀮𑀪𑁂𑀤𑁄 𑀧𑀯𑀢𑁆𑀢𑀺𑀯𑀲𑁂𑀦𑀸𑀧𑀺 𑀕𑀳𑁂𑀢𑀩𑁆𑀩𑁄, 𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯. ‘‘𑀤𑀼𑀢𑀺𑀬𑀚𑁆𑀛𑀸𑀦𑁂 𑀢𑀢𑀺𑀬𑀚𑁆𑀛𑀸𑀦𑁂 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁨𑁧) 𑀘 𑀛𑀸𑀦𑀫𑁆𑀧𑀺 𑀑𑀓𑀸𑀲𑀯𑀲𑁂𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑁆𑀣 𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀺𑀤𑀁 𑀦𑀬𑀫𑀼𑀔𑀁 𑁋 ‘‘𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀻’’𑀢𑀺 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀢𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀪𑀸𑀯𑀢𑁄. ‘‘𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀇𑀤𑀁 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀏𑀓𑀦𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀳𑀺 𑀘𑀺𑀢𑁆𑀢𑀁 𑀭𑀽𑀧𑀁, 𑀅𑀭𑀽𑀧𑀁 𑀯𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀚𑁆𑀚𑀫𑀸𑀦𑀁, 𑀞𑀺𑀢𑀁 𑀯𑀸. ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀻𑀦’’𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀘𑀺𑀢𑁆𑀢𑁂𑀦 𑀲𑀫𑀗𑁆𑀕𑀻𑀦𑀁 𑀔𑀻𑀡𑀸𑀲𑀯𑀸𑀦𑀁. ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀘𑁆𑀙𑀺𑀫𑀘𑀺𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀭𑀽𑀧𑀸𑀯𑀘𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀘𑀼𑀢𑀺𑀘𑀺𑀢𑁆𑀢𑀯𑀲𑁂𑀦, 𑀅𑀭𑀽𑀧𑀸𑀯𑀘𑀭𑀸𑀦𑀜𑁆𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀘𑀼𑀢𑀺𑀘𑀺𑀢𑁆𑀢𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀦𑀺𑀬𑀫𑀢𑁄 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀁 𑀤𑀺𑀦𑁆𑀦𑀁 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸. 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀦 𑀯𑀺𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀘 𑀦𑀺𑀭𑀼𑀚𑁆𑀛𑀢𑀺 𑀘. 𑀓𑀸𑀬𑀲𑀗𑁆𑀔𑀸𑀭𑁄 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺, 𑀏𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀥𑀫𑁆𑀫𑀢𑀸. 𑀬𑀁 𑀧𑀦 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀲𑁆𑀲 𑀲𑀻𑀳𑀴𑀝𑁆𑀞𑀓𑀣𑀸𑀬 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀸𑀬 ¶ 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀓𑀸𑀬𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀲𑀗𑁆𑀔𑀸𑀭𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀅𑀦𑀼𑀲𑀬𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀅𑀦𑀼𑀲𑀬𑀬𑀫𑀓𑀫𑀸𑀢𑀺𑀓𑀸𑀬 𑀧𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀲𑀬𑀬𑀫𑀓𑁂𑀧𑀺 𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀸𑀤𑀻𑀲𑀼 𑀯𑀺𑀬 𑀤𑁂𑀲𑀦𑀁 ¶ 𑀅𑀓𑀢𑁆𑀯𑀸 𑀅𑀜𑁆𑀜𑁂𑀦 𑀦𑀬𑁂𑀦 𑀧𑀸𑀴𑀺𑀤𑁂𑀲𑀦𑀸 𑀓𑀢𑀸. 𑀓𑀣𑀁? 𑀧𑀞𑀫𑀁 𑀢𑀸𑀯 𑀧𑀭𑀺𑀘𑁆𑀙𑁂𑀤𑀯𑀸𑀭𑁄 𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑁄𑀢𑀺 𑀤𑁆𑀯𑁂 𑀯𑀸𑀭𑀸 𑀉𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑀺𑀢𑀸, 𑀢𑀢𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑁄𑀢𑀺 𑀏𑀓𑁄 𑀔𑀼𑀤𑁆𑀤𑀓𑀯𑀸𑀭𑁄. 𑀢𑀢𑁄 𑀅𑀦𑀼𑀲𑀬𑀯𑀸𑀭𑁄 𑀲𑀸𑀦𑀼𑀲𑀬𑀯𑀸𑀭𑁄 𑀧𑀚𑀳𑀦𑀯𑀸𑀭𑁄 𑀧𑀭𑀺𑀜𑁆𑀜𑀸𑀯𑀸𑀭𑁄 𑀧𑀳𑀻𑀦𑀯𑀸𑀭𑁄 𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀥𑀸𑀢𑀼𑀯𑀸𑀭𑁄𑀢𑀺 𑀅𑀦𑀼𑀲𑀬𑁂 𑀬𑁄𑀚𑁂𑀢𑁆𑀯𑀸 𑀬𑀫𑀓𑀯𑀲𑁂𑀦 𑀧𑀧𑀜𑁆𑀘𑀢𑁄 𑀦𑀺𑀤𑁆𑀤𑀺𑀝𑁆𑀞𑀸 𑀲𑀢𑁆𑀢 𑀫𑀳𑀸𑀯𑀸𑀭𑀸𑀢𑀺 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑀺𑀢𑀸, 𑀏𑀯𑀁 𑀤𑀲𑀳𑀺 𑀯𑀸𑀭𑁂𑀳𑀺 𑀅𑀦𑀼𑀲𑀬𑀬𑀫𑀓𑀤𑁂𑀲𑀦𑀸 𑀓𑀢𑀸. 𑀢𑁂𑀲𑀼 𑀬𑁂 𑀇𑀫𑁂 𑀳𑀺 𑀧𑀭𑀺𑀘𑁆𑀙𑁂𑀤𑀯𑀸𑀭𑁄𑀢𑀺𑀆𑀤𑀺𑀦𑀸 𑀤𑁆𑀯𑁂 𑀯𑀸𑀭𑀸 𑀉𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸, 𑀢𑁂 𑀇𑀥 𑀅𑀦𑀼𑀲𑀬𑀬𑀫𑀓𑀫𑀸𑀢𑀺𑀓𑀸𑀢𑀺 𑀕𑀳𑁂𑀢𑀩𑁆𑀩𑀸.

𑀢𑀢𑁆𑀣 𑀳𑀺 𑀲𑀢𑁆𑀢 𑀅𑀦𑀼𑀲𑀬𑀸𑀢𑀺 𑀅𑀬𑀁 𑀕𑀡𑀦𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀲𑀬𑀸𑀦𑀁 𑀤𑁂𑀲𑀺𑀢𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑀯𑀸𑀭𑁄 𑀦𑀸𑀫. 𑀓𑀸𑀫𑀭𑀸𑀕𑀸𑀦𑀼𑀲𑀬𑁄…𑀧𑁂… 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀅𑀬𑀁 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀦𑀸𑀫𑀫𑀢𑁆𑀢𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀇𑀫𑁂 𑀦𑀸𑀫 𑀢𑁂’’𑀢𑀺 𑀤𑁂𑀲𑀺𑀢𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑁄 𑀦𑀸𑀫. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀢𑀸𑀯 𑀅𑀦𑀼𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀅𑀦𑀼𑀲𑀬𑀸? 𑀅𑀦𑀼𑀲𑀬𑀦𑀝𑁆𑀞𑁂𑀦. 𑀓𑁄 𑀏𑀲 𑀅𑀦𑀼𑀲𑀬𑀦𑀝𑁆𑀞𑁄 𑀦𑀸𑀫𑀸𑀢𑀺? 𑀅𑀧𑁆𑀧𑀳𑀻𑀦𑀝𑁆𑀞𑁄. 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀬𑁄 𑀳𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀢𑀲𑁆𑀲 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀺 𑀦𑀸𑀫, 𑀢𑀲𑁆𑀫𑀸 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀦𑀼𑀲𑁂𑀦𑁆𑀢𑀻𑀢𑀺 𑀘 𑀢𑀁 𑀢𑀁 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀧𑀺 𑀲𑀺𑀬𑀸 𑁋 𑀅𑀦𑀼𑀲𑀬𑀦𑀝𑁆𑀞𑁄 𑀦𑀸𑀫 𑀅𑀧𑁆𑀧𑀳𑀻𑀦𑀸𑀓𑀸𑀭𑁄, 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀘 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀼𑀲𑀬𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑀢𑁆𑀭𑀺𑀤𑀁 𑀧𑀝𑀺𑀯𑀘𑀦𑀁 𑁋 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀅𑀦𑀼𑀲𑀬𑁄, 𑀅𑀦𑀼𑀲𑀬𑁄𑀢𑀺 𑀧𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀺, 𑀲𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀭𑀫𑁆𑀫𑀡𑁄 𑀲𑀧𑁆𑀧𑀘𑁆𑀘𑀬𑀝𑁆𑀞𑁂𑀦 𑀲𑀳𑁂𑀢𑀼𑀓𑁄 𑀏𑀓𑀦𑁆𑀢𑀸𑀓𑀼𑀲𑀮𑁄𑀯 𑀳𑁄𑀢𑀺 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁 (𑀓𑀣𑀸. 𑁫𑁫𑁪 𑀆𑀤𑀬𑁄) 𑀅𑀦𑀼𑀲𑀬𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀲𑁆𑀲 𑀧𑀝𑀺𑀲𑁂𑀥𑀺𑀢𑀢𑁆𑀢𑀸 ¶ , 𑀲𑁄 𑀘 𑀅𑀢𑀻𑀢𑁄𑀧𑀺 𑀳𑁄𑀢𑀺, 𑀅𑀦𑀸𑀕𑀢𑁄𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀧𑀺, 𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀳𑁂 𑀫𑁄𑀳𑀲𑁆𑀲 𑀧𑀤𑀪𑀸𑀚𑀦𑁂 𑁩𑁧𑁭 ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁…𑀧𑁂… 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁄𑀳𑁄 𑀳𑁄𑀢𑀻’’𑀢𑀺 (𑀥. 𑀲. 𑁩𑁯𑁦). 𑀇𑀫𑀲𑁆𑀫𑀺𑀜𑁆𑀘 𑀬𑀫𑀓𑁂 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀢𑀁 𑀢𑀁 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀢𑀺 𑀓𑀸𑀫𑀭𑀸𑀕𑁄 𑀘 𑀲𑁄 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑁄 𑀘𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑁄. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣𑀸𑀧𑀺 𑀦𑀺𑀤𑁆𑀤𑁂𑀲𑀦𑀬𑀫𑀼𑀔𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀺, 𑀦𑀺𑀤𑁆𑀤𑁂𑀲𑁄 𑀘𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀸𑀤𑀬𑁄 𑀅𑀝𑁆𑀞 𑀯𑀸𑀭𑀸 𑀘, 𑀢𑀢𑁆𑀭𑀸𑀬𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀸𑀦𑀼𑀧𑀼𑀩𑁆𑀩𑀺𑀓𑀸𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀸. 𑀢𑁂𑀲𑀁 𑀳𑀺 𑀧𑀞𑀫𑁄 𑀅𑀦𑀼𑀲𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑁄 𑀦𑀸𑀫. 𑀢𑀢𑁆𑀣 𑀯𑀸𑀭𑀪𑁂𑀤𑁄 𑀬𑀫𑀓𑀬𑁄𑀚𑀦𑀯𑀸𑀭𑁂 𑀦𑀢𑁆𑀣𑀺, 𑀇𑀢𑀭𑁂𑀲𑀼 𑀧𑀦 𑀲𑀢𑁆𑀢𑀲𑀼 𑀫𑀳𑀸𑀯𑀸𑀭𑁂𑀲𑀼 𑀅𑀢𑁆𑀣𑀺. 𑀢𑁂𑀲𑀼 𑀳𑀺 𑀧𑀞𑀫𑁄 𑀅𑀦𑀼𑀲𑀬𑀯𑀸𑀭𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀮𑁄𑀫𑀦𑀬𑁂 ‘‘𑀬𑀲𑁆𑀲 𑀬𑀢𑁆𑀣…𑀧𑁂… 𑀅𑀦𑀼𑀲𑁂𑀢𑀻’’𑀢𑀺 𑀧𑀼𑀕𑁆𑀕𑀮𑁄𑀓𑀸𑀲𑀢𑀤𑀼𑀪𑀬𑀦𑀸𑀫𑀯𑀲𑁂𑀦 𑀢𑀬𑁄 𑀅𑀦𑁆𑀢𑀭𑀯𑀸𑀭𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀏𑀓𑀫𑀽𑀮𑀓𑀤𑁆𑀯𑀺𑀫𑀽𑀮𑀓𑀢𑀺𑀫𑀽𑀮𑀓𑀘𑀢𑀼𑀫𑀽𑀮𑀓𑀧𑀜𑁆𑀘𑀫𑀽𑀮𑀓𑀙𑀫𑀽𑀮𑀓𑀸𑀦𑀁 𑀯𑀲𑁂𑀦 𑀬𑀫𑀓𑀪𑁂𑀤𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀅𑀦𑀼𑀮𑁄𑀫𑀦𑀬𑁂, 𑀏𑀯𑀁 𑀧𑀝𑀺𑀮𑁄𑀫𑀦𑀬𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁆𑀣 𑀅𑀦𑀼𑀲𑀬𑀯𑀸𑀭𑁂, 𑀏𑀯𑀁 𑀲𑀸𑀦𑀼𑀲𑀬𑀯𑀸𑀭𑀧𑀚𑀳𑀦𑀯𑀸𑀭𑀧𑀭𑀺𑀜𑁆𑀜𑀸𑀯𑀸𑀭𑀧𑀳𑀻𑀦𑀯𑀸𑀭𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀲𑀼 𑀧𑀜𑁆𑀘𑀲𑀼𑀧𑀺. 𑀅𑀬𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀯𑀺𑀲𑁂𑀲𑁄. 𑀑𑀓𑀸𑀲𑀯𑀸𑀭𑁂 ‘‘𑀬𑀢𑁆𑀣 𑀢𑀢𑁆𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀬𑀢𑁄 𑀢𑀢𑁄’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑁂𑀦 𑀤𑁂𑀲𑀦𑀸 𑀓𑀢𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯 ¶ . 𑀬𑁄 𑀧𑀦𑀸𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑁄 𑀥𑀸𑀢𑀼𑀯𑀸𑀭𑁄 𑀦𑀸𑀫, 𑀲𑁄 𑀧𑀼𑀘𑁆𑀙𑀸𑀯𑀸𑀭𑁄 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑁄𑀢𑀺 𑀤𑁆𑀯𑀺𑀥𑀸 𑀞𑀺𑀢𑁄. 𑀢𑀢𑁆𑀣 𑀧𑀼𑀘𑁆𑀙𑀸𑀯𑀸𑀭𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀲𑁆𑀲𑀸𑀯𑀲𑀸𑀦𑁂 𑀧𑀼𑀘𑁆𑀙𑀸𑀦𑀼𑀓𑁆𑀓𑀫𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀅𑀝𑁆𑀞𑀦𑁆𑀦𑀁 𑀯𑀸𑀭𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁. ‘‘𑀓𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺? 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀏𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀓𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬…𑀧𑁂… 𑀫𑀸𑀦𑀸𑀦𑀼𑀲𑀬𑁄 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀘 𑀅𑀦𑀼𑀲𑁂𑀢𑀺. 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀘 𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼, 𑀪𑀯𑀭𑀸𑀕𑀸𑀦𑀼𑀲𑀬𑁄 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀲𑁂𑀢𑀻’’𑀢𑀺 𑀅𑀬𑀁 𑀢𑀸𑀯 𑀧𑀞𑀫𑀯𑀸𑀭𑁂 𑀧𑀸𑀴𑀺𑀦𑀬𑁄.

𑀢𑀢𑁆𑀣 ¶ 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀲𑀼𑀔𑀸𑀬 𑀘𑁂𑀯 𑀉𑀧𑁂𑀓𑁆𑀔𑀸𑀬 𑀘𑀸𑀢𑀺 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼, 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀦 𑀲𑀳𑀚𑀸𑀢𑀯𑀲𑁂𑀦, 𑀆𑀭𑀫𑁆𑀫𑀡𑀯𑀲𑁂𑀦 𑀘𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁂𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀅𑀓𑀼𑀲𑀮𑀸𑀳𑀺 𑀲𑀼𑀔𑀉𑀧𑁂𑀓𑁆𑀔𑀸𑀳𑀺 𑀲𑀳𑀚𑀸𑀢𑁄𑀧𑀺 𑀳𑀼𑀢𑁆𑀯𑀸 𑀢𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀯𑀲𑁂𑀲𑀸 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑁂𑀤𑀦𑀸 𑀆𑀭𑀫𑁆𑀫𑀡𑀫𑁂𑀯 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀫𑀸𑀦𑁄 𑀘𑁂𑀲 𑀢𑀸𑀳𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀅𑀦𑀼𑀲𑁂𑀢𑀺𑀬𑁂𑀯. 𑀇𑀫𑀸𑀲𑀁 𑀧𑀦 𑀯𑁂𑀤𑀦𑀸𑀦𑀁 𑀅𑀲𑁆𑀲𑀸𑀤𑀝𑁆𑀞𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀼𑀧𑁆𑀧𑀢𑁆𑀢𑀺𑀬𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀧𑀥𑀸𑀦𑀢𑁆𑀢𑀸, 𑀑𑀴𑀸𑀭𑀺𑀓𑀢𑁆𑀢𑁂𑀦 𑀯𑁂𑀦𑁂𑀬𑁆𑀬𑀸𑀦𑀁 𑀲𑀼𑀩𑁄𑀥𑀢𑁆𑀢𑀸 𑀘 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼𑀬𑁂𑀯 𑀅𑀦𑀼𑀲𑁂𑀢𑀻𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀉𑀧𑀭𑀺𑀧𑀺. 𑀦 𑀓𑁂𑀯𑀮𑀜𑁆𑀘𑁂𑀲 𑀅𑀦𑀼𑀲𑀬𑀫𑀸𑀦𑁄 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼𑀬𑁂𑀯, 𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘 𑀅𑀦𑀼𑀲𑁂𑀢𑀺, 𑀇𑀝𑁆𑀞𑁂𑀲𑀼 ¶ 𑀧𑀦 𑀭𑀽𑀧𑀸𑀤𑀻𑀲𑀼𑀧𑀺 𑀅𑀦𑀼𑀲𑁂𑀢𑀺 𑀏𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣 𑀲𑀢𑁆𑀢𑀸𑀦𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀯𑀺𑀪. 𑁮𑁧𑁬), 𑀏𑀢𑁆𑀣𑀸𑀦𑀼𑀲𑀬𑀬𑀫𑀓𑁂𑀧𑀺 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻’’𑀢𑀺𑀆𑀤𑀺. 𑀏𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀭𑀽𑀧𑀸𑀤𑀻𑀲𑀼 𑀙𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀅𑀦𑀼𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀧𑀦 𑀢𑀁 𑀲𑀩𑁆𑀩𑀁 𑀅𑀯𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀧𑀥𑀸𑀦𑀢𑁆𑀢𑀸𑀤𑀺𑀦𑀸 𑀓𑀸𑀭𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀤𑀼𑀓𑁆𑀔𑀸𑀬𑀸𑀢𑀺 𑀏𑀢𑁆𑀣 𑀧𑀝𑀺𑀖𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑁂 𑀤𑁄𑀫𑀦𑀲𑁆𑀲𑀯𑁂𑀤𑀦𑀸, 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀯𑁂𑀤𑀦𑀸 𑀘𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸, 𑀅𑀦𑀺𑀝𑁆𑀞𑀸 𑀙 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀧𑀝𑀺𑀖𑀸𑀦𑀼𑀲𑀬𑀲𑀳𑀚𑀸𑀢𑀯𑀲𑁂𑀦, 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀬𑀣𑀸𑀭𑀳𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀁. 𑀓𑀺𑀁 𑀧𑀦 𑀇𑀢𑀭𑀸 𑀤𑁆𑀯𑁂 𑀯𑁂𑀤𑀦𑀸 𑀇𑀝𑁆𑀞𑀸𑀭𑀫𑁆𑀫𑀡𑀁 𑀯𑀸 𑀧𑀝𑀺𑀖𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺? 𑀦𑁄 𑀦 𑀳𑁄𑀦𑁆𑀢𑀺. 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀳𑀺 𑀦𑀝𑁆𑀞𑀁 𑀇𑀝𑁆𑀞𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀛𑀸𑀦𑀫𑀸𑀭𑀩𑁆𑀪 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀦 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯, 𑀦𑀸𑀦𑀼𑀲𑀬𑀦𑀝𑁆𑀞𑀸𑀦𑀁 𑀇𑀝𑁆𑀞𑀢𑁆𑀢𑀸. 𑀅𑀦𑀺𑀝𑁆𑀞𑀫𑁂𑀯 𑀳𑀺 𑀇𑀝𑁆𑀞𑀢𑁄 𑀧𑀝𑀺𑀳𑀦𑀦𑀦𑀺𑀫𑀺𑀢𑁆𑀢𑀁, 𑀬𑀁 𑀧𑀦 𑀢𑀢𑁆𑀣𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀝𑀺𑀖𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄𑀢𑀺. 𑀧𑀝𑀺𑀖𑀸𑀦𑀼𑀲𑀬𑁄 𑀳𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀝𑀺𑀳𑀦𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄, 𑀇𑀢𑀭𑁄 𑀤𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑁄𑀧𑀺 𑀅𑀢𑁆𑀢𑀦𑁄 𑀧𑀝𑀺𑀳𑀦𑀦𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄 𑀧𑀝𑀺𑀖𑀸𑀦𑀼𑀲𑀬𑁄 𑀦 𑀳𑁄𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀁 𑀕𑀘𑁆𑀙𑀢𑀺. 𑀬𑀣𑀸 𑀳𑀺 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑁄𑀧𑀺 𑀩𑁆𑀬𑀸𑀧𑀸𑀤𑁄 𑀫𑀦𑁄𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀁 𑀕𑀘𑁆𑀙𑀢𑀺, 𑀏𑀯𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁 𑀯𑀼𑀢𑁆𑀢𑀁. 𑀫𑀸𑀦𑀸𑀦𑀼𑀲𑀬𑀲𑁆𑀲 𑀧𑀦 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀯𑀚𑁆𑀚𑀺𑀢𑀸 𑀲𑀩𑁆𑀩𑁂 𑀮𑁄𑀓𑀺𑀬𑀸 𑀥𑀫𑁆𑀫𑀸 𑀅𑀦𑀼𑀲𑀬𑀦𑀝𑁆𑀞𑀸𑀦𑀁. ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀧𑀭𑀺𑀬𑀸𑀧𑀦𑁆𑀦𑁂 𑀏𑀢𑁆𑀣…𑀧𑁂… 𑀫𑀸𑀦𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀢𑀻’’𑀢𑀺 𑀳𑀺 ¶ 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀧𑀦 𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀅𑀦𑀼𑀲𑀬𑀦𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 ¶ 𑀥𑀫𑁆𑀫𑁂𑀲𑀽’’𑀢𑀺. 𑀢𑀢𑁆𑀣 𑀲𑀁𑀲𑀸𑀭𑀯𑀝𑁆𑀝𑀦𑀺𑀲𑁆𑀲𑀺𑀢𑀝𑁆𑀞𑁂𑀦 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀘 𑀲𑀳𑀚𑀸𑀢𑀸𑀭𑀫𑁆𑀫𑀡𑀪𑁂𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀦 𑀓𑀺𑀜𑁆𑀘𑀸𑀧𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀲𑀳𑀚𑀸𑀢𑀯𑀲𑁂𑀦 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀢𑀻𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀲𑁄 𑀧𑀦 𑀬𑀲𑁆𑀫𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀫𑁂𑀯𑀸𑀭𑀫𑁆𑀫𑀡𑀁 𑀮𑀪𑀢𑀺, 𑀦 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀫𑁂𑀯, 𑀅𑀦𑀼𑀲𑀬𑀸𑀦𑀁 𑀧𑀦 𑀢𑀁 𑀦 𑀅𑀦𑀼𑀲𑀬𑀦𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀭𑀸𑀕𑀯𑀲𑁂𑀦 𑀲𑁄 𑀘 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑁂 𑀦𑀬𑁄.

𑀇𑀢𑀭𑁂𑀲𑀼 𑀧𑀦 𑀲𑀢𑁆𑀢𑀲𑀼 𑀫𑀳𑀸𑀯𑀸𑀭𑁂𑀲𑀼 𑀢𑀸𑀯 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀅𑀦𑀸𑀕𑀸𑀫𑀺𑀲𑁆𑀲 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦𑁄 𑀘 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀫𑀸𑀦𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦𑁄 𑀘…𑀧𑁂… 𑀤𑀺𑀝𑁆𑀞𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 ¶ 𑀅𑀦𑀼𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀸𑀬𑀧𑀺 𑀤𑀺𑀝𑁆𑀞𑀸𑀦𑀼𑀲𑀬𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺…𑀧𑁂… 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺. 𑀅𑀯𑀺𑀚𑁆𑀚𑀸𑀦𑀼𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀦𑀬𑁂𑀦 𑀧𑀝𑀺𑀖𑀸𑀦𑀼𑀲𑀬𑀸𑀤𑀺𑀫𑀽𑀮𑀺𑀓𑀸𑀲𑀼 𑀧𑀼𑀘𑁆𑀙𑀸𑀲𑀼 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀏𑀓𑀫𑀽𑀮𑀓𑁂 𑀦𑀬𑁄.

𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀫𑀽𑀮𑀺𑀓𑀸…𑀧𑁂… 𑀧𑀜𑁆𑀘𑀫𑀽𑀮𑀺𑀓𑀸𑀦𑀁 𑀧𑀦 𑀏𑀓𑀫𑀽𑀮𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 ¶ 𑀜𑀸𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀧𑀘𑁆𑀙𑀺𑀫𑀸𑀦𑀼𑀲𑀬𑁂 𑀬𑁄𑀚𑀦𑀸 𑁋 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀫𑀸𑀦𑀸𑀦𑀼𑀲𑀬𑁄 𑀘 𑀤𑀺𑀝𑁆𑀞𑀸𑀦𑀼𑀲𑀬𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀘 𑀪𑀯𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘…𑀧𑁂… 𑀪𑀯𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀻𑀢𑀺? 𑀅𑀦𑀸𑀕𑀸𑀫𑀺𑀲𑁆𑀲 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀘 𑀫𑀸𑀦𑀸𑀦𑀼𑀲𑀬𑁄 𑀘 𑀪𑀯𑀭𑀸𑀕𑀸𑀦𑀼𑀲𑀬𑁄 𑀘 𑀅𑀦𑀼𑀲𑁂𑀢𑀺, 𑀦 𑀇𑀢𑀭𑁂, 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀘 𑀓𑀸𑀫𑀭𑀸𑀕𑀧𑀝𑀺𑀖𑀫𑀸𑀦𑀪𑀯𑀭𑀸𑀕𑀸𑀦𑀼𑀲𑀬𑀸 𑀘 𑀅𑀦𑀼𑀲𑁂𑀦𑁆𑀢𑀺, 𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀲𑀩𑁆𑀩𑁂𑀧𑀺 𑀅𑀦𑀼𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀧𑀼𑀕𑁆𑀕𑀮𑀯𑀸𑀭𑁂 𑀦𑀬𑁄.

𑀑𑀓𑀸𑀲𑀯𑀸𑀭𑁂 𑀧𑀦 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀦𑁄. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺 ¶ , 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄…𑀧𑁂… 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦𑁄. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺.

𑀬𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦𑁄. 𑀬𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄, 𑀤𑀼𑀓𑁆𑀔𑀸𑀬 𑀧𑀦 𑀯𑁂𑀤𑀦𑀸𑀬 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦𑁄. 𑀬𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺…𑀧𑁂… 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺, 𑀅𑀜𑁆𑀜𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀘.

𑀬𑀢𑁆𑀣 ¶ 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀤𑀺𑀝𑁆𑀞𑀸𑀦𑀼𑀲𑀬𑁄𑀯, 𑀦𑁂𑀢𑀭𑁄 ¶ , 𑀢𑀤𑀜𑁆𑀜𑁂𑀲𑀼 𑀲𑀩𑁆𑀩𑀢𑁆𑀣 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀫𑀸𑀦𑀸𑀦𑀼𑀲𑀬𑁄, 𑀦𑁂𑀢𑀭𑁄, 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀧𑀦 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀯𑁂𑀤𑀦𑀁 𑀞𑀧𑁂𑀢𑁆𑀯𑀸 𑀢𑀤𑀜𑁆𑀜𑀸𑀲𑀼 𑀲𑀩𑁆𑀩𑀢𑁆𑀣 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀢𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀓𑀸𑀫𑀥𑀸𑀢𑀼𑀬𑀸 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀤𑀺𑀝𑁆𑀞𑀸𑀦𑀼𑀲𑀬𑁄𑀯, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀺. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀏𑀲 𑀦𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀓𑁂𑀲𑀼𑀧𑀺. 𑀬𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀓𑀸𑀫𑀥𑀸𑀢𑀼𑀬𑀸 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀯, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀦 𑀢𑀤𑀼𑀪𑀬𑀁 𑀅𑀦𑀼𑀲𑁂𑀢𑀻’’𑀢𑀺 𑀅𑀬𑀫𑁂𑀢𑁆𑀣 𑀏𑀓𑀫𑀽𑀮𑀦𑀬𑁄.

‘‘𑀬𑀲𑁆𑀲…𑀧𑁂… 𑀦𑀸𑀦𑀼𑀲𑁂𑀢𑀺. 𑀬𑀲𑁆𑀲…𑀧𑁂… 𑀦𑀸𑀦𑀼𑀲𑁂𑀢𑀺 𑀫𑀸𑀦𑀸𑀦𑀼𑀲𑀬𑁄, 𑀅𑀭𑀳𑀢𑁄 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀦𑀸𑀦𑀼𑀲𑁂𑀢𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀸𑀦𑀼𑀲𑁂𑀢𑀻𑀢𑀺? 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄𑀯 𑀦𑀸𑀦𑀼𑀲𑁂𑀢𑀺, 𑀦𑁂𑀢𑀭𑁄, 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀁 𑀢𑀤𑀼𑀪𑀬𑀫𑁆𑀧𑀺 𑀦𑀸𑀦𑀼𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀯𑀸𑀭𑁂,

‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯 𑀦𑀸𑀦𑀼𑀲𑁂𑀢𑀺, 𑀦𑁂𑀢𑀭𑁄, 𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦𑀸𑀦𑀼𑀲𑁂𑀢𑀻𑀢𑀺 ¶ ? 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀧𑀝𑀺𑀖𑀸𑀦𑀼𑀲𑀬𑁄𑀯, 𑀭𑀽𑀧𑀸𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀧𑀦 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀤𑀼𑀓𑁆𑀔𑀸𑀬 𑀧𑀦 𑀯𑁂𑀤𑀦𑀸𑀬, 𑀅𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀘 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀅𑀧𑀭𑀺𑀬𑀸𑀧𑀦𑁆𑀦𑁂 𑀧𑀦 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀑𑀓𑀸𑀲𑀯𑀸𑀭𑁂 𑀘,

‘‘𑀬𑀲𑁆𑀲 ¶ 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀲𑁆𑀲 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀭𑀽𑀧𑀸𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺, 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀩𑁆𑀩𑀢𑁆𑀣 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺. 𑀬𑀲𑁆𑀲 𑀯𑀸 𑀧𑀦 𑀬𑀢𑁆𑀣…𑀧𑁂… 𑀦𑀸𑀦𑀼𑀲𑁂𑀢𑀻𑀢𑀺? 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀧𑀝𑀺𑀖𑀸𑀦𑀼𑀲𑀬𑁄𑀯, 𑀭𑀽𑀧𑀸𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺, 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀩𑁆𑀩𑀢𑁆𑀣 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺. 𑀬𑀲𑁆𑀲 𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀲𑁆𑀲 𑀢𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀦𑁂𑀢𑀭𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬, 𑀅𑀧𑀭𑀺𑀬𑀸𑀧𑀦𑁆𑀦𑁂 𑀘 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀅𑀭𑀳𑀢𑁄 𑀧𑀦 𑀲𑀩𑁆𑀩𑀢𑁆𑀣 𑀢𑀤𑀼𑀪𑀬𑀁 𑀦𑀸𑀦𑀼𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀦𑀬𑁄 𑀜𑀸𑀢𑀩𑁆𑀩𑁄𑀢𑀺 𑀅𑀬𑀁 𑀧𑀸𑀴𑀺𑀦𑀬𑁄.

𑀢𑀢𑁆𑀣 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀁 𑀤𑀺𑀦𑁆𑀦𑀁, 𑀢𑀁 𑀤𑀼𑀤𑁆𑀤𑀺𑀦𑁆𑀦𑀁 𑀯𑀺𑀬 𑀔𑀸𑀬𑀢𑀺. 𑀓𑀲𑁆𑀫𑀸? 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀁 𑀏𑀓𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀬𑀣𑀸 𑀳𑀺 ‘‘𑀬𑀲𑁆𑀲 𑀫𑀦𑀸𑀬𑀢𑀦𑀁 ¶ 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀥𑀫𑁆𑀫𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀣𑀸 𑀓𑀸𑀫𑀭𑀸𑀕𑀧𑀝𑀺𑀖𑀸, 𑀯𑀺𑀲𑀼𑀜𑁆𑀜𑁂𑀯 𑀉𑀧𑁆𑀧𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀏𑀢𑁆𑀣 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀢𑀁 𑀧𑀦 𑀅𑀓𑀢𑁆𑀯𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀳𑁂𑀝𑁆𑀞𑀸 𑀬𑀫𑀓𑁂𑀲𑀼 𑀯𑀺𑀬 𑀏𑀢𑁆𑀣 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀢𑁆𑀢𑀫𑀸𑀦𑀯𑁄𑀳𑀸𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑁄. 𑀓𑀣𑀁 𑀕𑀳𑁂𑀢𑀩𑁆𑀩𑁄? 𑀅𑀧𑁆𑀧𑀳𑀻𑀦𑀯𑀲𑁂𑀦. 𑀅𑀧𑁆𑀧𑀳𑀻𑀦𑀢𑀁 𑀳𑀺 𑀲𑀦𑁆𑀥𑀸𑀬 𑀅𑀬𑀁 𑀅𑀦𑀼𑀲𑁂𑀢𑀻𑀢𑀺 𑀯𑀢𑁆𑀢𑀫𑀸𑀦𑀯𑁄𑀳𑀸𑀭𑁄 𑀯𑀼𑀢𑁆𑀢𑁄, 𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸 𑀧𑀼𑀘𑁆𑀙𑀸𑀬 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄, 𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄, 𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀢𑁂𑀲𑀼 𑀓𑀸𑀫𑀭𑀸𑀕𑀧𑀝𑀺𑀖𑁂𑀲𑀼 𑀬𑀲𑁆𑀲𑁂𑀓𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀇𑀢𑀭𑁄𑀧𑀺 𑀅𑀧𑁆𑀧𑀳𑀻𑀦𑁄𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀉𑀧𑁆𑀧𑀚𑁆𑀚𑀢𑀺𑀯𑀸𑀭𑀸𑀤𑀺𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁. 𑀏𑀯𑀁 𑀉𑀧𑁆𑀧𑀚𑁆𑀚𑀦𑀁 𑀤𑀻𑀧𑀺𑀢𑀁. 𑀑𑀓𑀸𑀲𑀯𑀸𑀭𑀲𑁆𑀲 𑀧𑀞𑀫𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀬𑀲𑁆𑀫𑀸 𑀓𑀸𑀫𑀭𑀸𑀕𑀧𑀝𑀺𑀖𑀸 𑀏𑀓𑀘𑀺𑀢𑁆𑀢𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀤𑀼𑀓𑀫𑀽𑀮𑀸𑀤𑀻𑀲𑀼 𑀘 𑀬𑀲𑁆𑀫𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀤𑀬𑁄 𑀏𑀓𑀲𑁆𑀫𑀺𑀁 𑀞𑀸𑀦𑀲𑀗𑁆𑀔𑀸𑀢𑁂 𑀘𑀺𑀢𑁆𑀢𑁂, 𑀆𑀭𑀫𑁆𑀫𑀡𑁂 𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑀢𑁆𑀣𑀻’’𑀢𑀺 𑀢𑀢𑁆𑀣 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀅𑀬𑀁 𑀧𑀼𑀘𑁆𑀙𑀸 𑀅𑀧𑀼𑀩𑁆𑀩𑀸 ¶ 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀘𑀢𑀼𑀦𑁆𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀁. 𑀧𑀝𑀺𑀮𑁄𑀫𑁂 𑀤𑁆𑀯𑀺𑀦𑁆𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀅𑀦𑀼𑀲𑀬𑀯𑀸𑀭𑁂 𑀦𑀬𑁄.

𑀲𑀸𑀦𑀼𑀲𑀬𑀯𑀸𑀭𑁂 𑀧𑀦 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀲𑁄 𑀧𑀝𑀺𑀖𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀆𑀫𑀦𑁆𑀢𑀸…𑀧𑁂… 𑀫𑀸𑀦𑀸𑀦𑀼𑀲𑀬𑁂𑀦 ¶ 𑀲𑀸𑀦𑀼𑀲𑀬𑁄𑀢𑀺? 𑀆𑀫𑀦𑁆𑀢𑀸. 𑀬𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀅𑀦𑀸𑀕𑀸𑀫𑀻 𑀫𑀸𑀦𑀸𑀦𑀼𑀲𑀬𑁂𑀦𑁂𑀯, 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦, 𑀢𑀬𑁄 𑀧𑀦 𑀧𑀼𑀕𑁆𑀕𑀮𑀸 𑀢𑀤𑀼𑀪𑀬𑁂𑀦𑀸𑀧𑀺 𑀅𑀦𑀼𑀲𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼 𑀤𑀼𑀓𑀫𑀽𑀮𑀸𑀤𑀻𑀲𑀼 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄, 𑀅𑀬𑀁 𑀧𑀼𑀕𑁆𑀕𑀮𑀯𑀸𑀭𑁂 𑀦𑀬𑁄.

‘‘𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀢𑀢𑁄 𑀧𑀝𑀺𑀖𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀦𑁄…𑀧𑁂… 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀫𑀸𑀦𑀸𑀦𑀼𑀲𑀬𑁂𑀦𑁂𑀯, 𑀦𑁂𑀢𑀭𑁂𑀦, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀤𑀼𑀪𑀬𑁂𑀦𑀸𑀧𑀻’’𑀢𑀺𑀆𑀤𑀺𑀦𑀸 𑀑𑀓𑀸𑀲𑀯𑀸𑀭𑁂 𑀘,

‘‘𑀬𑁄 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀲𑁄 𑀢𑀢𑁄 𑀧𑀝𑀺𑀖𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀘𑀸𑀢𑀺 𑀏𑀯𑀁 𑀅𑀦𑀼𑀮𑁄𑀫𑀦𑀬𑁂 𑀘, ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄, 𑀲𑁄 𑀧𑀝𑀺𑀖𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂𑀧𑀺 𑀲𑀩𑁆𑀩𑀢𑁆𑀣 𑀅𑀦𑀼𑀲𑀬𑀯𑀸𑀭𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄.

𑀢𑀢𑁆𑀣 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺 𑀬𑀢𑁄 𑀓𑀸𑀭𑀡𑀢𑁄 𑀉𑀧𑁆𑀧𑀦𑁆𑀦𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀓𑀺𑀁 𑀲𑁄 𑀢𑀢𑁄 𑀓𑀸𑀭𑀡𑀢𑁄 𑀉𑀧𑁆𑀧𑀦𑁆𑀦𑀧𑀝𑀺𑀖𑀸𑀦𑀼𑀲𑀬𑁂𑀦𑀧𑀺 𑀲𑀸𑀦𑀼𑀲𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁂 𑀤𑁆𑀯𑁂 𑀏𑀓𑀲𑁆𑀫𑀸 𑀞𑀸𑀦𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺 𑀅𑀬𑀁 𑀲𑀸𑀦𑀼𑀲𑀬𑀯𑀸𑀭𑁂 𑀦𑀬𑁄.

𑀧𑀚𑀳𑀦𑀯𑀸𑀭𑁂 ¶ 𑀧𑀦 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀧𑀝𑀺𑀖𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀺. 𑀬𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄…𑀧𑁂… 𑀲𑁄 𑀤𑀺𑀝𑁆𑀞𑀸𑀦𑀼𑀲𑀬𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄. 𑀬𑁄 𑀯𑀸 𑀧𑀦 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺 ¶ ? 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀺. 𑀬𑁄…𑀧𑁂… 𑀪𑀯𑀭𑀸𑀕𑀸𑀦𑀼𑀲𑀬𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀺…𑀧𑁂… 𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀜𑁆𑀘 𑀧𑀝𑀺𑀖𑀸𑀦𑀼𑀲𑀬𑀜𑁆𑀘 𑀫𑀸𑀦𑀸𑀦𑀼𑀲𑀬𑀜𑁆𑀘…𑀧𑁂… 𑀧𑀚𑀳𑀢𑀻𑀢𑀺? 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀯𑀸𑀭𑁂,

‘‘𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀢𑀢𑁄 𑀧𑀝𑀺𑀖𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄…𑀧𑁂… 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀢𑀢𑁄 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀢𑀢𑁄 𑀫𑀸𑀦𑀸𑀦𑀼𑀲𑀬𑀫𑁂𑀯, 𑀓𑀸𑀫𑀥𑀸𑀢𑀼𑀬𑀸 𑀧𑀦 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀢𑁄 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀑𑀓𑀸𑀲𑀯𑀸𑀭𑁂 𑀘,

‘‘𑀬𑁄 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀢𑀢𑁄 𑀧𑀝𑀺𑀖𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄…𑀧𑁂… 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀺…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄. 𑀬𑁄 𑀯𑀸 𑀧𑀦 𑀬𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀅𑀝𑁆𑀞𑀫𑀓𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀲𑁄 𑀢𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀦𑁄 𑀘 𑀲𑁄 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀲𑁄 𑀢𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀢𑀤𑁂𑀓𑀝𑁆𑀞𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀘𑀸𑀢𑀺 𑀏𑀯𑀁 𑀅𑀦𑀼𑀮𑁄𑀫𑀦𑀬𑁂 𑀘, ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀦 𑀧𑀚𑀳𑀢𑀺, 𑀲𑁄 𑀧𑀝𑀺𑀖𑀸𑀦𑀼𑀲𑀬𑀁 𑀦 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁 𑀦 𑀧𑀚𑀳𑀢𑀻𑀢𑀺 ¶ ? 𑀅𑀝𑁆𑀞𑀫𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀦 𑀧𑀚𑀳𑀢𑀺, 𑀦𑁂𑀢𑀭𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑀗𑁆𑀕𑀺𑀁, 𑀅𑀝𑁆𑀞𑀫𑀓𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸 𑀢𑀤𑀼𑀪𑀬𑀁 𑀦 𑀧𑀚𑀳𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄.

𑀢𑀢𑁆𑀣 𑀧𑀚𑀳𑀢𑀻𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀧𑀚𑀳𑀢𑀺. 𑀢𑀤𑁂𑀓𑀝𑁆𑀞𑀦𑁆𑀢𑀺 𑀧𑀳𑀸𑀦𑁂𑀓𑀝𑁆𑀞𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀫𑀕𑁆𑀕𑀸𑀤𑀺𑀦𑀸 𑀳𑀺 𑀦 𑀓𑁂𑀯𑀮𑀁 𑀤𑀺𑀝𑁆𑀞𑀸𑀤𑀺𑀓𑀸 𑀏𑀯 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀅𑀣 𑀔𑁄 𑀅𑀧𑀸𑀬𑀕𑀫𑀦𑀺𑀬𑀸 𑀢𑁂𑀦 𑀓𑀸𑀫𑀭𑀸𑀕𑀧𑀝𑀺𑀖𑀫𑀸𑀦𑀸𑀤𑀬𑁄𑀧𑀺 𑀧𑀳𑀻𑀬𑀦𑁆𑀢𑀺 𑀏𑀯. 𑀧𑀞𑀫𑀫𑀕𑁆𑀕𑀯𑀚𑁆𑀛𑀸 𑀳𑀺 𑀓𑀸𑀫𑀭𑀸𑀕𑀸, 𑀅𑀧𑀸𑀬𑀕𑀫𑀦𑀺𑀬𑀸 𑀘 𑀫𑀸𑀦𑀸𑀯𑀺𑀚𑁆𑀚𑀸𑀤𑀬𑁄𑀧𑀺, 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑀸𑀢𑀺 𑀧𑀳𑀸𑀦𑁂𑀓𑀝𑁆𑀞𑀸 𑀳𑀼𑀢𑁆𑀯𑀸 𑀧𑀳𑀻𑀬𑀦𑁆𑀢𑀺 𑀏𑀯𑀸𑀢𑀺 ‘‘𑀦𑁄’’𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀁𑀬𑁂𑀯 𑀧𑀳𑀻𑀦𑀢𑁆𑀢𑀸 𑀦 𑀧𑀚𑀳𑀢𑀻𑀢𑀺. 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺 𑀬𑀢𑁄 𑀉𑀧𑁆𑀧𑀚𑁆𑀚𑀦𑀓𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄, 𑀅𑀝𑁆𑀞𑀫𑀓𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄. 𑀲𑁄 𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀨𑀮𑀝𑁆𑀞𑀢𑁄 𑀧𑀝𑁆𑀞𑀸𑀬 𑀕𑀡𑀺𑀬𑀫𑀸𑀦𑁄 𑀅𑀝𑁆𑀞𑀫𑀓𑁄 𑀦𑀸𑀫. 𑀧𑀝𑀺𑀮𑁄𑀫𑀦𑀬𑁂 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀝𑁆𑀞𑀫𑀓𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀢𑀺 ¶ 𑀧𑀼𑀣𑀼𑀚𑁆𑀚𑀦𑀲𑁂𑀲𑀲𑁂𑀔𑀸𑀲𑁂𑀔𑀸. 𑀢𑁂𑀲𑀼 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀅𑀪𑀸𑀯𑁂𑀦 𑀦 𑀧𑀚𑀳𑀦𑁆𑀢𑀺, 𑀲𑁂𑀲𑀸 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀧𑀚𑀳𑀦𑀯𑀸𑀭𑁂 𑀦𑀬𑁄.

𑀧𑀭𑀺𑀜𑁆𑀜𑀸𑀯𑀸𑀭𑁄 𑀧𑀦 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀧𑀝𑀺𑀖𑀸𑀦𑀼𑀲𑀬𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀧𑀚𑀳𑀦𑀯𑀸𑀭𑀲𑀤𑀺𑀲𑁄𑀯. 𑀅𑀬𑀫𑁆𑀧𑀺 𑀳𑀺 𑀧𑀚𑀳𑀦𑀯𑀸𑀭𑁄 𑀯𑀺𑀬 𑀫𑀕𑁆𑀕𑀝𑁆𑀞𑀸𑀦𑀜𑁆𑀜𑁂𑀯 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀢𑀢𑁆𑀣 𑀧𑀭𑀺𑀚𑀸𑀦𑀸𑀢𑀻𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀭𑀺𑀜𑁆𑀜𑀸𑀯𑀸𑀭𑁂 𑀦𑀬𑁄.

𑀧𑀳𑀻𑀦𑀯𑀸𑀭𑁂 𑀧𑀦 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀧𑀳𑀻𑀦𑁄𑀢𑀺? 𑀆𑀫𑀦𑁆𑀢𑀸…𑀧𑁂… 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄𑀢𑀺? 𑀅𑀦𑀸𑀕𑀸𑀫𑀺𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯, 𑀅𑀭𑀳𑀢𑁄 ¶ 𑀧𑀦 𑀫𑀸𑀦𑀸𑀦𑀼𑀲𑀬𑁄𑀧𑀺 𑀧𑀳𑀻𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀯𑀸𑀭𑁂, ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄, 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀧𑀳𑀻𑀦𑁄𑀢𑀺? 𑀦 𑀯𑀢𑁆𑀢𑀩𑁆𑀩𑁄 𑀧𑀳𑀻𑀦𑁄𑀢𑀺 𑀯𑀸 𑀅𑀧𑁆𑀧𑀳𑀻𑀦𑁄𑀢𑀺 𑀯𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀦 𑀯𑀢𑁆𑀢𑀩𑁆𑀩𑁄…𑀧𑁂… 𑀢𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦…𑀧𑁂… 𑀧𑀳𑀻𑀦𑁄𑀢𑀺? 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄, 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦 𑀯𑀢𑁆𑀢𑀩𑁆𑀩𑁄, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀏𑀢𑁆𑀣 𑀢𑀤𑀼𑀪𑀬𑀁 𑀧𑀳𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀑𑀓𑀸𑀲𑀯𑀸𑀭𑁂, 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂𑀢𑀺 𑀏𑀯𑀁 𑀅𑀦𑀼𑀮𑁄𑀫𑀦𑀬𑁂, ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸…𑀧𑁂… 𑀬𑀲𑁆𑀲 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄𑀢𑀺? 𑀅𑀦𑀸𑀕𑀸𑀫𑀺𑀲𑁆𑀲 𑀫𑀸𑀦𑀸𑀦𑀼𑀲𑀬𑁄𑀯, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀢𑀤𑀼𑀪𑀬𑀁 𑀅𑀧𑁆𑀧𑀳𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀦𑀬𑁂 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄.

𑀏𑀢𑁆𑀣 𑀘 𑀨𑀮𑀝𑁆𑀞𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀫𑀕𑁆𑀕𑀝𑁆𑀞𑀸𑀦𑀁 𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸𑀪𑀸𑀯𑀸. 𑀢𑁂𑀲𑀁 𑀳𑀺 𑀅𑀦𑀼𑀲𑀬𑀸 𑀧𑀳𑀻𑀬𑀦𑁆𑀢𑀺 𑀏𑀯, 𑀦 𑀧𑀦 𑀧𑀳𑀻𑀦𑀸𑀢𑀺 𑀅𑀦𑀸𑀕𑀸𑀫𑀺𑀆𑀤𑀬𑁄 𑀨𑀮𑀝𑁆𑀞𑀸𑀯 𑀕𑀳𑁂𑀢𑀩𑁆𑀩𑀸, 𑀑𑀓𑀸𑀲𑀯𑀸𑀭𑁂 𑀧𑀦 ‘‘𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀇𑀤𑀁 𑀉𑀪𑀺𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀅𑀲𑀸𑀥𑀸𑀭𑀡𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀜𑁆𑀜𑀁 𑀳𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁, 𑀅𑀜𑁆𑀜𑀁 𑀧𑀝𑀺𑀖𑀸𑀦𑀼𑀲𑀬𑀲𑁆𑀲. 𑀅𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀘 𑀬𑀢𑁆𑀣 𑀅𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀫𑀕𑁆𑀕𑁂 𑀪𑀸𑀯𑀺𑀢𑁂 𑀢𑀢𑁆𑀣𑁂𑀯 𑀲𑁄 𑀧𑀳𑀻𑀦𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀢𑀢𑁆𑀣 𑀧𑀳𑀻𑀦𑁄𑀢𑀺 𑀯𑀸, 𑀅𑀧𑁆𑀧𑀳𑀻𑀦𑁄𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄, 𑀲𑀩𑁆𑀩𑀢𑁆𑀣𑀸𑀧𑀺 𑀧𑀦 𑀲𑀬𑀁 𑀅𑀪𑀸𑀯𑁂𑀦 𑀢𑀢𑁆𑀣 𑀅𑀧𑁆𑀧𑀳𑀻𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀉𑀪𑀺𑀦𑁆𑀦𑀁 𑀧𑀦 𑀲𑀸𑀥𑀸𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ¶ ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀫𑀸𑀦𑀸𑀦𑀼𑀲𑀬𑁄 𑀳𑀺 𑀓𑀸𑀫𑀥𑀸𑀢𑀼𑀬𑀸 𑀯𑁂𑀤𑀦𑀸𑀤𑁆𑀯𑀬𑀲𑀗𑁆𑀔𑀸𑀢𑁂 𑀲𑀸𑀥𑀸𑀭𑀡𑀝𑁆𑀞𑀸𑀦𑁂 𑀓𑀸𑀫𑀭𑀸𑀕𑁂𑀦 𑀲𑀤𑁆𑀥𑀺𑀁 𑀧𑀳𑀻𑀦𑁄 𑀦𑀸𑀫 𑀳𑁄𑀢𑀺 ¶ . 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀨𑀮𑀝𑁆𑀞𑀸𑀦𑀜𑁆𑀘 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀅𑀬𑀁 𑀧𑀳𑀻𑀦𑀯𑀸𑀭𑁂 𑀦𑀬𑁄.

𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀧𑀦 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀅𑀦𑀼𑀲𑀬𑀯𑀸𑀭𑀲𑀤𑀺𑀲𑁄𑀯𑀸𑀢𑀺 𑀅𑀬𑀁 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀦𑀬𑁄.

𑀥𑀸𑀢𑀼𑀯𑀸𑀭𑁂 𑀧𑀦 ‘‘𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀢𑀺 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀓𑀢𑀺 𑀅𑀦𑀼𑀲𑀬𑀸 𑀦𑀸𑀦𑀼𑀲𑁂𑀦𑁆𑀢𑀺, 𑀓𑀢𑀺 𑀅𑀦𑀼𑀲𑀬𑀸 𑀪𑀗𑁆𑀕𑀸? 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲…𑀧𑁂… 𑀓𑀢𑀺 𑀪𑀗𑁆𑀕𑀸? 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲…𑀧𑁂… 𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀦 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲…𑀧𑁂… 𑀓𑀢𑀺 𑀪𑀗𑁆𑀕𑀁? 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀦 𑀓𑀸𑀫𑀥𑀸𑀢𑀼𑀁, 𑀦 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲…𑀧𑁂… 𑀦 𑀭𑀽𑀧𑀥𑀸𑀢𑀼𑀁 𑀦 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲. 𑀦 𑀓𑀸𑀫𑀥𑀸𑀢𑀼𑀁 𑀦 𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀢𑀺 𑀪𑀗𑁆𑀕𑀸’’𑀢𑀺 𑀏𑀯𑀁 𑀓𑀸𑀫𑀥𑀸𑀢𑀼𑀫𑀽𑀮𑀓𑀸 𑀦𑀯 𑀧𑀼𑀘𑁆𑀙𑀸, 𑀢𑀣𑀸 ‘‘𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀭𑀽𑀧𑀥𑀸𑀢𑀼𑀫𑀽𑀮𑀓𑀸 𑀦𑀯, 𑀅𑀭𑀽𑀧𑀥𑀸𑀢𑀼𑀬𑀸 𑀦𑀯 𑀘𑀸𑀢𑀺 𑀲𑀢𑁆𑀢𑀯𑀻𑀲𑀢𑀺 𑀅𑀦𑀼𑀮𑁄𑀫𑀧𑀼𑀘𑁆𑀙𑀸, 𑀢𑀣𑀸 ‘‘𑀦 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀯𑀻𑀲𑀢𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀘, 𑀢𑀣𑀸 ‘‘𑀦 𑀓𑀸𑀫𑀥𑀸𑀢𑀼𑀬𑀸 𑀦 𑀅𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀯𑀻𑀲𑀢𑀺 𑀤𑀼𑀓𑀫𑀽𑀮𑀓𑀸 𑀧𑀼𑀘𑁆𑀙𑀸 𑀘𑀸𑀢𑀺 𑀏𑀯𑀁 𑀧𑀼𑀘𑁆𑀙𑀸𑀯𑀸𑀭𑁂 𑀏𑀓𑀸𑀲𑀻𑀢𑀺 𑀧𑀼𑀘𑁆𑀙𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀅𑀦𑀼𑀲𑁂𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀕𑀢𑀸 𑀳𑀼𑀢𑁆𑀯𑀸 𑀓𑀢𑀺 𑀅𑀦𑀼𑀲𑁂𑀦𑁆𑀢𑀺, 𑀪𑀗𑁆𑀕𑀸𑀢𑀺 𑀅𑀦𑀼𑀲𑁂𑀦𑁆𑀢𑀺 𑀘 𑀦𑀸𑀦𑀼𑀲𑁂𑀦𑁆𑀢𑀺 𑀘𑀸𑀢𑀺 𑀏𑀯𑀁 𑀓𑀢𑀺 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀓𑀸𑀫𑀥𑀸𑀢𑀼𑀯𑀺𑀭𑀳𑀺𑀢𑀸 𑀤𑁆𑀯𑁂 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑁄 𑀉𑀧𑀧𑀚𑁆𑀚𑀦𑁆𑀢𑀲𑁆𑀲. 𑀦 𑀓𑀸𑀫𑀥𑀸𑀢𑀼𑀁 𑀦 𑀭𑀽𑀧𑀥𑀸𑀢𑀼𑀦𑁆𑀢𑀺 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲. 𑀦 𑀓𑀸𑀫𑀥𑀸𑀢𑀼𑀬𑀸𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀽𑀳𑀺 𑀘𑀼𑀢𑀲𑁆𑀲, 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 ¶ 𑀧𑀝𑀺𑀲𑀦𑁆𑀥𑀺𑀯𑀲𑁂𑀦, 𑀥𑀸𑀢𑀼𑀯𑀲𑁂𑀦 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀉𑀤𑁆𑀤𑁂𑀲𑀯𑀸𑀭𑁂 𑀦𑀬𑁄.

𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑀲𑁆𑀲 ‘‘𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀓𑀲𑁆𑀲𑀘𑀺 𑀧𑀜𑁆𑀘 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀅𑀦𑀼𑀲𑀬𑀸 𑀪𑀗𑁆𑀕𑀸 𑀦𑀢𑁆𑀣𑀺, 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀓𑀲𑁆𑀲𑀘𑀺 𑀧𑀜𑁆𑀘, 𑀓𑀲𑁆𑀲𑀘𑀺 𑀢𑀬𑁄 ¶ …𑀧𑁂… 𑀪𑀗𑁆𑀕𑀸 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀲𑀢𑁆𑀢𑁂𑀯 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀢𑀣𑀸 ‘‘𑀅𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼𑀧𑀺, 𑀅𑀭𑀽𑀧𑀥𑀸𑀢𑀼𑀬𑀸 𑀧𑀦 𑀘𑀼𑀢𑀲𑁆𑀲 𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀉𑀧𑀧𑀚𑁆𑀚𑀫𑀸𑀦𑁄 𑀓𑀸𑀫𑀥𑀸𑀢𑀼𑀁 𑀏𑀯 𑀉𑀧𑀧𑀚𑁆𑀚𑀢𑀺, 𑀲𑀢𑁆𑀢𑁂𑀯 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀻𑀢𑀺 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀦𑀬𑁄.

𑀢𑀢𑁆𑀣 𑀓𑀲𑁆𑀲𑀘𑀺 𑀲𑀢𑁆𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀜𑁆𑀘𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀯𑀲𑁂𑀦. 𑀢𑁂𑀲𑀁 𑀳𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀧𑀳𑀻𑀦𑀸𑀢𑀺, 𑀓𑀸𑀫𑀥𑀸𑀢𑀼𑀬𑀸 𑀧𑀦 𑀅𑀦𑀸𑀕𑀸𑀫𑀻𑀦𑀁 𑀉𑀧𑀧𑀢𑁆𑀢𑀺𑀅𑀪𑀸𑀯𑀢𑁄 𑀧𑀞𑀫𑀯𑀸𑀭𑁂 ‘‘𑀓𑀲𑁆𑀲𑀘𑀺 𑀢𑀬𑁄’’𑀢𑀺 𑀦 𑀯𑀼𑀢𑁆𑀢𑀁, 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀲𑀼 𑀏𑀯 𑀯𑀼𑀢𑁆𑀢𑀁…𑀧𑁂… 𑀅𑀦𑀸𑀕𑀸𑀫𑀻𑀦𑀁 𑀳𑀺 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀫𑁆𑀧𑀺 𑀧𑀳𑀻𑀦𑀢𑁆𑀢𑀸 𑀢𑀬𑁄𑀯 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀇𑀥 𑀘 𑀅𑀦𑀼𑀲𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀦𑀬𑁄, 𑀅𑀦𑀼𑀲𑀬𑀸𑀦𑀁 𑀅𑀦𑀼𑀲𑀬𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀧𑀺 𑀅𑀦𑀼𑀲𑀬𑀦𑀁 𑀕𑀳𑁂𑀢𑀩𑁆𑀩𑀁. 𑀲𑀢𑁆𑀢𑁂𑀯𑀸𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀳𑁂𑀝𑁆𑀞𑀸 𑀓𑀸𑀫𑀪𑀯𑀸𑀤𑀻𑀲𑀼 𑀉𑀧𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀢𑁆𑀢𑁂𑀯𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺. 𑀓𑀲𑁆𑀫𑀸 𑀦𑀢𑁆𑀣𑀺? 𑀅𑀭𑀽𑀧𑀻𑀦𑀁 𑀭𑀽𑀧𑀚𑁆𑀛𑀸𑀦𑀲𑁆𑀲 𑀅𑀪𑀸𑀯𑀸. 𑀢𑁂 ¶ 𑀳𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀭𑀽𑀧𑀥𑀸𑀢𑀼𑀁 𑀉𑀧𑀧𑀦𑁆𑀦𑀸𑀢𑀺. 𑀲𑁂𑀲𑀁 𑀦𑀬𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀅𑀬𑀁 𑀥𑀸𑀢𑀼𑀯𑀸𑀭𑁂 𑀦𑀬𑁄. 𑀅𑀬𑀁 𑀅𑀦𑀼𑀲𑀬𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀘𑀺𑀢𑁆𑀢𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀘𑀺𑀢𑁆𑀢𑀬𑀫𑀓𑀫𑀸𑀢𑀺𑀓𑀸𑀬𑀁 𑀧𑀦 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀲𑁆𑀲𑀁 𑀳𑀺 𑀫𑀸𑀢𑀺𑀓𑀸𑀬𑀁 𑀧𑀼𑀕𑁆𑀕𑀮𑀯𑀸𑀭𑁄 𑀥𑀫𑁆𑀫𑀯𑀸𑀭𑁄 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄𑀢𑀺 𑀆𑀤𑀺𑀢𑁄𑀯 𑀢𑀬𑁄 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺, 𑀢𑀢𑁆𑀣 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀧𑀼𑀕𑁆𑀕𑀮𑀯𑀸𑀭𑁄 𑀦𑀸𑀫. ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀥𑀫𑁆𑀫𑀯𑀲𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀥𑀫𑁆𑀫𑀯𑀸𑀭𑁄 𑀦𑀸𑀫. ‘‘𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀉𑀪𑀬𑀯𑀲𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄 𑀦𑀸𑀫.

𑀢𑀢𑁄 ¶ ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀅𑀧𑀭𑁂 𑀲𑀭𑀸𑀕𑀸𑀤𑀺𑀧𑀤𑀯𑀺𑀲𑁂𑀲𑀺𑀢𑀸 𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸, 𑀲𑁄𑀴𑀲 𑀥𑀫𑁆𑀫𑀯𑀸𑀭𑀸, 𑀲𑁄𑀴𑀲 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀫𑀺𑀲𑁆𑀲𑀓𑀯𑀸𑀭𑀸 𑀳𑁄𑀦𑁆𑀢𑀺, 𑀢𑁂 𑀲𑀭𑀸𑀕𑀸𑀤𑀺𑀧𑀤𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸. 𑀢𑀢𑁄 ‘‘𑀬𑀲𑁆𑀲 𑀓𑀼𑀲𑀮𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀲𑀗𑁆𑀔𑀸𑀢𑀸𑀦𑀁 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀤𑀸𑀦𑀁 𑀯𑀲𑁂𑀦 𑀅𑀧𑀭𑁂 𑀓𑀼𑀲𑀮𑀸𑀤𑀺𑀧𑀤𑀯𑀺𑀲𑁂𑀲𑀺𑀢𑀸 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀧𑀼𑀕𑁆𑀕𑀮𑀯𑀸𑀭𑀸, 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀥𑀫𑁆𑀫𑀯𑀸𑀭𑀸, 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑀸𑀢𑀺 𑀅𑀝𑁆𑀞𑀦𑀯𑀼𑀢𑀺𑀲𑀢𑁆𑀢𑀲𑀢𑀸 𑀫𑀺𑀲𑁆𑀲𑀓𑀯𑀸𑀭𑀸 𑀳𑁄𑀦𑁆𑀢𑀺, 𑀢𑁂𑀧𑀺 𑀓𑀼𑀲𑀮𑀸𑀤𑀺𑀧𑀤𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑀸𑀬𑁂𑀯, 𑀬𑀸𑀦𑀺𑀧𑁂𑀢𑁆𑀣 𑀲𑀦𑀺𑀤𑀲𑁆𑀲𑀦𑀸𑀤𑀻𑀦𑀺 𑀧𑀤𑀸𑀦𑀺 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀫𑁄𑀖𑀧𑀼𑀘𑁆𑀙𑀸𑀯𑀲𑁂𑀦 𑀕𑀳𑀺𑀢𑀸𑀦𑀻𑀢𑀺.

𑀢𑁂𑀲𑀼 𑀧𑀦 𑀢𑀻𑀲𑀼 𑀯𑀸𑀭𑁂𑀲𑀼 𑀲𑀩𑁆𑀩𑀧𑀞𑀫𑁂 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀫𑀳𑀸𑀯𑀸𑀭𑁂 𑀢𑀸𑀯 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄 ¶ 𑀉𑀧𑁆𑀧𑀸𑀤𑀯𑀸𑀭𑁄 𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀚𑁆𑀚𑀫𑀸𑀦𑀦𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄 𑀘𑀸𑀢𑀺 𑀘𑀼𑀤𑁆𑀤𑀲 𑀅𑀦𑁆𑀢𑀭𑀯𑀸𑀭𑀸, 𑀢𑁂𑀲𑀼 𑀉𑀧𑁆𑀧𑀸𑀤𑀯𑀸𑀭𑁄 𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀧𑀘𑁆𑀘𑁂𑀓𑀁 𑀯𑀢𑁆𑀢𑀫𑀸𑀦𑀸𑀢𑀻𑀢𑀲𑁆𑀲, 𑀯𑀢𑁆𑀢𑀫𑀸𑀦𑀸𑀦𑀸𑀕𑀢𑀲𑁆𑀲, 𑀅𑀢𑀻𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀺 𑀢𑀺𑀡𑁆𑀡𑀁 𑀓𑀸𑀮𑀪𑁂𑀤𑀸𑀦𑀁 𑀯𑀲𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀙 𑀙 𑀓𑀢𑁆𑀯𑀸 𑀅𑀝𑁆𑀞𑀸𑀭𑀲 𑀬𑀫𑀓𑀸𑀦𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁂 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀯𑀲𑁂𑀦 𑀅𑀦𑀼𑀮𑁄𑀫𑀢𑁄 𑀤𑁆𑀯𑁂, 𑀧𑀝𑀺𑀮𑁄𑀫𑀢𑁄 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺, 𑀲𑁂𑀲𑁂𑀲𑀼 𑀆𑀤𑀺𑀢𑁄 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀢𑀻𑀲𑀼, 𑀅𑀦𑁆𑀢𑀭𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀢𑀻𑀲𑀼, 𑀅𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀘𑀢𑀽𑀲𑀽𑀢𑀺 𑀤𑀲𑀲𑀼 𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀢𑁄 𑀏𑀓𑀁, 𑀧𑀝𑀺𑀮𑁄𑀫𑀢𑁄 𑀏𑀓𑀦𑁆𑀢𑀺 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺, 𑀏𑀯𑀁 𑀲𑀩𑁆𑀩𑁂𑀲𑀼𑀧𑀺 𑀘𑀼𑀤𑁆𑀤𑀲𑀲𑀼 𑀅𑀦𑁆𑀢𑀭𑀯𑀸𑀭𑁂𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀬𑀫𑀓𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀧𑀼𑀘𑁆𑀙𑀸, 𑀅𑀝𑁆𑀞𑀲𑀝𑁆𑀞𑀺𑀅𑀢𑁆𑀣𑀲𑀢𑀁 𑀳𑁄𑀢𑀺. 𑀬𑀣𑀸 𑀘 𑀏𑀓𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀫𑀳𑀸𑀯𑀸𑀭𑁂, 𑀢𑀣𑀸 𑀲𑀼𑀤𑁆𑀥𑀺𑀓𑀥𑀫𑁆𑀫𑀫𑀳𑀸𑀯𑀸𑀭𑁂, 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀥𑀫𑁆𑀫𑀫𑀳𑀸𑀯𑀸𑀭𑁂𑀧𑀻𑀢𑀺 𑀢𑀻𑀲𑀼 𑀫𑀳𑀸𑀯𑀸𑀭𑁂𑀲𑀼 𑀙𑀩𑁆𑀩𑀻𑀲𑀢𑀺𑀬𑀫𑀓𑀲𑀢𑀁, 𑀢𑀢𑁄 𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀤𑀺𑀕𑀼𑀡𑀸 𑀅𑀢𑁆𑀣𑀸 𑀘 𑀯𑁂𑀤𑀺𑀢𑀩𑁆𑀩𑀸, 𑀇𑀤𑀁 𑀧𑀦 𑀯𑀸𑀭𑀢𑁆𑀢𑀬𑀁 𑀲𑀭𑀸𑀕𑀸𑀤𑀺𑀯𑀲𑁂𑀦 𑀲𑁄𑀴𑀲𑀕𑀼𑀡𑀁, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀕𑀼𑀡𑀁 𑀓𑀢𑁆𑀯𑀸 𑀇𑀫𑀺𑀲𑁆𑀲𑀸 𑀘𑀺𑀢𑁆𑀢𑀬𑀫𑀓𑀫𑀸𑀢𑀺𑀓𑀸𑀬 𑀅𑀦𑁂𑀓𑀸𑀦𑀺 𑀬𑀫𑀓𑀲𑀳𑀲𑁆𑀲𑀸𑀦𑀺, 𑀢𑀤𑁆𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀤𑁆𑀤𑀺𑀕𑀼𑀡𑀸 𑀅𑀢𑁆𑀣𑀸 𑀘 𑀳𑁄𑀦𑁆𑀢𑀺, 𑀧𑀸𑀞𑁄 𑀧𑀦 𑀲𑀁𑀔𑀺𑀢𑁆𑀢𑁄. 𑀏𑀯𑀫𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑀺𑀤𑀺𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑀺𑀪𑀗𑁆𑀕𑀦𑀬𑀲𑀳𑀺𑀢𑁄 𑀲𑀗𑁆𑀔𑁂𑀧𑀢𑁆𑀣𑀯𑀡𑁆𑀡𑀦𑀸𑀦𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 ¶ 𑀦𑀺𑀭𑁄𑀥𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀓𑀺𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 ¶ 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀸, 𑀢𑀲𑁆𑀲𑀸 𑀘, ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀇𑀢𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀢𑁂𑀲𑀁 𑀘𑀺𑀢𑁆𑀢𑀦𑁆𑀢𑀺 𑀬𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀢𑁆𑀢𑀢𑀺, 𑀢𑁂𑀲𑀁 𑀢𑀤𑁂𑀯 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀧𑁆𑀧𑀢𑁆𑀢𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀪𑀗𑁆𑀕𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺 𑀦𑀸𑀫, 𑀇𑀤𑀸𑀦𑀺 𑀧𑀦 𑀪𑀗𑁆𑀕𑀁 𑀧𑀢𑁆𑀯𑀸 𑀢𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀜𑁆𑀜𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀇𑀢𑀭𑁂𑀲𑀦𑁆𑀢𑀺 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀔𑀻𑀡𑀸𑀲𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀲𑁂𑀔𑀸𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀅𑀜𑁆𑀜𑀁 𑀧𑀦 𑀢𑀲𑁆𑀫𑀺𑀁 𑀯𑀸 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀸𑀢𑀺 𑀅𑀢𑁆𑀣𑁄.

‘‘𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀳𑀺 𑀪𑀗𑁆𑀕𑀓𑁆𑀔𑀡𑁂 𑀅𑀭𑀳𑀢𑁄 𑀧𑀘𑁆𑀙𑀺𑀫𑀘𑀺𑀢𑁆𑀢𑀫𑁆𑀧𑀺 𑀲𑁂𑀲𑀸𑀦𑀁 𑀪𑀺𑀚𑁆𑀚𑀫𑀸𑀦𑀘𑀺𑀢𑁆𑀢𑀫𑁆𑀧𑀺 𑀧𑀼𑀘𑁆𑀙𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀳𑀢𑁄 𑀢𑀸𑀯 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀦 𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀦𑁄’’𑀢𑀺 𑀏𑀢𑁆𑀣 𑀧𑀝𑀺𑀲𑁂𑀥𑁄 𑀓𑀢𑁄, ‘‘𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑁂𑀧𑁄𑀯 𑀯𑀺𑀲𑁆𑀲𑀚𑁆𑀚𑀦𑀁. 𑀬𑀲𑁆𑀲 𑀳𑀺 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸, 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘, 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 ¶ , 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀦𑀼𑀧𑁆𑀧𑀦𑁆𑀦𑀁, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀼𑀧𑁆𑀧𑀦𑁆𑀦𑀜𑁆𑀘. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀏𑀢𑁆𑀣 𑀘 𑀉𑀧𑁆𑀧𑀦𑁆𑀦𑀦𑁆𑀢𑀺 𑀉𑀧𑁆𑀧𑀸𑀤𑀲𑀫𑀗𑁆𑀕𑀺𑀦𑁄𑀧𑁂𑀢𑀁 𑀦𑀸𑀫𑀁, 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘 𑀉𑀧𑁆𑀧𑀸𑀤𑀲𑀫𑀗𑁆𑀕𑀺𑀦𑁄𑀯.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀤𑀻𑀦𑀁 𑀘𑀺𑀢𑁆𑀢𑀁. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑀧𑁆𑀧𑀢𑁆𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀅𑀦𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄𑀢𑀺 𑀅𑀝𑁆𑀞𑀓𑀣𑀸𑀬𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀧𑀦 𑀇𑀫𑀲𑁆𑀲 𑀅𑀢𑀻𑀢𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀏𑀯 𑀉𑀧𑀭𑀺𑀧𑀸𑀴𑀺𑀬𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀴𑀺𑀅𑀯𑀺𑀭𑁄𑀥𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀦𑀢𑁆𑀣𑀺. 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀔𑀻𑀡𑀸𑀲𑀯𑀯𑀺𑀭𑀳𑀺𑀢𑀸𑀦𑀁 𑀘𑀺𑀢𑁆𑀢𑀁 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁…𑀧𑁂… 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀅𑀲𑁂𑀔𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁…𑀧𑁂… 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀢𑁆𑀣𑀺. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀲𑁂𑀲𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁…𑀧𑁂… 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀺𑀭𑀼𑀚𑁆𑀛𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 ¶ 𑀲𑁂𑀲𑀸𑀦𑀁 𑀘𑀺𑀢𑁆𑀢𑀁 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑀺𑀭𑀼𑀚𑁆𑀛𑀺𑀢𑁆𑀣.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀢𑁆𑀣𑀺, 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑀺𑀭𑀼𑀚𑁆𑀛𑀫𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸.

𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀤𑀻𑀦𑀁 𑀘𑀺𑀢𑁆𑀢𑀁 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸.

𑀬𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀪𑀗𑁆𑀕𑀓𑁆𑀔𑀡𑁂 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀤𑀻𑀦𑀁 𑀘𑀺𑀢𑁆𑀢𑀁 𑀢𑀣𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀉𑀧𑁆𑀧𑀦𑁆𑀦𑀦𑁆𑀢𑀺 ¶ ? 𑀘𑀺𑀢𑁆𑀢𑀲𑀫𑀗𑁆𑀕𑀻𑀦𑀁 𑀢𑀣𑀸. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦𑀢𑁆𑀣𑀺…𑀧𑁂… 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀉𑀧𑁆𑀧𑀦𑁆𑀦𑀁.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸. 𑀏𑀢𑁆𑀣 ‘‘𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀇𑀤𑀁 𑀅𑀲𑀜𑁆𑀜𑀸𑀤𑀺𑀅𑀘𑀺𑀢𑁆𑀢𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀁 𑀦𑀺𑀬𑀫𑁂𑀦 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀉𑀪𑀬𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀯𑀸𑀭𑁄 𑀓𑀸𑀮𑀢𑁆𑀢𑀬𑁂 𑀕𑀳𑁂𑀢𑁆𑀯𑀸 𑀲𑀫𑀢𑁆𑀣𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

‘‘𑀬𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑀢𑁆𑀣𑀺. 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑁄 𑀘 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀉𑀧𑁆𑀧𑀚𑁆𑀚𑀺𑀢𑁆𑀣.

𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀢𑀣𑀸. 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀼𑀧𑁆𑀧𑀦𑁆𑀦𑀁 𑀦𑀼𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀼𑀧𑁆𑀧𑀚𑁆𑀚𑀫𑀸𑀦𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀅𑀢𑀻𑀢𑀸𑀦𑀸𑀕𑀢𑀘𑀺𑀢𑁆𑀢𑀁 𑀢𑀣𑀸.

𑀦𑀺𑀭𑀼𑀤𑁆𑀥𑀁 ¶ 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺? 𑀦𑁄, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀤𑁆𑀥𑀦𑁆𑀢𑀺? 𑀦𑁄, 𑀦𑀦𑀺𑀭𑀼𑀤𑁆𑀥𑀁 𑀦𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺? 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀢𑀣𑀸. 𑀦𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀦𑀺𑀭𑀼𑀤𑁆𑀥𑀦𑁆𑀢𑀺𑀧𑀺 𑀢𑀣𑁂𑀯.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺? 𑀦𑁄 𑀘 𑀪𑀗𑁆𑀕𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀢𑀤𑀼𑀪𑀬𑀁 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺? 𑀅𑀢𑀻𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀯𑀸𑀭𑁂 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀦𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀔𑀡𑀁, 𑀉𑀧𑁆𑀧𑀸𑀤𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 ¶ 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀦 𑀘𑀺𑀭𑀁 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀢𑀫𑁂𑀯 𑀧𑀦 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀦𑁆𑀢𑀺 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲 𑀔𑀡𑀁, 𑀪𑀗𑁆𑀕𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀏𑀯𑀁 𑀦𑀺𑀭𑁄𑀥𑀓𑁆𑀔𑀡𑀫𑁆𑀧𑀺 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀬𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀺, 𑀦𑀺𑀭𑁄𑀥𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀺, 𑀅𑀢𑀻𑀢𑀁 𑀧𑀦 𑀘𑀺𑀢𑁆𑀢𑀁 𑀉𑀪𑁄𑀧𑀺 𑀔𑀡𑁂 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑀻𑀢𑀘𑀺𑀢𑁆𑀢𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀉𑀧𑀭𑀺𑀫𑁂𑀲𑀼 𑀅𑀢𑁆𑀣𑀥𑀫𑁆𑀫𑀯𑀸𑀭𑀸𑀤𑀻𑀲𑀼 𑀘 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁂 𑀦𑀬𑁄.

𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀁 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸. 𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄. 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑀢𑁆𑀣𑀺.

𑀬𑀁 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀬𑀁 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀢𑀣𑀸, 𑀏𑀯𑀁 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀲𑀼𑀧𑀺 𑀢𑀢𑁄 𑀲𑁂𑀲𑀸𑀲𑀼𑀧𑀺. ‘‘𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀢𑀣𑀸. 𑀬𑀁 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸…𑀧𑁂… 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄. 𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀅𑀦𑀸𑀕𑀢𑀜𑁆𑀘𑀸’’𑀢𑀺𑀆𑀤𑀺𑀦𑀸, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄. 𑀬𑀁 𑀯𑀸 𑀧𑀦…𑀧𑁂… 𑀦𑁄, 𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀅𑀢𑀻𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄. 𑀬𑀁 𑀯𑀸 𑀧𑀦…𑀧𑁂… 𑀦𑁄, 𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀅𑀦𑀸𑀕𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘,

‘‘𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 ¶ ? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀘,

‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀬𑀁 𑀯𑀸 𑀧𑀦…𑀧𑁂… 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺…𑀧𑁂… 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘, ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄. 𑀬𑀁 𑀯𑀸 𑀧𑀦…𑀧𑁂… 𑀦𑁄’’𑀢𑀺𑀆𑀤𑀺𑀦𑀸 𑀘,

‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄. 𑀬𑀁 𑀯𑀸 𑀧𑀦…𑀧𑁂… 𑀦𑁄. 𑀬𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘, ‘‘𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺…𑀧𑁂… 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘. 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘, ‘‘𑀦𑀺𑀭𑀼𑀤𑁆𑀥𑀁 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀘,

‘‘𑀬𑀁 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀢𑀁 𑀘𑀺𑀢𑁆𑀢𑀦𑁆𑀢𑀺…𑀧𑁂… 𑀅𑀢𑀻𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀥𑀫𑁆𑀫𑀯𑀸𑀭𑁂,

‘‘𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀘 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁂 𑀘, 𑀲𑀭𑀸𑀕𑀸𑀤𑀺𑀧𑀤𑁂𑀳𑀺, 𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀘 𑀫𑀺𑀲𑁆𑀲𑁂𑀲𑀼 𑀲𑀩𑁆𑀩𑀯𑀸𑀭𑁂𑀲𑀼 𑀘 𑀧𑀼𑀘𑁆𑀙𑀸𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀘𑀺𑀢𑁆𑀢𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀥𑀫𑁆𑀫𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀥𑀫𑁆𑀫𑀬𑀫𑀓𑀫𑀸𑀢𑀺𑀓𑀸𑀬 𑀧𑀦 𑀔𑀦𑁆𑀥𑀬𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀬𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀪𑀸𑀯𑁂𑀢𑀺, 𑀲𑁄 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀚𑀳𑀢𑀻’’𑀢𑀺 𑀆𑀕𑀢𑀢𑁆𑀢𑀸 𑀧𑀦𑁂𑀢𑁆𑀣 𑀧𑀭𑀺𑀜𑁆𑀜𑀸𑀯𑀸𑀭𑁄 𑀪𑀸𑀯𑀦𑀸𑀯𑀸𑀭𑁄 𑀦𑀸𑀫. 𑀢𑀢𑁆𑀣 𑀬𑀲𑁆𑀫𑀸 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀦𑁂𑀯 𑀪𑀸𑀯𑁂𑀢𑀩𑁆𑀩𑁄 𑀦 𑀧𑀳𑀸𑀢𑀩𑁆𑀩𑁄, 𑀢𑀲𑁆𑀫𑀸 𑀧𑀤𑀫𑁂𑀯 𑀦 𑀉𑀤𑁆𑀥𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ¶ . 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑁂𑀢𑁆𑀣 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸, ‘‘𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺? 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀥𑀫𑁆𑀫𑀸 𑀘𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘, 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀘 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀜𑀸𑀢𑀩𑁆𑀩𑁄.

‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀦𑁄. 𑀬𑀲𑁆𑀲 𑀯𑀸 𑀧𑀦…𑀧𑁂… 𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀧𑀜𑁆𑀘𑀯𑁄𑀓𑀸𑀭𑁂 𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂…𑀧𑁂… 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀢𑀢𑁆𑀣 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ¶ …𑀧𑁂… 𑀘𑀢𑀼𑀯𑁄𑀓𑀸𑀭𑁂…𑀧𑁂… 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀬𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸…𑀧𑁂… 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀘,

‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺…𑀧𑁂… 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀓𑀼𑀲𑀮𑀸 𑀘 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀅𑀓𑀼𑀲𑀮𑀸 𑀘 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺…𑀧𑁂… 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀆𑀭𑀼𑀧𑁆𑀧𑁂 𑀅𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘, ‘‘𑀬𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸…𑀧𑁂… 𑀢𑀢𑁆𑀣 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀢𑁆𑀣 𑀯𑀸 𑀧𑀦 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀘 𑀉𑀧𑁆𑀧𑀸𑀤𑀯𑀸𑀭𑁂,

‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑀯𑀸𑀭𑁂 𑀘,

‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁂 𑀘,

‘‘𑀬𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀪𑀸𑀯𑁂𑀢𑀺, 𑀲𑁄 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀚𑀳𑀺𑀢𑁆𑀣𑀸𑀢𑀺? 𑀦𑁄…𑀧𑁂… 𑀬𑁄 𑀓𑀼𑀲𑀮𑀁 𑀥𑀫𑁆𑀫𑀁 ¶ 𑀦 𑀪𑀸𑀯𑁂𑀢𑀺, 𑀲𑁄 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀦𑀧𑁆𑀧𑀚𑀳𑀺𑀢𑁆𑀣𑀸𑀢𑀺? 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀜𑁆𑀘 𑀅𑀭𑀳𑀦𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀯𑀸𑀭𑁂 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑁄.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁. 𑀇𑀫𑀲𑁆𑀲 𑀳𑀺 𑀥𑀫𑁆𑀫𑀬𑀫𑀓𑀲𑁆𑀲 𑀧𑀯𑀢𑁆𑀢𑀺𑀫𑀳𑀸𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀇𑀫𑁂𑀲𑀼 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸 𑀢𑀸𑀯 𑀏𑀓𑀦𑁆𑀢𑁂𑀦 𑀧𑀯𑀢𑁆𑀢𑀺𑀬𑀁𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼, 𑀅𑀩𑁆𑀬𑀸𑀓𑀢𑀥𑀫𑁆𑀫𑀸 𑀧𑀦 𑀧𑀯𑀢𑁆𑀢𑁂 ¶ 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀘𑀸𑀢𑀺 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀏𑀯𑀫𑁂𑀢𑁆𑀣 𑀬𑀁 𑀬𑀢𑁆𑀣 𑀬𑀢𑁆𑀣 𑀮𑀩𑁆𑀪𑀢𑀺, 𑀢𑀲𑁆𑀲 𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀦𑀬𑀫𑀼𑀔𑀁 𑁋 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀢𑀸𑀯 𑀏𑀓𑀓𑁆𑀔𑀡𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀦𑁄’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀅𑀩𑁆𑀬𑀸𑀓𑀢𑀸 𑀘𑀸𑀢𑀺 𑀇𑀤𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀲𑀜𑁆𑀜𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲𑀸𑀪𑀸𑀯𑀸 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀦𑀺𑀭𑁄𑀥𑀯𑀸𑀭𑁂 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀏𑀓𑀢𑁄 𑀅𑀦𑀺𑀭𑀼𑀚𑁆𑀛𑀦𑀢𑁄 ‘‘𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸𑀯 𑀦𑀬𑀫𑀼𑀔𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀥𑀫𑁆𑀫𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀇𑀦𑁆𑀤𑁆𑀭𑀺𑀬𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀦𑁆𑀤𑁆𑀭𑀺𑀬𑀬𑀫𑀓𑀫𑀸𑀢𑀺𑀓𑀸𑀬𑀁 𑀧𑀦 𑀔𑀦𑁆𑀥𑀬𑀫𑀓𑀫𑀸𑀢𑀺𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀸𑀤𑀺𑀓𑁄 𑀲𑀩𑁆𑀩𑁄 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀢𑁆𑀣 𑀬𑀣𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀳𑀺, 𑀢𑀣𑁂𑀯 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦𑀺𑀓𑁆𑀔𑀺𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀅𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑁂𑀳𑀺𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑁄𑀲𑀸𑀦𑁂 𑀬𑁄𑀚𑀺𑀢𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂𑀦 𑀘 𑀲𑀤𑁆𑀥𑀺𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀘 𑀧𑀝𑀺𑀲𑀦𑁆𑀥𑀺𑀬𑀁 𑀦𑀢𑁆𑀣𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀩𑀳𑀼𑀓𑀢𑀸𑀬 𑀥𑀸𑀢𑀼𑀬𑀫𑀓𑀢𑁄𑀧𑀺 𑀩𑀳𑀼𑀢𑀭𑀸𑀦𑀺 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀇𑀦𑁆𑀤𑁆𑀭𑀺𑀬𑀬𑀫𑀓𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀬𑀫𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀝𑁆𑀞𑀸𑀦𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑀧𑀝𑁆𑀞𑀸𑀦𑀫𑀸𑀢𑀺𑀓𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀦𑁆𑀢𑀺? 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀝𑁆𑀞𑁂𑀦. 𑀧-𑀲𑀤𑁆𑀤𑁄 𑀳𑀺 𑀦𑀸𑀦𑀧𑁆𑀧𑀓𑀸𑀭𑀢𑁆𑀣𑀁 𑀤𑀻𑀧𑁂𑀢𑀺, 𑀞𑀸𑀦-𑀲𑀤𑁆𑀤𑁄 𑀧𑀘𑁆𑀘𑀬𑀢𑁆𑀣𑀁. 𑀅𑀣 𑀯𑀸 𑀯𑀺𑀪𑀚𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁. 𑀬𑀣𑀸 𑀳𑀺 𑀧𑀜𑁆𑀜𑀸𑀧𑀦𑀸 𑀧𑀝𑁆𑀞𑀧𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀪𑀚𑀦𑀝𑁆𑀞𑁄 𑀧𑀝𑁆𑀞𑀸𑀦𑀲𑀤𑁆𑀤𑀲𑀫𑀸𑀦𑀢𑁆𑀣𑁄 𑀧𑀝𑁆𑀞𑀧𑀦𑀸-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀏𑀯𑀫𑀺𑀥𑀸𑀧𑀺 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀯𑀺𑀪𑀚𑀦𑀢𑁄 𑀯𑀺𑀪𑀚𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁 𑀦𑀸𑀫. 𑀅𑀣 𑀯𑀸 𑀧𑀝𑁆𑀞𑀺𑀢𑀝𑁆𑀞𑁂𑀦 𑀧𑀝𑁆𑀞𑀸𑀦𑀁, 𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀥𑀫𑁆𑀫𑁂𑀲𑀼 𑀳𑀺 𑀅𑀲𑀗𑁆𑀕𑀕𑀫𑀦𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀯𑀺𑀢𑁆𑀣𑀸𑀭𑀺𑀢𑀦𑀬𑀮𑀸𑀪𑀢𑁄 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀕𑀫𑀦𑀢𑁆𑀢𑀸 𑀕𑀫𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁 𑀦𑀸𑀫, 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀝𑁆𑀞𑁂𑀦, 𑀯𑀺𑀪𑀚𑀦𑀝𑁆𑀞𑁂𑀦, 𑀕𑀫𑀦𑀝𑁆𑀞𑁂𑀦 𑀘 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀫𑁆𑀧𑀺 𑀧𑀝𑁆𑀞𑀸𑀦𑀁 𑀦𑀸𑀫, 𑀢𑁂𑀲𑀁 𑀧𑀦 𑀲𑀫𑀽𑀳𑀢𑁄 𑀧𑀓𑀭𑀡𑀁 𑀧𑀝𑁆𑀞𑀸𑀦𑀁 𑀦𑀸𑀫, 𑀢𑁂𑀲𑀁 𑀧𑀝𑁆𑀞𑀸𑀦𑀸𑀦𑀁 𑀫𑀸𑀢𑀺𑀓𑀸. 𑀲𑀬𑀫𑁆𑀧𑀺 𑀯𑀸 𑀧𑀝𑁆𑀞𑀸𑀦𑀪𑀽𑀢𑀸 𑀫𑀸𑀢𑀺𑀓𑀸, 𑀲𑀩𑁆𑀩𑀫𑁆𑀧𑁂𑀢𑀁 𑀧𑀝𑁆𑀞𑀸𑀦𑀫𑀸𑀢𑀺𑀓𑀸. 𑀬𑀸 𑀲𑀸 ‘‘𑀳𑁂𑀢𑀼𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀧𑀘𑁆𑀘𑀬𑁄…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀘𑀢𑀼𑀯𑀻𑀲𑀢𑀺𑀧𑁆𑀧𑀪𑁂𑀤𑀲𑀫𑀦𑁆𑀢𑀧𑀝𑁆𑀞𑀸𑀦𑀤𑁂𑀲𑀦𑀸𑀬 𑀫𑀽𑀮𑀪𑀽𑀢𑀧𑀘𑁆𑀘𑀬𑀪𑁂𑀤𑀲𑁆𑀲 𑀯𑀲𑁂𑀦 𑀪𑀕𑀯𑀢𑀸 𑀧𑀓𑀭𑀡𑀲𑁆𑀲 𑀆𑀤𑀺𑀫𑁆𑀳𑀺 𑀞𑀧𑀺𑀢𑀸, 𑀅𑀬𑀁 𑀇𑀥 𑀧𑀝𑁆𑀞𑀸𑀦𑀫𑀸𑀢𑀺𑀓𑀸 𑀦𑀸𑀫.

𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀸𑀤𑀺𑀲𑀳𑀺𑀢𑁄 𑀲𑀗𑁆𑀔𑁂𑀧𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀳𑁂𑀢𑀼𑀧𑀘𑁆𑀘𑀬𑁄𑀢𑀺𑀆𑀤𑀻𑀲𑀼 𑀳𑀺 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁂𑀢𑀼𑀧𑀘𑁆𑀘𑀬𑁄, 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀳𑁂𑀢𑀽𑀢𑀺 𑀯𑀘𑀦𑀸𑀯𑀬𑀯𑀓𑀸𑀭𑀡𑀫𑀽𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀧𑀝𑀺𑀜𑁆𑀜𑀸𑀳𑁂𑀢𑀽’’𑀢𑀺𑀆𑀤𑀻𑀲𑀼 𑀳𑀺 𑀮𑁄𑀓𑁂 𑀯𑀘𑀦𑀸𑀯𑀬𑀯𑁄 ‘‘𑀳𑁂𑀢𑀽’’𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀲𑀦𑁂 𑀧𑀦 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺𑀆𑀤𑀻𑀲𑀼 ¶ (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬) 𑀓𑀸𑀭𑀡𑀁, ‘‘𑀢𑀬𑁄 𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀸 𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁫𑁯) 𑀫𑀽𑀮𑀁, 𑀇𑀤𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁 ¶ , 𑀢𑀁 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀅𑀧𑀘𑁆𑀘𑀓𑁆𑀔𑀸𑀬 𑀦𑀁 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀧𑀘𑁆𑀘𑀓𑁆𑀔𑀸𑀬 𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀲𑁄 𑀢𑀲𑁆𑀲 𑀉𑀧𑀓𑀸𑀭𑀓𑀮𑀓𑁆𑀔𑀡𑁂𑀦 𑀧𑀘𑁆𑀘𑀬𑁄 𑀦𑀸𑀫. 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺 𑀲𑀗𑁆𑀔𑁂𑀧𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄, 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄𑀢𑀺 𑀓𑁂𑀘𑀺, 𑀏𑀯𑀁 𑀲𑀦𑁆𑀢𑁂 𑀧𑀦 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀜𑁆𑀘 𑀯𑀺𑀦𑀸 𑀏𑀢𑁂𑀳𑀺 𑀅𑀩𑁆𑀬𑀸𑀓𑀢𑀪𑀸𑀯𑁄 𑀲𑀺𑀤𑁆𑀥𑁄, 𑀲𑀳𑁂𑀢𑀼𑀓𑀸𑀦𑀫𑁆𑀧𑀺 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀧𑀝𑀺𑀩𑀤𑁆𑀥𑁄. 𑀬𑀤𑀺 𑀘 𑀲𑀺𑀬𑀸, 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁂𑀦 𑀅𑀜𑁆𑀜𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀯𑀲𑁂𑀦 𑀧𑀦 𑀳𑁂𑀢𑀽𑀦𑀁 𑀫𑀽𑀮𑀝𑁆𑀞𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀬𑁆𑀳𑀫𑀸𑀦𑁂 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀚𑁆𑀛𑀢𑀺. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀇𑀢𑀭𑁂 𑀧𑀦 𑀢𑀺𑀮𑀩𑀻𑀚𑀓𑀸𑀤𑀺𑀲𑁂𑀯𑀸𑀮𑀸 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀤𑁆𑀤𑁂𑀲𑁂 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀇𑀤𑀁 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀁. 𑀧𑀜𑁆𑀳𑀸𑀯𑀸𑀭𑀲𑁆𑀫𑀺𑀁 𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀆𑀕𑀢𑀁, 𑀓𑀲𑁆𑀫𑀸 𑀧𑀦𑀸𑀬𑀁 𑀳𑁂𑀢𑀼 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺 ¶ , 𑀦 𑀧𑀯𑀢𑁆𑀢𑁂𑀢𑀺? 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬, 𑀪𑀯𑀧𑀞𑀫𑀦𑀺𑀧𑀸𑀢𑀢𑁄 𑀘𑀺𑀢𑁆𑀢𑀚𑀸𑀢𑀺. 𑀇𑀢𑀭𑀭𑀽𑀧𑀲𑀦𑁆𑀢𑀢𑀺𑀉𑀧𑁆𑀧𑀢𑁆𑀣𑀫𑁆𑀪𑀸𑀪𑀸𑀯𑁂𑀦 𑀏𑀯 𑀤𑀼𑀩𑁆𑀩𑀮𑀯𑀢𑁆𑀣𑀼𑀁 𑀘𑀺𑀢𑁆𑀢𑀫𑁂𑀯 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘. 𑀢𑀁 𑀘𑀺𑀢𑁆𑀢𑀫𑁆𑀧𑀺 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑀸𑀬 𑀘𑁂𑀯 𑀅𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀢𑀸𑀬 𑀘 𑀅𑀧𑁆𑀧𑀢𑀺𑀝𑁆𑀞𑀺𑀢𑀁, 𑀧𑀧𑀸𑀢𑁂 𑀧𑀢𑀺𑀢𑀫𑀢𑁆𑀢𑀓𑁄 𑀧𑀼𑀭𑀺𑀲𑁄 𑀦 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀓𑀸𑀢𑀼𑀁 𑀯𑀺𑀬 𑀘𑀺𑀢𑁆𑀢𑀚𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀁 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀸𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺 𑀳𑀺 𑀭𑀽𑀧𑀁 𑀦 𑀚𑀦𑁂𑀦𑁆𑀢𑀺, 𑀓𑀫𑁆𑀫𑀚𑀭𑀽𑀧𑀫𑁂𑀯 𑀧𑀦 𑀢𑁂𑀲𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀯𑀢𑁆𑀢𑀺𑀬𑀁 𑀧𑀦 𑀧𑀝𑀺𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀢𑀸𑀬 𑀢𑀁 𑀭𑀽𑀧𑀁 𑀯𑀺𑀦𑀸𑀧𑀺 𑀓𑀫𑁆𑀫𑀧𑀝𑀺𑀩𑀤𑁆𑀥𑀸𑀯 𑀧𑀯𑀢𑁆𑀢𑀺, 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀧𑀦𑁂𑀢𑁆𑀣 𑀓𑀼𑀲𑀮𑀸𑀤𑀺𑀪𑁂𑀤𑀢𑁄, 𑀪𑀽𑀫𑀺𑀪𑁂𑀤𑀢𑁄 𑀘 𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀳𑁂𑀢𑀼𑀧𑀘𑁆𑀘𑀬𑁂 𑀦𑀬𑁄.

𑀢𑀢𑁄 𑀧𑀭𑁂𑀲𑀼 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀲𑁄 𑀦𑀺𑀤𑁆𑀤𑁂𑀲𑁂 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 ¶ 𑀥𑀫𑁆𑀫𑀸𑀦𑀁…𑀧𑁂… 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸…𑀧𑁂… 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦 𑀓𑁄𑀘𑀺 𑀥𑀫𑁆𑀫𑁄 𑀦 𑀳𑁄𑀢𑀺. 𑀬𑀣𑀸 𑀳𑀺 𑀤𑀼𑀩𑁆𑀩𑀮𑀧𑀼𑀭𑀺𑀲𑁄 𑀤𑀡𑁆𑀟𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀉𑀝𑁆𑀞𑀳𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘, 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀬𑀁 𑀓𑀺𑀜𑁆𑀘𑀺 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘, 𑀢𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀤𑀺𑀪𑁂𑀤𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀬𑀣𑀸𑀬𑁄𑀕𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀦𑀬𑁄.

𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄, 𑀲𑁄 𑀦𑀺𑀤𑁆𑀤𑁂𑀲𑁂 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 ¶ 𑀭𑀽𑀧𑀸𑀦𑀁…𑀧𑁂… 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀥𑀺𑀧𑀢𑀺…𑀧𑁂… 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀲𑀳𑀚𑀸𑀢𑀸𑀥𑀺𑀧𑀢𑀺𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀕𑀭𑀼𑀓𑀸𑀢𑀩𑁆𑀩𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦. 𑀢𑀢𑁆𑀣 𑀘 𑀮𑁄𑀓𑀺𑀬𑀓𑀼𑀲𑀮𑀪𑀽𑀢𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀦𑀜𑁆𑀘𑁂𑀯 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀳𑁄𑀢𑀺, 𑀦𑀸𑀜𑁆𑀜𑀲𑁆𑀲, 𑀅𑀓𑀼𑀲𑀮𑀪𑀽𑀢𑁄 𑀧𑀦 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺 𑀇𑀢𑀭𑁂𑀲𑀼 𑀕𑀭𑀼𑀓𑀸𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄, 𑀲𑁄 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀮𑁄𑀓𑀺𑀬𑀯𑀺𑀧𑀸𑀓𑀭𑀽𑀧𑀓𑁆𑀔𑀦𑁆𑀥𑀪𑀽𑀢𑁄 𑀘 𑀮𑁄𑀪𑀲𑀳𑀕𑀢𑀲𑁆𑀲𑁂𑀯, 𑀦𑀸𑀜𑁆𑀜𑀲𑁆𑀲, 𑀢𑀣𑀸 𑀓𑀺𑀭𑀺𑀬𑀪𑀽𑀢𑁄𑀧𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁, 𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀪𑀺𑀜𑁆𑀜𑀸𑀤𑀺𑀧𑀼𑀩𑁆𑀩𑀯𑀲𑀧𑁆𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀳𑀺 𑀕𑀭𑀼𑀓𑀸𑀢𑀩𑁆𑀩𑀪𑀸𑀯𑀲𑁆𑀲𑀸𑀯𑀺𑀭𑁄𑀥𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀺 𑀧𑀦 𑀓𑀸𑀫𑀸𑀯𑀘𑀭𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀦𑀫𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀧𑀦 𑀢𑁂𑀲𑀜𑁆𑀜𑁂𑀯 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀸𑀦𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀦𑀬𑁄.

𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑁄𑀯 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄, 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀦𑀸𑀦𑀁 ‘‘𑀉𑀧𑀘𑀬𑀲𑀦𑁆𑀢𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀫𑁆𑀧𑀺 ‘‘𑀅𑀢𑁆𑀣𑀸𑀦𑀦𑁆𑀢𑀭𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑀁, 𑀢𑀁 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀢𑀁𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 ¶ 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 ¶ 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀓𑀼𑀲𑀮𑀸𑀦𑀁…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁…𑀧𑁂… 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀸 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀺𑀦𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀲𑀫𑀓𑁄 𑀏𑀯 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀺𑀤𑁆𑀤𑀺𑀝𑁆𑀞𑁄 𑀅𑀜𑁆𑀜𑀢𑁆𑀭 𑀦𑀸𑀫𑀦𑀸𑀦𑀸𑀢𑁆𑀢𑀸𑀢𑀺 𑀅𑀬𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀤𑁆𑀯𑀬𑁂 𑀦𑀬𑁄.

𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀲𑁄 𑀦𑀺𑀤𑁆𑀤𑁂𑀲𑁂 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁…𑀧𑁂… 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁…𑀧𑁂… 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀺𑀜𑁆𑀘𑀺𑀓𑀸𑀮𑁂 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀺𑀜𑁆𑀘𑀺𑀓𑀸𑀮𑁂 𑀦𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀙𑀩𑁆𑀩𑀺𑀥𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀤𑀻𑀧𑁂𑀢𑀺, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀁 𑀭𑀽𑀧𑀁 𑀦𑀸𑀫. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀻𑀢𑀺 𑀓𑁂𑀘𑀺 𑀢𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂 𑀧𑀯𑀺𑀝𑁆𑀞𑀢𑁆𑀢𑀸. 𑀢𑁂𑀲𑀁 𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯, 𑀢𑀸𑀦𑀺 𑀧𑀦 𑀯𑀢𑁆𑀣𑀼𑀯𑀺𑀭𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀢𑁆𑀣𑀁 𑀦 𑀨𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸 𑀪𑀽𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀁. 𑀏𑀯𑀁 𑀳𑀺 𑀅𑀕𑀬𑁆𑀳𑀫𑀸𑀦𑁂 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀲𑀳𑀚𑀸𑀢𑀸 𑀦𑀸𑀫 𑀦𑀺𑀲𑁆𑀲𑀬𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄 𑀅𑀧𑀭𑀺𑀧𑀼𑀡𑁆𑀡𑁄 𑀏𑀯 𑀲𑀺𑀬𑀸. 𑀓𑀺𑀜𑁆𑀘𑀺𑀓𑀸𑀮𑁂𑀢𑀺 𑀇𑀤𑀫𑁆𑀧𑀺 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀳𑀤𑀬𑀯𑀢𑁆𑀣𑀼𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀢𑀺𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻𑀢𑀺 𑀅𑀢𑁆𑀣𑀢𑁄 𑀅𑀬𑀁 𑀧𑀘𑁆𑀘𑀬𑁄 𑀧𑀜𑁆𑀘𑀯𑀺𑀥𑁄𑀢𑀺 𑀅𑀬𑀁 𑀲𑀳𑀚𑀸𑀢𑀧𑀘𑁆𑀘𑀬𑁂 𑀦𑀬𑁄.

𑀅𑀜𑁆𑀜𑀫𑀜𑁆𑀜𑀁 ¶ 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀢𑀺𑀤𑀡𑁆𑀟𑀓𑀁 𑀯𑀺𑀬. 𑀲𑁄 𑀦𑀺𑀤𑁆𑀤𑁂𑀲𑁂 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸…𑀧𑁂… 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀢𑀺𑀥𑀸 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀬𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀦𑀬𑁄.

𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦, 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀭𑀼𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀧𑀣𑀯𑀻𑀧𑀝𑀸𑀤𑀬𑁄 𑀯𑀺𑀬, 𑀲𑁄 𑀦𑀺𑀤𑁆𑀤𑁂𑀲𑁂 𑀲𑀳𑀚𑀸𑀢𑀧𑀘𑁆𑀘𑀬𑁂 𑀯𑀺𑀬 𑀙𑀥𑀸𑀯 𑀦𑀺𑀤𑁆𑀤𑀺𑀝𑁆𑀞𑁄. 𑀙𑀝𑁆𑀞𑁄 𑀧𑀦𑁂𑀢𑁆𑀣 𑀓𑁄𑀝𑁆𑀞𑀸𑀲𑁄 ‘‘𑀘𑀓𑁆𑀔𑀸𑀬𑀢𑀦𑀁 ¶ 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀢𑁆𑀢𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀢𑀢𑁆𑀣 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀦𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄, 𑀦𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑀬𑁄, 𑀬𑀣𑀸 𑀧𑀦 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄, 𑀏𑀯𑀁 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄, 𑀩𑀮𑀯𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀩𑀮𑀯𑀓𑀸𑀭𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸 𑀯𑀺𑀪𑀢𑁆𑀢𑁄. 𑀢𑀢𑁆𑀣 𑀬𑀁 𑀆𑀭𑀫𑁆𑀫𑀡𑀁 𑀕𑀭𑀼𑀁 𑀓𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀺𑀬𑀫𑀢𑁄 𑀢𑁂𑀲𑀁 𑀆𑀭𑀫𑁆𑀫𑀡𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀇𑀢𑀺 𑀕𑀭𑀼𑀓𑀸𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀧𑀺 ¶ 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀬 𑀅𑀦𑀦𑁆𑀢𑀭𑀢𑀸, 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀧𑀘𑁆𑀙𑀺𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂 𑀩𑀮𑀯𑀢𑀸𑀬 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀯𑀺𑀦𑀸𑀧𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀏𑀯𑀁 𑀅𑀦𑀦𑁆𑀢𑀭𑀘𑀺𑀢𑁆𑀢𑀁 𑀯𑀺𑀦𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺, 𑀇𑀢𑀺 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀅𑀦𑀦𑁆𑀢𑀭𑁄𑀯 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀧𑀓𑀢𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀺𑀢𑁄 𑀯𑀸 𑀲𑀤𑁆𑀥𑀸𑀲𑀻𑀮𑀸𑀤𑀺𑀉𑀧𑀲𑁂𑀯𑀺𑀢𑁄 𑀯𑀸 𑀉𑀢𑀼𑀪𑁄𑀚𑀦𑀸𑀤𑀺𑀧𑀓𑀢𑀺𑀬𑀸𑀬𑁂𑀯 𑀯𑀸 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀇𑀢𑀺 𑀧𑀭𑀽𑀧𑀦𑀺𑀲𑁆𑀲𑀬𑁂𑀦 𑀅𑀫𑀺𑀲𑁆𑀲𑁄𑀢𑀺 𑀅𑀢𑁆𑀣𑁄. 𑀲𑁄 𑀘 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺; 𑀯𑀺𑀧𑀲𑁆𑀲𑀦𑀁, 𑀫𑀕𑁆𑀕𑀁, 𑀅𑀪𑀺𑀜𑁆𑀜𑀁, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺; 𑀲𑀻𑀮𑀁, 𑀲𑀼𑀢𑀁, 𑀘𑀸𑀕𑀁, 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀇𑀫𑁂𑀲𑀁 𑀲𑀤𑁆𑀥𑀸𑀤𑀻𑀦𑀁 𑀯𑀲𑁂𑀦 𑀩𑀳𑀼𑀥𑀸 𑀯𑀺𑀪𑀢𑁆𑀢𑁄, 𑀏𑀯𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀺𑀯𑀺𑀥𑁄. 𑀦𑀺𑀤𑁆𑀤𑁂𑀲𑁂 𑀧𑀦𑀸𑀬𑀁 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 ¶ …𑀧𑁂… 𑀅𑀓𑀼𑀲𑀮𑀸𑀦𑀁 𑀓𑁂𑀲𑀜𑁆𑀘𑀺…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀓𑀼𑀲𑀮𑀸𑀦𑀁…𑀧𑁂… 𑀓𑀼𑀲𑀮𑀸𑀦𑀁 𑀓𑁂𑀲𑀜𑁆𑀘𑀺…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁, 𑀓𑀼𑀲𑀮𑀸𑀦𑀁, 𑀅𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀕𑁆𑀕𑀮𑁄𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑁂𑀦𑀸𑀲𑀦𑀫𑁆𑀧𑀻’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀧𑀼𑀭𑀺𑀫𑀸𑀢𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀲𑀫𑀦𑀦𑁆𑀢𑀭𑀸𑀢𑀻𑀢𑀸𑀯 𑀮𑀩𑁆𑀪𑀦𑁆𑀢𑀺.

𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀲𑀼 ¶ 𑀧𑀦 𑀦𑀸𑀦𑀸𑀯𑀺𑀥𑀺𑀯𑀲𑁂𑀦 𑀧𑀼𑀭𑀺𑀫𑀢𑀭𑀸𑀯𑀸𑀢𑀺 𑀢𑀬𑁄𑀧𑀺 𑀭𑀸𑀲𑀻 𑀓𑀼𑀲𑀮𑁂𑀦 𑀓𑀼𑀲𑀮𑀧𑀤𑁂 𑀮𑀩𑁆𑀪𑀦𑁆𑀢𑀺. 𑀓𑀼𑀲𑀮𑁂𑀦 𑀧𑀦𑀸𑀓𑀼𑀲𑀮𑁂 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀦 𑀮𑀩𑁆𑀪𑀦𑁆𑀢𑀺, 𑀢𑁂𑀦𑀸𑀳 ‘‘𑀓𑁂𑀲𑀜𑁆𑀘𑀻’’𑀢𑀺. 𑀇𑀤𑀁 𑀳𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀧𑀦 𑀤𑀸𑀦𑀁 𑀤𑀢𑁆𑀯𑀸…𑀧𑁂… 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀳𑀸𑀯𑀸𑀭𑁂 𑀆𑀕𑀢𑀁 𑀇𑀫𑀁 𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀓𑀼𑀲𑀮𑁂𑀦 𑀓𑀼𑀲𑀮𑀧𑀤𑁂 𑀳𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀦 𑀮𑀩𑁆𑀪𑀦𑁆𑀢𑀺, 𑀢𑁂𑀦𑀸𑀳 ‘‘𑀓𑁂𑀲𑀜𑁆𑀘𑀻’’𑀢𑀺. 𑀇𑀤𑀁 𑀧𑀦 ‘‘𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀧𑀸𑀡𑀁 𑀳𑀦𑁆𑀢𑁆𑀯𑀸 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑀸𑀯𑀸𑀭𑁂 𑀆𑀕𑀢𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀅𑀓𑀼𑀲𑀮𑀁 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀺, 𑀢𑀣𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀧𑀺 𑀦 𑀳𑁄𑀢𑀺. 𑀦 𑀳𑀺 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀓𑀼𑀲𑀮𑀁 𑀧𑀯𑀢𑁆𑀢𑀢𑀺.

𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀧𑀤𑁂 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀯 𑀦 𑀮𑀩𑁆𑀪𑀢𑀺. 𑀦 𑀳𑀺 𑀢𑀁 𑀅𑀩𑁆𑀬𑀸𑀓𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀅𑀦𑀦𑁆𑀢𑀭𑀸 𑀧𑀦𑀲𑁆𑀲 𑀳𑁄𑀦𑁆𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀯𑀼𑀢𑁆𑀢𑀁. 𑀲𑁂𑀲𑀧𑀤𑁂𑀲𑀼 𑀢𑀬𑁄𑀧𑀺 𑀉𑀧𑀦𑀺𑀲𑁆𑀲𑀬𑀸 𑀮𑀩𑁆𑀪𑀦𑁆𑀢𑁂𑀯. ‘‘𑀧𑀼𑀕𑁆𑀕𑀮𑁄𑀧𑀺, 𑀲𑁂𑀦𑀸𑀲𑀦𑀫𑁆𑀧𑀻’’𑀢𑀺 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯𑁂𑀢𑁆𑀣 𑀯𑀼𑀢𑁆𑀢𑀁, 𑀉𑀢𑀼𑀪𑁄𑀚𑀦𑀸𑀤𑀬𑁄 𑀘𑁂𑀢𑁆𑀣 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀘𑁆𑀘𑀬𑁂 𑀏𑀓𑀘𑁆𑀘𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀘𑀢𑀼𑀪𑀽𑀫𑀓𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀦𑀬𑁄.

𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀭𑀽𑀧𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄, 𑀲𑁄 𑀧𑀲𑀸𑀤𑀢𑀩𑁆𑀩𑀺𑀲𑀬𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁄. 𑀦𑀺𑀤𑁆𑀤𑁂𑀲𑁂 𑀘 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 ¶ 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 ¶ …𑀧𑁂… 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸…𑀧𑁂… 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬…𑀧𑁂… 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀓𑀺𑀜𑁆𑀘𑀺𑀓𑀸𑀮𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦, 𑀫𑀦𑁄𑀤𑁆𑀯𑀸𑀭𑁂 𑀯𑀢𑁆𑀣𑀼𑀯𑀲𑁂𑀦𑁂𑀯 𑀘𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑁄. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 ‘‘𑀅𑀭𑀳𑀸 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀻’’𑀢𑀺 𑀆𑀕𑀢𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑁂𑀧𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀭𑀽𑀧𑀸𑀦𑀁 𑀯𑀲𑁂𑀦 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀫𑁆𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀅𑀬𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀦𑀬𑁄.

𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀅𑀭𑀽𑀧𑀥𑀫𑁆𑀫𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸 𑀯𑀺𑀬. 𑀦𑀺𑀤𑁆𑀤𑁂𑀲𑁂𑀧𑀺 𑀘𑀲𑁆𑀲 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀓𑀸𑀬𑀲𑁆𑀲. 𑀥𑀫𑁆𑀫𑀢𑁄 𑀘𑀸𑀬𑀁 𑀞𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁂 𑀆𑀭𑀼𑀧𑁆𑀧𑀯𑀺𑀧𑀸𑀓𑁂 𑀅𑀯𑀲𑁂𑀲𑀸 𑀲𑀩𑁆𑀩𑁂 𑀘𑀢𑀼𑀪𑀽𑀫𑀓𑀸 𑀅𑀭𑀽𑀧𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀦𑀬𑁄.

𑀆𑀲𑁂𑀯𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀕𑀦𑁆𑀣𑀸𑀤𑀺𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬. 𑀲𑁄 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀯𑀲𑁂𑀦 𑀢𑀺𑀯𑀺𑀥𑁄. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀲𑀩𑁆𑀩𑀢𑁆𑀣 𑀲𑀫𑀦𑀦𑁆𑀢𑀭𑀸𑀢𑀻𑀢𑀸𑀯 𑀤𑀝𑁆𑀞𑀩𑁆𑀩𑀸, 𑀢𑀢𑁆𑀣𑀸𑀧𑀺 ¶ 𑀓𑀼𑀲𑀮𑀸𑀤𑀬𑁄 𑀅𑀩𑁆𑀬𑀸𑀓𑀢𑀸𑀤𑀻𑀦𑀁 𑀪𑀺𑀦𑁆𑀦𑀚𑀸𑀢𑀺𑀓𑀸𑀦𑀁 𑀲𑀫𑀦𑀦𑁆𑀢𑀭𑀸𑀦𑀫𑁆𑀧𑀺 𑀯𑀸𑀲𑀦𑀸𑀲𑀗𑁆𑀔𑀸𑀢𑁂𑀦 𑀆𑀲𑁂𑀯𑀦𑁂𑀦 𑀧𑀕𑀼𑀡𑀢𑀭𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀪𑀽𑀫𑀺𑀢𑁄, 𑀧𑀦 𑀆𑀭𑀫𑁆𑀫𑀡𑀢𑁄 𑀘 𑀪𑀺𑀦𑁆𑀦𑀸𑀧𑀺 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀓𑀼𑀲𑀮𑀓𑀺𑀭𑀺𑀬𑀸 𑀅𑀢𑁆𑀢𑀦𑀸 𑀲𑀤𑀺𑀲𑀯𑁂𑀤𑀦𑀸𑀦𑀫𑁂𑀯 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑁆𑀧𑀺, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀜𑁆𑀘 𑀅𑀦𑀼𑀮𑁄𑀫𑀓𑀼𑀲𑀮𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀕𑁄𑀢𑁆𑀭𑀪𑀼𑀓𑀼𑀲𑀮𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯. 𑀮𑁄𑀓𑀼𑀢𑁆𑀢𑀭𑁄 𑀧𑀦 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀢𑀣𑀸 𑀯𑀺𑀧𑀸𑀓𑁄 𑀓𑀫𑁆𑀫𑀧𑀭𑀺𑀡𑀸𑀫𑀺𑀢𑀢𑁆𑀢𑀸𑀢𑀺 𑀅𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑁂 𑀦𑀬𑁄.

𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑁄. 𑀲𑁄 𑀦𑀸𑀦𑀓𑁆𑀔𑀡𑀺𑀓𑀸𑀬 ¶ 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀘𑁂𑀯 𑀲𑀳𑀚𑀸𑀢𑀸𑀬 𑀘 𑀲𑀩𑁆𑀩𑀸𑀬𑀧𑀺 𑀘𑁂𑀢𑀦𑀸𑀬 𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀦𑀺𑀤𑁆𑀤𑁂𑀲𑁂𑀧𑀺 𑀘𑀲𑁆𑀲 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁…𑀧𑁂… 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀤𑁆𑀯𑀺𑀥𑀸𑀯 𑀯𑀼𑀢𑁆𑀢𑁄. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀘𑁂𑀢𑀦𑀸𑀓𑀫𑁆𑀫𑀫𑁂𑀯. 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀦𑁆𑀢𑀺 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀚𑀸𑀦𑀁 𑀭𑀽𑀧𑀸𑀦𑀁 𑀓𑀝𑀢𑁆𑀢𑀸 𑀏𑀯, 𑀓𑀫𑁆𑀫𑀫𑁆𑀧𑀺 𑀓𑀸𑀮𑀦𑁆𑀢𑀭𑁂𑀬𑁂𑀯 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑁂𑀢𑀺, 𑀦 𑀢𑀼 𑀯𑀺𑀦𑀝𑁆𑀞𑀢𑁆𑀢𑀸 𑀞𑀺𑀢𑀢𑁆𑀢𑀸 𑀢𑀁 𑀯𑀸 𑀞𑀺𑀢𑀁 𑀧𑀦 𑀓𑀫𑁆𑀫𑀁 𑀦 𑀚𑀦𑁂𑀢𑀺. 𑀏𑀯𑀁 𑀢𑀁𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀬𑀁 𑀓𑀫𑁆𑀫𑀧𑀘𑁆𑀘𑀬𑁂 𑀦𑀬𑁄.

𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀯𑀺𑀧𑀸𑀓𑀥𑀫𑁆𑀫𑁄 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀲𑁄 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀲𑀩𑁆𑀩𑀢𑁆𑀣 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸𑀳 𑀲𑀩𑁆𑀩𑀧𑀜𑁆𑀳𑀸𑀯𑀸𑀭𑁂 𑁋 ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 ¶ 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂… 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 ‘‘𑀯𑀺𑀧𑀸𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀧𑀜𑁆𑀳𑀸𑀯𑀸𑀭𑁂 𑀯𑀼𑀢𑁆𑀢𑀯𑀺𑀥𑀸𑀦𑀁 𑀲𑀦𑁆𑀥𑀸𑀬 𑀲𑀸𑀯𑀲𑁂𑀲𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀯𑀺𑀧𑀸𑀓𑀧𑀘𑁆𑀘𑀬𑁂 𑀦𑀬𑁄.

𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲…𑀧𑁂… 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀘𑀢𑀼𑀲𑀫𑀼𑀝𑁆𑀞𑀸𑀦𑀫𑀼𑀧𑀕𑀢𑀸 𑀑𑀚𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀦𑀸𑀫. 𑀲𑁄 𑀬𑀲𑁆𑀫𑀸 𑀆𑀳𑀸𑀭𑀽𑀧𑀲𑁂𑀯𑀻𑀦𑀜𑁆𑀜𑁂𑀯 𑀅𑀚𑁆𑀛𑁄𑀳𑀝𑀸𑀳𑀸𑀭𑀉𑀢𑀼𑀚𑀸𑀳𑀸𑀭𑀽𑀧𑀢𑁆𑀣𑀤𑁆𑀥𑁄 𑀏𑀯 𑀘 𑀓𑀫𑁆𑀫𑀚𑀸𑀤𑀺𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀧𑀯𑀢𑁆𑀢𑀢𑀺, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀓𑀩𑀴𑀻𑀓𑀸𑀢𑀩𑁆𑀩𑀉𑀢𑀼𑀚𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀘𑀸𑀬𑀁 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁄, 𑀯𑀺𑀲𑁂𑀲𑀢𑁄 𑀧𑀦 𑀆𑀳𑀸𑀭𑀚𑀭𑀽𑀧𑀲𑁆𑀲 𑀚𑀦𑀓𑁄 𑀘𑁂𑀯 𑀅𑀦𑀼𑀧𑀸𑀮𑀓𑁄 𑀘 𑀳𑀼𑀢𑁆𑀯𑀸 𑀲𑁂𑀲𑀢𑀺𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀅𑀦𑀼𑀧𑀸𑀮𑀓𑁄 𑀏𑀯 𑀳𑀼𑀢𑁆𑀯𑀸 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺 𑀕𑀳𑀺𑀢𑀸𑀦𑁂𑀯. 𑀧𑀜𑁆𑀳𑀸𑀯𑀸𑀭𑁂 𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀆𑀳𑀸𑀭𑀧𑀘𑁆𑀘𑀬𑁂 𑀦𑀬𑁄.

𑀅𑀥𑀺𑀧𑀢𑀺𑀬𑀝𑁆𑀞𑁂𑀦 ¶ 𑀉𑀧𑀓𑀸𑀭𑀓𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸 𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀓𑀧𑁆𑀧𑀸𑀤𑀻𑀦𑀁 𑀩𑀻𑀚𑀪𑀽𑀢𑀸𑀦𑀺, 𑀦𑁂𑀯 𑀧𑀦 𑀢𑁂𑀲𑀁, 𑀦 𑀅𑀜𑁆𑀜𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀘𑁆𑀘𑀬𑀢𑀁 𑀨𑀭𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀦 ¶ 𑀢𑁂𑀲𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀨𑀭𑀦𑁆𑀢𑀻𑀢𑀺 𑀩𑀸𑀯𑀻𑀲𑀢𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀬𑁄 𑀧𑀜𑁆𑀘 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀯 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁂𑀯, 𑀲𑁂𑀲𑀸 𑀭𑀽𑀧𑀸𑀭𑀽𑀧𑀸𑀦𑀁. 𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀧𑀜𑁆𑀳𑀸𑀯𑀸𑀭𑁂 𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀦𑀬𑁄.

𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀯𑁂𑀤𑀦𑀸𑀢𑁆𑀢𑀬𑀁, 𑀏𑀓𑀕𑁆𑀕𑀢𑀜𑁆𑀘 𑀲𑁂𑀲𑀸𑀦𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀳𑀺 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸 𑀢𑁂𑀲𑀼 𑀯𑁂𑀤𑀦𑁂𑀓𑀕𑁆𑀕𑀢𑀸 𑀉𑀧𑀦𑀺𑀚𑁆𑀛𑀸𑀬𑀦𑀸𑀓𑀸𑀭𑀲𑁆𑀲 𑀅𑀪𑀸𑀯𑁂𑀦 𑀛𑀸𑀦𑀗𑁆𑀕𑁂𑀲𑀼 𑀦 𑀉𑀤𑁆𑀥𑀝𑀸, 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 ‘‘𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀇𑀥𑀸𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀫𑀺𑀦𑀸 𑀘 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀕𑀳𑀺𑀢𑀁. 𑀧𑀜𑁆𑀳𑀸𑀯𑀸𑀭𑁂𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀛𑀸𑀦𑀧𑀘𑁆𑀘𑀬𑁂 𑀦𑀬𑁄.

𑀬𑀢𑁄 𑀢𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀤𑁆𑀯𑀸𑀤𑀲 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀢𑁆𑀣𑀸𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀫𑀺𑀦𑀸 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑀁. 𑀧𑀜𑁆𑀳𑀸𑀯𑀸𑀭𑁂 𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀘𑁂𑀢𑁆𑀣 𑀯𑀺𑀚𑁆𑀚𑀫𑀸𑀦𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀅𑀬𑀁 𑀫𑀕𑁆𑀕𑀧𑀘𑁆𑀘𑀬𑁂 𑀦𑀬𑁄.

𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 ¶ 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 ¶ 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀦𑀬𑁄.

𑀏𑀓𑀯𑀢𑁆𑀣𑀼𑀓𑀸𑀤𑀺𑀪𑀸𑀯𑀸𑀦𑀼𑀧𑀕𑀫𑁂𑀦 𑀉𑀧𑀓𑀸𑀭𑀓𑀸 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁, 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀻𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀲𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁…𑀧𑁂… 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀧𑀼𑀭𑁂𑀚𑀸𑀢𑀁 𑀧𑀦 𑀙𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁…𑀧𑁂… 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀸𑀫𑀜𑁆𑀜𑀢𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀭𑀽𑀧𑀺𑀦𑁄𑀢𑀺 𑀇𑀤𑀁 𑀙𑀯𑀢𑁆𑀣𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀭𑀽𑀧𑀸𑀤𑀬𑁄 𑀧𑀦 𑀆𑀭𑀫𑁆𑀫𑀡𑀥𑀫𑁆𑀫𑀸 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬𑀸𑀪𑀸𑀯𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀦 𑀯𑀼𑀢𑁆𑀢𑀸. 𑀘𑀓𑁆𑀔𑀸𑀤𑀻𑀦𑀁 𑀳𑀺 𑀯𑀢𑁆𑀣𑀽𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀅𑀭𑀽𑀧𑀥𑀫𑁆𑀫𑀸 𑀦𑀺𑀓𑁆𑀔𑀫𑀦𑁆𑀢𑀸 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀳𑁄𑀢𑀺. 𑀧𑀜𑁆𑀳𑀸𑀯𑀸𑀭𑁂𑀧𑀺 𑀳𑀺 ‘‘𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁…𑀧𑁂… 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺𑀆𑀤𑀺𑀦𑀸 𑀙 𑀯𑀢𑁆𑀣𑀽𑀦𑁂𑀯 𑀉𑀤𑁆𑀥𑀝𑀸𑀦𑀺, 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀻𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀦𑀺𑀩𑁆𑀩𑀸𑀦𑀁 𑀅𑀭𑀽𑀧𑀫𑁆𑀧𑀺 𑀲𑀫𑀸𑀦𑀁 𑀭𑀽𑀧𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀲𑀩𑁆𑀩𑀣𑀸 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀪𑀸𑀯𑀢𑁄, ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 (𑀥𑀸𑀢𑀼. 𑁩) 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀦𑀬𑁄.

𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀢𑁆𑀣𑀺𑀧𑀘𑁆𑀘𑀬𑁄, 𑀲𑁄 𑀦𑀺𑀤𑁆𑀤𑁂𑀲𑁂 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 ¶ 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁, 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁…𑀧𑁂… 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸…𑀧𑁂… 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀘 𑀩𑀳𑀼𑀥𑀸 𑀦𑀺𑀤𑁆𑀤𑀺𑀝𑁆𑀞𑁄, 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀯𑀲𑁂𑀦 𑀆𑀕𑀢𑀢𑁆𑀢𑀸 𑀧𑀘𑁆𑀙𑀸𑀚𑀸𑀢𑀓𑀩𑀴𑀻𑀓𑀸𑀭𑀆𑀳𑀸𑀭𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦𑀸𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀕𑀳𑁂𑀢𑀩𑁆𑀩𑁄𑀯𑀸𑀢𑀺 𑀅𑀬𑀁 𑀅𑀢𑁆𑀣𑀺𑀧𑀘𑁆𑀘𑀬𑁂 𑀦𑀬𑁄.

𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑀯𑀲𑁂𑀦 𑀉𑀧𑀓𑀸𑀭𑀓𑀸 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 ¶ 𑀅𑀭𑀽𑀧𑀥𑀫𑁆𑀫𑀸 𑀦𑀢𑁆𑀣𑀺𑀧𑀘𑁆𑀘𑀬𑁄, 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀸𑀫𑀜𑁆𑀜𑀢𑁄𑀯 𑀦𑀺𑀤𑁆𑀤𑀺𑀝𑁆𑀞𑁄. 𑀲𑀩𑁆𑀩𑀣𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑀤𑀺𑀲𑀢𑀸𑀬 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀦𑀬𑁂𑀦𑁂𑀯𑁂𑀢𑁆𑀣 𑀯𑀺𑀲𑁂𑀲𑁄 𑀜𑀸𑀢𑀩𑁆𑀩𑁄𑀢𑀺 𑀅𑀬𑀁 𑀦𑀢𑁆𑀣𑀺𑀧𑀘𑁆𑀘𑀬𑁂 𑀦𑀬𑁄.

𑀦𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑀸𑀯 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀲𑀳 𑀦𑀺𑀤𑁆𑀤𑁂𑀲𑁂𑀦 𑀦𑀢𑁆𑀣𑀺𑀧𑀘𑁆𑀘𑀬𑀲𑀤𑀺𑀲𑁄𑀯𑀸𑀢𑀺.

𑀅𑀯𑀺𑀕𑀢𑀧𑀘𑁆𑀘𑀬𑁄𑀧𑀺 𑀲𑀩𑁆𑀩𑀣𑀸 𑀅𑀢𑁆𑀣𑀺𑀧𑀘𑁆𑀘𑀬𑀲𑀤𑀺𑀲𑁄𑀯, 𑀤𑁂𑀲𑀦𑀸𑀯𑀺𑀮𑀸𑀲𑁂𑀦, 𑀯𑁂𑀦𑁂𑀬𑁆𑀬𑀯𑀲𑁂𑀦 𑀯𑀸 𑀅𑀬𑀁 𑀤𑀼𑀓𑁄 𑀯𑀼𑀢𑁆𑀢𑁄𑀢𑀺 𑀅𑀬𑀁 𑀅𑀯𑀺𑀕𑀢𑀧𑀘𑁆𑀘𑀬𑁂 𑀦𑀬𑁄.

𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄

𑀇𑀫𑁂𑀲𑀼 𑀧𑀦 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀜𑀸𑀡𑀘𑀸𑀭𑀲𑁆𑀲 𑀯𑀺𑀲𑀤𑀪𑀸𑀯𑀢𑁆𑀣𑀁 𑁋

𑀥𑀫𑁆𑀫𑀢𑁄 𑀓𑀸𑀮𑀢𑁄 𑀘𑁂𑀯, 𑀏𑀓𑀲𑁆𑀲𑀸𑀦𑁂𑀓𑀧𑀘𑁆𑀘𑀬𑀸;

𑀅𑀦𑁂𑀓𑁂𑀲𑀜𑁆𑀘 𑀥𑀫𑁆𑀫𑀸𑀦𑀁, 𑀏𑀓𑀧𑀘𑁆𑀘𑀬𑀪𑀸𑀯𑀢𑁄.

𑀲𑀪𑀸𑀕𑀸 ¶ 𑀯𑀺𑀲𑀪𑀸𑀕𑀸 𑀘, 𑀬𑀼𑀕𑀴𑀸 𑀚𑀦𑀓𑀸𑀤𑀺𑀢𑁄;

𑀲𑀩𑁆𑀩𑀝𑁆𑀞𑀸𑀦𑀸𑀤𑀺𑀪𑁂𑀤𑀸 𑀘, 𑀭𑀽𑀧𑀸𑀭𑀽𑀧𑀯𑀺𑀓𑀧𑁆𑀧𑀢𑁄;

𑀪𑀯𑀢𑁄 𑀲𑀗𑁆𑀕𑀳𑀸 𑀜𑁂𑀬𑁆𑀬𑁄, 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑀇𑀫𑁂𑀲𑀼 𑀳𑀺 𑀧𑀘𑁆𑀘𑀬𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑁄 𑀢𑀸𑀯 𑀦𑀸𑀫𑀭𑀽𑀧𑀥𑀫𑁆𑀫𑁂𑀲𑀼 𑀦𑀸𑀫𑀥𑀫𑁆𑀫𑁂𑀓𑀤𑁂𑀲𑁄, 𑀢𑀣𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀓𑀫𑁆𑀫𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸, 𑀢𑀣𑀸 𑀆𑀲𑁂𑀯𑀦𑀯𑀺𑀧𑀸𑀓𑀧𑀘𑁆𑀘𑀬𑀸, 𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸𑀧𑀺 𑀯𑀺𑀧𑀸𑀓𑀥𑀫𑁆𑀫𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀙𑀸𑀚𑀸𑀢𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀗𑁆𑀕𑀳𑀢𑁄 𑀦𑀸𑀫𑁂𑀓𑀤𑁂𑀲𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯, 𑀲𑁂𑀲𑀸 𑀬𑀣𑀸𑀮𑀸𑀪𑀯𑀲𑁂𑀦 𑀦𑀸𑀫𑀭𑀽𑀧𑀥𑀫𑁆𑀫𑀸. 𑀢𑀢𑁆𑀣 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀲𑀼 𑀧𑀜𑁆𑀜𑀢𑁆𑀢𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀅𑀬𑀁 𑀥𑀫𑁆𑀫𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀸𑀮𑀢𑁄 ¶ 𑀧𑀦 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸 𑀧𑀦𑁆𑀦𑀭𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀧𑀜𑁆𑀘 𑀅𑀢𑀻𑀢𑀸 𑀏𑀯 𑀳𑀼𑀢𑁆𑀯𑀸, 𑀓𑀫𑁆𑀫𑀧𑀘𑁆𑀘𑀬𑁄 𑀧𑀦𑁂𑀓𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀧𑀺 𑀅𑀢𑀻𑀢𑁄𑀧𑀺 𑀳𑀼𑀢𑁆𑀯𑀸, 𑀲𑁂𑀲𑀸 𑀆𑀭𑀫𑁆𑀫𑀡𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀢𑀬𑁄𑀧𑀺 𑀢𑁂𑀓𑀸𑀮𑀺𑀓𑀸𑀧𑀺, 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑀸𑀧𑀺 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀓𑀸𑀮𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀓𑀲𑁆𑀲𑀸𑀦𑁂𑀓𑀧𑀘𑁆𑀘𑀬𑀸𑀢𑀺 𑀏𑀓𑀥𑀫𑁆𑀫𑀲𑁆𑀲, 𑀏𑀓𑀧𑀘𑁆𑀘𑀬𑀲𑁆𑀲 𑀘 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄. 𑀓𑀣𑀁? 𑀳𑁂𑀢𑀼𑀧𑀘𑁆𑀘𑀬𑁂 𑀢𑀸𑀯 𑀅𑀫𑁄𑀳𑁄 𑀏𑀓𑁄 𑀥𑀫𑁆𑀫𑁄, 𑀲𑁄 𑀧𑀼𑀭𑁂𑀚𑀸𑀢𑀓𑀫𑁆𑀫𑀆𑀳𑀸𑀭𑀛𑀸𑀦𑀯𑀚𑁆𑀚𑀸𑀦𑀁 𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀅𑀜𑁆𑀜𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀯𑀲𑁂𑀦 𑀯𑀸 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺 ¶ , 𑀢𑀣𑀸 𑀅𑀮𑁄𑀪𑀸𑀤𑀬𑁄, 𑀢𑁂𑀲𑀼 𑀧𑀦 𑀅𑀮𑁄𑀪𑀸𑀤𑁄𑀲𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑁂 𑀢𑀬𑁄 𑀅𑀯𑀺𑀧𑀸𑀓𑀪𑀽𑀢𑀸 𑀮𑁄𑀪𑀤𑁄𑀲𑀫𑁄𑀳𑀸 𑀯𑀺𑀧𑀸𑀓𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀺, 𑀢𑁂 𑀧𑀦 𑀅𑀫𑁄𑀳𑀯𑀚𑁆𑀚𑀺𑀢𑀸 𑀧𑀜𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀲𑁂𑀲𑀸𑀧𑀺 𑀅𑀯𑀺𑀧𑀸𑀓𑀪𑀽𑀢𑀸.

𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀫𑀦𑁄𑀥𑀸𑀢𑀼𑀬𑀸, 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘. 𑀲𑀳𑁂𑀢𑀼𑀓𑀸𑀬 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀦𑀫𑁆𑀧𑀺 𑀯𑀲𑁂𑀦, 𑀲𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀸𑀬𑀢𑀦𑀁 𑀧𑀦 𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑀲𑁂𑀦𑀸𑀧𑀺 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀲𑀫𑁆𑀧𑀺 𑀲𑀢𑁆𑀢𑀦𑁆𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀢𑀢𑁆𑀣 𑀅𑀭𑀽𑀧𑀸𑀦𑀁 𑀧𑀦 𑀭𑀽𑀧𑀸𑀦𑀁 𑀯𑀸 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀫𑀢𑁆𑀢𑀫𑁂𑀯 𑀉𑀢𑁆𑀢𑀭𑀺 𑀮𑀩𑁆𑀪𑀢𑀺.

𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀯𑀼𑀢𑁆𑀢𑀦𑀬𑁄𑀯. 𑀲𑀳𑀚𑀸𑀢𑀸𑀥𑀺𑀧𑀢𑀻𑀲𑀼 𑀘𑀺𑀢𑁆𑀢𑀁 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀛𑀸𑀦𑀫𑀕𑁆𑀕𑀯𑀚𑁆𑀚𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄 𑀅𑀧𑀭𑁂𑀲𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀤𑀲𑀦𑁆𑀦𑀁 𑀯𑀲𑁂𑀦𑁂𑀯, 𑀢𑀣𑀸 𑀯𑀻𑀭𑀺𑀬𑀁 𑀆𑀳𑀸𑀭𑀧𑀘𑁆𑀘𑀬𑀯𑀚𑁆𑀚𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑀲𑀳𑀺𑀢𑀸𑀦𑀁 ¶ 𑀯𑀲𑁂𑀦, 𑀙𑀦𑁆𑀤𑁄 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀯𑀻𑀫𑀁𑀲𑀸 𑀳𑁂𑀢𑀼𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑀸𑀯.

𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀢𑀸𑀯 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀫𑀕𑁆𑀕𑀧𑀘𑁆𑀘𑀬𑀯𑀚𑁆𑀚𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 ¶ , 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑀛𑀸𑀦𑀯𑀚𑁆𑀚𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀯𑀲𑁂𑀦, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀯𑀚𑁆𑀚𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁂𑀦, 𑀢𑀣𑀸 𑀘𑁂𑀢𑀦𑀸 𑀓𑀫𑁆𑀫𑀲𑀳𑀺𑀢𑀸𑀦𑀁, 𑀯𑀺𑀢𑀓𑁆𑀓𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸𑀦𑀁 𑀛𑀸𑀦𑀫𑀕𑁆𑀕𑀲𑀳𑀺𑀢𑀸𑀦𑀁, 𑀯𑀺𑀘𑀸𑀭𑁄, 𑀧𑀻𑀢𑀺 𑀘 𑀆𑀦𑀦𑁆𑀢𑀭𑀺𑀬𑀸𑀦𑀁 𑀫𑀕𑁆𑀕𑀯𑀚𑁆𑀚𑀸𑀦𑀁, 𑀏𑀓𑀕𑁆𑀕𑀢𑀸 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀯𑀚𑁆𑀚𑀸𑀦𑀁 𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦, 𑀲𑀤𑁆𑀥𑀸, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀅𑀦𑀦𑁆𑀢𑀭𑀸𑀦𑀁 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀫𑀕𑁆𑀕𑀯𑀚𑁆𑀚𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀲𑀢𑀺 𑀫𑀕𑁆𑀕𑀲𑀳𑀺𑀢𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸, 𑀳𑀺𑀭𑀺𑀑𑀢𑁆𑀢𑀧𑁆𑀧𑀓𑀸𑀬𑀧𑀲𑁆𑀲𑀤𑁆𑀥𑀸𑀤𑀺𑀙𑀬𑀼𑀕𑀸, 𑀬𑁂𑀯𑀸𑀧𑀦𑀓𑁂𑀲𑀼 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀘 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁, 𑀯𑀺𑀭𑀢𑀺𑀬𑁄 𑀧𑀦 𑀫𑀕𑁆𑀕𑀲𑀳𑀺𑀢𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀢𑁄 𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀯𑀲𑁂𑀦, 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀢𑁂𑀳𑀺 𑀘𑁂𑀯 𑀓𑀫𑁆𑀫𑀸𑀳𑀸𑀭𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦, 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀫𑀸𑀦𑁄 𑀣𑀺𑀦𑀁 𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀦𑁆𑀢𑀺 𑀇𑀫𑁂 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀯𑀚𑁆𑀚𑀸𑀦𑀁 𑀲𑁄𑀴𑀲𑀦𑁆𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀢𑀢𑁄 𑀅𑀥𑀺𑀧𑀢𑀺𑀯𑀚𑁆𑀚𑀸𑀦𑀁 𑀧𑀦𑁆𑀦𑀭𑀲𑀦𑁆𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀦𑀁 𑀧𑀦𑁂𑀢𑁂𑀲𑀁 𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀦𑀢𑁆𑀣𑀺𑀯𑀺𑀕𑀢𑀸𑀦𑀁 𑀅𑀧𑀭𑁂𑀲𑀁 𑀙𑀦𑁆𑀦𑀁 𑀯𑀲𑁂𑀦 𑀘. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦𑁂𑀯 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀳𑀚𑀸𑀢𑀧𑀘𑁆𑀘𑀬𑁂 𑀫𑀳𑀸𑀪𑀽𑀢𑀸𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀦𑀯𑀦𑁆𑀦𑀁, 𑀳𑀤𑀬𑀯𑀢𑁆𑀣𑀼 𑀢𑁂𑀲𑀜𑁆𑀜𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀲𑀳𑀺𑀢𑀸𑀦𑀁 𑀯𑀲𑁂𑀦. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀦𑀯𑀦𑁆𑀦𑀁 𑀯𑀲𑁂𑀦. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀬𑀢𑀦𑀸𑀤𑀻𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀙𑀦𑁆𑀦𑀁 𑀯𑀲𑁂𑀦. 𑀆𑀳𑀸𑀭𑀧𑀘𑁆𑀘𑀬𑁂 𑀑𑀚𑀸 ¶ 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀸𑀳𑀸𑀭𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀙𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀁𑀢𑀁𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀲𑀩𑁆𑀩𑀢𑁆𑀣 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀅𑀬𑀁 𑀏𑀓𑀲𑁆𑀲𑀸𑀦𑁂𑀓𑀧𑀘𑁆𑀘𑀬𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀦𑁂𑀓𑁂𑀲𑀜𑁆𑀘 ¶ 𑀥𑀫𑁆𑀫𑀸𑀦𑀁, 𑀏𑀓𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀞𑀧𑁂𑀢𑁆𑀯𑀸 𑀓𑀫𑁆𑀫𑀧𑀘𑁆𑀘𑀬𑀁 𑀲𑁂𑀲𑁂𑀲𑀼 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀦𑁂𑀓𑁂 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀢𑁄 𑀏𑀓𑁂𑀓𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀫𑁆𑀫𑀧𑀘𑁆𑀘𑀬𑁄 𑀧𑀦 𑀘𑁂𑀢𑀦𑀸 𑀏𑀓𑀥𑀫𑁆𑀫𑁄𑀯𑀸𑀢𑀺 𑀅𑀬𑀁 𑀅𑀦𑁂𑀓𑀥𑀫𑁆𑀫𑀸𑀦𑀁 𑀏𑀓𑀧𑀘𑁆𑀘𑀬𑀪𑀸𑀯𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀪𑀸𑀕𑀸 𑀯𑀺𑀲𑀪𑀸𑀕𑀸 𑀘𑀸𑀢𑀺 𑀏𑀢𑁂𑀲𑀼 𑀳𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀲𑀪𑀸𑀕𑀸, 𑀢𑀣𑀸 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀦𑁂𑀢𑁆𑀣 𑀧𑀘𑁆𑀙𑀸𑀚𑀸𑀢𑁂𑀦 𑀯𑀺𑀲𑀪𑀸𑀕𑁄, 𑀢𑀣𑀸 𑀲𑀫𑁆𑀧𑀬𑀼𑀢𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦, 𑀅𑀢𑁆𑀣𑀺 𑀦𑀢𑁆𑀣𑀺𑀦𑀸, 𑀯𑀺𑀕𑀢𑁄 𑀅𑀯𑀺𑀕𑀢𑁂𑀦𑀸𑀢𑀺 𑀅𑀬𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀬𑀼𑀕𑀴𑀸𑀢𑀺 𑀏𑀢𑁆𑀣 𑀅𑀢𑁆𑀣𑀲𑀭𑀺𑀓𑁆𑀔𑀢𑀸𑀬 𑀲𑀤𑁆𑀤𑀲𑀭𑀺𑀓𑁆𑀔𑀢𑀸𑀬 𑀓𑀸𑀮𑀧𑀝𑀺𑀧𑀓𑁆𑀔𑀢𑀸𑀬 𑀳𑁂𑀢𑀼𑀨𑀮𑀢𑀸𑀬 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀢𑀸𑀬𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀬𑀼𑀕𑀴𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸 𑀳𑀺 𑀅𑀢𑁆𑀣𑀲𑀭𑀺𑀓𑁆𑀔𑀢𑀸𑀬 𑀏𑀓𑀁 𑀬𑀼𑀕𑀴𑀁 𑀦𑀸𑀫. 𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀸 𑀲𑀤𑁆𑀤𑀲𑀭𑀺𑀓𑁆𑀔𑀢𑀸𑀬, 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸 𑀓𑀸𑀮𑀧𑀝𑀺𑀧𑀓𑁆𑀔𑀢𑀸𑀬, 𑀓𑀫𑁆𑀫𑀯𑀺𑀧𑀸𑀓𑀸 𑀳𑁂𑀢𑀼𑀨𑀮𑀢𑀸𑀬, 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀢𑀸𑀬 𑀏𑀓𑀁 𑀬𑀼𑀕𑀴𑀁, 𑀢𑀣𑀸 𑀅𑀢𑁆𑀣𑀺𑀦𑀢𑁆𑀣𑀺𑀧𑀘𑁆𑀘𑀬𑀸, 𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀸𑀢𑀺 𑀅𑀬𑀁 𑀬𑀼𑀕𑀴𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀚𑀦𑀓𑀸𑀤𑀺𑀢𑁄𑀢𑀺 𑀚𑀦𑀓𑁄𑀧𑀢𑁆𑀣𑀫𑁆𑀪𑀓𑀢𑁄. 𑀏𑀢𑁂𑀲𑀼 𑀳𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀧𑀘𑁆𑀘𑀬𑀸, 𑀦𑀸𑀦𑀓𑁆𑀔𑀡𑀺𑀓𑁄 ¶ 𑀓𑀫𑁆𑀫𑀧𑀘𑁆𑀘𑀬𑁄, 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀘𑀸𑀢𑀺 𑀇𑀫𑁂 𑀚𑀦𑀓𑀸 𑀏𑀯, 𑀦 𑀉𑀧𑀢𑁆𑀣𑀫𑁆𑀪𑀓𑀸. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀉𑀧𑀢𑁆𑀣𑀫𑁆𑀪𑀓𑁄 𑀏𑀯, 𑀦 𑀚𑀦𑀓𑁄. 𑀲𑁂𑀲𑀸 𑀚𑀦𑀓𑀸 𑀘𑁂𑀯 𑀉𑀧𑀢𑁆𑀣𑀫𑁆𑀪𑀓𑀸 𑀘𑀸𑀢𑀺 𑀅𑀬𑀁 𑀚𑀦𑀓𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀩𑁆𑀩𑀝𑁆𑀞𑀸𑀦𑀸𑀤𑀺𑀪𑁂𑀤𑀸𑀢𑀺 𑀲𑀩𑁆𑀩𑀝𑁆𑀞𑀸𑀦𑀺𑀓𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀪𑁂𑀤𑀢𑁄. 𑀏𑀢𑁂𑀲𑀼 𑀳𑀺 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸 𑀲𑀩𑁆𑀩𑀝𑁆𑀞𑀸𑀦𑀺𑀓𑀸. 𑀲𑀩𑁆𑀩𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑀸. 𑀏𑀢𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀓𑀥𑀫𑁆𑀫𑁄𑀧𑀺 𑀦𑀢𑁆𑀣𑀺. 𑀲𑁂𑀲𑀸 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸. 𑀢𑀢𑁆𑀣 𑀘 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀸𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢 𑀅𑀢𑁆𑀣𑀺𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀓𑀸𑀭𑀡𑀢𑁄 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸. 𑀢𑀣𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀸𑀦𑀜𑁆𑀜𑁂𑀯 𑀓𑀸𑀭𑀡𑀢𑁄, 𑀲𑁂𑀲𑀸 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀓𑀸𑀭𑀡𑀢𑁄 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸. 𑀅𑀬𑀁 𑀲𑀩𑁆𑀩𑀝𑁆𑀞𑀸𑀦𑀸𑀤𑀺𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀭𑀽𑀧𑀸𑀭𑀽𑀧𑀯𑀺𑀓𑀧𑁆𑀧𑀢𑁄𑀢𑀺 ¶ 𑀭𑀽𑀧𑀁 𑀭𑀽𑀧𑀲𑁆𑀲, 𑀭𑀽𑀧𑀁 𑀅𑀭𑀽𑀧𑀲𑁆𑀲𑀸𑀢𑀺𑀆𑀤𑀺 𑀯𑀺𑀓𑀧𑁆𑀧𑀢𑁄. 𑀏𑀢𑁂𑀲𑀼 𑀳𑀺 𑀏𑀓𑁄𑀧𑀺 𑀧𑀘𑁆𑀘𑀬𑁄 𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀪𑀯𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀭𑀽𑀧𑀫𑁂𑀯 𑀧𑀦 𑀅𑀭𑀽𑀧𑀲𑁆𑀲𑁂𑀯 𑀅𑀢𑁆𑀣𑀺, 𑀲𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀏𑀓𑁄 𑀏𑀯. 𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺𑀧𑀺 𑀦𑀢𑁆𑀣𑀺, 𑀅𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄𑀧𑀺 𑀅𑀢𑁆𑀣𑀺, 𑀲𑁄 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀙𑀩𑁆𑀩𑀺𑀥𑁄. 𑀅𑀭𑀽𑀧𑀫𑁂𑀯 𑀧𑀦 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄𑀧𑀺 𑀅𑀢𑁆𑀣𑀺, 𑀲𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀏𑀓𑁄 𑀏𑀯. 𑀅𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀸𑀦𑀫𑁆𑀧𑀺 𑀅𑀢𑁆𑀣𑀺, 𑀲𑁄 𑀳𑁂𑀢𑀼𑀓𑀫𑁆𑀫𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀭𑀽𑀧𑀸𑀭𑀽𑀧𑀧𑀜𑁆𑀜𑀢𑁆𑀢𑀺 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄𑀧𑀺 𑀅𑀢𑁆𑀣𑀺, 𑀲𑁄 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀤𑀼𑀯𑀺𑀥𑁄. 𑀭𑀽𑀧𑀸𑀭𑀽𑀧𑀁 𑀧𑀦 𑀭𑀽𑀧𑀸𑀭𑀽𑀧𑀲𑁆𑀲𑀸𑀧𑀺 𑀅𑀢𑁆𑀣𑀺, 𑀲𑁄 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀯𑀺𑀥𑁄𑀢𑀺 𑀅𑀬𑀁 𑀭𑀽𑀧𑀸𑀭𑀽𑀧𑀯𑀺𑀓𑀧𑁆𑀧𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀪𑀯𑀢𑁄𑀢𑀺 ¶ 𑀇𑀫𑁂𑀲𑀼 𑀳𑀺 𑀧𑀘𑁆𑀘𑀬𑁂𑀲𑀼 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀸𑀯 𑀦 𑀓𑁄𑀘𑀺 𑀧𑀘𑁆𑀘𑀬𑁄 𑀦 𑀮𑀩𑁆𑀪𑀢𑀺 𑀦𑀸𑀫, 𑀲𑀩𑁆𑀩𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸 𑀏𑀓𑀯𑀻𑀲𑀢𑀺𑀫𑁂𑀯. 𑀏𑀓𑀯𑁄𑀓𑀸𑀭𑀪𑀯𑁂 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀲𑀢𑁆𑀢𑁂𑀯. 𑀩𑀸𑀳𑀺𑀭𑁂 𑀧𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀢𑁂𑀲𑀼 𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸 𑀧𑀜𑁆𑀘𑁂𑀯 𑀮𑀩𑁆𑀪𑀦𑁆𑀢𑀻𑀢𑀺 𑀅𑀬𑀁 𑀪𑀯𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀕𑀳𑀸𑀢𑀺 𑀲𑀩𑁆𑀩𑁂𑀧𑀺 𑀳𑀺 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀅𑀝𑁆𑀞𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀢𑁂𑀲𑀼 𑀳𑀺 𑀳𑁂𑀢𑀼𑀅𑀜𑁆𑀜𑀫𑀜𑁆𑀜𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀙 𑀲𑀳𑀚𑀸𑀢𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀧𑀜𑁆𑀘 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂. 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂, 𑀧𑀼𑀭𑁂𑀚𑀸𑀢𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂. 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀆𑀭𑀫𑁆𑀫𑀡𑀪𑀽𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂, 𑀲𑀳𑀚𑀸𑀢𑀪𑀽𑀢𑁄 𑀲𑀳𑀚𑀸𑀢𑀧𑀘𑁆𑀘𑀬𑁂. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀽𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀧𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀪𑀽𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀇𑀫𑁂𑀲𑀼 𑀧𑀘𑁆𑀘𑀬𑁂𑀲𑀼 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯 𑀢𑀺𑀓𑀧𑀝𑁆𑀞𑀸𑀦𑀧𑀸𑀴𑀺𑀬𑀁 𑀧𑀘𑁆𑀘𑀦𑀻𑀬𑀦𑀬𑁂 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦𑁂𑀯 𑀓𑀢𑀺𑀧𑀬𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀇𑀫𑁂𑀲𑀁 𑀧𑀦 𑀅𑀝𑁆𑀞𑀦𑁆𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀳𑁄𑀧𑀺 𑀅𑀢𑁆𑀣𑀺𑀬𑁂𑀯. 𑀢𑁂𑀲𑀼 𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀪𑀽𑀢𑁄 𑀉𑀧𑀦𑀺𑀲𑁆𑀲𑀬𑁂 ¶ , 𑀅𑀦𑀥𑀺𑀧𑀢𑀺𑀪𑀽𑀢𑁄 𑀦 𑀓𑀢𑁆𑀣𑀘𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀯𑀺𑀲𑀼𑀜𑁆𑀜𑁂𑀯 𑀢𑀺𑀝𑁆𑀞𑀢𑀺. 𑀓𑀫𑁆𑀫𑀧𑀘𑁆𑀘𑀬𑁄𑀧𑀺 𑀲𑀳𑀚𑀸𑀢𑁄 𑀲𑀳𑀚𑀸𑀢𑁂. 𑀦𑀸𑀦𑀓𑁆𑀔𑀡𑀺𑀓𑁄 𑀧𑀦 ¶ 𑀩𑀮𑀯𑀸 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀩𑀮𑀯𑀸𑀧𑀺 𑀧𑀦 𑀓𑀫𑁆𑀫𑀚𑀭𑀽𑀧𑀸𑀦𑀁, 𑀤𑀼𑀩𑁆𑀩𑀮𑁄 𑀅𑀭𑀽𑀧𑀸𑀦𑀁 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀯𑀺𑀲𑀼𑀜𑁆𑀜𑁂𑀯 𑀢𑀺𑀝𑁆𑀞𑀢𑀺. 𑀆𑀳𑀸𑀭𑀧𑀘𑁆𑀘𑀬𑁄𑀧𑀺 𑀅𑀭𑀽𑀧𑀪𑀽𑀢𑁄 𑀲𑀳𑀚𑀸𑀢𑁂, 𑀭𑀽𑀧𑀪𑀽𑀢𑁄 𑀦 𑀓𑀢𑁆𑀣𑀘𑀻𑀢𑀺 𑀯𑀺𑀲𑀼𑀜𑁆𑀜𑁂𑀯 𑀢𑀺𑀝𑁆𑀞𑀢𑀺, 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄𑀧𑀺 𑀅𑀭𑀽𑀧𑀪𑀽𑀢𑁄 𑀲𑀳𑀚𑀸𑀢𑁂, 𑀧𑀲𑀸𑀤𑀺𑀦𑁆𑀤𑁆𑀭𑀺𑀬𑀸 𑀧𑀼𑀭𑁂𑀚𑀸𑀢𑁂, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀓𑀢𑁆𑀣𑀘𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀯𑀺𑀲𑀼𑀜𑁆𑀜𑁂𑀯 𑀢𑀺𑀝𑁆𑀞𑀢𑀻𑀢𑀺 𑀏𑀯𑀫𑁂𑀯𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀳𑁄𑀧𑀺 𑀅𑀢𑁆𑀣𑁂𑀯. 𑀲𑀩𑁆𑀩𑁂𑀧𑀺 𑀧𑀦𑁂𑀢𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀅𑀢𑁆𑀣𑀺𑀧𑀘𑁆𑀘𑀬𑁂𑀲𑀼 𑀘𑀢𑀽𑀲𑀼𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀬𑀁 𑀲𑀗𑁆𑀕𑀳𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀲𑀳𑀺𑀢𑁄 𑀲𑀗𑁆𑀔𑁂𑀧𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀪𑀗𑁆𑀕𑀦𑀬𑁂 𑀧𑀦𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀝𑁆𑀞𑀸𑀦𑀧𑀸𑀴𑀺𑀬𑀁 𑀳𑀺 ‘‘𑀳𑁂𑀢𑀼𑀧𑀘𑁆𑀘𑀬𑁄…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀧𑀘𑁆𑀘𑀬𑀧𑀤𑀸𑀦𑀺 𑀫𑀸𑀢𑀺𑀓𑀸𑀯𑀲𑁂𑀦 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑁋 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀬𑀪𑀸𑀚𑀦𑀻𑀬𑀲𑀗𑁆𑀔𑀸𑀢𑁄 𑀦𑀺𑀤𑁆𑀤𑁂𑀲𑀯𑀸𑀭𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀲𑁄𑀧𑀺 𑀘 𑀅𑀦𑀦𑁆𑀢𑀭𑀲𑀗𑁆𑀔𑁂𑀧𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀺𑀢𑁄 𑀏𑀯. 𑀢𑀤𑀦𑀦𑁆𑀢𑀭𑀁 𑀢𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀓𑀼𑀲𑀮𑀢𑁆𑀢𑀺𑀓𑀸𑀤𑀬𑁄 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂, 𑀳𑁂𑀢𑀼𑀤𑀼𑀓𑀸𑀤𑀬𑁄 𑀲𑀢𑀁 𑀤𑀼𑀓𑁂 𑀘 𑀦𑀺𑀲𑁆𑀲𑀸𑀬 𑀦𑀸𑀦𑀸𑀦𑀬𑀢𑁄 𑀯𑀺𑀪𑀚𑀦𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀁 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀺𑀪𑀢𑁆𑀢𑀁. 𑀓𑀣𑀁? 𑀘𑀢𑀼𑀩𑁆𑀩𑀺𑀥𑀁 𑀳𑀺 𑀧𑀝𑁆𑀞𑀸𑀦𑀁 𑁋 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀁, 𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑀁, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑀁, 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸, ‘‘𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀻𑀦𑀁, 𑀳𑁂𑀢𑀼𑀆𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀯𑀲𑁂𑀦 𑀧𑀯𑀢𑁆𑀢𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀁 𑀦𑀸𑀫. ‘‘𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀻𑀦𑀁, 𑀳𑁂𑀢𑀼𑀆𑀤𑀻𑀦𑀜𑁆𑀘 ¶ 𑀥𑀫𑁆𑀫𑀸𑀦𑀁 𑀧𑀘𑁆𑀘𑀦𑀻𑀓𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑀁 𑀦𑀸𑀫. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑀁 𑀦𑀸𑀫 ¶ . ‘‘𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄…𑀧𑁂… 𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀁 𑀦𑀸𑀫.

𑀏𑀯𑀫𑁂𑀢𑁂𑀲𑀼 𑀘𑀢𑀽𑀲𑀼 𑀧𑀝𑁆𑀞𑀸𑀦𑁂𑀲𑀼 𑀬𑀁 𑀥𑀫𑁆𑀫𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀁 𑀦𑀸𑀫, 𑀢𑀁 𑀢𑀸𑀯 𑀙𑀩𑁆𑀩𑀺𑀥𑀁 𑀳𑁄𑀢𑀺 𑁋 𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀦𑁆𑀢𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀢𑀻𑀡𑀺 𑀢𑀻𑀡𑀺 𑀧𑀘𑁆𑀘𑁂𑀓𑀦𑁆𑀢𑀺 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀁 𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁. 𑀲𑀢𑀁 𑀤𑀼𑀓𑁂 𑀦𑀺𑀲𑁆𑀲𑀸𑀬 𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀢𑁄 𑀢𑀺𑀓𑁂 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀢𑁄 𑀤𑀼𑀓𑁂 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀺𑀓𑁂 𑀧𑀦 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑁂 𑀘 𑀤𑀼𑀓𑁂𑀲𑀼 𑀏𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁. 𑀧𑀞𑀫𑀁 𑀢𑀸𑀯𑁂𑀢𑁆𑀣 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀢𑀺𑀓𑀧𑀝𑁆𑀞𑀸𑀦𑀦𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀯𑀁 𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑁂, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀝𑁆𑀞𑀸𑀦𑁂, 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑁂𑀢𑀺 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀤𑁂𑀲𑀺𑀢𑀁.

𑀏𑀢𑁆𑀣 𑀘 𑀤𑀼𑀯𑀺𑀥𑀁 𑀅𑀦𑀼𑀮𑁄𑀫𑀁, 𑀧𑀘𑁆𑀘𑀦𑀻𑀓𑀜𑁆𑀘 𑀥𑀫𑁆𑀫𑀸𑀦𑀼𑀮𑁄𑀫𑀁 𑀥𑀫𑁆𑀫𑀧𑀘𑁆𑀘𑀦𑀻𑀓𑀁, 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀧𑀘𑁆𑀘𑀬𑀧𑀘𑁆𑀘𑀦𑀻𑀓𑀦𑁆𑀢𑀺. 𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 ¶ 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀻𑀦𑀁 𑀢𑀺𑀓𑀥𑀫𑁆𑀫𑀸𑀦𑀁, 𑀳𑁂𑀢𑀼𑀆𑀤𑀻𑀦𑀁 𑀤𑀼𑀓𑀥𑀫𑁆𑀫𑀸𑀦𑀜𑁆𑀘 𑀅𑀦𑀼𑀮𑁄𑀫𑀤𑁂𑀲𑀦𑀸𑀯𑀲𑁂𑀦 𑀥𑀫𑁆𑀫𑀸𑀦𑀼𑀮𑁄𑀫𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀢𑀺𑀓𑀤𑀼𑀓𑀥𑀫𑁆𑀫𑀸𑀦𑀁 𑀧𑀘𑁆𑀘𑀦𑀻𑀓𑀯𑀲𑁂𑀦 𑀥𑀫𑁆𑀫𑀧𑀘𑁆𑀘𑀦𑀻𑀓𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑀤𑁂𑀲𑀦𑀸𑀯𑀲𑁂𑀦 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀦𑀻𑀓𑀯𑀲𑁂𑀦 𑀧𑀘𑁆𑀘𑀬𑀧𑀘𑁆𑀘𑀦𑀻𑀓𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭 𑀬𑀤𑀺𑀤𑀁 𑀥𑀫𑁆𑀫𑀸𑀦𑀼𑀮𑁄𑀫𑀁 𑀥𑀫𑁆𑀫𑀧𑀘𑁆𑀘𑀦𑀻𑀓𑀜𑁆𑀘, 𑀢𑀲𑁆𑀲 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀧𑀘𑁆𑀘𑀬𑀧𑀘𑁆𑀘𑀦𑀻𑀓𑀜𑁆𑀘 𑀅𑀦𑀼𑀮𑁄𑀫𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀢𑀺𑀓𑀤𑀼𑀓𑁂𑀲𑀼 𑀏𑀯𑀁 𑀮𑀩𑁆𑀪𑀢𑀺. 𑀢𑀜𑁆𑀘 𑀉𑀧𑀭𑀺 𑀧𑀸𑀴𑀺𑀦𑀬𑀤𑀲𑁆𑀲𑀦𑁂 𑀏𑀯 𑀧𑀸𑀓𑀝𑀁 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀭𑀺𑀫𑀸𑀦𑀺 𑀘𑀢𑀼𑀯𑀻𑀲𑀢𑀺 𑀧𑀝𑁆𑀞𑀸𑀦𑀸𑀦𑀺 𑀇𑀫𑁂𑀲𑀁 𑀢𑀺𑀓𑀤𑀼𑀓𑀸𑀦𑀁 𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀢𑀺𑀓𑀧𑀝𑁆𑀞𑀸𑀦𑀁…𑀧𑁂… 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀲𑀼 𑀢𑀺𑀓𑀤𑀼𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀤𑀼𑀓𑀁 𑀇𑀫𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑀸𑀤𑀺𑀦𑀬𑀘𑀢𑀼𑀓𑁆𑀓𑀯𑀲𑁂𑀦 𑀲𑀢𑁆𑀢𑀳𑀺 𑀲𑀢𑁆𑀢𑀳𑀺 𑀫𑀳𑀸𑀯𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀧𑀝𑀺𑀘𑁆𑀘𑀯𑀸𑀭𑁄 𑀲𑀳𑀚𑀸𑀢𑀯𑀸𑀭𑁄 𑀧𑀘𑁆𑀘𑀬𑀯𑀸𑀭𑁄 𑀦𑀺𑀲𑁆𑀲𑀬𑀯𑀸𑀭𑁄 𑀲𑀁𑀲𑀝𑁆𑀞𑀯𑀸𑀭𑁄 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁄 𑀧𑀜𑁆𑀳𑀸𑀯𑀸𑀭𑁄𑀢𑀺 𑀇𑀫𑁂𑀳𑀺 ¶ . 𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀸𑀪𑀺𑀥𑀸𑀦𑁂𑀦 𑀯𑀼𑀢𑁆𑀢𑁄 𑀧𑀝𑀺𑀘𑁆𑀘𑀯𑀸𑀭𑁄 𑀦𑀸𑀫. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄, 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸, 𑀓𑀼𑀲𑀮𑀁 𑀥𑀫𑁆𑀫𑀁 𑀦𑀺𑀲𑁆𑀲𑀸𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀁𑀲𑀝𑁆𑀞𑁄, 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀏𑀯𑀁 𑀲𑀳𑀚𑀸𑀢𑀸𑀤𑀺𑀅𑀪𑀺𑀥𑀸𑀦𑁂𑀳𑀺 𑀯𑀼𑀢𑁆𑀢𑀸 𑀧𑀜𑁆𑀘 𑀯𑀸𑀭𑀸 𑀲𑀳𑀚𑀸𑀢𑀸𑀤𑀺𑀯𑀸𑀭𑀸𑀦𑀺. 𑀧𑀭𑀢𑁄 𑀘 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁂𑀲𑀼 𑀤𑁆𑀯𑀻𑀲𑀼 𑀅𑀭𑀽𑀧𑀥𑀫𑁆𑀫𑀯𑀲𑁂𑀦𑁂𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘, 𑀲𑁂𑀲𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼, 𑀲𑀢𑁆𑀢𑀫𑁂𑀯 𑀧𑀜𑁆𑀳𑀸𑀯𑀸𑀭𑁂 𑀘 𑀭𑀽𑀧𑀸𑀭𑀽𑀧𑀯𑀲𑁂𑀦, 𑀧𑀘𑁆𑀘𑀬𑀯𑀸𑀭𑁂, 𑀦𑀺𑀲𑁆𑀲𑀬𑀯𑀸𑀭𑁂 𑀘 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦, 𑀲𑁂𑀲𑁂𑀲𑀼 ¶ 𑀲𑀳𑀚𑀸𑀢𑀯𑀲𑁂𑀦 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀓𑀣𑀺𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑀢𑁆𑀢𑀫𑀯𑀸𑀭𑁂 𑀧𑀦 𑀬𑀲𑁆𑀫𑀸 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂 𑀢𑁂 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀧𑀺 𑀢𑁂 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸, 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀯𑀺𑀪𑀢𑁆𑀢𑀸, 𑀢𑀲𑁆𑀫𑀸 𑀲𑁄 𑀯𑀸𑀭𑁄 𑀧𑀜𑁆𑀳𑀸𑀦𑀁 𑀲𑀸𑀥𑀼𑀓𑀁 𑀯𑀺𑀪𑀢𑁆𑀢𑀢𑁆𑀢𑀸 𑀧𑀜𑁆𑀳𑀸𑀯𑀸𑀭𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀇𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀫𑀳𑀸𑀯𑀸𑀭𑁂𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀲𑀫𑀦𑁆𑀢𑀧𑀝𑁆𑀞𑀸𑀦𑁂𑀲𑀼 𑀲𑀩𑁆𑀩𑁂𑀧𑀺 𑀢𑀺𑀓𑀤𑀼𑀓𑀸 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸. 𑀓𑀣𑀁? 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀳𑀺 𑀬𑀤𑀺𑀤𑀁 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀲𑀩𑁆𑀩𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀁 𑀢𑀸𑀯 𑀇𑀫𑁂𑀳𑀺 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀳𑀺 𑀫𑀳𑀸𑀯𑀸𑀭𑁂𑀳𑀺 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀺𑀦𑀬𑀘𑀢𑀼𑀓𑁆𑀓𑀢𑁄 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀬𑁄 𑀢𑀸𑀯𑁂𑀲 𑀲𑀩𑁆𑀩𑀧𑀞𑀫𑁄 𑀧𑀝𑀺𑀘𑁆𑀘𑀯𑀸𑀭𑁄 𑀦𑀸𑀫, 𑀲𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀢𑁄 𑀤𑀼𑀯𑀺𑀥𑁄 𑀳𑁄𑀢𑀺.

𑀢𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁄 𑀓𑀼𑀲𑀮𑀸𑀤𑀬𑁄 𑀧𑀝𑀺𑀘𑁆𑀘 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀻𑀦𑀁 𑀬𑀼𑀢𑁆𑀢𑀸𑀦𑀁, 𑀅𑀓𑀼𑀲𑀮𑀸𑀤𑀻𑀦𑀁 𑀅𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀼𑀘𑁆𑀙𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑁆𑀢𑀸 ‘‘𑀧𑀼𑀘𑁆𑀙𑀸𑀯𑀸𑀭𑁄’’𑀢𑀺𑀧𑀺, 𑀧𑀼𑀘𑁆𑀙𑀸𑀦𑀜𑁆𑀜𑁂𑀯 𑀧𑀜𑁆𑀜𑀸𑀧𑀦𑀢𑁄 ‘‘𑀧𑀡𑁆𑀡𑀢𑁆𑀢𑀺𑀯𑀸𑀭𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀦 𑀳𑀺 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀅𑀢𑁆𑀣𑀺. 𑀦𑀺𑀤𑁆𑀤𑁂𑀲𑀯𑀸𑀭𑁄 𑀧𑀦 𑀧𑀼𑀘𑁆𑀙𑀸𑀯𑀸𑀭𑁂 𑀧𑀭𑀺𑀧𑀼𑀘𑁆𑀙𑀺𑀢𑁂𑀲𑀼 𑀧𑀜𑁆𑀳𑁂𑀲𑀼 ‘‘𑀲𑀺𑀬𑀸 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀺𑀓𑀁 𑀅𑀬𑀼𑀢𑁆𑀢𑀁 𑀧𑀜𑁆𑀳𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀸𑀦𑀜𑁆𑀜𑁂𑀯 𑀧𑀜𑁆𑀳𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑁄. 𑀇𑀢𑀭𑁂𑀲𑀼 𑀧𑀦 𑀲𑀳𑀚𑀸𑀢𑀸𑀤𑀻𑀲𑀼, 𑀲𑁂𑀲𑁂𑀲𑀼 𑀘 𑀢𑀺𑀓𑁂𑀲𑀼, 𑀲𑁂𑀲𑀧𑀝𑁆𑀞𑀸𑀦𑁂𑀲𑀼 𑀘 𑀲𑀩𑁆𑀩𑀢𑁆𑀣 𑀧𑀼𑀘𑁆𑀙𑀸𑀯𑀸𑀭𑁄 𑀦𑀢𑁆𑀣𑀺, 𑀮𑀩𑁆𑀪𑀫𑀸𑀦𑀯𑀲𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀇𑀤𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀯𑀯𑀢𑁆𑀣𑀸𑀦𑀁.

𑀇𑀤𑀸𑀦𑀺 𑀧𑀦𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀺𑀪𑀗𑁆𑀕𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀲𑀢𑁆𑀢𑀲𑀼 𑀫𑀳𑀸𑀯𑀸𑀭𑁂𑀲𑀼 𑀧𑀞𑀫𑀲𑁆𑀲 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀧𑀼𑀘𑁆𑀙𑀸𑀯𑀸𑀭𑁂 𑀢𑀸𑀯 ¶ 𑁋 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸…𑀧𑁂… 𑀅𑀓𑀼𑀲𑀮𑁄 𑀥𑀫𑁆𑀫𑁄…𑀧𑁂… 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘…𑀧𑁂… 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 ¶ 𑀘…𑀧𑁂… 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘…𑀧𑁂… 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀓𑀼𑀲𑀮𑀧𑀤𑀫𑀽𑀮𑀸 𑀲𑀢𑁆𑀢 𑀧𑀼𑀘𑁆𑀙𑀸 𑀉𑀤𑁆𑀥𑀝𑀸.

𑀏𑀯𑀁 𑀅𑀓𑀼𑀲𑀮𑀧𑀤𑀫𑀽𑀮𑀸, 𑀅𑀩𑁆𑀬𑀸𑀓𑀢𑀧𑀤𑀫𑀽𑀮𑀸 𑀘. ‘‘𑀲𑀺𑀬𑀸 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄…𑀧𑁂… 𑀲𑀺𑀬𑀸 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘…𑀧𑁂… 𑀲𑀺𑀬𑀸 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘…𑀧𑁂… 𑀲𑀺𑀬𑀸 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺 𑀤𑁆𑀯𑀺𑀫𑀽𑀮𑀓𑀸, 𑀢𑀺𑀫𑀽𑀮𑀓𑀸 𑀘 𑀲𑀢𑁆𑀢 𑀲𑀢𑁆𑀢 𑀧𑀼𑀘𑁆𑀙𑀸𑀢𑀺 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸 𑀳𑁂𑀢𑀼𑀧𑀘𑁆𑀘𑀬𑀫𑀽𑀮𑀓𑀸 𑀉𑀤𑁆𑀥𑀝𑀸.

𑀇𑀫𑀺𑀦𑀸𑀯 𑀦𑀬𑁂𑀦 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀲𑁂𑀲𑀧𑀘𑁆𑀘𑀬𑀫𑀽𑀮𑀓𑀸𑀧𑀺 𑀧𑀼𑀘𑁆𑀙𑀸𑀯𑁂𑀤𑀺𑀢𑀩𑁆𑀩𑀸. 𑀏𑀓𑀫𑀽𑀮𑀓𑀦𑀬𑁄.

𑀬𑀣𑀸 𑀘 𑀏𑀓𑀫𑀽𑀮𑀓𑁂, 𑀏𑀯𑀁 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀳𑁂𑀢𑀼𑀧𑀘𑁆𑀘𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀫𑀽𑀮𑀓𑁂𑀧𑀺. ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸…𑀧𑁂… 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸…𑀧𑁂… 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀢𑀺𑀫𑀽𑀮𑀓𑀸𑀤𑀻𑀲𑀼 𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑁂𑀲𑀼 𑀯𑀸𑀭𑁂𑀲𑀼 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀳𑁂𑀢𑀼𑀧𑀘𑁆𑀘𑀬𑀫𑀽𑀮𑀓𑀦𑀬𑁄.

𑀬𑀣𑀸 𑀘 𑀳𑁂𑀢𑀼𑀫𑀽𑀮𑀓𑁂, 𑀏𑀯𑀁 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀲𑁂𑀲𑀧𑀘𑁆𑀘𑀬𑀫𑀽𑀮𑀓𑁂𑀲𑀼𑀧𑀺 𑀦𑀬𑁄 𑀜𑀸𑀢𑀩𑁆𑀩𑁄. 𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀸𑀭𑁄. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑀬𑀼𑀢𑁆𑀢𑁄 ¶ 𑀧𑀘𑁆𑀘𑀬𑀧𑀘𑁆𑀘𑀦𑀻𑀓𑀯𑀸𑀭𑁄𑀧𑀺. ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁…𑀧𑁂… 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀘𑁆𑀘𑀬𑀯𑀸𑀭𑁄𑀧𑀺. ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁…𑀧𑁂… 𑀉𑀧𑁆𑀧𑀚𑁆𑀚𑁂𑀬𑁆𑀬 𑀦𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀯𑀸𑀭𑁄𑀧𑀺 𑀲𑀩𑁆𑀩𑀢𑁆𑀣 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀼𑀘𑁆𑀙𑀸𑀯𑀸𑀭𑁂 𑀦𑀬𑁄.

𑀦𑀺𑀤𑁆𑀤𑁂𑀲𑀯𑀸𑀭𑁄 𑀧𑀦 𑀉𑀤𑁆𑀤𑁂𑀲𑀯𑀸𑀭𑁂 𑀤𑀲𑁆𑀲𑀺𑀢𑀸𑀲𑀼 𑀧𑀼𑀘𑁆𑀙𑀸𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀬𑀸 𑀏𑀢𑀸 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀓𑀸 𑀧𑀼𑀘𑁆𑀙𑀸 𑀲𑀩𑁆𑀩𑀲𑁄 ¶ 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑀸 𑀧𑀳𑀸𑀬 𑀬𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑀸𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀢𑁆𑀭𑀸𑀬𑀁 𑀦𑀬𑁄 𑁋 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸. 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄. 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁. 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁. 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺 𑀏𑀯𑀁 𑀓𑀼𑀲𑀮𑀧𑀤𑀫𑀽𑀮𑀸𑀲𑀼 𑀲𑀢𑁆𑀢𑀲𑀼 𑀧𑀼𑀘𑁆𑀙𑀸𑀲𑀼 𑀢𑀺𑀲𑁆𑀲𑁄𑀯 𑀮𑀩𑁆𑀪𑀫𑀸𑀦𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀣𑀸 𑀅𑀓𑀼𑀲𑀮𑀧𑀤𑀫𑀽𑀮𑀸𑀲𑀼𑀧𑀺 𑀢𑀺𑀲𑁆𑀲𑁄𑀯. 𑀅𑀩𑁆𑀬𑀸𑀓𑀢𑀧𑀤𑀫𑀽𑀮𑀸𑀲𑀼 𑀧𑀦 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀼, 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸. 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸…𑀧𑁂… 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 ¶ 𑀤𑁆𑀯𑁂 𑀫𑀳𑀸𑀪𑀽𑀢𑀸. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀓𑀸𑀯. 𑀤𑁆𑀯𑀺𑀫𑀽𑀮𑀺𑀓𑀸𑀤𑀻𑀲𑀼 𑀘 ‘‘𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀏𑀓𑀸. 𑀢𑀣𑀸 ‘‘𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺, 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀫𑀽𑀮𑀺𑀓𑀸𑀲𑀼 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀧𑀼𑀘𑁆𑀙𑀸𑀲𑀼 𑀦𑀯𑁂𑀯 𑀮𑀩𑁆𑀪𑀫𑀸𑀦𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀲𑁂𑀲𑀸 𑀘𑀢𑁆𑀢𑀸𑀮𑀻𑀲 𑀫𑁄𑀖𑀧𑀼𑀘𑁆𑀙𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀏𑀯𑀁 𑀉𑀧𑀭𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑀸𑀯𑀲𑁂𑀲𑀸 𑀫𑁄𑀖𑀧𑀼𑀘𑁆𑀙𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀯𑀺𑀚𑀸𑀦𑀦𑀲𑀼𑀔𑀢𑁆𑀣𑀁 𑀧𑀦 𑀪𑀕𑀯𑀢𑀸 𑀧𑀼𑀘𑁆𑀙𑀸𑀯𑀸𑀭𑁂 𑀮𑀩𑁆𑀪𑀫𑀸𑀦𑀸, 𑀅𑀮𑀩𑁆𑀪𑀫𑀸𑀦𑀸 𑀘 𑀲𑀩𑁆𑀩𑀸𑀧𑀺 𑀢𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀢𑀢𑁆𑀣 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀲𑀳𑀚𑀸𑀢𑁂𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑀁 𑀏𑀓𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀧𑀝𑀺𑀕𑀦𑁆𑀢𑁆𑀯𑀸, 𑀲𑀳𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀲𑀤𑀺𑀲𑀪𑀸𑀯𑁂𑀦 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀤𑀺𑀲𑀢𑁆𑀣𑁄 𑀳𑀺 𑀏𑀢𑁆𑀣 𑀧𑀝𑀺𑀲𑀤𑁆𑀤𑁄 ‘‘𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀼𑀲𑀮𑁄 𑀥𑀫𑁆𑀫𑁄𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑁄 𑀲𑀳𑀼𑀧𑁆𑀧𑀦𑁆𑀦𑁄 𑀓𑀼𑀲𑀮𑁄 𑀥𑀫𑁆𑀫𑁄. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀸𑀓𑀝𑀪𑀸𑀯𑀢𑁄 𑀉𑀤𑁆𑀥𑀁 𑀉𑀧𑁆𑀧𑀸𑀤𑀸𑀤𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀧𑀝𑀺𑀮𑀪𑀢𑀺. 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀦 𑀓𑁂𑀯𑀮𑀁 𑀓𑀼𑀲𑀮𑀥𑀫𑁆𑀫𑀫𑀢𑁆𑀢𑀫𑁂𑀯 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀔𑁄 𑀓𑀼𑀲𑀮𑀳𑁂𑀢𑀼𑀦𑀸 𑀳𑁂𑀢𑀼𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑁂𑀦 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀫𑀺𑀤𑀁 ¶ ‘‘𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑀯𑀲𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀏𑀓𑁄 𑀔𑀦𑁆𑀥𑁄 𑀏𑀓𑀲𑁆𑀲𑁂𑀯, 𑀤𑁆𑀯𑀺𑀦𑁆𑀦𑀁𑀬𑁂𑀯 𑀯𑀸, 𑀤𑁆𑀯𑁂 𑀯𑀸 𑀧𑀦 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀓𑀸𑀭𑁂𑀦 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀸𑀯𑀲𑁂𑀲𑀁 𑀲𑀩𑁆𑀩𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀦𑁆𑀢𑀺 𑀇𑀤𑀁 𑀧𑀝𑀺𑀘𑁆𑀘𑀢𑁆𑀣𑀲𑁆𑀲 𑀲𑀳𑀚𑀸𑀢𑀢𑁆𑀣𑀢𑁆𑀢𑀸 ¶ 𑀬𑀁 𑀓𑀼𑀲𑀮𑁂𑀦 𑀲𑀳𑀚𑀸𑀢𑀜𑁆𑀘𑁂𑀯 𑀳𑁂𑀢𑀼𑀧𑀘𑁆𑀘𑀬𑀜𑁆𑀘 𑀮𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢’’𑀦𑁆𑀢𑀺. 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀸𑀥𑀺𑀓𑀸𑀭𑁂 𑀅𑀳𑁂𑀢𑀼𑀓𑀸 𑀦 𑀕𑀳𑁂𑀢𑀩𑁆𑀩𑀸. 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽𑀢𑀺𑀆𑀤𑀺 𑀓𑀝𑀢𑁆𑀢𑀸𑀭𑀽𑀧𑀕𑁆𑀕𑀳𑀡𑁂𑀦 𑀯𑀢𑁆𑀣𑀼𑀲𑁆𑀫𑀺𑀁 𑀕𑀳𑀺𑀢𑁂𑀧𑀺 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀓𑀁 𑀫𑀳𑀸𑀪𑀽𑀢𑀦𑁆𑀢𑀺𑀆𑀤𑀺 𑀧𑀦 𑀭𑀽𑀧𑀸𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀭𑀽𑀧𑀸𑀩𑁆𑀬𑀸𑀓𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀳𑁂𑀢𑀼𑀧𑀘𑁆𑀘𑀬𑁂 𑀉𑀧𑀢𑁆𑀣𑀫𑁆𑀪𑀓𑀸𑀦𑀫𑁂𑀯 𑀘𑁂𑀢𑁆𑀣 𑀘𑀺𑀢𑁆𑀢𑀚𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀕𑀳𑁂𑀢𑀩𑁆𑀩𑀸, 𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑀚𑀉𑀢𑀼𑀚𑀸𑀤𑀻𑀦𑀁 𑀢𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀆𑀤𑀺 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀭𑀫𑁆𑀫𑀡𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸. 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸. 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄…𑀧𑁂… 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀏𑀯𑀁 𑀢𑀺𑀲𑁆𑀲𑁄 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀲𑁂𑀲𑀸 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸, 𑀭𑀽𑀧𑀲𑁆𑀲 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀦 𑀕𑀳𑀺𑀢𑀸. 𑀢𑁂𑀦𑁂𑀯 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀢𑁆𑀯𑀸 ‘‘𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀢𑁆𑀣𑀽’’𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀲𑀳𑀚𑀸𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀢𑀢𑁄 𑀅𑀜𑁆𑀜𑁂𑀦 𑀅𑀲𑀳𑀚𑀸𑀢𑁂𑀦 𑀙𑀩𑁆𑀩𑀺𑀥𑁂𑀦 𑀆𑀭𑀫𑁆𑀫𑀡𑀪𑀽𑀢𑁂𑀦 𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑁂𑀲𑀼 𑀧𑀦 𑀭𑀽𑀧𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀁. 𑀲𑀳𑀚𑀸𑀢𑀧𑀘𑁆𑀘𑀬𑁂𑀧𑀺 ¶ 𑀳𑁂𑀢𑀼𑀧𑀘𑁆𑀘𑀬𑀲𑀤𑀺𑀲𑀁. 𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑀼𑀧𑁆𑀧𑀢𑁆𑀢𑀺𑀬𑀸 ¶ 𑀧𑀦 ‘‘𑀩𑀸𑀳𑀺𑀭𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀤𑁆𑀯𑁂 𑀫𑀳𑀸𑀪𑀽𑀢𑀸. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀁…𑀧𑁂… 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁…𑀧𑁂… 𑀤𑁆𑀯𑁂 𑀫𑀳𑀸𑀪𑀽𑀢𑀸…𑀧𑁂… 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀏𑀓𑀁…𑀧𑁂… 𑀤𑁆𑀯𑁂 𑀫𑀳𑀸𑀪𑀽𑀢𑀸…𑀧𑁂… 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀤𑁆𑀯𑁂 𑀫𑀳𑀸𑀪𑀽𑀢𑀸…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀇𑀤𑀁 𑀅𑀥𑀺𑀓𑀁. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀧𑀺. 𑀓𑁂𑀯𑀮𑀁 𑀢𑀢𑁆𑀣 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀜𑁆𑀘 𑀦 𑀕𑀳𑀺𑀢𑀁 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀧𑀝𑀺𑀘𑁆𑀘𑀢𑁆𑀣𑀲𑁆𑀲 𑀧𑀦 𑀲𑀳𑀚𑀸𑀢𑀢𑁆𑀣𑀢𑁆𑀢𑀸 𑀘𑀓𑁆𑀔𑀸𑀤𑀻𑀲𑀼 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸 𑀇𑀥 𑀦 𑀕𑀳𑀺𑀢𑀸𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀧𑀺 𑀭𑀽𑀧𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸𑀪𑀸𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀫𑁂𑀯 𑀯𑀺𑀲𑁆𑀲𑀚𑁆𑀚𑀦𑀁.

𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀧𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀏𑀓𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸. 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄…𑀧𑁂… 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀢𑁆𑀣 𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀢𑀺 𑀇𑀤𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀁 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁𑀬𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀁 𑀲𑀸𑀥𑀬𑀢𑀺, 𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀇𑀥 𑀦 𑀕𑀳𑀺𑀢𑀁.

𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀇𑀥 𑀅𑀭𑀽𑀧𑀥𑀫𑁆𑀫𑁂𑀲𑀼 𑀦 𑀮𑀩𑁆𑀪𑀢𑀺. 𑀭𑀽𑀧𑀥𑀫𑁆𑀫𑁂𑀲𑀼 𑀘 𑀉𑀧𑀢𑁆𑀣𑀫𑁆𑀪𑀓𑁄𑀯, 𑀦 𑀚𑀦𑀓𑁄, 𑀢𑀲𑁆𑀫𑀸 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑁄𑀯𑀸𑀢𑀺 𑀅𑀬𑀁 𑀦 𑀕𑀳𑀺𑀢𑁄. 𑀆𑀲𑁂𑀯𑀦𑀧𑀘𑁆𑀘𑀬𑁂𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀺𑀬 𑀢𑀺𑀲𑁆𑀲𑁄𑀯 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸.

𑀓𑀫𑁆𑀫𑀧𑀘𑁆𑀘𑀬𑁂 ¶ ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀓𑀫𑁆𑀫𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁…𑀧𑁂… 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀓𑀼𑀲𑀮𑀧𑀤𑁂 𑀢𑀺𑀲𑁆𑀲𑁄, 𑀢𑀣𑀸 𑀅𑀓𑀼𑀲𑀮𑀧𑀤𑁂. 𑀅𑀩𑁆𑀬𑀸𑀓𑀢𑀧𑀤𑁂 𑀧𑀦 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁, 𑀅𑀲𑀜𑁆𑀜𑀲𑀢𑁆𑀢𑀸𑀦𑀁…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀯𑀁 𑀢𑀺𑀲𑁆𑀲𑁄. ‘‘𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 ¶ 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀳𑀚𑀸𑀢𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀆𑀭𑀫𑁆𑀫𑀡𑀲𑀤𑀺𑀲𑀁.

𑀏𑀯𑀁 𑀲𑀩𑁆𑀩𑀧𑀘𑁆𑀘𑀬𑁂𑀲𑀼 𑀮𑀩𑁆𑀪𑀫𑀸𑀦𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀳𑁂𑀢𑀼𑀅𑀥𑀺𑀧𑀢𑀺𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀏𑀓𑀲𑀤𑀺𑀲𑀸. 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀏𑀓𑀲𑀤𑀺𑀲𑀸. 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀸 𑀏𑀓𑀲𑀤𑀺𑀲𑀸. 𑀆𑀲𑁂𑀯𑀦𑀧𑀘𑁆𑀘𑀬𑁂 𑀯𑀺𑀧𑀸𑀓𑁄 𑀦 𑀮𑀩𑁆𑀪𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀘𑀺𑀢𑁆𑀢𑀚𑀭𑀽𑀧𑀁, 𑀉𑀧𑀸𑀤𑀸𑀭𑀽𑀧𑀜𑁆𑀘 𑀦 𑀮𑀩𑁆𑀪𑀢𑀻𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀢𑁆𑀢𑀁 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘‘𑀳𑁂𑀢𑀼𑀬𑀸 𑀦𑀯. 𑀆𑀭𑀫𑁆𑀫𑀡𑁂 𑀢𑀻𑀡𑀺. 𑀅𑀥𑀺𑀧𑀢𑀺𑀬𑀸 𑀦𑀯. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑁂𑀲𑀼 𑀢𑀻𑀡𑀺. 𑀲𑀳𑀚𑀸𑀢𑁂 𑀦𑀯. 𑀅𑀜𑁆𑀜𑀫𑀜𑁆𑀜𑁂 𑀢𑀻𑀡𑀺. 𑀦𑀺𑀲𑁆𑀲𑀬𑁂 𑀦𑀯. 𑀉𑀧𑀦𑀺𑀲𑁆𑀲𑀬𑁂 𑀢𑀻𑀡𑀺. 𑀧𑀼𑀭𑁂𑀚𑀸𑀢𑁂 𑀢𑀻𑀡𑀺. 𑀆𑀲𑁂𑀯𑀦𑁂 𑀢𑀻𑀡𑀺. 𑀓𑀫𑁆𑀫𑁂 𑀦𑀯. 𑀯𑀺𑀧𑀸𑀓𑁂 𑀏𑀓𑀁. 𑀆𑀳𑀸𑀭𑁂 𑀦𑀯. 𑀇𑀦𑁆𑀤𑁆𑀭𑀺𑀬𑁂 𑀦𑀯. 𑀛𑀸𑀦𑁂 𑀦𑀯. 𑀫𑀕𑁆𑀕𑁂 𑀦𑀯. 𑀲𑀫𑁆𑀧𑀬𑀼𑀢𑁆𑀢𑁂 𑀢𑀻𑀡𑀺. 𑀯𑀺𑀧𑁆𑀧𑀬𑀼𑀢𑁆𑀢𑁂 𑀦𑀯. 𑀅𑀢𑁆𑀣𑀺𑀬𑀸 𑀦𑀯. 𑀦𑀢𑁆𑀣𑀺𑀬𑀸 𑀢𑀻𑀡𑀺. 𑀯𑀺𑀕𑀢𑁂 𑀢𑀻𑀡𑀺. 𑀅𑀯𑀺𑀕𑀢𑁂 𑀦𑀯𑀸’’𑀢𑀺 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀦𑀁 𑀏𑀓𑁂𑀓𑀲𑁆𑀫𑀺𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀕𑀡𑀦𑀸 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀏𑀓𑀫𑀽𑀮𑀓𑀦𑀬𑁄.

𑀬𑀣𑀸 𑀘 𑀏𑀓𑀫𑀽𑀮𑀓𑁂, 𑀏𑀯𑀁 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀫𑀽𑀮𑀓𑀸𑀤𑀻𑀲𑀼𑀧𑀺 𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 ¶ 𑀦𑀬𑁄 𑀦𑁂𑀢𑀩𑁆𑀩𑁄. 𑀧𑀸𑀴𑀺𑀬𑀫𑁆𑀧𑀺 𑀯𑀺𑀢𑁆𑀣𑀸𑀭𑀦𑀬𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀢𑀻𑀡𑀻’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀕𑀡𑀦𑀪𑁂𑀤𑁄 𑀤𑀲𑁆𑀲𑀺𑀢𑁄𑀢𑀺 𑀅𑀬𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀦𑀬𑁄.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑁂 𑀧𑀦 ‘‘𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄. 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸. 𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁…𑀧𑁂… 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸. 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁, 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁…𑀧𑁂… 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀇𑀫𑀸 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑀺𑀢𑀸.

𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑁂 ¶ ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂…𑀧𑁂… 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀓𑀼𑀲𑀮𑁂…𑀧𑁂… 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁, 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀇𑀫𑀸 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀸.

𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄…𑀧𑁂… 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺…𑀧𑁂… 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄…𑀧𑁂… 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸, 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘 𑀥𑀫𑁆𑀫𑀸…𑀧𑁂… 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 ¶ …𑀧𑁂… 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘…𑀧𑁂… 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁. 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀦𑀯 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀦𑀸𑀦𑀦𑁆𑀢𑀭𑀦𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀸.

𑀦𑀸𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀓𑀼𑀲𑀮𑁂…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂…𑀧𑁂… 𑀓𑀝𑀢𑁆𑀢𑀸 𑀭𑀽𑀧𑀁. 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁. 𑀩𑀸𑀳𑀺𑀭𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀁. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀉𑀧𑀸𑀤𑀸𑀭𑀽𑀧𑀁. 𑀉𑀢𑀼𑀲𑀫𑀼𑀝𑁆𑀞𑀸𑀦𑁂…𑀧𑁂… 𑀉𑀧𑀸𑀤𑀸𑀭𑀽𑀧𑀁. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀁. 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀧𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀢𑁆𑀣 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 ¶ 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀓𑀝𑀢𑁆𑀢𑀸𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀯𑀚𑁆𑀚𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑁄.

𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄…𑀧𑁂… 𑀅𑀭𑀽𑀧𑁂 𑀓𑀼𑀲𑀮𑀁…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀓𑀼𑀲𑀮𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 𑀓𑀼𑀲𑀮𑀧𑀤𑁂 𑀤𑁆𑀯𑁂, 𑀢𑀣𑀸 𑀅𑀓𑀼𑀲𑀮𑀧𑀤𑁂𑀧𑀺. ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀅𑀭𑀽𑀧𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁…𑀧𑁂… 𑀩𑀸𑀳𑀺𑀭𑀁…𑀧𑁂… 𑀉𑀧𑀸𑀤𑀸𑀭𑀽𑀧𑀁. 𑀓𑀼𑀲𑀮𑀜𑁆𑀘 ¶ 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄. 𑀓𑀼𑀲𑀮𑁂 𑀔𑀦𑁆𑀥𑁂 𑀘 𑀫𑀳𑀸𑀪𑀽𑀢𑁂 𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘…𑀧𑁂… 𑀅𑀓𑀼𑀲𑀮𑁂 𑀔𑀦𑁆𑀥𑁂 𑀘…𑀧𑁂… 𑀭𑀽𑀧’’𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄𑀢𑀺 𑀲𑀢𑁆𑀢 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀦𑀧𑀘𑁆𑀙𑀸𑀚𑀸𑀢𑀦𑀸𑀲𑁂𑀯𑀦𑀧𑀘𑁆𑀘𑀬𑀸 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀲𑀤𑀺𑀲𑀸. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀧𑀞𑀫𑀚𑀯𑀦𑀯𑀲𑁂𑀦 𑀦𑀸𑀲𑁂𑀯𑀦𑀧𑀘𑁆𑀘𑀬𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀓𑀫𑁆𑀫𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄, 𑀓𑀼𑀲𑀮𑀸 𑀘𑁂𑀢𑀦𑀸. 𑀅𑀓𑀼𑀲𑀮𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄, 𑀅𑀓𑀼𑀲𑀮𑀸 𑀘𑁂𑀢𑀦𑀸. 𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄, 𑀯𑀺𑀧𑀸𑀓𑀓𑀺𑀭𑀺𑀬𑀸 𑀘𑁂𑀢𑀦𑀸. 𑀩𑀸𑀳𑀺𑀭𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀲𑁆𑀲𑀚𑁆𑀚𑀺𑀢𑀸.

𑀦𑀯𑀺𑀧𑀸𑀓𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄, 𑀅𑀩𑁆𑀬𑀸𑀓𑀢𑁄. 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘𑀸’’𑀢𑀺 𑀓𑀼𑀲𑀮𑀧𑀤𑁂 𑀢𑀺𑀲𑁆𑀲𑁄, 𑀢𑀣𑀸 𑀅𑀓𑀼𑀲𑀮𑀧𑀤𑁂𑀧𑀺. ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄…𑀧𑁂… 𑀩𑀸𑀳𑀺𑀭𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀅𑀲𑀜𑁆𑀜…𑀧𑁂… 𑀉𑀧𑀸𑀤𑀸𑀭𑀽𑀧𑀁…𑀧𑁂… 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀅𑀩𑁆𑀬𑀸𑀓𑀢𑁄’’𑀢𑀺 𑀇𑀫𑀸 𑀢𑀺𑀲𑁆𑀲𑁄𑀢𑀺 𑀦𑀯 𑀯𑀺𑀲𑁆𑀲𑀚𑁆𑀚𑀺𑀢𑀸.

𑀦𑀸𑀳𑀸𑀭𑀧𑀘𑁆𑀘𑀬𑁂 ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄. 𑀩𑀸𑀳𑀺𑀭𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀅𑀲𑀜𑁆𑀜…𑀧𑁂… 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀓𑀸𑀯.

𑀦𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄. 𑀩𑀸𑀳𑀺𑀭𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁…𑀧𑁂… 𑀉𑀢𑀼𑀲𑀫𑀼𑀝𑁆𑀞𑀸𑀦𑀁…𑀧𑁂… 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀓𑀸𑀯.

𑀦𑀛𑀸𑀦𑀧𑀘𑁆𑀘𑀬𑁂 ¶ ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀁…𑀧𑁂… 𑀩𑀸𑀳𑀺𑀭𑀁 𑀆𑀳𑀸𑀭𑀉𑀢𑀼𑀅𑀲𑀜𑁆𑀜𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀓𑀸𑀯.

𑀦𑀫𑀕𑁆𑀕𑀧𑀘𑁆𑀘𑀬𑁂 ‘‘𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄. 𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁…𑀧𑁂… 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 ¶ 𑀯𑀺𑀧𑀸𑀓𑀸…𑀧𑁂… 𑀓𑀝𑀢𑁆𑀢𑀸 𑀘 𑀭𑀽𑀧𑀁…𑀧𑁂… 𑀩𑀸𑀳𑀺𑀭𑀁 𑀆𑀳𑀸𑀭𑀉𑀢𑀼𑀅𑀲𑀜𑁆𑀜𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀏𑀓𑀸𑀯.

𑀦𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑁄.

𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄. 𑀅𑀭𑀽𑀧𑁂 𑀓𑀼𑀲𑀮𑁄𑀯. 𑀅𑀓𑀼𑀲𑀮𑀁…𑀧𑁂… 𑀅𑀭𑀽𑀧𑁂 𑀅𑀓𑀼𑀲𑀮𑁄. 𑀅𑀩𑁆𑀬𑀸𑀓𑀢𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄, 𑀅𑀭𑀽𑀧𑁂 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁. 𑀩𑀸𑀳𑀺𑀭𑀁 𑀅𑀲𑀜𑁆𑀜…𑀧𑁂… 𑀉𑀧𑀸𑀤𑀸𑀭𑀽𑀧’’𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄𑀯 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀸. 𑀦𑀲𑀳𑀚𑀸𑀢𑀦𑀦𑀺𑀲𑁆𑀲𑀬𑀦𑁄𑀅𑀢𑁆𑀣𑀺𑀦𑁄𑀅𑀯𑀺𑀕𑀢𑀧𑀘𑁆𑀘𑀬𑀸 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑁄𑀧𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺.

𑀏𑀯𑀁 𑀧𑀘𑁆𑀘𑀦𑀻𑀓𑁂 𑀮𑀩𑁆𑀪𑀫𑀸𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 ‘‘𑀦𑀳𑁂𑀢𑀼𑀬𑀸 𑀤𑁆𑀯𑁂. 𑀦𑀸𑀭𑀫𑁆𑀫𑀡𑁂 𑀧𑀜𑁆𑀘. 𑀦𑀸𑀥𑀺𑀧𑀢𑀺𑀬𑀸 𑀦𑀯. 𑀦𑀸𑀦𑀦𑁆𑀢𑀭𑁂 𑀦𑀲𑀫𑀦𑀦𑁆𑀢𑀭𑁂 𑀦𑀸𑀜𑁆𑀜𑀫𑀜𑁆𑀜𑁂 𑀦𑀉𑀧𑀦𑀺𑀲𑁆𑀲𑀬𑁂 𑀧𑀜𑁆𑀘. 𑀦𑀧𑀼𑀭𑁂𑀚𑀸𑀢𑁂 𑀲𑀢𑁆𑀢. 𑀦𑀧𑀘𑁆𑀙𑀸𑀚𑀸𑀢𑁂 𑀦𑀸𑀲𑁂𑀯𑀦𑁂 𑀦𑀯. 𑀦𑀓𑀫𑁆𑀫𑁂 𑀢𑀻𑀡𑀺. 𑀦𑀯𑀺𑀧𑀸𑀓𑁂 𑀦𑀯. 𑀦𑀸𑀳𑀸𑀭𑁂 𑀦𑀇𑀦𑁆𑀤𑁆𑀭𑀺𑀬𑁂 𑀦𑀛𑀸𑀦𑁂 𑀦𑀫𑀕𑁆𑀕𑁂 𑀏𑀓𑀁. 𑀦𑀲𑀫𑁆𑀧𑀬𑀼𑀢𑁆𑀢𑁂 𑀧𑀜𑁆𑀘. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀢𑀻𑀡𑀺. 𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑁂𑀲𑀼 𑀧𑀜𑁆𑀘𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀕𑀡𑀦𑀸 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀏𑀓𑀫𑀽𑀮𑀓𑀦𑀬𑁄.

𑀇𑀫𑀺𑀦𑀸𑀯 𑀦𑀬𑁂𑀦 𑀤𑁆𑀯𑀺𑀫𑀽𑀮𑀓𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀦𑀬𑁄 𑀦𑁂𑀢𑀩𑁆𑀩𑁄, 𑀧𑀸𑀴𑀺𑀬𑀁 𑀧𑀦 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀕𑀡𑀦𑀸𑀯 𑀤𑀲𑁆𑀲𑀺𑀢𑀸𑀢𑀺 𑀅𑀬𑀁 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀦𑀬𑁄.

𑀇𑀫𑀺𑀦𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀦𑀬𑁂, ‘‘𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀦𑀬𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀯𑀸𑀭𑀕𑀡𑀦𑀸𑀯 𑀤𑀲𑁆𑀲𑀺𑀢𑀸𑀢𑀺 ¶ 𑀅𑀬𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀓𑀼𑀲𑀮𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀦𑀬𑁄.

𑀲𑀳𑀚𑀸𑀢𑀯𑀸𑀭𑀸𑀤𑀻𑀲𑀼𑀧𑀺 𑀙𑀯𑀸𑀭𑁂𑀲𑀼 𑀧𑀝𑀺𑀘𑁆𑀘𑀯𑀸𑀭𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄. 𑀬𑁂 𑀧𑀦 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀯𑀺𑀲𑁂𑀲𑀸, 𑀅𑀢𑁆𑀣𑀯𑀺𑀲𑁂𑀲𑀸 𑀘 𑀉𑀧𑀮𑀩𑁆𑀪𑀦𑁆𑀢𑀺, 𑀢𑁂 𑀧𑀝𑁆𑀞𑀸𑀦𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀏𑀯 𑀲𑀩𑁆𑀩𑀸𑀓𑀸𑀭𑀢𑁄 𑀕𑀳𑁂𑀢𑀩𑁆𑀩𑀸. 𑀇𑀥 𑀧𑀦 𑀢𑁂 𑀲𑀩𑁆𑀩𑁂 𑀲𑀗𑁆𑀔𑁂𑀧𑀦𑀬𑀢𑁄 𑀤𑀲𑁆𑀲𑀺𑀬𑀫𑀸𑀦𑀸𑀧𑀺 𑀕𑀦𑁆𑀣𑀪𑀸𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀦 𑀤𑀲𑁆𑀲𑀺𑀢𑀸.

𑀢𑁂𑀲𑀼 𑀧𑀦 𑀯𑀸𑀭𑁂𑀲𑀼 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸… 𑀓𑀼𑀲𑀮𑀁 𑀥𑀫𑁆𑀫𑀁 𑀦𑀺𑀲𑁆𑀲𑀸𑀬… 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀁𑀲𑀝𑁆𑀞𑁄… 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑁆𑀧𑀬𑀼𑀢𑁆𑀢𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀆𑀤𑀺𑀢𑁄 𑀧𑀜𑁆𑀘𑀲𑀼 𑀯𑀸𑀭𑁂𑀲𑀼 𑀧𑀸𑀴𑀺𑀕𑀢𑀺 𑀜𑀸𑀢𑀩𑁆𑀩𑀸. 𑀢𑁂𑀲𑀼 𑀘 𑀧𑀝𑀺𑀘𑁆𑀘𑀲𑀳𑀚𑀸𑀢𑀸 𑀏𑀓𑀢𑁆𑀣𑀸, 𑀧𑀘𑁆𑀘𑀬𑀦𑀺𑀲𑁆𑀲𑀬𑀸 𑀏𑀓𑀢𑁆𑀣𑀸, 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀢𑁆𑀣𑀸. 𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄’’𑀢𑀺𑀆𑀤𑀻𑀲𑀼 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀢𑁂𑀦 𑀲𑀳𑀚𑀸𑀢𑁄 𑀳𑀼𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀙𑀺𑀫𑁂 𑀧𑀦 𑀧𑀜𑁆𑀳𑀸𑀯𑀸𑀭𑁂 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲…𑀧𑁂… 𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘…𑀧𑁂… 𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑁂,

‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺…𑀧𑁂… 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁… 𑀲𑁂𑀔𑀸 𑀕𑁄𑀢𑁆𑀭𑀪𑀼𑀁 𑀯𑁄𑀤𑀸𑀦𑀁 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺. 𑀲𑁂𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺 ¶ . 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀲𑁆𑀲… 𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀬𑀣𑀸𑀓𑀫𑁆𑀫𑀽𑀧𑀕𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.

𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲…𑀧𑁂… 𑀤𑀸𑀦𑀁 𑀤𑀢𑁆𑀯𑀸…𑀧𑁂… 𑀓𑀢𑁆𑀯𑀸 𑀢𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑁆𑀥𑀘𑁆𑀘𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀅𑀲𑁆𑀲𑀸𑀤𑁂𑀢𑀺 ¶ …𑀧𑁂… 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀅𑀲𑁆𑀲𑀸𑀤𑁂𑀢𑀺…𑀧𑁂… 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀛𑀸𑀦𑁂 𑀧𑀭𑀺𑀳𑀻𑀦𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲…𑀧𑁂… 𑀧𑀘𑁆𑀘𑀬𑁄. 𑀅𑀭𑀳𑀸 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺… 𑀓𑀼𑀲𑀮…𑀧𑁂… 𑀯𑀺𑀧𑀲𑁆𑀲𑀢𑀺…𑀧𑁂… 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀲𑁆𑀲…𑀧𑁂… 𑀓𑀺𑀭𑀺𑀬𑀲𑁆𑀲. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦…𑀧𑁂… 𑀯𑀺𑀧𑀸𑀓𑀲𑁆𑀲 𑀘 𑀓𑀺𑀭𑀺𑀬𑀲𑁆𑀲 𑀘. 𑀓𑀼𑀲𑀮𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬…𑀧𑁂… 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬.

𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲…𑀧𑁂… 𑀧𑀘𑁆𑀘𑀬𑁄. 𑀭𑀸𑀕𑀁 𑀅𑀲𑁆𑀲𑀸𑀤𑁂𑀢𑀺…𑀧𑁂… 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀓𑀼𑀲𑀮𑁄 𑀓𑀼𑀲𑀮𑀲𑁆𑀲…𑀧𑁂… 𑀧𑀘𑁆𑀘𑀬𑁄. 𑀲𑁂𑀔𑀸 𑀧𑀳𑀻𑀦𑁂 𑀓𑀺𑀮𑁂𑀲𑁂…𑀧𑁂… 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲. 𑀅𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲… 𑀅𑀭𑀳𑀸 𑀧𑀳𑀻𑀦𑁂 𑀓𑀺𑀮𑁂𑀲𑁂…𑀧𑁂… 𑀆𑀯𑀚𑁆𑀚𑀦𑀸𑀬.

𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲… 𑀅𑀭𑀳𑀸 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀦𑀺𑀩𑁆𑀩𑀸𑀦𑀁, 𑀘𑀓𑁆𑀔𑀼𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀁 𑀯𑀺𑀧𑀲𑁆𑀲𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀁…𑀧𑁂… 𑀓𑀺𑀭𑀺𑀬𑀲𑁆𑀲. 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀆𑀯𑀚𑁆𑀚𑀦𑀸𑀬. 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲… 𑀲𑁂𑀔𑀸 𑀨𑀮𑀁…𑀧𑁂… 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲. 𑀅𑀩𑁆𑀬𑀸𑀓𑀢𑁄 𑀅𑀓𑀼𑀲𑀮𑀲𑁆𑀲… 𑀘𑀓𑁆𑀔𑀼𑀁 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀘,

‘‘𑀓𑀼𑀲𑀮𑁄 ¶ 𑀓𑀼𑀲𑀮𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀤𑀸𑀦𑀁 𑀤𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀘,

‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀲𑀼 𑀘,

‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑁋 𑀤𑀸𑀦𑀁 𑀤𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦, ‘‘𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 ¶ 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, ‘‘𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀛𑀸𑀦𑀁, 𑀯𑀺𑀧𑀲𑁆𑀲𑀦𑀁, 𑀫𑀕𑁆𑀕𑀁, 𑀅𑀪𑀺𑀜𑁆𑀜𑀁, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀻𑀮𑀁, 𑀲𑀼𑀢𑀁, 𑀘𑀸𑀕𑀁, 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬…𑀧𑁂… 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲…𑀧𑁂… 𑀧𑀞𑀫𑀲𑁆𑀲 𑀫𑀕𑁆𑀕𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀞𑀫𑀲𑁆𑀲…𑀧𑁂… 𑀢𑀢𑀺𑀬𑁄 𑀫𑀕𑁆𑀕𑁄 𑀘𑀢𑀼𑀢𑁆𑀣𑀲𑁆𑀲. 𑀫𑀕𑁆𑀕𑁄 𑀲𑁂𑀔𑀸𑀦𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬…𑀧𑁂… 𑀞𑀸𑀦𑀸𑀞𑀸𑀦𑀓𑁄𑀲𑀮𑁆𑀮𑀲𑁆𑀲 𑀉𑀧𑀦𑀺𑀲𑁆𑀲𑀬. 𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲…𑀧𑁂… 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑀽𑀧…𑀧𑁂… 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺…𑀧𑁂… 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸 𑀭𑀸𑀕𑀲𑁆𑀲, 𑀤𑁄𑀲𑀲𑁆𑀲, 𑀫𑁄𑀳𑀲𑁆𑀲, 𑀫𑀸𑀦𑀲𑁆𑀲, 𑀤𑀺𑀝𑁆𑀞𑀺𑀬𑀸. 𑀧𑀢𑁆𑀣𑀦𑀸𑀬…𑀧𑁂… 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲…𑀧𑁂… 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄. 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑀽𑀧…𑀧𑁂… 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺…𑀧𑁂… 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲, 𑀤𑀼𑀓𑁆𑀔𑀲𑁆𑀲, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸. 𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲…𑀧𑁂… 𑀫𑀕𑁆𑀕𑁄 𑀅𑀭𑀳𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀘𑁆𑀘𑀬𑁄.

𑀅𑀓𑀼𑀲𑀮𑁄 ¶ 𑀅𑀓𑀼𑀲𑀮𑀲𑁆𑀲…𑀧𑁂… 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀡𑀁 𑀳𑀦𑀢𑀺…𑀧𑁂… 𑀲𑀫𑁆𑀨𑀁 𑀧𑀮𑀧𑀢𑀺…𑀧𑁂… 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺. 𑀤𑁄𑀲𑀁, 𑀫𑁄𑀳𑀁, 𑀫𑀸𑀦𑀁, 𑀤𑀺𑀝𑁆𑀞𑀺𑀁, 𑀧𑀢𑁆𑀣𑀦𑀁 𑀉𑀧𑀦𑀺𑀲𑁆𑀲𑀸𑀬…𑀧𑁂… 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺…𑀧𑁂… 𑀧𑀸𑀡𑀸𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲…𑀧𑁂… 𑀲𑀗𑁆𑀖𑀪𑁂𑀤𑀓𑀫𑁆𑀫𑀲𑁆𑀲…𑀧𑁂… 𑀧𑀘𑁆𑀘𑀬𑁄.

𑀅𑀓𑀼𑀲𑀮𑁄 𑀓𑀼𑀲𑀮𑀲𑁆𑀲…𑀧𑁂… 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀭𑀸𑀕𑁄…𑀧𑁂… 𑀧𑀢𑁆𑀣𑀦𑀸. 𑀲𑀤𑁆𑀥𑀸𑀬, 𑀲𑀻𑀮𑀲𑁆𑀲…𑀧𑁂… 𑀧𑀜𑁆𑀜𑀸𑀬 𑀉𑀧𑀦𑀺𑀲𑁆𑀲𑀬. 𑀧𑀸𑀡𑀁 𑀳𑀦𑁆𑀢𑁆𑀯𑀸 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀘,

‘‘𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑁋 𑀅𑀭𑀳𑀸 𑀘𑀓𑁆𑀔𑀼𑀁…𑀧𑁂… 𑀨𑁄𑀝𑁆𑀞𑀩𑁆𑀩𑁂, 𑀯𑀢𑁆𑀣𑀼𑀁 𑀯𑀺𑀧𑀲𑁆𑀲𑀢𑀺…𑀧𑁂… 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑁋 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀯𑀢𑁆𑀣𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀘,

‘‘𑀓𑀼𑀲𑀮𑁄 ¶ 𑀅𑀩𑁆𑀬𑀸𑀓𑀢𑀲𑁆𑀲…𑀧𑁂… 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀘,

‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲…𑀧𑁂… 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀆𑀲𑁂𑀯𑀦𑀧𑀘𑁆𑀘𑀬𑁂 𑀘,

‘‘𑀲𑀳𑀚𑀸𑀢𑀸 𑀦𑀸𑀦𑀸𑀓𑁆𑀔𑀡𑀺𑀓𑀸, 𑀲𑀳𑀚𑀸𑀢𑀸 𑀓𑀼𑀲𑀮𑀸 𑀘𑁂𑀢𑀦𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁. 𑀦𑀸𑀦𑀸𑀓𑁆𑀔𑀡𑀺𑀓𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀓𑀫𑁆𑀫𑀧𑀘𑁆𑀘𑀬𑁂 𑀘,

‘‘𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲…𑀧𑁂… 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀸𑀓𑀧𑀘𑁆𑀘𑀬𑁂 𑀘,

‘‘𑀓𑀼𑀲𑀮𑁄 ¶ 𑀓𑀼𑀲𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀆𑀳𑀸𑀭𑀧𑀘𑁆𑀘𑀬𑀸𑀤𑀻𑀲𑀼 𑀘, ‘‘𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀲𑀳𑀚𑀸𑀢𑀁, 𑀧𑀘𑁆𑀙𑀸𑀚𑀸𑀢𑀁, 𑀲𑀳𑀚𑀸𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁. 𑀧𑀘𑁆𑀙𑀸𑀚𑀸𑀢𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲…𑀧𑁂… 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲…𑀧𑁂… 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀤𑀻𑀲𑀼 𑀘 𑀧𑀸𑀴𑀺𑀕𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀓𑀼𑀲𑀮𑀥𑀫𑁆𑀫𑁄 𑀦𑀸𑀫𑁂𑀲 𑀬𑀲𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁, 𑀯𑀺𑀧𑀸𑀓𑀧𑀘𑁆𑀘𑀬𑀜𑁆𑀘 𑀲𑁂𑀲𑁂𑀳𑀺 𑀤𑁆𑀯𑀸𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀲𑀮𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀲𑁂𑀲𑁂𑀳𑀺 𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀓𑀼𑀲𑀮𑁄 𑀓𑀼𑀲𑀮𑀸𑀤𑀻𑀦𑀁, 𑀅𑀓𑀼𑀲𑀮𑁄 𑀘 𑀅𑀓𑀼𑀲𑀮𑀸𑀤𑀻𑀦𑀁 𑀬𑀣𑀸𑀦𑀼𑀭𑀽𑀧𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀳𑀸𑀯𑀸𑀭𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑁂𑀔𑀸 𑀕𑁄𑀢𑁆𑀭𑀪𑀼𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑁄𑀤𑀸𑀦𑀦𑁆𑀢𑀺 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄. 𑀢𑁂𑀲𑀁 𑀳𑀺 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀯𑁄𑀤𑀸𑀦𑀁 𑀦𑀸𑀫. 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀕𑁆𑀕𑀯𑀻𑀣𑀺𑀢𑁄 𑀯𑀼𑀝𑁆𑀞𑀸𑀬. 𑀦 𑀳𑀺 𑀫𑀕𑁆𑀕𑀸𑀦𑀦𑁆𑀢𑀭𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀅𑀢𑁆𑀣𑀻𑀢𑀺 𑀅𑀬𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑀦𑀬𑁄.

𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸. 𑀤𑁆𑀯𑁂 𑀔𑀦𑁆𑀥𑁂 ¶ 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀧𑀜𑁆𑀳𑀸𑀯𑀸𑀭𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀳𑀺 𑀘 𑀏𑀓𑀫𑀽𑀮𑀸𑀤𑀻𑀳𑀺 𑀦𑀬𑁂𑀳𑀺 𑀘 𑀲𑀩𑁆𑀩𑀢𑁆𑀢𑀺𑀓𑁂𑀲𑀼 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀕𑀡𑀦𑀸𑀦𑀬𑁄 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀯𑁂𑀤𑀦𑀸𑀢𑁆𑀢𑀺𑀓𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀅𑀮𑀩𑁆𑀪𑀦𑀢𑁄 ‘‘𑀏𑀓𑀁 𑀔𑀦𑁆𑀥𑀁 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀔𑀦𑁆𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀯𑀺𑀲𑁂𑀲𑁄 ¶ 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀼𑀲𑀸𑀭𑁂𑀦𑁂𑀯 𑀜𑀸𑀢𑀩𑁆𑀩𑁄𑀢𑀺 𑀅𑀬𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑀦𑀬𑁄.

𑀤𑀼𑀓𑀧𑀝𑁆𑀞𑀸𑀦𑁂 𑀧𑀦 ‘‘𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀅𑀮𑁄𑀪𑀁 𑀧𑀝𑀺𑀘𑁆𑀘 𑀅𑀤𑁄𑀲𑁄. 𑀅𑀫𑁄𑀳𑁄. 𑀅𑀤𑁄𑀲𑀁 𑀅𑀫𑁄𑀳𑀁 𑀧𑀝𑀺𑀘𑁆𑀘 𑀅𑀮𑁄𑀪𑁄. 𑀅𑀤𑁄𑀲𑁄. 𑀮𑁄𑀪𑀁 𑀧𑀝𑀺𑀘𑁆𑀘 𑀫𑁄𑀳𑁄. 𑀫𑁄𑀳𑀁 𑀧𑀝𑀺𑀘𑁆𑀘 𑀮𑁄𑀪𑁄. 𑀤𑁄𑀲𑀁 𑀧𑀝𑀺𑀘𑁆𑀘 𑀫𑁄𑀳𑁄. 𑀫𑁄𑀳𑀁 𑀧𑀝𑀺𑀘𑁆𑀘 𑀤𑁄𑀲𑁄. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀳𑁂𑀢𑀽 𑀘 𑀦𑀳𑁂𑀢𑀽 𑀘. 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀥𑀫𑁆𑀫𑁄 𑀦…𑀧𑁂… 𑀳𑁂𑀢𑀽 𑀘 𑀦𑀳𑁂𑀢𑀽 𑀘𑀸’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀤𑀼𑀓𑁂,

‘‘𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀲𑀳𑁂𑀢𑀼𑀓𑀁 𑀏𑀓𑀁 𑀔𑀦𑁆𑀥𑀁…𑀧𑁂… 𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘. 𑀅𑀳𑁂𑀢𑀼𑀓𑁄…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂… 𑀲𑀳𑁂𑀢𑀼𑀓𑁄 𑀘, 𑀅𑀳𑁂𑀢𑀼𑀓𑁄 𑀘…𑀧𑁂… 𑀅𑀳𑁂𑀢𑀼𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀅𑀳𑁂𑀢𑀼𑀓𑁄. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀫𑁄𑀳𑀁 𑀧𑀝𑀺𑀘𑁆𑀘 𑀲𑀫𑁆𑀧𑀬𑀼𑀢𑁆𑀢𑀓𑀸 𑀔𑀦𑁆𑀥𑀸…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀲𑀼 𑀘 𑀓𑁂𑀦𑀘𑀺𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀯𑀚𑁆𑀚𑀺𑀢𑁂𑀲𑀼 𑀲𑀩𑁆𑀩𑀤𑀼𑀓𑁂𑀲𑀼 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀲𑀢𑁆𑀢𑀲𑀼 𑀫𑀳𑀸𑀯𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀲𑀼 𑀘𑀢𑀽𑀲𑀼 𑀦𑀬𑁂𑀲𑀼 𑀏𑀓𑀫𑀽𑀮𑀓𑀸𑀤𑀻𑀳𑀺 𑀲𑀩𑁆𑀩𑀯𑀸𑀭𑁂𑀳𑀺 𑀓𑀼𑀲𑀮𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀦𑀼𑀭𑀽𑀧𑀁 𑀯𑀺𑀪𑀗𑁆𑀕𑀦𑀬𑁄 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀳𑀺 𑀧𑀝𑁆𑀞𑀸𑀦𑁂 𑀓𑁂𑀦𑀘𑀺𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀬𑀁 𑀤𑀼𑀓𑀧𑀝𑁆𑀞𑀸𑀦𑀦𑀬𑁄.

𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀧𑀦 ‘‘𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀤𑀼𑀓𑁂𑀦 𑀲𑀤𑁆𑀥𑀺𑀁 𑀓𑀼𑀲𑀮𑀢𑁆𑀢𑀺𑀓𑁂 𑀓𑀼𑀲𑀮𑀁 𑀧𑀤𑀁 𑀬𑁄𑀚𑁂𑀢𑁆𑀯𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀦𑀬𑀸𑀦𑀁 𑀯𑀲𑁂𑀦 𑀮𑀩𑁆𑀪𑀫𑀸𑀦𑀓𑀧𑀘𑁆𑀘𑀬𑀸 𑀏𑀓𑀫𑀽𑀮𑀓𑀸𑀤𑀺𑀦𑀬𑁂𑀳𑀺 𑀤𑀲𑁆𑀲𑀺𑀢𑀸 ¶ . 𑀬𑀣𑀸 𑀘 𑀓𑀼𑀲𑀮𑀁 𑀧𑀤𑀁, 𑀏𑀯𑀁 𑀅𑀓𑀼𑀲𑀮𑀁 𑀧𑀤𑀁, 𑀅𑀩𑁆𑀬𑀸𑀓𑀢𑀜𑁆𑀘 𑀳𑁂𑀢𑀼𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀤𑀲𑁆𑀲𑁂𑀢𑁆𑀯𑀸 𑀳𑁂𑀢𑀼𑀓𑀼𑀲𑀮𑀤𑀼𑀓𑀢𑀺𑀓𑀦𑁆𑀢𑀺 𑀞𑀧𑀺𑀢𑀁. 𑀧𑀸𑀴𑀺 𑀧𑀦 𑀅𑀢𑀺𑀲𑀁𑀔𑀺𑀢𑁆𑀢𑀸. 𑀬𑀣𑀸 𑀓𑀼𑀲𑀮𑀢𑁆𑀢𑀺𑀓𑀁, 𑀏𑀯𑀁 ‘‘𑀳𑁂𑀢𑀼𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀬𑁄𑀧𑀺 𑀳𑁂𑀢𑀼𑀤𑀼𑀓𑁂𑀦 ¶ 𑀬𑁄𑀚𑁂𑀢𑁆𑀯𑀸 𑀳𑁂𑀢𑀼𑀯𑁂𑀤𑀦𑀤𑀼𑀓𑀢𑀺𑀓𑀸𑀤𑀻𑀦𑀺 𑀏𑀓𑀯𑀻𑀲𑀢𑀺𑀤𑀼𑀓𑀢𑀺𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺. 𑀬𑀣𑀸 𑀘 𑀳𑁂𑀢𑀼𑀤𑀼𑀓𑁂𑀦 𑀲𑀤𑁆𑀥𑀺𑀁 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑀸 𑀬𑁄𑀚𑀺𑀢𑀸, 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀁 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀸𑀴𑀺 𑀧𑀦𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀅𑀢𑀺𑀲𑀁𑀔𑀺𑀢𑁆𑀢𑀸. 𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀦𑀬𑁄.

𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂𑀧𑀺 ‘‘𑀓𑀼𑀲𑀮𑀁 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀳𑁂𑀢𑀼𑀧𑀤𑀁 𑀬𑁄𑀚𑁂𑀢𑁆𑀯𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 𑀲𑀢𑁆𑀢𑀲𑀼 𑀫𑀳𑀸𑀯𑀸𑀭𑁂𑀲𑀼 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀺𑀦𑀬𑀘𑀢𑀼𑀓𑁆𑀓𑀯𑀲𑁂𑀦 𑀮𑀩𑁆𑀪𑀫𑀸𑀦𑀓𑀧𑀘𑁆𑀘𑀬𑀸 𑀏𑀓𑀫𑀽𑀮𑀸𑀤𑀻𑀳𑀺 𑀲𑀩𑁆𑀩𑀯𑀸𑀭𑁂𑀳𑀺 𑀤𑀲𑁆𑀲𑀺𑀢𑀸. 𑀬𑀣𑀸 𑀳𑁂𑀢𑀼𑀧𑀤𑀁, 𑀏𑀯𑀁 𑀦𑀳𑁂𑀢𑀼𑀧𑀤𑀫𑁆𑀧𑀺 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀓𑀼𑀲𑀮𑀳𑁂𑀢𑀼 𑀢𑀺𑀓𑀤𑀼𑀓𑀦𑁆𑀢𑀺 𑀞𑀧𑀺𑀢𑀁. 𑀬𑀣𑀸 𑀘 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀳𑁂𑀢𑀼𑀤𑀼𑀓𑀁, 𑀏𑀯𑀁 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀳𑀺𑀧𑀺 𑀢𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀦𑀸𑀢𑁆𑀢𑀺𑀓𑀤𑀼𑀓𑀸𑀤𑀻𑀦𑀺 𑀏𑀓𑀯𑀻𑀲𑀢𑀺𑀢𑀺𑀓𑀤𑀼𑀓𑀸𑀤𑀻𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀬𑀣𑀸 𑀘 𑀳𑁂𑀢𑀼𑀤𑀼𑀓𑀁, 𑀏𑀯𑀁 𑀲𑀳𑁂𑀢𑀼𑀓𑀸𑀤𑀬𑁄𑀧𑀺 𑀲𑀩𑁆𑀩𑁂 𑀧𑀘𑁆𑀘𑁂𑀓𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦𑁂𑀯 𑀬𑁄𑀚𑀺𑀢𑀸. 𑀏𑀯𑀁 𑀤𑀼𑀓𑀲𑀢𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀁 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀦𑀬𑁄.

𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑁂𑀧𑀺 ¶ ‘‘𑀓𑀼𑀲𑀮𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀳𑀺 𑀲𑀩𑁆𑀩𑀢𑁆𑀢𑀺𑀓𑁂𑀳𑀺, 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀬𑁄 𑀘 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀳𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀢𑀺𑀓𑁂𑀲𑀼 𑀏𑀯 𑀢𑀺𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀁 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀦𑀬𑁄.

𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑁂𑀧𑀺 ‘‘𑀳𑁂𑀢𑀼𑀁 𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀤𑀼𑀓𑀁 𑀲𑀳𑁂𑀢𑀼𑀓𑀸𑀤𑀻𑀳𑀺, 𑀲𑀳𑁂𑀢𑀼𑀓𑀜𑁆𑀘 𑀳𑁂𑀢𑀼𑀤𑀼𑀓𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀳𑀺 𑀧𑀘𑁆𑀘𑀬𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀤𑀼𑀓𑁂𑀲𑀼 𑀏𑀯 𑀤𑀼𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀁 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀦𑀬𑁄. 𑀏𑀯𑀁 𑀢𑀸𑀯 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 ¶ 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. 𑁋

𑀯𑀼𑀢𑁆𑀢𑀸 𑀙 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁂𑀲𑀼 𑀙𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀦𑀬𑀸𑀦𑀁 𑀯𑀲𑁂𑀦 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀫𑀺𑀤𑀁 𑀥𑀫𑁆𑀫𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀦𑀬𑁄.

𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂 𑀧𑀦 ‘‘𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘…𑀧𑁂… 𑀤𑁆𑀯𑁂 𑀔𑀦𑁆𑀥𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀢𑀺𑀓𑀧𑀝𑁆𑀞𑀸𑀦𑁂, ‘‘𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀦𑀳𑁂𑀢𑀼𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘…𑀧𑁂… 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀳𑁂𑀢𑀼𑀁 𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀦𑀳𑁂𑀢𑀼𑀁 𑀦𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 ¶ 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀓𑀼𑀲𑀮𑀁 𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀦𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀓𑀼𑀲𑀮𑀁 𑀦𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀦𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀳𑁂𑀢𑀼𑀁 𑀦𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀦𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑁂 𑀘𑀸𑀢𑀺 𑀙𑀲𑀼 𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂𑀲𑀼 𑀅𑀦𑀼𑀮𑁄𑀫𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀙𑀲𑀼 𑀧𑀝𑁆𑀞𑀸𑀦𑁂𑀲𑀼 𑀯𑀼𑀢𑁆𑀢𑁂𑀦 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀘 𑀓𑀼𑀲𑀮𑀸𑀤𑀻𑀦𑀁, 𑀳𑁂𑀢𑀼𑀆𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀥𑀫𑁆𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀁 𑀦𑀸𑀫 𑀚𑀸𑀢𑀁. 𑀢𑀢𑁆𑀣 𑀳𑀺 𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑁄. 𑀢𑀣𑀸 ‘‘𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘…𑀧𑁂… 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. 𑁋

𑀯𑀼𑀢𑁆𑀢𑀸 ¶ 𑀙 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁆𑀣𑀸𑀧𑀺 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀦𑀬𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀫𑀺𑀤𑀁 𑀥𑀫𑁆𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀦𑀬𑁄.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂 𑀧𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸. 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀢𑀺𑀓𑀧𑀝𑁆𑀞𑀸𑀦𑁂, ‘‘𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 ¶ 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀓𑀼𑀲𑀮𑀁 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀦𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀓𑀼𑀲𑀮𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀓𑀼𑀲𑀮𑁄 𑀦𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀳𑁂𑀢𑀼𑀁 𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼 𑀦𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑁂 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀢𑁆𑀢𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀁 𑀦𑀸𑀫 𑀚𑀸𑀢𑀁. 𑀢𑀢𑁆𑀣 𑀳𑀺 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀯𑀺𑀥𑀸𑀦𑀁. 𑀦𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀦𑀺𑀯𑀸𑀭𑀡𑀁, 𑀢𑀲𑁆𑀫𑀸 ‘‘𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. 𑁋

𑀯𑀼𑀢𑁆𑀢𑀸 𑀙 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁆𑀣𑀸𑀧𑀺 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀦𑀬𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀫𑀺𑀤𑀁 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀦𑀬𑁄.

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑁂 ‘‘𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄…𑀧𑁂… 𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 ¶ 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀢𑀺𑀓𑀧𑀝𑁆𑀞𑀸𑀦𑁂, ‘‘𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀳𑁂𑀢𑀼𑀁 ¶ 𑀦𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀅𑀓𑀼𑀲𑀮𑁄 𑀥𑀫𑁆𑀫𑁄…𑀧𑁂… 𑀳𑁂𑀢𑀼 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺’’𑀆𑀤𑀺𑀦𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀓𑀼𑀲𑀮𑀁 𑀦𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀳𑁂𑀢𑀼 𑀥𑀫𑁆𑀫𑁄…𑀧𑁂… 𑀅𑀩𑁆𑀬𑀸𑀓𑀢𑁄 𑀳𑁂𑀢𑀼 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀓𑀼𑀲𑀮𑀁 𑀦𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄…𑀧𑁂… 𑀅𑀩𑁆𑀬𑀸𑀓𑀢𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑁂 𑀘, ‘‘𑀦𑀳𑁂𑀢𑀼𑀁 𑀦𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑁂 𑀘, 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀘 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀅𑀧𑁆𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀥𑀫𑁆𑀫𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀁 𑀦𑀸𑀫 𑀚𑀸𑀢𑀁. 𑀢𑀢𑁆𑀣 𑀦𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀦𑀺𑀯𑀸𑀭𑀡𑀁. 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁. 𑀓𑀼𑀲𑀮𑀁 𑀧𑀦 𑀧𑀝𑀺𑀘𑁆𑀘 𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀅𑀪𑀸𑀯𑀢𑁄 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀼𑀲𑀮𑀁, 𑀳𑀺 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁 𑀯𑀸 𑀲𑀳𑀚𑀸𑀢𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀼𑀲𑀮𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀓𑀼𑀲𑀮𑀲𑁆𑀲 𑀘 𑀅𑀩𑁆𑀬𑀸𑀓𑀢𑀲𑁆𑀲 𑀘 𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸. 𑀏𑀯𑀫𑀜𑁆𑀜𑀢𑁆𑀣. 𑀏𑀯𑀫𑁂𑀢𑁆𑀣 𑀥𑀫𑁆𑀫𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. 𑁋

𑀯𑀼𑀢𑁆𑀢𑀸 𑀙 𑀦𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁆𑀣𑀸𑀧𑀺 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 ¶ 𑀦𑀬𑀸𑀦𑀁 𑀯𑀲𑁂𑀦 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀫𑀺𑀤𑀁 𑀥𑀫𑁆𑀫𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑀦𑀬𑁄.

𑀏𑀯𑀫𑀺𑀤𑀁 𑀪𑀕𑀯𑀢𑀸 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀸𑀤𑀻𑀲𑀼 𑀘𑀢𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀢𑀺𑀓𑀤𑀼𑀓𑀸𑀤𑀻𑀦𑀜𑁆𑀜𑁂𑀯 𑀙𑀦𑁆𑀦𑀁 𑀙𑀦𑁆𑀦𑀁 𑀦𑀬𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀁 𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁 𑀤𑁂𑀲𑀺𑀢𑀁. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀦𑀬𑀸𑀦𑀁 ¶ 𑀯𑀲𑁂𑀦𑁂𑀢𑀁 𑀙𑀦𑁆𑀦𑀯𑀼𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀁 𑀳𑁄𑀢𑀺, 𑀥𑀫𑁆𑀫𑀯𑀲𑁂𑀦𑁂𑀯 𑀘𑁂𑀢𑀁 𑀧𑀓𑀭𑀡𑀁 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀪𑀗𑁆𑀕𑀦𑀬𑁄.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀧𑀝𑁆𑀞𑀸𑀦𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 ¶ 𑀘 𑁋

𑁧.

𑀫𑀸𑀢𑀺𑀓𑀸𑀬𑀸𑀪𑀺𑀥𑀫𑁆𑀫𑀲𑁆𑀲, 𑀆𑀭𑀤𑁆𑀥𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀫𑁄𑀳𑀯𑀺𑀘𑁆𑀙𑁂𑀤𑀦𑀻 𑀦𑀸𑀫, 𑀬𑀸 𑀲𑀸 𑀦𑀺𑀝𑁆𑀞𑀫𑀼𑀧𑀸𑀕𑀢𑀸.

𑁨.

𑀦𑀺𑀝𑁆𑀞𑀁 𑀬𑀣𑀸𑀬𑀁 𑀲𑀫𑁆𑀧𑀢𑁆𑀢𑀸, 𑀮𑀚𑁆𑀚𑀻𑀳𑀺 𑀅𑀪𑀺𑀧𑀢𑁆𑀣𑀺𑀢𑀸;

𑀲𑀩𑁆𑀩𑁂 𑀦𑀺𑀝𑁆𑀞𑀁 𑀢𑀣𑀸 𑀲𑀦𑁆𑀢𑀸, 𑀲𑀫𑁂𑀦𑁆𑀢𑀼 𑀲𑀼𑀫𑀦𑁄𑀭𑀣𑀸.

𑁩.

𑀬𑁄 𑀕𑀫𑁆𑀪𑀻𑀭𑁄 𑀲𑀲𑀸𑀤𑀻𑀦𑀁, 𑀲𑀫𑀼𑀤𑁆𑀤𑁄𑀯 𑀪𑀬𑀸𑀯𑀳𑁄;

𑀓𑀸𑀮𑁂𑀲𑁆𑀫𑀺𑀁 𑀥𑀻𑀫𑀢𑀜𑁆𑀘𑀸𑀧𑀺, 𑀅𑀧𑀺 𑀕𑀦𑁆𑀣𑀸𑀯𑀮𑁄𑀓𑀦𑁂.

𑁪.

𑀧𑀞𑀫𑀦𑁆𑀢𑀭𑀥𑀸𑀦𑀲𑁆𑀲, 𑀅𑀪𑀺𑀥𑀫𑁆𑀫𑀲𑁆𑀲 𑀢𑀲𑁆𑀲 𑀬𑀁;

𑀲𑀺𑀮𑀸𑀮𑁂𑀔𑀸 𑀦𑀺𑀥𑀻𑀦𑀁𑀯, 𑀥𑀫𑁆𑀫𑀢𑁆𑀣𑀸𑀦𑀁 𑀧𑀓𑀸𑀲𑀺𑀓𑀸.

𑁫.

𑀦𑀸𑀯𑀸 𑀯𑀺𑀬 𑀲𑀫𑀼𑀤𑁆𑀤𑀲𑁆𑀲, 𑀲𑀼𑀔𑁄𑀢𑀭𑀡𑀧𑀤𑁆𑀥𑀢𑀺;

𑀧𑀸𑀴𑀺𑀅𑀝𑁆𑀞𑀓𑀣𑀸 𑀘𑁂𑀲𑀸, 𑀧𑀭𑀺𑀲𑀼𑀤𑁆𑀥𑀸 𑀅𑀦𑀸𑀓𑀼𑀮𑀸.

𑁬.

𑀦𑀬𑀢𑁄𑀧𑀺 ¶ 𑀅𑀯𑀺𑀓𑁆𑀓𑀺𑀡𑁆𑀡𑀸, 𑀅𑀲𑀁𑀓𑀺𑀡𑁆𑀡𑀸 𑀦𑀺𑀓𑀸𑀬𑀢𑁄;

𑀬𑀢𑁄 𑀲𑀓𑁆𑀓𑀘𑁆𑀘 𑀲𑁄𑀢𑀩𑁆𑀩𑀸, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀲𑀢𑀸.

𑁭.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀸𑀤𑀺𑀢𑁄;

𑀫𑀬𑀸𑀧𑀺 𑀯𑀡𑁆𑀡𑀬𑀦𑁆𑀢𑁂𑀦, 𑀭𑀘𑀺𑀢𑀸 𑀲𑀼𑀤𑁆𑀥𑀘𑁂𑀢𑀲𑀸;

𑀢𑁂𑀢𑁆𑀢𑀺𑀁𑀲𑀪𑀸𑀡𑀯𑀸𑀭𑀸𑀬, 𑀧𑀭𑀺𑀫𑀸𑀡𑁂𑀦 𑀢𑀦𑁆𑀢𑀺𑀬𑀸.

𑁮.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀬𑀸 𑀲𑀸, 𑀬𑀸𑀯 𑀦𑀺𑀝𑁆𑀞𑀁 𑀬𑀣𑀸𑀩𑀮𑀁;

𑀲𑀩𑁆𑀩𑀢𑁆𑀣𑀲𑀗𑁆𑀕𑀳𑀸 𑀏𑀲𑀸, 𑀅𑀦𑀸𑀓𑀼𑀮𑀧𑀤𑀓𑁆𑀓𑀫𑀸.

𑁯.

𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀢𑁂𑀦, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀦𑀺𑀝𑁆𑀞𑀁 𑀧𑀸𑀧𑁂𑀬𑁆𑀬𑀫𑀔𑀺𑀮𑁂, 𑀧𑀸𑀡𑀺𑀦𑁄 𑀳𑀺𑀢𑀘𑁂𑀢𑀲𑀸.

𑁧𑁦.

𑀦𑀸𑀦𑀸𑀚𑀦𑀸𑀥𑀺𑀭𑀫𑀡𑀻𑀬𑀢𑀭𑀲𑁆𑀲,

𑀘𑁄𑀴𑀭𑀝𑁆𑀞𑀲𑁆𑀲 𑀪𑀸𑀭𑀫𑀥𑀺𑀯𑀸𑀳𑀓𑀼𑀮𑀦𑁆𑀥𑀭𑀲𑁆𑀲;

𑀓𑀸𑀯𑁂𑀭𑀺𑀧𑀽𑀢𑀲𑀮𑀺𑀮𑁂𑀦 𑀳𑀺𑀢𑀸𑀮𑀬𑀲𑁆𑀲,

𑀭𑀸𑀚𑀸𑀥𑀺𑀭𑀸𑀚𑀯𑀭𑀯𑀁𑀲𑀲𑀼𑀧𑀻𑀡𑀺𑀢𑀲𑁆𑀲.

𑁧𑁧.

𑀫𑀚𑁆𑀛𑀫𑁆𑀳𑀺 ¶ 𑀘𑁄𑀴𑀓𑀓𑀮𑀗𑁆𑀓𑀦𑀺𑀪𑁂𑀦 𑀫𑀕𑁆𑀕𑀁,

𑀧𑀽𑀭𑀁 𑀯𑀺𑀲𑀸𑀮𑀯𑀺𑀪𑀯𑁂𑀳𑀺 𑀫𑀳𑀸𑀓𑀼𑀮𑁂𑀳𑀺;

𑀧𑀸𑀓𑀸𑀭𑀘𑀓𑁆𑀓𑀧𑀭𑀺𑀔𑀸𑀳𑀺 𑀘 𑀕𑁄𑀧𑀼𑀭𑁂𑀳𑀺,

𑀬𑀼𑀢𑁆𑀢𑀁 𑀚𑀦𑀸𑀓𑀼𑀮𑀲𑀼𑀲𑀚𑁆𑀚𑀺𑀢𑀭𑀸𑀚𑀫𑀕𑁆𑀕𑀁.

𑁧𑁨.

𑀲𑀩𑁆𑀩𑀽𑀧𑀪𑁄𑀕𑀧𑀭𑀺𑀪𑁄𑀕𑀥𑀦𑁂𑀳𑀺 𑀦𑀸𑀦𑀸-

𑀯𑀡𑁆𑀡𑁂𑀳𑀺 𑀧𑀼𑀡𑁆𑀡𑀯𑀺𑀯𑀺𑀥𑀸𑀧𑀡𑀺𑀓𑁂𑀳𑀺 𑀲𑁄𑀪𑀁;

𑀘𑁄𑀴𑀸𑀥𑀺𑀦𑀸𑀕𑀧𑀼𑀭𑀦𑀦𑁆𑀤𑀦𑀦𑀸𑀣𑀪𑀽𑀢𑀁,

𑀬𑁂 𑀢𑀢𑁆𑀣 𑀲𑁄𑀕𑀢𑀯𑀺𑀳𑀸𑀭𑀯𑀭𑀸𑀪𑀺𑀭𑀸𑀫𑀸.

𑁧𑁩.

𑀢𑁂𑀲𑀁 ¶ 𑀫𑀼𑀔𑁂 𑀚𑀦𑀫𑀦𑁄𑀳𑀭𑀲𑀢𑁆𑀣𑀼𑀩𑀺𑀫𑁆𑀩-

𑀲𑀫𑁆𑀪𑀸𑀯𑀺𑀢𑁂 𑀫𑀳𑀢𑀺 𑀲𑀚𑁆𑀚𑀦𑀫𑀸𑀦𑀦𑀻𑀬𑁂;

𑀯𑀺𑀚𑁆𑀚𑀸𑀮𑀬𑁂𑀳𑀺 𑀉𑀤𑀬𑀸𑀘𑀮𑀲𑀦𑁆𑀦𑀺𑀪𑁂𑀳𑀺,

𑀓𑁂𑀮𑀸𑀲𑀓𑀽𑀝𑀲𑀺𑀔𑀭𑁄𑀧𑀫𑀘𑁂𑀢𑀺𑀬𑁂𑀳𑀺.

𑁧𑁪.

𑀧𑀸𑀲𑀸𑀤𑀳𑀫𑁆𑀫𑀺𑀬𑀯𑀭𑁂𑀳𑀺 𑀘 𑀫𑀡𑁆𑀟𑀧𑁂𑀳𑀺,

𑀚𑀫𑁆𑀩𑀫𑁆𑀩𑀢𑀸𑀮𑀧𑀦𑀲𑀸𑀤𑀺𑀢𑀭𑀸𑀯𑀮𑀻𑀳𑀺;

𑀦𑀦𑁆𑀤𑁄𑀧𑀦𑀦𑁆𑀤𑀪𑀼𑀚𑀕𑀲𑁆𑀲 𑀯𑀭𑀲𑁆𑀲 𑀪𑁄𑀕-

𑀘𑀓𑁆𑀓𑀸𑀯𑀮𑀻𑀲𑀫𑀲𑀼𑀥𑀸𑀓𑀢𑀕𑁄𑀧𑀼𑀭𑁂𑀳𑀺.

𑁧𑁫.

𑀬𑀼𑀢𑁆𑀢𑁂 𑀯𑀺𑀲𑀸𑀮𑀲𑀺𑀓𑀢𑀸𑀲𑀺𑀢𑀫𑀸𑀴𑀓𑁂𑀳𑀺,

𑀬𑀼𑀢𑁆𑀢𑁂 𑀲𑀼𑀲𑀻𑀮𑀬𑀢𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀫𑁆𑀳𑀺;

𑀓𑀮𑁆𑀬𑀸𑀡𑀓𑀫𑁆𑀫𑀦𑀺𑀭𑀢𑁂𑀳𑀺 𑀳𑀝𑀽𑀧𑀳𑀸𑀭𑁂,

𑀦𑀸𑀕𑀚𑁆𑀚𑀼𑀦𑀯𑁆𑀳𑀬𑀯𑀺𑀳𑀸𑀭𑀯𑀭𑁂 𑀯𑀲𑀦𑁆𑀢𑁄.

𑁧𑁬.

𑀦𑀸𑀫𑁂𑀦 𑀬𑁄 𑀥𑀼𑀢𑀥𑀭𑀕𑁆𑀕𑀲𑀫𑀸𑀦𑀦𑀸𑀫𑁄,

𑀘𑀦𑁆𑀤𑁄𑀯 𑀧𑀸𑀓𑀝𑀦𑀪𑁄𑀤𑀺𑀢𑀯𑀻𑀢𑀧𑀜𑁆𑀜𑁄;

𑀲𑀢𑁆𑀣𑀦𑁆𑀢𑀭𑁂𑀲𑀼 𑀦𑀺𑀧𑀼𑀡𑁄 𑀧𑀺𑀝𑀓𑀢𑁆𑀢𑀬𑁂 𑀘,

𑀯𑀸𑀤𑀻𑀪𑀬𑀽𑀣𑀯𑀺𑀧𑀺𑀦𑁂 𑀫𑀺𑀕𑀭𑀸𑀚𑀮𑀻𑀮𑁄.

𑁧𑁭.

𑀬𑁄 ¶ 𑀲𑀸𑀕𑀭𑁄𑀯 𑀦 𑀯𑀺𑀮𑀗𑁆𑀖𑀢𑀺 𑀲𑀻𑀮𑀯𑁂𑀮-

𑀫𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀸𑀭𑀯𑀺𑀪𑀽𑀲𑀺𑀢𑀢𑁆𑀢𑁄;

𑀚𑁄𑀢𑁂𑀢𑀺 𑀲𑀸𑀲𑀦𑀫𑀮𑀁 𑀦𑀺𑀔𑀺𑀮𑀁 𑀚𑀳𑀦𑁆𑀢𑁄,

𑀲𑀓𑁆𑀓𑀘𑁆𑀘 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀤𑀻𑀧𑀬𑀦𑁆𑀢𑁄.

𑁧𑁮.

𑀢𑁂𑀦𑀸𑀪𑀺𑀥𑀫𑁆𑀫𑀧𑀺𑀝𑀓𑀡𑁆𑀡𑀯𑀯𑀺𑀧𑁆𑀧𑀓𑀺𑀡𑁆𑀡-

𑀲𑀸𑀭𑀢𑁆𑀣𑀭𑀢𑁆𑀦𑀦𑀺𑀓𑀭𑁂𑀯 𑀲𑀫𑀼𑀤𑁆𑀥𑀭𑀺𑀢𑁆𑀯𑀸;

𑀲𑀫𑁆𑀫𑀸𑀧𑀚𑀸𑀦𑀕𑀴𑀮𑀗𑁆𑀓𑀭𑀡𑀸𑀬 ¶ 𑀫𑁄𑀳-

𑀯𑀺𑀘𑁆𑀙𑁂𑀤𑀦𑀻 𑀯𑀺𑀭𑀘𑀺𑀢𑀸 𑀭𑀢𑀦𑀸𑀯𑀮𑀻 𑀬𑀸.

𑁧𑁯.

𑀲𑀸𑀬𑀁 𑀧𑀪𑀸𑀲𑀢𑀼 𑀲𑀼𑀓𑀺𑀢𑁆𑀢𑀺𑀯𑀺𑀭𑀸𑀚𑀫𑀸𑀦𑀸,

𑀥𑀫𑁆𑀫𑁂𑀲𑀼 𑀫𑁄𑀳𑀢𑀺𑀫𑀺𑀭𑀁 𑀯𑀺𑀦𑀺𑀳𑀘𑁆𑀘 𑀲𑀫𑁆𑀫𑀸;

𑀆𑀪𑀸𑀢𑀼 𑀢𑀸𑀯 𑀚𑀺𑀦𑀲𑀸𑀲𑀦𑀚𑁄𑀢𑀺 𑀬𑀸𑀯,

𑀯𑀢𑁆𑀢𑀺𑀲𑁆𑀲𑀢𑀺𑀲𑁆𑀲 𑀚𑀦𑀢𑀸𑀳𑀺𑀢𑀫𑀸𑀯𑀳𑀦𑁆𑀢𑀻.

𑀇𑀢𑀺 𑀘𑁄𑀴𑀭𑀝𑁆𑀞𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀯𑀺𑀭𑀘𑀺𑀢𑀸

𑀫𑁄𑀳𑀯𑀺𑀘𑁆𑀙𑁂𑀤𑀦𑀻 𑀦𑀸𑀫

𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.