📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄

(𑀤𑀼𑀢𑀺𑀬𑁄 𑀪𑀸𑀕𑁄)

𑁧𑁨. 𑀇𑀤𑁆𑀥𑀺𑀯𑀺𑀥𑀦𑀺𑀤𑁆𑀤𑁂𑀲𑁄

𑀅𑀪𑀺𑀜𑁆𑀜𑀸𑀓𑀣𑀸

𑁩𑁬𑁫. 𑀇𑀤𑀸𑀦𑀺 ¶ ¶ 𑀬𑀸𑀲𑀁 𑀮𑁄𑀓𑀺𑀓𑀸𑀪𑀺𑀜𑁆𑀜𑀸𑀦𑀁 𑀯𑀲𑁂𑀦 𑀅𑀬𑀁 𑀲𑀫𑀸𑀥𑀺𑀪𑀸𑀯𑀦𑀸 𑀅𑀪𑀺𑀜𑁆𑀜𑀸𑀦𑀺𑀲𑀁𑀲𑀸𑀢𑀺 𑀯𑀼𑀢𑁆𑀢𑀸, 𑀢𑀸 𑀅𑀪𑀺𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀼𑀁 𑀬𑀲𑁆𑀫𑀸 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀬𑁄𑀕𑀺𑀦𑀸 𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺𑀲𑁆𑀲 𑀲𑀸 𑀲𑀫𑀸𑀥𑀺𑀪𑀸𑀯𑀦𑀸 𑀅𑀥𑀺𑀕𑀢𑀸𑀦𑀺𑀲𑀁𑀲𑀸 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀣𑀺𑀭𑀢𑀭𑀸 𑀘, 𑀲𑁄 𑀅𑀥𑀺𑀕𑀢𑀸𑀦𑀺𑀲𑀁𑀲𑀸𑀬 𑀣𑀺𑀭𑀢𑀭𑀸𑀬 𑀲𑀫𑀸𑀥𑀺𑀪𑀸𑀯𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀼𑀔𑁂𑀦𑁂𑀯 𑀧𑀜𑁆𑀜𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀺. 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀓𑀣𑀁 𑀢𑀸𑀯 𑀆𑀭𑀪𑀺𑀲𑁆𑀲𑀸𑀫.

𑀪𑀕𑀯𑀢𑀸 𑀳𑀺 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀉𑀢𑁆𑀢𑀭𑀼𑀢𑁆𑀢𑀭𑀺 𑀧𑀡𑀻𑀢𑀧𑀡𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀣𑀜𑁆𑀘 ¶ ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁩𑁮) 𑀦𑀬𑁂𑀦 𑀇𑀤𑁆𑀥𑀺𑀯𑀺𑀥𑀁, 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑁂 𑀜𑀸𑀡𑀦𑁆𑀢𑀺 𑀧𑀜𑁆𑀘 𑀮𑁄𑀓𑀺𑀓𑀸𑀪𑀺𑀜𑁆𑀜𑀸 𑀯𑀼𑀢𑁆𑀢𑀸.

𑀢𑀢𑁆𑀣 ¶ 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻𑀢𑀺𑀆𑀤𑀺𑀓𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀸𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀬𑁄𑀕𑀺𑀦𑀸 𑀑𑀤𑀸𑀢𑀓𑀲𑀺𑀡𑀧𑀭𑀺𑀬𑀦𑁆𑀢𑁂𑀲𑀼 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀅𑀝𑁆𑀞 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑁋

𑀓𑀲𑀺𑀡𑀸𑀦𑀼𑀮𑁄𑀫𑀢𑁄, 𑀓𑀲𑀺𑀡𑀧𑀝𑀺𑀮𑁄𑀫𑀢𑁄, 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀢𑁄, 𑀛𑀸𑀦𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑁄, 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀢𑁄, 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄, 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄, 𑀅𑀗𑁆𑀕𑀯𑀯𑀢𑁆𑀣𑀸𑀧𑀦𑀢𑁄, 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀢𑁄𑀢𑀺.

𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑀩𑁆𑀩𑀁.

𑁩𑁬𑁬. 𑀓𑀢𑀫𑀁 𑀧𑀦𑁂𑀢𑁆𑀣 𑀓𑀲𑀺𑀡𑀸𑀦𑀼𑀮𑁄𑀫𑀁…𑀧𑁂… 𑀓𑀢𑀫𑀁 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀦𑁆𑀢𑀺. 𑀇𑀥 𑀪𑀺𑀓𑁆𑀔𑀼 𑀧𑀣𑀯𑀻𑀓𑀲𑀺𑀡𑁂 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀆𑀧𑁄𑀓𑀲𑀺𑀡𑁂𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀇𑀤𑀁 𑀓𑀲𑀺𑀡𑀸𑀦𑀼𑀮𑁄𑀫𑀁 𑀦𑀸𑀫.

𑀑𑀤𑀸𑀢𑀓𑀲𑀺𑀡𑀢𑁄 𑀧𑀦 𑀧𑀝𑁆𑀞𑀸𑀬 𑀢𑀣𑁂𑀯 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀲𑀫𑀸𑀧𑀚𑁆𑀚𑀦𑀁 𑀓𑀲𑀺𑀡𑀧𑀝𑀺𑀮𑁄𑀫𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀑𑀤𑀸𑀢𑀓𑀲𑀺𑀡𑀁, 𑀑𑀤𑀸𑀢𑀓𑀲𑀺𑀡𑀢𑁄𑀧𑀺 𑀧𑀝𑁆𑀞𑀸𑀬 𑀬𑀸𑀯 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀏𑀯𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀁 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀦𑀸𑀫.

𑀧𑀞𑀫𑀚𑁆𑀛𑀸𑀦𑀢𑁄 𑀧𑀦 𑀧𑀝𑁆𑀞𑀸𑀬 𑀧𑀝𑀺𑀧𑀸𑀝𑀺𑀬𑀸 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀁 𑀛𑀸𑀦𑀸𑀦𑀼𑀮𑁄𑀫𑀁 𑀦𑀸𑀫.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀁, 𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀁 𑀛𑀸𑀦𑀧𑀝𑀺𑀮𑁄𑀫𑀁 𑀦𑀸𑀫.

𑀧𑀞𑀫𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀦𑁆𑀢𑀺 𑀏𑀯𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀁 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀦 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀢𑀤𑁂𑀯 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀢𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 ¶ 𑀏𑀯𑀁 𑀓𑀲𑀺𑀡𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀛𑀸𑀦𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀁 𑀦𑀸𑀫. 𑀏𑀯𑀁 𑀆𑀧𑁄𑀓𑀲𑀺𑀡𑀸𑀤𑀺𑀫𑀽𑀮𑀺𑀓𑀸𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀢𑁂𑀚𑁄𑀓𑀲𑀺𑀡𑁂, 𑀢𑀢𑁄 𑀦𑀻𑀮𑀓𑀲𑀺𑀡𑁂, 𑀢𑀢𑁄 𑀮𑁄𑀳𑀺𑀢𑀓𑀲𑀺𑀡𑁂𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀛𑀸𑀦𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀓𑀲𑀺𑀡𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀢𑁂𑀚𑁄𑀓𑀲𑀺𑀡𑁂 𑀢𑀢𑀺𑀬𑀁, 𑀦𑀻𑀮𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀮𑁄𑀳𑀺𑀢𑀓𑀲𑀺𑀡𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀛𑀸𑀦𑀲𑁆𑀲 𑀘𑁂𑀯 𑀓𑀲𑀺𑀡𑀲𑁆𑀲 𑀘 𑀉𑀓𑁆𑀓𑀫𑀦𑀁 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀦 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀇𑀢𑀭𑁂𑀲𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀁 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀓𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀤𑁂𑀯 𑀆𑀧𑁄𑀓𑀲𑀺𑀡𑁂…𑀧𑁂… 𑀢𑀤𑁂𑀯 𑀑𑀤𑀸𑀢𑀓𑀲𑀺𑀡𑁂𑀢𑀺 𑀏𑀯𑀁 𑀲𑀩𑁆𑀩𑀓𑀲𑀺𑀡𑁂𑀲𑀼 𑀏𑀓𑀲𑁆𑀲𑁂𑀯 𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀁 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀧𑁄𑀓𑀲𑀺𑀡𑁂 𑀤𑀼𑀢𑀺𑀬𑀁, 𑀢𑁂𑀚𑁄𑀓𑀲𑀺𑀡𑁂 𑀢𑀢𑀺𑀬𑀁, 𑀯𑀸𑀬𑁄𑀓𑀲𑀺𑀡𑁂 𑀘𑀢𑀼𑀢𑁆𑀣𑀁, 𑀦𑀻𑀮𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀧𑀻𑀢𑀓𑀲𑀺𑀡𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 ¶ , 𑀮𑁄𑀳𑀺𑀢𑀓𑀲𑀺𑀡𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀑𑀤𑀸𑀢𑀓𑀲𑀺𑀡𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀅𑀗𑁆𑀕𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀜𑁆𑀘 𑀲𑀗𑁆𑀓𑀫𑀦𑀁 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀁 𑀦𑀸𑀫.

𑀧𑀞𑀫𑀁 𑀛𑀸𑀦𑀁 𑀧𑀦 𑀧𑀜𑁆𑀘𑀗𑁆𑀕𑀺𑀓𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀢𑀺𑀯𑀗𑁆𑀕𑀺𑀓𑀁, 𑀢𑀢𑀺𑀬𑀁 𑀤𑀼𑀯𑀗𑁆𑀕𑀺𑀓𑀁, 𑀢𑀣𑀸 𑀘𑀢𑀼𑀢𑁆𑀣𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀛𑀸𑀦𑀗𑁆𑀕𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀅𑀗𑁆𑀕𑀯𑀯𑀢𑁆𑀣𑀸𑀧𑀦𑀁 𑀦𑀸𑀫.

𑀢𑀣𑀸 𑀇𑀤𑀁 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀤𑀁 𑀆𑀧𑁄𑀓𑀲𑀺𑀡𑀁…𑀧𑁂… 𑀇𑀤𑀁 𑀑𑀤𑀸𑀢𑀓𑀲𑀺𑀡𑀦𑁆𑀢𑀺 𑀏𑀯𑀁 𑀆𑀭𑀫𑁆𑀫𑀡𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀁 𑀦𑀸𑀫 ¶ . 𑀅𑀗𑁆𑀕𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀫𑁆𑀧𑀺 𑀏𑀓𑁂 𑀇𑀘𑁆𑀙𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀅𑀤𑁆𑀥𑀸 𑀢𑀁 𑀪𑀸𑀯𑀦𑀸𑀫𑀼𑀔𑀁 𑀦 𑀳𑁄𑀢𑀺.

𑁩𑁬𑁭. 𑀇𑀫𑁂𑀳𑀺 𑀧𑀦 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀅𑀧𑀭𑀺𑀤𑀫𑁂𑀢𑁆𑀯𑀸 𑀧𑀼𑀩𑁆𑀩𑁂 𑀅𑀪𑀸𑀯𑀺𑀢𑀪𑀸𑀯𑀦𑁄 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑁆𑀧𑀺 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀓𑀢𑀓𑀲𑀺𑀡𑀧𑀭𑀺𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀁 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀉𑀧𑁆𑀧𑀦𑁆𑀦𑁂 𑀦𑀺𑀫𑀺𑀢𑁆𑀢𑁂 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀧𑁆𑀧𑀦𑀸𑀥𑀺𑀕𑀫𑁄 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀅𑀥𑀺𑀕𑀢𑀧𑁆𑀧𑀦𑀲𑁆𑀲 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀧𑀭𑀺𑀤𑀫𑀺𑀢𑀘𑀺𑀢𑁆𑀢𑀲𑁆𑀲𑀸𑀧𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀦𑀸𑀫 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺. 𑀯𑀺𑀓𑀼𑀩𑁆𑀩𑀦𑀧𑁆𑀧𑀢𑁆𑀢𑀲𑁆𑀲𑀸𑀧𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁄 𑀦𑀸𑀫 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀔𑀺𑀧𑁆𑀧𑀦𑀺𑀲𑀦𑁆𑀢𑀻 𑀳𑁄𑀢𑀺. 𑀣𑁂𑀭𑀫𑁆𑀩𑀢𑁆𑀣𑀮𑁂 𑀫𑀳𑀸𑀭𑁄𑀳𑀡𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀆𑀕𑀢𑁂𑀲𑀼 𑀢𑀺𑀁𑀲𑀫𑀢𑁆𑀢𑁂𑀲𑀼 𑀇𑀤𑁆𑀥𑀺𑀫𑀦𑁆𑀢𑀲𑀳𑀲𑁆𑀲𑁂𑀲𑀼 𑀉𑀧𑀲𑀫𑁆𑀧𑀤𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀺𑀬. 𑀢𑀲𑁆𑀲𑀸𑀦𑀼𑀪𑀸𑀯𑁄 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁭𑁮 𑀆𑀤𑀬𑁄) 𑀯𑀼𑀢𑁆𑀢𑁄𑀬𑁂𑀯. 𑀢𑀁 𑀧𑀦𑀲𑁆𑀲𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀆𑀳 ‘‘𑀆𑀯𑀼𑀲𑁄, 𑀲𑀘𑁂 𑀭𑀓𑁆𑀔𑀺𑀢𑁄 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂 𑀕𑀭𑀳𑀧𑁆𑀧𑀢𑁆𑀢𑀸 𑀅𑀲𑁆𑀲𑀸𑀫 ‘𑀦𑀸𑀕𑀭𑀸𑀚𑀸𑀦𑀁 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀽’𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀩𑁆𑀩𑀁 𑀆𑀯𑀼𑀥𑀁 𑀦𑀸𑀫 𑀫𑀮𑀁 𑀲𑁄𑀥𑁂𑀢𑁆𑀯𑀸𑀯 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀢𑀺𑀁𑀲𑀲𑀳𑀲𑁆𑀲𑀸𑀧𑀺 𑀪𑀺𑀓𑁆𑀔𑀽 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀦𑁄 𑀅𑀳𑁂𑀲𑀼𑀁.

𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀬𑀸𑀧𑀺 ¶ 𑀘 𑀲𑀢𑀺 𑀧𑀭𑀲𑁆𑀲 𑀧𑀢𑀺𑀝𑁆𑀞𑀸𑀪𑀸𑀯𑁄 𑀪𑀸𑀭𑁄, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀳𑁄𑀢𑀺, 𑀕𑀺𑀭𑀺𑀪𑀡𑁆𑀟𑀯𑀸𑀳𑀦𑀧𑀽𑀚𑀸𑀬 𑀫𑀸𑀭𑁂𑀦 𑀅𑀗𑁆𑀕𑀸𑀭𑀯𑀲𑁆𑀲𑁂 𑀧𑀯𑀢𑁆𑀢𑀺𑀢𑁂 𑀆𑀓𑀸𑀲𑁂 𑀧𑀣𑀯𑀺𑀁 𑀫𑀸𑀧𑁂𑀢𑁆𑀯𑀸 𑀅𑀗𑁆𑀕𑀸𑀭𑀯𑀲𑁆𑀲𑀧𑀭𑀺𑀢𑁆𑀢𑀸𑀭𑀓𑁄 𑀣𑁂𑀭𑁄 𑀯𑀺𑀬.

𑀩𑀮𑀯𑀧𑀼𑀩𑁆𑀩𑀬𑁄𑀕𑀸𑀦𑀁 𑀧𑀦 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀕𑁆𑀕𑀲𑀸𑀯𑀓𑀸𑀤𑀻𑀦𑀁 𑀯𑀺𑀦𑀸𑀧𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑀝𑀺𑀮𑀸𑀪𑁂𑀦𑁂𑀯 𑀇𑀤𑀜𑁆𑀘 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀅𑀜𑁆𑀜𑁂 ¶ 𑀘 𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀪𑁂𑀤𑀸 𑀕𑀼𑀡𑀸 𑀇𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀁 𑀓𑀢𑁆𑀢𑀼𑀓𑀸𑀫𑁄 𑀲𑀼𑀯𑀡𑁆𑀡𑀓𑀸𑀭𑁄 𑀅𑀕𑁆𑀕𑀺𑀥𑀫𑀦𑀸𑀤𑀻𑀳𑀺 𑀲𑀼𑀯𑀡𑁆𑀡𑀁 𑀫𑀼𑀤𑀼𑀁 𑀓𑀫𑁆𑀫𑀜𑁆𑀜𑀁 𑀓𑀢𑁆𑀯𑀸𑀯 𑀓𑀭𑁄𑀢𑀺, 𑀬𑀣𑀸 𑀘 𑀪𑀸𑀚𑀦𑀯𑀺𑀓𑀢𑀺𑀁 𑀓𑀢𑁆𑀢𑀼𑀓𑀸𑀫𑁄 𑀓𑀼𑀫𑁆𑀪𑀓𑀸𑀭𑁄 𑀫𑀢𑁆𑀢𑀺𑀓𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀁 𑀫𑀼𑀤𑀼𑀁 𑀓𑀢𑁆𑀯𑀸 𑀓𑀭𑁄𑀢𑀺, 𑀏𑀯𑀫𑁂𑀯 𑀆𑀤𑀺𑀓𑀫𑁆𑀫𑀺𑀓𑁂𑀦 𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑁆𑀯𑀸 𑀙𑀦𑁆𑀤𑀲𑀻𑀲𑀘𑀺𑀢𑁆𑀢𑀲𑀻𑀲𑀯𑀻𑀭𑀺𑀬𑀲𑀻𑀲𑀯𑀻𑀫𑀁𑀲𑀸𑀲𑀻𑀲𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀘𑁂𑀯 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀯𑀲𑁂𑀦 𑀘 𑀫𑀼𑀤𑀼𑀁 𑀓𑀫𑁆𑀫𑀜𑁆𑀜𑀁 𑀓𑀢𑁆𑀯𑀸 𑀇𑀤𑁆𑀥𑀺𑀯𑀺𑀥𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄. 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑁂𑀦 𑀧𑀦 𑀓𑀲𑀺𑀡𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂 𑀘𑀺𑀡𑁆𑀡𑀯𑀲𑀺𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀧𑀦𑁂𑀢𑁆𑀣 𑀬𑁄𑀕𑁄 𑀓𑀸𑀢𑀩𑁆𑀩𑁄, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑁩𑁬𑁮. 𑀢𑀢𑁆𑀭𑀸𑀬𑀁 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁄 𑀬𑁄𑀕𑀻. 𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀇𑀫𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀸𑀤𑀺𑀦𑀸 𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑁂𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀘𑀺𑀢𑁆𑀢𑁂𑀢𑀺 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂. 𑀧𑀭𑀺𑀲𑀼𑀤𑁆𑀥𑁂𑀢𑀺𑀆𑀤𑀻𑀲𑀼 𑀧𑀦 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦 𑀯𑀺𑀳𑀢𑀭𑀸𑀕𑀸𑀤𑀺𑀅𑀗𑁆𑀕𑀡𑀢𑁆𑀢𑀸 𑀅𑀦𑀗𑁆𑀕𑀡𑁂. 𑀅𑀦𑀗𑁆𑀕𑀡𑀢𑁆𑀢𑀸𑀬𑁂𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀅𑀗𑁆𑀕𑀡𑁂𑀦 𑀳𑀺 𑀢𑀁 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺. 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑁂, 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑁂 𑀯𑀢𑁆𑀢𑀫𑀸𑀦𑀁 𑀳𑀺 𑀘𑀺𑀢𑁆𑀢𑀁 𑀫𑀼𑀤𑀼𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀢𑁆𑀢𑀸𑀬𑁂𑀯 𑀘 𑀓𑀫𑁆𑀫𑀦𑀺𑀬𑁂, 𑀓𑀫𑁆𑀫𑀓𑁆𑀔𑀫𑁂 𑀓𑀫𑁆𑀫𑀬𑁄𑀕𑁆𑀕𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀁 𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀲𑀼𑀤𑀦𑁆𑀢𑀫𑀺𑀯 𑀲𑀼𑀯𑀡𑁆𑀡𑀁, 𑀢𑀜𑁆𑀘 𑀉𑀪𑀬𑀫𑁆𑀧𑀺 𑀲𑀼𑀪𑀸𑀯𑀺𑀢𑀢𑁆𑀢𑀸𑀬𑁂𑀯𑀸𑀢𑀺. 𑀬𑀣𑀸𑀳 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀫𑀼𑀤𑀼𑀜𑁆𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁨𑁨).

𑀏𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂, 𑀅𑀘𑀮𑁂 𑀦𑀺𑀭𑀺𑀜𑁆𑀚𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 ¶ . 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀁 𑀳𑀺 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂𑀦 𑀦 𑀇𑀜𑁆𑀚𑀢𑀺. 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀁 𑀓𑁄𑀲𑀚𑁆𑀚𑁂𑀦 𑀦 𑀇𑀜𑁆𑀚𑀢𑀺. 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀁 𑀧𑀫𑀸𑀤𑁂𑀦 𑀦 𑀇𑀜𑁆𑀚𑀢𑀺. 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑁆𑀥𑀘𑁆𑀘𑁂𑀦 𑀦 𑀇𑀜𑁆𑀚𑀢𑀺 ¶ . 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺. 𑀑𑀪𑀸𑀲𑀕𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀺. 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀅𑀧𑀭𑁄 𑀦𑀬𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀦𑀻𑀯𑀭𑀡𑀤𑀽𑀭𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀸𑀢𑁂. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀢𑁆𑀣𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀯𑀲𑀺𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀪𑀽𑀢𑁂. 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑁂𑀦 𑀓𑀫𑁆𑀫𑀦𑀺𑀬𑁂. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂. 𑀬𑀣𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀦𑁆𑀢𑀺.

𑀤𑀲𑀇𑀤𑁆𑀥𑀺𑀓𑀣𑀸

𑁩𑁬𑁯. 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀏𑀢𑁆𑀣 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺, 𑀦𑀺𑀧𑁆𑀨𑀢𑁆𑀢𑀺𑀅𑀢𑁆𑀣𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀜𑁆𑀳𑀺 𑀦𑀺𑀧𑁆𑀨𑀚𑁆𑀚𑀢𑀺 𑀧𑀝𑀺𑀮𑀩𑁆𑀪𑀢𑀺 𑀘, 𑀢𑀁 𑀇𑀚𑁆𑀛𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀻’’𑀢𑀺 (𑀲𑀼. 𑀦𑀺. 𑁭𑁭𑁨). 𑀢𑀣𑀸 ‘‘𑀦𑁂𑀓𑁆𑀔𑀫𑁆𑀫𑀁 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀧𑀝𑀺𑀳𑀭𑀢𑀻𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀧𑀝𑀺𑀳𑀭𑀢𑀻𑀢𑀺 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁩𑁨).

𑀅𑀧𑀭𑁄 𑀦𑀬𑁄, 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀉𑀧𑀸𑀬𑀲𑀫𑁆𑀧𑀤𑀸𑀬𑁂𑀢𑀫𑀥𑀺𑀯𑀘𑀦𑀁. 𑀉𑀧𑀸𑀬𑀲𑀫𑁆𑀧𑀤𑀸 𑀳𑀺 𑀇𑀚𑁆𑀛𑀢𑀺 𑀅𑀥𑀺𑀧𑁆𑀧𑁂𑀢𑀨𑀮𑀧𑁆𑀧𑀲𑀯𑀦𑀢𑁄. 𑀬𑀣𑀸𑀳 𑁋 ‘‘𑀅𑀬𑀁 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀲𑀘𑁂 𑀧𑀡𑀺𑀤𑀳𑀺𑀲𑁆𑀲𑀢𑀺 ‘𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’𑀢𑀺, 𑀢𑀲𑁆𑀲 𑀔𑁄 𑀅𑀬𑀁 𑀇𑀚𑁆𑀛𑀺𑀲𑁆𑀲𑀢𑀺 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁪.𑁩𑁫𑁨).

𑀅𑀧𑀭𑁄 𑀦𑀬𑁄, 𑀏𑀢𑀸𑀬 𑀲𑀢𑁆𑀢𑀸 𑀇𑀚𑁆𑀛𑀦𑁆𑀢𑀻𑀢𑀺 𑀇𑀤𑁆𑀥𑀺. 𑀇𑀚𑁆𑀛𑀦𑁆𑀢𑀻𑀢𑀺 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸 𑀤𑀲𑀯𑀺𑀥𑀸. 𑀬𑀣𑀸𑀳 ‘‘𑀓𑀢𑀺 𑀇𑀤𑁆𑀥𑀺𑀬𑁄𑀢𑀺 𑀤𑀲 𑀇𑀤𑁆𑀥𑀺𑀬𑁄’’. 𑀧𑀼𑀦 𑀘𑀧𑀭𑀁 𑀆𑀳 ‘‘𑀓𑀢𑀫𑀸 𑀤𑀲 𑀇𑀤𑁆𑀥𑀺𑀬𑁄 ¶ ? 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺, 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺, 𑀫𑀦𑁄𑀫𑀬𑀸 𑀇𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀅𑀭𑀺𑀬𑀸 𑀇𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁯).

𑁩𑁭𑁦. 𑀢𑀢𑁆𑀣 ‘‘𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺. 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 ‘𑀩𑀳𑀼𑀓𑁄 𑀳𑁄𑀫𑀻’’’𑀢𑀺 (𑀧𑀝𑀺. 𑀫. 𑁩.𑁧𑁦) 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀇𑀤𑁆𑀥𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺 𑀦𑀸𑀫.

𑁩𑁭𑁧. ‘‘𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺 𑀦𑀸𑀫.

𑁩𑁭𑁨. ‘‘𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁧𑁪) 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸 𑀇𑀤𑁆𑀥𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀲𑁆𑀲𑁂𑀯 𑀫𑀦𑁄𑀫𑀬𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸 𑀇𑀤𑁆𑀥𑀺 𑀦𑀸𑀫.

𑁩𑁭𑁩. 𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀦 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁𑀔𑀡𑁂 𑀯𑀸 𑀜𑀸𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀩𑀸𑀓𑁆𑀓𑀼𑀮𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀪𑀽𑀢𑀧𑀸𑀮𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁫).

𑀢𑀢𑁆𑀣 𑀆𑀬𑀲𑁆𑀫𑀸 𑀩𑀸𑀓𑁆𑀓𑀼𑀮𑁄 𑀤𑀳𑀭𑁄𑀯 𑀫𑀗𑁆𑀕𑀮𑀤𑀺𑀯𑀲𑁂 𑀦𑀤𑀺𑀬𑀸 𑀦𑁆𑀳𑀸𑀧𑀺𑀬𑀫𑀸𑀦𑁄 𑀥𑀸𑀢𑀺𑀬𑀸 𑀧𑀫𑀸𑀤𑁂𑀦 𑀲𑁄𑀢𑁂 𑀧𑀢𑀺𑀢𑁄. 𑀢𑀫𑁂𑀦𑀁 𑀫𑀘𑁆𑀙𑁄 𑀕𑀺𑀮𑀺𑀢𑁆𑀯𑀸 𑀩𑀸𑀭𑀸𑀡𑀲𑀻𑀢𑀺𑀢𑁆𑀣𑀁 𑀅𑀕𑀫𑀸𑀲𑀺. 𑀢𑀢𑁆𑀭 𑀢𑀁 𑀫𑀘𑁆𑀙𑀩𑀦𑁆𑀥𑁄 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀯𑀺𑀓𑁆𑀓𑀺𑀡𑀺. 𑀲𑀸 𑀫𑀘𑁆𑀙𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀳𑀫𑁂𑀯 𑀦𑀁 𑀧𑀘𑀺𑀲𑁆𑀲𑀸𑀫𑀻𑀢𑀺 𑀨𑀸𑀮𑁂𑀦𑁆𑀢𑀻 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀲𑀼𑀯𑀡𑁆𑀡𑀩𑀺𑀫𑁆𑀩𑀁 𑀯𑀺𑀬 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺. 𑀇𑀢𑀺 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀅𑀭𑁄𑀕𑀪𑀸𑀯𑁄 𑀆𑀬𑀲𑁆𑀫𑀢𑁄 𑀩𑀸𑀓𑁆𑀓𑀼𑀮𑀲𑁆𑀲 ¶ 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀦𑀼𑀪𑀸𑀯𑁂𑀦 ¶ 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀯𑀢𑁆𑀣𑀼 𑀧𑀦 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀩𑁆𑀩𑀁.

𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀲𑁆𑀲 𑀧𑀦 𑀕𑀩𑁆𑀪𑀕𑀢𑀲𑁆𑀲𑁂𑀯 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲𑀸 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀛𑀸𑀧𑀺𑀬𑀫𑀸𑀦𑀸𑀬 𑀤𑀸𑀭𑀓𑁄 𑀲𑀽𑀮𑀓𑁄𑀝𑀺𑀬𑀸 𑀅𑀓𑁆𑀔𑀺𑀓𑀽𑀝𑁂 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸 𑀲𑀤𑁆𑀤𑀁 𑀅𑀓𑀸𑀲𑀺. 𑀢𑀢𑁄 𑀤𑀸𑀭𑀓𑁄 𑀚𑀻𑀯𑀢𑀻𑀢𑀺 𑀑𑀢𑀸𑀭𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀤𑀸𑀭𑀓𑀁 𑀅𑀬𑁆𑀬𑀺𑀓𑀸𑀬 𑀅𑀤𑀁𑀲𑀼. 𑀲𑁄 𑀢𑀸𑀬 𑀧𑀝𑀺𑀚𑀕𑁆𑀕𑀺𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀸𑀭𑀼𑀘𑀺𑀢𑀓𑀸𑀬 𑀅𑀭𑁄𑀕𑀪𑀸𑀯𑁄 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫.

𑀪𑀽𑀢𑀧𑀸𑀮𑀤𑀸𑀭𑀓𑀲𑁆𑀲 𑀧𑀦 𑀧𑀺𑀢𑀸 𑀭𑀸𑀚𑀕𑀳𑁂 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑁄. 𑀲𑁄 𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀲𑀓𑀝𑁂𑀦 𑀅𑀝𑀯𑀺𑀁 𑀕𑀦𑁆𑀢𑁆𑀯𑀸 𑀤𑀸𑀭𑀼𑀪𑀸𑀭𑀁 𑀓𑀢𑁆𑀯𑀸 𑀲𑀸𑀬𑀁 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑀁 𑀧𑀢𑁆𑀢𑁄. 𑀅𑀣𑀲𑁆𑀲 𑀕𑁄𑀡𑀸 𑀬𑀼𑀕𑀁 𑀑𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀲𑁄 𑀲𑀓𑀝𑀫𑀽𑀮𑁂 𑀧𑀼𑀢𑁆𑀢𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑁄𑀡𑀸𑀦𑀁 𑀅𑀦𑀼𑀧𑀤𑀁 𑀕𑀘𑁆𑀙𑀦𑁆𑀢𑁄 𑀦𑀕𑀭𑀫𑁂𑀯 𑀧𑀸𑀯𑀺𑀲𑀺. 𑀢𑀲𑁆𑀲 𑀅𑀦𑀺𑀓𑁆𑀔𑀦𑁆𑀢𑀲𑁆𑀲𑁂𑀯 𑀤𑁆𑀯𑀸𑀭𑀁 𑀧𑀺𑀳𑀺𑀢𑀁. 𑀤𑀸𑀭𑀓𑀲𑁆𑀲 𑀯𑀸𑀴𑀬𑀓𑁆𑀔𑀸𑀦𑀼𑀘𑀭𑀺𑀢𑁂𑀧𑀺 𑀩𑀳𑀺𑀦𑀕𑀭𑁂 𑀢𑀺𑀬𑀸𑀫𑀭𑀢𑁆𑀢𑀺𑀁 𑀅𑀭𑁄𑀕𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀯𑀢𑁆𑀣𑀼 𑀧𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁩𑁭𑁪. 𑀲𑀫𑀸𑀥𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁𑀔𑀡𑁂 𑀯𑀸 𑀲𑀫𑀣𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲, 𑀆𑀬𑀲𑁆𑀫𑀢𑁄 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀲𑁆𑀲, 𑀉𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬, 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁬).

𑀢𑀢𑁆𑀣 𑀬𑀤𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀧𑁄𑀢𑀓𑀦𑁆𑀤𑀭𑀸𑀬𑀁 𑀯𑀺𑀳𑀭𑀢𑁄 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀺 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑀲𑁆𑀲 𑀏𑀓𑁄 𑀤𑀼𑀝𑁆𑀞𑀬𑀓𑁆𑀔𑁄 𑀲𑀳𑀸𑀬𑀓𑁂𑀦 𑀬𑀓𑁆𑀔𑁂𑀦 𑀯𑀸𑀭𑀺𑀬𑀫𑀸𑀦𑁄𑀧𑀺 𑀲𑀻𑀲𑁂 𑀧𑀳𑀸𑀭𑀫𑀤𑀸𑀲𑀺. 𑀬𑀲𑁆𑀲 𑀫𑁂𑀖𑀲𑁆𑀲 𑀯𑀺𑀬 𑀕𑀚𑁆𑀚𑀢𑁄 ¶ 𑀲𑀤𑁆𑀤𑁄 𑀅𑀳𑁄𑀲𑀺. 𑀢𑀤𑀸 𑀣𑁂𑀭𑁄 𑀢𑀲𑁆𑀲 𑀧𑀳𑀭𑀡𑀲𑀫𑀬𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀲𑀺. 𑀅𑀣𑀲𑁆𑀲 𑀢𑁂𑀦 𑀧𑀳𑀸𑀭𑁂𑀦 𑀦 𑀓𑁄𑀘𑀺 𑀆𑀩𑀸𑀥𑁄 𑀅𑀳𑁄𑀲𑀺 ¶ . 𑀅𑀬𑀁 𑀢𑀲𑁆𑀲𑀸𑀬𑀲𑁆𑀫𑀢𑁄 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀯𑀢𑁆𑀣𑀼 𑀧𑀦 𑀉𑀤𑀸𑀦𑁂 (𑀉𑀤𑀸. 𑁩𑁪) 𑀆𑀕𑀢𑀫𑁂𑀯.

𑀲𑀜𑁆𑀚𑀻𑀯𑀢𑁆𑀣𑁂𑀭𑀁 𑀧𑀦 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀁 𑀓𑀸𑀮𑀓𑀢𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑁄𑀧𑀸𑀮𑀓𑀸𑀤𑀬𑁄 𑀢𑀺𑀡𑀓𑀝𑁆𑀞𑀕𑁄𑀫𑀬𑀸𑀦𑀺 𑀲𑀗𑁆𑀓𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀣𑁂𑀭𑀲𑁆𑀲 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦𑀚𑁆𑀛𑀸𑀬𑀺𑀢𑁆𑀣. 𑀅𑀬𑀫𑀲𑁆𑀲 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀲𑀫𑀣𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀯𑀢𑁆𑀣𑀼 𑀧𑀦 𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁫𑁦𑁭) 𑀆𑀕𑀢𑀫𑁂𑀯.

𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀧𑀦 𑀧𑀓𑀢𑀺𑀬𑀸𑀯 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄. 𑀲𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑁂 𑀭𑀢𑁆𑀢𑀺𑀁 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀪𑀡𑁆𑀟𑀓𑀁 𑀣𑁂𑀦𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 ‘‘𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀅𑀦𑀼𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀫𑀺𑀢𑀼𑀓𑀸𑀫𑀸 𑀪𑀡𑁆𑀟𑀓𑀁 𑀑𑀭𑁄𑀧𑀬𑀫𑀸𑀦𑀸 ‘‘𑀔𑀸𑀡𑀼𑀓𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀣𑁂𑀭𑀲𑁆𑀲𑁂𑀯 𑀉𑀧𑀭𑀺 𑀲𑀩𑁆𑀩𑀪𑀡𑁆𑀟𑀓𑀸𑀦𑀺 𑀞𑀧𑁂𑀲𑀼𑀁. 𑀢𑁂𑀲𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀧𑀞𑀫𑀁 𑀞𑀧𑀺𑀢𑀪𑀡𑁆𑀟𑀓𑀲𑁆𑀲 𑀕𑀳𑀡𑀓𑀸𑀮𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀣𑁂𑀭𑁄 𑀯𑀼𑀝𑁆𑀞𑀸𑀲𑀺. 𑀢𑁂 𑀣𑁂𑀭𑀲𑁆𑀲 𑀘𑀮𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀯𑀺𑀭𑀯𑀺𑀁𑀲𑀼. 𑀣𑁂𑀭𑁄 ‘‘𑀫𑀸 𑀪𑀸𑀬𑀺𑀢𑁆𑀣 𑀉𑀧𑀸𑀲𑀓𑀸, 𑀪𑀺𑀓𑁆𑀔𑀼 𑀅𑀳’’𑀦𑁆𑀢𑀺 𑀆𑀳. 𑀢𑁂 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀕𑀢𑁂𑀦 𑀧𑀲𑀸𑀤𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼 (𑀥. 𑀧. 𑀅𑀝𑁆𑀞. 𑁧.𑁧). 𑀅𑀬𑀫𑁂𑀢𑁆𑀣 𑀧𑀜𑁆𑀘𑀳𑀺 𑀪𑀡𑁆𑀟𑀓𑀲𑀢𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀣𑁂𑀭𑀲𑁆𑀲 𑀆𑀩𑀸𑀥𑀸𑀪𑀸𑀯𑁄 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺.

𑀉𑀢𑁆𑀢𑀭𑀸 𑀧𑀦 𑀉𑀧𑀸𑀲𑀺𑀓𑀸 𑀧𑀼𑀡𑁆𑀡𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸. 𑀢𑀲𑁆𑀲𑀸 𑀲𑀺𑀭𑀺𑀫𑀸 𑀦𑀸𑀫 𑀕𑀡𑀺𑀓𑀸 𑀇𑀲𑁆𑀲𑀸𑀧𑀓𑀢𑀸 𑀢𑀢𑁆𑀢𑀢𑁂𑀮𑀓𑀝𑀸𑀳𑀁 𑀲𑀻𑀲𑁂 𑀆𑀲𑀺𑀜𑁆𑀘𑀺. 𑀉𑀢𑁆𑀢𑀭𑀸 𑀢𑀁𑀔𑀡𑀜𑁆𑀜𑁂𑀯 𑀫𑁂𑀢𑁆𑀢𑀁 𑀲𑀫𑀸𑀧𑀚𑁆𑀚𑀺. 𑀢𑁂𑀮𑀁 𑀧𑁄𑀓𑁆𑀔𑀭𑀧𑀢𑁆𑀢𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀯𑀝𑁆𑀝𑀫𑀸𑀦𑀁 𑀅𑀕𑀫𑀸𑀲𑀺. 𑀅𑀬𑀫𑀲𑁆𑀲𑀸 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀯𑀢𑁆𑀣𑀼 𑀧𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀲𑀸𑀫𑀸𑀯𑀢𑀻 𑀦𑀸𑀫 𑀉𑀤𑁂𑀦𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻. 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀥𑀻𑀢𑀸𑀬 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀧𑀢𑁆𑀣𑀬𑀫𑀸𑀦𑁄 𑀢𑀲𑁆𑀲𑀸 𑀯𑀻𑀡𑀸𑀬 𑀆𑀲𑀻𑀯𑀺𑀲𑀁 ¶ 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 ‘‘𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀻 𑀢𑀁 𑀫𑀸𑀭𑁂𑀢𑀼𑀓𑀸𑀫𑀸 𑀯𑀻𑀡𑀸𑀬 𑀆𑀲𑀻𑀯𑀺𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀢𑀻’’𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 𑀲𑀸𑀫𑀸𑀯𑀢𑀺𑀁 𑀯𑀥𑀺𑀲𑁆𑀲𑀸𑀫𑀻𑀢𑀺 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀲𑀧𑀻𑀢𑀁 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺. 𑀲𑀸𑀫𑀸𑀯𑀢𑀻 𑀲𑀧𑀭𑀺𑀯𑀸𑀭𑀸 𑀭𑀸𑀚𑀸𑀦𑀁 𑀫𑁂𑀢𑁆𑀢𑀸𑀬 𑀨𑀭𑀺. 𑀭𑀸𑀚𑀸 𑀦𑁂𑀯 𑀲𑀭𑀁 𑀔𑀺𑀧𑀺𑀢𑀼𑀁 𑀦 𑀑𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀯𑁂𑀥𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀦𑀁 𑀤𑁂𑀯𑀻 𑀆𑀳 ‘‘𑀓𑀺𑀁, 𑀫𑀳𑀸𑀭𑀸𑀚, 𑀓𑀺𑀮𑀫𑀲𑀻’’𑀢𑀺? ‘‘𑀆𑀫 𑀓𑀺𑀮𑀫𑀸𑀫𑀻’’𑀢𑀺. ‘‘𑀢𑁂𑀦 ¶ 𑀳𑀺 𑀥𑀦𑀼𑀁 𑀑𑀭𑁄𑀧𑁂𑀳𑀻’’𑀢𑀺. 𑀲𑀭𑁄 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂𑀬𑁂𑀯 𑀧𑀢𑀺. 𑀢𑀢𑁄 𑀦𑀁 𑀤𑁂𑀯𑀻 ‘‘𑀫𑀳𑀸𑀭𑀸𑀚, 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀧𑁆𑀧𑀤𑀼𑀲𑁆𑀲𑀺𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺. 𑀇𑀢𑀺 𑀭𑀜𑁆𑀜𑁄 𑀲𑀭𑀁 𑀫𑀼𑀜𑁆𑀘𑀺𑀢𑀼𑀁 𑀅𑀯𑀺𑀲𑀳𑀦𑀪𑀸𑀯𑁄 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻𑀢𑀺.

𑁩𑁭𑁫. 𑀧𑀝𑀺𑀓𑁆𑀓𑀽𑀮𑀸𑀤𑀻𑀲𑀼 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀯𑀺𑀳𑀸𑀭𑀸𑀤𑀺𑀓𑀸 𑀧𑀦 𑀅𑀭𑀺𑀬𑀸 𑀇𑀤𑁆𑀥𑀺 𑀦𑀸𑀫. 𑀬𑀣𑀸𑀳 𑁋 ‘‘𑀓𑀢𑀫𑀸 𑀅𑀭𑀺𑀬𑀸 𑀇𑀤𑁆𑀥𑀺? 𑀇𑀥 𑁋 𑀪𑀺𑀓𑁆𑀔𑀼 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑁆𑀓𑀽𑀮𑁂 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀧𑀝𑀺. 𑀫. 𑁩.𑁧𑁭). 𑀅𑀬𑀜𑁆𑀳𑀺 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸𑀦𑀁 𑀅𑀭𑀺𑀬𑀸𑀦𑀁𑀬𑁂𑀯 𑀲𑀫𑁆𑀪𑀯𑀢𑁄 𑀅𑀭𑀺𑀬𑀸 𑀇𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀏𑀢𑀸𑀬 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀧𑀝𑀺𑀓𑁆𑀓𑀽𑀮𑁂 𑀅𑀦𑀺𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀨𑀭𑀡𑀁 𑀯𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀧𑁆𑀧𑀝𑀺𑀓𑁆𑀓𑀽𑀮𑁂 𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀨𑀭𑀡𑀁 𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀢𑀣𑀸 𑀧𑀝𑀺𑀓𑁆𑀓𑀽𑀮𑀸𑀧𑀝𑀺𑀓𑁆𑀓𑀽𑀮𑁂𑀲𑀼 𑀢𑀤𑁂𑀯 𑀫𑁂𑀢𑁆𑀢𑀸𑀨𑀭𑀡𑀁 𑀯𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀧𑁆𑀧𑀝𑀺𑀓𑁆𑀓𑀽𑀮𑀧𑀝𑀺𑀓𑁆𑀓𑀽𑀮𑁂𑀲𑀼 𑀘 𑀢𑀤𑁂𑀯 𑀅𑀲𑀼𑀪𑀨𑀭𑀡𑀁 𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀁 𑀧𑀯𑀢𑁆𑀢𑀬𑀫𑀸𑀦𑁄 𑀧𑀝𑀺𑀓𑁆𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑁆𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀳𑀺 ‘‘𑀓𑀣𑀁 𑀧𑀝𑀺𑀓𑁆𑀓𑀽𑀮𑁂 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺 𑀥𑀸𑀢𑀼𑀲𑁄 𑀯𑀸 𑀉𑀧𑀲𑀁𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁧𑁭) 𑀦𑀬𑁂𑀦 𑀅𑀬𑀫𑁂𑀯 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄. 𑀅𑀬𑀁 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸𑀦𑀁 𑀅𑀭𑀺𑀬𑀸𑀦𑀁𑀬𑁂𑀯 𑀲𑀫𑁆𑀪𑀯𑀢𑁄 𑀅𑀭𑀺𑀬𑀸 𑀇𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑁩𑁭𑁬. 𑀧𑀓𑁆𑀔𑀻𑀆𑀤𑀻𑀦𑀁 𑀧𑀦 ¶ 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺 𑀦𑀸𑀫. 𑀬𑀣𑀸𑀳 𑁋 ‘‘𑀓𑀢𑀫𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺? 𑀲𑀩𑁆𑀩𑁂𑀲𑀁 𑀧𑀓𑁆𑀔𑀻𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀓𑀘𑁆𑀘𑀸𑀦𑀜𑁆𑀘 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀅𑀬𑀁 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁮). 𑀏𑀢𑁆𑀣 𑀳𑀺 𑀲𑀩𑁆𑀩𑁂𑀲𑀁 𑀧𑀓𑁆𑀔𑀻𑀦𑀁 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀯𑀺𑀦𑀸𑀬𑁂𑀯 𑀆𑀓𑀸𑀲𑁂𑀦 𑀕𑀫𑀦𑀁. 𑀢𑀣𑀸 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀧𑀞𑀫𑀓𑀧𑁆𑀧𑀺𑀓𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀢𑀣𑀸 𑀧𑀺𑀬𑀗𑁆𑀓𑀭𑀫𑀸𑀢𑀸 (𑀲𑀁. 𑀦𑀺. 𑁧.𑁨𑁪𑁦) 𑀬𑀓𑁆𑀔𑀺𑀦𑀻 ¶ 𑀉𑀢𑁆𑀢𑀭𑀫𑀸𑀢𑀸 𑀨𑀼𑀲𑁆𑀲𑀫𑀺𑀢𑁆𑀢𑀸 𑀥𑀫𑁆𑀫𑀕𑀼𑀢𑁆𑀢𑀸𑀢𑀺 𑀏𑀯𑀫𑀸𑀤𑀻𑀦𑀁 𑀏𑀓𑀘𑁆𑀘𑀸𑀦𑀁 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀆𑀓𑀸𑀲𑁂𑀦 𑀕𑀫𑀦𑀁 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀻𑀢𑀺.

𑁩𑁭𑁭. 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀧𑀦 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑀸 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺? 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀯𑁂𑀳𑀸𑀲𑀁 𑀕𑀘𑁆𑀙𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀅𑀦𑁆𑀢𑀫𑀲𑁄 𑀅𑀲𑁆𑀲𑀩𑀦𑁆𑀥𑀕𑁄𑀩𑀦𑁆𑀥𑀧𑀼𑀭𑀺𑀲𑁂 𑀉𑀧𑀸𑀤𑀸𑀬. 𑀚𑁄𑀢𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀚𑀝𑀺𑀮𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀖𑁄𑀲𑀺𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀻’’𑀢𑀺. 𑀲𑀗𑁆𑀔𑁂𑀧𑀢𑁄 𑀧𑀦 𑀧𑀭𑀺𑀧𑀸𑀓𑀁 𑀕𑀢𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀇𑀚𑁆𑀛𑀦𑀓𑀯𑀺𑀲𑁂𑀲𑁄 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺.

𑀏𑀢𑁆𑀣 𑀘 𑀚𑁄𑀢𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀡𑀺𑀧𑀸𑀲𑀸𑀤𑁄 𑀉𑀝𑁆𑀞𑀳𑀺. 𑀘𑀢𑀼𑀲𑀝𑁆𑀞𑀺 𑀘 𑀓𑀧𑁆𑀧𑀭𑀼𑀓𑁆𑀔𑀸𑀢𑀺 𑀅𑀬𑀫𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀚𑀝𑀺𑀮𑀓𑀲𑁆𑀲 𑀅𑀲𑀻𑀢𑀺𑀳𑀢𑁆𑀣𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀖𑁄𑀲𑀺𑀢𑀲𑁆𑀲 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀫𑀸𑀭𑀡𑀢𑁆𑀣𑀸𑀬 𑀉𑀧𑀓𑁆𑀓𑀫𑁂 𑀓𑀢𑁂𑀧𑀺 𑀅𑀭𑁄𑀕𑀪𑀸𑀯𑁄 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀫𑁂𑀡𑁆𑀟𑀓𑀲𑁆𑀲 𑀏𑀓𑀓𑀭𑀻𑀲𑀫𑀢𑁆𑀢𑁂 𑀧𑀤𑁂𑀲𑁂 𑀲𑀢𑁆𑀢𑀭𑀢𑀦𑀫𑀬𑀸𑀦𑀁 𑀫𑁂𑀡𑁆𑀟𑀓𑀸𑀦𑀁 𑀧𑀸𑀢𑀼𑀪𑀸𑀯𑁄 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀧𑀜𑁆𑀘 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑁂𑀡𑁆𑀟𑀓𑀲𑁂𑀝𑁆𑀞𑀺, 𑀢𑀲𑁆𑀲 𑀪𑀭𑀺𑀬𑀸 𑀘𑀦𑁆𑀤𑀧𑀤𑀼𑀫𑀲𑀺𑀭𑀻, 𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺, 𑀲𑀼𑀡𑀺𑀲𑀸 𑀲𑀼𑀫𑀦𑀤𑁂𑀯𑀻, 𑀤𑀸𑀲𑁄 𑀧𑀼𑀡𑁆𑀡𑁄 𑀦𑀸𑀫𑀸𑀢𑀺. 𑀢𑁂𑀲𑀼 𑀲𑁂𑀝𑁆𑀞𑀺𑀲𑁆𑀲 𑀲𑀻𑀲𑀁 𑀦𑁆𑀳𑀸𑀢𑀲𑁆𑀲 𑀆𑀓𑀸𑀲𑀁 𑀉𑀮𑁆𑀮𑁄𑀓𑀦𑀓𑀸𑀮𑁂 𑀅𑀟𑁆𑀠𑀢𑁂𑀴𑀲𑀓𑁄𑀝𑁆𑀞𑀲𑀳𑀲𑁆𑀲𑀸𑀦𑀺 𑀆𑀓𑀸𑀲𑀢𑁄 𑀭𑀢𑁆𑀢𑀲𑀸𑀮𑀻𑀦𑀁 𑀧𑀽𑀭𑁂𑀦𑁆𑀢𑀺. 𑀪𑀭𑀺𑀬𑀸𑀬 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑁂 𑀧𑀭𑀺𑀯𑀺𑀲𑀫𑀸𑀦𑀸𑀬 𑀪𑀢𑁆𑀢𑀁 𑀦 𑀔𑀻𑀬𑀢𑀺. 𑀧𑀼𑀢𑁆𑀢𑀲𑁆𑀲 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑀸𑀦𑀫𑁆𑀧𑀺 𑀤𑁂𑀦𑁆𑀢𑀲𑁆𑀲 𑀓𑀳𑀸𑀧𑀡𑀸 𑀦 𑀔𑀻𑀬𑀦𑁆𑀢𑀺. 𑀲𑀼𑀡𑀺𑀲𑀸𑀬 𑀏𑀓𑀁 ¶ 𑀯𑀻𑀳𑀺𑀢𑀼𑀫𑁆𑀩𑀁 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑀸𑀦𑀫𑁆𑀧𑀺 𑀪𑀸𑀚𑀬𑀫𑀸𑀦𑀸𑀬 𑀥𑀜𑁆𑀜𑀁 𑀦 𑀔𑀻𑀬𑀢𑀺. 𑀤𑀸𑀲𑀲𑁆𑀲 𑀏𑀓𑁂𑀦 𑀦𑀗𑁆𑀕𑀮𑁂𑀦 𑀓𑀲𑀢𑁄 𑀇𑀢𑁄 𑀲𑀢𑁆𑀢 𑀇𑀢𑁄 𑀲𑀢𑁆𑀢𑀸𑀢𑀺 𑀘𑀼𑀤𑁆𑀤𑀲 𑀫𑀕𑁆𑀕𑀸 𑀳𑁄𑀦𑁆𑀢𑀺. 𑀅𑀬𑀁 𑀦𑁂𑀲𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺.

𑁩𑁭𑁮. 𑀯𑀺𑀚𑁆𑀚𑀸𑀥𑀭𑀸𑀤𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀧𑀦 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺. 𑀬𑀣𑀸𑀳 ‘‘𑀓𑀢𑀫𑀸 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺? 𑀯𑀺𑀚𑁆𑀚𑀸𑀥𑀭𑀸 𑀯𑀺𑀚𑁆𑀚𑀁 𑀧𑀭𑀺𑀚𑀧𑀺𑀢𑁆𑀯𑀸 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺. 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁮).

𑁩𑁭𑁯. 𑀢𑁂𑀦 𑀢𑁂𑀦 𑀧𑀦 𑀲𑀫𑁆𑀫𑀸𑀧𑀬𑁄𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀇𑀚𑁆𑀛𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀬𑀣𑀸𑀳 𑁋 ‘‘𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀢𑀢𑁆𑀣 ¶ 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁮). 𑀏𑀢𑁆𑀣 𑀘 𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲𑁂𑀯 𑀲𑀫𑁆𑀫𑀸𑀧𑀬𑁄𑀕𑀲𑁆𑀲 𑀤𑀻𑀧𑀦𑀯𑀲𑁂𑀦 𑀧𑀼𑀭𑀺𑀫𑀧𑀸𑀴𑀺𑀲𑀤𑀺𑀲𑀸𑀯 𑀧𑀸𑀴𑀺 𑀆𑀕𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀓𑀝𑀩𑁆𑀬𑀽𑀳𑀸𑀤𑀺𑀓𑀭𑀡𑀯𑀲𑁂𑀦 𑀬𑀁𑀓𑀺𑀜𑁆𑀘𑀺 𑀲𑀺𑀧𑁆𑀧𑀓𑀫𑁆𑀫𑀁 𑀬𑀁𑀓𑀺𑀜𑁆𑀘𑀺 𑀯𑁂𑀚𑁆𑀚𑀓𑀫𑁆𑀫𑀁 𑀢𑀺𑀡𑁆𑀡𑀁 𑀩𑁂𑀤𑀸𑀦𑀁 𑀉𑀕𑁆𑀕𑀳𑀡𑀁 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀉𑀕𑁆𑀕𑀳𑀡𑀁 𑀅𑀦𑁆𑀢𑀫𑀲𑁄 𑀓𑀲𑀦𑀯𑀧𑀦𑀸𑀤𑀻𑀦𑀺 𑀉𑀧𑀸𑀤𑀸𑀬 𑀢𑀁 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀯𑀺𑀲𑁂𑀲𑁄 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻𑀢𑀺 𑀆𑀕𑀢𑀸. (𑁧𑁦)

𑀇𑀢𑀺 𑀇𑀫𑀸𑀲𑀼 𑀤𑀲𑀲𑀼 𑀇𑀤𑁆𑀥𑀻𑀲𑀼 𑀇𑀤𑁆𑀥𑀺𑀯𑀺𑀥𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺𑀬𑁂𑀯 𑀆𑀕𑀢𑀸. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀺𑀓𑀼𑀩𑁆𑀩𑀦𑀸𑀫𑀦𑁄𑀫𑀬𑀸𑀇𑀤𑁆𑀥𑀺𑀬𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑀸 𑀏𑀯.

𑁩𑁮𑁦. 𑀇𑀤𑁆𑀥𑀺𑀯𑀺𑀥𑀸𑀬𑀸𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀸𑀬, 𑀇𑀤𑁆𑀥𑀺𑀯𑀺𑀓𑀧𑁆𑀧𑀸𑀬 𑀯𑀸. 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀲𑁂𑀦 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑁂 𑀚𑀸𑀢𑁂 𑀇𑀤𑁆𑀥𑀺𑀯𑀺𑀥𑀸𑀥𑀺𑀕𑀫𑀢𑁆𑀣𑀸𑀬 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀓𑀲𑀺𑀡𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀇𑀤𑁆𑀥𑀺𑀯𑀺𑀥𑀸𑀪𑀺𑀫𑀼𑀔𑀁 𑀧𑁂𑀲𑁂𑀢𑀺. 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀇𑀤𑁆𑀥𑀺𑀧𑁄𑀡𑀁 𑀇𑀤𑁆𑀥𑀺𑀧𑀩𑁆𑀪𑀸𑀭𑀁 𑀓𑀭𑁄𑀢𑀺. 𑀲𑁄𑀢𑀺 𑀲𑁄 𑀏𑀯𑀁 𑀓𑀢𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀪𑀺𑀓𑁆𑀔𑀼. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁. 𑀇𑀤𑁆𑀥𑀺𑀯𑀺𑀥𑀦𑁆𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀁. 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀧𑀘𑁆𑀘𑀦𑀼𑀪𑀯𑀢𑀺, 𑀨𑀼𑀲𑀢𑀺 ¶ 𑀲𑀘𑁆𑀙𑀺𑀓𑀭𑁄𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺𑀲𑁆𑀲 𑀅𑀦𑁂𑀓𑀯𑀺𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑁄𑀧𑀺 𑀳𑀼𑀢𑁆𑀯𑀸𑀢𑀺 𑀇𑀤𑁆𑀥𑀺𑀓𑀭𑀡𑀢𑁄 𑀧𑀼𑀩𑁆𑀩𑁂 𑀧𑀓𑀢𑀺𑀬𑀸 𑀏𑀓𑁄𑀧𑀺 𑀳𑀼𑀢𑁆𑀯𑀸. 𑀩𑀳𑀼𑀥𑀸 𑀳𑁄𑀢𑀻𑀢𑀺 𑀩𑀳𑀽𑀦𑀁 𑀲𑀦𑁆𑀢𑀺𑀓𑁂 𑀘𑀗𑁆𑀓𑀫𑀺𑀢𑀼𑀓𑀸𑀫𑁄 𑀯𑀸 𑀲𑀚𑁆𑀛𑀸𑀬𑀁 𑀯𑀸 𑀓𑀢𑁆𑀢𑀼𑀓𑀸𑀫𑁄 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀳𑁄𑀢𑀺. 𑀓𑀣𑀁 𑀧𑀦𑀸𑀬𑀫𑁂𑀯𑀁 𑀳𑁄𑀢𑀺? 𑀇𑀤𑁆𑀥𑀺𑀬𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀅𑀝𑁆𑀞 𑀧𑀤𑀸𑀦𑀺 𑀲𑁄𑀴𑀲 𑀘 𑀫𑀽𑀮𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄.

𑁩𑁮𑁧. 𑀢𑀢𑁆𑀣 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄𑀢𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘‘𑀇𑀤𑁆𑀥𑀺𑀬𑀸 𑀓𑀢𑀫𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄? 𑀯𑀺𑀯𑁂𑀓𑀚𑀪𑀽𑀫𑀺 𑀧𑀞𑀫𑀁 𑀛𑀸𑀦𑀁, 𑀧𑀻𑀢𑀺𑀲𑀼𑀔𑀪𑀽𑀫𑀺 𑀤𑀼𑀢𑀺𑀬𑀁 𑀛𑀸𑀦𑀁, 𑀉𑀧𑁂𑀓𑁆𑀔𑀸𑀲𑀼𑀔𑀪𑀽𑀫𑀺 𑀢𑀢𑀺𑀬𑀁 𑀛𑀸𑀦𑀁, 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀇𑀤𑁆𑀥𑀺𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀲𑀺𑀢𑀸𑀬 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁯). 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀬𑀲𑁆𑀫𑀸 𑀧𑀻𑀢𑀺𑀨𑀭𑀡𑁂𑀦 𑀘 𑀲𑀼𑀔𑀨𑀭𑀡𑁂𑀦 𑀘 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 ¶ 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀓𑀸𑀬𑁄 𑀇𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀫𑁆𑀪𑀸𑀭𑀪𑀽𑀫𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀦 𑀇𑀤𑁆𑀥𑀺𑀮𑀸𑀪𑀸𑀬 𑀧𑀓𑀢𑀺𑀪𑀽𑀫𑀺𑀬𑁂𑀯.

𑁩𑁮𑁨. 𑀘𑀢𑁆𑀢𑀸𑀭𑁄 𑀧𑀸𑀤𑀸𑀢𑀺 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀤𑁆𑀥𑀺𑀬𑀸 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀧𑀸𑀤𑀸? 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀯𑀻𑀭𑀺𑀬… 𑀘𑀺𑀢𑁆𑀢… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀤𑁆𑀥𑀺𑀬𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀇𑀤𑁆𑀥𑀺𑀮𑀸𑀪𑀸𑀬…𑀧𑁂… 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁯). 𑀏𑀢𑁆𑀣 𑀘 𑀙𑀦𑁆𑀤𑀳𑁂𑀢𑀼𑀓𑁄 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘 𑀉𑀧𑁂𑀢𑀁. 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀯𑀸 𑀇𑀚𑁆𑀛𑀦𑀝𑁆𑀞𑁂𑀦, 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀻𑀢𑀺 𑀲𑀗𑁆𑀔𑀁 𑀕𑀢𑀸𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 ¶ 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑀁 𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁪𑁩𑁪).

𑀅𑀣 𑀯𑀸 𑀧𑀚𑁆𑀚𑀢𑁂 𑀅𑀦𑁂𑀦𑀸𑀢𑀺 𑀧𑀸𑀤𑁄. 𑀧𑀸𑀧𑀼𑀡𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄. 𑀙𑀦𑁆𑀤𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋 ‘‘𑀙𑀦𑁆𑀤𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀺. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁…𑀧𑁂… 𑀧𑀤𑀳𑀢𑀺, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀇𑀢𑀺 𑀅𑀬𑀜𑁆𑀘 𑀙𑀦𑁆𑀤𑁄 𑀅𑀬𑀜𑁆𑀘 𑀙𑀦𑁆𑀤𑀲𑀫𑀸𑀥𑀺 𑀇𑀫𑁂 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 (𑀲𑀁. 𑀦𑀺. 𑁫.𑁮𑁨𑁫). 𑀏𑀯𑀁 𑀲𑁂𑀲𑀺𑀤𑁆𑀥𑀺𑀧𑀸𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁮𑁩. 𑀅𑀝𑁆𑀞 𑀧𑀤𑀸𑀦𑀻𑀢𑀺 𑀙𑀦𑁆𑀤𑀸𑀤𑀻𑀦𑀺 𑀅𑀝𑁆𑀞 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀤𑁆𑀥𑀺𑀬𑀸 𑀓𑀢𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺? 𑀙𑀦𑁆𑀤𑀜𑁆𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁. 𑀙𑀦𑁆𑀤𑁄 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀙𑀦𑁆𑀤𑁄. 𑀅𑀜𑁆𑀜𑁄 𑀙𑀦𑁆𑀤𑁄, 𑀅𑀜𑁆𑀜𑁄 𑀲𑀫𑀸𑀥𑀺. 𑀯𑀻𑀭𑀺𑀬𑀜𑁆𑀘𑁂 𑀪𑀺𑀓𑁆𑀔𑀼… 𑀘𑀺𑀢𑁆𑀢𑀜𑁆𑀘𑁂 𑀪𑀺𑀓𑁆𑀔𑀼… 𑀯𑀻𑀫𑀁𑀲𑀜𑁆𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁. 𑀯𑀻𑀫𑀁𑀲𑀸 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀯𑀻𑀫𑀁𑀲𑀸. 𑀅𑀜𑁆𑀜𑀸 𑀯𑀻𑀫𑀁𑀲𑀸, 𑀅𑀜𑁆𑀜𑁄 𑀲𑀫𑀸𑀥𑀺. 𑀇𑀤𑁆𑀥𑀺𑀬𑀸 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀇𑀤𑁆𑀥𑀺𑀮𑀸𑀪𑀸𑀬…𑀧𑁂… 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁯). 𑀏𑀢𑁆𑀣 𑀳𑀺 𑀇𑀤𑁆𑀥𑀺𑀫𑀼𑀧𑁆𑀧𑀸𑀤𑁂𑀢𑀼𑀓𑀸𑀫𑀢𑀸𑀙𑀦𑁆𑀤𑁄 ¶ 𑀲𑀫𑀸𑀥𑀺𑀦𑀸 𑀏𑀓𑀢𑁄 𑀦𑀺𑀬𑀼𑀢𑁆𑀢𑁄𑀯 𑀇𑀤𑁆𑀥𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺; 𑀢𑀣𑀸 𑀯𑀻𑀭𑀺𑀬𑀸𑀤𑀬𑁄. 𑀢𑀲𑁆𑀫𑀸 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩𑁮𑁪. 𑀲𑁄𑀴𑀲 𑀫𑀽𑀮𑀸𑀦𑀻𑀢𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀆𑀦𑁂𑀜𑁆𑀚𑀢𑀸 𑀘𑀺𑀢𑁆𑀢𑀲𑁆𑀲 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀤𑁆𑀥𑀺𑀬𑀸 𑀓𑀢𑀺 𑀫𑀽𑀮𑀸𑀦𑀺? 𑀲𑁄𑀴𑀲 𑀫𑀽𑀮𑀸𑀦𑀺 𑁋 𑀅𑀦𑁄𑀦𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀅𑀦𑀼𑀦𑁆𑀦𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀅𑀦𑀪𑀺𑀦𑀢𑀁 𑀘𑀺𑀢𑁆𑀢𑀁 𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀅𑀦𑀧𑀦𑀢𑀁 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀅𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀬𑀸 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀅𑀧𑁆𑀧𑀝𑀺𑀩𑀤𑁆𑀥𑀁 𑀘𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀸𑀫𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀯𑀺𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀯𑀺𑀫𑀭𑀺𑀬𑀸𑀤𑀺𑀓𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑀫𑀭𑀺𑀬𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀦𑀸𑀦𑀢𑁆𑀢𑀓𑀺𑀮𑁂𑀲𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀲𑀤𑁆𑀥𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 ¶ 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀯𑀻𑀭𑀺𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀲𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀫𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀲𑀫𑀸𑀥𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀑𑀪𑀸𑀲𑀕𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀇𑀤𑁆𑀥𑀺𑀬𑀸 𑀇𑀫𑀸𑀦𑀺 𑀲𑁄𑀴𑀲 𑀫𑀽𑀮𑀸𑀦𑀺 𑀇𑀤𑁆𑀥𑀺𑀮𑀸𑀪𑀸𑀬…𑀧𑁂… 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁯).

𑀓𑀸𑀫𑀜𑁆𑀘 𑀏𑀲 𑀅𑀢𑁆𑀣𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺𑀆𑀤𑀺𑀦𑀸𑀧𑀺 𑀲𑀺𑀤𑁆𑀥𑁄𑀬𑁂𑀯, 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀧𑀦 𑀇𑀤𑁆𑀥𑀺𑀬𑀸 𑀪𑀽𑀫𑀺𑀧𑀸𑀤𑀧𑀤𑀫𑀽𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀯𑀼𑀢𑁆𑀢𑁄. 𑀧𑀼𑀭𑀺𑀫𑁄 𑀘 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁄. 𑀅𑀬𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁. 𑀇𑀢𑀺 𑀉𑀪𑀬𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀫𑁆𑀧𑀺 𑀧𑀼𑀦 𑀯𑀼𑀢𑁆𑀢𑁄.

𑁩𑁮𑁫. 𑀜𑀸𑀡𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄𑀢𑀺 𑀲𑁆𑀯𑀸𑀬𑀫𑁂𑀢𑁂 𑀇𑀤𑁆𑀥𑀺𑀬𑀸 𑀪𑀽𑀫𑀺𑀧𑀸𑀤𑀧𑀤𑀪𑀽𑀢𑁂 𑀥𑀫𑁆𑀫𑁂 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀘𑁂 𑀲𑀢𑀁 𑀇𑀘𑁆𑀙𑀢𑀺 ‘‘𑀲𑀢𑀁 𑀳𑁄𑀫𑀺 𑀲𑀢𑀁 𑀳𑁄𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀢𑀺, 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳𑁂𑀯 𑀲𑀢𑀁 𑀳𑁄𑀢𑀺. 𑀲𑀳𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀏𑀯𑀁 𑀦 𑀇𑀚𑁆𑀛𑀢𑀺 𑀧𑀼𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀳𑀺 𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀺 𑀲𑀢𑀸𑀭𑀫𑁆𑀫𑀡𑀸𑀦𑀺 𑀯𑀸 𑀲𑀳𑀲𑁆𑀲𑀸𑀭𑀫𑁆𑀫𑀡𑀸𑀦𑀺 𑀯𑀸, 𑀢𑀸𑀦𑀺 𑀘 𑀔𑁄 𑀯𑀡𑁆𑀡𑀯𑀲𑁂𑀦, 𑀦𑁄 𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺 𑀢𑀣𑁂𑀯 𑀲𑀢𑀸𑀭𑀫𑁆𑀫𑀡𑀁 ¶ 𑀯𑀸 𑀲𑀳𑀲𑁆𑀲𑀸𑀭𑀫𑁆𑀫𑀡𑀁 𑀯𑀸. 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀫𑀺𑀯 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁 𑀏𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁.

𑁩𑁮𑁬. 𑀬𑀫𑁆𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀁 ‘‘𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸, 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 ‘𑀩𑀳𑀼𑀓𑁄 𑀳𑁄𑀫𑀻’𑀢𑀺, 𑀩𑀳𑀼𑀓𑁄 𑀳𑁄𑀢𑀺, 𑀬𑀣𑀸 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄’’𑀢𑀺 (𑀧𑀝𑀺. 𑀫. 𑁩.𑁧𑁦). 𑀢𑀢𑁆𑀭𑀸𑀧𑀺 𑀆𑀯𑀚𑁆𑀚𑀢𑀻𑀢𑀺 𑀧𑀭𑀺𑀓𑀫𑁆𑀫𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻𑀢𑀺 𑀅𑀪𑀺𑀜𑁆𑀜𑀸𑀜𑀸𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺, 𑀢𑀢𑁄 𑀢𑁂𑀲𑀫𑁆𑀧𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀁 𑀅𑀯𑀲𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀩𑀳𑀼𑀓𑁄 𑀳𑁄𑀫𑀻𑀢𑀺 𑀆𑀯𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀯𑀸 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀁 𑀅𑀦𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑁂𑀦 𑀲𑀦𑁆𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 ¶ 𑀮𑀤𑁆𑀥𑀦𑀸𑀫𑁂𑀦 𑀏𑀓𑁂𑀦𑁂𑀯 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀬𑀣𑀸 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄’’𑀢𑀺, 𑀢𑀁 𑀩𑀳𑀼𑀥𑀸𑀪𑀸𑀯𑀲𑁆𑀲 𑀓𑀸𑀬𑀲𑀓𑁆𑀔𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀁 𑀧𑀦 𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑀁. 𑀢𑁂 𑀓𑀺𑀭 𑀤𑁆𑀯𑁂𑀪𑀸𑀢𑀭𑁄 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀦𑁆𑀣𑀓𑀸𑀢𑀺 𑀦𑀸𑀫𑀁 𑀮𑀪𑀺𑀁𑀲𑀼. 𑀢𑁂𑀲𑀁 𑀚𑁂𑀝𑁆𑀞𑁄 𑀫𑀳𑀸𑀧𑀦𑁆𑀣𑀓𑁄, 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀸 𑀳𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑁋

𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁, 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁, 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂𑀢𑀺. (𑀅. 𑀦𑀺. 𑁫.𑁧𑁯𑁫) 𑁋

𑀇𑀫𑀁 𑀕𑀸𑀣𑀁 𑀅𑀤𑀸𑀲𑀺. 𑀲𑁄 𑀢𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀕𑀼𑀡𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀣𑁂𑀭𑁄 𑀅𑀪𑀩𑁆𑀩𑁄 𑀢𑁆𑀯𑀁 𑀲𑀸𑀲𑀦𑁂𑀢𑀺 𑀯𑀺𑀳𑀸𑀭𑀢𑁄 𑀦𑀻𑀳𑀭𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀣𑁂𑀭𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀚𑀻𑀯𑀓𑁄 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀣𑁂𑀭𑁄𑀧𑀺 𑀞𑀧𑁂𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑀁 𑀲𑁂𑀲𑀸𑀦𑀁 𑀅𑀥𑀺𑀯𑀸𑀲𑁂𑀫𑀻𑀢𑀺 𑀅𑀥𑀺𑀯𑀸𑀲𑁂𑀲𑀺.

𑀘𑀽𑀴𑀧𑀦𑁆𑀣𑀓𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀭𑁄𑀤𑀢𑀺. 𑀪𑀕𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀲𑁆𑀫𑀸 𑀭𑁄𑀤𑀲𑀻𑀢𑀺 𑀆𑀳. 𑀲𑁄 𑀢𑀁 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀺. 𑀪𑀕𑀯𑀸 𑀦 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀫 ¶ 𑀲𑀸𑀲𑀦𑁂 𑀅𑀪𑀩𑁆𑀩𑁄 𑀦𑀸𑀫 𑀳𑁄𑀢𑀺, 𑀫𑀸 𑀲𑁄𑀘𑀺 𑀪𑀺𑀓𑁆𑀔𑀽𑀢𑀺 𑀢𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀤𑀸𑀲𑀺, 𑀳𑀦𑁆𑀤 𑀪𑀺𑀓𑁆𑀔𑀼 𑀇𑀫𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻𑀢𑀺. 𑀢𑀲𑁆𑀲 𑀢𑀣𑀸 𑀓𑀭𑁄𑀢𑁄 𑀢𑀁 𑀓𑀸𑀴𑀯𑀡𑁆𑀡𑀁 𑀅𑀳𑁄𑀲𑀺. 𑀲𑁄 𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣𑀁, 𑀦𑀢𑁆𑀣𑁂𑀢𑁆𑀣 𑀤𑁄𑀲𑁄, 𑀅𑀢𑁆𑀢𑀪𑀸𑀯𑀲𑁆𑀲 𑀧𑀦𑀸𑀬𑀁 𑀤𑁄𑀲𑁄𑀢𑀺 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀼𑀮𑁄𑀫𑀢𑁄 𑀕𑁄𑀢𑁆𑀭𑀪𑀼𑀲𑀫𑀻𑀧𑀁 𑀧𑀸𑀧𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀑𑀪𑀸𑀲𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀧𑀡𑁆𑀟𑀺𑀢𑀸,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 ¶ …𑀧𑁂….

‘‘𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀧𑀡𑁆𑀟𑀺𑀢𑀸,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. (𑀫𑀳𑀸𑀦𑀺. 𑁨𑁦𑁯);

𑀢𑀲𑁆𑀲 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀙𑀴𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀸 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀳𑀢𑁆𑀣𑀕𑀢𑀸𑀯 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀤𑀼𑀢𑀺𑀬𑀤𑀺𑀯𑀲𑁂 𑀚𑀻𑀯𑀓𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀤𑀓𑁆𑀔𑀺𑀡𑁄𑀤𑀓𑀸𑀯𑀲𑀸𑀦𑁂 𑀬𑀸𑀕𑀼𑀬𑀸 𑀤𑀺𑀬𑁆𑀬𑀫𑀸𑀦𑀸𑀬 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀚𑀻𑀯𑀓𑁄 𑀓𑀺𑀁 𑀪𑀦𑁆𑀢𑁂𑀢𑀺 𑀧𑀼𑀘𑁆𑀙𑀺. 𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀅𑀢𑁆𑀣𑀻𑀢𑀺. 𑀲𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 ‘‘𑀕𑀘𑁆𑀙, 𑀅𑀬𑁆𑀬𑀁 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀏𑀳𑀻’’𑀢𑀺. 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑁂 𑀧𑀦 𑀪𑀕𑀯𑀢𑀺,

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁 ¶ , 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸𑀢𑀺. (𑀣𑁂𑀭𑀕𑀸. 𑁫𑁬𑁩);

𑀅𑀣 𑀲𑁄 𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 𑀓𑀸𑀲𑀸𑀯𑁂𑀳𑀺 𑀏𑀓𑀧𑀚𑁆𑀚𑁄𑀢𑀁 𑀆𑀭𑀸𑀫𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀪𑀭𑀺𑀢𑁄 𑀪𑀦𑁆𑀢𑁂 𑀆𑀭𑀸𑀫𑁄, 𑀦𑀸𑀳𑀁 𑀚𑀸𑀦𑀸𑀫𑀺 𑀓𑀢𑀫𑁄 𑀲𑁄 𑀅𑀬𑁆𑀬𑁄𑀢𑀺 𑀆𑀳. 𑀢𑀢𑁄 𑀦𑀁 𑀪𑀕𑀯𑀸 𑀆𑀳 ‘‘𑀕𑀘𑁆𑀙 𑀬𑀁 𑀧𑀞𑀫𑀁 𑀧𑀲𑁆𑀲𑀲𑀺, 𑀢𑀁 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘𑀲𑀢𑁆𑀣𑀸 𑀢𑀁 𑀆𑀫𑀦𑁆𑀢𑁂𑀢𑀻’𑀢𑀺 𑀯𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀘𑀻𑀯𑀭𑀓𑀡𑁆𑀡𑁂 𑀅𑀕𑁆𑀕𑀳𑁂𑀲𑀺. 𑀢𑀸𑀯𑀤𑁂𑀯 𑀲𑀩𑁆𑀩𑁂𑀧𑀺 𑀦𑀺𑀫𑁆𑀫𑀺𑀢𑀸 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀣𑁂𑀭𑁄 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀣𑀸 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄’’𑀢𑀺.

𑀢𑀢𑁆𑀭 𑀬𑁂 𑀢𑁂 𑀩𑀳𑀽 𑀦𑀺𑀫𑁆𑀫𑀺𑀢𑀸 𑀢𑁂 𑀅𑀦𑀺𑀬𑀫𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀢𑁆𑀢𑀸 𑀇𑀤𑁆𑀥𑀺𑀫𑀢𑀸 𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀸 𑀪𑀸𑀲𑀺𑀢𑀢𑀼𑀡𑁆𑀳𑀻𑀪𑀸𑀯𑀸𑀤𑀻𑀲𑀼 𑀯𑀸 𑀬𑀁 𑀬𑀁 𑀇𑀤𑁆𑀥𑀺𑀫𑀸 𑀓𑀭𑁄𑀢𑀺, 𑀢𑀁 𑀢𑀤𑁂𑀯 𑀓𑀭𑁄𑀦𑁆𑀢𑀺. 𑀲𑀘𑁂 𑀧𑀦 𑀦𑀸𑀦𑀸𑀯𑀡𑁆𑀡𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀓𑁂𑀘𑀺 𑀧𑀞𑀫𑀯𑀬𑁂, 𑀓𑁂𑀘𑀺 𑀫𑀚𑁆𑀛𑀺𑀫𑀯𑀬𑁂, 𑀓𑁂𑀘𑀺 𑀧𑀘𑁆𑀙𑀺𑀫𑀯𑀬𑁂, 𑀢𑀣𑀸 ¶ 𑀤𑀻𑀖𑀓𑁂𑀲𑁂, 𑀉𑀧𑀟𑁆𑀠𑀫𑀼𑀡𑁆𑀟𑁂, 𑀫𑀼𑀡𑁆𑀟𑁂, 𑀫𑀺𑀲𑁆𑀲𑀓𑁂𑀲𑁂, 𑀉𑀧𑀟𑁆𑀠𑀭𑀢𑁆𑀢𑀘𑀻𑀯𑀭𑁂, 𑀧𑀡𑁆𑀟𑀼𑀓𑀘𑀻𑀯𑀭𑁂, 𑀧𑀤𑀪𑀸𑀡𑀥𑀫𑁆𑀫𑀓𑀣𑀸𑀲𑀭𑀪𑀜𑁆𑀜𑀧𑀜𑁆𑀳𑀧𑀼𑀘𑁆𑀙𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀭𑀚𑀦𑀧𑀘𑀦𑀘𑀻𑀯𑀭𑀲𑀺𑀩𑁆𑀩𑀦𑀥𑁄𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀅𑀧𑀭𑁂𑀧𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀏𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀞𑀫𑀯𑀬𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀓𑀸𑀭𑀸𑀬𑁂𑀯 𑀳𑁄𑀦𑁆𑀢𑀻𑀢𑀺. 𑀏𑀲 𑀦𑀬𑁄 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻𑀢𑀺𑀆𑀤𑀻𑀲𑀼.

𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀩𑀳𑀼𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀦 ‘‘𑀏𑀓𑁄𑀯 𑀳𑀼𑀢𑁆𑀯𑀸 𑀘𑀗𑁆𑀓𑀫𑀺𑀲𑁆𑀲𑀸𑀫𑀺, 𑀲𑀚𑁆𑀛𑀸𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸, ‘‘𑀅𑀬𑀁 𑀯𑀺𑀳𑀸𑀭𑁄 𑀅𑀧𑁆𑀧𑀪𑀺𑀓𑁆𑀔𑀼𑀓𑁄, 𑀲𑀘𑁂 𑀓𑁂𑀘𑀺 𑀆𑀕𑀫𑀺𑀲𑁆𑀲𑀦𑁆𑀢𑀺 ‘𑀓𑀼𑀢𑁄 𑀇𑀫𑁂 𑀏𑀢𑁆𑀢𑀓𑀸 𑀏𑀓𑀲𑀤𑀺𑀲𑀸 𑀪𑀺𑀓𑁆𑀔𑀽, 𑀅𑀤𑁆𑀥𑀸 𑀣𑁂𑀭𑀲𑁆𑀲 𑀏𑀲 𑀆𑀦𑀼𑀪𑀸𑀯𑁄’𑀢𑀺 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀸 𑀅𑀦𑁆𑀢𑀭𑀸𑀯 ‘‘𑀏𑀓𑁄 𑀳𑁄𑀫𑀻’’𑀢𑀺 𑀇𑀘𑁆𑀙𑀦𑁆𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀏𑀓𑁄 𑀳𑁄𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀏𑀓𑁄 𑀳𑁄𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀏𑀓𑁄 𑀳𑁄𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀬𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀬𑀫𑁂𑀯 𑀏𑀓𑁄 𑀳𑁄𑀢𑀺.

𑁩𑁮𑁭. 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀦𑁆𑀢𑀺 𑀏𑀢𑁆𑀣 𑀆𑀯𑀺𑀪𑀸𑀯𑀁 𑀓𑀭𑁄𑀢𑀺 𑀢𑀺𑀭𑁄𑀪𑀸𑀯𑀁 𑀓𑀭𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 ¶ . 𑀇𑀤𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀁 ‘‘𑀆𑀯𑀺𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀅𑀦𑀸𑀯𑀝𑀁 𑀳𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀝𑀁 𑀧𑀸𑀓𑀝𑀁. 𑀢𑀺𑀭𑁄𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀆𑀯𑀝𑀁 𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀧𑀺𑀳𑀺𑀢𑀁 𑀧𑀝𑀺𑀓𑀼𑀚𑁆𑀚𑀺𑀢’’𑀦𑁆𑀢𑀺 (𑀧𑀝𑀺. 𑀫. 𑁩.𑁧𑁧). 𑀢𑀢𑁆𑀭𑀸𑀬𑀁 𑀇𑀤𑁆𑀥𑀺𑀫𑀸 𑀆𑀯𑀺𑀪𑀸𑀯𑀁 𑀓𑀸𑀢𑀼𑀓𑀸𑀫𑁄 𑀅𑀦𑁆𑀥𑀓𑀸𑀭𑀁 𑀯𑀸 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀝𑀁, 𑀅𑀦𑀸𑀧𑀸𑀣𑀁 𑀯𑀸 𑀆𑀧𑀸𑀣𑀁 𑀓𑀭𑁄𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀤𑀽𑀭𑁂 𑀞𑀺𑀢𑁄𑀧𑀺 𑀯𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀓𑀸𑀢𑀼𑀓𑀸𑀫𑁄 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀇𑀤𑀁 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑀁 𑀆𑀮𑁄𑀓𑀚𑀸𑀢𑀁 𑀳𑁄𑀢𑀽𑀢𑀺 𑀯𑀸, 𑀇𑀤𑀁 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀝𑀁 𑀳𑁄𑀢𑀽𑀢𑀺 𑀯𑀸, 𑀇𑀤𑀁 𑀅𑀦𑀸𑀧𑀸𑀣𑀁 𑀆𑀧𑀸𑀣𑀁 𑀳𑁄𑀢𑀽𑀢𑀺 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀺, 𑀲𑀳 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀬𑀣𑀸𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀧𑀭𑁂 𑀤𑀽𑀭𑁂 𑀞𑀺𑀢𑀸𑀧𑀺 𑀧𑀲𑁆𑀲𑀦𑁆𑀢𑀺. 𑀲𑀬𑀫𑁆𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑁄 𑀧𑀲𑁆𑀲𑀢𑀺.

𑁩𑁮𑁮. 𑀏𑀢𑀁 ¶ 𑀧𑀦 𑀧𑀸𑀝𑀺𑀳𑀸𑀭𑀺𑀬𑀁 𑀓𑁂𑀦 𑀓𑀢𑀧𑀼𑀩𑁆𑀩𑀦𑁆𑀢𑀺? 𑀪𑀕𑀯𑀢𑀸. 𑀪𑀕𑀯𑀸 𑀳𑀺 𑀘𑀽𑀴𑀲𑀼𑀪𑀤𑁆𑀤𑀸𑀬 𑀦𑀺𑀫𑀦𑁆𑀢𑀺𑀢𑁄 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑁂𑀳𑀺 𑀧𑀜𑁆𑀘𑀳𑀺 𑀓𑀽𑀝𑀸𑀕𑀸𑀭𑀲𑀢𑁂𑀳𑀺 𑀲𑀸𑀯𑀢𑁆𑀣𑀺𑀢𑁄 𑀲𑀢𑁆𑀢𑀬𑁄𑀚𑀦𑀩𑁆𑀪𑀦𑁆𑀢𑀭𑀁 𑀲𑀸𑀓𑁂𑀢𑀁 𑀕𑀘𑁆𑀙𑀦𑁆𑀢𑁄 𑀬𑀣𑀸 𑀲𑀸𑀓𑁂𑀢𑀦𑀕𑀭𑀯𑀸𑀲𑀺𑀦𑁄 𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑁂, 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀘 𑀲𑀸𑀓𑁂𑀢𑀯𑀸𑀲𑀺𑀓𑁂 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺. 𑀦𑀕𑀭𑀫𑀚𑁆𑀛𑁂 𑀘 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀬𑀸𑀯 𑀅𑀯𑀻𑀘𑀺𑀁 𑀆𑀓𑀸𑀲𑀜𑁆𑀘 𑀤𑁆𑀯𑀺𑀥𑀸 𑀯𑀺𑀬𑀽𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀁 𑀤𑀲𑁆𑀲𑁂𑀲𑀺.

𑀤𑁂𑀯𑁄𑀭𑁄𑀳𑀡𑁂𑀦𑀧𑀺 𑀘 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀪𑀕𑀯𑀸 𑀓𑀺𑀭 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀩𑀦𑁆𑀥𑀦𑀸 𑀧𑀫𑁄𑀘𑁂𑀢𑁆𑀯𑀸 𑀅𑀢𑀻𑀢𑀸 𑀩𑀼𑀤𑁆𑀥𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀯𑀲𑀸𑀦𑁂 𑀓𑀼𑀳𑀺𑀁 𑀕𑀢𑀸𑀢𑀺 𑀆𑀯𑀚𑁆𑀚𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀢𑀸𑀢𑀺 𑀅𑀤𑁆𑀤𑀲. 𑀅𑀣𑁂𑀓𑁂𑀦 𑀧𑀸𑀤𑁂𑀦 𑀧𑀣𑀯𑀻𑀢𑀮𑀁 𑀅𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀁 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀼𑀦 𑀧𑀼𑀭𑀺𑀫𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀺𑀦𑁂𑀭𑀼𑀫𑀢𑁆𑀣𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑀮𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀪𑀺𑀥𑀫𑁆𑀫𑀓𑀣𑀁 𑀆𑀭𑀪𑀺. 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀪𑀕𑀯𑀸 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀽𑀲𑀼 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀢𑀻𑀭𑁂 𑀧𑀭𑀺𑀪𑀼𑀜𑁆𑀚𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀢𑀺. 𑀪𑀕𑀯𑀸 𑀅𑀚𑁆𑀚 𑀏𑀢𑁆𑀢𑀓𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺𑀦𑁆𑀢𑀺 𑀣𑁂𑀭𑀲𑁆𑀲 𑀦𑀬𑀁 𑀤𑁂𑀢𑀺. 𑀏𑀯𑀁 𑀢𑀬𑁄 𑀫𑀸𑀲𑁂 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀅𑀲𑀻𑀢𑀺𑀓𑁄𑀝𑀺𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀲𑀦𑁆𑀦𑀺𑀧𑀢𑀺𑀢𑀸𑀧𑀺 𑀤𑁆𑀯𑀸𑀤𑀲𑀬𑁄𑀚𑀦𑀸 𑀧𑀭𑀺𑀲𑀸 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸𑀢𑀺 ¶ 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀬𑁂𑀯 𑀲𑀩𑁆𑀩𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀓𑀼𑀳𑀺𑀁 𑀪𑀕𑀯𑀸𑀢𑀺 𑀚𑀸𑀦𑀦𑀢𑁆𑀣𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀅𑀤𑁆𑀤𑀲 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀢𑀢𑁆𑀣 𑀯𑀲𑁆𑀲𑀽𑀧𑀕𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀲𑀺.

𑀢𑁂 𑀪𑀕𑀯𑀢𑁄 𑀯𑀦𑁆𑀤𑀦𑀢𑁆𑀣𑀸𑀬 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀫𑀳𑀸𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑀁 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀢𑀣𑀸𑀕𑀢𑀧𑀸𑀤𑀫𑀽𑀮𑁂 ¶ 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀫𑀸𑀦𑁄𑀯 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀧𑀲𑁆𑀲𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀻’’𑀢𑀺. 𑀪𑀕𑀯𑀸 𑀆𑀳 ‘‘𑀓𑀼𑀳𑀺𑀁 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀢𑀭𑀳𑀺 𑀚𑁂𑀝𑁆𑀞𑀪𑀸𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀻’’𑀢𑀺? ‘‘𑀲𑀗𑁆𑀓𑀲𑁆𑀲𑀦𑀕𑀭𑁂 𑀪𑀦𑁆𑀢𑁂’’𑀢𑀺. ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀫𑀁 𑀤𑀝𑁆𑀞𑀼𑀓𑀸𑀫𑀸 𑀲𑁆𑀯𑁂 𑀲𑀗𑁆𑀓𑀲𑁆𑀲𑀦𑀕𑀭𑀁 𑀆𑀕𑀘𑁆𑀙𑀦𑁆𑀢𑀼, 𑀅𑀳𑀁 𑀲𑁆𑀯𑁂 𑀫𑀳𑀸𑀧𑀯𑀸𑀭𑀡𑀧𑀼𑀡𑁆𑀡𑀫𑀸𑀲𑀻𑀉𑀧𑁄𑀲𑀣𑀤𑀺𑀯𑀲𑁂 𑀲𑀗𑁆𑀓𑀲𑁆𑀲𑀦𑀕𑀭𑁂 𑀑𑀢𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀑𑀭𑀼𑀬𑁆𑀳 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑀁 𑀲𑀫𑁆𑀧𑀸𑀧𑀼𑀡𑀺. 𑀕𑀫𑀦𑀸𑀕𑀫𑀦𑀓𑀸𑀮𑁂 𑀘 𑀬𑀣𑀸 𑀦𑀁 𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺. 𑀇𑀤𑀁 𑀢𑀸𑀯𑁂𑀢𑁆𑀣 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀆𑀯𑀺𑀪𑀸𑀯𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺.

𑀲𑁄 𑀏𑀯𑀁 𑀆𑀕𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀤𑀽𑀭𑀦𑁆𑀢𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀓𑀢𑀧𑀸𑀢𑀭𑀸𑀲𑀸𑀯 𑀦𑀺𑀓𑁆𑀔𑀫𑀣𑀸’’𑀢𑀺 𑀆𑀳. 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ‘‘𑀫𑀳𑀸𑀭𑀸𑀚, 𑀲𑁆𑀯𑁂 𑀫𑀦𑀼𑀲𑁆𑀲𑀮𑁄𑀓𑀁 𑀕𑀘𑁆𑀙𑀸𑀫𑀻’’𑀢𑀺. 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀡𑀸𑀧𑁂𑀲𑀺 ‘‘𑀢𑀸𑀢, 𑀲𑁆𑀯𑁂 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀺𑀲𑁆𑀲𑁄 𑀲𑁄𑀧𑀸𑀦𑀧𑀦𑁆𑀢𑀺𑀬𑁄 𑀫𑀸𑀧𑁂𑀳𑀺 𑀏𑀓𑀁 𑀓𑀦𑀓𑀫𑀬𑀁, 𑀏𑀓𑀁 𑀭𑀚𑀢𑀫𑀬𑀁, 𑀏𑀓𑀁 𑀫𑀡𑀺𑀫𑀬’’𑀦𑁆𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀯𑀺𑀯𑀝𑀸𑀦𑀺 𑀳𑀼𑀢𑁆𑀯𑀸 𑀏𑀓𑀗𑁆𑀕𑀡𑀁 𑀯𑀺𑀬 𑀧𑀓𑀸𑀲𑀺𑀁𑀲𑀼. 𑀬𑀣𑀸 𑀘 𑀧𑀼𑀭𑀢𑁆𑀣𑀺𑀫𑁂𑀦, 𑀏𑀯𑀁 𑀧𑀘𑁆𑀙𑀺𑀫𑁂𑀦𑀧𑀺 𑀉𑀢𑁆𑀢𑀭𑁂𑀦𑀧𑀺 𑀤𑀓𑁆𑀔𑀺𑀡𑁂𑀦𑀧𑀺 𑀲𑀩𑁆𑀩𑀁 𑀯𑀺𑀯𑀝𑀫𑀤𑁆𑀤𑀲. 𑀳𑁂𑀝𑁆𑀞𑀸𑀧𑀺 𑀬𑀸𑀯 𑀅𑀯𑀻𑀘𑀺, 𑀉𑀧𑀭𑀺 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀁, 𑀢𑀸𑀯 𑀅𑀤𑁆𑀤𑀲.

𑀢𑀁 𑀤𑀺𑀯𑀲𑀁 𑀓𑀺𑀭 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀤𑁂𑀯𑁂 𑀧𑀲𑁆𑀲𑀦𑁆𑀢𑀺, 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑁂. 𑀢𑀢𑁆𑀣 𑀦𑁂𑀯 𑀫𑀦𑀼𑀲𑁆𑀲𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑀺, 𑀦 𑀤𑁂𑀯𑀸 𑀅𑀥𑁄 𑀑𑀮𑁄𑀓𑁂𑀦𑁆𑀢𑀺, 𑀲𑀩𑁆𑀩𑁂 𑀲𑀫𑁆𑀫𑀼𑀔𑀸𑀯 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺. 𑀪𑀕𑀯𑀸 𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀦𑁂𑀦 𑀑𑀢𑀭𑀢𑀺, 𑀙𑀓𑀸𑀫𑀸𑀯𑀘𑀭𑀤𑁂𑀯𑀸 𑀯𑀸𑀫𑀧𑀲𑁆𑀲𑁂 𑀓𑀦𑀓𑀫𑀬𑁂𑀦, 𑀲𑀼𑀤𑁆𑀥𑀸𑀯𑀸𑀲𑀸 𑀘 𑀫𑀳𑀸𑀩𑁆𑀭𑀳𑁆𑀫𑀸 𑀘 𑀤𑀓𑁆𑀔𑀺𑀡𑀧𑀲𑁆𑀲𑁂 𑀭𑀚𑀢𑀫𑀬𑁂𑀦. 𑀤𑁂𑀯𑀭𑀸𑀚𑀸 𑀧𑀢𑁆𑀢𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀢𑀺𑀬𑁄𑀚𑀦𑀺𑀓𑀁 𑀲𑁂𑀢𑀘𑁆𑀙𑀢𑁆𑀢𑀁, 𑀲𑀼𑀬𑀸𑀫𑁄 𑀯𑀸𑀴𑀩𑀻𑀚𑀦𑀺𑀁, 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 ¶ 𑀢𑀺𑀕𑀸𑀯𑀼𑀢𑀫𑀢𑁆𑀢𑀁 𑀩𑁂𑀴𑀼𑀯𑀧𑀡𑁆𑀟𑀼𑀯𑀻𑀡𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀑𑀢𑀭𑀢𑀺. 𑀢𑀁𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀪𑀸𑀯𑀸𑀬 𑀧𑀺𑀳𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀞𑀺𑀢𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀤𑀫𑁂𑀢𑁆𑀣 𑀪𑀕𑀯𑀸 𑀆𑀯𑀺𑀪𑀸𑀯𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺.

𑀅𑀧𑀺𑀘 ¶ 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀢𑀮𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄𑀧𑀺 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀘𑁂𑀢𑀺𑀬𑀗𑁆𑀕𑀡𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀅𑀧𑀡𑁆𑀡𑀓𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁧𑁬) 𑀓𑀣𑁂𑀦𑁆𑀢𑁄 𑀳𑁂𑀝𑁆𑀞𑀸𑀫𑀼𑀔𑀁 𑀩𑀻𑀚𑀦𑀺𑀁 𑀅𑀓𑀸𑀲𑀺, 𑀬𑀸𑀯 𑀅𑀯𑀻𑀘𑀺𑀢𑁄 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺. 𑀢𑀢𑁄 𑀉𑀧𑀭𑀺𑀫𑀼𑀔𑀁 𑀅𑀓𑀸𑀲𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺. 𑀣𑁂𑀭𑁄 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀲𑀕𑁆𑀕𑀲𑀼𑀔𑁂𑀦 𑀘 𑀧𑀮𑁄𑀪𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻 𑀅𑀭𑀳𑀦𑁆𑀢𑁄𑀢𑀺.

𑁩𑁮𑁯. 𑀢𑀺𑀭𑁄𑀪𑀸𑀯𑀁 𑀓𑀸𑀢𑀼𑀓𑀸𑀫𑁄 𑀧𑀦 𑀆𑀮𑁄𑀓𑀁 𑀯𑀸 𑀅𑀦𑁆𑀥𑀓𑀸𑀭𑀁 𑀓𑀭𑁄𑀢𑀺, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀧𑀝𑀺𑀘𑁆𑀙𑀦𑁆𑀦𑀁, 𑀆𑀧𑀸𑀣𑀁 𑀯𑀸 𑀅𑀦𑀸𑀧𑀸𑀣𑀁 𑀓𑀭𑁄𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀬𑀣𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀲𑀫𑀻𑀧𑁂 𑀞𑀺𑀢𑁄𑀧𑀺 𑀯𑀸 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀓𑀸𑀢𑀼𑀓𑀸𑀫𑁄 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀇𑀤𑀁 𑀆𑀮𑁄𑀓𑀝𑁆𑀞𑀸𑀦𑀁 𑀅𑀦𑁆𑀥𑀓𑀸𑀭𑀁 𑀳𑁄𑀢𑀽’’𑀢𑀺 𑀯𑀸, ‘‘𑀇𑀤𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀽’’𑀢𑀺 𑀯𑀸, ‘‘𑀇𑀤𑀁 𑀆𑀧𑀸𑀣𑀁 𑀅𑀦𑀸𑀧𑀸𑀣𑀁 𑀳𑁄𑀢𑀽’’𑀢𑀺 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀺. 𑀲𑀳 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀬𑀣𑀸𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀧𑀭𑁂 𑀲𑀫𑀻𑀧𑁂 𑀞𑀺𑀢𑀸𑀧𑀺 𑀦 𑀧𑀲𑁆𑀲𑀦𑁆𑀢𑀺. 𑀲𑀬𑀫𑁆𑀧𑀺 𑀅𑀧𑀲𑁆𑀲𑀺𑀢𑀼𑀓𑀸𑀫𑁄 𑀦 𑀧𑀲𑁆𑀲𑀢𑀺.

𑁩𑁯𑁦. 𑀏𑀢𑀁 𑀧𑀦 𑀧𑀸𑀝𑀺𑀳𑀸𑀭𑀺𑀬𑀁 𑀓𑁂𑀦 𑀓𑀢𑀧𑀼𑀩𑁆𑀩𑀦𑁆𑀢𑀺? 𑀪𑀕𑀯𑀢𑀸. 𑀪𑀕𑀯𑀸 𑀳𑀺 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀁𑀬𑁂𑀯 𑀬𑀣𑀸 𑀦𑀁 𑀧𑀺𑀢𑀸 𑀦 𑀧𑀲𑁆𑀲𑀢𑀺, 𑀏𑀯𑀫𑀓𑀸𑀲𑀺. 𑀢𑀣𑀸 𑀯𑀻𑀲𑀬𑁄𑀚𑀦𑀲𑀢𑀁 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀁 𑀅𑀦𑀸𑀕𑀸𑀫𑀺𑀨𑀮𑁂, 𑀅𑀫𑀘𑁆𑀘𑀲𑀳𑀲𑁆𑀲𑀜𑁆𑀘𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀢𑀲𑁆𑀲 𑀅𑀦𑀼𑀫𑀕𑁆𑀕𑀁 𑀆𑀕𑀢𑀸 𑀲𑀳𑀲𑁆𑀲𑀺𑀢𑁆𑀣𑀺𑀧𑀭𑀺𑀯𑀸𑀭𑀸 𑀅𑀦𑁄𑀚𑀸𑀤𑁂𑀯𑀻 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀸𑀧𑀺 𑀬𑀣𑀸 𑀲𑀧𑀭𑀺𑀲𑀁 𑀭𑀸𑀚𑀸𑀦𑀁 𑀦 𑀧𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 ‘‘𑀅𑀧𑀺, 𑀪𑀦𑁆𑀢𑁂, 𑀭𑀸𑀚𑀸𑀦𑀁 𑀧𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀦 𑀢𑁂 𑀭𑀸𑀚𑀸𑀦𑀁 𑀕𑀯𑁂𑀲𑀺𑀢𑀼𑀁 𑀯𑀭𑀁, 𑀉𑀤𑀸𑀳𑀼 𑀅𑀢𑁆𑀢𑀸𑀦’’𑀦𑁆𑀢𑀺? ‘‘𑀅𑀢𑁆𑀢𑀸𑀦𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀢𑀲𑁆𑀲𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀬𑀣𑀸 𑀲𑀸 𑀲𑀤𑁆𑀥𑀺𑀁 𑀇𑀢𑁆𑀣𑀺𑀲𑀳𑀲𑁆𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀅𑀫𑀘𑁆𑀘𑀸 𑀅𑀦𑀸𑀕𑀸𑀫𑀺𑀨𑀮𑁂, 𑀭𑀸𑀚𑀸 𑀅𑀭𑀳𑀢𑁆𑀢𑁂𑀢𑀺. 𑀅𑀧𑀺𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 ¶ ¶ 𑀆𑀕𑀢𑀤𑀺𑀯𑀲𑁂 𑀬𑀣𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁂 𑀅𑀯𑀲𑁂𑀲𑁂 𑀭𑀸𑀚𑀸 𑀦 𑀧𑀲𑁆𑀲𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁂𑀦 𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦𑀸𑀧𑀺 𑀇𑀤𑀁 𑀓𑀢𑀫𑁂𑀯 (𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸).

𑁩𑁯𑁧. 𑀅𑀧𑀺𑀘 𑀲𑀩𑁆𑀩𑀫𑁆𑀧𑀺 𑀧𑀸𑀓𑀝𑀁 𑀧𑀸𑀝𑀺𑀳𑀸𑀭𑀺𑀬𑀁 𑀆𑀯𑀺𑀪𑀸𑀯𑀁 𑀦𑀸𑀫. 𑀅𑀧𑀸𑀓𑀝𑀧𑀸𑀝𑀺𑀳𑀸𑀭𑀺𑀬𑀁 𑀢𑀺𑀭𑁄𑀪𑀸𑀯𑀁 𑀦𑀸𑀫. 𑀢𑀢𑁆𑀣 𑀧𑀸𑀓𑀝𑀧𑀸𑀝𑀺𑀳𑀸𑀭𑀺𑀬𑁂 𑀇𑀤𑁆𑀥𑀺𑀧𑀺 𑀧𑀜𑁆𑀜𑀸𑀬𑀢𑀺 𑀇𑀤𑁆𑀥𑀺𑀫𑀸𑀧𑀺. 𑀢𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀢𑀢𑁆𑀭 𑀳𑀺 ‘‘𑀇𑀥 𑀢𑀣𑀸𑀕𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀺 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺. 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁧𑁬) 𑀏𑀯𑀁 𑀉𑀪𑀬𑀁 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀧𑀸𑀓𑀝𑀧𑀸𑀝𑀺𑀳𑀸𑀭𑀺𑀬𑁂 𑀇𑀤𑁆𑀥𑀺𑀬𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀇𑀤𑁆𑀥𑀺𑀫𑀸. 𑀢𑀁 𑀫𑀳𑀓𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁪.𑁩𑁪𑁬) 𑀘 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁫𑁦𑁧 𑀆𑀤𑀬𑁄) 𑀘 𑀤𑀻𑀧𑁂𑀢𑀩𑁆𑀩𑀁. 𑀢𑀢𑁆𑀭 𑀳𑀺 𑀆𑀬𑀲𑁆𑀫𑀢𑁄 𑀘 𑀫𑀳𑀓𑀲𑁆𑀲, 𑀪𑀕𑀯𑀢𑁄 𑀘 𑀇𑀤𑁆𑀥𑀺𑀬𑁂𑀯 𑀧𑀜𑁆𑀜𑀸𑀬𑀺𑀢𑁆𑀣, 𑀦 𑀇𑀤𑁆𑀥𑀺𑀫𑀸.

𑀬𑀣𑀸𑀳 𑁋

‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀫𑀳𑀓𑀁 𑀏𑀢𑀤𑀯𑁄𑀘 ‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀓𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀽’𑀢𑀺. 𑀢𑁂𑀦 𑀳𑀺 𑀢𑁆𑀯𑀁 𑀕𑀳𑀧𑀢𑀺 𑀆𑀴𑀺𑀦𑁆𑀤𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀺𑀡𑀓𑀮𑀸𑀧𑀁 𑀑𑀓𑀸𑀲𑁂𑀳𑀻𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀫𑀳𑀓𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀴𑀺𑀦𑁆𑀤𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀺𑀡𑀓𑀮𑀸𑀧𑀁 𑀑𑀓𑀸𑀲𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺, 𑀬𑀣𑀸 𑀢𑀸𑀮𑀘𑁆𑀙𑀺𑀕𑁆𑀕𑀴𑁂𑀦 𑀘 𑀅𑀕𑁆𑀕𑀴𑀦𑁆𑀢𑀭𑀺𑀓𑀸𑀬 𑀘 𑀅𑀘𑁆𑀘𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀡𑀸𑀦𑀺 𑀛𑀸𑀧𑁂𑀲𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀦 𑀛𑀸𑀧𑁂𑀲𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁬).

𑀬𑀣𑀸 𑀘𑀸𑀳 𑁋

‘‘𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺𑀁 ‘𑀏𑀢𑁆𑀢𑀸𑀯𑀢𑀸 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑀲𑀤𑁆𑀤𑀜𑁆𑀘 𑀫𑁂 𑀲𑁄𑀲𑁆𑀲𑀦𑁆𑀢𑀺, 𑀦 𑀘 𑀫𑀁 𑀤𑀓𑁆𑀔𑀺𑀲𑁆𑀲𑀦𑁆𑀢𑀻’𑀢𑀺 𑀅𑀦𑁆𑀢𑀭𑀳𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺𑀁 𑁋

‘𑀪𑀯𑁂 ¶ ¶ 𑀯𑀸𑀳𑀁 𑀪𑀬𑀁 𑀤𑀺𑀲𑁆𑀯𑀸, 𑀪𑀯𑀜𑁆𑀘 𑀯𑀺𑀪𑀯𑁂𑀲𑀺𑀦𑀁;

𑀪𑀯𑀁 𑀦𑀸𑀪𑀺𑀯𑀤𑀺𑀁 𑀓𑀺𑀜𑁆𑀘𑀺, 𑀦𑀦𑁆𑀤𑀺𑀜𑁆𑀘 𑀦 𑀉𑀧𑀸𑀤𑀺𑀬𑀺’’’𑀦𑁆𑀢𑀺. (𑀫. 𑀦𑀺. 𑁧.𑁫𑁦𑁪);

𑁩𑁯𑁨. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂𑀢𑀺 𑀏𑀢𑁆𑀣 𑀢𑀺𑀭𑁄𑀓𑀼𑀝𑁆𑀝𑀦𑁆𑀢𑀺 𑀧𑀭𑀓𑀼𑀝𑁆𑀝𑀁, 𑀓𑀼𑀝𑁆𑀝𑀲𑁆𑀲 𑀧𑀭𑀪𑀸𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀓𑀼𑀝𑁆𑀝𑁄𑀢𑀺 𑀘 𑀕𑁂𑀳𑀪𑀺𑀢𑁆𑀢𑀺𑀬𑀸 𑀏𑀢𑀫𑀥𑀺𑀯𑀘𑀦𑀁. 𑀧𑀸𑀓𑀸𑀭𑁄𑀢𑀺 𑀕𑁂𑀳𑀯𑀺𑀳𑀸𑀭𑀕𑀸𑀫𑀸𑀤𑀻𑀦𑀁 𑀧𑀭𑀺𑀓𑁆𑀔𑁂𑀧𑀧𑀸𑀓𑀸𑀭𑁄. 𑀧𑀩𑁆𑀩𑀢𑁄𑀢𑀺 𑀧𑀁𑀲𑀼𑀧𑀩𑁆𑀩𑀢𑁄 𑀯𑀸 𑀧𑀸𑀲𑀸𑀡𑀧𑀩𑁆𑀩𑀢𑁄 𑀯𑀸. 𑀅𑀲𑀚𑁆𑀚𑀫𑀸𑀦𑁄𑀢𑀺 𑀅𑀮𑀕𑁆𑀕𑀫𑀸𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂𑀢𑀺 𑀆𑀓𑀸𑀲𑁂 𑀯𑀺𑀬. 𑀏𑀯𑀁 𑀕𑀦𑁆𑀢𑀼𑀓𑀸𑀫𑁂𑀦 𑀧𑀦 𑀆𑀓𑀸𑀲𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀓𑀼𑀝𑁆𑀝𑀁 𑀯𑀸 𑀧𑀸𑀓𑀸𑀭𑀁 𑀯𑀸 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀅𑀜𑁆𑀜𑀢𑀭𑀁 𑀧𑀩𑁆𑀩𑀢𑀁 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀓𑀢𑀧𑀭𑀺𑀓𑀫𑁆𑀫𑁂𑀦 𑀆𑀓𑀸𑀲𑁄 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀆𑀓𑀸𑀲𑁄𑀬𑁂𑀯 𑀳𑁄𑀢𑀺. 𑀅𑀥𑁄 𑀑𑀢𑀭𑀺𑀢𑀼𑀓𑀸𑀫𑀲𑁆𑀲, 𑀉𑀤𑁆𑀥𑀁 𑀯𑀸 𑀆𑀭𑁄𑀳𑀺𑀢𑀼𑀓𑀸𑀫𑀲𑁆𑀲 𑀲𑀼𑀲𑀺𑀭𑁄 𑀳𑁄𑀢𑀺, 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀲𑁆𑀲 𑀙𑀺𑀤𑁆𑀤𑁄. 𑀲𑁄 𑀢𑀢𑁆𑀣 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺.

𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑁂𑀢𑁆𑀣𑀸𑀳 𑁋 ‘‘𑀆𑀓𑀸𑀲𑀓𑀲𑀺𑀡𑀲𑀫𑀸𑀧𑀚𑁆𑀚𑀦𑀁, 𑀆𑀯𑀼𑀲𑁄, 𑀓𑀺𑀫𑀢𑁆𑀣𑀺𑀬𑀁, 𑀓𑀺𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀺 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑀼𑀓𑀸𑀫𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺 𑀓𑀲𑀺𑀡𑀸𑀦𑀺 𑀲𑀫𑀸𑀧𑀚𑁆𑀚𑀢𑀺, 𑀦𑀦𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑀻𑀪𑀸𑀯𑁄𑀬𑁂𑀯 𑀧𑀫𑀸𑀡𑀁. 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀤𑁂𑀯 𑀳𑁄𑀢𑀻’’𑀢𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀧𑀸𑀴𑀺𑀬𑀸, 𑀪𑀦𑁆𑀢𑁂, 𑀆𑀓𑀸𑀲𑀓𑀲𑀺𑀡𑀁𑀬𑁂𑀯 𑀆𑀕𑀢𑀁, 𑀢𑀲𑁆𑀫𑀸 𑀅𑀯𑀲𑁆𑀲𑀫𑁂𑀢𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀓𑀢𑀺𑀬𑀸 𑀆𑀓𑀸𑀲𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘𑀆𑀓𑀸𑀲𑁄 𑀳𑁄𑀢𑀽’𑀢𑀺. 𑀆𑀓𑀸𑀲𑁄 𑀳𑁄𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀓𑁂𑀦𑀘𑀺 𑀅𑀦𑀸𑀯𑀝𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀲𑀚𑁆𑀚𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂’’𑀢𑀺 (𑀧𑀝𑀺. 𑀫. 𑁩.𑁧𑁧).

𑀲𑀘𑁂 ¶ 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸 𑀧𑀩𑁆𑀩𑀢𑁄 𑀯𑀸 𑀭𑀼𑀓𑁆𑀔𑁄 𑀯𑀸 𑀉𑀝𑁆𑀞𑁂𑀢𑀺, 𑀓𑀺𑀁 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺? 𑀤𑁄𑀲𑁄 𑀦𑀢𑁆𑀣𑀺. 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀁 𑀳𑀺 ¶ 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀕𑁆𑀕𑀳𑀡𑀲𑀤𑀺𑀲𑀁 𑀳𑁄𑀢𑀺. 𑀇𑀫𑀺𑀦𑀸 𑀘 𑀧𑀦 𑀪𑀺𑀓𑁆𑀔𑀼𑀦𑀸 𑀆𑀓𑀸𑀲𑁄 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀆𑀓𑀸𑀲𑁄 𑀳𑁄𑀢𑀺𑀬𑁂𑀯. 𑀧𑀼𑀭𑀺𑀫𑀸𑀥𑀺𑀝𑁆𑀞𑀸𑀦𑀩𑀮𑁂𑀦𑁂𑀯 𑀘𑀲𑁆𑀲 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀧𑀩𑁆𑀩𑀢𑁄 𑀯𑀸 𑀭𑀼𑀓𑁆𑀔𑁄 𑀯𑀸 𑀉𑀢𑀼𑀫𑀬𑁄 𑀉𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀯𑁂𑀢𑀁. 𑀅𑀜𑁆𑀜𑁂𑀦 𑀇𑀤𑁆𑀥𑀺𑀫𑀢𑀸 𑀦𑀺𑀫𑁆𑀫𑀺𑀢𑁂 𑀧𑀦 𑀧𑀞𑀫𑀦𑀺𑀫𑁆𑀫𑀸𑀦𑀁 𑀩𑀮𑀯𑀁 𑀳𑁄𑀢𑀺. 𑀇𑀢𑀭𑁂𑀦 𑀢𑀲𑁆𑀲 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀕𑀦𑁆𑀢𑀩𑁆𑀩𑀁.

𑁩𑁯𑁩. 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀦𑁆𑀢𑀺 𑀏𑀢𑁆𑀣 𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀉𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀦𑀺𑀫𑀼𑀚𑁆𑀚𑀦𑁆𑀢𑀺 𑀲𑀁𑀲𑀻𑀤𑀦𑀁. 𑀉𑀫𑁆𑀫𑀼𑀚𑁆𑀚𑀜𑁆𑀘 𑀦𑀺𑀫𑀼𑀚𑁆𑀚𑀜𑁆𑀘 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁. 𑀏𑀯𑀁 𑀓𑀸𑀢𑀼𑀓𑀸𑀫𑁂𑀦 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀏𑀢𑁆𑀢𑀓𑁂 𑀞𑀸𑀦𑁂 𑀧𑀣𑀯𑀻 𑀉𑀤𑀓𑀁 𑀳𑁄𑀢𑀽𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦 𑀬𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀞𑀸𑀦𑁂 𑀧𑀣𑀯𑀻 𑀉𑀤𑀓𑀫𑁂𑀯 𑀳𑁄𑀢𑀺. 𑀲𑁄 𑀢𑀢𑁆𑀣 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀓𑀢𑀺𑀬𑀸 𑀆𑀧𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀧𑀣𑀯𑀺𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘𑀉𑀤𑀓𑀁 𑀳𑁄𑀢𑀽’𑀢𑀺. 𑀉𑀤𑀓𑀁 𑀳𑁄𑀢𑀺. 𑀲𑁄 𑀧𑀣𑀯𑀺𑀬𑀸 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀉𑀤𑀓𑁂 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀧𑀣𑀯𑀺𑀬𑀸 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂’’𑀢𑀺 (𑀧𑀝𑀺. 𑀫. 𑁩.𑁧𑁧).

𑀦 𑀓𑁂𑀯𑀮𑀜𑁆𑀘 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀫𑁂𑀯, 𑀦𑁆𑀳𑀸𑀦𑀧𑀸𑀦𑀫𑀼𑀔𑀥𑁄𑀯𑀦𑀪𑀡𑁆𑀟𑀓𑀥𑁄𑀯𑀦𑀸𑀤𑀻𑀲𑀼 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀓𑀭𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀉𑀤𑀓𑀫𑁂𑀯, 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼𑀧𑀺 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀏𑀢𑁆𑀢𑀓𑀁 𑀳𑁄𑀢𑀽𑀢𑀺 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀬𑀣𑀸𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀉𑀤𑁆𑀥𑀭𑀺𑀢𑁆𑀯𑀸 𑀪𑀸𑀚𑀦𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀲𑀧𑁆𑀧𑀺 𑀲𑀧𑁆𑀧𑀺𑀫𑁂𑀯 𑀳𑁄𑀢𑀺. 𑀢𑁂𑀮𑀸𑀤𑀻𑀦𑀺 𑀢𑁂𑀮𑀸𑀤𑀻𑀦𑀺𑀬𑁂𑀯. 𑀉𑀤𑀓𑀁 𑀉𑀤𑀓𑀫𑁂𑀯. 𑀲𑁄 𑀢𑀢𑁆𑀣 𑀢𑁂𑀫𑀺𑀢𑀼𑀓𑀸𑀫𑁄𑀯 𑀢𑁂𑀫𑁂𑀢𑀺, 𑀦 𑀢𑁂𑀫𑀺𑀢𑀼𑀓𑀸𑀫𑁄 𑀦 𑀢𑁂𑀫𑁂𑀢𑀺. 𑀢𑀲𑁆𑀲𑁂𑀯 𑀘 𑀲𑀸 𑀧𑀣𑀯𑀻 𑀉𑀤𑀓𑀁 𑀳𑁄𑀢𑀺 𑀲𑁂𑀲𑀚𑀦𑀲𑁆𑀲 𑀧𑀣𑀯𑀻𑀬𑁂𑀯. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀧𑀢𑁆𑀢𑀺𑀓𑀸𑀧𑀺 𑀕𑀘𑁆𑀙𑀦𑁆𑀢𑀺, 𑀬𑀸𑀦𑀸𑀤𑀻𑀳𑀺𑀧𑀺 𑀕𑀘𑁆𑀙𑀦𑁆𑀢𑀺, 𑀓𑀲𑀺𑀓𑀫𑁆𑀫𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀺𑀬𑁂𑀯. 𑀲𑀘𑁂 𑀧𑀦𑀸𑀬𑀁 𑀢𑁂𑀲𑀫𑁆𑀧𑀺 𑀉𑀤𑀓𑀁 𑀳𑁄𑀢𑀽𑀢𑀺 ¶ 𑀇𑀘𑁆𑀙𑀢𑀺, 𑀳𑁄𑀢𑀺𑀬𑁂𑀯. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀧𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀁 𑀧𑀓𑀢𑀺𑀬𑀸 𑀖𑀝𑀢𑀴𑀸𑀓𑀸𑀤𑀻𑀲𑀼 𑀉𑀤𑀓𑀁, 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁 𑀧𑀣𑀯𑀻𑀬𑁂𑀯 𑀳𑁄𑀢𑀺.

𑁩𑁯𑁪. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀬𑀁 𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀁𑀲𑀻𑀤𑀢𑀺, 𑀢𑀁 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺. 𑀯𑀺𑀧𑀭𑀻𑀢𑀁 𑀅𑀪𑀺𑀚𑁆𑀚𑀫𑀸𑀦𑀁. 𑀏𑀯𑀁 𑀕𑀦𑁆𑀢𑀼𑀓𑀸𑀫𑁂𑀦 𑀧𑀦 𑀧𑀣𑀯𑀻𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀏𑀢𑁆𑀢𑀓𑁂 𑀞𑀸𑀦𑁂 𑀉𑀤𑀓𑀁 𑀧𑀣𑀯𑀻 𑀳𑁄𑀢𑀽𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦 𑀬𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂 𑀉𑀤𑀓𑀁 𑀧𑀣𑀯𑀻𑀬𑁂𑀯 𑀳𑁄𑀢𑀺. 𑀲𑁄 𑀢𑀢𑁆𑀣 𑀕𑀘𑁆𑀙𑀢𑀺, 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀓𑀢𑀺𑀬𑀸 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀉𑀤𑀓𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘𑀧𑀣𑀯𑀻 𑀳𑁄𑀢𑀽’𑀢𑀺. 𑀧𑀣𑀯𑀻 𑀳𑁄𑀢𑀺. 𑀲𑁄 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀕𑀘𑁆𑀙𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀅𑀪𑀺𑀚𑁆𑀚𑀫𑀸𑀦𑀸𑀬 𑀧𑀣𑀯𑀺𑀬𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁧𑁧).

𑀦 𑀓𑁂𑀯𑀮𑀜𑁆𑀘 𑀕𑀘𑁆𑀙𑀢𑀺, 𑀬𑀁 𑀬𑀁 𑀇𑀭𑀺𑀬𑀸𑀧𑀣𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀓𑀭𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀧𑀣𑀯𑀺𑀫𑁂𑀯 𑀓𑀭𑁄𑀢𑀺, 𑀫𑀡𑀺𑀲𑀼𑀯𑀡𑁆𑀡𑀧𑀩𑁆𑀩𑀢𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀯𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀺, 𑀬𑀣𑀸𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀲𑁂𑀯 𑀘 𑀢𑀁 𑀉𑀤𑀓𑀁 𑀧𑀣𑀯𑀻 𑀳𑁄𑀢𑀺, 𑀲𑁂𑀲𑀚𑀦𑀲𑁆𑀲 𑀉𑀤𑀓𑀫𑁂𑀯, 𑀫𑀘𑁆𑀙𑀓𑀘𑁆𑀙𑀧𑀸 𑀘 𑀉𑀤𑀓𑀓𑀸𑀓𑀸𑀤𑀬𑁄 𑀘 𑀬𑀣𑀸𑀭𑀼𑀘𑀺 𑀯𑀺𑀘𑀭𑀦𑁆𑀢𑀺. 𑀲𑀘𑁂 𑀧𑀦𑀸𑀬𑀁 𑀅𑀜𑁆𑀜𑁂𑀲𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀢𑀁 𑀧𑀣𑀯𑀺𑀁 𑀓𑀸𑀢𑀼𑀁 𑀇𑀘𑁆𑀙𑀢𑀺, 𑀓𑀭𑁄𑀢𑀺𑀬𑁂𑀯. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀧𑀦 𑀉𑀤𑀓𑀫𑁂𑀯 𑀳𑁄𑀢𑀺.

𑁩𑁯𑁫. 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀻𑀢𑀺 𑀧𑀮𑁆𑀮𑀗𑁆𑀓𑁂𑀦 𑀕𑀘𑁆𑀙𑀢𑀺. 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺 𑀧𑀓𑁆𑀔𑁂𑀳𑀺 𑀬𑀼𑀢𑁆𑀢𑀲𑀓𑀼𑀡𑁄. 𑀏𑀯𑀁 𑀓𑀸𑀢𑀼𑀓𑀸𑀫𑁂𑀦 𑀧𑀦 𑀧𑀣𑀯𑀻𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀘𑁂 𑀦𑀺𑀲𑀺𑀦𑁆𑀦𑁄 𑀕𑀦𑁆𑀢𑀼𑀫𑀺𑀘𑁆𑀙𑀢𑀺, 𑀧𑀮𑁆𑀮𑀗𑁆𑀓𑀧𑁆𑀧𑀫𑀸𑀡𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀘𑁂 𑀦𑀺𑀧𑀦𑁆𑀦𑁄 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺 𑀫𑀜𑁆𑀘𑀧𑁆𑀧𑀫𑀸𑀡𑀁, 𑀲𑀘𑁂 𑀧𑀤𑀲𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺 𑀫𑀕𑁆𑀕𑀧𑁆𑀧𑀫𑀸𑀡𑀦𑁆𑀢𑀺 𑀏𑀯𑀁 𑀬𑀣𑀸𑀦𑀼𑀭𑀽𑀧𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀣𑀯𑀻 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦 𑀧𑀣𑀯𑀻𑀬𑁂𑀯 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀆𑀓𑀸𑀲𑁂𑀧𑀺 ¶ 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺. 𑀧𑀓𑀢𑀺𑀬𑀸 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺, 𑀆𑀓𑀸𑀲𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘𑀧𑀣𑀯𑀻 𑀳𑁄𑀢𑀽’𑀢𑀺. 𑀧𑀣𑀯𑀻 𑀳𑁄𑀢𑀺. 𑀲𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 ¶ 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀧𑀣𑀯𑀺𑀬𑀁 𑀘𑀗𑁆𑀓𑀫𑀦𑁆𑀢𑀺𑀧𑀺…𑀧𑁂… 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺…𑀧𑁂… 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁧).

𑀆𑀓𑀸𑀲𑁂 𑀕𑀦𑁆𑀢𑀼𑀓𑀸𑀫𑁂𑀦 𑀘 𑀪𑀺𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑀸𑀧𑀺 𑀪𑀯𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀦𑁆𑀢𑀭𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀯𑀸 𑀧𑀩𑁆𑀩𑀢𑀭𑀼𑀓𑁆𑀔𑀸𑀤𑀬𑁄 𑀳𑁄𑀦𑁆𑀢𑀺, 𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀯𑀸 𑀉𑀲𑀽𑀬𑀦𑁆𑀢𑀸 𑀫𑀸𑀧𑁂𑀦𑁆𑀢𑀺, 𑀦𑁂𑀲𑀁 𑀤𑀲𑁆𑀲𑀦𑀢𑁆𑀣𑀁. 𑀢𑁂 𑀧𑀦 𑀤𑀺𑀲𑁆𑀯𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀆𑀓𑀸𑀲𑁄 𑀳𑁄𑀢𑀽𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀣𑁂𑀭𑁄 𑀧𑀦𑀸𑀳 ‘‘𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀆𑀯𑀼𑀲𑁄, 𑀓𑀺𑀫𑀢𑁆𑀣𑀺𑀬𑀁, 𑀦𑀦𑀼 𑀲𑀫𑀸𑀳𑀺𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁, 𑀢𑁂𑀦 𑀬𑀁 𑀬𑀁 𑀞𑀸𑀦𑀁 𑀆𑀓𑀸𑀲𑁄 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀺, 𑀆𑀓𑀸𑀲𑁄𑀬𑁂𑀯 𑀳𑁄𑀢𑀻’’𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀫𑀸𑀳, 𑀅𑀣 𑀔𑁄 𑀢𑀺𑀭𑁄𑀓𑀼𑀝𑁆𑀝𑀧𑀸𑀭𑀺𑀳𑀸𑀭𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀅𑀧𑀺𑀘 𑀑𑀓𑀸𑀲𑁂 𑀑𑀭𑁄𑀳𑀡𑀢𑁆𑀣𑀫𑁆𑀧𑀺 𑀇𑀫𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀅𑀬𑀜𑁆𑀳𑀺 𑀲𑀘𑁂 𑀅𑀦𑁄𑀓𑀸𑀲𑁂 𑀦𑁆𑀳𑀸𑀦𑀢𑀺𑀢𑁆𑀣𑁂 𑀯𑀸 𑀕𑀸𑀫𑀤𑁆𑀯𑀸𑀭𑁂 𑀯𑀸 𑀑𑀭𑁄𑀳𑀢𑀺. 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀢𑀲𑁆𑀫𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸 𑀅𑀦𑁄𑀓𑀸𑀲𑀁 𑀯𑀚𑁆𑀚𑁂𑀢𑁆𑀯𑀸 𑀑𑀓𑀸𑀲𑁂 𑀑𑀢𑀭𑀢𑀻𑀢𑀺.

𑁩𑁯𑁬. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀻𑀢𑀺 𑀏𑀢𑁆𑀣 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀲𑁆𑀲 𑀉𑀧𑀭𑀺 𑀘𑀭𑀡𑁂𑀦 𑀫𑀳𑀺𑀤𑁆𑀥𑀺𑀓𑀢𑀸, 𑀢𑀻𑀲𑀼 𑀤𑀻𑀧𑁂𑀲𑀼 𑀏𑀓𑀓𑁆𑀔𑀡𑁂 𑀆𑀮𑁄𑀓𑀓𑀭𑀡𑁂𑀦 𑀫𑀳𑀸𑀦𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀉𑀧𑀭𑀺 𑀘𑀭𑀡𑀆𑀮𑁄𑀓𑀓𑀭𑀡𑁂𑀳𑀺 𑀯𑀸 𑀫𑀳𑀺𑀤𑁆𑀥𑀺𑀓𑁂 𑀢𑁂𑀦𑁂𑀯 𑀫𑀳𑀸𑀦𑀼𑀪𑀸𑀯𑁂. 𑀧𑀭𑀸𑀫𑀲𑀢𑀻𑀢𑀺 𑀧𑀭𑀺𑀕𑁆𑀕𑀡𑁆𑀳𑀢𑀺 𑀏𑀓𑀤𑁂𑀲𑁂 𑀯𑀸 𑀙𑀼𑀧𑀢𑀺. 𑀧𑀭𑀺𑀫𑀚𑁆𑀚𑀢𑀻𑀢𑀺 𑀲𑀫𑀦𑁆𑀢𑀢𑁄 𑀆𑀤𑀸𑀲𑀢𑀮𑀁 𑀯𑀺𑀬 𑀧𑀭𑀺𑀫𑀚𑁆𑀚𑀢𑀺. 𑀅𑀬𑀁 𑀧𑀦𑀲𑁆𑀲 𑀇𑀤𑁆𑀥𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦𑁂𑀯 𑀇𑀚𑁆𑀛𑀢𑀺, 𑀦𑀢𑁆𑀣𑁂𑀢𑁆𑀣 𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀦𑀺𑀬𑀫𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀇𑀫𑁂𑀧𑀺 ¶ 𑀘𑀦𑁆𑀤𑀺𑀫𑀲𑀽𑀭𑀺𑀬𑁂…𑀧𑁂… 𑀧𑀭𑀺𑀫𑀚𑁆𑀚𑀢𑀻𑀢𑀺 𑀇𑀥 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀆𑀯𑀚𑁆𑀚𑀢𑀺, 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘𑀳𑀢𑁆𑀣𑀧𑀸𑀲𑁂 𑀳𑁄𑀢𑀽’𑀢𑀺. 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺. 𑀲𑁄 𑀦𑀺𑀲𑀺𑀦𑁆𑀦𑀓𑁄 𑀯𑀸 𑀦𑀺𑀧𑀦𑁆𑀦𑀓𑁄 𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀡𑀺𑀦𑀸 𑀆𑀫𑀲𑀢𑀺 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀓𑀺𑀜𑁆𑀘𑀺𑀤𑁂𑀯 𑀭𑀽𑀧𑀕𑀢𑀁 𑀳𑀢𑁆𑀣𑀧𑀸𑀲𑁂 ¶ 𑀆𑀫𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑀺, 𑀏𑀯𑀫𑁂𑀯 𑀲𑁄 𑀇𑀤𑁆𑀥𑀺𑀫𑀸…𑀧𑁂… 𑀧𑀭𑀺𑀫𑀚𑁆𑀚𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁨).

𑀲𑁆𑀯𑀸𑀬𑀁 𑀬𑀤𑀺 𑀇𑀘𑁆𑀙𑀢𑀺 𑀕𑀦𑁆𑀢𑁆𑀯𑀸 𑀧𑀭𑀸𑀫𑀲𑀺𑀢𑀼𑀁, 𑀕𑀦𑁆𑀢𑁆𑀯𑀸 𑀧𑀭𑀸𑀫𑀲𑀢𑀺, 𑀬𑀤𑀺 𑀧𑀦 𑀇𑀥𑁂𑀯 𑀦𑀺𑀲𑀺𑀦𑁆𑀦𑀓𑁄 𑀯𑀸 𑀦𑀺𑀧𑀦𑁆𑀦𑀓𑁄 𑀯𑀸 𑀧𑀭𑀸𑀫𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀳𑀢𑁆𑀣𑀧𑀸𑀲𑁂 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀺, 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀯𑀡𑁆𑀝𑀸 𑀫𑀼𑀢𑁆𑀢𑀢𑀸𑀮𑀨𑀮𑀁 𑀯𑀺𑀬 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂 𑀯𑀸 𑀧𑀭𑀸𑀫𑀲𑀢𑀺, 𑀳𑀢𑁆𑀣𑀁 𑀯𑀸 𑀯𑀟𑁆𑀠𑁂𑀢𑁆𑀯𑀸. 𑀯𑀟𑁆𑀠𑁂𑀦𑁆𑀢𑀲𑁆𑀲 𑀧𑀦 𑀓𑀺𑀁 𑀉𑀧𑀸𑀤𑀺𑀡𑁆𑀡𑀓𑀁 𑀯𑀟𑁆𑀠𑀢𑀺, 𑀅𑀦𑀼𑀧𑀸𑀤𑀺𑀡𑁆𑀡𑀓𑀦𑁆𑀢𑀺? 𑀉𑀧𑀸𑀤𑀺𑀡𑁆𑀡𑀓𑀁 𑀦𑀺𑀲𑁆𑀲𑀸𑀬 𑀅𑀦𑀼𑀧𑀸𑀤𑀺𑀡𑁆𑀡𑀓𑀁 𑀯𑀟𑁆𑀠𑀢𑀺.

𑀢𑀢𑁆𑀣 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀆𑀳 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀉𑀧𑀸𑀤𑀺𑀡𑁆𑀡𑀓𑀁 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀦 𑀳𑁄𑀢𑀺, 𑀦𑀦𑀼 𑀬𑀤𑀸 𑀪𑀺𑀓𑁆𑀔𑀼 𑀢𑀸𑀮𑀘𑁆𑀙𑀺𑀤𑁆𑀤𑀸𑀤𑀻𑀳𑀺 𑀦𑀺𑀓𑁆𑀔𑀫𑀢𑀺, 𑀢𑀤𑀸 𑀉𑀧𑀸𑀤𑀺𑀡𑁆𑀡𑀓𑀁 𑀔𑀼𑀤𑁆𑀤𑀓𑀁 𑀳𑁄𑀢𑀺. 𑀬𑀤𑀸 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀓𑀭𑁄𑀢𑀺, 𑀢𑀤𑀸 𑀫𑀳𑀦𑁆𑀢𑀁 𑀳𑁄𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀺𑀬𑀸’’𑀢𑀺.

𑀦𑀦𑁆𑀤𑁄𑀧𑀦𑀦𑁆𑀤𑀦𑀸𑀕𑀤𑀫𑀦𑀓𑀣𑀸

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀺. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀁𑀤𑀺𑀯𑀲𑀸𑀯𑀲𑁂𑀲𑀁 𑀭𑀢𑁆𑀢𑀺𑀪𑀸𑀕𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀦𑀦𑁆𑀤𑁄𑀧𑀦𑀦𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀺. 𑀪𑀕𑀯𑀸 ‘‘𑀅𑀬𑀁 𑀦𑀸𑀕𑀭𑀸𑀚𑀸 𑀫𑀬𑁆𑀳𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀺, 𑀅𑀢𑁆𑀣𑀺 𑀦𑀼 𑀔𑁄 𑀅𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀧𑁆𑀧𑀲𑀦𑁆𑀦𑁄𑀢𑀺 𑀤𑀺𑀲𑁆𑀯𑀸 𑀓𑁄 𑀦𑀼 𑀔𑁄 𑀇𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀯𑀺𑀯𑁂𑀘𑁂𑀬𑁆𑀬𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀅𑀤𑁆𑀤𑀲.

𑀢𑀢𑁄 ¶ 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀆𑀭𑁄𑀘𑁂𑀳𑀺 𑀢𑀣𑀸𑀕𑀢𑁄 𑀤𑁂𑀯𑀘𑀸𑀭𑀺𑀓𑀁 𑀕𑀘𑁆𑀙𑀢𑀻’’𑀢𑀺. 𑀢𑀁 𑀤𑀺𑀯𑀲𑀜𑁆𑀘 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀆𑀧𑀸𑀦𑀪𑀽𑀫𑀺𑀁 𑀲𑀚𑁆𑀚𑀬𑀺𑀁𑀲𑀼. 𑀲𑁄 𑀤𑀺𑀩𑁆𑀩𑀭𑀢𑀦𑀧𑀮𑁆𑀮𑀗𑁆𑀓𑁂 𑀤𑀺𑀩𑁆𑀩𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦 𑀢𑀺𑀯𑀺𑀥𑀦𑀸𑀝𑀓𑁂𑀳𑀺 𑀘𑁂𑀯 𑀦𑀸𑀕𑀧𑀭𑀺𑀲𑀸𑀬 𑀘 𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑀪𑀸𑀚𑀦𑁂𑀲𑀼 𑀉𑀧𑀝𑁆𑀞𑀸𑀧𑀺𑀢𑀁 𑀅𑀦𑁆𑀦𑀧𑀸𑀦𑀯𑀺𑀥𑀺𑀁 𑀑𑀮𑁄𑀓𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀪𑀕𑀯𑀸 𑀬𑀣𑀸 𑀦𑀸𑀕𑀭𑀸𑀚𑀸 𑀧𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 𑀢𑀲𑁆𑀲 𑀯𑀺𑀢𑀸𑀦𑀫𑀢𑁆𑀣𑀓𑁂𑀦𑁂𑀯 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀇𑀫𑁂 𑀳𑀺 𑀦𑀸𑀫 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀅𑀫𑁆𑀳𑀸𑀓𑀁 𑀉𑀧𑀭𑀽𑀧𑀭𑀺𑀪𑀯𑀦𑁂𑀦 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀯𑀦𑀁 𑀧𑀯𑀺𑀲𑀦𑁆𑀢𑀺𑀧𑀺 𑀦𑀺𑀓𑁆𑀔𑀫𑀦𑁆𑀢𑀺𑀧𑀺, 𑀦 𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀇𑀫𑁂𑀲𑀁 𑀅𑀫𑁆𑀳𑀸𑀓𑀁 𑀫𑀢𑁆𑀣𑀓𑁂 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀦𑁆𑀢𑀸𑀦𑀁 𑀕𑀦𑁆𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀲𑀺𑀦𑁂𑀭𑀼𑀧𑀸𑀤𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀺𑀦𑁂𑀭𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀯𑀓𑀼𑀚𑁆𑀚𑁂𑀦 𑀨𑀡𑁂𑀦 𑀕𑀳𑁂𑀢𑁆𑀯𑀸 𑀅𑀤𑀲𑁆𑀲𑀦𑀁 𑀕𑀫𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀼𑀩𑁆𑀩𑁂, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑁄 𑀲𑀺𑀦𑁂𑀭𑀼𑀁 𑀧𑀲𑁆𑀲𑀸𑀫𑀺, 𑀲𑀺𑀦𑁂𑀭𑀼𑀧𑀭𑀺𑀪𑀡𑁆𑀟𑀁 𑀧𑀲𑁆𑀲𑀸𑀫𑀺, 𑀢𑀸𑀯𑀢𑀺𑀁𑀲𑀁 𑀧𑀲𑁆𑀲𑀸𑀫𑀺, 𑀯𑁂𑀚𑀬𑀦𑁆𑀢𑀁 𑀧𑀲𑁆𑀲𑀸𑀫𑀺, 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀥𑀚𑀁 𑀧𑀲𑁆𑀲𑀸𑀫𑀺. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑀁 𑀏𑀢𑀭𑀳𑀺 𑀦𑁂𑀯 𑀲𑀺𑀦𑁂𑀭𑀼𑀁 𑀧𑀲𑁆𑀲𑀸𑀫𑀺…𑀧𑁂… 𑀦 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀥𑀚𑀁 𑀧𑀲𑁆𑀲𑀸𑀫𑀻’’𑀢𑀺. ‘‘𑀅𑀬𑀁, 𑀭𑀝𑁆𑀞𑀧𑀸𑀮, 𑀦𑀦𑁆𑀤𑁄𑀧𑀦𑀦𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀢𑀼𑀫𑁆𑀳𑀸𑀓𑀁 𑀓𑀼𑀧𑀺𑀢𑁄 𑀲𑀺𑀦𑁂𑀭𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀞𑀺𑀢𑁄’’𑀢𑀺. ‘‘𑀤𑀫𑁂𑀫𑀺 𑀦𑀁, 𑀪𑀦𑁆𑀢𑁂’’𑀢𑀺. 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀉𑀝𑁆𑀞𑀳𑀺𑀁𑀲𑀼. 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀺.

𑀅𑀯𑀲𑀸𑀦𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 ‘‘𑀅𑀳𑀁, 𑀪𑀦𑁆𑀢𑁂, 𑀤𑀫𑁂𑀫𑀺 𑀦’’𑀦𑁆𑀢𑀺 𑀆𑀳. ‘‘𑀤𑀫𑁂𑀳𑀺 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺 𑀪𑀕𑀯𑀸 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀦𑀸𑀕𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀦𑁆𑀤𑁄𑀧𑀦𑀦𑁆𑀤𑀁 𑀘𑀼𑀤𑁆𑀤𑀲𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀨𑀡𑀫𑀢𑁆𑀣𑀓𑁂 𑀅𑀢𑁆𑀢𑀦𑁄 𑀨𑀡𑀁 𑀞𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀦𑀸 ¶ 𑀲𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀲𑀺. 𑀦𑀸𑀕𑀭𑀸𑀚𑀸 𑀧𑀥𑀽𑀫𑀸𑀬𑀺. 𑀣𑁂𑀭𑁄𑀧𑀺 𑀦 𑀢𑀼𑀬𑁆𑀳𑀁𑀬𑁂𑀯 𑀲𑀭𑀻𑀭𑁂 𑀥𑀽𑀫𑁄 𑀅𑀢𑁆𑀣𑀺, 𑀫𑀬𑁆𑀳𑀫𑁆𑀧𑀺 𑀅𑀢𑁆𑀣𑀻𑀢𑀺 𑀧𑀥𑀽𑀫𑀸𑀬𑀺. 𑀦𑀸𑀕𑀭𑀸𑀚𑀲𑁆𑀲 𑀥𑀽𑀫𑁄 𑀣𑁂𑀭𑀁 𑀦 𑀩𑀸𑀥𑀢𑀺. 𑀣𑁂𑀭𑀲𑁆𑀲 𑀧𑀦 𑀥𑀽𑀫𑁄 𑀦𑀸𑀕𑀭𑀸𑀚𑀸𑀦𑀁 𑀩𑀸𑀥𑀢𑀺. 𑀢𑀢𑁄 𑀦𑀸𑀕𑀭𑀸𑀚𑀸 𑀧𑀚𑁆𑀚𑀮𑀺. 𑀣𑁂𑀭𑁄𑀧𑀺 𑀦 𑀢𑀼𑀬𑁆𑀳𑀁𑀬𑁂𑀯 𑀲𑀭𑀻𑀭𑁂 𑀅𑀕𑁆𑀕𑀺 𑀅𑀢𑁆𑀣𑀺, 𑀫𑀬𑁆𑀳𑀫𑁆𑀧𑀺 𑀅𑀢𑁆𑀣𑀻𑀢𑀺 𑀧𑀚𑁆𑀚𑀮𑀺. 𑀦𑀸𑀕𑀭𑀸𑀚𑀲𑁆𑀲 𑀢𑁂𑀚𑁄 𑀣𑁂𑀭𑀁 𑀦 𑀩𑀸𑀥𑀢𑀺. 𑀣𑁂𑀭𑀲𑁆𑀲 𑀧𑀦 𑀢𑁂𑀚𑁄 𑀦𑀸𑀕𑀭𑀸𑀚𑀸𑀦𑀁 𑀩𑀸𑀥𑀢𑀺. 𑀦𑀸𑀕𑀭𑀸𑀚𑀸 𑀅𑀬𑀁 𑀫𑀁 𑀲𑀺𑀦𑁂𑀭𑀼𑀦𑀸 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀥𑀽𑀫𑀸𑀬𑀢𑀺 𑀘𑁂𑀯 𑀧𑀚𑁆𑀚𑀮𑀢𑀺 𑀘𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑁄 𑀢𑁆𑀯𑀁 𑀓𑁄𑀲𑀻’’𑀢𑀺 𑀧𑀝𑀺𑀧𑀼𑀘𑁆𑀙𑀺. ‘‘𑀅𑀳𑀁 𑀔𑁄, 𑀦𑀦𑁆𑀤, 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. ‘‘𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀪𑀺𑀓𑁆𑀔𑀼𑀪𑀸𑀯𑁂𑀦 𑀢𑀺𑀝𑁆𑀞𑀸𑀳𑀻’’𑀢𑀺.

𑀣𑁂𑀭𑁄 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀢𑀲𑁆𑀲 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑀓𑀡𑁆𑀡𑀲𑁄𑀢𑁂𑀦 𑀦𑀺𑀓𑁆𑀔𑀫𑀺 ¶ , 𑀯𑀸𑀫𑀓𑀡𑁆𑀡𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑁂𑀦 𑀦𑀺𑀓𑁆𑀔𑀫𑀺, 𑀢𑀣𑀸 𑀤𑀓𑁆𑀔𑀺𑀡𑀦𑀸𑀲𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑀦𑀸𑀲𑀲𑁄𑀢𑁂𑀦 𑀦𑀺𑀓𑁆𑀔𑀫𑀺, 𑀯𑀸𑀫𑀦𑀸𑀲𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀦𑀸𑀲𑀲𑁄𑀢𑁂𑀦 𑀦𑀺𑀓𑁆𑀔𑀫𑀺. 𑀢𑀢𑁄 𑀦𑀸𑀕𑀭𑀸𑀚𑀸 𑀫𑀼𑀔𑀁 𑀯𑀺𑀯𑀭𑀺. 𑀣𑁂𑀭𑁄 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀧𑀸𑀘𑀻𑀦𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘 𑀘𑀗𑁆𑀓𑀫𑀢𑀺. 𑀪𑀕𑀯𑀸 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀫𑀦𑀲𑀺𑀓𑀭𑁄𑀳𑀺 𑀫𑀳𑀺𑀤𑁆𑀥𑀺𑀓𑁄 𑀏𑀲 𑀦𑀸𑀕𑁄’’𑀢𑀺 𑀆𑀳. 𑀣𑁂𑀭𑁄 ‘‘𑀫𑀬𑁆𑀳𑀁 𑀔𑁄, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀦𑀦𑁆𑀤𑁄𑀧𑀦𑀦𑁆𑀤𑁄, 𑀅𑀳𑀁 𑀦𑀦𑁆𑀤𑁄𑀧𑀦𑀦𑁆𑀤𑀲𑀤𑀺𑀲𑀸𑀦𑀁 𑀦𑀸𑀕𑀭𑀸𑀚𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀢𑀲𑀳𑀲𑁆𑀲𑀫𑁆𑀧𑀺 𑀤𑀫𑁂𑀬𑁆𑀬’’𑀦𑁆𑀢𑀺 𑀆𑀳.

𑀦𑀸𑀕𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀧𑀯𑀺𑀲𑀦𑁆𑀢𑁄 𑀢𑀸𑀯 𑀫𑁂 𑀦 𑀤𑀺𑀝𑁆𑀞𑁄, 𑀦𑀺𑀓𑁆𑀔𑀫𑀦𑀓𑀸𑀮𑁂 𑀤𑀸𑀦𑀺 𑀦𑀁 𑀤𑀸𑀞𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀫 𑀪𑀦𑁆𑀢𑁂, 𑀫𑀸 𑀫𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀦𑁆𑀢𑁄 𑀩𑀸𑀥𑀬𑀺𑀢𑁆𑀣𑀸𑀢𑀺 𑀆𑀳. 𑀣𑁂𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀦𑀸𑀕𑀭𑀸𑀚𑀸 𑀅𑀬𑀁 𑀲𑁄𑀢𑀺 𑀤𑀺𑀲𑁆𑀯𑀸 𑀦𑀸𑀲𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑀺. 𑀣𑁂𑀭𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀮𑁄𑀫𑀓𑀽𑀧𑀫𑁆𑀧𑀺𑀲𑁆𑀲 𑀯𑀸𑀢𑁄 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀓𑀺𑀭 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀇𑀫𑀁 𑀧𑀦 𑀞𑀸𑀦𑀁 𑀧𑀢𑁆𑀯𑀸 𑀏𑀯𑀁 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀦𑁄 𑀳𑀼𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀁 𑀪𑀕𑀯𑀸 𑀦𑀸𑀕𑀭𑀸𑀚𑀤𑀫𑀦𑀁 𑀦𑀸𑀦𑀼𑀚𑀸𑀦𑀺.

𑀦𑀸𑀕𑀭𑀸𑀚𑀸 ¶ ‘‘𑀅𑀳𑀁 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀦𑀸𑀲𑀯𑀸𑀢𑁂𑀦 𑀮𑁄𑀫𑀓𑀽𑀧𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀫𑀳𑀺𑀤𑁆𑀥𑀺𑀓𑁄 𑀲𑀫𑀡𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀧𑀡𑁆𑀡𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀼𑀧𑀡𑁆𑀡𑀯𑀸𑀢𑀁 𑀤𑀲𑁆𑀲𑁂𑀦𑁆𑀢𑁄 𑀦𑀸𑀕𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀺. 𑀦𑀸𑀕𑀭𑀸𑀚𑀸 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀣𑁂𑀭𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺. 𑀣𑁂𑀭𑁄 ‘‘𑀲𑀢𑁆𑀣𑀸, 𑀦𑀦𑁆𑀤, 𑀆𑀕𑀢𑁄, 𑀏𑀳𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀕𑀭𑀸𑀚𑀸𑀦𑀁 𑀤𑀫𑀬𑀺𑀢𑁆𑀯𑀸 𑀦𑀺𑀩𑁆𑀩𑀺𑀲𑀁 𑀓𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀦𑀸𑀕𑀭𑀸𑀚𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀪𑀕𑀯𑀸 ‘‘𑀲𑀼𑀔𑀻 𑀳𑁄𑀳𑀺, 𑀦𑀸𑀕𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀓𑀺𑀁, 𑀪𑀦𑁆𑀢𑁂, 𑀅𑀢𑀺𑀤𑀺𑀯𑀸 𑀆𑀕𑀢𑀢𑁆𑀣𑀸’’𑀢𑀺 𑀆𑀳. 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀘 𑀲𑀗𑁆𑀕𑀸𑀫𑁄 𑀅𑀳𑁄𑀲𑀻𑀢𑀺. 𑀓𑀲𑁆𑀲, 𑀪𑀦𑁆𑀢𑁂, 𑀚𑀬𑁄, 𑀓𑀲𑁆𑀲 𑀧𑀭𑀸𑀚𑀬𑁄𑀢𑀺. 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀚𑀬𑁄, 𑀦𑀦𑁆𑀤𑀲𑁆𑀲 𑀧𑀭𑀸𑀚𑀬𑁄𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀢𑁆𑀢𑀸𑀳𑀁 ¶ 𑀏𑀓𑀧𑀝𑀺𑀧𑀸𑀝𑀺𑀬𑀸 𑀪𑀢𑁆𑀢𑀁, 𑀲𑀢𑁆𑀢𑀸𑀳𑀁 𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀇𑀢𑀺 𑀇𑀫𑀁 𑀇𑀫𑀲𑁆𑀫𑀺𑀁 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑁂 𑀓𑀢𑀁 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀬𑀤𑀸 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀓𑀭𑁄𑀢𑀺, 𑀢𑀤𑀸 𑀫𑀳𑀦𑁆𑀢𑀁 𑀳𑁄𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀺𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀪𑀺𑀓𑁆𑀔𑀽 𑀉𑀧𑀸𑀤𑀺𑀡𑁆𑀡𑀓𑀁 𑀦𑀺𑀲𑁆𑀲𑀸𑀬 𑀅𑀦𑀼𑀧𑀸𑀤𑀺𑀡𑁆𑀡𑀓𑀫𑁂𑀯 𑀯𑀟𑁆𑀠𑀢𑀻𑀢𑀺 𑀆𑀳𑀁𑀲𑀼. 𑀅𑀬𑀫𑁂𑀯 𑀘𑁂𑀢𑁆𑀣 𑀬𑀼𑀢𑁆𑀢𑀺.

𑀲𑁄 𑀏𑀯𑀁 𑀓𑀢𑁆𑀯𑀸 𑀦 𑀓𑁂𑀯𑀮𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀭𑀸𑀫𑀲𑀢𑀺. 𑀲𑀘𑁂 𑀇𑀘𑁆𑀙𑀢𑀺 𑀧𑀸𑀤𑀓𑀣𑀮𑀺𑀓𑀁 𑀓𑀢𑁆𑀯𑀸 𑀧𑀸𑀤𑁂 𑀞𑀧𑁂𑀢𑀺, 𑀧𑀻𑀞𑀁 𑀓𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀫𑀜𑁆𑀘𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀅𑀧𑀲𑁆𑀲𑁂𑀦𑀨𑀮𑀓𑀁 𑀓𑀢𑁆𑀯𑀸 𑀅𑀧𑀲𑁆𑀲𑀬𑀢𑀺. 𑀬𑀣𑀸 𑀘 𑀏𑀓𑁄, 𑀏𑀯𑀁 𑀅𑀧𑀭𑁄𑀧𑀺. 𑀅𑀦𑁂𑀓𑁂𑀲𑀼𑀧𑀺 𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀲𑀼 𑀏𑀯𑀁 𑀓𑀭𑁄𑀦𑁆𑀢𑁂𑀲𑀼 𑀢𑁂𑀲𑀜𑁆𑀘 𑀏𑀓𑀫𑁂𑀓𑀲𑁆𑀲 𑀢𑀣𑁂𑀯 𑀇𑀚𑁆𑀛𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀜𑁆𑀘 𑀕𑀫𑀦𑀫𑁆𑀧𑀺 𑀆𑀮𑁄𑀓𑀓𑀭𑀡𑀫𑁆𑀧𑀺 𑀢𑀣𑁂𑀯 𑀳𑁄𑀢𑀺. 𑀬𑀣𑀸 𑀳𑀺 𑀧𑀸𑀢𑀺𑀲𑀳𑀲𑁆𑀲𑁂𑀲𑀼 𑀉𑀤𑀓𑀧𑀽𑀭𑁂𑀲𑀼 𑀲𑀩𑁆𑀩𑀧𑀸𑀢𑀻𑀲𑀼 𑀘 𑀘𑀦𑁆𑀤𑀫𑀡𑁆𑀟𑀮𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀧𑀸𑀓𑀢𑀺𑀓𑀫𑁂𑀯 𑀘 𑀘𑀦𑁆𑀤𑀲𑁆𑀲 𑀕𑀫𑀦𑀁 𑀆𑀮𑁄𑀓𑀓𑀭𑀡𑀜𑁆𑀘 𑀳𑁄𑀢𑀺. 𑀢𑀣𑀽𑀧𑀫𑀫𑁂𑀢𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁩𑁯𑁭. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑀫𑁆𑀧𑀺 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁂 𑀓𑀸𑀬𑁂𑀦 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀸𑀴𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀧𑀸𑀴𑀺 𑁋

‘‘𑀬𑀸𑀯 ¶ 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀺 𑀲𑀦𑁆𑀢𑀺𑀓𑁂 𑀳𑁄𑀢𑀽𑀢𑀺, 𑀲𑀦𑁆𑀢𑀺𑀓𑁂 𑀳𑁄𑀢𑀺. 𑀲𑀦𑁆𑀢𑀺𑀓𑁂𑀧𑀺 𑀤𑀽𑀭𑁂 𑀅𑀥𑀺𑀝𑁆𑀞𑀸𑀢𑀺 𑀤𑀽𑀭𑁂 𑀳𑁄𑀢𑀽𑀢𑀺, 𑀤𑀽𑀭𑁂 𑀳𑁄𑀢𑀺. 𑀩𑀳𑀼𑀓𑀫𑁆𑀧𑀺 𑀣𑁄𑀓𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀺 𑀣𑁄𑀓𑀁 𑀳𑁄𑀢𑀽𑀢𑀺, 𑀣𑁄𑀓𑀁 𑀳𑁄𑀢𑀺. 𑀣𑁄𑀓𑀫𑁆𑀧𑀺 𑀩𑀳𑀼𑀓𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀺 𑀩𑀳𑀼𑀓𑀁 𑀳𑁄𑀢𑀽𑀢𑀺, 𑀩𑀳𑀼𑀓𑀁 𑀳𑁄𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀁 𑀧𑀲𑁆𑀲𑀢𑀺. 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀺, 𑀘𑀺𑀢𑁆𑀢𑀯𑀲𑁂𑀦 ¶ 𑀓𑀸𑀬𑀁 𑀅𑀥𑀺𑀝𑁆𑀞𑀸𑀢𑀺. 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺. 𑀲𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀼𑀭𑀢𑁄 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀜𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑀗𑁆𑀓𑀫𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀘𑀗𑁆𑀓𑀫𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀥𑀽𑀫𑀸𑀬𑀢𑀺, 𑀧𑀚𑁆𑀚𑀮𑀢𑀺, 𑀥𑀫𑁆𑀫𑀁 𑀪𑀸𑀲𑀢𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀲𑀮𑁆𑀮𑀧𑀢𑀺, 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀲𑀮𑁆𑀮𑀧𑀢𑀺, 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺. 𑀬𑀁 𑀬𑀤𑁂𑀯 𑀳𑀺 𑀲𑁄 𑀇𑀤𑁆𑀥𑀺𑀫𑀸 𑀓𑀭𑁄𑀢𑀺, 𑀢𑀁 𑀢𑀤𑁂𑀯 𑀦𑀺𑀫𑁆𑀫𑀺𑀢𑁄 𑀓𑀭𑁄𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁨).

𑀢𑀢𑁆𑀣 ¶ 𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀻𑀢𑀺 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀤𑀽𑀭𑁂 𑀤𑁂𑀯𑀮𑁄𑀓𑀁 𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸 𑀆𑀯𑀚𑁆𑀚𑀢𑀺 𑀲𑀦𑁆𑀢𑀺𑀓𑁂 𑀳𑁄𑀢𑀽𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑀲𑀦𑁆𑀢𑀺𑀓𑁂 𑀳𑁄𑀢𑀽𑀢𑀺, 𑀲𑀦𑁆𑀢𑀺𑀓𑁂 𑀳𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺.

𑀢𑀢𑁆𑀣 𑀓𑁄 𑀤𑀽𑀭𑀁 𑀕𑀳𑁂𑀢𑁆𑀯𑀸 𑀲𑀦𑁆𑀢𑀺𑀓𑀁 𑀅𑀓𑀸𑀲𑀻𑀢𑀺? 𑀪𑀕𑀯𑀸. 𑀪𑀕𑀯𑀸 𑀳𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀯𑀲𑀸𑀦𑁂 𑀤𑁂𑀯𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀬𑀼𑀕𑀦𑁆𑀥𑀭𑀜𑁆𑀘 𑀲𑀺𑀦𑁂𑀭𑀼𑀜𑁆𑀘 𑀲𑀦𑁆𑀢𑀺𑀓𑁂 𑀓𑀢𑁆𑀯𑀸 𑀧𑀣𑀯𑀻𑀢𑀮𑀢𑁄 𑀏𑀓𑀧𑀸𑀤𑀁 𑀬𑀼𑀕𑀦𑁆𑀥𑀭𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀞𑀧𑁂𑀲𑀺. 𑀅𑀜𑁆𑀜𑁄 𑀓𑁄 𑀅𑀓𑀸𑀲𑀺? 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄. 𑀣𑁂𑀭𑁄 𑀳𑀺 𑀲𑀸𑀯𑀢𑁆𑀣𑀺𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀧𑀭𑀺𑀲𑀁 𑀢𑀺𑀁𑀲𑀬𑁄𑀚𑀦𑀁 𑀲𑀗𑁆𑀓𑀲𑁆𑀲𑀦𑀕𑀭𑀫𑀕𑁆𑀕𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀲𑀫𑁆𑀧𑀸𑀧𑁂𑀲𑀺.

𑀅𑀧𑀺𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀘𑀽𑀴𑀲𑀫𑀼𑀤𑁆𑀤𑀢𑁆𑀣𑁂𑀭𑁄𑀧𑀺 𑀅𑀓𑀸𑀲𑀺. 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀓𑀺𑀭 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀢𑁄𑀯 𑀲𑀢𑁆𑀢 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀕𑀫𑀁𑀲𑀼. 𑀣𑁂𑀭𑁄 ‘‘𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀼𑀳𑀺𑀁 𑀪𑀺𑀓𑁆𑀔𑀸𑀘𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀤𑀺𑀲𑁆𑀯𑀸 ‘‘𑀧𑀭𑀢𑀻𑀭𑁂 𑀧𑀸𑀝𑀮𑀺𑀧𑀼𑀢𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀏𑀣𑀸𑀯𑀼𑀲𑁄, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀧𑀣𑀯𑀺𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄. 𑀪𑀺𑀓𑁆𑀔𑀽 ‘‘𑀓𑀢𑀭𑀁, 𑀪𑀦𑁆𑀢𑁂, 𑀇𑀫𑀁 𑀦𑀕𑀭’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀧𑀸𑀝𑀮𑀺𑀧𑀼𑀢𑁆𑀢𑀁, 𑀆𑀯𑀼𑀲𑁄𑀢𑀺. 𑀧𑀸𑀝𑀮𑀺𑀧𑀼𑀢𑁆𑀢𑀁 𑀦𑀸𑀫 𑀤𑀽𑀭𑁂 𑀪𑀦𑁆𑀢𑁂𑀢𑀺. 𑀆𑀯𑀼𑀲𑁄, 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀦𑀸𑀫 𑀤𑀽𑀭𑁂𑀧𑀺 𑀕𑀳𑁂𑀢𑁆𑀯𑀸 𑀲𑀦𑁆𑀢𑀺𑀓𑁂 𑀓𑀭𑁄𑀦𑁆𑀢𑀻𑀢𑀺. 𑀫𑀳𑀸𑀲𑀫𑀼𑀤𑁆𑀤𑁄 𑀓𑀼𑀳𑀺𑀁, 𑀪𑀦𑁆𑀢𑁂𑀢𑀺? 𑀦𑀦𑀼, 𑀆𑀯𑀼𑀲𑁄, 𑀅𑀦𑁆𑀢𑀭𑀸 𑀏𑀓𑀁 𑀦𑀻𑀮𑀫𑀸𑀢𑀺𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ¶ 𑀆𑀕𑀢𑀢𑁆𑀣𑀸𑀢𑀺? 𑀆𑀫, 𑀪𑀦𑁆𑀢𑁂. 𑀫𑀳𑀸𑀲𑀫𑀼𑀤𑁆𑀤𑁄 𑀧𑀦 𑀫𑀳𑀦𑁆𑀢𑁄𑀢𑀺. 𑀆𑀯𑀼𑀲𑁄, 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀦𑀸𑀫 𑀫𑀳𑀦𑁆𑀢𑀫𑁆𑀧𑀺 𑀔𑀼𑀤𑁆𑀤𑀓𑀁 𑀓𑀭𑁄𑀦𑁆𑀢𑀻𑀢𑀺.

𑀬𑀣𑀸 𑀘𑀸𑀬𑀁, 𑀏𑀯𑀁 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄𑀧𑀺 𑀲𑀸𑀬𑀦𑁆𑀳𑀲𑀫𑀬𑁂 𑀦𑁆𑀳𑀸𑀬𑀺𑀢𑁆𑀯𑀸 𑀓𑀢𑀼𑀢𑁆𑀢𑀭𑀸𑀲𑀗𑁆𑀕𑁄 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀦𑁆𑀢𑀺𑀓𑁂 𑀅𑀓𑀸𑀲𑀺.

𑀲𑀦𑁆𑀢𑀺𑀓𑀁 𑀧𑀦 𑀕𑀳𑁂𑀢𑁆𑀯𑀸 𑀓𑁄 𑀤𑀽𑀭𑀫𑀓𑀸𑀲𑀻𑀢𑀺? 𑀪𑀕𑀯𑀸. 𑀪𑀕𑀯𑀸 𑀳𑀺 𑀅𑀢𑁆𑀢𑀦𑁄 𑀘 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 (𑀫. 𑀦𑀺. 𑁨.𑁩𑁪𑁮) 𑀘 𑀅𑀦𑁆𑀢𑀭𑀁 𑀲𑀦𑁆𑀢𑀺𑀓𑀫𑁆𑀧𑀺 𑀤𑀽𑀭𑀫𑀓𑀸𑀲𑀻𑀢𑀺.

𑀅𑀣 𑀓𑁄 𑀩𑀳𑀼𑀓𑀁 𑀣𑁄𑀓𑀁 𑀅𑀓𑀸𑀲𑀻𑀢𑀺? 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄. 𑀭𑀸𑀚𑀕𑀳𑁂 𑀓𑀺𑀭 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀬𑁄 𑀘𑀦𑁆𑀤𑀧𑀽𑀯𑁂 𑀕𑀳𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀓𑀻𑀴𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺𑀬𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀓𑀺𑀜𑁆𑀘𑀺 𑀦𑀸𑀤𑀁𑀲𑀼. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀧𑀦 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀫𑁆𑀳𑀸𑀓𑀁 𑀣𑁂𑀭𑁄 𑀏𑀢𑀺 𑀧𑀽𑀯𑀁 𑀤𑀲𑁆𑀲𑀸𑀫𑀸𑀢𑀺 𑀲𑀩𑁆𑀩𑀸 𑀧𑀽𑀯𑁂 ¶ 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀣𑁂𑀭𑁄 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀁 𑀏𑀓𑀧𑀢𑁆𑀢𑀧𑀽𑀭𑀫𑀢𑁆𑀢𑀫𑀓𑀸𑀲𑀺. 𑀪𑀕𑀯𑀸 𑀣𑁂𑀭𑀁 𑀆𑀕𑀫𑀬𑀫𑀸𑀦𑁄 𑀧𑀼𑀭𑀢𑁄 𑀦𑀺𑀲𑀻𑀤𑀺. 𑀣𑁂𑀭𑁄 𑀆𑀳𑀭𑀺𑀢𑁆𑀯𑀸 𑀪𑀕𑀯𑀢𑁄 𑀅𑀤𑀸𑀲𑀺.

𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀣𑁄𑀓𑀁 𑀩𑀳𑀼𑀓𑀫𑀓𑀸𑀲𑀺, 𑀓𑀸𑀓𑀯𑀮𑀺𑀬𑀯𑀢𑁆𑀣𑀼𑀲𑁆𑀫𑀺𑀜𑁆𑀘 𑀪𑀕𑀯𑀸. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀓𑀺𑀭 𑀲𑀢𑁆𑀢𑀸𑀳𑀁 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀤𑀮𑀺𑀤𑁆𑀤𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀓𑀸𑀓𑀯𑀮𑀺𑀬𑀲𑁆𑀲 𑀦𑀸𑀫 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀚𑀸𑀬𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀢𑀺𑀦𑁄 𑀧𑀓𑁆𑀓𑀁 𑀅𑀮𑁄𑀡𑀫𑁆𑀩𑀺𑀮𑀬𑀸𑀕𑀼𑀁 𑀧𑀢𑁆𑀢𑁂 𑀆𑀓𑀺𑀭𑀺. 𑀣𑁂𑀭𑁄 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀳𑀢𑁆𑀣𑁂 𑀞𑀧𑁂𑀲𑀺. 𑀪𑀕𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀏𑀓𑀧𑀢𑁆𑀢𑁂𑀦 𑀆𑀪𑀢𑀸 𑀲𑀩𑁆𑀩𑁂𑀲𑀁 𑀧𑀳𑁄𑀲𑀺. 𑀓𑀸𑀓𑀯𑀮𑀺𑀬𑁄𑀧𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀮𑀢𑁆𑀣𑀸𑀢𑀺.

𑀦 𑀓𑁂𑀯𑀮𑀜𑁆𑀘 𑀣𑁄𑀓𑀲𑁆𑀲 𑀩𑀳𑀼𑀓𑀭𑀡𑀁, 𑀫𑀥𑀼𑀭𑀁 𑀅𑀫𑀥𑀼𑀭𑀁, 𑀅𑀫𑀥𑀼𑀭𑀁 𑀫𑀥𑀼𑀭𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑀁 𑀬𑀁 𑀇𑀘𑁆𑀙𑀢𑀺, 𑀲𑀩𑁆𑀩𑀁 𑀇𑀤𑁆𑀥𑀺𑀫𑀢𑁄 𑀇𑀚𑁆𑀛𑀢𑀺. 𑀢𑀣𑀸 𑀳𑀺 𑀫𑀳𑀸𑀅𑀦𑀼𑀴𑀢𑁆𑀣𑁂𑀭𑁄 𑀦𑀸𑀫 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀼𑀓𑁆𑀔𑀪𑀢𑁆𑀢𑀫𑁂𑀯 𑀮𑀪𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀫𑀸𑀦𑁂 𑀤𑀺𑀲𑁆𑀯𑀸 𑀕𑀗𑁆𑀕𑀸𑀬 𑀉𑀤𑀓𑀁 𑀲𑀧𑁆𑀧𑀺𑀫𑀡𑁆𑀟𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀸𑀫𑀡𑁂𑀭𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑁂 𑀣𑀸𑀮𑀓𑁂𑀳𑀺 𑀆𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼. 𑀲𑀩𑁆𑀩𑁂 𑀫𑀥𑀼𑀭𑁂𑀦 𑀲𑀧𑁆𑀧𑀺𑀫𑀡𑁆𑀟𑁂𑀦 𑀪𑀼𑀜𑁆𑀚𑀺𑀁𑀲𑀽𑀢𑀺.

𑀤𑀺𑀩𑁆𑀩𑁂𑀦 ¶ 𑀘𑀓𑁆𑀔𑀼𑀦𑀸𑀢𑀺 𑀇𑀥𑁂𑀯 𑀞𑀺𑀢𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀁 𑀧𑀲𑁆𑀲𑀢𑀺. 𑀇𑀥𑁂𑀯 𑀘 𑀞𑀺𑀢𑁄 𑀲𑀩𑁆𑀩𑀁 𑀢𑀲𑁆𑀲 𑀪𑀸𑀲𑀢𑁄 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀻𑀢𑀺 𑀓𑀭𑀚𑀓𑀸𑀬𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺. 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀸𑀬𑁂 𑀆𑀭𑁄𑀧𑁂𑀢𑀺. 𑀓𑀸𑀬𑀸𑀦𑀼𑀕𑀢𑀺𑀓𑀁 𑀓𑀭𑁄𑀢𑀺 𑀤𑀦𑁆𑀥𑀕𑀫𑀦𑀁. 𑀓𑀸𑀬𑀕𑀫𑀦𑀁 𑀳𑀺 𑀤𑀦𑁆𑀥𑀁 𑀳𑁄𑀢𑀺. 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀢𑀻𑀢𑀺 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑁂𑀦 𑀇𑀤𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀁 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀢𑀺 𑀧𑀯𑀺𑀲𑀢𑀺 𑀨𑀲𑁆𑀲𑁂𑀢𑀺 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀲𑀼𑀔𑀲𑀜𑁆𑀜𑀸 𑀦𑀸𑀫 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸. 𑀉𑀧𑁂𑀓𑁆𑀔𑀸 𑀳𑀺 𑀲𑀦𑁆𑀢𑀁 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀸𑀬𑁂𑀯 𑀘 𑀲𑀜𑁆𑀜𑀸 𑀦𑀻𑀯𑀭𑀡𑁂𑀳𑀺 𑀘𑁂𑀯 𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀘𑁆𑀘𑀦𑀻𑀓𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀮𑀳𑀼𑀲𑀜𑁆𑀜𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀑𑀓𑁆𑀓𑀦𑁆𑀢𑀲𑁆𑀲 𑀧𑀦𑀲𑁆𑀲 𑀓𑀭𑀚𑀓𑀸𑀬𑁄𑀧𑀺 𑀢𑀽𑀮𑀧𑀺𑀘𑀼 𑀯𑀺𑀬 𑀲𑀮𑁆𑀮𑀳𑀼𑀓𑁄 𑀳𑁄𑀢𑀺. 𑀲𑁄 𑀏𑀯𑀁 𑀯𑀸𑀬𑀼𑀓𑁆𑀔𑀺𑀢𑁆𑀢𑀢𑀽𑀮𑀧𑀺𑀘𑀼𑀦𑀸 ¶ 𑀯𑀺𑀬 𑀲𑀮𑁆𑀮𑀳𑀼𑀓𑁂𑀦 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀘 𑀲𑀘𑁂 𑀇𑀘𑁆𑀙𑀢𑀺 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀆𑀓𑀸𑀲𑁂 𑀫𑀕𑁆𑀕𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀤𑀲𑀸 𑀕𑀘𑁆𑀙𑀢𑀺. 𑀲𑀘𑁂 𑀇𑀘𑁆𑀙𑀢𑀺 𑀯𑀸𑀬𑁄𑀓𑀲𑀺𑀡𑀯𑀲𑁂𑀦 𑀯𑀸𑀬𑀼𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀽𑀮𑀧𑀺𑀘𑀼 𑀯𑀺𑀬 𑀯𑀸𑀬𑀼𑀦𑀸 𑀕𑀘𑁆𑀙𑀢𑀺. 𑀅𑀧𑀺𑀘 𑀕𑀦𑁆𑀢𑀼𑀓𑀸𑀫𑀢𑀸 𑀏𑀯 𑀏𑀢𑁆𑀣 𑀧𑀫𑀸𑀡𑀁. ‘‘𑀲𑀢𑀺 𑀳𑀺 𑀕𑀦𑁆𑀢𑀼𑀓𑀸𑀫𑀢𑀸𑀬’’ 𑀏𑀯𑀁 𑀓𑀢𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑁄 𑀅𑀥𑀺𑀝𑁆𑀞𑀸𑀦𑀯𑁂𑀕𑀼𑀓𑁆𑀔𑀺𑀢𑁆𑀢𑁄𑀯 𑀲𑁄 𑀇𑀲𑁆𑀲𑀸𑀲𑀔𑀺𑀢𑁆𑀢𑀲𑀭𑁄 𑀯𑀺𑀬 𑀤𑀺𑀲𑁆𑀲𑀫𑀸𑀦𑁄 𑀕𑀘𑁆𑀙𑀢𑀺.

𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀻𑀢𑀺 𑀓𑀸𑀬𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑀺. 𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀓𑀭𑁄𑀢𑀺 𑀲𑀻𑀖𑀕𑀫𑀦𑀁. 𑀘𑀺𑀢𑁆𑀢𑀕𑀫𑀦𑀁 𑀳𑀺 𑀲𑀻𑀖𑀁 𑀳𑁄𑀢𑀺. 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀢𑀻𑀢𑀺 𑀭𑀽𑀧𑀓𑀸𑀬𑀸𑀭𑀫𑁆𑀫𑀡𑁂𑀦 𑀇𑀤𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀁 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦 𑀘𑀺𑀢𑁆𑀢𑀕𑀫𑀦𑀫𑁂𑀯 𑀳𑁄𑀢𑀺. 𑀏𑀯𑀁 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀘𑁆𑀙𑀦𑁆𑀢𑁄 𑀧𑀦𑀸𑀬𑀁 𑀓𑀺𑀁 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀕𑀘𑁆𑀙𑀢𑀺, 𑀉𑀤𑀸𑀳𑀼 𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀯𑀸𑀢𑀺 𑀯𑀼𑀢𑁆𑀢𑁂 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀕𑀘𑁆𑀙𑀢𑀻𑀢𑀺 𑀣𑁂𑀭𑁄 𑀆𑀳. 𑀓𑀺𑀁 𑀧𑀦 𑀲𑁄 𑀲𑀬𑀁 𑀕𑀘𑁆𑀙𑀢𑀺 𑀦𑀺𑀫𑁆𑀫𑀺𑀢𑀁 𑀧𑁂𑀲𑁂𑀢𑀻𑀢𑀺. 𑀬𑀣𑀸𑀭𑀼𑀘𑀺 𑀓𑀭𑁄𑀢𑀺. 𑀇𑀥 𑀧𑀦𑀲𑁆𑀲 𑀲𑀬𑀁 𑀕𑀫𑀦𑀫𑁂𑀯 𑀆𑀕𑀢𑀁.

𑀫𑀦𑁄𑀫𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀫𑀦𑁂𑀦 𑀦𑀺𑀫𑁆𑀫𑀺𑀢𑀢𑁆𑀢𑀸 𑀫𑀦𑁄𑀫𑀬𑀁. 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀤𑀁 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀲𑀡𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀫𑁆𑀫𑀺𑀢𑀭𑀽𑀧𑁂 𑀧𑀦 𑀧𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺. 𑀲𑀘𑁂 𑀇𑀤𑁆𑀥𑀺𑀫𑀸 𑀘𑀗𑁆𑀓𑀫𑀢𑀺 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀘𑀗𑁆𑀓𑀫𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀲𑀸𑀯𑀓𑀦𑀺𑀫𑁆𑀫𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀦𑀺𑀫𑁆𑀫𑀺𑀢𑁄 𑀧𑀦 𑀬𑀁 𑀬𑀁 𑀪𑀕𑀯𑀸 𑀓𑀭𑁄𑀢𑀺, 𑀢𑀁 𑀢𑀫𑁆𑀧𑀺 𑀓𑀭𑁄𑀢𑀺. 𑀪𑀕𑀯𑀢𑁄 𑀭𑀼𑀘𑀺𑀯𑀲𑁂𑀦 𑀅𑀜𑁆𑀜𑀫𑁆𑀧𑀺 𑀓𑀭𑁄𑀢𑀻𑀢𑀺. 𑀏𑀢𑁆𑀣 𑀘 𑀬𑀁 𑀲𑁄 𑀇𑀤𑁆𑀥𑀺𑀫𑀸 𑀇𑀥𑁂𑀯 𑀞𑀺𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 ¶ 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺, 𑀦 𑀏𑀢𑁆𑀢𑀸𑀯𑀢𑀸 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀬𑀫𑁆𑀧𑀺 𑀲𑁄 𑀇𑀥𑁂𑀯 𑀞𑀺𑀢𑁄 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀬𑀫𑁆𑀧𑀺𑀲𑁆𑀲 𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀻𑀢𑀺𑀆𑀤𑀺𑀓𑀁 𑀅𑀥𑀺𑀝𑁆𑀞𑀸𑀦𑀁, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀬𑀫𑁆𑀧𑀺 𑀲𑁄 𑀤𑀺𑀲𑁆𑀲𑀫𑀸𑀦𑁂𑀦 𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀯𑀸 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀬𑀜𑁆𑀘 𑀔𑁄 𑀲𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀼𑀭𑀢𑁄 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 ¶ 𑀯𑀼𑀢𑁆𑀢𑀯𑀺𑀥𑀸𑀦𑀁 𑀆𑀧𑀚𑁆𑀚𑀢𑀺, 𑀏𑀢𑁆𑀢𑀸𑀯𑀢𑀸 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺 𑀦𑀸𑀫𑀁. 𑀲𑁂𑀲𑀁 𑀧𑀦𑁂𑀢𑁆𑀣 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑀦𑀸𑀬 𑀧𑀼𑀩𑁆𑀩𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀢𑀸𑀯 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺.

𑁩𑁯𑁮. 𑀯𑀺𑀓𑀼𑀩𑁆𑀩𑀦𑀸𑀬 𑀧𑀦 𑀫𑀦𑁄𑀫𑀬𑀸𑀬 𑀘 𑀇𑀤𑀁 𑀦𑀸𑀦𑀸𑀓𑀭𑀡𑀁. 𑀯𑀺𑀓𑀼𑀩𑁆𑀩𑀦𑀁 𑀢𑀸𑀯 𑀓𑀭𑁄𑀦𑁆𑀢𑁂𑀦 ‘‘𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀦𑀸𑀕𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀅𑀲𑀼𑀭𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀇𑀦𑁆𑀤𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀤𑁂𑀯𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀩𑁆𑀭𑀳𑁆𑀫𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀫𑀼𑀤𑁆𑀤𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀧𑀩𑁆𑀩𑀢𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀻𑀳𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀩𑁆𑀬𑀕𑁆𑀖𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀤𑀻𑀧𑀺𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀅𑀲𑁆𑀲𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀭𑀣𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀓𑀼𑀫𑀸𑀭𑀓𑀯𑀡𑁆𑀡𑀸𑀤𑀻𑀲𑀼 𑀬𑀁 𑀬𑀁 𑀆𑀓𑀗𑁆𑀔𑀢𑀺, 𑀢𑀁 𑀢𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀘 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀢𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀓𑀼𑀫𑀸𑀭𑀓𑀯𑀡𑁆𑀡𑁄 𑀆𑀯𑀚𑁆𑀚𑀺𑀢𑀩𑁆𑀩𑁄. 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀸𑀯𑀲𑀸𑀦𑁂 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀏𑀯𑀭𑀽𑀧𑁄 𑀦𑀸𑀫 𑀓𑀼𑀫𑀸𑀭𑀓𑁄 𑀳𑁄𑀫𑀻𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀳 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀓𑀼𑀫𑀸𑀭𑀓𑁄 𑀳𑁄𑀢𑀺 𑀤𑁂𑀯𑀤𑀢𑁆𑀢𑁄 𑀯𑀺𑀬 (𑀘𑀽𑀴𑀯. 𑁩𑁩𑁩). 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺𑀆𑀤𑀺 𑀧𑀦𑁂𑀢𑁆𑀣 𑀩𑀳𑀺𑀤𑁆𑀥𑀸𑀧𑀺 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀢𑁆𑀣𑀻 𑀳𑁄𑀫𑀻𑀢𑀺 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀳𑀢𑁆𑀣𑀻 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀅𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀅𑀬𑀁 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺.

𑁩𑁯𑁯. 𑀫𑀦𑁄𑀫𑀬𑀁 𑀓𑀸𑀢𑀼𑀓𑀸𑀫𑁄 𑀧𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀓𑀸𑀬𑀁 𑀢𑀸𑀯 𑀆𑀯𑀚𑁆𑀚𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀲𑀺𑀭𑁄 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀺, 𑀲𑀼𑀲𑀺𑀭𑁄 𑀳𑁄𑀢𑀺. 𑀅𑀣𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀁 𑀓𑀸𑀬𑀁 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀺, 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑁄 𑀓𑀸𑀬𑁄 𑀳𑁄𑀢𑀽𑀢𑀺. 𑀲𑁄 𑀢𑀁 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀁 𑀯𑀺𑀬 𑀓𑁄𑀲𑀺𑀬𑀸 𑀅𑀲𑀺𑀁 𑀯𑀺𑀬 𑀓𑀭𑀡𑁆𑀟𑀸𑀬 𑀅𑀳𑀺𑀁 𑀯𑀺𑀬 𑀘 𑀅𑀩𑁆𑀩𑀸𑀳𑀢𑀺 ¶ . 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑁄 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀁 𑀧𑀯𑀸𑀳𑁂𑀬𑁆𑀬, 𑀢𑀲𑁆𑀲 𑀏𑀯𑀫𑀲𑁆𑀲 𑀅𑀬𑀁 𑀫𑀼𑀜𑁆𑀚𑁄 𑀅𑀬𑀁 𑀈𑀲𑀺𑀓𑀸 ¶ , 𑀅𑀜𑁆𑀜𑁄 𑀫𑀼𑀜𑁆𑀚𑁄 𑀅𑀜𑁆𑀜𑀸 𑀈𑀲𑀺𑀓𑀸, 𑀫𑀼𑀜𑁆𑀚𑀫𑁆𑀳𑀸𑀢𑁆𑀯𑁂𑀯 𑀈𑀲𑀺𑀓𑀸 𑀧𑀯𑀸𑀴𑁆𑀳𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁩.𑁧𑁪). 𑀏𑀢𑁆𑀣 𑀘 𑀬𑀣𑀸 𑀈𑀲𑀺𑀓𑀸𑀤𑀬𑁄 𑀫𑀼𑀜𑁆𑀚𑀸𑀤𑀻𑀳𑀺 𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀯𑀁 𑀫𑀦𑁄𑀫𑀬𑀭𑀽𑀧𑀁 𑀇𑀤𑁆𑀥𑀺𑀫𑀢𑀸𑀲𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀢𑀸 𑀉𑀧𑀫𑀸 𑀯𑀼𑀢𑁆𑀢𑀸𑀢𑀺. 𑀅𑀬𑀁 𑀫𑀦𑁄𑀫𑀬𑀸 𑀇𑀤𑁆𑀥𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀇𑀤𑁆𑀥𑀺𑀯𑀺𑀥𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁩. 𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄

𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀓𑀣𑀸

𑁪𑁦𑁦. 𑀇𑀤𑀸𑀦𑀺 ¶ ¶ 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀦𑀺𑀤𑁆𑀤𑁂𑀲𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀢𑀢𑁄 𑀧𑀭𑀸𑀲𑀼 𑀘 𑀢𑀻𑀲𑀼 𑀅𑀪𑀺𑀜𑁆𑀜𑀸𑀲𑀼 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺𑀆𑀤𑀻𑀦𑀁 (𑀤𑀻. 𑀦𑀺. 𑁧.𑁨𑁪𑁦 𑀆𑀤𑀬𑁄) 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀧𑀦 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀢𑁆𑀭 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸𑀢𑀺 𑀏𑀢𑁆𑀣 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀤𑁂𑀯𑀸𑀦𑀁 𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀸 𑀤𑀺𑀩𑁆𑀩𑀧𑀲𑀸𑀤𑀲𑁄𑀢𑀥𑀸𑀢𑀼 𑀳𑁄𑀢𑀺. 𑀅𑀬𑀜𑁆𑀘𑀸𑀧𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀸 𑀜𑀸𑀡𑀲𑁄𑀢𑀥𑀸𑀢𑀼 𑀢𑀸𑀤𑀺𑀲𑀸𑀬𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀅𑀧𑀺𑀘 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀸. 𑀲𑀯𑀦𑀝𑁆𑀞𑁂𑀦 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀘 𑀲𑁄𑀢𑀥𑀸𑀢𑀼. 𑀲𑁄𑀢𑀥𑀸𑀢𑀼𑀓𑀺𑀘𑁆𑀘𑀓𑀭𑀡𑁂𑀦 𑀘 𑀲𑁄𑀢𑀥𑀸𑀢𑀼 𑀯𑀺𑀬𑀸𑀢𑀺𑀧𑀺 𑀲𑁄𑀢𑀥𑀸𑀢𑀼. 𑀢𑀸𑀬 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸.

𑀯𑀺𑀲𑀼𑀤𑁆𑀥𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀬 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸𑀬. 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬𑀸𑀢𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀤𑀲𑀯𑀦𑁂𑀦 𑀫𑀸𑀦𑀼𑀲𑀺𑀓𑀁 𑀫𑀁𑀲𑀲𑁄𑀢𑀥𑀸𑀢𑀼𑀁 𑀅𑀢𑀺𑀓𑁆𑀓𑀦𑁆𑀢𑀸𑀬 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀸𑀬. 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀻𑀢𑀺 𑀤𑁆𑀯𑁂 𑀲𑀤𑁆𑀤𑁂 𑀲𑀼𑀡𑀸𑀢𑀺. 𑀓𑀢𑀫𑁂 𑀤𑁆𑀯𑁂? 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘, 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀲𑀤𑁆𑀤𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀧𑀤𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸𑀢𑀺 𑀬𑁂 𑀲𑀤𑁆𑀤𑀸 𑀤𑀽𑀭𑁂 𑀧𑀭𑀘𑀓𑁆𑀓𑀯𑀸𑀴𑁂𑀧𑀺 𑀬𑁂 𑀘 𑀲𑀦𑁆𑀢𑀺𑀓𑁂 𑀅𑀦𑁆𑀢𑀫𑀲𑁄 𑀲𑀤𑁂𑀳𑀲𑀦𑁆𑀦𑀺𑀲𑁆𑀲𑀺𑀢𑀧𑀸𑀡𑀓𑀲𑀤𑁆𑀤𑀸𑀧𑀺, 𑀢𑁂 𑀲𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀦𑀺𑀧𑁆𑀧𑀤𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀧𑀦𑀸𑀬𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺? 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀘𑀺𑀢𑁆𑀢𑁂𑀦 𑀧𑀞𑀫𑀢𑀭𑀁 𑀧𑀓𑀢𑀺𑀲𑁄𑀢𑀧𑀣𑁂 𑀤𑀽𑀭𑁂 𑀑𑀴𑀸𑀭𑀺𑀓𑁄 𑀅𑀭𑀜𑁆𑀜𑁂 𑀲𑀻𑀳𑀸𑀤𑀻𑀦𑀁 𑀲𑀤𑁆𑀤𑁄 𑀆𑀯𑀚𑁆𑀚𑀺𑀢𑀩𑁆𑀩𑁄. 𑀯𑀺𑀳𑀸𑀭𑁂 𑀖𑀡𑁆𑀟𑀺𑀲𑀤𑁆𑀤𑁄, 𑀪𑁂𑀭𑀺𑀲𑀤𑁆𑀤𑁄, 𑀲𑀗𑁆𑀔𑀲𑀤𑁆𑀤𑁄, 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽𑀦𑀁 𑀲𑀩𑁆𑀩𑀣𑀸𑀫𑁂𑀦 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 ¶ 𑀲𑀚𑁆𑀛𑀸𑀬𑀦𑀲𑀤𑁆𑀤𑁄, 𑀧𑀓𑀢𑀺𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀁 𑀪𑀦𑁆𑀢𑁂, 𑀓𑀺𑀫𑀸𑀯𑀼𑀲𑁄’’𑀢𑀺𑀆𑀤𑀺𑀲𑀤𑁆𑀤𑁄, 𑀲𑀓𑀼𑀡𑀲𑀤𑁆𑀤𑁄, 𑀯𑀸𑀢𑀲𑀤𑁆𑀤𑁄, 𑀧𑀤𑀲𑀤𑁆𑀤𑁄, 𑀧𑀓𑁆𑀓𑀼𑀣𑀺𑀢𑀉𑀤𑀓𑀲𑁆𑀲 ¶ 𑀘𑀺𑀘𑁆𑀘𑀺𑀝𑀸𑀬𑀦𑀲𑀤𑁆𑀤𑁄, 𑀆𑀢𑀧𑁂 𑀲𑀼𑀲𑁆𑀲𑀫𑀸𑀦𑀢𑀸𑀮𑀧𑀡𑁆𑀡𑀲𑀤𑁆𑀤𑁄, 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀸𑀤𑀺𑀲𑀤𑁆𑀤𑁄𑀢𑀺 𑀏𑀯𑀁 𑀲𑀩𑁆𑀩𑁄𑀴𑀸𑀭𑀺𑀓𑀢𑁄 𑀧𑀪𑀼𑀢𑀺 𑀬𑀣𑀸𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀤𑁆𑀤𑀸 𑀆𑀯𑀚𑁆𑀚𑀺𑀢𑀩𑁆𑀩𑀸. 𑀢𑁂𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀧𑀘𑁆𑀙𑀺𑀫𑀸𑀬, 𑀉𑀢𑁆𑀢𑀭𑀸𑀬, 𑀤𑀓𑁆𑀔𑀺𑀡𑀸𑀬, 𑀳𑁂𑀝𑁆𑀞𑀺𑀫𑀸𑀬, 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬, 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬, 𑀉𑀢𑁆𑀢𑀭𑀸𑀬, 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀑𑀴𑀸𑀭𑀺𑀓𑀸𑀦𑀫𑁆𑀧𑀺 𑀲𑀼𑀔𑀼𑀫𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀢𑀲𑁆𑀲 𑀢𑁂 𑀲𑀤𑁆𑀤𑀸 𑀧𑀸𑀓𑀢𑀺𑀓𑀘𑀺𑀢𑁆𑀢𑀲𑁆𑀲𑀸𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀘𑀺𑀢𑁆𑀢𑀲𑁆𑀲 𑀧𑀦 𑀅𑀢𑀺𑀯𑀺𑀬 𑀧𑀸𑀓𑀝𑀸.

𑀢𑀲𑁆𑀲𑁂𑀯𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀇𑀤𑀸𑀦𑀺 𑀤𑀺𑀩𑁆𑀩𑀲𑁄𑀢𑀥𑀸𑀢𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀢𑁂𑀲𑀼 𑀲𑀤𑁆𑀤𑁂𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀬𑁂𑀲𑀁 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑀓𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀭𑀽𑀧𑀸𑀯𑀘𑀭𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁. 𑀢𑀢𑁆𑀣 𑀬𑀁 𑀢𑁂𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀅𑀬𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀭𑀁 𑀢𑀲𑁆𑀫𑀺𑀁 𑀲𑁄𑀢𑁂 𑀧𑀢𑀺𑀢𑁄 𑀳𑁄𑀢𑀺. 𑀢𑀁 𑀣𑀸𑀫𑀚𑀸𑀢𑀁 𑀓𑀭𑁄𑀦𑁆𑀢𑁂𑀦 ‘‘𑀏𑀢𑁆𑀣𑀦𑁆𑀢𑀭𑁂 𑀲𑀤𑁆𑀤𑀁 𑀲𑀼𑀡𑀸𑀫𑀻’’𑀢𑀺 𑀏𑀓𑀗𑁆𑀕𑀼𑀮𑀫𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀟𑁆𑀠𑁂𑀢𑀩𑁆𑀩𑀁. 𑀢𑀢𑁄 𑀤𑁆𑀯𑀗𑁆𑀕𑀼𑀮𑀘𑀢𑀼𑀭𑀗𑁆𑀕𑀼𑀮𑀅𑀝𑁆𑀞𑀗𑁆𑀕𑀼𑀮𑀯𑀺𑀤𑀢𑁆𑀣𑀺𑀭𑀢𑀦𑀅𑀦𑁆𑀢𑁄𑀕𑀩𑁆𑀪𑀧𑀫𑀼𑀔𑀧𑀸𑀲𑀸𑀤𑀧𑀭𑀺𑀯𑁂𑀡𑀲𑀗𑁆𑀖𑀸𑀭𑀸𑀫𑀕𑁄𑀘𑀭𑀕𑀸𑀫𑀚𑀦𑀧𑀤𑀸𑀤𑀺𑀯𑀲𑁂𑀦 𑀬𑀸𑀯 𑀘𑀓𑁆𑀓𑀯𑀸𑀴𑀁 𑀢𑀢𑁄 𑀯𑀸 𑀪𑀺𑀬𑁆𑀬𑁄𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀟𑁆𑀠𑁂𑀢𑀩𑁆𑀩𑀁.

𑀏𑀯𑀁 𑀅𑀥𑀺𑀕𑀢𑀸𑀪𑀺𑀜𑁆𑀜𑁄 𑀏𑀲 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑁂𑀦 𑀨𑀼𑀝𑁆𑀞𑁄𑀓𑀸𑀲𑀩𑁆𑀪𑀦𑁆𑀢𑀭𑀕𑀢𑁂𑀧𑀺 𑀲𑀤𑁆𑀤𑁂 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀲𑀼𑀡𑀸𑀢𑀺𑀬𑁂𑀯. 𑀏𑀯𑀁 𑀲𑀼𑀡𑀦𑁆𑀢𑁄 𑀘 𑀲𑀘𑁂𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀗𑁆𑀔𑀪𑁂𑀭𑀺𑀧𑀡𑀯𑀸𑀤𑀺𑀲𑀤𑁆𑀤𑁂𑀳𑀺 𑀏𑀓𑀓𑁄𑀮𑀸𑀳𑀮𑀁 𑀳𑁄𑀢𑀺, 𑀧𑀸𑀝𑀺𑀬𑁂𑀓𑁆𑀓𑀁 𑀯𑀯𑀢𑁆𑀣𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀅𑀬𑀁 𑀲𑀗𑁆𑀔𑀲𑀤𑁆𑀤𑁄 𑀅𑀬𑀁 𑀪𑁂𑀭𑀺𑀲𑀤𑁆𑀤𑁄𑀢𑀺 𑀯𑀯𑀢𑁆𑀣𑀧𑁂𑀢𑀼𑀁 𑀲𑀓𑁆𑀓𑁄𑀢𑀺𑀬𑁂𑀯𑀸𑀢𑀺.

𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀣𑀸

𑁪𑁦𑁧. 𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀣𑀸𑀬 ¶ ¶ 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀢𑀻𑀢𑀺 𑀧𑀭𑀺𑀬𑀁, 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑀲𑁄 𑀧𑀭𑀺𑀬𑀁 𑀘𑁂𑀢𑁄𑀧𑀭𑀺𑀬𑀁. 𑀘𑁂𑀢𑁄𑀧𑀭𑀺𑀬𑀜𑁆𑀘 𑀢𑀁 𑀜𑀸𑀡𑀜𑁆𑀘𑀸𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁. 𑀢𑀤𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀇𑀤𑀫𑁆𑀧𑀺 𑀇𑀫𑀺𑀦𑀸 𑀏𑀓𑀢𑁆𑀣𑀫𑁂𑀯. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀩𑁆𑀬𑀜𑁆𑀚𑀦𑀦𑀸𑀦𑀢𑁆𑀢𑀁 𑀓𑀢𑀁. 𑀘𑁂𑀢𑀲𑀸 𑀘𑁂𑀢𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀢𑁂𑀲𑀁 𑀘𑀺𑀢𑁆𑀢𑀁. 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀭𑀸𑀕𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀸𑀢𑀺.

𑀓𑀣𑀁 𑀧𑀦𑁂𑀢𑀁 𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺? 𑀏𑀢𑀜𑁆𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦 𑀇𑀚𑁆𑀛𑀢𑀺, 𑀢𑀁 𑀏𑀢𑀲𑁆𑀲 𑀧𑀭𑀺𑀓𑀫𑁆𑀫𑀁. 𑀢𑀲𑁆𑀫𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀭𑀲𑁆𑀲 𑀳𑀤𑀬𑀭𑀽𑀧𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀫𑀸𑀦𑀲𑁆𑀲 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀤𑀸 𑀳𑀺 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀁 𑀯𑀢𑁆𑀢𑀢𑀺, 𑀢𑀤𑀸 𑀭𑀢𑁆𑀢𑀁 𑀦𑀺𑀕𑁆𑀭𑁄𑀥𑀧𑀓𑁆𑀓𑀲𑀤𑀺𑀲𑀁 𑀳𑁄𑀢𑀺. 𑀬𑀤𑀸 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀁 𑀯𑀢𑁆𑀢𑀢𑀺, 𑀢𑀤𑀸 𑀓𑀸𑀴𑀓𑀁 𑀚𑀫𑁆𑀩𑀼𑀧𑀓𑁆𑀓𑀲𑀤𑀺𑀲𑀁. 𑀬𑀤𑀸 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑀁 𑀯𑀢𑁆𑀢𑀢𑀺, 𑀢𑀤𑀸 𑀧𑀲𑀦𑁆𑀦𑀢𑀺𑀮𑀢𑁂𑀮𑀲𑀤𑀺𑀲𑀁. 𑀢𑀲𑁆𑀫𑀸 𑀢𑁂𑀦 ‘‘𑀇𑀤𑀁 𑀭𑀽𑀧𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀧𑀭𑀲𑁆𑀲 𑀳𑀤𑀬𑀮𑁄𑀳𑀺𑀢𑀯𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀣𑀸𑀫𑀕𑀢𑀁 𑀓𑀸𑀢𑀩𑁆𑀩𑀁. 𑀏𑀯𑀁 𑀣𑀸𑀫𑀕𑀢𑁂 𑀳𑀺 𑀢𑀲𑁆𑀫𑀺𑀁 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀫𑁆𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀜𑁆𑀘 𑀧𑀚𑀸𑀦𑀸𑀢𑀺 𑀘𑀺𑀢𑁆𑀢𑀸 𑀘𑀺𑀢𑁆𑀢𑀫𑁂𑀯 𑀲𑀗𑁆𑀓𑀫𑀦𑁆𑀢𑁄 𑀯𑀺𑀦𑀸𑀧𑀺 𑀳𑀤𑀬𑀭𑀽𑀧𑀤𑀲𑁆𑀲𑀦𑁂𑀦. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑀼𑀧𑁆𑀧𑁂 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀓𑀲𑁆𑀲 𑀳𑀤𑀬𑀭𑀽𑀧𑀁 𑀧𑀲𑁆𑀲𑀢𑀺, 𑀓𑀲𑁆𑀲𑀺𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀁 𑀑𑀮𑁄𑀓𑁂𑀢𑀻𑀢𑀺? 𑀦 𑀓𑀲𑁆𑀲𑀘𑀺. 𑀇𑀤𑁆𑀥𑀺𑀫𑀢𑁄 𑀯𑀺𑀲𑀬𑁄 𑀏𑀲 𑀬𑀤𑀺𑀤𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑁆𑀢𑁄 𑀲𑁄𑀴𑀲𑀧𑁆𑀧𑀪𑁂𑀤𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀦 𑀯𑀲𑁂𑀦 𑀅𑀬𑀁 𑀓𑀣𑀸’’𑀢𑀺.

𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀝𑁆𑀞𑀯𑀺𑀥𑀁 𑀮𑁄𑀪𑀲𑀳𑀕𑀢𑀁 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁. 𑀤𑁆𑀯𑁂 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀸𑀦𑀺 𑀤𑁆𑀯𑁂 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀘𑀺𑀢𑁆𑀢𑀸𑀦𑀻𑀢𑀺 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑀢𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀤𑀼𑀯𑀺𑀥𑀁 𑀧𑀦 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀁 𑀲𑀤𑁄𑀲𑀁 𑀘𑀺𑀢𑁆𑀢𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀓𑀁 ¶ 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀯𑀻𑀢𑀤𑁄𑀲𑀁. 𑀲𑁂𑀲𑀸𑀦𑀺 𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑀢𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀺.

𑀲𑀫𑁄𑀳𑀁 ¶ 𑀯𑀻𑀢𑀫𑁄𑀳𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀦𑀬𑁂𑀦 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀤𑁆𑀯𑀬𑀫𑁂𑀯 𑀲𑀫𑁄𑀳𑀁, 𑀫𑁄𑀳𑀲𑁆𑀲 𑀧𑀦 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀲𑀫𑁆𑀪𑀯𑀢𑁄 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀲𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀯𑀻𑀢𑀫𑁄𑀳𑀁. 𑀣𑀺𑀦𑀫𑀺𑀤𑁆𑀥𑀸𑀦𑀼𑀕𑀢𑀁 𑀧𑀦 𑀲𑀁𑀔𑀺𑀢𑁆𑀢𑀁. 𑀉𑀤𑁆𑀥𑀘𑁆𑀘𑀸𑀦𑀼𑀕𑀢𑀁 𑀯𑀺𑀓𑁆𑀔𑀺𑀢𑁆𑀢𑀁. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀫𑀳𑀕𑁆𑀕𑀢𑀁. 𑀅𑀯𑀲𑁂𑀲𑀁 𑀅𑀫𑀳𑀕𑁆𑀕𑀢𑀁. 𑀲𑀩𑁆𑀩𑀫𑁆𑀧𑀺 𑀢𑁂𑀪𑀽𑀫𑀓𑀁 𑀲𑀉𑀢𑁆𑀢𑀭𑀁. 𑀮𑁄𑀓𑀼𑀢𑁆𑀢𑀭𑀁 𑀅𑀦𑀼𑀢𑁆𑀢𑀭𑀁. 𑀉𑀧𑀘𑀸𑀭𑀧𑁆𑀧𑀢𑁆𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀜𑁆𑀘 𑀲𑀫𑀸𑀳𑀺𑀢𑀁. 𑀉𑀪𑀬𑀫𑀧𑁆𑀧𑀢𑁆𑀢𑀁 𑀅𑀲𑀫𑀸𑀳𑀺𑀢𑀁. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀧𑀜𑁆𑀘𑀯𑀺𑀥𑀫𑁆𑀧𑀺 𑀏𑀢𑀁 𑀯𑀺𑀫𑀼𑀢𑁆𑀢𑀺𑀫𑀧𑁆𑀧𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀪𑀺𑀓𑁆𑀔𑀼 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀇𑀤𑀁 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺.

𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀓𑀣𑀸

𑁪𑁦𑁨. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀓𑀣𑀸𑀬𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬𑀸𑀢𑀺 (𑀤𑀻. 𑀦𑀺. 𑁧.𑁨𑁪𑁪) 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀺 𑀬𑀁 𑀜𑀸𑀡𑀁, 𑀢𑀤𑀢𑁆𑀣𑀸𑀬. 𑀧𑀼𑀩𑁆𑀩𑁂𑀦𑀺𑀯𑀸𑀲𑁄𑀢𑀺 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸. 𑀦𑀺𑀯𑀼𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸. 𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸. 𑀦𑀺𑀯𑀼𑀢𑁆𑀣𑀸𑀢𑀺 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀢𑁆𑀣𑀸 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼, 𑀢𑁂 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀜𑀸𑀡𑀦𑁆𑀢𑀺 𑀢𑀸𑀬 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁. 𑀏𑀯𑀫𑀺𑀫𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀢𑁆𑀣𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀏𑀢𑀲𑁆𑀲 𑀜𑀸𑀡𑀲𑁆𑀲 𑀅𑀥𑀺𑀕𑀫𑀸𑀬 𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁, 𑀅𑀦𑁂𑀓𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀁, 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀪𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦𑀁. 𑀅𑀦𑀼𑀲𑁆𑀲𑀭𑀢𑀻𑀢𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀯𑀲𑁂𑀦 ¶ 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀢𑀺. 𑀇𑀫𑀜𑁆𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀙 𑀚𑀦𑀸 𑀅𑀦𑀼𑀲𑁆𑀲𑀭𑀦𑁆𑀢𑀺 𑁋 𑀢𑀺𑀢𑁆𑀣𑀺𑀬𑀸, 𑀧𑀓𑀢𑀺𑀲𑀸𑀯𑀓𑀸, 𑀫𑀳𑀸𑀲𑀸𑀯𑀓𑀸, 𑀅𑀕𑁆𑀕𑀲𑀸𑀯𑀓𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀢𑀺.

𑀢𑀢𑁆𑀣 ¶ 𑀢𑀺𑀢𑁆𑀣𑀺𑀬𑀸 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀦 𑀢𑀢𑁄 𑀧𑀭𑀁. 𑀓𑀲𑁆𑀫𑀸, 𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀺𑀭𑀳𑀺𑀢𑀢𑁆𑀢𑀸 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀳𑁄𑀢𑀺. 𑀧𑀓𑀢𑀺𑀲𑀸𑀯𑀓𑀸 𑀓𑀧𑁆𑀧𑀲𑀢𑀫𑁆𑀧𑀺 𑀓𑀧𑁆𑀧𑀲𑀳𑀲𑁆𑀲𑀫𑁆𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑁂𑀯, 𑀩𑀮𑀯𑀧𑀜𑁆𑀜𑀢𑁆𑀢𑀸. 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀢𑀲𑀳𑀲𑁆𑀲𑀜𑁆𑀘. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁆𑀢𑀓𑁄 𑀳𑀺 𑀏𑀢𑁂𑀲𑀁 𑀅𑀪𑀺𑀦𑀻𑀳𑀸𑀭𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺.

𑀢𑀺𑀢𑁆𑀣𑀺𑀬𑀸 𑀘 𑀔𑀦𑁆𑀥𑀧𑀝𑀺𑀧𑀸𑀝𑀺𑀫𑁂𑀯 𑀲𑀭𑀦𑁆𑀢𑀺, 𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀭𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀦𑁆𑀥𑀸𑀦𑀁 𑀯𑀺𑀬 𑀇𑀘𑁆𑀙𑀺𑀢𑀧𑀤𑁂𑀲𑁄𑀓𑁆𑀓𑀫𑀦𑀁 𑀦𑀢𑁆𑀣𑀺. 𑀬𑀣𑀸 𑀧𑀦 𑀅𑀦𑁆𑀥𑀸 𑀬𑀝𑁆𑀞𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀢𑁂 𑀔𑀦𑁆𑀥𑀸𑀦𑀁 𑀧𑀝𑀺𑀧𑀸𑀝𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀦𑁆𑀢𑀺. 𑀧𑀓𑀢𑀺𑀲𑀸𑀯𑀓𑀸 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀗𑁆𑀓𑀫𑀦𑁆𑀢𑀺. 𑀢𑀣𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸. 𑀤𑁆𑀯𑀺𑀦𑁆𑀦𑀁 𑀧𑀦 𑀅𑀕𑁆𑀕𑀲𑀸𑀯𑀓𑀸𑀦𑀁 𑀔𑀦𑁆𑀥𑀧𑀝𑀺𑀧𑀸𑀝𑀺𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀏𑀓𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀧𑀲𑁆𑀲𑀦𑁆𑀢𑀺, 𑀧𑀼𑀦 𑀅𑀧𑀭𑀲𑁆𑀲 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀏𑀯𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯 𑀲𑀗𑁆𑀓𑀫𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸.

𑀩𑀼𑀤𑁆𑀥𑀸𑀦𑀁 𑀧𑀦 𑀦𑁂𑀯 𑀔𑀦𑁆𑀥𑀧𑀝𑀺𑀧𑀸𑀝𑀺𑀓𑀺𑀘𑁆𑀘𑀁, 𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀗𑁆𑀓𑀫𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑁂𑀲𑀜𑁆𑀳𑀺 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀬𑀁 𑀬𑀁 𑀞𑀸𑀦𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀧𑀸𑀓𑀝𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀅𑀦𑁂𑀓𑀸𑀧𑀺 𑀓𑀧𑁆𑀧𑀓𑁄𑀝𑀺𑀬𑁄 𑀧𑁂𑀬𑁆𑀬𑀸𑀮𑀧𑀸𑀴𑀺𑀁 𑀯𑀺𑀬 𑀲𑀁𑀔𑀺𑀧𑀺𑀢𑁆𑀯𑀸 𑀬𑀁 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀑𑀓𑁆𑀓𑀫𑀦𑁆𑀢𑀸 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀦𑁂𑀲𑀁 𑀜𑀸𑀡𑀁 𑀬𑀣𑀸 𑀦𑀸𑀫 𑀓𑀢𑀯𑀸𑀮𑀯𑁂𑀥𑀧𑀭𑀺𑀘𑀬𑀲𑁆𑀲 𑀲𑀭𑀪𑀗𑁆𑀕𑀲𑀤𑀺𑀲𑀲𑁆𑀲 𑀥𑀦𑀼𑀕𑁆𑀕𑀳𑀲𑁆𑀲 𑀔𑀺𑀢𑁆𑀢𑁄 𑀲𑀭𑁄 𑀅𑀦𑁆𑀢𑀭𑀸 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄 𑀮𑀓𑁆𑀔𑁂𑀬𑁂𑀯 𑀧𑀢𑀢𑀺, 𑀦 𑀲𑀚𑁆𑀚𑀢𑀺, 𑀦 𑀯𑀺𑀭𑀚𑁆𑀛𑀢𑀺, 𑀏𑀯𑀁 𑀅𑀦𑁆𑀢𑀭𑀦𑁆𑀢𑀭𑀸𑀲𑀼 𑀚𑀸𑀢𑀻𑀲𑀼 𑀦 𑀲𑀚𑁆𑀚𑀢𑀺, 𑀦 𑀯𑀺𑀭𑀚𑁆𑀛𑀢𑀺, 𑀅𑀲𑀚𑁆𑀚𑀫𑀸𑀦𑀁 𑀅𑀯𑀺𑀭𑀚𑁆𑀛𑀫𑀸𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁𑀬𑁂𑀯 𑀕𑀡𑁆𑀳𑀸𑀢𑀺.

𑀇𑀫𑁂𑀲𑀼 𑀘 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀡𑀲𑀢𑁆𑀢𑁂𑀲𑀼 𑀢𑀺𑀢𑁆𑀣𑀺𑀬𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀲𑁆𑀲𑀦𑀁 𑀔𑀚𑁆𑀚𑀼𑀧𑀦𑀓𑀧𑀪𑀸𑀲𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀓𑀢𑀺𑀲𑀸𑀯𑀓𑀸𑀦𑀁 𑀤𑀻𑀧𑀧𑁆𑀧𑀪𑀸𑀲𑀤𑀺𑀲𑀁. 𑀫𑀳𑀸𑀲𑀸𑀯𑀓𑀸𑀦𑀁 𑀉𑀓𑁆𑀓𑀸𑀧𑀪𑀸𑀲𑀤𑀺𑀲𑀁 ¶ . 𑀅𑀕𑁆𑀕𑀲𑀸𑀯𑀓𑀸𑀦𑀁 𑀑𑀲𑀥𑀺𑀢𑀸𑀭𑀓𑀧𑁆𑀧𑀪𑀸𑀲𑀤𑀺𑀲𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀦𑁆𑀤𑀧𑁆𑀧𑀪𑀸𑀲𑀤𑀺𑀲𑀁. 𑀩𑀼𑀤𑁆𑀥𑀸𑀦𑀁 𑀭𑀲𑁆𑀫𑀺𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀲𑀭𑀤𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀢𑀺𑀢𑁆𑀣𑀺𑀬𑀸𑀦𑀜𑁆𑀘 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀅𑀦𑁆𑀥𑀸𑀦𑀁 𑀬𑀝𑁆𑀞𑀺𑀓𑁄𑀝𑀺𑀕𑀫𑀦𑀁 𑀯𑀺𑀬 𑀳𑁄𑀢𑀺. 𑀧𑀓𑀢𑀺𑀲𑀸𑀯𑀓𑀸𑀦𑀁 𑀤𑀡𑁆𑀟𑀓𑀲𑁂𑀢𑀼𑀕𑀫𑀦𑀁 𑀯𑀺𑀬. 𑀫𑀳𑀸𑀲𑀸𑀯𑀓𑀸𑀦𑀁 𑀚𑀗𑁆𑀖𑀲𑁂𑀢𑀼𑀕𑀫𑀦𑀁 𑀯𑀺𑀬. 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀓𑀝𑀲𑁂𑀢𑀼𑀕𑀫𑀦𑀁 𑀯𑀺𑀬. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀳𑀸𑀚𑀗𑁆𑀖𑀫𑀕𑁆𑀕𑀕𑀫𑀦𑀁 𑀯𑀺𑀬. 𑀩𑀼𑀤𑁆𑀥𑀸𑀦𑀁 𑀫𑀳𑀸𑀲𑀓𑀝𑀫𑀕𑁆𑀕𑀕𑀫𑀦𑀁 𑀯𑀺𑀬.

𑀇𑀫𑀲𑁆𑀫𑀺𑀁 𑀧𑀦 𑀅𑀥𑀺𑀓𑀸𑀭𑁂 𑀲𑀸𑀯𑀓𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀲𑁆𑀲𑀭𑀢𑀻𑀢𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀢𑀻’’𑀢𑀺.

𑁪𑁦𑁩. 𑀢𑀲𑁆𑀫𑀸 𑀏𑀯𑀫𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀺𑀦𑁂𑀦 𑀧𑀝𑀺𑀧𑀸𑀝𑀺𑀬𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀲𑀩𑁆𑀩𑀧𑀘𑁆𑀙𑀺𑀫𑀸 𑀦𑀺𑀲𑀚𑁆𑀚𑀸 𑀆𑀯𑀚𑁆𑀚𑀺𑀢𑀩𑁆𑀩𑀸. 𑀢𑀢𑁄 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀲𑁂𑀦𑀸𑀲𑀦𑀧𑁆𑀧𑀯𑁂𑀲𑀦𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀲𑀸𑀫𑀦𑀁, 𑀪𑁄𑀚𑀦𑀓𑀸𑀮𑁄, 𑀕𑀸𑀫𑀢𑁄 𑀆𑀕𑀫𑀦𑀓𑀸𑀮𑁄, 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀓𑀸𑀮𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀓𑀸𑀮𑁄, 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁄, 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀦𑁆𑀤𑀦𑀓𑀸𑀮𑁄, 𑀧𑀢𑁆𑀢𑀥𑁄𑀯𑀦𑀓𑀸𑀮𑁄, 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀓𑀸𑀮𑁄, 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀢𑁄 𑀬𑀸𑀯 𑀫𑀼𑀔𑀥𑁄𑀯𑀦𑀸 𑀓𑀢𑀓𑀺𑀘𑁆𑀘𑀁, 𑀧𑀘𑁆𑀘𑀽𑀲𑀓𑀸𑀮𑁂 𑀓𑀢𑀓𑀺𑀘𑁆𑀘𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀓𑀢𑀓𑀺𑀘𑁆𑀘𑀁, 𑀧𑀞𑀫𑀬𑀸𑀫𑁂 𑀓𑀢𑀓𑀺𑀘𑁆𑀘𑀦𑁆𑀢𑀺 𑀏𑀯𑀁 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀲𑀓𑀮𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀓𑀢𑀓𑀺𑀘𑁆𑀘𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀏𑀢𑁆𑀢𑀓𑀁 𑀧𑀦 𑀧𑀓𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀧𑀸𑀓𑀝𑀁 𑀳𑁄𑀢𑀺. 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀘𑀺𑀢𑁆𑀢𑀲𑁆𑀲 𑀧𑀦 𑀅𑀢𑀺𑀧𑀸𑀓𑀝𑀫𑁂𑀯.

𑀲𑀘𑁂 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺 𑀦 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀏𑀢𑁆𑀢𑀓𑁂𑀦 𑀤𑀻𑀧𑁂 𑀚𑀮𑀺𑀢𑁂 𑀯𑀺𑀬 𑀧𑀸𑀓𑀝𑀁 𑀳𑁄𑀢𑀺. 𑀏𑀯𑀁 𑀧𑀝𑀺𑀮𑁄𑀫𑀓𑁆𑀓𑀫𑁂𑀦𑁂𑀯 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀤𑀺𑀯𑀲𑁂𑀧𑀺 𑀤𑀲𑀸𑀳𑁂𑀧𑀺 𑀅𑀟𑁆𑀠𑀫𑀸𑀲𑁂𑀧𑀺 𑀫𑀸𑀲𑁂𑀧𑀺 𑀬𑀸𑀯 𑀲𑀁𑀯𑀘𑁆𑀙𑀭𑀸𑀧𑀺 𑀓𑀢𑀓𑀺𑀘𑁆𑀘𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀲𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀯𑀲𑁆𑀲𑀸𑀦𑀻𑀢𑀺 𑀬𑀸𑀯 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀦𑁄 𑀧𑀝𑀺𑀲𑀦𑁆𑀥𑀺, 𑀢𑀸𑀯 𑀆𑀯𑀚𑁆𑀚𑀦𑁆𑀢𑁂𑀦 𑀧𑀼𑀭𑀺𑀫𑀪𑀯𑁂 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀧𑀳𑁄𑀢𑀺 𑀳𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀧𑀞𑀫𑀯𑀸𑀭𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘𑀼𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀫𑀸𑀭𑀫𑁆𑀫𑀡𑀁 𑀓𑀸𑀢𑀼𑀁.

𑀬𑀲𑁆𑀫𑀸 ¶ 𑀧𑀦 𑀧𑀼𑀭𑀺𑀫𑀪𑀯𑁂 𑀦𑀸𑀫𑀭𑀽𑀧𑀁 𑀅𑀲𑁂𑀲𑀁 𑀦𑀺𑀭𑀼𑀤𑁆𑀥𑀁 𑀅𑀜𑁆𑀜𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀆𑀳𑀼𑀦𑁆𑀤𑀭𑀺𑀓𑀁 𑀅𑀦𑁆𑀥𑀢𑀫𑀫𑀺𑀯 𑀳𑁄𑀢𑀺 𑀤𑀼𑀤𑁆𑀤𑀲𑀁 𑀤𑀼𑀧𑁆𑀧𑀜𑁆𑀜𑁂𑀦. 𑀢𑁂𑀦𑀸𑀧𑀺 ‘‘𑀦 𑀲𑀓𑁆𑀓𑁄𑀫𑀳𑀁 ¶ 𑀧𑀝𑀺𑀲𑀦𑁆𑀥𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀫𑀸𑀭𑀫𑁆𑀫𑀡𑀁 𑀓𑀸𑀢𑀼’’𑀦𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁄 𑀦 𑀓𑀸𑀢𑀩𑁆𑀩𑁄. 𑀢𑀤𑁂𑀯 𑀧𑀦 𑀧𑀸𑀤𑀓𑀚𑁆𑀛𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀢𑀢𑁄 𑀘 𑀯𑀼𑀝𑁆𑀞𑀸𑀬 𑀯𑀼𑀝𑁆𑀞𑀸𑀬 𑀢𑀁 𑀞𑀸𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁.

𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀢𑁆𑀣𑀸𑀬 𑀫𑀳𑀸𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑁄 𑀲𑀸𑀔𑀸𑀧𑀮𑀸𑀲𑀘𑁆𑀙𑁂𑀤𑀦𑀫𑀢𑁆𑀢𑁂𑀦𑁂𑀯 𑀨𑀭𑀲𑀼𑀥𑀸𑀭𑀸𑀬 𑀯𑀺𑀧𑀦𑁆𑀦𑀸𑀬 𑀫𑀳𑀸𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸𑀯 𑀓𑀫𑁆𑀫𑀸𑀭𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀺𑀔𑀺𑀡𑀁 𑀨𑀭𑀲𑀼𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀙𑀺𑀦𑁆𑀤𑁂𑀬𑁆𑀬, 𑀧𑀼𑀦 𑀯𑀺𑀧𑀦𑁆𑀦𑀸𑀬 𑀘 𑀧𑀼𑀦𑀧𑀺 𑀢𑀣𑁂𑀯 𑀓𑀸𑀭𑁂𑀢𑁆𑀯𑀸 𑀙𑀺𑀦𑁆𑀤𑁂𑀬𑁆𑀬. 𑀲𑁄 𑀏𑀯𑀁 𑀙𑀺𑀦𑁆𑀤𑀦𑁆𑀢𑁄 𑀙𑀺𑀦𑁆𑀦𑀲𑁆𑀲 𑀙𑀺𑀦𑁆𑀦𑀲𑁆𑀲 𑀧𑀼𑀦 𑀙𑁂𑀢𑀩𑁆𑀩𑀸𑀪𑀸𑀯𑀢𑁄 𑀅𑀘𑁆𑀙𑀺𑀦𑁆𑀦𑀲𑁆𑀲 𑀘 𑀙𑁂𑀤𑀦𑀢𑁄 𑀦𑀘𑀺𑀭𑀲𑁆𑀲𑁂𑀯 𑀫𑀳𑀸𑀭𑀼𑀓𑁆𑀔𑀁 𑀧𑀸𑀢𑁂𑀬𑁆𑀬, 𑀏𑀯𑀫𑁂𑀯𑀁 𑀧𑀸𑀤𑀓𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑁂 𑀆𑀯𑀚𑁆𑀚𑀺𑀢𑀁 𑀅𑀦𑀸𑀯𑀚𑁆𑀚𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀫𑁂𑀯 𑀆𑀯𑀚𑁆𑀚𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀧𑀝𑀺𑀲𑀦𑁆𑀥𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀭𑁂𑀬𑁆𑀬𑀸𑀢𑀺. 𑀓𑀝𑁆𑀞𑀨𑀸𑀮𑀓𑀓𑁂𑀲𑁄𑀳𑀸𑀭𑀓𑀸𑀤𑀻𑀳𑀺𑀧𑀺 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄.

𑀢𑀢𑁆𑀣 𑀧𑀘𑁆𑀙𑀺𑀫𑀦𑀺𑀲𑀚𑁆𑀚𑀢𑁄 𑀧𑀪𑀼𑀢𑀺 𑀬𑀸𑀯 𑀧𑀝𑀺𑀲𑀦𑁆𑀥𑀺𑀢𑁄 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀦𑀸𑀫 𑀦 𑀳𑁄𑀢𑀺. 𑀢𑀁 𑀧𑀦 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀜𑀸𑀡𑀁 𑀦𑀸𑀫 𑀳𑁄𑀢𑀺. 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺𑀧𑀺 𑀏𑀓𑁂 𑀯𑀤𑀦𑁆𑀢𑀺. 𑀢𑀁 𑀭𑀽𑀧𑀸𑀯𑀘𑀭𑀁 𑀲𑀦𑁆𑀥𑀸𑀬 𑀦 𑀬𑀼𑀚𑁆𑀚𑀢𑀺. 𑀬𑀤𑀸 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀦𑁆𑀥𑀺𑀁 𑀅𑀢𑀺𑀓𑁆𑀓𑀫𑁆𑀫 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀜𑁆𑀘 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀭𑀺𑀫𑀸𑀦𑀺 𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀓𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀳𑁄𑀦𑁆𑀢𑀺. 𑀧𑀘𑁆𑀙𑀺𑀫𑀁 𑀭𑀽𑀧𑀸𑀯𑀘𑀭𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁. 𑀢𑀤𑀸𑀲𑁆𑀲 𑀬𑀁 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫. 𑀢𑁂𑀦 𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀢𑀺𑀬𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 (𑀤𑀻. 𑀦𑀺. 𑁧.𑁨𑁪𑁪).

𑁪𑁦𑁪. 𑀢𑀢𑁆𑀣 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼𑀧𑀺. 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 ¶ 𑀕𑀳𑀺𑀢𑁄 ¶ 𑀳𑁄𑀢𑀺, 𑀢𑀁𑀫𑀽𑀮𑀓𑀢𑁆𑀢𑀸. 𑀯𑀺𑀯𑀝𑁆𑀝𑁂𑀦 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻, 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄, 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 (𑀅. 𑀦𑀺. 𑁪.𑁧𑁫𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑁋 𑀆𑀧𑁄𑀲𑀁𑀯𑀝𑁆𑀝𑁄, 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑁋 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺.

𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀤𑀸𑀧𑀺 𑀏𑀓𑀁 𑀩𑀼𑀤𑁆𑀥𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺.

𑀩𑀼𑀤𑁆𑀥𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥𑀁 𑀳𑁄𑀢𑀺 𑁋 𑀚𑀸𑀢𑀺𑀔𑁂𑀢𑁆𑀢𑀁, 𑀆𑀡𑀸𑀔𑁂𑀢𑁆𑀢𑀁, 𑀯𑀺𑀲𑀬𑀔𑁂𑀢𑁆𑀢𑀜𑁆𑀘. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺. 𑀬𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑀳𑀡𑀸𑀤𑀻𑀲𑀼 𑀓𑀫𑁆𑀧𑀢𑀺. 𑀆𑀡𑀸𑀔𑁂𑀢𑁆𑀢𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀬𑀢𑁆𑀣 𑀭𑀢𑀦𑀲𑀼𑀢𑁆𑀢𑀁 (𑀔𑀼. 𑀧𑀸. 𑁬.𑁧 𑀆𑀤𑀬𑁄) 𑀔𑀦𑁆𑀥𑀧𑀭𑀺𑀢𑁆𑀢𑀁 (𑀘𑀽𑀴𑀯. 𑁨𑁫𑁧; 𑀅. 𑀦𑀺. 𑁪.𑁬𑁭) 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 (𑀲𑀁. 𑀦𑀺. 𑁧.𑁨𑁪𑁯) 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 (𑀚𑀸. 𑁧.𑁨.𑁧𑁭-𑁧𑁮) 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀁 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁. 𑀬𑀁 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀼𑀢𑁆𑀢𑀁, 𑀬𑀢𑁆𑀣 𑀬𑀁 𑀬𑀁 𑀢𑀣𑀸𑀕𑀢𑁄 𑀆𑀓𑀗𑁆𑀔𑀢𑀺, 𑀢𑀁 𑀢𑀁 𑀚𑀸𑀦𑀸𑀢𑀺. 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀔𑁂𑀢𑁆𑀢𑁂𑀲𑀼 𑀏𑀓𑀁 𑀆𑀡𑀸𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀦𑀲𑁆𑀲𑀦𑁆𑀢𑁂 𑀚𑀸𑀢𑀺𑀔𑁂𑀢𑁆𑀢𑀫𑁆𑀧𑀺 𑀯𑀺𑀦𑀝𑁆𑀞𑀫𑁂𑀯 𑀳𑁄𑀢𑀺. 𑀯𑀺𑀦𑀲𑁆𑀲𑀦𑁆𑀢𑀜𑁆𑀘 𑀏𑀓𑀢𑁄𑀯 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄 𑀲𑀡𑁆𑀞𑀳𑀢𑀺. 𑀢𑀲𑁆𑀲𑁂𑀯𑀁 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁫. 𑀬𑀲𑁆𑀫𑀺𑀁 𑀳𑀺 𑀲𑀫𑀬𑁂 𑀓𑀧𑁆𑀧𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀏𑀓𑀁 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀢𑀺. 𑀫𑀦𑀼𑀲𑁆𑀲𑀸 𑀢𑀼𑀝𑁆𑀞𑀳𑀝𑁆𑀞𑀸 𑀲𑀩𑁆𑀩𑀩𑀻𑀚𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀧𑀦𑁆𑀢𑀺. 𑀲𑀲𑁆𑀲𑁂𑀲𑀼 𑀧𑀦 𑀕𑁄𑀔𑀸𑀬𑀺𑀢𑀓𑀫𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀕𑀤𑁆𑀭𑀪𑀭𑀯𑀁 𑀭𑀯𑀦𑁆𑀢𑁄 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀯𑀲𑁆𑀲𑀢𑀺, 𑀢𑀤𑀸 𑀧𑀘𑁆𑀙𑀺𑀦𑁆𑀦𑀁 𑀧𑀘𑁆𑀙𑀺𑀦𑁆𑀦𑀫𑁂𑀯 𑀯𑀲𑁆𑀲𑀁 𑀳𑁄𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀳𑀺 𑀪𑀕𑀯𑀢𑀸 ‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 ¶ 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 ¶ 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁭.𑁬𑁬) 𑀯𑀼𑀢𑁆𑀢𑀁. 𑀯𑀲𑁆𑀲𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸 𑀓𑀸𑀮𑀗𑁆𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀼𑀧𑁆𑀨𑀨𑀮𑀽𑀧𑀚𑀻𑀯𑀺𑀦𑀺𑀬𑁄 𑀘 𑀤𑁂𑀯𑀢𑀸. 𑀏𑀯𑀁 𑀤𑀻𑀖𑁂 𑀅𑀤𑁆𑀥𑀸𑀦𑁂 𑀯𑀻𑀢𑀺𑀯𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀘𑁆𑀙𑀓𑀘𑁆𑀙𑀧𑀸𑀧𑀺 𑀓𑀸𑀮𑀗𑁆𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺. 𑀢𑀢𑁆𑀣 𑀦𑁂𑀭𑀬𑀺𑀓𑀸 𑀲𑀢𑁆𑀢𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁂 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀏𑀓𑁂.

𑀛𑀸𑀦𑀁 𑀯𑀺𑀦𑀸 𑀦𑀢𑁆𑀣𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀢𑁂𑀲𑀜𑁆𑀘 𑀓𑁂𑀘𑀺 𑀤𑀼𑀩𑁆𑀪𑀺𑀓𑁆𑀔𑀧𑀻𑀴𑀺𑀢𑀸 𑀓𑁂𑀘𑀺 𑀅𑀪𑀩𑁆𑀩𑀸 𑀛𑀸𑀦𑀸𑀥𑀺𑀕𑀫𑀸𑀬, 𑀢𑁂 𑀓𑀣𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺. 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦. 𑀢𑀤𑀸 𑀳𑀺 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀫𑀸𑀭𑀺𑀲𑀸 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀉𑀲𑁆𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀉𑀤𑁆𑀤𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺. 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺.

𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀘 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀲𑀁𑀯𑁂𑀕𑀚𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀤𑀼𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀤𑀺𑀩𑁆𑀩𑀲𑀼𑀥𑀸𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀢𑀤𑀜𑁆𑀜𑁂 𑀧𑀦 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑁂𑀦 𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀭𑀳𑀺𑀢𑁄 𑀳𑀺 𑀲𑀁𑀲𑀸𑀭𑁂 𑀲𑀁𑀲𑀭𑀫𑀸𑀦𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀧𑀺 𑀢𑀢𑁆𑀣 𑀢𑀣𑁂𑀯 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀏𑀯𑀁 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺.

𑀯𑀲𑁆𑀲𑀽𑀧𑀘𑁆𑀙𑁂𑀤𑀢𑁄 𑀧𑀦 𑀉𑀤𑁆𑀥𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 ‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄’’𑀢𑀺 𑀲𑀢𑁆𑀢𑀲𑀽𑀭𑀺𑀬𑀁 (𑀅. 𑀦𑀺. 𑁭.𑁬𑁬) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀧𑀸𑀢𑀼𑀪𑀽𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀦𑁂𑀯 ¶ 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄, 𑀦 𑀤𑀺𑀯𑀸𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺. 𑀏𑀓𑁄 𑀲𑀽𑀭𑀺𑀬𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀅𑀯𑀺𑀘𑁆𑀙𑀺𑀦𑁆𑀦𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀯 𑀮𑁄𑀓𑁄 𑀳𑁄𑀢𑀺. 𑀬𑀣𑀸 𑀘 𑀧𑀓𑀢𑀺𑀲𑀽𑀭𑀺𑀬𑁂 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀦𑀢𑁆𑀣𑀺. 𑀢𑀢𑁆𑀣 𑀧𑀓𑀢𑀺𑀲𑀽𑀭𑀺𑀬𑁂 ¶ 𑀯𑀢𑁆𑀢𑀫𑀸𑀦𑁂 𑀆𑀓𑀸𑀲𑁂 𑀯𑀮𑀸𑀳𑀓𑀸𑀧𑀺 𑀥𑀽𑀫𑀲𑀺𑀔𑀸𑀧𑀺 𑀘𑀭𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀯𑀢𑁆𑀢𑀫𑀸𑀦𑁂 𑀯𑀺𑀕𑀢𑀥𑀽𑀫𑀯𑀮𑀸𑀳𑀓𑀁 𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀦𑀺𑀫𑁆𑀫𑀮𑀁 𑀦𑀪𑀁 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀲𑁂𑀲𑀓𑀼𑀦𑁆𑀦𑀤𑀻𑀆𑀤𑀻𑀲𑀼 𑀉𑀤𑀓𑀁 𑀲𑀼𑀲𑁆𑀲𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀫𑀳𑀸𑀦𑀤𑀺𑀬𑁄𑀧𑀺 𑀲𑀼𑀲𑁆𑀲𑀦𑁆𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀳𑀺𑀫𑀯𑀢𑀺 𑀫𑀳𑀸𑀦𑀤𑀻𑀦𑀁 𑀧𑀪𑀯𑀸 ‘‘𑀲𑀻𑀳𑀧𑀧𑀸𑀢𑁄 𑀳𑀁𑀲𑀧𑀸𑀢𑀦𑁄 𑀓𑀡𑁆𑀡𑀫𑀼𑀡𑁆𑀟𑀓𑁄 𑀭𑀣𑀓𑀸𑀭𑀤𑀳𑁄 𑀅𑀦𑁄𑀢𑀢𑁆𑀢𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄’’𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀸𑀲𑀭𑀸 𑀲𑀼𑀲𑁆𑀲𑀦𑁆𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀧𑀜𑁆𑀘𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀙𑀝𑁆𑀞𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀥𑀽𑀫𑀁 𑀳𑁄𑀢𑀺. 𑀧𑀭𑀺𑀬𑀸𑀤𑀺𑀡𑁆𑀡𑀲𑀺𑀦𑁂𑀳𑀁 𑀥𑀽𑀫𑁂𑀦. 𑀬𑀣𑀸 𑀘𑀺𑀤𑀁, 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺𑀧𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀢𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀚𑀸𑀮𑀁 𑀳𑁄𑀢𑀺 𑀲𑀤𑁆𑀥𑀺𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀳𑀺. 𑀬𑁄𑀚𑀦𑀲𑀢𑀺𑀓𑀸𑀤𑀺𑀪𑁂𑀤𑀸𑀦𑀺 𑀲𑀺𑀦𑁂𑀭𑀼𑀓𑀽𑀝𑀸𑀦𑀺𑀧𑀺 𑀧𑀮𑀼𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑀸 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀓𑀦𑀓𑀯𑀺𑀫𑀸𑀦𑀭𑀢𑀦𑀯𑀺𑀫𑀸𑀦𑀫𑀡𑀺𑀯𑀺𑀫𑀸𑀦𑀸𑀦𑀺 𑀛𑀸𑀧𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀡𑁆𑀳𑀸𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀛𑀸𑀧𑁂𑀢𑁆𑀯𑀸 𑀆𑀪𑀲𑁆𑀲𑀭𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀲𑀸 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀦𑀺𑀩𑁆𑀩𑀸𑀬𑀢𑀺. 𑀲𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸 𑀧𑀦 𑀲𑀧𑁆𑀧𑀺𑀢𑁂𑀮𑀛𑀸𑀧𑀦𑀕𑁆𑀕𑀺𑀲𑀺𑀔𑀸 𑀯𑀺𑀬 𑀙𑀸𑀭𑀺𑀓𑀫𑁆𑀧𑀺 ¶ 𑀅𑀦𑀯𑀲𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄.

𑁪𑁦𑁬. 𑀅𑀣 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀁 𑀲𑀼𑀔𑀼𑀫𑀁 𑀲𑀼𑀔𑀼𑀫𑀁 𑀯𑀲𑁆𑀲𑀢𑀺 ¶ . 𑀅𑀦𑀼𑀧𑀼𑀩𑁆𑀩𑁂𑀦 𑀓𑀼𑀫𑀼𑀤𑀦𑀸𑀴𑀬𑀝𑁆𑀞𑀺𑀫𑀼𑀲𑀮𑀢𑀸𑀮𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀫𑀸𑀡𑀸𑀳𑀺 𑀥𑀸𑀭𑀸𑀳𑀺 𑀯𑀲𑁆𑀲𑀦𑁆𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀁 𑀤𑀟𑁆𑀠𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀘 𑀢𑀺𑀭𑀺𑀬𑀜𑁆𑀘 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀖𑀦𑀁 𑀓𑀭𑁄𑀢𑀺 𑀧𑀭𑀺𑀯𑀝𑀼𑀫𑀁 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼𑀲𑀤𑀺𑀲𑀁. 𑀓𑀣𑀁 𑀢𑀸𑀯 𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁 𑀖𑀦𑀁 𑀓𑀭𑁄𑀢𑀻𑀢𑀺 𑀘𑁂? 𑀯𑀺𑀯𑀭𑀲𑀫𑁆𑀧𑀤𑀸𑀦𑀢𑁄. 𑀢𑀜𑁆𑀳𑀺𑀲𑁆𑀲 𑀢𑀫𑁆𑀳𑀺 𑀢𑀫𑁆𑀳𑀺 𑀯𑀺𑀯𑀭𑀁 𑀤𑁂𑀢𑀺. 𑀢𑀁 𑀏𑀯𑀁 𑀯𑀸𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀬𑀫𑀸𑀦𑀁 𑀖𑀦𑀁 𑀓𑀭𑀺𑀬𑀫𑀸𑀦𑀁 𑀧𑀭𑀺𑀓𑁆𑀔𑀬𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀑𑀢𑀺𑀡𑁆𑀡𑁂 𑀑𑀢𑀺𑀡𑁆𑀡𑁂 𑀉𑀤𑀓𑁂 𑀩𑁆𑀭𑀳𑁆𑀫𑀮𑁄𑀓𑀝𑁆𑀞𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀸, 𑀉𑀧𑀭𑀺 𑀘𑀢𑀼𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀝𑁆𑀞𑀸𑀦𑁂 𑀘 𑀤𑁂𑀯𑀮𑁄𑀓𑀸 𑀧𑀸𑀢𑀼𑀪𑀯𑀦𑁆𑀢𑀺.

𑀧𑀼𑀭𑀺𑀫𑀧𑀣𑀯𑀺𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑁂 𑀧𑀦 𑀩𑀮𑀯𑀯𑀸𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀢𑀁 𑀧𑀺𑀳𑀺𑀢𑀤𑁆𑀯𑀸𑀭𑁂 𑀥𑀫𑀓𑀭𑀡𑁂 𑀞𑀺𑀢𑀉𑀤𑀓𑀫𑀺𑀯 𑀦𑀺𑀭𑀲𑁆𑀲𑀸𑀲𑀁 𑀓𑀢𑁆𑀯𑀸 𑀭𑀼𑀦𑁆𑀥𑀦𑁆𑀢𑀺. 𑀫𑀥𑀼𑀭𑁄𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀫𑀸𑀦𑀁 𑀉𑀧𑀭𑀺 𑀭𑀲𑀧𑀣𑀯𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀘𑁂𑀯 𑀳𑁄𑀢𑀺 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸 𑀘 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀉𑀧𑀭𑀺 𑀧𑀝𑀮𑀁 𑀯𑀺𑀬.

𑀢𑀤𑀸 𑀘 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀧𑀞𑀫𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀳𑁄𑀦𑁆𑀢𑀺 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸. 𑀢𑁂 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁧𑁯) 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀭𑀲𑀧𑀣𑀯𑀺𑀁 𑀲𑀸𑀬𑀺𑀢𑁆𑀯𑀸 𑀢𑀡𑁆𑀳𑀸𑀪𑀺𑀪𑀽𑀢𑀸 𑀆𑀮𑀼𑀧𑁆𑀧𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀺. 𑀅𑀣 𑀦𑁂𑀲𑀁 𑀲𑀬𑀁𑀧𑀪𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺. 𑀢𑁂 𑀅𑀦𑁆𑀥𑀓𑀸𑀭𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺.

𑀢𑀢𑁄 𑀦𑁂𑀲𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀧𑀡𑁆𑀡𑀸𑀲𑀬𑁄𑀚𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺, 𑀢𑁂 𑀢𑀁 𑀤𑀺𑀲𑁆𑀯𑀸 ‘‘𑀆𑀮𑁄𑀓𑀁 𑀧𑀝𑀺𑀮𑀪𑀺𑀫𑁆𑀳𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀻𑀢𑀸𑀦𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑁄 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 ‘‘𑀲𑀽𑀭𑀺𑀬𑁄 𑀳𑁄𑀢𑀽’’𑀢𑀺 𑀲𑀽𑀭𑀺𑀬𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺.

𑀅𑀣 ¶ 𑀲𑀽𑀭𑀺𑀬𑁂 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀬𑀫𑁆𑀧𑀺 𑀆𑀮𑁄𑀓𑀁 𑀮𑀪𑀺𑀫𑁆𑀳𑀸, 𑀲𑁄𑀧𑀺 𑀦𑁄 𑀦𑀝𑁆𑀞𑁄𑀢𑀺 𑀧𑀼𑀦 𑀪𑀻𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀅𑀜𑁆𑀜𑀁 𑀆𑀮𑁄𑀓𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀬 𑀏𑀓𑀽𑀦𑀧𑀡𑁆𑀡𑀸𑀲𑀬𑁄𑀚𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀺𑀬 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀘𑀦𑁆𑀤𑁄 𑀳𑁄𑀢𑀽’’𑀢𑀺 ¶ 𑀘𑀦𑁆𑀤𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺.

𑀢𑀢𑁄 𑀧𑀪𑀼𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀘 𑀫𑀸𑀲𑀤𑁆𑀥𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀦 𑀧𑀸𑀢𑀼𑀪𑀽𑀢𑀤𑀺𑀯𑀲𑁂𑀬𑁂𑀯 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑁂 𑀘 𑀔𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀣𑀁? 𑀬𑀣𑀸 𑀦𑀸𑀫 𑀓𑀗𑁆𑀕𑀼𑀪𑀢𑁆𑀢𑁂 𑀧𑀘𑁆𑀘𑀫𑀸𑀦𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀼𑀧𑁆𑀨𑀼𑀴𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀏𑀓𑁂 𑀧𑀤𑁂𑀲𑀸 𑀣𑀽𑀧𑀣𑀽𑀧𑀸 𑀳𑁄𑀦𑁆𑀢𑀺, 𑀏𑀓𑁂 𑀦𑀺𑀦𑁆𑀦𑀦𑀺𑀦𑁆𑀦𑀸, 𑀏𑀓𑁂 𑀲𑀫𑀲𑀫𑀸. 𑀏𑀯𑀫𑁂𑀯𑀁 𑀣𑀽𑀧𑀣𑀽𑀧𑀝𑁆𑀞𑀸𑀦𑁂 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀦𑀺𑀦𑁆𑀦𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀫𑀼𑀤𑁆𑀤𑀸, 𑀲𑀫𑀲𑀫𑀝𑁆𑀞𑀸𑀦𑁂 𑀤𑀻𑀧𑀸𑀢𑀺.

𑀅𑀣 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀫𑁂𑀦 𑀏𑀓𑀘𑁆𑀘𑁂 𑀯𑀡𑁆𑀡𑀯𑀦𑁆𑀢𑁄, 𑀏𑀓𑀘𑁆𑀘𑁂 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀯𑀡𑁆𑀡𑀯𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁂 𑀅𑀢𑀺𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀅𑀢𑀺𑀫𑀸𑀦𑀧𑀘𑁆𑀘𑀬𑀸 𑀲𑀸𑀧𑀺 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀢𑀺. 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀪𑀯𑀢𑀺. 𑀅𑀣 𑀦𑁂𑀲𑀁 𑀢𑁂𑀦𑁂𑀯 𑀦𑀬𑁂𑀦 𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀢𑀺. 𑀧𑀤𑀸𑀮𑀢𑀸 𑀧𑀸𑀢𑀼𑀪𑀯𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀲𑀸𑀧𑀺 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 𑀧𑀸𑀢𑀼𑀪𑀯𑀢𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀤𑁆𑀥𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀧𑁆𑀨𑀮𑁄.

𑀢𑀢𑁄 𑀦𑁂𑀲𑀁 𑀪𑀸𑀚𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀲𑀸𑀮𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀸 𑀞𑀧𑁂𑀦𑁆𑀢𑀺, 𑀲𑀬𑀫𑁂𑀯 𑀚𑀸𑀮𑀲𑀺𑀔𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑀘𑀢𑀺. 𑀲𑁄 𑀳𑁄𑀢𑀺 𑀑𑀤𑀦𑁄 𑀲𑀼𑀫𑀦𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄, 𑀦 𑀢𑀲𑁆𑀲 𑀲𑀽𑀧𑁂𑀦 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀯𑀸 𑀓𑀭𑀡𑀻𑀬𑀁 𑀅𑀢𑁆𑀣𑀺. 𑀬𑀁 𑀬𑀁 𑀭𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀁 𑀭𑀲𑁄𑀯 𑀳𑁄𑀢𑀺. 𑀢𑁂𑀲𑀁 𑀢𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀬𑀢𑀁 𑀢𑀢𑁄 𑀧𑀪𑀼𑀢𑀺 𑀫𑀼𑀢𑁆𑀢𑀓𑀭𑀻𑀲𑀁 𑀲𑀜𑁆𑀚𑀸𑀬𑀢𑀺. 𑀅𑀣 𑀦𑁂𑀲𑀁 𑀢𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀡𑀫𑀼𑀔𑀸𑀦𑀺 𑀧𑀪𑀺𑀚𑁆𑀚𑀦𑁆𑀢𑀺, 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀇𑀢𑁆𑀣𑀺𑀬𑀸𑀧𑀺 𑀇𑀢𑁆𑀣𑀺𑀪𑀸𑀯𑁄 𑀧𑀸𑀢𑀼𑀪𑀯𑀢𑀺.

𑀢𑀢𑁆𑀭 ¶ 𑀲𑀼𑀤𑀁 𑀇𑀢𑁆𑀣𑀻 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁄 𑀘 𑀇𑀢𑁆𑀣𑀺𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑀧𑀘𑁆𑀘𑀬𑀸 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺. 𑀢𑁂 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀬𑀫𑀸𑀦𑀸 𑀯𑀺𑀳𑁂𑀞𑀺𑀬𑀫𑀸𑀦𑀸 𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀅𑀕𑀸𑀭𑀸𑀦𑀺 𑀓𑀭𑁄𑀦𑁆𑀢𑀺. 𑀢𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀜𑁆𑀜𑀢𑀭𑀲𑁆𑀲 𑀅𑀮𑀲𑀚𑀸𑀢𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀓𑀡𑁄𑀧𑀺 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀢𑀺, 𑀮𑀸𑀬𑀺𑀢𑀝𑁆𑀞𑀸𑀦𑀫𑁆𑀧𑀺 𑀦 𑀧𑀝𑀺𑀯𑀺𑀭𑀽𑀳𑀢𑀺.

𑀢𑁂 ¶ 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀦𑁆𑀢𑀺 ‘‘𑀧𑀸𑀧𑀓𑀸 𑀯𑀢 𑀪𑁄 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀫𑀬𑀁 𑀳𑀺 𑀧𑀼𑀩𑁆𑀩𑁂 𑀫𑀦𑁄𑀫𑀬𑀸 𑀅𑀳𑀼𑀫𑁆𑀳𑀸’’𑀢𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁨𑁮) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁄 𑀫𑀭𑀺𑀬𑀸𑀤𑀁 𑀞𑀧𑁂𑀦𑁆𑀢𑀺. 𑀅𑀣 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀪𑀸𑀲𑁂𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀧𑀸𑀡𑀺𑀮𑁂𑀝𑁆𑀝𑀼𑀤𑀡𑁆𑀟𑁂𑀳𑀺 𑀧𑀳𑀭𑀦𑁆𑀢𑀺. 𑀢𑁂 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀕𑀭𑀳𑀫𑀼𑀲𑀸𑀯𑀸𑀤𑀤𑀡𑁆𑀟𑀸𑀤𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑀺 ‘‘𑀬𑀁𑀦𑀽𑀦 𑀫𑀬𑀁 𑀏𑀓𑀁 𑀲𑀢𑁆𑀢𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫, 𑀬𑁄 𑀦𑁄 𑀲𑀫𑁆𑀫𑀸 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬𑁂𑀬𑁆𑀬, 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑁂𑀬𑁆𑀬, 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀫𑀬𑀁 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀸’’𑀢𑀺.

𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁂𑀲𑀼 𑀧𑀦 𑀲𑀢𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀢𑀸𑀯 𑀓𑀧𑁆𑀧𑁂 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀢𑁂𑀦 𑀲𑀫𑀬𑁂𑀦 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀪𑀺𑀭𑀽𑀧𑀢𑀭𑁄 𑀘 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀝𑀺𑀩𑀮𑁄 𑀦𑀺𑀕𑁆𑀕𑀳𑀧𑀕𑁆𑀕𑀳𑀁 𑀓𑀸𑀢𑀼𑀁. 𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀁𑀲𑀼. 𑀲𑁄 𑀢𑁂𑀦 𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑁄𑀢𑀺 𑀫𑀳𑀸𑀲𑀫𑁆𑀫𑀢𑁄, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑀢𑁆𑀢𑀺𑀬𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑁂 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸𑀢𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀬𑀜𑁆𑀳𑀺 𑀮𑁄𑀓𑁂 𑀅𑀘𑁆𑀙𑀭𑀺𑀬𑀝𑁆𑀞𑀸𑀦𑀁, 𑀩𑁄𑀥𑀺𑀲𑀢𑁆𑀢𑁄𑀯 𑀢𑀢𑁆𑀣 𑀆𑀤𑀺𑀧𑀼𑀭𑀺𑀲𑁄𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀔𑀢𑁆𑀢𑀺𑀬𑀫𑀡𑁆𑀟𑀮𑁂 𑀲𑀡𑁆𑀞𑀺𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀸𑀤𑀬𑁄𑀧𑀺 𑀯𑀡𑁆𑀡𑀸 𑀲𑀡𑁆𑀞𑀳𑀺𑀁𑀲𑀼.

𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀚𑀸𑀮𑀼𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺.

𑀓𑀧𑁆𑀧𑀯𑀺𑀦𑀸𑀲𑀓𑀚𑀸𑀮𑀼𑀧𑀘𑁆𑀙𑁂𑀤𑀢𑁄 ¶ 𑀬𑀸𑀯 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀧𑀽𑀭𑀓𑁄 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀢𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀢𑁄 𑀬𑀸𑀯 𑀧𑀼𑀦 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄, 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀏𑀯𑀁 𑀢𑀸𑀯 𑀅𑀕𑁆𑀕𑀺𑀦𑀸 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁭. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀧𑁆𑀧𑁄 𑀉𑀤𑀓𑁂𑀦 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 ¶ 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥 𑀓𑀧𑁆𑀧𑀯𑀺𑀦𑀸𑀲𑀓𑁄 𑀔𑀸𑀭𑀼𑀤𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺. 𑀲𑁄 𑀆𑀤𑀺𑀢𑁄 𑀲𑀼𑀔𑀼𑀫𑀁 𑀲𑀼𑀔𑀼𑀫𑀁 𑀯𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀥𑀸𑀭𑀸𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀁 𑀧𑀽𑀭𑁂𑀦𑁆𑀢𑁄 𑀯𑀲𑁆𑀲𑀢𑀺. 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀯𑀺𑀮𑀻𑀬𑀦𑁆𑀢𑀺, 𑀉𑀤𑀓𑀁 𑀲𑀫𑀦𑁆𑀢𑀢𑁄 𑀯𑀸𑀢𑁂𑀳𑀺 𑀥𑀸𑀭𑀺𑀬𑀢𑀺. 𑀧𑀣𑀯𑀺𑀢𑁄 𑀬𑀸𑀯 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀁 𑀉𑀤𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀢𑀁 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀯𑀽𑀧𑀲𑀫𑁆𑀫𑀢𑀺. 𑀉𑀤𑀓𑀸𑀦𑀼𑀕𑀢𑀁 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳𑀲𑀸 𑀯𑀽𑀧𑀲𑀫𑁆𑀫𑀢𑀺 𑀅𑀦𑁆𑀢𑀭𑀥𑀸𑀦𑀁 𑀕𑀘𑁆𑀙𑀢𑀺. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀓𑁂𑀯𑀮𑀁 𑀧𑀦𑀺𑀥 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀲𑀼𑀪𑀓𑀺𑀡𑁆𑀳𑀢𑁄 𑀘 𑀘𑀯𑀺𑀢𑁆𑀯𑀸 𑀆𑀪𑀲𑁆𑀲𑀭𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀼𑀤𑀓𑀽𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁. 𑀉𑀤𑀓𑀽𑀧𑀘𑁆𑀙𑁂𑀤𑀢𑁄 𑀬𑀸𑀯 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁. 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄…𑀧𑁂… 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀏𑀯𑀁 𑀉𑀤𑀓𑁂𑀦 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁮. 𑀬𑀲𑁆𑀫𑀺𑀁 ¶ 𑀲𑀫𑀬𑁂 𑀓𑀧𑁆𑀧𑁄 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥 𑀓𑀧𑁆𑀧𑀯𑀺𑀦𑀸𑀲𑀦𑀢𑁆𑀣𑀁 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀲𑁄 𑀧𑀞𑀫𑀁 𑀣𑀽𑀮𑀭𑀚𑀁 𑀉𑀝𑁆𑀞𑀸𑀧𑁂𑀢𑀺. 𑀢𑀢𑁄 𑀲𑀡𑁆𑀳𑀭𑀚𑀁 𑀲𑀼𑀔𑀼𑀫𑀯𑀸𑀮𑀺𑀓𑀁 𑀣𑀽𑀮𑀯𑀸𑀮𑀺𑀓𑀁 𑀲𑀓𑁆𑀔𑀭𑀧𑀸𑀲𑀸𑀡𑀸𑀤𑀬𑁄𑀢𑀺 𑀬𑀸𑀯 𑀓𑀽𑀝𑀸𑀕𑀸𑀭𑀫𑀢𑁆𑀢𑁂 𑀧𑀸𑀲𑀸𑀡𑁂 𑀯𑀺𑀲𑀫𑀝𑁆𑀞𑀸𑀦𑁂 𑀞𑀺𑀢𑀫𑀳𑀸𑀭𑀼𑀓𑁆𑀔𑁂 𑀘 𑀉𑀝𑁆𑀞𑀸𑀧𑁂𑀢𑀺. 𑀢𑁂 𑀧𑀣𑀯𑀺𑀢𑁄 𑀦𑀪𑀫𑀼𑀕𑁆𑀕𑀢𑀸 𑀦 𑀘 𑀧𑀼𑀦 𑀧𑀢𑀦𑁆𑀢𑀺. 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺.

𑀅𑀣𑀸𑀦𑀼𑀓𑁆𑀓𑀫𑁂𑀦 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺. 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀸𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑀸 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀘𑀢𑀼𑀬𑁄𑀚𑀦𑀧𑀜𑁆𑀘𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀸𑀧𑀺 𑀪𑀺𑀚𑁆𑀚𑀺𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸 𑀆𑀓𑀸𑀲𑁂𑀬𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀫𑁆𑀧𑀺 𑀯𑀸𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀳𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀪𑀼𑀫𑁆𑀫𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀯𑀺𑀦𑀸𑀲𑁂𑀦𑁆𑀢𑁄 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 ¶ 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀸𑀴𑀸 𑀘𑀓𑁆𑀓𑀯𑀸𑀴𑁂𑀳𑀺 𑀳𑀺𑀫𑀯𑀦𑁆𑀢𑀸 𑀳𑀺𑀫𑀯𑀦𑁆𑀢𑁂𑀳𑀺 𑀲𑀺𑀦𑁂𑀭𑀽 𑀲𑀺𑀦𑁂𑀭𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀧𑀣𑀯𑀺𑀢𑁄 𑀬𑀸𑀯 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀁 𑀯𑀸𑀢𑁄 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀏𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑀺𑀦𑀲𑁆𑀲𑀢𑀺. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀇𑀥 𑀧𑀦 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀯𑁂𑀳𑀧𑁆𑀨𑀮𑀢𑁄 𑀘 𑀘𑀯𑀺𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀯𑀸𑀢𑀽𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁. 𑀯𑀸𑀢𑀽𑀧𑀘𑁆𑀙𑁂𑀤𑀢𑁄 𑀬𑀸𑀯 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁…𑀧𑁂… 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀏𑀯𑀁 𑀯𑀸𑀢𑁂𑀦 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁯. 𑀓𑀺𑀁𑀓𑀸𑀭𑀡𑀸 ¶ 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺? 𑀅𑀓𑀼𑀲𑀮𑀫𑀽𑀮𑀓𑀸𑀭𑀡𑀸. 𑀅𑀓𑀼𑀲𑀮𑀫𑀽𑀮𑁂𑀲𑀼 𑀳𑀺 𑀉𑀲𑁆𑀲𑀦𑁆𑀦𑁂𑀲𑀼 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺. 𑀲𑁄 𑀘 𑀔𑁄 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺. 𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀺. 𑀓𑁂𑀘𑀺 𑀧𑀦 𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸. 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦𑀸𑀢𑀺 𑀯𑀤𑀦𑁆𑀢𑀺. 𑀫𑁄𑀳𑁂 𑀉𑀲𑁆𑀲𑀦𑁆𑀦𑀢𑀭𑁂 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺. 𑀏𑀯𑀁 𑀯𑀺𑀦𑀲𑁆𑀲𑀦𑁆𑀢𑁄𑀧𑀺 𑀘 𑀦𑀺𑀭𑀦𑁆𑀢𑀭𑀫𑁂𑀯 𑀲𑀢𑁆𑀢𑀯𑀸𑀭𑁂 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺. 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦. 𑀧𑀼𑀦 𑀲𑀢𑁆𑀢𑀯𑀸𑀭𑁂 𑀅𑀕𑁆𑀕𑀺𑀦𑀸. 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦𑀸𑀢𑀺 𑀏𑀯𑀁 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀯𑀸𑀭𑁂 𑀯𑀺𑀦𑀲𑁆𑀲𑀦𑁆𑀢𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀉𑀤𑀓𑁂𑀦 𑀯𑀺𑀦𑀲𑁆𑀲𑀺𑀢𑁆𑀯𑀸 𑀧𑀼𑀦 𑀲𑀢𑁆𑀢𑀯𑀸𑀭𑁂 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀲𑀝𑁆𑀞𑀺 𑀓𑀧𑁆𑀧𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀉𑀤𑀓𑁂𑀦 𑀦𑀲𑁆𑀲𑀦𑀯𑀸𑀭𑀁 𑀲𑀫𑁆𑀧𑀢𑁆𑀢𑀫𑁆𑀧𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑁄 𑀯𑀸𑀢𑁄 𑀧𑀭𑀺𑀧𑀼𑀡𑁆𑀡𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀬𑀼𑀓𑁂 𑀲𑀼𑀪𑀓𑀺𑀡𑁆𑀳𑁂 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀮𑁄𑀓𑀁 𑀯𑀺𑀦𑀸𑀲𑁂𑀢𑀺.

𑁪𑁧𑁦. 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀘 𑀓𑀧𑁆𑀧𑀸𑀦𑀼𑀲𑁆𑀲𑀭𑀡𑀓𑁄 𑀪𑀺𑀓𑁆𑀔𑀼 𑀏𑀢𑁂𑀲𑀼 𑀓𑀧𑁆𑀧𑁂𑀲𑀼 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀢𑀺. 𑀓𑀣𑀁? ‘‘𑀅𑀫𑀼𑀢𑁆𑀭𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁪𑁪) 𑀦𑀬𑁂𑀦.

𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀳𑀁 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀸 𑀯𑀸 𑀕𑀢𑀺𑀬𑀸 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀆𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀓𑀘𑁆𑀘𑀸𑀦𑁄 𑀯𑀸 𑀓𑀲𑁆𑀲𑀧𑁄 𑀯𑀸. 𑀇𑀤𑀫𑀲𑁆𑀲 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀯𑀲𑁂𑀦 ¶ 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀯𑀸 𑀮𑀽𑀔𑀧𑀡𑀻𑀢𑀚𑀻𑀯𑀺𑀓𑀪𑀸𑀯𑀁 𑀯𑀸 𑀲𑀼𑀔𑀤𑀼𑀓𑁆𑀔𑀩𑀳𑀼𑀮𑀢𑀁 𑀯𑀸 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀪𑀸𑀯𑀁 𑀯𑀸 𑀅𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀫𑁆𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀏𑀯𑀁𑀯𑀡𑁆𑀡𑁄…𑀧𑁂… 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺.

𑀢𑀢𑁆𑀣 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀺𑀫𑀸𑀡𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄𑀳𑀁 𑀢𑀢𑁄 ¶ 𑀪𑀯𑀢𑁄 𑀬𑁄𑀦𑀺𑀢𑁄 𑀕𑀢𑀺𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀢𑁄 𑀲𑀢𑁆𑀢𑀸𑀯𑀸𑀲𑀢𑁄 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄 𑀧𑀼𑀦 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀅𑀣 𑀢𑀢𑁆𑀭𑀸𑀧𑀺 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀧𑀼𑀦 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀺𑀘 𑀬𑀲𑁆𑀫𑀸 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀁. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀢𑀲𑁆𑀫𑀸 ‘‘𑀇𑀥𑀽𑀧𑀧𑀦𑁆𑀦𑁄’’𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀫𑁂𑀯𑀲𑁆𑀲 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀅𑀫𑀼𑀢𑁆𑀭 𑀉𑀤𑀧𑀸𑀤𑀺’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀏𑀯𑀫𑀸𑀤𑀺 𑀧𑀦𑀲𑁆𑀲 𑀢𑀢𑁆𑀭 𑀇𑀫𑀺𑀲𑁆𑀲𑀸 𑀉𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑁂 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀦𑀸𑀫𑀕𑁄𑀢𑁆𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺 𑀲𑁆𑀯𑀸𑀳𑀁 𑀢𑀢𑁄 𑀅𑀦𑀦𑁆𑀢𑀭𑀽𑀧𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀘𑀼𑀢𑁄 𑀇𑀥 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀇𑀢𑀻𑀢𑀺 𑀏𑀯𑀁. 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀲𑀉𑀤𑁆𑀤𑁂𑀲𑀁, 𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀸𑀓𑀸𑀭𑀁. 𑀦𑀸𑀫𑀕𑁄𑀢𑁆𑀢𑁂𑀦 𑀳𑀺 𑀲𑀢𑁆𑀢𑁄 𑀢𑀺𑀲𑁆𑀲𑁄 𑀓𑀲𑁆𑀲𑀧𑁄𑀢𑀺 𑀉𑀤𑁆𑀤𑀺𑀲𑀻𑀬𑀢𑀺. 𑀯𑀡𑁆𑀡𑀸𑀤𑀻𑀳𑀺 𑀲𑀸𑀫𑁄 𑀑𑀤𑀸𑀢𑁄𑀢𑀺 𑀦𑀸𑀦𑀢𑁆𑀢𑀢𑁄 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄, 𑀇𑀢𑀭𑁂 𑀆𑀓𑀸𑀭𑀸. 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀫𑀦𑀼𑀲𑁆𑀲𑀭𑀢𑀻𑀢𑀺 𑀇𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀢𑀽𑀧𑀧𑀸𑀢𑀜𑀸𑀡𑀓𑀣𑀸

𑁪𑁧𑁧. 𑀲𑀢𑁆𑀢𑀸𑀦𑀁 ¶ 𑀘𑀼𑀢𑀽𑀧𑀧𑀸𑀢𑀜𑀸𑀡𑀓𑀣𑀸𑀬 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬𑀸𑀢𑀺 (𑀤𑀻. 𑀦𑀺. 𑁧.𑁨𑁪𑁭) 𑀘𑀼𑀢𑀺𑀬𑀸 𑀘 𑀉𑀧𑀧𑀸𑀢𑁂 𑀘 𑀜𑀸𑀡𑀸𑀬. 𑀬𑁂𑀦 𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘 𑀉𑀧𑀧𑀸𑀢𑁄 𑀘 𑀜𑀸𑀬𑀢𑀺, 𑀢𑀤𑀢𑁆𑀣𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻𑀢𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀘𑁂𑀯 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀘. 𑀲𑁄𑀢𑀺 𑀲𑁄 𑀓𑀢𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀪𑀺𑀓𑁆𑀔𑀼. 𑀤𑀺𑀩𑁆𑀩𑁂𑀦𑀸𑀢𑀺𑀆𑀤𑀻𑀲𑀼 𑀧𑀦 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 ¶ 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼. 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀁. 𑀬𑁄 𑀳𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀉𑀧𑀧𑀸𑀢𑀁. 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸𑀲𑁆𑀲 𑀢𑀁𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀩𑀼𑀤𑁆𑀥𑀧𑀼𑀢𑁆𑀢𑀸 𑀧𑀲𑁆𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺.

𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁, 𑀫𑀸𑀦𑀼𑀲𑀓𑀁 𑀯𑀸 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦. 𑀲𑀢𑁆𑀢𑁂 𑀧𑀲𑁆𑀲𑀢𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀑𑀮𑁄𑀓𑁂𑀢𑀺.

𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸. 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀘𑀯𑀫𑀸𑀦𑀸. 𑀬𑁂 𑀘 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺𑀦𑀺𑀩𑁆𑀩𑀢𑁆𑀢𑀸𑀯, 𑀢𑁂 𑀉𑀧𑀧𑀚𑁆𑀚𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀘 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀳𑀻𑀦𑁂𑀢𑀺 ¶ 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑀸𑀦𑀁 𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀻𑀦𑀁 𑀯𑀲𑁂𑀦 𑀳𑀻𑀴𑀺𑀢𑁂 𑀑𑀳𑀻𑀴𑀺𑀢𑁂 𑀑𑀜𑁆𑀜𑀸𑀢𑁂 𑀅𑀯𑀜𑁆𑀜𑀸𑀢𑁂. 𑀧𑀡𑀻𑀢𑁂𑀢𑀺 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀧𑀭𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀸𑀓𑀦𑁆𑀢𑀅𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀅𑀦𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺𑀧𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂. 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂. 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂.

𑀬𑀣𑀸𑀓𑀫𑁆𑀫𑀼𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀘𑀯𑀫𑀸𑀦𑁂𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀓𑀺𑀘𑁆𑀘𑀁. 𑀢𑀲𑁆𑀲 𑀘 𑀜𑀸𑀡𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄, 𑀇𑀥 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀦𑀺𑀭𑀬𑀸𑀪𑀺𑀫𑀼𑀔𑀁 ¶ 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑁂𑀭𑀬𑀺𑀓𑁂 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀤𑀼𑀓𑁆𑀔𑀫𑀦𑀼𑀪𑀯𑀫𑀸𑀦𑁂. 𑀢𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺𑀓𑀭𑁄𑀢𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. 𑀅𑀣𑀲𑁆𑀲 𑀇𑀤𑀁 𑀦𑀸𑀫 𑀓𑀢𑁆𑀯𑀸𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀉𑀧𑀭𑀺𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑀦𑁆𑀤𑀦𑀯𑀦𑀫𑀺𑀲𑁆𑀲𑀓𑀯𑀦𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀼 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂. 𑀢𑀫𑁆𑀧𑀺 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺𑀓𑀭𑁄𑀢𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. 𑀅𑀣𑀲𑁆𑀲 𑀇𑀤𑀁 𑀦𑀸𑀫 𑀓𑀢𑁆𑀯𑀸𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀦𑀸𑀫. 𑀇𑀫𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀬𑀣𑀸 𑀘𑀺𑀫𑀲𑁆𑀲, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀤𑀼𑀝𑁆𑀞𑀁 𑀯𑀸 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸𑀢𑀺 𑀤𑀼𑀘𑁆𑀘𑀭𑀺𑀢𑀁. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸. 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸 𑀅𑀓𑁆𑀓𑁄𑀲𑀓𑀸 𑀕𑀭𑀳𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄, 𑀅𑀲𑁆𑀲𑀫𑀡𑀸 𑀏𑀢𑁂𑀢𑀺 𑀯𑀤𑀦𑁆𑀢𑁄 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀉𑀧𑀯𑀤𑀢𑀺. 𑀦𑀢𑁆𑀣𑀺 𑀇𑀫𑁂𑀲𑀁 𑀛𑀸𑀦𑀁 𑀯𑀸 𑀯𑀺𑀫𑁄𑀓𑁆𑀔𑁄 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀕𑀼𑀡𑀧𑀭𑀺𑀥𑀁𑀲𑀦𑀯𑀲𑁂𑀦 𑀉𑀧𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀚𑀸𑀦𑀁 𑀯𑀸 𑀉𑀧𑀯𑀤𑁂𑀬𑁆𑀬 𑀅𑀚𑀸𑀦𑀁 𑀯𑀸, 𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀺. 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀲𑀕𑁆𑀕𑀸𑀯𑀭𑀡𑀜𑁆𑀘 𑀫𑀕𑁆𑀕𑀸𑀯𑀭𑀡𑀜𑁆𑀘, 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺. 𑀢𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑀢𑀭𑀲𑁆𑀫𑀺𑀁 ¶ 𑀓𑀺𑀭 𑀕𑀸𑀫𑁂 𑀏𑀓𑁄 𑀣𑁂𑀭𑁄 𑀘 𑀤𑀳𑀭𑀪𑀺𑀓𑁆𑀔𑀼 𑀘 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀢𑁂 𑀧𑀞𑀫𑀖𑀭𑁂𑀬𑁂𑀯 𑀉𑀴𑀼𑀗𑁆𑀓𑀫𑀢𑁆𑀢𑀁 𑀉𑀡𑁆𑀳𑀬𑀸𑀕𑀼𑀁 𑀮𑀪𑀺𑀁𑀲𑀼. 𑀣𑁂𑀭𑀲𑁆𑀲 𑀘 𑀓𑀼𑀘𑁆𑀙𑀺𑀯𑀸𑀢𑁄 𑀭𑀼𑀚𑁆𑀛𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀬𑀸𑀕𑀼 𑀫𑀬𑁆𑀳𑀁 𑀲𑀧𑁆𑀧𑀸𑀬𑀸, 𑀬𑀸𑀯 𑀦 𑀲𑀻𑀢𑀮𑀸 𑀳𑁄𑀢𑀺, 𑀢𑀸𑀯 𑀦𑀁 𑀧𑀺𑀯𑀸𑀫𑀻’’𑀢𑀺. 𑀲𑁄 𑀫𑀦𑀼𑀲𑁆𑀲𑁂𑀳𑀺 𑀉𑀫𑁆𑀫𑀸𑀭𑀢𑁆𑀣𑀸𑀬 𑀆𑀳𑀝𑁂 𑀤𑀸𑀭𑀼𑀔𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀯𑀺. 𑀇𑀢𑀭𑁄 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀅𑀢𑀺𑀔𑀼𑀤𑁆𑀤𑀸𑀪𑀺𑀪𑀽𑀢𑁄 𑀫𑀳𑀮𑁆𑀮𑀓𑁄, 𑀅𑀫𑁆𑀳𑀸𑀓𑀁 𑀮𑀚𑁆𑀚𑀺𑀢𑀩𑁆𑀩𑀓𑀁 𑀅𑀓𑀸𑀲𑀻’’𑀢𑀺 𑀆𑀳. 𑀣𑁂𑀭𑁄 ¶ 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀳𑀭𑀪𑀺𑀓𑁆𑀔𑀼𑀁 𑀆𑀳 ‘‘𑀅𑀢𑁆𑀣𑀺 𑀢𑁂, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸’’𑀢𑀺? 𑀆𑀫, 𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑁄 𑀅𑀳𑀦𑁆𑀢𑀺. 𑀢𑁂𑀦 𑀳𑀸𑀯𑀼𑀲𑁄, 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀸𑀬𑀸𑀫𑀁 𑀫𑀸 𑀅𑀓𑀸𑀲𑀺. 𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄𑀢𑀺. 𑀲𑁄 𑀢𑀁 𑀔𑀫𑀸𑀧𑁂𑀲𑀺. 𑀢𑁂𑀦𑀲𑁆𑀲 𑀢𑀁 𑀓𑀫𑁆𑀫𑀁 𑀧𑀸𑀓𑀢𑀺𑀓𑀁 𑀅𑀳𑁄𑀲𑀺.

𑀢𑀲𑁆𑀫𑀸 𑀬𑁄 𑀅𑀜𑁆𑀜𑁄𑀧𑀺 𑀅𑀭𑀺𑀬𑀁 𑀉𑀧𑀯𑀤𑀢𑀺, 𑀢𑁂𑀦 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀸𑀳𑀻’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦𑀯𑀓𑀢𑀭𑁄 𑀳𑁄𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀓𑁂 𑀯𑀸 𑀧𑁂𑀲𑁂𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄.

𑀲𑀘𑁂 𑀘 𑀦𑀸𑀧𑀺 𑀕𑀦𑁆𑀢𑀼𑀁, 𑀦 𑀧𑁂𑀲𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀦𑀯𑀓𑀢𑀭𑀸 𑀳𑁄𑀦𑁆𑀢𑀺, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀘𑁂 𑀯𑀼𑀟𑁆𑀠𑀢𑀭𑀸, 𑀯𑀼𑀟𑁆𑀠𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀔𑀫𑀢𑀼 𑀫𑁂 𑀲𑁄 𑀆𑀬𑀲𑁆𑀫𑀸’’𑀢𑀺 𑀯𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑀁. 𑀲𑀫𑁆𑀫𑀼𑀔𑀸 𑀅𑀔𑀫𑀦𑁆𑀢𑁂𑀧𑀺 𑀏𑀢𑀤𑁂𑀯 𑀓𑀢𑁆𑀢𑀩𑁆𑀩𑀁.

𑀲𑀘𑁂 𑀏𑀓𑀘𑀸𑀭𑀺𑀓𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁂𑀯𑀲𑁆𑀲 𑀯𑀲𑀦𑀝𑁆𑀞𑀸𑀦𑀁, 𑀦 𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀏𑀓𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀅𑀦𑀼𑀲𑁆𑀲𑀭𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀳𑁄𑀢𑀺, 𑀓𑀺𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁄 𑀯𑀓𑁆𑀔𑀢𑀺 ‘‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀣𑁂𑀭𑁄 𑀢𑀼𑀫𑁆𑀳𑀸𑀓𑀁 𑀔𑀫𑀢𑀺, 𑀘𑀺𑀢𑁆𑀢𑀁 𑀯𑀽𑀧𑀲𑀫𑁂𑀣𑀸’’𑀢𑀺. 𑀢𑁂𑀦𑀸𑀧𑀺 𑀅𑀭𑀺𑀬𑀲𑁆𑀲 𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀔𑀫𑀢𑀽𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀯𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀧𑀺 𑀔𑀫𑀸𑀧𑁂𑀢𑀩𑁆𑀩𑀁. 𑀏𑀯𑀁 𑀓𑀢𑁂 𑀦𑁂𑀯 𑀲𑀕𑁆𑀕𑀸𑀯𑀭𑀡𑀁, 𑀦 𑀫𑀕𑁆𑀕𑀸𑀯𑀭𑀡𑀁 𑀳𑁄𑀢𑀺, 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 ¶ 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸, 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 𑀲𑀫𑀸𑀤𑀧𑁂𑀦𑁆𑀢𑀺. 𑀏𑀢𑁆𑀣 𑀘 𑀯𑀘𑀻𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦𑁂𑀯 𑀅𑀭𑀺𑀬𑀽𑀧𑀯𑀸𑀤𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑀺𑀢𑀸𑀬𑀧𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀦 𑀯𑀘𑀦𑀁 ¶ 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀸𑀯𑀚𑁆𑀚𑁄 𑀳𑀺 𑀅𑀭𑀺𑀬𑀽𑀧𑀯𑀸𑀤𑁄, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀢𑁆𑀢𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂’’𑀢𑀺 (𑀫. 𑀦𑀺. 𑁧.𑁧𑁪𑁯). 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀘 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀣𑀸𑀳 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀫𑁆𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀓𑁆𑀔𑀦𑁆𑀥𑀕𑁆𑀕𑀳𑀡𑁂. 𑀅𑀣 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸. 𑀧𑀭𑀫𑁆𑀫𑀭𑀡𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀫𑁂𑀯.

𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄. 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀧𑀢𑀦𑁆𑀢𑀺 𑀲𑀁𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺𑀧𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀦 𑀤𑀼𑀕𑁆𑀕𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁. 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘, 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸. 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀺 𑀘 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 ¶ 𑀅𑀯𑀻𑀘𑀺𑀆𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯𑀸𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 ¶ 𑀧𑀦 𑀯𑀺𑀲𑁂𑀲𑁄, 𑀢𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄.

‘‘𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀕𑀫𑀦𑀯𑀘𑀦𑀁. 𑀏𑀯𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸…𑀧𑁂… 𑀧𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄.

𑁪𑁧𑁨. 𑀏𑀯𑀁 𑀧𑀲𑁆𑀲𑀺𑀢𑀼𑀓𑀸𑀫𑁂𑀦 𑀧𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀓𑀲𑀺𑀡𑀸𑀭𑀫𑁆𑀫𑀡𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 ‘‘𑀢𑁂𑀚𑁄𑀓𑀲𑀺𑀡𑀁, 𑀑𑀤𑀸𑀢𑀓𑀲𑀺𑀡𑀁, 𑀆𑀮𑁄𑀓𑀓𑀲𑀺𑀡’’𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀓𑀲𑀺𑀡𑁂𑀲𑀼 𑀅𑀜𑁆𑀜𑀢𑀭𑀁 𑀆𑀲𑀦𑁆𑀦𑀁 𑀓𑀸𑀢𑀩𑁆𑀩𑀁. 𑀉𑀧𑀘𑀸𑀭𑀚𑁆𑀛𑀸𑀦𑀕𑁄𑀘𑀭𑀁 𑀓𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀦 𑀢𑀢𑁆𑀣 𑀅𑀧𑁆𑀧𑀦𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀳𑀺 𑀉𑀧𑁆𑀧𑀸𑀤𑁂𑀢𑀺, 𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀦 𑀧𑀭𑀺𑀓𑀫𑁆𑀫𑀦𑀺𑀲𑁆𑀲𑀬𑀁. 𑀇𑀫𑁂𑀲𑀼 𑀘 𑀧𑀦 𑀢𑀻𑀲𑀼 𑀆𑀮𑁄𑀓𑀓𑀲𑀺𑀡𑀁𑀬𑁂𑀯 𑀲𑁂𑀝𑁆𑀞𑀢𑀭𑀁. 𑀢𑀲𑁆𑀫𑀸 𑀢𑀁 𑀯𑀸 𑀇𑀢𑀭𑁂𑀲𑀁 𑀯𑀸 𑀅𑀜𑁆𑀜𑀢𑀭𑀁 𑀓𑀲𑀺𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯 𑀞𑀢𑁆𑀯𑀸 𑀯𑀟𑁆𑀠𑁂𑀢𑀩𑁆𑀩𑀁. 𑀯𑀟𑁆𑀠𑀦𑀸𑀦𑀬𑁄𑀧𑀺 𑀘𑀲𑁆𑀲 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀯𑀟𑁆𑀠𑀺𑀢𑀝𑁆𑀞𑀸𑀦𑀲𑁆𑀲 𑀅𑀦𑁆𑀢𑁄𑀬𑁂𑀯 𑀭𑀽𑀧𑀕𑀢𑀁 𑀧𑀲𑁆𑀲𑀺𑀢𑀩𑁆𑀩𑀁. 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀧𑀦𑀲𑁆𑀲 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀅𑀢𑀺𑀓𑁆𑀓𑀫𑀢𑀺. 𑀢𑀢𑁄 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀫𑁆𑀧𑀺 𑀦 𑀤𑀺𑀲𑁆𑀲𑀢𑀺. 𑀅𑀣𑀸𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀆𑀮𑁄𑀓𑁄 𑀨𑀭𑀺𑀢𑀩𑁆𑀩𑁄. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀆𑀮𑁄𑀓𑁄 𑀣𑀸𑀫𑀕𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀆𑀮𑁄𑀓𑁄 𑀳𑁄𑀢𑀽𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀢𑀢𑁆𑀣 𑀆𑀮𑁄𑀓𑁄 𑀢𑀺𑀝𑁆𑀞𑀢𑀺𑀬𑁂𑀯. 𑀤𑀺𑀯𑀲𑀫𑁆𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀧𑀲𑁆𑀲𑀢𑁄 𑀭𑀽𑀧𑀤𑀲𑁆𑀲𑀦𑀁 𑀳𑁄𑀢𑀺. 𑀭𑀢𑁆𑀢𑀺𑀁 𑀢𑀺𑀡𑀼𑀓𑁆𑀓𑀸𑀬 𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀘𑁂𑀢𑁆𑀣 𑀧𑀼𑀭𑀺𑀲𑁄 𑀑𑀧𑀫𑁆𑀫𑀁.

𑀏𑀓𑁄 𑀓𑀺𑀭 𑀭𑀢𑁆𑀢𑀺𑀁 𑀢𑀺𑀡𑀼𑀓𑁆𑀓𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀲 𑀲𑀸 𑀢𑀺𑀡𑀼𑀓𑁆𑀓𑀸 𑀯𑀺𑀚𑁆𑀛𑀸𑀬𑀺. 𑀅𑀣𑀲𑁆𑀲 𑀲𑀫𑀯𑀺𑀲𑀫𑀸𑀦𑀺 𑀦 𑀧𑀜𑁆𑀜𑀸𑀬𑀺𑀁𑀲𑀼. 𑀲𑁄 𑀢𑀁 𑀢𑀺𑀡𑀼𑀓𑁆𑀓𑀁 𑀪𑀽𑀫𑀺𑀬𑀁 𑀖𑀁𑀲𑀺𑀢𑁆𑀯𑀸 𑀢𑀺𑀡𑀼𑀓𑁆𑀓𑀸 𑀧𑀼𑀦 𑀉𑀚𑁆𑀚𑀸𑀮𑁂𑀲𑀺. 𑀲𑀸 𑀧𑀚𑁆𑀚𑀮𑀺𑀢𑁆𑀯𑀸 𑀧𑀼𑀭𑀺𑀫𑀸𑀮𑁄𑀓𑀢𑁄 𑀫𑀳𑀦𑁆𑀢𑀢𑀭𑀁 𑀆𑀮𑁄𑀓𑀁 𑀅𑀓𑀸𑀲𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀯𑀺𑀚𑁆𑀛𑀸𑀢𑀁 ¶ 𑀉𑀚𑁆𑀚𑀸𑀮𑀬𑀢𑁄 𑀓𑀫𑁂𑀦 𑀲𑀽𑀭𑀺𑀬𑁄 𑀉𑀝𑁆𑀞𑀸𑀲𑀺. 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 𑀉𑀓𑁆𑀓𑀸𑀬 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀅𑀕𑀫𑀸𑀲𑀺. 𑀢𑀢𑁆𑀣 𑀉𑀓𑁆𑀓𑀸𑀮𑁄𑀓𑁄 𑀯𑀺𑀬 𑀧𑀭𑀺𑀓𑀫𑁆𑀫𑀓𑀸𑀮𑁂 𑀓𑀲𑀺𑀡𑀸𑀮𑁄𑀓𑁄. 𑀉𑀓𑁆𑀓𑀸𑀬 ¶ 𑀯𑀺𑀚𑁆𑀛𑀸𑀢𑀸𑀬 𑀲𑀫𑀯𑀺𑀲𑀫𑀸𑀦𑀁 𑀅𑀤𑀲𑁆𑀲𑀦𑀁 𑀯𑀺𑀬 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑀸𑀢𑀺𑀓𑁆𑀓𑀫𑁂𑀦 𑀆𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀸𑀦𑀁 𑀅𑀤𑀲𑁆𑀲𑀦𑀁. 𑀉𑀓𑁆𑀓𑀸𑀬 𑀖𑀁𑀲𑀦𑀁 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀧𑀯𑁂𑀲𑀦𑀁. 𑀉𑀓𑁆𑀓𑀸𑀬 𑀧𑀼𑀭𑀺𑀫𑀸𑀮𑁄𑀓𑀢𑁄 𑀫𑀳𑀦𑁆𑀢𑀢𑀭𑀸𑀮𑁄𑀓𑀓𑀭𑀡𑀁 𑀯𑀺𑀬 𑀧𑀼𑀦 𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑁄 𑀩𑀮𑀯𑀢𑀭𑀸𑀮𑁄𑀓𑀨𑀭𑀡𑀁. 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀯𑀺𑀬 𑀣𑀸𑀫𑀕𑀢𑀸𑀮𑁄𑀓𑀲𑁆𑀲 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀞𑀸𑀦𑀁. 𑀢𑀺𑀡𑀼𑀓𑁆𑀓𑀁 𑀙𑀟𑁆𑀟𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀕𑀫𑀦𑀁 𑀯𑀺𑀬 𑀧𑀭𑀺𑀢𑁆𑀢𑀸𑀮𑁄𑀓𑀁 𑀙𑀟𑁆𑀟𑁂𑀢𑁆𑀯𑀸 𑀣𑀸𑀫𑀕𑀢𑁂𑀦𑀸𑀮𑁄𑀓𑁂𑀦 𑀤𑀺𑀯𑀲𑀫𑁆𑀧𑀺 𑀭𑀽𑀧𑀤𑀲𑁆𑀲𑀦𑀁.

𑀢𑀢𑁆𑀣 𑀬𑀤𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀁𑀲𑀘𑀓𑁆𑀔𑀼𑀲𑁆𑀲 𑀅𑀦𑀸𑀧𑀸𑀣𑀕𑀢𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀳𑁂𑀝𑁆𑀞𑀸𑀧𑀣𑀯𑀻𑀢𑀮𑀦𑀺𑀲𑁆𑀲𑀺𑀢𑀁 𑀢𑀺𑀭𑁄𑀓𑀼𑀝𑁆𑀝𑀧𑀩𑁆𑀩𑀢𑀧𑀸𑀓𑀸𑀭𑀕𑀢𑀁 𑀧𑀭𑀘𑀓𑁆𑀓𑀯𑀸𑀴𑀕𑀢𑀦𑁆𑀢𑀺 𑀇𑀤𑀁 𑀭𑀽𑀧𑀁 𑀜𑀸𑀡𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀲𑁆𑀲𑀫𑀸𑀦𑀁 𑀯𑀺𑀬 𑀳𑁄𑀢𑀺, 𑀢𑀤𑀸 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑁂𑀯 𑀘𑁂𑀢𑁆𑀣 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀁, 𑀦 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺.

𑀢𑀁 𑀧𑀦𑁂𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀩𑀦𑁆𑀥𑁄 𑀳𑁄𑀢𑀺. 𑀓𑀲𑁆𑀫𑀸? 𑀲𑁄 𑀳𑀺 𑀬𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀆𑀮𑁄𑀓𑁄 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀢𑀺, 𑀢𑀁 𑀢𑀁 𑀧𑀣𑀯𑀻𑀲𑀫𑀼𑀤𑁆𑀤𑀧𑀩𑁆𑀩𑀢𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀧𑀺 𑀏𑀓𑀸𑀮𑁄𑀓𑀁 𑀳𑁄𑀢𑀺, 𑀅𑀣𑀲𑁆𑀲 𑀢𑀢𑁆𑀣 𑀪𑀬𑀸𑀦𑀓𑀸𑀦𑀺 𑀬𑀓𑁆𑀔𑀭𑀓𑁆𑀔𑀲𑀸𑀤𑀺𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀢𑁆𑀯𑀸 𑀛𑀸𑀦𑀯𑀺𑀩𑁆𑀪𑀦𑁆𑀢𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀭𑀽𑀧𑀤𑀲𑁆𑀲𑀦𑁂 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀢𑀁 𑀭𑀽𑀧𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺. 𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀣𑀲𑀸𑀥𑀓𑀘𑀺𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀭𑀽𑀧𑀸𑀯𑀘𑀭𑀁. 𑀢𑁂𑀦 𑀲𑀳𑀚𑀸𑀢𑀁 𑀜𑀸𑀡𑀁 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑁂 𑀜𑀸𑀡𑀦𑁆𑀢𑀺𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺.

𑀘𑀼𑀢𑀽𑀧𑀧𑀸𑀢𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸

𑁪𑁧𑁩.

𑀇𑀢𑀺 ¶ 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀤𑀽, 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀯𑁄𑀘 𑀬𑀸 𑀦𑀸𑀣𑁄;

𑀢𑀸 𑀜𑀢𑁆𑀯𑀸 𑀢𑀸𑀲𑀼 𑀅𑀬𑀁, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀏𑀢𑀸𑀲𑀼 ¶ 𑀳𑀺 𑀬𑀤𑁂𑀢𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑀗𑁆𑀔𑀸𑀢𑀁 𑀤𑀺𑀩𑁆𑀩𑀘𑀓𑁆𑀔𑀼, 𑀢𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀜𑁆𑀘𑀸𑀢𑀺 𑀤𑁆𑀯𑁂𑀧𑀺 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀤𑁆𑀯𑁂 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀺 𑀘 𑀧𑀜𑁆𑀘𑀸𑀢𑀺 𑀲𑀢𑁆𑀢 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀇𑀥𑀸𑀕𑀢𑀸𑀦𑀺. 𑀇𑀤𑀸𑀦𑀺 𑀢𑁂𑀲𑀁 𑀆𑀭𑀫𑁆𑀫𑀡𑀯𑀺𑀪𑀸𑀕𑁂 𑀅𑀲𑀫𑁆𑀫𑁄𑀳𑀢𑁆𑀣𑀁 𑁋

𑀆𑀭𑀫𑁆𑀫𑀡𑀢𑁆𑀢𑀺𑀓𑀸 𑀯𑀼𑀢𑁆𑀢𑀸, 𑀬𑁂 𑀘𑀢𑁆𑀢𑀸𑀭𑁄 𑀫𑀳𑁂𑀲𑀺𑀦𑀸;

𑀲𑀢𑁆𑀢𑀦𑁆𑀦𑀫𑀧𑀺 𑀜𑀸𑀡𑀸𑀦𑀁, 𑀧𑀯𑀢𑁆𑀢𑀺𑀁 𑀢𑁂𑀲𑀼 𑀤𑀻𑀧𑀬𑁂.

𑀢𑀢𑁆𑀭𑀸𑀬𑀁 𑀤𑀻𑀧𑀦𑀸. 𑀘𑀢𑁆𑀢𑀸𑀭𑁄 𑀳𑀺 𑀆𑀭𑀫𑁆𑀫𑀡𑀢𑁆𑀢𑀺𑀓𑀸 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄, 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁄, 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄, 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁩, 𑁧𑁬, 𑁧𑁯, 𑁨𑁧).

𑁪𑁧𑁪. 𑀢𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀲𑀢𑁆𑀢𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀬𑀤𑀸 𑀓𑀸𑀬𑀁 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀺, 𑀫𑀳𑀕𑁆𑀕𑀢𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺 𑀲𑀫𑀸𑀭𑁄𑀧𑁂𑀢𑀺, 𑀢𑀤𑀸 𑀉𑀧𑀬𑁄𑀕𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀭𑀽𑀧𑀓𑀸𑀬𑀸𑀭𑀫𑁆𑀫𑀡𑀢𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀤𑀸 𑀘𑀺𑀢𑁆𑀢𑀁 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺, 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀭𑀽𑀧𑀓𑀸𑀬𑁂 𑀲𑀫𑁄𑀤𑀳𑀢𑀺 𑀲𑀫𑀸𑀭𑁄𑀧𑁂𑀢𑀺, 𑀢𑀤𑀸 𑀉𑀧𑀬𑁄𑀕𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀬𑀲𑁆𑀫𑀸 𑀧𑀦 𑀢𑀤𑁂𑀯 𑀘𑀺𑀢𑁆𑀢𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀅𑀢𑀻𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀅𑀦𑀸𑀕𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀦𑀸𑀕𑀢𑁂 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂𑀯𑀲𑁆𑀲𑀲𑀢𑀸𑀦𑀺 𑀇𑀫𑁂 𑀕𑀦𑁆𑀥𑀸 𑀫𑀸 𑀲𑀼𑀲𑁆𑀲𑀺𑀁𑀲𑀼, 𑀧𑀼𑀧𑁆𑀨𑀸𑀦𑀺 𑀫𑀸 𑀫𑀺𑀮𑀸𑀬𑀺𑀁𑀲𑀼, 𑀤𑀻𑀧𑀸 𑀫𑀸 𑀦𑀺𑀩𑁆𑀩𑀸𑀬𑀺𑀁𑀲𑀽’’𑀢𑀺 ¶ (𑀥. 𑀲. 𑀅𑀝𑁆𑀞. 𑁧𑁪𑁩𑁪) 𑀅𑀥𑀺𑀝𑁆𑀞𑀳𑀺. 𑀲𑀩𑁆𑀩𑀁 𑀢𑀣𑁂𑀯 𑀅𑀳𑁄𑀲𑀺. 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑁄 𑀯𑀢𑁆𑀢𑀦𑀺𑀬𑀲𑁂𑀦𑀸𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀼𑀓𑁆𑀔𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀁 𑀤𑀺𑀲𑁆𑀯𑀸 𑀉𑀤𑀓𑀲𑁄𑀡𑁆𑀟𑀺𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀼𑀭𑁂𑀪𑀢𑁆𑀢𑁂 𑀤𑀥𑀺𑀭𑀲𑀁 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀧𑀼𑀭𑁂𑀪𑀢𑁆𑀢𑁂 𑀕𑀳𑀺𑀢𑀁 𑀤𑀥𑀺𑀭𑀲𑀁 𑀳𑁄𑀢𑀺. 𑀧𑀘𑁆𑀙𑀸𑀪𑀢𑁆𑀢𑁂 𑀧𑀸𑀓𑀢𑀺𑀓𑀉𑀤𑀓𑀫𑁂𑀯 (𑀥. 𑀲. 𑀅𑀝𑁆𑀞. 𑁧𑁪𑁩𑁪). 𑀓𑀸𑀬𑀁 𑀧𑀦 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 ¶ 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀫𑀦𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀯𑀲𑁂𑀦 𑀯𑀸 𑀓𑀸𑀬𑀁 𑀧𑀭𑀺𑀡𑀸𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀓𑀼𑀫𑀸𑀭𑀓𑀯𑀡𑁆𑀡𑀸𑀤𑀺𑀦𑀺𑀫𑁆𑀫𑀸𑀦𑀓𑀸𑀮𑁂 𑀘 𑀲𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀢𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀤𑀲𑁆𑀲𑀦𑀓𑀸𑀮𑁂 𑀧𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀢𑀸𑀯 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀲𑀢𑁆𑀢𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁫. 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀬𑀲𑁆𑀫𑀸 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀤𑁆𑀤𑁄 𑀘 𑀧𑀭𑀺𑀢𑁆𑀢𑁄, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀁𑀬𑁂𑀯 𑀧𑀦 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀁 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀲𑀤𑁆𑀤𑀲𑀯𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑁂𑀲𑀁 𑀲𑀤𑁆𑀤𑀲𑀯𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀲𑁆𑀲 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁬. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀫𑀕𑁆𑀕𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀧𑀭𑁂𑀲𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀫𑀕𑁆𑀕𑀨𑀮𑀚𑀸𑀦𑀦𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀏𑀢𑁆𑀣 𑀘 𑀧𑀼𑀣𑀼𑀚𑁆𑀚𑀦𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀲𑁄𑀢𑀸𑀧𑀦𑁆𑀦𑁄 𑀯𑀸 𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀢𑀺 𑀏𑀯𑀁 𑀬𑀸𑀯 𑀅𑀭𑀳𑀢𑁄 𑀦𑁂𑀢𑀩𑁆𑀩𑀁. 𑀅𑀭𑀳𑀸 𑀧𑀦 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀅𑀜𑁆𑀜𑁄𑀧𑀺 𑀘 𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀲𑁆𑀲𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀤𑀸 𑀧𑀦 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀘 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀘 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀤𑀸 𑀅𑀢𑀻𑀢𑀸𑀭𑀫𑁆𑀫𑀡𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀜𑁆𑀘 𑀳𑁄𑀢𑀺.

𑀓𑀣𑀁 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀢𑀺𑀯𑀺𑀥𑀁 𑁋 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘. 𑀢𑀢𑁆𑀣 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀧𑁆𑀧𑀢𑁆𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀅𑀦𑁆𑀥𑀓𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀮𑁄𑀓𑀝𑁆𑀞𑀸𑀦𑀁 𑀕𑀢𑀲𑁆𑀲 𑀦 𑀢𑀸𑀯 𑀆𑀭𑀫𑁆𑀫𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀬𑀸𑀯 𑀧𑀦 𑀢𑀁 𑀧𑀸𑀓𑀝𑀁 𑀳𑁄𑀢𑀺 ¶ , 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀮𑁄𑀓𑀝𑁆𑀞𑀸𑀦𑁂 𑀯𑀺𑀘𑀭𑀺𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲𑀸𑀧𑀺 𑀦 𑀢𑀸𑀯 𑀲𑀳𑀲𑀸 𑀭𑀽𑀧𑀁 𑀧𑀸𑀓𑀝𑀁 𑀳𑁄𑀢𑀺, 𑀬𑀸𑀯 𑀧𑀦 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀽𑀭𑁂 𑀞𑀢𑁆𑀯𑀸 𑀧𑀦 𑀭𑀚𑀓𑀸𑀦𑀁 𑀳𑀢𑁆𑀣𑀯𑀺𑀓𑀸𑀭𑀁, 𑀖𑀡𑁆𑀟𑀺𑀪𑁂𑀭𑀻𑀆𑀓𑁄𑀝𑀦𑀯𑀺𑀓𑀸𑀭𑀜𑁆𑀘 𑀤𑀺𑀲𑁆𑀯𑀸𑀧𑀺 𑀦 𑀢𑀸𑀯 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀬𑀸𑀯 𑀧𑀦 𑀢𑀁 𑀲𑀼𑀡𑀸𑀢𑀺, 𑀏𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯 𑀫𑀚𑁆𑀛𑀺𑀫𑀪𑀸𑀡𑀓𑀸.

𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀧𑀦 𑀭𑀽𑀧𑀲𑀦𑁆𑀢𑀢𑀺 𑀅𑀭𑀽𑀧𑀲𑀦𑁆𑀢𑀢𑀻𑀢𑀺 𑀤𑁆𑀯𑁂 𑀲𑀦𑁆𑀢𑀢𑀺𑀬𑁄 𑀯𑀢𑁆𑀯𑀸 𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀕𑀢𑀲𑁆𑀲 𑀬𑀸𑀯 𑀢𑀻𑀭𑁂 𑀅𑀓𑁆𑀓𑀦𑁆𑀢𑀉𑀤𑀓𑀮𑁂𑀔𑀸 𑀦 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀤𑁆𑀥𑀸𑀦𑀢𑁄 𑀆𑀕𑀢𑀲𑁆𑀲 𑀬𑀸𑀯 𑀓𑀸𑀬𑁂 𑀉𑀲𑀼𑀫𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀆𑀢𑀧𑀸 𑀆𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀲𑁆𑀲 𑀬𑀸𑀯 𑀅𑀦𑁆𑀥𑀓𑀸𑀭𑀪𑀸𑀯𑁄 𑀦 𑀯𑀺𑀕𑀘𑁆𑀙𑀢𑀺, 𑀅𑀦𑁆𑀢𑁄𑀕𑀩𑁆𑀪𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀤𑀺𑀯𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀬𑀸𑀯 𑀅𑀓𑁆𑀔𑀻𑀦𑀁 𑀨𑀦𑁆𑀤𑀦𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀭𑀽𑀧𑀲𑀦𑁆𑀢𑀢𑀺 𑀦𑀸𑀫. 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀅𑀭𑀽𑀧𑀲𑀦𑁆𑀢𑀢𑀺 𑀦𑀸𑀫𑀸𑀢𑀺 𑀯𑀢𑁆𑀯𑀸 𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺.

𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑁂 ‘‘𑀬𑁄 𑀘𑀸𑀯𑀼𑀲𑁄, 𑀫𑀦𑁄 𑀬𑁂 𑀘 𑀥𑀫𑁆𑀫𑀸 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻’’𑀢𑀺 (𑀫. 𑀦𑀺. 𑁩.𑁨𑁮𑁪) 𑀯𑀼𑀢𑁆𑀢𑀁. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀁. 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀼𑀢𑁆𑀢𑁂.

𑀢𑀢𑁆𑀣 𑀓𑁂𑀘𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀬𑀲𑁆𑀫𑀸 𑀇𑀤𑁆𑀥𑀺𑀫𑀢𑁄 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀇𑀤𑀜𑁆𑀘 𑀦𑁂𑀲𑀁 𑀑𑀧𑀫𑁆𑀫𑀁, 𑀬𑀣𑀸 𑀆𑀓𑀸𑀲𑁂 𑀔𑀺𑀢𑁆𑀢𑁂 𑀧𑀼𑀧𑁆𑀨𑀫𑀼𑀝𑁆𑀞𑀺𑀫𑁆𑀳𑀺 𑀅𑀯𑀲𑁆𑀲𑀁 𑀏𑀓𑀁 𑀧𑀼𑀧𑁆𑀨𑀁 𑀏𑀓𑀲𑁆𑀲 𑀯𑀡𑁆𑀝𑁂𑀦 𑀯𑀡𑁆𑀝𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀯𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀭𑀸𑀲𑀺𑀯𑀲𑁂𑀦 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂 𑀅𑀯𑀲𑁆𑀲𑀁 𑀏𑀓𑀲𑁆𑀲 𑀘𑀺𑀢𑁆𑀢𑀁 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀸 𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻𑀢𑀺. 𑀢𑀁 𑀧𑀦 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀆𑀯𑀚𑁆𑀚𑀦𑁆𑀢𑁄 𑀬𑁂𑀦 𑀘 𑀘𑀺𑀢𑁆𑀢𑁂𑀦 𑀆𑀯𑀚𑁆𑀚𑀢𑀺 ¶ , 𑀬𑁂𑀦 𑀘 𑀚𑀸𑀦𑀸𑀢𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀳𑀞𑀸𑀦𑀸𑀪𑀸𑀯𑀢𑁄 𑀆𑀯𑀚𑁆𑀚𑀦𑀚𑀯𑀦𑀸𑀦𑀜𑁆𑀘 𑀅𑀦𑀺𑀝𑁆𑀞𑀝𑁆𑀞𑀸𑀦𑁂 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀧𑁆𑀧𑀢𑁆𑀢𑀺𑀤𑁄𑀲𑀢𑁄 𑀅𑀬𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 ¶ 𑀧𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀫𑀸𑀦𑀚𑀯𑀦𑀯𑀻𑀣𑀺𑀢𑁄 𑀅𑀢𑀻𑀢𑀸𑀦𑀸𑀕𑀢𑀯𑀲𑁂𑀦 𑀤𑁆𑀯𑀺𑀢𑁆𑀢𑀺𑀚𑀯𑀦𑀯𑀻𑀣𑀺𑀧𑀭𑀺𑀫𑀸𑀡𑁂 𑀓𑀸𑀮𑁂 𑀧𑀭𑀲𑁆𑀲 𑀘𑀺𑀢𑁆𑀢𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. ‘‘𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀚𑀯𑀦𑀯𑀸𑀭𑁂𑀦 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀁 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀤𑀻𑀧𑀦𑀸, 𑀇𑀤𑁆𑀥𑀺𑀫𑀸 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀆𑀯𑀚𑁆𑀚𑀢𑀺, 𑀆𑀯𑀚𑁆𑀚𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺. 𑀬𑁂𑀲𑀁 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀘 𑀢𑀸𑀦𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀅𑀤𑁆𑀥𑀸𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸. 𑀏𑀓𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀘 𑀇𑀤𑁆𑀥𑀺𑀘𑀺𑀢𑁆𑀢𑀫𑁂𑀯 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑀸𑀦𑀺. 𑀬𑀣𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀇𑀢𑀭𑀸𑀦𑀻𑀢𑀺. 𑀇𑀢𑀺 𑀇𑀤𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑁂𑀯 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀢𑀢𑀺, 𑀢𑀲𑁆𑀫𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀯𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀲𑁆𑀲 𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀬𑁂𑀯 𑀧𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁭. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀫𑀕𑁆𑀕𑀅𑀢𑀻𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀯𑀲𑁂𑀦 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. 𑀅𑀢𑀻𑀢𑁂 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀯𑀸 𑀪𑀸𑀯𑀺𑀢𑀫𑀕𑁆𑀕𑀁 𑀲𑀘𑁆𑀙𑀺𑀓𑀢𑀨𑀮𑀜𑁆𑀘 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀪𑀸𑀯𑀺𑀢𑀫𑀕𑁆𑀕𑀫𑁂𑀯 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀁. 𑀦𑀺𑀬𑀫𑀢𑁄 𑀧𑀦𑁂𑀢𑀁 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀸𑀦𑀺𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀢𑁂𑀲𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑀸𑀢𑀻𑀢𑀁 𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀢𑀜𑁆𑀳𑀺 𑀅𑀜𑁆𑀜𑀁 𑀔𑀦𑁆𑀥𑀁 𑀯𑀸 𑀔𑀦𑁆𑀥𑀧𑀝𑀺𑀩𑀤𑁆𑀥𑀁 𑀯𑀸 𑀦 𑀚𑀸𑀦𑀸𑀢𑀺. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀭𑀺𑀬𑀸𑀬𑀢𑁄 𑀫𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀘 𑀅𑀢𑀻𑀢𑀁 𑀘𑁂𑀢𑀦𑀸𑀫𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀧𑀦 𑀅𑀢𑀻𑀢𑀸 𑀔𑀦𑁆𑀥𑀸 𑀔𑀦𑁆𑀥𑀧𑀝𑀺𑀩𑀤𑁆𑀥𑀜𑁆𑀘 𑀓𑀺𑀜𑁆𑀘𑀺 𑀅𑀦𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺 ¶ . 𑀢𑀜𑁆𑀳𑀺 𑀅𑀢𑀻𑀢𑀓𑁆𑀔𑀦𑁆𑀥𑀔𑀦𑁆𑀥𑀧𑀝𑀺𑀩𑀤𑁆𑀥𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀁 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀦𑀬𑁄. 𑀬𑀲𑁆𑀫𑀸 𑀧𑀦 ‘‘𑀓𑀼𑀲𑀮𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁪) 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄𑀧𑀺 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀸𑀦𑀁 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀢𑀢𑁆𑀭𑀸𑀧𑀺 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀸 𑀏𑀯𑀸𑀢𑀺.

𑀅𑀢𑁆𑀢𑀦𑁄 𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀧𑀦𑁂𑀢𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀲𑁆𑀲 𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. ‘‘𑀅𑀢𑀻𑀢𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀸 𑀩𑀦𑁆𑀥𑀼𑀫𑀢𑀻, 𑀧𑀺𑀢𑀸 𑀩𑀦𑁆𑀥𑀼𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁨) 𑀦𑀬𑁂𑀦 𑀦𑀸𑀫𑀕𑁄𑀢𑁆𑀢𑀧𑀣𑀯𑀻𑀦𑀺𑀫𑀺𑀢𑁆𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀔𑀦𑁆𑀥𑀽𑀧𑀦𑀺𑀩𑀦𑁆𑀥𑁄 𑀲𑀫𑁆𑀫𑀼𑀢𑀺𑀲𑀺𑀤𑁆𑀥𑁄 𑀩𑁆𑀬𑀜𑁆𑀚𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀩𑁆𑀬𑀜𑁆𑀚𑀦𑀁. 𑀩𑁆𑀬𑀜𑁆𑀚𑀦𑀜𑁆𑀳𑀺 𑀲𑀤𑁆𑀤𑀸𑀬𑀢𑀦𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀭𑀺𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁪𑁯). 𑀅𑀬𑀫𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀏𑀯𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁮. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀬𑀲𑁆𑀫𑀸 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀭𑀽𑀧𑀜𑁆𑀘 𑀧𑀭𑀺𑀢𑁆𑀢𑀁, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀘 𑀭𑀽𑀧𑁂 𑀧𑀯𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀕𑀢𑀸𑀤𑀺𑀭𑀽𑀧𑀤𑀲𑁆𑀲𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀲𑁆𑀲 𑀭𑀽𑀧𑀤𑀲𑁆𑀲𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁯. 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀫𑀕𑁆𑀕𑀅𑀦𑀸𑀕𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀯𑀲𑁂𑀦 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 ‘‘𑀅𑀬𑀁 𑀅𑀦𑀸𑀕𑀢𑁂 𑀓𑀸𑀫𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. ‘‘𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. ‘‘𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 ¶ 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. ‘‘𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺’’𑀘𑁆𑀘𑁂𑀯 𑀚𑀸𑀦𑀦𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀁. 𑀦𑀺𑀬𑀫𑀢𑁄 𑀧𑀦 𑀢𑀁 𑀅𑀦𑀸𑀕𑀢𑀸𑀭𑀫𑁆𑀫𑀡𑀫𑁂𑀯.

𑀢𑀢𑁆𑀣 ¶ 𑀓𑀺𑀜𑁆𑀘𑀸𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀣 𑀔𑁄 𑀢𑀲𑁆𑀲 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑀸𑀦𑀸𑀕𑀢𑀁 𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀢𑀜𑁆𑀳𑀺 𑀅𑀜𑁆𑀜𑀁 𑀔𑀦𑁆𑀥𑀁 𑀯𑀸 𑀔𑀦𑁆𑀥𑀧𑀝𑀺𑀩𑀤𑁆𑀥𑀁 𑀯𑀸 𑀦 𑀚𑀸𑀦𑀸𑀢𑀺. 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀯𑀼𑀢𑁆𑀢𑀦𑀬𑁂𑀦 𑀅𑀦𑀸𑀕𑀢𑁂 𑀅𑀦𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. ‘‘𑀅𑀳𑀁 𑀅𑀫𑀼𑀢𑁆𑀭 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁. ‘‘𑀅𑀲𑀼𑀓𑁄 𑀅𑀫𑀼𑀢𑁆𑀭 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. ‘‘𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑁄 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 (𑀤𑀻. 𑀦𑀺. 𑁩.𑁧𑁦𑁭). 𑀲𑀼𑀩𑁆𑀭𑀳𑁆𑀫𑀸 𑀦𑀸𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀪𑀯𑀺𑀲𑁆𑀲𑀢𑀺. 𑀩𑁆𑀭𑀳𑁆𑀫𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀦𑀸𑀫𑀕𑁄𑀢𑁆𑀢𑀚𑀸𑀦𑀦𑀓𑀸𑀮𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀅𑀝𑁆𑀞𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁨𑁦. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀢𑀻𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀢𑀜𑁆𑀳𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀚𑀸𑀦𑀦𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. 𑀅𑀢𑀻𑀢𑀫𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀁. 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀚𑀸𑀦𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀲𑁆𑀲 𑀓𑀫𑁆𑀫𑀁 𑀚𑀸𑀦𑀦𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀜𑁆𑀘𑁂𑀢𑁆𑀣 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀜𑁆𑀘𑁂𑀯 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸 𑀚𑀸𑀦𑀦𑀓𑀸𑀮𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁪. 𑀔𑀦𑁆𑀥𑀦𑀺𑀤𑁆𑀤𑁂𑀲𑁄

𑀧𑀜𑁆𑀜𑀸𑀓𑀣𑀸

𑁪𑁨𑁧. 𑀇𑀤𑀸𑀦𑀺 ¶ ¶ 𑀬𑀲𑁆𑀫𑀸 𑀏𑀯𑀁 𑀅𑀪𑀺𑀜𑁆𑀜𑀸𑀯𑀲𑁂𑀦 𑀅𑀥𑀺𑀕𑀢𑀸𑀦𑀺𑀲𑀁𑀲𑀸𑀬 𑀣𑀺𑀭𑀢𑀭𑀸𑀬 𑀲𑀫𑀸𑀥𑀺𑀪𑀸𑀯𑀦𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀲𑀫𑀸𑀥𑀺 𑀲𑀩𑁆𑀩𑀸𑀓𑀸𑀭𑁂𑀦 𑀪𑀸𑀯𑀺𑀢𑁄 𑀳𑁄𑀢𑀺.

𑀢𑀤𑀦𑀦𑁆𑀢𑀭𑀸 𑀧𑀦 𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸. 𑀲𑀸 𑀘 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑀢𑁆𑀢𑀸 𑀯𑀺𑀜𑁆𑀜𑀸𑀢𑀼𑀫𑁆𑀧𑀺 𑀢𑀸𑀯 𑀦 𑀲𑀼𑀓𑀭𑀸, 𑀧𑀕𑁂𑀯 𑀪𑀸𑀯𑁂𑀢𑀼𑀁. 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑀁 𑀪𑀸𑀯𑀦𑀸𑀦𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑀳𑁄𑀢𑀺.

𑀓𑀸 𑀧𑀜𑁆𑀜𑀸, 𑀓𑁂𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀓𑀸𑀦𑀲𑁆𑀲𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺, 𑀓𑀢𑀺𑀯𑀺𑀥𑀸 𑀧𑀜𑁆𑀜𑀸, 𑀓𑀣𑀁 𑀪𑀸𑀯𑁂𑀢𑀩𑁆𑀩𑀸, 𑀧𑀜𑁆𑀜𑀸𑀪𑀸𑀯𑀦𑀸𑀬 𑀓𑁄 𑀆𑀦𑀺𑀲𑀁𑀲𑁄𑀢𑀺?

𑁪𑁨𑁨. 𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀓𑀸 𑀧𑀜𑁆𑀜𑀸𑀢𑀺 𑀧𑀜𑁆𑀜𑀸 𑀩𑀳𑀼𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀸. 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑀬𑀺𑀢𑀼𑀁 𑀆𑀭𑀩𑁆𑀪𑀫𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀅𑀥𑀺𑀧𑁆𑀧𑁂𑀢𑀜𑁆𑀘𑁂𑀯 𑀅𑀢𑁆𑀣𑀁 𑀦 𑀲𑀸𑀥𑁂𑀬𑁆𑀬, 𑀉𑀢𑁆𑀢𑀭𑀺 𑀘 𑀯𑀺𑀓𑁆𑀔𑁂𑀧𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀇𑀥 𑀅𑀥𑀺𑀧𑁆𑀧𑁂𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀸𑀫. 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀜𑁆𑀜𑀸.

𑁪𑁨𑁩. 𑀓𑁂𑀦𑀝𑁆𑀞𑁂𑀦 𑀧𑀜𑁆𑀜𑀸𑀢𑀺 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀓𑀺𑀫𑀺𑀤𑀁 𑀧𑀚𑀸𑀦𑀦𑀁 𑀦𑀸𑀫? 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀸𑀓𑀸𑀭𑀯𑀺𑀲𑀺𑀝𑁆𑀞𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀦𑀁. 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁 𑀳𑀺 𑀲𑀫𑀸𑀦𑁂𑀧𑀺 𑀚𑀸𑀦𑀦𑀪𑀸𑀯𑁂, 𑀲𑀜𑁆𑀜𑀸 ‘‘𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀜𑁆𑀜𑀸𑀡𑀁 ‘‘𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺 𑀆𑀭𑀫𑁆𑀫𑀡𑀜𑁆𑀘 𑀚𑀸𑀦𑀸𑀢𑀺, 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀺. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 ¶ 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸 𑀯𑀼𑀢𑁆𑀢𑀦𑀬𑀯𑀲𑁂𑀦 𑀆𑀭𑀫𑁆𑀫𑀡𑀜𑁆𑀘 𑀚𑀸𑀦𑀸𑀢𑀺, 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀜𑁆𑀘 𑀧𑀸𑀧𑁂𑀢𑀺.

𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑁂 𑀞𑀧𑀺𑀢𑀁 𑀓𑀳𑀸𑀧𑀡𑀭𑀸𑀲𑀺𑀁 𑀏𑀓𑁄 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑁄, 𑀏𑀓𑁄 𑀕𑀸𑀫𑀺𑀓𑀧𑀼𑀭𑀺𑀲𑁄, 𑀏𑀓𑁄 𑀳𑁂𑀭𑀜𑁆𑀜𑀺𑀓𑁄𑀢𑀺 𑀢𑀻𑀲𑀼 𑀚𑀦𑁂𑀲𑀼 𑀧𑀲𑁆𑀲𑀫𑀸𑀦𑁂𑀲𑀼 ¶ 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑁄 𑀓𑀳𑀸𑀧𑀡𑀸𑀦𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀤𑀻𑀖𑀘𑀢𑀼𑀭𑀲𑁆𑀲𑀧𑀭𑀺𑀫𑀡𑁆𑀟𑀮𑀪𑀸𑀯𑀫𑀢𑁆𑀢𑀫𑁂𑀯 𑀚𑀸𑀦𑀸𑀢𑀺, ‘‘𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀕𑀸𑀫𑀺𑀓𑀧𑀼𑀭𑀺𑀲𑁄 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀸𑀤𑀺𑀪𑀸𑀯𑀁 𑀚𑀸𑀦𑀸𑀢𑀺, ‘‘𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀘. ‘‘𑀅𑀬𑀁 𑀙𑁂𑀓𑁄, 𑀅𑀬𑀁 𑀓𑀽𑀝𑁄, 𑀅𑀬𑀁 𑀅𑀤𑁆𑀥𑀲𑀸𑀭𑁄’’𑀢𑀺 𑀇𑀫𑀁 𑀧𑀦 𑀯𑀺𑀪𑀸𑀕𑀁 𑀦 𑀚𑀸𑀦𑀸𑀢𑀺. 𑀳𑁂𑀭𑀜𑁆𑀜𑀺𑀓𑁄 𑀲𑀩𑁆𑀩𑁂𑀧𑀺 𑀢𑁂 𑀧𑀓𑀸𑀭𑁂 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄 𑀘 𑀓𑀳𑀸𑀧𑀡𑀁 𑀑𑀮𑁄𑀓𑁂𑀢𑁆𑀯𑀸𑀧𑀺 𑀚𑀸𑀦𑀸𑀢𑀺, 𑀆𑀓𑁄𑀝𑀺𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺, 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀧𑀺, 𑀭𑀲𑀁 𑀲𑀸𑀬𑀺𑀢𑁆𑀯𑀸𑀧𑀺, 𑀳𑀢𑁆𑀣𑁂𑀦 𑀥𑀸𑀭𑀬𑀺𑀢𑁆𑀯𑀸𑀧𑀺, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀦𑀤𑀻𑀢𑀻𑀭𑁂 𑀯𑀸 𑀓𑀢𑁄𑀢𑀺𑀧𑀺, 𑀅𑀲𑀼𑀓𑀸𑀘𑀭𑀺𑀬𑁂𑀦 𑀓𑀢𑁄𑀢𑀺𑀧𑀺 𑀚𑀸𑀦𑀸𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀜𑁆𑀜𑀸 𑀳𑀺 𑀅𑀚𑀸𑀢𑀩𑀼𑀤𑁆𑀥𑀺𑀦𑁄 𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀺, 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀕𑀳𑀡𑀢𑁄. 𑀯𑀺𑀜𑁆𑀜𑀸𑀡𑀁 𑀕𑀸𑀫𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀫𑀺𑀯 𑀳𑁄𑀢𑀺, 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀸𑀓𑀸𑀭𑀕𑀳𑀡𑀢𑁄, 𑀉𑀤𑁆𑀥𑀁𑀧𑀺 𑀘 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑀫𑁆𑀧𑀸𑀧𑀦𑀢𑁄. 𑀧𑀜𑁆𑀜𑀸 𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀫𑀺𑀯 𑀳𑁄𑀢𑀺, 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸, 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑁆𑀯𑀸, 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀫𑀕𑁆𑀕𑀧𑀸𑀢𑀼𑀪𑀸𑀯𑀧𑀸𑀧𑀦𑀢𑁄. 𑀢𑀲𑁆𑀫𑀸 𑀬𑀤𑁂𑀢𑀁 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀸𑀓𑀸𑀭𑀯𑀺𑀲𑀺𑀝𑁆𑀞𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀦𑀁. 𑀇𑀤𑀁 𑀧𑀚𑀸𑀦𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀲𑀦𑁆𑀥𑀸𑀬 𑀳𑀺 𑀏𑀢𑀁 𑀯𑀼𑀢𑁆𑀢𑀁 ‘‘𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸’’𑀢𑀺.

𑀲𑀸 𑀧𑀦𑁂𑀲𑀸 𑀬𑀢𑁆𑀣 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀺, 𑀦 𑀢𑀢𑁆𑀣 𑀏𑀓𑀁𑀲𑁂𑀦 𑀳𑁄𑀢𑀺. 𑀬𑀤𑀸 𑀧𑀦 𑀳𑁄𑀢𑀺, 𑀢𑀤𑀸 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸 𑀢𑁂𑀳𑀺 𑀥𑀫𑁆𑀫𑁂𑀳𑀺 ‘‘𑀅𑀬𑀁 𑀲𑀜𑁆𑀜𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀧𑀜𑁆𑀜𑀸’’𑀢𑀺 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀅𑀮𑀩𑁆𑀪𑀦𑁂𑀬𑁆𑀬𑀦𑀸𑀦𑀢𑁆𑀢𑀸 𑀲𑀼𑀔𑀼𑀫𑀸 𑀤𑀼𑀤𑁆𑀤𑀲𑀸. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 ‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢’’𑀦𑁆𑀢𑀺. 𑀓𑀺𑀁, 𑀪𑀦𑁆𑀢𑁂, 𑀦𑀸𑀕𑀲𑁂𑀦 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺? ‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁 𑀬𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁 𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’’’𑀦𑁆𑀢𑀺 (𑀫𑀺. 𑀧. 𑁨.𑁭.𑁧𑁬).

𑁪𑁨𑁪. 𑀓𑀸𑀦𑀲𑁆𑀲𑀸 ¶ ¶ 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀥𑀫𑁆𑀫𑀸𑀦𑀁 𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀭𑀲𑀸, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁧𑁦.𑁨) 𑀯𑀘𑀦𑀢𑁄 𑀧𑀦 𑀲𑀫𑀸𑀥𑀺 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑀁.

𑀧𑀜𑁆𑀜𑀸𑀧𑀪𑁂𑀤𑀓𑀣𑀸

𑁪𑁨𑁫. 𑀓𑀢𑀺𑀯𑀺𑀥𑀸 𑀧𑀜𑁆𑀜𑀸𑀢𑀺 𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑁂𑀦 𑀢𑀸𑀯 𑀏𑀓𑀯𑀺𑀥𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀣𑀸 𑀲𑀸𑀲𑀯𑀸𑀦𑀸𑀲𑀯𑀸𑀤𑀺𑀯𑀲𑁂𑀦, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀯𑀲𑁂𑀦, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀯𑀲𑁂𑀦, 𑀤𑀲𑁆𑀲𑀦𑀪𑀸𑀯𑀦𑀸𑀪𑀽𑀫𑀺𑀯𑀲𑁂𑀦 𑀘. 𑀢𑀺𑀯𑀺𑀥𑀸 𑀘𑀺𑀦𑁆𑀢𑀸𑀲𑀼𑀢𑀪𑀸𑀯𑀦𑀸𑀫𑀬𑀯𑀲𑁂𑀦. 𑀢𑀣𑀸 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀯𑀲𑁂𑀦, 𑀆𑀬𑀸𑀧𑀸𑀬𑀉𑀧𑀸𑀬𑀓𑁄𑀲𑀮𑁆𑀮𑀯𑀲𑁂𑀦, 𑀅𑀚𑁆𑀛𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀤𑀺𑀯𑀲𑁂𑀦 𑀘. 𑀘𑀢𑀼𑀩𑁆𑀩𑀺𑀥𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀜𑀸𑀡𑀯𑀲𑁂𑀦 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀘𑀸𑀢𑀺.

𑁪𑁨𑁬. 𑀢𑀢𑁆𑀣 𑀏𑀓𑀯𑀺𑀥𑀓𑁄𑀝𑁆𑀞𑀸𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. 𑀤𑀼𑀯𑀺𑀥𑀓𑁄𑀝𑁆𑀞𑀸𑀲𑁂 𑀮𑁄𑀓𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀺𑀬𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑀸.

𑀤𑀼𑀢𑀺𑀬𑀤𑀼𑀓𑁂 𑀆𑀲𑀯𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀲𑀸𑀲𑀯𑀸. 𑀢𑁂𑀲𑀁 𑀅𑀦𑀸𑀭𑀫𑁆𑀫𑀡𑀸 𑀅𑀦𑀸𑀲𑀯𑀸. 𑀅𑀢𑁆𑀣𑀢𑁄 𑀧𑀦𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀳𑁄𑀢𑀺. 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀲𑀸𑀲𑀯𑀸𑀦𑀸𑀲𑀯𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀢𑀺𑀬𑀤𑀼𑀓𑁂 𑀬𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑀼𑀓𑀸𑀫𑀲𑁆𑀲 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀯𑀢𑁆𑀣𑀸𑀧𑀦𑁂 𑀧𑀜𑁆𑀜𑀸, 𑀅𑀬𑀁 𑀦𑀸𑀫𑀯𑀯𑀢𑁆𑀣𑀸𑀧𑀦𑀧𑀜𑁆𑀜𑀸. 𑀬𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀯𑀢𑁆𑀣𑀸𑀧𑀦𑁂 𑀧𑀜𑁆𑀜𑀸, 𑀅𑀬𑀁 𑀭𑀽𑀧𑀯𑀯𑀢𑁆𑀣𑀸𑀧𑀦𑀧𑀜𑁆𑀜𑀸𑀢𑀺 𑀏𑀯𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀯𑀲𑁂𑀦 𑀤𑀼𑀯𑀺𑀥𑀸.

𑀘𑀢𑀼𑀢𑁆𑀣𑀤𑀼𑀓𑁂 𑀤𑁆𑀯𑀻𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀲𑁄𑀴𑀲𑀲𑀼 𑀘 𑀧𑀜𑁆𑀘𑀓𑀦𑀬𑁂𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑁂𑀲𑀼 𑀫𑀕𑁆𑀕𑀘𑀺𑀢𑁆𑀢𑁂𑀲𑀼 𑀧𑀜𑁆𑀜𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸. 𑀤𑁆𑀯𑀻𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀘𑀢𑀽𑀲𑀼 𑀘 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂𑀲𑀼 𑀫𑀕𑁆𑀕𑀘𑀺𑀢𑁆𑀢𑁂𑀲𑀼 𑀧𑀜𑁆𑀜𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀯𑀲𑁂𑀦 𑀤𑀼𑀯𑀺𑀥𑀸.

𑀧𑀜𑁆𑀘𑀫𑀤𑀼𑀓𑁂 ¶ 𑀧𑀞𑀫𑀫𑀕𑁆𑀕𑀧𑀜𑁆𑀜𑀸 ¶ 𑀤𑀲𑁆𑀲𑀦𑀪𑀽𑀫𑀺. 𑀅𑀯𑀲𑁂𑀲𑀫𑀕𑁆𑀕𑀢𑁆𑀢𑀬𑀧𑀜𑁆𑀜𑀸 𑀪𑀸𑀯𑀦𑀸𑀪𑀽𑀫𑀻𑀢𑀺 𑀏𑀯𑀁 𑀤𑀲𑁆𑀲𑀦𑀪𑀸𑀯𑀦𑀸𑀪𑀽𑀫𑀺𑀯𑀲𑁂𑀦 𑀤𑀼𑀯𑀺𑀥𑀸.

𑁪𑁨𑁭. 𑀢𑀺𑀓𑁂𑀲𑀼 𑀧𑀞𑀫𑀢𑁆𑀢𑀺𑀓𑁂 𑀧𑀭𑀢𑁄 𑀅𑀲𑁆𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀧𑀜𑁆𑀜𑀸 𑀅𑀢𑁆𑀢𑀦𑁄 𑀘𑀺𑀦𑁆𑀢𑀸𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀘𑀺𑀦𑁆𑀢𑀸𑀫𑀬𑀸. 𑀧𑀭𑀢𑁄 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀧𑀜𑁆𑀜𑀸 𑀲𑀼𑀢𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀲𑀼𑀢𑀫𑀬𑀸. 𑀬𑀣𑀸 𑀢𑀣𑀸 𑀯𑀸 𑀪𑀸𑀯𑀦𑀸𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸? 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀓𑀫𑁆𑀫𑀸𑀬𑀢𑀦𑁂𑀲𑀼 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀲𑀼 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀓𑀫𑁆𑀫𑀲𑁆𑀲𑀓𑀢𑀁 𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀯𑀸 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀬𑀁 𑀏𑀯𑀭𑀽𑀧𑀺𑀁 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀤𑀺𑀝𑁆𑀞𑀺𑀁 𑀭𑀼𑀘𑀺𑀁 𑀫𑀼𑀢𑀺𑀁 𑀧𑁂𑀓𑁆𑀔𑀁 𑀥𑀫𑁆𑀫𑀦𑀺𑀚𑁆𑀛𑀸𑀦𑀔𑀦𑁆𑀢𑀺𑀁 𑀧𑀭𑀢𑁄 𑀅𑀲𑁆𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸…𑀧𑁂… 𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀢𑀫𑀬𑀸 𑀧𑀜𑁆𑀜𑀸. 𑀲𑀩𑁆𑀩𑀸𑀧𑀺 𑀲𑀫𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁬𑁮).

𑀏𑀯𑀁 𑀘𑀺𑀦𑁆𑀢𑀸𑀲𑀼𑀢𑀪𑀸𑀯𑀦𑀸𑀫𑀬𑀯𑀲𑁂𑀦 𑀢𑀺𑀯𑀺𑀥𑀸.

𑀤𑀼𑀢𑀺𑀬𑀢𑁆𑀢𑀺𑀓𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀲𑀸 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀲𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀢𑀺 𑀏𑀯𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀯𑀲𑁂𑀦 𑀢𑀺𑀯𑀺𑀥𑀸.

𑀢𑀢𑀺𑀬𑀢𑁆𑀢𑀺𑀓𑁂 𑀆𑀬𑁄 𑀦𑀸𑀫 𑀯𑀼𑀤𑁆𑀥𑀺, 𑀲𑀸 𑀤𑀼𑀯𑀺𑀥𑀸 𑀅𑀦𑀢𑁆𑀣𑀳𑀸𑀦𑀺𑀢𑁄 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘. 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀆𑀬𑀓𑁄𑀲𑀮𑁆𑀮𑀁. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀁 𑀆𑀬𑀓𑁄𑀲𑀮𑁆𑀮𑀁? 𑀇𑀫𑁂 𑀫𑁂 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀇𑀫𑁂 𑀯𑀸 𑀧𑀦𑀺𑀫𑁂 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀬𑀸 𑀢𑀢𑁆𑀣 𑀧𑀜𑁆𑀜𑀸 ¶ 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀬𑀓𑁄𑀲𑀮𑁆𑀮’’𑀦𑁆𑀢𑀺 (𑀯𑀺𑀪. 𑁭𑁭𑁧).

𑀅𑀧𑀸𑀬𑁄𑀢𑀺 ¶ 𑀧𑀦 𑀅𑀯𑀼𑀤𑁆𑀥𑀺, 𑀲𑀸𑀧𑀺 𑀤𑀼𑀯𑀺𑀥𑀸 𑀅𑀢𑁆𑀣𑀳𑀸𑀦𑀺𑀢𑁄 𑀘 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄 𑀘. 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀅𑀧𑀸𑀬𑀓𑁄𑀲𑀮𑁆𑀮𑀁. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀁 𑀅𑀧𑀸𑀬𑀓𑁄𑀲𑀮𑁆𑀮𑀁? 𑀇𑀫𑁂 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺 (𑀯𑀺𑀪. 𑁭𑁭𑁧).

𑀲𑀩𑁆𑀩𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀉𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑁂𑀲𑀼 𑀢𑀁𑀔𑀡𑀧𑁆𑀧𑀯𑀢𑁆𑀢𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀁 𑀓𑁄𑀲𑀮𑁆𑀮𑀁 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫. 𑀬𑀣𑀸𑀳 𑁋 ‘‘𑀲𑀩𑁆𑀩𑀸𑀧𑀺 𑀢𑀢𑁆𑀭𑀼𑀧𑀸𑀬𑀸 𑀧𑀜𑁆𑀜𑀸 𑀉𑀧𑀸𑀬𑀓𑁄𑀲𑀮𑁆𑀮’’𑀦𑁆𑀢𑀺 (𑀯𑀺𑀪. 𑁭𑁭𑁧). 𑀏𑀯𑀁 𑀆𑀬𑀸𑀧𑀸𑀬𑀉𑀧𑀸𑀬𑀓𑁄𑀲𑀮𑁆𑀮𑀯𑀲𑁂𑀦 𑀢𑀺𑀯𑀺𑀥𑀸.

𑀘𑀢𑀼𑀢𑁆𑀣𑀢𑁆𑀢𑀺𑀓𑁂 𑀅𑀢𑁆𑀢𑀦𑁄 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀆𑀭𑀤𑁆𑀥𑀸 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀅𑀚𑁆𑀛𑀢𑁆𑀢𑀸𑀪𑀺𑀦𑀺𑀯𑁂𑀲𑀸. 𑀧𑀭𑀲𑁆𑀲 𑀔𑀦𑁆𑀥𑁂 𑀩𑀸𑀳𑀺𑀭𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁 𑀕𑀳𑁂𑀢𑁆𑀯𑀸 𑀆𑀭𑀤𑁆𑀥𑀸 𑀩𑀳𑀺𑀤𑁆𑀥𑀸𑀪𑀺𑀦𑀺𑀯𑁂𑀲𑀸. 𑀉𑀪𑀬𑀁 𑀕𑀳𑁂𑀢𑁆𑀯𑀸 𑀆𑀭𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑀺𑀦𑀺𑀯𑁂𑀲𑀸𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀸.

𑁪𑁨𑁮. 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑀤𑀼𑀓𑁆𑀔𑀲𑀘𑁆𑀘𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀜𑀸𑀡𑀁 𑀤𑀼𑀓𑁆𑀔𑁂 𑀜𑀸𑀡𑀁. 𑀤𑀼𑀓𑁆𑀔𑀲𑀫𑀼𑀤𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀜𑀸𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁. 𑀤𑀼𑀓𑁆𑀔𑀦𑀺𑀭𑁄𑀥𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀜𑀸𑀡𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫 𑀅𑀢𑁆𑀣𑀸𑀤𑀻𑀲𑀼 𑀧𑀪𑁂𑀤𑀕𑀢𑀸𑀦𑀺 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀥𑀫𑁆𑀫𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀢𑀢𑁆𑀭𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮).

𑀢𑀢𑁆𑀣 𑀅𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀳𑁂𑀢𑀼𑀨𑀮𑀁 𑀳𑀺 𑀬𑀲𑁆𑀫𑀸 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀅𑀭𑀺𑀬𑀢𑀺 𑀅𑀥𑀺𑀕𑀫𑀺𑀬𑀢𑀺 𑀲𑀫𑁆𑀧𑀸𑀧𑀼𑀡𑀺𑀬𑀢𑀺, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀲𑀫𑁆𑀪𑀽𑀢𑀁, 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑀸 ¶ . 𑀢𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀥𑀫𑁆𑀫𑁄𑀢𑀺𑀧𑀺 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀘𑁆𑀘𑀬𑁄 𑀳𑀺 𑀬𑀲𑁆𑀫𑀸 𑀢𑀁 𑀢𑀁 𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 ¶ 𑀧𑀦 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄, 𑀪𑀸𑀲𑀺𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸.

𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 𑀅𑀪𑀺𑀥𑀫𑁆𑀫𑁂 𑁋

‘‘𑀤𑀼𑀓𑁆𑀔𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀬𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀬𑀫𑁆𑀳𑀸 𑀥𑀫𑁆𑀫𑀸 𑀢𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀚𑀭𑀸𑀫𑀭𑀡𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸…𑀧𑁂… 𑀲𑀗𑁆𑀔𑀸𑀭𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀯𑁂𑀤𑀮𑁆𑀮𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀲𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 ‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁭𑁧𑁯 𑀆𑀤𑀬𑁄) 𑀦𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑁄.

𑀢𑀢𑁆𑀭𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀅𑀩𑁆𑀬𑀪𑀺𑀘𑀸𑀭𑀻 𑀯𑁄𑀳𑀸𑀭𑁄. 𑀢𑀤𑀪𑀺𑀮𑀸𑀧𑁂 𑀢𑀲𑁆𑀲 𑀪𑀸𑀲𑀦𑁂 𑀉𑀤𑀻𑀭𑀡𑁂 𑀢𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀉𑀤𑀻𑀭𑀺𑀢𑀁 𑀲𑀼𑀢𑁆𑀯𑀸𑀯 𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀏𑀯𑀁 𑀢𑀲𑁆𑀲𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀲𑀜𑁆𑀜𑀺𑀢𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀫𑀸𑀕𑀥𑀺𑀓𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀽𑀮𑀪𑀸𑀲𑀸𑀬 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀳𑀺 𑀨𑀲𑁆𑀲𑁄 𑀯𑁂𑀤𑀦𑀸𑀢𑀺 𑀏𑀯𑀫𑀸𑀤𑀺𑀯𑀘𑀦𑀁 𑀲𑀼𑀢𑁆𑀯𑀸𑀯 𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀚𑀸𑀦𑀸𑀢𑀺. 𑀨𑀲𑁆𑀲𑀸 𑀯𑁂𑀤𑀦𑁄𑀢𑀺 𑀏𑀯𑀫𑀸𑀤𑀺𑀓𑀁 𑀧𑀦 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺.

𑀜𑀸𑀡𑁂𑀲𑀼 ¶ ¶ 𑀜𑀸𑀡𑀦𑁆𑀢𑀺 𑀲𑀩𑁆𑀩𑀢𑁆𑀣 𑀜𑀸𑀡𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀜𑀸𑀡𑀸𑀭𑀫𑁆𑀫𑀡𑀁 𑀜𑀸𑀡𑀁, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀸 𑀢𑁂𑀲𑀼 𑀜𑀸𑀡𑁂𑀲𑀼 𑀲𑀕𑁄𑀘𑀭𑀓𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀢𑁆𑀣𑁄.

𑁪𑁨𑁯. 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸 𑀧𑀝𑀺𑀲𑀫𑁆𑀪𑀺𑀤𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺 𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘.

𑀢𑀢𑁆𑀣 𑀅𑀕𑁆𑀕𑀲𑀸𑀯𑀓𑀸𑀦𑀁 𑀫𑀳𑀸𑀲𑀸𑀯𑀓𑀸𑀦𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀕𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑀘𑀺𑀢𑁆𑀢𑀕𑀳𑀧𑀢𑀺𑀥𑀫𑁆𑀫𑀺𑀓𑀉𑀧𑀸𑀲𑀓𑀉𑀧𑀸𑀮𑀺𑀕𑀳𑀧𑀢𑀺𑀔𑀼𑀚𑁆𑀚𑀼𑀢𑁆𑀢𑀭𑀸𑀉𑀧𑀸𑀲𑀺𑀓𑀸𑀤𑀻𑀦𑀁 𑀲𑁂𑀓𑁆𑀔𑀪𑀽𑀫𑀺𑀬𑀁. 𑀏𑀯𑀁 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺𑀬𑁄𑀧𑀺 𑀘𑁂𑀢𑀸 𑀅𑀥𑀺𑀕𑀫𑁂𑀦 𑀧𑀭𑀺𑀬𑀢𑁆𑀢𑀺𑀬𑀸 𑀲𑀯𑀦𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀧𑀼𑀩𑁆𑀩𑀬𑁄𑀕𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀲𑀤𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀅𑀥𑀺𑀕𑀫𑁄 𑀦𑀸𑀫 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺. 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁. 𑀲𑀯𑀦𑀁 𑀦𑀸𑀫 𑀲𑀓𑁆𑀓𑀘𑁆𑀘𑀁 𑀅𑀢𑁆𑀣𑀺𑀁 𑀓𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀁. 𑀧𑀭𑀺𑀧𑀼𑀘𑁆𑀙𑀸 𑀦𑀸𑀫 𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀕𑀡𑁆𑀞𑀺𑀧𑀤𑀅𑀢𑁆𑀣𑀧𑀤𑀯𑀺𑀦𑀺𑀘𑁆𑀙𑀬𑀓𑀣𑀸, 𑀧𑀼𑀩𑁆𑀩𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀕𑀢𑀧𑀘𑁆𑀘𑀸𑀕𑀢𑀺𑀓𑀪𑀸𑀯𑁂𑀦 𑀬𑀸𑀯 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑀫𑀻𑀧𑀁, 𑀢𑀸𑀯 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁄.

𑀅𑀧𑀭𑁂 𑀆𑀳𑀼 𑁋

‘‘𑀧𑀼𑀩𑁆𑀩𑀬𑁄𑀕𑁄 𑀩𑀸𑀳𑀼𑀲𑀘𑁆𑀘𑀁, 𑀤𑁂𑀲𑀪𑀸𑀲𑀸 𑀘 𑀆𑀕𑀫𑁄;

𑀧𑀭𑀺𑀧𑀼𑀘𑁆𑀙𑀸 𑀅𑀥𑀺𑀕𑀫𑁄, 𑀕𑀭𑀼𑀲𑀦𑁆𑀦𑀺𑀲𑁆𑀲𑀬𑁄 𑀢𑀣𑀸;

𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺 𑀘𑁂𑀯𑀸𑀢𑀺, 𑀧𑀝𑀺𑀲𑀫𑁆𑀪𑀺𑀤𑀧𑀘𑁆𑀘𑀬𑀸’’𑀢𑀺.

𑀢𑀢𑁆𑀣 𑀧𑀼𑀩𑁆𑀩𑀬𑁄𑀕𑁄 𑀯𑀼𑀢𑁆𑀢𑀦𑀬𑁄𑀯. 𑀩𑀸𑀳𑀼𑀲𑀘𑁆𑀘𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀲𑀢𑁆𑀣𑁂𑀲𑀼 𑀘 𑀲𑀺𑀧𑁆𑀧𑀸𑀬𑀢𑀦𑁂𑀲𑀼 𑀘 𑀓𑀼𑀲𑀮𑀢𑀸. 𑀤𑁂𑀲𑀪𑀸𑀲𑀸 𑀦𑀸𑀫 𑀏𑀓𑀲𑀢𑀯𑁄𑀳𑀸𑀭𑀓𑀼𑀲𑀮𑀢𑀸. 𑀯𑀺𑀲𑁂𑀲𑁂𑀦 𑀧𑀦 𑀫𑀸𑀕𑀥𑀺𑀓𑁂 𑀓𑁄𑀲𑀮𑁆𑀮𑀁. 𑀆𑀕𑀫𑁄 𑀦𑀸𑀫 𑀅𑀦𑁆𑀢𑀫𑀲𑁄 𑀑𑀧𑀫𑁆𑀫𑀯𑀕𑁆𑀕𑀫𑀢𑁆𑀢𑀲𑁆𑀲𑀧𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁. 𑀧𑀭𑀺𑀧𑀼𑀘𑁆𑀙𑀸 𑀦𑀸𑀫 𑀏𑀓𑀕𑀸𑀣𑀸𑀬𑀧𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀧𑀼𑀘𑁆𑀙𑀦𑀁. 𑀅𑀥𑀺𑀕𑀫𑁄 𑀦𑀸𑀫 𑀲𑁄𑀢𑀸𑀧𑀦𑁆𑀦𑀢𑀸 𑀯𑀸…𑀧𑁂… 𑀅𑀭𑀳𑀢𑁆𑀢𑀁 𑀯𑀸. 𑀕𑀭𑀼𑀲𑀦𑁆𑀦𑀺𑀲𑁆𑀲𑀬𑁄 ¶ 𑀦𑀸𑀫 𑀲𑀼𑀢𑀧𑀝𑀺𑀪𑀸𑀦𑀩𑀳𑀼𑀮𑀸𑀦𑀁 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀯𑀸𑀲𑁄. 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺 𑀦𑀸𑀫 𑀢𑀣𑀸𑀭𑀽𑀧𑀸𑀦𑀁𑀬𑁂𑀯 𑀫𑀺𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑁄𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀧𑀼𑀩𑁆𑀩𑀬𑁄𑀕𑀜𑁆𑀘𑁂𑀯 𑀅𑀥𑀺𑀕𑀫𑀜𑁆𑀘 𑀦𑀺𑀲𑁆𑀲𑀸𑀬 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀦𑁆𑀢𑀺. 𑀲𑀸𑀯𑀓𑀸 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀓𑀸𑀭𑀡𑀸𑀦𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀺𑀬𑀸 𑀘 𑀧𑀸𑀝𑀺𑀬𑁂𑀓𑁆𑀓𑁄 ¶ 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺. 𑀲𑁂𑀓𑁆𑀔𑀸𑀦𑀁 𑀧𑀦 𑀲𑁂𑀓𑁆𑀔𑀨𑀮𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀸. 𑀅𑀲𑁂𑀓𑁆𑀔𑀸𑀦𑀁 𑀅𑀲𑁂𑀓𑁆𑀔𑀨𑀮𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀸𑀯 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀢𑀣𑀸𑀕𑀢𑀸𑀦𑀁 𑀳𑀺 𑀤𑀲𑀩𑀮𑀸𑀦𑀺 𑀯𑀺𑀬 𑀅𑀭𑀺𑀬𑀸𑀦𑀁 𑀅𑀭𑀺𑀬𑀨𑀮𑁂𑀦𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀇𑀚𑁆𑀛𑀦𑁆𑀢𑀻𑀢𑀺 𑀇𑀫𑀸 𑀧𑀝𑀺𑀲𑀫𑁆𑀪𑀺𑀤𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀢𑀺.

𑀧𑀜𑁆𑀜𑀸𑀪𑀽𑀫𑀺-𑀫𑀽𑀮-𑀲𑀭𑀻𑀭𑀯𑀯𑀢𑁆𑀣𑀸𑀦𑀁

𑁪𑁩𑁦. 𑀓𑀣𑀁 𑀪𑀸𑀯𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀇𑀫𑀸𑀬 𑀧𑀜𑁆𑀜𑀸𑀬 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀪𑀽𑀫𑀺. 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀘𑀸𑀢𑀺 𑀇𑀫𑀸 𑀤𑁆𑀯𑁂 𑀯𑀺𑀲𑀼𑀤𑁆𑀥𑀺𑀬𑁄 𑀫𑀽𑀮𑀁. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀭𑀻𑀭𑀁. 𑀢𑀲𑁆𑀫𑀸 𑀢𑁂𑀲𑀼 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸 𑀫𑀽𑀮𑀪𑀽𑀢𑀸 𑀤𑁆𑀯𑁂 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀭𑀻𑀭𑀪𑀽𑀢𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑁪𑁩𑁧. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄, 𑀬𑀁 𑀢𑀸𑀯 𑀯𑀼𑀢𑁆𑀢𑀁 ‘‘𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀪𑀽𑀫𑀻’’𑀢𑀺, 𑀏𑀢𑁆𑀣 𑀔𑀦𑁆𑀥𑀸𑀢𑀺 𑀧𑀜𑁆𑀘 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺.

𑀭𑀽𑀧𑀓𑁆𑀔𑀦𑁆𑀥𑀓𑀣𑀸

𑁪𑁩𑁨. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀲𑀻𑀢𑀸𑀤𑀻𑀳𑀺 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀥𑀫𑁆𑀫𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀤𑁂𑀢𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀏𑀓𑀯𑀺𑀥𑀫𑁆𑀧𑀺 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄 𑀤𑀼𑀯𑀺𑀥𑀁.

𑀢𑀢𑁆𑀣 ¶ 𑀪𑀽𑀢𑀭𑀽𑀧𑀁 𑀘𑀢𑀼𑀩𑁆𑀩𑀺𑀥𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀢𑀸𑀲𑀁 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀺. 𑀧𑀤𑀝𑁆𑀞𑀸𑀦𑀢𑁄 𑀧𑀦 𑀢𑀸 𑀲𑀩𑁆𑀩𑀸𑀧𑀺 𑀅𑀯𑀲𑁂𑀲𑀥𑀸𑀢𑀼𑀢𑁆𑀢𑀬𑀧𑀤𑀝𑁆𑀞𑀸𑀦𑀸.

𑀉𑀧𑀸𑀤𑀸𑀭𑀽𑀧𑀁 𑀘𑀢𑀼𑀯𑀻𑀲𑀢𑀺𑀯𑀺𑀥𑀁 𑁋 𑀘𑀓𑁆𑀔𑀼, 𑀲𑁄𑀢𑀁, 𑀖𑀸𑀦𑀁, 𑀚𑀺𑀯𑁆𑀳𑀸, 𑀓𑀸𑀬𑁄, 𑀭𑀽𑀧𑀁, 𑀲𑀤𑁆𑀤𑁄, 𑀕𑀦𑁆𑀥𑁄, 𑀭𑀲𑁄, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀳𑀤𑀬𑀯𑀢𑁆𑀣𑀼, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 ¶ , 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸, 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀭𑀽𑀧𑀲𑁆𑀲 𑀚𑀭𑀢𑀸, 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺.

𑁪𑁩𑁩. 𑀢𑀢𑁆𑀣 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀘𑀓𑁆𑀔𑀼, 𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀲𑀤𑁆𑀤𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀲𑁄𑀢𑀁, 𑀲𑀤𑁆𑀤𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀕𑀦𑁆𑀥𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁, 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀯𑀸 𑀖𑀸𑀦𑀁, 𑀕𑀦𑁆𑀥𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀁, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀖𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁.

𑀭𑀲𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀯𑀸 𑀚𑀺𑀯𑁆𑀳𑀸, 𑀭𑀲𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸𑀬𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀸.

𑀨𑁄𑀝𑁆𑀞𑀩𑁆𑀩𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁄 𑀯𑀸 𑀓𑀸𑀬𑁄, 𑀨𑁄𑀝𑁆𑀞𑀩𑁆𑀩𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑁄, 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑁄.

𑁪𑁩𑁪. 𑀓𑁂𑀘𑀺 ¶ 𑀧𑀦 ‘‘𑀢𑁂𑀚𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀘𑀓𑁆𑀔𑀼, 𑀯𑀸𑀬𑀼𑀧𑀣𑀯𑀻𑀆𑀧𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸, 𑀓𑀸𑀬𑁄 𑀲𑀩𑁆𑀩𑁂𑀲𑀫𑁆𑀧𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀢𑁂𑀚𑀸𑀥𑀺𑀓𑀸𑀦𑀁 𑀧𑀲𑀸𑀤𑁄 𑀘𑀓𑁆𑀔𑀼, 𑀯𑀺𑀯𑀭𑀯𑀸𑀬𑀼𑀆𑀧𑀧𑀣𑀯𑀸𑀥𑀺𑀓𑀸𑀦𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀲𑀼𑀢𑁆𑀢𑀁 𑀆𑀳𑀭𑀣𑀸’’𑀢𑀺. 𑀅𑀤𑁆𑀥𑀸 𑀲𑀼𑀢𑁆𑀢𑀫𑁂𑀯 𑀦 𑀤𑀓𑁆𑀔𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀢𑁂𑀚𑀸𑀤𑀻𑀦𑀁 𑀕𑀼𑀡𑁂𑀳𑀺 𑀭𑀽𑀧𑀸𑀤𑀻𑀳𑀺 𑀅𑀦𑀼𑀕𑀬𑁆𑀳𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀓𑁄 𑀧𑀦𑁂𑀯𑀫𑀸𑀳𑀭𑀽𑀧𑀸𑀤𑀬𑁄 𑀢𑁂𑀚𑀸𑀤𑀻𑀦𑀁 𑀕𑀼𑀡𑀸’𑀢𑀺. 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀻𑀲𑀼 𑀳𑀺 𑀪𑀽𑀢𑁂𑀲𑀼 𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄 𑀅𑀬𑀁 𑀇𑀫𑀲𑁆𑀲 𑀕𑀼𑀡𑁄𑀢𑀺 𑀦 𑀮𑀩𑁆𑀪𑀸 𑀯𑀢𑁆𑀢𑀼’’𑀦𑁆𑀢𑀺. 𑀅𑀣𑀸𑀧𑀺 𑀯𑀤𑁂𑀬𑁆𑀬𑀼𑀁 ‘‘𑀬𑀣𑀸 𑀢𑁂𑀲𑀼 𑀢𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀢𑀲𑁆𑀲 𑀢𑀲𑁆𑀲 ¶ 𑀪𑀽𑀢𑀲𑁆𑀲 𑀅𑀥𑀺𑀓𑀢𑀸𑀬 𑀧𑀣𑀯𑀻𑀆𑀤𑀻𑀦𑀁 𑀲𑀦𑁆𑀥𑀸𑀭𑀡𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀇𑀘𑁆𑀙𑀣, 𑀏𑀯𑀁 𑀢𑁂𑀚𑀸𑀤𑀺𑀅𑀥𑀺𑀓𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀭𑀽𑀧𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑀤𑀲𑁆𑀲𑀦𑀢𑁄 𑀇𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀭𑀽𑀧𑀸𑀤𑀬𑁄 𑀢𑁂𑀲𑀁 𑀕𑀼𑀡𑀸’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀇𑀘𑁆𑀙𑁂𑀬𑁆𑀬𑀸𑀫, 𑀬𑀤𑀺 𑀆𑀧𑀸𑀥𑀺𑀓𑀲𑁆𑀲 𑀆𑀲𑀯𑀲𑁆𑀲 𑀕𑀦𑁆𑀥𑀢𑁄 𑀧𑀣𑀯𑀻𑀅𑀥𑀺𑀓𑁂 𑀓𑀧𑁆𑀧𑀸𑀲𑁂 𑀕𑀦𑁆𑀥𑁄 𑀅𑀥𑀺𑀓𑀢𑀭𑁄 𑀲𑀺𑀬𑀸, 𑀢𑁂𑀚𑀸𑀥𑀺𑀓𑀲𑁆𑀲 𑀘 𑀉𑀡𑁆𑀳𑁄𑀤𑀓𑀲𑁆𑀲 𑀯𑀡𑁆𑀡𑀢𑁄 𑀲𑀻𑀢𑀼𑀤𑀓𑀲𑁆𑀲 𑀯𑀡𑁆𑀡𑁄 𑀧𑀭𑀺𑀳𑀸𑀬𑁂𑀣’’. 𑀬𑀲𑁆𑀫𑀸 𑀧𑀦𑁂𑀢𑀁 𑀉𑀪𑀬𑀫𑁆𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀳𑀸𑀬𑁂𑀢𑀁 𑀏𑀢𑁂𑀲𑀁 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀯𑀺𑀲𑁂𑀲𑀓𑀧𑁆𑀧𑀦𑀁, ‘‘𑀬𑀣𑀸 𑀅𑀯𑀺𑀲𑁂𑀲𑁂𑀧𑀺 𑀏𑀓𑀓𑀮𑀸𑀧𑁂 𑀪𑀽𑀢𑀸𑀦𑀁 𑀭𑀽𑀧𑀭𑀲𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀲𑁂𑀲𑀓𑀸𑀭𑀡𑁂’’𑀢𑀺 𑀕𑀳𑁂𑀢𑀩𑁆𑀩𑀫𑁂𑀢𑀁.

𑀓𑀺𑀁 𑀧𑀦 𑀢𑀁 𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀸𑀥𑀸𑀭𑀡𑀁? 𑀓𑀫𑁆𑀫𑀫𑁂𑀯 𑀦𑁂𑀲𑀁 𑀯𑀺𑀲𑁂𑀲𑀓𑀸𑀭𑀡𑀁. 𑀢𑀲𑁆𑀫𑀸 𑀓𑀫𑁆𑀫𑀯𑀺𑀲𑁂𑀲𑀢𑁄 𑀏𑀢𑁂𑀲𑀁 𑀯𑀺𑀲𑁂𑀲𑁄, 𑀦 𑀪𑀽𑀢𑀯𑀺𑀲𑁂𑀲𑀢𑁄. 𑀪𑀽𑀢𑀯𑀺𑀲𑁂𑀲𑁂 𑀳𑀺 𑀲𑀢𑀺 𑀧𑀲𑀸𑀤𑁄𑀯 𑀦 𑀉𑀧𑁆𑀧𑀚𑁆𑀚𑀢𑀺. 𑀲𑀫𑀸𑀦𑀸𑀦𑀜𑁆𑀳𑀺 𑀧𑀲𑀸𑀤𑁄, 𑀦 𑀯𑀺𑀲𑀫𑀸𑀦𑀸𑀦𑀦𑁆𑀢𑀺 𑀧𑁄𑀭𑀸𑀡𑀸.

𑁪𑁩𑁫. 𑀏𑀯𑀁 𑀓𑀫𑁆𑀫𑀯𑀺𑀲𑁂𑀲𑀢𑁄 𑀯𑀺𑀲𑁂𑀲𑀯𑀦𑁆𑀢𑁂𑀲𑀼 𑀘 𑀏𑀢𑁂𑀲𑀼 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑀸𑀳𑀓𑀸𑀦𑀺, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀦𑀮𑁆𑀮𑀻𑀦𑀦𑀺𑀲𑁆𑀲𑀬𑁂 𑀏𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑀸𑀳𑀓𑀸, 𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯, 𑀲𑀬𑀜𑁆𑀘, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀮𑁆𑀮𑀻𑀦𑁂𑀬𑁂𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀳𑁂𑀢𑀼𑀢𑁆𑀢𑀸.

𑁪𑁩𑁬. 𑀘𑀓𑁆𑀔𑀼 𑀘𑁂𑀢𑁆𑀣 𑀬𑀤𑁂𑀢𑀁 𑀮𑁄𑀓𑁂 𑀦𑀻𑀮𑀧𑀔𑀼𑀫𑀲𑀫𑀸𑀓𑀺𑀡𑁆𑀡𑀓𑀡𑁆𑀳𑀲𑀼𑀓𑁆𑀓𑀫𑀡𑁆𑀟𑀮𑀯𑀺𑀘𑀺𑀢𑁆𑀢𑀁 𑀦𑀻𑀮𑀼𑀧𑁆𑀧𑀮𑀤𑀮𑀲𑀦𑁆𑀦𑀺𑀪𑀁 𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁄 𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀧𑀤𑁂𑀲𑁂 𑀲𑀢𑁆𑀢𑀲𑀼 𑀧𑀺𑀘𑀼𑀧𑀝𑀮𑁂𑀲𑀼 𑀆𑀲𑀺𑀢𑁆𑀢𑀢𑁂𑀮𑀁 𑀧𑀺𑀘𑀼𑀧𑀝𑀮𑀸𑀦𑀺 𑀯𑀺𑀬 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺𑀩𑁆𑀬𑀸𑀧𑁂𑀢𑁆𑀯𑀸 𑀥𑀸𑀭𑀡𑀦𑁆𑀳𑀸𑀧𑀦𑀫𑀡𑁆𑀟𑀦𑀩𑀻𑀚𑀦𑀓𑀺𑀘𑁆𑀘𑀸𑀳𑀺 ¶ 𑀘𑀢𑀽𑀳𑀺 𑀥𑀸𑀢𑀻𑀳𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬 𑀲𑀦𑁆𑀥𑀸𑀭𑀡𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁 ¶ 𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀻𑀳𑀺 𑀧𑀭𑀺𑀯𑀼𑀢𑀁 𑀧𑀫𑀸𑀡𑀢𑁄 𑀊𑀓𑀸𑀲𑀺𑀭𑀫𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀏𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫’’𑀦𑁆𑀢𑀺.

𑀲𑀲𑀫𑁆𑀪𑀸𑀭𑀲𑁄𑀢𑀩𑀺𑀮𑀲𑁆𑀲 𑀅𑀦𑁆𑀢𑁄 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀲𑁄𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁 𑀯𑀡𑁆𑀡𑀸𑀤𑀻𑀳𑀺 𑀧𑀭𑀺𑀯𑀼𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀲𑀲𑀫𑁆𑀪𑀸𑀭𑀖𑀸𑀦𑀩𑀺𑀮𑀲𑁆𑀲 𑀅𑀦𑁆𑀢𑁄 𑀅𑀚𑀧𑀤𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀖𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀼𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀁 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸𑀫𑀚𑁆𑀛𑀲𑁆𑀲 𑀉𑀧𑀭𑀺 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀚𑀺𑀯𑁆𑀳𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀼𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀢𑀺𑀝𑁆𑀞𑀢𑀺.

𑀬𑀸𑀯𑀢𑀸 𑀧𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀡𑁆𑀡𑀭𑀽𑀧𑀁 𑀦𑀸𑀫 𑀅𑀢𑁆𑀣𑀺. 𑀲𑀩𑁆𑀩𑀢𑁆𑀣 𑀓𑀸𑀬𑁄 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀼𑀧𑀓𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀦𑀼𑀧𑀸𑀮𑀦𑀧𑀭𑀺𑀯𑀸𑀭𑁄𑀯 𑀳𑀼𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑁄 𑀢𑀺𑀝𑁆𑀞𑀢𑀺.

𑀯𑀫𑁆𑀫𑀺𑀓𑀉𑀤𑀓𑀸𑀓𑀸𑀲𑀕𑀸𑀫𑀲𑀺𑀯𑀣𑀺𑀓𑀲𑀗𑁆𑀔𑀸𑀢𑀲𑀕𑁄𑀘𑀭𑀦𑀺𑀦𑁆𑀦𑀸 𑀯𑀺𑀬 𑀘 𑀅𑀳𑀺𑀲𑀼𑀲𑀼𑀫𑀸𑀭𑀧𑀓𑁆𑀔𑀻𑀓𑀼𑀓𑁆𑀓𑀼𑀭𑀲𑀺𑀗𑁆𑀕𑀸𑀮𑀸𑀭𑀽𑀧𑀸𑀤𑀺𑀲𑀕𑁄𑀘𑀭𑀦𑀺𑀦𑁆𑀦𑀸𑀯 𑀏𑀢𑁂 𑀘𑀓𑁆𑀔𑀸𑀤𑀬𑁄𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁩𑁭. 𑀢𑀢𑁄 𑀧𑀭𑁂𑀲𑀼 𑀧𑀦 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑀁 ¶ , 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀢𑀼𑀫𑀳𑀸𑀪𑀽𑀢𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀘𑁂𑀢𑀁 𑀢𑀣𑀸 𑀲𑀩𑁆𑀩𑀸𑀦𑀺𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀺. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀓𑁆𑀔𑀸𑀫. 𑀢𑀬𑀺𑀤𑀁 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁.

𑀲𑁄𑀢𑀧𑀝𑀺𑀳𑀦𑀦𑀮𑀓𑁆𑀔𑀡𑁄 ¶ 𑀲𑀤𑁆𑀤𑁄, 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁂𑀓𑀯𑀺𑀥𑁄.

𑀖𑀸𑀦𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀕𑀦𑁆𑀥𑁄, 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁂𑀓𑀯𑀺𑀥𑁄.

𑀚𑀺𑀯𑁆𑀳𑀸𑀧𑀝𑀺𑀳𑀦𑀦𑀮𑀓𑁆𑀔𑀡𑁄 𑀭𑀲𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀭𑀲𑁄, 𑀢𑀲𑁆𑀲𑁂𑀯 𑀕𑁄𑀘𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁂𑀓𑀯𑀺𑀥𑁄.

𑁪𑁩𑁮. 𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀻𑀢𑀺 𑀧𑀓𑀸𑀲𑀦𑀭𑀲𑀁, 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀼𑀭𑀺𑀲𑀪𑀸𑀯𑀮𑀓𑁆𑀔𑀡𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑁄𑀢𑀺 𑀧𑀓𑀸𑀲𑀦𑀭𑀲𑀁, 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀓𑀸𑀬𑀧𑁆𑀧𑀲𑀸𑀤𑁄 𑀯𑀺𑀬 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑀓𑀫𑁂𑀯, 𑀦 𑀘 𑀓𑀸𑀬𑀧𑀲𑀸𑀤𑁂𑀦 𑀞𑀺𑀢𑁄𑀓𑀸𑀲𑁂 𑀞𑀺𑀢𑀦𑁆𑀢𑀺 𑀯𑀸 𑀅𑀝𑁆𑀞𑀺𑀢𑁄𑀓𑀸𑀲𑁂 𑀞𑀺𑀢𑀦𑁆𑀢𑀺 𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀭𑀽𑀧𑀭𑀲𑀸𑀤𑀬𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑁄 𑀦𑀢𑁆𑀣𑀺.

𑁪𑁩𑁯. 𑀲𑀳𑀚𑀭𑀽𑀧𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀜𑁆𑀜𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀪𑀽𑀢𑀧𑀤𑀝𑁆𑀞𑀸𑀦𑀁. 𑀲𑀦𑁆𑀢𑁂𑀧𑀺 𑀘 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀲𑀳𑀚𑀭𑀽𑀧𑀸𑀦𑀺 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺. 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀧𑀸𑀮𑁂𑀢𑀺 𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭𑀁. 𑀲𑀬𑀁 𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀘 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬. 𑀦 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀢𑀺, 𑀅𑀢𑁆𑀢𑀦𑁄 𑀘 𑀧𑀯𑀢𑁆𑀢𑀬𑀺𑀢𑀩𑁆𑀩𑀸𑀦𑀜𑁆𑀘 𑀅𑀪𑀸𑀯𑀸. 𑀦 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑀺, 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸. 𑀔𑀻𑀬𑀫𑀸𑀦𑁄 𑀯𑀺𑀬 𑀯𑀝𑁆𑀝𑀺𑀲𑁆𑀦𑁂𑀳𑁄 𑀤𑀻𑀧𑀲𑀺𑀔𑀁. 𑀦 𑀘 𑀅𑀦𑀼𑀧𑀸𑀮𑀦𑀧𑀯𑀢𑁆𑀢𑀦𑀝𑁆𑀞𑀧𑀦𑀸𑀦𑀼𑀪𑀸𑀯𑀯𑀺𑀭𑀳𑀺𑀢𑀁, 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑁂 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁪𑁦. 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀳𑀤𑀬𑀯𑀢𑁆𑀣𑀼, 𑀢𑀸𑀲𑀜𑁆𑀜𑁂𑀯 𑀥𑀸𑀢𑀽𑀦𑀁 𑀆𑀥𑀸𑀭𑀡𑀭𑀲𑀁 ¶ , 𑀉𑀩𑁆𑀩𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀳𑀤𑀬𑀲𑁆𑀲 𑀅𑀦𑁆𑀢𑁄 𑀓𑀸𑀬𑀕𑀢𑀸𑀲𑀢𑀺𑀓𑀣𑀸𑀬𑀁 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀮𑁄𑀳𑀺𑀢𑀁 𑀦𑀺𑀲𑁆𑀲𑀸𑀬 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑁂𑀳𑀺 𑀪𑀽𑀢𑁂𑀳𑀺 𑀓𑀢𑀽𑀧𑀓𑀸𑀭𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀆𑀬𑀼𑀦𑀸 𑀅𑀦𑀼𑀧𑀸𑀮𑀺𑀬𑀫𑀸𑀦𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀜𑁆𑀘𑁂𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀯𑀢𑁆𑀣𑀼𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺.

𑁪𑁪𑁧. 𑀅𑀪𑀺𑀓𑁆𑀓𑀫𑀸𑀤𑀺𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸 𑀲𑀳𑀚𑀭𑀽𑀧𑀓𑀸𑀬𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀆𑀓𑀸𑀭𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀅𑀥𑀺𑀧𑁆𑀧𑀸𑀬𑀧𑀓𑀸𑀲𑀦𑀭𑀲𑀸, 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀧𑀤𑀝𑁆𑀞𑀸𑀦𑀸. 𑀲𑀸 𑀧𑀦𑁂𑀲𑀸 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸, 𑀲𑀬𑀜𑁆𑀘 𑀢𑁂𑀦 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀲𑀗𑁆𑀔𑀸𑀢𑁂𑀦 𑀓𑀸𑀬𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀓𑀸𑀬𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀘 𑀧𑀦 𑀘𑀮𑀺𑀢𑁂𑀳𑀺 𑀘𑀺𑀢𑁆𑀢𑀚𑀭𑀽𑀧𑁂𑀳𑀺 𑀅𑀪𑀺𑀲𑀫𑁆𑀩𑀦𑁆𑀥𑀸𑀦𑀁 𑀉𑀢𑀼𑀚𑀸𑀤𑀻𑀦𑀫𑁆𑀧𑀺 𑀘𑀮𑀦𑀢𑁄 𑀅𑀪𑀺𑀓𑁆𑀓𑀫𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀘𑀻𑀪𑁂𑀤𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀡𑁆𑀡𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑁄 𑀆𑀓𑀸𑀭𑀯𑀺𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀭𑀲𑀸, 𑀯𑀘𑀻𑀖𑁄𑀲𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀧𑀤𑀝𑁆𑀞𑀸𑀦𑀸. 𑀲𑀸 𑀧𑀦𑁂𑀲𑀸 𑀯𑀘𑀻𑀖𑁄𑀲𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸, 𑀲𑀬𑀜𑁆𑀘 𑀢𑀸𑀬 𑀯𑀘𑀻𑀖𑁄𑀲𑀲𑀗𑁆𑀔𑀸𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀯𑀘𑀻𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀅𑀭𑀜𑁆𑀜𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀩𑀦𑁆𑀥𑀕𑁄𑀲𑀻𑀲𑀸𑀤𑀺𑀉𑀤𑀓𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀉𑀤𑀓𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀜𑁆𑀘𑁂𑀯 𑀯𑀘𑀻𑀖𑁄𑀲𑀜𑁆𑀘 𑀕𑀳𑁂𑀢𑁆𑀯𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄𑀧𑀺 𑀯𑀺𑀜𑁆𑀜𑀸𑀬𑀦𑁆𑀢𑀺.

𑁪𑁪𑁨. 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀸 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀧𑀭𑀺𑀬𑀦𑁆𑀢𑀧𑁆𑀧𑀓𑀸𑀲𑀦𑀭𑀲𑀸, 𑀭𑀽𑀧𑀫𑀭𑀺𑀬𑀸𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀘𑁆𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑀸. 𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀽𑀧𑁂𑀲𑀼 𑀇𑀤𑀫𑀺𑀢𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀦𑁆𑀢𑀺 𑀘 𑀳𑁄𑀢𑀺.

𑁪𑁪𑁩. 𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀸𑀦𑀁 𑀕𑀭𑀼𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀅𑀣𑀤𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀸𑀦𑀁 𑀣𑀤𑁆𑀥𑀪𑀸𑀯𑀯𑀺𑀦𑁄𑀤𑀦𑀭𑀲𑀸, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀼𑀤𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 ¶ 𑀓𑀫𑁆𑀫𑀜𑁆𑀜𑀢𑀸, 𑀅𑀓𑀫𑁆𑀫𑀜𑁆𑀜𑀢𑀸𑀯𑀺𑀦𑁄𑀤𑀦𑀭𑀲𑀸, 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀜𑁆𑀜𑀭𑀽𑀧𑀧𑀤𑀝𑁆𑀞𑀸𑀦𑀸.

𑀏𑀢𑀸 ¶ 𑀧𑀦 𑀢𑀺𑀲𑁆𑀲𑁄 𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑀳𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁄 𑀅𑀭𑁄𑀕𑀺𑀦𑁄 𑀯𑀺𑀬 𑀭𑀽𑀧𑀸𑀦𑀁 𑀮𑀳𑀼𑀪𑀸𑀯𑁄 𑀅𑀤𑀦𑁆𑀥𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀺𑀧𑁆𑀧𑀓𑀸𑀭𑁄 𑀭𑀽𑀧𑀤𑀦𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 𑀭𑀽𑀧𑀲𑁆𑀲 𑀮𑀳𑀼𑀢𑀸. 𑀬𑁄 𑀧𑀦 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑁆𑀲𑁂𑀯 𑀭𑀽𑀧𑀸𑀦𑀁 𑀫𑀼𑀤𑀼𑀪𑀸𑀯𑁄 𑀲𑀩𑁆𑀩𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀲𑀼 𑀯𑀲𑀯𑀢𑁆𑀢𑀦𑀪𑀸𑀯𑀫𑀤𑁆𑀤𑀯𑀧𑁆𑀧𑀓𑀸𑀭𑁄 𑀭𑀽𑀧𑀢𑁆𑀣𑀤𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸. 𑀬𑁄 𑀧𑀦 𑀲𑀼𑀤𑀦𑁆𑀢𑀲𑀼𑀯𑀡𑁆𑀡𑀲𑁆𑀲𑁂𑀯 𑀭𑀽𑀧𑀸𑀦𑀁 𑀓𑀫𑁆𑀫𑀜𑁆𑀜𑀪𑀸𑀯𑁄 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀪𑀸𑀯𑀧𑁆𑀧𑀓𑀸𑀭𑁄 𑀲𑀭𑀻𑀭𑀓𑀺𑀭𑀺𑀬𑀸𑀦𑀁 𑀅𑀦𑀦𑀼𑀓𑀽𑀮𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄, 𑀲𑁄 𑀭𑀽𑀧𑀯𑀺𑀓𑀸𑀭𑁄 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸𑀢𑀺 𑀏𑀯𑀫𑁂𑀢𑀸𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁪𑁪. 𑀆𑀘𑀬𑀮𑀓𑁆𑀔𑀡𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀧𑀼𑀩𑁆𑀩𑀦𑁆𑀢𑀢𑁄 𑀭𑀽𑀧𑀸𑀦𑀁 𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄, 𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄. 𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸, 𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑀼𑀧𑁆𑀧𑀩𑀦𑁆𑀥𑀓𑀭𑀽𑀧𑀧𑀤𑀝𑁆𑀞𑀸𑀦𑀸. 𑀉𑀪𑀬𑀫𑁆𑀧𑁂𑀢𑀁 𑀚𑀸𑀢𑀺𑀭𑀽𑀧𑀲𑁆𑀲𑁂𑀯𑀸𑀥𑀺𑀯𑀘𑀦𑀁, 𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀧𑀦 𑀯𑁂𑀦𑁂𑀬𑁆𑀬𑀯𑀲𑁂𑀦 𑀘 ‘‘𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀉𑀤𑁆𑀤𑁂𑀲𑀤𑁂𑀲𑀦𑀸 𑀓𑀢𑀸. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀫𑁂𑀲𑀁 𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁂 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄, 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄. 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑁬𑁪𑁧-𑁬𑁪𑁨) 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀆𑀘𑀬𑁄 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺, 𑀉𑀧𑀘𑀬𑁄 𑀦𑀸𑀫 𑀯𑀟𑁆𑀠𑀺, 𑀲𑀦𑁆𑀢𑀢𑀺 𑀦𑀸𑀫 𑀧𑀯𑀢𑁆𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁬𑁪𑁧) 𑀯𑀢𑁆𑀯𑀸 ‘‘𑀦𑀤𑀻𑀢𑀻𑀭𑁂 𑀔𑀢𑀓𑀽𑀧𑀓𑀫𑁆𑀳𑀺 𑀉𑀤𑀓𑀼𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀆𑀘𑀬𑁄 𑀦𑀺𑀩𑁆𑀩𑀢𑁆𑀢𑀺, 𑀧𑀭𑀺𑀧𑀼𑀡𑁆𑀡𑀓𑀸𑀮𑁄 𑀯𑀺𑀬 𑀉𑀧𑀘𑀬𑁄 𑀯𑀟𑁆𑀠𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁄 𑀯𑀺𑀬 𑀲𑀦𑁆𑀢𑀢𑀺 𑀧𑀯𑀢𑁆𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁬𑁪𑁧) 𑀉𑀧𑀫𑀸 𑀓𑀢𑀸.

𑀉𑀧𑀫𑀸𑀯𑀲𑀸𑀦𑁂 𑀘 ‘‘𑀏𑀯𑀁 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀆𑀬𑀢𑀦𑁂𑀦 𑀆𑀘𑀬𑁄 𑀓𑀣𑀺𑀢𑁄, 𑀆𑀘𑀬𑁂𑀦 𑀆𑀬𑀢𑀦𑀁 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀸 𑀭𑀽𑀧𑀸𑀦𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀆𑀘𑀬𑁄. 𑀬𑀸 𑀢𑁂𑀲𑀁 𑀉𑀧𑀭𑀺 𑀅𑀜𑁆𑀜𑁂𑀲𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀯𑀟𑁆𑀠𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀢𑁄 𑀉𑀧𑀘𑀬𑁄. 𑀬𑀸 𑀢𑁂𑀲𑀫𑁆𑀧𑀺 𑀉𑀧𑀭𑀺 𑀧𑀼𑀦𑀧𑁆𑀧𑀼𑀦𑀁 ¶ 𑀅𑀜𑁆𑀜𑁂𑀲𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀅𑀦𑀼𑀧𑀩𑀦𑁆𑀥𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀢𑁄 𑀲𑀦𑁆𑀢𑀢𑀻𑀢𑀺 𑀘 𑀧𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀢𑀸, 𑀉𑀧𑀦𑀬𑀦𑀭𑀲𑀸, 𑀲𑀪𑀸𑀯𑀸𑀦𑀧𑀕𑀫𑁂𑀧𑀺 𑀦𑀯𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬, 𑀧𑀭𑀺𑀧𑀘𑁆𑀘𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸. 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀤𑀦𑁆𑀢𑀸𑀤𑀻𑀲𑀼 𑀯𑀺𑀓𑀸𑀭𑀤𑀲𑁆𑀲𑀦𑀢𑁄 ¶ 𑀇𑀤𑀁 𑀧𑀸𑀓𑀝𑀚𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀲𑀸 𑀏𑀲 𑀯𑀺𑀓𑀸𑀭𑁄 𑀦𑀢𑁆𑀣𑀺, 𑀬𑀸 𑀘 𑀧𑀣𑀯𑀻 𑀉𑀤𑀓𑀧𑀩𑁆𑀩𑀢𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀲𑀼 𑀅𑀯𑀻𑀘𑀺𑀚𑀭𑀸 𑀦𑀸𑀫.

𑀧𑀭𑀺𑀪𑁂𑀤𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀲𑀁𑀲𑀻𑀤𑀦𑀭𑀲𑀸, 𑀔𑀬𑀯𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀺𑀪𑀺𑀚𑁆𑀚𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀸.

𑁪𑁪𑁫. 𑀑𑀚𑀸𑀮𑀓𑁆𑀔𑀡𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀸𑀳𑀭𑀡𑀭𑀲𑁄, 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀓𑀩𑀴𑀁 𑀓𑀢𑁆𑀯𑀸 𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄. 𑀬𑀸𑀬 𑀑𑀚𑀸𑀬 𑀲𑀢𑁆𑀢𑀸 𑀬𑀸𑀧𑁂𑀦𑁆𑀢𑀺, 𑀢𑀲𑁆𑀲𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑁪𑁪𑁬. 𑀇𑀫𑀸𑀦𑀺 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀭𑀽𑀧𑀸𑀦𑁂𑀯. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀩𑀮𑀭𑀽𑀧𑀁 𑀲𑀫𑁆𑀪𑀯𑀭𑀽𑀧𑀁 𑀚𑀸𑀢𑀺𑀭𑀽𑀧𑀁 𑀭𑁄𑀕𑀭𑀽𑀧𑀁 𑀏𑀓𑀘𑁆𑀘𑀸𑀦𑀁 𑀫𑀢𑁂𑀦 𑀫𑀺𑀤𑁆𑀥𑀭𑀽𑀧𑀦𑁆𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀭𑀽𑀧𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺𑀆𑀤𑀻𑀦𑀺 (𑀲𑀼. 𑀦𑀺. 𑁫𑁪𑁬) 𑀯𑀢𑁆𑀯𑀸 𑀫𑀺𑀤𑁆𑀥𑀭𑀽𑀧𑀁 𑀢𑀸𑀯 𑀦𑀢𑁆𑀣𑀺𑀬𑁂𑀯𑀸𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀇𑀢𑀭𑁂𑀲𑀼 𑀭𑁄𑀕𑀭𑀽𑀧𑀁 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯, 𑀚𑀸𑀢𑀺𑀭𑀽𑀧𑀁 𑀉𑀧𑀘𑀬𑀲𑀦𑁆𑀢𑀢𑀺𑀕𑁆𑀕𑀳𑀡𑁂𑀦, 𑀲𑀫𑁆𑀪𑀯𑀭𑀽𑀧𑀁 𑀆𑀧𑁄𑀥𑀸𑀢𑀼𑀕𑁆𑀕𑀳𑀡𑁂𑀦, 𑀩𑀮𑀭𑀽𑀧𑀁 𑀯𑀸𑀬𑁄𑀥𑀸𑀢𑀼𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯. 𑀢𑀲𑁆𑀫𑀸 𑀢𑁂𑀲𑀼 𑀏𑀓𑀫𑁆𑀧𑀺 𑀯𑀺𑀲𑀼𑀁 𑀦𑀢𑁆𑀣𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁.

𑀇𑀢𑀺 𑀇𑀤𑀁 𑀘𑀢𑀼𑀯𑀻𑀲𑀢𑀺𑀯𑀺𑀥𑀁 𑀉𑀧𑀸𑀤𑀸𑀭𑀽𑀧𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀪𑀽𑀢𑀭𑀽𑀧𑀜𑁆𑀘𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁 𑀳𑁄𑀢𑀺 𑀅𑀦𑀽𑀦𑀫𑀦𑀥𑀺𑀓𑀁.

𑁪𑁪𑁭. 𑀢𑀁 𑀲𑀩𑁆𑀩𑀫𑁆𑀧𑀺 𑀦 𑀳𑁂𑀢𑀼 𑀅𑀳𑁂𑀢𑀼𑀓𑀁 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀧𑁆𑀧𑀘𑁆𑀘𑀬𑀁 𑀮𑁄𑀓𑀺𑀬𑀁 𑀲𑀸𑀲𑀯𑀫𑁂𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀯𑀺𑀥𑀁.

𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀁, 𑀑𑀴𑀸𑀭𑀺𑀓𑀁 𑀲𑀼𑀔𑀼𑀫𑀁, 𑀤𑀽𑀭𑁂 𑀲𑀦𑁆𑀢𑀺𑀓𑁂, 𑀦𑀺𑀧𑁆𑀨𑀦𑁆𑀦𑀁 𑀅𑀦𑀺𑀧𑁆𑀨𑀦𑁆𑀦𑀁, 𑀧𑀲𑀸𑀤𑀭𑀽𑀧𑀁 𑀦𑀧𑀲𑀸𑀤𑀭𑀽𑀧𑀁, 𑀇𑀦𑁆𑀤𑁆𑀭𑀺𑀬𑀁 𑀅𑀦𑀺𑀦𑁆𑀤𑁆𑀭𑀺𑀬𑀁, 𑀉𑀧𑀸𑀤𑀺𑀡𑁆𑀡𑀁 𑀅𑀦𑀼𑀧𑀸𑀤𑀺𑀡𑁆𑀡𑀦𑁆𑀢𑀺𑀆𑀤𑀺𑀯𑀲𑁂𑀦 𑀤𑀼𑀯𑀺𑀥𑀁.

𑀢𑀢𑁆𑀣 ¶ 𑀘𑀓𑁆𑀔𑀸𑀤𑀺𑀧𑀜𑁆𑀘𑀯𑀺𑀥𑀁 𑀅𑀢𑁆𑀢𑀪𑀸𑀯𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀁, 𑀲𑁂𑀲𑀁 𑀢𑀢𑁄 𑀩𑀸𑀳𑀺𑀭𑀢𑁆𑀢𑀸 𑀩𑀸𑀳𑀺𑀭𑀁. 𑀘𑀓𑁆𑀔𑀸𑀤𑀻𑀦𑀺 𑀦𑀯 𑀆𑀧𑁄𑀥𑀸𑀢𑀼𑀯𑀚𑁆𑀚𑀺𑀢𑀸 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀘𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑀁 𑀖𑀝𑁆𑀝𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀑𑀴𑀸𑀭𑀺𑀓𑀁, 𑀲𑁂𑀲𑀁 𑀢𑀢𑁄 𑀯𑀺𑀧𑀭𑀻𑀢𑀢𑁆𑀢𑀸 𑀲𑀼𑀔𑀼𑀫𑀁. 𑀬𑀁 𑀲𑀼𑀔𑀼𑀫𑀁 𑀢𑀤𑁂𑀯 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀲𑀪𑀸𑀯𑀢𑁆𑀢𑀸 ¶ 𑀤𑀽𑀭𑁂, 𑀇𑀢𑀭𑀁 𑀲𑀼𑀧𑁆𑀧𑀝𑀺𑀯𑀺𑀚𑁆𑀛𑀲𑀪𑀸𑀯𑀢𑁆𑀢𑀸 𑀲𑀦𑁆𑀢𑀺𑀓𑁂. 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀓𑁆𑀔𑀸𑀤𑀻𑀦𑀺 𑀢𑁂𑀭𑀲, 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀘𑀸𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀁 𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀮𑀓𑁆𑀔𑀡𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀯𑁂𑀦𑁂𑀯 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑁄 𑀦𑀺𑀧𑁆𑀨𑀦𑁆𑀦𑀁, 𑀲𑁂𑀲𑀁 𑀢𑀩𑁆𑀩𑀺𑀧𑀭𑀻𑀢𑀢𑀸𑀬 𑀅𑀦𑀺𑀧𑁆𑀨𑀦𑁆𑀦𑀁. 𑀘𑀓𑁆𑀔𑀸𑀤𑀺𑀧𑀜𑁆𑀘𑀯𑀺𑀥𑀁 𑀭𑀽𑀧𑀸𑀤𑀻𑀦𑀁 𑀕𑀳𑀡𑀧𑀘𑁆𑀘𑀬𑀪𑀸𑀯𑁂𑀦 𑀆𑀤𑀸𑀲𑀢𑀮𑀁 𑀯𑀺𑀬 𑀯𑀺𑀧𑁆𑀧𑀲𑀦𑁆𑀦𑀢𑁆𑀢𑀸 𑀧𑀲𑀸𑀤𑀭𑀽𑀧𑀁, 𑀇𑀢𑀭𑀁 𑀢𑀢𑁄 𑀯𑀺𑀧𑀭𑀻𑀢𑀢𑁆𑀢𑀸 𑀦𑀧𑀲𑀸𑀤𑀭𑀽𑀧𑀁. 𑀧𑀲𑀸𑀤𑀭𑀽𑀧𑀫𑁂𑀯 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑁆𑀢𑀬𑁂𑀦 𑀲𑀤𑁆𑀥𑀺𑀁 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁, 𑀲𑁂𑀲𑀁 𑀢𑀢𑁄 𑀯𑀺𑀧𑀭𑀻𑀢𑀢𑁆𑀢𑀸 𑀅𑀦𑀺𑀦𑁆𑀤𑁆𑀭𑀺𑀬𑀁. 𑀬𑀁 𑀓𑀫𑁆𑀫𑀚𑀦𑁆𑀢𑀺 𑀧𑀭𑀢𑁄 𑀯𑀓𑁆𑀔𑀸𑀫, 𑀢𑀁 𑀓𑀫𑁆𑀫𑁂𑀦 𑀉𑀧𑀸𑀤𑀺𑀡𑁆𑀡𑀢𑁆𑀢𑀸 𑀉𑀧𑀸𑀤𑀺𑀡𑁆𑀡𑀁, 𑀲𑁂𑀲𑀁 𑀢𑀢𑁄 𑀯𑀺𑀧𑀭𑀻𑀢𑀢𑁆𑀢𑀸 𑀅𑀦𑀼𑀧𑀸𑀤𑀺𑀡𑁆𑀡𑀁.

𑁪𑁪𑁮. 𑀧𑀼𑀦 𑀲𑀩𑁆𑀩𑀫𑁂𑀯 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀓𑀫𑁆𑀫𑀚𑀸𑀤𑀻𑀦𑀁 𑀢𑀺𑀓𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀑𑀴𑀸𑀭𑀺𑀓𑁂 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑁂𑀲𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁. 𑀲𑀩𑁆𑀩𑀫𑁆𑀧𑀺 𑀲𑀼𑀔𑀼𑀫𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁. 𑀏𑀯𑀁 𑀢𑀸𑀯 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀯𑀲𑁂𑀦 𑀢𑀺𑀯𑀺𑀥𑀁. 𑀓𑀫𑁆𑀫𑀚𑀸𑀤𑀺𑀢𑁆𑀢𑀺𑀓𑀯𑀲𑁂𑀦 𑀧𑀦 𑀓𑀫𑁆𑀫𑀢𑁄 𑀚𑀸𑀢𑀁 𑀓𑀫𑁆𑀫𑀚𑀁, 𑀢𑀤𑀜𑁆𑀜𑀧𑀘𑁆𑀘𑀬𑀚𑀸𑀢𑀁 𑀅𑀓𑀫𑁆𑀫𑀚𑀁, 𑀦𑀓𑀼𑀢𑁄𑀘𑀺𑀚𑀸𑀢𑀁 𑀦𑁂𑀯 𑀓𑀫𑁆𑀫𑀚𑀁 𑀦𑀸𑀓𑀫𑁆𑀫𑀚𑀁. 𑀘𑀺𑀢𑁆𑀢𑀢𑁄 𑀚𑀸𑀢𑀁 𑀘𑀺𑀢𑁆𑀢𑀚𑀁, 𑀢𑀤𑀜𑁆𑀜𑀧𑀘𑁆𑀘𑀬𑀚𑀸𑀢𑀁 𑀅𑀘𑀺𑀢𑁆𑀢𑀚𑀁, 𑀦𑀓𑀼𑀢𑁄𑀘𑀺𑀚𑀸𑀢𑀁 𑀦𑁂𑀯 𑀘𑀺𑀢𑁆𑀢𑀚𑀁 𑀦𑀸𑀘𑀺𑀢𑁆𑀢𑀚𑀁, 𑀆𑀳𑀸𑀭𑀢𑁄 𑀚𑀸𑀢𑀁 𑀆𑀳𑀸𑀭𑀚𑀁, 𑀢𑀤𑀜𑁆𑀜𑀧𑀘𑁆𑀘𑀬𑀚𑀸𑀢𑀁 𑀅𑀦𑀸𑀳𑀸𑀭𑀚𑀁, 𑀦𑀓𑀼𑀢𑁄𑀘𑀺𑀚𑀸𑀢𑀁 𑀦𑁂𑀯 𑀆𑀳𑀸𑀭𑀚𑀁 𑀦𑀅𑀦𑀸𑀳𑀸𑀭𑀚𑀁. 𑀉𑀢𑀼𑀢𑁄 𑀚𑀸𑀢𑀁 𑀉𑀢𑀼𑀚𑀁, 𑀢𑀤𑀜𑁆𑀜𑀧𑀘𑁆𑀘𑀬𑀚𑀸𑀢𑀁 𑀅𑀦𑀼𑀢𑀼𑀚𑀁, 𑀦𑀓𑀼𑀢𑁄𑀘𑀺𑀚𑀸𑀢𑀁 𑀦𑁂𑀯 𑀉𑀢𑀼𑀚𑀁 𑀦𑀅𑀦𑀼𑀢𑀼𑀚𑀦𑁆𑀢𑀺 𑀏𑀯𑀁 𑀓𑀫𑁆𑀫𑀚𑀸𑀤𑀺𑀢𑁆𑀢𑀺𑀓𑀯𑀲𑁂𑀦 𑀢𑀺𑀯𑀺𑀥𑀁.

𑁪𑁪𑁯. 𑀧𑀼𑀦 𑀤𑀺𑀝𑁆𑀞𑀸𑀤𑀺𑀭𑀽𑀧𑀭𑀽𑀧𑀸𑀤𑀺𑀯𑀢𑁆𑀣𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀦𑀸𑀫 𑀤𑀲𑁆𑀲𑀦𑀯𑀺𑀲𑀬𑀢𑁆𑀢𑀸, 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁 𑀦𑀸𑀫 𑀲𑀯𑀦𑀯𑀺𑀲𑀬𑀢𑁆𑀢𑀸, 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀢𑁆𑀢𑀬𑀁 𑀫𑀼𑀢𑀁 𑀦𑀸𑀫 𑀲𑀫𑁆𑀧𑀢𑁆𑀢𑀕𑀸𑀳𑀓𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀢𑁆𑀢𑀸, 𑀲𑁂𑀲𑀁 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑀢𑁆𑀢𑀸𑀢𑀺 𑀏𑀯𑀁 𑀢𑀸𑀯 𑀤𑀺𑀝𑁆𑀞𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀧𑀦𑁂𑀢𑁆𑀣 𑀭𑀽𑀧𑀭𑀽𑀧𑀁 𑀦𑀸𑀫, 𑀆𑀓𑀸𑀲𑀥𑀸𑀢𑀼 𑀧𑀭𑀺𑀘𑁆𑀙𑁂𑀤𑀭𑀽𑀧𑀁 𑀦𑀸𑀫, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀆𑀤𑀺 𑀓𑀫𑁆𑀫𑀜𑁆𑀜𑀢𑀸𑀧𑀭𑀺𑀬𑀦𑁆𑀢𑀁 𑀯𑀺𑀓𑀸𑀭𑀭𑀽𑀧𑀁 𑀦𑀸𑀫, 𑀚𑀸𑀢𑀺𑀚𑀭𑀸𑀪𑀗𑁆𑀕𑀁 𑀮𑀓𑁆𑀔𑀡𑀭𑀽𑀧𑀁 𑀦𑀸𑀫𑀸𑀢𑀺 𑀏𑀯𑀁 𑀭𑀽𑀧𑀭𑀽𑀧𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑀬𑀁 ¶ 𑀧𑀦𑁂𑀢𑁆𑀣 𑀳𑀤𑀬𑀭𑀽𑀧𑀁 𑀦𑀸𑀫, 𑀢𑀁 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀁. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀤𑁆𑀯𑀸𑀭𑀁 𑀦 𑀯𑀢𑁆𑀣𑀼. 𑀧𑀲𑀸𑀤𑀭𑀽𑀧𑀁 𑀯𑀢𑁆𑀣𑀼 𑀘𑁂𑀯 𑀤𑁆𑀯𑀸𑀭𑀜𑁆𑀘. 𑀲𑁂𑀲𑀁 𑀦𑁂𑀯 𑀯𑀢𑁆𑀣𑀼 𑀦 𑀤𑁆𑀯𑀸𑀭𑀦𑁆𑀢𑀺 𑀏𑀯𑀁 𑀯𑀢𑁆𑀣𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁.

𑁪𑁫𑁦. 𑀧𑀼𑀦 ¶ 𑀏𑀓𑀚𑀁, 𑀤𑁆𑀯𑀺𑀚𑀁, 𑀢𑀺𑀚𑀁, 𑀘𑀢𑀼𑀚𑀁, 𑀦𑀓𑀼𑀢𑁄𑀘𑀺𑀚𑀸𑀢𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 𑀓𑀫𑁆𑀫𑀚𑀫𑁂𑀯 𑀘𑀺𑀢𑁆𑀢𑀚𑀫𑁂𑀯 𑀘 𑀏𑀓𑀚𑀁 𑀦𑀸𑀫. 𑀢𑁂𑀲𑀼 𑀲𑀤𑁆𑀥𑀺𑀁 𑀳𑀤𑀬𑀯𑀢𑁆𑀣𑀼𑀦𑀸 𑀇𑀦𑁆𑀤𑁆𑀭𑀺𑀬𑀭𑀽𑀧𑀁 𑀓𑀫𑁆𑀫𑀚𑀫𑁂𑀯. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀘𑀺𑀢𑁆𑀢𑀚𑀫𑁂𑀯. 𑀬𑀁 𑀧𑀦 𑀘𑀺𑀢𑁆𑀢𑀢𑁄 𑀘 𑀉𑀢𑀼𑀢𑁄 𑀘 𑀚𑀸𑀢𑀁, 𑀢𑀁 𑀤𑁆𑀯𑀺𑀚𑀁 𑀦𑀸𑀫, 𑀢𑀁 𑀲𑀤𑁆𑀤𑀸𑀬𑀢𑀦𑀫𑁂𑀯. 𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀚𑀸𑀢𑀁, 𑀢𑀁 𑀢𑀺𑀚𑀁 𑀦𑀸𑀫, 𑀢𑀁 𑀧𑀦 𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁂𑀯. 𑀬𑀁 𑀘𑀢𑀽𑀳𑀺𑀧𑀺 𑀓𑀫𑁆𑀫𑀸𑀤𑀻𑀳𑀺 𑀚𑀸𑀢𑀁, 𑀢𑀁 𑀘𑀢𑀼𑀚𑀁 𑀦𑀸𑀫, 𑀢𑀁 𑀮𑀓𑁆𑀔𑀡𑀭𑀽𑀧𑀯𑀚𑁆𑀚𑀁 𑀅𑀯𑀲𑁂𑀲𑀁 𑀳𑁄𑀢𑀺. 𑀮𑀓𑁆𑀔𑀡𑀭𑀽𑀧𑀁 𑀧𑀦 𑀦𑀓𑀼𑀢𑁄𑀘𑀺𑀚𑀸𑀢𑀁. 𑀓𑀲𑁆𑀫𑀸? 𑀦 𑀳𑀺 𑀉𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀅𑀢𑁆𑀣𑀺, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀧𑀭𑀺𑀧𑀸𑀓𑀪𑁂𑀤𑀫𑀢𑁆𑀢𑀁 𑀇𑀢𑀭𑀤𑁆𑀯𑀬𑀁. 𑀬𑀫𑁆𑀧𑀺 ‘‘𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸, 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀇𑀫𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁦𑁧) 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺𑀚𑀸𑀢𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀧𑀦 𑀭𑀽𑀧𑀚𑀦𑀓𑀧𑀘𑁆𑀘𑀬𑀸𑀦𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀤𑀺𑀝𑁆𑀞𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀁 𑀢𑀸𑀯 𑀭𑀽𑀧𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀓𑀣𑀸

𑁪𑁫𑁧. 𑀇𑀢𑀭𑁂𑀲𑀼 𑀧𑀦 𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄; 𑀬𑀁𑀓𑀺𑀜𑁆𑀘𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄; 𑀬𑀁𑀓𑀺𑀜𑁆𑀘𑀺 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄; 𑀬𑀁𑀓𑀺𑀜𑁆𑀘𑀺 𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀲𑁆𑀫𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀯𑀺𑀜𑁆𑀜𑀸𑀢𑁂 𑀇𑀢𑀭𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀬𑀁𑀓𑀺𑀜𑁆𑀘𑀺 𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀳𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁? 𑀬𑀣𑀸𑀳 ‘‘𑀯𑀺𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀻𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁪𑁪𑁯). 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁 𑀫𑀦𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀤𑁂𑀢𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑁂𑀦 𑀲𑀪𑀸𑀯𑀢𑁄 ¶ 𑀏𑀓𑀯𑀺𑀥𑀫𑁆𑀧𑀺 𑀚𑀸𑀢𑀺𑀯𑀲𑁂𑀦 𑀢𑀺𑀯𑀺𑀥𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀜𑁆𑀘.

𑁪𑁫𑁨. 𑀢𑀢𑁆𑀣 ¶ 𑀓𑀼𑀲𑀮𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀜𑁆𑀘, 𑀢𑀣𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀜𑁆𑀘, 𑀢𑀣𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁.

𑀬𑀤𑀸 𑀳𑀺 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀁 𑀆𑀕𑀫𑁆𑀫 𑀳𑀝𑁆𑀞𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫. 𑀦𑀺. 𑁧.𑁪𑁪𑁧) 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀲𑀁𑀲𑀻𑀤𑀦𑁆𑀢𑁄 𑀅𑀦𑀼𑀲𑁆𑀲𑀸𑀳𑀺𑀢𑁄 𑀧𑀭𑁂𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀳𑁄𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀯𑀲𑁂𑀦 𑀲𑀁𑀲𑀻𑀤𑀫𑀸𑀦𑁄 𑀯𑀸 𑀧𑀭𑁂𑀳𑀺 𑀯𑀸 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀤𑁂𑀯 𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀗𑁆𑀔𑀸𑀭𑁄𑀢𑀺 𑀏𑀢𑀁 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀲𑁆𑀲𑀸𑀥𑀺𑀯𑀘𑀦𑀁. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀤𑀸𑀭𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀓𑀺𑀜𑁆𑀘𑀺𑀤𑁂𑀯 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑀢𑀺𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 ‘‘𑀤𑁂𑀣 𑀯𑀦𑁆𑀤𑀣𑀸𑀢𑀺’’ 𑀜𑀸𑀢𑀻𑀳𑀺 𑀉𑀲𑁆𑀲𑀸𑀳𑀺𑀢𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀁 𑀅𑀲𑀫𑁆𑀧𑀢𑁆𑀢𑀺𑀁 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀸𑀯𑀘𑀭𑀁 𑀧𑀦 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀸𑀥𑀺𑀬𑀼𑀢𑁆𑀢𑀁 𑀧𑀞𑀫𑀁, 𑀅𑀢𑀺𑀓𑁆𑀓𑀦𑁆𑀢𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀁, 𑀢𑀢𑁄 𑀅𑀢𑀺𑀓𑁆𑀓𑀦𑁆𑀢𑀯𑀺𑀘𑀸𑀭𑀁 𑀢𑀢𑀺𑀬𑀁, 𑀢𑀢𑁄 𑀯𑀺𑀭𑀢𑁆𑀢𑀧𑀻𑀢𑀺𑀓𑀁 𑀘𑀢𑀼𑀢𑁆𑀣𑀁, 𑀅𑀢𑁆𑀣𑀗𑁆𑀕𑀢𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀫𑀸𑀥𑀺𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺.

𑀅𑀭𑀽𑀧𑀸𑀯𑀘𑀭𑀁 𑀘𑀢𑀼𑀦𑁆𑀦𑀁 𑀆𑀭𑀼𑀧𑁆𑀧𑀸𑀦𑀁 𑀬𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀳𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀚𑁆𑀛𑀸𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀳𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 ¶ . 𑀮𑁄𑀓𑀼𑀢𑁆𑀢𑀭𑀁 𑀘𑀢𑀼𑀫𑀕𑁆𑀕𑀲𑀫𑁆𑀧𑀬𑁄𑀕𑀢𑁄 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀏𑀯𑀁 𑀢𑀸𑀯 𑀓𑀼𑀲𑀮𑀯𑀺𑀜𑁆𑀜𑀸𑀡𑀫𑁂𑀯 𑀏𑀓𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺.

𑁪𑁫𑁩. 𑀅𑀓𑀼𑀲𑀮𑀁 ¶ 𑀧𑀦 𑀪𑀽𑀫𑀺𑀢𑁄 𑀏𑀓𑀯𑀺𑀥𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀫𑀽𑀮𑀢𑁄 𑀢𑀺𑀯𑀺𑀥𑀁 𑀮𑁄𑀪𑀫𑀽𑀮𑀁 𑀤𑁄𑀲𑀫𑀽𑀮𑀁 𑀫𑁄𑀳𑀫𑀽𑀮𑀜𑁆𑀘.

𑀢𑀢𑁆𑀣 𑀮𑁄𑀪𑀫𑀽𑀮𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀜𑁆𑀘, 𑀢𑀣𑀸 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀜𑁆𑀘, 𑀢𑀣𑀸 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁.

𑀬𑀤𑀸 𑀳𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑀺 (𑀫. 𑀦𑀺. 𑁧.𑁪𑁬𑁯) 𑀆𑀤𑀺𑀦𑀸 𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀧𑀞𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀤𑀼𑀢𑀺𑀬𑀁. 𑀬𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀯𑀸 𑀲𑁂𑀯𑀢𑀺, 𑀧𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀢𑀢𑀺𑀬𑀁. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀮𑁄𑀪𑀫𑀽𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀤𑁄𑀲𑀫𑀽𑀮𑀁 𑀧𑀦 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀦𑁆𑀢𑀺 𑀤𑀼𑀯𑀺𑀥𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑁄𑀳𑀫𑀽𑀮𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀢𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑀓𑀸𑀮𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀜𑁆𑀜𑀸𑀡𑀁 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺.

𑁪𑁫𑁪. 𑀅𑀩𑁆𑀬𑀸𑀓𑀢𑀁 𑀚𑀸𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑀁 𑀯𑀺𑀧𑀸𑀓𑀁 𑀓𑀺𑀭𑀺𑀬𑀜𑁆𑀘. 𑀢𑀢𑁆𑀣 𑀯𑀺𑀧𑀸𑀓𑀁 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀢𑁆𑀣 ¶ 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀜𑁆𑀘. 𑀓𑀼𑀲𑀮𑀯𑀺𑀧𑀸𑀓𑀫𑁆𑀧𑀺 𑀤𑀼𑀯𑀺𑀥𑀁 𑀅𑀳𑁂𑀢𑀼𑀓𑀁 𑀲𑀳𑁂𑀢𑀼𑀓𑀜𑁆𑀘.

𑀢𑀢𑁆𑀣 𑀅𑀮𑁄𑀪𑀸𑀤𑀺𑀯𑀺𑀧𑀸𑀓𑀳𑁂𑀢𑀼𑀯𑀺𑀭𑀳𑀺𑀢𑀁 𑀅𑀳𑁂𑀢𑀼𑀓𑀁, 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁 ¶ , 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀸 𑀫𑀦𑁄𑀥𑀸𑀢𑀼, 𑀲𑀦𑁆𑀢𑀻𑀭𑀡𑀸𑀤𑀺𑀓𑀺𑀘𑁆𑀘𑀸 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀘𑀸𑀢𑀺 𑀅𑀝𑁆𑀞𑀯𑀺𑀥𑀁.

𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀁, 𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑀧𑀤𑀝𑁆𑀞𑀸𑀦𑀁. 𑀲𑁄𑀢𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑁆𑀤𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸𑀦𑀺 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀲𑀤𑁆𑀤𑀸𑀤𑀺𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀸𑀦𑀺, 𑀲𑀤𑁆𑀤𑀸𑀤𑀺𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺, 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀽𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀸𑀦𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀁 𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸 𑀫𑀦𑁄𑀥𑀸𑀢𑀼, 𑀭𑀽𑀧𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀅𑀧𑀕𑀫𑀧𑀤𑀝𑁆𑀞𑀸𑀦𑀸.

𑀅𑀳𑁂𑀢𑀼𑀓𑀯𑀺𑀧𑀸𑀓𑀸 𑀲𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸 𑀤𑀼𑀯𑀺𑀥𑀸𑀧𑀺 𑀲𑀦𑁆𑀢𑀻𑀭𑀡𑀸𑀤𑀺𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑀦𑁆𑀢𑀻𑀭𑀡𑀸𑀤𑀺𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸. 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀬𑁄𑀕𑀢𑁄 𑀧𑀦 𑀤𑁆𑀯𑀺𑀧𑀜𑁆𑀘𑀝𑁆𑀞𑀸𑀦𑀪𑁂𑀤𑀢𑁄 𑀘 𑀢𑀲𑁆𑀲𑀸 𑀪𑁂𑀤𑁄. 𑀏𑀢𑀸𑀲𑀼 𑀳𑀺 𑀏𑀓𑀸 𑀏𑀓𑀦𑁆𑀢𑀫𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀤𑁆𑀯𑀸𑀭𑁂 𑀘𑁂𑀯 𑀚𑀯𑀦𑀸𑀯𑀲𑀸𑀦𑁂 𑀘 𑀧𑀯𑀢𑁆𑀢𑀦𑀢𑁄 𑀤𑁆𑀯𑀺𑀝𑁆𑀞𑀸𑀦𑀸 𑀳𑁄𑀢𑀺. 𑀏𑀓𑀸 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀜𑁆𑀘𑀝𑁆𑀞𑀸𑀦𑀸 𑀳𑁄𑀢𑀺.

𑀅𑀝𑁆𑀞𑀯𑀺𑀥𑀫𑁆𑀧𑀺 𑀘𑁂𑀢𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀦𑀺𑀬𑀢𑀸𑀦𑀺𑀬𑀢𑀸𑀭𑀫𑁆𑀫𑀡𑀢𑁆𑀢𑀸 𑀤𑀼𑀯𑀺𑀥𑀁. 𑀉𑀧𑁂𑀓𑁆𑀔𑀸𑀲𑀼𑀔𑀲𑁄𑀫𑀦𑀲𑁆𑀲𑀪𑁂𑀤𑀢𑁄 𑀢𑀺𑀯𑀺𑀥𑀁. 𑀯𑀺𑀜𑁆𑀜𑀸𑀡𑀧𑀜𑁆𑀘𑀓𑀁 𑀳𑁂𑀢𑁆𑀣 𑀦𑀺𑀬𑀢𑀸𑀭𑀫𑁆𑀫𑀡𑀁 𑀬𑀣𑀸𑀓𑁆𑀓𑀫𑀁 𑀭𑀽𑀧𑀸𑀤𑀻𑀲𑀼𑀬𑁂𑀯 𑀧𑀯𑀢𑁆𑀢𑀺𑀢𑁄, 𑀲𑁂𑀲𑀁 𑀅𑀦𑀺𑀬𑀢𑀸𑀭𑀫𑁆𑀫𑀡𑀁. 𑀢𑀢𑁆𑀭 𑀳𑀺 𑀫𑀦𑁄𑀥𑀸𑀢𑀼 𑀧𑀜𑁆𑀘𑀲𑀼𑀧𑀺 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀙𑀲𑀽𑀢𑀺. 𑀓𑀸𑀬𑀯𑀺𑀜𑁆𑀜𑀸𑀡𑀁 𑀧𑀦𑁂𑀢𑁆𑀣 𑀲𑀼𑀔𑀬𑀼𑀢𑁆𑀢𑀁, 𑀤𑁆𑀯𑀺𑀝𑁆𑀞𑀸𑀦𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸, 𑀲𑁂𑀲𑀁 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀦𑁆𑀢𑀺. 𑀏𑀯𑀁 𑀢𑀸𑀯 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀁 𑀅𑀝𑁆𑀞𑀯𑀺𑀥𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀮𑁄𑀪𑀸𑀤𑀺𑀯𑀺𑀧𑀸𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀲𑀳𑁂𑀢𑀼𑀓𑀁, 𑀢𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀲𑁄𑀫𑀦𑀲𑁆𑀲𑀸𑀤𑀺 𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀬𑀣𑀸 𑀧𑀦 𑀓𑀼𑀲𑀮𑀁 𑀤𑀸𑀦𑀸𑀤𑀺𑀯𑀲𑁂𑀦 ¶ 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀇𑀤𑀁 𑀢𑀣𑀸. 𑀇𑀤𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀲𑀼𑀬𑁂𑀯 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺 ¶ . 𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀪𑀸𑀯𑁄 𑀧𑀦𑁂𑀢𑁆𑀣 𑀆𑀕𑀫𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑁂 𑀅𑀲𑀢𑀺𑀧𑀺 𑀆𑀤𑀸𑀲𑀢𑀮𑀸𑀤𑀻𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀧𑀸𑀓𑀁, 𑀫𑀼𑀔𑀁 𑀯𑀺𑀬 𑀲𑀉𑀲𑁆𑀲𑀸𑀳𑀁 𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀯𑀮𑀁 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑀁 𑀅𑀳𑁂𑀢𑀼𑀓𑀫𑁂𑀯, 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀸 𑀫𑀦𑁄𑀥𑀸𑀢𑀼, 𑀲𑀦𑁆𑀢𑀻𑀭𑀡𑀸𑀤𑀺𑀓𑀺𑀘𑁆𑀘𑀸 𑀧𑀜𑁆𑀘𑀝𑁆𑀞𑀸𑀦𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀲𑀢𑁆𑀢𑀯𑀺𑀥𑀁. 𑀢𑀁 𑀮𑀓𑁆𑀔𑀡𑀸𑀤𑀺𑀢𑁄 𑀓𑀼𑀲𑀮𑀸𑀳𑁂𑀢𑀼𑀓𑀯𑀺𑀧𑀸𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀯𑀮𑀜𑁆𑀳𑀺 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀦𑀺, 𑀇𑀫𑀸𑀦𑀺 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀢𑀸𑀦𑀺 𑀘 𑀉𑀧𑁂𑀓𑁆𑀔𑀸𑀲𑀼𑀔𑀲𑁄𑀫𑀦𑀲𑁆𑀲𑀪𑁂𑀤𑀢𑁄 𑀢𑀺𑀯𑀺𑀥𑀸𑀦𑀺, 𑀇𑀫𑀸𑀦𑀺 𑀤𑀼𑀓𑁆𑀔𑀉𑀧𑁂𑀓𑁆𑀔𑀸𑀯𑀲𑁂𑀦 𑀤𑀼𑀯𑀺𑀥𑀸𑀦𑀺. 𑀏𑀢𑁆𑀣 𑀳𑀺 𑀓𑀸𑀬𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀲𑀳𑀕𑀢𑀫𑁂𑀯, 𑀲𑁂𑀲𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺. 𑀲𑀸 𑀘 𑀢𑁂𑀲𑀼 𑀉𑀧𑁂𑀓𑁆𑀔𑀸 𑀳𑀻𑀦𑀸 𑀤𑀼𑀓𑁆𑀔𑀁 𑀯𑀺𑀬 𑀦𑀸𑀢𑀺𑀢𑀺𑀔𑀺𑀡𑀸, 𑀇𑀢𑀭𑁂𑀲𑀼 𑀉𑀧𑁂𑀓𑁆𑀔𑀸 𑀧𑀡𑀻𑀢𑀸 𑀲𑀼𑀔𑀁 𑀯𑀺𑀬 𑀦𑀸𑀢𑀺𑀢𑀺𑀔𑀺𑀡𑀸. 𑀇𑀢𑀺 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀼𑀭𑀺𑀫𑀸𑀦𑀜𑁆𑀘 𑀲𑁄𑀴𑀲𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀯𑀲𑁂𑀦 𑀓𑀸𑀫𑀸𑀯𑀘𑀭𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀢𑁂𑀯𑀻𑀲𑀢𑀺𑀯𑀺𑀥𑀁.

𑀭𑀽𑀧𑀸𑀯𑀘𑀭𑀁 𑀧𑀦 𑀓𑀼𑀲𑀮𑀁 𑀯𑀺𑀬 𑀧𑀜𑁆𑀘𑀯𑀺𑀥𑀁. 𑀓𑀼𑀲𑀮𑀁 𑀧𑀦 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀚𑀯𑀦𑀯𑀻𑀣𑀺𑀬𑀁 𑀧𑀯𑀢𑁆𑀢𑀢𑀺. 𑀇𑀤𑀁 𑀉𑀧𑀧𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦. 𑀬𑀣𑀸 𑀘 𑀭𑀽𑀧𑀸𑀯𑀘𑀭𑀁, 𑀏𑀯𑀁 𑀅𑀭𑀽𑀧𑀸𑀯𑀘𑀭𑀫𑁆𑀧𑀺 𑀓𑀼𑀲𑀮𑀁 𑀯𑀺𑀬 𑀘𑀢𑀼𑀩𑁆𑀩𑀺𑀥𑀁. 𑀧𑀯𑀢𑁆𑀢𑀺𑀪𑁂𑀤𑁄𑀧𑀺𑀲𑁆𑀲 𑀭𑀽𑀧𑀸𑀯𑀘𑀭𑁂 𑀯𑀼𑀢𑁆𑀢𑀦𑀬𑁄 𑀏𑀯. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀘𑀢𑀼𑀫𑀕𑁆𑀕𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀁, 𑀢𑀁 𑀫𑀕𑁆𑀕𑀯𑀻𑀣𑀺𑀯𑀲𑁂𑀦 𑀘𑁂𑀯 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘 𑀤𑁆𑀯𑀺𑀥𑀸 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀙𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀳𑁄𑀢𑀺.

𑀓𑀺𑀭𑀺𑀬𑀁 𑀧𑀦 𑀪𑀽𑀫𑀺𑀪𑁂𑀤𑀢𑁄 𑀢𑀺𑀯𑀺𑀥𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀅𑀳𑁂𑀢𑀼𑀓𑀁 𑀲𑀳𑁂𑀢𑀼𑀓𑀜𑁆𑀘. 𑀢𑀢𑁆𑀣 𑀅𑀮𑁄𑀪𑀸𑀤𑀺𑀓𑀺𑀭𑀺𑀬𑀳𑁂𑀢𑀼𑀯𑀺𑀭𑀳𑀺𑀢𑀁 𑀅𑀳𑁂𑀢𑀼𑀓𑀁, 𑀢𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑀢𑁄 𑀤𑀼𑀯𑀺𑀥𑀁.

𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑀼𑀭𑁂𑀘𑀭𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸 𑀫𑀦𑁄𑀥𑀸𑀢𑀼, 𑀆𑀯𑀚𑁆𑀚𑀦𑀭𑀲𑀸, 𑀭𑀽𑀧𑀸𑀤𑀺𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀪𑀯𑀗𑁆𑀕𑀯𑀺𑀘𑁆𑀙𑁂𑀤𑀧𑀤𑀝𑁆𑀞𑀸𑀦𑀸, 𑀲𑀸 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀯 𑀳𑁄𑀢𑀺.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 ¶ ¶ 𑀧𑀦 𑀤𑀼𑀯𑀺𑀥𑀸 𑀲𑀸𑀥𑀸𑀭𑀡𑀸 𑀅𑀲𑀸𑀥𑀸𑀭𑀡𑀸 𑀘. 𑀢𑀢𑁆𑀣 𑀲𑀸𑀥𑀸𑀭𑀡𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀸 𑀲𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀓𑀺𑀘𑁆𑀘𑀯𑀲𑁂𑀦 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀪𑀯𑀗𑁆𑀕𑀸𑀦𑀁 𑀅𑀜𑁆𑀜𑀢𑀭𑀸𑀧𑀕𑀫𑀧𑀤𑀝𑁆𑀞𑀸𑀦𑀸.

𑀅𑀲𑀸𑀥𑀸𑀭𑀡𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀸 𑀲𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀓𑀺𑀘𑁆𑀘𑀯𑀲𑁂𑀦 𑀅𑀭𑀳𑀢𑀁 𑀅𑀦𑀼𑀴𑀸𑀭𑁂𑀲𑀼 𑀯𑀢𑁆𑀣𑀽𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀦𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸𑀢𑀺. 𑀇𑀢𑀺 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀅𑀳𑁂𑀢𑀼𑀓𑀁 𑀢𑀺𑀯𑀺𑀥𑀁.

𑀲𑀳𑁂𑀢𑀼𑀓𑀁 𑀧𑀦 𑀲𑁄𑀫𑀦𑀲𑁆𑀲𑀸𑀤𑀺𑀪𑁂𑀤𑀢𑁄 𑀓𑀼𑀲𑀮𑀁 𑀯𑀺𑀬 𑀅𑀝𑁆𑀞𑀯𑀺𑀥𑀁. 𑀓𑁂𑀯𑀮𑀜𑁆𑀳𑀺 𑀓𑀼𑀲𑀮𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀅𑀭𑀳𑀢𑀁𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀸𑀫𑀸𑀯𑀘𑀭𑀁 𑀏𑀓𑀸𑀤𑀲𑀯𑀺𑀥𑀁.

𑀭𑀽𑀧𑀸𑀯𑀘𑀭𑀁 𑀧𑀦 𑀅𑀭𑀽𑀧𑀸𑀯𑀘𑀭𑀜𑁆𑀘 𑀓𑀼𑀲𑀮𑀁 𑀯𑀺𑀬 𑀧𑀜𑁆𑀘𑀯𑀺𑀥𑀁 𑀘𑀢𑀼𑀩𑁆𑀩𑀺𑀥𑀜𑁆𑀘 𑀳𑁄𑀢𑀺. 𑀅𑀭𑀳𑀢𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀘𑀲𑁆𑀲 𑀓𑀼𑀲𑀮𑀢𑁄 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀢𑀻𑀲𑀼 𑀪𑀽𑀫𑀻𑀲𑀼 𑀯𑀻𑀲𑀢𑀺𑀯𑀺𑀥𑀁 𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀁 𑀳𑁄𑀢𑀺.

𑁪𑁫𑁫. 𑀇𑀢𑀺 𑀏𑀓𑀯𑀻𑀲𑀢𑀺 𑀓𑀼𑀲𑀮𑀸𑀦𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺 𑀙𑀢𑁆𑀢𑀺𑀁𑀲 𑀯𑀺𑀧𑀸𑀓𑀸𑀦𑀺 𑀯𑀻𑀲𑀢𑀺 𑀓𑀺𑀭𑀺𑀬𑀸𑀦𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀏𑀓𑀽𑀦𑀦𑀯𑀼𑀢𑀺 𑀯𑀺𑀜𑁆𑀜𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀬𑀸𑀦𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀯𑀚𑁆𑀚𑀦𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀘𑀼𑀢𑀺𑀯𑀲𑁂𑀦 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀦𑁆𑀢𑀺.

𑀓𑀣𑀁? 𑀬𑀤𑀸 𑀳𑀺 𑀅𑀝𑁆𑀞𑀦𑁆𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀁 𑀆𑀦𑀼𑀪𑀸𑀯𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀤𑀸 𑀦𑁂𑀲𑀁 𑀫𑀭𑀡𑀓𑀸𑀮𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀺, 𑀫𑀦𑀼𑀲𑁆𑀲𑁂𑀲𑀼 𑀧𑀡𑁆𑀟𑀓𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑀸𑀦𑀁 𑀤𑀼𑀩𑁆𑀩𑀮𑀤𑁆𑀯𑀺𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀯 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀬𑀤𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀼𑀪𑀸𑀯𑁂𑀦 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 ¶ , 𑀢𑀤𑀸 𑀦𑁂𑀲𑀁 𑀫𑀭𑀡𑀓𑀸𑀮𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀯 𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑀬𑀤𑀸 ¶ 𑀧𑀦 𑀅𑀓𑀼𑀲𑀮𑀸𑀦𑀼𑀪𑀸𑀯𑁂𑀦 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀤𑀸 𑀦𑁂𑀲𑀁 𑀫𑀭𑀡𑀓𑀸𑀮𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂 𑀧𑀦 𑀦𑀺𑀭𑀼𑀤𑁆𑀥𑁂 𑀢𑀁 𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑀦𑀼𑀩𑀦𑁆𑀥𑀫𑀸𑀦𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀁 𑀢𑀲𑁆𑀫𑀺𑀜𑁆𑀜𑁂𑀯 𑀆𑀭𑀫𑁆𑀫𑀡𑁂 𑀢𑀸𑀤𑀺𑀲𑀫𑁂𑀯 𑀪𑀯𑀗𑁆𑀕𑀯𑀺𑀜𑁆𑀜𑀸𑀡𑀁 𑀦𑀸𑀫 𑀧𑀯𑀢𑁆𑀢𑀢𑀺, 𑀧𑀼𑀦𑀧𑀺 𑀢𑀸𑀤𑀺𑀲𑀦𑁆𑀢𑀺 𑀏𑀯𑀁 𑀅𑀲𑀢𑀺 𑀲𑀦𑁆𑀢𑀸𑀦𑀯𑀺𑀦𑀺𑀯𑀢𑁆𑀢𑀓𑁂 𑀅𑀜𑁆𑀜𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀦𑀤𑀻𑀲𑁄𑀢𑀁 𑀯𑀺𑀬 𑀲𑀼𑀧𑀺𑀦𑀁 𑀅𑀧𑀲𑁆𑀲𑀢𑁄 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑀸𑀤𑀻𑀲𑀼 𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑀫𑁆𑀧𑀺 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀏𑀯𑀁 𑀢𑁂𑀲𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀸𑀦𑀁 𑀪𑀯𑀗𑁆𑀕𑀯𑀲𑁂𑀦𑀸𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀧𑀯𑀢𑁆𑀢𑁂 𑀧𑀦 𑀪𑀯𑀗𑁆𑀕𑀲𑀦𑁆𑀢𑀸𑀦𑁂 𑀬𑀤𑀸 𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀆𑀭𑀫𑁆𑀫𑀡𑀕𑀳𑀡𑀓𑁆𑀔𑀫𑀸𑀦𑀺 𑀳𑁄𑀦𑁆𑀢𑀺, 𑀢𑀤𑀸 𑀘𑀓𑁆𑀔𑀼𑀲𑁆𑀲𑀸𑀧𑀸𑀣𑀕𑀢𑁂 𑀭𑀽𑀧𑁂 𑀭𑀽𑀧𑀁 𑀧𑀝𑀺𑀘𑁆𑀘 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀖𑀝𑁆𑀝𑀦𑀸 𑀳𑁄𑀢𑀺, 𑀢𑀢𑁄 𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦 𑀪𑀯𑀗𑁆𑀕𑀘𑀮𑀦𑀁 𑀳𑁄𑀢𑀺, 𑀅𑀣 𑀦𑀺𑀭𑀼𑀤𑁆𑀥𑁂 𑀪𑀯𑀗𑁆𑀕𑁂 𑀢𑀤𑁂𑀯 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀫𑀸𑀦𑀸 𑀯𑀺𑀬 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀙𑀩𑁆𑀩𑀺𑀥𑁂𑀧𑀺 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀪𑀯𑀗𑁆𑀕𑀘𑀮𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀫𑀸𑀦𑀸 𑀯𑀺𑀬 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀳𑁂𑀢𑀼𑀓𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀸𑀦𑀁 𑀆𑀯𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀲𑀯𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀦𑀺 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀦𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀯𑀺𑀲𑀬𑁂𑀲𑀼 𑀓𑀼𑀲𑀮𑀯𑀺𑀧𑀸𑀓𑀸𑀦𑀺, 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀯𑀺𑀲𑀬𑁂𑀲𑀼 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀻𑀢𑀺 𑀏𑀯𑀁 𑀤𑀲𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 ¶ 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀢𑀚𑁆𑀚𑀸 𑀫𑀦𑁄𑀥𑀸𑀢𑀽’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁧𑁮𑁪) 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 ¶ 𑀢𑁂𑀲𑀜𑁆𑀜𑁂𑀯 𑀯𑀺𑀲𑀬𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀓𑀼𑀲𑀮𑀯𑀺𑀧𑀸𑀓𑀸𑀦𑀦𑁆𑀢𑀭𑀁 𑀓𑀼𑀲𑀮𑀯𑀺𑀧𑀸𑀓𑀸, 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀦𑁆𑀢𑀭𑀁 𑀅𑀓𑀼𑀲𑀮𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁪) 𑀯𑀘𑀦𑀢𑁄 𑀧𑀦 𑀫𑀦𑁄𑀥𑀸𑀢𑀼𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑁂𑀯 𑀯𑀺𑀲𑀬𑀁 𑀲𑀦𑁆𑀢𑀻𑀭𑀬𑀫𑀸𑀦𑀸 𑀅𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀸 𑀅𑀓𑀼𑀲𑀮𑀯𑀺𑀧𑀸𑀓𑀸, 𑀓𑀼𑀲𑀮𑀯𑀺𑀧𑀸𑀓𑀸𑀬 𑀅𑀦𑀦𑁆𑀢𑀭𑀸 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀉𑀧𑁆𑀧𑀚𑁆𑀚𑀢𑀺 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀯𑀁 𑀢𑀺𑀡𑁆𑀡𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀲𑀦𑁆𑀢𑀻𑀭𑀡𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀦𑁆𑀢𑀻𑀭𑀡𑀸𑀦𑀦𑁆𑀢𑀭𑀁 𑀧𑀦 𑀢𑀫𑁂𑀯 𑀯𑀺𑀲𑀬𑀁 𑀯𑀯𑀢𑁆𑀣𑀸𑀧𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀏𑀯𑀁 𑀏𑀓𑀲𑁆𑀲𑁂𑀯 𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀁 𑀧𑀦 𑀲𑀘𑁂 𑀫𑀳𑀦𑁆𑀢𑀁 𑀳𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁, 𑀅𑀣 𑀬𑀣𑀸𑀯𑀯𑀢𑁆𑀣𑀸𑀧𑀺𑀢𑁂 𑀯𑀺𑀲𑀬𑁂 𑀅𑀝𑁆𑀞𑀦𑁆𑀦𑀁 𑀯𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀯𑀸 𑀅𑀓𑀼𑀲𑀮𑀸𑀦𑀁 𑀦𑀯𑀦𑁆𑀦𑀁 𑀯𑀸 𑀅𑀯𑀲𑁂𑀲𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀙 𑀲𑀢𑁆𑀢 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀏𑀲𑁄 𑀢𑀸𑀯 𑀧𑀜𑁆𑀘𑀤𑁆𑀯𑀸𑀭𑁂 𑀦𑀬𑁄.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀢𑀸𑀦𑀺𑀬𑁂𑀯. 𑀕𑁄𑀢𑁆𑀭𑀪𑀼𑀢𑁄 𑀉𑀤𑁆𑀥𑀁 𑀭𑀽𑀧𑀸𑀯𑀘𑀭𑀢𑁄 𑀧𑀜𑁆𑀘 𑀓𑀼𑀲𑀮𑀸𑀦𑀺 𑀧𑀜𑁆𑀘 𑀓𑀺𑀭𑀺𑀬𑀸𑀦𑀺, 𑀅𑀭𑀽𑀧𑀸𑀯𑀘𑀭𑀢𑁄 𑀘𑀢𑁆𑀢𑀸𑀭𑀺 𑀓𑀼𑀲𑀮𑀸𑀦𑀺 𑀘𑀢𑁆𑀢𑀸𑀭𑀺 𑀓𑀺𑀭𑀺𑀬𑀸𑀦𑀺, 𑀮𑁄𑀓𑀼𑀢𑁆𑀢𑀭𑀢𑁄 𑀘𑀢𑁆𑀢𑀸𑀭𑀺 𑀫𑀕𑁆𑀕𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀨𑀮𑀘𑀺𑀢𑁆𑀢𑀸𑀦𑀻𑀢𑀺 𑀇𑀫𑁂𑀲𑀼 𑀬𑀁 𑀬𑀁 𑀮𑀤𑁆𑀥𑀧𑀘𑁆𑀘𑀬𑀁 𑀳𑁄𑀢𑀺, 𑀢𑀁 𑀢𑀁 𑀚𑀯𑀢𑀻𑀢𑀺 𑀏𑀯𑀁 𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀚𑀯𑀦𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀚𑀯𑀦𑀸𑀯𑀲𑀸𑀦𑁂 𑀧𑀦 𑀲𑀘𑁂 𑀧𑀜𑁆𑀘𑀤𑁆𑀯𑀸𑀭𑁂 𑀅𑀢𑀺𑀫𑀳𑀦𑁆𑀢𑀁, 𑀫𑀦𑁄𑀤𑁆𑀯𑀸𑀭𑁂 𑀘 𑀯𑀺𑀪𑀽𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀣 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀚𑀯𑀦𑀸𑀯𑀲𑀸𑀦𑁂 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀦𑀁 𑀧𑀼𑀭𑀺𑀫𑀓𑀫𑁆𑀫𑀚𑀯𑀦𑀘𑀺𑀢𑁆𑀢𑀸𑀤𑀻𑀦𑀜𑁆𑀘 𑀯𑀲𑁂𑀦 𑀬𑁄 𑀬𑁄 𑀧𑀘𑁆𑀘𑀬𑁄 𑀮𑀤𑁆𑀥𑁄 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀅𑀝𑁆𑀞𑀲𑀼 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂𑀲𑀼 𑀢𑀻𑀲𑀼 ¶ 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀘 𑀅𑀜𑁆𑀜𑀢𑀭𑀁 𑀧𑀝𑀺𑀲𑁄𑀢𑀕𑀢𑀁 𑀦𑀸𑀯𑀁 𑀅𑀦𑀼𑀩𑀦𑁆𑀥𑀫𑀸𑀦𑀁 𑀓𑀺𑀜𑁆𑀘𑀺 𑀅𑀦𑁆𑀢𑀭𑀁 𑀉𑀤𑀓𑀫𑀺𑀯 𑀪𑀯𑀗𑁆𑀕𑀲𑁆𑀲𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 ¶ 𑀚𑀯𑀺𑀢𑀁 𑀚𑀯𑀦𑀫𑀦𑀼𑀩𑀦𑁆𑀥𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁 𑀯𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀤𑁂𑀢𑀁 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀸𑀭𑀳𑀁 𑀲𑀫𑀸𑀦𑀁 𑀢𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀏𑀓𑀸𑀤𑀲𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑁂 𑀧𑀦 𑀧𑀼𑀦 𑀪𑀯𑀗𑁆𑀕𑀫𑁂𑀯 𑀧𑀯𑀢𑁆𑀢𑀢𑀺, 𑀪𑀯𑀗𑁆𑀕𑁂 𑀯𑀺𑀘𑁆𑀙𑀺𑀦𑁆𑀦𑁂 𑀧𑀼𑀦 𑀆𑀯𑀚𑁆𑀚𑀦𑀸𑀤𑀻𑀦𑀻𑀢𑀺 𑀏𑀯𑀁 𑀮𑀤𑁆𑀥𑀧𑀘𑁆𑀘𑀬𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀆𑀯𑀚𑁆𑀚𑀦𑀁 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀤𑀲𑁆𑀲𑀦𑀸𑀤𑀻𑀦𑀻𑀢𑀺 𑀘𑀺𑀢𑁆𑀢𑀦𑀺𑀬𑀫𑀯𑀲𑁂𑀦𑁂𑀯 𑀧𑀼𑀦𑀧𑁆𑀧𑀼𑀦𑀁 𑀢𑀸𑀯 𑀧𑀯𑀢𑁆𑀢𑀢𑀺, 𑀬𑀸𑀯 𑀏𑀓𑀲𑁆𑀫𑀺𑀁 𑀪𑀯𑁂 𑀪𑀯𑀗𑁆𑀕𑀲𑁆𑀲 𑀧𑀭𑀺𑀓𑁆𑀔𑀬𑁄. 𑀏𑀓𑀲𑁆𑀫𑀺𑀁 𑀳𑀺 𑀪𑀯𑁂 𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑀁 𑀪𑀯𑀗𑁆𑀕𑀘𑀺𑀢𑁆𑀢𑀁, 𑀢𑀁 𑀢𑀢𑁄 𑀘𑀯𑀦𑀢𑁆𑀢𑀸 𑀘𑀼𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀫𑁂𑀯 𑀳𑁄𑀢𑀺. 𑀏𑀯𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀼𑀢𑀺𑀢𑁄 𑀧𑀦 𑀧𑀼𑀦 𑀧𑀝𑀺𑀲𑀦𑁆𑀥𑀺, 𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀦 𑀪𑀯𑀗𑁆𑀕𑀦𑁆𑀢𑀺 𑀏𑀯𑀁 𑀪𑀯𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀲𑀁𑀲𑀭𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀯𑀢𑁆𑀢𑀢𑀺𑀬𑁂𑀯. 𑀬𑁄 𑀧𑀦𑁂𑀢𑁆𑀣 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑁂 𑀦𑀺𑀭𑀼𑀤𑁆𑀥𑀫𑁂𑀯 𑀳𑁄𑀢𑀻𑀢𑀺.

𑀇𑀤𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀯𑁂𑀤𑀦𑀸𑀓𑁆𑀔𑀦𑁆𑀥𑀓𑀣𑀸

𑁪𑁫𑁬. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺, 𑀏𑀢𑁆𑀣𑀸𑀧𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀁 𑀦𑀸𑀫 𑀯𑁂𑀤𑀦𑀸𑀯. 𑀬𑀣𑀸𑀳 𑁋 ‘‘𑀯𑁂𑀤𑀬𑀢𑀺 𑀯𑁂𑀤𑀬𑀢𑀻𑀢𑀺 𑀔𑁄 𑀆𑀯𑀼𑀲𑁄, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁦). 𑀲𑀸 𑀧𑀦 𑀯𑁂𑀤𑀬𑀺𑀢𑀮𑀓𑁆𑀔𑀡𑁂𑀦 𑀲𑀪𑀸𑀯𑀢𑁄 𑀏𑀓𑀯𑀺𑀥𑀸𑀧𑀺 𑀚𑀸𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀢𑀺 𑀓𑀼𑀲𑀮𑀸, 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸 𑀘𑀸𑀢𑀺.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀦 𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀦 ¶ 𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸, 𑀅𑀓𑀼𑀲𑀮𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀅𑀩𑁆𑀬𑀸𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀲𑀪𑀸𑀯𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺 𑁋 𑀲𑀼𑀔𑀁 𑀤𑀼𑀓𑁆𑀔𑀁 𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁 𑀉𑀧𑁂𑀓𑁆𑀔𑀸𑀢𑀺.

𑀢𑀢𑁆𑀣 ¶ 𑀓𑀼𑀲𑀮𑀯𑀺𑀧𑀸𑀓𑁂𑀦 𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁. 𑀅𑀓𑀼𑀲𑀮𑀯𑀺𑀧𑀸𑀓𑁂𑀦 𑀤𑀼𑀓𑁆𑀔𑀁. 𑀓𑀸𑀫𑀸𑀯𑀘𑀭𑀢𑁄 𑀘𑀢𑀽𑀳𑀺 𑀓𑀼𑀲𑀮𑁂𑀳𑀺, 𑀘𑀢𑀽𑀳𑀺 𑀲𑀳𑁂𑀢𑀼𑀓𑀯𑀺𑀧𑀸𑀓𑁂𑀳𑀺, 𑀏𑀓𑁂𑀦 𑀅𑀳𑁂𑀢𑀼𑀓𑀯𑀺𑀧𑀸𑀓𑁂𑀦, 𑀘𑀢𑀽𑀳𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑁂𑀳𑀺, 𑀏𑀓𑁂𑀦 𑀅𑀳𑁂𑀢𑀼𑀓𑀓𑀺𑀭𑀺𑀬𑁂𑀦, 𑀘𑀢𑀽𑀳𑀺 𑀅𑀓𑀼𑀲𑀮𑁂𑀳𑀺, 𑀭𑀽𑀧𑀸𑀯𑀘𑀭𑀢𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀜𑁆𑀜𑀸𑀡𑀁 𑀘𑀢𑀽𑀳𑀺 𑀓𑀼𑀲𑀮𑁂𑀳𑀺, 𑀘𑀢𑀽𑀳𑀺 𑀯𑀺𑀧𑀸𑀓𑁂𑀳𑀺, 𑀘𑀢𑀽𑀳𑀺 𑀓𑀺𑀭𑀺𑀬𑁂𑀳𑀺, 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀬𑀲𑁆𑀫𑀸 𑀅𑀛𑀸𑀦𑀺𑀓𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀜𑁆𑀘𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀮𑀻𑀲𑀁 𑀳𑁄𑀦𑁆𑀢𑀺. 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀅𑀝𑁆𑀞 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀺 𑀲𑁂𑀲𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀓𑀼𑀲𑀮𑀯𑀺𑀧𑀸𑀓𑁂𑀳𑀻𑀢𑀺 𑀏𑀯𑀁 𑀲𑁄𑀫𑀦𑀲𑁆𑀲𑀁 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀤𑁄𑀫𑀦𑀲𑁆𑀲𑀁 𑀤𑁆𑀯𑀻𑀳𑀺 𑀅𑀓𑀼𑀲𑀮𑁂𑀳𑀺. 𑀉𑀧𑁂𑀓𑁆𑀔𑀸 𑀅𑀯𑀲𑁂𑀲𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀓𑀸𑀬𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁.

𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀺𑀮𑀸𑀧𑀦𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁.

𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀁.

𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁.

𑀫𑀚𑁆𑀛𑀢𑁆𑀢𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀸𑀢𑀺𑀉𑀧𑀩𑁆𑀭𑀽𑀳𑀦𑀫𑀺𑀮𑀸𑀧𑀦𑀭𑀲𑀸, 𑀲𑀦𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀦𑀺𑀧𑁆𑀧𑀻𑀢𑀺𑀓𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸𑀢𑀺.

𑀇𑀤𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀲𑀜𑁆𑀜𑀸𑀓𑁆𑀔𑀦𑁆𑀥𑀓𑀣𑀸

𑁪𑁫𑁭. 𑀇𑀤𑀸𑀦𑀺 ¶ 𑀬𑀁 𑀯𑀼𑀢𑁆𑀢𑀁 ‘‘𑀬𑀁𑀓𑀺𑀜𑁆𑀘𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺, 𑀏𑀢𑁆𑀣𑀸𑀧𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁 𑀦𑀸𑀫 𑀲𑀜𑁆𑀜𑀸𑀯. 𑀬𑀣𑀸𑀳 𑁋 ‘‘𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀻𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 ¶ (𑀫. 𑀦𑀺. 𑁧.𑁪𑁫𑁦). 𑀲𑀸 𑀧𑀦𑁂𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂𑀦 𑀲𑀪𑀸𑀯𑀢𑁄 𑀏𑀓𑀯𑀺𑀥𑀸𑀧𑀺 𑀚𑀸𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀢𑀺 𑀓𑀼𑀲𑀮𑀸, 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸 𑀘.

𑀢𑀢𑁆𑀣 𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸, 𑀅𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀩𑁆𑀬𑀸𑀓𑀢𑀸. 𑀦 𑀳𑀺 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺, 𑀬𑀁 𑀲𑀜𑁆𑀜𑀸𑀬 𑀯𑀺𑀧𑁆𑀧𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀢𑁆𑀢𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀪𑁂𑀤𑁄, 𑀢𑀢𑁆𑀢𑀓𑁄 𑀲𑀜𑁆𑀜𑀸𑀬𑀸𑀢𑀺.

𑀲𑀸 𑀧𑀦𑁂𑀲𑀸 𑀏𑀯𑀁 𑀯𑀺𑀜𑁆𑀜𑀸𑀡𑁂𑀦 𑀲𑀫𑀧𑁆𑀧𑀪𑁂𑀤𑀸𑀧𑀺 𑀮𑀓𑁆𑀔𑀡𑀸𑀤𑀺𑀢𑁄 𑀲𑀩𑁆𑀩𑀸𑀯 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀢𑀤𑁂𑀯𑁂𑀢𑀦𑁆𑀢𑀺 𑀧𑀼𑀦 𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸 𑀤𑀸𑀭𑀼𑀆𑀤𑀻𑀲𑀼 𑀢𑀘𑁆𑀙𑀓𑀸𑀤𑀬𑁄 𑀯𑀺𑀬, 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 (𑀉𑀤𑀸. 𑁫𑁪) 𑀯𑀺𑀬, 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 𑀧𑀼𑀭𑀺𑀲𑀸𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬𑀸𑀢𑀺.

𑀇𑀤𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀓𑀣𑀸

𑁪𑁫𑁮. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀬𑀁𑀓𑀺𑀜𑁆𑀘𑀺 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺, 𑀏𑀢𑁆𑀣 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁 𑀦𑀸𑀫 𑀭𑀸𑀲𑀺𑀓𑀭𑀡𑀮𑀓𑁆𑀔𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺, 𑀲𑀗𑁆𑀔𑀸𑀭𑀸𑀬𑁂𑀯. 𑀬𑀣𑀸𑀳 𑁋 ‘‘𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯). 𑀢𑁂 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀯𑀺𑀧𑁆𑀨𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑁂𑀲𑀔𑀦𑁆𑀥𑀢𑁆𑀢𑀬𑀧𑀤𑀝𑁆𑀞𑀸𑀦𑀸.

𑀏𑀯𑀁 𑀮𑀓𑁆𑀔𑀡𑀸𑀤𑀺𑀢𑁄 𑀏𑀓𑀯𑀺𑀥𑀸𑀧𑀺 𑀘 𑀚𑀸𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀓𑀼𑀲𑀮𑀸, 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸𑀢𑀺 ¶ . 𑀢𑁂𑀲𑀼 𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸. 𑀅𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀸. 𑀅𑀩𑁆𑀬𑀸𑀓𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀩𑁆𑀬𑀸𑀓𑀢𑀸.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀲𑀢𑁆𑀢𑀯𑀻𑀲𑀢𑀺, 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄, 𑀅𑀦𑀺𑀬𑀢𑀸 𑀧𑀜𑁆𑀘𑀸𑀢𑀺 𑀙𑀢𑁆𑀢𑀺𑀁𑀲. 𑀢𑀢𑁆𑀣 𑀨𑀲𑁆𑀲𑁄, 𑀘𑁂𑀢𑀦𑀸, 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀧𑀻𑀢𑀺, 𑀯𑀻𑀭𑀺𑀬𑀁, 𑀚𑀻𑀯𑀺𑀢𑀁, 𑀲𑀫𑀸𑀥𑀺, 𑀲𑀤𑁆𑀥𑀸, 𑀲𑀢𑀺, 𑀳𑀺𑀭𑀻, 𑀑𑀢𑁆𑀢𑀧𑁆𑀧𑀁, 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄, 𑀓𑀸𑀬𑀧𑀲𑁆𑀲𑀤𑁆𑀥𑀺, 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺, 𑀓𑀸𑀬𑀮𑀳𑀼𑀢𑀸, 𑀘𑀺𑀢𑁆𑀢𑀮𑀳𑀼𑀢𑀸, 𑀓𑀸𑀬𑀫𑀼𑀤𑀼𑀢𑀸, 𑀘𑀺𑀢𑁆𑀢𑀫𑀼𑀤𑀼𑀢𑀸, 𑀓𑀸𑀬𑀓𑀫𑁆𑀫𑀜𑁆𑀜𑀢𑀸, 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸, 𑀓𑀸𑀬𑀧𑀸𑀕𑀼𑀜𑁆𑀜𑀢𑀸, 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸, 𑀓𑀸𑀬𑀼𑀚𑀼𑀓𑀢𑀸, 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺 𑀇𑀫𑁂 𑀲𑀭𑀽𑀧𑁂𑀦 ¶ 𑀆𑀕𑀢𑀸 𑀲𑀢𑁆𑀢𑀯𑀻𑀲𑀢𑀺 (𑀥. 𑀲. 𑁧; 𑀥. 𑀲. 𑀅𑀝𑁆𑀞. 𑁧 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸). 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑁄, 𑀫𑀦𑀲𑀺𑀓𑀸𑀭𑁄, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄 (𑀥. 𑀲. 𑀅𑀝𑁆𑀞. 𑁧 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸). 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀻𑀢𑀺 𑀇𑀫𑁂 𑀅𑀦𑀺𑀬𑀢𑀸 𑀧𑀜𑁆𑀘. 𑀏𑀢𑁂 𑀳𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀘 𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁪𑁫𑁯. 𑀢𑀢𑁆𑀣 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄. 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀏𑀓𑀤𑁂𑀲𑁂𑀦 𑀘 𑀅𑀦𑀮𑁆𑀮𑀺𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀺, 𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁂𑀦 𑀘𑁂𑀯 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦 𑀦𑀺𑀘𑁆𑀘𑀫𑁆𑀫𑀕𑀸𑀯𑀻 (𑀲𑀁. 𑀦𑀺. 𑁨.𑁬𑁩) 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁪𑁬𑁦. 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸. 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀦𑀸𑀪𑀸𑀯𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀺𑀓𑀸 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀻𑀆𑀤𑀬𑁄 𑀯𑀺𑀬. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀘 𑀧𑀦𑀸𑀬𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀲𑁆𑀲𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺.

𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 𑀧𑀞𑀫𑀚𑁆𑀛𑀸𑀦𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁧.𑁭𑁧) 𑀯𑀼𑀢𑁆𑀢𑀫𑁂𑀯.

𑁪𑁬𑁧. 𑀯𑀻𑀭𑀪𑀸𑀯𑁄 ¶ 𑀯𑀻𑀭𑀺𑀬𑀁. 𑀢𑀁 𑀉𑀲𑁆𑀲𑀳𑀦𑀮𑀓𑁆𑀔𑀡𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 (𑀅. 𑀦𑀺. 𑁪.𑁧𑁧𑁩) 𑀯𑀘𑀦𑀢𑁄 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁 𑀯𑀸, 𑀲𑀫𑁆𑀫𑀸 𑀆𑀭𑀤𑁆𑀥𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁬𑁨. 𑀚𑀻𑀯𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀚𑀻𑀯𑀢𑀺, 𑀚𑀻𑀯𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀚𑀻𑀯𑀺𑀢𑀁. 𑀮𑀓𑁆𑀔𑀡𑀸𑀤𑀻𑀦𑀺 𑀧𑀦𑀲𑁆𑀲 𑀭𑀽𑀧𑀚𑀻𑀯𑀺𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀜𑁆𑀳𑀺 𑀭𑀽𑀧𑀥𑀫𑁆𑀫𑀸𑀦𑀁 𑀚𑀻𑀯𑀺𑀢𑀁, 𑀇𑀤𑀁 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀇𑀤𑀫𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁.

𑁪𑁬𑁩. 𑀆𑀭𑀫𑁆𑀫𑀡𑁂 ¶ 𑀘𑀺𑀢𑁆𑀢𑀁 𑀲𑀫𑀁 𑀆𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀸 𑀆𑀥𑀺𑀬𑀢𑀺, 𑀲𑀫𑀸𑀥𑀸𑀦𑀫𑀢𑁆𑀢𑀫𑁂𑀯 𑀯𑀸 𑀏𑀢𑀁 𑀘𑀺𑀢𑁆𑀢𑀲𑁆𑀲𑀸𑀢𑀺 𑀲𑀫𑀸𑀥𑀺. 𑀲𑁄 𑀅𑀯𑀺𑀲𑀸𑀭𑀮𑀓𑁆𑀔𑀡𑁄, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸, 𑀲𑀳𑀚𑀸𑀢𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀯𑀺𑀲𑁂𑀲𑀢𑁄 𑀲𑀼𑀔𑀧𑀤𑀝𑁆𑀞𑀸𑀦𑁄, 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑁪𑁬𑁪. 𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸 𑀑𑀖𑀼𑀢𑁆𑀢𑀭𑀡𑁄 𑀯𑀺𑀬. 𑀅𑀓𑀸𑀮𑀼𑀲𑁆𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕(𑀤𑀻. 𑀦𑀺. 𑁩.𑁩𑁧𑁧; 𑀲𑀁. 𑀦𑀺. 𑁫.𑁧𑁦𑁦𑁧) 𑀧𑀤𑀝𑁆𑀞𑀸𑀦𑀸 𑀯𑀸, 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑁪𑁬𑁫. 𑀲𑀭𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀯𑀸. 𑀆𑀭𑀫𑁆𑀫𑀡𑁂 𑀤𑀴𑁆𑀳𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀧𑀦 𑀏𑀲𑀺𑀓𑀸 𑀯𑀺𑀬, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀭𑀓𑁆𑀔𑀡𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸.

𑁪𑁬𑁬. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀺𑀬𑀢𑀻𑀢𑀺 𑀳𑀺𑀭𑀻. 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁. 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻. 𑀉𑀢𑁆𑀢𑀸𑀲𑀦𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀸𑀓𑀸𑀭𑁂𑀦 𑀧𑀸𑀧𑀸𑀦𑀁 𑀅𑀓𑀭𑀡𑀭𑀲𑀸 𑀳𑀺𑀭𑀻. 𑀉𑀢𑁆𑀢𑀸𑀲𑀸𑀓𑀸𑀭𑁂𑀦 𑀑𑀢𑁆𑀢𑀧𑁆𑀧𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 ¶ 𑀘 𑀧𑀸𑀧𑀢𑁄 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀏𑀢𑀸, 𑀅𑀢𑁆𑀢𑀕𑀸𑀭𑀯𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸. 𑀅𑀢𑁆𑀢𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀳𑀺𑀭𑀺𑀬𑀸 𑀧𑀸𑀧𑀁 𑀚𑀳𑀸𑀢𑀺 𑀓𑀼𑀮𑀯𑀥𑀽 𑀯𑀺𑀬. 𑀧𑀭𑀁 𑀕𑀭𑀼𑀁 𑀓𑀢𑁆𑀯𑀸 𑀑𑀢𑁆𑀢𑀧𑁆𑀧𑁂𑀦 𑀧𑀸𑀧𑀁 𑀚𑀳𑀸𑀢𑀺 𑀯𑁂𑀲𑀺𑀬𑀸 𑀯𑀺𑀬. 𑀇𑀫𑁂 𑀘 𑀧𑀦 𑀤𑁆𑀯𑁂 𑀥𑀫𑁆𑀫𑀸 𑀮𑁄𑀓𑀧𑀸𑀮𑀓𑀸𑀢𑀺 (𑀅. 𑀦𑀺. 𑁨.𑁯) 𑀤𑀝𑁆𑀞𑀩𑁆𑀩𑀸.

𑁪𑁬𑁭. 𑀦 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀅𑀤𑁄𑀲𑀸𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀮𑁄𑀪𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀕𑁂𑀥𑀮𑀓𑁆𑀔𑀡𑁄, 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬. 𑀅𑀧𑀭𑀺𑀕𑁆𑀕𑀳𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬, 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬.

𑁪𑁬𑁮. 𑀅𑀤𑁄𑀲𑁄 ¶ 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬, 𑀆𑀖𑀸𑀢𑀯𑀺𑀦𑀬𑀭𑀲𑁄, 𑀧𑀭𑀺𑀴𑀸𑀳𑀯𑀺𑀦𑀬𑀭𑀲𑁄 𑀯𑀸 𑀘𑀦𑁆𑀤𑀦𑀁 𑀯𑀺𑀬, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬.

𑁪𑁬𑁯. 𑀅𑀫𑁄𑀳𑁄 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑁄, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑁄 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑁄 𑀧𑀤𑀻𑀧𑁄 𑀯𑀺𑀬. 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬. 𑀢𑀬𑁄𑀧𑀺 𑀘𑁂𑀢𑁂 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁭𑁦. 𑀓𑀸𑀬𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀏𑀓𑀢𑁄 𑀓𑀢𑁆𑀯𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀬𑁄, 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀽𑀧𑀲𑀫𑀓𑀭𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀲𑁆𑀲 𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀦𑀺𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀫𑀼𑀤𑀼𑀪𑀸𑀯𑁄 𑀓𑀸𑀬𑀫𑀼𑀤𑀼𑀢𑀸. 𑀘𑀺𑀢𑁆𑀢𑀲𑁆𑀲 𑀫𑀼𑀤𑀼𑀪𑀸𑀯𑁄 𑀘𑀺𑀢𑁆𑀢𑀫𑀼𑀤𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀢𑁆𑀣𑀫𑁆𑀪𑀯𑀽𑀧𑀲𑀫𑀮𑀓𑁆𑀔𑀡𑀸 ¶ , 𑀓𑀸𑀬𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀦𑀺𑀫𑀤𑁆𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀸𑀬𑀓𑀫𑁆𑀫𑀜𑁆𑀜𑀢𑀸. 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀸𑀯𑀲𑁂𑀲𑀦𑀻𑀯𑀭𑀡𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸, 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸, 𑀳𑀺𑀢𑀓𑀺𑀭𑀺𑀬𑀸𑀲𑀼 𑀯𑀺𑀦𑀺𑀬𑁄𑀕𑀓𑁆𑀔𑀫𑀪𑀸𑀯𑀸𑀯𑀳𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 ¶ 𑀧𑀸𑀕𑀼𑀜𑁆𑀜𑀪𑀸𑀯𑁄 𑀓𑀸𑀬𑀧𑀸𑀕𑀼𑀜𑁆𑀜𑀢𑀸. 𑀘𑀺𑀢𑁆𑀢𑀲𑁆𑀲 𑀧𑀸𑀕𑀼𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑁂𑀮𑀜𑁆𑀜𑀦𑀺𑀫𑀤𑁆𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀓𑀭𑀅𑀲𑀤𑁆𑀥𑀺𑀬𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀉𑀚𑀼𑀓𑀪𑀸𑀯𑁄 𑀓𑀸𑀬𑀼𑀚𑀼𑀓𑀢𑀸. 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀪𑀸𑀯𑁄 𑀘𑀺𑀢𑁆𑀢𑀼𑀚𑀼𑀓𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀅𑀚𑁆𑀚𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀓𑀼𑀝𑀺𑀮𑀪𑀸𑀯𑀦𑀺𑀫𑀤𑁆𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁭𑁧. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄 𑀙𑀦𑁆𑀤𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀅𑀬𑀁 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁪𑁭𑁨. 𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁪𑁭𑁩. 𑀓𑀺𑀭𑀺𑀬𑀸 𑀓𑀸𑀭𑁄. 𑀫𑀦𑀫𑁆𑀳𑀺 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀫𑀦𑀁 𑀓𑀭𑁄𑀢𑀻𑀢𑀺𑀧𑀺 𑀫𑀦𑀲𑀺𑀓𑀸𑀭𑁄. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄, 𑀯𑀻𑀣𑀺𑀧𑀝𑀺𑀧𑀸𑀤𑀓𑁄, 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄.

𑀢𑀢𑁆𑀣 ¶ 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀫𑀦𑀫𑁆𑀳𑀺 𑀓𑀸𑀭𑁄𑀢𑀺 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀲𑀁𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑁄. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄, 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑁪𑁭𑁪. 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀪𑀸𑀯𑁂𑀦 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀆𑀚𑀸𑀦𑀻𑀬𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀓𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀓𑀭𑀼𑀡𑀸𑀫𑀼𑀤𑀺𑀢𑀸 ¶ 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁬𑁨) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀭𑀽𑀧𑀸𑀯𑀘𑀭𑀸, 𑀇𑀫𑀸 𑀓𑀸𑀫𑀸𑀯𑀘𑀭𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀓𑁂𑀘𑀺 𑀧𑀦 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀬𑁄𑀧𑀺 𑀅𑀦𑀺𑀬𑀢𑁂𑀲𑀼 𑀇𑀘𑁆𑀙𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀣𑀢𑁄 𑀳𑀺 𑀅𑀤𑁄𑀲𑁄𑀬𑁂𑀯 𑀫𑁂𑀢𑁆𑀢𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬𑁂𑀯 𑀉𑀧𑁂𑀓𑁆𑀔𑀸𑀢𑀺.

𑁪𑁭𑁫. 𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀏𑀲 𑀦𑀬𑁄 𑀲𑁂𑀲𑀸𑀲𑀼𑀧𑀺. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑀸 𑀢𑀺𑀲𑁆𑀲𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸, 𑀅𑀫𑀤𑁆𑀤𑀦𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀭𑀲𑀸, 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸, 𑀧𑀸𑀧𑀓𑀺𑀭𑀺𑀬𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀔𑀪𑀸𑀯𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁭𑁬. 𑀇𑀢𑀺 𑀇𑀫𑁂𑀯 𑀙𑀢𑁆𑀢𑀺𑀁𑀲 𑀲𑀗𑁆𑀔𑀸𑀭𑀸 𑀧𑀞𑀫𑁂𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄.

𑀢𑀢𑀺𑀬𑁂𑀦 𑀧𑀦 𑀞𑀧𑁂𑀢𑁆𑀯𑀸 𑀅𑀫𑁄𑀳𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀘𑀢𑀼𑀢𑁆𑀣𑁂𑀦. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄.

𑀧𑀞𑀫𑁂 ¶ 𑀯𑀼𑀢𑁆𑀢𑁂𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀧𑀜𑁆𑀘𑀫𑁂𑀦, 𑀏𑀯𑀁 𑀙𑀝𑁆𑀞𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀘 𑀧𑀦 𑀞𑀧𑁂𑀢𑁆𑀯𑀸 𑀅𑀫𑁄𑀳𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀝𑁆𑀞𑀫𑁂𑀦. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄.

𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀲𑁂𑀲𑀸 𑀭𑀽𑀧𑀸𑀯𑀘𑀭𑀓𑀼𑀲𑀮𑁂𑀲𑀼 𑀧𑀞𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀤𑀼𑀢𑀺𑀬𑁂𑀦 𑀢𑀢𑁄 𑀯𑀺𑀢𑀓𑁆𑀓𑀯𑀚𑁆𑀚𑀸. 𑀢𑀢𑀺𑀬𑁂𑀦 𑀢𑀢𑁄 𑀯𑀺𑀘𑀸𑀭𑀯𑀚𑁆𑀚𑀸. 𑀘𑀢𑀼𑀢𑁆𑀣𑁂𑀦 𑀢𑀢𑁄 𑀧𑀻𑀢𑀺𑀯𑀚𑁆𑀚𑀸. 𑀧𑀜𑁆𑀘𑀫𑁂𑀦 𑀢𑀢𑁄 𑀅𑀦𑀺𑀬𑀢𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀚𑁆𑀚𑀸. 𑀢𑁂𑀬𑁂𑀯 𑀘𑀢𑀽𑀲𑀼 𑀆𑀭𑀼𑀧𑁆𑀧𑀓𑀼𑀲𑀮𑁂𑀲𑀼. 𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀬𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄.

𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀞𑀫𑀚𑁆𑀛𑀸𑀦𑀺𑀓𑁂 𑀢𑀸𑀯 𑀫𑀕𑁆𑀕𑀯𑀺𑀜𑁆𑀜𑀸𑀡𑁂 𑀧𑀞𑀫𑀭𑀽𑀧𑀸𑀯𑀘𑀭𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀦𑀬𑁂𑀦, 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀪𑁂𑀤𑁂 𑀤𑀼𑀢𑀺𑀬𑀭𑀽𑀧𑀸𑀯𑀘𑀭𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀧𑀦 𑀅𑀪𑀸𑀯𑁄, 𑀦𑀺𑀬𑀢𑀯𑀺𑀭𑀢𑀺𑀢𑀸 ¶ , 𑀮𑁄𑀓𑀼𑀢𑁆𑀢𑀭𑀢𑀸 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀼𑀲𑀮𑀸𑀬𑁂𑀯 𑀲𑀗𑁆𑀔𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁭𑁭. 𑀅𑀓𑀼𑀲𑀮𑁂𑀲𑀼 𑀮𑁄𑀪𑀫𑀽𑀮𑁂 𑀧𑀞𑀫𑀸𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀢𑁂𑀭𑀲, 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄𑀢𑀺 𑀲𑀢𑁆𑀢𑀭𑀲. 𑀢𑀢𑁆𑀣 𑀨𑀲𑁆𑀲𑁄, 𑀘𑁂𑀢𑀦𑀸, 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀧𑀻𑀢𑀺, 𑀯𑀻𑀭𑀺𑀬𑀁, 𑀚𑀻𑀯𑀺𑀢𑀁, 𑀲𑀫𑀸𑀥𑀺, 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁, 𑀮𑁄𑀪𑁄, 𑀫𑁄𑀳𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀲𑀭𑀽𑀧𑁂𑀦 𑀆𑀕𑀢𑀸 𑀢𑁂𑀭𑀲 (𑀥. 𑀲. 𑁩𑁬𑁫; 𑀥. 𑀲. 𑀅𑀝𑁆𑀞. 𑁩𑁬𑁫). 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑁄, 𑀉𑀤𑁆𑀥𑀘𑁆𑀘𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄 (𑀥. 𑀲. 𑀅𑀝𑁆𑀞. 𑁩𑁬𑁫).

𑁪𑁭𑁮. 𑀢𑀢𑁆𑀣 𑀦 𑀳𑀺𑀭𑀺𑀬𑀢𑀻𑀢𑀺 𑀅𑀳𑀺𑀭𑀺𑀓𑁄. 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑀁. 𑀦 𑀑𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀁. 𑀢𑁂𑀲𑀼 𑀅𑀳𑀺𑀭𑀺𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀮𑀚𑁆𑀚𑀸𑀮𑀓𑁆𑀔𑀡𑀁 𑀯𑀸. 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀮𑀓𑁆𑀔𑀡𑀁, 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀁 𑀯𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁭𑁯. 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀢𑁂𑀲𑀼 𑀮𑁄𑀪𑁄 𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬, 𑀅𑀪𑀺𑀲𑀗𑁆𑀕𑀭𑀲𑁄 𑀢𑀢𑁆𑀢𑀓𑀧𑀸𑀮𑁂 𑀔𑀺𑀢𑁆𑀢𑀫𑀁𑀲𑀧𑁂𑀲𑀺 𑀯𑀺𑀬. 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀢𑁂𑀮𑀜𑁆𑀚𑀦𑀭𑀸𑀕𑁄 ¶ 𑀯𑀺𑀬. 𑀲𑀁𑀬𑁄𑀚𑀦𑀺𑀬𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄. 𑀢𑀡𑁆𑀳𑀸𑀦𑀤𑀻𑀪𑀸𑀯𑁂𑀦 𑀯𑀟𑁆𑀠𑀫𑀸𑀦𑁄 𑀲𑀻𑀖𑀲𑁄𑀢𑀸 𑀦𑀤𑀻 𑀇𑀯 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑁪𑁮𑁦. 𑀫𑁄𑀳𑁄 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑀮𑀓𑁆𑀔𑀡𑁄, 𑀅𑀜𑁆𑀜𑀸𑀡𑀮𑀓𑁆𑀔𑀡𑁄 𑀯𑀸, 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄, 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄 𑀯𑀸, 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑁄, 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀫𑀽𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑁄.

𑁪𑁮𑁧. 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀁 𑀯𑀸 𑀏𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸, 𑀧𑀭𑀸𑀫𑀸𑀲𑀭𑀲𑀸, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀧𑀤𑀝𑁆𑀞𑀸𑀦𑀸, 𑀧𑀭𑀫𑀁 𑀯𑀚𑁆𑀚𑀦𑁆𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁮𑁨. 𑀉𑀤𑁆𑀥𑀢𑀪𑀸𑀯𑁄 ¶ 𑀉𑀤𑁆𑀥𑀘𑁆𑀘𑀁. 𑀢𑀁 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀚𑀮𑀁 𑀯𑀺𑀬, 𑀅𑀦𑀯𑀝𑁆𑀞𑀸𑀦𑀭𑀲𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀥𑀚𑀧𑀝𑀸𑀓𑀸 𑀯𑀺𑀬, 𑀪𑀦𑁆𑀢𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀸𑀲𑀸𑀡𑀸𑀪𑀺𑀖𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀁 𑀯𑀺𑀬, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁, 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀸 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀓𑀼𑀲𑀮𑀪𑀸𑀯𑁄𑀬𑁂𑀯 𑀳𑀺 𑀅𑀓𑀼𑀲𑀮𑀪𑀸𑀯𑁂𑀦 𑀘 𑀮𑀸𑀫𑀓𑀢𑁆𑀢𑀁 𑀏𑀢𑁂𑀲𑀁 𑀢𑁂𑀳𑀺 𑀯𑀺𑀲𑁂𑀲𑁄.

𑁪𑁮𑁩. 𑀇𑀢𑀺 𑀇𑀫𑁂 𑀲𑀢𑁆𑀢𑀭𑀲 𑀲𑀗𑁆𑀔𑀸𑀭𑀸 𑀧𑀞𑀫𑁂𑀦 𑀅𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀢𑀸 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑁆𑀲 𑀘 𑀅𑀦𑀺𑀬𑀢𑀢𑀸 𑀯𑀺𑀲𑁂𑀲𑁄.

𑀢𑀢𑁆𑀣 𑀣𑀺𑀦𑀦𑀢𑀸 𑀣𑀺𑀦𑀁. 𑀫𑀺𑀤𑁆𑀥𑀦𑀢𑀸 𑀫𑀺𑀤𑁆𑀥𑀁. 𑀅𑀦𑀼𑀲𑁆𑀲𑀸𑀳𑀲𑀁𑀳𑀦𑀦𑀢𑀸 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀢𑀢𑁆𑀣 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀮𑀓𑁆𑀔𑀡𑀁, 𑀯𑀻𑀭𑀺𑀬𑀯𑀺𑀦𑁄𑀤𑀦𑀭𑀲𑀁, 𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀫𑀺𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀑𑀦𑀳𑀦𑀭𑀲𑀁, 𑀮𑀻𑀦𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸. 𑀉𑀪𑀬𑀫𑁆𑀧𑀺 𑀅𑀭𑀢𑀺𑀯𑀺𑀚𑀫𑁆𑀪𑀺𑀓𑀸𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁.

𑀢𑀢𑀺𑀬𑁂𑀦 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄 ¶ 𑀳𑁄𑀢𑀺. 𑀅𑀬𑀁 𑀯𑀺𑀲𑁂𑀲𑁄, 𑀲𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄, 𑀲𑀫𑁆𑀧𑀕𑁆𑀕𑀳𑀭𑀲𑁄, 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄, 𑀉𑀫𑁆𑀫𑀸𑀤𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀢𑁆𑀣𑁂𑀦 𑀤𑀼𑀢𑀺𑀬𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀘 𑀫𑀸𑀦𑁄 𑀅𑀦𑀺𑀬𑀢𑁂𑀲𑀼 𑀳𑁄𑀢𑀺𑀬𑁂𑀯. 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀧𑀜𑁆𑀘𑀫𑁂𑀦, 𑀏𑀯𑀁 𑀙𑀝𑁆𑀞𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀢𑀸 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑁆𑀲 𑀘 𑀅𑀦𑀺𑀬𑀢𑀪𑀸𑀯𑁄 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀧𑀜𑁆𑀘𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄 𑀳𑁄𑀢𑀺. 𑀅𑀝𑁆𑀞𑀫𑁂𑀦 𑀙𑀝𑁆𑀞𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀘 𑀫𑀸𑀦𑁄 𑀅𑀦𑀺𑀬𑀢𑁂𑀲𑀼 𑀳𑁄𑀢𑀺𑀬𑁂𑀯𑀸𑀢𑀺.

𑁪𑁮𑁪. 𑀤𑁄𑀲𑀫𑀽𑀮𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀞𑀫𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀏𑀓𑀸𑀤𑀲, 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄, 𑀅𑀦𑀺𑀬𑀢𑀸 𑀢𑀬𑁄𑀢𑀺 𑀅𑀝𑁆𑀞𑀸𑀭𑀲 ¶ . 𑀢𑀢𑁆𑀣 𑀨𑀲𑁆𑀲𑁄, 𑀘𑁂𑀢𑀦𑀸, 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀯𑀻𑀭𑀺𑀬𑀁, 𑀚𑀻𑀯𑀺𑀢𑀁, 𑀲𑀫𑀸𑀥𑀺, 𑀅𑀳𑀺𑀭𑀺𑀓𑀁, 𑀅𑀦𑁄𑀧𑁆𑀧𑀢𑁆𑀢𑀁, 𑀤𑁄𑀲𑁄, 𑀫𑁄𑀳𑁄𑀢𑀺 𑀇𑀫𑁂 𑀲𑀭𑀽𑀧𑁂𑀦 𑀆𑀕𑀢𑀸 𑀏𑀓𑀸𑀤𑀲 (𑀥. 𑀲. 𑁪𑁧𑁩; 𑀥. 𑀲. 𑀅𑀝𑁆𑀞. 𑁪𑁧𑁩). 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑁄, 𑀉𑀤𑁆𑀥𑀘𑁆𑀘𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀘𑀢𑁆𑀢𑀸𑀭𑁄 (𑀥. 𑀲. 𑀅𑀝𑁆𑀞. 𑁪𑁧𑁩). 𑀇𑀲𑁆𑀲𑀸, 𑀫𑀘𑁆𑀙𑀭𑀺𑀬𑀁, 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀇𑀫𑁂 𑀅𑀦𑀺𑀬𑀢𑀸 𑀢𑀬𑁄 (𑀥. 𑀲. 𑀅𑀝𑁆𑀞. 𑁪𑁧𑁩).

𑁪𑁮𑁫. 𑀢𑀢𑁆𑀣 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄. 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀝𑀸𑀲𑀻𑀯𑀺𑀲𑁄 𑀯𑀺𑀬, 𑀯𑀺𑀲𑀧𑁆𑀧𑀦𑀭𑀲𑁄 𑀯𑀺𑀲𑀦𑀺𑀧𑀸𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸 𑀤𑀸𑀯𑀕𑁆𑀕𑀺 𑀯𑀺𑀬. 𑀤𑀽𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄, 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁪𑁮𑁬. 𑀇𑀲𑁆𑀲𑀸𑀬𑀦𑀸 𑀇𑀲𑁆𑀲𑀸. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸. 𑀢𑀢𑁆𑀣𑁂𑀯 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸, 𑀲𑀁𑀬𑁄𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁮𑁭. 𑀫𑀘𑁆𑀙𑀭𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀢𑀁 𑀮𑀤𑁆𑀥𑀸𑀦𑀁 𑀯𑀸 𑀮𑀪𑀺𑀢𑀩𑁆𑀩𑀸𑀦𑀁 𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑀽𑀳𑀦𑀮𑀓𑁆𑀔𑀡𑀁, 𑀢𑀸𑀲𑀁𑀬𑁂𑀯 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀓𑁆𑀔𑀫𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀝𑀼𑀓𑀜𑁆𑀘𑀼𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁, 𑀘𑁂𑀢𑀲𑁄 𑀯𑀺𑀭𑀽𑀧𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁮𑁮. 𑀓𑀼𑀘𑁆𑀙𑀺𑀢𑀁 ¶ 𑀓𑀢𑀁 𑀓𑀼𑀓𑀢𑀁. 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁, 𑀤𑀸𑀲𑀩𑁆𑀬𑀫𑀺𑀯 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬𑁂𑀯𑀸𑀢𑀺.

𑀇𑀢𑀺 𑀇𑀫𑁂 𑀅𑀝𑁆𑀞𑀸𑀭𑀲 𑀲𑀗𑁆𑀔𑀸𑀭𑀸 𑀧𑀞𑀫𑁂𑀦 𑀤𑁄𑀲𑀫𑀽𑀮𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀢𑀸 𑀧𑀦 𑀅𑀦𑀺𑀬𑀢𑁂𑀲𑀼 𑀘 𑀣𑀺𑀦𑀫𑀺𑀤𑁆𑀥𑀲𑀫𑁆𑀪𑀯𑁄𑀯 𑀯𑀺𑀲𑁂𑀲𑁄.

𑁪𑁮𑁯. 𑀫𑁄𑀳𑀫𑀽𑀮𑁂𑀲𑀼 𑀤𑁆𑀯𑀻𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀦 𑀢𑀸𑀯 𑀨𑀲𑁆𑀲𑁄, 𑀘𑁂𑀢𑀦𑀸, 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀯𑀻𑀭𑀺𑀬𑀁, 𑀚𑀻𑀯𑀺𑀢𑀁, 𑀘𑀺𑀢𑁆𑀢𑀝𑁆𑀞𑀺𑀢𑀺, 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁 ¶ , 𑀫𑁄𑀳𑁄, 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀭𑀽𑀧𑁂𑀦 𑀆𑀕𑀢𑀸 𑀏𑀓𑀸𑀤𑀲 (𑀥. 𑀲. 𑁪𑁨𑁨; 𑀥. 𑀲. 𑀅𑀝𑁆𑀞. 𑁪𑁨𑁨), 𑀉𑀤𑁆𑀥𑀘𑁆𑀘𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀬𑁂𑀯𑀸𑀧𑀦𑀓𑀸 𑀤𑁆𑀯𑁂 𑀘𑀸𑀢𑀺 𑀢𑁂𑀭𑀲.

𑁪𑁯𑁦. 𑀢𑀢𑁆𑀣 𑀘𑀺𑀢𑁆𑀢𑀝𑁆𑀞𑀺𑀢𑀻𑀢𑀺 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑁄 𑀤𑀼𑀩𑁆𑀩𑀮𑁄 𑀲𑀫𑀸𑀥𑀺. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀦𑁂𑀓𑀁𑀲𑀕𑀸𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑁂𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬𑁂𑀯.

𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀲𑁂𑀲𑀸 𑀤𑁆𑀯𑀸𑀤𑀲. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀧𑀦𑁂𑀢𑁆𑀣 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀢𑁂𑀭𑀲𑁂𑀯, 𑀅𑀥𑀺𑀫𑁄𑀓𑁆𑀔𑀲𑀩𑁆𑀪𑀸𑀯𑀢𑁄 𑀘 𑀩𑀮𑀯𑀢𑀭𑁄 𑀲𑀫𑀸𑀥𑀺 𑀳𑁄𑀢𑀺. 𑀬𑀜𑁆𑀘𑁂𑀢𑁆𑀣 𑀉𑀤𑁆𑀥𑀘𑁆𑀘𑀁, 𑀢𑀁 𑀲𑀭𑀽𑀧𑁂𑀦𑁂𑀯 𑀆𑀕𑀢𑀁. 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀸 𑀬𑁂𑀯𑀸𑀧𑀦𑀓𑀯𑀲𑁂𑀦𑀸𑀢𑀺 𑀏𑀯𑀁 𑀅𑀓𑀼𑀲𑀮𑀲𑀗𑁆𑀔𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁯𑁧. 𑀅𑀩𑁆𑀬𑀸𑀓𑀢𑁂𑀲𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀢𑀸𑀯 𑀅𑀳𑁂𑀢𑀼𑀓𑀲𑀳𑁂𑀢𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀢𑁂𑀲𑀼 𑀅𑀳𑁂𑀢𑀼𑀓𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀸. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀨𑀲𑁆𑀲𑁄, 𑀘𑁂𑀢𑀦𑀸, 𑀚𑀻𑀯𑀺𑀢𑀁, 𑀘𑀺𑀢𑁆𑀢𑀝𑁆𑀞𑀺𑀢𑀻𑀢𑀺 𑀲𑀭𑀽𑀧𑁂𑀦 𑀆𑀕𑀢𑀸 𑀘𑀢𑁆𑀢𑀸𑀭𑁄 (𑀥. 𑀲. 𑁪𑁩𑁧; 𑀥. 𑀲. 𑀅𑀝𑁆𑀞. 𑁪𑁩𑁧), 𑀬𑁂𑀯𑀸𑀧𑀦𑀓𑁄 𑀫𑀦𑀲𑀺𑀓𑀸𑀭𑁄𑀬𑁂𑀯𑀸𑀢𑀺 𑀧𑀜𑁆𑀘. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀏𑀢𑁂𑀬𑁂𑀯. 𑀉𑀪𑀬𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀏𑀢𑁂 𑀘𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀥𑀺𑀫𑁄𑀓𑁆𑀔𑀸 𑀘𑀸𑀢𑀺 ¶ 𑀅𑀝𑁆𑀞, 𑀢𑀣𑀸 𑀢𑀺𑀯𑀺𑀥𑀸𑀬𑀧𑀺 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀬𑀸 𑀧𑀦𑁂𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀢𑀸𑀬 𑀲𑀤𑁆𑀥𑀺𑀁 𑀧𑀻𑀢𑀺 𑀅𑀥𑀺𑀓𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀳𑁂𑀢𑀼𑀓𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀳𑁂𑀢𑀼𑀓𑀸. 𑀢𑁂𑀲𑀼 𑀅𑀝𑁆𑀞𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀅𑀝𑁆𑀞𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑀤𑀺𑀲𑀸𑀬𑁂𑀯. 𑀬𑀸 𑀧𑀦 𑀢𑀸 𑀅𑀦𑀺𑀬𑀢𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸, 𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀧𑀸𑀓𑁂𑀲𑀼 𑀦 𑀲𑀦𑁆𑀢𑀺. 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀳𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸. 𑀦 𑀓𑁂𑀯𑀮𑀜𑁆𑀘 𑀓𑀭𑀼𑀡𑀸𑀫𑀼𑀤𑀺𑀢𑀸, 𑀯𑀺𑀭𑀢𑀺𑀬𑁄𑀧𑀺 𑀯𑀺𑀧𑀸𑀓𑁂𑀲𑀼 𑀦 𑀲𑀦𑁆𑀢𑀺. ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 ¶ 𑀧𑀦 𑀢𑁂𑀲𑀁 𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀲𑀤𑀺𑀲𑀸 𑀏𑀯.

𑁪𑁯𑁨. 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀧𑀺 𑀅𑀳𑁂𑀢𑀼𑀓𑀲𑀳𑁂𑀢𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀢𑁂𑀲𑀼 𑀅𑀳𑁂𑀢𑀼𑀓𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀸. 𑀢𑁂 𑀘 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂 𑀧𑀦 𑀯𑀻𑀭𑀺𑀬𑀁 𑀅𑀥𑀺𑀓𑀁. 𑀯𑀻𑀭𑀺𑀬𑀲𑀩𑁆𑀪𑀸𑀯𑀢𑁄 𑀩𑀮𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑀲𑀳𑁂𑀢𑀼𑀓𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀳𑁂𑀢𑀼𑀓𑀸. 𑀢𑁂𑀲𑀼 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀬𑁄 𑀅𑀝𑁆𑀞𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑀤𑀺𑀲𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀢𑁂𑀲𑀁 𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀤𑀺𑀲𑀸𑀬𑁂𑀯𑀸𑀢𑀺 𑀏𑀯𑀁 𑀅𑀩𑁆𑀬𑀸𑀓𑀢𑀸𑀧𑀺 𑀲𑀗𑁆𑀔𑀸𑀭𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀇𑀤𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀇𑀤𑀁 𑀢𑀸𑀯 𑀅𑀪𑀺𑀥𑀫𑁆𑀫𑁂 𑀧𑀤𑀪𑀸𑀚𑀦𑀻𑀬𑀦𑀬𑁂𑀦 𑀔𑀦𑁆𑀥𑁂𑀲𑀼 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀓𑀣𑀸

𑁪𑁯𑁩. 𑀪𑀕𑀯𑀢𑀸 ¶ 𑀧𑀦 𑁋

‘‘𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁨,𑁨𑁬) 𑁋

𑀏𑀯𑀁 𑀔𑀦𑁆𑀥𑀸 𑀯𑀺𑀢𑁆𑀣𑀸𑀭𑀺𑀢𑀸.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀭𑀽𑀧𑀦𑁆𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀦𑀁. 𑀏𑀯𑀁 𑀧𑀤𑀤𑁆𑀯𑀬𑁂𑀦𑀸𑀧𑀺 𑀭𑀽𑀧𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀕𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀅𑀣𑀲𑁆𑀲 𑀅𑀢𑀻𑀢𑀸𑀤𑀺𑀦𑀸 ¶ 𑀯𑀺𑀪𑀸𑀕𑀁 𑀆𑀭𑀪𑀢𑀺. 𑀢𑀜𑁆𑀳𑀺 𑀓𑀺𑀜𑁆𑀘𑀺 𑀅𑀢𑀻𑀢𑀁, 𑀓𑀺𑀜𑁆𑀘𑀺 𑀅𑀦𑀸𑀕𑀢𑀸𑀤𑀺𑀪𑁂𑀤𑀦𑁆𑀢𑀺. 𑀏𑀲 𑀦𑀬𑁄 𑀯𑁂𑀤𑀦𑀸𑀤𑀻𑀲𑀼.

𑁪𑁯𑁪. 𑀢𑀢𑁆𑀣 𑀭𑀽𑀧𑀁 𑀢𑀸𑀯 𑀅𑀤𑁆𑀥𑀸𑀲𑀦𑁆𑀢𑀢𑀺𑀲𑀫𑀬𑀔𑀡𑀯𑀲𑁂𑀦 𑀘𑀢𑀼𑀥𑀸 𑀅𑀢𑀻𑀢𑀁 𑀦𑀸𑀫 𑀳𑁄𑀢𑀺. 𑀢𑀣𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁.

𑀢𑀢𑁆𑀣 𑀅𑀤𑁆𑀥𑀸𑀯𑀲𑁂𑀦 𑀢𑀸𑀯 𑀏𑀓𑀲𑁆𑀲 𑀏𑀓𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀦𑀸𑀕𑀢𑀁, 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁.

𑀲𑀦𑁆𑀢𑀢𑀺𑀯𑀲𑁂𑀦 𑀲𑀪𑀸𑀕𑀏𑀓𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀏𑀓𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀯𑀢𑁆𑀢𑀫𑀸𑀦𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀼𑀩𑁆𑀩𑁂 𑀯𑀺𑀲𑀪𑀸𑀕𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀘𑀺𑀢𑁆𑀢𑀚𑀁 𑀏𑀓𑀯𑀻𑀣𑀺𑀏𑀓𑀚𑀯𑀦𑀏𑀓𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀸𑀝𑀺𑀬𑁂𑀓𑁆𑀓𑀁 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑁂𑀤𑁄 𑀦𑀢𑁆𑀣𑀺, 𑀢𑁂𑀲𑀜𑁆𑀜𑁂𑀯 𑀧𑀦 𑀉𑀢𑀼𑀆𑀳𑀸𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀢𑀲𑁆𑀲 𑀅𑀢𑀻𑀢𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀬𑀯𑀲𑁂𑀦 ¶ 𑀏𑀓𑀫𑀼𑀳𑀼𑀢𑁆𑀢𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀭𑀢𑁆𑀢𑀺𑀦𑁆𑀤𑀺𑀯𑀸𑀤𑀻𑀲𑀼 𑀲𑀫𑀬𑁂𑀲𑀼 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀢𑀁 𑀢𑀁 𑀲𑀫𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀁, 𑀧𑀘𑁆𑀙𑀸 𑀅𑀦𑀸𑀕𑀢𑀁.

𑀔𑀡𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁, 𑀧𑀘𑁆𑀙𑀸 𑀅𑀢𑀻𑀢𑀁. 𑀅𑀧𑀺𑀘 𑀅𑀢𑀺𑀓𑁆𑀓𑀦𑁆𑀢𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀁 𑀅𑀢𑀻𑀢𑀁, 𑀦𑀺𑀝𑁆𑀞𑀺𑀢𑀳𑁂𑀢𑀼𑀓𑀺𑀘𑁆𑀘𑀁 𑀅𑀦𑀺𑀝𑁆𑀞𑀺𑀢𑀧𑀘𑁆𑀘𑀬𑀓𑀺𑀘𑁆𑀘𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀉𑀪𑀬𑀓𑀺𑀘𑁆𑀘𑀁 𑀅𑀲𑀫𑁆𑀧𑀢𑁆𑀢𑀁 𑀅𑀦𑀸𑀕𑀢𑀁. 𑀲𑀓𑀺𑀘𑁆𑀘𑀓𑁆𑀔𑀡𑁂 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁, 𑀧𑀘𑁆𑀙𑀸 𑀅𑀢𑀻𑀢𑀁. 𑀏𑀢𑁆𑀣 𑀘 𑀔𑀡𑀸𑀤𑀺𑀓𑀣𑀸𑀯 𑀦𑀺𑀧𑁆𑀧𑀭𑀺𑀬𑀸𑀬𑀸. 𑀲𑁂𑀲𑀸 𑀲𑀧𑀭𑀺𑀬𑀸𑀬𑀸.

𑁪𑁯𑁫. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁄 𑀯𑀼𑀢𑁆𑀢𑀦𑀬𑁄 𑀏𑀯. 𑀅𑀧𑀺𑀘 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀫𑁆𑀧𑀺 𑀅𑀚𑁆𑀛𑀢𑁆𑀢𑀁 𑀧𑀭𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀘 𑀩𑀳𑀺𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑁂𑀤𑁄 𑀯𑀼𑀢𑁆𑀢𑀦𑀬𑁄𑀯.

𑁪𑁯𑁬. 𑀳𑀻𑀦𑀧𑀡𑀻𑀢𑀪𑁂𑀤𑁄 𑀤𑀼𑀯𑀺𑀥𑁄 𑀧𑀭𑀺𑀬𑀸𑀬𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘. 𑀢𑀢𑁆𑀣 𑀅𑀓𑀦𑀺𑀝𑁆𑀞𑀸𑀦𑀁 𑀭𑀽𑀧𑀢𑁄 𑀲𑀼𑀤𑀲𑁆𑀲𑀻𑀦𑀁 𑀭𑀽𑀧𑀁 𑀳𑀻𑀦𑀁. 𑀢𑀤𑁂𑀯 𑀲𑀼𑀤𑀲𑁆𑀲𑀸𑀦𑀁 𑀭𑀽𑀧𑀢𑁄 𑀧𑀡𑀻𑀢𑀁. 𑀏𑀯𑀁 𑀬𑀸𑀯 𑀦𑀭𑀓𑀲𑀢𑁆𑀢𑀸𑀦𑀁 𑀭𑀽𑀧𑀁, 𑀢𑀸𑀯 𑀧𑀭𑀺𑀬𑀸𑀬𑀢𑁄 𑀳𑀻𑀦𑀧𑀡𑀻𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀬𑀢𑁆𑀣 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀳𑀻𑀦𑀁. 𑀬𑀢𑁆𑀣 𑀓𑀼𑀲𑀮𑀯𑀺𑀧𑀸𑀓𑀁, 𑀢𑀁 𑀧𑀡𑀻𑀢𑀁.

𑀤𑀽𑀭𑁂 ¶ 𑀲𑀦𑁆𑀢𑀺𑀓𑁂𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀧𑀺𑀘 𑀑𑀓𑀸𑀲𑀢𑁄𑀧𑁂𑀢𑁆𑀣 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁯𑁭. 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀁 𑀅𑀢𑀻𑀢𑀸𑀤𑀻𑀳𑀺 𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀤𑁆𑀤𑀺𑀝𑁆𑀞𑀁 𑀭𑀽𑀧𑀁 𑀲𑀩𑁆𑀩𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀲𑀗𑁆𑀔𑀸𑀢𑁂 𑀏𑀓𑀯𑀺𑀥𑀪𑀸𑀯𑁂 𑀧𑀜𑁆𑀜𑀸𑀬 𑀭𑀸𑀲𑀺𑀁 𑀓𑀢𑁆𑀯𑀸 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀢𑁂𑀦 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑁂 𑀭𑀸𑀲𑀺𑀪𑀸𑀯𑀽𑀧𑀕𑀫𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀦 𑀳𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫 𑀅𑀢𑁆𑀣𑀺.

𑁪𑁯𑁮. 𑀬𑀣𑀸 𑀘 𑀭𑀽𑀧𑀁, 𑀏𑀯𑀁 𑀯𑁂𑀤𑀦𑀸𑀤𑀬𑁄𑀧𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀸𑀤𑀻𑀲𑀼 𑀭𑀸𑀲𑀺𑀪𑀸𑀯𑀽𑀧𑀕𑀫𑀦𑁂𑀦. 𑀦 𑀳𑀺 𑀯𑁂𑀤𑀦𑀸𑀤𑀻𑀳𑀺 𑀅𑀜𑁆𑀜𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀦𑀸𑀫 𑀅𑀢𑁆𑀣𑀺.

𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂 ¶ 𑀧𑀦𑁂𑀢𑁆𑀣 𑀲𑀦𑁆𑀢𑀢𑀺𑀯𑀲𑁂𑀦 𑀔𑀡𑀸𑀤𑀺𑀯𑀲𑁂𑀦 𑀘 𑀯𑁂𑀤𑀦𑀸𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀯𑀻𑀣𑀺𑀏𑀓𑀚𑀯𑀦𑀏𑀓𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀏𑀓𑀯𑀻𑀣𑀺𑀯𑀺𑀲𑀬𑀲𑀫𑀸𑀬𑁄𑀕𑀧𑁆𑀧𑀯𑀢𑁆𑀢𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀔𑀡𑀸𑀤𑀺𑀯𑀲𑁂𑀦 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀢𑁆𑀢𑀕𑀢𑀸 𑀲𑀓𑀺𑀘𑁆𑀘𑀜𑁆𑀘 𑀓𑀼𑀭𑀼𑀫𑀸𑀦𑀸 𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁄 𑀦𑀺𑀬𑀓𑀚𑁆𑀛𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁯𑁯. 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑁂𑀤𑁄 ‘‘𑀅𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁧) 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀦 𑀚𑀸𑀢𑀺𑀲𑀪𑀸𑀯𑀧𑀼𑀕𑁆𑀕𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀚𑀸𑀢𑀺𑀯𑀲𑁂𑀦 𑀢𑀸𑀯 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀲𑀸𑀯𑀚𑁆𑀚𑀓𑀺𑀭𑀺𑀬𑀳𑁂𑀢𑀼𑀢𑁄, 𑀓𑀺𑀮𑁂𑀲𑀲𑀦𑁆𑀢𑀸𑀧𑀪𑀸𑀯𑀢𑁄 𑀘 𑀅𑀯𑀽𑀧𑀲𑀦𑁆𑀢𑀯𑀼𑀢𑁆𑀢𑀻𑀢𑀺 𑀓𑀼𑀲𑀮𑀯𑁂𑀤𑀦𑀸𑀬 𑀑𑀴𑀸𑀭𑀺𑀓𑀸, 𑀲𑀩𑁆𑀬𑀸𑀧𑀸𑀭𑀢𑁄, 𑀲𑀉𑀲𑁆𑀲𑀸𑀳𑀢𑁄, 𑀲𑀯𑀺𑀧𑀸𑀓𑀢𑁄, 𑀓𑀺𑀮𑁂𑀲𑀲𑀦𑁆𑀢𑀸𑀧𑀪𑀸𑀯𑀢𑁄, 𑀲𑀸𑀯𑀚𑁆𑀚𑀢𑁄 𑀘 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀬 𑀑𑀴𑀸𑀭𑀺𑀓𑀸, 𑀲𑀯𑀺𑀧𑀸𑀓𑀢𑁄, 𑀓𑀺𑀮𑁂𑀲𑀲𑀦𑁆𑀢𑀸𑀧𑀪𑀸𑀯𑀢𑁄, 𑀲𑀩𑁆𑀬𑀸𑀩𑀚𑁆𑀛𑀢𑁄, 𑀲𑀸𑀯𑀚𑁆𑀚𑀢𑁄 𑀘 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀬 𑀑𑀴𑀸𑀭𑀺𑀓𑀸. 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀅𑀓𑀼𑀲𑀮𑀸𑀬 𑀲𑀼𑀔𑀼𑀫𑀸. 𑀤𑁆𑀯𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑀯𑁂𑀤𑀦𑀸 𑀲𑀩𑁆𑀬𑀸𑀧𑀸𑀭𑀢𑁄, 𑀲𑀉𑀲𑁆𑀲𑀸𑀳𑀢𑁄, 𑀲𑀯𑀺𑀧𑀸𑀓𑀢𑁄 𑀘 𑀬𑀣𑀸𑀬𑁄𑀕𑀁 𑀤𑀼𑀯𑀺𑀥𑀸𑀬𑀧𑀺 𑀅𑀩𑁆𑀬𑀸𑀓𑀢𑀸𑀬 𑀑𑀴𑀸𑀭𑀺𑀓𑀸 ¶ , 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀤𑀼𑀯𑀺𑀥𑀸𑀧𑀺 𑀅𑀩𑁆𑀬𑀸𑀓𑀢𑀸 𑀢𑀸𑀳𑀺 𑀲𑀼𑀔𑀼𑀫𑀸. 𑀏𑀯𑀁 𑀢𑀸𑀯 𑀚𑀸𑀢𑀺𑀯𑀲𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁦𑁦. 𑀲𑀪𑀸𑀯𑀯𑀲𑁂𑀦 𑀧𑀦 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀦𑀺𑀭𑀲𑁆𑀲𑀸𑀤𑀢𑁄, 𑀲𑀯𑀺𑀧𑁆𑀨𑀸𑀭𑀢𑁄, 𑀔𑁄𑀪𑀓𑀭𑀡𑀢𑁄, 𑀉𑀩𑁆𑀩𑁂𑀚𑀦𑀻𑀬𑀢𑁄, 𑀅𑀪𑀺𑀪𑀯𑀦𑀢𑁄 𑀘 𑀇𑀢𑀭𑀸𑀳𑀺 𑀤𑁆𑀯𑀻𑀳𑀺 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀧𑀦 𑀤𑁆𑀯𑁂 𑀲𑀸𑀢𑀢𑁄, 𑀲𑀦𑁆𑀢𑀢𑁄, 𑀧𑀡𑀻𑀢𑀢𑁄, 𑀫𑀦𑀸𑀧𑀢𑁄, 𑀫𑀚𑁆𑀛𑀢𑁆𑀢𑀢𑁄 𑀘 𑀬𑀣𑀸𑀬𑁄𑀕𑀁 𑀤𑀼𑀓𑁆𑀔𑀸𑀬 𑀲𑀼𑀔𑀼𑀫𑀸. 𑀉𑀪𑁄 𑀧𑀦 𑀲𑀼𑀔𑀤𑀼𑀓𑁆𑀔𑀸 𑀲𑀯𑀺𑀧𑁆𑀨𑀸𑀭𑀢𑁄, 𑀔𑁄𑀪𑀓𑀭𑀡𑀢𑁄, 𑀧𑀸𑀓𑀝𑀢𑁄 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀑𑀴𑀸𑀭𑀺𑀓𑀸, 𑀲𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀢𑀤𑀼𑀪𑀬𑀢𑁄 𑀲𑀼𑀔𑀼𑀫𑀸. 𑀏𑀯𑀁 𑀲𑀪𑀸𑀯𑀯𑀲𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁦𑁧. 𑀧𑀼𑀕𑁆𑀕𑀮𑀯𑀲𑁂𑀦 𑀧𑀦 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀢𑁄 𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸𑀬 𑀑𑀴𑀸𑀭𑀺𑀓𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑀸 𑀲𑀼𑀔𑀼𑀫𑀸. 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 ¶ 𑀧𑀦 𑀲𑀸𑀲𑀯𑀸 𑀯𑁂𑀤𑀦𑀸 𑀮𑁄𑀓𑀺𑀬𑀸, 𑀲𑀸 𑀆𑀲𑀯𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄, 𑀑𑀖𑀦𑀺𑀬𑀢𑁄, 𑀬𑁄𑀕𑀦𑀺𑀬𑀢𑁄, 𑀕𑀦𑁆𑀣𑀦𑀺𑀬𑀢𑁄, 𑀦𑀻𑀯𑀭𑀡𑀺𑀬𑀢𑁄, 𑀉𑀧𑀸𑀤𑀸𑀦𑀺𑀬𑀢𑁄, 𑀲𑀁𑀓𑀺𑀮𑁂𑀲𑀺𑀓𑀢𑁄, 𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑀢𑁄 𑀘 𑀅𑀦𑀸𑀲𑀯𑀸𑀬 𑀑𑀴𑀸𑀭𑀺𑀓𑀸. 𑀲𑀸 𑀯𑀺𑀧𑀭𑀺𑀬𑀸𑀬𑁂𑀦 𑀲𑀸𑀲𑀯𑀸𑀬 𑀲𑀼𑀔𑀼𑀫𑀸. 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁦𑁨. 𑀢𑀢𑁆𑀣 𑀚𑀸𑀢𑀺𑀆𑀤𑀺𑀯𑀲𑁂𑀦 𑀲𑀫𑁆𑀪𑁂𑀤𑁄 𑀧𑀭𑀺𑀳𑀭𑀺𑀢𑀩𑁆𑀩𑁄. 𑀅𑀓𑀼𑀲𑀮𑀯𑀺𑀧𑀸𑀓𑀓𑀆𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀯𑁂𑀤𑀦𑀸 𑀚𑀸𑀢𑀺𑀯𑀲𑁂𑀦 𑀅𑀩𑁆𑀬𑀸𑀓𑀢𑀢𑁆𑀢𑀸 𑀲𑀼𑀔𑀼𑀫𑀸𑀧𑀺 𑀲𑀫𑀸𑀦𑀸 𑀲𑀪𑀸𑀯𑀸𑀤𑀺𑀯𑀲𑁂𑀦 𑀑𑀴𑀸𑀭𑀺𑀓𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀩𑁆𑀬𑀸𑀓𑀢𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸. 𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸 𑀲𑀼𑀔𑀼𑀫𑀸. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸. 𑀲𑀸𑀲𑀯𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸. 𑀅𑀦𑀸𑀲𑀯𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺 (𑀯𑀺𑀪. 𑁧𑁧). 𑀬𑀣𑀸 𑀘 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀏𑀯𑀁 𑀲𑀼𑀔𑀸𑀤𑀬𑁄𑀧𑀺 𑀚𑀸𑀢𑀺𑀯𑀲𑁂𑀦 𑀑𑀴𑀸𑀭𑀺𑀓𑀸 𑀲𑀪𑀸𑀯𑀸𑀤𑀺𑀯𑀲𑁂𑀦 𑀲𑀼𑀔𑀼𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀚𑀸𑀢𑀺𑀆𑀤𑀺𑀯𑀲𑁂𑀦 𑀲𑀫𑁆𑀪𑁂𑀤𑁄 𑀦 𑀳𑁄𑀢𑀺, 𑀢𑀣𑀸 𑀯𑁂𑀤𑀦𑀸𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀩𑁆𑀬𑀸𑀓𑀢𑀸 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀳𑀺 𑀲𑀼𑀔𑀼𑀫𑀸. 𑀢𑀢𑁆𑀣 𑀓𑀢𑀫𑀸 𑀅𑀩𑁆𑀬𑀸𑀓𑀢𑀸? 𑀓𑀺𑀁 𑀤𑀼𑀓𑁆𑀔𑀸? 𑀓𑀺𑀁 𑀲𑀼𑀔𑀸? 𑀓𑀺𑀁 𑀲𑀫𑀸𑀧𑀦𑁆𑀦𑀲𑁆𑀲? 𑀓𑀺𑀁 𑀅𑀲𑀫𑀸𑀧𑀦𑁆𑀦𑀲𑁆𑀲? 𑀓𑀺𑀁 𑀲𑀸𑀲𑀯𑀸 ¶ ? 𑀓𑀺𑀁 𑀅𑀦𑀸𑀲𑀯𑀸𑀢𑀺? 𑀏𑀯𑀁 𑀲𑀪𑀸𑀯𑀸𑀤𑀺𑀪𑁂𑀤𑁄 𑀦 𑀧𑀭𑀸𑀫𑀲𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀧𑀺𑀘 𑀢𑀁 𑀢𑀁 𑀯𑀸 𑀧𑀦 𑀯𑁂𑀤𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑁂𑀤𑀦𑀸 𑀑𑀴𑀸𑀭𑀺𑀓𑀲𑀼𑀔𑀼𑀫𑀸 𑀤𑀝𑁆𑀞𑀩𑁆𑀩𑀸𑀢𑀺 𑀯𑀘𑀦𑀢𑁄 𑀅𑀓𑀼𑀲𑀮𑀸𑀤𑀻𑀲𑀼𑀧𑀺 𑀮𑁄𑀪𑀲𑀳𑀕𑀢𑀸𑀬 𑀤𑁄𑀲𑀲𑀳𑀕𑀢𑀸 𑀯𑁂𑀤𑀦𑀸 𑀅𑀕𑁆𑀕𑀺 𑀯𑀺𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀢𑁄 𑀑𑀴𑀸𑀭𑀺𑀓𑀸, 𑀮𑁄𑀪𑀲𑀳𑀕𑀢𑀸 𑀲𑀼𑀔𑀼𑀫𑀸. 𑀤𑁄𑀲𑀲𑀳𑀕𑀢𑀸𑀧𑀺 𑀦𑀺𑀬𑀢𑀸 𑀑𑀴𑀸𑀭𑀺𑀓𑀸, 𑀅𑀦𑀺𑀬𑀢𑀸 𑀲𑀼𑀔𑀼𑀫𑀸. 𑀦𑀺𑀬𑀢𑀸𑀧𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀓𑀧𑁆𑀧𑀝𑁆𑀞𑀺𑀢𑀺𑀓𑀸𑀲𑀼𑀧𑀺 𑀅𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀮𑁄𑀪𑀲𑀳𑀕𑀢𑀸 𑀧𑀦 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀲𑀸𑀧𑀺 𑀦𑀺𑀬𑀢𑀸 𑀓𑀧𑁆𑀧𑀝𑁆𑀞𑀺𑀢𑀺𑀓𑀸 𑀅𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀅𑀯𑀺𑀲𑁂𑀲𑁂𑀦 𑀘 𑀅𑀓𑀼𑀲𑀮𑀸 𑀩𑀳𑀼𑀯𑀺𑀧𑀸𑀓𑀸 𑀑𑀴𑀸𑀭𑀺𑀓𑀸, 𑀅𑀧𑁆𑀧𑀯𑀺𑀧𑀸𑀓𑀸 𑀲𑀼𑀔𑀼𑀫𑀸. 𑀓𑀼𑀲𑀮𑀸 𑀧𑀦 𑀅𑀧𑁆𑀧𑀯𑀺𑀧𑀸𑀓𑀸 𑀑𑀴𑀸𑀭𑀺𑀓𑀸, 𑀩𑀳𑀼𑀯𑀺𑀧𑀸𑀓𑀸 𑀲𑀼𑀔𑀼𑀫𑀸.

𑀅𑀧𑀺𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑀸 𑀑𑀴𑀸𑀭𑀺𑀓𑀸. 𑀭𑀽𑀧𑀸𑀯𑀘𑀭𑀸 𑀲𑀼𑀔𑀼𑀫𑀸. 𑀢𑀢𑁄 𑀅𑀭𑀽𑀧𑀸𑀯𑀘𑀭𑀸. 𑀢𑀢𑁄 𑀮𑁄𑀓𑀼𑀢𑁆𑀢𑀭𑀸. 𑀓𑀸𑀫𑀸𑀯𑀘𑀭𑀸 𑀤𑀸𑀦𑀫𑀬𑀸 𑀑𑀴𑀸𑀭𑀺𑀓𑀸. 𑀲𑀻𑀮𑀫𑀬𑀸 𑀲𑀼𑀔𑀼𑀫𑀸. 𑀢𑀢𑁄 𑀪𑀸𑀯𑀦𑀸𑀫𑀬𑀸. 𑀪𑀸𑀯𑀦𑀸𑀫𑀬𑀸𑀧𑀺 𑀤𑀼𑀳𑁂𑀢𑀼𑀓𑀸 𑀑𑀴𑀸𑀭𑀺𑀓𑀸. 𑀢𑀺𑀳𑁂𑀢𑀼𑀓𑀸 𑀲𑀼𑀔𑀼𑀫𑀸. 𑀢𑀺𑀳𑁂𑀢𑀼𑀓𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀸 𑀑𑀴𑀸𑀭𑀺𑀓𑀸. 𑀅𑀲𑀗𑁆𑀔𑀸𑀭𑀺𑀓𑀸 𑀲𑀼𑀔𑀼𑀫𑀸. 𑀭𑀽𑀧𑀸𑀯𑀘𑀭𑀸 𑀘 𑀧𑀞𑀫𑀚𑁆𑀛𑀸𑀦𑀺𑀓𑀸 𑀑𑀴𑀸𑀭𑀺𑀓𑀸…𑀧𑁂… 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸 ¶ 𑀲𑀼𑀔𑀼𑀫𑀸. 𑀅𑀭𑀽𑀧𑀸𑀯𑀘𑀭𑀸 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑁆𑀧𑀬𑀼𑀢𑁆𑀢𑀸 𑀑𑀴𑀸𑀭𑀺𑀓𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑁆𑀧𑀬𑀼𑀢𑁆𑀢𑀸 𑀲𑀼𑀔𑀼𑀫𑀸𑀯. 𑀮𑁄𑀓𑀼𑀢𑁆𑀢𑀭𑀸 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀑𑀴𑀸𑀭𑀺𑀓𑀸…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀼𑀔𑀼𑀫𑀸𑀯. 𑀏𑀲 𑀦𑀬𑁄 𑀢𑀁 𑀢𑀁 𑀪𑀽𑀫𑀺𑀯𑀺𑀧𑀸𑀓𑀓𑀺𑀭𑀺𑀬𑀯𑁂𑀤𑀦𑀸𑀲𑀼 𑀘 𑀤𑀼𑀓𑁆𑀔𑀸𑀤𑀺𑀅𑀲𑀫𑀸𑀧𑀦𑁆𑀦𑀸𑀤𑀺𑀲𑀸𑀲𑀯𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀯𑁂𑀤𑀦𑀸𑀲𑀼 𑀘.

𑀑𑀓𑀸𑀲𑀯𑀲𑁂𑀦 𑀘𑀸𑀧𑀺 𑀦𑀺𑀭𑀬𑁂 𑀤𑀼𑀓𑁆𑀔𑀸 𑀑𑀴𑀸𑀭𑀺𑀓𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀲𑀼𑀔𑀼𑀫𑀸…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀲𑀼𑀔𑀼𑀫𑀸𑀯. 𑀬𑀣𑀸 𑀘 𑀤𑀼𑀓𑁆𑀔𑀸, 𑀏𑀯𑀁 𑀲𑀼𑀔𑀸𑀧𑀺 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑀩𑁆𑀩𑀸. 𑀯𑀢𑁆𑀣𑀼𑀯𑀲𑁂𑀦 𑀘𑀸𑀧𑀺 𑀳𑀻𑀦𑀯𑀢𑁆𑀣𑀼𑀓𑀸 𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀧𑀡𑀻𑀢𑀯𑀢𑁆𑀣𑀼𑀓𑀸 𑀲𑀼𑀔𑀼𑀫𑀸.

𑀳𑀻𑀦𑀧𑀡𑀻𑀢𑀪𑁂𑀤𑁂 𑀬𑀸 𑀑𑀴𑀸𑀭𑀺𑀓𑀸, 𑀲𑀸 𑀳𑀻𑀦𑀸. 𑀬𑀸 𑀘 𑀲𑀼𑀔𑀼𑀫𑀸, 𑀲𑀸 𑀧𑀡𑀻𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁫𑁦𑁩. 𑀤𑀽𑀭𑀧𑀤𑀁 𑀧𑀦 ‘‘𑀅𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀯𑁂𑀤𑀦𑀸𑀳𑀺 𑀤𑀽𑀭𑁂’’. 𑀲𑀦𑁆𑀢𑀺𑀓𑁂𑀧𑀤𑀁 ‘‘𑀅𑀓𑀼𑀲𑀮𑀸 𑀯𑁂𑀤𑀦𑀸 𑀅𑀓𑀼𑀲𑀮𑀸𑀬 𑀯𑁂𑀤𑀦𑀸𑀬 𑀲𑀦𑁆𑀢𑀺𑀓𑁂’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑀁. 𑀢𑀲𑁆𑀫𑀸 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀯𑀺𑀲𑀪𑀸𑀕𑀢𑁄, 𑀅𑀲𑀁𑀲𑀝𑁆𑀞𑀢𑁄, 𑀅𑀲𑀭𑀺𑀓𑁆𑀔𑀢𑁄 𑀘 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀤𑀽𑀭𑁂, 𑀢𑀣𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀓𑀼𑀲𑀮𑀸𑀬. 𑀏𑀲 𑀦𑀬𑁄 𑀲𑀩𑁆𑀩𑀯𑀸𑀭𑁂𑀲𑀼. 𑀅𑀓𑀼𑀲𑀮𑀸 𑀧𑀦 𑀯𑁂𑀤𑀦𑀸 𑀲𑀪𑀸𑀕𑀢𑁄, 𑀲𑀭𑀺𑀓𑁆𑀔𑀢𑁄 𑀘 𑀅𑀓𑀼𑀲𑀮𑀸𑀬 𑀲𑀦𑁆𑀢𑀺𑀓𑁂𑀢𑀺. 𑀇𑀤𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁. 𑀢𑀁𑀢𑀁𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀲𑀜𑁆𑀜𑀸𑀤𑀻𑀦𑀫𑁆𑀧𑀺 𑀏𑀯𑀫𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁦𑁪. 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀘 𑀧𑀼𑀦 𑀏𑀢𑁂𑀲𑁆𑀯𑁂𑀯 𑁋

𑀔𑀦𑁆𑀥𑁂𑀲𑀼 𑀜𑀸𑀡𑀪𑁂𑀤𑀢𑁆𑀣𑀁, 𑀓𑀫𑀢𑁄𑀣 𑀯𑀺𑀲𑁂𑀲𑀢𑁄;

𑀅𑀦𑀽𑀦𑀸𑀥𑀺𑀓𑀢𑁄 𑀘𑁂𑀯, 𑀉𑀧𑀫𑀸𑀢𑁄 𑀢𑀣𑁂𑀯 𑀘.

𑀤𑀝𑁆𑀞𑀩𑁆𑀩𑀢𑁄 𑀤𑁆𑀯𑀺𑀥𑀸 𑀏𑀯𑀁, 𑀧𑀲𑁆𑀲𑀦𑁆𑀢𑀲𑁆𑀲𑀢𑁆𑀣𑀲𑀺𑀤𑁆𑀥𑀺𑀢𑁄;

𑀯𑀺𑀦𑀺𑀘𑁆𑀙𑀬𑀦𑀬𑁄 𑀲𑀫𑁆𑀫𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑀢𑀢𑁆𑀣 ¶ 𑀓𑀫𑀢𑁄𑀢𑀺 𑀇𑀥 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄, 𑀧𑀳𑀸𑀦𑀓𑁆𑀓𑀫𑁄, 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄, 𑀪𑀽𑀫𑀺𑀓𑁆𑀓𑀫𑁄, 𑀤𑁂𑀲𑀦𑀸𑀓𑁆𑀓𑀫𑁄𑀢𑀺 𑀩𑀳𑀼𑀯𑀺𑀥𑁄 𑀓𑀫𑁄.

𑀢𑀢𑁆𑀣 ‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀺, 𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩𑁫) 𑀏𑀯𑀫𑀸𑀤𑀺 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄. ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁮) 𑀏𑀯𑀫𑀸𑀤𑀺 𑀧𑀳𑀸𑀦𑀓𑁆𑀓𑀫𑁄. ‘‘𑀲𑀻𑀮𑀯𑀺𑀲𑀼𑀤𑁆𑀥𑀺, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻’’𑀢𑀺 (𑀫. 𑀦𑀺. 𑁧.𑁨𑁫𑁯; 𑀧𑀝𑀺. 𑀫. 𑁩.𑁪𑁧) 𑀏𑀯𑀫𑀸𑀤𑀺 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄. ‘‘𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸’’𑀢𑀺 (𑀥. 𑀲. 𑁯𑁮𑁭) 𑀏𑀯𑀫𑀸𑀤𑀺 𑀪𑀽𑀫𑀺𑀓𑁆𑀓𑀫𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 (𑀤𑀻. 𑀦𑀺. 𑁩.𑁧𑁪𑁫) 𑀯𑀸, ‘‘𑀤𑀸𑀦𑀓𑀣𑀁, 𑀲𑀻𑀮𑀓𑀣’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁯𑁮) 𑀯𑀸 𑀏𑀯𑀫𑀸𑀤𑀺 𑀤𑁂𑀲𑀦𑀸𑀓𑁆𑀓𑀫𑁄. 𑀢𑁂𑀲𑀼 𑀇𑀥 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀓𑀮𑀮𑀸𑀤𑀻𑀦𑀁 𑀯𑀺𑀬 𑀔𑀦𑁆𑀥𑀸𑀦𑀁 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀦 𑀧𑀳𑀸𑀦𑀓𑁆𑀓𑀫𑁄, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄. 𑀦𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄, 𑀅𑀓𑀼𑀲𑀮𑀸𑀦𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄. 𑀦 𑀪𑀽𑀫𑀺𑀓𑁆𑀓𑀫𑁄, 𑀯𑁂𑀤𑀦𑀸𑀤𑀻𑀦𑀁 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀤𑁂𑀲𑀦𑀸𑀓𑁆𑀓𑀫𑁄 𑀧𑀦 𑀬𑀼𑀚𑁆𑀚𑀢𑀺.

𑀅𑀪𑁂𑀤𑁂𑀦 𑀳𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑀸𑀳𑀧𑀢𑀺𑀢𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀽𑀳𑀖𑀦𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑁂𑀦 𑀅𑀢𑁆𑀢𑀕𑀸𑀳𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀪𑀕𑀯𑀸 𑀳𑀺𑀢𑀓𑀸𑀫𑁄 ¶ 𑀢𑀲𑁆𑀲 𑀢𑀲𑁆𑀲 𑀚𑀦𑀲𑁆𑀲 𑀲𑀼𑀔𑀕𑀳𑀡𑀢𑁆𑀣𑀁 𑀘𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀯𑀺𑀲𑀬𑀪𑀽𑀢𑀁 𑀑𑀴𑀸𑀭𑀺𑀓𑀁 𑀧𑀞𑀫𑀁 𑀭𑀽𑀧𑀓𑁆𑀔𑀦𑁆𑀥𑀁 𑀤𑁂𑀲𑁂𑀲𑀺. 𑀢𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀭𑀽𑀧𑀲𑀁𑀯𑁂𑀤𑀦𑀺𑀓𑀁 𑀯𑁂𑀤𑀦𑀁. ‘‘𑀬𑀁 𑀯𑁂𑀤𑀬𑀢𑀺, 𑀢𑀁 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀯𑁂𑀤𑀦𑀸𑀯𑀺𑀲𑀬𑀲𑁆𑀲 𑀆𑀓𑀸𑀭𑀕𑀸𑀳𑀺𑀓𑀁 𑀲𑀜𑁆𑀜𑀁. 𑀲𑀜𑁆𑀜𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀸𑀭𑀓𑁂 𑀲𑀗𑁆𑀔𑀸𑀭𑁂. 𑀢𑁂𑀲𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀲𑁆𑀲𑀬𑀁 𑀅𑀥𑀺𑀧𑀢𑀺𑀪𑀽𑀢𑀜𑁆𑀘 𑀦𑁂𑀲𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀢𑀸𑀯 𑀓𑀫𑀢𑁄 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

𑁫𑁦𑁫. 𑀯𑀺𑀲𑁂𑀲𑀢𑁄𑀢𑀺 𑀔𑀦𑁆𑀥𑀸𑀦𑀜𑁆𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀜𑁆𑀘 𑀯𑀺𑀲𑁂𑀲𑀢𑁄. 𑀓𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄, 𑀔𑀦𑁆𑀥𑀸 𑀢𑀸𑀯 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀸. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀲𑀯𑀉𑀧𑀸𑀤𑀸𑀦𑀺𑀬𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸. 𑀬𑀣𑀸𑀳 𑁋

‘‘𑀧𑀜𑁆𑀘 𑀘𑁂𑀯 𑀯𑁄, 𑀪𑀺𑀓𑁆𑀔𑀯𑁂, 𑀔𑀦𑁆𑀥𑁂 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀘, 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀬𑀁𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀓𑁆𑀔𑀦𑁆𑀥𑁄. 𑀬𑀸 ¶ 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀬𑀁𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁪𑁮).

𑀏𑀢𑁆𑀣 𑀘 𑀬𑀣𑀸 𑀯𑁂𑀤𑀦𑀸𑀤𑀬𑁄 𑀅𑀦𑀸𑀲𑀯𑀸𑀧𑀺 𑀅𑀢𑁆𑀣𑀺, 𑀦 𑀏𑀯𑀁 𑀭𑀽𑀧𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀪𑀸𑀯𑁄 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀭𑀸𑀲𑀝𑁆𑀞𑁂𑀦 𑀘 𑀲𑀸𑀲𑀯𑀝𑁆𑀞𑁂𑀦 𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑀸𑀯𑁄 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀤𑀬𑁄 𑀧𑀦 𑀅𑀦𑀸𑀲𑀯𑀸𑀯 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀸. 𑀲𑀸𑀲𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀘𑁂𑀢𑁆𑀣 𑀉𑀧𑀸𑀤𑀸𑀦𑀕𑁄𑀘𑀭𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀥 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀔𑀦𑁆𑀥𑀸𑀢𑀺 𑀅𑀥𑀺𑀧𑁆𑀧𑁂𑀢𑀸.

𑁫𑁦𑁬. 𑀅𑀦𑀽𑀦𑀸𑀥𑀺𑀓𑀢𑁄𑀢𑀺 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺. 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑁄 𑀅𑀜𑁆𑀜𑁂𑀲𑀜𑁆𑀘 𑀢𑀤𑀯𑀭𑁄𑀥𑀢𑁄. 𑀅𑀦𑁂𑀓𑀧𑁆𑀧𑀪𑁂𑀤𑁂𑀲𑀼 𑀳𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 ¶ 𑀲𑀪𑀸𑀕𑀯𑀲𑁂𑀦 𑀲𑀗𑁆𑀕𑀬𑁆𑀳𑀫𑀸𑀦𑁂𑀲𑀼 𑀭𑀽𑀧𑀫𑁆𑀧𑀺 𑀭𑀽𑀧𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺. 𑀯𑁂𑀤𑀦𑀸 𑀯𑁂𑀤𑀦𑀸𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀜𑁆𑀜𑀸𑀤𑀻𑀲𑀼. 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀏𑀢𑀧𑀭𑀫𑀜𑁆𑀘𑁂𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀯𑀢𑁆𑀣𑀼 𑀬𑀤𑀺𑀤𑀁 𑀭𑀽𑀧𑀸𑀤𑀬𑁄 𑀧𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺 𑀭𑀽𑀧𑀁 𑀉𑀧𑀸𑀤𑀸𑀬 𑀭𑀽𑀧𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺. 𑀯𑁂𑀤𑀦𑀸𑀬, 𑀲𑀜𑁆𑀜𑀸𑀬, 𑀲𑀗𑁆𑀔𑀸𑀭𑁂𑀲𑀼, 𑀯𑀺𑀜𑁆𑀜𑀸𑀡𑁂 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁨𑁦𑁭). 𑀢𑀲𑁆𑀫𑀸 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀬𑁂𑀧𑀺 𑀘𑀜𑁆𑀜𑁂 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀢𑁆𑀣𑁂𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀢𑀤𑀯𑀭𑁄𑀥𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀏𑀯𑀁 𑀅𑀦𑀽𑀦𑀸𑀥𑀺𑀓𑀢𑁄 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

𑁫𑁦𑁭. 𑀉𑀧𑀫𑀸𑀢𑁄𑀢𑀺 𑀏𑀢𑁆𑀣 𑀳𑀺 𑀕𑀺𑀮𑀸𑀦𑀲𑀸𑀮𑀼𑀧𑀫𑁄 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑀺𑀮𑀸𑀦𑀼𑀧𑀫𑀲𑁆𑀲 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲 ¶ 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀦𑀺𑀯𑀸𑀲𑀝𑁆𑀞𑀸𑀦𑀢𑁄. 𑀕𑁂𑀮𑀜𑁆𑀜𑀼𑀧𑀫𑁄 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀆𑀩𑀸𑀥𑀓𑀢𑁆𑀢𑀸. 𑀕𑁂𑀮𑀜𑁆𑀜𑀲𑀫𑀼𑀝𑁆𑀞𑀸𑀦𑀼𑀧𑀫𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀓𑀸𑀫𑀲𑀜𑁆𑀜𑀸𑀤𑀺𑀯𑀲𑁂𑀦 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀲𑀩𑁆𑀪𑀸𑀯𑀸. 𑀅𑀲𑀧𑁆𑀧𑀸𑀬𑀲𑁂𑀯𑀦𑀼𑀧𑀫𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀕𑁂𑀮𑀜𑁆𑀜𑀲𑁆𑀲 𑀦𑀺𑀤𑀸𑀦𑀢𑁆𑀢𑀸. ‘‘𑀯𑁂𑀤𑀦𑀁 𑀯𑁂𑀤𑀦𑀢𑁆𑀣𑀸𑀬 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀳𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀤𑀼𑀓𑁆𑀔𑀲𑀳𑀕𑀢’’𑀦𑁆𑀢𑀺 (𑀥. 𑀲. 𑁫𑁫𑁬). 𑀕𑀺𑀮𑀸𑀦𑀼𑀧𑀫𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀕𑁂𑀮𑀜𑁆𑀜𑁂𑀦 𑀅𑀧𑀭𑀺𑀫𑀼𑀢𑁆𑀢𑀢𑁆𑀢𑀸. 𑀅𑀧𑀺𑀘 𑀘𑀸𑀭𑀓𑀓𑀸𑀭𑀡𑀅𑀧𑀭𑀸𑀥𑀓𑀸𑀭𑀡𑀓𑀸𑀭𑀓𑀅𑀧𑀭𑀸𑀥𑀺𑀓𑀼𑀧𑀫𑀸 𑀏𑀢𑁂 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀧𑀭𑀺𑀯𑁂𑀲𑀓𑀪𑀼𑀜𑁆𑀚𑀓𑀽𑀧𑀫𑀸 𑀘𑀸𑀢𑀺 𑀏𑀯𑀁 𑀉𑀧𑀫𑀸𑀢𑁄 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄.

𑁫𑁦𑁮. 𑀤𑀝𑁆𑀞𑀩𑁆𑀩𑀢𑁄 𑀤𑁆𑀯𑀺𑀥𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀤𑀝𑁆𑀞𑀩𑁆𑀩𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀳𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀆𑀲𑀻𑀯𑀺𑀲𑀽𑀧𑀫𑁂 (𑀲𑀁. 𑀦𑀺. 𑁪.𑁨𑁩𑁮) 𑀯𑀼𑀢𑁆𑀢𑀦𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀢𑁄, 𑀪𑀸𑀭𑀲𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁨𑁨) 𑀪𑀸𑀭𑀢𑁄, 𑀔𑀚𑁆𑀚𑀦𑀻𑀬𑀧𑀭𑀺𑀬𑀸𑀬𑀯𑀲𑁂𑀦 (𑀲𑀁. 𑀦𑀺. 𑁩.𑁭𑁯) 𑀔𑀸𑀤𑀓𑀢𑁄, 𑀬𑀫𑀓𑀲𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁮𑁫) 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀗𑁆𑀔𑀢𑀯𑀥𑀓𑀢𑁄 𑀤𑀝𑁆𑀞𑀩𑁆𑀩𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀧𑀭𑀺𑀫𑀤𑁆𑀤𑀦𑀸𑀲𑀳𑀦𑀢𑁄. 𑀉𑀤𑀓𑀧𑀼𑀩𑁆𑀩𑀼𑀴𑀁 𑀯𑀺𑀬 ¶ 𑀯𑁂𑀤𑀦𑀸, 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑁄. 𑀫𑀭𑀻𑀘𑀺𑀓𑀸 𑀯𑀺𑀬 𑀲𑀜𑁆𑀜𑀸, 𑀯𑀺𑀧𑁆𑀧𑀮𑀫𑁆𑀪𑀦𑀢𑁄. 𑀓𑀤𑀮𑀺𑀓𑁆𑀔𑀦𑁆𑀥𑁄 𑀯𑀺𑀬 𑀲𑀗𑁆𑀔𑀸𑀭𑀸, 𑀅𑀲𑀸𑀭𑀓𑀢𑁄. 𑀫𑀸𑀬𑀸 𑀯𑀺𑀬 𑀯𑀺𑀜𑁆𑀜𑀸𑀡𑀁, 𑀯𑀜𑁆𑀘𑀓𑀢𑁄. 𑀯𑀺𑀲𑁂𑀲𑀢𑁄 𑀘 𑀲𑀼𑀴𑀸𑀭𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀭𑀽𑀧𑀁 𑀅𑀲𑀼𑀪𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀅𑀯𑀺𑀦𑀺𑀫𑀼𑀢𑁆𑀢𑀢𑁄 𑀤𑀼𑀓𑁆𑀔𑀸𑀢𑀺. 𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀅𑀯𑀺𑀥𑁂𑀬𑁆𑀬𑀢𑁄 𑀅𑀦𑀢𑁆𑀢𑀸𑀢𑀺. 𑀯𑀺𑀜𑁆𑀜𑀸𑀡𑀁 𑀉𑀤𑀬𑀩𑁆𑀩𑀬𑀥𑀫𑁆𑀫𑀢𑁄 𑀅𑀦𑀺𑀘𑁆𑀘𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁦𑁯. 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲𑀢𑁆𑀣𑀲𑀺𑀤𑁆𑀥𑀺𑀢𑁄𑀢𑀺 𑀏𑀯𑀜𑁆𑀘 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑁆𑀯𑀺𑀥𑀸 𑀧𑀲𑁆𑀲𑀢𑁄 𑀬𑀸 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀢𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀪𑀸𑀯𑁂𑀦 𑀧𑀲𑁆𑀲𑀦𑁆𑀢𑁄 𑀔𑀦𑁆𑀥𑁂𑀳𑀺 𑀦 𑀯𑀺𑀳𑀜𑁆𑀜𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀭𑀽𑀧𑀸𑀤𑀻𑀦𑀺 𑀨𑁂𑀡𑀧𑀺𑀡𑁆𑀟𑀸𑀤𑀺𑀲𑀤𑀺𑀲𑀪𑀸𑀯𑁂𑀦 𑀧𑀲𑁆𑀲𑀦𑁆𑀢𑁄 𑀦 𑀅𑀲𑀸𑀭𑁂𑀲𑀼 𑀲𑀸𑀭𑀤𑀲𑁆𑀲𑀻 𑀳𑁄𑀢𑀺.

𑀯𑀺𑀲𑁂𑀲𑀢𑁄 𑀘 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀅𑀲𑀼𑀪𑀢𑁄 𑀧𑀲𑁆𑀲𑀦𑁆𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺. 𑀓𑀸𑀫𑁄𑀖𑀁 𑀉𑀢𑁆𑀢𑀭𑀢𑀺, 𑀓𑀸𑀫𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀓𑀸𑀫𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀓𑀸𑀫𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀯𑁂𑀤𑀦𑀁 ¶ 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀨𑀲𑁆𑀲𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀪𑀯𑁄𑀖𑀁 𑀉𑀢𑁆𑀢𑀭𑀢𑀺, 𑀪𑀯𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀪𑀯𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀲𑀜𑁆𑀜𑀁 𑀲𑀗𑁆𑀔𑀸𑀭𑁂 𑀘 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀤𑀺𑀝𑁆𑀞𑁄𑀖𑀁 𑀉𑀢𑁆𑀢𑀭𑀢𑀺, 𑀤𑀺𑀝𑁆𑀞𑀺𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀤𑀺𑀝𑁆𑀞𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺. 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀅𑀯𑀺𑀚𑁆𑀚𑁄𑀖𑀁 𑀉𑀢𑁆𑀢𑀭𑀢𑀺, 𑀅𑀯𑀺𑀚𑁆𑀚𑀸𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺, 𑀅𑀯𑀺𑀚𑁆𑀚𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀏𑀯𑀁 ¶ 𑀫𑀳𑀸𑀦𑀺𑀲𑀁𑀲𑀁, 𑀯𑀥𑀓𑀸𑀤𑀺𑀯𑀲𑁂𑀦 𑀤𑀲𑁆𑀲𑀦𑀁 𑀬𑀲𑁆𑀫𑀸;

𑀢𑀲𑁆𑀫𑀸 𑀔𑀦𑁆𑀥𑁂 𑀥𑀻𑀭𑁄, 𑀯𑀥𑀓𑀸𑀤𑀺𑀯𑀲𑁂𑀦 𑀧𑀲𑁆𑀲𑁂𑀬𑁆𑀬𑀸𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀔𑀦𑁆𑀥𑀦𑀺𑀤𑁆𑀤𑁂𑀲𑁄 𑀦𑀸𑀫

𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁫. 𑀆𑀬𑀢𑀦𑀥𑀸𑀢𑀼𑀦𑀺𑀤𑁆𑀤𑁂𑀲𑁄

𑀆𑀬𑀢𑀦𑀯𑀺𑀢𑁆𑀣𑀸𑀭𑀓𑀣𑀸

𑁫𑁧𑁦. 𑀆𑀬𑀢𑀦𑀸𑀦𑀻𑀢𑀺 ¶ ¶ 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀢𑀢𑁆𑀣 𑁋

𑀅𑀢𑁆𑀣 𑀮𑀓𑁆𑀔𑀡 𑀢𑀸𑀯𑀢𑁆𑀯, 𑀓𑀫 𑀲𑀗𑁆𑀔𑁂𑀧 𑀯𑀺𑀢𑁆𑀣𑀸𑀭𑀸;

𑀢𑀣𑀸 𑀤𑀝𑁆𑀞𑀩𑁆𑀩𑀢𑁄 𑀘𑁂𑀯, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀯𑀺𑀲𑁂𑀲𑀢𑁄 𑀢𑀸𑀯 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄, 𑀉𑀤𑀸𑀳𑀭𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄. 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀁 𑀅𑀯𑁆𑀳𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀲𑁄, 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀨𑀼𑀲𑀺𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀫𑀼𑀦𑀸𑀢𑀻𑀢𑀺 𑀫𑀦𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸.

𑁫𑁧𑁧. 𑀅𑀯𑀺𑀲𑁂𑀲𑀢𑁄 𑀧𑀦 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺, 𑀯𑀸𑀬𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺, 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀤𑀜𑁆𑀘 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀬𑀸𑀯 𑀦 𑀦𑀺𑀯𑀢𑁆𑀢𑀢𑀺, 𑀢𑀸𑀯 𑀦𑀬𑀦𑁆𑀢𑁂𑀯, 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 ¶ 𑀲𑀩𑁆𑀩𑁂𑀧𑀺𑀫𑁂 𑀥𑀫𑁆𑀫𑀸 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁫𑁧𑁨. 𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁆𑀫𑁂 𑀆𑀬𑀢𑀦𑁂 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁦𑁨) 𑀓𑀸𑀭𑀡𑀁.

𑀘𑀓𑁆𑀔𑀼𑀆𑀤𑀻𑀲𑀼 𑀘𑀸𑀧𑀺 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀺𑀯𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀘𑀓𑁆𑀔𑀸𑀤𑀻𑀲𑀼 𑀘 𑀢𑁂 𑀆𑀓𑀺𑀡𑁆𑀡𑀸 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀢𑁆𑀢𑀸 𑀘𑀸𑀢𑀺 𑀘𑀓𑁆𑀔𑀸𑀤𑀬𑁄 𑀦𑁂𑀲𑀁 𑀆𑀓𑀭𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁, 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀲𑀫𑁄𑀲𑀭𑀡𑀢𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀢𑀦𑁆𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀸𑀯𑁂𑀦 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀓𑀸𑀭𑀡𑀁, 𑀢𑁂𑀲𑀁 𑀅𑀪𑀸𑀯𑁂 𑀅𑀪𑀸𑀯𑀢𑁄𑀢𑀺. 𑀇𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦𑀘𑀸𑀢𑀺 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀏𑀢𑁂 𑀥𑀫𑁆𑀫𑀸 𑀆𑀬𑀢𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸𑀢𑀺 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁧𑁩. 𑀮𑀓𑁆𑀔𑀡𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀮𑀓𑁆𑀔𑀡𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀸𑀦𑀺 𑀘 𑀧𑀦 𑀢𑁂𑀲𑀁 𑀮𑀓𑁆𑀔𑀡𑀸𑀦𑀺 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀸𑀯𑀢𑁆𑀯𑀢𑁄𑀢𑀺 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀓𑁆𑀔𑀸𑀤𑀬𑁄𑀧𑀺 𑀳𑀺 𑀥𑀫𑁆𑀫𑀸 𑀏𑀯, 𑀏𑀯𑀁 𑀲𑀢𑀺 𑀥𑀫𑁆𑀫𑀸𑀬𑀢𑀦𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂. 𑀙𑀯𑀺𑀜𑁆𑀜𑀸𑀡𑀓𑀸𑀬𑀼𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀇𑀥 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘 𑀯𑀯𑀢𑁆𑀣𑀸𑀦𑀢𑁄 𑀅𑀬𑀫𑁂𑀢𑁂𑀲𑀁 𑀪𑁂𑀤𑁄 𑀳𑁄𑀢𑀻𑀢𑀺 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 ¶ 𑀘𑀓𑁆𑀔𑀸𑀬𑀢𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀭𑀽𑀧𑀸𑀬𑀢𑀦𑀫𑁂𑀯 𑀘𑀸𑀭𑀫𑁆𑀫𑀡𑀁, 𑀢𑀣𑀸 𑀇𑀢𑀭𑀸𑀦𑀺 𑀇𑀢𑀭𑁂𑀲𑀁. 𑀙𑀝𑁆𑀞𑀲𑁆𑀲 𑀧𑀦 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄 𑀫𑀦𑀸𑀬𑀢𑀦𑁂𑀓𑀤𑁂𑀲𑁄𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀅𑀲𑀸𑀥𑀸𑀭𑀡𑀫𑁂𑀯 𑀘 𑀥𑀫𑁆𑀫𑀸𑀬𑀢𑀦𑀁 𑀆𑀭𑀫𑁆𑀫𑀡𑀦𑁆𑀢𑀺 ¶ . 𑀇𑀢𑀺 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀢𑀸𑀯𑀢𑁆𑀯𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁧𑁪. 𑀓𑀫𑀢𑁄𑀢𑀺 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀺 𑀆𑀬𑀢𑀦𑁂𑀲𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀢𑁆𑀢𑀸 𑀘𑀓𑁆𑀔𑀸𑀬𑀢𑀦𑀁 𑀧𑀸𑀓𑀝𑀦𑁆𑀢𑀺 𑀧𑀞𑀫𑀁 𑀤𑁂𑀲𑀺𑀢𑀁, 𑀢𑀢𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀸𑀦𑀺 𑀲𑁄𑀢𑀸𑀬𑀢𑀦𑀸𑀤𑀻𑀦𑀺. 𑀅𑀣 𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑁂𑀦 𑀩𑀳𑀽𑀧𑀓𑀸𑀭𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀘𑀓𑁆𑀔𑀸𑀬𑀢𑀦𑀲𑁄𑀢𑀸𑀬𑀢𑀦𑀸𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺, 𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀺 𑀢𑀻𑀡𑀺, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑁄𑀘𑀭𑀯𑀺𑀲𑀬𑀢𑁆𑀢𑀸 𑀅𑀦𑁆𑀢𑁂 𑀫𑀦𑀸𑀬𑀢𑀦𑀁, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀦 𑀕𑁄𑀘𑀭𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸𑀦𑀺 𑀩𑀸𑀳𑀺𑀭𑁂𑀲𑀼 𑀭𑀽𑀧𑀸𑀬𑀢𑀦𑀸𑀤𑀻𑀦𑀺. 𑀅𑀧𑀺𑀘 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀧𑀺 𑀅𑀬𑀫𑁂𑀢𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁪𑁨𑁧; 𑀲𑀁. 𑀦𑀺. 𑁨.𑁪𑁩). 𑀏𑀯𑀁 𑀓𑀫𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁧𑁫. 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀢𑀺 𑀲𑀗𑁆𑀔𑁂𑀧𑀢𑁄 𑀳𑀺 𑀫𑀦𑀸𑀬𑀢𑀦𑀲𑁆𑀲 𑀘𑁂𑀯 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀲𑁆𑀲 𑀘 𑀦𑀸𑀫𑁂𑀦 𑀢𑀤𑀯𑀲𑁂𑀲𑀸𑀦𑀜𑁆𑀘 𑀆𑀬𑀢𑀦𑀸𑀦𑀁 𑀭𑀽𑀧𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀸𑀧𑀺 𑀆𑀬𑀢𑀦𑀸𑀦𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀳𑁄𑀦𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀢𑀸𑀯 𑀘𑀓𑁆𑀔𑀸𑀬𑀢𑀦𑀁 𑀚𑀸𑀢𑀺𑀯𑀲𑁂𑀦 𑀘𑀓𑁆𑀔𑀼𑀧𑀲𑀸𑀤𑀫𑀢𑁆𑀢𑀫𑁂𑀯, 𑀧𑀘𑁆𑀘𑀬𑀕𑀢𑀺𑀦𑀺𑀓𑀸𑀬𑀧𑀼𑀕𑁆𑀕𑀮𑀪𑁂𑀤𑀢𑁄 𑀧𑀦 𑀅𑀦𑀦𑁆𑀢𑀧𑁆𑀧𑀪𑁂𑀤𑀁. 𑀢𑀣𑀸 𑀲𑁄𑀢𑀸𑀬𑀢𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀫𑀦𑀸𑀬𑀢𑀦𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀪𑁂𑀤𑁂𑀦 𑀏𑀓𑀽𑀦𑀦𑀯𑀼𑀢𑀺𑀧𑁆𑀧𑀪𑁂𑀤𑀁 𑀏𑀓𑀯𑀻𑀲𑀼𑀢𑁆𑀢𑀭𑀲𑀢𑀧𑁆𑀧𑀪𑁂𑀤𑀜𑁆𑀘. 𑀯𑀢𑁆𑀣𑀼𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀧𑀦 𑀅𑀦𑀦𑁆𑀢𑀧𑁆𑀧𑀪𑁂𑀤𑀁. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀬𑀢𑀦𑀸𑀦𑀺 𑀯𑀺𑀲𑀪𑀸𑀕𑀧𑀘𑁆𑀘𑀬𑀸𑀤𑀺𑀪𑁂𑀤𑀢𑁄 𑀅𑀦𑀦𑁆𑀢𑀧𑁆𑀧𑀪𑁂𑀤𑀸𑀦𑀺. 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑀣𑀯𑀻𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀯𑀲𑁂𑀦 𑀢𑀺𑀧𑁆𑀧𑀪𑁂𑀤𑀁. 𑀧𑀘𑁆𑀘𑀬𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀥𑀫𑁆𑀫𑀸𑀬𑀢𑀦𑀁 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀪𑀸𑀯𑀦𑀸𑀦𑀢𑁆𑀢𑀪𑁂𑀤𑀢𑁄 𑀅𑀦𑁂𑀓𑀧𑁆𑀧𑀪𑁂𑀤𑀦𑁆𑀢𑀺. 𑀏𑀯𑀁 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁧𑁬. 𑀤𑀝𑁆𑀞𑀩𑁆𑀩𑀢𑁄𑀢𑀺 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀦𑁂𑀯 𑀲𑀗𑁆𑀔𑀢𑀸𑀦𑀺 𑀆𑀬𑀢𑀦𑀸𑀦𑀺 𑀅𑀦𑀸𑀕𑀫𑀦𑀢𑁄 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀳𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀉𑀤𑀬𑀸 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦𑀧𑀺 𑀉𑀤𑁆𑀥𑀁 𑀯𑀬𑀸 ¶ 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑁂 𑀉𑀤𑀬𑀸 𑀅𑀧𑁆𑀧𑀝𑀺𑀮𑀤𑁆𑀥𑀲𑀪𑀸𑀯𑀸𑀦𑀺 ¶ , 𑀉𑀤𑁆𑀥𑀁 𑀯𑀬𑀸 𑀧𑀭𑀺𑀪𑀺𑀦𑁆𑀦𑀲𑀪𑀸𑀯𑀸𑀦𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑁂𑀫𑀚𑁆𑀛𑁂 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀯𑀲𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀅𑀦𑀸𑀕𑀫𑀦𑀢𑁄 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀣𑀸 𑀦𑀺𑀭𑀻𑀳𑀓𑀢𑁄 𑀅𑀩𑁆𑀬𑀸𑀧𑀸𑀭𑀢𑁄 𑀘. 𑀦 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀺 ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀲𑀸𑀫𑀕𑁆𑀕𑀺𑀬𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺, 𑀦 𑀘 𑀢𑀸𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀭𑀪𑀸𑀯𑁂𑀦 𑀯𑀢𑁆𑀣𑀼𑀪𑀸𑀯𑁂𑀦 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀈𑀳𑀦𑁆𑀢𑀺, 𑀦 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀥𑀫𑁆𑀫𑀢𑀸𑀯𑁂𑀲𑀸, 𑀬𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀲𑀸𑀫𑀕𑁆𑀕𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀦𑀺𑀭𑀻𑀳𑀓𑀢𑁄 𑀅𑀩𑁆𑀬𑀸𑀧𑀸𑀭𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺, 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁆𑀢𑀸. 𑀩𑀸𑀳𑀺𑀭𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬, 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀅𑀪𑀺𑀖𑀸𑀢𑀓𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀳𑀺 𑀭𑀽𑀧𑁂𑀳𑀻’’𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀧𑀸𑀡𑀓𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺, 𑀩𑀸𑀳𑀺𑀭𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸 𑀯𑀺𑀬𑀸𑀢𑀺. 𑀏𑀯𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀇𑀤𑀁 𑀢𑀸𑀯 𑀆𑀬𑀢𑀦𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀥𑀸𑀢𑀼𑀯𑀺𑀢𑁆𑀣𑀸𑀭𑀓𑀣𑀸

𑁫𑁧𑁭. 𑀢𑀤𑀦𑀦𑁆𑀢𑀭𑀸 𑀧𑀦 𑀥𑀸𑀢𑀼𑀬𑁄𑀢𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑁋 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼, 𑀲𑀤𑁆𑀤𑀥𑀸𑀢𑀼, 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼, 𑀕𑀦𑁆𑀥𑀥𑀸𑀢𑀼, 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼, 𑀭𑀲𑀥𑀸𑀢𑀼, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼, 𑀨𑁄𑀝𑁆𑀞𑀩𑁆𑀩𑀥𑀸𑀢𑀼, 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼, 𑀥𑀫𑁆𑀫𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺. 𑀢𑀢𑁆𑀣 𑁋

𑀅𑀢𑁆𑀣𑀢𑁄 𑀮𑀓𑁆𑀔𑀡𑀸𑀤𑀻𑀳𑀺, 𑀓𑀫 𑀢𑀸𑀯𑀢𑁆𑀯𑀲𑀗𑁆𑀔𑀢𑁄;

𑀧𑀘𑁆𑀘𑀬𑀸 𑀅𑀣 𑀤𑀝𑁆𑀞𑀩𑁆𑀩𑀸, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀅𑀢𑁆𑀣𑀢𑁄𑀢𑀺 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀘𑀓𑁆𑀔𑀼𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀢𑀸𑀯 𑀦𑀬𑁂𑀦 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀤𑀳𑀢𑀺, 𑀥𑀻𑀬𑀢𑁂, 𑀯𑀺𑀥𑀸𑀦𑀁, 𑀯𑀺𑀥𑀻𑀬𑀢𑁂 𑀏𑀢𑀸𑀬, 𑀏𑀢𑁆𑀣 𑀯𑀸 𑀥𑀻𑀬𑀢𑀻𑀢𑀺 𑀥𑀸𑀢𑀼. 𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀬 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀁 ¶ , 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺. 𑀪𑀸𑀭𑀳𑀸𑀭𑁂𑀳𑀺 𑀘 𑀪𑀸𑀭𑁄 𑀯𑀺𑀬, 𑀲𑀢𑁆𑀢𑁂𑀳𑀺 ¶ 𑀥𑀻𑀬𑀦𑁆𑀢𑁂, 𑀥𑀸𑀭𑀺𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀲𑀸, 𑀅𑀯𑀲𑀯𑀢𑁆𑀢𑀦𑀢𑁄. 𑀏𑀢𑀸𑀳𑀺 𑀘 𑀓𑀭𑀡𑀪𑀽𑀢𑀸𑀳𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺. 𑀢𑀣𑀸𑀯𑀺𑀳𑀺𑀢𑀜𑁆𑀘 𑀢𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺, 𑀞𑀧𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀘𑀓𑁆𑀔𑀸𑀤𑀻𑀲𑀼 𑀏𑀓𑁂𑀓𑁄 𑀥𑀫𑁆𑀫𑁄 𑀬𑀣𑀸𑀲𑀫𑁆𑀪𑀯𑀁 𑀯𑀺𑀤𑀳𑀢𑀺, 𑀥𑀻𑀬𑀢𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑀯𑀲𑁂𑀦 𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺.

𑁫𑁧𑁮. 𑀅𑀧𑀺𑀘 𑀬𑀣𑀸 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀦𑀸𑀫 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀦 𑀏𑀯𑀫𑁂𑀢𑀸, 𑀏𑀢𑀸 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀬𑀣𑀸 𑀮𑁄𑀓𑁂 𑀯𑀺𑀘𑀺𑀢𑁆𑀢𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀬𑁄 𑀲𑁂𑀮𑀸𑀯𑀬𑀯𑀸 𑀥𑀸𑀢𑀼𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀢𑀸𑀧𑀺 𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄. 𑀯𑀺𑀘𑀺𑀢𑁆𑀢𑀸 𑀳𑁂𑀢𑁂 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀸𑀢𑀺. 𑀬𑀣𑀸 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑁂𑀲𑀼 𑀭𑀲𑀲𑁄𑀡𑀺𑀢𑀸𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸, 𑀏𑀯𑀫𑁂𑀢𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀯𑀬𑀯𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁂𑀢𑁂 𑀘𑀓𑁆𑀔𑀸𑀤𑀬𑁄𑀢𑀺. 𑀅𑀧𑀺𑀘 𑀥𑀸𑀢𑀽𑀢𑀺 𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀣𑀸 𑀳𑀺 𑀪𑀕𑀯𑀸 ‘‘𑀙 𑀥𑀸𑀢𑀼𑀭𑁄 𑀅𑀬𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁪𑁪) 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀁 𑀥𑀸𑀢𑀼𑀤𑁂𑀲𑀦𑀁 𑀅𑀓𑀸𑀲𑀻𑀢𑀺.

𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀥𑀸𑀢𑀼 𑀘 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘 𑀢𑀁 𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁧𑁯. 𑀮𑀓𑁆𑀔𑀡𑀸𑀤𑀺𑀢𑁄𑀢𑀺 𑀘𑀓𑁆𑀔𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀺𑀢𑁄𑀧𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀸𑀦𑀺 𑀘 𑀧𑀦 𑀦𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀺 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀓𑀫𑀢𑁄𑀢𑀺 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀲𑁄 𑀘 𑀧𑀦𑀸𑀬𑀁 𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀳𑁂𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀨𑀮𑀁. 𑀏𑀯𑀁 𑀲𑀩𑁆𑀩𑀢𑁆𑀣.

𑁫𑁨𑁦. 𑀢𑀸𑀯𑀢𑁆𑀯𑀢𑁄𑀢𑀺 ¶ 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀲𑀼 𑀢𑁂𑀲𑀼 𑀳𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑁆𑀧𑀤𑁂𑀲𑁂𑀲𑀼 ‘‘𑀆𑀪𑀸𑀥𑀸𑀢𑀼, 𑀲𑀼𑀪𑀥𑀸𑀢𑀼, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀥𑀸𑀢𑀼, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀥𑀸𑀢𑀼, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀥𑀸𑀢𑀼, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀸𑀢𑀼, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀥𑀸𑀢𑀼’’ (𑀲𑀁. 𑀦𑀺. 𑁨.𑁯𑁫), ‘‘𑀓𑀸𑀫𑀥𑀸𑀢𑀼 ¶ , 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀅𑀯𑀺𑀳𑀺𑀁𑀲𑀸𑀥𑀸𑀢𑀼’’ (𑀯𑀺𑀪. 𑁧𑁮𑁨; 𑀤𑀻. 𑀦𑀺. 𑁩.𑁩𑁦𑁫; 𑀫. 𑀦𑀺. 𑁩.𑁧𑁨𑁫), ‘‘𑀲𑀼𑀔𑀥𑀸𑀢𑀼, 𑀤𑀼𑀓𑁆𑀔𑀥𑀸𑀢𑀼, 𑀲𑁄𑀫𑀦𑀲𑁆𑀲𑀥𑀸𑀢𑀼, 𑀤𑁄𑀫𑀦𑀲𑁆𑀲𑀥𑀸𑀢𑀼, 𑀉𑀧𑁂𑀓𑁆𑀔𑀸𑀥𑀸𑀢𑀼, 𑀅𑀯𑀺𑀚𑁆𑀚𑀸𑀥𑀸𑀢𑀼’’ (𑀯𑀺𑀪. 𑁧𑁮𑁦; 𑀫. 𑀦𑀺. 𑁩.𑁧𑁨𑁫), ‘‘𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼’’ (𑀲𑀁. 𑀦𑀺. 𑁫.𑁧𑁮𑁩), ‘‘𑀳𑀻𑀦𑀥𑀸𑀢𑀼, 𑀫𑀚𑁆𑀛𑀺𑀫𑀥𑀸𑀢𑀼, 𑀧𑀡𑀻𑀢𑀥𑀸𑀢𑀼’’ (𑀤𑀻. 𑀦𑀺. 𑁩.𑁩𑁦𑁫), ‘‘𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼 (𑀤𑀻. 𑀦𑀺. 𑁩.𑁩𑁧𑁧), 𑀆𑀓𑀸𑀲𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼’’ (𑀫. 𑀦𑀺. 𑁩.𑁧𑁨𑁫; 𑀯𑀺𑀪. 𑁧𑁭𑁨), ‘‘𑀲𑀗𑁆𑀔𑀢𑀥𑀸𑀢𑀼, 𑀅𑀲𑀗𑁆𑀔𑀢𑀥𑀸𑀢𑀼’’ (𑀫. 𑀦𑀺. 𑁩.𑁧𑁨𑁫), ‘‘𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀮𑁄𑀓𑁄’’𑀢𑀺 (𑀤𑀻. 𑀦𑀺. 𑁨.𑁩𑁬𑁬; 𑀫. 𑀦𑀺. 𑁧.𑁧𑁪𑁮) 𑀏𑀯𑀫𑀸𑀤𑀬𑁄 𑀅𑀜𑁆𑀜𑀸𑀧𑀺 𑀥𑀸𑀢𑀼𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀢𑀺 𑀲𑀩𑁆𑀩𑀸𑀲𑀁 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀅𑀝𑁆𑀞𑀸𑀭𑀲𑀸𑀢𑀺 𑀅𑀬𑀫𑁂𑀯 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄𑀢𑀺 𑀘𑁂. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑀥𑀸𑀢𑀽𑀦𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸.

𑀭𑀽𑀧𑀥𑀸𑀢𑀼𑀬𑁂𑀯 𑀳𑀺 𑀆𑀪𑀸𑀥𑀸𑀢𑀼, 𑀲𑀼𑀪𑀥𑀸𑀢𑀼 𑀧𑀦 𑀭𑀽𑀧𑀸𑀤𑀺𑀧𑀝𑀺𑀩𑀤𑁆𑀥𑀸. 𑀓𑀲𑁆𑀫𑀸, 𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀢𑀸. 𑀲𑀼𑀪𑀦𑀺𑀫𑀺𑀢𑁆𑀢𑀜𑁆𑀳𑀺 𑀲𑀼𑀪𑀥𑀸𑀢𑀼. 𑀢𑀜𑁆𑀘 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀦 𑀯𑀺𑀚𑁆𑀚𑀢𑀺. 𑀓𑀼𑀲𑀮𑀯𑀺𑀧𑀸𑀓𑀸𑀭𑀫𑁆𑀫𑀡𑀸 𑀯𑀸 𑀭𑀽𑀧𑀸𑀤𑀬𑁄 𑀏𑀯 𑀲𑀼𑀪𑀥𑀸𑀢𑀽𑀢𑀺 𑀭𑀽𑀧𑀸𑀤𑀺𑀫𑀢𑁆𑀢𑀫𑁂𑀯𑁂𑀲𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀥𑀸𑀢𑀼𑀆𑀤𑀻𑀲𑀼 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁂𑀯, 𑀲𑁂𑀲𑀸 𑀥𑀫𑁆𑀫𑀥𑀸𑀢𑀼. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀥𑀸𑀢𑀼 𑀧𑀦 𑀲𑀪𑀸𑀯𑀢𑁄 𑀦𑀢𑁆𑀣𑀺. 𑀥𑀸𑀢𑀼𑀤𑁆𑀯𑀬𑀦𑀺𑀭𑁄𑀥𑀫𑀢𑁆𑀢𑀫𑁂𑀯 𑀳𑀺 𑀲𑀸.

𑀓𑀸𑀫𑀥𑀸𑀢𑀼 𑀥𑀫𑁆𑀫𑀥𑀸𑀢𑀼𑀫𑀢𑁆𑀢𑀁 𑀯𑀸 𑀳𑁄𑀢𑀺. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼? 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄’’𑀢𑀺 (𑀯𑀺𑀪. 𑁧𑁮𑁨). 𑀅𑀝𑁆𑀞𑀸𑀭𑀲𑀸𑀧𑀺 𑀯𑀸 𑀥𑀸𑀢𑀼𑀬𑁄. 𑀬𑀣𑀸𑀳 𑁋 ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀦𑁂𑀓𑁆𑀔𑀫𑁆𑀫𑀥𑀸𑀢𑀼 ¶ 𑀥𑀫𑁆𑀫𑀥𑀸𑀢𑀼 𑀏𑀯, ‘‘𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀦𑁂𑀓𑁆𑀔𑀫𑁆𑀫𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨) 𑀯𑀘𑀦𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀺 𑀳𑁄𑀢𑀺𑀬𑁂𑀯. 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸-𑀅𑀩𑁆𑀬𑀸𑀧𑀸𑀤-𑀅𑀯𑀺𑀳𑀺𑀁𑀲𑀸𑀲𑀼𑀔-𑀤𑀼𑀓𑁆𑀔-𑀲𑁄𑀫𑀦𑀲𑁆𑀲-𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸-𑀅𑀯𑀺𑀚𑁆𑀚𑀸𑀆𑀭𑀫𑁆𑀪-𑀦𑀺𑀓𑁆𑀓𑀫-𑀧𑀭𑀓𑁆𑀓𑀫𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀬𑁂𑀯.

𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀥𑀸𑀢𑀼𑀬𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀫𑀢𑁆𑀢𑀫𑁂𑀯. 𑀳𑀻𑀦𑀸 𑀳𑀺 𑀘𑀓𑁆𑀔𑀸𑀤𑀬𑁄 𑀳𑀻𑀦𑀸 𑀥𑀸𑀢𑀼, 𑀫𑀚𑁆𑀛𑀺𑀫𑀧𑀡𑀻𑀢𑀸 ¶ 𑀫𑀚𑁆𑀛𑀺𑀫𑀸 𑀘𑁂𑀯 𑀧𑀡𑀻𑀢𑀸 𑀘. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀅𑀓𑀼𑀲𑀮𑀸 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀳𑀻𑀦𑀥𑀸𑀢𑀼, 𑀮𑁄𑀓𑀺𑀬𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀉𑀪𑁄𑀧𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀘 𑀫𑀚𑁆𑀛𑀺𑀫𑀥𑀸𑀢𑀼, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀡𑀻𑀢𑀥𑀸𑀢𑀼.

𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀬𑁄 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀬𑁂𑀯, 𑀆𑀧𑁄𑀥𑀸𑀢𑀼 𑀆𑀓𑀸𑀲𑀥𑀸𑀢𑀼 𑀘 𑀥𑀫𑁆𑀫𑀥𑀸𑀢𑀼𑀬𑁂𑀯. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑁂𑀧𑁄𑀬𑁂𑀯.

𑀲𑀢𑁆𑀢𑀭𑀲 𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄 𑀘 𑀲𑀗𑁆𑀔𑀢𑀥𑀸𑀢𑀼, 𑀅𑀲𑀗𑁆𑀔𑀢𑀸 𑀧𑀦 𑀥𑀸𑀢𑀼 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄𑀯. 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄 𑀧𑀦 𑀅𑀝𑁆𑀞𑀸𑀭𑀲 𑀥𑀸𑀢𑀼𑀧𑁆𑀧𑀪𑁂𑀤𑀫𑀢𑁆𑀢𑀫𑁂𑀯𑀸𑀢𑀺. 𑀇𑀢𑀺 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑀥𑀸𑀢𑀽𑀦𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺.

𑁫𑁨𑁧. 𑀅𑀧𑀺𑀘 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀻𑀦𑀁 𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀫𑁆𑀧𑀺 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸. 𑀲𑀦𑁆𑀢𑀺 𑀳𑀺 𑀲𑀢𑁆𑀢𑀸 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀺𑀦𑁄, 𑀢𑁂𑀲𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦 𑀢𑀲𑁆𑀲 𑀅𑀦𑁂𑀓𑀢𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁 𑀚𑀻𑀯𑀲𑀜𑁆𑀜𑀁 𑀲𑀫𑀽𑀳𑀦𑀺𑀢𑀼𑀓𑀸𑀫𑁂𑀦 𑀪𑀕𑀯𑀢𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀓𑀸𑀲𑀺𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀢𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀘. 𑀬𑁂 𑀘 𑀇𑀫𑀸𑀬 𑀅𑀦𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀬 𑀤𑁂𑀲𑀦𑀸𑀬 𑀯𑁂𑀦𑁂𑀬𑁆𑀬𑀲𑀢𑁆𑀢𑀸, 𑀢𑀤𑀚𑁆𑀛𑀸𑀲𑀬𑀯𑀲𑁂𑀦 𑀘 𑀅𑀝𑁆𑀞𑀸𑀭𑀲𑁂𑀯 𑀧𑀓𑀸𑀲𑀺𑀢𑀸.

𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀢𑀣𑀸 𑀢𑀣𑀸 𑀳𑀺,

𑀥𑀫𑁆𑀫𑀁 𑀧𑀓𑀸𑀲𑀬𑀢𑀺 𑀏𑀲 𑀬𑀣𑀸 𑀬𑀣𑀸𑀲𑁆𑀲;

𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦,

𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄 𑀧𑀬𑀸𑀢𑀻𑀢𑀺.

𑀏𑀯𑀫𑁂𑀢𑁆𑀣 𑀢𑀸𑀯𑀢𑁆𑀯𑀢𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁨𑁨. 𑀲𑀗𑁆𑀔𑀢𑁄𑀢𑀺 ¶ 𑀘𑀓𑁆𑀔𑀼𑀥𑀸𑀢𑀼 𑀢𑀸𑀯 𑀚𑀸𑀢𑀺𑀢𑁄 𑀏𑀓𑁄 𑀥𑀫𑁆𑀫𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀘𑀓𑁆𑀔𑀼𑀧𑀲𑀸𑀤𑀯𑀲𑁂𑀦, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀥𑀸𑀢𑀼𑀬𑁄 𑀲𑁄𑀢𑀧𑁆𑀧𑀲𑀸𑀤𑀸𑀤𑀺𑀯𑀲𑁂𑀦, 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑀦 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀯𑀲𑁂𑀦 𑀢𑀬𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 ¶ 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀫𑀦𑁄𑀥𑀸𑀢𑀼 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀢𑀬𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀥𑀫𑁆𑀫𑀥𑀸𑀢𑀼 𑀢𑀺𑀡𑁆𑀡𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀲𑁄𑀴𑀲𑀦𑁆𑀦𑀁 𑀲𑀼𑀔𑀼𑀫𑀭𑀽𑀧𑀸𑀦𑀁 𑀅𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀯𑀻𑀲𑀢𑀺 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁂𑀲𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀺𑀜𑁆𑀜𑀸𑀡𑀯𑀲𑁂𑀦 𑀙𑀲𑀢𑁆𑀢𑀢𑀺 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀢𑁆𑀣 𑀲𑀗𑁆𑀔𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁨𑁩. 𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀘 𑀘𑀓𑁆𑀔𑀼𑀥𑀸𑀢𑀼 𑀢𑀸𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀙𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀥𑀸𑀢𑀼 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀲𑁄𑀢𑀥𑀸𑀢𑀼𑀲𑀤𑁆𑀤𑀥𑀸𑀢𑀼𑀆𑀤𑀬𑁄. 𑀧𑀜𑁆𑀘𑀦𑁆𑀦𑀁 𑀧𑀦 𑀦𑁂𑀲𑀁 𑀆𑀯𑀚𑁆𑀚𑀦𑀫𑀦𑁄𑀥𑀸𑀢𑀼 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀜𑁆𑀘𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀸 𑀘 𑀧𑀜𑁆𑀘𑀧𑀺 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀬𑀸. 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼 𑀲𑀦𑁆𑀢𑀻𑀭𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀲𑀸 𑀘 𑀯𑁄𑀝𑁆𑀞𑀩𑁆𑀩𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀯𑁄𑀝𑁆𑀞𑀩𑁆𑀩𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀅𑀦𑀦𑁆𑀢𑀭𑀸𑀬 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑁂𑀳𑀺 𑀘𑁂𑀯 𑀧𑀜𑁆𑀘𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀘𑀸𑀢𑀺 𑀙𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀲 𑀢𑀸𑀯 𑀧𑀜𑁆𑀘𑀤𑁆𑀯𑀸𑀭𑁂 𑀦𑀬𑁄.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀪𑀯𑀗𑁆𑀕𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀆𑀯𑀚𑁆𑀚𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀆𑀯𑀚𑁆𑀚𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀼𑀭𑀺𑀫𑁂𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀥𑀫𑁆𑀫𑀥𑀸𑀢𑀼 𑀧𑀦 𑀲𑀢𑁆𑀢𑀦𑁆𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀻𑀳𑀺 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀧𑀦 𑀏𑀓𑀘𑁆𑀘𑀸 𑀘 𑀥𑀫𑁆𑀫𑀥𑀸𑀢𑀼 𑀏𑀓𑀘𑁆𑀘𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀳𑀺𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀜𑁆𑀘 𑀦 𑀓𑁂𑀯𑀮𑀁 𑀘𑀓𑁆𑀔𑀼𑀭𑀽𑀧𑀸𑀤𑀬𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀣 𑀔𑁄 𑀆𑀮𑁄𑀓𑀸𑀤𑀬𑁄𑀧𑀺. 𑀢𑁂𑀦𑀸𑀳𑀼 𑀧𑀼𑀩𑁆𑀩𑀸𑀘𑀭𑀺𑀬𑀸 𑁋

‘‘𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑁂 ¶ 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀲𑁄𑀢𑀲𑀤𑁆𑀤𑀯𑀺𑀯𑀭𑀫𑀦𑀲𑀺𑀓𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀁. 𑀖𑀸𑀦𑀕𑀦𑁆𑀥𑀯𑀸𑀬𑀼𑀫𑀦𑀲𑀺𑀓𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀖𑀸𑀦𑀯𑀺𑀜𑁆𑀜𑀸𑀡𑀁. 𑀚𑀺𑀯𑁆𑀳𑀸𑀭𑀲𑀆𑀧𑀫𑀦𑀲𑀺𑀓𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁. 𑀓𑀸𑀬𑀨𑁄𑀝𑁆𑀞𑀩𑁆𑀩𑀧𑀣𑀯𑀻𑀫𑀦𑀲𑀺𑀓𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀁. 𑀪𑀯𑀗𑁆𑀕𑀫𑀦𑀥𑀫𑁆𑀫𑀫𑀦𑀲𑀺𑀓𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺.

𑀅𑀬𑀫𑁂𑀢𑁆𑀣 ¶ 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀘𑁆𑀘𑀬𑀧𑁆𑀧𑀪𑁂𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁨𑁪. 𑀤𑀝𑁆𑀞𑀩𑁆𑀩𑀢𑁄𑀢𑀺 𑀤𑀝𑁆𑀞𑀩𑁆𑀩𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸 𑀏𑀯 𑀳𑀺 𑀲𑀗𑁆𑀔𑀢𑀥𑀸𑀢𑀼𑀬𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀼𑀜𑁆𑀜𑀢𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀘 𑀤𑀝𑁆𑀞𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀤𑀡𑁆𑀟𑁄 𑀯𑀺𑀬 𑀭𑀽𑀧𑀥𑀸𑀢𑀼, 𑀲𑀤𑁆𑀤𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀆𑀤𑀸𑀲𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀫𑀼𑀔𑀁 𑀯𑀺𑀬 𑀭𑀽𑀧𑀥𑀸𑀢𑀼, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀅𑀣 𑀯𑀸 𑀉𑀘𑁆𑀙𑀼𑀢𑀺𑀮𑀸 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀬𑀦𑁆𑀢𑀘𑀓𑁆𑀓𑀬𑀝𑁆𑀞𑀺 𑀯𑀺𑀬 𑀭𑀽𑀧𑀥𑀸𑀢𑀼, 𑀉𑀘𑁆𑀙𑀼𑀭𑀲𑀢𑁂𑀮𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀅𑀥𑀭𑀸𑀭𑀡𑀻 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼, 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀭𑀽𑀧𑀥𑀸𑀢𑀼, 𑀅𑀕𑁆𑀕𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀲 𑀦𑀬𑁄 𑀲𑁄𑀢𑀥𑀸𑀢𑀼𑀆𑀤𑀻𑀲𑀼.

𑀫𑀦𑁄𑀥𑀸𑀢𑀼 𑀧𑀦 𑀬𑀣𑀸𑀲𑀫𑁆𑀪𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀥𑀫𑁆𑀫𑀥𑀸𑀢𑀼𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀮𑁆𑀮𑀫𑀺𑀯 𑀲𑀽𑀮𑀫𑀺𑀯 𑀘 𑀤𑀝𑁆𑀞𑀩𑁆𑀩𑁄. 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀯𑁂𑀤𑀦𑀸𑀲𑀮𑁆𑀮𑀲𑀽𑀮𑀬𑁄𑀕𑀸𑀆𑀢𑀼𑀭𑀸 𑀯𑀺𑀬, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀸 𑀲𑀜𑁆𑀜𑀸 𑀆𑀲𑀸𑀤𑀼𑀓𑁆𑀔𑀚𑀦𑀦𑀢𑁄 𑀭𑀺𑀢𑁆𑀢𑀫𑀼𑀝𑁆𑀞𑀺 𑀯𑀺𑀬. 𑀅𑀬𑀣𑀸𑀪𑀼𑀘𑁆𑀘𑀦𑀺𑀫𑀺𑀢𑁆𑀢𑀕𑀸𑀳𑀓𑀢𑁄 𑀯𑀦𑀫𑀺𑀕𑁄 𑀯𑀺𑀬. 𑀲𑀗𑁆𑀔𑀸𑀭𑀸 𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀢𑁄 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀔𑀺𑀧𑀦𑀓𑀧𑀼𑀭𑀺𑀲𑀸 𑀯𑀺𑀬. 𑀚𑀸𑀢𑀺 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑁄 𑀭𑀸𑀚𑀧𑀼𑀭𑀺𑀲𑀸𑀦𑀼𑀩𑀦𑁆𑀥𑀘𑁄𑀭𑀸 𑀯𑀺𑀬. 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀳𑁂𑀢𑀼𑀢𑁄 𑀯𑀺𑀲𑀭𑀼𑀓𑁆𑀔𑀩𑀻𑀚𑀸𑀦𑀺 𑀯𑀺𑀬. 𑀭𑀽𑀧𑀁 𑀦𑀸𑀦𑀸𑀯𑀺𑀥𑀼𑀧𑀤𑁆𑀤𑀯𑀦𑀺𑀫𑀺𑀢𑁆𑀢𑀢𑁄 𑀔𑀼𑀭𑀘𑀓𑁆𑀓𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀅𑀲𑀗𑁆𑀔𑀢𑀸 𑀧𑀦 𑀥𑀸𑀢𑀼 𑀅𑀫𑀢𑀢𑁄 𑀲𑀦𑁆𑀢𑀢𑁄 𑀔𑁂𑀫𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸? 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸.

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 ¶ 𑀆𑀭𑀫𑁆𑀫𑀡𑁂𑀲𑀼 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀭𑀜𑁆𑀜𑀫𑀓𑁆𑀓𑀝𑁄 𑀯𑀺𑀬, 𑀤𑀼𑀤𑁆𑀤𑀫𑀦𑀢𑁄 𑀅𑀲𑁆𑀲𑀔𑀴𑀼𑀗𑁆𑀓𑁄 𑀯𑀺𑀬, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀢𑁄 𑀯𑁂𑀳𑀸𑀲𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀯𑀺𑀬, 𑀮𑁄𑀪𑀤𑁄𑀲𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀺𑀮𑁂𑀲𑀯𑁂𑀲𑀬𑁄𑀕𑀢𑁄 𑀭𑀗𑁆𑀕𑀦𑀝𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀆𑀬𑀢𑀦𑀥𑀸𑀢𑀼𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁬. 𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑀇𑀦𑁆𑀤𑁆𑀭𑀺𑀬𑀯𑀺𑀢𑁆𑀣𑀸𑀭𑀓𑀣𑀸

𑁫𑁨𑁫. 𑀥𑀸𑀢𑀽𑀦𑀁 ¶ ¶ 𑀅𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀢𑀢𑁆𑀣 𑁋

𑀅𑀢𑁆𑀣𑀢𑁄 𑀮𑀓𑁆𑀔𑀡𑀸𑀤𑀻𑀳𑀺, 𑀓𑀫𑀢𑁄 𑀘 𑀯𑀺𑀚𑀸𑀦𑀺𑀬𑀸;

𑀪𑁂𑀤𑀸𑀪𑁂𑀤𑀸 𑀢𑀣𑀸 𑀓𑀺𑀘𑁆𑀘𑀸, 𑀪𑀽𑀫𑀺𑀢𑁄 𑀘 𑀯𑀺𑀦𑀺𑀘𑁆𑀙𑀬𑀁.

𑀢𑀢𑁆𑀣 𑀘𑀓𑁆𑀔𑀸𑀤𑀻𑀦𑀁 𑀢𑀸𑀯 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀧𑀘𑁆𑀙𑀺𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀞𑀫𑀁 𑀧𑀼𑀩𑁆𑀩𑀪𑀸𑀕𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁 𑀆𑀚𑀸𑀦𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀢𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀓𑁄 𑀧𑀦 𑀦𑁂𑀲𑀁 𑀇𑀦𑁆𑀤𑁆𑀭𑀺𑀬𑀝𑁆𑀞𑁄 𑀦𑀸𑀫𑀸𑀢𑀺? 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄. 𑀲𑁄 𑀲𑀩𑁆𑀩𑁄𑀧𑀺 𑀇𑀥 𑀬𑀣𑀸𑀬𑁄𑀕𑀁 𑀬𑀼𑀚𑁆𑀚𑀢𑀺. 𑀪𑀕𑀯𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀢𑁄 𑀇𑀦𑁆𑀤𑁄. 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀓𑀫𑁆𑀫𑀁, 𑀓𑀫𑁆𑀫𑁂𑀲𑀼 𑀓𑀲𑁆𑀲𑀘𑀺 𑀇𑀲𑁆𑀲𑀭𑀺𑀬𑀸𑀪𑀸𑀯𑀢𑁄. 𑀢𑁂𑀦𑁂𑀯𑁂𑀢𑁆𑀣 𑀓𑀫𑁆𑀫𑀲𑀜𑁆𑀚𑀦𑀺𑀢𑀸𑀦𑀺 𑀢𑀸𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 ¶ 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺. 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁂𑀦 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀩𑁆𑀩𑀸𑀦𑁂𑀯 𑀧𑀦𑁂𑀢𑀸𑀦𑀺 𑀪𑀕𑀯𑀢𑀸 𑀬𑀣𑀸𑀪𑀽𑀢𑀢𑁄 𑀧𑀓𑀸𑀲𑀺𑀢𑀸𑀦𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀦𑀺 𑀘𑀸𑀢𑀺 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁂𑀦 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀦𑁂𑀯 𑀪𑀕𑀯𑀢𑀸 𑀫𑀼𑀦𑀺𑀦𑁆𑀤𑁂𑀦 𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬 𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑀸𑀦𑀻𑀢𑀺 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁂𑀦𑀸𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺.

𑀅𑀧𑀺𑀘 ¶ 𑀆𑀥𑀺𑀧𑀘𑁆𑀘𑀲𑀗𑁆𑀔𑀸𑀢𑁂𑀦 𑀇𑀲𑁆𑀲𑀭𑀺𑀬𑀝𑁆𑀞𑁂𑀦𑀸𑀧𑀺 𑀏𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀘𑀓𑁆𑀔𑀸𑀤𑀻𑀦𑀁 𑀲𑀺𑀤𑁆𑀥𑀁 𑀆𑀥𑀺𑀧𑀘𑁆𑀘𑀁, 𑀢𑀲𑁆𑀫𑀺𑀁 𑀢𑀺𑀓𑁆𑀔𑁂 𑀢𑀺𑀓𑁆𑀔𑀢𑁆𑀢𑀸 𑀫𑀦𑁆𑀤𑁂 𑀘 𑀫𑀦𑁆𑀤𑀢𑁆𑀢𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑀓𑁆𑀔𑀡𑀸𑀤𑀻𑀳𑀻𑀢𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑁂𑀳𑀺𑀧𑀺 𑀘𑀓𑁆𑀔𑀸𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀘 𑀦𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀺 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀦𑁂𑀯. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀅𑀢𑁆𑀣𑀢𑁄 𑀅𑀫𑁄𑀳𑁄𑀬𑁂𑀯. 𑀲𑁂𑀲𑀸𑀦𑀺 𑀢𑀢𑁆𑀣 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸𑀦𑀺.

𑁫𑁨𑁬. 𑀓𑀫𑀢𑁄𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀬 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀳𑁄𑀢𑀻𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺. 𑀲𑁄 𑀧𑀦 𑀅𑀢𑁆𑀢𑀪𑀸𑀯𑁄 𑀬𑀁 𑀥𑀫𑁆𑀫𑀁 𑀉𑀧𑀸𑀤𑀸𑀬 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀅𑀬𑀁 𑀲𑁄𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀲𑁄 𑀤𑀼𑀯𑀺𑀥𑁄𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀬𑀸𑀯 𑀢𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀯 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀺. 𑀬𑀜𑁆𑀘 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀁𑀦𑀺𑀭𑁄𑀥𑀢𑁆𑀣𑀁 𑀧𑀦 𑀏𑀢𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀲𑀤𑁆𑀥𑀸𑀤𑀻𑀦𑀺. 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀏𑀲 𑀥𑀫𑁆𑀫𑁄 𑀧𑀞𑀫𑀁 𑀅𑀢𑁆𑀢𑀦𑀺 𑀧𑀸𑀢𑀼𑀪𑀯𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲𑁂𑀯 𑀨𑀮𑀢𑁆𑀢𑀸 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁄 𑀘 𑀢𑀢𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀢𑁄 𑀧𑀭𑀁 𑀪𑀸𑀯𑀦𑀸𑀬 𑀇𑀫𑀲𑁆𑀲 𑀅𑀥𑀺𑀕𑀫𑁄, 𑀅𑀥𑀺𑀕𑀢𑁂 𑀘 𑀧𑀦 𑀇𑀫𑀲𑁆𑀫𑀺𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀅𑀦𑁆𑀢𑁂 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀓𑀫𑁄.

𑀪𑁂𑀤𑀸𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀘𑁂𑀢𑁆𑀣 𑀪𑁂𑀤𑁄. 𑀢𑀜𑁆𑀳𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀲𑁂𑀲𑀸𑀦𑀁 𑀅𑀪𑁂𑀤𑁄𑀢𑀺 𑀏𑀯𑀫𑁂𑀢𑁆𑀣 𑀪𑁂𑀤𑀸𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸.

𑁫𑁨𑁭. 𑀓𑀺𑀘𑁆𑀘𑀸𑀢𑀺 ¶ 𑀓𑀺𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀘𑁆𑀘𑀦𑁆𑀢𑀺 𑀘𑁂. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀢𑀸𑀯 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀢𑁄 𑀬𑀁 𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀁 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀪𑀸𑀯𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀢𑁆𑀢𑀸𑀧𑀦𑀁, 𑀇𑀤𑀁 𑀓𑀺𑀘𑁆𑀘𑀁. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 ¶ 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀯𑀲𑀯𑀢𑁆𑀢𑀸𑀧𑀦𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀳𑀚𑀸𑀢𑀥𑀫𑁆𑀫𑀸𑀦𑀼𑀧𑀸𑀮𑀦𑀁. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀓𑀸𑀭𑀸𑀦𑀼𑀯𑀺𑀥𑀸𑀦𑀁. 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀬𑀣𑀸𑀲𑀓𑀁 𑀑𑀴𑀸𑀭𑀺𑀓𑀸𑀓𑀸𑀭𑀸𑀦𑀼𑀧𑀸𑀧𑀦𑀁. 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀦𑁆𑀢𑀧𑀡𑀻𑀢𑀫𑀚𑁆𑀛𑀢𑁆𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁. 𑀲𑀤𑁆𑀥𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀧𑀲𑀦𑁆𑀦𑀸𑀓𑀸𑀭𑀸𑀤𑀺𑀪𑀸𑀯𑀲𑀫𑁆𑀧𑀸𑀧𑀦𑀁. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀁𑀬𑁄𑀚𑀦𑀢𑁆𑀢𑀬𑀧𑁆𑀧𑀳𑀸𑀦𑀜𑁆𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀢𑀧𑁆𑀧𑀳𑀸𑀦𑀸𑀪𑀺𑀫𑀼𑀔𑀪𑀸𑀯𑀓𑀭𑀡𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀺𑀢𑀦𑀼𑀓𑀭𑀡𑀧𑁆𑀧𑀳𑀸𑀦𑀜𑁆𑀘𑁂𑀯 𑀲𑀳𑀚𑀸𑀢𑀸𑀦𑀜𑁆𑀘 𑀅𑀢𑁆𑀢𑀦𑁄 𑀯𑀲𑀸𑀦𑀼𑀯𑀢𑁆𑀢𑀸𑀧𑀦𑀁. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑁆𑀓𑀧𑁆𑀧𑀳𑀸𑀦𑀜𑁆𑀘𑁂𑀯 𑀅𑀫𑀢𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀬𑀢𑀸 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀓𑀺𑀘𑁆𑀘𑀢𑁄 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑀺𑀬𑀸.

𑁫𑁨𑁮. 𑀪𑀽𑀫𑀺𑀢𑁄𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀇𑀢𑁆𑀣𑀺𑀧𑀼𑀭𑀺𑀲𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀢𑁆𑀣 𑀓𑀸𑀫𑀸𑀯𑀘𑀭𑀸𑀦𑁂𑀯. 𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀘 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀁. 𑀅𑀯𑀲𑀸𑀦𑁂 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀸𑀦𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀪𑀽𑀫𑀺𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀁 𑀯𑀺𑀚𑀸𑀦𑁂𑀬𑁆𑀬. 𑀏𑀯𑀁 𑀳𑀺 𑀯𑀺𑀚𑀸𑀦𑀦𑁆𑀢𑁄 𑁋

𑀲𑀁𑀯𑁂𑀕𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀞𑀺𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂;

𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀜𑁆𑀜𑀸𑀬, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺.

𑀇𑀤𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁.

𑀲𑀘𑁆𑀘𑀯𑀺𑀢𑁆𑀣𑀸𑀭𑀓𑀣𑀸

𑁫𑁨𑁯. 𑀢𑀤𑀦𑀦𑁆𑀢𑀭𑀸𑀦𑀺 𑀧𑀦 𑀲𑀘𑁆𑀘𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄 ¶ 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀢𑀢𑁆𑀣 𑁋

𑀯𑀺𑀪𑀸𑀕𑀢𑁄 ¶ 𑀦𑀺𑀩𑁆𑀩𑀘𑀦, 𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄;

𑀅𑀢𑁆𑀣𑀢𑁆𑀣𑀼𑀤𑁆𑀥𑀸𑀭𑀢𑁄 𑀘𑁂𑀯, 𑀅𑀦𑀽𑀦𑀸𑀥𑀺𑀓𑀢𑁄 𑀢𑀣𑀸.

𑀓𑀫𑀢𑁄 𑀚𑀸𑀢𑀺𑀆𑀤𑀻𑀦𑀁, 𑀦𑀺𑀘𑁆𑀙𑀬𑀸 𑀜𑀸𑀡𑀓𑀺𑀘𑁆𑀘𑀢𑁄;

𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀸, 𑀉𑀧𑀫𑀸𑀢𑁄 𑀘𑀢𑀼𑀓𑁆𑀓𑀢𑁄.

𑀲𑀼𑀜𑁆𑀜𑀢𑁂𑀓𑀯𑀺𑀥𑀸𑀤𑀻𑀳𑀺, 𑀲𑀪𑀸𑀕𑀯𑀺𑀲𑀪𑀸𑀕𑀢𑁄;

𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀜𑁆𑀜𑀼𑀦𑀸 𑀲𑀸𑀲𑀦𑀓𑁆𑀓𑀫𑁂.

𑀢𑀢𑁆𑀣 𑀯𑀺𑀪𑀸𑀕𑀢𑁄𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀳𑀺 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀺𑀪𑀢𑁆𑀢𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀬𑁂 𑀤𑀼𑀓𑁆𑀔𑀸𑀤𑀻𑀦𑀺 𑀅𑀪𑀺𑀲𑀫𑁂𑀦𑁆𑀢𑁂𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑀼𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸’’𑀢𑀺 (𑀧𑀝𑀺. 𑀫. 𑁨.𑁮). 𑀢𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁨.𑁧𑁧) 𑀏𑀯𑀫𑀸𑀤𑀺. 𑀇𑀢𑀺 𑀏𑀯𑀁 𑀯𑀺𑀪𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀺𑀪𑀸𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁩𑁦. 𑀦𑀺𑀩𑁆𑀩𑀘𑀦𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀘𑀦𑀢𑁄 𑀢𑀸𑀯 𑀇𑀥 𑀤𑀼-𑀇𑀢𑀺 𑀅𑀬𑀁 𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑁂 𑀤𑀺𑀲𑁆𑀲𑀢𑀺. 𑀓𑀼𑀘𑁆𑀙𑀺𑀢𑀁 𑀳𑀺 𑀧𑀼𑀢𑁆𑀢𑀁 𑀤𑀼𑀧𑁆𑀧𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀔𑀁-𑀲𑀤𑁆𑀤𑁄 𑀧𑀦 𑀢𑀼𑀘𑁆𑀙𑁂. 𑀢𑀼𑀘𑁆𑀙𑀁 𑀳𑀺 𑀆𑀓𑀸𑀲𑀁 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀧𑀞𑀫𑀲𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀅𑀦𑁂𑀓𑀉𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑁄. 𑀢𑀼𑀘𑁆𑀙𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁄. 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀢𑁆𑀢𑀸 𑀢𑀼𑀘𑁆𑀙𑀢𑁆𑀢𑀸 𑀘 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀁-𑀇𑀢𑀺 ¶ 𑀘 𑀅𑀬𑀁 𑀲𑀤𑁆𑀤𑁄 ‘‘𑀲𑀫𑀸𑀕𑀫𑁄 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁯𑁬; 𑀯𑀺𑀪. 𑁧𑁯𑁯) 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺. 𑀉-𑀇𑀢𑀺 𑀅𑀬𑀁 ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁧; 𑀫𑀳𑀸𑀯. 𑁮𑁪) 𑀉𑀧𑁆𑀧𑀢𑁆𑀢𑀺𑀁. 𑀅𑀬-𑀲𑀤𑁆𑀤𑁄 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀇𑀤𑀜𑁆𑀘𑀸𑀧𑀺 𑀤𑀼𑀢𑀺𑀬𑀲𑀘𑁆𑀘𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀇𑀢𑀺 𑀤𑀼𑀓𑁆𑀔𑀲𑁆𑀲 𑀲𑀁𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀲𑀫𑀼𑀤𑀬𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑀺𑀬𑀲𑀘𑁆𑀘𑀁 ¶ 𑀧𑀦 𑀬𑀲𑁆𑀫𑀸 𑀦𑀺-𑀲𑀤𑁆𑀤𑁄 𑀅𑀪𑀸𑀯𑀁, 𑀭𑁄𑀥-𑀲𑀤𑁆𑀤𑁄 𑀘 𑀘𑀸𑀭𑀓𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀅𑀪𑀸𑀯𑁄 𑀏𑀢𑁆𑀣 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸, 𑀲𑀫𑀥𑀺𑀕𑀢𑁂 𑀯𑀸 𑀢𑀲𑁆𑀫𑀺𑀁 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸𑀢𑀺𑀧𑀺 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺.

𑀘𑀢𑀼𑀢𑁆𑀣𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀏𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀪𑀽𑀢𑀢𑁆𑀢𑀸, 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀯𑀼𑀘𑁆𑀘𑀢𑀺.

𑁫𑁩𑁧. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀓𑀢𑀫𑀸𑀦𑀺…𑀧𑁂… 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀭𑀺𑀬𑀸 𑀇𑀫𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀅𑀧𑀺𑀘 𑀅𑀭𑀺𑀬𑀲𑁆𑀲 𑀲𑀘𑁆𑀘𑀸𑀦𑀻𑀢𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀭𑀺𑀬𑁄, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮). 𑀅𑀣 𑀯𑀸 𑀏𑀢𑁂𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀬𑀣𑀸𑀪𑀽𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀅𑀧𑀺𑀘 𑀔𑁄 𑀧𑀦 𑀅𑀭𑀺𑀬𑀸𑀦𑀺 𑀲𑀘𑁆𑀘𑀸𑀦𑀻𑀢𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀭𑀺𑀬𑀸𑀦𑀻𑀢𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀯𑀺𑀲𑀁𑀯𑀸𑀤𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁭) 𑀏𑀯𑀫𑁂𑀢𑁆𑀣 𑀦𑀺𑀩𑁆𑀩𑀘𑀦𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁨. 𑀓𑀣𑀁 𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄? 𑀏𑀢𑁆𑀣 𑀳𑀺 𑀩𑀸𑀥𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀦𑁆𑀢𑀸𑀧𑀦𑀭𑀲𑀁, 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀮𑀓𑁆𑀔𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀁, 𑀧𑀮𑀺𑀩𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀦𑁆𑀢𑀺𑀮𑀓𑁆𑀔𑀡𑀁 ¶ 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀺𑀮𑁂𑀲𑀧𑁆𑀧𑀳𑀸𑀦𑀭𑀲𑀁, 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀧𑀺𑀘 𑀧𑀯𑀢𑁆𑀢𑀺𑀧𑀯𑀢𑁆𑀢𑀦𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀦𑀮𑀓𑁆𑀔𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸. 𑀢𑀣𑀸 𑀲𑀗𑁆𑀔𑀢𑀢𑀡𑁆𑀳𑀸 𑀅𑀲𑀗𑁆𑀔𑀢𑀤𑀲𑁆𑀲𑀦𑀮𑀓𑁆𑀔𑀡𑀸𑀦𑀺 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁩. 𑀅𑀢𑁆𑀣𑀢𑁆𑀣𑀼𑀤𑁆𑀥𑀸𑀭𑀢𑁄 ¶ 𑀘𑁂𑀯𑀸𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑀓𑁄 𑀲𑀘𑁆𑀘𑀝𑁆𑀞𑁄𑀢𑀺 𑀘𑁂? 𑀬𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀫𑀸𑀬𑀸𑀯 𑀯𑀺𑀧𑀭𑀻𑀢𑁄, 𑀫𑀭𑀻𑀘𑀺𑀯 𑀯𑀺𑀲𑀁𑀯𑀸𑀤𑀓𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸𑀯 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑁄 𑀘 𑀦 𑀳𑁄𑀢𑀺, 𑀅𑀣 𑀔𑁄 𑀩𑀸𑀥𑀦𑀧𑁆𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀧𑁆𑀧𑀓𑀸𑀭𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀦 𑀅𑀭𑀺𑀬𑀜𑀸𑀡𑀲𑁆𑀲 𑀕𑁄𑀘𑀭𑁄 𑀳𑁄𑀢𑀺𑀬𑁂𑀯. 𑀏𑀲 𑀅𑀕𑁆𑀕𑀺𑀮𑀓𑁆𑀔𑀡𑀁 𑀯𑀺𑀬, 𑀮𑁄𑀓𑀧𑀓𑀢𑀺 𑀯𑀺𑀬 𑀘 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄 𑀲𑀘𑁆𑀘𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀅𑀧𑀺𑀘 𑁋

𑀦𑀸𑀩𑀸𑀥𑀓𑀁 𑀬𑀢𑁄 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀸 𑀅𑀜𑁆𑀜𑀁 𑀦 𑀩𑀸𑀥𑀓𑀁;

𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦, 𑀢𑀢𑁄 𑀲𑀘𑁆𑀘𑀫𑀺𑀤𑀁 𑀫𑀢𑀁.

𑀢𑀁 𑀯𑀺𑀦𑀸 𑀦𑀸𑀜𑁆𑀜𑀢𑁄 𑀤𑀼𑀓𑁆𑀔𑀁, 𑀦 𑀳𑁄𑀢𑀺 𑀦 𑀘 𑀢𑀁 𑀢𑀢𑁄;

𑀤𑀼𑀓𑁆𑀔𑀳𑁂𑀢𑀼𑀦𑀺𑀬𑀸𑀫𑁂𑀦, 𑀇𑀢𑀺 𑀲𑀘𑁆𑀘𑀁 𑀯𑀺𑀲𑀢𑁆𑀢𑀺𑀓𑀸.

𑀦𑀸𑀜𑁆𑀜𑀸 𑀦𑀺𑀩𑁆𑀩𑀸𑀦𑀢𑁄 𑀲𑀦𑁆𑀢𑀺, 𑀲𑀦𑁆𑀢𑀁 𑀦 𑀘 𑀦 𑀢𑀁 𑀬𑀢𑁄;

𑀲𑀦𑁆𑀢𑀪𑀸𑀯𑀦𑀺𑀬𑀸𑀫𑁂𑀦, 𑀢𑀢𑁄 𑀲𑀘𑁆𑀘𑀫𑀺𑀤𑀁 𑀫𑀢𑀁.

𑀫𑀕𑁆𑀕𑀸 𑀅𑀜𑁆𑀜𑀁 𑀦 𑀦𑀺𑀬𑁆𑀬𑀸𑀦𑀁, 𑀅𑀦𑀺𑀬𑁆𑀬𑀸𑀦𑁄 𑀦 𑀘𑀸𑀧𑀺 𑀲𑁄;

𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸, 𑀇𑀢𑀺 𑀲𑁄 𑀲𑀘𑁆𑀘𑀲𑀫𑁆𑀫𑀢𑁄.

𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲, 𑀪𑀽𑀢𑀪𑀸𑀯𑀁 𑀘𑀢𑀽𑀲𑁆𑀯𑀧𑀺;

𑀤𑀼𑀓𑁆𑀔𑀸𑀤𑀻𑀲𑁆𑀯𑀯𑀺𑀲𑁂𑀲𑁂𑀦, 𑀲𑀘𑁆𑀘𑀝𑁆𑀞𑀁 𑀆𑀳𑀼 𑀧𑀡𑁆𑀟𑀺𑀢𑀸𑀢𑀺.

𑀏𑀯𑀁 𑀅𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁪. 𑀓𑀣𑀁 ¶ 𑀅𑀢𑁆𑀣𑀼𑀤𑁆𑀥𑀸𑀭𑀢𑁄? 𑀇𑀥𑀸𑀬𑀁 𑀲𑀘𑁆𑀘-𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀏𑀓𑀁 𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦) 𑀧𑀭𑀫𑀢𑁆𑀣𑀲𑀘𑁆𑀘𑁂 𑀦𑀺𑀩𑁆𑀩𑀸𑀦𑁂 𑀘𑁂𑀯 𑀫𑀕𑁆𑀕𑁂 𑀘. ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀅𑀭𑀺𑀬𑀲𑀘𑁆𑀘𑁂 𑀯𑀢𑁆𑀢𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁫. 𑀅𑀦𑀽𑀦𑀸𑀥𑀺𑀓𑀢𑁄𑀢𑀺 ¶ 𑀓𑀲𑁆𑀫𑀸 𑀧𑀦 𑀘𑀢𑁆𑀢𑀸𑀭𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀻𑀢𑀺 𑀘𑁂? 𑀅𑀜𑁆𑀜𑀲𑁆𑀲𑀸𑀲𑀫𑁆𑀪𑀯𑀢𑁄 𑀅𑀜𑁆𑀜𑀢𑀭𑀲𑁆𑀲 𑀘 𑀅𑀧𑀦𑁂𑀬𑁆𑀬𑀸𑀪𑀸𑀯𑀢𑁄. 𑀦 𑀳𑀺 𑀏𑀢𑁂𑀳𑀺 𑀅𑀜𑁆𑀜𑀁 𑀅𑀥𑀺𑀓𑀁 𑀯𑀸, 𑀏𑀢𑁂𑀲𑀁 𑀯𑀸 𑀏𑀓𑀫𑁆𑀧𑀺 𑀅𑀧𑀦𑁂𑀢𑀩𑁆𑀩𑀁 𑀲𑀫𑁆𑀪𑁄𑀢𑀺. 𑀬𑀣𑀸𑀳 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑁂𑀬𑁆𑀬 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 ‘𑀦𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀅𑀳𑀫𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺. 𑀬𑀣𑀸 𑀘𑀸𑀳 𑁋 ‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀦𑁂𑀢𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁 𑀬𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀤𑁂𑀲𑀺𑀢𑀁, 𑀅𑀳𑀫𑁂𑀢𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁 𑀧𑀘𑁆𑀘𑀓𑁆𑀔𑀸𑀬 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀧𑀞𑀫𑀁 𑀅𑀭𑀺𑀬𑀲𑀘𑁆𑀘𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁦𑁮𑁬).

𑀅𑀧𑀺𑀘 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀦𑁆𑀢𑁄 𑀪𑀕𑀯𑀸 𑀲𑀳𑁂𑀢𑀼𑀓𑀁 𑀆𑀘𑀺𑀓𑁆𑀔𑀺, 𑀦𑀺𑀯𑀢𑁆𑀢𑀺𑀜𑁆𑀘 𑀲𑀉𑀧𑀸𑀬𑀁. 𑀇𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀽𑀦𑀁 𑀏𑀢𑀧𑀭𑀫𑀢𑁄 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀣𑀸 𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀸𑀦𑀁, 𑀢𑀡𑁆𑀳𑀸𑀯𑀢𑁆𑀣𑀼𑀢𑀡𑁆𑀳𑀸𑀢𑀡𑁆𑀳𑀸𑀦𑀺𑀭𑁄𑀥𑀢𑀡𑁆𑀳𑀸𑀦𑀺𑀭𑁄𑀥𑀼𑀧𑀸𑀬𑀸𑀦𑀁, 𑀆𑀮𑀬𑀆𑀮𑀬𑀸𑀭𑀸𑀫𑀢𑀸𑀆𑀮𑀬𑀲𑀫𑀼𑀕𑁆𑀖𑀸𑀢𑀆𑀮𑀬𑀲𑀫𑀼𑀕𑁆𑀖𑀸𑀢𑀼𑀧𑀸𑀬𑀸𑀦𑀜𑁆𑀘 𑀯𑀲𑁂𑀦𑀸𑀧𑀺 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀦𑀽𑀦𑀸𑀥𑀺𑀓𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁬. 𑀓𑀫𑀢𑁄𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀏𑀢𑁆𑀣 𑀘 𑀑𑀴𑀸𑀭𑀺𑀓𑀢𑁆𑀢𑀸, 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀧𑀞𑀫𑀁 𑀯𑀼𑀢𑁆𑀢𑀁. 𑀢𑀲𑁆𑀲𑁂𑀯 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑀼𑀤𑀬𑀲𑀘𑁆𑀘𑀁. 𑀳𑁂𑀢𑀼𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑁄𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀦𑀺𑀭𑁄𑀥𑀲𑀘𑁆𑀘𑀁. 𑀢𑀤𑀥𑀺𑀕𑀫𑀼𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀫𑀕𑁆𑀕𑀲𑀘𑁆𑀘𑀁. 𑀪𑀯𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀧𑀞𑀫𑀁 𑀤𑀼𑀓𑁆𑀔𑀫𑀸𑀳. 𑀢𑀁 𑀦𑁂𑀯 𑀅𑀓𑀢𑀁 𑀆𑀕𑀘𑁆𑀙𑀢𑀺 ¶ , 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀢𑁄 𑀳𑁄𑀢𑀺, 𑀇𑀢𑁄 𑀧𑀦 𑀳𑁄𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑀼𑀤𑀬𑀁. 𑀢𑀢𑁄 𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀦𑀁 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀕𑀯𑁂𑀲𑀻𑀦𑀁 𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀦𑀺𑀭𑁄𑀥𑀁. 𑀢𑀢𑁄 𑀦𑀺𑀭𑁄𑀥𑀸𑀥𑀺𑀕𑀫𑀢𑁆𑀣𑀁 𑀦𑀺𑀭𑁄𑀥𑀲𑀫𑁆𑀧𑀸𑀧𑀓𑀁 𑀫𑀕𑁆𑀕𑀦𑁆𑀢𑀺 𑀏𑀯𑀫𑁂𑀢𑁆𑀣 𑀓𑀫𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁩𑁭. 𑀚𑀸𑀢𑀺𑀆𑀤𑀻𑀦𑀁 𑀦𑀺𑀘𑁆𑀙𑀬𑀸𑀢𑀺 𑀬𑁂 𑀢𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 ¶ 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀯𑀺𑀪. 𑁧𑁯𑁦) 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑁂 𑀤𑁆𑀯𑀸𑀤𑀲 𑀥𑀫𑁆𑀫𑀸, ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻. 𑀲𑁂𑀬𑁆𑀬𑀣𑀺𑀤𑀁, 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸’’𑀢𑀺 (𑀯𑀺𑀪. 𑁨𑁦𑁩) 𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑁂 𑀢𑀺𑀯𑀺𑀥𑀸 𑀢𑀡𑁆𑀳𑀸, ‘‘𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 (𑀯𑀺𑀪. 𑁨𑁦𑁪) 𑀏𑀯𑀁 𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑁂 𑀅𑀢𑁆𑀣𑀢𑁄 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁, ‘‘𑀓𑀢𑀫𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁, 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 (𑀯𑀺𑀪. 𑁨𑁦𑁫) 𑀏𑀯𑀁 𑀫𑀕𑁆𑀕𑀦𑀺𑀤𑁆𑀤𑁂𑀲𑁂 𑀅𑀝𑁆𑀞 𑀥𑀫𑁆𑀫𑀸𑀢𑀺 𑀇𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀦𑀺𑀤𑁆𑀤𑁂𑀲𑁂 𑀚𑀸𑀢𑀺𑀆𑀤𑀬𑁄 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀚𑀸𑀢𑀺𑀆𑀤𑀻𑀦𑀁 𑀦𑀺𑀘𑁆𑀙𑀬𑀸𑀧𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑀓𑀣𑀸

𑀚𑀸𑀢𑀺𑀦𑀺𑀤𑁆𑀤𑁂𑀲𑁄

𑀲𑁂𑀬𑁆𑀬𑀣𑀺𑀤𑀁, 𑀅𑀬𑀜𑁆𑀳𑀺 𑀚𑀸𑀢𑀺-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑁂𑀲 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 (𑀤𑀻. 𑀦𑀺. 𑁧.𑁨𑁪𑁪; 𑀧𑀸𑀭𑀸. 𑁧𑁨) 𑀏𑀢𑁆𑀣 𑀪𑀯𑁂 𑀆𑀕𑀢𑁄. ‘‘𑀅𑀢𑁆𑀣𑀺, 𑀯𑀺𑀲𑀸𑀔𑁂, 𑀦𑀺𑀕𑀡𑁆𑀞𑀸 𑀦𑀸𑀫 𑀲𑀫𑀡𑀚𑀸𑀢𑀻’’𑀢𑀺 (𑀅. 𑀦𑀺. 𑁩.𑁭𑁧) 𑀏𑀢𑁆𑀣 𑀦𑀺𑀓𑀸𑀬𑁂. ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁭𑁧) 𑀏𑀢𑁆𑀣 𑀲𑀗𑁆𑀔𑀢𑀮𑀓𑁆𑀔𑀡𑁂. ‘‘𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀻’’𑀢𑀺 (𑀫𑀳𑀸𑀯. 𑁧𑁨𑁪) 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁. ‘‘𑀲𑀫𑁆𑀧𑀢𑀺𑀚𑀸𑀢𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄’’𑀢𑀺 (𑀫. 𑀦𑀺. 𑁩.𑁨𑁦𑁭) 𑀏𑀢𑁆𑀣 𑀧𑀲𑀽𑀢𑀺𑀬𑀁. ‘‘𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁩𑁩𑁧) 𑀏𑀢𑁆𑀣 𑀓𑀼𑀮𑁂. ‘‘𑀬𑀢𑁄𑀳𑀁, 𑀪𑀕𑀺𑀦𑀺, 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄’’𑀢𑀺 (𑀫. 𑀦𑀺. 𑁨.𑁩𑁫𑁧) 𑀏𑀢𑁆𑀣 𑀅𑀭𑀺𑀬𑀲𑀻𑀮𑁂.

𑁫𑁩𑁮. 𑀲𑁆𑀯𑀸𑀬𑀫𑀺𑀥 ¶ 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀦𑀁, 𑀢𑀸𑀯 𑀧𑀯𑀢𑁆𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀇𑀢𑀭𑁂𑀲𑀁 𑀧𑀝𑀺𑀲𑀦𑁆𑀥𑀺𑀔𑀦𑁆𑀥𑁂𑀲𑁆𑀯𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀬𑀫𑁆𑀧𑀺 𑀘 𑀧𑀭𑀺𑀬𑀸𑀬𑀓𑀣𑀸𑀯. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀬𑁂 𑀬𑁂 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀧𑀞𑀫𑀧𑀸𑀢𑀼𑀪𑀸𑀯𑁄 𑀚𑀸𑀢𑀺 𑀦𑀸𑀫.

𑀲𑀸 ¶ 𑀧𑀦𑁂𑀲𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸, 𑀦𑀺𑀬𑁆𑀬𑀸𑀢𑀦𑀭𑀲𑀸, 𑀅𑀢𑀻𑀢𑀪𑀯𑀢𑁄 𑀇𑀥 𑀉𑀫𑁆𑀫𑀼𑀚𑁆𑀚𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸.

𑁫𑁩𑁯. 𑀓𑀲𑁆𑀫𑀸 𑀧𑀦𑁂𑀲𑀸 𑀤𑀼𑀓𑁆𑀔𑀸𑀢𑀺 𑀘𑁂? 𑀅𑀦𑁂𑀓𑁂𑀲𑀁 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄. 𑀅𑀦𑁂𑀓𑀸𑀦𑀺 𑀳𑀺 𑀤𑀼𑀓𑁆𑀔𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀼𑀓𑁆𑀔𑀤𑀼𑀓𑁆𑀔𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑀁, 𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁, 𑀧𑀭𑀺𑀬𑀸𑀬𑀤𑀼𑀓𑁆𑀔𑀁, 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺.

𑀢𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸𑀲𑀪𑀸𑀯𑀢𑁄 𑀘 𑀦𑀸𑀫𑀢𑁄 𑀘 𑀤𑀼𑀓𑁆𑀔𑀢𑁆𑀢𑀸 𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀔𑀸 𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑁂𑀦 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁.

𑀉𑀧𑁂𑀓𑁆𑀔𑀸 𑀯𑁂𑀤𑀦𑀸 𑀘𑁂𑀯 𑀅𑀯𑀲𑁂𑀲𑀸 𑀘 𑀢𑁂𑀪𑀽𑀫𑀓𑀸 𑀲𑀗𑁆𑀔𑀸𑀭𑀸 𑀉𑀤𑀬𑀩𑁆𑀩𑀬𑀧𑁆𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀁. 𑀓𑀡𑁆𑀡𑀲𑀽𑀮𑀤𑀦𑁆𑀢𑀲𑀽𑀮𑀭𑀸𑀕𑀚𑀧𑀭𑀺𑀴𑀸𑀳𑀤𑁄𑀲𑀚𑀧𑀭𑀺𑀴𑀸𑀳𑀸𑀤𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀆𑀩𑀸𑀥𑁄 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀢𑁄 𑀉𑀧𑀓𑁆𑀓𑀫𑀲𑁆𑀲 𑀘 𑀅𑀧𑀸𑀓𑀝𑀪𑀸𑀯𑀢𑁄 𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁 𑀦𑀸𑀫. 𑀅𑀧𑀸𑀓𑀝𑀤𑀼𑀓𑁆𑀔𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀸𑀤𑀺𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀸𑀦𑀺𑀢𑀩𑁆𑀩𑀢𑁄 𑀉𑀧𑀓𑁆𑀓𑀫𑀲𑁆𑀲 𑀘 𑀧𑀸𑀓𑀝𑀪𑀸𑀯𑀢𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀁 𑀦𑀸𑀫. 𑀧𑀸𑀓𑀝𑀤𑀼𑀓𑁆𑀔𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀁 𑀲𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀯𑀺𑀪𑀗𑁆𑀕𑁂 𑀆𑀕𑀢𑀁 𑀚𑀸𑀢𑀺𑀆𑀤𑀺 𑀲𑀩𑁆𑀩𑀫𑁆𑀧𑀺 𑀢𑀲𑁆𑀲 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀧𑀭𑀺𑀬𑀸𑀬𑀤𑀼𑀓𑁆𑀔𑀁. 𑀤𑀼𑀓𑁆𑀔𑀤𑀼𑀓𑁆𑀔𑀁 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 ¶ 𑀚𑀸𑀢𑀺 𑀬𑀁 𑀢𑀁 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁪𑁬 𑀆𑀤𑀬𑁄) 𑀪𑀕𑀯𑀢𑀸𑀧𑀺 𑀉𑀧𑀫𑀸𑀯𑀲𑁂𑀦 𑀧𑀓𑀸𑀲𑀺𑀢𑀁 𑀆𑀧𑀸𑀬𑀺𑀓𑀁 𑀤𑀼𑀓𑁆𑀔𑀁, 𑀬𑀜𑁆𑀘 𑀲𑀼𑀕𑀢𑀺𑀬𑀫𑁆𑀧𑀺 𑀫𑀦𑀼𑀲𑁆𑀲𑀮𑁄𑀓𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑀸.

𑁫𑁪𑁦. 𑀢𑀢𑁆𑀭𑀺𑀤𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀁 𑁋 𑀅𑀬𑀁 𑀳𑀺 𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀦 𑀉𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀣 𑀔𑁄 𑀳𑁂𑀝𑁆𑀞𑀸 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀧𑀓𑁆𑀓𑀸𑀲𑀬𑀲𑁆𑀲 𑀉𑀤𑀭𑀧𑀝𑀮𑀧𑀺𑀝𑁆𑀞𑀺𑀓𑀡𑁆𑀝𑀓𑀸𑀦𑀁 𑀯𑁂𑀫𑀚𑁆𑀛𑁂 𑀧𑀭𑀫𑀲𑀫𑁆𑀩𑀸𑀥𑁂 𑀢𑀺𑀩𑁆𑀩𑀦𑁆𑀥𑀓𑀸𑀭𑁂𑀦𑀸𑀦𑀸𑀓𑀼𑀡𑀧𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑀧𑀭𑀫𑀤𑀼𑀕𑁆𑀕𑀦𑁆𑀥𑀧𑀯𑀦𑀯𑀺𑀘𑀭𑀺𑀢𑁂 𑀅𑀥𑀺𑀫𑀢𑁆𑀢𑀚𑁂𑀕𑀼𑀘𑁆𑀙𑁂 𑀓𑀼𑀘𑁆𑀙𑀺𑀧𑀤𑁂𑀲𑁂 𑀧𑀽𑀢𑀺𑀫𑀘𑁆𑀙𑀧𑀽𑀢𑀺𑀓𑀼𑀫𑁆𑀫𑀸𑀲𑀘𑀦𑁆𑀤𑀦𑀺𑀓𑀸𑀤𑀻𑀲𑀼 𑀓𑀺𑀫𑀺 𑀯𑀺𑀬 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄 𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀉𑀲𑁆𑀫𑀦𑀸 𑀧𑀼𑀝𑀧𑀸𑀓𑀁 𑀯𑀺𑀬 𑀧𑀘𑁆𑀘𑀫𑀸𑀦𑁄 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀲𑁂𑀤𑀺𑀬𑀫𑀸𑀦𑁄 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀭𑀳𑀺𑀢𑁄 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑁄𑀢𑀻𑀢𑀺, 𑀇𑀤𑀁 𑀢𑀸𑀯 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁.

𑀬𑀁 ¶ 𑀧𑀦 𑀲𑁄 𑀫𑀸𑀢𑀼 𑀲𑀳𑀲𑀸 𑀉𑀧𑀓𑁆𑀔𑀮𑀦𑀕𑀫𑀦𑀦𑀺𑀲𑀻𑀤𑀦𑀯𑀼𑀝𑁆𑀞𑀸𑀦𑀧𑀭𑀺𑀯𑀢𑁆𑀢𑀦𑀸𑀤𑀻𑀲𑀼 𑀲𑀼𑀭𑀸𑀥𑀼𑀢𑁆𑀢𑀳𑀢𑁆𑀣𑀕𑀢𑁄 𑀏𑀴𑀓𑁄 𑀯𑀺𑀬 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀕𑀢𑁄 𑀲𑀧𑁆𑀧𑀧𑁄𑀢𑀓𑁄 𑀯𑀺𑀬 𑀘 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀑𑀥𑀽𑀦𑀦𑀦𑀺𑀤𑁆𑀥𑀽𑀦𑀦𑀸𑀤𑀺𑀦𑀸 𑀉𑀧𑀓𑁆𑀓𑀫𑁂𑀦 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀢𑀺, 𑀬𑀜𑁆𑀘 𑀫𑀸𑀢𑀼 𑀲𑀻𑀢𑀽𑀤𑀓𑀧𑀸𑀦𑀓𑀸𑀮𑁂 𑀲𑀻𑀢𑀦𑀭𑀓𑀼𑀧𑀧𑀦𑁆𑀦𑁄 𑀯𑀺𑀬, 𑀉𑀡𑁆𑀳𑀬𑀸𑀕𑀼𑀪𑀢𑁆𑀢𑀸𑀤𑀺𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀅𑀗𑁆𑀕𑀸𑀭𑀯𑀼𑀝𑁆𑀞𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑁄 𑀯𑀺𑀬, 𑀮𑁄𑀡𑀫𑁆𑀩𑀺𑀮𑀸𑀤𑀺𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀔𑀸𑀭𑀸𑀧𑀝𑀺𑀘𑁆𑀙𑀓𑀸𑀤𑀺𑀓𑀫𑁆𑀫𑀓𑀸𑀭𑀡𑀧𑀢𑁆𑀢𑁄 𑀯𑀺𑀬 𑀢𑀺𑀩𑁆𑀩𑀁 𑀤𑀼𑀓𑁆𑀔𑀫𑀦𑀼𑀪𑁄𑀢𑀺, 𑀇𑀤𑀁 𑀕𑀩𑁆𑀪𑀧𑀭𑀺𑀳𑀭𑀡𑀫𑀽𑀮𑀓𑀁 𑀤𑀼𑀓𑁆𑀔𑀁.

𑀬𑀁 𑀧𑀦𑀲𑁆𑀲 𑀫𑀽𑀴𑁆𑀳𑀕𑀩𑁆𑀪𑀸𑀬 𑀫𑀸𑀢𑀼𑀬𑀸 𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀳𑀚𑁆𑀚𑀸𑀤𑀻𑀳𑀺𑀧𑀺 𑀅𑀤𑀲𑁆𑀲𑀦𑀸𑀭𑀳𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀙𑁂𑀤𑀦𑀨𑀸𑀮𑀦𑀸𑀤𑀻𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀕𑀩𑁆𑀪𑀯𑀺𑀧𑀢𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁.

𑀬𑀁 𑀯𑀺𑀚𑀸𑀬𑀫𑀸𑀦𑀸𑀬 𑀫𑀸𑀢𑀼𑀬𑀸 𑀓𑀫𑁆𑀫𑀚𑁂𑀳𑀺 𑀯𑀸𑀢𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀭𑀓𑀧𑀧𑀸𑀢𑀁 𑀯𑀺𑀬 𑀅𑀢𑀺𑀪𑀬𑀸𑀦𑀓𑀁 𑀬𑁄𑀦𑀺𑀫𑀕𑁆𑀕𑀁 𑀧𑀝𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀧𑀭𑀫𑀲𑀫𑁆𑀩𑀸𑀥𑁂𑀦 𑀬𑁄𑀦𑀺𑀫𑀼𑀔𑁂𑀦 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀯𑀺𑀬 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀲𑁆𑀲 𑀫𑀳𑀸𑀦𑀸𑀕𑀲𑁆𑀲 𑀦𑀭𑀓𑀲𑀢𑁆𑀢𑀲𑁆𑀲 𑀯𑀺𑀬 𑀘 𑀲𑀗𑁆𑀖𑀸𑀢𑀧𑀩𑁆𑀩𑀢𑁂𑀳𑀺 𑀯𑀺𑀘𑀼𑀡𑁆𑀡𑀺𑀬𑀫𑀸𑀦𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀯𑀺𑀚𑀸𑀬𑀦𑀫𑀽𑀮𑀓𑀁 𑀤𑀼𑀓𑁆𑀔𑀁.

𑀬𑀁 𑀧𑀦 𑀚𑀸𑀢𑀲𑁆𑀲 𑀢𑀭𑀼𑀡𑀯𑀡𑀲𑀤𑀺𑀲𑀲𑀼𑀔𑀼𑀫𑀸𑀮𑀲𑀭𑀻𑀭𑀲𑁆𑀲 𑀳𑀢𑁆𑀣𑀕𑀳𑀡𑀦𑀳𑀸𑀧𑀦𑀥𑁄𑀯𑀦𑀘𑁄𑀴𑀧𑀭𑀺𑀫𑀚𑁆𑀚𑀦𑀸𑀤𑀺𑀓𑀸𑀮𑁂 ¶ 𑀲𑀽𑀘𑀺𑀫𑀼𑀔𑀔𑀼𑀭𑀥𑀸𑀭𑀸𑀳𑀺 𑀯𑀺𑀚𑁆𑀛𑀦𑀨𑀸𑀮𑀦𑀲𑀤𑀺𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀩𑀳𑀺𑀦𑀺𑀓𑁆𑀔𑀫𑀦𑀫𑀽𑀮𑀓𑀁 𑀤𑀼𑀓𑁆𑀔𑀁.

𑀬𑀁 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀯𑀥𑁂𑀦𑁆𑀢𑀲𑁆𑀲 𑀅𑀘𑁂𑀮𑀓𑀯𑀢𑀸𑀤𑀺𑀯𑀲𑁂𑀦 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑁆𑀲, 𑀓𑁄𑀥𑀯𑀲𑁂𑀦 𑀅𑀪𑀼𑀜𑁆𑀚𑀦𑁆𑀢𑀲𑁆𑀲, 𑀉𑀩𑁆𑀩𑀦𑁆𑀥𑀦𑁆𑀢𑀲𑁆𑀲 𑀘 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁 𑀤𑀼𑀓𑁆𑀔𑀁. 𑀬𑀁 𑀧𑀦 𑀧𑀭𑀢𑁄 𑀯𑀥𑀩𑀦𑁆𑀥𑀦𑀸𑀤𑀻𑀦𑀺 𑀅𑀦𑀼𑀪𑀯𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀧𑀭𑀽𑀧𑀓𑁆𑀓𑀫𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺.

𑀇𑀢𑀺 𑀇𑀫𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀅𑀬𑀁 𑀚𑀸𑀢𑀺 𑀯𑀢𑁆𑀣𑀼𑀫𑁂𑀯 𑀳𑁄𑀢𑀺.

𑁫𑁪𑁧. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀚𑀸𑀬𑁂𑀣 𑀦𑁄 𑀘𑁂 𑀦𑀭𑀓𑁂𑀲𑀼 𑀲𑀢𑁆𑀢𑁄,

𑀢𑀢𑁆𑀢𑀕𑁆𑀕𑀺𑀤𑀸𑀳𑀸𑀤𑀺𑀓𑀫𑀧𑁆𑀧𑀲𑀬𑁆𑀳𑀁;

𑀮𑀪𑁂𑀣 𑀤𑀼𑀓𑁆𑀔𑀁 𑀦𑀼 𑀓𑀼𑀳𑀺𑀁 𑀧𑀢𑀺𑀝𑁆𑀞𑀁,

𑀇𑀘𑁆𑀘𑀸𑀳 𑀤𑀼𑀓𑁆𑀔𑀸𑀢𑀺 𑀫𑀼𑀦𑀻𑀥 𑀚𑀸𑀢𑀺𑀁.

𑀤𑀼𑀓𑁆𑀔𑀁 ¶ 𑀢𑀺𑀭𑀘𑁆𑀙𑁂𑀲𑀼 𑀓𑀲𑀸𑀧𑀢𑁄𑀤-

𑀤𑀡𑁆𑀟𑀸𑀪𑀺𑀖𑀸𑀢𑀸𑀤𑀺𑀪𑀯𑀁 𑀅𑀦𑁂𑀓𑀁;

𑀬𑀁 𑀢𑀁 𑀓𑀣𑀁 𑀢𑀢𑁆𑀣 𑀪𑀯𑁂𑀬𑁆𑀬 𑀚𑀸𑀢𑀺𑀁,

𑀯𑀺𑀦𑀸 𑀢𑀳𑀺𑀁 𑀚𑀸𑀢𑀺 𑀢𑀢𑁄𑀧𑀺 𑀤𑀼𑀓𑁆𑀔𑀸.

𑀧𑁂𑀢𑁂𑀲𑀼 𑀤𑀼𑀓𑁆𑀔𑀁 𑀧𑀦 𑀔𑀼𑀧𑁆𑀧𑀺𑀧𑀸𑀲𑀸-

𑀯𑀸𑀢𑀸𑀢𑀧𑀸𑀤𑀺𑀧𑁆𑀧𑀪𑀯𑀁 𑀯𑀺𑀘𑀺𑀢𑁆𑀢𑀁;

𑀬𑀲𑁆𑀫𑀸 𑀅𑀚𑀸𑀢𑀲𑁆𑀲 𑀦 𑀢𑀢𑁆𑀣 𑀅𑀢𑁆𑀣𑀺,

𑀢𑀲𑁆𑀫𑀸𑀧𑀺 𑀤𑀼𑀓𑁆𑀔𑀁 𑀫𑀼𑀦𑀺 𑀚𑀸𑀢𑀺𑀫𑀸𑀳.

𑀢𑀺𑀩𑁆𑀩𑀦𑁆𑀥𑀓𑀸𑀭𑁂 ¶ 𑀘 𑀅𑀲𑀬𑁆𑀳𑀲𑀻𑀢𑁂,

𑀮𑁄𑀓𑀦𑁆𑀢𑀭𑁂 𑀬𑀁 𑀅𑀲𑀼𑀭𑁂𑀲𑀼 𑀤𑀼𑀓𑁆𑀔𑀁;

𑀦 𑀢𑀁 𑀪𑀯𑁂 𑀢𑀢𑁆𑀣 𑀦 𑀘𑀲𑁆𑀲 𑀚𑀸𑀢𑀺,

𑀬𑀢𑁄 𑀅𑀬𑀁 𑀚𑀸𑀢𑀺 𑀢𑀢𑁄𑀧𑀺 𑀤𑀼𑀓𑁆𑀔𑀸.

𑀬𑀜𑁆𑀘𑀸𑀧𑀺 𑀕𑀽𑀣𑀦𑀭𑀓𑁂 𑀯𑀺𑀬 𑀫𑀸𑀢𑀼𑀕𑀩𑁆𑀪𑁂,

𑀲𑀢𑁆𑀢𑁄 𑀯𑀲𑀁 𑀘𑀺𑀭𑀫𑀢𑁄 𑀩𑀳𑀺 𑀦𑀺𑀓𑁆𑀔𑀫𑀜𑁆𑀘;

𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀫𑀢𑀺𑀖𑁄𑀭𑀫𑀺𑀤𑀫𑁆𑀧𑀺 𑀦𑀢𑁆𑀣𑀺,

𑀚𑀸𑀢𑀺𑀁 𑀯𑀺𑀦𑀸 𑀇𑀢𑀺𑀧𑀺 𑀚𑀸𑀢𑀺 𑀅𑀬𑀜𑁆𑀳𑀺 𑀤𑀼𑀓𑁆𑀔𑀸.

𑀓𑀺𑀁 𑀪𑀸𑀲𑀺𑀢𑁂𑀦 𑀩𑀳𑀼𑀦𑀸 𑀦𑀦𑀼 𑀬𑀁 𑀓𑀼𑀳𑀺𑀜𑁆𑀘𑀺,

𑀅𑀢𑁆𑀣𑀻𑀥 𑀓𑀺𑀜𑁆𑀘𑀺𑀤𑀧𑀺 𑀤𑀼𑀓𑁆𑀔𑀫𑀺𑀤𑀁 𑀓𑀤𑀸𑀘𑀺;

𑀦𑁂𑀯𑀢𑁆𑀣𑀺 𑀚𑀸𑀢𑀺𑀯𑀺𑀭𑀳𑁂𑀦 𑀬𑀢𑁄 𑀫𑀳𑁂𑀲𑀺,

𑀤𑀼𑀓𑁆𑀔𑀸𑀢𑀺 𑀲𑀩𑁆𑀩𑀧𑀞𑀫𑀁 𑀇𑀫𑀫𑀸𑀳 𑀚𑀸𑀢𑀺𑀦𑁆𑀢𑀺.

𑀅𑀬𑀁 𑀢𑀸𑀯 𑀚𑀸𑀢𑀺𑀬𑀁 𑀯𑀺𑀦𑀺𑀘𑁆𑀙𑀬𑁄.

𑀚𑀭𑀸𑀦𑀺𑀤𑁆𑀤𑁂𑀲𑁄

𑁫𑁪𑁨. 𑀚𑀭𑀸𑀧𑀺 𑀤𑀼𑀓𑁆𑀔𑀸𑀢𑀺 𑀏𑀢𑁆𑀣 𑀤𑀼𑀯𑀺𑀥𑀸 𑀚𑀭𑀸 𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘, 𑀔𑀡𑁆𑀟𑀺𑀘𑁆𑀘𑀸𑀤𑀺𑀲𑀫𑁆𑀫𑀢𑁄 𑀲𑀦𑁆𑀢𑀢𑀺𑀬𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀔𑀦𑁆𑀥𑀧𑀼𑀭𑀸𑀡𑀪𑀸𑀯𑁄 𑀘, 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀧𑀦𑁂𑀲𑀸 𑀚𑀭𑀸 𑀔𑀦𑁆𑀥𑀧𑀭𑀺𑀧𑀸𑀓𑀮𑀓𑁆𑀔𑀡𑀸, 𑀫𑀭𑀡𑀽𑀧𑀦𑀬𑀦𑀭𑀲𑀸, 𑀬𑁄𑀩𑁆𑀩𑀦𑀯𑀺𑀦𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄 𑀘𑁂𑀯 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘 ¶ . 𑀬𑀁 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀣𑀺𑀮𑀻𑀪𑀸𑀯𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀯𑀺𑀭𑀽𑀧𑀢𑀸𑀬𑁄𑀩𑁆𑀩𑀦𑀯𑀺𑀦𑀸𑀲𑀩𑀮𑀽𑀧𑀖𑀸𑀢𑀲𑀢𑀺𑀫𑀢𑀺𑀯𑀺𑀧𑁆𑀧𑀯𑀸𑀲𑀧𑀭𑀧𑀭𑀺𑀪𑀯𑀸𑀤𑀺𑀅𑀦𑁂𑀓𑀧𑀘𑁆𑀘𑀬𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀚𑀭𑀸 𑀢𑀲𑁆𑀲 𑀯𑀢𑁆𑀣𑀼. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀗𑁆𑀕𑀸𑀦𑀁 𑀲𑀺𑀣𑀺𑀮𑀻𑀪𑀸𑀯𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀓𑀸𑀭𑀢𑁄;

𑀬𑁄𑀩𑁆𑀩𑀦𑀲𑁆𑀲 𑀯𑀺𑀦𑀸𑀲𑁂𑀦, 𑀩𑀮𑀲𑁆𑀲 𑀉𑀧𑀖𑀸𑀢𑀢𑁄.

‘‘𑀯𑀺𑀧𑁆𑀧𑀯𑀸𑀲𑀸 ¶ 𑀲𑀢𑀸𑀤𑀻𑀦𑀁, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀅𑀢𑁆𑀢𑀦𑁄;

𑀅𑀧𑀲𑀸𑀤𑀦𑀻𑀬𑀢𑁄 𑀘𑁂𑀯, 𑀪𑀺𑀬𑁆𑀬𑁄 𑀩𑀸𑀮𑀢𑁆𑀢𑀧𑀢𑁆𑀢𑀺𑀬𑀸.

‘‘𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀁 𑀬𑀁 𑀫𑀘𑁆𑀘𑁄, 𑀓𑀸𑀬𑀺𑀓𑀁 𑀫𑀸𑀦𑀲𑀁 𑀢𑀣𑀸;

𑀲𑀩𑁆𑀩𑀫𑁂𑀢𑀁 𑀚𑀭𑀸𑀳𑁂𑀢𑀼, 𑀬𑀲𑁆𑀫𑀸 𑀢𑀲𑁆𑀫𑀸 𑀚𑀭𑀸 𑀤𑀼𑀔𑀸’’𑀢𑀺.

𑀅𑀬𑀁 𑀚𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄.

𑀫𑀭𑀡𑀦𑀺𑀤𑁆𑀤𑁂𑀲𑁄

𑁫𑁪𑁩. 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀣𑀸𑀧𑀺 𑀤𑀼𑀯𑀺𑀥𑀁 𑀫𑀭𑀡𑀁 𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀚𑀭𑀸𑀫𑀭𑀡𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁭𑁧). 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑁄 𑀘, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬’’𑀦𑁆𑀢𑀺 (𑀲𑀼. 𑀦𑀺. 𑁫𑁮𑁧). 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀚𑀸𑀢𑀺𑀧𑀘𑁆𑀘𑀬𑀸 𑀫𑀭𑀡𑀁 𑀉𑀧𑀓𑁆𑀓𑀫𑀫𑀭𑀡𑀁 𑀲𑀭𑀲𑀫𑀭𑀡𑀁 𑀆𑀬𑀼𑀓𑁆𑀔𑀬𑀫𑀭𑀡𑀁 𑀧𑀼𑀜𑁆𑀜𑀓𑁆𑀔𑀬𑀫𑀭𑀡𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀬𑀺𑀤𑀁 𑀘𑀼𑀢𑀺𑀮𑀓𑁆𑀔𑀡𑀁, 𑀯𑀺𑀬𑁄𑀕𑀭𑀲𑀁, 𑀕𑀢𑀺𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀤𑀼𑀓𑁆𑀔𑀲𑁆𑀲 𑀧𑀦 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀸𑀧𑀲𑁆𑀲 𑀧𑀸𑀧𑀓𑀫𑁆𑀫𑀸𑀤𑀺-𑀦𑀺𑀫𑀺𑀢𑁆𑀢𑀫𑀦𑀼𑀧𑀲𑁆𑀲𑀢𑁄;

𑀪𑀤𑁆𑀤𑀲𑁆𑀲𑀸𑀧𑀲𑀳𑀦𑁆𑀢𑀲𑁆𑀲, 𑀯𑀺𑀬𑁄𑀕𑀁 𑀧𑀺𑀬𑀯𑀢𑁆𑀣𑀼𑀓𑀁;

𑀫𑀻𑀬𑀫𑀸𑀦𑀲𑁆𑀲 𑀬𑀁 𑀤𑀼𑀓𑁆𑀔𑀁, 𑀫𑀸𑀦𑀲𑀁 𑀅𑀯𑀺𑀲𑁂𑀲𑀢𑁄.

𑀲𑀩𑁆𑀩𑁂𑀲𑀜𑁆𑀘𑀸𑀧𑀺 𑀬𑀁 𑀲𑀦𑁆𑀥𑀺-𑀩𑀦𑁆𑀥𑀦𑀘𑁆𑀙𑁂𑀤𑀦𑀸𑀤𑀺𑀓𑀁;

𑀯𑀺𑀢𑀼𑀚𑁆𑀚𑀫𑀸𑀦𑀫𑀫𑁆𑀫𑀸𑀦𑀁, 𑀳𑁄𑀢𑀺 𑀤𑀼𑀓𑁆𑀔𑀁 𑀲𑀭𑀻𑀭𑀚𑀁.

𑀅𑀲𑀬𑁆𑀳𑀫𑀧𑁆𑀧𑀢𑀺𑀓𑀸𑀭𑀁, 𑀤𑀼𑀓𑁆𑀔𑀲𑁆𑀲𑁂𑀢𑀲𑁆𑀲𑀺𑀤𑀁 𑀬𑀢𑁄;

𑀫𑀭𑀡𑀁 𑀯𑀢𑁆𑀣𑀼 𑀢𑁂𑀦𑁂𑀢𑀁, 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢’’𑀦𑁆𑀢𑀺.

𑀅𑀬𑀁 𑀫𑀭𑀡𑁂 𑀯𑀺𑀦𑀺𑀘𑁆𑀙𑀬𑁄.

𑀲𑁄𑀓𑀸𑀤𑀺𑀦𑀺𑀤𑁆𑀤𑁂𑀲𑀸

𑁫𑁪𑁪. 𑀲𑁄𑀓𑀸𑀤𑀻𑀲𑀼 ¶ ¶ 𑀲𑁄𑀓𑁄 𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀲𑁄 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀫𑁂𑀯 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁄, 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀧𑀦𑀭𑀲𑁄, 𑀅𑀦𑀼𑀲𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀤𑀼𑀓𑁆𑀔𑁄 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀢𑁆𑀢𑀸𑀦𑀁 𑀳𑀤𑀬𑀁 𑀲𑁄𑀓𑁄, 𑀯𑀺𑀲𑀲𑀮𑁆𑀮𑀁𑀯 𑀢𑀼𑀚𑁆𑀚𑀢𑀺;

𑀅𑀕𑁆𑀕𑀺𑀢𑀢𑁆𑀢𑁄𑀯 𑀦𑀸𑀭𑀸𑀘𑁄, 𑀪𑀼𑀲𑀁𑀯 𑀤𑀳𑀢𑁂 𑀧𑀼𑀦.

‘‘𑀲𑀫𑀸𑀯𑀳𑀢𑀺 𑀘 𑀩𑁆𑀬𑀸𑀥𑀺-𑀚𑀭𑀸𑀫𑀭𑀡𑀪𑁂𑀤𑀦𑀁;

𑀤𑀼𑀓𑁆𑀔𑀫𑁆𑀧𑀺 𑀯𑀺𑀯𑀺𑀥𑀁 𑀬𑀲𑁆𑀫𑀸, 𑀢𑀲𑁆𑀫𑀸 𑀤𑀼𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀅𑀬𑀁 𑀲𑁄𑀓𑁂 𑀯𑀺𑀦𑀺𑀘𑁆𑀙𑀬𑁄.

𑀧𑀭𑀺𑀤𑁂𑀯𑁄

𑁫𑁪𑁫. 𑀧𑀭𑀺𑀤𑁂𑀯𑁄 𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀯𑀘𑀻𑀧𑀮𑀸𑀧𑁄. 𑀲𑁄 𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄, 𑀕𑀼𑀡𑀤𑁄𑀲𑀓𑀺𑀢𑁆𑀢𑀦𑀭𑀲𑁄, 𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀤𑀼𑀓𑁆𑀔𑁄 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀬𑀁 𑀲𑁄𑀓𑀲𑀮𑁆𑀮𑀯𑀺𑀳𑀢𑁄 𑀧𑀭𑀺𑀤𑁂𑀯𑀫𑀸𑀦𑁄,

𑀓𑀡𑁆𑀞𑁄𑀝𑁆𑀞𑀢𑀸𑀮𑀼𑀢𑀮𑀲𑁄𑀲𑀚𑀫𑀧𑁆𑀧𑀲𑀬𑁆𑀳𑀁;

𑀪𑀺𑀬𑁆𑀬𑁄𑀥𑀺𑀫𑀢𑁆𑀢𑀫𑀥𑀺𑀕𑀘𑁆𑀙𑀢𑀺𑀬𑁂𑀯 𑀤𑀼𑀓𑁆𑀔𑀁,

𑀤𑀼𑀓𑁆𑀔𑁄𑀢𑀺 𑀢𑁂𑀦 𑀪𑀕𑀯𑀸 𑀧𑀭𑀺𑀤𑁂𑀯𑀫𑀸𑀳𑀸’’𑀢𑀺.

𑀅𑀬𑀁 𑀧𑀭𑀺𑀤𑁂𑀯𑁂 𑀯𑀺𑀦𑀺𑀘𑁆𑀙𑀬𑁄.

𑀤𑀼𑀓𑁆𑀔𑀁

𑁫𑁪𑁬. 𑀤𑀼𑀓𑁆𑀔𑀁 ¶ 𑀦𑀸𑀫 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁, 𑀢𑀁 𑀓𑀸𑀬𑀧𑀻𑀴𑀦𑀮𑀓𑁆𑀔𑀡𑀁, 𑀤𑀼𑀧𑁆𑀧𑀜𑁆𑀜𑀸𑀦𑀁 𑀤𑁄𑀫𑀦𑀲𑁆𑀲𑀓𑀭𑀡𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀤𑀼𑀓𑁆𑀔𑀁 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑁄 𑀫𑀸𑀦𑀲𑀤𑀼𑀓𑁆𑀔𑀸𑀯𑀳𑀦𑀢𑁄 𑀘. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀻𑀴𑁂𑀢𑀺 𑀓𑀸𑀬𑀺𑀓𑀫𑀺𑀤𑀁, 𑀤𑀼𑀓𑁆𑀔𑀜𑁆𑀘 𑀫𑀸𑀦𑀲𑀁 𑀪𑀺𑀬𑁆𑀬𑁄;

𑀚𑀦𑀬𑀢𑀺 𑀬𑀲𑁆𑀫𑀸 𑀢𑀲𑁆𑀫𑀸, 𑀤𑀼𑀓𑁆𑀔𑀦𑁆𑀢𑀺 𑀯𑀺𑀲𑁂𑀲𑀢𑁄 𑀯𑀼𑀢𑁆𑀢’’𑀦𑁆𑀢𑀺.

𑀅𑀬𑀁 𑀤𑀼𑀓𑁆𑀔𑁂 𑀯𑀺𑀦𑀺𑀘𑁆𑀙𑀬𑁄.

𑀤𑁄𑀫𑀦𑀲𑁆𑀲𑀁

𑁫𑁪𑁭. 𑀤𑁄𑀫𑀦𑀲𑁆𑀲𑀁 ¶ 𑀦𑀸𑀫 𑀫𑀸𑀦𑀲𑀁 𑀤𑀼𑀓𑁆𑀔𑀁. 𑀢𑀁 𑀘𑀺𑀢𑁆𑀢𑀧𑀻𑀴𑀦𑀮𑀓𑁆𑀔𑀡𑀁, 𑀫𑀦𑁄𑀯𑀺𑀖𑀸𑀢𑀭𑀲𑀁, 𑀫𑀸𑀦𑀲𑀩𑁆𑀬𑀸𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀤𑀼𑀓𑁆𑀔𑀁 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑁄 𑀓𑀸𑀬𑀺𑀓𑀤𑀼𑀓𑁆𑀔𑀸𑀯𑀳𑀦𑀢𑁄 𑀘. 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸 𑀳𑀺 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀉𑀭𑀸𑀦𑀺 𑀧𑀝𑀺𑀧𑀺𑀲𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺, 𑀉𑀤𑁆𑀥𑀁𑀧𑀸𑀤𑀁 𑀧𑀧𑀢𑀦𑁆𑀢𑀺, 𑀲𑀢𑁆𑀣𑀁 𑀆𑀳𑀭𑀦𑁆𑀢𑀺, 𑀯𑀺𑀲𑀁 𑀔𑀸𑀤𑀦𑁆𑀢𑀺, 𑀭𑀚𑁆𑀚𑀼𑀬𑀸 𑀉𑀩𑁆𑀩𑀦𑁆𑀥𑀦𑁆𑀢𑀺, 𑀅𑀕𑁆𑀕𑀺𑀁 𑀧𑀯𑀺𑀲𑀦𑁆𑀢𑀻𑀢𑀺 𑀢𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀻𑀴𑁂𑀢𑀺 𑀬𑀢𑁄 𑀘𑀺𑀢𑁆𑀢𑀁, 𑀓𑀸𑀬𑀲𑁆𑀲 𑀘 𑀧𑀻𑀴𑀦𑀁 𑀲𑀫𑀸𑀯𑀳𑀢𑀺;

𑀤𑀼𑀓𑁆𑀔𑀦𑁆𑀢𑀺 𑀤𑁄𑀫𑀦𑀲𑁆𑀲𑀁, 𑀯𑀺𑀤𑁄𑀫𑀦𑀲𑁆𑀲𑀸 𑀢𑀢𑁄 𑀆𑀳𑀽’’𑀢𑀺.

𑀅𑀬𑀁 𑀤𑁄𑀫𑀦𑀲𑁆𑀲𑁂 𑀯𑀺𑀦𑀺𑀘𑁆𑀙𑀬𑁄.

𑀉𑀧𑀸𑀬𑀸𑀲𑁄

𑁫𑁪𑁮. 𑀉𑀧𑀸𑀬𑀸𑀲𑁄 𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀅𑀥𑀺𑀫𑀢𑁆𑀢𑀘𑁂𑀢𑁄𑀤𑀼𑀓𑁆𑀔𑀧𑁆𑀧𑀪𑀸𑀯𑀺𑀢𑁄 𑀤𑁄𑀲𑁄𑀬𑁂𑀯. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄 𑀥𑀫𑁆𑀫𑁄𑀢𑀺 𑀏𑀓𑁂. 𑀲𑁄 𑀘𑀺𑀢𑁆𑀢𑀧𑀭𑀺𑀤𑀳𑀦𑀮𑀓𑁆𑀔𑀡𑁄, 𑀦𑀺𑀢𑁆𑀣𑀼𑀦𑀦𑀭𑀲𑁄 ¶ , 𑀯𑀺𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀤𑀼𑀓𑁆𑀔𑁄 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄 𑀘𑀺𑀢𑁆𑀢𑀧𑀭𑀺𑀤𑀳𑀦𑀢𑁄 𑀓𑀸𑀬𑀯𑀺𑀲𑀸𑀤𑀦𑀢𑁄 𑀘. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀘𑀺𑀢𑁆𑀢𑀲𑁆𑀲 𑀘 𑀧𑀭𑀺𑀤𑀳𑀦𑀸, 𑀓𑀸𑀬𑀲𑁆𑀲 𑀯𑀺𑀲𑀸𑀤𑀦𑀸 𑀘 𑀅𑀥𑀺𑀫𑀢𑁆𑀢𑀁;

𑀬𑀁 𑀤𑀼𑀓𑁆𑀔𑀫𑀼𑀧𑀸𑀬𑀸𑀲𑁄, 𑀚𑀦𑁂𑀢𑀺 𑀤𑀼𑀓𑁆𑀔𑁄 𑀢𑀢𑁄 𑀯𑀼𑀢𑁆𑀢𑁄’’𑀢𑀺.

𑀅𑀬𑀁 𑀉𑀧𑀸𑀬𑀸𑀲𑁂 𑀯𑀺𑀦𑀺𑀘𑁆𑀙𑀬𑁄.

𑀏𑀢𑁆𑀣 𑀘 𑀫𑀦𑁆𑀤𑀕𑁆𑀕𑀺𑀦𑀸 𑀅𑀦𑁆𑀢𑁄𑀪𑀸𑀚𑀦𑁂 𑀧𑀸𑀓𑁄 𑀯𑀺𑀬 𑀲𑁄𑀓𑁄. 𑀢𑀺𑀓𑁆𑀔𑀕𑁆𑀕𑀺𑀦𑀸 𑀧𑀘𑁆𑀘𑀫𑀸𑀦𑀲𑁆𑀲 𑀪𑀸𑀚𑀦𑀢𑁄 𑀩𑀳𑀺𑀦𑀺𑀓𑁆𑀔𑀫𑀦𑀁 𑀯𑀺𑀬 𑀧𑀭𑀺𑀤𑁂𑀯𑁄. 𑀩𑀳𑀺𑀦𑀺𑀓𑁆𑀔𑀦𑁆𑀢𑀸𑀯𑀲𑁂𑀲𑀲𑁆𑀲 𑀦𑀺𑀓𑁆𑀔𑀫𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀲𑁆𑀲 𑀅𑀦𑁆𑀢𑁄𑀪𑀸𑀚𑀦𑁂𑀬𑁂𑀯 𑀬𑀸𑀯 𑀧𑀭𑀺𑀓𑁆𑀔𑀬𑀸 𑀧𑀸𑀓𑁄 𑀯𑀺𑀬 𑀉𑀧𑀸𑀬𑀸𑀲𑁄 𑀤𑀝𑁆𑀞𑀩𑁆𑀩𑁄.

𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄

𑁫𑁪𑁯. 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀦𑀸𑀫 𑀅𑀫𑀦𑀸𑀧𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀲𑀫𑁄𑀥𑀸𑀦𑀁. 𑀲𑁄 𑀅𑀦𑀺𑀝𑁆𑀞𑀲𑀫𑁄𑀥𑀸𑀦𑀮𑀓𑁆𑀔𑀡𑁄, 𑀘𑀺𑀢𑁆𑀢𑀯𑀺𑀖𑀸𑀢𑀓𑀭𑀡𑀭𑀲𑁄, 𑀅𑀦𑀢𑁆𑀣𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀤𑀼𑀓𑁆𑀔𑁄 𑀧𑀦 𑀤𑀼𑀓𑁆𑀔𑀯𑀢𑁆𑀣𑀼𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀤𑀺𑀲𑁆𑀯𑀸𑀯 ¶ 𑀅𑀧𑁆𑀧𑀺𑀬𑁂 𑀤𑀼𑀓𑁆𑀔𑀁, 𑀧𑀞𑀫𑀁 𑀳𑁄𑀢𑀺 𑀘𑁂𑀢𑀲𑀺;

𑀢𑀤𑀼𑀧𑀓𑁆𑀓𑀫𑀲𑀫𑁆𑀪𑀽𑀢-𑀫𑀣𑀓𑀸𑀬𑁂 𑀬𑀢𑁄 𑀇𑀥.

‘‘𑀢𑀢𑁄 𑀤𑀼𑀓𑁆𑀔𑀤𑁆𑀯𑀬𑀲𑁆𑀲𑀸𑀧𑀺, 𑀯𑀢𑁆𑀣𑀼𑀢𑁄 𑀲𑁄 𑀫𑀳𑁂𑀲𑀺𑀦𑀸;

𑀤𑀼𑀓𑁆𑀔𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀧𑁆𑀧𑀺𑀬𑁂𑀳𑀺 𑀲𑀫𑀸𑀕𑀫𑁄’’𑀢𑀺.

𑀅𑀬𑀁 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁂 𑀯𑀺𑀦𑀺𑀘𑁆𑀙𑀬𑁄.

𑀧𑀺𑀬𑀯𑀺𑀧𑁆𑀧𑀬𑁄𑀕𑁄

𑁫𑁫𑁦. 𑀧𑀺𑀬𑀯𑀺𑀧𑁆𑀧𑀬𑁄𑀕𑁄 𑀦𑀸𑀫 𑀫𑀦𑀸𑀧𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀯𑀺𑀦𑀸𑀪𑀸𑀯𑁄. 𑀲𑁄 𑀇𑀝𑁆𑀞𑀯𑀢𑁆𑀣𑀼𑀯𑀺𑀬𑁄𑀕𑀮𑀓𑁆𑀔𑀡𑁄 ¶ , 𑀲𑁄𑀓𑀼𑀧𑁆𑀧𑀸𑀤𑀦𑀭𑀲𑁄, 𑀩𑁆𑀬𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀤𑀼𑀓𑁆𑀔𑁄 𑀧𑀦 𑀲𑁄𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀜𑀸𑀢𑀺𑀥𑀦𑀸𑀤𑀺𑀯𑀺𑀬𑁄𑀕𑀸,

𑀲𑁄𑀓𑀲𑀭𑀲𑀫𑀧𑁆𑀧𑀺𑀢𑀸 𑀯𑀺𑀢𑀼𑀚𑁆𑀚𑀦𑁆𑀢𑀺;

𑀩𑀸𑀮𑀸 𑀬𑀢𑁄 𑀢𑀢𑁄 𑀬𑀁,

𑀤𑀼𑀓𑁆𑀔𑁄𑀢𑀺 𑀫𑀢𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑁄’’𑀢𑀺.

𑀅𑀬𑀁 𑀧𑀺𑀬𑀯𑀺𑀧𑁆𑀧𑀬𑁄𑀕𑁂 𑀯𑀺𑀦𑀺𑀘𑁆𑀙𑀬𑁄.

𑀇𑀘𑁆𑀙𑀺𑀢𑀸𑀮𑀸𑀪𑁄

𑁫𑁫𑁧. 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀻𑀢𑀺 𑀏𑀢𑁆𑀣 ‘‘𑀅𑀳𑁄 𑀯𑀢 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁯𑁮; 𑀯𑀺𑀪. 𑁨𑁦𑁧) 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀽𑀲𑀼 𑀇𑀘𑁆𑀙𑀸𑀯 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀸 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀇𑀘𑁆𑀙𑀦𑀮𑀓𑁆𑀔𑀡𑀸, 𑀢𑀧𑁆𑀧𑀭𑀺𑀬𑁂𑀲𑀦𑀭𑀲𑀸, 𑀢𑁂𑀲𑀁 𑀅𑀧𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀤𑀼𑀓𑁆𑀔𑀸 𑀧𑀦 𑀤𑀼𑀓𑁆𑀔𑀯𑀢𑁆𑀣𑀼𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀁 𑀢𑀁 𑀧𑀢𑁆𑀣𑀬𑀫𑀸𑀦𑀸𑀦𑀁, 𑀢𑀲𑁆𑀲 𑀢𑀲𑁆𑀲 𑀅𑀮𑀸𑀪𑀢𑁄;

𑀬𑀁 𑀯𑀺𑀖𑀸𑀢𑀫𑀬𑀁 𑀤𑀼𑀓𑁆𑀔𑀁, 𑀲𑀢𑁆𑀢𑀸𑀦𑀁 𑀇𑀥 𑀚𑀸𑀬𑀢𑀺.

‘‘𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀽𑀦𑀁, 𑀧𑀢𑁆𑀣𑀦𑀸 𑀢𑀲𑁆𑀲 𑀓𑀸𑀭𑀡𑀁;

𑀬𑀲𑁆𑀫𑀸 𑀢𑀲𑁆𑀫𑀸 𑀚𑀺𑀦𑁄 𑀤𑀼𑀓𑁆𑀔𑀁, 𑀇𑀘𑁆𑀙𑀺𑀢𑀸𑀮𑀸𑀪𑀫𑀩𑁆𑀭𑀯𑀻’’𑀢𑀺.

𑀅𑀬𑀁 𑀇𑀘𑁆𑀙𑀺𑀢𑀸𑀮𑀸𑀪𑁂 𑀯𑀺𑀦𑀺𑀘𑁆𑀙𑀬𑁄.

𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸

𑁫𑁫𑁨. 𑀲𑀁𑀔𑀺𑀢𑁆𑀢𑁂𑀦 ¶ 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸𑀢𑀺 𑀏𑀢𑁆𑀣 𑀧𑀦 𑁋

𑀚𑀸𑀢𑀺𑀧𑁆𑀧𑀪𑀼𑀢𑀺𑀓𑀁 ¶ 𑀤𑀼𑀓𑁆𑀔𑀁, 𑀬𑀁 𑀯𑀼𑀢𑁆𑀢𑀫𑀺𑀥 𑀢𑀸𑀤𑀺𑀦𑀸;

𑀅𑀯𑀼𑀢𑁆𑀢𑀁 𑀬𑀜𑁆𑀘 𑀢𑀁 𑀲𑀩𑁆𑀩𑀁, 𑀯𑀺𑀦𑀸 𑀏𑀢𑁂 𑀦 𑀯𑀺𑀚𑁆𑀚𑀢𑀺.

𑀬𑀲𑁆𑀫𑀸 𑀢𑀲𑁆𑀫𑀸 𑀉𑀧𑀸𑀤𑀸𑀦-𑀓𑁆𑀔𑀦𑁆𑀥𑀸 𑀲𑀗𑁆𑀔𑁂𑀧𑀢𑁄 𑀇𑀫𑁂;

𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸 𑀤𑀼𑀓𑁆𑀔𑀦𑁆𑀢-𑀤𑁂𑀲𑀓𑁂𑀦 𑀫𑀳𑁂𑀲𑀺𑀦𑀸.

𑀢𑀣𑀸 𑀳𑀺 𑀇𑀦𑁆𑀥𑀦𑀫𑀺𑀯 𑀧𑀸𑀯𑀓𑁄, 𑀮𑀓𑁆𑀔𑀫𑀺𑀯 𑀧𑀳𑀭𑀡𑀸𑀦𑀺, 𑀕𑁄𑀭𑀽𑀧𑀁 𑀯𑀺𑀬 𑀟𑀁𑀲𑀫𑀓𑀲𑀸𑀤𑀬𑁄, 𑀔𑁂𑀢𑁆𑀢𑀫𑀺𑀯 𑀮𑀸𑀬𑀓𑀸, 𑀕𑀸𑀫𑀁 𑀯𑀺𑀬 𑀕𑀸𑀫𑀖𑀸𑀢𑀓𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀚𑀸𑀢𑀺𑀆𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀺𑀩𑀸𑀥𑁂𑀦𑁆𑀢𑀸 𑀢𑀺𑀡𑀮𑀢𑀸𑀤𑀻𑀦𑀺 𑀯𑀺𑀬 𑀪𑀽𑀫𑀺𑀬𑀁, 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀦𑀺 𑀯𑀺𑀬 𑀭𑀼𑀓𑁆𑀔𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀜𑁆𑀘 𑀆𑀤𑀺𑀤𑀼𑀓𑁆𑀔𑀁 𑀚𑀸𑀢𑀺, 𑀫𑀚𑁆𑀛𑁂𑀤𑀼𑀓𑁆𑀔𑀁 𑀚𑀭𑀸, 𑀧𑀭𑀺𑀬𑁄𑀲𑀸𑀦𑀤𑀼𑀓𑁆𑀔𑀁 𑀫𑀭𑀡𑀁, 𑀫𑀸𑀭𑀡𑀦𑁆𑀢𑀺𑀓𑀤𑀼𑀓𑁆𑀔𑀸𑀪𑀺𑀖𑀸𑀢𑁂𑀦 𑀧𑀭𑀺𑀟𑀬𑁆𑀳𑀦𑀤𑀼𑀓𑁆𑀔𑀁 𑀲𑁄𑀓𑁄, 𑀢𑀤𑀲𑀳𑀦𑀢𑁄 𑀮𑀸𑀮𑀧𑁆𑀧𑀦𑀤𑀼𑀓𑁆𑀔𑀁 𑀧𑀭𑀺𑀤𑁂𑀯𑁄, 𑀢𑀢𑁄 𑀥𑀸𑀢𑀼𑀓𑁆𑀔𑁄𑀪𑀲𑀗𑁆𑀔𑀸𑀢𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀲𑀫𑀸𑀬𑁄𑀕𑀢𑁄 𑀓𑀸𑀬𑀲𑁆𑀲 𑀆𑀩𑀸𑀥𑀦𑀤𑀼𑀓𑁆𑀔𑀁 𑀤𑀼𑀓𑁆𑀔𑀁, 𑀢𑁂𑀦 𑀩𑀸𑀥𑀺𑀬𑀫𑀸𑀦𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀢𑀢𑁆𑀣 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀢𑁄 𑀘𑁂𑀢𑁄𑀩𑀸𑀥𑀦𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀲𑁄𑀓𑀸𑀤𑀺𑀯𑀼𑀤𑁆𑀥𑀺𑀬𑀸 𑀚𑀦𑀺𑀢𑀯𑀺𑀲𑀸𑀤𑀸𑀦𑀁 𑀅𑀦𑀼𑀢𑁆𑀣𑀼𑀦𑀦𑀤𑀼𑀓𑁆𑀔𑀁 𑀉𑀧𑀸𑀬𑀸𑀲𑁄, 𑀫𑀦𑁄𑀭𑀣𑀯𑀺𑀖𑀸𑀢𑀧𑁆𑀧𑀢𑁆𑀢𑀸𑀦𑀁 𑀇𑀘𑁆𑀙𑀸𑀯𑀺𑀖𑀸𑀢𑀤𑀼𑀓𑁆𑀔𑀁 𑀇𑀘𑁆𑀙𑀺𑀢𑀸𑀮𑀸𑀪𑁄𑀢𑀺 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀯 𑀤𑀼𑀓𑁆𑀔𑀸𑀢𑀺. 𑀬𑀤𑁂𑀢𑀁 𑀏𑀓𑀫𑁂𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀁 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑁂𑀳𑀺 𑀦 𑀲𑀓𑁆𑀓𑀸 𑀅𑀲𑁂𑀲𑀢𑁄 𑀯𑀢𑁆𑀢𑀼𑀁, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀏𑀓𑀚𑀮𑀩𑀺𑀦𑁆𑀤𑀼𑀫𑁆𑀳𑀺 𑀲𑀓𑀮𑀲𑀫𑀼𑀤𑁆𑀤𑀚𑀮𑀭𑀲𑀁 𑀯𑀺𑀬 𑀬𑁂𑀲𑀼 𑀓𑁂𑀲𑀼𑀘𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘𑀸𑀢𑀺. 𑀅𑀬𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀯𑀺𑀦𑀺𑀘𑁆𑀙𑀬𑁄.

𑀅𑀬𑀁 𑀢𑀸𑀯 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑁂 𑀦𑀬𑁄.

𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑀓𑀣𑀸

𑁫𑁫𑁩. 𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑁂 𑀧𑀦 𑀬𑀸𑀬𑀁 𑀢𑀡𑁆𑀳𑀸𑀢𑀺 𑀬𑀸 𑀅𑀬𑀁 𑀢𑀡𑁆𑀳𑀸. 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑁄𑀩𑁆𑀪𑀯𑁄, 𑀧𑀼𑀦𑁄𑀩𑁆𑀪𑀯𑁄 𑀲𑀻𑀮𑀫𑁂𑀢𑀺𑀲𑁆𑀲𑀸𑀢𑀺 ¶ 𑀧𑁄𑀦𑁄𑀩𑁆𑀪𑀯𑀺𑀓𑀸. 𑀦𑀦𑁆𑀤𑀻𑀭𑀸𑀕𑁂𑀦 𑀲𑀳𑀕𑀢𑀸𑀢𑀺 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸, 𑀦𑀦𑁆𑀤𑀻𑀭𑀸𑀕𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀫𑁂𑀯 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭 𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀬𑀢𑁆𑀭 𑀬𑀢𑁆𑀭 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀭 𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄 ¶ , 𑀢𑀲𑁆𑀲 𑀲𑀸 𑀓𑀢𑀫𑀸𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀇𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀆𑀯𑀺𑀪𑀯𑀺𑀲𑁆𑀲𑀦𑁆𑀢𑀺. 𑀇𑀥 𑀧𑀦𑀸𑀬𑀁 𑀢𑀺𑀯𑀺𑀥𑀸𑀧𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀝𑁆𑀞𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀁 𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑁂 𑀦𑀬𑁄.

𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑀓𑀣𑀸

𑁫𑁫𑁪. 𑀤𑀼𑀓𑁆𑀔𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑁂 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀼𑀤𑀬𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀲𑁄 𑀓𑀲𑁆𑀫𑀸𑀢𑀺 𑀘𑁂? 𑀲𑀫𑀼𑀤𑀬𑀦𑀺𑀭𑁄𑀥𑁂𑀦 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀲𑀫𑀼𑀤𑀬𑀦𑀺𑀭𑁄𑀥𑁂𑀦 𑀳𑀺 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸. 𑀢𑁂𑀦𑀸𑀳 𑁋

‘‘𑀬𑀣𑀸𑀧𑀺 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂,

𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀤𑁂𑀯 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂,

𑀦𑀺𑀩𑁆𑀩𑀢𑁆𑀢𑀢𑀻 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. (𑀥. 𑀧. 𑁩𑁩𑁮);

𑀇𑀢𑀺 𑀬𑀲𑁆𑀫𑀸 𑀲𑀫𑀼𑀤𑀬𑀦𑀺𑀭𑁄𑀥𑁂𑀦𑁂𑀯 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀤𑁂𑀲𑁂𑀦𑁆𑀢𑁄 𑀲𑀫𑀼𑀤𑀬𑀦𑀺𑀭𑁄𑀥𑁂𑀦𑁂𑀯 𑀤𑁂𑀲𑁂𑀲𑀺. 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄 𑀳𑀺 𑀢𑀣𑀸𑀕𑀢𑀸. 𑀢𑁂 𑀤𑀼𑀓𑁆𑀔𑀁 𑀦𑀺𑀭𑁄𑀥𑁂𑀦𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀜𑁆𑀘 𑀤𑁂𑀲𑁂𑀦𑁆𑀢𑀸 𑀳𑁂𑀢𑀼𑀫𑁆𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦 𑀨𑀮𑁂. 𑀲𑀼𑀯𑀸𑀦𑀯𑀼𑀢𑁆𑀢𑀺𑀦𑁄 𑀧𑀦 𑀢𑀺𑀢𑁆𑀣𑀺𑀬𑀸. 𑀢𑁂 𑀤𑀼𑀓𑁆𑀔𑀁 𑀦𑀺𑀭𑁄𑀥𑁂𑀦𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀜𑁆𑀘 𑀤𑁂𑀲𑁂𑀦𑁆𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀤𑁂𑀲𑀦𑀸𑀤𑀻𑀳𑀺 𑀨𑀮𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦 𑀳𑁂𑀢𑀼𑀫𑁆𑀳𑀻𑀢𑀺. 𑀏𑀯𑀁 𑀢𑀸𑀯 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀲𑀫𑀼𑀤𑀬𑀦𑀺𑀭𑁄𑀥𑀯𑀲𑁂𑀦 𑀤𑁂𑀲𑀦𑀸𑀬 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁫𑁫𑁫. 𑀅𑀬𑀁 𑀧𑀦𑀢𑁆𑀣𑁄 𑁋 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬𑀸𑀢𑀺 𑀢𑀲𑁆𑀲𑀸 ‘‘𑀧𑁄𑀦𑁄𑀩𑁆𑀪𑀯𑀺𑀓𑀸’’𑀢𑀺 𑀯𑀢𑁆𑀯𑀸 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀢𑀡𑁆𑀳𑀸𑀬. 𑀯𑀺𑀭𑀸𑀕𑁄 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄. ‘‘𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁨𑁪𑁫; 𑀲𑀁. 𑀦𑀺. 𑁩.𑁧𑁪) 𑀳𑀺 𑀯𑀼𑀢𑁆𑀢𑀁. 𑀯𑀺𑀭𑀸𑀕𑁂𑀦 𑀦𑀺𑀭𑁄𑀥𑁄 𑀯𑀺𑀭𑀸𑀕𑀦𑀺𑀭𑁄𑀥𑁄. 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀢𑁄 𑀅𑀲𑁂𑀲𑁄 𑀯𑀺𑀭𑀸𑀕𑀦𑀺𑀭𑁄𑀥𑁄 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄. 𑀅𑀣 𑀯𑀸 𑀯𑀺𑀭𑀸𑀕𑁄𑀢𑀺 𑀧𑀳𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀅𑀲𑁂𑀲𑁄 ¶ 𑀯𑀺𑀭𑀸𑀕𑁄 𑀅𑀲𑁂𑀲𑁄 𑀦𑀺𑀭𑁄𑀥𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀸𑀦𑁂𑀯 ¶ 𑀏𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀧𑀭𑀫𑀢𑁆𑀣𑀢𑁄 𑀳𑀺 𑀤𑀼𑀓𑁆𑀔𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀢𑀡𑁆𑀳𑀸 𑀯𑀺𑀭𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀲𑁆𑀫𑀸 𑀯𑀺𑀭𑀸𑀕𑁄𑀢𑀺 𑀘 𑀦𑀺𑀭𑁄𑀥𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀤𑁂𑀯 𑀆𑀕𑀫𑁆𑀫 𑀢𑀲𑁆𑀲𑀸 𑀘𑀸𑀕𑀸𑀤𑀬𑁄 𑀳𑁄𑀦𑁆𑀢𑀺, 𑀓𑀸𑀫𑀕𑀼𑀡𑀸𑀮𑀬𑁂𑀲𑀼 𑀘𑁂𑀢𑁆𑀣 𑀏𑀓𑁄𑀧𑀺 𑀆𑀮𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑁫𑁫𑁬. 𑀢𑀬𑀺𑀤𑀁 𑀲𑀦𑁆𑀢𑀺𑀮𑀓𑁆𑀔𑀡𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀲𑁆𑀲𑀸𑀲𑀓𑀭𑀡𑀭𑀲𑀁 𑀯𑀸, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀺𑀧𑁆𑀧𑀧𑀜𑁆𑀘𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸.

𑀦𑀺𑀩𑁆𑀩𑀸𑀦𑀓𑀣𑀸

𑁫𑁫𑁭. 𑀦𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁, 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄𑀢𑀺 𑀘𑁂? 𑀦, 𑀉𑀧𑀸𑀬𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑁄. 𑀉𑀧𑀮𑀩𑁆𑀪𑀢𑀺 𑀳𑀺 𑀢𑀁 𑀢𑀤𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀉𑀧𑀸𑀬𑁂𑀦, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀭𑁂𑀲𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀯𑀺𑀬, 𑀢𑀲𑁆𑀫𑀸 ‘‘𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 ‘‘𑀬𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀦 𑀉𑀧𑀮𑀪𑀦𑁆𑀢𑀺, 𑀢𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁫𑁫𑁮. 𑀅𑀧𑀺𑀘 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸? 𑀧𑀝𑀺𑀧𑀢𑁆𑀢𑀺𑀬𑀸 𑀯𑀜𑁆𑀛𑀪𑀸𑀯𑀸𑀧𑀚𑁆𑀚𑀦𑀢𑁄. 𑀅𑀲𑀢𑀺 𑀳𑀺 𑀦𑀺𑀩𑁆𑀩𑀸𑀦𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀸𑀬 𑀲𑀻𑀮𑀸𑀤𑀺𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀜𑁆𑀛𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀦 𑀘𑀸𑀬𑀁 𑀯𑀜𑁆𑀛𑀸, 𑀦𑀺𑀩𑁆𑀩𑀸𑀦𑀧𑀸𑀧𑀦𑀢𑁄𑀢𑀺. 𑀦 𑀧𑀝𑀺𑀧𑀢𑁆𑀢𑀺𑀬𑀸 𑀯𑀜𑁆𑀛𑀪𑀸𑀯𑀸𑀧𑀢𑁆𑀢𑀺, 𑀅𑀪𑀸𑀯𑀧𑀸𑀧𑀓𑀢𑁆𑀢𑀸𑀢𑀺 𑀘𑁂. 𑀦, 𑀅𑀢𑀻𑀢𑀸𑀦𑀸𑀕𑀢𑀸𑀪𑀸𑀯𑁂𑀧𑀺 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀅𑀪𑀸𑀯𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂. 𑀦, 𑀢𑁂𑀲𑀁 𑀅𑀪𑀸𑀯𑀸𑀲𑀫𑁆𑀪𑀯𑀢𑁄, 𑀅𑀪𑀸𑀯𑁂 𑀘 𑀅𑀯𑀢𑁆𑀢𑀫𑀸𑀦𑀪𑀸𑀯𑀸𑀧𑀚𑁆𑀚𑀦𑀢𑁄, 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀦𑀺𑀲𑁆𑀲𑀺𑀢𑀫𑀕𑁆𑀕𑀓𑁆𑀔𑀡𑁂 𑀘 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀤𑁄𑀲𑀢𑁄. 𑀢𑀤𑀸 𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀢𑀫𑀸𑀦𑀢𑁆𑀢𑀸 𑀦 𑀤𑁄𑀲𑁄𑀢𑀺 𑀘𑁂. 𑀦, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀸𑀧𑀚𑁆𑀚𑀦𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑀢𑁄 𑀧𑀼𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀅𑀓𑀸𑀭𑀡𑀫𑁂𑀢𑀁.

𑁫𑁫𑁯. ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁪.𑁩𑁧𑁫) ‘‘𑀔𑀬𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀘𑁂. 𑀦, 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀔𑀬𑀫𑀢𑁆𑀢𑀸𑀧𑀚𑁆𑀚𑀦𑀢𑁄. 𑀢𑀫𑁆𑀧𑀺 𑀳𑀺 ¶ ‘‘𑀬𑁄 𑀔𑁄, 𑀆𑀯𑀼𑀲𑁄 ¶ , 𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 (𑀲. 𑀦𑀺. 𑁪.𑁩𑁧𑁫) 𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀦𑀺𑀩𑁆𑀩𑀸𑀦𑀲𑁆𑀲 𑀇𑀢𑁆𑀢𑀭𑀓𑀸𑀮𑀸𑀤𑀺𑀧𑁆𑀧𑀢𑁆𑀢𑀺𑀤𑁄𑀲𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀦𑀺𑀩𑁆𑀩𑀸𑀦𑀁 𑀇𑀢𑁆𑀢𑀭𑀓𑀸𑀮𑀁, 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀲𑀫𑁆𑀫𑀸𑀯𑀸𑀬𑀸𑀫𑀦𑀺𑀭𑀧𑁂𑀓𑁆𑀔𑀸𑀥𑀺𑀕𑀫𑀦𑀻𑀬𑀪𑀸𑀯𑀜𑁆𑀘 𑀆𑀧𑀚𑁆𑀚𑀢𑀺. 𑀲𑀗𑁆𑀔𑀢𑀮𑀓𑁆𑀔𑀡𑀢𑁆𑀢𑀸𑀬𑁂𑀯 𑀘 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀁, 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀭𑀸𑀕𑀸𑀤𑀻𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀁, 𑀆𑀤𑀺𑀢𑁆𑀢𑀢𑁆𑀢𑀸 𑀤𑀼𑀓𑁆𑀔𑀜𑁆𑀘𑀸𑀢𑀺𑀧𑀺 𑀆𑀧𑀚𑁆𑀚𑀢𑀺. 𑀬𑀲𑁆𑀫𑀸 𑀔𑀬𑀸 𑀧𑀝𑁆𑀞𑀸𑀬 𑀦 𑀪𑀺𑀬𑁆𑀬𑁄 𑀧𑀯𑀢𑁆𑀢𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀢𑁄 𑀦 𑀤𑁄𑀲𑁄𑀢𑀺 𑀘𑁂. 𑀦, 𑀢𑀸𑀤𑀺𑀲𑀲𑁆𑀲 𑀔𑀬𑀲𑁆𑀲 𑀅𑀪𑀸𑀯𑀢𑁄. 𑀪𑀸𑀯𑁂𑀧𑀺 𑀘𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀦𑀺𑀩𑁆𑀩𑀸𑀦𑀪𑀸𑀯𑀸𑀧𑀚𑁆𑀚𑀦𑀢𑁄. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀤𑁄𑀲𑁂 𑀔𑀻𑀡𑁂𑀢𑀺, 𑀢𑀲𑁆𑀫𑀸 𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀘 𑀧𑀝𑁆𑀞𑀸𑀬 𑀦 𑀪𑀺𑀬𑁆𑀬𑁄 𑀤𑁄𑀲𑀸𑀦𑀁 𑀧𑀯𑀢𑁆𑀢𑀻𑀢𑀺.

𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀲𑀗𑁆𑀔𑀸𑀢𑀲𑁆𑀲 𑀧𑀦 𑀔𑀬𑀲𑁆𑀲 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀢𑁆𑀢𑀸, 𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺 𑀢𑀤𑀼𑀧𑀘𑀸𑀭𑁂𑀦 ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀁. 𑀲𑀭𑀽𑀧𑁂𑀦𑁂𑀯 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀅𑀢𑀺𑀲𑀼𑀔𑀼𑀫𑀢𑁆𑀢𑀸. 𑀅𑀢𑀺𑀲𑀼𑀔𑀼𑀫𑀢𑀸 𑀘𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑁄𑀲𑀼𑀓𑁆𑀓𑀪𑀸𑀯𑀸𑀯𑀳𑀦𑀢𑁄, 𑀅𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀢𑁄 𑀘 𑀲𑀺𑀤𑁆𑀥𑀸𑀢𑀺.

𑁫𑁬𑁦. 𑀢𑀬𑀺𑀤𑀁 𑀫𑀕𑁆𑀕𑀲𑀫𑀗𑁆𑀕𑀺𑀦𑀸 𑀧𑀢𑁆𑀢𑀩𑁆𑀩𑀢𑁄 𑀅𑀲𑀸𑀥𑀸𑀭𑀡𑀁, 𑀧𑀼𑀭𑀺𑀫𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀅𑀧𑁆𑀧𑀪𑀯𑀁. 𑀫𑀕𑁆𑀕𑀪𑀸𑀯𑁂 𑀪𑀸𑀯𑀢𑁄 𑀦 𑀅𑀧𑁆𑀧𑀪𑀯𑀦𑁆𑀢𑀺 𑀘𑁂. 𑀦, 𑀫𑀕𑁆𑀕𑁂𑀦 𑀅𑀦𑀼𑀧𑁆𑀧𑀸𑀤𑀦𑀻𑀬𑀢𑁄. 𑀧𑀢𑁆𑀢𑀩𑁆𑀩𑀫𑁂𑀯 𑀳𑁂𑀢𑀁 𑀫𑀕𑁆𑀕𑁂𑀦, 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀅𑀧𑁆𑀧𑀪𑀯𑀫𑁂𑀯. 𑀅𑀧𑁆𑀧𑀪𑀯𑀢𑁆𑀢𑀸 𑀅𑀚𑀭𑀸𑀫𑀭𑀡𑀁. 𑀧𑀪𑀯𑀚𑀭𑀸𑀫𑀭𑀡𑀸𑀦𑀁 𑀅𑀪𑀸𑀯𑀢𑁄 𑀦𑀺𑀘𑁆𑀘𑀁.

𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀡𑀼𑀆𑀤𑀻𑀦𑀫𑁆𑀧𑀺 𑀦𑀺𑀘𑁆𑀘𑀪𑀸𑀯𑀸𑀧𑀢𑁆𑀢𑀻𑀢𑀺 𑀘𑁂. 𑀦, 𑀳𑁂𑀢𑀼𑀦𑁄 𑀅𑀪𑀸𑀯𑀸. 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀘𑁆𑀘𑀢𑁆𑀢𑀸 𑀢𑁂 𑀦𑀺𑀘𑁆𑀘𑀸𑀢𑀺 𑀘𑁂. 𑀦, 𑀳𑁂𑀢𑀼𑀮𑀓𑁆𑀔𑀡𑀲𑁆𑀲 𑀅𑀦𑀼𑀧𑀧𑀢𑁆𑀢𑀺𑀢𑁄. 𑀦𑀺𑀘𑁆𑀘𑀸 𑀉𑀧𑁆𑀧𑀸𑀤𑀸𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀯𑀺𑀬𑀸𑀢𑀺 𑀘𑁂. 𑀦, 𑀅𑀡𑀼𑀆𑀤𑀻𑀦𑀁 𑀅𑀲𑀺𑀤𑁆𑀥𑀢𑁆𑀢𑀸.

𑁫𑁬𑁧. 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀧𑀦 𑀇𑀤𑀫𑁂𑀯 𑀦𑀺𑀘𑁆𑀘𑀁, 𑀭𑀽𑀧𑀲𑀪𑀸𑀯𑀸𑀢𑀺𑀓𑁆𑀓𑀫𑀢𑁄 𑀅𑀭𑀽𑀧𑀁. 𑀩𑀼𑀤𑁆𑀥𑀸𑀤𑀻𑀦𑀁 𑀦𑀺𑀝𑁆𑀞𑀸𑀬 𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀓𑀸𑀯 𑀦𑀺𑀝𑁆𑀞𑀸. 𑀬𑁂𑀦 𑀪𑀸𑀯𑀦𑀸𑀬 𑀧𑀢𑁆𑀢𑀁, 𑀢𑀲𑁆𑀲 𑀓𑀺𑀮𑁂𑀲𑀯𑀽𑀧𑀲𑀫𑀁, 𑀉𑀧𑀸𑀤𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀦𑀻𑀬𑀢𑁆𑀢𑀸 𑀲𑀳 𑀉𑀧𑀸𑀤𑀺𑀲𑁂𑀲𑁂𑀦 𑀧𑀜𑁆𑀜𑀸𑀧𑀺𑀬𑀢𑀻𑀢𑀺 𑀲𑀉𑀧𑀸𑀤𑀺𑀲𑁂𑀲𑀁. 𑀬𑁄 𑀘𑀲𑁆𑀲 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀉𑀧𑀳𑀢𑀸𑀬𑀢𑀺𑀓𑀫𑁆𑀫𑀨𑀮𑀲𑁆𑀲 𑀘𑀭𑀺𑀫𑀘𑀺𑀢𑁆𑀢𑀢𑁄 𑀘 𑀉𑀤𑁆𑀥𑀁 𑀧𑀯𑀢𑁆𑀢𑀺𑀔𑀦𑁆𑀥𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀢𑁄, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀅𑀦𑁆𑀢𑀭𑀥𑀸𑀦𑀢𑁄 𑀉𑀧𑀸𑀤𑀺𑀲𑁂𑀲𑀸𑀪𑀸𑀯𑁄 ¶ , 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀦𑀻𑀬𑀢𑁄 𑀦𑀢𑁆𑀣𑀺 𑀏𑀢𑁆𑀣 𑀉𑀧𑀸𑀤𑀺𑀲𑁂𑀲𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁.

𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀲𑀺𑀤𑁆𑀥𑁂𑀦 ¶ 𑀜𑀸𑀡𑀯𑀺𑀲𑁂𑀲𑁂𑀦 𑀅𑀥𑀺𑀕𑀫𑀦𑀻𑀬𑀢𑁄, 𑀲𑀩𑁆𑀩𑀜𑁆𑀜𑀼𑀯𑀘𑀦𑀢𑁄 𑀘 𑀧𑀭𑀫𑀢𑁆𑀣𑁂𑀦 𑀲𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀦𑀸𑀯𑀺𑀚𑁆𑀚𑀫𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺.

𑀇𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑁂 𑀯𑀺𑀦𑀺𑀘𑁆𑀙𑀬𑀓𑀣𑀸𑀫𑀼𑀔𑀁.

𑀫𑀕𑁆𑀕𑀦𑀺𑀤𑁆𑀤𑁂𑀲𑀓𑀣𑀸

𑁫𑁬𑁨. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸 𑀧𑀦 𑀅𑀝𑁆𑀞 𑀥𑀫𑁆𑀫𑀸 𑀓𑀸𑀫𑀁 𑀔𑀦𑁆𑀥𑀦𑀺𑀤𑁆𑀤𑁂𑀲𑁂𑀧𑀺 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀸𑀬𑁂𑀯, 𑀇𑀥 𑀧𑀦 𑀦𑁂𑀲𑀁 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀁 𑀯𑀤𑀸𑀫. 𑀲𑀗𑁆𑀔𑁂𑀧𑀢𑁄 𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀓𑀁 𑀧𑀜𑁆𑀜𑀸𑀘𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀸 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸, 𑀥𑀸𑀢𑀼𑀧𑁆𑀧𑀓𑀸𑀲𑀦𑀭𑀲𑀸, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑀣𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀦𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀦𑀺𑀖𑀸𑀢𑀓𑀁 𑀘𑁂𑀢𑀲𑁄 𑀦𑀺𑀩𑁆𑀩𑀸𑀦𑀧𑀤𑀸𑀪𑀺𑀦𑀺𑀭𑁄𑀧𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁄 𑀲𑀫𑁆𑀫𑀸 𑀘𑀺𑀢𑁆𑀢𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀅𑀧𑁆𑀧𑀦𑀸𑀭𑀲𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀢𑀣𑀸 𑀧𑀲𑁆𑀲𑀢𑁄 𑀯𑀺𑀢𑀓𑁆𑀓𑀬𑀢𑁄 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀫𑀼𑀕𑁆𑀖𑀸𑀢𑀺𑀓𑀸 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀭𑀢𑀺 𑀲𑀫𑁆𑀫𑀸𑀯𑀸𑀘𑀸 𑀦𑀸𑀫. 𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸, 𑀯𑀺𑀭𑀫𑀡𑀭𑀲𑀸, 𑀫𑀺𑀘𑁆𑀙𑀸𑀯𑀸𑀘𑀸𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑀣𑀸 𑀯𑀺𑀭𑀫𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑀫𑀼𑀘𑁆𑀙𑁂𑀤𑀺𑀓𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀸𑀫. 𑀲𑁄 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄, 𑀯𑀺𑀭𑀫𑀡𑀭𑀲𑁄, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀬𑀸 𑀧𑀦𑀲𑁆𑀲 𑀢𑁂𑀲𑀁 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀪𑀽𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀓𑀼𑀳𑀦𑀸𑀤𑀺𑀉𑀧𑀘𑁆𑀙𑁂𑀤𑀺𑀓𑀸 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺, 𑀲𑁄 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫. 𑀲𑁄 𑀯𑁄𑀤𑀸𑀦𑀮𑀓𑁆𑀔𑀡𑁄, 𑀜𑀸𑀬𑀸𑀚𑀻𑀯𑀧𑀯𑀢𑁆𑀢𑀺𑀭𑀲𑁄, 𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀅𑀣𑀲𑁆𑀲 𑀬𑁄 𑀢𑀲𑁆𑀲𑀸 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀲𑀗𑁆𑀔𑀸𑀢𑀸𑀬 𑀲𑀻𑀮𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀤𑀦𑀼𑀭𑀽𑀧𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀯 𑀓𑁄𑀲𑀚𑁆𑀚𑀲𑀫𑀼𑀘𑁆𑀙𑁂𑀤𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄, 𑀏𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀦𑀸𑀫. 𑀲𑁄 𑀧𑀕𑁆𑀕𑀳𑀮𑀓𑁆𑀔𑀡𑁄, 𑀅𑀦𑀼𑀧𑁆𑀧𑀦𑁆𑀦𑀅𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀭𑀲𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑀲𑁆𑀲𑁂𑀯𑀁 𑀯𑀸𑀬𑀫𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀯 𑀫𑀺𑀘𑁆𑀙𑀸𑀲𑀢𑀺𑀯𑀺𑀦𑀺𑀤𑁆𑀥𑀼𑀦𑀦𑁄 𑀘𑁂𑀢𑀲𑁄 𑀅𑀲𑀫𑁆𑀫𑁄𑀲𑁄 ¶ 𑀲𑀫𑁆𑀫𑀸𑀲𑀢𑀺 𑀦𑀸𑀫. 𑀲𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸, 𑀫𑀺𑀘𑁆𑀙𑀸𑀲𑀢𑀺𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀯𑀁 𑀅𑀦𑀼𑀢𑁆𑀢𑀭𑀸𑀬 𑀲𑀢𑀺𑀬𑀸 𑀲𑀁𑀭𑀓𑁆𑀔𑀺𑀬𑀫𑀸𑀦𑀘𑀺𑀢𑁆𑀢𑀲𑁆𑀲 ¶ 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯 𑀫𑀺𑀘𑁆𑀙𑀸𑀲𑀫𑀸𑀥𑀺𑀯𑀺𑀤𑁆𑀥𑀁𑀲𑀺𑀓𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑁆𑀫𑀸𑀲𑀫𑀸𑀥𑀺 𑀦𑀸𑀫. 𑀲𑁄 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄, 𑀲𑀫𑀸𑀥𑀸𑀦𑀭𑀲𑁄, 𑀫𑀺𑀘𑁆𑀙𑀸𑀲𑀫𑀸𑀥𑀺𑀧𑁆𑀧𑀳𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁂 𑀦𑀬𑁄. 𑀏𑀯𑀫𑁂𑀢𑁆𑀣 𑀚𑀸𑀢𑀺𑀆𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁩. 𑀜𑀸𑀡𑀓𑀺𑀘𑁆𑀘𑀢𑁄𑀢𑀺 𑀲𑀘𑁆𑀘𑀜𑀸𑀡𑀲𑁆𑀲 𑀓𑀺𑀘𑁆𑀘𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀯𑀺𑀥𑀁 𑀳𑀺 𑀲𑀘𑁆𑀘𑀜𑀸𑀡𑀁 𑁋 𑀅𑀦𑀼𑀩𑁄𑀥𑀜𑀸𑀡𑀁 𑀧𑀝𑀺𑀯𑁂𑀥𑀜𑀸𑀡𑀜𑁆𑀘. 𑀢𑀢𑁆𑀣 𑀅𑀦𑀼𑀩𑁄𑀥𑀜𑀸𑀡𑀁 𑀮𑁄𑀓𑀺𑀬𑀁 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀦𑀺𑀭𑁄𑀥𑁂 𑀫𑀕𑁆𑀕𑁂 𑀘 𑀧𑀯𑀢𑁆𑀢𑀢𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁 𑀦𑀺𑀭𑁄𑀥𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀬𑀣𑀸𑀳 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀫𑁆𑀧𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀢𑀁 𑀧𑀦𑀲𑁆𑀲 𑀓𑀺𑀘𑁆𑀘𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀬𑀁 𑀧𑀦𑁂𑀢𑀁 𑀮𑁄𑀓𑀺𑀬𑀁, 𑀢𑀢𑁆𑀣 𑀤𑀼𑀓𑁆𑀔𑀜𑀸𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀫𑀼𑀤𑀬𑀜𑀸𑀡𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁. 𑀦𑀺𑀭𑁄𑀥𑀜𑀸𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁. 𑀫𑀕𑁆𑀕𑀜𑀸𑀡𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁. 𑀤𑀼𑀓𑁆𑀔𑀜𑀸𑀡𑀁 𑀯𑀸 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑁂𑀲𑀼 𑀔𑀦𑁆𑀥𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀜𑁆𑀜𑀸𑀲𑀗𑁆𑀔𑀸𑀢𑀁 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁. 𑀲𑀫𑀼𑀤𑀬𑀜𑀸𑀡𑀁 𑀇𑀲𑁆𑀲𑀭𑀧𑀥𑀸𑀦𑀓𑀸𑀮𑀲𑀪𑀸𑀯𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀅𑀓𑀸𑀭𑀡𑁂 𑀓𑀸𑀭𑀡𑀸𑀪𑀺𑀫𑀸𑀦𑀧𑁆𑀧𑀯𑀢𑁆𑀢𑀁 𑀳𑁂𑀢𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁. 𑀦𑀺𑀭𑁄𑀥𑀜𑀸𑀡𑀁 𑀅𑀭𑀽𑀧𑀮𑁄𑀓𑀮𑁄𑀓𑀣𑀽𑀧𑀺𑀓𑀸𑀤𑀻𑀲𑀼 𑀅𑀧𑀯𑀕𑁆𑀕𑀕𑀸𑀳𑀪𑀽𑀢𑀁 𑀦𑀺𑀭𑁄𑀥𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁. 𑀫𑀕𑁆𑀕𑀜𑀸𑀡𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑁂 𑀅𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀁 𑀉𑀧𑀸𑀬𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀮𑁄𑀓𑁂 𑀮𑁄𑀓𑀧𑁆𑀧𑀪𑀯𑁂, 𑀮𑁄𑀓𑀢𑁆𑀣𑀕𑀫𑁂 𑀲𑀺𑀯𑁂 𑀘 𑀢𑀤𑀼𑀧𑀸𑀬𑁂;

𑀲𑀫𑁆𑀫𑀼𑀬𑁆𑀳𑀢𑀺 𑀢𑀸𑀯 𑀦𑀭𑁄, 𑀦 𑀯𑀺𑀚𑀸𑀦𑀸𑀢𑀺 𑀬𑀸𑀯 𑀲𑀘𑁆𑀘𑀸𑀦𑀻’’𑀢𑀺.

𑀏𑀯𑀫𑁂𑀢𑁆𑀣 𑀜𑀸𑀡𑀓𑀺𑀘𑁆𑀘𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁪. 𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀫𑀺𑀁 𑀳𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀜𑁆𑀘𑁂𑀯 𑀅𑀦𑀸𑀲𑀯𑀥𑀫𑁆𑀫𑁂 𑀘 𑀲𑁂𑀲𑀸 𑀲𑀩𑁆𑀩𑀥𑀫𑁆𑀫𑀸 𑀅𑀦𑁆𑀢𑁄𑀕𑀥𑀸. 𑀲𑀫𑀼𑀤𑀬𑀲𑀘𑁆𑀘𑁂 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀲𑀫𑁆𑀫𑀺𑀲𑁆𑀲𑀁. 𑀫𑀕𑁆𑀕𑀲𑀘𑁆𑀘𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀼𑀔𑁂𑀦 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀸𑀩𑀮𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀧𑀤𑁂𑀲𑁂𑀦 𑀢𑀬𑁄 ¶ 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄. 𑀲𑀫𑁆𑀫𑀸𑀯𑀸𑀘𑀸𑀧𑀤𑁂𑀲𑁂𑀦 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 ¶ . 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀧𑀤𑁂𑀲𑁂𑀦 𑀢𑀻𑀡𑀺 𑀓𑀸𑀬𑀲𑀼𑀘𑀭𑀺𑀢𑀸𑀦𑀺. 𑀲𑀫𑁆𑀫𑀸𑀚𑀻𑀯𑀫𑀼𑀔𑁂𑀦 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 𑀘. 𑀲𑀩𑁆𑀩𑁂𑀲𑀁𑀬𑁂𑀯 𑀯𑀸 𑀏𑀢𑁂𑀲𑀁 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀅𑀭𑀺𑀬𑀓𑀦𑁆𑀢𑀲𑀻𑀮𑀢𑁆𑀢𑀸 𑀅𑀭𑀺𑀬𑀓𑀦𑁆𑀢𑀲𑀻𑀮𑀲𑁆𑀲 𑀘 𑀲𑀤𑁆𑀥𑀸𑀳𑀢𑁆𑀣𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀅𑀢𑁆𑀣𑀺𑀢𑀸𑀬 𑀅𑀢𑁆𑀣𑀺𑀪𑀸𑀯𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸. 𑀲𑀫𑁆𑀫𑀸𑀯𑀸𑀬𑀸𑀫𑀸𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀻𑀭𑀺𑀬𑀩𑀮𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺. 𑀲𑀫𑁆𑀫𑀸𑀲𑀢𑀺𑀅𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀢𑀺𑀧𑀝𑁆𑀞𑀸𑀦𑀲𑀢𑀺𑀦𑁆𑀤𑁆𑀭𑀺𑀬𑀲𑀢𑀺𑀩𑀮𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺. 𑀲𑀫𑁆𑀫𑀸𑀲𑀫𑀸𑀥𑀺𑀅𑀧𑀤𑁂𑀲𑁂𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀬𑁄 𑀢𑀬𑁄 𑀲𑀫𑀸𑀥𑀻 𑀘𑀺𑀢𑁆𑀢𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀩𑀮𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀺 𑀅𑀦𑁆𑀢𑁄𑀕𑀥𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁫. 𑀉𑀧𑀫𑀸𑀢𑁄𑀢𑀺 𑀪𑀸𑀭𑁄 𑀯𑀺𑀬 𑀳𑀺 𑀤𑀼𑀓𑁆𑀔𑀲𑀘𑁆𑀘𑀁 𑀤𑀝𑁆𑀞𑀩𑁆𑀩𑀁, 𑀪𑀸𑀭𑀸𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀼𑀧𑀸𑀬𑁄 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁. 𑀭𑁄𑀕𑁄 𑀯𑀺𑀬 𑀘 𑀤𑀼𑀓𑁆𑀔𑀲𑀘𑁆𑀘𑀁, 𑀭𑁄𑀕𑀦𑀺𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀭𑁄𑀕𑀯𑀽𑀧𑀲𑀫𑁄 𑀯𑀺𑀬 𑀦𑀺𑀭𑁄𑀥𑀲𑀘𑁆𑀘𑀁, 𑀪𑁂𑀲𑀚𑁆𑀚𑀫𑀺𑀯 𑀫𑀕𑁆𑀕𑀲𑀘𑁆𑀘𑀁. 𑀤𑀼𑀩𑁆𑀪𑀺𑀓𑁆𑀔𑀫𑀺𑀯 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀤𑀼𑀩𑁆𑀩𑀼𑀝𑁆𑀞𑀺 𑀯𑀺𑀬 𑀲𑀫𑀼𑀤𑀬𑀲𑀘𑁆𑀘𑀁, 𑀲𑀼𑀪𑀺𑀓𑁆𑀔𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁, 𑀲𑀼𑀯𑀼𑀝𑁆𑀞𑀺 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁. 𑀅𑀧𑀺𑀘 𑀯𑁂𑀭𑀻-𑀯𑁂𑀭𑀫𑀽𑀮-𑀯𑁂𑀭𑀲𑀫𑀼𑀕𑁆𑀖𑀸𑀢-𑀯𑁂𑀭𑀲𑀫𑀼𑀕𑁆𑀖𑀸𑀢𑀼𑀧𑀸𑀬𑁂𑀳𑀺, 𑀯𑀺𑀲𑀭𑀼𑀓𑁆𑀔-𑀭𑀼𑀓𑁆𑀔𑀫𑀽𑀮-𑀫𑀽𑀮𑀼𑀧𑀘𑁆𑀙𑁂𑀤-𑀢𑀤𑀼𑀧𑀘𑁆𑀙𑁂𑀤𑀼𑀧𑀸𑀬𑁂𑀳𑀺, 𑀪𑀬-𑀪𑀬𑀫𑀽𑀮-𑀦𑀺𑀩𑁆𑀪𑀬-𑀢𑀤𑀥𑀺𑀕𑀫𑀼𑀧𑀸𑀬𑁂𑀳𑀺, 𑀑𑀭𑀺𑀫𑀢𑀻𑀭-𑀫𑀳𑁄𑀖𑀧𑀸𑀭𑀺𑀫𑀢𑀻𑀭-𑀢𑀁𑀲𑀫𑁆𑀧𑀸𑀧𑀓𑀯𑀸𑀬𑀸𑀫𑁂𑀳𑀺 𑀘 𑀬𑁄𑀚𑁂𑀢𑁆𑀯𑀸𑀧𑁂𑀢𑀸𑀦𑀺 𑀉𑀧𑀫𑀸𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀉𑀧𑀫𑀸𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁬. 𑀘𑀢𑀼𑀓𑁆𑀓𑀢𑁄𑀢𑀺 𑀅𑀢𑁆𑀣𑀺 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁, 𑀅𑀢𑁆𑀣𑀺 𑀅𑀭𑀺𑀬𑀲𑀘𑁆𑀘𑀁 𑀦 𑀤𑀼𑀓𑁆𑀔𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀜𑁆𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀅𑀢𑁆𑀣𑀺 𑀦𑁂𑀯 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁. 𑀏𑀲 𑀦𑀬𑁄 𑀲𑀫𑀼𑀤𑀬𑀸𑀤𑀻𑀲𑀼. 𑀢𑀢𑁆𑀣 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀁, 𑀦 𑀅𑀭𑀺𑀬𑀲𑀘𑁆𑀘𑀁. 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀤𑀼𑀓𑁆𑀔𑀁. 𑀇𑀢𑀭𑀁 𑀧𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀢𑁄, 𑀦 𑀧𑀦 𑀬𑀲𑁆𑀲 𑀧𑀭𑀺𑀜𑁆𑀜𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀜𑁆𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘 𑀅𑀜𑁆𑀜𑀢𑁆𑀭 𑀢𑀡𑁆𑀳𑀸𑀬. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀧𑀭𑀺𑀜𑁆𑀜𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦 𑀦𑁂𑀯 𑀤𑀼𑀓𑁆𑀔𑀁 𑀦 𑀅𑀭𑀺𑀬𑀲𑀘𑁆𑀘𑀁. 𑀏𑀯𑀁 𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 𑀘𑀢𑀼𑀓𑁆𑀓𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁭. 𑀲𑀼𑀜𑁆𑀜𑀢𑁂𑀓𑀯𑀺𑀥𑀸𑀤𑀻𑀳𑀻𑀢𑀺𑀏𑀢𑁆𑀣 ¶ ¶ 𑀲𑀼𑀜𑁆𑀜𑀢𑁄 𑀢𑀸𑀯 𑀧𑀭𑀫𑀢𑁆𑀣𑁂𑀦 𑀳𑀺 𑀲𑀩𑁆𑀩𑀸𑀦𑁂𑀯 𑀲𑀘𑁆𑀘𑀸𑀦𑀺 𑀯𑁂𑀤𑀓𑀓𑀸𑀭𑀓𑀦𑀺𑀩𑁆𑀩𑀼𑀢𑀕𑀫𑀓𑀸𑀪𑀸𑀯𑀢𑁄 𑀲𑀼𑀜𑁆𑀜𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀤𑀼𑀓𑁆𑀔𑀫𑁂𑀯 𑀳𑀺, 𑀦 𑀓𑁄𑀘𑀺 𑀤𑀼𑀓𑁆𑀔𑀺𑀢𑁄;

𑀓𑀸𑀭𑀓𑁄 𑀦, 𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀺.

𑀅𑀢𑁆𑀣𑀺 𑀦𑀺𑀩𑁆𑀩𑀼𑀢𑀺, 𑀦 𑀦𑀺𑀩𑁆𑀩𑀼𑀢𑁄 𑀧𑀼𑀫𑀸;

𑀫𑀕𑁆𑀕𑀫𑀢𑁆𑀣𑀺, 𑀕𑀫𑀓𑁄 𑀦 𑀯𑀺𑀚𑁆𑀚𑀢𑀻’’𑀢𑀺.

𑀅𑀣 𑀯𑀸,

𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀲𑀼𑀜𑁆𑀜𑀁, 𑀧𑀼𑀭𑀺𑀫𑀤𑁆𑀯𑀬𑀫𑀢𑁆𑀢𑀲𑀼𑀜𑁆𑀜𑀫𑀫𑀢𑀧𑀤𑀁;

𑀥𑀼𑀯𑀲𑀼𑀔𑀅𑀢𑁆𑀢𑀯𑀺𑀭𑀳𑀺𑀢𑁄, 𑀫𑀕𑁆𑀕𑁄𑀇𑀢𑀺 𑀲𑀼𑀜𑁆𑀜𑀢𑀸 𑀢𑁂𑀲𑀼.

𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 𑀯𑀸 𑀢𑀻𑀡𑀺, 𑀦𑀺𑀭𑁄𑀥𑁄 𑀘 𑀲𑁂𑀲𑀢𑁆𑀢𑀬𑀲𑀼𑀜𑁆𑀜𑁄. 𑀨𑀮𑀲𑀼𑀜𑁆𑀜𑁄 𑀯𑀸 𑀏𑀢𑁆𑀣 𑀳𑁂𑀢𑀼 𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄, 𑀫𑀕𑁆𑀕𑁂 𑀘 𑀦𑀺𑀭𑁄𑀥𑀲𑁆𑀲, 𑀦 𑀨𑀮𑁂𑀦 𑀲𑀕𑀩𑁆𑀪𑁄 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬. 𑀳𑁂𑀢𑀼𑀲𑀼𑀜𑁆𑀜𑀜𑁆𑀘 𑀨𑀮𑀁 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸, 𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮𑀁 𑀲𑀫𑀯𑀸𑀬𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀸𑀤𑀺 𑀯𑀺𑀬. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀬𑀫𑀺𑀥 𑀦𑀺𑀭𑁄𑀥𑀲𑀼𑀜𑁆𑀜𑀁, 𑀢𑀬𑁂𑀦 𑀢𑁂𑀦𑀸𑀧𑀺 𑀦𑀺𑀩𑁆𑀩𑀼𑀢𑀺 𑀲𑀼𑀜𑁆𑀜𑀸;

𑀲𑀼𑀜𑁆𑀜𑁄 𑀨𑀮𑁂𑀦 𑀳𑁂𑀢𑀼, 𑀨𑀮𑀫𑁆𑀧𑀺 𑀢𑀁𑀳𑁂𑀢𑀼𑀦𑀸 𑀲𑀼𑀜𑁆𑀜’’𑀦𑁆𑀢𑀺.

𑀏𑀯𑀁 𑀢𑀸𑀯 𑀲𑀼𑀜𑁆𑀜𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀯𑀺𑀥𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁬𑁮. 𑀏𑀓𑀯𑀺𑀥𑀸𑀤𑀻𑀳𑀻𑀢𑀺 𑀲𑀩𑁆𑀩𑀫𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀏𑀓𑀯𑀺𑀥𑀁 𑀧𑀯𑀢𑁆𑀢𑀺𑀪𑀸𑀯𑀢𑁄. 𑀤𑀼𑀯𑀺𑀥𑀁 𑀦𑀸𑀫𑀭𑀽𑀧𑀢𑁄. 𑀢𑀺𑀯𑀺𑀥𑀁 𑀓𑀸𑀫𑀭𑀽𑀧𑀸𑀭𑀽𑀧𑀽𑀧𑀧𑀢𑁆𑀢𑀺𑀪𑀯𑀪𑁂𑀤𑀢𑁄. 𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀆𑀳𑀸𑀭𑀪𑁂𑀤𑀢𑁄. 𑀧𑀜𑁆𑀘𑀯𑀺𑀥𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑁂𑀤𑀢𑁄.

𑀲𑀫𑀼𑀤𑀬𑁄𑀧𑀺 ¶ 𑀏𑀓𑀯𑀺𑀥𑁄 𑀧𑀯𑀢𑁆𑀢𑀓𑀪𑀸𑀯𑀢𑁄. 𑀤𑀼𑀯𑀺𑀥𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀲𑀫𑁆𑀧𑀬𑀼𑀢𑁆𑀢𑀢𑁄. 𑀢𑀺𑀯𑀺𑀥𑁄 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀪𑁂𑀤𑀢𑁄. 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀫𑀕𑁆𑀕𑀧𑁆𑀧𑀳𑁂𑀬𑁆𑀬𑀢𑁄. 𑀧𑀜𑁆𑀘𑀯𑀺𑀥𑁄 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑁂𑀤𑀢𑁄. 𑀙𑀩𑁆𑀩𑀺𑀥𑁄 𑀙𑀢𑀡𑁆𑀳𑀸𑀓𑀸𑀬𑀪𑁂𑀤𑀢𑁄.

𑀦𑀺𑀭𑁄𑀥𑁄𑀧𑀺 ¶ 𑀏𑀓𑀯𑀺𑀥𑁄 𑀅𑀲𑀗𑁆𑀔𑀢𑀥𑀸𑀢𑀼𑀪𑀸𑀯𑀢𑁄. 𑀧𑀭𑀺𑀬𑀸𑀬𑁂𑀦 𑀧𑀦 𑀤𑀼𑀯𑀺𑀥𑁄 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀪𑁂𑀤𑀢𑁄. 𑀢𑀺𑀯𑀺𑀥𑁄 𑀪𑀯𑀢𑁆𑀢𑀬𑀯𑀽𑀧𑀲𑀫𑀢𑁄. 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀫𑀕𑁆𑀕𑀸𑀥𑀺𑀕𑀫𑀦𑀻𑀬𑀢𑁄. 𑀧𑀜𑁆𑀘𑀯𑀺𑀥𑁄 𑀧𑀜𑁆𑀘𑀸𑀪𑀺𑀦𑀦𑁆𑀤𑀦𑀯𑀽𑀧𑀲𑀫𑀢𑁄. 𑀙𑀩𑁆𑀩𑀺𑀥𑁄 𑀙𑀢𑀡𑁆𑀳𑀸𑀓𑀸𑀬𑀓𑁆𑀔𑀬𑀪𑁂𑀤𑀢𑁄.

𑀫𑀕𑁆𑀕𑁄𑀧𑀺 𑀏𑀓𑀯𑀺𑀥𑁄 𑀪𑀸𑀯𑁂𑀢𑀩𑁆𑀩𑀢𑁄. 𑀤𑀼𑀯𑀺𑀥𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑁂𑀤𑀢𑁄, 𑀤𑀲𑁆𑀲𑀦𑀪𑀸𑀯𑀦𑀸𑀪𑁂𑀤𑀢𑁄 𑀯𑀸. 𑀢𑀺𑀯𑀺𑀥𑁄 𑀔𑀦𑁆𑀥𑀢𑁆𑀢𑀬𑀪𑁂𑀤𑀢𑁄. 𑀅𑀬𑀜𑁆𑀳𑀺 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦 𑀦𑀺𑀧𑁆𑀧𑀤𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀬𑀣𑀸𑀳 𑁋

‘‘𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀢𑀬𑁄 𑀔𑀦𑁆𑀥𑀸 𑀲𑀗𑁆𑀕𑀳𑀺𑀢𑀸, 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄. 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸. 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸. 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨).

𑀏𑀢𑁆𑀣 𑀳𑀺 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀲𑀻𑀮𑀫𑁂𑀯, 𑀢𑀲𑁆𑀫𑀸 𑀢𑁂 𑀲𑀚𑀸𑀢𑀺𑀢𑁄 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀸𑀴𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑁂𑀢𑀺 𑀪𑀼𑀫𑁆𑀫𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀢𑁆𑀣𑁄 𑀧𑀦 𑀓𑀭𑀡𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀲𑀫𑀸𑀥𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀻𑀭𑀺𑀬𑁂 𑀧𑀦 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀼𑀧𑀓𑀸𑀭𑁄 𑀳𑀼𑀢𑁆𑀯𑀸 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁂𑀲𑀼 𑀢𑀻𑀲𑀼 𑀲𑀳𑀸𑀬𑁂𑀲𑀼 𑀏𑀓𑁄 𑀲𑀼𑀧𑀼𑀧𑁆𑀨𑀺𑀢𑀁 𑀘𑀫𑁆𑀧𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀤𑀼𑀢𑀺𑀬𑁄 𑀑𑀦𑀫𑀺𑀢𑁆𑀯𑀸 ¶ 𑀧𑀺𑀝𑁆𑀞𑀺𑀁 𑀤𑀤𑁂𑀬𑁆𑀬, 𑀲𑁄 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸𑀧𑀺 𑀓𑀫𑁆𑀧𑀫𑀸𑀦𑁄 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀇𑀢𑀭𑁄 𑀅𑀁𑀲𑀓𑀽𑀝𑀁 𑀉𑀧𑀦𑀸𑀫𑁂𑀬𑁆𑀬. 𑀲𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀏𑀓𑀢𑁄 ¶ 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀸 𑀢𑀬𑁄 𑀲𑀳𑀸𑀬𑀸 𑀯𑀺𑀬 𑀳𑀺 𑀏𑀓𑀢𑁄 𑀚𑀸𑀢𑀸 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸. 𑀲𑀼𑀧𑀼𑀧𑁆𑀨𑀺𑀢𑀘𑀫𑁆𑀧𑀓𑁄 𑀯𑀺𑀬 𑀆𑀭𑀫𑁆𑀫𑀡𑀁. 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺. 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺. 𑀬𑀣𑀸 𑀢𑁂𑀲𑀼 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀇𑀢𑀭𑁄 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀯𑀻𑀭𑀺𑀬𑁂 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀼𑀧𑀓𑀸𑀭𑁄 𑀲𑀫𑀸𑀥𑀺 𑀲𑀓𑁆𑀓𑁄𑀢𑀺 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁. 𑀢𑀲𑁆𑀫𑀸 𑀲𑀫𑀸𑀥𑀺𑀬𑁂𑀯𑁂𑀢𑁆𑀣 𑀲𑀚𑀸𑀢𑀺𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄, 𑀯𑀸𑀬𑀸𑀫𑀲𑀢𑀺𑀬𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀲𑀼𑀧𑀺 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀢𑀓𑁆𑀓𑁂 𑀧𑀦 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀤𑁂𑀦𑁆𑀢𑁂 𑀲𑀓𑁆𑀓𑁄𑀢𑀺. 𑀓𑀣𑀁? 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀓𑀳𑀸𑀧𑀡𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀲𑀼 𑀑𑀮𑁄𑀓𑁂𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀘𑀓𑁆𑀔𑀼𑀢𑀮𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀳𑀺 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀦 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁂𑀦 𑀧𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁂𑀦 𑀯𑀺𑀢𑀓𑁆𑀓𑁂𑀦 𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬𑀸𑀤𑀸𑀬 𑀤𑀺𑀦𑁆𑀦𑀫𑁂𑀯 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯 𑀲𑀚𑀸𑀢𑀺𑀢𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀓𑀺𑀭𑀺𑀬𑀯𑀲𑁂𑀦 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺.

𑀇𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀫𑀕𑁆𑀕𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀯𑀺𑀥𑁄 𑀔𑀦𑁆𑀥𑀢𑁆𑀢𑀬𑀪𑁂𑀤𑀢𑁄’’𑀢𑀺. 𑀘𑀢𑀼𑀩𑁆𑀩𑀺𑀥𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀯𑀲𑁂𑀦𑁂𑀯.

𑀅𑀧𑀺𑀘 𑀲𑀩𑁆𑀩𑀸𑀦𑁂𑀯 𑀲𑀘𑁆𑀘𑀸𑀦𑀺 𑀏𑀓𑀯𑀺𑀥𑀸𑀦𑀺 𑀅𑀯𑀺𑀢𑀣𑀢𑁆𑀢𑀸, 𑀅𑀪𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀸. 𑀤𑀼𑀯𑀺𑀥𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄, 𑀲𑀗𑁆𑀔𑀢𑀸𑀲𑀗𑁆𑀔𑀢𑀢𑁄 𑀯𑀸. 𑀢𑀺𑀯𑀺𑀥𑀸𑀦𑀺 𑀤𑀲𑁆𑀲𑀦-𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀢𑁄, 𑀅𑀧𑁆𑀧𑀳𑀸𑀢𑀩𑁆𑀩𑀢𑁄 𑀘. 𑀘𑀢𑀼𑀩𑁆𑀩𑀺𑀥𑀸𑀦𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑀢𑁄𑀢𑀺 𑀏𑀯𑀫𑁂𑀢𑁆𑀣 𑀏𑀓𑀯𑀺𑀥𑀸𑀤𑀻𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁬𑁯. 𑀲𑀪𑀸𑀕𑀯𑀺𑀲𑀪𑀸𑀕𑀢𑁄𑀢𑀺 ¶ ¶ 𑀲𑀩𑁆𑀩𑀸𑀦𑁂𑀯 𑀲𑀘𑁆𑀘𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀸𑀦𑀺 𑀅𑀯𑀺𑀢𑀣𑀢𑁄 𑀅𑀢𑁆𑀢𑀲𑀼𑀜𑁆𑀜𑀢𑁄 𑀤𑀼𑀓𑁆𑀓𑀭𑀧𑀝𑀺𑀯𑁂𑀥𑀢𑁄 𑀘. 𑀬𑀣𑀸𑀳 𑁋

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀦𑀦𑁆𑀤, 𑀓𑀢𑀫𑀁 𑀦𑀼 𑀔𑁄 𑀤𑀼𑀓𑁆𑀓𑀭𑀢𑀭𑀁 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀸, 𑀬𑁄 𑀯𑀸 𑀤𑀽𑀭𑀢𑁄𑀯 𑀲𑀼𑀔𑀼𑀫𑁂𑀦 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀅𑀲𑀦𑀁 𑀅𑀢𑀺𑀧𑀸𑀢𑁂𑀬𑁆𑀬 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀅𑀯𑀺𑀭𑀸𑀥𑀺𑀢𑀁, 𑀬𑁄 𑀯𑀸 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺? 𑀏𑀢𑀤𑁂𑀯, 𑀪𑀦𑁆𑀢𑁂, 𑀤𑀼𑀓𑁆𑀓𑀭𑀢𑀭𑀜𑁆𑀘𑁂𑀯 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀜𑁆𑀘, 𑀬𑁄 𑀯𑀸 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺. 𑀢𑀢𑁄 𑀔𑁄 𑀢𑁂, 𑀆𑀦𑀦𑁆𑀤, 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀭𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀬𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁧𑁫).

𑀯𑀺𑀲𑀪𑀸𑀕𑀸𑀦𑀺 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀢𑁄. 𑀧𑀼𑀭𑀺𑀫𑀸𑀦𑀺 𑀘 𑀤𑁆𑀯𑁂 𑀲𑀪𑀸𑀕𑀸𑀦𑀺 𑀤𑀼𑀭𑀯𑀕𑀸𑀳𑀢𑁆𑀣𑁂𑀦 𑀕𑀫𑁆𑀪𑀻𑀭𑀢𑁆𑀢𑀸 𑀮𑁄𑀓𑀺𑀬𑀢𑁆𑀢𑀸 𑀲𑀸𑀲𑀯𑀢𑁆𑀢𑀸 𑀘. 𑀯𑀺𑀲𑀪𑀸𑀕𑀸𑀦𑀺 𑀨𑀮𑀳𑁂𑀢𑀼𑀪𑁂𑀤𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀧𑁆𑀧𑀳𑀸𑀢𑀩𑁆𑀩𑀢𑁄 𑀘. 𑀧𑀘𑁆𑀙𑀺𑀫𑀸𑀦𑀺𑀧𑀺 𑀤𑁆𑀯𑁂 𑀲𑀪𑀸𑀕𑀸𑀦𑀺 𑀕𑀫𑁆𑀪𑀻𑀭𑀢𑁆𑀢𑁂𑀦 𑀤𑀼𑀭𑀯𑀕𑀸𑀳𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀢𑁆𑀢𑀸 𑀅𑀦𑀸𑀲𑀯𑀢𑁆𑀢𑀸 𑀘. 𑀯𑀺𑀲𑀪𑀸𑀕𑀸𑀦𑀺 𑀯𑀺𑀲𑀬𑀯𑀺𑀲𑀬𑀻𑀪𑁂𑀤𑀢𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀢𑁄 𑀘. 𑀧𑀞𑀫𑀢𑀢𑀺𑀬𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀨𑀮𑀸𑀧𑀤𑁂𑀲𑀢𑁄. 𑀯𑀺𑀲𑀪𑀸𑀕𑀸𑀦𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀢𑁄. 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀳𑁂𑀢𑀼𑀅𑀧𑀤𑁂𑀲𑀢𑁄. 𑀯𑀺𑀲𑀪𑀸𑀕𑀸𑀦𑀺 𑀏𑀓𑀦𑁆𑀢𑀓𑀼𑀲𑀮𑀸𑀓𑀼𑀲𑀮𑀢𑁄. 𑀧𑀞𑀫𑀘𑀢𑀼𑀢𑁆𑀣𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀲𑀗𑁆𑀔𑀢𑀢𑁄. 𑀯𑀺𑀲𑀪𑀸𑀕𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀘𑀸𑀧𑀺 𑀲𑀪𑀸𑀕𑀸𑀦𑀺 𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀪𑀸𑀯𑀢𑁄. 𑀯𑀺𑀲𑀪𑀸𑀕𑀸𑀦𑀺 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀢𑁄.

𑀇𑀢𑀺 𑀏𑀯𑀁 𑀧𑀓𑀸𑀭𑁂𑀳𑀺, 𑀦𑀬𑁂𑀳𑀺 𑀘 𑀯𑀺𑀘𑀓𑁆𑀔𑀡𑁄;

𑀯𑀺𑀚𑀜𑁆𑀜𑀸 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀲𑀪𑀸𑀕𑀯𑀺𑀲𑀪𑀸𑀕𑀢𑀦𑁆𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁭. 𑀧𑀜𑁆𑀜𑀸𑀪𑀽𑀫𑀺𑀦𑀺𑀤𑁆𑀤𑁂𑀲𑁄

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸

𑁫𑁭𑁦. 𑀇𑀤𑀸𑀦𑀺 ¶ ¶ ‘‘𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀪𑀽𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀇𑀫𑀺𑀲𑁆𑀲𑀸 𑀧𑀜𑁆𑀜𑀸𑀬 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀲𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀘𑁂𑀯, 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀘 𑀅𑀯𑀲𑁂𑀲𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄.

𑀢𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀢𑀸𑀯 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄? 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 (𑀲𑀁. 𑀦𑀺. 𑁨.𑁧).

𑀚𑀭𑀸𑀫𑀭𑀡𑀸𑀤𑀬𑁄 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸? 𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁. 𑀚𑀸𑀢𑀺, 𑀪𑀺𑀓𑁆𑀔𑀯𑁂…𑀧𑁂… 𑀪𑀯𑁄… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀸… 𑀯𑁂𑀤𑀦𑀸… 𑀨𑀲𑁆𑀲𑁄… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑀸… 𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 ¶ 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 (𑀲𑀁. 𑀦𑀺. 𑁨.𑁨𑁦).

𑁫𑁭𑁧. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀧𑀘𑁆𑀘𑀬𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀸. 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 ¶ 𑀘𑁂? 𑀪𑀕𑀯𑀢𑁄 𑀯𑀘𑀦𑁂𑀦. 𑀪𑀕𑀯𑀢𑀸 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀤𑁂𑀲𑀦𑀸𑀲𑀼𑀢𑁆𑀢𑁂 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄? 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁, 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑀁 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀅𑀪𑀺𑀲𑀫𑁂𑀢𑀺, 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀪𑀺𑀲𑀫𑁂𑀢𑁆𑀯𑀸 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺, 𑀧𑀲𑁆𑀲𑀣𑀸𑀢𑀺 𑀘𑀸𑀳. 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀪𑀯𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁…𑀧𑁂… 𑀉𑀢𑁆𑀢𑀸𑀦𑀻𑀓𑀭𑁄𑀢𑀺 𑀧𑀲𑁆𑀲𑀣𑀸𑀢𑀺 𑀘𑀸𑀳. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀬𑀸 𑀢𑀢𑁆𑀭 𑀢𑀣𑀢𑀸 𑀅𑀯𑀺𑀢𑀣𑀢𑀸 𑀅𑀦𑀜𑁆𑀜𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 (𑀲𑀁. 𑀦𑀺. 𑁨.𑁨𑁦).

𑁫𑁭𑁨. 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀦𑁆𑀢𑁂𑀦 𑀢𑀣𑀢𑀸𑀤𑀻𑀳𑀺 𑀯𑁂𑀯𑀘𑀦𑁂𑀳𑀺 𑀧𑀘𑁆𑀘𑀬𑀥𑀫𑁆𑀫𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀚𑀭𑀸𑀫𑀭𑀡𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀮𑀓𑁆𑀔𑀡𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀦𑀭𑀲𑁄, 𑀓𑀼𑀫𑁆𑀫𑀕𑁆𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑁄 𑀧𑀦𑀸𑀬𑀁 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀽𑀦𑀸𑀥𑀺𑀓𑁂𑀳𑁂𑀯 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀫𑁆𑀪𑀯𑀢𑁄 𑀢𑀣𑀢𑀸𑀢𑀺, 𑀲𑀸𑀫𑀕𑁆𑀕𑀺𑀁 𑀉𑀧𑀕𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀫𑀼𑀳𑀼𑀢𑁆𑀢𑀫𑁆𑀧𑀺 𑀢𑀢𑁄 𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀸𑀦𑀁 𑀅𑀲𑀫𑁆𑀪𑀯𑀸𑀪𑀸𑀯𑀢𑁄 𑀅𑀯𑀺𑀢𑀣𑀢𑀸𑀢𑀺, 𑀅𑀜𑁆𑀜𑀥𑀫𑁆𑀫𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄 𑀅𑀦𑀜𑁆𑀜𑀣𑀢𑀸𑀢𑀺, 𑀬𑀣𑀸𑀯𑀼𑀢𑁆𑀢𑀸𑀦𑀁 𑀏𑀢𑁂𑀲𑀁 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀢𑁄 𑀯𑀸 𑀧𑀘𑁆𑀘𑀬𑀲𑀫𑀽𑀳𑀢𑁄 𑀯𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀯𑀼𑀢𑁆𑀢𑁄.

𑁫𑁭𑁩. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄, 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑁫𑁭𑁪. 𑀓𑁂𑀘𑀺 ¶ 𑀧𑀦 𑀧𑀝𑀺𑀘𑁆𑀘 𑀲𑀫𑁆𑀫𑀸 𑀘 𑀢𑀺𑀢𑁆𑀣𑀺𑀬𑀧𑀭𑀺𑀓𑀧𑁆𑀧𑀺𑀢𑀧𑀓𑀢𑀺𑀧𑀼𑀭𑀺𑀲𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑁄 𑀉𑀧𑁆𑀧𑀸𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀏𑀯𑀁 𑀉𑀧𑁆𑀧𑀸𑀤𑀫𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑀤𑀦𑁆𑀢𑀺 ¶ , 𑀢𑀁 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑀼𑀢𑁆𑀢𑀸𑀪𑀸𑀯𑀢𑁄, 𑀲𑀼𑀢𑁆𑀢𑀯𑀺𑀭𑁄𑀥𑀢𑁄, 𑀕𑀫𑁆𑀪𑀻𑀭𑀦𑀬𑀸𑀲𑀫𑁆𑀪𑀯𑀢𑁄, 𑀲𑀤𑁆𑀤𑀪𑁂𑀤𑀢𑁄 𑀘. ‘‘𑀉𑀧𑁆𑀧𑀸𑀤𑀫𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀳𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀢𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀘 𑀯𑀤𑀦𑁆𑀢𑀲𑁆𑀲 𑀧𑀤𑁂𑀲𑀯𑀺𑀳𑀸𑀭𑀲𑀼𑀢𑁆𑀢𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀓𑀣𑀁? 𑀪𑀕𑀯𑀢𑁄 𑀳𑀺 ‘‘𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀻’’𑀢𑀺 (𑀫𑀳𑀸𑀯. 𑁧) 𑀆𑀤𑀺𑀯𑀘𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑁄 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀯𑀺𑀳𑀸𑀭𑁄, 𑀧𑀤𑁂𑀲𑀯𑀺𑀳𑀸𑀭𑁄 𑀘 𑀢𑀲𑁆𑀲𑁂𑀓𑀤𑁂𑀲𑀯𑀺𑀳𑀸𑀭𑁄. 𑀬𑀣𑀸𑀳 ‘‘𑀬𑁂𑀦 𑀲𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑁂𑀦 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄 𑀯𑀺𑀳𑀭𑀸𑀫𑀺, 𑀢𑀲𑁆𑀲 𑀧𑀤𑁂𑀲𑁂𑀦 𑀯𑀺𑀳𑀸𑀲𑀺’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧). 𑀢𑀢𑁆𑀭 𑀘 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑁂𑀦 𑀯𑀺𑀳𑀸𑀲𑀺, 𑀦 𑀉𑀧𑁆𑀧𑀸𑀤𑀫𑀢𑁆𑀢𑀤𑀲𑁆𑀲𑀦𑁂𑀦𑀸𑀢𑀺. 𑀬𑀣𑀸𑀳 ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀯𑀁 𑀉𑀧𑁆𑀧𑀸𑀤𑀫𑀢𑁆𑀢𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀯𑀤𑀦𑁆𑀢𑀲𑁆𑀲 𑀧𑀤𑁂𑀲𑀯𑀺𑀳𑀸𑀭𑀲𑀼𑀢𑁆𑀢𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀢𑀣𑀸 𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀺𑀭𑁄𑀥𑁄.

𑀓𑀘𑁆𑀘𑀸𑀦𑀲𑀼𑀢𑁆𑀢𑁂𑀧𑀺 𑀳𑀺 ‘‘𑀮𑁄𑀓𑀲𑀫𑀼𑀤𑀬𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫) 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀮𑁄𑀓𑀧𑀘𑁆𑀘𑀬𑀢𑁄 ‘‘𑀮𑁄𑀓𑀲𑀫𑀼𑀤𑀬𑁄’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀢𑁆𑀣𑀁 𑀧𑀓𑀸𑀲𑀺𑀢𑁄, 𑀦 𑀉𑀧𑁆𑀧𑀸𑀤𑀫𑀢𑁆𑀢𑀁. 𑀦 𑀳𑀺 𑀉𑀧𑁆𑀧𑀸𑀤𑀫𑀢𑁆𑀢𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀫𑀼𑀕𑁆𑀖𑀸𑀢𑁄 𑀳𑁄𑀢𑀺. 𑀧𑀘𑁆𑀘𑀬𑀸𑀦𑀼𑀧𑀭𑀫𑀤𑀲𑁆𑀲𑀦𑁂𑀦 𑀧𑀦 𑀳𑁄𑀢𑀺. 𑀧𑀘𑁆𑀘𑀬𑀸𑀦𑀼𑀧𑀭𑀫𑁂 𑀨𑀮𑀸𑀦𑀼𑀧𑀭𑀫𑀢𑁄𑀢𑀺. 𑀏𑀯𑀁 𑀉𑀧𑁆𑀧𑀸𑀤𑀫𑀢𑁆𑀢𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀯𑀤𑀦𑁆𑀢𑀲𑁆𑀲 𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀺𑀭𑁄𑀥𑁄𑀧𑀺 𑀆𑀧𑀚𑁆𑀚𑀢𑀺.

𑀕𑀫𑁆𑀪𑀻𑀭𑀦𑀬𑀸𑀲𑀫𑁆𑀪𑀯𑀢𑁄𑀢𑀺 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦). 𑀕𑀫𑁆𑀪𑀻𑀭𑀢𑁆𑀢𑀜𑁆𑀘 𑀦𑀸𑀫 𑀘𑀢𑀼𑀩𑁆𑀩𑀺𑀥𑀁, 𑀢𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀁 𑀉𑀧𑁆𑀧𑀸𑀤𑀫𑀢𑁆𑀢𑁂 𑀦𑀢𑁆𑀣𑀺. 𑀘𑀢𑀼𑀩𑁆𑀩𑀺𑀥𑀦𑀬𑀧𑀝𑀺𑀫𑀡𑁆𑀟𑀺𑀢𑀜𑁆𑀘𑁂𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑀡𑁆𑀡𑀬𑀦𑁆𑀢𑀺, 𑀢𑀫𑁆𑀧𑀺 𑀦𑀬𑀘𑀢𑀼𑀓𑁆𑀓𑀁 𑀉𑀧𑁆𑀧𑀸𑀤𑀫𑀢𑁆𑀢𑁂 𑀦𑀢𑁆𑀣𑀻𑀢𑀺 𑀕𑀫𑁆𑀪𑀻𑀭𑀦𑀬𑀸𑀲𑀫𑁆𑀪𑀯𑀢𑁄𑀧𑀺 𑀦 𑀉𑀧𑁆𑀧𑀸𑀤𑀫𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

𑁫𑁭𑁫. 𑀲𑀤𑁆𑀤𑀪𑁂𑀤𑀢𑁄𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑁄 𑀘 𑀧𑀦𑀸𑀬𑀁 𑀲𑀫𑀸𑀦𑁂 𑀓𑀢𑁆𑀢𑀭𑀺 𑀧𑀼𑀩𑁆𑀩𑀓𑀸𑀮𑁂 𑀧𑀬𑀼𑀚𑁆𑀚𑀫𑀸𑀦𑁄 𑀅𑀢𑁆𑀣𑀲𑀺𑀤𑁆𑀥𑀺𑀓𑀭𑁄 ¶ 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁, ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁪𑁩). 𑀇𑀥 𑀧𑀦 𑀪𑀸𑀯𑀲𑀸𑀥𑀦𑁂𑀦 𑀉𑀧𑁆𑀧𑀸𑀤𑀲𑀤𑁆𑀤𑁂𑀦 ¶ 𑀲𑀤𑁆𑀥𑀺𑀁 𑀧𑀬𑀼𑀚𑁆𑀚𑀫𑀸𑀦𑁄 𑀲𑀫𑀸𑀦𑀲𑁆𑀲 𑀓𑀢𑁆𑀢𑀼 𑀅𑀪𑀸𑀯𑀢𑁄 𑀲𑀤𑁆𑀤𑀪𑁂𑀤𑀁 𑀕𑀘𑁆𑀙𑀢𑀺, 𑀦 𑀘 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀲𑀤𑁆𑀤𑀪𑁂𑀤𑀢𑁄𑀧𑀺 𑀦 𑀉𑀧𑁆𑀧𑀸𑀤𑀫𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘‘𑀳𑁄𑀢𑀺-𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑀬𑀺𑀲𑁆𑀲𑀸𑀫 ‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀳𑁄𑀢𑀻’𑀢𑀺’’, 𑀢𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀬𑁄𑀕𑀸𑀪𑀸𑀯𑀢𑁄 𑀘𑁂𑀯, 𑀉𑀧𑁆𑀧𑀸𑀤𑀲𑁆𑀲 𑀘 𑀉𑀧𑁆𑀧𑀸𑀤𑀧𑀢𑁆𑀢𑀺𑀤𑁄𑀲𑀢𑁄. ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 (𑀲𑀁. 𑀦𑀺. 𑁨.𑁧). 𑀇𑀫𑁂𑀲𑀼 𑀳𑀺 𑀧𑀤𑁂𑀲𑀼 𑀏𑀓𑁂𑀦𑀧𑀺 𑀲𑀤𑁆𑀥𑀺𑀁 𑀳𑁄𑀢𑀺-𑀲𑀤𑁆𑀤𑁄 𑀬𑁄𑀕𑀁 𑀦 𑀕𑀘𑁆𑀙𑀢𑀺, 𑀦 𑀘 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀲𑀘𑁂 𑀪𑀯𑁂𑀬𑁆𑀬, 𑀉𑀧𑁆𑀧𑀸𑀤𑀲𑁆𑀲𑀸𑀧𑀺 𑀉𑀧𑁆𑀧𑀸𑀤𑁄 𑀧𑀸𑀧𑀼𑀡𑁂𑀬𑁆𑀬𑀸𑀢𑀺.

𑁫𑁭𑁬. 𑀬𑁂𑀧𑀺 𑀫𑀜𑁆𑀜𑀦𑁆𑀢𑀺 ‘‘𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀪𑀸𑀯𑁄 𑀘 𑀦𑀸𑀫 𑀬𑁄 𑀆𑀓𑀸𑀭𑁄 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀗𑁆𑀔𑀸𑀭𑀸𑀤𑀺𑀧𑀸𑀢𑀼𑀪𑀸𑀯𑁂 𑀳𑁂𑀢𑀼, 𑀲𑁄. 𑀢𑀲𑁆𑀫𑀺𑀜𑁆𑀘 𑀲𑀗𑁆𑀔𑀸𑀭𑀯𑀺𑀓𑀸𑀭𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀸’’𑀢𑀺, 𑀢𑁂𑀲𑀁 𑀢𑀁 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀸𑀤𑀻𑀦𑀁 𑀳𑁂𑀢𑀼𑀯𑀘𑀦𑀢𑁄. 𑀪𑀕𑀯𑀢𑀸 𑀳𑀺 ‘‘𑀢𑀲𑁆𑀫𑀸𑀢𑀺𑀳, 𑀆𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼, 𑀏𑀢𑀁 𑀦𑀺𑀤𑀸𑀦𑀁, 𑀏𑀲 𑀲𑀫𑀼𑀤𑀬𑁄, 𑀏𑀲 𑀧𑀘𑁆𑀘𑀬𑁄 𑀚𑀭𑀸𑀫𑀭𑀡𑀲𑁆𑀲 𑀬𑀤𑀺𑀤𑀁 𑀚𑀸𑀢𑀺…𑀧𑁂… 𑀲𑀗𑁆𑀔𑀸𑀭𑀸𑀦𑀁, 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸’’𑀢𑀺 (𑀤𑀻. 𑀦𑀺. 𑁨.𑁯𑁮 𑀆𑀤𑀬𑁄) 𑀏𑀯𑀁 𑀅𑀯𑀺𑀚𑁆𑀚𑀸𑀤𑀬𑁄𑀯 𑀳𑁂𑀢𑀽𑀢𑀺 𑀯𑀼𑀢𑁆𑀢𑀸, 𑀦 𑀢𑁂𑀲𑀁 𑀯𑀺𑀓𑀸𑀭𑁄. 𑀢𑀲𑁆𑀫𑀸 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀧𑀘𑁆𑀘𑀬𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀢𑀁 𑀲𑀫𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁭𑁭. 𑀬𑀸 𑀧𑀦𑁂𑀢𑁆𑀣 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀇𑀫𑀸𑀬 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀉𑀧𑁆𑀧𑀸𑀤𑁄𑀬𑁂𑀯𑀸𑀬𑀁 𑀯𑀼𑀢𑁆𑀢𑁄𑀢𑀺 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀇𑀫𑀲𑁆𑀲 𑀧𑀤𑀲𑁆𑀲 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀽𑀧𑀲𑀫𑁂𑀢𑀩𑁆𑀩𑀸. 𑀪𑀕𑀯𑀢𑀸 𑀳𑀺,

𑀤𑁆𑀯𑁂𑀥𑀸 𑀢𑀢𑁄 𑀧𑀯𑀢𑁆𑀢𑁂, 𑀥𑀫𑁆𑀫𑀲𑀫𑀽𑀳𑁂 𑀬𑀢𑁄 𑀇𑀤𑀁 𑀯𑀘𑀦𑀁;

𑀢𑀧𑁆𑀧𑀘𑁆𑀘𑀬𑁄 𑀢𑀢𑁄𑀬𑀁, 𑀨𑀮𑁄𑀧𑀘𑀸𑀭𑁂𑀦 𑀇𑀢𑀺 𑀯𑀼𑀢𑁆𑀢𑁄.

𑀬𑁄 𑀳𑀺 𑀅𑀬𑀁 𑀧𑀘𑁆𑀘𑀬𑀢𑀸𑀬 𑀧𑀯𑀢𑁆𑀢𑁄 𑀥𑀫𑁆𑀫𑀲𑀫𑀽𑀳𑁄, 𑀢𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀤𑀁 𑀯𑀘𑀦𑀁 𑀤𑁆𑀯𑀺𑀥𑀸 𑀇𑀘𑁆𑀙𑀦𑁆𑀢𑀺. 𑀲𑁄 𑀳𑀺 𑀬𑀲𑁆𑀫𑀸 𑀧𑀢𑀻𑀬𑀫𑀸𑀦𑁄 𑀳𑀺𑀢𑀸𑀬 𑀲𑀼𑀔𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀘𑁆𑀘𑁂𑀢𑀼𑀫𑀭𑀳𑀦𑁆𑀢𑀺 ¶ 𑀦𑀁 𑀧𑀡𑁆𑀟𑀺𑀢𑀸𑀢𑀺 𑀧𑀝𑀺𑀘𑁆𑀘𑁄. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀘 𑀲𑀳 𑀲𑀫𑁆𑀫𑀸 𑀘 𑀉𑀧𑁆𑀧𑀚𑁆𑀚𑀢𑀺, 𑀦 𑀏𑀓𑁂𑀓𑀢𑁄, 𑀦𑀸𑀧𑀺 𑀅𑀳𑁂𑀢𑀼𑀢𑁄𑀢𑀺 𑀲𑀫𑀼𑀧𑁆𑀧𑀸𑀤𑁄. 𑀏𑀯𑀁 𑀧𑀝𑀺𑀘𑁆𑀘𑁄 𑀘 𑀲𑁄 𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ¶ . 𑀅𑀧𑀺𑀘 𑀲𑀳 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑀼𑀧𑁆𑀧𑀸𑀤𑁄, 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀧𑀦 𑀧𑀝𑀺𑀘𑁆𑀘 𑀅𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀏𑀯𑀫𑁆𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀢𑀲𑁆𑀲 𑀘𑀸𑀬𑀁 𑀳𑁂𑀢𑀼𑀲𑀫𑀽𑀳𑁄 𑀧𑀘𑁆𑀘𑀬𑁄𑀢𑀺 𑀢𑀧𑁆𑀧𑀘𑁆𑀘𑀬𑀢𑁆𑀢𑀸 𑀅𑀬𑀫𑁆𑀧𑀺, 𑀬𑀣𑀸 𑀮𑁄𑀓𑁂 𑀲𑁂𑀫𑁆𑀳𑀲𑁆𑀲 𑀧𑀘𑁆𑀘𑀬𑁄 𑀕𑀼𑀴𑁄 𑀲𑁂𑀫𑁆𑀳𑁄 𑀕𑀼𑀴𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀘 𑀲𑀸𑀲𑀦𑁂 𑀲𑀼𑀔𑀧𑁆𑀧𑀘𑁆𑀘𑀬𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀇𑀘𑁆𑀘𑁂𑀯 𑀨𑀮𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁭𑁮. 𑀅𑀣 𑀯𑀸,

𑀧𑀝𑀺𑀫𑀼𑀔𑀫𑀺𑀢𑁄𑀢𑀺 𑀯𑀼𑀢𑁆𑀢𑁄, 𑀳𑁂𑀢𑀼𑀲𑀫𑀽𑀳𑁄 𑀅𑀬𑀁 𑀧𑀝𑀺𑀘𑁆𑀘𑁄𑀢𑀺;

𑀲𑀳𑀺𑀢𑁂 𑀉𑀧𑁆𑀧𑀸𑀤𑁂𑀢𑀺 𑀘, 𑀇𑀢𑀺 𑀯𑀼𑀢𑁆𑀢𑁄 𑀲𑁄 𑀲𑀫𑀼𑀧𑁆𑀧𑀸𑀤𑁄.

𑀬𑁄 𑀳𑀺 𑀏𑀲 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀸𑀢𑀼𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀤𑀺𑀏𑀓𑁂𑀓𑀳𑁂𑀢𑀼𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀲𑀫𑀽𑀳𑁄, 𑀲𑁄 𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀝𑁆𑀞𑁂𑀦 𑀅𑀯𑁂𑀓𑀮𑁆𑀮𑀝𑁆𑀞𑁂𑀦 𑀘 𑀲𑀸𑀫𑀕𑁆𑀕𑀺𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀝𑀺𑀫𑀼𑀔𑀁 𑀇𑀢𑁄 𑀕𑀢𑁄𑀢𑀺 𑀓𑀢𑁆𑀯𑀸 𑀧𑀝𑀺𑀘𑁆𑀘𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀁 𑀲𑀳𑀺𑀢𑁂𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑀼𑀧𑁆𑀧𑀸𑀤𑁄𑀢𑀺𑀧𑀺 𑀯𑀼𑀢𑁆𑀢𑁄. 𑀏𑀯𑀫𑁆𑀧𑀺 𑀧𑀝𑀺𑀘𑁆𑀘𑁄 𑀘 𑀲𑁄 𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

𑁫𑁭𑁯. 𑀅𑀧𑀭𑁄 𑀦𑀬𑁄 𑁋

𑀧𑀘𑁆𑀘𑀬𑀢𑀸 𑀅𑀜𑁆𑀜𑁄𑀜𑁆𑀜𑀁, 𑀧𑀝𑀺𑀘𑁆𑀘 𑀬𑀲𑁆𑀫𑀸 𑀲𑀫𑀁 𑀲𑀳 𑀘 𑀥𑀫𑁆𑀫𑁂;

𑀅𑀬𑀫𑀼𑀧𑁆𑀧𑀸𑀤𑁂𑀢𑀺 𑀢𑀢𑁄𑀧𑀺, 𑀏𑀯𑀫𑀺𑀥 𑀪𑀸𑀲𑀺𑀢𑀸 𑀫𑀼𑀦𑀺𑀦𑀸.

𑀅𑀯𑀺𑀚𑁆𑀚𑀸𑀤𑀺𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀧𑀘𑁆𑀘𑀬𑁂𑀲𑀼 𑀳𑀺 𑀬𑁂 𑀧𑀘𑁆𑀘𑀬𑀸 𑀬𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀦 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀧𑀝𑀺𑀘𑁆𑀘 𑀅𑀜𑁆𑀜𑀫𑀜𑁆𑀜𑀯𑁂𑀓𑀮𑁆𑀮𑁂 𑀲𑀢𑀺 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑀸𑀢𑀺. 𑀢𑀲𑁆𑀫𑀸 𑀧𑀝𑀺𑀘𑁆𑀘 𑀲𑀫𑀁 𑀲𑀳 𑀘 𑀦 𑀏𑀓𑁂𑀓𑀤𑁂𑀲𑀁, 𑀦𑀸𑀧𑀺 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦 𑀅𑀬𑀁 𑀧𑀘𑁆𑀘𑀬𑀢𑀸 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑀸𑀦𑀼𑀲𑀸𑀭𑀯𑁄𑀳𑀸𑀭𑀓𑀼𑀲𑀮𑁂𑀦 𑀫𑀼𑀦𑀺𑀦𑀸 𑀏𑀯𑀫𑀺𑀥 𑀪𑀸𑀲𑀺𑀢𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑁆𑀯𑁂𑀯 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄.

𑁫𑁮𑁦. 𑀏𑀯𑀁 ¶ 𑀪𑀸𑀲𑀫𑀸𑀦𑁂𑀦 𑀘,

𑀧𑀼𑀭𑀺𑀫𑁂𑀦 𑀲𑀲𑁆𑀲𑀢𑀸𑀤𑀻𑀦, 𑀫𑀪𑀸𑀯𑁄 𑀧𑀘𑁆𑀙𑀺𑀫𑁂𑀦 𑀘 𑀧𑀤𑁂𑀦;

𑀉𑀘𑁆𑀙𑁂𑀤𑀸𑀤𑀺𑀯𑀺𑀖𑀸𑀢𑁄, 𑀤𑁆𑀯𑀬𑁂𑀦 𑀧𑀭𑀺𑀤𑀻𑀧𑀺𑀢𑁄 𑀜𑀸𑀬𑁄.

𑀧𑀼𑀭𑀺𑀫𑁂𑀦𑀸𑀢𑀺 ¶ 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀧𑀭𑀺𑀤𑀻𑀧𑀓𑁂𑀦 𑀧𑀝𑀺𑀘𑁆𑀘𑀧𑀤𑁂𑀦 𑀧𑀯𑀢𑁆𑀢𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀆𑀬𑀢𑁆𑀢𑀯𑀼𑀢𑁆𑀢𑀺𑀢𑁆𑀢𑀸 𑀲𑀲𑁆𑀲𑀢𑀸𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀯𑀲𑀯𑀢𑁆𑀢𑀺𑀯𑀸𑀤𑀧𑁆𑀧𑀪𑁂𑀤𑀸𑀦𑀁 𑀲𑀲𑁆𑀲𑀢𑀸𑀤𑀻𑀦𑀁 𑀅𑀪𑀸𑀯𑁄 𑀧𑀭𑀺𑀤𑀻𑀧𑀺𑀢𑁄 𑀳𑁄𑀢𑀺? 𑀓𑀺𑀁 𑀳𑀺 𑀲𑀲𑁆𑀲𑀢𑀸𑀦𑀁, 𑀅𑀳𑁂𑀢𑀼𑀆𑀤𑀺𑀯𑀲𑁂𑀦 𑀯𑀸 𑀧𑀯𑀢𑁆𑀢𑀸𑀦𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸𑀢𑀺? 𑀧𑀘𑁆𑀙𑀺𑀫𑁂𑀦 𑀘 𑀧𑀤𑁂𑀦𑀸𑀢𑀺 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀧𑀭𑀺𑀤𑀻𑀧𑀓𑁂𑀦 𑀲𑀫𑀼𑀧𑁆𑀧𑀸𑀤𑀧𑀤𑁂𑀦 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀯𑀺𑀳𑀢𑀸 𑀉𑀘𑁆𑀙𑁂𑀤𑀦𑀢𑁆𑀣𑀺𑀓𑀅𑀓𑀺𑀭𑀺𑀬𑀯𑀸𑀤𑀸𑀢𑀺 𑀉𑀘𑁆𑀙𑁂𑀤𑀸𑀤𑀺𑀯𑀺𑀖𑀸𑀢𑁄 𑀧𑀭𑀺𑀤𑀻𑀧𑀺𑀢𑁄 𑀳𑁄𑀢𑀺. 𑀧𑀼𑀭𑀺𑀫𑀧𑀼𑀭𑀺𑀫𑀧𑀘𑁆𑀘𑀬𑀯𑀲𑁂𑀦 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀼𑀢𑁄 𑀉𑀘𑁆𑀙𑁂𑀤𑁄, 𑀦𑀢𑁆𑀣𑀺𑀓𑀸𑀓𑀺𑀭𑀺𑀬𑀯𑀸𑀤𑀸 𑀘𑀸𑀢𑀺. 𑀤𑁆𑀯𑀬𑁂𑀦𑀸𑀢𑀺 𑀲𑀓𑀮𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀘𑀦𑁂𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀦𑁆𑀢𑀢𑀺𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀢𑁄 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸, ‘‘𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀜𑁆𑀜𑁄 𑀓𑀭𑁄𑀢𑀺 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀯𑀸𑀤𑀧𑁆𑀧𑀳𑀸𑀦𑀁, 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀅𑀦𑀪𑀺𑀦𑀺𑀯𑁂𑀲𑁄, 𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀦𑁆𑀢𑀺 𑀅𑀬𑀁 𑀜𑀸𑀬𑁄 𑀧𑀭𑀺𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑀘𑀦𑀫𑀢𑁆𑀢𑀲𑁆𑀲 𑀅𑀢𑁆𑀣𑁄.

𑁫𑁮𑁧. 𑀬𑀸 𑀧𑀦𑀸𑀬𑀁 𑀪𑀕𑀯𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀦𑁆𑀢𑁂𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀓𑁆𑀔𑀺𑀢𑁆𑀢𑀸 𑀢𑀦𑁆𑀢𑀺, 𑀢𑀲𑁆𑀲𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁 𑀑𑀢𑀭𑀺𑀢𑁆𑀯𑀸 𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦 𑀲𑀓𑀲𑀫𑀬𑀁 𑀅𑀯𑁄𑀓𑁆𑀓𑀫𑀦𑁆𑀢𑁂𑀦 𑀧𑀭𑀲𑀫𑀬𑀁 𑀅𑀦𑀸𑀬𑀽𑀳𑀦𑁆𑀢𑁂𑀦 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦 𑀯𑀺𑀦𑀬𑀁 𑀅𑀦𑀼𑀮𑁄𑀫𑁂𑀦𑁆𑀢𑁂𑀦 𑀫𑀳𑀸𑀧𑀤𑁂𑀲𑁂 𑀑𑀮𑁄𑀓𑁂𑀦𑁆𑀢𑁂𑀦 𑀥𑀫𑁆𑀫𑀁 𑀤𑀻𑀧𑁂𑀦𑁆𑀢𑁂𑀦 𑀅𑀢𑁆𑀣𑀁 𑀲𑀗𑁆𑀕𑀸𑀳𑁂𑀦𑁆𑀢𑁂𑀦 𑀢𑀫𑁂𑀯𑀢𑁆𑀣𑀁 𑀧𑀼𑀦𑀭𑀸𑀯𑀢𑁆𑀢𑁂𑀢𑁆𑀯𑀸 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀘 𑀬𑀲𑁆𑀫𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀺, 𑀧𑀓𑀢𑀺𑀬𑀸𑀧𑀺 𑀘 𑀤𑀼𑀓𑁆𑀓𑀭𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀘𑁆𑀘𑀁 𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺, 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘;

𑀤𑀼𑀤𑁆𑀤𑀲𑀸 𑀘𑀢𑀼𑀭𑁄 𑀥𑀫𑁆𑀫𑀸, 𑀤𑁂𑀲𑁂𑀢𑀼𑀁 𑀘 𑀲𑀼𑀤𑀼𑀓𑁆𑀓𑀭𑀸’’𑀢𑀺.

𑀢𑀲𑁆𑀫𑀸 ¶ 𑀅𑀜𑁆𑀜𑀢𑁆𑀭 𑀆𑀕𑀫𑀸𑀥𑀺𑀕𑀫𑀧𑁆𑀧𑀢𑁆𑀢𑁂𑀳𑀺 𑀦 𑀲𑀼𑀓𑀭𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲𑀢𑁆𑀣𑀯𑀡𑁆𑀡𑀦𑀸𑀢𑀺 𑀧𑀭𑀺𑀢𑀼𑀮𑀬𑀺𑀢𑁆𑀯𑀸,

𑀯𑀢𑁆𑀢𑀼𑀓𑀸𑀫𑁄 ¶ 𑀅𑀳𑀁 𑀅𑀚𑁆𑀚, 𑀧𑀘𑁆𑀘𑀬𑀸𑀓𑀸𑀭𑀯𑀡𑁆𑀡𑀦𑀁;

𑀧𑀢𑀺𑀝𑁆𑀞𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄𑀯 𑀲𑀸𑀕𑀭𑀁.

𑀲𑀸𑀲𑀦𑀁 𑀧𑀦𑀺𑀤𑀁 𑀦𑀸𑀦𑀸, 𑀤𑁂𑀲𑀦𑀸𑀦𑀬𑀫𑀡𑁆𑀟𑀺𑀢𑀁;

𑀧𑀼𑀩𑁆𑀩𑀸𑀘𑀭𑀺𑀬𑀫𑀕𑁆𑀕𑁄 𑀘, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀧𑀯𑀢𑁆𑀢𑀢𑀺.

𑀬𑀲𑁆𑀫𑀸 𑀢𑀲𑁆𑀫𑀸 𑀢𑀤𑀼𑀪𑀬𑀁, 𑀲𑀦𑁆𑀦𑀺𑀲𑁆𑀲𑀸𑀬𑀢𑁆𑀣𑀯𑀡𑁆𑀡𑀦𑀁;

𑀆𑀭𑀪𑀺𑀲𑁆𑀲𑀸𑀫𑀺 𑀏𑀢𑀲𑁆𑀲, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑁋

‘‘𑀬𑁄 𑀓𑁄𑀘𑀺 𑀫𑀁 𑀅𑀝𑁆𑀞𑀺𑀓𑀢𑁆𑀯𑀸 𑀲𑀼𑀡𑁂𑀬𑁆𑀬,

𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁;

𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁,

𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’𑀢𑀺.

𑁫𑁮𑁨. 𑀇𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀳𑀺 𑀆𑀤𑀺𑀢𑁄𑀬𑁂𑀯 𑀢𑀸𑀯,

𑀤𑁂𑀲𑀦𑀸𑀪𑁂𑀤𑀢𑁄 𑀅𑀢𑁆𑀣, 𑀮𑀓𑁆𑀔𑀡𑁂𑀓𑀯𑀺𑀥𑀸𑀤𑀺𑀢𑁄. 𑀅𑀗𑁆𑀕𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀤𑁂𑀲𑀦𑀸𑀪𑁂𑀤𑀢𑁄𑀢𑀺 𑀪𑀕𑀯𑀢𑁄 𑀳𑀺 𑀯𑀮𑁆𑀮𑀺𑀳𑀸𑀭𑀓𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀯𑀮𑁆𑀮𑀺𑀕𑀳𑀡𑀁 𑀯𑀺𑀬 𑀆𑀤𑀺𑀢𑁄 𑀯𑀸 𑀫𑀚𑁆𑀛𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀁, 𑀢𑀣𑀸 𑀧𑀭𑀺𑀬𑁄𑀲𑀸𑀦𑀢𑁄 𑀯𑀸 𑀫𑀚𑁆𑀛𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀻𑀢𑀺 𑀘𑀢𑀼𑀩𑁆𑀩𑀺𑀥𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸.

𑀬𑀣𑀸 𑀳𑀺 𑀯𑀮𑁆𑀮𑀺𑀳𑀸𑀭𑀓𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀽𑀮𑀫𑁂𑀯 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀫𑀽𑀮𑁂 ¶ 𑀙𑁂𑀢𑁆𑀯𑀸 𑀲𑀩𑁆𑀩𑀁 𑀆𑀓𑀟𑁆𑀠𑀺𑀢𑁆𑀯𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 (𑀫. 𑀦𑀺. 𑁧.𑁪𑁦𑁨; 𑀲𑀁. 𑀦𑀺. 𑁨.𑁨) 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀢𑀺.

𑀬𑀣𑀸 𑀧𑀦 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀚𑁆𑀛𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀺𑀪𑀸𑀕𑀜𑁆𑀜𑁂𑀯 𑀆𑀓𑀟𑁆𑀠𑀺𑀢𑁆𑀯𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀢𑀲𑁆𑀲 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 ¶ 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻. 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻, 𑀢𑀤𑀼𑀧𑀸𑀤𑀸𑀦𑀁. 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁯; 𑀲𑀁. 𑀦𑀺. 𑁩.𑁫) 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸𑀧𑀺 𑀤𑁂𑀲𑁂𑀢𑀺.

𑀬𑀣𑀸 𑀘 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀅𑀕𑁆𑀕𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀅𑀕𑁆𑀕𑀸𑀦𑀼𑀲𑀸𑀭𑁂𑀦 𑀬𑀸𑀯 𑀫𑀽𑀮𑀸 𑀲𑀩𑁆𑀩𑀁 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀚𑀸𑀢𑀺𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁 𑀦𑁄 𑀯𑀸 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻𑀢𑀺? 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀦𑁄 𑀯𑀸 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁩) 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺𑀢𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀢𑀺.

𑀬𑀣𑀸 𑀧𑀦𑁂𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑀮𑁆𑀮𑀺𑀬𑀸 𑀫𑀚𑁆𑀛𑀫𑁂𑀯 𑀧𑀞𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀑𑀢𑀭𑀦𑁆𑀢𑁄 𑀬𑀸𑀯 𑀫𑀽𑀮𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀪𑀕𑀯𑀸 ‘‘𑀇𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀦𑁆𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸? 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸, 𑀢𑀡𑁆𑀳𑀸𑀲𑀫𑀼𑀤𑀬𑀸, 𑀢𑀡𑁆𑀳𑀸𑀚𑀸𑀢𑀺𑀓𑀸, 𑀢𑀡𑁆𑀳𑀸𑀧𑀪𑀯𑀸. 𑀢𑀡𑁆𑀳𑀸 𑀓𑀺𑀦𑁆𑀦𑀺𑀤𑀸𑀦𑀸… 𑀯𑁂𑀤𑀦𑀸… 𑀨𑀲𑁆𑀲𑁄… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑀸 𑀓𑀺𑀦𑁆𑀦𑀺𑀤𑀸𑀦𑀸…𑀧𑁂… 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀦𑀺𑀤𑀸𑀦𑀸…𑀧𑁂… 𑀅𑀯𑀺𑀚𑁆𑀚𑀸𑀧𑀪𑀯𑀸’’𑀢𑀺 (𑀲𑀁. 𑀦𑀺. 𑁨.𑁧𑁧) 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺𑀢𑁄 𑀤𑁂𑀲𑁂𑀢𑀺.

𑁫𑁮𑁩. 𑀓𑀲𑁆𑀫𑀸 𑀧𑀦𑁂𑀯𑀁 𑀤𑁂𑀲𑁂𑀢𑀻𑀢𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸 𑀲𑀬𑀜𑁆𑀘 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀢𑁆𑀢𑀸. 𑀲𑀫𑀦𑁆𑀢𑀪𑀤𑁆𑀤𑀓𑁄 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀢𑀢𑁄 𑀢𑀢𑁄 𑀜𑀸𑀬𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺𑀬𑁂𑀯 ¶ . 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀘 𑀪𑀕𑀯𑀸 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑀝𑀺𑀲𑀫𑁆𑀪𑀺𑀤𑀸𑀬𑁄𑀕𑁂𑀦 𑀘𑀢𑀼𑀩𑁆𑀩𑀺𑀥𑀕𑀫𑁆𑀪𑀻𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘. 𑀲𑁄 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀢𑁆𑀢𑀸 𑀦𑀸𑀦𑀸𑀦𑀬𑁂𑀳𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀯𑀺𑀲𑁂𑀲𑀢𑁄 𑀧𑀦𑀲𑁆𑀲 𑀬𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸, 𑀲𑀸 𑀧𑀯𑀢𑁆𑀢𑀺𑀓𑀸𑀭𑀡𑀯𑀺𑀪𑀸𑀕𑀲𑀁𑀫𑀽𑀴𑁆𑀳𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀦𑀼𑀧𑀲𑁆𑀲𑀢𑁄 𑀬𑀣𑀸𑀲𑀓𑁂𑀳𑀺 𑀓𑀸𑀭𑀡𑁂𑀳𑀺 𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀯𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀸. 𑀬𑀸 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸, 𑀲𑀸 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 ¶ 𑀆𑀧𑀦𑁆𑀦𑁄 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪) 𑀦𑀬𑁂𑀦 𑀓𑀺𑀘𑁆𑀙𑀸𑀧𑀦𑁆𑀦𑀁 𑀮𑁄𑀓𑀁 𑀅𑀦𑀼𑀯𑀺𑀮𑁄𑀓𑀬𑀢𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀯𑁂𑀥𑀸𑀦𑀼𑀲𑀸𑀭𑁂𑀦 𑀢𑀲𑁆𑀲 𑀢𑀲𑁆𑀲 𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀭𑀡𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀬𑀸 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺 𑀧𑀯𑀢𑁆𑀢𑀸, 𑀲𑀸 𑀆𑀳𑀸𑀭𑀦𑀺𑀤𑀸𑀦𑀯𑀯𑀢𑁆𑀣𑀸𑀧𑀦𑀸𑀦𑀼𑀲𑀸𑀭𑁂𑀦 𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀅𑀢𑀻𑀢𑀤𑁆𑀥𑀢𑁄 𑀧𑀪𑀼𑀢𑀺 𑀳𑁂𑀢𑀼𑀨𑀮𑀧𑀝𑀺𑀧𑀸𑀝𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀬𑀸 𑀧𑀦 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀁 𑀧𑀯𑀢𑁆𑀢𑀸, 𑀲𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀤𑁆𑀥𑀸𑀦𑁂 𑀅𑀦𑀸𑀕𑀢𑀤𑁆𑀥𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀅𑀦𑀸𑀕𑀢𑀤𑁆𑀥𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀢𑀸𑀲𑀼 𑀬𑀸 𑀧𑀯𑀢𑁆𑀢𑀺𑀓𑀸𑀭𑀡𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑁂𑀦𑁂𑀬𑁆𑀬𑀚𑀦𑀲𑁆𑀲 𑀬𑀣𑀸𑀲𑀓𑁂𑀳𑀺 𑀓𑀸𑀭𑀡𑁂𑀳𑀺 𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸 𑀯𑀼𑀢𑁆𑀢𑀸, 𑀲𑀸 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁮𑁪. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸, 𑀓𑀺𑀁 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬 𑀅𑀯𑀺𑀚𑁆𑀚𑀸𑀧𑀺 𑀅𑀓𑀸𑀭𑀡𑀁 𑀫𑀽𑀮𑀓𑀸𑀭𑀡𑀁 𑀮𑁄𑀓𑀲𑁆𑀲𑀸𑀢𑀺? 𑀦 𑀅𑀓𑀸𑀭𑀡𑀁. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀳𑀺 𑀅𑀯𑀺𑀚𑁆𑀚𑀸𑀬 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀧𑀦 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀽𑀮𑀓𑀸𑀭𑀡𑀁 𑀲𑀺𑀬𑀸, 𑀓𑁄 𑀧𑀦 𑀲𑁄𑀢𑀺? 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀸𑀯𑁄.

𑀪𑀕𑀯𑀸 𑀳𑀺 𑀯𑀝𑁆𑀝𑀓𑀣𑀁 𑀓𑀣𑁂𑀦𑁆𑀢𑁄 𑀤𑁆𑀯𑁂 𑀥𑀫𑁆𑀫𑁂 𑀲𑀻𑀲𑀁 𑀓𑀢𑁆𑀯𑀸 𑀓𑀣𑁂𑀢𑀺, 𑀅𑀯𑀺𑀚𑁆𑀚𑀁 𑀯𑀸. 𑀬𑀣𑀸𑀳 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 ‘𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺, 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑀇𑀤𑀧𑁆𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 (𑀅. 𑀦𑀺. 𑁧𑁦.𑁬𑁧). 𑀪𑀯𑀢𑀡𑁆𑀳𑀁 𑀯𑀸. 𑀬𑀣𑀸𑀳 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬 ‘𑀇𑀢𑁄 𑀧𑀼𑀩𑁆𑀩𑁂 𑀪𑀯𑀢𑀡𑁆𑀳𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺, 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑀢𑀡𑁆𑀳𑀸’’𑀢𑀺 (𑀅. 𑀦𑀺. 𑁧𑁦.𑁬𑁨).

𑁫𑁮𑁫. 𑀓𑀲𑁆𑀫𑀸 ¶ 𑀧𑀦 𑀪𑀕𑀯𑀸 𑀯𑀝𑁆𑀝𑀓𑀣𑀁 𑀓𑀣𑁂𑀦𑁆𑀢𑁄 𑀇𑀫𑁂 𑀤𑁆𑀯𑁂 𑀥𑀫𑁆𑀫𑁂 𑀲𑀻𑀲𑀁 𑀓𑀢𑁆𑀯𑀸 𑀓𑀣𑁂𑀢𑀻𑀢𑀺? 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀽𑀢𑀢𑁆𑀢𑀸. 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼 𑀅𑀯𑀺𑀚𑁆𑀚𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄 𑀅𑀕𑁆𑀕𑀺𑀲𑀦𑁆𑀢𑀸𑀧𑀮𑀕𑀼𑀴𑀸𑀪𑀺𑀖𑀸𑀢𑀧𑀭𑀺𑀲𑁆𑀲𑀫𑀸𑀪𑀺𑀪𑀽𑀢𑀸 𑀯𑀚𑁆𑀛𑀕𑀸𑀯𑀻 𑀢𑀸𑀬 𑀧𑀭𑀺𑀲𑁆𑀲𑀫𑀸𑀢𑀼𑀭𑀢𑀸𑀬 𑀦𑀺𑀭𑀲𑁆𑀲𑀸𑀤𑀫𑁆𑀧𑀺 𑀅𑀢𑁆𑀢𑀦𑁄 𑀅𑀦𑀢𑁆𑀣𑀸𑀯𑀳𑀫𑁆𑀧𑀺 𑀘 𑀉𑀡𑁆𑀳𑁄𑀤𑀓𑀧𑀸𑀦𑀁 ¶ 𑀯𑀺𑀬 𑀓𑀺𑀮𑁂𑀲𑀲𑀦𑁆𑀢𑀸𑀧𑀢𑁄 𑀦𑀺𑀭𑀲𑁆𑀲𑀸𑀤𑀫𑁆𑀧𑀺 𑀤𑀼𑀕𑁆𑀕𑀢𑀺𑀦𑀺𑀧𑀸𑀢𑀦𑀢𑁄 𑀘 𑀅𑀢𑁆𑀢𑀦𑁄 𑀅𑀦𑀢𑁆𑀣𑀸𑀯𑀳𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺. 𑀲𑀼𑀕𑀢𑀺𑀕𑀸𑀫𑀺𑀦𑁄 𑀧𑀦 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼 𑀪𑀯𑀢𑀡𑁆𑀳𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀪𑀯𑀢𑀡𑁆𑀳𑀸𑀪𑀺𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄 𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀕𑀸𑀯𑀻 𑀲𑀻𑀢𑀽𑀤𑀓𑀢𑀡𑁆𑀳𑀸𑀬 𑀲𑀅𑀲𑁆𑀲𑀸𑀤𑀁 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀜𑁆𑀘 𑀲𑀻𑀢𑀽𑀤𑀓𑀧𑀸𑀦𑀁 𑀯𑀺𑀬 𑀓𑀺𑀮𑁂𑀲𑀲𑀦𑁆𑀢𑀸𑀧𑀯𑀺𑀭𑀳𑀢𑁄 𑀲𑀅𑀲𑁆𑀲𑀸𑀤𑀁 𑀲𑀼𑀕𑀢𑀺𑀲𑀫𑁆𑀧𑀸𑀧𑀦𑁂𑀦 𑀅𑀢𑁆𑀢𑀦𑁄 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀺𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀼𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺.

𑁫𑁮𑁬. 𑀏𑀢𑁂𑀲𑀼 𑀧𑀦 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑁆𑀣𑀘𑀺 𑀪𑀕𑀯𑀸 𑀏𑀓𑀥𑀫𑁆𑀫𑀫𑀽𑀮𑀺𑀓𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁, ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀽𑀧𑀦𑀺𑀲𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀽𑀧𑀦𑀺𑀲𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁨𑁩). 𑀢𑀣𑀸 ‘‘𑀉𑀧𑀸𑀤𑀸𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁫𑁨). 𑀓𑀢𑁆𑀣𑀘𑀺 𑀉𑀪𑀬𑀫𑀽𑀮𑀺𑀓𑀫𑁆𑀧𑀺. 𑀲𑁂𑀬𑁆𑀬𑀣𑀺𑀤𑀁, ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀏𑀯𑀫𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄. 𑀇𑀢𑀺 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀁 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁. 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄 𑀲𑀴𑁂𑀯𑀸𑀬𑀢𑀦𑀸𑀦𑀺, 𑀬𑁂𑀳𑀺 𑀨𑀼𑀝𑁆𑀞𑁄 𑀩𑀸𑀮𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁯). 𑀢𑀸𑀲𑀼 𑀤𑁂𑀲𑀦𑀸𑀲𑀼 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸𑀯𑀲𑁂𑀦 𑀏𑀓𑀥𑀫𑁆𑀫𑀫𑀽𑀮𑀺𑀓𑀸 𑀤𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯𑁂𑀢𑁆𑀣 𑀤𑁂𑀲𑀦𑀸𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁮𑁭. 𑀅𑀢𑁆𑀣𑀢𑁄𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀢𑁄. 𑀲𑁂𑀬𑁆𑀬𑀣𑀺𑀤𑀁, 𑀧𑀽𑀭𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀅𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀢𑀁 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸. 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀩𑁆𑀩𑀬𑁄𑀦𑀺𑀕𑀢𑀺𑀪𑀯𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 ¶ 𑀅𑀯𑀺𑀚𑁆𑀚𑀸. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀔𑀦𑁆𑀥𑀸𑀤𑀻𑀲𑀼 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀅𑀧𑀺𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 ¶ 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀙𑀸𑀤𑀦𑀢𑁄𑀧𑀺 𑀅𑀯𑀺𑀚𑁆𑀚𑀸.

𑀬𑀁 𑀧𑀝𑀺𑀘𑁆𑀘 𑀨𑀮𑀫𑁂𑀢𑀺, 𑀲𑁄 𑀧𑀘𑁆𑀘𑀬𑁄. 𑀧𑀝𑀺𑀘𑁆𑀘𑀸𑀢𑀺 𑀦 𑀯𑀺𑀦𑀸 𑀅𑀧𑀘𑁆𑀘𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀉𑀧𑀓𑀸𑀭𑀓𑀝𑁆𑀞𑁄 𑀧𑀘𑁆𑀘𑀬𑀝𑁆𑀞𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸.

𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸. 𑀅𑀧𑀺𑀘 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸𑀢𑀺 𑀤𑀼𑀯𑀺𑀥𑀸 𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀢𑀬𑁄, 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀢𑀬𑁄𑀢𑀺 𑀇𑀫𑁂 𑀙 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀫𑀢𑁆𑀢𑀫𑁂𑀯 𑀳𑁄𑀦𑁆𑀢𑀺.

𑀲𑀗𑁆𑀔𑀢𑀲𑀗𑁆𑀔𑀸𑀭𑁄, 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑁄, 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑁄, 𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀲𑀗𑁆𑀔𑀸𑀭-𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸. 𑀢𑀢𑁆𑀣 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬) 𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀲𑀗𑁆𑀔𑀢𑀲𑀗𑁆𑀔𑀸𑀭𑀸 𑀦𑀸𑀫. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀢𑁂𑀪𑀽𑀫𑀓𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸, 𑀢𑁂𑀧𑀺 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 (𑀤𑀻. 𑀦𑀺. 𑁨.𑁨𑁨𑁧; 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬) 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀯𑀺𑀲𑀼𑀁 𑀧𑀦 𑀦𑁂𑀲𑀁 𑀆𑀕𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀢𑁂𑀪𑀽𑀫𑀺𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀧𑀦 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 ‘‘𑀅𑀯𑀺𑀚𑁆𑀚𑀸𑀕𑀢𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀜𑁆𑀘𑁂𑀯 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁧) 𑀆𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀧𑀦 𑀯𑀻𑀭𑀺𑀬𑀁 𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 ‘‘𑀬𑀸𑀯𑀢𑀺𑀓𑀸 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀢𑀺, 𑀢𑀸𑀯𑀢𑀺𑀓𑀸 𑀕𑀦𑁆𑀢𑁆𑀯𑀸 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁫) 𑀆𑀕𑀢𑁄.

𑀦 𑀓𑁂𑀯𑀮𑀜𑁆𑀘 𑀏𑀢𑁂𑀬𑁂𑀯, 𑀅𑀜𑁆𑀜𑁂𑀧𑀺 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼𑀦𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄, 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁪) 𑀦𑀬𑁂𑀦 𑀲𑀗𑁆𑀔𑀸𑀭-𑀲𑀤𑁆𑀤𑁂𑀦 𑀆𑀕𑀢𑀸 𑀅𑀦𑁂𑀓𑁂 𑀲𑀗𑁆𑀔𑀸𑀭𑀸. 𑀢𑁂𑀲𑀼 𑀦𑀢𑁆𑀣𑀺 𑀲𑁄 𑀲𑀗𑁆𑀔𑀸𑀭𑁄, 𑀬𑁄 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀳𑀺 𑀲𑀗𑁆𑀕𑀳𑀁 𑀦 𑀕𑀘𑁆𑀙𑁂𑀬𑁆𑀬, 𑀇𑀢𑁄 𑀧𑀭𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀯𑀼𑀢𑁆𑀢𑁂 ¶ ¶ 𑀧𑀦 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀦𑀫𑀢𑀻𑀢𑀺 𑀦𑀸𑀫𑀁. 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁. 𑀆𑀬𑁂 𑀢𑀦𑁄𑀢𑀺 𑀆𑀬𑀢𑀜𑁆𑀘 𑀦𑀬𑀢𑀻𑀢𑀺 𑀆𑀬𑀢𑀦𑀁. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀁. 𑀪𑀯𑀢𑀺 𑀪𑀸𑀯𑀬𑀢𑀺 𑀘𑀸𑀢𑀺 𑀪𑀯𑁄. 𑀚𑀦𑀦𑀁 𑀚𑀸𑀢𑀺. 𑀚𑀺𑀭𑀡𑀁 𑀚𑀭𑀸. 𑀫𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀭𑀡𑀁. 𑀲𑁄𑀘𑀦𑀁 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁. 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀯𑀲𑁂𑀦 𑀯𑀸 𑀤𑁆𑀯𑀺𑀥𑀸 𑀔𑀡𑀢𑀻𑀢𑀺𑀧𑀺 𑀤𑀼𑀓𑁆𑀔𑀁. 𑀤𑀼𑀫𑁆𑀫𑀦𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄.

𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀸𑀤𑀻𑀳𑁂𑀯, 𑀅𑀣 𑀔𑁄 𑀲𑀩𑁆𑀩𑀧𑀤𑁂𑀳𑀺 𑀲𑀫𑁆𑀪𑀯𑀦𑁆𑀢𑀺-𑀲𑀤𑁆𑀤𑀲𑁆𑀲 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀭𑀣𑀸 𑀳𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀓𑀭𑁄𑀦𑁆𑀢𑀻𑀢𑀺 𑀦 𑀧𑀜𑁆𑀜𑀸𑀬𑁂𑀬𑁆𑀬, 𑀲𑀫𑁆𑀪𑀯𑀦𑁆𑀢𑀻𑀢𑀺 𑀧𑀦 𑀬𑁄𑀚𑀦𑀸𑀬 𑀲𑀢𑀺 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀦𑀬𑀦𑀺𑀤𑀲𑁆𑀲𑀦𑀁. 𑀢𑁂𑀦 𑀅𑀯𑀺𑀚𑁆𑀚𑀸𑀤𑀻𑀳𑁂𑀯 𑀓𑀸𑀭𑀡𑁂𑀳𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲, 𑀲𑀓𑀮𑀲𑁆𑀲 𑀯𑀸. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑀽𑀳𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀦 𑀲𑀼𑀔𑀲𑀼𑀪𑀸𑀤𑀻𑀦𑀁. 𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀳𑁄𑀢𑀻𑀢𑀺 𑀲𑀫𑁆𑀪𑀯𑀢𑀺. 𑀏𑀯𑀫𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁮𑁮. 𑀮𑀓𑁆𑀔𑀡𑀸𑀤𑀺𑀢𑁄𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀺𑀢𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀜𑁆𑀜𑀸𑀡𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀲𑀫𑁆𑀫𑁄𑀳𑀦𑀭𑀲𑀸, 𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀆𑀲𑀯𑀧𑀤𑀝𑁆𑀞𑀸𑀦𑀸. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀆𑀬𑀽𑀳𑀦𑀭𑀲𑀸, 𑀘𑁂𑀢𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀚𑁆𑀚𑀸𑀧𑀤𑀝𑁆𑀞𑀸𑀦𑀸. 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀧𑀤𑀝𑁆𑀞𑀸𑀦𑀁, 𑀯𑀢𑁆𑀣𑀸𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑀁 𑀯𑀸. 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀲𑀫𑁆𑀧𑀬𑁄𑀕𑀭𑀲𑀁, 𑀅𑀯𑀺𑀦𑀺𑀩𑁆𑀪𑁄𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀯𑀺𑀓𑀺𑀭𑀡𑀭𑀲𑀁, 𑀅𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀆𑀬𑀢𑀦𑀮𑀓𑁆𑀔𑀡𑀁 𑀲𑀴𑀸𑀬𑀢𑀦𑀁, 𑀤𑀲𑁆𑀲𑀦𑀸𑀤𑀺𑀭𑀲𑀁, 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀗𑁆𑀕𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀴𑀸𑀬𑀢𑀦𑀧𑀤𑀝𑁆𑀞𑀸𑀦𑁄. 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀯𑀺𑀲𑀬𑀭𑀲𑀲𑀫𑁆𑀪𑁄𑀕𑀭𑀲𑀸, 𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀨𑀲𑁆𑀲𑀧𑀤𑀝𑁆𑀞𑀸𑀦𑀸. 𑀳𑁂𑀢𑀼𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀅𑀪𑀺𑀦𑀦𑁆𑀤𑀦𑀭𑀲𑀸, 𑀅𑀢𑀺𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑁂𑀤𑀦𑀸𑀧𑀤𑀝𑁆𑀞𑀸𑀦𑀸. 𑀕𑀳𑀡𑀮𑀓𑁆𑀔𑀡𑀁 ¶ 𑀉𑀧𑀸𑀤𑀸𑀦𑀁, 𑀅𑀫𑀼𑀜𑁆𑀘𑀦𑀭𑀲𑀁, 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀤𑀺𑀝𑁆𑀞𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀓𑀫𑁆𑀫𑀨𑀮𑀮𑀓𑁆𑀔𑀡𑁄 𑀪𑀯𑁄, 𑀪𑀸𑀯𑀦𑀪𑀯𑀦𑀭𑀲𑁄, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄 ¶ , 𑀉𑀧𑀸𑀤𑀸𑀦𑀧𑀤𑀝𑁆𑀞𑀸𑀦𑁄. 𑀚𑀸𑀢𑀺𑀆𑀤𑀻𑀦𑀁 𑀮𑀓𑁆𑀔𑀡𑀸𑀤𑀻𑀦𑀺 𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀸𑀤𑀺𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁮𑁯. 𑀏𑀓𑀯𑀺𑀥𑀸𑀤𑀺𑀢𑁄𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸 𑀅𑀜𑁆𑀜𑀸𑀡𑀸𑀤𑀲𑁆𑀲𑀦𑀫𑁄𑀳𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀸. 𑀅𑀧𑁆𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀸. 𑀢𑀣𑀸 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀢𑁄. 𑀯𑁂𑀤𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄 𑀢𑀺𑀯𑀺𑀥𑀸. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁄 𑀘𑀢𑀼𑀩𑁆𑀩𑀺𑀥𑀸. 𑀕𑀢𑀺𑀧𑀜𑁆𑀘𑀓𑀸𑀤𑀻𑀦𑀯𑀘𑁆𑀙𑀸𑀤𑀦𑀢𑁄 𑀧𑀜𑁆𑀘𑀯𑀺𑀥𑀸. 𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀅𑀭𑀽𑀧𑀥𑀫𑁆𑀫𑁂𑀲𑀼 𑀙𑀩𑁆𑀩𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀔𑀸𑀭𑀸 𑀲𑀸𑀲𑀯𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀸. 𑀓𑀼𑀲𑀮𑀸𑀓𑀼𑀲𑀮𑀢𑁄 𑀤𑀼𑀯𑀺𑀥𑀸. 𑀢𑀣𑀸 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀳𑀻𑀦𑀫𑀚𑁆𑀛𑀺𑀫𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺𑀬𑀢𑀢𑁄. 𑀢𑀺𑀯𑀺𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀪𑀸𑀯𑀢𑁄. 𑀘𑀢𑀼𑀩𑁆𑀩𑀺𑀥𑀸 𑀘𑀢𑀼𑀬𑁄𑀦𑀺𑀲𑀁𑀯𑀢𑁆𑀢𑀦𑀢𑁄. 𑀧𑀜𑁆𑀘𑀯𑀺𑀥𑀸 𑀧𑀜𑁆𑀘𑀕𑀢𑀺𑀕𑀸𑀫𑀺𑀢𑁄.

𑀯𑀺𑀜𑁆𑀜𑀸𑀡𑀁 𑀮𑁄𑀓𑀺𑀬𑀯𑀺𑀧𑀸𑀓𑀸𑀤𑀺𑀪𑀸𑀯𑀢𑁄 𑀏𑀓𑀯𑀺𑀥𑀁. 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀢𑁄 𑀤𑀼𑀯𑀺𑀥𑀁. 𑀪𑀯𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑁄, 𑀯𑁂𑀤𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄, 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀢𑁄 𑀘 𑀢𑀺𑀯𑀺𑀥𑀁. 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀧𑀜𑁆𑀘𑀯𑀺𑀥𑀜𑁆𑀘.

𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀢𑁄 𑀓𑀫𑁆𑀫𑀧𑀘𑁆𑀘𑀬𑀢𑁄 𑀘 𑀏𑀓𑀯𑀺𑀥𑀁. 𑀲𑀸𑀭𑀫𑁆𑀫𑀡𑀦𑀸𑀭𑀫𑁆𑀫𑀡𑀢𑁄 𑀤𑀼𑀯𑀺𑀥𑀁. 𑀅𑀢𑀻𑀢𑀸𑀤𑀺𑀢𑁄 𑀢𑀺𑀯𑀺𑀥𑀁. 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀧𑀜𑁆𑀘𑀯𑀺𑀥𑀜𑁆𑀘.

𑀲𑀴𑀸𑀬𑀢𑀦𑀁 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁄 𑀏𑀓𑀯𑀺𑀥𑀁. 𑀪𑀽𑀢𑀧𑁆𑀧𑀲𑀸𑀤𑀯𑀺𑀜𑁆𑀜𑀸𑀡𑀸𑀤𑀺𑀢𑁄 𑀤𑀼𑀯𑀺𑀥𑀁. 𑀲𑀫𑁆𑀧𑀢𑁆𑀢𑀸𑀲𑀫𑁆𑀧𑀢𑁆𑀢𑀦𑁄𑀪𑀬𑀕𑁄𑀘𑀭𑀢𑁄 𑀢𑀺𑀯𑀺𑀥𑀁. 𑀬𑁄𑀦𑀺𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁄 𑀘𑀢𑀼𑀩𑁆𑀩𑀺𑀥𑀁 𑀧𑀜𑁆𑀘𑀯𑀺𑀥𑀜𑁆𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀏𑀓𑀯𑀺𑀥𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀫𑁂𑀢𑁆𑀣 𑀏𑀓𑀯𑀺𑀥𑀸𑀤𑀺𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁫𑁯𑁦. 𑀅𑀗𑁆𑀕𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀸𑀢𑀺 𑀲𑁄𑀓𑀸𑀤𑀬𑁄 𑀘𑁂𑀢𑁆𑀣 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀺. 𑀬𑀣𑀸𑀳 ¶ 𑁋 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁨). 𑀬𑀸𑀯 𑀘 𑀢𑁂𑀲𑀁 𑀧𑀯𑀢𑁆𑀢𑀺, 𑀢𑀸𑀯 𑀅𑀯𑀺𑀚𑁆𑀚𑀸𑀬𑀸𑀢𑀺 𑀧𑀼𑀦𑀧𑀺 ¶ 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑀫𑁂𑀯 𑀳𑁄𑀢𑀺 𑀪𑀯𑀘𑀓𑁆𑀓𑀁. 𑀢𑀲𑁆𑀫𑀸 𑀢𑁂𑀲𑀁 𑀚𑀭𑀸𑀫𑀭𑀡𑁂𑀦𑁂𑀯 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀬𑀁 𑀢𑀸𑀯𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀧𑀤𑀓𑀣𑀸

𑁫𑁬𑁧. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑀦𑀬𑁄 𑁋 𑀅𑀯𑀺𑀚𑁆𑀚𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀼𑀩𑁆𑀩𑀦𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸, 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡’’𑀦𑁆𑀢𑀺 (𑀥. 𑀲. 𑁧𑁧𑁦𑁬). 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀲𑀘𑁆𑀘𑀤𑁆𑀯𑀬𑀁 𑀲𑁂𑀲𑀝𑁆𑀞𑀸𑀦𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀲𑀘𑁆𑀘𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀢𑀣𑀸 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁, 𑀧𑀼𑀩𑁆𑀩𑀦𑁆𑀢𑀲𑀗𑁆𑀔𑀸𑀢𑀁 𑀅𑀢𑀻𑀢𑀁 𑀔𑀦𑁆𑀥𑀧𑀜𑁆𑀘𑀓𑀁, 𑀅𑀧𑀭𑀦𑁆𑀢𑀲𑀗𑁆𑀔𑀸𑀢𑀁 𑀅𑀦𑀸𑀕𑀢𑀁 𑀔𑀦𑁆𑀥𑀧𑀜𑁆𑀘𑀓𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀲𑀗𑁆𑀔𑀸𑀢𑀁 𑀢𑀤𑀼𑀪𑀬𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀗𑁆𑀔𑀸𑀢𑀁 𑀇𑀤𑀧𑁆𑀧𑀘𑁆𑀘𑀬𑀢𑀜𑁆𑀘𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. ‘‘𑀅𑀬𑀁 𑀅𑀯𑀺𑀚𑁆𑀚𑀸, 𑀇𑀫𑁂 𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀫𑁂𑀢𑁆𑀣 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁫𑁯𑁨. 𑀲𑀗𑁆𑀔𑀸𑀭𑀸𑀢𑀺 𑀧𑀼𑀜𑁆𑀜𑀸𑀤𑀬𑁄 𑀢𑀬𑁄 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄 𑀢𑀬𑁄𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀸 𑀙, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀤𑀸𑀦𑀲𑀻𑀮𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑁂𑀯 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑀸𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀳𑁄𑀦𑁆𑀢𑀺. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 ¶ . 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑀸𑀢𑀺 𑀢𑀬𑁄𑀧𑀺 𑀲𑀗𑁆𑀔𑀸𑀭𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀳𑁄𑀦𑁆𑀢𑀺.

𑀇𑀢𑀭𑁂𑀲𑀼 ¶ 𑀧𑀦 𑀢𑀻𑀲𑀼 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀜𑁆𑀘𑁂𑀢𑀦𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀅𑀬𑀁 𑀢𑀺𑀓𑁄 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀳𑀺 𑀓𑀸𑀬𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸𑀢𑀺 𑀲𑀫𑀯𑀻𑀲𑀢𑀺 𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫. 𑀢𑀸 𑀏𑀯 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀧𑀦𑁂𑀢𑁆𑀣 𑀧𑀭𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀸. 𑀬𑀣𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀺. 𑀢𑀲𑁆𑀫𑀸 𑀲𑀸𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦 𑀲𑀩𑁆𑀩𑀸𑀧𑁂𑀢𑀸 𑀳𑁄𑀦𑁆𑀢𑀺. 𑀉𑀪𑁄𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀽𑀦𑀢𑀺𑀁𑀲𑀢𑀺 𑀘𑁂𑀢𑀦𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺. 𑀇𑀢𑀺 𑀅𑀬𑀁 𑀢𑀺𑀓𑁄 𑀧𑀼𑀭𑀺𑀫𑀢𑁆𑀢𑀺𑀓𑀫𑁂𑀯 𑀧𑀯𑀺𑀲𑀢𑀻𑀢𑀺 𑀅𑀢𑁆𑀣𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁩. 𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺? 𑀅𑀯𑀺𑀚𑁆𑀚𑀸𑀪𑀸𑀯𑁂 𑀪𑀸𑀯𑀢𑁄. 𑀬𑀲𑁆𑀲 𑀳𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀢𑀲𑁆𑀲𑁂𑀯 𑀳𑁂𑀢𑀼𑀪𑀽𑀢𑁂 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺. 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁂𑀧𑀺 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂 𑀲𑀗𑁆𑀔𑀸𑀭𑁂 𑀲𑀼𑀔𑀳𑁂𑀢𑀼𑀢𑁄 𑀫𑀜𑁆𑀜𑀫𑀸𑀦𑁄 𑀆𑀭𑀪𑀢𑀺. 𑀦𑀺𑀭𑁄𑀥𑁂 𑀧𑀦 𑀫𑀕𑁆𑀕𑁂 𑀘 𑀅𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑀲𑁆𑀲 𑀅𑀦𑀺𑀭𑁄𑀥𑀪𑀽𑀢𑁂𑀧𑀺 𑀕𑀢𑀺𑀯𑀺𑀲𑁂𑀲𑁂 𑀤𑀼𑀓𑁆𑀔𑀦𑀺𑀭𑁄𑀥𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦𑀺𑀭𑁄𑀥𑀲𑁆𑀲 𑀘 𑀅𑀫𑀕𑁆𑀕𑀪𑀽𑀢𑁂𑀲𑀼𑀧𑀺 𑀬𑀜𑁆𑀜𑀸𑀫𑀭𑀢𑀧𑀸𑀤𑀻𑀲𑀼 𑀦𑀺𑀭𑁄𑀥𑀫𑀕𑁆𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀧𑀢𑁆𑀣𑀬𑀫𑀸𑀦𑁄 𑀬𑀜𑁆𑀜𑀸𑀫𑀭𑀢𑀧𑀸𑀤𑀺𑀫𑀼𑀔𑁂𑀦 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀺.

𑀅𑀧𑀺𑀘 𑀲𑁄 𑀢𑀸𑀬 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑀢𑀸𑀬 𑀯𑀺𑀲𑁂𑀲𑀢𑁄 𑀚𑀸𑀢𑀺𑀚𑀭𑀸𑀭𑁄𑀕𑀫𑀭𑀡𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀯𑁄𑀓𑀺𑀡𑁆𑀡𑀫𑁆𑀧𑀺 𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 ¶ 𑀆𑀭𑀪𑀢𑀺 𑀤𑁂𑀯𑀘𑁆𑀙𑀭𑀓𑀸𑀫𑀓𑁄 𑀯𑀺𑀬 𑀫𑀭𑀼𑀧𑁆𑀧𑀧𑀸𑀢𑀁. 𑀲𑀼𑀔𑀲𑀫𑁆𑀫𑀢𑀲𑁆𑀲𑀸𑀧𑀺 𑀘 𑀢𑀲𑁆𑀲 𑀧𑀼𑀜𑁆𑀜𑀨𑀮𑀲𑁆𑀲 𑀅𑀦𑁆𑀢𑁂 𑀫𑀳𑀸𑀧𑀭𑀺𑀴𑀸𑀳𑀚𑀦𑀺𑀓𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀧𑁆𑀧𑀲𑁆𑀲𑀸𑀤𑀢𑀜𑁆𑀘 𑀅𑀧𑀲𑁆𑀲𑀦𑁆𑀢𑁄𑀧𑀺 𑀢𑀧𑁆𑀧𑀘𑁆𑀘𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺 𑀲𑀮𑀪𑁄 𑀯𑀺𑀬 𑀤𑀻𑀧𑀲𑀺𑀔𑀸𑀪𑀺𑀦𑀺𑀧𑀸𑀢𑀁, 𑀫𑀥𑀼𑀩𑀺𑀦𑁆𑀤𑀼𑀕𑀺𑀤𑁆𑀥𑁄 𑀯𑀺𑀬 𑀘 𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀮𑁂𑀳𑀦𑀁. 𑀓𑀸𑀫𑀼𑀧𑀲𑁂𑀯𑀦𑀸𑀤𑀻𑀲𑀼 𑀘 𑀲𑀯𑀺𑀧𑀸𑀓𑁂𑀲𑀼 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀸𑀬 𑀘𑁂𑀯 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀘 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀫𑁆𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺, 𑀩𑀸𑀮𑁄 𑀯𑀺𑀬 𑀕𑀽𑀣𑀓𑀻𑀴𑀦𑀁, 𑀫𑀭𑀺𑀢𑀼𑀓𑀸𑀫𑁄 𑀯𑀺𑀬 𑀘 𑀯𑀺𑀲𑀔𑀸𑀤𑀦𑀁. 𑀆𑀭𑀼𑀧𑁆𑀧𑀯𑀺𑀧𑀸𑀓𑁂𑀲𑀼 ¶ 𑀘𑀸𑀧𑀺 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀲𑀲𑁆𑀲𑀢𑀸𑀤𑀺𑀯𑀺𑀧𑀮𑁆𑀮𑀸𑀲𑁂𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑀽𑀢𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺, 𑀤𑀺𑀲𑀸𑀫𑀽𑀴𑁆𑀳𑁄 𑀯𑀺𑀬 𑀧𑀺𑀲𑀸𑀘𑀦𑀕𑀭𑀸𑀪𑀺𑀫𑀼𑀔𑀫𑀕𑁆𑀕𑀕𑀫𑀦𑀁.

𑀏𑀯𑀁 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀯𑀢𑁄𑀯 𑀲𑀗𑁆𑀔𑀸𑀭𑀪𑀸𑀯𑁄, 𑀦 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀲𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀦𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺.

𑀧𑀝𑁆𑀞𑀸𑀦𑀧𑀘𑁆𑀘𑀬𑀓𑀣𑀸

𑁫𑁯𑁪. 𑀏𑀢𑁆𑀣𑀸𑀳 𑁋 𑀕𑀡𑁆𑀳𑀸𑀫 𑀢𑀸𑀯 𑀏𑀢𑀁 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄𑀢𑀺, 𑀇𑀤𑀁 𑀧𑀦 𑀯𑀢𑁆𑀢𑀩𑁆𑀩𑀁 𑀓𑀢𑀫𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺? 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺, 𑀪𑀕𑀯𑀢𑀸 𑀳𑀺 ‘‘𑀳𑁂𑀢𑀼𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀅𑀥𑀺𑀧𑀢𑀺𑀧𑀘𑁆𑀘𑀬𑁄, 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄, 𑀆𑀲𑁂𑀯𑀦𑀧𑀘𑁆𑀘𑀬𑁄, 𑀓𑀫𑁆𑀫𑀧𑀘𑁆𑀘𑀬𑁄, 𑀯𑀺𑀧𑀸𑀓𑀧𑀘𑁆𑀘𑀬𑁄, 𑀆𑀳𑀸𑀭𑀧𑀘𑁆𑀘𑀬𑁄, 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄, 𑀛𑀸𑀦𑀧𑀘𑁆𑀘𑀬𑁄, 𑀫𑀕𑁆𑀕𑀧𑀘𑁆𑀘𑀬𑁄, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀅𑀢𑁆𑀣𑀺𑀧𑀘𑁆𑀘𑀬𑁄, 𑀦𑀢𑁆𑀣𑀺𑀧𑀘𑁆𑀘𑀬𑁄, 𑀯𑀺𑀕𑀢𑀧𑀘𑁆𑀘𑀬𑁄, 𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑀧𑀘𑁆𑀘𑀬𑀼𑀤𑁆𑀤𑁂𑀲) 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸.

𑀢𑀢𑁆𑀣 ¶ 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄, 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁫𑁯𑁫. 𑀢𑀢𑁆𑀣 𑀳𑁂𑀢𑀽𑀢𑀺 𑀯𑀘𑀦𑀸𑀯𑀬𑀯𑀓𑀸𑀭𑀡𑀫𑀽𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀧𑀝𑀺𑀜𑁆𑀜𑀸, 𑀳𑁂𑀢𑀽’’𑀢𑀺𑀆𑀤𑀻𑀲𑀼 𑀳𑀺 𑀮𑁄𑀓𑁂 𑀯𑀘𑀦𑀸𑀯𑀬𑀯𑁄 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀲𑀦𑁂 𑀧𑀦 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁦) 𑀓𑀸𑀭𑀡𑀁. ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁫𑁯) 𑀫𑀽𑀮𑀁 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀯𑀘𑀦𑀢𑁆𑀣𑁄, 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄. 𑀅𑀧𑀘𑁆𑀘𑀓𑁆𑀔𑀸𑀬 𑀦𑀁 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀅𑀧𑀘𑁆𑀘𑀓𑁆𑀔𑀸𑀬 𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀲𑁄 𑀢𑀲𑁆𑀲 ¶ 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀢𑁄 𑀧𑀦 𑀉𑀧𑀓𑀸𑀭𑀓𑀮𑀓𑁆𑀔𑀡𑁄 𑀧𑀘𑁆𑀘𑀬𑁄. 𑀬𑁄 𑀳𑀺 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀯𑀸 𑀉𑀧𑁆𑀧𑀢𑁆𑀢𑀺𑀬𑀸 𑀯𑀸 𑀉𑀧𑀓𑀸𑀭𑀓𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑁄, 𑀳𑁂𑀢𑀼, 𑀓𑀸𑀭𑀡𑀁, 𑀦𑀺𑀤𑀸𑀦𑀁, 𑀲𑀫𑁆𑀪𑀯𑁄, 𑀧𑀪𑀯𑁄𑀢𑀺𑀆𑀤𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁. 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺 𑀲𑀗𑁆𑀔𑁂𑀧𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄.

𑀲𑁄 𑀲𑀸𑀮𑀺𑀆𑀤𑀻𑀦𑀁 𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀯𑀺𑀬, 𑀫𑀡𑀺𑀧𑀪𑀸𑀤𑀻𑀦𑀁 𑀯𑀺𑀬 𑀘 𑀫𑀡𑀺𑀯𑀡𑁆𑀡𑀸𑀤𑀬𑁄 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄𑀢𑀺 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀦𑁆𑀢𑁂 𑀧𑀦 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺. 𑀦 𑀳𑀺 𑀲𑁄 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀢𑀺, 𑀦 𑀘 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧). 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀜𑁆𑀘 𑀯𑀺𑀦𑀸 𑀏𑀢𑁂𑀦 𑀅𑀩𑁆𑀬𑀸𑀓𑀢𑀪𑀸𑀯𑁄 𑀲𑀺𑀤𑁆𑀥𑁄, 𑀲𑀳𑁂𑀢𑀼𑀓𑀸𑀦𑀫𑁆𑀧𑀺 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀧𑀝𑀺𑀩𑀤𑁆𑀥𑁄. 𑀬𑀤𑀺 𑀘 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀽𑀲𑀼 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀲𑀺𑀬𑀸, 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀅𑀮𑁄𑀪𑁄 𑀓𑀼𑀲𑀮𑁄 𑀯𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑁄 𑀯𑀸. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀏𑀯𑀁 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀢𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀯𑀲𑁂𑀦 ¶ 𑀧𑀦 𑀳𑁂𑀢𑀽𑀦𑀁 𑀫𑀽𑀮𑀝𑁆𑀞𑀁 𑀅𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀬𑁆𑀳𑀫𑀸𑀦𑁂 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀚𑁆𑀛𑀢𑀺. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀽𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀅𑀳𑁂𑀢𑀼𑀓𑀸 𑀢𑀺𑀮𑀩𑀻𑀚𑀓𑀸𑀤𑀺𑀲𑁂𑀯𑀸𑀮𑀸 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸. 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁬. 𑀢𑀢𑁄 𑀧𑀭𑁂𑀲𑀼 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑁄 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁨) 𑀆𑀭𑀪𑀺𑀢𑁆𑀯𑀸𑀧𑀺 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁨) 𑀑𑀲𑀸𑀧𑀺𑀢𑀢𑁆𑀢𑀸 𑀦 𑀓𑁄𑀘𑀺 𑀥𑀫𑁆𑀫𑁄 𑀦 𑀳𑁄𑀢𑀺. 𑀬𑀣𑀸 𑀳𑀺 𑀤𑀼𑀩𑁆𑀩𑀮𑁄 𑀧𑀼𑀭𑀺𑀲𑁄 𑀤𑀡𑁆𑀟𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸𑀯 𑀉𑀝𑁆𑀞𑀳𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘, 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀆𑀭𑀩𑁆𑀪𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘. 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁯𑁭. 𑀚𑁂𑀝𑁆𑀞𑀓𑀝𑁆𑀞𑁂𑀦 ¶ 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄, 𑀲𑁄 𑀲𑀳𑀚𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁩.𑁩) 𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦𑁄 𑀘 𑀔𑁄 𑀏𑀓𑀢𑁄. 𑀬𑀤𑀸 𑀳𑀺 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀙𑀦𑁆𑀤𑁄𑀯 𑀅𑀥𑀺𑀧𑀢𑀺, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀬𑀁 𑀧𑀦 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀲𑁄 𑀦𑁂𑀲𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁩).

𑁫𑁯𑁮. 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀲𑀫𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀇𑀤𑀜𑁆𑀘 𑀧𑀘𑁆𑀘𑀬𑀤𑁆𑀯𑀬𑀁 ¶ 𑀩𑀳𑀼𑀥𑀸 𑀧𑀧𑀜𑁆𑀘𑀬𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄, 𑀬𑁄 𑀳𑀺 𑀏𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀸 𑀫𑀦𑁄𑀥𑀸𑀢𑀼, 𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺𑀆𑀤𑀺 𑀘𑀺𑀢𑁆𑀢𑀦𑀺𑀬𑀫𑁄, 𑀲𑁄 𑀬𑀲𑁆𑀫𑀸 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀯𑀲𑁂𑀦𑁂𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁪). 𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑁆𑀯𑁂𑀯 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀦𑀸𑀦𑀁, 𑀉𑀧𑀘𑀬𑀲𑀦𑁆𑀢𑀢𑀻𑀲𑀼 𑀯𑀺𑀬 𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀤𑀼𑀓𑀸𑀤𑀻𑀲𑀼 𑀯𑀺𑀬 𑀘. 𑀅𑀢𑁆𑀣𑀢𑁄 𑀧𑀦 𑀦𑀸𑀦𑀁 𑀦𑀢𑁆𑀣𑀺.

𑀬𑀫𑁆𑀧𑀺 ‘‘𑀅𑀢𑁆𑀣𑀸𑀦𑀦𑁆𑀢𑀭𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑀁, 𑀢𑀁 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀳𑀺 (𑀧𑀝𑁆𑀞𑀸. 𑁧.𑁧.𑁪𑁧𑁮) 𑀯𑀺𑀭𑀼𑀚𑁆𑀛𑀢𑀺. 𑀬𑀫𑁆𑀧𑀺 𑀢𑀢𑁆𑀣 𑀯𑀤𑀦𑁆𑀢𑀺 ‘‘𑀥𑀫𑁆𑀫𑀸𑀦𑀁 𑀲𑀫𑀼𑀝𑁆𑀞𑀸𑀧𑀦𑀲𑀫𑀢𑁆𑀣𑀢𑀸 𑀦 𑀧𑀭𑀺𑀳𑀸𑀬𑀢𑀺, 𑀪𑀸𑀯𑀦𑀸𑀩𑀮𑁂𑀦 𑀧𑀦 𑀯𑀸𑀭𑀺𑀢𑀢𑁆𑀢𑀸 𑀥𑀫𑁆𑀫𑀸 𑀲𑀫𑀦𑀦𑁆𑀢𑀭𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺, 𑀢𑀫𑁆𑀧𑀺 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀅𑀪𑀸𑀯𑀫𑁂𑀯 𑀲𑀸𑀥𑁂𑀢𑀺. 𑀪𑀸𑀯𑀦𑀸𑀩𑀮𑁂𑀦 𑀳𑀺 𑀢𑀢𑁆𑀣 𑀓𑀸𑀮𑀸𑀦𑀦𑁆𑀢𑀭𑀢𑀸 𑀦𑀢𑁆𑀣𑀻𑀢𑀺, 𑀫𑀬𑀫𑁆𑀧𑀺 𑀏𑀢𑀤𑁂𑀯 𑀯𑀤𑀸𑀫. 𑀬𑀲𑁆𑀫𑀸 𑀘 𑀓𑀸𑀮𑀸𑀦𑀦𑁆𑀢𑀭𑀢𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀦 𑀬𑀼𑀚𑁆𑀚𑀢𑀺. 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀳𑀺 𑀢𑁂𑀲𑀁 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀮𑀤𑁆𑀥𑀺. 𑀢𑀲𑁆𑀫𑀸 ¶ 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀅𑀢𑁆𑀣𑀢𑁄. 𑀓𑀣𑀁? 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀺 𑀳𑀺 𑀅𑀦𑀦𑁆𑀢𑀭𑀸. 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀸𑀢𑀺 𑀲𑀫𑀦𑀦𑁆𑀢𑀭𑀸.

𑁫𑁯𑁯. 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀳 𑀉𑀧𑁆𑀧𑀸𑀤𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬. 𑀲𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁, 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀺𑀜𑁆𑀘𑀺𑀓𑀸𑀮𑁂 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁬). 𑀇𑀤𑀁 𑀳𑀤𑀬𑀯𑀢𑁆𑀣𑀼𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁬𑁦𑁦. 𑀅𑀜𑁆𑀜𑀫𑀜𑁆𑀜𑀁 ¶ 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑀓𑀁 𑀢𑀺𑀤𑀡𑁆𑀟𑀓𑀁 𑀯𑀺𑀬. 𑀲𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁭).

𑁬𑁦𑁧. 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀭𑀼𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀧𑀣𑀯𑀻𑀧𑀝𑀸𑀤𑀬𑁄 𑀯𑀺𑀬. 𑀲𑁄 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀳𑀚𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀙𑀝𑁆𑀞𑁄 𑀧𑀦𑁂𑀢𑁆𑀣 𑀓𑁄𑀝𑁆𑀞𑀸𑀲𑁄 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁮) 𑀏𑀯𑀁 𑀯𑀺𑀪𑀢𑁆𑀢𑁄.

𑁬𑁦𑁨. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀢𑀸𑀯 𑀯𑀘𑀦𑀢𑁆𑀣𑁄, 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑀬𑁄. 𑀬𑀣𑀸 𑀧𑀦 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄, 𑀏𑀯𑀁 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄, 𑀩𑀮𑀯𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀩𑀮𑀯𑀓𑀸𑀭𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑁄 ¶ 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 ‘‘𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀲𑁂𑀓𑁆𑀔𑀸 𑀕𑁄𑀢𑁆𑀭𑀪𑀼𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀯𑁄𑀤𑀸𑀦𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺. 𑀲𑁂𑀓𑁆𑀔𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀕𑀭𑀼𑀁𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄. 𑀢𑀢𑁆𑀣 𑀬𑀁 𑀆𑀭𑀫𑁆𑀫𑀡𑀁 𑀕𑀭𑀼𑀁𑀓𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀺𑀬𑀫𑀢𑁄 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀢𑀺 𑀕𑀭𑀼𑀓𑀢𑁆𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 ¶ 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀧𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁯) 𑀦𑀬𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄. 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑁂 𑀧𑀦 𑀦𑁂𑀲𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪) 𑀦𑀬𑁂𑀦 𑀅𑀦𑀦𑁆𑀢𑀭𑀲𑁆𑀲, ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁯) 𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀲𑁆𑀲 𑀆𑀕𑀢𑀢𑁆𑀢𑀸 𑀦𑀺𑀓𑁆𑀔𑁂𑀧𑁂 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀲𑁄𑀧𑀺 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀸 𑀅𑀦𑀼𑀭𑀽𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀬 𑀅𑀦𑀦𑁆𑀢𑀭𑀢𑀸, 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀧𑀘𑁆𑀙𑀺𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂 𑀩𑀮𑀯𑀢𑀸𑀬 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀯𑀺𑀦𑀸𑀧𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀏𑀯𑀁 𑀅𑀦𑀦𑁆𑀢𑀭𑀘𑀺𑀢𑁆𑀢𑀁 𑀯𑀺𑀦𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀸 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀯𑀲𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀩𑀮𑀯𑀓𑀸𑀭𑀡𑀯𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀦 𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑁄 𑀯𑀸 𑀲𑀤𑁆𑀥𑀸𑀲𑀻𑀮𑀸𑀤𑀺 𑀉𑀧𑀲𑁂𑀯𑀺𑀢𑁄 𑀯𑀸 𑀉𑀢𑀼𑀪𑁄𑀚𑀦𑀸𑀤𑀺. 𑀧𑀓𑀢𑀺𑀬𑀸 𑀏𑀯 𑀯𑀸 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀯𑀺𑀧𑀲𑁆𑀲𑀦𑀁 ¶ 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀻𑀮𑀁, 𑀲𑀼𑀢𑀁, 𑀘𑀸𑀕𑀁, 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀤𑁆𑀥𑀸, 𑀲𑀻𑀮𑀁, 𑀲𑀼𑀢𑀁, 𑀘𑀸𑀕𑁄, 𑀧𑀜𑁆𑀜𑀸 𑀲𑀤𑁆𑀥𑀸𑀬, 𑀲𑀻𑀮𑀲𑁆𑀲, 𑀲𑀼𑀢𑀲𑁆𑀲, 𑀘𑀸𑀕𑀲𑁆𑀲, 𑀧𑀜𑁆𑀜𑀸𑀬, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀦𑀬𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀇𑀫𑁂 𑀲𑀤𑁆𑀥𑀸𑀤𑀬𑁄 𑀧𑀓𑀢𑀸 𑀘𑁂𑀯 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀉𑀧𑀦𑀺𑀲𑁆𑀲𑀬𑀸 𑀘𑀸𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺.

𑁬𑁦𑁩. 𑀧𑀞𑀫𑀢𑀭𑀁 ¶ 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀣𑀸𑀭𑀫𑁆𑀫𑀡𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁄𑀢…𑀧𑁂… 𑀖𑀸𑀦, 𑀚𑀺𑀯𑁆𑀳𑀸, 𑀓𑀸𑀬𑀸𑀬𑀢𑀦𑀁, 𑀭𑀽𑀧, 𑀲𑀤𑁆𑀤, 𑀕𑀦𑁆𑀥, 𑀭𑀲, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧, 𑀲𑀤𑁆𑀤, 𑀕𑀦𑁆𑀥, 𑀭𑀲, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀓𑀺𑀜𑁆𑀘𑀺𑀓𑀸𑀮𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁦).

𑁬𑁦𑁪. 𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑁄 𑀅𑀭𑀽𑀧𑀥𑀫𑁆𑀫𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸𑀘𑁂𑀢𑀦𑀸 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧).

𑁬𑁦𑁫. 𑀆𑀲𑁂𑀯𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀕𑀦𑁆𑀣𑀸𑀤𑀻𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬. 𑀲𑁄 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀓𑀼𑀲𑀮𑀸…𑀧𑁂… 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁨).

𑁬𑁦𑁬. 𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑁄. 𑀲𑁄 𑀦𑀸𑀦𑀓𑁆𑀔𑀡𑀺𑀓𑀸𑀬 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀲𑀳𑀚𑀸𑀢𑀸𑀬 𑀘 𑀲𑀩𑁆𑀩𑀸𑀬𑀧𑀺 𑀘𑁂𑀢𑀦𑀸𑀬 𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺 ¶ . 𑀬𑀣𑀸𑀳 𑁋 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁩).

𑁬𑁦𑁭. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 ¶ 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀯𑀺𑀧𑀸𑀓𑀥𑀫𑁆𑀫𑁄 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀲𑁄 𑀧𑀯𑀢𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁, 𑀲𑀩𑁆𑀩𑀢𑁆𑀣 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸𑀳 𑁋‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁. 𑀢𑀬𑁄 𑀔𑀦𑁆𑀥𑀸 𑀏𑀓𑀲𑁆𑀲 𑀔𑀦𑁆𑀥𑀲𑁆𑀲. 𑀤𑁆𑀯𑁂 𑀔𑀦𑁆𑀥𑀸 𑀤𑁆𑀯𑀺𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑁬𑁦𑁮. 𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀬𑀣𑀸𑀳 𑁋‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫). 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 (𑀧𑀝𑁆𑀞𑀸. 𑁧.𑁧.𑁪𑁨𑁯) 𑀯𑀼𑀢𑁆𑀢𑀁.

𑁬𑁦𑁯. 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸 𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀢𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯, 𑀲𑁂𑀲𑀸 𑀭𑀽𑀧𑀸𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁬). 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 (𑀧𑀝𑁆𑀞𑀸. 𑁧.𑁧.𑁪𑁩𑁦) 𑀯𑀼𑀢𑁆𑀢𑀁.

𑁬𑁧𑁦. 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬𑀁 𑀲𑀩𑁆𑀩𑀸𑀦𑀺𑀧𑀺 ¶ 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄. 𑀬𑀣𑀸𑀳 𑁋‘‘𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 ¶ 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁭). 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 (𑀧𑀝𑁆𑀞𑀸. 𑁧.𑁧.𑁪𑁩𑁧) 𑀯𑀼𑀢𑁆𑀢𑀁.

𑁬𑁧𑁧. 𑀬𑀢𑁄 𑀢𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀤𑁆𑀯𑀸𑀤𑀲 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄. 𑀬𑀣𑀸𑀳 𑁋 ‘‘𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁮). 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 (𑀧𑀝𑁆𑀞𑀸. 𑁧.𑁧.𑁪𑁩𑁨) 𑀯𑀼𑀢𑁆𑀢𑀁. 𑀏𑀢𑁂 𑀧𑀦 𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁧𑁨. 𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀅𑀭𑀽𑀧𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁯).

𑁬𑁧𑁩. 𑀏𑀓𑀯𑀢𑁆𑀣𑀼𑀓𑀸𑀤𑀺𑀪𑀸𑀯𑀸𑀦𑀼𑀧𑀕𑀫𑁂𑀦 𑀉𑀧𑀓𑀸𑀭𑀓𑀸 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁, 𑀅𑀭𑀽𑀧𑀺𑀦𑁄𑀧𑀺 𑀭𑀽𑀧𑀻𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀲𑁄 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁩𑁪). 𑀅𑀩𑁆𑀬𑀸𑀓𑀢𑀧𑀤𑀲𑁆𑀲 𑀧𑀦 𑀲𑀳𑀚𑀸𑀢𑀯𑀺𑀪𑀗𑁆𑀕𑁂 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲. 𑀯𑀢𑁆𑀣𑀼 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 (𑀧𑀝𑁆𑀞𑀸. 𑁧.𑁧.𑁪𑁩𑁪) 𑀯𑀼𑀢𑁆𑀢𑀁. 𑀧𑀼𑀭𑁂𑀚𑀸𑀢𑀁 𑀧𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀧𑀼𑀭𑁂𑀚𑀸𑀢𑀁 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀔𑀦𑁆𑀥𑀸𑀦𑀁…𑀧𑁂… 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁…𑀧𑁂… 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁩𑁪).

𑁬𑁧𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑁂𑀦 ¶ 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀢𑀲𑁆𑀲 𑀅𑀭𑀽𑀧𑀓𑁆𑀔𑀦𑁆𑀥𑀫𑀳𑀸𑀪𑀽𑀢𑀦𑀸𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀫𑀳𑀸𑀪𑀽𑀢𑀆𑀬𑀢𑀦𑀯𑀢𑁆𑀣𑀼𑀯𑀲𑁂𑀦 𑀲𑀢𑁆𑀢𑀥𑀸 𑀫𑀸𑀢𑀺𑀓𑀸 ¶ 𑀦𑀺𑀓𑁆𑀔𑀺𑀢𑁆𑀢𑀸. 𑀬𑀣𑀸𑀳 𑁋‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸, 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁. 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁. 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀓𑀸𑀬𑀸𑀬𑀢𑀦𑀁…𑀧𑁂… 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁨𑁧).

𑀧𑀜𑁆𑀳𑀸𑀯𑀸𑀭𑁂 𑀧𑀦 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁 𑀧𑀘𑁆𑀙𑀸𑀚𑀸𑀢𑀁 𑀆𑀳𑀸𑀭𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀺𑀧𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀚𑀸𑀢𑁂 𑀢𑀸𑀯 ‘‘𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁩𑁫) 𑀦𑀬𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀧𑀼𑀭𑁂𑀚𑀸𑀢𑁂 𑀧𑀼𑀭𑁂𑀚𑀸𑀢𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀘𑁆𑀙𑀸𑀚𑀸𑀢𑁂 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁩𑁫) 𑀏𑀯𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺.

𑁬𑁧𑁫. 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀉𑀧𑀓𑀸𑀭𑀓𑀸 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀅𑀭𑀽𑀧𑀥𑀫𑁆𑀫𑀸 𑀦𑀢𑁆𑀣𑀺𑀧𑀘𑁆𑀘𑀬𑁄. 𑀬𑀣𑀸𑀳 𑁋‘‘𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀢𑁂 𑀏𑀯 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀯𑀺𑀕𑀢𑀧𑀘𑁆𑀘𑀬𑁄. 𑀬𑀣𑀸𑀳 𑁋 ‘‘𑀲𑀫𑀦𑀦𑁆𑀢𑀭𑀯𑀺𑀕𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀅𑀢𑁆𑀣𑀺 𑀧𑀘𑁆𑀘𑀬𑀥𑀫𑁆𑀫𑀸 𑀏𑀯 𑀘 𑀅𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 ¶ 𑀧𑀦 𑀢𑀣𑀸 𑀯𑀺𑀦𑁂𑀢𑀩𑁆𑀩𑀯𑁂𑀦𑁂𑀬𑁆𑀬𑀯𑀲𑁂𑀦 𑀯𑀸 𑀅𑀬𑀁 𑀤𑀼𑀓𑁄 𑀯𑀼𑀢𑁆𑀢𑁄, 𑀅𑀳𑁂𑀢𑀼𑀓𑀤𑀼𑀓𑀁 𑀯𑀢𑁆𑀯𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑁄 𑀯𑀺𑀬𑀸𑀢𑀺.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁧𑁬. 𑀏𑀯𑀫𑀺𑀫𑁂𑀲𑀼 ¶ 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀬𑀁 𑀅𑀯𑀺𑀚𑁆𑀚𑀸,

𑀧𑀘𑁆𑀘𑀬𑁄 𑀳𑁄𑀢𑀺 𑀧𑀼𑀜𑁆𑀜𑀸𑀦𑀁, 𑀤𑀼𑀯𑀺𑀥𑀸𑀦𑁂𑀓𑀥𑀸 𑀧𑀦;

𑀧𑀭𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀲𑀸, 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸𑀢𑀺.

𑀢𑀢𑁆𑀣 𑀧𑀼𑀜𑁆𑀜𑀸𑀦𑀁 𑀤𑀼𑀯𑀺𑀥𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀳𑀺 𑀅𑀯𑀺𑀚𑁆𑀚𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑀓𑀸𑀮𑁂 𑀓𑀸𑀫𑀸𑀯𑀘𑀭𑀸𑀦𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀲𑀫𑁄𑀳𑀘𑀺𑀢𑁆𑀢𑀁 𑀚𑀸𑀦𑀦𑀓𑀸𑀮𑁂 𑀭𑀽𑀧𑀸𑀯𑀘𑀭𑀸𑀦𑀁. 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬 𑀧𑀦 𑀤𑀸𑀦𑀸𑀤𑀻𑀦𑀺 𑀘𑁂𑀯 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀧𑀽𑀭𑁂𑀦𑁆𑀢𑀲𑁆𑀲, 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀘 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑁆𑀢𑀸 𑀓𑀸𑀫𑀪𑀯𑀭𑀽𑀧𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑁂𑀢𑁆𑀯𑀸 𑀢𑀸𑀦𑁂𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀲𑁆𑀲.

𑀅𑀦𑁂𑀓𑀥𑀸 𑀧𑀦 𑀧𑀭𑁂𑀲𑀦𑁆𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀣𑀁? 𑀏𑀲𑀸 𑀳𑀺 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦, 𑀕𑀭𑀼𑀁𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀳𑀺, 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦, 𑀤𑀼𑀢𑀺𑀬𑀚𑀯𑀦𑀸𑀤𑀻𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺, 𑀬𑀁𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀳𑁂𑀢𑀼 𑀲𑀳𑀚𑀸𑀢 𑀅𑀜𑁆𑀜𑀫𑀜𑁆𑀜 𑀦𑀺𑀲𑁆𑀲𑀬 𑀲𑀫𑁆𑀧𑀬𑀼𑀢𑁆𑀢 𑀅𑀢𑁆𑀣𑀺 𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀻𑀢𑀺 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀘𑁆𑀙𑀺𑀫𑀸𑀦𑀁 𑀲𑀸 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀏𑀓𑀥𑀸 𑀧𑀘𑁆𑀘𑀬𑁄 𑀫𑀢𑀸. 𑀲𑁄 𑀧𑀦𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑁬𑁧𑁭. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑀸𑀬𑀫𑁂𑀓𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀧𑀘𑁆𑀘𑀬𑀸 ¶ 𑀲𑀦𑁆𑀢𑀻𑀢𑀺? 𑀓𑀺𑀁 𑀧𑀦𑁂𑀢𑁆𑀣, 𑀬𑀤𑀺 𑀢𑀸𑀯 𑀏𑀓𑀸𑀯, 𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀺. 𑀅𑀣𑀜𑁆𑀜𑁂𑀧𑀺 𑀲𑀦𑁆𑀢𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀓𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀦𑀼𑀧𑀧𑀚𑁆𑀚𑀢𑀻𑀢𑀺? 𑀦 𑀦𑀼𑀧𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑁋

𑀏𑀓𑀁 𑀦 𑀏𑀓𑀢𑁄 𑀇𑀥, 𑀦𑀸𑀦𑁂𑀓𑀫𑀦𑁂𑀓𑀢𑁄𑀧𑀺 𑀦𑁄 𑀏𑀓𑀁;

𑀨𑀮𑀫𑀢𑁆𑀣𑀺 𑀅𑀢𑁆𑀣𑀺 𑀧𑀦 𑀏𑀓-𑀳𑁂𑀢𑀼𑀨𑀮𑀤𑀻𑀧𑀦𑁂 𑀅𑀢𑁆𑀣𑁄.

𑀏𑀓𑀢𑁄 ¶ 𑀳𑀺 𑀓𑀸𑀭𑀡𑀢𑁄 𑀦 𑀇𑀥 𑀓𑀺𑀜𑁆𑀘𑀺 𑀏𑀓𑀁 𑀨𑀮𑀫𑀢𑁆𑀣𑀺, 𑀦 𑀅𑀦𑁂𑀓𑀁. 𑀦𑀸𑀧𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀏𑀓𑀁. 𑀅𑀦𑁂𑀓𑁂𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀅𑀦𑁂𑀓𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀦𑁂𑀓𑁂𑀳𑀺 𑀉𑀢𑀼𑀧𑀣𑀯𑀻𑀩𑀻𑀚𑀲𑀮𑀺𑀮𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀅𑀦𑁂𑀓𑀫𑁂𑀯 𑀭𑀽𑀧𑀕𑀦𑁆𑀥𑀭𑀲𑀸𑀤𑀺𑀓𑀁 𑀅𑀗𑁆𑀓𑀼𑀭𑀲𑀗𑁆𑀔𑀸𑀢𑀁 𑀨𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑀺𑀲𑁆𑀲𑀢𑀺. 𑀬𑀁 𑀧𑀦𑁂𑀢𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀁 𑀓𑀢𑀁, 𑀢𑀢𑁆𑀣 𑀅𑀢𑁆𑀣𑁄 𑀅𑀢𑁆𑀣𑀺, 𑀧𑀬𑁄𑀚𑀦𑀁 𑀯𑀺𑀚𑁆𑀚𑀢𑀺.

𑀪𑀕𑀯𑀸 𑀳𑀺 𑀓𑀢𑁆𑀣𑀘𑀺 𑀧𑀥𑀸𑀦𑀢𑁆𑀢𑀸, 𑀓𑀢𑁆𑀣𑀘𑀺 𑀧𑀸𑀓𑀝𑀢𑁆𑀢𑀸, 𑀓𑀢𑁆𑀣𑀘𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀲𑁆𑀲 𑀘 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀅𑀦𑀼𑀭𑀽𑀧𑀢𑁄 𑀏𑀓𑀫𑁂𑀯 𑀳𑁂𑀢𑀼𑀁 𑀯𑀸 𑀨𑀮𑀁 𑀯𑀸 𑀤𑀻𑀧𑁂𑀢𑀺. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀳𑀺 𑀧𑀥𑀸𑀦𑀢𑁆𑀢𑀸 𑀏𑀓𑀫𑁂𑀯 𑀳𑁂𑀢𑀼𑀨𑀮𑀫𑀸𑀳. 𑀨𑀲𑁆𑀲𑁄 𑀳𑀺 𑀯𑁂𑀤𑀦𑀸𑀬 𑀧𑀥𑀸𑀦𑀳𑁂𑀢𑀼 𑀬𑀣𑀸𑀨𑀲𑁆𑀲𑀁 𑀯𑁂𑀤𑀦𑀸 𑀯𑀯𑀢𑁆𑀣𑀸𑀦𑀢𑁄. 𑀯𑁂𑀤𑀦𑀸 𑀘 𑀨𑀲𑁆𑀲𑀲𑁆𑀲 𑀧𑀥𑀸𑀦𑀨𑀮𑀁 𑀬𑀣𑀸𑀯𑁂𑀤𑀦𑀁 𑀨𑀲𑁆𑀲𑀯𑀯𑀢𑁆𑀣𑀸𑀦𑀢𑁄. ‘‘𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸’’𑀢𑀺 (𑀅. 𑀦𑀺. 𑁧𑁦.𑁬𑁦) 𑀧𑀸𑀓𑀝𑀢𑁆𑀢𑀸 𑀏𑀓𑀁 𑀳𑁂𑀢𑀼𑀫𑀸𑀳. 𑀧𑀸𑀓𑀝𑁄 𑀳𑀺 𑀏𑀢𑁆𑀣 𑀲𑁂𑀫𑁆𑀳𑁄, 𑀦 𑀓𑀫𑁆𑀫𑀸𑀤𑀬𑁄. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸’’𑀢𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀏𑀓𑀁 𑀳𑁂𑀢𑀼𑀫𑀸𑀳. 𑀅𑀲𑀸𑀥𑀸𑀭𑀡𑁄 𑀳𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀓𑀼𑀲𑀮𑀸𑀦𑀁, 𑀲𑀸𑀥𑀸𑀭𑀡𑀸𑀦𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀻𑀢𑀺. 𑀢𑀲𑁆𑀫𑀸 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀥𑀫𑁆𑀫𑀸𑀤𑀻𑀲𑀼 𑀲𑀗𑁆𑀔𑀸𑀭𑀓𑀸𑀭𑀡𑁂𑀲𑀼 ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨) 𑀘 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀆𑀲𑀯𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁪) 𑀘 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀢𑀡𑁆𑀳𑀸𑀤𑀻𑀦𑀁 𑀲𑀗𑁆𑀔𑀸𑀭𑀳𑁂𑀢𑀽𑀦𑀁 𑀳𑁂𑀢𑀽𑀢𑀺 𑀧𑀥𑀸𑀦𑀢𑁆𑀢𑀸, ‘‘𑀅𑀯𑀺𑀤𑁆𑀯𑀸, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀧𑀸𑀓𑀝𑀢𑁆𑀢𑀸, 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦𑁂𑀯 𑀘 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀧𑀭𑀺𑀳𑀸𑀭𑀯𑀘𑀦𑁂𑀦 𑀲𑀩𑁆𑀩𑀢𑁆𑀣 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑁂 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁬𑁧𑁮. 𑀏𑀢𑁆𑀣𑀸𑀳 ¶ 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸𑀬 𑀲𑀸𑀯𑀚𑁆𑀚𑀸𑀬 𑀅𑀯𑀺𑀚𑁆𑀚𑀸𑀬 𑀓𑀣𑀁 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁆𑀢𑀁 𑀬𑀼𑀚𑁆𑀚𑀢𑀺? 𑀦 𑀳𑀺 𑀦𑀺𑀫𑁆𑀩𑀩𑀻𑀚𑀢𑁄 𑀉𑀘𑁆𑀙𑀼 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀓𑀣𑀁 𑀦 𑀬𑀼𑀚𑁆𑀚𑀺𑀲𑁆𑀲𑀢𑀺? 𑀮𑁄𑀓𑀲𑁆𑀫𑀺𑀜𑁆𑀳𑀺 𑁋

𑀯𑀺𑀭𑀼𑀤𑁆𑀥𑁄 ¶ 𑀘𑀸𑀯𑀺𑀭𑀼𑀤𑁆𑀥𑁄 𑀘, 𑀲𑀤𑀺𑀲𑀸𑀲𑀤𑀺𑀲𑁄 𑀢𑀣𑀸;

𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀲𑀺𑀤𑁆𑀥𑁄, 𑀯𑀺𑀧𑀸𑀓𑀸 𑀏𑀯 𑀢𑁂 𑀘 𑀦.

𑀥𑀫𑁆𑀫𑀸𑀦𑀁 𑀳𑀺 𑀞𑀸𑀦𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀯𑀺𑀭𑀼𑀤𑁆𑀥𑁄 𑀘𑀸𑀯𑀺𑀭𑀼𑀤𑁆𑀥𑁄 𑀘 𑀧𑀘𑁆𑀘𑀬𑁄 𑀮𑁄𑀓𑁂 𑀲𑀺𑀤𑁆𑀥𑁄. 𑀧𑀼𑀭𑀺𑀫𑀘𑀺𑀢𑁆𑀢𑀁 𑀳𑀺 𑀅𑀧𑀭𑀘𑀺𑀢𑁆𑀢𑀲𑁆𑀲 𑀞𑀸𑀦𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄, 𑀧𑀼𑀭𑀺𑀫𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸 𑀘 𑀧𑀘𑁆𑀙𑀸 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀺𑀧𑁆𑀧𑀸𑀤𑀺𑀓𑀺𑀭𑀺𑀬𑀸𑀦𑀁. 𑀓𑀫𑁆𑀫𑀁 𑀭𑀽𑀧𑀲𑁆𑀲 𑀲𑀪𑀸𑀯𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄, 𑀔𑀻𑀭𑀸𑀤𑀻𑀦𑀺 𑀘 𑀤𑀥𑀺𑀆𑀤𑀻𑀦𑀁. 𑀆𑀮𑁄𑀓𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀓𑀺𑀘𑁆𑀘𑀯𑀺𑀭𑀼𑀤𑁆𑀥𑁄, 𑀕𑀼𑀴𑀸𑀤𑀬𑁄 𑀘 𑀆𑀲𑀯𑀸𑀤𑀻𑀦𑀁. 𑀘𑀓𑁆𑀔𑀼𑀭𑀽𑀧𑀸𑀤𑀬𑁄 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀞𑀸𑀦𑀸𑀯𑀺𑀭𑀼𑀤𑁆𑀥𑀸 𑀧𑀘𑁆𑀘𑀬𑀸. 𑀧𑀼𑀭𑀺𑀫𑀚𑀯𑀦𑀸𑀤𑀬𑁄 𑀧𑀘𑁆𑀙𑀺𑀫𑀚𑀯𑀦𑀸𑀤𑀻𑀦𑀁 𑀲𑀪𑀸𑀯𑀸𑀯𑀺𑀭𑀼𑀤𑁆𑀥𑀸 𑀓𑀺𑀘𑁆𑀘𑀸𑀯𑀺𑀭𑀼𑀤𑁆𑀥𑀸 𑀘.

𑀬𑀣𑀸 𑀘 𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀸 𑀧𑀘𑁆𑀘𑀬𑀸 𑀲𑀺𑀤𑁆𑀥𑀸, 𑀏𑀯𑀁 𑀲𑀤𑀺𑀲𑀸𑀲𑀤𑀺𑀲𑀸𑀧𑀺. 𑀲𑀤𑀺𑀲𑀫𑁂𑀯 𑀳𑀺 𑀉𑀢𑀼𑀆𑀳𑀸𑀭𑀲𑀗𑁆𑀔𑀸𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄, 𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀘 𑀲𑀸𑀮𑀺𑀨𑀮𑀸𑀤𑀻𑀦𑀁. 𑀅𑀲𑀤𑀺𑀲𑀫𑁆𑀧𑀺 𑀭𑀽𑀧𑀁 𑀅𑀭𑀽𑀧𑀲𑁆𑀲, 𑀅𑀭𑀽𑀧𑀜𑁆𑀘 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀕𑁄𑀮𑁄𑀫𑀸𑀯𑀺𑀮𑁄𑀫-𑀯𑀺𑀲𑀸𑀡-𑀤𑀥𑀺𑀢𑀺𑀮𑀧𑀺𑀝𑁆𑀞𑀸𑀤𑀻𑀦𑀺 𑀘 𑀤𑀼𑀩𑁆𑀩𑀸-𑀲𑀭𑀪𑀽𑀢𑀺𑀡𑀓𑀸𑀤𑀻𑀦𑀁. 𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀢𑁂 𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀲𑀤𑀺𑀲𑀸𑀲𑀤𑀺𑀲𑀧𑀘𑁆𑀘𑀬𑀸, 𑀦 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀏𑀯.

𑀇𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸 𑀯𑀺𑀧𑀸𑀓𑀯𑀲𑁂𑀦 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸, 𑀲𑀪𑀸𑀯𑀯𑀲𑁂𑀦 𑀘 𑀲𑀸𑀯𑀚𑁆𑀚𑀸𑀧𑀺 𑀲𑀫𑀸𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀏𑀢𑁂𑀲𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀬𑀣𑀸𑀦𑀼𑀭𑀽𑀧𑀁 𑀞𑀸𑀦𑀓𑀺𑀘𑁆𑀘𑀲𑀪𑀸𑀯𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀯𑀲𑁂𑀦, 𑀲𑀤𑀺𑀲𑀸𑀲𑀤𑀺𑀲𑀧𑀘𑁆𑀘𑀬𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄 𑀘𑀲𑁆𑀲𑀸 𑀧𑀘𑁆𑀘𑀬𑀪𑀸𑀯𑁄 ‘‘𑀬𑀲𑁆𑀲 𑀳𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀲𑁄 𑀤𑀼𑀓𑁆𑀔𑁂 𑀢𑀸𑀯 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘 𑀅𑀜𑁆𑀜𑀸𑀡𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀳𑁂𑀢𑀼𑀪𑀽𑀢𑁂 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑁂 𑀆𑀭𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀏𑀯.

𑁬𑁧𑁯. 𑀅𑀧𑀺𑀘 𑀅𑀬𑀁 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑁋

𑀘𑀼𑀢𑀽𑀧𑀧𑀸𑀢𑁂 ¶ 𑀲𑀁𑀲𑀸𑀭𑁂, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀮𑀓𑁆𑀔𑀡𑁂;

𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦-𑀥𑀫𑁆𑀫𑁂𑀲𑀼 𑀘 𑀯𑀺𑀫𑀼𑀬𑁆𑀳𑀢𑀺.

𑀅𑀪𑀺𑀲𑀗𑁆𑀔𑀭𑁄𑀢𑀺 𑀲𑁄 𑀏𑀢𑁂, 𑀲𑀗𑁆𑀔𑀸𑀭𑁂 𑀢𑀺𑀯𑀺𑀥𑁂 𑀬𑀢𑁄;

𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀢𑁂𑀲𑀁, 𑀢𑀺𑀯𑀺𑀥𑀸𑀦𑀫𑁆𑀧𑀬𑀁 𑀢𑀢𑁄𑀢𑀺.

𑀓𑀣𑀁 ¶ 𑀧𑀦 𑀬𑁄 𑀏𑀢𑁂𑀲𑀼 𑀯𑀺𑀫𑀼𑀬𑁆𑀳𑀢𑀺, 𑀲𑁄 𑀢𑀺𑀯𑀺𑀥𑁂𑀧𑁂𑀢𑁂 𑀲𑀗𑁆𑀔𑀸𑀭𑁂 𑀓𑀭𑁄𑀢𑀻𑀢𑀺 𑀘𑁂. 𑀘𑀼𑀢𑀺𑀬𑀸 𑀢𑀸𑀯 𑀯𑀺𑀫𑀽𑀴𑁆𑀳𑁄 ‘‘𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀫𑀭𑀡’’𑀦𑁆𑀢𑀺 𑀘𑀼𑀢𑀺𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀲𑀢𑁆𑀢𑁄 𑀫𑀭𑀢𑀺, 𑀲𑀢𑁆𑀢𑀲𑁆𑀲 𑀤𑁂𑀳𑀦𑁆𑀢𑀭𑀲𑀗𑁆𑀓𑀫𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺.

𑀉𑀧𑀧𑀸𑀢𑁂 𑀯𑀺𑀫𑀽𑀴𑁆𑀳𑁄 ‘‘𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀚𑀸𑀢𑀻’’𑀢𑀺 𑀉𑀧𑀧𑀸𑀢𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀲𑀢𑁆𑀢𑁄 𑀉𑀧𑀧𑀚𑁆𑀚𑀢𑀺, 𑀲𑀢𑁆𑀢𑀲𑁆𑀲 𑀦𑀯𑀲𑀭𑀻𑀭𑀧𑀸𑀢𑀼𑀪𑀸𑀯𑁄’’𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺.

𑀲𑀁𑀲𑀸𑀭𑁂 𑀯𑀺𑀫𑀽𑀴𑁆𑀳𑁄 𑀬𑁄 𑀏𑀲,

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋

𑀏𑀯𑀁 𑀯𑀡𑁆𑀡𑀺𑀢𑁄 𑀲𑀁𑀲𑀸𑀭𑁄, 𑀢𑀁 𑀏𑀯𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀢𑀺, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀦𑀺 𑀯𑀺𑀓𑀧𑁆𑀧𑁂𑀢𑀺.

𑀲𑀗𑁆𑀔𑀸𑀭𑀸𑀦𑀁 𑀮𑀓𑁆𑀔𑀡𑁂 𑀯𑀺𑀫𑀽𑀴𑁆𑀳𑁄 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘 𑀅𑀕𑀡𑁆𑀳𑀦𑁆𑀢𑁄 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀅𑀢𑁆𑀢𑀦𑀺𑀬𑀢𑁄 𑀥𑀼𑀯𑀢𑁄 𑀲𑀼𑀔𑀢𑁄 𑀲𑀼𑀪𑀢𑁄 𑀯𑀺𑀓𑀧𑁆𑀧𑁂𑀢𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀯𑀺𑀫𑀽𑀴𑁆𑀳𑁄 𑀅𑀯𑀺𑀚𑁆𑀚𑀸𑀤𑀻𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀯𑀢𑁆𑀢𑀺𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀅𑀢𑁆𑀢𑀸 𑀚𑀸𑀦𑀸𑀢𑀺 𑀯𑀸 𑀦 𑀚𑀸𑀦𑀸𑀢𑀺 𑀯𑀸, 𑀲𑁄 𑀏𑀯 𑀓𑀭𑁄𑀢𑀺 𑀘 𑀓𑀸𑀭𑁂𑀢𑀺 𑀘. 𑀲𑁄 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀡𑀼𑀇𑀲𑁆𑀲𑀭𑀸𑀤𑀬𑁄 𑀓𑀮𑀮𑀸𑀤𑀺𑀪𑀸𑀯𑁂𑀦 𑀲𑀭𑀻𑀭𑀁 𑀲𑀡𑁆𑀞𑀧𑁂𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀲𑁄 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄 𑀨𑀼𑀲𑀢𑀺, 𑀯𑁂𑀤𑀺𑀬𑀢𑀺, 𑀢𑀡𑁆𑀳𑀻𑀬𑀢𑀺, 𑀉𑀧𑀸𑀤𑀺𑀬𑀢𑀺, 𑀖𑀝𑀺𑀬𑀢𑀺. 𑀲𑁄 𑀧𑀼𑀦 𑀪𑀯𑀦𑁆𑀢𑀭𑁂 𑀪𑀯𑀢𑀻’’𑀢𑀺 ¶ 𑀯𑀸, ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀯𑀸 𑀯𑀺𑀓𑀧𑁆𑀧𑁂𑀢𑀺.

𑀲𑁄 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑁄 𑀏𑀯𑀁 𑀯𑀺𑀓𑀧𑁆𑀧𑁂𑀦𑁆𑀢𑁄 𑀬𑀣𑀸 𑀦𑀸𑀫 𑀅𑀦𑁆𑀥𑁄 𑀧𑀣𑀯𑀺𑀬𑀁 𑀯𑀺𑀘𑀭𑀦𑁆𑀢𑁄 𑀫𑀕𑁆𑀕𑀫𑁆𑀧𑀺 𑀅𑀫𑀕𑁆𑀕𑀫𑁆𑀧𑀺 𑀣𑀮𑀫𑁆𑀧𑀺 𑀦𑀺𑀦𑁆𑀦𑀫𑁆𑀧𑀺 𑀲𑀫𑀫𑁆𑀧𑀺 𑀯𑀺𑀲𑀫𑀫𑁆𑀧𑀺 𑀧𑀝𑀺𑀧𑀚𑁆𑀚𑀢𑀺, 𑀏𑀯𑀁 𑀧𑀼𑀜𑁆𑀜𑀫𑁆𑀧𑀺 𑀅𑀧𑀼𑀜𑁆𑀜𑀫𑁆𑀧𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀫𑁆𑀧𑀺 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺.

𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀬𑀣𑀸𑀧𑀺 ¶ 𑀦𑀸𑀫 𑀚𑀘𑁆𑀘𑀦𑁆𑀥𑁄, 𑀦𑀭𑁄 𑀅𑀧𑀭𑀺𑀡𑀸𑀬𑀓𑁄;

𑀏𑀓𑀤𑀸 𑀬𑀸𑀢𑀺 𑀫𑀕𑁆𑀕𑁂𑀦, 𑀉𑀫𑁆𑀫𑀕𑁆𑀕𑁂𑀦𑀸𑀧𑀺 𑀏𑀓𑀤𑀸.

‘‘𑀲𑀁𑀲𑀸𑀭𑁂 𑀲𑀁𑀲𑀭𑀁 𑀩𑀸𑀮𑁄, 𑀢𑀣𑀸 𑀅𑀧𑀭𑀺𑀡𑀸𑀬𑀓𑁄;

𑀓𑀭𑁄𑀢𑀺 𑀏𑀓𑀤𑀸 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀫𑀧𑀺 𑀏𑀓𑀤𑀸.

‘‘𑀬𑀤𑀸 𑀘 𑀜𑀢𑁆𑀯𑀸 𑀲𑁄 𑀥𑀫𑁆𑀫𑀁, 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀲𑁆𑀲𑀢𑀺;

𑀢𑀤𑀸 𑀅𑀯𑀺𑀚𑁆𑀚𑀽𑀧𑀲𑀫𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺.

𑀅𑀬𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁨𑁦. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀧𑀤𑁂 𑁋 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀙𑀩𑁆𑀩𑀺𑀥𑀁. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀆𑀬𑀯𑀺𑀜𑁆𑀜𑀸𑀡𑀸𑀦𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀲𑀳𑁂𑀢𑀼𑀓𑀸𑀦𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀸𑀦𑀻𑀢𑀺 𑀩𑀸𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀲𑀩𑁆𑀩𑀸𑀦𑀺𑀧𑀺 𑀩𑀸𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 ¶ 𑀲𑀗𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀯𑀝𑁆𑀝𑀓𑀣𑀸𑀬 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺.

𑀢𑀢𑁆𑀣 𑀲𑀺𑀬𑀸 ‘‘𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀳𑁂𑀢𑀁, 𑀯𑀺𑀧𑀸𑀓𑀜𑁆𑀘 𑀦 𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬 𑀲𑀩𑁆𑀩𑁂𑀲𑀁 𑀲𑀩𑁆𑀩𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀘 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺.

𑀓𑀢𑀭𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀓𑀢𑀭𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑁂. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀢𑀸𑀯 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀫𑀦𑁄𑀯𑀺𑀜𑁆𑀜𑀸𑀡𑁂 𑀏𑀓𑀸 𑀫𑀦𑁄𑀥𑀸𑀢𑀼, 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀅𑀝𑁆𑀞 𑀓𑀸𑀫𑀸𑀯𑀘𑀭𑀫𑀳𑀸𑀯𑀺𑀧𑀸𑀓𑀸𑀦𑀻𑀢𑀺 𑀲𑁄𑀴𑀲. 𑀬𑀣𑀸𑀳 𑁋

‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀯𑀺𑀜𑁆𑀜𑀸𑀡𑀁 ¶ … 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦𑀸’’𑀢𑀺 (𑀥. 𑀲. 𑁪𑁩𑁧, 𑁪𑁯𑁮).

𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀦 𑀧𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀺. 𑀬𑀣𑀸𑀳 𑁋

‘‘𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁪𑁯𑁯). 𑀏𑀯𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀏𑀓𑀯𑀻𑀲𑀢𑀺𑀯𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺.

𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀏𑀓𑀸 𑀫𑀦𑁄𑀥𑀸𑀢𑀼, 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀯𑀁 𑀲𑀢𑁆𑀢𑀯𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀯𑀺𑀜𑁆𑀜𑀸𑀡𑀁… 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀻’’𑀢𑀺 (𑀥. 𑀲. 𑁫𑁫𑁬).

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀦 𑀘𑀢𑁆𑀢𑀸𑀭𑀺 𑀅𑀭𑀽𑀧𑀯𑀺𑀧𑀸𑀓𑀸𑀦𑀻𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁫𑁦𑁧).

𑁬𑁨𑁧. 𑀏𑀯𑀁 ¶ 𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀬𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀢𑀁 𑀜𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀏𑀯𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀩𑁆𑀩𑀫𑁂𑀯 𑀳𑀺 𑀇𑀤𑀁 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑁂𑀥𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑀸𑀦𑀺 𑀢𑁂𑀭𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀺𑀬𑀜𑁆𑀜𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀲𑁂𑀲𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺.

𑀓𑀣𑀁? 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀢𑀸𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑁂𑀦 𑀅𑀓𑀼𑀲𑀮𑀯𑀺𑀧𑀸𑀓𑁂𑀦 𑀯𑀸 𑀦𑀺𑀩𑁆𑀩𑀢𑁆𑀢𑀲𑁆𑀲 𑀬𑀣𑀸𑀓𑁆𑀓𑀫𑀁 𑀧𑀭𑀺𑀧𑀸𑀓𑀁 𑀉𑀧𑀕𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀓𑁆𑀔𑀸𑀤𑀻𑀦𑀁 𑀆𑀧𑀸𑀣𑀕𑀢𑀁 𑀇𑀝𑁆𑀞𑀁 𑀇𑀝𑁆𑀞𑀫𑀚𑁆𑀛𑀢𑁆𑀢𑀁 𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀘𑀓𑁆𑀔𑀸𑀤𑀺𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀅𑀦𑀺𑀝𑁆𑀞𑀁 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀤𑀲𑀧𑀺 𑀘𑁂𑀢𑀸𑀦𑀺 𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀢𑁆𑀣𑀼𑀝𑁆𑀞𑀸𑀦𑀸𑀦𑀺 𑀦𑀺𑀬𑀢𑀓𑀺𑀘𑁆𑀘𑀸𑀦𑁂𑀯 𑀘 𑀪𑀯𑀦𑁆𑀢𑀺.

𑀢𑀢𑁄 ¶ 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 𑀓𑀼𑀲𑀮𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀢𑁂𑀲𑀁𑀬𑁂𑀯 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀅𑀦𑀦𑁆𑀢𑀭𑀸 𑀅𑀓𑀼𑀲𑀮𑀯𑀺𑀧𑀸𑀓𑀸. 𑀇𑀤𑀜𑁆𑀘 𑀧𑀦 𑀤𑁆𑀯𑀬𑀁 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀦𑀺𑀬𑀢𑀯𑀢𑁆𑀣𑀼𑀝𑁆𑀞𑀸𑀦𑀁 𑀦𑀺𑀬𑀢𑀓𑀺𑀘𑁆𑀘𑀜𑁆𑀘 𑀳𑁄𑀢𑀺.

𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀧𑀦 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀸 𑀢𑀲𑁆𑀲𑀸 𑀏𑀯 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀯𑀻𑀣𑀺𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀯𑀦𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀧𑀯𑀢𑁆𑀢𑀢𑀻𑀢𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀧𑀦 𑀢𑀤𑀸𑀭𑀫𑁆𑀫𑀡𑁂 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑀸 𑀆𑀕𑀢𑀸. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀘 𑀧𑀺𑀝𑁆𑀞𑀺𑀪𑀯𑀗𑁆𑀕𑀦𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺. 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀦𑀺𑀬𑀢𑀯𑀢𑁆𑀣𑀼𑀓𑀁 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀜𑁆𑀘 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯 𑀢𑁂𑀭𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀺𑀬𑀜𑁆𑀜𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑁂𑀲𑁂𑀲𑀼 ¶ 𑀏𑀓𑀽𑀦𑀯𑀻𑀲𑀢𑀺𑀬𑀸 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀦 𑀧𑀯𑀢𑁆𑀢𑀢𑀺. 𑀧𑀯𑀢𑁆𑀢𑀺𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀢𑀸𑀯 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀜𑁆𑀘𑀤𑁆𑀯𑀸𑀭𑁂 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀽𑀦𑀁 𑀅𑀦𑀦𑁆𑀢𑀭𑀸 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁, 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸 𑀦𑀺𑀬𑀢𑀯𑀢𑁆𑀣𑀼𑀓𑀸 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺.

𑀅𑀝𑁆𑀞 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁, 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀸𑀦𑀺 𑀦𑀺𑀬𑀢𑀯𑀢𑁆𑀣𑀼𑀓𑀸𑀦𑀺 𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺.

𑀧𑀜𑁆𑀘 𑀭𑀽𑀧𑀸𑀯𑀘𑀭𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀆𑀭𑀼𑀧𑁆𑀧𑀸𑀦𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀲𑀢𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀓𑀺𑀘𑁆𑀘𑀁, 𑀅𑀦𑁆𑀢𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘𑀸𑀢𑀺 𑀓𑀺𑀘𑁆𑀘𑀤𑁆𑀯𑀬𑀁 𑀲𑀸𑀥𑀬𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺 ¶ . 𑀢𑁂𑀲𑀼 𑀭𑀽𑀧𑀸𑀯𑀘𑀭𑀸𑀦𑀺 𑀦𑀺𑀬𑀢𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺, 𑀇𑀢𑀭𑀸𑀦𑀺 𑀦𑀺𑀬𑀢𑀯𑀢𑁆𑀣𑀼𑀓𑀸𑀦𑀺 𑀦𑀺𑀬𑀢𑀸𑀭𑀫𑁆𑀫𑀡𑀸𑀦𑀺 𑀅𑀦𑀺𑀬𑀢𑀝𑁆𑀞𑀸𑀦𑀓𑀺𑀘𑁆𑀘𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀢𑀸𑀯 𑀩𑀸𑀢𑁆𑀢𑀺𑀁𑀲𑀯𑀺𑀥𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀺𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀭𑀸𑀲𑁆𑀲 𑀢𑁂 𑀢𑁂 𑀲𑀗𑁆𑀔𑀸𑀭𑀸 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑁬𑁨𑁨. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑁂𑀲𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀦 𑀧𑀯𑀢𑁆𑀢𑀢𑀻’’𑀢𑀺, 𑀢𑀁 𑀅𑀢𑀺𑀲𑀁𑀔𑀺𑀢𑁆𑀢𑀢𑁆𑀢𑀸 𑀤𑀼𑀩𑁆𑀩𑀺𑀚𑀸𑀦𑀁. 𑀢𑁂𑀦𑀲𑁆𑀲 𑀯𑀺𑀢𑁆𑀣𑀸𑀭𑀦𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀘𑁆𑀘𑀢𑀺 𑁋 𑀓𑀢𑀺 𑀧𑀝𑀺𑀲𑀦𑁆𑀥𑀺𑀬𑁄, 𑀓𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺, 𑀓𑁂𑀦 𑀓𑀢𑁆𑀣 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀓𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀦𑁆𑀢𑀺?

𑀅𑀲𑀜𑁆𑀜𑀧𑀝𑀺𑀲𑀦𑁆𑀥𑀺𑀬𑀸 𑀲𑀤𑁆𑀥𑀺𑀁 𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀬𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑁂𑀯 𑀏𑀓𑀽𑀦𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺. 𑀢𑀢𑁆𑀣 𑀅𑀓𑀼𑀲𑀮𑀯𑀺𑀧𑀸𑀓𑀸𑀬 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀓𑀼𑀲𑀮𑀯𑀺𑀧𑀸𑀓𑀸𑀬 𑀫𑀦𑀼𑀲𑁆𑀲𑀮𑁄𑀓𑁂 𑀚𑀘𑁆𑀘𑀦𑁆𑀥𑀚𑀸𑀢𑀺𑀩𑀥𑀺𑀭𑀚𑀸𑀢𑀺𑀉𑀫𑁆𑀫𑀢𑁆𑀢𑀓𑀚𑀸𑀢𑀺𑀏𑀴𑀫𑀽𑀕𑀦𑀧𑀼𑀁𑀲𑀓𑀸𑀤𑀻𑀦𑀁. 𑀅𑀝𑁆𑀞𑀳𑀺 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀧𑀜𑁆𑀘𑀳𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂. 𑀘𑀢𑀽𑀳𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀅𑀭𑀽𑀧𑀮𑁄𑀓𑁂𑀢𑀺. 𑀬𑁂𑀦 𑀘 𑀬𑀢𑁆𑀣 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺 ¶ , 𑀲𑀸 𑀏𑀯 𑀢𑀲𑁆𑀲 𑀅𑀦𑀼𑀭𑀽𑀧𑀸 𑀧𑀝𑀺𑀲𑀦𑁆𑀥𑀺 𑀦𑀸𑀫. 𑀲𑀗𑁆𑀔𑁂𑀧𑀢𑁄 𑀧𑀦 𑀧𑀝𑀺𑀲𑀦𑁆𑀥𑀺𑀬𑀸 𑀢𑀻𑀡𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺 𑀅𑀢𑀻𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀯𑀢𑁆𑀢𑀩𑁆𑀩𑀜𑁆𑀘. 𑀅𑀲𑀜𑁆𑀜𑀸 𑀧𑀝𑀺𑀲𑀦𑁆𑀥𑀺 𑀅𑀦𑀸𑀭𑀫𑁆𑀫𑀡𑀸𑀢𑀺.

𑀢𑀢𑁆𑀣 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀧𑀝𑀺𑀲𑀦𑁆𑀥𑀻𑀦𑀁 𑀅𑀢𑀻𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀤𑀲𑀦𑁆𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀅𑀢𑀻𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸. 𑀲𑁂𑀲𑀸𑀦𑀁 𑀦𑀯𑀢𑁆𑀢𑀩𑁆𑀩𑀫𑁂𑀯. 𑀏𑀯𑀁 𑀢𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀧𑀦 𑀧𑀝𑀺𑀲𑀦𑁆𑀥𑀺 𑀬𑀲𑁆𑀫𑀸 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀯𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀲𑁆𑀲 𑀯𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀫𑁂𑀯 𑀧𑀯𑀢𑁆𑀢𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀧𑀦 𑀘𑀼𑀢𑀺𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀢𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁨𑁩. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀢𑀸𑀯 𑀞𑀺𑀢𑀲𑁆𑀲 𑀧𑀸𑀧𑀓𑀫𑁆𑀫𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 ‘‘𑀢𑀸𑀦𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁩.𑁨𑁪𑁮) 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 ¶ 𑀬𑀣𑀽𑀧𑀘𑀺𑀢𑀁 𑀧𑀸𑀧𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀬 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀬 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯 𑀆𑀧𑀸𑀣𑀕𑀢𑀁 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢𑀁 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀫𑁆𑀫𑀯𑀲𑁂𑀦 𑀦𑀭𑀓𑀸𑀤𑀻𑀲𑀼 𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓𑀁 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀏𑀓𑀁 𑀆𑀯𑀚𑁆𑀚𑀦𑀁, 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺 𑀢𑀻𑀡𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲 𑀅𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀜𑁆𑀜𑁂𑀯 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 ¶ 𑀫𑀭𑀡𑀲𑀫𑀬𑁂 𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀸𑀕𑀸𑀤𑀺𑀳𑁂𑀢𑀼𑀪𑀽𑀢𑀁 𑀳𑀻𑀦𑀫𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑁂 𑀯𑁄𑀝𑁆𑀞𑀩𑁆𑀩𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀘 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺, 𑀆𑀯𑀚𑁆𑀚𑀦𑀁, 𑀤𑀲𑁆𑀲𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑀦𑁆𑀢𑀻𑀭𑀡𑀁, 𑀯𑁄𑀝𑁆𑀞𑀩𑁆𑀩𑀦𑀁, 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺, 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀅𑀣𑀸𑀯𑀲𑁂𑀲𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀜𑁆𑀜𑁂𑀯 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺. 𑀏𑀲 𑀢𑀸𑀯 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑁬𑁨𑁪. 𑀤𑀼𑀕𑁆𑀕𑀢𑀺𑀬𑀁 𑀞𑀺𑀢𑀲𑁆𑀲 𑀧𑀦 𑀉𑀧𑀘𑀺𑀢𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀓𑀡𑁆𑀳𑀧𑀓𑁆𑀔𑁂 𑀲𑀼𑀓𑁆𑀓𑀧𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑁬𑁨𑁫. 𑀲𑀼𑀕𑀢𑀺𑀬𑀁 ¶ 𑀞𑀺𑀢𑀲𑁆𑀲 𑀧𑀦 𑀉𑀧𑀘𑀺𑀢𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲 ‘‘𑀢𑀸𑀦𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀬𑀣𑀽𑀧𑀘𑀺𑀢𑀁 𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀜𑁆𑀘 𑀔𑁄 𑀉𑀧𑀘𑀺𑀢𑀓𑀸𑀫𑀸𑀯𑀘𑀭𑀸𑀦𑀯𑀚𑁆𑀚𑀓𑀫𑁆𑀫𑀲𑁆𑀲𑁂𑀯. 𑀉𑀧𑀘𑀺𑀢𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 𑀧𑀦 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀬 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀬 𑀲𑀼𑀤𑁆𑀥𑀸𑀬 𑀯𑀸 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀢𑀫𑁂𑀯 𑀆𑀧𑀸𑀣𑀕𑀢𑀁 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢𑀁 𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀯𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀯𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀓𑀸𑀫𑀸𑀯𑀘𑀭𑀅𑀦𑀯𑀚𑁆𑀚𑀓𑀫𑁆𑀫𑀯𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀲𑀗𑁆𑀔𑀸𑀢𑀁 𑀯𑀸 𑀤𑁂𑀯𑀮𑁄𑀓𑁂 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀯𑀡𑁆𑀡𑀲𑀗𑁆𑀔𑀸𑀢𑀁 𑀯𑀸 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀲𑁆𑀲 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑁂 ¶ 𑀤𑀲𑁆𑀲𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀘𑀼𑀢𑀺𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀅𑀧𑀭𑀲𑁆𑀲 𑀫𑀭𑀡𑀲𑀫𑀬𑁂 𑀜𑀸𑀢𑀓𑀸 ‘‘𑀅𑀬𑀁 𑀢𑀸𑀢 𑀢𑀯𑀢𑁆𑀣𑀸𑀬 𑀩𑀼𑀤𑁆𑀥𑀧𑀽𑀚𑀸 𑀓𑀭𑀻𑀬𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀧𑀝𑀸𑀓𑀸𑀤𑀺𑀯𑀲𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸, 𑀥𑀫𑁆𑀫𑀲𑁆𑀲𑀯𑀦𑀢𑀽𑀭𑀺𑀬𑀧𑀽𑀚𑀸𑀤𑀺𑀯𑀲𑁂𑀦 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸, 𑀥𑀽𑀫𑀯𑀸𑀲𑀕𑀦𑁆𑀥𑀸𑀤𑀺𑀯𑀲𑁂𑀦 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸, ‘‘𑀇𑀤𑀁 𑀢𑀸𑀢 𑀲𑀸𑀬𑀲𑁆𑀲𑀼 𑀢𑀯𑀢𑁆𑀣𑀸𑀬 𑀤𑀸𑀢𑀩𑁆𑀩𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀫𑀥𑀼𑀨𑀸𑀡𑀺𑀢𑀸𑀤𑀺𑀯𑀲𑁂𑀦 𑀭𑀲𑀸𑀭𑀫𑁆𑀫𑀡𑀁 𑀯𑀸, ‘‘𑀇𑀤𑀁 𑀢𑀸𑀢 𑀨𑀼𑀲𑀲𑁆𑀲𑀼 𑀢𑀯𑀢𑁆𑀣𑀸𑀬 𑀤𑀸𑀢𑀩𑁆𑀩𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀘𑀻𑀦𑀧𑀝𑁆𑀝𑀲𑁄𑀫𑀸𑀭𑀧𑀝𑁆𑀝𑀸𑀤𑀺𑀯𑀲𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑀲𑀁𑀳𑀭𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀫𑀺𑀁 𑀆𑀧𑀸𑀣𑀕𑀢𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀯𑁄𑀝𑁆𑀞𑀩𑁆𑀩𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁, 𑀢𑀤𑀯𑀲𑀸𑀦𑁂 𑀢𑀲𑁆𑀫𑀺𑀜𑁆𑀜𑁂𑀯 𑀏𑀓𑀘𑀺𑀢𑁆𑀢𑀓𑁆𑀔𑀡𑀝𑁆𑀞𑀺𑀢𑀺𑀓𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑁬𑁨𑁬. 𑀅𑀧𑀭𑀲𑁆𑀲 𑀧𑀦 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀫𑀳𑀕𑁆𑀕𑀢𑀲𑁆𑀲 𑀲𑀼𑀕𑀢𑀺𑀬𑀁 𑀞𑀺𑀢𑀲𑁆𑀲 𑀫𑀭𑀡𑀲𑀫𑀬𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀫𑁆𑀫-𑀓𑀫𑁆𑀫𑀦𑀺𑀫𑀺𑀢𑁆𑀢-𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀯𑀸 𑀅𑀜𑁆𑀜𑀢𑀭𑀁, 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀯𑀸 𑀦𑀺𑀫𑀺𑀢𑁆𑀢𑀁, 𑀫𑀳𑀕𑁆𑀕𑀢𑀘𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 ¶ 𑀧𑀡𑀻𑀢𑀫𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀯𑁄𑀝𑁆𑀞𑀩𑁆𑀩𑀦𑀸𑀯𑀲𑀸𑀦𑁂 𑀫𑀭𑀡𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀳𑀕𑁆𑀕𑀢𑀕𑀢𑀺𑀓𑀸𑀦𑀁 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀚𑀯𑀦𑀸𑀦𑀦𑁆𑀢𑀭𑀁𑀬𑁂𑀯 𑀪𑀯𑀗𑁆𑀕𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲𑀸𑀯𑀲𑀸𑀦𑁂 𑀓𑀸𑀫𑀸𑀯𑀘𑀭𑀫𑀳𑀕𑁆𑀕𑀢𑀲𑀼𑀕𑀢𑀻𑀦𑀁 𑀅𑀜𑁆𑀜𑀢𑀭𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀬𑀣𑀽𑀧𑀝𑁆𑀞𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺.

𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀆𑀭𑀼𑀧𑁆𑀧𑀘𑀼𑀢𑀺𑀬𑀸𑀧𑀺 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀬 𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄.

𑁬𑁨𑁭. 𑀤𑀼𑀕𑁆𑀕𑀢𑀺𑀬𑀁 ¶ 𑀞𑀺𑀢𑀲𑁆𑀲 𑀧𑀦 𑀧𑀸𑀧𑀓𑀫𑁆𑀫𑀺𑀦𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂. 𑀧𑀜𑁆𑀘𑀤𑁆𑀯𑀸𑀭𑁂 𑀯𑀸 𑀧𑀦 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺 𑀳𑁂𑀢𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀅𑀣𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀘𑀼𑀢𑀺𑀘𑀺𑀢𑁆𑀢𑀸𑀯𑀲𑀸𑀦𑁂 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀲𑁆𑀲𑀸𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺.

𑁬𑁨𑁮. 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀏𑀯𑀁,

𑀧𑀯𑀢𑁆𑀢𑀫𑀸𑀦𑀁 𑀲𑀦𑁆𑀥𑀺𑀫𑁆𑀳𑀺, 𑀤𑁆𑀯𑁂𑀥𑀸 𑀓𑀫𑁆𑀫𑁂𑀦 𑀯𑀢𑁆𑀢𑀢𑀺;

𑀫𑀺𑀲𑁆𑀲𑀸𑀤𑀻𑀳𑀺 𑀘 𑀪𑁂𑀤𑁂𑀳𑀺, 𑀪𑁂𑀤𑀲𑁆𑀲 𑀤𑀼𑀯𑀺𑀥𑀸𑀤𑀺𑀓𑁄.

𑀇𑀤𑀜𑁆𑀳𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀫𑁆𑀳𑀺 𑀧𑀯𑀢𑁆𑀢𑀫𑀸𑀦𑀸 𑀤𑁆𑀯𑁂𑀥𑀸 𑀓𑀫𑁆𑀫𑁂𑀦 𑀯𑀢𑁆𑀢𑀢𑀺. 𑀬𑀣𑀸𑀲𑀓𑀜𑁆𑀳𑀺 𑀏𑀓𑀲𑁆𑀲 𑀚𑀦𑀓𑀓𑀫𑁆𑀫𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩). 𑀏𑀯𑀁 𑀯𑀢𑁆𑀢𑀫𑀸𑀦𑀲𑁆𑀲 𑀧𑀦𑀲𑁆𑀲 𑀫𑀺𑀲𑁆𑀲𑀸𑀤𑀻𑀳𑀺 𑀪𑁂𑀤𑁂𑀳𑀺 𑀤𑀼𑀯𑀺𑀥𑀸𑀤𑀺𑀓𑁄𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀬𑁆𑀬𑀣𑀺𑀤𑀁 ¶ 𑁋 𑀇𑀤𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀓𑀥𑀸 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀭𑀽𑀧𑁂𑀦 𑀲𑀳 𑀫𑀺𑀲𑁆𑀲𑀸𑀫𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀪𑁂𑀤𑀢𑁄 𑀢𑀺𑀯𑀺𑀥𑀁. 𑀅𑀡𑁆𑀟𑀚𑀚𑀮𑀸𑀩𑀼𑀚-𑀲𑀁𑀲𑁂𑀤𑀚-𑀑𑀧𑀧𑀸𑀢𑀺𑀓𑀬𑁄𑀦𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀕𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀁. 𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺.

𑁬𑁨𑁯. 𑀢𑀢𑁆𑀣,

𑀫𑀺𑀲𑁆𑀲𑀁 𑀤𑁆𑀯𑀺𑀥𑀸 𑀪𑀸𑀯𑀪𑁂𑀤𑀸, 𑀲𑀪𑀸𑀯𑀁 𑀢𑀢𑁆𑀣 𑀘 𑀤𑁆𑀯𑀺𑀥𑀸;

𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸, 𑀑𑀫𑀢𑁄 𑀆𑀤𑀺𑀦𑀸 𑀲𑀳.

𑀫𑀺𑀲𑁆𑀲𑀁 𑀤𑁆𑀯𑀺𑀥𑀸 𑀪𑀸𑀯𑀪𑁂𑀤𑀸𑀢𑀺 𑀬𑀁 𑀳𑁂𑀢𑀁 𑀏𑀢𑁆𑀣 𑀅𑀜𑁆𑀜𑀢𑁆𑀭 𑀅𑀭𑀽𑀧𑀪𑀯𑀸 𑀭𑀽𑀧𑀫𑀺𑀲𑁆𑀲𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀭𑀽𑀧𑀪𑀯𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑁂𑀦 𑀪𑀸𑀯𑁂𑀦 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺𑀢𑁄. 𑀓𑀸𑀫𑀪𑀯𑁂 𑀅𑀜𑁆𑀜𑀢𑁆𑀭 𑀚𑀸𑀢𑀺𑀧𑀡𑁆𑀟𑀓𑀧𑀝𑀺𑀲𑀦𑁆𑀥𑀺𑀬𑀸 𑀪𑀸𑀯𑁂𑀦 𑀲𑀳 𑀉𑀧𑁆𑀧𑀢𑁆𑀢𑀺𑀢𑁄 𑀲-𑀪𑀸𑀯𑀁, 𑀅-𑀪𑀸𑀯𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺.

𑀲𑀪𑀸𑀯𑀁 ¶ 𑀢𑀢𑁆𑀣 𑀘 𑀤𑁆𑀯𑀺𑀥𑀸𑀢𑀺 𑀢𑀢𑁆𑀣𑀸𑀧𑀺 𑀘 𑀬𑀁 𑀲-𑀪𑀸𑀯𑀁, 𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀳 𑀉𑀧𑁆𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀫𑁂𑀯 𑀳𑁄𑀢𑀺.

𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸 𑀑𑀫𑀢𑁄 𑀆𑀤𑀺𑀦𑀸 𑀲𑀳𑀸𑀢𑀺 𑀬𑀁 𑀳𑁂𑀢𑀫𑁂𑀢𑁆𑀣 ‘‘𑀫𑀺𑀲𑁆𑀲𑀁 𑀅𑀫𑀺𑀲𑁆𑀲’’𑀦𑁆𑀢𑀺 𑀤𑀼𑀓𑁂 𑀆𑀤𑀺𑀪𑀽𑀢𑀁 𑀭𑀽𑀧𑀫𑀺𑀲𑁆𑀲𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀲𑀳 𑀯𑀢𑁆𑀣𑀼𑀓𑀸𑀬𑀤𑀲𑀓𑀯𑀲𑁂𑀦 𑀤𑁆𑀯𑁂 𑀯𑀸, 𑀯𑀢𑁆𑀣𑀼𑀓𑀸𑀬𑀪𑀸𑀯𑀤𑀲𑀓𑀯𑀲𑁂𑀦 𑀢𑀬𑁄 𑀯𑀸 𑀤𑀲𑀓𑀸 𑀑𑀫𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀢𑁆𑀣𑀺 𑀇𑀢𑁄 𑀧𑀭𑀁 𑀭𑀽𑀧𑀧𑀭𑀺𑀳𑀸𑀦𑀻𑀢𑀺. 𑀢𑀁 𑀧𑀦𑁂𑀢𑀁 𑀏𑀯𑀁 𑀑𑀫𑀓𑀧𑀭𑀺𑀫𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀡𑁆𑀟𑀚𑀚𑀮𑀸𑀩𑀼𑀚𑀦𑀸𑀫𑀺𑀓𑀸𑀲𑀼 𑀤𑁆𑀯𑀻𑀲𑀼 𑀬𑁄𑀦𑀻𑀲𑀼 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑁂𑀦 𑀅𑀁𑀲𑀼𑀦𑀸 𑀉𑀤𑁆𑀥𑀝𑀲𑀧𑁆𑀧𑀺𑀫𑀡𑁆𑀟𑀧𑁆𑀧𑀫𑀸𑀡𑀁 𑀓𑀮𑀮𑀦𑁆𑀢𑀺 𑀮𑀤𑁆𑀥𑀲𑀗𑁆𑀔𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑁄𑀦𑀻𑀦𑀁 𑀕𑀢𑀺𑀯𑀲𑁂𑀦 𑀲𑀫𑁆𑀪𑀯𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁩𑁦. 𑀏𑀢𑀸𑀲𑀼 𑀳𑀺,

𑀦𑀺𑀭𑀬𑁂 𑀪𑀼𑀫𑁆𑀫𑀯𑀚𑁆𑀚𑁂𑀲𑀼, 𑀤𑁂𑀯𑁂𑀲𑀼 𑀘 𑀦 𑀬𑁄𑀦𑀺𑀬𑁄;

𑀢𑀺𑀲𑁆𑀲𑁄 𑀧𑀼𑀭𑀺𑀫𑀺𑀓𑀸 𑀳𑁄𑀦𑁆𑀢𑀺, 𑀘𑀢𑀲𑁆𑀲𑁄𑀧𑀺 𑀕𑀢𑀺𑀢𑁆𑀢𑀬𑁂.

𑀢𑀢𑁆𑀣 ¶ 𑀤𑁂𑀯𑁂𑀲𑀼 𑀘𑀸𑀢𑀺 𑀘𑀲𑀤𑁆𑀤𑁂𑀦 𑀬𑀣𑀸 𑀦𑀺𑀭𑀬𑁂 𑀘 𑀪𑀼𑀫𑁆𑀫𑀯𑀚𑁆𑀚𑁂𑀲𑀼 𑀘 𑀤𑁂𑀯𑁂𑀲𑀼, 𑀏𑀯𑀁 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑁂𑀲𑀼 𑀘 𑀧𑀼𑀭𑀺𑀫𑀺𑀓𑀸 𑀢𑀺𑀲𑁆𑀲𑁄 𑀬𑁄𑀦𑀺𑀬𑁄 𑀦 𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀑𑀧𑀧𑀸𑀢𑀺𑀓𑀸 𑀏𑀯 𑀳𑀺 𑀢𑁂 𑀳𑁄𑀦𑁆𑀢𑀺. 𑀲𑁂𑀲𑁂 𑀧𑀦 𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑁂 𑀕𑀢𑀺𑀢𑁆𑀢𑀬𑁂 𑀧𑀼𑀩𑁆𑀩𑁂 𑀯𑀚𑁆𑀚𑀺𑀢𑀪𑀼𑀫𑁆𑀫𑀤𑁂𑀯𑁂𑀲𑀼 𑀘 𑀘𑀢𑀲𑁆𑀲𑁄𑀧𑀺 𑀬𑁄𑀦𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣,

𑀢𑀺𑀁𑀲 𑀦𑀯 𑀘𑁂𑀯 𑀭𑀽𑀧𑀻𑀲𑀼, 𑀲𑀢𑁆𑀢𑀢𑀺 𑀉𑀓𑁆𑀓𑀁𑀲𑀢𑁄𑀣 𑀭𑀽𑀧𑀸𑀦𑀺;

𑀲𑀁𑀲𑁂𑀤𑀼𑀧𑀧𑀸𑀢𑀬𑁄𑀦𑀺𑀲𑀼, 𑀅𑀣 𑀯𑀸 𑀅𑀯𑀓𑀁𑀲𑀢𑁄 𑀢𑀺𑀁𑀲.

𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀼 𑀢𑀸𑀯 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀼 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁 𑀚𑀻𑀯𑀺𑀢𑀦𑀯𑀓𑀲𑁆𑀲 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀓𑀮𑀸𑀧𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀘 𑀦𑀯 𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀽𑀧𑀻 𑀩𑁆𑀭𑀳𑁆𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀼 𑀉𑀓𑁆𑀓𑀁𑀲𑀢𑁄 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀸𑀦𑀁 𑀯𑀲𑁂𑀦 𑀲𑀢𑁆𑀢𑀢𑀺, 𑀢𑀸𑀦𑀺 𑀘 𑀦𑀺𑀘𑁆𑀘𑀁 𑀤𑁂𑀯𑁂𑀲𑀼. 𑀢𑀢𑁆𑀣 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸 𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄 𑀘𑀓𑁆𑀔𑀼𑀧𑀲𑀸𑀤𑁄 𑀚𑀻𑀯𑀺𑀢𑀦𑁆𑀢𑀺 𑀅𑀬𑀁 𑀤𑀲𑀭𑀽𑀧𑀧𑀭𑀺𑀫𑀸𑀡𑁄 𑀭𑀽𑀧𑀧𑀼𑀜𑁆𑀚𑁄 𑀘𑀓𑁆𑀔𑀼𑀤𑀲𑀓𑁄 𑀦𑀸𑀫. 𑀏𑀯𑀁 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸 ¶ . 𑀅𑀯𑀓𑀁𑀲𑀢𑁄 𑀧𑀦 𑀚𑀘𑁆𑀘𑀦𑁆𑀥𑀩𑀥𑀺𑀭𑀅𑀖𑀸𑀦𑀓𑀦𑀧𑀼𑀁𑀲𑀓𑀲𑁆𑀲 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀓𑁆𑀓𑀁𑀲𑀸𑀯𑀓𑀁𑀲𑀸𑀦𑀁 𑀧𑀦 𑀅𑀦𑁆𑀢𑀭𑁂 𑀅𑀦𑀼𑀭𑀽𑀧𑀢𑁄 𑀯𑀺𑀓𑀧𑁆𑀧𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁩𑁧. 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀧𑀼𑀦,

𑀔𑀦𑁆𑀥𑀸𑀭𑀫𑁆𑀫𑀡𑀕𑀢𑀺𑀳𑁂𑀢𑀼-𑀯𑁂𑀤𑀦𑀸𑀧𑀻𑀢𑀺𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺;

𑀪𑁂𑀤𑀸𑀪𑁂𑀤𑀯𑀺𑀲𑁂𑀲𑁄, 𑀘𑀼𑀢𑀺𑀲𑀦𑁆𑀥𑀻𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑁄.

𑀬𑀸 𑀳𑁂𑀲𑀸 𑀫𑀺𑀲𑁆𑀲𑀸𑀫𑀺𑀲𑁆𑀲𑀢𑁄 𑀤𑀼𑀯𑀺𑀥𑀸 𑀧𑀝𑀺𑀲𑀦𑁆𑀥𑀺, 𑀬𑀸 𑀘𑀲𑁆𑀲𑀸 𑀅𑀢𑀻𑀢𑀸𑀦𑀦𑁆𑀢𑀭𑀸 𑀘𑀼𑀢𑀺, 𑀢𑀸𑀲𑀁 𑀇𑀫𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀪𑁂𑀤𑀸𑀪𑁂𑀤𑀯𑀺𑀲𑁂𑀲𑁄 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀓𑀣𑀁? 𑀓𑀤𑀸𑀘𑀺 𑀳𑀺 𑀘𑀢𑀼𑀓𑁆𑀔𑀦𑁆𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀘𑀢𑀼𑀓𑁆𑀔𑀦𑁆𑀥𑀸𑀯 𑀆𑀭𑀫𑁆𑀫𑀡𑀢𑁄𑀧𑀺 𑀅𑀪𑀺𑀦𑁆𑀦𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀓𑀤𑀸𑀘𑀺 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸. 𑀅𑀬𑀁 𑀢𑀸𑀯 𑀅𑀭𑀽𑀧𑀪𑀽𑀫𑀻𑀲𑀼𑀬𑁂𑀯 𑀦𑀬𑁄. 𑀓𑀤𑀸𑀘𑀺 𑀧𑀦 𑀘𑀢𑀼𑀓𑁆𑀔𑀦𑁆𑀥𑀸𑀬 𑀅𑀭𑀽𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺 ¶ . 𑀓𑀤𑀸𑀘𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀘𑀼𑀢𑀺𑀬𑀸 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀯𑀸 𑀅𑀦𑀦𑁆𑀢𑀭𑀸 𑀘𑀢𑀼𑀓𑁆𑀔𑀦𑁆𑀥𑀸 𑀅𑀭𑀽𑀧𑀧𑀝𑀺𑀲𑀦𑁆𑀥𑀺. 𑀏𑀯𑀁 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺. 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺. 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺. 𑀤𑀼𑀳𑁂𑀢𑀼𑀓𑀘𑀼𑀢𑀺𑀬𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀼𑀢𑀺𑀬𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀧𑀝𑀺𑀲𑀦𑁆𑀥𑀺. 𑀅𑀧𑁆𑀧𑀻𑀢𑀺𑀓𑀘𑀼𑀢𑀺𑀬𑀸 𑀲𑀧𑁆𑀧𑀻𑀢𑀺𑀓𑀧𑀝𑀺𑀲𑀦𑁆𑀥𑀺. 𑀅𑀯𑀺𑀢𑀓𑁆𑀓𑀘𑀼𑀢𑀺𑀬𑀸 𑀲𑀯𑀺𑀢𑀓𑁆𑀓𑀧𑀝𑀺𑀲𑀦𑁆𑀥𑀺. 𑀅𑀯𑀺𑀘𑀸𑀭𑀘𑀼𑀢𑀺𑀬𑀸 𑀲𑀯𑀺𑀘𑀸𑀭𑀧𑀝𑀺𑀲𑀦𑁆𑀥𑀺. 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀘𑀼𑀢𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀧𑀝𑀺𑀲𑀦𑁆𑀥𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀭𑀻𑀢𑀢𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁.

𑁬𑁩𑁨.

𑀮𑀤𑁆𑀥𑀧𑀘𑁆𑀘𑀬𑀫𑀺𑀢𑀺 𑀥𑀫𑁆𑀫𑀫𑀢𑁆𑀢𑀫𑁂𑀢𑀁 𑀪𑀯𑀦𑁆𑀢𑀭𑀫𑀼𑀧𑁂𑀢𑀺;

𑀦𑀸𑀲𑁆𑀲 𑀢𑀢𑁄 𑀲𑀗𑁆𑀓𑀦𑁆𑀢𑀺, 𑀦 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀳𑁄𑀢𑀺.

𑀇𑀢𑀺 𑀳𑁂𑀢𑀁 𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀪𑀯𑀦𑁆𑀢𑀭𑀫𑀼𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀲𑀢𑁆𑀢𑁄, 𑀦 𑀚𑀻𑀯𑁄. 𑀢𑀲𑁆𑀲 𑀘 𑀦𑀸𑀧𑀺 𑀅𑀢𑀻𑀢𑀪𑀯𑀢𑁄 𑀇𑀥 𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑀺. 𑀦𑀸𑀧𑀺 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀇𑀥 𑀧𑀸𑀢𑀼𑀪𑀸𑀯𑁄. 𑀢𑀬𑀺𑀤𑀁 𑀧𑀸𑀓𑀝𑁂𑀦 𑀫𑀦𑀼𑀲𑁆𑀲𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀅𑀢𑀻𑀢𑀪𑀯𑀲𑁆𑀫𑀺𑀁 ¶ 𑀳𑀺 𑀲𑀭𑀲𑁂𑀦 𑀉𑀧𑀓𑁆𑀓𑀫𑁂𑀦 𑀯𑀸 𑀲𑀫𑀸𑀲𑀦𑁆𑀦𑀫𑀭𑀡𑀲𑁆𑀲 𑀅𑀲𑀬𑁆𑀳𑀸𑀦𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀓𑀸𑀦𑀁 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀸𑀲𑀢𑁆𑀣𑀸𑀦𑀁 𑀲𑀦𑁆𑀦𑀺𑀧𑀸𑀢𑀁 𑀅𑀲𑀳𑀦𑁆𑀢𑀲𑁆𑀲 𑀆𑀢𑀧𑁂 𑀧𑀓𑁆𑀔𑀺𑀢𑁆𑀢𑀳𑀭𑀺𑀢𑀢𑀸𑀮𑀧𑀡𑁆𑀡𑀫𑀺𑀯 𑀓𑀫𑁂𑀦 𑀉𑀧𑀲𑀼𑀲𑁆𑀲𑀫𑀸𑀦𑁂 𑀲𑀭𑀻𑀭𑁂 𑀦𑀺𑀭𑀼𑀤𑁆𑀥𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁂𑀲𑀼 𑀓𑀸𑀬𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀲𑀼 𑀢𑀗𑁆𑀔𑀡𑀸𑀯𑀲𑁂𑀲𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀕𑀭𑀼𑀓𑀲𑀫𑀸𑀲𑁂𑀯𑀺𑀢𑀸𑀲𑀦𑁆𑀦𑀧𑀼𑀩𑁆𑀩𑀓𑀢𑀸𑀦𑀁 𑀅𑀜𑁆𑀜𑀢𑀭𑀁 𑀮𑀤𑁆𑀥𑀸𑀯𑀲𑁂𑀲𑀧𑀘𑁆𑀘𑀬𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀁, 𑀢𑀤𑀼𑀧𑀝𑁆𑀞𑀸𑀧𑀺𑀢𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀯𑀺𑀲𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀢𑀤𑁂𑀯𑀁 𑀧𑀯𑀢𑁆𑀢𑀫𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀢𑀡𑁆𑀳𑀸 𑀦𑀸𑀫𑁂𑀢𑀺, 𑀲𑀳𑀚𑀸𑀢𑀲𑀗𑁆𑀔𑀸𑀭𑀸 𑀔𑀺𑀧𑀦𑁆𑀢𑀺. 𑀢𑀁 𑀲𑀦𑁆𑀢𑀢𑀺𑀯𑀲𑁂𑀦 𑀢𑀡𑁆𑀳𑀸𑀬 𑀦𑀸𑀫𑀺𑀬𑀫𑀸𑀦𑀁 𑀲𑀗𑁆𑀔𑀸𑀭𑁂𑀳𑀺 𑀔𑀺𑀧𑁆𑀧𑀫𑀸𑀦𑀁 𑀑𑀭𑀺𑀫𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀭𑀚𑁆𑀚𑀼𑀫𑀸𑀮𑀫𑁆𑀩𑀺𑀢𑁆𑀯𑀸 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑀓𑁄 𑀯𑀺𑀬 𑀧𑀼𑀭𑀺𑀫𑀜𑁆𑀘 𑀦𑀺𑀲𑁆𑀲𑀬𑀁 𑀚𑀳𑀢𑀺, 𑀅𑀧𑀭𑀜𑁆𑀘 𑀓𑀫𑁆𑀫𑀲𑀫𑀼𑀝𑁆𑀞𑀸𑀧𑀺𑀢𑀁 𑀦𑀺𑀲𑁆𑀲𑀬𑀁 𑀅𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀸𑀤𑀻𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀻𑀢𑀺.

𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀘𑀯𑀦𑀢𑁄 𑀘𑀼𑀢𑀺. 𑀧𑀘𑁆𑀙𑀺𑀫𑀁 𑀪𑀯𑀦𑁆𑀢𑀭𑀸𑀤𑀺𑀧𑀝𑀺𑀲𑀦𑁆𑀥𑀸𑀦𑀢𑁄 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺 ¶ . 𑀢𑀤𑁂𑀢𑀁 𑀦𑀸𑀧𑀺 𑀧𑀼𑀭𑀺𑀫𑀪𑀯𑀸 𑀇𑀥𑀸𑀕𑀢𑀁, 𑀦𑀸𑀧𑀺 𑀢𑀢𑁄 𑀓𑀫𑁆𑀫𑀲𑀗𑁆𑀔𑀸𑀭𑀦𑀢𑀺𑀯𑀺𑀲𑀬𑀸𑀤𑀺𑀳𑁂𑀢𑀼𑀁 𑀯𑀺𑀦𑀸 𑀧𑀸𑀢𑀼𑀪𑀽𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁩𑁩.

𑀲𑀺𑀬𑀼𑀁 𑀦𑀺𑀤𑀲𑁆𑀲𑀦𑀸𑀦𑁂𑀢𑁆𑀣, 𑀧𑀝𑀺𑀖𑁄𑀲𑀸𑀤𑀺𑀓𑀸 𑀅𑀣;

𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺, 𑀏𑀓𑀢𑀸 𑀦𑀸𑀧𑀺 𑀦𑀸𑀦𑀢𑀸.

𑀏𑀢𑁆𑀣 𑀘𑁂𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑀺𑀫𑀪𑀯𑀢𑁄 𑀇𑀥 𑀅𑀦𑀸𑀕𑀫𑀦𑁂, 𑀅𑀢𑀻𑀢𑀪𑀯𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽𑀢𑀺 𑀘 𑀉𑀧𑁆𑀧𑀸𑀤𑁂 𑀧𑀝𑀺𑀖𑁄𑀲-𑀧𑀤𑀻𑀧-𑀫𑀼𑀤𑁆𑀤𑀸-𑀧𑀝𑀺𑀩𑀺𑀫𑁆𑀩𑀧𑁆𑀧𑀓𑀸𑀭𑀸 𑀥𑀫𑁆𑀫𑀸 𑀦𑀺𑀤𑀲𑁆𑀲𑀦𑀸𑀦𑀺 𑀲𑀺𑀬𑀼𑀁. 𑀬𑀣𑀸 𑀳𑀺 𑀧𑀝𑀺𑀖𑁄𑀲-𑀧𑀤𑀻𑀧-𑀫𑀼𑀤𑁆𑀤𑀸-𑀙𑀸𑀬𑀸 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀳𑁄𑀦𑁆𑀢𑀺 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀏𑀯𑀫𑁂𑀯𑀁 𑀇𑀤𑀁 𑀘𑀺𑀢𑁆𑀢𑀁.

𑀏𑀢𑁆𑀣 𑀘 𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺 𑀏𑀓𑀢𑀸 𑀦𑀸𑀧𑀺 𑀦𑀸𑀦𑀢𑀸. 𑀬𑀤𑀺 𑀳𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀏𑀓𑀦𑁆𑀢𑀫𑁂𑀓𑀢𑀸 𑀪𑀯𑁂𑀬𑁆𑀬, 𑀦 𑀔𑀻𑀭𑀢𑁄 𑀤𑀥𑀺 𑀲𑀫𑁆𑀪𑀽𑀢𑀁 𑀲𑀺𑀬𑀸. 𑀅𑀣𑀸𑀧𑀺 𑀏𑀓𑀦𑁆𑀢𑀦𑀸𑀦𑀢𑀸 𑀪𑀯𑁂𑀬𑁆𑀬, 𑀦 𑀔𑀻𑀭𑀲𑁆𑀲𑀸𑀥𑀻𑀦𑁄 𑀤𑀥𑀺 𑀲𑀺𑀬𑀸. 𑀏𑀲 𑀦𑀬𑁄 𑀲𑀩𑁆𑀩𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼. 𑀏𑀯𑀜𑁆𑀘 𑀲𑀢𑀺 𑀲𑀩𑁆𑀩𑀮𑁄𑀓𑀯𑁄𑀳𑀸𑀭𑀮𑁄𑀧𑁄 ¶ 𑀲𑀺𑀬𑀸, 𑀲𑁄 𑀘 𑀅𑀦𑀺𑀝𑁆𑀞𑁄. 𑀢𑀲𑁆𑀫𑀸 𑀏𑀢𑁆𑀣 𑀦 𑀏𑀓𑀦𑁆𑀢𑀫𑁂𑀓𑀢𑀸 𑀯𑀸 𑀦𑀸𑀦𑀢𑀸 𑀯𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺.

𑁬𑁩𑁪. 𑀏𑀢𑁆𑀣𑀸𑀳 𑁋 𑀦𑀦𑀼 𑀏𑀯𑀁 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀲𑀢𑀺 𑀬𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀔𑀦𑁆𑀥𑀸, 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀨𑀮𑀧𑀘𑁆𑀘𑀬𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀢𑀢𑁆𑀣 𑀅𑀕𑀫𑀦𑀢𑁄 𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁄 𑀘 𑀢𑀁 𑀨𑀮𑀁 𑀲𑀺𑀬𑀸, 𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸, 𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀫𑀺𑀤𑀁 𑀯𑀺𑀥𑀸𑀦𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁 𑀏𑀢𑀁, 𑀦𑀸𑀜𑁆𑀜𑀲𑁆𑀲 𑀦 𑀘 𑀅𑀜𑁆𑀜𑀢𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄.

𑀏𑀓𑀲𑀦𑁆𑀢𑀸𑀦𑀲𑁆𑀫𑀺𑀁 𑀳𑀺 𑀨𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀢𑁆𑀣 𑀏𑀓𑀦𑁆𑀢𑀏𑀓𑀢𑁆𑀢𑀦𑀸𑀦𑀢𑁆𑀢𑀸𑀦𑀁 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀅𑀜𑁆𑀜𑀲𑁆𑀲𑀸𑀢𑀺 𑀯𑀸 𑀅𑀜𑁆𑀜𑀢𑁄𑀢𑀺 𑀯𑀸 𑀦 𑀳𑁄𑀢𑀺. 𑀏𑀢𑀲𑁆𑀲 𑀘 𑀧𑀦𑀢𑁆𑀣𑀲𑁆𑀲 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀲𑀸𑀥𑀓𑁄. 𑀅𑀫𑁆𑀩𑀩𑀻𑀚𑀸𑀤𑀻𑀦𑀁 𑀳𑀺 𑀅𑀪𑀺𑀲𑀗𑁆𑀔𑀸𑀭𑁂𑀲𑀼 𑀓𑀢𑁂𑀲𑀼 𑀢𑀲𑁆𑀲 𑀩𑀻𑀚𑀲𑁆𑀲 𑀲𑀦𑁆𑀢𑀸𑀦𑁂 𑀮𑀤𑁆𑀥𑀧𑀘𑁆𑀘𑀬𑁄 𑀓𑀸𑀮𑀦𑁆𑀢𑀭𑁂 𑀨𑀮𑀯𑀺𑀲𑁂𑀲𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦 𑀅𑀜𑁆𑀜𑀩𑀻𑀚𑀸𑀦𑀁, 𑀦𑀸𑀧𑀺 𑀅𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 ¶ , 𑀦 𑀘 𑀢𑀸𑀦𑀺 𑀩𑀻𑀚𑀸𑀦𑀺, 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀸 𑀨𑀮𑀝𑁆𑀞𑀸𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸𑀤𑀻𑀳𑀺 𑀘𑀸𑀧𑀺 𑀩𑀸𑀮𑀲𑀭𑀻𑀭𑁂 𑀉𑀧𑀬𑀼𑀢𑁆𑀢𑁂𑀳𑀺 𑀓𑀸𑀮𑀦𑁆𑀢𑀭𑁂 𑀯𑀼𑀟𑁆𑀠𑀲𑀭𑀻𑀭𑀸𑀤𑀻𑀲𑀼 𑀨𑀮𑀤𑁂𑀳𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸’’𑀢𑀺, 𑀢𑀢𑁆𑀣,

𑀨𑀮𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀏𑀯, 𑀲𑀺𑀤𑁆𑀥𑀸 𑀪𑀼𑀜𑁆𑀚𑀓𑀲𑀫𑁆𑀫𑀼𑀢𑀺;

𑀨𑀮𑀼𑀧𑁆𑀧𑀸𑀤𑁂𑀦 𑀭𑀼𑀓𑁆𑀔𑀲𑁆𑀲, 𑀬𑀣𑀸 𑀨𑀮𑀢𑀺 𑀲𑀫𑁆𑀫𑀼𑀢𑀺.

𑀬𑀣𑀸 𑀳𑀺 𑀭𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑀪𑀽𑀢𑀲𑁆𑀲 𑀭𑀼𑀓𑁆𑀔𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀭𑀼𑀓𑁆𑀔𑁄 𑀨𑀮𑀢𑀻𑀢𑀺 𑀯𑀸 𑀨𑀮𑀺𑀢𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀤𑁂𑀯𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑀪𑀽𑀢𑀲𑁆𑀲 𑀉𑀧𑀪𑁄𑀕𑀲𑀗𑁆𑀔𑀸𑀢𑀲𑁆𑀲 𑀲𑀼𑀔𑀤𑀼𑀓𑁆𑀔𑀨𑀮𑀲𑁆𑀲 𑀉𑀧𑁆𑀧𑀸𑀤𑁂𑀦𑁂𑀯 𑀤𑁂𑀯𑁄, 𑀫𑀦𑀼𑀲𑁆𑀲𑁄 𑀯𑀸 𑀉𑀧𑀪𑀼𑀜𑁆𑀚𑀢𑀻𑀢𑀺 𑀯𑀸, 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦 𑀏𑀢𑁆𑀣 𑀅𑀜𑁆𑀜𑁂𑀦 𑀉𑀧𑀪𑀼𑀜𑁆𑀚𑀓𑁂𑀦 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺.

𑁬𑁩𑁫. 𑀬𑁄𑀧𑀺 ¶ 𑀯𑀤𑁂𑀬𑁆𑀬 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀏𑀢𑁂 𑀲𑀗𑁆𑀔𑀸𑀭𑀸 𑀯𑀺𑀚𑁆𑀚𑀫𑀸𑀦𑀸 𑀯𑀸 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀅𑀯𑀺𑀚𑁆𑀚𑀫𑀸𑀦𑀸 𑀯𑀸, 𑀬𑀤𑀺 𑀘 𑀯𑀺𑀚𑁆𑀚𑀫𑀸𑀦𑀸 𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀦𑁂𑀲𑀁 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀣 𑀅𑀯𑀺𑀚𑁆𑀚𑀫𑀸𑀦𑀸 𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸 𑀲𑀺𑀬𑀼’’𑀦𑁆𑀢𑀺, 𑀲𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋

𑀓𑀢𑀢𑁆𑀢𑀸 𑀧𑀘𑁆𑀘𑀬𑀸 𑀏𑀢𑁂, 𑀦 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸;

𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀢𑀢𑁆𑀣, 𑀯𑁂𑀤𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦𑀁.

𑀓𑀢𑀢𑁆𑀢𑀸𑀬𑁂𑀯 𑀳𑀺 𑀲𑀗𑁆𑀔𑀸𑀭𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸. 𑀬𑀣𑀸𑀳 𑁋 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺 (𑀥. 𑀲. 𑁪𑁩𑁧). 𑀬𑀣𑀸𑀭𑀳𑀲𑁆𑀲 𑀘 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀦 𑀧𑀼𑀦 𑀨𑀮𑀸𑀯𑀳𑀸 𑀳𑁄𑀦𑁆𑀢𑀺 𑀯𑀺𑀧𑀸𑀓𑀢𑁆𑀢𑀸. 𑀏𑀢𑀲𑁆𑀲 𑀘𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑁂 𑀇𑀤𑀁 𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀦𑀺𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀮𑁄𑀓𑁂 𑀬𑁄 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀦𑀺𑀬𑁆𑀬𑀸𑀢𑀦𑀢𑁆𑀣𑀁 𑀧𑀸𑀝𑀺𑀪𑁄𑀕𑁄 𑀳𑁄𑀢𑀺, 𑀪𑀡𑁆𑀟𑀁 𑀯𑀸 𑀓𑀺𑀡𑀸𑀢𑀺, 𑀇𑀡𑀁 𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀸𑀓𑀭𑀡𑀫𑀢𑁆𑀢𑀫𑁂𑀯 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑀸𑀤𑀺𑀫𑁆𑀳𑀺 ¶ 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀓𑀺𑀭𑀺𑀬𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀁 𑀯𑀸, 𑀦 𑀘 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑀸𑀤𑀺𑀢𑁄 𑀧𑀭𑀫𑁆𑀧𑀺 𑀥𑀸𑀭𑀓𑁄𑀯 𑀳𑁄𑀢𑀺. 𑀓𑀲𑁆𑀫𑀸? 𑀦𑀺𑀬𑁆𑀬𑀸𑀢𑀦𑀸𑀤𑀻𑀦𑀁 𑀓𑀢𑀢𑁆𑀢𑀸. 𑀏𑀯𑀁 𑀓𑀢𑀢𑁆𑀢𑀸𑀯 𑀲𑀗𑁆𑀔𑀸𑀭𑀸𑀧𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀘 𑀬𑀣𑀸𑀭𑀳𑀁 𑀨𑀮𑀤𑀸𑀦𑀢𑁄 𑀧𑀭𑀫𑁆𑀧𑀺 𑀨𑀮𑀸𑀯𑀳𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀫𑀺𑀲𑁆𑀲𑀸𑀫𑀺𑀲𑁆𑀲𑀯𑀲𑁂𑀦 𑀤𑁆𑀯𑁂𑀥𑀸𑀧𑀺 𑀯𑀢𑁆𑀢𑀫𑀸𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺.

𑁬𑁩𑁬. 𑀇𑀤𑀸𑀦𑀺 𑀲𑀩𑁆𑀩𑁂𑀲𑁆𑀯𑁂𑀯 𑀢𑁂𑀲𑀼 𑀩𑀸𑀢𑁆𑀢𑀺𑀁𑀲𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑁂𑀲𑀼 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁆𑀣𑀁,

𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁, 𑀯𑀲𑁂𑀦𑁂𑀢𑁂 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸.

𑀢𑀢𑁆𑀣 𑀢𑀬𑁄 𑀪𑀯𑀸, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀲𑀢𑁆𑀢𑀸𑀯𑀸𑀲𑀸𑀢𑀺 𑀏𑀢𑁂 𑀪𑀯𑀸𑀤𑀬𑁄 𑀦𑀸𑀫. 𑀏𑀢𑁂𑀲𑀼 𑀪𑀯𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀏𑀢𑁂 𑀬𑁂𑀲𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑀸, 𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀯𑀺𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣 ¶ 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀢𑀸𑀯 𑀓𑀸𑀫𑀸𑀯𑀘𑀭𑀅𑀝𑁆𑀞𑀘𑁂𑀢𑀦𑀸𑀪𑁂𑀤𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀯𑀺𑀲𑁂𑀲𑁂𑀦 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀦𑀯𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀧𑀘𑁆𑀘𑀬𑁄. 𑀭𑀽𑀧𑀸𑀯𑀘𑀭𑀧𑀜𑁆𑀘𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀭𑀽𑀧𑀪𑀯𑁂 𑀧𑀝𑀺𑀲𑀦𑁆𑀥𑀺𑀬𑀁 𑀏𑀯 𑀧𑀜𑁆𑀘𑀦𑁆𑀦𑀁.

𑀯𑀼𑀢𑁆𑀢𑀧𑁆𑀧𑀪𑁂𑀤𑀓𑀸𑀫𑀸𑀯𑀘𑀭𑁄 𑀧𑀦 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀭𑀺𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑁂𑀥𑀸 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑁆𑀯𑁂𑀯 𑀭𑀽𑀧𑀪𑀯𑁂 𑀧𑀜𑁆𑀘𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀓𑀸𑀫𑀪𑀯𑁂 𑀧𑀦 𑀤𑀼𑀕𑁆𑀕𑀢𑀺𑀬𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀭𑀺𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀢𑁆𑀣 𑀦𑀺𑀭𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀦𑀭𑀓𑀘𑀸𑀭𑀺𑀓𑀸𑀤𑀻𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁂 𑀲𑁄 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑁂𑀲𑀼 𑀧𑀦 𑀧𑁂𑀢𑀫𑀳𑀺𑀤𑁆𑀥𑀺𑀓𑁂𑀲𑀼 𑀘 𑀇𑀝𑁆𑀞𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀺𑀬𑁂𑀯.

𑀲𑁆𑀯𑁂𑀯 𑀓𑀸𑀫𑀪𑀯𑁂 𑀲𑀼𑀕𑀢𑀺𑀬𑀁 𑀲𑁄𑀴𑀲𑀦𑁆𑀦𑀫𑁆𑀧𑀺 𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 ¶ 𑀧𑀝𑀺𑀲𑀦𑁆𑀥𑀺𑀬𑀜𑁆𑀘. 𑀅𑀯𑀺𑀲𑁂𑀲𑁂𑀦 𑀧𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀭𑀽𑀧𑀪𑀯𑁂 𑀤𑀲𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘.

𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀸𑀫𑀪𑀯𑁂 𑀤𑀼𑀕𑁆𑀕𑀢𑀺𑀬𑀁 𑀏𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂. 𑀙𑀦𑁆𑀦𑀁 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘.

𑀓𑀸𑀫𑀪𑀯𑁂 𑀧𑀦 𑀲𑀼𑀕𑀢𑀺𑀬𑀁 𑀢𑁂𑀲𑀁𑀬𑁂𑀯 𑀲𑀢𑁆𑀢𑀦𑁆𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀭𑀽𑀧𑀪𑀯𑁂 𑀘𑀢𑀼𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀲𑁄 𑀘 𑀔𑁄 𑀓𑀸𑀫𑀸𑀯𑀘𑀭𑁂 𑀅𑀦𑀺𑀝𑁆𑀞𑀭𑀽𑀧𑀤𑀲𑁆𑀲𑀦𑀲𑀤𑁆𑀤𑀲𑀯𑀦𑀯𑀲𑁂𑀦, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀦 𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀧𑀺.

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀅𑀭𑀽𑀧𑀪𑀯𑁂 𑀘𑀢𑀼𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀯𑀢𑁆𑀢𑁂 𑀘 𑀧𑀝𑀺𑀲𑀦𑁆𑀥𑀺𑀬𑀜𑁆𑀘.

𑀏𑀯𑀁 ¶ 𑀢𑀸𑀯 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 𑀯𑀲𑁂𑀦 𑀏𑀢𑁂 𑀲𑀗𑁆𑀔𑀸𑀭𑀸 𑀬𑁂𑀲𑀁 𑀧𑀘𑁆𑀘𑀬𑀸, 𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀬𑁄𑀦𑀺𑀆𑀤𑀻𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁩𑁭. 𑀢𑀢𑁆𑀭𑀺𑀤𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀧𑀓𑀸𑀲𑀦𑀁 𑁋 𑀇𑀫𑁂𑀲𑀼 𑀳𑀺 𑀲𑀗𑁆𑀔𑀸𑀭𑁂𑀲𑀼 𑀬𑀲𑁆𑀫𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀢𑀸𑀯 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀩𑁆𑀩𑀫𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀢𑀣𑀸 𑀅𑀡𑁆𑀟𑀚𑀸𑀤𑀻𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀤𑁂𑀯𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀲𑀼 𑀤𑁆𑀯𑀻𑀲𑀼 𑀕𑀢𑀻𑀲𑀼, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻-𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻-𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑀸𑀲𑀼 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼. 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁂 𑀧𑀦𑁂𑀲 𑀭𑀽𑀧𑀫𑀢𑁆𑀢𑀫𑁂𑀯𑀸𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀘𑀢𑀽𑀲𑀼𑀬𑁂𑀯 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀩𑁆𑀩𑀫𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀢𑀲𑁆𑀫𑀸 𑀏𑀲 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀪𑀯𑁂𑀲𑀼, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀤𑁆𑀯𑀻𑀲𑀼 𑀕𑀢𑀻𑀲𑀼, 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀘𑀢𑀽𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘 𑀏𑀓𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀬𑀣𑀸𑀲𑀫𑁆𑀪𑀯𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘.

𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀦 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀫𑀪𑀯𑁂 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀅𑀯𑀲𑁂𑀲𑀸𑀲𑀼 𑀢𑀻𑀲𑀼 𑀕𑀢𑀻𑀲𑀼 ¶ , 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑀸𑀬 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸, 𑀢𑀸𑀤𑀺𑀲𑁂𑀬𑁂𑀯 𑀘 𑀏𑀓𑀲𑁆𑀫𑀺𑀁 𑀲𑀢𑁆𑀢𑀸𑀯𑀸𑀲𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀲 𑀏𑀓𑀲𑁆𑀫𑀺𑀁 𑀪𑀯𑁂, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀢𑀻𑀲𑀼 𑀕𑀢𑀻𑀲𑀼, 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸, 𑀏𑀓𑀫𑁆𑀳𑀺 𑀘 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘.

𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀧𑀦 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁𑀬𑁂𑀯 𑀅𑀭𑀽𑀧𑀪𑀯𑁂, 𑀏𑀓𑀺𑀲𑁆𑀲𑀸 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸, 𑀏𑀓𑀺𑀲𑁆𑀲𑀸 𑀤𑁂𑀯𑀕𑀢𑀺𑀬𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀓𑀸𑀲𑀼 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀓𑁂𑀲𑀼 𑀘 𑀘𑀢𑀽𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀲 𑀏𑀓𑀲𑁆𑀫𑀺𑀁 𑀪𑀯𑁂, 𑀏𑀓𑀺𑀲𑁆𑀲𑀸 𑀬𑁄𑀦𑀺𑀬𑀸, 𑀏𑀓𑀺𑀲𑁆𑀲𑀸 𑀕𑀢𑀺𑀬𑀸, 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀘𑀢𑀽𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘𑀢𑀼𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘𑀸𑀢𑀺. 𑀏𑀯𑀁,

𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 ¶ , 𑀯𑀲𑁂𑀦𑁂𑀢𑁂 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸𑀢𑀺.

𑀅𑀬𑀁 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀸𑀫𑀭𑀽𑀧𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁩𑁮. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀧𑀤𑁂 𑁋

𑀯𑀺𑀪𑀸𑀕𑀸 𑀦𑀸𑀫𑀭𑀽𑀧𑀸𑀦𑀁, 𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄;

𑀲𑀗𑁆𑀕𑀳𑀸 𑀧𑀘𑁆𑀘𑀬𑀦𑀬𑀸, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀪𑀸𑀕𑀸 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀏𑀢𑁆𑀣 𑀳𑀺 𑀦𑀸𑀫𑀦𑁆𑀢𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸, 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀢𑁂𑀲𑀁 𑀯𑀺𑀪𑀸𑀕𑁄 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄𑀬𑁂𑀯𑀸𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀯𑀺𑀪𑀸𑀕𑀸 𑀦𑀸𑀫𑀭𑀽𑀧𑀸𑀦𑀁 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄𑀢𑀺 𑀏𑀢𑁆𑀣 𑀘 𑀦𑀸𑀫𑀁 𑀏𑀓𑀁 𑀲𑀢𑁆𑀢𑀸𑀯𑀸𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑁂𑀲𑀲𑀢𑁆𑀢𑀸𑀯𑀸𑀲𑁂𑀲𑀼 ¶ 𑀧𑀯𑀢𑁆𑀢𑀢𑀺, 𑀭𑀽𑀧𑀁 𑀤𑁆𑀯𑀻𑀲𑀼 𑀪𑀯𑁂𑀲𑀼, 𑀘𑀢𑀽𑀲𑀼 𑀬𑁄𑀦𑀻𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀧𑀼𑀭𑀺𑀫𑀸𑀲𑀼 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀧𑀜𑁆𑀘𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀯𑀢𑁆𑀢𑀢𑀺.

𑀏𑀯𑀁 𑀧𑀯𑀢𑁆𑀢𑀫𑀸𑀦𑁂 𑀘 𑀏𑀢𑀲𑁆𑀫𑀺𑀁 𑀦𑀸𑀫𑀭𑀽𑀧𑁂 𑀬𑀲𑁆𑀫𑀸 𑀅𑀪𑀸𑀯𑀓𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀡𑁆𑀟𑀚𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀓𑀸𑀬𑀤𑀲𑀓𑀯𑀲𑁂𑀦 𑀭𑀽𑀧𑀢𑁄 𑀤𑁆𑀯𑁂𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀭𑀽𑀧𑀭𑀽𑀧𑀢𑁄 𑀯𑀻𑀲𑀢𑀺 𑀥𑀫𑁆𑀫𑀸, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀢𑁂𑀯𑀻𑀲𑀢𑀺 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀏𑀓𑀲𑀦𑁆𑀢𑀢𑀺𑀲𑀻𑀲𑀢𑁄 𑀦𑀯 𑀭𑀽𑀧𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀘𑀼𑀤𑁆𑀤𑀲. 𑀲𑀪𑀸𑀯𑀓𑀸𑀦𑀁 𑀪𑀸𑀯𑀤𑀲𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀢𑁆𑀢𑀺𑀁𑀲, 𑀢𑁂𑀲𑀫𑁆𑀧𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀦𑁆𑀢𑀢𑀺𑀲𑀻𑀲𑀤𑁆𑀯𑀬𑀢𑁄 𑀅𑀝𑁆𑀞𑀸𑀭𑀲 𑀭𑀽𑀧𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀧𑀦𑁆𑀦𑀭𑀲.

𑀬𑀲𑁆𑀫𑀸 𑀘 𑀑𑀧𑀧𑀸𑀢𑀺𑀓𑀲𑀢𑁆𑀢𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀲𑁆𑀲 𑀘 𑀯𑀲𑁂𑀦 𑀭𑀽𑀧𑀢𑁄 𑀘𑀢𑁆𑀢𑀸𑀭𑀺 𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀭𑀽𑀧𑀭𑀽𑀧𑀢𑁄 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 ¶ 𑀏𑀢𑁂 𑀩𑀸𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀲𑀦𑁆𑀢𑀢𑀺𑀲𑀻𑀲𑀢𑁆𑀢𑀬𑀢𑁄 𑀲𑀢𑁆𑀢𑀯𑀻𑀲𑀢𑀺 𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀧𑀦𑁆𑀦𑀭𑀲.

𑀓𑀸𑀫𑀪𑀯𑁂 𑀧𑀦 𑀬𑀲𑁆𑀫𑀸 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀁, 𑀲𑀁𑀲𑁂𑀤𑀚𑀸𑀦𑀁 𑀯𑀸 𑀲𑀪𑀸𑀯𑀓𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀢𑁄 𑀲𑀢𑁆𑀢 𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀭𑀽𑀧𑀭𑀽𑀧𑀢𑁄 𑀲𑀢𑁆𑀢𑀢𑀺 𑀥𑀫𑁆𑀫𑀸, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀢𑁂 𑀢𑁂𑀲𑀢𑁆𑀢𑀢𑀺 𑀥𑀫𑁆𑀫𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀙𑀓𑁆𑀓𑀢𑁄 𑀘𑀢𑀼𑀧𑀜𑁆𑀜𑀸𑀲 𑀥𑀫𑁆𑀫𑁂 𑀅𑀧𑀦𑁂𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺. 𑀏𑀲 𑀉𑀓𑁆𑀓𑀁𑀲𑁄. 𑀅𑀯𑀓𑀁𑀲𑁂𑀦 𑀧𑀦 𑀢𑀁𑀢𑀁𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀯𑀺𑀓𑀮𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀳𑀸𑀧𑁂𑀢𑁆𑀯𑀸 𑀳𑀸𑀧𑁂𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀲𑀗𑁆𑀔𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀭𑀽𑀧𑀻𑀦𑀁 𑀧𑀦 𑀢𑀬𑁄𑀯 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀅𑀲𑀜𑁆𑀜𑀻𑀦𑀁 𑀭𑀽𑀧𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀯𑀓𑀫𑁂𑀯𑀸𑀢𑀺. 𑀏𑀲 𑀢𑀸𑀯 𑀧𑀝𑀺𑀲𑀦𑁆𑀥𑀺𑀬𑀁 𑀦𑀬𑁄.

𑀧𑀯𑀢𑁆𑀢𑁂 𑀧𑀦 𑀲𑀩𑁆𑀩𑀢𑁆𑀣 𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑁂𑀲𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀧𑀯𑀢𑁆𑀢𑀉𑀢𑀼𑀢𑁄 ¶ 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀁 𑀧𑀸𑀢𑀼𑀪𑀯𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀦 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀜𑁆𑀳𑀺 𑀬𑀣𑀸 𑀧𑀧𑀸𑀢𑁂 𑀧𑀢𑀺𑀢𑀧𑀼𑀭𑀺𑀲𑁄 𑀧𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬 𑀤𑀼𑀩𑁆𑀩𑀮𑀢𑁆𑀢𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀧𑀦 𑀉𑀤𑁆𑀥𑀁 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀤𑁆𑀤𑀧𑀸𑀢𑀼𑀪𑀸𑀯𑀓𑀸𑀮𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀉𑀢𑀼𑀢𑁄 𑀘𑁂𑀯 𑀘𑀺𑀢𑁆𑀢𑀢𑁄 𑀘 𑀲𑀤𑁆𑀤𑀦𑀯𑀓𑀁, 𑀬𑁂 𑀧𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀺𑀦𑁄 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸, 𑀢𑁂𑀲𑀁,

‘‘𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀺 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺. 𑁋

𑀯𑀘𑀦𑀢𑁄 𑀫𑀸𑀢𑀭𑀸 𑀅𑀚𑁆𑀛𑁄𑀳𑀭𑀺𑀢𑀸𑀳𑀸𑀭𑁂𑀦 𑀅𑀦𑀼𑀕𑀢𑁂 𑀲𑀭𑀻𑀭𑁂, 𑀑𑀧𑀧𑀸𑀢𑀺𑀓𑀸𑀦𑀁 𑀲𑀩𑁆𑀩𑀧𑀞𑀫𑀁 𑀅𑀢𑁆𑀢𑀦𑁄 𑀫𑀼𑀔𑀕𑀢𑀁 𑀔𑁂𑀴𑀁 𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀲𑀼𑀤𑁆𑀥𑀝𑁆𑀞𑀓𑀦𑁆𑀢𑀺 𑀇𑀤𑀁 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀼𑀤𑁆𑀥𑀝𑁆𑀞𑀓𑀲𑁆𑀲, 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀉𑀓𑁆𑀓𑀁𑀲𑀢𑁄 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦𑀁 𑀯𑀲𑁂𑀦 𑀙𑀩𑁆𑀩𑀻𑀲𑀢𑀺𑀯𑀺𑀥𑀁, 𑀧𑀼𑀩𑁆𑀩𑁂 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 ¶ 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀼𑀢𑁆𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀢𑁆𑀢𑀢𑀺𑀯𑀺𑀥𑀦𑁆𑀢𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀁 𑀭𑀽𑀧𑀁, 𑀢𑀬𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀲𑀫𑀸𑀲𑀢𑁄 𑀦𑀯𑀦𑀯𑀼𑀢𑀺 𑀥𑀫𑁆𑀫𑀸. 𑀬𑀲𑁆𑀫𑀸 𑀯𑀸 𑀲𑀤𑁆𑀤𑁄 𑀅𑀦𑀺𑀬𑀢𑁄 𑀓𑀤𑀸𑀘𑀺𑀤𑁂𑀯 𑀧𑀸𑀢𑀼𑀪𑀸𑀯𑀢𑁄, 𑀢𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀇𑀫𑁂 𑀲𑀢𑁆𑀢𑀦𑀯𑀼𑀢𑀺 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀁 𑀳𑀺 𑀲𑀼𑀢𑁆𑀢𑀸𑀦𑀫𑁆𑀧𑀺 𑀧𑀫𑀢𑁆𑀢𑀸𑀦𑀫𑁆𑀧𑀺 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀧𑀺𑀯𑀦𑁆𑀢𑀸𑀦𑀫𑁆𑀧𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀏𑀢𑁂 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀜𑁆𑀘 𑀦𑁂𑀲𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀬𑀫𑁆𑀧𑀦𑁂𑀢𑀫𑁂𑀢𑁆𑀣 𑀓𑀫𑁆𑀫𑀚𑀭𑀽𑀧𑀁, 𑀢𑀁 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀩𑁆𑀩𑀧𑀞𑀫𑀁 𑀧𑀢𑀺𑀝𑁆𑀞𑀳𑀦𑁆𑀢𑀫𑁆𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂𑀦 𑀅𑀦𑀼𑀧𑀢𑁆𑀣𑀤𑁆𑀥𑀁 𑀦 𑀲𑀓𑁆𑀓𑁄𑀢𑀺 𑀲𑀡𑁆𑀞𑀸𑀢𑀼𑀁, 𑀦𑀸𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀁 𑀢𑁂𑀦 𑀅𑀦𑀼𑀧𑀢𑁆𑀣𑀤𑁆𑀥𑀁. 𑀅𑀣 𑀔𑁄 𑀯𑀸𑀢𑀩𑁆𑀪𑀸𑀳𑀢𑀸𑀧𑀺 𑀘𑀢𑀼𑀤𑁆𑀤𑀺𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀦𑀴𑀓𑀮𑀸𑀧𑀺𑀬𑁄 𑀯𑀺𑀬, 𑀊𑀫𑀺𑀯𑁂𑀕𑀩𑁆𑀪𑀸𑀳𑀢𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀓𑀢𑁆𑀣𑀘𑀺 𑀮𑀤𑁆𑀥𑀧𑀢𑀺𑀝𑁆𑀞𑀸 𑀪𑀺𑀦𑁆𑀦𑀯𑀸𑀳𑀦𑀺𑀓𑀸 𑀯𑀺𑀬 𑀘 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀤𑁆𑀥𑀸𑀦𑁂𑀯𑁂𑀢𑀸𑀦𑀺 𑀅𑀧𑀢𑀫𑀸𑀦𑀸𑀦𑀺 𑀲𑀡𑁆𑀞𑀳𑀺𑀢𑁆𑀯𑀸 𑀏𑀓𑀫𑁆𑀧𑀺 𑀯𑀲𑁆𑀲𑀁 𑀤𑁆𑀯𑁂𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀯𑀲𑁆𑀲𑀲𑀢𑀫𑁆𑀧𑀺 𑀬𑀸𑀯 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀓𑁆𑀔𑀬𑁄 𑀯𑀸 𑀧𑀼𑀜𑁆𑀜𑀓𑁆𑀔𑀬𑁄 𑀯𑀸, 𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁩𑁯. 𑀲𑀗𑁆𑀕𑀳𑀸𑀢𑀺 𑀏𑀢𑁆𑀣 𑀘 𑀬𑀁 𑀆𑀭𑀼𑀧𑁆𑀧𑁂 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀻𑀲𑀼, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 ¶ 𑀦𑀸𑀫𑀫𑁂𑀯, 𑀬𑀜𑁆𑀘 𑀅𑀲𑀜𑁆𑀜𑁂𑀲𑀼 𑀲𑀩𑁆𑀩𑀢𑁆𑀣, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀭𑀽𑀧𑀫𑁂𑀯, 𑀬𑀜𑁆𑀘 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀩𑁆𑀩𑀢𑁆𑀣 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀢𑀁 𑀲𑀩𑁆𑀩𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀯𑀁 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀲𑀜𑁆𑀜𑁂𑀲𑀼 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂, 𑀦𑀸𑀬𑀼𑀢𑁆𑀢𑀁. 𑀇𑀤𑀫𑁆𑀧𑀺,

𑀦𑀸𑀫𑀭𑀽𑀧𑀲𑁆𑀲 𑀬𑀁 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀢𑀁 𑀤𑁆𑀯𑀺𑀥𑀸 𑀫𑀢𑀁;

𑀯𑀺𑀧𑀸𑀓𑀫𑀯𑀺𑀧𑀸𑀓𑀜𑁆𑀘, 𑀬𑀼𑀢𑁆𑀢𑀫𑁂𑀯 𑀬𑀢𑁄 𑀇𑀤𑀁.

𑀬𑀜𑁆𑀳𑀺 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼 𑀯𑀺𑀜𑁆𑀜𑀸𑀡𑀁, 𑀢𑀁 𑀯𑀺𑀧𑀸𑀓𑀸𑀯𑀺𑀧𑀸𑀓𑀪𑁂𑀤𑀢𑁄 𑀤𑁆𑀯𑁂𑀥𑀸 𑀫𑀢𑀁. 𑀇𑀤𑀜𑁆𑀘 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀯𑀢𑁆𑀢𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀭𑀽𑀧𑀁. 𑀢𑀣𑀸 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀬𑀼𑀢𑁆𑀢𑀫𑁂𑀯 𑀇𑀤𑀁. 𑀏𑀯𑀁 𑀲𑀗𑁆𑀕𑀳𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁪𑁦. 𑀧𑀘𑁆𑀘𑀬𑀦𑀬𑀸𑀢𑀺 ¶ 𑀏𑀢𑁆𑀣 𑀳𑀺,

𑀦𑀸𑀫𑀲𑁆𑀲 𑀧𑀸𑀓𑀯𑀺𑀜𑁆𑀜𑀸𑀡𑀁, 𑀦𑀯𑀥𑀸 𑀳𑁄𑀢𑀺 𑀧𑀘𑁆𑀘𑀬𑁄;

𑀯𑀢𑁆𑀣𑀼𑀭𑀽𑀧𑀲𑁆𑀲 𑀦𑀯𑀥𑀸, 𑀲𑁂𑀲𑀭𑀽𑀧𑀲𑁆𑀲 𑀅𑀝𑁆𑀞𑀥𑀸.

𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀳𑁄𑀢𑀺 𑀭𑀽𑀧𑀲𑁆𑀲 𑀏𑀓𑀥𑀸;

𑀢𑀤𑀜𑁆𑀜𑀁 𑀧𑀦 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀢𑀲𑁆𑀲 𑀬𑀣𑀸𑀭𑀳𑀁.

𑀬𑀜𑁆𑀳𑁂𑀢𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀬𑀁 𑀯𑀸 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀦𑀸𑀫𑀁, 𑀢𑀲𑁆𑀲 𑀭𑀽𑀧𑀫𑀺𑀲𑁆𑀲𑀲𑁆𑀲 𑀯𑀸 𑀅𑀫𑀺𑀲𑁆𑀲𑀲𑁆𑀲 𑀯𑀸 𑀧𑀝𑀺𑀲𑀦𑁆𑀥𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀯𑀢𑁆𑀣𑀼𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 ¶ 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀯𑀢𑁆𑀣𑀼𑀭𑀽𑀧𑀁 𑀲𑁂𑀲𑀭𑀽𑀧𑀲𑁆𑀲 𑀇𑀫𑁂𑀲𑀼 𑀦𑀯𑀲𑀼 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂𑀳𑀺 𑀅𑀝𑁆𑀞𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀦 𑀅𑀲𑀜𑁆𑀜𑀲𑀢𑁆𑀢𑀭𑀽𑀧𑀲𑁆𑀲 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸 𑀓𑀫𑁆𑀫𑀚𑀲𑁆𑀲 𑀭𑀽𑀧𑀲𑁆𑀲 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀲𑁂𑀲𑀁 𑀧𑀞𑀫𑀪𑀯𑀗𑁆𑀕𑀢𑁄 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑀲𑁆𑀲 𑀧𑀘𑁆𑀘𑀬𑀦𑀬𑁂 𑀤𑀲𑁆𑀲𑀺𑀬𑀫𑀸𑀦𑁂 𑀲𑀩𑁆𑀩𑀸𑀧𑀺 𑀧𑀝𑁆𑀞𑀸𑀦𑀓𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸 𑀳𑁄𑀢𑀻𑀢𑀺 𑀦 𑀦𑀁 𑀆𑀭𑀪𑀸𑀫.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻’’𑀢𑀺? 𑀲𑀼𑀢𑁆𑀢𑀢𑁄 𑀬𑀼𑀢𑁆𑀢𑀺𑀢𑁄 𑀘. 𑀲𑀼𑀢𑁆𑀢𑁂 𑀳𑀺 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁬𑁨) 𑀦𑀬𑁂𑀦 𑀩𑀳𑀼𑀥𑀸 𑀯𑁂𑀤𑀦𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀲𑀺𑀤𑁆𑀥𑀸. 𑀬𑀼𑀢𑁆𑀢𑀺𑀢𑁄 𑀧𑀦,

𑀘𑀺𑀢𑁆𑀢𑀚𑁂𑀦 𑀳𑀺 𑀭𑀽𑀧𑁂𑀦, 𑀇𑀥 𑀤𑀺𑀝𑁆𑀞𑁂𑀦 𑀲𑀺𑀚𑁆𑀛𑀢𑀺;

𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀭𑀽𑀧𑀲𑁆𑀲, 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀇𑀢𑀺.

𑀘𑀺𑀢𑁆𑀢𑁂 𑀳𑀺 𑀧𑀲𑀦𑁆𑀦𑁂 𑀅𑀧𑁆𑀧𑀲𑀦𑁆𑀦𑁂 𑀯𑀸 𑀢𑀤𑀦𑀼𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀤𑀺𑀝𑁆𑀞𑀸𑀦𑀺. 𑀤𑀺𑀝𑁆𑀞𑁂𑀦 𑀘 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀇𑀥 𑀤𑀺𑀝𑁆𑀞𑁂𑀦 𑀘𑀺𑀢𑁆𑀢𑀚𑀭𑀽𑀧𑁂𑀦 𑀅𑀤𑀺𑀝𑁆𑀞𑀲𑁆𑀲𑀸𑀧𑀺 𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 ¶ 𑀳𑀺 𑀢𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀧𑀝𑁆𑀞𑀸𑀦𑁂 𑀆𑀕𑀢𑀸𑀢𑀺. 𑀏𑀯𑀁 𑀧𑀘𑁆𑀘𑀬𑀦𑀬𑀢𑁄𑀧𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀅𑀬𑀁 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀲𑀴𑀸𑀬𑀢𑀦𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁧. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀧𑀤𑁂 𑁋

𑀦𑀸𑀫𑀁 𑀔𑀦𑁆𑀥𑀢𑁆𑀢𑀬𑀁 𑀭𑀽𑀧𑀁, 𑀪𑀽𑀢𑀯𑀢𑁆𑀣𑀸𑀤𑀺𑀓𑀁 𑀫𑀢𑀁;

𑀓𑀢𑁂𑀓𑀲𑁂𑀲𑀁 𑀢𑀁 𑀢𑀲𑁆𑀲, 𑀢𑀸𑀤𑀺𑀲𑀲𑁆𑀲𑁂𑀯 𑀧𑀘𑁆𑀘𑀬𑁄.

𑀬𑀜𑁆𑀳𑁂𑀢𑀁 ¶ 𑀲𑀴𑀸𑀬𑀢𑀦𑀲𑁆𑀲𑁂𑀯 𑀧𑀘𑁆𑀘𑀬𑀪𑀽𑀢𑀁 𑀦𑀸𑀫𑀭𑀽𑀧𑀁, 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁, 𑀭𑀽𑀧𑀁 𑀧𑀦 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀦𑀺𑀬𑀫𑀢𑁄 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀙 𑀯𑀢𑁆𑀣𑀽𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀁 𑀪𑀽𑀢𑀯𑀢𑁆𑀣𑀸𑀤𑀺𑀓𑀁 𑀫𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀁 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀲𑁆𑀲𑁂𑀯 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀭𑀼𑀧𑁆𑀧𑁂 𑀦𑀸𑀫𑀫𑁂𑀯 𑀧𑀘𑁆𑀘𑀬𑁄, 𑀢𑀜𑁆𑀘 𑀙𑀝𑁆𑀞𑀸𑀬𑀢𑀦𑀲𑁆𑀲𑁂𑀯 𑀦 𑀅𑀜𑁆𑀜𑀲𑁆𑀲. ‘‘𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 (𑀯𑀺𑀪. 𑁩𑁨𑁨) 𑀳𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄’’𑀢𑀺? 𑀦𑀸𑀫𑀭𑀽𑀧𑀪𑀸𑀯𑁂 𑀪𑀸𑀯𑀢𑁄. 𑀢𑀲𑁆𑀲 𑀢𑀲𑁆𑀲 𑀳𑀺 𑀦𑀸𑀫𑀲𑁆𑀲 𑀭𑀽𑀧𑀲𑁆𑀲 𑀘 𑀪𑀸𑀯𑁂 𑀢𑀁 𑀢𑀁 𑀆𑀬𑀢𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀲𑀸 𑀧𑀦𑀲𑁆𑀲 𑀢𑀩𑁆𑀪𑀸𑀯𑀪𑀸𑀯𑀺𑀢𑀸 𑀧𑀘𑁆𑀘𑀬𑀦𑀬𑀲𑁆𑀫𑀺𑀁 𑀬𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸,

𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑁂 𑀯𑀸, 𑀳𑁄𑀢𑀺 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄;

𑀬𑀣𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀦𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑀢𑀢𑁆𑀭𑀸𑀬𑀫𑀢𑁆𑀣𑀤𑀻𑀧𑀦𑀸 𑁋

𑀦𑀸𑀫𑀫𑁂𑀯 𑀳𑀺 𑀆𑀭𑀼𑀧𑁆𑀧𑁂, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼;

𑀧𑀘𑁆𑀘𑀬𑁄 𑀲𑀢𑁆𑀢𑀥𑀸 𑀙𑀥𑀸, 𑀳𑁄𑀢𑀺 𑀢𑀁 𑀅𑀯𑀓𑀁𑀲𑀢𑁄.

𑀓𑀣𑀁? 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀅𑀯𑀓𑀁𑀲𑀢𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀲𑀢𑁆𑀢𑀥𑀸 𑀦𑀸𑀫𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 ¶ 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑁂𑀧𑀺 𑀯𑀺𑀧𑀸𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀇𑀢𑀭𑀁 𑀧𑀦 𑀅𑀯𑀓𑀁𑀲𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀧𑀘𑁆𑀘𑀬𑁂𑀲𑀼 𑀯𑀺𑀧𑀸𑀓𑀧𑀘𑁆𑀘𑀬𑀯𑀚𑁆𑀚𑁂𑀳𑀺 𑀙𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀲𑁆𑀫𑀺𑀫𑁆𑀧𑀺 ¶ 𑀪𑀯𑁂 𑀦𑀸𑀫𑀁, 𑀢𑀣𑁂𑀯 𑀧𑀝𑀺𑀲𑀦𑁆𑀥𑀺𑀬𑀁;

𑀙𑀝𑁆𑀞𑀲𑁆𑀲 𑀇𑀢𑀭𑁂𑀲𑀁 𑀢𑀁, 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑁄.

𑀆𑀭𑀼𑀧𑁆𑀧𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀁 𑀯𑀺𑀧𑀸𑀓𑀦𑀸𑀫𑀁 𑀳𑀤𑀬𑀯𑀢𑁆𑀣𑀼𑀦𑁄 𑀲𑀳𑀸𑀬𑀁 𑀳𑀼𑀢𑁆𑀯𑀸 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀬𑀣𑀸 𑀆𑀭𑀼𑀧𑁆𑀧𑁂 𑀯𑀼𑀢𑁆𑀢𑀁, 𑀢𑀣𑁂𑀯 𑀅𑀯𑀓𑀁𑀲𑀢𑁄 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀭𑁂𑀲𑀁 𑀧𑀦 𑀢𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀘𑀢𑀼𑀫𑀳𑀸𑀪𑀽𑀢𑀲𑀳𑀸𑀬𑀁 𑀳𑀼𑀢𑁆𑀯𑀸 𑀲𑀳𑀚𑀸𑀢𑀦𑀺𑀲𑁆𑀲𑀬𑀯𑀺𑀧𑀸𑀓𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀧𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁂𑀦, 𑀓𑀺𑀜𑁆𑀘𑀺 𑀆𑀳𑀸𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀯𑀁 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑁂𑀧𑀺 𑀢𑀣𑀸 𑀳𑁄𑀢𑀺, 𑀧𑀸𑀓𑀁 𑀧𑀸𑀓𑀲𑁆𑀲 𑀧𑀘𑁆𑀘𑀬𑁄;

𑀅𑀧𑀸𑀓𑀁 𑀅𑀯𑀺𑀧𑀸𑀓𑀲𑁆𑀲, 𑀙𑀥𑀸 𑀙𑀝𑁆𑀞𑀲𑁆𑀲 𑀧𑀘𑁆𑀘𑀬𑁄.

𑀧𑀯𑀢𑁆𑀢𑁂𑀧𑀺 𑀳𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀬𑀣𑀸 𑀧𑀝𑀺𑀲𑀦𑁆𑀥𑀺𑀬𑀁, 𑀢𑀣𑁂𑀯 𑀯𑀺𑀧𑀸𑀓𑀦𑀸𑀫𑀁 𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀸𑀬𑀢𑀦𑀲𑁆𑀲 𑀅𑀯𑀓𑀁𑀲𑀢𑁄 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀧𑀸𑀓𑀁 𑀧𑀦 𑀅𑀯𑀺𑀧𑀸𑀓𑀲𑁆𑀲 𑀙𑀝𑁆𑀞𑀲𑁆𑀲 𑀅𑀯𑀓𑀁𑀲𑀢𑁄𑀯 𑀢𑀢𑁄 𑀯𑀺𑀧𑀸𑀓𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀦𑁂𑀢𑁆𑀣 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣𑁂𑀯 𑀲𑁂𑀲𑀧𑀜𑁆𑀘𑀦𑁆𑀦𑀁, 𑀯𑀺𑀧𑀸𑀓𑀁 𑀧𑀘𑁆𑀘𑀬𑁄 𑀪𑀯𑁂;

𑀘𑀢𑀼𑀥𑀸 𑀅𑀯𑀺𑀧𑀸𑀓𑀫𑁆𑀧𑀺, 𑀏𑀯𑀫𑁂𑀯 𑀧𑀓𑀸𑀲𑀺𑀢𑀁.

𑀢𑀢𑁆𑀣𑁂𑀯 𑀳𑀺 𑀧𑀯𑀢𑁆𑀢𑁂 𑀲𑁂𑀲𑀸𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀁 𑀇𑀢𑀭𑀫𑁆𑀧𑀺 𑀯𑀺𑀧𑀸𑀓𑀦𑀸𑀫𑀁 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀘 𑀯𑀺𑀧𑀸𑀓𑀁, 𑀅𑀯𑀺𑀧𑀸𑀓𑀫𑁆𑀧𑀺 𑀏𑀯𑀫𑁂𑀯 𑀧𑀓𑀸𑀲𑀺𑀢𑀁. 𑀢𑀲𑁆𑀫𑀸 𑀓𑀼𑀲𑀮𑀸𑀤𑀺𑀪𑁂𑀤𑀫𑁆𑀧𑀺 𑀢𑁂𑀲𑀁 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 ¶ 𑀢𑀸𑀯 𑀦𑀸𑀫𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀯𑀸 𑀬𑀲𑁆𑀲 𑀬𑀲𑁆𑀲 𑀆𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀣𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀁 𑀧𑀦𑁂𑀢𑁆𑀣 𑀆𑀭𑀼𑀧𑁆𑀧𑁂, 𑀪𑀯𑁂 𑀪𑀯𑀢𑀺 𑀧𑀘𑁆𑀘𑀬𑁄;

𑀦 𑀏𑀓𑀸𑀬𑀢𑀦𑀲𑁆𑀲𑀸𑀧𑀺, 𑀧𑀜𑁆𑀘𑀓𑁆𑀔𑀦𑁆𑀥𑀪𑀯𑁂 𑀧𑀦.

𑀭𑀽𑀧𑀢𑁄 ¶ 𑀲𑀦𑁆𑀥𑀺𑀬𑀁 𑀯𑀢𑁆𑀣𑀼, 𑀙𑀥𑀸 𑀙𑀝𑁆𑀞𑀲𑁆𑀲 𑀧𑀘𑁆𑀘𑀬𑁄;

𑀪𑀽𑀢𑀸𑀦𑀺 𑀘𑀢𑀼𑀥𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀦𑁆𑀦𑀁 𑀅𑀯𑀺𑀲𑁂𑀲𑀢𑁄.

𑀭𑀽𑀧𑀢𑁄 𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀁 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀧𑀦 𑀪𑀽𑀢𑀸𑀦𑀺 𑀅𑀯𑀺𑀲𑁂𑀲𑀢𑁄 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀬𑀁 𑀬𑀁 𑀆𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀧𑀜𑁆𑀘𑀦𑁆𑀦𑀫𑁆𑀧𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀘𑀢𑀼𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀢𑀺𑀥𑀸 𑀚𑀻𑀯𑀺𑀢𑀫𑁂𑀢𑁂𑀲𑀁, 𑀆𑀳𑀸𑀭𑁄 𑀘 𑀧𑀯𑀢𑁆𑀢𑀺𑀬𑀁;

𑀢𑀸𑀦𑁂𑀯 𑀙𑀥𑀸 𑀙𑀝𑁆𑀞𑀲𑁆𑀲, 𑀯𑀢𑁆𑀣𑀼 𑀢𑀲𑁆𑀲𑁂𑀯 𑀧𑀜𑁆𑀘𑀥𑀸.

𑀏𑀢𑁂𑀲𑀁 𑀧𑀦 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀅𑀢𑁆𑀣𑀺 𑀅𑀯𑀺𑀕𑀢𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀭𑀽𑀧𑀚𑀻𑀯𑀺𑀢𑀁 𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀆𑀳𑀸𑀭𑁄 𑀘 𑀅𑀢𑁆𑀣𑀺𑀅𑀯𑀺𑀕𑀢𑀸𑀳𑀸𑀭𑀯𑀲𑁂𑀦 𑀢𑀺𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀘 𑀔𑁄 𑀬𑁂 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀆𑀳𑀸𑀭𑀸𑀦𑀼𑀕𑀢𑁂 𑀓𑀸𑀬𑁂 𑀧𑀯𑀢𑁆𑀢𑀺𑀬𑀁𑀬𑁂𑀯, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀢𑀸𑀦𑀺 𑀧𑀦 𑀧𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀙𑀝𑁆𑀞𑀲𑁆𑀲 𑀘𑀓𑁆𑀔𑀼 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀯𑀢𑁆𑀢𑁂, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀞𑀧𑁂𑀢𑁆𑀯𑀸 𑀧𑀦 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀢𑀲𑁆𑀲𑁂𑀯 𑀅𑀯𑀲𑁂𑀲𑀫𑀦𑀸𑀬𑀢𑀦𑀲𑁆𑀲 𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀯𑀢𑁆𑀢𑁂𑀬𑁂𑀯, 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁. 𑀏𑀯𑀁 𑀭𑀽𑀧𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀯𑀸 𑀬𑀲𑁆𑀲 𑀬𑀲𑁆𑀲 𑀆𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀣𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀫𑀭𑀽𑀧𑀁 𑀧𑀦𑀼𑀪𑀬𑀁, 𑀳𑁄𑀢𑀺 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄;

𑀬𑀣𑀸 𑀘 𑀢𑀫𑁆𑀧𑀺 𑀲𑀩𑁆𑀩𑀢𑁆𑀣, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑀲𑁂𑀬𑁆𑀬𑀣𑀺𑀤𑀁 ¶ . 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀔𑀦𑁆𑀥𑀢𑁆𑀢𑀬𑀯𑀢𑁆𑀣𑀼𑀭𑀽𑀧𑀲𑀗𑁆𑀔𑀸𑀢𑀁 𑀦𑀸𑀫𑀭𑀽𑀧𑀁 𑀙𑀝𑁆𑀞𑀸𑀬𑀢𑀦𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀤𑀻𑀳𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀇𑀤𑀫𑁂𑀢𑁆𑀣 𑀫𑀼𑀔𑀫𑀢𑁆𑀢𑀁. 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀧𑀦 𑀲𑀓𑁆𑀓𑀸 𑀲𑀩𑁆𑀩𑀁 𑀬𑁄𑀚𑁂𑀢𑀼𑀦𑁆𑀢𑀺 𑀦 𑀏𑀢𑁆𑀣 𑀯𑀺𑀢𑁆𑀣𑀸𑀭𑁄 𑀤𑀲𑁆𑀲𑀺𑀢𑁄𑀢𑀺.

𑀅𑀬𑀁 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸𑀨𑀲𑁆𑀲𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁨. 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 ¶ 𑀨𑀲𑁆𑀲𑀧𑀤𑁂 𑁋

𑀲𑀴𑁂𑀯 𑀨𑀲𑁆𑀲𑀸 𑀲𑀗𑁆𑀔𑁂𑀧𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀆𑀤𑀬𑁄;

𑀯𑀺𑀜𑁆𑀜𑀸𑀡𑀫𑀺𑀯 𑀩𑀸𑀢𑁆𑀢𑀺𑀁𑀲, 𑀯𑀺𑀢𑁆𑀣𑀸𑀭𑁂𑀦 𑀪𑀯𑀦𑁆𑀢𑀺 𑀢𑁂.

𑀲𑀗𑁆𑀔𑁂𑀧𑁂𑀦 𑀳𑀺 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀲𑁄𑀢𑀲𑀫𑁆𑀨𑀲𑁆𑀲𑁄, 𑀖𑀸𑀦𑀲𑀫𑁆𑀨𑀲𑁆𑀲𑁄, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄, 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀇𑀫𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀙 𑀏𑀯 𑀨𑀲𑁆𑀲𑀸 𑀪𑀯𑀦𑁆𑀢𑀺. 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀓𑀼𑀲𑀮𑀯𑀺𑀧𑀸𑀓𑀸, 𑀧𑀜𑁆𑀘 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀤𑀲, 𑀲𑁂𑀲𑀸 𑀩𑀸𑀯𑀻𑀲𑀢𑀺-𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀩𑀸𑀯𑀻𑀲𑀢𑀻𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀫𑀺𑀯 𑀩𑀸𑀢𑁆𑀢𑀺𑀁𑀲 𑀳𑁄𑀦𑁆𑀢𑀺.

𑀬𑀁 𑀧𑀦𑁂𑀢𑀲𑁆𑀲 𑀩𑀸𑀢𑁆𑀢𑀺𑀁𑀲𑀯𑀺𑀥𑀲𑁆𑀲𑀸𑀧𑀺 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀲𑀴𑀸𑀬𑀢𑀦𑀁, 𑀢𑀢𑁆𑀣,

𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁, 𑀘𑀓𑁆𑀔𑀸𑀤𑀺𑀁 𑀩𑀸𑀳𑀺𑀭𑁂𑀳𑀺𑀧𑀺;

𑀲𑀴𑀸𑀬𑀢𑀦𑀫𑀺𑀘𑁆𑀙𑀦𑁆𑀢𑀺, 𑀙𑀳𑀺 𑀲𑀤𑁆𑀥𑀺𑀁 𑀯𑀺𑀘𑀓𑁆𑀔𑀡𑀸.

𑀢𑀢𑁆𑀣 𑀬𑁂 𑀢𑀸𑀯 ‘‘𑀉𑀧𑀸𑀤𑀺𑀡𑁆𑀡𑀓𑀧𑀯𑀢𑁆𑀢𑀺𑀓𑀣𑀸 𑀅𑀬’’𑀦𑁆𑀢𑀺 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀧𑀘𑁆𑀘𑀬𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀤𑀻𑀧𑁂𑀦𑁆𑀢𑀺, 𑀢𑁂 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 (𑀯𑀺𑀪. 𑁩𑁨𑁨) 𑀧𑀸𑀴𑀺𑀅𑀦𑀼𑀲𑀸𑀭𑀢𑁄 𑀆𑀭𑀼𑀧𑁆𑀧𑁂 𑀙𑀝𑁆𑀞𑀸𑀬𑀢𑀦𑀜𑁆𑀘, 𑀅𑀜𑁆𑀜𑀢𑁆𑀣 𑀲𑀩𑁆𑀩𑀲𑀗𑁆𑀕𑀳𑀢𑁄 𑀲𑀴𑀸𑀬𑀢𑀦𑀜𑁆𑀘 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁 𑀘𑀓𑁆𑀔𑀸𑀤𑀺𑀁 𑀲𑀴𑀸𑀬𑀢𑀦𑀦𑁆𑀢𑀺 𑀇𑀘𑁆𑀙𑀦𑁆𑀢𑀺. 𑀢𑀜𑁆𑀳𑀺 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀬𑁂 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁂𑀯 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀤𑀻𑀧𑁂𑀦𑁆𑀢𑀺, 𑀧𑀘𑁆𑀘𑀬𑀁 𑀧𑀦 𑀪𑀺𑀦𑁆𑀦𑀲𑀦𑁆𑀢𑀸𑀦𑀫𑁆𑀧𑀺, 𑀢𑁂 𑀬𑀁 𑀬𑀁 𑀆𑀬𑀢𑀦𑀁 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 ¶ 𑀤𑀻𑀧𑁂𑀦𑁆𑀢𑀸 𑀩𑀸𑀳𑀺𑀭𑀫𑁆𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑁂𑀯 𑀙𑀝𑁆𑀞𑁂𑀦 𑀲𑀳 𑀅𑀚𑁆𑀛𑀢𑁆𑀢𑀁 𑀩𑀸𑀳𑀺𑀭𑁂𑀳𑀺𑀧𑀺 𑀭𑀽𑀧𑀸𑀬𑀢𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀴𑀸𑀬𑀢𑀦𑀦𑁆𑀢𑀺 𑀇𑀘𑁆𑀙𑀦𑁆𑀢𑀺. 𑀢𑀫𑁆𑀧𑀺 𑀳𑀺 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀢𑁂𑀲𑀁 𑀏𑀓𑀲𑁂𑀲𑁂 𑀓𑀢𑁂 𑀲𑀴𑀸𑀬𑀢𑀦𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀏𑀢𑁆𑀣𑀸𑀳 ¶ 𑁋 𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀺, 𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸, 𑀅𑀬𑀜𑁆𑀘 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀏𑀓𑁄𑀯 𑀯𑀼𑀢𑁆𑀢𑁄, 𑀲𑁄 𑀓𑀲𑁆𑀫𑀸𑀢𑀺. 𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋 𑀲𑀘𑁆𑀘𑀫𑁂𑀢𑀁, 𑀲𑀩𑁆𑀩𑁂𑀳𑀺 𑀏𑀓𑁄, 𑀏𑀓𑀫𑁆𑀳𑀸 𑀯𑀸 𑀲𑀩𑁆𑀩𑁂 𑀦 𑀲𑀫𑁆𑀪𑁄𑀦𑁆𑀢𑀺, 𑀲𑀫𑁆𑀪𑁄𑀢𑀺 𑀧𑀦 𑀅𑀦𑁂𑀓𑁂𑀳𑀺 𑀏𑀓𑁄. 𑀬𑀣𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀘𑀓𑁆𑀔𑀸𑀬𑀢𑀦𑀸 𑀭𑀽𑀧𑀸𑀬𑀢𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀫𑀦𑀸𑀬𑀢𑀦𑀸 𑀅𑀯𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬𑀢𑀦𑀸 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀯 𑀳𑀺,

𑀏𑀓𑁄𑀧𑀦𑁂𑀓𑀸𑀬𑀢𑀦𑀧𑁆𑀧𑀪𑀯𑁄 𑀇𑀢𑀺 𑀤𑀻𑀧𑀺𑀢𑁄;

𑀨𑀲𑁆𑀲𑁄𑀬𑀁 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁂𑀦𑀻𑀥 𑀢𑀸𑀤𑀺𑀦𑀸.

𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀅𑀦𑁂𑀓𑁂𑀳𑀺 𑀆𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀻𑀢𑀺 𑀢𑀸𑀤𑀺𑀦𑀸 𑀤𑀻𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀬𑀢𑀦𑁂𑀲𑀼 𑀧𑀦,

𑀙𑀥𑀸 𑀧𑀜𑁆𑀘 𑀢𑀢𑁄 𑀏𑀓𑀁, 𑀦𑀯𑀥𑀸 𑀩𑀸𑀳𑀺𑀭𑀸𑀦𑀺 𑀙;

𑀬𑀣𑀸𑀲𑀫𑁆𑀪𑀯𑀫𑁂𑀢𑀲𑁆𑀲, 𑀧𑀘𑁆𑀘𑀬𑀢𑁆𑀢𑁂 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀯𑀺𑀪𑀸𑀯𑀦𑀸 𑁋 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀢𑀸𑀯 𑀧𑀜𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀁 𑀏𑀓𑀁 𑀯𑀺𑀧𑀸𑀓𑀫𑀦𑀸𑀬𑀢𑀦𑀁 𑀅𑀦𑁂𑀓𑀪𑁂𑀤𑀲𑁆𑀲 𑀯𑀺𑀧𑀸𑀓𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀸𑀳𑀸𑀭𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀩𑀸𑀳𑀺𑀭𑁂𑀲𑀼 𑀧𑀦 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀲𑀤𑁆𑀤𑀸𑀬𑀢𑀦𑀸𑀤𑀻𑀦𑀺 𑀲𑁄𑀢𑀲𑀫𑁆𑀨𑀲𑁆𑀲𑀸𑀤𑀻𑀦𑀁. 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀧𑀦 𑀢𑀸𑀦𑀺 𑀘 𑀥𑀫𑁆𑀫𑀸𑀬𑀢𑀦𑀜𑁆𑀘 𑀢𑀣𑀸 𑀘 ¶ 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑁂𑀯 𑀘𑀸𑀢𑀺 𑀏𑀯𑀁 𑀩𑀸𑀳𑀺𑀭𑀸𑀦𑀺 𑀙 𑀬𑀣𑀸𑀲𑀫𑁆𑀪𑀯𑀫𑁂𑀢𑀲𑁆𑀲 𑀧𑀘𑁆𑀘𑀬𑀢𑁆𑀢𑁂 𑀯𑀺𑀪𑀸𑀯𑀬𑁂𑀢𑀺.

𑀅𑀬𑀁 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀨𑀲𑁆𑀲𑀧𑀘𑁆𑀘𑀬𑀸𑀯𑁂𑀤𑀦𑀸𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁩. 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀧𑀤𑁂 𑁋

𑀤𑁆𑀯𑀸𑀭𑀢𑁄 ¶ 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸;

𑀲𑀴𑁂𑀯 𑀢𑀸 𑀧𑀪𑁂𑀤𑁂𑀦, 𑀏𑀓𑀽𑀦𑀦𑀯𑀼𑀢𑀻 𑀫𑀢𑀸.

𑀏𑀢𑀲𑁆𑀲𑀧𑀺 𑀧𑀤𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸. 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸’’𑀢𑀺 (𑀯𑀺𑀪. 𑁨𑁩𑁧) 𑀏𑀯𑀁 𑀤𑁆𑀯𑀸𑀭𑀢𑁄 𑀲𑀴𑁂𑀯 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀢𑀸 𑀧𑀦 𑀧𑀪𑁂𑀤𑁂𑀦 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀏𑀓𑀽𑀦𑀦𑀯𑀼𑀢𑀺 𑀫𑀢𑀸.

𑀯𑁂𑀤𑀦𑀸𑀲𑀼 𑀧𑀦𑁂𑀢𑀸𑀲𑀼, 𑀇𑀥 𑀩𑀸𑀢𑁆𑀢𑀺𑀁𑀲 𑀯𑁂𑀤𑀦𑀸;

𑀯𑀺𑀧𑀸𑀓𑀘𑀺𑀢𑁆𑀢𑀬𑀼𑀢𑁆𑀢𑀸𑀯, 𑀅𑀥𑀺𑀧𑁆𑀧𑁂𑀢𑀸𑀢𑀺 𑀪𑀸𑀲𑀺𑀢𑀸.

𑀅𑀝𑁆𑀞𑀥𑀸 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀤𑁆𑀯𑀸𑀭𑀫𑁆𑀳𑀺 𑀧𑀘𑁆𑀘𑀬𑁄;

𑀲𑁂𑀲𑀸𑀦𑀁 𑀏𑀓𑀥𑀸 𑀨𑀲𑁆𑀲𑁄, 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑁄 𑀢𑀣𑀸.

𑀢𑀢𑁆𑀣 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑁂𑀤𑀦𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀸𑀦𑀁 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑁄 𑀢𑀣𑀸𑀢𑀺 𑀫𑀦𑁄𑀤𑁆𑀯𑀸𑀭𑁂𑀧𑀺 𑀳𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸𑀦𑀁 𑀲𑁄 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀗𑁆𑀔𑀸𑀢𑁄 𑀨𑀲𑁆𑀲𑁄 𑀢𑀣𑁂𑀯 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀫𑁆𑀧𑀺. 𑀬𑀸 𑀧𑀦 𑀢𑀸 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 ¶ 𑀧𑀯𑀢𑁆𑀢𑀸 𑀓𑀸𑀫𑀸𑀯𑀘𑀭𑀯𑁂𑀤𑀦𑀸, 𑀢𑀸𑀲𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀬𑀼𑀢𑁆𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀅𑀬𑀁 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀯𑁂𑀤𑀦𑀸𑀧𑀘𑁆𑀘𑀬𑀸𑀢𑀡𑁆𑀳𑀸𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁪. 𑀯𑁂𑀤𑀦𑀸𑀧𑀘𑁆𑀘𑀬𑀸 ¶ 𑀢𑀡𑁆𑀳𑀸𑀧𑀤𑁂 𑁋

𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑁂𑀦, 𑀙 𑀢𑀡𑁆𑀳𑀸 𑀇𑀥 𑀤𑀻𑀧𑀺𑀢𑀸;

𑀏𑀓𑁂𑀓𑀸 𑀢𑀺𑀯𑀺𑀥𑀸 𑀢𑀢𑁆𑀣, 𑀧𑀯𑀢𑁆𑀢𑀸𑀓𑀸𑀭𑀢𑁄 𑀫𑀢𑀸.

𑀇𑀫𑀲𑁆𑀫𑀺𑀁 𑀳𑀺 𑀧𑀤𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄𑀢𑀺 𑀧𑀺𑀢𑀺𑀢𑁄 𑀦𑀸𑀫𑀯𑀲𑁂𑀦 𑀧𑀼𑀢𑁆𑀢𑁄 𑀯𑀺𑀬 ‘‘𑀭𑀽𑀧𑀢𑀡𑁆𑀳𑀸. 𑀲𑀤𑁆𑀤… 𑀕𑀦𑁆𑀥… 𑀭𑀲… 𑀨𑁄𑀝𑁆𑀞𑀩𑁆𑀩… 𑀥𑀫𑁆𑀫𑀢𑀡𑁆𑀳𑀸’’𑀢𑀺 (𑀯𑀺𑀪. 𑁨𑁩𑁨) 𑀆𑀭𑀫𑁆𑀫𑀡𑀢𑁄 𑀦𑀸𑀫𑀯𑀲𑁂𑀦 𑀯𑀺𑀪𑀗𑁆𑀕𑁂 𑀙 𑀢𑀡𑁆𑀳𑀸 𑀤𑀻𑀧𑀺𑀢𑀸.

𑀢𑀸𑀲𑀼 𑀧𑀦 𑀢𑀡𑁆𑀳𑀸𑀲𑀼 𑀏𑀓𑁂𑀓𑀸 𑀢𑀡𑁆𑀳𑀸 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸𑀢𑀺 𑀏𑀯𑀁 𑀢𑀺𑀯𑀺𑀥𑀸 𑀫𑀢𑀸. 𑀭𑀽𑀧𑀢𑀡𑁆𑀳𑀸𑀬𑁂𑀯 𑀳𑀺 𑀬𑀤𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀫𑀸𑀕𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀅𑀲𑁆𑀲𑀸𑀤𑀬𑀫𑀸𑀦𑀸 𑀧𑀯𑀢𑁆𑀢𑀢𑀺, 𑀢𑀤𑀸 𑀓𑀸𑀫𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀬𑀤𑀸 𑀢𑀤𑁂𑀯𑀸𑀭𑀫𑁆𑀫𑀡𑀁 ‘‘𑀥𑀼𑀯𑀁 𑀲𑀲𑁆𑀲𑀢’’𑀦𑁆𑀢𑀺 𑀧𑀯𑀢𑁆𑀢𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀪𑀯𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀳𑀺 𑀭𑀸𑀕𑁄 𑀪𑀯𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸 𑀧𑀦 𑀢𑀤𑁂𑀯𑀸𑀭𑀫𑁆𑀫𑀡𑀁 ‘‘𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀯𑀺𑀪𑀯𑀢𑀡𑁆𑀳𑀸 𑀦𑀸𑀫 𑀳𑁄𑀢𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀳𑀺 𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀲 𑀦𑀬𑁄 𑀲𑀤𑁆𑀤𑀢𑀡𑁆𑀳𑀸𑀤𑀻𑀲𑀼𑀧𑀻𑀢𑀺. 𑀏𑀢𑀸 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸 𑀳𑁄𑀦𑁆𑀢𑀺.

𑀢𑀸 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲. 𑀇𑀢𑀺 𑀅𑀢𑀻𑀢𑀸 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸 𑀳𑁄𑀦𑁆𑀢𑀺. 𑀢𑀸 𑀧𑀼𑀦 𑀲𑀗𑁆𑀔𑁂𑀧𑁆𑀧𑀫𑀸𑀡𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀙, 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀯𑀸 𑀢𑀺𑀲𑁆𑀲𑁄𑀯 𑀢𑀡𑁆𑀳𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦𑀺𑀫𑁂 𑀲𑀢𑁆𑀢𑀸 𑀧𑀼𑀢𑁆𑀢𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀢𑁆𑀢𑁂 𑀫𑀫𑀢𑁆𑀢𑁂𑀦 𑀥𑀸𑀢𑀺𑀬𑀸 𑀯𑀺𑀬 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑁂𑀤𑀦𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀯𑁂𑀤𑀦𑀸𑀬 𑀫𑀫𑀢𑁆𑀢𑁂𑀦 ¶ 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀓𑀸𑀭-𑀕𑀦𑁆𑀥𑀩𑁆𑀩-𑀕𑀦𑁆𑀥𑀺𑀓-𑀲𑀽𑀤-𑀢𑀦𑁆𑀢𑀯𑀸𑀬𑀭𑀲𑀸𑀬𑀦𑀯𑀺𑀥𑀸𑀬𑀓𑀯𑁂𑀚𑁆𑀚𑀸𑀤𑀻𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀸𑀧𑁂𑀲𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 ¶ 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸, 𑀯𑀺𑀧𑀸𑀓𑀲𑀼𑀔𑀯𑁂𑀤𑀦𑀸;

𑀏𑀓𑀸𑀯 𑀏𑀓𑀥𑀸𑀯𑁂𑀲𑀸, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄.

𑀏𑀓𑀥𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀲𑁆𑀫𑀸 𑀯𑀸,

𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀺, 𑀲𑀼𑀔𑀻 𑀪𑀺𑀬𑁆𑀬𑁄𑀧𑀺 𑀇𑀘𑁆𑀙𑀢𑀺;

𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸.

𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀢𑀲𑁆𑀫𑀸, 𑀳𑁄𑀦𑁆𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸;

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀇𑀢𑀺 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀘𑀸𑀧𑀺, 𑀬𑀲𑁆𑀫𑀸 𑀦𑀸𑀦𑀼𑀲𑀬𑀁 𑀯𑀺𑀦𑀸;

𑀳𑁄𑀢𑀺 𑀢𑀲𑁆𑀫𑀸 𑀦 𑀲𑀸 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄𑀢𑀺.

𑀅𑀬𑀁 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀢𑀡𑁆𑀳𑀸𑀧𑀘𑁆𑀘𑀬𑀸𑀉𑀧𑀸𑀤𑀸𑀦𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁫. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀧𑀤𑁂 𑁋

𑀉𑀧𑀸𑀤𑀸𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀸𑀦𑀺 𑀅𑀢𑁆𑀣𑀯𑀺𑀪𑀸𑀕𑀢𑁄;

𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸, 𑀓𑀫𑀢𑁄 𑀘 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀯𑀺𑀪𑀸𑀯𑀦𑀸 𑁋 𑀓𑀸𑀫𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀢𑀸𑀯𑁂𑀢𑁆𑀣 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺. 𑀢𑁂𑀲𑀁 𑀅𑀬𑀁 𑀅𑀢𑁆𑀣𑀯𑀺𑀪𑀸𑀕𑁄 𑁋 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀦𑁆𑀢𑀺 𑀤𑀴𑁆𑀳𑀕𑁆𑀕𑀳𑀡𑀁. 𑀤𑀴𑁆𑀳𑀢𑁆𑀣𑁄 𑀳𑁂𑀢𑁆𑀣 𑀉𑀧𑀲𑀤𑁆𑀤𑁄 𑀉𑀧𑀸𑀬𑀸𑀲𑀉𑀧𑀓𑀝𑁆𑀞𑀸𑀤𑀻𑀲𑀼 𑀯𑀺𑀬. 𑀢𑀣𑀸 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀻𑀢𑀺 𑀯𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀻𑀲𑀼 ¶ (𑀤𑀻. 𑀦𑀺. 𑁧.𑁩𑁧) 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀺. 𑀢𑀣𑀸 𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 ‘‘𑀏𑀯𑀁 𑀲𑀼𑀤𑁆𑀥𑀻’’𑀢𑀺 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀺. 𑀢𑀣𑀸 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄. 𑀉𑀧𑀸𑀤𑀺𑀬𑀦𑁆𑀢𑀺 ¶ 𑀏𑀢𑁂𑀦𑀸𑀢𑀺 𑀉𑀧𑀸𑀤𑀸𑀦𑀁. 𑀓𑀺𑀁 𑀯𑀤𑀦𑁆𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀬𑀁 𑀢𑀸𑀯 𑀢𑁂𑀲𑀁 𑀅𑀢𑁆𑀣𑀯𑀺𑀪𑀸𑀕𑁄.

𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂 𑀧𑀦 𑀓𑀸𑀫𑀼𑀧𑀸𑀤𑀸𑀦𑀁 𑀢𑀸𑀯 ‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁦; 𑀯𑀺𑀪. 𑁯𑁩𑁮) 𑀆𑀕𑀢𑀢𑁆𑀢𑀸 𑀲𑀗𑁆𑀔𑁂𑀧𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀦𑀸𑀫 𑀧𑀼𑀭𑀺𑀫𑀢𑀡𑁆𑀳𑀸𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀤𑀴𑁆𑀳𑀲𑀫𑁆𑀪𑀽𑀢𑀸 𑀉𑀢𑁆𑀢𑀭𑀢𑀡𑁆𑀳𑀸𑀯. 𑀓𑁂𑀘𑀺 𑀧𑀦𑀸𑀳𑀼 ‘‘𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 𑀢𑀡𑁆𑀳𑀸 𑀅𑀦𑁆𑀥𑀓𑀸𑀭𑁂 𑀘𑁄𑀭𑀲𑁆𑀲 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁 𑀢𑀲𑁆𑀲𑁂𑀯 𑀪𑀡𑁆𑀟𑀕𑁆𑀕𑀳𑀡𑀁 𑀯𑀺𑀬. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀧𑀝𑀺𑀧𑀓𑁆𑀔𑀸 𑀘 𑀢𑁂 𑀥𑀫𑁆𑀫𑀸. 𑀢𑀣𑀸 𑀧𑀭𑀺𑀬𑁂𑀲𑀦𑀸𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀸’’𑀢𑀺. 𑀲𑁂𑀲𑀼𑀧𑀸𑀤𑀸𑀦𑀢𑁆𑀢𑀬𑀁 𑀧𑀦 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀼𑀩𑁆𑀩𑁂 𑀭𑀽𑀧𑀸𑀤𑀻𑀲𑀼 𑀯𑀼𑀢𑁆𑀢𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸𑀬𑀧𑀺 𑀢𑀡𑁆𑀳𑀸𑀬 𑀤𑀴𑁆𑀳𑀪𑀸𑀯𑁄 𑀓𑀸𑀫𑀼𑀧𑀸𑀤𑀸𑀦𑀁. 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁? 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮). 𑀲𑀻𑀮𑀩𑁆𑀩𑀢𑁂𑀳𑀺 𑀲𑀼𑀤𑁆𑀥𑀻𑀢𑀺 𑀧𑀭𑀸𑀫𑀲𑀦𑀁 𑀧𑀦 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁? 𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀺, 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻𑀢𑀺 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁨; 𑀯𑀺𑀪. 𑁯𑁩𑁮). 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁩; 𑀯𑀺𑀪. 𑁯𑁩𑁮). 𑀅𑀬𑀫𑁂𑀢𑁆𑀣 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁄.

𑀓𑀫𑀢𑁄𑀢𑀺 𑀏𑀢𑁆𑀣 𑀧𑀦 𑀢𑀺𑀯𑀺𑀥𑁄 𑀓𑀫𑁄 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑁄 𑀤𑁂𑀲𑀦𑀸𑀓𑁆𑀓𑀫𑁄 𑀘. 𑀢𑀢𑁆𑀣 𑀅𑀦𑀫𑀢𑀕𑁆𑀕𑁂 ¶ 𑀲𑀁𑀲𑀸𑀭𑁂 𑀇𑀫𑀲𑁆𑀲 𑀧𑀞𑀫𑀁 𑀉𑀧𑁆𑀧𑀢𑁆𑀢𑀻𑀢𑀺 𑀅𑀪𑀸𑀯𑀢𑁄 𑀓𑀺𑀮𑁂𑀲𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀦 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀬𑁂𑀦 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀏𑀓𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀕𑁆𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑁄, 𑀢𑀢𑁄 ‘‘𑀲𑀲𑁆𑀲𑀢𑁄 𑀅𑀬𑀁 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀢𑁄 𑀅𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, ‘‘𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀕𑀡𑁆𑀳𑀢𑁄 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 ¶ 𑀏𑀯𑀁 𑀧𑀞𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀢𑀢𑁄 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀓𑀸𑀫𑀼𑀧𑀸𑀤𑀸𑀦𑀸𑀦𑀻𑀢𑀺 𑀅𑀬𑀫𑁂𑀢𑁂𑀲𑀁 𑀏𑀓𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄.

𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑁂𑀢𑁆𑀣 𑀧𑀞𑀫𑀁 𑀧𑀳𑀻𑀬𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀢𑁆𑀢𑀸. 𑀓𑀸𑀫𑀼𑀧𑀸𑀤𑀸𑀦𑀁 𑀧𑀘𑁆𑀙𑀸, 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑁆𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀧𑀳𑀸𑀦𑀓𑁆𑀓𑀫𑁄.

𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀦 𑀧𑀸𑀓𑀝𑀢𑁆𑀢𑀸 𑀘 𑀏𑀢𑁂𑀲𑀼 𑀓𑀸𑀫𑀼𑀧𑀸𑀤𑀸𑀦𑀁 𑀧𑀞𑀫𑀁 𑀤𑁂𑀲𑀺𑀢𑀁. 𑀫𑀳𑀸𑀯𑀺𑀲𑀬𑀁 𑀳𑀺 𑀢𑀁 𑀅𑀝𑁆𑀞𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀸, 𑀅𑀧𑁆𑀧𑀯𑀺𑀲𑀬𑀸𑀦𑀺 𑀇𑀢𑀭𑀸𑀦𑀺 𑀘𑀢𑀼𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀸, 𑀬𑁂𑀪𑀼𑀬𑁆𑀬𑁂𑀦 𑀘 𑀆𑀮𑀬𑀭𑀸𑀫𑀢𑁆𑀢𑀸 𑀧𑀚𑀸𑀬 𑀧𑀸𑀓𑀝𑀁 𑀓𑀸𑀫𑀼𑀧𑀸𑀤𑀸𑀦𑀁, 𑀦 𑀇𑀢𑀭𑀸𑀦𑀺. 𑀓𑀸𑀫𑀼𑀧𑀸𑀤𑀸𑀦 𑀯𑀸 𑀓𑀸𑀫𑀸𑀦𑀁 𑀲𑀫𑀥𑀺𑀕𑀫𑀢𑁆𑀣𑀁 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀩𑀳𑀼𑀮𑁄 𑀳𑁄𑀢𑀺, 𑀲𑀸𑀲𑁆𑀲 𑀤𑀺𑀝𑁆𑀞𑀻𑀢𑀺 𑀢𑀤𑀦𑀦𑁆𑀢𑀭𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀢𑀁 𑀧𑀪𑀺𑀚𑁆𑀚𑀫𑀸𑀦𑀁 𑀲𑀻𑀮𑀩𑁆𑀩𑀢𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀕𑁄𑀓𑀺𑀭𑀺𑀬𑀁 𑀓𑀼𑀓𑁆𑀓𑀼𑀭𑀓𑀺𑀭𑀺𑀬𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀯𑁂𑀤𑀺𑀢𑀩𑁆𑀩𑀢𑁄 𑀑𑀴𑀸𑀭𑀺𑀓𑀦𑁆𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀧𑀞𑀫𑀁 𑀤𑁂𑀲𑀺𑀢𑀁. 𑀲𑀼𑀔𑀼𑀫𑀢𑁆𑀢𑀸 𑀅𑀦𑁆𑀢𑁂 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄.

𑀢𑀡𑁆𑀳𑀸 𑀘 𑀧𑀼𑀭𑀺𑀫𑀲𑁆𑀲𑁂𑀢𑁆𑀣, 𑀏𑀓𑀥𑀸 𑀳𑁄𑀢𑀺 𑀧𑀘𑁆𑀘𑀬𑁄;

𑀲𑀢𑁆𑀢𑀥𑀸 𑀅𑀝𑁆𑀞𑀥𑀸 𑀯𑀸𑀧𑀺, 𑀳𑁄𑀢𑀺 𑀲𑁂𑀲𑀢𑁆𑀢𑀬𑀲𑁆𑀲 𑀲𑀸.

𑀏𑀢𑁆𑀣 𑀘 𑀏𑀯𑀁 𑀤𑁂𑀲𑀺𑀢𑁂 𑀉𑀧𑀸𑀤𑀸𑀦𑀘𑀢𑀼𑀓𑁆𑀓𑁂 𑀧𑀼𑀭𑀺𑀫𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀓𑀸𑀫𑀢𑀡𑁆𑀳𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀡𑁆𑀳𑀸𑀪𑀺𑀦𑀦𑁆𑀤𑀺𑀢𑁂𑀲𑀼 𑀯𑀺𑀲𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀢𑁄. 𑀲𑁂𑀲𑀢𑁆𑀢𑀬𑀲𑁆𑀲 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀯𑀲𑁂𑀦 𑀲𑀢𑁆𑀢𑀥𑀸 𑀯𑀸, 𑀉𑀧𑀦𑀺𑀲𑁆𑀲𑀬𑁂𑀦 𑀲𑀳 𑀅𑀝𑁆𑀞𑀥𑀸 𑀯𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀤𑀸 𑀘 𑀲𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀸 𑀅𑀲𑀳𑀚𑀸𑀢𑀸𑀯 𑀳𑁄𑀢𑀻𑀢𑀺.

𑀅𑀬𑀁 ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀪𑀯𑀧𑀤𑀯𑀺𑀢𑁆𑀣𑀸𑀭𑀓𑀣𑀸

𑁬𑁪𑁬. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀪𑀯𑀧𑀤𑁂 𑁋

𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀘𑁂𑀯, 𑀲𑀸𑀢𑁆𑀣𑀢𑁄 𑀪𑁂𑀤𑀲𑀗𑁆𑀕𑀳𑀸;

𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀘𑁂𑀯, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 ¶ 𑀪𑀯𑀢𑀻𑀢𑀺 𑀪𑀯𑁄. 𑀲𑁄 𑀓𑀫𑁆𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀪𑀯𑁄 𑀤𑀼𑀯𑀺𑀥𑁂𑀦 𑀅𑀢𑁆𑀣𑀺 𑀓𑀫𑁆𑀫𑀪𑀯𑁄, 𑀅𑀢𑁆𑀣𑀺 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺 (𑀯𑀺𑀪. 𑁨𑁩𑁪). 𑀢𑀢𑁆𑀣 𑀓𑀫𑁆𑀫𑀫𑁂𑀯 𑀪𑀯𑁄 𑀓𑀫𑁆𑀫𑀪𑀯𑁄, 𑀢𑀣𑀸 𑀉𑀧𑀧𑀢𑁆𑀢𑀺𑀬𑁂𑀯 𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀢𑁆𑀣 𑀘 𑀉𑀧𑀧𑀢𑁆𑀢𑀺 𑀪𑀯𑀢𑀻𑀢𑀺 𑀪𑀯𑁄. 𑀓𑀫𑁆𑀫𑀁 𑀧𑀦 𑀬𑀣𑀸 𑀲𑀼𑀔𑀓𑀸𑀭𑀡𑀢𑁆𑀢𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄’’𑀢𑀺 (𑀥. 𑀧. 𑁧𑁯𑁪) 𑀯𑀼𑀢𑁆𑀢𑁄, 𑀏𑀯𑀁 𑀪𑀯𑀓𑀸𑀭𑀡𑀢𑁆𑀢𑀸 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁪𑁭. 𑀥𑀫𑁆𑀫𑀢𑁄 𑀧𑀦 𑀓𑀫𑁆𑀫𑀪𑀯𑁄 𑀢𑀸𑀯 𑀲𑀗𑁆𑀔𑁂𑀧𑀢𑁄 𑀘𑁂𑀢𑀦𑀸 𑀘𑁂𑀯 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀘 𑀅𑀪𑀺𑀚𑁆𑀛𑀸𑀤𑀬𑁄 𑀓𑀫𑁆𑀫𑀲𑀗𑁆𑀔𑀸𑀢𑀸 𑀥𑀫𑁆𑀫𑀸. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑁄 𑀓𑀫𑁆𑀫𑀪𑀯𑁄? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 (𑀯𑀺𑀪. 𑁨𑁩𑁪) 𑀧𑀭𑀺𑀢𑁆𑀢𑀪𑀽𑀫𑀓𑁄 𑀯𑀸 𑀫𑀳𑀸𑀪𑀽𑀫𑀓𑁄 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀫𑁆𑀫𑀪𑀯𑁄. 𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄’’𑀢𑀺 (𑀯𑀺𑀪. 𑁨𑁩𑁪). 𑀏𑀢𑁆𑀣 𑀳𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀢𑁂𑀭𑀲 𑀘𑁂𑀢𑀦𑀸. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀤𑁆𑀯𑀸𑀤𑀲. 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀘𑀢𑀲𑁆𑀲𑁄 𑀘𑁂𑀢𑀦𑀸. 𑀏𑀯𑀁 𑀧𑀭𑀺𑀢𑁆𑀢𑀪𑀽𑀫𑀓𑁄 𑀯𑀸 𑀫𑀳𑀸𑀪𑀽𑀫𑀓𑁄 𑀯𑀸𑀢𑀺 𑀏𑀢𑁂𑀦 𑀢𑀸𑀲𑀁𑀬𑁂𑀯 𑀘𑁂𑀢𑀦𑀸𑀦𑀁 𑀫𑀦𑁆𑀤𑀩𑀳𑀼𑀯𑀺𑀧𑀸𑀓𑀢𑀸 𑀯𑀼𑀢𑁆𑀢𑀸. 𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀯𑀼𑀢𑁆𑀢𑀸.

𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀲𑀗𑁆𑀔𑁂𑀧𑀢𑁄 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸, 𑀧𑀪𑁂𑀤𑀢𑁄 𑀦𑀯𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑁄 𑀉𑀧𑀧𑀢𑁆𑀢𑀺𑀪𑀯𑁄? 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀅𑀭𑀽𑀧𑀪𑀯𑁄 𑀲𑀜𑁆𑀜𑀸𑀪𑀯𑁄 𑀅𑀲𑀜𑁆𑀜𑀸𑀪𑀯𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄, 𑀏𑀓𑀯𑁄𑀓𑀸𑀭𑀪𑀯𑁄 𑀘𑀢𑀼𑀯𑁄𑀓𑀸𑀭𑀪𑀯𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺 (𑀯𑀺𑀪. 𑁨𑁩𑁪). 𑀢𑀢𑁆𑀣 𑀓𑀸𑀫𑀲𑀗𑁆𑀔𑀸𑀢𑁄 𑀪𑀯𑁄 𑀓𑀸𑀫𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀲𑀜𑁆𑀜𑀸𑀯𑀢𑀁 𑀪𑀯𑁄, 𑀲𑀜𑁆𑀜𑀸 𑀯𑀸 𑀏𑀢𑁆𑀣 𑀪𑀯𑁂 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀪𑀯𑁄. 𑀯𑀺𑀧𑀭𑀺𑀬𑀸𑀬𑁂𑀦 𑀅𑀲𑀜𑁆𑀜𑀸𑀪𑀯𑁄. 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀸 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀸 𑀦𑁂𑀯𑀲𑀜𑁆𑀜𑀸, 𑀦𑀸𑀲𑀜𑁆𑀜𑀸 𑀅𑀲𑁆𑀫𑀺𑀁 ¶ 𑀪𑀯𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄. 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁄𑀓𑀺𑀡𑁆𑀡𑁄 𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄. 𑀏𑀓𑁄 𑀯𑀸 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁄. 𑀏𑀲 𑀦𑀬𑁄 𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼. 𑀢𑀢𑁆𑀣 𑀓𑀸𑀫𑀪𑀯𑁄 𑀧𑀜𑁆𑀘 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑀸. 𑀢𑀣𑀸 𑀭𑀽𑀧𑀪𑀯𑁄. 𑀅𑀭𑀽𑀧𑀪𑀯𑁄 𑀘𑀢𑁆𑀢𑀸𑀭𑁄 ¶ , 𑀲𑀜𑁆𑀜𑀸𑀪𑀯𑁄 𑀧𑀜𑁆𑀘. 𑀅𑀲𑀜𑁆𑀜𑀸𑀪𑀯𑁄 𑀏𑀓𑁄 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄 𑀘𑀢𑁆𑀢𑀸𑀭𑁄. 𑀏𑀓𑀯𑁄𑀓𑀸𑀭𑀪𑀯𑀸𑀤𑀬𑁄 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑁂𑀳𑀻𑀢𑀺 𑀏𑀯𑀫𑁂𑀢𑁆𑀣 𑀥𑀫𑁆𑀫𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁪𑁮. 𑀲𑀸𑀢𑁆𑀣𑀢𑁄𑀢𑀺 𑀬𑀣𑀸 𑀘 𑀪𑀯𑀦𑀺𑀤𑁆𑀤𑁂𑀲𑁂, 𑀢𑀣𑁂𑀯 𑀓𑀸𑀫𑀁 𑀲𑀗𑁆𑀔𑀸𑀭𑀦𑀺𑀤𑁆𑀤𑁂𑀲𑁂𑀧𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀯 𑀯𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑀺𑀫𑁂 𑀅𑀢𑀻𑀢𑀓𑀫𑁆𑀫𑀯𑀲𑁂𑀦 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀢𑁆𑀢𑀸, 𑀇𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀯𑀲𑁂𑀦 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀢𑁆𑀢𑀸𑀢𑀺 𑀧𑀼𑀦𑀯𑀘𑀦𑀁 𑀲𑀸𑀢𑁆𑀣𑀓𑀫𑁂𑀯, 𑀧𑀼𑀩𑁆𑀩𑁂 𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺 (𑀯𑀺𑀪. 𑁨𑁨𑁬) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀇𑀥 𑀧𑀦 ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫’’𑀦𑁆𑀢𑀺 (𑀯𑀺𑀪. 𑁨𑁩𑁪) 𑀯𑀘𑀦𑀢𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀺. 𑀧𑀼𑀩𑁆𑀩𑁂 𑀘 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀫𑁂𑀯 𑀓𑀫𑁆𑀫𑀁 ‘‘𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀅𑀲𑀜𑁆𑀜𑀸𑀪𑀯𑀦𑀺𑀩𑁆𑀩𑀢𑁆𑀢𑀓𑀫𑁆𑀧𑀺. 𑀓𑀺𑀁 𑀯𑀸 𑀩𑀳𑀼𑀦𑀸, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀯 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀪𑀯𑀲𑁆𑀲𑀸𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑀸𑀢𑁆𑀣𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁪𑁯. 𑀪𑁂𑀤𑀲𑀗𑁆𑀕𑀳𑀸𑀢𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑀲𑁆𑀲 𑀪𑁂𑀤𑀢𑁄 𑀘𑁂𑀯 𑀲𑀗𑁆𑀕𑀳𑀢𑁄 𑀘. 𑀬𑀜𑁆𑀳𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀫𑀪𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀲𑁄 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀏𑀯𑀁 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀤𑁆𑀯𑁂 𑀓𑀸𑀫𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸 𑀘 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸, 𑀤𑁆𑀯𑁂 𑀭𑀽𑀧𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸 𑀘 𑀲𑀜𑁆𑀜𑀸𑀪𑀯𑀅𑀲𑀜𑁆𑀜𑀸𑀪𑀯𑀏𑀓𑀯𑁄𑀓𑀸𑀭𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸, 𑀤𑁆𑀯𑁂 𑀅𑀭𑀽𑀧𑀪𑀯𑀸, 𑀢𑀤𑀦𑁆𑀢𑁄𑀕𑀥𑀸 𑀘 𑀲𑀜𑁆𑀜𑀸𑀪𑀯𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀘𑀢𑀼𑀯𑁄𑀓𑀸𑀭𑀪𑀯𑀸𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀙 𑀪𑀯𑀸. 𑀬𑀣𑀸 𑀘 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀙 𑀪𑀯𑀸. 𑀢𑀣𑀸 𑀲𑁂𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀻𑀢𑀺 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑁂𑀤𑀢𑁄 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀘𑀢𑀼𑀯𑀻𑀲𑀢𑀺 𑀪𑀯𑀸.

𑀲𑀗𑁆𑀕𑀳𑀢𑁄 𑀧𑀦 𑀓𑀫𑁆𑀫𑀪𑀯𑀁 𑀉𑀧𑀧𑀢𑁆𑀢𑀺𑀪𑀯𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 ¶ 𑀏𑀓𑁄 𑀓𑀸𑀫𑀪𑀯𑁄. 𑀢𑀣𑀸 𑀭𑀽𑀧𑀸𑀭𑀽𑀧𑀪𑀯𑀸𑀢𑀺 𑀢𑀬𑁄 𑀪𑀯𑀸. 𑀢𑀣𑀸 𑀲𑁂𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀧𑀻𑀢𑀺. 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀗𑁆𑀕𑀳𑀢𑁄 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀤𑁆𑀯𑀸𑀤𑀲 𑀪𑀯𑀸. 𑀅𑀧𑀺𑀘 ¶ 𑀅𑀯𑀺𑀲𑁂𑀲𑁂𑀦 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀏𑀯𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀤𑁆𑀯𑁂 𑀓𑀸𑀫𑀪𑀯𑀸, 𑀤𑁆𑀯𑁂 𑀭𑀽𑀧𑀪𑀯𑀸, 𑀤𑁆𑀯𑁂 𑀅𑀭𑀽𑀧𑀪𑀯𑀸𑀢𑀺 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀲𑀗𑁆𑀕𑀳𑀢𑁄 𑀙 𑀪𑀯𑀸. 𑀓𑀫𑁆𑀫𑀪𑀯𑀉𑀧𑀧𑀢𑁆𑀢𑀺𑀪𑀯𑀪𑁂𑀤𑀁 𑀯𑀸 𑀅𑀦𑀼𑀧𑀕𑀫𑁆𑀫 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀥𑁂𑀳𑀺 𑀓𑀸𑀫𑀪𑀯𑀸𑀤𑀺𑀯𑀲𑁂𑀦 𑀢𑀬𑁄 𑀪𑀯𑀸 𑀳𑁄𑀦𑁆𑀢𑀺. 𑀓𑀸𑀫𑀪𑀯𑀸𑀤𑀺𑀪𑁂𑀤𑀫𑁆𑀧𑀺 𑀅𑀦𑀼𑀧𑀕𑀫𑁆𑀫 𑀓𑀫𑁆𑀫𑀪𑀯𑀉𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀤𑁆𑀯𑁂 𑀪𑀯𑀸 𑀳𑁄𑀦𑁆𑀢𑀺. 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑁂𑀤𑀜𑁆𑀘𑀸𑀧𑀺 𑀅𑀦𑀼𑀧𑀕𑀫𑁆𑀫 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀪𑀯𑀯𑀲𑁂𑀦 𑀏𑀓𑁄𑀯 𑀪𑀯𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀉𑀧𑀸𑀤𑀸𑀦𑀧𑀘𑁆𑀘𑀬𑀲𑁆𑀲 𑀪𑀯𑀲𑁆𑀲 𑀪𑁂𑀤𑀲𑀗𑁆𑀕𑀳𑀸𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁬𑁫𑁦. 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀘𑁂𑀯𑀸𑀢𑀺 𑀬𑀜𑁆𑀘𑁂𑀢𑁆𑀣 𑀉𑀧𑀸𑀤𑀸𑀦𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦𑁂𑀢𑁆𑀣 𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺? 𑀬𑀁𑀓𑀺𑀜𑁆𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀲𑁄 𑀇𑀤𑀁 𑀬𑀼𑀢𑁆𑀢𑀁 𑀇𑀤𑀁 𑀅𑀬𑀼𑀢𑁆𑀢𑀦𑁆𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀧𑀸𑀤𑀸𑀦𑀲𑁆𑀲 𑀯𑀲𑁂𑀦 𑀬𑀁𑀓𑀺𑀜𑁆𑀘𑀺 𑀪𑀯𑀁 𑀧𑀢𑁆𑀣𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀤𑁂𑀓𑀘𑁆𑀘𑁂 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑁂𑀦 𑀭𑀽𑀧𑀸𑀭𑀽𑀧𑀪𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑁂𑀦 𑀧𑀦 𑀲𑀩𑁆𑀩𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀅𑀦𑀼𑀲𑁆𑀲𑀯𑀯𑀲𑁂𑀦 𑀯𑀸 𑀤𑀺𑀝𑁆𑀞𑀸𑀦𑀼𑀲𑀸𑀭𑁂𑀦 𑀯𑀸 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀫𑀦𑀼𑀲𑁆𑀲𑀮𑁄𑀓𑁂 𑀘𑁂𑀯 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀤𑀻𑀲𑀼, 𑀙 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀘 𑀲𑀫𑀺𑀤𑁆𑀥𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀅𑀥𑀺𑀕𑀫𑀢𑁆𑀣𑀁 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀳𑀺 𑀯𑀜𑁆𑀘𑀺𑀢𑁄 ‘‘𑀇𑀫𑀺𑀦𑀸 𑀓𑀫𑁆𑀫𑁂𑀦 𑀓𑀸𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺𑀧𑀺 𑀓𑀭𑁄𑀢𑀺, 𑀲𑁄 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑀧𑀚𑁆𑀚𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑁂 𑀯𑀸 𑀧𑀦 𑀓𑀸𑀫𑁂 𑀧𑀢𑁆𑀣𑀬𑀫𑀸𑀦𑁄 𑀧𑀝𑀺𑀮𑀤𑁆𑀥𑁂 𑀘 𑀕𑁄𑀧𑀬𑀫𑀸𑀦𑁄 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀲𑁄 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯.

𑀅𑀧𑀭𑁄 ¶ 𑀧𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀳𑀺 𑀉𑀧𑀩𑁆𑀭𑀽𑀳𑀺𑀢𑀜𑀸𑀡𑁄 ‘‘𑀇𑀫𑀺𑀦𑀸 𑀓𑀫𑁆𑀫𑁂𑀦 𑀓𑀸𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀢𑀺. 𑀲𑁄 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 ¶ 𑀤𑁂𑀯𑁂𑀲𑀼 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀲𑁆𑀲 𑀲𑀸𑀦𑁆𑀢𑁄𑀕𑀥𑀲𑁆𑀲 𑀓𑀸𑀫𑀪𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀢𑀢𑁄 𑀲𑀫𑀺𑀤𑁆𑀥𑀢𑀭𑀸 𑀓𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦𑁂𑀯 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀭𑀽𑀧𑀸𑀭𑀽𑀧𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀭𑀸𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸-𑀅𑀲𑀜𑁆𑀜𑀸-𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸-𑀏𑀓-𑀘𑀢𑀼-𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀸𑀦𑀫𑁆𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀅𑀬𑀁 𑀅𑀢𑁆𑀢𑀸 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀘𑁆𑀙𑀺𑀦𑁆𑀦𑁂 𑀲𑀼𑀉𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀸𑀬 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀅𑀬𑀁 𑀅𑀢𑁆𑀢𑀸 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀼𑀔𑀻 𑀳𑁄𑀢𑀺 𑀯𑀺𑀕𑀢𑀧𑀭𑀺𑀴𑀸𑀳𑁄’’𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀧𑀭𑁄 ‘‘𑀇𑀤𑀁 𑀲𑀻𑀮𑀩𑁆𑀩𑀢𑀁 𑀦𑀸𑀫 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀸 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀲𑀼𑀔𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀯𑀲𑁂𑀦 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄. 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀜𑁆𑀜𑀸𑀪𑀯𑀸𑀤𑀬𑁄 𑀧𑀦 𑀢𑀤𑀦𑁆𑀢𑁄𑀕𑀥𑀸 𑀏𑀯. 𑀇𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀲𑀧𑁆𑀧𑀪𑁂𑀤𑀸𑀦𑀁 𑀲𑀸𑀦𑁆𑀢𑁄𑀕𑀥𑀸𑀦𑀁 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀫𑁂𑀢𑁆𑀣 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀺𑀁 𑀧𑀦𑁂𑀢𑁆𑀣 ¶ 𑀓𑀲𑁆𑀲 𑀪𑀯𑀲𑁆𑀲 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑁂?

𑀭𑀽𑀧𑀸𑀭𑀽𑀧𑀪𑀯𑀸𑀦𑀁 ¶ , 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀸𑀤𑀸𑀦𑀁;

𑀲𑀳𑀚𑀸𑀢𑀸𑀤𑀻𑀳𑀺𑀧𑀺 𑀢𑀁, 𑀓𑀸𑀫𑀪𑀯𑀲𑁆𑀲𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀁.

𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀳𑀺, 𑀓𑀸𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀘 𑀓𑀫𑁆𑀫𑀪𑀯𑁂 𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯, 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀘𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑁂𑀳𑀺 𑀲𑀳𑀚𑀸𑀢𑀸𑀤𑀻𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯𑀸𑀢𑀺.

𑀅𑀬𑀁 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀧𑀤𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑀓𑀣𑀸.

𑀪𑀯𑀧𑀘𑁆𑀘𑀬𑀸𑀚𑀸𑀢𑀺𑀆𑀤𑀺𑀯𑀺𑀢𑁆𑀣𑀸𑀭𑀓𑀣𑀸

𑁬𑁫𑁧. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺𑀆𑀤𑀻𑀲𑀼 𑀚𑀸𑀢𑀺𑀆𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀪𑀯𑁄𑀢𑀺 𑀧𑀦𑁂𑀢𑁆𑀣 𑀓𑀫𑁆𑀫𑀪𑀯𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀦 𑀉𑀧𑀧𑀢𑁆𑀢𑀺𑀪𑀯𑁄. 𑀲𑁄 𑀘 𑀧𑀦 𑀓𑀫𑁆𑀫𑀧𑀘𑁆𑀘𑀬𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀤𑁆𑀯𑁂𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀘𑁂? 𑀩𑀸𑀳𑀺𑀭𑀧𑀘𑁆𑀘𑀬𑀲𑀫𑀢𑁆𑀢𑁂𑀧𑀺 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁄. 𑀩𑀸𑀳𑀺𑀭𑀸𑀦𑀁 𑀳𑀺 𑀚𑀦𑀓𑀚𑀦𑀦𑀻𑀲𑀼𑀓𑁆𑀓𑀲𑁄𑀡𑀺𑀢𑀸𑀳𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀲𑀫𑀢𑁆𑀢𑁂𑀧𑀺 𑀲𑀢𑁆𑀢𑀸𑀦𑀁 𑀬𑀫𑀓𑀸𑀦𑀫𑁆𑀧𑀺 𑀲𑀢𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀲𑁄 𑀘 𑀦 𑀅𑀳𑁂𑀢𑀼𑀓𑁄 𑀲𑀩𑁆𑀩𑀤𑀸 𑀘 𑀲𑀩𑁆𑀩𑁂𑀲𑀜𑁆𑀘 𑀅𑀪𑀸𑀯𑀢𑁄, 𑀦 𑀓𑀫𑁆𑀫𑀪𑀯𑀢𑁄 𑀅𑀜𑁆𑀜𑀳𑁂𑀢𑀼𑀓𑁄 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑀸𑀦𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄𑀢𑀺 𑀓𑀫𑁆𑀫𑀪𑀯𑀳𑁂𑀢𑀼𑀓𑁄𑀯. 𑀓𑀫𑁆𑀫𑀁 𑀳𑀺 𑀲𑀢𑁆𑀢𑀸𑀦𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑀲𑁆𑀲 𑀳𑁂𑀢𑀼. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁮𑁯). 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 ‘‘𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺.

𑀬𑀲𑁆𑀫𑀸 𑀘 𑀅𑀲𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀁 𑀦𑀸𑀫, 𑀲𑁄𑀓𑀸𑀤𑀬𑁄 𑀯𑀸 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺. 𑀚𑀸𑀢𑀺𑀬𑀸 𑀧𑀦 𑀲𑀢𑀺 𑀚𑀭𑀸𑀫𑀭𑀡𑀜𑁆𑀘𑁂𑀯, 𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀤𑀼𑀓𑁆𑀔𑀥𑀫𑁆𑀫𑀨𑀼𑀝𑁆𑀞𑀲𑁆𑀲 𑀘 𑀩𑀸𑀮𑀚𑀦𑀲𑁆𑀲 𑀚𑀭𑀸𑀫𑀭𑀡𑀸𑀪𑀺𑀲𑀫𑁆𑀩𑀦𑁆𑀥𑀸 ¶ 𑀯𑀸 𑀢𑁂𑀦 𑀢𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 ¶ 𑀅𑀦𑀪𑀺𑀲𑀫𑁆𑀩𑀦𑁆𑀥𑀸 𑀯𑀸 𑀲𑁄𑀓𑀸𑀤𑀬𑁄 𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀘𑁂𑀯 𑀲𑁄𑀓𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀏𑀓𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀅𑀬𑀁 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀢𑁆𑀣𑀸𑀭𑀓𑀣𑀸.

𑀪𑀯𑀘𑀓𑁆𑀓𑀓𑀣𑀸

𑁬𑁫𑁨. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑁄𑀓𑀸𑀤𑀬𑁄 𑀅𑀯𑀲𑀸𑀦𑁂 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀬𑀸 𑀲𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀯𑀫𑁂𑀢𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸, 𑀲𑀸,

𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸, 𑀲𑀺𑀤𑁆𑀥𑀸 𑀪𑀯𑀘𑀓𑁆𑀓𑀫𑀯𑀺𑀤𑀺𑀢𑀸𑀤𑀺𑀫𑀺𑀤𑀁;

𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀁, 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀁.

𑀲𑀢𑀢𑀁 𑀲𑀫𑀺𑀢𑀁 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀧𑀦𑁂𑀢𑁆𑀣 𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸, 𑀓𑀣𑀫𑀺𑀤𑀁 𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀺, 𑀓𑀣𑀁 𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀁, 𑀓𑀣𑀁 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀦𑁆𑀢𑀺 𑀘𑁂? 𑀏𑀢𑁆𑀣 𑀳𑀺 𑀲𑁄𑀓𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀅𑀯𑀺𑀚𑁆𑀚𑀸𑀬 𑀅𑀯𑀺𑀬𑁄𑀕𑀺𑀦𑁄, 𑀧𑀭𑀺𑀤𑁂𑀯𑁄 𑀘 𑀦𑀸𑀫 𑀫𑀽𑀴𑁆𑀳𑀲𑁆𑀲𑀸𑀢𑀺 𑀢𑁂𑀲𑀼 𑀢𑀸𑀯 𑀲𑀺𑀤𑁆𑀥𑁂𑀲𑀼 𑀲𑀺𑀤𑁆𑀥𑀸 𑀳𑁄𑀢𑀺 𑀅𑀯𑀺𑀚𑁆𑀚𑀸. 𑀅𑀧𑀺𑀘 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀼𑀢𑁆𑀢𑀁. 𑀆𑀲𑀯𑀲𑀫𑀼𑀤𑀬𑀸 𑀘𑁂𑀢𑁂 𑀲𑁄𑀓𑀸𑀤𑀬𑁄 𑀳𑁄𑀦𑁆𑀢𑀺.

𑀓𑀣𑀁? 𑀯𑀢𑁆𑀣𑀼𑀓𑀸𑀫𑀯𑀺𑀬𑁄𑀕𑁂 𑀢𑀸𑀯 𑀲𑁄𑀓𑁄 𑀓𑀸𑀫𑀸𑀲𑀯𑀲𑀫𑀼𑀤𑀬𑀸 𑀳𑁄𑀢𑀺. 𑀬𑀣𑀸𑀳 𑁋

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁩);

𑀬𑀣𑀸 𑀘𑀸𑀳 𑁋 ‘‘𑀓𑀸𑀫𑀢𑁄 𑀚𑀸𑀬𑀢𑀺 𑀲𑁄𑀓𑁄’’𑀢𑀺. (𑀥. 𑀧. 𑁨𑁧𑁫).

𑀲𑀩𑁆𑀩𑁂𑀧𑀺 ¶ 𑀘𑁂𑀢𑁂 𑀤𑀺𑀝𑁆𑀞𑀸𑀲𑀯𑀲𑀫𑀼𑀤𑀬𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀢𑀲𑁆𑀲 ‘𑀅𑀳𑀁 𑀭𑀽𑀧𑀁 𑀫𑀫 𑀭𑀽𑀧’𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 (𑀲𑀁. 𑀦𑀺. 𑁩.𑁧).

𑀬𑀣𑀸 𑀘 𑀤𑀺𑀝𑁆𑀞𑀸𑀲𑀯𑀲𑀫𑀼𑀤𑀬𑀸, 𑀏𑀯𑀁 𑀪𑀯𑀸𑀲𑀯𑀲𑀫𑀼𑀤𑀬𑀸𑀧𑀺. 𑀬𑀣𑀸𑀳 𑁋

‘‘𑀬𑁂𑀧𑀺 ¶ 𑀢𑁂 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸 𑀉𑀘𑁆𑀘𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀓𑀸, 𑀢𑁂𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀬𑀁 𑀲𑀦𑁆𑀢𑀸𑀲𑀁 𑀲𑀁𑀯𑁂𑀕𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁮). 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀫𑀭𑀡𑀪𑀬𑁂𑀦 𑀲𑀦𑁆𑀢𑀚𑁆𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀯𑀺𑀬.

𑀬𑀣𑀸 𑀘 𑀪𑀯𑀸𑀲𑀯𑀲𑀫𑀼𑀤𑀬𑀸, 𑀏𑀯𑀁 𑀅𑀯𑀺𑀚𑁆𑀚𑀸𑀲𑀯𑀲𑀫𑀼𑀤𑀬𑀸𑀧𑀺. 𑀬𑀣𑀸𑀳 𑁋

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀢𑀺𑀯𑀺𑀥𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 (𑀫. 𑀦𑀺. 𑁩.𑁨𑁪𑁬).

𑀇𑀢𑀺 𑀬𑀲𑁆𑀫𑀸 𑀆𑀲𑀯𑀲𑀫𑀼𑀤𑀬𑀸 𑀏𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂 𑀲𑀺𑀚𑁆𑀛𑀫𑀸𑀦𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼𑀪𑀽𑀢𑁂 𑀆𑀲𑀯𑁂 𑀲𑀸𑀥𑁂𑀦𑁆𑀢𑀺. 𑀆𑀲𑀯𑁂𑀲𑀼 𑀘 𑀲𑀺𑀤𑁆𑀥𑁂𑀲𑀼 𑀧𑀘𑁆𑀘𑀬𑀪𑀸𑀯𑁂 𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀧𑀺 𑀲𑀺𑀤𑁆𑀥𑀸𑀯 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀲𑁄𑀓𑀸𑀤𑀻𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦 𑀏𑀯𑀁 𑀧𑀘𑁆𑀘𑀬𑀪𑀸𑀯𑁂 𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀸𑀬 𑀧𑀼𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀁 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀁 𑀤𑁆𑀯𑀸𑀤𑀲𑀗𑁆𑀕𑀁 𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀏𑀯𑀁 𑀲𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀤𑀁 𑀆𑀤𑀺𑀫𑀢𑁆𑀢𑀓𑀣𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂. 𑀦𑀬𑀺𑀤𑀁 𑀆𑀤𑀺𑀫𑀢𑁆𑀢𑀓𑀣𑀦𑀁. 𑀧𑀥𑀸𑀦𑀥𑀫𑁆𑀫𑀓𑀣𑀦𑀁 𑀧𑀦𑁂𑀢𑀁. 𑀢𑀺𑀡𑁆𑀡𑀦𑁆𑀦𑀁 𑀳𑀺 𑀯𑀝𑁆𑀝𑀸𑀦𑀁 𑀅𑀯𑀺𑀚𑁆𑀚𑀸 𑀧𑀥𑀸𑀦𑀸. 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀳𑀺 𑀅𑀯𑀲𑁂𑀲𑀓𑀺𑀮𑁂𑀲𑀯𑀝𑁆𑀝𑀜𑁆𑀘 𑀓𑀫𑁆𑀫𑀸𑀤𑀻𑀦𑀺 𑀘 𑀩𑀸𑀮𑀁 𑀧𑀮𑀺𑀩𑁄𑀥𑁂𑀦𑁆𑀢𑀺. 𑀲𑀧𑁆𑀧𑀲𑀺𑀭𑀕𑁆𑀕𑀳𑀡𑁂𑀦 𑀲𑁂𑀲𑀲𑀧𑁆𑀧𑀲𑀭𑀻𑀭𑀁 𑀯𑀺𑀬 𑀩𑀸𑀳𑀁. 𑀅𑀯𑀺𑀚𑁆𑀚𑀸𑀲𑀫𑀼𑀘𑁆𑀙𑁂𑀤𑁂 𑀧𑀦 𑀓𑀢𑁂 𑀢𑁂𑀳𑀺 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 ¶ . 𑀲𑀧𑁆𑀧𑀲𑀺𑀭𑀘𑁆𑀙𑁂𑀤𑁂 𑀓𑀢𑁂 𑀧𑀮𑀺𑀩𑁄𑀥𑀺𑀢𑀩𑀸𑀳𑀸𑀯𑀺𑀫𑁄𑀓𑁆𑀔𑁄 𑀯𑀺𑀬. 𑀬𑀣𑀸𑀳 𑁋 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧; 𑀫𑀳𑀸𑀯. 𑁧). 𑀇𑀢𑀺 𑀬𑀁 𑀕𑀡𑁆𑀳𑀢𑁄 𑀩𑀦𑁆𑀥𑁄, 𑀫𑀼𑀘𑁆𑀘𑀢𑁄 𑀘 𑀫𑁄𑀓𑁆𑀔𑁄 𑀳𑁄𑀢𑀺, 𑀢𑀲𑁆𑀲 𑀧𑀥𑀸𑀦𑀥𑀫𑁆𑀫𑀲𑁆𑀲 𑀓𑀣𑀦𑀫𑀺𑀤𑀁, 𑀦 𑀆𑀤𑀺𑀫𑀢𑁆𑀢𑀓𑀣𑀦𑀦𑁆𑀢𑀺. 𑀏𑀯𑀫𑀺𑀤𑀁 𑀪𑀯𑀘𑀓𑁆𑀓𑀁 𑀅𑀯𑀺𑀤𑀺𑀢𑀸𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀬𑀺𑀤𑀁 ¶ 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀯𑀢𑁆𑀢𑀺, 𑀢𑀲𑁆𑀫𑀸 𑀢𑀢𑁄 𑀅𑀜𑁆𑀜𑁂𑀦 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸’’𑀢𑀺 (𑀤𑀻. 𑀦𑀺. 𑁧.𑁪𑁨) 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑁂𑀦 𑀩𑁆𑀭𑀳𑁆𑀫𑀸𑀤𑀺𑀦𑀸 𑀯𑀸 𑀲𑀁𑀲𑀸𑀭𑀲𑁆𑀲 𑀓𑀸𑀭𑀓𑁂𑀦, ‘‘𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀯𑀤𑁄 𑀯𑁂𑀤𑁂𑀬𑁆𑀬𑁄’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀦𑀸 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑁂𑀤𑀓𑁂𑀦 𑀭𑀳𑀺𑀢𑀁. 𑀇𑀢𑀺 𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀉𑀤𑀬𑀩𑁆𑀩𑀬𑀥𑀫𑁆𑀫𑀓𑀢𑁆𑀢𑀸 𑀥𑀼𑀯𑀪𑀸𑀯𑁂𑀦, 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀸 𑀘 𑀲𑀼𑀪𑀪𑀸𑀯𑁂𑀦, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀲𑀼𑀔𑀪𑀸𑀯𑁂𑀦, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁆𑀢𑀸 𑀯𑀲𑀯𑀢𑁆𑀢𑀦𑀪𑀽𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀘 𑀲𑀼𑀜𑁆𑀜𑀸. 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀺𑀧𑀺 𑀅𑀗𑁆𑀕𑀸𑀦𑀺. 𑀬𑀲𑁆𑀫𑀸 𑀯𑀸 𑀅𑀯𑀺𑀚𑁆𑀚𑀸 𑀦 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑁄, 𑀦 𑀅𑀢𑁆𑀢𑀦𑀺, 𑀦 𑀅𑀢𑁆𑀢𑀯𑀢𑀻. 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀺𑀧𑀺 𑀅𑀗𑁆𑀕𑀸𑀦𑀺. 𑀢𑀲𑁆𑀫𑀸 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀫𑁂𑀢𑀁 𑀪𑀯𑀘𑀓𑁆𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁫𑁩. 𑀏𑀯𑀜𑁆𑀘 𑀯𑀺𑀤𑀺𑀢𑁆𑀯𑀸 𑀧𑀼𑀦,

𑀢𑀲𑁆𑀲𑀸𑀯𑀺𑀚𑁆𑀚𑀸𑀢𑀡𑁆𑀳𑀸, 𑀫𑀽𑀮𑀫𑀢𑀻𑀢𑀸𑀤𑀬𑁄 𑀢𑀬𑁄 𑀓𑀸𑀮𑀸;

𑀤𑁆𑀯𑁂 𑀅𑀝𑁆𑀞 𑀤𑁆𑀯𑁂 𑀏𑀯 𑀘, 𑀲𑀭𑀽𑀧𑀢𑁄 𑀢𑁂𑀲𑀼 𑀅𑀗𑁆𑀕𑀸𑀦𑀺.

𑀢𑀲𑁆𑀲 𑀔𑁄 𑀧𑀦𑁂𑀢𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀘𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀤𑁂𑀢𑀁 𑀧𑀼𑀩𑁆𑀩𑀦𑁆𑀢𑀸𑀳𑀭𑀡𑀢𑁄 𑀅𑀯𑀺𑀚𑁆𑀚𑀸𑀫𑀽𑀮𑀁 𑀯𑁂𑀤𑀦𑀸𑀯𑀲𑀸𑀦𑀁, 𑀅𑀧𑀭𑀦𑁆𑀢𑀲𑀦𑁆𑀢𑀸𑀦𑀢𑁄 𑀢𑀡𑁆𑀳𑀸𑀫𑀽𑀮𑀁 𑀚𑀭𑀸𑀫𑀭𑀡𑀸𑀯𑀲𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀁 𑀤𑀺𑀝𑁆𑀞𑀺𑀘𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀘𑁆𑀙𑀺𑀫𑀁 𑀢𑀡𑁆𑀳𑀸𑀘𑀭𑀺𑀢𑀯𑀲𑁂𑀦. 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀳𑀺 𑀅𑀯𑀺𑀚𑁆𑀚𑀸, 𑀢𑀡𑁆𑀳𑀸𑀘𑀭𑀺𑀢𑀸𑀦𑀜𑁆𑀘 𑀢𑀡𑁆𑀳𑀸 𑀲𑀁𑀲𑀸𑀭𑀦𑀸𑀬𑀺𑀓𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀸𑀬 𑀯𑀸 𑀧𑀞𑀫𑀁, 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀲𑀦𑀢𑁄, 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀸𑀬 𑀤𑀼𑀢𑀺𑀬𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀚𑀭𑀸𑀫𑀭𑀡𑀧𑁆𑀧𑀓𑀸𑀲𑀦𑀢𑁄. 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀯𑀸 𑀧𑀼𑀭𑀺𑀫𑀁, 𑀅𑀦𑀼𑀧𑀼𑀩𑁆𑀩𑀧𑀯𑀢𑁆𑀢𑀺𑀤𑀻𑀧𑀦𑀢𑁄, 𑀑𑀧𑀧𑀸𑀢𑀺𑀓𑀯𑀲𑁂𑀦 𑀧𑀘𑁆𑀙𑀺𑀫𑀁, 𑀲𑀳𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄.

𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀸 ¶ 𑀘𑀲𑁆𑀲 𑀢𑀬𑁄 𑀓𑀸𑀮𑀸. 𑀢𑁂𑀲𑀼 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀯𑀲𑁂𑀦 ‘‘𑀅𑀯𑀺𑀚𑁆𑀚𑀸, 𑀲𑀗𑁆𑀔𑀸𑀭𑀸 𑀘𑀸’’𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀅𑀢𑀻𑀢𑀓𑀸𑀮𑀸𑀦𑀺. 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀪𑀯𑀸𑀯𑀲𑀸𑀦𑀸𑀦𑀺 𑀅𑀝𑁆𑀞 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀸𑀦𑀺. 𑀚𑀸𑀢𑀺 𑀘𑁂𑀯 𑀚𑀭𑀸𑀫𑀭𑀡𑀜𑁆𑀘 𑀤𑁆𑀯𑁂 𑀅𑀦𑀸𑀕𑀢𑀓𑀸𑀮𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬𑁫𑁪. 𑀧𑀼𑀦 ¶ ,

‘‘𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓-𑀢𑀺𑀲𑀦𑁆𑀥𑀺𑀘𑀢𑀼𑀪𑁂𑀤𑀲𑀗𑁆𑀕𑀳𑀜𑁆𑀘𑁂𑀢𑀁;

𑀯𑀻𑀲𑀢𑀺 𑀆𑀓𑀸𑀭𑀸𑀭𑀁, 𑀢𑀺𑀯𑀝𑁆𑀝𑀫𑀦𑀯𑀝𑁆𑀞𑀺𑀢𑀁 𑀪𑀫𑀢𑀺’’.

𑀇𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺 𑀦𑀸𑀫. 𑀯𑁂𑀤𑀦𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀦𑁆𑀢𑀭𑀸 𑀏𑀓𑁄 𑀨𑀮𑀳𑁂𑀢𑀼𑀲𑀦𑁆𑀥𑀺 𑀦𑀸𑀫. 𑀪𑀯𑀲𑁆𑀲 𑀘 𑀚𑀸𑀢𑀺𑀬𑀸 𑀘 𑀅𑀦𑁆𑀢𑀭𑀸 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀻𑀢𑀺 𑀏𑀯𑀫𑀺𑀤𑀁 𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓𑀢𑀺𑀲𑀦𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀦𑁆𑀥𑀻𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀯𑀯𑀢𑁆𑀣𑀺𑀢𑀸 𑀧𑀦𑀲𑁆𑀲 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀏𑀓𑁄 𑀲𑀗𑁆𑀕𑀳𑁄. 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀤𑀼𑀢𑀺𑀬𑁄. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀢𑀢𑀺𑀬𑁄. 𑀚𑀸𑀢𑀺𑀚𑀭𑀸𑀫𑀭𑀡𑀁 𑀘𑀢𑀼𑀢𑁆𑀣𑁄𑀢𑀺. 𑀏𑀯𑀫𑀺𑀤𑀁 𑀘𑀢𑀼𑀪𑁂𑀤𑀲𑀗𑁆𑀕𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁;

𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘, 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺.

𑀏𑀢𑁂𑀳𑀺 𑀧𑀦 𑀯𑀻𑀲𑀢𑀺𑀬𑀸 𑀆𑀓𑀸𑀭𑀲𑀗𑁆𑀔𑀸𑀢𑁂𑀳𑀺 𑀅𑀭𑁂𑀳𑀺 𑀯𑀻𑀲𑀢𑀺𑀆𑀓𑀸𑀭𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘𑀸𑀢𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀘𑀸𑀢𑀺 𑀇𑀫𑁂 𑀢𑀸𑀯 𑀤𑁆𑀯𑁂 𑀯𑀼𑀢𑁆𑀢𑀸 𑀏𑀯. 𑀬𑀲𑁆𑀫𑀸 𑀧𑀦 𑀅𑀯𑀺𑀤𑁆𑀯𑀸 𑀧𑀭𑀺𑀢𑀲𑁆𑀲𑀢𑀺, 𑀧𑀭𑀺𑀢𑀲𑁆𑀲𑀺𑀢𑁄 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄. 𑀢𑀲𑁆𑀫𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭).

𑀢𑀢𑁆𑀣 ¶ 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑁂 𑀓𑀫𑁆𑀫𑀪𑀯𑁂, 𑀅𑀢𑀻𑀢𑀚𑀸𑀢𑀺𑀬𑀁 𑀓𑀫𑁆𑀫𑀪𑀯𑁂 𑀓𑀭𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀫𑁄𑀳𑁄 𑀅𑀯𑀺𑀚𑁆𑀚𑀸𑀢𑀺 𑀬𑁄 𑀢𑀤𑀸 𑀤𑀼𑀓𑁆𑀔𑀸𑀤𑀻𑀲𑀼 𑀫𑁄𑀳𑁄, 𑀬𑁂𑀦 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸. 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸𑀢𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀢𑁄 𑀬𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄, 𑀬𑀣𑀸 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀲𑀫𑁆𑀧𑀺 𑀲𑀁𑀯𑀘𑁆𑀙𑀭𑀫𑁆𑀧𑀺 𑀤𑀸𑀦𑀼𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀦 𑀳𑀢𑁆𑀣𑁂 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑀬𑀢𑁄 𑀘𑁂𑀢𑀦𑀸 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸𑀯𑀚𑁆𑀚𑀦𑁂𑀲𑀼 𑀯𑀸 𑀙𑀲𑀼 𑀚𑀯𑀦𑁂𑀲𑀼 𑀘𑁂𑀢𑀦𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸 𑀦𑀸𑀫 ¶ . 𑀲𑀢𑁆𑀢𑀫𑁂 𑀪𑀯𑁄. 𑀬𑀸 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄. 𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸 𑀦𑀸𑀫. 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀢𑀺 𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀨𑀮𑁂 𑀉𑀧𑀧𑀢𑁆𑀢𑀺𑀪𑀯𑁂 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸, 𑀲𑀸 𑀢𑀡𑁆𑀳𑀸 𑀦𑀸𑀫. 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀦𑁆𑀢𑀺 𑀬𑀁 𑀓𑀫𑁆𑀫𑀪𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 ‘‘𑀇𑀤𑀁 𑀓𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀸𑀫𑁂 𑀲𑁂𑀯𑀺𑀲𑁆𑀲𑀸𑀫𑀺 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀉𑀧𑀕𑀫𑀦𑀁 𑀕𑀳𑀡𑀁 𑀧𑀭𑀸𑀫𑀲𑀦𑀁, 𑀇𑀤𑀁 𑀉𑀧𑀸𑀤𑀸𑀦𑀁 𑀦𑀸𑀫. 𑀘𑁂𑀢𑀦𑀸 𑀪𑀯𑁄𑀢𑀺 𑀆𑀬𑀽𑀳𑀦𑀸𑀯𑀲𑀸𑀦𑁂 𑀯𑀼𑀢𑁆𑀢𑀸 𑀘𑁂𑀢𑀦𑀸 𑀪𑀯𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀺𑀯𑁂𑀤𑀦𑀸𑀯𑀲𑀸𑀦𑀁 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀬𑀣𑀸𑀳 𑁋 ‘‘𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸, 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀽𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑁧.𑁪𑁭). 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀜𑁆𑀜𑀸𑀡𑀁. 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 𑀬𑀸 𑀕𑀩𑁆𑀪𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀑𑀓𑁆𑀓𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑀁 𑀯𑀺𑀬, 𑀇𑀤𑀁 𑀦𑀸𑀫𑀭𑀽𑀧𑀁. 𑀧𑀲𑀸𑀤𑁄 𑀆𑀬𑀢𑀦𑀦𑁆𑀢𑀺 𑀇𑀤𑀁 𑀘𑀓𑁆𑀔𑀸𑀤𑀺𑀧𑀜𑁆𑀘𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀨𑀼𑀝𑁆𑀞𑁄 𑀨𑀲𑁆𑀲𑁄𑀢𑀺 𑀬𑁄 𑀆𑀭𑀫𑁆𑀫𑀡𑀁 𑀨𑀼𑀝𑁆𑀞𑁄 𑀨𑀼𑀲𑀦𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀨𑀲𑁆𑀲𑁄. 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸𑀢𑀺 𑀬𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑀴𑀸𑀬𑀢𑀦𑀧𑀘𑁆𑀘𑀬𑁂𑀦 𑀯𑀸 𑀨𑀲𑁆𑀲𑁂𑀦 𑀲𑀳 𑀉𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀯𑁂𑀤𑀬𑀺𑀢𑀁, 𑀲𑀸 𑀯𑁂𑀤𑀦𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘𑀸𑀢𑀺 𑀢𑀡𑁆𑀳𑀸𑀤𑀬𑁄 𑀧𑀸𑀴𑀺𑀬𑀁 𑀆𑀕𑀢𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸. 𑀪𑀯𑁂 𑀧𑀦 𑀕𑀳𑀺𑀢𑁂 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀡𑁆𑀳𑀼𑀧𑀸𑀤𑀸𑀦𑀕𑁆𑀕𑀳𑀡𑁂𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀬𑀸𑀬 𑀯𑀸 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺. 𑀏𑀯𑀁 𑀧𑀜𑁆𑀘. 𑀢𑁂𑀦𑀸𑀳 ‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 ¶ (𑀧𑀝𑀺. 𑀫. 𑁧.𑁪𑁭). 𑀢𑀢𑁆𑀣 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀦𑁆𑀢𑀺 𑀧𑀭𑀺𑀧𑀓𑁆𑀓𑀸𑀬𑀢𑀦𑀲𑁆𑀲 𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀫𑁆𑀫𑁄𑀳𑁄 𑀤𑀲𑁆𑀲𑀺𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘. 𑀢𑀸𑀦𑀺 𑀚𑀸𑀢𑀺𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀸𑀦𑀺. 𑀚𑀭𑀸𑀫𑀭𑀡𑀁 𑀧𑀦 𑀢𑁂𑀲𑀁𑀬𑁂𑀯 𑀚𑀭𑀸𑀫𑀭𑀡𑀁. 𑀢𑁂𑀦𑀸𑀳 𑁋 ‘‘𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁 ¶ , 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸, 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀇𑀥 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭). 𑀏𑀯𑀫𑀺𑀤𑀁 𑀯𑀻𑀲𑀢𑀺 𑀆𑀓𑀸𑀭𑀸𑀭𑀁 𑀳𑁄𑀢𑀺.

𑀢𑀺𑀯𑀝𑁆𑀝𑀫𑀦𑀯𑀝𑁆𑀞𑀺𑀢𑀁 𑀪𑀫𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀗𑁆𑀔𑀸𑀭𑀪𑀯𑀸 𑀓𑀫𑁆𑀫𑀯𑀝𑁆𑀝𑀁, 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀓𑀺𑀮𑁂𑀲𑀯𑀝𑁆𑀝𑀁, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀝𑁆𑀝𑁂𑀳𑀺 𑀢𑀺𑀯𑀝𑁆𑀝𑀫𑀺𑀤𑀁 𑀪𑀯𑀘𑀓𑁆𑀓𑀁 𑀬𑀸𑀯 𑀓𑀺𑀮𑁂𑀲𑀯𑀝𑁆𑀝𑀁 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀅𑀦𑀼𑀧𑀘𑁆𑀙𑀺𑀦𑁆𑀦𑀧𑀘𑁆𑀘𑀬𑀢𑁆𑀢𑀸 𑀅𑀦𑀯𑀝𑁆𑀞𑀺𑀢𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑀦𑀢𑁄 𑀪𑀫𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁫𑁫. 𑀢𑀬𑀺𑀤𑀫𑁂𑀯𑀁 𑀪𑀫𑀫𑀸𑀦𑀁,

𑀲𑀘𑁆𑀘𑀧𑁆𑀧𑀪𑀯𑀢𑁄 𑀓𑀺𑀘𑁆𑀘𑀸, 𑀯𑀸𑀭𑀡𑀸 𑀉𑀧𑀫𑀸𑀳𑀺 𑀘;

𑀕𑀫𑁆𑀪𑀻𑀭𑀦𑀬𑀪𑁂𑀤𑀸 𑀘, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀢𑀢𑁆𑀣 𑀬𑀲𑁆𑀫𑀸 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀅𑀯𑀺𑀲𑁂𑀲𑁂𑀦 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁. 𑀲𑀗𑁆𑀔𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀁 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁. 𑀯𑀺𑀜𑁆𑀜𑀸𑀡𑀸𑀤𑀻𑀳𑀺 ¶ 𑀦𑀸𑀫𑀭𑀽𑀧𑀸𑀤𑀻𑀦𑀺 𑀯𑀺𑀧𑀸𑀓𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁. 𑀯𑁂𑀤𑀦𑀸𑀬 𑀢𑀡𑁆𑀳𑀸 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁. 𑀢𑀡𑁆𑀳𑀸𑀬 𑀉𑀧𑀸𑀤𑀸𑀦𑀁 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀤𑀼𑀢𑀺𑀬𑀲𑀘𑁆𑀘𑀁. 𑀉𑀧𑀸𑀤𑀸𑀦𑀢𑁄 𑀪𑀯𑁄 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀤𑀼𑀢𑀺𑀬𑀲𑀘𑁆𑀘𑀤𑁆𑀯𑀬𑀁. 𑀪𑀯𑀢𑁄 𑀚𑀸𑀢𑀺 𑀤𑀼𑀢𑀺𑀬𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀁. 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀁 𑀧𑀞𑀫𑀲𑀘𑁆𑀘𑀧𑁆𑀧𑀪𑀯𑀁 𑀧𑀞𑀫𑀲𑀘𑁆𑀘𑀦𑁆𑀢𑀺 𑀏𑀯𑀁 𑀢𑀸𑀯𑀺𑀤𑀁 𑀲𑀘𑁆𑀘𑀧𑁆𑀧𑀪𑀯𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁫𑁬. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀯𑀢𑁆𑀣𑀽𑀲𑀼 𑀘 𑀲𑀢𑁆𑀢𑁂 𑀲𑀫𑁆𑀫𑁄𑀳𑁂𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 ¶ 𑀧𑀸𑀢𑀼𑀪𑀸𑀯𑀸𑀬. 𑀢𑀣𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀢𑀜𑁆𑀘 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀧𑀘𑁆𑀘𑀬𑀸 𑀘 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲. 𑀯𑀺𑀜𑁆𑀜𑀸𑀡𑀫𑁆𑀧𑀺 𑀯𑀢𑁆𑀣𑀼𑀜𑁆𑀘 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀦𑀸𑀫𑀭𑀽𑀧𑀲𑁆𑀲. 𑀦𑀸𑀫𑀭𑀽𑀧𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀜𑁆𑀘 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀲𑀴𑀸𑀬𑀢𑀦𑀲𑁆𑀲. 𑀲𑀴𑀸𑀬𑀢𑀦𑀫𑁆𑀧𑀺 𑀲𑀯𑀺𑀲𑀬𑁂 𑀘 𑀧𑀯𑀢𑁆𑀢𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀨𑀲𑁆𑀲𑀲𑁆𑀲. 𑀨𑀲𑁆𑀲𑁄𑀧𑀺 𑀆𑀭𑀫𑁆𑀫𑀡𑀜𑁆𑀘 𑀨𑀼𑀲𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀯𑁂𑀤𑀦𑀸𑀬. 𑀯𑁂𑀤𑀦𑀸𑀧𑀺 𑀆𑀭𑀫𑁆𑀫𑀡𑀭𑀲𑀜𑁆𑀘 𑀅𑀦𑀼𑀪𑀯𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀢𑀡𑁆𑀳𑀸𑀬. 𑀢𑀡𑁆𑀳𑀸𑀧𑀺 𑀭𑀚𑁆𑀚𑀦𑀻𑀬𑁂 𑀘 𑀥𑀫𑁆𑀫𑁂 𑀭𑀚𑁆𑀚𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀉𑀧𑀸𑀤𑀸𑀦𑀲𑁆𑀲. 𑀉𑀧𑀸𑀤𑀸𑀦𑀫𑁆𑀧𑀺 𑀉𑀧𑀸𑀤𑀸𑀦𑀺𑀬𑁂 𑀘 𑀥𑀫𑁆𑀫𑁂 𑀉𑀧𑀸𑀤𑀺𑀬𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀲𑁆𑀲. 𑀪𑀯𑁄𑀧𑀺 𑀦𑀸𑀦𑀸𑀕𑀢𑀻𑀲𑀼 𑀘 𑀯𑀺𑀓𑁆𑀔𑀺𑀧𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀚𑀸𑀢𑀺𑀬𑀸. 𑀚𑀸𑀢𑀺𑀧𑀺 𑀔𑀦𑁆𑀥𑁂 𑀘 𑀚𑀦𑁂𑀢𑀺 𑀢𑁂𑀲𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀚𑀭𑀸𑀫𑀭𑀡𑀲𑁆𑀲. 𑀚𑀭𑀸𑀫𑀭𑀡𑀫𑁆𑀧𑀺 𑀔𑀦𑁆𑀥𑀸𑀦𑀁 𑀧𑀸𑀓𑀪𑁂𑀤𑀪𑀸𑀯𑀜𑁆𑀘 𑀅𑀥𑀺𑀢𑀺𑀝𑁆𑀞𑀢𑀺, 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬 𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸. 𑀢𑀲𑁆𑀫𑀸 𑀲𑀩𑁆𑀩𑀧𑀤𑁂𑀲𑀼 𑀤𑁆𑀯𑁂𑀥𑀸 𑀧𑀯𑀢𑁆𑀢𑀺𑀓𑀺𑀘𑁆𑀘𑀢𑁄𑀧𑀺 𑀇𑀤𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁫𑁭. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀤𑀁 𑀓𑀸𑀭𑀓𑀤𑀲𑁆𑀲𑀦𑀦𑀺𑀯𑀸𑀭𑀡𑀁. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀢𑀲𑀗𑁆𑀓𑀦𑁆𑀢𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀁. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 ‘‘𑀅𑀢𑁆𑀢𑀸’’𑀢𑀺𑀧𑀭𑀺𑀓𑀧𑁆𑀧𑀺𑀢𑀯𑀢𑁆𑀣𑀼𑀪𑁂𑀤𑀤𑀲𑁆𑀲𑀦𑀢𑁄 𑀖𑀦𑀲𑀜𑁆𑀜𑀸𑀦𑀺𑀯𑀸𑀭𑀡𑀁. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺𑀆𑀤𑀺 𑀅𑀢𑁆𑀢𑀸 𑀧𑀲𑁆𑀲𑀢𑀺…𑀧𑁂… 𑀯𑀺𑀚𑀸𑀦𑀸𑀢𑀺, 𑀨𑀼𑀲𑀢𑀺, 𑀯𑁂𑀤𑀬𑀢𑀺, 𑀢𑀡𑁆𑀳𑀺𑀬𑀢𑀺, 𑀉𑀧𑀸𑀤𑀺𑀬𑀢𑀺, 𑀪𑀯𑀢𑀺, 𑀚𑀸𑀬𑀢𑀺, 𑀚𑀻𑀬𑀢𑀺, 𑀫𑀻𑀬𑀢𑀻𑀢𑀺𑀏𑀯𑀫𑀸𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀁. 𑀢𑀲𑁆𑀫𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑀺𑀯𑀸𑀭𑀡𑀢𑁄𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁫𑁮. 𑀬𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀤𑀲𑁆𑀲𑀦𑀢𑁄 𑀅𑀦𑁆𑀥𑁄 𑀯𑀺𑀬 𑀅𑀯𑀺𑀚𑁆𑀚𑀸. 𑀅𑀦𑁆𑀥𑀲𑁆𑀲 𑀉𑀧𑀓𑁆𑀔𑀮𑀦𑀁 𑀯𑀺𑀬 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀉𑀧𑀓𑁆𑀔𑀮𑀺𑀢𑀲𑁆𑀲 𑀧𑀢𑀦𑀁 𑀯𑀺𑀬 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁. 𑀧𑀢𑀺𑀢𑀲𑁆𑀲 𑀕𑀡𑁆𑀟𑀧𑀸𑀢𑀼𑀪𑀸𑀯𑁄 𑀯𑀺𑀬 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀕𑀡𑁆𑀟𑀪𑁂𑀤𑀧𑀻𑀴𑀓𑀸 𑀯𑀺𑀬 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁. 𑀕𑀡𑁆𑀟𑀧𑀻𑀴𑀓𑀸𑀖𑀝𑁆𑀝𑀦𑀁 𑀯𑀺𑀬 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄. 𑀖𑀝𑁆𑀝𑀦𑀤𑀼𑀓𑁆𑀔𑀁 𑀯𑀺𑀬 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁄 𑀯𑀺𑀬 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁂𑀦 𑀅𑀲𑀧𑁆𑀧𑀸𑀬𑀕𑁆𑀕𑀳𑀡𑀁 𑀯𑀺𑀬 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁. 𑀉𑀧𑀸𑀤𑀺𑀡𑁆𑀡𑀅𑀲𑀧𑁆𑀧𑀸𑀬𑀸𑀮𑁂𑀧𑀦𑀁 𑀯𑀺𑀬 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄. 𑀅𑀲𑀧𑁆𑀧𑀸𑀬𑀸𑀮𑁂𑀧𑀦𑁂𑀦 𑀕𑀡𑁆𑀟𑀯𑀺𑀓𑀸𑀭𑀧𑀸𑀢𑀼𑀪𑀸𑀯𑁄 𑀯𑀺𑀬 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺. 𑀕𑀡𑁆𑀟𑀯𑀺𑀓𑀸𑀭𑀢𑁄 𑀕𑀡𑁆𑀟𑀪𑁂𑀤𑁄 𑀯𑀺𑀬 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀬𑀲𑁆𑀫𑀸 𑀯𑀸 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸 𑀅𑀧𑁆𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀪𑀸𑀯𑁂𑀦 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀧𑀝𑀮𑀁 𑀯𑀺𑀬 𑀅𑀓𑁆𑀔𑀻𑀦𑀺 ¶ . 𑀢𑀤𑀪𑀺𑀪𑀽𑀢𑁄 𑀘 𑀩𑀸𑀮𑁄 𑀧𑀼𑀦𑀩𑁆𑀪𑀯𑀺𑀓𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀅𑀢𑁆𑀢𑀸𑀦𑀁 𑀯𑁂𑀞𑁂𑀢𑀺 𑀓𑁄𑀲𑀓𑀸𑀭𑀓𑀺𑀫𑀺 𑀯𑀺𑀬 𑀓𑁄𑀲𑀧𑁆𑀧𑀤𑁂𑀲𑁂𑀳𑀺. 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀁 𑀕𑀢𑀻𑀲𑀼 𑀧𑀢𑀺𑀝𑁆𑀞𑀁 𑀮𑀪𑀢𑀺 𑀧𑀭𑀺𑀡𑀸𑀬𑀓𑀧𑀭𑀺𑀕𑁆𑀕𑀳𑀺𑀢𑁄 𑀯𑀺𑀬 𑀭𑀸𑀚𑀓𑀼𑀫𑀸𑀭𑁄 𑀭𑀚𑁆𑀚𑁂. 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀧𑀭𑀺𑀓𑀧𑁆𑀧𑀦𑀢𑁄 𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀬𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀸𑀫𑀭𑀽𑀧𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀫𑀸𑀬𑀸𑀓𑀸𑀭𑁄 𑀯𑀺𑀬 𑀫𑀸𑀬𑀁. 𑀦𑀸𑀫𑀭𑀽𑀧𑁂 𑀧𑀢𑀺𑀝𑁆𑀞𑀺𑀢𑀁 𑀲𑀴𑀸𑀬𑀢𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀲𑀼𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀯𑀦𑀧𑁆𑀧𑀕𑀼𑀫𑁆𑀩𑁄 𑀯𑀺𑀬. 𑀆𑀬𑀢𑀦𑀖𑀝𑁆𑀝𑀦𑀢𑁄 𑀨𑀲𑁆𑀲𑁄 𑀚𑀸𑀬𑀢𑀺 𑀅𑀭𑀡𑀺𑀲𑀳𑀺𑀢𑀸𑀪𑀺𑀫𑀦𑁆𑀣𑀦𑀢𑁄 𑀅𑀕𑁆𑀕𑀺 𑀯𑀺𑀬. 𑀨𑀲𑁆𑀲𑁂𑀦 𑀨𑀼𑀝𑁆𑀞𑀲𑁆𑀲 𑀯𑁂𑀤𑀦𑀸 𑀧𑀸𑀢𑀼𑀪𑀯𑀢𑀺 𑀅𑀕𑁆𑀕𑀺𑀦𑀸 𑀨𑀼𑀝𑁆𑀞𑀲𑁆𑀲 𑀤𑀸𑀳𑁄 𑀯𑀺𑀬. 𑀯𑁂𑀤𑀬𑀫𑀸𑀦𑀲𑁆𑀲 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺 𑀮𑁄𑀡𑀽𑀤𑀓𑀁 𑀧𑀺𑀯𑀢𑁄 𑀧𑀺𑀧𑀸𑀲𑀸 𑀯𑀺𑀬. 𑀢𑀲𑀺𑀢𑁄 𑀪𑀯𑁂𑀲𑀼 𑀅𑀪𑀺𑀮𑀸𑀲𑀁 𑀓𑀭𑁄𑀢𑀺 𑀧𑀺𑀧𑀸𑀲𑀺𑀢𑁄 𑀯𑀺𑀬 𑀧𑀸𑀦𑀻𑀬𑁂. 𑀢𑀤𑀲𑁆𑀲𑀼𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑁂𑀦 𑀪𑀯𑀁 𑀉𑀧𑀸𑀤𑀺𑀬𑀢𑀺 𑀆𑀫𑀺𑀲𑀮𑁄𑀪𑁂𑀦 𑀫𑀘𑁆𑀙𑁄 𑀩𑀴𑀺𑀲𑀁 𑀯𑀺𑀬. 𑀪𑀯𑁂 𑀲𑀢𑀺 𑀚𑀸𑀢𑀺 𑀳𑁄𑀢𑀺 𑀩𑀻𑀚𑁂 𑀲𑀢𑀺 𑀅𑀗𑁆𑀓𑀼𑀭𑁄 𑀯𑀺𑀬. 𑀚𑀸𑀢𑀲𑁆𑀲 𑀅𑀯𑀲𑁆𑀲𑀁 𑀚𑀭𑀸𑀫𑀭𑀡𑀁 𑀉𑀧𑁆𑀧𑀦𑁆𑀦𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀢𑀦𑀁 𑀯𑀺𑀬. 𑀢𑀲𑁆𑀫𑀸 𑀏𑀯𑀁 𑀉𑀧𑀫𑀸𑀳𑀺𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁫𑁯. 𑀬𑀲𑁆𑀫𑀸 𑀘 𑀪𑀕𑀯𑀢𑀸 𑀅𑀢𑁆𑀣𑀢𑁄𑀧𑀺 𑀥𑀫𑁆𑀫𑀢𑁄𑀧𑀺 𑀤𑁂𑀲𑀦𑀢𑁄𑀧𑀺 𑀧𑀝𑀺𑀯𑁂𑀥𑀢𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀪𑁂𑀤𑀢𑁄𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀢𑀢𑁆𑀣 ¶ 𑀬𑀲𑁆𑀫𑀸 𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀺, 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀏𑀯𑀁 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑀲𑁆𑀲 𑀤𑀼𑀭𑀯𑀩𑁄𑀥𑀦𑀻𑀬𑀢𑁄 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄. 𑀢𑀣𑀸 𑀚𑀸𑀢𑀺𑀬𑀸 𑀪𑀯𑀧𑀘𑁆𑀘𑀬…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄. 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀅𑀢𑁆𑀣𑀕𑀫𑁆𑀪𑀻𑀭𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀕𑀫𑁆𑀪𑀻𑀭𑀢𑀸. 𑀳𑁂𑀢𑀼𑀨𑀮𑀜𑁆𑀳𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦).

𑀬𑀲𑁆𑀫𑀸 𑀧𑀦 𑀬𑁂𑀦𑀸𑀓𑀸𑀭𑁂𑀦 𑀬𑀤𑀯𑀢𑁆𑀣𑀸 𑀘 𑀅𑀯𑀺𑀚𑁆𑀚𑀸 𑀢𑁂𑀲𑀁 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀤𑀼𑀭𑀯𑀩𑁄𑀥𑀦𑀻𑀬𑀢𑁄 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄. 𑀢𑀣𑀸 𑀲𑀗𑁆𑀔𑀸𑀭𑀸𑀦𑀁…𑀧𑁂… 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀥𑀫𑁆𑀫𑀕𑀫𑁆𑀪𑀻𑀭𑀦𑁆𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀕𑀫𑁆𑀪𑀻𑀭𑀢𑀸. 𑀳𑁂𑀢𑀼𑀦𑁄 𑀳𑀺 𑀥𑀫𑁆𑀫𑁄𑀢𑀺 𑀦𑀸𑀫𑀁. 𑀬𑀣𑀸𑀳 𑁋 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁦).

𑀬𑀲𑁆𑀫𑀸 ¶ 𑀘𑀲𑁆𑀲 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸 𑀢𑀣𑀸 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸 𑀤𑁂𑀲𑀦𑀸𑀧𑀺 𑀕𑀫𑁆𑀪𑀻𑀭𑀸, 𑀦 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀜𑁆𑀜𑀁 𑀜𑀸𑀡𑀁 𑀧𑀢𑀺𑀝𑁆𑀞𑀁 𑀮𑀪𑀢𑀺. 𑀢𑀣𑀸𑀳𑁂𑀢𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀅𑀦𑀼𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀧𑀝𑀺𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀢𑁄 𑀯𑀸 𑀧𑀝𑀺𑀮𑁄𑀫𑀢𑁄 𑀯𑀸, 𑀓𑀢𑁆𑀣𑀘𑀺 𑀢𑀺𑀲𑀦𑁆𑀥𑀺𑀘𑀢𑀼𑀲𑀗𑁆𑀔𑁂𑀧𑀁, 𑀓𑀢𑁆𑀣𑀘𑀺 𑀤𑁆𑀯𑀺𑀲𑀦𑁆𑀥𑀺𑀢𑀺𑀲𑀗𑁆𑀔𑁂𑀧𑀁, 𑀓𑀢𑁆𑀣𑀘𑀺 𑀏𑀓𑀲𑀦𑁆𑀥𑀺𑀤𑁆𑀯𑀺𑀲𑀗𑁆𑀔𑁂𑀧𑀁 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀦𑁆𑀢𑀺 𑀅𑀬𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸.

𑀬𑀲𑁆𑀫𑀸 𑀘𑁂𑀢𑁆𑀣 𑀬𑁄 𑀲𑁄 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄, 𑀬𑁂𑀦 𑀧𑀝𑀺𑀯𑀺𑀤𑁆𑀥𑁂𑀦 𑀅𑀯𑀺𑀚𑁆𑀚𑀸𑀤𑀬𑁄 𑀲𑀫𑁆𑀫𑀸 𑀲𑀮𑀓𑁆𑀔𑀡𑀢𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 𑀇𑀤𑀁 𑀪𑀯𑀘𑀓𑁆𑀓𑀁 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁. 𑀢𑀣𑀸 𑀳𑁂𑀢𑁆𑀣 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀸𑀤𑀲𑁆𑀲𑀦𑀲𑀘𑁆𑀘𑀸𑀲𑀫𑁆𑀧𑀝𑀺𑀯𑁂𑀥𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀸𑀬𑀽𑀳𑀦𑀲𑀭𑀸𑀕𑀯𑀺𑀭𑀸𑀕𑀝𑁆𑀞𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀅𑀩𑁆𑀬𑀸𑀧𑀸𑀭𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑁄, 𑀦𑀸𑀫𑀭𑀽𑀧𑀲𑁆𑀲 𑀏𑀓𑀼𑀧𑁆𑀧𑀸𑀤𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀦𑀫𑀦𑀭𑀼𑀧𑁆𑀧𑀦𑀝𑁆𑀞𑁄, 𑀲𑀴𑀸𑀬𑀢𑀦𑀲𑁆𑀲 𑀅𑀥𑀺𑀧𑀢𑀺𑀮𑁄𑀓𑀤𑁆𑀯𑀸𑀭𑀔𑁂𑀢𑁆𑀢𑀯𑀺𑀲𑀬𑀺𑀪𑀸𑀯𑀝𑁆𑀞𑁄, 𑀨𑀲𑁆𑀲𑀲𑁆𑀲 𑀨𑀼𑀲𑀦𑀲𑀗𑁆𑀖𑀝𑁆𑀝𑀦𑀲𑀗𑁆𑀕𑀢𑀺𑀲𑀦𑁆𑀦𑀺𑀧𑀸𑀢𑀝𑁆𑀞𑁄 ¶ , 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀲𑀼𑀔𑀤𑀼𑀓𑁆𑀔𑀫𑀚𑁆𑀛𑀢𑁆𑀢𑀪𑀸𑀯𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄. 𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀺𑀢𑀚𑁆𑀛𑁄𑀲𑀸𑀦𑀲𑀭𑀺𑀢𑀸𑀮𑀢𑀸𑀦𑀤𑀻𑀢𑀡𑁆𑀳𑀸𑀲𑀫𑀼𑀤𑁆𑀤𑀤𑀼𑀧𑁆𑀧𑀽𑀭𑀝𑁆𑀞𑁄, 𑀉𑀧𑀸𑀤𑀸𑀦𑀲𑁆𑀲 𑀆𑀤𑀸𑀦𑀕𑁆𑀕𑀳𑀡𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄, 𑀪𑀯𑀲𑁆𑀲 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼𑀔𑀺𑀧𑀦𑀝𑁆𑀞𑁄, 𑀚𑀸𑀢𑀺𑀬𑀸 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑀝𑁆𑀞𑁄, 𑀚𑀭𑀸𑀫𑀭𑀡𑀲𑁆𑀲 𑀔𑀬𑀯𑀬𑀪𑁂𑀤𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀫𑁂𑀢𑁆𑀣 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸.

𑁬𑁬𑁦. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀏𑀓𑀢𑁆𑀢𑀦𑀬𑁄, 𑀦𑀸𑀦𑀢𑁆𑀢𑀦𑀬𑁄, 𑀅𑀩𑁆𑀬𑀸𑀧𑀸𑀭𑀦𑀬𑁄, 𑀏𑀯𑀁𑀥𑀫𑁆𑀫𑀢𑀸𑀦𑀬𑁄𑀢𑀺 𑀘𑀢𑁆𑀢𑀸𑀭𑁄 𑀅𑀢𑁆𑀣𑀦𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀬𑀪𑁂𑀤𑀢𑁄𑀧𑁂𑀢𑀁 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀪𑀸𑀯𑁂𑀦 𑀭𑀼𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺 𑀯𑀺𑀬 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀏𑀓𑀢𑁆𑀢𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀸𑀯𑀩𑁄𑀥𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀏𑀓𑀢𑁆𑀢𑀕𑀳𑀡𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀦 𑀬𑀣𑀸𑀲𑀓𑀁𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁 𑀦𑀸𑀦𑀢𑁆𑀢𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀦𑀯𑀦𑀯𑀸𑀦𑀁 ¶ 𑀉𑀧𑁆𑀧𑀸𑀤𑀤𑀲𑁆𑀲𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀏𑀓𑀲𑀦𑁆𑀢𑀸𑀦𑀧𑀢𑀺𑀢𑀲𑁆𑀲 𑀪𑀺𑀦𑁆𑀦𑀲𑀦𑁆𑀢𑀸𑀦𑀲𑁆𑀲𑁂𑀯 𑀦𑀸𑀦𑀢𑁆𑀢𑀕𑁆𑀕𑀳𑀡𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀫𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸, 𑀲𑀗𑁆𑀔𑀸𑀭𑀸𑀦𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀅𑀫𑁆𑀳𑁂𑀳𑀻𑀢𑀺 𑀏𑀯𑀫𑀸𑀤𑀺𑀩𑁆𑀬𑀸𑀧𑀸𑀭𑀸𑀪𑀸𑀯𑁄 𑀅𑀩𑁆𑀬𑀸𑀧𑀸𑀭𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀓𑀸𑀭𑀓𑀲𑁆𑀲 𑀅𑀪𑀸𑀯𑀸𑀯𑀩𑁄𑀥𑀢𑁄 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀬𑁄 𑀅𑀲𑀢𑀺𑀧𑀺 𑀩𑁆𑀬𑀸𑀧𑀸𑀭𑁂 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑀦𑀺𑀬𑀫𑀲𑀺𑀤𑁆𑀥𑁄 𑀳𑁂𑀢𑀼𑀪𑀸𑀯𑁄, 𑀢𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀯𑀺𑀚𑁆𑀚𑀸𑀤𑀻𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀻𑀦𑀁𑀬𑁂𑀯 𑀲𑀫𑁆𑀪𑀯𑁄 𑀔𑀻𑀭𑀸𑀤𑀻𑀳𑀺 𑀤𑀥𑀺𑀆𑀤𑀻𑀦𑀁 𑀯𑀺𑀬, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀅𑀬𑀁 𑀏𑀯𑀁𑀥𑀫𑁆𑀫𑀢𑀸𑀦𑀬𑁄 𑀦𑀸𑀫. 𑀬𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀢𑁄 𑀨𑀮𑀸𑀯𑀩𑁄𑀥𑀸 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀜𑁆𑀘 𑀧𑀚𑀳𑀢𑀺. 𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀁 𑀨𑀮𑀧𑁆𑀧𑀯𑀢𑁆𑀢𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀢𑁄 𑀓𑀼𑀢𑁄𑀘𑀺 ¶ 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀲𑀫𑁆𑀪𑀯𑀕𑁆𑀕𑀳𑀡𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀜𑁆𑀘𑁂𑀯 𑀦𑀺𑀬𑀢𑀯𑀸𑀤𑀜𑁆𑀘 𑀉𑀧𑀸𑀤𑀺𑀬𑀢𑀻𑀢𑀺 𑀏𑀯𑀫𑀺𑀤𑀁 𑀪𑀯𑀘𑀓𑁆𑀓𑀁,

𑀲𑀘𑁆𑀘𑀧𑁆𑀧𑀪𑀯𑀢𑁄 𑀓𑀺𑀘𑁆𑀘𑀸, 𑀯𑀸𑀭𑀡𑀸𑀉𑀧𑀫𑀸𑀳𑀺 𑀘;

𑀕𑀫𑁆𑀪𑀻𑀭𑀦𑀬𑀪𑁂𑀤𑀸 𑀘, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁬𑁧. 𑀇𑀤𑀜𑁆𑀳𑀺 𑀅𑀢𑀺𑀕𑀫𑁆𑀪𑀻𑀭𑀢𑁄 𑀅𑀕𑀸𑀥𑀁. 𑀦𑀸𑀦𑀸𑀦𑀬𑀕𑀳𑀦𑀢𑁄 𑀤𑀼𑀭𑀢𑀺𑀬𑀸𑀦𑀁. 𑀜𑀸𑀡𑀸𑀲𑀺𑀦𑀸 𑀲𑀫𑀸𑀥𑀺𑀧𑀯𑀭𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑁂𑀦,

𑀪𑀯𑀘𑀓𑁆𑀓𑀫𑀧𑀤𑀸𑀮𑁂𑀢𑁆𑀯𑀸, 𑀅𑀲𑀦𑀺𑀯𑀺𑀘𑀓𑁆𑀓𑀫𑀺𑀯 𑀦𑀺𑀘𑁆𑀘𑀦𑀺𑀫𑁆𑀫𑀣𑀦𑀁;

𑀲𑀁𑀲𑀸𑀭𑀪𑀬𑀫𑀢𑀻𑀢𑁄, 𑀦 𑀓𑁄𑀘𑀺 𑀲𑀼𑀧𑀺𑀦𑀦𑁆𑀢𑀭𑁂𑀧𑁆𑀬𑀢𑁆𑀣𑀺.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀏𑀢𑀲𑁆𑀲 𑀘𑀸𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀬𑀁 𑀧𑀚𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀸𑀕𑀡𑁆𑀞𑀺𑀓𑀚𑀸𑀢𑀸 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 (𑀫𑀳𑀸𑀯. 𑁯𑁫; 𑀲𑀁. 𑀦𑀺. 𑁨.𑁬𑁦). 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀅𑀯𑀲𑁂𑀲𑀓𑀺𑀘𑁆𑀘𑀸𑀦𑀺 𑀧𑀳𑀸𑀬,

𑀕𑀫𑁆𑀪𑀻𑀭𑁂 ¶ 𑀧𑀘𑁆𑀘𑀬𑀸𑀓𑀸𑀭𑀧𑁆𑀧𑀪𑁂𑀤𑁂 𑀇𑀥 𑀧𑀡𑁆𑀟𑀺𑀢𑁄;

𑀬𑀣𑀸 𑀕𑀸𑀥𑀁 𑀮𑀪𑁂𑀣𑁂𑀯𑀫𑀦𑀼𑀬𑀼𑀜𑁆𑀚𑁂 𑀲𑀤𑀸 𑀲𑀢𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀧𑀜𑁆𑀜𑀸𑀪𑀽𑀫𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁮. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀣𑀸

𑁬𑁬𑁨. 𑀇𑀤𑀸𑀦𑀺 ¶ ¶ 𑀬𑀸 ‘‘𑀇𑀫𑁂𑀲𑀼 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸 ‘𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀘𑀸’𑀢𑀺 𑀤𑁆𑀯𑁂 𑀫𑀽𑀮𑀪𑀽𑀢𑀸 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀻𑀮𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀼𑀧𑀭𑀺𑀲𑀼𑀤𑁆𑀥𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀲𑀻𑀮𑀁, 𑀢𑀜𑁆𑀘 𑀲𑀻𑀮𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀉𑀧𑀘𑀸𑀭𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀢𑀸𑀧𑀺 𑀘𑀺𑀢𑁆𑀢𑀲𑀻𑀲𑁂𑀦 𑀯𑀼𑀢𑁆𑀢𑀲𑀫𑀸𑀥𑀺𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯. 𑀢𑀲𑁆𑀫𑀸 𑀢𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀇𑀫𑀸 𑀧𑀦 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀭𑀻𑀭’’𑀦𑁆𑀢𑀺, 𑀢𑀢𑁆𑀣 𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁬𑁬𑁩. 𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀲𑀫𑀣𑀬𑀸𑀦𑀺𑀓𑁂𑀦 𑀢𑀸𑀯 𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀮𑀓𑁆𑀔𑀡𑀭𑀲𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀫𑁆𑀧𑁂𑀢𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀦𑀫𑀦𑀝𑁆𑀞𑁂𑀦 𑀦𑀸𑀫𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀢𑀢𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀅𑀦𑁆𑀢𑁄𑀕𑁂𑀳𑁂 𑀲𑀧𑁆𑀧𑀁 𑀤𑀺𑀲𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀢𑀲𑁆𑀲 𑀆𑀲𑀬𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀬𑁄𑀕𑀸𑀯𑀘𑀭𑁄 𑀢𑀁 𑀦𑀸𑀫𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀇𑀤𑀁 𑀦𑀸𑀫𑀁 𑀓𑀺𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻’’𑀢𑀺 𑀧𑀭𑀺𑀬𑁂𑀲𑀫𑀸𑀦𑁄 𑀢𑀲𑁆𑀲 𑀦𑀺𑀲𑁆𑀲𑀬𑀁 𑀳𑀤𑀬𑀭𑀽𑀧𑀁 𑀧𑀲𑁆𑀲𑀢𑀺. 𑀢𑀢𑁄 𑀳𑀤𑀬𑀭𑀽𑀧𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀺, 𑀪𑀽𑀢𑀦𑀺𑀲𑁆𑀲𑀺𑀢𑀸𑀦𑀺 𑀘 𑀲𑁂𑀲𑀼𑀧𑀸𑀤𑀸𑀬𑀭𑀽𑀧𑀸𑀦𑀻𑀢𑀺 𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀭𑀼𑀧𑁆𑀧𑀦𑀢𑁄 ¶ 𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀢𑁄 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁪. 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀧𑀦 𑀅𑀬𑀫𑁂𑀯 𑀯𑀸 𑀲𑀫𑀣𑀬𑀸𑀦𑀺𑀓𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀁 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀅𑀣𑀲𑁆𑀲 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀆𑀯𑀺𑀪𑀽𑀢𑀸𑀲𑀼 𑀥𑀸𑀢𑀽𑀲𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁆𑀳𑀺 ¶ 𑀢𑀸𑀯 𑀓𑁂𑀲𑁂 ‘‘𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀯𑀡𑁆𑀡𑁄, 𑀕𑀦𑁆𑀥𑁄, 𑀭𑀲𑁄, 𑀑𑀚𑀸, 𑀚𑀻𑀯𑀺𑀢𑀁, 𑀓𑀸𑀬𑀧𑁆𑀧𑀲𑀸𑀤𑁄’’𑀢𑀺 𑀏𑀯𑀁 𑀓𑀸𑀬𑀤𑀲𑀓𑀯𑀲𑁂𑀦 𑀤𑀲 𑀭𑀽𑀧𑀸𑀦𑀺, 𑀢𑀢𑁆𑀣𑁂𑀯 𑀪𑀸𑀯𑀲𑁆𑀲 𑀅𑀢𑁆𑀣𑀺𑀢𑀸𑀬 𑀪𑀸𑀯𑀤𑀲𑀓𑀯𑀲𑁂𑀦 𑀤𑀲, 𑀢𑀢𑁆𑀣𑁂𑀯 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀑𑀚𑀝𑁆𑀞𑀫𑀓𑀁, 𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀧𑀭𑀸𑀦𑀺𑀧𑀺 𑀘𑀢𑀼𑀯𑀻𑀲𑀢𑀻𑀢𑀺 𑀏𑀯𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀘𑀢𑀼𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂𑀲𑀼 𑀘𑀢𑀼𑀘𑀢𑁆𑀢𑀸𑀮𑀻𑀲 𑀘𑀢𑀼𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀺, 𑀲𑁂𑀤𑁄, 𑀅𑀲𑁆𑀲𑀼, 𑀔𑁂𑀴𑁄, 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀤𑁆𑀯𑀺𑀦𑁆𑀦𑀁 𑀑𑀚𑀝𑁆𑀞𑀫𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲 𑀲𑁄𑀴𑀲 𑀭𑀽𑀧𑀸𑀦𑀺, 𑀉𑀤𑀭𑀺𑀬𑀁, 𑀓𑀭𑀻𑀲𑀁, 𑀧𑀼𑀩𑁆𑀩𑁄, 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀑𑀚𑀝𑁆𑀞𑀫𑀓𑀲𑁆𑀲 𑀯𑀲𑁂𑀦 𑀅𑀝𑁆𑀞 𑀅𑀝𑁆𑀞 𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀏𑀲 𑀢𑀸𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀦𑀬𑁄.

𑀬𑁂 𑀧𑀦 𑀇𑀫𑀲𑁆𑀫𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀆𑀯𑀺𑀪𑀽𑀢𑁂 𑀅𑀧𑀭𑁂 𑀤𑀲 𑀆𑀓𑀸𑀭𑀸 𑀆𑀯𑀺𑀪𑀯𑀦𑁆𑀢𑀺. 𑀢𑀢𑁆𑀣 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁂 𑀢𑀸𑀯 𑀓𑀫𑁆𑀫𑀚𑁂 𑀢𑁂𑀚𑁄𑀓𑁄𑀝𑁆𑀞𑀸𑀲𑀫𑁆𑀳𑀺 𑀑𑀚𑀝𑁆𑀞𑀫𑀓𑀜𑁆𑀘𑁂𑀯 𑀚𑀻𑀯𑀺𑀢𑀜𑁆𑀘𑀸𑀢𑀺 𑀦𑀯 𑀭𑀽𑀧𑀸𑀦𑀺, 𑀢𑀣𑀸 𑀘𑀺𑀢𑁆𑀢𑀚𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑁄𑀝𑁆𑀞𑀸𑀲𑁂𑀧𑀺 𑀑𑀚𑀝𑁆𑀞𑀫𑀓𑀜𑁆𑀘𑁂𑀯 𑀲𑀤𑁆𑀤𑁄 𑀘𑀸𑀢𑀺 𑀦𑀯, 𑀲𑁂𑀲𑁂𑀲𑀼 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀅𑀝𑁆𑀞𑀲𑀼 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀯 𑀢𑀻𑀡𑀺 𑀘 𑀑𑀚𑀝𑁆𑀞𑀫𑀓𑀸𑀦𑀻𑀢𑀺 𑀢𑁂𑀢𑁆𑀢𑀺𑀁𑀲 𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺.

𑀢𑀲𑁆𑀲𑁂𑀯𑀁 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀓𑀸𑀭𑀯𑀲𑁂𑀦 𑀇𑀫𑁂𑀲𑀼 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀲𑀼 𑀧𑀸𑀓𑀝𑁂𑀲𑀼 𑀚𑀸𑀢𑁂𑀲𑀼 𑀯𑀢𑁆𑀣𑀼𑀤𑁆𑀯𑀸𑀭𑀯𑀲𑁂𑀦 𑀧𑀜𑁆𑀘 𑀘𑀓𑁆𑀔𑀼𑀤𑀲𑀓𑀸𑀤𑀬𑁄, 𑀳𑀤𑀬𑀯𑀢𑁆𑀣𑀼𑀤𑀲𑀓𑀜𑁆𑀘𑀸𑀢𑀺 𑀅𑀧𑀭𑀸𑀦𑀺𑀧𑀺 𑀲𑀝𑁆𑀞𑀺𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀏𑀓𑀢𑁄 𑀓𑀢𑁆𑀯𑀸 ‘‘𑀏𑀢𑀁 𑀭𑀽𑀧’’𑀦𑁆𑀢𑀺 𑀧𑀲𑁆𑀲𑀢𑀺.

𑀢𑀲𑁆𑀲𑁂𑀯𑀁 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀲𑁆𑀲 𑀤𑁆𑀯𑀸𑀭𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄, 𑀅𑀝𑁆𑀞𑀲𑀝𑁆𑀞𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀢𑀺 𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺, 𑀅𑀯𑀺𑀲𑁂𑀲𑁂𑀦 𑀘 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑁄 𑀨𑀲𑁆𑀲𑁄, 𑀯𑁂𑀤𑀦𑀸, 𑀲𑀜𑁆𑀜𑀸, 𑀘𑁂𑀢𑀦𑀸, 𑀚𑀻𑀯𑀺𑀢𑀁, 𑀘𑀺𑀢𑁆𑀢𑀝𑁆𑀞𑀺𑀢𑀺, 𑀫𑀦𑀲𑀺𑀓𑀸𑀭𑁄𑀢𑀺 𑀇𑀫𑁂 𑀲𑀢𑁆𑀢 𑀲𑀢𑁆𑀢 𑀘𑁂𑀢𑀲𑀺𑀓𑀸𑀢𑀺. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀧𑀦 𑀦𑁂𑀯 𑀲𑀼𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 ¶ , 𑀦 𑀲𑀫𑀣𑀬𑀸𑀦𑀺𑀓𑀲𑁆𑀲 𑀧𑀭𑀺𑀕𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀅𑀦𑀥𑀺𑀕𑀢𑀢𑁆𑀢𑀸𑀢𑀺. 𑀲𑁄 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀽𑀧𑀥𑀫𑁆𑀫𑁂 𑀦𑀫𑀦𑀮𑀓𑁆𑀔𑀡𑁂𑀦 𑀏𑀓𑀢𑁄 𑀓𑀢𑁆𑀯𑀸 ‘‘𑀏𑀢𑀁 𑀦𑀸𑀫’’𑀦𑁆𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁂𑀓𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀯𑀺𑀢𑁆𑀣𑀸𑀭𑀢𑁄 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁫. 𑀅𑀧𑀭𑁄 ¶ 𑀅𑀝𑁆𑀞𑀸𑀭𑀲𑀥𑀸𑀢𑀼𑀯𑀲𑁂𑀦. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀥𑀸𑀢𑀼𑀬𑁄 𑀆𑀯𑀚𑁆𑀚𑀺𑀢𑁆𑀯𑀸 𑀬𑀁 𑀮𑁄𑀓𑁄 𑀲𑁂𑀢𑀓𑀡𑁆𑀳𑀫𑀡𑁆𑀟𑀮𑀯𑀺𑀘𑀺𑀢𑁆𑀢𑀁 𑀆𑀬𑀢𑀯𑀺𑀢𑁆𑀣𑀢𑀁 𑀅𑀓𑁆𑀔𑀺𑀓𑀽𑀧𑀓𑁂 𑀦𑁆𑀳𑀸𑀭𑀼𑀲𑀼𑀢𑁆𑀢𑀓𑁂𑀦 𑀆𑀩𑀤𑁆𑀥𑀁 𑀫𑀁𑀲𑀧𑀺𑀡𑁆𑀟𑀁 ‘‘𑀘𑀓𑁆𑀔𑀽’’𑀢𑀺 𑀲𑀜𑁆𑀚𑀸𑀦𑀸𑀢𑀺, 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀉𑀧𑀸𑀤𑀸𑀭𑀽𑀧𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀓𑁆𑀔𑀼𑀧𑀲𑀸𑀤𑀁 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀬𑀸𑀦𑀺 𑀧𑀦𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀧𑀭𑀺𑀯𑀸𑀭𑀓𑀸𑀦𑀺 𑀘𑀢𑁆𑀢𑀸𑀭𑀺 𑀯𑀡𑁆𑀡-𑀕𑀦𑁆𑀥-𑀭𑀲-𑀑𑀚𑀸-𑀭𑀽𑀧𑀸𑀦𑀺, 𑀅𑀦𑀼𑀧𑀸𑀮𑀓𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀦𑀯 𑀲𑀳𑀚𑀸𑀢𑀭𑀽𑀧𑀸𑀦𑀺, 𑀢𑀢𑁆𑀣𑁂𑀯 𑀞𑀺𑀢𑀸𑀦𑀺 𑀓𑀸𑀬𑀤𑀲𑀓𑀪𑀸𑀯𑀤𑀲𑀓𑀯𑀲𑁂𑀦 𑀯𑀻𑀲𑀢𑀺 𑀓𑀫𑁆𑀫𑀚𑀭𑀽𑀧𑀸𑀦𑀺, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀑𑀚𑀝𑁆𑀞𑀫𑀓𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑀸𑀦𑀻𑀢𑀺 𑀏𑀯𑀁 𑀲𑁂𑀲𑀸𑀦𑀺 𑀢𑁂𑀧𑀡𑁆𑀡𑀸𑀲 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀸𑀦𑀺 𑀘 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀏𑀲 𑀦𑀬𑁄 𑀲𑁄𑀢𑀥𑀸𑀢𑀼𑀆𑀤𑀻𑀲𑀼𑀧𑀺. 𑀓𑀸𑀬𑀥𑀸𑀢𑀼𑀬𑀁 𑀧𑀦 𑀅𑀯𑀲𑁂𑀲𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀓𑁂𑀘𑀺 𑀧𑀦 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀲𑀤𑁆𑀤𑁂𑀦 𑀲𑀳 𑀦𑀯 𑀦𑀯 𑀓𑀢𑁆𑀯𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀢𑀺 𑀯𑀤𑀦𑁆𑀢𑀺.

𑀇𑀢𑀺 𑀇𑀫𑁂 𑀧𑀜𑁆𑀘 𑀧𑀲𑀸𑀤𑀸, 𑀢𑁂𑀲𑀜𑁆𑀘 𑀯𑀺𑀲𑀬𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀧𑀜𑁆𑀘𑀸𑀢𑀺 𑀤𑀲 𑀭𑀽𑀧𑀸𑀦𑀺 𑀤𑀲 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀅𑀯𑀲𑁂𑀲𑀭𑀽𑀧𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑁂𑀯 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀁 𑀧𑀦 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫𑀸𑀢𑀺 𑀏𑀯𑀁 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀧𑀜𑁆𑀘 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀢𑀻𑀡𑀺 𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀸𑀦𑀺 𑀏𑀓𑀸 𑀫𑀦𑁄𑀥𑀸𑀢𑀼, 𑀅𑀝𑁆𑀞𑀲𑀝𑁆𑀞𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑀸𑀦𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀲𑀩𑁆𑀩𑀸𑀦𑀺𑀧𑀺 𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀥𑀸𑀢𑀽𑀢𑀺 𑀏𑀯𑀫𑁂𑀢𑁆𑀣 𑀅𑀟𑁆𑀠𑁂𑀓𑀸𑀤𑀲 𑀥𑀸𑀢𑀼𑀬𑁄 𑀭𑀽𑀧𑀁, 𑀅𑀟𑁆𑀠𑀝𑁆𑀞𑀫𑀸 𑀥𑀸𑀢𑀼𑀬𑁄 𑀦𑀸𑀫𑀦𑁆𑀢𑀺 𑀏𑀯𑀫𑁂𑀓𑁄 𑀅𑀝𑁆𑀞𑀸𑀭𑀲𑀥𑀸𑀢𑀼𑀯𑀲𑁂𑀦 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁬. 𑀅𑀧𑀭𑁄 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦. 𑀓𑀣𑀁? 𑀘𑀓𑁆𑀔𑀼𑀥𑀸𑀢𑀼𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀞𑀧𑁂𑀢𑁆𑀯𑀸 𑀢𑁂𑀧𑀡𑁆𑀡𑀸𑀲 𑀭𑀽𑀧𑀸𑀦𑀺 𑀘𑀓𑁆𑀔𑀼𑀧𑀲𑀸𑀤𑀫𑀢𑁆𑀢𑀁 ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀥𑀸𑀢𑀼𑀬𑁄 ‘‘𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀸𑀦𑀻’’𑀢𑀺, 𑀢𑁂𑀲𑀁 𑀯𑀺𑀲𑀬𑀪𑀽𑀢𑁂 𑀧𑀜𑁆𑀘𑀥𑀫𑁆𑀫𑁂 ‘‘𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀻’’𑀢𑀺 ¶ , 𑀮𑁄𑀓𑀺𑀬𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 ‘‘𑀫𑀦𑀸𑀬𑀢𑀦’’𑀦𑁆𑀢𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀲𑁂𑀲𑀭𑀽𑀧𑀜𑁆𑀘 ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀏𑀯𑀫𑁂𑀢𑁆𑀣 ¶ 𑀅𑀟𑁆𑀠𑁂𑀓𑀸𑀤𑀲 𑀆𑀬𑀢𑀦𑀸𑀦𑀺 𑀭𑀽𑀧𑀁, 𑀤𑀺𑀬𑀟𑁆𑀠𑀆𑀬𑀢𑀦𑀸𑀦𑀺 𑀦𑀸𑀫𑀦𑁆𑀢𑀺 𑀏𑀯𑀫𑁂𑀓𑁄 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁭. 𑀅𑀧𑀭𑁄 𑀢𑀢𑁄 𑀲𑀁𑀔𑀺𑀢𑁆𑀢𑀢𑀭𑀁 𑀔𑀦𑁆𑀥𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑀺. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀢𑀁𑀦𑀺𑀲𑁆𑀲𑀺𑀢𑁄 𑀯𑀡𑁆𑀡𑁄, 𑀕𑀦𑁆𑀥𑁄, 𑀭𑀲𑁄, 𑀑𑀚𑀸, 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀧𑀜𑁆𑀘 𑀧𑀲𑀸𑀤𑀸, 𑀯𑀢𑁆𑀣𑀼𑀭𑀽𑀧𑀁, 𑀪𑀸𑀯𑁄, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑁄 𑀲𑀤𑁆𑀤𑁄𑀢𑀺 𑀇𑀫𑀸𑀦𑀺 𑀲𑀢𑁆𑀢𑀭𑀲 𑀭𑀽𑀧𑀸𑀦𑀺 𑀲𑀫𑁆𑀫𑀲𑀦𑀼𑀧𑀕𑀸𑀦𑀺 𑀦𑀺𑀧𑁆𑀨𑀦𑁆𑀦𑀸𑀦𑀺 𑀭𑀽𑀧𑀭𑀽𑀧𑀸𑀦𑀺. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀺, 𑀚𑀭𑀢𑀸, 𑀅𑀦𑀺𑀘𑁆𑀘𑀢𑀸𑀢𑀺 𑀇𑀫𑀸𑀦𑀺 𑀧𑀦 𑀤𑀲 𑀭𑀽𑀧𑀸𑀦𑀺 𑀦 𑀲𑀫𑁆𑀫𑀲𑀦𑀼𑀧𑀕𑀸𑀦𑀺, 𑀆𑀓𑀸𑀭𑀯𑀺𑀓𑀸𑀭𑀅𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀓𑀸𑀦𑀺, 𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺, 𑀦 𑀭𑀽𑀧𑀭𑀽𑀧𑀸𑀦𑀺. 𑀅𑀧𑀺𑀘 𑀔𑁄 𑀭𑀽𑀧𑀸𑀦𑀁 𑀆𑀓𑀸𑀭𑀯𑀺𑀓𑀸𑀭𑀅𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀢𑁄 𑀭𑀽𑀧𑀦𑁆𑀢𑀺 𑀲𑀗𑁆𑀔𑀁 𑀕𑀢𑀸𑀦𑀺. 𑀇𑀢𑀺 𑀲𑀩𑁆𑀩𑀸𑀦𑀺 𑀧𑁂𑀢𑀸𑀦𑀺 𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀲𑀻𑀢𑀺𑀬𑀸 𑀮𑁄𑀓𑀺𑀬𑀘𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀇𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀁, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀦𑀸𑀫𑀦𑁆𑀢𑀺 𑀏𑀯𑀫𑁂𑀓𑁄 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁮. 𑀅𑀧𑀭𑁄 ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀲𑀩𑁆𑀩𑀁 𑀭𑀽𑀧𑀁 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁧.𑁩𑁪𑁭; 𑀅. 𑀦𑀺. 𑁧𑁧.𑁧𑁭) 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑁂𑀯 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀢𑀣𑀸 𑀫𑀦𑀸𑀬𑀢𑀦𑀜𑁆𑀘𑁂𑀯 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀜𑁆𑀘 𑀦𑀸𑀫𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀇𑀢𑀺 𑀇𑀤𑀜𑁆𑀘 𑀦𑀸𑀫𑀁 𑀇𑀤𑀜𑁆𑀘 𑀭𑀽𑀧𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑁬𑁬𑁯. 𑀲𑀘𑁂 𑀧𑀦𑀲𑁆𑀲 𑀢𑁂𑀦 𑀢𑁂𑀦 𑀫𑀼𑀔𑁂𑀦 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀲𑀼𑀔𑀼𑀫𑀢𑁆𑀢𑀸 𑀅𑀭𑀽𑀧𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀭𑀽𑀧𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀁 𑀫𑀦𑀲𑀺𑀓𑀸𑀢𑀩𑁆𑀩𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀬𑀣𑀸 𑀬𑀣𑀸 𑀳𑀺𑀲𑁆𑀲 𑀭𑀽𑀧𑀁 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀳𑁄𑀢𑀺 𑀦𑀺𑀚𑁆𑀚𑀝𑀁 𑀲𑀼𑀧𑀭𑀺𑀲𑀼𑀤𑁆𑀥𑀁, 𑀢𑀣𑀸 𑀢𑀣𑀸 𑀢𑀤𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀬𑀣𑀸 𑀳𑀺 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀺, 𑀲𑁄 ‘‘𑀦𑀺𑀫𑀺𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀦 𑀆𑀤𑀸𑀲𑀁 ¶ 𑀙𑀟𑁆𑀟𑁂𑀢𑀺, 𑀅𑀣 𑀔𑁄 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀢𑀺 ¶ . 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑁂 𑀦𑀺𑀫𑀺𑀢𑁆𑀢𑀁 𑀲𑀬𑀫𑁂𑀯 𑀧𑀸𑀓𑀝𑀁 𑀳𑁄𑀢𑀺. 𑀬𑀣𑀸 𑀘 𑀢𑁂𑀮𑀢𑁆𑀣𑀺𑀓𑁄 𑀢𑀺𑀮𑀧𑀺𑀝𑁆𑀞𑀁 𑀤𑁄𑀡𑀺𑀬𑀁 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑁆𑀯𑀸 𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭𑀁 𑀧𑀻𑀴𑀦𑀫𑀢𑁆𑀢𑁂𑀦 𑀢𑁂𑀮𑁂 𑀅𑀦𑀺𑀓𑁆𑀔𑀫𑀦𑁆𑀢𑁂 𑀦 𑀢𑀺𑀮𑀧𑀺𑀝𑁆𑀞𑀁 𑀙𑀟𑁆𑀟𑁂𑀢𑀺, 𑀅𑀣 𑀔𑁄 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀉𑀡𑁆𑀳𑁄𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀧𑀻𑀴𑁂𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀯𑀺𑀧𑁆𑀧𑀲𑀦𑁆𑀦𑀁 𑀢𑀺𑀮𑀢𑁂𑀮𑀁 𑀦𑀺𑀓𑁆𑀔𑀫𑀢𑀺. 𑀬𑀣𑀸 𑀯𑀸 𑀧𑀦 𑀉𑀤𑀓𑀁 𑀧𑀲𑀸𑀤𑁂𑀢𑀼𑀓𑀸𑀫𑁄 𑀓𑀢𑀓𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀖𑀝𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀏𑀓𑀤𑁆𑀯𑁂𑀯𑀸𑀭𑁂 𑀖𑀁𑀲𑀦𑀫𑀢𑁆𑀢𑁂𑀦 𑀉𑀤𑀓𑁂 𑀅𑀯𑀺𑀧𑁆𑀧𑀲𑀻𑀤𑀦𑁆𑀢𑁂 𑀦 𑀓𑀢𑀓𑀝𑁆𑀞𑀺𑀁 𑀙𑀟𑁆𑀟𑁂𑀢𑀺, 𑀅𑀣 𑀔𑁄 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀖𑀁𑀲𑀢𑀺. 𑀢𑀲𑁆𑀲𑁂𑀯𑀁 𑀓𑀭𑁄𑀦𑁆𑀢𑀲𑁆𑀲 𑀓𑀮𑀮𑀓𑀤𑁆𑀤𑀫𑀁 𑀲𑀦𑁆𑀦𑀺𑀲𑀻𑀤𑀢𑀺. 𑀉𑀤𑀓𑀁 𑀅𑀘𑁆𑀙𑀁 𑀳𑁄𑀢𑀺 𑀯𑀺𑀧𑁆𑀧𑀲𑀦𑁆𑀦𑀁, 𑀏𑀯𑀫𑁂𑀯𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀭𑀽𑀧𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀁 𑀫𑀦𑀲𑀺𑀓𑀸𑀢𑀩𑁆𑀩𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀬𑀣𑀸 𑀬𑀣𑀸 𑀳𑀺𑀲𑁆𑀲 𑀭𑀽𑀧𑀁 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀳𑁄𑀢𑀺 𑀦𑀺𑀚𑁆𑀚𑀝𑀁 𑀲𑀼𑀧𑀭𑀺𑀲𑀼𑀤𑁆𑀥𑀁, 𑀢𑀣𑀸 𑀢𑀣𑀸 𑀢𑀧𑁆𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀻𑀤𑀦𑁆𑀢𑀺, 𑀓𑀤𑁆𑀤𑀫𑀼𑀧𑀭𑀺 𑀉𑀤𑀓𑀁 𑀯𑀺𑀬 𑀘𑀺𑀢𑁆𑀢𑀁 𑀧𑀲𑀦𑁆𑀦𑀁 𑀳𑁄𑀢𑀺. 𑀢𑀤𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀸𑀳𑀺𑀧𑀺 𑀉𑀘𑁆𑀙𑀼𑀘𑁄𑀭𑀕𑁄𑀡𑀤𑀥𑀺𑀫𑀘𑁆𑀙𑀸𑀤𑀻𑀳𑀺 𑀉𑀧𑀫𑀸𑀳𑀺 𑀅𑀬𑀫𑀢𑁆𑀣𑁄 𑀧𑀓𑀸𑀲𑁂𑀢𑀩𑁆𑀩𑁄.

𑀅𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀓𑀣𑀸

𑁬𑁭𑁦. 𑀏𑀯𑀁 𑀲𑀼𑀯𑀺𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀧𑀦𑀲𑁆𑀲 𑀅𑀭𑀽𑀧𑀥𑀫𑁆𑀫𑀸 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀺 𑀨𑀲𑁆𑀲𑀯𑀲𑁂𑀦 𑀯𑀸 𑀯𑁂𑀤𑀦𑀸𑀯𑀲𑁂𑀦 𑀯𑀸 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸. 𑀓𑀣𑀁? 𑀏𑀓𑀲𑁆𑀲 𑀢𑀸𑀯 ‘‘𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀤𑁆𑀥𑀺𑀁 𑀨𑀲𑁆𑀲𑁂𑀦 𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀢𑀣𑀸 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁭) 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀅𑀭𑀽𑀧𑀥𑀫𑁆𑀫𑀸 𑀨𑀲𑁆𑀲𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀺.

𑀏𑀓𑀲𑁆𑀲 ‘‘𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀓𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄 ¶ 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀢𑀣𑀸 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸 ¶ …𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀓𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀺.

𑀅𑀧𑀭𑀲𑁆𑀲 ‘‘𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀢𑀣𑀸 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀺.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀥𑀸𑀢𑀼𑀓𑁄𑀝𑁆𑀞𑀸𑀲𑁂𑀲𑀼 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦, 𑀲𑁂𑀲𑁂𑀲𑀼 𑀘 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀲𑀼 𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑁂𑀲𑀼 𑀲𑀩𑁆𑀩𑀁 𑀦𑀬𑀪𑁂𑀤𑀁 𑀅𑀦𑀼𑀕𑀦𑁆𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁬𑁭𑁧. 𑀬𑀲𑁆𑀫𑀸 𑀘 𑀏𑀯𑀁 𑀲𑀼𑀯𑀺𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲𑁂𑀯 𑀢𑀲𑁆𑀲 𑀅𑀭𑀽𑀧𑀥𑀫𑁆𑀫𑀸 𑀢𑀻𑀳𑀸𑀓𑀸𑀭𑁂𑀳𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀯𑀺𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑁂𑀦𑁂𑀯 𑀅𑀭𑀽𑀧𑀧𑀭𑀺𑀕𑁆𑀕𑀳𑀸𑀬 𑀬𑁄𑀕𑁄 𑀓𑀸𑀢𑀩𑁆𑀩𑁄, 𑀦 𑀇𑀢𑀭𑁂𑀦. 𑀲𑀘𑁂 𑀳𑀺 𑀏𑀓𑀲𑁆𑀫𑀺𑀁 𑀯𑀸 𑀭𑀽𑀧𑀥𑀫𑁆𑀫𑁂 𑀉𑀧𑀝𑁆𑀞𑀺𑀢𑁂 𑀤𑁆𑀯𑀻𑀲𑀼 𑀯𑀸 𑀭𑀽𑀧𑀁 𑀧𑀳𑀸𑀬 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀆𑀭𑀪𑀢𑀺 𑀓𑀫𑁆𑀫𑀝𑁆𑀞𑀸𑀦𑀢𑁄 𑀧𑀭𑀺𑀳𑀸𑀬𑀢𑀺, 𑀧𑀣𑀯𑀻𑀓𑀲𑀺𑀡𑀪𑀸𑀯𑀦𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀩𑁆𑀩𑀢𑁂𑀬𑁆𑀬𑀸 𑀕𑀸𑀯𑀻 𑀯𑀺𑀬. 𑀲𑀼𑀯𑀺𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀧𑀦 𑀅𑀭𑀽𑀧𑀧𑀭𑀺𑀕𑁆𑀕𑀳𑀸𑀬 𑀬𑁄𑀕𑀁 𑀓𑀭𑁄𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺.

𑀲𑁄 𑀏𑀯𑀁 𑀨𑀲𑁆𑀲𑀸𑀤𑀻𑀦𑀁 𑀯𑀲𑁂𑀦 𑀉𑀧𑀝𑁆𑀞𑀺𑀢𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑁂 𑀦𑀸𑀫𑀦𑁆𑀢𑀺, 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁 𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀇𑀢𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑁂 𑀥𑀫𑁆𑀫𑁂 𑀔𑀕𑁆𑀕𑁂𑀦 𑀲𑀫𑀼𑀕𑁆𑀕𑀁 𑀯𑀺𑀯𑀭𑀫𑀸𑀦𑁄 ¶ 𑀯𑀺𑀬 𑀬𑀫𑀓𑀢𑀸𑀮𑀓𑀦𑁆𑀤𑀁 𑀨𑀸𑀮𑀬𑀫𑀸𑀦𑁄 𑀯𑀺𑀬 𑀘 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀺. 𑀦𑀸𑀫𑀭𑀽𑀧𑀫𑀢𑁆𑀢𑀢𑁄 𑀉𑀤𑁆𑀥𑀁 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀦𑀢𑁆𑀣𑀻𑀢𑀺 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺.

𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀦𑁆𑀢𑀲𑀁𑀲𑀦𑁆𑀤𑀦𑀸

𑁬𑁭𑁨. 𑀲𑁄 ¶ 𑀏𑀯𑀁 𑀬𑀸𑀣𑀸𑀯𑀲𑀭𑀲𑀢𑁄 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺 𑀇𑀫𑀺𑀲𑁆𑀲𑀸 𑀮𑁄𑀓𑀲𑀫𑀜𑁆𑀜𑀸𑀬 𑀧𑀳𑀸𑀦𑀢𑁆𑀣𑀸𑀬 𑀲𑀢𑁆𑀢𑀲𑀫𑁆𑀫𑁄𑀳𑀲𑁆𑀲 𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬 𑀅𑀲𑀫𑁆𑀫𑁄𑀳𑀪𑀽𑀫𑀺𑀬𑀁 𑀘𑀺𑀢𑁆𑀢𑀁 𑀞𑀧𑀦𑀢𑁆𑀣𑀸𑀬 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀦𑁆𑀢𑀯𑀲𑁂𑀦 ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯𑀺𑀤𑀁, 𑀦 𑀲𑀢𑁆𑀢𑁄, 𑀦 𑀧𑀼𑀕𑁆𑀕𑀮𑁄 𑀅𑀢𑁆𑀣𑀻’’𑀢𑀺 𑀏𑀢𑀫𑀢𑁆𑀣𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁, ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘 𑀯𑀮𑁆𑀮𑀺𑀜𑁆𑀘 𑀧𑀝𑀺𑀘𑁆𑀘 𑀫𑀢𑁆𑀢𑀺𑀓𑀜𑁆𑀘 𑀧𑀝𑀺𑀘𑁆𑀘 𑀢𑀺𑀡𑀜𑁆𑀘 𑀧𑀝𑀺𑀘𑁆𑀘 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀅𑀕𑀸𑀭𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧);

𑀉𑀧𑀫𑀸𑀳𑀺 𑀦𑀸𑀫𑀭𑀽𑀧𑀯𑀺𑀪𑀸𑀯𑀦𑀸

𑁬𑁭𑁩. 𑀏𑀯𑀁 𑀅𑀦𑁂𑀓𑀲𑀢𑁂𑀳𑀺 𑀲𑀼𑀢𑁆𑀢𑀦𑁆𑀢𑁂𑀳𑀺 𑀦𑀸𑀫𑀭𑀽𑀧𑀫𑁂𑀯 𑀤𑀻𑀧𑀺𑀢𑀁, 𑀦 𑀲𑀢𑁆𑀢𑁄 𑀦 𑀧𑀼𑀕𑁆𑀕𑀮𑁄. 𑀢𑀲𑁆𑀫𑀸 𑀬𑀣𑀸 𑀅𑀓𑁆𑀔𑀘𑀓𑁆𑀓𑀧𑀜𑁆𑀚𑀭𑀈𑀲𑀸𑀤𑀻𑀲𑀼 𑀅𑀗𑁆𑀕𑀲𑀫𑁆𑀪𑀸𑀭𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑁂𑀲𑀼 𑀭𑀣𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀧𑀭𑀫𑀢𑁆𑀣𑀢𑁄 𑀏𑀓𑁂𑀓𑀲𑁆𑀫𑀺𑀁 𑀅𑀗𑁆𑀕𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀭𑀣𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘 𑀓𑀝𑁆𑀞𑀸𑀤𑀻𑀲𑀼 𑀕𑁂𑀳𑀲𑀫𑁆𑀪𑀸𑀭𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀆𑀓𑀸𑀲𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀕𑁂𑀳𑀦𑁆𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀧𑀭𑀫𑀢𑁆𑀣𑀢𑁄 𑀕𑁂𑀳𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘 𑀅𑀗𑁆𑀕𑀼𑀮𑀺𑀅𑀗𑁆𑀕𑀼𑀝𑁆𑀞𑀸𑀤𑀻𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀞𑀺𑀢𑁂𑀲𑀼 𑀫𑀼𑀝𑁆𑀞𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 ¶ 𑀳𑁄𑀢𑀺. 𑀤𑁄𑀡𑀺𑀢𑀦𑁆𑀢𑀺𑀆𑀤𑀻𑀲𑀼 𑀯𑀻𑀡𑀸𑀢𑀺. 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀲𑁂𑀦𑀸𑀢𑀺. 𑀧𑀸𑀓𑀸𑀭𑀕𑁂𑀳𑀕𑁄𑀧𑀼𑀭𑀸𑀤𑀻𑀲𑀼 ¶ 𑀦𑀕𑀭𑀦𑁆𑀢𑀺. 𑀔𑀦𑁆𑀥𑀲𑀸𑀔𑀸𑀧𑀮𑀸𑀲𑀸𑀤𑀻𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀞𑀺𑀢𑁂𑀲𑀼 𑀭𑀼𑀓𑁆𑀔𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀧𑀭𑀫𑀢𑁆𑀣𑀢𑁄 𑀏𑀓𑁂𑀓𑀲𑁆𑀫𑀺𑀁 𑀅𑀯𑀬𑀯𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀭𑀼𑀓𑁆𑀔𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑁂𑀯𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀢𑀺 ‘‘𑀲𑀢𑁆𑀢𑁄, 𑀧𑀼𑀕𑁆𑀕𑀮𑁄’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀧𑀭𑀫𑀢𑁆𑀣𑀢𑁄 𑀏𑀓𑁂𑀓𑀲𑁆𑀫𑀺𑀁 𑀥𑀫𑁆𑀫𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 ‘‘𑀅𑀲𑁆𑀫𑀻𑀢𑀺 𑀯𑀸 𑀅𑀳𑀦𑁆𑀢𑀺 𑀯𑀸’’𑀢𑀺 𑀕𑀸𑀳𑀲𑁆𑀲 𑀯𑀢𑁆𑀣𑀼𑀪𑀽𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀧𑀭𑀫𑀢𑁆𑀣𑀢𑁄 𑀧𑀦 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀅𑀢𑁆𑀣𑀻𑀢𑀺. 𑀏𑀯𑀁 𑀧𑀲𑁆𑀲𑀢𑁄 𑀳𑀺 𑀤𑀲𑁆𑀲𑀦𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑀁 𑀦𑀸𑀫 𑀳𑁄𑀢𑀺.

𑁬𑁭𑁪. 𑀬𑁄 𑀧𑀦𑁂𑀢𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑀁 𑀧𑀳𑀸𑀬 ‘‘𑀲𑀢𑁆𑀢𑁄 𑀅𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀺. 𑀲𑁄 𑀢𑀲𑁆𑀲 𑀯𑀺𑀦𑀸𑀲𑀁 𑀅𑀦𑀼𑀚𑀸𑀦𑁂𑀬𑁆𑀬 𑀅𑀯𑀺𑀦𑀸𑀲𑀁 𑀯𑀸. 𑀅𑀯𑀺𑀦𑀸𑀲𑀁 𑀅𑀦𑀼𑀚𑀸𑀦𑀦𑁆𑀢𑁄 𑀲𑀲𑁆𑀲𑀢𑁂 𑀧𑀢𑀢𑀺. 𑀯𑀺𑀦𑀸𑀲𑀁 𑀅𑀦𑀼𑀚𑀸𑀦𑀦𑁆𑀢𑁄 𑀉𑀘𑁆𑀙𑁂𑀤𑁂 𑀧𑀢𑀢𑀺. 𑀓𑀲𑁆𑀫𑀸? 𑀔𑀻𑀭𑀦𑁆𑀯𑀬𑀲𑁆𑀲 𑀤𑀥𑀺𑀦𑁄 𑀯𑀺𑀬 𑀢𑀤𑀦𑁆𑀯𑀬𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄. 𑀲𑁄 ‘‘𑀲𑀲𑁆𑀲𑀢𑁄 𑀲𑀢𑁆𑀢𑁄’’𑀢𑀺 𑀕𑀡𑁆𑀳𑀦𑁆𑀢𑁄 𑀑𑀮𑀻𑀬𑀢𑀺 𑀦𑀸𑀫. ‘‘𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀅𑀢𑀺𑀥𑀸𑀯𑀢𑀺 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀑𑀮𑀻𑀬𑀦𑁆𑀢𑀺 𑀏𑀓𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂? 𑀪𑀯𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀪𑀯𑀭𑀢𑀸 𑀪𑀯𑀲𑀫𑀼𑀤𑀺𑀢𑀸. 𑀢𑁂𑀲𑀁 𑀪𑀯𑀦𑀺𑀭𑁄𑀥𑀸𑀬 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂? 𑀪𑀯𑁂𑀦𑁂𑀯 𑀔𑁄 𑀧𑀦𑁂𑀓𑁂 𑀅𑀝𑁆𑀝𑀻𑀬𑀫𑀸𑀦𑀸 𑀳𑀭𑀸𑀬𑀫𑀸𑀦𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀯𑀺𑀪𑀯𑀁 𑀅𑀪𑀺𑀦𑀦𑁆𑀤𑀦𑁆𑀢𑀺, 𑀬𑀢𑁄 𑀓𑀺𑀭 𑀪𑁄 𑀅𑀬𑀁 𑀅𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁𑀫𑀭𑀡𑀸, 𑀏𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢𑀁, 𑀏𑀢𑀁 𑀬𑀸𑀣𑀸𑀯𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀧𑀲𑁆𑀲𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀽𑀢𑀁 𑀪𑀽𑀢𑀢𑁄 ¶ 𑀧𑀲𑁆𑀲𑀢𑀺, 𑀪𑀽𑀢𑀁 𑀪𑀽𑀢𑀢𑁄 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀧𑀲𑁆𑀲𑀦𑁆𑀢𑀻’’𑀢𑀺 (𑀇𑀢𑀺𑀯𑀼. 𑁪𑁯).

𑁬𑁭𑁫. 𑀢𑀲𑁆𑀫𑀸 ¶ 𑀬𑀣𑀸 𑀤𑀸𑀭𑀼𑀬𑀦𑁆𑀢𑀁 𑀲𑀼𑀜𑁆𑀜𑀁 𑀦𑀺𑀚𑁆𑀚𑀻𑀯𑀁 𑀦𑀺𑀭𑀻𑀳𑀓𑀁, 𑀅𑀣 𑀘 𑀧𑀦 𑀤𑀸𑀭𑀼𑀭𑀚𑁆𑀚𑀼𑀓𑀲𑀫𑀸𑀬𑁄𑀕𑀯𑀲𑁂𑀦 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺. 𑀲𑀈𑀳𑀓𑀁 𑀲𑀩𑁆𑀬𑀸𑀧𑀸𑀭𑀁 𑀯𑀺𑀬 𑀔𑀸𑀬𑀢𑀺, 𑀏𑀯𑀫𑀺𑀤𑀁 𑀦𑀸𑀫𑀭𑀽𑀧𑀫𑁆𑀧𑀺 𑀲𑀼𑀜𑁆𑀜𑀁 𑀦𑀺𑀚𑁆𑀚𑀻𑀯𑀁 𑀦𑀺𑀭𑀻𑀳𑀓𑀁, 𑀅𑀣 𑀘 𑀧𑀦 𑀅𑀜𑁆𑀜𑀫𑀜𑁆𑀜𑀲𑀫𑀸𑀬𑁄𑀕𑀯𑀲𑁂𑀦 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺. 𑀲𑀈𑀳𑀓𑀁 𑀲𑀩𑁆𑀬𑀸𑀧𑀸𑀭𑀁 𑀯𑀺𑀬 𑀔𑀸𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀇𑀥𑀢𑁆𑀣𑀺 𑀲𑀘𑁆𑀘𑀢𑁄,

𑀦 𑀳𑁂𑀢𑁆𑀣 𑀲𑀢𑁆𑀢𑁄 𑀫𑀦𑀼𑀚𑁄 𑀘 𑀯𑀺𑀚𑁆𑀚𑀢𑀺;

𑀲𑀼𑀜𑁆𑀜𑀁 𑀇𑀤𑀁 𑀬𑀦𑁆𑀢𑀫𑀺𑀯𑀸𑀪𑀺𑀲𑀗𑁆𑀔𑀢𑀁,

𑀤𑀼𑀓𑁆𑀔𑀲𑁆𑀲 𑀧𑀼𑀜𑁆𑀚𑁄 𑀢𑀺𑀡𑀓𑀝𑁆𑀞𑀲𑀸𑀤𑀺𑀲𑁄’’𑀢𑀺.

𑀦 𑀓𑁂𑀯𑀮𑀜𑁆𑀘𑁂𑀢𑀁 𑀤𑀸𑀭𑀼𑀬𑀦𑁆𑀢𑀼𑀧𑀫𑀸𑀬, 𑀅𑀜𑁆𑀜𑀸𑀳𑀺𑀧𑀺 𑀦𑀴𑀓𑀮𑀸𑀧𑀻𑀆𑀤𑀻𑀳𑀺 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀩𑁆𑀩𑀁 𑁋 𑀬𑀣𑀸 𑀳𑀺 𑀤𑁆𑀯𑀻𑀲𑀼 𑀦𑀴𑀓𑀮𑀸𑀧𑀻𑀲𑀼 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀸𑀲𑀼 𑀏𑀓𑀸 𑀏𑀓𑀺𑀲𑁆𑀲𑀸 𑀉𑀧𑀢𑁆𑀣𑀫𑁆𑀪𑁄 𑀳𑁄𑀢𑀺, 𑀏𑀓𑀺𑀲𑁆𑀲𑀸 𑀧𑀢𑀫𑀸𑀦𑀸𑀬 𑀇𑀢𑀭𑀸𑀧𑀺 𑀧𑀢𑀢𑀺, 𑀏𑀯𑀫𑁂𑀯𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀏𑀓𑀁 𑀏𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑁄 𑀳𑁄𑀢𑀺. 𑀫𑀭𑀡𑀯𑀲𑁂𑀦 𑀏𑀓𑀲𑁆𑀫𑀺𑀁 𑀧𑀢𑀫𑀸𑀦𑁂 𑀇𑀢𑀭𑀫𑁆𑀧𑀺 𑀧𑀢𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀫𑀓𑀁 𑀦𑀸𑀫𑀭𑀽𑀧𑀜𑁆𑀘, 𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸;

𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺 𑀧𑀘𑁆𑀘𑀬𑀸’’𑀢𑀺.

𑁬𑁭𑁬. 𑀬𑀣𑀸 𑀘 𑀤𑀡𑁆𑀟𑀸𑀪𑀺𑀳𑀢𑀁 𑀪𑁂𑀭𑀺𑀁 𑀦𑀺𑀲𑁆𑀲𑀸𑀬 𑀲𑀤𑁆𑀤𑁂 𑀧𑀯𑀢𑁆𑀢𑀫𑀸𑀦𑁂 𑀅𑀜𑁆𑀜𑀸 𑀪𑁂𑀭𑀻, 𑀅𑀜𑁆𑀜𑁄 𑀲𑀤𑁆𑀤𑁄, 𑀪𑁂𑀭𑀺𑀲𑀤𑁆𑀤𑀸 𑀅𑀲𑀫𑁆𑀫𑀺𑀲𑁆𑀲𑀸, 𑀪𑁂𑀭𑀻 𑀲𑀤𑁆𑀤𑁂𑀦 𑀲𑀼𑀜𑁆𑀜𑀸, 𑀲𑀤𑁆𑀤𑁄 𑀪𑁂𑀭𑀺𑀬𑀸 𑀲𑀼𑀜𑁆𑀜𑁄, 𑀏𑀯𑀫𑁂𑀯𑀁 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀦𑀸𑀫𑁂 𑀧𑀯𑀢𑁆𑀢𑀫𑀸𑀦𑁂 𑀅𑀜𑁆𑀜𑀁 𑀭𑀽𑀧𑀁, 𑀅𑀜𑁆𑀜𑀁 𑀦𑀸𑀫𑀁, 𑀦𑀸𑀫𑀭𑀽𑀧𑀸 𑀅𑀲𑀫𑁆𑀫𑀺𑀲𑁆𑀲𑀸, 𑀦𑀸𑀫𑀁 𑀭𑀽𑀧𑁂𑀦 𑀲𑀼𑀜𑁆𑀜𑀁, 𑀭𑀽𑀧𑀁 𑀦𑀸𑀫𑁂𑀦 𑀲𑀼𑀜𑁆𑀜𑀁, 𑀅𑀧𑀺𑀘 𑀔𑁄 𑀪𑁂𑀭𑀺𑀁 𑀧𑀝𑀺𑀘𑁆𑀘 𑀲𑀤𑁆𑀤𑁄 𑀯𑀺𑀬 𑀭𑀽𑀧𑀁 𑀧𑀝𑀺𑀘𑁆𑀘 𑀦𑀸𑀫𑀁 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀦 ¶ 𑀘𑀓𑁆𑀔𑀼𑀢𑁄 𑀚𑀸𑀬𑀭𑁂 𑀨𑀲𑁆𑀲𑀧𑀜𑁆𑀘𑀫𑀸,

𑀦 𑀭𑀽𑀧𑀢𑁄 𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸;

𑀳𑁂𑀢𑀼𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀲𑀗𑁆𑀔𑀢𑀸,

𑀬𑀣𑀸𑀧𑀺 𑀲𑀤𑁆𑀤𑁄 𑀧𑀳𑀝𑀸𑀬 𑀪𑁂𑀭𑀺𑀬𑀸.

‘‘𑀦 ¶ 𑀲𑁄𑀢𑀢𑁄 𑀚𑀸𑀬𑀭𑁂 𑀨𑀲𑁆𑀲𑀧𑀜𑁆𑀘𑀫𑀸,

𑀦 𑀲𑀤𑁆𑀤𑀢𑁄 𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸…𑀧𑁂….

‘‘𑀦 𑀖𑀸𑀦𑀢𑁄 𑀚𑀸𑀬𑀭𑁂 𑀨𑀲𑁆𑀲𑀧𑀜𑁆𑀘𑀫𑀸,

𑀦 𑀕𑀦𑁆𑀥𑀢𑁄 𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸…𑀧𑁂….

‘‘𑀦 𑀚𑀺𑀯𑁆𑀳𑀸𑀢𑁄 𑀚𑀸𑀬𑀭𑁂 𑀨𑀲𑁆𑀲𑀧𑀜𑁆𑀘𑀫𑀸,

𑀦 𑀭𑀲𑀢𑁄 𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸…𑀧𑁂….

‘‘𑀦 𑀓𑀸𑀬𑀢𑁄 𑀚𑀸𑀬𑀭𑁂 𑀨𑀲𑁆𑀲𑀧𑀜𑁆𑀘𑀫𑀸,

𑀦 𑀨𑀲𑁆𑀲𑀢𑁄 𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸…𑀧𑁂….

‘‘𑀦 𑀯𑀢𑁆𑀣𑀼𑀭𑀽𑀧𑀸 𑀧𑀪𑀯𑀦𑁆𑀢𑀺 𑀲𑀗𑁆𑀔𑀢𑀸,

𑀦 𑀘𑀸𑀧𑀺 𑀥𑀫𑁆𑀫𑀸𑀬𑀢𑀦𑁂𑀳𑀺 𑀦𑀺𑀕𑁆𑀕𑀢𑀸;

𑀳𑁂𑀢𑀼𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀲𑀗𑁆𑀔𑀢𑀸,

𑀬𑀣𑀸𑀧𑀺 𑀲𑀤𑁆𑀤𑁄 𑀧𑀳𑀝𑀸𑀬 𑀪𑁂𑀭𑀺𑀬𑀸’’𑀢𑀺.

𑁬𑁭𑁭. 𑀅𑀧𑀺𑀘𑁂𑀢𑁆𑀣 𑀦𑀸𑀫𑀁 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀔𑀸𑀤𑀢𑀺, 𑀦 𑀧𑀺𑀯𑀢𑀺, 𑀦 𑀩𑁆𑀬𑀸𑀳𑀭𑀢𑀺, 𑀦 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺. 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀳𑀺 𑀢𑀲𑁆𑀲𑀸 𑀔𑀸𑀤𑀺𑀢𑀼𑀓𑀸𑀫𑀢𑀸, 𑀦𑀸𑀧𑀺 𑀧𑀺𑀯𑀺𑀢𑀼𑀓𑀸𑀫𑀢𑀸, 𑀦 𑀩𑁆𑀬𑀸𑀳𑀭𑀺𑀢𑀼𑀓𑀸𑀫𑀢𑀸, 𑀦 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀼𑀓𑀸𑀫𑀢𑀸, 𑀅𑀣 𑀔𑁄 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀦𑀸𑀫𑀁 𑀧𑀯𑀢𑁆𑀢𑀢𑀺, 𑀦𑀸𑀫𑀲𑁆𑀲 𑀔𑀸𑀤𑀺𑀢𑀼𑀓𑀸𑀫𑀢𑀸𑀬 𑀧𑀺𑀯𑀺𑀢𑀼𑀓𑀸𑀫𑀢𑀸𑀬 𑀩𑁆𑀬𑀸𑀳𑀭𑀺𑀢𑀼𑀓𑀸𑀫𑀢𑀸𑀬 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀭𑀽𑀧𑀁 𑀔𑀸𑀤𑀢𑀺, 𑀧𑀺𑀯𑀢𑀺, 𑀩𑁆𑀬𑀸𑀳𑀭𑀢𑀺, 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺.

𑀇𑀫𑀲𑁆𑀲 ¶ 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀸𑀬 𑀇𑀫𑀁 𑀉𑀧𑀫𑀁 𑀉𑀤𑀸𑀳𑀭𑀦𑁆𑀢𑀺 𑁋 𑀬𑀣𑀸 𑀚𑀘𑁆𑀘𑀦𑁆𑀥𑁄 𑀘 𑀧𑀻𑀞𑀲𑀧𑁆𑀧𑀻 𑀘 𑀤𑀺𑀲𑀸𑀧𑀓𑁆𑀓𑀫𑀺𑀢𑀼𑀓𑀸𑀫𑀸 𑀅𑀲𑁆𑀲𑀼, 𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀺𑀁 𑀏𑀯𑀫𑀸𑀳 ‘‘𑀅𑀳𑀁 𑀔𑁄 𑀪𑀡𑁂, 𑀲𑀓𑁆𑀓𑁄𑀫𑀺 𑀧𑀸𑀤𑁂𑀳𑀺 𑀧𑀸𑀤𑀓𑀭𑀡𑀻𑀬𑀁 𑀓𑀸𑀢𑀼𑀁, 𑀦𑀢𑁆𑀣𑀺 𑀘 𑀫𑁂 𑀘𑀓𑁆𑀔𑀽𑀦𑀺 𑀬𑁂𑀳𑀺 𑀲𑀫𑀯𑀺𑀲𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀧𑀻𑀞𑀲𑀧𑁆𑀧𑀻𑀧𑀺 𑀚𑀘𑁆𑀘𑀦𑁆𑀥𑀁 𑀏𑀯𑀫𑀸𑀳 ‘‘𑀅𑀳𑀁 𑀔𑁄 𑀪𑀡𑁂, 𑀲𑀓𑁆𑀓𑁄𑀫𑀺 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀓𑀭𑀡𑀻𑀬𑀁 𑀓𑀸𑀢𑀼𑀁, 𑀦𑀢𑁆𑀣𑀺 𑀘 𑀫𑁂 𑀧𑀸𑀤𑀸𑀦𑀺 𑀬𑁂𑀳𑀺 𑀅𑀪𑀺𑀓𑁆𑀓𑀫𑁂𑀬𑁆𑀬𑀁 𑀯𑀸 𑀧𑀝𑀺𑀓𑁆𑀓𑀫𑁂𑀬𑁆𑀬𑀁 𑀯𑀸’’𑀢𑀺. 𑀲𑁄 𑀢𑀼𑀝𑁆𑀞𑀳𑀝𑁆𑀞𑁄 𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀺𑀁 𑀅𑀁𑀲𑀓𑀽𑀝𑀁 𑀆𑀭𑁄𑀧𑁂𑀲𑀺. 𑀧𑀻𑀞𑀲𑀧𑁆𑀧𑀻 𑀚𑀘𑁆𑀘𑀦𑁆𑀥𑀲𑁆𑀲 𑀅𑀁𑀲𑀓𑀽𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀯𑀸𑀫𑀁 𑀫𑀼𑀜𑁆𑀘 𑀤𑀓𑁆𑀔𑀺𑀡𑀁 𑀕𑀡𑁆𑀳, 𑀤𑀓𑁆𑀔𑀺𑀡𑀁 𑀫𑀼𑀜𑁆𑀘 𑀯𑀸𑀫𑀁 𑀕𑀡𑁆𑀳𑀸’’𑀢𑀺. 𑀢𑀢𑁆𑀣 𑀚𑀘𑁆𑀘𑀦𑁆𑀥𑁄𑀧𑀺 𑀦𑀺𑀢𑁆𑀢𑁂𑀚𑁄 ¶ 𑀤𑀼𑀩𑁆𑀩𑀮𑁄 𑀦 𑀲𑀓𑁂𑀦 𑀢𑁂𑀚𑁂𑀦 𑀲𑀓𑁂𑀦 𑀩𑀮𑁂𑀦 𑀕𑀘𑁆𑀙𑀢𑀺, 𑀧𑀻𑀞𑀲𑀧𑁆𑀧𑀻𑀧𑀺 𑀦𑀺𑀢𑁆𑀢𑁂𑀚𑁄 𑀤𑀼𑀩𑁆𑀩𑀮𑁄 𑀦 𑀲𑀓𑁂𑀦 𑀢𑁂𑀚𑁂𑀦 𑀲𑀓𑁂𑀦 𑀩𑀮𑁂𑀦 𑀕𑀘𑁆𑀙𑀢𑀺, 𑀦 𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀕𑀫𑀦𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀏𑀯𑀫𑁂𑀯𑀁 𑀦𑀸𑀫𑀫𑁆𑀧𑀺 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀲𑀼 𑀢𑀸𑀲𑀼 𑀓𑀺𑀭𑀺𑀬𑀸𑀲𑀼 𑀧𑀯𑀢𑁆𑀢𑀢𑀺. 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀲𑀼 𑀢𑀸𑀲𑀼 𑀓𑀺𑀭𑀺𑀬𑀸𑀲𑀼 𑀧𑀯𑀢𑁆𑀢𑀢𑀺, 𑀦 𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀢𑁆𑀢𑀺 𑀯𑀸 𑀧𑀯𑀢𑁆𑀢𑀺 𑀯𑀸 𑀦 𑀳𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦 𑀲𑀓𑁂𑀦 𑀩𑀮𑁂𑀦 𑀚𑀸𑀬𑀭𑁂,

𑀦𑁄𑀧𑀺 𑀲𑀓𑁂𑀦 𑀩𑀮𑁂𑀦 𑀢𑀺𑀝𑁆𑀞𑀭𑁂;

𑀧𑀭𑀥𑀫𑁆𑀫𑀯𑀲𑀸𑀦𑀼𑀯𑀢𑁆𑀢𑀺𑀦𑁄,

𑀚𑀸𑀬𑀭𑁂 𑀲𑀗𑁆𑀔𑀢𑀸 𑀅𑀢𑁆𑀢𑀤𑀼𑀩𑁆𑀩𑀮𑀸.

‘‘𑀧𑀭𑀧𑀘𑁆𑀘𑀬𑀢𑁄 𑀘 𑀚𑀸𑀬𑀭𑁂,

𑀧𑀭𑀆𑀭𑀫𑁆𑀫𑀡𑀢𑁄 𑀲𑀫𑀼𑀝𑁆𑀞𑀺𑀢𑀸;

𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀳𑀺 𑀘,

𑀧𑀭𑀥𑀫𑁆𑀫𑁂𑀳𑀺 𑀘𑀺𑀫𑁂 𑀧𑀪𑀸𑀯𑀺𑀢𑀸.

‘‘𑀬𑀣𑀸𑀧𑀺 𑀦𑀸𑀯𑀁 𑀦𑀺𑀲𑁆𑀲𑀸𑀬, 𑀫𑀦𑀼𑀲𑁆𑀲𑀸 𑀬𑀦𑁆𑀢𑀺 𑀅𑀡𑁆𑀡𑀯𑁂;

𑀏𑀯𑀫𑁂𑀯 𑀭𑀽𑀧𑀁 𑀦𑀺𑀲𑁆𑀲𑀸𑀬, 𑀦𑀸𑀫𑀓𑀸𑀬𑁄 𑀧𑀯𑀢𑁆𑀢𑀢𑀺.

‘‘𑀬𑀣𑀸 𑀘 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬, 𑀦𑀸𑀯𑀸 𑀕𑀘𑁆𑀙𑀢𑀺 𑀅𑀡𑁆𑀡𑀯𑁂;

𑀏𑀯𑀫𑁂𑀯 𑀦𑀸𑀫𑀁 𑀦𑀺𑀲𑁆𑀲𑀸𑀬, 𑀭𑀽𑀧𑀓𑀸𑀬𑁄 𑀧𑀯𑀢𑁆𑀢𑀢𑀺.

‘‘𑀉𑀪𑁄 ¶ 𑀦𑀺𑀲𑁆𑀲𑀸𑀬 𑀕𑀘𑁆𑀙𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀦𑀸𑀯𑀸 𑀘 𑀅𑀡𑁆𑀡𑀯𑁂;

𑀏𑀯𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸’’𑀢𑀺.

𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀸𑀧𑀬𑀢𑁄 𑀲𑀢𑁆𑀢𑀲𑀜𑁆𑀜𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀲𑀫𑁆𑀫𑁄𑀳𑀪𑀽𑀫𑀺𑀬𑀁 𑀞𑀺𑀢𑀁 𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀦𑁆𑀢𑀺𑀧𑀺 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀅𑀥𑀺𑀯𑀘𑀦𑀁.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁯. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀓𑀣𑀸

𑁬𑁭𑁮. 𑀏𑀢𑀲𑁆𑀲𑁂𑀯 ¶ ¶ 𑀧𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀭𑁄𑀕𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀺. 𑀬𑀣𑀸 𑀯𑀸 𑀧𑀦 𑀅𑀦𑀼𑀓𑀫𑁆𑀧𑀓𑁄 𑀧𑀼𑀭𑀺𑀲𑁄 𑀤𑀳𑀭𑀁 𑀓𑀼𑀫𑀸𑀭𑀁 𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀁 𑀭𑀣𑀺𑀓𑀸𑀬 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀧𑀼𑀢𑁆𑀢𑀓𑁄’’𑀢𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀆𑀯𑀚𑁆𑀚𑀢𑀺, 𑀏𑀯𑀫𑁂𑀯 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁 𑀆𑀧𑀚𑁆𑀚𑀢𑀺.

𑀲𑁄 𑀆𑀤𑀺𑀢𑁄𑀯 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀦 𑀢𑀸𑀯𑀺𑀥𑀁 𑀦𑀸𑀫𑀭𑀽𑀧𑀁 𑀅𑀳𑁂𑀢𑀼𑀓𑀁, 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀜𑁆𑀘 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄, 𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁, 𑀦𑀸𑀫𑀭𑀽𑀧𑀢𑁄 𑀉𑀤𑁆𑀥𑀁 𑀇𑀲𑁆𑀲𑀭𑀸𑀤𑀻𑀦𑀁 𑀅𑀪𑀸𑀯𑀢𑁄. 𑀬𑁂𑀧𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀇𑀲𑁆𑀲𑀭𑀸𑀤𑀬𑁄𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀇𑀲𑁆𑀲𑀭𑀸𑀤𑀺𑀲𑀗𑁆𑀔𑀸𑀢𑀦𑀸𑀫𑀭𑀽𑀧𑀲𑁆𑀲 𑀅𑀳𑁂𑀢𑀼𑀓𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀢𑀲𑁆𑀫𑀸 𑀪𑀯𑀺𑀢𑀩𑁆𑀩𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀳𑀺, 𑀓𑁂 𑀦𑀼 𑀔𑁄 𑀢𑁂’’𑀢𑀺.

𑁬𑁭𑁯. 𑀲𑁄 𑀏𑀯𑀁 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂 𑀆𑀯𑀚𑁆𑀚𑁂𑀢𑁆𑀯𑀸 𑀇𑀫𑀲𑁆𑀲 𑀢𑀸𑀯 𑀭𑀽𑀧𑀓𑀸𑀬𑀲𑁆𑀲 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑁋 ‘‘𑀅𑀬𑀁 𑀓𑀸𑀬𑁄 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀦𑁂𑀯 𑀉𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑁄𑀕𑀦𑁆𑀥𑀺𑀓𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀦 𑀫𑀡𑀺𑀫𑀼𑀢𑁆𑀢𑀸𑀳𑀸𑀭𑀸𑀤𑀻𑀦𑀁, 𑀅𑀣 𑀔𑁄 𑀆𑀫𑀸𑀲𑀬𑀧𑀓𑁆𑀓𑀸𑀲𑀬𑀸𑀦𑀁 𑀅𑀦𑁆𑀢𑀭𑁂 𑀉𑀤𑀭𑀧𑀝𑀮𑀁 𑀧𑀘𑁆𑀙𑀢𑁄 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀅𑀦𑁆𑀢𑀅𑀦𑁆𑀢𑀕𑀼𑀡𑀧𑀭𑀺𑀯𑀸𑀭𑀺𑀢𑁄 𑀲𑀬𑀫𑁆𑀧𑀺 𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑁄 𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑁂 𑀧𑀭𑀫𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀧𑀽𑀢𑀺𑀫𑀘𑁆𑀙𑀧𑀽𑀢𑀺𑀓𑀼𑀫𑁆𑀫𑀸𑀲𑀑𑀴𑀺𑀕𑀮𑁆𑀮𑀘𑀦𑁆𑀤𑀦𑀺𑀓𑀸𑀤𑀻𑀲𑀼 𑀓𑀺𑀫𑀺𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀲𑁂𑀯𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲 ‘𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑀓𑀫𑁆𑀫’𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸 𑀳𑁂𑀢𑀼, 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀸 𑀧𑀘𑁆𑀘𑀬𑁄𑀢𑀺 𑀧𑀜𑁆𑀘 ¶ 𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀲𑀼𑀧𑀺 𑀅𑀯𑀺𑀚𑁆𑀚𑀸𑀤𑀬𑁄 𑀢𑀬𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀫𑀸𑀢𑀸 𑀯𑀺𑀬 𑀤𑀸𑀭𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀓𑀫𑁆𑀫𑀁 𑀧𑀺𑀢𑀸 𑀯𑀺𑀬 𑀧𑀼𑀢𑁆𑀢𑀲𑁆𑀲 𑀚𑀦𑀓𑀁 ¶ . 𑀆𑀳𑀸𑀭𑁄 𑀥𑀸𑀢𑀺 𑀯𑀺𑀬 𑀤𑀸𑀭𑀓𑀲𑁆𑀲 𑀲𑀦𑁆𑀥𑀸𑀭𑀓𑁄’’𑀢𑀺. 𑀏𑀯𑀁 𑀭𑀽𑀧𑀓𑀸𑀬𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸, 𑀧𑀼𑀦 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁪𑁩) 𑀦𑀬𑁂𑀦 𑀦𑀸𑀫𑀓𑀸𑀬𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺.

𑀲𑁄 𑀏𑀯𑀁 𑀧𑀘𑁆𑀘𑀬𑀢𑁄 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀢𑀺.

𑁬𑁮𑁦. 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀬𑀸 𑀲𑀸 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀧𑀜𑁆𑀘𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸, 𑀬𑀸𑀧𑀺 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 ‘‘𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸, 𑀬𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀩𑁆𑀪 ‘‘𑀏𑀢𑀭𑀳𑀺 𑀯𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀳𑁄𑀢𑀺 𑁋 𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁧𑁮) 𑀙𑀩𑁆𑀩𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸𑀧𑀺 𑀧𑀳𑀻𑀬𑀢𑀺.

𑁬𑁮𑁧. 𑀅𑀧𑀭𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀲𑁂𑀦 𑀤𑀼𑀯𑀺𑀥𑀁 𑀦𑀸𑀫𑀲𑁆𑀲 𑀧𑀘𑁆𑀘𑀬𑀁 𑀧𑀲𑁆𑀲𑀢𑀺, 𑀓𑀫𑁆𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀭𑀽𑀧𑀲𑁆𑀲. 𑀤𑀼𑀯𑀺𑀥𑁄 𑀳𑀺 𑀦𑀸𑀫𑀲𑁆𑀲 𑀧𑀘𑁆𑀘𑀬𑁄 𑀲𑀸𑀥𑀸𑀭𑀡𑁄 𑀅𑀲𑀸𑀥𑀸𑀭𑀡𑁄 𑀘. 𑀢𑀢𑁆𑀣 𑀘𑀓𑁆𑀔𑀸𑀤𑀻𑀦𑀺 𑀙 𑀤𑁆𑀯𑀸𑀭𑀸𑀦𑀺, 𑀭𑀽𑀧𑀸𑀤𑀻𑀦𑀺 𑀙 𑀆𑀭𑀫𑁆𑀫𑀡𑀸𑀦𑀺 𑀦𑀸𑀫𑀲𑁆𑀲 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄, 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲𑀸𑀧𑀺 𑀢𑀢𑁄 𑀧𑀯𑀢𑁆𑀢𑀺𑀢𑁄. 𑀫𑀦𑀲𑀺𑀓𑀸𑀭𑀸𑀤𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑁄 𑀳𑀺 𑀓𑀼𑀲𑀮𑀲𑁆𑀲𑁂𑀯 𑀳𑁄𑀢𑀺, 𑀯𑀺𑀧𑀭𑀻𑀢𑁄 𑀅𑀓𑀼𑀲𑀮𑀲𑁆𑀲, 𑀓𑀫𑁆𑀫𑀸𑀤𑀺𑀓𑁄 𑀯𑀺𑀧𑀸𑀓𑀲𑁆𑀲, 𑀪𑀯𑀗𑁆𑀕𑀸𑀤𑀺𑀓𑁄 𑀓𑀺𑀭𑀺𑀬𑀲𑁆𑀲𑀸𑀢𑀺.

𑀭𑀽𑀧𑀲𑁆𑀲 ¶ 𑀧𑀦 𑀓𑀫𑁆𑀫𑀁 𑀘𑀺𑀢𑁆𑀢𑀁 𑀉𑀢𑀼 𑀆𑀳𑀸𑀭𑁄𑀢𑀺 𑀅𑀬𑀁 𑀓𑀫𑁆𑀫𑀸𑀤𑀺𑀓𑁄 𑀘𑀢𑀼𑀩𑁆𑀩𑀺𑀥𑁄 𑀧𑀘𑁆𑀘𑀬𑁄. 𑀢𑀢𑁆𑀣 𑀓𑀫𑁆𑀫𑀁 𑀅𑀢𑀻𑀢𑀫𑁂𑀯 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 ¶ . 𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀉𑀢𑀼𑀆𑀳𑀸𑀭𑀸 𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀯𑁂𑀓𑁄 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺.

𑀲𑁄 𑀏𑀯𑀁 𑀧𑀘𑁆𑀘𑀬𑀢𑁄 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀻𑀲𑀼𑀧𑀺 𑀅𑀤𑁆𑀥𑀸𑀲𑀼 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺.

𑁬𑁮𑁨. 𑀅𑀧𑀭𑁄 𑀢𑁂𑀲𑀁𑀬𑁂𑀯 𑀦𑀸𑀫𑀭𑀽𑀧𑀲𑀗𑁆𑀔𑀸𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀚𑀭𑀸𑀧𑀢𑁆𑀢𑀺𑀁 𑀚𑀺𑀡𑁆𑀡𑀸𑀦𑀜𑁆𑀘 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀇𑀤𑀁 𑀲𑀗𑁆𑀔𑀸𑀭𑀸𑀦𑀁 𑀚𑀭𑀸𑀫𑀭𑀡𑀁 𑀦𑀸𑀫 𑀚𑀸𑀢𑀺𑀬𑀸 𑀲𑀢𑀺 𑀳𑁄𑀢𑀺, 𑀚𑀸𑀢𑀺 𑀪𑀯𑁂 𑀲𑀢𑀺, 𑀪𑀯𑁄 𑀉𑀧𑀸𑀤𑀸𑀦𑁂 𑀲𑀢𑀺, 𑀉𑀧𑀸𑀤𑀸𑀦𑀁 𑀢𑀡𑁆𑀳𑀸𑀬 𑀲𑀢𑀺, 𑀢𑀡𑁆𑀳𑀸 𑀯𑁂𑀤𑀦𑀸𑀬 𑀲𑀢𑀺, 𑀯𑁂𑀤𑀦𑀸 𑀨𑀲𑁆𑀲𑁂 𑀲𑀢𑀺, 𑀨𑀲𑁆𑀲𑁄 𑀲𑀴𑀸𑀬𑀢𑀦𑁂 𑀲𑀢𑀺, 𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑁂 𑀲𑀢𑀺, 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑁂 𑀲𑀢𑀺, 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑁂𑀲𑀼 𑀲𑀢𑀺, 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬 𑀲𑀢𑀻𑀢𑀺 𑀏𑀯𑀁 𑀧𑀝𑀺𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀅𑀣𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺.

𑁬𑁮𑁩. 𑀅𑀧𑀭𑁄 ‘‘𑀇𑀢𑀺 𑀔𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 (𑀲𑀁. 𑀦𑀺. 𑁨.𑁨) 𑀧𑀼𑀩𑁆𑀩𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀅𑀣𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀗𑁆𑀔𑀸 𑀧𑀳𑀻𑀬𑀢𑀺.

𑁬𑁮𑁪. 𑀅𑀧𑀭𑁄 ‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸, 𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀽𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸. 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸…𑀧𑁂… 𑀘𑁂𑀢𑀦𑀸 𑀪𑀯𑁄𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭) 𑀏𑀯𑀁 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺.

𑁬𑁮𑁫. 𑀢𑀢𑁆𑀣 ¶ 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁 𑁋 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁, 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺. 𑀢𑁂𑀲𑀼 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 ¶ 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀺𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀧𑀦 ‘‘𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀇𑀫𑀲𑁆𑀲 𑀢𑀺𑀓𑀲𑁆𑀲 𑀯𑀲𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀧𑀜𑁆𑀘 𑀚𑀯𑀦𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺.

𑁬𑁮𑁬. 𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁 𑁋 𑀬𑀁 𑀕𑀭𑀼𑀓𑀁, 𑀬𑀁 𑀩𑀳𑀼𑀮𑀁, 𑀬𑀤𑀸𑀲𑀦𑁆𑀦𑀁, 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀓𑀼𑀲𑀮𑀁 𑀯𑀸 𑀳𑁄𑀢𑀼 𑀅𑀓𑀼𑀲𑀮𑀁 𑀯𑀸, 𑀕𑀭𑀼𑀓𑀸𑀕𑀭𑀼𑀓𑁂𑀲𑀼 𑀬𑀁 𑀕𑀭𑀼𑀓𑀁 𑀫𑀸𑀢𑀼𑀖𑀸𑀢𑀸𑀤𑀺𑀓𑀫𑁆𑀫𑀁 𑀯𑀸 𑀫𑀳𑀕𑁆𑀕𑀢𑀓𑀫𑁆𑀫𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀢𑀣𑀸 𑀩𑀳𑀼𑀮𑀸𑀩𑀳𑀼𑀮𑁂𑀲𑀼𑀧𑀺 𑀬𑀁 𑀩𑀳𑀼𑀮𑀁 𑀳𑁄𑀢𑀺 𑀲𑀼𑀲𑀻𑀮𑁆𑀬𑀁 𑀯𑀸 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀤𑀸𑀲𑀦𑁆𑀦𑀁 𑀦𑀸𑀫 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀓𑀫𑁆𑀫𑀁. 𑀬𑀜𑁆𑀳𑀺 𑀆𑀲𑀦𑁆𑀦𑀫𑀭𑀡𑁄 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑁂𑀦𑁂𑀯 𑀉𑀧𑀧𑀚𑁆𑀚𑀢𑀺. 𑀏𑀢𑁂𑀳𑀺 𑀧𑀦 𑀢𑀻𑀳𑀺 𑀫𑀼𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀁 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀢𑁂𑀲𑀁 𑀅𑀪𑀸𑀯𑁂 𑀢𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺.

𑁬𑁮𑁭. 𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁 𑁋 𑀚𑀦𑀓𑀁, 𑀉𑀧𑀢𑁆𑀣𑀫𑁆𑀪𑀓𑀁, 𑀉𑀧𑀧𑀻𑀴𑀓𑀁, 𑀉𑀧𑀖𑀸𑀢𑀓𑀦𑁆𑀢𑀺. 𑀢𑀢𑁆𑀣 𑀚𑀦𑀓𑀁 𑀦𑀸𑀫 𑀓𑀼𑀲𑀮𑀫𑁆𑀧𑀺 𑀳𑁄𑀢𑀺 𑀅𑀓𑀼𑀲𑀮𑀫𑁆𑀧𑀺. 𑀢𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑁂𑀧𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀚𑀦𑁂𑀢𑀺. 𑀉𑀧𑀢𑁆𑀣𑀫𑁆𑀪𑀓𑀁 𑀧𑀦 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀓𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀉𑀧𑀧𑀻𑀴𑀓𑀁 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀲𑀬𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀤𑀼𑀩𑁆𑀩𑀮𑀓𑀫𑁆𑀫𑀁 𑀖𑀸𑀢𑁂𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀓𑀢𑁂 𑀑𑀓𑀸𑀲𑁂 𑀢𑀁 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀺.

𑀇𑀢𑀺 ¶ 𑀇𑀫𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀫𑁆𑀫𑀦𑁆𑀢𑀭𑀜𑁆𑀘𑁂𑀯 𑀯𑀺𑀧𑀸𑀓𑀦𑁆𑀢𑀭𑀜𑁆𑀘 𑀩𑀼𑀤𑁆𑀥𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀲𑁆𑀲𑁂𑀯 ¶ 𑀬𑀸𑀣𑀸𑀯𑀲𑀭𑀲𑀢𑁄 𑀧𑀸𑀓𑀝𑀁 𑀳𑁄𑀢𑀺, 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺. 𑀯𑀺𑀧𑀲𑁆𑀲𑀓𑁂𑀦 𑀧𑀦 𑀓𑀫𑁆𑀫𑀦𑁆𑀢𑀭𑀜𑁆𑀘 𑀯𑀺𑀧𑀸𑀓𑀦𑁆𑀢𑀭𑀜𑁆𑀘 𑀏𑀓𑀤𑁂𑀲𑀢𑁄 𑀚𑀸𑀦𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀅𑀬𑀁 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑁂𑀦 𑀓𑀫𑁆𑀫𑀯𑀺𑀲𑁂𑀲𑁄 𑀧𑀓𑀸𑀲𑀺𑀢𑁄𑀢𑀺.

𑁬𑁮𑁮. 𑀇𑀢𑀺 𑀇𑀫𑀁 𑀤𑁆𑀯𑀸𑀤𑀲𑀯𑀺𑀥𑀁 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀁 𑀏𑀓𑁄 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀲𑁄 𑀏𑀯𑀁 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀧𑀘𑁆𑀘𑀬𑀢𑁄 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦𑁂𑀯 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀇𑀢𑀺 𑀓𑀫𑁆𑀫𑀜𑁆𑀘𑁂𑀯 𑀓𑀫𑁆𑀫𑀯𑀺𑀧𑀸𑀓𑁄 𑀘, 𑀓𑀫𑁆𑀫𑀯𑀝𑁆𑀝𑀜𑁆𑀘 𑀯𑀺𑀧𑀸𑀓𑀯𑀝𑁆𑀝𑀜𑁆𑀘, 𑀓𑀫𑁆𑀫𑀧𑀯𑀢𑁆𑀢𑀜𑁆𑀘 𑀯𑀺𑀧𑀸𑀓𑀧𑀯𑀢𑁆𑀢𑀜𑁆𑀘, 𑀓𑀫𑁆𑀫𑀲𑀦𑁆𑀢𑀢𑀺 𑀘 𑀯𑀺𑀧𑀸𑀓𑀲𑀦𑁆𑀢𑀢𑀺 𑀘, 𑀓𑀺𑀭𑀺𑀬𑀸 𑀘 𑀓𑀺𑀭𑀺𑀬𑀸𑀨𑀮𑀜𑁆𑀘.

𑀓𑀫𑁆𑀫𑀸 𑀯𑀺𑀧𑀸𑀓𑀸 𑀯𑀢𑁆𑀢𑀦𑁆𑀢𑀺, 𑀯𑀺𑀧𑀸𑀓𑁄 𑀓𑀫𑁆𑀫𑀲𑀫𑁆𑀪𑀯𑁄;

𑀓𑀫𑁆𑀫𑀸 𑀧𑀼𑀦𑀩𑁆𑀪𑀯𑁄 𑀳𑁄𑀢𑀺, 𑀏𑀯𑀁 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺. 𑁋

𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀬𑀸 𑀲𑀸 𑀧𑀼𑀩𑁆𑀩𑀦𑁆𑀢𑀸𑀤𑀬𑁄 𑀆𑀭𑀩𑁆𑀪 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀲𑁄𑀴𑀲𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀸 𑀲𑀩𑁆𑀩𑀸 𑀧𑀳𑀻𑀬𑀢𑀺. 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀝𑁆𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀔𑀸𑀬𑀢𑀺. 𑀲𑁄 𑀦𑁂𑀯 𑀓𑀸𑀭𑀡𑀢𑁄 𑀉𑀤𑁆𑀥𑀁 𑀓𑀸𑀭𑀓𑀁 𑀧𑀲𑁆𑀲𑀢𑀺, 𑀦 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀢𑁄 𑀉𑀤𑁆𑀥𑀁 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀓𑀁. 𑀓𑀸𑀭𑀡𑁂 𑀧𑀦 𑀲𑀢𑀺 ‘‘𑀓𑀸𑀭𑀓𑁄’’𑀢𑀺, 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 ‘‘𑀧𑀝𑀺𑀲𑀁𑀯𑁂𑀤𑀓𑁄’’𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑁂𑀦 𑀧𑀡𑁆𑀟𑀺𑀢𑀸 𑀯𑁄𑀳𑀭𑀦𑁆𑀢𑀺𑀘𑁆𑀘𑁂𑀯𑀲𑁆𑀲 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁 𑀳𑁄𑀢𑀺.

𑁬𑁮𑁯. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀺, 𑀯𑀺𑀧𑀸𑀓𑀲𑁆𑀲 𑀘 𑀯𑁂𑀤𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀏𑀯𑁂𑀢𑀁 𑀲𑀫𑁆𑀫𑀤𑀲𑁆𑀲𑀦𑀁.

‘‘𑀏𑀯𑀁 𑀓𑀫𑁆𑀫𑁂 𑀯𑀺𑀧𑀸𑀓𑁂 𑀘, 𑀯𑀢𑁆𑀢𑀫𑀸𑀦𑁂 𑀲𑀳𑁂𑀢𑀼𑀓𑁂;

𑀩𑀻𑀚𑀭𑀼𑀓𑁆𑀔𑀸𑀤𑀺𑀓𑀸𑀦𑀁𑀯, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀦𑀸𑀬𑀢𑀺;

𑀅𑀦𑀸𑀕𑀢𑁂𑀧𑀺 𑀲𑀁𑀲𑀸𑀭𑁂, 𑀅𑀧𑁆𑀧𑀯𑀢𑁆𑀢𑀁 𑀦 𑀤𑀺𑀲𑁆𑀲𑀢𑀺.

‘‘𑀏𑀢𑀫𑀢𑁆𑀣𑀁 ¶ ¶ 𑀅𑀦𑀜𑁆𑀜𑀸𑀬, 𑀢𑀺𑀢𑁆𑀣𑀺𑀬𑀸 𑀅𑀲𑀬𑀁𑀯𑀲𑀻;

𑀲𑀢𑁆𑀢𑀲𑀜𑁆𑀜𑀁 𑀕𑀳𑁂𑀢𑁆𑀯𑀸𑀦, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀲𑁆𑀲𑀺𑀦𑁄;

𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀢𑀸.

‘‘𑀤𑀺𑀝𑁆𑀞𑀺𑀩𑀦𑁆𑀥𑀦𑀩𑀤𑁆𑀥𑀸 𑀢𑁂, 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀭𑁂;

𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀸, 𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂.

‘‘𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀲𑀼𑀜𑁆𑀜𑀁, 𑀧𑀘𑁆𑀘𑀬𑀁 𑀧𑀝𑀺𑀯𑀺𑀚𑁆𑀛𑀢𑀺.

‘‘𑀓𑀫𑁆𑀫𑀁 𑀦𑀢𑁆𑀣𑀺 𑀯𑀺𑀧𑀸𑀓𑀫𑁆𑀳𑀺, 𑀧𑀸𑀓𑁄 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀉𑀪𑁄 𑀲𑀼𑀜𑁆𑀜𑀸, 𑀦 𑀘 𑀓𑀫𑁆𑀫𑀁 𑀯𑀺𑀦𑀸 𑀨𑀮𑀁.

‘‘𑀬𑀣𑀸 𑀦 𑀲𑀽𑀭𑀺𑀬𑁂 𑀅𑀕𑁆𑀕𑀺, 𑀦 𑀫𑀡𑀺𑀫𑁆𑀳𑀺 𑀦 𑀕𑁄𑀫𑀬𑁂;

𑀦 𑀢𑁂𑀲𑀁 𑀩𑀳𑀺 𑀲𑁄 𑀅𑀢𑁆𑀣𑀺, 𑀲𑀫𑁆𑀪𑀸𑀭𑁂𑀳𑀺 𑀘 𑀚𑀸𑀬𑀢𑀺.

‘‘𑀢𑀣𑀸 𑀦 𑀅𑀦𑁆𑀢𑁄 𑀓𑀫𑁆𑀫𑀲𑁆𑀲, 𑀯𑀺𑀧𑀸𑀓𑁄 𑀉𑀧𑀮𑀩𑁆𑀪𑀢𑀺;

𑀩𑀳𑀺𑀤𑁆𑀥𑀸𑀧𑀺 𑀦 𑀓𑀫𑁆𑀫𑀲𑁆𑀲, 𑀦 𑀓𑀫𑁆𑀫𑀁 𑀢𑀢𑁆𑀣 𑀯𑀺𑀚𑁆𑀚𑀢𑀺.

‘‘𑀨𑀮𑁂𑀦 𑀲𑀼𑀜𑁆𑀜𑀁 𑀢𑀁 𑀓𑀫𑁆𑀫𑀁, 𑀨𑀮𑀁 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀓𑀫𑁆𑀫𑀜𑁆𑀘 𑀔𑁄 𑀉𑀧𑀸𑀤𑀸𑀬, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

‘‘𑀦 𑀳𑁂𑀢𑁆𑀣 𑀤𑁂𑀯𑁄 𑀩𑁆𑀭𑀳𑁆𑀫𑀸 𑀯𑀸, 𑀲𑀁𑀲𑀸𑀭𑀲𑁆𑀲𑀢𑁆𑀣𑀺𑀓𑀸𑀭𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸’’𑀢𑀺.

𑁬𑁯𑁦. 𑀢𑀲𑁆𑀲𑁂𑀯𑀁 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀳𑀻𑀦𑀯𑀺𑀘𑀺𑀓𑀺𑀘𑁆𑀙𑀲𑁆𑀲 𑀲𑀩𑁆𑀩𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀜𑀸𑀢𑀧𑀭𑀺𑀜𑁆𑀜𑀸.

𑀲𑁄 ¶ 𑀏𑀯𑀁 𑀧𑀚𑀸𑀦𑀸𑀢𑀺 𑁋 𑀬𑁂 𑀅𑀢𑀻𑀢𑁂 𑀓𑀫𑁆𑀫𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸, 𑀢𑁂 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀅𑀢𑀻𑀢𑀓𑀫𑁆𑀫𑀧𑀘𑁆𑀘𑀬𑀸 𑀧𑀦 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀜𑁆𑀜𑁂 𑀦𑀺𑀩𑁆𑀩𑀢𑁆𑀢𑀸, 𑀅𑀢𑀻𑀢𑀪𑀯𑀢𑁄 𑀇𑀫𑀁 𑀪𑀯𑀁 𑀆𑀕𑀢𑁄 𑀏𑀓𑀥𑀫𑁆𑀫𑁄𑀧𑀺 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀫𑁆𑀧𑀺 𑀪𑀯𑁂 𑀓𑀫𑁆𑀫𑀧𑀘𑁆𑀘𑀬𑁂𑀦 𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀧𑀼𑀦𑀩𑁆𑀪𑀯𑁂 𑀅𑀜𑁆𑀜𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀇𑀫𑀫𑁆𑀳𑀸 𑀪𑀯𑀸 𑀧𑀼𑀦𑀩𑁆𑀪𑀯𑀁 𑀏𑀓𑀥𑀫𑁆𑀫𑁄𑀧𑀺 𑀦 𑀕𑀫𑀺𑀲𑁆𑀲𑀢𑀺. 𑀅𑀧𑀺𑀘 𑀔𑁄 𑀬𑀣𑀸 𑀦 𑀆𑀘𑀭𑀺𑀬𑀫𑀼𑀔𑀢𑁄 𑀲𑀚𑁆𑀛𑀸𑀬𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀫𑀼𑀔𑀁 𑀧𑀯𑀺𑀲𑀢𑀺, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀢𑀲𑁆𑀲 ¶ 𑀫𑀼𑀔𑁂 𑀲𑀚𑁆𑀛𑀸𑀬𑁄 𑀦 𑀯𑀢𑁆𑀢𑀢𑀺, 𑀦 𑀤𑀽𑀢𑁂𑀦 𑀫𑀦𑁆𑀢𑁄𑀤𑀓𑀁 𑀧𑀻𑀢𑀁 𑀭𑁄𑀕𑀺𑀦𑁄 𑀉𑀤𑀭𑀁 𑀧𑀯𑀺𑀲𑀢𑀺, 𑀦 𑀘 𑀢𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀦 𑀫𑀼𑀔𑁂 𑀫𑀡𑁆𑀟𑀦𑀯𑀺𑀥𑀸𑀦𑀁 𑀆𑀤𑀸𑀲𑀢𑀮𑀸𑀤𑀻𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀕𑀘𑁆𑀙𑀢𑀺, 𑀦 𑀘 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸 𑀫𑀡𑁆𑀟𑀦𑀯𑀺𑀥𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺, 𑀦 𑀏𑀓𑀺𑀲𑁆𑀲𑀸 𑀯𑀝𑁆𑀝𑀺𑀬𑀸 𑀤𑀻𑀧𑀲𑀺𑀔𑀸 𑀅𑀜𑁆𑀜𑀁 𑀯𑀝𑁆𑀝𑀺𑀁 𑀲𑀗𑁆𑀓𑀫𑀢𑀺, 𑀦 𑀘 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸 𑀤𑀻𑀧𑀲𑀺𑀔𑀸 𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀯𑀫𑁂𑀯 𑀦 𑀅𑀢𑀻𑀢𑀪𑀯𑀢𑁄 𑀇𑀫𑀁 𑀪𑀯𑀁, 𑀇𑀢𑁄 𑀯𑀸 𑀧𑀼𑀦𑀩𑁆𑀪𑀯𑀁 𑀓𑁄𑀘𑀺 𑀥𑀫𑁆𑀫𑁄 𑀲𑀗𑁆𑀓𑀫𑀢𑀺, 𑀦 𑀘 𑀅𑀢𑀻𑀢𑀪𑀯𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀸 𑀇𑀥, 𑀇𑀥 𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀸 𑀧𑀼𑀦𑀩𑁆𑀪𑀯𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺.

𑀬𑀣𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀁;

𑀦 𑀘𑁂𑀯 𑀆𑀕𑀢𑀁 𑀦𑀸𑀧𑀺, 𑀦 𑀦𑀺𑀩𑁆𑀩𑀢𑁆𑀢𑀁 𑀅𑀦𑀦𑁆𑀢𑀭𑀁.

𑀢𑀣𑁂𑀯 𑀧𑀝𑀺𑀲𑀦𑁆𑀥𑀺𑀫𑁆𑀳𑀺, 𑀯𑀢𑁆𑀢𑀢𑁂 𑀘𑀺𑀢𑁆𑀢𑀲𑀦𑁆𑀢𑀢𑀺;

𑀧𑀼𑀭𑀺𑀫𑀁 𑀪𑀺𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀧𑀘𑁆𑀙𑀺𑀫𑀁 𑀚𑀸𑀬𑀢𑁂 𑀢𑀢𑁄.

𑀢𑁂𑀲𑀁 𑀅𑀦𑁆𑀢𑀭𑀺𑀓𑀸 𑀦𑀢𑁆𑀣𑀺, 𑀯𑀻𑀘𑀺 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀺;

𑀦 𑀘𑀺𑀢𑁄 𑀕𑀘𑁆𑀙𑀢𑀺 𑀓𑀺𑀜𑁆𑀘𑀺, 𑀧𑀝𑀺𑀲𑀦𑁆𑀥𑀺 𑀘 𑀚𑀸𑀬𑀢𑀻𑀢𑀺.

𑁬𑁯𑁧. 𑀏𑀯𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀤𑀺𑀢𑀲𑀩𑁆𑀩𑀥𑀫𑁆𑀫𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀜𑀸𑀡𑀁 𑀣𑀸𑀫𑀕𑀢𑀁 𑀳𑁄𑀢𑀺, 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸 𑀲𑀼𑀝𑁆𑀞𑀼𑀢𑀭𑀁 𑀧𑀳𑀻𑀬𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑀸 𑀏𑀯, ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺 (𑀥. 𑀲. 𑁧𑁦𑁦𑁮) 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀅𑀝𑁆𑀞𑀯𑀺𑀥𑀸𑀧𑀺 𑀓𑀗𑁆𑀔𑀸 𑀧𑀳𑀻𑀬𑀢𑀺𑀬𑁂𑀯, 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺. 𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺𑀧𑀺 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺𑀧𑀺 𑀲𑀫𑁆𑀫𑀸𑀤𑀲𑁆𑀲𑀦𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀯𑀺𑀚𑁆𑀚𑀸 ¶ 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁬).

‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀓𑀣𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀳𑁄𑀢𑀺, 𑀓𑀣𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀓𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺? 𑀤𑀼𑀓𑁆𑀔𑀢𑁄…𑀧𑁂… 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺…𑀧𑁂… 𑀓𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀻𑀢𑀺?

‘‘𑀅𑀦𑀺𑀘𑁆𑀘𑀢𑁄 ¶ 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀫𑀺𑀢𑁆𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀏𑀯𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺…𑀧𑁂… 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀏𑀯𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺.

‘‘𑀬𑀜𑁆𑀘 𑀬𑀣𑀸𑀪𑀽𑀢𑀜𑀸𑀡𑀁 𑀬𑀜𑁆𑀘 𑀲𑀫𑁆𑀫𑀸𑀤𑀲𑁆𑀲𑀦𑀁 𑀬𑀸 𑀘 𑀓𑀗𑁆𑀔𑀸𑀯𑀺𑀢𑀭𑀡𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀜𑁆𑀘 𑀬𑀣𑀸𑀪𑀽𑀢𑀜𑀸𑀡𑀁 𑀬𑀜𑁆𑀘 𑀲𑀫𑁆𑀫𑀸𑀤𑀲𑁆𑀲𑀦𑀁 𑀬𑀸 𑀘 𑀓𑀗𑁆𑀔𑀸𑀯𑀺𑀢𑀭𑀡𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁨𑁭).

𑀇𑀫𑀺𑀦𑀸 𑀧𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀧𑀲𑁆𑀲𑀓𑁄 𑀩𑀼𑀤𑁆𑀥𑀲𑀸𑀲𑀦𑁂 𑀮𑀤𑁆𑀥𑀲𑁆𑀲𑀸𑀲𑁄 𑀮𑀤𑁆𑀥𑀧𑀢𑀺𑀝𑁆𑀞𑁄 𑀦𑀺𑀬𑀢𑀕𑀢𑀺𑀓𑁄 𑀘𑀽𑀴𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺.

𑀢𑀲𑁆𑀫𑀸 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄, 𑀦𑀸𑀫𑀭𑀽𑀧𑀲𑁆𑀲 𑀲𑀩𑁆𑀩𑀲𑁄;

𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬, 𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀺𑀓𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁦. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀲𑀫𑁆𑀫𑀲𑀦𑀜𑀸𑀡𑀓𑀣𑀸

𑁬𑁯𑁨. 𑀅𑀬𑀁 ¶ ¶ 𑀫𑀕𑁆𑀕𑁄, 𑀅𑀬𑀁 𑀦 𑀫𑀕𑁆𑀕𑁄𑀢𑀺 𑀏𑀯𑀁 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀜𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 𑀧𑀦 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑀲𑀗𑁆𑀔𑀸𑀢𑀸𑀬 𑀦𑀬𑀯𑀺𑀧𑀲𑁆𑀲𑀦𑀸𑀬 𑀢𑀸𑀯 𑀬𑁄𑀕𑁄 𑀓𑀭𑀡𑀻𑀬𑁄. 𑀓𑀲𑁆𑀫𑀸? 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀑𑀪𑀸𑀲𑀸𑀤𑀺𑀲𑀫𑁆𑀪𑀯𑁂 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑀫𑁆𑀪𑀯𑀢𑁄. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀳𑀺 𑀑𑀪𑀸𑀲𑀸𑀤𑀻𑀲𑀼 𑀲𑀫𑁆𑀪𑀽𑀢𑁂𑀲𑀼 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀘 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀺. 𑀢𑀲𑁆𑀫𑀸 𑀏𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀁. 𑀅𑀧𑀺𑀘 𑀬𑀲𑁆𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘 𑀜𑀸𑀢𑀧𑀭𑀺𑀜𑁆𑀜𑀸𑀦𑀦𑁆𑀢𑀭𑀸, 𑀢𑀲𑁆𑀫𑀸𑀧𑀺 𑀢𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑁂 𑀢𑀸𑀯 𑀬𑁄𑀕𑁄 𑀓𑀸𑀢𑀩𑁆𑀩𑁄.

𑁬𑁯𑁩. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀢𑀺𑀲𑁆𑀲𑁄 𑀳𑀺 𑀮𑁄𑀓𑀺𑀬𑀧𑀭𑀺𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀘. 𑀬𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀪𑀺𑀜𑁆𑀜𑀸𑀧𑀜𑁆𑀜𑀸 𑀜𑀸𑀢𑀝𑁆𑀞𑁂 𑀜𑀸𑀡𑀁. 𑀧𑀭𑀺𑀜𑁆𑀜𑀸𑀧𑀜𑁆𑀜𑀸 𑀢𑀻𑀭𑀡𑀝𑁆𑀞𑁂 𑀜𑀸𑀡𑀁. 𑀧𑀳𑀸𑀦𑀧𑀜𑁆𑀜𑀸 𑀧𑀭𑀺𑀘𑁆𑀘𑀸𑀕𑀝𑁆𑀞𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁭𑁫). 𑀢𑀢𑁆𑀣 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫. ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀦𑀸𑀫. 𑀢𑁂𑀲𑀼𑀬𑁂𑀯 𑀧𑀦 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀦𑀸𑀫.

𑀢𑀢𑁆𑀣 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸 𑀜𑀸𑀢𑀧𑀭𑀺𑀜𑁆𑀜𑀸𑀬 𑀪𑀽𑀫𑀺. 𑀏𑀢𑀲𑁆𑀫𑀺𑀁 𑀳𑀺 𑀅𑀦𑁆𑀢𑀭𑁂 ¶ 𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘𑀁 𑀳𑁄𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀪𑀽𑀫𑀺. 𑀏𑀢𑀲𑁆𑀫𑀺𑀁 𑀳𑀺 𑀅𑀦𑁆𑀢𑀭𑁂 𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘𑀁 𑀳𑁄𑀢𑀺. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑀭𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀪𑀽𑀫𑀺 ¶ . 𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺 (𑀧𑀝𑀺. 𑀫. 𑁧.𑁫𑁨) 𑀏𑀯𑀁 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀳𑀸𑀦𑀲𑀸𑀥𑀺𑀓𑀸𑀦𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀆𑀥𑀺𑀧𑀘𑁆𑀘𑀁. 𑀇𑀢𑀺 𑀇𑀫𑀸𑀲𑀼 𑀢𑀻𑀲𑀼 𑀧𑀭𑀺𑀜𑁆𑀜𑀸𑀲𑀼 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀲𑁆𑀲 𑀘𑁂𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲 𑀘 𑀲𑀸𑀥𑀺𑀢𑀢𑁆𑀢𑀸 𑀇𑀫𑀺𑀦𑀸 𑀬𑁄𑀕𑀺𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀯 𑀅𑀥𑀺𑀕𑀢𑀸 𑀳𑁄𑀢𑀺, 𑀇𑀢𑀭𑀸 𑀘 𑀅𑀥𑀺𑀕𑀦𑁆𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘 𑀜𑀸𑀢𑀧𑀭𑀺𑀜𑁆𑀜𑀸𑀦𑀦𑁆𑀢𑀭𑀸, 𑀢𑀲𑁆𑀫𑀸𑀧𑀺 𑀢𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑁂 𑀢𑀸𑀯 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺.

𑁬𑁯𑁪. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀓𑀣𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁? 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁…𑀧𑁂… 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁.

‘‘𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁.

‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀯𑁂𑀤𑀦𑀁… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁…𑀧𑁂… 𑀲𑀫𑁆𑀫𑀲𑀦𑁂 𑀜𑀸𑀡𑀁.

‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 ¶ 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀯𑁂𑀤𑀦𑀁… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁…𑀧𑁂… 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁.

‘‘𑀚𑀸𑀢𑀺𑀧𑀘𑁆𑀘𑀬𑀸 ¶ 𑀚𑀭𑀸𑀫𑀭𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁.

‘‘𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁. 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁮).

𑀏𑀢𑁆𑀣 𑀘 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀦𑁆𑀢𑀺 𑀇𑀫𑀺𑀦𑀸 𑀧𑁂𑀬𑁆𑀬𑀸𑀮𑁂𑀦 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀥𑀫𑁆𑀫𑀸, 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀙 𑀤𑁆𑀯𑀸𑀭𑀸𑀦𑀺, 𑀙 𑀆𑀭𑀫𑁆𑀫𑀡𑀸𑀦𑀺, 𑀙 𑀯𑀺𑀜𑁆𑀜𑀸𑀡𑀸𑀦𑀺, 𑀙 𑀨𑀲𑁆𑀲𑀸, 𑀙 𑀯𑁂𑀤𑀦𑀸, 𑀙 𑀲𑀜𑁆𑀜𑀸, 𑀙 𑀘𑁂𑀢𑀦𑀸, 𑀙 𑀢𑀡𑁆𑀳𑀸, 𑀙 𑀯𑀺𑀢𑀓𑁆𑀓𑀸, 𑀙 𑀯𑀺𑀘𑀸𑀭𑀸, 𑀙 𑀥𑀸𑀢𑀼𑀬𑁄, 𑀤𑀲 𑀓𑀲𑀺𑀡𑀸𑀦𑀺, 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀩𑀸𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀦𑀯 𑀪𑀯𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸, 𑀘𑀢𑀲𑁆𑀲𑁄 𑀲𑀫𑀸𑀧𑀢𑁆𑀢𑀺𑀬𑁄, 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀻𑀢𑀺 𑀇𑀫𑁂 𑀥𑀫𑁆𑀫𑀭𑀸𑀲𑀬𑁄 𑀲𑀁𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀼𑀢𑁆𑀢𑀁 𑀳𑁂𑀢𑀁 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂 𑁋

‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀅𑀪𑀺𑀜𑁆𑀜𑁂𑀬𑁆𑀬𑀁? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀭𑀽𑀧𑀸… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄… 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 ¶ 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀲𑁄𑀢𑀁…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀁.

‘‘𑀭𑀽𑀧𑀁…𑀧𑁂… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀫𑀦𑁄… 𑀭𑀽𑀧𑀸…𑀧𑁂… 𑀥𑀫𑁆𑀫𑀸… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄….

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 ¶ 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀭𑀽𑀧𑀲𑀜𑁆𑀜𑀸…𑀧𑁂… 𑀥𑀫𑁆𑀫𑀲𑀜𑁆𑀜𑀸… 𑀭𑀽𑀧𑀲𑀜𑁆𑀘𑁂𑀢𑀦𑀸…𑀧𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸… 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸… 𑀭𑀽𑀧𑀯𑀺𑀢𑀓𑁆𑀓𑁄…𑀧𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄… 𑀭𑀽𑀧𑀯𑀺𑀘𑀸𑀭𑁄…𑀧𑁂… 𑀥𑀫𑁆𑀫𑀯𑀺𑀘𑀸𑀭𑁄….

‘‘𑀧𑀣𑀯𑀻𑀥𑀸𑀢𑀼…𑀧𑁂… 𑀯𑀺𑀜𑁆𑀜𑀸𑀡𑀥𑀸𑀢𑀼… 𑀧𑀣𑀯𑀻𑀓𑀲𑀺𑀡𑀁…𑀧𑁂… 𑀯𑀺𑀜𑁆𑀜𑀸𑀡𑀓𑀲𑀺𑀡𑀁… 𑀓𑁂𑀲𑀸…𑀧𑁂… 𑀫𑀼𑀢𑁆𑀢𑀁… 𑀫𑀢𑁆𑀣𑀮𑀼𑀗𑁆𑀕𑀁….

‘‘𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦𑀁… 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁….

‘‘𑀓𑀸𑀫𑀥𑀸𑀢𑀼… 𑀭𑀽𑀧𑀥𑀸𑀢𑀼… 𑀅𑀭𑀽𑀧𑀥𑀸𑀢𑀼… 𑀓𑀸𑀫𑀪𑀯𑁄… 𑀭𑀽𑀧𑀪𑀯𑁄… 𑀅𑀭𑀽𑀧𑀪𑀯𑁄… 𑀲𑀜𑁆𑀜𑀸𑀪𑀯𑁄… 𑀅𑀲𑀜𑁆𑀜𑀸𑀪𑀯𑁄… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄… 𑀏𑀓𑀯𑁄𑀓𑀸𑀭𑀪𑀯𑁄… 𑀘𑀢𑀼𑀯𑁄𑀓𑀸𑀭𑀪𑀯𑁄… 𑀧𑀜𑁆𑀘𑀯𑁄𑀓𑀸𑀭𑀪𑀯𑁄….

‘‘𑀧𑀞𑀫𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺… 𑀅𑀯𑀺𑀚𑁆𑀚𑀸 𑀅𑀪𑀺𑀜𑁆𑀜𑁂𑀬𑁆𑀬𑀸…𑀧𑁂… 𑀚𑀭𑀸𑀫𑀭𑀡𑀁 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀧𑀝𑀺. 𑀫. 𑁧.𑁩; 𑀲𑀁. 𑀦𑀺. 𑁪.𑁪𑁬).

𑀢𑀁 𑀢𑀢𑁆𑀣 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀲𑀩𑁆𑀩𑀁 𑀧𑁂𑀬𑁆𑀬𑀸𑀮𑁂𑀦 𑀲𑀁𑀔𑀺𑀢𑁆𑀢𑀁. 𑀏𑀯𑀁 𑀲𑀁𑀔𑀺𑀢𑁆𑀢𑁂 𑀧𑀦𑁂𑀢𑁆𑀣 𑀬𑁂 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀆𑀕𑀢𑀸, 𑀢𑁂 𑀅𑀲𑀫𑁆𑀫𑀲𑀦𑀼𑀧𑀕𑀢𑁆𑀢𑀸 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀦 𑀕𑀳𑁂𑀢𑀩𑁆𑀩𑀸. 𑀬𑁂𑀧𑀺 𑀘 𑀲𑀫𑁆𑀫𑀲𑀦𑀼𑀧𑀕𑀸 ¶ , 𑀢𑁂𑀲𑀼 𑀬𑁂 𑀬𑀲𑁆𑀲 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀼𑀔𑁂𑀦 𑀧𑀭𑀺𑀕𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀼 𑀢𑁂𑀦 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑀩𑁆𑀩𑀁.

𑁬𑁯𑁫. 𑀢𑀢𑁆𑀭𑀸𑀬𑀁 𑀔𑀦𑁆𑀥𑀯𑀲𑁂𑀦 𑀆𑀭𑀩𑁆𑀪𑀯𑀺𑀥𑀸𑀦𑀬𑁄𑀚𑀦𑀸 𑁋 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁…𑀧𑁂… 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀬𑀁 𑀪𑀺𑀓𑁆𑀔𑀼 ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺 𑀏𑀯𑀁 𑀅𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀁 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀅𑀢𑀻𑀢𑀢𑁆𑀢𑀺𑀓𑁂𑀦 𑀘𑁂𑀯 𑀘𑀢𑀽𑀳𑀺 𑀘 𑀅𑀚𑁆𑀛𑀢𑁆𑀢𑀸𑀤𑀺𑀤𑀼𑀓𑁂𑀳𑀻𑀢𑀺 𑀏𑀓𑀸𑀤𑀲𑀳𑀺 𑀑𑀓𑀸𑀲𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀅𑀦𑀺𑀘𑁆𑀘𑀦𑁆𑀢𑀺 𑀲𑀫𑁆𑀫𑀲𑀢𑀺.

𑀓𑀣𑀁 ¶ ? 𑀧𑀭𑀢𑁄 𑀯𑀼𑀢𑁆𑀢𑀦𑀬𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 (𑀧𑀝𑀺. 𑀫. 𑁧.𑁪𑁮).

𑀢𑀲𑁆𑀫𑀸 𑀏𑀲 𑀬𑀁 𑀅𑀢𑀻𑀢𑀁 𑀭𑀽𑀧𑀁, 𑀢𑀁 𑀬𑀲𑁆𑀫𑀸 𑀅𑀢𑀻𑀢𑁂𑀬𑁂𑀯 𑀔𑀻𑀡𑀁, 𑀦𑀬𑀺𑀫𑀁 𑀪𑀯𑀁 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦.

𑀬𑀁 𑀅𑀦𑀸𑀕𑀢𑀁 𑀅𑀦𑀦𑁆𑀢𑀭𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀔𑀻𑀬𑀺𑀲𑁆𑀲𑀢𑀺, 𑀦 𑀢𑀢𑁄 𑀧𑀭𑀁 𑀪𑀯𑀁 𑀕𑀫𑀺𑀲𑁆𑀲𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦.

𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁, 𑀢𑀫𑁆𑀧𑀺 𑀇𑀥𑁂𑀯 𑀔𑀻𑀬𑀢𑀺, 𑀦 𑀇𑀢𑁄 𑀕𑀘𑁆𑀙𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦.

𑀬𑀁 𑀅𑀚𑁆𑀛𑀢𑁆𑀢𑀁, 𑀢𑀫𑁆𑀧𑀺 𑀅𑀚𑁆𑀛𑀢𑁆𑀢𑀫𑁂𑀯 𑀔𑀻𑀬𑀢𑀺, 𑀦 𑀩𑀳𑀺𑀤𑁆𑀥𑀸𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦.

𑀬𑀁 𑀩𑀳𑀺𑀤𑁆𑀥𑀸…𑀧𑁂… 𑀑𑀴𑀸𑀭𑀺𑀓𑀁…𑀧𑁂… 𑀲𑀼𑀔𑀼𑀫𑀁…𑀧𑁂… 𑀳𑀻𑀦𑀁…𑀧𑁂… 𑀧𑀡𑀻𑀢𑀁…𑀧𑁂… 𑀤𑀽𑀭𑁂…𑀧𑁂… 𑀲𑀦𑁆𑀢𑀺𑀓𑁂, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀔𑀻𑀬𑀢𑀺, 𑀦 𑀤𑀽𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺 𑀲𑀫𑁆𑀫𑀲𑀢𑀺.

𑀇𑀤𑀁 𑀲𑀩𑁆𑀩𑀫𑁆𑀧𑀺 ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 𑀏𑀢𑀲𑁆𑀲 𑀯𑀲𑁂𑀦 𑀏𑀓𑀁 𑀲𑀫𑁆𑀫𑀲𑀦𑀁. 𑀪𑁂𑀤𑀢𑁄 𑀧𑀦 𑀏𑀓𑀸𑀤𑀲𑀯𑀺𑀥𑀁 𑀳𑁄𑀢𑀺.

𑀲𑀩𑁆𑀩𑀫𑁂𑀯 𑀘 𑀢𑀁 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦. 𑀪𑀬𑀝𑁆𑀞𑁂𑀦𑀸𑀢𑀺 𑀲𑀧𑁆𑀧𑀝𑀺𑀪𑀬𑀢𑀸𑀬. 𑀬𑀜𑁆𑀳𑀺 𑀅𑀦𑀺𑀘𑁆𑀘𑀁, 𑀢𑀁 𑀪𑀬𑀸𑀯𑀳𑀁 𑀳𑁄𑀢𑀺 𑀲𑀻𑀳𑁄𑀧𑀫𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁪.𑁩𑁩) 𑀤𑁂𑀯𑀸𑀦𑀁 𑀯𑀺𑀬. 𑀇𑀢𑀺 ¶ 𑀇𑀤𑀫𑁆𑀧𑀺 ‘‘𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦𑀸’’𑀢𑀺 𑀏𑀢𑀲𑁆𑀲 𑀯𑀲𑁂𑀦 𑀏𑀓𑀁 𑀲𑀫𑁆𑀫𑀲𑀦𑀁. 𑀪𑁂𑀤𑀢𑁄 𑀧𑀦 𑀏𑀓𑀸𑀤𑀲𑀯𑀺𑀥𑀁 𑀳𑁄𑀢𑀺.

𑀬𑀣𑀸 𑀘 𑀤𑀼𑀓𑁆𑀔𑀁, 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀢𑀁 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 ‘‘𑀅𑀢𑁆𑀢𑀸 𑀦𑀺𑀯𑀸𑀲𑀻 𑀓𑀸𑀭𑀓𑁄 𑀯𑁂𑀤𑀓𑁄 𑀲𑀬𑀁𑀯𑀲𑀻’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀲𑀸𑀭𑀲𑁆𑀲 𑀅𑀪𑀸𑀯𑁂𑀦. 𑀬𑀜𑁆𑀳𑀺 𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁, 𑀢𑀁 𑀅𑀢𑁆𑀢𑀦𑁄𑀧𑀺 𑀅𑀦𑀺𑀘𑁆𑀘𑀢𑀁 𑀯𑀸 𑀉𑀤𑀬𑀩𑁆𑀩𑀬𑀧𑀻𑀴𑀦𑀁 𑀯𑀸 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀢𑁄 𑀢𑀲𑁆𑀲 𑀓𑀸𑀭𑀓𑀸𑀤𑀺𑀪𑀸𑀯𑁄. 𑀢𑁂𑀦𑀸𑀳 𑁋 ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲. 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁫𑁯). 𑀇𑀢𑀺 𑀇𑀤𑀫𑁆𑀧𑀺 ‘‘𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸’’𑀢𑀺 ¶ 𑀏𑀢𑀲𑁆𑀲 𑀯𑀲𑁂𑀦 𑀏𑀓𑀁 𑀲𑀫𑁆𑀫𑀲𑀦𑀁. 𑀪𑁂𑀤𑀢𑁄 𑀧𑀦 𑀏𑀓𑀸𑀤𑀲𑀯𑀺𑀥𑀁 𑀳𑁄𑀢𑀺. 𑀏𑀲 𑀦𑀬𑁄 𑀯𑁂𑀤𑀦𑀸𑀤𑀻𑀲𑀼.

𑁬𑁯𑁬. 𑀬𑀁 𑀧𑀦 𑀅𑀦𑀺𑀘𑁆𑀘𑀁, 𑀢𑀁 𑀬𑀲𑁆𑀫𑀸 𑀦𑀺𑀬𑀫𑀢𑁄 𑀲𑀗𑁆𑀔𑀢𑀸𑀤𑀺𑀪𑁂𑀤𑀁 𑀳𑁄𑀢𑀺. 𑀢𑁂𑀦𑀲𑁆𑀲 𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁆𑀣𑀁, 𑀦𑀸𑀦𑀸𑀓𑀸𑀭𑁂𑀳𑀺 𑀯𑀸 𑀫𑀦𑀲𑀺𑀓𑀸𑀭𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀧𑀼𑀦 𑀧𑀸𑀴𑀺 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀯𑁂𑀤𑀦𑀸𑀤𑀻𑀲𑀽𑀢𑀺.

𑀘𑀢𑁆𑀢𑀸𑀭𑀻𑀲𑀸𑀓𑀸𑀭𑀅𑀦𑀼𑀧𑀲𑁆𑀲𑀦𑀸𑀓𑀣𑀸

𑁬𑁯𑁭. 𑀲𑁄 𑀢𑀲𑁆𑀲𑁂𑀯 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀫𑁆𑀫𑀲𑀦𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀸𑀬, 𑀬𑀁 𑀢𑀁 𑀪𑀕𑀯𑀢𑀸 ‘‘𑀓𑀢𑀫𑁂𑀳𑀺 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀓𑀢𑀫𑁂𑀳𑀺 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑁋

‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀭𑁄𑀕𑀢𑁄, 𑀕𑀡𑁆𑀟𑀢𑁄, 𑀲𑀮𑁆𑀮𑀢𑁄, 𑀅𑀖𑀢𑁄, 𑀆𑀩𑀸𑀥𑀢𑁄, 𑀧𑀭𑀢𑁄, 𑀧𑀮𑁄𑀓𑀢𑁄, 𑀈𑀢𑀺𑀢𑁄, 𑀉𑀧𑀤𑁆𑀤𑀯𑀢𑁄, 𑀪𑀬𑀢𑁄, 𑀉𑀧𑀲𑀕𑁆𑀕𑀢𑁄, 𑀘𑀮𑀢𑁄, 𑀧𑀪𑀗𑁆𑀕𑀼𑀢𑁄, 𑀅𑀤𑁆𑀥𑀼𑀯𑀢𑁄, 𑀅𑀢𑀸𑀡𑀢𑁄, 𑀅𑀮𑁂𑀡𑀢𑁄, 𑀅𑀲𑀭𑀡𑀢𑁄, 𑀭𑀺𑀢𑁆𑀢𑀢𑁄, 𑀢𑀼𑀘𑁆𑀙𑀢𑁄, 𑀲𑀼𑀜𑁆𑀜𑀢𑁄, 𑀅𑀦𑀢𑁆𑀢𑀢𑁄, 𑀆𑀤𑀻𑀦𑀯𑀢𑁄, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄, 𑀅𑀲𑀸𑀭𑀓𑀢𑁄, 𑀅𑀖𑀫𑀽𑀮𑀢𑁄, 𑀯𑀥𑀓𑀢𑁄, 𑀯𑀺𑀪𑀯𑀢𑁄, 𑀲𑀸𑀲𑀯𑀢𑁄, 𑀲𑀗𑁆𑀔𑀢𑀢𑁄, 𑀫𑀸𑀭𑀸𑀫𑀺𑀲𑀢𑁄, 𑀚𑀸𑀢𑀺𑀥𑀫𑁆𑀫𑀢𑁄, 𑀚𑀭𑀸𑀥𑀫𑁆𑀫𑀢𑁄, 𑀩𑁆𑀬𑀸𑀥𑀺𑀥𑀫𑁆𑀫𑀢𑁄, 𑀫𑀭𑀡𑀥𑀫𑁆𑀫𑀢𑁄 ¶ , 𑀲𑁄𑀓𑀥𑀫𑁆𑀫𑀢𑁄, 𑀧𑀭𑀺𑀤𑁂𑀯𑀥𑀫𑁆𑀫𑀢𑁄, 𑀉𑀧𑀸𑀬𑀸𑀲𑀥𑀫𑁆𑀫𑀢𑁄, 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄’’𑀢𑀺 (𑀧𑀝𑀺. 𑀫. 𑁩.𑁩𑁭) 𑁋

𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺,

‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁮) 𑀦𑀬𑁂𑀦,

𑀅𑀦𑀼𑀮𑁄𑀫𑀜𑀸𑀡𑀁 𑀯𑀺𑀪𑀚𑀦𑁆𑀢𑁂𑀦 𑀧𑀪𑁂𑀤𑀢𑁄 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀢𑀺.

𑁬𑁯𑁮. 𑀓𑀣𑀁 ¶ ? 𑀲𑁄 𑀳𑀺 𑀏𑀓𑁂𑀓𑀁 𑀔𑀦𑁆𑀥𑀁 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬, 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬 𑀘 𑀅𑀦𑀺𑀘𑁆𑀘𑀢𑁄. 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀢𑀸𑀬, 𑀤𑀼𑀓𑁆𑀔𑀯𑀢𑁆𑀣𑀼𑀢𑀸𑀬 𑀘 𑀤𑀼𑀓𑁆𑀔𑀢𑁄. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬, 𑀭𑁄𑀕𑀫𑀽𑀮𑀢𑀸𑀬 𑀘 𑀭𑁄𑀕𑀢𑁄. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀺𑀢𑀸𑀬, 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑀸𑀬, 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀪𑀺𑀦𑁆𑀦𑀢𑀸𑀬 𑀘 𑀕𑀡𑁆𑀟𑀢𑁄. 𑀧𑀻𑀴𑀸𑀚𑀦𑀓𑀢𑀸𑀬, 𑀅𑀦𑁆𑀢𑁄𑀢𑀼𑀤𑀦𑀢𑀸𑀬, 𑀤𑀼𑀦𑁆𑀦𑀻𑀳𑀭𑀡𑀻𑀬𑀢𑀸𑀬 𑀘 𑀲𑀮𑁆𑀮𑀢𑁄. 𑀯𑀺𑀕𑀭𑀳𑀡𑀻𑀬𑀢𑀸𑀬, 𑀅𑀯𑀟𑁆𑀠𑀺𑀆𑀯𑀳𑀦𑀢𑀸𑀬, 𑀅𑀖𑀯𑀢𑁆𑀣𑀼𑀢𑀸𑀬 𑀘 𑀅𑀖𑀢𑁄. 𑀅𑀲𑁂𑀭𑀺𑀪𑀸𑀯𑀚𑀦𑀓𑀢𑀸𑀬, 𑀆𑀩𑀸𑀥𑀧𑀤𑀝𑁆𑀞𑀸𑀦𑀢𑀸𑀬 𑀘 𑀆𑀩𑀸𑀥𑀢𑁄. 𑀅𑀯𑀲𑀢𑀸𑀬, 𑀅𑀯𑀺𑀥𑁂𑀬𑁆𑀬𑀢𑀸𑀬 𑀘 𑀧𑀭𑀢𑁄. 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀢𑀸𑀬 𑀧𑀮𑁄𑀓𑀢𑁄. 𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀦𑀢𑀸𑀬 𑀈𑀢𑀺𑀢𑁄. 𑀅𑀯𑀺𑀤𑀺𑀢𑀸𑀦𑀁𑀬𑁂𑀯 𑀯𑀺𑀧𑀼𑀮𑀸𑀦𑀁 𑀅𑀦𑀢𑁆𑀣𑀸𑀦𑀁 𑀆𑀯𑀳𑀦𑀢𑁄, 𑀲𑀩𑁆𑀩𑀼𑀧𑀤𑁆𑀤𑀯𑀯𑀢𑁆𑀣𑀼𑀢𑀸𑀬 𑀘 𑀉𑀧𑀤𑁆𑀤𑀯𑀢𑁄. 𑀲𑀩𑁆𑀩𑀪𑀬𑀸𑀦𑀁 𑀆𑀓𑀭𑀢𑀸𑀬, 𑀤𑀼𑀓𑁆𑀔𑀯𑀽𑀧𑀲𑀫𑀲𑀗𑁆𑀔𑀸𑀢𑀲𑁆𑀲 𑀧𑀭𑀫𑀲𑁆𑀲𑀸𑀲𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀢𑀸𑀬 𑀘 𑀪𑀬𑀢𑁄. 𑀅𑀦𑁂𑀓𑁂𑀳𑀺 𑀅𑀦𑀢𑁆𑀣𑁂𑀳𑀺 𑀅𑀦𑀼𑀩𑀤𑁆𑀥𑀢𑀸𑀬, 𑀤𑁄𑀲𑀽𑀧𑀲𑀝𑁆𑀞𑀢𑀸𑀬, 𑀉𑀧𑀲𑀕𑁆𑀕𑁄 𑀯𑀺𑀬 𑀅𑀦𑀥𑀺𑀯𑀸𑀲𑀦𑀸𑀭𑀳𑀢𑀸𑀬 𑀘 𑀉𑀧𑀲𑀕𑁆𑀕𑀢𑁄. 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀘𑁂𑀯 𑀮𑀸𑀪𑀸𑀮𑀸𑀪𑀸𑀤𑀻𑀳𑀺 𑀘 𑀮𑁄𑀓𑀥𑀫𑁆𑀫𑁂𑀳𑀺 𑀧𑀘𑀮𑀺𑀢𑀢𑀸𑀬 𑀘𑀮𑀢𑁄. 𑀉𑀧𑀓𑁆𑀓𑀫𑁂𑀦 𑀘𑁂𑀯 𑀲𑀭𑀲𑁂𑀦 𑀘 𑀧𑀪𑀗𑁆𑀕𑀼𑀧𑀕𑀫𑀦𑀲𑀻𑀮𑀢𑀸𑀬 𑀧𑀪𑀗𑁆𑀕𑀼𑀢𑁄. 𑀲𑀩𑁆𑀩𑀸𑀯𑀢𑁆𑀣𑀦𑀺𑀧𑀸𑀢𑀺𑀢𑀸𑀬, 𑀣𑀺𑀭𑀪𑀸𑀯𑀲𑁆𑀲 𑀘 𑀅𑀪𑀸𑀯𑀢𑀸𑀬 𑀅𑀤𑁆𑀥𑀼𑀯𑀢𑁄. 𑀅𑀢𑀸𑀬𑀦𑀢𑀸𑀬 𑀘𑁂𑀯, 𑀅𑀮𑀩𑁆𑀪𑀦𑁂𑀬𑁆𑀬𑀔𑁂𑀫𑀢𑀸𑀬 𑀘 𑀅𑀢𑀸𑀡𑀢𑁄. 𑀅𑀮𑁆𑀮𑀻𑀬𑀺𑀢𑀼𑀁 𑀅𑀦𑀭𑀳𑀢𑀸𑀬, 𑀅𑀮𑁆𑀮𑀻𑀦𑀸𑀦𑀫𑁆𑀧𑀺 𑀘 𑀮𑁂𑀡𑀓𑀺𑀘𑁆𑀘𑀸𑀓𑀸𑀭𑀺𑀢𑀸𑀬 𑀅𑀮𑁂𑀡𑀢𑁄. 𑀦𑀺𑀲𑁆𑀲𑀺𑀢𑀸𑀦𑀁 𑀪𑀬𑀲𑀸𑀭𑀓𑀢𑁆𑀢𑀸𑀪𑀸𑀯𑁂𑀦 𑀅𑀲𑀭𑀡𑀢𑁄. 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑁂𑀳𑀺 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑁂𑀳𑀺 𑀭𑀺𑀢𑁆𑀢𑀢𑀸𑀬 𑀭𑀺𑀢𑁆𑀢𑀢𑁄. 𑀭𑀺𑀢𑁆𑀢𑀢𑀸𑀬𑁂𑀯 𑀢𑀼𑀘𑁆𑀙𑀢𑁄 𑀅𑀧𑁆𑀧𑀓𑀢𑁆𑀢𑀸 𑀯𑀸, 𑀅𑀧𑁆𑀧𑀓𑀫𑁆𑀧𑀺 𑀳𑀺 𑀮𑁄𑀓𑁂 𑀢𑀼𑀘𑁆𑀙𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀫𑀺-𑀦𑀺𑀯𑀸𑀲𑀺-𑀓𑀸𑀭𑀓-𑀯𑁂𑀤𑀓𑀸𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑀺𑀢𑀢𑀸𑀬 ¶ 𑀲𑀼𑀜𑁆𑀜𑀢𑁄. 𑀲𑀬𑀜𑁆𑀘 𑀅𑀲𑁆𑀲𑀸𑀫𑀺𑀓𑀪𑀸𑀯𑀸𑀤𑀺𑀢𑀸𑀬 𑀅𑀦𑀢𑁆𑀢𑀢𑁄. 𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀸𑀬, 𑀤𑀼𑀓𑁆𑀔𑀲𑁆𑀲 𑀘 𑀆𑀤𑀻𑀦𑀯𑀢𑀸𑀬 𑀆𑀤𑀻𑀦𑀯𑀢𑁄, 𑀅𑀣 𑀯𑀸 𑀆𑀤𑀻𑀦𑀁 𑀯𑀸𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀓𑀧𑀡𑀫𑀦𑀼𑀲𑁆𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀔𑀦𑁆𑀥𑀸𑀧𑀺 𑀘 𑀓𑀧𑀡𑀸𑀬𑁂𑀯𑀸𑀢𑀺 𑀆𑀤𑀻𑀦𑀯𑀲𑀤𑀺𑀲𑀢𑀸𑀬 𑀆𑀤𑀻𑀦𑀯𑀢𑁄. 𑀚𑀭𑀸𑀬 𑀘𑁂𑀯 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀧𑀭𑀺𑀡𑀸𑀫𑀧𑀓𑀢𑀺𑀢𑀸𑀬 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄. 𑀤𑀼𑀩𑁆𑀩𑀮𑀢𑀸𑀬, 𑀨𑁂𑀕𑁆𑀕𑀼 𑀯𑀺𑀬 𑀲𑀼𑀔𑀪𑀜𑁆𑀚𑀦𑀻𑀬𑀢𑀸𑀬 𑀘 𑀅𑀲𑀸𑀭𑀓𑀢𑁄. 𑀅𑀖𑀳𑁂𑀢𑀼𑀢𑀸𑀬 𑀅𑀖𑀫𑀽𑀮𑀢𑁄. 𑀫𑀺𑀢𑁆𑀢𑀫𑀼𑀔𑀲𑀧𑀢𑁆𑀢𑁄 ¶ 𑀯𑀺𑀬 𑀯𑀺𑀲𑁆𑀲𑀸𑀲𑀖𑀸𑀢𑀺𑀢𑀸𑀬 𑀯𑀥𑀓𑀢𑁄. 𑀯𑀺𑀕𑀢𑀪𑀯𑀢𑀸𑀬, 𑀯𑀺𑀪𑀯𑀲𑀫𑁆𑀪𑀽𑀢𑀢𑀸𑀬 𑀘 𑀯𑀺𑀪𑀯𑀢𑁄. 𑀆𑀲𑀯𑀧𑀤𑀝𑁆𑀞𑀸𑀦𑀢𑀸𑀬 𑀲𑀸𑀲𑀯𑀢𑁄. 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀢𑀸𑀬 𑀲𑀗𑁆𑀔𑀢𑀢𑁄. 𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀸𑀦𑀁 𑀆𑀫𑀺𑀲𑀪𑀽𑀢𑀢𑀸𑀬 𑀫𑀸𑀭𑀸𑀫𑀺𑀲𑀢𑁄. 𑀚𑀸𑀢𑀺-𑀚𑀭𑀸-𑀩𑁆𑀬𑀸𑀥𑀺𑀫𑀭𑀡𑀧𑀓𑀢𑀺𑀢𑀸𑀬 𑀚𑀸𑀢𑀺-𑀚𑀭𑀸-𑀩𑁆𑀬𑀸𑀥𑀺-𑀫𑀭𑀡𑀥𑀫𑁆𑀫𑀢𑁄. 𑀲𑁄𑀓-𑀧𑀭𑀺𑀤𑁂𑀯-𑀉𑀧𑀸𑀬𑀸𑀲𑀳𑁂𑀢𑀼𑀢𑀸𑀬 𑀲𑁄𑀓-𑀧𑀭𑀺𑀤𑁂𑀯𑀉𑀧𑀸𑀬𑀸𑀲𑀥𑀫𑁆𑀫𑀢𑁄. 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀸𑀦𑀁 𑀯𑀺𑀲𑀬𑀥𑀫𑁆𑀫𑀢𑀸𑀬 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄𑀢𑀺 𑀏𑀯𑀁 𑀧𑀪𑁂𑀤𑀢𑁄 𑀯𑀼𑀢𑁆𑀢𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀲𑁆𑀲 𑀯𑀲𑁂𑀦 𑀲𑀫𑁆𑀫𑀲𑀢𑀺.

𑀏𑀢𑁆𑀣 𑀳𑀺 𑀅𑀦𑀺𑀘𑁆𑀘𑀢𑁄, 𑀧𑀮𑁄𑀓𑀢𑁄, 𑀘𑀮𑀢𑁄, 𑀧𑀪𑀗𑁆𑀕𑀼𑀢𑁄, 𑀅𑀤𑁆𑀥𑀼𑀯𑀢𑁄, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄, 𑀅𑀲𑀸𑀭𑀓𑀢𑁄, 𑀯𑀺𑀪𑀯𑀢𑁄, 𑀲𑀗𑁆𑀔𑀢𑀢𑁄, 𑀫𑀭𑀡𑀥𑀫𑁆𑀫𑀢𑁄𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀤𑀲 𑀤𑀲 𑀓𑀢𑁆𑀯𑀸 𑀧𑀜𑁆𑀜𑀸𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀦𑀺. 𑀧𑀭𑀢𑁄, 𑀭𑀺𑀢𑁆𑀢𑀢𑁄, 𑀢𑀼𑀘𑁆𑀙𑀢𑁄, 𑀲𑀼𑀜𑁆𑀜𑀢𑁄, 𑀅𑀦𑀢𑁆𑀢𑀢𑁄𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺. 𑀲𑁂𑀲𑀸𑀦𑀺 𑀤𑀼𑀓𑁆𑀔𑀢𑁄, 𑀭𑁄𑀕𑀢𑁄𑀢𑀺𑀆𑀤𑀻𑀦𑀺 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀜𑁆𑀘𑀯𑀻𑀲𑀢𑀺 𑀧𑀜𑁆𑀘𑀯𑀻𑀲𑀢𑀺 𑀓𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺𑀲𑀢𑀁 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀦𑀻𑀢𑀺.

𑀇𑀘𑁆𑀘𑀲𑁆𑀲 𑀇𑀫𑀺𑀦𑀸 𑀤𑁆𑀯𑀺𑀲𑀢𑀪𑁂𑀤𑁂𑀦 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀢𑁄 𑀢𑀁 𑀦𑀬𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀫𑁆𑀫𑀲𑀦𑀁 𑀣𑀺𑀭𑀁 𑀳𑁄𑀢𑀺. 𑀇𑀤𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀲𑀫𑁆𑀫𑀲𑀦𑀸𑀭𑀫𑁆𑀪𑀯𑀺𑀥𑀸𑀦𑀁.

𑀇𑀦𑁆𑀤𑁆𑀭𑀺𑀬𑀢𑀺𑀓𑁆𑀔𑀓𑀸𑀭𑀡𑀦𑀯𑀓𑀓𑀣𑀸

𑁬𑁯𑁯. 𑀬𑀲𑁆𑀲 𑀧𑀦 𑀏𑀯𑀁 𑀦𑀬𑀯𑀺𑀧𑀲𑁆𑀲𑀦𑀸𑀬 𑀬𑁄𑀕𑀁 𑀓𑀭𑁄𑀢𑁄𑀧𑀺 𑀦𑀬𑀯𑀺𑀧𑀲𑁆𑀲𑀦𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀦 ‘‘𑀦𑀯𑀳𑀸𑀓𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀪𑀯𑀦𑁆𑀢𑀺 𑁋 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀬𑀫𑁂𑀯 𑀧𑀲𑁆𑀲𑀢𑀺, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑁆𑀧𑀸𑀤𑁂𑀢𑀺, 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑁆𑀧𑀸𑀤𑁂𑀢𑀺, 𑀲𑀧𑁆𑀧𑀸𑀬𑀓𑀺𑀭𑀺𑀬𑀸𑀬 𑀲𑀫𑁆𑀧𑀸𑀤𑁂𑀢𑀺, 𑀲𑀫𑀸𑀥𑀺𑀲𑁆𑀲 𑀘 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁂𑀦, 𑀩𑁄𑀚𑁆𑀛𑀗𑁆𑀕𑀸𑀦𑀜𑁆𑀘 𑀅𑀦𑀼𑀧𑀯𑀢𑁆𑀢𑀦𑀢𑀸𑀬, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 ¶ 𑀅𑀦𑀧𑁂𑀓𑁆𑀔𑀢𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀢𑀢𑁆𑀣 𑀘 𑀅𑀪𑀺𑀪𑀼𑀬𑁆𑀬 𑀦𑁂𑀓𑁆𑀔𑀫𑁆𑀫𑁂𑀦, 𑀅𑀦𑁆𑀢𑀭𑀸 𑀘 𑀅𑀩𑁆𑀬𑁄𑀲𑀸𑀦𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀦𑀯𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺 𑀓𑀢𑁆𑀯𑀸 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀲𑀢𑁆𑀢 𑀅𑀲𑀧𑁆𑀧𑀸𑀬𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀢 𑀲𑀧𑁆𑀧𑀸𑀬𑀸𑀦𑀺 𑀲𑁂𑀯𑀫𑀸𑀦𑁂𑀦 𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀺𑀢𑀩𑁆𑀩𑀁, 𑀓𑀸𑀮𑁂𑀦 𑀅𑀭𑀽𑀧𑀁. 𑀭𑀽𑀧𑀁 𑀲𑀫𑁆𑀫𑀲𑀦𑁆𑀢𑁂𑀦 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸.

𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀧𑀲𑁆𑀲𑀦𑀸𑀓𑀸𑀭𑀓𑀣𑀸

𑁭𑁦𑁦. 𑀲𑁂𑀬𑁆𑀬𑀣𑀺𑀤𑀁 ¶ 𑁋 𑀇𑀤𑀁 𑀭𑀽𑀧𑀁 𑀦𑀸𑀫 𑀓𑀫𑁆𑀫𑀸𑀤𑀺𑀯𑀲𑁂𑀦 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀭𑀽𑀧𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀧𑀞𑀫𑀁 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀳𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀢𑀸𑀯 𑀢𑀺𑀲𑀦𑁆𑀢𑀢𑀺𑀯𑀲𑁂𑀦 𑀯𑀢𑁆𑀣𑀼-𑀓𑀸𑀬-𑀪𑀸𑀯𑀤𑀲𑀓𑀲𑀗𑁆𑀔𑀸𑀢𑀸𑀦𑀺 𑀢𑀺𑀁𑀲 𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀸𑀦𑀺 𑀘 𑀔𑁄 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯. 𑀬𑀣𑀸 𑀘 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀢𑀣𑀸 𑀞𑀺𑀢𑀺𑀓𑁆𑀔𑀡𑁂𑀧𑀺 𑀪𑀗𑁆𑀕𑀓𑁆𑀔𑀡𑁂𑀧𑀺.

𑀢𑀢𑁆𑀣 𑀭𑀽𑀧𑀁 𑀤𑀦𑁆𑀥𑀦𑀺𑀭𑁄𑀥𑀁 𑀕𑀭𑀼𑀧𑀭𑀺𑀯𑀢𑁆𑀢𑀺, 𑀘𑀺𑀢𑁆𑀢𑀁 𑀔𑀺𑀧𑁆𑀧𑀦𑀺𑀭𑁄𑀥𑀁 𑀮𑀳𑀼𑀧𑀭𑀺𑀯𑀢𑁆𑀢𑀺. 𑀢𑁂𑀦𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮). 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀳𑀺 𑀲𑁄𑀴𑀲𑀯𑀸𑀭𑁂 𑀪𑀯𑀗𑁆𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁄𑀧𑀺 𑀞𑀺𑀢𑀺𑀓𑁆𑀔𑀡𑁄𑀧𑀺 𑀪𑀗𑁆𑀕𑀓𑁆𑀔𑀡𑁄𑀧𑀺 𑀏𑀓𑀲𑀤𑀺𑀲𑀸. 𑀭𑀽𑀧𑀲𑁆𑀲 𑀧𑀦 𑀉𑀧𑁆𑀧𑀸𑀤𑀪𑀗𑁆𑀕𑀓𑁆𑀔𑀡𑀸𑀬𑁂𑀯 𑀮𑀳𑀼𑀓𑀸, 𑀢𑁂𑀳𑀺 𑀲𑀤𑀺𑀲𑀸. 𑀞𑀺𑀢𑀺𑀓𑁆𑀔𑀡𑁄 𑀧𑀦 𑀫𑀳𑀸, 𑀬𑀸𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀸𑀯 𑀯𑀢𑁆𑀢𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀞𑀸𑀦𑀧𑁆𑀧𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑀁 𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀞𑀸𑀦𑀧𑁆𑀧𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑀢𑀺𑀬𑀁 𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀬𑀸𑀯𑀢𑀸𑀬𑀼𑀓𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀦𑁆𑀦𑀫𑀭𑀡𑀲𑁆𑀲 𑀧𑀦 𑀏𑀓𑀫𑁂𑀯 𑀞𑀸𑀦𑀧𑁆𑀧𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁 𑀲𑁄𑀴𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀞𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀲𑀢𑁆𑀢𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀲𑀢𑁆𑀢𑀭𑀲𑀫𑀲𑁆𑀲 𑀞𑀸𑀦𑀓𑁆𑀔𑀡𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀬𑀸𑀯 𑀧𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀏𑀯𑀫𑁂𑀯 𑀧𑀯𑀢𑁆𑀢𑀢𑀺. 𑀑𑀧𑀧𑀸𑀢𑀺𑀓𑀸𑀦𑀫𑁆𑀧𑀺 𑀲𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦 𑀲𑀢𑁆𑀢𑀢𑀺 𑀭𑀽𑀧𑀸𑀦𑀺 𑀏𑀯𑀫𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁭𑁦𑁧. 𑀢𑀢𑁆𑀣 ¶ 𑀓𑀫𑁆𑀫𑀁, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁, 𑀓𑀫𑁆𑀫𑀧𑀘𑁆𑀘𑀬𑀁, 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀓𑀫𑁆𑀫𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀲 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀫𑁆𑀫𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀘, 𑀘𑀓𑁆𑀔𑀼𑀤𑀲𑀓𑀸𑀤𑀺 𑀲𑀫𑀲𑀢𑁆𑀢𑀢𑀺𑀭𑀽𑀧𑀜𑁆𑀘. 𑀓𑀫𑁆𑀫𑀧𑀘𑁆𑀘𑀬𑀁 𑀦𑀸𑀫 𑀢𑀤𑁂𑀯, 𑀓𑀫𑁆𑀫𑀁 𑀳𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁄𑀧𑀺 𑀳𑁄𑀢𑀺. 𑀓𑀫𑁆𑀫𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀓𑀫𑁆𑀫𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 ¶ 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀑𑀚𑀸 𑀞𑀸𑀦𑀁 𑀧𑀢𑁆𑀯𑀸 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀺. 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼 𑀞𑀸𑀦𑀧𑁆𑀧𑀢𑁆𑀢𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀉𑀢𑀼 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀦𑁆𑀢𑀺 𑀏𑀯𑀁 𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀺. 𑀏𑀯𑀁 𑀢𑀸𑀯 𑀓𑀫𑁆𑀫𑀚𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸.

𑁭𑁦𑁨. 𑀘𑀺𑀢𑁆𑀢𑀚𑁂𑀲𑀼𑀧𑀺 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀧𑀘𑁆𑀘𑀬𑀁, 𑀘𑀺𑀢𑁆𑀢𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀲 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀘𑀺𑀢𑁆𑀢𑀁 𑀦𑀸𑀫 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀸𑀦𑀺.

𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺, 𑀙𑀩𑁆𑀩𑀻𑀲𑁂𑀓𑀽𑀦𑀯𑀻𑀲𑀢𑀺;

𑀲𑁄𑀴𑀲 𑀭𑀽𑀧𑀺𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀸 𑀫𑀢𑀸.

𑀓𑀸𑀫𑀸𑀯𑀘𑀭𑀢𑁄 𑀳𑀺 𑀅𑀝𑁆𑀞 𑀓𑀼𑀲𑀮𑀸𑀦𑀺, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺, 𑀫𑀦𑁄𑀥𑀸𑀢𑀼𑀯𑀚𑁆𑀚𑀸 𑀤𑀲 𑀓𑀺𑀭𑀺𑀬𑀸, 𑀓𑀼𑀲𑀮𑀓𑀺𑀭𑀺𑀬𑀢𑁄 𑀤𑁆𑀯𑁂 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀻𑀢𑀺 𑀤𑁆𑀯𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁, 𑀇𑀭𑀺𑀬𑀸𑀧𑀣𑀁, 𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀚𑀦𑁂𑀦𑁆𑀢𑀺. 𑀯𑀺𑀧𑀸𑀓𑀯𑀚𑁆𑀚𑀸𑀦𑀺 𑀲𑁂𑀲𑀤𑀲𑀭𑀽𑀧𑀸𑀯𑀘𑀭𑀸𑀦𑀺, 𑀅𑀝𑁆𑀞 𑀅𑀭𑀽𑀧𑀸𑀯𑀘𑀭𑀸𑀦𑀺, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀻𑀢𑀺 𑀙𑀩𑁆𑀩𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁, 𑀇𑀭𑀺𑀬𑀸𑀧𑀣𑀜𑁆𑀘 𑀚𑀦𑀬𑀦𑁆𑀢𑀺, 𑀦 𑀯𑀺𑀜𑁆𑀜𑀢𑁆𑀢𑀺𑀁. 𑀓𑀸𑀫𑀸𑀯𑀘𑀭𑁂 𑀤𑀲 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺, 𑀭𑀽𑀧𑀸𑀯𑀘𑀭𑁂 𑀧𑀜𑁆𑀘, 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄, 𑀏𑀓𑀸 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀢𑀺 𑀏𑀓𑀽𑀦𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀭𑀽𑀧𑀫𑁂𑀯 𑀚𑀦𑀬𑀦𑁆𑀢𑀺, 𑀦 𑀇𑀭𑀺𑀬𑀸𑀧𑀣𑀁, 𑀦 𑀯𑀺𑀜𑁆𑀜𑀢𑁆𑀢𑀺𑀁. 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀁, 𑀘𑀢𑁆𑀢𑀸𑀭𑀺 𑀆𑀭𑀼𑀧𑁆𑀧𑀯𑀺𑀧𑀸𑀓𑀸𑀦𑀻𑀢𑀺 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀦𑁂𑀯 𑀭𑀽𑀧𑀁 𑀚𑀦𑀬𑀦𑁆𑀢𑀺, 𑀦 𑀇𑀭𑀺𑀬𑀸𑀧𑀣𑀁, 𑀦 𑀯𑀺𑀜𑁆𑀜𑀢𑁆𑀢𑀺𑀁. 𑀬𑀸𑀦𑀺 𑀘𑁂𑀢𑁆𑀣 𑀭𑀽𑀧𑀁 𑀚𑀦𑁂𑀦𑁆𑀢𑀺, 𑀢𑀸𑀦𑀺 𑀦 𑀞𑀺𑀢𑀺𑀓𑁆𑀔𑀡𑁂, 𑀪𑀗𑁆𑀕𑀓𑁆𑀔𑀡𑁂 𑀯𑀸, 𑀢𑀤𑀸 𑀳𑀺 𑀘𑀺𑀢𑁆𑀢𑀁 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀦 𑀩𑀮𑀯𑀁, 𑀢𑀲𑁆𑀫𑀸 𑀢𑀁 𑀢𑀤𑀸 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 ¶ 𑀦𑀸𑀫 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, ‘‘𑀲𑀤𑁆𑀤𑀦𑀯𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀆𑀓𑀸𑀲𑀥𑀸𑀢𑀼, 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀻’’𑀢𑀺 𑀲𑀢𑁆𑀢𑀭𑀲𑀯𑀺𑀥𑀁 𑀭𑀽𑀧𑀜𑁆𑀘. 𑀘𑀺𑀢𑁆𑀢𑀧𑀘𑁆𑀘𑀬𑀁 𑀦𑀸𑀫 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧) 𑀏𑀯𑀁 𑀯𑀼𑀢𑁆𑀢𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀘𑀺𑀢𑁆𑀢𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀞𑀸𑀦𑀧𑁆𑀧𑀢𑁆𑀢𑀸 ¶ 𑀑𑀚𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀤𑁆𑀯𑁂 𑀢𑀺𑀲𑁆𑀲𑁄 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀺. 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀉𑀢𑀼 𑀞𑀸𑀦𑀧𑁆𑀧𑀢𑁆𑀢𑁄 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀤𑁆𑀯𑁂 𑀢𑀺𑀲𑁆𑀲𑁄 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀺. 𑀏𑀯𑀁 𑀘𑀺𑀢𑁆𑀢𑀚𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸.

𑁭𑁦𑁩. 𑀆𑀳𑀸𑀭𑀚𑁂𑀲𑀼𑀧𑀺 𑀆𑀳𑀸𑀭𑁄, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀧𑀘𑁆𑀘𑀬𑀁, 𑀆𑀳𑀸𑀭𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀲 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀆𑀳𑀸𑀭𑁄 𑀦𑀸𑀫 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀉𑀧𑀸𑀤𑀺𑀡𑁆𑀡𑀁 𑀓𑀫𑁆𑀫𑀚𑀭𑀽𑀧𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀞𑀸𑀦𑀧𑁆𑀧𑀢𑁆𑀢𑀸𑀬 𑀑𑀚𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀁 𑀑𑀚𑀝𑁆𑀞𑀫𑀓𑀁, 𑀆𑀓𑀸𑀲𑀥𑀸𑀢𑀼, 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀻𑀢𑀺 𑀘𑀼𑀤𑁆𑀤𑀲𑀯𑀺𑀥𑀁 𑀭𑀽𑀧𑀁. 𑀆𑀳𑀸𑀭𑀧𑀘𑁆𑀘𑀬𑀁 𑀦𑀸𑀫 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫) 𑀏𑀯𑀁 𑀯𑀼𑀢𑁆𑀢𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀆𑀳𑀸𑀭𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀭𑀽𑀧𑁂𑀲𑀼 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀑𑀚𑀸 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀤𑀲𑀤𑁆𑀯𑀸𑀤𑀲𑀯𑀸𑀭𑁂 𑀧𑀯𑀢𑁆𑀢𑀺𑀁 𑀖𑀝𑁂𑀢𑀺. 𑀏𑀓𑀤𑀺𑀯𑀲𑀁 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄 𑀲𑀢𑁆𑀢𑀸𑀳𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀤𑀺𑀩𑁆𑀩𑀸 𑀧𑀦 𑀑𑀚𑀸 𑀏𑀓𑀫𑀸𑀲𑀁 𑀤𑁆𑀯𑁂𑀫𑀸𑀲𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀫𑀸𑀢𑀭𑀸 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄𑀧𑀺 𑀤𑀸𑀭𑀓𑀲𑁆𑀲 𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀭𑀻𑀭𑁂 𑀫𑀓𑁆𑀔𑀺𑀢𑀸𑀳𑀸𑀭𑁄𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀫𑁆𑀫𑀚𑀸𑀳𑀸𑀭𑁄 𑀉𑀧𑀸𑀤𑀺𑀡𑁆𑀡𑀓𑀸𑀳𑀸𑀭𑁄 𑀦𑀸𑀫. 𑀲𑁄𑀧𑀺 𑀞𑀸𑀦𑀧𑁆𑀧𑀢𑁆𑀢𑁄 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀑𑀚𑀸 𑀅𑀜𑁆𑀜𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀏𑀯𑀁 𑀘𑀢𑀲𑁆𑀲𑁄 𑀯𑀸 𑀧𑀜𑁆𑀘 𑀯𑀸 𑀧𑀯𑀢𑁆𑀢𑀺𑀬𑁄 𑀖𑀝𑁂𑀢𑀺. 𑀆𑀳𑀸𑀭𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀼 𑀞𑀸𑀦𑀧𑁆𑀧𑀢𑁆𑀢𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀭𑀸𑀬𑀁 𑀆𑀳𑀸𑀭𑁄 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀚𑀦𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀦𑀺𑀲𑁆𑀲𑀬𑀸𑀳𑀸𑀭𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑀸𑀢𑀺 𑀏𑀯𑀁 𑀆𑀳𑀸𑀭𑀚𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸.

𑁭𑁦𑁪. 𑀉𑀢𑀼𑀚𑁂𑀲𑀼𑀧𑀺 𑀉𑀢𑀼, 𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀧𑀘𑁆𑀘𑀬𑀁, 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀲 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀉𑀢𑀼 𑀦𑀸𑀫 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀼, 𑀉𑀡𑁆𑀳𑀉𑀢𑀼 𑀲𑀻𑀢𑀉𑀢𑀽𑀢𑀺 𑀏𑀯𑀁 𑀧𑀦𑁂𑀲 𑀤𑀼𑀯𑀺𑀥𑁄 𑀳𑁄𑀢𑀺. 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀘𑀢𑀼𑀲𑀫𑀼𑀝𑁆𑀞𑀸𑀦𑁄 𑀉𑀢𑀼 𑀉𑀧𑀸𑀤𑀺𑀡𑁆𑀡𑀓𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀞𑀸𑀦𑀧𑁆𑀧𑀢𑁆𑀢𑁄 𑀲𑀭𑀻𑀭𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀁 𑀲𑀤𑁆𑀤𑀦𑀯𑀓𑀁, 𑀆𑀓𑀸𑀲𑀥𑀸𑀢𑀼 ¶ ¶ , 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀻𑀢𑀺 𑀧𑀦𑁆𑀦𑀭𑀲𑀯𑀺𑀥𑀁 𑀳𑁄𑀢𑀺. 𑀉𑀢𑀼𑀧𑀘𑁆𑀘𑀬𑀁 𑀦𑀸𑀫 𑀉𑀢𑀼 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀬𑀸 𑀘 𑀯𑀺𑀦𑀸𑀲𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀢𑀼𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀼 𑀞𑀸𑀦𑀧𑁆𑀧𑀢𑁆𑀢𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀉𑀢𑀼 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀤𑀻𑀖𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀦𑀼𑀧𑀸𑀤𑀺𑀡𑁆𑀡𑀧𑀓𑁆𑀔𑁂 𑀞𑀢𑁆𑀯𑀸𑀧𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀧𑀯𑀢𑁆𑀢𑀢𑀺𑀬𑁂𑀯. 𑀉𑀢𑀼𑀧𑀘𑁆𑀘𑀬𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀞𑀸𑀦𑀧𑁆𑀧𑀢𑁆𑀢𑀸 𑀑𑀚𑀸 𑀅𑀜𑁆𑀜𑀁 𑀑𑀚𑀝𑁆𑀞𑀫𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀑𑀚𑀸 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀤𑀲𑀤𑁆𑀯𑀸𑀤𑀲𑀯𑀸𑀭𑁂 𑀧𑀯𑀢𑁆𑀢𑀺𑀁 𑀖𑀝𑁂𑀢𑀺. 𑀢𑀢𑁆𑀭𑀸𑀬𑀁 𑀉𑀢𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀚𑀦𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀸𑀦𑀁 𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑀸𑀢𑀺 𑀏𑀯𑀁 𑀉𑀢𑀼𑀚𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀢𑀺 𑀦𑀸𑀫.

𑀅𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀧𑀲𑁆𑀲𑀦𑀸𑀓𑀸𑀭𑀓𑀣𑀸

𑁭𑁦𑁫. 𑀬𑀣𑀸 𑀘 𑀭𑀽𑀧𑀁 𑀲𑀫𑁆𑀫𑀲𑀦𑁆𑀢𑁂𑀦 𑀭𑀽𑀧𑀲𑁆𑀲, 𑀏𑀯𑀁 𑀅𑀭𑀽𑀧𑀁 𑀲𑀫𑁆𑀫𑀲𑀦𑁆𑀢𑁂𑀦𑀧𑀺 𑀅𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸. 𑀲𑀸 𑀘 𑀔𑁄 𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯.

𑀲𑁂𑀬𑁆𑀬𑀣𑀺𑀤𑀁 𑁋 𑀇𑀤𑀜𑁆𑀳𑀺 𑀅𑀭𑀽𑀧𑀁 𑀦𑀸𑀫 𑀧𑀼𑀭𑀺𑀫𑀪𑀯𑁂 𑀆𑀬𑀽𑀳𑀺𑀢𑀓𑀫𑁆𑀫𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀏𑀓𑀽𑀦𑀯𑀻𑀲𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀪𑁂𑀤𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀦𑀺𑀩𑁆𑀩𑀢𑁆𑀢𑀦𑀸𑀓𑀸𑀭𑁄 𑀧𑀦𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀪𑀯𑀗𑁆𑀕𑀯𑀲𑁂𑀦, 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀘𑀼𑀢𑀺𑀯𑀲𑁂𑀦. 𑀬𑀁 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁, 𑀢𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦.

𑀧𑀯𑀢𑁆𑀢𑁂 𑀧𑀦 𑀅𑀲𑀫𑁆𑀪𑀺𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀕𑀢𑀢𑁆𑀢𑀸 𑀭𑀽𑀧𑀸𑀦𑀁 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑀢𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺. 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀳𑀺 𑀞𑀺𑀢𑀺𑀓𑁆𑀔𑀡𑁂 𑀞𑀺𑀢𑀺𑀧𑁆𑀧𑀢𑁆𑀢𑀫𑁂𑀯 𑀭𑀽𑀧𑀁 𑀘𑀓𑁆𑀔𑀼𑀁 𑀖𑀝𑁆𑀝𑁂𑀢𑀺. 𑀢𑀲𑁆𑀫𑀺𑀁 𑀖𑀝𑁆𑀝𑀺𑀢𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀤𑀦𑀦𑁆𑀢𑀭𑀁 𑀢𑀤𑁂𑀯 𑀭𑀽𑀧𑀁 𑀧𑀲𑁆𑀲𑀫𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀁 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀢𑁄 𑀢𑀤𑁂𑀯 𑀭𑀽𑀧𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼. 𑀢𑀢𑁄 𑀢𑀤𑁂𑀯 𑀭𑀽𑀧𑀁 𑀲𑀦𑁆𑀢𑀻𑀭𑀬𑀫𑀸𑀦𑀸 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀢𑁄 𑀢𑀤𑁂𑀯 𑀭𑀽𑀧𑀁 𑀯𑀯𑀢𑁆𑀣𑀸𑀧𑀬𑀫𑀸𑀦𑀸 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 ¶ 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 ¶ . 𑀢𑀢𑁄 𑀧𑀭𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀏𑀓𑀁 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀁 𑀘𑀺𑀢𑁆𑀢𑀁 𑀧𑀜𑁆𑀘 𑀲𑀢𑁆𑀢 𑀯𑀸 𑀚𑀯𑀦𑀸𑀦𑀺. 𑀢𑀢𑁄 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀏𑀓𑀸𑀤𑀲𑀲𑀼 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑁂𑀲𑀼 𑀚𑀯𑀦𑀸𑀦𑀼𑀭𑀽𑀧𑀁 𑀬𑀁𑀓𑀺𑀜𑁆𑀘𑀺 𑀢𑀤𑀸𑀭𑀫𑁆𑀫𑀡𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀺𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀅𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀅𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀓𑀸𑀮𑁂𑀦 𑀅𑀭𑀽𑀧𑀁 𑀲𑀫𑁆𑀫𑀲𑀢𑀺 𑀦𑀸𑀫.

𑀏𑀯𑀁 𑀓𑀸𑀮𑁂𑀦 𑀭𑀽𑀧𑀁 𑀓𑀸𑀮𑁂𑀦 𑀅𑀭𑀽𑀧𑀁 𑀲𑀫𑁆𑀫𑀲𑀺𑀢𑁆𑀯𑀸𑀧𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀧𑀚𑁆𑀚𑀫𑀸𑀦𑁄 𑀏𑀓𑁄 𑀧𑀜𑁆𑀜𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺.

𑀭𑀽𑀧𑀲𑀢𑁆𑀢𑀓𑀲𑀫𑁆𑀫𑀲𑀦𑀓𑀣𑀸

𑁭𑁦𑁬. 𑀅𑀧𑀭𑁄 𑀭𑀽𑀧𑀲𑀢𑁆𑀢𑀓𑀅𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀢𑀢𑁆𑀣 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄, 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄, 𑀆𑀳𑀸𑀭𑀫𑀬𑀢𑁄, 𑀉𑀢𑀼𑀫𑀬𑀢𑁄, 𑀓𑀫𑁆𑀫𑀚𑀢𑁄, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁄, 𑀥𑀫𑁆𑀫𑀢𑀸𑀭𑀽𑀧𑀢𑁄𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀢𑀺 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄, 𑀯𑀬𑁄𑀯𑀼𑀟𑁆𑀠𑀢𑁆𑀣𑀕𑀸𑀫𑀺𑀢𑁄;

𑀆𑀳𑀸𑀭𑀢𑁄 𑀘 𑀉𑀢𑀼𑀢𑁄, 𑀓𑀫𑁆𑀫𑀢𑁄 𑀘𑀸𑀧𑀺 𑀘𑀺𑀢𑁆𑀢𑀢𑁄;

𑀥𑀫𑁆𑀫𑀢𑀸𑀭𑀽𑀧𑀢𑁄 𑀲𑀢𑁆𑀢, 𑀯𑀺𑀢𑁆𑀣𑀸𑀭𑁂𑀦 𑀯𑀺𑀧𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀆𑀤𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺. 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀘𑀼𑀢𑀺. 𑀇𑀢𑀺 𑀬𑁄𑀕𑀸𑀯𑀘𑀭𑁄 𑀇𑀫𑁂𑀳𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑁂𑀳𑀺 𑀏𑀓𑀁 𑀯𑀲𑁆𑀲𑀲𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀔𑀸𑀭𑁂𑀲𑀼 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀓𑀣𑀁? 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀯𑀢𑁆𑀢𑀺𑀢𑁄, 𑀯𑀺𑀧𑀭𑀺𑀡𑀸𑀫𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘. 𑀬𑀲𑁆𑀫𑀸 𑀧𑀦 𑀉𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸 𑀞𑀺𑀢𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀞𑀺𑀢𑀺𑀬𑀁 𑀚𑀭𑀸𑀬 𑀓𑀺𑀮𑀫𑀦𑁆𑀢𑀺, 𑀚𑀭𑀁 𑀧𑀢𑁆𑀯𑀸 𑀅𑀯𑀲𑁆𑀲𑀁 𑀪𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄, 𑀤𑀼𑀓𑁆𑀔𑀫𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄, 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄 𑀘 𑀤𑀼𑀓𑁆𑀔𑀸. 𑀬𑀲𑁆𑀫𑀸 𑀘 ‘‘𑀉𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸 𑀞𑀺𑀢𑀺𑀁 𑀫𑀸 𑀧𑀸𑀧𑀼𑀡𑀦𑁆𑀢𑀼, 𑀞𑀸𑀦𑀧𑁆𑀧𑀢𑁆𑀢𑀸 𑀫𑀸 𑀚𑀻𑀭𑀦𑁆𑀢𑀼, 𑀚𑀭𑀧𑁆𑀧𑀢𑁆𑀢𑀸 𑀫𑀸 𑀪𑀺𑀚𑁆𑀚𑀦𑁆𑀢𑀽’’𑀢𑀺 𑀇𑀫𑁂𑀲𑀼 𑀢𑀻𑀲𑀼 ¶ 𑀞𑀸𑀦𑁂𑀲𑀼 𑀓𑀲𑁆𑀲𑀘𑀺 𑀯𑀲𑀯𑀢𑁆𑀢𑀺𑀪𑀸𑀯𑁄 ¶ 𑀦𑀢𑁆𑀣𑀺, 𑀲𑀼𑀜𑁆𑀜𑀸 𑀢𑁂𑀦 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦, 𑀢𑀲𑁆𑀫𑀸 𑀲𑀼𑀜𑁆𑀜𑀢𑁄, 𑀅𑀲𑁆𑀲𑀸𑀫𑀺𑀓𑀢𑁄, 𑀅𑀯𑀲𑀯𑀢𑁆𑀢𑀺𑀢𑁄, 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄 𑀘 𑀅𑀦𑀢𑁆𑀢𑀸𑀢𑀺.

𑁭𑁦𑁭. 𑀏𑀯𑀁 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀯𑀲𑁂𑀦 𑀯𑀲𑁆𑀲𑀲𑀢𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀆𑀭𑁄𑀧𑁂𑀢𑀺. 𑀢𑀢𑁆𑀣 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑁄 𑀦𑀸𑀫 𑀯𑀬𑀯𑀲𑁂𑀦 𑀯𑀼𑀟𑁆𑀠𑀲𑁆𑀲 𑀯𑀟𑁆𑀠𑀺𑀢𑀲𑁆𑀲 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀢𑀲𑁆𑀲 𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀓𑀣𑀁? 𑀲𑁄 𑀢𑀫𑁂𑀯 𑀯𑀲𑁆𑀲𑀲𑀢𑀁 𑀧𑀞𑀫𑀯𑀬𑁂𑀦 𑀫𑀚𑁆𑀛𑀺𑀫𑀯𑀬𑁂𑀦 𑀧𑀘𑁆𑀙𑀺𑀫𑀯𑀬𑁂𑀦𑀸𑀢𑀺 𑀢𑀻𑀳𑀺 𑀯𑀬𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀢𑀢𑁆𑀣 𑀆𑀤𑀺𑀢𑁄 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺 𑀧𑀞𑀫𑀯𑀬𑁄 𑀦𑀸𑀫. 𑀢𑀢𑁄 𑀘𑀢𑀼𑀢𑁆𑀢𑀺𑀁𑀲 𑀫𑀚𑁆𑀛𑀺𑀫𑀯𑀬𑁄 𑀦𑀸𑀫. 𑀢𑀢𑁄 𑀢𑁂𑀢𑁆𑀢𑀺𑀁𑀲 𑀧𑀘𑁆𑀙𑀺𑀫𑀯𑀬𑁄 𑀦𑀸𑀫𑀸𑀢𑀺. 𑀇𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀬𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸, ‘‘𑀧𑀞𑀫𑀯𑀬𑁂 𑀧𑀯𑀢𑁆𑀢𑀁 𑀭𑀽𑀧𑀁 𑀫𑀚𑁆𑀛𑀺𑀫𑀯𑀬𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸. 𑀫𑀚𑁆𑀛𑀺𑀫𑀯𑀬𑁂 𑀧𑀯𑀢𑁆𑀢𑀭𑀽𑀧𑀫𑁆𑀧𑀺 𑀧𑀘𑁆𑀙𑀺𑀫𑀯𑀬𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸. 𑀧𑀘𑁆𑀙𑀺𑀫𑀯𑀬𑁂 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺 𑀧𑀯𑀢𑁆𑀢𑀭𑀽𑀧𑀫𑁆𑀧𑀺 𑀫𑀭𑀡𑀢𑁄 𑀧𑀭𑀁 𑀕𑀫𑀦𑀲𑀫𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁦𑁮. 𑀏𑀯𑀁 𑀧𑀞𑀫𑀯𑀬𑀸𑀤𑀺𑀯𑀲𑁂𑀦 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 ‘‘𑀫𑀦𑁆𑀤𑀤𑀲𑀓𑀁, 𑀔𑀺𑀟𑁆𑀟𑀸𑀤𑀲𑀓𑀁, 𑀯𑀡𑁆𑀡𑀤𑀲𑀓𑀁, 𑀩𑀮𑀤𑀲𑀓𑀁, 𑀧𑀜𑁆𑀜𑀸𑀤𑀲𑀓𑀁, 𑀳𑀸𑀦𑀺𑀤𑀲𑀓𑀁, 𑀧𑀩𑁆𑀪𑀸𑀭𑀤𑀲𑀓𑀁, 𑀯𑀗𑁆𑀓𑀤𑀲𑀓𑀁, 𑀫𑁄𑀫𑀽𑀳𑀤𑀲𑀓𑀁, 𑀲𑀬𑀦𑀤𑀲𑀓’’𑀦𑁆𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀤𑀲𑀓𑀸𑀦𑀁 𑀯𑀲𑁂𑀦 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀢𑀢𑁆𑀣 𑀤𑀲𑀓𑁂𑀲𑀼 𑀢𑀸𑀯 𑀯𑀲𑁆𑀲𑀲𑀢𑀚𑀻𑀯𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀧𑀞𑀫𑀸𑀦𑀺 𑀤𑀲 𑀯𑀲𑁆𑀲𑀸𑀦𑀺 𑀫𑀦𑁆𑀤𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺 𑀲𑁄 𑀫𑀦𑁆𑀤𑁄 𑀳𑁄𑀢𑀺 𑀘𑀧𑀮𑁄 𑀓𑀼𑀫𑀸𑀭𑀓𑁄. 𑀢𑀢𑁄 𑀧𑀭𑀸𑀦𑀺 𑀤𑀲 𑀔𑀺𑀟𑁆𑀟𑀸𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺 𑀲𑁄 𑀔𑀺𑀟𑁆𑀟𑀸𑀭𑀢𑀺𑀩𑀳𑀼𑀮𑁄 𑀳𑁄𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀯𑀡𑁆𑀡𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀯𑀡𑁆𑀡𑀸𑀬𑀢𑀦𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀩𑀮𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀩𑀮𑀜𑁆𑀘 𑀣𑀸𑀫𑁄 𑀘 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀧𑀜𑁆𑀜𑀸𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀧𑀜𑁆𑀜𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺, 𑀧𑀓𑀢𑀺𑀬𑀸 𑀓𑀺𑀭 𑀤𑀼𑀩𑁆𑀩𑀮𑀧𑀜𑁆𑀜𑀲𑁆𑀲𑀸𑀧𑀺 ¶ 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀧𑁆𑀧𑀫𑀢𑁆𑀢𑀓𑀸 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀢𑀢𑁄 𑀧𑀭𑀸𑀦𑀺 𑀤𑀲 𑀳𑀸𑀦𑀺𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀔𑀺𑀟𑁆𑀟𑀸𑀭𑀢𑀺𑀯𑀡𑁆𑀡𑀩𑀮𑀧𑀜𑁆𑀜𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀢𑀢𑁄 𑀧𑀭𑀸𑀦𑀺 ¶ 𑀤𑀲 𑀧𑀩𑁆𑀪𑀸𑀭𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀅𑀢𑁆𑀢𑀪𑀸𑀯𑁄 𑀧𑀼𑀭𑀢𑁄 𑀧𑀩𑁆𑀪𑀸𑀭𑁄 𑀳𑁄𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀯𑀗𑁆𑀓𑀤𑀲𑀓𑀁 𑀦𑀸𑀫, 𑀢𑀤𑀸 𑀳𑀺𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀗𑁆𑀕𑀮𑀓𑁄𑀝𑀺 𑀯𑀺𑀬 𑀯𑀗𑁆𑀓𑁄 𑀳𑁄𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀫𑁄𑀫𑀽𑀳𑀤𑀲𑀓𑀁 𑀦𑀸𑀫. 𑀢𑀤𑀸 𑀳𑀺 𑀲𑁄 𑀫𑁄𑀫𑀽𑀳𑁄 𑀳𑁄𑀢𑀺, 𑀓𑀢𑀁 𑀓𑀢𑀁 𑀧𑀫𑀼𑀲𑁆𑀲𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑀲 𑀲𑀬𑀦𑀤𑀲𑀓𑀁 𑀦𑀸𑀫, 𑀯𑀲𑁆𑀲𑀲𑀢𑀺𑀓𑁄 𑀳𑀺 𑀲𑀬𑀦𑀩𑀳𑀼𑀮𑁄𑀯 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀬𑁄𑀕𑀻 𑀏𑀢𑁂𑀲𑀁 𑀤𑀲𑀓𑀸𑀦𑀁 𑀯𑀲𑁂𑀦 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀼𑀁 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀧𑀞𑀫𑀤𑀲𑀓𑁂 𑀧𑀯𑀢𑁆𑀢𑀭𑀽𑀧𑀁 𑀤𑀼𑀢𑀺𑀬𑀤𑀲𑀓𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸. 𑀤𑀼𑀢𑀺𑀬𑀤𑀲𑀓𑁂…𑀧𑁂… 𑀦𑀯𑀫𑀤𑀲𑀓𑁂 𑀧𑀯𑀢𑁆𑀢𑀭𑀽𑀧𑀁 𑀤𑀲𑀫𑀤𑀲𑀓𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀤𑀲𑀫𑀤𑀲𑀓𑁂 𑀧𑀯𑀢𑁆𑀢𑀭𑀽𑀧𑀁 𑀧𑀼𑀦𑀩𑁆𑀪𑀯𑀁 𑀅𑀧𑁆𑀧𑀢𑁆𑀯𑀸 𑀇𑀥𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁦𑁯. 𑀏𑀯𑀁 𑀤𑀲𑀓𑀯𑀲𑁂𑀦 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀯𑀲𑁆𑀲𑀲𑀢𑀁 𑀧𑀜𑁆𑀘𑀧𑀜𑁆𑀘𑀯𑀲𑁆𑀲𑀯𑀲𑁂𑀦 𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀓𑀣𑀁? 𑀲𑁄 𑀳𑀺 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀧𑀞𑀫𑁂 𑀯𑀲𑁆𑀲𑀧𑀜𑁆𑀘𑀓𑁂 𑀧𑀯𑀢𑁆𑀢𑀭𑀽𑀧𑀁 𑀤𑀼𑀢𑀺𑀬𑀁 𑀯𑀲𑁆𑀲𑀧𑀜𑁆𑀘𑀓𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸. 𑀤𑀼𑀢𑀺𑀬𑁂 𑀯𑀲𑁆𑀲𑀧𑀜𑁆𑀘𑀓𑁂 𑀧𑀯𑀢𑁆𑀢𑀭𑀽𑀧𑀁 𑀢𑀢𑀺𑀬𑀁…𑀧𑁂… 𑀏𑀓𑀽𑀦𑀯𑀻𑀲𑀢𑀺𑀫𑁂 𑀯𑀲𑁆𑀲𑀧𑀜𑁆𑀘𑀓𑁂 𑀧𑀯𑀢𑁆𑀢𑀭𑀽𑀧𑀁 𑀯𑀻𑀲𑀢𑀺𑀫𑀁 𑀯𑀲𑁆𑀲𑀧𑀜𑁆𑀘𑀓𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀯𑀻𑀲𑀢𑀺𑀫𑁂 𑀯𑀲𑁆𑀲𑀧𑀜𑁆𑀘𑀓𑁂 𑀧𑀯𑀢𑁆𑀢𑀭𑀽𑀧𑀁 𑀫𑀭𑀡𑀢𑁄 𑀧𑀭𑀁 𑀕𑀫𑀦𑀲𑀫𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺.

𑀏𑀯𑀁 𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀢𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀧𑀜𑁆𑀘𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀯𑀲𑁂𑀦 𑀆𑀭𑁄𑀧𑁂𑀢𑀺. 𑀢𑀢𑁄 𑀢𑁂𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀯𑀲𑁂𑀦, 𑀧𑀜𑁆𑀜𑀸𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀸𑀦𑀁 𑀯𑀲𑁂𑀦, 𑀲𑀢𑀁 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑁂𑀓𑀯𑀲𑁆𑀲𑀯𑀲𑁂𑀦. 𑀢𑀢𑁄 𑀏𑀓𑀁 𑀯𑀲𑁆𑀲𑀁 𑀢𑀬𑁄 ¶ 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀲𑁆𑀲𑀸𑀦𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼 𑀢𑀻𑀲𑀼 𑀉𑀢𑀽𑀲𑀼 𑀏𑀓𑁂𑀓𑀉𑀢𑀼𑀯𑀲𑁂𑀦 𑀢𑀲𑁆𑀫𑀺𑀁 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀓𑀣𑀁? ‘‘𑀯𑀲𑁆𑀲𑀸𑀦𑁂 𑀘𑀢𑀼𑀫𑀸𑀲𑀁 𑀧𑀯𑀢𑁆𑀢𑀭𑀽𑀧𑀁 𑀳𑁂𑀫𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁. 𑀳𑁂𑀫𑀦𑁆𑀢𑁂 𑀧𑀯𑀢𑁆𑀢𑀭𑀽𑀧𑀁 𑀕𑀺𑀫𑁆𑀳𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁. 𑀕𑀺𑀫𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀧𑀼𑀦 𑀯𑀲𑁆𑀲𑀸𑀦𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺. 𑀏𑀯𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀏𑀓𑀁 𑀯𑀲𑁆𑀲𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑁋 ‘‘𑀯𑀲𑁆𑀲𑀸𑀦𑁂 ¶ 𑀤𑁆𑀯𑁂𑀫𑀸𑀲𑀁 𑀧𑀯𑀢𑁆𑀢𑀭𑀽𑀧𑀁 𑀲𑀭𑀤𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁. 𑀲𑀭𑀤𑁂 𑀧𑀯𑀢𑁆𑀢𑀭𑀽𑀧𑀁 𑀳𑁂𑀫𑀦𑁆𑀢𑀁. 𑀳𑁂𑀫𑀦𑁆𑀢𑁂 𑀧𑀯𑀢𑁆𑀢𑀭𑀽𑀧𑀁 𑀲𑀺𑀲𑀺𑀭𑀁. 𑀲𑀺𑀲𑀺𑀭𑁂 𑀧𑀯𑀢𑁆𑀢𑀭𑀽𑀧𑀁 𑀯𑀲𑀦𑁆𑀢𑀁. 𑀯𑀲𑀦𑁆𑀢𑁂 𑀧𑀯𑀢𑁆𑀢𑀭𑀽𑀧𑀁 𑀕𑀺𑀫𑁆𑀳𑀁. 𑀕𑀺𑀫𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀧𑀼𑀦 𑀯𑀲𑁆𑀲𑀸𑀦𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀏𑀯𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁄 𑀓𑀸𑀴𑀚𑀼𑀡𑁆𑀳𑀯𑀲𑁂𑀦 𑁋 ‘‘𑀓𑀸𑀴𑁂 𑀧𑀯𑀢𑁆𑀢𑀭𑀽𑀧𑀁 𑀚𑀼𑀡𑁆𑀳𑀁 𑀅𑀧𑁆𑀧𑀢𑁆𑀯𑀸. 𑀚𑀼𑀡𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀓𑀸𑀴𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀢𑀢𑁄 𑀭𑀢𑁆𑀢𑀺𑀦𑁆𑀤𑀺𑀯𑀯𑀲𑁂𑀦 𑁋 ‘‘𑀭𑀢𑁆𑀢𑀺𑀁 𑀧𑀯𑀢𑁆𑀢𑀭𑀽𑀧𑀁 𑀤𑀺𑀯𑀲𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁. 𑀤𑀺𑀯𑀲𑀁 𑀧𑀯𑀢𑁆𑀢𑀭𑀽𑀧𑀫𑁆𑀧𑀺 𑀭𑀢𑁆𑀢𑀺𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀢𑀢𑁄 𑀢𑀤𑁂𑀯 𑀭𑀢𑁆𑀢𑀺𑀦𑁆𑀤𑀺𑀯𑀁 𑀧𑀼𑀩𑁆𑀩𑀡𑁆𑀳𑀸𑀤𑀺𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑁋 ‘‘𑀧𑀼𑀩𑁆𑀩𑀡𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀫𑀚𑁆𑀛𑀦𑁆𑀳𑀁 𑀅𑀧𑁆𑀧𑀢𑁆𑀯𑀸. 𑀫𑀚𑁆𑀛𑀦𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀲𑀸𑀬𑀦𑁆𑀳𑀁. 𑀲𑀸𑀬𑀦𑁆𑀳𑁂 𑀧𑀯𑀢𑁆𑀢𑀭𑀽𑀧𑀁 𑀧𑀞𑀫𑀬𑀸𑀫𑀁. 𑀧𑀞𑀫𑀬𑀸𑀫𑁂 𑀧𑀯𑀢𑁆𑀢𑀭𑀽𑀧𑀁 𑀫𑀚𑁆𑀛𑀺𑀫𑀬𑀸𑀫𑀁. 𑀫𑀚𑁆𑀛𑀺𑀫𑀬𑀸𑀫𑁂 𑀧𑀯𑀢𑁆𑀢𑀭𑀽𑀧𑀁 𑀧𑀘𑁆𑀙𑀺𑀫𑀬𑀸𑀫𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁. 𑀧𑀘𑁆𑀙𑀺𑀫𑀬𑀸𑀫𑁂 𑀧𑀯𑀢𑁆𑀢𑀭𑀽𑀧𑀁 𑀧𑀼𑀦 𑀧𑀼𑀩𑁆𑀩𑀡𑁆𑀳𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁧𑁦. 𑀏𑀯𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀭𑀽𑀧𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀆𑀮𑁄𑀓𑀦𑀯𑀺𑀮𑁄𑀓𑀦𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀯𑀲𑁂𑀦 𑁋 ‘‘𑀅𑀪𑀺𑀓𑁆𑀓𑀫𑁂 𑀧𑀯𑀢𑁆𑀢𑀭𑀽𑀧𑀁 𑀧𑀝𑀺𑀓𑁆𑀓𑀫𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀓𑁆𑀓𑀫𑁂 𑀧𑀯𑀢𑁆𑀢𑀭𑀽𑀧𑀁 𑀆𑀮𑁄𑀓𑀦𑀁. 𑀆𑀮𑁄𑀓𑀦𑁂 𑀧𑀯𑀢𑁆𑀢𑀭𑀽𑀧𑀁 𑀯𑀺𑀮𑁄𑀓𑀦𑀁. 𑀯𑀺𑀮𑁄𑀓𑀦𑁂 𑀧𑀯𑀢𑁆𑀢𑀭𑀽𑀧𑀁 𑀲𑀫𑀺𑀜𑁆𑀚𑀦𑀁. 𑀲𑀫𑀺𑀜𑁆𑀚𑀦𑁂 𑀧𑀯𑀢𑁆𑀢𑀭𑀽𑀧𑀁 𑀧𑀲𑀸𑀭𑀡𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀢𑀢𑁄 𑀏𑀓𑀧𑀤𑀯𑀸𑀭𑀁 𑀉𑀤𑁆𑀥𑀭𑀡 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀯𑁄𑀲𑁆𑀲𑀚𑁆𑀚𑀦𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀓𑀭𑁄𑀢𑀺.

𑀢𑀢𑁆𑀣 ¶ 𑀉𑀤𑁆𑀥𑀭𑀡𑀁 𑀦𑀸𑀫 𑀧𑀸𑀤𑀲𑁆𑀲 𑀪𑀽𑀫𑀺𑀢𑁄 𑀉𑀓𑁆𑀔𑀺𑀧𑀦𑀁. 𑀅𑀢𑀺𑀳𑀭𑀡𑀁 𑀦𑀸𑀫 𑀧𑀼𑀭𑀢𑁄 𑀳𑀭𑀡𑀁. 𑀯𑀻𑀢𑀺𑀳𑀭𑀡𑀁 𑀦𑀸𑀫 𑀔𑀸𑀡𑀼𑀓𑀡𑁆𑀝𑀓𑀤𑀻𑀖𑀚𑀸𑀢𑀺𑀆𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀤𑀺𑀲𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀸𑀤𑀲𑀜𑁆𑀘𑀸𑀭𑀡𑀁. 𑀯𑁄𑀲𑁆𑀲𑀚𑁆𑀚𑀦𑀁 𑀦𑀸𑀫 𑀧𑀸𑀤𑀲𑁆𑀲 𑀳𑁂𑀝𑁆𑀞𑀸 𑀑𑀭𑁄𑀧𑀦𑀁. 𑀲𑀦𑁆𑀦𑀺𑀓𑁆𑀔𑁂𑀧𑀦𑀁 𑀦𑀸𑀫 𑀧𑀣𑀯𑀻𑀢𑀮𑁂 𑀞𑀧𑀦𑀁. 𑀲𑀦𑁆𑀦𑀺𑀭𑀼𑀫𑁆𑀪𑀦𑀁 𑀦𑀸𑀫 𑀧𑀼𑀦 𑀧𑀸𑀤𑀼𑀤𑁆𑀥𑀭𑀡𑀓𑀸𑀮𑁂 𑀧𑀸𑀤𑀲𑁆𑀲 𑀧𑀣𑀯𑀺𑀬𑀸 𑀲𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀧𑀻𑀴𑀦𑀁. 𑀢𑀢𑁆𑀣 𑀉𑀤𑁆𑀥𑀭𑀡𑁂 𑀧𑀣𑀯𑀻𑀥𑀸𑀢𑀼 ¶ 𑀆𑀧𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄. 𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼. 𑀯𑁄𑀲𑁆𑀲𑀚𑁆𑀚𑀦𑁂 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄. 𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀲𑀼. 𑀏𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀢𑀲𑁆𑀫𑀺𑀁 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀓𑀣𑀁? 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀬𑀸 𑀉𑀤𑁆𑀥𑀭𑀡𑁂 𑀧𑀯𑀢𑁆𑀢𑀸 𑀥𑀸𑀢𑀼𑀬𑁄, 𑀬𑀸𑀦𑀺 𑀘 𑀢𑀤𑀼𑀧𑀸𑀤𑀸𑀬𑀭𑀽𑀧𑀸𑀦𑀺, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀢𑀺𑀳𑀭𑀡𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸. 𑀢𑀣𑀸 𑀅𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑀻𑀢𑀺𑀳𑀭𑀡𑀁. 𑀯𑀻𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑁄𑀲𑁆𑀲𑀚𑁆𑀚𑀦𑀁. 𑀯𑁄𑀲𑁆𑀲𑀚𑁆𑀚𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀁. 𑀲𑀦𑁆𑀦𑀺𑀓𑁆𑀔𑁂𑀧𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀭𑀼𑀫𑁆𑀪𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀇𑀢𑀺 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸 𑀇𑀢𑀭𑀁 𑀇𑀢𑀭𑀁 𑀓𑁄𑀝𑁆𑀞𑀸𑀲𑀁 𑀅𑀧𑁆𑀧𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀩𑁆𑀩𑀁 𑀧𑀩𑁆𑀩𑀁 𑀲𑀦𑁆𑀥𑀺 𑀲𑀦𑁆𑀥𑀺 𑀑𑀥𑀺 𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸 𑀯𑀺𑀬 𑀢𑀝𑀢𑀝𑀸𑀬𑀦𑁆𑀢𑀸 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺. 𑀢𑀲𑁆𑀲𑁂𑀯𑀁 𑀧𑀩𑁆𑀩𑀧𑀩𑁆𑀩𑀕𑀢𑁂 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀢𑁄 𑀭𑀽𑀧𑀲𑀫𑁆𑀫𑀲𑀦𑀁 𑀲𑀼𑀔𑀼𑀫𑀁 𑀳𑁄𑀢𑀺.

𑁭𑁧𑁧. 𑀲𑀼𑀔𑀼𑀫𑀢𑁆𑀢𑁂 𑀘 𑀧𑀦𑀲𑁆𑀲 𑀇𑀤𑀁 𑀑𑀧𑀫𑁆𑀫𑀁. 𑀏𑀓𑁄 𑀓𑀺𑀭 𑀤𑀸𑀭𑀼𑀢𑀺𑀡𑀼𑀓𑁆𑀓𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀧𑀤𑀻𑀧𑁄 𑀧𑀘𑁆𑀘𑀦𑁆𑀢𑀯𑀸𑀲𑀺𑀓𑁄 𑀦𑀕𑀭𑀫𑀸𑀕𑀫𑁆𑀫 𑀅𑀦𑁆𑀢𑀭𑀸𑀧𑀡𑁂 𑀚𑀮𑀫𑀸𑀦𑀁 𑀧𑀤𑀻𑀧𑀁 𑀤𑀺𑀲𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀧𑀼𑀘𑁆𑀙𑀺 𑀅𑀫𑁆𑀪𑁄 ‘‘𑀓𑀺𑀁 𑀦𑀸𑀫𑁂𑀢𑀁 𑀏𑀯𑀁 𑀫𑀦𑀸𑀧’’𑀦𑁆𑀢𑀺? 𑀢𑀫𑁂𑀦𑀁 𑀲𑁄 𑀆𑀳 ‘‘𑀓𑀺𑀫𑁂𑀢𑁆𑀣 𑀫𑀦𑀸𑀧𑀁, 𑀧𑀤𑀻𑀧𑁄 𑀦𑀸𑀫𑁂𑀲 𑀢𑁂𑀮𑀓𑁆𑀔𑀬𑁂𑀦 𑀯𑀝𑁆𑀝𑀺𑀓𑁆𑀔𑀬𑁂𑀦 𑀘 𑀕𑀢𑀫𑀕𑁆𑀕𑁄𑀧𑀺𑀲𑁆𑀲 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀢𑀫𑀜𑁆𑀜𑁄 𑀏𑀯𑀫𑀸𑀳 ‘‘𑀇𑀤𑀁 𑀑𑀴𑀸𑀭𑀺𑀓𑀁, 𑀇𑀫𑀺𑀲𑁆𑀲𑀸 𑀳𑀺 𑀯𑀝𑁆𑀝𑀺𑀬𑀸 𑀅𑀦𑀼𑀧𑀼𑀩𑁆𑀩𑁂𑀦 𑀟𑀬𑁆𑀳𑀫𑀸𑀦𑀸𑀬 𑀢𑀢𑀺𑀬𑀪𑀸𑀕𑁂 𑀢𑀢𑀺𑀬𑀪𑀸𑀕𑁂 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀧𑀤𑁂𑀲𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀢𑀫𑀜𑁆𑀜𑁄 𑀏𑀯𑀫𑀸𑀳 ‘‘𑀇𑀤𑀫𑁆𑀧𑀺 𑀑𑀴𑀸𑀭𑀺𑀓𑀁, 𑀇𑀫𑀺𑀲𑁆𑀲𑀸 𑀳𑀺 𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑁂 𑀅𑀟𑁆𑀠𑀗𑁆𑀕𑀼𑀮𑀟𑁆𑀠𑀗𑁆𑀕𑀼𑀮𑀦𑁆𑀢𑀭𑁂 ¶ 𑀢𑀦𑁆𑀢𑀼𑀫𑁆𑀳𑀺 𑀢𑀦𑁆𑀢𑀼𑀫𑁆𑀳𑀺 𑀅𑀁𑀲𑀼𑀫𑁆𑀳𑀺 𑀅𑀁𑀲𑀼𑀫𑁆𑀳𑀺 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀅𑀁𑀲𑀼𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀅𑀁𑀲𑀼𑀁 𑀧𑀦 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀲𑀓𑁆𑀓𑀸 𑀚𑀸𑀮𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺.

𑀢𑀢𑁆𑀣 ‘‘𑀢𑁂𑀮𑀓𑁆𑀔𑀬𑁂𑀦 𑀯𑀝𑁆𑀝𑀺𑀓𑁆𑀔𑀬𑁂𑀦 𑀘 𑀧𑀤𑀻𑀧𑀲𑁆𑀲 𑀕𑀢𑀫𑀕𑁆𑀕𑁄𑀧𑀺 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄 𑀯𑀲𑁆𑀲𑀲𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. ‘‘𑀯𑀝𑁆𑀝𑀺𑀬𑀸 𑀢𑀢𑀺𑀬𑀪𑀸𑀕𑁂 𑀢𑀢𑀺𑀬𑀪𑀸𑀕𑁂 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀧𑀤𑁂𑀲𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 ¶ 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀯𑀲𑁆𑀲𑀲𑀢𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. ‘‘𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑁂 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀤𑀲𑀯𑀲𑁆𑀲 𑀧𑀜𑁆𑀘𑀯𑀲𑁆𑀲 𑀘𑀢𑀼𑀯𑀲𑁆𑀲 𑀢𑀺𑀯𑀲𑁆𑀲 𑀤𑁆𑀯𑀺𑀯𑀲𑁆𑀲 𑀏𑀓𑀯𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. ‘‘𑀅𑀟𑁆𑀠𑀗𑁆𑀕𑀼𑀮𑀟𑁆𑀠𑀗𑁆𑀕𑀼𑀮𑀦𑁆𑀢𑀭𑁂 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀏𑀓𑁂𑀓𑀉𑀢𑀼𑀯𑀲𑁂𑀦 𑀏𑀓𑀁 𑀯𑀲𑁆𑀲𑀁 𑀢𑀺𑀥𑀸, 𑀙𑀥𑀸 𑀘 𑀯𑀺𑀪𑀚𑀺𑀢𑁆𑀯𑀸 𑀘𑀢𑀼𑀫𑀸𑀲-𑀤𑁆𑀯𑀺𑀫𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. ‘‘𑀢𑀦𑁆𑀢𑀼𑀫𑁆𑀳𑀺 𑀢𑀦𑁆𑀢𑀼𑀫𑁆𑀳𑀺 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀓𑀸𑀴𑀚𑀼𑀡𑁆𑀳𑀯𑀲𑁂𑀦, 𑀭𑀢𑁆𑀢𑀺𑀦𑁆𑀤𑀺𑀯𑀯𑀲𑁂𑀦, 𑀏𑀓𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀸𑀤𑀺𑀯𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. ‘‘𑀅𑀁𑀲𑀼𑀫𑁆𑀳𑀺 𑀅𑀁𑀲𑀼𑀫𑁆𑀳𑀺 𑀚𑀸𑀮𑀸 𑀇𑀢𑀭𑀻𑀢𑀭𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀅𑀪𑀺𑀓𑁆𑀓𑀫𑀸𑀤𑀺𑀯𑀲𑁂𑀦 𑀘𑁂𑀯 𑀉𑀤𑁆𑀥𑀭𑀡𑀸𑀤𑀻𑀲𑀼 𑀘 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁂 𑀭𑀽𑀧𑁂 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀦𑁆𑀢𑀺.

𑁭𑁧𑁨. 𑀲𑁄 𑀏𑀯𑀁 𑀦𑀸𑀦𑀸𑀓𑀸𑀭𑁂𑀳𑀺 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀭𑀽𑀧𑀁 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀆𑀳𑀸𑀭𑀫𑀬𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀢𑀢𑁆𑀭𑀸𑀲𑁆𑀲 𑀆𑀳𑀸𑀭𑀫𑀬𑀁 𑀭𑀽𑀧𑀁 𑀙𑀸𑀢𑀲𑀼𑀳𑀺𑀢𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺. 𑀙𑀸𑀢𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀁 𑀭𑀽𑀧𑀁 𑀳𑀺 𑀛𑀢𑁆𑀢𑀁 𑀳𑁄𑀢𑀺 𑀓𑀺𑀮𑀦𑁆𑀢𑀁, 𑀛𑀸𑀫𑀔𑀸𑀡𑀼𑀓𑁄 𑀯𑀺𑀬, 𑀅𑀗𑁆𑀕𑀸𑀭𑀧𑀘𑁆𑀙𑀺𑀬𑀁 𑀦𑀺𑀮𑀻𑀦𑀓𑀸𑀓𑁄 𑀯𑀺𑀬 𑀘 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁. 𑀲𑀼𑀳𑀺𑀢𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀁 𑀥𑀸𑀢𑀁 𑀧𑀻𑀡𑀺𑀢𑀁 𑀫𑀼𑀤𑀼 𑀲𑀺𑀦𑀺𑀤𑁆𑀥𑀁 𑀨𑀲𑁆𑀲𑀯𑀦𑁆𑀢𑀁 𑀳𑁄𑀢𑀺. 𑀲𑁄 𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀙𑀸𑀢𑀓𑀸𑀮𑁂 ¶ 𑀧𑀯𑀢𑁆𑀢𑀭𑀽𑀧𑀁 𑀲𑀼𑀳𑀺𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀲𑀼𑀳𑀺𑀢𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀫𑁆𑀧𑀺 𑀙𑀸𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁧𑁩. 𑀉𑀢𑀼𑀫𑀬𑀁 𑀲𑀻𑀢𑀼𑀡𑁆𑀳𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺. 𑀉𑀡𑁆𑀳𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀁 𑀭𑀽𑀧𑀁 𑀳𑀺 𑀛𑀢𑁆𑀢𑀁 𑀳𑁄𑀢𑀺 𑀓𑀺𑀮𑀦𑁆𑀢𑀁 𑀤𑀼𑀩𑁆𑀩𑀡𑁆𑀡𑀁. 𑀲𑀻𑀢𑀉𑀢𑀼𑀦𑀸 𑀲𑀫𑀼𑀝𑁆𑀞𑀺𑀢𑀁 𑀭𑀽𑀧𑀁 𑀥𑀸𑀢𑀁 𑀧𑀻𑀡𑀺𑀢𑀁 𑀲𑀺𑀦𑀺𑀤𑁆𑀥𑀁 𑀳𑁄𑀢𑀺. 𑀲𑁄 𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀉𑀡𑁆𑀳𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀲𑀻𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀲𑀻𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀉𑀡𑁆𑀳𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁧𑁪. 𑀓𑀫𑁆𑀫𑀚𑀁 𑀆𑀬𑀢𑀦𑀤𑁆𑀯𑀸𑀭𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀁 𑀳𑀺 𑀘𑀓𑁆𑀔𑀼𑀓𑀸𑀬𑀪𑀸𑀯𑀤𑀲𑀓𑀯𑀲𑁂𑀦 ¶ 𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺, 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀧𑀦 𑀢𑁂𑀲𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀺 𑀘𑀢𑀼𑀯𑀻𑀲𑀢𑀻𑀢𑀺 𑀘𑀢𑀼𑀧𑀡𑁆𑀡𑀸𑀲 𑀳𑁄𑀦𑁆𑀢𑀺. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀤𑁆𑀯𑀸𑀭𑁂𑀲𑀼. 𑀓𑀸𑀬𑀤𑁆𑀯𑀸𑀭𑁂 𑀓𑀸𑀬𑀪𑀸𑀯𑀤𑀲𑀓𑀯𑀲𑁂𑀦 𑀘𑁂𑀯 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀘𑀢𑀼𑀘𑀢𑁆𑀢𑀸𑀮𑀻𑀲. 𑀫𑀦𑁄𑀤𑁆𑀯𑀸𑀭𑁂 𑀳𑀤𑀬𑀯𑀢𑁆𑀣𑀼𑀓𑀸𑀬𑀪𑀸𑀯𑀤𑀲𑀓𑀯𑀲𑁂𑀦 𑀘𑁂𑀯 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀘𑀢𑀼𑀧𑀡𑁆𑀡𑀸𑀲𑀫𑁂𑀯.

𑀲𑁄 𑀲𑀩𑁆𑀩𑀫𑁆𑀧𑀺 𑀢𑀁 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀯𑀢𑁆𑀢𑀭𑀽𑀧𑀁 𑀲𑁄𑀢𑀤𑁆𑀯𑀸𑀭𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀤𑁆𑀯𑀸𑀭𑁂 𑀧𑀯𑀢𑁆𑀢𑀭𑀽𑀧𑀁 𑀖𑀸𑀦𑀤𑁆𑀯𑀸𑀭𑀁. 𑀖𑀸𑀦𑀤𑁆𑀯𑀸𑀭𑁂 𑀧𑀯𑀢𑁆𑀢𑀭𑀽𑀧𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑀁. 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀧𑀯𑀢𑁆𑀢𑀭𑀽𑀧𑀁 𑀓𑀸𑀬𑀤𑁆𑀯𑀸𑀭𑀁. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀭𑀽𑀧𑀁 𑀫𑀦𑁄𑀤𑁆𑀯𑀸𑀭𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑁭𑁧𑁫. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑁄𑀫𑀦𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀺𑀢𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀺𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀳𑀺 𑀭𑀽𑀧𑀁 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼 𑀧𑀻𑀡𑀺𑀢𑀁 𑀨𑀲𑁆𑀲𑀯𑀦𑁆𑀢𑀁 𑀳𑁄𑀢𑀺. 𑀤𑁄𑀫𑀦𑀲𑁆𑀲𑀺𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀛𑀢𑁆𑀢𑀁 𑀓𑀺𑀮𑀦𑁆𑀢𑀁 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺. 𑀲𑁄 𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀺𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀤𑁄𑀫𑀦𑀲𑁆𑀲𑀺𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀤𑁄𑀫𑀦𑀲𑁆𑀲𑀺𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀲𑁄𑀫𑀦𑀲𑁆𑀲𑀺𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺.

𑀢𑀲𑁆𑀲𑁂𑀯𑀁 ¶ 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑀬𑀢𑁄 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀺 𑁋

𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

𑀘𑀼𑀮𑁆𑀮𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀁 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁄𑀳𑀺𑀢𑀸.

𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀯 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

𑀅𑀦𑀦𑁆𑀢𑀭𑀸 ¶ 𑀘 𑀬𑁂 𑀪𑀕𑁆𑀕𑀸, 𑀬𑁂 𑀘 𑀪𑀕𑁆𑀕𑀸 𑀅𑀦𑀸𑀕𑀢𑁂;

𑀢𑀤𑀦𑁆𑀢𑀭𑀸 𑀦𑀺𑀭𑀼𑀤𑁆𑀥𑀸𑀦𑀁, 𑀯𑁂𑀲𑀫𑀁 𑀦𑀢𑁆𑀣𑀺 𑀮𑀓𑁆𑀔𑀡𑁂.

𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸.

𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀦𑀺𑀩𑁆𑀩𑀢𑁆𑀢𑀸 𑀬𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸.

𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀪𑀗𑁆𑀕𑁄 𑀦𑁂𑀲𑀁 𑀧𑀼𑀭𑀓𑁆𑀔𑀢𑁄;

𑀧𑀮𑁄𑀓𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀼𑀭𑀸𑀡𑁂𑀳𑀺 𑀅𑀫𑀺𑀲𑁆𑀲𑀺𑀢𑀸.

𑀅𑀤𑀲𑁆𑀲𑀦𑀢𑁄 𑀆𑀬𑀦𑁆𑀢𑀺, 𑀪𑀕𑁆𑀕𑀸 𑀕𑀘𑁆𑀙𑀦𑁆𑀢𑀼𑀤𑀲𑁆𑀲𑀦𑀁;

𑀯𑀺𑀚𑁆𑀚𑀼𑀧𑁆𑀧𑀸𑀤𑁄𑀯 𑀆𑀓𑀸𑀲𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺 𑀘𑀸𑀢𑀺. (𑀫𑀳𑀸𑀦𑀺. 𑁧𑁦);

𑁭𑁧𑁬. 𑀏𑀯𑀁 𑀆𑀳𑀸𑀭𑀫𑀬𑀸𑀤𑀻𑀲𑀼 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀦 𑀥𑀫𑁆𑀫𑀢𑀸𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺. 𑀥𑀫𑁆𑀫𑀢𑀸𑀭𑀽𑀧𑀁 𑀦𑀸𑀫 𑀩𑀳𑀺𑀤𑁆𑀥𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀅𑀬𑀮𑁄𑀳𑀢𑀺𑀧𑀼𑀲𑀻𑀲𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀮𑁄𑀳𑀺𑀢𑀗𑁆𑀕𑀫𑀲𑀸𑀭𑀕𑀮𑁆𑀮𑀪𑀽𑀫𑀺𑀧𑀸𑀲𑀸𑀡𑀧𑀩𑁆𑀩𑀢𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀪𑁂𑀤𑀁 𑀯𑀺𑀯𑀝𑁆𑀝𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀚𑁆𑀚𑀦𑀓𑀭𑀽𑀧𑀁. 𑀢𑀤𑀲𑁆𑀲 𑀅𑀲𑁄𑀓𑀗𑁆𑀓𑀼𑀭𑀸𑀤𑀺𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺.

𑀅𑀲𑁄𑀓𑀗𑁆𑀓𑀼𑀭𑀁 𑀳𑀺 𑀆𑀤𑀺𑀢𑁄𑀯 𑀢𑀦𑀼𑀭𑀢𑁆𑀢𑀁 𑀳𑁄𑀢𑀺, 𑀢𑀢𑁄 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀖𑀦𑀭𑀢𑁆𑀢𑀁, 𑀧𑀼𑀦 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀫𑀦𑁆𑀤𑀭𑀢𑁆𑀢𑀁, 𑀢𑀢𑁄 𑀢𑀭𑀼𑀡𑀧𑀮𑁆𑀮𑀯𑀯𑀡𑁆𑀡𑀁, 𑀢𑀢𑁄 ¶ 𑀧𑀭𑀺𑀡𑀢𑀧𑀮𑁆𑀮𑀯𑀯𑀡𑁆𑀡𑀁, 𑀢𑀢𑁄 𑀳𑀭𑀺𑀢𑀧𑀡𑁆𑀡𑀯𑀡𑁆𑀡𑀁. 𑀢𑀢𑁄 𑀦𑀻𑀮𑀧𑀡𑁆𑀡𑀯𑀡𑁆𑀡𑀁. 𑀢𑀢𑁄 𑀦𑀻𑀮𑀧𑀡𑁆𑀡𑀯𑀡𑁆𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀪𑀸𑀕𑀭𑀽𑀧𑀲𑀦𑁆𑀢𑀢𑀺𑀫𑀦𑀼𑀧𑁆𑀧𑀩𑀦𑁆𑀥𑀸𑀧𑀬𑀫𑀸𑀦𑀁 𑀲𑀁𑀯𑀘𑁆𑀙𑀭𑀫𑀢𑁆𑀢𑁂𑀦 𑀧𑀡𑁆𑀟𑀼𑀧𑀮𑀸𑀲𑀁 𑀳𑀼𑀢𑁆𑀯𑀸 𑀯𑀡𑁆𑀝𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺.

𑀲𑁄 𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀢𑀦𑀼𑀭𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀖𑀦𑀭𑀢𑁆𑀢𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀖𑀦𑀭𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀫𑀦𑁆𑀤𑀭𑀢𑁆𑀢𑀓𑀸𑀮𑀁. 𑀫𑀦𑁆𑀤𑀭𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀭𑀽𑀧𑀁 𑀢𑀭𑀼𑀡𑀧𑀮𑁆𑀮𑀯𑀯𑀡𑁆𑀡𑀓𑀸𑀮𑀁. 𑀢𑀭𑀼𑀡𑀧𑀮𑁆𑀮𑀯𑀯𑀡𑁆𑀡𑀓𑀸𑀮𑁂 𑀧𑀯𑀢𑁆𑀢𑀁 𑀧𑀭𑀺𑀡𑀢𑀧𑀮𑁆𑀮𑀯𑀯𑀡𑁆𑀡𑀓𑀸𑀮𑀁. 𑀧𑀭𑀺𑀡𑀢𑀧𑀮𑁆𑀮𑀯𑀯𑀡𑁆𑀡𑀓𑀸𑀮𑁂 𑀧𑀯𑀢𑁆𑀢𑀁 𑀳𑀭𑀺𑀢𑀧𑀡𑁆𑀡𑀯𑀡𑁆𑀡𑀓𑀸𑀮𑀁 ¶ . 𑀳𑀭𑀺𑀢𑀧𑀡𑁆𑀡𑀓𑀸𑀮𑁂 𑀧𑀯𑀢𑁆𑀢𑀁 𑀦𑀻𑀮𑀧𑀡𑁆𑀡𑀯𑀡𑁆𑀡𑀓𑀸𑀮𑀁. 𑀦𑀻𑀮𑀧𑀡𑁆𑀡𑀯𑀡𑁆𑀡𑀓𑀸𑀮𑁂 𑀧𑀯𑀢𑁆𑀢𑀁 𑀧𑀡𑁆𑀟𑀼𑀧𑀮𑀸𑀲𑀓𑀸𑀮𑀁. 𑀧𑀡𑁆𑀟𑀼𑀧𑀮𑀸𑀲𑀓𑀸𑀮𑁂 𑀧𑀯𑀢𑁆𑀢𑀁 𑀯𑀡𑁆𑀝𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑀓𑀸𑀮𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺, 𑀏𑀯𑀁 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀫𑁆𑀧𑀺 𑀥𑀫𑁆𑀫𑀢𑀸𑀭𑀽𑀧𑀁 𑀲𑀫𑁆𑀫𑀲𑀢𑀺.

𑀏𑀯𑀁 𑀢𑀸𑀯 𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺.

𑀅𑀭𑀽𑀧𑀲𑀢𑁆𑀢𑀓𑀲𑀫𑁆𑀫𑀲𑀦𑀓𑀣𑀸

𑁭𑁧𑁭. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀭𑀽𑀧𑀲𑀢𑁆𑀢𑀓𑀯𑀲𑁂𑀦𑀸’’𑀢𑀺, 𑀢𑀢𑁆𑀣 𑀅𑀬𑀁 𑀫𑀸𑀢𑀺𑀓𑀸 𑁋 𑀓𑀮𑀸𑀧𑀢𑁄, 𑀬𑀫𑀓𑀢𑁄, 𑀔𑀡𑀺𑀓𑀢𑁄, 𑀧𑀝𑀺𑀧𑀸𑀝𑀺𑀢𑁄, 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀢𑁄, 𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀢𑁄, 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁄𑀢𑀺.

𑀢𑀢𑁆𑀣 𑀓𑀮𑀸𑀧𑀢𑁄𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸. 𑀓𑀣𑀁 𑀓𑀮𑀸𑀧𑀢𑁄 𑀲𑀫𑁆𑀫𑀲𑀢𑀻𑀢𑀺? 𑀇𑀥 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀬𑁂 𑀇𑀫𑁂 ‘𑀓𑁂𑀲𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’𑀢𑀺 𑀲𑀫𑁆𑀫𑀲𑀦𑁂 𑀉𑀧𑁆𑀧𑀦𑁆𑀦𑀸 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸, 𑀬𑁂 𑀘 ‘𑀮𑁄𑀫𑀸…𑀧𑁂… 𑀫𑀢𑁆𑀣𑀮𑀼𑀗𑁆𑀕𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’𑀢𑀺 𑀲𑀫𑁆𑀫𑀲𑀦𑁂 𑀉𑀧𑁆𑀧𑀦𑁆𑀦𑀸 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀇𑀢𑀭𑀻𑀢𑀭𑀁 𑀅𑀧𑁆𑀧𑀢𑁆𑀯𑀸 𑀧𑀩𑁆𑀩𑀁𑀧𑀩𑁆𑀩𑀁 𑀑𑀥𑀺𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸 𑀯𑀺𑀬 𑀢𑀝𑀢𑀝𑀸𑀬𑀦𑁆𑀢𑀸 𑀯𑀺𑀦𑀝𑁆𑀞𑀸, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺. 𑀅𑀬𑀁 𑀢𑀸𑀯 𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀦𑀬𑁄.

𑀅𑀭𑀺𑀬𑀯𑀁𑀲𑀓𑀣𑀸𑀬𑀁 𑀧𑀦 ‘‘𑀳𑁂𑀝𑁆𑀞𑀸 𑀭𑀽𑀧𑀲𑀢𑁆𑀢𑀓𑁂 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 ‘𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’𑀢𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀅𑀧𑀭𑁂𑀦 𑀘𑀺𑀢𑁆𑀢𑁂𑀦 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’𑀢𑀺 𑀲𑀫𑁆𑀫𑀲𑀦𑁆𑀢𑁄 ‘𑀓𑀮𑀸𑀧𑀢𑁄 ¶ 𑀲𑀫𑁆𑀫𑀲𑀢𑀻’𑀢𑀺’’ 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀢𑀭𑀁. 𑀢𑀲𑁆𑀫𑀸 𑀲𑁂𑀲𑀸𑀦𑀺𑀧𑀺 𑀢𑁂𑀦𑁂𑀯 𑀦𑀬𑁂𑀦 𑀯𑀺𑀪𑀚𑀺𑀲𑁆𑀲𑀸𑀫.

𑁭𑁧𑁮. 𑀬𑀫𑀓𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀆𑀤𑀸𑀦𑀦𑀺𑀓𑁆𑀔𑁂𑀧𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀫𑁆𑀧𑀺 𑀘𑀺𑀢𑁆𑀢𑀁 𑀅𑀧𑀭𑁂𑀦 𑀘𑀺𑀢𑁆𑀢𑁂𑀦 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀢𑀺. 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑀁, 𑀆𑀳𑀸𑀭𑀫𑀬𑀁, 𑀉𑀢𑀼𑀫𑀬𑀁, 𑀓𑀫𑁆𑀫𑀚𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀥𑀫𑁆𑀫𑀢𑀸𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 ¶ 𑀲𑀫𑁆𑀫𑀲𑀺𑀢𑁆𑀯𑀸 𑀢𑀫𑁆𑀧𑀺 𑀘𑀺𑀢𑁆𑀢𑀁 𑀅𑀧𑀭𑁂𑀦 𑀘𑀺𑀢𑁆𑀢𑁂𑀦 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀢𑀺. 𑀏𑀯𑀁 𑀬𑀫𑀓𑀢𑁄 𑀲𑀫𑁆𑀫𑀲𑀢𑀺 𑀦𑀸𑀫.

𑁭𑁧𑁯. 𑀔𑀡𑀺𑀓𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀆𑀤𑀸𑀦𑀦𑀺𑀓𑁆𑀔𑁂𑀧𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀧𑀞𑀫𑀘𑀺𑀢𑁆𑀢𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦, 𑀤𑀼𑀢𑀺𑀬𑀁 𑀢𑀢𑀺𑀬𑁂𑀦, 𑀢𑀢𑀺𑀬𑀁 𑀘𑀢𑀼𑀢𑁆𑀣𑁂𑀦, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑁂𑀦 ‘‘𑀏𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀢𑀺. 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑀁, 𑀆𑀳𑀸𑀭𑀫𑀬𑀁, 𑀉𑀢𑀼𑀫𑀬𑀁, 𑀓𑀫𑁆𑀫𑀚𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀥𑀫𑁆𑀫𑀢𑀸𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀧𑀞𑀫𑀘𑀺𑀢𑁆𑀢𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦, 𑀤𑀼𑀢𑀺𑀬𑀁 𑀢𑀢𑀺𑀬𑁂𑀦, 𑀢𑀢𑀺𑀬𑀁 𑀘𑀢𑀼𑀢𑁆𑀣𑁂𑀦, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑁂𑀦 ‘‘𑀏𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀢𑀺. 𑀏𑀯𑀁 𑀭𑀽𑀧𑀧𑀭𑀺𑀕𑁆𑀕𑀸𑀳𑀓𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀲𑀫𑁆𑀫𑀲𑀦𑁆𑀢𑁄 𑀔𑀡𑀺𑀓𑀢𑁄 𑀲𑀫𑁆𑀫𑀲𑀢𑀺 𑀦𑀸𑀫.

𑁭𑁨𑁦. 𑀧𑀝𑀺𑀧𑀸𑀝𑀺𑀢𑁄𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀧𑀞𑀫𑀘𑀺𑀢𑁆𑀢𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦, 𑀤𑀼𑀢𑀺𑀬𑀁 𑀢𑀢𑀺𑀬𑁂𑀦, 𑀢𑀢𑀺𑀬𑀁 𑀘𑀢𑀼𑀢𑁆𑀣𑁂𑀦…𑀧𑁂… 𑀤𑀲𑀫𑀁 𑀏𑀓𑀸𑀤𑀲𑀫𑁂𑀦 ‘‘𑀏𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀢𑀺. 𑀯𑀬𑁄𑀯𑀼𑀟𑁆𑀠𑀢𑁆𑀣𑀗𑁆𑀕𑀫𑀭𑀽𑀧𑀁, 𑀆𑀳𑀸𑀭𑀫𑀬𑀁, 𑀉𑀢𑀼𑀫𑀬𑀁, 𑀓𑀫𑁆𑀫𑀚𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀥𑀫𑁆𑀫𑀢𑀸𑀭𑀽𑀧𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀧𑀞𑀫𑀘𑀺𑀢𑁆𑀢𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦, 𑀤𑀼𑀢𑀺𑀬𑀁 𑀢𑀢𑀺𑀬𑁂𑀦, 𑀢𑀢𑀺𑀬𑀁 𑀘𑀢𑀼𑀢𑁆𑀣𑁂𑀦…𑀧𑁂… 𑀤𑀲𑀫𑀁 𑀏𑀓𑀸𑀤𑀲𑀫𑁂𑀦 ‘‘𑀏𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸 𑀧𑀝𑀺𑀧𑀸𑀝𑀺𑀬𑀸 𑀲𑀓𑀮𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀲𑀫𑁆𑀫𑀲𑀺𑀢𑀼𑀁 𑀯𑀝𑁆𑀝𑁂𑀬𑁆𑀬. 𑀬𑀸𑀯 𑀤𑀲𑀫𑀘𑀺𑀢𑁆𑀢𑀲𑀫𑁆𑀫𑀲𑀦𑀸 𑀧𑀦 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀧𑀕𑀼𑀡𑀁 𑀳𑁄𑀢𑀺. 𑀢𑀲𑁆𑀫𑀸 𑀤𑀲𑀫𑁂𑀬𑁂𑀯 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀫𑁆𑀫𑀲𑀦𑁆𑀢𑁄 𑀧𑀝𑀺𑀧𑀸𑀝𑀺𑀢𑁄 𑀲𑀫𑁆𑀫𑀲𑀢𑀺 𑀦𑀸𑀫.

𑁭𑁨𑁧. 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀢𑁄 𑀫𑀸𑀦𑀉𑀕𑁆𑀖𑀸𑀝𑀦𑀢𑁄 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁄𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀯𑀺𑀲𑀼𑀁 𑀲𑀫𑁆𑀫𑀲𑀦𑀦𑀬𑁄 𑀦𑀸𑀫 𑀦𑀢𑁆𑀣𑀺. 𑀬𑀁 𑀧𑀦𑁂𑀢𑀁 𑀳𑁂𑀝𑁆𑀞𑀸 ¶ 𑀭𑀽𑀧𑀁, 𑀇𑀥 𑀘 𑀅𑀭𑀽𑀧𑀁 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀁 𑀧𑀲𑁆𑀲𑀦𑁆𑀢𑁄 𑀭𑀽𑀧𑀸𑀭𑀽𑀧𑀢𑁄 𑀉𑀤𑁆𑀥𑀁 𑀅𑀜𑁆𑀜𑀁 𑀲𑀢𑁆𑀢𑀁 𑀦𑀸𑀫 𑀦 𑀧𑀲𑁆𑀲𑀢𑀺. 𑀲𑀢𑁆𑀢𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀲𑀜𑁆𑀜𑀸 𑀉𑀕𑁆𑀖𑀸𑀝𑀺𑀢𑀸 𑀳𑁄𑀢𑀺. 𑀲𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑀺𑀢𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀢𑁄 𑀤𑀺𑀝𑁆𑀞𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀤𑀺𑀝𑁆𑀞𑀺𑀬𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀬 𑀤𑀺𑀝𑁆𑀞𑀺 𑀉𑀕𑁆𑀖𑀸𑀝𑀺𑀢𑀸 𑀦𑀸𑀫 𑀳𑁄𑀢𑀺. 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀺𑀢𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀢𑁄 𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀫𑀸𑀦𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀫𑀸𑀦𑁄 𑀲𑀫𑀼𑀕𑁆𑀖𑀸𑀝𑀺𑀢𑁄 𑀦𑀸𑀫 𑀳𑁄𑀢𑀺. 𑀫𑀸𑀦𑀲𑀫𑀼𑀕𑁆𑀖𑀸𑀝𑀺𑀢𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀢𑁄 𑀢𑀡𑁆𑀳𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀡𑁆𑀳𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀺𑀬𑀸 𑀦𑀺𑀓𑀦𑁆𑀢𑀺 𑀧𑀭𑀺𑀬𑀸𑀤𑀺𑀡𑁆𑀡𑀸 𑀦𑀸𑀫 𑀳𑁄𑀢𑀻𑀢𑀺 𑀇𑀤𑀁 𑀢𑀸𑀯 𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀭𑀺𑀬𑀯𑀁𑀲𑀓𑀣𑀸𑀬𑀁 ¶ 𑀧𑀦 ‘‘𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀢𑁄 𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀢𑁄 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁄’’𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄.

‘‘𑀅𑀳𑀁 𑀯𑀺𑀧𑀲𑁆𑀲𑀸𑀫𑀺, 𑀫𑀫 𑀯𑀺𑀧𑀲𑁆𑀲𑀦𑀸’’𑀢𑀺 𑀕𑀡𑁆𑀳𑀢𑁄 𑀳𑀺 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀝𑀦𑀁 𑀦𑀸𑀫 𑀦 𑀳𑁄𑀢𑀺. ‘‘𑀲𑀗𑁆𑀔𑀸𑀭𑀸𑀯 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀦𑁆𑀢𑀺 𑀲𑀫𑁆𑀫𑀲𑀦𑁆𑀢𑀺 𑀯𑀯𑀢𑁆𑀣𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻’’𑀢𑀺 𑀕𑀡𑁆𑀳𑀢𑁄 𑀧𑀦 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀁 𑀦𑀸𑀫 𑀳𑁄𑀢𑀺.

‘‘𑀲𑀼𑀝𑁆𑀞𑀼 𑀯𑀺𑀧𑀲𑁆𑀲𑀸𑀫𑀺, 𑀫𑀦𑀸𑀧𑀁 𑀯𑀺𑀧𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑁄 𑀫𑀸𑀦𑀲𑀫𑀼𑀕𑁆𑀖𑀸𑀝𑁄 𑀦𑀸𑀫 𑀦 𑀳𑁄𑀢𑀺. ‘‘𑀲𑀗𑁆𑀔𑀸𑀭𑀸𑀯 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀦𑁆𑀢𑀺 𑀲𑀫𑁆𑀫𑀲𑀦𑁆𑀢𑀺 𑀯𑀯𑀢𑁆𑀣𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻’’𑀢𑀺 𑀕𑀡𑁆𑀳𑀢𑁄 𑀧𑀦 𑀫𑀸𑀦𑀲𑀫𑀼𑀕𑁆𑀖𑀸𑀝𑁄 𑀦𑀸𑀫 𑀳𑁄𑀢𑀺.

‘‘𑀯𑀺𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺. ‘‘𑀲𑀗𑁆𑀔𑀸𑀭𑀸𑀯 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀦𑁆𑀢𑀺 𑀲𑀫𑁆𑀫𑀲𑀦𑁆𑀢𑀺 𑀯𑀯𑀢𑁆𑀣𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻’’𑀢𑀺 𑀕𑀡𑁆𑀳𑀢𑁄 𑀧𑀦 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺.

𑀲𑀘𑁂 𑀲𑀗𑁆𑀔𑀸𑀭𑀸 𑀅𑀢𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀅𑀢𑁆𑀢𑀸𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑁂𑀬𑁆𑀬𑀼𑀁, 𑀅𑀦𑀢𑁆𑀢𑀸 𑀘 𑀧𑀦 𑀅𑀢𑁆𑀢𑀸𑀢𑀺 𑀕𑀳𑀺𑀢𑀸, 𑀢𑀲𑁆𑀫𑀸 𑀢𑁂 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸, 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸𑀢𑀺 𑀧𑀲𑁆𑀲𑀢𑁄 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀁 𑀦𑀸𑀫 𑀳𑁄𑀢𑀺.

𑀲𑀘𑁂 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀪𑀯𑁂𑀬𑁆𑀬𑀼𑀁, 𑀦𑀺𑀘𑁆𑀘𑀸𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑁂𑀬𑁆𑀬𑀼𑀁, 𑀅𑀦𑀺𑀘𑁆𑀘𑀸 𑀘 𑀧𑀦 𑀦𑀺𑀘𑁆𑀘𑀸𑀢𑀺 𑀕𑀳𑀺𑀢𑀸, 𑀢𑀲𑁆𑀫𑀸 𑀢𑁂 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸, 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸𑀢𑀺 𑀧𑀲𑁆𑀲𑀢𑁄 𑀫𑀸𑀦𑀲𑀫𑀼𑀕𑁆𑀖𑀸𑀝𑁄 𑀦𑀸𑀫 𑀳𑁄𑀢𑀺.

𑀲𑀘𑁂 ¶ 𑀲𑀗𑁆𑀔𑀸𑀭𑀸 𑀲𑀼𑀔𑀸 𑀪𑀯𑁂𑀬𑁆𑀬𑀼𑀁, 𑀲𑀼𑀔𑀸𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸 𑀘 𑀧𑀦 𑀲𑀼𑀔𑀸𑀢𑀺 𑀕𑀳𑀺𑀢𑀸, 𑀢𑀲𑁆𑀫𑀸 𑀢𑁂 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸𑀢𑀺 𑀧𑀲𑁆𑀲𑀢𑁄 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺.

𑀏𑀯𑀁 𑀲𑀗𑁆𑀔𑀸𑀭𑁂 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀝𑀦𑀁 𑀦𑀸𑀫 𑀳𑁄𑀢𑀺. 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀁 ¶ 𑀦𑀸𑀫 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺. 𑀇𑀢𑀺 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺.

𑀏𑀯𑀁 𑀅𑀭𑀽𑀧𑀲𑀢𑁆𑀢𑀓𑀯𑀲𑁂𑀦𑀸𑀧𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀦𑀲𑁆𑀲 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀧𑀕𑀼𑀡𑀁 𑀳𑁄𑀢𑀺.

𑁭𑁨𑁨. 𑀲𑁄 𑀏𑀯𑀁 𑀧𑀕𑀼𑀡𑀭𑀽𑀧𑀸𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁄 𑀬𑀸 𑀉𑀧𑀭𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀲𑀩𑁆𑀩𑀸𑀓𑀸𑀭𑀢𑁄 𑀧𑀢𑁆𑀢𑀩𑁆𑀩𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸, 𑀢𑀸𑀲𑀁 𑀇𑀥𑁂𑀯 𑀢𑀸𑀯 𑀏𑀓𑀤𑁂𑀲𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑁂 𑀥𑀫𑁆𑀫𑁂 𑀧𑀚𑀳𑀢𑀺.

𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀧𑀜𑁆𑀜𑀸. 𑀬𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺, 𑀔𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀖𑀦𑀲𑀜𑁆𑀜𑀁 𑀧𑀚𑀳𑀢𑀺, 𑀯𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀆𑀬𑀽𑀳𑀦𑀁 𑀧𑀚𑀳𑀢𑀺, 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀥𑀼𑀯𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑀁 𑀧𑀚𑀳𑀢𑀺, 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀧𑀡𑀺𑀥𑀺𑀁 𑀧𑀚𑀳𑀢𑀺, 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀆𑀮𑀬𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀅𑀧𑁆𑀧𑀝𑀺𑀲𑀗𑁆𑀔𑀁 𑀧𑀚𑀳𑀢𑀺, 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺.

𑀢𑀸𑀲𑀼 ¶ 𑀬𑀲𑁆𑀫𑀸 𑀇𑀫𑀺𑀦𑀸 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀯𑀲𑁂𑀦 𑀲𑀗𑁆𑀔𑀸𑀭𑀸 𑀤𑀺𑀝𑁆𑀞𑀸, 𑀢𑀲𑁆𑀫𑀸 𑀅𑀦𑀺𑀘𑁆𑀘-𑀤𑀼𑀓𑁆𑀔-𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀬𑀲𑁆𑀫𑀸 𑀘 ‘‘𑀬𑀸 𑀘 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁’’. 𑀢𑀣𑀸 ‘‘𑀬𑀸 𑀘 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁’’. ‘‘𑀬𑀸 𑀘 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁨𑁭) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀸𑀧𑀺 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺.

𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸 ¶ 𑀧𑀦 𑀲𑀩𑁆𑀩𑀸𑀧𑀺 𑀯𑀺𑀧𑀲𑁆𑀲𑀦𑀸. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀏𑀯 𑀲𑀗𑁆𑀕𑀳𑀺𑀢𑀁. 𑀇𑀢𑀺 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀧𑀝𑀺𑀯𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀲𑁂𑀲𑁂𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀓𑀺𑀜𑁆𑀘𑀺 𑀧𑀝𑀺𑀯𑀺𑀤𑁆𑀥𑀁, 𑀓𑀺𑀜𑁆𑀘𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁, 𑀢𑁂𑀲𑀁 𑀯𑀺𑀪𑀸𑀕𑀁 𑀧𑀭𑀢𑁄 𑀆𑀯𑀺𑀓𑀭𑀺𑀲𑁆𑀲𑀸𑀫.

𑀬𑀤𑁂𑀯 𑀳𑀺 𑀧𑀝𑀺𑀯𑀺𑀤𑁆𑀥𑀁, 𑀢𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀧𑀕𑀼𑀡𑀭𑀽𑀧𑀸𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁄 𑀬𑀸 𑀉𑀧𑀭𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀲𑀩𑁆𑀩𑀸𑀓𑀸𑀭𑀢𑁄 𑀧𑀢𑁆𑀢𑀩𑁆𑀩𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸. 𑀢𑀸𑀲𑀁 𑀇𑀥𑁂𑀯 𑀢𑀸𑀯 𑀏𑀓𑀤𑁂𑀲𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑁂 𑀥𑀫𑁆𑀫𑁂 𑀧𑀚𑀳𑀢𑀻’’𑀢𑀺.

𑀉𑀤𑀬𑀩𑁆𑀩𑀬𑀜𑀸𑀡𑀓𑀣𑀸

𑁭𑁨𑁩. 𑀲𑁄 𑀏𑀯𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀓𑁆𑀔𑀸𑀦𑀁 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀳𑀸𑀦𑁂𑀦 𑀯𑀺𑀲𑀼𑀤𑁆𑀥𑀜𑀸𑀡𑁄 𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀧𑀸𑀭𑀁 𑀕𑀦𑁆𑀢𑁆𑀯𑀸, 𑀬𑀁 𑀢𑀁 𑀲𑀫𑁆𑀫𑀲𑀦𑀜𑀸𑀡𑀸𑀦𑀦𑁆𑀢𑀭𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁬) 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀬𑁄𑀕𑀁 𑀆𑀭𑀪𑀢𑀺. 𑀆𑀭𑀪𑀫𑀸𑀦𑁄 𑀘 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀆𑀭𑀪𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁? 𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁. 𑀚𑀸𑀢𑀸 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀚𑀸𑀢𑀁 𑀘𑀓𑁆𑀔𑀼…𑀧𑁂… 𑀚𑀸𑀢𑁄 𑀪𑀯𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁯).

𑀲𑁄 ¶ 𑀇𑀫𑀺𑀦𑀸 𑀧𑀸𑀴𑀺𑀦𑀬𑁂𑀦 𑀚𑀸𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀚𑀸𑀢𑀺𑀁 𑀉𑀧𑁆𑀧𑀸𑀤𑀁 𑀅𑀪𑀺𑀦𑀯𑀸𑀓𑀸𑀭𑀁 ‘‘𑀉𑀤𑀬𑁄’’𑀢𑀺, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀔𑀬𑀁 𑀪𑀗𑁆𑀕𑀁 ‘‘𑀯𑀬𑁄’’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀇𑀫𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀭𑀸𑀲𑀺 𑀯𑀸 𑀦𑀺𑀘𑀬𑁄 𑀯𑀸 𑀦𑀢𑁆𑀣𑀺, 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀭𑀸𑀲𑀺𑀢𑁄 𑀯𑀸 𑀦𑀺𑀘𑀬𑀢𑁄 𑀯𑀸 𑀆𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲𑀸𑀧𑀺 𑀤𑀺𑀲𑀸𑀯𑀺𑀤𑀺𑀲𑀸𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀺𑀢𑁄 𑀦𑀺𑀘𑀬𑀢𑁄 𑀦𑀺𑀥𑀸𑀦𑀢𑁄 𑀅𑀯𑀝𑁆𑀞𑀸𑀦𑀁 ¶ 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀯𑀻𑀡𑀸𑀬 𑀯𑀸𑀤𑀺𑀬𑀫𑀸𑀦𑀸𑀬 𑀉𑀧𑁆𑀧𑀦𑁆𑀦𑀲𑀤𑁆𑀤𑀲𑁆𑀲 𑀦𑁂𑀯 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀲𑀦𑁆𑀦𑀺𑀘𑀬𑁄 𑀅𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀦𑁆𑀦𑀺𑀘𑀬𑀢𑁄 𑀆𑀕𑀢𑁄, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲 𑀤𑀺𑀲𑀸𑀯𑀺𑀤𑀺𑀲𑀸𑀕𑀫𑀦𑀁 𑀅𑀢𑁆𑀣𑀺, 𑀦 𑀦𑀺𑀭𑀼𑀤𑁆𑀥𑁄 𑀓𑀢𑁆𑀣𑀘𑀺 𑀲𑀦𑁆𑀦𑀺𑀘𑀺𑀢𑁄 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀯𑀻𑀡𑀜𑁆𑀘 𑀉𑀧𑀯𑀻𑀡𑀜𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺. 𑀏𑀯𑀁 𑀲𑀩𑁆𑀩𑁂𑀧𑀺 𑀭𑀽𑀧𑀸𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺.

𑁭𑁨𑁪. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀉𑀤𑀬𑀩𑁆𑀩𑀬𑀫𑀦𑀲𑀺𑀓𑀸𑀭𑀁 𑀓𑀢𑁆𑀯𑀸 𑀧𑀼𑀦 𑀬𑀸𑀦𑀺 𑀏𑀢𑀲𑁆𑀲𑁂𑀯 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲 𑀯𑀺𑀪𑀗𑁆𑀕𑁂 𑁋

‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸… 𑀓𑀫𑁆𑀫𑀲𑀫𑀼𑀤𑀬𑀸… 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸… 𑀓𑀫𑁆𑀫𑀦𑀺𑀭𑁄𑀥𑀸… 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄𑀧𑀺 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺’’ (𑀧𑀝𑀺. 𑀫. 𑁧.𑁫𑁦).

𑀢𑀣𑀸 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸… 𑀓𑀫𑁆𑀫𑀲𑀫𑀼𑀤𑀬𑀸… 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 ¶ 𑀉𑀤𑀬𑀁 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸… 𑀢𑀡𑁆𑀳𑀸𑀦𑀺𑀭𑁄𑀥𑀸… 𑀓𑀫𑁆𑀫𑀦𑀺𑀭𑁄𑀥𑀸… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺’’ (𑀧𑀝𑀺. 𑀫. 𑁧.𑁫𑁦).

𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 ¶ 𑀯𑀺𑀬 𑀘 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀦𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀨𑀲𑁆𑀲𑀝𑁆𑀞𑀸𑀦𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸’’𑀢𑀺 𑁋

𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂 𑀤𑀲 𑀤𑀲 𑀓𑀢𑁆𑀯𑀸 𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀯𑀲𑁂𑀦 𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀉𑀤𑀬𑁄 𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀯𑀬𑁄, 𑀏𑀯𑀫𑁆𑀧𑀺 𑀭𑀽𑀧𑀁 𑀉𑀤𑁂𑀢𑀺, 𑀏𑀯𑀫𑁆𑀧𑀺 𑀭𑀽𑀧𑀁 𑀯𑁂𑀢𑀻𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀔𑀡𑀢𑁄 𑀘 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺.

𑁭𑁨𑁫. 𑀢𑀲𑁆𑀲𑁂𑀯𑀁 𑀫𑀦𑀲𑀺𑀓𑀭𑁄𑀢𑁄 ‘‘𑀇𑀢𑀺 𑀓𑀺𑀭𑀺𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 𑀜𑀸𑀡𑀁 𑀯𑀺𑀲𑀤𑀢𑀭𑀁 𑀳𑁄𑀢𑀺. 𑀢𑀲𑁆𑀲𑁂𑀯𑀁 𑀧𑀘𑁆𑀘𑀬𑀢𑁄 𑀘𑁂𑀯 𑀔𑀡𑀢𑁄 𑀘 𑀤𑁆𑀯𑁂𑀥𑀸 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑁄 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀮𑀓𑁆𑀔𑀡𑀪𑁂𑀤𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑁭𑁨𑁬. 𑀬𑀜𑁆𑀳𑀺 𑀲𑁄 𑀅𑀯𑀺𑀚𑁆𑀚𑀸𑀤𑀺𑀲𑀫𑀼𑀤𑀬𑀸 𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀁, 𑀅𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑀸 𑀘 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑀁 𑀧𑀲𑁆𑀲𑀢𑀺, 𑀇𑀤𑀫𑀲𑁆𑀲 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁. 𑀬𑀁 𑀧𑀦 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀦𑁆𑀢𑁄 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑀺, 𑀇𑀤𑀫𑀲𑁆𑀲 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁, 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀳𑀺 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁. 𑀪𑀗𑁆𑀕𑀓𑁆𑀔𑀡𑁂 𑀘 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁.

𑁭𑁨𑁭. 𑀇𑀘𑁆𑀘𑀲𑁆𑀲𑁂𑀯𑀁 𑀧𑀘𑁆𑀘𑀬𑀢𑁄 𑀘𑁂𑀯 𑀔𑀡𑀢𑁄 𑀘 𑀤𑁆𑀯𑁂𑀥𑀸 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑁄 𑀧𑀘𑁆𑀘𑀬𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀚𑀦𑀓𑀸𑀯𑀩𑁄𑀥𑀢𑁄. 𑀔𑀡𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀚𑀸𑀢𑀺𑀤𑀼𑀓𑁆𑀔𑀸𑀯𑀩𑁄𑀥𑀢𑁄. 𑀧𑀘𑁆𑀘𑀬𑀢𑁄 𑀯𑀬𑀤𑀲𑁆𑀲𑀦𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀧𑀘𑁆𑀘𑀬𑀸𑀦𑀼𑀧𑁆𑀧𑀸𑀤𑁂𑀦 𑀧𑀘𑁆𑀘𑀬𑀯𑀢𑀁 𑀅𑀦𑀼𑀧𑁆𑀧𑀸𑀤𑀸𑀯𑀩𑁄𑀥𑀢𑁄. 𑀔𑀡𑀢𑁄 𑀯𑀬𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀫𑁂𑀯 𑀧𑀸𑀓𑀝𑀁 𑀳𑁄𑀢𑀺 𑀫𑀭𑀡𑀤𑀼𑀓𑁆𑀔𑀸𑀯𑀩𑁄𑀥𑀢𑁄. 𑀬𑀜𑁆𑀘𑀲𑁆𑀲 ¶ 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁, 𑀫𑀕𑁆𑀕𑁄𑀯𑀸𑀬𑀁 𑀮𑁄𑀓𑀺𑀓𑁄𑀢𑀺 𑀫𑀕𑁆𑀕𑀲𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺 𑀢𑀢𑁆𑀭 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁄.

𑁭𑁨𑁮. 𑀧𑀘𑁆𑀘𑀬𑀢𑁄 𑀘𑀲𑁆𑀲 𑀉𑀤𑀬𑀤𑀲𑁆𑀲𑀦𑁂𑀦 𑀅𑀦𑀼𑀮𑁄𑀫𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀧𑀸𑀓𑀝𑁄 𑀳𑁄𑀢𑀺, ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁪; 𑀲𑀁. 𑀦𑀺. 𑁨.𑁨𑁧; 𑀉𑀤𑀸. 𑁧) 𑀅𑀯𑀩𑁄𑀥𑀢𑁄. 𑀧𑀘𑁆𑀘𑀬𑀢𑁄 𑀯𑀬𑀤𑀲𑁆𑀲𑀦𑁂𑀦 𑀧𑀝𑀺𑀮𑁄𑀫𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀧𑀸𑀓𑀝𑁄 𑀳𑁄𑀢𑀺, ‘‘𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁬; 𑀲𑀁. 𑀦𑀺. 𑁨.𑁨𑁧; 𑀉𑀤𑀸. 𑁨) 𑀅𑀯𑀩𑁄𑀥𑀢𑁄 ¶ . 𑀔𑀡𑀢𑁄 𑀧𑀦 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀯𑀩𑁄𑀥𑀢𑁄. 𑀉𑀤𑀬𑀩𑁆𑀩𑀬𑀯𑀦𑁆𑀢𑁄 𑀳𑀺 𑀲𑀗𑁆𑀔𑀢𑀸, 𑀢𑁂 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺.

𑁭𑁨𑁯. 𑀧𑀘𑁆𑀘𑀬𑀢𑁄 𑀘𑀲𑁆𑀲 𑀉𑀤𑀬𑀤𑀲𑁆𑀲𑀦𑁂𑀦 𑀏𑀓𑀢𑁆𑀢𑀦𑀬𑁄 𑀧𑀸𑀓𑀝𑁄 𑀳𑁄𑀢𑀺 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦 𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀸𑀯𑀩𑁄𑀥𑀢𑁄. 𑀅𑀣 𑀲𑀼𑀝𑁆𑀞𑀼𑀢𑀭𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀔𑀡𑀢𑁄 𑀉𑀤𑀬𑀤𑀲𑁆𑀲𑀦𑁂𑀦 𑀦𑀸𑀦𑀢𑁆𑀢𑀦𑀬𑁄 𑀧𑀸𑀓𑀝𑁄 𑀳𑁄𑀢𑀺 𑀦𑀯𑀦𑀯𑀸𑀦𑀁 𑀉𑀧𑁆𑀧𑀸𑀤𑀸𑀯𑀩𑁄𑀥𑀢𑁄. 𑀅𑀣 𑀲𑀼𑀝𑁆𑀞𑀼𑀢𑀭𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀧𑀘𑁆𑀘𑀬𑀢𑁄 𑀘𑀲𑁆𑀲 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀅𑀩𑁆𑀬𑀸𑀧𑀸𑀭𑀦𑀬𑁄 𑀧𑀸𑀓𑀝𑁄 𑀳𑁄𑀢𑀺 𑀥𑀫𑁆𑀫𑀸𑀦𑀁 𑀅𑀯𑀲𑀯𑀢𑁆𑀢𑀺𑀪𑀸𑀯𑀸𑀯𑀩𑁄𑀥𑀢𑁄. 𑀅𑀣 𑀲𑀼𑀝𑁆𑀞𑀼𑀢𑀭𑀁 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀧𑀘𑁆𑀘𑀬𑀢𑁄 𑀧𑀦 𑀉𑀤𑀬𑀤𑀲𑁆𑀲𑀦𑁂𑀦 𑀏𑀯𑀁𑀥𑀫𑁆𑀫𑀢𑀸𑀦𑀬𑁄 𑀧𑀸𑀓𑀝𑁄 𑀳𑁄𑀢𑀺 𑀧𑀘𑁆𑀘𑀬𑀸𑀦𑀼𑀭𑀽𑀧𑁂𑀦 𑀨𑀮𑀲𑁆𑀲 𑀉𑀧𑁆𑀧𑀸𑀤𑀸𑀯𑀩𑁄𑀥𑀢𑁄. 𑀅𑀣 𑀲𑀼𑀝𑁆𑀞𑀼𑀢𑀭𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀧𑀚𑀳𑀢𑀺.

𑁭𑁩𑁦. 𑀧𑀘𑁆𑀘𑀬𑀢𑁄 𑀘𑀲𑁆𑀲 𑀉𑀤𑀬𑀤𑀲𑁆𑀲𑀦𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺 𑀥𑀫𑁆𑀫𑀸𑀦𑀁 𑀦𑀺𑀭𑀻𑀳𑀓𑀢𑁆𑀢𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀯𑀩𑁄𑀥𑀢𑁄. 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀯𑀩𑁄𑀥𑀢𑁄, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑁂𑀓𑀸𑀯𑀩𑁄𑀥𑀢𑁄 𑀘. 𑀤𑀼𑀓𑁆𑀔𑀮𑀓𑁆𑀔𑀡𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺 𑀉𑀤𑀬𑀩𑁆𑀩𑀬𑁂𑀳𑀺 𑀧𑀝𑀺𑀧𑀻𑀴𑀦𑀸𑀯𑀩𑁄𑀥𑀢𑁄. 𑀲𑀪𑀸𑀯𑀮𑀓𑁆𑀔𑀡𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀸𑀯𑀩𑁄𑀥𑀢𑁄. 𑀲𑀪𑀸𑀯𑀮𑀓𑁆𑀔𑀡𑁂 𑀲𑀗𑁆𑀔𑀢𑀮𑀓𑁆𑀔𑀡𑀲𑁆𑀲 𑀢𑀸𑀯𑀓𑀸𑀮𑀺𑀓𑀢𑁆𑀢𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺 𑀉𑀤𑀬𑀓𑁆𑀔𑀡𑁂 𑀯𑀬𑀲𑁆𑀲, 𑀯𑀬𑀓𑁆𑀔𑀡𑁂 𑀘 𑀉𑀤𑀬𑀲𑁆𑀲 𑀅𑀪𑀸𑀯𑀸𑀯𑀩𑁄𑀥𑀢𑁄𑀢𑀺.

𑁭𑁩𑁧. 𑀢𑀲𑁆𑀲𑁂𑀯𑀁 𑀧𑀸𑀓𑀝𑀻𑀪𑀽𑀢𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀮𑀓𑁆𑀔𑀡𑀪𑁂𑀤𑀲𑁆𑀲 ‘‘𑀏𑀯𑀁 𑀓𑀺𑀭 𑀦𑀸𑀫𑀺𑀫𑁂 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀦𑀺𑀘𑁆𑀘𑀦𑀯𑀸𑀯 𑀳𑀼𑀢𑁆𑀯𑀸 𑀲𑀗𑁆𑀔𑀸𑀭𑀸 ¶ 𑀉𑀧𑀝𑁆𑀞𑀳𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀦𑀺𑀘𑁆𑀘𑀦𑀯𑀸, 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀯𑀺𑀬 𑀉𑀤𑀓𑀩𑀼𑀩𑁆𑀩𑀼𑀴𑁄 𑀯𑀺𑀬 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀆𑀭𑀕𑁆𑀕𑁂 𑀲𑀸𑀲𑀧𑁄 𑀯𑀺𑀬 𑀯𑀺𑀚𑁆𑀚𑀼𑀧𑁆𑀧𑀸𑀤𑁄 𑀯𑀺𑀬 𑀘 𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀦𑁄. 𑀫𑀸𑀬𑀸𑀫𑀭𑀻𑀘𑀺𑀲𑀼𑀧𑀺𑀦𑀦𑁆𑀢𑀅𑀮𑀸𑀢𑀘𑀓𑁆𑀓𑀕𑀦𑁆𑀥𑀩𑁆𑀩𑀦𑀕𑀭𑀨𑁂𑀡𑀓𑀤𑀮𑀺𑀆𑀤𑀬𑁄 𑀯𑀺𑀬 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸𑀢𑀺 𑀘𑀸𑀧𑀺 𑀉𑀧𑀝𑁆𑀞𑀳𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸𑀦𑁂𑀦 ‘‘𑀯𑀬𑀥𑀫𑁆𑀫𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀯𑀬𑀁 𑀉𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀁 𑀦𑀸𑀫 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺, 𑀬𑀲𑁆𑀲𑀸𑀥𑀺𑀕𑀫𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀓𑀣𑀸

𑁭𑁩𑁨. 𑀅𑀣𑀲𑁆𑀲 ¶ 𑀇𑀫𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀳𑀺 𑀧𑀝𑀺𑀯𑁂𑀥𑀧𑁆𑀧𑀢𑁆𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑁂𑀯 𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲 𑀘 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀼𑀲𑀻𑀢𑀧𑀼𑀕𑁆𑀕𑀮𑀲𑁆𑀲 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀓𑀲𑁆𑀲 𑀧𑀦 𑀬𑀼𑀢𑁆𑀢𑀧𑀬𑀼𑀢𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯.

𑀓𑀢𑀫𑁂 𑀧𑀦 𑀢𑁂 𑀤𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺? 𑀑𑀪𑀸𑀲𑁄, 𑀜𑀸𑀡𑀁, 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀲𑀼𑀔𑀁, 𑀅𑀥𑀺𑀫𑁄𑀓𑁆𑀔𑁄, 𑀧𑀕𑁆𑀕𑀳𑁄, 𑀉𑀧𑀝𑁆𑀞𑀸𑀦𑀁, 𑀉𑀧𑁂𑀓𑁆𑀔𑀸, 𑀦𑀺𑀓𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀣𑀁 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, ‘𑀑𑀪𑀸𑀲𑁄 𑀥𑀫𑁆𑀫𑁄’𑀢𑀺 𑀑𑀪𑀸𑀲𑀁 𑀆𑀯𑀚𑁆𑀚𑀢𑀺, 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀢𑁄… 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺’’.

𑀢𑀣𑀸 ‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀻𑀢𑀺… 𑀧𑀲𑁆𑀲𑀤𑁆𑀥𑀺… 𑀲𑀼𑀔𑀁… 𑀅𑀥𑀺𑀫𑁄𑀓𑁆𑀔𑁄… 𑀧𑀕𑁆𑀕𑀳𑁄… 𑀉𑀧𑀝𑁆𑀞𑀸𑀦𑀁… 𑀉𑀧𑁂𑀓𑁆𑀔𑀸… 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, ‘𑀦𑀺𑀓𑀦𑁆𑀢𑀺 𑀥𑀫𑁆𑀫𑁄’𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑀢𑀺, 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀢𑁄… 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺 (𑀧𑀝𑀺. 𑀫. 𑁨.𑁬).

𑁭𑁩𑁩. 𑀢𑀢𑁆𑀣 ¶ 𑀑𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑁄𑀪𑀸𑀲𑁄. 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀬𑁄𑀕𑀸𑀯𑀘𑀭𑁄 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄, 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄𑀲𑁆𑀫𑀺 𑀨𑀮𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺, 𑀅𑀨𑀮𑀫𑁂𑀯 𑀘 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀅𑀫𑀕𑁆𑀕𑀁 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀁 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀑𑀪𑀸𑀲𑀫𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺.

𑀲𑁄 𑀔𑁄 𑀧𑀦𑀸𑀬𑀁 𑀑𑀪𑀸𑀲𑁄 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀑𑀪𑀸𑀲𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀲𑀘𑀺 ¶ 𑀅𑀦𑁆𑀢𑁄𑀕𑀩𑁆𑀪𑀁. 𑀓𑀲𑁆𑀲𑀘𑀺 𑀩𑀳𑀺𑀕𑀩𑁆𑀪𑀫𑁆𑀧𑀺. 𑀓𑀲𑁆𑀲𑀘𑀺 𑀲𑀓𑀮𑀯𑀺𑀳𑀸𑀭𑀁, 𑀕𑀸𑀯𑀼𑀢𑀁, 𑀅𑀟𑁆𑀠𑀬𑁄𑀚𑀦𑀁, 𑀬𑁄𑀚𑀦𑀁, 𑀤𑁆𑀯𑀺𑀬𑁄𑀚𑀦𑀁, 𑀢𑀺𑀬𑁄𑀚𑀦𑀁…𑀧𑁂… 𑀓𑀲𑁆𑀲𑀘𑀺 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀸𑀮𑁄𑀓𑀁 𑀓𑀼𑀭𑀼𑀫𑀸𑀦𑁄. 𑀪𑀕𑀯𑀢𑁄 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀪𑀸𑀲𑁂𑀦𑁆𑀢𑁄 𑀉𑀤𑀧𑀸𑀤𑀺.

𑀏𑀯𑀁 𑀯𑁂𑀫𑀢𑁆𑀢𑀢𑀸𑀬 𑀘𑀲𑁆𑀲 𑀇𑀤𑀁 𑀯𑀢𑁆𑀣𑀼 𑁋 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀓𑀺𑀭 𑀤𑁆𑀯𑀺𑀓𑀼𑀝𑁆𑀝𑀕𑁂𑀳𑀲𑁆𑀲 𑀅𑀦𑁆𑀢𑁄 𑀤𑁆𑀯𑁂 𑀣𑁂𑀭𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀁𑀤𑀺𑀯𑀲𑀜𑁆𑀘 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑁄 𑀳𑁄𑀢𑀺, 𑀫𑁂𑀖𑀧𑀝𑀮𑀘𑁆𑀙𑀦𑁆𑀦𑀸 𑀤𑀺𑀲𑀸, 𑀭𑀢𑁆𑀢𑀺𑀪𑀸𑀕𑁂 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀫𑀁 𑀧𑀯𑀢𑁆𑀢𑀢𑀺. 𑀅𑀣𑁂𑀓𑁄 𑀣𑁂𑀭𑁄 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀇𑀤𑀸𑀦𑀺 𑀘𑁂𑀢𑀺𑀬𑀗𑁆𑀕𑀡𑀫𑁆𑀳𑀺 𑀲𑀻𑀳𑀸𑀲𑀦𑁂 𑀧𑀜𑁆𑀘𑀯𑀡𑁆𑀡𑀸𑀦𑀺 𑀓𑀼𑀲𑀼𑀫𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺. 𑀢𑀁 𑀇𑀢𑀭𑁄 𑀆𑀳 𑁋 ‘‘𑀅𑀦𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀓𑀣𑁂𑀲𑀺, 𑀫𑀬𑁆𑀳𑀁 𑀧𑀦𑁂𑀢𑀭𑀳𑀺 𑀫𑀳𑀸𑀲𑀫𑀼𑀤𑁆𑀤𑀫𑁆𑀳𑀺 𑀬𑁄𑀚𑀦𑀝𑁆𑀞𑀸𑀦𑁂 𑀫𑀘𑁆𑀙𑀓𑀘𑁆𑀙𑀧𑀸 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺.

𑀅𑀬𑀁 𑀧𑀦 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁄 𑀬𑁂𑀪𑀼𑀬𑁆𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀤𑀸𑀘𑀸𑀭𑀢𑁄 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺 𑀉𑀘𑁆𑀘𑀯𑀸𑀮𑀺𑀓𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀳𑀁𑀓𑀦𑀓𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀦𑀺𑀗𑁆𑀓𑀧𑁂𑀡𑁆𑀡𑀓𑀧𑀥𑀸𑀦𑀖𑀭𑀯𑀸𑀲𑀻 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀘.

𑀢𑀢𑁆𑀭𑀺𑀤𑀁 𑀏𑀓𑀯𑀢𑁆𑀣𑀼𑀧𑀭𑀺𑀤𑀻𑀧𑀦𑀁 𑁋 𑀢𑀮𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀏𑀓𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀫𑀳𑀸𑀔𑀻𑀡𑀸𑀲𑀯𑁄 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀤𑀸𑀬𑀓𑁄 ¶ 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀉𑀘𑁆𑀘𑀯𑀸𑀮𑀺𑀓𑀯𑀸𑀲𑀻𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀲𑀫𑀡𑀪𑀸𑀯𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀦𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀫𑁂𑀯𑀲𑁆𑀲 𑀤𑀺𑀲𑁆𑀯𑀸 ‘‘𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀫𑁂𑀯 𑀓𑀭𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀑𑀭𑁄𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. ‘‘𑀓𑀺𑀁, 𑀆𑀯𑀼𑀲𑁄 𑀥𑀫𑁆𑀫𑀤𑀺𑀦𑁆𑀦, 𑀅𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀧𑀜𑁆𑀳𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀼𑀲𑁄, 𑀚𑀸𑀦𑀫𑀸𑀦𑀸 𑀓𑀣𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀜𑁆𑀳𑀲𑀳𑀲𑁆𑀲𑀁 𑀧𑀼𑀘𑁆𑀙𑀺.

𑀣𑁂𑀭𑁄 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀅𑀲𑀚𑁆𑀚𑀫𑀸𑀦𑁄𑀯 𑀓𑀣𑁂𑀲𑀺. 𑀢𑀢𑁄 ‘‘𑀅𑀢𑀺𑀢𑀺𑀓𑁆𑀔𑀁 𑀯𑁄, 𑀪𑀦𑁆𑀢𑁂, 𑀜𑀸𑀡𑀁, 𑀓𑀤𑀸 𑀢𑀼𑀫𑁆𑀳𑁂𑀳𑀺 𑀅𑀬𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁄 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂, 𑀆𑀯𑀼𑀲𑁄’’𑀢𑀺 𑀆𑀳. 𑀲𑀫𑀸𑀥𑀺𑀫𑁆𑀧𑀺, 𑀪𑀦𑁆𑀢𑁂, 𑀯𑀴𑀜𑁆𑀚𑁂𑀣𑀸𑀢𑀺, 𑀦 𑀬𑀺𑀤𑀁, 𑀆𑀯𑀼𑀲𑁄, 𑀪𑀸𑀭𑀺𑀬𑀦𑁆𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀏𑀓𑀁 𑀳𑀢𑁆𑀣𑀺𑀁 𑀫𑀸𑀧𑁂𑀣𑀸𑀢𑀺 ¶ . 𑀣𑁂𑀭𑁄 𑀲𑀩𑁆𑀩𑀲𑁂𑀢𑀁 𑀳𑀢𑁆𑀣𑀺𑀁 𑀫𑀸𑀧𑁂𑀲𑀺. 𑀇𑀤𑀸𑀦𑀺, 𑀪𑀦𑁆𑀢𑁂, 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀅𑀜𑁆𑀘𑀺𑀢𑀓𑀡𑁆𑀡𑁄 𑀧𑀲𑀸𑀭𑀺𑀢𑀦𑀗𑁆𑀕𑀼𑀝𑁆𑀞𑁄 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑁂𑀭𑀯𑀁 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀢𑀣𑀸 𑀦𑀁 𑀓𑀭𑁄𑀣𑀸𑀢𑀺. 𑀣𑁂𑀭𑁄 𑀢𑀣𑀸 𑀓𑀢𑁆𑀯𑀸 𑀯𑁂𑀕𑁂𑀦 𑀆𑀕𑀘𑁆𑀙𑀢𑁄 𑀳𑀢𑁆𑀣𑀺𑀲𑁆𑀲 𑀪𑁂𑀭𑀯𑀁 𑀆𑀓𑀸𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀢𑀫𑁂𑀦𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀲𑀸𑀭𑀚𑁆𑀚𑀁 𑀦𑀸𑀫 𑀳𑁄𑀢𑀻’’𑀢𑀺 𑀆𑀳.

𑀲𑁄 𑀢𑀫𑁆𑀳𑀺 𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀯𑀲𑁆𑀲𑀬𑁄 𑀫𑁂, 𑀆𑀯𑀼𑀲𑁄, 𑀥𑀫𑁆𑀫𑀤𑀺𑀦𑁆𑀦 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀺𑀘𑁆𑀘𑁂𑀯𑀸𑀳𑀁 𑀆𑀕𑀢𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀘𑀗𑁆𑀓𑀫𑀁 𑀆𑀭𑀼𑀬𑁆𑀳 𑀢𑀢𑀺𑀬𑁂 𑀧𑀤𑀯𑀸𑀭𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀓𑀺𑀭 𑀤𑁄𑀲𑀘𑀭𑀺𑀢𑁄 𑀅𑀳𑁄𑀲𑀺. 𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀑𑀪𑀸𑀲𑁂 𑀓𑀫𑁆𑀧𑀦𑁆𑀢𑀺.

𑁭𑁩𑁪. 𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀲𑁆𑀲 𑀓𑀺𑀭 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀢𑀼𑀮𑀬𑀦𑁆𑀢𑀲𑁆𑀲 𑀢𑀻𑀭𑁂𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯 𑀅𑀯𑀺𑀳𑀢𑀯𑁂𑀕𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀅𑀢𑀺𑀯𑀺𑀲𑀤𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺.

𑀧𑀻𑀢𑀻𑀢𑀺 ¶ 𑀯𑀺𑀧𑀲𑁆𑀲𑀦𑀸𑀧𑀻𑀢𑀺. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀔𑀼𑀤𑁆𑀤𑀓𑀸𑀧𑀻𑀢𑀺, 𑀔𑀡𑀺𑀓𑀸𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺, 𑀉𑀩𑁆𑀩𑁂𑀕𑀸𑀧𑀻𑀢𑀺, 𑀨𑀭𑀡𑀸𑀧𑀻𑀢𑀻𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺.

𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀲𑁆𑀲𑀤𑁆𑀥𑀺. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀁 𑀦𑁂𑀯 𑀤𑀭𑀣𑁄, 𑀦 𑀕𑀸𑀭𑀯𑀁, 𑀦 𑀓𑀓𑁆𑀔𑀴𑀢𑀸, 𑀦 𑀅𑀓𑀫𑁆𑀫𑀜𑁆𑀜𑀢𑀸, 𑀦 𑀕𑁂𑀮𑀜𑁆𑀜𑀁, 𑀦 𑀯𑀗𑁆𑀓𑀢𑀸 𑀳𑁄𑀢𑀺, 𑀅𑀣 𑀔𑁄 𑀧𑀦𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀺 𑀧𑀲𑁆𑀲𑀤𑁆𑀥𑀸𑀦𑀺 𑀮𑀳𑀽𑀦𑀺 𑀫𑀼𑀤𑀽𑀦𑀺 𑀓𑀫𑁆𑀫𑀜𑁆𑀜𑀸𑀦𑀺 𑀲𑀼𑀯𑀺𑀲𑀤𑀸𑀦𑀺 𑀉𑀚𑀼𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀲𑁄 𑀇𑀫𑁂𑀳𑀺 𑀧𑀲𑁆𑀲𑀤𑁆𑀥𑀸𑀤𑀻𑀳𑀺 𑀅𑀦𑀼𑀕𑁆𑀕𑀳𑀺𑀢𑀓𑀸𑀬𑀘𑀺𑀢𑁆𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀫𑀸𑀦𑀼𑀲𑀺𑀁 𑀦𑀸𑀫 𑀭𑀢𑀺𑀁 𑀅𑀦𑀼𑀪𑀯𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

‘‘𑀬𑀢𑁄 ¶ 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁩-𑁩𑁭𑁪);

𑀏𑀯𑀫𑀲𑁆𑀲 𑀇𑀫𑀁 𑀅𑀫𑀸𑀦𑀼𑀲𑀺𑀁 𑀭𑀢𑀺𑀁 𑀲𑀸𑀥𑀬𑀫𑀸𑀦𑀸 𑀮𑀳𑀼𑀢𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺.

𑀲𑀼𑀔𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀼𑀔𑀁. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀓𑀮𑀲𑀭𑀻𑀭𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀅𑀢𑀺𑀧𑀡𑀻𑀢𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀥𑀺𑀫𑁄𑀓𑁆𑀔𑁄𑀢𑀺 𑀲𑀤𑁆𑀥𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀬𑁂𑀯 𑀳𑀺𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀢𑀺𑀲𑀬𑀧𑀲𑀸𑀤𑀪𑀽𑀢𑀸 𑀩𑀮𑀯𑀢𑀻 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀺.

𑀧𑀕𑁆𑀕𑀳𑁄𑀢𑀺 𑀯𑀻𑀭𑀺𑀬𑀁. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀳𑀺𑀲𑁆𑀲 𑀅𑀲𑀺𑀣𑀺𑀮𑀁 𑀅𑀦𑀘𑁆𑀘𑀸𑀭𑀤𑁆𑀥𑀁 𑀲𑀼𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺.

𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀬𑁂𑀯 𑀳𑀺𑀲𑁆𑀲 𑀲𑀼𑀧𑀝𑁆𑀞𑀺𑀢𑀸 𑀲𑀼𑀧𑀢𑀺𑀝𑁆𑀞𑀺𑀢𑀸 𑀦𑀺𑀔𑀸𑀢𑀸 𑀅𑀘𑀮𑀸 𑀧𑀩𑁆𑀩𑀢𑀭𑀸𑀚𑀲𑀤𑀺𑀲𑀸 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀬𑀁 𑀬𑀁 𑀞𑀸𑀦𑀁 𑀆𑀯𑀚𑁆𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺 𑀫𑀦𑀲𑀺𑀓𑀭𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀢𑀁 𑀞𑀸𑀦𑀫𑀲𑁆𑀲 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀭𑀮𑁄𑀓𑁄 𑀯𑀺𑀬 𑀲𑀢𑀺𑀬𑀸 𑀉𑀧𑀝𑁆𑀞𑀸𑀢𑀺.

𑀉𑀧𑁂𑀓𑁆𑀔𑀸𑀢𑀺 ¶ 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀘𑁂𑀯 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸 𑀘. 𑀢𑀲𑁆𑀫𑀺𑀁 𑀳𑀺𑀲𑁆𑀲 𑀲𑀫𑀬𑁂 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀪𑀽𑀢𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀧𑀺 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸𑀧𑀺. 𑀲𑀸 𑀳𑀺𑀲𑁆𑀲 𑀢𑀁 𑀢𑀁 𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯 𑀧𑀢𑁆𑀢𑀧𑀼𑀝𑁂 𑀧𑀓𑁆𑀔𑀺𑀢𑁆𑀢 𑀢𑀢𑁆𑀢𑀦𑀸𑀭𑀸𑀘𑁄 𑀯𑀺𑀬 𑀘 𑀲𑀽𑀭𑀸 𑀢𑀺𑀔𑀺𑀡𑀸 𑀳𑀼𑀢𑁆𑀯𑀸 𑀯𑀳𑀢𑀺.

𑀦𑀺𑀓𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺. 𑀏𑀯𑀁 𑀑𑀪𑀸𑀲𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸𑀬 𑀳𑀺𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀲𑀼𑀔𑀼𑀫𑀸 𑀲𑀦𑁆𑀢𑀸𑀓𑀸𑀭𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀸 𑀦𑀺𑀓𑀦𑁆𑀢𑀺 𑀓𑀺𑀮𑁂𑀲𑁄𑀢𑀺 𑀧𑀭𑀺𑀕𑁆𑀕𑀳𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀢𑀺.

𑀬𑀣𑀸 ¶ 𑀘 𑀑𑀪𑀸𑀲𑁂, 𑀏𑀯𑀁 𑀏𑀢𑁂𑀲𑀼𑀧𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀬𑁄𑀕𑀸𑀯𑀘𑀭𑁄 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀜𑀸𑀡𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀏𑀯𑀭𑀽𑀧𑀸 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀲𑀼𑀔𑀁, 𑀅𑀥𑀺𑀫𑁄𑀓𑁆𑀔𑁄, 𑀧𑀕𑁆𑀕𑀳𑁄, 𑀉𑀧𑀝𑁆𑀞𑀸𑀦𑀁, 𑀉𑀧𑁂𑀓𑁆𑀔𑀸, 𑀦𑀺𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄𑀲𑁆𑀫𑀺 𑀨𑀮𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀫𑁂𑀯 𑀘 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀅𑀫𑀕𑁆𑀕𑀁 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀁 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀓𑀦𑁆𑀢𑀺𑀫𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀻𑀢𑀺.

𑁭𑁩𑁫. 𑀏𑀢𑁆𑀣 𑀘 𑀑𑀪𑀸𑀲𑀸𑀤𑀬𑁄 𑀉𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸, 𑀦 𑀅𑀓𑀼𑀲𑀮𑀢𑁆𑀢𑀸. 𑀦𑀺𑀓𑀦𑁆𑀢𑀺 𑀧𑀦 𑀉𑀧𑀓𑁆𑀓𑀺𑀮𑁂𑀲𑁄 𑀘𑁂𑀯 𑀉𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀼 𑀘. 𑀯𑀢𑁆𑀣𑀼𑀯𑀲𑁂𑀦𑁂𑀯 𑀘𑁂𑀢𑁂 𑀤𑀲. 𑀕𑀸𑀳𑀯𑀲𑁂𑀦 𑀧𑀦 𑀲𑀫𑀢𑀺𑀁𑀲 𑀳𑁄𑀦𑁆𑀢𑀺. 𑀓𑀣𑀁? ‘‘𑀫𑀫 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀡𑁆𑀳𑀢𑁄 𑀳𑀺 𑀤𑀺𑀝𑁆𑀞𑀺𑀕𑀸𑀳𑁄 𑀳𑁄𑀢𑀺, ‘‘𑀫𑀦𑀸𑀧𑁄 𑀯𑀢 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀡𑁆𑀳𑀢𑁄 𑀫𑀸𑀦𑀕𑀸𑀳𑁄, 𑀑𑀪𑀸𑀲𑀁 𑀅𑀲𑁆𑀲𑀸𑀤𑀬𑀢𑁄 𑀢𑀡𑁆𑀳𑀸𑀕𑀸𑀳𑁄, 𑀇𑀢𑀺 𑀑𑀪𑀸𑀲𑁂 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 𑀢𑀬𑁄 𑀕𑀸𑀳𑀸. 𑀢𑀣𑀸 𑀲𑁂𑀲𑁂𑀲𑀼𑀧𑀻𑀢𑀺 𑀏𑀯𑀁 𑀕𑀸𑀳𑀯𑀲𑁂𑀦 𑀲𑀫𑀢𑀺𑀁𑀲 𑀉𑀧𑀓𑁆𑀓𑀺𑀮𑁂𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀲𑁂𑀦 𑀅𑀓𑀼𑀲𑀮𑁄 𑀅𑀩𑁆𑀬𑀢𑁆𑀢𑁄 𑀬𑁄𑀕𑀸𑀯𑀘𑀭𑁄 𑀑𑀪𑀸𑀲𑀸𑀤𑀻𑀲𑀼 𑀓𑀫𑁆𑀧𑀢𑀺 𑀯𑀺𑀓𑁆𑀔𑀺𑀧𑀢𑀺. 𑀑𑀪𑀸𑀲𑀸𑀤𑀻𑀲𑀼 𑀏𑀓𑁂𑀓𑀁 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁨𑁪𑁧) 𑀲𑀫𑀦𑀼𑀧𑀲𑁆𑀲𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀑𑀪𑀸𑀲𑁂 𑀘𑁂𑀯 𑀜𑀸𑀡𑁂 𑀘, 𑀧𑀻𑀢𑀺𑀬𑀸 𑀘 𑀯𑀺𑀓𑀫𑁆𑀧𑀢𑀺;

𑀧𑀲𑁆𑀲𑀤𑁆𑀥𑀺𑀬𑀸 𑀲𑀼𑀔𑁂 𑀘𑁂𑀯, 𑀬𑁂𑀳𑀺 𑀘𑀺𑀢𑁆𑀢𑀁 𑀧𑀯𑁂𑀥𑀢𑀺.

‘‘𑀅𑀥𑀺𑀫𑁄𑀓𑁆𑀔𑁂 ¶ 𑀘 𑀧𑀕𑁆𑀕𑀸𑀳𑁂, 𑀉𑀧𑀝𑁆𑀞𑀸𑀦𑁂 𑀘 𑀓𑀫𑁆𑀧𑀢𑀺;

𑀉𑀧𑁂𑀓𑁆𑀔𑀸𑀯𑀚𑁆𑀚𑀦𑀸𑀬𑀜𑁆𑀘, 𑀉𑀧𑁂𑀓𑁆𑀔𑀸𑀬 𑀦𑀺𑀓𑀦𑁆𑀢𑀺𑀬𑀸’’𑀢𑀺. (𑀧𑀝𑀺. 𑀫. 𑁨.𑁭);

𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀓𑀣𑀸

𑁭𑁩𑁬. 𑀓𑀼𑀲𑀮𑁄 𑀧𑀦 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀬𑁄𑀕𑀸𑀯𑀘𑀭𑁄 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀅𑀬𑀁 𑀔𑁄 𑀫𑁂 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀔𑁄 𑀧𑀦𑀸𑀬𑀁 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄’’𑀢𑀺 𑀇𑀢𑀺 𑀯𑀸 𑀢𑀁 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀉𑀧𑀧𑀭𑀺𑀓𑁆𑀔𑀢𑀺. 𑀅𑀣 𑀯𑀸 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺, ‘‘𑀲𑀘𑁂 𑀑𑀪𑀸𑀲𑁄 𑀅𑀢𑁆𑀢𑀸 𑀪𑀯𑁂𑀬𑁆𑀬, ‘𑀅𑀢𑁆𑀢𑀸’𑀢𑀺 𑀕𑀳𑁂𑀢𑀼𑀁 ¶ 𑀯𑀝𑁆𑀝𑁂𑀬𑁆𑀬. 𑀅𑀦𑀢𑁆𑀢𑀸 𑀘 𑀧𑀦𑀸𑀬𑀁 ‘𑀅𑀢𑁆𑀢𑀸’𑀢𑀺 𑀕𑀳𑀺𑀢𑁄. 𑀢𑀲𑁆𑀫𑀸 𑀲𑁄 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑁄, 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑁄’’𑀢𑀺 𑀲𑀩𑁆𑀩𑀁 𑀅𑀭𑀽𑀧𑀲𑀢𑁆𑀢𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀬𑀣𑀸 𑀘 𑀑𑀪𑀸𑀲𑁂, 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀲𑁄 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀑𑀪𑀸𑀲𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁨𑁪𑁧) 𑀲𑀫𑀦𑀼𑀧𑀲𑁆𑀲𑀢𑀺. 𑀜𑀸𑀡𑀁…𑀧𑁂… 𑀦𑀺𑀓𑀦𑁆𑀢𑀺𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁨𑁪𑁧) 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀑𑀪𑀸𑀲𑀸𑀤𑀻𑀲𑀼 𑀦 𑀓𑀫𑁆𑀧𑀢𑀺 𑀦 𑀯𑁂𑀥𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀇𑀫𑀸𑀦𑀺 𑀤𑀲 𑀞𑀸𑀦𑀸𑀦𑀺, 𑀧𑀜𑁆𑀜𑀸𑀬𑀲𑁆𑀲 𑀧𑀭𑀺𑀘𑁆𑀘𑀺𑀢𑀸;

𑀥𑀫𑁆𑀫𑀼𑀤𑁆𑀥𑀘𑁆𑀘𑀓𑀼𑀲𑀮𑁄 𑀳𑁄𑀢𑀺, 𑀦 𑀘 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀻’’𑀢𑀺. (𑀧𑀝𑀺. 𑀫. 𑁨.𑁭);

𑀲𑁄 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀅𑀕𑀘𑁆𑀙𑀦𑁆𑀢𑁄 𑀢𑀁 𑀲𑀫𑀢𑀺𑀁𑀲𑀯𑀺𑀥𑀁 𑀉𑀧𑀓𑁆𑀓𑀺𑀮𑁂𑀲𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀑𑀪𑀸𑀲𑀸𑀤𑀬𑁄 𑀥𑀫𑁆𑀫𑀸 𑀦 𑀫𑀕𑁆𑀕𑁄. 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑁄𑀢𑀺 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑀲𑁆𑀲𑁂𑀯𑀁 ‘‘𑀅𑀬𑀁 𑀫𑀕𑁆𑀕𑁄, 𑀅𑀬𑀁 𑀦 𑀫𑀕𑁆𑀕𑁄’’𑀢𑀺 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀜𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀢𑁂𑀦 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁 𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀓𑀣𑀁? 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀁 𑀢𑀸𑀯 𑀦𑀸𑀫𑀭𑀽𑀧𑀲𑁆𑀲 𑀯𑀯𑀢𑁆𑀣𑀸𑀧𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀯𑀯𑀢𑁆𑀣𑀸𑀦𑀁 𑀓𑀢𑀁. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑁂𑀦 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀯𑀯𑀢𑁆𑀣𑀸𑀦𑀁. 𑀇𑀫𑀺𑀲𑁆𑀲𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁 𑀲𑀫𑁆𑀫𑀸𑀫𑀕𑁆𑀕𑀲𑁆𑀲 𑀅𑀯𑀥𑀸𑀭𑀡𑁂𑀦 𑀫𑀕𑁆𑀕𑀲𑀘𑁆𑀘𑀲𑁆𑀲 𑀯𑀯𑀢𑁆𑀣𑀸𑀦𑀁 ¶ 𑀓𑀢𑀦𑁆𑀢𑀺, 𑀏𑀯𑀁 𑀮𑁄𑀓𑀺𑀬𑁂𑀦𑁂𑀯 𑀢𑀸𑀯 𑀜𑀸𑀡𑁂𑀦 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁 𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁧. 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀓𑀣𑀸

𑁭𑁩𑁭. 𑀅𑀝𑁆𑀞𑀦𑁆𑀦𑀁 ¶ ¶ 𑀧𑀦 𑀜𑀸𑀡𑀸𑀦𑀁 𑀯𑀲𑁂𑀦 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸, 𑀦𑀯𑀫𑀜𑁆𑀘 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀅𑀬𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀘𑁂𑀢𑁆𑀣 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀯𑀻𑀣𑀺𑀧𑀝𑀺𑀧𑀦𑁆𑀦𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀜𑀸𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀯𑀫𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀅𑀦𑀼𑀮𑁄𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀢𑁂𑀲𑀼 𑀜𑀸𑀡𑁂𑀲𑀼 𑀬𑁄𑀕𑁄 𑀓𑀭𑀡𑀻𑀬𑁄.

𑁭𑁩𑁮. 𑀧𑀼𑀦 𑀉𑀤𑀬𑀩𑁆𑀩𑀬𑀜𑀸𑀡𑁂 𑀬𑁄𑀕𑁄 𑀓𑀺𑀫𑀢𑁆𑀣𑀺𑀬𑁄𑀢𑀺 𑀘𑁂? 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁆𑀣𑁄. 𑀉𑀤𑀬𑀩𑁆𑀩𑀬𑀜𑀸𑀡𑀁 𑀳𑀺 𑀳𑁂𑀝𑁆𑀞𑀸 𑀤𑀲𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀳𑀼𑀢𑁆𑀯𑀸 𑀬𑀸𑀣𑀸𑀯𑀲𑀭𑀲𑀢𑁄 𑀢𑀺𑀮𑀓𑁆𑀔𑀡𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁆𑀣𑀫𑁂𑀢𑁆𑀣 𑀧𑀼𑀦 𑀬𑁄𑀕𑁄 𑀓𑀭𑀡𑀻𑀬𑁄.

𑁭𑁩𑁯. 𑀮𑀓𑁆𑀔𑀡𑀸𑀦𑀺 𑀧𑀦 𑀓𑀺𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺? 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀢𑀸𑀯 𑀉𑀤𑀬𑀩𑁆𑀩𑀬𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀲𑀦𑁆𑀢𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺. 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺. 𑀅𑀦𑀢𑁆𑀢𑀮𑀓𑁆𑀔𑀡𑀁 𑀦𑀸𑀦𑀸𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀖𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺. 𑀉𑀤𑀬𑀩𑁆𑀩𑀬𑀫𑁆𑀧𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀦𑁆𑀢𑀢𑀺𑀬𑀸 𑀯𑀺𑀓𑁄𑀧𑀺𑀢𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀁 𑀫𑀦𑀲𑀺𑀓𑀢𑁆𑀯𑀸 𑀇𑀭𑀺𑀬𑀸𑀧𑀣𑁂 𑀉𑀕𑁆𑀖𑀸𑀝𑀺𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀦𑀸𑀦𑀸𑀥𑀸𑀢𑀼𑀬𑁄 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺.

𑁭𑁪𑁦. 𑀏𑀢𑁆𑀣 ¶ 𑀘 𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸 ¶ , 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀯𑀸. 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀳𑀼𑀢𑁆𑀯𑀸 𑀅𑀪𑀸𑀯𑀲𑀗𑁆𑀔𑀸𑀢𑁄 𑀯𑀸 𑀆𑀓𑀸𑀭𑀯𑀺𑀓𑀸𑀭𑁄.

‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀧𑀦 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁. 𑀓𑀲𑁆𑀫𑀸? 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀸, 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀸𑀓𑀸𑀭𑁄 𑀤𑀼𑀓𑁆𑀔𑀮𑀓𑁆𑀔𑀡𑀁.

‘‘𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀧𑀦 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀢𑁆𑀢𑀸. 𑀓𑀲𑁆𑀫𑀸? 𑀅𑀯𑀲𑀯𑀢𑁆𑀢𑀦𑀢𑁄, 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀮𑀓𑁆𑀔𑀡𑀁.

𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀅𑀬𑀁 𑀬𑁄𑀕𑀸𑀯𑀘𑀭𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁂𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀦 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀬𑀸𑀣𑀸𑀯𑀲𑀭𑀲𑀢𑁄 𑀲𑀮𑁆𑀮𑀓𑁆𑀔𑁂𑀢𑀺.

𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸

𑁭𑁪𑁧. 𑀢𑀲𑁆𑀲𑁂𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀢𑀼𑀮𑀬𑀢𑁄 𑀢𑀻𑀭𑀬𑀢𑁄 𑀢𑀁 𑀜𑀸𑀡𑀁 𑀢𑀺𑀓𑁆𑀔𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀲𑀗𑁆𑀔𑀸𑀭𑀸 𑀮𑀳𑀼𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀜𑀸𑀡𑁂 𑀢𑀺𑀓𑁆𑀔𑁂 𑀯𑀳𑀦𑁆𑀢𑁂 𑀲𑀗𑁆𑀔𑀸𑀭𑁂𑀲𑀼 𑀮𑀳𑀼𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀉𑀧𑁆𑀧𑀸𑀤𑀁 𑀯𑀸 𑀞𑀺𑀢𑀺𑀁 𑀯𑀸 𑀧𑀯𑀢𑁆𑀢𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀯𑀸 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀔𑀬𑀯𑀬𑀪𑁂𑀤𑀦𑀺𑀭𑁄𑀥𑁂𑀬𑁂𑀯 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺. 𑀢𑀲𑁆𑀲 ‘‘𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀦𑀸𑀫 𑀲𑀗𑁆𑀔𑀸𑀭𑀕𑀢𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀲𑁆𑀲𑀢𑁄 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀦𑀸𑀫 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀓𑀣𑀁 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑁂 𑀜𑀸𑀡𑀁? 𑀭𑀽𑀧𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀧𑀝𑀺𑀲𑀗𑁆𑀔𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀺 ¶ . 𑀅𑀦𑀼𑀧𑀲𑁆𑀲𑀢𑀻𑀢𑀺 𑀓𑀣𑀁 𑀅𑀦𑀼𑀧𑀲𑁆𑀲𑀢𑀺? 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀲𑀼𑀔𑀢𑁄, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀅𑀢𑁆𑀢𑀢𑁄, 𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺 𑀦𑁄 𑀭𑀚𑁆𑀚𑀢𑀺, 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀺.

‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺. 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 ¶ 𑀦𑀦𑁆𑀤𑀺𑀁, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺.

‘‘𑀯𑁂𑀤𑀦𑀸𑀭𑀫𑁆𑀫𑀡𑀢𑀸…𑀧𑁂… 𑀲𑀜𑁆𑀜𑀸𑀭𑀫𑁆𑀫𑀡𑀢𑀸… 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸… 𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀢𑀸… 𑀘𑀓𑁆𑀔𑀸𑀭𑀫𑁆𑀫𑀡𑀢𑀸…𑀧𑁂… 𑀚𑀭𑀸𑀫𑀭𑀡𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺.

‘‘𑀯𑀢𑁆𑀣𑀼𑀲𑀗𑁆𑀓𑀫𑀦𑀸 𑀘𑁂𑀯, 𑀧𑀜𑁆𑀜𑀸𑀬 𑀘 𑀯𑀺𑀯𑀝𑁆𑀝𑀦𑀸;

𑀆𑀯𑀚𑁆𑀚𑀦𑀸𑀩𑀮𑀜𑁆𑀘𑁂𑀯, 𑀧𑀝𑀺𑀲𑀗𑁆𑀔𑀸𑀯𑀺𑀧𑀲𑁆𑀲𑀦𑀸.

‘‘𑀆𑀭𑀫𑁆𑀫𑀡𑀅𑀦𑁆𑀯𑀬𑁂𑀦, 𑀉𑀪𑁄 𑀏𑀓𑀯𑀯𑀢𑁆𑀣𑀦𑀸;

𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸, 𑀯𑀬𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸.

‘‘𑀆𑀭𑀫𑁆𑀫𑀡𑀜𑁆𑀘 𑀧𑀝𑀺𑀲𑀗𑁆𑀔𑀸, 𑀪𑀗𑁆𑀕𑀜𑁆𑀘 𑀅𑀦𑀼𑀧𑀲𑁆𑀲𑀢𑀺;

𑀲𑀼𑀜𑁆𑀜𑀢𑁄 𑀘 𑀉𑀧𑀝𑁆𑀞𑀸𑀦𑀁, 𑀅𑀥𑀺𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸.

‘‘𑀓𑀼𑀲𑀮𑁄 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼, 𑀘𑀢𑀲𑁆𑀲𑁄 𑀘 𑀯𑀺𑀧𑀲𑁆𑀲𑀦𑀸𑀲𑀼;

𑀢𑀬𑁄 𑀉𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑀸, 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻’’𑀢𑀺.

‘‘𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑁂 𑀜𑀸𑀡’’’𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁧-𑁫𑁨).

𑁭𑁪𑁨. 𑀢𑀢𑁆𑀣 ¶ 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀢𑀺 𑀬𑀁𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀧𑀝𑀺𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸, 𑀔𑀬𑀢𑁄 𑀯𑀬𑀢𑁄 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸𑀢𑀺 𑀢𑀲𑁆𑀲, 𑀆𑀭𑀫𑁆𑀫𑀡𑀁 𑀔𑀬𑀢𑁄 𑀯𑀬𑀢𑁄 𑀧𑀝𑀺𑀲𑀗𑁆𑀔𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀜𑀸𑀡𑀲𑁆𑀲 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀦𑁂 𑀬𑀸 𑀧𑀜𑁆𑀜𑀸, 𑀇𑀤𑀁 𑀯𑀺𑀧𑀲𑁆𑀲𑀦𑁂 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀓𑀣𑀁 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀬 𑀅𑀢𑁆𑀣𑁄. 𑀢𑀢𑁄 𑀬𑀣𑀸 𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀭𑀫𑁆𑀫𑀡𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀭𑀽𑀧𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀻𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀅𑀣 𑀯𑀸 𑀭𑀽𑀧𑀸𑀭𑀫𑁆𑀫𑀡𑀪𑀸𑀯𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀆𑀭𑀫𑁆𑀫𑀡𑀁 𑀧𑀝𑀺𑀲𑀗𑁆𑀔𑀸𑀢𑀺 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀧𑀝𑀺𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸, 𑀔𑀬𑀢𑁄 𑀯𑀬𑀢𑁄 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀻𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀔𑀬𑀢𑁄 𑀯𑀬𑀢𑁄 𑀤𑀺𑀝𑁆𑀞𑀁, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀧𑀭𑁂𑀦 𑀘𑀺𑀢𑁆𑀢𑁂𑀦 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀜𑀸𑀢𑀜𑁆𑀘 𑀜𑀸𑀡𑀜𑁆𑀘 𑀉𑀪𑁄𑀧𑀺 𑀯𑀺𑀧𑀲𑁆𑀲𑀢𑀻’’𑀢𑀺.

𑀏𑀢𑁆𑀣 ¶ 𑀘 𑀅𑀦𑀼𑀧𑀲𑁆𑀲𑀢𑀻𑀢𑀺 𑀅𑀦𑀼 𑀅𑀦𑀼 𑀧𑀲𑁆𑀲𑀢𑀺, 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀅𑀦𑀼𑀧𑀲𑁆𑀲𑀢𑀻𑀢𑀺 𑀓𑀣𑀁 𑀅𑀦𑀼𑀧𑀲𑁆𑀲𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀬𑀲𑁆𑀫𑀸 𑀪𑀗𑁆𑀕𑁄 𑀦𑀸𑀫 𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸 𑀓𑁄𑀝𑀺, 𑀢𑀲𑁆𑀫𑀸 𑀲𑁄 𑀪𑀗𑁆𑀕𑀸𑀦𑀼𑀧𑀲𑁆𑀲𑀓𑁄 𑀬𑁄𑀕𑀸𑀯𑀘𑀭𑁄 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄. 𑀢𑀢𑁄 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀢𑁆𑀢𑀢𑁆𑀢𑀸 𑀢𑀤𑁂𑀯 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄. 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀅𑀢𑁆𑀢𑀢𑁄.

𑀬𑀲𑁆𑀫𑀸 𑀧𑀦 𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸, 𑀦 𑀢𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁. 𑀬𑀜𑁆𑀘 𑀅𑀦𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀦 𑀢𑀢𑁆𑀣 𑀭𑀚𑁆𑀚𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀢𑀲𑁆𑀫𑀺𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀼𑀲𑀸𑀭𑁂𑀦 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀤𑀺𑀝𑁆𑀞𑁂 𑀲𑀗𑁆𑀔𑀸𑀭𑀕𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺. 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺. 𑀲𑁄 𑀏𑀯𑀁 𑀅𑀭𑀚𑁆𑀚𑀦𑁆𑀢𑁄 𑀮𑁄𑀓𑀺𑀓𑁂𑀦𑁂𑀯 𑀢𑀸𑀯 𑀜𑀸𑀡𑁂𑀦 𑀭𑀸𑀕𑀁 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺. 𑀲𑀫𑀼𑀤𑀬𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀲𑁄 𑀏𑀯𑀁 𑀯𑀺𑀭𑀢𑁆𑀢𑁄 𑀬𑀣𑀸 𑀤𑀺𑀝𑁆𑀞𑀁 𑀲𑀗𑁆𑀔𑀸𑀭𑀕𑀢𑀁, 𑀢𑀣𑀸 𑀅𑀤𑀺𑀝𑁆𑀞𑀫𑁆𑀧𑀺 𑀅𑀦𑁆𑀯𑀬𑀜𑀸𑀡𑀯𑀲𑁂𑀦 𑀦𑀺𑀭𑁄𑀥𑁂𑀢𑀺 ¶ , 𑀦𑁄 𑀲𑀫𑀼𑀤𑁂𑀢𑀺. 𑀦𑀺𑀭𑁄𑀥𑀢𑁄𑀯 𑀫𑀦𑀲𑀺𑀓𑀭𑁄𑀢𑀺. 𑀦𑀺𑀭𑁄𑀥𑀫𑁂𑀯𑀲𑁆𑀲 𑀧𑀲𑁆𑀲𑀢𑀺, 𑀦𑁄 𑀲𑀫𑀼𑀤𑀬𑀦𑁆𑀢𑀺 𑀅𑀢𑁆𑀣𑁄.

𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀬𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄, 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 𑀘 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀦𑀢𑁄 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀬𑀣𑀸𑀯𑀼𑀢𑁆𑀢𑁂𑀦 𑀦𑀬𑁂𑀦 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀢𑀺. 𑀦𑀸𑀧𑀺 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀺𑀮𑁂𑀲𑁂 𑀆𑀤𑀺𑀬𑀢𑀺, 𑀦 𑀅𑀤𑁄𑀲𑀤𑀲𑁆𑀲𑀺𑀢𑀸𑀯𑀲𑁂𑀦 𑀲𑀗𑁆𑀔𑀢𑀸𑀭𑀫𑁆𑀫𑀡𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀻’’𑀢𑀺.

𑁭𑁪𑁩. 𑀇𑀤𑀸𑀦𑀺𑀲𑁆𑀲 𑀢𑁂𑀳𑀺 𑀜𑀸𑀡𑁂𑀳𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀁 𑀢𑀡𑁆𑀳𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁭𑁪𑁪. 𑀕𑀸𑀣𑀸𑀲𑀼 ¶ 𑀧𑀦 𑀯𑀢𑁆𑀣𑀼𑀲𑀗𑁆𑀓𑀫𑀦𑀸𑀢𑀺 𑀭𑀽𑀧𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀧𑀼𑀦 𑀬𑁂𑀦 𑀘𑀺𑀢𑁆𑀢𑁂𑀦 𑀪𑀗𑁆𑀕𑁄 𑀤𑀺𑀝𑁆𑀞𑁄, 𑀢𑀲𑁆𑀲𑀸𑀧𑀺 𑀪𑀗𑁆𑀕𑀤𑀲𑁆𑀲𑀦𑀯𑀲𑁂𑀦 𑀧𑀼𑀭𑀺𑀫𑀯𑀢𑁆𑀣𑀼𑀢𑁄 𑀅𑀜𑁆𑀜𑀯𑀢𑁆𑀣𑀼𑀲𑀗𑁆𑀓𑀫𑀦𑀸. 𑀧𑀜𑁆𑀜𑀸𑀬 𑀘 𑀯𑀺𑀯𑀝𑁆𑀝𑀦𑀸𑀢𑀺 𑀉𑀤𑀬𑀁 𑀧𑀳𑀸𑀬 𑀯𑀬𑁂 𑀲𑀦𑁆𑀢𑀺𑀝𑁆𑀞𑀦𑀸. 𑀆𑀯𑀚𑁆𑀚𑀦𑀸𑀩𑀮𑀜𑁆𑀘𑁂𑀯𑀸𑀢𑀺 𑀭𑀽𑀧𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀧𑀼𑀦 𑀪𑀗𑁆𑀕𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀤𑀲𑁆𑀲𑀦𑀢𑁆𑀣𑀁 𑀅𑀦𑀦𑁆𑀢𑀭𑀫𑁂𑀯 𑀆𑀯𑀚𑁆𑀚𑀦𑀲𑀫𑀢𑁆𑀣𑀢𑀸. 𑀧𑀝𑀺𑀲𑀗𑁆𑀔𑀸𑀯𑀺𑀧𑀲𑁆𑀲𑀦𑀸𑀢𑀺 𑀏𑀲𑀸 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸 𑀦𑀸𑀫.

𑁭𑁪𑁫. 𑀆𑀭𑀫𑁆𑀫𑀡𑀅𑀦𑁆𑀯𑀬𑁂𑀦 𑀉𑀪𑁄 𑀏𑀓𑀯𑀯𑀢𑁆𑀣𑀦𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑁆𑀯𑀬𑁂𑀦 𑀅𑀦𑀼𑀕𑀫𑀦𑁂𑀦 𑀬𑀣𑀸 𑀇𑀤𑀁, 𑀢𑀣𑀸 𑀅𑀢𑀻𑀢𑁂𑀧𑀺 𑀲𑀗𑁆𑀔𑀸𑀭𑀕𑀢𑀁 𑀪𑀺𑀚𑁆𑀚𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀏𑀓𑀲𑀪𑀸𑀯𑁂𑀦𑁂𑀯 𑀯𑀯𑀢𑁆𑀣𑀸𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀲𑀁𑀯𑀺𑀚𑁆𑀚𑀫𑀸𑀦𑀫𑁆𑀳𑀺 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁄,

𑀢𑀤𑀦𑁆𑀯𑀬𑀁 𑀦𑁂𑀢𑀺 𑀅𑀢𑀻𑀢𑀦𑀸𑀕𑀢𑁂;

𑀲𑀩𑁆𑀩𑁂𑀧𑀺 ¶ 𑀲𑀗𑁆𑀔𑀸𑀭𑀕𑀢𑀸 𑀧𑀮𑁄𑀓𑀺𑀦𑁄,

𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀲𑀽𑀭𑀺𑀬𑁂𑀯 𑀉𑀕𑁆𑀕𑀢𑁂’’𑀢𑀺.

𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀪𑀗𑁆𑀕𑀯𑀲𑁂𑀦 𑀏𑀓𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀪𑀗𑁆𑀕𑀲𑀗𑁆𑀔𑀸𑀢𑁂 𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸 𑀢𑀕𑁆𑀕𑀭𑀼𑀢𑀸 𑀢𑀦𑁆𑀦𑀺𑀦𑁆𑀦𑀢𑀸 𑀢𑀧𑁆𑀧𑁄𑀡𑀢𑀸 𑀢𑀧𑁆𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄. 𑀯𑀬𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸𑀢𑀺 𑀏𑀲𑀸 𑀯𑀬𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁪𑁬. 𑀆𑀭𑀫𑁆𑀫𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀢𑀺 𑀧𑀼𑀭𑀺𑀫𑀜𑁆𑀘 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀚𑀸𑀦𑀺𑀢𑁆𑀯𑀸. 𑀪𑀗𑁆𑀕𑀜𑁆𑀘 𑀅𑀦𑀼𑀧𑀲𑁆𑀲𑀢𑀻𑀢𑀺 𑀢𑀲𑁆𑀲𑀸𑀭𑀫𑁆𑀫𑀡𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑀺. 𑀲𑀼𑀜𑁆𑀜𑀢𑁄 𑀘 𑀉𑀧𑀝𑁆𑀞𑀸𑀦𑀦𑁆𑀢𑀺 𑀢𑀲𑁆𑀲𑁂𑀯𑀁 𑀪𑀗𑁆𑀕𑀁 𑀅𑀦𑀼𑀧𑀲𑁆𑀲𑀢𑁄 ‘‘𑀲𑀗𑁆𑀔𑀸𑀭𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀪𑁂𑀤𑁄 𑀫𑀭𑀡𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑀻’’𑀢𑀺 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀸𑀦𑀁 𑀇𑀚𑁆𑀛𑀢𑀺.

𑀢𑁂𑀦𑀸𑀳𑀼 ¶ 𑀧𑁄𑀭𑀸𑀡𑀸 𑁋

‘‘𑀔𑀦𑁆𑀥𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀦 𑀘𑀢𑁆𑀣𑀺 𑀅𑀜𑁆𑀜𑁄,

𑀔𑀦𑁆𑀥𑀸𑀦 𑀪𑁂𑀤𑁄 𑀫𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀢𑁂𑀲𑀁 𑀔𑀬𑀁 𑀧𑀲𑁆𑀲𑀢𑀺 𑀅𑀧𑁆𑀧𑀫𑀢𑁆𑀢𑁄,

𑀫𑀡𑀺𑀁𑀯 𑀯𑀺𑀚𑁆𑀛𑀁 𑀯𑀚𑀺𑀭𑁂𑀦 𑀬𑁄𑀦𑀺𑀲𑁄’’𑀢𑀺.

𑀅𑀥𑀺𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀢𑀺 𑀬𑀸 𑀘 𑀆𑀭𑀫𑁆𑀫𑀡𑀧𑀝𑀺𑀲𑀗𑁆𑀔𑀸 𑀬𑀸 𑀘 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸 𑀬𑀜𑁆𑀘 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀸𑀦𑀁, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁪𑁭. 𑀓𑀼𑀲𑀮𑁄 𑀢𑀻𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀽𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀢𑀻𑀲𑀼 𑀙𑁂𑀓𑁄 𑀪𑀺𑀓𑁆𑀔𑀼. 𑀘𑀢𑀲𑁆𑀲𑁄 𑀘 𑀯𑀺𑀧𑀲𑁆𑀲𑀦𑀸𑀲𑀽𑀢𑀺 𑀦𑀺𑀩𑁆𑀩𑀺𑀤𑀸𑀤𑀻𑀲𑀼 𑀘 𑀘𑀢𑀽𑀲𑀼 𑀯𑀺𑀧𑀲𑁆𑀲𑀦𑀸𑀲𑀼. 𑀢𑀬𑁄 𑀉𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑀸𑀢𑀺 𑀔𑀬𑀢𑁄 𑀯𑀬𑀢𑁄 𑀲𑀼𑀜𑁆𑀜𑀢𑁄𑀢𑀺 𑀇𑀫𑀲𑁆𑀫𑀺𑀜𑁆𑀘 𑀢𑀺𑀯𑀺𑀥𑁂 𑀉𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑀸𑀬. 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀻𑀲𑀼 𑀦𑀸𑀦𑀧𑁆𑀧𑀓𑀸𑀭𑀸𑀲𑀼 𑀤𑀺𑀝𑁆𑀞𑀻𑀲𑀼 𑀦 𑀯𑁂𑀥𑀢𑀺.

𑁭𑁪𑁮. 𑀲𑁄 𑀏𑀯𑀁 𑀅𑀯𑁂𑀥𑀫𑀸𑀦𑁄 ‘‘𑀅𑀦𑀺𑀭𑀼𑀤𑁆𑀥𑀫𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀅𑀪𑀺𑀦𑁆𑀦𑀫𑁂𑀯 𑀪𑀺𑀚𑁆𑀚𑀢𑀻’’𑀢𑀺 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 ¶ 𑀤𑀼𑀩𑁆𑀩𑀮𑀪𑀸𑀚𑀦𑀲𑁆𑀲 𑀯𑀺𑀬 𑀪𑀺𑀚𑁆𑀚𑀫𑀸𑀦𑀲𑁆𑀲, 𑀲𑀼𑀔𑀼𑀫𑀭𑀚𑀲𑁆𑀲𑁂𑀯 𑀯𑀺𑀧𑁆𑀧𑀓𑀺𑀭𑀺𑀬𑀫𑀸𑀦𑀲𑁆𑀲, 𑀢𑀺𑀮𑀸𑀦𑀁 𑀯𑀺𑀬 𑀪𑀚𑁆𑀚𑀺𑀬𑀫𑀸𑀦𑀸𑀦𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀧𑀯𑀢𑁆𑀢𑀦𑀺𑀫𑀺𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁂𑀤𑀫𑁂𑀯 𑀧𑀲𑁆𑀲𑀢𑀺. 𑀲𑁄 𑀬𑀣𑀸 𑀦𑀸𑀫 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀧𑁄𑀓𑁆𑀔𑀭𑀡𑀻𑀢𑀻𑀭𑁂 𑀯𑀸 𑀦𑀤𑀻𑀢𑀻𑀭𑁂 𑀯𑀸 𑀞𑀺𑀢𑁄 𑀣𑀽𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑀧𑀺𑀝𑁆𑀞𑁂 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀉𑀤𑀓𑀩𑀼𑀩𑁆𑀩𑀼𑀴𑀓𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀪𑀺𑀚𑁆𑀚𑀫𑀸𑀦𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀻𑀢𑀺 𑀧𑀲𑁆𑀲𑀢𑀺. 𑀏𑀯𑀭𑀽𑀧𑀁 𑀳𑀺 𑀬𑁄𑀕𑀸𑀯𑀘𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀬𑀣𑀸 𑀩𑀼𑀩𑁆𑀩𑀼𑀴𑀓𑀁 𑀧𑀲𑁆𑀲𑁂, 𑀬𑀣𑀸 𑀧𑀲𑁆𑀲𑁂 𑀫𑀭𑀻𑀘𑀺𑀓𑀁;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺. (𑀥. 𑀧. 𑁧𑁭𑁦);

𑁭𑁪𑁯. 𑀢𑀲𑁆𑀲𑁂𑀯𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀻’’𑀢𑀺 𑀅𑀪𑀺𑀡𑁆𑀳𑀁 𑀧𑀲𑁆𑀲𑀢𑁄 𑀅𑀝𑁆𑀞𑀸𑀦𑀺𑀲𑀁𑀲𑀧𑀭𑀺𑀯𑀸𑀭𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀩𑀮𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀺𑀫𑁂 𑀅𑀝𑁆𑀞𑀸𑀦𑀺𑀲𑀁𑀲𑀸 𑁋 𑀪𑀯𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁, 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀧𑀭𑀺𑀘𑁆𑀘𑀸𑀕𑁄, 𑀲𑀤𑀸𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸, 𑀯𑀺𑀲𑀼𑀤𑁆𑀥𑀸𑀚𑀻𑀯𑀺𑀢𑀸, 𑀉𑀲𑁆𑀲𑀼𑀓𑁆𑀓𑀧𑁆𑀧𑀳𑀸𑀦𑀁, 𑀯𑀺𑀕𑀢𑀪𑀬𑀢𑀸, 𑀔𑀦𑁆𑀢𑀺𑀲𑁄𑀭𑀘𑁆𑀘𑀧𑀝𑀺𑀮𑀸𑀪𑁄, 𑀅𑀭𑀢𑀺𑀭𑀢𑀺𑀲𑀳𑀦𑀢𑀸𑀢𑀺.

𑀢𑁂𑀦𑀸𑀳𑀼 ¶ 𑀧𑁄𑀭𑀸𑀡𑀸 𑁋

‘‘𑀇𑀫𑀸𑀦𑀺 𑀅𑀝𑁆𑀞𑀕𑁆𑀕𑀼𑀡𑀫𑀼𑀢𑁆𑀢𑀫𑀸𑀦𑀺,

𑀤𑀺𑀲𑁆𑀯𑀸 𑀢𑀳𑀺𑀁 𑀲𑀫𑁆𑀫𑀲𑀢𑁂 𑀧𑀼𑀦𑀧𑁆𑀧𑀼𑀦𑀁;

𑀆𑀤𑀺𑀢𑁆𑀢𑀘𑁂𑀮𑀲𑁆𑀲𑀺𑀭𑀲𑀽𑀧𑀫𑁄 𑀫𑀼𑀦𑀺,

𑀪𑀗𑁆𑀕𑀸𑀦𑀼𑀧𑀲𑁆𑀲𑀻 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸’’𑀢𑀺.

𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀓𑀣𑀸

𑁭𑁫𑁦. 𑀢𑀲𑁆𑀲𑁂𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀔𑀬𑀯𑀬𑀪𑁂𑀤𑀦𑀺𑀭𑁄𑀥𑀸𑀭𑀫𑁆𑀫𑀡𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 ¶ 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀪𑁂𑀤𑀓𑀸 𑀲𑀗𑁆𑀔𑀸𑀭𑀸 𑀲𑀼𑀔𑁂𑀦 𑀚𑀻𑀯𑀺𑀢𑀼𑀓𑀸𑀫𑀲𑁆𑀲 𑀪𑀻𑀭𑀼𑀓𑀧𑀼𑀭𑀺𑀲𑀲𑁆𑀲 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀅𑀘𑁆𑀙𑀢𑀭𑀘𑁆𑀙𑀬𑀓𑁆𑀔𑀭𑀓𑁆𑀔𑀲𑀘𑀡𑁆𑀟𑀕𑁄𑀡𑀘𑀡𑁆𑀟𑀓𑀼𑀓𑁆𑀓𑀼𑀭𑀧𑀪𑀺𑀦𑁆𑀦𑀫𑀤𑀘𑀡𑁆𑀟𑀳𑀢𑁆𑀣𑀺𑀖𑁄𑀭𑀆𑀲𑀻𑀯𑀺𑀲𑀅𑀲𑀦𑀺𑀯𑀺𑀘𑀓𑁆𑀓𑀲𑀼𑀲𑀸𑀦𑀭𑀡𑀪𑀽𑀫𑀺𑀚𑀮𑀺𑀢𑀅𑀗𑁆𑀕𑀸𑀭𑀓𑀸𑀲𑀼𑀆𑀤𑀬𑁄 𑀯𑀺𑀬 𑀫𑀳𑀸𑀪𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀲𑁆𑀲 ‘‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀗𑁆𑀔𑀸𑀭𑀸𑀧𑀺 𑀏𑀯𑀫𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀲𑁆𑀲𑀢𑁄 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑀺𑀲𑁆𑀲𑀸 𑀓𑀺𑀭 𑀇𑀢𑁆𑀣𑀺𑀬𑀸 𑀢𑀬𑁄 𑀧𑀼𑀢𑁆𑀢𑀸 𑀭𑀸𑀚𑀧𑀭𑀸𑀥𑀺𑀓𑀸, 𑀢𑁂𑀲𑀁 𑀭𑀸𑀚𑀸 𑀲𑀻𑀲𑀘𑁆𑀙𑁂𑀤𑀁 𑀆𑀡𑀸𑀧𑁂𑀲𑀺. 𑀲𑀸 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀆𑀖𑀸𑀢𑀦𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀚𑁆𑀛𑀺𑀫𑀲𑁆𑀲 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀲𑀸 𑀚𑁂𑀝𑁆𑀞𑀲𑁆𑀲 𑀲𑀻𑀲𑀁 𑀙𑀺𑀦𑁆𑀦𑀁 𑀫𑀚𑁆𑀛𑀺𑀫𑀲𑁆𑀲 𑀘 𑀙𑀺𑀚𑁆𑀚𑀫𑀸𑀦𑀁 𑀤𑀺𑀲𑁆𑀯𑀸 𑀓𑀦𑀺𑀝𑁆𑀞𑀫𑁆𑀳𑀺 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑀺 ‘‘𑀅𑀬𑀫𑁆𑀧𑀺 𑀏𑀢𑁂𑀲𑀜𑁆𑀜𑁂𑀯 𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀣 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀙𑀺𑀦𑁆𑀦𑀲𑀻𑀲𑀤𑀲𑁆𑀲𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀅𑀢𑀻𑀢𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁, 𑀫𑀚𑁆𑀛𑀺𑀫𑀲𑁆𑀲 𑀙𑀺𑀚𑁆𑀚𑀫𑀸𑀦𑀲𑀻𑀲𑀤𑀲𑁆𑀲𑀦𑀁 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁, ‘‘𑀅𑀬𑀫𑁆𑀧𑀺 𑀏𑀢𑁂𑀲𑀜𑁆𑀜𑁂𑀯 𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀦𑀺𑀝𑁆𑀞𑀧𑀼𑀢𑁆𑀢𑀫𑁆𑀳𑀺 𑀆𑀮𑀬𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 ‘‘𑀅𑀦𑀸𑀕𑀢𑁂𑀧𑀺 𑀦𑀺𑀩𑁆𑀩𑀢𑁆𑀢𑀦𑀓𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀕𑀢𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁. 𑀢𑀲𑁆𑀲𑁂𑀯𑀁 𑀧𑀲𑁆𑀲𑀢𑁄 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀉𑀧𑁆𑀧𑀚𑁆𑀚𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁.

𑀅𑀧𑀭𑀸𑀧𑀺 𑀉𑀧𑀫𑀸 𑁋 𑀏𑀓𑀸 𑀓𑀺𑀭 𑀧𑀽𑀢𑀺𑀧𑀚𑀸 𑀇𑀢𑁆𑀣𑀻 𑀤𑀲 𑀤𑀸𑀭𑀓𑁂 𑀯𑀺𑀚𑀸𑀬𑀺. 𑀢𑁂𑀲𑀼 𑀦𑀯 𑀫𑀢𑀸, 𑀏𑀓𑁄 𑀳𑀢𑁆𑀣𑀕𑀢𑁄 𑀫𑀭𑀢𑀺, 𑀅𑀧𑀭𑁄 𑀓𑀼𑀘𑁆𑀙𑀺𑀬𑀁. 𑀲𑀸 𑀦𑀯 𑀤𑀸𑀭𑀓𑁂 ¶ 𑀫𑀢𑁂 𑀤𑀲𑀫𑀜𑁆𑀘 𑀫𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀓𑀼𑀘𑁆𑀙𑀺𑀕𑀢𑁂 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑀺 ‘‘𑀅𑀬𑀫𑁆𑀧𑀺 𑀏𑀢𑁂𑀲𑀜𑁆𑀜𑁂𑀯 𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀣 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀦𑀯𑀦𑁆𑀦𑀁 𑀤𑀸𑀭𑀓𑀸𑀦𑀁 𑀫𑀭𑀡𑀸𑀦𑀼𑀲𑁆𑀲𑀭𑀡𑀁 𑀯𑀺𑀬 𑀬𑁄𑀕𑀺𑀦𑁄 𑀅𑀢𑀻𑀢𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁, 𑀳𑀢𑁆𑀣𑀕𑀢𑀲𑁆𑀲 𑀫𑀻𑀬𑀫𑀸𑀦𑀪𑀸𑀯𑀤𑀲𑁆𑀲𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁, 𑀓𑀼𑀘𑁆𑀙𑀺𑀕𑀢𑁂 𑀆𑀮𑀬𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀅𑀦𑀸𑀕𑀢𑀸𑀦𑀁 𑀦𑀺𑀭𑁄𑀥𑀤𑀲𑁆𑀲𑀦𑀁. 𑀢𑀲𑁆𑀲𑁂𑀯𑀁 𑀧𑀲𑁆𑀲𑀢𑁄 𑀏𑀢𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀚𑁆𑀚𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁.

𑁭𑁫𑁧. 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀧𑀦 𑀪𑀸𑀬𑀢𑀺 𑀦 𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀦𑀕𑀭𑀤𑁆𑀯𑀸𑀭𑁂 𑀢𑀺𑀲𑁆𑀲𑁄 𑀅𑀗𑁆𑀕𑀸𑀭𑀓𑀸𑀲𑀼𑀬𑁄 𑀑𑀮𑁄𑀓𑀬𑀫𑀸𑀦𑁄 𑀲𑀬𑀁 𑀦 𑀪𑀸𑀬𑀢𑀺, 𑀓𑁂𑀯𑀮𑀁 𑀳𑀺𑀲𑁆𑀲 ‘‘𑀬𑁂 𑀬𑁂 𑀏𑀢𑁆𑀣 𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀯𑀸 𑀧𑀦 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀔𑀤𑀺𑀭𑀲𑀽𑀮𑀁 𑀅𑀬𑁄𑀲𑀽𑀮𑀁 𑀲𑀼𑀯𑀡𑁆𑀡𑀲𑀽𑀮𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 ¶ 𑀞𑀧𑀺𑀢𑀁 𑀲𑀽𑀮𑀢𑁆𑀢𑀬𑀁 𑀑𑀮𑁄𑀓𑀬𑀫𑀸𑀦𑁄 𑀲𑀬𑀁 𑀦 𑀪𑀸𑀬𑀢𑀺, 𑀓𑁂𑀯𑀮𑀁 𑀳𑀺𑀲𑁆𑀲 ‘‘𑀬𑁂 𑀬𑁂 𑀇𑀫𑁂𑀲𑀼 𑀲𑀽𑀮𑁂𑀲𑀼 𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀲𑀬𑀁 𑀦 𑀪𑀸𑀬𑀢𑀺, 𑀓𑁂𑀯𑀮𑀁 𑀳𑀺𑀲𑁆𑀲 𑀅𑀗𑁆𑀕𑀸𑀭𑀓𑀸𑀲𑀼𑀢𑁆𑀢𑀬𑀲𑀤𑀺𑀲𑁂𑀲𑀼, 𑀲𑀽𑀮𑀢𑁆𑀢𑀬𑀲𑀤𑀺𑀲𑁂𑀲𑀼 𑀘 𑀢𑀻𑀲𑀼 𑀪𑀯𑁂𑀲𑀼 ‘‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀓𑁂𑀯𑀮𑀁 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑀕𑀢𑀸 𑀲𑀗𑁆𑀔𑀸𑀭𑀸 𑀩𑁆𑀬𑀲𑀦𑀸𑀧𑀦𑁆𑀦𑀸 𑀲𑀧𑁆𑀧𑀝𑀺𑀪𑀬𑀸 𑀳𑀼𑀢𑁆𑀯𑀸 𑀪𑀬𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀪𑀬𑀢𑀼𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 𑀪𑀬𑀢𑁄 𑀉𑀧𑀝𑁆𑀞𑀸𑀦𑁂 𑀧𑀦𑀲𑁆𑀲 𑀅𑀬𑀁 𑀧𑀸𑀴𑀺 𑁋

‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺? 𑀤𑀼𑀓𑁆𑀔𑀢𑁄. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀻𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀪𑀬𑀢𑁄 𑀉𑀧𑀝𑁆𑀞𑀸𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁨𑁭).

𑀢𑀢𑁆𑀣 ¶ 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀫𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀫𑀭𑀡𑀫𑁂𑀯 𑀧𑀲𑁆𑀲𑀢𑀺, 𑀢𑁂𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀧𑀯𑀢𑁆𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀪𑀯𑀧𑀯𑀢𑁆𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀳𑀺 𑀲𑀼𑀔𑀲𑀫𑁆𑀫𑀢𑀸𑀬𑀧𑀺 𑀧𑀯𑀢𑁆𑀢𑀺𑀬𑀸 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀪𑀸𑀯𑀫𑁂𑀯 𑀧𑀲𑁆𑀲𑀢𑀺, 𑀢𑁂𑀦𑀲𑁆𑀲 𑀧𑀯𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀲𑀼𑀜𑁆𑀜𑀕𑀸𑀫𑀁 𑀯𑀺𑀬 𑀫𑀭𑀻𑀘𑀺𑀕𑀦𑁆𑀥𑀩𑁆𑀩𑀦𑀕𑀭𑀸𑀤𑀻𑀦𑀺 𑀯𑀺𑀬 𑀘 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑀼𑀜𑁆𑀜𑀁 𑀅𑀲𑁆𑀲𑀸𑀫𑀺𑀓𑀁 𑀅𑀧𑀭𑀺𑀡𑀸𑀬𑀓𑀁 𑀧𑀲𑁆𑀲𑀢𑀺. 𑀢𑁂𑀦𑀲𑁆𑀲 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀉𑀪𑀬𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀻𑀢𑀺.

𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸

𑁭𑁫𑁨. 𑀢𑀲𑁆𑀲 𑀢𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 ¶ 𑀦𑁂𑀯 𑀢𑀸𑀡𑀁, 𑀦 𑀮𑁂𑀡𑀁, 𑀦 𑀕𑀢𑀺, 𑀦𑀧𑁆𑀧𑀝𑀺𑀲𑀭𑀡𑀁 𑀧𑀜𑁆𑀜𑀸𑀬𑀢𑀺. 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑀕𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀏𑀓𑀲𑀗𑁆𑀔𑀸𑀭𑁂𑀧𑀺 𑀧𑀢𑁆𑀣𑀦𑀸 𑀯𑀸 𑀧𑀭𑀸𑀫𑀸𑀲𑁄 𑀯𑀸 𑀦 𑀳𑁄𑀢𑀺. 𑀢𑀬𑁄 𑀪𑀯𑀸 𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑀧𑀼𑀡𑁆𑀡𑀅𑀗𑁆𑀕𑀸𑀭𑀓𑀸𑀲𑀼𑀬𑁄 𑀯𑀺𑀬, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀖𑁄𑀭𑀯𑀺𑀲𑀆𑀲𑀻𑀯𑀺𑀲𑀸 𑀯𑀺𑀬, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀸 𑀯𑀺𑀬, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬, 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀘 𑀲𑀢𑁆𑀢𑀸𑀯𑀸𑀲𑀸 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀸 𑀲𑀫𑁆𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸 𑀯𑀺𑀬 𑀘, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀕𑀡𑁆𑀟𑀪𑀽𑀢𑀸 𑀭𑁄𑀕𑀪𑀽𑀢𑀸 𑀲𑀮𑁆𑀮𑀪𑀽𑀢𑀸 𑀅𑀖𑀪𑀽𑀢𑀸 𑀆𑀩𑀸𑀥𑀪𑀽𑀢𑀸 𑀯𑀺𑀬 𑀘 𑀦𑀺𑀭𑀲𑁆𑀲𑀸𑀤𑀸 𑀦𑀺𑀭𑀲𑀸 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺.

𑀓𑀣𑀁? 𑀲𑀼𑀔𑁂𑀦 𑀚𑀻𑀯𑀺𑀢𑀼𑀓𑀸𑀫𑀲𑁆𑀲 𑀪𑀻𑀭𑀼𑀓𑀧𑀼𑀭𑀺𑀲𑀲𑁆𑀲 𑀭𑀫𑀡𑀻𑀬𑀸𑀓𑀸𑀭𑀲𑀡𑁆𑀞𑀺𑀢𑀫𑁆𑀧𑀺 𑀲𑀯𑀸𑀴𑀓𑀫𑀺𑀯 𑀯𑀦𑀕𑀳𑀦𑀁, 𑀲𑀲𑀤𑁆𑀤𑀽𑀮𑀸 𑀯𑀺𑀬 𑀕𑀼𑀳𑀸, 𑀲𑀕𑀸𑀳𑀭𑀓𑁆𑀔𑀲𑀁 𑀯𑀺𑀬 𑀉𑀤𑀓𑀁, 𑀲𑀫𑀼𑀲𑁆𑀲𑀺𑀢𑀔𑀕𑁆𑀕𑀸 𑀯𑀺𑀬 𑀧𑀘𑁆𑀘𑀢𑁆𑀣𑀺𑀓𑀸, 𑀲𑀯𑀺𑀲𑀁 𑀯𑀺𑀬 𑀪𑁄𑀚𑀦𑀁, 𑀲𑀘𑁄𑀭𑁄 𑀯𑀺𑀬 𑀫𑀕𑁆𑀕𑁄, 𑀆𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁, 𑀉𑀬𑁆𑀬𑀼𑀢𑁆𑀢𑀲𑁂𑀦𑀸 𑀯𑀺𑀬 𑀭𑀡𑀪𑀽𑀫𑀺. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀏𑀢𑀸𑀦𑀺 𑀲𑀯𑀸𑀴𑀓𑀯𑀦𑀕𑀳𑀦𑀸𑀤𑀻𑀦𑀺 𑀆𑀕𑀫𑁆𑀫 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀲𑀫𑀦𑁆𑀢𑀢𑁄 𑀆𑀤𑀻𑀦𑀯𑀫𑁂𑀯 𑀧𑀲𑁆𑀲𑀢𑀺, 𑀏𑀯𑀫𑁂𑀯𑀸𑀬𑀁 𑀬𑁄𑀕𑀸𑀯𑀘𑀭𑁄 ¶ 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂𑀲𑀼 𑀲𑀫𑀦𑁆𑀢𑀢𑁄 𑀦𑀺𑀭𑀲𑀁 𑀦𑀺𑀭𑀲𑁆𑀲𑀸𑀤𑀁 𑀆𑀤𑀻𑀦𑀯𑀫𑁂𑀯 𑀧𑀲𑁆𑀲𑀢𑀺. 𑀢𑀲𑁆𑀲𑁂𑀯𑀁 𑀧𑀲𑁆𑀲𑀢𑁄 𑀆𑀤𑀻𑀦𑀯𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀓𑀣𑀁 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁? 𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀪𑀬𑀦𑁆𑀢𑀺… 𑀦𑀺𑀫𑀺𑀢𑁆𑀢𑀁 𑀪𑀬𑀦𑁆𑀢𑀺… 𑀆𑀬𑀽𑀳𑀦𑀸 𑀪𑀬𑀦𑁆𑀢𑀺… 𑀧𑀝𑀺𑀲𑀦𑁆𑀥𑀺 𑀪𑀬𑀦𑁆𑀢𑀺… 𑀕𑀢𑀺 𑀪𑀬𑀦𑁆𑀢𑀺… 𑀦𑀺𑀩𑁆𑀩𑀢𑁆𑀢𑀺 𑀪𑀬𑀦𑁆𑀢𑀺… 𑀉𑀧𑀧𑀢𑁆𑀢𑀺 𑀪𑀬𑀦𑁆𑀢𑀺… 𑀚𑀸𑀢𑀺 𑀪𑀬𑀦𑁆𑀢𑀺… 𑀚𑀭𑀸 𑀪𑀬𑀦𑁆𑀢𑀺… 𑀩𑁆𑀬𑀸𑀥𑀺 𑀪𑀬𑀦𑁆𑀢𑀺… 𑀫𑀭𑀡𑀁 𑀪𑀬𑀦𑁆𑀢𑀺… 𑀲𑁄𑀓𑁄 𑀪𑀬𑀦𑁆𑀢𑀺… 𑀧𑀭𑀺𑀤𑁂𑀯𑁄 𑀪𑀬𑀦𑁆𑀢𑀺… 𑀉𑀧𑀸𑀬𑀸𑀲𑁄 𑀪𑀬𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀪𑀬𑀁, 𑀅𑀦𑀼𑀧𑀸𑀬𑀸𑀲𑁄 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

‘‘𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀤𑀼𑀓𑁆𑀔𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁄 𑀲𑀼𑀔𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 ¶ 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀲𑀼𑀔𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀁, 𑀅𑀦𑀼𑀧𑁆𑀧𑀸𑀤𑁄 𑀲𑀼𑀔𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀤𑀼𑀓𑁆𑀔𑀁, 𑀅𑀦𑀼𑀧𑀸𑀬𑀸𑀲𑁄 𑀲𑀼𑀔𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

‘‘𑀉𑀧𑁆𑀧𑀸𑀤𑁄 𑀲𑀸𑀫𑀺𑀲𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀸𑀫𑀺𑀲𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀉𑀧𑁆𑀧𑀸𑀤𑁄 𑀲𑀸𑀫𑀺𑀲𑀁, 𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀸𑀫𑀺𑀲𑀁, 𑀅𑀦𑀼𑀧𑀸𑀬𑀸𑀲𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 ¶ ‘‘𑀲𑀗𑁆𑀔𑀸𑀭𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸, 𑀅𑀦𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸, 𑀅𑀦𑀼𑀧𑀸𑀬𑀸𑀲𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

‘‘𑀉𑀧𑁆𑀧𑀸𑀤𑀜𑁆𑀘 𑀧𑀯𑀢𑁆𑀢𑀜𑁆𑀘, 𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀦𑁆𑀢𑀺 𑀧𑀲𑁆𑀲𑀢𑀺;

𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁, 𑀜𑀸𑀡𑀁 𑀆𑀤𑀻𑀦𑀯𑁂 𑀇𑀤𑀁.

‘‘𑀅𑀦𑀼𑀧𑁆𑀧𑀸𑀤𑀁 𑀅𑀧𑁆𑀧𑀯𑀢𑁆𑀢𑀁, 𑀅𑀦𑀺𑀫𑀺𑀢𑁆𑀢𑀁 𑀲𑀼𑀔𑀦𑁆𑀢𑀺 𑀘;

𑀅𑀦𑀸𑀬𑀽𑀳𑀦𑀸 𑀅𑀧𑁆𑀧𑀝𑀺𑀲𑀦𑁆𑀥𑀺, 𑀜𑀸𑀡𑀁 𑀲𑀦𑁆𑀢𑀺𑀧𑀤𑁂 𑀇𑀤𑀁.

‘‘𑀇𑀤𑀁 𑀆𑀤𑀻𑀦𑀯𑁂 𑀜𑀸𑀡𑀁, 𑀧𑀜𑁆𑀘𑀞𑀸𑀦𑁂𑀲𑀼 𑀚𑀸𑀬𑀢𑀺;

𑀧𑀜𑁆𑀘𑀞𑀸𑀦𑁂 𑀲𑀦𑁆𑀢𑀺𑀧𑀤𑁂, 𑀤𑀲 𑀜𑀸𑀡𑁂 𑀧𑀚𑀸𑀦𑀸𑀢𑀺;

𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀓𑀼𑀲𑀮𑀢𑀸, 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻’’𑀢𑀺.

‘‘𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁. 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁩).

𑁭𑁫𑁩. 𑀢𑀢𑁆𑀣 ¶ 𑀉𑀧𑁆𑀧𑀸𑀤𑁄𑀢𑀺 𑀧𑀼𑀭𑀺𑀫𑀓𑀫𑁆𑀫𑀧𑀘𑁆𑀘𑀬𑀸 𑀇𑀥 𑀉𑀧𑁆𑀧𑀢𑁆𑀢𑀺. 𑀧𑀯𑀢𑁆𑀢𑀦𑁆𑀢𑀺 𑀢𑀣𑀸 𑀉𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁. 𑀆𑀬𑀽𑀳𑀦𑀸𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀧𑀝𑀺𑀲𑀦𑁆𑀥𑀻𑀢𑀺 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺. 𑀕𑀢𑀻𑀢𑀺 𑀬𑀸𑀬 𑀕𑀢𑀺𑀬𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀦𑀺𑀩𑁆𑀩𑀢𑁆𑀢𑀻𑀢𑀺 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁. 𑀉𑀧𑀧𑀢𑁆𑀢𑀻𑀢𑀺 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸’’𑀢𑀺 (𑀥. 𑀲. 𑁧𑁨𑁮𑁯, 𑁧𑁨𑁯𑁧) 𑀏𑀯𑀁 𑀯𑀼𑀢𑁆𑀢𑀸 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺. 𑀚𑀸𑀢𑀻𑀢𑀺 𑀚𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀸 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺. 𑀚𑀭𑀸𑀫𑀭𑀡𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑀸𑀤𑀬𑁄 𑀧𑀜𑁆𑀘𑁂𑀯 𑀆𑀤𑀻𑀦𑀯𑀜𑀸𑀡𑀲𑁆𑀲 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀸. 𑀲𑁂𑀲𑀸 𑀢𑁂𑀲𑀁 𑀯𑁂𑀯𑀘𑀦𑀯𑀲𑁂𑀦. 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀻𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀉𑀧𑁆𑀧𑀸𑀤𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀘 𑀯𑁂𑀯𑀘𑀦𑀁. 𑀕𑀢𑀺 𑀉𑀧𑀧𑀢𑁆𑀢𑀻𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀯𑀢𑁆𑀢𑀲𑁆𑀲. 𑀚𑀭𑀸𑀤𑀬𑁄 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺. 𑀢𑁂𑀦𑀸𑀳 𑁋

‘‘𑀉𑀧𑁆𑀧𑀸𑀤𑀜𑁆𑀘 𑀧𑀯𑀢𑁆𑀢𑀜𑁆𑀘, 𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀦𑁆𑀢𑀺 𑀧𑀲𑁆𑀲𑀢𑀺;

𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁, 𑀜𑀸𑀡𑀁 𑀆𑀤𑀻𑀦𑀯𑁂 𑀇𑀤’’𑀦𑁆𑀢𑀺 𑀘.

‘‘𑀇𑀤𑀁 𑀆𑀤𑀻𑀦𑀯𑁂 𑀜𑀸𑀡𑀁, 𑀧𑀜𑁆𑀘𑀞𑀸𑀦𑁂𑀲𑀼 𑀚𑀸𑀬𑀢𑀻’’𑀢𑀺 𑀘.

𑀅𑀦𑀼𑀧𑁆𑀧𑀸𑀤𑁄 ¶ 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀦𑁆𑀢𑀺𑀆𑀤𑀺 𑀧𑀦 𑀆𑀤𑀻𑀦𑀯𑀜𑀸𑀡𑀲𑁆𑀲 𑀧𑀝𑀺𑀧𑀓𑁆𑀔𑀜𑀸𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀬𑀢𑀼𑀧𑀝𑁆𑀞𑀸𑀦𑁂𑀦 𑀯𑀸 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀉𑀩𑁆𑀩𑀺𑀕𑁆𑀕𑀳𑀤𑀬𑀸𑀦𑀁 𑀅𑀪𑀬𑀫𑁆𑀧𑀺 𑀅𑀢𑁆𑀣𑀺 𑀔𑁂𑀫𑀁 𑀦𑀺𑀭𑀸𑀤𑀻𑀦𑀯𑀦𑁆𑀢𑀺 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀫𑁆𑀧𑀺 𑀏𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀧𑀦𑀲𑁆𑀲 𑀉𑀧𑁆𑀧𑀸𑀤𑀸𑀤𑀬𑁄 𑀪𑀬𑀢𑁄 𑀲𑀽𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀢𑀧𑁆𑀧𑀝𑀺𑀧𑀓𑁆𑀔𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀪𑀬𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀲𑀺𑀤𑁆𑀥𑀲𑁆𑀲 𑀆𑀤𑀻𑀦𑀯𑀜𑀸𑀡𑀲𑁆𑀲 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀫𑁆𑀧𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀬𑀁 𑀪𑀬𑀁, 𑀢𑀁 𑀬𑀲𑁆𑀫𑀸 𑀦𑀺𑀬𑀫𑀢𑁄 𑀤𑀼𑀓𑁆𑀔𑀁. 𑀢𑀁 𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀓𑀺𑀮𑁂𑀲𑀸𑀫𑀺𑀲𑁂𑀳𑀺 𑀅𑀯𑀺𑀧𑁆𑀧𑀫𑀼𑀢𑁆𑀢𑀢𑁆𑀢𑀸 𑀲𑀸𑀫𑀺𑀲𑀫𑁂𑀯. 𑀬𑀜𑁆𑀘 𑀲𑀸𑀫𑀺𑀲𑀁, 𑀢𑀁 𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯. 𑀢𑀲𑁆𑀫𑀸 ‘‘𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀦𑁆𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀬𑀸𑀓𑀸𑀭𑁂𑀦 𑀤𑀼𑀓𑁆𑀔𑀸𑀓𑀸𑀭𑁂𑀦 𑀲𑀸𑀫𑀺𑀲𑀸𑀓𑀸𑀭𑁂𑀦𑀸𑀢𑀺 𑀏𑀯𑀁 𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀧𑀯𑀢𑁆𑀢𑀺𑀯𑀲𑁂𑀦𑁂𑀯𑁂𑀢𑁆𑀣 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀜𑀸𑀡𑁂 𑀧𑀚𑀸𑀦𑀸𑀢𑀻𑀢𑀺 𑀆𑀤𑀻𑀦𑀯𑀜𑀸𑀡𑀁 𑀧𑀚𑀸𑀦𑀦𑁆𑀢𑁄 𑀉𑀧𑁆𑀧𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑀺 𑀧𑀜𑁆𑀘, 𑀅𑀦𑀼𑀧𑁆𑀧𑀸𑀤𑀸𑀤𑀺𑀯𑀢𑁆𑀣𑀼𑀓𑀸𑀦𑀺 𑀧𑀜𑁆𑀘𑀸𑀢𑀺 𑀤𑀲 𑀜𑀸𑀡𑀸𑀦𑀺 𑀧𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀲𑀘𑁆𑀙𑀺𑀓𑀭𑁄𑀢𑀺. 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀓𑀼𑀲𑀮𑀢𑀸𑀢𑀺 𑀆𑀤𑀻𑀦𑀯𑀜𑀸𑀡𑀲𑁆𑀲 𑀘𑁂𑀯 𑀲𑀦𑁆𑀢𑀺𑀧𑀤𑀜𑀸𑀡𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑀼𑀲𑀮𑀢𑀸𑀬. 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 ¶ 𑀦 𑀓𑀫𑁆𑀧𑀢𑀻𑀢𑀺 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀲𑀼 𑀤𑀺𑀝𑁆𑀞𑀻𑀲𑀼 𑀦 𑀯𑁂𑀥𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸

𑁭𑁫𑁪. 𑀲𑁄 𑀏𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑁂 𑀆𑀤𑀻𑀦𑀯𑀢𑁄 𑀧𑀲𑁆𑀲𑀦𑁆𑀢𑁄 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀕𑀢𑁂 𑀲𑀪𑁂𑀤𑀓𑁂 𑀲𑀗𑁆𑀔𑀸𑀭𑀕𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑀺 𑀉𑀓𑁆𑀓𑀡𑁆𑀞𑀢𑀺 𑀦𑀸𑀪𑀺𑀭𑀫𑀢𑀺.

𑀲𑁂𑀬𑁆𑀬𑀣𑀸𑀧𑀺 𑀦𑀸𑀫, 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀧𑀸𑀤𑀸𑀪𑀺𑀭𑀢𑁄 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁄 𑀅𑀲𑀼𑀘𑀺𑀫𑁆𑀳𑀺 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑀆𑀯𑀸𑀝𑁂 𑀦𑀸𑀪𑀺𑀭𑀫𑀢𑀺, 𑀲𑀢𑁆𑀢𑀲𑀼 𑀫𑀳𑀸𑀲𑀭𑁂𑀲𑀼𑀬𑁂𑀯 𑀅𑀪𑀺𑀭𑀫𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀬𑁄𑀕𑀻𑀭𑀸𑀚𑀳𑀁𑀲𑁄 𑀲𑀼𑀧𑀭𑀺𑀤𑀺𑀝𑁆𑀞𑀸𑀤𑀻𑀦𑀯𑁂 𑀲𑀪𑁂𑀤𑀓𑁂 𑀲𑀗𑁆𑀔𑀸𑀭𑀕𑀢𑁂 𑀦𑀸𑀪𑀺𑀭𑀫𑀢𑀺. 𑀪𑀸𑀯𑀦𑀸𑀭𑀸𑀫𑀢𑀸𑀬 𑀧𑀦 𑀪𑀸𑀯𑀦𑀸𑀭𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁆𑀢𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼𑀬𑁂𑀯 𑀭𑀫𑀢𑀺.

𑀬𑀣𑀸 ¶ 𑀘 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦𑀸𑀪𑀺𑀭𑀫𑀢𑀺, 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀧𑀦 𑀳𑀺𑀫𑀯𑀦𑁆𑀢𑁂𑀬𑁂𑀯 𑀭𑀫𑀢𑀺, 𑀏𑀯𑀫𑀬𑀁 𑀬𑁄𑀕𑀻𑀲𑀻𑀳𑁄 𑀢𑀺𑀯𑀺𑀥𑁂 𑀲𑀼𑀕𑀢𑀺𑀪𑀯𑁂𑀧𑀺 𑀦𑀸𑀪𑀺𑀭𑀫𑀢𑀺, 𑀢𑀻𑀲𑀼 𑀧𑀦 𑀅𑀦𑀼𑀧𑀲𑁆𑀲𑀦𑀸𑀲𑀼𑀬𑁂𑀯 𑀭𑀫𑀢𑀺.

𑀬𑀣𑀸 𑀘 𑀲𑀩𑁆𑀩𑀲𑁂𑀢𑁄 𑀲𑀢𑁆𑀢𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀦𑀕𑀭𑀫𑀚𑁆𑀛𑁂 𑀦𑀸𑀪𑀺𑀭𑀫𑀢𑀺, 𑀳𑀺𑀫𑀯𑀢𑀺 𑀙𑀤𑁆𑀤𑀦𑁆𑀢𑀤𑀳𑀕𑀳𑀦𑁂𑀬𑁂𑀯 𑀅𑀪𑀺𑀭𑀫𑀢𑀺, 𑀏𑀯𑀫𑀬𑀁 𑀬𑁄𑀕𑀻𑀯𑀭𑀯𑀸𑀭𑀡𑁄 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑁂 𑀦𑀸𑀪𑀺𑀭𑀫𑀢𑀺, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀝𑁆𑀞𑁂 𑀲𑀦𑁆𑀢𑀺𑀧𑀤𑁂𑀬𑁂𑀯 𑀅𑀪𑀺𑀭𑀫𑀢𑀺, 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀫𑀸𑀦𑀲𑁄 𑀳𑁄𑀢𑀻𑀢𑀺.

𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑁭𑁫𑁫. 𑀢𑀁 𑀧𑀦𑁂𑀢𑀁 𑀧𑀼𑀭𑀺𑀫𑁂𑀦 𑀜𑀸𑀡𑀤𑁆𑀯𑀬𑁂𑀦 𑀅𑀢𑁆𑀣𑀢𑁄 𑀏𑀓𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀪𑀬𑀢𑀼𑀧𑀝𑁆𑀞𑀸𑀦𑀁 ¶ 𑀏𑀓𑀫𑁂𑀯 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑁂 𑀪𑀬𑀢𑁄 𑀅𑀤𑁆𑀤𑀲𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀁 𑀦𑀸𑀫 𑀚𑀸𑀢𑀁. 𑀢𑁂𑀲𑀼𑀬𑁂𑀯 𑀲𑀗𑁆𑀔𑀸𑀭𑁂𑀲𑀼 𑀆𑀤𑀻𑀦𑀯𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀚𑀸𑀢𑀁. 𑀢𑁂𑀲𑀼𑀬𑁂𑀯 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀚𑀸𑀢’’𑀦𑁆𑀢𑀺.

𑀧𑀸𑀴𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀬𑀸 𑀘 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸, 𑀬𑀜𑁆𑀘 𑀆𑀤𑀻𑀦𑀯𑁂 𑀜𑀸𑀡𑀁, 𑀬𑀸 𑀘 𑀦𑀺𑀩𑁆𑀩𑀺𑀤𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁨𑁭).

𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀓𑀣𑀸

𑁭𑁫𑁬. 𑀇𑀫𑀺𑀦𑀸 𑀧𑀦 𑀦𑀺𑀩𑁆𑀩𑀺𑀤𑀸𑀜𑀸𑀡𑁂𑀦 𑀇𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀉𑀓𑁆𑀓𑀡𑁆𑀞𑀦𑁆𑀢𑀲𑁆𑀲 𑀅𑀦𑀪𑀺𑀭𑀫𑀦𑁆𑀢𑀲𑁆𑀲 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀕𑀢𑁂𑀲𑀼 𑀲𑀪𑁂𑀤𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀏𑀓𑀲𑀗𑁆𑀔𑀸𑀭𑁂𑀧𑀺 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺, 𑀦 𑀮𑀕𑁆𑀕𑀢𑀺, 𑀦 𑀩𑀚𑁆𑀛𑀢𑀺, 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀁 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀁 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀸𑀫 𑀚𑀸𑀮𑀩𑁆𑀪𑀦𑁆𑀢𑀭𑀕𑀢𑁄 𑀫𑀘𑁆𑀙𑁄, 𑀲𑀧𑁆𑀧𑀫𑀼𑀔𑀕𑀢𑁄 𑀫𑀡𑁆𑀟𑀽𑀓𑁄, 𑀧𑀜𑁆𑀚𑀭𑀧𑀓𑁆𑀔𑀺𑀢𑁆𑀢𑁄 𑀯𑀦𑀓𑀼𑀓𑁆𑀓𑀼𑀝𑁄, 𑀤𑀴𑁆𑀳𑀧𑀸𑀲𑀯𑀲𑀕𑀢𑁄 𑀫𑀺𑀕𑁄, 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀕𑀢𑁄 𑀲𑀧𑁆𑀧𑁄, 𑀫𑀳𑀸𑀧𑀗𑁆𑀓𑀧𑀓𑁆𑀔𑀦𑁆𑀤𑁄 𑀓𑀼𑀜𑁆𑀚𑀭𑁄, 𑀲𑀼𑀧𑀡𑁆𑀡𑀫𑀼𑀔𑀕𑀢𑁄 ¶ 𑀦𑀸𑀕𑀭𑀸𑀚𑀸, 𑀭𑀸𑀳𑀼𑀫𑀼𑀔𑀧𑁆𑀧𑀯𑀺𑀝𑁆𑀞𑁄 𑀘𑀦𑁆𑀤𑁄, 𑀲𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑁄 𑀧𑀼𑀭𑀺𑀲𑁄𑀢𑀺 𑀏𑀯𑀫𑀸𑀤𑀬𑁄 𑀢𑀢𑁄 𑀢𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀢𑀲𑁆𑀲 𑀬𑁄𑀕𑀺𑀦𑁄 𑀘𑀺𑀢𑁆𑀢𑀁 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀁 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀁 𑀳𑁄𑀢𑀺. 𑀅𑀣𑀲𑁆𑀲 𑀏𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀯𑀺𑀕𑀢𑀸𑀮𑀬𑀲𑁆𑀲 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀜𑀸𑀡𑀦𑁆𑀢𑀺.

𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸

𑁭𑁫𑁭. 𑀲𑁄 𑀏𑀯𑀁 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀝𑁆𑀞𑀺𑀢𑀺𑀦𑀺𑀯𑀸𑀲𑀕𑀢𑁂𑀳𑀺 𑀲𑀪𑁂𑀤𑀓𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀘𑁆𑀘𑀺𑀢𑀼𑀁 𑀧𑀼𑀦 𑀢𑁂 𑀏𑀯𑀁 𑀲𑀗𑁆𑀔𑀸𑀭𑁂 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀲𑁄 ¶ 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀘𑁆𑀘𑀦𑁆𑀢𑀺𑀓𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀉𑀧𑁆𑀧𑀸𑀤𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑁄, 𑀧𑀮𑁄𑀓𑀢𑁄, 𑀘𑀮𑀢𑁄, 𑀧𑀪𑀗𑁆𑀕𑀼𑀢𑁄, 𑀅𑀤𑁆𑀥𑀼𑀯𑀢𑁄, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄, 𑀅𑀲𑁆𑀲𑀸𑀭𑀓𑀢𑁄, 𑀯𑀺𑀪𑀯𑀢𑁄, 𑀲𑀗𑁆𑀔𑀢𑀢𑁄, 𑀫𑀭𑀡𑀥𑀫𑁆𑀫𑀢𑁄𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀸𑀢𑀺 𑀧𑀲𑁆𑀲𑀢𑀺.

𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀢𑁄, 𑀤𑀼𑀓𑁆𑀔𑀫𑀢𑁄, 𑀤𑀼𑀓𑁆𑀔𑀯𑀢𑁆𑀣𑀼𑀢𑁄, 𑀭𑁄𑀕𑀢𑁄, 𑀕𑀡𑁆𑀟𑀢𑁄, 𑀲𑀮𑁆𑀮𑀢𑁄, 𑀅𑀖𑀢𑁄, 𑀆𑀩𑀸𑀥𑀢𑁄, 𑀈𑀢𑀺𑀢𑁄, 𑀉𑀧𑀤𑁆𑀤𑀯𑀢𑁄, 𑀪𑀬𑀢𑁄, 𑀉𑀧𑀲𑀕𑁆𑀕𑀢𑁄, 𑀅𑀢𑀸𑀡𑀢𑁄, 𑀅𑀮𑁂𑀡𑀢𑁄, 𑀅𑀲𑀭𑀡𑀢𑁄, 𑀆𑀤𑀻𑀦𑀯𑀢𑁄, 𑀅𑀖𑀫𑀽𑀮𑀢𑁄, 𑀯𑀥𑀓𑀢𑁄, 𑀲𑀸𑀲𑀯𑀢𑁄, 𑀫𑀸𑀭𑀸𑀫𑀺𑀲𑀢𑁄, 𑀚𑀸𑀢𑀺𑀥𑀫𑁆𑀫𑀢𑁄, 𑀚𑀭𑀸𑀥𑀫𑁆𑀫𑀢𑁄, 𑀩𑁆𑀬𑀸𑀥𑀺𑀥𑀫𑁆𑀫𑀢𑁄, 𑀲𑁄𑀓𑀥𑀫𑁆𑀫𑀢𑁄, 𑀧𑀭𑀺𑀤𑁂𑀯𑀥𑀫𑁆𑀫𑀢𑁄, 𑀉𑀧𑀸𑀬𑀸𑀲𑀥𑀫𑁆𑀫𑀢𑁄, 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀸𑀢𑀺 𑀧𑀲𑁆𑀲𑀢𑀺.

𑀅𑀚𑀜𑁆𑀜𑀢𑁄, 𑀤𑀼𑀕𑁆𑀕𑀦𑁆𑀥𑀢𑁄, 𑀚𑁂𑀕𑀼𑀘𑁆𑀙𑀢𑁄, 𑀧𑀝𑀺𑀓𑁆𑀓𑀽𑀮𑀢𑁄, 𑀅𑀫𑀡𑁆𑀟𑀦𑀸𑀭𑀳𑀢𑁄, 𑀯𑀺𑀭𑀽𑀧𑀢𑁄, 𑀩𑀻𑀪𑀘𑁆𑀙𑀢𑁄𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀮𑀓𑁆𑀔𑀡𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀢𑁄 𑀅𑀲𑀼𑀪𑀢𑁄 𑀧𑀲𑁆𑀲𑀢𑀺.

𑀧𑀭𑀢𑁄, 𑀭𑀺𑀢𑁆𑀢𑀢𑁄, 𑀢𑀼𑀘𑁆𑀙𑀢𑁄, 𑀲𑀼𑀜𑁆𑀜𑀢𑁄, 𑀅𑀲𑁆𑀲𑀸𑀫𑀺𑀓𑀢𑁄, 𑀅𑀦𑀺𑀲𑁆𑀲𑀭𑀢𑁄, 𑀅𑀯𑀲𑀯𑀢𑁆𑀢𑀺𑀢𑁄𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀦𑀢𑁆𑀢𑀢𑁄 𑀧𑀲𑁆𑀲𑀢𑀺.

𑁭𑁫𑁮. 𑀏𑀯𑀜𑁆𑀳𑀺 ¶ 𑀧𑀲𑁆𑀲𑀢𑀸𑀦𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑀸 𑀧𑀭𑀺𑀕𑁆𑀕𑀳𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀓𑀲𑁆𑀫𑀸 𑀧𑀦𑀸𑀬𑀫𑁂𑀢𑁂 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺? 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀲𑀫𑁆𑀧𑀸𑀤𑀦𑀢𑁆𑀣𑀁.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 ‘‘𑀫𑀘𑁆𑀙𑁂 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀫𑀘𑁆𑀙𑀔𑀺𑀧𑁆𑀧𑀁 𑀕𑀳𑁂𑀢𑁆𑀯𑀸 𑀉𑀤𑀓𑁂 𑀑𑀟𑁆𑀟𑀸𑀧𑁂𑀲𑀺 𑀲𑁄 𑀔𑀺𑀧𑁆𑀧𑀫𑀼𑀔𑁂𑀦 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑁆𑀢𑁄𑀉𑀤𑀓𑁂 𑀲𑀧𑁆𑀧𑀁 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 ‘‘𑀫𑀘𑁆𑀙𑁄 𑀫𑁂 𑀕𑀳𑀺𑀢𑁄’’𑀢𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀲𑁄 ‘‘𑀫𑀳𑀸 𑀯𑀢 𑀫𑀬𑀸 𑀫𑀘𑁆𑀙𑁄 𑀮𑀤𑁆𑀥𑁄’’𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀲𑁄𑀯𑀢𑁆𑀣𑀺𑀓𑀢𑁆𑀢𑀬𑀤𑀲𑁆𑀲𑀦𑁂𑀦 𑀲𑀧𑁆𑀧𑁄𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 𑀪𑀻𑀢𑁄 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑀳𑀡𑁂 𑀦𑀺𑀩𑁆𑀩𑀺𑀦𑁆𑀦𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀁 𑀓𑀭𑁄𑀦𑁆𑀢𑁄 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀁 𑀦𑀺𑀩𑁆𑀩𑁂𑀞𑁂𑀢𑁆𑀯𑀸 𑀩𑀸𑀳𑀼𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀲𑀻𑀲𑁂 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 𑀲𑀧𑁆𑀧𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 ‘‘𑀕𑀘𑁆𑀙 𑀤𑀼𑀝𑁆𑀞 𑀲𑀧𑁆𑀧𑀸’’𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑁂𑀕𑁂𑀦 𑀢𑀴𑀸𑀓𑀧𑀸𑀴𑀺𑀁 𑀆𑀭𑀼𑀬𑁆𑀳 ‘‘𑀫𑀳𑀦𑁆𑀢𑀲𑁆𑀲 𑀯𑀢 𑀪𑁄 𑀲𑀧𑁆𑀧𑀲𑁆𑀲 𑀫𑀼𑀔𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑀬𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀢𑀢𑁆𑀣 ¶ 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 ‘‘𑀫𑀘𑁆𑀙𑁄’’𑀢𑀺 𑀲𑀧𑁆𑀧𑀁 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀢𑀼𑀝𑁆𑀞𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀬𑁄𑀕𑀺𑀦𑁄 𑀆𑀤𑀺𑀢𑁄𑀯 𑀅𑀢𑁆𑀢𑀪𑀸𑀯𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀼𑀝𑁆𑀞𑀓𑀸𑀮𑁄, 𑀢𑀲𑁆𑀲 𑀔𑀺𑀧𑁆𑀧𑀫𑀼𑀔𑀢𑁄 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀲𑁄𑀯𑀢𑁆𑀣𑀺𑀓𑀢𑁆𑀢𑀬𑀤𑀲𑁆𑀲𑀦𑀁 𑀯𑀺𑀬 𑀇𑀫𑀲𑁆𑀲 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂𑀲𑀼 𑀢𑀺𑀮𑀓𑁆𑀔𑀡𑀤𑀲𑁆𑀲𑀦𑀁, 𑀢𑀲𑁆𑀲 𑀪𑀻𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁. 𑀢𑀢𑁄 𑀆𑀤𑀻𑀦𑀯𑀤𑀲𑁆𑀲𑀦𑀁 𑀯𑀺𑀬 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀕𑀳𑀡𑁂 𑀦𑀺𑀩𑁆𑀩𑀺𑀦𑁆𑀤𑀦𑀁 𑀯𑀺𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀲𑀧𑁆𑀧𑀁 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸 𑀯𑀺𑀬 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀓𑀭𑀡𑀁 𑀯𑀺𑀬 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀗𑁆𑀔𑀸𑀭𑁂𑀲𑀼 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀲𑀧𑁆𑀧𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀟𑀁𑀲𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀁 𑀧𑀸𑀧𑁂𑀢𑁆𑀯𑀸 𑀲𑀼𑀫𑀼𑀢𑁆𑀢𑀁 𑀫𑀼𑀜𑁆𑀘𑀢𑀺, 𑀏𑀯𑀫𑀬𑀁 𑀬𑁄𑀕𑀸𑀯𑀘𑀭𑁄 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑁂𑀦 𑀲𑀗𑁆𑀔𑀸𑀭𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑁂 𑀓𑀢𑁆𑀯𑀸 𑀧𑀼𑀦 𑀦𑀺𑀘𑁆𑀘𑀲𑀼𑀔𑀲𑀼𑀪𑀅𑀢𑁆𑀢𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀁 𑀧𑀸𑀧𑁂𑀢𑁆𑀯𑀸 𑀲𑀼𑀫𑀼𑀢𑁆𑀢𑀁 𑀫𑀼𑀜𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀲𑀫𑁆𑀧𑀸𑀤𑀦𑀢𑁆𑀣𑀁 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺.

𑁭𑁫𑁯. 𑀏𑀢𑁆𑀢𑀸𑀯𑀢𑀸 𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀧𑀝𑀺𑀲𑀗𑁆𑀔𑀸𑀜𑀸𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀦𑀺𑀘𑁆𑀘𑀢𑁄 ¶ 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺? 𑀤𑀼𑀓𑁆𑀔𑀢𑁄. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁨𑁭).

𑀏𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀧𑀝𑀺𑀲𑀗𑁆𑀔𑀸𑀢𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 ‘‘𑀅𑀤𑁆𑀥𑀼𑀯𑀁 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀲𑁂𑀦 𑀚𑀸𑀦𑀺𑀢𑁆𑀯𑀸. 𑀓𑀸𑀫𑀜𑁆𑀘 𑀦 𑀧𑀞𑀫𑀁 𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀯𑁄𑀳𑀸𑀭𑀯𑀲𑁂𑀦 𑀧𑀦 ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀦𑀺 (𑀫. 𑀦𑀺. 𑁩.𑁪𑁨𑁧) 𑀯𑀺𑀬 𑀏𑀯𑀁 𑀯𑀼𑀘𑁆𑀘𑀢𑀺. 𑀏𑀓𑀢𑁆𑀢𑀦𑀬𑁂𑀦 𑀯𑀸 𑀧𑀼𑀭𑀺𑀫𑀜𑁆𑀘 𑀧𑀘𑁆𑀙𑀺𑀫𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀓𑀣𑀸

𑁭𑁬𑁦. 𑀲𑁄 ¶ 𑀏𑀯𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀸’’𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺 (𑀫. 𑀦𑀺. 𑁩.𑁬𑁯) 𑀤𑁆𑀯𑀺𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁄 𑀏𑀯𑀁 𑀦𑁂𑀯 𑀅𑀢𑁆𑀢𑀸𑀦𑀁, 𑀦 𑀧𑀭𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀪𑀸𑀯𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀧𑀼𑀦 ‘‘𑀦𑀸𑀳𑀁 𑀓𑁆𑀯𑀘𑀦𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁, 𑀦 𑀘 𑀫𑀫 𑀓𑁆𑀯𑀘𑀦𑀺, 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’’𑀢𑀺 𑀬𑀸 𑀏𑀢𑁆𑀣 𑀘𑀢𑀼𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀓𑀣𑀺𑀢𑀸, 𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀓𑀣𑀁? 𑀅𑀬𑀜𑁆𑀳𑀺 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀓𑁆𑀯𑀘𑀺 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺. 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺. 𑀪𑀸𑀢𑀺𑀝𑁆𑀞𑀸𑀦𑁂𑀯𑀸 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀯𑀸 𑀲𑀳𑀸𑀬𑀁, 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀫𑀜𑁆𑀜𑀺𑀢𑁆𑀯𑀸 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫-𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸 𑀦 𑀘 𑀓𑁆𑀯𑀘𑀦𑀻𑀢𑀺 𑀧𑀭𑀲𑁆𑀲 𑀘 𑀅𑀢𑁆𑀢𑀸𑀦𑀁 𑀓𑁆𑀯𑀘𑀺 𑀦𑀧𑀲𑁆𑀲𑀢𑀻𑀢𑀺 ¶ 𑀅𑀬𑀫𑀢𑁆𑀣𑁄. 𑀇𑀤𑀸𑀦𑀺 𑀫𑀫-𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻𑀢𑀺 𑀲𑁄 𑀧𑀭𑀲𑁆𑀲 𑀅𑀢𑁆𑀢𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀪𑀸𑀯𑁂 𑀅𑀢𑁆𑀣𑀻𑀢𑀺 𑀦 𑀧𑀲𑁆𑀲𑀢𑀻𑀢𑀺. 𑀅𑀢𑁆𑀢𑀦𑁄 𑀪𑀸𑀢𑀺𑀝𑁆𑀞𑀸𑀦𑁂 𑀯𑀸 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀯𑀸 𑀲𑀳𑀸𑀬𑀁 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀇𑀫𑀺𑀦𑀸 𑀓𑀺𑀜𑁆𑀘𑀦𑀪𑀸𑀯𑁂𑀦 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀬𑀁 𑀬𑀲𑁆𑀫𑀸 𑀦𑁂𑀯 𑀓𑀢𑁆𑀣𑀘𑀺 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺. 𑀢𑀲𑁆𑀫𑀸𑀦𑁂𑀦 𑀘𑀢𑀼𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺.

𑁭𑁬𑁧. 𑀏𑀯𑀁 𑀘𑀢𑀼𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀙𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀓𑀣𑀁? 𑀘𑀓𑁆𑀔𑀼 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸…𑀧𑁂… 𑀫𑀦𑁄 𑀲𑀼𑀜𑁆𑀜𑁄. 𑀭𑀽𑀧𑀸 𑀲𑀼𑀜𑁆𑀜𑀸…𑀧𑁂… 𑀥𑀫𑁆𑀫𑀸 𑀲𑀼𑀜𑁆𑀜𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀏𑀯𑀁 𑀬𑀸𑀯 𑀚𑀭𑀸𑀫𑀭𑀡𑀸 𑀦𑀬𑁄 𑀦𑁂𑀢𑀩𑁆𑀩𑁄.

𑁭𑁬𑁨. 𑀏𑀯𑀁 𑀙𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀁 𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀥𑀼𑀯𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 ¶ 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀥𑀼𑀯𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀬𑀣𑀸 𑀦𑀴𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄. 𑀬𑀣𑀸 𑀏𑀭𑀡𑁆𑀟𑁄… 𑀬𑀣𑀸 𑀉𑀤𑀼𑀫𑁆𑀩𑀭𑁄… 𑀬𑀣𑀸 𑀲𑁂𑀢𑀯𑀘𑁆𑀙𑁄… 𑀬𑀣𑀸 𑀧𑀸𑀴𑀺𑀪𑀤𑁆𑀤𑀓𑁄… 𑀬𑀣𑀸 𑀨𑁂𑀡𑀧𑀺𑀡𑁆𑀟𑁄… 𑀬𑀣𑀸 𑀉𑀤𑀓𑀩𑀼𑀩𑁆𑀩𑀼𑀴𑀁… 𑀬𑀣𑀸 𑀫𑀭𑀻𑀘𑀺… 𑀬𑀣𑀸 𑀓𑀤𑀮𑀺𑀓𑁆𑀔𑀦𑁆𑀥𑁄… 𑀬𑀣𑀸 𑀫𑀸𑀬𑀸 𑀅𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸, 𑀏𑀯𑀫𑁂𑀯 𑀭𑀽𑀧𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸…𑀧𑁂… 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸𑀢𑀺 (𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮).

𑁭𑁬𑁩. 𑀲𑁄 ¶ 𑀏𑀯𑀁 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀤𑀲𑀳𑀸𑀓𑀸𑀭𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀭𑀽𑀧𑀁 𑀭𑀺𑀢𑁆𑀢𑀢𑁄 𑀧𑀲𑁆𑀲𑀢𑀺. 𑀢𑀼𑀘𑁆𑀙𑀢𑁄… 𑀲𑀼𑀜𑁆𑀜𑀢𑁄… 𑀅𑀦𑀢𑁆𑀢𑀢𑁄… 𑀅𑀦𑀺𑀲𑁆𑀲𑀭𑀺𑀬𑀢𑁄… 𑀅𑀓𑀸𑀫𑀓𑀸𑀭𑀺𑀬𑀢𑁄… 𑀅𑀮𑀩𑁆𑀪𑀦𑀻𑀬𑀢𑁄… 𑀅𑀯𑀲𑀯𑀢𑁆𑀢𑀓𑀢𑁄… 𑀧𑀭𑀢𑁄… 𑀯𑀺𑀯𑀺𑀢𑁆𑀢𑀢𑁄 𑀧𑀲𑁆𑀲𑀢𑀺. 𑀯𑁂𑀤𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀭𑀺𑀢𑁆𑀢𑀢𑁄…𑀧𑁂… 𑀯𑀺𑀯𑀺𑀢𑁆𑀢𑀢𑁄 𑀧𑀲𑁆𑀲𑀢𑀻𑀢𑀺.

𑁭𑁬𑁪. 𑀏𑀯𑀁 𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀁 𑀦 𑀲𑀢𑁆𑀢𑁄, 𑀦 𑀚𑀻𑀯𑁄, 𑀦 𑀦𑀭𑁄, 𑀦 𑀫𑀸𑀡𑀯𑁄, 𑀦 𑀇𑀢𑁆𑀣𑀻, 𑀦 𑀧𑀼𑀭𑀺𑀲𑁄, 𑀦 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑀺𑀬𑀁. 𑀦𑀸𑀳𑀁, 𑀦 𑀫𑀫, 𑀦 𑀅𑀜𑁆𑀜𑀲𑁆𑀲, 𑀦 𑀓𑀲𑁆𑀲𑀘𑀺. 𑀯𑁂𑀤𑀦𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀦 𑀓𑀲𑁆𑀲𑀘𑀻𑀢𑀺 (𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮).

𑁭𑁬𑁫. 𑀏𑀯𑀁 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄… 𑀤𑀼𑀓𑁆𑀔𑀢𑁄… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄… 𑀅𑀖𑀢𑁄… 𑀆𑀩𑀸𑀥𑀢𑁄… 𑀧𑀭𑀢𑁄… 𑀧𑀮𑁄𑀓𑀢𑁄… 𑀈𑀢𑀺𑀢𑁄… 𑀉𑀧𑀤𑁆𑀤𑀯𑀢𑁄… 𑀪𑀬𑀢𑁄… 𑀉𑀧𑀲𑀕𑁆𑀕𑀢𑁄… 𑀘𑀮𑀢𑁄… 𑀧𑀪𑀗𑁆𑀕𑀼𑀢𑁄… 𑀅𑀤𑁆𑀥𑀼𑀯𑀢𑁄… 𑀅𑀢𑀸𑀡𑀢𑁄… 𑀅𑀮𑁂𑀡𑀢𑁄… 𑀅𑀲𑀭𑀡𑀢𑁄… 𑀅𑀲𑀭𑀡𑀻𑀪𑀽𑀢𑀢𑁄… 𑀭𑀺𑀢𑁆𑀢𑀢𑁄… 𑀢𑀼𑀘𑁆𑀙𑀢𑁄… 𑀲𑀼𑀜𑁆𑀜𑀢𑁄… 𑀅𑀦𑀢𑁆𑀢𑀢𑁄… 𑀅𑀦𑀲𑁆𑀲𑀸𑀤𑀢𑁄… 𑀆𑀤𑀻𑀦𑀯𑀢𑁄… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄… 𑀅𑀲𑁆𑀲𑀸𑀭𑀓𑀢𑁄… 𑀅𑀖𑀫𑀽𑀮𑀢𑁄… 𑀯𑀥𑀓𑀢𑁄… 𑀯𑀺𑀪𑀯𑀢𑁄… 𑀲𑀸𑀲𑀯𑀢𑁄… 𑀲𑀗𑁆𑀔𑀢𑀢𑁄… 𑀫𑀸𑀭𑀸𑀫𑀺𑀲𑀢𑁄… 𑀚𑀸𑀢𑀺𑀥𑀫𑁆𑀫𑀢𑁄… 𑀚𑀭𑀸𑀥𑀫𑁆𑀫𑀢𑁄… 𑀩𑁆𑀬𑀸𑀥𑀺𑀥𑀫𑁆𑀫𑀢𑁄… 𑀫𑀭𑀡𑀥𑀫𑁆𑀫𑀢𑁄… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀉𑀧𑀸𑀬𑀸𑀲𑀥𑀫𑁆𑀫𑀢𑁄… 𑀲𑀫𑀼𑀤𑀬𑀢𑁄… 𑀅𑀢𑁆𑀣𑀗𑁆𑀕𑀫𑀢𑁄… 𑀅𑀦𑀲𑁆𑀲𑀸𑀤𑀢𑁄 ¶ … 𑀆𑀤𑀻𑀦𑀯𑀢𑁄… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀢𑀺. 𑀯𑁂𑀤𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀢𑀺.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀦𑁆𑀢𑁄 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀯𑁂𑀤𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀦𑁆𑀢𑁄 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺’’.

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁧𑁨𑁫; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮);

𑁭𑁬𑁬. 𑀏𑀯𑀁 ¶ 𑀲𑀼𑀜𑁆𑀜𑀢𑁄 𑀤𑀺𑀲𑁆𑀯𑀸 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀯𑀺𑀧𑁆𑀧𑀳𑀸𑀬 𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑁄 𑀅𑀳𑁄𑀲𑀺 𑀫𑀚𑁆𑀛𑀢𑁆𑀢𑁄, 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀦 𑀕𑀡𑁆𑀳𑀸𑀢𑀺 𑀯𑀺𑀲𑁆𑀲𑀝𑁆𑀞𑀪𑀭𑀺𑀬𑁄 𑀯𑀺𑀬 𑀧𑀼𑀭𑀺𑀲𑁄.

𑀬𑀣𑀸 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸 𑀪𑀯𑁂𑀬𑁆𑀬 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸, 𑀲𑁄 𑀢𑀸𑀬 𑀯𑀺𑀦𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀅𑀢𑀺𑀯𑀺𑀬 𑀦𑀁 𑀫𑀫𑀸𑀬𑁂𑀬𑁆𑀬, 𑀲𑁄 𑀢𑀁 𑀇𑀢𑁆𑀣𑀺𑀁 𑀅𑀜𑁆𑀜𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀞𑀺𑀢𑀁 𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀓𑀣𑁂𑀦𑁆𑀢𑀺𑀁 𑀯𑀸 𑀳𑀲𑀦𑁆𑀢𑀺𑀁 𑀯𑀸 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 𑀅𑀲𑁆𑀲 𑀅𑀦𑀢𑁆𑀢𑀫𑀦𑁄, 𑀅𑀥𑀺𑀫𑀢𑁆𑀢𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀤𑁄𑀲𑀁 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀦 𑀦𑀁 𑀫𑀫𑀸𑀢𑀺 𑀕𑀡𑁆𑀳𑁂𑀬𑁆𑀬. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀬𑁂𑀦𑀓𑁂𑀦𑀘𑀺 𑀲𑀤𑁆𑀥𑀺𑀁 𑀬𑀁𑀓𑀺𑀜𑁆𑀘𑀺 𑀓𑀼𑀭𑀼𑀫𑀸𑀦𑀁 𑀤𑀺𑀲𑁆𑀯𑀸𑀧𑀺 𑀦𑁂𑀯 𑀓𑀼𑀧𑁆𑀧𑁂𑀬𑁆𑀬, 𑀦 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑀤𑀢𑁆𑀣𑀼 𑀉𑀤𑀸𑀲𑀻𑀦𑁄𑀯 𑀪𑀯𑁂𑀬𑁆𑀬 𑀫𑀚𑁆𑀛𑀢𑁆𑀢𑁄. 𑀏𑀯𑀫𑁂𑀯𑀸𑀬𑀁 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀳𑀁 𑀫𑀫𑀸𑀢𑀺 𑀕𑀳𑁂𑀢𑀩𑁆𑀩𑀁 𑀅𑀤𑀺𑀲𑁆𑀯𑀸 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀯𑀺𑀧𑁆𑀧𑀳𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑁄 𑀳𑁄𑀢𑀺 𑀫𑀚𑁆𑀛𑀢𑁆𑀢𑁄.

𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀢𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 ¶ 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀤𑀼𑀫𑀧𑀮𑀸𑀲𑁂 𑀈𑀲𑀓𑀧𑁄𑀡𑁂 𑀉𑀤𑀓𑀨𑀼𑀲𑀺𑀢𑀸𑀦𑀺 𑀧𑀢𑀺𑀮𑀻𑀬𑀦𑁆𑀢𑀺 𑀧𑀢𑀺𑀓𑀼𑀝𑀦𑁆𑀢𑀺 𑀧𑀢𑀺𑀯𑀢𑁆𑀢𑀦𑁆𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀦𑁆𑀢𑀺, 𑀏𑀯𑀫𑁂𑀯…𑀧𑁂… 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 (𑀅. 𑀦𑀺. 𑁭.𑁪𑁯), 𑀏𑀯𑀫𑁂𑀯 𑀢𑀲𑁆𑀲 𑀢𑀻𑀲𑀼 𑀪𑀯𑁂𑀲𑀼 𑀘𑀺𑀢𑁆𑀢𑀁…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀇𑀘𑁆𑀘𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺.

𑁭𑁬𑁭. 𑀢𑀁 𑀧𑀦𑁂𑀢𑀁 𑀲𑀘𑁂 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀲𑀩𑁆𑀩𑀁 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑁂𑀯 𑀧𑀓𑁆𑀔𑀦𑁆𑀤𑀢𑀺. 𑀦𑁄 𑀘𑁂 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 ¶ 𑀧𑀲𑁆𑀲𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺 𑀲𑀸𑀫𑀼𑀤𑁆𑀤𑀺𑀓𑀸𑀦𑀁 𑀤𑀺𑀲𑀸𑀓𑀸𑀓𑁄 𑀯𑀺𑀬. 𑀲𑀸𑀫𑀼𑀤𑁆𑀤𑀺𑀓𑀸 𑀓𑀺𑀭 𑀯𑀸𑀡𑀺𑀚𑀓𑀸 𑀦𑀸𑀯𑀁 𑀆𑀭𑁄𑀳𑀦𑁆𑀢𑀸 𑀤𑀺𑀲𑀸𑀓𑀸𑀓𑀁 𑀦𑀸𑀫 𑀕𑀡𑁆𑀳𑀦𑁆𑀢𑀺, 𑀢𑁂 𑀬𑀤𑀸 𑀦𑀸𑀯𑀸 𑀯𑀸𑀢𑀓𑁆𑀔𑀺𑀢𑁆𑀢𑀸 𑀯𑀺𑀤𑁂𑀲𑀁 𑀧𑀓𑁆𑀔𑀦𑁆𑀤𑀢𑀺, 𑀢𑀻𑀭𑀁 𑀦 𑀧𑀜𑁆𑀜𑀸𑀬𑀢𑀺, 𑀢𑀤𑀸 𑀤𑀺𑀲𑀸𑀓𑀸𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀲𑁄 𑀓𑀽𑀧𑀓𑀬𑀝𑁆𑀞𑀺𑀢𑁄 𑀆𑀓𑀸𑀲𑀁 𑀮𑀗𑁆𑀖𑀺𑀢𑁆𑀯𑀸 𑀲𑀩𑁆𑀩𑀸 𑀤𑀺𑀲𑀸 𑀘 𑀯𑀺𑀤𑀺𑀲𑀸 𑀘 𑀅𑀦𑀼𑀕𑀦𑁆𑀢𑁆𑀯𑀸 𑀲𑀘𑁂 𑀢𑀻𑀭𑀁 𑀧𑀲𑁆𑀲𑀢𑀺, 𑀢𑀤𑀪𑀺𑀫𑀼𑀔𑁄𑀯 𑀕𑀘𑁆𑀙𑀢𑀺. 𑀦𑁄 𑀘𑁂 𑀧𑀲𑁆𑀲𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀕𑀦𑁆𑀢𑁆𑀯𑀸 𑀓𑀽𑀧𑀓𑀬𑀝𑁆𑀞𑀺𑀁𑀬𑁂𑀯 𑀅𑀮𑁆𑀮𑀻𑀬𑀢𑀺. 𑀏𑀯𑀫𑁂𑀯 𑀲𑀘𑁂 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀲𑀩𑁆𑀩𑀁 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑁂𑀯 𑀧𑀓𑁆𑀔𑀦𑁆𑀤𑀢𑀺. 𑀦𑁄 𑀘𑁂 𑀧𑀲𑁆𑀲𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺.

𑀢𑀤𑀺𑀤𑀁 𑀲𑀼𑀧𑁆𑀧𑀕𑁆𑀕𑁂 𑀧𑀺𑀝𑁆𑀞𑀁 𑀯𑀝𑁆𑀝𑀬𑀫𑀸𑀦𑀁 𑀯𑀺𑀬. 𑀦𑀺𑀩𑁆𑀩𑀝𑁆𑀝𑀺𑀢𑀓𑀧𑁆𑀧𑀸𑀲𑀁 𑀯𑀺𑀳𑀦𑀫𑀸𑀦𑀁 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬 𑀲𑀗𑁆𑀔𑀸𑀭𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀁 𑀳𑀼𑀢𑁆𑀯𑀸 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺.

𑁭𑁬𑁮. 𑀢𑀢𑁆𑀭𑀺𑀤𑀁 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀢𑀺𑀡𑁆𑀡𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑀢𑁂𑀬𑁆𑀬𑀯𑀲𑁂𑀦 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀢𑀺 𑀦𑀸𑀫. 𑀢𑀺𑀲𑁆𑀲𑁄 𑀳𑀺 𑀅𑀦𑀼𑀧𑀲𑁆𑀲𑀦𑀸 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋

‘‘𑀢𑀻𑀡𑀺 ¶ 𑀔𑁄 𑀧𑀦𑀺𑀫𑀸𑀦𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀮𑁄𑀓𑀦𑀺𑀬𑁆𑀬𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑁂 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬, 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀫𑀦𑁄𑀲𑀫𑀼𑀢𑁆𑀢𑁂𑀚𑀦𑀢𑀸𑀬, 𑀅𑀧𑁆𑀧𑀡𑀺𑀳𑀺𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬, 𑀲𑀩𑁆𑀩𑀥𑀫𑁆𑀫𑁂 𑀧𑀭𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬, 𑀲𑀼𑀜𑁆𑀜𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬, 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀮𑁄𑀓𑀦𑀺𑀬𑁆𑀬𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁧𑁯).

𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀢𑁄𑀢𑀺 𑀉𑀤𑀬𑀩𑁆𑀩𑀬𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀢𑁄 𑀘𑁂𑀯 𑀧𑀭𑀺𑀯𑀝𑀼𑀫𑀢𑁄 𑀘. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁 𑀳𑀺 ‘‘𑀉𑀤𑀬𑀢𑁄 𑀧𑀼𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑀢𑁆𑀣𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀕𑀢𑀺𑀁 𑀲𑀫𑀦𑁆𑀦𑁂𑀲𑀫𑀸𑀦𑀁 ‘‘𑀯𑀬𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀺, 𑀏𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀻’’𑀢𑀺 𑀧𑀭𑀺𑀯𑀝𑀼𑀫𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀫𑀦𑁄𑀲𑀫𑀼𑀢𑁆𑀢𑁂𑀚𑀦𑀢𑀸𑀬𑀸𑀢𑀺 𑀘𑀺𑀢𑁆𑀢𑀲𑀁𑀯𑁂𑀚𑀦𑀢𑀸𑀬 ¶ . 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑁂𑀦 𑀳𑀺 𑀲𑀗𑁆𑀔𑀸𑀭𑁂𑀲𑀼 𑀘𑀺𑀢𑁆𑀢𑀁 𑀲𑀁𑀯𑁂𑀚𑁂𑀢𑀺. 𑀧𑀭𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬𑀸𑀢𑀺 ‘‘𑀦𑀸𑀳𑀁, 𑀦 𑀫𑀫𑀸’’𑀢𑀺 𑀏𑀯𑀁 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬. 𑀇𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑁂𑀯 𑀢𑀤𑀦𑀦𑁆𑀢𑀭𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀯𑀼𑀢𑁆𑀢𑀁 𑁋 ‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀔𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀪𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁧𑁯).

𑁭𑁬𑁯. 𑀓𑀢𑀫𑁂 𑀧𑀦 𑀢𑁂 𑀯𑀺𑀫𑁄𑀓𑁆𑀔𑀸, 𑀬𑁂𑀲𑀁 𑀇𑀫𑀸𑀦𑀺 𑀅𑀦𑀼𑀧𑀲𑁆𑀲𑀦𑀸𑀦𑀺 𑀫𑀼𑀔𑀸𑀦𑀻𑀢𑀺? 𑀅𑀦𑀺𑀫𑀺𑀢𑁆𑀢𑁄, 𑀅𑀧𑁆𑀧𑀡𑀺𑀳𑀺𑀢𑁄, 𑀲𑀼𑀜𑁆𑀜𑀢𑁄𑀢𑀺 𑀏𑀢𑁂 𑀢𑀬𑁄. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁨𑁩).

𑀏𑀢𑁆𑀣 𑀘 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀅𑀦𑀺𑀫𑀺𑀢𑁆𑀢𑀸𑀬 𑀥𑀸𑀢𑀼𑀬𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑁄. 𑀓𑀺𑀮𑁂𑀲𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑁄𑀓𑁆𑀔𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀅𑀧𑁆𑀧𑀡𑀺𑀳𑀺𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄. 𑀲𑀼𑀜𑁆𑀜𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀲𑀼𑀜𑁆𑀜𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁭𑁭𑁦. 𑀬𑀁 𑀧𑀦 𑀅𑀪𑀺𑀥𑀫𑁆𑀫𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 ¶ 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀅𑀧𑁆𑀧𑀡𑀺𑀳𑀺𑀢𑀁 𑀲𑀼𑀜𑁆𑀜𑀢’’𑀦𑁆𑀢𑀺 (𑀥. 𑀲. 𑁩𑁪𑁩 𑀆𑀤𑀬𑁄) 𑀏𑀯𑀁 𑀯𑀺𑀫𑁄𑀓𑁆𑀔𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀲𑀦𑁆𑀥𑀸𑀬. 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑀺 𑀓𑀺𑀜𑁆𑀘𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑁋

‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑁂𑀲𑀁 𑀫𑀼𑀜𑁆𑀘𑀢𑀻𑀢𑀺 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀅𑀪𑀺𑀦𑀺𑀯𑁂𑀲𑀁. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀅𑀪𑀺𑀦𑀺𑀯𑁂𑀲𑀁 𑀫𑀼𑀜𑁆𑀘𑀢𑀻𑀢𑀺 ¶ 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁨𑁯) 𑀏𑀯𑀁 𑀅𑀪𑀺𑀦𑀺𑀯𑁂𑀲𑀁 𑀫𑀼𑀜𑁆𑀘𑀦𑀯𑀲𑁂𑀦 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀘,

‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀦𑀺𑀫𑀺𑀢𑁆𑀢𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁨𑁯) 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀦𑀯𑀲𑁂𑀦 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀘,

‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀡𑀺𑀥𑀺𑀁 𑀫𑀼𑀜𑁆𑀘𑀢𑀻𑀢𑀺 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀧𑀡𑀺𑀥𑀺𑀁. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀧𑀡𑀺𑀥𑀺𑀁 𑀫𑀼𑀜𑁆𑀘𑀢𑀻𑀢𑀺 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁨𑁯) 𑀏𑀯𑀁 𑀧𑀡𑀺𑀥𑀺𑀁 𑀫𑀼𑀜𑁆𑀘𑀦𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀘 𑁋

𑀯𑀼𑀢𑁆𑀢𑀁. 𑀢𑀣𑀸𑀧𑀺 𑀢𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲 𑀅𑀯𑀺𑀚𑀳𑀦𑀢𑁄 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀲𑀼𑀜𑁆𑀜𑀢𑀜𑁆𑀘𑁂𑀯 𑀅𑀧𑁆𑀧𑀡𑀺𑀳𑀺𑀢𑀜𑁆𑀘. 𑀢𑀲𑁆𑀲 𑀘 𑀆𑀕𑀫𑀦𑀯𑀲𑁂𑀦 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀯𑀺𑀫𑁄𑀓𑁆𑀔𑁄 𑀉𑀤𑁆𑀥𑀝𑁄. 𑀢𑀲𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀁 𑀲𑀼𑀜𑁆𑀜𑀢𑀦𑁆𑀢𑀺 𑀯𑀺𑀫𑁄𑀓𑁆𑀔𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯𑁂𑀢𑁆𑀣 𑀯𑀺𑀫𑁄𑀓𑁆𑀔𑀓𑀣𑀸.

𑁭𑁭𑁧. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, 𑀢𑀢𑁆𑀣 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀓𑀸𑀬𑀲𑀓𑁆𑀔𑀺, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 ¶ 𑀇𑀫𑁂 𑀢𑀸𑀯 𑀲𑀢𑁆𑀢 𑀅𑀭𑀺𑀬𑀧𑀼𑀕𑁆𑀕𑀮𑀸, 𑀢𑁂𑀲𑀁 𑀯𑀺𑀪𑀸𑀕𑀸𑀬 𑀇𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑁭𑁭𑁨. 𑀬𑁄 𑀳𑀺 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺, 𑀲𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀳𑁄𑀢𑀺. 𑀲𑁂𑀲𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄.

𑁭𑁭𑁩. 𑀬𑁄 𑀧𑀦 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺, 𑀲𑁄 𑀲𑀩𑁆𑀩𑀢𑁆𑀣 𑀓𑀸𑀬𑀲𑀓𑁆𑀔𑀺 𑀦𑀸𑀫 𑀳𑁄𑀢𑀺. 𑀅𑀭𑀽𑀧𑀚𑁆𑀛𑀸𑀦𑀁 𑀧𑀦 𑀧𑀢𑁆𑀯𑀸 𑀅𑀕𑁆𑀕𑀨𑀮𑀧𑁆𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑁭𑁭𑁪. 𑀬𑁄 ¶ 𑀧𑀦 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺, 𑀲𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀳𑁄𑀢𑀺. 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀅𑀕𑁆𑀕𑀨𑀮𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺.

𑁭𑁭𑁫. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺.

𑀢𑀣𑀸 ‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁨𑁨𑁧).

𑁭𑁭𑁬. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀢𑁄𑀢𑀺 𑀓𑀸𑀬𑀲𑀓𑁆𑀔𑀺. 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀺. ‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄’𑀢𑀺 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀼𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’𑀢𑀺 (𑀧𑀝𑀺. 𑀫. 𑁧.𑁨𑁨𑁧).

𑁭𑁭𑁭. 𑀇𑀢𑀭𑁂𑀲𑀼 ¶ 𑀧𑀦 𑀘𑀢𑀽𑀲𑀼 𑀲𑀤𑁆𑀥𑀁 𑀅𑀦𑀼𑀲𑀭𑀢𑀺, 𑀲𑀤𑁆𑀥𑀸𑀬 𑀯𑀸 𑀅𑀦𑀼𑀲𑀭𑀢𑀺 𑀕𑀘𑁆𑀙𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀢𑀣𑀸 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀅𑀦𑀼𑀲𑀭𑀢𑀺, 𑀥𑀫𑁆𑀫𑁂𑀦 𑀯𑀸 𑀅𑀦𑀼𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀅𑀭𑀽𑀧𑀚𑁆𑀛𑀸𑀦𑁂𑀦 𑀘𑁂𑀯 𑀅𑀭𑀺𑀬𑀫𑀕𑁆𑀕𑁂𑀦 𑀘𑀸𑀢𑀺 𑀉𑀪𑀢𑁄𑀪𑀸𑀕𑁂𑀦 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀧𑀚𑀸𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁.

𑁭𑁭𑁮. 𑀢𑀁 𑀧𑀦𑁂𑀢𑀁 𑀧𑀼𑀭𑀺𑀫𑁂𑀦 𑀜𑀸𑀡𑀤𑁆𑀯𑀬𑁂𑀦 𑀅𑀢𑁆𑀣𑀢𑁄 𑀏𑀓𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀇𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀏𑀓𑀫𑁂𑀯 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀳𑁂𑀝𑁆𑀞𑀸 ¶ 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀸𑀫 𑀚𑀸𑀢𑀁, 𑀫𑀚𑁆𑀛𑁂 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀸𑀫, 𑀅𑀦𑁆𑀢𑁂 𑀘 𑀲𑀺𑀔𑀸𑀧𑁆𑀧𑀢𑁆𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦𑀸𑀫’’.

𑁭𑁭𑁯. 𑀧𑀸𑀴𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀓𑀣𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸-𑀧𑀝𑀺𑀲𑀗𑁆𑀔𑀸-𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁? 𑀉𑀧𑁆𑀧𑀸𑀤𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸-𑀧𑀝𑀺𑀲𑀗𑁆𑀔𑀸-𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀧𑀯𑀢𑁆𑀢𑀁…𑀧𑁂… 𑀦𑀺𑀫𑀺𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸-𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀦𑁆𑀢𑀺…𑀧𑁂… 𑀪𑀬𑀦𑁆𑀢𑀺…𑀧𑁂… 𑀲𑀸𑀫𑀺𑀲𑀦𑁆𑀢𑀺…𑀧𑁂… 𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸𑀢𑀺…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸-𑀧𑀝𑀺𑀲𑀗𑁆𑀔𑀸-𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁪).

𑁭𑁮𑁦. 𑀢𑀢𑁆𑀣 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀘 𑀲𑀸 𑀧𑀝𑀺𑀲𑀗𑁆𑀔𑀸 𑀘 𑀲𑀦𑁆𑀢𑀺𑀝𑁆𑀞𑀦𑀸 𑀘𑀸𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸-𑀧𑀝𑀺𑀲𑀗𑁆𑀔𑀸-𑀲𑀦𑁆𑀢𑀺𑀝𑁆𑀞𑀦𑀸. 𑀇𑀢𑀺 𑀧𑀼𑀩𑁆𑀩𑀪𑀸𑀕𑁂 𑀦𑀺𑀩𑁆𑀩𑀺𑀤𑀸𑀜𑀸𑀡𑁂𑀦 𑀦𑀺𑀩𑁆𑀩𑀺𑀦𑁆𑀦𑀲𑁆𑀲 𑀉𑀧𑁆𑀧𑀸𑀤𑀸𑀤𑀻𑀦𑀺 𑀧𑀭𑀺𑀘𑁆𑀘𑀚𑀺𑀢𑀼𑀓𑀸𑀫𑀢𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸. 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀓𑀭𑀡𑀢𑁆𑀣𑀁 𑀫𑀚𑁆𑀛𑁂 𑀧𑀝𑀺𑀲𑀗𑁆𑀔𑀸𑀦𑀁 𑀧𑀝𑀺𑀲𑀗𑁆𑀔𑀸. 𑀫𑀼𑀜𑁆𑀘𑀺𑀢𑁆𑀯𑀸 𑀅𑀯𑀲𑀸𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀲𑀦𑁆𑀢𑀺𑀝𑁆𑀞𑀦𑀸. 𑀬𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸, 𑀢𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁫𑁪) 𑀯𑀼𑀢𑁆𑀢𑀁. 𑀏𑀯𑀁 𑀏𑀓𑀫𑁂𑀯𑀺𑀤𑀁 𑀜𑀸𑀡𑀁.

𑁭𑁮𑁧. 𑀅𑀧𑀺𑀘 𑀇𑀫𑀸𑀬𑀧𑀺 𑀧𑀸𑀴𑀺𑀬𑀸 𑀇𑀤𑀁 𑀏𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀬𑀸 𑀘 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸, 𑀬𑀸 𑀘 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸, 𑀬𑀸 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁨𑁭).

𑁭𑁮𑁨. 𑀏𑀯𑀁 ¶ 𑀅𑀥𑀺𑀕𑀢𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀲𑁆𑀲 𑀧𑀦 𑀇𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀳𑁄𑀢𑀺. 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀢𑀺 𑀯𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀤𑀺𑀜𑀸𑀡𑀢𑁆𑀢𑀬𑀲𑁆𑀲𑁂𑀯 𑀏𑀢𑀁 𑀦𑀸𑀫𑀁. 𑀲𑀸 𑀳𑀺 𑀲𑀺𑀔𑀁 𑀉𑀢𑁆𑀢𑀫𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀲𑀺𑀔𑀸𑀧𑁆𑀧𑀢𑁆𑀢𑀸. 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻. 𑀯𑀼𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺 𑀩𑀳𑀺𑀤𑁆𑀥𑀸𑀦𑀺𑀫𑀺𑀢𑁆𑀢𑀪𑀽𑀢𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑀯𑀢𑁆𑀣𑀼𑀢𑁄 𑀘𑁂𑀯 𑀅𑀚𑁆𑀛𑀢𑁆𑀢𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀳𑀦𑀢𑁄 𑀫𑀕𑁆𑀕𑁄, 𑀢𑀁 𑀕𑀘𑁆𑀙𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻, 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀻𑀢𑀺 𑀅𑀢𑁆𑀣𑁄.

𑁭𑁮𑁩. 𑀢𑀢𑁆𑀭𑀸𑀬𑀁 𑀅𑀪𑀺𑀦𑀺𑀯𑁂𑀲𑀯𑀼𑀝𑁆𑀞𑀸𑀦𑀸𑀦𑀁 𑀆𑀯𑀺𑀪𑀸𑀯𑀢𑁆𑀣𑀸𑀬 𑀫𑀸𑀢𑀺𑀓𑀸 𑁋 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀸 𑀯𑀼𑀝𑁆𑀞𑀸𑀢𑀺, 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺 ¶ , 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀸 𑀯𑀼𑀝𑁆𑀞𑀸𑀢𑀺, 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺, 𑀏𑀓𑀧𑁆𑀧𑀳𑀸𑀭𑁂𑀦 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀤𑀼𑀓𑁆𑀔𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑀼𑀓𑁆𑀔𑀢𑁄, 𑀅𑀦𑀺𑀘𑁆𑀘𑀢𑁄, 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀅𑀦𑀢𑁆𑀢𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀢𑁆𑀢𑀢𑁄, 𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀸𑀢𑀺.

𑁭𑁮𑁪. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀆𑀤𑀺𑀢𑁄𑀯 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀦𑀺𑀯𑀺𑀲𑀢𑀺, 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀢𑁂 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀦 𑀲𑀼𑀤𑁆𑀥𑀅𑀚𑁆𑀛𑀢𑁆𑀢𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀤𑀝𑁆𑀞𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀧𑀭𑀲𑁆𑀲 𑀔𑀦𑁆𑀥𑁂𑀧𑀺 𑀅𑀦𑀼𑀧𑀸𑀤𑀺𑀡𑁆𑀡𑀲𑀗𑁆𑀔𑀸𑀭𑁂𑀧𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀧𑀲𑁆𑀲𑀢𑀺. 𑀲𑁄 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀲𑀫𑁆𑀫𑀲𑀢𑀺, 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀢𑁄 𑀅𑀚𑁆𑀛𑀢𑁆𑀢𑀁 𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺. 𑀅𑀬𑀁 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀧𑀦𑀲𑁆𑀲 𑀩𑀳𑀺𑀤𑁆𑀥𑀸 𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺, 𑀅𑀬𑀁 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀏𑀲 𑀦𑀬𑁄 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀘 𑀅𑀚𑁆𑀛𑀢𑁆𑀢𑀸 𑀘 𑀯𑀼𑀝𑁆𑀞𑀸𑀦𑁂𑀧𑀺.

𑁭𑁮𑁫. 𑀅𑀧𑀭𑁄 𑀆𑀤𑀺𑀢𑁄𑀯 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀢𑀺, 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀪𑀽𑀢𑀭𑀽𑀧𑀜𑁆𑀘 𑀉𑀧𑀸𑀤𑀸𑀭𑀽𑀧𑀜𑁆𑀘 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀦 𑀲𑀼𑀤𑁆𑀥𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀭𑀽𑀧𑀫𑁆𑀧𑀺 𑀤𑀝𑁆𑀞𑀩𑁆𑀩𑀫𑁂𑀯. 𑀢𑀲𑁆𑀫𑀸 𑀢𑀁 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀲𑀜𑁆𑀜𑀁 𑀲𑀗𑁆𑀔𑀸𑀭𑁂 𑀯𑀺𑀜𑁆𑀜𑀸𑀡𑀜𑁆𑀘 ‘‘𑀇𑀤𑀁 𑀅𑀭𑀽𑀧’’𑀦𑁆𑀢𑀺 𑀅𑀭𑀽𑀧𑀁 𑀧𑀲𑁆𑀲𑀢𑀺. 𑀲𑁄 𑀓𑀸𑀮𑁂𑀦 𑀭𑀽𑀧𑀁 𑀲𑀫𑁆𑀫𑀲𑀢𑀺, 𑀓𑀸𑀮𑁂𑀦 𑀅𑀭𑀽𑀧𑀁 ¶ . 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀢𑁄 𑀭𑀽𑀧𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺, 𑀅𑀬𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑀽𑀧𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀧𑀦𑀲𑁆𑀲 𑀅𑀭𑀽𑀧𑀲𑀫𑁆𑀫𑀲𑀦𑀓𑀸𑀮𑁂 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀺𑀬𑀢𑀺, 𑀅𑀬𑀁 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀏𑀲 𑀦𑀬𑁄 𑀅𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀭𑀽𑀧𑀸 𑀘 𑀭𑀽𑀧𑀸 𑀘 𑀯𑀼𑀝𑁆𑀞𑀸𑀦𑁂𑀧𑀺.

𑁭𑁮𑁬. ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁯𑁮) 𑀏𑀯𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀏𑀯𑀫𑁂𑀯 𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀏𑀓𑀧𑁆𑀧𑀳𑀸𑀭𑁂𑀦 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑁭𑁮𑁭. 𑀏𑀓𑁄 ¶ 𑀆𑀤𑀺𑀢𑁄𑀯 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀬𑀲𑁆𑀫𑀸 𑀧𑀦 𑀦 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀫𑀢𑁆𑀢𑁂𑀦𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀲𑀫𑁆𑀫𑀲𑀺𑀢𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀲𑀫𑁆𑀫𑀲𑀢𑀺. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀓𑀸𑀮𑁂 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀬𑀁 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀘𑁂 𑀧𑀦𑀲𑁆𑀲 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀲𑀫𑁆𑀫𑀲𑀦𑀓𑀸𑀮𑁂 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀬𑀁 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀏𑀲 𑀦𑀬𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑁂𑀲𑀯𑀼𑀝𑁆𑀞𑀸𑀦𑁂𑀲𑀼𑀧𑀺.

𑁭𑁮𑁮. 𑀏𑀢𑁆𑀣 𑀘 𑀬𑁄𑀧𑀺 𑀅𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑁄, 𑀬𑁄𑀧𑀺 𑀤𑀼𑀓𑁆𑀔𑀢𑁄, 𑀬𑁄𑀧𑀺 𑀅𑀦𑀢𑁆𑀢𑀢𑁄, 𑀯𑀼𑀝𑁆𑀞𑀸𑀦𑀓𑀸𑀮𑁂 𑀘 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀬𑁄𑀧𑀺 𑀚𑀦𑀸 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀸 𑀳𑁄𑀦𑁆𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀦𑁆𑀢𑀺, 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸. 𑀲𑀘𑁂 𑀧𑀦 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀬𑁄𑀧𑀺 𑀚𑀦𑀸 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀸 𑀳𑁄𑀦𑁆𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀦𑁆𑀢𑀺, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀓𑀸𑀬𑀲𑀓𑁆𑀔𑀺𑀦𑁄 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦𑁂𑀢𑁆𑀣 𑀅𑀭𑀽𑀧𑀚𑁆𑀛𑀸𑀦𑀁 𑀧𑀸𑀤𑀓𑀁, 𑀲𑁄 𑀅𑀕𑁆𑀕𑀨𑀮𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀅𑀣 𑀦𑁂𑀲𑀁 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀬𑁄𑀧𑀺 𑀚𑀦𑀸 𑀯𑁂𑀤𑀩𑀳𑀼𑀮𑀸 𑀳𑁄𑀦𑁆𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸 𑀅𑀕𑁆𑀕𑀨𑀮𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸𑀢𑀺.

𑁭𑁮𑁯. 𑀇𑀤𑀸𑀦𑀺 ¶ 𑀲𑀤𑁆𑀥𑀺𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀜𑀸𑀡𑁂𑀳𑀺 𑀇𑀫𑀺𑀲𑁆𑀲𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀆𑀯𑀺𑀪𑀸𑀯𑀢𑁆𑀣𑀁 𑀤𑁆𑀯𑀸𑀤𑀲 𑀉𑀧𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀲𑀁 𑀇𑀤𑀁 𑀉𑀤𑁆𑀤𑀸𑀦𑀁 𑁋

‘‘𑀯𑀕𑁆𑀕𑀼𑀮𑀻 𑀓𑀡𑁆𑀳𑀲𑀧𑁆𑀧𑁄 𑀘, 𑀖𑀭𑀁 𑀕𑁄 𑀬𑀓𑁆𑀔𑀺 𑀤𑀸𑀭𑀓𑁄;

𑀔𑀼𑀤𑁆𑀤𑀁 𑀧𑀺𑀧𑀸𑀲𑀁 𑀲𑀻𑀢𑀼𑀡𑁆𑀳𑀁, 𑀅𑀦𑁆𑀥𑀓𑀸𑀭𑀁 𑀯𑀺𑀲𑁂𑀦 𑀘𑀸’’𑀢𑀺.

𑀇𑀫𑀸 𑀘 𑀉𑀧𑀫𑀸 𑀪𑀬𑀢𑀼𑀧𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀜𑀸𑀡𑁂 𑀞𑀢𑁆𑀯𑀸 𑀆𑀳𑀭𑀺𑀢𑀼𑀁 𑀯𑀝𑁆𑀝𑁂𑀬𑁆𑀬𑀼𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀆𑀳𑀭𑀺𑀬𑀫𑀸𑀦𑀸𑀲𑀼 𑀪𑀬𑀢𑀼𑀧𑀝𑁆𑀞𑀸𑀦𑀢𑁄 𑀬𑀸𑀯 𑀨𑀮𑀜𑀸𑀡𑀁 𑀲𑀩𑁆𑀩𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀥𑁂𑀯 𑀆𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸.

𑁭𑁯𑁦. 𑀯𑀕𑁆𑀕𑀼𑀮𑀻𑀢𑀺 ¶ 𑀏𑀓𑀸 𑀓𑀺𑀭 𑀯𑀕𑁆𑀕𑀼𑀮𑀻 ‘‘𑀏𑀢𑁆𑀣 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀲𑀸𑀔𑁂 𑀫𑀥𑀼𑀓𑀭𑀼𑀓𑁆𑀔𑁂 𑀦𑀺𑀮𑀻𑀬𑀺𑀢𑁆𑀯𑀸 𑀏𑀓𑀁 𑀲𑀸𑀔𑀁 𑀧𑀭𑀸𑀫𑀲𑀺𑀢𑁆𑀯𑀸 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀨𑀮𑀁 𑀯𑀸 𑀕𑀬𑁆𑀳𑀼𑀧𑀕𑀁 𑀅𑀤𑁆𑀤𑀲. 𑀬𑀣𑀸 𑀘 𑀏𑀓𑀁, 𑀏𑀯𑀁 𑀤𑀼𑀢𑀺𑀬𑀁, 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁. 𑀧𑀜𑁆𑀘𑀫𑀫𑁆𑀧𑀺 𑀲𑀸𑀔𑀁 𑀧𑀭𑀸𑀫𑀲𑀺𑀢𑁆𑀯𑀸 𑀦𑀸𑀤𑁆𑀤𑀲. 𑀲𑀸 ‘‘𑀅𑀨𑀮𑁄 𑀯𑀢𑀸𑀬𑀁 𑀭𑀼𑀓𑁆𑀔𑁄, 𑀦𑀢𑁆𑀣𑁂𑀢𑁆𑀣 𑀓𑀺𑀜𑁆𑀘𑀺 𑀕𑀬𑁆𑀳𑀼𑀧𑀕’’𑀦𑁆𑀢𑀺 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀚𑀼𑀓𑀸𑀬 𑀲𑀸𑀔𑀸𑀬 𑀆𑀭𑀼𑀬𑁆𑀳 𑀯𑀺𑀝𑀧𑀦𑁆𑀢𑀭𑁂𑀦 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀨𑀮𑀭𑀼𑀓𑁆𑀔𑁂 𑀦𑀺𑀮𑀻𑀬𑀢𑀺.

𑀢𑀢𑁆𑀣 𑀯𑀕𑁆𑀕𑀼𑀮𑀺 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀧𑀜𑁆𑀘𑀲𑀸𑀔𑁄 𑀫𑀥𑀼𑀓𑀭𑀼𑀓𑁆𑀔𑁄 𑀯𑀺𑀬 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀢𑀢𑁆𑀣 𑀯𑀕𑁆𑀕𑀼𑀮𑀺𑀬𑀸 𑀦𑀺𑀮𑀻𑀬𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀔𑀦𑁆𑀥𑀧𑀜𑁆𑀘𑀓𑁂 𑀅𑀪𑀺𑀦𑀺𑀯𑁂𑀲𑁄, 𑀢𑀲𑁆𑀲𑀸 𑀏𑀓𑁂𑀓𑀁 𑀲𑀸𑀔𑀁 𑀧𑀭𑀸𑀫𑀲𑀺𑀢𑁆𑀯𑀸 𑀓𑀺𑀜𑁆𑀘𑀺 𑀕𑀬𑁆𑀳𑀼𑀧𑀕𑀁 𑀅𑀤𑀺𑀲𑁆𑀯𑀸 𑀅𑀯𑀲𑁂𑀲𑀲𑀸𑀔𑀸𑀧𑀭𑀸𑀫𑀲𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀭𑀽𑀧𑀓𑁆𑀔𑀦𑁆𑀥𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀕𑀬𑁆𑀳𑀼𑀧𑀕𑀁 𑀅𑀤𑀺𑀲𑁆𑀯𑀸 𑀅𑀯𑀲𑁂𑀲𑀓𑁆𑀔𑀦𑁆𑀥𑀲𑀫𑁆𑀫𑀲𑀦𑀁, 𑀢𑀲𑁆𑀲𑀸 ‘‘𑀅𑀨𑀮𑁄 𑀯𑀢𑀸𑀬𑀁 𑀭𑀼𑀓𑁆𑀔𑁄’’𑀢𑀺 𑀭𑀼𑀓𑁆𑀔𑁂 𑀆𑀮𑀬𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀧𑀜𑁆𑀘𑀲𑀼𑀧𑀺 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀦𑀺𑀩𑁆𑀩𑀺𑀦𑁆𑀦𑀲𑁆𑀲 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀤𑀺𑀜𑀸𑀡𑀢𑁆𑀢𑀬𑀁, 𑀢𑀲𑁆𑀲𑀸 𑀉𑀚𑀼𑀓𑀸𑀬 𑀲𑀸𑀔𑀸𑀬 𑀉𑀧𑀭𑀺 𑀆𑀭𑁄𑀳𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀅𑀦𑀼𑀮𑁄𑀫𑀁, 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀆𑀓𑀸𑀲𑁂 𑀉𑀧𑁆𑀧𑀢𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀁, 𑀅𑀜𑁆𑀜𑀲𑁆𑀫𑀺𑀁 𑀨𑀮𑀭𑀼𑀓𑁆𑀔𑁂 𑀦𑀺𑀮𑀻𑀬𑀦𑀁 𑀯𑀺𑀬 𑀨𑀮𑀜𑀸𑀡𑀁.

𑁭𑁯𑁧. 𑀓𑀡𑁆𑀳𑀲𑀧𑁆𑀧𑀼𑀧𑀫𑀸 𑀧𑀝𑀺𑀲𑀗𑁆𑀔𑀸𑀜𑀸𑀡𑁂 𑀯𑀼𑀢𑁆𑀢𑀸𑀯. 𑀉𑀧𑀫𑀸𑀲𑀁𑀲𑀦𑁆𑀤𑀦𑁂 𑀧𑀦𑁂𑀢𑁆𑀣 𑀲𑀧𑁆𑀧𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 ¶ 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀫𑀼𑀜𑁆𑀘𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀞𑀸𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀁, 𑀕𑀦𑁆𑀢𑁆𑀯𑀸 𑀅𑀪𑀬𑀝𑁆𑀞𑀸𑀦𑁂 𑀞𑀸𑀦𑀁 𑀯𑀺𑀬 𑀨𑀮𑀜𑀸𑀡𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑁭𑁯𑁨. 𑀖𑀭𑀦𑁆𑀢𑀺 𑀖𑀭𑀲𑀸𑀫𑀺𑀓𑁂 𑀓𑀺𑀭 𑀲𑀸𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀁 𑀆𑀭𑀼𑀬𑁆𑀳 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂 𑀖𑀭𑀁 𑀆𑀤𑀺𑀢𑁆𑀢𑀁, 𑀲𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 ‘‘𑀪𑀻𑀢𑁄 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀅𑀟𑀬𑁆𑀳𑀫𑀸𑀦𑁄 𑀦𑀺𑀓𑁆𑀔𑀫𑁂𑀬𑁆𑀬’’𑀦𑁆𑀢𑀺 𑀑𑀮𑁄𑀓𑀬𑀫𑀸𑀦𑁄 𑀫𑀕𑁆𑀕𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀕𑁂𑀦 𑀔𑁂𑀫𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀞𑀺𑀢𑁄. 𑀢𑀢𑁆𑀣 𑀖𑀭𑀲𑀸𑀫𑀺𑀓𑀲𑁆𑀲 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀁 𑀆𑀭𑀼𑀬𑁆𑀳 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑁂 ‘‘𑀅𑀳𑀁 𑀫𑀫𑀸’’𑀢𑀺 𑀕𑀳𑀡𑀁. 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀪𑀻𑀢𑀓𑀸𑀮𑁄 𑀯𑀺𑀬 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀮𑀓𑁆𑀔𑀡𑀁 𑀤𑀺𑀲𑁆𑀯𑀸 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁, 𑀦𑀺𑀓𑁆𑀔𑀫𑀦𑀫𑀕𑁆𑀕𑀁 𑀑𑀮𑁄𑀓𑀦𑀁 𑀯𑀺𑀬 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 ¶ , 𑀫𑀕𑁆𑀕𑀤𑀲𑁆𑀲𑀦𑀁 𑀯𑀺𑀬 𑀅𑀦𑀼𑀮𑁄𑀫𑀁, 𑀦𑀺𑀓𑁆𑀔𑀫𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀯𑁂𑀕𑁂𑀦 𑀕𑀫𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀁, 𑀔𑁂𑀫𑀝𑁆𑀞𑀸𑀦𑁂 𑀞𑀸𑀦𑀁 𑀯𑀺𑀬 𑀨𑀮𑀜𑀸𑀡𑀁.

𑁭𑁯𑁩. 𑀕𑁄𑀢𑀺 𑀏𑀓𑀲𑁆𑀲 𑀓𑀺𑀭 𑀓𑀲𑁆𑀲𑀓𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀲𑁆𑀲 𑀯𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑁄𑀡𑀸 𑀧𑀮𑀸𑀢𑀸, 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀮𑀸𑀢𑀪𑀸𑀯𑀁 𑀜𑀢𑁆𑀯𑀸 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀕𑁄𑀡𑁂 𑀅𑀤𑁆𑀤𑀲. 𑀢𑁂 ‘‘𑀫𑀬𑁆𑀳𑀁 𑀕𑁄𑀡𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀳𑀭𑀦𑁆𑀢𑁄 𑀧𑀪𑀸𑀢𑀓𑀸𑀮𑁂 ‘‘𑀦 𑀇𑀫𑁂 𑀫𑀬𑁆𑀳𑀁 𑀕𑁄𑀡𑀸, 𑀭𑀜𑁆𑀜𑁄 𑀕𑁄𑀡𑀸’’𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀬𑀸𑀯 𑀫𑀁 ‘𑀘𑁄𑀭𑁄 𑀅𑀬’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀦 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀢𑀸𑀯𑀤𑁂𑀯 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀻𑀢𑁄 𑀕𑁄𑀡𑁂 𑀧𑀳𑀸𑀬 𑀯𑁂𑀕𑁂𑀦 𑀧𑀮𑀸𑀬𑀺𑀢𑁆𑀯𑀸 𑀦𑀺𑀩𑁆𑀪𑀬𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀢𑀢𑁆𑀣 ‘‘𑀫𑀬𑁆𑀳𑀁 𑀕𑁄𑀡𑀸’’𑀢𑀺 𑀭𑀸𑀚𑀕𑁄𑀡𑀸𑀦𑀁 𑀕𑀳𑀡𑀁 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 ‘‘𑀅𑀳𑀁 𑀫𑀫𑀸’’𑀢𑀺 𑀔𑀦𑁆𑀥𑀸𑀦𑀁 𑀕𑀳𑀡𑀁, 𑀧𑀪𑀸𑀢𑁂 ‘‘𑀭𑀸𑀚𑀕𑁄𑀡𑀸’’𑀢𑀺 𑀲𑀜𑁆𑀚𑀸𑀦𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀢𑀺𑀮𑀓𑁆𑀔𑀡𑀯𑀲𑁂𑀦 𑀔𑀦𑁆𑀥𑀸𑀦𑀁 ‘‘𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺 𑀲𑀜𑁆𑀚𑀸𑀦𑀦𑀁, 𑀪𑀻𑀢𑀓𑀸𑀮𑁄 𑀯𑀺𑀬 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁, 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀢𑀸 𑀯𑀺𑀬 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸, 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼, 𑀧𑀮𑀸𑀬𑀦𑀁 𑀯𑀺𑀬 𑀫𑀕𑁆𑀕𑁄, 𑀧𑀮𑀸𑀬𑀺𑀢𑁆𑀯𑀸 𑀅𑀪𑀬𑀤𑁂𑀲𑁂 𑀞𑀸𑀦𑀁 𑀯𑀺𑀬 𑀨𑀮𑀁.

𑁭𑁯𑁪. 𑀬𑀓𑁆𑀔𑀻𑀢𑀺 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀬𑀓𑁆𑀔𑀺𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀲𑀸 𑀭𑀢𑁆𑀢𑀺𑀪𑀸𑀕𑁂 ‘‘𑀲𑀼𑀢𑁆𑀢𑁄 𑀅𑀬’’𑀦𑁆𑀢𑀺 𑀫𑀦𑁆𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀢𑀺. 𑀲𑁄 ‘‘𑀓𑀼𑀳𑀺𑀁 𑀏𑀲𑀸 𑀕𑀘𑁆𑀙𑀢𑀻’’𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀅𑀫𑀦𑀼𑀲𑁆𑀲𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀬𑀸𑀯 𑀫𑀁 𑀦 𑀔𑀸𑀤𑀢𑀺, 𑀢𑀸𑀯 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀻𑀢𑁄 𑀯𑁂𑀕𑁂𑀦 𑀧𑀮𑀸𑀬𑀺𑀢𑁆𑀯𑀸 𑀔𑁂𑀫𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀬𑀓𑁆𑀔𑀺𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀯𑀺𑀬 𑀔𑀦𑁆𑀥𑀸𑀦𑀁 ‘‘𑀅𑀳𑀁 𑀫𑀫𑀸’’𑀢𑀺 𑀕𑀳𑀡𑀁, 𑀲𑀼𑀲𑀸𑀦𑁂 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀫𑀸𑀦𑀁 ¶ 𑀤𑀺𑀲𑁆𑀯𑀸 ‘‘𑀬𑀓𑁆𑀔𑀺𑀦𑀻 𑀅𑀬’’𑀦𑁆𑀢𑀺 𑀚𑀸𑀦𑀦𑀁 𑀯𑀺𑀬 𑀔𑀦𑁆𑀥𑀸𑀦𑀁 𑀢𑀺𑀮𑀓𑁆𑀔𑀡𑀁 𑀤𑀺𑀲𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀚𑀸𑀦𑀦𑀁, 𑀪𑀻𑀢𑀓𑀸𑀮𑁄 𑀯𑀺𑀬 𑀪𑀬𑀢𑀼𑀧𑀝𑁆𑀞𑀸𑀦𑀁, 𑀧𑀮𑀸𑀬𑀺𑀢𑀼𑀓𑀸𑀫𑀢𑀸 𑀯𑀺𑀬 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸, 𑀲𑀼𑀲𑀸𑀦𑀯𑀺𑀚𑀳𑀦𑀁 𑀯𑀺𑀬 𑀕𑁄𑀢𑁆𑀭𑀪𑀼, 𑀯𑁂𑀕𑁂𑀦 𑀧𑀮𑀸𑀬𑀦𑀁 𑀯𑀺𑀬 𑀫𑀕𑁆𑀕𑁄, 𑀅𑀪𑀬𑀤𑁂𑀲𑁂 𑀞𑀸𑀦𑀁 𑀯𑀺𑀬 𑀨𑀮𑀁.

𑁭𑁯𑁫. 𑀤𑀸𑀭𑀓𑁄𑀢𑀺 𑀏𑀓𑀸 𑀓𑀺𑀭 𑀧𑀼𑀢𑁆𑀢𑀕𑀺𑀤𑁆𑀥𑀺𑀦𑀻 𑀇𑀢𑁆𑀣𑀻, 𑀲𑀸 𑀉𑀧𑀭𑀺𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀸𑀯 𑀅𑀦𑁆𑀢𑀭𑀯𑀻𑀣𑀺𑀬𑀁 𑀤𑀸𑀭𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀦𑀼 𑀔𑁄 𑀫𑁂 𑀓𑁂𑀦𑀘𑀺 𑀯𑀺𑀳𑁂𑀞𑀺𑀬𑀢𑀻’’𑀢𑀺 𑀯𑁂𑀕𑀲𑀸 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀼𑀢𑁆𑀢𑁄’’𑀢𑀺 𑀲𑀜𑁆𑀜𑀸𑀬 𑀧𑀭𑀧𑀼𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀲𑀸 ‘‘𑀧𑀭𑀧𑀼𑀢𑁆𑀢𑁄 𑀅𑀬’’𑀦𑁆𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 𑀑𑀢𑁆𑀢𑀧𑁆𑀧𑀫𑀸𑀦𑀸 𑀇𑀢𑁄 𑀘𑀺𑀢𑁄 ¶ 𑀘 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀸 𑀳𑁂𑀯 𑀫𑀁 𑀓𑁄𑀘𑀺 ‘𑀤𑀸𑀭𑀓𑀘𑁄𑀭𑀻 𑀅𑀬’𑀦𑁆𑀢𑀺 𑀯𑀤𑁂𑀬𑁆𑀬𑀸’’𑀢𑀺 𑀤𑀸𑀭𑀓𑀁 𑀢𑀢𑁆𑀣𑁂𑀯 𑀑𑀭𑁄𑀧𑁂𑀢𑁆𑀯𑀸 𑀧𑀼𑀦 𑀯𑁂𑀕𑀲𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀦𑀺𑀲𑀻𑀤𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑀜𑁆𑀜𑀸𑀬 𑀧𑀭𑀧𑀼𑀢𑁆𑀢𑀲𑁆𑀲 𑀕𑀳𑀡𑀁 𑀯𑀺𑀬 ‘‘𑀅𑀳𑀁 𑀫𑀫𑀸’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀕𑀳𑀡𑀁, ‘‘𑀧𑀭𑀧𑀼𑀢𑁆𑀢𑁄 𑀅𑀬’’𑀦𑁆𑀢𑀺 𑀲𑀜𑁆𑀚𑀸𑀦𑀦𑀁 𑀯𑀺𑀬 𑀢𑀺𑀮𑀓𑁆𑀔𑀡𑀯𑀲𑁂𑀦 ‘‘𑀦𑀸𑀳𑀁, 𑀦 𑀫𑀫𑀸’’𑀢𑀺 𑀲𑀜𑁆𑀚𑀸𑀦𑀦𑀁, 𑀑𑀢𑁆𑀢𑀧𑁆𑀧𑀦𑀁 𑀯𑀺𑀬 𑀪𑀬𑀢𑀼𑀧𑀝𑁆𑀞𑀸𑀦𑀁, 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑀦𑀁 𑀯𑀺𑀬 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀢𑀢𑁆𑀣𑁂𑀯 𑀤𑀸𑀭𑀓𑀲𑁆𑀲 𑀑𑀭𑁄𑀧𑀦𑀁 𑀯𑀺𑀬 𑀅𑀦𑀼𑀮𑁄𑀫𑀁, 𑀑𑀭𑁄𑀧𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑀓𑀸𑀮𑁄 𑀯𑀺𑀬 𑀕𑁄𑀢𑁆𑀭𑀪𑀼, 𑀧𑀸𑀲𑀸𑀤𑀸𑀭𑀽𑀳𑀦𑀁 𑀯𑀺𑀬 𑀫𑀕𑁆𑀕𑁄, 𑀆𑀭𑀼𑀬𑁆𑀳 𑀦𑀺𑀲𑀻𑀤𑀦𑀁 𑀯𑀺𑀬 𑀨𑀮𑀁.

𑁭𑁯𑁬. 𑀔𑀼𑀤𑁆𑀤𑀁 𑀧𑀺𑀧𑀸𑀲𑀁 𑀲𑀻𑀢𑀼𑀡𑁆𑀳𑀁, 𑀅𑀦𑁆𑀥𑀓𑀸𑀭𑀁 𑀯𑀺𑀲𑁂𑀦 𑀘𑀸𑀢𑀺 𑀇𑀫𑀸 𑀧𑀦 𑀙 𑀉𑀧𑀫𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀪𑀺𑀫𑀼𑀔𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀬𑀣𑀸 𑀳𑀺 𑀔𑀼𑀤𑁆𑀤𑀸𑀬 𑀅𑀪𑀺𑀪𑀽𑀢𑁄 𑀲𑀼𑀚𑀺𑀖𑀘𑁆𑀙𑀺𑀢𑁄 𑀧𑀼𑀭𑀺𑀲𑁄 𑀲𑀸𑀤𑀼𑀭𑀲𑀁 𑀪𑁄𑀚𑀦𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀲𑀁𑀲𑀸𑀭𑀯𑀝𑁆𑀝𑀚𑀺𑀖𑀘𑁆𑀙𑀸𑀬 𑀨𑀼𑀝𑁆𑀞𑁄 𑀬𑁄𑀕𑀸𑀯𑀘𑀭𑁄 𑀅𑀫𑀢𑀭𑀲𑀁 𑀓𑀸𑀬𑀕𑀢𑀸𑀲𑀢𑀺𑀪𑁄𑀚𑀦𑀁 𑀧𑀢𑁆𑀣𑁂𑀢𑀺.

𑀬𑀣𑀸 𑀘 𑀧𑀺𑀧𑀸𑀲𑀺𑀢𑁄 𑀧𑀼𑀭𑀺𑀲𑁄 𑀧𑀭𑀺𑀲𑀼𑀲𑁆𑀲𑀫𑀸𑀦𑀓𑀡𑁆𑀞𑀫𑀼𑀔𑁄 𑀅𑀦𑁂𑀓𑀗𑁆𑀕𑀲𑀫𑁆𑀪𑀸𑀭𑀁 𑀧𑀸𑀦𑀓𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀲𑀁𑀲𑀸𑀭𑀯𑀝𑁆𑀝𑀧𑀺𑀧𑀸𑀲𑀸𑀬 𑀨𑀼𑀝𑁆𑀞𑁄 𑀬𑁄𑀕𑀸𑀯𑀘𑀭𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀧𑀸𑀦𑀓𑀁 𑀧𑀢𑁆𑀣𑁂𑀢𑀺.

𑀬𑀣𑀸 𑀧𑀦 𑀲𑀻𑀢𑀲𑀫𑁆𑀨𑀼𑀝𑁆𑀞𑁄 𑀧𑀼𑀭𑀺𑀲𑁄 𑀉𑀡𑁆𑀳𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀲𑀁𑀲𑀸𑀭𑀯𑀝𑁆𑀝𑁂 𑀢𑀡𑁆𑀳𑀸𑀲𑀺𑀦𑁂𑀳𑀲𑀻𑀢𑁂𑀦 𑀨𑀼𑀝𑁆𑀞𑁄 𑀬𑁄𑀕𑀸𑀯𑀘𑀭𑁄 𑀓𑀺𑀮𑁂𑀲𑀲𑀦𑁆𑀢𑀸𑀧𑀓𑀁 𑀫𑀕𑁆𑀕𑀢𑁂𑀚𑀁 𑀧𑀢𑁆𑀣𑁂𑀢𑀺.

𑀬𑀣𑀸 𑀘 𑀉𑀡𑁆𑀳𑀲𑀫𑁆𑀨𑀼𑀝𑁆𑀞𑁄 𑀧𑀼𑀭𑀺𑀲𑁄 𑀲𑀻𑀢𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀲𑀁𑀲𑀸𑀭𑀯𑀝𑁆𑀝𑁂 𑀏𑀓𑀸𑀤𑀲𑀕𑁆𑀕𑀺𑀲𑀦𑁆𑀢𑀸𑀧𑀲𑀦𑁆𑀢𑀢𑁆𑀢𑁄 𑀬𑁄𑀕𑀸𑀯𑀘𑀭𑁄 𑀏𑀓𑀸𑀤𑀲𑀕𑁆𑀕𑀺𑀯𑀽𑀧𑀲𑀫𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀢𑀺.

𑀬𑀣𑀸 ¶ 𑀧𑀦 𑀅𑀦𑁆𑀥𑀓𑀸𑀭𑀧𑀭𑁂𑀢𑁄 𑀧𑀼𑀭𑀺𑀲𑁄 𑀆𑀮𑁄𑀓𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀧𑀭𑀺𑀬𑁄𑀦𑀤𑁆𑀥𑁄 𑀬𑁄𑀕𑀸𑀯𑀘𑀭𑁄 𑀜𑀸𑀡𑀸𑀮𑁄𑀓𑀁 𑀫𑀕𑁆𑀕𑀪𑀸𑀯𑀦𑀁 𑀧𑀢𑁆𑀣𑁂𑀢𑀺.

𑀬𑀣𑀸 𑀘 𑀯𑀺𑀲𑀲𑀫𑁆𑀨𑀼𑀝𑁆𑀞𑁄 𑀧𑀼𑀭𑀺𑀲𑁄 𑀯𑀺𑀲𑀖𑀸𑀢𑀦𑀁 𑀪𑁂𑀲𑀚𑁆𑀚𑀁 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀯𑀸𑀬𑀁 𑀓𑀺𑀮𑁂𑀲𑀯𑀺𑀲𑀲𑀫𑁆𑀨𑀼𑀝𑁆𑀞𑁄 𑀬𑁄𑀕𑀸𑀯𑀘𑀭𑁄 𑀓𑀺𑀮𑁂𑀲𑀯𑀺𑀲𑀦𑀺𑀫𑁆𑀫𑀣𑀦𑀁 𑀅𑀫𑀢𑁄𑀲𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀲𑁂𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 ¶ 𑀢𑀻𑀲𑀼 𑀪𑀯𑁂𑀲𑀼…𑀧𑁂… 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀤𑀼𑀫𑀧𑀮𑀸𑀲𑁂 𑀈𑀲𑀓𑀧𑁄𑀡𑁂’’𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁭𑁯𑁭. 𑀏𑀢𑁆𑀢𑀸𑀯𑀢𑀸 𑀘 𑀧𑀦𑁂𑀲 𑀧𑀢𑀺𑀮𑀻𑀦𑀘𑀭𑁄 𑀦𑀸𑀫 𑀳𑁄𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄,

𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁,

𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺. (𑀲𑀼. 𑀦𑀺. 𑁮𑁧𑁬; 𑀫𑀳𑀸𑀦𑀺. 𑁪𑁫);

𑀏𑀯𑀫𑀺𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀬𑁄𑀕𑀺𑀦𑁄 𑀧𑀢𑀺𑀮𑀻𑀦𑀘𑀭𑀪𑀸𑀯𑀁 𑀦𑀺𑀬𑀫𑁂𑀢𑁆𑀯𑀸 𑀉𑀢𑁆𑀢𑀭𑀺 𑀅𑀭𑀺𑀬𑀫𑀕𑁆𑀕𑀲𑁆𑀲𑀸𑀧𑀺 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀧𑀝𑀺𑀧𑀤𑀸𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺. 𑀓𑁂𑀘𑀺 𑀳𑀺 𑀣𑁂𑀭𑀸 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀸𑀦𑀁 𑀯𑀺𑀲𑁂𑀲𑀁 𑀧𑀸𑀤𑀓𑀚𑁆𑀛𑀸𑀦𑀁 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀯𑀸𑀤𑁂𑀲𑀼 𑀅𑀬𑀁 𑀧𑀼𑀩𑁆𑀩𑀪𑀸𑀕𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁭𑁯𑁮. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀳𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑁄𑀧𑀺, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀛𑀸𑀦𑀁 𑀧𑀸𑀤𑀓𑀁 𑀅𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑁄𑀧𑀺, 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺. 𑀲𑀩𑁆𑀩𑁂𑀲𑀼 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀦𑀺 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀧𑀜𑁆𑀘 𑀛𑀸𑀦𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀁 𑀳𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺 𑀳𑀼𑀢𑁆𑀯𑀸 𑀯𑀼𑀝𑁆𑀞𑀸𑀦𑀓𑀸𑀮𑁂 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑀁 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 ¶ 𑀳𑁄𑀢𑀺. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁂𑀲𑀼 𑀬𑀣𑀸𑀓𑁆𑀓𑀫𑁂𑀦𑁂𑀯 𑀛𑀸𑀦𑀁 𑀘𑀢𑀼𑀭𑀗𑁆𑀕𑀺𑀓𑀁 𑀢𑀺𑀯𑀗𑁆𑀕𑀺𑀓𑀁 𑀤𑀼𑀯𑀗𑁆𑀕𑀺𑀓𑀜𑁆𑀘 𑀳𑁄𑀢𑀺. 𑀲𑀩𑁆𑀩𑁂𑀲𑀼 𑀧𑀦 𑀲𑀢𑁆𑀢 𑀫𑀕𑁆𑀕𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀙 𑀩𑁄𑀚𑁆𑀛𑀗𑁆𑀕𑀸𑀦𑀺. 𑀅𑀬𑀁 𑀯𑀺𑀲𑁂𑀲𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀘 𑀳𑁄𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺 𑀳𑁄𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯. 𑀧𑀜𑁆𑀘𑀫𑀚𑁆𑀛𑀸𑀦𑀁 ¶ 𑀧𑀸𑀤𑀓𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀕𑁆𑀕𑁂 𑀧𑀦 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑁆𑀯𑁂 𑀛𑀸𑀦𑀗𑁆𑀕𑀸𑀦𑀺 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀙 𑀲𑀢𑁆𑀢 𑀘𑁂𑀯. 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀉𑀪𑀬𑀦𑀺𑀬𑀫𑀯𑀲𑁂𑀦 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀳𑀺 𑀦𑀬𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸 𑀳𑁄𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯. 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀬𑁂𑀓𑁂𑀘𑀺 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀧𑀤𑁂𑀲𑁂 𑀯𑀼𑀝𑁆𑀞𑀺𑀢𑀲𑀫𑀸𑀧𑀢𑁆𑀢𑀺 𑀅𑀢𑁆𑀢𑀦𑁄 𑀲𑀤𑀺𑀲𑀪𑀸𑀯𑀁 𑀓𑀭𑁄𑀢𑀺 𑀪𑀽𑀫𑀺𑀯𑀡𑁆𑀡𑁄 𑀯𑀺𑀬 𑀕𑁄𑀥𑀸𑀯𑀡𑁆𑀡𑀲𑁆𑀲.

𑁭𑁯𑁯. 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀧𑀦 𑀬𑀢𑁄 𑀬𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀬𑁂 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑁄𑀢𑀺, 𑀢𑀁𑀢𑀁𑀲𑀫𑀸𑀧𑀢𑁆𑀢𑀺𑀲𑀤𑀺𑀲𑁄𑀯 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀘 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁮𑁦𑁦. 𑀢𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀬𑀁 𑀬𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀬𑁂 𑀬𑁂 𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄, 𑀢𑀁𑀢𑀁𑀛𑀸𑀦𑀲𑀤𑀺𑀲𑁄𑀯 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀁 𑀧𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸 𑀯𑀺𑀦𑀸 𑀅𑀚𑁆𑀛𑀸𑀲𑀬𑀫𑀢𑁆𑀢𑁂𑀦𑁂𑀯 𑀢𑀁 𑀦 𑀇𑀚𑁆𑀛𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑁂𑀦 (𑀫. 𑀦𑀺. 𑁩.𑁩𑁯𑁮 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀏𑀢𑁆𑀣𑀸𑀧𑀺 𑀘 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑀸𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀸𑀦𑀺 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁮𑁦𑁧. 𑀲𑀘𑁂 𑀧𑀦𑀸𑀬𑀁 𑀆𑀤𑀺𑀢𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑀬𑀫𑀸𑀦𑀸 𑀤𑀼𑀓𑁆𑀔𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀲𑀗𑁆𑀔𑀸𑀭𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀅𑀲𑀓𑁆𑀔𑀺, 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸𑀧𑀝𑀺𑀧𑀤𑀸. 𑀓𑀺𑀮𑁂𑀲𑁂 𑀧𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀲𑀡𑀺𑀓𑀁 𑀓𑀼𑀭𑀼𑀫𑀸𑀦𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀇𑀢𑀺 𑀅𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀺. 𑀢𑁂𑀦 𑀫𑀕𑁆𑀕𑁄 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺.

𑀲𑀸 ¶ ¶ 𑀧𑀦𑀸𑀬𑀁 𑀧𑀝𑀺𑀧𑀤𑀸 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀦𑀸𑀦𑀸 𑀳𑁄𑀢𑀺, 𑀓𑀲𑁆𑀲𑀘𑀺 𑀘𑀢𑀽𑀲𑀼𑀧𑀺 𑀫𑀕𑁆𑀕𑁂𑀲𑀼 𑀏𑀓𑀸𑀯. 𑀩𑀼𑀤𑁆𑀥𑀸𑀦𑀁 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀯 𑀅𑀳𑁂𑀲𑀼𑀁. 𑀢𑀣𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀧𑀦 𑀧𑀞𑀫𑀫𑀕𑁆𑀕𑁄 𑀲𑀼𑀔𑀸𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀉𑀧𑀭𑀺 𑀢𑀬𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀬𑀣𑀸 𑀘 𑀧𑀝𑀺𑀧𑀤𑀸, 𑀏𑀯𑀁 𑀅𑀥𑀺𑀧𑀢𑀬𑁄𑀧𑀺 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀦𑀸𑀦𑀸 𑀳𑁄𑀦𑁆𑀢𑀺. 𑀓𑀲𑁆𑀲𑀘𑀺 𑀘𑀢𑀽𑀲𑀼𑀧𑀺 𑀏𑀓𑀸𑀯. 𑀏𑀯𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀧𑀝𑀺𑀧𑀤𑀸𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺. 𑀬𑀣𑀸 𑀧𑀦 𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺, 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯.

𑁮𑁦𑁨. 𑀅𑀧𑀺𑀘 𑀫𑀕𑁆𑀕𑁄 𑀦𑀸𑀫 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺 𑀲𑀭𑀲𑁂𑀦 𑀯𑀸 𑀧𑀘𑁆𑀘𑀦𑀻𑀓𑁂𑀦 𑀯𑀸 𑀲𑀕𑀼𑀡𑁂𑀦 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀸 𑀆𑀕𑀫𑀦𑁂𑀦 𑀯𑀸. 𑀲𑀘𑁂 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀲𑀘𑁂 𑀤𑀼𑀓𑁆𑀔𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀲𑀘𑁂 𑀅𑀦𑀢𑁆𑀢𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀇𑀤𑀁 𑀲𑀭𑀲𑀢𑁄 𑀦𑀸𑀫𑀁 𑀦𑀸𑀫.

𑀬𑀲𑁆𑀫𑀸 𑀧𑀦𑁂𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑀸𑀦𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀥𑀼𑀯𑀦𑀺𑀫𑀺𑀢𑁆𑀢𑀲𑀲𑁆𑀲𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀚𑀳𑀦𑁆𑀢𑁄 𑀆𑀕𑀢𑁄, 𑀢𑀲𑁆𑀫𑀸 𑀅𑀦𑀺𑀫𑀺𑀢𑁆𑀢𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀦 𑀲𑀼𑀔𑀲𑀜𑁆𑀜𑀁 𑀧𑀳𑀸𑀬 𑀧𑀡𑀺𑀥𑀺𑀁 𑀧𑀢𑁆𑀣𑀦𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀢𑁆𑀢𑀧𑀼𑀕𑁆𑀕𑀮𑀲𑀜𑁆𑀜𑀁 𑀧𑀳𑀸𑀬 𑀲𑀗𑁆𑀔𑀸𑀭𑀸𑀦𑀁 𑀲𑀼𑀜𑁆𑀜𑀢𑁄 𑀤𑀺𑀝𑁆𑀞𑀢𑁆𑀢𑀸 𑀲𑀼𑀜𑁆𑀜𑀢𑁄𑀢𑀺 𑀇𑀤𑀁 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀁 𑀦𑀸𑀫.

𑀭𑀸𑀕𑀸𑀤𑀻𑀳𑀺 𑀧𑀦𑁂𑀲 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑁄, 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀜𑁂𑀯 𑀯𑀸 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑁄, 𑀭𑀸𑀕𑀧𑀡𑀺𑀥𑀺𑀆𑀤𑀻𑀦𑀁 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀇𑀤𑀫𑀲𑁆𑀲 𑀲𑀕𑀼𑀡𑀢𑁄 𑀦𑀸𑀫𑀁.

𑀲𑁆𑀯𑀸𑀬𑀁 𑀲𑀼𑀜𑁆𑀜𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺𑀧𑀺 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑀲𑁆𑀲 𑀆𑀭𑀫𑁆𑀫𑀡𑀢𑁄 𑀦𑀸𑀫𑀁.

𑁮𑁦𑁩. 𑀆𑀕𑀫𑀦𑀁 𑀧𑀦 𑀤𑀼𑀯𑀺𑀥𑀁 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀜𑁆𑀘. 𑀢𑀢𑁆𑀣 𑀫𑀕𑁆𑀕𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀮𑀪𑀢𑀺, 𑀨𑀮𑁂 𑀫𑀕𑁆𑀕𑀸𑀕𑀫𑀦𑀁. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀳𑀺 𑀲𑀼𑀜𑁆𑀜𑀢𑀸 𑀦𑀸𑀫, 𑀲𑀼𑀜𑁆𑀜𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀲𑀼𑀜𑁆𑀜𑀢𑁄, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 ¶ , 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬 ¶ 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄. 𑀇𑀤𑀁 𑀧𑀦 𑀦𑀸𑀫𑀁 𑀦 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀢𑀺, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀢𑀺. 𑀢𑀢𑁆𑀭 𑀳𑀺 𑀕𑁄𑀢𑁆𑀭𑀪𑀼𑀜𑀸𑀡𑀁 𑀅𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀦𑀸𑀫𑀓𑀁 𑀳𑀼𑀢𑁆𑀯𑀸 𑀲𑀬𑀁 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀫𑀕𑁆𑀕𑀸𑀕𑀫𑀦𑁂𑀦 𑀧𑀦 𑀨𑀮𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁂𑀲𑀼 𑀧𑀡𑀺𑀥𑀺𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫, 𑀅𑀧𑁆𑀧𑀡𑀺𑀳𑀺𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀧𑁆𑀧𑀡𑀺𑀳𑀺𑀢𑁄, 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀲𑁆𑀲 𑀨𑀮𑀁 𑀅𑀧𑁆𑀧𑀡𑀺𑀳𑀺𑀢𑀁. 𑀏𑀯𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀦𑀸𑀫𑀁 𑀫𑀕𑁆𑀕𑀲𑁆𑀲 𑀤𑁂𑀢𑀺, 𑀫𑀕𑁆𑀕𑁄 𑀨𑀮𑀲𑁆𑀲𑀸𑀢𑀺 𑀇𑀤𑀁 𑀆𑀕𑀫𑀦𑀢𑁄 𑀦𑀸𑀫𑀁. 𑀏𑀯𑀫𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀻𑀢𑀺.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀅𑀦𑀼𑀮𑁄𑀫𑀜𑀸𑀡𑀓𑀣𑀸

𑁮𑁦𑁪. 𑀢𑀲𑁆𑀲 𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀅𑀥𑀺𑀫𑁄𑀓𑁆𑀔𑀲𑀤𑁆𑀥𑀸 𑀩𑀮𑀯𑀢𑀭𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀯𑀻𑀭𑀺𑀬𑀁 𑀲𑀼𑀧𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸, 𑀘𑀺𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁, 𑀢𑀺𑀓𑁆𑀔𑀢𑀭𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 ‘‘𑀤𑀸𑀦𑀺 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀢𑀺 𑀯𑀸 𑀤𑀼𑀓𑁆𑀔𑀸𑀢𑀺 𑀯𑀸 𑀅𑀦𑀢𑁆𑀢𑀸𑀢𑀺 𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀓𑀢𑀦𑀬𑁂𑀦𑁂𑀯 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀢𑀺 𑀯𑀸 𑀤𑀼𑀓𑁆𑀔𑀸𑀢𑀺 𑀯𑀸 𑀅𑀦𑀢𑁆𑀢𑀸𑀢𑀺 𑀯𑀸 𑀆𑀭𑀫𑁆𑀫𑀡𑀁 𑀓𑀼𑀭𑀼𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁. 𑀢𑀢𑁄 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀢𑀲𑁆𑀲 𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀁 𑀅𑀯𑀻𑀘𑀺𑀓𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀁 𑀅𑀦𑀼𑀧𑁆𑀧𑀩𑀦𑁆𑀥𑀫𑀸𑀦𑀁 𑀢𑀣𑁂𑀯 𑀲𑀗𑁆𑀔𑀸𑀭𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀧𑀞𑀫𑀁 𑀚𑀯𑀦𑀘𑀺𑀢𑁆𑀢𑀁, 𑀬𑀁 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀦𑀦𑁆𑀢𑀭𑀁 𑀢𑀣𑁂𑀯 𑀲𑀗𑁆𑀔𑀸𑀭𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀤𑀼𑀢𑀺𑀬𑀁 𑀚𑀯𑀦𑀘𑀺𑀢𑁆𑀢𑀁, 𑀬𑀁 𑀉𑀧𑀘𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀦𑀦𑁆𑀢𑀭𑀫𑁆𑀧𑀺 𑀢𑀣𑁂𑀯 𑀲𑀗𑁆𑀔𑀸𑀭𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀢𑀢𑀺𑀬𑀁 𑀚𑀯𑀦𑀘𑀺𑀢𑁆𑀢𑀁, 𑀬𑀁 𑀅𑀦𑀼𑀮𑁄𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀦𑁂𑀲𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁.

𑀅𑀯𑀺𑀲𑁂𑀲𑁂𑀦 𑀧𑀦 𑀢𑀺𑀯𑀺𑀥𑀫𑁆𑀧𑁂𑀢𑀁 𑀆𑀲𑁂𑀯𑀦𑀦𑁆𑀢𑀺𑀧𑀺 𑀧𑀭𑀺𑀓𑀫𑁆𑀫𑀦𑁆𑀢𑀺𑀧𑀺 𑀉𑀧𑀘𑀸𑀭𑀦𑁆𑀢𑀺𑀧𑀺 𑀅𑀦𑀼𑀮𑁄𑀫𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀺𑀲𑁆𑀲𑀸𑀦𑀼𑀮𑁄𑀫𑀁? 𑀧𑀼𑀭𑀺𑀫𑀪𑀸𑀕𑀧𑀘𑁆𑀙𑀺𑀫𑀪𑀸𑀕𑀸𑀦𑀁. 𑀢𑀜𑁆𑀳𑀺 𑀧𑀼𑀭𑀺𑀫𑀸𑀦𑀁 𑀅𑀝𑁆𑀞𑀦𑁆𑀦𑀁 ¶ 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀁 𑀢𑀣𑀓𑀺𑀘𑁆𑀘𑀢𑀸𑀬 𑀘 𑀅𑀦𑀼𑀮𑁄𑀫𑁂𑀢𑀺, 𑀉𑀧𑀭𑀺 𑀘 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁. 𑀢𑀜𑁆𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 ¶ 𑀧𑀯𑀢𑁆𑀢𑀢𑁆𑀢𑀸, ‘‘𑀉𑀤𑀬𑀩𑁆𑀩𑀬𑀯𑀦𑁆𑀢𑀸𑀦𑀁𑀬𑁂𑀯 𑀯𑀢 𑀥𑀫𑁆𑀫𑀸𑀦𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀸𑀤𑀯𑀬𑁂 𑀅𑀤𑁆𑀤𑀲𑀸’’𑀢𑀺 𑀘, ‘‘𑀪𑀗𑁆𑀕𑀯𑀦𑁆𑀢𑀸𑀦𑀁𑀬𑁂𑀯 𑀯𑀢 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀪𑀗𑁆𑀕𑀁 𑀅𑀤𑁆𑀤𑀲𑀸’’𑀢𑀺 𑀘, ‘‘𑀲𑀪𑀬𑀁𑀬𑁂𑀯 𑀯𑀢 𑀪𑀬𑀢𑀼𑀧𑀝𑁆𑀞𑀸𑀦𑀲𑁆𑀲 𑀪𑀬𑀢𑁄 𑀉𑀧𑀝𑁆𑀞𑀺𑀢’’𑀦𑁆𑀢𑀺 𑀘, ‘‘𑀲𑀸𑀤𑀻𑀦𑀯𑁂𑀬𑁂𑀯 𑀯𑀢 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀁 𑀆𑀤𑀻𑀦𑀯𑀁 𑀅𑀤𑁆𑀤𑀲𑀸’’𑀢𑀺 𑀘, ‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑀩𑁆𑀩𑁂𑀬𑁂𑀯 𑀯𑀢 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀦𑀺𑀩𑁆𑀩𑀺𑀦𑁆𑀦’’𑀦𑁆𑀢𑀺 𑀘, ‘‘𑀫𑀼𑀜𑁆𑀘𑀺𑀢𑀩𑁆𑀩𑀫𑁆𑀳𑀺𑀬𑁂𑀯 𑀯𑀢 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀫𑀼𑀜𑁆𑀘𑀺𑀢𑀼𑀓𑀸𑀫𑀁 𑀚𑀸𑀢’’𑀦𑁆𑀢𑀺 𑀘, ‘‘𑀧𑀝𑀺𑀲𑀗𑁆𑀔𑀸𑀢𑀩𑁆𑀩𑀁𑀬𑁂𑀯 𑀯𑀢 𑀧𑀝𑀺𑀲𑀗𑁆𑀔𑀸𑀜𑀸𑀡𑁂𑀦 𑀧𑀝𑀺𑀲𑀗𑁆𑀔𑀸𑀢’’𑀦𑁆𑀢𑀺 𑀘, ‘‘𑀉𑀧𑁂𑀓𑁆𑀔𑀺𑀢𑀩𑁆𑀩𑀁𑀬𑁂𑀯 𑀯𑀢 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀺𑀢’’𑀦𑁆𑀢𑀺 𑀘 𑀅𑀢𑁆𑀣𑀢𑁄 𑀯𑀤𑀫𑀸𑀦𑀁 𑀯𑀺𑀬 𑀇𑀫𑁂𑀲𑀜𑁆𑀘 𑀅𑀝𑁆𑀞𑀦𑁆𑀦𑀁 𑀜𑀸𑀡𑀸𑀦𑀁 𑀢𑀣𑀓𑀺𑀘𑁆𑀘𑀢𑀸𑀬 𑀅𑀦𑀼𑀮𑁄𑀫𑁂𑀢𑀺, 𑀉𑀧𑀭𑀺 𑀘 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀢𑁆𑀢𑀩𑁆𑀩𑀢𑁆𑀢𑀸.

𑀬𑀣𑀸 𑀳𑀺 𑀥𑀫𑁆𑀫𑀺𑀓𑁄 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀯𑁄𑀳𑀸𑀭𑀺𑀓𑀫𑀳𑀸𑀫𑀢𑁆𑀢𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀲𑀼𑀢𑁆𑀯𑀸 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀫𑀸𑀦𑁄 𑀢𑁂𑀲𑀜𑁆𑀘 𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀦𑀼𑀮𑁄𑀫𑁂𑀢𑀺, 𑀧𑁄𑀭𑀸𑀡𑀲𑁆𑀲 𑀘 𑀭𑀸𑀚𑀥𑀫𑁆𑀫𑀲𑁆𑀲, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀸𑀚𑀸 𑀯𑀺𑀬 𑀳𑀺 𑀅𑀦𑀼𑀮𑁄𑀫𑀜𑀸𑀡𑀁, 𑀅𑀝𑁆𑀞 𑀯𑁄𑀳𑀸𑀭𑀺𑀓𑀫𑀳𑀸𑀫𑀢𑁆𑀢𑀸 𑀯𑀺𑀬 𑀅𑀝𑁆𑀞 𑀜𑀸𑀡𑀸𑀦𑀺, 𑀧𑁄𑀭𑀸𑀡𑁄 𑀭𑀸𑀚𑀥𑀫𑁆𑀫𑁄 𑀯𑀺𑀬 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀸. 𑀢𑀢𑁆𑀣 𑀬𑀣𑀸 𑀭𑀸𑀚𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀤𑀫𑀸𑀦𑁄 𑀯𑁄𑀳𑀸𑀭𑀺𑀓𑀸𑀦𑀜𑁆𑀘 𑀯𑀺𑀦𑀺𑀘𑁆𑀙𑀬𑀲𑁆𑀲, 𑀭𑀸𑀚𑀥𑀫𑁆𑀫𑀲𑁆𑀲 𑀘 𑀅𑀦𑀼𑀮𑁄𑀫𑁂𑀢𑀺, 𑀏𑀯𑀫𑀺𑀤𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀝𑁆𑀞𑀦𑁆𑀦𑀜𑁆𑀘 𑀜𑀸𑀡𑀸𑀦𑀁 𑀢𑀣𑀓𑀺𑀘𑁆𑀘𑀢𑀸𑀬 𑀅𑀦𑀼𑀮𑁄𑀫𑁂𑀢𑀺, 𑀉𑀧𑀭𑀺 𑀘 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁. 𑀢𑁂𑀦𑁂𑀯 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀅𑀦𑀼𑀮𑁄𑀫𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀓𑀣𑀸

𑁮𑁦𑁫. 𑀇𑀤𑀜𑁆𑀘 𑀧𑀦 𑀅𑀦𑀼𑀮𑁄𑀫𑀜𑀸𑀡𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀳𑁄𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀁. 𑀇𑀤𑀸𑀦𑀺 𑀢𑀲𑁆𑀲𑀸𑀬𑁂𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀅𑀲𑀫𑁆𑀫𑁄𑀳𑀢𑁆𑀣𑀁 𑀅𑀬𑀁 𑀲𑀼𑀢𑁆𑀢𑀲𑀁𑀲𑀦𑁆𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀬𑁆𑀬𑀣𑀺𑀤𑀁 ¶ ¶ 𑁋

𑀅𑀬𑀜𑁆𑀳𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀯𑀺𑀧𑀲𑁆𑀲𑀦𑀸 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑁂 ‘‘𑀅𑀢𑀫𑁆𑀫𑀬𑀢𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀬 𑀅𑀢𑀫𑁆𑀫𑀬𑀢𑀁 𑀆𑀕𑀫𑁆𑀫 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸, 𑀢𑀁 𑀧𑀚𑀳𑀣 𑀢𑀁 𑀲𑀫𑀢𑀺𑀓𑁆𑀓𑀫𑀣𑀸’’𑀢𑀺 (𑀫. 𑀦𑀺. 𑁩.𑁩𑁧𑁦) 𑀏𑀯𑀁 𑀅𑀢𑀫𑁆𑀫𑀬𑀢𑀸𑀢𑀺 𑀯𑀼𑀢𑁆𑀢𑀸.

𑀅𑀮𑀕𑀤𑁆𑀤𑀲𑀼𑀢𑁆𑀢𑀦𑁆𑀢𑁂 ‘‘𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁨𑁪𑁫) 𑀏𑀯𑀁 𑀦𑀺𑀩𑁆𑀩𑀺𑀤𑀸𑀢𑀺 𑀯𑀼𑀢𑁆𑀢𑀸.

𑀲𑀼𑀲𑀺𑀫𑀲𑀼𑀢𑁆𑀢𑀦𑁆𑀢𑁂 ‘‘𑀧𑀼𑀩𑁆𑀩𑁂 𑀔𑁄, 𑀲𑀼𑀲𑀺𑀫, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁭𑁦) 𑀏𑀯𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀸.

𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀦𑁆𑀢𑁂 ‘‘𑀲𑀜𑁆𑀜𑀸 𑀔𑁄, 𑀧𑁄𑀝𑁆𑀞𑀧𑀸𑀤, 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡’’𑀦𑁆𑀢𑀺 (𑀤𑀻. 𑀦𑀺. 𑁧.𑁪𑁧𑁬) 𑀏𑀯𑀁 𑀲𑀜𑁆𑀜𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀸.

𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑁂 ‘‘𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁫𑁯) 𑀏𑀯𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀸.

𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀬𑀸 𑀘 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀬𑀸 𑀘 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁨𑁭) 𑀏𑀯𑀁 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀸.

𑀧𑀝𑁆𑀞𑀸𑀦𑁂 ‘‘𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲, 𑀅𑀦𑀼𑀮𑁄𑀫𑀁 𑀯𑁄𑀤𑀸𑀦𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀏𑀯𑀁 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀸.

𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀦𑁆𑀢𑁂 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁭) 𑀏𑀯𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀸.

𑀇𑀢𑀺𑀦𑁂𑀓𑁂𑀳𑀺 ¶ ¶ 𑀦𑀸𑀫𑁂𑀳𑀺, 𑀓𑀺𑀢𑁆𑀢𑀺𑀢𑀸 𑀬𑀸 𑀫𑀳𑁂𑀲𑀺𑀦𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑀦𑁆𑀢𑀸, 𑀧𑀭𑀺𑀲𑀼𑀤𑁆𑀥𑀸 𑀯𑀺𑀧𑀲𑁆𑀲𑀦𑀸.

𑀯𑀼𑀝𑁆𑀞𑀸𑀢𑀼𑀓𑀸𑀫𑁄 𑀲𑀁𑀲𑀸𑀭-𑀤𑀼𑀓𑁆𑀔𑀧𑀗𑁆𑀓𑀸 𑀫𑀳𑀩𑁆𑀪𑀬𑀸;

𑀓𑀭𑁂𑀬𑁆𑀬 𑀲𑀢𑀢𑀁 𑀢𑀢𑁆𑀣, 𑀬𑁄𑀕𑀁 𑀧𑀡𑁆𑀟𑀺𑀢𑀚𑀸𑀢𑀺𑀓𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁨. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀧𑀞𑀫𑀫𑀕𑁆𑀕𑀜𑀸𑀡𑀓𑀣𑀸

𑁮𑁦𑁬. 𑀇𑀢𑁄 ¶ ¶ 𑀧𑀭𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀳𑁄𑀢𑀺, 𑀢𑀁 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀢𑁆𑀢𑀸 𑀦𑁂𑀯 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀦 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀪𑀚𑀢𑀺, 𑀅𑀦𑁆𑀢𑀭𑀸 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀢𑀢𑁆𑀣 𑀧𑀞𑀫𑀫𑀕𑁆𑀕𑀜𑀸𑀡𑀁 𑀢𑀸𑀯 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀬𑀜𑁆𑀳𑀺 𑀅𑀦𑁂𑀦 𑀓𑀸𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀅𑀦𑀼𑀮𑁄𑀫𑀸𑀯𑀲𑀸𑀦𑀁 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀓𑀢𑀫𑁂𑀯. 𑀏𑀯𑀁 𑀉𑀧𑁆𑀧𑀦𑁆𑀦𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀧𑀦𑀲𑁆𑀲 𑀢𑁂𑀳𑀺 𑀢𑀻𑀳𑀺𑀧𑀺 𑀅𑀦𑀼𑀮𑁄𑀫𑀜𑀸𑀡𑁂𑀳𑀺 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀣𑀽𑀮𑀣𑀽𑀮𑁂 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑁂 𑀢𑀫𑀫𑁆𑀳𑀺 𑀅𑀦𑁆𑀢𑀭𑀥𑀸𑀧𑀺𑀢𑁂 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑁂𑀲𑀼 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺, 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀦 𑀲𑀚𑁆𑀚𑀢𑀺, 𑀦 𑀮𑀕𑁆𑀕𑀢𑀺, 𑀦 𑀩𑀚𑁆𑀛𑀢𑀺. 𑀧𑀤𑀼𑀫𑀧𑀮𑀸𑀲𑀢𑁄 𑀉𑀤𑀓𑀁 𑀯𑀺𑀬 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺. 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀲𑀩𑁆𑀩𑀁 𑀧𑀯𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀧𑀮𑀺𑀩𑁄𑀥𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀣𑀲𑁆𑀲 𑀲𑀩𑁆𑀩𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑀸𑀭𑀫𑁆𑀫𑀡𑁂 𑀧𑀮𑀺𑀩𑁄𑀥𑀢𑁄 𑀉𑀧𑀝𑁆𑀞𑀺𑀢𑁂 𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀆𑀲𑁂𑀯𑀦𑀦𑁆𑀢𑁂 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀯𑀺𑀲𑀗𑁆𑀔𑀸𑀭𑀁 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀼𑀭𑀼𑀫𑀸𑀦𑀁 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀁 𑀧𑀼𑀣𑀼𑀚𑁆𑀚𑀦𑀲𑀗𑁆𑀔𑀁 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁 𑀅𑀢𑀺𑀓𑁆𑀓𑀫𑀫𑀸𑀦𑀁 𑀅𑀭𑀺𑀬𑀕𑁄𑀢𑁆𑀢𑀁 𑀅𑀭𑀺𑀬𑀲𑀗𑁆𑀔𑀁 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀧𑀞𑀫𑀸𑀯𑀝𑁆𑀝𑀦𑀧𑀞𑀫𑀸𑀪𑁄𑀕𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀪𑀽𑀢𑀁 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀉𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀙𑀳𑀺 𑀆𑀓𑀸𑀭𑁂𑀳𑀺 𑀧𑀘𑁆𑀘𑀬𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀲𑀺𑀔𑀸𑀧𑁆𑀧𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀬 𑀫𑀼𑀤𑁆𑀥𑀪𑀽𑀢𑀁 𑀅𑀧𑀼𑀦𑀭𑀸𑀯𑀝𑁆𑀝𑀓𑀁 𑀉𑀧𑁆𑀧𑀚𑁆𑀚𑀢𑀺 𑀕𑁄𑀢𑁆𑀭𑀪𑀼𑀜𑀸𑀡𑀁.

𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀓𑀣𑀁 ¶ 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀕𑁄𑀢𑁆𑀭𑀪𑀼𑀜𑀸𑀡𑀁? 𑀉𑀧𑁆𑀧𑀸𑀤𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀅𑀧𑁆𑀧𑀯𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀬𑀸𑀲𑀁 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 ¶ 𑀕𑁄𑀢𑁆𑀭𑀪𑀼. 𑀉𑀧𑁆𑀧𑀸𑀤𑀁 𑀅𑀪𑀺𑀪𑀼𑀬𑁆𑀬𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀕𑁄𑀢𑁆𑀭𑀪𑀽’’𑀢𑀺 (𑀧𑀝𑀺. 𑀫. 𑁧.𑁫𑁯) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁮𑁦𑁭. 𑀢𑀢𑁆𑀭𑀸𑀬𑀁 𑀏𑀓𑀸𑀯𑀚𑁆𑀚𑀦𑁂𑀦 𑀏𑀓𑀯𑀻𑀣𑀺𑀬𑀁 𑀧𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀽𑀦𑀁 𑀦𑀸𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀸𑀓𑀸𑀭𑀤𑀻𑀧𑀺𑀓𑀸 𑀉𑀧𑀫𑀸 𑁋 𑀬𑀣𑀸 𑀳𑀺 𑀫𑀳𑀸𑀫𑀸𑀢𑀺𑀓𑀁 𑀮𑀗𑁆𑀖𑀺𑀢𑁆𑀯𑀸 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀸𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑁂𑀕𑁂𑀦 𑀥𑀸𑀯𑀺𑀢𑁆𑀯𑀸 𑀫𑀸𑀢𑀺𑀓𑀸𑀬 𑀑𑀭𑀺𑀫𑀢𑀻𑀭𑁂 𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀁 𑀭𑀚𑁆𑀚𑀼𑀁 𑀯𑀸 𑀬𑀝𑁆𑀞𑀺𑀁 𑀯𑀸 𑀕𑀳𑁂𑀢𑁆𑀯𑀸 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀧𑀭𑀢𑀻𑀭𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀓𑀸𑀬𑁄 𑀳𑀼𑀢𑁆𑀯𑀸 𑀧𑀭𑀢𑀻𑀭𑀲𑁆𑀲 𑀉𑀧𑀭𑀺𑀪𑀸𑀕𑀁 𑀧𑀢𑁆𑀢𑁄 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑁂𑀥𑀫𑀸𑀦𑁄 𑀧𑀭𑀢𑀻𑀭𑁂 𑀧𑀢𑀺𑀢𑁆𑀯𑀸 𑀲𑀡𑀺𑀓𑀁 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀫𑁂𑀯𑀸𑀬𑀁 𑀬𑁄𑀕𑀸𑀯𑀘𑀭𑁄𑀧𑀺 𑀪𑀯𑀬𑁄𑀦𑀺𑀕𑀢𑀺𑀝𑁆𑀞𑀺𑀢𑀺𑀦𑀺𑀯𑀸𑀲𑀸𑀦𑀁 𑀧𑀭𑀢𑀻𑀭𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑀸𑀢𑀼𑀓𑀸𑀫𑁄 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀦𑀸 𑀯𑁂𑀕𑁂𑀦 𑀥𑀸𑀯𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀁 𑀭𑀽𑀧𑀭𑀚𑁆𑀚𑀼𑀁 𑀯𑀸 𑀯𑁂𑀤𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑀡𑁆𑀟𑀁 𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀅𑀦𑀢𑁆𑀢𑀸𑀢𑀺 𑀯𑀸𑀢𑀺 𑀅𑀦𑀼𑀮𑁄𑀫𑀸𑀯𑀚𑁆𑀚𑀦𑁂𑀦 𑀕𑀳𑁂𑀢𑁆𑀯𑀸 𑀢𑀁 𑀅𑀫𑀼𑀜𑁆𑀘𑀫𑀸𑀦𑁄𑀯 𑀧𑀞𑀫𑁂𑀦 𑀅𑀦𑀼𑀮𑁄𑀫𑀘𑀺𑀢𑁆𑀢𑁂𑀦 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀤𑀼𑀢𑀺𑀬𑁂𑀦 𑀧𑀭𑀢𑀻𑀭𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀓𑀸𑀬𑁄 𑀯𑀺𑀬 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀫𑀸𑀦𑀲𑁄 𑀳𑀼𑀢𑁆𑀯𑀸 𑀢𑀢𑀺𑀬𑁂𑀦 𑀧𑀭𑀢𑀻𑀭𑀲𑁆𑀲 𑀉𑀧𑀭𑀺𑀪𑀸𑀕𑀁 𑀧𑀢𑁆𑀢𑁄 𑀯𑀺𑀬 𑀇𑀤𑀸𑀦𑀺 𑀧𑀢𑁆𑀢𑀩𑁆𑀩𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀆𑀲𑀦𑁆𑀦𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀢𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑁂𑀦 𑀯𑀺𑀲𑀗𑁆𑀔𑀸𑀭𑁂 𑀧𑀭𑀢𑀻𑀭𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀧𑀢𑀢𑀺. 𑀏𑀓𑀸𑀭𑀫𑁆𑀫𑀡𑁂 𑀧𑀦 𑀅𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀯𑁂𑀥𑀫𑀸𑀦𑁄 𑀲𑁄 𑀧𑀼𑀭𑀺𑀲𑁄 𑀯𑀺𑀬 𑀦 𑀢𑀸𑀯 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀢𑁄 𑀫𑀕𑁆𑀕𑀜𑀸𑀡𑁂𑀦 𑀧𑀢𑀺𑀝𑁆𑀞𑀸𑀢𑀻𑀢𑀺.

𑁮𑁦𑁮. 𑀢𑀢𑁆𑀣 𑀅𑀦𑀼𑀮𑁄𑀫𑀁 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀓𑀺𑀮𑁂𑀲𑀢𑀫𑀁 𑀯𑀺𑀦𑁄𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀦𑀺𑀩𑁆𑀩𑀸𑀦𑀫𑀸𑀭𑀫𑁆𑀫𑀡𑀁 𑀓𑀸𑀢𑀼𑀁. 𑀕𑁄𑀢𑁆𑀭𑀪𑀼 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑀁 𑀯𑀺𑀦𑁄𑀤𑁂𑀢𑀼𑀁. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 ‘‘𑀦𑀓𑁆𑀔𑀢𑁆𑀢𑀬𑁄𑀕𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀦𑁆𑀤𑀁 𑀧𑀲𑁆𑀲𑀺𑀢𑀼𑀁 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀲𑀺, 𑀢𑀲𑁆𑀲 𑀯𑀮𑀸𑀳𑀓𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀘𑀦𑁆𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣𑁂𑀓𑁄 𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀣𑀽𑀮𑀣𑀽𑀮𑁂 𑀯𑀮𑀸𑀳𑀓𑁂 𑀯𑀺𑀤𑁆𑀥𑀁𑀲𑁂𑀢𑀺. 𑀅𑀧𑀭𑁄 𑀫𑀚𑁆𑀛𑀺𑀫𑁂, 𑀅𑀧𑀭𑁄 𑀲𑀼𑀔𑀼𑀫𑁂𑀢𑀺. 𑀢𑀢𑁄 𑀲𑁄 𑀧𑀼𑀭𑀺𑀲𑁄 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀘𑀦𑁆𑀤𑀁 𑀤𑀺𑀲𑁆𑀯𑀸 𑀦𑀓𑁆𑀔𑀢𑁆𑀢𑀬𑁄𑀕𑀁 𑀅𑀜𑁆𑀜𑀸𑀲𑀺.

𑀢𑀢𑁆𑀣 ¶ ¶ 𑀢𑀬𑁄 𑀯𑀮𑀸𑀳𑀓𑀸 𑀯𑀺𑀬 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀣𑀽𑀮𑀫𑀚𑁆𑀛𑀺𑀫𑀲𑀼𑀔𑀼𑀫𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀁, 𑀢𑀬𑁄 𑀯𑀸𑀢𑀸 𑀯𑀺𑀬 𑀢𑀻𑀡𑀺 𑀅𑀦𑀼𑀮𑁄𑀫𑀘𑀺𑀢𑁆𑀢𑀸𑀦𑀺, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀘𑀦𑁆𑀤𑁄 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀏𑀓𑁂𑀓𑀲𑁆𑀲 𑀯𑀸𑀢𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀯𑀮𑀸𑀳𑀓𑀯𑀺𑀤𑁆𑀥𑀁𑀲𑀦𑀁 𑀯𑀺𑀬 𑀏𑀓𑁂𑀓𑀲𑁆𑀲 𑀅𑀦𑀼𑀮𑁄𑀫𑀘𑀺𑀢𑁆𑀢𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀯𑀺𑀦𑁄𑀤𑀦𑀁, 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀲𑀼𑀤𑁆𑀥𑀘𑀦𑁆𑀤𑀤𑀲𑁆𑀲𑀦𑀁 𑀯𑀺𑀬 𑀯𑀺𑀕𑀢𑁂 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑁂 𑀢𑀫𑁂 𑀕𑁄𑀢𑁆𑀭𑀪𑀼𑀜𑀸𑀡𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁.

𑀬𑀣𑁂𑀯 𑀳𑀺 𑀢𑀬𑁄 𑀯𑀸𑀢𑀸 𑀘𑀦𑁆𑀤𑀧𑀝𑀺𑀘𑁆𑀙𑀸𑀤𑀓𑁂 𑀯𑀮𑀸𑀳𑀓𑁂𑀬𑁂𑀯 𑀯𑀺𑀤𑁆𑀥𑀁𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀘𑀦𑁆𑀤𑀁 𑀤𑀝𑁆𑀞𑀼𑀁, 𑀏𑀯𑀁 𑀅𑀦𑀼𑀮𑁄𑀫𑀸𑀦𑀺 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑀜𑁆𑀜𑁂𑀯 𑀯𑀺𑀦𑁄𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀼𑀁. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀘𑀦𑁆𑀤𑀫𑁂𑀯 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺, 𑀦 𑀯𑀮𑀸𑀳𑀓𑁂 𑀯𑀺𑀤𑁆𑀥𑀁𑀲𑁂𑀢𑀼𑀁, 𑀏𑀯𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀦𑀺𑀩𑁆𑀩𑀸𑀦𑀫𑁂𑀯 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺, 𑀦 𑀓𑀺𑀮𑁂𑀲𑀢𑀫𑀁 𑀯𑀺𑀦𑁄𑀤𑁂𑀢𑀼𑀁. 𑀢𑁂𑀦𑁂𑀯 𑀘𑁂𑀢𑀁 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀅𑀦𑀸𑀯𑀚𑁆𑀚𑀦𑀫𑁆𑀧𑀺 𑀲𑀫𑀸𑀦𑀁 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 ‘‘𑀏𑀯𑀁 𑀦𑀺𑀩𑁆𑀩𑀢𑁆𑀢𑀸𑀳𑀻’’𑀢𑀺 𑀫𑀕𑁆𑀕𑀲𑁆𑀲 𑀲𑀜𑁆𑀜𑀁 𑀤𑀢𑁆𑀯𑀸 𑀯𑀺𑀬 𑀦𑀺𑀭𑀼𑀚𑁆𑀛𑀢𑀺. 𑀫𑀕𑁆𑀕𑁄𑀧𑀺 𑀢𑁂𑀦 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀅𑀯𑀻𑀘𑀺𑀲𑀦𑁆𑀢𑀢𑀺𑀯𑀲𑁂𑀦 𑀢𑀁 𑀜𑀸𑀡𑀁 𑀅𑀦𑀼𑀧𑁆𑀧𑀩𑀦𑁆𑀥𑀫𑀸𑀦𑁄 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀤𑁄𑀲𑀓𑁆𑀔𑀦𑁆𑀥𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀫𑀸𑀦𑁄𑀯 𑀧𑀤𑀸𑀮𑀬𑀫𑀸𑀦𑁄𑀯 𑀦𑀺𑀩𑁆𑀩𑀢𑁆𑀢𑀢𑀺.

𑁮𑁦𑁯. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀏𑀓𑁄 𑀓𑀺𑀭 𑀇𑀲𑁆𑀲𑀸𑀲𑁄 𑀅𑀝𑁆𑀞𑀉𑀲𑀪𑀫𑀢𑁆𑀢𑁂 𑀧𑀤𑁂𑀲𑁂 𑀨𑀮𑀓𑀲𑀢𑀁 𑀞𑀧𑀸𑀧𑁂𑀢𑁆𑀯𑀸 𑀯𑀢𑁆𑀣𑁂𑀦 𑀫𑀼𑀔𑀁 𑀯𑁂𑀞𑁂𑀢𑁆𑀯𑀸 𑀲𑀭𑀁 𑀲𑀦𑁆𑀦𑀳𑀺𑀢𑁆𑀯𑀸 𑀘𑀓𑁆𑀓𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀘𑀓𑁆𑀓𑀬𑀦𑁆𑀢𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀬𑀤𑀸 𑀇𑀲𑁆𑀲𑀸𑀲𑀲𑁆𑀲 𑀨𑀮𑀓𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺, 𑀢𑀤𑀸 𑀢𑀢𑁆𑀣 𑀤𑀡𑁆𑀟𑀓𑁂𑀦 𑀲𑀜𑁆𑀜𑀁 𑀤𑁂𑀢𑀺. 𑀇𑀲𑁆𑀲𑀸𑀲𑁄 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀨𑀮𑀓𑀲𑀢𑀁 𑀦𑀺𑀩𑁆𑀩𑀺𑀚𑁆𑀛𑀢𑀺. 𑀢𑀢𑁆𑀣 𑀤𑀡𑁆𑀟𑀓𑀲𑀜𑁆𑀜𑀁 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀇𑀲𑁆𑀲𑀸𑀲𑁄 𑀯𑀺𑀬 𑀫𑀕𑁆𑀕𑀜𑀸𑀡𑀁. 𑀇𑀲𑁆𑀲𑀸𑀲𑀲𑁆𑀲 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀨𑀮𑀓𑀲𑀢𑀦𑀺𑀩𑁆𑀩𑀺𑀚𑁆𑀛𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀲𑁆𑀲 𑀕𑁄𑀢𑁆𑀭𑀪𑀼𑀜𑀸𑀡𑁂𑀦 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀸𑀦𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀸𑀦𑀁 𑀮𑁄𑀪𑀤𑁄𑀲𑀫𑁄𑀳𑀓𑁆𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀧𑀤𑀸𑀮𑀦𑀁.

𑁮𑁧𑁦. 𑀦 𑀓𑁂𑀯𑀮𑀜𑁆𑀘𑁂𑀲 𑀫𑀕𑁆𑀕𑁄 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀫𑁂𑀯 𑀓𑀭𑁄𑀢𑀺, 𑀅𑀧𑀺𑀘 𑀔𑁄 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀤𑁆𑀤𑀁 𑀲𑁄𑀲𑁂𑀢𑀺, 𑀲𑀩𑁆𑀩𑀅𑀧𑀸𑀬𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀢𑀺, 𑀲𑀢𑁆𑀢𑀦𑁆𑀦𑀁 𑀅𑀭𑀺𑀬𑀥𑀦𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀓𑀭𑁄𑀢𑀺, 𑀅𑀝𑁆𑀞𑀗𑁆𑀕𑀺𑀓𑀁 𑀫𑀺𑀘𑁆𑀙𑀸𑀫𑀕𑁆𑀕𑀁 𑀧𑀚𑀳𑀢𑀺, 𑀲𑀩𑁆𑀩𑀯𑁂𑀭𑀪𑀬𑀸𑀦𑀺 𑀯𑀽𑀧𑀲𑀫𑁂𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀭𑀲𑀧𑀼𑀢𑁆𑀢𑀪𑀸𑀯𑀁 𑀉𑀧𑀦𑁂𑀢𑀺 ¶ ¶ , 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀢𑀸𑀦𑀁 𑀆𑀦𑀺𑀲𑀁𑀲𑀸𑀦𑀁 𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀅𑀦𑁂𑀓𑀸𑀦𑀺𑀲𑀁𑀲𑀤𑀸𑀬𑀓𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀜𑀸𑀡𑀦𑁆𑀢𑀺.

𑀧𑀞𑀫𑀫𑀕𑁆𑀕𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀲𑁄𑀢𑀸𑀧𑀦𑁆𑀦𑀧𑀼𑀕𑁆𑀕𑀮𑀓𑀣𑀸

𑁮𑁧𑁧. 𑀇𑀫𑀲𑁆𑀲 𑀧𑀦 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀢𑀲𑁆𑀲𑁂𑀯 𑀯𑀺𑀧𑀸𑀓𑀪𑀽𑀢𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀦𑀦𑁆𑀢𑀭𑀯𑀺𑀧𑀸𑀓𑀢𑁆𑀢𑀸𑀬𑁂𑀯 𑀳𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 ‘‘𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀽’’𑀢𑀺 (𑀔𑀼. 𑀧𑀸. 𑁬.𑁫) 𑀘 ‘‘𑀤𑀦𑁆𑀥𑀁 𑀆𑀦𑀦𑁆𑀢𑀭𑀺𑀓𑀁 𑀧𑀸𑀧𑀼𑀡𑀸𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺 (𑀅. 𑀦𑀺. 𑁪.𑁧𑁬𑁨) 𑀘 𑀆𑀤𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀏𑀓𑀁 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀅𑀦𑀼𑀮𑁄𑀫𑀲𑁆𑀲 𑀳𑀺 𑀆𑀲𑁂𑀯𑀦𑀦𑁆𑀢𑁂 𑀕𑁄𑀢𑁆𑀭𑀪𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀻𑀳𑀺 𑀅𑀦𑀼𑀮𑁄𑀫𑀘𑀺𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀏𑀓𑀁 𑀆𑀲𑁂𑀯𑀦𑀧𑀘𑁆𑀘𑀬𑀁 𑀮𑀪𑀢𑀺, 𑀲𑀢𑁆𑀢𑀘𑀺𑀢𑁆𑀢𑀧𑀭𑀫𑀸 𑀘 𑀏𑀓𑀸𑀯𑀚𑁆𑀚𑀦𑀯𑀻𑀣𑀺. 𑀢𑀲𑁆𑀫𑀸 𑀬𑀲𑁆𑀲 𑀤𑁆𑀯𑁂 𑀅𑀦𑀼𑀮𑁄𑀫𑀸𑀦𑀺, 𑀢𑀲𑁆𑀲 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼 𑀘𑀢𑀼𑀢𑁆𑀣𑀁 𑀫𑀕𑁆𑀕𑀘𑀺𑀢𑁆𑀢𑀁 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀲𑁆𑀲 𑀢𑀻𑀡𑀺 𑀅𑀦𑀼𑀮𑁄𑀫𑀸𑀦𑀺, 𑀢𑀲𑁆𑀲 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼 𑀧𑀜𑁆𑀘𑀫𑀁 𑀫𑀕𑁆𑀕𑀘𑀺𑀢𑁆𑀢𑀁 𑀤𑁆𑀯𑁂 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀢𑀻𑀡𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

𑀓𑁂𑀘𑀺 𑀧𑀦 𑀬𑀲𑁆𑀲 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀸𑀦𑀺, 𑀢𑀲𑁆𑀲 𑀧𑀜𑁆𑀘𑀫𑀁 𑀕𑁄𑀢𑁆𑀭𑀪𑀼 𑀙𑀝𑁆𑀞𑀁 𑀫𑀕𑁆𑀕𑀘𑀺𑀢𑁆𑀢𑀁 𑀏𑀓𑀁 𑀨𑀮𑀘𑀺𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀬𑀲𑁆𑀫𑀸 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀦 𑀢𑀢𑁄 𑀧𑀭𑀁 𑀆𑀲𑀦𑁆𑀦𑀪𑀯𑀗𑁆𑀕𑀢𑁆𑀢𑀸𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀫𑀸 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑁮𑁧𑁨. 𑀏𑀢𑁆𑀢𑀸𑀯𑀢𑀸 𑀘 𑀧𑀦𑁂𑀲 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀤𑀼𑀢𑀺𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀪𑀼𑀲𑀁 𑀧𑀫𑀢𑁆𑀢𑁄𑀧𑀺 𑀳𑀼𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀲𑁆𑀲 𑀓𑀭𑀡𑀲𑀫𑀢𑁆𑀣𑁄 𑀳𑁄𑀢𑀺. 𑀨𑀮𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀢𑀢𑁄 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑀻𑀢𑀺. 𑀧𑀼𑀦 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀢𑁂𑀦𑁂𑀯 𑀦𑀬𑁂𑀦 ¶ 𑀨𑀮𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀆𑀯𑀚𑁆𑀚𑀦𑀸𑀤𑀻𑀦𑀺 ¶ 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀏𑀲 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀺.

𑀲𑁄 𑀳𑀺 ‘‘𑀇𑀫𑀺𑀦𑀸 𑀯𑀢𑀸𑀳𑀁 𑀫𑀕𑁆𑀕𑁂𑀦 𑀆𑀕𑀢𑁄’’𑀢𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀢𑁄 ‘‘𑀅𑀬𑀁 𑀫𑁂 𑀆𑀦𑀺𑀲𑀁𑀲𑁄 𑀮𑀤𑁆𑀥𑁄’’𑀢𑀺 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀅𑀯𑀲𑀺𑀝𑁆𑀞𑀸’’𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑁂 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀯𑀲𑀸𑀦𑁂 𑀘 ‘‘𑀅𑀬𑀁 𑀫𑁂 𑀥𑀫𑁆𑀫𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀤𑁆𑀥𑁄’’𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀏𑀯𑀁 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀫𑁆𑀧𑀺. 𑀅𑀭𑀳𑀢𑁄 𑀧𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀦𑀸𑀫.

𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀬𑁂𑀯 𑀘𑁂𑀲𑁄. 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀳𑀺 𑀲𑁂𑀓𑁆𑀔𑀸𑀦𑀫𑁆𑀧𑀺 𑀳𑁄𑀢𑀺 𑀯𑀸 𑀦 𑀯𑀸. 𑀢𑀲𑁆𑀲 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀅𑀪𑀸𑀯𑁂𑀦𑁂𑀯 𑀫𑀳𑀸𑀦𑀸𑀫𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 ‘‘𑀓𑁄𑀲𑀼 𑀦𑀸𑀫 𑀫𑁂 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀅𑀧𑁆𑀧𑀳𑀻𑀦𑁄, 𑀬𑁂𑀦 𑀫𑁂 𑀏𑀓𑀤𑀸 𑀮𑁄𑀪𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁧𑁭𑁫) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀓𑀣𑀸

𑁮𑁧𑁩. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀦 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀜𑁆𑀜𑁂𑀯 𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀅𑀧𑀭𑁂𑀦 𑀯𑀸 𑀲𑀫𑀬𑁂𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀸𑀬 𑀤𑀼𑀢𑀺𑀬𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀬𑁄𑀕𑀁 𑀓𑀭𑁄𑀢𑀺. 𑀲𑁄 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀤𑁂𑀯 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀪𑁂𑀤𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀢𑀺, 𑀧𑀭𑀺𑀯𑀢𑁆𑀢𑁂𑀢𑀺, 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀕𑀸𑀳𑀢𑀺. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀲𑀸𑀦𑁂 𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀜𑀸𑀡𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀜𑀸𑀡𑀦𑁆𑀢𑀺.

𑀤𑀼𑀢𑀺𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀢𑀢𑀺𑀬𑀫𑀕𑁆𑀕𑀜𑀸𑀡𑀓𑀣𑀸

𑁮𑁧𑁪. 𑀇𑀫𑀲𑁆𑀲𑀸𑀧𑀺 ¶ ¶ 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀨𑀮𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 𑀲𑀓𑀤𑀸𑀕𑀸𑀫𑀻 𑀦𑀸𑀫 𑀘𑀢𑀼𑀢𑁆𑀣𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺 𑀲𑀓𑀺𑀁𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀡𑀲𑀫𑀢𑁆𑀣𑁄. 𑀢𑀢𑁄 𑀧𑀭𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀲𑁄 𑀲𑀓𑀤𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀜𑁆𑀜𑁂𑀯 𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀧𑀭𑁂𑀦 𑀯𑀸 𑀲𑀫𑀬𑁂𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬 𑀢𑀢𑀺𑀬𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀬𑁄𑀕𑀁 𑀓𑀭𑁄𑀢𑀺, 𑀲𑁄 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀤𑁂𑀯 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀢𑀺, 𑀧𑀭𑀺𑀯𑀢𑁆𑀢𑁂𑀢𑀺, 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀕𑀸𑀳𑀢𑀺. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀲𑀸𑀦𑁂 𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀜𑀸𑀡𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀜𑀸𑀡𑀦𑁆𑀢𑀺.

𑀢𑀢𑀺𑀬𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀓𑀣𑀸

𑁮𑁧𑁫. 𑀇𑀫𑀲𑁆𑀲𑀧𑀺 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀨𑀮𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 𑀅𑀦𑀸𑀕𑀸𑀫𑀻 𑀦𑀸𑀫 𑀙𑀝𑁆𑀞𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀇𑀫𑀁 𑀮𑁄𑀓𑀁 𑀧𑀼𑀦 𑀅𑀦𑀸𑀕𑀦𑁆𑀢𑀸. 𑀢𑀢𑁄 𑀧𑀭𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀲𑁄 𑀅𑀦𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀜𑁆𑀜𑁂𑀯 𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀅𑀧𑀭𑁂𑀦 𑀯𑀸 𑀲𑀫𑀬𑁂𑀦 𑀭𑀽𑀧𑀸𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸𑀬 𑀘𑀢𑀼𑀢𑁆𑀣𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀬𑁄𑀕𑀁 𑀓𑀭𑁄𑀢𑀺, 𑀲𑁄 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀤𑁂𑀯 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀢𑀺, 𑀧𑀭𑀺𑀯𑀢𑁆𑀢𑁂𑀢𑀺, 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀕𑀸𑀳𑀢𑀺. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀲𑀸𑀦𑁂 𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀜𑀸𑀡𑁂𑀲𑀼 ¶ 𑀉𑀧𑁆𑀧𑀦𑁆𑀦𑁂𑀲𑀼 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀅𑀭𑀳𑀢𑁆𑀢𑀫𑀕𑁆𑀕𑁂 𑀜𑀸𑀡𑀦𑁆𑀢𑀺.

𑀘𑀢𑀼𑀢𑁆𑀣𑀜𑀸𑀡𑀁 𑀦𑀺𑀝𑁆𑀞𑀺𑀢𑀁.

𑀅𑀭𑀳𑀦𑁆𑀢𑀧𑀼𑀕𑁆𑀕𑀮𑀓𑀣𑀸

𑁮𑁧𑁬. 𑀇𑀫𑀲𑁆𑀲𑀧𑀺 ¶ 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀨𑀮𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 𑀅𑀭𑀳𑀸 𑀦𑀸𑀫 𑀅𑀝𑁆𑀞𑀫𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺 𑀫𑀳𑀸𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀸𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺.

𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫𑀸’’𑀢𑀺, 𑀢𑀁 𑀇𑀫𑀸𑀦𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀸𑀦𑀺 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀩𑁄𑀥𑀺𑀧𑀓𑁆𑀔𑀺𑀬𑀓𑀣𑀸

𑁮𑁧𑁭. 𑀇𑀤𑀸𑀦𑀺 𑀇𑀫𑀺𑀲𑁆𑀲𑀸𑀬𑁂𑀯 𑀘𑀢𑀼𑀜𑀸𑀡𑀸𑀬 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀆𑀦𑀼𑀪𑀸𑀯𑀯𑀺𑀚𑀸𑀦𑀦𑀢𑁆𑀣𑀁 𑁋

𑀧𑀭𑀺𑀧𑀼𑀡𑁆𑀡𑀩𑁄𑀥𑀺𑀧𑀓𑁆𑀔𑀺𑀬, 𑀪𑀸𑀯𑁄 𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑁄;

𑀬𑁂 𑀬𑁂𑀦 𑀧𑀳𑀸𑀢𑀩𑁆𑀩𑀸, 𑀥𑀫𑁆𑀫𑀸 𑀢𑁂𑀲𑀁 𑀧𑀳𑀸𑀦𑀜𑁆𑀘.

𑀓𑀺𑀘𑁆𑀘𑀸𑀦𑀺 𑀧𑀭𑀺𑀜𑁆𑀜𑀸𑀤𑀻𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀅𑀪𑀺𑀲𑀫𑀬𑀓𑀸𑀮𑁂;

𑀢𑀸𑀦𑀺 𑀘 𑀬𑀣𑀸𑀲𑀪𑀸𑀯𑁂𑀦, 𑀚𑀸𑀦𑀺𑀢𑀩𑁆𑀩𑀸𑀦𑀺 𑀲𑀩𑁆𑀩𑀸𑀦𑀻𑀢𑀺.

𑁮𑁧𑁮. 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀩𑁄𑀥𑀺𑀧𑀓𑁆𑀔𑀺𑀬, 𑀪𑀸𑀯𑁄𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀧𑀭𑀺𑀧𑀼𑀡𑁆𑀡𑀪𑀸𑀯𑁄. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀳𑀺 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀥𑁄𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀓𑁆𑀔𑁂 𑀪𑀯𑀢𑁆𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑀸𑀫. 𑀧𑀓𑁆𑀔𑁂 𑀪𑀯𑀢𑁆𑀢𑀸𑀢𑀺 𑀉𑀧𑀓𑀸𑀭𑀪𑀸𑀯𑁂 𑀞𑀺𑀢𑀢𑁆𑀢𑀸.

𑁮𑁧𑁯. 𑀢𑁂𑀲𑀼 ¶ 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀦𑀁. 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀦𑀲𑁆𑀲𑀸 𑀅𑀲𑀼𑀪-𑀤𑀼𑀓𑁆𑀔-𑀅𑀦𑀺𑀘𑁆𑀘-𑀅𑀦𑀢𑁆𑀢𑀸𑀓𑀸𑀭𑀕𑀳𑀡𑀯𑀲𑁂𑀦 ¶ 𑀲𑀼𑀪-𑀲𑀼𑀔-𑀦𑀺𑀘𑁆𑀘-𑀅𑀢𑁆𑀢-𑀲𑀜𑁆𑀜𑀸𑀧𑀳𑀸𑀦𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑁄 𑀘𑀢𑀼𑀥𑀸 𑀪𑁂𑀤𑁄 𑀳𑁄𑀢𑀺. 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁮𑁨𑁦. 𑀧𑀤𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀥𑀸𑀦𑀁. 𑀲𑁄𑀪𑀦𑀁 𑀧𑀥𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀲𑀫𑁆𑀫𑀸 𑀯𑀸 𑀧𑀤𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀲𑁄𑀪𑀦𑀁 𑀯𑀸 𑀢𑀁 𑀓𑀺𑀮𑁂𑀲𑀯𑀺𑀭𑀽𑀧𑀢𑁆𑀢𑀯𑀺𑀭𑀳𑀢𑁄 𑀧𑀥𑀸𑀦𑀜𑁆𑀘 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀲𑁂𑀝𑁆𑀞𑀪𑀸𑀯𑀸𑀯𑀳𑀦𑀢𑁄 𑀧𑀥𑀸𑀦𑀪𑀸𑀯𑀓𑀸𑀭𑀡𑀢𑁄 𑀘𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀬𑀺𑀤𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀸𑀦𑀼𑀧𑁆𑀧𑀢𑁆𑀢𑀺𑀓𑀺𑀘𑁆𑀘𑀁 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀺𑀓𑀺𑀘𑁆𑀘𑀁 𑀲𑀸𑀥𑀬𑀢𑀻𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁮𑁨𑁧. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀢𑀲𑁆𑀲𑀸 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀨𑀮𑀪𑀽𑀢𑀸𑀬 𑀧𑀼𑀩𑁆𑀩𑀪𑀸𑀕𑀓𑀸𑀭𑀡𑀝𑁆𑀞𑁂𑀦 𑀘 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀲𑁄 𑀙𑀦𑁆𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁄 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 (𑀯𑀺𑀪. 𑁪𑁫𑁭). 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸𑀯. 𑀮𑁄𑀓𑀺𑀬𑀸 𑀧𑀦 ‘‘𑀙𑀦𑁆𑀤𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁪𑁩𑁨) 𑀙𑀦𑁆𑀤𑀸𑀤𑀺𑀅𑀥𑀺𑀧𑀢𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀥𑀫𑁆𑀫𑀸𑀧𑀺 𑀳𑁄𑀦𑁆𑀢𑀺.

𑁮𑁨𑁨. 𑀅𑀲𑁆𑀲𑀤𑁆𑀥𑀺𑀬𑀓𑁄𑀲𑀚𑁆𑀚𑀧𑀫𑀸𑀤𑀯𑀺𑀓𑁆𑀔𑁂𑀧𑀲𑀫𑁆𑀫𑁄𑀳𑀸𑀦𑀁 𑀅𑀪𑀺𑀪𑀯𑀦𑀢𑁄 𑀅𑀪𑀺𑀪𑀯𑀦𑀲𑀗𑁆𑀔𑀸𑀢𑁂𑀦 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀘 𑀅𑀦𑀪𑀺𑀪𑀯𑀦𑀻𑀬𑀢𑁄 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀁. 𑀢𑀤𑀼𑀪𑀬𑀫𑁆𑀧𑀺 𑀲𑀤𑁆𑀥𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁮𑁨𑁩. 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲 𑀧𑀦 𑀅𑀗𑁆𑀕𑀪𑀸𑀯𑁂𑀦 𑀲𑀢𑀺𑀆𑀤𑀬𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀬𑁆𑀬𑀸𑀦𑀺𑀓𑀝𑁆𑀞𑁂𑀦 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺.

𑁮𑁨𑁪. 𑀇𑀢𑀺 ¶ 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀬 𑀯𑀢𑁆𑀢𑀫𑀸𑀦𑀸𑀬 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀘 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀦𑀯𑀯𑀺𑀥𑁂𑀦 𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀘 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀘 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀢𑁄 𑀘 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 ¶ 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀁 𑀧𑀭𑀲𑁆𑀲 𑀉𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲𑁂𑀢𑀁 𑀉𑀧𑁆𑀧𑀦𑁆𑀦𑀁, 𑀦 𑀢𑀣𑀸 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺 𑀏𑀯𑀁 𑀫𑁂 𑀏𑀢𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺, 𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀯𑀸𑀬𑀫𑀦𑀓𑀸𑀮𑁂 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀅𑀢𑁆𑀢𑀦𑁄 𑀲𑀫𑀼𑀤𑀸𑀘𑀸𑀭𑀧𑁆𑀧𑀢𑁆𑀢𑀁 𑀅𑀓𑀼𑀲𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀦𑀓𑀸𑀮𑁂 𑀤𑀼𑀢𑀺𑀬𑀁. 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀁 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀉𑀧𑁆𑀧𑀸𑀤𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀢𑀢𑀺𑀬𑀁. 𑀉𑀧𑁆𑀧𑀦𑁆𑀦𑀁 𑀬𑀣𑀸 𑀦 𑀧𑀭𑀺𑀳𑀸𑀬𑀢𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀓𑀼𑀲𑀮𑀼𑀧𑁆𑀧𑀸𑀤𑀦𑀓𑀸𑀮𑁂 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄. 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀭𑀫𑀡𑀓𑀸𑀮𑁂 𑀲𑀫𑁆𑀫𑀸𑀯𑀸𑀘𑀸𑀢𑀺 𑀏𑀯𑀁 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀏𑀓𑀘𑀺𑀢𑁆𑀢𑁂 𑀮𑀩𑁆𑀪𑀦𑁆𑀢𑀺. 𑀨𑀮𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀅𑀯𑀲𑁂𑀲𑀸 𑀢𑁂𑀢𑁆𑀢𑀺𑀁𑀲 𑀮𑀩𑁆𑀪𑀦𑁆𑀢𑀺.

𑁮𑁨𑁫. 𑀏𑀯𑀁 𑀏𑀓𑀘𑀺𑀢𑁆𑀢𑁂 𑀮𑀩𑁆𑀪𑀫𑀸𑀦𑁂𑀲𑀼 𑀘𑁂𑀢𑁂𑀲𑀼 𑀏𑀓𑀸𑀯 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀲𑀢𑀺 𑀓𑀸𑀬𑀸𑀤𑀻𑀲𑀼 𑀲𑀼𑀪𑀲𑀜𑁆𑀜𑀸𑀤𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀫𑁂𑀯 𑀘 𑀯𑀻𑀭𑀺𑀬𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑁂𑀲𑀼 𑀧𑀦 𑀳𑀸𑀧𑀦𑀯𑀟𑁆𑀠𑀦𑀁 𑀦𑀢𑁆𑀣𑀺.

𑁮𑁨𑁬. 𑀅𑀧𑀺𑀘 𑀢𑁂𑀲𑀼 𑁋

𑀦𑀯 𑀏𑀓𑀯𑀺𑀥𑀸 𑀏𑀓𑁄, 𑀤𑁆𑀯𑁂𑀥𑀸𑀣 𑀘𑀢𑀼 𑀧𑀜𑁆𑀘𑀥𑀸;

𑀅𑀝𑁆𑀞𑀥𑀸 𑀦𑀯𑀥𑀸 𑀘𑁂𑀯, 𑀇𑀢𑀺 𑀙𑀤𑁆𑀥𑀸 𑀪𑀯𑀦𑁆𑀢𑀺 𑀢𑁂.

𑀦𑀯 𑀏𑀓𑀯𑀺𑀥𑀸𑀢𑀺 𑀙𑀦𑁆𑀤𑁄, 𑀘𑀺𑀢𑁆𑀢𑀁, 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀉𑀧𑁂𑀓𑁆𑀔𑀸, 𑀲𑀗𑁆𑀓𑀧𑁆𑀧𑁄, 𑀯𑀸𑀘𑀸, 𑀓𑀫𑁆𑀫𑀦𑁆𑀢𑁄, 𑀆𑀚𑀻𑀯𑁄𑀢𑀺 𑀇𑀫𑁂 𑀦𑀯 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀤𑀺𑀯𑀲𑁂𑀦 𑀏𑀓𑀯𑀺𑀥𑀸𑀯 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀁 𑀓𑁄𑀝𑁆𑀞𑀸𑀲𑀁 𑀪𑀚𑀦𑁆𑀢𑀺. 𑀏𑀓𑁄 𑀤𑁆𑀯𑁂𑀥𑀸𑀢𑀺 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬, 𑀩𑀮𑀯𑀲𑁂𑀦 𑀤𑁆𑀯𑁂𑀥𑀸 𑀞𑀺𑀢𑀸. 𑀅𑀣 𑀘𑀢𑀼 𑀧𑀜𑁆𑀘𑀥𑀸𑀢𑀺 𑀅𑀣𑀜𑁆𑀜𑁄 𑀏𑀓𑁄 𑀘𑀢𑀼𑀥𑀸, 𑀅𑀜𑁆𑀜𑁄 𑀧𑀜𑁆𑀘𑀥𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀫𑀸𑀥𑀺 𑀏𑀓𑁄 𑀇𑀦𑁆𑀤𑁆𑀭𑀺𑀬, 𑀩𑀮, 𑀩𑁄𑀚𑁆𑀛𑀗𑁆𑀕, 𑀫𑀕𑁆𑀕𑀗𑁆𑀕𑀯𑀲𑁂𑀦 𑀘𑀢𑀼𑀥𑀸 𑀞𑀺𑀢𑁄. 𑀧𑀜𑁆𑀜𑀸 𑀢𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀓𑁄𑀝𑁆𑀞𑀸𑀲𑀲𑁆𑀲 𑀘 ¶ 𑀯𑀲𑁂𑀦 𑀧𑀜𑁆𑀘𑀥𑀸. 𑀅𑀝𑁆𑀞𑀥𑀸 𑀦𑀯𑀥𑀸 𑀘𑁂𑀯𑀸𑀢𑀺 𑀅𑀧𑀭𑁄 𑀏𑀓𑁄 𑀅𑀝𑁆𑀞𑀥𑀸, 𑀏𑀓𑁄 𑀦𑀯𑀥𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀘𑀢𑀼𑀲𑀢𑀺𑀧𑀝𑁆𑀞𑀸𑀦, 𑀇𑀦𑁆𑀤𑁆𑀭𑀺𑀬, 𑀩𑀮, 𑀩𑁄𑀚𑁆𑀛𑀗𑁆𑀕, 𑀫𑀕𑁆𑀕𑀗𑁆𑀕𑀯𑀲𑁂𑀦 𑀲𑀢𑀺 𑀅𑀝𑁆𑀞𑀥𑀸 𑀞𑀺𑀢𑀸. 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦, 𑀇𑀤𑁆𑀥𑀺𑀧𑀸𑀤, 𑀇𑀦𑁆𑀤𑁆𑀭𑀺𑀬, 𑀩𑀮, 𑀩𑁄𑀚𑁆𑀛𑀗𑁆𑀕, 𑀫𑀕𑁆𑀕𑀗𑁆𑀕𑀯𑀲𑁂𑀦 𑀯𑀻𑀭𑀺𑀬𑀁 𑀦𑀯𑀥𑀸𑀢𑀺. 𑀏𑀯𑀁 𑁋

𑀘𑀼𑀤𑁆𑀤𑀲𑁂𑀯 ¶ 𑀅𑀲𑀫𑁆𑀪𑀺𑀦𑁆𑀦𑀸, 𑀳𑁄𑀦𑁆𑀢𑁂𑀢𑁂 𑀩𑁄𑀥𑀺𑀧𑀓𑁆𑀔𑀺𑀬𑀸;

𑀓𑁄𑀝𑁆𑀞𑀸𑀲𑀢𑁄 𑀲𑀢𑁆𑀢𑀯𑀺𑀥𑀸, 𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑀢𑁄.

𑀲𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁄, 𑀲𑀭𑀽𑀧𑁂𑀦 𑀘 𑀯𑀼𑀢𑁆𑀢𑀺𑀢𑁄;

𑀲𑀩𑁆𑀩𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲, 𑀲𑀫𑁆𑀪𑀯𑁂 𑀲𑀫𑁆𑀪𑀯𑀦𑁆𑀢𑀺 𑀢𑁂𑀢𑀺.

𑀏𑀯𑀁 𑀢𑀸𑀯𑁂𑀢𑁆𑀣 𑀧𑀭𑀺𑀧𑀼𑀡𑁆𑀡𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄.

𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑀓𑀣𑀸

𑁮𑁨𑁭. 𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑁄𑀢𑀺 𑀯𑀼𑀝𑁆𑀞𑀸𑀦𑀜𑁆𑀘𑁂𑀯 𑀩𑀮𑀲𑀫𑀸𑀬𑁄𑀕𑁄 𑀘. 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸 𑀳𑀺 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘𑁂𑀯 𑀧𑀯𑀢𑁆𑀢𑀺𑀓𑀸𑀭𑀡𑀲𑁆𑀲 𑀘 𑀲𑀫𑀼𑀤𑀬𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀦𑁂𑀯 𑀦𑀺𑀫𑀺𑀢𑁆𑀢𑀸 𑀦 𑀧𑀯𑀢𑁆𑀢𑀸 𑀯𑀼𑀝𑁆𑀞𑀸𑀢𑀺. 𑀕𑁄𑀢𑁆𑀭𑀪𑀼𑀜𑀸𑀡𑀁 𑀲𑀫𑀼𑀤𑀬𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀧𑀯𑀢𑁆𑀢𑀸 𑀦 𑀯𑀼𑀝𑁆𑀞𑀸𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀧𑀦 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀸𑀢𑀻𑀢𑀺 𑀏𑀓𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀕𑁄𑀢𑁆𑀭𑀪𑀼𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁧𑁦). 𑀢𑀣𑀸 ‘‘𑀉𑀧𑁆𑀧𑀸𑀤𑀸 𑀯𑀺𑀯𑀝𑁆𑀝𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀕𑁄𑀢𑁆𑀭𑀪𑀼, 𑀧𑀯𑀢𑁆𑀢𑀸 𑀯𑀺𑀯𑀝𑁆𑀝𑀺𑀢𑁆𑀯𑀸’’𑀢𑀺 (𑀧𑀝𑀺. 𑀫. 𑁧.𑁫𑁯) 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺𑀧𑀺 𑀜𑀸𑀡𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀧𑀯𑀢𑁆𑀢𑀸 𑀯𑀼𑀝𑁆𑀞𑀳𑀦𑁆𑀢𑀻𑀢𑀺 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀓𑀣𑀁 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡𑀁?

‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡𑀁. 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸…𑀧𑁂… 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀘𑀸 𑀫𑀺𑀘𑁆𑀙𑀸𑀯𑀸𑀘𑀸𑀬. 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀯𑁄𑀤𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀆𑀚𑀻𑀯𑁄. 𑀧𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄 ¶ . 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 ¶ 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡’𑀦𑁆𑀢𑀺.

‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸 𑀧𑀝𑀺𑀖𑀲𑀁𑀬𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺…𑀧𑁂….

‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸 𑀧𑀝𑀺𑀖𑀲𑀁𑀬𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺…𑀧𑁂….

‘‘𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡’’’𑀦𑁆𑀢𑀺 (𑀧𑀝𑀺. 𑀫. 𑁧.𑁬𑁧).

𑁮𑁨𑁮. 𑀮𑁄𑀓𑀺𑀬𑀸𑀦𑀜𑁆𑀘 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀪𑀸𑀯𑀦𑀸𑀓𑀸𑀮𑁂 𑀲𑀫𑀣𑀩𑀮𑀁 𑀅𑀥𑀺𑀓𑀁 𑀳𑁄𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀪𑀸𑀯𑀦𑀸𑀓𑀸𑀮𑁂 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀧𑀦 𑀬𑀼𑀕𑀦𑀤𑁆𑀥𑀸 𑀢𑁂 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦. 𑀢𑀲𑁆𑀫𑀸 𑀇𑀫𑁂𑀲𑀼 𑀘𑀢𑀽𑀲𑀼𑀧𑀺 𑀜𑀸𑀡𑁂𑀲𑀼 𑀉𑀪𑀬𑀩𑀮𑀲𑀫𑀸𑀬𑁄𑀕𑁄 𑀳𑁄𑀢𑀺. 𑀬𑀣𑀸𑀳 𑁋

‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 ¶ 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀧𑀝𑀺. 𑀫. 𑁨.𑁫).

𑀏𑀯𑀫𑁂𑀢𑁆𑀣 𑀯𑀼𑀝𑁆𑀞𑀸𑀦𑀩𑀮𑀲𑀫𑀸𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀳𑀸𑀢𑀩𑁆𑀩𑀥𑀫𑁆𑀫𑀧𑀳𑀸𑀦𑀓𑀣𑀸

𑁮𑁨𑁯. 𑀬𑁂 ¶ 𑀬𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀢𑁂𑀲𑀁 𑀧𑀳𑀸𑀦𑀜𑁆𑀘𑀸𑀢𑀺 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀜𑀸𑀡𑁂𑀲𑀼 𑀬𑁂 𑀥𑀫𑁆𑀫𑀸 𑀬𑁂𑀦 𑀜𑀸𑀡𑁂𑀦 𑀧𑀳𑀸𑀢𑀩𑁆𑀩𑀸, 𑀢𑁂𑀲𑀁 𑀧𑀳𑀸𑀦𑀜𑁆𑀘 𑀚𑀸𑀦𑀺𑀢𑀩𑁆𑀩𑀁. 𑀏𑀢𑀸𑀦𑀺 𑀳𑀺 𑀬𑀣𑀸𑀬𑁄𑀕𑀁 𑀲𑀁𑀬𑁄𑀚𑀦𑀓𑀺𑀮𑁂𑀲𑀫𑀺𑀘𑁆𑀙𑀢𑁆𑀢𑀮𑁄𑀓𑀥𑀫𑁆𑀫𑀫𑀘𑁆𑀙𑀭𑀺𑀬𑀯𑀺𑀧𑀮𑁆𑀮𑀸𑀲𑀕𑀦𑁆𑀣𑀅𑀕𑀢𑀺𑀆𑀲𑀯𑀑𑀖𑀬𑁄𑀕𑀦𑀻𑀯𑀭𑀡𑀧𑀭𑀸𑀫𑀸𑀲𑀉𑀧𑀸𑀤𑀸𑀦𑀅𑀦𑀼𑀲𑀬𑀫𑀮𑀅𑀓𑀼𑀲𑀮𑀓𑀫𑁆𑀫𑀧𑀣𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀓𑀭𑀸𑀦𑀺.

𑀢𑀢𑁆𑀣 𑀲𑀁𑀬𑁄𑀚𑀦𑀸𑀦𑀻𑀢𑀺 𑀔𑀦𑁆𑀥𑁂𑀳𑀺 𑀔𑀦𑁆𑀥𑀸𑀦𑀁 𑀨𑀮𑁂𑀦 𑀓𑀫𑁆𑀫𑀲𑁆𑀲 𑀤𑀼𑀓𑁆𑀔𑁂𑀦 𑀯𑀸 𑀲𑀢𑁆𑀢𑀸𑀦𑀁 𑀲𑀁𑀬𑁄𑀚𑀓𑀢𑁆𑀢𑀸 𑀭𑀽𑀧𑀭𑀸𑀕𑀸𑀤𑀬𑁄 𑀤𑀲 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀸𑀯𑀜𑁆𑀳𑀺 𑀢𑁂, 𑀢𑀸𑀯 𑀏𑀢𑁂𑀲𑀁 𑀅𑀦𑀼𑀧𑀭𑀫𑁄𑀢𑀺. 𑀢𑀢𑁆𑀭𑀸𑀧𑀺 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀢𑀺 𑀇𑀫𑁂 𑀧𑀜𑁆𑀘 𑀉𑀤𑁆𑀥𑀁𑀦𑀺𑀩𑁆𑀩𑀢𑁆𑀢𑀦𑀓𑀔𑀦𑁆𑀥𑀸𑀤𑀺𑀲𑀁𑀬𑁄𑀚𑀓𑀢𑁆𑀢𑀸 𑀉𑀤𑁆𑀥𑀁𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀫𑀭𑀸𑀕𑁄 𑀧𑀝𑀺𑀖𑁄𑀢𑀺 𑀇𑀫𑁂 𑀧𑀜𑁆𑀘 𑀅𑀥𑁄𑀦𑀺𑀩𑁆𑀩𑀢𑁆𑀢𑀦𑀓𑀔𑀦𑁆𑀥𑀸𑀤𑀺𑀲𑀁𑀬𑁄𑀚𑀓𑀢𑁆𑀢𑀸 𑀅𑀥𑁄𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫.

𑀓𑀺𑀮𑁂𑀲𑀸𑀢𑀺 𑀲𑀬𑀁 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀤𑀲 𑀥𑀫𑁆𑀫𑀸.

𑀫𑀺𑀘𑁆𑀙𑀢𑁆𑀢𑀸𑀢𑀺 𑀫𑀺𑀘𑁆𑀙𑀸𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀻𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀫𑀺𑀘𑁆𑀙𑀸𑀜𑀸𑀡𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀤𑀲.

𑀮𑁄𑀓𑀥𑀫𑁆𑀫𑀸𑀢𑀺 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀅𑀦𑀼𑀧𑀭𑀫𑀥𑀫𑁆𑀫𑀓𑀢𑁆𑀢𑀸 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀲𑀼𑀔𑀁 𑀤𑀼𑀓𑁆𑀔𑀁 𑀦𑀺𑀦𑁆𑀤𑀸 𑀧𑀲𑀁𑀲𑀸𑀢𑀺 𑀇𑀫𑁂 𑀅𑀝𑁆𑀞. 𑀇𑀥 𑀧𑀦 𑀓𑀸𑀭𑀡𑁄𑀧𑀘𑀸𑀭𑁂𑀦 𑀮𑀸𑀪𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀅𑀦𑀼𑀦𑀬𑀲𑁆𑀲 𑀅𑀮𑀸𑀪𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀖𑀲𑁆𑀲 𑀘𑁂𑀢𑀁 𑀮𑁄𑀓𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀘𑁆𑀙𑀭𑀺𑀬𑀸𑀦𑀻𑀢𑀺 ¶ 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀓𑀼𑀮𑀫𑀘𑁆𑀙𑀭𑀺𑀬𑀁 𑀮𑀸𑀪𑀫𑀘𑁆𑀙𑀭𑀺𑀬𑀁 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀯𑀡𑁆𑀡𑀫𑀘𑁆𑀙𑀭𑀺𑀬𑀦𑁆𑀢𑀺 𑀇𑀫𑀸𑀲𑀼 𑀆𑀯𑀸𑀲𑀸𑀤𑀻𑀲𑀼 𑀅𑀜𑁆𑀜𑁂𑀲𑀁 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺.

𑀯𑀺𑀧𑀮𑁆𑀮𑀸𑀲𑀸𑀢𑀺 ¶ 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀅𑀲𑀼𑀪𑁂𑀲𑀼𑀬𑁂𑀯 𑀯𑀢𑁆𑀣𑀽𑀲𑀼 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺 𑀇𑀫𑁂 𑀢𑀬𑁄.

𑀕𑀦𑁆𑀣𑀸𑀢𑀺 𑀦𑀸𑀫𑀓𑀸𑀬𑀲𑁆𑀲 𑀘𑁂𑀯 𑀭𑀽𑀧𑀓𑀸𑀬𑀲𑁆𑀲 𑀘 𑀕𑀦𑁆𑀣𑀦𑀢𑁄 𑀅𑀪𑀺𑀚𑁆𑀛𑀸𑀤𑀬𑁄 𑀘𑀢𑁆𑀢𑀸𑀭𑁄. 𑀢𑀣𑀸 𑀳𑀺 𑀢𑁂 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄 𑀇𑀘𑁆𑀘𑁂𑀯 𑀯𑀼𑀢𑁆𑀢𑀸.

𑀅𑀕𑀢𑀻𑀢𑀺 𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀓𑀭𑀡𑀲𑁆𑀲, 𑀓𑀢𑁆𑀢𑀩𑁆𑀩𑀸𑀓𑀭𑀡𑀲𑁆𑀲 𑀘 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀅𑀭𑀺𑀬𑁂𑀳𑀺 𑀅𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀕𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀆𑀲𑀯𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀆𑀕𑁄𑀢𑁆𑀭𑀪𑀼𑀢𑁄, 𑀆𑀪𑀯𑀕𑁆𑀕𑀢𑁄 𑀘 𑀲𑀯𑀦𑀸, 𑀅𑀲𑀁𑀯𑀼𑀢𑁂𑀳𑀺 𑀯𑀸 𑀤𑁆𑀯𑀸𑀭𑁂𑀳𑀺 𑀖𑀝𑀙𑀺𑀤𑁆𑀤𑁂𑀳𑀺 𑀉𑀤𑀓𑀁 𑀯𑀺𑀬 𑀲𑀯𑀦𑀢𑁄 𑀦𑀺𑀘𑁆𑀘𑀧𑀕𑁆𑀖𑀭𑀡𑀝𑁆𑀞𑁂𑀦 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀯𑀸 𑀲𑀯𑀦𑀢𑁄 𑀓𑀸𑀫𑀭𑀸𑀕𑀪𑀯𑀭𑀸𑀕𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

𑀪𑀯𑀲𑀸𑀕𑀭𑁂 𑀆𑀓𑀟𑁆𑀠𑀦𑀝𑁆𑀞𑁂𑀦 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁂𑀦 𑀘 𑀑𑀖𑀸𑀢𑀺𑀧𑀺, 𑀆𑀭𑀫𑁆𑀫𑀡𑀯𑀺𑀬𑁄𑀕𑀲𑁆𑀲 𑀘𑁂𑀯 𑀤𑀼𑀓𑁆𑀔𑀯𑀺𑀬𑁄𑀕𑀲𑁆𑀲 𑀘 𑀅𑀧𑁆𑀧𑀤𑀸𑀦𑀢𑁄 𑀬𑁄𑀕𑀸𑀢𑀺𑀧𑀺 𑀢𑁂𑀲𑀜𑁆𑀜𑁂𑀯 𑀅𑀥𑀺𑀯𑀘𑀦𑀁.

𑀦𑀻𑀯𑀭𑀡𑀸𑀦𑀻𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀭𑀡𑀦𑀻𑀯𑀭𑀡𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁂𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀜𑁆𑀘.

𑀧𑀭𑀸𑀫𑀸𑀲𑁄𑀢𑀺 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀢𑁄 𑀅𑀪𑀽𑀢𑀁 𑀲𑀪𑀸𑀯𑀁 𑀆𑀫𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀉𑀧𑀸𑀤𑀸𑀦𑀸𑀦𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺.

𑀅𑀦𑀼𑀲𑀬𑀸𑀢𑀺 𑀣𑀸𑀫𑀕𑀢𑀝𑁆𑀞𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖, 𑀫𑀸𑀦, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀪𑀯𑀭𑀸𑀕, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 ¶ . 𑀢𑁂 𑀳𑀺 𑀣𑀸𑀫𑀕𑀢𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀅𑀦𑀼𑀲𑁂𑀦𑁆𑀢𑀺𑀬𑁂𑀯𑀸𑀢𑀺 𑀅𑀦𑀼𑀲𑀬𑀸.

𑀫𑀮𑀸𑀢𑀺 ¶ 𑀢𑁂𑀮𑀜𑁆𑀚𑀦𑀓𑀮𑀮𑀁 𑀯𑀺𑀬 𑀲𑀬𑀜𑁆𑀘 𑀅𑀲𑀼𑀤𑁆𑀥𑀢𑁆𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀅𑀲𑀼𑀤𑁆𑀥𑀪𑀸𑀯𑀓𑀭𑀡𑀢𑁄 𑀮𑁄𑀪𑀤𑁄𑀲𑀫𑁄𑀳𑀸 𑀢𑀬𑁄.

𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀪𑀸𑀯𑁂𑀦 𑀘𑁂𑀯 𑀤𑀼𑀕𑁆𑀕𑀢𑀻𑀦𑀜𑁆𑀘 𑀧𑀣𑀪𑀸𑀯𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀤𑀲.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀮𑁄𑀪𑀫𑀽𑀮𑀸 𑀅𑀝𑁆𑀞 𑀤𑁄𑀲𑀫𑀽𑀮𑀸 𑀤𑁆𑀯𑁂 𑀫𑁄𑀳𑀫𑀽𑀮𑀸 𑀤𑁆𑀯𑁂𑀢𑀺 𑀇𑀫𑁂 𑀤𑁆𑀯𑀸𑀤𑀲.

𑁮𑁩𑁦. 𑀇𑀢𑀺 𑀏𑀢𑁂𑀲𑀁 𑀲𑀁𑀬𑁄𑀚𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀏𑀢𑀸𑀦𑀺 𑀬𑀣𑀸𑀬𑁄𑀕𑀁 𑀧𑀳𑀸𑀦𑀓𑀭𑀸𑀦𑀺. 𑀓𑀣𑀁? 𑀲𑀁𑀬𑁄𑀚𑀦𑁂𑀲𑀼 𑀢𑀸𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀅𑀧𑀸𑀬𑀕𑀫𑀦𑀻𑀬𑀸 𑀘 𑀓𑀸𑀫𑀭𑀸𑀕𑀧𑀝𑀺𑀖𑀸𑀢𑀺 𑀏𑀢𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀲𑁂𑀲𑀸 𑀓𑀸𑀫𑀭𑀸𑀕𑀧𑀝𑀺𑀖𑀸 𑀑𑀴𑀸𑀭𑀺𑀓𑀸 𑀤𑀼𑀢𑀺𑀬𑀜𑀸𑀡𑀯𑀚𑁆𑀛𑀸, 𑀲𑀼𑀔𑀼𑀫𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀭𑀽𑀧𑀭𑀸𑀕𑀸𑀤𑀬𑁄 𑀧𑀜𑁆𑀘𑀧𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸 𑀏𑀯. 𑀧𑀭𑀢𑁄𑀧𑀺 𑀘 𑀬𑀢𑁆𑀣 𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑀁 𑀦 𑀓𑀭𑀺𑀲𑁆𑀲𑀸𑀫. 𑀢𑀢𑁆𑀣 𑀢𑀢𑁆𑀣 𑀬𑀁 𑀬𑀁 ‘‘𑀉𑀧𑀭𑀺𑀜𑀸𑀡𑀯𑀚𑁆𑀛𑁄’’𑀢𑀺 𑀯𑀓𑁆𑀔𑀸𑀫, 𑀲𑁄 𑀲𑁄 𑀧𑀼𑀭𑀺𑀫𑀜𑀸𑀡𑁂𑀳𑀺 𑀳𑀢𑀸𑀧𑀸𑀬𑀕𑀫𑀦𑀻𑀬𑀸𑀤𑀺𑀪𑀸𑀯𑁄𑀯 𑀳𑀼𑀢𑁆𑀯𑀸 𑀉𑀧𑀭𑀺𑀜𑀸𑀡𑀯𑀚𑁆𑀛𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀮𑁂𑀲𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀤𑁄𑀲𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑁄, 𑀮𑁄𑀪𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀺.

𑀫𑀺𑀘𑁆𑀙𑀢𑁆𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀼𑀲𑀸𑀯𑀸𑀤𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄𑀢𑀺 𑀇𑀫𑁂 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸𑀢𑀺 𑀇𑀫𑁂 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀘𑁂𑀢𑀦𑀸𑀬𑁂𑀯 𑀘𑁂𑀢𑁆𑀣 𑀯𑀸𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀨𑀧𑁆𑀧𑀮𑀸𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀺.

𑀮𑁄𑀓𑀥𑀫𑁆𑀫𑁂𑀲𑀼 𑀧𑀝𑀺𑀖𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑁄, 𑀅𑀦𑀼𑀦𑀬𑁄 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑁄, 𑀬𑀲𑁂 𑀘 𑀧𑀲𑀁𑀲𑀸𑀬 𑀘 𑀅𑀦𑀼𑀦𑀬𑁄 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑁄𑀢𑀺 𑀏𑀓𑁂. 𑀫𑀘𑁆𑀙𑀭𑀺𑀬𑀸𑀦𑀺 𑀧𑀞𑀫𑀜𑀸𑀡𑀯𑀚𑁆𑀛𑀸𑀦𑁂𑀯.

𑀯𑀺𑀧𑀮𑁆𑀮𑀸𑀲𑁂𑀲𑀼 ¶ ¶ 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀁, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀘 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸, 𑀤𑀼𑀓𑁆𑀔𑁂 𑀲𑀼𑀔𑀁, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀘𑀸𑀢𑀺 𑀇𑀫𑁂 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸.

𑀕𑀦𑁆𑀣𑁂𑀲𑀼 𑀲𑀻𑀮𑀩𑁆𑀩𑀢𑀧𑀭𑀸𑀫𑀲𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀸 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑁄, 𑀇𑀢𑀭𑁄 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑁄.

𑀅𑀕𑀢𑀺 𑀧𑀞𑀫𑀜𑀸𑀡𑀯𑀚𑁆𑀛𑀸𑀯.

𑀆𑀲𑀯𑁂𑀲𑀼 𑀤𑀺𑀝𑁆𑀞𑀸𑀲𑀯𑁄 𑀧𑀞𑀫𑀜𑀸𑀡𑀯𑀚𑁆𑀛𑁄, 𑀓𑀸𑀫𑀸𑀲𑀯𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑁄, 𑀇𑀢𑀭𑁂 𑀤𑁆𑀯𑁂 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸. 𑀑𑀖𑀬𑁄𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀻𑀯𑀭𑀡𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀞𑀫𑀜𑀸𑀡𑀯𑀚𑁆𑀛𑀁, 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀢𑀻𑀡𑀺 𑀢𑀢𑀺𑀬𑀜𑀸𑀡𑀯𑀚𑁆𑀛𑀸𑀦𑀺, 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀺.

𑀧𑀭𑀸𑀫𑀸𑀲𑁄 𑀧𑀞𑀫𑀜𑀸𑀡𑀯𑀚𑁆𑀛𑁄𑀯.

𑀉𑀧𑀸𑀤𑀸𑀦𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀯𑀢𑁆𑀣𑀼𑀓𑀸𑀫𑀯𑀲𑁂𑀦 𑀓𑀸𑀫𑀸𑀢𑀺 𑀆𑀕𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑀭𑀸𑀕𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑁂 𑀧𑀢𑀢𑀺, 𑀢𑀲𑁆𑀫𑀸 𑀢𑀁 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀁, 𑀲𑁂𑀲𑀸𑀦𑀺 𑀧𑀞𑀫𑀜𑀸𑀡𑀯𑀚𑁆𑀛𑀸𑀦𑀺.

𑀅𑀦𑀼𑀲𑀬𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀧𑀞𑀫𑀜𑀸𑀡𑀯𑀚𑁆𑀛𑀸𑀯, 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀫𑀸𑀦𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀦𑀼𑀲𑀬𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸.

𑀫𑀮𑁂𑀲𑀼 𑀤𑁄𑀲𑀫𑀮𑀁 𑀢𑀢𑀺𑀬𑀜𑀸𑀡𑀯𑀚𑁆𑀛𑀁, 𑀇𑀢𑀭𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀺.

𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀧𑀞𑀫𑀜𑀸𑀡𑀯𑀚𑁆𑀛𑀸 ¶ , 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀩𑁆𑀬𑀸𑀧𑀸𑀤𑁄𑀢𑀺 𑀢𑀬𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀲𑀫𑁆𑀨𑀧𑁆𑀧𑀮𑀸𑀧𑀸𑀪𑀺𑀚𑁆𑀛𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁄 𑀘𑀸𑀢𑀺 𑀧𑀜𑁆𑀘 𑀧𑀞𑀫𑀜𑀸𑀡𑀯𑀚𑁆𑀛𑀸𑀯, 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀲𑁂𑀲𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀢𑀺.

𑀬𑀜𑁆𑀘 𑀬𑁂𑀦 𑀯𑀚𑁆𑀛𑀁, 𑀢𑀁 𑀢𑁂𑀦 𑀧𑀳𑀸𑀢𑀩𑁆𑀩𑀁 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺 𑀏𑀢𑁂𑀲𑀁 𑀲𑀁𑀬𑁄𑀚𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀏𑀢𑀸𑀦𑀺 𑀬𑀣𑀸𑀬𑁄𑀕𑀁 𑀧𑀳𑀸𑀦𑀓𑀭𑀸𑀦𑀻’’𑀢𑀺.

𑁮𑁩𑁧. 𑀓𑀺𑀁 ¶ 𑀧𑀦𑁂𑀢𑀸𑀦𑀺 𑀏𑀢𑁂 𑀥𑀫𑁆𑀫𑁂 𑀅𑀢𑀻𑀢𑀸𑀦𑀸𑀕𑀢𑁂 𑀧𑀚𑀳𑀦𑁆𑀢𑀺 𑀉𑀤𑀸𑀳𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀬𑀤𑀺 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂, 𑀅𑀨𑀮𑁄 𑀯𑀸𑀬𑀸𑀫𑁄 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀧𑀳𑀸𑀢𑀩𑁆𑀩𑀸𑀦𑀁 𑀦𑀢𑁆𑀣𑀺𑀢𑀸𑀬. 𑀅𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀢𑀣𑀸𑀧𑀺 𑀅𑀨𑀮𑁄, 𑀯𑀸𑀬𑀸𑀫𑁂𑀦 𑀲𑀤𑁆𑀥𑀺𑀁 𑀧𑀳𑀸𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀢𑀸𑀬, 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀫𑀕𑁆𑀕𑀪𑀸𑀯𑀦𑀸 𑀆𑀧𑀚𑁆𑀚𑀢𑀺, 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀸 𑀓𑀺𑀮𑁂𑀲𑀸𑀦𑀁, 𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀺𑀮𑁂𑀲𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺. 𑀦𑀸𑀬𑀁 𑀆𑀯𑁂𑀡𑀺𑀓𑀸 𑀘𑁄𑀤𑀦𑀸. 𑀧𑀸𑀴𑀺𑀬𑀁𑀬𑁂𑀯 𑀳𑀺 ‘‘𑀲𑁆𑀯𑀸𑀬𑀁 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺 𑀯𑀢𑁆𑀯𑀸, 𑀧𑀼𑀦 ‘‘𑀳𑀜𑁆𑀘𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦𑀳𑀺 𑀔𑀻𑀡𑀁 𑀔𑁂𑀧𑁂𑀢𑀺, 𑀦𑀺𑀭𑀼𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀯𑀺𑀕𑀢𑀁 𑀯𑀺𑀕𑀫𑁂𑀢𑀺, 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀗𑁆𑀕𑀫𑁂𑀢𑀺. 𑀅𑀢𑀻𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀻’’𑀢𑀺 (𑀧𑀝𑀺. 𑀫. 𑁩.𑁨𑁧) 𑀘 𑀯𑀢𑁆𑀯𑀸, ‘‘𑀦 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀢𑀣𑀸 ‘‘𑀳𑀜𑁆𑀘𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦𑀳𑀺 𑀅𑀚𑀸𑀢𑀁 𑀧𑀚𑀳𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁 𑀧𑀚𑀳𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀧𑀚𑀳𑀢𑀺, 𑀅𑀧𑀸𑀢𑀼𑀪𑀽𑀢𑀁 𑀧𑀚𑀳𑀢𑀺. 𑀅𑀦𑀸𑀕𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀻’’𑀢𑀺 𑀘 𑀯𑀢𑁆𑀯𑀸, ‘‘𑀦 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀢𑀣𑀸 ‘‘𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺. 𑀤𑀼𑀝𑁆𑀞𑁄 𑀤𑁄𑀲𑀁, 𑀫𑀽𑀴𑁆𑀳𑁄 𑀫𑁄𑀳𑀁, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀁, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀁, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀁, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀁, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀺. 𑀓𑀡𑁆𑀳𑀲𑀼𑀓𑁆𑀓𑀸 𑀥𑀫𑁆𑀫𑀸 𑀬𑀼𑀕𑀦𑀤𑁆𑀥𑀸𑀯 𑀯𑀢𑁆𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀺𑀓𑀸 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀻’’𑀢𑀺 𑀘 𑀯𑀢𑁆𑀯𑀸, ‘‘𑀦 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀅𑀦𑀸𑀕𑀢𑁂, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻’’𑀢𑀺 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, ‘‘𑀢𑁂𑀦𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀦𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 ¶ , 𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 𑀧𑀜𑁆𑀳𑀸𑀧𑀭𑀺𑀬𑁄𑀲𑀸𑀦𑁂 ‘‘𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸…𑀧𑁂… 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀬𑀣𑀸 𑀓𑀣𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑁂 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺 𑀢𑀭𑀼𑀡𑁄 𑀭𑀼𑀓𑁆𑀔𑁄 𑀅𑀚𑀸𑀢𑀨𑀮𑁄, 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬, 𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀚𑀸𑀢𑀨𑀮𑀸, 𑀢𑁂 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀬𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀏𑀯𑀫𑁂𑀯 ¶ 𑀉𑀧𑁆𑀧𑀸𑀤𑁄 𑀳𑁂𑀢𑀼 𑀉𑀧𑁆𑀧𑀸𑀤𑁄 𑀧𑀘𑁆𑀘𑀬𑁄 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀉𑀧𑁆𑀧𑀸𑀤𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀦𑀼𑀧𑁆𑀧𑀸𑀤𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺, 𑀅𑀦𑀼𑀧𑁆𑀧𑀸𑀤𑁂 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀢𑁆𑀢𑀸 𑀬𑁂 𑀆𑀬𑀽𑀳𑀦𑀧𑀘𑁆𑀘𑀬𑀸 𑀓𑀺𑀮𑁂𑀲𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑁂 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺…𑀧𑁂… 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀏𑀯𑀁 𑀳𑁂𑀢𑀼𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀧𑀯𑀢𑁆𑀢𑀁 𑀳𑁂𑀢𑀼…𑀧𑁂… 𑀦𑀺𑀫𑀺𑀢𑁆𑀢𑀁 𑀳𑁂𑀢𑀼…𑀧𑁂… 𑀆𑀬𑀽𑀳𑀦𑀸 𑀳𑁂𑀢𑀼…𑀧𑁂… 𑀅𑀦𑀸𑀬𑀽𑀳𑀦𑁂 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀢𑁆𑀢𑀸 𑀬𑁂 𑀆𑀬𑀽𑀳𑀦𑀧𑀘𑁆𑀘𑀬𑀸 𑀓𑀺𑀮𑁂𑀲𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑁂 𑀅𑀚𑀸𑀢𑀸𑀬𑁂𑀯…𑀧𑁂… 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀏𑀯𑀁 𑀳𑁂𑀢𑀼𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀏𑀯𑀁 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀅𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀅𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 (𑀧𑀝𑀺. 𑀫. 𑁩.𑁨𑁧).

𑁮𑁩𑁨. 𑀏𑀢𑁂𑀦 𑀓𑀺𑀁 𑀤𑀻𑀧𑀺𑀢𑀁 𑀳𑁄𑀢𑀺? 𑀪𑀽𑀫𑀺𑀮𑀤𑁆𑀥𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀪𑀽𑀫𑀺𑀮𑀤𑁆𑀥𑀸 𑀧𑀦 𑀓𑀺𑀁 𑀅𑀢𑀻𑀢𑀸𑀦𑀸𑀕𑀢𑀸 𑀉𑀤𑀸𑀳𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺. 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸 𑀏𑀯 𑀦𑀸𑀫 𑀢𑁂.

𑁮𑁩𑁩. 𑀉𑀧𑁆𑀧𑀦𑁆𑀦𑀁 𑀳𑀺 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑁄𑀓𑀸𑀲𑀓𑀢𑀪𑀽𑀫𑀺𑀮𑀤𑁆𑀥𑀯𑀲𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀢𑀢𑁆𑀣 𑀲𑀩𑁆𑀩𑀫𑁆𑀧𑀺 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀺𑀲𑀗𑁆𑀔𑀸𑀢𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀦𑀼𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀉𑀧𑁆𑀧𑀸𑀤𑀸𑀤𑀺𑀢𑁆𑀢𑀬𑀁 𑀅𑀦𑀼𑀧𑁆𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂𑀓𑀢𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 (𑀫. 𑀦𑀺. 𑁩.𑁨𑁪𑁮) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀁 𑀅𑀢𑀻𑀢𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸 𑀢𑀣𑀸 𑀓𑀢𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀁 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀽𑀳𑀢𑀁 𑀅𑀓𑀼𑀲𑀮𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫.

𑁮𑁩𑁪. 𑀏𑀢𑁆𑀣 ¶ 𑀘 𑀪𑀽𑀫𑀺𑀬𑀸 𑀪𑀽𑀫𑀺𑀮𑀤𑁆𑀥𑀲𑁆𑀲 𑀘 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀽𑀫𑀻𑀢𑀺 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀉𑀧𑁆𑀧𑀢𑁆𑀢𑀺𑀭𑀳𑀁 𑀓𑀺𑀮𑁂𑀲𑀚𑀸𑀢𑀁. 𑀢𑁂𑀦𑀳𑀺 𑀲𑀸 𑀪𑀽𑀫𑀺 𑀮𑀤𑁆𑀥𑀸 𑀦𑀸𑀫 𑀳𑁄𑀢𑀻𑀢𑀺 𑀢𑀲𑁆𑀫𑀸 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀘 𑀔𑁄 𑀦 𑀆𑀭𑀫𑁆𑀫𑀡𑀯𑀲𑁂𑀦. 𑀆𑀭𑀫𑁆𑀫𑀡𑀯𑀲𑁂𑀦 ¶ 𑀳𑀺 𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀦𑀸𑀕𑀢𑁂 𑀧𑀭𑀺𑀜𑁆𑀜𑀸𑀢𑁂𑀧𑀺 𑀘 𑀔𑀻𑀡𑀸𑀲𑀯𑀸𑀦𑀁 𑀔𑀦𑁆𑀥𑁂 𑀆𑀭𑀩𑁆𑀪 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑀳𑀸𑀓𑀘𑁆𑀘𑀸𑀦𑀉𑀧𑁆𑀧𑀮𑀯𑀡𑁆𑀡𑀸𑀤𑀻𑀦𑀁 𑀔𑀦𑁆𑀥𑁂 𑀆𑀭𑀩𑁆𑀪 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺 𑀦𑀦𑁆𑀤𑀫𑀸𑀡𑀯𑀓𑀸𑀤𑀻𑀦𑀁 𑀯𑀺𑀬. 𑀬𑀤𑀺 𑀘 𑀢𑀁 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀲𑀺𑀬𑀸, 𑀢𑀲𑁆𑀲 𑀅𑀧𑁆𑀧𑀳𑁂𑀬𑁆𑀬𑀢𑁄 𑀦 𑀓𑁄𑀘𑀺 𑀪𑀯𑀫𑀽𑀮𑀁 𑀧𑀚𑀳𑁂𑀬𑁆𑀬. 𑀯𑀢𑁆𑀣𑀼𑀯𑀲𑁂𑀦 𑀧𑀦 𑀪𑀽𑀫𑀺𑀮𑀤𑁆𑀥𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀅𑀧𑀭𑀺𑀜𑁆𑀜𑀸𑀢𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀸𑀤𑀢𑁄 𑀧𑀪𑀼𑀢𑀺 𑀢𑁂𑀲𑀼 𑀯𑀝𑁆𑀝𑀫𑀽𑀮𑀁 𑀓𑀺𑀮𑁂𑀲𑀚𑀸𑀢𑀁 𑀅𑀦𑀼𑀲𑁂𑀢𑀺. 𑀢𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁩𑁫. 𑀢𑀢𑁆𑀣 𑀘 𑀬𑀲𑁆𑀲 𑀬𑁂𑀲𑀼 𑀔𑀦𑁆𑀥𑁂𑀲𑀼 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑀺𑀢𑀸 𑀓𑀺𑀮𑁂𑀲𑀸, 𑀢𑀲𑁆𑀲 𑀢𑁂 𑀏𑀯 𑀔𑀦𑁆𑀥𑀸 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼, 𑀦 𑀅𑀜𑁆𑀜𑁂𑀲𑀁 𑀲𑀦𑁆𑀢𑀓𑀸 𑀔𑀦𑁆𑀥𑀸. 𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀼 𑀘 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀢𑀻𑀢𑀓𑁆𑀔𑀦𑁆𑀥𑀸𑀯 𑀯𑀢𑁆𑀣𑀼, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀅𑀦𑀸𑀕𑀢𑀸𑀤𑀻𑀲𑀼. 𑀢𑀣𑀸 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑁂𑀲𑀼 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸𑀯 𑀯𑀢𑁆𑀣𑀼, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼. 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀧𑀦 𑀬𑀲𑁆𑀲 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀔𑀦𑁆𑀥𑁂𑀲𑀼 𑀢𑀁 𑀢𑀁 𑀯𑀝𑁆𑀝𑀫𑀽𑀮𑀁 𑀓𑀺𑀮𑁂𑀲𑀚𑀸𑀢𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀁, 𑀢𑀲𑁆𑀲 𑀢𑀲𑁆𑀲 𑀢𑁂 𑀢𑁂 𑀔𑀦𑁆𑀥𑀸 𑀧𑀳𑀻𑀦𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀯𑀝𑁆𑀝𑀫𑀽𑀮𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀣𑀼𑀢𑁄 𑀪𑀽𑀫𑀻𑀢𑀺 𑀲𑀗𑁆𑀔𑀁 𑀦 𑀮𑀪𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀩𑁆𑀩𑀲𑁄𑀯 𑀯𑀝𑁆𑀝𑀫𑀽𑀮𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑀁𑀓𑀺𑀜𑁆𑀘𑀺 𑀓𑀭𑀺𑀬𑀫𑀸𑀦𑀁 𑀓𑀫𑁆𑀫𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀯𑀸 𑀳𑁄𑀢𑀺. 𑀇𑀘𑁆𑀘𑀲𑁆𑀲 𑀓𑀫𑁆𑀫𑀓𑀺𑀮𑁂𑀲𑀧𑀘𑁆𑀘𑀬𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺. 𑀢𑀲𑁆𑀲𑁂𑀢𑀁 𑀯𑀝𑁆𑀝𑀫𑀽𑀮𑀁 𑀭𑀽𑀧𑀓𑁆𑀔𑀦𑁆𑀥𑁂𑀬𑁂𑀯, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀬𑁂𑀯 𑀯𑀸, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀽𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀯𑀺𑀲𑁂𑀲𑁂𑀦 𑀧𑀜𑁆𑀘𑀲𑀼𑀧𑀺 𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀢𑁆𑀢𑀸.

𑁮𑁩𑁬. 𑀓𑀣𑀁? 𑀧𑀣𑀯𑀻𑀭𑀲𑀸𑀤𑀺 𑀯𑀺𑀬 𑀭𑀼𑀓𑁆𑀔𑁂. 𑀬𑀣𑀸 𑀳𑀺 𑀫𑀳𑀸𑀭𑀼𑀓𑁆𑀔𑁂 𑀧𑀣𑀯𑀻𑀢𑀮𑀁 𑀅𑀥𑀺𑀝𑁆𑀞𑀸𑀬 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀦𑀺𑀲𑁆𑀲𑀸𑀬 𑀢𑀧𑁆𑀧𑀘𑁆𑀘𑀬𑀸 𑀫𑀽𑀮𑀔𑀦𑁆𑀥𑀲𑀸𑀔𑀧𑀲𑀸𑀔𑀧𑀮𑁆𑀮𑀯𑀧𑀮𑀸𑀲𑀧𑀼𑀧𑁆𑀨𑀨𑀮𑁂𑀳𑀺 𑀯𑀟𑁆𑀠𑀺𑀢𑁆𑀯𑀸 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀬𑀸𑀯 𑀓𑀧𑁆𑀧𑀸𑀯𑀲𑀸𑀦𑀸 𑀩𑀻𑀚𑀧𑀭𑀫𑁆𑀧𑀭𑀸𑀬 𑀭𑀼𑀓𑁆𑀔𑀧𑀯𑁂𑀡𑀺𑀁 𑀲𑀦𑁆𑀢𑀸𑀦𑀬𑀫𑀸𑀦𑁂 𑀞𑀺𑀢𑁂 𑀢𑀁 𑀧𑀣𑀯𑀻𑀭𑀲𑀸𑀤𑀺 𑀫𑀽𑀮𑁂𑀬𑁂𑀯, 𑀦 𑀔𑀦𑁆𑀥𑀸𑀤𑀻𑀲𑀼…𑀧𑁂… 𑀨𑀮𑁂𑀬𑁂𑀯 𑀯𑀸, 𑀦 𑀫𑀽𑀮𑀸𑀤𑀻𑀲𑀽𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀲𑀼 𑀫𑀽𑀮𑀸𑀤𑀻𑀲𑀼 𑀅𑀦𑀼𑀕𑀢𑀢𑁆𑀢𑀸𑀢𑀺.

𑀬𑀣𑀸 ¶ 𑀧𑀦 𑀢𑀲𑁆𑀲𑁂𑀯 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀨𑀮𑀸𑀤𑀻𑀲𑀼 𑀦𑀺𑀩𑁆𑀩𑀺𑀦𑁆𑀦𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀡𑁆𑀟𑀽𑀓𑀓𑀡𑁆𑀝𑀓𑀁 𑀦𑀸𑀫 𑀯𑀺𑀲𑀓𑀡𑁆𑀝𑀓𑀁 𑀆𑀓𑁄𑀝𑁂𑀬𑁆𑀬, 𑀅𑀣 𑀲𑁄 ¶ 𑀭𑀼𑀓𑁆𑀔𑁄 𑀢𑁂𑀦 𑀯𑀺𑀲𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀣𑀯𑀻𑀭𑀲𑀆𑀧𑁄𑀭𑀲𑀸𑀦𑀁 𑀧𑀭𑀺𑀬𑀸𑀤𑀺𑀡𑁆𑀡𑀢𑁆𑀢𑀸 𑀅𑀧𑁆𑀧𑀲𑀯𑀦𑀥𑀫𑁆𑀫𑀢𑀁 𑀆𑀕𑀫𑁆𑀫 𑀧𑀼𑀦 𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀏𑀯𑀫𑁂𑀯 𑀔𑀦𑁆𑀥𑀧𑀯𑀢𑁆𑀢𑀺𑀬𑀁 𑀦𑀺𑀩𑁆𑀩𑀺𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀭𑀼𑀓𑁆𑀔𑁂 𑀯𑀺𑀲𑀬𑁄𑀚𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀘𑀢𑀼𑀫𑀕𑁆𑀕𑀪𑀸𑀯𑀦𑀁 𑀆𑀭𑀪𑀢𑀺. 𑀅𑀣𑀲𑁆𑀲 𑀲𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀢𑁂𑀦 𑀘𑀢𑀼𑀫𑀕𑁆𑀕𑀯𑀺𑀲𑀲𑀫𑁆𑀨𑀲𑁆𑀲𑁂𑀦 𑀲𑀩𑁆𑀩𑀲𑁄 𑀯𑀝𑁆𑀝𑀫𑀽𑀮𑀓𑀓𑀺𑀮𑁂𑀲𑀸𑀦𑀁 𑀧𑀭𑀺𑀬𑀸𑀤𑀺𑀡𑁆𑀡𑀢𑁆𑀢𑀸 𑀓𑀺𑀭𑀺𑀬𑀪𑀸𑀯𑀫𑀢𑁆𑀢𑀉𑀧𑀕𑀢𑀓𑀸𑀬𑀓𑀫𑁆𑀫𑀸𑀤𑀺𑀲𑀩𑁆𑀩𑀓𑀫𑁆𑀫𑀧𑁆𑀧𑀪𑁂𑀤𑁄 𑀳𑀼𑀢𑁆𑀯𑀸 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀦𑀪𑀺𑀦𑀺𑀩𑁆𑀩𑀢𑁆𑀢𑀦𑀥𑀫𑁆𑀫𑀢𑀁 𑀆𑀕𑀫𑁆𑀫 𑀪𑀯𑀦𑁆𑀢𑀭𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑁂𑀯𑀮𑀁 𑀘𑀭𑀺𑀫𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀦𑀺𑀭𑀺𑀦𑁆𑀥𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀅𑀦𑀼𑀧𑀸𑀤𑀸𑀦𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀯𑀁 𑀪𑀽𑀫𑀺𑀬𑀸 𑀪𑀽𑀫𑀺𑀮𑀤𑁆𑀥𑀲𑁆𑀲 𑀘 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁩𑁭. 𑀅𑀧𑀺𑀘 𑀅𑀧𑀭𑀫𑁆𑀧𑀺 𑀲𑀫𑀼𑀤𑀸𑀘𑀸𑀭𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀅𑀯𑀺𑀓𑁆𑀔𑀫𑁆𑀪𑀺𑀢𑀅𑀲𑀫𑀽𑀳𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀫𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁. 𑀘𑀓𑁆𑀔𑀸𑀤𑀻𑀦𑀁 𑀧𑀦 𑀆𑀧𑀸𑀣𑀕𑀢𑁂 𑀆𑀭𑀫𑁆𑀫𑀡𑁂 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀓𑀺𑀮𑁂𑀲𑀚𑀸𑀢𑀁 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸 𑀏𑀯 𑀅𑀧𑀭𑀪𑀸𑀕𑁂 𑀏𑀓𑀦𑁆𑀢𑁂𑀦 𑀉𑀧𑁆𑀧𑀢𑁆𑀢𑀺𑀢𑁄 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀮𑁆𑀬𑀸𑀡𑀺𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀚𑀸𑀢𑀁 𑀯𑀺𑀬. 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀅𑀯𑀺𑀓𑁆𑀔𑀫𑁆𑀪𑀺𑀢𑀁 𑀓𑀺𑀮𑁂𑀲𑀚𑀸𑀢𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀫𑀦𑀸𑀭𑀽𑀴𑁆𑀳𑀫𑁆𑀧𑀺 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀓𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀽𑀳𑀢𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀢𑀻𑀢𑀢𑀸𑀬 𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀣𑁂𑀭𑀲𑁆𑀲 𑀓𑀼𑀲𑀼𑀫𑀺𑀢𑀭𑀼𑀓𑁆𑀔𑁂 𑀉𑀧𑀯𑀦𑁂 𑀧𑀼𑀧𑁆𑀨𑀸𑀦𑀺 𑀉𑀘𑁆𑀘𑀺𑀦𑀦𑁆𑀢𑀲𑁆𑀲 𑀫𑀥𑀼𑀭𑁂𑀦 𑀲𑀭𑁂𑀦 𑀕𑀸𑀬𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀕𑀻𑀢𑀲𑀯𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀚𑀸𑀢𑀁 𑀯𑀺𑀬. 𑀢𑀺𑀯𑀺𑀥𑀫𑁆𑀧𑀺 𑀘𑁂𑀢𑀁 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀁 𑀪𑀽𑀫𑀺𑀮𑀤𑁆𑀥𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁩𑁮. 𑀇𑀘𑁆𑀘𑁂𑀢𑀲𑁆𑀫𑀺𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀉𑀧𑁆𑀧𑀦𑁆𑀦𑁂 𑀬𑀤𑁂𑀢𑀁 𑀯𑀢𑁆𑀢𑀫𑀸𑀦𑀪𑀽𑀢𑀸𑀧𑀕𑀢𑁄𑀓𑀸𑀲𑀓𑀢𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀅𑀫𑀕𑁆𑀕𑀯𑀚𑁆𑀛𑀢𑁆𑀢𑀸 𑀓𑁂𑀦𑀘𑀺𑀧𑀺 𑀜𑀸𑀡𑁂𑀦 𑀧𑀳𑀸𑀢𑀩𑁆𑀩𑀁 𑀦 𑀳𑁄𑀢𑀺. 𑀬𑀁 𑀧𑀦𑁂𑀢𑀁 𑀪𑀽𑀫𑀺𑀮𑀤𑁆𑀥𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀅𑀯𑀺𑀓𑁆𑀔𑀫𑁆𑀪𑀺𑀢𑀅𑀲𑀫𑀽𑀳𑀢𑀲𑀗𑁆𑀔𑀸𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀯𑀺𑀦𑀸𑀲𑀬𑀫𑀸𑀦𑀁 𑀬𑀲𑁆𑀫𑀸 𑀢𑀁 𑀢𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀳𑀸𑀢𑀩𑁆𑀩𑀁 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀬𑁂 𑀬𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀢𑁂𑀲𑀁 𑀧𑀳𑀸𑀦𑀜𑁆𑀘 𑀚𑀸𑀦𑀺𑀢𑀩𑁆𑀩𑀁.

𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀣𑀸

𑁮𑁩𑁯.

𑀓𑀺𑀘𑁆𑀘𑀸𑀦𑀺 ¶ ¶ 𑀧𑀭𑀺𑀜𑁆𑀜𑀸𑀤𑀻𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀅𑀪𑀺𑀲𑀫𑀬𑀓𑀸𑀮𑁂;

𑀢𑀸𑀦𑀺 𑀘 𑀬𑀣𑀸𑀲𑀪𑀸𑀯𑁂𑀦, 𑀚𑀸𑀦𑀺𑀢𑀩𑁆𑀩𑀸𑀦𑀺 𑀲𑀩𑁆𑀩𑀸𑀦𑀻𑀢𑀺.

𑀲𑀘𑁆𑀘𑀸𑀪𑀺𑀲𑀫𑀬𑀓𑀸𑀮𑀁 𑀳𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀜𑀸𑀡𑁂𑀲𑀼 𑀏𑀓𑁂𑀓𑀲𑁆𑀲 𑀏𑀓𑀓𑁆𑀔𑀡𑁂 𑀧𑀭𑀺𑀜𑁆𑀜𑀸 𑀧𑀳𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀪𑀸𑀯𑀦𑀸𑀢𑀺 𑀏𑀢𑀸𑀦𑀺 𑀧𑀭𑀺𑀜𑁆𑀜𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀣𑀸𑀲𑀪𑀸𑀯𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀬𑀣𑀸 𑀧𑀤𑀻𑀧𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀯𑀝𑁆𑀝𑀺𑀁 𑀛𑀸𑀧𑁂𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀧𑀭𑀺𑀯𑀺𑀤𑀁𑀲𑁂𑀢𑀺, 𑀲𑀺𑀦𑁂𑀳𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀏𑀯𑀫𑁂𑀯 𑀫𑀕𑁆𑀕𑀜𑀸𑀡𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀢𑀺, 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀸𑀧𑀼𑀡𑀸𑀢𑀺 𑀧𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀫𑁆𑀧𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁, 𑀤𑀼𑀓𑁆𑀔𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬𑀧𑁂𑀢𑀁 𑀜𑀸𑀡’’𑀦𑁆𑀢𑀺 (𑀯𑀺𑀪. 𑁭𑁯𑁪; 𑀧𑀝𑀺. 𑀫. 𑁧.𑁧𑁦𑁯).

𑀢𑀢𑁆𑀣 𑀬𑀣𑀸 𑀧𑀤𑀻𑀧𑁄 𑀯𑀝𑁆𑀝𑀺𑀁 𑀛𑀸𑀧𑁂𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺. 𑀬𑀣𑀸 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀏𑀯𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺. 𑀬𑀣𑀸 𑀆𑀮𑁄𑀓𑀁 𑀧𑀭𑀺𑀯𑀺𑀤𑀁𑀲𑁂𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀥𑀫𑁆𑀫𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀬𑀣𑀸 𑀲𑀺𑀦𑁂𑀳𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀏𑀯𑀁 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁪𑁦. 𑀅𑀧𑀭𑁄 ¶ 𑀦𑀬𑁄 𑁋 𑀬𑀣𑀸 𑀲𑀽𑀭𑀺𑀬𑁄 𑀉𑀤𑀬𑀦𑁆𑀢𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀲𑀳 𑀧𑀸𑀢𑀼𑀪𑀸𑀯𑀸 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀭𑀽𑀧𑀕𑀢𑀸𑀦𑀺 𑀑𑀪𑀸𑀲𑁂𑀢𑀺, 𑀅𑀦𑁆𑀥𑀓𑀸𑀭𑀁 ¶ 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺, 𑀲𑀻𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀏𑀯𑀫𑁂𑀯 𑀫𑀕𑁆𑀕𑀜𑀸𑀡𑀁…𑀧𑁂… 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀇𑀥𑀸𑀧𑀺 𑀬𑀣𑀸 𑀲𑀽𑀭𑀺𑀬𑁄 𑀭𑀽𑀧𑀕𑀢𑀸𑀦𑀺 𑀑𑀪𑀸𑀲𑁂𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺. 𑀬𑀣𑀸 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀏𑀯𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺. 𑀬𑀣𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀬𑀣𑀸 𑀲𑀻𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀏𑀯𑀁 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁪𑁧. 𑀅𑀧𑀭𑁄 𑀦𑀬𑁄 𑁋 𑀬𑀣𑀸 𑀦𑀸𑀯𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀑𑀭𑀺𑀫𑀢𑀻𑀭𑀁 𑀧𑀚𑀳𑀢𑀺, 𑀲𑁄𑀢𑀁 𑀙𑀺𑀦𑁆𑀤𑀢𑀺, 𑀪𑀡𑁆𑀟𑀁 𑀯𑀳𑀢𑀺, 𑀧𑀸𑀭𑀺𑀫𑀢𑀻𑀭𑀁 𑀅𑀧𑁆𑀧𑁂𑀢𑀺, 𑀏𑀯𑀫𑁂𑀯 𑀫𑀕𑁆𑀕𑀜𑀸𑀡𑀁…𑀧𑁂… 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀏𑀢𑁆𑀣𑀸𑀧𑀺 𑀬𑀣𑀸 𑀦𑀸𑀯𑀸 𑀑𑀭𑀺𑀫𑀢𑀻𑀭𑀁 𑀧𑀚𑀳𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺. 𑀬𑀣𑀸 𑀲𑁄𑀢𑀁 𑀙𑀺𑀦𑁆𑀤𑀢𑀺, 𑀏𑀯𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺. 𑀬𑀣𑀸 𑀪𑀡𑁆𑀟𑀁 𑀯𑀳𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀬𑀣𑀸 𑀧𑀸𑀭𑀺𑀫𑀢𑀻𑀭𑀁 𑀅𑀧𑁆𑀧𑁂𑀢𑀺, 𑀏𑀯𑀁 𑀧𑀸𑀭𑀺𑀫𑀢𑀻𑀭𑀪𑀽𑀢𑀁 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁪𑁨. 𑀏𑀯𑀁 𑀲𑀘𑁆𑀘𑀸𑀪𑀺𑀲𑀫𑀬𑀓𑀸𑀮𑀲𑁆𑀫𑀺𑀁 𑀏𑀓𑀓𑁆𑀔𑀡𑁂 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀲𑁆𑀲 𑀧𑀦𑀲𑁆𑀲 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀓𑀣𑀁 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑀸𑀦𑀺? 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀢𑀣𑀝𑁆𑀞𑁄. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄, 𑀧𑀮𑀺𑀩𑁄𑀥𑀝𑁆𑀞𑁄, 𑀢𑀣𑀝𑁆𑀞𑁄. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄, 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄, 𑀢𑀣𑀝𑁆𑀞𑁄. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑀼𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄, 𑀢𑀣𑀝𑁆𑀞𑁄. 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁, 𑀢𑀁 𑀏𑀓𑀢𑁆𑀢𑀁. 𑀬𑀁 𑀏𑀓𑀢𑁆𑀢𑀁, 𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑀸𑀦𑀻’’𑀢𑀺 (𑀧𑀝𑀺. 𑀫. 𑁨.𑁧𑁧).

𑁮𑁪𑁩. 𑀢𑀢𑁆𑀣 ¶ 𑀲𑀺𑀬𑀸 𑀬𑀤𑀸 𑀤𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑁂𑀧𑀺 𑀭𑁄𑀕𑀕𑀡𑁆𑀟𑀸𑀤𑀬𑁄 𑀅𑀢𑁆𑀣𑀸 𑀅𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄𑀬𑁂𑀯 𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀯𑀤𑀸𑀫, 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀆𑀯𑀺𑀪𑀸𑀯𑀢𑁄. ‘‘𑀢𑀢𑁆𑀣 𑀓𑀢𑀫𑀁 ¶ 𑀤𑀼𑀓𑁆𑀔𑁂 𑀜𑀸𑀡𑀁? 𑀤𑀼𑀓𑁆𑀔𑀁 𑀆𑀭𑀩𑁆𑀪 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁭𑁯𑁪; 𑀧𑀝𑀺. 𑀫. 𑁧.𑁧𑁦𑁯) 𑀳𑀺 𑀦𑀬𑁂𑀦 𑀏𑀓𑁂𑀓𑀲𑀘𑁆𑀘𑀸𑀭𑀫𑁆𑀫𑀡𑀯𑀲𑁂𑀦𑀸𑀧𑀺 𑀲𑀘𑁆𑀘𑀜𑀸𑀡𑀁 𑀯𑀼𑀢𑁆𑀢𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀦𑀬𑁂𑀦 𑀏𑀓𑀁 𑀲𑀘𑁆𑀘𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀲𑁂𑀲𑁂𑀲𑀼𑀧𑀺 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦𑀸𑀧𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀤𑀸 𑀏𑀓𑁂𑀓𑀁 𑀲𑀘𑁆𑀘𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀤𑀸 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀢𑀸𑀯 𑀲𑀪𑀸𑀯𑀢𑁄 𑀧𑀻𑀴𑀦𑀮𑀓𑁆𑀔𑀡𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲, 𑀬𑀲𑁆𑀫𑀸 𑀢𑀁 𑀆𑀬𑀽𑀳𑀦𑀮𑀓𑁆𑀔𑀡𑁂𑀦 𑀲𑀫𑀼𑀤𑀬𑁂𑀦 𑀆𑀬𑀽𑀳𑀺𑀢𑀁 𑀲𑀗𑁆𑀔𑀢𑀁 𑀭𑀸𑀲𑀺𑀓𑀢𑀁, 𑀢𑀲𑁆𑀫𑀸𑀲𑁆𑀲 𑀲𑁄 𑀲𑀗𑁆𑀔𑀢𑀝𑁆𑀞𑁄 𑀆𑀯𑀺𑀪𑀯𑀢𑀺. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁄 𑀓𑀺𑀮𑁂𑀲𑀲𑀦𑁆𑀢𑀸𑀧𑀳𑀭𑁄 𑀲𑀼𑀲𑀻𑀢𑀮𑁄, 𑀢𑀲𑁆𑀫𑀸𑀲𑁆𑀲 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀧𑀝𑁆𑀞𑁄 𑀆𑀯𑀺𑀪𑀯𑀢𑀺 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀅𑀘𑁆𑀙𑀭𑀸𑀤𑀲𑁆𑀲𑀦𑁂𑀦 𑀲𑀼𑀦𑁆𑀤𑀭𑀺𑀬𑀸 𑀅𑀦𑀪𑀺𑀭𑀽𑀧𑀪𑀸𑀯𑁄 𑀯𑀺𑀬. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀲𑁆𑀲 𑀧𑀦 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦𑀲𑁆𑀲 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀆𑀯𑀺𑀪𑀯𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯𑁂𑀢𑁆𑀣 𑀦𑀢𑁆𑀣𑀺.

𑀢𑀣𑀸 𑀲𑀪𑀸𑀯𑀢𑁄 𑀆𑀬𑀽𑀳𑀦𑀮𑀓𑁆𑀔𑀡𑀲𑁆𑀲𑀸𑀧𑀺 𑀲𑀫𑀼𑀤𑀬𑀲𑁆𑀲, 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀦𑀺𑀤𑀸𑀦𑀝𑁆𑀞𑁄 𑀆𑀯𑀺𑀪𑀯𑀢𑀺 𑀅𑀲𑀧𑁆𑀧𑀸𑀬𑀪𑁄𑀚𑀦𑀢𑁄 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀤𑀲𑁆𑀲𑀦𑁂𑀦 𑀪𑁄𑀚𑀦𑀲𑁆𑀲 𑀩𑁆𑀬𑀸𑀥𑀺𑀦𑀺𑀤𑀸𑀦𑀪𑀸𑀯𑁄 𑀯𑀺𑀬. 𑀯𑀺𑀲𑀁𑀬𑁄𑀕𑀪𑀽𑀢𑀲𑁆𑀲 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀲𑀁𑀬𑁄𑀕𑀝𑁆𑀞𑁄. 𑀦𑀺𑀬𑁆𑀬𑀸𑀦𑀪𑀽𑀢𑀲𑁆𑀲 𑀘 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀧𑀮𑀺𑀩𑁄𑀥𑀝𑁆𑀞𑁄𑀢𑀺.

𑀢𑀣𑀸 𑀦𑀺𑀲𑁆𑀲𑀭𑀡𑀮𑀓𑁆𑀔𑀡𑀲𑁆𑀲𑀸𑀧𑀺 𑀦𑀺𑀭𑁄𑀥𑀲𑁆𑀲, 𑀅𑀯𑀺𑀯𑁂𑀓𑀪𑀽𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀤𑀲𑁆𑀲𑀦𑁂𑀦 𑀯𑀺𑀯𑁂𑀓𑀝𑁆𑀞𑁄 𑀆𑀯𑀺𑀪𑀯𑀢𑀺. 𑀫𑀕𑁆𑀕𑀤𑀲𑁆𑀲𑀦𑁂𑀦 𑀅𑀲𑀗𑁆𑀔𑀢𑀝𑁆𑀞𑁄, 𑀇𑀫𑀺𑀦𑀸 𑀳𑀺 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑁂 𑀫𑀕𑁆𑀕𑁄 𑀦𑀤𑀺𑀝𑁆𑀞𑀧𑀼𑀩𑁆𑀩𑁄, 𑀲𑁄𑀧𑀺 𑀘 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀲𑀗𑁆𑀔𑀢𑁄𑀬𑁂𑀯𑀸𑀢𑀺 𑀅𑀧𑁆𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀅𑀲𑀗𑁆𑀔𑀢𑀪𑀸𑀯𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄 𑀳𑁄𑀢𑀺. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀧𑀦𑀲𑁆𑀲 𑀅𑀫𑀢𑀝𑁆𑀞𑁄 𑀆𑀯𑀺𑀪𑀯𑀢𑀺, 𑀤𑀼𑀓𑁆𑀔𑀁 𑀳𑀺 𑀯𑀺𑀲𑀁, 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺.

𑀢𑀣𑀸 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀲𑁆𑀲𑀸𑀧𑀺 𑀫𑀕𑁆𑀕𑀲𑁆𑀲, 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 ‘‘𑀦𑀸𑀬𑀁 𑀳𑁂𑀢𑀼 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸, 𑀅𑀬𑀁 𑀳𑁂𑀢𑀽’’𑀢𑀺 𑀳𑁂𑀢𑀼𑀝𑁆𑀞𑁄 𑀆𑀯𑀺𑀪𑀯𑀢𑀺. 𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀤𑀲𑁆𑀲𑀦𑀝𑁆𑀞𑁄, 𑀧𑀭𑀫𑀲𑀼𑀔𑀼𑀫𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 ‘‘𑀯𑀺𑀧𑁆𑀧𑀲𑀦𑁆𑀦𑀁 𑀯𑀢 𑀫𑁂 ¶ 𑀘𑀓𑁆𑀔𑀽’’𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄 𑀯𑀺𑀬. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄, 𑀅𑀦𑁂𑀓𑀭𑁄𑀕𑀸𑀢𑀼𑀭𑀓𑀧𑀡𑀚𑀦𑀤𑀲𑁆𑀲𑀦𑁂𑀦 𑀇𑀲𑁆𑀲𑀭𑀚𑀦𑀲𑁆𑀲 𑀉𑀴𑀸𑀭𑀪𑀸𑀯𑁄 𑀯𑀺𑀬𑀸𑀢𑀺 𑀏𑀯𑀫𑁂𑀢𑁆𑀣 𑀲𑀮𑀓𑁆𑀔𑀡𑀯𑀲𑁂𑀦 𑀏𑀓𑁂𑀓𑀲𑁆𑀲, 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀘 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀆𑀯𑀺𑀪𑀸𑀯𑀢𑁄 𑀏𑀓𑁂𑀓𑀲𑁆𑀲 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀲𑀩𑁆𑀩𑁂 𑀘𑁂𑀢𑁂 𑀅𑀢𑁆𑀣𑀸 𑀏𑀓𑁂𑀦𑁂𑀯 𑀤𑀼𑀓𑁆𑀔𑀸𑀤𑀻𑀲𑀼 ¶ 𑀘𑀢𑀼𑀓𑀺𑀘𑁆𑀘𑁂𑀦 𑀜𑀸𑀡𑁂𑀦 𑀧𑀝𑀺𑀯𑁂𑀥𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀬𑁂 𑀧𑀦 𑀦𑀸𑀦𑀸𑀪𑀺𑀲𑀫𑀬𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀉𑀢𑁆𑀢𑀭𑀁 𑀅𑀪𑀺𑀥𑀫𑁆𑀫𑁂 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀫𑁂𑀯.

𑀧𑀭𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀓𑀣𑀸

𑁮𑁪𑁪. 𑀇𑀤𑀸𑀦𑀺 𑀬𑀸𑀦𑀺 𑀢𑀸𑀦𑀺 𑀧𑀭𑀺𑀜𑁆𑀜𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀼 𑁋

𑀢𑀺𑀯𑀺𑀥𑀸 𑀳𑁄𑀢𑀺 𑀧𑀭𑀺𑀜𑁆𑀜𑀸, 𑀢𑀣𑀸 𑀧𑀳𑀸𑀦𑀫𑁆𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀺;

𑀤𑁆𑀯𑁂 𑀪𑀸𑀯𑀦𑀸 𑀅𑀪𑀺𑀫𑀢𑀸, 𑀯𑀺𑀦𑀺𑀘𑁆𑀙𑀬𑁄 𑀢𑀢𑁆𑀣 𑀜𑀸𑀢𑀩𑁆𑀩𑁄.

𑁮𑁪𑁫. 𑀢𑀺𑀯𑀺𑀥𑀸 𑀳𑁄𑀢𑀺 𑀧𑀭𑀺𑀜𑁆𑀜𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀏𑀯𑀁 𑀧𑀭𑀺𑀜𑁆𑀜𑀸 𑀢𑀺𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 ‘‘𑀅𑀪𑀺𑀜𑁆𑀜𑀸𑀧𑀜𑁆𑀜𑀸 𑀜𑀸𑀢𑀝𑁆𑀞𑁂𑀦 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁨𑁦) 𑀏𑀯𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀜𑀸𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁭𑁫) 𑀏𑀯𑀁 𑀲𑀗𑁆𑀔𑁂𑀧𑀢𑁄, ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀅𑀪𑀺𑀜𑁆𑀜𑁂𑀬𑁆𑀬𑀁? 𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫. 𑀢𑀲𑁆𑀲𑀸 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀸𑀪𑀺𑀚𑀸𑀦𑀦𑀸 𑀆𑀯𑁂𑀡𑀺𑀓𑀸 𑀪𑀽𑀫𑀺.

𑁮𑁪𑁬. ‘‘𑀧𑀭𑀺𑀜𑁆𑀜𑀸𑀧𑀜𑁆𑀜𑀸 𑀢𑀻𑀭𑀡𑀝𑁆𑀞𑁂𑀦 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁨𑁧) 𑀏𑀯𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀦 ‘‘𑀬𑁂 𑀬𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀢𑀻𑀭𑀺𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁭𑁫) 𑀏𑀯𑀁 𑀲𑀗𑁆𑀔𑁂𑀧𑀢𑁄, ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑀁. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀭𑀺𑀜𑁆𑀜𑁂𑀬𑁆𑀬𑀁? 𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨𑁧) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀦𑀸𑀫. 𑀢𑀲𑁆𑀲𑀸 𑀓𑀮𑀸𑀧𑀲𑀫𑁆𑀫𑀲𑀦𑀢𑁄 𑀧𑀝𑁆𑀞𑀸𑀬 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀢𑀻𑀭𑀡𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀬𑀸𑀯 𑀅𑀦𑀼𑀮𑁄𑀫𑀸 𑀆𑀯𑁂𑀡𑀺𑀓𑀸 𑀪𑀽𑀫𑀺.

𑁮𑁪𑁭. ‘‘𑀧𑀳𑀸𑀦𑀧𑀜𑁆𑀜𑀸 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁨𑁨) 𑀏𑀯𑀁 𑀧𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀧𑀭𑀺𑀘𑁆𑀘𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁭𑁫) 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 ¶ 𑀯𑀼𑀢𑁆𑀢𑀸 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 ¶ 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑀲𑁆𑀲𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀕𑁆𑀕𑀜𑀸𑀡𑀸 𑀪𑀽𑀫𑀺, 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀬𑀲𑁆𑀫𑀸 𑀯𑀸 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀬𑁄𑀧𑀺 𑀢𑀤𑀢𑁆𑀣𑀸𑀬𑁂𑀯, 𑀬𑀲𑁆𑀫𑀸 𑀘 𑀬𑁂 𑀥𑀫𑁆𑀫𑁂 𑀧𑀚𑀳𑀢𑀺, 𑀢𑁂 𑀦𑀺𑀬𑀫𑀢𑁄 𑀜𑀸𑀢𑀸 𑀘𑁂𑀯 𑀢𑀻𑀭𑀺𑀢𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀜𑁆𑀜𑀸𑀢𑁆𑀢𑀬𑀫𑁆𑀧𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀫𑀕𑁆𑀕𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁪𑁮. 𑀢𑀣𑀸 𑀧𑀳𑀸𑀦𑀫𑁆𑀧𑀻𑀢𑀺 𑀧𑀳𑀸𑀦𑀫𑁆𑀧𑀺 𑀳𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀦𑁆𑀢𑀺 𑀧𑀭𑀺𑀜𑁆𑀜𑀸 𑀯𑀺𑀬 𑀢𑀺𑀯𑀺𑀥𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀬𑀁 𑀲𑀲𑁂𑀯𑀸𑀮𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁂𑀦 𑀖𑀝𑁂𑀦 𑀲𑁂𑀯𑀸𑀮𑀲𑁆𑀲 𑀯𑀺𑀬 𑀢𑁂𑀦 𑀢𑁂𑀦 𑀮𑁄𑀓𑀺𑀬𑀲𑀫𑀸𑀥𑀺𑀦𑀸 𑀦𑀻𑀯𑀭𑀡𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁, 𑀇𑀤𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀜𑁆𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀁 𑀛𑀸𑀦𑀁 𑀪𑀸𑀯𑀬𑀢𑁄’’𑀢𑀺 (𑀧𑀝𑀺. 𑀫. 𑁧.𑁨𑁪) 𑀦𑀻𑀯𑀭𑀡𑀸𑀦𑀜𑁆𑀜𑁂𑀯 𑀯𑀺𑀓𑁆𑀔𑀫𑁆𑀪𑀦𑀁 𑀯𑀼𑀢𑁆𑀢𑀁, 𑀢𑀁 𑀧𑀸𑀓𑀝𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀘𑁆𑀙𑀸𑀪𑀸𑀕𑁂𑀧𑀺 𑀦 𑀲𑀳𑀲𑀸 𑀘𑀺𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺, 𑀯𑀺𑀢𑀓𑁆𑀓𑀸𑀤𑀬𑁄 𑀅𑀧𑁆𑀧𑀺𑀢𑀓𑁆𑀔𑀡𑁂𑀬𑁂𑀯. 𑀢𑀲𑁆𑀫𑀸 𑀦𑀻𑀯𑀭𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁 𑀧𑀸𑀓𑀝𑀁.

𑁮𑁪𑁯. 𑀬𑀁 𑀧𑀦 𑀭𑀢𑁆𑀢𑀺𑀪𑀸𑀕𑁂 𑀲𑀫𑀼𑀚𑁆𑀚𑀮𑀺𑀢𑁂𑀦 𑀧𑀤𑀻𑀧𑁂𑀦 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀬 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀬 𑀅𑀯𑀬𑀯𑀪𑀽𑀢𑁂𑀦 𑀜𑀸𑀡𑀗𑁆𑀕𑁂𑀦 𑀧𑀝𑀺𑀧𑀓𑁆𑀔𑀯𑀲𑁂𑀦𑁂𑀯 𑀢𑀲𑁆𑀲 𑀢𑀲𑁆𑀲 𑀧𑀳𑀸𑀢𑀩𑁆𑀩𑀥𑀫𑁆𑀫𑀲𑁆𑀲 𑀧𑀳𑀸𑀦𑀁, 𑀇𑀤𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀢𑀸𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺𑀬𑀸 𑀘𑁂𑀯 𑀓𑀗𑁆𑀔𑀸𑀫𑀮𑀲𑁆𑀲 𑀘. 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀲𑀫𑀽𑀳𑀕𑀸𑀳𑀲𑁆𑀲. 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬. 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸. 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸. 𑀪𑀬𑀢𑀼𑀧𑀝𑁆𑀞𑀸𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬. 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑁂𑀦 𑀅𑀪𑀺𑀭𑀢𑀺𑀲𑀜𑁆𑀜𑀸𑀬. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀬 𑀅𑀫𑀼𑀜𑁆𑀘𑀺𑀢𑀼𑀓𑀸𑀫𑀪𑀸𑀯𑀲𑁆𑀲. 𑀧𑀝𑀺𑀲𑀗𑁆𑀔𑀸𑀦𑁂𑀦 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀲𑁆𑀲. 𑀉𑀧𑁂𑀓𑁆𑀔𑀸𑀬 𑀅𑀦𑀼𑀧𑁂𑀓𑁆𑀔𑀦𑀲𑁆𑀲. 𑀅𑀦𑀼𑀮𑁄𑀫𑁂𑀦 𑀲𑀘𑁆𑀘𑀧𑀝𑀺𑀮𑁄𑀫𑀕𑀸𑀳𑀲𑁆𑀲 𑀧𑀳𑀸𑀦𑀁.

𑀬𑀁 𑀯𑀸 𑀧𑀦 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀬. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀬. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀬. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀬𑀸. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀲𑁆𑀲. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 ¶ 𑀲𑀫𑀼𑀤𑀬𑀲𑁆𑀲. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 ¶ 𑀆𑀤𑀸𑀦𑀲𑁆𑀲. 𑀔𑀬𑀸𑀦𑀼𑀧𑀲𑁆𑀲𑀦𑀸𑀬 𑀖𑀦𑀲𑀜𑁆𑀜𑀸𑀬. 𑀯𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀬𑀽𑀳𑀦𑀲𑁆𑀲. 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀬 𑀥𑀼𑀯𑀲𑀜𑁆𑀜𑀸𑀬. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀲𑁆𑀲. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀡𑀺𑀥𑀺𑀬𑀸. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀦𑀺𑀯𑁂𑀲𑀲𑁆𑀲. 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀲𑁆𑀲. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀲𑁆𑀲. 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀆𑀮𑀬𑀸𑀪𑀺𑀦𑀺𑀯𑁂𑀲𑀲𑁆𑀲. 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀅𑀧𑁆𑀧𑀝𑀺𑀲𑀗𑁆𑀔𑀸𑀬. 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁. 𑀇𑀤𑀫𑁆𑀧𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀫𑁂𑀯.

𑁮𑁫𑁦. 𑀢𑀢𑁆𑀣 𑀬𑀣𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀲𑀢𑁆𑀢𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂 𑀯𑀼𑀢𑁆𑀢𑀫𑁂𑀯.

𑀔𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀧𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺 𑀏𑀯𑀁 𑀔𑀬𑀁 𑀧𑀲𑁆𑀲𑀢𑁄 𑀜𑀸𑀡𑀁. 𑀢𑁂𑀦 𑀖𑀦𑀲𑀜𑁆𑀜𑀸𑀬 𑀧𑀳𑀸𑀦𑀁 𑀳𑁄𑀢𑀺.

𑀯𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑁋

𑀆𑀭𑀫𑁆𑀫𑀡𑀸𑀦𑁆𑀯𑀬𑁂𑀦, 𑀉𑀪𑁄 𑀏𑀓𑀯𑀯𑀢𑁆𑀣𑀸𑀦𑀸;

𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸, 𑀯𑀬𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀸 𑀧𑀘𑁆𑀘𑀓𑁆𑀔𑀢𑁄 𑀘𑁂𑀯 𑀅𑀦𑁆𑀯𑀬𑀢𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀪𑀗𑁆𑀕𑀲𑀗𑁆𑀔𑀸𑀢𑁂 𑀦𑀺𑀭𑁄𑀥𑁂 𑀅𑀥𑀺𑀫𑀼𑀢𑁆𑀢𑀢𑀸, 𑀢𑀸𑀬 𑀆𑀬𑀽𑀳𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀬𑁂𑀲𑀁 𑀳𑀺 𑀅𑀢𑁆𑀣𑀸𑀬 𑀆𑀬𑀽𑀳𑁂𑀬𑁆𑀬, ‘‘𑀢𑁂 𑀏𑀯𑀁 𑀯𑀬𑀥𑀫𑁆𑀫𑀸’’𑀢𑀺 𑀯𑀺𑀧𑀲𑁆𑀲𑀢𑁄 𑀆𑀬𑀽𑀳𑀦𑁂 𑀘𑀺𑀢𑁆𑀢𑀁 𑀦 𑀦𑀫𑀢𑀺.

𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀢𑀺 𑀭𑀽𑀧𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀢𑀁 𑀢𑀁 𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀣𑀸𑀧𑀯𑀢𑁆𑀢𑀺𑀤𑀲𑁆𑀲𑀦𑀁. 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀚𑀭𑀸𑀬 𑀘𑁂𑀯 𑀫𑀭𑀡𑁂𑀦 𑀘 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀺𑀧𑀭𑀺𑀡𑀸𑀫𑀤𑀲𑁆𑀲𑀦𑀁, 𑀢𑀸𑀬 𑀥𑀼𑀯𑀲𑀜𑁆𑀜𑀸𑀬 𑀧𑀳𑀸𑀦𑀁 𑀳𑁄𑀢𑀺.

𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯, 𑀢𑀸𑀬 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺.

𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯, 𑀢𑀸𑀬 𑀲𑀼𑀔𑀧𑀡𑀺𑀥𑀺𑀲𑀼𑀔𑀧𑀢𑁆𑀣𑀦𑀸𑀧𑀳𑀸𑀦𑀁 𑀳𑁄𑀢𑀺.

𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯, 𑀢𑀸𑀬 ‘‘𑀅𑀢𑁆𑀣𑀺 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺.

𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀢𑀺 ¶ ¶ 𑁋

‘‘𑀆𑀭𑀫𑁆𑀫𑀡𑀜𑁆𑀘 𑀧𑀝𑀺𑀲𑀗𑁆𑀔𑀸, 𑀪𑀗𑁆𑀕𑀜𑁆𑀘 𑀅𑀦𑀼𑀧𑀲𑁆𑀲𑀢𑀺;

𑀲𑀼𑀜𑁆𑀜𑀢𑁄 𑀘 𑀉𑀧𑀝𑁆𑀞𑀸𑀦𑀁, 𑀅𑀥𑀺𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀘 𑀆𑀭𑀫𑁆𑀫𑀡𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀁 𑀤𑀺𑀲𑁆𑀯𑀸 ‘‘𑀲𑀗𑁆𑀔𑀸𑀭𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀲𑀗𑁆𑀔𑀸𑀭𑀸𑀦𑀁 𑀫𑀭𑀡𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑀻’’𑀢𑀺 𑀪𑀗𑁆𑀕𑀯𑀲𑁂𑀦 𑀲𑀼𑀜𑁆𑀜𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸. 𑀲𑀸 𑀅𑀥𑀺𑀧𑀜𑁆𑀜𑀸 𑀘 𑀥𑀫𑁆𑀫𑁂𑀲𑀼 𑀘 𑀯𑀺𑀧𑀲𑁆𑀲𑀦𑀸𑀢𑀺 𑀓𑀢𑁆𑀯𑀸 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀦𑀺𑀘𑁆𑀘𑀲𑀸𑀭𑀸𑀪𑀸𑀯𑀲𑁆𑀲 𑀘 𑀅𑀢𑁆𑀢𑀲𑀸𑀭𑀸𑀪𑀸𑀯𑀲𑁆𑀲 𑀘 𑀲𑀼𑀝𑁆𑀞𑀼 𑀤𑀺𑀝𑁆𑀞𑀢𑁆𑀢𑀸 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺.

𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄, 𑀢𑁂𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀘𑁂𑀯, ‘‘𑀇𑀲𑁆𑀲𑀭𑀢𑁄 𑀮𑁄𑀓𑁄 𑀲𑀫𑁆𑀪𑁄𑀢𑀻’’𑀢𑀺𑀆𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀲𑁆𑀲 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺.

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀪𑀯𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀜𑀸𑀡𑀁, 𑀢𑁂𑀦 ‘‘𑀓𑀺𑀜𑁆𑀘𑀺 𑀅𑀮𑁆𑀮𑀻𑀬𑀺𑀢𑀩𑁆𑀩𑀁 𑀦 𑀤𑀺𑀲𑁆𑀲𑀢𑀻’’𑀢𑀺 𑀆𑀮𑀬𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺.

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀢𑀺 𑀫𑀼𑀜𑁆𑀘𑀦𑀲𑁆𑀲 𑀉𑀧𑀸𑀬𑀓𑀭𑀡𑀁 𑀧𑀝𑀺𑀲𑀗𑁆𑀔𑀸𑀜𑀸𑀡𑀁, 𑀢𑁂𑀦 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀧𑀳𑀸𑀦𑀁 𑀳𑁄𑀢𑀺.

𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀘𑁂𑀯 𑀅𑀦𑀼𑀮𑁄𑀫𑀜𑁆𑀘. 𑀢𑀤𑀸 𑀳𑀺𑀲𑁆𑀲 𑀘𑀺𑀢𑁆𑀢𑀁 𑀈𑀲𑀓𑀧𑁄𑀡𑁂 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀧𑀢𑀺𑀮𑀻𑀬𑀢𑀺, 𑀧𑀢𑀺𑀓𑀼𑀝𑀢𑀺, 𑀧𑀢𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀸𑀬 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺, 𑀓𑀸𑀫𑀲𑀁𑀬𑁄𑀕𑀸𑀤𑀺𑀓𑀲𑁆𑀲 𑀓𑀺𑀮𑁂𑀲𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀺𑀮𑁂𑀲𑀧𑁆𑀧𑀯𑀢𑁆𑀢𑀺𑀬𑀸 𑀧𑀳𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 ‘‘𑀢𑀤𑀗𑁆𑀕𑀧𑁆𑀧𑀳𑀸𑀦𑀜𑁆𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄’’𑀢𑀺 (𑀧𑀝𑀺. 𑀫. 𑁧.𑁨𑁪) 𑀲𑀗𑁆𑀔𑁂𑀧𑁂𑀦𑁂𑀯 𑀯𑀼𑀢𑁆𑀢𑀁.

𑁮𑁫𑁧. 𑀬𑀁 ¶ 𑀧𑀦 𑀅𑀲𑀦𑀺𑀯𑀺𑀘𑀓𑁆𑀓𑀸𑀪𑀺𑀳𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀯𑀺𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀲𑀁𑀬𑁄𑀚𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸 𑀦 𑀧𑀼𑀦 𑀧𑀯𑀢𑁆𑀢𑀺, 𑀏𑀯𑀁 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀜𑁆𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄’’𑀢𑀺 (𑀧𑀝𑀺. 𑀫. 𑁧.𑁨𑁪) ¶ . 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀳𑀸𑀦𑁂𑀲𑀼 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀬𑀲𑁆𑀫𑀸 𑀧𑀦 𑀢𑀲𑁆𑀲 𑀬𑁄𑀕𑀺𑀦𑁄 𑀧𑀼𑀩𑁆𑀩𑀪𑀸𑀕𑁂 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀦𑀺𑀧𑀺 𑀢𑀤𑀢𑁆𑀣𑀸𑀦𑁂𑀯, 𑀢𑀲𑁆𑀫𑀸 𑀧𑀳𑀸𑀦𑀢𑁆𑀢𑀬𑀫𑁆𑀧𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀫𑀕𑁆𑀕𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀭𑀸𑀚𑀸𑀦𑀁 𑀯𑀥𑀺𑀢𑁆𑀯𑀸 𑀭𑀚𑁆𑀚𑀁 𑀧𑀢𑁆𑀢𑁂𑀦 𑀳𑀺 𑀬𑀫𑁆𑀧𑀺 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀁, 𑀲𑀩𑁆𑀩𑀁 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀭𑀜𑁆𑀜𑀸 𑀓𑀢’’𑀦𑁆𑀢𑀺𑀬𑁂𑀯 𑀯𑀼𑀘𑁆𑀘𑀢𑀺.

𑁮𑁫𑁨. 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀻𑀢𑀺 𑀮𑁄𑀓𑀺𑀬𑀲𑀘𑁆𑀙𑀺𑀓𑀺𑀭𑀺𑀬𑀸 𑀮𑁄𑀓𑀼𑀢𑁆𑀢𑀭𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀤𑁆𑀯𑁂𑀥𑀸 𑀪𑀺𑀦𑁆𑀦𑀸𑀧𑀺 𑀮𑁄𑀓𑀼𑀢𑁆𑀢𑀭𑀸𑀬 𑀤𑀲𑁆𑀲𑀦𑀪𑀸𑀯𑀦𑀸𑀯𑀲𑁂𑀦 𑀪𑁂𑀤𑀢𑁄 𑀢𑀺𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺, 𑀯𑀲𑀻𑀫𑁆𑀳𑀺, 𑀧𑀞𑀫𑀚𑁆𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁦𑁩-𑁨𑁦𑁪) 𑀦𑀬𑁂𑀦 𑀆𑀕𑀢𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀨𑀲𑁆𑀲𑀦𑀸 𑀮𑁄𑀓𑀺𑀬𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀸𑀫. 𑀨𑀲𑁆𑀲𑀦𑀸𑀢𑀺 𑀅𑀥𑀺𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀦𑀸. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀜𑁆𑀜𑀸 𑀨𑀲𑁆𑀲𑀦𑀝𑁆𑀞𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁨𑁪) 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀨𑀲𑁆𑀲𑀺𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁭𑁫) 𑀲𑀘𑁆𑀙𑀺𑀓𑀺𑀭𑀺𑀬𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑁄.

𑀅𑀧𑀺𑀘 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀧𑀺 𑀬𑁂 𑀥𑀫𑁆𑀫𑀸 𑀓𑁂𑀯𑀮𑀁 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀸𑀡𑁂𑀦 𑀜𑀸𑀢𑀸, 𑀢𑁂 𑀲𑀘𑁆𑀙𑀺𑀓𑀢𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀳𑀺 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁨𑁯) 𑀯𑀼𑀢𑁆𑀢𑀁.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀲𑀘𑁆𑀙𑀺𑀓𑀭𑁄𑀢𑀺. 𑀯𑁂𑀤𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀦𑁆𑀢𑁄 𑀲𑀘𑁆𑀙𑀺𑀓𑀭𑁄𑀢𑀺. 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀦𑁆𑀢𑁄 𑀲𑀘𑁆𑀙𑀺𑀓𑀭𑁄𑀢𑀻𑀢𑀺. 𑀬𑁂 𑀬𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀨𑀲𑁆𑀲𑀺𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁯).

𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀧𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀤𑀲𑁆𑀲𑀦𑀲𑀘𑁆𑀙𑀺𑀓𑀺𑀭𑀺𑀬𑀸. 𑀲𑁂𑀲𑀫𑀕𑁆𑀕𑀓𑁆𑀔𑀡𑁂𑀲𑀼 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺. 𑀲𑀸 𑀤𑀼𑀯𑀺𑀥𑀸𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀤𑀲𑁆𑀲𑀦𑀪𑀸𑀯𑀦𑀸𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸 𑀇𑀫𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁫𑁩. 𑀤𑁆𑀯𑁂 ¶ ¶ 𑀪𑀸𑀯𑀦𑀸 𑀅𑀪𑀺𑀫𑀢𑀸𑀢𑀺 𑀪𑀸𑀯𑀦𑀸 𑀧𑀦 𑀮𑁄𑀓𑀺𑀬𑀪𑀸𑀯𑀦𑀸 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀢𑀺 𑀤𑁆𑀯𑁂𑀬𑁂𑀯 𑀅𑀪𑀺𑀫𑀢𑀸. 𑀢𑀢𑁆𑀣 𑀮𑁄𑀓𑀺𑀬𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀉𑀧𑁆𑀧𑀸𑀤𑀦𑀁, 𑀢𑀸𑀳𑀺 𑀘 𑀲𑀦𑁆𑀢𑀸𑀦𑀯𑀸𑀲𑀦𑀁 𑀮𑁄𑀓𑀺𑀬𑀪𑀸𑀯𑀦𑀸. 𑀮𑁄𑀓𑀼𑀢𑁆𑀢𑀭𑀸𑀦𑀁 𑀉𑀧𑁆𑀧𑀸𑀤𑀦𑀁, 𑀢𑀸𑀳𑀺 𑀘 𑀲𑀦𑁆𑀢𑀸𑀦𑀯𑀸𑀲𑀦𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸. 𑀢𑀸𑀲𑀼 𑀇𑀥 𑀮𑁄𑀓𑀼𑀢𑁆𑀢𑀭𑀸 𑀅𑀥𑀺𑀧𑁆𑀧𑁂𑀢𑀸. 𑀮𑁄𑀓𑀼𑀢𑁆𑀢𑀭𑀸𑀦𑀺 𑀳𑀺 𑀲𑀻𑀮𑀸𑀤𑀻𑀦𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑁂𑀢𑀁 𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀺. 𑀢𑁂𑀲𑀁 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀢𑀸𑀬 𑀢𑁂𑀳𑀺 𑀘 𑀲𑀦𑁆𑀢𑀸𑀦𑀁 𑀯𑀸𑀲𑁂𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀯𑀲𑁆𑀲 𑀓𑀺𑀘𑁆𑀘𑀦𑁆𑀢𑀺.

𑀏𑀯𑀁 𑁋

𑀓𑀺𑀘𑁆𑀘𑀸𑀦𑀺 𑀧𑀭𑀺𑀜𑁆𑀜𑀸𑀤𑀻𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀅𑀪𑀺𑀲𑀫𑀬𑀓𑀸𑀮𑁂;

𑀢𑀸𑀦𑀺 𑀘 𑀬𑀣𑀸𑀲𑀪𑀸𑀯𑁂𑀦, 𑀚𑀸𑀦𑀺𑀢𑀩𑁆𑀩𑀸𑀦𑀺 𑀲𑀩𑁆𑀩𑀸𑀦𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑁋

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺. 𑁋

𑀏𑀯𑀁 𑀲𑀭𑀽𑀧𑁂𑀦𑁂𑀯 𑀆𑀪𑀢𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬 𑀯𑀺𑀥𑀸𑀦𑀤𑀲𑁆𑀲𑀦𑀢𑁆𑀣𑀁 𑀬𑀁 𑀯𑀼𑀢𑁆𑀢𑀁 ‘‘𑀫𑀽𑀮𑀪𑀽𑀢𑀸 𑀤𑁆𑀯𑁂 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀭𑀻𑀭𑀪𑀽𑀢𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸’’𑀢𑀺, 𑀢𑀁 𑀯𑀺𑀢𑁆𑀣𑀸𑀭𑀺𑀢𑀁 𑀳𑁄𑀢𑀺. 𑀓𑀣𑀁 𑀪𑀸𑀯𑁂𑀢𑀩𑁆𑀩𑀸𑀢𑀺 𑀅𑀬𑀜𑁆𑀘 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀩𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁩. 𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑁄

𑀆𑀦𑀺𑀲𑀁𑀲𑀧𑀓𑀸𑀲𑀦𑀸

𑁮𑁫𑁪. 𑀬𑀁 ¶ ¶ 𑀧𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀪𑀸𑀯𑀦𑀸𑀬 𑀓𑁄 𑀆𑀦𑀺𑀲𑀁𑀲𑁄’’𑀢𑀺, 𑀢𑀢𑁆𑀣 𑀯𑀤𑀸𑀫. 𑀅𑀬𑀜𑁆𑀳𑀺 𑀧𑀜𑁆𑀜𑀸𑀪𑀸𑀯𑀦𑀸 𑀦𑀸𑀫 𑀅𑀦𑁂𑀓𑀲𑀢𑀸𑀦𑀺𑀲𑀁𑀲𑀸. 𑀢𑀲𑁆𑀲𑀸 𑀤𑀻𑀖𑁂𑀦𑀸𑀧𑀺 𑀅𑀤𑁆𑀥𑀼𑀦𑀸 𑀦 𑀲𑀼𑀓𑀭𑀁 𑀯𑀺𑀢𑁆𑀣𑀸𑀭𑀢𑁄 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑀼𑀁. 𑀲𑀗𑁆𑀔𑁂𑀧𑀢𑁄 𑀧𑀦𑀲𑁆𑀲𑀸 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁, 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸, 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀻𑀢𑀺 𑀅𑀬𑀫𑀸𑀦𑀺𑀲𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀣𑀸

𑁮𑁫𑁫. 𑀢𑀢𑁆𑀣 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀯𑀲𑁂𑀦 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁 𑀯𑀼𑀢𑁆𑀢𑀁, 𑀅𑀬𑀁 𑀮𑁄𑀓𑀺𑀓𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄. 𑀬𑀁 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀲𑀁𑀬𑁄𑀚𑀦𑀸𑀤𑀻𑀦𑀁 𑀯𑀲𑁂𑀦 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁 𑀯𑀼𑀢𑁆𑀢𑀁, 𑀅𑀬𑀁 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀻𑀫𑀯𑁂𑀕𑀸𑀦𑀼𑀧𑀢𑀺𑀢𑀸, 𑀅𑀲𑀦𑀻𑀯 𑀲𑀺𑀮𑀼𑀘𑁆𑀘𑀬𑁂;

𑀯𑀸𑀬𑀼𑀯𑁂𑀕𑀲𑀫𑀼𑀝𑁆𑀞𑀺𑀢𑁄, 𑀅𑀭𑀜𑁆𑀜𑀫𑀺𑀯 𑀧𑀸𑀯𑀓𑁄.

𑀅𑀦𑁆𑀥𑀓𑀸𑀭𑀁 𑀯𑀺𑀬 𑀭𑀯𑀺, 𑀲𑀢𑁂𑀚𑀼𑀚𑁆𑀚𑀮𑀫𑀡𑁆𑀟𑀮𑁄;

𑀤𑀻𑀖𑀭𑀢𑁆𑀢𑀸𑀦𑀼𑀧𑀢𑀺𑀢𑀁, 𑀲𑀩𑁆𑀩𑀸𑀦𑀢𑁆𑀣𑀯𑀺𑀥𑀸𑀬𑀓𑀁.

𑀓𑀺𑀮𑁂𑀲𑀚𑀸𑀮𑀁 𑀧𑀜𑁆𑀜𑀸 𑀳𑀺, 𑀯𑀺𑀤𑁆𑀥𑀁𑀲𑀬𑀢𑀺 𑀪𑀸𑀯𑀺𑀢𑀸;

𑀲𑀦𑁆𑀤𑀺𑀝𑁆𑀞𑀺𑀓𑀫𑀢𑁄 𑀚𑀜𑁆𑀜𑀸, 𑀆𑀦𑀺𑀲𑀁𑀲𑀫𑀺𑀫𑀁 𑀇𑀥.

𑀨𑀮𑀲𑀫𑀸𑀧𑀢𑁆𑀢𑀺𑀓𑀣𑀸

𑁮𑁫𑁬. 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀦𑁆𑀢𑀺 ¶ 𑀦 𑀓𑁂𑀯𑀮𑀜𑁆𑀘 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀜𑁆𑀜𑁂𑀯, 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀫𑁆𑀧𑀺 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄. 𑀅𑀭𑀺𑀬𑀨𑀮𑀦𑁆𑀢𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺 𑀲𑀸𑀫𑀜𑁆𑀜𑀨𑀮𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀭𑀲𑀸𑀦𑀼𑀪𑀯𑀦𑀁 𑀳𑁄𑀢𑀺. 𑀫𑀕𑁆𑀕𑀯𑀻𑀣𑀺𑀬𑀜𑁆𑀘 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁. 𑀢𑀢𑁆𑀭𑀸𑀲𑁆𑀲 𑀫𑀕𑁆𑀕𑀯𑀻𑀣𑀺𑀬𑀁 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀬𑁂𑀯.

𑁮𑁫𑁭. 𑀅𑀧𑀺𑀘 ¶ 𑀬𑁂 ‘‘𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀨𑀮𑀁 𑀦𑀸𑀫, 𑀦 𑀓𑁄𑀘𑀺 𑀅𑀜𑁆𑀜𑁄 𑀥𑀫𑁆𑀫𑁄 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀦𑀬𑀢𑁆𑀣𑀁 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀤𑀲𑁆𑀲𑁂𑀢𑀩𑁆𑀩𑀁 𑁋 ‘‘𑀓𑀣𑀁 𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀜𑁆𑀜𑀸 𑀨𑀮𑁂 𑀜𑀸𑀡𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀕𑁆𑀕𑀲𑁆𑀲𑁂𑀢𑀁 𑀨𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁬𑁩) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’ (𑀥. 𑀲. 𑁧𑁪𑁨𑁨). ‘‘𑀫𑀳𑀕𑁆𑀕𑀢𑁄 𑀥𑀫𑁆𑀫𑁄 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁬𑁨) 𑀏𑀯𑀫𑀸𑀤𑀻𑀦𑀺𑀧𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺.

𑁮𑁫𑁮. 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀧𑀦𑀲𑁆𑀲 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑁋 𑀓𑀸 𑀨𑀮𑀲𑀫𑀸𑀧𑀢𑁆𑀢𑀺, 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀁, 𑀓𑀺𑀁 𑀨𑀮𑀲𑁆𑀲 𑀅𑀦𑀦𑁆𑀢𑀭𑀁, 𑀓𑀲𑁆𑀲 𑀘 𑀨𑀮𑀁 𑀅𑀦𑀦𑁆𑀢𑀭𑀦𑁆𑀢𑀺?

𑁮𑁫𑁯. 𑀢𑀢𑁆𑀣 𑀓𑀸 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀬𑀸 𑀅𑀭𑀺𑀬𑀨𑀮𑀲𑁆𑀲 𑀦𑀺𑀭𑁄𑀥𑁂 𑀅𑀧𑁆𑀧𑀦𑀸.

𑁮𑁬𑁦. 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀅𑀦𑀥𑀺𑀕𑀢𑀢𑁆𑀢𑀸. 𑀅𑀭𑀺𑀬𑀸 𑀧𑀦 𑀲𑀩𑁆𑀩𑁂𑀧𑀺 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀅𑀥𑀺𑀕𑀢𑀢𑁆𑀢𑀸. 𑀉𑀧𑀭𑀺𑀫𑀸 𑀧𑀦 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀼𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀳𑁂𑀝𑁆𑀞𑀺𑀫𑀸 𑀘 𑀉𑀧𑀭𑀺𑀫𑀁, 𑀅𑀦𑀥𑀺𑀕𑀢𑀢𑁆𑀢𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀬𑁂𑀯 𑀧𑀦 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁.

𑀓𑁂𑀘𑀺 𑀧𑀦 ‘‘𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀉𑀧𑀭𑀺𑀫𑀸 𑀤𑁆𑀯𑁂𑀬𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 ¶ 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀢𑁂𑀲𑀁 𑀓𑀸𑀭𑀡𑀁, 𑀏𑀢𑁂 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺. 𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀥𑀺𑀲𑀫𑀸𑀧𑀚𑁆𑀚𑀦𑀢𑁄 𑀅𑀓𑀸𑀭𑀡𑀫𑁂𑀯. 𑀓𑀺𑀜𑁆𑀘𑁂𑀢𑁆𑀣 𑀓𑀸𑀭𑀡𑀸𑀓𑀸𑀭𑀡𑀘𑀺𑀦𑁆𑀢𑀸𑀬. 𑀦𑀦𑀼 𑀧𑀸𑀴𑀺𑀬𑀁𑀬𑁂𑀯 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑁂 𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑀁 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 ¶ …𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁…𑀧𑁂… 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀽’’𑀢𑀺 (𑀧𑀝𑀺. 𑀫. 𑁧.𑁬𑁦). 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁮𑁬𑁧. 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁. 𑀬𑀣𑀸 𑀳𑀺 𑀭𑀸𑀚𑀸 𑀭𑀚𑁆𑀚𑀲𑀼𑀔𑀁, 𑀤𑁂𑀯𑀢𑀸 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀁 𑀅𑀭𑀺𑀬𑀸 ‘‘𑀅𑀭𑀺𑀬𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀤𑁆𑀥𑀸𑀦𑀧𑁆𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑁮𑁬𑁨. 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀦𑁆𑀢𑀺 𑀤𑁆𑀯𑀻𑀳𑀺 𑀢𑀸𑀯 𑀆𑀓𑀸𑀭𑁂𑀳𑀺 𑀅𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺 𑁋 𑀦𑀺𑀩𑁆𑀩𑀸𑀦𑀢𑁄 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀫𑀦𑀲𑀺𑀓𑀸𑀭𑀸. 𑀬𑀣𑀸𑀳 𑁋 ‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮).

𑁮𑁬𑁩. 𑀅𑀬𑀫𑁆𑀧𑀦𑁂𑀢𑁆𑀣 𑀲𑀫𑀸𑀧𑀚𑁆𑀚𑀦𑀓𑁆𑀓𑀫𑁄. 𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀺𑀓𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸 𑀯𑀺𑀧𑀲𑁆𑀲𑀺𑀢𑀩𑁆𑀩𑀸. 𑀢𑀲𑁆𑀲 𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀲𑁆𑀲 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀢𑀸𑀬 𑀘𑁂𑀢𑁆𑀣 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄.

𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀲𑁄𑀢𑀸𑀧𑀦𑁆𑀦𑁄 ‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀻 𑀘 𑀅𑀦𑀸𑀕𑀸𑀫𑀻’’𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀏𑀯𑀁 𑀲𑀢𑀺 𑀅𑀦𑀸𑀕𑀸𑀫𑀻 𑀅𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 𑀩𑀼𑀤𑁆𑀥𑁄. 𑀢𑀲𑁆𑀫𑀸 𑀦 𑀓𑀺𑀜𑁆𑀘𑀺 𑀏𑀢𑀁, 𑀧𑀸𑀴𑀺𑀯𑀲𑁂𑀦𑁂𑀯 𑀘 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀇𑀤𑀫𑁂𑀯 𑀧𑀦 𑀕𑀳𑁂𑀢𑀩𑁆𑀩𑀁 𑁋 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 ¶ 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄. 𑀨𑀮𑀜𑁆𑀘𑀲𑁆𑀲 𑀲𑀘𑁂 𑀅𑀦𑁂𑀦 𑀧𑀞𑀫𑀚𑁆𑀛𑀸𑀦𑀺𑀓𑁄 𑀫𑀕𑁆𑀕𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀧𑀞𑀫𑀚𑁆𑀛𑀸𑀦𑀺𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀲𑀘𑁂 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄, 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀫𑁂𑀯𑀸𑀢𑀺. 𑀏𑀯𑀁 𑀢𑀸𑀯𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺.

𑁮𑁬𑁪. ‘‘𑀢𑀬𑁄 ¶ 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑀯𑀘𑀦𑀢𑁄 𑀧𑀦𑀲𑁆𑀲𑀸 𑀢𑀻𑀳𑀸𑀓𑀸𑀭𑁂𑀳𑀺 𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀳𑀺𑀲𑁆𑀲𑀸 𑀬𑀸𑀯 𑀲𑁄 𑀓𑀸𑀮𑁄 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀞𑀸𑀦𑀁 𑀳𑁄𑀢𑀺. 𑀏𑀯𑀫𑀲𑁆𑀲𑀸 𑀞𑀸𑀦𑀁 𑀳𑁄𑀢𑀻𑀢𑀺.

𑁮𑁬𑁫. ‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀅𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑀯𑀘𑀦𑀢𑁄 𑀧𑀦𑀲𑁆𑀲𑀸 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀁. 𑀓𑀸𑀫𑀜𑁆𑀘 𑀦 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀏𑀓𑀢𑁄 𑀫𑀦𑀲𑀺𑀓𑀭𑁄𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀫𑀦𑀲𑀺𑀓𑀭𑁄𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀫𑀲𑁆𑀲𑀸 𑀯𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁬𑁬. 𑀓𑀺𑀁 𑀨𑀮𑀲𑁆𑀲 𑀅𑀦𑀦𑁆𑀢𑀭𑀁, 𑀓𑀲𑁆𑀲 𑀘 𑀨𑀮𑀁 𑀅𑀦𑀦𑁆𑀢𑀭𑀦𑁆𑀢𑀺 𑀨𑀮𑀲𑁆𑀲 𑀢𑀸𑀯 𑀨𑀮𑀫𑁂𑀯 𑀯𑀸 𑀅𑀦𑀦𑁆𑀢𑀭𑀁 𑀳𑁄𑀢𑀺, 𑀪𑀯𑀗𑁆𑀕𑀁 𑀯𑀸. 𑀨𑀮𑀁 𑀧𑀦 𑀅𑀢𑁆𑀣𑀺 𑀫𑀕𑁆𑀕𑀸𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀨𑀮𑀸𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀁. 𑀢𑀢𑁆𑀣 𑀫𑀕𑁆𑀕𑀯𑀻𑀣𑀺𑀬𑀁 𑀫𑀕𑁆𑀕𑀸𑀦𑀦𑁆𑀢𑀭𑀁, 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀨𑀮𑀸𑀦𑀦𑁆𑀢𑀭𑀁. 𑀨𑀮𑀲𑀫𑀸𑀧𑀢𑁆𑀢𑀻𑀲𑀼 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁. 𑀕𑁄𑀢𑁆𑀭𑀪𑀽𑀢𑀺 𑀘𑁂𑀢𑁆𑀣 𑀅𑀦𑀼𑀮𑁄𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂 𑁋 ‘‘𑀅𑀭𑀳𑀢𑁄 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁂𑀓𑁆𑀔𑀸𑀦𑀁 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭). 𑀬𑁂𑀦 𑀨𑀮𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀫𑀕𑁆𑀕𑀯𑀻𑀣𑀺𑀬𑀁 𑀉𑀧𑁆𑀧𑀦𑁆𑀦𑀁 𑀨𑀮𑀁 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁 𑀦𑀸𑀫. 𑀏𑀯𑀫𑁂𑀢𑀁 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀯𑀸 𑀉𑀧𑁆𑀧𑀚𑁆𑀚𑀦𑀯𑀲𑁂𑀦,

𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀁 ¶ , 𑀅𑀫𑀢𑀸𑀭𑀫𑁆𑀫𑀡𑀁 𑀲𑀼𑀪𑀁;

𑀯𑀦𑁆𑀢𑀮𑁄𑀓𑀸𑀫𑀺𑀲𑀁 𑀲𑀦𑁆𑀢𑀁, 𑀲𑀸𑀫𑀜𑁆𑀜𑀨𑀮𑀫𑀼𑀢𑁆𑀢𑀫𑀁.

𑀑𑀚𑀯𑀦𑁆𑀢𑁂𑀦 𑀲𑀼𑀘𑀺𑀦𑀸, 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑀺𑀢𑀁;

𑀬𑁂𑀦 𑀲𑀸𑀢𑀸𑀢𑀺𑀲𑀸𑀢𑁂𑀦, 𑀅𑀫𑀢𑁂𑀦 𑀫𑀥𑀼𑀁 𑀯𑀺𑀬.

𑀢𑀁 ¶ 𑀲𑀼𑀔𑀁 𑀢𑀲𑁆𑀲 𑀅𑀭𑀺𑀬𑀲𑁆𑀲, 𑀭𑀲𑀪𑀽𑀢𑀫𑀦𑀼𑀢𑁆𑀢𑀭𑀁;

𑀨𑀮𑀲𑁆𑀲 𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸, 𑀬𑀲𑁆𑀫𑀸 𑀯𑀺𑀦𑁆𑀤𑀢𑀺 𑀧𑀡𑁆𑀟𑀺𑀢𑁄.

𑀢𑀲𑁆𑀫𑀸 𑀅𑀭𑀺𑀬𑀨𑀮𑀲𑁆𑀲𑁂𑀢𑀁, 𑀭𑀲𑀸𑀦𑀼𑀪𑀯𑀦𑀁 𑀇𑀥;

𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬, 𑀆𑀦𑀺𑀲𑀁𑀲𑁄𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸

𑁮𑁬𑁭. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀁𑀬𑁂𑀯, 𑀅𑀬𑀁 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀧𑀺 𑀇𑀫𑀺𑀲𑁆𑀲𑀸 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀢𑁆𑀣𑀁 𑀧𑀜𑁆𑀳𑀸𑀓𑀫𑁆𑀫𑀁 𑁋 𑀓𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀁, 𑀯𑀼𑀝𑁆𑀞𑀺𑀢𑀲𑁆𑀲 𑀓𑀺𑀁𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀫𑀢𑀲𑁆𑀲 𑀘 𑀲𑀫𑀸𑀧𑀦𑁆𑀦𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀓𑀺𑀁 𑀲𑀗𑁆𑀔𑀢𑀸 𑀅𑀲𑀗𑁆𑀔𑀢𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀦𑀺𑀧𑁆𑀨𑀦𑁆𑀦𑀸 𑀅𑀦𑀺𑀧𑁆𑀨𑀦𑁆𑀦𑀸𑀢𑀺?

𑁮𑁬𑁮. 𑀢𑀢𑁆𑀣 𑀓𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀬𑀸 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸, 𑀲𑁄𑀢𑀸𑀧𑀦𑁆𑀦𑀸, 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀘 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀦𑁆𑀢𑁄 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀅𑀦𑀸𑀕𑀸𑀫𑀺𑀦𑁄, 𑀔𑀻𑀡𑀸𑀲𑀯𑀸 𑀘 𑀲𑀫𑀸𑀧𑀚𑁆𑀚𑀦𑁆𑀢𑀺. ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ¶ , 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸, 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺, 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸 𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁩𑁪) 𑀳𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀲𑀫𑁆𑀧𑀤𑀸 𑀞𑀧𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀜𑁆𑀜𑁂𑀲𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀬𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑁂.

𑁮𑁬𑁯. 𑀓𑀢𑀫𑀸𑀦𑀺 𑀧𑀦𑁂𑀢𑁆𑀣 𑀤𑁆𑀯𑁂 𑀩𑀮𑀸𑀦𑀺…𑀧𑁂… 𑀓𑀢𑀫𑀸 𑀯𑀲𑀻𑀪𑀸𑀯𑀢𑀸𑀢𑀺? 𑀦 𑀏𑀢𑁆𑀣 𑀓𑀺𑀜𑁆𑀘𑀺 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺. 𑀲𑀩𑁆𑀩𑀫𑀺𑀤𑀁 𑀏𑀢𑀲𑁆𑀲 𑀉𑀤𑁆𑀤𑁂𑀲𑀲𑁆𑀲 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯. 𑀬𑀣𑀸𑀳 𑁋

‘‘𑀤𑁆𑀯𑀻𑀳𑀺 ¶ 𑀩𑀮𑁂𑀳𑀻𑀢𑀺 𑀤𑁆𑀯𑁂 𑀩𑀮𑀸𑀦𑀺 𑀲𑀫𑀣𑀩𑀮𑀁 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀓𑀢𑀫𑀁 𑀲𑀫𑀣𑀩𑀮𑀁? 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀣𑀩𑀮𑀁. 𑀅𑀩𑁆𑀬𑀸𑀧𑀸𑀤𑀯𑀲𑁂𑀦… 𑀆𑀮𑁄𑀓𑀲𑀜𑁆𑀜𑀸𑀯𑀲𑁂𑀦… 𑀅𑀯𑀺𑀓𑁆𑀔𑁂𑀧𑀯𑀲𑁂𑀦…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀯𑀲𑁂𑀦… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀣𑀩𑀮𑀦𑁆𑀢𑀺. 𑀓𑁂𑀦𑀝𑁆𑀞𑁂𑀦 𑀲𑀫𑀣𑀩𑀮𑀁? 𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀣𑀩𑀮𑀁. 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀣𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀘 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀻𑀢𑀺 𑀲𑀫𑀣𑀩𑀮𑀁. 𑀇𑀤𑀁 𑀲𑀫𑀣𑀩𑀮𑀁.

‘‘𑀓𑀢𑀫𑀁 𑀯𑀺𑀧𑀲𑁆𑀲𑀦𑀸𑀩𑀮𑀁? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸…𑀧𑁂… 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀦𑁆𑀢𑀺. 𑀓𑁂𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸𑀩𑀮𑀁? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀬𑀸 𑀦 𑀓𑀫𑁆𑀧𑀢𑀻𑀢𑀺… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑁂 𑀦 𑀓𑀫𑁆𑀧𑀢𑀻𑀢𑀺… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑁂 𑀦 𑀓𑀫𑁆𑀧𑀢𑀻𑀢𑀺… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀅𑀯𑀺𑀚𑁆𑀚𑀸𑀬 ¶ 𑀘 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀇𑀤𑀁 𑀯𑀺𑀧𑀲𑁆𑀲𑀦𑀸𑀩𑀮𑀁.

‘‘𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀓𑀢𑀫𑁂𑀲𑀁 𑀢𑀺𑀡𑁆𑀡𑀦𑁆𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸? 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀦𑁆𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸.

‘‘𑀲𑁄𑀴𑀲𑀳𑀺 ¶ 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀓𑀢𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀸… 𑀅𑀦𑀢𑁆𑀢𑀸… 𑀦𑀺𑀩𑁆𑀩𑀺𑀤𑀸… 𑀯𑀺𑀭𑀸𑀕𑀸… 𑀦𑀺𑀭𑁄𑀥𑀸… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸… 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄…𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺.

‘‘𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀓𑀢𑀫𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺? 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀥𑀺𑀘𑀭𑀺𑀬𑀸. 𑀤𑀼𑀢𑀺𑀬𑀚𑁆𑀛𑀸𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀲𑀫𑀸𑀥𑀺𑀘𑀭𑀺𑀬𑀸. 𑀧𑀞𑀫𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘. 𑀇𑀫𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺.

‘‘𑀯𑀲𑀻𑀢𑀺 𑀧𑀜𑁆𑀘 𑀯𑀲𑀺𑀬𑁄 𑁋 𑀆𑀯𑀚𑁆𑀚𑀦𑀯𑀲𑀻, 𑀲𑀫𑀸𑀧𑀚𑁆𑀚𑀦𑀯𑀲𑀻, 𑀅𑀥𑀺𑀝𑁆𑀞𑀸𑀦𑀯𑀲𑀻, 𑀯𑀼𑀝𑁆𑀞𑀸𑀦𑀯𑀲𑀻, 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀧𑀞𑀫𑀚𑁆𑀛𑀸𑀦𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀆𑀯𑀚𑁆𑀚𑀢𑀺, 𑀆𑀯𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀆𑀯𑀚𑁆𑀚𑀦𑀯𑀲𑀻. 𑀧𑀞𑀫𑀚𑁆𑀛𑀸𑀦𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀲𑀫𑀸𑀧𑀚𑁆𑀚𑀦𑀯𑀲𑀻…𑀧𑁂… 𑀅𑀥𑀺𑀝𑁆𑀞𑀸𑀢𑀺 𑀅𑀥𑀺𑀝𑁆𑀞𑀸𑀦𑁂…𑀧𑁂… 𑀯𑀼𑀝𑁆𑀞𑀸𑀢𑀺 𑀯𑀼𑀝𑁆𑀞𑀸𑀦𑁂…𑀧𑁂… 𑀧𑀘𑁆𑀘𑀯𑁂𑀓𑁆𑀔𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀤𑀼𑀢𑀺𑀬𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀆𑀯𑀚𑁆𑀚𑀢𑀺 ¶ …𑀧𑁂… 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀇𑀫𑀸 𑀧𑀜𑁆𑀘 𑀯𑀲𑀺𑀬𑁄’’𑀢𑀺 (𑀧𑀝𑀺. 𑀫. 𑁧.𑁮𑁩).

𑁮𑁭𑁦. 𑀏𑀢𑁆𑀣 𑀘 ‘‘𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻’’𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀘𑀼𑀤𑁆𑀤𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀳𑁄𑀢𑀺. 𑀬𑀤𑀺 𑀏𑀯𑀁 𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑀸𑀤𑀲𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀤𑀲𑀳𑀺 𑀓𑀺𑀁 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀺𑀓𑀲𑁆𑀲 𑀧𑀜𑁆𑀘 𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀢𑁂𑀲𑀁 𑀳𑀺 𑀲𑁄 𑀅𑀧𑁆𑀧𑀳𑀻𑀦𑁄. 𑀢𑀲𑁆𑀫𑀸 𑀲𑀫𑀣𑀩𑀮𑀁 𑀦 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀧𑀭𑀺𑀧𑀽𑀭𑁂 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀩𑀮𑀯𑁂𑀓𑀮𑁆𑀮𑁂𑀦 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀦 𑀲𑁄 𑀧𑀳𑀻𑀦𑁄, 𑀢𑀲𑁆𑀫𑀸 𑀏𑀲 𑀧𑀭𑀺𑀧𑀼𑀡𑁆𑀡𑀩𑀮𑁄 ¶ 𑀳𑁄𑀢𑀺. 𑀧𑀭𑀺𑀧𑀼𑀡𑁆𑀡𑀩𑀮𑀢𑁆𑀢𑀸 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭). 𑀇𑀤𑀜𑁆𑀳𑀺 𑀧𑀝𑁆𑀞𑀸𑀦𑁂 𑀫𑀳𑀸𑀧𑀓𑀭𑀡𑁂 𑀅𑀦𑀸𑀕𑀸𑀫𑀺𑀦𑁄𑀯 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑁮𑁭𑁧. 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀓𑀲𑁆𑀫𑀸? 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀢𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀼𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀢𑁆𑀣𑀼𑀲𑁆𑀲 𑀅𑀪𑀸𑀯𑀸’’𑀢𑀺 𑀯𑀤𑀦𑁆𑀢𑀺.

𑁮𑁭𑁨. 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 ‘‘𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑀺.

𑁮𑁭𑁩. 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑀬𑀢𑁄, 𑀏𑀯𑀫𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺. 𑀬𑁄 𑀳𑀺 𑀲𑀫𑀣𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀉𑀪𑀬𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑁂𑀢𑀺, 𑀲𑁄 𑀢𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑁮𑁭𑁪. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄 𑁋 𑀇𑀥 𑀪𑀺𑀓𑁆𑀔𑀼 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀼𑀥𑁄𑀢𑀳𑀢𑁆𑀣𑀧𑀸𑀤𑁄 ¶ 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀲𑀼𑀧𑀜𑁆𑀜𑀢𑁆𑀢𑀫𑁆𑀳𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, 𑀲𑁄 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺.

𑀯𑀺𑀧𑀲𑁆𑀲𑀦𑀸 𑀧𑀦𑁂𑀲𑀸 𑀢𑀺𑀯𑀺𑀥𑀸 𑀳𑁄𑀢𑀺 𑁋 𑀲𑀗𑁆𑀔𑀸𑀭𑀧𑀭𑀺𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸, 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀧𑀭𑀺𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸 𑀫𑀦𑁆𑀤𑀸 𑀯𑀸 𑀳𑁄𑀢𑀼 𑀢𑀺𑀓𑁆𑀔𑀸 𑀯𑀸, 𑀫𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺𑀬𑁂𑀯. 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 ¶ 𑀢𑀺𑀓𑁆𑀔𑀸𑀯 𑀯𑀝𑁆𑀝𑀢𑀺 𑀫𑀕𑁆𑀕𑀪𑀸𑀯𑀦𑀸𑀲𑀤𑀺𑀲𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀧𑀦 𑀦𑀸𑀢𑀺𑀫𑀦𑁆𑀤𑀦𑀸𑀢𑀺𑀢𑀺𑀓𑁆𑀔𑀸 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀏𑀲 𑀦𑀸𑀢𑀺𑀫𑀦𑁆𑀤𑀸𑀬 𑀦𑀸𑀢𑀺𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑁂 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀢𑀺.

𑀢𑀢𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺 𑁋 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁, 𑀲𑀗𑁆𑀖𑀧𑀝𑀺𑀫𑀸𑀦𑀦𑀁, 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁, 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀦𑁆𑀢𑀺.

𑁮𑁭𑁫. 𑀢𑀢𑁆𑀣 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀦𑁆𑀢𑀺 𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀦 𑀳𑁄𑀢𑀺, 𑀦𑀸𑀦𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀫𑀜𑁆𑀘𑀧𑀻𑀞𑀁 𑀯𑀸 𑀦𑀺𑀯𑀸𑀲𑀕𑁂𑀳𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀢𑀁 𑀬𑀣𑀸 𑀦 𑀯𑀺𑀓𑀼𑀧𑁆𑀧𑀢𑀺, 𑀅𑀕𑁆𑀕𑀺𑀉𑀤𑀓𑀯𑀸𑀢𑀘𑁄𑀭𑀉𑀦𑁆𑀤𑀽𑀭𑀸𑀤𑀻𑀦𑀁 𑀯𑀲𑁂𑀦 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀁 ‘‘𑀇𑀤𑀜𑁆𑀘 𑀇𑀤𑀜𑁆𑀘 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀫𑀸 𑀅𑀕𑁆𑀕𑀺𑀦𑀸 𑀛𑀸𑀬𑀢𑀼, 𑀫𑀸 𑀉𑀤𑀓𑁂𑀦 𑀯𑀼𑀬𑁆𑀳𑀢𑀼, 𑀫𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀼, 𑀫𑀸 𑀘𑁄𑀭𑁂𑀳𑀺 𑀳𑀭𑀺𑀬𑀢𑀼, 𑀫𑀸 𑀉𑀦𑁆𑀤𑀽𑀭𑀸𑀤𑀻𑀳𑀺 𑀔𑀚𑁆𑀚𑀢𑀽’’𑀢𑀺. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂 𑀢𑀁 𑀲𑀢𑁆𑀢𑀸𑀳𑀁 𑀢𑀲𑁆𑀲 𑀦 𑀓𑁄𑀘𑀺 𑀧𑀭𑀺𑀲𑁆𑀲𑀬𑁄 𑀳𑁄𑀢𑀺.

𑀅𑀦𑀥𑀺𑀝𑁆𑀞𑀳𑀢𑁄 𑀧𑀦 𑀅𑀕𑁆𑀕𑀺𑀆𑀤𑀻𑀳𑀺 𑀯𑀺𑀦𑀲𑁆𑀲𑀢𑀺 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀣𑁂𑀭𑁄 𑀓𑀺𑀭 𑀫𑀸𑀢𑀼𑀉𑀧𑀸𑀲𑀺𑀓𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀉𑀧𑀸𑀲𑀺𑀓𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀸𑀧𑁂𑀲𑀺. 𑀣𑁂𑀭𑁄 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑀲𑀸𑀮𑀸𑀬 𑀅𑀕𑁆𑀕𑀺𑀦𑀸 𑀕𑀳𑀺𑀢𑀸𑀬 𑀲𑁂𑀲𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀕𑀸𑀫𑀯𑀸𑀲𑀺𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ¶ 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀮𑀲𑀲𑀫𑀡𑁄’’𑀢𑀺 𑀆𑀳𑀁𑀲𑀼. 𑀅𑀕𑁆𑀕𑀺 𑀢𑀺𑀡𑀯𑁂𑀡𑀼𑀓𑀝𑁆𑀞𑀸𑀦𑀺 𑀛𑀸𑀧𑁂𑀢𑁆𑀯𑀸 𑀣𑁂𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀖𑀝𑁂𑀳𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀼𑀝𑁆𑀞𑀸𑀬 𑀢𑁂 𑀤𑀺𑀲𑁆𑀯𑀸 ‘‘𑀧𑀸𑀓𑀝𑁄𑀫𑁆𑀳𑀺 𑀚𑀸𑀢𑁄’’𑀢𑀺 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀺𑀬𑀗𑁆𑀕𑀼𑀤𑀻𑀧𑀁 𑀅𑀕𑀫𑀸𑀲𑀺. 𑀇𑀤𑀁 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁 𑀦𑀸𑀫.

𑀬𑀁 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀁 𑀯𑀸, 𑀢𑀢𑁆𑀣 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀦𑀁 𑀭𑀓𑁆𑀔𑀢𑀺 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀯𑀺𑀬 ¶ . 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻’’𑀢𑀺.

𑁮𑁭𑁬. 𑀲𑀗𑁆𑀖𑀧𑀝𑀺𑀫𑀸𑀦𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀧𑀝𑀺𑀫𑀸𑀦𑀦𑀁 𑀉𑀤𑀺𑀓𑁆𑀔𑀦𑀁. 𑀬𑀸𑀯 𑀏𑀲𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀢𑀸𑀯 𑀲𑀗𑁆𑀖𑀓𑀫𑁆𑀫𑀲𑁆𑀲 𑀅𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀦 𑀧𑀝𑀺𑀫𑀸𑀦𑀦𑀁 𑀏𑀢𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀁, 𑀧𑀝𑀺𑀫𑀸𑀦𑀦𑀸𑀯𑀚𑁆𑀚𑀦𑀁 𑀧𑀦 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀢𑀲𑁆𑀫𑀸 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 ‘‘𑀲𑀘𑁂 𑀫𑀬𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀗𑁆𑀖𑁄 𑀉𑀢𑁆𑀢𑀺𑀓𑀫𑁆𑀫𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀸𑀯 𑀫𑀁 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀼𑀝𑁆𑀞𑀸𑀢𑀺𑀬𑁂𑀯.

𑀬𑁄 𑀧𑀦 𑀏𑀯𑀁 𑀦 𑀓𑀭𑁄𑀢𑀺, 𑀲𑀗𑁆𑀖𑁄 𑀘 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀓𑀼𑀳𑀺’’𑀦𑁆𑀢𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑁄 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑀺 ‘‘𑀕𑀘𑁆𑀙 𑀦𑀁 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦 𑀧𑀓𑁆𑀓𑁄𑀲𑀸𑀳𑀻’’𑀢𑀺. 𑀅𑀣𑀲𑁆𑀲 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀗𑁆𑀖𑁄 𑀢𑀁 𑀆𑀯𑀼𑀲𑁄 𑀧𑀝𑀺𑀫𑀸𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀁 𑀕𑀭𑀼𑀓𑀸 𑀳𑀺 𑀲𑀗𑁆𑀖𑀲𑁆𑀲 𑀆𑀡𑀸 𑀦𑀸𑀫. 𑀢𑀲𑁆𑀫𑀸 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀬𑀣𑀸 𑀲𑀬𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁.

𑁮𑁭𑁭. 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀦𑁆𑀢𑀺 𑀇𑀥𑀸𑀧𑀺 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀯𑀚𑁆𑀚𑀦𑀫𑁂𑀯 𑀇𑀫𑀲𑁆𑀲 𑀓𑀺𑀘𑁆𑀘𑀁. 𑀢𑀲𑁆𑀫𑀸 𑀢𑀫𑁆𑀧𑀺 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 ‘‘𑀲𑀘𑁂 𑀫𑀬𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀧𑀜𑁆𑀜𑀧𑁂𑀢𑀺, 𑀢𑀣𑀸𑀭𑀽𑀧𑀸𑀬 𑀯𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀸𑀯 𑀫𑀁 ¶ 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀼𑀝𑁆𑀞𑀸𑀢𑀺𑀬𑁂𑀯.

𑀬𑁄 𑀧𑀦 𑀏𑀯𑀁 𑀦 𑀓𑀭𑁄𑀢𑀺, 𑀲𑀢𑁆𑀣𑀸 𑀘 𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀓𑀼𑀳𑀺’’𑀦𑁆𑀢𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑀺 ‘‘𑀕𑀘𑁆𑀙 𑀦𑀁 𑀫𑀫 𑀯𑀘𑀦𑁂𑀦 𑀧𑀓𑁆𑀓𑁄𑀲𑀸’’𑀢𑀺. 𑀅𑀣𑀲𑁆𑀲 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑀁 𑀆𑀫𑀦𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀁 𑀕𑀭𑀼𑀓𑀁 𑀳𑀺 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁, 𑀢𑀲𑁆𑀫𑀸 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀬𑀣𑀸 𑀲𑀬𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁.

𑁮𑁭𑁮. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀚𑀻𑀯𑀺𑀢𑀤𑁆𑀥𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑁄. 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 𑀲𑀼𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 ‘‘𑀆𑀬𑀼𑀲𑀗𑁆𑀔𑀸𑀭𑀸 𑀲𑀢𑁆𑀢𑀸𑀳𑀁 ¶ 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺 𑀦 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀦𑀺𑀭𑀼𑀚𑁆𑀛𑀦𑀓𑁂 𑀆𑀬𑀼𑀲𑀗𑁆𑀔𑀸𑀭𑁂 𑀅𑀦𑀸𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀢𑀺, 𑀦𑀸𑀲𑁆𑀲 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀦𑁆𑀢𑁄𑀦𑀺𑀭𑁄𑀥𑁂 𑀫𑀭𑀡𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑁆𑀢𑀭𑀸𑀯 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀢𑀺. 𑀢𑀲𑁆𑀫𑀸 𑀏𑀢𑀁 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀳𑀺 𑀅𑀦𑀸𑀯𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀤𑀁 𑀧𑀦 𑀆𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁.

𑁮𑁭𑁯. 𑀲𑁄 𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀇𑀫𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀅𑀣𑁂𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺, 𑀦𑀺𑀭𑁄𑀥𑀁 𑀨𑀼𑀲𑀢𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺𑀘𑀺𑀢𑁆𑀢𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺? 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸. 𑀇𑀤𑀜𑁆𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀬𑀼𑀕𑀦𑀤𑁆𑀥𑁂 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀆𑀭𑁄𑀳𑀦𑀁 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑁄, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀦 𑀧𑀯𑀢𑁆𑀢𑀦𑁆𑀢𑀺.

𑀬𑁄 𑀧𑀦 𑀪𑀺𑀓𑁆𑀔𑀼 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀇𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀧𑀭𑀢𑁄 𑀅𑀘𑀺𑀢𑁆𑀢𑀓𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀫𑀕𑁆𑀕𑀁 𑀅𑀕𑀢𑀧𑀼𑀩𑁆𑀩𑀧𑀼𑀭𑀺𑀲𑀽𑀧𑀫𑀸 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀸 𑁋

𑀏𑀓𑁄 ¶ 𑀓𑀺𑀭 𑀧𑀼𑀭𑀺𑀲𑁄 𑀏𑀓𑀁 𑀫𑀕𑁆𑀕𑀁 𑀅𑀕𑀢𑀧𑀼𑀩𑁆𑀩𑁄 𑀅𑀦𑁆𑀢𑀭𑀸 𑀉𑀤𑀓𑀓𑀦𑁆𑀤𑀭𑀁 𑀯𑀸 𑀕𑀫𑁆𑀪𑀻𑀭𑀁 𑀉𑀤𑀓𑀘𑀺𑀓𑁆𑀔𑀮𑁆𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀧𑀺𑀢𑀁 𑀘𑀡𑁆𑀟𑀸𑀢𑀧𑀲𑀦𑁆𑀢𑀢𑁆𑀢𑀧𑀸𑀲𑀸𑀡𑀁 𑀯𑀸 𑀆𑀕𑀫𑁆𑀫 𑀢𑀁 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀅𑀲𑀡𑁆𑀞𑀧𑁂𑀢𑁆𑀯𑀸𑀯 𑀓𑀦𑁆𑀤𑀭𑀁 𑀑𑀭𑀽𑀴𑁆𑀳𑁄 𑀧𑀭𑀺𑀓𑁆𑀔𑀸𑀭𑀢𑁂𑀫𑀦𑀪𑀬𑁂𑀦 𑀧𑀼𑀦𑀤𑁂𑀯 𑀢𑀻𑀭𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀸𑀲𑀸𑀡𑀁 𑀅𑀓𑁆𑀓𑀫𑀺𑀢𑁆𑀯𑀸𑀧𑀺 𑀲𑀦𑁆𑀢𑀢𑁆𑀢𑀧𑀸𑀤𑁄 𑀧𑀼𑀦𑀤𑁂𑀯 𑀑𑀭𑀪𑀸𑀕𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀅𑀲𑀡𑁆𑀞𑀧𑀺𑀢𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀢𑁆𑀢𑀸 𑀓𑀦𑁆𑀤𑀭𑀁 𑀑𑀢𑀺𑀡𑁆𑀡𑀫𑀢𑁆𑀢𑁄𑀯, 𑀢𑀢𑁆𑀢𑀧𑀸𑀲𑀸𑀡𑀁 𑀅𑀓𑁆𑀓𑀦𑁆𑀢𑀫𑀢𑁆𑀢𑁄 𑀏𑀯 𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀭𑀢𑁄𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄𑀧𑀺 𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀫𑀢𑁆𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀧𑀢𑀺𑀝𑁆𑀞𑀸𑀢𑀺.

𑀬𑀣𑀸 𑀧𑀦 𑀧𑀼𑀩𑁆𑀩𑁂𑀧𑀺 𑀢𑀁 𑀫𑀕𑁆𑀕𑀁 𑀕𑀢𑀧𑀼𑀩𑁆𑀩𑀧𑀼𑀭𑀺𑀲𑁄 𑀢𑀁 𑀞𑀸𑀦𑀁 𑀆𑀕𑀫𑁆𑀫 𑀏𑀓𑀁 𑀲𑀸𑀝𑀓𑀁 𑀤𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀧𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀓𑀦𑁆𑀤𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀢𑀢𑁆𑀢𑀧𑀸𑀲𑀸𑀡𑀁 ¶ 𑀯𑀸 𑀅𑀓𑁆𑀓𑀦𑁆𑀢𑀫𑀢𑁆𑀢𑀓𑀫𑁂𑀯 𑀓𑀭𑀺𑀢𑁆𑀯𑀸 𑀧𑀭𑀢𑁄 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑁄 𑀪𑀺𑀓𑁆𑀔𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀧𑀭𑀢𑁄 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀭𑁄𑀥𑀁 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺.

𑁮𑁮𑁦. 𑀓𑀣𑀁 𑀞𑀸𑀦𑀦𑁆𑀢𑀺 𑀏𑀯𑀁 𑀲𑀫𑀸𑀧𑀦𑁆𑀦𑀸𑀬 𑀧𑀦𑀲𑁆𑀲𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀅𑀦𑁆𑀢𑀭𑀸𑀆𑀬𑀼𑀓𑁆𑀔𑀬𑀲𑀗𑁆𑀖𑀧𑀝𑀺𑀫𑀸𑀦𑀦𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀪𑀸𑀯𑁂𑀦 𑀘 𑀞𑀸𑀦𑀁 𑀳𑁄𑀢𑀺.

𑁮𑁮𑁧. 𑀓𑀣𑀁 𑀯𑀼𑀝𑁆𑀞𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁄 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀏𑀯𑀁 𑀤𑁆𑀯𑁂𑀥𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺.

𑁮𑁮𑁨. 𑀯𑀼𑀝𑁆𑀞𑀺𑀢𑀲𑁆𑀲 𑀓𑀺𑀁𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼𑀦𑁄 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁪).

𑁮𑁮𑁩. 𑀫𑀢𑀲𑁆𑀲 𑀘 𑀲𑀫𑀸𑀧𑀦𑁆𑀦𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸𑀳 𑁋 ‘‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸… 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀪𑀺𑀦𑁆𑀦𑀸𑀦𑀺. 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲𑀧𑀺 𑀓𑀸𑀬𑀲𑀗𑁆𑀔𑀸𑀭𑀸 ¶ 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸… 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀅𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀅𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀭𑀺𑀪𑀺𑀦𑁆𑀦𑀸𑀦𑀻’’𑀢𑀺 (𑀫. 𑀦𑀺. 𑁧.𑁪𑁫𑁭).

𑁮𑁮𑁪. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀗𑁆𑀔𑀢𑀸𑀢𑀺𑀆𑀤𑀺𑀧𑀼𑀘𑁆𑀙𑀸𑀬𑀁 𑀧𑀦 𑀲𑀗𑁆𑀔𑀢𑀸𑀢𑀺𑀧𑀺 𑀅𑀲𑀗𑁆𑀔𑀢𑀸𑀢𑀺𑀧𑀺 𑀮𑁄𑀓𑀺𑀬𑀸𑀢𑀺𑀧𑀺 𑀮𑁄𑀓𑀼𑀢𑁆𑀢𑀭𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀲𑀪𑀸𑀯𑀢𑁄 𑀦𑀢𑁆𑀣𑀺𑀢𑀸𑀬. 𑀬𑀲𑁆𑀫𑀸 𑀧𑀦𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦 𑀲𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀨𑀦𑁆𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦𑁄 𑀅𑀦𑀺𑀧𑁆𑀨𑀦𑁆𑀦𑀸.

𑀇𑀢𑀺 𑀲𑀦𑁆𑀢𑀁 𑀲𑀫𑀸𑀧𑀢𑁆𑀢𑀺𑀁, 𑀇𑀫𑀁 𑀅𑀭𑀺𑀬𑀦𑀺𑀲𑁂𑀯𑀺𑀢𑀁;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀫𑀺𑀢𑀺𑀲𑀗𑁆𑀔𑀁 𑀉𑀧𑀸𑀕𑀢𑀁;

𑀪𑀸𑀯𑁂𑀢𑁆𑀯𑀸 𑀅𑀭𑀺𑀬𑀁 𑀧𑀜𑁆𑀜𑀁, 𑀲𑀫𑀸𑀧𑀚𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀬𑀲𑁆𑀫𑀸 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀲𑀫𑀢𑁆𑀣𑀢𑀸;

𑀅𑀭𑀺𑀬𑀫𑀕𑁆𑀕𑁂𑀲𑀼 𑀧𑀜𑁆𑀜𑀸𑀬, 𑀆𑀦𑀺𑀲𑀁𑀲𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀓𑀣𑀸

𑁮𑁮𑁫. 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀻𑀢𑀺 ¶ 𑀦 𑀓𑁂𑀯𑀮𑀜𑁆𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀯, 𑀅𑀬𑀁 𑀧𑀦 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀧𑀺 𑀇𑀫𑀺𑀲𑁆𑀲𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀳𑀺 𑀘𑀢𑀼𑀩𑁆𑀩𑀺𑀥𑀸𑀬𑀧𑀺 𑀏𑀢𑀺𑀲𑁆𑀲𑀸 𑀪𑀸𑀯𑀺𑀢𑀢𑁆𑀢𑀸 𑀪𑀸𑀯𑀺𑀢𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀻𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

𑁮𑁮𑁬. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀧𑀞𑀫𑀫𑀕𑁆𑀕𑀧𑀜𑁆𑀜𑀁 𑀢𑀸𑀯 𑀪𑀸𑀯𑁂𑀢𑁆𑀯𑀸 𑀫𑀦𑁆𑀤𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺, 𑀲𑀢𑁆𑀢𑀲𑀼𑀕𑀢𑀺𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀫𑀚𑁆𑀛𑀺𑀫𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑁄 𑀓𑁄𑀮𑀁𑀓𑁄𑀮𑁄 𑀦𑀸𑀫 𑀳𑁄𑀢𑀺, 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 ¶ 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺, 𑀏𑀓𑀜𑁆𑀜𑁂𑀯 𑀫𑀸𑀦𑀼𑀲𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑁮𑁮𑁭. 𑀤𑀼𑀢𑀺𑀬𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑁮𑁮𑁮. 𑀢𑀢𑀺𑀬𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺. 𑀲𑁄 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀯𑀲𑁂𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘𑀥𑀸. 𑀇𑀥 𑀯𑀺𑀳𑀸𑀬𑀦𑀺𑀝𑁆𑀞𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀼𑀤𑁆𑀥𑀸𑀯𑀸𑀲𑀪𑀯𑁂 𑀉𑀧𑀧𑀚𑁆𑀚𑀺𑀢𑁆𑀯𑀸 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀉𑀧𑀭𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀉𑀧𑀭𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀬𑀢𑁆𑀣𑀼𑀧𑀧𑀦𑁆𑀦𑁄, 𑀢𑀢𑁄 𑀉𑀤𑁆𑀥𑀁 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀸 𑀆𑀭𑀼𑀬𑁆𑀳 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑁮𑁮𑁯. 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀓𑁄𑀘𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀢𑁂𑀯𑀺𑀚𑁆𑀚𑁄, 𑀓𑁄𑀘𑀺 𑀙𑀴𑀪𑀺𑀜𑁆𑀜𑁄, 𑀓𑁄𑀘𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀪𑁂𑀤𑀧𑁆𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀓𑁆𑀔𑀡𑁂 𑀧𑀦𑁂𑀲 𑀢𑀁 𑀚𑀝𑀁 𑀯𑀺𑀚𑀝𑁂𑀢𑀺 𑀦𑀸𑀫 ¶ . 𑀨𑀮𑀓𑁆𑀔𑀡𑁂 𑀯𑀺𑀚𑀝𑀺𑀢𑀚𑀝𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀻’’𑀢𑀺.

𑀏𑀯𑀁 𑀅𑀦𑁂𑀓𑀸𑀦𑀺𑀲𑀁𑀲𑀸, 𑀅𑀭𑀺𑀬𑀧𑀜𑁆𑀜𑀸𑀬 𑀪𑀸𑀯𑀦𑀸;

𑀬𑀲𑁆𑀫𑀸 𑀢𑀲𑁆𑀫𑀸 𑀓𑀭𑁂𑀬𑁆𑀬𑀸𑀣, 𑀭𑀢𑀺𑀁 𑀢𑀢𑁆𑀣 𑀯𑀺𑀘𑀓𑁆𑀔𑀡𑁄.

𑁮𑁯𑁦. 𑀏𑀢𑁆𑀢𑀸𑀯𑀢𑀸 𑀘 𑁋

𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀦𑁆𑀢𑀺. 𑁋

𑀇𑀫𑀺𑀲𑁆𑀲𑀸 ¶ 𑀕𑀸𑀣𑀸𑀬 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦 𑀤𑁂𑀲𑀺𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀸𑀦𑀺𑀲𑀁𑀲𑀸 𑀧𑀜𑁆𑀜𑀸𑀪𑀸𑀯𑀦𑀸 𑀧𑀭𑀺𑀤𑀻𑀧𑀺𑀢𑀸 𑀳𑁄𑀢𑀻𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀕𑀫𑀦𑀓𑀣𑀸

𑁮𑁯𑁧. 𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀯𑁄𑀘𑀼𑀫𑁆𑀳 𑁋

‘‘𑀇𑀫𑀺𑀲𑁆𑀲𑀸 𑀤𑀸𑀦𑀺 𑀕𑀸𑀣𑀸𑀬, 𑀓𑀣𑀺𑀢𑀸𑀬 𑀫𑀳𑁂𑀲𑀺𑀦𑀸;

𑀯𑀡𑁆𑀡𑀬𑀦𑁆𑀢𑁄 𑀬𑀣𑀸𑀪𑀽𑀢𑀁, 𑀅𑀢𑁆𑀣𑀁 𑀲𑀻𑀮𑀸𑀤𑀺𑀪𑁂𑀤𑀦𑀁.

‘‘𑀲𑀼𑀤𑀼𑀮𑁆𑀮𑀪𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑁆𑀚𑀁 𑀚𑀺𑀦𑀲𑀸𑀲𑀦𑁂;

𑀲𑀻𑀮𑀸𑀤𑀺𑀲𑀗𑁆𑀕𑀳𑀁 𑀔𑁂𑀫𑀁, 𑀉𑀚𑀼𑀁 𑀫𑀕𑁆𑀕𑀁 𑀯𑀺𑀲𑀼𑀤𑁆𑀥𑀺𑀬𑀸.

‘‘𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸, 𑀲𑀼𑀤𑁆𑀥𑀺𑀓𑀸𑀫𑀸𑀧𑀺 𑀬𑁂 𑀇𑀥;

𑀯𑀺𑀲𑀼𑀤𑁆𑀥𑀺𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀯𑀸𑀬𑀫𑀦𑁆𑀢𑀸𑀧𑀺 𑀬𑁄𑀕𑀺𑀦𑁄.

‘‘𑀢𑁂𑀲𑀁 ¶ 𑀧𑀸𑀫𑁄𑀚𑁆𑀚𑀓𑀭𑀡𑀁, 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀁.

‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲𑀁, 𑀢𑀁 𑀫𑁂 𑀲𑀓𑁆𑀓𑀘𑁆𑀘 𑀪𑀸𑀲𑀢𑁄;

𑀯𑀺𑀲𑀼𑀤𑁆𑀥𑀺𑀓𑀸𑀫𑀸 𑀲𑀩𑁆𑀩𑁂𑀧𑀺, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄’’𑀢𑀺.

𑀲𑁆𑀯𑀸𑀬𑀁 𑀪𑀸𑀲𑀺𑀢𑁄 𑀳𑁄𑀢𑀺.

𑁮𑁯𑁨. 𑀢𑀢𑁆𑀣 𑀘 𑁋

𑀢𑁂𑀲𑀁 𑀲𑀻𑀮𑀸𑀤𑀺𑀪𑁂𑀤𑀸𑀦𑀁, 𑀅𑀢𑁆𑀣𑀸𑀦𑀁 𑀬𑁄 𑀯𑀺𑀦𑀺𑀘𑁆𑀙𑀬𑁄;

𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀺𑀓𑀸𑀬𑀸𑀦𑀁, 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀦𑀬𑁂.

𑀲𑀫𑀸𑀳𑀭𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀬𑁂𑀪𑀼𑀬𑁆𑀬𑁂𑀦 𑀲𑀦𑀺𑀘𑁆𑀙𑀬𑁄;

𑀲𑀩𑁆𑀩𑀲𑀗𑁆𑀓𑀭𑀤𑁄𑀲𑁂𑀳𑀺, 𑀫𑀼𑀢𑁆𑀢𑁄 𑀬𑀲𑁆𑀫𑀸 𑀧𑀓𑀸𑀲𑀺𑀢𑁄.

𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀓𑀸𑀫𑁂𑀳𑀺, 𑀲𑀼𑀤𑁆𑀥𑀧𑀜𑁆𑀜𑁂𑀳𑀺 𑀬𑁄𑀕𑀺𑀳𑀺;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀏𑀢𑀲𑁆𑀫𑀺𑀁, 𑀓𑀭𑀡𑀻𑀬𑁄𑀯 𑀆𑀤𑀭𑁄𑀢𑀺.

𑁮𑁯𑁩.

𑀯𑀺𑀪𑀚𑁆𑀚𑀯𑀸𑀤𑀺𑀲𑁂𑀝𑁆𑀞𑀸𑀦𑀁 ¶ , 𑀣𑁂𑀭𑀺𑀬𑀸𑀦𑀁 𑀬𑀲𑀲𑁆𑀲𑀺𑀦𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀁𑀲𑀚𑀲𑁆𑀲 𑀯𑀺𑀪𑀸𑀯𑀺𑀦𑁄.

𑀪𑀤𑀦𑁆𑀢𑀲𑀗𑁆𑀖𑀧𑀸𑀮𑀲𑁆𑀲, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄;

𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑀲𑁆𑀲, 𑀬𑀼𑀢𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀁.

𑀔𑀦𑁆𑀢𑀺𑀲𑁄𑀭𑀘𑁆𑀘𑀫𑁂𑀢𑁆𑀢𑀸𑀤𑀺-𑀕𑀼𑀡𑀪𑀽𑀲𑀺𑀢𑀘𑁂𑀢𑀲𑁄;

𑀅𑀚𑁆𑀛𑁂𑀲𑀦𑀁 𑀕𑀳𑁂𑀢𑁆𑀯𑀸𑀦, 𑀓𑀭𑁄𑀦𑁆𑀢𑁂𑀦 𑀇𑀫𑀁 𑀫𑀬𑀸.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦 ¶ , 𑀬𑁄 𑀧𑀢𑁆𑀢𑁄 𑀧𑀼𑀜𑁆𑀜𑀲𑀜𑁆𑀘𑀬𑁄;

𑀢𑀲𑁆𑀲 𑀢𑁂𑀚𑁂𑀦 𑀲𑀩𑁆𑀩𑁂𑀧𑀺, 𑀲𑀼𑀔𑀫𑁂𑀥𑀦𑁆𑀢𑀼 𑀧𑀸𑀡𑀺𑀦𑁄.

𑁮𑁯𑁪.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀏𑀲𑁄 𑀘, 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀇𑀥;

𑀦𑀺𑀝𑁆𑀞𑀺𑀢𑁄 𑀅𑀝𑁆𑀞𑀧𑀜𑁆𑀜𑀸𑀲-𑀪𑀸𑀡𑀯𑀸𑀭𑀸𑀬 𑀧𑀸𑀴𑀺𑀬𑀸.

𑀬𑀣𑀸 𑀢𑀣𑁂𑀯 𑀮𑁄𑀓𑀲𑁆𑀲, 𑀲𑀩𑁆𑀩𑁂 𑀓𑀮𑁆𑀬𑀸𑀡𑀦𑀺𑀲𑁆𑀲𑀺𑀢𑀸;

𑀅𑀦𑀦𑁆𑀢𑀭𑀸𑀬𑀸 𑀇𑀚𑁆𑀛𑀦𑁆𑀢𑀼, 𑀲𑀻𑀖𑀁 𑀲𑀻𑀖𑀁 𑀫𑀦𑁄𑀭𑀣𑀸𑀢𑀺.

𑁮𑁯𑁫. 𑀧𑀭𑀫 𑀯𑀺𑀲𑀼𑀤𑁆𑀥 𑀲𑀤𑁆𑀥𑀸 𑀩𑀼𑀤𑁆𑀥𑀺 𑀯𑀻𑀭𑀺𑀬 𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯 𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬 𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺 𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀧𑁆𑀧𑀝𑀺𑀳𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀫𑀼𑀤𑀦𑁆𑀢𑀔𑁂𑀤𑀓𑀯𑀢𑁆𑀢𑀩𑁆𑀩𑁂𑀦 𑀓𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀦𑀸𑀫.

𑁮𑁯𑁬.

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀻𑀮𑀸𑀤𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 ¶ 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀣𑀸,

𑀧𑀸𑀴𑀺𑀕𑀡𑀦𑀸𑀬 𑀧𑀦 𑀲𑀸 𑀅𑀝𑁆𑀞𑀧𑀜𑁆𑀜𑀸𑀲𑀪𑀸𑀡𑀯𑀸𑀭𑀸 𑀳𑁄𑀢𑀻𑀢𑀺.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.