📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀲𑀼𑀤𑁆𑀥𑀺𑀫𑀕𑁆𑀕-𑀫𑀳𑀸𑀝𑀻𑀓𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀲𑀤𑁆𑀥𑀫𑁆𑀫𑀭𑀁𑀲𑀺𑀫𑀸𑀮𑀻 ¶ ¶ 𑀬𑁄, 𑀯𑀺𑀦𑁂𑀬𑁆𑀬𑀓𑀫𑀮𑀸𑀓𑀭𑁂;

𑀯𑀺𑀩𑁄𑀥𑁂𑀲𑀺 𑀫𑀳𑀸𑀫𑁄𑀳-𑀢𑀫𑀁 𑀳𑀦𑁆𑀢𑁆𑀯𑀸𑀦 𑀲𑀩𑁆𑀩𑀲𑁄.

𑀜𑀸𑀡𑀸𑀢𑀺𑀲𑀬𑀩𑀺𑀫𑁆𑀩𑀁 𑀢𑀁, 𑀯𑀺𑀲𑀼𑀤𑁆𑀥𑀓𑀭𑀼𑀡𑀸𑀭𑀼𑀡𑀁;

𑀯𑀦𑁆𑀤𑀺𑀢𑁆𑀯𑀸 𑀦𑀺𑀭𑀼𑀧𑀓𑁆𑀮𑁂𑀲𑀁, 𑀩𑀼𑀤𑁆𑀥𑀸𑀤𑀺𑀘𑁆𑀘𑀁 𑀫𑀳𑁄𑀤𑀬𑀁.

𑀮𑁄𑀓𑀸𑀮𑁄𑀓𑀓𑀭𑀁 𑀥𑀫𑁆𑀫𑀁, 𑀕𑀼𑀡𑀭𑀲𑁆𑀫𑀺𑀲𑀫𑀼𑀚𑁆𑀚𑀮𑀁;

𑀅𑀭𑀺𑀬𑀲𑀗𑁆𑀖𑀜𑁆𑀘 𑀲𑀫𑁆𑀨𑀼𑀮𑁆𑀮𑀁, 𑀯𑀺𑀲𑀼𑀤𑁆𑀥𑀓𑀫𑀮𑀸𑀓𑀭𑀁.

𑀯𑀦𑁆𑀤𑀦𑀸𑀚𑀦𑀺𑀢𑀁 ¶ 𑀧𑀼𑀜𑁆𑀜𑀁, 𑀇𑀢𑀺 𑀬𑀁 𑀭𑀢𑀦𑀢𑁆𑀢𑀬𑁂;

𑀳𑀢𑀦𑁆𑀢𑀭𑀸𑀬𑁄 𑀲𑀩𑁆𑀩𑀢𑁆𑀣, 𑀳𑀼𑀢𑁆𑀯𑀸𑀳𑀁 𑀢𑀲𑁆𑀲 𑀢𑁂𑀚𑀲𑀸.

𑀲𑀫𑁆𑀧𑀦𑁆𑀦𑀲𑀻𑀮𑀸𑀘𑀸𑀭𑁂𑀦, 𑀥𑀻𑀫𑀢𑀸 𑀲𑀼𑀘𑀺𑀯𑀼𑀢𑁆𑀢𑀺𑀦𑀸;

𑀅𑀚𑁆𑀛𑁂𑀲𑀺𑀢𑁄 𑀤𑀸𑀞𑀸𑀦𑀸𑀕𑀢𑁆𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸.

𑀯𑀺𑀲𑀼𑀤𑁆𑀥𑀘𑀭𑀺𑀢𑁄 𑀦𑀸𑀣𑁄, 𑀬𑀁 𑀯𑀺𑀲𑀼𑀤𑁆𑀥𑀺𑀫𑀦𑀼𑀢𑁆𑀢𑀭𑀁;

𑀧𑀢𑁆𑀯𑀸 𑀤𑁂𑀲𑁂𑀲𑀺 𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄.

𑀢𑀲𑁆𑀲𑀸 𑀅𑀥𑀺𑀕𑀫𑀽𑀧𑀸𑀬𑁄, 𑀯𑀺𑀲𑀼𑀤𑁆𑀥𑀦𑀬𑀫𑀡𑁆𑀟𑀺𑀢𑁄;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑁄 𑀯𑀼𑀢𑁆𑀢𑁄, 𑀲𑀼𑀯𑀺𑀲𑀼𑀤𑁆𑀥𑀧𑀤𑀓𑁆𑀓𑀫𑁄.

𑀲𑀼𑀯𑀺𑀲𑀼𑀤𑁆𑀥𑀁 𑀅𑀲𑀁𑀓𑀺𑀡𑁆𑀡𑀁, 𑀦𑀺𑀧𑀼𑀡𑀢𑁆𑀣𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀲𑀫𑀬𑀁 𑀅𑀯𑀺𑀮𑁄𑀫𑀬𑀁.

𑀢𑀲𑁆𑀲 ¶ 𑀦𑀺𑀲𑁆𑀲𑀸𑀬 𑀧𑁄𑀭𑀸𑀡𑀁, 𑀓𑀣𑀸𑀫𑀕𑁆𑀕𑀁 𑀅𑀦𑀸𑀓𑀼𑀮𑀁;

𑀢𑀦𑁆𑀢𑀺𑀦𑀬𑀸𑀦𑀼𑀕𑀁 𑀲𑀼𑀤𑁆𑀥𑀁, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀇𑀢𑀺 𑀆𑀓𑀗𑁆𑀔𑀫𑀸𑀦𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀁;

𑀯𑀺𑀪𑀚𑀦𑁆𑀢𑀲𑁆𑀲 𑀢𑀲𑁆𑀲𑀢𑁆𑀣𑀁, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄𑀢𑀺.

𑀦𑀺𑀤𑀸𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀲𑁆𑀯𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑀁 𑀲𑀼𑀢𑁆𑀢𑀧𑀤𑀁 𑀦𑀺𑀲𑁆𑀲𑀸𑀬 𑀧𑀝𑁆𑀞𑀧𑀻𑀬𑀢𑀺, 𑀢𑀁 𑀢𑀸𑀯 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀦𑀺𑀤𑀸𑀦𑀸𑀤𑀺𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀥𑀫𑁆𑀫𑀁 𑀲𑀁𑀯𑀡𑁆𑀡𑁂𑀦𑁆𑀢𑁂𑀦 𑀳𑀺 𑀆𑀤𑀺𑀢𑁄 𑀢𑀲𑁆𑀲 𑀦𑀺𑀤𑀸𑀦𑀁 𑀯𑀢𑁆𑀢𑀩𑁆𑀩𑀁, 𑀢𑀢𑁄 𑀧𑀬𑁄𑀚𑀦𑀁 𑀧𑀺𑀡𑁆𑀟𑀢𑁆𑀣𑁄 𑀧𑀤𑀢𑁆𑀣𑁄 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑀸𑀬𑁄 𑀘𑁄𑀤𑀦𑀸 𑀲𑁄𑀥𑀦𑀁 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀘𑁂𑀯 𑀆𑀘𑀭𑀺𑀬𑁂𑀦 𑀧𑀝𑀺𑀧𑀦𑁆𑀦𑀁. 𑀏𑀢𑁆𑀣 𑀳𑀺 𑀪𑀕𑀯𑀦𑁆𑀢𑀁 𑀓𑀺𑀭𑀸𑀢𑀺𑀆𑀤𑀺 𑀤𑁂𑀲𑀦𑀸𑀬 𑀦𑀺𑀤𑀸𑀦𑀧𑀬𑁄𑀚𑀦𑀦𑀺𑀤𑁆𑀥𑀸𑀭𑀡𑀁, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲𑀦𑁆𑀢𑀺𑀆𑀤𑀺 𑀧𑀺𑀡𑁆𑀟𑀢𑁆𑀣𑀦𑀺𑀤𑁆𑀥𑀸𑀭𑀡𑀁 ¶ , 𑀲𑀻𑀮𑁂 𑀞𑀢𑁆𑀯𑀸𑀢𑀺𑀆𑀤𑀺 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑀸𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀸, 𑀓𑀺𑀁 𑀲𑀻𑀮𑀦𑁆𑀢𑀺𑀆𑀤𑀺 𑀘𑁄𑀤𑀦𑀸, 𑀢𑀢𑁄 𑀧𑀭𑀁 𑀲𑁄𑀥𑀦𑀁, 𑀲𑀫𑀸𑀥𑀺𑀧𑀜𑁆𑀜𑀸𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀆𑀤𑀺𑀫𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀸, 𑀦 𑀧𑀼𑀘𑁆𑀙𑀸𑀕𑀸𑀣𑀸. 𑀧𑀼𑀘𑁆𑀙𑀸𑀧𑀼𑀩𑁆𑀩𑀺𑀓𑀸 𑀳𑀺 𑀯𑀺𑀲𑁆𑀲𑀚𑁆𑀚𑀦𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀤𑀢𑁆𑀣𑀲𑁆𑀲 𑀫𑀗𑁆𑀕𑀮𑀪𑀸𑀯𑀢𑁄, 𑀲𑀸𑀲𑀦𑀲𑁆𑀲 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑀯𑀺𑀪𑀸𑀯𑀦𑀢𑁄, 𑀪𑀬𑀸𑀤𑀺𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑁂𑀦 𑀅𑀦𑁆𑀢𑀭𑀸𑀬𑀯𑀺𑀥𑀫𑀦𑀢𑁄, 𑀉𑀧𑀭𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑀗𑁆𑀕𑀳𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀣𑀸 𑀯𑀢𑁆𑀣𑀼𑀧𑀼𑀩𑁆𑀩𑀺𑀓𑀸 𑀆𑀭𑀤𑁆𑀥𑀸, 𑀦 𑀲𑀢𑁆𑀣𑀼𑀣𑁄𑀫𑀦𑀸𑀧𑀼𑀩𑁆𑀩𑀺𑀓𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑀺𑀲𑀼𑀁 𑀅𑀲𑀁𑀯𑀡𑁆𑀡𑀦𑀸𑀤𑀺𑀪𑀸𑀯𑀢𑁄. 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀳𑀺 𑀤𑀻𑀖𑀦𑀺𑀓𑀸𑀬𑀸𑀤𑀻𑀦𑀁 𑀦𑀸𑀬𑀁 𑀯𑀺𑀲𑀼𑀁 𑀲𑀁𑀯𑀡𑁆𑀡𑀦𑀸, 𑀦 𑀧𑀓𑀭𑀡𑀦𑁆𑀢𑀭𑀁 𑀯𑀸 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀼𑀫𑀢𑀸𑀯𑀢𑀸𑀭𑀸𑀤𑀺 𑀯𑀺𑀬. 𑀢𑀸𑀲𑀁𑀬𑁂𑀯 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀻𑀦𑀁 𑀯𑀺𑀲𑁂𑀲𑀪𑀽𑀢𑀸. 𑀢𑁂𑀦𑁂𑀯𑀸𑀳 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀫. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁧.𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸). 𑀅𑀣 𑀯𑀸 𑀣𑁄𑀫𑀦𑀸𑀧𑀼𑀩𑁆𑀩𑀺𑀓𑀸𑀧𑀺 𑀘𑀸𑀬𑀁 𑀓𑀣𑀸 𑀦 𑀯𑀢𑁆𑀣𑀼𑀧𑀼𑀩𑁆𑀩𑀺𑀓𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀲𑀦𑁂 𑀳𑀺 𑀯𑀢𑁆𑀣𑀼𑀓𑀺𑀢𑁆𑀢𑀦𑀁 𑀦 𑀮𑁄𑀓𑁂 𑀯𑀺𑀬 𑀓𑁂𑀯𑀮𑀁 𑀳𑁄𑀢𑀺, 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀢𑁆𑀢𑀸 𑀧𑀦 𑀲𑀢𑁆𑀣𑀼 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸𑀪𑀸𑀯𑀯𑀺𑀪𑀸𑀯𑀦𑁂𑀦 𑀲𑀢𑁆𑀣𑀼𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀉𑀮𑁆𑀮𑀺𑀗𑁆𑀕𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀢𑁆𑀢𑀸𑀯𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸’’𑀢𑀺𑀆𑀤𑀺. 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀲𑁆𑀲 𑀘 𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀳𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 ¶ 𑀯𑀺𑀬 𑀲𑀩𑁆𑀩𑁂𑀧𑀺 𑀅𑀭𑀳𑀦𑁆𑀢𑁄 𑀲𑀗𑁆𑀕𑀬𑁆𑀳𑀦𑁆𑀢𑀺 𑀯𑀺𑀪𑀸𑀕𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀢𑁂𑀦 𑀢𑀺𑀡𑁆𑀡𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀻𑀮𑀸𑀤𑀬𑁄 𑀇𑀥 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀺𑀡𑁆𑀡𑀫𑁆𑀧𑀺 𑀳𑀺 𑀦𑁂𑀲𑀁 𑀘𑀭𑀺𑀫𑀪𑀯𑁂 𑀯𑀺𑀲𑁂𑀲𑀢𑁄 𑀲𑀁𑀲𑀸𑀭𑀪𑀬𑀺𑀓𑁆𑀔𑀡𑀁, 𑀬𑀣𑀸𑀲𑀓𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀧𑀝𑀺𑀧𑀢𑁆𑀢𑀺 𑀘 𑀲𑀫𑀸𑀦𑀸𑀢𑀺. 𑀅𑀣 𑀯𑀸 ‘‘𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 𑀲𑀸𑀥𑀸𑀭𑀡𑀯𑀘𑀦𑁂𑀦 𑀲𑀸𑀢𑀺𑀲𑀬𑀁, 𑀦𑀺𑀭𑀢𑀺𑀲𑀬𑀜𑁆𑀘 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀁 𑀕𑀳𑀺𑀢𑀁. 𑀢𑀢𑁆𑀣 𑀬𑀁 𑀦𑀺𑀭𑀢𑀺𑀲𑀬𑀁 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑀸𑀬. 𑀢𑁂𑀦 𑀲𑀢𑁆𑀣𑀼 𑀧𑀳𑀸𑀦𑀲𑀫𑁆𑀧𑀤𑀸 𑀓𑀺𑀢𑁆𑀢𑀺𑀢𑀸 𑀳𑁄𑀢𑀺, 𑀢𑀦𑁆𑀦𑀺𑀫𑀺𑀢𑁆𑀢𑀸 𑀜𑀸𑀡𑀲𑀫𑁆𑀧𑀤𑀸 𑀘. 𑀢𑀤𑀼𑀪𑀬𑁂𑀦 𑀦𑀸𑀦𑀦𑁆𑀢𑀭𑀺𑀓𑀢𑀸𑀬 𑀆𑀦𑀼𑀪𑀸𑀯𑀲𑀫𑁆𑀧𑀤𑀸𑀤𑀬𑁄𑀧𑀻𑀢𑀺. 𑀏𑀯𑀫𑁆𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀺𑀓𑀸𑀬𑀁 𑀓𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀣𑁄𑀫𑀦𑀸𑀧𑀼𑀩𑁆𑀩𑀺𑀓𑀸 𑀏𑀯𑀸𑀬𑀁 𑀓𑀣𑀸𑀢𑀺 𑀤𑀝𑁆𑀞𑀩𑁆𑀩𑀁, ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄’’𑀢𑀺𑀆𑀤𑀺𑀦𑀸 𑀲𑀢𑁆𑀣𑀼 𑀣𑁄𑀫𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀬 𑀆𑀭𑀤𑁆𑀥𑀢𑁆𑀢𑀸. 𑀲𑀸 𑀧𑀦𑀸𑀬𑀁 𑀬𑀲𑁆𑀫𑀸 𑀧𑀼𑀘𑁆𑀙𑀦𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀢𑀸𑀬 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀆𑀘𑀺𑀡𑁆𑀡𑀜𑁆𑀘𑁂𑀢𑀁 𑀆𑀘𑀭𑀺𑀬𑀲𑁆𑀲 𑀬𑀤𑀺𑀤𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀸𑀦𑀼𑀓𑀽𑀮𑀁 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀲𑀢𑁆𑀣𑀼 𑀅𑀪𑀺𑀢𑁆𑀣𑀯𑀦𑀁. 𑀢𑀲𑁆𑀫𑀸 ¶ 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀯𑀫𑁂𑀢𑁆𑀣 𑀣𑁄𑀫𑀦𑀸 𑀧𑀯𑀢𑁆𑀢𑀺𑀢𑀸𑀢𑀺. 𑀣𑁄𑀫𑀦𑀸𑀓𑀸𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀲𑁆𑀲 𑀓𑀸𑀭𑀡𑀁 𑀉𑀤𑁆𑀥𑀭𑀦𑁆𑀢𑁂𑀦 𑀧𑀞𑀫𑀁 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑀸 𑀦𑀺𑀤𑀸𑀦𑀘𑁄𑀤𑀦𑀸𑀫𑀼𑀔𑁂𑀦 𑀧𑀼𑀘𑁆𑀙𑀸𑀕𑀸𑀣𑀁 𑀲𑀭𑀽𑀧𑀢𑁄 𑀘 𑀅𑀢𑁆𑀣𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀅𑀯𑀺𑀧𑀭𑀻𑀢𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀪𑀸𑀯𑀸𑀯𑀚𑁄𑀢𑀦𑀁 𑀪𑀕𑀯𑀢𑁄 𑀣𑁄𑀫𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀥𑀫𑁆𑀫𑀲𑀁𑀯𑀡𑁆𑀡𑀦𑀸 𑀓𑀢𑀸. 𑀢𑁂𑀦𑀸𑀳 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀕𑀸𑀣𑀸𑀬 𑀅𑀢𑁆𑀣𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀇𑀢𑀻𑀢𑀺𑀆𑀤𑀻𑀲𑀼 𑀇𑀢𑀻𑀢𑀺 𑀅𑀬𑀁 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼 𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑀧𑀓𑀸𑀭𑀸𑀯𑀥𑀸𑀭𑀡𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁭𑁯) 𑀳𑁂𑀢𑀼𑀫𑁆𑀳𑀺 𑀆𑀕𑀢𑁄. ‘‘𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀧𑀭𑀺𑀲𑀫𑀸𑀧𑀦𑁂. ‘‘𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁯𑁭) 𑀆𑀤𑀺𑀅𑀢𑁆𑀣𑁂. ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 ¶ 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁭𑁩, 𑁭𑁫) 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂. ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁪) 𑀧𑀓𑀸𑀭𑁂. ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁, 𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁯𑁬) 𑀅𑀯𑀥𑀸𑀭𑀡𑁂, 𑀲𑀦𑁆𑀦𑀺𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀦𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀦𑀺𑀤𑀲𑁆𑀲𑀦𑁂. 𑀇𑀥𑀸𑀧𑀺 𑀦𑀺𑀤𑀲𑁆𑀲𑀦𑁂 𑀤𑀝𑁆𑀞𑀩𑁆𑀩𑁄, 𑀧𑀓𑀸𑀭𑁂𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑁂𑀯. 𑀧𑀞𑀫𑁄 𑀧𑀦 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂 𑀤𑀝𑁆𑀞𑀩𑁆𑀩𑁄. 𑀳𑀻𑀢𑀺 𑀅𑀯𑀥𑀸𑀭𑀡𑁂. 𑀇𑀤𑀦𑁆𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀘𑀦𑀁 𑀬𑀣𑀸𑀥𑀺𑀕𑀢𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀪𑀺𑀫𑀼𑀔𑀻𑀓𑀭𑀡𑀢𑁄.

𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀯𑀼𑀢𑁆𑀢-𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄, 𑀅𑀦𑀼𑀧𑀲𑀕𑁆𑀕𑁄 𑀘 𑀯𑀧𑁆𑀧𑀦𑀯𑀸𑀧𑀲𑀫𑀻𑀓𑀭𑀡𑀓𑁂𑀲𑁄𑀳𑀸𑀭𑀡𑀚𑀻𑀯𑀺𑀢𑀯𑀼𑀢𑁆𑀢𑀺𑀧𑀫𑀼𑀢𑁆𑀢𑀪𑀸𑀯𑀧𑀸𑀯𑀘𑀦𑀧𑀯𑀢𑁆𑀢𑀺𑀢𑀅𑀚𑁆𑀛𑁂𑀲𑀦𑀓𑀣𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀅𑀬𑀁 𑁋

‘‘𑀕𑀸𑀯𑁄 ¶ 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀯𑀼𑀢𑁆𑀢𑀸𑀦𑀁 𑀨𑀮𑀫𑀲𑁆𑀦𑀸𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁯) 𑀯𑀧𑁆𑀧𑀦𑁂 𑀆𑀕𑀢𑁄. ‘‘𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁮𑁯) 𑀅𑀝𑁆𑀞𑀤𑀦𑁆𑀢𑀓𑀸𑀤𑀻𑀳𑀺 𑀯𑀸𑀧𑀲𑀫𑀻𑀓𑀭𑀡𑁂. ‘‘𑀓𑀸𑀧𑀝𑀺𑀓𑁄 𑀫𑀸𑀡𑀯𑁄 𑀤𑀳𑀭𑁄 𑀯𑀼𑀢𑁆𑀢𑀲𑀺𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨𑁬) 𑀓𑁂𑀲𑁄𑀳𑀸𑀭𑀡𑁂. ‘‘𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁩𑁨) 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀅𑀪𑀩𑁆𑀩𑁄 𑀳𑀭𑀺𑀢𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁫𑁯; 𑀧𑀸𑀭𑀸. 𑁯𑁨; 𑀧𑀸𑀘𑀺. 𑁬𑁬𑁬; 𑀫𑀳𑀸𑀯. 𑁧𑁨𑁯) 𑀩𑀦𑁆𑀥𑀦𑀢𑁄 𑀧𑀫𑀼𑀢𑁆𑀢𑀪𑀸𑀯𑁂. ‘‘𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁫; 𑀫. 𑀦𑀺. 𑁨.𑁪𑁨𑁭; 𑀫𑀳𑀸𑀯. 𑁩𑁦𑁦) 𑀧𑀸𑀯𑀘𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁂. 𑀮𑁄𑀓𑁂 𑀧𑀦 ‘‘𑀯𑀼𑀢𑁆𑀢𑁄 𑀕𑀼𑀡𑁄 𑀯𑀼𑀢𑁆𑀢𑁄 𑀧𑀸𑀭𑀸𑀬𑀦𑁄’’𑀢𑀺𑀆𑀤𑀻𑀲𑀼 𑀅𑀚𑁆𑀛𑁂𑀲𑀦𑁂. ‘‘𑀯𑀼𑀢𑁆𑀢𑀁 𑀔𑁄 ¶ 𑀧𑀦𑁂𑀢𑀁 𑀪𑀕𑀯𑀢𑀸 ‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺’’𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦) 𑀓𑀣𑀦𑁂. 𑀇𑀥𑀸𑀧𑀺 𑀓𑀣𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 ‘‘𑀇𑀢𑀺 𑀳𑀺 𑀏𑀯𑀫𑁂𑀯 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢’’𑀦𑁆𑀢𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀁 𑀕𑀸𑀣𑀁 𑀤𑁂𑀲𑀺𑀢𑀪𑀸𑀯𑁂𑀦 𑀦𑀺𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀯𑀸 𑀤𑁂𑀲𑀺𑀢𑀸𑀓𑀸𑀭𑀁 𑀅𑀯𑀥𑀸𑀭𑁂𑀢𑀺.

𑀓𑀲𑁆𑀫𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀁. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀼𑀢𑁆𑀢𑀧𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀯𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀸𑀦𑀺𑀫𑀺𑀢𑁆𑀢𑀁. 𑀢𑀤𑀢𑁆𑀣𑀲𑁆𑀲 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀢𑀁 𑀉𑀧𑀸𑀤𑀸𑀬 ‘‘𑀇𑀤’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀪𑀕𑀯𑀢𑀸 𑀪𑀸𑀲𑀺𑀢𑀸𑀓𑀸𑀭𑀁 𑀲𑀦𑁆𑀥𑀸𑀬 ‘‘𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀓𑀮𑁂𑀦 𑀧𑀦𑀸𑀦𑁂𑀦 𑀯𑀘𑀦𑁂𑀦 𑀤𑁂𑀲𑀦𑀸𑀬 𑀦𑀺𑀤𑀸𑀦𑀁 𑀚𑁄𑀢𑀺𑀢𑀁 𑀳𑁄𑀢𑀺. 𑀧𑀭𑀢𑁄 𑀢𑀲𑁆𑀲𑀸 𑀤𑁂𑀲𑀓𑀤𑁂𑀲𑀓𑀸𑀮𑀧𑀝𑀺𑀕𑁆𑀕𑀸𑀳𑀓𑁂 𑀯𑀺𑀪𑀸𑀯𑁂𑀢𑀼𑀁 ‘‘𑀪𑀕𑀯𑀦𑁆𑀢𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲𑀢𑁆𑀣𑀲𑁆𑀲 𑀅𑀦𑀼 𑀅𑀦𑀼 𑀲𑀼𑀬𑁆𑀬𑀫𑀸𑀦𑀢𑀁 𑀤𑀻𑀧𑁂𑀢𑀺. 𑀭𑀢𑁆𑀢𑀺𑀪𑀸𑀕𑁂𑀢𑀺 𑀭𑀢𑁆𑀢𑀺𑀬𑀸 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂, 𑀫𑀚𑁆𑀛𑀺𑀫𑀬𑀸𑀫𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁂𑀲𑁆𑀲𑀯𑀡𑀸𑀤𑀬𑁄 𑀯𑀺𑀬 𑀅𑀧𑀸𑀓𑀝𑀦𑀸𑀫𑀥𑁂𑀬𑁆𑀬𑀢𑁆𑀢𑀸 𑀅𑀜𑁆𑀜𑀢𑀭𑁄. 𑀤𑁂𑀯𑁄 𑀏𑀯 𑀤𑁂𑀯𑀧𑀼𑀢𑁆𑀢𑁄. 𑀲𑀁𑀲𑀬𑀲𑀫𑀼𑀕𑁆𑀖𑀸𑀝𑀢𑁆𑀣𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀮𑁆𑀮𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀧𑀼𑀘𑁆𑀙𑀻𑀢𑀺 𑀬𑁄𑀚𑀦𑀸. ‘‘𑀲𑀁𑀲𑀬𑀲𑀫𑀼𑀕𑁆𑀖𑀸𑀝𑀢𑁆𑀣’’𑀦𑁆𑀢𑀺 𑀘 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀧𑀼𑀘𑁆𑀙𑀸𑀲𑀼 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦 𑀅𑀢𑁆𑀣𑁂𑀦 𑀢𑀡𑁆𑀳𑀸 ‘‘𑀚𑀝𑀸’’𑀢𑀺 𑀯𑀼𑀢𑁆𑀢𑀸, 𑀢𑀫𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀮𑀺𑀦𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸 𑀳𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤𑁄 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑁄 𑀏𑀯 𑀚𑀸𑀮𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 ‘‘𑀚𑀸𑀮𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺𑀲𑁆𑀲𑀸 ¶ 𑀚𑀝𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀫𑀸𑀳, 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀢𑀡𑁆𑀳𑀸𑀯𑀺𑀲𑀬𑀲𑁆𑀲 𑀅𑀪𑀸𑀯𑀢𑁄. 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦𑀸𑀢𑀺 𑀓𑀤𑀸𑀘𑀺 𑀭𑀽𑀧𑀸𑀭𑀫𑁆𑀫𑀡𑁂 𑀓𑀤𑀸𑀘𑀺 𑀬𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑁂 𑀓𑀤𑀸𑀘𑀺 𑀥𑀫𑁆𑀫𑀸𑀭𑀫𑁆𑀫𑀡𑁂 𑀓𑀤𑀸𑀘𑀺 𑀬𑀸𑀯 𑀭𑀽𑀧𑀸𑀭𑀫𑁆𑀫𑀡𑁂𑀢𑀺 𑀏𑀯𑀁 𑀳𑁂𑀝𑁆𑀞𑀸, 𑀉𑀧𑀭𑀺 𑀘 𑀧𑀯𑀢𑁆𑀢𑀺𑀯𑀲𑁂𑀦. 𑀤𑁂𑀲𑀦𑀸𑀓𑁆𑀓𑀫𑁂𑀦 𑀘𑁂𑀢𑁆𑀣 𑀳𑁂𑀝𑁆𑀞𑀼𑀧𑀭𑀺𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀓𑀤𑀸𑀘𑀺 𑀓𑀸𑀫𑀪𑀯𑁂 𑀓𑀤𑀸𑀘𑀺 𑀭𑀽𑀧𑀪𑀯𑁂 𑀓𑀤𑀸𑀘𑀺 𑀅𑀭𑀽𑀧𑀪𑀯𑁂 𑀓𑀤𑀸𑀘𑀺 𑀯𑀸 𑀅𑀭𑀽𑀧𑀪𑀯𑁂…𑀧𑁂… 𑀓𑀤𑀸𑀘𑀺 𑀓𑀸𑀫𑀪𑀯𑁂𑀢𑀺 𑀏𑀯𑀫𑁂𑀢𑁆𑀣 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺 𑀏𑀢𑁆𑀣 𑀲𑀁𑀲𑀺𑀩𑁆𑀩𑀦𑀦𑁆𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺. ‘‘𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦𑀸’’𑀢𑀺 𑀇𑀤𑀁 𑀬𑁂𑀦 𑀲𑀫𑁆𑀩𑀦𑁆𑀥𑁂𑀦 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸𑀢𑀺 ¶ 𑀚𑀝𑀸𑀢𑀡𑁆𑀳𑀸𑀦𑀁 𑀉𑀧𑀫𑀽𑀧𑀫𑁂𑀬𑁆𑀬𑀢𑀸, 𑀢𑀁𑀤𑀲𑁆𑀲𑀦𑀁. 𑀅𑀬𑀁 𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀚𑀸𑀮𑀺𑀦𑁄 𑀯𑁂𑀴𑀼𑀕𑀼𑀫𑁆𑀩𑀲𑁆𑀲 𑀲𑀸𑀔𑀸, 𑀓𑁄𑀲𑀲𑀜𑁆𑀘𑀬𑀸𑀤𑀬𑁄 𑀘 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄 𑀅𑀯𑀬𑀯𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑀸 𑀯𑀺𑀦𑀤𑁆𑀥𑀸 ‘‘𑀚𑀝𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀧𑀺 𑀲𑀁𑀲𑀺𑀩𑁆𑀩𑀦𑀲𑀪𑀸𑀯𑁂𑀦𑀸𑀢𑀺, ‘‘𑀲𑀁𑀲𑀺𑀩𑁆𑀩𑀺𑀢𑀝𑁆𑀞𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀲𑀁𑀲𑀺𑀩𑁆𑀩𑀺𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀳𑀺 𑀢𑀡𑁆𑀳𑀸 𑀓𑁄𑀲𑀓𑀸𑀭𑀓𑀺𑀫𑀺 𑀯𑀺𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀫𑁆𑀧𑀺 𑀲𑀁𑀲𑀺𑀩𑁆𑀩𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁮𑁬; 𑀯𑀺𑀪. 𑁨𑁦𑁩). 𑀇𑀫𑁂 𑀲𑀢𑁆𑀢𑀸 ‘‘𑀫𑀫 𑀇𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀁 𑀯𑀢𑁆𑀣𑀼𑀁 𑀅𑀢𑁆𑀢𑀦𑀺𑀩𑁆𑀩𑀺𑀲𑁂𑀲𑀁 𑀫𑀜𑁆𑀜𑀫𑀸𑀦𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀓𑀭𑁄𑀦𑁆𑀢𑀺. 𑀅𑀩𑁆𑀪𑀦𑁆𑀢𑀭𑀢𑁆𑀣𑁄 𑀘 𑀅𑀦𑁆𑀢𑁄𑀲𑀤𑁆𑀤𑁄𑀢𑀺 𑀲𑀓𑀧𑀭𑀺𑀓𑁆𑀔𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀢𑀡𑁆𑀳𑀸 ‘‘𑀅𑀦𑁆𑀢𑁄𑀚𑀝𑀸’’𑀢𑀺 𑀯𑀼𑀢𑁆𑀢𑀸. 𑀧𑀩𑁆𑀩𑀚𑀺𑀢𑀲𑁆𑀲 𑀧𑀢𑁆𑀢𑀸𑀤𑀺, 𑀕𑀳𑀝𑁆𑀞𑀲𑁆𑀲 𑀳𑀢𑁆𑀣𑀺𑀆𑀤𑀺 𑀲𑀓𑀧𑀭𑀺𑀓𑁆𑀔𑀸𑀭𑁄.

‘‘𑀅𑀢𑁆𑀢𑀸’’𑀢𑀺 𑀪𑀯𑀢𑀺 𑀏𑀢𑁆𑀣 𑀅𑀪𑀺𑀫𑀸𑀦𑁄𑀢𑀺 𑀅𑀢𑁆𑀢𑀪𑀸𑀯𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀲𑀭𑀻𑀭𑀦𑁆𑀢𑀺 𑀓𑁂𑀘𑀺. 𑀫𑀫 𑀅𑀢𑁆𑀢𑀪𑀸𑀯𑁄 𑀲𑀼𑀦𑁆𑀤𑀭𑁄, 𑀅𑀲𑀼𑀓𑀲𑁆𑀲 𑀯𑀺𑀬 𑀫𑀫 𑀅𑀢𑁆𑀢𑀪𑀸𑀯𑁄 𑀪𑀯𑁂𑀬𑁆𑀬𑀸𑀢𑀺 𑀯𑀸 𑀆𑀤𑀺𑀦𑀸 𑀲𑀓𑀅𑀢𑁆𑀢𑀪𑀸𑀯𑀸𑀤𑀻𑀲𑀼 𑀢𑀡𑁆𑀳𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀘𑀓𑁆𑀔𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺. 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀭𑀽𑀧𑀸𑀤𑀻𑀦𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀧𑀭𑁂𑀲𑀁 𑀲𑀩𑁆𑀩𑀸𑀦𑀺 𑀯𑀸, 𑀲𑀧𑀭𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺. 𑀢𑀣𑀸 𑀭𑀽𑀧𑀸𑀤𑀻𑀦𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀪𑀯𑁂𑀲𑀼 𑀧𑀯𑀢𑁆𑀢𑀺𑀬𑀸𑀧𑀺 𑀢𑀡𑁆𑀳𑀸𑀬 𑀅𑀦𑁆𑀢𑁄𑀚𑀝𑀸𑀩𑀳𑀺𑀚𑀝𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀪𑀯𑁄 𑀳𑀺 𑀓𑀲𑁆𑀲𑀘𑀺𑀧𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑀣𑀜𑁆𑀘𑀺𑀧𑀺 𑀅𑀯𑀺𑀫𑀼𑀢𑁆𑀢𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 ‘‘𑀅𑀚𑁆𑀛𑀢𑁆𑀢𑀁, 𑀅𑀦𑁆𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀭𑀽𑀧𑀸𑀭𑀽𑀧𑀪𑀯𑁄 ‘‘𑀩𑀳𑀺𑀤𑁆𑀥𑀸, 𑀩𑀳𑀻’’𑀢𑀺 𑀘. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄 𑀧𑀼𑀕𑁆𑀕𑀮𑁄, 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄 𑀧𑀼𑀕𑁆𑀕𑀮𑁄’’𑀢𑀺 (𑀅. 𑀦𑀺. 𑁨.𑁩𑁭). 𑀯𑀺𑀲𑀬𑀪𑁂𑀤𑁂𑀦, 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀢𑀡𑁆𑀳𑀁 ¶ 𑀚𑀝𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀢𑀸𑀬 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀚𑀝𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 ‘‘𑀧𑀚𑀸’’𑀢𑀺 𑀯𑀼𑀢𑁆𑀢𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀚𑀝𑁂𑀦𑁆𑀢𑀻 𑀯𑀺𑀦𑀦𑁆𑀥𑀦𑁆𑀢𑀻 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸’’𑀢𑀺. 𑀢𑀣𑀸 𑀳𑀺 𑀧𑀭𑀫𑀢𑁆𑀣𑀢𑁄 𑀬𑀤𑀺𑀧𑀺 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑁄 𑀦𑀢𑁆𑀣𑀺, 𑀏𑀓𑀤𑁂𑀲𑁄 𑀧𑀦 𑀲𑀫𑀼𑀤𑀸𑀬𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀯𑀬𑀯𑀢𑁄 𑀲𑀫𑀼𑀤𑀸𑀬𑀁 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀉𑀧𑀫𑀽𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫 ¶ 𑀯𑁂𑀴𑀼𑀚𑀝𑀸𑀤𑀻𑀳𑀺…𑀧𑁂… 𑀲𑀁𑀲𑀺𑀩𑁆𑀩𑀺𑀢𑀸’’𑀢𑀺 𑀆𑀳. 𑀇𑀫𑀁 𑀚𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀲𑀼 𑀥𑀸𑀢𑀽𑀲𑀼 𑀏𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀁𑀲𑀺𑀩𑁆𑀩𑀦𑁂𑀦 𑀢𑁂𑀥𑀸𑀢𑀼𑀓𑀁 𑀚𑀝𑁂𑀢𑁆𑀯𑀸 𑀞𑀺𑀢𑀁. 𑀢𑁂𑀦𑀲𑁆𑀲𑀸 𑀫𑀳𑀸𑀯𑀺𑀲𑀬𑀢𑀁, 𑀯𑀺𑀚𑀝𑀦𑀲𑁆𑀲 𑀘 𑀲𑀼𑀤𑀼𑀓𑁆𑀓𑀭𑀪𑀸𑀯𑀫𑀸𑀳. ‘‘𑀯𑀺𑀚𑀝𑁂𑀢𑀼𑀁 𑀓𑁄 𑀲𑀫𑀢𑁆𑀣𑁄’’𑀢𑀺 𑀇𑀫𑀺𑀦𑀸 ‘‘𑀯𑀺𑀚𑀝𑀬𑁂’’𑀢𑀺 𑀧𑀤𑀁 𑀲𑀢𑁆𑀢𑀺𑀅𑀢𑁆𑀣𑀁, 𑀦 𑀯𑀺𑀥𑀺𑀆𑀤𑀺𑀅𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 ‘‘𑀅𑀦𑁆𑀢𑁄𑀚𑀝𑀸’’𑀢𑀺𑀆𑀤𑀺𑀦𑀸 𑀧𑀼𑀝𑁆𑀞𑁄 𑀧𑀦 𑀅𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀇𑀫𑀁 𑀕𑀸𑀣𑀫𑀸𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀤𑀺𑀲𑁄𑀯 𑀇𑀫𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀸𑀭𑀁 𑀕𑀼𑀡𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀲𑀩𑁆𑀩𑁂𑀲𑀼 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄𑀢𑀺 𑀅𑀦𑀯𑀲𑁂𑀲𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑁂𑀦 𑀦𑀺𑀲𑁆𑀲𑀗𑁆𑀕𑀘𑀸𑀭𑀢𑁆𑀢𑀸 𑀦𑀯𑀺𑀳𑀢𑀜𑀸𑀡𑀧𑀯𑀢𑁆𑀢𑀺𑀓𑁄. 𑀏𑀢𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀯𑀺𑀪𑀸𑀯𑀦𑁂𑀦 𑀆𑀤𑀺𑀢𑁄 𑀢𑀺𑀡𑁆𑀡𑀁 𑀆𑀯𑁂𑀡𑀺𑀓𑀥𑀫𑁆𑀫𑀸𑀦𑀁 𑀕𑀳𑀡𑁂𑀦𑁂𑀯 𑀢𑀤𑁂𑀓𑀮𑀓𑁆𑀔𑀡𑀢𑀸𑀬 𑀢𑀤𑀯𑀺𑀦𑀸𑀪𑀸𑀯𑀢𑁄 𑀘 𑀪𑀕𑀯𑀢𑁄 𑀲𑁂𑀲𑀸𑀯𑁂𑀡𑀺𑀓𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀇𑀲𑁆𑀲𑀭𑀺𑀬𑀥𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀁, 𑀢𑀁𑀢𑀁𑀅𑀢𑁆𑀣𑀸𑀦𑀼𑀲𑀸𑀲𑀦𑀜𑁆𑀘 𑀓𑀭𑁄𑀦𑁆𑀢𑀸 𑀯𑁄𑀳𑀭𑀦𑁆𑀢𑀺, 𑀧𑀼𑀜𑁆𑀜𑀸𑀢𑀺𑀲𑀬𑀬𑁄𑀕𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑀦𑁆𑀢𑀺, 𑀬𑀣𑀸𑀥𑀺𑀧𑁆𑀧𑁂𑀢𑀜𑁆𑀘 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀺, 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀘 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑁂𑀯𑀸. 𑀅𑀣 𑀯𑀸 𑀤𑁂𑀯𑀦𑀻𑀬𑀸 𑀢𑀁𑀢𑀁𑀩𑁆𑀬𑀲𑀦𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀲𑀭𑀡𑀁 𑀧𑀭𑀸𑀬𑀡𑀦𑁆𑀢𑀺 𑀕𑀫𑀦𑀻𑀬𑀸, 𑀅𑀪𑀺𑀢𑁆𑀣𑀯𑀦𑀻𑀬𑀸 𑀯𑀸, 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦 𑀓𑀫𑀦𑀻𑀬𑀸𑀢𑀺 𑀯𑀸 𑀤𑁂𑀯𑀸. 𑀢𑁂 𑀢𑀺𑀯𑀺𑀥𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀪𑀕𑀯𑀸 𑀧𑀦 𑀦𑀺𑀭𑀢𑀺𑀲𑀬𑀸𑀬 𑀅𑀪𑀺𑀜𑁆𑀜𑀸𑀓𑀻𑀴𑀸𑀬 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀧𑀭𑀲𑀦𑁆𑀢𑀸𑀦𑀕𑀢𑀧𑀜𑁆𑀘𑀯𑀺𑀥𑀫𑀸𑀭𑀯𑀺𑀚𑀬𑀺𑀘𑁆𑀙𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑀢𑁆𑀢𑀥𑀦𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀅𑀯𑁂𑀘𑁆𑀘𑀧𑀲𑀸𑀤𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁂𑀦, 𑀥𑀫𑁆𑀫𑀲𑀪𑀸𑀯𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁂𑀦 𑀘 𑀯𑁄𑀳𑀸𑀭𑀸𑀢𑀺𑀲𑀬𑁂𑀦 𑀧𑀭𑀫𑀸𑀬 𑀧𑀜𑁆𑀜𑀸𑀲𑀭𑀻𑀭𑀧𑁆𑀧𑀪𑀸𑀲𑀗𑁆𑀔𑀸𑀢𑀸𑀬 𑀚𑀼𑀢𑀺𑀬𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀜𑀸𑀡𑀲𑀭𑀻𑀭𑀕𑀢𑀺𑀬𑀸, 𑀫𑀸𑀭𑀯𑀺𑀚𑀬𑀲𑀩𑁆𑀩𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀭𑀳𑀺𑀢𑀦𑀺𑀧𑁆𑀨𑀸𑀤𑀦𑁂𑀲𑀼 𑀅𑀧𑁆𑀧𑀝𑀺𑀳𑀢𑀸𑀬 𑀲𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀕𑀫𑀦𑀻𑀬𑀢𑁄, 𑀅𑀪𑀺𑀢𑁆𑀣𑀯𑀦𑀻𑀬𑀢𑁄, 𑀪𑀢𑁆𑀢𑀺𑀯𑀲𑁂𑀦 𑀓𑀫𑀦𑀻𑀬𑀢𑁄 𑀘 𑀲𑀩𑁆𑀩𑁂 ¶ 𑀢𑁂 𑀤𑁂𑀯𑁂 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀪𑀺𑀪𑀼𑀬𑁆𑀬 𑀞𑀺𑀢𑀢𑁆𑀢𑀸 𑀢𑁂𑀲𑀁 𑀤𑁂𑀯𑀸𑀦𑀁 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄. 𑀲𑀩𑁆𑀩𑀤𑁂𑀯𑁂𑀳𑀺 ¶ 𑀧𑀽𑀚𑀦𑀻𑀬𑀢𑀭𑁄 𑀤𑁂𑀯𑁄𑀢𑀺 𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀸𑀯𑀲𑁆𑀲 𑀯𑀸 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀮𑀗𑁆𑀓𑀸𑀭𑀲𑁆𑀲 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀤𑁂𑀯𑀸𑀦𑀁 𑀅𑀢𑀺𑀲𑀬𑁂𑀦 𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄.

𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀓𑁆𑀓𑀸𑀦𑀁, 𑀫𑀳𑀸𑀩𑁆𑀭𑀳𑁆𑀫𑀸𑀦𑀜𑁆𑀘 𑀕𑀼𑀡𑀸𑀪𑀺𑀪𑀯𑀦𑀢𑁄 𑀅𑀥𑀺𑀓𑁄 𑀅𑀢𑀺𑀲𑀬𑁄 𑀅𑀢𑀺𑀭𑁂𑀓𑀢𑀭𑁄 𑀯𑀸 𑀲𑀓𑁆𑀓𑁄 𑀩𑁆𑀭𑀳𑁆𑀫𑀸 𑀘𑀸𑀢𑀺 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸. 𑀜𑀸𑀡𑀧𑁆𑀧𑀳𑀸𑀦𑀤𑁂𑀲𑀦𑀸𑀯𑀺𑀲𑁂𑀲𑁂𑀲𑀼 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑀝𑁆𑀞𑀸𑀦𑀢𑀸𑀬 𑀓𑀼𑀢𑁄𑀘𑀺𑀧𑀺 𑀉𑀢𑁆𑀭𑀲𑁆𑀢𑀸𑀪𑀸𑀯𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀯𑀺𑀲𑀸𑀭𑀤𑁄𑀢𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸…𑀧𑁂… 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮). 𑀞𑀸𑀦𑀸𑀞𑀸𑀦𑀜𑀸𑀡𑀸𑀤𑀻𑀳𑀺 𑀤𑀲𑀳𑀺 𑀜𑀸𑀡𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀤𑀲𑀩𑀮𑀥𑀭𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀥 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄, 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁨𑁧; 𑀯𑀺𑀪. 𑁮𑁦𑁯). 𑀬𑀁 𑀓𑀺𑀜𑁆𑀘𑀺 𑀜𑁂𑀬𑁆𑀬𑀁 𑀦𑀸𑀫, 𑀢𑀢𑁆𑀣 𑀲𑀩𑁆𑀩𑀢𑁆𑀣𑁂𑀯 𑀅𑀦𑀸𑀯𑀝𑀜𑀸𑀡𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑁄. 𑀢𑀜𑁆𑀘 𑀲𑀩𑁆𑀩𑀁 𑀲𑀫𑀦𑁆𑀢𑀢𑁄 𑀲𑀩𑁆𑀩𑀸𑀓𑀸𑀭𑀢𑁄 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀽𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀏𑀢𑁆𑀣 𑀘 ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄’’𑀢𑀺 𑀇𑀫𑀺𑀦𑀸 𑀢𑀺𑀬𑀤𑁆𑀥𑀸𑀭𑀼𑀴𑁆𑀳𑀸𑀦𑀁 𑀧𑀼𑀘𑁆𑀙𑀸𑀦𑀁 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀢𑀸𑀬 𑀤𑀲𑁆𑀲𑀺𑀢𑀸𑀬 𑀓𑀺𑀁 𑀤𑁂𑀯𑀢𑀸𑀦𑀫𑁆𑀧𑀺 𑀧𑀼𑀘𑁆𑀙𑀁 𑀩𑁆𑀬𑀸𑀓𑀸𑀢𑀼𑀁 𑀲𑀫𑀢𑁆𑀣𑁄 𑀪𑀕𑀯𑀸𑀢𑀺 𑀆𑀲𑀗𑁆𑀓𑀸𑀬 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀤𑁂𑀯𑀤𑁂𑀯𑁄’’𑀢𑀺 𑀯𑀼𑀢𑁆𑀢𑀁. 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, ‘‘𑀢𑀢𑁄 𑀇𑀫𑀲𑁆𑀲 𑀓𑁄 𑀯𑀺𑀲𑁂𑀲𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁. 𑀲𑀓𑁆𑀓𑁂𑀦𑀧𑀺 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀲𑀦𑀗𑁆𑀓𑀼𑀫𑀸𑀭𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, ‘‘𑀢𑀢𑁄 𑀇𑀫𑀲𑁆𑀲 𑀓𑁄 𑀅𑀢𑀺𑀲𑀬𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀘𑀲𑁆𑀲 𑀯𑀺𑀲𑁂𑀲𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀤𑀲𑀩𑀮𑀜𑀸𑀡𑁂𑀳𑀺 𑀧𑀸𑀓𑀝𑁄 𑀚𑀸𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀘𑀢𑀼…𑀧𑁂… ¶ 𑀥𑀭𑁄’’𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀘 𑀜𑀸𑀡𑀸𑀦𑀺 𑀇𑀫𑀲𑁆𑀲 𑀜𑀸𑀡𑀤𑁆𑀯𑀬𑀲𑁆𑀲 𑀅𑀥𑀺𑀕𑀫𑁂𑀦 𑀲𑀳𑁂𑀯 𑀲𑀺𑀤𑁆𑀥𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀸𑀯𑀭𑀡𑀜𑀸𑀡𑁄 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀜𑀸𑀡𑀤𑁆𑀯𑀬𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀽𑀧𑀘𑀬𑀲𑀺𑀤𑁆𑀥𑀸𑀬 𑀪𑀕𑁆𑀕𑀤𑁄𑀲𑀢𑀸𑀬 𑀲𑀺𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸’’𑀢𑀺 𑀅𑀯𑁄𑀘𑀸𑀢𑀺. 𑀏𑀯𑀫𑁂𑀢𑁂𑀲𑀁 ¶ 𑀧𑀤𑀸𑀦𑀁 𑀕𑀳𑀡𑁂 𑀧𑀬𑁄𑀚𑀦𑀁, 𑀅𑀦𑀼𑀧𑀼𑀩𑁆𑀩𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑀁 𑀧𑀘𑁆𑀙𑀺𑀫𑀁 𑀅𑀦𑀸𑀯𑀭𑀡𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 𑀜𑀸𑀡𑀤𑁆𑀯𑀬𑀁, 𑀢𑀁 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀁. 𑀏𑀓𑀫𑁂𑀯 𑀳𑀺 𑀢𑀁 𑀜𑀸𑀡𑀁 𑀯𑀺𑀲𑀬𑀧𑀯𑀢𑁆𑀢𑀺𑀫𑀼𑀔𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣𑀸𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 ‘‘𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀯𑀓𑁆𑀔𑀸𑀫.

𑁨. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀏𑀲𑀻 𑀕𑀯𑁂𑀲𑀻𑀢𑀺 𑀫𑀳𑁂𑀲𑀺, 𑀪𑀕𑀯𑀸. 𑀢𑁂𑀦 𑀫𑀳𑁂𑀲𑀺𑀦𑀸. 𑀯𑀡𑁆𑀡𑀬𑀦𑁆𑀢𑁄𑀢𑀺 𑀯𑀺𑀯𑀭𑀦𑁆𑀢𑁄 𑀯𑀺𑀢𑁆𑀣𑀸𑀭𑁂𑀦𑁆𑀢𑁄. 𑀬𑀣𑀸𑀪𑀽𑀢𑀦𑁆𑀢𑀺 𑀅𑀯𑀺𑀧𑀭𑀻𑀢𑀁. 𑀲𑀻𑀮𑀸𑀤𑀺𑀪𑁂𑀤𑀦𑀦𑁆𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀯𑀺𑀪𑀸𑀕𑀁. 𑀲𑀼𑀤𑀼𑀮𑁆𑀮𑀪𑀦𑁆𑀢𑀺 𑀅𑀝𑁆𑀞𑀓𑁆𑀔𑀡𑀯𑀚𑁆𑀚𑀺𑀢𑁂𑀦 𑀦𑀯𑀫𑁂𑀦 𑀔𑀡𑁂𑀦 𑀮𑀤𑁆𑀥𑀩𑁆𑀩𑀢𑁆𑀢𑀸 𑀲𑀼𑀝𑁆𑀞𑀼 𑀤𑀼𑀮𑁆𑀮𑀪𑀁. 𑀲𑀻𑀮𑀸𑀤𑀺𑀲𑀗𑁆𑀕𑀳𑀦𑁆𑀢𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀁. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦, 𑀦 𑀢𑀬𑁄 𑀔𑀦𑁆𑀥𑀸 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀧𑁆𑀧𑀤𑁂𑀲𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀢𑀬𑁄 𑀔𑀦𑁆𑀥𑀸 𑀲𑀗𑁆𑀕𑀳𑀺𑀢𑀸; 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄’’𑀢𑀺 (𑀫. 𑀦𑀺. 𑁧.𑁪𑁬𑁨). 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀧𑀭𑀺𑀧𑀦𑁆𑀣𑀦𑀻𑀬𑀢𑀸𑀬 𑀔𑁂𑀫𑀁. 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑀢𑁄, 𑀫𑀸𑀬𑀸𑀤𑀺𑀓𑀸𑀬𑀯𑀗𑁆𑀓𑀸𑀤𑀺𑀧𑁆𑀧𑀳𑀸𑀦𑀢𑁄 𑀘 𑀉𑀚𑀼𑀁. 𑀲𑀩𑁆𑀩𑁂𑀲𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀫𑀸𑀭𑀡𑀯𑀲𑁂𑀦 𑀕𑀫𑀦𑀢𑁄 𑀧𑀯𑀢𑁆𑀢𑀦𑀢𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑀦𑀢𑁄, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑀢𑁄 𑀘 𑀫𑀕𑁆𑀕𑀁. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀬, 𑀯𑀺𑀲𑀼𑀤𑁆𑀥𑀺𑀪𑀸𑀯𑀸𑀬 𑀯𑀸, 𑀅𑀭𑀳𑀢𑁆𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀢𑀺 𑀏𑀯𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑁄 𑀏𑀯𑀭𑀽𑀧𑁄 𑀏𑀯𑀁𑀓𑀺𑀘𑁆𑀘𑀓𑁄 𑀏𑀯𑀫𑀢𑁆𑀣𑁄𑀢𑀺 𑀬𑀸𑀣𑀸𑀯𑀢𑁄 𑀅𑀦𑀯𑀩𑀼𑀚𑁆𑀛𑀦𑁆𑀢𑀸. 𑀲𑀓𑀮𑀲𑀁𑀓𑀺𑀮𑁂𑀲𑀢𑁄, 𑀲𑀁𑀲𑀸𑀭𑀢𑁄 𑀘 𑀲𑀼𑀤𑁆𑀥𑀺𑀁 𑀯𑀺𑀫𑀼𑀢𑁆𑀢𑀺𑀁 𑀓𑀸𑀫𑁂𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀻𑀢𑀺 𑀲𑀼𑀤𑁆𑀥𑀺𑀓𑀸𑀫𑀸. 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀢𑁂𑀦 𑀦 𑀓𑁂𑀯𑀮𑀁 𑀲𑀻𑀮𑀫𑀢𑁆𑀢𑁂𑀦 𑀧𑀭𑀺𑀢𑀼𑀝𑁆𑀞𑀸, 𑀅𑀣 𑀔𑁄 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀧𑀺 𑀲𑀫𑀸𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸𑀬 𑀬𑁄𑀕𑀺𑀦𑁄 𑀯𑀸𑀬𑀫𑀦𑁆𑀢𑀸𑀧𑀺 𑀯𑀺𑀲𑀼𑀤𑁆𑀥𑀺𑀁 ¶ 𑀉𑀤𑁆𑀤𑀺𑀲𑁆𑀲 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀦𑁆𑀢𑀸𑀧𑀺 𑀉𑀧𑀸𑀬𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀬𑁄𑀕𑀻𑀦𑀁. 𑀓𑀸𑀫𑀜𑁆𑀘𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸 𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀸𑀤𑀺𑀧𑀲𑀼𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀫𑁄𑀚𑁆𑀚𑀓𑀭𑁄, 𑀬𑁄𑀕𑀻𑀦𑀁 𑀧𑀦 𑀲𑀸𑀢𑀺𑀲𑀬𑀁 𑀧𑀫𑁄𑀤𑀳𑁂𑀢𑀽𑀢𑀺 𑀆𑀳 ‘‘𑀢𑁂𑀲𑀁 𑀧𑀸𑀫𑁄𑀚𑁆𑀚𑀓𑀭𑀡’’𑀦𑁆𑀢𑀺. 𑀩𑀸𑀳𑀺𑀭𑀓𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀢𑁆𑀢𑀸 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁. 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀦𑁆𑀢𑀺 𑀅𑀢𑁆𑀢𑀦𑁄 𑀅𑀧𑀲𑁆𑀲𑀬𑀪𑀽𑀢𑀁 𑀦𑀺𑀓𑀸𑀬𑀁 𑀤𑀲𑁆𑀲𑁂𑀢𑀺 ¶ . 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀦𑁆𑀢𑀺 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁. 𑀏𑀢𑁆𑀣 𑀘 ‘‘𑀢𑁂𑀲𑀁 𑀧𑀸𑀫𑁄𑀚𑁆𑀚𑀓𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀢𑀸𑀬 𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑀸𑀦𑀁 𑀬𑁄𑀕𑀻𑀦𑀁 𑀏𑀓𑀁𑀲𑁂𑀦 𑀢𑀤𑀸𑀯𑀳𑀢𑁆𑀢𑀸 𑀧𑀸𑀫𑁄𑀚𑁆𑀚𑀓𑀭𑁄 𑀜𑀸𑀡𑀼𑀢𑁆𑀢𑀭𑁂𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀳𑀺 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀲𑀼𑀝𑁆𑀞𑀼 𑀲𑀫𑁆𑀫𑀸 𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀓𑀣𑀸𑀫𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀓𑁆𑀓𑀘𑁆𑀘𑀁 𑀫𑁂 𑀪𑀸𑀲𑀢𑁄 𑀲𑀓𑁆𑀓𑀘𑁆𑀘𑀁 𑀦𑀺𑀲𑀸𑀫𑀬𑀣𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀣 𑀘 ‘‘𑀇𑀫𑀺𑀲𑁆𑀲𑀸 𑀤𑀸𑀦𑀺 𑀕𑀸𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀪𑀸𑀲𑀦𑀲𑁆𑀲 𑀦𑀺𑀲𑁆𑀲𑀬𑀁, ‘‘𑀓𑀣𑀺𑀢𑀸𑀬 𑀫𑀳𑁂𑀲𑀺𑀦𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀧𑀫𑀸𑀡𑀪𑀸𑀯𑀁, ‘‘𑀬𑀣𑀸𑀪𑀽𑀢𑀁 𑀅𑀢𑁆𑀣𑀁 𑀲𑀻𑀮𑀸𑀤𑀺𑀪𑁂𑀤𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀯𑀺𑀧𑀭𑀻𑀢𑀧𑀺𑀡𑁆𑀟𑀢𑁆𑀣𑀁, ‘‘𑀲𑀼𑀤𑀼𑀮𑁆𑀮𑀪𑀁…𑀧𑁂… 𑀬𑁄𑀕𑀺𑀦𑁄’’𑀢𑀺 𑀇𑀫𑀺𑀦𑀸 𑀦𑀺𑀫𑀺𑀢𑁆𑀢𑀁, ‘‘𑀢𑁂𑀲𑀁 𑀧𑀸𑀫𑁄𑀚𑁆𑀚𑀓𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀁, ‘‘𑀯𑀡𑁆𑀡𑀬𑀦𑁆𑀢𑁄 𑀅𑀢𑁆𑀣𑀁, 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀁, 𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀘 𑀇𑀫𑀺𑀦𑀸 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀯𑀺𑀲𑀼𑀤𑁆𑀥𑀺𑀓𑀸𑀫𑀸 𑀲𑀩𑁆𑀩𑁂𑀧𑀺, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄’’𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀲𑀓𑁆𑀓𑀘𑁆𑀘𑀲𑀯𑀦𑁂 𑀲𑀸𑀥𑀼𑀚𑀦𑁂 𑀦𑀺𑀬𑁄𑀚𑁂𑀢𑀺. 𑀲𑀸𑀥𑀼𑀓𑀁 𑀲𑀯𑀦𑀧𑀝𑀺𑀩𑀤𑁆𑀥𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺.

𑁩. 𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑁂𑀦 𑀧𑀯𑁂𑀤𑀺𑀢𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀅𑀪𑀺𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀧𑀤𑀢𑁆𑀣𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀲𑀼𑀤𑁆𑀥𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀤𑀺𑀤𑀁 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲’’𑀦𑁆𑀢𑀺 𑀏𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑀤𑀁 𑀯𑀼𑀢𑁆𑀢𑀁, 𑀢𑀢𑁆𑀣. 𑀲𑀩𑁆𑀩𑀫𑀮𑀯𑀺𑀭𑀳𑀺𑀢𑀦𑁆𑀢𑀺 𑀲𑀩𑁆𑀩𑁂𑀳𑀺 𑀭𑀸𑀕𑀸𑀤𑀺𑀫𑀮𑁂𑀳𑀺, 𑀲𑀩𑁆𑀩𑁂𑀳𑀺 𑀲𑀁𑀓𑀺𑀮𑁂𑀲𑀫𑀮𑁂𑀳𑀺 𑀘 𑀯𑀺𑀭𑀳𑀺𑀢𑀁 𑀯𑀺𑀯𑀺𑀢𑁆𑀢𑀁. 𑀢𑀢𑁄 𑀏𑀯 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀲𑀩𑁆𑀩𑀤𑀸 𑀲𑀩𑁆𑀩𑀣𑀸 𑀘 𑀯𑀺𑀲𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀺 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑁄𑀢𑀺 𑀅𑀥𑀺𑀕𑀫𑀽𑀧𑀸𑀬𑁄 𑀯𑀼𑀘𑁆𑀘𑀢𑀻’’𑀢𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺 𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀤𑀼𑀧𑀸𑀬𑀢𑁆𑀢𑀸 𑀧𑀦 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀢𑀦𑁆𑀦𑀺𑀲𑁆𑀲𑀬𑁄 𑀓𑀣𑀸𑀧𑀩𑀦𑁆𑀥𑁄 𑀘 𑀢𑀣𑀸 𑀯𑀼𑀘𑁆𑀘𑀢𑀺.

𑀲𑁆𑀯𑀸𑀬𑀁 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀢𑁆𑀣𑀸𑀭𑀸 𑀤𑁂𑀲𑀦𑀸𑀯𑀺𑀮𑀸𑀲𑀢𑁄, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀘 𑀦𑀸𑀦𑀸𑀦𑀬𑁂𑀳𑀺 𑀤𑁂𑀲𑀺𑀢𑁄, 𑀢𑁂𑀲𑀼 𑀅𑀬𑀫𑁂𑀓𑁄 𑀦𑀬𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀧𑀦𑀸𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀢𑁆𑀣𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀲𑀼𑀢𑁆𑀢𑁂. 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀲𑀫𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀲𑁄 𑀳𑀺 𑀢𑀲𑁆𑀲𑀸 𑀧𑀝𑀺𑀬𑁄𑀕𑀻, 𑀦 𑀲𑀻𑀮𑀸𑀤𑀺. 𑀫𑀢𑁆𑀢-𑀲𑀤𑁆𑀤𑁂𑀦 𑀘 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀲𑀯𑀺𑀲𑁂𑀲𑀁 𑀲𑀫𑀸𑀥𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀲𑁄 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀦 𑀲𑀫𑀸𑀥𑀺𑀫𑀢𑁆𑀢𑀁. 𑀦 𑀳𑀺 ¶ 𑀔𑀡𑀺𑀓𑀲𑀫𑀸𑀥𑀺𑀁 𑀯𑀺𑀦𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺. 𑀯𑀺𑀧𑀲𑁆𑀲𑀦𑀸𑀢𑀺 𑀘 𑀢𑀺𑀯𑀺𑀥𑀸𑀧𑀺 𑀅𑀦𑀼𑀧𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯. 𑀦 𑀳𑀺 𑀅𑀦𑀺𑀘𑁆𑀘𑀤𑀲𑁆𑀲𑀦𑀫𑀢𑁆𑀢𑁂𑀦 𑀲𑀘𑁆𑀘𑀸𑀪𑀺𑀲𑀫𑀬𑁄 𑀲𑀫𑁆𑀪𑀯𑀢𑀺. 𑀬𑀁 𑀧𑀦 𑀕𑀸𑀣𑀸𑀬𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀲𑁆𑀲𑁂𑀯 𑀕𑀳𑀡𑀁 𑀓𑀢𑀁, 𑀢𑀁 𑀬𑀲𑁆𑀲 𑀢𑀤𑁂𑀯 𑀲𑀼𑀝𑁆𑀞𑀼𑀢𑀭𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀸𑀤𑀺𑀲𑀲𑁆𑀲 𑀯𑀲𑁂𑀦. 𑀲𑁄𑀧𑀺 𑀳𑀺 𑀇𑀢𑀭𑀁 𑀮𑀓𑁆𑀔𑀡𑀤𑁆𑀯𑀬𑀁 𑀯𑀺𑀪𑀽𑀢𑀢𑀭𑀁 𑀓𑀢𑁆𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀦 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀲𑀩𑁆𑀩𑁂 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸, 𑀢𑁂 𑀳𑀺 𑀲𑀫𑁆𑀫𑀲𑀦𑀻𑀬𑀸. 𑀅𑀦𑀺𑀘𑁆𑀘𑀸𑀢𑀺 𑀦 𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀇𑀢𑁆𑀢𑀭𑀸 𑀔𑀡𑀪𑀗𑁆𑀕𑀼𑀭𑀸𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀧𑀲𑁆𑀲𑀢𑀺 𑀲𑀫𑁆𑀫𑀲𑀢𑀺. 𑀅𑀣 𑀧𑀘𑁆𑀙𑀸 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀉𑀢𑁆𑀢𑀭𑀓𑀸𑀮𑀁. 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀤𑀺𑀝𑁆𑀞𑁂 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀪𑀽𑀫𑀓𑁂 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀧𑀝𑀺𑀮𑀪𑀢𑀺. 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀏𑀲 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁄 𑀯𑀺𑀭𑀸𑀕𑀸𑀤𑀻𑀦𑀁 𑀓𑀸𑀭𑀡𑀪𑀽𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑁄.

𑀛𑀸𑀦𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀛𑀸𑀦𑀦𑁆𑀢𑀺 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀁 𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀬𑀫𑁆𑀳𑀻𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀛𑀸𑀦𑀜𑁆𑀘 𑀧𑀜𑁆𑀜𑀸 𑀘𑀸𑀢𑀺 𑀏𑀢𑁆𑀣𑀸𑀬𑀫𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀺. 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂𑀢𑀺 𑀲𑁄 𑀩𑁆𑀬𑀢𑁆𑀢𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑀻𑀧𑁂 𑀏𑀓𑀦𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀢𑀻𑀢𑀺.

𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸. 𑀲𑀸 𑀳𑀺 𑀅𑀧𑀘𑀬𑀕𑀸𑀫𑀺𑀢𑀸𑀬 𑀲𑀢𑁆𑀢𑀸𑀦𑀁 𑀲𑀼𑀤𑁆𑀥𑀺𑀁 𑀆𑀯𑀳𑀢𑀺. 𑀯𑀺𑀚𑁆𑀚𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀻𑀮𑀦𑁆𑀢𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸. 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀲𑀫𑁆𑀫𑀸𑀆𑀚𑀻𑀯𑁄. 𑀥𑀫𑁆𑀫𑁄𑀢𑀺 𑀅𑀯𑀲𑁂𑀲𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸. 𑀅𑀣 𑀯𑀸 𑀓𑀫𑁆𑀫𑀦𑁆𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀕𑀳𑀡𑀁. ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 ¶ 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀯𑀘𑀦𑀢𑁄. 𑀯𑀺𑀚𑁆𑀚𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀦𑀁 𑀕𑀳𑀡𑀁. 𑀥𑀫𑁆𑀫𑁄𑀢𑀺 𑀲𑀫𑀸𑀥𑀺 ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁩𑁭𑁮) 𑀯𑀺𑀬. 𑀢𑀕𑁆𑀕𑀳𑀡𑁂𑀦𑁂𑀯 ‘‘𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀘𑀦𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀻𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀲𑀻𑀮𑀦𑁆𑀢𑀺 𑀲𑀫𑁆𑀫𑀸𑀯𑀸𑀘𑀸𑀚𑀻𑀯𑀸𑀦𑀁. 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀏𑀯𑀭𑀽𑀧𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀺𑀢𑀁 𑀉𑀢𑁆𑀢𑀫𑀁 𑀚𑀻𑀯𑀺𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀮𑀸𑀤𑀺𑀯𑀲𑁂𑀦𑀸𑀢𑀺 ¶ 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀻𑀭𑀺𑀬𑀯𑀲𑁂𑀦. 𑀲𑀩𑁆𑀩𑀤𑀸𑀢𑀺 𑀲𑀫𑀸𑀤𑀸𑀦𑀢𑁄 𑀧𑀪𑀼𑀢𑀺 𑀲𑀩𑁆𑀩𑀓𑀸𑀮𑀁. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀫𑁆𑀧𑀤𑀸𑀬 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀧𑀜𑁆𑀜𑀯𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑀸𑀥𑀺𑀦𑀸 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺𑀧𑁂𑀲𑀺𑀢𑀢𑁆𑀢𑀢𑀸𑀬 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁄. 𑀑𑀖𑀦𑁆𑀢𑀺 𑀓𑀸𑀫𑁄𑀖𑀸𑀤𑀺𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁, 𑀲𑀁𑀲𑀸𑀭𑀫𑀳𑁄𑀖𑀫𑁂𑀯 𑀯𑀸.

𑀏𑀓𑀸𑀬𑀦𑁄𑀢𑀺 𑀏𑀓𑀫𑀕𑁆𑀕𑁄. 𑀫𑀕𑁆𑀕𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀅𑀬𑀦-𑀲𑀤𑁆𑀤𑁄, 𑀢𑀲𑁆𑀫𑀸 𑀏𑀓𑀧𑀣𑀪𑀽𑀢𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄, 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀅𑀬𑀢𑀺 𑀕𑀘𑁆𑀙𑀢𑀻𑀢𑀺 𑀏𑀓𑀸𑀬𑀦𑁄, 𑀏𑀓𑁂𑀦 𑀯𑀸 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀺𑀯𑁂𑀓𑀝𑁆𑀞𑁂𑀦 𑀅𑀬𑀺𑀢𑀩𑁆𑀩𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀏𑀓𑀸𑀬𑀦𑁄, 𑀅𑀬𑀦𑁆𑀢𑀺 𑀢𑁂𑀦𑀸𑀢𑀺 𑀯𑀸 𑀅𑀬𑀦𑁄, 𑀏𑀓𑀲𑁆𑀲 𑀲𑁂𑀝𑁆𑀞𑀲𑁆𑀲 𑀪𑀕𑀯𑀢𑁄 𑀅𑀬𑀦𑁄𑀢𑀺 𑀏𑀓𑀸𑀬𑀦𑁄, 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸, 𑀏𑀓𑀲𑁆𑀫𑀺𑀁 𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑀯𑀺𑀦𑀬𑁂 𑀅𑀬𑀦𑁄𑀢𑀺 𑀏𑀓𑀸𑀬𑀦𑁄. 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀭𑀸𑀕𑀸𑀤𑀺𑀫𑀮𑁂𑀳𑀺, 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀘 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀯𑀺𑀲𑀼𑀚𑁆𑀛𑀦𑀢𑁆𑀣𑀸𑀬. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁂 𑀇𑀫𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀲𑀭𑀡𑀮𑀓𑁆𑀔𑀡𑁂𑀦 𑀫𑀕𑁆𑀕𑀝𑁆𑀞𑁂𑀦 𑀘 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀓𑀸𑀬𑀸𑀤𑀺𑀯𑀺𑀲𑀬𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀫𑀸𑀤𑀸𑀪𑀺𑀭𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀅𑀧𑁆𑀧𑀫𑀸𑀤𑀸𑀪𑀺𑀭𑀢𑀺𑀆𑀤𑀺𑀯𑀲𑁂𑀦𑀸𑀧𑀺 𑀳𑀺 𑀓𑀢𑁆𑀣𑀘𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀤𑁂𑀲𑀺𑀢𑁄. 𑀬𑀣𑀸𑀳 𑁋

‘‘𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺. (𑀥. 𑀧. 𑁩𑁨);

𑁪. 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀕𑀸𑀣𑀸𑀬𑀁. 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸 𑀕𑀸𑀣𑀸𑀬 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀝𑁆𑀞𑀸𑀦𑀺𑀬𑀸, 𑀢𑀢𑁄 𑀲𑀁𑀔𑀺𑀢𑁆𑀢𑀢𑀭𑀸 𑀅𑀢𑁆𑀣𑀯𑀡𑁆𑀡𑀦𑀸 𑀉𑀤𑁆𑀤𑁂𑀲𑀝𑁆𑀞𑀸𑀦𑀺𑀬𑀸𑀢𑀺 𑀆𑀳 ‘‘𑀅𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸’’𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸 𑀲𑀼𑀓𑀭𑀸, 𑀲𑀼𑀩𑁄𑀥𑀸 𑀘 𑀳𑁄𑀦𑁆𑀢𑀻𑀢𑀺. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀏𑀢𑁆𑀣 𑀲𑀻𑀮𑁂𑀢𑀺 𑀓𑀼𑀲𑀮𑀲𑀻𑀮𑁂. 𑀬𑀤𑀺𑀧𑀺 ‘‘𑀓𑀢𑀫𑁂 𑀘, 𑀣𑀧𑀢𑀺, 𑀅𑀓𑀼𑀲𑀮𑀸 𑀲𑀻𑀮𑀸’’𑀢𑀺𑀆𑀤𑀻𑀲𑀼 𑀅𑀓𑀼𑀲𑀮𑀸 𑀥𑀫𑁆𑀫𑀸𑀧𑀺 𑀲𑀻𑀮𑀦𑁆𑀢𑀺 𑀆𑀕𑀢𑀸. 𑀯𑀼𑀘𑁆𑀘𑀫𑀸𑀦𑀸𑀬 𑀧𑀦 𑀘𑀺𑀢𑁆𑀢𑀧𑀜𑁆𑀜𑀸𑀪𑀸𑀯𑀦𑀸𑀬 𑀅𑀥𑀺𑀝𑁆𑀞𑀸𑀦𑀸𑀬𑁄𑀕𑁆𑀬𑀢𑀸𑀬 𑀓𑀺𑀭𑀺𑀬𑀲𑀻𑀮𑀸𑀦𑀫𑁆𑀧𑀺 𑀅𑀲𑀫𑁆𑀪𑀯𑁄, 𑀓𑀼𑀢𑁄 𑀇𑀢𑀭𑁂𑀲𑀦𑁆𑀢𑀺 𑀓𑀼𑀲𑀮𑀲𑀻𑀮𑀫𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀁. 𑀲𑀻𑀮𑀁 𑀧𑀭𑀺𑀧𑀽𑀭𑀬𑀫𑀸𑀦𑁄𑀢𑀺𑀆𑀤𑀻𑀲𑀼 𑀧𑀭𑀺𑀧𑀽𑀭𑀬𑀫𑀸𑀦𑁄𑀢𑀺 𑀧𑀭𑀺𑀧𑀸𑀮𑁂𑀦𑁆𑀢𑁄, 𑀧𑀭𑀺𑀯𑀟𑁆𑀠𑁂𑀦𑁆𑀢𑁄 𑀯𑀸, 𑀲𑀩𑁆𑀩𑀪𑀸𑀕𑁂𑀳𑀺 𑀲𑀁𑀯𑀭𑀦𑁆𑀢𑁄 ¶ , 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑁄 𑀳𑀺 𑀢𑀁 𑀅𑀯𑀺𑀚𑀳𑀦𑁆𑀢𑁄 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. ‘‘𑀲𑀻𑀮𑁂’’𑀢𑀺 𑀳𑀺 𑀇𑀤𑀁 𑀆𑀥𑀸𑀭𑁂 𑀪𑀼𑀫𑁆𑀫𑀁. 𑀧𑀢𑀺𑀝𑁆𑀞𑀸𑀬𑀸𑀢𑀺 𑀤𑀼𑀯𑀺𑀥𑀸 𑀧𑀢𑀺𑀝𑁆𑀞𑀸 𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀪𑁂𑀤𑀢𑁄. 𑀢𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀢𑀺𑀝𑁆𑀞𑀸 𑀮𑁄𑀓𑀺𑀬𑀸, 𑀇𑀢𑀭𑀸 𑀮𑁄𑀓𑀼𑀢𑁆𑀢𑀭𑀸 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂. 𑀪𑀺𑀦𑁆𑀤𑀺𑀢𑁆𑀯𑀸 𑀧𑀦 𑀕𑀳𑀡𑁂 𑀬𑀣𑀸 𑀮𑁄𑀓𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀳𑀚𑀸𑀢𑀸𑀦𑀁, 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀜𑁆𑀘 𑀯𑀲𑁂𑀦 𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀧𑀢𑀺𑀝𑁆𑀞𑀸 𑀲𑀫𑁆𑀪𑀯𑀢𑀺, 𑀏𑀯𑀁 𑀮𑁄𑀓𑀼𑀢𑁆𑀢𑀭𑁂𑀲𑀼 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀲𑀻𑀮𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀧𑀢𑀺𑀝𑁆𑀞𑀸𑀧𑀺 𑀲𑀫𑁆𑀪𑀯𑀢𑀺. ‘‘𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀘 𑀧𑀤𑀲𑁆𑀲 𑀬𑀤𑀸 𑀉𑀧𑀦𑀺𑀲𑁆𑀲𑀬𑀧𑀢𑀺𑀝𑁆𑀞𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀯𑀺𑀬 𑀧𑀼𑀭𑀺𑀫𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧). 𑀬𑀤𑀸 𑀧𑀦 𑀦𑀺𑀲𑁆𑀲𑀬𑀧𑀢𑀺𑀝𑁆𑀞𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧; 𑀲𑀁. 𑀦𑀺. 𑁪.𑁬𑁦) 𑀯𑀺𑀬 𑀲𑀫𑀸𑀦𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀳𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀲𑀳𑀚𑀸𑀢𑀯𑀲𑁂𑀦𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀦𑀭𑀢𑀺 ¶ 𑀦𑁂𑀢𑀻𑀢𑀺 𑀦𑀭𑁄, 𑀧𑀼𑀭𑀺𑀲𑁄. 𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄, 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑀺 𑀉𑀘𑁆𑀘𑁂 𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀦𑀬𑀦𑀝𑁆𑀞𑁂𑀦 ‘‘𑀦𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀦𑁂𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀇𑀢𑀭𑁄 𑀇𑀢𑀭𑀸𑀲𑀁. 𑀦𑀭𑁂𑀦 𑀬𑁄𑀕𑀢𑁄, 𑀦𑀭𑀲𑁆𑀲 𑀅𑀬𑀦𑁆𑀢𑀺 𑀯𑀸 𑀦𑀸𑀭𑀻, 𑀇𑀢𑁆𑀣𑀻. 𑀲𑀸𑀧𑀺 𑀘𑁂𑀢𑁆𑀣 𑀓𑀸𑀫𑀁 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀲𑀫𑀢𑁆𑀣𑀢𑀸 𑀅𑀢𑁆𑀣𑀺, 𑀧𑀥𑀸𑀦𑀫𑁂𑀯 𑀧𑀦 𑀲𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀭𑁄’’𑀢𑀺 𑀆𑀳 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫). 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀯𑀺𑀪𑀸𑀕𑁂𑀦 𑀧𑀼𑀕𑁆𑀕𑀮𑀧𑀭𑀺𑀬𑀸𑀬𑁄 𑀅𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀭𑁄𑀢𑀺 𑀲𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀧𑀜𑁆𑀜𑁄𑀢𑀺 𑀯𑀺𑀧𑀸𑀓𑀪𑀽𑀢𑀸𑀬 𑀲𑀳 𑀧𑀜𑁆𑀜𑀸𑀬 𑀧𑀯𑀢𑁆𑀢𑀢𑀻𑀢𑀺 𑀲𑀧𑀜𑁆𑀜𑁄. 𑀢𑀸𑀬 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀦𑁆𑀢𑀸𑀦𑀯𑀲𑁂𑀦 𑀩𑀳𑀼𑀮𑀁 𑀧𑀯𑀢𑁆𑀢𑀫𑀸𑀦𑀸𑀬 𑀅𑀬𑀁 𑀲𑀢𑁆𑀢𑁄 𑀲𑀯𑀺𑀲𑁂𑀲𑀁 ‘‘𑀲𑀧𑀜𑁆𑀜𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀯𑀺𑀧𑀸𑀓𑀧𑀜𑁆𑀜𑀸𑀧𑀺 𑀳𑀺 𑀲𑀦𑁆𑀢𑀸𑀦𑀯𑀺𑀲𑁂𑀲𑀦𑁂𑀦 𑀪𑀸𑀯𑀦𑀸𑀧𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀢𑀤𑀪𑀸𑀯𑀢𑁄. 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑀸𑀬 𑀘 𑀢𑀁𑀢𑀁𑀓𑀺𑀘𑁆𑀘𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀯𑀲𑁂𑀦 ‘‘𑀲𑀧𑀜𑁆𑀜𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀧𑀓-𑀲𑀤𑁆𑀤𑁂𑀦 𑀧𑀸𑀭𑀺𑀳𑀸𑀭𑀺𑀓𑀧𑀜𑁆𑀜𑀸 𑀕𑀬𑁆𑀳𑀢𑀻𑀢𑀺 𑀯𑀺𑀧𑀸𑀓𑀧𑀜𑁆𑀜𑀸𑀯𑀲𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀓𑀫𑁆𑀫𑀚𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬𑀸𑀢𑀺 𑀓𑀫𑁆𑀫𑀚𑀸𑀬 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀧𑀜𑁆𑀜𑀸𑀬𑀸𑀢𑀺 𑀏𑀯𑀁 𑀢𑀺𑀳𑁂𑀢𑀼𑀓-𑀲𑀤𑁆𑀤𑁄 𑀧𑀝𑀺𑀲𑀦𑁆𑀥𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀦 𑀧𑀜𑁆𑀜𑀸-𑀲𑀤𑁆𑀤𑁂𑀦. 𑀦 𑀳𑀺 𑀧𑀜𑁆𑀜𑀸 𑀢𑀺𑀳𑁂𑀢𑀼𑀓𑀸 𑀅𑀢𑁆𑀣𑀺. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀫𑀸𑀦𑀸 𑀧𑀜𑁆𑀜𑀸 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸 𑀢𑀁𑀫𑀽𑀮𑀓𑀢𑁆𑀢𑀸, 𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀯𑀢𑁆𑀢𑀸 𑀏𑀯.

𑀘𑀺𑀦𑁆𑀢𑁂𑀢𑀺 ¶ 𑀆𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀘𑀺𑀢𑁆𑀢𑀁, 𑀲𑀫𑀸𑀥𑀺. 𑀲𑁄 𑀳𑀺 𑀲𑀸𑀢𑀺𑀲𑀬𑀁 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑁄. 𑀦 𑀳𑀺 𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀦𑀸 𑀲𑀫𑀸𑀥𑀺𑀦𑀸 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀺, 𑀲𑀫𑀸𑀥𑀺 𑀧𑀦 𑀢𑁂𑀳𑀺 𑀯𑀺𑀦𑀸𑀧𑀺 𑀲𑀸𑀥𑁂𑀢𑀻𑀢𑀺. 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀧𑀘𑁆𑀘𑀬𑁂𑀳𑀺 𑀘𑀺𑀢𑀁, 𑀢𑀣𑀸 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺𑀧𑀺 𑀘𑀺𑀢𑁆𑀢𑀁, 𑀲𑀫𑀸𑀥𑀺. 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬, 𑀇𑀤𑁆𑀥𑀺𑀯𑀺𑀥𑀸𑀤𑀺𑀘𑀺𑀢𑁆𑀢𑀓𑀭𑀡𑁂𑀦 𑀘 𑀲𑀫𑀸𑀥𑀺 𑀘𑀺𑀢𑁆𑀢𑀦𑁆𑀢𑀺 𑀯𑀺𑀦𑀸𑀧𑀺 𑀧𑀭𑁄𑀧𑀤𑁂𑀲𑁂𑀦𑀲𑁆𑀲 𑀘𑀺𑀢𑁆𑀢𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑁂𑀯. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀺𑀢𑁆𑀢-𑀲𑀤𑁆𑀤𑁄 𑀯𑀺𑀜𑁆𑀜𑀸𑀡𑁂 𑀦𑀺𑀭𑀼𑀴𑁆𑀳𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀻𑀲𑁂𑀦 𑀳𑁂𑀢𑁆𑀣 𑀲𑀫𑀸𑀥𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀲𑀸 𑀬𑀤𑀺𑀧𑀺 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀩𑀳𑀼𑀯𑀺𑀥𑀸. ‘‘𑀪𑀸𑀯𑀬’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀪𑀸𑀯𑁂𑀢𑀩𑁆𑀩𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀪𑀸𑀯𑀬’’𑀦𑁆𑀢𑀺 𑀘 𑀇𑀤𑀁 𑀧𑀘𑁆𑀘𑁂𑀓𑀁 ¶ 𑀬𑁄𑀚𑁂𑀢𑀩𑁆𑀩𑀁 ‘‘𑀘𑀺𑀢𑁆𑀢𑀜𑁆𑀘 𑀪𑀸𑀯𑀬𑀁, 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺. 𑀢𑀬𑀺𑀤𑀁 𑀤𑁆𑀯𑀬𑀁 𑀓𑀺𑀁 𑀮𑁄𑀓𑀺𑀬𑀁, 𑀉𑀤𑀸𑀳𑀼 𑀮𑁄𑀓𑀼𑀢𑁆𑀢𑀭𑀦𑁆𑀢𑀺? 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀢𑁄. 𑀢𑀁 𑀳𑀺 𑀪𑀸𑀯𑀬𑀫𑀸𑀦𑁄 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀢𑀡𑁆𑀳𑀸𑀚𑀝𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀚𑀝𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀮𑁄𑀓𑀺𑀬𑀁. 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑁂𑀦 𑀧𑀦𑁂𑀢𑁆𑀣 𑀮𑁄𑀓𑀺𑀬𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀮𑁄𑀓𑀺𑀬𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀳𑀺 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀪𑁂𑀤𑀁 𑀲𑀫𑀸𑀥𑀺𑀁 𑀇𑀢𑀭𑀲𑁆𑀲 𑀔𑀡𑀺𑀓𑀲𑀫𑀸𑀥𑀺𑀁, 𑀉𑀪𑀬𑁂𑀲𑀫𑁆𑀧𑀺 𑀯𑀺𑀫𑁄𑀓𑁆𑀔𑀫𑀼𑀔𑀢𑁆𑀢𑀬𑀁 𑀯𑀺𑀦𑀸 𑀦 𑀓𑀤𑀸𑀘𑀺𑀧𑀺 𑀮𑁄𑀓𑀼𑀢𑁆𑀢𑀭𑀸𑀥𑀺𑀕𑀫𑁄 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀲𑀫𑀸𑀥𑀺𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀜𑁆𑀘 𑀪𑀸𑀯𑀬𑀫𑀸𑀦𑁄’’𑀢𑀺. 𑀢𑀢𑁆𑀣 𑀬𑀤𑀸 𑀮𑁄𑀓𑀺𑀬𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 ‘‘𑀪𑀸𑀯𑀬’’𑀦𑁆𑀢𑀺 𑀇𑀤𑀁 𑀪𑀸𑀯𑀦𑀸𑀓𑀺𑀭𑀺𑀬𑀸𑀬 𑀳𑁂𑀢𑀼𑀪𑀸𑀯𑀓𑀣𑀦𑀁, 𑀪𑀸𑀯𑀦𑀸𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀢𑀁𑀪𑀸𑀯𑀦𑀸𑀳𑁂𑀢𑀼𑀓𑀸 𑀳𑀺 𑀯𑀺𑀚𑀝𑀦𑀓𑀺𑀭𑀺𑀬𑀸𑀢𑀺. 𑀬𑀤𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 𑀓𑁂𑀯𑀮𑀁 𑀯𑀢𑁆𑀢𑀫𑀸𑀦𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑀤𑀼𑀪𑀬𑀪𑀸𑀯𑀦𑀸𑀲𑀫𑀓𑀸𑀮𑀫𑁂𑀯 𑀳𑀺 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀁.

‘‘𑀆𑀢𑀸𑀧𑀻 𑀦𑀺𑀧𑀓𑁄’’𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀪𑀸𑀯𑀦𑀸𑀬 𑀉𑀧𑀓𑀸𑀭𑀓𑀥𑀫𑁆𑀫𑀓𑀺𑀢𑁆𑀢𑀦𑀁. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀳𑀺 𑀯𑀻𑀭𑀺𑀬𑀁 𑀲𑀢𑀺 𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀩𑀳𑀽𑀧𑀓𑀸𑀭𑀸. 𑀯𑀻𑀭𑀺𑀬𑀽𑀧𑀢𑁆𑀣𑀤𑁆𑀥𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀼𑀧𑀸𑀮𑀺𑀢𑀁 𑀦 𑀧𑀭𑀺𑀧𑀢𑀢𑀺, 𑀉𑀧𑀭𑀺 𑀘 𑀯𑀺𑀲𑁂𑀲𑀁 𑀆𑀯𑀳𑀢𑀺. 𑀧𑀢𑀺𑀝𑁆𑀞𑀸𑀲𑀺𑀤𑁆𑀥𑀺𑀬𑀸 𑀘𑁂𑀢𑁆𑀣 𑀲𑀤𑁆𑀥𑀸𑀲𑀺𑀤𑁆𑀥𑀺, 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑀢𑁆𑀢𑀸 𑀲𑀻𑀮𑀲𑁆𑀲, 𑀯𑀻𑀭𑀺𑀬𑀸𑀤𑀺𑀲𑀺𑀤𑁆𑀥𑀺𑀬𑀸 𑀘. 𑀦 𑀳𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀅𑀲𑀤𑁆𑀤𑀳𑀦𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀺, 𑀢𑀣𑀸 𑀲𑀫𑀸𑀥𑀺𑀧𑀺. 𑀬𑀣𑀸 𑀳𑀺 𑀳𑁂𑀢𑀼𑀪𑀸𑀯𑀢𑁄 𑀯𑀻𑀭𑀺𑀬𑀸𑀤𑀻𑀳𑀺 𑀲𑀤𑁆𑀥𑀸𑀲𑀺𑀤𑁆𑀥𑀺, 𑀏𑀯𑀁 𑀨𑀮𑀪𑀸𑀯𑀢𑁄 𑀢𑁂𑀳𑀺 𑀲𑀫𑀸𑀥𑀺𑀲𑀺𑀤𑁆𑀥𑀺. 𑀯𑀻𑀭𑀺𑀬𑀸𑀤𑀻𑀲𑀼 𑀳𑀺 𑀲𑀫𑁆𑀧𑀚𑁆𑀚𑀫𑀸𑀦𑁂𑀲𑀼 𑀲𑀫𑀸𑀥𑀺 𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺 𑀅𑀲𑀫𑀸𑀳𑀺𑀢𑀲𑁆𑀲 𑀢𑀤𑀪𑀸𑀯𑀢𑁄. 𑀓𑀣𑀁 𑀧𑀦𑁂𑀢𑁆𑀣 𑀲𑀢𑀺𑀲𑀺𑀤𑁆𑀥𑀺? 𑀦𑀺𑀧𑀓𑀕𑁆𑀕𑀳𑀡𑀢𑁄. 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀸 𑀳𑀺 𑀲𑀢𑀺 ‘‘𑀦𑁂𑀧𑀓𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀦𑁂𑀧𑀓𑁆𑀓𑀁 𑀧𑀜𑁆𑀜𑀸’’𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀕𑁆𑀕𑀳𑀡𑁂𑀦𑁂𑀯 ¶ 𑀲𑀢𑀺𑀧𑀺 𑀕𑀳𑀺𑀢𑀸𑀯 𑀳𑁄𑀢𑀺. 𑀦 𑀳𑀺 𑀲𑀢𑀺𑀯𑀺𑀭𑀳𑀺𑀢𑀸 𑀧𑀜𑁆𑀜𑀸 𑀅𑀢𑁆𑀣𑀻𑀢𑀺. 𑀅𑀧𑀭𑁂 𑀧𑀦 ‘‘𑀲𑀧𑀜𑁆𑀜𑁄’’𑀢𑀺 𑀇𑀫𑀺𑀦𑀸𑀯 𑀧𑀸𑀭𑀺𑀳𑀸𑀭𑀺𑀓𑀧𑀜𑁆𑀜𑀸𑀧𑀺 𑀕𑀬𑁆𑀳𑀢𑀻𑀢𑀺 ‘‘𑀦𑀺𑀧𑀓𑁄’’𑀢𑀺 𑀧𑀤𑀲𑁆𑀲 ‘‘𑀲𑀢𑁄’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀬𑀤𑀺𑀧𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀁, 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯. 𑀆𑀢𑀧𑁆𑀧𑀲𑀤𑁆𑀤𑁄 𑀯𑀺𑀬 𑀧𑀦 𑀆𑀢𑀸𑀧𑀲𑀤𑁆𑀤𑁄 𑀯𑀻𑀭𑀺𑀬𑁂𑀬𑁂𑀯 ¶ 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸’’𑀢𑀺. 𑀅𑀣 𑀯𑀸 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀸𑀢𑀺𑀲𑀬𑀁 𑀢𑀤𑀸𑀢𑀸𑀧𑀦𑀦𑁆𑀢𑀺 𑀯𑀻𑀭𑀺𑀬𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑁂 𑀥𑀫𑁆𑀫𑀸. 𑀆𑀢𑀸𑀧𑀻𑀢𑀺 𑀘𑀸𑀬𑀫𑀻𑀓𑀸𑀭𑁄 𑀧𑀲𑀁𑀲𑀸𑀬, 𑀅𑀢𑀺𑀲𑀬𑀲𑁆𑀲 𑀯𑀸 𑀤𑀻𑀧𑀓𑁄. 𑀯𑀻𑀭𑀺𑀬𑀯𑀸𑀢𑀺 𑀯𑀸-𑀲𑀤𑁆𑀤𑁄𑀧𑀺 𑀢𑀤𑀢𑁆𑀣𑁄 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑀗𑁆𑀕𑀺𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀝𑁆𑀞𑁂𑀦𑀸’’𑀢𑀺. 𑀆𑀢𑀸𑀧𑀦𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀆𑀭𑀫𑁆𑀪 𑀥𑀸𑀢𑀼𑀫𑀸𑀳 𑀆𑀤𑀺𑀢𑁄 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀓𑀢𑁆𑀯𑀸, 𑀧𑀭𑀺𑀢𑀸𑀧𑀦𑀕𑁆𑀕𑀳𑀡𑁂𑀦 𑀦𑀺𑀓𑁆𑀓𑀫𑀧𑀭𑀓𑁆𑀓𑀫𑀥𑀸𑀢𑀼𑀬𑁄 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑀁, 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀜𑁆𑀘 𑀉𑀧𑀸𑀤𑀸𑀬. 𑀦𑀺𑀧𑀬𑀢𑀺 𑀯𑀺𑀲𑁄𑀲𑁂𑀢𑀺 𑀧𑀝𑀺𑀧𑀓𑁆𑀔𑀁, 𑀢𑀢𑁄 𑀯𑀸 𑀅𑀢𑁆𑀢𑀸𑀦𑀁 𑀦𑀺𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀦𑀺𑀧𑀓𑁄, 𑀲𑀫𑁆𑀧𑀚𑀸𑀦𑁄. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀭𑀺𑀳𑀭𑀡𑁂 𑀦𑀺𑀬𑀼𑀢𑁆𑀢𑀸𑀢𑀺 𑀧𑀸𑀭𑀺𑀳𑀸𑀭𑀺𑀓𑀸.

𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀦𑁂𑀢𑀻𑀢𑀺 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀡𑀸𑀬𑀺𑀓𑀸. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀸 𑀉𑀕𑁆𑀕𑀳𑁄 𑀧𑀭𑀺𑀧𑀼𑀘𑁆𑀙𑀸 𑀪𑀸𑀯𑀦𑀸𑀭𑀫𑁆𑀪𑁄 𑀫𑀦𑀲𑀺𑀓𑀸𑀭𑀯𑀺𑀥𑀺, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀲𑀸𑀢𑀘𑁆𑀘𑀓𑀸𑀭𑀺𑀢𑀸 𑀲𑀧𑁆𑀧𑀸𑀬𑀓𑀸𑀭𑀺𑀢𑀸 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀧𑀳𑀺𑀢𑀢𑁆𑀢𑀢𑀸 𑀅𑀦𑁆𑀢𑀭𑀸𑀅𑀲𑀗𑁆𑀓𑁄𑀘𑁄 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀯𑀻𑀭𑀺𑀬𑀲𑀫𑀢𑀸𑀧𑀸𑀤𑀦𑀁 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀓𑀺𑀘𑁆𑀘𑀸𑀦𑀁 𑀧𑀭𑀺𑀡𑀸𑀬𑀺𑀓𑀸 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀡𑀸𑀬𑀺𑀓𑀸. 𑀪𑀬𑀁 𑀇𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀽𑀢𑀺 𑀲𑀸𑀥𑀸𑀭𑀡𑀢𑁄 𑀪𑀺𑀓𑁆𑀔𑀼𑀮𑀓𑁆𑀔𑀡𑀓𑀣𑀦𑁂𑀦 𑀧𑀝𑀺𑀧𑀢𑁆𑀢𑀺𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑁄, 𑀦 𑀪𑀺𑀓𑁆𑀔𑀓𑀪𑀺𑀦𑁆𑀦𑀧𑀝𑀥𑀭𑀸𑀤𑀺𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀳𑀺 𑀓𑀢𑀓𑀺𑀘𑁆𑀘𑀸𑀦𑀁 𑀲𑀸𑀫𑀡𑁂𑀭𑀸𑀤𑀻𑀦𑀁, 𑀧𑀝𑀺𑀧𑀦𑁆𑀦𑀸𑀦𑀜𑁆𑀘 𑀅𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀇𑀥 𑀧𑀦 𑀧𑀝𑀺𑀧𑀚𑁆𑀚𑀦𑀓𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀯𑀸 𑀪𑀺𑀓𑁆𑀔𑀼. 𑀲𑁄 𑀇𑀫𑀁 𑀯𑀺𑀚𑀝𑀬𑁂𑀢𑀺 𑀬𑁄 𑀦𑀭𑁄 𑀲𑀧𑁆𑀧𑀜𑁆𑀜𑁄 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀆𑀢𑀸𑀧𑀻 𑀦𑀺𑀧𑀓𑁄 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀢𑀡𑁆𑀳𑀸𑀚𑀝𑀁 𑀯𑀺𑀚𑀝𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀸𑀦𑀺 𑀢𑀫𑁆𑀧𑀺 𑀯𑀺𑀚𑀝𑀦𑀁 𑀯𑁂𑀴𑀼𑀕𑀼𑀫𑁆𑀩𑀯𑀺𑀚𑀝𑀦𑁂𑀦 𑀉𑀧𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀕𑀸𑀣𑀸𑀬 𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑀸𑀤𑀺𑀥𑀫𑁆𑀫𑁂 ‘‘𑀇𑀫𑀺𑀦𑀸 𑀘 𑀲𑀻𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀸𑀫𑀲𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀬𑁄𑀕𑀸𑀯𑀘𑀭𑀲𑀦𑁆𑀢𑀸𑀦𑀕𑀢𑀸 𑀦𑀸𑀦𑀸𑀓𑁆𑀔𑀡𑀺𑀓𑀸 𑀫𑀺𑀲𑁆𑀲𑀓𑀸 𑀲𑀻𑀮𑀸𑀤𑀺𑀥𑀫𑁆𑀫𑀸 𑀕𑀸𑀣𑀸𑀬 𑀕𑀳𑀺𑀢𑀸, 𑀢𑀲𑁆𑀫𑀸 𑀢𑁂 𑀏𑀓𑀘𑁆𑀘𑀁 𑀕𑀡𑁆𑀳𑀦𑁆𑀢𑁄 ‘‘𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳. 𑀦 𑀳𑀺 𑀢𑁂 𑀙 𑀥𑀫𑁆𑀫𑀸 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀏𑀓𑀲𑁆𑀫𑀺𑀁 𑀔𑀡𑁂 ¶ 𑀮𑀩𑁆𑀪𑀦𑁆𑀢𑀺. 𑀬𑀲𑁆𑀫𑀸 𑀘 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀫𑁂𑀯 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀲𑀼𑀦𑀺𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀦𑀺𑀲𑀺𑀢𑀁, 𑀅𑀢𑀺𑀯𑀺𑀬 𑀢𑀺𑀔𑀺𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀲𑁆𑀲 𑀦𑀺𑀲𑀸𑀦𑀲𑀺𑀮𑀸𑀬𑀁 𑀦𑀺𑀲𑀺𑀢𑀢𑀭𑀪𑀸𑀯𑀓𑀭𑀡𑀁, 𑀩𑀸𑀳𑀼𑀩𑀮𑁂𑀦 𑀘𑀲𑁆𑀲 𑀉𑀓𑁆𑀔𑀺𑀧𑀦𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀅𑀢𑁆𑀣𑀸𑀧𑀦𑁆𑀦𑀁 𑀓𑀢𑁆𑀯𑀸 𑀉𑀧𑀫𑀸 𑀯𑀼𑀢𑁆𑀢𑀸𑀢𑀺 𑀢𑀤𑀼𑀪𑀬𑀁 𑀉𑀧𑀫𑁂𑀬𑁆𑀬𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀁…𑀧𑁂… 𑀧𑀜𑁆𑀜𑀸𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀆𑀳. 𑀲𑀫𑀸𑀥𑀺𑀕𑀼𑀡𑁂𑀦 𑀳𑀺 𑀧𑀜𑁆𑀜𑀸𑀬 𑀢𑀺𑀓𑁆𑀔𑀪𑀸𑀯𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪). 𑀯𑀻𑀭𑀺𑀬𑀜𑁆𑀘𑀲𑁆𑀲𑀸 𑀉𑀧𑀢𑁆𑀣𑀫𑁆𑀪𑀓𑀁 𑀧𑀕𑁆𑀕𑀡𑁆𑀳𑀦𑀢𑁄. 𑀯𑀺𑀚𑀝𑁂𑀬𑁆𑀬𑀸𑀢𑀺 𑀯𑀺𑀚𑀝𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀳𑀺 𑀯𑀢𑁆𑀢𑀫𑀸𑀦𑀸𑀬 𑀬𑁄𑀕𑀸𑀯𑀘𑀭𑁄 𑀢𑀡𑁆𑀳𑀸𑀚𑀝𑀁 𑀯𑀺𑀚𑀝𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫. 𑀯𑀺𑀚𑀝𑀦𑀁 𑀘𑁂𑀢𑁆𑀣 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀦𑁆𑀢𑀺 𑀆𑀳 ‘‘𑀲𑀜𑁆𑀙𑀺𑀦𑁆𑀤𑁂𑀬𑁆𑀬 𑀲𑀫𑁆𑀧𑀤𑀸𑀮𑁂𑀬𑁆𑀬𑀸’’𑀢𑀺. 𑀤𑀓𑁆𑀔𑀺𑀡𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀅𑀕𑁆𑀕𑁄 𑀘 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀘𑀸𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄, 𑀅𑀕𑁆𑀕𑀸 𑀯𑀸 𑀤𑀓𑁆𑀔𑀺𑀡𑀸 𑀅𑀕𑁆𑀕𑀤𑀓𑁆𑀔𑀺𑀡𑀸, 𑀢𑀁 𑀅𑀭𑀳𑀢𑀻𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄.

𑁫. 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀕𑀸𑀣𑀸𑀬𑀁. 𑀅𑀬𑀦𑁆𑀢𑀺 ‘‘𑀦𑀭𑁄’’𑀢𑀺 𑀘 ‘‘𑀪𑀺𑀓𑁆𑀔𑀽’’𑀢𑀺 𑀘 𑀯𑀼𑀢𑁆𑀢𑁄 𑀬𑁄𑀕𑀸𑀯𑀘𑀭𑁄. 𑀧𑀼𑀦 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀧𑀜𑁆𑀜𑀸𑀬𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀓𑀢𑁆𑀢𑀭𑀺 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀅𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀭𑀡𑀻𑀬𑀁 𑀦𑀢𑁆𑀣𑀺 𑀯𑀺𑀲𑁂𑀲𑀸𑀥𑀸𑀦𑀲𑁆𑀲 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑁂𑀯 𑀳𑀺𑀲𑁆𑀲 𑀲𑀸 𑀲𑀺𑀤𑁆𑀥𑀸’’𑀢𑀺. 𑀢𑁂𑀦𑀸𑀢𑀺 𑀬𑁄𑀕𑀺𑀦𑀸. 𑀪𑀸𑀯𑀦𑀸𑀬𑀁 𑀲𑀢𑀢𑀧𑀯𑀢𑁆𑀢𑀺𑀢𑀯𑀻𑀭𑀺𑀬𑀢𑀸𑀬 𑀲𑀸𑀢𑀘𑁆𑀘𑀓𑀸𑀭𑀺𑀦𑀸. 𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑁂𑀧𑀓𑁆𑀓𑀲𑀗𑁆𑀔𑀸𑀢𑀧𑀜𑁆𑀜𑀸𑀯𑀲𑁂𑀦. 𑀬𑀁 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀫𑁆𑀧𑀚𑀸𑀦𑀯𑀲𑁂𑀦𑁂𑀯 𑀓𑀭𑀡𑀲𑀻𑀮𑁄, 𑀢𑀢𑁆𑀣 𑀯𑀸 𑀲𑀫𑁆𑀧𑀚𑀸𑀦𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀺, 𑀲𑀫𑁆𑀧𑀚𑀸𑀦𑀲𑁆𑀲 𑀯𑀸 𑀅𑀲𑀫𑁆𑀫𑁄𑀳𑀲𑁆𑀲 𑀓𑀸𑀭𑀓𑁄 𑀉𑀧𑁆𑀧𑀸𑀤𑀓𑁄𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻, 𑀢𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀦𑀸. 𑀅𑀢𑁆𑀭𑀸𑀢𑀺 𑀅𑀲𑁆𑀲𑀁 𑀕𑀸𑀣𑀸𑀬𑀁. 𑀲𑀻𑀮𑀸𑀤𑀺𑀲𑀫𑁆𑀧𑀸𑀤𑀦𑁂 𑀯𑀻𑀭𑀺𑀬𑀲𑁆𑀲 𑀢𑁂𑀲𑀁 𑀅𑀗𑁆𑀕𑀪𑀸𑀯𑀢𑁄 𑀢𑀁 𑀯𑀺𑀲𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦𑀸’’𑀢𑀺 𑀯𑀼𑀢𑁆𑀢𑀁.

‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀤𑀲𑁆𑀲𑁂𑀢𑀻’’𑀢𑀺 𑀅𑀯𑀺𑀪𑀸𑀕𑀢𑁄 𑀤𑁂𑀲𑀦𑀸𑀬 𑀧𑀺𑀡𑁆𑀟𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬. 𑀲𑀺𑀓𑁆𑀔𑀸𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸. 𑀲𑀺𑀓𑁆𑀔𑀦𑀁 𑀘𑁂𑀢𑁆𑀣 𑀆𑀲𑁂𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀻𑀮𑀸𑀤𑀺𑀥𑀫𑁆𑀫𑁂𑀳𑀺 𑀲𑀁𑀯𑀭𑀡𑀸𑀤𑀺𑀯𑀲𑁂𑀦 𑀆𑀲𑁂𑀯𑀦𑁆𑀢𑁄 𑀢𑁂 𑀲𑀺𑀓𑁆𑀔𑀢𑀻𑀢𑀺 ¶ 𑀯𑀼𑀘𑁆𑀘𑀢𑀺. 𑀲𑀸𑀲𑀦𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁. 𑀉𑀧𑀦𑀺𑀲𑁆𑀲𑀬𑁄 𑀩𑀮𑀯𑀓𑀸𑀭𑀡𑀁. 𑀯𑀚𑁆𑀚𑀦𑀁 𑀅𑀦𑀼𑀧𑀕𑀫𑀦𑀁. 𑀲𑁂𑀯𑀦𑀸 𑀪𑀸𑀯𑀦𑀸. 𑀧𑀝𑀺𑀧𑀓𑁆𑀔𑁄𑀢𑀺 𑀧𑀳𑀸𑀬𑀓𑀧𑀝𑀺𑀧𑀓𑁆𑀔𑁄. 𑀬𑀤𑀺𑀧𑀺 𑀕𑀸𑀣𑀸𑀬𑀁 ‘‘𑀲𑀻𑀮𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀦 ‘‘𑀅𑀥𑀺𑀲𑀻𑀮𑁂’’𑀢𑀺. 𑀢𑀁 𑀧𑀦 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀲𑁆𑀲 𑀧𑀢𑀺𑀝𑁆𑀞𑀸𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀻𑀮𑁂𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀓𑀸𑀲𑀺𑀢𑀸’’𑀢𑀺. 𑀪𑀯𑀕𑀸𑀫𑀺 𑀳𑀺 𑀲𑀻𑀮𑀁 𑀲𑀻𑀮𑀫𑁂𑀯, 𑀯𑀺𑀪𑀯𑀕𑀸𑀫𑀺 ¶ 𑀲𑀻𑀮𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀲𑀺𑀓𑁆𑀔𑀸𑀲𑀼𑀧𑀺.

𑀲𑀻𑀮𑁂𑀦𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀪𑀽𑀢𑁂𑀦 𑀲𑀻𑀮𑁂𑀦. 𑀢𑀁 𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀲𑀸𑀲𑀦𑀲𑁆𑀲 𑀆𑀤𑀺𑀓𑀮𑁆𑀬𑀸𑀡𑀢𑀁 𑀧𑀓𑀸𑀲𑁂𑀢𑀺, 𑀦 𑀬𑀫𑀦𑀺𑀬𑀫𑀸𑀤𑀺𑀫𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁, 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀘. 𑀓𑀼𑀲𑀮𑀸𑀦𑀦𑁆𑀢𑀺 𑀫𑀕𑁆𑀕𑀓𑀼𑀲𑀮𑀸𑀦𑀁. 𑀓𑀼𑀲𑀮𑀸𑀦𑀦𑁆𑀢𑀺 𑀯𑀸 𑀅𑀦𑀯𑀚𑁆𑀚𑀸𑀦𑀁. 𑀢𑁂𑀦 𑀅𑀭𑀺𑀬𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀦𑁆𑀢𑀺 𑀲𑀩𑁆𑀩𑀲𑁆𑀲𑀸𑀧𑀺 𑀲𑀸𑀯𑀚𑁆𑀚𑀲𑁆𑀲 𑀅𑀓𑀺𑀭𑀺𑀬𑀸 𑀅𑀦𑀚𑁆𑀛𑀸𑀧𑀚𑁆𑀚𑀦𑀁. 𑀏𑀢𑁂𑀦 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀪𑁂𑀤𑀲𑁆𑀲 𑀲𑀩𑁆𑀩𑀲𑁆𑀲 𑀲𑀻𑀮𑀲𑁆𑀲 𑀕𑀳𑀡𑀁 𑀓𑀢𑀁 𑀳𑁄𑀢𑀺. 𑀓𑀢𑁆𑀢𑀩𑁆𑀩𑀸𑀓𑀭𑀡𑀫𑁆𑀧𑀺 𑀳𑀺 𑀲𑀸𑀯𑀚𑁆𑀚𑀫𑁂𑀯𑀸𑀢𑀺. 𑀆𑀤𑀺𑀯𑀘𑀦𑀢𑁄𑀢𑀺 𑀕𑀸𑀣𑀸𑀬𑀁 𑀯𑀼𑀢𑁆𑀢𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀆𑀤𑀺𑀫𑁆𑀳𑀺 𑀯𑀘𑀦𑀢𑁄. 𑀆𑀤𑀺𑀪𑀸𑀯𑁄 𑀘𑀲𑁆𑀲 𑀢𑀫𑁆𑀫𑀽𑀮𑀓𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁. 𑀆𑀤𑀻𑀦𑀁 𑀯𑀸 𑀯𑀘𑀦𑀁 𑀆𑀤𑀺𑀯𑀘𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 ‘‘𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑀼𑀢𑁆𑀢𑀭𑀸’’𑀢𑀺 (𑀤𑀻. 𑀦𑀺. 𑁨.𑁧𑁮𑁬) 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀢𑁆𑀢𑀸 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀳𑁂𑀢𑀽𑀦𑀁 𑀤𑀽𑀭𑀻𑀓𑀭𑀡𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀕𑀼𑀡𑀸𑀯𑀳𑀁. ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀕𑀼𑀡𑀸𑀯𑀳𑀢𑁆𑀢𑀸’’𑀢𑀺 𑀏𑀢𑁂𑀦 𑀦 𑀓𑁂𑀯𑀮𑀁 𑀲𑀻𑀮𑀲𑁆𑀲 𑀓𑀮𑁆𑀬𑀸𑀡𑀢𑀸𑀯 𑀯𑀺𑀪𑀸𑀯𑀺𑀢𑀸, 𑀅𑀣 𑀔𑁄 𑀆𑀤𑀺𑀪𑀸𑀯𑁄𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺𑀲𑁆𑀲 𑀲𑀼𑀢𑁆𑀢𑁂 (𑀧𑀭𑀺. 𑁩𑁬𑁬) 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀧𑀭𑀺𑀬𑁄𑀲𑀸𑀦𑀸𑀦𑀁 𑀧𑀭𑀫𑁆𑀧𑀭𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀲𑀫𑀸𑀥𑀺𑀦𑀸𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀪𑀽𑀢𑁂𑀦 𑀲𑀫𑀸𑀥𑀺𑀦𑀸. 𑀲𑀓𑀮𑀁 𑀲𑀸𑀲𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀕𑀸𑀣𑀸𑀬 𑀆𑀤𑀺𑀧𑀤𑁂𑀦 𑀆𑀤𑀺𑀫𑁆𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀲𑁆𑀲 𑀲𑀻𑀮𑀲𑁆𑀲, 𑀢𑀢𑀺𑀬𑀧𑀤𑁂𑀦 𑀧𑀭𑀺𑀬𑁄𑀲𑀸𑀦𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀬 𑀧𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀫𑀚𑁆𑀛𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄 𑀲𑀫𑀸𑀥𑀺 𑀧𑀸𑀭𑀺𑀲𑁂𑀲𑀢𑁄 𑀤𑀼𑀢𑀺𑀬𑀧𑀤𑁂𑀦 𑀕𑀬𑁆𑀳𑀢𑀻𑀢𑀺 ‘‘𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸𑀢𑀺𑀆𑀤𑀺𑀯𑀘𑀦𑀢𑁄 𑀳𑀺 𑀲𑀫𑀸𑀥𑀺 𑀲𑀸𑀲𑀦𑀲𑁆𑀲 𑀫𑀚𑁆𑀛𑁂’’𑀢𑀺 𑀯𑀼𑀢𑁆𑀢𑀁, 𑀦 𑀓𑀼𑀲𑀮𑀲𑀤𑁆𑀤𑀲𑁆𑀲 𑀲𑀫𑀸𑀥𑀺𑀧𑀭𑀺𑀬𑀸𑀬𑀢𑁆𑀢𑀸. 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀯𑀢𑁄 𑀳𑀺 𑀲𑀫𑀸𑀳𑀺𑀢𑀢𑀸𑀤𑀺𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀢𑀸 𑀲𑀫𑀸𑀥𑀺𑀲𑁆𑀲 𑀇𑀤𑁆𑀥𑀺𑀯𑀺𑀥𑀸𑀤𑀺𑀕𑀼𑀡𑀸𑀯𑀳𑀢𑁆𑀢𑀁, 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀅𑀥𑀺𑀕𑀢𑀸𑀬 𑀬𑀤𑀢𑁆𑀣𑀁 𑀧𑀩𑁆𑀩𑀚𑀢𑀺, 𑀢𑀁 𑀧𑀭𑀺𑀬𑁄𑀲𑀺𑀢𑀦𑁆𑀢𑀺 𑀧𑀜𑁆𑀜𑀸 𑀲𑀸𑀲𑀦𑀲𑁆𑀲 ¶ 𑀧𑀭𑀺𑀬𑁄𑀲𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀺𑀓𑁆𑀔𑀸𑀦𑀺𑀲𑀁𑀲𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀁 𑀧𑀜𑁆𑀜𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀲𑀸𑀭’’𑀦𑁆𑀢𑀺 (𑀅. 𑀦𑀺. 𑁪.𑁨𑁪𑁫). 𑀲𑀓𑀁 𑀘𑀺𑀢𑁆𑀢𑀁 𑀲𑀘𑀺𑀢𑁆𑀢𑀁, 𑀲𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀺𑀲𑁄𑀥𑀦𑀁 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁. 𑀏𑀯𑀁 𑀧𑀦 𑀧𑀜𑁆𑀜𑀸𑀓𑀺𑀘𑁆𑀘𑁂 𑀫𑀢𑁆𑀣𑀓𑀧𑁆𑀧𑀢𑁆𑀢𑁂 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀲𑀸𑀲𑀦𑀲𑁆𑀲 𑀧𑀜𑁆𑀜𑀼𑀢𑁆𑀢𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄𑀢𑀺 𑀬𑀸𑀤𑀺𑀲𑁄 𑀇𑀝𑁆𑀞𑁂𑀲𑀼, 𑀮𑀸𑀪𑀸𑀤𑀻𑀲𑀼 𑀘 𑀅𑀦𑀼𑀦𑀬𑀸𑀪𑀸𑀯𑀢𑁄, 𑀢𑀸𑀤𑀺𑀲𑁄 𑀅𑀦𑀺𑀝𑁆𑀞𑁂𑀲𑀼, 𑀅𑀮𑀸𑀪𑀸𑀤𑀻𑀲𑀼 𑀘 𑀧𑀝𑀺𑀖𑀸𑀪𑀸𑀯𑀢𑁄. 𑀢𑀢𑁄 𑀏𑀯 𑀯𑀸 𑀬𑀸𑀤𑀺𑀲𑁄 𑀅𑀦𑀸𑀧𑀸𑀣𑀕𑀢𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼, 𑀢𑀸𑀤𑀺𑀲𑁄 𑀆𑀧𑀸𑀣𑀕𑀢𑁂𑀲𑀼𑀧𑀻𑀢𑀺 𑀢𑀸𑀤𑀻. 𑀢𑀲𑁆𑀲 𑀪𑀸𑀯𑁄 𑀢𑀸𑀤𑀺𑀪𑀸𑀯𑁄, 𑀢𑀲𑁆𑀲 𑀆𑀯𑀳𑀦𑀢𑁄. 𑀯𑀸𑀢𑁂𑀦𑀸𑀢𑀺 ¶ 𑀯𑀸𑀢𑀳𑁂𑀢𑀼. 𑀦 𑀲𑀫𑀻𑀭𑀢𑀻𑀢𑀺 𑀦 𑀘𑀮𑀢𑀺. 𑀦 𑀲𑀫𑀺𑀜𑁆𑀚𑀦𑁆𑀢𑀻𑀢𑀺 𑀦 𑀨𑀦𑁆𑀤𑀦𑁆𑀢𑀺, 𑀓𑀼𑀢𑁄 𑀘𑀮𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀣𑀸𑀢𑀺 𑀬𑀣𑀸 𑀲𑀻𑀮𑀸𑀤𑀬𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀧𑀓𑀸𑀲𑀓𑀸, 𑀢𑀣𑀸 𑀢𑁂𑀯𑀺𑀚𑁆𑀚𑀢𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀲𑁆𑀲𑀸𑀢𑀺 𑀢𑁂𑀲𑀁 𑀧𑀓𑀸𑀲𑀦𑀸𑀓𑀸𑀭𑀽𑀧𑀲𑀁𑀳𑀸𑀭𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀬𑀲𑁆𑀫𑀸 𑀲𑀻𑀮𑀁 𑀯𑀺𑀲𑀼𑀚𑁆𑀛𑀫𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦, 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀩𑀮𑁂𑀦 𑀘 𑀲𑀁𑀓𑀺𑀮𑁂𑀲𑀫𑀮𑀢𑁄 𑀯𑀺𑀲𑀼𑀚𑁆𑀛𑀢𑀺 𑀧𑀸𑀭𑀺𑀧𑀽𑀭𑀺𑀜𑁆𑀘 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀻𑀮𑀲𑀫𑁆𑀧𑀤𑀸 𑀲𑀺𑀚𑁆𑀛𑀫𑀸𑀦𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀪𑀸𑀯𑁂𑀦 𑀲𑀢𑀺𑀩𑀮𑀁, 𑀜𑀸𑀡𑀩𑀮𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀢𑀲𑁆𑀲𑀸 𑀯𑀺𑀚𑁆𑀚𑀢𑁆𑀢𑀬𑀽𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 𑀲𑀪𑀸𑀕𑀳𑁂𑀢𑀼𑀲𑀫𑁆𑀧𑀸𑀤𑀦𑀢𑁄. 𑀲𑀢𑀺𑀦𑁂𑀧𑀓𑁆𑀓𑁂𑀦 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀯𑀺𑀚𑁆𑀚𑀸𑀲𑀺𑀤𑁆𑀥𑀺, 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀲𑀼𑀤𑀺𑀝𑁆𑀞𑀓𑀸𑀭𑀺𑀢𑀸𑀧𑀭𑀺𑀘𑀬𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀦𑀼𑀩𑀦𑁆𑀥𑀸𑀬 𑀤𑀼𑀢𑀺𑀬𑀯𑀺𑀚𑁆𑀚𑀸𑀲𑀺𑀤𑁆𑀥𑀺, 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑀩𑁆𑀪𑀸𑀯𑀢𑁄 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸𑀯𑀲𑁂𑀦 𑀅𑀚𑁆𑀛𑀸𑀲𑀬𑀲𑀼𑀤𑁆𑀥𑀺𑀬𑀸 𑀢𑀢𑀺𑀬𑀯𑀺𑀚𑁆𑀚𑀸𑀲𑀺𑀤𑁆𑀥𑀺. 𑀧𑀼𑀭𑁂𑀢𑀭𑀁 𑀲𑀺𑀤𑁆𑀥𑀸𑀦𑀁 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀧𑀸𑀭𑀺𑀧𑀽𑀭𑀺𑀁 𑀯𑀺𑀦𑀸 𑀲𑀻𑀮𑀲𑁆𑀲 𑀆𑀲𑀯𑀓𑁆𑀔𑀬𑀜𑀸𑀡𑀽𑀧𑀦𑀺𑀲𑁆𑀲𑀬𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀲𑀫𑀸𑀥𑀺𑀧𑀜𑁆𑀜𑀸 𑀯𑀺𑀬 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀲𑀻𑀮𑀁 𑀦 𑀲𑀪𑀸𑀕𑀳𑁂𑀢𑀽𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦 𑀢𑀢𑁄 𑀧𑀭’’𑀦𑁆𑀢𑀺. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪) 𑀯𑀘𑀦𑀢𑁄 𑀲𑀫𑀸𑀥𑀺𑀲𑀫𑁆𑀧𑀤𑀸 𑀙𑀴𑀪𑀺𑀜𑁆𑀜𑀢𑀸𑀬 𑀉𑀧𑀦𑀺𑀲𑁆𑀲𑀬𑁄. 𑀧𑀜𑁆𑀜𑀸 𑀯𑀺𑀬 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀲𑀫𑀸𑀥𑀺 𑀦 𑀲𑀪𑀸𑀕𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 ‘‘𑀦 𑀢𑀢𑁄 𑀧𑀭’’𑀦𑁆𑀢𑀺. ‘‘𑀬𑁄𑀕𑀸 𑀯𑁂 𑀚𑀸𑀬𑀢𑁂 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨) 𑀯𑀘𑀦𑀢𑁄 𑀧𑀼𑀩𑁆𑀩𑀬𑁄𑀕𑁂𑀦, 𑀕𑀭𑀼𑀯𑀸𑀲𑀤𑁂𑀲𑀪𑀸𑀲𑀸𑀓𑀑𑀲𑀮𑁆𑀮𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘 𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 ¶ 𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑁄𑀧𑀺 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀸𑀢𑀺 𑀧𑀜𑁆𑀜𑀸𑀬 𑀅𑀦𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑀢𑁄, 𑀢𑀲𑁆𑀲𑀸 𑀘 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀲𑁆𑀲 𑀏𑀓𑀦𑁆𑀢𑀺𑀓𑀓𑀸𑀭𑀡𑀢𑁄 𑀳𑁂𑀝𑁆𑀞𑀸 𑀯𑀺𑀬 ‘‘𑀦 𑀢𑀢𑁄 𑀧𑀭’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀲𑀻𑀮𑀲𑀫𑁆𑀧𑀢𑁆𑀢𑀺𑀜𑁆𑀳𑀺 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀲𑀫𑀸𑀥𑀺𑀯𑀺𑀚𑀫𑁆𑀪𑀦𑀪𑀽𑀢𑀸 𑀅𑀦𑀯𑀲𑁂𑀲𑀸 𑀙 𑀅𑀪𑀺𑀜𑁆𑀜𑀸 𑀦 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸 𑀅𑀢𑁆𑀣𑀻𑀢𑀺. 𑀲𑀢𑀺𑀧𑀺 𑀯𑀺𑀚𑁆𑀚𑀸𑀦𑀁 𑀅𑀪𑀺𑀜𑁆𑀜𑁂𑀓𑀤𑁂𑀲𑀪𑀸𑀯𑁂 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀏𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀕𑀳𑀺𑀢𑀸. 𑀬𑀣𑀸 𑀳𑀺 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀢𑀸𑀲𑀁 𑀧𑀝𑀺𑀮𑀪𑀺𑀢𑀩𑁆𑀩𑀢𑁄, 𑀏𑀯𑀁 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀘 𑀙 𑀅𑀪𑀺𑀜𑁆𑀜𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀻𑀢𑀺 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 ¶ 𑀢𑀸𑀲𑀁 𑀅𑀥𑀺𑀕𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀲𑀤𑀺𑀲𑀸 𑀳𑀺 𑀇𑀫𑁂𑀲𑀁 𑀅𑀭𑀺𑀬𑀸𑀦𑀁 𑀇𑀫𑁂 𑀯𑀺𑀲𑁂𑀲𑀸𑀥𑀺𑀕𑀫𑀸𑀢𑀺. 𑀯𑀺𑀦𑀬𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀯𑀺𑀚𑁆𑀚𑀢𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀢𑀸𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀫𑁆𑀧𑀦𑁆𑀦𑀲𑀻𑀮𑀲𑁆𑀲 𑀓𑀸𑀫𑀲𑁂𑀯𑀦𑀸𑀪𑀸𑀯𑀢𑁄 𑀲𑀻𑀮𑁂𑀦 𑀧𑀞𑀫𑀦𑁆𑀢𑀯𑀺𑀯𑀚𑁆𑀚𑀦𑀁 𑀯𑀼𑀢𑁆𑀢𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀓𑀸𑀫𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦𑀸𑀧𑀺 𑀅𑀲𑀼𑀤𑁆𑀥𑀧𑀬𑁄𑀕𑀸 𑀳𑁄𑀦𑁆𑀢𑀺. 𑀛𑀸𑀦𑀲𑀼𑀔𑀮𑀸𑀪𑀺𑀦𑁄 𑀓𑀸𑀬𑀓𑀺𑀮𑀫𑀣𑀲𑁆𑀲 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺 𑀲𑀫𑀸𑀥𑀺𑀦𑀸 𑀤𑀼𑀢𑀺𑀬𑀦𑁆𑀢𑀯𑀺𑀯𑀚𑁆𑀚𑀦𑀁 𑀯𑀼𑀢𑁆𑀢𑀁 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀓𑀸𑀬𑀢𑁆𑀢𑀸. 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀳𑀺 𑀏𑀓𑀁𑀲𑀢𑁄 𑀅𑀭𑀺𑀬𑀫𑀕𑁆𑀕𑁄𑀯 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺 𑀦𑀸𑀫. 𑀏𑀯𑀁 𑀲𑀦𑁆𑀢𑁂𑀧𑀺 𑀮𑁄𑀓𑀺𑀬𑀧𑀜𑁆𑀜𑀸𑀯𑀲𑁂𑀦𑀧𑀺 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀁 𑀯𑀺𑀪𑀸𑀯𑁂𑀢𑀩𑁆𑀩𑀁.

𑀲𑀻𑀮𑀁 𑀢𑀁𑀲𑀫𑀗𑁆𑀕𑀺𑀦𑁄 𑀓𑀸𑀫𑀲𑀼𑀕𑀢𑀻𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀯𑀺𑀫𑀼𑀢𑁆𑀢𑀺𑀬𑀸 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀻𑀮𑁂𑀦 𑀅𑀧𑀸𑀬𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺. 𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀝𑀺𑀯𑀺𑀭𑀢𑀺 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀁 𑀆𑀯𑀳𑀢𑀺. 𑀲𑀫𑀸𑀥𑀺 𑀢𑀁𑀲𑀫𑀗𑁆𑀕𑀺𑀦𑁄 𑀫𑀳𑀕𑁆𑀕𑀢𑀪𑀽𑀫𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀸𑀧𑀦𑁂𑀦 𑀲𑀓𑀮𑀓𑀸𑀫𑀪𑀯𑀢𑁄 𑀯𑀺𑀫𑁄𑀘𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀦𑀸 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺. 𑀦 𑀳𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀬𑀻𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀓𑀁 𑀛𑀸𑀦𑀁 𑀓𑀸𑀫𑀥𑀸𑀢𑀼𑀧𑀭𑀺𑀓𑀺𑀮𑁂𑀲𑀸𑀯𑀳𑀁 𑀳𑁄𑀢𑀺. 𑀦 𑀘𑁂𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀁, 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 ¶ 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦𑀸𑀧𑀺 ‘‘𑀲𑀻𑀮𑁂𑀦𑁂𑀯 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀲𑁆𑀲 𑀅𑀧𑀸𑀬𑀪𑀯𑀲𑁆𑀲 𑀲𑀫𑀸𑀥𑀺𑀦𑀸 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑀸’’𑀢𑀺 𑀯𑀘𑀦𑁄𑀓𑀸𑀲𑁄. 𑀲𑀼𑀕𑀢𑀺𑀪𑀯𑀫𑁆𑀧𑀺 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀕𑁆𑀕𑀢𑀺𑀲𑀫𑀢𑀺𑀓𑁆𑀓𑀫𑀦𑁂 𑀓𑀸 𑀓𑀣𑀸𑀢𑀺. 𑀲𑀩𑁆𑀩𑀪𑀯𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑁄𑀢𑀺 𑀓𑀸𑀫𑀪𑀯𑀸𑀤𑀻𑀦𑀁 𑀦𑀯𑀦𑁆𑀦𑀫𑁆𑀧𑀺 𑀪𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑁄 𑀲𑀻𑀮𑀲𑀫𑀸𑀥𑀻𑀳𑀺 𑀅𑀢𑀺𑀓𑁆𑀓𑀦𑁆𑀢𑀸𑀧𑀺 𑀪𑀯𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀏𑀯, 𑀓𑀸𑀭𑀡𑀲𑁆𑀲 𑀅𑀧𑀳𑀻𑀦𑀢𑁆𑀢𑀸. 𑀧𑀜𑁆𑀜𑀸𑀬 𑀧𑀦𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑀸 𑀏𑀯.

𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦𑀸𑀢𑀺 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀕𑀢𑁂𑀦 𑀢𑁂𑀦 𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀸𑀦𑀯𑀲𑁂𑀦. 𑀲𑀫𑀸𑀥𑀺𑀦𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀚𑀮𑀢𑀮𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀯𑀲𑁂𑀦. 𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭) 𑀯𑀼𑀢𑁆𑀢𑀲𑁆𑀲 ¶ 𑀲𑀫𑀼𑀤𑀬𑀧𑀓𑁆𑀔𑀺𑀬𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑁆𑀧𑀳𑀸𑀦𑀯𑀲𑁂𑀦.

𑀓𑀺𑀮𑁂𑀲𑀸𑀦𑀁 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑁄𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁, 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀯𑀸 𑀬𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀯𑀻𑀢𑀺𑀓𑁆𑀓𑀫𑁄 𑀅𑀚𑁆𑀛𑀸𑀘𑀸𑀭𑁄, 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀻𑀮𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀺, 𑀅𑀯𑀻𑀢𑀺𑀓𑁆𑀓𑀫𑀲𑀪𑀸𑀯𑀢𑁆𑀢𑀸 𑀲𑀻𑀮𑀲𑁆𑀲. 𑀑𑀓𑀸𑀲𑀸𑀤𑀸𑀦𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀘𑀺𑀢𑁆𑀢𑁂 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀉𑀝𑁆𑀞𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀢𑀁 𑀲𑀫𑀸𑀥𑀺 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀆𑀳 ‘‘𑀲𑀫𑀸𑀥𑀺𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺, 𑀲𑀫𑀸𑀥𑀺𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀬𑀓𑀢𑁆𑀢𑀸. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀦𑀢𑁄 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀭𑀳𑀸 𑀅𑀦𑀼𑀲𑀬𑀸, 𑀢𑁂 𑀧𑀦 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀣𑀸𑀫𑀕𑀢𑀸 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 𑀓𑀺𑀮𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀻𑀢𑀺 𑀆𑀳 ‘‘𑀧𑀜𑁆𑀜𑀸𑀬 𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀓𑀺𑀮𑁂𑀲𑁂𑀳𑀺 𑀯𑀸 𑀤𑀽𑀲𑀺𑀢𑀁 𑀘𑀭𑀺𑀢𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁, 𑀢𑀫𑁂𑀯 𑀬𑀢𑁆𑀣 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑁂𑀢𑀺 𑀯𑀺𑀩𑀸𑀥𑀢𑀺, 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀯𑀺𑀲𑁄𑀥𑀦𑀁 𑀲𑀻𑀮𑁂𑀦 𑀢𑀤𑀗𑁆𑀕𑀯𑀲𑁂𑀦 𑀧𑀳𑀸𑀦𑀁 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲. 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀲𑁄𑀥𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 ¶ 𑀧𑀳𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀸𑀥𑀺𑀲𑁆𑀲, 𑀢𑀡𑁆𑀳𑀸𑀬 𑀘𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀺𑀓𑀪𑀸𑀯𑀢𑁄. 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀲𑁄𑀥𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀁 𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬, 𑀤𑀺𑀝𑁆𑀞𑀺𑀕𑀢𑀸𑀦𑀜𑁆𑀘 𑀅𑀬𑀸𑀣𑀸𑀯𑀕𑀸𑀳𑀻𑀦𑀁 𑀬𑀸𑀣𑀸𑀯𑀕𑀸𑀳𑀺𑀦𑀺𑀬𑀸 𑀧𑀜𑁆𑀜𑀸𑀬 𑀉𑀚𑀼𑀯𑀺𑀧𑀘𑁆𑀘𑀦𑀺𑀓𑀪𑀸𑀯𑀢𑁄.

𑀓𑀸𑀭𑀡𑀦𑁆𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀢𑁆𑀢𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀁 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀲𑀗𑁆𑀔𑀸𑀢𑀸𑀦𑀁 𑀫𑀳𑀸𑀲𑀻𑀮𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑀢𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀁 𑀆𑀧𑀚𑁆𑀚𑀦𑁂 𑀲𑀳𑀲𑀸𑀯 𑀢𑁂𑀳𑀺 𑀯𑀼𑀝𑁆𑀞𑀸𑀦𑁂𑀦 𑀲𑀻𑀮𑁂𑀲𑀼 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀺𑀧𑀽𑀭𑀁 𑀲𑀫𑀢𑁆𑀣𑀁 𑀓𑀭𑁄𑀢𑀻𑀢𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀢𑀣𑀸 𑀲𑀓𑀤𑀸𑀕𑀸𑀫𑀻𑀢𑀺 ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀏𑀢𑀁 𑀉𑀧𑀲𑀁𑀳𑀭𑀢𑀺 𑀢𑀣𑀸-𑀲𑀤𑁆𑀤𑁂𑀦. 𑀏𑀢𑁂 𑀳𑀺 𑀤𑁆𑀯𑁂 𑀅𑀭𑀺𑀬𑀸 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀸𑀦𑀁 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀧𑀜𑁆𑀜𑀸𑀧𑀸𑀭𑀺𑀧𑀦𑁆𑀣𑀺𑀓𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀲𑁆𑀲 𑀲𑀩𑁆𑀩𑀲𑁄 𑀅𑀲𑀫𑀽𑀳𑀢𑀢𑁆𑀢𑀸 𑀲𑀫𑀸𑀥𑀺𑀁, 𑀧𑀜𑁆𑀜𑀜𑁆𑀘 𑀪𑀸𑀯𑁂𑀦𑁆𑀢𑀸𑀧𑀺 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀫𑀢𑁆𑀢𑀲𑁄 𑀧𑀫𑀸𑀡𑁂𑀦 𑀧𑀤𑁂𑀲𑀫𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑁆𑀫𑀺𑀁, 𑀧𑀜𑁆𑀜𑀸𑀬 𑀘 𑀫𑀢𑁆𑀢𑀲𑁄 𑀓𑀸𑀭𑀺𑀦𑁄 ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀸𑀕𑀸𑀫𑀻 ¶ 𑀧𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻. 𑀅𑀭𑀳𑀸 𑀲𑀩𑁆𑀩𑀲𑁄 𑀲𑀫𑁆𑀫𑁄𑀳𑀲𑁆𑀲 𑀲𑀼𑀲𑀫𑀽𑀳𑀢𑀢𑁆𑀢𑀸 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀻.

𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 (𑀅. 𑀦𑀺. 𑁩.𑁮𑁭) 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑀸𑀦𑀺 𑀆𑀧𑀚𑁆𑀚𑀢𑀺𑀧𑀺 𑀯𑀼𑀝𑁆𑀞𑀸𑀢𑀺𑀧𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑀺 𑀫𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀅𑀪𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀬𑀸𑀦𑀺 𑀘 𑀔𑁄 𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑀸𑀭𑀼𑀧𑁆𑀧𑀸𑀦𑀺, 𑀢𑀢𑁆𑀣 𑀥𑀼𑀯𑀲𑀻𑀮𑁄 𑀘 𑀳𑁄𑀢𑀺 𑀞𑀺𑀢𑀲𑀻𑀮𑁄 𑀘, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼…𑀧𑁂… 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺. 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 ¶ 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺…𑀧𑁂… 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁…𑀧𑁂… 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀻. 𑀲𑁄 𑀬𑀸𑀦𑀺 𑀢𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺…𑀧𑁂… 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺.

‘‘𑀓𑀣’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀺𑀓𑁆𑀔𑀸𑀤𑀺𑀓𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑁂 𑀘𑀸𑀢𑀺 𑀢𑀬𑁄 𑀯𑀺𑀯𑁂𑀓𑀸, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺, 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀏𑀯𑀫𑀸𑀤𑀬𑁄, 𑀲𑀺𑀓𑁆𑀔𑀢𑁆𑀢𑀺𑀓𑀸𑀤𑀻𑀳𑀺 𑀅𑀜𑁆𑀜𑁂 𑀘 𑀕𑀼𑀡𑀢𑁆𑀢𑀺𑀓𑀸. 𑀏𑀯𑀭𑀽𑀧𑀸𑀢𑀺 𑀬𑀸𑀤𑀺𑀲𑀓𑀸 𑀲𑀺𑀓𑁆𑀔𑀢𑁆𑀢𑀺𑀓𑀸𑀤𑀬𑁄 𑀇𑀥 𑀲𑀻𑀮𑀸𑀤𑀻𑀳𑀺 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀏𑀤𑀺𑀲𑀸.

𑀏𑀢𑁆𑀣 𑀳𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀲𑀻𑀮𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀻𑀮𑁂𑀦 𑀓𑀸𑀬𑀯𑀺𑀯𑁂𑀓𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺, 𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀧𑀜𑁆𑀜𑀸𑀬 𑀉𑀧𑀥𑀺𑀯𑀺𑀯𑁂𑀓𑁄. 𑀢𑀣𑀸 𑀲𑀻𑀮𑁂𑀦 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺, 𑀢𑀺𑀢𑀺𑀓𑁆𑀔𑀧𑁆𑀧𑀥𑀸𑀦𑀢𑀸𑀬, 𑀅𑀧𑀭𑀽𑀧𑀖𑀸𑀢𑀲𑀪𑀸𑀯𑀢𑀸𑀬 𑀘 𑀲𑀻𑀮𑀲𑁆𑀲. 𑀲𑀫𑀸𑀥𑀺𑀦𑀸 𑀅𑀮𑁄𑀪𑁄 ¶ 𑀓𑀼𑀲𑀮𑀫𑀽𑀮𑀁, 𑀮𑁄𑀪𑀧𑀝𑀺𑀧𑀓𑁆𑀔𑀢𑁄, 𑀅𑀮𑁄𑀪𑀧𑀥𑀸𑀦𑀢𑀸𑀬 𑀘 𑀲𑀫𑀸𑀥𑀺𑀲𑁆𑀲. 𑀧𑀜𑁆𑀜𑀸𑀬 𑀧𑀦 𑀅𑀫𑁄𑀳𑁄𑀬𑁂𑀯. 𑀲𑀻𑀮𑁂𑀦 𑀘 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺. 𑀅𑀤𑁄𑀲𑀧𑁆𑀧𑀥𑀸𑀦𑀁 𑀳𑀺 𑀲𑀻𑀮𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀤𑁄𑀲𑁂 𑀆𑀤𑀻𑀦𑀯𑀤𑀲𑁆𑀲𑀺𑀦𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀘 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁. 𑀲𑀫𑀸𑀥𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁. 𑀧𑀜𑁆𑀜𑀸𑀬 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁. 𑀅𑀮𑁄𑀪𑀧𑁆𑀧𑀥𑀸𑀦𑀁 𑀳𑀺 𑀓𑀸𑀫𑀦𑀺𑀲𑁆𑀲𑀭𑀡𑀁 𑀲𑀫𑀸𑀥𑀺𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀓𑀸𑀫𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀺𑀦𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀘 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁. 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁. 𑀢𑀣𑀸 𑀲𑀻𑀮𑁂𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺. 𑀢𑀁 𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀁. 𑀲𑀫𑀸𑀥𑀺𑀦𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀁 𑀳𑀺 𑀉𑀓𑁆𑀓𑀁𑀲𑀕𑀢𑀁 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀦𑀸𑀕𑀸𑀫𑀺𑀦𑁄, 𑀅𑀕𑁆𑀕𑀫𑀕𑁆𑀕𑀝𑁆𑀞𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑀁. 𑀧𑀜𑁆𑀜𑀸𑀬 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺. 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀳𑀺 𑀅𑀭𑀳𑀸 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀻𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀕𑀼𑀡𑀢𑁆𑀢𑀺𑀓𑀸 𑀲𑀻𑀮𑀸𑀤𑀻𑀳𑀺 𑀧𑀓𑀸𑀲𑁂𑀢𑀩𑁆𑀩𑀸.

𑁧. 𑀲𑀻𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀻𑀮𑀲𑀭𑀽𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁬. 𑀏𑀯𑀦𑁆𑀢𑀺 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀦𑁂𑀓𑀕𑀼𑀡𑀲𑀗𑁆𑀕𑀸𑀳𑀓𑁂𑀦𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁, 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑁂𑀲𑀁 𑀕𑀼𑀡𑀸𑀦𑀁 𑀲𑀗𑁆𑀕𑀸𑀳𑀓𑁂𑀦. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁭𑁭; 𑀣𑁂𑀭𑀕𑀸. 𑁬𑁭𑁬; 𑀦𑁂𑀢𑁆𑀢𑀺. 𑁫) 𑀯𑀺𑀬 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀸𑀤𑀺𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀅𑀤𑁂𑀲𑁂𑀢𑁆𑀯𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦 𑀤𑁂𑀲𑀺𑀢𑁄𑀧𑀺, 𑀲𑀢𑁆𑀢𑀢𑀺𑀁𑀲𑀸𑀬𑀧𑀺 𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁆𑀣 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀫𑀼𑀔𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄𑀧𑀺. 𑀏𑀢𑁂𑀦 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀅𑀯𑀲𑁂𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀲𑀪𑀸𑀯𑀢𑁄, 𑀉𑀧𑀓𑀸𑀭𑀢𑁄 𑀘 𑀅𑀦𑁆𑀢𑁄𑀕𑀥𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑁄𑀬𑁂𑀯 𑀳𑁄𑀢𑀺 𑀲𑀪𑀸𑀯𑀯𑀺𑀪𑀸𑀕𑀸𑀤𑀺𑀢𑁄 𑀅𑀯𑀺𑀪𑀸𑀯𑀺𑀢𑀢𑁆𑀢𑀸. 𑀦𑀸𑀮𑀦𑁆𑀢𑀺 𑀦 𑀧𑀭𑀺𑀬𑀢𑁆𑀢𑀁 𑀦 𑀲𑀫𑀢𑁆𑀣𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀦𑀸𑀢𑀺𑀲𑀗𑁆𑀔𑁂𑀧𑀦𑀸𑀢𑀺𑀯𑀺𑀢𑁆𑀣𑀸𑀭𑀭𑀼𑀘𑀻𑀦𑀫𑁆𑀧𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀸𑀦𑀫𑁆𑀧𑀺 𑀯𑀸. 𑀲𑀗𑁆𑀔𑁂𑀧𑀤𑁂𑀲𑀦𑀸 𑀳𑀺 𑀲𑀁𑀔𑀺𑀢𑁆𑀢𑀭𑀼𑀘𑀻𑀦𑀁, 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁𑀬𑁂𑀯 𑀘 𑀉𑀧𑀓𑀸𑀭𑀸𑀬 𑀳𑁄𑀢𑀺, 𑀦 𑀧𑀦𑀺𑀢𑀭𑁂𑀲𑀁. 𑀅𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲. 𑀧𑀼𑀘𑁆𑀙𑀦𑀝𑁆𑀞𑁂𑀦 𑀧𑀜𑁆𑀳𑀸, 𑀓𑀺𑀭𑀺𑀬𑀸 𑀓𑀭𑀡𑀁 𑀓𑀫𑁆𑀫𑀁, 𑀧𑀜𑁆𑀳𑀸𑀯 𑀓𑀫𑁆𑀫𑀁 𑀧𑀜𑁆𑀳𑀸𑀓𑀫𑁆𑀫𑀁, 𑀧𑀼𑀘𑁆𑀙𑀦𑀧𑀬𑁄𑀕𑁄.

𑀓𑀺𑀁 𑀲𑀻𑀮𑀦𑁆𑀢𑀺 𑀲𑀭𑀽𑀧𑀧𑀼𑀘𑁆𑀙𑀸. 𑀓𑁂𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 𑀓𑁂𑀦 𑀅𑀢𑁆𑀣𑁂𑀦 𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, ‘‘𑀲𑀻𑀮’’𑀦𑁆𑀢𑀺 𑀧𑀤𑀁 𑀓𑀁 𑀅𑀪𑀺𑀥𑁂𑀬𑁆𑀬𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀬𑀺𑀤𑀁 𑀲𑀻𑀮𑀁 𑀲𑀪𑀸𑀯𑀢𑁄, 𑀓𑀺𑀘𑁆𑀘𑀢𑁄, 𑀉𑀧𑀝𑁆𑀞𑀸𑀦𑀸𑀓𑀸𑀭𑀢𑁄, 𑀆𑀲𑀦𑁆𑀦𑀓𑀸𑀭𑀡𑀢𑁄 𑀘 𑀓𑀣𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀓𑀸𑀦𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺. 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀤𑀺𑀝𑁆𑀞𑀸𑀦𑀺𑀲𑀁𑀲𑁂 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀓𑀺𑀫𑀸𑀦𑀺𑀲𑀁𑀲’’𑀦𑁆𑀢𑀺. 𑀓𑀢𑀺𑀯𑀺𑀥𑀦𑁆𑀢𑀺 𑀧𑀪𑁂𑀤𑀧𑀼𑀘𑁆𑀙𑀸. 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀳𑀺 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺. 𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺. 𑀲𑀸 𑀘 𑀲𑀁𑀓𑀺𑀮𑁂𑀲𑀫𑀮𑀯𑀺𑀫𑀼𑀢𑁆𑀢𑀺. 𑀢𑀁 𑀇𑀘𑁆𑀙𑀦𑁆𑀢𑁂𑀦 𑀬𑀲𑁆𑀫𑀸 𑀉𑀧𑀸𑀬𑀓𑁄𑀲𑀮𑁆𑀮𑀢𑁆𑀣𑀺𑀦𑀸 𑀅𑀦𑀼𑀧𑀸𑀬𑀓𑁄𑀲𑀮𑁆𑀮𑀁 𑀯𑀺𑀬 𑀲𑀁𑀓𑀺𑀮𑁂𑀲𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀓𑁄 𑀘𑀲𑁆𑀲 𑀲𑀁𑀓𑀺𑀮𑁂𑀲𑁄’’𑀢𑀺.

𑀢𑀢𑁆𑀭𑀸𑀢𑀺 ¶ 𑀢𑀲𑁆𑀫𑀺𑀁, 𑀢𑀲𑁆𑀲 𑀯𑀸 𑀧𑀜𑁆𑀳𑀸𑀓𑀫𑁆𑀫𑀲𑁆𑀲. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀺𑀯𑀭𑀡𑀁. 𑀧𑀼𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀅𑀯𑀺𑀪𑀸𑀯𑀺𑀢𑀢𑁆𑀢𑀸 𑀦𑀺𑀕𑀽𑀴𑁆𑀳𑁄 𑀫𑀼𑀝𑁆𑀞𑀺𑀬𑀁 𑀓𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀯𑀺𑀯𑀭𑀡𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀽𑀢𑀪𑀸𑀯𑀓𑀸𑀭𑀡𑀢𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀻𑀢𑀺 𑀏𑀢𑁆𑀣 ¶ 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑁂 𑀏𑀯 𑀅𑀢𑀺𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄, 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀧𑀸𑀡𑀖𑀸𑀢𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑁂𑀳𑀺. 𑀯𑀺𑀭𑀫𑀦𑁆𑀢𑀲𑁆𑀲𑀸𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺𑀯𑀲𑁂𑀦, 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦 𑀘 𑀑𑀭𑀫𑀦𑁆𑀢𑀲𑁆𑀲. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀯𑀢𑁆𑀢𑀓𑀭𑀡𑀁. 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀬 𑀅𑀦𑀼𑀓𑀽𑀮𑀯𑀲𑁂𑀦𑁂𑀯 𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑁆𑀢𑀺. 𑀘𑁂𑀢𑀦𑀸 𑀓𑀸𑀫𑀁 𑀓𑀼𑀲𑀮𑀢𑁆𑀢𑀺𑀓𑀲𑀸𑀥𑀸𑀭𑀡𑀸, 𑀇𑀥 𑀧𑀦 𑀲𑀻𑀮𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀓𑀢𑁆𑀯𑀸 ‘‘𑀓𑀼𑀲𑀮𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀁 𑀘𑁂𑀢𑀲𑀺𑀓𑀁, 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀬 𑀲𑀢𑀺𑀧𑀺 𑀘𑁂𑀢𑀲𑀺𑀓𑀢𑁆𑀢𑁂 ‘‘𑀘𑁂𑀢𑀦𑀸 𑀲𑀻𑀮’’𑀦𑁆𑀢𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀢𑀤𑀜𑁆𑀜𑀫𑁂𑀯 𑀯𑀺𑀭𑀢𑀺𑀅𑀦𑀪𑀺𑀚𑁆𑀛𑀸𑀤𑀺𑀓𑀁 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀤𑀝𑁆𑀞𑀩𑁆𑀩𑀁 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦. 𑀲𑀁𑀯𑀭𑀡𑀁 𑀲𑀁𑀯𑀭𑁄. 𑀬𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑁂 𑀦 𑀑𑀢𑀭𑀦𑁆𑀢𑀺, 𑀢𑀣𑀸 𑀧𑀺𑀤𑀳𑀦𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀸. 𑀢𑀢𑁆𑀣 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀯𑀺𑀯𑀭𑀡𑀁. 𑀯𑀺𑀭𑀫𑀦𑁆𑀢𑀲𑁆𑀲 𑀘𑁂𑀢𑀦𑀸𑀢𑀺 𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀧𑀥𑀸𑀦𑀪𑀽𑀢𑀁 𑀘𑁂𑀢𑀦𑀫𑀸𑀳. 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀢𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀆𑀬𑀽𑀳𑀺𑀦𑀻. 𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀭𑀢𑀻𑀢𑀺 𑀯𑀺𑀭𑀢𑀺𑀬𑀸 𑀧𑀥𑀸𑀦𑀪𑀸𑀯𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀏𑀢𑁆𑀣 𑀳𑀺 𑀬𑀤𑀸 ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺 (𑀓𑀣𑀸. 𑁫𑁩𑁯) 𑀯𑀘𑀦𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀢𑀩𑁆𑀩𑀺𑀭𑀢𑀺𑀯𑀺𑀲𑀺𑀝𑁆𑀞𑀸 𑀘𑁂𑀢𑀦𑀸 𑀢𑀣𑀸𑀧𑀯𑀢𑁆𑀢𑀸 𑀧𑀥𑀸𑀦𑀪𑀸𑀯𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀝𑀺𑀯𑀺𑀭𑀢𑀺𑀲𑀸𑀥𑀺𑀓𑀸 𑀳𑁄𑀢𑀺, 𑀢𑀤𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺𑀅𑀦𑀪𑀺𑀚𑁆𑀛𑀸𑀤𑀬𑁄 𑀘 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀘𑁂𑀢𑀦𑀸𑀲𑀻𑀮𑀁 𑀯𑀼𑀢𑁆𑀢𑀁. 𑀬𑀤𑀸 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀢𑀢𑁄 𑀯𑀺𑀭𑀫𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀸 𑀘𑁂𑀢𑀦𑀸𑀯𑀺𑀲𑀺𑀝𑁆𑀞𑀸 𑀯𑀺𑀭𑀢𑀺, 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘 𑀢𑀢𑁆𑀣 𑀢𑀢𑁆𑀣 𑀧𑀥𑀸𑀦𑀪𑀸𑀯𑁂𑀦 𑀓𑀺𑀘𑁆𑀘𑀲𑀸𑀥𑀺𑀓𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 𑀯𑀺𑀭𑀢𑀺𑀆𑀤𑀺𑀧𑀓𑁆𑀔𑀺𑀓𑀸 ¶ 𑀯𑀸 𑀳𑁄𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀘𑁂𑀢𑀲𑀺𑀓𑀲𑀻𑀮𑀁 𑀯𑀼𑀢𑁆𑀢𑀁.

𑀇𑀤𑀸𑀦𑀺 ¶ 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀘𑁂𑀢𑀦𑀸𑀘𑁂𑀢𑀲𑀺𑀓𑀲𑀻𑀮𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀲𑀫𑀸𑀤𑀸𑀦𑀯𑀲𑁂𑀦 ‘‘𑀇𑀢𑁄 𑀧𑀝𑁆𑀞𑀸𑀬 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀓𑀸𑀦𑀺𑀧𑀺 𑀅𑀦𑀚𑁆𑀛𑀸𑀘𑀭𑀡𑁂𑀦 𑀧𑀚𑀳𑀦𑁆𑀢𑀲𑁆𑀲. 𑀲𑀢𑁆𑀢 𑀓𑀫𑁆𑀫𑀧𑀣𑀘𑁂𑀢𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀳𑀸𑀦𑀲𑀸𑀥𑀺𑀓𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀼𑀲𑀮𑀓𑀫𑁆𑀫𑀧𑀣𑀘𑁂𑀢𑀦𑀸. 𑀅𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀬𑀁 𑀧𑀭𑀤𑀸𑀭𑀕𑀫𑀦𑀸𑀤𑀺 𑀓𑀭𑀻𑀬𑀢𑀺, 𑀢𑀲𑁆𑀲 𑀧𑀳𑀸𑀬𑀓𑀸 𑀅𑀦𑀪𑀺𑀚𑁆𑀛𑀸𑀤𑀬𑁄 𑀲𑀻𑀮𑀦𑁆𑀢𑀺 𑀆𑀳 ‘‘𑀘𑁂𑀢𑀲𑀺𑀓𑀁 𑀲𑀻𑀮𑀁 𑀦𑀸𑀫 𑀅𑀦𑀪𑀺𑀚𑁆𑀛𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸’’𑀢𑀺. 𑀬𑀣𑀸 𑀳𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀯𑀲𑁂𑀦 𑀫𑀺𑀘𑁆𑀙𑀸𑀘𑀸𑀭𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀓𑀭𑀻𑀬𑀦𑁆𑀢𑀺, 𑀏𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀧𑀺 𑀢𑁂 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸𑀤𑀺𑀅𑀢𑁆𑀣𑀁 𑀓𑀭𑀻𑀬𑀦𑁆𑀢𑀺. 𑀢𑁂𑀲𑀜𑁆𑀘 𑀧𑀚𑀳𑀦𑀓𑀸 𑀅𑀦𑀪𑀺𑀚𑁆𑀛𑀸𑀤𑀬𑁄𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀺𑀪𑀸𑀕𑀁 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀲𑀢𑀺𑀲𑀁𑀯𑀭𑁄 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀭𑀓𑁆𑀔𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀲𑀢𑀺𑀬𑁂𑀯. 𑀜𑀸𑀡𑀲𑀁𑀯𑀭𑁄 𑀧𑀜𑁆𑀜𑀸. 𑀔𑀦𑁆𑀢𑀺𑀲𑀁𑀯𑀭𑁄 𑀅𑀥𑀺𑀯𑀸𑀲𑀦𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀅𑀤𑁄𑀲𑀧𑀥𑀸𑀦𑀸 𑀔𑀦𑁆𑀥𑀸, 𑀅𑀤𑁄𑀲𑁄 𑀏𑀯 𑀯𑀸. 𑀯𑀻𑀭𑀺𑀬𑀲𑀁𑀯𑀭𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀦𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀭𑀺𑀬𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀢𑀺𑀲𑀁𑀯𑀭𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀲𑁄𑀢𑀸𑀦𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀤𑀼𑀘𑁆𑀘𑀭𑀺𑀢𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀲𑁄𑀢𑀸𑀦𑀺. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 𑀯𑀢𑁆𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺 𑀯𑀘𑀦𑁂𑀦 𑀲𑁄𑀢𑀸𑀦𑀁 𑀲𑀁𑀯𑀭𑁄 𑀧𑀺𑀤𑀳𑀦𑀁 𑀲𑀫𑀼𑀘𑁆𑀙𑁂𑀤𑀦𑀁 𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀇𑀤𑀫𑀢𑁆𑀣𑀺𑀓𑀢𑀁 𑀫𑀦𑀲𑀺 𑀓𑀢𑁆𑀯𑀸 𑀬𑁂𑀦 𑀜𑀸𑀡𑁂𑀦 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀬𑀸 𑀧𑀝𑀺𑀲𑁂𑀯𑀻𑀬𑀦𑁆𑀢𑀺. 𑀢𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀫𑁆𑀧𑀺 𑀜𑀸𑀡𑀲𑀪𑀸𑀯𑀢𑁆𑀢𑀸 𑀏𑀢𑁆𑀣𑁂𑀯 𑀜𑀸𑀡𑀲𑀁𑀯𑀭𑁂 𑀏𑀯 𑀲𑀫𑁄𑀥𑀸𑀦𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀔𑀫𑀢𑀺 𑀅𑀥𑀺𑀯𑀸𑀲𑁂𑀢𑀻𑀢𑀺 𑀔𑀫𑁄. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁. 𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀓𑀸𑀫𑀽𑀧𑀲𑀁𑀳𑀺𑀢𑀁 𑀯𑀺𑀢𑀓𑁆𑀓𑀁. 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀦 𑀯𑀸𑀲𑁂𑀢𑀺. 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀻𑀢𑀺 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀅𑀦𑀯𑀚𑁆𑀚𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑁂𑀦 𑀲𑀺𑀚𑁆𑀛𑀦𑀓𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁆𑀧𑀺 𑀏𑀢𑁆𑀣𑁂𑀯 𑀯𑀻𑀭𑀺𑀬𑀲𑀁𑀯𑀭𑁂 𑀏𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺 𑀯𑀻𑀭𑀺𑀬𑀲𑀸𑀥𑀦𑀢𑁆𑀢𑀸. 𑀏𑀢𑁆𑀣 𑀘 𑀬𑀣𑀸 𑀜𑀸𑀡𑀁 𑀢𑀡𑁆𑀳𑀸𑀤𑀺𑀲𑁄𑀢𑀸𑀦𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀧𑀺𑀤𑀳𑀦𑀝𑁆𑀞𑁂𑀦 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄 𑀘, 𑀧𑀭𑀢𑁄 𑀧𑀯𑀢𑁆𑀢𑀦𑀓𑀕𑀼𑀡𑀸𑀦𑀁 𑀆𑀥𑀸𑀭𑀸𑀤𑀺𑀪𑀸𑀯𑀢𑁄 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁 ¶ , 𑀏𑀯𑀁 𑀔𑀦𑁆𑀢𑀺 𑀅𑀦𑀥𑀺𑀯𑀸𑀲𑀦𑁂𑀦 𑀉𑀧𑁆𑀧𑀚𑁆𑀚𑀦𑀓𑀓𑀺𑀮𑁂𑀲𑀸𑀦𑀁 𑀅𑀥𑀺𑀯𑀸𑀲𑀦𑁂𑀦 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄 𑀘, 𑀔𑀫𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀕𑀼𑀡𑀸𑀦𑀁 𑀆𑀥𑀸𑀭𑀸𑀤𑀺𑀪𑀸𑀯𑀢𑁄 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁, 𑀯𑀻𑀭𑀺𑀬𑀁 𑀯𑀺𑀦𑁄𑀤𑁂𑀢𑀩𑁆𑀩𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀦𑁄𑀤𑀦𑁂𑀦 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄 𑀘, 𑀯𑀺𑀦𑁄𑀤𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀕𑀼𑀡𑀸𑀦𑀁 𑀆𑀥𑀸𑀭𑀸𑀤𑀺𑀪𑀸𑀯𑀢𑁄 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀸𑀤𑀺 𑀢𑀲𑁆𑀲 𑀢𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀲𑀁𑀯𑀭𑀡𑀁 𑀧𑀺𑀤𑀳𑀦𑀁, 𑀢𑀁 𑀉𑀧𑀸𑀤𑀸𑀬 𑀲𑀁𑀯𑀭𑁄, 𑀏𑀯𑀁 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀆𑀕𑀢𑀯𑀢𑁆𑀣𑀼𑀢𑁄 𑀯𑀺𑀭𑀫𑀡𑀫𑁆𑀧𑀻𑀢𑀺 𑀆𑀳 ‘‘𑀬𑀸 𑀘 𑀧𑀸𑀧𑀪𑀻𑀭𑀼𑀓𑀸𑀦𑀁…𑀧𑁂… 𑀲𑀁𑀯𑀭𑀲𑀻𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀦 𑀯𑀻𑀢𑀺𑀓𑁆𑀓𑀫𑀢𑀺 𑀏𑀢𑁂𑀦𑀸𑀢𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀢𑀣𑀸𑀧𑀯𑀢𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑁭. 𑀅𑀯𑀲𑁂𑀲𑁂𑀲𑀼 𑀧𑀦 𑀧𑀜𑁆𑀳𑁂𑀲𑀼. 𑀲𑀫𑀸𑀥𑀸𑀦𑀁 𑀲𑀡𑁆𑀞𑀧𑀦𑀁. 𑀤𑀼𑀲𑁆𑀲𑀻𑀮𑁆𑀬𑀯𑀲𑁂𑀦 𑀳𑀺 𑀧𑀯𑀢𑁆𑀢𑀸 𑀓𑀸𑀬𑀓𑀫𑁆𑀫𑀸𑀤𑀬𑁄 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀸, 𑀦 𑀲𑀫𑁆𑀫𑀸 𑀞𑀧𑀺𑀢𑀸𑀢𑀺 𑀅𑀲𑀡𑁆𑀞𑀧𑀺𑀢𑀸 𑀯𑀺𑀧𑁆𑀧𑀓𑀺𑀡𑁆𑀡𑀸 𑀯𑀺𑀲𑀝𑀸 𑀘 𑀦𑀸𑀫 𑀳𑁄𑀦𑁆𑀢𑀺, 𑀲𑀼𑀲𑀻𑀮𑁆𑀬𑀯𑀲𑁂𑀦 𑀧𑀦 𑀧𑀯𑀢𑁆𑀢𑀸 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀲𑀡𑁆𑀞𑀧𑀺𑀢𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀸 𑀅𑀯𑀺𑀲𑀝𑀸 𑀘 𑀦𑀸𑀫 𑀳𑁄𑀦𑁆𑀢𑀺 𑀬𑀣𑀸 𑀢𑀁 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸 𑀅𑀩𑀸𑀳𑀼𑀧𑁆𑀧𑀘𑀸𑀮𑀦𑀸𑀤𑀺. 𑀢𑁂𑀦𑀸𑀳 ‘‘𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑁂𑀦 𑀲𑀫𑀸𑀥𑀺𑀓𑀺𑀘𑁆𑀘𑀢𑁄 𑀲𑀻𑀮𑀦𑀁 𑀯𑀺𑀲𑁂𑀲𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑁂𑀧𑀳𑁂𑀢𑀼𑀢𑀸. 𑀇𑀤𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀡𑁆𑀞𑀧𑀦𑀁 𑀲𑀁𑀬𑀫𑀦𑀁. 𑀉𑀧𑀥𑀸𑀭𑀡𑀁 𑀅𑀥𑀺𑀝𑁆𑀞𑀸𑀦𑀁 𑀫𑀽𑀮𑀪𑀸𑀯𑁄. 𑀢𑀣𑀸 𑀳𑀺𑀲𑁆𑀲 𑀆𑀤𑀺𑀘𑀭𑀡𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀢𑁂𑀦 𑀧𑀣𑀯𑀻𑀥𑀸𑀢𑀼𑀓𑀺𑀘𑁆𑀘𑀢𑁄 𑀲𑀻𑀮𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀲𑀸 𑀳𑀺 𑀲𑀳𑀚𑀸𑀢𑀭𑀽𑀧𑀥𑀫𑁆𑀫𑀸𑀦𑀁 𑀲𑀦𑁆𑀥𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀇𑀤𑀁 𑀧𑀦 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀫𑀽𑀮𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀓𑀼𑀲𑀮𑀥𑀫𑁆𑀫𑀸 𑀦𑀸𑀫 𑀲𑀧𑀼𑀩𑁆𑀩𑀪𑀸𑀕𑀸 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀸 𑀥𑀫𑁆𑀫𑀸. 𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸. 𑀲𑀺𑀭𑀝𑁆𑀞𑁄𑀢𑀺 𑀬𑀣𑀸 𑀲𑀺𑀭𑀲𑀺 𑀙𑀺𑀦𑁆𑀦𑁂 𑀲𑀩𑁆𑀩𑁄 𑀅𑀢𑁆𑀢𑀪𑀸𑀯𑁄 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀲𑀻𑀮𑁂 𑀪𑀺𑀦𑁆𑀦𑁂 𑀲𑀩𑁆𑀩𑀁 𑀕𑀼𑀡𑀲𑀭𑀻𑀭𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀉𑀢𑁆𑀢𑀫𑀗𑁆𑀕𑀝𑁆𑀞𑁄 𑀲𑀻𑀮𑀝𑁆𑀞𑁄. ‘‘𑀲𑀺𑀭𑁄 𑀲𑀻𑀲’’𑀦𑁆𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀢𑀮𑀝𑁆𑀞𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀝𑁆𑀞𑁄. 𑀢𑁂𑀦 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑁂𑀯 ‘‘𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺𑀤𑀁 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀁 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑀓𑀭𑀁 𑀳𑁄𑀢𑀺. 𑀏𑀯𑀫𑀸𑀤𑀺𑀦𑀸𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀲𑀬𑀦𑁆𑀢𑀺 𑀅𑀓𑀼𑀲𑀮𑀸 𑀏𑀢𑀲𑁆𑀫𑀺𑀁 𑀲𑀢𑀺 𑀅𑀧𑀯𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀲𑀻𑀮𑀁, 𑀲𑀼𑀧𑀦𑁆𑀢𑀺 𑀯𑀸 𑀢𑁂𑀦 𑀯𑀺𑀳𑀢𑀼𑀲𑁆𑀲𑀸𑀳𑀸𑀦𑀺 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀻𑀢𑀺 𑀲𑀻𑀮𑀁, 𑀲𑀩𑁆𑀩𑁂𑀲𑀁 𑀯𑀸 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀯𑁂𑀲𑀸𑀭𑀳𑀲𑀸𑀮𑀸𑀢𑀺 𑀲𑀻𑀮𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑁮. ‘‘𑀲𑀻𑀮𑀦𑀝𑁆𑀞𑁂𑀦 𑀲𑀻𑀮’’𑀦𑁆𑀢𑀺 𑀧𑀼𑀩𑁆𑀩𑁂 𑀲𑀤𑁆𑀤𑀢𑁆𑀣𑀼𑀤𑁆𑀥𑀸𑀭𑁂𑀦 𑀧𑀓𑀸𑀲𑀺𑀢𑁄𑀧𑀺 𑀪𑀸𑀯𑀢𑁆𑀣𑁄 𑀏𑀯𑀸𑀢𑀺 𑀆𑀳 ‘‘𑀲𑀻𑀮𑀦𑀁 𑀮𑀓𑁆𑀔𑀡𑀁 𑀢𑀲𑁆𑀲𑀸’’𑀢𑀺. 𑀦 𑀳𑀺 𑀢𑀲𑁆𑀲 𑀘𑁂𑀢𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀸𑀳𑀓𑁄 𑀢𑀢𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀅𑀢𑁆𑀣𑀺, 𑀬𑁄 𑀮𑀓𑁆𑀔𑀡𑀪𑀸𑀯𑁂𑀦 𑀯𑀼𑀘𑁆𑀘𑁂𑀬𑁆𑀬. 𑀦𑀦𑀼 𑀘 𑀅𑀦𑁂𑀓𑀪𑁂𑀤𑀲𑀗𑁆𑀕𑀸𑀳𑀓𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀦𑀸𑀫 𑀲𑀺𑀬𑀸, 𑀦 𑀯𑀺𑀲𑁂𑀲𑀮𑀓𑁆𑀔𑀡𑀦𑁆𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀭𑀽𑀧𑀲𑁆𑀲, 𑀬𑀣𑀸 𑀪𑀺𑀦𑁆𑀦𑀲𑁆𑀲𑀦𑁂𑀓𑀥𑀸’’𑀢𑀺.

𑀬𑀣𑀸 ¶ 𑀳𑀺 𑀦𑀻𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀲𑁆𑀲𑀸𑀧𑀺 𑀭𑀽𑀧𑀸𑀬𑀢𑀦𑀲𑁆𑀲 𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀯𑀺𑀲𑁂𑀲𑀮𑀓𑁆𑀔𑀡𑀁 𑀢𑀤𑀜𑁆𑀜𑀥𑀫𑁆𑀫𑀸𑀲𑀸𑀥𑀸𑀭𑀡𑀢𑁄. 𑀦 𑀅𑀦𑀺𑀘𑁆𑀘𑀢𑀸𑀤𑀺 𑀯𑀺𑀬, 𑀭𑀼𑀧𑁆𑀧𑀦𑀁 𑀯𑀺𑀬 𑀯𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑀁, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀁 𑀧𑀦𑁂𑀢𑀁 𑀲𑀦𑀺𑀤𑀲𑁆𑀲𑀦𑀢𑁆𑀢𑀁 𑀦𑀸𑀫? 𑀤𑀝𑁆𑀞𑀩𑁆𑀩𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄. 𑀢𑀲𑁆𑀲 𑀧𑀦 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀲𑀪𑀸𑀯𑁄, 𑀲𑁄 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀁 𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀅𑀣 𑀯𑀸 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦𑀸’’𑀢𑀺 𑀏𑀢𑁆𑀣 𑀢𑀩𑁆𑀪𑀸𑀯𑀢𑁆𑀣𑁄 𑀲𑀳-𑀲𑀤𑁆𑀤𑁄 𑀬𑀣𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁪; 𑀧𑀝𑀺. 𑀫. 𑁨.𑁩𑁦).

𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀦𑁆𑀢𑀺 𑀓𑀸𑀬𑀺𑀓𑀅𑀲𑀁𑀯𑀭𑀸𑀤𑀺𑀪𑁂𑀤𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀯𑀺𑀥𑀫𑀦𑀓𑀺𑀘𑁆𑀘𑀁. 𑀅𑀦𑀯𑀚𑁆𑀚𑀭𑀲𑀦𑁆𑀢𑀺 𑀅𑀕𑀸𑀭𑀬𑁆𑀳𑀲𑀫𑁆𑀧𑀢𑁆𑀢𑀺𑀓𑀁 𑀅𑀕𑀭𑀳𑀺𑀢𑀩𑁆𑀩𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑀓𑀁, 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀯𑀸 𑀲𑀫𑁆𑀧𑀚𑁆𑀚𑀦𑀓𑀁. 𑀮𑀓𑁆𑀔𑀡𑀸𑀤𑀻𑀲𑀽𑀢𑀺 𑀮𑀓𑁆𑀔𑀡𑀭𑀲𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼 𑀓𑀺𑀘𑁆𑀘𑀫𑁂𑀯, 𑀲𑀫𑁆𑀧𑀢𑁆𑀢𑀺 𑀯𑀸 𑀭𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀦 𑀭𑀲𑀸𑀬𑀢𑀦𑀭𑀲𑀸𑀤𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀓𑀺𑀘𑁆𑀘𑀫𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀢𑀲𑁆𑀲 𑀇𑀢𑀭𑀭𑀲𑀢𑁄 𑀩𑀮𑀯𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀓𑀺𑀘𑁆𑀘𑀫𑁂𑀯, 𑀲𑀫𑁆𑀧𑀢𑁆𑀢𑀺 𑀏𑀯 𑀯𑀸 𑀭𑀲𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 ¶ 𑀓𑀸𑀬𑀸𑀤𑀻𑀳𑀺 𑀲𑀼𑀘𑀺𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺. 𑀕𑀳𑀡𑀪𑀸𑀯𑀦𑁆𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑀁. 𑀢𑁂𑀦 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀨𑀮𑀝𑁆𑀞𑁂𑀦 𑀧𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀫𑀸𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸. 𑀲𑀻𑀮𑀁 𑀳𑀺 𑀲𑀫𑁆𑀧𑀢𑀺𑀬𑁂𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀧𑀭𑀫𑁆𑀧𑀭𑀸𑀬 𑀲𑀫𑀸𑀥𑀺𑀁. 𑀇𑀫𑀲𑁆𑀲 𑀧𑀦 𑀆𑀦𑀺𑀲𑀁𑀲𑀨𑀮𑀲𑁆𑀲 𑀆𑀦𑀺𑀲𑀁𑀲𑀓𑀣𑀸𑀬𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 𑀨𑀮𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀇𑀥 𑀅𑀕𑁆𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀨𑀮𑀲𑁆𑀲 𑀅𑀦𑁂𑀓𑀯𑀺𑀥𑀢𑁆𑀢𑀸, 𑀮𑁄𑀓𑀺𑀬𑀸𑀤𑀺𑀲𑀻𑀮𑀲𑁆𑀲𑀸𑀧𑀺 𑀯𑀺𑀪𑀚𑀺𑀬𑀫𑀸𑀦𑀢𑁆𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀲𑁆𑀲𑀺𑀢𑀸𑀦𑀺𑀲𑁆𑀲𑀺𑀢𑀯𑀲𑁂𑀦𑀸’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁦). 𑀬𑀣𑀸 𑀧𑀣𑀯𑀻𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺 𑀤𑀽𑀭𑀓𑀸𑀭𑀡𑀁, 𑀲𑁂𑀲𑀪𑀽𑀢𑀢𑁆𑀢𑀬𑀁 𑀆𑀲𑀦𑁆𑀦𑀓𑀸𑀭𑀡𑀁, 𑀬𑀣𑀸 𑀘 𑀯𑀢𑁆𑀣𑀲𑁆𑀲 𑀢𑀦𑁆𑀢𑀯𑀸𑀬𑀢𑀼𑀭𑀺𑀯𑁂𑀫𑀲𑀮𑀸𑀓𑀸𑀤𑀺 𑀤𑀽𑀭𑀓𑀸𑀭𑀡𑀁, 𑀢𑀦𑁆𑀢𑀯𑁄 𑀆𑀲𑀦𑁆𑀦𑀓𑀸𑀭𑀡𑀁, 𑀏𑀯𑀁 𑀲𑀻𑀮𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺 𑀤𑀽𑀭𑀓𑀸𑀭𑀡𑀁, 𑀳𑀺𑀭𑀺𑀑𑀢𑁆𑀢𑀧𑁆𑀧𑀫𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘 𑀧𑀦𑀸’’𑀢𑀺𑀆𑀤𑀺. 𑀳𑀺𑀭𑁄𑀢𑁆𑀢𑀧𑁆𑀧𑁂 𑀳𑀻𑀢𑀺𑀆𑀤𑀺 𑀢𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀪𑀸𑀯𑀲𑀸𑀥𑀦𑀁. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀲𑀫𑀸𑀤𑀸𑀦𑀯𑀲𑁂𑀦, 𑀢𑀺𑀝𑁆𑀞𑀢𑀺 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀮𑀸𑀦𑀺𑀲𑀁𑀲𑀓𑀣𑀸𑀯𑀡𑁆𑀡𑀦𑀸

𑁯. 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀢𑀺 ¶ 𑀏𑀢𑁆𑀣 𑀯𑀺𑀧𑁆𑀧𑀝𑀺𑀲𑀸𑀭𑀧𑀝𑀺𑀧𑀓𑁆𑀔𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄. 𑀲𑁄 𑀧𑀦 𑀯𑀺𑀲𑁂𑀲𑀢𑁄 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀻𑀮’’𑀦𑁆𑀢𑀺 𑀅𑀢𑁆𑀢𑀦𑁄 𑀲𑀻𑀮𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀫𑁄𑀚𑁆𑀚𑀪𑁄𑀕𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀺𑀲𑀤𑁆𑀤𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑁆𑀧𑀬𑁄𑀚𑀦𑀸𑀦𑀺. 𑀓𑀼𑀲𑀮𑀸𑀦𑀻𑀢𑀺 𑀅𑀦𑀯𑀚𑁆𑀚𑀸𑀦𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀼𑀤𑁆𑀤𑀬𑀸𑀦𑀺. 𑀏𑀢𑁂𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀸𑀫 𑀲𑀻𑀮𑀲𑁆𑀲 𑀉𑀤𑁆𑀤𑀬𑀫𑀢𑁆𑀢𑀁, 𑀲𑀁𑀯𑀟𑁆𑀠𑀺𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀧𑀼𑀧𑁆𑀨𑀲𑀤𑀺𑀲𑀁. 𑀅𑀜𑁆𑀜𑁄 𑀏𑀯 𑀧𑀦𑀸𑀦𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁄 𑀲𑀫𑀸𑀥𑀺𑀆𑀤𑀺𑀕𑀼𑀡𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑁂𑀦 𑀲𑀻𑀮𑀯𑀢𑁄, 𑀢𑀸𑀬 𑀏𑀯 𑀲𑀻𑀮𑀲𑀫𑁆𑀧𑀤𑀸𑀬. 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀦𑁆𑀢𑀺 𑀅𑀧𑁆𑀧𑀫𑀸𑀤𑀓𑀸𑀭𑀡𑀸. 𑀪𑁄𑀕𑀓𑁆𑀔𑀦𑁆𑀥𑀦𑁆𑀢𑀺 𑀪𑁄𑀕𑀭𑀸𑀲𑀺𑀁. 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 ‘‘𑀇𑀢𑀺𑀧𑀺 𑀲𑀻𑀮𑀯𑀸, 𑀇𑀢𑀺𑀧𑀺 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀲𑀼𑀦𑁆𑀤𑀭𑁄 𑀣𑀼𑀢𑀺𑀖𑁄𑀲𑁄 𑀉𑀝𑁆𑀞𑀳𑀢𑀺, 𑀮𑁄𑀓𑀁 𑀧𑀢𑁆𑀣𑀭𑀢𑀺. 𑀯𑀺𑀲𑀸𑀭𑀤𑁄𑀢𑀺 𑀅𑀢𑁆𑀢𑀦𑀺 𑀓𑀺𑀜𑁆𑀘𑀺 𑀕𑀭𑀳𑀺𑀢𑀩𑁆𑀩𑀁 ¶ 𑀉𑀧𑀯𑀤𑀺𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑁄 𑀯𑀺𑀕𑀢𑀲𑀸𑀭𑀚𑁆𑀚𑁄 𑀦𑀺𑀩𑁆𑀪𑀬𑁄. 𑀅𑀫𑀗𑁆𑀓𑀼𑀪𑀽𑀢𑁄𑀢𑀺 𑀅𑀯𑀺𑀮𑀓𑁆𑀔𑁄. 𑀅𑀲𑀫𑁆𑀫𑀽𑀴𑁆𑀳𑁄𑀢𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁮) 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄, 𑀓𑀼𑀲𑀮𑀓𑀫𑁆𑀫𑀸𑀤𑀻𑀦𑀁𑀬𑁂𑀯 𑀘 𑀢𑀤𑀸 𑀉𑀧𑀝𑁆𑀞𑀸𑀦𑀢𑁄 𑀅𑀫𑀽𑀴𑁆𑀳𑁄 𑀧𑀲𑀦𑁆𑀦𑀫𑀸𑀦𑀲𑁄 𑀏𑀯 𑀓𑀸𑀮𑀁𑀓𑀭𑁄𑀢𑀺. 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀢𑁄 𑀉𑀤𑁆𑀥𑀁. 𑀲𑀼𑀕𑀢𑀺𑀦𑁆𑀢𑀺 𑀲𑀼𑀦𑁆𑀤𑀭𑀁 𑀕𑀢𑀺𑀁. 𑀢𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀕𑁆𑀕𑀦𑁆𑀢𑀺 𑀤𑁂𑀯𑀕𑀢𑀺𑀁. 𑀲𑀸 𑀳𑀺 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄, 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀉𑀴𑀸𑀭𑀁 𑀧𑀼𑀜𑁆𑀜𑀨𑀮𑀦𑁆𑀢𑀺 𑀮𑁄𑀓𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀆𑀓𑀗𑁆𑀔𑁂𑀬𑁆𑀬 𑀘𑁂𑀢𑀺 𑀬𑀤𑀺 𑀇𑀘𑁆𑀙𑁂𑀬𑁆𑀬. 𑀧𑀺𑀬𑁄 𑀘 𑀅𑀲𑁆𑀲𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑁄 𑀧𑀺𑀬𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑁄 𑀧𑁂𑀫𑀦𑀺𑀬𑁄 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀫𑀦𑀸𑀧𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀫𑀦𑀯𑀟𑁆𑀠𑀦𑀓𑁄, 𑀢𑁂𑀲𑀁 𑀯𑀸 𑀫𑀦𑁂𑀦 𑀧𑀢𑁆𑀢𑀩𑁆𑀩𑁄, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀨𑀭𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀭𑀽𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑁄 𑀧𑀸𑀲𑀸𑀡𑀙𑀢𑁆𑀢𑀲𑀤𑀺𑀲𑁄. 𑀪𑀸𑀯𑀦𑀻𑀬𑁄𑀢𑀺 ‘‘𑀅𑀤𑁆𑀥𑀸 𑀅𑀬𑀫𑀸𑀬𑀲𑁆𑀫𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀻’’𑀢𑀺 𑀲𑀫𑁆𑀪𑀸𑀯𑀦𑀻𑀬𑁄. 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼 𑀏𑀯 𑀧𑀭𑀺𑀧𑀽𑀭𑀓𑀸𑀭𑀻 𑀅𑀲𑁆𑀲, 𑀅𑀦𑀽𑀦𑀓𑀸𑀭𑀻 𑀧𑀭𑀺𑀧𑀽𑀭𑀡𑀸𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬. ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀏𑀢𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 ¶ 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁬𑁫) 𑀏𑀯𑀫𑀸𑀤𑀺𑀓𑁂 𑀲𑀻𑀮𑀣𑁄𑀫𑀦𑀲𑀼𑀢𑁆𑀢𑀸𑀕𑀢𑁂 𑀲𑀢𑁆𑀢𑀭𑀲 𑀲𑀻𑀮𑀸𑀦𑀺𑀲𑀁𑀲𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀇𑀤𑀸𑀦𑀺 𑀦 𑀓𑁂𑀯𑀮𑀫𑀺𑀫𑁂 𑀏𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀬𑁄, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀩𑀳𑀽 𑀲𑀻𑀮𑀸𑀦𑀺𑀲𑀁𑀲𑀸 𑀯𑀺𑀚𑁆𑀚𑀦𑁆𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀸𑀲𑀦𑁂𑀢𑀺 𑀇𑀫𑀲𑁆𑀫𑀺𑀁 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀯𑀳𑁂 𑀲𑀢𑁆𑀣𑀼𑀲𑀸𑀲𑀦𑁂. 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸𑀦𑀁 𑀬𑀁 𑀲𑀻𑀮𑀁 𑀯𑀺𑀦𑀸 𑀧𑀢𑀺𑀝𑁆𑀞𑀸 𑀅𑀯𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀲 𑀏𑀯𑀁 𑀫𑀳𑀸𑀦𑀼𑀪𑀸𑀯𑀲𑁆𑀲 𑀲𑀻𑀮𑀲𑁆𑀲 𑀆𑀦𑀺𑀲𑀁𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀫𑀸𑀡𑀁 𑀓𑁄 𑀯𑀤𑁂 𑀓𑁄 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀩𑁆𑀩𑁂𑀲𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀕𑀼𑀡𑀸𑀦𑀁 𑀲𑀻𑀮𑀫𑁂𑀯 𑀫𑀽𑀮𑀪𑀽𑀢𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀫𑁆𑀧𑀺 𑀫𑀮𑀯𑀺𑀲𑁄𑀥𑀦𑁂𑀦, 𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑁂𑀦, 𑀲𑀼𑀘𑀺𑀕𑀦𑁆𑀥𑀯𑀸𑀬𑀦𑁂𑀦, 𑀲𑀕𑁆𑀕𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀽𑀧𑀸𑀬𑀪𑀸𑀯𑁂𑀦, 𑀲𑁄𑀪𑀸𑀮𑀗𑁆𑀓𑀸𑀭𑀲𑀸𑀥𑀦𑀢𑀸𑀬 𑀪𑀬𑀯𑀺𑀥𑀫𑀦𑁂𑀦, 𑀓𑀺𑀢𑁆𑀢𑀺𑀧𑀸𑀫𑁄𑀚𑁆𑀚𑀚𑀦𑁂𑀦 𑀘 𑀲𑀻𑀮𑀲𑀤𑀺𑀲𑀁 𑀅𑀜𑁆𑀜𑀁 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀕𑀗𑁆𑀕𑀸’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀲𑀭𑀪𑀽𑀢𑀺 𑀏𑀓𑀸 𑀦𑀤𑀻, ‘‘𑀬𑀁 𑀮𑁄𑀓𑁂 𑀲𑀭𑀪𑀽’’𑀢𑀺 𑀯𑀤𑀦𑁆𑀢𑀺. 𑀦𑀺𑀦𑁆𑀦𑀕𑀸 𑀯𑀸𑀘𑀺𑀭𑀯𑀢𑀻𑀢𑀺 ‘‘𑀅𑀘𑀺𑀭𑀯𑀢𑀻’’𑀢𑀺 𑀏𑀯𑀁𑀦𑀸𑀫𑀺𑀓𑀸 𑀦𑀤𑀻, 𑀯𑀸𑀢𑀺 𑀲𑀩𑁆𑀩𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀢𑁂𑀦 𑀅𑀯𑀼𑀢𑁆𑀢𑀸 𑀕𑁄𑀥𑀸𑀯𑀭𑀻𑀘𑀦𑁆𑀤𑀪𑀸𑀕𑀸𑀤𑀺𑀓𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀡𑀦𑀝𑁆𑀞𑁂𑀦 𑀧𑀸𑀡𑀻𑀦𑀁 𑀲𑀢𑁆𑀢𑀸𑀦𑀁 𑀬𑀁 𑀫𑀮𑀁 𑀲𑀻𑀮𑀚𑀮𑀁 𑀯𑀺𑀲𑁄𑀥𑀬𑀢𑀺, 𑀢𑀁 𑀫𑀮𑀁 𑀯𑀺𑀲𑁄𑀥𑁂𑀢𑀼𑀁 𑀦 𑀲𑀓𑁆𑀓𑀼𑀡𑀦𑁆𑀢𑀺 𑀕𑀗𑁆𑀕𑀸𑀤𑀬𑁄 𑀦𑀤𑀺𑀬𑁄𑀢𑀺 𑀧𑀞𑀫𑀕𑀸𑀣𑀸𑀬 𑀦-𑀓𑀸𑀭𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀳𑀸𑀭𑀸𑀢𑀺 𑀫𑀼𑀢𑁆𑀢𑀸𑀳𑀸𑀭𑀸. 𑀫𑀡𑀬𑁄𑀢𑀺 𑀯𑁂𑀴𑀼𑀭𑀺𑀬𑀸𑀤𑀺𑀫𑀡𑀬𑁄. 𑀅𑀭𑀺𑀬𑀦𑁆𑀢𑀺 𑀯𑀺𑀲𑀼𑀤𑁆𑀥𑀁. 𑀲𑀻𑀮𑀲𑀫𑀼𑀝𑁆𑀞𑀸𑀦𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀕𑀦𑁆𑀥𑁄 𑀫𑀦𑁄𑀳𑀭𑀪𑀸𑀯𑀢𑁄, 𑀤𑀺𑀲𑀸𑀲𑀼 𑀅𑀪𑀺𑀩𑁆𑀬𑀸𑀧𑀦𑀢𑁄 𑀘 ‘‘𑀲𑀻𑀮𑀕𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀲𑁄 𑀳𑀺 𑀧𑀝𑀺𑀯𑀸𑀢𑁂𑀧𑀺 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀻’’𑀢𑀺 (𑀥. 𑀧. 𑁫𑁪; 𑀅. 𑀦𑀺. 𑁩.𑁮𑁦; 𑀫𑀺. 𑀧. 𑁫.𑁪.𑁧). 𑀤𑁄𑀲𑀸𑀦𑀁 𑀩𑀮𑀁 𑀦𑀸𑀫 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁄, 𑀢𑀁 𑀢𑁂𑀲𑀁 𑀓𑀸𑀢𑀼𑀁 𑀅𑀤𑁂𑀦𑁆𑀢𑀁 𑀲𑀻𑀮𑀁 𑀤𑁄𑀲𑀸𑀦𑀁 𑀩𑀮𑀁 𑀖𑀸𑀢𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀮𑀧𑁆𑀧𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁧𑁦. ‘‘𑀓𑀢𑀺𑀯𑀺𑀥’’𑀦𑁆𑀢𑀺 𑀏𑀢𑁆𑀣 𑀯𑀺𑀥-𑀲𑀤𑁆𑀤𑁄 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄 ‘‘𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀧𑀓𑀸𑀭𑀢𑁆𑀣𑁄 𑀯𑀸, 𑀓𑀢𑀺𑀧𑁆𑀧𑀓𑀸𑀭𑀁 𑀓𑀺𑀢𑁆𑀢𑀓𑀸 𑀲𑀻𑀮𑀲𑁆𑀲 𑀧𑀓𑀸𑀭𑀪𑁂𑀤𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀦𑀮𑀓𑁆𑀔𑀡𑁂𑀦𑀸𑀢𑀺 𑀲𑀻𑀮𑀦𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑁂𑀦.

𑀘𑀭𑀦𑁆𑀢𑀺 ¶ 𑀢𑁂𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀘𑀭𑀺𑀢𑁆𑀢𑀁, 𑀘𑀭𑀺𑀢𑁆𑀢𑀫𑁂𑀯 𑀘𑀸𑀭𑀺𑀢𑁆𑀢𑀁. 𑀯𑀸𑀭𑀺𑀢𑀢𑁄 𑀢𑁂𑀦 𑀅𑀢𑁆𑀢𑀸𑀦𑀁 𑀢𑀸𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀻𑀢𑀺 𑀯𑀸𑀭𑀺𑀢𑁆𑀢𑀁. 𑀅𑀥𑀺𑀓𑁄 𑀲𑀫𑀸𑀘𑀸𑀭𑁄 𑀅𑀪𑀺𑀲𑀫𑀸𑀘𑀸𑀭𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀁, 𑀲𑁄 𑀯𑀸 𑀧𑀬𑁄𑀚𑀦𑀁 𑀏𑀢𑀲𑁆𑀲𑀸𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀁. 𑀆𑀤𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀤𑁂𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁. 𑀯𑀺𑀭𑀫𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀯𑀺𑀭𑀫𑀢𑀺, 𑀯𑀺𑀭𑀫𑀡𑀁 𑀯𑀸 𑀯𑀺𑀭𑀢𑀺, 𑀦 𑀯𑀺𑀭𑀢𑀻𑀢𑀺 𑀅𑀯𑀺𑀭𑀢𑀺. 𑀦𑀺𑀲𑁆𑀲𑀬𑀢𑀻𑀢𑀺 𑀦𑀺𑀲𑁆𑀲𑀺𑀢𑀁, 𑀦 𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀦𑀺𑀲𑁆𑀲𑀺𑀢𑀁. 𑀧𑀭𑀺𑀬𑀦𑁆𑀢𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀭𑀺𑀬𑀦𑁆𑀢𑀁, 𑀓𑀸𑀮𑁂𑀦 𑀧𑀭𑀺𑀬𑀦𑁆𑀢𑀁 𑀓𑀸𑀮𑀧𑀭𑀺𑀬𑀦𑁆𑀢𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀸 𑀓𑀸𑀮𑁄 𑀧𑀭𑀺𑀬𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀸𑀮𑀧𑀭𑀺𑀬𑀦𑁆𑀢𑀁. 𑀬𑀸𑀯 𑀧𑀸𑀡𑀦𑀁 𑀚𑀻𑀯𑀦𑀁 𑀓𑁄𑀝𑀺 𑀏𑀢𑀲𑁆𑀲𑀸𑀢𑀺 𑀆𑀧𑀸𑀡𑀓𑁄𑀝𑀺𑀓𑀁. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀮𑁄𑀓𑁂 𑀦𑀺𑀬𑀼𑀢𑁆𑀢𑀁, 𑀢𑀢𑁆𑀣 𑀯𑀸 𑀯𑀺𑀤𑀺𑀢𑀦𑁆𑀢𑀺 𑀮𑁄𑀓𑀺𑀬𑀁. 𑀮𑁄𑀓𑀁 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁.

𑀧𑀘𑁆𑀘𑀬𑀢𑁄, 𑀨𑀮𑀢𑁄 𑀘 𑀫𑀚𑁆𑀛𑀺𑀫𑀧𑀡𑀻𑀢𑁂𑀳𑀺 𑀦𑀺𑀳𑀻𑀦𑀁, 𑀢𑁂𑀲𑀁 𑀯𑀸 𑀕𑀼𑀡𑁂𑀳𑀺 𑀧𑀭𑀺𑀳𑀻𑀦𑀦𑁆𑀢𑀺 𑀳𑀻𑀦𑀁. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀦𑁆𑀢𑀺 𑀧𑀡𑀻𑀢𑀁. 𑀉𑀪𑀺𑀦𑁆𑀦𑀫𑁂𑀯 𑀯𑁂𑀫𑀚𑁆𑀛𑁂 ¶ 𑀪𑀯𑀁 𑀫𑀚𑁆𑀛𑀺𑀫𑀁. 𑀅𑀢𑁆𑀢𑀸𑀥𑀺𑀧𑀢𑀺𑀢𑁄 𑀆𑀕𑀢𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀡𑁆𑀳𑀸𑀬, 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀸𑀫𑀝𑁆𑀞𑀁 𑀧𑀥𑀁𑀲𑀺𑀢𑀦𑁆𑀢𑀺 𑀧𑀭𑀸𑀫𑀝𑁆𑀞𑀁. 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀧𑀭𑀸𑀫𑀝𑁆𑀞𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁. 𑀲𑀺𑀓𑁆𑀔𑀸𑀲𑀼 𑀚𑀸𑀢𑀁, 𑀲𑁂𑀓𑁆𑀔𑀲𑁆𑀲 𑀇𑀤𑀦𑁆𑀢𑀺 𑀯𑀸 𑀲𑁂𑀓𑁆𑀔𑀁. 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑀸𑀬 𑀅𑀲𑁂𑀓𑁆𑀔𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀁 𑀅𑀲𑁂𑀓𑁆𑀔𑀁. 𑀢𑀤𑀼𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀁. 𑀳𑀸𑀦𑀁 𑀪𑀚𑀢𑀺, 𑀳𑀸𑀦𑀪𑀸𑀕𑁄 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀸𑀦𑀪𑀸𑀕𑀺𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑁆𑀧𑀧𑀭𑀺𑀫𑀸𑀡𑀢𑁆𑀢𑀸 𑀧𑀭𑀺𑀬𑀦𑁆𑀢𑀯𑀦𑁆𑀢𑀁, 𑀧𑀸𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀜𑁆𑀘 𑀲𑀻𑀮𑀁 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀅𑀦𑀧𑁆𑀧𑀧𑀭𑀺𑀫𑀸𑀡𑀢𑁆𑀢𑀸 𑀅𑀧𑀭𑀺𑀬𑀦𑁆𑀢𑀁, 𑀧𑀸𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀜𑁆𑀘 𑀲𑀻𑀮𑀁 𑀅𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀩𑁆𑀩𑀲𑁄 𑀧𑀼𑀡𑁆𑀡𑀁, 𑀧𑀸𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀜𑁆𑀘 𑀲𑀻𑀮𑀁 𑀧𑀭𑀺𑀧𑀼𑀡𑁆𑀡𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁.

𑁧𑁧. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑀻𑀮𑀦𑀝𑁆𑀞𑁂𑀦 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁭) 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀇𑀤𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀦𑁆𑀢𑀺 𑀇𑀤𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀓𑀢𑁆𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀧𑀜𑁆𑀜𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑀻𑀮𑀲𑁆𑀲 𑀧𑀽𑀭𑀡𑀁. 𑀲𑀺𑀓𑁆𑀔𑀸𑀧𑀤𑀲𑀻𑀮𑀁 𑀳𑀺 𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀧𑀽𑀭𑁂𑀢𑀺 𑀧𑀸𑀮𑁂𑀢𑀺 𑀦𑀸𑀫. 𑀲𑀺𑀓𑁆𑀔𑀸 𑀏𑀯 𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀘 𑀲𑀺𑀓𑁆𑀔𑀸𑀧𑀤𑀁. 𑀢𑀲𑁆𑀲 𑀧𑀽𑀭𑀡𑀦𑁆𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀅𑀓𑀭𑀡𑀦𑁆𑀢𑀺 𑀇𑀤𑀁 𑀤𑀼𑀘𑁆𑀘𑀭𑀺𑀢𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀅𑀓𑀭𑀡𑀁 𑀯𑀺𑀭𑀫𑀡𑀁. 𑀘𑀭𑀦𑁆𑀢𑀺 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀲𑀻𑀮𑁂 𑀢𑀁𑀲𑀫𑀗𑁆𑀕𑀺𑀦𑁄 𑀘𑀭𑀦𑁆𑀢𑀻𑀢𑀺 𑀲𑀻𑀮𑀲𑁆𑀲 𑀅𑀥𑀺𑀓𑀭𑀡𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑁂𑀲𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀯𑀸𑀭𑀺𑀢𑀦𑁆𑀢𑀺 𑀇𑀤𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀓𑀧𑁆𑀧𑀺𑀬𑀁 ¶ . 𑀢𑀸𑀬𑀦𑁆𑀢𑀻𑀢𑀺 𑀅𑀓𑀭𑀡𑁂𑀦𑁂𑀯 𑀢𑀸𑀬𑀦𑁆𑀢𑀺. 𑀢𑁂𑀦𑀸𑀢𑀺 𑀯𑀸𑀭𑀺𑀢𑁆𑀢𑀲𑀻𑀮𑀫𑀸𑀳. 𑀯𑀸𑀭𑁂𑀢𑀺 𑀯𑀸 𑀲𑀢𑁆𑀣𑀸 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀯𑀸𑀭𑀺𑀢𑀁, 𑀲𑀺𑀓𑁆𑀔𑀸𑀧𑀤𑀁. 𑀢𑀁 𑀅𑀯𑀺𑀓𑁄𑀧𑁂𑀦𑁆𑀢𑁄 𑀢𑀸𑀬𑀦𑁆𑀢𑀺 𑀢𑁂𑀦𑀸𑀢𑀺 𑀯𑀸𑀭𑀺𑀢𑁆𑀢𑀁. 𑀲𑀤𑁆𑀥𑀸𑀯𑀻𑀭𑀺𑀬𑀲𑀸𑀥𑀦𑀦𑁆𑀢𑀺 𑀲𑀤𑁆𑀥𑀸𑀬, 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀘 𑀲𑀸𑀥𑁂𑀢𑀩𑁆𑀩𑀁. 𑀦 𑀳𑀺 𑀅𑀲𑀤𑁆𑀥𑁄, 𑀓𑀼𑀲𑀻𑀢𑁄 𑀘 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀤𑁆𑀥𑁄 𑀏𑀯 𑀲𑀢𑁆𑀣𑀸𑀭𑀸 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀡𑀼𑀫𑀢𑁆𑀢𑁂𑀧𑀺 𑀯𑀚𑁆𑀚𑁂 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀆𑀳 ‘‘𑀲𑀤𑁆𑀥𑀸𑀲𑀸𑀥𑀦𑀁 𑀯𑀸𑀭𑀺𑀢𑁆𑀢’’𑀦𑁆𑀢𑀺.

𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀪𑀺𑀯𑀺𑀲𑀺𑀝𑁆𑀞𑁄 𑀲𑀫𑀸𑀘𑀸𑀭𑁄𑀢𑀺 𑀅𑀪𑀺𑀲𑀫𑀸𑀘𑀸𑀭𑁄𑀢𑀺 𑀆𑀳 ‘‘𑀉𑀢𑁆𑀢𑀫𑀲𑀫𑀸𑀘𑀸𑀭𑁄’’𑀢𑀺. 𑀅𑀪𑀺𑀲𑀫𑀸𑀘𑀸𑀭𑁄𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁, 𑀬𑀣𑀸 𑀯𑁂𑀦𑀬𑀺𑀓𑁄𑀢𑀺 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮) 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺𑀲𑀫𑀸𑀘𑀸𑀭𑁄 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀢𑁄 ¶ 𑀫𑀕𑁆𑀕𑀲𑀻𑀮𑀁, 𑀨𑀮𑀲𑀻𑀮𑀜𑁆𑀘, 𑀢𑀁 𑀆𑀭𑀩𑁆𑀪 𑀉𑀤𑁆𑀤𑀺𑀲𑁆𑀲 𑀢𑀤𑀢𑁆𑀣𑀁 𑀢𑀧𑁆𑀧𑀬𑁄𑀚𑀦𑀁 𑀧𑀜𑁆𑀜𑀢𑁆𑀢𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁. 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀺 𑀢𑀻𑀡𑀺 𑀓𑀸𑀬𑀓𑀫𑁆𑀫𑀸𑀦𑀺, 𑀘𑀢𑁆𑀢𑀸𑀭𑀺 𑀯𑀘𑀻𑀓𑀫𑁆𑀫𑀸𑀦𑀺, 𑀲𑀼𑀧𑀭𑀺𑀲𑀼𑀤𑁆𑀥𑁄 𑀆𑀚𑀻𑀯𑁄𑀢𑀺 𑀇𑀤𑀁 𑀆𑀚𑀻𑀯𑀝𑁆𑀞𑀫𑀓𑀁. 𑀢𑀢𑁆𑀣 𑀓𑀸𑀫𑀁 𑀆𑀚𑀻𑀯𑀳𑁂𑀢𑀼𑀓𑀢𑁄 𑀲𑀢𑁆𑀢𑀯𑀺𑀥𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀲𑀫𑁆𑀫𑀸𑀆𑀚𑀻𑀯𑁄𑀢𑀺 𑀲𑁄𑀧𑀺 𑀲𑀢𑁆𑀢𑀯𑀺𑀥𑁄 𑀳𑁄𑀢𑀺, 𑀲𑀫𑁆𑀫𑀸𑀚𑀻𑀯𑀢𑀸𑀲𑀸𑀫𑀜𑁆𑀜𑁂𑀦 𑀧𑀦 𑀢𑀁 𑀏𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀺𑀯𑀺𑀥𑀓𑀼𑀳𑀦𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀢𑁄 𑀫𑀺𑀘𑁆𑀙𑀸𑀚𑀻𑀯𑀢𑁄 𑀯𑀺𑀭𑀢𑀺𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 ‘‘𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄’’𑀢𑀺. 𑀲𑁂𑀝𑁆𑀞𑀘𑀭𑀺𑀬𑀪𑀸𑀯𑀢𑁄 𑀫𑀕𑁆𑀕𑁄 𑀏𑀯 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲. 𑀆𑀤𑀺𑀪𑀸𑀯𑀪𑀽𑀢𑀦𑁆𑀢𑀺 𑀆𑀤𑀺𑀫𑁆𑀳𑀺 𑀪𑀸𑀯𑁂𑀢𑀩𑁆𑀩𑀢𑀁 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑀁 𑀪𑀽𑀢𑀁 𑀧𑀢𑁆𑀢𑀁 𑀆𑀤𑀺𑀪𑀸𑀯𑀪𑀽𑀢𑀁. 𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀦𑀼𑀓𑁆𑀓𑀫𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀆𑀤𑀺, 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀧𑀦 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀆𑀤𑀻𑀢𑀺. 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑁆𑀲 𑀲𑀫𑁆𑀧𑀚𑁆𑀚𑀦𑁂𑀦 𑀧𑀭𑀺𑀧𑀽𑀭𑀡𑁂𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀲𑀫𑁆𑀧𑀚𑁆𑀚𑀢𑀺. 𑀬𑁄 𑀳𑀺 𑀮𑀳𑀼𑀓𑀸𑀦𑀺𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲𑁄 𑀕𑀭𑀼𑀓𑀸𑀦𑀺 𑀫𑀳𑀸𑀲𑀸𑀯𑀚𑁆𑀚𑀸𑀦𑀺 𑀩𑀳𑁆𑀯𑀸𑀤𑀻𑀦𑀯𑀸𑀦𑀺 𑀧𑀭𑀺𑀯𑀚𑁆𑀚𑁂𑀲𑁆𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀲𑀼𑀢𑁆𑀢𑀁 𑀧𑀦 𑀏𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀲𑀻𑀮𑀁. 𑀢𑀁 𑀳𑀺 𑀉𑀧𑀭𑀺𑀕𑀼𑀡𑀯𑀺𑀲𑁂𑀲𑀸𑀦𑀁 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀭𑀢𑀺𑀲𑀻𑀮𑀲𑁆𑀲 𑀇𑀢𑀭𑀲𑀻𑀮𑁂𑀦 𑀲𑀢𑀺𑀧𑀺 𑀲𑀫𑁆𑀧𑀬𑁄𑀕𑀸𑀤𑀺𑀓𑁂 𑀅𑀲𑀫𑁆𑀫𑀺𑀲𑁆𑀲𑀓𑀢𑀸𑀤𑀲𑁆𑀲𑀦𑀢𑁆𑀣𑀁 ‘‘𑀯𑁂𑀭𑀫𑀡𑀺𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀦𑀺𑀲𑁆𑀲𑀺𑀢𑀸𑀦𑀺𑀲𑁆𑀲𑀺𑀢𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀦𑀺𑀲𑁆𑀲𑀬𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀲𑁆𑀲𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑁂𑀦 𑀦𑀺𑀲𑁆𑀲𑀬𑀺𑀢𑀩𑁆𑀩𑀢𑁄 𑀢𑀡𑁆𑀳𑀸𑀯 𑀢𑀡𑁆𑀳𑀸𑀦𑀺𑀲𑁆𑀲𑀬𑁄. 𑀢𑀣𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀳𑀺 𑀅𑀲𑀢𑀺𑀧𑀺 𑀤𑀺𑀝𑁆𑀞𑀺𑀬𑀸 𑀢𑀡𑁆𑀳𑀸𑀯𑀺𑀭𑀳𑁂 𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑁄𑀯 𑀧𑀯𑀢𑁆𑀢𑀢𑀺. 𑀤𑁂𑀯𑁄𑀢𑀺 𑀘𑀢𑀼𑀫𑀳𑀸𑀭𑀸𑀚𑀲𑀓𑁆𑀓𑀲𑀼𑀬𑀸𑀫𑀸𑀤𑀺𑀧𑀸𑀓𑀝𑀤𑁂𑀯𑀫𑀸𑀳 ¶ . 𑀤𑁂𑀯𑀜𑁆𑀜𑀢𑀭𑁄𑀢𑀺 𑀅𑀧𑀸𑀓𑀝𑀁. 𑀢𑀡𑁆𑀳𑀁 𑀏𑀯 𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑀁. 𑀢𑀡𑁆𑀳𑀸𑀬 𑀦𑀺𑀲𑁆𑀲𑀺𑀢𑀦𑁆𑀢𑀺 𑀘 𑀓𑁂𑀘𑀺 𑀯𑀤𑀦𑁆𑀢𑀺. 𑀢𑁂𑀲𑀁 ‘‘𑀤𑁆𑀯𑁂 𑀦𑀺𑀲𑁆𑀲𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀭𑀼𑀚𑁆𑀛𑀢𑀺. 𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀬𑀸𑀢𑀺 ‘‘𑀇𑀢𑀺 𑀲𑀁𑀲𑀸𑀭𑀲𑀼𑀤𑁆𑀥𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀤𑀺𑀝𑁆𑀞𑀺𑀬𑀸, 𑀮𑁄𑀓𑀼𑀢𑁆𑀢𑀭𑀁 𑀲𑀻𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑁂𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀲𑁆𑀲𑁂𑀯 𑀲𑀫𑁆𑀪𑀸𑀭𑀪𑀽𑀢𑀁 𑀓𑀸𑀭𑀡𑀪𑀽𑀢𑀁, 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 ‘‘𑀇𑀫𑀜𑁆𑀘 𑀭𑀢𑁆𑀢𑀺𑀁, 𑀇𑀫𑀜𑁆𑀘 𑀤𑀺𑀯’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁪𑁧) 𑀯𑀺𑀬 𑀓𑀸𑀮𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑀸𑀯𑀺𑀘𑁆𑀙𑀺𑀦𑁆𑀦𑀁 ¶ 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦 𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑀺𑀢𑀫𑁆𑀧𑀺 𑀆𑀧𑀸𑀡𑀓𑁄𑀝𑀺𑀓𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀚𑀻𑀯𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀣𑁂𑀯 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀮𑀸𑀪𑀬𑀲𑀜𑀸𑀢𑀺𑀅𑀗𑁆𑀕𑀚𑀻𑀯𑀺𑀢𑀯𑀲𑁂𑀦𑀸𑀢𑀺 𑀮𑀸𑀪𑀬𑀲𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀦𑀯𑀲𑁂𑀦, 𑀉𑀧𑁆𑀧𑀦𑁆𑀦𑀸𑀦𑀁 𑀭𑀓𑁆𑀔𑀡𑀯𑀲𑁂𑀦 𑀘𑁂𑀯 𑀯𑀟𑁆𑀠𑀦𑀯𑀲𑁂𑀦 𑀘 𑀜𑀸𑀢𑀺𑀅𑀗𑁆𑀕𑀚𑀻𑀯𑀺𑀢𑀸𑀦𑀁 𑀅𑀯𑀺𑀦𑀸𑀲𑀦𑀯𑀲𑁂𑀦. 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀬𑁄 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀓𑀸𑀬𑀯𑀸𑀘𑀸𑀳𑀺 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀓𑀺𑀁 𑀇𑀤𑀁, 𑀦𑀢𑁆𑀣𑁂𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀔𑁂𑀧𑁂 𑀳𑀺 𑀅𑀬𑀁 𑀓𑀺𑀁-𑀲𑀤𑁆𑀤𑁄.

𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀡𑁄 𑀯𑀺𑀬 𑀆𑀲𑀯𑁂 𑀓𑀸𑀫𑀸𑀲𑀯𑀸𑀤𑀺𑀓𑁂 𑀧𑀕𑁆𑀖𑀭𑀢𑀻𑀢𑀺 𑀲𑀫𑁆𑀧𑀬𑁄𑀕𑀪𑀸𑀯𑀸𑀪𑀸𑀯𑁂𑀧𑀺 𑀲𑀳𑀸𑀲𑀯𑁂𑀳𑀻𑀢𑀺 𑀲𑀸𑀲𑀯𑀁. 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀦𑁆𑀢𑀺 𑀲𑀻𑀮𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀲𑀸𑀲𑀯𑀁 𑀲𑀻𑀮𑀁 𑀮𑁄𑀓𑀺𑀬’’𑀦𑁆𑀢𑀺. 𑀪𑀯𑀯𑀺𑀲𑁂𑀲𑀸 𑀲𑀫𑁆𑀧𑀢𑁆𑀢𑀺𑀪𑀯𑀸. 𑀯𑀺𑀦𑀬𑁄𑀢𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺, 𑀢𑀢𑁆𑀣 𑀯𑀸 𑀆𑀕𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀧𑀸𑀫𑁄𑀚𑁆𑀚𑀁 𑀢𑀭𑀼𑀡𑀧𑀻𑀢𑀺. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀲𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁, 𑀢𑀤𑀥𑀺𑀝𑁆𑀞𑀸𑀦𑀸 𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀺𑀤𑀸𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀁. 𑀢𑁂𑀦 𑀩𑀮𑀯𑀯𑀺𑀧𑀲𑁆𑀲𑀦𑀫𑀸𑀳. 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀓𑀣𑀸𑀢𑀺 𑀯𑀺𑀦𑀬𑀓𑀣𑀸. 𑀫𑀦𑁆𑀢𑀦𑀸𑀢𑀺 𑀯𑀺𑀦𑀬𑀯𑀺𑀘𑀸𑀭𑀡𑀸. 𑀉𑀧𑀦𑀺𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀧𑀭𑀫𑁆𑀧𑀭𑀸𑀲𑀗𑁆𑀔𑀸𑀢𑁄 𑀉𑀧𑀦𑀺𑀲𑁆𑀲𑀬𑁄. 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀨𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁. 𑀢𑀢𑁆𑀣 𑀫𑀕𑁆𑀕𑀲𑀻𑀮𑀁 𑀪𑀯𑀦𑀺𑀲𑁆𑀲𑀭𑀡𑀸𑀯𑀳𑀁 𑀳𑁄𑀢𑀺, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀘 𑀪𑀽𑀫𑀺, 𑀨𑀮𑀲𑀻𑀮𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀲𑁆𑀲𑁂𑀯 𑀪𑀽𑀫𑀺.

𑁧𑁨. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀙𑀦𑁆𑀤𑀸𑀤𑀻𑀦𑀫𑁆𑀧𑀺 𑀳𑀻𑀦𑀢𑀸. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀡𑀻𑀢𑀢𑀸. 𑀢𑀤𑀼𑀪𑀬𑀯𑁂𑀫𑀚𑁆𑀛𑀢𑀸𑀯𑀲𑁂𑀦 𑀫𑀚𑁆𑀛𑀺𑀫𑀢𑀸. 𑀬𑀣𑁂𑀯 𑀳𑀺 𑀓𑀫𑁆𑀫𑀁 𑀆𑀬𑀽𑀳𑀦𑀯𑀲𑁂𑀦 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀳𑁄𑀢𑀺, 𑀏𑀯𑀁 ¶ 𑀙𑀦𑁆𑀤𑀸𑀤𑀬𑁄𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦. 𑀲𑁄 𑀘 𑀦𑁂𑀲𑀁 𑀧𑀯𑀢𑁆𑀢𑀺𑀆𑀓𑀸𑀭𑁄 𑀅𑀥𑀺𑀫𑀼𑀢𑁆𑀢𑀺𑀪𑁂𑀤𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑀓𑀸𑀫𑀢𑀸𑀬𑀸𑀢𑀺 𑀓𑀺𑀢𑁆𑀢𑀺𑀲𑀺𑀮𑁄𑀓𑀸𑀪𑀺𑀭𑀢𑀺𑀬𑀸, 𑀧𑀭𑀺𑀯𑀸𑀭𑀺𑀘𑁆𑀙𑀸𑀬 𑀯𑀸. ‘‘𑀓𑀣𑀁 𑀦𑀸𑀫 𑀫𑀸𑀤𑀺𑀲𑁄 𑀈𑀤𑀺𑀲𑀁 𑀓𑀭𑁂𑀬𑁆𑀬𑀸’’𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀸𑀬 𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬. 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀦𑁆𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀳𑀺, 𑀅𑀜𑁆𑀜𑁂𑀳𑀺 𑀘 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁. 𑀪𑀯𑀪𑁄𑀕𑀢𑁆𑀣𑀸𑀬𑀸𑀢𑀺 𑀪𑀯𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀜𑁆𑀘𑁂𑀯 𑀪𑁄𑀕𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀜𑁆𑀘. 𑀅𑀢𑁆𑀢𑀦𑁄 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀦𑁆𑀢𑀺 𑀲𑀸𑀯𑀓𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑀻𑀮𑀫𑀸𑀳. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀫𑁄𑀓𑁆𑀔𑀢𑁆𑀣𑀸𑀬𑀸𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀩𑀦𑁆𑀥𑀦𑀢𑁄 ¶ 𑀯𑀺𑀫𑁄𑀘𑀦𑀢𑁆𑀣𑀸𑀬. 𑀧𑀸𑀭𑀫𑀺𑀢𑀸𑀲𑀻𑀮𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑀻𑀮𑀁. 𑀬𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀫𑀳𑀸𑀩𑁄𑀥𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑁄𑀘𑁂𑀬𑁆𑀬𑀲𑀮𑁆𑀮𑁂𑀔𑀸 𑀤𑁂𑀲𑀓𑀸𑀮𑀲𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀭𑀳𑀺𑀢𑀸 𑀲𑀻𑀮𑀧𑀸𑀭𑀫𑀺𑀢𑀸.

𑀅𑀦𑀦𑀼𑀭𑀽𑀧𑀦𑁆𑀢𑀺 𑀅𑀲𑀸𑀭𑀼𑀧𑁆𑀧𑀁. 𑀅𑀢𑁆𑀢𑀸 𑀏𑀯 𑀕𑀭𑀼 𑀅𑀥𑀺𑀧𑀢𑀺 𑀏𑀢𑀲𑁆𑀲𑀸𑀢𑀺 𑀅𑀢𑁆𑀢𑀕𑀭𑀼, 𑀮𑀚𑁆𑀚𑀸𑀥𑀺𑀓𑁄. 𑀅𑀢𑁆𑀢𑀸𑀥𑀺𑀧𑀢𑀺𑀢𑁄 𑀆𑀕𑀢𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁. 𑀮𑁄𑀓𑁄 𑀅𑀥𑀺𑀧𑀢𑀺 𑀕𑀭𑀼 𑀏𑀢𑀲𑁆𑀲𑀸𑀢𑀺 𑀮𑁄𑀓𑀸𑀥𑀺𑀧𑀢𑀺, 𑀑𑀢𑁆𑀢𑀧𑁆𑀧𑀸𑀥𑀺𑀓𑁄. 𑀥𑀫𑁆𑀫𑁄 𑀦𑀸𑀫𑀸𑀬𑀁 𑀫𑀳𑀸𑀦𑀼𑀪𑀸𑀯𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑁄, 𑀲𑁄 𑀘 𑀧𑀝𑀺𑀧𑀢𑁆𑀢𑀺𑀬𑀸𑀯 𑀧𑀽𑀚𑁂𑀢𑀩𑁆𑀩𑁄. 𑀢𑀲𑁆𑀫𑀸 ‘‘𑀦𑀁 𑀲𑀻𑀮𑀲𑀫𑁆𑀧𑀤𑀸𑀬 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀥𑀫𑁆𑀫𑀫𑀳𑀢𑁆𑀢𑀁 𑀧𑀽𑀚𑁂𑀢𑀼𑀓𑀸𑀫𑁂𑀦.

𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 𑀧𑀭𑀸𑀪𑀯𑀯𑀲𑁂𑀦 𑀆𑀫𑀝𑁆𑀞𑀢𑁆𑀢𑀸. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀳𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀇𑀫𑀺𑀦𑀸 𑀫𑁂 𑀲𑀻𑀮𑁂𑀦 𑀲𑀁𑀲𑀸𑀭𑀲𑀼𑀤𑁆𑀥𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑀲𑁆𑀲 𑀲𑀻𑀮𑀁 𑀧𑀭𑀸𑀫𑀲𑀦𑁆𑀢𑀺𑀬𑁄 𑀢𑀁 𑀧𑀭𑀸𑀪𑀯𑀁 𑀧𑀸𑀧𑁂𑀦𑁆𑀢𑀺 𑀫𑀕𑁆𑀕𑀲𑁆𑀲 𑀅𑀦𑀼𑀧𑀦𑀺𑀲𑁆𑀲𑀬𑀪𑀸𑀯𑀓𑀭𑀡𑀢𑁄. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀲𑀼 𑀓𑀮𑁆𑀬𑀸𑀡𑀓𑀲𑁆𑀲. 𑀲𑁄 𑀳𑀺 𑀧𑀼𑀣𑀼𑀚𑁆𑀚𑀦𑁄𑀯 𑀳𑀼𑀢𑁆𑀯𑀸 𑀓𑀮𑁆𑀬𑀸𑀡𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀭𑀸𑀫𑀲𑀦𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑁄, 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀘 𑀢𑁂𑀳𑀺 𑀦 𑀧𑀭𑀸𑀫𑀝𑁆𑀞𑀦𑁆𑀢𑀺 𑀅𑀧𑀭𑀸𑀫𑀝𑁆𑀞𑀁. 𑀢𑀲𑁆𑀲 𑀢𑀲𑁆𑀲 𑀓𑀺𑀮𑁂𑀲𑀤𑀭𑀣𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄 𑀯𑀽𑀧𑀲𑀫𑀦𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁.

𑀓𑀢𑀧𑀝𑀺𑀓𑀫𑁆𑀫𑀦𑁆𑀢𑀺 𑀯𑀼𑀝𑁆𑀞𑀸𑀦𑀤𑁂𑀲𑀦𑀸𑀳𑀺 𑀬𑀣𑀸𑀥𑀫𑁆𑀫𑀁 𑀓𑀢𑀧𑀝𑀺𑀓𑀸𑀭𑀁. 𑀏𑀯𑀁 𑀳𑀺 𑀢𑀁 𑀲𑀻𑀮𑀁 𑀧𑀝𑀺𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀁 𑀯𑀺𑀲𑀼𑀤𑁆𑀥’’𑀦𑁆𑀢𑀺. ‘‘𑀓𑀢𑀧𑀝𑀺𑀓𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀘 ‘‘𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀘𑁆𑀙𑀫𑀁𑀲𑀁 𑀦𑀼 𑀔𑁄, 𑀲𑀽𑀓𑀭𑀫𑀁𑀲𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀫𑁆𑀳𑀺 𑀯𑀸, ‘‘𑀧𑀸𑀘𑀺𑀢𑁆𑀢𑀺𑀬𑀁 𑀦𑀼 𑀔𑁄, 𑀤𑀼𑀓𑁆𑀓𑀝𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀆𑀧𑀢𑁆𑀢𑀺𑀬𑀸 𑀯𑀸, ‘‘𑀫𑀬𑀸 𑀢𑀁 𑀯𑀢𑁆𑀣𑀼 𑀯𑀻𑀢𑀺𑀓𑁆𑀓𑀦𑁆𑀢𑀁 𑀦𑀼 𑀔𑁄, 𑀦 𑀦𑀼 𑀔𑁄 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀚𑁆𑀛𑀸𑀘𑀸𑀭𑁂 𑀯𑀸 𑀯𑁂𑀫𑀢𑀺𑀓𑀲𑁆𑀲 𑀲𑀁𑀲𑀬𑀸𑀧𑀦𑁆𑀦𑀲𑁆𑀲. 𑀯𑀺𑀲𑁄𑀥𑁂𑀢𑀩𑁆𑀩𑀁 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀫𑁆𑀫𑁂𑀦. 𑀯𑀺𑀫𑀢𑀺 𑀏𑀯 𑀯𑁂𑀫𑀢𑀺𑀓𑀁, 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁂 𑀲𑀢𑀺, 𑀯𑀺𑀫𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺 𑀧𑀝𑀺𑀯𑀺𑀦𑁂𑀢𑀩𑁆𑀩𑀸𑀢𑀺 𑀲𑀬𑀁 𑀯𑀸 𑀢𑀁 𑀯𑀢𑁆𑀣𑀼𑀁 ¶ 𑀯𑀺𑀘𑀸𑀭𑁂𑀢𑁆𑀯𑀸, 𑀯𑀺𑀦𑀬𑀥𑀭𑁂 𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀓𑀗𑁆𑀔𑀸 𑀯𑀺𑀦𑁄𑀤𑁂𑀢𑀩𑁆𑀩𑀸. 𑀦𑀺𑀓𑁆𑀓𑀗𑁆𑀔𑁂𑀦 𑀧𑀦 𑀓𑀧𑁆𑀧𑀺𑀬𑀁 𑀘𑁂 𑀓𑀸𑀢𑀩𑁆𑀩𑀁, 𑀅𑀓𑀧𑁆𑀧𑀺𑀬𑀁 𑀘𑁂 𑀙𑀟𑁆𑀟𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀇𑀘𑁆𑀘𑀲𑁆𑀲 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀘𑀢𑀽𑀳𑀺 ¶ 𑀅𑀭𑀺𑀬𑀫𑀕𑁆𑀕𑁂𑀳𑀻’’𑀢𑀺𑀆𑀤𑀺𑀦𑀸 𑀫𑀕𑁆𑀕𑀨𑀮𑀧𑀭𑀺𑀬𑀸𑀧𑀦𑁆𑀦𑀁 𑀲𑀻𑀮𑀁 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀁 𑀯𑀼𑀢𑁆𑀢𑀁. 𑀲𑀫𑀼𑀤𑀸𑀬𑁂𑀲𑀼 𑀧𑀯𑀢𑁆𑀢𑀯𑁄𑀳𑀸𑀭𑀸 𑀅𑀯𑀬𑀯𑁂𑀲𑀼𑀧𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀲𑁂𑀲𑀦𑁆𑀢𑀺 𑀲𑀩𑁆𑀩𑀁 𑀮𑁄𑀓𑀺𑀬𑀲𑀻𑀮𑀁.

𑀧𑀓𑀢𑀺𑀧𑀻𑀢𑀺 𑀲𑀪𑀸𑀯𑁄𑀧𑀺. 𑀲𑀼𑀔𑀲𑀻𑀮𑁄 𑀲𑀔𑀺𑀮𑁄 𑀲𑀼𑀔𑀲𑀁𑀯𑀸𑀲𑁄. 𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀧𑀓𑀢𑀺𑀅𑀢𑁆𑀣𑀯𑀸𑀘𑀓𑀢𑁆𑀣𑁂𑀦. 𑀏𑀓𑀘𑁆𑀘𑀁 𑀅𑀩𑁆𑀬𑀸𑀓𑀢𑀁 𑀲𑀻𑀮𑀁 𑀇𑀥𑀸𑀥𑀺𑀧𑁆𑀧𑁂𑀢𑀲𑀻𑀮𑁂𑀦 𑀏𑀓𑀲𑀗𑁆𑀕𑀳𑀦𑁆𑀢𑀺 𑀅𑀓𑀼𑀲𑀮𑀲𑁆𑀲𑁂𑀯𑀸𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑁂𑀓𑁆𑀔𑀢𑁆𑀢𑀺𑀓𑀁 𑀇𑀥 𑀕𑀳𑀺𑀢𑀁, 𑀇𑀥 𑀦 𑀉𑀧𑀦𑀻𑀢𑀁 𑀓𑀼𑀲𑀮𑀢𑁆𑀢𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀓𑀼𑀲𑀮𑀢𑁆𑀢𑀺𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀳𑀻𑀦𑀢𑁆𑀢𑀺𑀓𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀢𑀺𑀓𑀸𑀦𑀁 𑀯𑀲𑁂𑀦 𑀅𑀲𑁆𑀲 𑀲𑀻𑀮𑀲𑁆𑀲 𑀢𑀺𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁩. 𑀬𑁄𑀥𑀸𑀢𑀺 𑀬𑁄 𑀇𑀥. 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂𑀢𑀺 𑀆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀦𑁄 𑀯𑀻𑀢𑀺𑀓𑁆𑀓𑀫𑀦𑁂 𑀅𑀚𑁆𑀛𑀸𑀘𑀸𑀭𑁂. 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀦𑀯 𑀫𑀳𑀸𑀯𑀺𑀢𑀓𑁆𑀓𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸. 𑀏𑀯𑀭𑀽𑀧𑀲𑁆𑀲𑀸𑀢𑀺 𑀏𑀤𑀺𑀲𑀲𑁆𑀲. 𑀢𑀲𑁆𑀲 𑀳𑀺 𑀲𑀻𑀮𑀯𑀦𑁆𑀢𑁂 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑁂 𑀲𑁂𑀯𑀦𑁆𑀢𑀲𑁆𑀲 𑀢𑀢𑁄 𑀏𑀯 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁂𑀦 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀅𑀤𑁄𑀲𑀤𑀲𑁆𑀲𑀸𑀯𑀺𑀦𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀩𑀳𑀼𑀮𑀢𑀸𑀬 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀓𑁆𑀔𑀢𑁄 𑀲𑀻𑀮𑀁 𑀏𑀓𑀁𑀲𑁂𑀦𑁂𑀯 𑀳𑀸𑀦𑀪𑀸𑀕𑀺𑀬𑀁 𑀳𑁄𑀢𑀺, 𑀦 𑀞𑀺𑀢𑀺𑀪𑀸𑀕𑀺𑀬𑀁, 𑀓𑀼𑀢𑁄 𑀯𑀺𑀲𑁂𑀲𑀸𑀤𑀺𑀪𑀸𑀕𑀺𑀬𑀢𑀸. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀧𑀸𑀭𑀺𑀧𑀽𑀭𑀺𑀬𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦. 𑀅𑀖𑀝𑀦𑁆𑀢𑀲𑁆𑀲 𑀉𑀢𑁆𑀢𑀭𑀻𑀢𑀺 𑀉𑀢𑁆𑀢𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑀸𑀬 𑀅𑀯𑀸𑀬𑀫𑀦𑁆𑀢𑀲𑁆𑀲. 𑀞𑀺𑀢𑀺𑀪𑀸𑀕𑀺𑀬𑀁 𑀲𑀻𑀮𑀁 𑀪𑀯𑀢𑀺 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀬𑀢𑁆𑀢𑀸. 𑀲𑀫𑁆𑀧𑀸𑀤𑀺𑀢𑁂 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀲𑀻𑀮𑀲𑁆𑀲 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀬𑀢𑀸 𑀦𑀺𑀘𑁆𑀙𑀺𑀬𑀢𑀺. 𑀲𑀫𑀸𑀥𑀢𑁆𑀣𑀸𑀬𑀸𑀢𑀺 𑀲𑀫𑀣𑀯𑀲𑁂𑀦 𑀲𑀫𑀸𑀥𑀸𑀦𑀢𑁆𑀣𑀸𑀬. 𑀦𑀺𑀩𑁆𑀩𑀺𑀤𑀦𑁆𑀢𑀺 𑀯𑀺𑀧𑀲𑁆𑀲𑀦𑀁. 𑀩𑀮𑀯𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁆𑀣𑀁 𑀦𑀺𑀩𑁆𑀩𑀺𑀤𑀸𑀕𑀳𑀡𑀁 𑀢𑀸𑀯𑀢𑀸𑀧𑀺 𑀲𑀻𑀮𑀲𑁆𑀲 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄.

𑀬𑀸𑀦𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑁂𑀲𑀁 𑀭𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀸𑀦𑀺 𑀧𑀦 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀢𑁄 𑀅𑀜𑁆𑀜𑀸𑀦𑀺. 𑀦𑁂𑀲𑀦𑁆𑀢𑀺 ‘‘𑀭𑀓𑁆𑀔𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀅𑀢𑁆𑀣𑁄. 𑀲𑀢𑀺 𑀯𑀸 𑀉𑀲𑁆𑀲𑀸𑀳𑁂𑀢𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑀼𑀁 𑀉𑀲𑁆𑀲𑀸𑀳𑁂 𑀲𑀢𑀺. 𑀤𑀲𑀸𑀢𑀺 𑀲𑀸𑀫𑀡𑁂𑀭𑁂𑀳𑀺 𑀭𑀓𑁆𑀔𑀺𑀢𑀩𑁆𑀩𑀲𑀻𑀮𑀫𑀸𑀳 𑀖𑀝𑀺𑀓𑀸𑀭𑀸𑀤𑀻𑀦𑀁 𑀯𑀺𑀬. 𑀅𑀝𑁆𑀞𑀸𑀢𑀺 𑀦𑀘𑁆𑀘𑀸𑀤𑀺𑀫𑀸𑀮𑀸𑀤𑀺𑀯𑁂𑀭𑀫𑀡𑀺𑀁 𑀏𑀓𑀁 𑀓𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀺𑀫𑀯𑀚𑁆𑀚𑀸𑀦𑀺 𑀅𑀝𑁆𑀞.

𑀅𑀯𑀻𑀢𑀺𑀓𑁆𑀓𑀫𑁄𑀢𑀺 ¶ ¶ 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑁄. 𑀧𑀓𑀢𑀺𑀲𑀻𑀮𑀦𑁆𑀢𑀺 𑀲𑀪𑀸𑀯𑀲𑀻𑀮𑀁. 𑀢𑀢𑁆𑀭𑀽𑀧𑀧𑀢𑁆𑀢𑀺𑀦𑀺𑀬𑀢𑀁 𑀳𑀺 𑀲𑀻𑀮𑀁 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁. 𑀫𑀭𑀺𑀬𑀸𑀤𑀸𑀘𑀸𑀭𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀸𑀯𑀚𑁆𑀚𑀲𑁆𑀲 𑀅𑀓𑀭𑀡𑁂 𑀫𑀭𑀺𑀬𑀸𑀤𑀪𑀽𑀢𑀁, 𑀢𑀢𑁆𑀣 𑀢𑀢𑁆𑀣 𑀓𑀼𑀮𑀸𑀤𑀻𑀲𑀼 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀞𑀧𑀺𑀢𑀁 𑀘𑀸𑀭𑀺𑀢𑁆𑀢𑀁. 𑀓𑀼𑀮𑀤𑁂𑀲𑀧𑀸𑀲𑀡𑁆𑀟𑀥𑀫𑁆𑀫𑁄 𑀳𑀺 ‘‘𑀆𑀘𑀸𑀭𑀲𑀻𑀮’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀓𑀼𑀮𑀥𑀫𑁆𑀫𑁄 𑀢𑀸𑀯 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀅𑀫𑀚𑁆𑀚𑀧𑀸𑀦𑀸𑀤𑀺, 𑀤𑁂𑀲𑀥𑀫𑁆𑀫𑁄 𑀏𑀓𑀘𑁆𑀘𑀚𑀦𑀧𑀤𑀯𑀸𑀲𑀻𑀦𑀁 𑀅𑀳𑀺𑀁𑀲𑀦𑀸𑀤𑀺, 𑀧𑀸𑀲𑀡𑁆𑀟𑀥𑀫𑁆𑀫𑁄 𑀢𑀺𑀢𑁆𑀣𑀺𑀬𑀸𑀦𑀁 𑀬𑀫𑀦𑀺𑀬𑀫𑀸𑀤𑀺. 𑀢𑀺𑀢𑁆𑀣𑀺𑀬𑀫𑀢𑀁 𑀳𑀺 𑀤𑀺𑀝𑁆𑀞𑀺𑀧𑀸𑀲𑁂𑀦, 𑀢𑀡𑁆𑀳𑀸𑀧𑀸𑀲𑁂𑀦 𑀘 𑀟𑁂𑀢𑀺 𑀧𑀯𑀢𑁆𑀢𑀢𑀺, 𑀧𑀸𑀲𑀁 𑀯𑀸 𑀩𑀸𑀥𑀁 𑀅𑀭𑀺𑀬𑀯𑀺𑀦𑀬𑀲𑁆𑀲 𑀟𑁂𑀢𑀻𑀢𑀺 ‘‘𑀧𑀸𑀲𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀓𑀢𑀺𑀬𑀸 𑀲𑀻𑀮𑀯𑀢𑀻 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁨.𑁨𑁦) 𑀯𑀘𑀦𑀢𑁄 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀻𑀮𑀁 𑀧𑀭𑀺𑀧𑀼𑀡𑁆𑀡𑀫𑁂𑀯. 𑀇𑀤𑀁 𑀧𑀦 𑀉𑀓𑁆𑀓𑀁𑀲𑀕𑀢𑀁 𑀩𑁄𑀥𑀺𑀲𑀢𑁆𑀢𑀧𑀺𑀢𑀭𑀺𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀅𑀲𑀁𑀓𑀺𑀮𑀺𑀝𑁆𑀞𑀁 ‘‘𑀥𑀫𑁆𑀫𑀢𑀸𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀦𑁆𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀅𑀲𑁆𑀲𑀸𑀤𑀽𑀧𑀲𑀁𑀳𑀺𑀢𑀁 𑀓𑀸𑀫𑀲𑁆𑀲𑀸𑀤𑀕𑀥𑀺𑀢𑀁. 𑀥𑀫𑁆𑀫𑀢𑀸𑀲𑀻𑀮𑀦𑁆𑀢𑀺 𑀥𑀫𑁆𑀫𑀢𑀸𑀬 𑀓𑀸𑀭𑀡𑀦𑀺𑀬𑀸𑀫𑁂𑀦 𑀆𑀕𑀢𑀁 𑀲𑀻𑀮𑀁. 𑀲𑀻𑀮𑀧𑀸𑀭𑀫𑀺𑀁 𑀳𑀺 𑀧𑀭𑀫𑀼𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀓𑀼𑀘𑁆𑀙𑀺𑀕𑀢𑀲𑁆𑀲 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀕𑀼𑀡𑀸𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀲𑀭𑀲𑁂𑀦𑁂𑀯 𑀧𑀭𑀫𑀲𑀮𑁆𑀮𑁂𑀔𑀧𑁆𑀧𑀢𑁆𑀢𑀁 𑀲𑀻𑀮𑀁 𑀳𑁄𑀢𑀺. 𑀫𑀳𑀸𑀓𑀲𑁆𑀲𑀧𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑀤𑁆𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂 𑀓𑀺𑀭 𑀲𑀼𑀘𑀺𑀭𑀁 𑀓𑀸𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀏𑀯 𑀳𑀼𑀢𑁆𑀯𑀸 𑀆𑀕𑀢𑀸. 𑀢𑁂𑀦𑀸𑀳 ‘‘𑀲𑀼𑀤𑁆𑀥𑀲𑀢𑁆𑀢𑀸𑀦’’𑀦𑁆𑀢𑀺. 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀽𑀢𑀺 𑀲𑀻𑀮𑀯𑀭𑀸𑀚𑀫𑀳𑀺𑀁𑀲𑀭𑀸𑀚𑀸𑀤𑀺𑀚𑀸𑀢𑀻𑀲𑀼. 𑀧𑀼𑀩𑁆𑀩𑁂 𑀧𑀼𑀭𑀺𑀫𑀚𑀸𑀢𑀺𑀬𑀁 𑀲𑀺𑀤𑁆𑀥𑁄 𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑀳𑁂𑀢𑀼𑀓𑀲𑀻𑀮𑀁. 𑀇𑀤𑀁 𑀧𑀦 𑀧𑀓𑀢𑀺𑀲𑀻𑀮𑀸𑀤𑀺𑀲𑀫𑀸𑀤𑀸𑀦𑁂𑀦 𑀯𑀺𑀦𑀸 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀁 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀗𑁆𑀕𑀳𑀁 𑀤𑀝𑁆𑀞𑀩𑁆𑀩𑀁.

𑀬𑀁 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑀁 𑀲𑀻𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀯𑀓𑁆𑀔𑀫𑀸𑀦𑀲𑀻𑀮𑀧𑀭𑀺𑀧𑀽𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑀁, 𑀅𑀜𑁆𑀜𑀲𑀸𑀲𑀦𑀲𑁆𑀲 𑀘 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪; 𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧). 𑀪𑀺𑀓𑁆𑀔𑀽𑀢𑀺 𑀢𑀲𑁆𑀲 𑀲𑀻𑀮𑀲𑁆𑀲 𑀧𑀭𑀺𑀧𑀽𑀭𑀓𑀧𑀼𑀕𑁆𑀕𑀮𑀧𑀭𑀺𑀤𑀻𑀧𑀦𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀇𑀤𑀫𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀯𑀺𑀳𑀭𑀢𑀻𑀢𑀺 𑀇𑀤𑀫𑀲𑁆𑀲 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲, 𑀉𑀧𑀭𑀺𑀅𑀥𑀺𑀕𑀦𑁆𑀢𑀩𑁆𑀩𑀕𑀼𑀡𑀸𑀦𑀜𑁆𑀘 𑀉𑀧𑀓𑀸𑀭𑀓𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀢𑁄 𑀅𑀘𑀯𑀦𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀫𑀸𑀤𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀢𑀻𑀢𑀺 𑀲𑀺𑀓𑁆𑀔𑀸𑀬 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁 ¶ . 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀲𑁄𑀢𑀺 ¶ 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀪𑀺𑀓𑁆𑀔𑀼. 𑀢𑁂𑀦 𑀬𑀸𑀤𑀺𑀲𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀦𑀸𑀢𑀺 𑀬𑀢𑁄 𑀲𑁄 𑀲𑀁𑀯𑀭𑁄, 𑀢𑀁 𑀤𑀲𑁆𑀲𑁂𑀢𑀺. 𑀭𑀽𑀧𑀦𑁆𑀢𑀺 𑀬𑀢𑁆𑀣 𑀲𑁄 𑀲𑀁𑀯𑀭𑁄, 𑀢𑀁 𑀤𑀲𑁆𑀲𑁂𑀢𑀺. 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀲𑀁𑀯𑀭𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀯𑀸𑀥𑀺𑀓𑀭𑀡…𑀧𑁂… 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀦𑁆𑀢𑀺 𑀲𑀁𑀯𑀭𑀲𑁆𑀲 𑀧𑀝𑀺𑀧𑀓𑁆𑀔𑀁 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺. 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺 𑀧𑀕𑁂𑀯 𑀲𑀢𑀺𑀬𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀢𑀺𑀬𑀸 𑀉𑀧𑀝𑁆𑀞𑀸𑀧𑀦𑀫𑁂𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀆𑀭𑀓𑁆𑀔𑀸𑀢𑀺 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 𑀢𑀣𑀸𑀪𑀽𑀢𑀸 𑀲𑀢𑀺𑀬𑁂𑀯𑁂𑀢𑁆𑀣 𑀲𑀁𑀯𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀻𑀢𑀺𑀓𑁆𑀓𑀫𑀲𑁆𑀲 𑀯𑀲𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 ‘‘𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀁 𑀙𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁. 𑀲𑀸𑀫𑀦𑁆𑀢𑀚𑀧𑁆𑀧𑀦𑀸𑀤𑀺𑀦𑀸 𑀢𑀺𑀯𑀺𑀥𑁂𑀦 𑀓𑀼𑀳𑀦𑀯𑀢𑁆𑀣𑀼𑀦𑀸 𑀯𑀺𑀫𑁆𑀳𑀸𑀧𑀦𑀁 𑀓𑀼𑀳𑀦𑀸. 𑀅𑀢𑁆𑀢𑀸𑀦𑀁, 𑀤𑀸𑀬𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀲𑁄 𑀓𑀺𑀜𑁆𑀘𑀺 𑀤𑀤𑀸𑀢𑀺, 𑀏𑀯𑀁 𑀓𑀣𑀦𑀁 𑀮𑀧𑀦𑀸. 𑀦𑀺𑀫𑀺𑀢𑁆𑀢𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀼𑀧𑁆𑀧𑀸𑀤𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀘𑀭𑀢𑀺, 𑀦𑀺𑀫𑀺𑀢𑁆𑀢𑀁 𑀯𑀸 𑀓𑀭𑁄𑀢𑀻𑀢𑀺 𑀦𑁂𑀫𑀺𑀢𑁆𑀢𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀫𑀺𑀢𑁆𑀢𑀺𑀓𑀢𑀸. 𑀕𑀦𑁆𑀥𑀸𑀤𑀬𑁄 𑀯𑀺𑀬 𑀮𑀸𑀪𑀸𑀬 𑀧𑀭𑁂𑀲𑀁 𑀅𑀓𑁆𑀓𑁄𑀲𑀦𑀸𑀤𑀺𑀦𑀸 𑀦𑀺𑀧𑀺𑀲𑀢𑀻𑀢𑀺 𑀦𑀺𑀧𑁆𑀧𑁂𑀲𑁄, 𑀦𑀺𑀧𑁆𑀧𑁂𑀲𑁄𑀯 𑀦𑀺𑀧𑁆𑀧𑁂𑀲𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀦𑀺𑀧𑁆𑀧𑁂𑀲𑀺𑀓𑀢𑀸. 𑀫𑀳𑀺𑀘𑁆𑀙𑀢𑀸𑀬 𑀅𑀢𑁆𑀢𑀦𑀸 𑀮𑀤𑁆𑀥𑀮𑀸𑀪𑁂𑀦 𑀧𑀭𑀢𑁄 𑀮𑀸𑀪𑀧𑀭𑀺𑀬𑁂𑀲𑀦𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸. 𑀏𑀯𑀫𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸𑀘𑀸𑀝𑀼𑀓𑀫𑁆𑀬𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀲𑀗𑁆𑀔𑀸𑀦𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀭𑀺𑀲𑀼𑀤𑁆𑀥𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀧𑀝𑀺𑀲𑀗𑁆𑀔𑀸𑀦𑀧𑀭𑀺𑀲𑀼𑀤𑁆𑀥𑁄. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀧𑀭𑀺𑀪𑀼𑀜𑁆𑀚𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑁄, 𑀢𑀣𑀸𑀧𑀯𑀢𑁆𑀢𑀸 𑀅𑀦𑀯𑀚𑁆𑀚𑀘𑁂𑀢𑀦𑀸.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀯𑀡𑁆𑀡𑀦𑀸

𑁧𑁪. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀻𑀲𑀼. 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀇𑀥 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮; 𑀤𑀻. 𑀦𑀺. 𑁧.𑁧𑁯𑁪) 𑀆𑀕𑀢𑀤𑁂𑀲𑀦𑀸𑀬 𑀆𑀤𑀺𑀢𑁄 𑀧𑀪𑀼𑀢𑀺. 𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 𑀢𑀢𑁆𑀣 𑀲𑀁𑀲𑀬𑀯𑀺𑀥𑀫𑀦𑁂𑀦 𑀯𑀺𑀦𑀺𑀘𑁆𑀙𑀬𑀸𑀯𑀳𑀸 𑀓𑀣𑀸. 𑀧𑀞𑀫𑀲𑁆𑀲 𑀅𑀢𑁆𑀣𑀲𑁆𑀲 ¶ 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀅𑀲𑀸𑀥𑀸𑀭𑀡𑀁 𑀧𑀩𑁆𑀩𑀚𑀺𑀢𑀸𑀯𑁂𑀡𑀺𑀓𑀁 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑀸𑀤𑀺𑀢𑀸𑀬 𑀯𑀸’’𑀢𑀺 𑀆𑀳. 𑀏𑀯𑀁 𑀳𑀺𑀲𑁆𑀲 𑀧𑀭𑀺𑀧𑀼𑀡𑁆𑀡𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀬𑁄𑀕𑁆𑀬𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀪𑀺𑀦𑁆𑀦𑀧𑀝𑀥𑀭𑀸𑀤𑀺𑀪𑀸𑀯𑁄 𑀘 𑀦𑀸𑀫 𑀤𑀮𑀺𑀤𑁆𑀤𑀲𑁆𑀲𑀸𑀧𑀺 𑀦𑀺𑀕𑁆𑀕𑀳𑀺𑀢𑀲𑁆𑀲 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀬𑁄𑀕𑁆𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀓𑀼𑀮𑀧𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀯𑀸 𑀳𑀺 𑀧𑀝𑀺𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄 𑀯𑀸. 𑀲𑀺𑀓𑁆𑀔𑀸𑀧𑀤𑀲𑀻𑀮𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀧𑁆𑀧𑀪𑁂𑀤𑀁 𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀧𑀜𑁆𑀜𑀢𑁆𑀢𑀁 𑀲𑀻𑀮𑀁. 𑀬𑁄𑀢𑀺 ¶ 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄. 𑀦𑀦𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀁 𑀲𑀻𑀮𑀁. 𑀢𑀦𑁆𑀢𑀺 𑀧𑀼𑀕𑁆𑀕𑀮𑀁. 𑀫𑁄𑀓𑁆𑀔𑁂𑀢𑀺 𑀲𑀳𑀓𑀸𑀭𑀺𑀓𑀸𑀭𑀡𑀪𑀸𑀯𑀢𑁄. 𑀅𑀧𑀸𑀬𑁂 𑀪𑀯𑀸𑀦𑀺 𑀆𑀧𑀸𑀬𑀺𑀓𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀜𑁆𑀜𑀁 𑀲𑀩𑁆𑀩𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀁𑀯𑀭𑀡𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀧𑀺𑀤𑀳𑀦𑀁. 𑀬𑁂𑀦 𑀢𑁂 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸 𑀳𑁄𑀦𑁆𑀢𑀺, 𑀲𑁄 𑀲𑀁𑀯𑀭𑁄. 𑀬𑀲𑁆𑀫𑀸 𑀧𑀦 𑀲𑁄 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑁄 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑁄𑀢𑀺 𑀓𑀢𑁆𑀯𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄. 𑀢𑀣𑀸𑀪𑀽𑀢𑁄 𑀘 𑀬𑀲𑁆𑀫𑀸 𑀢𑀁 𑀉𑀧𑁂𑀢𑁄 𑀢𑁂𑀦 𑀘 𑀲𑀫𑀗𑁆𑀕𑀻 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀧𑀕𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀺𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀸𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀁 𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺, ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘. 𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀻, ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 ¶ . ‘‘𑀓𑀡𑁆𑀞𑁂𑀓𑀸𑀴𑁄’’𑀢𑀺𑀆𑀤𑀻𑀦𑀁 𑀯𑀺𑀬𑀲𑁆𑀲 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀁 𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂, 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀻, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀁 𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁫-𑁫𑁭), 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀅. 𑀦𑀺. 𑁪.𑁯; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲) 𑀘 𑀆𑀤𑀺. 𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀻𑀦𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀁 𑀳𑀺 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁦; 𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 ¶ 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻-𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀇𑀤𑀁 𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀫𑁄𑀓𑁆𑀔𑁄𑀢𑀺 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑁄. 𑀲𑀻𑀮𑀲𑀁𑀯𑀭𑁄 𑀳𑀺 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀯𑀺𑀬 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄, 𑀧𑀢𑀺𑀫𑁄𑀓𑁆𑀔𑁄𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀫𑁄𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀺, 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀭𑀺𑀬𑀢𑀻𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀺. ‘‘𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀧𑀸𑀴𑀺𑀬𑀦𑁆𑀢𑀺 𑀛𑀸𑀦𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁫𑁦𑁮 𑀆𑀤𑀬𑁄).

𑀢𑀢𑁆𑀣 𑀓𑀸𑀫𑀁 𑀲𑀫𑀡𑀘𑀸𑀭𑀁, 𑀲𑀫𑀡𑀕𑁄𑀘𑀭𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀧𑀦 𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 𑀯𑀚𑁆𑀚𑁂𑀢𑀩𑁆𑀩𑀧𑀼𑀩𑁆𑀩𑀓𑀁 𑀕𑀳𑁂𑀢𑀩𑁆𑀩𑀁 𑀯𑀤𑁂𑀬𑁆𑀬, 𑀬𑀣𑀸 𑀯𑀸 𑀲𑀲𑀻𑀲𑀦𑁆𑀳𑀸𑀦𑁂𑀦 𑀧𑀳𑀻𑀦𑀲𑁂𑀤𑀫𑀮𑀚𑀮𑁆𑀮𑀺𑀓𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀯𑀺𑀪𑀽𑀲𑀦𑀲𑀁𑀯𑀺𑀥𑀸𑀦𑀁 𑀬𑀼𑀢𑁆𑀢𑀭𑀽𑀧𑀁, 𑀏𑀯𑀁 𑀧𑀳𑀻𑀦𑀧𑀸𑀧𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀥𑀫𑁆𑀫𑀲𑀫𑀸𑀬𑁄𑀕𑁄 𑀬𑀼𑀢𑁆𑀢𑀭𑀽𑀧𑁄𑀢𑀺 ‘‘𑀅𑀢𑁆𑀣𑀺 𑀆𑀘𑀸𑀭𑁄, 𑀅𑀢𑁆𑀣𑀺 𑀅𑀦𑀸𑀘𑀸𑀭𑁄’’𑀢𑀺 𑀤𑁆𑀯𑀬𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀦𑀸𑀘𑀸𑀭𑀁 𑀢𑀸𑀯 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀅𑀦𑀸𑀘𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀬𑀺𑀓𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀯𑀸𑀘𑀲𑀺𑀓𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀓𑀸𑀬𑀺𑀓𑀯𑀸𑀘𑀲𑀺𑀓𑁄𑀢𑀺 𑀢𑀤𑀼𑀪𑀬𑀁.

𑀏𑀯𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀫𑀸𑀦𑀲𑀁 𑀅𑀦𑀸𑀘𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀫𑁆𑀧𑀺 ¶ 𑀤𑀼𑀲𑁆𑀲𑀻𑀮𑁆𑀬𑀁 𑀅𑀦𑀸𑀘𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀏𑀓𑀘𑁆𑀘𑀺𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀓𑀘𑁆𑀘𑁄 𑀯𑁂𑀴𑀼𑀤𑀸𑀦𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀴𑀼𑀤𑀸𑀦𑁂𑀦𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁆𑀣𑁂𑀦 𑀯𑁂𑀴𑀼𑀤𑀸𑀦𑁂𑀦. 𑀧𑀢𑁆𑀢𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑁂𑀴𑀽𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀬𑁄𑀚𑀦𑀸𑀯𑀳𑁄 𑀬𑁄 𑀓𑁄𑀘𑀺 𑀯𑁂𑀴𑀼𑀤𑀡𑁆𑀟𑁄. 𑀧𑀢𑁆𑀢𑀁 𑀕𑀦𑁆𑀥𑀺𑀓𑀸𑀤𑀻𑀦𑀁 𑀕𑀦𑁆𑀥𑀧𑀮𑀺𑀯𑁂𑀞𑀦𑀸𑀤𑀺𑀅𑀢𑁆𑀣𑀁 𑀯𑀸, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀧𑀢𑁆𑀢𑀁 𑀯𑀸. 𑀧𑀼𑀧𑁆𑀨𑀁 𑀬𑀁 𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁 𑀧𑀬𑁄𑀚𑀦𑀸𑀯𑀳𑀁. 𑀢𑀣𑀸 𑀨𑀮𑀁. 𑀲𑀺𑀦𑀸𑀦𑀁 𑀲𑀺𑀭𑀻𑀲𑀘𑀼𑀡𑁆𑀡𑀸𑀤𑀺𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀁. 𑀫𑀢𑁆𑀢𑀺𑀓𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀤𑀦𑁆𑀢𑀓𑀝𑁆𑀞𑀁 𑀬𑀁 𑀓𑀺𑀜𑁆𑀘𑀺 𑀫𑀼𑀔𑀲𑁄𑀥𑀦𑀢𑁆𑀣𑀁 𑀤𑀦𑁆𑀢𑀧𑁄𑀦𑀁. 𑀘𑀸𑀝𑀼𑀓𑀫𑁆𑀬𑀢𑀸 𑀅𑀢𑁆𑀢𑀸𑀦𑀁 𑀤𑀸𑀲𑀁 𑀯𑀺𑀬 𑀦𑀻𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀭𑀲𑁆𑀲 𑀔𑀮𑀺𑀢𑀯𑀘𑀦𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀬𑀓𑀸𑀫𑀢𑀸𑀬 𑀧𑀕𑁆𑀕𑀬𑁆𑀳𑀯𑀘𑀦𑀁. 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀢𑀺 𑀫𑀼𑀕𑁆𑀕𑀲𑀽𑀧𑀲𑀫𑀢𑀸 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀁. 𑀬𑀣𑀸 𑀳𑀺 𑀫𑀼𑀕𑁆𑀕𑀲𑀽𑀧𑁂 𑀧𑀘𑁆𑀘𑀦𑁆𑀢𑁂 𑀩𑀳𑀽 𑀫𑀼𑀕𑁆𑀕𑀸 𑀧𑀘𑁆𑀘𑀦𑁆𑀢𑀺, 𑀓𑀢𑀺𑀧𑀬𑀸 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑁂 𑀩𑀳𑀼 𑀅𑀮𑀺𑀓𑀁 𑀳𑁄𑀢𑀺, 𑀅𑀧𑁆𑀧𑀓𑀁 𑀲𑀘𑁆𑀘𑀦𑁆𑀢𑀺. 𑀧𑀭𑀺𑀪𑀝𑀢𑀻𑀢𑀺 𑀧𑀭𑀺𑀪𑀝𑁄, 𑀧𑀭𑁂𑀲𑀁 𑀤𑀸𑀭𑀓𑁂 𑀧𑀭𑀺𑀳𑀭𑀦𑁆𑀢𑁄. 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀲𑀸 𑀏𑀯 𑀧𑀸𑀭𑀺𑀪𑀝𑁆𑀬𑀢𑀸, 𑀅𑀮𑀗𑁆𑀓𑀭𑀡𑀸𑀤𑀺𑀦𑀸 𑀓𑀼𑀮𑀤𑀸𑀭𑀓𑀧𑀭𑀺𑀳𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀲𑀸𑀲𑀦𑀧𑀝𑀺𑀲𑀸𑀲𑀦𑀳𑀭𑀡𑀁 𑀚𑀗𑁆𑀖𑀧𑁂𑀲𑀦𑀺𑀓𑀁. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦𑀸𑀢𑀺 𑀏𑀢𑁂𑀲𑀁 𑀯𑀸 𑀯𑁂𑀴𑀼𑀤𑀸𑀦𑀸𑀤𑀻𑀦𑀁 𑀯𑁂𑀚𑁆𑀚𑀓𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑀫𑁆𑀫𑀲𑀗𑁆𑀖𑀼𑀧𑁆𑀧𑀸𑀤𑀘𑁂𑀢𑀺𑀬𑀼𑀧𑁆𑀧𑀸𑀤𑀧𑀝𑁆𑀞𑀧𑀦𑀸𑀤𑀻𑀦𑀁 𑀯𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀓𑀓𑀫𑁆𑀫𑀸𑀦𑀁 𑀬𑁂𑀦 𑀓𑁂𑀦𑀘𑀺 ¶ . 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦𑀸𑀢𑀺 𑀩𑀼𑀤𑁆𑀥𑁂𑀳𑀺 𑀕𑀭𑀳𑀺𑀢𑁂𑀦 𑀧𑀝𑀺𑀲𑀺𑀤𑁆𑀥𑁂𑀦. 𑀫𑀺𑀘𑁆𑀙𑀸𑀚𑀻𑀯𑁂𑀦𑀸𑀢𑀺 𑀦 𑀲𑀫𑁆𑀫𑀸𑀆𑀚𑀻𑀯𑁂𑀦. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀸𑀘𑀸𑀭𑁄𑀢𑀺 𑀅𑀬𑀁 𑀲𑀩𑁆𑀩𑁄𑀧𑀺 ‘‘𑀅𑀦𑀸𑀘𑀸𑀭𑁄’’𑀢𑀺 𑀓𑀣𑀻𑀬𑀢𑀺. 𑀆𑀘𑀸𑀭𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀘𑀭𑀦𑀺𑀤𑁆𑀤𑁂𑀲𑁂𑀧𑀺 𑀧𑀞𑀫𑀁 𑀅𑀕𑁄𑀘𑀭𑀲𑁆𑀲 𑀯𑀘𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀕𑁄𑀘𑀭𑁄𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁. 𑀅𑀬𑀼𑀢𑁆𑀢𑀝𑁆𑀞𑀸𑀦𑀁 𑀅𑀕𑁄𑀘𑀭𑁄. 𑀯𑁂𑀲𑀺𑀬𑀸 𑀕𑁄𑀘𑀭𑁄 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀸𑀕𑁄𑀘𑀭𑁄, 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑁂𑀲𑀺𑀬𑀸 𑀦𑀸𑀫 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄, 𑀢𑀸 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸, 𑀲𑀫𑀡𑀪𑀸𑀯𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸, 𑀧𑀭𑀺𑀲𑀼𑀤𑁆𑀥𑀸𑀲𑀬𑀲𑁆𑀲𑀸𑀧𑀺 𑀕𑀭𑀳𑀳𑁂𑀢𑀼𑀢𑁄, 𑀢𑀲𑁆𑀫𑀸 𑀤𑀓𑁆𑀔𑀺𑀡𑀸𑀤𑀸𑀦𑀯𑀲𑁂𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸. 𑀯𑀺𑀥𑀯𑀸 𑀯𑀼𑀘𑁆𑀘𑀦𑁆𑀢𑀺 𑀫𑀢𑀧𑀢𑀺𑀓𑀸, 𑀧𑀯𑀼𑀢𑁆𑀣𑀧𑀢𑀺𑀓𑀸 𑀯𑀸. 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀢𑀺 𑀫𑀳𑀮𑁆𑀮𑀺𑀓𑀸 𑀅𑀦𑀺𑀯𑀺𑀝𑁆𑀞𑀓𑀼𑀫𑀸𑀭𑀺𑀬𑁄, 𑀧𑀡𑁆𑀟𑀓𑀸𑀢𑀺 𑀦𑀧𑀼𑀁𑀲𑀓𑀸. 𑀢𑁂 𑀳𑀺 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀅𑀯𑀽𑀧𑀲𑀦𑁆𑀢𑀧𑀭𑀺𑀴𑀸𑀳𑀸 𑀮𑁄𑀓𑀸𑀫𑀺𑀲𑀲𑀦𑁆𑀦𑀺𑀲𑁆𑀲𑀺𑀢𑀓𑀣𑀸𑀩𑀳𑀼𑀮𑀸, 𑀢𑀲𑁆𑀫𑀸 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸. 𑀪𑀺𑀓𑁆𑀔𑀼𑀦𑀺𑀬𑁄 𑀦𑀸𑀫 𑀉𑀲𑁆𑀲𑀦𑁆𑀦𑀩𑁆𑀭𑀳𑁆𑀫𑀘𑀭𑀺𑀬𑀸. 𑀢𑀣𑀸 𑀪𑀺𑀓𑁆𑀔𑀽𑀧𑀺. 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀪𑀸𑀯𑀢𑁄 𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁂 𑀓𑀢𑀺𑀧𑀸𑀳𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸. 𑀕𑀺𑀮𑀸𑀦𑀧𑀼𑀘𑁆𑀙𑀦𑀸𑀤𑀺𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁂 𑀲𑀢𑁄𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀧𑀸𑀦𑀸𑀕𑀸𑀭𑀦𑁆𑀢𑀺 𑀲𑀼𑀭𑀸𑀧𑀸𑀦𑀖𑀭𑀁. 𑀢𑀁 𑀲𑁄𑀡𑁆𑀟𑀚𑀦𑁂𑀳𑀺 ¶ 𑀅𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀢𑁂𑀳𑀺 𑀲𑁄𑀡𑁆𑀟𑀢𑀸𑀤𑀺𑀯𑀲𑁂𑀦 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀓𑀭𑀢𑁆𑀢𑀸. 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀻𑀢𑀺𑀆𑀤𑀻𑀲𑀼 𑀭𑀸𑀚𑀸𑀦𑁄 𑀦𑀸𑀫 𑀬𑁂 𑀭𑀚𑁆𑀚𑀫𑀦𑀼𑀲𑀸𑀲𑀦𑁆𑀢𑀺. 𑀭𑀸𑀚𑀫𑀳𑀸𑀫𑀢𑁆𑀢𑀸 𑀭𑀸𑀚𑀺𑀲𑁆𑀲𑀭𑀺𑀬𑀲𑀤𑀺𑀲𑀸𑀬 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑀺𑀢𑁆𑀣𑀺𑀬𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 𑀩𑀸𑀳𑀺𑀭𑀓𑀧𑀭𑀺𑀩𑁆𑀩𑀸𑀚𑀓𑀸. 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀢𑁂𑀲𑀼 𑀤𑀴𑁆𑀳𑀪𑀢𑁆𑀢𑀸 𑀧𑀘𑁆𑀘𑀬𑀤𑀸𑀬𑀓𑀸. 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦𑀸𑀢𑀺 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑁂𑀦 𑀧𑀘𑁆𑀘𑀦𑀻𑀓𑀪𑀽𑀢𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺, 𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀯𑀸 𑀲𑀮𑁆𑀮𑁂𑀔𑀧𑀭𑀺𑀳𑀸𑀦𑀺𑀁 𑀯𑀸 𑀧𑀸𑀧𑀼𑀡𑀸𑀢𑀺.

𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀅𑀕𑁄𑀘𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑁆𑀲𑀤𑁆𑀥𑀸𑀦𑀻𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸𑀦𑀺. 𑀢𑀢𑁄 𑀏𑀯 𑀅𑀧𑁆𑀧𑀲𑀦𑁆𑀦𑀸𑀦𑀺, 𑀓𑀫𑁆𑀫𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀯𑀸 𑀅𑀪𑀸𑀯𑁂𑀦 𑀅𑀲𑁆𑀲𑀤𑁆𑀥𑀸𑀦𑀺. 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀸𑀪𑀸𑀯𑁂𑀦 𑀅𑀧𑁆𑀧𑀲𑀦𑁆𑀦𑀸𑀦𑀺. 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀻𑀢𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 ¶ 𑀅𑀓𑁆𑀓𑁄𑀲𑀓𑀸𑀦𑀺 𑀘𑁂𑀯 𑀪𑀬𑀤𑀲𑁆𑀲𑀦𑁂𑀦 𑀲𑀦𑁆𑀢𑀚𑁆𑀚𑀦𑀓𑀸𑀦𑀺 𑀘. 𑀅𑀢𑁆𑀣𑀁 𑀦 𑀇𑀘𑁆𑀙𑀦𑁆𑀢𑀺 𑀅𑀦𑀢𑁆𑀣𑀫𑁂𑀯 𑀇𑀘𑁆𑀙𑀦𑁆𑀢𑀻𑀢𑀺 𑀅𑀦𑀢𑁆𑀣𑀓𑀸𑀫𑀸𑀦𑀺. 𑀳𑀺𑀢𑀁 𑀦 𑀇𑀘𑁆𑀙𑀦𑁆𑀢𑀺 𑀅𑀳𑀺𑀢𑀫𑁂𑀯 𑀇𑀘𑁆𑀙𑀦𑁆𑀢𑀻𑀢𑀺 𑀅𑀳𑀺𑀢𑀓𑀸𑀫𑀸𑀦𑀺. 𑀨𑀸𑀲𑀼 𑀦 𑀇𑀘𑁆𑀙𑀦𑁆𑀢𑀺 𑀅𑀨𑀸𑀲𑀼𑀁𑀬𑁂𑀯 𑀇𑀘𑁆𑀙𑀦𑁆𑀢𑀻𑀢𑀺 𑀅𑀨𑀸𑀲𑀼𑀓𑀓𑀸𑀫𑀸𑀦𑀺. 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀪𑀬𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀬𑁄𑀕𑀓𑁆𑀔𑁂𑀫𑀫𑁂𑀯 𑀇𑀘𑁆𑀙𑀦𑁆𑀢𑀻𑀢𑀺 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺. 𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀢𑁆𑀣 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑁄. 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀁. 𑀲𑀩𑁆𑀩𑁂𑀲𑀁 𑀳𑀺 𑀲𑀸𑀲𑀦𑀺𑀓𑀸𑀦𑀁 𑀅𑀦𑀢𑁆𑀣𑀓𑀸𑀫𑀢𑀸𑀤𑀻𑀧𑀦𑀧𑀤𑀫𑀺𑀤𑀁 𑀯𑀘𑀦𑀁. 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀻𑀢𑀺 𑀢𑀸𑀤𑀺𑀲𑀸𑀦𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺. 𑀲𑁂𑀯𑀢𑀻𑀢𑀺 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀪𑀚𑀢𑀻𑀢𑀺 𑀉𑀧𑀲𑀗𑁆𑀓𑀫𑀢𑀺. 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀯𑁂𑀲𑀺𑀬𑀸𑀤𑀺𑀓𑁄, 𑀭𑀸𑀚𑀸𑀤𑀺𑀓𑁄, 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀘 𑀢𑀁 𑀢𑀁 𑀲𑁂𑀯𑀦𑁆𑀢𑀲𑁆𑀲 𑀢𑀺𑀧𑁆𑀧𑀓𑀸𑀭𑁄𑀧𑀺 𑀅𑀬𑀼𑀢𑁆𑀢𑁄 𑀕𑁄𑀘𑀭𑁄𑀢𑀺 𑀅𑀕𑁄𑀘𑀭𑁄. 𑀏𑀢𑁆𑀣 𑀳𑀺 𑀯𑁂𑀲𑀺𑀬𑀸𑀤𑀺𑀓𑁄 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀬𑀢𑁄 𑀅𑀕𑁄𑀘𑀭𑁄. 𑀬𑀣𑀸𑀳 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄? 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁨). 𑀭𑀸𑀚𑀸𑀤𑀺𑀓𑁄 𑀲𑀫𑀡𑀥𑀫𑁆𑀫𑀲𑁆𑀲 𑀅𑀦𑀼𑀧𑀦𑀺𑀲𑁆𑀲𑀬𑀢𑁄, 𑀮𑀸𑀪𑀲𑀓𑁆𑀓𑀸𑀭𑀸𑀲𑀦𑀺𑀯𑀺𑀘𑀓𑁆𑀓𑀦𑀺𑀧𑁆𑀧𑁄𑀣𑀦𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀳𑁂𑀢𑀼𑀢𑁄 𑀘. 𑀅𑀲𑁆𑀲𑀤𑁆𑀥𑀓𑀼𑀮𑀸𑀤𑀺𑀓𑁄 𑀲𑀤𑁆𑀥𑀸𑀳𑀸𑀦𑀺𑀘𑀺𑀢𑁆𑀢𑀲𑀦𑁆𑀢𑀸𑀲𑀸𑀯𑀳𑀢𑁄 𑀅𑀕𑁄𑀘𑀭𑁄.

𑀕𑁄𑀘𑀭𑀦𑀺𑀤𑁆𑀤𑁂𑀲𑁂 ‘‘𑀦 𑀯𑁂𑀲𑀺𑀬𑀸𑀕𑁄𑀘𑀭𑁄’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀑𑀧𑀸𑀦𑀪𑀽𑀢𑀸𑀦𑀻𑀢𑀺 𑀉𑀤𑀧𑀸𑀦𑀪𑀽𑀢𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲 𑀘 𑀘𑀢𑀼𑀫𑀳𑀸𑀧𑀣𑁂 𑀔𑀢𑀧𑁄𑀓𑁆𑀔𑀭𑀡𑀻 𑀯𑀺𑀬 𑀬𑀣𑀸𑀲𑀼𑀔𑀁 𑀑𑀕𑀸𑀳𑀦𑀓𑁆𑀔𑀫𑀸𑀦𑀺. 𑀓𑀸𑀲𑀸𑀯𑀧𑀚𑁆𑀚𑁄𑀢𑀸𑀦𑀻𑀢𑀺 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀦𑀺𑀯𑀢𑁆𑀣𑀧𑀸𑀭𑀼𑀢𑀓𑀸𑀲𑀸𑀯𑀸𑀦𑀁𑀬𑁂𑀯 𑀧𑀪𑀸𑀳𑀺 𑀏𑀓𑁄𑀪𑀸𑀲𑀸𑀦𑀺. 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸𑀦𑀻𑀢𑀺 𑀕𑁂𑀳𑀁 𑀧𑀯𑀺𑀲𑀦𑁆𑀢𑀸𑀦𑀁 ¶ , 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀗𑁆𑀔𑀸𑀢𑀸𑀦𑀁 𑀇𑀲𑀻𑀦𑀁 𑀘𑀻𑀯𑀭𑀯𑀸𑀢𑁂𑀦 𑀘𑁂𑀯 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀚𑀦𑀺𑀢𑀲𑀭𑀻𑀭𑀯𑀸𑀢𑁂𑀦 𑀘 𑀧𑀝𑀺𑀯𑀸𑀢𑀸𑀦𑀺 𑀧𑀯𑀸𑀬𑀺𑀢𑀸𑀦𑀺 𑀯𑀺𑀦𑀺𑀤𑁆𑀥𑀼𑀢𑀓𑀺𑀩𑁆𑀩𑀺𑀲𑀸𑀦𑀺 𑀯𑀸.

𑀇𑀤𑀸𑀦𑀺 𑀦𑀺𑀤𑁆𑀤𑁂𑀲𑁂 𑀆𑀕𑀢𑀦𑀬𑁂𑀦𑀸𑀧𑀺 𑀆𑀘𑀸𑀭𑀕𑁄𑀘𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀦𑀺𑀤𑁆𑀤𑁂𑀲𑁂. 𑀇𑀫𑀺𑀦𑀸𑀧𑀺 𑀦𑀬𑁂𑀦𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀯𑀺𑀥𑀺𑀦𑀸𑀧𑀺. 𑀲𑀗𑁆𑀖𑀕𑀢𑁄𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀁 𑀕𑀢𑁄. 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄𑀢𑀺 𑀅𑀓𑀢𑀘𑀺𑀢𑁆𑀢𑀻𑀓𑀸𑀭𑁄, 𑀅𑀓𑀢𑀕𑀸𑀭𑀯𑁄𑀢𑀺 𑀅𑀢𑁆𑀣𑁄. 𑀖𑀝𑁆𑀝𑀬𑀦𑁆𑀢𑁄𑀢𑀺 𑀲𑀭𑀻𑀭𑁂𑀦, 𑀘𑀻𑀯𑀭𑁂𑀦 𑀯𑀸 𑀖𑀁𑀲𑀦𑁆𑀢𑁄. 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄𑀢𑀺 ¶ 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀞𑀺𑀢𑀓𑁄𑀧𑀻𑀢𑀺 𑀉𑀧𑀭𑀺 𑀢𑀺𑀝𑁆𑀞𑀦𑁆𑀢𑁄 𑀯𑀺𑀬 𑀆𑀲𑀦𑁆𑀦𑀢𑀭𑀝𑁆𑀞𑀸𑀦𑁂 𑀞𑀺𑀢𑀓𑁄𑀧𑀺 𑀪𑀡𑀢𑀺. 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀢𑀺 𑀩𑀸𑀳𑀼𑀁 𑀯𑀺𑀓𑁆𑀔𑀺𑀧𑀦𑁆𑀢𑁄. 𑀅𑀦𑀼𑀧𑀸𑀳𑀦𑀸𑀦𑀦𑁆𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀲𑀉𑀧𑀸𑀳𑀦𑁄𑀢𑀺 𑀉𑀧𑀸𑀳𑀦𑀸𑀭𑀼𑀴𑁆𑀳𑁄. 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀸𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀞𑀺𑀢𑀝𑁆𑀞𑀸𑀦𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀆𑀲𑀦𑁆𑀦𑀢𑀭𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸. 𑀓𑀝𑁆𑀞𑀁 𑀧𑀓𑁆𑀔𑀺𑀧𑀢𑀺 𑀅𑀕𑁆𑀕𑀺𑀓𑀼𑀡𑁆𑀟𑁂. 𑀯𑁄𑀓𑁆𑀓𑀫𑁆𑀫𑀸𑀢𑀺 𑀧𑀲𑁆𑀲𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀕𑀽𑀴𑁆𑀳𑀸𑀦𑀺 𑀲𑀪𑀸𑀯𑀢𑁄 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀲𑀸𑀡𑀺𑀧𑀸𑀓𑀸𑀭𑀸𑀤𑀺𑀦𑀸 𑀧𑀝𑀺𑀘𑁆𑀙𑀸𑀤𑀺𑀢𑀸𑀦𑀺. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀅𑀲𑁆𑀲𑀸𑀢𑀺 𑀅𑀦𑀸𑀘𑀸𑀭𑀲𑁆𑀲.

𑀅𑀧𑀺𑀘 𑀪𑀺𑀓𑁆𑀔𑀽𑀢𑀺𑀆𑀤𑀺 𑀲𑀩𑁆𑀩𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀆𑀘𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀦 𑀦𑀺𑀤𑁆𑀤𑁂𑀲𑀧𑀸𑀴𑀺. 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀸𑀤𑀺𑀕𑀼𑀡𑀳𑁂𑀢𑀼𑀓𑁄 𑀕𑀭𑀼𑀪𑀸𑀯𑁄 𑀕𑀭𑀼𑀓𑀭𑀡𑀁 𑀯𑀸 𑀕𑀸𑀭𑀯𑁄, 𑀲𑀳 𑀕𑀸𑀭𑀯𑁂𑀦𑀸𑀢𑀺 𑀲𑀕𑀸𑀭𑀯𑁄. 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼 𑀕𑀸𑀭𑀯𑀲𑀸𑀭𑀚𑁆𑀚𑀸𑀤𑀺𑀯𑀲𑁂𑀦 𑀧𑀝𑀺𑀲𑁆𑀲𑀸𑀬𑀦𑀸 𑀧𑀢𑀺𑀲𑁆𑀲𑀸, 𑀲𑀧𑁆𑀧𑀢𑀺𑀲𑁆𑀲𑀯𑀧𑀝𑀺𑀧𑀢𑁆𑀢𑀺. 𑀲𑀳 𑀧𑀢𑀺𑀲𑁆𑀲𑀸𑀬𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑁄. 𑀲𑀯𑀺𑀲𑁂𑀲𑀁 𑀳𑀺𑀭𑀺𑀫𑀦𑀢𑀸𑀬, 𑀑𑀢𑁆𑀢𑀧𑁆𑀧𑀺𑀪𑀸𑀯𑁂𑀦 𑀘 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄. 𑀲𑁂𑀔𑀺𑀬𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀙𑀲𑀼 𑀧𑀤𑁂𑀲𑀼. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀪𑀺𑀓𑁆𑀓𑀫𑁂𑀦. 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑁆𑀧𑀦𑁆𑀦𑀇𑀭𑀺𑀬𑀸𑀧𑀣𑁄. 𑀢𑁂𑀦 𑀲𑁂𑀲𑀇𑀭𑀺𑀬𑀸𑀧𑀣𑀸𑀦𑀫𑁆𑀧𑀺 𑀧𑀸𑀲𑀸𑀤𑀺𑀓𑀢𑀫𑀸𑀳. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀪𑁄𑀚𑀦𑀲𑀜𑁆𑀜𑀺𑀢𑁂 𑀘𑀢𑀼𑀩𑁆𑀩𑀺𑀥𑁂𑀧𑀺 𑀧𑀘𑁆𑀘𑀬𑁂 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀲𑀩𑁆𑀩𑀲𑁄 𑀧𑀫𑀸𑀡𑀜𑁆𑀜𑀽. 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄𑀢𑀺 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀁 𑀚𑀸𑀕𑀭𑀺𑀬𑀁 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀯𑀲𑁂𑀦 𑀅𑀦𑀼 𑀅𑀦𑀼 𑀬𑀼𑀢𑁆𑀢𑁄 𑀢𑀢𑁆𑀣 𑀬𑀼𑀢𑁆𑀢𑀧𑀬𑀼𑀢𑁆𑀢𑁄. 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀆𑀘𑀸𑀭𑀲𑁆𑀲 𑀲𑀫𑁆𑀪𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑁄𑀢𑀺 𑀦𑀺𑀇𑀘𑁆𑀙𑁄. 𑀲𑀦𑁆𑀢𑀼𑀝𑁆𑀞𑁄𑀢𑀺 𑀬𑀣𑀸𑀮𑀸𑀪𑀸𑀤𑀺𑀯𑀲𑁂𑀦 𑀲𑀦𑁆𑀢𑁄𑀲𑁂𑀦 𑀢𑀼𑀝𑁆𑀞𑁄. 𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺 𑀆𑀤𑀭𑀓𑀸𑀭𑀻. 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄𑀢𑀺 ¶ 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼 𑀕𑀭𑀼𑀓𑀭𑀡𑀩𑀳𑀼𑀮𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄𑀢𑀺 𑀅𑀬𑀁 𑀲𑀕𑀸𑀭𑀯𑀢𑀸𑀤𑀺 𑀅𑀢𑁆𑀣𑀓𑀸𑀫𑁂𑀳𑀺 𑀆𑀘𑀭𑀺𑀢𑀩𑁆𑀩𑀢𑁄 𑀆𑀘𑀸𑀭𑁄.

𑀲𑀻𑀮𑀸𑀤𑀻𑀦𑀁 𑀕𑀼𑀡𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑁄 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄. 𑀲𑀢𑀺𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀲𑁆𑀲 𑀆𑀭𑀓𑁆𑀔𑀪𑀽𑀢𑁄 𑀏𑀯 𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄. 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀲𑁆𑀲 𑀉𑀧𑀦𑀺𑀩𑀦𑁆𑀥𑀦𑀝𑁆𑀞𑀸𑀦𑀪𑀽𑀢𑁄 𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄. 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 ¶ 𑀤𑀲𑀳𑀺 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀬 𑀓𑀣𑀸𑀬 𑀯𑀢𑁆𑀣𑀼𑀪𑀽𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄. 𑀢𑀢𑁄 𑀏𑀯 𑀓𑀮𑁆𑀬𑀸𑀡𑁄 𑀲𑀼𑀦𑁆𑀤𑀭𑁄 𑀫𑀺𑀢𑁆𑀢𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀢𑀲𑁆𑀲 𑀮𑀓𑁆𑀔𑀡𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀲𑁆𑀲𑀼𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀁. 𑀲𑀼𑀡𑀸𑀢𑀻𑀢𑀺 𑀲𑀼𑀢𑀫𑀬𑀁 𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀻𑀢𑀺 𑀢𑀫𑁂𑀯 𑀬𑀣𑀸𑀲𑀼𑀢𑀁 𑀅𑀯𑀺𑀲𑀤𑀢𑀸𑀬 𑀅𑀧𑀭𑀺𑀬𑁄𑀤𑀸𑀢𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀧𑀼𑀘𑁆𑀙𑀦𑀸𑀤𑀺𑀦𑀸 𑀯𑀺𑀲𑁄𑀥𑁂𑀢𑀺 𑀦𑀺𑀚𑁆𑀚𑀝𑀁 𑀦𑀺𑀕𑀼𑀫𑁆𑀩𑀁 𑀓𑀭𑁄𑀢𑀺. 𑀢𑀢𑁆𑀣 𑀘 𑀬𑁂 𑀓𑀗𑁆𑀔𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸, 𑀢𑁂𑀲𑀼 𑀲𑀁𑀲𑀬𑀁 𑀙𑀺𑀦𑁆𑀤𑀦𑁆𑀢𑁄 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼, 𑀭𑀢𑀦𑀢𑁆𑀢𑀬𑁂 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀭𑀡𑁂𑀦 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺. 𑀢𑀢𑁄 𑀏𑀯 𑀘 𑀤𑀼𑀯𑀺𑀥𑀸𑀬𑀧𑀺 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺. 𑀅𑀣 𑀯𑀸 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀧𑀭𑀺𑀬𑁄𑀤𑀧𑁂𑀢𑁆𑀯𑀸 𑀢𑀢𑁆𑀣𑀸𑀕𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑀤𑀺𑀝𑁆𑀞𑀺𑀯𑀗𑁆𑀓𑀯𑀺𑀥𑀫𑀦𑁂𑀦 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺. 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀫𑀢𑁆𑀢𑀤𑀲𑁆𑀲𑀦𑁂𑀦 𑀢𑀻𑀲𑀼𑀧𑀺 𑀅𑀤𑁆𑀥𑀸𑀲𑀼 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀢𑀢𑁄 𑀧𑀭𑀁 𑀘 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀦𑁆𑀢𑁄 𑀅𑀯𑁂𑀘𑁆𑀘𑀧𑀲𑀸𑀤𑁂𑀦 𑀭𑀢𑀦𑀢𑁆𑀢𑀬𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺. 𑀢𑀣𑀸𑀪𑀽𑀢𑁄𑀯 𑀢𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑁂𑀦 𑀲𑀤𑁆𑀥𑀸𑀤𑀻𑀳𑀺 𑀕𑀼𑀡𑁂𑀳𑀺 𑀦 𑀳𑀸𑀬𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀟𑁆𑀠𑀢𑁂𑀯. 𑀢𑁂𑀦𑀸𑀳 ‘‘𑀬𑀲𑁆𑀲 𑀯𑀸’’𑀢𑀺𑀆𑀤𑀺.

𑀅𑀦𑁆𑀢𑀭𑀖𑀭𑀦𑁆𑀢𑀺 𑀅𑀦𑁆𑀢𑀭𑁂 𑀅𑀦𑁆𑀢𑀭𑁂 𑀖𑀭𑀸𑀦𑀺 𑀏𑀢𑁆𑀣, 𑀢𑀁 𑀏𑀢𑀲𑁆𑀲𑀸𑀢𑀺 𑀯𑀸 ‘‘𑀅𑀦𑁆𑀢𑀭𑀖𑀭’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀕𑁄𑀘𑀭𑀕𑀸𑀫𑀁 𑀧𑀯𑀺𑀝𑁆𑀞𑁄. 𑀢𑀢𑁆𑀣 𑀖𑀭𑁂 𑀖𑀭𑁂 𑀪𑀺𑀓𑁆𑀔𑀸𑀧𑀭𑀺𑀬𑁂𑀲𑀦𑀸𑀬 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼. 𑀓𑀺𑀢𑁆𑀢𑀓𑁂𑀦 𑀧𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀻𑀢𑀺 𑀆𑀳 ‘‘𑀬𑀼𑀕𑀫𑀢𑁆𑀢𑀤𑀲𑁆𑀲𑀸𑀯𑀻’’𑀢𑀺. 𑀲𑀼𑀲𑀁𑀯𑀼𑀢𑁄𑀢𑀺 𑀲𑀁𑀬𑀢𑁄. 𑀬𑀣𑀸 𑀧𑀦𑁂𑀢𑁆𑀣 𑀲𑀼𑀲𑀁𑀯𑀼𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀢𑁆𑀣𑀸𑀢𑀺 𑀬𑁂𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀘𑀺𑀢𑁆𑀢𑀁 𑀪𑀸𑀯𑀦𑀸𑀘𑀺𑀢𑁆𑀢𑀁. 𑀉𑀧𑀦𑀺𑀩𑀦𑁆𑀥𑀢𑀻𑀢𑀺 𑀉𑀧𑀦𑁂𑀢𑁆𑀯𑀸 𑀦𑀺𑀩𑀦𑁆𑀥𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀣𑀸 ¶ 𑀣𑀫𑁆𑀪𑁂 𑀦𑀺𑀩𑀦𑁆𑀥𑁂𑀬𑁆𑀬, 𑀯𑀘𑁆𑀙𑀁 𑀤𑀫𑀁 𑀦𑀭𑁄 𑀇𑀥;

𑀩𑀦𑁆𑀥𑁂𑀬𑁆𑀬𑁂𑀯𑀁 𑀲𑀓𑀁 𑀘𑀺𑀢𑁆𑀢𑀁, 𑀲𑀢𑀺𑀬𑀸𑀭𑀫𑁆𑀫𑀡𑁂 𑀤𑀴𑁆𑀳’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁭; 𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁫; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄𑀢𑀺 𑀅𑀢𑁆𑀢𑀦𑁄 𑀧𑀺𑀢𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀓𑁄, 𑀢𑁂𑀦 𑀤𑀺𑀝𑁆𑀞𑁄 𑀤𑀲𑁆𑀲𑀺𑀢𑁄 𑀘 𑀯𑀺𑀲𑀬𑁄.

𑀅𑀡𑀼𑀧𑁆𑀧𑀫𑀸𑀡𑁂𑀲𑀽𑀢𑀺 ¶ 𑀧𑀭𑀫𑀸𑀡𑀼𑀧𑁆𑀧𑀫𑀸𑀡𑁂𑀲𑀼. 𑀅𑀲𑀜𑁆𑀘𑀺𑀘𑁆𑀘𑀆𑀧𑀦𑁆𑀦𑀲𑁂𑀔𑀺𑀬𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀽𑀢𑀺 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑁂𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀽𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘𑀕𑁆𑀕𑀳𑀡𑀁 𑀲𑁂𑀔𑀺𑀬𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀔𑀺𑀬𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀯𑀢𑁆𑀢𑀓𑁆𑀔𑀦𑁆𑀥𑀓𑀸𑀤𑀻𑀲𑀼 (𑀘𑀽𑀴𑀯. 𑁩𑁫𑁬 𑀆𑀤𑀬𑁄) 𑀆𑀕𑀢𑀯𑀢𑁆𑀢𑀸𑀤𑀻𑀦𑀫𑁆𑀧𑀺 𑀕𑀳𑀡𑀁. 𑀢𑁂𑀧𑀺 𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 ‘‘𑀲𑁂𑀔𑀺𑀬𑀸’’𑀢𑀺 𑀇𑀘𑁆𑀙𑀺𑀢𑀸. 𑀢𑀣𑀸 𑀳𑀺 𑀫𑀸𑀢𑀺𑀓𑀸𑀬𑀁 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀺𑀬 𑀲𑁂𑀔𑀺𑀬𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑀸’’𑀢𑀺 𑀅𑀲𑀜𑁆𑀘𑀺𑀘𑁆𑀘𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀦 𑀳𑀺 𑀫𑀸𑀢𑀺𑀓𑀸𑀬𑀁 𑀆𑀕𑀢𑁂𑀲𑀼 𑀧𑀜𑁆𑀘𑀲𑀢𑁆𑀢𑀢𑀺𑀬𑀸 𑀲𑁂𑀔𑀺𑀬𑁂𑀲𑀼 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀢𑁆𑀣𑀺, 𑀅𑀲𑀜𑁆𑀘𑀺𑀘𑁆𑀘𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀅𑀲𑀢𑀺𑀅𑀚𑀸𑀦𑀦𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄. 𑀓𑁂𑀘𑀺 𑀧𑀦𑁂𑀢𑁆𑀣 𑀅𑀲𑀺𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀕𑁆𑀕𑀳𑀡𑁂𑀦 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀬𑁄 𑀕𑀳𑀺𑀢𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀕𑀭𑀼𑀓𑀸𑀧𑀢𑁆𑀢𑀻𑀲𑀼𑀧𑀺 𑀓𑀸𑀲𑀜𑁆𑀘𑀺 𑀅𑀘𑀺𑀢𑁆𑀢𑀓𑀪𑀸𑀯𑀲𑀩𑁆𑀪𑀸𑀯𑀢𑁄, 𑀅𑀥𑀺𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀲𑁆𑀲, 𑀤𑁂𑀲𑀦𑀸𑀯𑀺𑀓𑀫𑁆𑀫𑀲𑁆𑀲𑁂𑀯 𑀯𑀸 𑀲𑀩𑁆𑀩𑀮𑀳𑀼𑀓𑀲𑁆𑀲 𑀯𑀚𑁆𑀚𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀸𑀦𑀺 𑀅𑀧𑁆𑀧𑀫𑀢𑁆𑀢𑀓𑀸𑀦𑀺 𑀑𑀭𑀫𑀢𑁆𑀢𑀓𑀸𑀦𑀺 𑀮𑀳𑀼𑀓𑀸𑀦𑀺 𑀮𑀳𑀼𑀲𑀫𑁆𑀫𑀢𑀸𑀦𑀻’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀺𑀲𑀼𑀤𑁆𑀥𑀢𑁆𑀣𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸𑀦𑀁 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀪𑀬𑀤𑀲𑁆𑀲𑀦𑀲𑀻𑀮𑁄𑀢𑀺 𑀧𑀭𑀫𑀸𑀡𑀼𑀫𑀢𑁆𑀢𑀁 𑀯𑀚𑁆𑀚𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑀦𑀲𑀪𑀸𑀯𑁄, 𑀲𑀩𑁆𑀩𑀮𑀳𑀼𑀓𑀁 𑀯𑀸 𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀁 𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑀦𑀲𑀪𑀸𑀯𑁄. 𑀬𑀁 𑀓𑀺𑀜𑁆𑀘𑀻𑀢𑀺 𑀫𑀽𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮𑀁. 𑀲𑀫𑁆𑀫𑀸 𑀆𑀤𑀸𑀬𑀸𑀢𑀺 𑀲𑀫𑁆𑀫𑀤𑁂𑀯 𑀲𑀓𑁆𑀓𑀘𑁆𑀘𑀁, 𑀲𑀩𑁆𑀩𑀲𑁄 𑀘 𑀆𑀤𑀺𑀬𑀺𑀢𑁆𑀯𑀸. 𑀅𑀬𑀁 𑀧𑀦 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀤𑀸 𑀓𑀺𑀁 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂 𑀧𑀭𑀺𑀬𑀸𑀧𑀦𑁆𑀦𑀸, 𑀉𑀤𑀸𑀳𑀼 𑀅𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀧𑀭𑀺𑀬𑀸𑀧𑀦𑁆𑀦𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀯𑀡𑁆𑀡𑀦𑀸

𑁧𑁫. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 ¶ 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀲𑀫𑁆𑀪𑀸𑀭𑀪𑀽𑀢𑀁, 𑀢𑀲𑁆𑀫𑀺𑀁 𑀲𑀢𑀺𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀪𑀺𑀓𑁆𑀔𑀽’’𑀢𑀺. 𑀲𑀫𑁆𑀧𑀸𑀤𑀺𑀢𑁂 𑀳𑀺 𑀏𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀲𑀼𑀕𑀼𑀢𑁆𑀢𑀁 𑀲𑀼𑀭𑀓𑁆𑀔𑀺𑀢𑀫𑁂𑀯 𑀳𑁄𑀢𑀺, 𑀲𑀼𑀲𑀁𑀯𑀺𑀳𑀺𑀢𑀓𑀡𑁆𑀝𑀓𑀯𑀢𑀺 𑀯𑀺𑀬 𑀲𑀲𑁆𑀲𑀦𑁆𑀢𑀺. 𑀓𑀸𑀭𑀡𑀯𑀲𑁂𑀦𑀸𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑀲𑁆𑀲 𑀯𑀲𑁂𑀦. 𑀅𑀲𑀸𑀥𑀸𑀭𑀡𑀓𑀸𑀭𑀡𑀯𑀲𑁂𑀦 ¶ 𑀳𑀺 𑀨𑀮𑀁 𑀅𑀧𑀤𑀺𑀲𑀻𑀬𑀢𑀺, 𑀬𑀣𑀸 𑀬𑀯𑀗𑁆𑀓𑀼𑀭𑁄 𑀪𑁂𑀭𑀺𑀲𑀤𑁆𑀤𑁄𑀢𑀺. 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀸 𑀏𑀢𑀁 𑀦𑀺𑀲𑁆𑀲𑀺𑀢𑀯𑀘𑀦𑀁, 𑀬𑀣𑀸 𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻𑀢𑀺. 𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀏𑀢𑁆𑀣 𑀬𑀤𑀺 𑀘𑀓𑁆𑀔𑀼 𑀭𑀽𑀧𑀁 𑀧𑀲𑁆𑀲𑁂𑀬𑁆𑀬, 𑀅𑀜𑁆𑀜𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑁄𑀧𑀺 𑀧𑀲𑁆𑀲𑁂𑀬𑁆𑀬𑀼𑀁, 𑀦 𑀘𑁂𑀢𑀁 𑀅𑀢𑁆𑀣𑀺, 𑀓𑀲𑁆𑀫𑀸? 𑀅𑀘𑁂𑀢𑀦𑀢𑁆𑀢𑀸 𑀘𑀓𑁆𑀔𑀼𑀲𑁆𑀲. 𑀢𑁂𑀦𑀸𑀳 ‘‘𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸’’𑀢𑀺. 𑀅𑀣 𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀧𑀲𑁆𑀲𑁂𑀬𑁆𑀬, 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀫𑁆𑀧𑀺 𑀦𑀁 𑀧𑀲𑁆𑀲𑁂𑀬𑁆𑀬 𑀅𑀧𑁆𑀧𑀝𑀺𑀖𑀪𑀸𑀯𑀢𑁄, 𑀇𑀤𑀫𑁆𑀧𑀺 𑀦𑀢𑁆𑀣𑀺 𑀲𑀩𑁆𑀩𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺 𑀅𑀘𑀓𑁆𑀔𑀼𑀓𑀢𑁆𑀢𑀸’’𑀢𑀺. 𑀢𑀢𑁆𑀣 𑀬𑀣𑀸 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀢𑀺, 𑀦 𑀬𑀁 𑀓𑀺𑀜𑁆𑀘𑀺. 𑀢𑀜𑁆𑀘 𑀓𑁂𑀦𑀘𑀺 𑀓𑀼𑀝𑁆𑀝𑀸𑀤𑀺𑀦𑀸 𑀅𑀦𑁆𑀢𑀭𑀺𑀢𑁂 𑀦 𑀉𑀧𑁆𑀧𑀚𑁆𑀚𑀢𑀺, 𑀬𑀢𑁆𑀣 𑀆𑀮𑁄𑀓𑀲𑁆𑀲 𑀯𑀺𑀩𑀦𑁆𑀥𑁄. 𑀬𑀢𑁆𑀣 𑀧𑀦 𑀦 𑀯𑀺𑀩𑀦𑁆𑀥𑁄 𑀨𑀮𑀺𑀓𑀕𑀩𑁆𑀪𑀧𑀝𑀮𑀸𑀤𑀺𑀓𑁂, 𑀢𑀢𑁆𑀣 𑀅𑀦𑁆𑀢𑀭𑀺𑀢𑁂𑀧𑀺 𑀉𑀧𑁆𑀧𑀚𑁆𑀚𑀢𑁂𑀯. 𑀏𑀯𑀁 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀘𑀓𑁆𑀔𑀼 𑀧𑀲𑁆𑀲𑀢𑀺, 𑀦 𑀬𑀁 𑀓𑀺𑀜𑁆𑀘𑀻𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀘𑀓𑁆𑀔𑀼𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺.

𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑁂𑀢𑀺 𑀤𑁆𑀯𑀸𑀭𑀲𑁆𑀲 𑀆𑀭𑀫𑁆𑀫𑀡𑁂𑀦 𑀲𑀗𑁆𑀖𑀝𑁆𑀝𑁂 𑀲𑀢𑀺, 𑀘𑀓𑁆𑀔𑀼𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀢𑀦𑁆𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀦 𑀯𑀺𑀜𑁆𑀜𑀸𑀡𑁂𑀦, 𑀬𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀢𑀻𑀢𑀺 𑀑𑀮𑁄𑀓𑁂𑀢𑀺. 𑀘𑀓𑁆𑀔𑀼𑀧𑀲𑀸𑀤𑀲𑀦𑁆𑀦𑀺𑀲𑁆𑀲𑀬𑁂 𑀳𑀺 𑀯𑀺𑀜𑁆𑀜𑀸𑀡𑁂 𑀆𑀮𑁄𑀓𑀸𑀦𑀼𑀕𑁆𑀕𑀳𑀺𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀦𑁆𑀦𑀺𑀲𑁆𑀲𑀬𑀕𑀼𑀡𑁂𑀦 𑀑𑀪𑀸𑀲𑁂𑀦𑁆𑀢𑁂 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 ‘‘𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀑𑀪𑀸𑀲𑀦𑀜𑁆𑀘𑁂𑀢𑁆𑀣 𑀆𑀭𑀫𑁆𑀫𑀡𑀲𑁆𑀲 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀦𑀁, 𑀬𑀁 ‘‘𑀧𑀘𑁆𑀘𑀓𑁆𑀔𑀢𑁄 𑀕𑀳𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀲𑀼𑀦𑀸 𑀮𑀓𑁆𑀔𑀲𑁆𑀲 𑀯𑁂𑀥𑁂 𑀲𑀺𑀚𑁆𑀛𑀦𑁆𑀢𑁂 𑀢𑀲𑁆𑀲 𑀲𑀫𑁆𑀪𑀸𑀭𑀪𑀽𑀢𑁂𑀦 𑀥𑀦𑀼𑀦𑀸 𑀯𑀺𑀚𑁆𑀛𑀢𑀻𑀢𑀺 𑀯𑀘𑀦𑀁 𑀯𑀺𑀬 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀤𑀲𑁆𑀲𑀦𑁂 𑀲𑀺𑀚𑁆𑀛𑀦𑁆𑀢𑁂 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀈𑀤𑀺𑀲𑀻 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫𑁂𑀲𑀸 𑀳𑁄𑀢𑀺. 𑀲𑀲𑀫𑁆𑀪𑀸𑀭𑀸 𑀓𑀣𑀸 𑀲𑀲𑀫𑁆𑀪𑀸𑀭𑀓𑀣𑀸, 𑀤𑀲𑁆𑀲𑀦𑀲𑁆𑀲 𑀓𑀸𑀭𑀡𑀲𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀲𑀫𑁆𑀪𑀸𑀭𑀲𑁆𑀲 𑀯𑀸 𑀤𑀲𑁆𑀲𑀦𑀲𑁆𑀲 𑀓𑀣𑀸 𑀲𑀲𑀫𑁆𑀪𑀸𑀭𑀓𑀣𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑁂𑀯𑀮𑁂𑀦 𑀘𑀓𑁆𑀔𑀼𑀦𑀸, 𑀓𑁂𑀯𑀮𑁂𑀦 𑀯𑀸 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀤𑀲𑁆𑀲𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸.

𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀇𑀢𑁆𑀣𑀺𑀲𑀦𑁆𑀢𑀸𑀦𑀦𑀺𑀲𑁆𑀲𑀺𑀢𑀭𑀽𑀧𑀫𑀼𑀔𑁂𑀦 𑀕𑀬𑁆𑀳𑀫𑀸𑀦𑀁 𑀲𑀡𑁆𑀞𑀸𑀦𑀁 𑀣𑀦𑀫𑀁𑀲𑀸𑀯𑀺𑀲𑀤𑀢𑀸 ¶ 𑀦𑀺𑀫𑁆𑀫𑀲𑁆𑀲𑀼𑀫𑀼𑀔𑀢𑀸 𑀓𑁂𑀲𑀩𑀦𑁆𑀥𑀦𑀯𑀢𑁆𑀣𑀕𑁆𑀕𑀳𑀡𑀁 𑀅𑀯𑀺𑀲𑀤𑀝𑁆𑀞𑀸𑀦𑀕𑀫𑀦𑀸𑀤𑀺 𑀘 𑀲𑀩𑁆𑀩𑀁 ‘‘𑀇𑀢𑁆𑀣𑀻’’𑀢𑀺 𑀲𑀜𑁆𑀚𑀸𑀦𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸𑀢𑀺 𑀏𑀢𑁆𑀣 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀇𑀝𑁆𑀞𑀸𑀓𑀸𑀭𑁄 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀝𑀺𑀖𑀦𑀺𑀫𑀺𑀢𑁆𑀢𑀸𑀤𑀻𑀦𑀁 ¶ 𑀲𑀗𑁆𑀕𑀳𑁄. 𑀲𑁄 𑀧𑀦 𑀤𑁄𑀲𑀼𑀧𑁆𑀧𑀢𑁆𑀢𑀺𑀆𑀤𑀺𑀳𑁂𑀢𑀼𑀪𑀽𑀢𑁄 𑀅𑀦𑀺𑀝𑁆𑀞𑀸𑀤𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀸𑀴𑀺𑀬𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀯 𑀲𑀭𑀽𑀧𑀢𑁄 𑀆𑀕𑀢𑀸, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀧𑀦 𑀲𑀗𑁆𑀕𑀳𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀲𑀫𑀧𑁂𑀓𑁆𑀔𑀦𑁂𑀦 𑀉𑀧𑁆𑀧𑀚𑁆𑀚𑀦𑀓𑀫𑁄𑀳𑀲𑁆𑀲𑀸𑀧𑀺 𑀅𑀲𑀁𑀯𑀭𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀫𑀼𑀝𑁆𑀞𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸’’𑀢𑀺. 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬 𑀯𑀢𑁆𑀣𑀼𑀪𑀽𑀢𑀁 𑀆𑀭𑀫𑁆𑀫𑀡𑀁, 𑀢𑀜𑁆𑀘𑀲𑁆𑀲 𑀅𑀲𑀫𑀧𑁂𑀓𑁆𑀔𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀓𑀸𑀭𑀡𑀁 ‘‘𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀲𑀡𑁆𑀞𑀸𑀢𑀻𑀢𑀺 ‘‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀉𑀤𑀸. 𑁧𑁦) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀡𑁆𑀡𑀸𑀬𑀢𑀦𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦, 𑀯𑀻𑀣𑀺𑀘𑀺𑀢𑁆𑀢𑁂𑀳𑀺 𑀘 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀦 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀲𑀼𑀪𑀸𑀤𑀺𑀆𑀓𑀸𑀭𑀁 𑀧𑀭𑀺𑀓𑀧𑁆𑀧𑁂𑀢𑀺. 𑀧𑀸𑀓𑀝𑀪𑀸𑀯𑀓𑀭𑀡𑀢𑁄𑀢𑀺 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑀓𑀭𑀡𑀢𑁄 𑀯𑀺𑀪𑀽𑀢𑀪𑀸𑀯𑀓𑀭𑀡𑀢𑁄. 𑀯𑀺𑀲𑀪𑀸𑀕𑀯𑀢𑁆𑀣𑀼𑀦𑁄 𑀳𑀺 𑀳𑀢𑁆𑀣𑀸𑀤𑀺𑀅𑀯𑀬𑀯𑁂𑀲𑀼 𑀲𑀼𑀪𑀸𑀤𑀺𑀢𑁄 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀅𑀧𑀭𑀸𑀧𑀭𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀺𑀮𑁂𑀲𑀸 𑀧𑀭𑀺𑀩𑁆𑀬𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀢𑁂 𑀢𑁂𑀲𑀁 𑀅𑀦𑀼𑀩𑁆𑀬𑀜𑁆𑀚𑀦𑀸 𑀦𑀸𑀫. 𑀢𑁂 𑀧𑀦 𑀬𑀲𑁆𑀫𑀸 𑀢𑀣𑀸 𑀢𑀣𑀸 𑀲𑀦𑁆𑀦𑀺𑀯𑀺𑀝𑁆𑀞𑀸𑀦𑀁 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀁 𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑁄. 𑀦 𑀳𑀺 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀭𑀫𑀢𑁆𑀣𑀢𑁄 𑀳𑀢𑁆𑀣𑀸𑀤𑀺 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀳𑀢𑁆𑀣𑀧𑀸𑀤…𑀧𑁂… 𑀆𑀓𑀸𑀭𑀁 𑀦 𑀕𑀡𑁆𑀳𑀸𑀢𑀻’’𑀢𑀺. 𑀓𑀺𑀁 𑀧𑀦 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀬𑀁 𑀢𑀢𑁆𑀣 𑀪𑀽𑀢𑀁, 𑀢𑀤𑁂𑀯 𑀕𑀡𑁆𑀳𑀸𑀢𑀻’’𑀢𑀺. 𑀬𑀁 𑀢𑀲𑁆𑀫𑀺𑀁 𑀲𑀭𑀻𑀭𑁂 𑀯𑀺𑀚𑁆𑀚𑀫𑀸𑀦𑀁 𑀓𑁂𑀲𑀮𑁄𑀫𑀸𑀤𑀺 𑀪𑀽𑀢𑀼𑀧𑀸𑀤𑀸𑀬𑀫𑀢𑁆𑀢𑀁 𑀯𑀸, 𑀢𑀤𑁂𑀯 𑀬𑀸𑀣𑀸𑀯𑀢𑁄 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀅𑀲𑀼𑀪𑀸𑀓𑀸𑀭𑀕𑀳𑀡𑀲𑁆𑀲 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀻’’𑀢𑀺𑀆𑀤𑀺𑀦𑀸 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼𑀁 𑀆𑀳𑀭𑀺.

𑀢𑀢𑁆𑀣 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸𑀢𑀺 𑀲𑀼𑀝𑁆𑀞𑀼 𑀫𑀡𑁆𑀟𑀺𑀢𑀸 𑀧𑀲𑀸𑀥𑀺𑀢𑀸 𑀘. 𑀆𑀪𑀭𑀡𑀸𑀤𑀻𑀳𑀺 𑀆𑀳𑀸𑀭𑀺𑀫𑁂𑀳𑀺 𑀫𑀡𑁆𑀟𑀦𑀁. 𑀲𑀭𑀻𑀭𑀲𑁆𑀲 𑀉𑀘𑁆𑀙𑀸𑀤𑀦𑀸𑀤𑀺𑀯𑀲𑁂𑀦 𑀧𑀝𑀺𑀲𑀗𑁆𑀔𑀭𑀡𑀁 𑀧𑀲𑀸𑀥𑀦𑀦𑁆𑀢𑀺 𑀯𑀤𑀦𑁆𑀢𑀺, 𑀆𑀪𑀭𑀡𑁂𑀳𑀺, 𑀧𑀦 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀘 𑀅𑀮𑀗𑁆𑀓𑀭𑀡𑀁 𑀧𑀲𑀸𑀥𑀦𑀁. 𑀊𑀦𑀝𑁆𑀞𑀸𑀦𑀧𑀽𑀭𑀡𑀁 𑀫𑀡𑁆𑀟𑀦𑀁. 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸𑀢𑀺 𑀭𑀸𑀕𑀯𑀲𑁂𑀦 𑀯𑀺𑀧𑀭𑀻𑀢𑀘𑀺𑀢𑁆𑀢𑀸. 𑀑𑀮𑁄𑀓𑁂𑀦𑁆𑀢𑁄𑀢𑀺 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦𑁂𑀯 𑀕𑀘𑁆𑀙𑀦𑁆𑀢𑁄 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀫𑀦𑀲𑀺𑀓𑀸𑀭𑀲𑁆𑀲 𑀳𑀲𑀺𑀢𑀲𑀤𑁆𑀤𑀸𑀦𑀼𑀲𑀸𑀭𑁂𑀦 ‘‘𑀓𑀺𑀫𑁂𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄. 𑀅𑀲𑀼𑀪𑀲𑀜𑁆𑀜𑀦𑁆𑀢𑀺 𑀅𑀝𑁆𑀞𑀺𑀓𑀲𑀜𑁆𑀜𑀁. 𑀅𑀝𑁆𑀞𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀳𑀺 𑀣𑁂𑀭𑁄 𑀢𑀤𑀸 𑀧𑀭𑀺𑀳𑀭𑀢𑀺. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀣𑁂𑀭𑁄 ¶ 𑀓𑀺𑀭 𑀢𑀲𑁆𑀲𑀸 𑀳𑀲𑀦𑁆𑀢𑀺𑀬𑀸 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀦𑁂𑀦𑁂𑀯 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀲𑀼𑀪𑀸𑀯𑀺𑀢𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁, 𑀲𑀸𑀢𑀺𑀲𑀬𑀜𑁆𑀘 𑀉𑀧𑀘𑀸𑀭𑀚𑁆𑀛𑀸𑀦𑀁 𑀮𑀪𑀺𑀢𑁆𑀯𑀸 𑀬𑀣𑀸𑀞𑀺𑀢𑁄𑀯 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 ¶ 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀧𑀭𑀫𑁆𑀧𑀭𑀸𑀬 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀧𑀼𑀩𑁆𑀩𑀲𑀜𑁆𑀜𑀁 𑀅𑀦𑀼𑀲𑁆𑀲𑀭𑀻𑀢𑀺 𑀧𑀼𑀩𑁆𑀩𑀓𑀁 𑀬𑀣𑀸𑀭𑀤𑁆𑀥𑀁 𑀓𑀸𑀮𑁂𑀦 𑀓𑀸𑀮𑀁 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀁 𑀅𑀝𑁆𑀞𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀲𑁆𑀲𑀭𑀺 𑀲𑀫𑀦𑁆𑀦𑀸𑀳𑀭𑀺. 𑀅𑀦𑀼𑀫𑀕𑁆𑀕𑀦𑁆𑀢𑀺 𑀅𑀦𑀼𑀧𑀣𑀁 𑀢𑀲𑁆𑀲𑀸 𑀧𑀤𑀸𑀦𑀼𑀧𑀤𑀁. 𑀣𑁂𑀭𑀲𑁆𑀲 𑀓𑀺𑀭 𑀪𑀸𑀯𑀦𑀸𑀬 𑀧𑀕𑀼𑀡𑀪𑀸𑀯𑀢𑁄 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀦𑁂𑀦𑁂𑀯 𑀢𑀲𑁆𑀲𑀸 𑀲𑀓𑀮𑀲𑀭𑀻𑀭𑀁 𑀅𑀝𑁆𑀞𑀺𑀓𑀲𑀗𑁆𑀖𑀸𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀲𑀺. 𑀦 𑀢𑀁 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀲𑀜𑁆𑀚𑀸𑀦𑀺. 𑀢𑁂𑀦𑀸𑀳 ‘‘𑀦𑀸𑀪𑀺𑀚𑀸𑀦𑀸𑀫𑀺…𑀧𑁂… 𑀫𑀳𑀸𑀧𑀣𑁂’’𑀢𑀺.

‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀽’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀲𑀁𑀯𑀭𑀲𑁆𑀲𑀸𑀢𑀺. 𑀬𑀤𑀺𑀤𑀁 𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀅𑀪𑀺𑀚𑁆𑀛𑀸𑀤𑀺𑀅𑀦𑁆𑀯𑀸𑀲𑁆𑀲𑀯𑀦𑀁 𑀤𑀲𑁆𑀲𑀺𑀢𑀁, 𑀢𑀁 𑀅𑀲𑀁𑀯𑀼𑀢𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀳𑁂𑀢𑀼 𑀧𑀯𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀲𑁆𑀲 𑀳𑀺 𑀅𑀪𑀺𑀚𑁆𑀛𑀸𑀤𑀺𑀅𑀦𑁆𑀯𑀸𑀲𑁆𑀲𑀯𑀦𑀲𑁆𑀲 𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑀥𑀸𑀦𑀓𑀸𑀭𑀡𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀅𑀲𑀁𑀯𑀼𑀢𑀢𑁆𑀢𑁂 𑀲𑀢𑀺 𑀢𑁂 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀻𑀢𑀺 𑀅𑀲𑀁𑀯𑀭𑀺𑀬𑀫𑀸𑀦𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀳𑁂𑀢𑀼𑀓𑁄 𑀲𑁄 𑀅𑀲𑀁𑀯𑀭𑁄 𑀢𑀣𑀸 𑀯𑀼𑀢𑁆𑀢𑁄𑀢𑀺. 𑀬𑀢𑁆𑀯𑀸𑀥𑀺𑀓𑀭𑀡𑀦𑁆𑀢𑀺 𑀳𑀺 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑀲𑁆𑀲 𑀘 𑀓𑀸𑀭𑀡𑀸𑀢𑀺? 𑀅𑀲𑀁𑀯𑀼𑀢𑀲𑁆𑀲, 𑀓𑀺𑀜𑁆𑀘 𑀅𑀲𑀁𑀯𑀼𑀢𑀁? 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀅𑀪𑀺𑀚𑁆𑀛𑀸𑀤𑀬𑁄 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺, 𑀢𑀲𑁆𑀲 𑀲𑀁𑀯𑀭𑀸𑀬𑀸𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸.

𑀚𑀯𑀦𑀓𑁆𑀔𑀡𑁂 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸𑀢𑀺𑀆𑀤𑀺 𑀧𑀼𑀦 𑀅𑀯𑀘𑀦𑀢𑁆𑀣𑀁 𑀇𑀥𑁂𑀯 𑀲𑀩𑁆𑀩𑀁 𑀯𑀼𑀢𑁆𑀢𑀦𑁆𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀲𑁆𑀲𑀻𑀮𑁆𑀬𑀸𑀲𑀁𑀯𑀭𑁄 𑀫𑀦𑁄𑀤𑁆𑀯𑀸𑀭𑀯𑀲𑁂𑀦, 𑀲𑁂𑀲𑀸𑀲𑀁𑀯𑀭𑁄 𑀙𑀤𑁆𑀯𑀸𑀭𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀫𑀼𑀝𑁆𑀞𑀲𑀘𑁆𑀘𑀸𑀤𑀻𑀦𑀁 𑀳𑀺 𑀲𑀢𑀺𑀧𑀝𑀺𑀧𑀓𑁆𑀔𑀸𑀓𑀼𑀲𑀮𑀥𑀫𑁆𑀫𑀸𑀤𑀺𑀪𑀸𑀯𑀢𑁄 𑀲𑀺𑀬𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀪𑀽𑀢𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺, 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸. 𑀤𑀼𑀲𑁆𑀲𑀻𑀮𑁆𑀬𑀸𑀤𑀬𑁄 𑀘𑁂𑀢𑁆𑀣 𑀧𑀜𑁆𑀘 𑀅𑀲𑀁𑀯𑀭𑀸 𑀲𑀻𑀮𑀲𑀁𑀯𑀭𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀲𑀁𑀯𑀭𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺.

𑀬𑀣𑀸 ¶ 𑀓𑀺𑀦𑁆𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑀁𑀯𑀭𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑀺𑀤𑀲𑁆𑀲𑀦𑀁 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺𑀆𑀤𑀺𑀦𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀖𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸 𑀯𑀺𑀬 𑀚𑀯𑀦𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀤𑁆𑀯𑀸𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸𑀢𑀺 𑀏𑀯𑀁 𑀅𑀜𑁆𑀜𑀸𑀲𑀁𑀯𑀭𑁂 𑀅𑀜𑁆𑀜𑀸𑀲𑀁𑀯𑀼𑀢𑀢𑀸 𑀲𑀸𑀫𑀜𑁆𑀜𑀫𑁂𑀯 𑀦𑀺𑀤𑀲𑁆𑀲𑁂𑀢𑀺, 𑀦 𑀧𑀼𑀩𑁆𑀩𑀸𑀧𑀭𑀲𑀸𑀫𑀜𑁆𑀜𑀁, 𑀅𑀦𑁆𑀢𑁄𑀩𑀳𑀺𑀲𑀸𑀫𑀜𑁆𑀜𑀁 𑀯𑀸. 𑀲𑀢𑀺 𑀯𑀸 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀓𑁂 𑀧𑀼𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀚𑀯𑀦𑀁 𑀩𑀸𑀳𑀺𑀭𑀁 𑀯𑀺𑀬 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀸𑀦𑀁 𑀯𑀼𑀢𑁆𑀢𑀁 ¶ , 𑀇𑀢𑀭𑀜𑁆𑀘 𑀅𑀦𑁆𑀢𑁄𑀦𑀕𑀭𑁂 𑀖𑀭𑀸𑀤𑀺𑀲𑀫𑀸𑀦𑀁. 𑀧𑀘𑁆𑀘𑀬𑀪𑀸𑀯𑁂𑀦 𑀳𑀺 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀁 𑀚𑀯𑀦𑀓𑀸𑀮𑁂 𑀅𑀲𑀦𑁆𑀢𑀫𑁆𑀧𑀺 𑀪𑀯𑀗𑁆𑀕𑀸𑀤𑀺 𑀘𑀓𑁆𑀔𑀸𑀤𑀺 𑀯𑀺𑀬 𑀨𑀮𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀦𑁆𑀢𑀁𑀬𑁂𑀯 𑀦𑀸𑀫 𑀳𑁄𑀢𑀺. 𑀦 𑀳𑀺 𑀥𑀭𑀫𑀸𑀦𑀁𑀬𑁂𑀯 ‘‘𑀲𑀦𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀩𑀸𑀳𑀺𑀭𑀁 𑀯𑀺𑀬 𑀓𑀢𑁆𑀯𑀸’’𑀢𑀺 𑀘 𑀧𑀭𑀫𑀢𑁆𑀣𑀢𑁄 𑀚𑀯𑀦𑀲𑁆𑀲 𑀩𑀸𑀳𑀺𑀭𑀪𑀸𑀯𑁂, 𑀇𑀢𑀭𑀲𑁆𑀲 𑀘 𑀅𑀩𑁆𑀪𑀦𑁆𑀢𑀭𑀪𑀸𑀯𑁂 𑀅𑀲𑀢𑀺𑀧𑀺 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁧.𑁪𑁯) 𑀯𑀘𑀦𑀢𑁄 𑀆𑀕𑀦𑁆𑀢𑀼𑀓𑀪𑀽𑀢𑀲𑁆𑀲 𑀓𑀤𑀸𑀘𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀚𑀯𑀦𑀲𑁆𑀲 𑀩𑀸𑀳𑀺𑀭𑀪𑀸𑀯𑁄, 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀲𑁆𑀲 𑀇𑀢𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑀪𑀸𑀯𑁄 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀚𑀯𑀦𑁂 𑀯𑀸 𑀅𑀲𑀁𑀯𑀭𑁂 𑀉𑀧𑁆𑀧𑀦𑁆𑀦𑁂 𑀢𑀢𑁄 𑀧𑀭𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀅𑀲𑀁𑀯𑀭𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀲𑀁𑀯𑀭𑀲𑁆𑀲 𑀳𑀺 𑀉𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀢𑀲𑁆𑀲 𑀳𑁂𑀢𑀼𑀪𑀸𑀯𑁄 𑀧𑀜𑁆𑀜𑀸𑀬𑀢𑀻𑀢𑀺. 𑀦𑀕𑀭𑀤𑁆𑀯𑀸𑀭𑀲𑀤𑀺𑀲𑁂𑀦 𑀚𑀯𑀦𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀘𑁄𑀭𑀸𑀦𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀲𑀼 𑀫𑀼𑀲𑀦𑀁 𑀓𑀼𑀲𑀮𑀪𑀡𑁆𑀟𑀯𑀺𑀦𑀸𑀲𑀦𑀁 𑀓𑀣𑀺𑀢𑀁. 𑀬𑀲𑁆𑀫𑀺𑀁 𑀳𑀺 𑀤𑁆𑀯𑀸𑀭𑁂 𑀅𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁆𑀣 𑀤𑁆𑀯𑀸𑀭𑀸𑀤𑀻𑀦𑀁 𑀲𑀁𑀯𑀭𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑁄𑀬𑁂𑀯 𑀧𑀯𑀢𑁆𑀢𑀢𑀻𑀢𑀺. 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀚𑀯𑀦𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣 𑀘 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀦𑀺𑀬𑀫𑀺𑀢𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑁂 𑀢𑀤𑀦𑀼𑀭𑀽𑀧𑀫𑁂𑀯 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁𑀬𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑁂 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑁂 𑀢𑀤𑁂𑀯𑀸𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀯𑀯𑀢𑁆𑀣𑀧𑁂𑀦𑁆𑀢𑀁 𑀧𑀲𑀸𑀤𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀦𑀁 𑀚𑀯𑀢𑀺. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀚𑀯𑀦𑀁 𑀲𑀦𑁆𑀥𑀸𑀬 ‘‘𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀺𑀁 𑀧𑀦 𑀚𑀯𑀦𑁂. 𑀲𑀻𑀮𑀸𑀤𑀻𑀲𑀽𑀢𑀺 𑀲𑀻𑀮𑀲𑀁𑀯𑀭𑀲𑀢𑀺𑀲𑀁𑀯𑀭𑀜𑀸𑀡𑀲𑀁𑀯𑀭𑀔𑀦𑁆𑀢𑀺𑀲𑀁𑀯𑀭𑀯𑀻𑀭𑀺𑀬𑀲𑀁𑀯𑀭𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼. 𑀬𑀣𑀸 𑀳𑀺 𑀧𑀕𑁂𑀯 𑀲𑀢𑀺𑀆𑀭𑀓𑁆𑀔𑀁 𑀅𑀦𑀼𑀧𑀝𑁆𑀞𑀧𑁂𑀦𑁆𑀢𑀲𑁆𑀲 ¶ 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺, 𑀏𑀯𑀁 𑀧𑀕𑁂𑀯 𑀲𑀢𑀺𑀆𑀭𑀓𑁆𑀔𑀁 𑀉𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀲𑀻𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀤𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀳𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀢𑁆𑀣𑀺𑀲𑀤𑁆𑀤𑁄’’𑀢𑀺 𑀯𑀸 ‘‘𑀧𑀼𑀭𑀺𑀲𑀲𑀤𑁆𑀤𑁄’’𑀢𑀺 𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀲𑀼𑀢𑀫𑀢𑁆𑀢𑁂 𑀏𑀯 𑀲𑀡𑁆𑀞𑀸𑀢𑀺. 𑀬𑁄 𑀘 𑀕𑀻𑀢𑀲𑀤𑁆𑀤𑀸𑀤𑀺𑀓𑀲𑁆𑀲 𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 ‘‘𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑁄 𑀫𑀦𑁆𑀤𑀢𑀸𑀭𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀺𑀢𑁄 𑀙𑀚𑁆𑀚𑀸𑀤𑀺𑀪𑁂𑀤𑀪𑀺𑀦𑁆𑀦𑁄 𑀆𑀓𑀸𑀭𑁄, 𑀢𑀫𑁆𑀧𑀺 𑀦 𑀕𑀡𑁆𑀳𑀸𑀢𑀻𑀢𑀺. 𑀏𑀯𑀁 𑀕𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀲𑀸𑀯𑀚𑁆𑀚𑀦𑀪𑀯𑀗𑁆𑀕𑀁 𑀫𑀦𑁄𑀤𑁆𑀯𑀸𑀭𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀥𑀫𑁆𑀫𑀸𑀭𑀫𑁆𑀫𑀡𑁂 ¶ 𑀆𑀧𑀸𑀣𑀕𑀢𑁂 𑀢𑀁 𑀚𑀯𑀦𑀫𑀦𑀲𑀸𑀯 𑀯𑀺𑀜𑁆𑀜𑀸𑀬 𑀯𑀺𑀚𑀸𑀦𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀮𑁂𑀲𑁄 𑀅𑀦𑀼𑀩𑀦𑁆𑀥𑁄 𑀏𑀢𑀲𑁆𑀲𑀸𑀢𑀺 𑀓𑀺𑀮𑁂𑀲𑀸𑀦𑀼𑀩𑀦𑁆𑀥𑁄, 𑀲𑁄 𑀏𑀯 𑀦𑀺𑀫𑀺𑀢𑁆𑀢𑀸𑀤𑀺𑀕𑀸𑀳𑁄, 𑀢𑀢𑁄 𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀁 𑀓𑀺𑀮𑁂𑀲𑀸𑀦𑀼𑀩𑀦𑁆𑀥𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀁. 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀼𑀩𑁆𑀬𑀜𑁆𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀯𑀡𑁆𑀡𑀦𑀸

𑁧𑁬. 𑀯𑀼𑀢𑁆𑀢𑁂𑀢𑀺 𑀇𑀥𑁂𑀯 𑀉𑀤𑁆𑀤𑁂𑀲𑀯𑀲𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂. 𑀢𑀣𑀸 𑀳𑀺 ‘‘𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦’’𑀦𑁆𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸 𑀢𑀸𑀦𑀺 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀦𑀺 𑀢𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀸𑀦𑀺 𑀢𑀸𑀦𑀺 𑀏𑀯𑀁 𑀧𑀜𑁆𑀜𑀢𑁆𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀚𑀻𑀯𑀳𑁂𑀢𑀽𑀢𑀺 𑀚𑀻𑀯𑀺𑀓𑀦𑀺𑀫𑀺𑀢𑁆𑀢𑀁, ‘‘𑀏𑀯𑀸𑀳𑀁 𑀧𑀘𑁆𑀘𑀬𑁂𑀳𑀺 𑀅𑀓𑀺𑀮𑀫𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦. 𑀆𑀚𑀻𑀯𑀓𑀸𑀭𑀡𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀸𑀧𑀺𑀘𑁆𑀙𑁄𑀢𑀺 𑀧𑀸𑀧𑀺𑀓𑀸𑀬 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀇𑀘𑁆𑀙𑀸𑀧𑀓𑀢𑁄𑀢𑀺 𑀇𑀘𑁆𑀙𑀸𑀬 𑀅𑀧𑀓𑀢𑁄 𑀉𑀧𑀤𑁆𑀤𑀼𑀢𑁄, 𑀅𑀪𑀺𑀪𑀽𑀢𑁄 𑀯𑀸. 𑀅𑀲𑀦𑁆𑀢𑀦𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀪𑀽𑀢𑀦𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀁. 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀳𑀺 𑀢𑀲𑁆𑀲 𑀢𑀁 𑀅𑀲𑀦𑁆𑀢𑀦𑁆𑀢𑀺 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀓𑀸𑀭𑀡𑀯𑀘𑀦𑀁. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀉𑀓𑁆𑀓𑀝𑁆𑀞𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁, 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀯𑀸 𑀉𑀢𑁆𑀢𑀭𑀺 𑀉𑀓𑁆𑀓𑀝𑁆𑀞𑀁. 𑀉𑀮𑁆𑀮𑀧𑀢𑀻𑀢𑀺 𑀉𑀕𑁆𑀕𑀢𑀸𑀬𑀼𑀓𑁄 𑀮𑀧𑀢𑀺. 𑀲𑀻𑀮𑀁 𑀳𑀺 𑀪𑀺𑀓𑁆𑀔𑀼𑀦𑁄 𑀆𑀬𑀼, 𑀢𑀁 𑀢𑀲𑁆𑀲 𑀢𑀣𑀸𑀮𑀧𑀦𑀲𑀫𑀓𑀸𑀮𑀫𑁂𑀯 𑀯𑀺𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀸 𑀆𑀧𑀢𑁆𑀢𑀺 𑀅𑀲𑁆𑀲, 𑀧𑀸𑀭𑀸𑀚𑀺𑀓𑀲𑀜𑁆𑀜𑀺𑀢𑀲𑁆𑀲 𑀯𑀸 𑀯𑀻𑀢𑀺𑀓𑁆𑀓𑀫𑀲𑁆𑀲 𑀆𑀧𑀚𑁆𑀚𑀦𑀁 𑀉𑀮𑁆𑀮𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀜𑁆𑀘𑀭𑀡𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁, 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀁 𑀆𑀭𑁄𑀘𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑁂𑀲𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀲𑁆𑀲 𑀯𑀲𑁂𑀦𑀸’’𑀢𑀺 𑀲𑀫𑁆𑀩𑀦𑁆𑀥𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯.

𑀓𑀼𑀳𑀦𑀸𑀢𑀺𑀆𑀤𑀻𑀲𑀽𑀢𑀺 ¶ 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑀧𑀸𑀴𑀺𑀬𑀸𑀯 𑀧𑀤𑀼𑀤𑁆𑀥𑀸𑀭𑁄. 𑀅𑀬𑀁 𑀧𑀸𑀴𑀻𑀢𑀺 𑀅𑀬𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁬𑁧) 𑀆𑀕𑀢𑀸 𑀦𑀺𑀤𑁆𑀤𑁂𑀲𑀧𑀸𑀴𑀺.

𑁧𑁭. 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 𑀮𑀸𑀪𑀸. 𑀢𑁂 𑀏𑀯 𑀲𑀓𑁆𑀓𑀘𑁆𑀘𑀁 𑀆𑀤𑀭𑀯𑀲𑁂𑀦 𑀤𑀺𑀬𑁆𑀬𑀫𑀸𑀦𑀸 𑀲𑀓𑁆𑀓𑀸𑀭𑀸. 𑀧𑀢𑁆𑀣𑀝𑀬𑀲𑀢𑀸 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀢𑀁 𑀮𑀸𑀪𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘. 𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀧𑀢𑁆𑀣𑀬𑀦𑁆𑀢𑀲𑁆𑀲𑀸’’𑀢𑀺. 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀓𑀸𑀫𑀲𑁆𑀲𑀸𑀢𑀺 𑀅𑀲𑀦𑁆𑀢𑁂 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑁂 𑀲𑀤𑁆𑀥𑀸𑀤𑀺𑀕𑀼𑀡𑁂 𑀲𑀫𑁆𑀪𑀸𑀯𑁂𑀢𑀼𑀓𑀸𑀫𑀲𑁆𑀲. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸𑀮𑀓𑁆𑀔𑀡𑀸, 𑀧𑀝𑀺𑀕𑁆𑀕𑀳𑀡𑁂 ¶ 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸𑀮𑀓𑁆𑀔𑀡𑀸 𑀳𑀺 𑀧𑀸𑀧𑀺𑀘𑁆𑀙𑀢𑀸. 𑀇𑀘𑁆𑀙𑀸𑀬 𑀅𑀧𑀓𑀢𑀲𑁆𑀲𑀸𑀢𑀺 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀲𑀫𑁆𑀫𑀸𑀆𑀚𑀻𑀯𑀢𑁄 𑀅𑀧𑁂𑀢𑁄 𑀓𑀢𑁄𑀢𑀺 𑀅𑀧𑀓𑀢𑁄. 𑀢𑀣𑀸𑀪𑀽𑀢𑁄 𑀘 𑀆𑀚𑀻𑀯𑀽𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀉𑀧𑀤𑁆𑀤𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺.

𑀓𑀼𑀳𑀦𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀲𑁆𑀲 𑀯𑀢𑁆𑀣𑀽𑀢𑀺 𑀓𑀼𑀳𑀦𑀯𑀢𑁆𑀣𑀼. 𑀢𑀺𑀯𑀺𑀥𑀫𑁆𑀧𑁂𑀢𑀁 𑀢𑀢𑁆𑀣 𑀆𑀕𑀢𑀁 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀬 𑀇𑀫𑀸𑀬 𑀧𑀸𑀴𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀢𑁆𑀣𑀺𑀓𑀲𑁆𑀲𑁂𑀯𑀸𑀢𑀺 𑀢𑁂𑀳𑀺 𑀘𑀻𑀯𑀭𑀸𑀤𑀻𑀳𑀺 𑀅𑀢𑁆𑀣𑀺𑀓𑀲𑁆𑀲𑁂𑀯. 𑀧𑀝𑀺𑀓𑁆𑀔𑀺𑀧𑀦𑁂𑀦𑀸𑀢𑀺 𑀘𑀻𑀯𑀭𑀸𑀤𑀻𑀦𑀁 𑀧𑀝𑀺𑀓𑁆𑀔𑀺𑀧𑀦𑀳𑁂𑀢𑀼. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀧𑀝𑀺𑀕𑁆𑀕𑀳𑀡𑁂𑀦 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀪𑀺𑀬𑁆𑀬𑁄𑀓𑀫𑁆𑀬𑀢𑀦𑁆𑀢𑀺 𑀩𑀳𑀼𑀓𑀸𑀫𑀢𑀁. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑀲𑁆𑀫𑀸 ‘‘𑀥𑀸𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑀡𑀁, 𑀏𑀢𑀁 𑀲𑀫𑀡𑀲𑁆𑀲 𑀲𑀸𑀭𑀼𑀧𑁆𑀧𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀧𑀡𑀺𑀓𑀸𑀦𑀻𑀢𑀺 𑀆𑀧𑀡𑀢𑁄 𑀙𑀟𑁆𑀟𑀺𑀢𑀸𑀦𑀺. 𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑁆𑀢𑀭𑀳𑀺𑀢𑀸𑀦𑀺 𑀘𑁄𑀴𑀔𑀡𑁆𑀟𑀸𑀦𑀺. 𑀉𑀘𑁆𑀘𑀺𑀦𑀺𑀢𑁆𑀯𑀸𑀢𑀺 𑀉𑀜𑁆𑀙𑀦𑁂𑀦 𑀘𑀺𑀦𑀺𑀢𑁆𑀯𑀸 𑀲𑀗𑁆𑀕𑀳𑁂𑀢𑁆𑀯𑀸. 𑀉𑀜𑁆𑀙𑀸𑀘𑀭𑀺𑀬𑀸𑀬𑀸𑀢𑀺 𑀉𑀜𑁆𑀙𑀸𑀘𑀭𑀺𑀬𑀸𑀬 𑀮𑀤𑁆𑀥𑁂𑀦. 𑀕𑀺𑀮𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀪𑁂𑀲𑀚𑁆𑀚𑀲𑀗𑁆𑀔𑀸𑀢𑀸 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀧𑀼𑀭𑀸𑀡𑀲𑁆𑀲, 𑀅𑀧𑀼𑀭𑀸𑀡𑀲𑁆𑀲 𑀘 𑀲𑀩𑁆𑀩𑀲𑁆𑀲 𑀕𑁄𑀫𑀼𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀽𑀢𑀺𑀫𑀼𑀢𑁆𑀢𑁂𑀦𑀸𑀢𑀺 𑀧𑀽𑀢𑀺𑀪𑀸𑀯𑁂𑀦 𑀫𑀼𑀢𑁆𑀢𑁂𑀦 𑀧𑀭𑁂𑀳𑀺 𑀙𑀟𑁆𑀟𑀺𑀢𑁂𑀦, 𑀧𑀽𑀢𑀺𑀪𑀽𑀢𑁂𑀦 𑀯𑀸 𑀕𑁄𑀫𑀼𑀢𑁆𑀢𑁂𑀦. 𑀥𑀼𑀢𑀯𑀸𑀤𑁄𑀢𑀺 𑀧𑀭𑁂𑀲𑀫𑁆𑀧𑀺 𑀥𑀼𑀢𑀕𑀼𑀡𑀯𑀸𑀤𑀻. 𑀲𑀫𑁆𑀫𑀼𑀔𑀻𑀪𑀸𑀯𑀸𑀢𑀺 𑀲𑀫𑁆𑀫𑀼𑀔𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀮𑀩𑁆𑀪𑀫𑀸𑀦𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀲𑀸𑀫𑀦𑁆𑀢𑁂 𑀓𑀢𑁆𑀯𑀸 𑀚𑀧𑁆𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀁. 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑀸𑀦𑀼𑀪𑀸𑀯𑁄, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀫𑀺𑀢𑁆𑀢𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀲𑁂𑀲𑁂𑀢𑀺 ‘‘𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄’’𑀢𑀺 ¶ . 𑀤𑀺𑀝𑁆𑀞𑀫𑀢𑁆𑀢𑁄 𑀳𑀺 𑀫𑀺𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑁄. 𑀤𑀴𑁆𑀳𑀪𑀢𑁆𑀢𑀺𑀓𑁄 𑀲𑀫𑁆𑀪𑀢𑁆𑀢𑁄. 𑀲𑀳𑀸𑀬𑁄𑀢𑀺 𑀲𑀳 𑀆𑀬𑀦𑀓𑁄, 𑀲𑀔𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀧𑀤𑀺𑀦𑁄 𑀳𑀺 ‘‘𑀲𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀳𑀸𑀭𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀆𑀯𑀸𑀲𑁄. 𑀅𑀟𑁆𑀠𑀬𑁄𑀕𑁄 𑀤𑀻𑀖𑀧𑀸𑀲𑀸𑀤𑁄, 𑀕𑀭𑀼𑀴𑀲𑀡𑁆𑀞𑀸𑀦𑀧𑀸𑀲𑀸𑀤𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀲𑀸𑀤𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀓𑀽𑀝𑀸𑀕𑀸𑀭𑀁 𑀤𑁆𑀯𑀻𑀳𑀺 𑀓𑀡𑁆𑀡𑀺𑀓𑀸𑀳𑀺 𑀓𑀢𑁆𑀢𑀩𑁆𑀩𑀧𑀸𑀲𑀸𑀤𑁄. 𑀅𑀝𑁆𑀝𑁄 𑀧𑀝𑀺𑀭𑀸𑀚𑀽𑀦𑀫𑁆𑀧𑀺 𑀧𑀝𑀺𑀩𑀸𑀳𑀦𑀬𑁄𑀕𑁆𑀬𑁄 𑀘𑀢𑀼𑀧𑀜𑁆𑀘𑀪𑀽𑀫𑀓𑁄 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑁄. 𑀉𑀤𑁆𑀤𑀡𑁆𑀟𑁄 𑀅𑀕𑀩𑁆𑀪𑀺𑀓𑀸 𑀏𑀓𑀤𑁆𑀯𑀸𑀭𑀸 𑀤𑀻𑀖𑀲𑀸𑀮𑀸𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀯𑀺𑀳𑀸𑀭𑁄 𑀦𑀸𑀫 𑀤𑀻𑀖𑀫𑀼𑀔𑀧𑀸𑀲𑀸𑀤𑁄. 𑀅𑀟𑁆𑀠𑀬𑁄𑀕𑁄 𑀏𑀓𑀧𑀲𑁆𑀲𑁂𑀦 𑀙𑀤𑀦𑀓𑀲𑁂𑀦𑀸𑀲𑀦𑀁. 𑀢𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀪𑀺𑀢𑁆𑀢𑀺 𑀉𑀘𑁆𑀘𑀢𑀭𑀸 𑀳𑁄𑀢𑀺, 𑀇𑀢𑀭𑀧𑀲𑁆𑀲𑁂 𑀦𑀻𑀘𑀸, 𑀢𑁂𑀦 𑀢𑀁 𑀏𑀓𑀧𑀲𑁆𑀲𑀙𑀤𑀦𑀓𑀁 ¶ 𑀳𑁄𑀢𑀺. 𑀧𑀸𑀲𑀸𑀤𑁄 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀁 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑀁. 𑀕𑀼𑀳𑀸 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀮𑁂𑀡𑀁 𑀤𑁆𑀯𑀸𑀭𑀩𑀤𑁆𑀥𑀁. 𑀓𑀽𑀝𑀸𑀕𑀸𑀭𑀁 𑀬𑁄 𑀓𑁄𑀘𑀺 𑀓𑀡𑁆𑀡𑀺𑀓𑀸𑀩𑀤𑁆𑀥𑀧𑀸𑀲𑀸𑀤𑁄. 𑀅𑀝𑁆𑀝𑁄 𑀩𑀳𑀮𑀪𑀺𑀢𑁆𑀢𑀺𑀕𑁂𑀳𑀁. 𑀬𑀲𑁆𑀲 𑀕𑁄𑀧𑀸𑀦𑀲𑀺𑀬𑁄 𑀅𑀕𑁆𑀕𑀳𑁂𑀢𑁆𑀯𑀸 𑀇𑀝𑁆𑀞𑀓𑀸𑀳𑀺 𑀏𑀯 𑀙𑀤𑀦𑀁 𑀳𑁄𑀢𑀺. 𑀅𑀝𑁆𑀝𑀸𑀮𑀓𑀸𑀓𑀸𑀭𑁂𑀦 𑀓𑀭𑀻𑀬𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀸𑀴𑁄 𑀯𑀝𑁆𑀝𑀸𑀓𑀸𑀭𑁂𑀦 𑀓𑀢𑀲𑁂𑀦𑀸𑀲𑀦𑀁. 𑀉𑀤𑁆𑀤𑀡𑁆𑀟𑁄 𑀏𑀓𑁄 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑁄. 𑀬𑁄 ‘‘𑀪𑀡𑁆𑀟𑀲𑀸𑀮𑀸, 𑀉𑀤𑁄𑀲𑀺𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀦𑁆𑀦𑀺𑀧𑀢𑀦𑀝𑁆𑀞𑀸𑀦𑀁.

𑀓𑀼𑀘𑁆𑀙𑀺𑀢𑀭𑀚𑀪𑀽𑀢𑀸𑀬 𑀧𑀸𑀧𑀺𑀘𑁆𑀙𑀢𑀸𑀬 𑀦𑀺𑀭𑀢𑁆𑀣𑀓𑀁 𑀓𑀸𑀬𑀯𑀘𑀻𑀯𑀺𑀧𑁆𑀨𑀦𑁆𑀤𑀦𑀺𑀕𑁆𑀕𑀡𑁆𑀳𑀦𑀁 𑀓𑁄𑀭𑀚𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑁄𑀭𑀚𑀺𑀓𑁄, 𑀓𑁄𑀳𑀜𑁆𑀜𑁂𑀦 𑀲𑀁𑀬𑀢𑀓𑀸𑀬𑁄, 𑀅𑀢𑀺𑀯𑀺𑀬, 𑀅𑀪𑀺𑀡𑁆𑀳𑀁 𑀯𑀸 𑀓𑁄𑀭𑀚𑀺𑀓𑁄 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄. 𑀅𑀢𑀺𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀓𑁂𑀘𑀺. 𑀅𑀢𑀺𑀯𑀺𑀬 𑀓𑀼𑀳𑁄 𑀓𑀼𑀳𑀓𑀓𑀼𑀳𑀓𑁄, 𑀲𑀸𑀢𑀺𑀲𑀬𑀯𑀺𑀫𑁆𑀳𑀸𑀧𑀓𑁄𑀢𑀺 𑀅𑀢𑁆𑀣𑁄. 𑀅𑀢𑀺𑀯𑀺𑀬 𑀮𑀧𑁄 𑀮𑀧𑀦𑀓𑁄 𑀮𑀧𑀓𑀮𑀧𑀓𑁄. 𑀫𑀼𑀔𑀲𑀫𑁆𑀪𑀸𑀯𑀺𑀓𑁄𑀢𑀺 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀯𑀘𑀦𑁂𑀳𑀺 𑀅𑀢𑁆𑀢𑀦𑁄 𑀫𑀼𑀔𑀫𑀢𑁆𑀢𑁂𑀦 𑀅𑀜𑁆𑀜𑁂𑀳𑀺 𑀲𑀫𑁆𑀪𑀸𑀯𑀺𑀓𑁄. 𑀲𑁄 𑀏𑀯𑀭𑀽𑀧𑁄 𑀏𑀯𑀭𑀽𑀧𑀢𑀸𑀬 𑀏𑀯 𑀅𑀢𑁆𑀢𑀸𑀦𑀁 𑀧𑀭𑀁 𑀯𑀺𑀬 𑀓𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄’’𑀢𑀺𑀆𑀤𑀻𑀦𑀺 𑀓𑀣𑁂𑀢𑀺. 𑀕𑀫𑁆𑀪𑀻𑀭𑀦𑁆𑀢𑀺𑀆𑀤𑀺 𑀢𑀲𑁆𑀲𑀸 𑀓𑀣𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀝𑀺𑀩𑀤𑁆𑀥𑀢𑀸𑀬 𑀯𑀼𑀢𑁆𑀢𑀁.

𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀓𑀢𑁂𑀦𑀸𑀢𑀺 ‘‘𑀓𑀣𑀁 𑀦𑀼 𑀔𑁄 𑀫𑀁 𑀚𑀦𑁄 ‘𑀅𑀭𑀺𑀬𑁄’𑀢𑀺 𑀯𑀸 ‘𑀯𑀺𑀲𑁂𑀲𑀮𑀸𑀪𑀻’𑀢𑀺 𑀯𑀸 𑀲𑀫𑁆𑀪𑀸𑀯𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀓𑀢𑁂𑀦. 𑀕𑀫𑀦𑀁 𑀲𑀡𑁆𑀞𑀧𑁂𑀢𑀻𑀢𑀺 𑀯𑀺𑀲𑁂𑀲𑀮𑀸𑀪𑀻𑀦𑀁 𑀕𑀫𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀕𑀫𑀦𑀁 𑀲𑀓𑁆𑀓𑀘𑁆𑀘𑀁 𑀞𑀧𑁂𑀢𑀺 ¶ , 𑀲𑀢𑁄 𑀲𑀫𑁆𑀧𑀚𑀸𑀦𑁄𑀯 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀧𑀡𑀺𑀥𑀸𑀬𑀸𑀢𑀺 ‘‘𑀅𑀭𑀳𑀸𑀢𑀺 𑀫𑀁 𑀚𑀸𑀦𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑁆𑀯𑀸, 𑀧𑀢𑁆𑀣𑁂𑀢𑁆𑀯𑀸 𑀯𑀸. 𑀲𑀫𑀸𑀳𑀺𑀢𑁄 𑀯𑀺𑀬𑀸𑀢𑀺 𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁄 𑀯𑀺𑀬. 𑀆𑀧𑀸𑀣𑀓𑀚𑁆𑀛𑀸𑀬𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀣𑀝𑁆𑀞𑀸𑀦𑁂 𑀲𑀫𑀸𑀥𑀺𑀲𑀫𑀸𑀧𑀦𑁆𑀦𑁄 𑀯𑀺𑀬 𑀦𑀺𑀲𑀻𑀤𑀦𑁆𑀢𑁄 𑀆𑀧𑀸𑀣𑀓𑁂 𑀚𑀦𑀲𑁆𑀲 𑀧𑀸𑀓𑀝𑀝𑁆𑀞𑀸𑀦𑁂 𑀛𑀸𑀬𑀻. 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀦𑁆𑀢𑀺 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀲𑀗𑁆𑀔𑀸𑀢𑀁.

𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀬𑁄𑀦𑀺𑀲𑁄 𑀉𑀧𑁆𑀧𑀸𑀤𑀺𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀧𑀝𑀺𑀲𑁂𑀯𑀦𑀦𑁆𑀢𑀺 𑀏𑀯𑀁 𑀓𑀣𑀺𑀢𑁂𑀦, 𑀢𑁂𑀦 𑀯𑀸 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑁂𑀦 𑀲𑀗𑁆𑀔𑀸𑀢𑀩𑁆𑀩𑁂𑀦 𑀓𑀣𑀺𑀢𑀩𑁆𑀩𑁂𑀦. 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀪𑀡𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑀁. 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀅𑀝𑁆𑀞𑀧𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀳𑀦𑀁 𑀓𑀼𑀳𑁄, 𑀢𑀲𑁆𑀲 𑀅𑀬𑀦𑀸 𑀧𑀯𑀢𑁆𑀢𑀺 𑀓𑀼𑀳𑀸𑀬𑀦𑀸, 𑀓𑀼𑀳𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀬𑀦𑀸 𑀕𑀢𑀺 𑀓𑀺𑀭𑀺𑀬𑀸 𑀓𑀼𑀳𑀸𑀬𑀦𑀸. 𑀓𑀼𑀳𑁂𑀢𑀺, 𑀓𑀼𑀳𑁂𑀦 𑀯𑀸 𑀇𑀢𑁄𑀢𑀺 𑀓𑀼𑀳𑀺𑀢𑁄, 𑀓𑀼𑀳𑀓𑁄.

𑀧𑀼𑀝𑁆𑀞𑀲𑁆𑀲𑀸𑀢𑀺 ¶ ‘‘𑀓𑁄 𑀢𑀺𑀲𑁆𑀲𑁄, 𑀓𑁄 𑀭𑀸𑀚𑀧𑀽𑀚𑀺𑀢𑁄’’𑀢𑀺 𑀧𑀼𑀝𑁆𑀞𑀲𑁆𑀲. 𑀉𑀤𑁆𑀥𑀁 𑀓𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀧𑀕𑁆𑀕𑀳𑁂𑀢𑁆𑀯𑀸.

𑀉𑀦𑁆𑀦𑀳𑀦𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀩𑀦𑁆𑀥𑀦𑀸 𑀧𑀮𑀺𑀯𑁂𑀞𑀦𑀸. 𑀤𑁆𑀯𑁂 𑀓𑀺𑀭 𑀪𑀺𑀓𑁆𑀔𑀽 𑀏𑀓𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀧𑀓𑁆𑀓𑁄𑀲𑀺𑀁𑀲𑀼. 𑀢𑀸𑀬 𑀆𑀕𑀢𑀸𑀬 𑀢𑀢𑁆𑀭𑁂𑀓𑁄 𑀏𑀓𑀁 𑀧𑀼𑀘𑁆𑀙𑀺 ‘‘𑀅𑀬𑀁, 𑀪𑀦𑁆𑀢𑁂, 𑀓𑀲𑁆𑀲 𑀓𑀼𑀫𑀸𑀭𑀺𑀓𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀬𑀺𑀓𑀸𑀬 𑀢𑁂𑀮𑀓𑀦𑁆𑀤𑀭𑀺𑀓𑀸𑀬 𑀥𑀻𑀢𑀸, 𑀇𑀫𑀺𑀲𑁆𑀲𑀸 𑀫𑀸𑀢𑀸 𑀫𑀬𑀺 𑀕𑁂𑀳𑀁 𑀕𑀢𑁂 𑀲𑀧𑁆𑀧𑀺𑀁 𑀤𑀤𑀫𑀸𑀦𑀸 𑀖𑀝𑁂𑀦𑁂𑀯 𑀤𑁂𑀢𑀺, 𑀅𑀬𑀫𑁆𑀧𑀺 𑀫𑀸𑀢𑀸 𑀯𑀺𑀬 𑀖𑀝𑁂𑀦 𑀤𑁂𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁮𑁬𑁨) 𑀉𑀓𑁆𑀓𑀸𑀘𑁂𑀲𑀺. 𑀇𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑁂𑀮𑀓𑀦𑁆𑀤𑀭𑀺𑀓𑀯𑀢𑁆𑀣𑀼 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀥𑀫𑁆𑀫𑀸𑀦𑀼𑀭𑀽𑀧𑀸 𑀯𑀸𑀢𑀺 𑀫𑀢𑁆𑀢𑀸𑀯𑀘𑀦𑀸𑀦𑀼𑀭𑀽𑀧𑀁 𑀯𑀸. 𑀫𑀢𑁆𑀢𑀸𑀯𑀘𑀦𑀁 𑀳𑀺 ‘‘𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄, 𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁧𑁩; 𑀲𑀼. 𑀦𑀺. 𑁪𑁫𑁨). 𑀢𑁂𑀦 𑀩𑀳𑀼𑀁 𑀯𑀺𑀧𑁆𑀧𑀮𑀧𑀦𑀫𑀸𑀳, 𑀲𑀘𑁆𑀘𑀢𑁄 𑀯𑀸 𑀅𑀜𑁆𑀜𑀸 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 ‘‘𑀥𑀫𑁆𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀓𑀫𑁆𑀫𑁄 𑀧𑀼𑀕𑁆𑀕𑀮𑁄 𑀫𑀼𑀕𑁆𑀕𑀲𑀽𑀧𑁆𑀬𑁄. 𑀢𑁂𑀦𑀸𑀳 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀫𑀼𑀕𑁆𑀕𑀲𑀽𑀧𑁆𑀬𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀢𑀤𑁂𑀯 𑀧𑀸𑀭𑀺𑀪𑀝𑁆𑀬𑀢𑀸.

𑀦𑀺𑀫𑀺𑀢𑁆𑀢𑁂𑀦 𑀘𑀭𑀦𑁆𑀢𑁄, 𑀚𑀻𑀯𑀦𑁆𑀢𑁄 𑀯𑀸 𑀦𑀺𑀫𑀺𑀢𑁆𑀢𑀓𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀫𑀺𑀢𑁆𑀢𑀺𑀓𑀢𑀸. 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀧𑀓𑀸𑀲𑀦𑀁 𑀑𑀪𑀸𑀲𑁄. 𑀓𑁄 𑀧𑀦 𑀲𑁄𑀢𑀺 ¶ ? ‘‘𑀅𑀚𑁆𑀚 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸 𑀚𑀸𑀢𑀸’’𑀢𑀺𑀆𑀤𑀺𑀓𑀸 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀇𑀘𑁆𑀙𑀺𑀢𑀯𑀢𑁆𑀣𑀼𑀲𑁆𑀲 𑀲𑀫𑀻𑀧𑁂 𑀓𑀣𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀸.

𑀅𑀓𑁆𑀓𑁄𑀲𑀦𑀪𑀬𑁂𑀦𑀸𑀧𑀺 𑀤𑀤𑁂𑀬𑁆𑀬𑀸𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑀁. 𑀢𑀣𑀸 𑀯𑀫𑁆𑀪𑀦𑀸𑀤𑀬𑁄. 𑀉𑀧𑁂𑀓𑁆𑀔𑀦𑀸 𑀉𑀧𑀸𑀲𑀓𑀸𑀦𑀁 𑀤𑀸𑀬𑀓𑀸𑀤𑀺𑀪𑀸𑀯𑀢𑁄 𑀩𑀳𑀺 𑀙𑀟𑁆𑀟𑀦𑀸. 𑀔𑀺𑀧𑀦𑀸𑀢𑀺 𑀔𑁂𑀧𑀯𑀘𑀦𑀁. 𑀢𑀁 𑀧𑀦 𑀅𑀯𑀳𑀲𑀺𑀢𑁆𑀯𑀸 𑀯𑀘𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑁆𑀧𑀡𑁆𑀟𑀦𑀸’’𑀢𑀺. 𑀧𑀸𑀧𑀦𑀸𑀢𑀺 𑀅𑀤𑀸𑀬𑀓𑀢𑁆𑀢𑀲𑁆𑀲, 𑀅𑀯𑀡𑁆𑀡𑀲𑁆𑀲 𑀯𑀸 𑀧𑀢𑀺𑀝𑁆𑀞𑀸𑀧𑀦𑀁. 𑀧𑀭𑁂𑀲𑀁 𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀦𑀲𑀻𑀮𑁄 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸. 𑀅𑀩𑁆𑀪𑀗𑁆𑀕𑀦𑁆𑀢𑀺 𑀅𑀩𑁆𑀪𑀜𑁆𑀚𑀦𑀁. 𑀦𑀺𑀧𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀕𑁆𑀕𑀦𑀸 𑀯𑀺𑀬𑀸𑀢𑀺 𑀅𑀦𑀺𑀧𑁆𑀧𑀺𑀲𑀺𑀢𑁂 𑀅𑀮𑀩𑁆𑀪𑀫𑀸𑀦𑀲𑁆𑀲 𑀕𑀦𑁆𑀥𑀲𑁆𑀲 𑀦𑀺𑀧𑀺𑀲𑀦𑁂 𑀮𑀸𑀪𑁄 𑀯𑀺𑀬 𑀧𑀭𑀕𑀼𑀡𑁂 𑀅𑀦𑀺𑀧𑁆𑀧𑀺𑀲𑀺𑀢𑁂 𑀅𑀮𑀩𑁆𑀪𑀫𑀸𑀦𑀸𑀦𑀁 𑀧𑀘𑁆𑀘𑀬𑀸𑀦𑀁 𑀦𑀺𑀧𑀺𑀲𑀦𑁂𑀦 𑀮𑀸𑀪𑁄 𑀤𑀝𑁆𑀞𑀩𑁆𑀩𑁄𑀢𑀺.

𑀦𑀺𑀓𑀢𑁆𑀢𑀼𑀁 ¶ 𑀅𑀧𑁆𑀧𑁂𑀦 𑀮𑀸𑀪𑁂𑀦 𑀩𑀳𑀼𑀓𑀁 𑀯𑀜𑁆𑀘𑁂𑀢𑁆𑀯𑀸 𑀕𑀳𑁂𑀢𑀼𑀁 𑀇𑀘𑁆𑀙𑀦𑀁 𑀦𑀺𑀚𑀺𑀕𑀻𑀲𑀦𑀁, 𑀢𑀲𑁆𑀲 𑀪𑀸𑀯𑁄 𑀦𑀺𑀚𑀺𑀕𑀻𑀲𑀦𑀢𑀸. 𑀢𑀲𑁆𑀲𑁂𑀯 𑀇𑀘𑁆𑀙𑀦𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀢𑀁𑀲𑀳𑀚𑀸𑀢𑀁 𑀯𑀸 𑀕𑀯𑁂𑀲𑀦𑀓𑀫𑁆𑀫𑀁.

𑀅𑀗𑁆𑀕𑀦𑁆𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀅𑀗𑁆𑀕𑀸𑀦𑀺 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀁 𑀯𑀺𑀚𑁆𑀚𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑀢𑁆𑀣𑀁. 𑀉𑀧𑁆𑀧𑀸𑀢𑀦𑁆𑀢𑀺 𑀉𑀓𑁆𑀓𑀸𑀧𑀸𑀢𑀤𑀺𑀲𑀸𑀟𑀸𑀳-𑀪𑀽𑀫𑀺𑀘𑀸𑀮𑀸𑀤𑀺𑀉𑀧𑁆𑀧𑀸𑀢𑀧𑀝𑀺𑀩𑀤𑁆𑀥𑀯𑀺𑀚𑁆𑀚𑀁. 𑀲𑀼𑀧𑀺𑀦𑀦𑁆𑀢𑀺 𑀲𑀼𑀧𑀺𑀦𑀲𑀢𑁆𑀣𑀁. 𑀮𑀓𑁆𑀔𑀡𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀮𑀓𑁆𑀔𑀡𑀚𑀸𑀦𑀦𑀲𑀢𑁆𑀣𑀁. 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀢𑁆𑀣𑀸𑀤𑀻𑀦𑀁 𑀅𑀲𑀼𑀓𑀪𑀸𑀕𑁂 𑀫𑀽𑀲𑀺𑀓𑀘𑁆𑀙𑁂𑀤𑁂 𑀲𑀢𑀺 𑀇𑀤𑀁 𑀦𑀸𑀫 𑀨𑀮𑀁 𑀳𑁄𑀢𑀻𑀢𑀺 𑀚𑀸𑀦𑀦𑀓𑀲𑀢𑁆𑀣𑀁. 𑀧𑀮𑀸𑀲𑀕𑁆𑀕𑀺𑀆𑀤𑀻𑀲𑀼 𑀇𑀫𑀺𑀦𑀸 𑀦𑀸𑀫 𑀅𑀕𑁆𑀕𑀺𑀦𑀸 𑀳𑀼𑀢𑁂 𑀇𑀤𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀕𑁆𑀕𑀺𑀯𑀲𑁂𑀦 𑀳𑁄𑀫𑀯𑀺𑀥𑀸𑀦𑀁 𑀅𑀕𑁆𑀕𑀺𑀳𑁄𑀫𑀁. 𑀇𑀫𑀺𑀦𑀸 𑀦𑀬𑁂𑀦 𑀤𑀩𑁆𑀩𑀺𑀳𑁄𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁂𑀦 𑀣𑀼𑀲𑀳𑁄𑀫𑀸𑀤𑀻𑀦𑀁, 𑀅𑀜𑁆𑀜𑁂𑀲𑀜𑁆𑀘 𑀲𑀼𑀢𑁆𑀢𑁂 𑀆𑀕𑀢𑀸𑀦𑀁 𑀫𑀺𑀘𑁆𑀙𑀸𑀚𑀻𑀯𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀻𑀭𑀺𑀬𑀲𑀸𑀥𑀦𑀢𑁆𑀢𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 ‘‘𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀯𑀸𑀬𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺 𑀅𑀦𑀯𑀚𑁆𑀚𑀪𑀸𑀯𑁄, 𑀬𑁂𑀦 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀮𑀸𑀪𑁄 𑀳𑁄𑀢𑀺. 𑀦 𑀳𑀺 𑀅𑀮𑀲𑁄 𑀜𑀸𑀬𑁂𑀦 𑀧𑀘𑁆𑀘𑀬𑁂 𑀧𑀭𑀺𑀬𑁂𑀲𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺.

𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀯𑀡𑁆𑀡𑀦𑀸

𑁧𑁮. 𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁧) 𑀯𑀺𑀬 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄. 𑀬𑁄𑀦𑀺𑀲𑁄𑀢𑀺 𑀘𑁂𑀢𑁆𑀣 𑀉𑀧𑀸𑀬𑀢𑁆𑀣𑁄 𑀬𑁄𑀦𑀺𑀲𑁄-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀸𑀬𑁂𑀦 𑀧𑀣𑁂𑀦𑀸’’𑀢𑀺. ‘‘𑀧𑀝𑀺𑀲𑀗𑁆𑀔𑀸𑀬 𑀜𑀢𑁆𑀯𑀸’’𑀢𑀺 ¶ 𑀯𑀢𑁆𑀯𑀸 𑀢𑀬𑀺𑀤𑀁 𑀧𑀝𑀺𑀲𑀗𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀓𑀁 𑀢𑀁 𑀢𑀁 𑀧𑀬𑁄𑀚𑀦𑀁 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀺𑀢𑁆𑀯𑀸, 𑀜𑀸𑀡𑁂𑀦 𑀧𑀲𑁆𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀏𑀯𑀁 𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀢𑀤𑁂𑀯 𑀧𑀬𑁄𑀚𑀦𑀁 𑀧𑀢𑀺 𑀧𑀢𑀺 𑀲𑀗𑁆𑀔𑀸𑀬, 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀲𑀗𑁆𑀔𑀸-𑀲𑀤𑁆𑀤𑁄𑀢𑀺. 𑀏𑀢𑁆𑀣 𑀘 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀺 𑀓𑀸𑀫𑀁 𑀧𑀘𑁆𑀘𑀬𑀧𑀭𑀺𑀪𑁄𑀕𑀓𑀸𑀮𑁂𑀦 𑀯𑀼𑀘𑁆𑀘𑀢𑀺, 𑀥𑀸𑀢𑀼𑀯𑀲𑁂𑀦 𑀧𑀦 𑀧𑀝𑀺𑀓𑀽𑀮𑀯𑀲𑁂𑀦 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀲𑀼𑀚𑁆𑀛𑀢𑀻𑀢𑀺 𑀅𑀧𑀭𑁂. 𑀪𑀺𑀚𑁆𑀚𑀢𑀻𑀢𑀺 𑀓𑁂𑀘𑀺. 𑀏𑀓𑁂 𑀧𑀦 𑀧𑀞𑀫𑀁 𑀏𑀯 𑀧𑀭𑀺𑀬𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀘𑀻𑀯𑀭’’𑀦𑁆𑀢𑀺 𑀏𑀓𑀯𑀘𑀦𑀁 𑀏𑀓𑀢𑁆𑀢𑀫𑀢𑁆𑀢𑀁 𑀯𑀸𑀘𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀦𑁆𑀢𑀭𑀯𑀸𑀲𑀓𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁, 𑀚𑀸𑀢𑀺𑀲𑀤𑁆𑀤𑀢𑀸𑀬 𑀧𑀦 𑀢𑀲𑁆𑀲 𑀧𑀸𑀴𑀺𑀬𑀁 𑀏𑀓𑀯𑀘𑀦𑀦𑁆𑀢𑀺 𑀬𑀢𑁆𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀬𑁄𑀕𑀺𑀦𑀸 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀏𑀓𑀚𑁆𑀛𑀁 𑀕𑀳𑀡𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀬𑀁 𑀓𑀺𑀜𑁆𑀘𑀻𑀢𑀺 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀫𑁂𑀢𑀁, 𑀦 𑀅𑀦𑀺𑀬𑀫𑀯𑀘𑀦𑀁. ‘‘𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑀁 𑀧𑀦 𑀧𑀝𑀺𑀲𑁂𑀯𑀦𑀧𑀭𑀺𑀬𑀸𑀬𑀲𑁆𑀲 𑀧𑀭𑀺𑀪𑁄𑀕𑀲𑁆𑀲 ¶ 𑀯𑀺𑀪𑀸𑀕𑀤𑀲𑁆𑀲𑀦𑀦𑁆𑀢𑀺 𑀢𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑀬𑀦𑀦𑀺𑀲𑀻𑀤𑀦-𑀘𑀻𑀯𑀭𑀓𑀼𑀝𑀺𑀓𑀭𑀡𑀸𑀤𑀺𑀯𑀲𑁂𑀦𑀸𑀧𑀺 𑀧𑀭𑀺𑀪𑁄𑀕𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀧𑀬𑁄𑀚𑀦𑀸𑀦𑀁 𑀫𑀭𑀺𑀬𑀸𑀤𑀸 𑀧𑀬𑁄𑀚𑀦𑀸𑀯𑀥𑀺, 𑀢𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀬𑁄 𑀦𑀺𑀬𑀫𑁄, 𑀢𑀲𑁆𑀲 𑀯𑀘𑀦𑀁 𑀧𑀬𑁄𑀚𑀦𑀸…𑀧𑁂… 𑀯𑀘𑀦𑀁. 𑀇𑀤𑀸𑀦𑀺 𑀢𑀁 𑀦𑀺𑀬𑀫𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀓𑀫𑁂𑀯 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀥𑀸𑀭𑀡𑁂𑀦 𑀮𑀻𑀴𑀸𑀯𑀺𑀪𑀽𑀲𑀸𑀯𑀺𑀮𑀫𑁆𑀩𑀦𑀸𑀦𑀝𑀫𑁆𑀩𑀭𑀸𑀤𑀺𑀯𑀲𑁂𑀦 𑀯𑀢𑁆𑀣𑀧𑀭𑀺𑀪𑁄𑀕𑀁 𑀦𑀺𑀲𑁂𑀥𑁂𑀢𑀺. 𑀢𑁂𑀦𑀸𑀳 ‘‘𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺. 𑀮𑀻𑀴𑀸𑀯𑀲𑁂𑀦 𑀳𑀺 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀦𑁆𑀢𑀺 𑀘𑁂𑀯 𑀉𑀧𑀲𑀁𑀯𑀺𑀬𑀦𑁆𑀢𑀺 𑀘. 𑀬𑀣𑀸 𑀢𑀁 𑀬𑁄𑀩𑁆𑀩𑀦𑁂 𑀞𑀺𑀢𑀸 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸. 𑀏𑀓𑀘𑁆𑀘𑁂 𑀯𑀺𑀪𑀽𑀲𑀦𑀯𑀲𑁂𑀦, 𑀬𑀣𑀸 𑀢𑀁 𑀭𑀽𑀧𑀽𑀧𑀚𑀻𑀯𑀺𑀦𑀺𑀆𑀤𑀬𑁄. 𑀯𑀺𑀮𑀫𑁆𑀩𑀦𑀯𑀲𑁂𑀦 𑀯𑀺𑀮𑀫𑁆𑀩𑀓𑀸. 𑀦𑀝𑀫𑁆𑀩𑀭𑀯𑀲𑁂𑀦 𑀪𑁄𑀚𑀸𑀤𑀬𑁄. 𑀅𑀚𑁆𑀛𑀢𑁆𑀢𑀥𑀸𑀢𑀼𑀓𑁆𑀔𑁄𑀪𑁄 𑀲𑀻𑀢𑀭𑁄𑀕𑀸𑀤𑀺𑀉𑀧𑁆𑀧𑀸𑀤𑀓𑁄. 𑀉𑀢𑀼𑀧𑀭𑀺𑀡𑀸𑀫𑀦𑀯𑀲𑁂𑀦𑀸𑀢𑀺 𑀉𑀢𑀼𑀦𑁄 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀯𑀺𑀲𑀪𑀸𑀕𑀲𑀻𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀦. 𑀯𑀸-𑀲𑀤𑁆𑀤𑁂𑀦 𑀳𑁂𑀫𑀦𑁆𑀢𑀸𑀤𑀻𑀲𑀼 𑀳𑀺𑀫𑀧𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀦 𑀉𑀧𑁆𑀧𑀸𑀤𑁂𑀢𑀺 𑀲𑀻𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀢𑁆𑀣𑀁 𑀧𑀦 𑀢𑀁 𑀯𑀺𑀦𑁄𑀤𑀦𑀁, 𑀢𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑀩𑁆𑀪𑀸𑀳𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀲𑁂𑀲𑀧𑀬𑁄𑀚𑀦𑁂𑀲𑀼. 𑀬𑀤𑀺𑀧𑀺 𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀧𑀺 𑀉𑀡𑁆𑀳𑁄𑀯, 𑀢𑀲𑁆𑀲 𑀧𑀦 𑀆𑀢𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲𑀸’’𑀢𑀺 ¶ 𑀯𑀼𑀢𑁆𑀢𑀁. 𑀏𑀓𑀘𑁆𑀘𑁄 𑀤𑀸𑀯𑀕𑁆𑀕𑀺𑀲𑀦𑁆𑀢𑀸𑀧𑁄 𑀓𑀸𑀬𑀁 𑀘𑀻𑀯𑀭𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀓𑁆𑀓𑀸 𑀯𑀺𑀦𑁄𑀤𑁂𑀢𑀼𑀦𑁆𑀢𑀺 𑀆𑀳 ‘‘𑀢𑀲𑁆𑀲 𑀯𑀦𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀢𑁂 𑀧𑀦 𑀬𑀲𑁆𑀫𑀸 𑀟𑀁𑀲𑀦𑀲𑀻𑀮𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀟𑀁𑀲𑀦𑀫𑀓𑁆𑀔𑀺𑀓𑀸’’𑀢𑀺. 𑀲𑀧𑁆𑀧𑀸𑀤𑀬𑁄𑀢𑀺 𑀲𑀧𑁆𑀧𑀲𑀢𑀧𑀤𑀺𑀉𑀡𑁆𑀡𑀦𑀸𑀪𑀺𑀲𑀭𑀩𑀽𑀯𑀺𑀘𑁆𑀙𑀺𑀓𑀸𑀤𑀬𑁄. 𑀨𑀼𑀝𑁆𑀞𑀲𑀫𑁆𑀨𑀲𑁆𑀲𑁄𑀢𑀺 𑀨𑀼𑀝𑁆𑀞𑀯𑀺𑀲𑀫𑀸𑀳. 𑀢𑀺𑀯𑀺𑀥𑀸 𑀳𑀺 𑀲𑀧𑁆𑀧𑀸 𑁋 𑀤𑀝𑁆𑀞𑀯𑀺𑀲𑀸 𑀨𑀼𑀝𑁆𑀞𑀯𑀺𑀲𑀸 𑀤𑀺𑀝𑁆𑀞𑀯𑀺𑀲𑀸. 𑀢𑁂𑀲𑀼 𑀧𑀼𑀭𑀺𑀫𑀓𑀸 𑀤𑁆𑀯𑁂 𑀏𑀯 𑀕𑀳𑀺𑀢𑀸. 𑀲𑀢𑀧𑀤𑀺𑀆𑀤𑀻𑀦𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁. 𑀦𑀺𑀬𑀢𑀧𑀬𑁄𑀚𑀦𑀁 𑀏𑀓𑀦𑁆𑀢𑀺𑀓𑀁, 𑀲𑀩𑁆𑀩𑀓𑀸𑀮𑀺𑀓𑀜𑁆𑀘 𑀧𑀬𑁄𑀚𑀦𑀁. 𑀳𑀺𑀭𑀻 𑀓𑀼𑀧𑁆𑀧𑀢𑀺 𑀦𑀺𑀮𑁆𑀮𑀚𑁆𑀚𑀢𑀸 𑀲𑀡𑁆𑀞𑀸𑀢𑀺. 𑀢𑁂𑀦𑀸𑀳 ‘‘𑀯𑀺𑀦𑀲𑁆𑀲𑀢𑀻’’𑀢𑀺. 𑀓𑀽𑀧𑀸𑀯𑀢𑀭𑀡𑀁 𑀯𑀸 𑀧𑀝𑀺𑀘𑁆𑀙𑀸𑀤𑀦𑀁 𑀅𑀭𑀳𑀢𑀻𑀢𑀺 𑀓𑁄𑀧𑀺𑀦𑀁. 𑀳𑀺𑀭𑀺𑀬𑀺𑀢𑀩𑁆𑀩𑀝𑁆𑀞𑁂𑀦 𑀳𑀺𑀭𑀻 𑀘 𑀢𑀁 𑀓𑁄𑀧𑀺𑀦𑀜𑁆𑀘𑀸𑀢𑀺 𑀳𑀺𑀭𑀺𑀓𑁄𑀧𑀺𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀬𑁄𑀚𑀦𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄.

𑀬𑀁 𑀓𑀺𑀜𑁆𑀘𑀺 𑀆𑀳𑀸𑀭𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀁. 𑀧𑀺𑀡𑁆𑀟𑀸𑀬 𑀪𑀺𑀓𑁆𑀔𑀸𑀬 𑀉𑀮𑀢𑀻𑀢𑀺 𑀧𑀺𑀡𑁆𑀟𑁄𑀮𑁄, 𑀢𑀲𑁆𑀲 𑀓𑀫𑁆𑀫𑀁 𑀧𑀺𑀡𑁆𑀟𑁄𑀮𑁆𑀬𑀁. 𑀢𑁂𑀦 𑀧𑀺𑀡𑁆𑀟𑁄𑀮𑁆𑀬𑁂𑀦 𑀪𑀺𑀓𑁆𑀔𑀸𑀘𑀭𑀺𑀬𑀸𑀬. 𑀧𑀢𑀺𑀢𑀢𑁆𑀢𑀸𑀢𑀺 𑀧𑀓𑁆𑀔𑀺𑀧𑀺𑀢𑀢𑁆𑀢𑀸. 𑀧𑀺𑀡𑁆𑀟𑀧𑀸𑀢𑁄 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀪𑀺𑀓𑁆𑀔𑀸𑀳𑀸𑀭𑁄. 𑀧𑀺𑀡𑁆𑀟𑀸𑀦𑀁 𑀯𑀸 𑀧𑀸𑀢𑁄𑀢𑀺 𑀖𑀭𑁂 𑀖𑀭𑁂 𑀮𑀤𑁆𑀥𑀪𑀺𑀓𑁆𑀔𑀸𑀦𑀁 𑀲𑀦𑁆𑀦𑀺𑀧𑀸𑀢𑁄. ‘‘𑀦𑀢𑁆𑀣𑀺 𑀤𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀲𑀳𑀲𑀸 𑀓𑀺𑀭𑀺𑀬𑀸𑀧𑀺 ¶ ‘‘𑀤𑀯𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀤𑀯𑀢𑁆𑀣𑀁, 𑀓𑀻𑀴𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀫𑀼𑀝𑁆𑀞𑀺𑀓𑀫𑀮𑁆𑀮𑀸 𑀫𑀼𑀝𑁆𑀞𑀺𑀬𑀼𑀤𑁆𑀥𑀬𑀼𑀚𑁆𑀛𑀦𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀩𑀼𑀤𑁆𑀥𑀬𑀼𑀚𑁆𑀛𑀦𑀓𑀸𑀤𑀻𑀦𑀁 𑀕𑀳𑀡𑀁. 𑀩𑀮𑀫𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀩𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀫𑀤𑁄 𑀩𑀮𑀫𑀤𑁄. 𑀢𑀁 𑀦𑀺𑀫𑀺𑀢𑁆𑀢𑀁, 𑀩𑀮𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀧𑁄𑀭𑀺𑀲𑀫𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑁄𑀭𑀺𑀲𑀫𑀤𑁄 𑀯𑀼𑀘𑁆𑀘𑀢𑀺 𑀧𑀼𑀭𑀺𑀲𑀫𑀸𑀦𑁄 ‘‘𑀅𑀳𑀁 𑀧𑀼𑀭𑀺𑀲𑁄’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀫𑀸𑀦𑁄. 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀲𑀫𑀢𑁆𑀣𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀫𑀸𑀦𑁄, 𑀭𑀸𑀕𑁄 𑀏𑀯 𑀯𑀸 𑀧𑁄𑀭𑀺𑀲𑀫𑀤𑁄𑀢𑀺 𑀓𑁂𑀘𑀺. 𑀢𑀁 𑀦𑀺𑀫𑀺𑀢𑁆𑀢𑀁. 𑀅𑀦𑁆𑀢𑁂𑀧𑀼𑀭𑀺𑀓𑀸 𑀭𑀸𑀚𑁄𑀭𑁄𑀥𑀸. 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀯𑁂𑀲𑀬𑁄𑀕𑁆𑀬𑀢𑀸𑀬 𑀯𑁂𑀲𑀺𑀬𑁄 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄. 𑀫𑀡𑁆𑀟𑀦𑀁 𑀦𑀸𑀫 𑀇𑀥𑀸𑀯𑀬𑀯𑀧𑀸𑀭𑀺𑀧𑀽𑀭𑀻𑀢𑀺 𑀆𑀳 ‘‘𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀧𑀻𑀡𑀪𑀸𑀯𑀦𑀺𑀫𑀺𑀢𑁆𑀢’’𑀦𑁆𑀢𑀺, 𑀧𑀭𑀺𑀩𑁆𑀭𑀽𑀳𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀦𑀝𑀸 𑀦𑀸𑀫 𑀭𑀗𑁆𑀕𑀦𑀝𑀸. 𑀦𑀘𑁆𑀘𑀓𑀸 𑀮𑀗𑁆𑀖𑀓𑀸𑀤𑀬𑁄. 𑀯𑀺𑀪𑀽𑀲𑀦𑀁 𑀲𑁄𑀪𑀸𑀲𑀫𑀼𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀧𑀲𑀦𑁆𑀦𑀘𑁆𑀙𑀯𑀺𑀯𑀡𑁆𑀡𑀢𑀸𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀏𑀢𑀁 𑀧𑀤𑀁. 𑀫𑁄𑀳𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀦𑁆𑀢𑀺 𑀫𑁄𑀳𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑀸𑀧𑀳𑀸𑀦𑀸𑀬. 𑀤𑀯𑀸 𑀳𑀺 𑀫𑁄𑀳𑁂𑀦 𑀳𑁄𑀢𑀺, 𑀫𑁄𑀳𑀜𑁆𑀘 𑀯𑀟𑁆𑀠𑁂𑀢𑀻𑀢𑀺 𑀢𑀲𑁆𑀲𑀸 𑀯𑀚𑁆𑀚𑀦𑁂𑀦 𑀫𑁄𑀳𑀲𑁆𑀲 𑀅𑀦𑀼𑀧𑀦𑀺𑀲𑁆𑀲𑀬𑀢𑀸. 𑀤𑁄𑀲𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀦𑁆𑀢𑀺 𑀇𑀤𑀁 𑀩𑀮𑀫𑀤𑀲𑁆𑀲, 𑀧𑀼𑀭𑀺𑀲𑀫𑀤𑀲𑁆𑀲 ¶ 𑀘 𑀤𑁄𑀲𑀳𑁂𑀢𑀼𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀦 𑀯𑀲𑁂𑀦 ‘‘𑀭𑀸𑀕𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀫𑀡𑁆𑀟𑀦𑀯𑀺𑀪𑀽𑀲𑀦𑀧𑀝𑀺𑀓𑁆𑀔𑁂𑀧𑁄 𑀲𑀺𑀬𑀸 𑀫𑁄𑀳𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀸𑀬𑀧𑀺, 𑀭𑀸𑀕𑀽𑀧𑀦𑀺𑀲𑁆𑀲𑀬𑀢𑀸𑀬 𑀧𑀦 𑀉𑀚𑀼𑀧𑀝𑀺𑀧𑀓𑁆𑀔𑁄𑀢𑀺 𑀯𑀼𑀢𑁆𑀢𑀁 ‘‘𑀭𑀸𑀕𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣’’𑀦𑁆𑀢𑀺. 𑀬𑀤𑀺𑀧𑀺 𑀏𑀓𑀘𑁆𑀘𑀲𑁆𑀲 𑀤𑀯𑀫𑀤𑁂 𑀆𑀭𑀩𑁆𑀪 𑀧𑀭𑀲𑁆𑀲 𑀧𑀝𑀺𑀖𑀲𑀁𑀬𑁄𑀚𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺𑀬𑁂𑀯 𑀫𑀦𑁄𑀧𑀤𑁄𑀲𑀺𑀓𑀤𑁂𑀯𑀸𑀤𑀻𑀦𑀁 𑀯𑀺𑀬, 𑀅𑀢𑁆𑀢𑀦𑁄 𑀧𑀦 𑀤𑀯𑀫𑀤𑁂 𑀆𑀭𑀩𑁆𑀪 𑀬𑁂𑀲𑀁 𑀲𑀯𑀺𑀲𑁂𑀲𑀁 𑀭𑀸𑀕𑀫𑁄𑀳𑀫𑀸𑀦𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 ‘‘𑀅𑀢𑁆𑀢𑀦𑁄 𑀲𑀁𑀬𑁄𑀚𑀦𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀦𑀢𑁆𑀣’’𑀦𑁆𑀢𑀺 𑀯𑀢𑁆𑀯𑀸 𑀫𑀡𑁆𑀟𑀦𑀯𑀺𑀪𑀽𑀲𑀦𑀸𑀦𑀺 𑀧𑀝𑀺𑀘𑁆𑀘 𑀲𑀯𑀺𑀲𑁂𑀲𑀁 𑀧𑀭𑀲𑁆𑀲𑀧𑀺 𑀭𑀸𑀕𑀫𑁄𑀳𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺 ‘‘𑀧𑀭𑀲𑁆𑀲𑀧𑀺 𑀲𑀁𑀬𑁄𑀚𑀦𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀦𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑁄𑀦𑀺𑀲𑁄 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀅𑀬𑁄𑀦𑀺𑀲𑁄 𑀧𑀝𑀺𑀧𑀢𑁆𑀢𑀺. 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀬𑁄𑀦𑀺𑀲𑁄 𑀧𑀝𑀺𑀧𑀢𑁆𑀢𑀺𑀬𑀸, 𑀧𑀘𑁆𑀙𑀺𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑁆𑀲 𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀘𑀢𑀽𑀳𑀺𑀧𑀺 𑀘𑁂𑀢𑁂𑀳𑀻’’𑀢𑀺 𑀧𑀦 𑀯𑀘𑀦𑀢𑁄 𑀲𑀩𑁆𑀩𑁂𑀳𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀓𑀻𑀴𑀸𑀧𑀺 𑀤𑀯𑀦𑁆𑀢𑁄𑀕𑀥𑀸 𑀳𑁄𑀢𑀺𑀬𑁂𑀯, 𑀧𑀼𑀭𑀺𑀲𑀫𑀤𑁄𑀧𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑁆𑀲 𑀳𑁂𑀢𑀼𑀬𑁂𑀯𑀸𑀢𑀺.

𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲𑀸𑀢𑀺 𑀘𑀢𑀼𑀫𑀳𑀸𑀪𑀽𑀢𑁂 𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲. 𑀭𑀽𑀧𑀓𑀸𑀬𑀲𑁆𑀲𑀸𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀫𑀽𑀳𑀲𑁆𑀲. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀲𑀸 𑀧𑀦𑀲𑁆𑀲 𑀞𑀺𑀢𑀺 𑀧𑀩𑀦𑁆𑀥𑀯𑀲𑁂𑀦 𑀇𑀘𑁆𑀙𑀺𑀢𑀸𑀢𑀺 𑀆𑀳 ‘‘𑀧𑀩𑀦𑁆𑀥𑀝𑁆𑀞𑀺𑀢𑀢𑁆𑀣’’𑀦𑁆𑀢𑀺. 𑀧𑀯𑀢𑁆𑀢𑀺𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀬𑀸. 𑀢𑀣𑀸 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ‘‘𑀬𑀸𑀧𑀦𑀸 𑀯𑀢𑁆𑀢𑀦𑀸’’𑀢𑀺 ¶ (𑀥. 𑀲. 𑁧𑁯, 𑁬𑁩𑁪) 𑀘 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀲𑁆𑀲𑀸 𑀘 𑀅𑀯𑀺𑀘𑁆𑀙𑁂𑀤𑁄 𑀆𑀳𑀸𑀭𑀽𑀧𑀬𑁄𑀕𑁂𑀦 𑀳𑁄𑀢𑀺. 𑀓𑀸𑀬𑀲𑁆𑀲 𑀘𑀺𑀭𑀢𑀭𑀁 𑀬𑀸𑀯 𑀆𑀬𑀼𑀓𑀧𑁆𑀧𑁄, 𑀢𑀸𑀯 𑀅𑀯𑀢𑁆𑀣𑀸𑀦𑀁 𑀬𑀸𑀧𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀭𑀓𑀸𑀮𑀝𑁆𑀞𑀺𑀢𑀢𑁆𑀣𑀁 𑀯𑀸’’𑀢𑀺 𑀆𑀳. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀖𑀭𑀽𑀧𑀢𑁆𑀣𑀫𑁆𑀪𑀫𑀺𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀬𑀣𑀸 𑀚𑀺𑀡𑁆𑀡𑀖𑀭𑀲𑀸𑀫𑀺𑀓𑁄 𑀖𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀁 𑀓𑀭𑁄𑀢𑀺 𑀢𑀲𑁆𑀲 𑀅𑀧𑀢𑀦𑀢𑁆𑀣𑀁, 𑀬𑀣𑀸 𑀘 𑀲𑀸𑀓𑀝𑀺𑀓𑁄 𑀅𑀓𑁆𑀔𑀩𑁆𑀪𑀜𑁆𑀚𑀦𑀁 𑀓𑀭𑁄𑀢𑀺 𑀢𑀲𑁆𑀲 𑀲𑀫𑁆𑀧𑀯𑀢𑁆𑀢𑀦𑀢𑁆𑀣𑀁, 𑀏𑀯𑀫𑁂𑀲 𑀬𑁄𑀕𑀻 𑀓𑀸𑀬𑀲𑁆𑀲 𑀞𑀺𑀢𑀢𑁆𑀣𑀁, 𑀬𑀸𑀧𑀦𑀢𑁆𑀣𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺. 𑀏𑀢𑁂𑀦 𑀞𑀺𑀢𑀺 𑀦𑀸𑀫 𑀅𑀧𑀢𑀦𑀁 𑀬𑀸𑀧𑀦𑀸 𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀤𑀯𑀫𑀤𑀫𑀡𑁆𑀟𑀦𑀯𑀺𑀪𑀽𑀲𑀦𑀢𑁆𑀣𑀦𑁆𑀢𑀺 𑀇𑀤𑀁 ‘‘𑀬𑀸𑀯𑀤𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀣𑀤𑀲𑁆𑀲𑀦𑀁. 𑀢𑀺𑀝𑁆𑀞𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀥𑀫𑁆𑀫𑀸 𑀏𑀢𑀸𑀬𑀸𑀢𑀺 𑀞𑀺𑀢𑀺, 𑀆𑀬𑀽𑀢𑀺 𑀆𑀳 ‘‘𑀞𑀺𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀣𑀸 𑀳𑀺 𑀢𑀁 𑀆𑀬𑀼 ‘‘𑀞𑀺𑀢𑀻’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸𑀢𑀺 𑀓𑀸𑀬𑀲𑁆𑀲 ¶ 𑀞𑀺𑀢𑀺𑀳𑁂𑀢𑀼𑀢𑀸𑀬 ‘‘𑀞𑀺𑀢𑀻’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀯𑀢𑁆𑀢𑀸𑀧𑀦𑀢𑁆𑀣’’𑀦𑁆𑀢𑀺. 𑀆𑀩𑀸𑀥𑀝𑁆𑀞𑁂𑀦𑀸𑀢𑀺 𑀯𑀺𑀩𑀸𑀥𑀦𑀝𑁆𑀞𑁂𑀦, 𑀭𑁄𑀕𑀝𑁆𑀞𑁂𑀦 𑀯𑀸. 𑀚𑀺𑀖𑀘𑁆𑀙𑀸𑀧𑀭𑀫𑀸 𑀳𑀺 𑀭𑁄𑀕𑀸. 𑀉𑀧𑀭𑀫𑀢𑁆𑀣𑀦𑁆𑀢𑀺 𑀯𑀽𑀧𑀲𑀫𑀢𑁆𑀣𑀁. 𑀯𑀡𑀸𑀮𑁂𑀧𑀦𑀫𑀺𑀯 𑀯𑀡𑀺𑀓𑁄. 𑀉𑀡𑁆𑀳𑀲𑀻𑀢𑀸𑀤𑀻𑀲𑀼 𑀅𑀪𑀺𑀪𑀯𑀦𑁆𑀢𑁂𑀲𑀼 𑀢𑀧𑁆𑀧𑀝𑀺𑀓𑀸𑀭𑀁 𑀲𑀻𑀢𑀼𑀡𑁆𑀳𑀁 𑀯𑀺𑀬 𑀧𑀝𑀺𑀲𑁂𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀞𑀧𑁂𑀢𑁆𑀯𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀸 𑀲𑀸𑀲𑀦𑀸𑀯𑀘𑀭𑀺𑀢𑀩𑁆𑀩𑀸 𑀅𑀦𑀼𑀲𑀸𑀲𑀦𑀻 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀆𑀳 ‘‘𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀸’’𑀢𑀺. 𑀅𑀦𑀼𑀕𑁆𑀕𑀳𑀡𑀢𑁆𑀣𑀦𑁆𑀢𑀺 𑀅𑀦𑀼 𑀅𑀦𑀼 𑀕𑀡𑁆𑀳𑀦𑀢𑁆𑀣𑀁 𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀬𑀩𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀬𑀣𑀸𑀲𑀫𑀸𑀭𑀤𑁆𑀥𑀁 𑀕𑀼𑀡𑀯𑀺𑀲𑁂𑀲𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀪𑀽𑀢𑀁 𑀓𑀸𑀬𑀩𑀮𑀫𑀢𑁆𑀢𑀁 𑀦𑀺𑀲𑁆𑀲𑀸𑀬. 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀬𑁄𑀕𑀯𑀲𑁂𑀦𑀸’’𑀢𑀺𑀆𑀤𑀺. 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸 𑀚𑀸𑀬𑀫𑁆𑀧𑀢𑀺𑀓𑀸, 𑀦𑀤𑀻𑀲𑀫𑀼𑀤𑁆𑀤𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸 𑀘 𑀧𑀼𑀢𑁆𑀢𑀫𑀁𑀲𑀸𑀤𑀻𑀦𑀺 𑀬𑀣𑀸 𑀅𑀕𑀺𑀤𑁆𑀥𑀸 𑀅𑀫𑀼𑀘𑁆𑀙𑀺𑀢𑀸 𑀓𑁂𑀯𑀮𑀁 𑀢𑀁 𑀢𑀁 𑀅𑀢𑁆𑀣𑀲𑀺𑀤𑁆𑀥𑀺𑀫𑁂𑀯 𑀅𑀯𑁂𑀓𑁆𑀔𑀦𑁆𑀢𑀸 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀳𑀺 𑀯𑀺𑀦𑀸 𑀅𑀲𑀺𑀚𑁆𑀛𑀦𑀢𑁄, 𑀏𑀯𑀫𑀬𑀫𑁆𑀧𑀺 𑀓𑁂𑀯𑀮𑀁 𑀪𑀯𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁄 𑀅𑀕𑀺𑀤𑁆𑀥𑁄 𑀅𑀫𑀼𑀘𑁆𑀙𑀺𑀢𑁄 𑀢𑁂𑀦 𑀯𑀺𑀦𑀸 𑀅𑀲𑀺𑀚𑁆𑀛𑀦𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀻𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁.

𑀇𑀢𑀻𑀢𑀺 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑀧𑀤𑀁. 𑀢𑁂𑀦 𑀧𑀝𑀺𑀲𑁂𑀯𑀺𑀬𑀫𑀸𑀦𑀲𑁆𑀲 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀝𑀺𑀲𑁂𑀯𑀦𑀸𑀓𑀸𑀭𑁄 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀏𑀯𑀁 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑁂𑀯𑀦𑁂𑀦𑀸’’𑀢𑀺. 𑀧𑀼𑀭𑀸𑀡𑀦𑁆𑀢𑀺 𑀪𑁄𑀚𑀦𑀢𑁄 𑀧𑀼𑀭𑀺𑀫𑀓𑀸𑀮𑀺𑀓𑀢𑁆𑀢𑀸 𑀧𑀼𑀭𑀸𑀢𑀦𑀁. 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀧𑀝𑀺𑀳𑀦𑀺𑀲𑁆𑀲𑀸𑀫𑀺. 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀲𑁂𑀯𑀢𑀻𑀢𑀺 𑀬𑁄𑀚𑀦𑀸. 𑀓𑀻𑀤𑀺𑀲𑀁, 𑀓𑀣𑀜𑁆𑀘𑀸𑀢𑀺 𑀆𑀳 ‘‘𑀅𑀧𑀭𑀺𑀫𑀺𑀢…𑀧𑁂… 𑀅𑀜𑁆𑀜𑀢𑀭𑁄 𑀯𑀺𑀬𑀸’’𑀢𑀺. 𑀅𑀧𑀭𑀺𑀫𑀺𑀢𑀁 𑀅𑀧𑀭𑀺𑀫𑀸𑀡𑀁 𑀪𑁄𑀚𑀦𑀁 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀅𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸, 𑀢𑀁 𑀅𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀁 𑀅𑀢𑁆𑀢𑀦𑁄 𑀕𑀳𑀡𑀻𑀢𑁂𑀚𑀧𑀫𑀸𑀡𑀢𑁄 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀪𑁄𑀚𑀦𑀳𑁂𑀢𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀥𑀫𑁆𑀫𑀢𑀸𑀬 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀆𑀳𑀭 𑀳𑀢𑁆𑀣’’𑀦𑁆𑀢𑀺 𑀯𑀤𑀢𑀺, 𑀅𑀬𑀁 𑀆𑀳𑀭𑀳𑀢𑁆𑀣𑀓𑁄. 𑀬𑁄 𑀪𑀼𑀜𑁆𑀚𑀺𑀢𑁆𑀯𑀸 𑀅𑀘𑁆𑀘𑀼𑀤𑁆𑀥𑀼𑀫𑀸𑀢𑀓𑀼𑀘𑁆𑀙𑀺𑀢𑀸𑀬 𑀉𑀝𑁆𑀞𑀺𑀢𑁄𑀧𑀺 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀅𑀮𑀁𑀲𑀸𑀝𑀓𑁄. 𑀬𑁄 𑀪𑀼𑀜𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀧𑀭𑀺𑀯𑀢𑁆𑀢𑀢𑀺, 𑀅𑀬𑀁 𑀢𑀢𑁆𑀭𑀯𑀝𑁆𑀝𑀓𑁄. 𑀬𑁄 𑀬𑀣𑀸 𑀓𑀸𑀓𑁂𑀳𑀺 𑀆𑀫𑀲𑀺𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀬𑀸𑀯 𑀫𑀼𑀔𑀤𑁆𑀯𑀸𑀭𑀁 𑀆𑀳𑀸𑀭𑁂𑀢𑀺, 𑀅𑀬𑀁 𑀓𑀸𑀓𑀫𑀸𑀲𑀓𑁄. 𑀬𑁄 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑁂 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀯𑀫𑀢𑀺, 𑀅𑀬𑀁 𑀪𑀼𑀢𑁆𑀢𑀯𑀫𑀺𑀢𑀓𑁄. 𑀏𑀢𑁂𑀲𑀁 𑀅𑀜𑁆𑀜𑀢𑀭𑁄 𑀯𑀺𑀬. 𑀅𑀣 𑀯𑀸 𑀧𑀼𑀭𑀸𑀡𑀯𑁂𑀤𑀦𑀸 𑀦𑀸𑀫 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸. 𑀢𑀁 ‘‘𑀧𑀝𑀺𑀳𑀦𑀺𑀲𑁆𑀲𑀸𑀫𑀻’’𑀢𑀺 ¶ 𑀧𑀝𑀺𑀲𑁂𑀯𑀢𑀺. 𑀦𑀯𑀯𑁂𑀤𑀦𑀸 𑀦𑀸𑀫 𑀅𑀢𑀺𑀪𑀼𑀢𑁆𑀢𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸. 𑀢𑀁 ‘‘𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀲𑁂𑀯𑀢𑀺. 𑀅𑀣 𑀯𑀸 𑀦𑀯𑀯𑁂𑀤𑀦𑀸 𑀦𑀸𑀫 𑀅𑀪𑀼𑀢𑁆𑀢𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀢𑀲𑁆𑀲𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀫𑁂𑀯 𑀧𑀝𑀺𑀲𑁂𑀯𑀢𑀺. 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀸𑀢𑀺 𑀘𑁂𑀢𑀁 𑀔𑀼𑀤𑁆𑀤𑀸𑀬 𑀯𑀺𑀲𑁂𑀲𑀦𑀁. 𑀬𑀲𑁆𑀲𑀸 𑀅𑀧𑁆𑀧𑀯𑀢𑁆𑀢𑀺 𑀪𑁄𑀚𑀦𑁂𑀦 𑀓𑀸𑀢𑀩𑁆𑀩𑀸, 𑀢𑀲𑁆𑀲𑀸 𑀤𑀲𑁆𑀲𑀦𑀢𑁆𑀣𑀁. 𑀅𑀪𑀼𑀢𑁆𑀢𑀧𑀘𑁆𑀘𑀬𑁂𑀦, 𑀪𑀼𑀢𑁆𑀢𑀧𑀘𑁆𑀘𑀬𑁂𑀦 𑀘 𑀉𑀧𑁆𑀧𑀚𑁆𑀚𑀦𑀓𑀸𑀦𑀼𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸𑀲𑀼 𑀧𑀼𑀭𑀺𑀫𑀸 𑀬𑀣𑀸𑀧𑀯𑀢𑁆𑀢𑀸 𑀚𑀺𑀖𑀘𑁆𑀙𑀸𑀦𑀺𑀫𑀺𑀢𑁆𑀢𑀸 𑀯𑁂𑀤𑀦𑀸. 𑀲𑀸 𑀳𑀺 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀬𑁆𑀬𑁄𑀧𑀯𑀟𑁆𑀠𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀧𑀘𑁆𑀙𑀺𑀫𑀸𑀧𑀺 𑀔𑀼𑀤𑁆𑀤𑀸𑀦𑀺𑀫𑀺𑀢𑁆𑀢𑀸𑀯 𑀅𑀗𑁆𑀕𑀤𑀸𑀳𑀲𑀽𑀮𑀸𑀤𑀺𑀯𑁂𑀤𑀦𑀸 𑀧𑀯𑀢𑁆𑀢𑀸. 𑀲𑀸 𑀳𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀸𑀯 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄. 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀢𑀸 𑀘𑁂𑀢𑀸𑀲𑀁 𑀯𑀺𑀳𑀺𑀁𑀲𑀸𑀬 𑀯𑀺𑀲𑁂𑀲𑁄.

𑀬𑀸 𑀯𑁂𑀤𑀦𑀸. 𑀅𑀥𑀼𑀦𑀸𑀢𑀺 𑀏𑀢𑀭𑀳𑀺. 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀪𑁄𑀚𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀲𑁆𑀲 𑀆𑀳𑀸𑀭𑀲𑁆𑀲 𑀪𑀼𑀜𑁆𑀚𑀦𑀧𑀬𑁄𑀕𑀁 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀡𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑁂 𑀧𑀼𑀭𑀺𑀫𑀚𑀸𑀢𑀺𑀬𑀁 𑀓𑀢𑀢𑁆𑀢𑀸 𑀧𑀼𑀭𑀸𑀡𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀢𑀸𑀯𑀲𑁂𑀦 𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸𑀬 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀸𑀧𑀦𑀁 𑀤𑀼𑀓𑁆𑀔𑀯𑁂𑀤𑀦𑀸𑀧𑀘𑁆𑀘𑀬𑀖𑀸𑀢𑁄, 𑀧𑀝𑀺𑀳𑀦𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀲𑀸 𑀧𑀘𑁆𑀘𑀬𑀁 𑀯𑀺𑀦𑀸𑀲𑁂𑀦𑁆𑀢𑁄 𑀢𑀁 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻’’𑀢𑀺. 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑁂 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑁄𑀕𑁄. 𑀲𑁄 𑀏𑀯 𑀓𑀢𑀽𑀧𑀘𑀺𑀢𑀓𑀫𑁆𑀫𑀢𑀸𑀬 𑀓𑀫𑁆𑀫𑀽𑀧𑀘𑀬𑁄. 𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀘𑁆𑀘 𑀆𑀬𑀢𑀺𑀁 𑀅𑀦𑀸𑀕𑀢𑁂 𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀢𑁄 𑀬𑀸 𑀘𑀸𑀬𑀁 ‘‘𑀦𑀯𑀯𑁂𑀤𑀦𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀬𑀼𑀢𑁆𑀢𑀧𑀭𑀺𑀪𑁄𑀕𑀯𑀲𑁂𑀦𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀬𑀸𑀦𑀁 𑀧𑀭𑀺𑀪𑁄𑀕𑀯𑀲𑁂𑀦, 𑀢𑀲𑁆𑀲𑀸 𑀦𑀯𑀯𑁂𑀤𑀦𑀸𑀬 𑀫𑀽𑀮𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀓𑀫𑁆𑀫𑀁 𑀅𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀇𑀢𑀺 𑀧𑀼𑀭𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀤𑀤𑁆𑀯𑀬𑁂𑀦. ‘‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀸 𑀧𑀤𑀘𑀢𑀼𑀓𑁆𑀓𑁂𑀦 𑀬𑀼𑀢𑁆𑀢𑀧𑀭𑀺𑀪𑁄𑀕𑀲𑀗𑁆𑀕𑀳𑁄 𑀧𑀩𑁆𑀩𑀚𑀺𑀢𑀸𑀦𑀼𑀘𑁆𑀙𑀯𑀺𑀓𑀲𑁆𑀲 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀳𑀸𑀦𑀁 𑀚𑀺𑀖𑀘𑁆𑀙𑀸𑀤𑀺𑀤𑀼𑀓𑁆𑀔𑀧𑀝𑀺𑀖𑀸𑀢𑀲𑁆𑀲 𑀪𑀸𑀲𑀺𑀢𑀢𑁆𑀢𑀸. 𑀛𑀸𑀦𑀲𑀼𑀔𑀸𑀤𑀻𑀦𑀁 ¶ 𑀧𑀘𑁆𑀘𑀬𑀪𑀽𑀢𑀲𑁆𑀲 𑀓𑀸𑀬𑀲𑀼𑀔𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀢𑁄 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑁄 𑀘 𑀤𑀻𑀧𑀺𑀢𑁄 𑀳𑁄𑀢𑀺.

𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀽𑀧𑀬𑁄𑀕𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑁄, 𑀇𑀭𑀺𑀬𑀸𑀧𑀣𑀪𑀜𑁆𑀚𑀦𑀓𑁄 𑀯𑀸 𑀲𑀺𑀬𑀸 𑀧𑀭𑀺𑀲𑁆𑀲𑀬𑁄, 𑀲𑀧𑁆𑀧𑀸𑀬𑀧𑀭𑀺𑀫𑀺𑀢𑀽𑀧𑀬𑁄𑀕𑁂𑀦 𑀧𑀦 𑀲𑁄 𑀦 𑀳𑁄𑀢𑀺. 𑀢𑀣𑀸 𑀲𑀢𑀺 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸 𑀲𑀭𑀻𑀭𑀲𑁆𑀲 𑀬𑀸𑀢𑁆𑀭𑀸 ¶ 𑀬𑀸𑀧𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑁂𑀦…𑀧𑁂… 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀬𑁄 𑀭𑁄𑀕𑁄 𑀲𑀸𑀤𑁆𑀥𑁄 𑀅𑀲𑀸𑀤𑁆𑀥𑁄 𑀘 𑀦 𑀳𑁄𑀢𑀺, 𑀲𑁄 𑀬𑀸𑀧𑁆𑀬𑀭𑁄𑀕𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀬𑀸𑀧𑁆𑀬𑀭𑁄𑀕𑀻. 𑀲𑁄 𑀳𑀺 𑀦𑀺𑀘𑁆𑀘𑀓𑀸𑀮𑀁 𑀪𑁂𑀲𑀚𑁆𑀚𑀁 𑀉𑀧𑀲𑁂𑀯𑀢𑀺, 𑀢𑀣𑀸 𑀅𑀬𑀫𑁆𑀧𑀻𑀢𑀺. 𑀬𑀤𑀺 𑀬𑀸𑀢𑁆𑀭𑀸𑀧𑀺 𑀬𑀸𑀧𑀦𑀸, 𑀧𑀼𑀩𑁆𑀩𑁂𑀧𑀺 ‘‘𑀬𑀸𑀧𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄𑀢𑀺? 𑀧𑀼𑀩𑁆𑀩𑁂 ‘‘𑀬𑀸𑀧𑀦𑀸𑀬𑀸’’𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀇𑀥 𑀧𑀦 𑀘𑀢𑀼𑀦𑁆𑀦𑀫𑁆𑀧𑀺 𑀇𑀭𑀺𑀬𑀸𑀧𑀣𑀸𑀦𑀁 𑀅𑀯𑀺𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀬𑀸𑀧𑀦𑀸 𑀬𑀸𑀢𑁆𑀭𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀸 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦𑀸. 𑀤𑀸𑀬𑀓𑀤𑁂𑀬𑁆𑀬𑀥𑀫𑁆𑀫𑀸𑀦𑀁, 𑀅𑀢𑁆𑀢𑀦𑁄 𑀘 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀁, 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀢𑁆𑀣𑀁 𑀯𑀸 𑀧𑀝𑀺𑀕𑁆𑀕𑀳𑀡𑀁 𑀅𑀬𑀼𑀢𑁆𑀢𑀧𑀝𑀺𑀕𑁆𑀕𑀳𑀡𑀁, 𑀬𑁂𑀦 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑁄𑀕𑁄 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁄. 𑀢𑁂𑀲𑀁 𑀧𑀭𑀺𑀯𑀚𑁆𑀚𑀦𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑁂𑀦 𑀳𑀺 𑀧𑀘𑁆𑀘𑀬𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀥𑀫𑁆𑀫𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀅𑀦𑀯𑀚𑁆𑀚𑀢𑀸 𑀦𑀸𑀫.

𑀅𑀭𑀢𑀻𑀢𑀺 𑀉𑀓𑁆𑀓𑀡𑁆𑀞𑀸. 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀅𑀦𑀪𑀺𑀭𑀢𑀺. 𑀢𑀦𑁆𑀤𑀻𑀢𑀺 𑀧𑀘𑀮𑀸𑀬𑀺𑀓𑀸 𑀦𑀺𑀤𑁆𑀤𑀸. 𑀯𑀺𑀚𑀫𑁆𑀪𑀺𑀢𑀸𑀢𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑁂𑀦 𑀓𑀸𑀬𑀲𑁆𑀲 𑀯𑀺𑀚𑀫𑁆𑀪𑀦𑀸. 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀯𑀺𑀜𑁆𑀜𑀽𑀕𑀭𑀳𑀸. 𑀏𑀓𑀘𑁆𑀘𑁄 𑀳𑀺 𑀅𑀦𑀯𑀚𑁆𑀚𑀁𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺, ‘‘𑀮𑀤𑁆𑀥𑀁 𑀫𑁂’’𑀢𑀺 𑀧𑀫𑀸𑀡𑀸𑀥𑀺𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀓𑀺𑀮𑀫𑀢𑀺, 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀪𑁂𑀲𑀚𑁆𑀚𑀧𑀭𑀺𑀬𑁂𑀲𑀦𑀸𑀧𑀲𑀼𑀢𑀸 𑀳𑁄𑀦𑁆𑀢𑀺. 𑀅𑀜𑁆𑀜𑁂 𑀢𑁂 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀲𑁆𑀲 𑀉𑀤𑀭𑀁 𑀉𑀤𑁆𑀥𑀼𑀫𑀸𑀢’’𑀦𑁆𑀢𑀺𑀆𑀤𑀻𑀦𑀺 𑀲𑀼𑀢𑁆𑀯𑀸 ‘‘𑀦𑀺𑀘𑁆𑀘𑀓𑀸𑀮𑀫𑁂𑀲 𑀏𑀯𑀁𑀧𑀓𑀢𑀺𑀓𑁄 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀧𑀫𑀸𑀡𑀁 𑀦𑀸𑀫 𑀦 𑀚𑀸𑀦𑀸𑀢𑀻’’𑀢𑀺 𑀦𑀺𑀦𑁆𑀤𑀦𑁆𑀢𑀺, 𑀏𑀯𑀁 𑀅𑀦𑀯𑀚𑁆𑀚𑀁𑀬𑁂𑀯 𑀲𑀸𑀯𑀚𑁆𑀚𑀁 𑀓𑀭𑁄𑀢𑀺. 𑀏𑀯𑀁 𑀅𑀓𑀢𑁆𑀯𑀸 ‘‘𑀅𑀦𑀯𑀚𑁆𑀚𑀢𑀸 𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀲𑁂𑀯𑀢𑀺. 𑀅𑀢𑁆𑀢𑀦𑁄 𑀳𑀺 𑀧𑀓𑀢𑀺𑀅𑀕𑁆𑀕𑀺𑀩𑀮𑀸𑀤𑀺𑀁 𑀚𑀸𑀦𑀺𑀢𑁆𑀯𑀸 ‘‘𑀏𑀯𑀁 𑀫𑁂 𑀅𑀭𑀢𑀺𑀆𑀤𑀻𑀦𑀁 𑀅𑀪𑀸𑀯𑁂𑀦 𑀓𑀸𑀬𑀲𑀼𑀔𑀢𑀸, 𑀅𑀕𑀭𑀳𑀺𑀢𑀩𑁆𑀩𑀢𑀸 𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀧𑀝𑀺𑀲𑁂𑀯𑀢𑀺. 𑀬𑀸𑀯𑀢𑀓𑁄 𑀪𑁄𑀚𑀦𑁂𑀦 𑀅𑀢𑁆𑀣𑁄, 𑀢𑀲𑁆𑀲 𑀲𑀸𑀥𑀦𑁂𑀦 𑀬𑀸𑀯𑀤𑀢𑁆𑀣𑀁 𑀉𑀤𑀭𑀲𑁆𑀲 𑀧𑀭𑀺𑀧𑀽𑀭𑀡𑁂𑀦 𑀉𑀤𑀭𑀸𑀯𑀤𑁂𑀳𑀓𑀁 𑀪𑁄𑀚𑀦𑀁 𑀬𑀸𑀯𑀤𑀢𑁆𑀣𑀉𑀤𑀭𑀸𑀯𑀤𑁂𑀳𑀓𑀪𑁄𑀚𑀦𑀁, 𑀢𑀲𑁆𑀲 𑀧𑀭𑀺𑀯𑀚𑁆𑀚𑀦𑁂𑀦. 𑀲𑁂𑀬𑁆𑀬𑀸𑀬 𑀲𑀬𑀦𑁂𑀦 𑀮𑀤𑁆𑀥𑀩𑁆𑀩𑀲𑀼𑀔𑀁 𑀲𑁂𑀬𑁆𑀬𑀲𑀼𑀔𑀁, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 ¶ 𑀲𑀫𑁆𑀧𑀭𑀺𑀯𑀢𑁆𑀢𑀦𑀓𑀁 𑀲𑀬𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 ¶ , 𑀫𑀺𑀤𑁆𑀥𑁂𑀦 𑀦𑀺𑀤𑁆𑀤𑀸𑀬𑀦𑁂𑀦 𑀉𑀧𑁆𑀧𑀚𑁆𑀚𑀦𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁, 𑀢𑁂𑀲𑀁 𑀲𑁂𑀬𑁆𑀬…𑀧𑁂… 𑀲𑀼𑀔𑀸𑀦𑀁 𑀧𑀳𑀸𑀦𑀢𑁄 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀬𑁄𑀕𑁆𑀬𑀪𑀸𑀯𑀲𑁆𑀲 𑀧𑀝𑀺𑀧𑀸𑀤𑀦𑀁 𑀓𑀸𑀬𑀲𑁆𑀲 𑀘𑀢𑀼𑀇𑀭𑀺𑀬𑀸𑀧𑀣𑀬𑁄𑀕𑁆𑀬𑀪𑀸𑀯𑀧𑀝𑀺𑀧𑀸𑀤𑀦𑀁, 𑀢𑀢𑁄. 𑀲𑀼𑀔𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀨𑀸𑀲𑀼𑀯𑀺𑀳𑀸𑀭𑁄. 𑀧𑀘𑁆𑀙𑀺𑀫𑁂 𑀯𑀺𑀓𑀧𑁆𑀧𑁂, 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀯𑀸 𑀯𑀼𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀮𑀓𑁆𑀔𑀡𑀁 𑀆𑀕𑀫𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀻𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀆𑀳𑀸𑀭𑀲𑁆𑀲 𑀊𑀦𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀳𑀺 𑀨𑀸𑀲𑀼𑀯𑀺𑀳𑀸𑀭𑁄 𑀯𑀼𑀢𑁆𑀢𑁄𑀢𑀺.

𑀏𑀢𑁆𑀢𑀸𑀯𑀢𑀸𑀢𑀺 ‘‘𑀬𑀸𑀢𑁆𑀭𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀤𑀢𑁆𑀢𑀬𑁂𑀦. ‘‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀬𑁄𑀚𑀦𑀧𑀭𑀺𑀕𑁆𑀕𑀳𑀤𑀻𑀧𑀦𑀸. 𑀬𑀸𑀢𑁆𑀭𑀸 𑀳𑀺 𑀦𑀁 𑀆𑀳𑀸𑀭𑀽𑀧𑀬𑁄𑀕𑀁 𑀧𑀬𑁄𑀚𑁂𑀢𑀻𑀢𑀺. 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀳𑁂𑀢𑀼𑀓𑁄 𑀨𑀸𑀲𑀼𑀯𑀺𑀳𑀸𑀭𑁄 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺 𑁋 ‘‘𑀦𑁂𑀯 𑀤𑀯𑀸𑀬𑀸’’𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀦 𑀫𑀤𑀸𑀬𑀸’’𑀢𑀺 𑀏𑀓𑀁, ‘‘𑀦 𑀫𑀡𑁆𑀟𑀦𑀸𑀬𑀸’’𑀢𑀺 𑀏𑀓𑀁, ‘‘𑀦 𑀯𑀺𑀪𑀽𑀲𑀦𑀸𑀬𑀸’’𑀢𑀺 𑀏𑀓𑀁, ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸’’𑀢𑀺 𑀏𑀓𑀁, ‘‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀏𑀓𑀁, ‘‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁, ‘‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁. ‘‘𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺 𑀅𑀬𑀫𑁂𑀢𑁆𑀣 𑀪𑁄𑀚𑀦𑀸𑀦𑀺𑀲𑀁𑀲𑁄. 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫, 𑀉𑀧𑀭𑀺 𑀧𑀦 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀻’’𑀢𑀺. 𑀢𑀢𑁆𑀣 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀬𑀸𑀧𑀦𑀸𑀬𑀸’’𑀢𑀺 𑀏𑀓𑀁, ‘‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸’’𑀢𑀺 𑀏𑀓𑀁, ‘‘𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀏𑀓𑀁, ‘‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻’’𑀢𑀺 𑀏𑀓𑀁, ‘‘𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁, ‘‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁, ‘‘𑀅𑀦𑀯𑀚𑁆𑀚𑀢𑀸 𑀘𑀸’’𑀢𑀺 𑀏𑀓𑀁. 𑀨𑀸𑀲𑀼𑀯𑀺𑀳𑀸𑀭𑁄 𑀧𑀦 𑀪𑁄𑀚𑀦𑀸𑀦𑀺𑀲𑀁𑀲𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺 𑀦𑀸𑀫.

𑀬𑀢𑁆𑀣 𑀬𑀢𑁆𑀣𑀸𑀢𑀺 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦 𑀲𑁂𑀦-𑀲𑀤𑁆𑀤𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑀯𑀼𑀢𑁆𑀢𑀺𑀫𑀸𑀳. 𑀢𑀣𑀸 𑀆𑀲𑀦-𑀲𑀤𑁆𑀤𑀲𑁆𑀲𑀸𑀢𑀺. 𑀅𑀟𑁆𑀠𑀬𑁄𑀕𑀸𑀤𑀺𑀫𑁆𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀲𑀸𑀤𑀸𑀤𑀺𑀁, 𑀫𑀜𑁆𑀘𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀢𑁆𑀣 𑀬𑀢𑁆𑀣 𑀯𑀺𑀳𑀸𑀭𑁂 𑀯𑀸 𑀅𑀟𑁆𑀠𑀬𑁄𑀕𑀸𑀤𑀺𑀫𑁆𑀳𑀺 𑀯𑀸 𑀆𑀲𑀢𑀻𑀢𑀺 𑀯𑀺𑀳𑀸𑀭𑀅𑀟𑁆𑀠𑀬𑁄𑀕𑀸𑀤𑀺𑀓𑁂 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀧𑀻𑀞𑀲𑀦𑁆𑀣𑀢𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀲𑀳𑀦𑀝𑁆𑀞𑁂𑀦𑀸𑀢𑀺 𑀅𑀪𑀺𑀪𑀯𑀦𑀝𑁆𑀞𑁂𑀦, 𑀯𑀺𑀩𑀸𑀥𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀢𑀼𑀬𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑁄𑀢𑀺 𑀲𑀻𑀢𑀼𑀡𑁆𑀳𑀸𑀤𑀺𑀉𑀢𑀼𑀬𑁂𑀯 ¶ 𑀅𑀲𑀧𑁆𑀧𑀸𑀬𑁄 𑀯𑀼𑀢𑁆𑀢𑀦𑀬𑁂𑀦 𑀉𑀢𑀼𑀧𑀭𑀺𑀲𑁆𑀲𑀬𑁄. 𑀢𑀲𑁆𑀲 𑀉𑀢𑀼𑀧𑀭𑀺𑀲𑁆𑀲𑀬𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀭𑀫𑁆𑀫𑀡𑀢𑁄 ¶ 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑁂 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀮𑀬𑀦𑀁 𑀧𑀝𑀺𑀲𑀮𑁆𑀮𑀸𑀦𑀁, 𑀢𑀢𑁆𑀣 𑀆𑀭𑀸𑀫𑁄 𑀅𑀪𑀺𑀭𑀢𑀺 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄, 𑀢𑀤𑀢𑁆𑀣𑀁. 𑀲𑁂𑀦𑀸𑀲𑀦𑀁 𑀳𑀺 𑀯𑀺𑀯𑀺𑀢𑁆𑀢𑀁 𑀬𑁄𑀕𑀺𑀦𑁄 𑀪𑀸𑀯𑀦𑀸𑀦𑀼𑀓𑀽𑀮𑀁 𑀲𑀼𑀜𑁆𑀜𑀸𑀕𑀸𑀭𑀪𑀸𑀯𑀢𑁄. 𑀢𑀁 𑀧𑀦𑁂𑀢𑀁 𑀅𑀢𑁆𑀣𑀤𑁆𑀯𑀬𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀬𑁄 𑀲𑀭𑀻𑀭𑀸𑀩𑀸𑀥𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀓𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀻𑀪𑀸𑀯𑀲𑀼𑀔𑀢𑁆𑀣𑀦𑁆𑀢𑀺 𑀏𑀓𑀻𑀪𑀸𑀯𑀳𑁂𑀢𑀼𑀓𑀁 𑀲𑀼𑀔𑀁 𑀏𑀓𑀻𑀪𑀸𑀯𑀲𑀼𑀔𑀁, 𑀢𑀤𑀢𑁆𑀣𑀁. 𑀕𑀡𑀲𑀗𑁆𑀕𑀡𑀺𑀓𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁.

𑀬𑀤𑀺 𑀉𑀢𑀼𑀬𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑁄, ‘‘𑀉𑀢𑀼 𑀘 𑀲𑀻𑀢𑀼𑀡𑁆𑀳’’𑀦𑁆𑀢𑀺 𑀲𑀻𑀢𑀼𑀡𑁆𑀳𑀧𑀝𑀺𑀖𑀸𑀢𑀁 𑀯𑀢𑁆𑀯𑀸 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀦𑀺𑀬𑀢𑀁 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦’’𑀦𑁆𑀢𑀺 𑀏𑀢𑁂𑀦 ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀻𑀢𑀼𑀡𑁆𑀳𑀁 𑀅𑀦𑀺𑀬𑀢𑀁 𑀓𑀤𑀸𑀘𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑀓𑀁, 𑀉𑀢𑀼𑀧𑀭𑀺𑀲𑁆𑀲𑀬𑁄 𑀧𑀦 𑀲𑀩𑁆𑀩𑀤𑀸𑀪𑀸𑀯𑀻 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀢𑀺 ‘‘𑀲𑀻𑀢𑀸𑀤𑀺𑀓𑁄, 𑀅𑀲𑀧𑁆𑀧𑀸𑀬𑁄’’𑀢𑀺 𑀘 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀺𑀯𑀝𑀗𑁆𑀕𑀡𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀅𑀧𑀭𑀺𑀕𑀼𑀢𑁆𑀢𑀺𑀬𑀸 𑀅𑀲𑀁𑀯𑀼𑀢𑀤𑁆𑀯𑀸𑀭𑀸𑀤𑀺𑀢𑀸𑀬 𑀧𑀸𑀓𑀝𑀧𑀭𑀺𑀲𑁆𑀲𑀬𑀸, 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀩𑀸𑀥𑀁 𑀓𑀭𑁂𑀬𑁆𑀬𑀼𑀁. 𑀬𑀢𑁆𑀣 𑀕𑀼𑀢𑁆𑀢𑁂 𑀲𑁂𑀦𑀸𑀲𑀦𑁂 𑀆𑀩𑀸𑀥𑀁 𑀦 𑀓𑀭𑁄𑀦𑁆𑀢𑀺. 𑀏𑀯𑀁 𑀚𑀸𑀦𑀺𑀢𑁆𑀯𑀸𑀢𑀺 𑀉𑀪𑀬𑀧𑀭𑀺𑀲𑁆𑀲𑀬𑀭𑀳𑀺𑀢𑀦𑁆𑀢𑀺 𑀏𑀯𑀁 𑀜𑀢𑁆𑀯𑀸 𑀧𑀝𑀺𑀲𑁂𑀯𑀦𑁆𑀢𑁄 𑀪𑀺𑀓𑁆𑀔𑀼 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀥𑀸𑀢𑀼𑀓𑁆𑀔𑁄𑀪𑀮𑀓𑁆𑀔𑀡𑀲𑁆𑀲, 𑀢𑀁𑀳𑁂𑀢𑀼𑀓𑀤𑀼𑀓𑁆𑀔𑀯𑁂𑀤𑀦𑀸𑀮𑀓𑁆𑀔𑀡𑀲𑁆𑀲 𑀯𑀸 𑀭𑁄𑀕𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀝𑀺𑀅𑀬𑀦𑀝𑁆𑀞𑁄. 𑀢𑁂𑀦𑀸𑀳 ‘‘𑀧𑀘𑁆𑀘𑀦𑀻𑀓𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺, 𑀯𑀽𑀧𑀲𑀫𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀲𑀧𑁆𑀧𑀺𑀆𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺. 𑀲𑀧𑁆𑀧𑀸𑀬𑀲𑁆𑀲𑀸𑀢𑀺 𑀳𑀺 𑀢𑀲𑁆𑀲 𑀯𑀺𑀓𑀸𑀭𑀯𑀽𑀧𑀲𑀫𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀯𑀺𑀥𑀸𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀢𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺. 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀻𑀢𑀺 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀡𑀓𑁂𑀳𑀺. 𑀯𑀺𑀯𑀝𑀧𑀭𑀺𑀓𑁆𑀔𑁂𑀧𑁄 𑀧𑀭𑀺𑀓𑁆𑀔𑀸 𑀉𑀟𑁆𑀟𑀸𑀧𑁄 𑀧𑀸𑀓𑀸𑀭𑁄 𑀏𑀲𑀺𑀓𑀸 𑀧𑀮𑀺𑀖𑁄 𑀧𑀸𑀓𑀸𑀭𑀧𑀢𑁆𑀣𑀡𑁆𑀟𑀺𑀮𑀦𑁆𑀢𑀺 𑀲𑀢𑁆𑀢 ‘‘𑀦𑀕𑀭𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀯𑀤𑀦𑁆𑀢𑀺. 𑀲𑀻𑀮𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀮𑀗𑁆𑀓𑀸𑀭𑁄 ¶ . 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀇𑀥 ‘‘𑀭𑀣𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀘 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀅𑀮𑀗𑁆𑀓𑀸𑀭𑀝𑁆𑀞𑁂𑀦 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀯𑀼𑀢𑁆𑀢𑀸. 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀭𑀡𑀸𑀦𑀺. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑁆𑀫𑀸 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀦𑁂𑀢𑀩𑁆𑀩𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀦𑀁 𑀧𑀭𑀺𑀢𑁄 𑀯𑀸𑀭𑀡𑀢𑁄. 𑀢𑁂𑀦𑀸𑀳 ‘‘𑀚𑀻𑀯𑀺𑀢…𑀧𑁂… 𑀭𑀓𑁆𑀔𑀡𑀢𑁄’’𑀢𑀺.

𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀺 𑀯𑀺𑀯𑀭𑀁, 𑀑𑀓𑀸𑀲𑁄𑀢𑀺 𑀅𑀢𑁆𑀣𑁄. 𑀯𑁂𑀭𑀺𑀓𑀸𑀦𑀁 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 ¶ 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑁂𑀯𑀓𑀸 𑀯𑀺𑀬 𑀭𑀓𑁆𑀔𑀡𑀢𑁄. 𑀅𑀲𑁆𑀲𑀸𑀢𑀺 𑀚𑀻𑀯𑀺𑀢𑀲𑁆𑀲. 𑀓𑀸𑀭𑀡𑀪𑀸𑀯𑀢𑁄𑀢𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄. 𑀭𑀲𑀸𑀬𑀦𑀪𑀽𑀢𑀁 𑀳𑀺 𑀪𑁂𑀲𑀚𑁆𑀚𑀁 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀢𑀺𑀬𑁂𑀯. 𑀬𑀤𑀺𑀧𑀺 𑀅𑀦𑀼𑀧𑁆𑀧𑀦𑁆𑀦𑀸 𑀏𑀯 𑀤𑀼𑀓𑁆𑀔𑀯𑁂𑀤𑀦𑀸 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑁂𑀦 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀦 𑀉𑀧𑁆𑀧𑀦𑁆𑀦𑀸 𑀢𑀸𑀲𑀁 𑀲𑀭𑀲𑁂𑀦𑁂𑀯 𑀪𑀺𑀚𑁆𑀚𑀦𑀢𑁄, 𑀉𑀧𑁆𑀧𑀦𑁆𑀦𑀲𑀤𑀺𑀲𑀸 𑀧𑀦 ‘‘𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁄, 𑀬𑀣𑀸 𑀲𑀸 𑀏𑀯 𑀢𑀺𑀢𑁆𑀢𑀺𑀭𑀺, 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀚𑀸𑀢𑀸𑀦𑀁 𑀪𑀽𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦’’𑀦𑁆𑀢𑀺. 𑀲𑀜𑁆𑀘𑀬𑀢𑁄 𑀧𑀝𑁆𑀞𑀸𑀬 𑀲𑁄 𑀥𑀸𑀢𑀼𑀓𑁆𑀔𑁄𑀪𑁄 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸. ‘‘𑀤𑀼𑀓𑁆𑀔𑀯𑁂𑀤𑀦𑀸’’𑀢𑀺 𑀯𑀢𑁆𑀯𑀸 𑀲𑀸 𑀅𑀓𑀼𑀲𑀮𑀲𑀪𑀸𑀯𑀸𑀧𑀺 𑀅𑀢𑁆𑀣𑀻𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀅𑀓𑀼𑀲𑀮𑀯𑀺𑀧𑀸𑀓𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀁. 𑀩𑁆𑀬𑀸𑀩𑀸𑀥𑀦𑀝𑁆𑀞𑁂𑀦 𑀩𑁆𑀬𑀸𑀩𑀸𑀥𑁄, 𑀩𑁆𑀬𑀸𑀩𑀸𑀥𑁄𑀯 𑀩𑁆𑀬𑀸𑀩𑀚𑁆𑀛𑀁, 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀏𑀢𑁆𑀣 𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀅𑀩𑁆𑀬𑀸𑀩𑀚𑁆𑀛𑀁, 𑀦𑀺𑀤𑁆𑀤𑀼𑀓𑁆𑀔𑀢𑀸. 𑀢𑁂𑀦𑀸𑀳 ‘‘𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸’’𑀢𑀺 𑀦𑀺𑀤𑁆𑀤𑀼𑀓𑁆𑀔𑀧𑀭𑀫𑀢𑀸𑀬𑀸𑀢𑀺. 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀭𑁄𑀕𑀦𑀺𑀫𑀺𑀢𑁆𑀢𑀓𑀁 𑀤𑀼𑀓𑁆𑀔𑀁.

𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀦𑀺𑀲𑁆𑀲𑀬𑀦𑀁 𑀧𑀭𑀺𑀪𑁄𑀕𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀧𑀭𑀺𑀪𑀼𑀜𑁆𑀚𑀫𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀯𑀢𑁆𑀢𑀦𑁆𑀢𑀻𑀢𑀺 𑀚𑀻𑀯𑀦𑁆𑀢𑀺. 𑀚𑀻𑀯𑀦𑀫𑁆𑀧𑀺 𑀳𑀺 𑀧𑀯𑀢𑁆𑀢𑀦𑀁, 𑀬𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 ‘‘𑀧𑀯𑀢𑁆𑀢𑀦𑀭𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀤𑀦𑀯𑀺𑀥𑀺𑀯𑀡𑁆𑀡𑀦𑀸

𑁧𑁯. 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀪𑁂𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀲𑀻𑀮𑀁 𑀧𑀼𑀦 𑀲𑀸𑀥𑀦𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀲𑀸𑀥𑀻𑀬𑀢𑀺 𑀲𑀫𑁆𑀧𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀲𑀸𑀥𑀦𑀁, 𑀲𑀤𑁆𑀥𑀸 𑀲𑀸𑀥𑀦𑀁 𑀏𑀢𑀲𑁆𑀲𑀸𑀢𑀺 𑀲𑀤𑁆𑀥𑀸𑀲𑀸𑀥𑀦𑁄. 𑀦𑀦𑀼 𑀘 𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀳𑀺𑀧𑀺 𑀯𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀦 𑀲𑀺𑀚𑁆𑀛𑀢𑀻𑀢𑀺? 𑀲𑀘𑁆𑀘𑀁 𑀦 𑀲𑀺𑀚𑁆𑀛𑀢𑀺, 𑀲𑀤𑁆𑀥𑀸𑀬 𑀧𑀦 𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳

‘‘𑀲𑀸𑀯𑀓𑀯𑀺𑀲𑀬𑀸𑀢𑀻𑀢𑀢𑁆𑀢𑀸 ¶ 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺. 𑀕𑀭𑀼𑀓𑀮𑀳𑀼𑀓𑀸𑀤𑀺𑀪𑁂𑀤𑁂 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀢𑀲𑁆𑀲 𑀢𑀲𑁆𑀲 𑀅𑀧𑀭𑀸𑀥𑀲𑁆𑀲 𑀅𑀦𑀼𑀭𑀽𑀧𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀦𑀸𑀫 𑀲𑀸𑀯𑀓𑀸𑀦𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁 𑀏𑀯 𑀯𑀺𑀲𑀬𑁄. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀢𑀲𑁆𑀲 𑀓𑀸𑀮𑁄𑀧𑀺 𑀦𑀸𑀫 𑀲𑀸𑀯𑀓𑀸𑀦𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁 𑀏𑀯 𑀯𑀺𑀲𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀧𑀝𑀺𑀓𑁆𑀔𑁂𑀧𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦’’𑀦𑁆𑀢𑀺 𑀆𑀳. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢, 𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁄𑀯 𑀢𑀢𑁆𑀣 𑀓𑀸𑀮𑀁 ¶ 𑀚𑀸𑀦𑀺𑀲𑁆𑀲𑀢𑀻’’𑀢𑀺 (𑀧𑀸𑀭𑀸. 𑁨𑁧). 𑀢𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 ‘‘𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀫, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀸𑀫, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀸𑀫𑀸’’𑀢𑀺 (𑀧𑀸𑀭𑀸. 𑁫𑁬𑁫) 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀤𑁆𑀥𑀸𑀬𑀸𑀢𑀺 𑀲𑀤𑁆𑀤𑀳𑀦𑁂𑀦 𑀲𑀢𑁆𑀣𑀭𑀺, 𑀥𑀫𑁆𑀫𑁂 𑀘 𑀲𑀤𑁆𑀥𑀸𑀬 𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑁂𑀦. 𑀚𑀻𑀯𑀺𑀢𑁂𑀧𑀺 𑀧𑀕𑁂𑀯 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀺𑀓𑀻𑀯 𑀅𑀡𑁆𑀟𑀦𑁆𑀢𑀺 𑀓𑀺𑀓𑀻𑀲𑀓𑀼𑀡𑀺𑀓𑀸 𑀯𑀺𑀬 𑀅𑀢𑁆𑀢𑀦𑁄 𑀅𑀡𑁆𑀟𑀁. 𑀲𑀸 𑀓𑀺𑀭 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀡𑁆𑀟𑀫𑁂𑀯 𑀭𑀓𑁆𑀔𑀢𑀺. 𑀘𑀫𑀭𑀻𑀯 𑀯𑀸𑀮𑀥𑀺𑀦𑁆𑀢𑀺 𑀘𑀫𑀭𑀻𑀫𑀺𑀕𑁄 𑀯𑀺𑀬 𑀅𑀢𑁆𑀢𑀦𑁄 𑀯𑀸𑀮𑀥𑀺𑀁. 𑀘𑀫𑀭𑀻𑀫𑀺𑀕𑀸 𑀓𑀺𑀭 𑀩𑁆𑀬𑀸𑀥𑁂𑀦 𑀧𑀭𑀺𑀧𑀸𑀢𑀺𑀬𑀫𑀸𑀦𑀸 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀡𑁆𑀟𑀓𑀕𑀼𑀫𑁆𑀩𑀸𑀤𑀻𑀲𑀼 𑀮𑀕𑁆𑀕𑀁 𑀅𑀢𑁆𑀢𑀦𑁄 𑀯𑀸𑀮𑀫𑁂𑀯 𑀭𑀓𑁆𑀔𑀦𑁆𑀢𑀺. 𑀧𑀺𑀬𑀁𑀯 𑀧𑀼𑀢𑁆𑀢𑀁 𑀏𑀓𑀓𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀏𑀓𑀧𑀼𑀢𑁆𑀢𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀏𑀓𑀧𑀼𑀢𑁆𑀢𑀁, 𑀏𑀓𑀦𑀬𑀦𑁄 𑀘 𑀢𑀁 𑀏𑀓𑀦𑀬𑀦𑀁 𑀲𑀼𑀝𑁆𑀞𑀼𑀢𑀭𑀁 𑀭𑀓𑁆𑀔𑀢𑀺. 𑀢𑀣𑁂𑀯 𑀲𑀻𑀮𑀁 𑀅𑀦𑀼𑀭𑀓𑁆𑀔𑀫𑀸𑀦𑀓𑀸𑀢𑀺 𑀅𑀦𑀼𑀓𑀫𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀧𑁂𑀲𑀮𑀸𑀢𑀺 𑀲𑀼𑀝𑁆𑀞𑀼 𑀧𑀺𑀬𑀲𑀻𑀮𑀸. 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀤𑀳𑀭𑀫𑀚𑁆𑀛𑀺𑀫𑀣𑁂𑀭𑀓𑀸𑀮𑁂𑀲𑀼. 𑀙𑀦𑁆𑀦𑀫𑁆𑀧𑀺 𑀕𑀸𑀭𑀯𑀸𑀦𑀁 𑀯𑀲𑁂𑀦 𑀲𑀕𑀸𑀭𑀯𑀸, 𑀕𑀭𑀼𑀓𑀸𑀭𑀯𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀏𑀯𑀫𑁂𑀯. 𑀫𑀫 𑀲𑀸𑀯𑀓𑀸𑀢𑀺 𑀅𑀭𑀺𑀬𑀲𑀸𑀯𑀓𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀥𑀼𑀯𑀲𑀻𑀮𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀚𑀻𑀯𑀺𑀢𑀳𑁂𑀢𑀼𑀧𑀺 𑀲𑀻𑀮𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀦𑁂.

𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀻 𑀦𑀸𑀫 𑀯𑀺𑀜𑁆𑀛𑀸𑀝𑀯𑀻. 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀅𑀝𑀯𑀻𑀢𑀺 𑀓𑁂𑀘𑀺. 𑀣𑁂𑀭𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀜𑁆𑀜𑀸𑀢𑀁 𑀏𑀓𑀁 𑀣𑁂𑀭𑀁. 𑀦𑀺𑀧𑀚𑁆𑀚𑀸𑀧𑁂𑀲𑀼𑀁 𑀕𑀦𑁆𑀢𑁆𑀯𑀸 𑀓𑀲𑁆𑀲𑀘𑀺 𑀫𑀸 𑀆𑀭𑁄𑀘𑁂𑀬𑁆𑀬𑀸𑀢𑀺.

𑀧𑀽𑀢𑀺𑀮𑀢𑀸𑀬𑀸𑀢𑀺 ¶ 𑀕𑀴𑁄𑀘𑀺𑀮𑀢𑀸𑀬. 𑀲𑀫𑀲𑀻𑀲𑀻𑀢𑀺 𑀚𑀻𑀯𑀺𑀢𑀲𑀫𑀲𑀻𑀲𑀻. 𑀬𑀲𑁆𑀲 𑀳𑀺 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀁 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀢𑀢𑁄 𑀏𑀓𑀽𑀦𑀯𑀻𑀲𑀢𑀺𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑁄𑀢𑁆𑀢𑀭𑀡𑁂 𑀯𑀝𑁆𑀝𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀲𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 ‘‘𑀚𑀻𑀯𑀺𑀢𑀲𑀫𑀲𑀻𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀘 𑀣𑁂𑀭𑁄 𑀢𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺. 𑀅𑀪𑀬𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀪𑀺𑀜𑁆𑀜𑁄. 𑀢𑀲𑁆𑀫𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀻𑀢𑀺 𑀯𑀤𑀦𑁆𑀢𑀺. 𑀅𑀧𑁆𑀧𑁂𑀯𑀸𑀢𑀺 𑀅𑀧𑁆𑀧𑁂𑀯 𑀦𑀸𑀫 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀚𑀳𑁂𑀬𑁆𑀬, 𑀦 𑀪𑀺𑀦𑁆𑀤𑁂𑀢𑀺 𑀦 𑀪𑀺𑀦𑁆𑀤𑁂𑀬𑁆𑀬, 𑀦 𑀯𑀻𑀢𑀺𑀓𑁆𑀓𑀫𑁂𑀬𑁆𑀬.

𑀲𑀢𑀺𑀬𑀸 ¶ 𑀅𑀥𑀺𑀝𑁆𑀞𑀺𑀢𑀸𑀦𑀦𑁆𑀢𑀺 𑀧𑀕𑁂𑀯 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀆𑀭𑀓𑁆𑀔𑀯𑀲𑁂𑀦 𑀅𑀥𑀺𑀝𑁆𑀞𑀺𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀅𑀦𑀦𑁆𑀯𑀸𑀲𑁆𑀲𑀯𑀦𑀻𑀬𑀢𑁄𑀢𑀺 𑀤𑁆𑀯𑀸𑀭𑀪𑀸𑀯𑁂𑀦 𑀅𑀪𑀺𑀚𑁆𑀛𑀸𑀤𑀻𑀳𑀺 𑀅𑀦𑀦𑀼𑀩𑀦𑁆𑀥𑀺𑀢𑀩𑁆𑀩𑀢𑁄. 𑀯𑀭𑀦𑁆𑀢𑀺 𑀲𑁂𑀝𑁆𑀞𑀁. 𑀢𑀢𑁆𑀢𑀸𑀬𑀸𑀢𑀺 𑀉𑀡𑁆𑀳𑀸𑀬. 𑀆𑀤𑀺𑀢𑁆𑀢𑀸𑀬𑀸𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀺𑀢𑁆𑀢𑀸𑀬. 𑀲𑀫𑁆𑀧𑀚𑁆𑀚𑀮𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀚𑀮𑀦𑁆𑀢𑀺𑀬𑀸. 𑀲𑀚𑁄𑀢𑀺𑀪𑀽𑀢𑀸𑀬𑀸𑀢𑀺 𑀏𑀓𑀚𑀸𑀮𑀻𑀪𑀽𑀢𑀸𑀬. 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀲𑀩𑁆𑀩𑀲𑁄 𑀆𑀫𑀝𑁆𑀞𑀁, 𑀅𑀜𑁆𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀢𑁆𑀯𑁂𑀯 𑀯𑀭𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀭𑀽𑀧𑁂𑀲𑀽𑀢𑀺 𑀭𑀽𑀧𑀸𑀭𑀫𑁆𑀫𑀡𑁂𑀲𑀼. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀯𑀲𑁂𑀦 𑀉𑀧𑁆𑀧𑀸𑀤𑀦𑁂𑀦 𑀧𑀸𑀓𑀝𑀻𑀓𑀭𑀡𑀯𑀲𑁂𑀦 𑀲𑀼𑀪𑀸𑀤𑀺𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀅𑀣 𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀅𑀦𑀼𑀩𑁆𑀬𑀜𑁆𑀚𑀦𑀢𑁄, 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀼𑀪𑀸𑀤𑀺𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁. 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀧𑀯𑀢𑁆𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀳𑀺 𑀧𑀯𑀢𑁆𑀢𑀲𑁆𑀲. 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀚𑀯𑀦𑀯𑀺𑀜𑁆𑀜𑀸𑀡𑀲𑁆𑀲. 𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀁 𑀦𑀺𑀲𑁂𑀥𑁂𑀦𑁆𑀢𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀁𑀯𑀺𑀳𑀺𑀢𑀲𑀸𑀔𑀸𑀧𑀭𑀺𑀯𑀸𑀭𑀦𑁆𑀢𑀺 𑀲𑀫𑁆𑀫𑀸 𑀅𑀯𑀺𑀳𑀺𑀢𑀯𑀢𑀺𑀧𑀭𑀺𑀓𑁆𑀔𑁂𑀧𑀁. 𑀧𑀭𑀲𑁆𑀲𑀳𑀸𑀭𑀻𑀳𑀻𑀢𑀺 𑀧𑀭𑀲𑀦𑁆𑀢𑀓𑀸𑀯𑀳𑀸𑀭𑀓𑁂𑀳𑀺 𑀘𑁄𑀭𑁂𑀳𑀺. 𑀲𑀫𑀢𑀺𑀯𑀺𑀚𑁆𑀛𑀢𑀻𑀢𑀺 𑀲𑀩𑁆𑀩𑀲𑁄 𑀅𑀢𑀺𑀯𑀺𑀚𑁆𑀛𑀢𑀺 𑀅𑀦𑀼𑀧𑀯𑀺𑀲𑀢𑀺.

𑀭𑀽𑀧𑁂𑀲𑀽𑀢𑀺 𑀭𑀽𑀧𑀳𑁂𑀢𑀼 𑀭𑀽𑀧𑀦𑀺𑀫𑀺𑀢𑁆𑀢𑀁. 𑀉𑀧𑁆𑀧𑀚𑁆𑀚𑀦𑀓𑀅𑀦𑀢𑁆𑀣𑀢𑁄 𑀭𑀓𑁆𑀔 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼. 𑀏𑀢𑁂 𑀳𑀺 𑀤𑁆𑀯𑀸𑀭𑀸𑀢𑀺 𑀏𑀢𑁂 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀸. 𑀲𑀢𑀺𑀓𑀯𑀸𑀝𑁂𑀦 𑀅𑀲𑀁𑀯𑀼𑀢𑀢𑁆𑀢𑀸 𑀯𑀺𑀯𑀝𑀸. 𑀢𑀢𑁄 𑀏𑀯 𑀅𑀭𑀓𑁆𑀔𑀺𑀢𑀸. 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁂𑀦 𑀢𑀁𑀲𑀫𑀗𑁆𑀕𑀺𑀦𑀁 𑀳𑀦𑀦𑁆𑀢𑀻𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀁. 𑀏𑀢𑁂 𑀯𑀸 𑀭𑀽𑀧𑀸𑀤𑀬𑁄. 𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀤𑁆𑀯𑀸𑀭𑀸 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀸. 𑀢𑁂 𑀓𑀻𑀤𑀺𑀲𑀸 𑀯𑀺𑀯𑀝𑀸 𑀅𑀭𑀓𑁆𑀔𑀺𑀢𑀸 𑀅𑀲𑀁𑀯𑀼𑀢𑀘𑀓𑁆𑀔𑀸𑀤𑀺𑀳𑁂𑀢𑀼𑀁 𑀢𑀁𑀲𑀫𑀗𑁆𑀕𑀺𑀦𑀁 𑀳𑀦𑀦𑁆𑀢𑀻𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀕𑀸𑀭𑀦𑁆𑀢𑀺 𑀕𑁂𑀳𑀁. 𑀤𑀼𑀘𑁆𑀙𑀦𑁆𑀦𑀦𑁆𑀢𑀺 𑀦 𑀲𑀫𑁆𑀫𑀸 𑀙𑀸𑀤𑀺𑀢𑀁. 𑀅𑀪𑀸𑀯𑀺𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀭𑀳𑀺𑀢𑀁.

𑀲𑀫𑁆𑀧𑀸𑀤𑀺𑀢𑁂𑀢𑀺𑀆𑀤𑀺𑀲𑁆𑀲 ¶ 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑁄 𑀅𑀢𑀺𑀉𑀓𑁆𑀓𑀝𑁆𑀞𑀤𑁂𑀲𑀦𑀸 𑀫𑀕𑁆𑀕𑁂𑀦𑀸𑀕𑀢𑀲𑀤𑀺𑀲𑀢𑁆𑀢𑀸. 𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 ‘‘𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑁄.

𑀅𑀥𑀼𑀦𑀸𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀦 𑀘𑀺𑀭𑀧𑀩𑁆𑀩𑀚𑀺𑀢𑁂𑀦, 𑀦𑀯𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀻𑀢𑀺 𑀓𑀸𑀫𑀭𑀸𑀕𑀕𑁆𑀕𑀺𑀦𑀸 𑀧𑀭𑀺𑀟𑀬𑁆𑀳𑀸𑀫𑀺. 𑀲𑁄 𑀘 𑀧𑀦 𑀤𑀸𑀳𑁄 𑀇𑀤𑀸𑀦𑀺 𑀘𑀺𑀢𑁆𑀢𑀕𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀻’’𑀢𑀺. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀸. 𑀦𑀺𑀩𑁆𑀩𑀸𑀧𑀦𑀦𑁆𑀢𑀺 𑀢𑀲𑁆𑀲 𑀦𑀺𑀩𑁆𑀩𑀸𑀧𑀦𑀼𑀧𑀸𑀬𑀁. 𑀕𑁄𑀢𑀫𑀸𑀢𑀺 𑀣𑁂𑀭𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑀲𑀜𑁆𑀜𑀸𑀬 ¶ 𑀯𑀺𑀧𑀭𑀺𑀬𑁂𑀲𑀸𑀢𑀺 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀲𑀜𑁆𑀜𑀸𑀯𑀺𑀧𑀭𑀺𑀬𑁂𑀲𑀳𑁂𑀢𑀼 𑀯𑀺𑀧𑀭𑀻𑀢𑀲𑀜𑁆𑀜𑀸𑀦𑀺𑀫𑀺𑀢𑁆𑀢𑀁. 𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺 𑀓𑀻𑀤𑀺𑀲𑀁? 𑀭𑀸𑀕𑀽𑀧𑀲𑀜𑁆𑀳𑀺𑀢𑀁 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺 𑀦 𑀫𑀦𑀲𑀺 𑀓𑀭𑁄𑀳𑀺. 𑀦 𑀓𑁂𑀯𑀮𑀁 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲𑀸𑀫𑀦𑀲𑀺𑀓𑀸𑀭𑁄 𑀏𑀯, 𑀅𑀣 𑀔𑁄 𑀅𑀲𑀼𑀪𑀪𑀸𑀯𑀦𑀸𑀬 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺. 𑀓𑀣𑀁? 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁 𑀬𑀣𑀸 𑀢𑀁 𑀅𑀲𑀼𑀪𑀸𑀭𑀫𑁆𑀫𑀡𑁂 𑀯𑀺𑀓𑁆𑀔𑁂𑀧𑀸𑀪𑀸𑀯𑁂𑀦 𑀏𑀓𑀕𑁆𑀕𑀁, 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀪𑀸𑀯𑁂𑀦 𑀲𑀼𑀲𑀫𑀸𑀳𑀺𑀢𑀜𑁆𑀘 𑀳𑁄𑀢𑀺, 𑀏𑀯𑀁 𑀪𑀸𑀯𑁂𑀳𑀻𑀢𑀺. 𑀏𑀯𑀁 𑀲𑀫𑀣𑀪𑀸𑀯𑀦𑀸𑀬 𑀓𑀸𑀫𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀘𑁆𑀙𑁂𑀤𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲𑀸𑀢𑀺 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑁂 𑀅𑀯𑀺𑀥𑁂𑀬𑁆𑀬𑀓𑀢𑀸𑀬 ‘‘𑀧𑀭𑁂’’𑀢𑀺 𑀧𑀲𑁆𑀲. 𑀅𑀦𑀺𑀘𑁆𑀘𑀢𑀸𑀬 𑀧𑀦 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀲𑀪𑀸𑀯𑀢𑁆𑀢𑀸, 𑀅𑀢𑁆𑀢𑀯𑀺𑀭𑀳𑀢𑁄 𑀘 𑀦𑁄 𑀅𑀢𑁆𑀢𑀢𑁄 𑀧𑀲𑁆𑀲. 𑀏𑀯𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁 𑀢𑁂𑀪𑀽𑀫𑀓𑀲𑁆𑀲 𑀅𑀪𑀺𑀪𑀯𑀦𑀢𑁄 𑀫𑀳𑀸𑀯𑀺𑀲𑀬𑀢𑀸𑀬 𑀫𑀳𑀸𑀭𑀸𑀕𑀁 𑀯𑀽𑀧𑀲𑀫𑁂𑀳𑀺. 𑀬𑀣𑀸 𑀏𑀢𑀭𑀳𑀺, 𑀏𑀯𑀁 𑀫𑀸 𑀟𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀤𑀴𑁆𑀳𑀢𑀭𑀁 𑀭𑀸𑀕𑀯𑀺𑀦𑁄𑀤𑀦𑁂 𑀦𑀺𑀬𑁄𑀚𑁂𑀲𑀺.

𑀏𑀯𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑁂 𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀁 𑀢𑀁 𑀲𑀼𑀲𑀫𑁆𑀧𑀸𑀤𑀺𑀢𑀁 𑀳𑁄𑀢𑀻𑀢𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀣𑁂𑀭𑁂 𑀦𑀺𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀮𑁂𑀡𑀁 𑀦 𑀉𑀮𑁆𑀮𑁄𑀓𑀺𑀢𑀧𑀼𑀩𑁆𑀩’’𑀦𑁆𑀢𑀺 𑀇𑀤𑀁 𑀲𑀩𑁆𑀩𑀢𑁆𑀣𑁂𑀯 𑀣𑁂𑀭𑀲𑁆𑀲 𑀬𑀼𑀕𑀫𑀢𑁆𑀢𑀤𑀲𑁆𑀲𑀺𑀢𑀸𑀬 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀣𑁂𑀭𑁄 𑀲𑁂𑀦𑀸𑀲𑀦𑀁 𑀦 𑀲𑁄𑀥𑁂𑀢𑀺 ¶ ? ‘‘𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀬𑁄 𑀏𑀯 𑀓𑀺𑀭𑀲𑁆𑀲 𑀲𑁂𑀦𑀸𑀲𑀦𑀁 𑀲𑁄𑀥𑁂𑀦𑁆𑀢𑀺. 𑀅𑀲𑁆𑀲 𑀦𑀸𑀕𑀭𑀼𑀓𑁆𑀔𑀲𑁆𑀲.

𑀢𑀲𑁆𑀫𑀺𑀁 𑀕𑀸𑀫𑁂𑀢𑀺 𑀫𑀳𑀸𑀕𑀸𑀫𑁂. 𑀢𑀭𑀼𑀡𑀸 𑀣𑀜𑁆𑀜𑀧𑀺𑀯𑀦𑀓𑀸 𑀧𑀼𑀢𑁆𑀢𑀥𑀻𑀢𑀭𑁄 𑀬𑀸𑀲𑀁 𑀢𑀸 𑀢𑀭𑀼𑀡𑀧𑀼𑀢𑁆𑀢𑀸, 𑀢𑀸𑀲𑀁. 𑀮𑀜𑁆𑀚𑀸𑀧𑁂𑀲𑀻𑀢𑀺 𑀣𑀦𑀧𑀝𑁆𑀝𑀺𑀓𑀸𑀬 𑀣𑀦𑁂 𑀩𑀦𑁆𑀥𑀸𑀧𑁂𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀚𑀸𑀧𑁂𑀲𑀺. 𑀭𑀸𑀚𑀸 𑀣𑁂𑀭𑀁 𑀘𑀺𑀭𑀢𑀭𑀁 𑀤𑀝𑁆𑀞𑀼𑀁 𑀓𑀸𑀮𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 ‘‘𑀲𑁆𑀯𑁂 𑀲𑀻𑀮𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀣𑁂𑀭𑁄 𑀭𑀜𑁆𑀜𑁄 𑀘 𑀤𑁂𑀯𑀺𑀬𑀸 𑀘 𑀯𑀦𑁆𑀤𑀦𑀓𑀸𑀮𑁂 𑀲𑀢𑁆𑀢𑀸𑀓𑀸𑀭𑀫𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀇𑀢𑁆𑀣𑀻 𑀧𑀼𑀭𑀺𑀲𑁄𑀢𑀺 𑀧𑀦 𑀯𑀺𑀯𑁂𑀓𑀁 𑀦 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀯𑀯𑀢𑁆𑀣𑀸𑀦𑀁 𑀦 𑀓𑀭𑁄𑀫𑀻’’𑀢𑀺. ‘‘𑀅𑀳𑁄 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀯𑀢𑀸𑀬𑀁 𑀅𑀬𑁆𑀬𑁄’’𑀢𑀺 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀢𑀺𑀧𑀭𑀺𑀲𑀼𑀤𑁆𑀥𑀁 𑀧𑀸𑀓𑀝𑀦𑁆𑀢𑀺 𑀲𑀧𑁆𑀧𑀸𑀬𑀮𑀸𑀪𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀁 𑀯𑀺𑀪𑀽𑀢𑀁 𑀅𑀳𑁄𑀲𑀺. 𑀲𑀓𑀮𑀁 𑀧𑀩𑁆𑀩𑀢𑀁 𑀉𑀦𑁆𑀦𑀸𑀤𑀬𑀦𑁆𑀢𑁄𑀢𑀺 𑀧𑀣𑀯𑀺𑀓𑀫𑁆𑀧𑀦𑁂𑀦 𑀲𑀓𑀮𑀁 𑀧𑀩𑁆𑀩𑀢𑀁 𑀏𑀓𑀁 𑀦𑀺𑀦𑁆𑀦𑀸𑀤𑀁 𑀓𑀭𑁄𑀦𑁆𑀢𑁄. 𑀢𑀦𑁆𑀦𑀺𑀯𑀸𑀲𑀺𑀤𑁂𑀯𑀢𑀸𑀦𑀁 𑀲𑀸𑀥𑀼𑀓𑀸𑀭𑀤𑀸𑀦𑁂𑀦𑀸𑀢𑀺 𑀓𑁂𑀘𑀺. 𑀪𑀦𑁆𑀢𑁄𑀢𑀺 𑀅𑀦𑀯𑀝𑁆𑀞𑀺𑀢𑁄. 𑀩𑀸𑀮𑁄𑀢𑀺 𑀢𑀭𑀼𑀡𑀤𑀸𑀭𑀓𑁄. 𑀉𑀢𑁆𑀭𑀲𑁆𑀢𑁄𑀢𑀺 𑀜𑀸𑀢𑀓𑁂𑀳𑀺 𑀯𑀺𑀦𑀸𑀪𑀸𑀯𑁂𑀦 𑀲𑀦𑁆𑀢𑁆𑀭𑀲𑁆𑀢𑁄.

𑀯𑀺𑀲𑀕𑀡𑁆𑀟𑀓𑀭𑁄𑀕𑁄𑀢𑀺 ¶ 𑀣𑀦𑀓𑀦𑁆𑀤𑀴𑀭𑁄𑀕𑀫𑀸𑀳. 𑀫𑀸𑀲𑀭𑁄𑀕𑀸𑀤𑀺𑀓𑁄𑀧𑀺 𑀯𑀺𑀲𑀕𑀡𑁆𑀟𑀓𑀭𑁄𑀕𑁄𑀢𑀺 𑀯𑀤𑀦𑁆𑀢𑀺. 𑀬𑀢𑁄 𑀧𑀩𑁆𑀩𑀚𑀺𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀻𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀦𑀺. 𑀢𑁂𑀲𑀼 𑀳𑀺 𑀪𑀺𑀦𑁆𑀦𑁂𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺 𑀆𑀭𑀓𑁆𑀔𑀸𑀪𑀸𑀯𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑁂𑀯 𑀯𑀸 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀲𑁆𑀲 𑀤𑁆𑀯𑀸𑀭𑀪𑀽𑀢𑀸𑀦𑀺 𑀪𑀺𑀦𑁆𑀦𑀸𑀦𑀺 𑀦𑀸𑀫 𑀢𑀁𑀲𑀫𑀗𑁆𑀕𑀺𑀦𑁄 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄, 𑀯𑀺𑀧𑀭𑀺𑀬𑀸𑀬𑀢𑁄 𑀅𑀪𑀺𑀦𑁆𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀸 𑀅𑀬𑁄𑀦𑀺𑀲𑁄 𑀉𑀧𑀲𑀁𑀳𑀸𑀭𑁄 𑀪𑁂𑀤𑀦𑀁, 𑀬𑁄𑀦𑀺𑀲𑁄 𑀉𑀧𑀲𑀁𑀳𑀸𑀭𑁄 𑀅𑀪𑁂𑀤𑀦𑀦𑁆𑀢𑀺 𑀅𑀧𑀭𑁂. 𑀫𑀺𑀢𑁆𑀢𑀢𑁆𑀣𑁂𑀭𑁄𑀯𑀸𑀢𑀺 𑀫𑀳𑀸𑀫𑀺𑀢𑁆𑀢𑀢𑁆𑀣𑁂𑀭𑁄 𑀯𑀺𑀬. 𑀯𑀭𑁂𑀢𑀺 𑀲𑁂𑀝𑁆𑀞𑁂.

𑀢𑀣𑀸 𑀯𑀻𑀭𑀺𑀬𑁂𑀦𑀸𑀢𑀺 𑀢𑀣𑀸-𑀲𑀤𑁆𑀤𑁂𑀦 𑀯𑀻𑀭𑀺𑀬𑀁 𑀯𑀺𑀲𑁂𑀲𑁂𑀢𑀺. 𑀬𑀣𑀸 𑀲𑀢𑀺 𑀅𑀦𑀯𑀚𑁆𑀚𑀮𑀓𑁆𑀔𑀡𑀸𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀸𑀥𑀦𑀁, 𑀢𑀣𑀸 𑀯𑀻𑀭𑀺𑀬𑀁 𑀅𑀦𑀯𑀚𑁆𑀚𑀮𑀓𑁆𑀔𑀡𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀸𑀥𑀦𑀦𑁆𑀢𑀺. 𑀯𑀻𑀭𑀺𑀬𑀸𑀧𑁂𑀓𑁆𑀔𑀫𑁂𑀯 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀲𑀫𑁆𑀫𑀸𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸’’𑀢𑀺. 𑀅𑀬𑀼𑀢𑁆𑀢𑀸 𑀏𑀲𑀦𑀸 𑀅𑀦𑁂𑀲𑀦𑀸, 𑀬𑀣𑀸𑀯𑀼𑀢𑁆𑀢𑀫𑀺𑀘𑁆𑀙𑀸𑀚𑀻𑀯𑀲𑀗𑁆𑀕𑀳𑀸. 𑀲𑀸 𑀏𑀯 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀦 𑀧𑀢𑀺𑀭𑀽𑀧𑀸𑀢𑀺 𑀅𑀧𑁆𑀧𑀢𑀺𑀭𑀽𑀧𑀁, 𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁. 𑀅𑀣 𑀯𑀸 𑀧𑀢𑀺𑀭𑀽𑀧𑀯𑀺𑀭𑁄𑀥𑀺𑀦𑀻 𑀅𑀧𑁆𑀧𑀢𑀺𑀭𑀽𑀧𑀸, 𑀧𑀭𑀺𑀕𑁆𑀕𑀳𑀺𑀢𑀥𑀼𑀢𑀗𑁆𑀕𑀲𑁆𑀲 ¶ 𑀥𑀼𑀢𑀗𑁆𑀕𑀦𑀺𑀬𑀫𑀯𑀺𑀭𑁄𑀥𑀺𑀦𑀻 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀮𑁆𑀮𑁂𑀔𑀯𑀺𑀓𑁄𑀧𑀺𑀦𑀻 𑀧𑀝𑀺𑀧𑀢𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀅𑀦𑁂𑀲𑀦𑀁, 𑀅𑀧𑁆𑀧𑀢𑀺𑀭𑀽𑀧𑀜𑁆𑀘 𑀧𑀳𑀸𑀬𑀸𑀢𑀺. 𑀧𑀝𑀺𑀲𑁂𑀯𑀫𑀸𑀦𑁂𑀦 𑀧𑀭𑀺𑀯𑀚𑁆𑀚𑀬𑀢𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀭𑀺𑀲𑀼𑀤𑁆𑀥𑀼𑀧𑁆𑀧𑀸𑀤𑁂’’𑀢𑀺 𑀇𑀫𑀺𑀦𑀸𑀯 𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀁 𑀧𑀭𑀺𑀲𑀼𑀤𑁆𑀥𑀸𑀬 𑀲𑀫𑀼𑀝𑁆𑀞𑀸𑀦𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 ‘‘𑀥𑀫𑁆𑀫𑀤𑁂𑀲𑀦𑀸𑀤𑀻𑀳𑀺 𑀘𑀲𑁆𑀲 𑀕𑀼𑀡𑁂𑀳𑀺 𑀧𑀲𑀦𑁆𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀩𑀸𑀳𑀼𑀲𑀘𑁆𑀘𑀯𑀢𑁆𑀢𑀧𑀭𑀺𑀧𑀽𑀭𑀡𑀇𑀭𑀺𑀬𑀸𑀧𑀣𑀲𑀫𑁆𑀧𑀢𑁆𑀢𑀺𑀆𑀤𑀻𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀥𑀼𑀢𑀕𑀼𑀡𑁂 𑀘𑀲𑁆𑀲 𑀧𑀲𑀦𑁆𑀦𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀺𑀢𑁆𑀢𑀲𑀼𑀳𑀚𑁆𑀚𑀧𑀁𑀲𑀼𑀓𑀽𑀮𑀘𑀭𑀺𑀬𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀥𑀼𑀢𑀗𑁆𑀕𑀦𑀺𑀬𑀫𑀸𑀦𑀼𑀮𑁄𑀫𑁂𑀦𑀸𑀢𑀺 𑀢𑀁𑀢𑀁𑀥𑀼𑀢𑀗𑁆𑀕𑀦𑀺𑀬𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑀯𑀲𑁂𑀦, 𑀅𑀯𑀺𑀓𑁄𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀳𑀺𑀘𑁆𑀙𑀲𑁆𑀲𑁂𑀯 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀸, 𑀦 𑀅𑀧𑁆𑀧𑀺𑀘𑁆𑀙𑀲𑁆𑀲. 𑀅𑀧𑁆𑀧𑀺𑀘𑁆𑀙𑀢𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀩𑁆𑀬𑀸𑀥𑀺𑀯𑀽𑀧𑀲𑀫𑀢𑁆𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀽𑀢𑀺𑀳𑀭𑀺𑀢𑀓𑀻𑀢𑀺 𑀧𑀽𑀢𑀺𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁, 𑀧𑀽𑀢𑀺𑀪𑀸𑀯𑁂𑀦 𑀯𑀸 𑀙𑀟𑁆𑀟𑀺𑀢𑀁 𑀳𑀭𑀺𑀢𑀓𑀁. 𑀅𑀭𑀺𑀬𑀯𑀁𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺, 𑀅𑀭𑀺𑀬𑀯𑀁𑀲𑁂 𑀯𑀸 𑀦𑀺𑀬𑀼𑀢𑁆𑀢𑁄𑀢𑀺 𑀅𑀭𑀺𑀬𑀯𑀁𑀲𑀺𑀓𑁄, 𑀧𑀘𑁆𑀘𑀬𑀕𑁂𑀥𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸 𑀉𑀢𑁆𑀢𑀫𑁄 𑀘 𑀲𑁄 𑀅𑀭𑀺𑀬𑀯𑀁𑀲𑀺𑀓𑁄 𑀘𑀸𑀢𑀺 𑀉𑀢𑁆𑀢𑀫𑀅𑀭𑀺𑀬𑀯𑀁𑀲𑀺𑀓𑁄. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀧𑀭𑀺𑀕𑁆𑀕𑀳𑀺𑀢𑀸𑀧𑀭𑀺𑀕𑁆𑀕𑀳𑀺𑀢𑀥𑀼𑀢𑀗𑁆𑀕𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺.

𑀦𑀺𑀫𑀺𑀢𑁆𑀢𑀁 𑀦𑀸𑀫 𑀧𑀘𑁆𑀘𑀬𑁂 𑀉𑀤𑁆𑀤𑀺𑀲𑁆𑀲 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀜𑀸𑀬𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁. 𑀑𑀪𑀸𑀲𑁄 𑀦𑀸𑀫 ¶ 𑀉𑀚𑀼𑀓𑀫𑁂𑀯 𑀅𑀓𑀣𑁂𑀢𑁆𑀯𑀸 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑀺𑀪𑀽𑀢𑁄 𑀳𑁄𑀢𑀺, 𑀏𑀯𑀁 𑀑𑀪𑀸𑀲𑀦𑀁. 𑀧𑀭𑀺𑀓𑀣𑀸 𑀦𑀸𑀫 𑀧𑀭𑀺𑀬𑀸𑀬𑁂𑀦 𑀓𑀣𑀦𑀁. 𑀢𑀣𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁.

𑀤𑁆𑀯𑀸𑀭𑀁 𑀤𑀺𑀦𑁆𑀦𑀦𑁆𑀢𑀺 𑀭𑁄𑀕𑀲𑀻𑀲𑁂𑀦 𑀧𑀭𑀺𑀪𑁄𑀕𑀲𑁆𑀲 𑀤𑁆𑀯𑀸𑀭𑀁 𑀤𑀺𑀦𑁆𑀦𑀁. 𑀢𑀲𑁆𑀫𑀸 𑀅𑀭𑁄𑀕𑀓𑀸𑀮𑁂𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀸𑀧𑀺 𑀆𑀧𑀢𑁆𑀢𑀺 𑀦 𑀳𑁄𑀢𑀻’’𑀢𑀺𑀆𑀤𑀺. 𑀦 𑀯𑀝𑁆𑀝𑀢𑀻𑀢𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀝𑁆𑀝𑀢𑀺, 𑀲𑀮𑁆𑀮𑁂𑀔𑀁 𑀓𑁄𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀚𑀻𑀯𑀁 𑀧𑀦 𑀓𑁄𑀧𑁂𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀥𑀼𑀢𑀗𑁆𑀕𑀥𑀭𑀲𑁆𑀲 𑀦𑀺𑀫𑀺𑀢𑁆𑀢𑀸𑀤𑀬𑁄 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀤𑀜𑁆𑀜𑀥𑀼𑀢𑀗𑁆𑀕𑀥𑀭𑀲𑁆𑀲𑀸𑀧𑀺 𑀦 𑀯𑀝𑁆𑀝𑀦𑁆𑀢𑀺𑀬𑁂𑀯𑀸𑀢𑀺 𑀅𑀧𑀭𑁂. 𑀅𑀓𑀭𑁄𑀦𑁆𑀢𑁄𑀢𑀺 𑀬𑀣𑀸𑀲𑀓𑀁 𑀅𑀦𑀼𑀜𑁆𑀜𑀸𑀢𑀯𑀺𑀲𑀬𑁂𑀧𑀺 𑀅𑀓𑀭𑁄𑀦𑁆𑀢𑁄. 𑀅𑀜𑁆𑀜𑀢𑁆𑀭𑁂𑀯𑀸𑀢𑀺 𑀞𑀧𑁂𑀢𑁆𑀯𑀸 𑀏𑀯.

𑀕𑀡𑀯𑀸𑀲𑀁 ¶ 𑀧𑀳𑀸𑀬 𑀅𑀭𑀜𑁆𑀜𑀸𑀬𑀢𑀦𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀲𑁆𑀲 𑀫𑀼𑀤𑁆𑀥𑀪𑀽𑀢𑀸𑀬 𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑁄 𑀫𑀳𑀸𑀣𑁂𑀭𑁄 ‘‘𑀧𑀯𑀺𑀯𑁂𑀓𑀁 𑀩𑁆𑀭𑀽𑀳𑀬𑀫𑀸𑀦𑁄’’𑀢𑀺 𑀯𑀼𑀢𑁆𑀢𑁄. 𑀉𑀤𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀸𑀢𑀸𑀩𑀸𑀥𑁄 𑀉𑀤𑀭𑀯𑀸𑀢𑀸𑀩𑀸𑀥𑁄. 𑀅𑀲𑀫𑁆𑀪𑀺𑀦𑁆𑀦𑀁 𑀔𑀻𑀭𑀁 𑀏𑀢𑀲𑁆𑀲𑀸𑀢𑀺 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀁, 𑀢𑀤𑁂𑀯 𑀧𑀸𑀬𑀸𑀲𑀦𑁆𑀢𑀺 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀸𑀲𑀁, 𑀉𑀤𑀓𑁂𑀦 𑀅𑀲𑀫𑁆𑀫𑀺𑀲𑁆𑀲𑀔𑀻𑀭𑁂𑀦 𑀧𑀓𑁆𑀓𑀧𑀸𑀬𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀧𑀸𑀬𑀸𑀲𑀲𑁆𑀲. 𑀉𑀧𑁆𑀧𑀢𑁆𑀢𑀺𑀫𑀽𑀮𑀦𑁆𑀢𑀺 ‘‘𑀕𑀺𑀳𑀺𑀓𑀸𑀮𑁂 𑀫𑁂, 𑀆𑀯𑀼𑀲𑁄, 𑀫𑀸𑀢𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀸𑀲𑀁 𑀅𑀤𑀸𑀲𑀺, 𑀢𑁂𑀦 𑀫𑁂 𑀨𑀸𑀲𑀼 𑀅𑀳𑁄𑀲𑀻’’𑀢𑀺 𑀅𑀢𑁆𑀢𑀦𑁄 𑀯𑀘𑀻𑀦𑀺𑀘𑁆𑀙𑀸𑀭𑀡𑀲𑀗𑁆𑀔𑀸𑀢𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀁. ‘‘𑀅𑀧𑀭𑀺𑀪𑁄𑀕𑀸𑀭𑀳𑁄 𑀧𑀺𑀡𑁆𑀟𑀧𑀸𑀢𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀣𑁂𑀭𑀲𑁆𑀲 𑀑𑀪𑀸𑀲𑀦𑀸𑀤𑀺𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑁂𑀯 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀅𑀚𑁆𑀛𑀸𑀲𑀬𑀁 𑀧𑀦 𑀅𑀚𑀸𑀦𑀦𑁆𑀢𑀸 𑀏𑀓𑀘𑁆𑀘𑁂 𑀧𑀼𑀣𑀼𑀚𑁆𑀚𑀦𑀸 𑀢𑀣𑀸 𑀫𑀜𑁆𑀜𑁂𑀬𑁆𑀬𑀼𑀁, 𑀅𑀦𑀸𑀕𑀢𑁂 𑀘 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀏𑀯𑀁 𑀫𑀫 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀧𑀺𑀘 𑀫𑀳𑀸𑀣𑁂𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀢𑀸 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺. 𑀢𑀣𑀸 𑀳𑀺 𑀤𑀳𑀭𑀪𑀺𑀓𑁆𑀔𑀼𑀦𑁄 ‘‘𑀓𑀲𑁆𑀲 𑀲𑀫𑁆𑀧𑀦𑁆𑀦𑀁 𑀦 𑀫𑀦𑀸𑀧’’𑀦𑁆𑀢𑀺 (𑀧𑀸𑀘𑀺. 𑁨𑁦𑁯, 𑁨𑁫𑁭, 𑁬𑁧𑁨, 𑁧𑁨𑁨𑁮, 𑁧𑁨𑁩𑁪; 𑀘𑀽𑀴𑀯. 𑁩𑁪𑁩) 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦 𑀔𑀸𑀤𑀢𑀺.

𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑀸𑀢𑀺 𑀯𑀘𑀻𑀦𑀺𑀘𑁆𑀙𑀸𑀭𑀡𑀳𑁂𑀢𑀼. 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀳𑀺 𑀲𑀤𑁆𑀤𑁄 𑀅𑀲𑀢𑀺𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀢𑀲𑁆𑀲 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁂 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 ‘‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀼𑀢𑁆𑀢𑁄𑀢𑀺 𑀪𑀼𑀢𑁆𑀢𑀯𑀸 𑀲𑀘𑁂 𑀪𑀯𑁂𑀬𑁆𑀬𑀁 𑀅𑀳𑀁. 𑀲𑀸𑀢𑀺 𑀅𑀲𑁆𑀲. 𑀅𑀓𑀸𑀭𑀮𑁄𑀧𑁂𑀦 𑀳𑀺 𑀦𑀺𑀤𑁆𑀤𑁂𑀲𑁄 ‘‘𑀏𑀯𑀁𑀲 𑀢𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑁮.𑁭) 𑀯𑀺𑀬. 𑀅𑀦𑁆𑀢𑀕𑀼𑀡𑀦𑁆𑀢𑀺 𑀅𑀦𑁆𑀢𑀪𑁄𑀕𑁄. 𑀩𑀳𑀺 𑀘𑀭𑁂𑀢𑀺 𑀆𑀲𑀬𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀕𑁆𑀕𑀳𑀡𑀯𑀲𑁂𑀦 ¶ 𑀩𑀳𑀺 𑀬𑀤𑀺 𑀯𑀺𑀘𑀭𑁂𑀬𑁆𑀬. 𑀧𑀭𑀫𑀧𑁆𑀧𑀺𑀘𑁆𑀙𑀁 𑀤𑀲𑁆𑀲𑁂𑀢𑀼𑀁 𑀮𑁄𑀓𑀯𑁄𑀳𑀸𑀭𑁂𑀦𑁂𑀯𑀫𑀸𑀳. 𑀮𑁄𑀓𑁂 𑀳𑀺 𑀅𑀬𑀼𑀢𑁆𑀢𑀪𑁄𑀚𑀦𑀁 𑀑𑀤𑀭𑀺𑀬𑀁 𑀕𑀭𑀳𑀦𑁆𑀢𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁𑀲𑀼 𑀦𑀸𑀫 𑀢𑀲𑁆𑀲 𑀅𑀦𑁆𑀢𑀸𑀦𑀺 𑀩𑀳𑀺 𑀘𑀭𑀦𑁆𑀢𑀻’’𑀢𑀺. 𑀆𑀭𑀸𑀥𑁂𑀫𑀻𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀭𑀸𑀥𑁂𑀫𑀺, 𑀯𑀲𑁂 𑀯𑀢𑁆𑀢𑁂𑀫𑀻𑀢𑀺 𑀅𑀢𑁆𑀣𑁄.

𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀪𑀢𑁆𑀢𑀘𑁆𑀙𑁂𑀤𑁂𑀦, 𑀫𑀕𑁆𑀕𑀓𑀺𑀮𑀫𑀣𑁂𑀦 𑀘 𑀓𑀺𑀮𑀦𑁆𑀢𑀓𑀸𑀬𑁄 𑀤𑀼𑀩𑁆𑀩𑀮𑁄 𑀅𑀜𑁆𑀜𑀢𑀭𑀲𑁆𑀲 𑀨𑀮𑀺𑀢𑀲𑁆𑀲 𑀅𑀫𑁆𑀩𑀲𑁆𑀲 𑀫𑀽𑀮𑁂 𑀦𑀺𑀧𑀚𑁆𑀚𑀺, 𑀩𑀳𑀽𑀦𑀺 𑀅𑀫𑁆𑀩𑀨𑀮𑀸𑀦𑀺 𑀢𑀳𑀁 𑀢𑀳𑀁 𑀧𑀢𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣𑁂𑀓𑁄 𑀯𑀼𑀟𑁆𑀠𑀢𑀭𑁄 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀧𑀭𑀺𑀲𑁆𑀲𑀫𑀁 𑀜𑀢𑁆𑀯𑀸 ¶ 𑀅𑀫𑁆𑀩𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑀺. 𑀣𑁂𑀭𑁄 𑁋

‘‘𑀦 𑀧𑀺𑀢𑀸 𑀦𑀧𑀺 𑀢𑁂 𑀫𑀸𑀢𑀸, 𑀦 𑀜𑀸𑀢𑀺 𑀦𑀧𑀺 𑀩𑀦𑁆𑀥𑀯𑁄;

𑀓𑀭𑁄𑀢𑁂𑀢𑀸𑀤𑀺𑀲𑀁 𑀓𑀺𑀘𑁆𑀘𑀁, 𑀲𑀻𑀮𑀯𑀦𑁆𑀢𑀲𑁆𑀲 𑀓𑀸𑀭𑀡𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁦) 𑁋

𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀕𑀢𑁄 𑀏𑀯 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀇𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀫𑁆𑀩𑀔𑀸𑀤𑀓𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼𑀧𑀺 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩’’𑀦𑁆𑀢𑀺. 𑀲𑀩𑁆𑀩𑀣𑀸𑀧𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀅𑀦𑁂𑀲𑀦𑀯𑀲𑁂𑀦, 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀧𑀺, 𑀧𑀕𑁂𑀯 𑀓𑀸𑀬𑀯𑀘𑀻𑀯𑀺𑀧𑁆𑀨𑀦𑁆𑀤𑀺𑀢𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀦𑁂𑀲𑀦𑀸𑀬𑀸’’𑀢𑀺𑀆𑀤𑀺.

𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀇𑀡𑀧𑀭𑀺𑀪𑁄𑀕𑀆𑀧𑀢𑁆𑀢𑀺𑀆𑀤𑀻𑀦𑀯𑀲𑁆𑀲, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀆𑀦𑀺𑀲𑀁𑀲𑀲𑁆𑀲 𑀘 𑀤𑀲𑁆𑀲𑀦𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑀁. 𑀢𑀲𑁆𑀲 𑀧𑀦 𑀧𑀘𑁆𑀘𑀬𑀸𑀥𑀺𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑁂𑀲𑀽’’𑀢𑀺. 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀳𑀺 𑀓𑀸𑀭𑀡𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥𑀦𑁆𑀢𑀺. 𑀬𑁂𑀦 𑀓𑀸𑀭𑀡𑁂𑀦 𑀪𑀺𑀓𑁆𑀔𑀼𑀦𑁄 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀦𑀸𑀫 𑀲𑀺𑀬𑀸, 𑀢𑀲𑁆𑀫𑀺𑀁 𑀯𑀚𑁆𑀚𑀺𑀢𑁂 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀲𑀺𑀚𑁆𑀛𑀢𑀺, 𑀯𑀺𑀲𑀼𑀚𑁆𑀛𑀢𑀺 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀘𑀬𑀕𑁂𑀥𑀦𑁆𑀢𑀺 𑀕𑁂𑀥𑀕𑁆𑀕𑀳𑀡𑁂𑀦𑁂𑀯 𑀲𑀫𑁆𑀫𑁄𑀳𑁄𑀧𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄 𑀢𑁂𑀦 𑀲𑀳 𑀧𑀯𑀢𑁆𑀢𑀦𑀢𑁄, 𑀢𑀤𑀼𑀧𑀦𑀺𑀲𑁆𑀲𑀬𑀢𑁄 𑀘. 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑁂𑀢𑀺 𑀇𑀤𑀁 𑀧𑀘𑁆𑀘𑀬𑀸𑀦𑀁 𑀆𑀕𑀫𑀦𑀲𑀼𑀤𑁆𑀥𑀺𑀤𑀲𑁆𑀲𑀦𑀁, 𑀦 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀁. 𑀧𑀘𑁆𑀘𑀬𑀸𑀦𑀁 𑀳𑀺 𑀇𑀤𑀫𑀢𑁆𑀣𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁. 𑀬𑀲𑁆𑀫𑀸 𑀧𑀦 𑀢𑁂 𑀧𑀘𑁆𑀘𑀬𑀸 𑀜𑀸𑀬𑀸𑀥𑀺𑀕𑀢𑀸 𑀏𑀯 𑀪𑀺𑀓𑁆𑀔𑀼𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂’’𑀢𑀺. 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸𑀢𑀺 ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬) 𑀯𑀼𑀢𑁆𑀢𑀯𑀺𑀥𑀺𑀦𑀸.

𑀥𑀸𑀢𑀼𑀯𑀲𑁂𑀦 ¶ 𑀯𑀸𑀢𑀺 ‘‘𑀬𑀣𑀸𑀧𑀘𑁆𑀘𑀬𑀁 𑀯𑀢𑁆𑀢𑀫𑀸𑀦𑀁 𑀥𑀸𑀢𑀼𑀫𑀢𑁆𑀢𑀫𑁂𑀯𑁂𑀢𑀁, 𑀬𑀤𑀺𑀤𑀁 𑀘𑀻𑀯𑀭𑀸𑀤𑀺, 𑀢𑀤𑀼𑀧𑀪𑀼𑀜𑁆𑀚𑀓𑁄 𑀘 𑀧𑀼𑀕𑁆𑀕𑀮𑁄’’𑀢𑀺 𑀏𑀯𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸. 𑀧𑀝𑀺𑀓𑀽𑀮𑀯𑀲𑁂𑀦 𑀯𑀸𑀢𑀺 𑀧𑀺𑀡𑁆𑀟𑀧𑀸𑀢𑁂 𑀢𑀸𑀯 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀯𑀲𑁂𑀦, ‘‘𑀲𑀩𑁆𑀩𑀸𑀦𑀺 𑀧𑀦 𑀇𑀫𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀅𑀚𑀺𑀕𑀼𑀘𑁆𑀙𑀦𑀻𑀬𑀸𑀦𑀺, 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀧𑀢𑁆𑀯𑀸 𑀅𑀢𑀺𑀯𑀺𑀬 𑀚𑀺𑀕𑀼𑀘𑁆𑀙𑀦𑀻𑀬𑀸𑀦𑀺 𑀚𑀸𑀬𑀦𑁆𑀢𑀻’’𑀢𑀺 𑀏𑀯𑀁 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸. 𑀢𑀢𑁄 𑀉𑀢𑁆𑀢𑀭𑀻𑀢𑀺 𑀧𑀝𑀺𑀮𑀸𑀪𑀓𑀸𑀮𑀢𑁄 𑀉𑀧𑀭𑀺. 𑀅𑀦𑀯𑀚𑁆𑀚𑁄𑀯 𑀧𑀭𑀺𑀪𑁄𑀕𑁄 ¶ 𑀆𑀤𑀺𑀢𑁄𑀯 𑀧𑀜𑁆𑀜𑀸𑀬 𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀧𑀢𑁆𑀢𑀘𑀻𑀯𑀭𑀸𑀦𑀁 𑀯𑀺𑀬𑀸𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀆𑀤𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀧𑀭𑀫𑁂𑀢𑀁, 𑀦 𑀧𑀭𑀺𑀪𑁄𑀕𑀓𑀸𑀮𑁂 𑀧𑀘𑁆𑀘𑀯𑁂𑀓𑁆𑀔𑀡𑀧𑀝𑀺𑀓𑁆𑀔𑁂𑀧𑀧𑀭𑀁. 𑀢𑁂𑀦𑀸𑀳 ‘‘𑀧𑀭𑀺𑀪𑁄𑀕𑀓𑀸𑀮𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀭𑀺𑀪𑁄𑀕𑀓𑀸𑀮𑁂 𑀧𑀘𑁆𑀘𑀯𑁂𑀓𑁆𑀔𑀡𑁂. 𑀲𑀦𑁆𑀦𑀺𑀝𑁆𑀞𑀸𑀦𑀓𑀭𑁄𑀢𑀺 𑀅𑀲𑀦𑁆𑀤𑁂𑀳𑀓𑀭𑁄 𑀏𑀓𑀦𑁆𑀢𑀺𑀓𑁄.

𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫 𑀅𑀦𑀭𑀳𑀲𑁆𑀲 𑀧𑀭𑀺𑀪𑁄𑀕𑁄. 𑀪𑀕𑀯𑀢𑀸𑀧𑀺 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀲𑀻𑀮𑀯𑀢𑁄 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀦 𑀤𑀼𑀲𑁆𑀲𑀻𑀮𑀲𑁆𑀲. 𑀤𑀸𑀬𑀓𑀸𑀦𑀫𑁆𑀧𑀺 𑀲𑀻𑀮𑀯𑀢𑁄 𑀏𑀯 𑀧𑀭𑀺𑀘𑁆𑀘𑀸𑀕𑁄, 𑀦 𑀤𑀼𑀲𑁆𑀲𑀻𑀮𑀲𑁆𑀲. 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀧𑀘𑁆𑀘𑀸𑀲𑀻𑀲𑀦𑀢𑁄. 𑀇𑀢𑀺 𑀲𑀢𑁆𑀣𑀸𑀭𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸, 𑀤𑀸𑀬𑀓𑁂𑀳𑀺 𑀘 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀸𑀬 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄. 𑀇𑀡𑀯𑀲𑁂𑀦 𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄, 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀇𑀡𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 ‘‘𑀲𑀻𑀮𑀯𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀘𑀻𑀯𑀭𑀁 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂 𑀧𑀼𑀭𑁂𑀪𑀢𑁆𑀢…𑀧𑁂… 𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑀯𑀲𑁂𑀦 𑀏𑀓𑀤𑀺𑀯𑀲𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁𑀬𑁂𑀯 𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀳𑀺𑀬𑁆𑀬𑁄 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢𑀁, 𑀢𑀁 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬…𑀧𑁂… 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀳𑀺𑀬𑁆𑀬𑁄 𑀬𑁄 𑀫𑀬𑀸 𑀧𑀺𑀡𑁆𑀟𑀧𑀸𑀢𑁄 𑀧𑀭𑀺𑀪𑀼𑀢𑁆𑀢𑁄, 𑀲𑁄 ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀘𑁂 𑀅𑀢𑀻𑀢𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀲𑁂𑀦𑀸𑀲𑀦𑀫𑁆𑀧𑀺 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀧𑀯𑁂𑀲𑁂 𑀧𑀯𑁂𑀲𑁂. 𑀲𑀢𑀺𑀧𑀘𑁆𑀘𑀬𑀢𑀸𑀢𑀺 𑀲𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀧𑀝𑀺𑀕𑁆𑀕𑀳𑀡𑀲𑁆𑀲, 𑀧𑀭𑀺𑀪𑁄𑀕𑀲𑁆𑀲 𑀘 𑀧𑀘𑁆𑀘𑀯𑁂𑀓𑁆𑀔𑀡𑀲𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀬𑀼𑀚𑁆𑀚𑀢𑀺, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀢𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀺 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸 𑀬𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺. 𑀅𑀧𑀭𑁂 𑀧𑀦𑀸𑀳𑀼 𑁋 𑀲𑀢𑀺 𑀧𑀘𑁆𑀘𑀬𑀢𑀸𑀢𑀺 𑀲𑀢𑀺 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑁂, 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀧𑀘𑁆𑀘𑀬𑁂 𑀲𑀢𑀺𑀧𑀻𑀢𑀺. 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀢𑀣𑀸 𑀳𑀺 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀺𑀲𑀼𑀚𑁆𑀛𑀢𑀺, 𑀦 𑀧𑀘𑁆𑀘𑀬𑀲𑁆𑀲 𑀪𑀸𑀯𑀫𑀢𑁆𑀢𑁂𑀦.

𑀏𑀯𑀁 ¶ 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀲𑀩𑁆𑀩𑀸𑀧𑀺 𑀯𑀺𑀲𑀼𑀤𑁆𑀥𑀺𑀬𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀩𑁆𑀩𑀺𑀥𑀸 𑀳𑀺 𑀲𑀼𑀤𑁆𑀥𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀚𑁆𑀛𑀢𑀺 ¶ 𑀏𑀢𑀸𑀬𑀸𑀢𑀺 𑀲𑀼𑀤𑁆𑀥𑀺, 𑀬𑀣𑀸𑀥𑀫𑁆𑀫𑀁 𑀤𑁂𑀲𑀦𑀸𑀯 𑀲𑀼𑀤𑁆𑀥𑀺 𑀤𑁂𑀲𑀦𑀸𑀲𑀼𑀤𑁆𑀥𑀺. 𑀯𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀘𑁂𑀢𑁆𑀣 𑀤𑁂𑀲𑀦𑀸𑀬 𑀏𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀙𑀺𑀦𑁆𑀦𑀫𑀽𑀮𑀸𑀧𑀢𑁆𑀢𑀻𑀦𑀁 𑀧𑀦 𑀅𑀪𑀺𑀓𑁆𑀔𑀼𑀢𑀸𑀧𑀝𑀺𑀜𑁆𑀜𑀸𑀯 𑀤𑁂𑀲𑀦𑀸. 𑀅𑀥𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁄 𑀲𑀁𑀯𑀭𑁄𑀯 𑀲𑀼𑀤𑁆𑀥𑀺 𑀲𑀁𑀯𑀭𑀲𑀼𑀤𑁆𑀥𑀺. 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀸𑀦𑀁 𑀧𑀭𑀺𑀬𑁂𑀝𑁆𑀞𑀺 𑀏𑀯 𑀲𑀼𑀤𑁆𑀥𑀺 𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀺. 𑀘𑀢𑀽𑀲𑀼𑀧𑀺 𑀧𑀘𑁆𑀘𑀬𑁂𑀲𑀼 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀯 𑀲𑀼𑀤𑁆𑀥𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀺. 𑀏𑀲 𑀢𑀸𑀯 𑀲𑀼𑀤𑁆𑀥𑀻𑀲𑀼 𑀲𑀫𑀸𑀲𑀦𑀬𑁄. 𑀲𑀼𑀤𑁆𑀥𑀺𑀫𑀦𑁆𑀢𑁂𑀲𑀼 𑀧𑀦 𑀤𑁂𑀲𑀦𑀸 𑀲𑀼𑀤𑁆𑀥𑀺 𑀏𑀢𑀲𑁆𑀲𑀸𑀢𑀺 𑀤𑁂𑀲𑀦𑀸𑀲𑀼𑀤𑁆𑀥𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀤𑁆𑀥𑀺-𑀲𑀤𑁆𑀤𑁄 𑀧𑀦 𑀯𑀼𑀢𑁆𑀢𑀦𑀬𑁄𑀯. 𑀏𑀯𑀦𑁆𑀢𑀺 𑀲𑀁𑀯𑀭𑀪𑁂𑀤𑀁 𑀲𑀦𑁆𑀥𑀸𑀬𑀸𑀳. 𑀧𑀳𑀸𑀬𑀸𑀢𑀺 𑀯𑀚𑁆𑀚𑁂𑀢𑁆𑀯𑀸, 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀬𑀁, 𑀢𑀁 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸. 𑀅𑀦𑀦𑀼𑀜𑁆𑀜𑀸𑀢𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀪𑁄𑀕𑀸𑀪𑀸𑀯𑀢𑁄, 𑀅𑀦𑀼𑀜𑁆𑀜𑀸𑀢𑁂𑀲𑀼 𑀏𑀯 𑀘 𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄 𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀧𑀘𑁆𑀘𑀬𑀸 𑀪𑀕𑀯𑀢𑁄 𑀲𑀦𑁆𑀢𑀓𑀸. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’’𑀢𑀺 (𑀫. 𑀦𑀺. 𑁧.𑁨𑁯) 𑀏𑀯𑀁 𑀧𑀯𑀢𑁆𑀢𑀁 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀸𑀥𑀓𑀁.

𑀅𑀯𑀻𑀢𑀭𑀸𑀕𑀸𑀦𑀁 𑀢𑀡𑁆𑀳𑀸𑀧𑀭𑀯𑀲𑀢𑀸𑀬 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺, 𑀢𑀤𑀪𑀸𑀯𑁂𑀦 𑀯𑀻𑀢𑀭𑀸𑀕𑀸𑀦𑀁 𑀢𑀢𑁆𑀣 𑀲𑀸𑀫𑀺𑀪𑀸𑀯𑁄 𑀬𑀣𑀸𑀭𑀼𑀘𑀺𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀢𑁂 𑀧𑀝𑀺𑀓𑀽𑀮𑀫𑁆𑀧𑀺 𑀅𑀧𑁆𑀧𑀝𑀺𑀓𑀽𑀮𑀸𑀓𑀸𑀭𑁂𑀦, 𑀅𑀧𑁆𑀧𑀝𑀺𑀓𑀽𑀮𑀫𑁆𑀧𑀺 𑀧𑀝𑀺𑀓𑀽𑀮𑀸𑀓𑀸𑀭𑁂𑀦, 𑀢𑀤𑀼𑀪𑀬𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑁂𑀦 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀬𑀓𑀸𑀦𑀜𑁆𑀘 𑀫𑀦𑁄𑀭𑀣𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑁂 𑀳𑀺 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀁 𑀅𑀢𑀻𑀢𑀢𑁆𑀢𑀸 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺.

𑀲𑀩𑁆𑀩𑁂𑀲𑀦𑁆𑀢𑀺 𑀅𑀭𑀺𑀬𑀸𑀦𑀁, 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘. 𑀓𑀣𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀇𑀫𑁂 𑀧𑀭𑀺𑀪𑁄𑀕𑀸 𑀲𑀫𑁆𑀪𑀯𑀦𑁆𑀢𑀺? 𑀉𑀧𑀘𑀸𑀭𑀯𑀲𑁂𑀦. 𑀬𑁄 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀧𑀘𑁆𑀘𑀬𑀕𑁂𑀥𑀁 𑀧𑀳𑀸𑀬 𑀢𑀢𑁆𑀣 𑀢𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀪𑁄𑀕𑁄, 𑀲𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺. 𑀲𑀻𑀮𑀯𑀢𑁄 𑀧𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺, 𑀤𑀸𑀬𑀓𑀸𑀦𑀁 𑀫𑀦𑁄𑀭𑀣𑀲𑁆𑀲 𑀅𑀯𑀺𑀭𑀸𑀥𑀦𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂𑀬𑁂𑀯 𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀪𑁄𑀕𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀲 𑀲𑁂𑀓𑁆𑀔𑀲𑀗𑁆𑀕𑀳𑀢𑁄. 𑀲𑁂𑀓𑁆𑀔𑀲𑀼𑀢𑁆𑀢𑀁 (𑀲𑀁. 𑀦𑀺. 𑁫.𑁧𑁩) 𑀳𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀢𑁂𑀦𑀸𑀳 ‘‘𑀲𑀻𑀮𑀯𑀸𑀧𑀺 ¶ 𑀳𑀻’’𑀢𑀺𑀆𑀤𑀺. 𑀧𑀘𑁆𑀘𑀦𑀻𑀓𑀢𑁆𑀢𑀸𑀢𑀺 𑀬𑀣𑀸 𑀇𑀡𑀸𑀬𑀺𑀓𑁄 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀇𑀘𑁆𑀙𑀺𑀢𑀤𑁂𑀲𑀁 𑀕𑀦𑁆𑀢𑀼𑀁 𑀦 ¶ 𑀮𑀪𑀢𑀺, 𑀏𑀯𑀁 𑀇𑀡𑀧𑀭𑀺𑀪𑁄𑀕𑀬𑀼𑀢𑁆𑀢𑁄 𑀮𑁄𑀓𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀆𑀡𑀡𑁆𑀬𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀆𑀡𑀡𑁆𑀬𑀧𑀭𑀺𑀪𑁄𑀕𑁄 𑀯𑀸’’𑀢𑀺. 𑀏𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘𑀢𑀼𑀧𑀭𑀺𑀪𑁄𑀕𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀲𑀼𑀁𑀬𑁂𑀯𑀸𑀬𑀁 𑀧𑀭𑀺𑀪𑁄𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀸𑀬 𑀲𑀺𑀓𑁆𑀔𑀸𑀬𑀸𑀢𑀺 𑀲𑀻𑀮𑀲𑀗𑁆𑀔𑀸𑀢𑀸𑀬 𑀲𑀺𑀓𑁆𑀔𑀸𑀬. 𑀓𑀺𑀘𑁆𑀘𑀓𑀸𑀭𑀻𑀢𑀺 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀦𑀢𑁄 𑀬𑀼𑀢𑁆𑀢𑀧𑀢𑁆𑀢𑀓𑀸𑀭𑀻.

𑀇𑀤𑀸𑀦𑀺 𑀢𑀫𑁂𑀯 𑀓𑀺𑀘𑁆𑀘𑀓𑀸𑀭𑀺𑀢𑀁 𑀲𑀼𑀢𑁆𑀢𑀧𑀤𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀳𑀸𑀭𑀦𑁆𑀢𑀺 𑀧𑀢𑀺𑀲𑁆𑀲𑀬𑀁. 𑀲𑀬𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑀸𑀤𑀺𑀁. 𑀉𑀪𑀬𑁂𑀦𑀧𑀺 𑀲𑁂𑀦𑀸𑀲𑀦𑀫𑁂𑀯 𑀯𑀼𑀢𑁆𑀢𑀁. 𑀆𑀧𑀦𑁆𑀢𑀺 𑀉𑀤𑀓𑀁. 𑀲𑀗𑁆𑀖𑀸𑀝𑀺𑀭𑀚𑀽𑀧𑀯𑀸𑀳𑀦𑀦𑁆𑀢𑀺 𑀧𑀁𑀲𑀼𑀫𑀮𑀸𑀤𑀺𑀦𑁄 𑀲𑀗𑁆𑀖𑀸𑀝𑀺𑀕𑀢𑀭𑀚𑀲𑁆𑀲 𑀥𑁄𑀯𑀦𑀁. 𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀦𑁆𑀢𑀺 𑀘𑀻𑀯𑀭𑀸𑀤𑀻𑀲𑀼 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬) 𑀦𑀬𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸. 𑀲𑀗𑁆𑀔𑀸𑀬 𑀲𑁂𑀯𑁂 𑀯𑀭𑀧𑀜𑁆𑀜𑀲𑀸𑀯𑀓𑁄𑀢𑀺 ‘‘𑀧𑀺𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀁, 𑀯𑀺𑀳𑀸𑀭𑀸𑀤𑀺𑀧𑀤𑁂𑀳𑀺 𑀯𑀼𑀢𑁆𑀢𑀁 𑀲𑁂𑀦𑀸𑀲𑀦𑀁, ‘‘𑀧𑀺𑀧𑀸𑀲𑀸𑀕𑁂𑀮𑀜𑁆𑀜𑀲𑁆𑀲 𑀯𑀽𑀧𑀲𑀫𑀦𑀢𑁄 𑀧𑀸𑀦𑀻𑀬𑀫𑁆𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑁄’’𑀢𑀺 𑀆𑀧𑀫𑀼𑀔𑁂𑀦 𑀤𑀲𑁆𑀲𑀺𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀁, 𑀲𑀗𑁆𑀖𑀸𑀝𑀺𑀬𑀸𑀤𑀺𑀘𑀻𑀯𑀭𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀧𑀘𑁆𑀘𑀬𑀁 𑀲𑀗𑁆𑀔𑀸𑀬 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁬.𑁫𑁮; 𑁮.𑁯; 𑀥. 𑀲. 𑁧𑁩𑁫𑁫) 𑀦𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀲𑁂𑀯𑁂 𑀲𑁂𑀯𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬 𑀉𑀢𑁆𑀢𑀫𑀧𑀜𑁆𑀜𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑁄 𑀲𑁂𑀔𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸.

𑀬𑀲𑁆𑀫𑀸 𑀘 𑀲𑀗𑁆𑀔𑀸𑀬 𑀲𑁂𑀯𑀻 𑀯𑀭𑀧𑀜𑁆𑀜𑀲𑀸𑀯𑀓𑁄, 𑀢𑀲𑁆𑀫𑀸 𑀳𑀺 𑀧𑀺𑀡𑁆𑀟𑁂…𑀧𑁂… 𑀧𑁄𑀓𑁆𑀔𑀭𑁂 𑀯𑀸𑀭𑀺𑀩𑀺𑀦𑁆𑀤𑀼, 𑀢𑀣𑀸 𑀳𑁄𑀢𑀺. 𑀓𑀸𑀮𑁂𑀦𑀸𑀢𑀺 𑀅𑀭𑀺𑀬𑀸𑀦𑀁 𑀪𑁄𑀚𑀦𑀓𑀸𑀮𑁂. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀧𑀭𑀢𑁄𑀢𑀺 𑀅𑀜𑁆𑀜𑀢𑁄 𑀤𑀸𑀬𑀓𑀢𑁄. 𑀅𑀦𑀼𑀕𑁆𑀕𑀳𑀸𑀢𑀺 𑀅𑀦𑀼𑀓𑀫𑁆𑀧𑀸𑀬 𑀩𑀳𑀼𑀫𑁆𑀳𑀺 𑀉𑀧𑀦𑀻𑀢𑁂 𑀫𑀢𑁆𑀢𑀁 𑀲𑁄 𑀚𑀜𑁆𑀜𑀸 𑀚𑀸𑀦𑁂𑀬𑁆𑀬 𑀲𑀢𑀢𑀁 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀺𑀢𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺. 𑀆𑀮𑁂𑀧𑀦𑀭𑀽𑀳𑀦𑁂 𑀬𑀣𑀸𑀢𑀺 𑀪𑁂𑀲𑀚𑁆𑀚𑀮𑁂𑀧𑀦𑁂𑀦 𑀯𑀡𑀲𑁆𑀲 𑀭𑀼𑀳𑀦𑁂 𑀯𑀺𑀬, 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀆𑀳𑀭𑁂𑀢𑀺 𑀆𑀳𑀭𑁂𑀬𑁆𑀬. ‘‘𑀆𑀳𑀭𑁂𑀬𑁆𑀬𑀸𑀳𑀸𑀭’’𑀦𑁆𑀢𑀺 𑀯𑀸 𑀧𑀸𑀞𑁄. 𑀬𑀸𑀧𑀦𑀢𑁆𑀣𑀦𑁆𑀢𑀺 𑀲𑀭𑀻𑀭𑀲𑁆𑀲 𑀬𑀸𑀧𑀦𑀸𑀬. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀸𑀬 𑀅𑀫𑀼𑀘𑁆𑀙𑀺𑀢𑁄 𑀕𑁂𑀥𑀁 𑀢𑀡𑁆𑀳𑀁 𑀅𑀦𑀸𑀧𑀦𑁆𑀦𑁄.

𑀅𑀢𑁆𑀢𑀦𑁄 ¶ 𑀫𑀸𑀢𑀼𑀮𑀲𑁆𑀲 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑁂𑀯 𑀦𑀸𑀫𑀲𑁆𑀲 𑀕𑀳𑀺𑀢𑀢𑁆𑀢𑀸 𑀪𑀸𑀕𑀺𑀦𑁂𑀬𑁆𑀬𑀲𑀗𑁆𑀖𑀭𑀓𑁆𑀔𑀺𑀢𑀲𑀸𑀫𑀡𑁂𑀭𑁄. 𑀲𑀸𑀮𑀺𑀓𑀽𑀭𑀦𑁆𑀢𑀺 𑀲𑀸𑀮𑀺𑀪𑀢𑁆𑀢𑀁. 𑀲𑀼𑀦𑀺𑀩𑁆𑀩𑀼𑀢𑀦𑁆𑀢𑀺 𑀲𑀼𑀲𑀻𑀢𑀮𑀁. 𑀅𑀲𑀜𑁆𑀜𑀢𑁄𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀡𑀁 𑀲𑀦𑁆𑀥𑀸𑀬𑀸𑀳. 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄𑀢𑀺 𑀧𑀭𑀺𑀓𑁆𑀔𑀻𑀡𑀲𑀩𑁆𑀩𑀸𑀲𑀯𑁄.

𑀧𑀞𑀫𑀲𑀻𑀮𑀧𑀜𑁆𑀘𑀓𑀯𑀡𑁆𑀡𑀦𑀸

𑁨𑁦. 𑀧𑀭𑀺𑀬𑀦𑁆𑀢𑁄 ¶ 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺, 𑀧𑀭𑀺𑀬𑀦𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀬𑁂𑀲𑀁 𑀢𑁂 𑀧𑀭𑀺𑀬𑀦𑁆𑀢𑀲𑀺𑀓𑁆𑀔𑀸𑀧𑀤𑀸, 𑀢𑁂𑀲𑀁 𑀧𑀭𑀺𑀬𑀦𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁. 𑀉𑀧𑀲𑀫𑁆𑀧𑀦𑁆𑀦𑀸𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸𑀲𑁂𑀓𑁆𑀔𑁂 𑀢𑀤𑀜𑁆𑀜𑁂𑀲𑀁 𑀉𑀧𑀲𑀫𑁆𑀧𑀦𑁆𑀦𑀸𑀦𑀁. 𑀲𑀸𑀫𑀜𑁆𑀜𑀚𑁄𑀢𑀦𑀸𑀧𑀺 𑀳𑀺 𑀯𑀺𑀲𑁂𑀲𑁂 𑀢𑀺𑀝𑁆𑀞𑀢𑀺. 𑀓𑀼𑀲𑀮𑀥𑀫𑁆𑀫𑁂 𑀬𑀼𑀢𑁆𑀢𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀸𑀭𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀸𑀦𑀁. 𑀲𑁂𑀓𑁆𑀔𑀥𑀫𑁆𑀫𑀸 𑀧𑀭𑀺𑀬𑀦𑁆𑀢𑀸 𑀧𑀭𑀫𑀸 𑀫𑀭𑀺𑀬𑀸𑀤𑀸 𑀏𑀢𑀲𑁆𑀲𑀸𑀢𑀺 𑀲𑁂𑀓𑁆𑀔𑀧𑀭𑀺𑀬𑀦𑁆𑀢𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑁄, 𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑀢𑁄 𑀯𑀸 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀕𑁄𑀢𑁆𑀭𑀪𑀽, 𑀢𑀸𑀯 𑀧𑀯𑀢𑁆𑀢𑀓𑀼𑀲𑀮𑀥𑀫𑁆𑀫𑀧𑁆𑀧𑀩𑀦𑁆𑀥𑁄 𑀲𑁂𑀓𑁆𑀔𑀥𑀫𑁆𑀫𑁂 𑀆𑀳𑀘𑁆𑀘 𑀞𑀺𑀢𑁄 𑀲𑁂𑀓𑁆𑀔𑀧𑀭𑀺𑀬𑀦𑁆𑀢𑁄. 𑀲𑁂𑀓𑁆𑀔𑀥𑀫𑁆𑀫𑀸𑀦𑀁 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀪𑀽𑀢𑀸 𑀲𑀺𑀓𑁆𑀔𑀺𑀢𑀩𑁆𑀩𑀸 𑀮𑁄𑀓𑀺𑀬𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑁂𑀓𑁆𑀔𑀧𑀭𑀺𑀬𑀦𑁆𑀢𑁄, 𑀢𑀲𑁆𑀫𑀺𑀁 𑀲𑁂𑀓𑁆𑀔𑀧𑀭𑀺𑀬𑀦𑁆𑀢𑁂. 𑀧𑀭𑀺𑀧𑀽𑀭𑀓𑀸𑀭𑀻𑀦𑀦𑁆𑀢𑀺 𑀓𑀺𑀜𑁆𑀘𑀺𑀧𑀺 𑀲𑀺𑀓𑁆𑀔𑀁 𑀅𑀳𑀸𑀧𑁂𑀢𑁆𑀯𑀸 𑀧𑀽𑀭𑁂𑀦𑁆𑀢𑀸𑀦𑀁. 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸𑀦𑀁. 𑀢𑀢𑁄 𑀏𑀯 𑀲𑀻𑀮𑀧𑀸𑀭𑀺𑀧𑀽𑀭𑀺𑀅𑀢𑁆𑀣𑀁 𑀧𑀭𑀺𑀘𑁆𑀘𑀢𑁆𑀢𑀚𑀻𑀯𑀺𑀢𑀸𑀦𑀁. 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁂𑀦 𑀅𑀧𑀭𑀸𑀫𑀲𑀦𑀻𑀬𑀢𑁄 𑀧𑀸𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀁 𑀲𑀻𑀮𑀁 𑀅𑀧𑀭𑀸𑀫𑀝𑁆𑀞𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀁 𑀲𑀻𑀮𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁.

𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀲𑁂𑀓𑁆𑀔𑀸𑀦𑀁, 𑀲𑁂𑀓𑁆𑀔𑀸𑀦𑀁, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀲𑀻𑀮𑀁 𑀫𑀳𑀸𑀦𑀼𑀪𑀸𑀯𑀢𑀸𑀬 𑀆𑀦𑀼𑀪𑀸𑀯𑀢𑁄 𑀅𑀧𑀭𑀺𑀬𑀦𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀕𑀡𑀦𑀯𑀲𑁂𑀦 𑀲𑀧𑀭𑀺𑀬𑀦𑁆𑀢𑀢𑁆𑀢𑀸’’𑀢𑀺. 𑀓𑀸𑀬𑀯𑀸𑀘𑀸𑀦𑀁 𑀲𑀁𑀯𑀭𑀡𑀢𑁄, 𑀯𑀺𑀦𑀬𑀦𑀢𑁄 𑀘 𑀲𑀁𑀯𑀭𑀯𑀺𑀦𑀬𑀸. 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀯𑀺𑀢𑁆𑀣𑀸𑀭𑀦𑀬𑁂𑀦 𑀬𑀣𑀸𑀯𑀼𑀢𑁆𑀢𑀕𑀡𑀦𑀢𑁄 𑀦𑀺𑀤𑁆𑀤𑀺𑀝𑁆𑀞𑀸. 𑀲𑀺𑀓𑁆𑀔𑀸𑀢𑀺 𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸. 𑀯𑀺𑀦𑀬𑀲𑀁𑀯𑀭𑁂𑀢𑀺 𑀯𑀺𑀦𑀬𑀧𑀺𑀝𑀓𑁂. 𑀕𑀡𑀦𑀯𑀲𑁂𑀦 𑀲𑀧𑀭𑀺𑀬𑀦𑁆𑀢𑀫𑁆𑀧𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀲𑀻𑀮𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀳𑀺 𑀉𑀧𑀲𑀫𑁆𑀧𑀦𑁆𑀦𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀁 𑀲𑀻𑀮𑀁 𑀦𑀸𑀫, 𑀢𑀢𑁆𑀣 𑀓𑀲𑁆𑀲𑀘𑀺𑀧𑀺 𑀅𑀦𑀯𑀲𑁂𑀲𑀢𑁄 𑀅𑀦𑀯𑀲𑁂𑀲𑀯𑀲𑁂𑀦 ¶ . 𑀲𑀫𑀸𑀤𑀸𑀦𑀪𑀸𑀯𑀦𑁆𑀢𑀺 𑀲𑀫𑀸𑀤𑀸𑀦𑀲𑀩𑁆𑀪𑀸𑀯𑀁. 𑀮𑀸𑀪…𑀧𑁂… 𑀯𑀲𑁂𑀦 𑀅𑀤𑀺𑀝𑁆𑀞𑀧𑀭𑀺𑀬𑀦𑁆𑀢𑀪𑀸𑀯𑁄 𑀮𑀸𑀪𑀸𑀤𑀺𑀳𑁂𑀢𑀼 𑀲𑀻𑀮𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑁄.

𑀥𑀦𑀁 𑀘𑀚𑁂 𑀅𑀗𑁆𑀕𑀯𑀭𑀲𑁆𑀲 𑀳𑁂𑀢𑀼 𑀧𑀸𑀭𑀺𑀧𑀦𑁆𑀣𑀺𑀓𑀘𑁄𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄. 𑀅𑀗𑁆𑀕𑀁 𑀘𑀚𑁂 𑀚𑀻𑀯𑀺𑀢𑀁 𑀭𑀓𑁆𑀔𑀫𑀸𑀦𑁄 𑀲𑀧𑁆𑀧𑀤𑀝𑁆𑀞𑀸𑀤𑀺𑀓𑀸𑀮𑁂. 𑀅𑀗𑁆𑀕𑀁 𑀥𑀦𑀁 𑀚𑀻𑀯𑀺𑀢𑀜𑁆𑀘𑀸𑀧𑀺 𑀲𑀩𑁆𑀩𑀁, 𑀘𑀚𑁂 𑀦𑀭𑁄 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑁄 𑀲𑀼𑀢𑀲𑁄𑀫𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳 ‘‘𑀇𑀫𑀁 𑀲𑀧𑁆𑀧𑀼𑀭𑀺𑀲𑀸𑀦𑀼𑀲𑁆𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄’’𑀢𑀺. 𑀚𑀺𑀖𑀘𑁆𑀙𑀸𑀧𑀭𑀺𑀲𑁆𑀲𑀫𑁂𑀦 𑀚𑀻𑀯𑀺𑀢𑀲𑀁𑀲𑀬𑁂 𑀲𑀢𑀺𑀧𑀺. 𑀲𑀺𑀓𑁆𑀔𑀸𑀧𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫𑀸𑀢𑀺 𑀅𑀲𑁆𑀲𑀸𑀫𑀺𑀓𑁂𑀲𑀼 𑀅𑀫𑁆𑀩𑀨𑀮𑁂𑀲𑀼 ¶ 𑀪𑀽𑀫𑀺𑀬𑀁 𑀧𑀢𑀺𑀢𑁂𑀲𑀼 𑀲𑀫𑀻𑀧𑁂𑀬𑁂𑀯 𑀲𑀦𑁆𑀢𑁂𑀲𑀼𑀧𑀺 𑀧𑀝𑀺𑀕𑁆𑀕𑀸𑀳𑀓𑀸𑀪𑀸𑀯𑁂𑀦 𑀅𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀁 𑀅𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸.

𑀲𑀻𑀮𑀯𑀦𑁆𑀢𑀲𑁆𑀲𑀸𑀢𑀺 𑀲𑀻𑀮𑀯𑀦𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀸, 𑀲𑀻𑀮𑀯𑀦𑁆𑀢𑀲𑁆𑀲 𑀯𑀸 𑀢𑀼𑀬𑁆𑀳𑀁 𑀏𑀢𑀸𑀤𑀺𑀲𑀁 𑀅𑀁𑀲𑁂𑀦 𑀯𑀸𑀳𑀡𑀸𑀤𑀺𑀓𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀓𑀸𑀭𑀡𑀸 𑀲𑀻𑀮𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬𑀸𑀢𑀺 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀲𑀫𑁆𑀫𑀤𑁂𑀯 𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬. 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀪𑀸𑀕𑀺𑀦𑁂𑀬𑁆𑀬𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀸𑀦𑀁 𑀯𑀺𑀬𑀸𑀢𑀺 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑁂𑀯 𑀪𑀸𑀕𑀺𑀦𑁂𑀬𑁆𑀬𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀯𑀺𑀬 𑀘. ‘‘𑀓𑀺𑀫𑀢𑁆𑀣𑀁 𑀫𑀬𑀁 𑀇𑀥𑀸𑀕𑀢𑀸’’𑀢𑀺 𑀫𑀳𑀸𑀚𑀦𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀙𑀭𑀺𑀓𑀸𑀬𑀸𑀢𑀺 𑀅𑀗𑁆𑀕𑀼𑀮𑀺𑀨𑁄𑀝𑀦𑁂𑀦. 𑀅𑀲𑀢𑀺𑀬𑀸𑀢𑀺 𑀲𑀢𑀺𑀲𑀫𑁆𑀫𑁄𑀲𑁂𑀦. 𑀅𑀜𑁆𑀜𑀸𑀡𑀧𑀓𑀢𑀦𑁆𑀢𑀺 𑀅𑀜𑁆𑀜𑀸𑀡𑁂𑀦 𑀅𑀧𑀭𑀚𑁆𑀛𑀺𑀢𑁆𑀯𑀸 𑀓𑀢𑀁, 𑀅𑀚𑀸𑀦𑀺𑀢𑁆𑀯𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀲𑁆𑀲𑀼𑀢𑁄𑀧𑀺 𑀘𑁂 𑀳𑁄𑀢𑀻𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀲𑀼𑀢𑀭𑀳𑀺𑀢𑁄 𑀳𑁄𑀢𑀺 𑀘𑁂. 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀲𑀻𑀮𑁂𑀲𑀼𑀧𑀺 𑀦 𑀲𑀫𑁆𑀫𑀸 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺 𑀘𑁂. 𑀦𑀸𑀲𑁆𑀲 𑀲𑀫𑁆𑀧𑀚𑁆𑀚𑀢𑁂 𑀲𑀼𑀢𑀦𑁆𑀢𑀺 𑀅𑀲𑁆𑀲 𑀲𑀻𑀮𑀭𑀳𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀢𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀓𑀢𑁆𑀣𑀘𑀺 𑀪𑀯𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀦 𑀳𑁄𑀢𑀺. ‘‘𑀤𑀼𑀲𑁆𑀲𑀻𑀮𑁄𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺 𑀳𑀺 𑀲𑀺𑀓𑁆𑀔𑀸𑀓𑀸𑀫𑀸 𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀩𑀳𑀼𑀲𑁆𑀲𑀼𑀢𑁄𑀧𑀺 𑀘𑁂𑀢𑀺 𑀏𑀢𑁆𑀣 𑀘𑁂-𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀲𑀁𑀲𑀺𑀢𑁄𑀢𑀺 𑀧𑀲𑀁𑀲𑀺𑀢𑁄 𑀏𑀯 𑀦𑀸𑀫.

𑀭𑀸𑀕𑀯𑀲𑁂𑀦 𑀅𑀧𑀭𑀸𑀫𑀝𑁆𑀞𑀕𑀳𑀡𑁂𑀦 𑀢𑀡𑁆𑀳𑀸𑀧𑀭𑀸𑀫𑀸𑀲𑀸𑀪𑀸𑀯𑀫𑀸𑀳. 𑀢𑀣𑀸𑀭𑀽𑀧𑀦𑁆𑀢𑀺 𑀭𑀸𑀕𑀯𑀲𑁂𑀦 𑀅𑀧𑀭𑀸𑀫𑀝𑁆𑀞𑀁. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀳𑀦𑀺𑀢𑁆𑀯𑀸. 𑀲𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀜𑀢𑁆𑀢𑀺𑀁 ¶ 𑀓𑀭𑀺𑀲𑁆𑀲𑀸𑀫𑀺, 𑀅𑀧𑁆𑀧𑀓𑀁 𑀯𑁂𑀮𑀁 𑀫𑀁 𑀯𑀺𑀲𑁆𑀲𑁂𑀚𑁆𑀚𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀝𑀺𑀬𑀸𑀫𑀻𑀢𑀺 𑀚𑀺𑀕𑀼𑀘𑁆𑀙𑀸𑀫𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺.

𑀧𑀮𑀺𑀧𑀦𑁆𑀦𑁄𑀢𑀺 𑀲𑀻𑀤𑀦𑁆𑀢𑁄, 𑀲𑀫𑁆𑀫𑀓𑁆𑀔𑀺𑀢𑁄 𑀯𑀸. 𑀲𑀻𑀮𑁂𑀦𑁂𑀯 𑀲𑀤𑁆𑀥𑀺𑀁 𑀫𑀭𑀺𑀲𑁆𑀲𑀸𑀫𑀻𑀢𑀺 𑀲𑀻𑀮𑀁 𑀅𑀯𑀺𑀦𑀸𑀲𑁂𑀦𑁆𑀢𑁄 𑀢𑁂𑀦 𑀲𑀳𑁂𑀯 𑀫𑀭𑀺𑀲𑁆𑀲𑀸𑀫𑀺, 𑀦 𑀇𑀤𑀸𑀦𑀺 𑀓𑀤𑀸𑀘𑀺𑀧𑀺 𑀢𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀺. 𑀲𑀢𑀺 𑀳𑀺 𑀪𑀯𑀸𑀤𑀸𑀦𑁂 𑀲𑀻𑀮𑁂𑀦 𑀯𑀺𑀬𑁄𑀕𑁄 𑀲𑀺𑀬𑀸, 𑀪𑀯𑀫𑁂𑀯 𑀦𑀸𑀤𑀺𑀬𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑁄𑀕𑀁 𑀲𑀫𑁆𑀫𑀲𑀦𑁆𑀢𑁄𑀢𑀺 𑀭𑁄𑀕𑀪𑀽𑀢𑀁 𑀯𑁂𑀤𑀦𑀁 𑀯𑁂𑀤𑀦𑀸𑀫𑀼𑀔𑁂𑀦 𑀲𑁂𑀲𑀸𑀭𑀽𑀧𑀥𑀫𑁆𑀫𑁂, 𑀭𑀽𑀧𑀥𑀫𑁆𑀫𑁂 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄.

𑀭𑀼𑀧𑁆𑀧𑀢𑁄𑀢𑀺 𑀯𑀺𑀓𑀸𑀭𑀁 𑀆𑀧𑀸𑀤𑀺𑀬𑀫𑀸𑀦𑀲𑀭𑀻𑀭𑀲𑁆𑀲. 𑀧𑀭𑀺𑀲𑀼𑀲𑁆𑀲𑀢𑀻𑀢𑀺 𑀲𑀫𑀦𑁆𑀢𑀢𑁄 𑀲𑀼𑀲𑁆𑀲𑀢𑀺. 𑀬𑀣𑀸 𑀓𑀺𑀁? 𑀧𑀼𑀧𑁆𑀨𑀁 𑀬𑀣𑀸 𑀧𑀁𑀲𑀼𑀦𑀺 𑀆𑀢𑀧𑁂 𑀓𑀢𑀁 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀢𑁆𑀢𑁂 𑀧𑀁𑀲𑀼𑀦𑀺 𑀞𑀧𑀺𑀢𑀁 𑀲𑀺𑀭𑀻𑀲𑀸𑀤𑀺𑀧𑀼𑀧𑁆𑀨𑀁 𑀯𑀺𑀬𑀸𑀢𑀺 ¶ 𑀅𑀢𑁆𑀣𑁄. 𑀅𑀚𑀜𑁆𑀜𑀦𑁆𑀢𑀺 𑀅𑀫𑀦𑀼𑀜𑁆𑀜𑀁 𑀚𑀺𑀕𑀼𑀘𑁆𑀙𑀦𑀻𑀬𑀁. 𑀚𑀜𑁆𑀜𑀲𑀗𑁆𑀔𑀸𑀢𑀦𑁆𑀢𑀺 𑀩𑀸𑀮𑁂𑀳𑀺 ‘‘𑀚𑀜𑁆𑀜’’𑀦𑁆𑀢𑀺 𑀏𑀯𑀁 𑀓𑀺𑀢𑁆𑀢𑀺𑀢𑀁. 𑀚𑀜𑁆𑀜𑀭𑀽𑀧𑀁 𑀅𑀧𑀲𑁆𑀲𑀢𑁄𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀲𑁆𑀲𑀢𑁄 𑀅𑀯𑀺𑀤𑁆𑀤𑀲𑀼𑀦𑁄 ‘‘𑀚𑀜𑁆𑀜’’𑀦𑁆𑀢𑀺 𑀧𑀲𑀁𑀲𑀺𑀢𑀁. 𑀥𑀺𑀭𑀢𑁆𑀣𑀼𑀫𑀦𑁆𑀢𑀺 𑀥𑀺 𑀅𑀢𑁆𑀣𑀼 𑀇𑀫𑀁, 𑀥𑀺-𑀲𑀤𑁆𑀤𑀬𑁄𑀕𑁂𑀦 𑀲𑀩𑁆𑀩𑀢𑁆𑀣 𑀉𑀧𑀬𑁄𑀕𑀯𑀘𑀦𑀁, 𑀇𑀫𑀲𑁆𑀲 𑀧𑀽𑀢𑀺𑀓𑀸𑀬𑀲𑁆𑀲 𑀥𑀺𑀓𑀸𑀭𑁄 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀦𑁆𑀥𑀺𑀬𑀦𑁆𑀢𑀺 𑀤𑀼𑀕𑁆𑀕𑀦𑁆𑀥𑀺𑀓𑀁 𑀤𑀼𑀕𑁆𑀕𑀦𑁆𑀥𑀯𑀦𑁆𑀢𑀁. 𑀬𑀢𑁆𑀣 𑀬𑀣𑀸𑀯𑀼𑀢𑁆𑀢𑁂 𑀧𑀽𑀢𑀺𑀓𑀸𑀬𑁂 𑀭𑀸𑀕𑀳𑁂𑀢𑀼 𑀧𑀫𑀢𑁆𑀢𑀸 𑀧𑀫𑀸𑀤𑀁 𑀆𑀧𑀦𑁆𑀦𑀸. 𑀧𑀚𑀸𑀢𑀺 𑀲𑀢𑁆𑀢𑀸. 𑀳𑀸𑀧𑁂𑀦𑁆𑀢𑀺 𑀫𑀕𑁆𑀕𑀁 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸𑀢𑀺 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁, 𑀲𑀻𑀮𑀫𑁆𑀧𑀺 𑀳𑀸𑀧𑁂𑀦𑁆𑀢𑀺, 𑀧𑀕𑁂𑀯 𑀛𑀸𑀦𑀸𑀤𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀯𑀮𑀁 ‘‘𑀅𑀭𑀳𑀦𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀸 𑀲𑀸𑀯𑀓𑀔𑀻𑀡𑀸𑀲𑀯𑀸, 𑀇𑀢𑀭𑁂 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀲𑀳 𑀯𑀺𑀲𑁂𑀲𑀦𑁂𑀦𑀸𑀢𑀺 𑀆𑀳 ‘‘𑀅𑀭𑀳𑀦𑁆𑀢𑀸𑀤𑀻𑀦’’𑀦𑁆𑀢𑀺. 𑀲𑀩𑁆𑀩𑀤𑀭𑀣𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸.

𑀤𑀼𑀢𑀺𑀬𑀲𑀻𑀮𑀧𑀜𑁆𑀘𑀓𑀯𑀡𑁆𑀡𑀦𑀸

𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀅𑀕𑁆𑀕𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀧𑀭𑀺𑀬𑁄𑀲𑀸𑀦𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀳𑀸𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀭𑀫𑀡𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀳𑀸𑀦𑀯𑀲𑁂𑀦𑀸’’𑀢𑀺 𑀮𑀺𑀔𑀦𑁆𑀢𑀺, 𑀲𑀸 𑀧𑀫𑀸𑀤𑀮𑁂𑀔𑀸. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁 𑀲𑀻𑀮𑀦𑁆𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀓𑀭𑀼𑀡𑀸𑀮𑁄𑀪𑀸𑀤𑀺𑀧𑀫𑀼𑀔𑁂𑀦 𑀬𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀧𑀳𑀻𑀬𑀢𑀺, 𑀢𑀁 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸 ¶ 𑀯𑀺𑀭𑀢𑀺 𑀯𑁂𑀭𑀫𑀡𑀻 𑀲𑀻𑀮𑀁. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀝𑀺𑀧𑀓𑁆𑀔𑀘𑁂𑀢𑀦𑀸 𑀘𑁂𑀢𑀦𑀸 𑀲𑀻𑀮𑀁. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀲𑀁𑀯𑀭𑀡𑀁 𑀧𑀯𑁂𑀲𑀤𑁆𑀯𑀸𑀭𑀧𑀺𑀥𑀸𑀦𑀁 𑀲𑀁𑀯𑀭𑁄 𑀲𑀻𑀮𑀁. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀦𑀁 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀦 𑀅𑀦𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀭𑀫𑀡𑀻 𑀘𑁂𑀢𑀦𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀁𑀯𑀭𑀸𑀯𑀻𑀢𑀺𑀓𑁆𑀓𑀫𑀸 𑀢𑀧𑁆𑀧𑀫𑀼𑀔𑀸 𑀥𑀫𑁆𑀫𑀸.

𑀏𑀯𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀧𑀳𑀸𑀦𑀲𑀻𑀮𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀉𑀧𑀸𑀬𑀸𑀦𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁, 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀯𑀺𑀧𑀲𑁆𑀲𑀦𑀸𑀦𑀁, 𑀅𑀭𑀺𑀬𑀫𑀕𑁆𑀕𑀸𑀦𑀜𑁆𑀘 𑀯𑀲𑁂𑀦 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀦𑁂𑀓𑁆𑀔𑀫𑁆𑀫𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀅𑀮𑁄𑀪𑀧𑁆𑀧𑀥𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀓𑀸𑀫𑀧𑀝𑀺𑀧𑀓𑁆𑀔𑀸 𑀇𑀥 ‘‘𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 ‘‘𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀁 𑀲𑀻𑀮’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀳𑀸𑀦𑀲𑀻𑀮𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀺𑀲𑁂𑀲𑀫𑁂𑀯 𑀯𑀓𑁆𑀔𑀸𑀫. 𑀅𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀫𑁂𑀢𑁆𑀢𑀸𑀬. 𑀆𑀮𑁄𑀓𑀲𑀜𑁆𑀜𑀸𑀬𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀚𑀸𑀦𑀦𑁂𑀦 ¶ . 𑀅𑀯𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀦𑀺𑀘𑁆𑀙𑀬𑁂𑀦. 𑀲𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁩𑁮) 𑀯𑀼𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀯𑀲𑁂𑀦 𑀧𑀳𑀸𑀦𑀲𑀻𑀮𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀉𑀧𑀸𑀬𑀸𑀦𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀁 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀁 𑀳𑀺 𑀯𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺. 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦. 𑀢𑀢𑁆𑀣 𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀦𑀁 𑀅𑀭𑀢𑀺𑀯𑀺𑀦𑁄𑀤𑀦𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀸𑀤𑀺𑀦𑀸 𑀉𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀬, 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀬𑀸’’𑀢𑀺. 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀧𑀦 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸𑀦𑀻𑀯𑀭𑀡𑁂𑀲𑀼𑀧𑀺 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀧𑀞𑀫𑁂𑀦 ¶ 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀓𑀣𑀁 𑀛𑀸𑀦𑀸𑀦𑀁 𑀲𑀻𑀮𑀪𑀸𑀯𑁄, 𑀓𑀣𑀁 𑀯𑀸 𑀢𑀢𑁆𑀣 𑀯𑀺𑀭𑀢𑀺𑀬𑀸 𑀲𑀫𑁆𑀪𑀯𑁄. 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀳𑀺 𑀘𑀺𑀢𑁆𑀢𑀲𑀫𑀸𑀤𑀸𑀦𑀯𑀲𑁂𑀦 𑀇𑀫𑀸𑀦𑀺 𑀛𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀦 𑀧𑀭𑀺𑀢𑁆𑀢𑀓𑀼𑀲𑀮𑀸𑀦𑀺 𑀯𑀺𑀬 𑀓𑀸𑀬𑀓𑀫𑁆𑀫𑀸𑀤𑀺𑀯𑀺𑀲𑁄𑀥𑀦𑀯𑀲𑁂𑀦, 𑀦𑀸𑀧𑀺 𑀫𑀕𑁆𑀕𑀨𑀮𑀥𑀫𑁆𑀫𑀸 𑀯𑀺𑀬 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦𑀸𑀢𑀺? 𑀲𑀘𑁆𑀘𑀫𑁂𑀢𑀁. 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀦𑀢𑁆𑀣𑀺 𑀲𑀻𑀮𑀦𑀝𑁆𑀞𑁄, 𑀓𑀼𑀢𑁄 𑀯𑀺𑀭𑀫𑀡𑀝𑁆𑀞𑁄. 𑀧𑀭𑀺𑀬𑀸𑀬𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁄 𑀧𑀦 𑀲𑁄 𑀧𑀭𑀺𑀬𑀸𑀬𑁄? 𑀬𑀤𑀕𑁆𑀕𑁂𑀦 𑀫𑀳𑀕𑁆𑀕𑀢𑀸 𑀓𑀼𑀲𑀮𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑁂 𑀧𑀚𑀳𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀢𑀢𑁄 𑀑𑀭𑀢𑀸. 𑀢𑁂 𑀘 𑀬𑀣𑀸 𑀘𑀺𑀢𑁆𑀢𑀁 𑀦𑀸𑀭𑁄𑀳𑀦𑁆𑀢𑀺, 𑀏𑀯𑀁 𑀲𑀁𑀯𑀼𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑁄 𑀫𑀦𑁄𑀤𑁆𑀯𑀸𑀭𑁂 𑀯𑀻𑀢𑀺𑀓𑁆𑀓𑀫𑁄 𑀦𑀢𑁆𑀣𑀺 𑀏𑀢𑁂𑀲𑀽𑀢𑀺 𑀅𑀯𑀻𑀢𑀺𑀓𑁆𑀓𑀫𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀘𑁂𑀢𑀦𑀸 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀲𑁄𑀬𑀫𑀢𑁆𑀣𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀢𑀓𑁆𑀓𑀸𑀤𑀺𑀧𑀳𑀸𑀦𑀯𑀘𑀦𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀦 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀻𑀮𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀳𑀸𑀬𑀓𑀁 𑀬𑀼𑀚𑁆𑀚𑀢𑀺, 𑀦 𑀘𑁂𑀢𑁆𑀣 𑀅𑀓𑀼𑀲𑀮𑀯𑀺𑀢𑀓𑁆𑀓𑀸𑀤𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀤𑀼𑀓𑁆𑀔𑀲𑁆𑀲, 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀲𑀼𑀔𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺, 𑀅𑀢𑀺𑀲𑀬𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀳𑀸𑀦’’𑀦𑁆𑀢𑀺. ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀆𑀭𑀼𑀧𑁆𑀧𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁫 𑀆𑀤𑀬𑁄) 𑀆𑀕𑀫𑀺𑀲𑁆𑀲𑀢𑀺.

𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀢𑁂𑀪𑀽𑀫𑀺𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 ¶ 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀸𑀬𑀸𑀢𑀺 ‘‘𑀲𑀗𑁆𑀔𑀢𑀥𑀫𑁆𑀫𑀸 𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀫𑀺𑀘𑁆𑀙𑀸𑀲𑀜𑁆𑀜𑀸𑀬, 𑀲𑀜𑁆𑀜𑀸𑀕𑁆𑀕𑀳𑀡𑁂𑀦𑁂𑀯 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑀸𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀦𑁆𑀤𑀺𑀬𑀸𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀭𑀸𑀕𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀭𑀸𑀕𑀲𑁆𑀲. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬. 𑀬𑀣𑀸 𑀯𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀻’’𑀢𑀺 (𑀧𑀝𑀺. 𑀫. 𑁧.𑁮𑁩). 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸𑀬 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸. 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁 ¶ . 𑀆𑀤𑀸𑀦𑀲𑁆𑀲𑀸𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀲𑁆𑀲. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁆𑀢𑀕𑀳𑀡𑀁 𑀖𑀦𑀲𑀜𑁆𑀜𑀸, 𑀢𑀲𑁆𑀲𑀸 𑀖𑀦𑀲𑀜𑁆𑀜𑀸𑀬. 𑀆𑀬𑀽𑀳𑀦𑀲𑁆𑀲𑀸𑀢𑀺 𑀅𑀪𑀺𑀲𑀗𑁆𑀔𑀭𑀡𑀲𑁆𑀲. 𑀲𑀗𑁆𑀔𑀸𑀭𑀸𑀦𑀁 𑀅𑀯𑀢𑁆𑀣𑀸𑀤𑀺𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀸𑀬𑀸𑀢𑀺 𑀣𑀺𑀭𑀪𑀸𑀯𑀕𑀳𑀡𑀲𑁆𑀲. 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀢𑀸𑀬. 𑀧𑀡𑀺𑀥𑀺𑀬𑀸𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀬𑀸, 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀯𑁂𑀲𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸. 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀢𑀺𑀭𑀡𑀸 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀲𑁆𑀲𑀸𑀢𑀺 𑀅𑀲𑀸𑀭𑁂𑀲𑀼 𑀲𑀸𑀭𑀕𑀳𑀡𑀯𑀺𑀧𑀮𑁆𑀮𑀸𑀲𑀲𑁆𑀲. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀣𑀺𑀭𑀪𑀸𑀯𑀧𑀢𑁆𑀢𑀸 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀯. 𑀉𑀤𑀬𑀩𑁆𑀩𑀬𑀜𑀸𑀡𑀦𑁆𑀢𑀺 𑀓𑁂𑀘𑀺. 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀦𑁆𑀢𑀺 𑀅𑀧𑀭𑁂. ‘‘𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄. 𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄𑀢𑀺 𑀅𑀧𑀭𑁂. 𑀲𑀗𑁆𑀔𑀸𑀭𑁂𑀲𑀼 𑀢𑀸𑀡𑀮𑁂𑀡𑀪𑀸𑀯𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭-𑁮) 𑀯𑀘𑀦𑀢𑁄 𑀆𑀮𑀬𑁄 𑀢𑀡𑁆𑀳𑀸. 𑀲𑀸 𑀏𑀯 𑀘𑀓𑁆𑀔𑀸𑀤𑀻𑀲𑀼, 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀅𑀧𑀭𑁂. ‘‘𑀏𑀯𑀁 𑀞𑀺𑀢𑀸 𑀢𑁂 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀅𑀧𑁆𑀧𑀝𑀺𑀲𑀗𑁆𑀔𑀸 𑀧𑀝𑀺𑀲𑀗𑁆𑀔𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀸 𑀫𑁄𑀳𑀧𑁆𑀧𑀥𑀸𑀦𑀸 𑀅𑀓𑀼𑀲𑀮𑀥𑀫𑁆𑀫𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀦𑀺𑀦𑁆𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀘𑁂𑀯 𑀅𑀦𑀼𑀮𑁄𑀫𑀜𑀸𑀡𑀜𑁆𑀘. 𑀲𑀜𑁆𑀜𑁄𑀕𑀸𑀪𑀺𑀦𑀺𑀯𑁂𑀲𑁄 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀦𑀺𑀯𑀺𑀲𑀦𑀁.

𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀦𑁆𑀢𑀺 ¶ 𑀤𑀺𑀝𑁆𑀞𑀺𑀬𑀸 𑀲𑀳𑀚𑁂𑀓𑀝𑁆𑀞𑀸𑀦𑀜𑁆𑀘 𑀧𑀳𑀸𑀦𑁂𑀓𑀝𑁆𑀞𑀸𑀦𑀜𑁆𑀘. 𑀑𑀴𑀸𑀭𑀺𑀓𑀸𑀦𑀦𑁆𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺 𑀑𑀴𑀸𑀭𑀺𑀓𑀸. 𑀅𑀡𑀼𑀲𑀳𑀕𑀢𑀸𑀦𑀦𑁆𑀢𑀺 𑀅𑀡𑀼𑀪𑀽𑀢𑀸𑀦𑀁, 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑀸𑀦𑀁. 𑀦 𑀳𑀺 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀺.

‘‘𑀘𑀺𑀢𑁆𑀢𑀲𑁆𑀲 ¶ 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬. ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻’’𑀢𑀺 (𑀅. 𑀦𑀺. 𑁧𑁦.𑁧) 𑀯𑀘𑀦𑀢𑁄 𑀘𑁂𑀢𑀲𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬 𑀪𑀯𑀦𑁆𑀢𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬. ‘‘𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁫𑁯) 𑀯𑀘𑀦𑀢𑁄 𑀧𑀸𑀫𑁄𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀬𑀸. ‘‘𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀅. 𑀦𑀺. 𑁩.𑁯𑁬; 𑁬.𑁧𑁦; 𑁧𑁧.𑁧𑁨) 𑀯𑀘𑀦𑀢𑁄 𑀧𑀻𑀢𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬. ‘‘𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀅. 𑀦𑀺. 𑁩.𑁯𑁬; 𑁬.𑁧𑁦; 𑁧𑁧.𑁧𑁨) 𑀯𑀘𑀦𑀢𑁄 𑀧𑀲𑁆𑀲𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬. ‘‘𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀅. 𑀦𑀺. 𑁩.𑁯𑁬; 𑁬.𑁧𑁦; 𑁧𑁧.𑁧𑁨) 𑀯𑀘𑀦𑀢𑁄 𑀲𑁄𑀫𑀦𑀲𑁆𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀲𑀼𑀔𑀢𑁆𑀣𑀸𑀬 𑀲𑀼𑀔𑀁 𑀯𑁂𑀤𑁂𑀢𑀻’’𑀢𑀺 𑀘𑁂𑀢𑁆𑀣 𑀲𑁄𑀫𑀦𑀲𑁆𑀲𑀁 ‘‘𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀲𑁂𑀯𑀦𑀸𑀬𑀸𑀢𑀺 𑀲𑀫𑀸𑀥𑀺𑀲𑁆𑀲 𑀆𑀲𑁂𑀯𑀦𑀸𑀬. 𑀦𑀺𑀭𑀸𑀫𑀺𑀲𑁂 𑀳𑀺 𑀲𑀼𑀔𑁂 𑀲𑀺𑀤𑁆𑀥𑁂 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀅. 𑀦𑀺. 𑁩.𑁯𑁬; 𑁬.𑁧𑁦; 𑁧𑁧.𑁧𑁨) 𑀯𑀘𑀦𑀢𑁄 𑀲𑀫𑀸𑀥𑀺 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀸𑀥𑀺𑀲𑁆𑀲 𑀆𑀲𑁂𑀯𑀦𑀸𑀬 𑀧𑀕𑀼𑀡𑀩𑀮𑀯𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀬𑀸𑀢𑀺 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲 𑀯𑀟𑁆𑀠𑀺𑀬𑀸. 𑀩𑀳𑀼𑀮𑀻𑀓𑀫𑁆𑀫𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀺𑀭𑀺𑀬𑀸𑀬. 𑀅𑀮𑀗𑁆𑀓𑀸𑀭𑀸𑀬𑀸𑀢𑀺 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲 𑀧𑀲𑀸𑀥𑀦𑀪𑀽𑀢𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀮𑀗𑁆𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀭𑀺𑀓𑁆𑀔𑀸𑀭𑀸𑀬𑀸𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀓𑀲𑁆𑀲 𑀲𑀫𑀸𑀥𑀺𑀲𑀫𑁆𑀪𑀸𑀭𑀲𑁆𑀲 𑀲𑀺𑀤𑁆𑀥𑀺𑀬𑀸 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲 𑀧𑀭𑀺𑀓𑁆𑀔𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀫𑁆𑀪𑀸𑀭𑀢𑁆𑀣𑁄 𑀳𑀺 𑀇𑀥 𑀧𑀭𑀺𑀓𑁆𑀔𑀸𑀭-𑀲𑀤𑁆𑀤𑁄. ‘‘𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯𑁧) 𑀯𑀺𑀬 𑀲𑀫𑁆𑀪𑀸𑀭𑁄𑀢𑀺 𑀘 𑀧𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘𑀸𑀬𑀁 𑀧𑀭𑀺𑀓𑁆𑀔𑀸𑀭-𑀲𑀤𑁆𑀤𑁄 ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀅𑀮𑀗𑁆𑀓𑀸𑀭𑀢𑁆𑀣𑁄. ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁭) 𑀧𑀭𑀺𑀯𑀸𑀭𑀢𑁆𑀣𑁄 𑀯𑀼𑀢𑁆𑀢𑁄. 𑀇𑀥 𑀧𑀦 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀲𑀫𑁆𑀪𑀸𑀭𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁 ¶ . 𑀧𑀭𑀺𑀯𑀸𑀭𑀸𑀬𑀸𑀢𑀺 𑀫𑀽𑀮𑀓𑀸𑀭𑀡𑀪𑀸𑀯𑁂𑀦𑁂𑀯 𑀲𑀫𑀸𑀥𑀺𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀲𑀢𑀺𑀯𑀻𑀭𑀺𑀬𑀸𑀤𑀺𑀥𑀫𑁆𑀫𑀯𑀺𑀲𑁂𑀲𑀲𑀸𑀥𑀦𑁂𑀦 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀯𑀲𑀻𑀪𑀸𑀯𑀲𑀫𑁆𑀧𑀸𑀧𑀦𑁂𑀦, 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑀸𑀧𑀸𑀤𑀦𑁂𑀦 𑀘 𑀧𑀭𑀺𑀧𑀼𑀡𑁆𑀡𑀪𑀸𑀯𑀲𑀸𑀥𑀦𑀢𑁄 𑀲𑀫𑀸𑀥𑀺𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺.

𑀏𑀯𑀁 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀫𑀽𑀮𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀲𑀫𑀸𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀲𑀫𑀸𑀳𑀺𑀢𑁄 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀬𑀣𑀸𑀪𑀽𑀢𑀁 𑀚𑀸𑀦𑀁 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺 ¶ , 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁧𑁦.𑁨; 𑀲. 𑀦𑀺. 𑁩.𑁧𑁪) 𑀯𑀘𑀦𑀢𑁄 𑀲𑀻𑀮𑀫𑀽𑀮𑀓𑀸𑀦𑀺 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸𑀦𑀺 𑀧𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀺𑀤𑀸𑀬 𑀳𑀺 𑀤𑀲𑁆𑀲𑀺𑀢𑀸𑀬 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑀪𑀽𑀢𑀁 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀬 𑀅𑀲𑀺𑀚𑁆𑀛𑀦𑀢𑁄. 𑀦𑀺𑀩𑁆𑀩𑀺𑀤𑀸𑀤𑀬𑁄 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀸 𑀏𑀯. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀦𑁂𑀢𑁆𑀣 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀫𑁂𑀢𑁆𑀣 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁 𑀲𑀻𑀮𑀲𑁆𑀲 𑀧𑀬𑁄𑀚𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀧𑀳𑀸𑀦𑀸𑀤𑀻𑀲𑀼 𑀲𑀻𑀮𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀚𑀳𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀧𑀳𑀸𑀦𑀦𑁆𑀢𑀺 𑀢𑀲𑁆𑀲 𑀪𑀸𑀯𑀲𑀸𑀥𑀦𑀢𑀁 𑀲𑀦𑁆𑀥𑀸𑀬 ‘‘𑀧𑀳𑀸𑀦𑀦𑁆𑀢𑀺 𑀓𑁄𑀘𑀺 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀧𑀦𑀲𑁆𑀲 𑀥𑀫𑁆𑀫𑀪𑀸𑀯𑁄 𑀲𑀫𑁆𑀪𑀯𑀢𑀺, 𑀢𑀣𑀸 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀫𑁂𑀯. 𑀏𑀯𑀁 𑀳𑀺𑀲𑁆𑀲 𑀲𑀻𑀮𑀪𑀸𑀯𑁄 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀢𑀁 𑀢𑀁 𑀧𑀳𑀸𑀦𑀦𑁆𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁, 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀳𑀸𑀦’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀢𑀁 𑀢𑀁 𑀧𑀳𑀸𑀦𑀁. 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀥𑀫𑁆𑀫𑀲𑁆𑀲𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁 𑀫𑁂𑀢𑁆𑀢𑀸𑀤𑀺𑀓𑀼𑀲𑀮𑀥𑀫𑁆𑀫𑀲𑁆𑀲, 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀳𑀸𑀦𑀁 𑀘𑀸𑀕𑀸𑀤𑀺𑀓𑀼𑀲𑀮𑀥𑀫𑁆𑀫𑀲𑁆𑀲𑀸𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀥𑀫𑁆𑀫𑀲𑁆𑀲. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦. 𑀧𑀳𑀸𑀦𑀁 𑀳𑀺 𑀢𑀲𑁆𑀫𑀺𑀁 𑀲𑀢𑀺 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀺, 𑀢𑀲𑁆𑀲 ‘‘𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀓𑀢𑁆𑀯𑀸 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀢𑀲𑁆𑀲 𑀧𑀓𑀫𑁆𑀧𑀳𑁂𑀢𑀯𑁄𑀢𑀺 𑀢𑀧𑁆𑀧𑀳𑀸𑀦𑀁 𑀯𑀺𑀓𑀫𑁆𑀧𑀸𑀪𑀸𑀯𑀓𑀭𑀡𑁂𑀦 𑀘 𑀲𑀫𑀸𑀥𑀸𑀦𑀁 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑀧𑀳𑀸𑀦𑁂𑀲𑀼𑀧𑀺 𑀯𑀢𑁆𑀢𑀩𑁆𑀩𑀁. 𑀲𑀫𑀸𑀥𑀸𑀦𑀁 𑀲𑀡𑁆𑀞𑀧𑀦𑀁, 𑀲𑀁𑀬𑀫𑀦𑀁 𑀯𑀸. 𑀇𑀢𑀭𑁂 𑀘𑀢𑁆𑀢𑀸𑀭𑁄𑀢𑀺 𑀯𑁂𑀭𑀫𑀡𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀦 𑀧𑀳𑀸𑀦𑀁 𑀯𑀺𑀬 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀢𑀢𑁄𑀢𑀺 𑀢𑀫𑁆𑀳𑀸 𑀢𑀫𑁆𑀳𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀲𑁆𑀲 𑀲𑀁𑀯𑀭𑀡𑀯𑀲𑁂𑀦, 𑀢𑀲𑁆𑀲 𑀢𑀲𑁆𑀲 𑀯𑀸 𑀲𑀁𑀯𑀭𑀲𑁆𑀲 𑀯𑀲𑁂𑀦. 𑀢𑀤𑀼𑀪𑀬𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀯𑀲𑁂𑀦𑀸𑀢𑀺 𑀯𑁂𑀭𑀫𑀡𑀻𑀳𑀺, 𑀲𑀁𑀯𑀭𑀥𑀫𑁆𑀫𑁂𑀳𑀺 𑀘 𑀲𑀫𑁆𑀧𑀬𑀼𑀢𑁆𑀢𑀸𑀬 𑀘𑁂𑀢𑀦𑀸𑀬 𑀯𑀲𑁂𑀦. 𑀢𑀁 𑀢𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀢𑀁 𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀥𑀫𑁆𑀫𑀲𑀫𑀽𑀳𑀲𑁆𑀲 𑀯𑀸 𑀯𑀲𑁂𑀦 𑀘𑁂𑀢𑀲𑁄 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀓𑀓𑁆𑀔𑀡𑁂𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀻𑀮𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀡𑁆𑀡𑀦𑀸

𑁨𑁧. 𑀲𑀁𑀓𑀺𑀮𑀺𑀲𑁆𑀲𑀢𑀺 ¶ ¶ 𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑁄. 𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀔𑀡𑁆𑀟𑀸𑀤𑀺𑀪𑀸𑀯𑁄 𑀲𑀻𑀮𑀲𑁆𑀲 𑀲𑀁𑀓𑀺𑀮𑁂𑀲𑁄’’𑀢𑀺. 𑀯𑁄𑀤𑀸𑀬𑀢𑀺 𑀯𑀺𑀲𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑁄𑀤𑀸𑀦𑀁, 𑀅𑀔𑀡𑁆𑀟𑀸𑀤𑀺𑀪𑀸𑀯𑁄. 𑀮𑀸𑀪𑀬𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀜𑀸𑀢𑀺𑀅𑀗𑁆𑀕𑀚𑀻𑀯𑀺𑀢𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀯𑁂𑀫𑀚𑁆𑀛𑁂𑀢𑀺 𑀘 𑀇𑀤𑀁 𑀢𑁂𑀲𑀁 𑀉𑀤𑁆𑀤𑁂𑀲𑀸𑀤𑀺𑀧𑀸𑀴𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑁄 𑀓𑁄𑀘𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑀼𑀓𑁆𑀓𑀫𑁄 𑀅𑀢𑁆𑀣𑀺. 𑀔𑀡𑁆𑀟𑀦𑁆𑀢𑀺 𑀔𑀡𑁆𑀟𑀯𑀦𑁆𑀢𑀁, 𑀔𑀡𑁆𑀟𑀺𑀢𑀁 𑀯𑀸. 𑀙𑀺𑀤𑁆𑀤𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀯𑀢𑁆𑀣𑀦𑁆𑀢𑁂, 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬.

𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀫𑁂𑀣𑀼𑀦𑀲𑀁𑀬𑁄𑀕𑀯𑀲𑁂𑀦𑀸𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀺𑀣𑀼𑀦𑀸𑀦𑀁 𑀇𑀤𑀦𑁆𑀢𑀺 𑀫𑁂𑀣𑀼𑀦𑀁, 𑀦𑀺𑀩𑀦𑁆𑀥𑀦𑀁. 𑀫𑁂𑀣𑀼𑀦𑀯𑀲𑁂𑀦 𑀲𑀫𑀸𑀬𑁄𑀕𑁄 𑀫𑁂𑀣𑀼𑀦𑀲𑀁𑀬𑁄𑀕𑁄. 𑀇𑀥 𑀧𑀦 𑀫𑁂𑀣𑀼𑀦𑀲𑀁𑀬𑁄𑀕𑁄 𑀯𑀺𑀬𑀸𑀢𑀺 𑀫𑁂𑀣𑀼𑀦𑀲𑀁𑀬𑁄𑀕𑁄, 𑀢𑀲𑁆𑀲 𑀯𑀲𑁂𑀦. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀏𑀓𑀘𑁆𑀘𑁄𑀢𑀺 𑀏𑀓𑁄. 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦 𑀲𑀫𑀡𑁄 𑀯𑀸 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀯𑀸. 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀫𑁂𑀣𑀼𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀳𑁂𑀯 𑀔𑁄 𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀘𑁆𑀙𑀸𑀤𑀦𑀁 𑀉𑀩𑁆𑀩𑀢𑁆𑀢𑀦𑀁. 𑀲𑀫𑁆𑀩𑀸𑀳𑀦𑀁 𑀧𑀭𑀺𑀫𑀤𑁆𑀤𑀦𑀁. 𑀲𑀸𑀤𑀺𑀬𑀢𑀻𑀢𑀺 𑀅𑀥𑀺𑀯𑀸𑀲𑁂𑀢𑀺. 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀢𑀁 𑀉𑀘𑁆𑀙𑀸𑀤𑀦𑀸𑀤𑀺𑀁 𑀅𑀪𑀺𑀭𑀫𑀢𑀺. 𑀦𑀺𑀓𑀸𑀫𑁂𑀢𑀻𑀢𑀺 𑀇𑀘𑁆𑀙𑀢𑀺. 𑀯𑀺𑀢𑁆𑀢𑀺𑀦𑁆𑀢𑀺 𑀢𑀼𑀝𑁆𑀞𑀺𑀁. 𑀇𑀤𑀫𑁆𑀧𑀺 𑀔𑁄𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀸𑀤𑀺𑀬𑀦𑀸𑀤𑀺𑀁 𑀔𑀡𑁆𑀟𑀪𑀸𑀯𑀸𑀤𑀺𑀯𑀲𑁂𑀦 𑀏𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀺-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑁂𑀢𑀁 𑀩𑁆𑀭𑀳𑁆𑀫𑀘𑀸𑀭𑀻𑀧𑀝𑀺𑀜𑁆𑀜𑀲𑁆𑀲 𑀅𑀲𑀢𑀺𑀧𑀺 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀲𑀸𑀤𑀺𑀬𑀦𑀸𑀤𑀺, 𑀇𑀤𑀫𑁆𑀧𑀺 𑀏𑀓𑀁𑀲𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑀢𑁄 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀻𑀢𑀺. 𑀏𑀯𑀁 𑀧𑀦 𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀲𑁄 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀦 𑀧𑀭𑀺𑀲𑀼𑀤𑁆𑀥𑀁, 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑀲𑀁𑀬𑁄𑀕𑁂𑀦, 𑀦 𑀯𑀺𑀲𑀁𑀬𑀼𑀢𑁆𑀢𑁄. 𑀢𑀢𑁄 𑀘𑀲𑁆𑀲 𑀦 𑀚𑀸𑀢𑀺𑀆𑀤𑀻𑀳𑀺 𑀧𑀭𑀺𑀫𑀼𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳.

𑀲𑀜𑁆𑀚𑀕𑁆𑀖𑀢𑀻𑀢𑀺 𑀓𑀺𑀮𑁂𑀲𑀯𑀲𑁂𑀦 𑀫𑀳𑀸𑀳𑀲𑀺𑀢𑀁 𑀳𑀲𑀢𑀺. 𑀲𑀁𑀓𑀻𑀴𑀢𑀻𑀢𑀺 𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦 𑀓𑀻𑀴𑀢𑀺. 𑀲𑀁𑀓𑁂𑀮𑀸𑀬𑀢𑀻𑀢𑀺 𑀲𑀩𑁆𑀩𑀲𑁄 𑀫𑀸𑀢𑀼𑀕𑀸𑀫𑀁 𑀓𑁂𑀮𑀸𑀬𑀦𑁆𑀢𑁄 ¶ 𑀯𑀺𑀳𑀭𑀢𑀺. 𑀘𑀓𑁆𑀔𑀼𑀦𑀸𑀢𑀺 𑀅𑀢𑁆𑀢𑀦𑁄 𑀘𑀓𑁆𑀔𑀼𑀦𑀸. 𑀘𑀓𑁆𑀔𑀼𑀦𑁆𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀁. 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑁂𑀘𑁆𑀘 𑀦𑀺𑀚𑁆𑀛𑀸𑀬𑀢𑀺 𑀑𑀮𑁄𑀓𑁂𑀢𑀺. 𑀢𑀺𑀭𑁄𑀓𑀼𑀝𑁆𑀝𑀸𑀢𑀺 𑀓𑀼𑀝𑁆𑀝𑀲𑁆𑀲 ¶ 𑀧𑀭𑀢𑁄. 𑀢𑀣𑀸 𑀢𑀺𑀭𑁄𑀧𑀸𑀓𑀸𑀭𑀸. 𑀫𑀢𑁆𑀢𑀺𑀓𑀸𑀫𑀬𑀸 𑀪𑀺𑀢𑁆𑀢𑀺 𑀓𑀼𑀝𑁆𑀝𑀁, 𑀇𑀝𑁆𑀞𑀓𑀸𑀫𑀬𑀸 𑀧𑀸𑀓𑀸𑀭𑁄𑀢𑀺 𑀯𑀤𑀦𑁆𑀢𑀺. 𑀬𑀸 𑀓𑀸𑀘𑀺 𑀯𑀸 𑀪𑀺𑀢𑁆𑀢𑀺 𑀧𑁄𑀭𑀺𑀲𑀢𑁄 𑀤𑀺𑀬𑀟𑁆𑀠𑀭𑀢𑀦𑀼𑀘𑁆𑀘𑀧𑁆𑀧𑀫𑀸𑀡𑀸 𑀓𑀼𑀝𑁆𑀝𑀁, 𑀓𑀼𑀝𑁆𑀝𑀢𑁄 𑀅𑀥𑀺𑀓𑁄 𑀧𑀸𑀓𑀸𑀭𑁄.

𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀘𑀸𑀭𑀻𑀧𑀝𑀺𑀜𑁆𑀜𑀲𑁆𑀲. 𑀧𑀼𑀩𑁆𑀩𑁂𑀢𑀺 𑀯𑀢𑀲𑀫𑀸𑀤𑀸𑀦𑀢𑁄 𑀧𑀼𑀩𑁆𑀩𑁂. 𑀓𑀸𑀫𑀕𑀼𑀡𑁂𑀳𑀻𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺. 𑀲𑀫𑀧𑁆𑀧𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀲𑀳𑀺𑀢𑀁. 𑀲𑀫𑀗𑁆𑀕𑀻𑀪𑀽𑀢𑀦𑁆𑀢𑀺 𑀲𑀫𑀦𑁆𑀦𑀸𑀕𑀢𑀁. 𑀧𑀭𑀺𑀘𑀸𑀭𑀬𑀫𑀸𑀦𑀦𑁆𑀢𑀺 𑀓𑀻𑀴𑀦𑁆𑀢𑀁, 𑀉𑀧𑀝𑁆𑀞𑀳𑀺𑀬𑀫𑀸𑀦𑀁 𑀯𑀸. 𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑁂𑀢𑁆𑀯𑀸. 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀬𑀫𑀦𑀺𑀬𑀫𑀸𑀤𑀺𑀲𑀫𑀸𑀤𑀸𑀦𑀯𑀲𑁂𑀦 𑀲𑀻𑀮𑀁. 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀯𑀢𑀁. 𑀉𑀪𑀬𑀫𑁆𑀧𑀺 𑀲𑀻𑀮𑀁. 𑀤𑀼𑀓𑁆𑀓𑀭𑀘𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀯𑀢𑀁. 𑀢𑀁𑀢𑀁𑀅𑀓𑀺𑀘𑁆𑀘𑀲𑀫𑁆𑀫𑀢𑀢𑁄 𑀯𑀸 𑀦𑀺𑀯𑀢𑁆𑀢𑀺𑀮𑀓𑁆𑀔𑀡𑀁 𑀲𑀻𑀮𑀁. 𑀢𑀁𑀢𑀁𑀲𑀫𑀸𑀤𑀸𑀦𑀯𑀢𑁄 𑀯𑁂𑀲𑀪𑁄𑀚𑀦𑀓𑀺𑀘𑁆𑀘𑀓𑀭𑀡𑀸𑀤𑀺𑀯𑀺𑀲𑁂𑀲𑀧𑀝𑀺𑀧𑀢𑁆𑀢𑀺 𑀯𑀢𑀁. 𑀲𑀩𑁆𑀩𑀣𑀸𑀧𑀺 𑀤𑀼𑀓𑁆𑀓𑀭𑀘𑀭𑀺𑀬𑀸 𑀢𑀧𑁄. 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁.

𑀲𑀩𑁆𑀩𑀲𑁄𑀢𑀺 𑀅𑀦𑀯𑀲𑁂𑀲𑀢𑁄, 𑀲𑀩𑁆𑀩𑁂𑀲𑀁 𑀯𑀸. 𑀅𑀪𑁂𑀤𑁂𑀦𑀸𑀢𑀺 𑀅𑀯𑀻𑀢𑀺𑀓𑁆𑀓𑀫𑁂𑀦. 𑀅𑀧𑀭𑀸𑀬 𑀘 𑀧𑀸𑀧𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸, 𑀕𑀼𑀡𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 𑀓𑁄𑀥𑁄. 𑀉𑀧𑀦𑀦𑁆𑀥𑀦𑀮𑀓𑁆𑀔𑀡𑁄 𑀉𑀧𑀦𑀸𑀳𑁄. 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄. 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄. 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸. 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁. 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁. 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀮𑀓𑁆𑀔𑀡𑁄 𑀣𑀫𑁆𑀪𑁄. 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄. 𑀉𑀦𑁆𑀦𑀢𑀺𑀮𑀓𑁆𑀔𑀡𑁄 𑀫𑀸𑀦𑁄. 𑀅𑀩𑁆𑀪𑀼𑀦𑁆𑀦𑀢𑀺𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄. 𑀫𑀚𑁆𑀚𑀦𑀮𑀓𑁆𑀔𑀡𑁄 𑀫𑀤𑁄. 𑀘𑀺𑀢𑁆𑀢𑀯𑁄𑀲𑀕𑁆𑀕𑀮𑀓𑁆𑀔𑀡𑁄 𑀧𑀫𑀸𑀤𑁄. 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀪𑀫𑁄𑀳𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀇𑀤𑀸𑀦𑀺 ‘‘𑀅𑀔𑀡𑁆𑀟𑀸𑀤𑀺𑀪𑀸𑀯𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀸𑀦𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑀳𑀢𑀸𑀦𑀻𑀢𑀺 𑀅𑀦𑀼𑀧𑀤𑁆𑀤𑀼𑀢𑀸𑀦𑀺. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸𑀬 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑁂𑀦 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀁. 𑀅𑀯𑀺𑀜𑁆𑀜𑀽𑀦𑀁 𑀅𑀧𑁆𑀧𑀫𑀸𑀡𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸’’𑀢𑀺. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀁 𑀯𑀸 𑀏𑀢𑁂𑀲𑀁 𑀧𑀬𑁄𑀚𑀦𑀁, 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑁂 𑀯𑀸 𑀦𑀺𑀬𑀼𑀢𑁆𑀢𑀸𑀦𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀦𑀺𑀤𑁆𑀤𑀸𑀦𑁂𑀦 𑀲𑀲𑁆𑀲𑀲𑀫𑁆𑀧𑀢𑁆𑀢𑀺 𑀯𑀺𑀬 𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀲𑀻𑀮𑀲𑀫𑁆𑀧𑀤𑀸, 𑀲𑀸 𑀘 𑀢𑀢𑁆𑀣 ¶ 𑀲𑀢𑀺 𑀤𑁄𑀲𑀤𑀲𑁆𑀲𑀦𑁂𑀢𑀺 𑀆𑀳 ‘‘𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀘 𑀆𑀤𑀻𑀦𑀯𑀤𑀲𑁆𑀲𑀦𑁂𑀦𑀸’’𑀢𑀺. 𑀦𑀺𑀲𑀫𑁆𑀫𑀓𑀸𑀭𑀻𑀦𑀁 𑀧𑀬𑁄𑀚𑀦𑀕𑀭𑀼𑀓𑀢𑀸𑀬 𑀤𑀺𑀝𑁆𑀞𑀕𑀼𑀡𑁂𑀬𑁂𑀯 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀘 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦𑀸’’𑀢𑀺.

𑀢𑀢𑁆𑀣 ¶ 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑁄 𑀲𑀻𑀮𑀲𑀫𑁆𑀧𑀤𑀸𑀬 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀆𑀦𑀺𑀲𑀁𑀲𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀧𑀓𑀸𑀭𑀦𑁆𑀢𑀭𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀣𑀸 𑀲𑀻𑀮𑀲𑀫𑁆𑀧𑀤𑀸 𑀲𑀢𑁆𑀢𑀸𑀦𑀁 𑀫𑀦𑀼𑀜𑁆𑀜𑀪𑀸𑀯𑀓𑀸𑀭𑀡𑀁, 𑀏𑀯𑀁 𑀲𑀻𑀮𑀯𑀺𑀧𑀢𑁆𑀢𑀺 𑀅𑀫𑀦𑀼𑀜𑁆𑀜𑀪𑀸𑀯𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀤𑀼𑀲𑁆𑀲𑀻𑀮𑁄…𑀧𑁂… 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀅𑀦𑀦𑀼𑀲𑀸𑀲𑀦𑀻𑀬𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀢𑁄. 𑀤𑀼𑀓𑁆𑀔𑀺𑀢𑁄𑀢𑀺 𑀲𑀜𑁆𑀚𑀸𑀢𑀤𑀼𑀓𑁆𑀔𑁄. 𑀯𑀺𑀧𑁆𑀧𑀝𑀺𑀲𑀸𑀭𑀻𑀢𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑀸𑀦𑀼𑀢𑀸𑀧𑀻. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀕𑀼𑀡𑀯𑀡𑁆𑀡𑁂𑀦, 𑀓𑀸𑀬𑀯𑀡𑁆𑀡𑁂𑀦 𑀘 𑀯𑀺𑀭𑀳𑀺𑀢𑁄. 𑀅𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀲𑁆𑀲. 𑀲𑀫𑁆𑀨𑀲𑁆𑀲𑀺𑀢𑀸𑀦𑀁 𑀤𑀼𑀓𑁆𑀔𑁄 𑀤𑀼𑀓𑁆𑀔𑀸𑀯𑀳𑁄 𑀲𑀫𑁆𑀨𑀲𑁆𑀲𑁄 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄. 𑀕𑀼𑀡𑀸𑀦𑀼𑀪𑀸𑀯𑀸𑀪𑀸𑀯𑀢𑁄 𑀅𑀧𑁆𑀧𑀁 𑀅𑀕𑁆𑀖𑀢𑀻𑀢𑀺 𑀅𑀧𑁆𑀧𑀕𑁆𑀖𑁄. 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀕𑀽𑀣𑀓𑀽𑀧𑁄 𑀯𑀺𑀬𑀸𑀢𑀺 𑀅𑀦𑁂𑀓𑀯𑀲𑁆𑀲𑀲𑀫𑀽𑀳𑁂 𑀲𑀜𑁆𑀘𑀺𑀢𑀼𑀓𑁆𑀓𑀸𑀭𑀸𑀯𑀸𑀝𑁄 𑀯𑀺𑀬. 𑀤𑀼𑀩𑁆𑀩𑀺𑀲𑁄𑀥𑀦𑁄 𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀙𑀯𑀸𑀮𑀸𑀢𑀁 𑀙𑀯𑀟𑀸𑀳𑁂 𑀲𑀦𑁆𑀢𑀚𑁆𑀚𑀦𑀼𑀫𑁆𑀫𑀼𑀓𑁆𑀓𑀁. 𑀉𑀪𑀢𑁄 𑀧𑀭𑀺𑀩𑀸𑀳𑀺𑀭𑁄𑀢𑀺 𑀲𑀸𑀫𑀜𑁆𑀜𑀢𑁄, 𑀕𑀺𑀳𑀺𑀪𑁄𑀕𑀢𑁄 𑀘 𑀧𑀭𑀺𑀳𑀻𑀦𑁄. 𑀲𑀩𑁆𑀩𑁂𑀲𑀁 𑀯𑁂𑀭𑀻, 𑀲𑀩𑁆𑀩𑁂 𑀯𑀸 𑀯𑁂𑀭𑀻 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀯𑁂𑀭𑀻, 𑀲𑁄 𑀏𑀯 𑀲𑀩𑁆𑀩𑀯𑁂𑀭𑀺𑀓𑁄, 𑀧𑀼𑀭𑀺𑀲𑁄. 𑀲𑀁𑀯𑀸𑀲𑀁 𑀦𑀸𑀭𑀳𑀢𑀻𑀢𑀺 𑀅𑀲𑀁𑀯𑀸𑀲𑀸𑀭𑀳𑁄. 𑀲𑀤𑁆𑀥𑀫𑁆𑀫𑁂𑀢𑀺 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁂, 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁂 𑀘.

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑀧𑀭𑀺𑀬𑀸𑀬𑁂 𑀯𑀼𑀢𑁆𑀢𑀤𑀼𑀓𑁆𑀔𑀪𑀸𑀕𑀺𑀢𑀸𑀬𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀲𑁆𑀲𑀻𑀮𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀪𑁄𑀕𑀲𑀼𑀔𑁂, 𑀧𑀭𑁂𑀳𑀺 𑀓𑀬𑀺𑀭𑀫𑀸𑀦𑀯𑀦𑁆𑀤𑀦𑀫𑀸𑀦𑀦𑀸𑀤𑀺𑀲𑀼𑀔𑁂 𑀘 𑀅𑀲𑁆𑀲𑀸𑀤𑁂𑀦 𑀕𑀥𑀺𑀢𑀘𑀺𑀢𑁆𑀢𑀸 𑀧𑀜𑁆𑀘𑀓𑀸𑀫…𑀧𑁂… 𑀕𑀥𑀺𑀢𑀘𑀺𑀢𑁆𑀢𑀸, 𑀢𑁂𑀲𑀁. 𑀢𑁂 𑀬𑀣𑀸𑀯𑀼𑀢𑁆𑀢𑀲𑀼𑀔𑀲𑁆𑀲𑀸𑀤𑀸 𑀧𑀘𑁆𑀘𑀬𑀸 𑀏𑀢𑀲𑁆𑀲𑀸𑀢𑀺 𑀢𑀧𑁆𑀧𑀘𑁆𑀘𑀬𑀁. 𑀤𑀼𑀓𑁆𑀔𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀲𑁆𑀲𑀣 𑀦𑁄𑀢𑀺 𑀧𑀲𑁆𑀲𑀣 𑀦𑀼, 𑀅𑀧𑀺 𑀧𑀲𑁆𑀲𑀣. 𑀫𑀳𑀦𑁆𑀢𑀦𑁆𑀢𑀺 𑀯𑀺𑀧𑀼𑀮𑀁. 𑀅𑀕𑁆𑀕𑀺𑀓𑁆𑀔𑀦𑁆𑀥𑀦𑁆𑀢𑀺 𑀅𑀕𑁆𑀕𑀺𑀲𑀫𑀽𑀳𑀁. 𑀆𑀤𑀺𑀢𑁆𑀢𑀦𑁆𑀢𑀺 𑀧𑀤𑀺𑀢𑁆𑀢𑀁. 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀁 𑀅𑀘𑁆𑀙𑀺𑀯𑀺𑀧𑁆𑀨𑀼𑀮𑀺𑀗𑁆𑀕𑀸𑀦𑀺 𑀫𑀼𑀘𑁆𑀘𑀦𑁆𑀢𑀁. 𑀲𑀚𑁄𑀢𑀺𑀪𑀽𑀢𑀦𑁆𑀢𑀺 𑀲𑀧𑀪𑀁 𑀲𑀫𑀦𑁆𑀢𑀢𑁄 𑀉𑀝𑁆𑀞𑀺𑀢𑀸𑀳𑀺 𑀚𑀸𑀮𑀸𑀳𑀺 𑀏𑀓𑀧𑁆𑀧𑀪𑀸𑀲𑀫𑀼𑀤𑀬𑀪𑀽𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀢𑀁 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑀫𑀢𑁆𑀣𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀅𑀦𑀼𑀫𑀢𑀺𑀕𑀳𑀡𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀆𑀮𑀺𑀗𑁆𑀕𑁂𑀢𑁆𑀯𑀸𑀢𑀺 𑀉𑀧𑀕𑀽𑀳𑀺𑀢𑁆𑀯𑀸. 𑀉𑀧𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀢𑁂𑀦𑁂𑀯 𑀆𑀮𑀺𑀗𑁆𑀕𑀦𑁂𑀦 𑀉𑀧𑁂𑀘𑁆𑀘 𑀦𑀺𑀲𑀻𑀤𑁂𑀬𑁆𑀬. 𑀬𑀤𑀢𑁆𑀣𑀫𑁂𑀢𑁆𑀣 𑀲𑀢𑁆𑀣𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀮𑀺𑀗𑁆𑀕𑀦𑀁, 𑀓𑀜𑁆𑀜𑀸𑀮𑀺𑀗𑁆𑀕𑀦𑀜𑁆𑀘 𑀆𑀦𑁂𑀲𑀺, 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀆𑀭𑁄𑀘𑀬𑀸𑀫𑀻’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀆𑀭𑁄𑀘𑀬𑀸𑀫𑀻𑀢𑀺 𑀆𑀫𑀦𑁆𑀢𑁂𑀫𑀺. 𑀯𑁄𑀢𑀺 𑀢𑀼𑀫𑁆𑀳𑁂. 𑀧𑀝𑀺𑀯𑁂𑀤𑀬𑀸𑀫𑀻𑀢𑀺 𑀧𑀩𑁄𑀥𑁂𑀫𑀺. 𑀤𑀼𑀲𑁆𑀲𑀻𑀮𑀲𑁆𑀲𑀸𑀢𑀺 𑀦𑀺𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀭𑀳𑀺𑀢𑀲𑁆𑀲. 𑀧𑀸𑀧𑀥𑀫𑁆𑀫𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀮𑀸𑀫𑀓𑀲𑀪𑀸𑀯𑀲𑁆𑀲. 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀲𑁆𑀲𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀢𑀸𑀬 𑀅𑀲𑀼𑀘𑀺𑀲𑁆𑀲 𑀳𑀼𑀢𑁆𑀯𑀸 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀲𑁆𑀲. 𑀤𑀼𑀲𑁆𑀲𑀻𑀮𑁄 𑀳𑀺 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 ¶ 𑀅𑀲𑀼𑀓𑁂𑀦 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀲𑀁 𑀆𑀲𑀗𑁆𑀓𑀦𑀻𑀬𑁄𑀯 𑀳𑁄𑀢𑀺, 𑀓𑁂𑀦𑀘𑀺𑀤𑁂𑀯 𑀯𑀸 𑀓𑀭𑀡𑀻𑀬𑁂𑀦 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀫𑁂 𑀫𑀬𑀸 𑀓𑀢𑀁 𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄𑀢𑀺. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀲𑁆𑀲𑀸𑀢𑀺 𑀮𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀓𑀫𑁆𑀫𑀦𑁆𑀢𑀲𑁆𑀲. 𑀅𑀲𑁆𑀲𑀫𑀡𑀲𑁆𑀲𑀸𑀢𑀺 𑀦 𑀲𑀫𑀡𑀲𑁆𑀲. 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀲𑀫𑀡𑀧𑀝𑀺𑀜𑁆𑀜𑀲𑁆𑀲. 𑀅𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀅𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲. 𑀉𑀧𑁄𑀲𑀣𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀲𑁆𑀲. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺𑀓𑀲𑁆𑀲. 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀯𑀲𑁆𑀲𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑀲𑁆𑀲. 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑀢𑁆𑀢𑀸, 𑀲𑀻𑀮𑀯𑀦𑁆𑀢𑁂𑀳𑀺 𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀘 𑀓𑀲𑀫𑁆𑀩𑀼𑀚𑀸𑀢𑀲𑁆𑀲. 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸𑀬 𑀳𑀻𑀦𑀽𑀧𑀫𑀪𑀽𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀏𑀢𑀤𑁂𑀯 𑀢𑀲𑁆𑀲 𑀯𑀭’’𑀦𑁆𑀢𑀺. 𑀪𑀕𑀯𑀸 𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀸𑀴𑀭𑀚𑁆𑀚𑀼𑀬𑀸𑀢𑀺 𑀯𑀸𑀴𑁂𑀳𑀺 𑀓𑀢𑀭𑀚𑁆𑀚𑀼𑀬𑀸. 𑀲𑀸 𑀳𑀺 𑀔𑀭𑀢𑀭𑀸 𑀳𑁄𑀢𑀺. 𑀖𑀁𑀲𑁂𑀬𑁆𑀬𑀸𑀢𑀺 𑀧𑀥𑀁𑀲𑀦𑀯𑀲𑁂𑀦 𑀖𑀁𑀲𑁂𑀬𑁆𑀬. 𑀢𑁂𑀮𑀥𑁄𑀢𑀸𑀬𑀸𑀢𑀺 𑀢𑁂𑀮𑁂𑀦 𑀦𑀺𑀲𑀺𑀢𑀸𑀬. 𑀧𑀘𑁆𑀘𑁄𑀭𑀲𑁆𑀫𑀺𑀦𑁆𑀢𑀺 𑀧𑀢𑀺𑀉𑀭𑀲𑁆𑀫𑀺𑀁 𑀉𑀭𑀸𑀪𑀺𑀫𑀼𑀔𑀁, 𑀉𑀭𑀫𑀚𑁆𑀛𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑁄𑀲𑀗𑁆𑀓𑀼𑀦𑀸𑀢𑀺 𑀲𑀡𑁆𑀟𑀸𑀲𑁂𑀦. 𑀨𑁂𑀡𑀼𑀤𑁆𑀤𑁂𑀳𑀓𑀦𑁆𑀢𑀺 𑀨𑁂𑀡𑀁 𑀉𑀤𑁆𑀤𑁂𑀳𑁂𑀢𑁆𑀯𑀸, 𑀅𑀦𑁂𑀓𑀯𑀸𑀭𑀁 𑀨𑁂𑀡𑀁 𑀉𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀮𑀺𑀗𑁆𑀕𑀦𑀤𑀼𑀓𑁆𑀔𑀢𑁄𑀧𑀺 𑀅𑀥𑀺𑀫𑀢𑁆𑀢𑀤𑀼𑀓𑁆𑀔𑀢𑀸𑀬 𑀓𑀝𑀼𑀓𑀪𑀽𑀢𑀁 𑀤𑀼𑀓𑁆𑀔𑀁 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀮𑀺𑀗𑁆𑀕𑀦𑀤𑀼𑀓𑁆𑀔𑀸𑀥𑀺𑀓𑀤𑀼𑀓𑁆𑀔𑀓𑀝𑀼𑀓𑀨𑀮𑀁. 𑀓𑀸𑀫𑀲𑀼𑀔𑀁 𑀅𑀯𑀺𑀚𑀳𑀢𑁄 𑀪𑀺𑀦𑁆𑀦𑀲𑀻𑀮𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲 𑀓𑀼𑀢𑁄 𑀢𑀲𑁆𑀲 𑀲𑀼𑀔𑀁 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀤𑀦𑁂𑀢𑀺 𑀲𑀸𑀤𑀺𑀬𑀦𑁂. 𑀬𑀦𑁆𑀢𑀺 𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀤𑀦𑀁. 𑀅𑀲𑀻𑀮𑀺𑀦𑁄𑀢𑀺 𑀤𑀼𑀲𑁆𑀲𑀻𑀮𑀲𑁆𑀲. 𑀉𑀧𑀳𑀢𑀦𑁆𑀢𑀺 𑀲𑀻𑀮𑀩𑁆𑀬𑀲𑀦𑁂𑀦 𑀉𑀧𑀤𑁆𑀤𑀼𑀢𑀁. 𑀔𑀢𑀦𑁆𑀢𑀺 𑀓𑀼𑀲𑀮𑀫𑀽𑀮𑀸𑀦𑀁 𑀔𑀡𑀦𑁂𑀦 𑀔𑀢𑀁, 𑀔𑀡𑀺𑀢𑀁 𑀯𑀸 𑀕𑀼𑀡𑀁 𑀲𑀭𑀻𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀪𑀬𑁂𑀳𑀻𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀲𑀩𑁆𑀩𑀪𑀬𑁂𑀳𑀺. 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂𑀳𑀺 𑀅𑀥𑀺𑀕𑀫𑀲𑀼𑀔𑁂𑀳𑀺.

𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀧𑀭𑀻𑀢𑀢𑁄𑀢𑀺 ¶ 𑀲𑀻𑀮𑀯𑀺𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀸𑀓𑀸𑀭𑀧𑀝𑀺𑀧𑀓𑁆𑀔𑀢𑁄 ‘‘𑀫𑀦𑀸𑀧𑁄 𑀳𑁄𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀓𑀸𑀬𑀕𑀦𑁆𑀥𑁄𑀧𑀺 𑀧𑀸𑀫𑁄𑀚𑁆𑀚𑀁, 𑀲𑀻𑀮𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀓𑀭𑁄𑀢𑀺 𑀅𑀧𑀺 𑀤𑁂𑀯𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦’’𑀦𑁆𑀢𑀺𑀆𑀤𑀺𑀓𑀸 (𑀚𑀸. 𑁨.𑁧𑁭.𑁫𑁫) 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀅𑀯𑀺𑀖𑀸𑀢𑀻𑀢𑀺 𑀅𑀧𑁆𑀧𑀝𑀺𑀖𑀸𑀢𑀻. 𑀯𑀥𑀩𑀦𑁆𑀥𑀸𑀤𑀺𑀧𑀭𑀺𑀓𑀺𑀮𑁂𑀲𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀆𑀲𑀯𑀸 𑀉𑀧𑀤𑁆𑀤𑀯𑀸. 𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀦𑀁 𑀫𑀽𑀮𑀁 𑀦𑀸𑀫 𑀤𑀼𑀲𑁆𑀲𑀻𑀮𑁆𑀬𑀁. 𑀅𑀦𑁆𑀢𑀫𑀢𑀺𑀓𑁆𑀓𑀦𑁆𑀢𑀁 𑀅𑀘𑁆𑀘𑀦𑁆𑀢𑀁, 𑀅𑀘𑁆𑀘𑀦𑁆𑀢𑀁 𑀲𑀦𑁆𑀢𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀸 ¶ 𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑀗𑁆𑀔𑀸𑀢𑀤𑀭𑀣𑀸𑀦𑀁 𑀅𑀪𑀸𑀯𑁂𑀦 𑀲𑀩𑁆𑀩𑀤𑀸 𑀲𑀦𑁆𑀢𑀸. 𑀉𑀩𑁆𑀩𑀺𑀚𑁆𑀚𑀺𑀢𑁆𑀯𑀸𑀢𑀺 𑀜𑀸𑀡𑀼𑀢𑁆𑀭𑀸𑀲𑁂𑀦 𑀉𑀢𑁆𑀢𑀲𑀺𑀢𑁆𑀯𑀸. 𑀯𑁄𑀤𑀸𑀧𑁂𑀢𑀩𑁆𑀩𑀦𑁆𑀢𑀺 𑀯𑀺𑀲𑁄𑀥𑁂𑀢𑀩𑁆𑀩𑀁.

𑀲𑀻𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀞𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁨. 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨. 𑀅𑀧𑁆𑀧𑀸 ¶ ¶ 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀺𑀘𑁆𑀙𑁄, 𑀧𑀘𑁆𑀘𑀬𑀕𑁂𑀥𑀭𑀳𑀺𑀢𑁄. 𑀢𑀲𑁆𑀲 𑀪𑀸𑀯𑁄 𑀅𑀧𑁆𑀧𑀺𑀘𑁆𑀙𑀢𑀸, 𑀅𑀮𑁄𑀪𑀚𑁆𑀛𑀸𑀲𑀬𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀁 𑀢𑀼𑀝𑁆𑀞𑀺, 𑀲𑀦𑁆𑀢𑁂𑀦, 𑀲𑀓𑁂𑀦 𑀯𑀸 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺, 𑀲𑀦𑁆𑀢𑀼𑀝𑁆𑀞𑀺 𑀏𑀯 𑀲𑀦𑁆𑀢𑀼𑀝𑁆𑀞𑀺𑀢𑀸, 𑀅𑀜𑁆𑀜𑀁 𑀅𑀧𑀢𑁆𑀣𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑁂𑀳𑀺 𑀇𑀢𑀭𑀻𑀢𑀭𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀭𑀺𑀢𑀼𑀲𑁆𑀲𑀦𑀸. 𑀲𑀦𑁆𑀢𑀼𑀝𑁆𑀞𑀺𑀢𑀸𑀤𑀻𑀳𑀻𑀢𑀺 𑀢-𑀓𑀸𑀭𑁄 𑀯𑀸 𑀧𑀤𑀲𑀦𑁆𑀥𑀺𑀓𑀭𑁄. ‘‘𑀲𑀦𑁆𑀢𑀼𑀝𑁆𑀞𑀺𑀆𑀤𑀻𑀳𑀻’’𑀢𑀺 𑀯𑀸 𑀧𑀸𑀞𑁄. 𑀢𑁂 𑀕𑀼𑀡𑁂𑀢𑀺 𑀢𑁂 𑀲𑀻𑀮𑀯𑁄𑀤𑀸𑀦𑀲𑁆𑀲 𑀳𑁂𑀢𑀼𑀪𑀽𑀢𑁂 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑁂. 𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀲𑀫𑁆𑀧𑀦𑁆𑀦𑁂 𑀓𑀸𑀢𑀼𑀁. 𑀢𑁂 𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀸 𑀳𑀼𑀢𑁆𑀯𑀸 𑀥𑀼𑀢𑀥𑀫𑁆𑀫𑁂𑀳𑀺 𑀲𑀫𑁆𑀧𑀦𑁆𑀦𑀢𑀭𑀸 𑀳𑁄𑀦𑁆𑀢𑀺. 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀥𑀼𑀦𑀦𑀓𑀅𑀗𑁆𑀕𑀸𑀦𑀁 𑀯𑀺𑀤𑁆𑀥𑀁𑀲𑀦𑀓𑀸𑀭𑀡𑀸𑀦𑀁 𑀲𑀫𑁆𑀫𑀤𑁂𑀯 𑀆𑀤𑀸𑀦𑀁. 𑀏𑀯𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂, 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑁂 𑀓𑀢𑁂𑀢𑀺 𑀅𑀢𑁆𑀣𑁄. 𑀅𑀲𑁆𑀲 𑀬𑁄𑀕𑀺𑀦𑁄. 𑀲𑀮𑁆𑀮𑁂𑀔𑁄 𑀓𑀺𑀮𑁂𑀲𑀸𑀦𑀁 𑀲𑀫𑁆𑀫𑀤𑁂𑀯 𑀮𑀺𑀔𑀦𑀸 𑀙𑁂𑀤𑀦𑀸 𑀢𑀦𑀼𑀓𑀭𑀡𑀁. 𑀧𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑀲𑁆𑀲 𑀉𑀧𑀸𑀬𑀪𑀽𑀢𑀸 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀸. 𑀅𑀧𑀘𑀬𑁄 𑀬𑀣𑀸 𑀧𑀝𑀺𑀧𑀚𑁆𑀚𑀦𑀢𑁄 𑀓𑀺𑀮𑁂𑀲𑀸 𑀦𑀁 𑀅𑀧𑀘𑀺𑀦𑀦𑁆𑀢𑀺 𑀦 𑀆𑀘𑀺𑀦𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀦𑀸. 𑀯𑀻𑀭𑀺𑀬𑀸𑀭𑀫𑁆𑀪𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀢𑀸. 𑀲𑀼𑀪𑀭𑀢𑀸 𑀬𑀣𑀸𑀯𑀼𑀢𑁆𑀢𑀅𑀧𑁆𑀧𑀺𑀘𑁆𑀙𑀪𑀸𑀯𑀸𑀤𑀺𑀲𑀺𑀤𑁆𑀥𑀸 𑀉𑀧𑀝𑁆𑀞𑀓𑀸𑀦𑀁 𑀲𑀼𑀔𑀪𑀭𑀡𑀻𑀬𑀢𑀸 𑀲𑀼𑀧𑁄𑀲𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀓𑀺𑀘𑁆𑀘𑀢𑀸𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀻𑀮𑀜𑁆𑀘𑁂𑀯 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀺. 𑀯𑀢𑀸𑀦𑀺 𑀘 𑀥𑀼𑀢𑀥𑀫𑁆𑀫𑀸 𑀘 𑀲𑀫𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀲𑀫𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀦𑁆𑀢𑀺 𑀯𑀸. 𑀬𑀸 𑀣𑀺𑀭𑀪𑀽𑀢𑀸 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀲𑀦𑁆𑀢𑀼𑀝𑁆𑀞𑀺 𑀧𑁄𑀭𑀸𑀡𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀧𑀯𑁂𑀡𑀺𑀪𑀸𑀯𑁂𑀦 𑀞𑀺𑀢𑀸, 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀧𑁄𑀭𑀸𑀡𑁂 𑀅𑀭𑀺𑀬𑀯𑀁𑀲𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺. 𑀪𑀸𑀯𑀦𑀸 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀭𑀸𑀫𑁄, 𑀢𑀩𑁆𑀪𑀸𑀯𑁄 𑀪𑀸𑀯𑀦𑀸𑀭𑀸𑀫𑀢𑀸, 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸. 𑀬𑀲𑁆𑀫𑀸 𑀅𑀥𑀺𑀕𑀫𑀸𑀭𑀳𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀮𑀸𑀪𑀲𑀓𑁆𑀓𑀸𑀭𑀸𑀤𑀺 𑀢𑀡𑁆𑀳𑀸𑀬 𑀆𑀫𑀲𑀺𑀢𑀩𑁆𑀩𑀢𑁄, 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀘 𑀮𑁄𑀓𑀸𑀫𑀺𑀲𑀁. 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀅𑀦𑀼𑀮𑁄𑀫𑀢𑁄 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸. 𑀅𑀢𑁆𑀣𑀢𑁄𑀢𑀺 𑀯𑀘𑀦𑀢𑁆𑀣𑀢𑁄. 𑀧𑀪𑁂𑀤𑀢𑁄𑀢𑀺 ¶ 𑀯𑀺𑀪𑀸𑀕𑀢𑁄. 𑀪𑁂𑀤𑀢𑁄𑀢𑀺 𑀯𑀺𑀦𑀸𑀲𑀢𑁄. 𑀥𑀼𑀢𑀸𑀤𑀻𑀦𑀦𑁆𑀢𑀺 𑀥𑀼𑀢𑀥𑀼𑀢𑀯𑀸𑀤𑀥𑀼𑀢𑀥𑀫𑁆𑀫𑀥𑀼𑀢𑀗𑁆𑀕𑀸𑀦𑀁. 𑀲𑀫𑀸𑀲𑀩𑁆𑀬𑀸𑀲𑀢𑁄𑀢𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄.

𑁨𑁩. 𑀭𑀣𑀺𑀓𑀸𑀢𑀺 ¶ 𑀭𑀘𑁆𑀙𑀸. 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦𑀸𑀢𑀺 𑀉𑀲𑁆𑀲𑀺𑀢𑀝𑁆𑀞𑁂𑀦. ‘‘𑀦𑀤𑀺𑀬𑀸 𑀓𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀲𑁆𑀲𑀬𑀢𑁆𑀣𑁄 𑀓𑀽𑀮-𑀲𑀤𑁆𑀤𑁄𑀢𑀺 𑀆𑀳 ‘‘𑀧𑀁𑀲𑀼𑀓𑀽𑀮𑀫𑀺𑀯 𑀧𑀁𑀲𑀼𑀓𑀽𑀮’’𑀦𑁆𑀢𑀺. 𑀓𑀼-𑀲𑀤𑁆𑀤𑁄 𑀓𑀼𑀘𑁆𑀙𑀸𑀬𑀁 𑀉𑀮-𑀲𑀤𑁆𑀤𑁄 𑀕𑀢𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀼𑀘𑁆𑀙𑀺𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀁 𑀉𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀧𑀁𑀲𑀼𑀓𑀽𑀮𑀁. 𑀧𑀁𑀲𑀼𑀓𑀽𑀮𑀲𑁆𑀲 𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄, 𑀬𑀣𑀸 ‘‘𑀆𑀧𑀽𑀧𑀺𑀓𑁄’’𑀢𑀺. 𑀅𑀗𑁆𑀕𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀝𑀺𑀘𑁆𑀘 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀗𑁆𑀕𑀁, 𑀓𑀸𑀭𑀡𑀁. 𑀬𑁂𑀦 𑀧𑀼𑀕𑁆𑀕𑀮𑁄 ‘‘𑀧𑀁𑀲𑀼𑀓𑀽𑀮𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀲𑀫𑀸𑀤𑀸𑀦𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀅𑀗𑁆𑀕𑀦𑁆𑀢𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁. 𑀢𑁂𑀦𑀸𑀳 ‘‘𑀧𑀁𑀲𑀼𑀓𑀽𑀮𑀺𑀓𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀲𑀫𑀸𑀤𑀸𑀦𑀲𑁆𑀲. 𑀲𑀫𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀲𑀫𑀸𑀤𑀸𑀦𑀁, 𑀘𑁂𑀢𑀦𑀸.

𑀏𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀬𑀣𑀸 𑀧𑀁𑀲𑀼𑀓𑀽𑀮𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀢𑀁𑀲𑀻𑀮𑁄 𑀧𑀁𑀲𑀼𑀓𑀽𑀮𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀲𑀫𑀸𑀤𑀸𑀦𑀘𑁂𑀢𑀦𑀸 ‘‘𑀧𑀁𑀲𑀼𑀓𑀽𑀮𑀺𑀓𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀏𑀢𑁂𑀦𑁂𑀯 𑀯𑀘𑀦𑀢𑁆𑀣𑀦𑀬𑁂𑀦 𑀢𑀺𑀘𑀻𑀯𑀭𑀥𑀸𑀭𑀡𑀁 𑀢𑀺𑀘𑀻𑀯𑀭𑀁, 𑀢𑀁𑀲𑀻𑀮𑁄 𑀢𑁂𑀘𑀻𑀯𑀭𑀺𑀓𑁄, 𑀢𑀲𑁆𑀲 𑀅𑀗𑁆𑀕𑀁 𑀲𑀫𑀸𑀤𑀸𑀦𑀘𑁂𑀢𑀦𑀸 ‘‘𑀢𑁂𑀘𑀻𑀯𑀭𑀺𑀓𑀗𑁆𑀕’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀏𑀯 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀢𑀺𑀘𑀻𑀯𑀭𑀲𑀫𑀜𑁆𑀜𑀸, 𑀦 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀤𑀻𑀲𑀽𑀢𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀖𑀸𑀝𑀺𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀲𑀗𑁆𑀔𑀸𑀢’’𑀦𑁆𑀢𑀺 𑀆𑀳.

𑀢𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀧𑀭𑁂𑀳𑀺 𑀤𑀺𑀬𑁆𑀬𑀫𑀸𑀦𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀢𑁆𑀢𑁂 𑀧𑀢𑀦𑀲𑀗𑁆𑀔𑀸𑀢𑀁 𑀧𑀺𑀡𑁆𑀟𑀧𑀸𑀢𑀁, 𑀢𑀁 𑀉𑀜𑁆𑀙𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀬𑀣𑀸 𑀩𑀸𑀤𑀭𑀺𑀓𑁄 𑀲𑀸𑀫𑀸𑀓𑀺𑀓𑁄. 𑀧𑀺𑀡𑁆𑀟𑀧𑀸𑀢𑀺 𑀏𑀯 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀬𑀣𑀸 𑀪𑀤𑁆𑀤𑁄 𑀏𑀯 𑀪𑀤𑁆𑀤𑀓𑁄. 𑀅𑀯𑀔𑀡𑁆𑀟𑀦𑀁 𑀯𑀺𑀘𑁆𑀙𑀺𑀦𑁆𑀤𑀦𑀁 𑀦𑀺𑀭𑀦𑁆𑀢𑀭𑀫𑀧𑁆𑀧𑀯𑀢𑁆𑀢𑀺. 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀯𑀔𑀡𑁆𑀟𑀦𑀁 𑀅𑀯𑀺𑀘𑁆𑀙𑀺𑀦𑁆𑀤𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺. 𑀲𑀳 𑀅𑀧𑀤𑀸𑀦𑁂𑀦𑀸𑀢𑀺 𑀲𑀳 𑀅𑀦𑀯𑀔𑀡𑁆𑀟𑀦𑁂𑀦. 𑀲𑀧𑀤𑀸𑀦𑀦𑁆𑀢𑀺 𑀧𑀤𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁, 𑀬𑀢𑁆𑀣 𑀘 𑀢𑀁 𑀅𑀦𑀯𑀔𑀡𑁆𑀟𑀦𑀁, 𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀔𑀡𑁆𑀟𑀦𑀭𑀳𑀺𑀢𑀁 𑀅𑀦𑀼𑀖𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀸𑀲𑀦𑁂𑀢𑀺 𑀇𑀭𑀺𑀬𑀸𑀧𑀣𑀦𑁆𑀢𑀭𑁂𑀦 𑀅𑀦𑀦𑁆𑀢𑀭𑀺𑀢𑀸𑀬 𑀏𑀓𑀸𑀬𑀬𑁂𑀯 𑀦𑀺𑀲𑀚𑁆𑀚𑀸𑀬. 𑀧𑀢𑁆𑀢𑁂 𑀧𑀺𑀡𑁆𑀟𑁄𑀢𑀺 𑀏𑀢𑁆𑀣 𑀯𑀢𑁆𑀣𑀼𑀪𑁂𑀤𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦 𑀲𑀸𑀫𑀜𑁆𑀜𑀁. 𑀏𑀯-𑀓𑀸𑀭𑁄 𑀘 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀯𑀮𑀁 𑀏𑀓𑀲𑁆𑀫𑀺𑀁𑀬𑁂𑀯 𑀧𑀢𑁆𑀢𑁂’’𑀢𑀺 𑀆𑀳. 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑁆𑀢𑀧𑀺𑀡𑁆𑀟𑀕𑀳𑀡𑁂 𑀧𑀢𑁆𑀢𑀧𑀺𑀡𑁆𑀟𑀲𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀆𑀳. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺.

𑀧𑀘𑁆𑀙𑀸𑀪𑀢𑁆𑀢𑀁 ¶ ¶ 𑀦𑀸𑀫 𑀧𑀯𑀸𑀭𑀡𑀢𑁄 𑀧𑀘𑁆𑀙𑀸 𑀮𑀤𑁆𑀥𑀪𑀢𑁆𑀢𑀁 𑀏𑀯. 𑀔𑀮𑀼-𑀲𑀤𑁆𑀤𑀲𑁆𑀲 𑀧𑀝𑀺𑀲𑁂𑀥𑀢𑁆𑀣𑀯𑀸𑀘𑀓𑀢𑁆𑀢𑀸 𑀢𑁂𑀦 𑀲𑀫𑀸𑀦𑀢𑁆𑀣𑀁 𑀦-𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀦 𑀧𑀘𑁆𑀙𑀸𑀪𑀢𑁆𑀢𑀺𑀓𑁄’’𑀢𑀺. 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀲𑀬𑁄 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀬𑁄 𑀢𑀲𑁆𑀲 𑀅𑀯𑀺𑀲𑀬𑁄, 𑀲𑁄 𑀏𑀯 𑀲𑀫𑀸𑀤𑀸𑀦𑀲𑁆𑀲 𑀯𑀺𑀲𑀬𑁄𑀢𑀺 𑀆𑀳 ‘‘𑀲𑀫𑀸𑀤𑀸𑀦𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺𑀭𑀺𑀢𑁆𑀢𑀪𑁄𑀚𑀦𑀲𑁆𑀲𑀸’’𑀢𑀺. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀯𑀸𑀲𑁄 𑀅𑀩𑁆𑀪𑁄𑀓𑀸𑀲𑁄. 𑀲𑀼𑀲𑀸𑀦𑁂 𑀦𑀺𑀯𑀸𑀲𑁄 𑀲𑀼𑀲𑀸𑀦𑀁, 𑀢𑀁 𑀲𑀻𑀮𑀁 𑀅𑀲𑁆𑀲𑀸𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀲𑁂𑀯 𑀦𑀬𑁄’’𑀢𑀺. 𑀬𑀣𑀸𑀲𑀦𑁆𑀣𑀢𑀁 𑀯𑀺𑀬 𑀬𑀣𑀸𑀲𑀦𑁆𑀣𑀢𑀁, 𑀆𑀤𑀺𑀢𑁄 𑀬𑀣𑀸𑀉𑀤𑁆𑀤𑀺𑀝𑁆𑀞𑀁. 𑀢𑀁 𑀳𑁂𑀲 ‘‘𑀇𑀤𑀁 𑀩𑀳𑀼𑀫𑀗𑁆𑀓𑀼𑀡𑀁 𑀤𑀼𑀕𑁆𑀕𑀦𑁆𑀥𑀧𑀯𑀸𑀢’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀢𑀼𑀬𑁆𑀳’’𑀦𑁆𑀢𑀺𑀆𑀤𑀺. 𑀲𑀬𑀦𑀦𑁆𑀢𑀺 𑀦𑀺𑀧𑀚𑁆𑀚𑀦𑀫𑀸𑀳. 𑀢𑁂𑀦 𑀢𑁂𑀦 𑀲𑀫𑀸𑀤𑀸𑀦𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸𑀤𑀺𑀓𑀲𑁆𑀲 𑀲𑀫𑀸𑀤𑀸𑀦𑁂𑀦 𑀥𑀼𑀢𑀓𑀺𑀮𑁂𑀲𑀢𑁆𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀓𑀺𑀮𑁂𑀲𑀢𑁆𑀢𑀸, 𑀢𑀤𑀗𑁆𑀕𑀯𑀲𑁂𑀦 𑀧𑀳𑀻𑀦𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀺𑀧𑀸𑀧𑀥𑀫𑁆𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑁂𑀳𑀺 𑀢𑀁 𑀓𑀺𑀮𑁂𑀲𑀥𑀼𑀦𑀦𑀁, 𑀢𑀸𑀦𑀺𑀬𑁂𑀯 𑀇𑀥 𑀥𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀦 𑀅𑀜𑁆𑀜𑀸𑀦𑀺 𑀬𑀸𑀦𑀺 𑀓𑀸𑀦𑀺𑀘𑀺, 𑀅𑀜𑁆𑀜𑁂𑀦 𑀯𑀸 𑀥𑀼𑀢𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄. ‘‘𑀜𑀸𑀡𑀁 𑀅𑀗𑁆𑀕𑀁 𑀏𑀢𑁂𑀲’’𑀦𑁆𑀢𑀺 𑀇𑀫𑀺𑀦𑀸 𑀜𑀸𑀡𑀧𑀼𑀩𑁆𑀩𑀓𑀢𑀁 𑀢𑁂𑀲𑀁 𑀲𑀫𑀸𑀤𑀸𑀦𑀲𑁆𑀲 𑀯𑀺𑀪𑀸𑀯𑁂𑀢𑀺. 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸. 𑀲𑀫𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀲𑀫𑀸𑀤𑀸𑀦𑀁, 𑀲𑀫𑀸𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀤𑀸𑀦𑀘𑁂𑀢𑀦𑀸𑀮𑀓𑁆𑀔𑀡𑀸𑀦𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀲𑀫𑀸𑀤𑀸𑀦𑀓𑀺𑀭𑀺𑀬𑀸𑀬, 𑀲𑀸𑀥𑀓𑀢𑀫𑀪𑀸𑀯𑀢𑁄;

𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀬𑁂𑀦𑀸𑀢𑀺, 𑀓𑀭𑀡𑀪𑀸𑀯𑁂𑀦 𑀤𑀲𑁆𑀲𑀺𑀢𑀸’’𑀢𑀺.

𑀲𑀫𑀸𑀤𑀸𑀦𑀘𑁂𑀢𑀦𑀸𑀬 𑀕𑀳𑀡𑀁 𑀢𑀁𑀫𑀽𑀮𑀓𑀢𑁆𑀢𑀸 𑀧𑀭𑀺𑀳𑀭𑀡𑀘𑁂𑀢𑀦𑀸𑀧𑀺 𑀥𑀼𑀢𑀗𑁆𑀕𑀫𑁂𑀯. 𑀅𑀢𑁆𑀢𑀦𑀸, 𑀧𑀭𑀫𑁆𑀫𑀼𑀔𑁂𑀦 𑀘 𑀓𑀼𑀲𑀮𑀪𑀡𑁆𑀟𑀲𑁆𑀲 𑀪𑀼𑀲𑀁 𑀯𑀺𑀮𑀼𑀧𑁆𑀧𑀦𑀝𑁆𑀞𑁂𑀦 𑀮𑁄𑀮𑀼𑀧𑁆𑀧𑀁 𑀢𑀡𑁆𑀳𑀸𑀘𑀸𑀭𑁄, 𑀢𑀲𑁆𑀲 𑀯𑀺𑀤𑁆𑀥𑀁𑀲𑀦𑀓𑀺𑀘𑁆𑀘𑀢𑁆𑀢𑀸 𑀮𑁄𑀮𑀼𑀧𑁆𑀧𑀯𑀺𑀤𑁆𑀥𑀁𑀲𑀦𑀭𑀲𑀸𑀦𑀺. 𑀢𑀢𑁄 𑀏𑀯 𑀦𑀺𑀮𑁆𑀮𑁄𑀮𑀼𑀧𑁆𑀧𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺, 𑀢𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀦𑀺𑀮𑁆𑀮𑁄𑀮𑀼𑀧𑁆𑀧𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺. 𑀅𑀭𑀺𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀤𑀺𑀲𑀤𑁆𑀥𑀫𑁆𑀫𑀧𑀤𑀝𑁆𑀞𑀸𑀦𑀸𑀦𑀺.

𑀪𑀕𑀯𑀢𑁄𑀯 𑀲𑀦𑁆𑀢𑀺𑀓𑁂 𑀲𑀫𑀸𑀤𑀸𑀢𑀩𑁆𑀩𑀸𑀦𑀻𑀢𑀺 𑀇𑀤𑀁 𑀅𑀦𑁆𑀢𑀭𑀸 𑀅𑀯𑀺𑀘𑁆𑀙𑁂𑀤𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀧𑀝𑀺𑀜𑁆𑀜𑀸𑀢𑀸𑀭𑀳𑀲𑁆𑀲 𑀅𑀢𑁆𑀣𑀲𑁆𑀲 𑀢𑀤𑀼𑀧𑀚𑀻𑀯𑀺𑀦𑁄 𑀏𑀓𑀁𑀲𑀢𑁄 𑀅𑀯𑀺𑀲𑀁𑀯𑀸𑀤𑀦𑀁 𑀯𑀺𑀬. 𑀲𑁂𑀲𑀸𑀦𑀁 𑀲𑀦𑁆𑀢𑀺𑀓𑁂 𑀲𑀫𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀲𑀗𑁆𑀕𑀻𑀢𑀺𑀓𑀲𑁆𑀲𑀸𑀢𑀺 ¶ 𑀧𑀜𑁆𑀘𑀲𑀼 𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼 𑀦𑀺𑀓𑀸𑀬𑁂𑀲𑀼 𑀏𑀓𑀦𑀺𑀓𑀸𑀬𑀺𑀓𑀲𑁆𑀲. 𑀅𑀝𑁆𑀞𑀓𑀣𑀸𑀘𑀭𑀺𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀝𑁆𑀞𑀓𑀣𑀸𑀢𑀦𑁆𑀢𑀺𑀬𑁂𑀯 𑀯𑀺𑀲𑁂𑀲𑀢𑁄 𑀧𑀕𑀼𑀡𑀸, 𑀢𑀲𑁆𑀲. 𑀏𑀢𑁆𑀣𑀸𑀢𑀺 𑀅𑀢𑁆𑀢𑀦𑀸𑀧𑀺 𑀲𑀫𑀸𑀤𑀸𑀦𑀲𑁆𑀲 𑀭𑀼𑀳𑀦𑁂. 𑀚𑁂𑀝𑁆𑀞𑀓𑀪𑀸𑀢𑀼 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀽𑀢𑀺 𑀲𑁄 𑀓𑀺𑀭 𑀣𑁂𑀭𑁄 𑀦𑁂𑀲𑀚𑁆𑀚𑀺𑀓𑁄 ¶ , 𑀢𑀲𑁆𑀲 𑀢𑀁 𑀦 𑀓𑁄𑀘𑀺 𑀚𑀸𑀦𑀸𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀢𑁆𑀢𑀺𑀬𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀁 𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁂𑀦 𑀤𑀺𑀲𑁆𑀯𑀸 𑀇𑀢𑀭𑁄 𑀧𑀼𑀘𑁆𑀙𑀺 ‘‘𑀓𑀺𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀦𑁂𑀲𑀚𑁆𑀚𑀺𑀓𑀸’’𑀢𑀺. 𑀣𑁂𑀭𑁄 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑀢𑀸𑀬 𑀢𑀸𑀯𑀤𑁂𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀲𑀫𑀸𑀤𑀺𑀬𑀻𑀢𑀺 𑀏𑀯𑀫𑀸𑀕𑀢𑀁 𑀯𑀢𑁆𑀣𑀼.

𑁧. 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁪. 𑀕𑀳𑀧𑀢𑀺𑀤𑀸𑀦𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀤𑀸𑀬𑀓𑀪𑀸𑀯𑁂𑀦 𑀲𑀫𑀡𑀸𑀧𑀺 𑀉𑀓𑁆𑀓𑀝𑁆𑀞𑀲𑁆𑀲 𑀕𑀳𑀧𑀢𑀺𑀧𑀓𑁆𑀔𑀁𑀬𑁂𑀯 𑀧𑀯𑀺𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀩𑁆𑀩𑀚𑀺𑀢𑁄 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀞𑀧𑀺𑀢𑀓𑀁 𑀲𑀺𑀬𑀸 𑀕𑀳𑀧𑀢𑀺𑀘𑀻𑀯𑀭𑀁, 𑀦 𑀧𑀦 𑀕𑀳𑀧𑀢𑀺𑀤𑀸𑀦𑀘𑀻𑀯𑀭𑀦𑁆𑀢𑀺 𑀢𑀸𑀤𑀺𑀲𑀁 𑀦𑀺𑀯𑀢𑁆𑀢𑁂𑀢𑀼𑀁 𑀤𑀸𑀦𑀕𑁆𑀕𑀳𑀡𑀁. 𑀅𑀜𑁆𑀜𑀢𑀭𑁂𑀦𑀸𑀢𑀺 𑀏𑀢𑁆𑀣 𑀲𑀫𑀸𑀤𑀸𑀦𑀯𑀘𑀦𑁂𑀦 𑀢𑀸𑀯 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀼, 𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦 𑀧𑀦 𑀓𑀣𑀦𑁆𑀢𑀺? 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸. 𑀬𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀤𑀺𑀯𑀸 𑀦 𑀪𑀼𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀭𑀢𑁆𑀢𑀺𑀬𑀁 𑀪𑀼𑀜𑁆𑀚𑀢𑀻’’𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀆𑀳𑀸𑀭𑁂𑀦 𑀯𑀺𑀦𑀸 𑀲𑀭𑀻𑀭𑀝𑁆𑀞𑀺𑀢𑀺 𑀦𑀢𑁆𑀣𑀻𑀢𑀺, 𑀏𑀯𑀫𑀺𑀥𑀸𑀧𑀺 𑀪𑀺𑀓𑁆𑀔𑀼𑀦𑁄 𑀕𑀳𑀧𑀢𑀺𑀤𑀸𑀦𑀘𑀻𑀯𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀜𑁆𑀜𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑁄 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄 𑀏𑀯 𑀳𑁄𑀢𑀺, 𑀘𑀻𑀯𑀭𑁂𑀦 𑀯𑀺𑀦𑀸 𑀲𑀸𑀲𑀦𑁂 𑀞𑀺𑀢𑀺 𑀦𑀢𑁆𑀣𑀻𑀢𑀺.

𑀏𑀯𑀁 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁂𑀦𑀸𑀢𑀺𑀆𑀤𑀺𑀯𑀺𑀥𑀸𑀦𑀁 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑁂 𑀧𑀝𑀺𑀧𑀚𑁆𑀚𑀦𑀯𑀺𑀥𑀺. 𑀲𑀼𑀲𑀸𑀦𑁂 𑀮𑀤𑁆𑀥𑀁 𑀲𑁄𑀲𑀸𑀦𑀺𑀓𑀁. 𑀢𑀁 𑀧𑀦 𑀬𑀲𑁆𑀫𑀸 𑀢𑀢𑁆𑀣 𑀓𑁂𑀦𑀘𑀺 𑀙𑀟𑁆𑀟𑀺𑀢𑀢𑁆𑀢𑀸 𑀧𑀢𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀲𑀸𑀦𑁂 𑀧𑀢𑀺𑀢𑀓’’𑀦𑁆𑀢𑀺. 𑀏𑀯𑀁 𑀧𑀸𑀧𑀡𑀺𑀓𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀮𑀯𑁂𑀴𑀺𑀫𑀕𑁆𑀕𑁄 𑀦𑀸𑀫 𑀫𑀳𑀸𑀕𑀸𑀫𑁂 𑀏𑀓𑀸 𑀯𑀻𑀣𑀺. 𑀅𑀦𑀼𑀭𑀸𑀥𑀧𑀼𑀭𑁂𑀢𑀺 𑀘 𑀯𑀤𑀦𑁆𑀢𑀺. 𑀟𑀟𑁆𑀠𑁄 𑀧𑀤𑁂𑀲𑁄 𑀏𑀢𑀲𑁆𑀲𑀸𑀢𑀺 𑀟𑀟𑁆𑀠𑀧𑁆𑀧𑀤𑁂𑀲𑀁, 𑀯𑀢𑁆𑀣𑀁. 𑀫𑀕𑁆𑀕𑁂 𑀧𑀢𑀺𑀢𑀓𑀁 𑀩𑀳𑀼𑀤𑀺𑀯𑀲𑀸𑀢𑀺𑀓𑁆𑀓𑀦𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀤𑁆𑀯𑀢𑁆𑀢𑀺𑀤𑀺𑀯𑀲𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀅𑀧𑀭𑁂. 𑀣𑁄𑀓𑀁 𑀭𑀓𑁆𑀔𑀺𑀢𑁆𑀯𑀸𑀢𑀺 𑀓𑀢𑀺𑀧𑀬𑀁 𑀓𑀸𑀮𑀁 𑀆𑀕𑀫𑁂𑀢𑁆𑀯𑀸. 𑀯𑀸𑀢𑀸𑀳𑀢𑀫𑁆𑀧𑀺 𑀲𑀸𑀫𑀺𑀓𑀸𑀦𑀁 𑀲𑀢𑀺𑀲𑀫𑁆𑀫𑁄𑀲𑁂𑀦 𑀧𑀢𑀺𑀢𑀲𑀤𑀺𑀲𑀦𑁆𑀢𑀺 ‘‘𑀲𑀸𑀫𑀺𑀓𑁂 𑀅𑀧𑀲𑁆𑀲𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀣𑁄𑀓𑀁 𑀆𑀕𑀫𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁, 𑀘𑁄𑀴𑀓𑀪𑀺𑀓𑁆𑀔𑀸𑀯𑀲𑁂𑀦 𑀮𑀤𑁆𑀥𑀜𑁆𑀘 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀲𑀫𑀡𑀘𑀻𑀯𑀭𑀁 𑀲𑀺𑀬𑀸 𑀦𑀼 𑀔𑁄, 𑀦𑁄’’𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀦 𑀢𑀁 𑀧𑀁𑀲𑀼𑀓𑀽𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀢𑁂𑀯𑀻𑀲𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂𑀲𑀼 𑀓𑀢𑁆𑀣𑀘𑀺 𑀧𑀭𑀺𑀬𑀸𑀧𑀦𑁆𑀦𑀁. 𑀇𑀤𑀸𑀦𑀺 𑀇𑀫𑀺𑀦𑀸𑀯 𑀧𑀲𑀗𑁆𑀕𑁂𑀦 𑀬𑀁 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑁂 𑀮𑀓𑁆𑀔𑀡𑀧𑀢𑁆𑀢𑀁 ¶ 𑀧𑀁𑀲𑀼𑀓𑀽𑀮𑀁, 𑀢𑀲𑁆𑀲 𑀘 𑀉𑀓𑁆𑀓𑀝𑁆𑀞𑀸𑀦𑀼𑀓𑁆𑀓𑀝𑁆𑀞𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀸𑀳𑁂𑀢𑁆𑀯𑀸 𑀯𑀸 𑀤𑀻𑀬𑀢𑀻𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀤𑁂𑀦𑁆𑀢𑁂𑀳𑀺 𑀬𑀁 𑀘𑀻𑀯𑀭𑀁 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑀻𑀬𑀢𑀺. 𑀲𑁂𑀦𑀸𑀲𑀦𑀘𑀻𑀯𑀭𑀦𑁆𑀢𑀺 𑀲𑁂𑀦𑀸𑀲𑀦𑀁 𑀓𑀸𑀭𑁂𑀢𑁆𑀯𑀸 ‘‘𑀏𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 ¶ 𑀤𑀺𑀦𑁆𑀦𑀘𑀻𑀯𑀭𑀁. 𑀦 𑀢𑀁 𑀧𑀁𑀲𑀼𑀓𑀽𑀮𑀦𑁆𑀢𑀺 𑀅𑀧𑀁𑀲𑀼𑀓𑀽𑀮𑀪𑀸𑀯𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀓𑀸𑀭𑀡𑀢𑁄, 𑀕𑀸𑀳𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀘. 𑀢𑁂𑀦𑀸𑀳 ‘‘𑀦𑁄 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁂𑀯 𑀧𑀁𑀲𑀼𑀓𑀽𑀮’’𑀦𑁆𑀢𑀺. 𑀢𑀢𑁆𑀭𑀧𑀻𑀢𑀺 𑀬𑀁 𑀕𑀸𑀳𑁂𑀢𑁆𑀯𑀸 𑀦 𑀤𑀺𑀦𑁆𑀦𑀁 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁, 𑀢𑀢𑁆𑀭𑀧𑀺 𑀬𑁂𑀦 𑀪𑀺𑀓𑁆𑀔𑀼𑀦𑀸 𑀘𑀻𑀯𑀭𑀁 𑀤𑀻𑀬𑀢𑀺, 𑀢𑀲𑁆𑀲 𑀮𑀸𑀪𑁂, 𑀤𑀸𑀦𑁂 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀪𑀬𑀢𑁆𑀣 𑀆𑀤𑀭𑀕𑀸𑀭𑀯𑀸𑀦𑀁 𑀲𑀩𑁆𑀪𑀸𑀯𑀢𑁄, 𑀢𑀤𑀪𑀸𑀯𑀢𑁄 𑀘 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀲𑁆𑀲 𑀏𑀓𑀢𑁄𑀲𑀼𑀤𑁆𑀥𑀺 𑀉𑀪𑀢𑁄𑀲𑀼𑀤𑁆𑀥𑀺 𑀅𑀦𑀼𑀓𑁆𑀓𑀝𑁆𑀞𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀤𑀸𑀬𑀓𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀓𑀁 𑀲𑀫𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀉𑀓𑁆𑀓𑀝𑁆𑀞𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺. 𑀭𑀼𑀘𑀺𑀬𑀸𑀢𑀺 𑀙𑀦𑁆𑀤𑁂𑀦. 𑀔𑀦𑁆𑀢𑀺𑀬𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸.

𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀦𑀺𑀲𑁆𑀲𑀬𑁂𑀲𑀼 𑀅𑀢𑁆𑀢𑀦𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀤𑀼𑀢𑀺𑀬𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀚𑁆𑀚𑀫𑀸𑀦𑀢𑀸. 𑀆𑀭𑀓𑁆𑀔𑀤𑀼𑀓𑁆𑀔𑀸𑀪𑀸𑀯𑁄𑀢𑀺 𑀘𑀻𑀯𑀭𑀸𑀭𑀓𑁆𑀔𑀦𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑁄 𑀧𑀁𑀲𑀼𑀓𑀽𑀮𑀘𑀻𑀯𑀭𑀲𑁆𑀲 𑀅𑀮𑁄𑀪𑀦𑀻𑀬𑀢𑁆𑀢𑀸. 𑀧𑀭𑀺𑀪𑁄𑀕𑀢𑀡𑁆𑀳𑀸𑀬 𑀅𑀪𑀸𑀯𑁄 𑀲𑀯𑀺𑀲𑁂𑀲𑀮𑀽𑀔𑀲𑀪𑀸𑀯𑀢𑁆𑀢𑀸. 𑀧𑀸𑀲𑀸𑀤𑀺𑀓𑀢𑀸𑀢𑀺 𑀧𑀭𑁂𑀲𑀁 𑀧𑀲𑀸𑀤𑀸𑀯𑀳𑀢𑀸. 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀨𑀮𑀦𑀺𑀧𑁆𑀨𑀢𑁆𑀢𑀺 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺𑀬𑁂𑀯 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁄. 𑀥𑀼𑀢𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑀁 𑀬𑀸𑀯𑀤𑁂𑀯 𑀉𑀧𑀭𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀸𑀤𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦’’𑀦𑁆𑀢𑀺. 𑀫𑀸𑀭𑀲𑁂𑀦𑀯𑀺𑀖𑀸𑀢𑀸𑀬𑀸𑀢𑀺 𑀫𑀸𑀭𑀲𑁆𑀲, 𑀫𑀸𑀭𑀲𑁂𑀦𑀸𑀬 𑀘 𑀯𑀺𑀳𑀦𑀦𑀸𑀬 𑀯𑀺𑀤𑁆𑀥𑀁𑀲𑀦𑀸𑀬. 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀬𑀢𑁄 𑀲𑀁𑀬𑀢𑁄𑀢𑀺 𑀬𑀢𑀺, 𑀪𑀺𑀓𑁆𑀔𑀼. 𑀥𑀸𑀭𑀺𑀢𑀁 𑀬𑀁 𑀮𑁄𑀓𑀕𑀭𑀼𑀦𑀸 𑀧𑀁𑀲𑀼𑀓𑀽𑀮𑀁, 𑀢𑀁 𑀓𑁄 𑀦 𑀥𑀸𑀭𑀬𑁂, 𑀬𑀲𑁆𑀫𑀸 𑀯𑀸 𑀮𑁄𑀓𑀕𑀭𑀼𑀦𑀸 𑀧𑀁𑀲𑀼𑀓𑀽𑀮𑀁 𑀥𑀸𑀭𑀺𑀢𑀁, 𑀢𑀲𑁆𑀫𑀸 𑀓𑁄 𑀢𑀁 𑀦 𑀥𑀸𑀭𑀬𑁂𑀢𑀺 𑀬𑁄𑀚𑀦𑀸 𑀬𑀁𑀢𑀁𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀺𑀪𑀸𑀯𑀢𑁄. 𑀧𑀝𑀺𑀜𑁆𑀜𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑀺 𑀉𑀧𑀲𑀫𑁆𑀧𑀤𑀫𑀸𑀴𑁂 ‘‘𑀆𑀫 𑀪𑀦𑁆𑀢𑁂’’𑀢𑀺 𑀆𑀘𑀭𑀺𑀬𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀤𑀺𑀦𑁆𑀦𑀁 𑀧𑀝𑀺𑀜𑁆𑀜𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄.

𑀇𑀢𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁨. 𑀢𑁂𑀘𑀻𑀯𑀭𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁫. 𑀘𑀢𑀼𑀢𑁆𑀣𑀓𑀘𑀻𑀯𑀭𑀦𑁆𑀢𑀺 ¶ 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀬𑁄𑀕𑁆𑀬𑀁 𑀘𑀢𑀼𑀢𑁆𑀣𑀓𑀘𑀻𑀯𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀁𑀲𑀓𑀸𑀲𑀸𑀯𑀲𑁆𑀲 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄. 𑀅𑀜𑁆𑀜𑀢𑀭𑀯𑀘𑀦𑁂𑀦𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀸𑀯 𑀦 𑀲𑀓𑁆𑀓𑁄𑀢𑀺, 𑀬𑀸𑀯 𑀦 𑀮𑀪𑀢𑀺, 𑀬𑀸𑀯 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀧𑀘𑁆𑀘𑁂𑀓𑀁 𑀬𑀸𑀯-𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦 𑀲𑀺𑀚𑁆𑀛𑀢𑀺. 𑀦𑀺𑀓𑁆𑀔𑀺𑀢𑁆𑀢𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀦𑀺𑀘𑀬𑀲𑀦𑁆𑀦𑀺𑀥𑀺𑀥𑀼𑀢𑀗𑁆𑀕𑀲𑀁𑀓𑀺𑀮𑁂𑀲𑀤𑁄𑀲𑁄 ¶ 𑀦𑀢𑁆𑀣𑀺. 𑀆𑀲𑀦𑁆𑀦𑁂𑀢𑀺 𑀘𑀻𑀯𑀭𑀲𑁆𑀲 𑀆𑀲𑀦𑁆𑀦𑁂 𑀞𑀸𑀦𑁂. 𑀭𑀚𑀦𑀓𑁆𑀔𑀡𑁂 𑀧𑀭𑀺𑀪𑀼𑀜𑁆𑀚𑀦𑀓𑀸𑀲𑀸𑀯𑀁 𑀭𑀚𑀦𑀓𑀸𑀲𑀸𑀯𑀁. 𑀢𑀢𑁆𑀭𑀝𑁆𑀞𑀓𑀧𑀘𑁆𑀘𑀢𑁆𑀣𑀭𑀡𑀁 𑀦𑀸𑀫 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀲𑁂𑀦𑀸𑀲𑀦𑁂 𑀧𑀘𑁆𑀘𑀢𑁆𑀣𑀭𑀡𑀯𑀲𑁂𑀦 𑀅𑀥𑀺𑀝𑁆𑀞𑀺𑀢𑀁. ‘‘𑀅𑀁𑀲𑀓𑀸𑀲𑀸𑀯𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀳𑁄𑀢𑀺, 𑀇𑀢𑀺 𑀧𑀘𑁆𑀘𑀢𑁆𑀣𑀭𑀡𑀁, 𑀅𑀁𑀲𑀓𑀸𑀲𑀸𑀯𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑀸𑀦𑀺𑀧𑀺 𑀥𑀼𑀢𑀗𑁆𑀕𑀪𑁂𑀤𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀳𑀭𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀭𑀚𑀦𑀓𑀸𑀮𑁂 𑀏𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀦𑀺𑀘𑁆𑀘𑀧𑀭𑀺𑀪𑁄𑀕𑀯𑀲𑁂𑀦 𑀦 𑀯𑀝𑁆𑀝𑀢𑀺 𑀢𑁂𑀘𑀻𑀯𑀭𑀺𑀓𑀲𑁆𑀲. 𑀅𑀁𑀲𑀓𑀸𑀲𑀸𑀯𑀦𑁆𑀢𑀺 𑀔𑀦𑁆𑀥𑁂 𑀞𑀧𑁂𑀢𑀩𑁆𑀩𑀓𑀸𑀲𑀸𑀯𑀁. 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦𑀸𑀢𑀺 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀢𑁄 𑀓𑀸𑀬𑀲𑁆𑀲 𑀧𑀭𑀺𑀳𑀭𑀡𑀫𑀢𑁆𑀢𑁂𑀦. 𑀲𑀫𑀸𑀤𑀸𑀬𑁂𑀯𑀸𑀢𑀺 𑀕𑀳𑁂𑀢𑁆𑀯𑀸 𑀏𑀯. 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀸𑀢𑀺 𑀅𑀧𑁆𑀧𑀓𑀺𑀘𑁆𑀘𑀢𑀸. 𑀓𑀧𑁆𑀧𑀺𑀬𑁂 𑀫𑀢𑁆𑀢𑀓𑀸𑀭𑀺𑀢𑀸𑀬𑀸𑀢𑀺 𑀦𑀺𑀲𑀻𑀤𑀦𑀸𑀤𑀺𑀯𑀲𑁂𑀦, 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀘 𑀩𑀳𑀽𑀲𑀼 𑀘𑀻𑀯𑀭𑁂𑀲𑀼 𑀅𑀦𑀼𑀜𑁆𑀜𑀸𑀢𑁂𑀲𑀼𑀧𑀺 𑀢𑀺𑀘𑀻𑀯𑀭𑀫𑀢𑁆𑀢𑁂 𑀞𑀺𑀢𑀢𑁆𑀢𑀸. 𑀲𑀳 𑀧𑀢𑁆𑀢𑀘𑀭𑀡𑀸𑀬𑀸𑀢𑀺 𑀲𑀧𑀢𑁆𑀢𑀘𑀭𑀡𑁄. 𑀧𑀓𑁆𑀔𑀻 𑀲𑀧𑀓𑁆𑀔𑀓𑁄.

𑀇𑀢𑀺 𑀢𑁂𑀘𑀻𑀯𑀭𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁩. 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁬. 𑀅𑀢𑀺𑀭𑁂𑀓𑀮𑀸𑀪𑀦𑁆𑀢𑀺 ‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺 (𑀫𑀳𑀸𑀯. 𑁭𑁩, 𑁧𑁨𑁮) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀸𑀳𑀸𑀭𑀮𑀸𑀪𑀢𑁄 𑀅𑀢𑀺𑀭𑁂𑀓𑀮𑀸𑀪𑀁, 𑀲𑀗𑁆𑀖𑀪𑀢𑁆𑀢𑀸𑀤𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁. 𑀓𑀢𑀺𑀧𑀬𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀤𑀺𑀯𑀲𑀁 𑀤𑀸𑀢𑀩𑁆𑀩𑀪𑀢𑁆𑀢𑀁 𑀧𑀓𑁆𑀔𑀺𑀓𑀁. 𑀉𑀧𑁄𑀲𑀣𑁂 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀁. 𑀧𑀝𑀺𑀧𑀤𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀧𑀸𑀝𑀺𑀧𑀤𑀺𑀓𑀁. 𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀁. 𑀥𑀼𑀭𑀕𑁂𑀳𑁂 𑀏𑀯 𑀞𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁. 𑀕𑀸𑀫𑀯𑀸𑀲𑀻𑀆𑀤𑀻𑀳𑀺 𑀯𑀸𑀭𑁂𑀦 𑀤𑀸𑀢𑀩𑁆𑀩𑀪𑀢𑁆𑀢𑀁 ¶ 𑀯𑀸𑀭𑀓𑀪𑀢𑁆𑀢𑀁. ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸𑀢𑀺𑀆𑀤𑀺𑀦𑀸’’𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀤𑀺𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀪𑀺𑀓𑁆𑀔𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀪𑁂𑀲𑀚𑁆𑀚𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀦𑀺𑀭𑀸𑀫𑀺𑀲𑀲𑀮𑀸𑀓𑀸. 𑀬𑀸𑀯𑀓𑀸𑀮𑀺𑀓𑀯𑀚𑁆𑀚𑀸𑀢𑀺 𑀘 𑀯𑀤𑀦𑁆𑀢𑀺. 𑀯𑀺𑀳𑀸𑀭𑁂 𑀧𑀓𑁆𑀓𑀪𑀢𑁆𑀢𑀫𑁆𑀧𑀻𑀢𑀺 𑀉𑀧𑀸𑀲𑀓𑀸 𑀇𑀥𑁂𑀯 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 ‘‘𑀲𑀩𑁆𑀩𑁂𑀲𑀁 𑀅𑀬𑁆𑀬𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑁂𑀬𑁂𑀯 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀆𑀳𑀭𑀺𑀢𑁆𑀯𑀸𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑀢𑁄 𑀆𑀦𑁂𑀢𑁆𑀯𑀸. 𑀢𑀁 𑀤𑀺𑀯𑀲𑀁 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 ‘‘𑀫𑀸, 𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀣, 𑀯𑀺𑀳𑀸𑀭𑁂𑀬𑁂𑀯 𑀪𑀺𑀓𑁆𑀔𑀸 𑀆𑀦𑀻𑀬𑀢𑀻’’𑀢𑀺 𑀯𑀤𑀦𑁆𑀢𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀢𑀁 𑀤𑀺𑀯𑀲𑀁 𑀦𑀺𑀲𑀻𑀤𑀺𑀢𑁆𑀯𑀸. 𑀲𑁂𑀭𑀺𑀯𑀺𑀳𑀸𑀭𑀲𑀼𑀔𑀦𑁆𑀢𑀺 𑀅𑀧𑀭𑀸𑀬𑀢𑁆𑀢𑀯𑀺𑀳𑀸𑀭𑀺𑀢𑀸𑀲𑀼𑀔𑀁 ¶ . 𑀅𑀭𑀺𑀬𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀧𑀝𑀺𑀲𑀁𑀬𑀼𑀢𑁆𑀢𑀸 (𑀤𑀻. 𑀦𑀺. 𑁩.𑁩𑁦𑁯; 𑀅. 𑀦𑀺. 𑁪.𑁨𑁮) 𑀥𑀫𑁆𑀫𑀓𑀣𑀸. 𑀥𑀫𑁆𑀫𑀭𑀲𑀦𑁆𑀢𑀺 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀸𑀫𑁄𑀚𑁆𑀚𑀸𑀤𑀺𑀭𑀲𑀁.

𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀧𑀺𑀡𑁆𑀟𑀧𑀭𑀺𑀬𑁂𑀲𑀦𑀢𑁄 𑀓𑁄𑀲𑀚𑁆𑀚𑀦𑀺𑀫𑁆𑀫𑀤𑁆𑀤𑀦𑀢𑀸. ‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁪𑁯; 𑀦𑁂𑀢𑁆𑀢𑀺. 𑁧𑁨𑁩) 𑀯𑀼𑀢𑁆𑀢𑀯𑀺𑀥𑀺𑀦𑀸 𑀆𑀳𑀸𑀭𑀧𑀭𑀺𑀬𑁂𑀲𑀦𑀢𑁄 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀢𑀸. 𑀦𑀺𑀘𑁆𑀘𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑀲𑁆𑀲𑁂𑀯 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀕𑀫𑀦𑀸𑀤𑀬𑁄 𑀲𑁂𑀔𑀺𑀬𑀥𑀫𑁆𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑁂𑀔𑀺𑀬𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁. 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀜𑁆𑀜𑀼𑀢𑀸𑀬, 𑀲𑀁𑀲𑀝𑁆𑀞𑀯𑀺𑀳𑀸𑀭𑀸𑀪𑀸𑀯𑀢𑁄 𑀘 𑀅𑀧𑀭𑀧𑁄𑀲𑀺𑀢𑀸. 𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀓𑀅𑀧𑁆𑀧𑀓𑀧𑀺𑀡𑁆𑀟𑀕𑀳𑀡𑁂𑀦 𑀧𑀭𑀸𑀦𑀼𑀕𑁆𑀕𑀳𑀓𑀺𑀭𑀺𑀬𑀸. 𑀅𑀦𑁆𑀢𑀺𑀫𑀸𑀬 𑀚𑀻𑀯𑀺𑀓𑀸𑀬 𑀅𑀯𑀝𑁆𑀞𑀸𑀦𑁂𑀦 𑀫𑀸𑀦𑀧𑁆𑀧𑀳𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁, 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬’’𑀦𑁆𑀢𑀺𑀆𑀤𑀺 (𑀇𑀢𑀺𑀯𑀼. 𑁯𑁧; 𑀲𑀁. 𑀦𑀺. 𑁩.𑁮𑁦). 𑀫𑀺𑀲𑁆𑀲𑀓𑀪𑀢𑁆𑀢𑁂𑀦 𑀬𑀸𑀧𑀦𑀢𑁄 𑀭𑀲𑀢𑀡𑁆𑀳𑀸𑀦𑀺𑀯𑀸𑀭𑀡𑀁. 𑀦𑀺𑀫𑀦𑁆𑀢𑀦𑀸𑀲𑀫𑁆𑀧𑀝𑀺𑀘𑁆𑀙𑀦𑀢𑁄 𑀕𑀡𑀪𑁄𑀚𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀦𑀸𑀧𑀢𑁆𑀢𑀺𑀢𑀸.

𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀯𑀢𑁆𑀢𑀦𑀝𑁆𑀞𑁂𑀦 𑀘𑀸𑀢𑀼𑀤𑁆𑀤𑀺𑀲𑁄. 𑀆𑀚𑀻𑀯𑀲𑁆𑀲 𑀯𑀺𑀲𑀼𑀚𑁆𑀛𑀢𑀻𑀢𑀺 𑀆𑀚𑀻𑀯𑁄 𑀅𑀲𑁆𑀲 𑀯𑀺𑀲𑀼𑀚𑁆𑀛𑀢𑀺. 𑀅𑀢𑁆𑀢𑀪𑀭𑀲𑁆𑀲𑀸𑀢𑀺 𑀅𑀧𑁆𑀧𑀸𑀦𑀯𑀚𑁆𑀚𑀲𑀼𑀮𑀪𑀭𑀽𑀧𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀢𑁆𑀢𑀦𑁄 𑀪𑀭𑀡𑀢𑁄 𑀅𑀢𑁆𑀢𑀪𑀭𑀲𑁆𑀲. 𑀢𑀢𑁄 𑀏𑀯 𑀏𑀓𑀯𑀺𑀳𑀸𑀭𑀺𑀢𑀸𑀬 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀫𑁆𑀧𑀺 𑀅𑀜𑁆𑀜𑁂𑀲𑀁 𑀅𑀧𑁄𑀲𑀦𑀢𑁄 𑀅𑀦𑀜𑁆𑀜𑀧𑁄𑀲𑀺𑀦𑁄. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦 𑀯𑀺𑀘𑀭𑀡𑀢𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀁, 𑀲𑀼𑀪𑀭𑀢𑀁, 𑀧𑀭𑀫𑀅𑀧𑁆𑀧𑀺𑀘𑁆𑀙𑀢𑀁, 𑀲𑀦𑁆𑀢𑀼𑀝𑁆𑀞𑀺𑀜𑁆𑀘 𑀤𑀲𑁆𑀲𑁂𑀢𑀺. 𑀤𑁂𑀯𑀸𑀧𑀺 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀲𑀲𑁆𑀲 𑀪𑀼𑀲𑀁 𑀅𑀢𑀺𑀯𑀺𑀬 𑀲𑀦𑁆𑀢𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀢𑀸𑀬 𑀉𑀧𑀲𑀦𑁆𑀢𑀲𑁆𑀲 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀫𑀢𑁄 𑀲𑀩𑁆𑀩𑀓𑀸𑀮𑀁 𑀲𑀢𑀺𑀫𑀢𑁄 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀓𑁆𑀓𑀸𑀤𑀬𑁄 ¶ 𑀤𑁂𑀯𑀸𑀧𑀺 𑀧𑀺𑀳𑀬𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀆𑀤𑀭𑀁 𑀚𑀦𑁂𑀦𑁆𑀢𑀺, 𑀧𑀕𑁂𑀯 𑀫𑀦𑀼𑀲𑁆𑀲𑀸. 𑀲𑀘𑁂 𑀲𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 𑀦 𑀳𑁄𑀢𑀺, 𑀢𑀤𑀪𑀺𑀓𑀗𑁆𑀔𑀻 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁪. 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁭. 𑀇𑀫𑀺𑀦𑀸𑀢𑀺 𑀲𑀧𑀤𑀸𑀦𑀘𑀸𑀭𑀺𑀓𑁂𑀦. 𑀓𑀸𑀮𑀢𑀭𑀦𑁆𑀢𑀺 𑀓𑀸𑀮𑀲𑁆𑀲𑁂𑀯. 𑀅𑀨𑀸𑀲𑀼𑀓𑀝𑁆𑀞𑀸𑀦𑀦𑁆𑀢𑀺 𑀲𑀧𑀭𑀺𑀲𑁆𑀲𑀬𑀸𑀤𑀺𑀯𑀲𑁂𑀦 ¶ 𑀤𑀼𑀧𑁆𑀧𑀯𑁂𑀲𑀦𑀝𑁆𑀞𑀸𑀦𑀁. 𑀧𑀼𑀭𑀢𑁄𑀢𑀺 𑀯𑀻𑀣𑀺𑀬𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀢𑁄 𑀖𑀭𑀁 𑀅𑀧𑀯𑀺𑀝𑁆𑀞𑀲𑁆𑀲𑁂𑀯. 𑀧𑀢𑁆𑀢𑀯𑀺𑀲𑁆𑀲𑀝𑁆𑀞𑀝𑁆𑀞𑀸𑀦𑀦𑁆𑀢𑀺 𑀧𑁂𑀲𑀓𑀸𑀭𑀯𑀻𑀣𑀺𑀬𑀁 𑀧𑁂𑀲𑀓𑀸𑀭𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀞𑀺𑀢𑀲𑁆𑀲 𑀲𑀓𑁆𑀓𑀲𑁆𑀲 𑀖𑀭𑀤𑁆𑀯𑀸𑀭𑁂 𑀧𑀢𑁆𑀢𑀯𑀺𑀲𑁆𑀲𑀝𑁆𑀞𑀝𑁆𑀞𑀸𑀦𑀁. 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑁄 𑀢𑀁 𑀤𑀺𑀯𑀲𑀁 𑀦 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀼𑀮𑁄𑀫𑁂𑀢𑀺. 𑀓𑀢𑁆𑀣𑀘𑀺𑀧𑀺 𑀓𑀼𑀮𑁂 𑀦𑀺𑀩𑀤𑁆𑀥𑀁 𑀉𑀧𑀲𑀗𑁆𑀓𑀫𑀦𑀸𑀪𑀸𑀯𑀢𑁄 𑀧𑀭𑀺𑀘𑀬𑀸𑀪𑀸𑀯𑁂𑀦 𑀓𑀼𑀮𑁂𑀲𑀼 𑀦𑀺𑀘𑁆𑀘𑀦𑀯𑀓𑀢𑀸. 𑀲𑀩𑁆𑀩𑀢𑁆𑀣 𑀅𑀮𑀕𑁆𑀕𑀫𑀸𑀦𑀲𑀢𑀸𑀬 𑀘 𑀲𑁄𑀫𑁆𑀫𑀪𑀸𑀯𑁂𑀦 𑀘 𑀘𑀦𑁆𑀤𑀽𑀧𑀫𑀢𑀸. 𑀓𑀼𑀮𑁂𑀲𑀼 𑀧𑀭𑀺𑀕𑁆𑀕𑀳𑀘𑀺𑀢𑁆𑀢𑀸𑀪𑀸𑀯𑁂𑀦 𑀢𑀢𑁆𑀣 𑀫𑀘𑁆𑀙𑁂𑀭𑀧𑁆𑀧𑀳𑀸𑀦𑀁. 𑀳𑀺𑀢𑁂𑀲𑀺𑀢𑀸𑀬 𑀯𑀺𑀪𑀸𑀕𑀸𑀪𑀸𑀯𑀢𑁄 𑀲𑀫𑀸𑀦𑀼𑀓𑀫𑁆𑀧𑀺𑀢𑀸. 𑀓𑀼𑀮𑀸𑀦𑀁 𑀲𑀗𑁆𑀕𑀡𑁆𑀳𑀦𑀲𑀁𑀲𑀝𑁆𑀞𑀢𑀸𑀤𑀬𑁄 𑀓𑀼𑀮𑀽𑀧𑀓𑀸𑀤𑀻𑀦𑀯𑀸. 𑀅𑀯𑁆𑀳𑀸𑀦𑀸𑀦𑀪𑀺𑀦𑀦𑁆𑀤𑀦𑀸𑀢𑀺 𑀦𑀺𑀫𑀦𑁆𑀢𑀦𑀯𑀲𑁂𑀦 𑀅𑀯𑁆𑀳𑀸𑀦𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀦𑀸. 𑀅𑀪𑀺𑀳𑀸𑀭𑁂𑀦𑀸𑀢𑀺 𑀪𑀺𑀓𑁆𑀔𑀸𑀪𑀺𑀳𑀸𑀭𑁂𑀦. 𑀲𑁂𑀭𑀺𑀘𑀸𑀭𑀦𑁆𑀢𑀺 𑀬𑀣𑀸𑀭𑀼𑀘𑀺 𑀯𑀺𑀘𑀭𑀡𑀁.

𑀇𑀢𑀺 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁫. 𑀏𑀓𑀸𑀲𑀦𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁮. 𑀦𑀸𑀦𑀸𑀲𑀦𑀪𑁄𑀚𑀦𑀦𑁆𑀢𑀺 𑀅𑀦𑁂𑀓𑀲𑁆𑀫𑀺𑀁 𑀆𑀲𑀦𑁂 𑀪𑁄𑀚𑀦𑀁, 𑀏𑀓𑀦𑀺𑀲𑀚𑁆𑀚𑀸𑀬 𑀏𑀯 𑀅𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀲𑀚𑁆𑀚𑀸𑀲𑀼 𑀆𑀳𑀸𑀭𑀧𑀭𑀺𑀪𑁄𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀬𑀼𑀢𑁆𑀢𑀭𑀽𑀧𑀁 𑀅𑀦𑀼𑀝𑁆𑀞𑀸𑀧𑀦𑀻𑀬𑀁. 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀢𑁆𑀢𑀁 𑀓𑀸𑀢𑀼𑀁 𑀬𑀼𑀚𑁆𑀚𑀢𑀺. 𑀯𑀢𑁆𑀢𑀁 𑀦𑀸𑀫 𑀕𑀭𑀼𑀝𑁆𑀞𑀸𑀦𑀻𑀬𑁂 𑀓𑀢𑁆𑀢𑀩𑁆𑀩𑀫𑁂𑀯. 𑀢𑀢𑁆𑀣 𑀧𑀦 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀬𑀁 𑀣𑁂𑀭𑀯𑀸𑀤𑀁 𑀆𑀳 ‘‘𑀆𑀲𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬 𑀪𑁄𑀚𑀦𑀁 𑀯𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀏𑀓𑀸𑀲𑀦𑀺𑀓𑀁 𑀪𑀺𑀓𑁆𑀔𑀼𑀁 𑀪𑀼𑀜𑁆𑀚𑀦𑁆𑀢𑀁 𑀆𑀲𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬, 𑀥𑀼𑀢𑀗𑁆𑀕𑀪𑁂𑀤𑀢𑁄 𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀸 𑀦 𑀯𑀼𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀪𑁄𑀚𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬 𑀥𑀼𑀢𑀗𑁆𑀕𑀪𑁂𑀤𑀢𑁄, 𑀅𑀪𑀼𑀜𑁆𑀚𑀺𑀬𑀫𑀸𑀦𑀁 𑀬𑀸𑀯 𑀪𑀼𑀜𑁆𑀚𑀺𑀢𑀼𑀁 𑀦𑀸𑀭𑀪𑀢𑀺, 𑀢𑀸𑀯 𑀯𑀼𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀬𑀺𑀤𑀁 𑀤𑁆𑀯𑀬𑀁 𑀇𑀥 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀢𑁆𑀢𑀓𑀭𑀡𑀁 𑀥𑀼𑀢𑀗𑁆𑀕𑀁 𑀦 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺. ‘‘𑀪𑁂𑀲𑀚𑁆𑀚𑀢𑁆𑀣𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀲𑀧𑁆𑀧𑀺𑀆𑀤𑀻𑀦𑀺𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀸𑀩𑀸𑀥𑀢𑀸𑀢𑀺 𑀅𑀭𑁄𑀕𑀢𑀸. 𑀅𑀧𑁆𑀧𑀸𑀢𑀗𑁆𑀓𑀢𑀸𑀢𑀺 𑀅𑀓𑀺𑀘𑁆𑀙𑀚𑀻𑀯𑀺𑀢𑀸 𑀲𑀭𑀻𑀭𑀤𑀼𑀓𑁆𑀔𑀸𑀪𑀸𑀯𑁄. 𑀮𑀳𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸. 𑀩𑀮𑀦𑁆𑀢𑀺 𑀲𑀭𑀻𑀭𑀩𑀮𑀁. 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀲𑀼𑀔𑀯𑀺𑀳𑀸𑀭𑁄. 𑀲𑀩𑁆𑀩𑀫𑁂𑀢𑀁 𑀩𑀳𑀼𑀓𑁆𑀔𑀢𑁆𑀢𑀼𑀁 𑀪𑀼𑀜𑁆𑀚𑀦𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀯𑀺𑀓𑀸𑀭𑀧𑀝𑀺𑀓𑁆𑀔𑁂𑀧𑀧𑀤𑀁. 𑀭𑀼𑀚𑀸𑀢𑀺 𑀭𑁄𑀕𑀸. 𑀦 𑀓𑀫𑁆𑀫𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀬𑁄𑀕𑀓𑀫𑁆𑀫𑀁 𑀧𑀼𑀭𑁂𑀪𑀢𑁆𑀢𑀁, 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀦 𑀧𑀭𑀺𑀳𑀸𑀧𑁂𑀢𑀺, 𑀩𑀳𑀼𑀲𑁄 𑀪𑁄𑀚𑀦𑁂 𑀅𑀩𑁆𑀬𑀸𑀯𑀝𑀪𑀸𑀯𑀢𑁄, 𑀅𑀭𑁄𑀕𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀏𑀓𑀸𑀲𑀦𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁬. 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁨𑁯. 𑀅𑀧𑁆𑀧𑀝𑀺𑀓𑀽𑀮𑀁 ¶ 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀧𑀝𑀺𑀓𑀽𑀮𑀲𑁆𑀲 𑀪𑀼𑀢𑁆𑀢𑀲𑁆𑀲 𑀅𑀕𑀡𑁆𑀳𑀦𑀫𑁆𑀧𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺 ‘‘𑀏𑀓𑀪𑀸𑀚𑀦𑀫𑁂𑀯 𑀕𑀡𑁆𑀳𑀸𑀫𑀻’’𑀢𑀺 𑀩𑀳𑀼𑀁 𑀕𑀳𑁂𑀢𑁆𑀯𑀸 𑀦 𑀙𑀟𑁆𑀟𑁂𑀢𑀩𑁆𑀩𑀁. 𑀦𑀸𑀦𑀸𑀭𑀲𑀢𑀡𑁆𑀳𑀸𑀯𑀺𑀦𑁄𑀤𑀦𑀦𑁆𑀢𑀺 𑀦𑀸𑀦𑀸𑀭𑀲𑀪𑁄𑀚𑀦𑁂 𑀢𑀡𑁆𑀳𑀸𑀬 𑀯𑀺𑀦𑁄𑀤𑀦𑀁. 𑀅𑀢𑁆𑀭 𑀅𑀢𑁆𑀭 𑀦𑀸𑀦𑀸𑀪𑀸𑀚𑀦𑁂 𑀞𑀺𑀢𑁂 𑀦𑀸𑀦𑀸𑀭𑀲𑁂 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀅𑀢𑁆𑀭𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀭𑀺𑀘𑁆𑀙𑀢𑀸, 𑀢𑀲𑁆𑀲𑀸 𑀅𑀢𑁆𑀭𑀺𑀘𑁆𑀙𑀢𑀸𑀬 𑀧𑀳𑀸𑀦𑀁. 𑀆𑀳𑀸𑀭𑁂 𑀧𑀬𑁄𑀚𑀦𑀫𑀢𑁆𑀢𑀤𑀲𑁆𑀲𑀺𑀢𑀸𑀢𑀺 𑀅𑀲𑀫𑁆𑀪𑀺𑀦𑁆𑀦𑀦𑀸𑀦𑀸𑀭𑀲𑁂 𑀕𑁂𑀥𑀁 𑀅𑀓𑀢𑁆𑀯𑀸 𑀆𑀳𑀸𑀭𑁂 𑀲𑀢𑁆𑀣𑀸𑀭𑀸 𑀅𑀦𑀼𑀜𑁆𑀜𑀸𑀢𑀧𑀬𑁄𑀚𑀦𑀫𑀢𑁆𑀢𑀤𑀲𑁆𑀲𑀺𑀢𑀸. 𑀯𑀺𑀲𑀼𑀁 𑀯𑀺𑀲𑀼𑀁 𑀪𑀸𑀚𑀦𑁂𑀲𑀼 𑀞𑀺𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀕𑀡𑁆𑀳𑀢𑁄 𑀢𑀢𑁆𑀣 𑀢𑀢𑁆𑀣 𑀲𑀸𑀪𑁄𑀕𑀢𑀸𑀬 𑀲𑀺𑀬𑀸 𑀯𑀺𑀓𑁆𑀔𑀺𑀢𑁆𑀢𑀪𑁄𑀚𑀺𑀢𑀸, 𑀦 𑀢𑀣𑀸 𑀇𑀫𑀲𑁆𑀲 𑀏𑀓𑀧𑀢𑁆𑀢𑀕𑀢𑀲𑀜𑁆𑀜𑀺𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀓𑁆𑀔𑀺𑀢𑁆𑀢𑀪𑁄𑀚𑀺𑀢𑀸’’𑀢𑀺. 𑀑𑀓𑁆𑀔𑀺𑀢𑁆𑀢𑀮𑁄𑀘𑀦𑁄𑀢𑀺 𑀧𑀢𑁆𑀢𑀲𑀜𑁆𑀜𑀺𑀢𑀸𑀬 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼. 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬.

𑀇𑀢𑀺 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁭. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁦. 𑀪𑀼𑀜𑁆𑀚𑀦𑁆𑀢𑀲𑁆𑀲 ¶ 𑀬𑀁 𑀉𑀧𑀦𑀻𑀢𑀁, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂𑀦 𑀢𑀁 𑀅𑀢𑀺𑀭𑀺𑀢𑁆𑀢𑀁 𑀪𑁄𑀚𑀦𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀪𑁄𑀚𑀦𑀁. 𑀧𑀼𑀦 𑀪𑁄𑀚𑀦𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀢𑀩𑁆𑀩𑀺𑀲𑀬𑀢𑁆𑀢𑀸 𑀇𑀫𑀲𑁆𑀲 𑀥𑀼𑀢𑀗𑁆𑀕𑀲𑁆𑀲. 𑀢𑁂𑀦𑀸𑀳 ‘‘𑀇𑀤𑀫𑀲𑁆𑀲 𑀯𑀺𑀥𑀸𑀦’’𑀦𑁆𑀢𑀺. 𑀬𑀲𑁆𑀫𑀺𑀁 𑀪𑁄𑀚𑀦𑁂𑀢𑀺 𑀬𑀲𑁆𑀫𑀺𑀁 𑀪𑀼𑀜𑁆𑀚𑀺𑀬𑀫𑀸𑀦𑁂 𑀪𑁄𑀚𑀦𑁂. 𑀢𑀤𑁂𑀯 𑀪𑀼𑀜𑁆𑀚𑀢𑀺, 𑀦 𑀅𑀜𑁆𑀜𑀁. 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀧𑀢𑁆𑀢𑀺, 𑀢𑀢𑁄 𑀤𑀽𑀭𑀻𑀪𑀸𑀯𑁄 𑀅𑀦𑀸𑀧𑀚𑁆𑀚𑀦𑀁. 𑀑𑀤𑀭𑀺𑀓𑀢𑁆𑀢𑀁 𑀖𑀲𑁆𑀫𑀭𑀪𑀸𑀯𑁄 𑀓𑀼𑀘𑁆𑀙𑀺𑀧𑀽𑀭𑀓𑀢𑀸, 𑀢𑀲𑁆𑀲 𑀅𑀪𑀸𑀯𑁄 𑀏𑀓𑀧𑀺𑀡𑁆𑀟𑁂𑀦𑀸𑀧𑀺 𑀬𑀸𑀧𑀦𑀢𑁄. 𑀦𑀺𑀭𑀸𑀫𑀺𑀲𑀲𑀦𑁆𑀦𑀺𑀥𑀺𑀢𑀸 𑀦𑀺𑀳𑀺𑀢𑀲𑁆𑀲 𑀅𑀪𑀼𑀜𑁆𑀚𑀦𑀢𑁄. 𑀧𑀼𑀦 𑀧𑀭𑀺𑀬𑁂𑀲𑀦𑀯𑀲𑁂𑀦 𑀧𑀭𑀺𑀬𑁂𑀲𑀦𑀸𑀬 𑀔𑁂𑀤𑀁 𑀦 𑀬𑀸𑀢𑀺. 𑀅𑀪𑀺𑀲𑀮𑁆𑀮𑁂𑀔𑀓𑀸𑀦𑀁 𑀲𑀦𑁆𑀢𑁄𑀲𑀕𑀼𑀡𑀸𑀤𑀻𑀦𑀁 𑀯𑀼𑀤𑁆𑀥𑀺𑀬𑀸 𑀲𑀜𑁆𑀚𑀦𑀦𑀁 𑀲𑀦𑁆𑀢𑁄𑀲𑀕𑀼𑀡𑀸𑀤𑀺𑀯𑀼𑀟𑁆𑀠𑀺𑀲𑀜𑁆𑀚𑀦𑀦𑀁. 𑀇𑀤𑀦𑁆𑀢𑀺 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁.

𑀇𑀢𑀺 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁮. 𑀆𑀭𑀜𑁆𑀜𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁧. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 ¶ 𑀧𑀳𑀸𑀬 𑀅𑀭𑀜𑁆𑀜𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀕𑀸𑀫𑀦𑁆𑀢𑀁, 𑀅𑀭𑀜𑁆𑀜𑀜𑁆𑀘 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀲𑁆𑀲 ‘‘𑀕𑀸𑀫𑁄𑀬𑁂𑀯 𑀕𑀸𑀫𑀦𑁆𑀢𑀲𑁂𑀦𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁄 𑀓𑁄𑀘𑀺 𑀲𑀢𑁆𑀣𑁄𑀧𑀺 𑀕𑀸𑀫𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀦𑁆𑀤𑀔𑀻𑀮𑀸𑀢𑀺 𑀉𑀫𑁆𑀫𑀸𑀭𑀸. 𑀢𑀲𑁆𑀲𑀸𑀢𑀺 𑀮𑁂𑀟𑁆𑀟𑀼𑀧𑀸𑀢𑀲𑁆𑀲. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀅𑀭𑀜𑁆𑀜𑀮𑀓𑁆𑀔𑀡𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑁂 (𑀧𑀸𑀭𑀸. 𑁯𑁨) 𑀆𑀕𑀢𑀁. 𑀢𑀢𑁆𑀣 𑀳𑀺 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀅𑀦𑀯𑀲𑁂𑀲𑀢𑁄 𑀅𑀯𑀳𑀸𑀭𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁂 𑀢𑀤𑀼𑀪𑀬𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀸𑀫𑀽𑀧𑀘𑀸𑀭𑁄 𑀳𑀺 𑀮𑁄𑀓𑁂 𑀕𑀸𑀫𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀻𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀕𑀸𑀫𑀯𑀺𑀦𑀺𑀫𑀼𑀢𑁆𑀢𑀁 𑀞𑀸𑀦𑀁 𑀅𑀭𑀜𑁆𑀜𑀫𑁂𑀯 𑀳𑁄𑀢𑀻𑀢𑀺 𑀅𑀪𑀺𑀥𑀫𑁆𑀫𑁂 (𑀯𑀺𑀪. 𑁫𑁨𑁯) 𑀕𑀸𑀫𑀸 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸, 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁬𑁫𑁪) ‘‘𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀆𑀕𑀢𑀁 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬. 𑀦 𑀳𑀺 𑀲𑁄 𑀯𑀺𑀦𑀬𑀧𑀭𑀺𑀬𑀸𑀬𑀺𑀓𑁂 ‘‘𑀅𑀭𑀜𑁆𑀜𑁂 𑀯𑀲𑀦𑀢𑁄 𑀆𑀭𑀜𑁆𑀜𑀺𑀓𑁄 𑀧𑀦𑁆𑀢𑀲𑁂𑀦𑀸𑀲𑀦𑁄’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄. 𑀅𑀬𑀜𑁆𑀘 𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀢𑀺 𑀇𑀥 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑀦𑁆𑀢𑀓𑀣𑀸𑀯 ¶ 𑀧𑀫𑀸𑀡𑀁. 𑀢𑀲𑁆𑀫𑀸 𑀢𑀢𑁆𑀣 𑀆𑀕𑀢𑀫𑁂𑀯 𑀮𑀓𑁆𑀔𑀡𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸’’𑀢𑀺𑀆𑀤𑀺𑀦𑀸 𑀫𑀺𑀦𑀦𑀯𑀺𑀥𑀺𑀁 𑀆𑀳. 𑀢𑁂𑀦𑁂𑀯 𑀳𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀦𑀬𑁄𑀯 (𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁬) 𑀇𑀤𑀫𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀘 𑀯𑀼𑀢𑁆𑀢𑁄.

𑀢𑀢𑁄 𑀢𑀢𑁄 𑀫𑀕𑁆𑀕𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀔𑀼𑀤𑁆𑀤𑀓𑀫𑀕𑁆𑀕𑀁 𑀧𑀺𑀤𑀳𑀢𑀺. 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑁂𑀦 𑀥𑀼𑀢𑀗𑁆𑀕𑀲𑁄𑀥𑀦𑀧𑀲𑀼𑀢𑁂𑀦. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀮𑁂𑀢𑀺 𑀉𑀓𑁆𑀓𑀝𑁆𑀞𑀲𑁆𑀲 𑀢𑀬𑁄𑀧𑀺 𑀉𑀢𑀽, 𑀫𑀚𑁆𑀛𑀺𑀫𑀲𑁆𑀲 𑀤𑁆𑀯𑁂, 𑀫𑀼𑀤𑀼𑀓𑀲𑁆𑀲 𑀏𑀓𑁄 𑀉𑀢𑀼. 𑀢𑀢𑁆𑀣𑀧𑀺 𑀥𑀼𑀢𑀗𑁆𑀕𑀁 𑀦 𑀪𑀺𑀚𑁆𑀚𑀢𑀺 𑀲𑀉𑀲𑁆𑀲𑀸𑀳𑀢𑁆𑀢𑀸. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸𑀢𑀺 𑀘𑀺𑀢𑁆𑀢𑀲𑁆𑀲 𑀲𑀺𑀣𑀺𑀮𑀪𑀸𑀯𑁂𑀦 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀭𑀜𑁆𑀜𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄𑀢𑀺 ‘‘𑀅𑀳𑀁 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀺, 𑀬𑀣𑀸𑀮𑀤𑁆𑀥𑁄𑀯 𑀓𑀸𑀬𑀯𑀺𑀯𑁂𑀓𑁄 𑀲𑀸𑀢𑁆𑀣𑀓𑁄 𑀓𑀸𑀢𑀩𑁆𑀩𑁄’’𑀢𑀺 𑀫𑀦𑀲𑀺𑀓𑀸𑀭𑀲𑀩𑁆𑀪𑀸𑀯𑀢𑁄 ‘‘𑀪𑀩𑁆𑀩𑁄…𑀧𑁂… 𑀭𑀓𑁆𑀔𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲 𑀆𑀭𑀜𑁆𑀜𑀺𑀓𑀲𑁆𑀲 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑀺𑀧𑀦𑁆𑀢𑀺 𑀆𑀧𑀸𑀣𑀫𑀦𑀼𑀧𑀕𑀫𑀦𑀢𑁄. 𑀯𑀺𑀕𑀢𑀲𑀦𑁆𑀢𑀸𑀲𑁄 𑀳𑁄𑀢𑀺 𑀯𑀺𑀯𑁂𑀓𑀧𑀭𑀺𑀘𑀬𑀢𑁄. 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀚𑀳𑀢𑀺 𑀩𑀳𑀼𑀧𑀭𑀺𑀲𑁆𑀲𑀬𑁂 𑀅𑀭𑀜𑁆𑀜𑁂 𑀦𑀺𑀯𑀸𑀲𑁂𑀦𑁂𑀯 𑀫𑀭𑀡𑀪𑀬𑀲𑁆𑀲 𑀤𑀽𑀭𑀻𑀓𑀭𑀡𑀢𑁄. 𑀧𑀯𑀺𑀯𑁂𑀓𑀲𑀼𑀔𑀭𑀲𑀁 𑀅𑀲𑁆𑀲𑀸𑀤𑁂𑀢𑀺 𑀅𑀦𑀼𑀪𑀯𑀢𑀺 𑀚𑀦𑀲𑀁𑀲𑀕𑁆𑀕𑀸𑀪𑀸𑀯𑀢𑁄. 𑀆𑀭𑀸𑀥𑀬𑀦𑁆𑀢𑁄𑀢𑀺 𑀅𑀦𑀼𑀦𑀬𑀦𑁆𑀢𑁄. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀯𑁂𑀓𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀆𑀭𑀜𑁆𑀜𑀺𑀓𑀗𑁆𑀕𑀬𑁄𑀕𑀺𑀦𑁄 𑀯𑀸𑀳𑀦𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀯𑀲𑁂𑀲𑀥𑀼𑀢𑀸𑀬𑀼𑀥𑁄’’𑀢𑀺, 𑀅𑀯𑀲𑀺𑀝𑁆𑀞𑀥𑀼𑀢𑀥𑀫𑁆𑀫𑀸𑀬𑀼𑀥𑁄𑀢𑀺 𑀅𑀢𑁆𑀣𑁄.

𑀇𑀢𑀺 𑀆𑀭𑀜𑁆𑀜𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁯. 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁨. 𑀙𑀦𑁆𑀦𑀦𑁆𑀢𑀺 ¶ 𑀇𑀝𑁆𑀞𑀓𑀸𑀙𑀤𑀦𑀸𑀤𑀻𑀳𑀺 𑀙𑀸𑀤𑀺𑀢𑀁, 𑀆𑀯𑀲𑀣𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀫𑀦𑁆𑀢𑀭𑀺𑀓𑀭𑀼𑀓𑁆𑀔𑁄𑀢𑀺 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀭𑀚𑁆𑀚𑀲𑀻𑀫𑀸𑀬 𑀞𑀺𑀢𑀭𑀼𑀓𑁆𑀔𑁄. 𑀢𑀢𑁆𑀣 𑀳𑀺 𑀢𑁂𑀲𑀁 𑀭𑀸𑀚𑀽𑀦𑀁 𑀩𑀮𑀓𑀸𑀬𑁄 𑀉𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀬𑀼𑀤𑁆𑀥𑀁 𑀓𑀭𑁂𑀬𑁆𑀬, 𑀘𑁄𑀭𑀸𑀧𑀺 𑀧𑀸𑀭𑀺𑀧𑀦𑁆𑀣𑀺𑀓𑀸 𑀲𑀫𑁄𑀲𑀭𑀦𑁆𑀢𑀸 𑀪𑀺𑀓𑁆𑀔𑀼𑀲𑁆𑀲 𑀲𑀼𑀔𑁂𑀦 𑀦𑀺𑀲𑀻𑀤𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀘𑁂𑀢𑀺𑀬𑀭𑀼𑀓𑁆𑀔𑁄 ‘‘𑀤𑁂𑀯𑀢𑀸𑀥𑀺𑀝𑁆𑀞𑀺𑀢𑁄’’𑀢𑀺 𑀫𑀦𑀼𑀲𑁆𑀲𑁂𑀳𑀺 𑀲𑀫𑁆𑀫𑀢𑀭𑀼𑀓𑁆𑀔𑁄 𑀧𑀽𑀚𑁂𑀢𑀼𑀁 𑀉𑀧𑀕𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀯𑀺𑀯𑀺𑀢𑁆𑀢𑁄 𑀳𑁄𑀢𑀺. 𑀦𑀺𑀬𑁆𑀬𑀸𑀲𑀭𑀼𑀓𑁆𑀔𑁄 𑀲𑀚𑁆𑀚𑀭𑀼𑀓𑁆𑀔𑀸𑀤𑀺. 𑀯𑀕𑁆𑀕𑀼𑀮𑀺𑀭𑀼𑀓𑁆𑀔𑁄 𑀯𑀕𑁆𑀕𑀼𑀮𑀺𑀦𑀺𑀲𑁂𑀯𑀺𑀢𑁄. 𑀲𑀻𑀫𑀦𑁆𑀢𑀭𑀺𑀓𑀭𑀼𑀓𑁆𑀔𑀸𑀤𑀬𑁄 𑀲𑀧𑀭𑀺𑀲𑁆𑀲𑀬𑀸, 𑀤𑀼𑀮𑁆𑀮𑀪𑀯𑀺𑀯𑁂𑀓𑀸 𑀘𑀸𑀢𑀺 𑀆𑀳 ‘‘𑀇𑀫𑁂 𑀭𑀼𑀓𑁆𑀔𑁂 𑀯𑀺𑀯𑀚𑁆𑀚𑁂𑀢𑁆𑀯𑀸’’𑀢𑀺. 𑀧𑀡𑁆𑀡𑀲𑀝𑀦𑁆𑀢𑀺 ¶ 𑀭𑀼𑀓𑁆𑀔𑀢𑁄 𑀧𑀢𑀺𑀢𑀧𑀡𑁆𑀡𑀁. 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁 𑀭𑀼𑀓𑁆𑀔𑀫𑀽𑀮𑀺𑀓𑀪𑀸𑀯𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀙𑀦𑁆𑀦𑁂 𑀯𑀸𑀲𑀓𑀧𑁆𑀧𑀦𑀸 𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀫𑀢𑁆𑀣𑀸𑀬𑀧𑀺 𑀳𑁄𑀢𑀺. 𑀢𑀲𑁆𑀫𑀸 ‘‘𑀚𑀸𑀦𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑀺𑀢𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁.

𑀅𑀪𑀺𑀡𑁆𑀳𑀁 𑀢𑀭𑀼𑀧𑀡𑁆𑀡𑀯𑀺𑀓𑀸𑀭𑀤𑀲𑁆𑀲𑀦𑁂𑀦𑀸𑀢𑀺 𑀅𑀪𑀺𑀓𑁆𑀔𑀡𑀁 𑀢𑀭𑀽𑀲𑀼, 𑀢𑀭𑀽𑀦𑀁 𑀯𑀸 𑀧𑀡𑁆𑀡𑁂𑀲𑀼 𑀯𑀺𑀓𑀸𑀭𑀲𑁆𑀲 𑀔𑀡𑀪𑀗𑁆𑀕𑀲𑁆𑀲 𑀤𑀲𑁆𑀲𑀦𑁂𑀦. 𑀲𑁂𑀦𑀸𑀲𑀦𑀫𑀘𑁆𑀙𑁂𑀭𑀓𑀫𑁆𑀫𑀸𑀭𑀸𑀫𑀢𑀸𑀦𑀦𑁆𑀢𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀦𑀯𑀓𑀫𑁆𑀫𑀭𑀢𑀪𑀸𑀯𑀸𑀦𑀁. 𑀤𑁂𑀯𑀢𑀸𑀳𑀻𑀢𑀺 𑀭𑀼𑀓𑁆𑀔𑀤𑁂𑀯𑀢𑀸𑀳𑀺. 𑀢𑀸𑀧𑀺 𑀳𑀺 𑀭𑀼𑀓𑁆𑀔𑀝𑁆𑀞𑀯𑀺𑀫𑀸𑀦𑁂𑀲𑀼 𑀯𑀲𑀦𑁆𑀢𑀺𑀬𑁄 𑀭𑀼𑀓𑁆𑀔𑁂𑀲𑀼 𑀯𑀲𑀦𑁆𑀢𑀺. 𑀅𑀬𑀫𑁆𑀧𑀺 𑀭𑀼𑀓𑁆𑀔𑁂𑀢𑀺 𑀲𑀳𑀯𑀸𑀲𑀺𑀢𑀸. 𑀯𑀡𑁆𑀡𑀺𑀢𑁄𑀢𑀺 ‘‘𑀅𑀧𑁆𑀧𑀸𑀦𑀺 𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀧𑀲𑀁𑀲𑀺𑀢𑁄. ‘‘𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺 (𑀫𑀳𑀸𑀯. 𑁭𑁩, 𑁧𑁨𑁮) 𑀏𑀯𑀁 𑀦𑀺𑀲𑁆𑀲𑀬𑁄𑀢𑀺 𑀘 𑀪𑀸𑀲𑀺𑀢𑁄. 𑀅𑀪𑀺𑀭𑀢𑁆𑀢𑀸𑀦𑀺 𑀢𑀭𑀼𑀡𑀓𑀸𑀮𑁂, 𑀦𑀻𑀮𑀸𑀦𑀺 𑀫𑀚𑁆𑀛𑀺𑀫𑀓𑀸𑀮𑁂, 𑀧𑀡𑁆𑀟𑀽𑀦𑀺 𑀚𑀺𑀡𑁆𑀡𑀓𑀸𑀮𑁂. 𑀧𑀢𑀺𑀢𑀸𑀦𑀺 𑀫𑀺𑀮𑀸𑀬𑀦𑀯𑀲𑁂𑀦. 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀢𑀭𑀼𑀧𑀡𑁆𑀡𑀸𑀦𑀺 𑀧𑀘𑁆𑀘𑀓𑁆𑀔𑀢𑁄 𑀏𑀯 𑀦𑀺𑀘𑁆𑀘𑀲𑀜𑁆𑀜𑀁 𑀧𑀦𑀽𑀤𑀢𑀺 𑀧𑀚𑀳𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀏𑀯𑀲𑁆𑀲 𑀲𑀡𑁆𑀞𑀸𑀢𑀺. 𑀬𑀲𑁆𑀫𑀸 𑀪𑀕𑀯𑀢𑁄 𑀚𑀸𑀢𑀺𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀭𑀼𑀓𑁆𑀔𑀫𑀽𑀮𑁂𑀬𑁂𑀯 𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺.

𑀇𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁩. ‘‘𑀭𑀼𑀓𑁆𑀔𑀫𑀽𑀮𑀁 𑀧𑀝𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀙𑀦𑁆𑀦𑀁 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀙𑀦𑁆𑀦𑀜𑁆𑀘 ¶ 𑀭𑀼𑀓𑁆𑀔𑀫𑀽𑀮𑀜𑁆𑀘 𑀧𑀝𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀥𑀼𑀢𑀗𑁆𑀕𑀲𑁆𑀲 𑀲𑀩𑁆𑀩𑀲𑁄 𑀧𑀝𑀺𑀬𑁄𑀕𑀺𑀧𑀝𑀺𑀓𑁆𑀔𑁂𑀧𑁂𑀦 𑀳𑀺 𑀲𑀫𑀸𑀤𑀸𑀦𑀁 𑀇𑀚𑁆𑀛𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺. ‘‘𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀇𑀫𑀺𑀦𑀸𑀯 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦𑀸𑀧𑀺 𑀉𑀧𑁄𑀲𑀣𑀤𑀺𑀯𑀲𑀸𑀤𑀻𑀲𑀼 𑀲𑀼𑀡𑀦𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀢𑁂𑀳𑀺 𑀬𑀸𑀘𑀺𑀢𑁂𑀦 𑀙𑀦𑁆𑀦𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀥𑀫𑁆𑀫𑀁 𑀧𑀦 𑀓𑀣𑁂𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁄𑀯 𑀕𑀦𑁆𑀢𑀩𑁆𑀩𑁄. 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁄𑀲𑀣𑀢𑁆𑀣𑀸𑀬𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑀸𑀬. 𑀉𑀤𑁆𑀤𑀺𑀲𑀦𑁆𑀢𑁂𑀦𑀸𑀢𑀺 𑀧𑀭𑁂𑀲𑀁 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁂𑀦. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦𑀸𑀢𑀺 𑀲𑀬𑀁 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁂𑀦. 𑀫𑀕𑁆𑀕𑀫𑀚𑁆𑀛𑁂 𑀞𑀺𑀢𑀁 𑀲𑀸𑀮𑀦𑁆𑀢𑀺 𑀲𑀻𑀳𑀴𑀤𑀻𑀧𑁂 𑀯𑀺𑀬 𑀫𑀕𑁆𑀕𑀸 𑀅𑀦𑁄𑀓𑁆𑀓𑀫𑁆𑀫 𑀉𑀚𑀼𑀓𑀫𑁂𑀯 𑀧𑀯𑀺𑀲𑀺𑀢𑀩𑁆𑀩𑀲𑀸𑀮𑀁. 𑀯𑁂𑀕𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺 𑀅𑀲𑀸𑀭𑀼𑀧𑁆𑀧𑀢𑁆𑀢𑀸. 𑀬𑀸𑀯 𑀯𑀲𑁆𑀲𑀽𑀧𑀭𑀫𑀸 𑀞𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀦 𑀢𑀸𑀯 𑀥𑀼𑀢𑀗𑁆𑀕𑀪𑁂𑀤𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀭𑀼𑀓𑁆𑀔𑀲𑁆𑀲 ¶ 𑀅𑀦𑁆𑀢𑁄 𑀦𑀸𑀫 𑀭𑀼𑀓𑁆𑀔𑀫𑀽𑀮𑀁. 𑀧𑀩𑁆𑀩𑀢𑀲𑁆𑀲 𑀧𑀦 𑀧𑀩𑁆𑀪𑀸𑀭𑀲𑀤𑀺𑀲𑁄 𑀧𑀩𑁆𑀩𑀢𑀧𑀤𑁂𑀲𑁄. 𑀅𑀘𑁆𑀙𑀦𑁆𑀦𑀫𑀭𑀺𑀬𑀸𑀤𑀦𑁆𑀢𑀺 𑀬𑀣𑀸 𑀯𑀲𑁆𑀲𑁄𑀤𑀓𑀁 𑀅𑀦𑁆𑀢𑁄 𑀦 𑀧𑀯𑀺𑀲𑀢𑀺, 𑀏𑀯𑀁 𑀙𑀤𑀦𑀲𑀗𑁆𑀔𑁂𑀧𑁂𑀦 𑀉𑀧𑀭𑀺 𑀅𑀓𑀢𑀫𑀭𑀺𑀬𑀸𑀤𑀁. 𑀅𑀦𑁆𑀢𑁄 𑀧𑀦 𑀧𑀩𑁆𑀪𑀸𑀭𑀲𑁆𑀲 𑀯𑀲𑁆𑀲𑁄𑀤𑀓𑀁 𑀧𑀯𑀺𑀲𑀢𑀺 𑀘𑁂, 𑀅𑀩𑁆𑀪𑁄𑀓𑀸𑀲𑀲𑀗𑁆𑀔𑁂𑀧𑀫𑁂𑀯𑀸𑀢𑀺 𑀢𑀢𑁆𑀣 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀸𑀔𑀸𑀫𑀡𑁆𑀟𑀧𑁄𑀢𑀺 𑀭𑀼𑀓𑁆𑀔𑀲𑀸𑀔𑀸𑀳𑀺 𑀯𑀺𑀭𑀴𑀘𑁆𑀙𑀦𑁆𑀦𑀫𑀡𑁆𑀟𑀧𑁄. 𑀧𑀻𑀞𑀧𑀝𑁄 𑀔𑀮𑀺𑀢𑁆𑀣𑀤𑁆𑀥𑀲𑀸𑀝𑀓𑁄.

𑀧𑀯𑀺𑀝𑁆𑀞𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺 𑀬𑀣𑀸𑀯𑀼𑀢𑁆𑀢𑀧𑀩𑁆𑀪𑀸𑀭𑀸𑀤𑀺𑀓𑁂 𑀞𑀧𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀸𑀦𑀺𑀢𑁆𑀯𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀅𑀢𑁆𑀣𑀁 𑀙𑀦𑁆𑀦𑀁 𑀭𑀼𑀓𑁆𑀔𑀫𑀽𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀇𑀤𑀸𑀦𑀺 𑀅𑀭𑀼𑀡𑁄 𑀉𑀝𑁆𑀞𑀳𑀢𑀻’’𑀢𑀺 𑀚𑀸𑀦𑀺𑀢𑁆𑀯𑀸. 𑀭𑀼𑀓𑁆𑀔𑀫𑀽𑀮𑁂𑀧𑀺 𑀓𑀢𑁆𑀣𑀘𑀺 𑀅𑀢𑁆𑀣𑁂𑀯 𑀦𑀺𑀯𑀸𑀲𑀨𑀸𑀲𑀼𑀓𑀢𑀸𑀢𑀺 𑀲𑀺𑀬𑀸 𑀢𑀢𑁆𑀣 𑀆𑀲𑀗𑁆𑀕𑀧𑀼𑀩𑁆𑀩𑀓𑁄 𑀆𑀯𑀸𑀲𑀧𑀮𑀺𑀩𑁄𑀥𑁄, 𑀦 𑀧𑀦 𑀅𑀩𑁆𑀪𑁄𑀓𑀸𑀲𑁂𑀢𑀺 𑀇𑀥𑁂𑀯 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀆𑀦𑀺𑀲𑀁𑀲𑁄 𑀯𑀼𑀢𑁆𑀢𑁄. 𑀧𑀲𑀁𑀲𑀸𑀬𑀸𑀦𑀼𑀭𑀽𑀧𑀢𑀸𑀢𑀺 𑀅𑀦𑀺𑀓𑁂𑀢𑀸𑀢𑀺 𑀯𑀼𑀢𑁆𑀢𑀧𑀲𑀁𑀲𑀸𑀬 𑀅𑀦𑀸𑀮𑀬𑀪𑀸𑀯𑁂𑀦 𑀅𑀦𑀼𑀘𑁆𑀙𑀯𑀺𑀓𑀢𑀸. 𑀦𑀺𑀲𑁆𑀲𑀗𑁆𑀕𑀢𑀸𑀢𑀺 𑀆𑀯𑀸𑀲𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦𑁂𑀯 𑀢𑀢𑁆𑀣 𑀦𑀺𑀲𑁆𑀲𑀗𑁆𑀕𑀢𑀸. 𑀅𑀲𑀼𑀓𑀤𑀺𑀲𑀸𑀬 𑀯𑀲𑀦𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀦𑁂𑀯 𑀲𑀓𑁆𑀓𑀸𑀢𑀺 𑀏𑀤𑀺𑀲𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀲𑁆𑀲 𑀅𑀪𑀸𑀯𑀢𑁄 𑀘𑀸𑀢𑀼𑀤𑁆𑀤𑀺𑀲𑁄. 𑀫𑀺𑀕𑀪𑀽𑀢𑁂𑀦𑀸𑀢𑀺 𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀫𑀺𑀕𑀲𑁆𑀲 𑀯𑀺𑀬 𑀪𑀽𑀢𑁂𑀦. 𑀲𑀺𑀢𑁄𑀢𑀺 𑀦𑀺𑀲𑁆𑀲𑀺𑀢𑁄. 𑀯𑀺𑀦𑁆𑀤𑀢𑀻𑀢𑀺 𑀮𑀪𑀢𑀺.

𑀇𑀢𑀺 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀲𑁄𑀲𑀸𑀦𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁪. 𑀦 ¶ 𑀲𑀼𑀲𑀸𑀦𑀦𑁆𑀢𑀺 𑀅𑀲𑀼𑀲𑀸𑀦𑀁. 𑀅𑀜𑁆𑀜𑀢𑁆𑀣𑁄 𑀦-𑀓𑀸𑀭𑁄, 𑀲𑀼𑀲𑀸𑀦𑀮𑀓𑁆𑀔𑀡𑀭𑀳𑀺𑀢𑀁 𑀯𑀲𑀦𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀢𑀢𑁆𑀣𑀸𑀢𑀺 ‘‘𑀲𑀼𑀲𑀸𑀦’’𑀦𑁆𑀢𑀺 𑀯𑀯𑀢𑁆𑀣𑀧𑀺𑀢𑀫𑀢𑁆𑀢𑁂 𑀞𑀸𑀦𑁂 𑀦 𑀯𑀲𑀺𑀢𑀩𑁆𑀩𑀁. 𑀦 𑀳𑀺 𑀦𑀸𑀫𑀫𑀢𑁆𑀢𑁂𑀦 𑀲𑀼𑀲𑀸𑀦𑀮𑀓𑁆𑀔𑀡𑀁 𑀲𑀺𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀛𑀸𑀧𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬…𑀧𑁂… 𑀲𑀼𑀲𑀸𑀦𑀫𑁂𑀯 𑀙𑀯𑁂𑀦 𑀲𑀬𑀺𑀢𑀫𑀢𑁆𑀢𑀸𑀬 𑀲𑀼𑀲𑀸𑀦𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀢𑁄. 𑀙𑀯𑀲𑀬𑀦𑀁 𑀳𑀺 ‘‘𑀲𑀼𑀲𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑁄𑀲𑀸𑀦𑀺𑀓𑁂𑀦 𑀦𑀸𑀫 𑀅𑀧𑁆𑀧𑀓𑀺𑀘𑁆𑀘𑁂𑀦 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀺𑀁 𑀧𑀦 𑀯𑀲𑀦𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀭𑀼𑀓𑀦𑁆𑀢𑀺 𑀤𑀼𑀧𑁆𑀧𑀭𑀺𑀳𑀸𑀭𑀁. 𑀢𑀫𑁂𑀯 𑀳𑀺 𑀤𑀼𑀧𑁆𑀧𑀭𑀺𑀳𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀯𑀺𑀖𑀸𑀢𑀢𑁆𑀣𑀸𑀬𑀸𑀢𑀺 ¶ ‘‘𑀲𑀼𑀲𑀸𑀦𑀁 𑀦𑀸𑀫 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓’’𑀦𑁆𑀢𑀺 𑀘𑁄𑀭𑀸 𑀓𑀢𑀓𑀫𑁆𑀫𑀸𑀧𑀺 𑀅𑀓𑀢𑀓𑀫𑁆𑀫𑀸𑀧𑀺 𑀑𑀲𑀭𑀦𑁆𑀢𑀺, 𑀢𑀢𑁆𑀣 𑀘𑁄𑀭𑁂𑀲𑀼 𑀪𑀡𑁆𑀟𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀲𑀫𑀻𑀧𑁂 𑀪𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑁂𑀲𑀼 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀁 ‘‘𑀘𑁄𑀭𑁄’’𑀢𑀺 𑀕𑀳𑁂𑀢𑁆𑀯𑀸 𑀧𑁄𑀣𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀯𑀺𑀳𑀸𑀭𑁂 𑀲𑀗𑁆𑀖𑀢𑁆𑀣𑁂𑀭𑀁 𑀯𑀸 𑀕𑁄𑀘𑀭𑀕𑀸𑀫𑁂 𑀭𑀜𑁆𑀜𑀸 𑀦𑀺𑀬𑀼𑀢𑁆𑀢𑀁 𑀭𑀸𑀚𑀬𑀼𑀢𑁆𑀢𑀓𑀁 𑀯𑀸 𑀅𑀢𑁆𑀢𑀦𑁄 𑀲𑁄𑀲𑀸𑀦𑀺𑀓𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀬𑀣𑀸 𑀢𑀸𑀤𑀺𑀲𑁄, 𑀅𑀜𑁆𑀜𑁄 𑀯𑀸 𑀧𑀭𑀺𑀲𑁆𑀲𑀬𑁄 𑀦 𑀳𑁄𑀢𑀺, 𑀢𑀣𑀸 𑀅𑀧𑁆𑀧𑀫𑀢𑁆𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀘𑀗𑁆𑀓𑀫𑀦𑁆𑀢𑀲𑁆𑀲 𑀬𑀤𑀸 𑀆𑀴𑀳𑀦𑀁 𑀅𑀪𑀺𑀫𑀼𑀔𑀁 𑀦 𑀳𑁄𑀢𑀺, 𑀢𑀤𑀸𑀧𑀺 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀢𑀢𑁆𑀣 𑀤𑀺𑀝𑁆𑀞𑀺 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀤𑁆𑀥𑀓𑁆𑀔𑀺𑀓𑁂𑀦 𑀆𑀴𑀳𑀦𑀁 𑀑𑀮𑁄𑀓𑁂𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀉𑀧𑁆𑀧𑀣𑀫𑀕𑁆𑀕𑁂𑀦 𑀕𑀦𑁆𑀢𑀩𑁆𑀩𑀁 𑀅𑀢𑁆𑀢𑀦𑁄 𑀲𑁄𑀲𑀸𑀦𑀺𑀓𑀪𑀸𑀯𑀲𑁆𑀲 𑀅𑀧𑀸𑀓𑀝𑀪𑀸𑀯𑀢𑁆𑀣𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀢𑀲𑁆𑀫𑀺𑀁 𑀲𑀼𑀲𑀸𑀦𑁂 ‘‘𑀅𑀬𑀁 𑀯𑀫𑁆𑀫𑀺𑀓𑁄, 𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀔𑀸𑀡𑀼𑀓𑁄’’𑀢𑀺𑀆𑀤𑀺𑀦𑀸 𑀤𑀺𑀯𑀸𑀬𑁂𑀯 𑀆𑀭𑀫𑁆𑀫𑀡𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀪𑀬𑀸𑀦𑀓𑀦𑁆𑀢𑀺 𑀪𑀬𑀚𑀦𑀓𑀁 𑀯𑀫𑁆𑀫𑀺𑀓𑀸𑀤𑀺𑀁. 𑀓𑁂𑀦𑀘𑀺 𑀮𑁂𑀟𑁆𑀟𑀼𑀧𑀸𑀲𑀸𑀡𑀸𑀤𑀺𑀦𑀸 𑀆𑀲𑀦𑁆𑀦𑁂 𑀯𑀺𑀘𑀭𑀦𑁆𑀢𑀻𑀢𑀺 𑀦 𑀧𑀳𑀭𑀺𑀢𑀩𑁆𑀩𑀸. 𑀢𑀺𑀮𑀧𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀧𑀮𑀮𑀁. 𑀫𑀸𑀲𑀫𑀺𑀲𑁆𑀲𑀁 𑀪𑀢𑁆𑀢𑀁 𑀫𑀸𑀲𑀪𑀢𑁆𑀢𑀁. 𑀕𑀼𑀴𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀮𑀲𑀁𑀕𑀼𑀴𑀺𑀓𑀸𑀤𑀺𑀖𑀦𑀧𑀽𑀯𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀮𑀕𑁂𑀳𑀁 𑀦 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀧𑁂𑀢𑀥𑀽𑀫𑁂𑀦 𑀯𑀸𑀲𑀺𑀢𑀢𑁆𑀢𑀸, 𑀧𑀺𑀲𑀸𑀘𑀸𑀦𑀼𑀩𑀦𑁆𑀥𑀢𑁆𑀢𑀸 𑀘 𑀓𑀼𑀮𑀕𑁂𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀤𑁂𑀯𑀲𑀺𑀓𑀁 𑀙𑀯𑀟𑀸𑀳𑁄 𑀥𑀼𑀯𑀟𑀸𑀳𑁄. 𑀫𑀢𑀜𑀸𑀢𑀓𑀸𑀦𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑁂𑀯𑀲𑀺𑀓𑀁 𑀭𑁄𑀤𑀦𑀁 𑀥𑀼𑀯𑀭𑁄𑀤𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀛𑀸𑀧𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦. ‘‘𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀘𑁆𑀙𑀺𑀢𑀢𑁆𑀢𑀸 ‘‘𑀲𑀼𑀲𑀸𑀦𑀁 𑀅𑀕𑀢𑀤𑀺𑀯𑀲𑁂’’𑀢𑀺 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸.

𑀲𑀼𑀲𑀸𑀦𑁂 𑀦𑀺𑀘𑁆𑀘𑀓𑀸𑀮𑀁 𑀲𑀺𑀯𑀣𑀺𑀓𑀤𑀲𑁆𑀲𑀦𑁂𑀦 𑀫𑀭𑀡𑀲𑁆𑀲𑀢𑀺𑀧𑀝𑀺𑀮𑀸𑀪𑁄. 𑀢𑀢𑁄 𑀏𑀯 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀢𑀸 ¶ . 𑀢𑀢𑁆𑀣 𑀙𑀟𑁆𑀟𑀺𑀢𑀲𑁆𑀲 𑀫𑀢𑀓𑀴𑁂𑀯𑀭𑀲𑁆𑀲 𑀤𑀲𑁆𑀲𑀦𑁂𑀦 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀥𑀺𑀕𑀫𑁄. 𑀢𑀢𑁄 𑀏𑀯 𑀓𑀸𑀫𑀭𑀸𑀕𑀯𑀺𑀦𑁄𑀤𑀦𑀁. 𑀩𑀳𑀼𑀮𑀁 𑀲𑀭𑀻𑀭𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀪𑀸𑀯𑀲𑀮𑁆𑀮𑀓𑁆𑀔𑀡𑀢𑁄 𑀅𑀪𑀺𑀡𑁆𑀳𑀁 𑀓𑀸𑀬𑀲𑀪𑀸𑀯𑀤𑀲𑁆𑀲𑀦𑀁. 𑀢𑀢𑁄 𑀫𑀭𑀡𑀲𑁆𑀲𑀢𑀺𑀧𑀝𑀺𑀮𑀸𑀪𑀢𑁄 𑀘 𑀲𑀁𑀯𑁂𑀕𑀩𑀳𑀼𑀮𑀢𑀸. 𑀩𑁆𑀬𑀸𑀥𑀺𑀓𑀸𑀦𑀁, 𑀚𑀭𑀸𑀚𑀺𑀡𑁆𑀡𑀸𑀦𑀜𑁆𑀘 𑀫𑀢𑀸𑀦𑀁 𑀢𑀢𑁆𑀣 𑀤𑀲𑁆𑀲𑀦𑁂𑀦 𑀆𑀭𑁄𑀕𑁆𑀬𑀬𑁄𑀩𑁆𑀩𑀦𑀚𑀻𑀯𑀺𑀢𑀫𑀤𑀧𑁆𑀧𑀳𑀸𑀦𑀁. 𑀔𑀼𑀤𑁆𑀤𑀓𑀲𑁆𑀲, 𑀫𑀳𑀢𑁄 𑀘 𑀪𑀬𑀲𑁆𑀲 𑀅𑀪𑀺𑀪𑀯𑀦𑀢𑁄 𑀪𑀬𑀪𑁂𑀭𑀯𑀲𑀳𑀦𑀢𑀸. 𑀲𑀁𑀯𑀺𑀕𑁆𑀕𑀲𑁆𑀲 𑀬𑁄𑀦𑀺𑀲𑁄 𑀧𑀤𑀳𑀦𑀁 𑀲𑀫𑁆𑀪𑀯𑀢𑀻𑀢𑀺 𑀅𑀫𑀦𑀼𑀲𑁆𑀲𑀸𑀦𑀁 𑀕𑀭𑀼𑀪𑀸𑀯𑀦𑀻𑀬𑀢𑀸. 𑀦𑀺𑀤𑁆𑀤𑀸𑀕𑀢𑀫𑁆𑀧𑀻𑀢𑀺 𑀲𑀼𑀢𑁆𑀢𑀫𑁆𑀧𑀺, 𑀲𑀼𑀧𑀺𑀦𑀦𑁆𑀢𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀲𑁄𑀲𑀸𑀦𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁧𑁨. 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁫. 𑀲𑁂𑀦𑀸𑀲𑀦𑀕𑀸𑀳𑀡𑁂 ¶ 𑀧𑀭𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑀡𑀁, ‘‘𑀇𑀤𑀁 𑀲𑀼𑀦𑁆𑀤𑀭𑀁, 𑀇𑀤𑀁 𑀦 𑀲𑀼𑀦𑁆𑀤𑀭’’𑀦𑁆𑀢𑀺 𑀧𑀭𑀺𑀢𑀼𑀮𑀬𑀺𑀢𑁆𑀯𑀸 𑀧𑀼𑀘𑁆𑀙𑀦𑀸, 𑀑𑀮𑁄𑀓𑀦𑀸 𑀘 𑀲𑁂𑀦𑀸𑀲𑀦𑀮𑁄𑀮𑀼𑀧𑁆𑀧𑀁. 𑀢𑀼𑀝𑁆𑀞𑀩𑁆𑀩𑀦𑁆𑀢𑀺 𑀢𑀼𑀲𑁆𑀲𑀺𑀢𑀩𑁆𑀩𑀁. 𑀯𑀺𑀳𑀸𑀭𑀲𑁆𑀲 𑀧𑀭𑀺𑀬𑀦𑁆𑀢𑀪𑀸𑀯𑁂𑀦 𑀤𑀽𑀭𑁂𑀢𑀺 𑀯𑀸 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀸𑀤𑀻𑀦𑀁 𑀅𑀘𑁆𑀘𑀸𑀲𑀦𑁆𑀦𑁂𑀢𑀺 𑀯𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀢𑀺, 𑀧𑀼𑀘𑁆𑀙𑀦𑁂𑀦𑀧𑀺𑀲𑁆𑀲 𑀥𑀼𑀢𑀗𑁆𑀕𑀲𑁆𑀲 𑀲𑀁𑀓𑀺𑀮𑀺𑀲𑁆𑀲𑀦𑀢𑁄. 𑀑𑀮𑁄𑀓𑁂𑀢𑀼𑀦𑁆𑀢𑀺 𑀮𑁄𑀮𑀼𑀧𑁆𑀧𑀯𑀲𑁂𑀦 𑀧𑀲𑁆𑀲𑀺𑀢𑀼𑀁. 𑀲𑀘𑀲𑁆𑀲 𑀢𑀁 𑀦 𑀭𑀼𑀘𑁆𑀘𑀢𑀻𑀢𑀺 𑀅𑀲𑁆𑀲 𑀬𑀣𑀸𑀲𑀦𑁆𑀣𑀢𑀺𑀓𑀲𑁆𑀲 𑀢𑀁 𑀬𑀣𑀸𑀕𑀸𑀳𑀺𑀢𑀁 𑀲𑁂𑀦𑀸𑀲𑀦𑀁 𑀅𑀨𑀸𑀲𑀼𑀓𑀪𑀸𑀯𑁂𑀦 𑀲𑀘𑁂 𑀦 𑀭𑀼𑀘𑁆𑀘𑀢𑀺, 𑀫𑀼𑀤𑀼𑀓𑀲𑁆𑀲 𑀅𑀲𑀢𑀺 𑀭𑁄𑀕𑁂 𑀬𑀣𑀸𑀕𑀸𑀳𑀺𑀢𑀁 𑀧𑀳𑀸𑀬 𑀅𑀜𑁆𑀜𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀕𑀳𑀡𑀁 𑀮𑁄𑀮𑀼𑀧𑁆𑀧𑀁, 𑀫𑀚𑁆𑀛𑀺𑀫𑀲𑁆𑀲 𑀕𑀦𑁆𑀢𑁆𑀯𑀸 𑀑𑀮𑁄𑀓𑀦𑀸, 𑀉𑀓𑁆𑀓𑀝𑁆𑀞𑀲𑁆𑀲 𑀧𑀼𑀘𑁆𑀙𑀦𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀉𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑀡𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀉𑀧𑀝𑁆𑀞𑀸𑀧𑀦𑀻𑀬𑀸𑀦𑀫𑁆𑀧𑀺 𑀅𑀦𑀼𑀝𑁆𑀞𑀸𑀧𑀦𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀳𑀺𑀢𑁂𑀲𑀺𑀢𑀸. 𑀢𑀸𑀬 𑀓𑀭𑀼𑀡𑀸𑀯𑀺𑀳𑀸𑀭𑀸𑀦𑀼𑀕𑀼𑀡𑀢𑀸. 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀯𑀺𑀪𑀸𑀕𑀸𑀓𑀭𑀡𑀢𑁄 𑀳𑀻𑀦𑀧𑀡𑀻𑀢𑀯𑀺𑀓𑀧𑁆𑀧𑀧𑀭𑀺𑀘𑁆𑀘𑀸𑀕𑁄. 𑀢𑁂𑀦 𑀢𑀸𑀤𑀺𑀮𑀓𑁆𑀔𑀡𑀸𑀦𑀼𑀕𑀼𑀡𑀢𑀸. 𑀢𑀢𑁄 𑀏𑀯 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑁆𑀧𑀳𑀸𑀦𑀁. 𑀤𑁆𑀯𑀸𑀭𑀧𑀺𑀤𑀳𑀦𑀁 𑀑𑀓𑀸𑀲𑀸𑀤𑀸𑀦𑀢𑁄. 𑀬𑀣𑀸𑀲𑀦𑁆𑀣𑀢𑀭𑀸𑀫𑀢𑀦𑁆𑀢𑀺 𑀬𑀣𑀸𑀕𑀸𑀳𑀺𑀢𑁂 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑁂 𑀲𑁂𑀦𑀸𑀲𑀦𑁂 𑀅𑀪𑀺𑀭𑀢𑀪𑀸𑀯𑀁.

𑀇𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑁧𑁩. 𑀦𑁂𑀲𑀚𑁆𑀚𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁬. 𑀲𑁂𑀬𑁆𑀬𑀦𑁆𑀢𑀺 ¶ 𑀇𑀭𑀺𑀬𑀸𑀧𑀣𑀮𑀓𑁆𑀔𑀡𑀁 𑀲𑁂𑀬𑁆𑀬𑀁. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀳𑀺 𑀢𑀤𑀢𑁆𑀣𑀸 ‘‘𑀫𑀜𑁆𑀘𑁄 𑀪𑀺𑀲𑀻’’𑀢𑀺 𑀏𑀯𑀫𑀸𑀤𑀺𑀓𑀸 (𑀘𑀽𑀴𑀯. 𑁩𑁨𑁧, 𑁩𑁨𑁨) 𑀲𑁂𑀬𑁆𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺. ‘‘𑀦𑁂𑀲𑀚𑁆𑀚𑀺𑀓𑁄’’𑀢𑀺 𑀘 𑀲𑀬𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀚𑁆𑀚𑀸𑀬 𑀏𑀯 𑀯𑀺𑀳𑀭𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑁂𑀬𑁆𑀬𑀸 𑀏𑀯𑁂𑀢𑁆𑀣 𑀧𑀝𑀺𑀬𑁄𑀕𑀺𑀦𑀻, 𑀦 𑀇𑀢𑀭𑁂 𑀢𑀣𑀸 𑀅𑀦𑀺𑀝𑁆𑀞𑀢𑁆𑀢𑀸, 𑀅𑀲𑀫𑁆𑀪𑀯𑀢𑁄 𑀘. 𑀓𑁄𑀲𑀚𑁆𑀚𑀧𑀓𑁆𑀔𑀺𑀬𑁄 𑀳𑀺 𑀇𑀭𑀺𑀬𑀸𑀧𑀣𑁄 𑀇𑀥 𑀧𑀝𑀺𑀬𑁄𑀕𑀺𑀪𑀸𑀯𑁂𑀦 𑀇𑀘𑁆𑀙𑀺𑀢𑁄, 𑀦 𑀇𑀢𑀭𑁂. 𑀦 𑀘 𑀲𑀓𑁆𑀓𑀸 𑀞𑀸𑀦𑀕𑀫𑀦𑁂𑀳𑀺 𑀯𑀺𑀦𑀸 𑀦𑀺𑀲𑀚𑁆𑀚𑀸𑀬 𑀏𑀯 𑀬𑀸𑀧𑁂𑀢𑀼𑀁 𑀢𑀣𑀸 𑀧𑀯𑀢𑁆𑀢𑁂𑀢𑀼𑀦𑁆𑀢𑀺 𑀲𑁂𑀬𑁆𑀬𑀸𑀯𑁂𑀢𑁆𑀣 𑀧𑀝𑀺𑀬𑁄𑀕𑀺𑀦𑀻. 𑀢𑁂𑀦𑀸𑀳 ‘‘𑀢𑁂𑀦 𑀧𑀦𑀸’’𑀢𑀺𑀆𑀤𑀺. 𑀘𑀗𑁆𑀓𑀫𑀺𑀢𑀩𑁆𑀩𑀁 𑀦 ‘‘𑀦𑁂𑀲𑀚𑁆𑀚𑀺𑀓𑁄 𑀅𑀳’’𑀦𑁆𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀇𑀭𑀺𑀬𑀸𑀧𑀣𑀦𑁆𑀢𑀭𑀸𑀦𑀼𑀕𑁆𑀕𑀳𑀺𑀢𑁄 𑀳𑀺 𑀓𑀸𑀬𑁄 𑀫𑀦𑀲𑀺𑀓𑀸𑀭𑀓𑁆𑀔𑀫𑁄 𑀳𑁄𑀢𑀺.

𑀘𑀢𑁆𑀢𑀸𑀭𑁄 ¶ 𑀧𑀸𑀤𑀸, 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁄 𑀘𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀧𑀜𑁆𑀘𑀗𑁆𑀕𑁄. 𑀘𑀢𑀽𑀳𑀺 𑀅𑀝𑁆𑀝𑀦𑀻𑀳𑀺, 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦 𑀘 𑀧𑀜𑁆𑀘𑀗𑁆𑀕𑁄𑀢𑀺 𑀅𑀧𑀭𑁂. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀺𑀝𑁆𑀞𑀺𑀧𑀲𑁆𑀲𑁂 𑀘 𑀬𑀣𑀸𑀲𑀼𑀔𑀁 𑀅𑀧𑀲𑁆𑀲𑀸𑀬 𑀯𑀺𑀳𑀭𑀢𑁄 𑀦𑁂𑀲𑀚𑁆𑀚𑀺𑀓𑀲𑁆𑀲 ‘‘𑀅𑀦𑁂𑀲𑀚𑁆𑀚𑀺𑀓𑀢𑁄 𑀓𑁄 𑀯𑀺𑀲𑁂𑀲𑁄’’𑀢𑀺 𑀕𑀸𑀳𑀁 𑀦𑀺𑀯𑀸𑀭𑁂𑀢𑀼𑀁 𑀅𑀪𑀬𑀢𑁆𑀣𑁂𑀭𑁄 𑀦𑀺𑀤𑀲𑁆𑀲𑀺𑀢𑁄 ‘‘𑀣𑁂𑀭𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺.

𑀉𑀧𑀘𑁆𑀙𑁂𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀉𑀧𑀘𑁆𑀙𑁂𑀤𑀦𑀦𑁆𑀢𑀺 𑀯𑀺𑀦𑀺𑀩𑀦𑁆𑀥𑀼𑀧𑀘𑁆𑀙𑁂𑀤𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑀧𑁆𑀧𑀸𑀬𑀢𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀢𑁆𑀢𑀸 𑀦𑀺𑀲𑀚𑁆𑀚𑀸𑀬. 𑀢𑀢𑁄 𑀏𑀯 𑀧𑀸𑀲𑀸𑀤𑀺𑀓𑀇𑀭𑀺𑀬𑀸𑀧𑀣𑀢𑀸. 𑀯𑀻𑀭𑀺𑀬𑀸𑀭𑀫𑁆𑀪𑀸𑀦𑀼𑀓𑀽𑀮𑀢𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀢𑀸. 𑀢𑀢𑁄 𑀏𑀯 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀢𑀸. 𑀧𑀡𑀺𑀥𑀸𑀬𑀸𑀢𑀺 𑀞𑀧𑁂𑀢𑁆𑀯𑀸. 𑀢𑀦𑀼𑀦𑁆𑀢𑀺 𑀉𑀧𑀭𑀺𑀫𑀓𑀸𑀬𑀁. 𑀯𑀺𑀓𑀫𑁆𑀧𑁂𑀢𑀻𑀢𑀺 𑀘𑀸𑀮𑁂𑀢𑀺, 𑀇𑀘𑁆𑀙𑀸𑀯𑀺𑀖𑀸𑀢𑀁 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑀦𑁆𑀢𑀺 𑀥𑀼𑀢𑀗𑁆𑀕𑀁.

𑀇𑀢𑀺 𑀦𑁂𑀲𑀚𑁆𑀚𑀺𑀓𑀗𑁆𑀕𑀓𑀣𑀸𑀯𑀡𑁆𑀡𑀦𑀸.

𑀥𑀼𑀢𑀗𑁆𑀕𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁩𑁭. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀲𑁂𑀦 𑀲𑀺𑀬𑀸 𑀓𑀼𑀲𑀮𑀸𑀦𑀺, 𑀔𑀻𑀡𑀸𑀲𑀯𑀸𑀦𑀁 𑀯𑀲𑁂𑀦 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸𑀦𑀺 ¶ . 𑀢𑀢𑁆𑀣 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀢𑁆𑀣𑀁, 𑀔𑀻𑀡𑀸𑀲𑀯𑀸 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁 𑀥𑀼𑀢𑀗𑁆𑀕𑀸𑀦𑀺 𑀧𑀭𑀺𑀳𑀭𑀦𑁆𑀢𑀺. 𑀅𑀓𑀼𑀲𑀮𑀫𑁆𑀧𑀺 𑀥𑀼𑀢𑀗𑁆𑀕𑀦𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀧𑀺 𑀥𑀼𑀢𑀗𑁆𑀕𑀲𑁂𑀯𑀦𑀸 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀦 𑀬𑀼𑀢𑁆𑀢𑀁, 𑀬𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀧𑀩𑁆𑀩𑀚𑀺𑀢𑀲𑁆𑀲 𑀆𑀭𑀜𑁆𑀜𑀺𑀓𑀢𑁆𑀢𑀁, 𑀢𑀁 𑀥𑀼𑀢𑀗𑁆𑀕𑀁 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀮𑀓𑁆𑀔𑀡𑀸𑀪𑀸𑀯𑀢𑁄. 𑀬𑀁 𑀳𑀺𑀤𑀁 𑀓𑀺𑀮𑁂𑀲𑀸𑀦𑀁 𑀥𑀼𑀦𑀦𑀢𑁄 𑀥𑀼𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀜𑀸𑀡𑀲𑁆𑀲, 𑀘𑁂𑀢𑀦𑀸𑀬 𑀯𑀸 𑀅𑀗𑁆𑀕𑀢𑁆𑀢𑀁, 𑀦 𑀢𑀁 𑀅𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀫𑁆𑀪𑀯𑀢𑀺. 𑀢𑀲𑁆𑀫𑀸 𑀅𑀭𑀜𑁆𑀜𑀯𑀸𑀲𑀸𑀤𑀺𑀫𑀢𑁆𑀢𑁂𑀦 𑀆𑀭𑀜𑁆𑀜𑀺𑀓𑀸𑀤𑀬𑁄 𑀢𑀸𑀯 𑀳𑁄𑀦𑁆𑀢𑀼, 𑀆𑀭𑀜𑁆𑀜𑀺𑀓𑀗𑁆𑀕𑀸𑀤𑀻𑀦𑀺 𑀧𑀦 𑀦 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀫𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀸𑀦𑀻𑀢𑀺 𑀥𑀼𑀢𑀗𑁆𑀕𑀸𑀦𑀺. 𑀯𑀼𑀢𑁆𑀢𑀁 𑀳𑁂𑀝𑁆𑀞𑀸 𑀯𑀘𑀦𑀢𑁆𑀣𑀦𑀺𑀤𑁆𑀤𑁂𑀲𑁂. 𑀦 𑀘 𑀅𑀓𑀼𑀲𑀮𑁂𑀦 𑀓𑁄𑀘𑀺 𑀥𑀼𑀢𑁄 𑀦𑀸𑀫 𑀳𑁄𑀢𑀺, 𑀓𑀺𑀮𑁂𑀲𑀸𑀦𑀁 𑀥𑀼𑀦𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀸𑀦𑀺 𑀲𑀫𑀸𑀤𑀸𑀦𑀸𑀦𑀺 𑀅𑀗𑁆𑀕𑀸𑀦𑀺, 𑀏𑀢𑁂𑀦 𑀧𑀞𑀫𑁂𑀦𑀸𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀦 ‘‘𑀦𑀢𑁆𑀣𑀺 𑀅𑀓𑀼𑀲𑀮𑀁 𑀥𑀼𑀢𑀗𑁆𑀕’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀅𑀓𑀼𑀲𑀮𑀁 𑀓𑀺𑀜𑁆𑀘𑀺 𑀥𑀼𑀦𑀸𑀢𑀻𑀢𑀺 𑀅𑀓𑀼𑀲𑀮𑀁 𑀓𑀺𑀜𑁆𑀘𑀺 𑀧𑀸𑀧𑀁 𑀦 𑀘 𑀥𑀼𑀦𑀸𑀢𑀺 𑀏𑀯 𑀅𑀧𑁆𑀧𑀝𑀺𑀧𑀓𑁆𑀔𑀢𑁄. 𑀬𑁂𑀲𑀁 𑀲𑀫𑀸𑀤𑀸𑀦𑀸𑀦𑀁 𑀢𑀁 𑀅𑀓𑀼𑀲𑀮𑀁 𑀜𑀸𑀡𑀁 𑀯𑀺𑀬 ¶ 𑀅𑀗𑁆𑀕𑀦𑁆𑀢𑀺 𑀓𑀢𑁆𑀯𑀸 𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦𑀸𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀦 ‘‘𑀦𑀢𑁆𑀣𑀺 𑀅𑀓𑀼𑀲𑀮𑀁 𑀥𑀼𑀢𑀗𑁆𑀕’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀧𑀺 𑀅𑀓𑀼𑀲𑀮𑀦𑁆𑀢𑀺𑀆𑀤𑀺 𑀢𑀢𑀺𑀬𑀅𑀢𑁆𑀣𑀯𑀺𑀓𑀧𑁆𑀧𑀯𑀲𑁂𑀦 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀬𑁂𑀲𑀦𑁆𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀥𑀼𑀢𑀗𑁆𑀕𑀁 𑀦𑀸𑀫 𑀧𑀜𑁆𑀜𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀲𑀢𑀺 𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀓𑀺𑀮𑁂𑀲𑀸𑀦𑀁 𑀥𑀼𑀦𑀦𑀝𑁆𑀞𑁄𑀧𑀺 𑀦 𑀲𑀺𑀬𑀸, 𑀲𑀫𑀸𑀤𑀸𑀢𑀩𑁆𑀩𑀢𑀸 𑀘𑀸𑀢𑀺 𑀢𑁂𑀲𑀁 𑀯𑀘𑀦𑀁 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑁂 𑀏𑀢𑁂 𑀤𑁄𑀲𑀸 𑀤𑀼𑀦𑁆𑀦𑀺𑀯𑀸𑀭𑀸, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁, 𑀯𑀼𑀢𑁆𑀢𑀦𑀬𑁄 𑀘𑁂𑀢𑀦𑀸𑀧𑀓𑁆𑀔𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀏𑀢𑁂 𑀥𑀼𑀢𑀕𑀼𑀡𑀸 𑀓𑀼𑀲𑀮𑀢𑁆𑀢𑀺𑀓𑁂 𑀧𑀞𑀫𑀢𑀢𑀺𑀬𑀧𑀤𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀏𑀯𑀁 𑀲𑁂𑀲𑀢𑀺𑀓𑀤𑀼𑀓𑀧𑀤𑁂𑀳𑀺𑀧𑀺 𑀦𑁂𑀲𑀁 𑀬𑀣𑀸𑀭𑀳𑀁 𑀲𑀗𑁆𑀕𑀳𑁄 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀓𑀸𑀫𑀁 𑀲𑀩𑁆𑀩𑁄𑀧𑀺 𑀅𑀭𑀳𑀸 𑀥𑀼𑀢𑀓𑀺𑀮𑁂𑀲𑁄, 𑀇𑀥 𑀧𑀦 𑀥𑀼𑀢𑀗𑁆𑀕𑀲𑁂𑀯𑀦𑀸𑀫𑀼𑀔𑁂𑀦 𑀓𑀺𑀮𑁂𑀲𑁂 𑀯𑀺𑀥𑀼𑀦𑀺𑀢𑁆𑀯𑀸 𑀞𑀺𑀢𑁄 𑀔𑀻𑀡𑀸𑀲𑀯𑁄 ‘‘𑀥𑀼𑀢𑀓𑀺𑀮𑁂𑀲𑁄 𑀧𑀼𑀕𑁆𑀕𑀮𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀲𑀩𑁆𑀩𑁄𑀧𑀺 𑀅𑀭𑀺𑀬𑀫𑀕𑁆𑀕𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀺𑀮𑁂𑀲𑀥𑀼𑀦𑀦𑁄 𑀥𑀫𑁆𑀫𑁄, 𑀯𑀺𑀲𑁂𑀲𑀢𑁄 𑀅𑀕𑁆𑀕𑀫𑀕𑁆𑀕𑁄. 𑀧𑀭𑀺𑀬𑀸𑀬𑁂𑀦 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀤𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀥𑀼𑀢𑀗𑁆𑀕𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀥𑀼𑀢𑀁 𑀤𑀲𑁆𑀲𑁂𑀢𑁆𑀯𑀸 𑀥𑀼𑀢𑀯𑀸𑀤𑁂 𑀤𑀲𑁆𑀲𑁂𑀢𑀩𑁆𑀩𑁂 𑀬𑀲𑁆𑀫𑀸 𑀥𑀼𑀢𑀯𑀸𑀤𑀪𑁂𑀤𑁂𑀦 ¶ 𑀥𑀼𑀢𑁄 𑀯𑀺𑀬 𑀥𑀼𑀢𑀪𑁂𑀤𑁂𑀦 𑀥𑀼𑀢𑀯𑀸𑀤𑁄𑀧𑀺 𑀤𑀼𑀯𑀺𑀥𑁄, 𑀢𑀲𑁆𑀫𑀸 𑀢𑁂𑀲𑀁, 𑀢𑀤𑀼𑀪𑀬𑀧𑀝𑀺𑀓𑁆𑀔𑁂𑀧𑀲𑁆𑀲 𑀘 𑀯𑀲𑁂𑀦 𑀘𑀢𑀼𑀓𑁆𑀓𑀫𑁂𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀺 𑀥𑀼𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀬𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 ‘‘𑀲𑁄 𑀅𑀬’’𑀦𑁆𑀢𑀺 𑀅𑀢𑁆𑀣𑁄. 𑀥𑀼𑀢𑀥𑀫𑁆𑀫𑀸 𑀦𑀸𑀫𑀸𑀢𑀺 𑀥𑀼𑀢𑀗𑁆𑀕𑀲𑁂𑀯𑀦𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀥𑀼𑀦𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 ‘‘𑀥𑀼𑀢𑁄’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀥𑀼𑀢𑀗𑁆𑀕𑀘𑁂𑀢𑀦𑀸𑀬 𑀉𑀧𑀓𑀸𑀭𑀓𑀸 𑀥𑀫𑁆𑀫𑀸𑀢𑀺 𑀓𑀢𑁆𑀯𑀸 𑀥𑀼𑀢𑀥𑀫𑁆𑀫𑀸 𑀦𑀸𑀫. 𑀅𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀼𑀩𑁆𑀪𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀅𑀢𑁆𑀣𑀢𑁄 𑀅𑀮𑁄𑀪𑁄. 𑀧𑀘𑁆𑀘𑀬𑀕𑁂𑀥𑀸𑀤𑀺𑀳𑁂𑀢𑀼𑀓𑀸𑀦𑀁 𑀮𑁄𑀮𑀢𑀸𑀤𑀻𑀦𑀁 𑀲𑀁𑀓𑀺𑀮𑁂𑀲𑀸𑀦𑀁 𑀲𑀫𑁆𑀫𑀤𑁂𑀯 𑀮𑀺𑀔𑀦𑀢𑁄 ¶ 𑀙𑁂𑀤𑀦𑀢𑁄 𑀕𑀡𑀲𑀗𑁆𑀕𑀡𑀺𑀓𑀸𑀤𑀺𑀪𑁂𑀤𑀢𑁄 𑀲𑀁𑀲𑀕𑁆𑀕𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀯𑁂𑀘𑀦𑀢𑁄 𑀲𑀮𑁆𑀮𑁂𑀔𑀢𑀸 𑀧𑀯𑀺𑀯𑁂𑀓𑀢𑀸 𑀘 𑀅𑀮𑁄𑀪𑁄 𑀅𑀫𑁄𑀳𑁄𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀢𑀦𑁆𑀢𑀺 𑀢𑀤𑀦𑁆𑀢𑁄𑀕𑀥𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀤𑀼𑀪𑀬𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑀪𑀸𑀯𑀢𑁄. 𑀇𑀫𑁂𑀳𑀺 𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀢𑁆𑀣𑀻 𑀇𑀤𑀫𑀢𑁆𑀣𑀻, 𑀬𑁂𑀦 𑀜𑀸𑀡𑁂𑀦 𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀥𑀼𑀢𑀕𑀼𑀡𑁂 𑀲𑀫𑀸𑀤𑀺𑀬𑀢𑀺 𑀘𑁂𑀯 𑀧𑀭𑀺𑀳𑀭𑀢𑀺 𑀘, 𑀢𑀁 𑀜𑀸𑀡𑀁 𑀇𑀤𑀫𑀢𑁆𑀣𑀺𑀢𑀸. 𑀢𑁂𑀦𑀸𑀳 ‘‘𑀇𑀤𑀫𑀢𑁆𑀣𑀺𑀢𑀸 𑀜𑀸𑀡𑀫𑁂𑀯𑀸’’𑀢𑀺. 𑀧𑀝𑀺𑀓𑁆𑀔𑁂𑀧𑀯𑀢𑁆𑀣𑀽𑀲𑀽𑀢𑀺 𑀕𑀳𑀧𑀢𑀺𑀘𑀻𑀯𑀭𑀸𑀤𑀻𑀲𑀼 𑀢𑁂𑀳𑀺 𑀢𑁂𑀳𑀺 𑀥𑀼𑀢𑀗𑁆𑀕𑁂𑀳𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀯𑀢𑁆𑀣𑀽𑀲𑀼. 𑀮𑁄𑀪𑀦𑁆𑀢𑀺 𑀢𑀡𑁆𑀳𑀁. 𑀢𑁂𑀲𑁆𑀯𑁂𑀯 𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑀯𑀢𑁆𑀣𑀽𑀲𑀼 𑀏𑀯. 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑀦𑁆𑀢𑀺 𑀆𑀭𑀓𑁆𑀔𑀤𑀼𑀓𑁆𑀔𑀧𑀭𑀸𑀥𑀻𑀦𑀯𑀼𑀢𑁆𑀢𑀺𑀘𑁄𑀭𑀪𑀬𑀸𑀤𑀺𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑀁. 𑀅𑀦𑀼𑀜𑁆𑀜𑀸𑀢𑀸𑀦𑀦𑁆𑀢𑀺 𑀲𑀢𑁆𑀣𑀸𑀭𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀸𑀦𑀁 𑀲𑀼𑀔𑀲𑀫𑁆𑀨𑀲𑁆𑀲𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀁. 𑀧𑀝𑀺𑀲𑁂𑀯𑀦𑀫𑀼𑀔𑁂𑀦𑀸𑀢𑀺 𑀧𑀝𑀺𑀲𑁂𑀯𑀦𑀤𑁆𑀯𑀸𑀭𑁂𑀦, 𑀢𑁂𑀦 𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀢𑀺𑀲𑀮𑁆𑀮𑁂𑀔𑀫𑀼𑀔𑁂𑀦𑀸𑀢𑀺 𑀅𑀢𑀺𑀯𑀺𑀬 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀫𑀼𑀔𑁂𑀦, 𑀉𑀓𑁆𑀓𑀝𑁆𑀞𑀲𑁆𑀲 𑀯𑀢𑁆𑀢𑀦𑀓𑀸𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀲𑀼𑀔𑀼𑀫𑀓𑀭𑀡𑀲𑀦𑁆𑀦𑀺𑀲𑁆𑀲𑀬𑁄 𑀭𑀸𑀕𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀻𑀢𑀺 𑀆𑀳 ‘‘𑀤𑀼𑀓𑁆𑀔𑀸𑀧𑀝𑀺𑀧𑀤𑀜𑁆𑀘 𑀦𑀺𑀲𑁆𑀲𑀸𑀬 𑀭𑀸𑀕𑁄 𑀯𑀽𑀧𑀲𑀫𑁆𑀫𑀢𑀻’’𑀢𑀺. 𑀲𑀮𑁆𑀮𑁂𑀔𑁄 𑀦𑀸𑀫 𑀲𑀫𑁆𑀧𑀚𑀸𑀦𑀲𑁆𑀲 𑀳𑁄𑀢𑀺, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂 𑀫𑁄𑀳𑁄 𑀅𑀧𑀢𑀺𑀝𑁆𑀞𑁄𑀯 𑀅𑀧𑁆𑀧𑀫𑀸𑀤𑀲𑀫𑁆𑀪𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀮𑁆𑀮𑁂𑀔𑀁 𑀦𑀺𑀲𑁆𑀲𑀸𑀬 𑀅𑀧𑁆𑀧𑀫𑀢𑁆𑀢𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀻’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀥𑀼𑀢𑀗𑁆𑀕𑁂𑀲𑀼. 𑀢𑀢𑁆𑀣𑀸𑀢𑀺 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑁂𑀲𑀼.

𑀲𑀻𑀲𑀗𑁆𑀕𑀸𑀦𑀻𑀢𑀺 𑀲𑀻𑀲𑀪𑀽𑀢𑀸𑀦𑀺 𑀅𑀗𑁆𑀕𑀸𑀦𑀺, 𑀧𑀭𑁂𑀲𑀫𑁆𑀧𑀺 𑀓𑁂𑀲𑀜𑁆𑀘𑀺 𑀦𑀸𑀦𑀦𑁆𑀢𑀭𑀺𑀓𑀢𑀸𑀬, 𑀲𑀼𑀓𑀭𑀢𑀸𑀬 𑀘 𑀲𑀗𑁆𑀕𑀡𑁆𑀳𑀦𑀢𑁄 𑀉𑀢𑁆𑀢𑀫𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀪𑀺𑀦𑁆𑀦𑀗𑁆𑀕𑀸𑀦𑀻𑀢𑀺 𑀓𑁂𑀳𑀺𑀘𑀺 𑀲𑀫𑁆𑀪𑁂𑀤𑀭𑀳𑀺𑀢𑀸𑀦𑀺, 𑀯𑀺𑀲𑀼𑀁𑀬𑁂𑀯 𑀅𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀫𑁄𑀳𑀘𑀭𑀺𑀢𑀲𑁆𑀲 𑀤𑁄𑀲𑀘𑀭𑀺𑀢𑀲𑁆𑀲𑀸𑀧𑀺, 𑀢𑀁 𑀏𑀓𑀘𑁆𑀘𑀁 ¶ 𑀥𑀼𑀢𑀗𑁆𑀕𑀁 𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀸𑀬𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀓𑀼𑀫𑀸𑀭𑀪𑀸𑀯𑁂𑀦𑀮𑀽𑀔𑀧𑀝𑀺𑀧𑀢𑁆𑀢𑀺𑀁 𑀅𑀲𑀳𑀦𑁆𑀢𑀲𑁆𑀲. 𑀯𑀟𑁆𑀠𑀢𑁂𑀯 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀯𑀟𑁆𑀠𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲. 𑀏𑀓𑀫𑁂𑀯 𑀳𑀺 𑀥𑀼𑀢𑀗𑁆𑀕𑀁 𑀬𑀣𑀸 𑀓𑀺𑀮𑁂𑀲𑀥𑀼𑀦𑀦𑀝𑁆𑀞𑁂𑀦, 𑀏𑀯𑀁 𑀘𑁂𑀢𑀦𑀸𑀲𑀪𑀸𑀯𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀫𑀸𑀤𑀸𑀦𑀘𑁂𑀢𑀦𑀸’’𑀢𑀺.

𑀢𑁂𑀭𑀲𑀸𑀧𑀺 ¶ 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀧𑀭𑀺𑀳𑀭𑀦𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑁂𑀭𑀲𑀦𑁆𑀦𑀫𑁆𑀧𑀺 𑀧𑀭𑀺𑀳𑀭𑀡𑀲𑁆𑀲 𑀏𑀓𑀚𑁆𑀛𑀁𑀬𑁂𑀯 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀏𑀓𑀧𑁆𑀧𑀳𑀸𑀭𑁂𑀦 𑀲𑀩𑁆𑀩𑀥𑀼𑀢𑀗𑁆𑀕𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀦𑁆𑀢𑀲𑁆𑀲 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁? ‘‘𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁨) 𑀯𑀘𑀦𑀢𑁄 𑀙𑀦𑁆𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑀺𑀢𑀫𑀢𑁆𑀢𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺, 𑀦 𑀅𑀩𑁆𑀪𑁄𑀓𑀸𑀲𑁂, 𑀢𑀲𑁆𑀫𑀸 𑀪𑁂𑀤𑀳𑁂𑀢𑀼𑀦𑁄 𑀅𑀪𑀸𑀯𑁂𑀦 𑀢𑀫𑁆𑀧𑀺 𑀅𑀭𑁄𑀕𑀫𑁂𑀯. 𑀢𑀣𑀸 𑀲𑁂𑀦𑀸𑀲𑀦𑀮𑁄𑀮𑀼𑀧𑁆𑀧𑀲𑁆𑀲 𑀅𑀪𑀸𑀯𑁂𑀦 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀭𑀜𑁆𑀜𑀺𑀓𑀗𑁆𑀕𑀁 𑀕𑀡𑀫𑁆𑀳𑀸 𑀑𑀳𑀻𑀬𑀦𑀲𑀺𑀓𑁆𑀔𑀸𑀧𑀤𑁂𑀦 (𑀧𑀸𑀘𑀺. 𑁬𑁯𑁧-𑁬𑁯𑁨) 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀦 (𑀧𑀸𑀘𑀺. 𑁨𑁩𑁮-𑁨𑁪𑁦). 𑀧𑀯𑀸𑀭𑀺𑀢𑀸𑀬 𑀳𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀢𑀺𑀭𑀺𑀢𑁆𑀢𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀩𑁆𑀪𑀢𑀺. 𑀓𑀧𑁆𑀧𑀺𑀬𑁂 𑀘 𑀯𑀢𑁆𑀣𑀼𑀲𑁆𑀫𑀺𑀁 𑀮𑁄𑀮𑀢𑀸𑀧𑀳𑀸𑀦𑀸𑀬 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁, 𑀦 𑀅𑀓𑀧𑁆𑀧𑀺𑀬𑁂, 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀅𑀝𑁆𑀞𑁂𑀯 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀁𑀓𑀘𑁆𑀘𑀺𑀓𑀘𑀻𑀯𑀭𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀧𑀺 𑀢𑀺𑀘𑀻𑀯𑀭𑀲𑀗𑁆𑀔𑀫𑁂𑀯 𑀕𑀘𑁆𑀙𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀬𑀣𑀸𑀯𑀼𑀢𑁆𑀢𑁂𑀲𑀽𑀢𑀺 𑀪𑀺𑀓𑁆𑀔𑀽𑀦𑀁 𑀯𑀼𑀢𑁆𑀢𑁂𑀲𑀼 𑀢𑁂𑀭𑀲𑀲𑀼 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀯𑀺𑀦𑀬𑀓𑀫𑁆𑀫𑀸𑀪𑀸𑀯𑀢𑁄 𑀞𑀧𑁂𑀢𑁆𑀯𑀸 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀤𑁆𑀯𑀸𑀤𑀲 𑀲𑀸𑀫𑀡𑁂𑀭𑀸𑀦𑀁. 𑀲𑀢𑁆𑀢𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀏𑀓𑀁 𑀧𑀳𑀸𑀬 𑀲𑀢𑁆𑀢 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀯𑀺𑀦𑀬𑀓𑀫𑁆𑀫𑀸𑀪𑀸𑀯𑀢𑁄. ‘‘𑀞𑀧𑁂𑀢𑁆𑀯𑀸 𑀢𑁂𑀘𑀻𑀯𑀭𑀺𑀓𑀗𑁆𑀕’’𑀦𑁆𑀢𑀺 𑀳𑀺 𑀇𑀫𑀁 𑀅𑀦𑀼𑀯𑀢𑁆𑀢𑀫𑀸𑀦𑀫𑁂𑀯 𑀓𑀢𑁆𑀯𑀸 ‘‘𑀲𑀢𑁆𑀢 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀢𑀺𑀭𑀽𑀧𑀸𑀦𑀻𑀢𑀺 𑀉𑀧𑀸𑀲𑀓𑀪𑀸𑀯𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀺.

𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀤𑀼𑀢𑀺𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁩. 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮. 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀻𑀢𑀺 ¶ ¶ 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀸𑀧𑀘𑀬𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀻𑀳𑀺. 𑀧𑀭𑀺𑀬𑁄𑀤𑀸𑀢𑁂𑀢𑀺 𑀲𑀼𑀯𑀺𑀲𑀼𑀤𑁆𑀥𑁂 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁂. 𑀇𑀫𑀲𑁆𑀫𑀺𑀁 𑀲𑀻𑀮𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂. ‘‘𑀘𑀺𑀢𑁆𑀢𑀁 𑀪𑀸𑀯𑀬’’𑀦𑁆𑀢𑀺 𑀇𑀫𑀫𑁂𑀯 𑀤𑁂𑀲𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑀢𑁆𑀢𑀸’’𑀢𑀺. 𑀓𑁄 𑀲𑀫𑀸𑀥𑀻𑀢𑀺 𑀲𑀭𑀽𑀧𑀧𑀼𑀘𑁆𑀙𑀸. 𑀓𑁂𑀦𑀝𑁆𑀞𑁂𑀦 𑀲𑀫𑀸𑀥𑀻𑀢𑀺 𑀓𑁂𑀦 𑀅𑀢𑁆𑀣𑁂𑀦 𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺, ‘‘𑀲𑀫𑀸𑀥𑀻’’𑀢𑀺 𑀧𑀤𑀁 𑀓𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀢𑀺𑀯𑀺𑀥𑁄𑀢𑀺 𑀧𑀪𑁂𑀤𑀧𑀼𑀘𑁆𑀙𑀸.

‘‘𑀓𑁄 𑀲𑀫𑀸𑀥𑀻’’𑀢𑀺 𑀓𑀸𑀫𑀜𑁆𑀘𑀸𑀬𑀁 𑀲𑀭𑀽𑀧𑀧𑀼𑀘𑁆𑀙𑀸, 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀧𑀦 𑀲𑀭𑀽𑀧𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀯𑀺𑀪𑀸𑀕𑁄 𑀢𑀸𑀯 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀁𑀤𑀲𑁆𑀲𑀦𑁂 𑀘 𑀅𑀬𑀫𑀸𑀤𑀻𑀦𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀥𑀺 𑀩𑀳𑀼𑀯𑀺𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀳𑀼𑀯𑀺𑀥𑁄𑀢𑀺 𑀓𑀼𑀲𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄. 𑀦𑀸𑀦𑀧𑁆𑀧𑀓𑀸𑀭𑀓𑁄𑀢𑀺 𑀆𑀮𑀫𑁆𑀩𑀦𑀫𑀦𑀲𑀺𑀓𑀸𑀭𑀙𑀦𑁆𑀤𑀧𑀡𑀺𑀥𑀺𑀅𑀥𑀺𑀫𑁄𑀓𑁆𑀔𑀅𑀪𑀺𑀦𑀻𑀳𑀸𑀭𑀲𑀜𑁆𑀜𑀸𑀦𑀸𑀦𑀢𑁆𑀢𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑁄. 𑀦 𑀲𑀸𑀥𑁂𑀬𑁆𑀬𑀸𑀢𑀺 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀪𑀸𑀯𑀦𑀸 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀣𑁄, 𑀢𑀜𑁆𑀘 𑀦 𑀲𑀸𑀥𑁂𑀬𑁆𑀬. 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀳𑀺 𑀲𑀫𑀸𑀥𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀮𑀩𑁆𑀪𑀫𑀸𑀦𑁂𑀳𑀺 𑀯𑀺𑀪𑀸𑀕𑁂𑀳𑀺 𑀯𑀺𑀲𑁆𑀲𑀚𑁆𑀚𑀦𑁂 𑀓𑀭𑀺𑀬𑀫𑀸𑀦𑁂 𑀛𑀸𑀦𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁫𑁦𑁮 𑀆𑀤𑀬𑁄) 𑀆𑀕𑀢𑁄 𑀲𑀩𑁆𑀩𑁄 𑀲𑀫𑀸𑀥𑀺𑀧𑀪𑁂𑀤𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀬𑁆𑀯𑀸𑀬𑀁 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀪𑀸𑀯𑀦𑀸𑀯𑀺𑀥𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸𑀬 𑀑𑀓𑀸𑀲𑁄𑀯 𑀦 𑀪𑀯𑁂𑀬𑁆𑀬. 𑀓𑀺𑀜𑁆𑀘 𑀬𑁂𑀦𑀲𑁆𑀲 𑀢𑀺𑀓𑀘𑀢𑀼𑀓𑁆𑀓𑀛𑀸𑀦𑀺𑀓𑁂𑀦 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀦 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀦𑀯𑀯𑀺𑀥𑁄, 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂𑀦 𑀯𑁂𑀳𑀧𑁆𑀨𑀮𑀸𑀤𑀺𑀯𑀲𑁂𑀦 𑀤𑀲𑀯𑀺𑀥𑁄 𑀯𑀸 𑀏𑀓𑀸𑀤𑀲𑀯𑀺𑀥𑁄 𑀯𑀸 𑀪𑀯𑀧𑁆𑀧𑀪𑁂𑀤𑁄 𑀦𑀺𑀧𑁆𑀧𑀚𑁆𑀚𑀢𑀺. 𑀲𑁆𑀯𑀸𑀲𑁆𑀲 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀅𑀬𑀁 𑀲𑁄𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄 𑀯𑀺𑀓𑁆𑀔𑁂𑀧𑀸𑀬 𑀲𑀺𑀬𑀸, 𑀬𑀣𑀸 𑀢𑀁 𑀅𑀯𑀺𑀲𑀬𑁂. 𑀢𑁂𑀦𑀸𑀳 ‘‘𑀉𑀢𑁆𑀢𑀭𑀺 𑀘 𑀯𑀺𑀓𑁆𑀔𑁂𑀧𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺. 𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀓𑀼𑀲𑀮𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸.

𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀁 𑀅𑀯𑀺𑀲𑀸𑀭𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀲𑁆𑀲 𑀯𑀺𑀬 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁. 𑀅𑀯𑀺𑀲𑀸𑀭𑀮𑀓𑁆𑀔𑀡𑁄 ¶ 𑀳𑀺 𑀲𑀫𑀸𑀥𑀺, 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀘. 𑀲𑀫𑁆𑀫𑀸 𑀅𑀯𑀺𑀓𑁆𑀔𑀺𑀧𑀦𑀯𑀲𑁂𑀦 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁. 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸 𑀳𑀺 ¶ 𑀲𑀫𑀸𑀥𑀺, 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑀭𑀲𑁄 𑀘𑀸𑀢𑀺. 𑀲𑁆𑀯𑀸𑀬𑀁 𑀬𑀲𑁆𑀫𑀸 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀳𑁂𑀢𑀼, 𑀢𑀲𑁆𑀫𑀸 ‘‘𑀞𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀢𑀣𑀸 𑀳𑁂𑀲 ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀻’’𑀢𑀺 (𑀥. 𑀲. 𑁧𑁫) 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀓𑀸𑀭𑀫𑁆𑀫𑀡𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀫𑀸𑀥𑀺𑀲𑁆𑀲 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 𑀳𑀺𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀤𑀻𑀧𑀘𑁆𑀘𑀺𑀝𑁆𑀞𑀺𑀢𑀺 𑀦𑀺𑀤𑀲𑁆𑀲𑀺𑀢𑀸. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦, 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀓𑁆𑀔𑀺𑀧𑀫𑀸𑀦𑀸𑀢𑀺 𑀦 𑀯𑀺𑀓𑁆𑀔𑀺𑀧𑀫𑀸𑀦𑀸 𑀯𑀽𑀧𑀲𑀫𑀫𑀸𑀦𑀸. 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀳𑀺 𑀲𑀫𑀸𑀥𑀺. 𑀏𑀢𑁂𑀦𑀲𑁆𑀲 𑀯𑀺𑀓𑁆𑀔𑁂𑀧𑀧𑀝𑀺𑀧𑀓𑁆𑀔𑀢𑀁 𑀤𑀲𑁆𑀲𑁂𑀢𑀺. 𑀅𑀯𑀺𑀧𑁆𑀧𑀓𑀺𑀡𑁆𑀡𑀸𑀢𑀺 𑀅𑀯𑀺𑀲𑀝𑀸. 𑀏𑀢𑁂𑀦 𑀅𑀯𑀺𑀲𑀸𑀭𑀮𑀓𑁆𑀔𑀡𑀢𑀁.

𑀲𑀬𑀁 𑀦 𑀯𑀺𑀓𑁆𑀔𑀺𑀧𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀦 𑀯𑀺𑀓𑁆𑀔𑀺𑀧𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀯𑀺𑀓𑁆𑀔𑁂𑀧𑁄, 𑀲𑁄 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄. 𑀯𑀺𑀓𑁆𑀔𑁂𑀧𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀢𑀣𑀸 𑀯𑀸 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑀭𑀲𑁄. 𑀉𑀤𑁆𑀥𑀘𑁆𑀘𑁂 𑀅𑀯𑀺𑀓𑀫𑁆𑀧𑀦𑀯𑀲𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀯𑀺𑀓𑀫𑁆𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀼𑀔𑀦𑁆𑀢𑀺 𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀤𑀝𑁆𑀞𑀩𑁆𑀩𑀁.

𑁩𑁯. 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁 𑀦𑀸𑀫 𑀲𑀫𑀸𑀥𑀺𑀲𑁆𑀲 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄, 𑀦 𑀢𑁂𑀦𑀲𑁆𑀲 𑀓𑁄𑀘𑀺 𑀯𑀺𑀪𑀸𑀕𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂𑀦 𑀢𑀸𑀯 𑀏𑀓𑀯𑀺𑀥𑁄’’𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀧𑁆𑀧𑁂𑀦𑁆𑀢𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀯𑀺𑀢𑀓𑁆𑀓𑁄 𑀅𑀧𑁆𑀧𑀦𑀸. 𑀢𑀣𑀸 𑀳𑀺 𑀲𑁄 ‘‘𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸’’𑀢𑀺 (𑀥. 𑀲. 𑁭) 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀧𑁆𑀧𑀫𑀼𑀔𑀢𑀸𑀯𑀲𑁂𑀦 𑀧𑀦 𑀲𑀩𑁆𑀩𑀲𑁆𑀫𑀺𑀁 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑁂 𑀛𑀸𑀦𑀥𑀫𑁆𑀫𑁂 ‘‘𑀅𑀧𑁆𑀧𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀯𑁄𑀳𑀸𑀭𑁄. 𑀢𑀣𑀸 𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀭𑀺𑀢𑁆𑀢𑀛𑀸𑀦𑁂 𑀉𑀧𑀘𑀸𑀭𑀯𑁄𑀳𑀸𑀭𑁄. 𑀕𑀸𑀫𑀸𑀤𑀻𑀦𑀁 𑀲𑀫𑀻𑀧𑀝𑁆𑀞𑀸𑀦𑁂 𑀕𑀸𑀫𑀽𑀧𑀘𑀸𑀭𑀸𑀤𑀺𑀲𑀫𑀜𑁆𑀜𑀸 𑀯𑀺𑀬𑀸𑀢𑀺 𑀆𑀳 ‘‘𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀤𑀼𑀯𑀺𑀥𑁄’’𑀢𑀺. 𑀇𑀥 𑀧𑀦 𑀲𑀫𑀸𑀥𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀮𑁄𑀓𑁂 𑀦𑀺𑀬𑀼𑀢𑁆𑀢𑁄, 𑀢𑀢𑁆𑀣 𑀯𑀸 𑀯𑀺𑀤𑀺𑀢𑁄𑀢𑀺 𑀮𑁄𑀓𑀺𑀬𑁄. 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀮𑁄𑀓𑀢𑁄 𑀉𑀢𑁆𑀢𑀭𑁄 𑀉𑀢𑁆𑀢𑀺𑀡𑁆𑀡𑁄𑀢𑀺 𑀮𑁄𑀓𑀼𑀢𑁆𑀢𑀭𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀮𑁄𑀓𑀺𑀬𑀲𑀫𑀸𑀥𑀺 𑀪𑀸𑀯𑁂𑀢𑀩𑁆𑀩𑀪𑀸𑀯𑁂𑀦 𑀕𑀬𑁆𑀳𑀢𑀺, 𑀉𑀪𑀬𑀁 𑀧𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀢𑁄 𑀇𑀢𑀭𑀁 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀻𑀢𑀺𑀓𑀦𑀺𑀧𑁆𑀧𑀻𑀢𑀺𑀓𑀯𑀲𑁂𑀦𑀸𑀢𑀺 𑀲𑀳 𑀧𑀻𑀢𑀺𑀬𑀸 𑀯𑀢𑁆𑀢𑀢𑀻𑀢𑀺 𑀲𑀧𑁆𑀧𑀻𑀢𑀺𑀓𑁄, 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀻𑀢𑀻𑀢𑀺 𑀦𑀺𑀧𑁆𑀧𑀻𑀢𑀺𑀓𑁄, 𑀧𑀻𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑁄. 𑀢𑁂𑀲𑀁 𑀯𑀲𑁂𑀦. 𑀲𑀼𑀔𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑁄𑀢𑀺 𑀲𑀼𑀔𑀲𑀳𑀕𑀢𑁄 ¶ , 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸𑀢𑀺 𑀘𑁂𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀲𑀼𑀔𑀤𑀼𑀓𑁆𑀔𑀸𑀓𑀸𑀭𑀧𑀯𑀢𑁆𑀢𑀺𑀁 𑀉𑀧𑁂𑀓𑁆𑀔𑀢𑀺 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀡𑁆𑀞𑀺𑀢𑀢𑁆𑀢𑀸. 𑀲𑀼𑀔𑀲𑀳𑀕𑀢-𑀧𑀤𑁂𑀦 ¶ 𑀘𑁂𑀢𑁆𑀣 𑀲𑀧𑁆𑀧𑀻𑀢𑀺𑀓𑁄, 𑀦𑀺𑀧𑁆𑀧𑀻𑀢𑀺𑀓𑁂𑀓𑀤𑁂𑀲𑁄 𑀘 𑀲𑀗𑁆𑀕𑀳𑀺𑀢𑁄, 𑀉𑀧𑁂𑀓𑁆𑀔𑀸𑀲𑀳𑀕𑀢-𑀧𑀤𑁂𑀦 𑀧𑀦 𑀦𑀺𑀧𑁆𑀧𑀻𑀢𑀺𑀓𑁂𑀓𑀤𑁂𑀲𑁄𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀧𑀤𑀸𑀦𑀁 𑀯𑀺𑀲𑁂𑀲𑁄.

𑀲𑀪𑀸𑀯𑀢𑁄, 𑀧𑀘𑁆𑀘𑀬𑀢𑁄, 𑀨𑀮𑀢𑁄 𑀘 𑀫𑀚𑁆𑀛𑀺𑀫𑀧𑀡𑀻𑀢𑁂𑀳𑀺 𑀦𑀺𑀳𑀻𑀦𑁄, 𑀢𑁂𑀲𑀁 𑀯𑀸 𑀕𑀼𑀡𑁂𑀳𑀺 𑀧𑀭𑀺𑀳𑀻𑀦𑁄𑀢𑀺 𑀳𑀻𑀦𑁄, 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑁄 𑀧𑀡𑀻𑀢𑁄, 𑀉𑀪𑀺𑀦𑁆𑀦𑀁 𑀫𑀚𑁆𑀛𑁂 𑀪𑀯𑁄 𑀫𑀚𑁆𑀛𑀺𑀫𑁄. 𑀲𑀫𑁆𑀧𑀬𑁄𑀕𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀦 𑀲𑀳 𑀯𑀺𑀢𑀓𑁆𑀓𑁂𑀦 𑀲𑀯𑀺𑀢𑀓𑁆𑀓𑁄, 𑀲𑀳 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑁄, 𑀲𑀯𑀺𑀢𑀓𑁆𑀓𑁄 𑀘 𑀲𑁄 𑀲𑀯𑀺𑀘𑀸𑀭𑁄 𑀘𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑁄 𑀘 𑀕𑀳𑀺𑀢𑁄. 𑀢𑀢𑁆𑀣 𑀯𑀺𑀘𑀸𑀭𑀢𑁄 𑀉𑀢𑁆𑀢𑀭𑀺 𑀯𑀺𑀢𑀓𑁆𑀓𑁂𑀦 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀅𑀯𑀺𑀢𑀓𑁆𑀓𑁄 𑀘 𑀲𑁄 𑀯𑀺𑀘𑀸𑀭𑀫𑀢𑁆𑀢𑁄 𑀘𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄. 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀯𑀸 𑀫𑀢𑁆𑀢-𑀲𑀤𑁆𑀤𑁄. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀳𑀺 𑀲𑀫𑀸𑀥𑀺 𑀯𑀺𑀢𑀓𑁆𑀓𑀯𑀺𑀲𑀺𑀝𑁆𑀞𑁂𑀦 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑁄, 𑀅𑀬𑀁 𑀧𑀦 𑀯𑀺𑀘𑀸𑀭𑀫𑀢𑁆𑀢𑁂𑀦 𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀯𑀺𑀲𑁂𑀲𑀭𑀳𑀺𑀢𑁂𑀦, 𑀢𑀲𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄. 𑀅𑀣 𑀯𑀸 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀯𑀺𑀢𑀓𑁆𑀓𑀸𑀪𑀸𑀯𑁂𑀦𑀸𑀬𑀁 𑀯𑀺𑀘𑀸𑀭𑀫𑀢𑁆𑀢𑁄, 𑀦 𑀯𑀺𑀘𑀸𑀭𑀢𑁄 𑀅𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀯𑀺𑀢𑀓𑁆𑀓-𑀯𑀘𑀦𑁂𑀦 𑀯𑀺𑀘𑀸𑀭𑀫𑀢𑁆𑀢-𑀧𑀤𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀪𑀬𑀭𑀳𑀺𑀢𑁄 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑁄. 𑀧𑀻𑀢𑀺𑀲𑀳𑀕𑀢𑀸𑀤𑀺𑀯𑀲𑁂𑀦𑀸𑀢𑀺 𑀧𑀻𑀢𑀺𑀲𑀳𑀕𑀢𑀲𑀼𑀔𑀲𑀳𑀕𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀲𑁂𑀦. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀼𑀔𑀲𑀳𑀕𑀢𑀤𑀼𑀓𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀝𑀺𑀧𑀓𑁆𑀔𑁂𑀳𑀺 𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀧𑀭𑀺𑀢𑁆𑀢𑁄. 𑀧𑀭𑀺𑀢𑁆𑀢𑀦𑁆𑀢𑀺 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁 𑀯𑀼𑀘𑁆𑀘𑀢𑀺, 𑀅𑀬𑀫𑁆𑀧𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀢𑁆𑀢𑁄 𑀯𑀺𑀬𑀸𑀢𑀺 𑀧𑀭𑀺𑀢𑁆𑀢𑁄. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑁄, 𑀯𑀺𑀧𑀼𑀮𑀨𑀮𑀢𑁄, 𑀤𑀻𑀖𑀲𑀦𑁆𑀢𑀸𑀦𑀢𑁄 𑀘 𑀫𑀳𑀦𑁆𑀢𑀪𑀸𑀯𑀁 𑀕𑀢𑁄, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀸𑀤𑀻𑀳𑀺 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀫𑀳𑀕𑁆𑀕𑀢𑁄. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀧𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀫𑀸𑀡𑀓𑀭𑀥𑀫𑁆𑀫𑀸, 𑀢𑁂𑀲𑀁 𑀯𑀸 𑀧𑀝𑀺𑀧𑀓𑁆𑀔𑁄𑀢𑀺 𑀅𑀧𑁆𑀧𑀫𑀸𑀡𑁄.

𑀧𑀝𑀺𑀧𑀚𑁆𑀚𑀢𑀺 𑀛𑀸𑀦𑀁 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸. 𑀤𑀼𑀓𑁆𑀔𑀸 𑀓𑀺𑀘𑁆𑀙𑀸 𑀧𑀝𑀺𑀧𑀤𑀸 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑁄. 𑀧𑀓𑀢𑀺𑀧𑀜𑁆𑀜𑀸𑀬 𑀅𑀪𑀺𑀯𑀺𑀲𑀺𑀝𑁆𑀞𑀢𑁆𑀢𑀸 𑀅𑀪𑀺𑀜𑁆𑀜𑀸 𑀦𑀸𑀫 𑀅𑀧𑁆𑀧𑀦𑀸𑀯𑀳𑀸 𑀪𑀸𑀯𑀦𑀸𑀧𑀜𑁆𑀜𑀸, 𑀤𑀦𑁆𑀥𑀸 𑀫𑀦𑁆𑀤𑀸 𑀅𑀪𑀺𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀤𑀦𑁆𑀥𑀸𑀪𑀺𑀜𑁆𑀜𑁄. 𑀤𑀼𑀓𑁆𑀔𑀸𑀧𑀝𑀺𑀧𑀤𑁄 𑀘 𑀲𑁄 𑀤𑀦𑁆𑀥𑀸𑀪𑀺𑀜𑁆𑀜𑁄 𑀘𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑁄 ¶ , 𑀲𑀫𑀸𑀥𑀺. 𑀢𑀤𑀸𑀤𑀺𑀯𑀲𑁂𑀦. 𑀘𑀢𑀼𑀛𑀸𑀦𑀗𑁆𑀕𑀯𑀲𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑀸𑀯𑀯𑀲𑁂𑀦, 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀳𑀸𑀦𑀪𑀸𑀕𑀺𑀬𑀸𑀤𑀺𑀯𑀲𑁂𑀦𑀸𑀢𑀺 𑀳𑀸𑀦𑀓𑁄𑀝𑁆𑀞𑀸𑀲𑀺𑀓𑀸𑀤𑀺𑀯𑀲𑁂𑀦.

𑀲𑀫𑀸𑀥𑀺𑀏𑀓𑀓𑀤𑀼𑀓𑀯𑀡𑁆𑀡𑀦𑀸

𑀙𑀦𑁆𑀦𑀁 ¶ 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀁 𑀙𑀦𑁆𑀦𑀁 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀦𑀁. 𑀇𑀫𑁂𑀲𑀁 𑀯𑀲𑁂𑀦𑀸𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀯𑀲𑁂𑀦. ‘‘𑀧𑀼𑀩𑁆𑀩𑀪𑀸𑀕𑁂 𑀏𑀓𑀕𑁆𑀕𑀢𑀸’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀬 𑀉𑀧𑀓𑀸𑀭𑀓𑀦𑀸𑀦𑀸𑀯𑀚𑁆𑀚𑀦𑀼𑀧𑀘𑀸𑀭𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀦 𑀏𑀓𑀸𑀯𑀚𑁆𑀚𑀦𑀲𑁆𑀲𑁂𑀯. 𑀅𑀧𑁆𑀧𑀦𑀸𑀲𑀫𑀸𑀥𑀻𑀦𑀦𑁆𑀢𑀺 𑀉𑀧𑀓𑀢𑁆𑀢𑀩𑁆𑀩𑀉𑀧𑀓𑀸𑀭𑀓𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁 ‘‘𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀕𑁄𑀢𑁆𑀭𑀪𑀼. 𑀅𑀧𑀭𑀺𑀢𑁆𑀢𑁄 𑀲𑀫𑀸𑀥𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀻𑀲𑀼 𑀪𑀽𑀫𑀻𑀲𑀽𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼. 𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑁄, 𑀲𑀺𑀬𑀸 𑀦𑀺𑀧𑁆𑀧𑀻𑀢𑀺𑀓𑁄𑀢𑀺 𑀅𑀦𑀺𑀬𑀫𑀯𑀘𑀦𑀁 𑀉𑀧𑀘𑀸𑀭𑀲𑀫𑀸𑀥𑀺𑀲𑀸𑀫𑀜𑁆𑀜𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀛𑀸𑀦𑀸𑀦𑀁 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀉𑀧𑀘𑀸𑀭𑀲𑀫𑀸𑀥𑀺 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑁄, 𑀲𑀺𑀬𑀸 𑀦𑀺𑀧𑁆𑀧𑀻𑀢𑀺𑀓𑁄. 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀦 𑀆𑀤𑀺𑀢𑁄 𑀤𑀼𑀓𑀢𑀺𑀓𑀚𑁆𑀛𑀸𑀦𑀸𑀦𑀁 𑀉𑀧𑀘𑀸𑀭𑀲𑀫𑀸𑀥𑀺 𑀲𑀧𑁆𑀧𑀻𑀢𑀺𑀓𑁄𑀯, 𑀇𑀢𑀭𑁂𑀲𑀁 𑀦𑀺𑀧𑁆𑀧𑀻𑀢𑀺𑀓𑁄𑀯, 𑀯𑀺𑀲𑀪𑀸𑀕𑀯𑁂𑀤𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑀸𑀪𑀸𑀯𑀢𑁄, 𑀏𑀓𑀯𑀻𑀣𑀺𑀬𑀁 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀸𑀪𑀸𑀯𑀢𑁄 𑀘. 𑀲𑀺𑀬𑀸 𑀲𑀼𑀔𑀲𑀳𑀕𑀢𑁄, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑁄𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀦 ‘‘𑀤𑀼𑀓𑀢𑀺𑀓𑀚𑁆𑀛𑀸𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀫𑀸𑀥𑀺𑀢𑀺𑀓𑀯𑀡𑁆𑀡𑀦𑀸

𑀧𑀝𑀺𑀮𑀤𑁆𑀥𑀫𑀢𑁆𑀢𑁄𑀢𑀺 𑀅𑀥𑀺𑀕𑀢𑀫𑀢𑁆𑀢𑁄 𑀅𑀦𑀸𑀲𑁂𑀯𑀺𑀢𑁄 𑀅𑀩𑀳𑀼𑀮𑀻𑀓𑀢𑁄. 𑀲𑁄 𑀳𑀺 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑁂𑀦 𑀳𑀻𑀦𑁄 𑀳𑁄𑀢𑀺. 𑀦𑀸𑀢𑀺𑀲𑀼𑀪𑀸𑀯𑀺𑀢𑁄𑀢𑀺 𑀅𑀢𑀺𑀯𑀺𑀬 𑀧𑀕𑀼𑀡𑀪𑀸𑀯𑀁 𑀅𑀧𑀸𑀧𑀺𑀢𑁄. 𑀲𑀼𑀪𑀸𑀯𑀺𑀢𑁄𑀢𑀺 𑀲𑀼𑀝𑁆𑀞𑀼 𑀪𑀸𑀯𑀺𑀢𑁄 𑀲𑀫𑁆𑀫𑀤𑁂𑀯 𑀧𑀕𑀼𑀡𑀢𑀁 𑀉𑀧𑀦𑀻𑀢𑁄. 𑀢𑁂𑀦𑀸𑀳 ‘‘𑀯𑀲𑀺𑀧𑁆𑀧𑀢𑁆𑀢𑁄’’𑀢𑀺. 𑀙𑀦𑁆𑀤𑀸𑀤𑀻𑀦𑀁 𑀳𑀻𑀦𑀢𑀸𑀤𑀺𑀯𑀲𑁂𑀦𑀸𑀧𑀺 𑀇𑀫𑁂𑀲𑀁 𑀳𑀻𑀦𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀉𑀴𑀸𑀭𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀳𑀻𑀦𑁄, 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀫𑁆𑀧𑀸𑀤𑀦𑀸𑀬 𑀧𑀯𑀢𑁆𑀢𑀺𑀢𑁄 𑀫𑀚𑁆𑀛𑀺𑀫𑁄, 𑀯𑀺𑀯𑁂𑀓𑀓𑀸𑀫𑀢𑀸𑀬 𑀅𑀭𑀺𑀬𑀪𑀸𑀯𑁂 𑀞𑀺𑀢𑁂𑀦 𑀧𑀯𑀢𑁆𑀢𑀺𑀢𑁄 𑀧𑀡𑀻𑀢𑁄 ¶ . 𑀅𑀢𑁆𑀢𑀳𑀺𑀢𑀸𑀬 𑀪𑀯𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀯𑀸 𑀳𑀻𑀦𑁄, 𑀓𑁂𑀯𑀮𑀁 𑀅𑀮𑁄𑀪𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑁄 𑀫𑀚𑁆𑀛𑀺𑀫𑁄, 𑀧𑀭𑀳𑀺𑀢𑀸𑀬 𑀧𑀯𑀢𑁆𑀢𑀺𑀢𑁄 𑀧𑀡𑀻𑀢𑁄. 𑀯𑀝𑁆𑀝𑀚𑁆𑀛𑀸𑀲𑀬𑁂𑀦 𑀯𑀸 𑀧𑀯𑀢𑁆𑀢𑀺𑀢𑁄 𑀳𑀻𑀦𑁄, 𑀯𑀺𑀯𑁂𑀓𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑁄 𑀫𑀚𑁆𑀛𑀺𑀫𑁄, 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑁂𑀦 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀧𑀡𑀻𑀢𑁄.

𑀲𑀤𑁆𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀦𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀛𑀸𑀦𑀸𑀦𑀁 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀳. 𑀯𑀺𑀢𑀓𑁆𑀓𑀫𑀢𑁆𑀢𑁂𑀬𑁂𑀯 𑀆𑀤𑀻𑀦𑀯𑀁 ¶ 𑀤𑀺𑀲𑁆𑀯𑀸𑀢𑀺 𑀯𑀺𑀢𑀓𑁆𑀓𑁂𑀬𑁂𑀯 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀳𑀦𑁆𑀢𑁂 ‘‘𑀘𑀺𑀢𑁆𑀢𑀲𑁆𑀲 𑀔𑁄𑀪𑀓𑀭𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀘𑀸𑀭𑀜𑁆𑀘 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀘𑀸𑀭𑁂 𑀅𑀤𑀺𑀲𑁆𑀯𑀸’’𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀏𑀯𑀁 𑀧𑀝𑀺𑀮𑀤𑁆𑀥𑀁 𑀲𑀫𑀸𑀥𑀺𑀁 𑀲𑀦𑁆𑀥𑀸𑀬. 𑀏𑀢𑀁 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀻’’𑀢𑀺 𑀤𑀼𑀢𑀺𑀬𑀧𑀤𑀁 𑀯𑀼𑀢𑁆𑀢𑀁. 𑀢𑀻𑀲𑀽𑀢𑀺 𑀆𑀤𑀺𑀢𑁄 𑀢𑀻𑀲𑀼.

𑀢𑁂𑀲𑁆𑀯𑁂𑀯𑀸𑀢𑀺 𑀢𑁂𑀲𑀼 𑀏𑀯 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑁂𑀲𑀼. 𑀢𑀢𑀺𑀬𑁂 𑀘𑀢𑀼𑀢𑁆𑀣𑁂𑀢𑀺 𑀘𑀢𑀼𑀓𑁆𑀓𑀦𑀬𑁂 𑀢𑀢𑀺𑀬𑁂, 𑀧𑀜𑁆𑀘𑀓𑀦𑀬𑁂 𑀘𑀢𑀼𑀢𑁆𑀣𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀯𑀲𑀸𑀦𑁂𑀢𑀺 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑀧𑀭𑀺𑀬𑁄𑀲𑀸𑀦𑀚𑁆𑀛𑀸𑀦𑁂. 𑀬𑀣𑀸𑀓𑁆𑀓𑀫𑀁 𑀘𑀢𑀼𑀢𑁆𑀣𑁂, 𑀧𑀜𑁆𑀘𑀫𑁂 𑀯𑀸. 𑀧𑀻𑀢𑀺𑀲𑀼𑀔𑀲𑀳𑀕𑀢𑁄 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀲𑀢𑀺𑀧𑀺 𑀧𑀻𑀢𑀺𑀲𑀳𑀕𑀢𑀲𑁆𑀲𑀸𑀧𑀺 𑀲𑀫𑀸𑀥𑀺𑀲𑁆𑀲 𑀲𑀼𑀔𑀲𑀳𑀕𑀢𑀢𑁆𑀢𑁂 𑀢𑀻𑀡𑀺𑀧𑀺 𑀧𑀤𑀸𑀦𑀺 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀦𑀺𑀧𑁆𑀧𑀻𑀢𑀺𑀓𑀲𑀼𑀔𑀢𑁄 𑀲𑀧𑁆𑀧𑀻𑀢𑀺𑀓𑀲𑀼𑀔𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀢𑁆𑀣𑀼 𑀧𑀻𑀢𑀺𑀢𑀺𑀓𑀤𑁂𑀲𑀦𑀸𑀢𑀺 𑀦𑀺𑀧𑁆𑀧𑀻𑀢𑀺𑀓𑀲𑁆𑀲𑁂𑀯 𑀲𑀼𑀔𑀲𑁆𑀲 𑀯𑀲𑁂𑀦 𑀲𑀼𑀔𑀲𑀳𑀕𑀢𑁄 𑀲𑀫𑀸𑀥𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀉𑀧𑀘𑀸𑀭𑀪𑀽𑀫𑀺𑀬𑀦𑁆𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂. 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺 ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀻𑀲𑀼 (𑀥. 𑀲. 𑁯𑁮𑁮) 𑀯𑀺𑀬. 𑀧𑀭𑀺𑀢𑁆𑀢𑁄 𑀲𑀫𑀸𑀥𑀺 𑀓𑀸𑀫𑀸𑀯𑀘𑀭𑀪𑀸𑀯𑀢𑁄.

𑀲𑀫𑀸𑀥𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄 𑀪𑀸𑀯𑀦𑀁 𑀆𑀭𑀪𑀦𑁆𑀢𑀲𑁆𑀲 ‘‘𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀝𑁆𑀞𑀸𑀦𑁂 𑀧𑀞𑀫𑀸𑀪𑀺𑀦𑀺𑀯𑁂𑀲𑁄. 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀦𑁆𑀢𑀺 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀦𑀺𑀓𑀦𑁆𑀢𑀺𑀆𑀤𑀻𑀦𑀁 𑀯𑀽𑀧𑀲𑀫𑁂 𑀣𑀺𑀭𑀪𑀽𑀢𑀁 𑀓𑀸𑀫𑀸𑀯𑀘𑀭𑀚𑁆𑀛𑀸𑀦𑀁. ‘‘𑀬𑀸𑀯 𑀅𑀧𑁆𑀧𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀏𑀯 𑀅𑀪𑀺𑀜𑁆𑀜𑀸𑀪𑀸𑀯𑁄 𑀯𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑀺 ¶ . 𑀅𑀧𑁆𑀧𑀦𑀸𑀧𑀜𑁆𑀜𑀸 𑀧𑀦 𑀅𑀪𑀺𑀜𑁆𑀜𑀸𑀯. 𑀬𑀤𑀕𑁆𑀕𑁂𑀦 𑀳𑀺 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀤𑀦𑁆𑀥𑀲𑀻𑀖𑀢𑀸, 𑀢𑀤𑀕𑁆𑀕𑁂𑀦 𑀅𑀧𑁆𑀧𑀦𑀸𑀧𑀜𑁆𑀜𑀸𑀬𑀧𑀻𑀢𑀺. 𑀲𑀫𑀼𑀤𑀸𑀘𑀸𑀭𑀕𑀳𑀡𑀢𑀸𑀬𑀸𑀢𑀺 𑀲𑀫𑀼𑀤𑀸𑀘𑀸𑀭𑀲𑁆𑀲 𑀕𑀳𑀡𑀪𑀸𑀯𑁂𑀦, 𑀧𑀯𑀢𑁆𑀢𑀺𑀩𑀸𑀳𑀼𑀮𑁆𑀮𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀼𑀔𑀸𑀲𑁂𑀯𑀦𑀸𑀢𑀺 𑀓𑀲𑀺𑀭𑀪𑀸𑀯𑀦𑀸.

𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑀸𑀯𑀦𑀸𑀯𑀺𑀥𑀸𑀦𑀸𑀧𑀭𑀺𑀳𑀸𑀧𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑀧𑁆𑀧𑀸𑀬𑀲𑁂𑀯𑀻𑀢𑀺 𑀉𑀧𑀘𑀸𑀭𑀸𑀥𑀺𑀕𑀫𑀢𑁄 𑀧𑀼𑀩𑁆𑀩𑁂 𑀅𑀲𑀧𑁆𑀧𑀸𑀬𑀲𑁂𑀯𑀺𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸. 𑀧𑀘𑁆𑀙𑀸 𑀅𑀲𑀧𑁆𑀧𑀸𑀬𑀲𑁂𑀯𑀺𑀢𑀸𑀬 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀲𑀧𑁆𑀧𑀸𑀬𑀲𑁂𑀯𑀺𑀦𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀸𑀥𑀺𑀕𑀫𑀢𑁄 ¶ 𑀑𑀭𑀪𑀸𑀕𑁂. 𑀅𑀧𑀭𑀪𑀸𑀕𑁂𑀢𑀺 𑀢𑀢𑁄 𑀉𑀤𑁆𑀥𑀁. 𑀢𑀲𑁆𑀲 𑀯𑁄𑀫𑀺𑀲𑁆𑀲𑀓𑀢𑀸𑀢𑀺 𑀬𑁄 𑀧𑀼𑀩𑁆𑀩𑀪𑀸𑀕𑁂 𑀅𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀧𑁆𑀧𑀸𑀬𑀲𑁂𑀯𑀻, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀇𑀢𑀭𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀳𑁄𑀢𑀺. 𑀏𑀯𑀁 𑀧𑀞𑀫𑀘𑀢𑀼𑀢𑁆𑀣𑀸𑀦𑀁 𑀯𑁄𑀫𑀺𑀲𑁆𑀲𑀓𑀢𑀸𑀬 𑀤𑀼𑀢𑀺𑀬𑀢𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀓𑀢𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀲𑁆𑀲 𑀲𑀧𑀭𑀺𑀧𑀦𑁆𑀣𑀢𑀸𑀬 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸 𑀳𑁄𑀢𑀺, 𑀇𑀢𑀭𑀲𑁆𑀲 𑀲𑀼𑀔𑀸. 𑀅𑀲𑀫𑁆𑀧𑀸𑀤𑀺𑀢𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀲𑁆𑀲 𑀜𑀸𑀡𑀲𑁆𑀲 𑀅𑀯𑀺𑀲𑀤𑀢𑀸𑀬 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀯𑀺𑀲𑀤𑀢𑀸𑀬 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸.

𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀦𑀁 𑀅𑀪𑀺𑀪𑀯𑀸𑀦𑀪𑀺𑀪𑀯𑀯𑀲𑁂𑀦. 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀺𑀓𑀸𑀭𑀯𑀲𑁂𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀅𑀲𑀢𑁄, 𑀲𑀢𑁄 𑀘 𑀅𑀥𑀺𑀓𑀸𑀭𑀲𑁆𑀲 𑀯𑀲𑁂𑀦. 𑀢𑀡𑁆𑀳𑀸𑀬 𑀲𑀫𑀸𑀥𑀺𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀸 𑀲𑀫𑀣𑀧𑀝𑀺𑀧𑀤𑀸𑀬 𑀧𑀭𑀺𑀧𑀦𑁆𑀣𑀺𑀦𑀻𑀢𑀺 𑀆𑀳 ‘‘𑀢𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀳𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀻’’𑀢𑀺. 𑀅𑀪𑀺𑀪𑀯𑁄 𑀘𑀲𑁆𑀲𑀸 𑀇𑀢𑀭𑀓𑀺𑀮𑁂𑀲𑁂𑀳𑀺 𑀅𑀥𑀺𑀓𑀢𑀸𑀬 𑀅𑀦𑀪𑀺𑀪𑀽𑀢𑀲𑁆𑀲 𑀢𑀡𑁆𑀳𑀸𑀬𑀸𑀢𑀺 𑀅𑀥𑀺𑀓𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀅𑀯𑀺𑀚𑁆𑀚𑀸 𑀧𑀜𑁆𑀜𑀸𑀬 𑀉𑀚𑀼𑀧𑀝𑀺𑀧𑀓𑁆𑀔𑀸𑀢𑀺 𑀢𑀤𑀪𑀺𑀪𑀽𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀢𑀸 𑀯𑀼𑀢𑁆𑀢𑀸. 𑀅𑀓𑀢𑀸𑀥𑀺𑀓𑀸𑀭𑁄𑀢𑀺 𑀪𑀯𑀦𑁆𑀢𑀭𑁂 𑀅𑀓𑀢𑀧𑀭𑀺𑀘𑀬𑁄 𑀬𑀣𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀕𑀦𑁆𑀣𑁄 𑀅𑀧𑁆𑀧𑀫𑀢𑁆𑀢𑀓𑁂𑀦 𑀧𑀬𑁄𑀕𑁂𑀦 𑀲𑀼𑀧𑁆𑀧𑀯𑀢𑁆𑀢𑀺 𑀯𑀸𑀘𑀼𑀕𑁆𑀕𑀢𑁄𑀯 𑀳𑁄𑀢𑀺, 𑀏𑀯𑀁 𑀧𑀼𑀩𑁆𑀩𑁂 𑀓𑀢𑀧𑀭𑀺𑀘𑀬𑀲𑁆𑀲 𑀪𑀸𑀯𑀦𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀇𑀚𑁆𑀛𑀢𑀻𑀢𑀺 𑀆𑀳 ‘‘𑀓𑀢𑀸𑀥𑀺𑀓𑀸𑀭𑀲𑁆𑀲 𑀲𑀼𑀔𑀸’’𑀢𑀺. 𑀲𑁆𑀯𑀸𑀬𑀁 𑀅𑀓𑀢𑁄, 𑀓𑀢𑁄 𑀘 𑀅𑀥𑀺𑀓𑀸𑀭𑁄 𑀲𑀫𑀣𑀦𑀺𑀲𑁆𑀲𑀺𑀢𑁄 𑀧𑀝𑀺𑀧𑀤𑀸𑀬𑀁 𑀯𑀼𑀢𑁆𑀢𑁄 𑀲𑀫𑀸𑀥𑀺𑀧𑁆𑀧𑀥𑀸𑀦𑀢𑁆𑀢𑀸 𑀧𑀝𑀺𑀧𑀤𑀸𑀬. 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑁄 𑀅𑀪𑀺𑀜𑁆𑀜𑀸𑀬𑀁 𑀜𑀸𑀡𑀧𑁆𑀧𑀥𑀸𑀦𑀢𑁆𑀢𑀸 𑀅𑀧𑁆𑀧𑀦𑀸𑀬. 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀢𑀺𑀓𑁆𑀔𑀸𑀢𑀺𑀓𑁆𑀔𑀸𑀦𑀁 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦. 𑀢𑁂𑀦𑀸𑀳 ‘‘𑀢𑀺𑀩𑁆𑀩𑀓𑀺𑀮𑁂𑀲𑀲𑁆𑀲𑀸’’𑀢𑀺𑀆𑀤𑀺 ¶ . 𑀢𑀢𑁆𑀣 𑀓𑀺𑀮𑁂𑀲𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀸𑀤𑀻𑀦𑀺.

𑀬𑀣𑀸𑀯𑀼𑀢𑁆𑀢𑀸 𑀧𑀝𑀺𑀧𑀤𑀸𑀪𑀺𑀜𑁆𑀜𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀢𑀺 𑀥𑀫𑁆𑀫𑀦𑀺𑀤𑁆𑀤𑁂𑀲𑀫𑁆𑀧𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀕𑀼𑀡𑁄𑀢𑀺 𑀦 𑀲𑀼𑀪𑀸𑀯𑀺𑀢𑁄 𑀯𑀲𑀻𑀪𑀸𑀯𑀁 𑀅𑀧𑀸𑀧𑀺𑀢𑁄. 𑀢𑁂𑀦𑀸𑀳 ‘‘𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀅𑀬𑀁 𑀧𑀭𑀺𑀢𑁆𑀢𑁄𑀢𑀺 𑀅𑀬𑀁 𑀲𑀫𑀸𑀥𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀢𑁆𑀢𑁄. 𑀅𑀯𑀟𑁆𑀠𑀺𑀢𑁂𑀢𑀺 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦 𑀯𑀟𑁆𑀠𑀺𑀢𑁂 𑀬𑀣𑀸𑀉𑀧𑀝𑁆𑀞𑀺𑀢𑁂 𑀆𑀭𑀫𑁆𑀫𑀡𑁂. 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀳𑀺 𑀯𑀟𑁆𑀠𑀺𑀢𑀁 𑀅𑀧𑁆𑀧𑀫𑀸𑀡𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. ‘‘𑀧𑀕𑀼𑀡𑁄 𑀲𑀼𑀪𑀸𑀯𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀇𑀫𑀺𑀦𑀸 𑀬𑀣𑀸 𑀧𑀕𑀼𑀡𑁄𑀧𑀺 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺 𑀧𑀭𑀺𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀦 𑀅𑀧𑁆𑀧𑀫𑀸𑀡𑁄, 𑀏𑀯𑀁 𑀜𑀸𑀡𑀼𑀢𑁆𑀢𑀭𑀲𑁆𑀲 𑀏𑀓𑀸𑀲𑀦𑁂𑀦𑁂𑀯 𑀉𑀧𑀭𑀺𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑁂𑀦𑀸𑀢𑀺 𑀲𑀼𑀪𑀸𑀯𑀺𑀢𑁄𑀧𑀺 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀸𑀬 𑀲𑀼𑀪𑀸𑀯𑀺𑀢𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 ‘‘𑀅𑀧𑁆𑀧𑀫𑀸𑀡𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀭𑁂 𑀧𑀦 𑀲𑀘𑁂 𑀲𑀼𑀪𑀸𑀯𑀺𑀢𑁄 𑀧𑀕𑀼𑀡𑁄 𑀯𑀲𑀻𑀪𑀸𑀯𑀁 𑀧𑀢𑁆𑀢𑁄 ¶ 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀅𑀳𑁄𑀦𑁆𑀢𑁄𑀧𑀺 𑀅𑀧𑁆𑀧𑀫𑀸𑀡𑁄 𑀏𑀯, 𑀧𑀫𑀸𑀡𑀓𑀭𑀸𑀦𑀁 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀸𑀦𑀁 𑀲𑀼𑀯𑀺𑀤𑀽𑀭𑀪𑀸𑀯𑀢𑁄𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀮𑀓𑁆𑀔𑀡𑀯𑁄𑀫𑀺𑀲𑁆𑀲𑀢𑀸𑀬𑀸𑀢𑀺 𑀬𑁄 𑀅𑀧𑁆𑀧𑀕𑀼𑀡𑁄 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀅𑀬𑀁 𑀧𑀭𑀺𑀢𑁆𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄. 𑀬𑁄 𑀧𑀦 𑀧𑀕𑀼𑀡𑁄 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀅𑀬𑀁 𑀅𑀧𑁆𑀧𑀫𑀸𑀡𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄𑀢𑀺 𑀏𑀯𑀁 𑀧𑀞𑀫𑀘𑀢𑀼𑀢𑁆𑀣𑀲𑀫𑀸𑀥𑀻𑀦𑀁 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲 𑀯𑁄𑀫𑀺𑀲𑁆𑀲𑀓𑀪𑀸𑀯𑁂𑀦 𑀤𑀼𑀢𑀺𑀬𑀢𑀢𑀺𑀬𑀲𑀫𑀸𑀥𑀺𑀲𑀗𑁆𑀕𑀸𑀳𑀓𑁄 𑀯𑁄𑀫𑀺𑀲𑁆𑀲𑀓𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄𑀢𑀺 𑀢𑀢𑁄 𑀧𑀞𑀫𑀚𑁆𑀛𑀸𑀦𑀢𑁄 𑀉𑀤𑁆𑀥𑀁. 𑀯𑀺𑀭𑀢𑁆𑀢𑀧𑀻𑀢𑀺𑀓𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀧𑀻𑀢𑀺𑀓𑀁 𑀯𑀸 𑀚𑀺𑀕𑀼𑀘𑁆𑀙𑀺𑀢𑀧𑀻𑀢𑀺𑀓𑀁 𑀯𑀸. 𑀅𑀯𑀬𑀯𑁄 𑀲𑀫𑀼𑀤𑀸𑀬𑀲𑁆𑀲 𑀅𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀺, ‘‘𑀲𑁂𑀦𑀗𑁆𑀕𑀁 𑀭𑀣𑀗𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑀽𑀢𑀸 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻’’𑀢𑀺.

𑀳𑀸𑀦𑀁 𑀪𑀚𑀢𑀻𑀢𑀺 𑀳𑀸𑀦𑀪𑀸𑀕𑀺𑀬𑁄, 𑀳𑀸𑀦𑀪𑀸𑀕𑁄 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀸𑀦𑀪𑀸𑀕𑀺𑀬𑁄, 𑀧𑀭𑀺𑀳𑀸𑀦𑀓𑁄𑀝𑁆𑀞𑀸𑀲𑀺𑀓𑁄𑀢𑀺 𑀅𑀢𑁆𑀣𑁄. 𑀆𑀮𑀬𑀲𑁆𑀲 𑀅𑀧𑁂𑀓𑁆𑀔𑀸𑀬 𑀅𑀧𑀭𑀺𑀘𑁆𑀘𑀚𑀦𑀢𑁄 𑀞𑀺𑀢𑀺𑀁 𑀪𑀚𑀢𑀻𑀢𑀺 𑀞𑀺𑀢𑀺𑀪𑀸𑀕𑀺𑀬𑁄. 𑀯𑀺𑀲𑁂𑀲𑀁 𑀪𑀚𑀢𑀻𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑁄. 𑀧𑀘𑁆𑀘𑀦𑀻𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 ¶ 𑀛𑀸𑀦𑀲𑁆𑀲 𑀧𑀘𑁆𑀘𑀦𑀻𑀓𑀸𑀦𑀁 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀦𑀁 𑀧𑀯𑀢𑁆𑀢𑀺𑀯𑀲𑁂𑀦. 𑀢𑀤𑀦𑀼𑀥𑀫𑁆𑀫𑀢𑀸𑀬𑀸𑀢𑀺 𑀢𑀤𑀦𑀼𑀭𑀽𑀧𑀪𑀽𑀢𑀸𑀬 𑀲𑀢𑀺𑀬𑀸. 𑀲𑀡𑁆𑀞𑀸𑀦𑀯𑀲𑁂𑀦𑀸𑀢𑀺 𑀲𑀡𑁆𑀞𑀳𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀯𑀲𑁂𑀦. ‘‘𑀲𑀸 𑀧𑀦 𑀢𑀤𑀲𑁆𑀲𑀸𑀤𑀲𑀗𑁆𑀔𑀸𑀢𑀸, 𑀢𑀤𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀯𑀸 𑀫𑀺𑀘𑁆𑀙𑀸𑀲𑀢𑀻’’𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁭𑁯𑁯) 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀧𑁂𑀓𑁆𑀔𑀲𑁆𑀲 𑀉𑀧𑀭𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀯𑀺𑀕𑀢𑀦𑀺𑀓𑀦𑁆𑀢𑀺𑀓𑀸 𑀢𑀁𑀢𑀁𑀧𑀭𑀺𑀳𑀭𑀡𑀲𑀢𑀻𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀢𑀺𑀬𑀸 𑀯𑀸 𑀦𑀺𑀓𑀦𑁆𑀢𑀺𑀬𑀸 𑀯𑀸’’𑀢𑀺 𑀯𑀺𑀓𑀧𑁆𑀧𑀯𑀘𑀦𑀜𑁆𑀘 𑀬𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀯𑀲𑁂𑀦𑀸𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀯𑀲𑁂𑀦, 𑀯𑀺𑀲𑁂𑀲𑀁 𑀯𑀸 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑁄, 𑀢𑀲𑁆𑀲 𑀯𑀲𑁂𑀦. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀦𑀺𑀩𑁆𑀩𑀺𑀦𑁆𑀤𑀦𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀬 𑀘 𑀆𑀪𑁄𑀕𑀲𑁆𑀲 𑀘 𑀧𑀯𑀢𑁆𑀢𑀺𑀯𑀲𑁂𑀦. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀸𑀢𑀺 𑀲𑀘𑁆𑀘𑀸𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀧𑀓𑁆𑀔𑀺𑀓𑀢𑀸 𑀯𑀺𑀧𑀲𑁆𑀲𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀫𑀲𑀳𑀕𑀢𑀸𑀢𑀺 𑀓𑀸𑀫𑀸𑀭𑀫𑁆𑀫𑀡𑀸, 𑀓𑀸𑀫𑀲𑀜𑁆𑀜𑀸𑀳𑀺 𑀯𑀸 𑀯𑁄𑀓𑀺𑀡𑁆𑀡𑀸. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 ‘‘𑀓𑀣𑀁 𑀦𑀼 𑀔𑁄 𑀫𑁂 𑀅𑀯𑀺𑀢𑀓𑁆𑀓𑀁 𑀛𑀸𑀦𑀁 𑀪𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸 𑀅𑀯𑀺𑀢𑀓𑁆𑀓𑀯𑀺𑀲𑀬𑀸. 𑀓𑀸𑀫𑀜𑁆𑀘𑀸𑀬𑀁 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲𑀸’’𑀢𑀺𑀆𑀤𑀺𑀓𑁄 𑀧𑀸𑀞𑁄 𑀧𑀜𑁆𑀜𑀸𑀯𑀲𑁂𑀦 𑀆𑀕𑀢𑁄, 𑀲𑀫𑀸𑀥𑀺𑀲𑁆𑀲𑀸𑀧𑀺 𑀧𑀦𑁂𑀢𑁆𑀣 𑀲𑀗𑁆𑀕𑀳𑁄 ¶ 𑀅𑀢𑁆𑀣𑁂𑀯𑀸𑀢𑀺 𑀉𑀤𑀸𑀳𑀭𑀡𑀲𑁆𑀲 𑀲𑀸𑀢𑁆𑀣𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀸𑀬 𑀧𑀦 𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑀸𑀥𑀻𑀧𑀺 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀻’’𑀢𑀺 𑀢𑁂𑀲𑀁 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀪𑀸𑀯𑀦𑀸𑀫𑀬𑀲𑁆𑀲 𑀲𑀫𑀸𑀥𑀺𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀉𑀧𑀘𑀸𑀭𑁂𑀓𑀕𑁆𑀕𑀢𑀸 ‘‘𑀓𑀸𑀫𑀸𑀯𑀘𑀭𑁄 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸𑀢𑀺 ‘‘𑀙𑀦𑁆𑀤𑀯𑀢𑁄 𑀘𑁂 𑀲𑀫𑀸𑀥𑀺 𑀳𑁄𑀢𑀺, 𑀫𑀬𑁆𑀳𑀫𑁆𑀧𑀺 𑀏𑀯𑀁 𑀳𑁄𑀢𑀻’’𑀢𑀺 𑀙𑀦𑁆𑀤𑀁 𑀅𑀥𑀺𑀧𑀢𑀺𑀁, 𑀙𑀦𑁆𑀤𑀁 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀮𑀪𑀢𑀺 𑀲𑀫𑀸𑀥𑀺𑀦𑁆𑀢𑀺 𑀏𑀯𑀁 𑀬𑀁 𑀲𑀫𑀸𑀥𑀺𑀁 𑀮𑀪𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀺, 𑀙𑀦𑁆𑀤𑀸𑀥𑀺𑀧𑀢𑀺𑀲𑀫𑀸𑀥𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀢𑀼𑀓𑁆𑀓𑀪𑁂𑀤𑁂𑀢𑀺 𑀘𑀢𑀼𑀓𑁆𑀓𑀯𑀲𑁂𑀦 𑀲𑀫𑀸𑀥𑀺𑀧𑁆𑀧𑀪𑁂𑀤𑀦𑀺𑀤𑁆𑀤𑁂𑀲𑁂. 𑀅𑀜𑁆𑀜𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀘𑀸𑀭𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄 𑀯𑀺𑀢𑀓𑁆𑀓𑁄 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀬𑁄𑀚𑀺𑀢𑁄𑀧𑀺 𑀦 𑀲𑀼𑀝𑁆𑀞𑀼 𑀯𑀺𑀬𑁄𑀚𑀺𑀢𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺𑀓𑁆𑀓𑀫𑁂𑀦 𑀢𑀢𑀺𑀬’’𑀦𑁆𑀢𑀺. 𑀤𑁆𑀯𑀺𑀥𑀸 ¶ 𑀪𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀓𑁆𑀓𑀪𑁂𑀤𑁂 𑀯𑀼𑀢𑁆𑀢𑀁 𑀤𑀼𑀢𑀺𑀬𑀁 𑀛𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀛𑀸𑀦𑀗𑁆𑀕𑀯𑀲𑁂𑀦𑀸𑀢𑀺 𑀧𑀜𑁆𑀘𑀦𑁆𑀦𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑀸𑀯𑀯𑀲𑁂𑀦 𑀲𑀫𑀸𑀥𑀺𑀲𑁆𑀲 𑀧𑀜𑁆𑀘𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁦. 𑀯𑀺𑀪𑀗𑁆𑀕𑁂𑀢𑀺 𑀜𑀸𑀡𑀯𑀺𑀪𑀗𑁆𑀕𑁂. 𑀢𑀢𑁆𑀣 𑀳𑀺 ‘‘𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦’’𑀦𑁆𑀢𑀺, 𑀏𑀢𑁆𑀣 ‘‘𑀲𑀁𑀓𑀺𑀮𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀸𑀦𑀪𑀸𑀕𑀺𑀬𑁄 𑀥𑀫𑁆𑀫𑁄𑀢𑀺 𑀅𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁. 𑀯𑀺𑀲𑁂𑀲𑀪𑀸𑀕𑀺𑀬𑁄 𑀥𑀫𑁆𑀫𑁄𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁. 𑀢𑁂𑀦𑀸𑀳 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 (𑀯𑀺𑀪. 𑀅𑀝𑁆𑀞. 𑁮𑁨𑁮) 𑁋 𑀅𑀧𑀕𑀼𑀡𑀲𑁆𑀲 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀦𑀁 𑀢𑀢𑁄 𑀯𑀼𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀘𑁄𑀤𑁂𑀦𑁆𑀢𑀺 𑀢𑀼𑀤𑀦𑁆𑀢𑀺, 𑀢𑀲𑁆𑀲 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀳𑀸𑀬𑀢𑀺, 𑀢𑀲𑁆𑀫𑀸 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀧𑀕𑀼𑀡𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀘𑁄𑀤𑁂𑀦𑁆𑀢𑀺 𑀢𑀼𑀤𑀦𑁆𑀢𑀺, 𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀢𑀸𑀬 𑀯𑀺𑀲𑁂𑀲𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀧𑀞𑀫𑀚𑁆𑀛𑀸𑀦𑁂 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼𑀧𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑁄, 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀤𑀲𑀧𑀮𑀺𑀩𑁄𑀥𑀯𑀡𑁆𑀡𑀦𑀸

𑁪𑁧. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄𑀢𑀺 ¶ 𑀮𑁄𑀓𑀼𑀢𑁆𑀢𑀭𑀅𑀧𑁆𑀧𑀫𑀸𑀡𑀅𑀧𑀭𑀺𑀬𑀸𑀧𑀦𑁆𑀦𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑁂𑀳𑀺 𑀅𑀲𑀸𑀥𑀸𑀭𑀡𑀢𑁄, 𑀲𑀧𑁆𑀧𑀻𑀢𑀺𑀓𑀸𑀤𑀺𑀕𑁆𑀕𑀳𑀡𑁂𑀦 𑀲𑀸𑀥𑀸𑀭𑀡𑀢𑁄 𑀘 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀯𑀼𑀢𑁆𑀢𑁄. 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸. 𑀢𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀁. 𑀯𑀺𑀲𑀼𑀦𑁆𑀢𑀺 𑀧𑀜𑁆𑀜𑀸𑀪𑀸𑀯𑀦𑀸𑀬 𑀯𑀺𑀲𑀼𑀁 𑀓𑀢𑁆𑀯𑀸 𑀦 𑀯𑀤𑀸𑀫.

𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀁 ¶ 𑀧𑀭𑀺𑀩𑀼𑀦𑁆𑀥𑁂𑀢𑀺 𑀉𑀧𑀭𑁄𑀥𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀧𑀮𑀺𑀩𑁄𑀥𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸, 𑀧𑀭𑀺𑀧𑀦𑁆𑀣𑁄𑀢𑀺 𑀅𑀢𑁆𑀣𑁄. 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀫𑀸𑀧𑀦𑁂𑀦, 𑀲𑀗𑁆𑀕𑀳𑀡𑁂𑀦 𑀯𑀸 𑀉𑀧𑀭𑀼𑀦𑁆𑀥𑀺𑀢𑁆𑀯𑀸, 𑀅𑀧𑀮𑀺𑀩𑁄𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀆𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀯𑀸𑀲𑁄. 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑁂𑀡𑀺𑀬𑀢𑀺 𑀤𑀺𑀲𑁆𑀲𑀢𑀻𑀢𑀺 𑀧𑀭𑀺𑀯𑁂𑀡𑀁. 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀢𑀁 𑀢𑀁 𑀯𑀲𑀦𑀝𑁆𑀞𑀸𑀦𑀁. 𑀲𑁆𑀯𑀸𑀬𑀁 𑀆𑀯𑀸𑀲𑁄. 𑀦𑀯𑀓𑀫𑁆𑀫𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀯𑀸𑀲𑀲𑁆𑀲 𑀢𑀤𑀜𑁆𑀜𑀁 𑀅𑀪𑀺𑀯𑀼𑀤𑁆𑀥𑀺𑀓𑀸𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀭𑀡𑁂𑀦𑀸𑀢𑀺 ‘‘𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀲𑀼𑀮𑀪𑀪𑀺𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦. 𑀅𑀧𑁂𑀓𑁆𑀔𑀯𑀸𑀢𑀺 𑀲𑀸𑀮𑀬𑁄.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀮𑀺𑀩𑁄𑀥𑀸𑀪𑀸𑀯𑁂. 𑀧𑀸𑀘𑀻𑀦𑀔𑀡𑁆𑀟𑀭𑀸𑀚𑀺𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀧𑀩𑁆𑀩𑀢𑀔𑀡𑁆𑀟𑀸𑀦𑀁 𑀅𑀦𑁆𑀢𑀭𑁂 𑀯𑀦𑀭𑀸𑀚𑀺𑀝𑁆𑀞𑀸𑀦𑀁. ‘‘𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀧𑀤𑁂𑀲𑀲𑁆𑀲 𑀅𑀬𑀁 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀲𑀸𑀫𑀺𑀢𑀫𑁂𑀯𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀧𑀝𑀺𑀲𑀸𑀫𑁂𑀢𑁆𑀯𑀸𑀯 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀥𑀸𑀢𑀼𑀦𑀺𑀥𑀸𑀦𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀩𑀦𑁆𑀥𑀦𑀥𑀫𑁆𑀫𑀓𑀭𑀡𑀦𑁆𑀳𑀸𑀦𑀲𑀸𑀝𑀺𑀓𑀅𑀓𑁆𑀔𑀓𑀥𑀸𑀢𑀼𑀲𑀗𑁆𑀔𑀸𑀢𑀸𑀦𑀁 𑀧𑀭𑀺𑀪𑁄𑀕𑀲𑀭𑀻𑀭𑀥𑀸𑀢𑀽𑀦𑀁 𑀦𑀺𑀤𑀳𑀺𑀢𑀝𑁆𑀞𑀸𑀦𑀁. 𑀈𑀤𑀺𑀲𑀲𑁆𑀲 𑀅𑀬𑀁 𑀣𑁂𑀭𑁄 𑀯𑀺𑀬 𑀅𑀮𑀕𑁆𑀕𑀘𑀺𑀢𑁆𑀢𑀲𑁆𑀲. 𑀏𑀢𑁂𑀦 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀆𑀯𑀸𑀲𑁂 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀑𑀯𑀸𑀤𑁄 𑀤𑀺𑀦𑁆𑀦𑁄 𑀳𑁄𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀯𑀢𑁆𑀣𑀽𑀲𑀼 𑀏𑀲𑁂𑀯 𑀦𑀬𑁄.

𑀓𑀼𑀮𑀦𑁆𑀢𑀺 𑀓𑀼𑀮𑀕𑁆𑀕𑀳𑀡𑁂𑀦 𑀓𑀼𑀮𑀫𑀦𑀼𑀲𑁆𑀲𑀸𑀦𑀁 𑀕𑀳𑀡𑀁 𑀕𑀸𑀫𑀕𑁆𑀕𑀳𑀡𑁂𑀦 𑀕𑀸𑀫𑀯𑀸𑀲𑀻𑀦𑀁 𑀯𑀺𑀬. 𑀉𑀧𑀝𑁆𑀞𑀸𑀓𑀓𑀼𑀮𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀜𑀸𑀢𑀺𑀓𑀼𑀮𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀤𑁆𑀤𑁂𑀲𑀢𑁆𑀣𑀦𑁆𑀢𑀺 𑀉𑀤𑁆𑀤𑀺𑀲𑀸𑀧𑀦𑀢𑁆𑀣𑀁, 𑀧𑀸𑀞𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀲𑀚𑁆𑀛𑀸𑀬𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀳𑀸𑀭𑁂𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀳𑀸𑀭𑀦𑁆𑀢𑀺 𑀢𑀁 𑀓𑁄𑀭𑀡𑁆𑀟𑀓𑀯𑀺𑀳𑀸𑀭𑀁.

𑀉𑀧𑀕𑀢𑁄𑀢𑀺 ¶ 𑀯𑀲𑁆𑀲𑀁 𑀉𑀧𑀕𑀢𑁄. 𑀲𑀤𑀸𑀢𑀺 𑀕𑀢𑀓𑀸𑀮𑀢𑁄 𑀧𑀪𑀼𑀢𑀺 𑀯𑀺𑀲𑁂𑀲𑀢𑁄 𑀧𑀯𑀸𑀭𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀤𑀸 𑀤𑀺𑀯𑀲𑁂 𑀤𑀺𑀯𑀲𑁂. 𑀧𑀭𑀺𑀤𑁂𑀯𑀫𑀸𑀦𑀸𑀢𑀺 𑀢𑀁𑀢𑀁𑀯𑀺𑀮𑀧𑀦𑀯𑀲𑁂𑀦 𑀯𑀺𑀯𑀺𑀥𑀁 𑀧𑀭𑀺𑀤𑁂𑀯𑀦𑁆𑀢𑀻. 𑀲𑀩𑁆𑀩𑀁 𑀧𑀯𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑀸 𑀢𑀢𑁆𑀣 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀸 𑀲𑀫𑀸𑀕𑀫𑀧𑀭𑀺𑀬𑁄𑀲𑀸𑀦𑀁 𑀤𑀳𑀭𑀲𑁆𑀲 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 ¶ ‘‘𑀧𑀲𑁆𑀲 𑀇𑀫’’𑀦𑁆𑀢𑀺 𑀫𑀼𑀔𑀧𑀝𑀺𑀕𑁆𑀕𑀸𑀳𑀓𑀁 𑀓𑀢𑁆𑀯𑀸. 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀦𑁆𑀢𑀺 𑀤𑀲𑀓𑀣𑀸𑀯𑀢𑁆𑀣𑀼𑀓𑀺𑀢𑁆𑀢𑀦𑀧𑀼𑀩𑁆𑀩𑀺𑀓𑀁 𑀭𑀣𑀯𑀺𑀦𑀻𑀢𑀽𑀧𑀫𑀸𑀳𑀺 𑀯𑀺𑀪𑀸𑀯𑀺𑀢𑀁 𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁫𑁨) 𑀆𑀕𑀢𑀁 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀁. 𑀦𑀸𑀮𑀓𑀧𑀝𑀺𑀧𑀤𑀦𑁆𑀢𑀺 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁭𑁦𑁬) 𑀲𑀢𑁆𑀣𑀸𑀭𑀸 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀤𑁂𑀲𑀺𑀢𑀧𑀝𑀺𑀧𑀤𑀁. 𑀢𑀼𑀯𑀝𑀓𑀧𑀝𑀺𑀧𑀤𑀦𑁆𑀢𑀺 ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁯𑁨𑁨) 𑀪𑀕𑀯𑀢𑀸 𑀤𑁂𑀲𑀺𑀢𑀧𑀝𑀺𑀧𑀤𑀁. 𑀢𑀢𑁆𑀣 𑀳𑀺 𑀬𑀣𑀸𑀓𑁆𑀓𑀫𑀁 𑁋

‘‘𑀦 𑀫𑀼𑀦𑀻 𑀕𑀸𑀫𑀫𑀸𑀕𑀫𑁆𑀫, 𑀓𑀼𑀮𑁂𑀲𑀼 𑀲𑀳𑀲𑀸 𑀘𑀭𑁂;

𑀖𑀸𑀲𑁂𑀲𑀦𑀁 𑀙𑀺𑀦𑁆𑀦𑀓𑀣𑁄, 𑀦 𑀯𑀸𑀘𑀁 𑀧𑀬𑀼𑀢𑀁 𑀪𑀡𑁂’’. (𑀲𑀼. 𑀦𑀺. 𑁭𑁧𑁬);

‘‘𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬, 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸’’𑀢𑀺. (𑀲𑀼. 𑀦𑀺. 𑁯𑁩𑁫) 𑁋

𑀏𑀯𑀫𑀸𑀤𑀺𑀓𑀸 𑀧𑀭𑀫𑀧𑁆𑀧𑀺𑀘𑁆𑀙𑀓𑀣𑀸 𑀆𑀕𑀢𑀸. 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀢𑀸𑀤𑀻𑀧𑀓𑀦𑁆𑀢𑀺 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀦𑁆𑀢𑁄𑀲𑀲𑁆𑀲, 𑀪𑀸𑀯𑀦𑀸𑀭𑀸𑀫𑀢𑀸𑀬 𑀘 𑀧𑀓𑀸𑀲𑀓𑀁.

𑀮𑀩𑁆𑀪𑀢𑀻𑀢𑀺 𑀮𑀸𑀪𑁄. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸’’𑀢𑀺. 𑀫𑀳𑀸𑀧𑀭𑀺𑀯𑀸𑀭𑁂𑀢𑀺 𑀯𑀺𑀧𑀼𑀮𑀧𑀭𑀺𑀯𑀸𑀭𑁂. 𑀧𑀺𑀡𑁆𑀟𑀧𑀸𑀢𑀁 𑀢𑀸𑀯 𑀤𑁂𑀦𑁆𑀢𑀸 𑀩𑀼𑀤𑁆𑀥𑀧𑀽𑀚𑀸𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀺 𑀓𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀣𑀸 𑀘𑀻𑀯𑀭𑀸𑀤𑀺𑀤𑀸𑀦𑁂𑀧𑀺. 𑀩𑀸𑀳𑀼𑀮𑁆𑀮𑀺𑀓𑀧𑀺𑀡𑁆𑀟𑀧𑀸𑀢𑀺𑀓𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀸. 𑀯𑀤𑀦𑁆𑀢𑀻𑀢𑀺 𑀧𑀼𑀭𑀺𑀫𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀦𑀓𑀸𑀮𑁂 𑀬𑀣𑀸𑀲𑀼𑀢𑀁 𑀯𑀤𑀦𑁆𑀢𑀺. 𑀦𑀺𑀘𑁆𑀘𑀩𑁆𑀬𑀸𑀯𑀝𑁄 𑀉𑀧𑀸𑀲𑀓𑀸𑀤𑀻𑀦𑀁 𑀲𑀗𑁆𑀕𑀡𑁆𑀳𑀦𑁂.

𑀢𑀲𑁆𑀲𑀸𑀢𑀺 𑀕𑀡𑀲𑁆𑀲. 𑀲𑁄𑀢𑀺 𑀕𑀡𑀧𑀮𑀺𑀩𑁄𑀥𑁄. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀕𑀡𑀯𑀸𑀘𑀓𑀲𑁆𑀲 𑀧𑀭𑀺𑀬𑁂𑀲𑀦𑀫𑁆𑀧𑀺 𑀮𑀳𑀼𑀓𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑁄𑀚𑀦𑀢𑁄 𑀧𑀭𑀁 𑀅𑀕𑀦𑁆𑀢𑁆𑀯𑀸’’𑀢𑀺. 𑀅𑀢𑁆𑀢𑀦𑁄 𑀓𑀫𑁆𑀫𑀦𑁆𑀢𑀺 𑀲𑀫𑀡𑀥𑀫𑁆𑀫𑀫𑀸𑀳.

𑀓𑀢𑀸𑀓𑀢𑁂𑀢𑀺 ¶ 𑀓𑀢𑁂 𑀘 𑀅𑀓𑀢𑁂 𑀘 𑀓𑀫𑁆𑀫𑁂 𑀚𑀸𑀦𑀦𑀯𑀲𑁂𑀦 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀢𑀩𑁆𑀩𑀁, 𑀓𑀢𑀸𑀓𑀢𑁂𑀢𑀺 𑀯𑀸 𑀅𑀧𑁆𑀧𑀓𑁂 𑀘 𑀫𑀳𑀦𑁆𑀢𑁂 𑀘 𑀓𑀢𑁂, 𑀬𑀣𑀸 ‘‘𑀨𑀮𑀸𑀨𑀮𑁂’’𑀢𑀺. 𑀲𑀘𑁂 𑀩𑀳𑀼𑀁 𑀅𑀯𑀲𑀺𑀝𑁆𑀞𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀸𑀭𑀳𑀸𑀭𑀸 𑀲𑀗𑁆𑀖𑀓𑀺𑀘𑁆𑀘𑀧𑀭𑀺𑀡𑀸𑀬𑀓𑀸.

𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄𑀢𑀺 ¶ 𑀲𑀻𑀳𑀴𑀤𑀻𑀧𑁂 𑀓𑀺𑀭 𑀓𑀼𑀮𑀤𑀸𑀭𑀓𑀸𑀦𑀁 𑀧𑀩𑁆𑀩𑀚𑁆𑀚𑀸 𑀆𑀯𑀸𑀳𑀯𑀺𑀯𑀸𑀳𑀲𑀤𑀺𑀲𑀸, 𑀢𑀲𑁆𑀫𑀸 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀤𑀺𑀯𑀲𑀁 𑀅𑀢𑀺𑀓𑁆𑀓𑀫𑁂𑀢𑀼𑀁 𑀦 𑀲𑀓𑁆𑀓𑀸. ‘‘𑀲𑀘𑁂 𑀢𑀁 𑀅𑀮𑀪𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀅𑀥𑀺𑀯𑀸𑀲𑁂𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀧𑀦𑁂𑀦 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀧𑀦 ‘‘𑀲𑀘𑁂 𑀢𑀁 𑀅𑀮𑀪𑀦𑁆𑀢𑁄 𑀲𑀓𑁆𑀓𑁄𑀢𑀺 𑀅𑀥𑀺𑀯𑀸𑀲𑁂𑀢𑀼𑀁, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑁄𑀯 𑀓𑀸𑀢𑀩𑁆𑀩𑁄’’𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀲𑀗𑁆𑀕𑀳𑀡𑁂𑀦 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀢𑀣𑀸𑀢𑀺 𑀬𑀣𑀸 𑀉𑀧𑀚𑁆𑀛𑀸𑀬𑁄 𑀕𑀺𑀮𑀸𑀦𑁄 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀢𑀣𑀸 𑀉𑀧𑀲𑀫𑁆𑀧𑀸𑀤𑀺𑀢𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀢𑁆𑀢𑀦𑁄 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑀺𑀢𑁄.

𑀬𑁄 𑀓𑁄𑀘𑀺 𑀭𑁄𑀕𑁄𑀢𑀺 𑀫𑀽𑀮𑀪𑀽𑀢𑁄, 𑀅𑀦𑀼𑀩𑀦𑁆𑀥𑁄 𑀯𑀸 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑁄. 𑀅𑀦𑀫𑀢𑀕𑁆𑀕𑁂𑀢𑀺 𑀅𑀦𑀼 𑀅𑀦𑀼 𑀅𑀫𑀢𑀕𑁆𑀕𑁂 𑀅𑀦𑀸𑀤𑀺𑀫𑀢𑀺.

‘‘𑀕𑀦𑁆𑀣𑁄’’𑀢𑀺 𑀇𑀫𑀺𑀦𑀸 𑀕𑀦𑁆𑀣𑀧𑀮𑀺𑀩𑁄𑀥𑁄 𑀇𑀥 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀭𑀺𑀬𑀢𑁆𑀢𑀺𑀳𑀭𑀡’’𑀦𑁆𑀢𑀺. 𑀲𑀚𑁆𑀛𑀸𑀬𑀸𑀤𑀻𑀳𑀻𑀢𑀺 𑀲𑀚𑁆𑀛𑀸𑀬𑀥𑀸𑀭𑀡𑀧𑀭𑀺𑀘𑀬𑀧𑀼𑀘𑁆𑀙𑀸𑀤𑀻𑀳𑀺. 𑀇𑀢𑀭𑀲𑁆𑀲𑀸𑀢𑀺 𑀅𑀩𑁆𑀬𑀸𑀯𑀝𑀲𑁆𑀲. 𑀬𑀲𑁆𑀲 𑀕𑀦𑁆𑀣𑀥𑀼𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀞𑀺𑀢𑀲𑁆𑀲𑀸𑀧𑀺 𑀕𑀦𑁆𑀣𑁄 𑀯𑀢𑁆𑀢𑀢𑁂𑀯, 𑀦 𑀢𑀲𑁆𑀲 𑀕𑀦𑁆𑀣𑁄 𑀧𑀮𑀺𑀩𑁄𑀥𑁄. 𑀬𑀣𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀢𑁆𑀣𑁂𑀭𑀸𑀦𑀁, 𑀦𑀸𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀕𑀦𑁆𑀣𑀧𑀲𑀼𑀢𑀲𑁆𑀲. 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄 𑀆𑀕𑀘𑁆𑀙𑀢𑀺, 𑀲𑀼𑀢𑁆𑀢𑀧𑀤𑁂𑀲𑀸𑀦𑀁 𑀯𑀸𑀭𑀸𑀦𑀜𑁆𑀘 𑀲𑀤𑀺𑀲𑀢𑀸𑀬 𑀩𑁆𑀬𑀸𑀫𑀼𑀬𑁆𑀳𑀦𑀢𑁄. 𑀧𑀼𑀦 𑀦 𑀑𑀮𑁄𑀓𑁂𑀲𑁆𑀲𑀸𑀫𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀦𑁆𑀣𑀥𑀼𑀭𑀁 𑀯𑀺𑀲𑁆𑀲𑀚𑁆𑀚𑁂𑀫𑀻𑀢𑀺 𑀅𑀢𑁆𑀣𑁄.

𑀕𑀸𑀫𑀯𑀸𑀲𑀺𑀓𑀢𑁆𑀣𑁂𑀭𑁂𑀳𑀻𑀢𑀺 𑀅𑀦𑀼𑀭𑀸𑀥𑀧𑀼𑀭𑀯𑀸𑀲𑀻𑀳𑀺. 𑀅𑀦𑀼𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀭𑀺𑀘𑀬𑀁 𑀅𑀓𑀢𑁆𑀯𑀸. 𑀧𑀜𑁆𑀘𑀦𑀺𑀓𑀸𑀬𑀫𑀡𑁆𑀟𑀮𑁂𑀢𑀺 𑀤𑀻𑀖𑀸𑀕𑀫𑀸𑀤𑀺𑀓𑁂 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀲𑀺𑀓𑁆𑀔𑀺𑀢𑀧𑀭𑀺𑀲𑀸𑀬. 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀯𑀡𑁆𑀡𑀬𑀺𑀲𑁆𑀲𑀸𑀫𑀺. 𑀲𑀼𑀯𑀡𑁆𑀡𑀪𑁂𑀭𑀺𑀦𑁆𑀢𑀺 𑀲𑁂𑀝𑁆𑀞𑀪𑁂𑀭𑀺𑀁. 𑀓𑀢𑀫𑀸𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄𑀢𑀺 𑀓𑀢𑀫𑁂𑀲𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄, 𑀓𑁂𑀦 𑀧𑀭𑀺𑀯𑀢𑁆𑀢𑀻𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑀫𑀕𑁆𑀕𑁄𑀢𑀺 𑀆𑀘𑀭𑀺𑀬𑀸𑀦𑀁 𑀓𑀣𑀸𑀫𑀕𑁆𑀕𑁄. 𑀅𑀢𑁆𑀢𑀦𑁄 𑀆𑀘𑀭𑀺𑀬𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀓𑀣𑁂𑀢𑀼𑀁 𑀬𑀼𑀢𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁. 𑀲𑀼𑀯𑀺𑀦𑀺𑀘𑁆𑀙𑀺𑀢𑀸 𑀲𑀩𑁆𑀩𑀸 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺 ¶ 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀓𑁄, 𑀢𑁂𑀧𑀺𑀝𑀓𑁄𑀢𑀺 𑀅𑀢𑁆𑀣𑁄. 𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀢𑀝𑁆𑀝𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸. 𑀕𑀢𑀓𑀲𑁆𑀲𑀸𑀢𑀺 𑀧𑀝𑀺𑀧𑀢𑁆𑀢𑀺𑀕𑀫𑀦𑁂𑀦 𑀕𑀢𑀲𑁆𑀲 𑀤𑀺𑀝𑁆𑀞𑀲𑀘𑁆𑀘𑀲𑁆𑀲. 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸𑀢𑀺 𑀆𑀘𑀭𑀺𑀬𑀲𑁆𑀲 𑀅𑀧𑀘𑀺𑀢𑀺𑀤𑀲𑁆𑀲𑀦𑀢𑁆𑀣𑀁 ¶ 𑀧𑀭𑀺𑀫𑀡𑁆𑀟𑀮𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸. 𑀲𑀸𑀞𑁂𑀬𑁆𑀬𑀸𑀪𑀸𑀯𑀢𑁄 𑀉𑀚𑀼. 𑀓𑀸𑀭𑀡𑀸𑀓𑀸𑀭𑀡𑀲𑁆𑀲 𑀆𑀚𑀸𑀦𑀦𑀢𑁄 𑀆𑀚𑀸𑀦𑀻𑀬𑁄.

𑀧𑁄𑀣𑀼𑀚𑁆𑀚𑀦𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑁂 𑀪𑀯𑀸. 𑀤𑀼𑀧𑁆𑀧𑀭𑀺𑀳𑀸𑀭𑀸 𑀩𑀳𑀼𑀧𑀭𑀺𑀲𑁆𑀲𑀬𑀢𑀸𑀬. 𑀢𑀣𑀸 𑀳𑀺𑀲𑁆𑀲𑀸 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄, 𑀢𑀭𑀼𑀡𑀲𑀲𑁆𑀲𑀜𑁆𑀘 𑀦𑀺𑀤𑀲𑁆𑀲𑀺𑀢𑀁. 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄 𑀲𑀫𑀣𑀬𑀸𑀦𑀺𑀓𑀲𑁆𑀲, 𑀦 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀛𑀸𑀦𑀮𑀸𑀪𑀻 𑀲𑀫𑀣𑀬𑀸𑀦𑀺𑀓𑁄𑀯 𑀳𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀼𑀔𑀢𑁄. 𑀇𑀢𑀭𑁂𑀦𑀸𑀢𑀺 𑀲𑀫𑀣𑀢𑁆𑀣𑀺𑀓𑁂𑀦. 𑀅𑀯𑀲𑁂𑀲𑀸 𑀦𑀯 𑀧𑀮𑀺𑀩𑁄𑀥𑀸.

𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀯𑀡𑁆𑀡𑀦𑀸

𑁪𑁨. 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑀼𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄. 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀲𑀳𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁. 𑀫𑀼𑀤𑀼𑀘𑀺𑀢𑁆𑀢𑀢𑀦𑁆𑀢𑀺 𑀅𑀢𑁆𑀢𑀦𑀺 𑀫𑀼𑀤𑀼𑀘𑀺𑀢𑁆𑀢𑀢𑀁 𑀚𑀦𑁂𑀢𑀺, 𑀅𑀬𑀜𑁆𑀘 𑀲𑀳𑀯𑀸𑀲𑀻𑀦𑀁 𑀘𑀺𑀢𑁆𑀢𑀫𑀤𑁆𑀤𑀯𑀚𑀦𑀦𑀸𑀤𑀺𑀅𑀢𑁆𑀣𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀫𑁂𑀢𑁆𑀢𑀸𑀦𑀺𑀲𑀁𑀲𑀲𑀼𑀢𑁆𑀢𑁂𑀦 (𑀅. 𑀦𑀺. 𑁧𑁧.𑁧𑁫; 𑀧𑀝𑀺. 𑀫. 𑁨.𑁨𑁨; 𑀫𑀺. 𑀧. 𑁪.𑁪.𑁬) 𑀤𑀻𑀧𑁂𑀢𑀩𑁆𑀩𑁄. 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁. 𑀤𑀺𑀩𑁆𑀩𑀸𑀦𑀺𑀧𑀺 𑀆𑀭𑀫𑁆𑀫𑀡𑀸𑀦𑀺 𑀧𑀕𑁂𑀯 𑀇𑀢𑀭𑀸𑀦𑀺. 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑁆𑀫𑀺𑀁 𑀲𑀫𑀡𑀓𑀭𑀡𑀻𑀬𑁂, 𑀲𑀩𑁆𑀩𑀲𑁆𑀫𑀺𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂. 𑀧𑀼𑀩𑁆𑀩𑀸𑀲𑁂𑀯𑀦𑀯𑀲𑁂𑀦 𑀅𑀢𑁆𑀣𑀬𑀺𑀢𑀩𑁆𑀩𑀁. 𑀬𑁄𑀕𑀲𑁆𑀲 𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁 𑀬𑁄𑀕𑀸𑀦𑀼𑀬𑁄𑀕𑁄, 𑀢𑀤𑁂𑀯 𑀓𑀭𑀡𑀻𑀬𑀝𑁆𑀞𑁂𑀦 𑀓𑀫𑁆𑀫𑀁, 𑀢𑀲𑁆𑀲 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀞𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀳𑁂𑀢𑀼.

𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸𑀢𑀺 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀬 𑀏𑀓𑀤𑀸𑀯 𑀅𑀦𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀧𑀭𑀺𑀳𑀭𑀡𑀻𑀬𑀢𑁆𑀢𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸. 𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀧𑀺𑀬𑀪𑀸𑀯𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑀁. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁, 𑀓𑀫𑁆𑀫𑀨𑀮𑀜𑁆𑀘, 𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀳𑁂𑀢𑀼𑀪𑀽𑀢𑀁 𑀲𑀢𑁆𑀢𑁂𑀲𑀼 𑀳𑀺𑀢𑁂𑀲𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀕𑀭𑀼 𑀪𑀸𑀯𑀦𑀻𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀻 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄, 𑀲𑀼𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀸𑀦𑀁 𑀓𑀣𑀸𑀦𑀁 𑀓𑀢𑁆𑀢𑀸 𑀳𑁄𑀢𑀺, 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 ¶ 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄, 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁, 𑀲𑀢𑀺𑀲𑀫𑁆𑀧𑀢𑁆𑀢𑀺𑀬𑀸 ¶ 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀲𑀫𑀸𑀳𑀺𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀧𑀭𑀻𑀢𑀁 𑀧𑀚𑀸𑀦𑀸𑀢𑀺. 𑀲𑁄 𑀲𑀢𑀺𑀬𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀫𑀸𑀦𑁄 𑀧𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀲𑀫𑀸𑀥𑀺𑀦𑀸 𑀢𑀢𑁆𑀣 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀻𑀭𑀺𑀬𑁂𑀦 𑀲𑀢𑁆𑀢𑁂 𑀅𑀳𑀺𑀢𑀁 𑀦𑀺𑀲𑁂𑀥𑁂𑀢𑁆𑀯𑀸 𑀳𑀺𑀢𑁂 𑀦𑀺𑀬𑁄𑀚𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀺𑀬𑁄…𑀧𑁂… 𑀦𑀺𑀬𑁄𑀚𑀓𑁄𑀢𑀺 𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺.

𑀢𑀁 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀫𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀭𑀓𑀪𑀸𑀯𑀁 𑀬𑁄𑀕𑀓𑀫𑁆𑀫𑀲𑁆𑀲. 𑀧𑀓𑀸𑀲𑁂𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑁂𑀦 𑀲𑀫𑀼𑀢𑁆𑀢𑁂𑀚𑀦𑀸𑀬, 𑀲𑀫𑁆𑀧𑀳𑀁𑀲𑀦𑀸𑀬 𑀘, 𑀦𑀦𑀼 𑀓𑀣𑁂𑀲𑀺 𑀧𑀯𑁂𑀡𑀺𑀧𑀸𑀮𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀭𑀽𑀧𑁄𑀢𑀺 𑀧𑁂𑀲𑀮𑁄 𑀳𑀼𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑁄. 𑀢𑀦𑁆𑀢𑀺𑀥𑀭𑁄𑀢𑀺 𑀲𑀼𑀢𑁆𑀢𑀥𑀭𑁄 𑀢𑀢𑁆𑀣 𑀓𑁂𑀳𑀺𑀘𑀺𑀧𑀺 𑀅𑀲𑀁𑀳𑀻𑀭𑁄. 𑀯𑀁𑀲𑀸𑀦𑀼𑀭𑀓𑁆𑀔𑀓𑁄𑀢𑀺 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀯𑀁𑀲𑀲𑁆𑀲 𑀅𑀦𑀼𑀭𑀓𑁆𑀔𑀓𑁄. 𑀧𑀯𑁂𑀡𑀺𑀧𑀸𑀮𑀓𑁄𑀢𑀺 𑀧𑀯𑁂𑀡𑀺𑀬𑀸 𑀆𑀘𑀭𑀺𑀬𑀼𑀕𑁆𑀕𑀳𑀡𑀲𑁆𑀲 𑀅𑀦𑀼𑀧𑀸𑀮𑀓𑁄. 𑀆𑀘𑀭𑀺𑀬𑀫𑀢𑀺𑀓𑁄𑀢𑀺 𑀆𑀘𑀭𑀺𑀬𑀫𑀢𑀺𑀬𑀁 𑀦𑀺𑀬𑀼𑀢𑁆𑀢𑁄 𑀢𑀲𑁆𑀲𑀸 𑀅𑀦𑀢𑀺𑀯𑀢𑁆𑀢𑀦𑀢𑁄. 𑀦 𑀅𑀢𑁆𑀢𑀦𑁄𑀫𑀢𑀺𑀁 𑀧𑀓𑀸𑀲𑁂𑀢𑀺 𑀓𑀣𑁂𑀢𑀻𑀢𑀺 𑀦 𑀅𑀢𑁆𑀢𑀦𑁄𑀫𑀢𑀺𑀓𑁄, 𑀅𑀢𑁆𑀢𑀦𑁄 𑀫𑀢𑀺𑀁 𑀧𑀕𑁆𑀕𑀬𑁆𑀳 𑀯𑀢𑁆𑀢𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀔𑀻𑀡𑀸𑀲𑀯𑀸𑀤𑀬𑁄’’𑀢𑀺𑀆𑀤𑀺 𑀏𑀓𑀘𑁆𑀘𑀔𑀻𑀡𑀸𑀲𑀯𑀢𑁄 𑀩𑀳𑀼𑀲𑁆𑀲𑀼𑀢𑁄𑀯 𑀓𑀫𑁆𑀫𑀝𑁆𑀞𑀸𑀦𑀤𑀸𑀦𑁂 𑀲𑁂𑀬𑁆𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀔𑀻𑀡𑀸𑀲𑀯𑀸𑀤𑀬𑁄𑀢𑀺 ‘‘𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀼𑀓𑀸𑀫𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀔𑀻𑀡𑀸𑀲𑀯𑀸𑀤𑀺𑀓𑀸. 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀦𑀁 𑀯𑀺𑀲𑁄𑀥𑀺𑀢𑀢𑁆𑀢𑀸𑀢𑀺 𑀉𑀕𑁆𑀕𑀳𑁂𑀢𑀩𑁆𑀩𑀢𑁄 ‘‘𑀉𑀕𑁆𑀕𑀳𑁄’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀓𑀫𑁆𑀫𑀝𑁆𑀞𑀸𑀦𑀼𑀧𑀓𑀸𑀭𑀸𑀬 𑀧𑀸𑀴𑀺𑀬𑀸, 𑀢𑀤𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀦𑀢𑁄 ‘‘𑀧𑀭𑀺𑀧𑀼𑀘𑁆𑀙𑀸’’𑀢𑀺 𑀮𑀤𑁆𑀥𑀲𑀫𑀜𑁆𑀜𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀘 𑀯𑀺𑀲𑁂𑀲𑀢𑁄 𑀲𑁄𑀥𑀺𑀢𑀢𑁆𑀢𑀸 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀕𑀳𑀺𑀢𑀢𑁆𑀢𑀸. 𑀇𑀢𑁄 𑀘𑀺𑀢𑁄 𑀘 𑀲𑀼𑀢𑁆𑀢𑀜𑁆𑀘 𑀓𑀸𑀭𑀡𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀧𑀜𑁆𑀘𑀲𑀼𑀧𑀺 𑀦𑀺𑀓𑀸𑀬𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀦𑀼𑀭𑀽𑀧𑀁 𑀲𑀼𑀢𑁆𑀢𑀧𑀤𑀜𑁆𑀘𑁂𑀯 𑀲𑀼𑀢𑁆𑀢𑀸𑀦𑀼𑀕𑀢𑀁 𑀬𑀼𑀢𑁆𑀢𑀺𑀜𑁆𑀘 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑁆𑀯𑀸. 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀬𑁄𑀚𑁂𑀢𑁆𑀯𑀸𑀢𑀺 𑀬𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀢𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀁 𑀬𑀼𑀢𑁆𑀢𑀺𑀁 𑀫𑀕𑁆𑀕𑀦𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀫𑀸𑀤𑀸𑀬 𑀯𑀸 𑀲𑀫𑁆𑀫𑀤𑁂𑀯 𑀳𑀤𑀬𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀺𑀁 𑀫𑀳𑀸𑀫𑀕𑁆𑀕𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄.

𑀲𑀩𑁆𑀩𑀢𑁆𑀣𑀸𑀢𑀺 ¶ 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀭𑁂. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑁂𑀦𑀸𑀢𑀺 𑀧𑀯𑀺𑀝𑁆𑀞𑀓𑀸𑀮𑁂 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀦𑀺𑀓𑁆𑀔𑀫𑀦𑀓𑀸𑀮𑁂 𑀕𑀫𑀺𑀓𑀯𑀢𑁆𑀢𑀦𑁆𑀢𑀺 𑀬𑀣𑀸𑀭𑀳𑀁 𑀢𑀁 𑀢𑀁 𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀦. 𑀲𑀩𑁆𑀩𑀧𑀸𑀭𑀺𑀳𑀸𑀭𑀺𑀬𑀢𑁂𑀮𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀗𑁆𑀕𑀸𑀦𑀁 ¶ , 𑀲𑀩𑁆𑀩𑁂𑀲𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀧𑀭𑀺𑀳𑀭𑀺𑀢𑀩𑁆𑀩𑀢𑁂𑀮𑀁. 𑀞𑀧𑁂𑀫𑀻𑀢𑀺 𑀅𑀦𑀼𑀚𑀸𑀦𑀸𑀧𑀦𑀁. 𑀬𑀁 𑀢𑀁 𑀲𑀫𑁆𑀫𑀸𑀯𑀢𑁆𑀢𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀤𑀺𑀯𑀲𑀁 𑀲𑀸𑀬𑀁 𑀯𑀺𑀲𑁆𑀲𑀚𑁆𑀚𑀺𑀢𑁂𑀦𑀸𑀧𑀻𑀢𑀺 𑀬𑁄𑀚𑀦𑀸. 𑀆𑀭𑁄𑀘𑁂𑀢𑀩𑁆𑀩𑀁 𑀆𑀕𑀫𑀦𑀓𑀸𑀭𑀡𑀁. 𑀲𑀧𑁆𑀧𑀸𑀬𑀯𑁂𑀮𑀸 𑀲𑀭𑀻𑀭𑀘𑀺𑀢𑁆𑀢𑀸𑀦𑀁 𑀓𑀮𑁆𑀮𑀲𑀫𑀬𑁄.

𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁩. 𑀲𑀦𑁆𑀢𑀸𑀦𑁂 𑀭𑀸𑀕𑀲𑁆𑀲 𑀉𑀲𑁆𑀲𑀦𑁆𑀦𑀪𑀸𑀯𑁂𑀦 𑀘𑀭𑀡𑀁 𑀧𑀯𑀢𑁆𑀢𑀺 𑀭𑀸𑀕𑀘𑀭𑀺𑀬𑀸, 𑀲𑀸 𑀲𑀲𑁆𑀲𑀢𑀸𑀲𑀬𑀸𑀤𑀬𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀤𑁄𑀲𑀘𑀭𑀺𑀬𑀸𑀤𑀬𑁄. 𑀲𑀁𑀲𑀕𑁆𑀕𑁄 𑀲𑀫𑁆𑀧𑀬𑁄𑀕𑀸𑀭𑀳𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀬𑀣𑀸 ‘‘𑀭𑀸𑀕𑀫𑁄𑀳𑀘𑀭𑀺𑀬𑀸 𑀤𑁄𑀲𑀫𑁄𑀳𑀘𑀭𑀺𑀬𑀸’’𑀢𑀺𑀆𑀤𑀺. 𑀲𑀦𑁆𑀦𑀺𑀧𑀸𑀢𑁄 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀲𑁂𑀦, 𑀬𑀣𑀸 ‘‘𑀭𑀸𑀕𑀤𑁄𑀲𑀘𑀭𑀺𑀬𑀸 𑀭𑀸𑀕𑀤𑁄𑀲𑀫𑁄𑀳𑀘𑀭𑀺𑀬𑀸’’𑀢𑀺𑀆𑀤𑀺. 𑀇𑀫𑀸 𑀏𑀯 𑀳𑀺 𑀲𑀦𑁆𑀥𑀸𑀬 ‘‘𑀅𑀧𑀭𑀸𑀧𑀺 𑀘𑀢𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀢𑀺 𑀬𑀣𑀸 𑀭𑀸𑀕𑀸𑀤𑀻𑀦𑀁, 𑀢𑀣𑀸 𑀲𑀤𑁆𑀥𑀸𑀤𑀻𑀦𑀁 𑀲𑀁𑀲𑀕𑁆𑀕𑀲𑀦𑁆𑀦𑀺𑀧𑀸𑀢𑀯𑀲𑁂𑀦 𑀲𑀤𑁆𑀥𑀸𑀩𑀼𑀤𑁆𑀥𑀺𑀘𑀭𑀺𑀬𑀸 𑀲𑀤𑁆𑀥𑀸𑀯𑀺𑀢𑀓𑁆𑀓𑀘𑀭𑀺𑀬𑀸 𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀬𑀸 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀬𑀸𑀢𑀺. 𑀇𑀫𑀸 𑀅𑀧𑀭𑀸𑀧𑀺 𑀘𑀢𑀲𑁆𑀲𑁄. 𑀏𑀯𑀦𑁆𑀢𑀺 𑀲𑀁𑀲𑀕𑁆𑀕𑀲𑀦𑁆𑀦𑀺𑀧𑀸𑀢𑀯𑀲𑁂𑀦. 𑀲𑀁𑀲𑀕𑁆𑀕𑀦𑁆𑀢𑀺 𑀲𑀁𑀲𑀚𑁆𑀚𑀦𑀁 𑀫𑀺𑀲𑁆𑀲𑀻𑀓𑀭𑀡𑀁 ‘‘𑀭𑀸𑀕𑀲𑀤𑁆𑀥𑀸𑀘𑀭𑀺𑀬𑀸 𑀤𑁄𑀲𑀲𑀤𑁆𑀥𑀸𑀘𑀭𑀺𑀬𑀸’’𑀢𑀺𑀆𑀤𑀺𑀦𑀸. 𑀅𑀦𑁂𑀓𑀸𑀢𑀺 𑀢𑁂𑀲𑀝𑁆𑀞𑀺, 𑀢𑀢𑁄 𑀅𑀢𑀺𑀭𑁂𑀓𑀸𑀧𑀺 𑀯𑀸, 𑀢𑀸 𑀧𑀦 𑀅𑀲𑀫𑁆𑀫𑁄𑀳𑀦𑁆𑀢𑁂𑀦 𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀝𑀻𑀓𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑀺𑀢𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀓𑀢𑀻’’𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬𑀁 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀢𑀸𑀦𑁂 𑀘𑀭𑀺𑀬𑀸𑀬 𑀲𑀪𑀸𑀯𑀪𑀽𑀢𑀢𑀁 𑀤𑀲𑁆𑀲𑁂𑀢𑀺. 𑀉𑀲𑁆𑀲𑀦𑁆𑀦𑀢𑀸 𑀅𑀜𑁆𑀜𑀥𑀫𑁆𑀫𑁂𑀳𑀺 𑀭𑀸𑀕𑀸𑀤𑀻𑀦𑀁 𑀅𑀥𑀺𑀓𑀢𑀸, 𑀬𑀢𑁄 𑀭𑀸𑀕𑀘𑀭𑀺𑀬𑀸𑀤𑀻𑀦𑀁 𑀧𑀘𑁆𑀘𑀬𑀲𑀫𑀯𑀸𑀬𑁂 𑀭𑀸𑀕𑀸𑀤𑀬𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀪𑀺𑀡𑁆𑀳𑀜𑁆𑀘 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀲𑀁 𑀯𑀲𑁂𑀦𑀸𑀢𑀺 𑀙𑀦𑁆𑀦𑀁 𑀫𑀽𑀮𑀘𑀭𑀺𑀬𑀸𑀦𑀁 𑀯𑀲𑁂𑀦 𑀙𑀴𑁂𑀯 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀅𑀜𑁆𑀜𑀣𑀸 𑀅𑀦𑁂𑀓𑀧𑀼𑀕𑁆𑀕𑀮𑀸 𑀲𑀺𑀬𑀼𑀁, 𑀢𑀣𑀸 𑀘 𑀲𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺 𑀘 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀤𑁆𑀥𑀸 𑀩𑀮𑀯𑀢𑀻 𑀳𑁄𑀢𑀺 𑀭𑀸𑀕𑀼𑀲𑁆𑀲𑀦𑁆𑀦𑁂 𑀲𑀦𑁆𑀢𑀸𑀦𑁂 𑀢𑀤𑀦𑀼𑀕𑀼𑀡𑀲𑁆𑀲 𑀥𑀫𑁆𑀫𑀲𑁆𑀲 𑀦𑀺𑀬𑁄𑀕𑀢𑁄 𑀅𑀥𑀺𑀓𑀪𑀸𑀯𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀭𑀸𑀕𑀲𑁆𑀲 𑀆𑀲𑀦𑁆𑀦𑀕𑀼𑀡𑀢𑁆𑀢𑀸’’𑀢𑀺, 𑀲𑀺𑀦𑁂𑀳𑀧𑀭𑀺𑀬𑁂𑀲𑀦𑀸𑀧𑀭𑀺𑀘𑁆𑀘𑀚𑀦𑁂𑀳𑀺 𑀲𑀪𑀸𑀕𑀥𑀫𑁆𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀕𑁄 𑀳𑀺 𑀤𑀽𑀭𑁂𑀧𑀺 𑀆𑀲𑀦𑁆𑀦𑁂𑀬𑁂𑀯𑀸𑀢𑀺 𑀲𑀪𑀸𑀕𑀢𑀸𑀮𑀓𑁆𑀔𑀡𑀫𑀺𑀥 𑀆𑀲𑀦𑁆𑀦𑀕𑁆𑀕𑀳𑀡𑀁. 𑀢𑀢𑁆𑀣 𑀲𑀤𑁆𑀥𑀸𑀬 𑀲𑀺𑀦𑀺𑀬𑁆𑀳𑀦𑀁 𑀧𑀲𑀸𑀤𑀯𑀲𑁂𑀦 𑀅𑀓𑀸𑀮𑀼𑀲𑁆𑀲𑀺𑀬𑀁 𑀅𑀮𑀽𑀔𑀢𑀸 ¶ , 𑀭𑀸𑀕𑀲𑁆𑀲 𑀧𑀦 𑀭𑀜𑁆𑀚𑀦𑀯𑀲𑁂𑀦. 𑀲𑀤𑁆𑀥𑀸𑀬 𑀧𑀭𑀺𑀬𑁂𑀲𑀦𑀁 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀢𑀦𑁆𑀦𑀺𑀦𑁆𑀦𑀢𑀸, 𑀭𑀸𑀕𑀲𑁆𑀲 𑀢𑀡𑁆𑀳𑀸𑀬𑀦𑀯𑀲𑁂𑀦. 𑀲𑀤𑁆𑀥𑀸𑀬 𑀅𑀧𑀭𑀺𑀘𑁆𑀘𑀚𑀦𑀁 𑀑𑀓𑀧𑁆𑀧𑀦𑀯𑀲𑁂𑀦 𑀅𑀦𑀼𑀧𑀓𑁆𑀔𑀦𑁆𑀤𑀦𑀁, 𑀭𑀸𑀕𑀲𑁆𑀲 𑀅𑀪𑀺𑀲𑀗𑁆𑀕𑀯𑀲𑁂𑀦𑀸𑀢𑀺 𑀏𑀯𑀁 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 ¶ 𑀢𑁂𑀲𑀁 𑀬𑀣𑀸 𑀅𑀮𑀽𑀔𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀲𑀪𑀸𑀕𑀢𑀸, 𑀏𑀯𑀁 𑀢𑀁𑀲𑀫𑀗𑁆𑀕𑀻𑀦𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀆𑀳 ‘‘𑀭𑀸𑀕𑀘𑀭𑀺𑀢𑀲𑁆𑀲 𑀲𑀤𑁆𑀥𑀸𑀘𑀭𑀺𑀢𑁄 𑀲𑀪𑀸𑀕𑁄’’𑀢𑀺.

𑀧𑀜𑁆𑀜𑀸 𑀩𑀮𑀯𑀢𑀻 𑀳𑁄𑀢𑀺 𑀤𑁄𑀲𑀼𑀲𑁆𑀲𑀦𑁆𑀦𑁂 𑀲𑀦𑁆𑀢𑀸𑀦𑁂 𑀢𑀤𑀦𑀼𑀕𑀼𑀡𑀲𑁆𑀲 𑀥𑀫𑁆𑀫𑀲𑁆𑀲 𑀦𑀺𑀬𑁄𑀕𑀢𑁄 𑀅𑀥𑀺𑀓𑀪𑀸𑀯𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀤𑁄𑀲𑀲𑁆𑀲 𑀆𑀲𑀦𑁆𑀦𑀕𑀼𑀡𑀢𑁆𑀢𑀸’’𑀢𑀺, 𑀅𑀦𑀮𑁆𑀮𑀻𑀬𑀦𑀧𑀭𑀺𑀬𑁂𑀲𑀦𑀧𑀭𑀺𑀯𑀚𑁆𑀚𑀦𑁂𑀳𑀺 𑀲𑀪𑀸𑀕𑀥𑀫𑁆𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀜𑁆𑀜𑀸𑀬 𑀆𑀭𑀫𑁆𑀫𑀡𑀲𑁆𑀲 𑀅𑀦𑀮𑁆𑀮𑀻𑀬𑀦𑀁 𑀢𑀲𑁆𑀲 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑀯𑀲𑁂𑀦 𑀯𑀺𑀲𑀁𑀲𑀝𑁆𑀞𑀢𑀸, 𑀤𑁄𑀲𑀲𑁆𑀲 𑀧𑀦 𑀩𑁆𑀬𑀸𑀧𑀚𑁆𑀚𑀦𑀯𑀲𑁂𑀦. 𑀧𑀜𑁆𑀜𑀸𑀬 𑀧𑀭𑀺𑀬𑁂𑀲𑀦𑀁 𑀬𑀣𑀸𑀪𑀽𑀢𑀤𑁄𑀲𑀧𑀯𑀺𑀘𑀬𑁄, 𑀤𑁄𑀲𑀲𑁆𑀲 𑀅𑀪𑀽𑀢𑀤𑁄𑀲𑀦𑀺𑀚𑀺𑀕𑀻𑀲𑀸. 𑀧𑀜𑁆𑀜𑀸𑀬 𑀧𑀭𑀺𑀯𑀚𑁆𑀚𑀦𑀁 𑀦𑀺𑀩𑁆𑀩𑀺𑀦𑁆𑀤𑀦𑀸𑀤𑀺𑀯𑀲𑁂𑀦 𑀜𑀸𑀡𑀼𑀢𑁆𑀭𑀸𑀲𑁄, 𑀤𑁄𑀲𑀲𑁆𑀲 𑀅𑀳𑀺𑀢𑀸𑀥𑀸𑀦𑀯𑀲𑁂𑀦 𑀙𑀟𑁆𑀟𑀦𑀦𑁆𑀢𑀺 𑀏𑀯𑀁 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀢𑁂𑀲𑀁 𑀬𑀣𑀸 𑀅𑀦𑀮𑁆𑀮𑀻𑀬𑀦𑀸𑀤𑀺𑀲𑀸𑀫𑀜𑁆𑀜𑁂𑀦 𑀲𑀪𑀸𑀕𑀢𑀸, 𑀏𑀯𑀁 𑀢𑀁𑀲𑀫𑀗𑁆𑀕𑀻𑀦𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀆𑀳 ‘‘𑀤𑁄𑀲𑀘𑀭𑀺𑀢𑀲𑁆𑀲 𑀩𑀼𑀤𑁆𑀥𑀺𑀘𑀭𑀺𑀢𑁄 𑀲𑀪𑀸𑀕𑁄’’𑀢𑀺.

𑀅𑀦𑁆𑀢𑀭𑀸𑀬𑀓𑀭𑀸 𑀯𑀺𑀢𑀓𑁆𑀓𑀸𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑁄𑀳𑀼𑀲𑁆𑀲𑀦𑁆𑀦𑁂 𑀲𑀦𑁆𑀢𑀸𑀦𑁂 𑀢𑀤𑀦𑀼𑀕𑀼𑀡𑀲𑁆𑀲 𑀥𑀫𑁆𑀫𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀫𑁄𑀳𑀲𑁆𑀲 𑀆𑀲𑀦𑁆𑀦𑀮𑀓𑁆𑀔𑀡𑀢𑁆𑀢𑀸’’𑀢𑀺, 𑀅𑀦𑀯𑀝𑁆𑀞𑀸𑀦𑀘𑀜𑁆𑀘𑀮𑀪𑀸𑀯𑁂𑀳𑀺 𑀲𑀪𑀸𑀕𑀥𑀫𑁆𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑀺𑀢𑀓𑁆𑀓𑀲𑁆𑀲 𑀅𑀦𑀯𑀝𑁆𑀞𑀸𑀦𑀁 𑀧𑀭𑀺𑀓𑀧𑁆𑀧𑀯𑀲𑁂𑀦 𑀲𑀯𑀺𑀧𑁆𑀨𑀸𑀭𑀢𑀸𑀬, 𑀫𑁄𑀳𑀲𑁆𑀲 𑀲𑀫𑁆𑀫𑀽𑀴𑁆𑀳𑀢𑀸𑀯𑀲𑁂𑀦 𑀩𑁆𑀬𑀸𑀓𑀼𑀮𑀢𑀸𑀬. 𑀢𑀣𑀸 𑀯𑀺𑀢𑀓𑁆𑀓𑀲𑁆𑀲 𑀮𑀳𑀼𑀧𑀭𑀺𑀯𑀺𑀢𑀓𑁆𑀓𑀦𑁂𑀦 𑀢𑀤𑀗𑁆𑀕𑀘𑀮𑀢𑀸𑀬 𑀘𑀜𑁆𑀘𑀮𑀢𑀸, 𑀫𑁄𑀳𑀲𑁆𑀲 𑀅𑀦𑁄𑀕𑀸𑀴𑁆𑀳𑀢𑀸𑀬𑀸𑀢𑀺 𑀏𑀯𑀁 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀢𑁂𑀲𑀁 𑀬𑀣𑀸 𑀅𑀦𑀯𑀝𑁆𑀞𑀸𑀦𑀸𑀤𑀺𑀲𑀸𑀫𑀜𑁆𑀜𑁂𑀦 𑀲𑀪𑀸𑀕𑀢𑀸, 𑀏𑀯𑀁 𑀢𑀁𑀲𑀫𑀗𑁆𑀕𑀻𑀦𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀆𑀳 ‘‘𑀫𑁄𑀳𑀘𑀭𑀺𑀢𑀲𑁆𑀲 𑀯𑀺𑀢𑀓𑁆𑀓𑀘𑀭𑀺𑀢𑁄 𑀲𑀪𑀸𑀕𑁄’’𑀢𑀺.

𑀢𑀡𑁆𑀳𑀸 𑀭𑀸𑀕𑁄𑀬𑁂𑀯 𑀲𑀪𑀸𑀯𑀢𑁄, 𑀢𑀲𑁆𑀫𑀸 𑀭𑀸𑀕𑀘𑀭𑀺𑀬𑀸𑀯𑀺𑀦𑀺𑀫𑀼𑀢𑁆𑀢𑀸 𑀢𑀡𑁆𑀳𑀸𑀘𑀭𑀺𑀬𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑁂𑀦 𑀭𑀸𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑁄, 𑀤𑁄𑀲𑀸𑀤𑀬𑁄 𑀯𑀺𑀬 𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀼𑀪𑀬𑀦𑁆𑀢𑀺 𑀢𑀡𑁆𑀳𑀸𑀫𑀸𑀦𑀤𑁆𑀯𑀬𑀁. 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀲𑀪𑀸𑀯𑀢𑁄, 𑀲𑀫𑁆𑀧𑀬𑁄𑀕𑀯𑀲𑁂𑀦 𑀘 𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀝𑁆𑀝𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀬𑀣𑀸 𑀭𑀸𑀕𑀤𑁄𑀲𑁂𑀳𑀺 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀳 ¶ 𑀯𑀢𑁆𑀢𑀫𑀸𑀦𑀲𑁆𑀲𑀧𑀺 𑀫𑁄𑀳𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀯𑀲𑁂𑀦 𑀯𑀺𑀲𑀼𑀁 𑀘𑀭𑀺𑀬𑀸𑀪𑀸𑀯𑁄, 𑀦 𑀓𑁂𑀯𑀮𑀁 𑀫𑁄𑀳𑀲𑁆𑀲𑁂𑀯, 𑀢𑀣𑀸 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀸𑀦𑀁. 𑀏𑀯𑀁 𑀭𑀸𑀕𑁂𑀦 𑀲𑀢𑀺𑀧𑀺 𑀲𑀫𑁆𑀧𑀬𑁄𑀕𑁂 𑀫𑀸𑀦𑀲𑁆𑀲𑀸𑀧𑀺 𑀯𑀺𑀲𑀼𑀁 𑀘𑀭𑀺𑀬𑀸𑀪𑀸𑀯𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀚𑁆𑀚𑀸𑀦𑀁 𑀯𑀺𑀬 𑀅𑀦𑀼𑀲𑀬𑀝𑁆𑀞𑁄 𑀇𑀫𑁂𑀲𑀁 𑀭𑀸𑀕𑀸𑀤𑀻𑀦𑀁𑀬𑁂𑀯 𑀆𑀯𑁂𑀡𑀺𑀓𑁄 𑀘𑀭𑀺𑀬𑀝𑁆𑀞𑁄𑀢𑀺, 𑀦𑀢𑁆𑀣𑁂𑀯 𑀫𑀸𑀦𑀘𑀭𑀺𑀬𑀸. 𑀬𑀢𑁄 𑀘𑀭𑀺𑀬𑀸 ‘‘𑀧𑀓𑀢𑀻’’𑀢𑀺 𑀯𑀼𑀢𑁆𑀢𑀸. 𑀧𑀓𑀢𑀺 𑀘 𑀲𑀪𑀸𑀯𑁄𑀢𑀺. 𑀏𑀢𑁂𑀦𑁂𑀯 𑀤𑀺𑀝𑁆𑀞𑀺𑀬𑀸𑀧𑀺 𑀯𑀺𑀲𑀼𑀁 𑀘𑀭𑀺𑀬𑀸𑀪𑀸𑀯𑀸𑀪𑀸𑀯𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑁄𑀳𑀘𑀭𑀺𑀬𑀦𑁆𑀢𑁄𑀕𑀥𑀸𑀯 ¶ 𑀤𑀺𑀝𑁆𑀞𑀺𑀘𑀭𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑁄𑀳𑀦𑀺𑀤𑀸𑀦𑀢𑁆𑀢𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘-𑀲𑀤𑁆𑀤𑁂𑀦 𑀲𑀫𑁆𑀧𑀬𑁄𑀕𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 𑀫𑁄𑀳𑀦𑀺𑀤𑀸𑀦𑀢𑁆𑀢𑀸, 𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀘𑀸𑀢𑀺.

𑁪𑁪. 𑀓𑀺𑀁 𑀲𑀧𑁆𑀧𑀸𑀬𑀦𑁆𑀢𑀺 𑀓𑀻𑀤𑀺𑀲𑀁 𑀲𑁂𑀦𑀸𑀲𑀦𑀸𑀤𑀺𑀲𑀧𑁆𑀧𑀸𑀬𑀁. 𑀧𑀼𑀩𑁆𑀩𑀸𑀘𑀺𑀡𑁆𑀡𑀁 𑀧𑀼𑀭𑀺𑀫𑀚𑀸𑀢𑀻𑀲𑀼 𑀆𑀘𑀭𑀺𑀢𑀁. 𑀏𑀓𑀘𑁆𑀘𑁂𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀳𑀺 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀢𑀣𑀸 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄. 𑀇𑀝𑁆𑀞𑀧𑁆𑀧𑀬𑁄𑀕𑁄 𑀫𑀦𑀸𑀧𑀓𑀺𑀭𑀺𑀬𑀸. 𑀲𑀼𑀪𑀓𑀫𑁆𑀫𑀩𑀳𑀼𑀮𑁄 𑀬𑁂𑀪𑀼𑀬𑁆𑀬𑁂𑀦 𑀲𑁄𑀪𑀦𑀓𑀫𑁆𑀫𑀓𑀸𑀭𑀻. 𑀦 𑀲𑀩𑁆𑀩𑁂 𑀭𑀸𑀕𑀘𑀭𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀅𑀮𑀼𑀤𑁆𑀥𑀸𑀦𑀫𑁆𑀧𑀺 𑀧𑀼𑀩𑁆𑀩𑁂 𑀇𑀝𑁆𑀞𑀧𑁆𑀧𑀬𑁄𑀕𑀲𑀼𑀪𑀓𑀫𑁆𑀫𑀩𑀳𑀼𑀮𑀢𑀸𑀲𑀫𑁆𑀪𑀯𑀢𑁄, 𑀲𑀕𑁆𑀕𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀘. 𑀏𑀢𑁂𑀦 𑀅𑀲𑀢𑀺 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑁂 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀫𑀢𑁆𑀢𑁂𑀦 𑀦 𑀢𑁂𑀲𑀁 𑀮𑀼𑀤𑁆𑀥𑀢𑀸, 𑀮𑀼𑀤𑁆𑀥𑀪𑀸𑀯𑀳𑁂𑀢𑀼𑀓𑀸 𑀘 𑀭𑀸𑀕𑀘𑀭𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀇𑀢𑀭𑁂𑀢𑀺 𑀙𑁂𑀤𑀦𑀸𑀤𑀺𑀓𑀫𑁆𑀫𑀩𑀳𑀼𑀮𑀸 𑀦𑀺𑀭𑀬𑀸𑀤𑀺𑀢𑁄 𑀇𑀥𑀽𑀧𑀧𑀦𑁆𑀦𑀸 𑀘 𑀦 𑀲𑀩𑁆𑀩𑁂 𑀤𑁄𑀲𑀫𑁄𑀳𑀘𑀭𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀓𑁄𑀥𑀦𑀪𑀸𑀯𑁂, 𑀫𑀽𑀴𑁆𑀳𑀪𑀸𑀯𑁂 𑀘 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀤𑁄𑀲𑀫𑁄𑀳𑀘𑀭𑀺𑀢𑀢𑀸𑀬𑀧𑀺 𑀅𑀦𑁂𑀓𑀁𑀲𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀥𑀸𑀢𑀽𑀦𑀁 𑀉𑀲𑁆𑀲𑀤𑀦𑀺𑀬𑀫𑁄 𑀬𑀤𑀺 𑀧𑀫𑀸𑀡𑀢𑁄, 𑀲𑁄 𑀦𑀢𑁆𑀣𑀺, 𑀅𑀣 𑀲𑀸𑀫𑀢𑁆𑀣𑀺𑀬𑀢𑁄, 𑀲𑁄𑀧𑀺 𑀏𑀓𑀁𑀲𑀺𑀓𑁄 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀉𑀲𑁆𑀲𑀤𑀦𑀺𑀬𑀫𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑁂𑀦𑁂𑀯𑀸𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀧𑀦 𑀥𑀸𑀢𑀽𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯. 𑀤𑁄𑀲𑀦𑀺𑀬𑀫𑁂𑀢𑀺 𑀲𑁂𑀫𑁆𑀳𑀸𑀤𑀺𑀤𑁄𑀲𑀸𑀥𑀺𑀓𑀢𑀸𑀬 𑀭𑀸𑀕𑀸𑀤𑀺𑀘𑀭𑀺𑀢𑁄 𑀳𑁄𑀢𑀻𑀢𑀺 𑀤𑁄𑀲𑀯𑀲𑁂𑀦 𑀘𑀭𑀺𑀬𑀸𑀦𑀺𑀬𑀫𑁂 ‘‘𑀲𑁂𑀫𑁆𑀳𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀲𑁂𑀫𑁆𑀳𑀸𑀥𑀺𑀓𑁄 𑀫𑁄𑀳𑀘𑀭𑀺𑀢𑁄’’𑀢𑀺, ‘‘𑀯𑀸𑀢𑀸𑀥𑀺𑀓𑁄 𑀫𑁄𑀳𑀘𑀭𑀺𑀢𑁄’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀯𑀸𑀢𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀧𑀺 𑀤𑁄𑀲𑀯𑀲𑁂𑀦 𑀦𑀺𑀬𑀫𑀯𑀘𑀦𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀫𑁂𑀯. 𑀅𑀧𑀭𑀺𑀘𑁆𑀙𑀺𑀦𑁆𑀦𑀯𑀘𑀦𑀦𑁆𑀢𑀺 ¶ 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀁, 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑀯𑀘𑀦𑀦𑁆𑀢𑀺 𑀅𑀢𑁆𑀣𑁄.

𑀉𑀲𑁆𑀲𑀤𑀓𑀺𑀢𑁆𑀢𑀦𑁂𑀢𑀺 𑀯𑀺𑀧𑀸𑀓𑀓𑀣𑀸𑀬𑀁 𑀕𑀳𑀺𑀢𑀉𑀲𑁆𑀲𑀤𑀓𑀺𑀢𑁆𑀢𑀦𑁂. 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑁂𑀦𑀸𑀢𑀺 𑀧𑀼𑀭𑀺𑀫𑀪𑀯𑁂 𑀧𑀯𑀢𑁆𑀢𑀮𑁄𑀪𑀸𑀤𑀺𑀳𑁂𑀢𑀼𑀦𑀺𑀬𑀸𑀫𑁂𑀦. 𑀦𑀺𑀬𑀸𑀫𑁄𑀢𑀺 𑀘 𑀢𑁂𑀲𑀁𑀬𑁂𑀯 𑀮𑁄𑀪𑀸𑀤𑀻𑀦𑀁 𑀧𑀝𑀺𑀦𑀺𑀬𑀢𑁄 𑀮𑀼𑀩𑁆𑀪𑀦𑀸𑀤𑀺𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀮𑁄𑀪𑁄 𑀉𑀲𑁆𑀲𑀤𑁄 𑀏𑀢𑁂𑀲𑀦𑁆𑀢𑀺 𑀮𑁄𑀪𑀼𑀲𑁆𑀲𑀤𑀸, 𑀉𑀲𑁆𑀲𑀦𑁆𑀦𑀮𑁄𑀪𑀸, 𑀮𑁄𑀪𑀸𑀥𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀫𑁄𑀳𑀼𑀲𑁆𑀲𑀤𑀸 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀬𑁂 𑀇𑀫𑁂 𑀮𑁄𑀪𑀼𑀲𑁆𑀲𑀤𑀢𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀯𑁄𑀫𑀺𑀲𑁆𑀲𑀢𑁄 𑀘 𑀘𑀼𑀤𑁆𑀤𑀲 𑀧𑀪𑁂𑀤𑀸 𑀇𑀘𑁆𑀙𑀺𑀢𑀸, 𑀢𑁂 𑀅𑀦𑀯𑀲𑁂𑀲𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀙𑀲𑁆𑀯𑁂𑀯 𑀢𑁂𑀲𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀨𑀮𑀪𑀽𑀢𑀸 𑀘𑁂𑀢𑁆𑀣 𑀮𑁄𑀪𑀼𑀲𑁆𑀲𑀤𑀢𑀸𑀤𑀬𑁄 𑀤𑀝𑁆𑀞𑀩𑁆𑀩𑀸.

𑀇𑀤𑀸𑀦𑀺 ¶ 𑀢𑀁 𑀦𑁂𑀲𑀁 𑀮𑁄𑀪𑀼𑀲𑁆𑀲𑀤𑀢𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀯𑁄𑀫𑀺𑀲𑁆𑀲𑀓𑀢𑀸𑀤𑀺𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂𑀢𑀺 𑀓𑀫𑁆𑀫𑀓𑀭𑀡𑀯𑁂𑀮𑀸𑀬𑀁. 𑀮𑁄𑀪𑁄 𑀩𑀮𑀯𑀸𑀢𑀺 𑀮𑁄𑀪𑁄 𑀢𑀚𑁆𑀚𑀸𑀬 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀓𑁄 𑀳𑁄𑀢𑀺. 𑀅𑀮𑁄𑀪𑁄 𑀫𑀦𑁆𑀤𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄 𑀤𑀼𑀩𑁆𑀩𑀮𑁄. 𑀓𑀣𑀁 𑀧𑀦𑁂𑀢𑁂 𑀮𑁄𑀪𑀸𑀮𑁄𑀪𑀸 𑀅𑀜𑁆𑀜𑀫𑀜𑁆𑀜𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀻𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀦𑀺𑀓𑀦𑁆𑀢𑀺𑀓𑁆𑀔𑀡𑀁 𑀧𑀦 𑀆𑀬𑀽𑀳𑀦𑀧𑀓𑁆𑀔𑀺𑀬𑀫𑁂𑀯 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀭𑀺𑀬𑀸𑀤𑀸𑀢𑀼𑀦𑁆𑀢𑀺 𑀅𑀪𑀺𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑁄 𑀳𑀺 ‘‘𑀏𑀯𑀁𑀲𑀼𑀦𑁆𑀤𑀭𑀁 𑀏𑀯𑀁𑀯𑀺𑀧𑀼𑀮𑀁 𑀏𑀯𑀁𑀫𑀳𑀕𑁆𑀖𑀜𑁆𑀘 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀅𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀬 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀅𑀮𑁄𑀪𑁄, 𑀲𑁄 𑀲𑀫𑁆𑀫𑀤𑁂𑀯 𑀮𑁄𑀪𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑁄𑀲𑀫𑁄𑀳𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸, 𑀢𑀸𑀤𑀺𑀲𑀧𑀘𑁆𑀘𑀬𑀮𑀸𑀪𑁂𑀦 𑀘 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄. 𑀢𑀲𑁆𑀫𑀸𑀢𑀺 𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀅𑀮𑁄𑀪𑀤𑁄𑀲𑀫𑁄𑀳𑀸𑀦𑀜𑁆𑀘 𑀤𑀼𑀩𑁆𑀩𑀮𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀫𑁂𑀯 𑀓𑀸𑀭𑀡𑀁 𑀧𑀘𑁆𑀘𑀸𑀫𑀲𑀢𑀺. 𑀲𑁄𑀢𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀢𑁂𑀦 𑀮𑁄𑀪𑀸𑀤𑀺𑀉𑀧𑀦𑀺𑀲𑁆𑀲𑀬𑀯𑀢𑀸 𑀓𑀼𑀲𑀮𑀓𑀫𑁆𑀫𑀼𑀦𑀸. 𑀲𑀼𑀔𑀲𑀻𑀮𑁄𑀢𑀺 𑀲𑀔𑀺𑀮𑁄. 𑀢𑀫𑁂𑀯𑀢𑁆𑀣𑀁 ‘‘𑀅𑀓𑁆𑀓𑁄𑀥𑀦𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺.

𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀫𑀦𑁆𑀤𑀸 𑀅𑀮𑁄𑀪𑀸𑀤𑁄𑀲𑀸 𑀮𑁄𑀪𑀤𑁄𑀲𑁂 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀫𑁄𑀳𑁄 𑀧𑀦 𑀩𑀮𑀯𑀸 𑀫𑁄𑀳𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀯𑀸𑀭𑁂 𑀬𑀣𑀸𑀭𑀳𑀁 𑀅𑀢𑀺𑀤𑁂𑀲𑀢𑁆𑀣𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀝𑁆𑀞𑁄𑀢𑀺 𑀓𑁄𑀥𑀦𑁄. 𑀤𑀦𑁆𑀥𑁄𑀢𑀺 𑀫𑀦𑁆𑀤𑀧𑀜𑁆𑀜𑁄. 𑀲𑀻𑀮𑀓𑁄𑀢𑀺 𑀲𑀼𑀔𑀲𑀻𑀮𑁄.

𑀏𑀢𑁆𑀣 𑀘 𑀮𑁄𑀪𑀯𑀲𑁂𑀦, 𑀤𑁄𑀲𑀫𑁄𑀳𑀮𑁄𑀪𑀤𑁄𑀲𑀮𑁄𑀪𑀫𑁄𑀳𑀤𑁄𑀲𑀫𑁄𑀳𑀮𑁄𑀪𑀤𑁄𑀲𑀫𑁄𑀳𑀯𑀲𑁂𑀦𑀸𑀢𑀺 𑀢𑀬𑁄 𑀏𑀓𑀓𑀸, 𑀢𑀬𑁄 𑀤𑀼𑀓𑀸, 𑀏𑀓𑁄 𑀢𑀺𑀓𑁄𑀢𑀺 𑀮𑁄𑀪𑀸𑀤𑀺𑀉𑀲𑁆𑀲𑀤𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁂𑀬𑁂𑀯 𑀲𑀢𑁆𑀢 𑀯𑀸𑀭𑀸, 𑀢𑀣𑀸 𑀓𑀼𑀲𑀮𑀧𑀓𑁆𑀔𑁂 𑀅𑀮𑁄𑀪𑀸𑀤𑀺𑀉𑀲𑁆𑀲𑀤𑀯𑀲𑁂𑀦𑀸𑀢𑀺 𑀘𑀼𑀤𑁆𑀤𑀲 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀅𑀮𑁄𑀪𑀤𑁄𑀲𑀸𑀫𑁄𑀳𑀸, 𑀅𑀮𑁄𑀪𑀸𑀤𑁄𑀲𑀫𑁄𑀳𑀸, 𑀅𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄𑀢𑀺 𑀆𑀕𑀢𑁂𑀳𑀺 𑀓𑀼𑀲𑀮𑀧𑀓𑁆𑀔𑁂 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀤𑁄𑀲𑀼𑀲𑁆𑀲𑀤𑀫𑁄𑀳𑀼𑀲𑁆𑀲𑀤𑀤𑁄𑀲𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑀣𑀸 𑀅𑀓𑀼𑀲𑀮𑀧𑀓𑁆𑀔𑁂 𑀮𑁄𑀪𑀸𑀤𑁄𑀲𑀫𑁄𑀳𑀸, 𑀮𑁄𑀪𑀤𑁄𑀲𑀸𑀫𑁄𑀳𑀸, 𑀮𑁄𑀪𑀸𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄𑀢𑀺 𑀆𑀕𑀢𑁂𑀳𑀺 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀅𑀤𑁄𑀲𑀼𑀲𑁆𑀲𑀤𑀅𑀫𑁄𑀳𑀼𑀲𑁆𑀲𑀤𑀅𑀤𑁄𑀲𑀸𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸 𑀏𑀯𑀸𑀢𑀺 𑀅𑀓𑀼𑀲𑀮𑀓𑀼𑀲𑀮𑀧𑀓𑁆𑀔𑁂𑀲𑀼 𑀢𑀬𑁄 𑀢𑀬𑁄 𑀯𑀸𑀭𑁂 𑀅𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 𑀅𑀝𑁆𑀞𑁂𑀯 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀬𑁂 𑀧𑀦 𑀉𑀪𑀬𑁂𑀲𑀁 𑀫𑀺𑀲𑁆𑀲𑀢𑀸𑀯𑀲𑁂𑀦 𑀮𑁄𑀪𑀸𑀮𑁄𑀪𑀼𑀲𑁆𑀲𑀤𑀯𑀸𑀭𑀸𑀤𑀬𑁄 𑀅𑀧𑀭𑁂 𑀏𑀓𑀽𑀦𑀧𑀜𑁆𑀜𑀸𑀲 𑀯𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸, 𑀢𑁂 𑀅𑀮𑀩𑁆𑀪𑀦𑀢𑁄 𑀏𑀯 𑀦 𑀤𑀲𑁆𑀲𑀺𑀢𑀸. 𑀦 𑀳𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑁆𑀢𑀭𑁂𑀦 𑀅𑀯𑀢𑁆𑀣𑀦𑁆𑀢𑀭𑀁 ‘‘𑀮𑁄𑀪𑁄 𑀘 𑀩𑀮𑀯𑀸, 𑀅𑀮𑁄𑀪𑁄 𑀘𑀸’’𑀢𑀺𑀆𑀤𑀺 𑀬𑀼𑀚𑁆𑀚𑀢𑀻𑀢𑀺, 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸 𑀳𑀺 𑀏𑀢𑁂𑀲𑀁 𑀩𑀮𑀯𑀤𑀼𑀩𑁆𑀩𑀮𑀪𑀸𑀯𑁄, 𑀲𑀳𑀚𑀸𑀢𑀥𑀫𑁆𑀫𑀯𑀲𑁂𑀦 ¶ 𑀯𑀸. 𑀢𑀢𑁆𑀣 𑀮𑁄𑀪𑀲𑁆𑀲 𑀢𑀸𑀯 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀮𑁄𑀪𑁂𑀦 𑀅𑀦𑀥𑀺𑀪𑀽𑀢𑀢𑀸𑀬 𑀩𑀮𑀯𑀪𑀸𑀯𑁄, 𑀢𑀣𑀸 𑀤𑁄𑀲𑀫𑁄𑀳𑀸𑀦𑀁 𑀅𑀤𑁄𑀲𑀸𑀫𑁄𑀳𑁂𑀳𑀺. 𑀅𑀮𑁄𑀪𑀸𑀤𑀻𑀦𑀁 𑀧𑀦 𑀮𑁄𑀪𑀸𑀤𑀺𑀅𑀪𑀺𑀪𑀯𑀦𑀢𑁄, 𑀲𑀩𑁆𑀩𑁂𑀲𑀜𑁆𑀘 𑀲𑀫𑀸𑀦𑀚𑀸𑀢𑀺𑀬𑀫𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀯𑀲𑁂𑀦 𑀲𑀳𑀚𑀸𑀢𑀥𑀫𑁆𑀫𑀢𑁄 𑀩𑀮𑀯𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀮𑁄𑀪𑁄 𑀩𑀮𑀯𑀸 𑀅𑀮𑁄𑀪𑁄 𑀫𑀦𑁆𑀤𑁄, 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸’’𑀢𑀺. 𑀲𑁄 𑀘 𑀦𑁂𑀲𑀁 𑀫𑀦𑁆𑀤𑀩𑀮𑀯𑀪𑀸𑀯𑁄 𑀧𑀼𑀭𑀺𑀫𑀽𑀧𑀦𑀺𑀲𑁆𑀲𑀬𑀢𑁄 𑀢𑀣𑀸 𑀆𑀲𑀬𑀲𑁆𑀲 𑀧𑀭𑀺𑀪𑀸𑀯𑀺𑀢𑀢𑀸𑀬 𑀯𑁂𑀤𑀺𑀢𑀩𑁆𑀩𑁄.

𑀬𑁄 𑀮𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄 𑀉𑀲𑁆𑀲𑀤𑀓𑀺𑀢𑁆𑀢𑀦𑁂 ‘‘𑀮𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁄, 𑀅𑀬𑀁 𑀇𑀥 𑀘𑀭𑀺𑀬𑀸𑀯𑀺𑀘𑀸𑀭𑁂 ‘‘𑀭𑀸𑀕𑀘𑀭𑀺𑀢𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀝𑁆𑀞𑀤𑀦𑁆𑀥𑀸𑀢𑀺 ‘‘𑀤𑀼𑀝𑁆𑀞𑁄, 𑀤𑀦𑁆𑀥𑁄’’𑀢𑀺 𑀘 𑀯𑀼𑀢𑁆𑀢𑀸 𑀬𑀣𑀸𑀓𑁆𑀓𑀫𑀁 𑀤𑁄𑀲𑀫𑁄𑀳𑀘𑀭𑀺𑀢𑀸. 𑀧𑀜𑁆𑀜𑀯𑀸𑀢𑀺 𑀲𑀸𑀢𑀺𑀲𑀬𑀁 𑀲𑀧𑁆𑀧𑀜𑁆𑀜𑁄. 𑀬𑀢𑁄 𑀲𑀤𑁆𑀥𑀸𑀯𑀺𑀢𑀓𑁆𑀓𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀩𑀼𑀤𑁆𑀥𑀺𑀘𑀭𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀮𑁄𑀪𑀸𑀤𑁄𑀲𑀸𑀦𑀁 ¶ 𑀩𑀮𑀯𑀪𑀸𑀯𑁄 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑀢𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀮𑀼𑀤𑁆𑀥𑀅𑀤𑀼𑀝𑁆𑀞𑀸 𑀧𑀲𑀦𑁆𑀦𑀧𑀓𑀢𑀺𑀢𑀸𑀬 𑀲𑀤𑁆𑀥𑀸𑀘𑀭𑀺𑀢𑀸’’𑀢𑀺.

𑀅𑀬𑀜𑁆𑀘 𑀦𑀬𑁄 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑀯𑀲𑁂𑀦𑁂𑀯 𑀩𑀼𑀤𑁆𑀥𑀺𑀘𑀭𑀺𑀢𑀸𑀤𑀺𑀓𑁂𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀫𑁄𑀳𑀧𑀭𑀺𑀯𑀸𑀭𑁂𑀦𑀸𑀢𑀺 𑀅𑀫𑁄𑀳𑀧𑀭𑀺𑀓𑁆𑀔𑀺𑀢𑁆𑀢𑁂𑀦, 𑀉𑀧𑀦𑀺𑀲𑁆𑀲𑀬𑀢𑁄 𑀲𑀫𑁆𑀧𑀬𑁄𑀕𑀢𑁄 𑀘 𑀧𑀜𑁆𑀜𑀸𑀬 𑀅𑀪𑀺𑀲𑀗𑁆𑀔𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀢𑁆𑀢𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑁄𑀪𑀸𑀤𑀺𑀦𑀸 𑀯𑁄𑀫𑀺𑀲𑁆𑀲𑀧𑀭𑀺𑀯𑀸𑀭𑁂𑀦𑀸𑀢𑀺 𑀏𑀢𑁆𑀣 𑀮𑁄𑀪𑀫𑁄𑀳𑀸𑀤𑀺𑀦𑀸 𑀅𑀜𑁆𑀜𑀫𑀜𑁆𑀜𑀅𑀯𑀺𑀭𑀼𑀤𑁆𑀥𑀯𑁄𑀫𑀺𑀲𑁆𑀲𑀧𑀭𑀺𑀯𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀭𑁄𑀥𑁄 𑀘 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀥𑀫𑁆𑀫𑀸𑀦𑀼𑀲𑀸𑀭𑀺𑀕𑁄𑀢𑁆𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀪𑀺𑀦𑁆𑀦𑀲𑀪𑀸𑀯𑀸𑀦𑁂𑀯. 𑀏𑀓𑀁𑀲𑁂𑀦 𑀘 𑀫𑀺𑀲𑁆𑀲𑀓𑀘𑀭𑀺𑀬𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑁂𑀦 𑀘𑀭𑀺𑀬𑀸𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀘𑁂𑀯 𑀉𑀲𑁆𑀲𑀤𑀓𑀺𑀢𑁆𑀢𑀦𑀁 𑀧𑀯𑀢𑁆𑀢𑀁 𑀬𑀣𑀸𑀭𑀳𑀁 𑀮𑁄𑀪𑀸𑀮𑁄𑀪𑀸𑀤𑀻𑀦𑀁 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀢𑁂𑀦𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁨𑁩𑁨) 𑁋

‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑁋

𑀆𑀤𑀺 ¶ . 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑁂𑀦 𑀘 𑀬𑀣𑀸 𑀢𑀺𑀳𑁂𑀢𑀼𑀓𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁, 𑀦 𑀢𑀣𑀸 𑀤𑀼𑀳𑁂𑀢𑀼𑀓𑀲𑁆𑀲. 𑀬𑀣𑀸 𑀘 𑀤𑀼𑀳𑁂𑀢𑀼𑀓𑀲𑁆𑀲 𑀇𑀢𑀺𑀓𑀢𑁆𑀢𑀩𑁆𑀩𑀢𑀸 𑀦𑁂𑀧𑀓𑁆𑀓𑀁, 𑀦 𑀢𑀣𑀸 𑀅𑀳𑁂𑀢𑀼𑀓𑀲𑁆𑀲. 𑀏𑀯𑀁 𑀮𑁄𑀪𑀼𑀲𑁆𑀲𑀤𑀸𑀤𑀬𑁄 𑀧𑀼𑀕𑁆𑀕𑀮𑀸 𑀭𑀸𑀕𑀘𑀭𑀺𑀢𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀮𑁄𑀪𑀸𑀤𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁫. 𑀢𑀢𑁆𑀭𑀸𑀢𑀺 ¶ 𑀢𑀲𑁆𑀫𑀺𑀁 𑀧𑀼𑀘𑁆𑀙𑀸𑀯𑀘𑀦𑁂. 𑀦𑀬𑁄𑀢𑀺 𑀚𑀸𑀦𑀦𑀦𑀬𑁄. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑁄𑀧𑀺 𑀅𑀢𑁆𑀣𑁄 𑀥𑀫𑁆𑀫𑀫𑀼𑀔𑁂𑀦𑁂𑀯 𑀧𑀜𑁆𑀜𑀸𑀬𑀢𑀻𑀢𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀦𑀸𑀳 ‘‘𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂’’𑀢𑀺. 𑀧𑀓𑀢𑀺𑀕𑀫𑀦𑁂𑀦𑀸𑀢𑀺 𑀅𑀓𑀺𑀢𑁆𑀢𑀺𑀫𑁂𑀦 𑀲𑀪𑀸𑀯𑀕𑀫𑀦𑁂𑀦. 𑀘𑀸𑀢𑀼𑀭𑀺𑀬𑁂𑀦𑀸𑀢𑀺 𑀘𑀸𑀢𑀼𑀭𑀪𑀸𑀯𑁂𑀦 𑀲𑀺𑀗𑁆𑀕𑀸𑀭𑁂𑀦. 𑀉𑀓𑁆𑀓𑀼𑀝𑀺𑀓𑀦𑁆𑀢𑀺 𑀅𑀲𑀫𑁆𑀨𑀼𑀝𑁆𑀞𑀫𑀚𑁆𑀛𑀁. 𑀔𑀡𑀦𑁆𑀢𑁄 𑀯𑀺𑀬𑀸𑀢𑀺 𑀪𑀽𑀫𑀺𑀁 𑀔𑀡𑀦𑁆𑀢𑁄 𑀯𑀺𑀬. 𑀅𑀦𑀼𑀓𑀟𑁆𑀠𑀺𑀢𑀦𑁆𑀢𑀺 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀓𑀟𑁆𑀠𑀦𑁆𑀢𑁄 𑀯𑀺𑀬 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺. 𑀢𑁂𑀦𑀲𑁆𑀲 𑀧𑀤𑀁 𑀅𑀦𑀼𑀓𑀟𑁆𑀠𑀺𑀢𑀁 𑀧𑀘𑁆𑀙𑀢𑁄 𑀅𑀜𑁆𑀙𑀺𑀢𑀁 𑀳𑁄𑀢𑀺. 𑀧𑀭𑀺𑀩𑁆𑀬𑀸𑀓𑀼𑀮𑀸𑀬𑀸𑀢𑀺 𑀧𑀭𑀺𑀢𑁄 𑀆𑀮𑀼𑀴𑀺𑀢𑀸𑀬. 𑀙𑀫𑁆𑀪𑀺𑀢𑁄 𑀯𑀺𑀬𑀸𑀢𑀺 𑀯𑀺𑀢𑁆𑀣𑀸𑀬𑀦𑁆𑀢𑁄 𑀯𑀺𑀬. 𑀪𑀻𑀢𑁄 𑀯𑀺𑀬𑀸𑀢𑀺 𑀓𑁂𑀘𑀺. 𑀲𑀳𑀲𑀸𑀦𑀼𑀧𑀻𑀴𑀺𑀢𑀦𑁆𑀢𑀺 𑀅𑀕𑁆𑀕𑀧𑀸𑀤𑁂𑀦, 𑀧𑀡𑁆𑀳𑀺𑀬𑀸 𑀘 𑀲𑀳𑀲𑀸𑀯 𑀲𑀦𑁆𑀦𑀺𑀭𑀼𑀚𑁆𑀛𑀺𑀢𑀁. 𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲𑀸𑀢𑀺 𑀯𑀺𑀦𑀺𑀯𑀝𑁆𑀝𑀘𑁆𑀙𑀤𑀦𑀲𑁆𑀲 𑀧𑀳𑀻𑀦𑀓𑀺𑀮𑁂𑀲𑀲𑁆𑀲. 𑀇𑀤𑀫𑀻𑀤𑀺𑀲𑀁 𑀧𑀤𑀦𑁆𑀢𑀺 𑀪𑀕𑀯𑀢𑁄 𑀧𑀤𑀁 𑀤𑀺𑀲𑁆𑀯𑀸 𑀯𑀤𑀢𑀺.

𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀸𑀯𑀳𑀁. 𑀫𑀥𑀼𑀭𑀸𑀓𑀸𑀭𑀦𑁆𑀢𑀺 𑀇𑀝𑁆𑀞𑀸𑀓𑀸𑀭𑀁. 𑀣𑀤𑁆𑀥𑀸𑀓𑀸𑀭𑀦𑁆𑀢𑀺 𑀣𑀫𑁆𑀪𑀺𑀢𑀸𑀓𑀸𑀭𑀁. 𑀅𑀢𑀭𑀫𑀸𑀦𑁄𑀢𑀺 𑀦𑀢𑀭𑀫𑀸𑀦𑁄, 𑀲𑀡𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁄𑀥𑀸𑀬𑀸𑀢𑀺 𑀲𑀫𑁆𑀫𑀤𑁂𑀯 𑀑𑀥𑀸𑀬 𑀅𑀯𑀺𑀓𑁆𑀔𑀺𑀧𑀺𑀢𑁆𑀯𑀸. 𑀦𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀓𑀸𑀬𑀧𑀲𑀸𑀭𑀡𑀮𑀓𑁆𑀔𑀡𑀸𑀬 𑀦𑀺𑀧𑀚𑁆𑀚𑀸𑀬 𑀲𑁂𑀬𑁆𑀬𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀬𑀢𑀺 𑀦𑀺𑀤𑁆𑀤𑀸𑀬𑀢𑀺. 𑀧𑀓𑁆𑀔𑀺𑀢𑁆𑀢𑀓𑀸𑀬𑁄𑀢𑀺 𑀅𑀯𑀓𑁆𑀔𑀺𑀢𑁆𑀢𑀓𑀸𑀬𑁄 𑀅𑀯𑀲𑁄 𑀯𑀺𑀬 𑀲𑀳𑀲𑀸 𑀧𑀢𑀺𑀢𑀓𑀸𑀬𑁄. 𑀤𑀼𑀲𑁆𑀲𑀡𑁆𑀞𑀸𑀦𑀦𑁆𑀢𑀺 𑀯𑀺𑀭𑀽𑀧𑀲𑀦𑁆𑀦𑀺𑀯𑁂𑀲𑀁. 𑀯𑀺𑀓𑁆𑀔𑀺𑀢𑁆𑀢𑀓𑀸𑀬𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀔𑀺𑀢𑁆𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑁄.

𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸. 𑀆𑀮𑁄𑀴𑀬𑀫𑀸𑀦𑁄 𑀯𑀸𑀮𑀺𑀓𑀸𑀓𑀘𑀯𑀭𑀸𑀦𑀺 𑀆𑀓𑀼𑀮𑀬𑀦𑁆𑀢𑁄.

𑀦𑀺𑀧𑀼𑀡𑀫𑀥𑀼𑀭𑀲𑀫𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺 𑀲𑀼𑀓𑁄𑀲𑀮𑁆𑀮𑀁 𑀲𑀼𑀦𑁆𑀤𑀭𑀁 𑀅𑀯𑀺𑀲𑀫𑀁 𑀲𑀸𑀪𑀺𑀲𑀗𑁆𑀔𑀸𑀭𑀜𑁆𑀘 𑀓𑀭𑀡𑀲𑀻𑀮𑁄. 𑀕𑀸𑀴𑁆𑀳𑀣𑀤𑁆𑀥𑀯𑀺𑀲𑀫𑀓𑀸𑀭𑀻𑀢𑀺 𑀣𑀺𑀭𑀁 𑀅𑀲𑀺𑀣𑀺𑀮𑀁 𑀯𑀺𑀲𑀫𑀜𑁆𑀘 𑀓𑀭𑀡𑀲𑀻𑀮𑁄. 𑀅𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀧𑀭𑀺𑀦𑀺𑀝𑁆𑀞𑀺𑀢𑀁.

𑀫𑀼𑀔𑀧𑀽𑀭𑀓𑀦𑁆𑀢𑀺 𑀫𑀼𑀔𑀲𑁆𑀲 𑀧𑀽𑀭𑀡𑀁 𑀫𑀳𑀦𑁆𑀢𑀁. 𑀅𑀭𑀲𑀧𑀝𑀺𑀲𑀁𑀯𑁂𑀤𑀻𑀢𑀺 𑀦𑀭𑀲𑀧𑀝𑀺𑀲𑀁𑀯𑁂𑀤𑀻. 𑀪𑀸𑀚𑀦𑁂 𑀙𑀟𑁆𑀟𑁂𑀦𑁆𑀢𑁄𑀢𑀺 𑀪𑁄𑀚𑀦𑀪𑀸𑀚𑀦𑁂 𑀲𑀺𑀢𑁆𑀣𑀸𑀦𑀺 𑀙𑀟𑁆𑀟𑁂𑀦𑁆𑀢𑁄. 𑀫𑀼𑀔𑀁 𑀫𑀓𑁆𑀔𑁂𑀦𑁆𑀢𑁄𑀢𑀺 𑀩𑀳𑀺𑀫𑀼𑀔𑀁 𑀫𑀓𑁆𑀔𑁂𑀦𑁆𑀢𑁄.

𑀓𑀺𑀮𑀦𑁆𑀢𑀭𑀽𑀧𑁄 ¶ 𑀯𑀺𑀬𑀸𑀢𑀺 𑀢𑀲𑁆𑀲 𑀅𑀲𑀳𑀦𑁂𑀦 𑀔𑁂𑀤𑀧𑁆𑀧𑀢𑁆𑀢𑁄 𑀯𑀺𑀬. 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬𑀸𑀢𑀺 𑀅𑀜𑁆𑀜𑀸𑀡𑀪𑀽𑀢𑀸𑀬 𑀉𑀧𑁂𑀓𑁆𑀔𑀸𑀬. 𑀅𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀬 𑀉𑀧𑁂𑀓𑁆𑀔𑀸𑀬𑀸𑀢𑀺 𑀓𑁂𑀘𑀺.

𑀫𑀸𑀬𑀸𑀤𑀻𑀲𑀼 ¶ 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀤𑀦𑀮𑀓𑁆𑀔𑀡𑀸 𑀫𑀸𑀬𑀸. 𑀅𑀲𑀦𑁆𑀢𑀕𑀼𑀡𑀧𑀓𑀸𑀲𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁. 𑀉𑀦𑁆𑀦𑀢𑀺𑀮𑀓𑁆𑀔𑀡𑁄 𑀫𑀸𑀦𑁄. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀫𑀼𑀔𑁂𑀦 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀮𑀓𑁆𑀔𑀡𑀸 𑀧𑀸𑀧𑀺𑀘𑁆𑀙𑀢𑀸. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀫𑀼𑀔𑁂𑀦 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀮𑀓𑁆𑀔𑀡𑀸 𑀫𑀳𑀺𑀘𑁆𑀙𑀢𑀸. 𑀲𑀓𑀮𑀸𑀪𑁂𑀦 𑀅𑀲𑀦𑁆𑀢𑀼𑀲𑁆𑀲𑀦𑀮𑀓𑁆𑀔𑀡𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀺𑀗𑁆𑀕𑀁, 𑀲𑀺𑀗𑁆𑀕𑀸𑀭𑀢𑀸𑀦𑀸𑀕𑀭𑀺𑀓𑀪𑀸𑀯𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀲𑀺𑀗𑁆𑀕𑀁. 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲, 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀲𑁆𑀲 𑀘 𑀫𑀡𑁆𑀟𑀦𑀯𑀲𑁂𑀦 𑀧𑀯𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀘𑀸𑀧𑀮𑁆𑀬𑀁. 𑀏𑀯𑀫𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀫𑀤𑀧𑁆𑀧𑀫𑀸𑀤𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀧𑀭𑀸𑀧𑀭𑀸𑀥𑀲𑁆𑀲 𑀉𑀧𑀦𑀬𑁆𑀳𑀦𑀮𑀓𑁆𑀔𑀡𑁄 𑀉𑀧𑀦𑀸𑀳𑁄. 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀡𑀮𑀓𑁆𑀔𑀡𑁄 𑀫𑀓𑁆𑀔𑁄. 𑀧𑀭𑀲𑁆𑀲 𑀕𑀼𑀡𑁂 𑀟𑀁𑀲𑀺𑀢𑁆𑀯𑀸 𑀅𑀧𑀦𑁂𑀦𑁆𑀢𑁄 𑀯𑀺𑀬 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄. 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸. 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁. 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀤𑁄𑀯𑀘𑀲𑁆𑀲𑀢𑀸𑀧𑀸𑀧𑀫𑀺𑀢𑁆𑀢𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀦𑀼𑀲𑁆𑀲𑀸𑀳𑀦𑀁 𑀣𑀺𑀦𑀁. 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀫𑀺𑀤𑁆𑀥𑀁. 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄 𑀉𑀤𑁆𑀥𑀘𑁆𑀘𑀁. 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀲𑀁𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸. 𑀅𑀬𑁄𑀦𑀺𑀲𑁄 𑀤𑀴𑁆𑀳𑀕𑁆𑀕𑀸𑀳𑁄 𑀆𑀥𑀸𑀦𑀕𑁆𑀕𑀸𑀳𑀺𑀢𑀸. 𑀬𑀣𑀸𑀕𑀳𑀺𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀤𑀼𑀩𑁆𑀩𑀺𑀯𑁂𑀞𑀺𑀬𑀢𑀸 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀬𑀢𑀸. 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀝𑁆𑀞𑀲𑀘𑁆𑀘𑀅𑀲𑀫𑁆𑀧𑀚𑀜𑁆𑀜𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀫𑀼𑀢𑁆𑀢𑀘𑀸𑀕𑀢𑀸𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑀢𑀸 𑀦𑀺𑀲𑁆𑀲𑀗𑁆𑀕𑀧𑀭𑀺𑀘𑁆𑀘𑀸𑀕𑁄. 𑀬𑀣𑀸 𑀫𑀸𑀬𑀸𑀤𑀬𑁄, 𑀢𑀣𑀸 𑀧𑀯𑀢𑁆𑀢𑀸 𑀅𑀓𑀼𑀲𑀮𑀓𑁆𑀔𑀦𑁆𑀥𑀸, 𑀬𑀣𑀸 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀓𑀸𑀫𑀢𑀸𑀤𑀬𑁄, 𑀢𑀣𑀸 𑀧𑀯𑀢𑁆𑀢𑀸 𑀓𑀼𑀲𑀮𑀓𑁆𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀲𑀸𑀤𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀯𑀢𑁆𑀣𑀼𑀢𑁆𑀢𑀬𑀁. 𑀲𑀁𑀯𑁂𑀚𑀦𑀻𑀬𑀝𑁆𑀞𑀸𑀦𑀸𑀦𑀺 𑀚𑀸𑀢𑀺𑀆𑀤𑀻𑀦𑀺. 𑀓𑀼𑀲𑀮𑀸𑀦𑀼𑀬𑁄𑀕𑁂𑀢𑀺 𑀓𑀼𑀲𑀮𑀥𑀫𑁆𑀫𑀪𑀸𑀯𑀦𑀸𑀬𑀁. ‘‘𑀏𑀯𑀜𑁆𑀘 𑀏𑀯𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀺𑀘𑁆𑀘𑀸𑀦𑀁 𑀭𑀢𑁆𑀢𑀺𑀪𑀸𑀕𑁂 𑀧𑀭𑀺𑀯𑀺𑀢𑀓𑁆𑀓𑀦𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸. 𑀢𑀣𑀸𑀯𑀺𑀢𑀓𑁆𑀓𑀺𑀢𑀸𑀦𑀁 𑀢𑁂𑀲𑀁 𑀤𑀺𑀯𑀲𑀪𑀸𑀕𑁂 𑀅𑀦𑀼𑀝𑁆𑀞𑀸𑀦𑀁 𑀤𑀺𑀯𑀸 𑀧𑀚𑁆𑀚𑀮𑀦𑀸. 𑀳𑀼𑀭𑀸𑀳𑀼𑀭𑀁 𑀥𑀸𑀯𑀦𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀢𑀢𑁆𑀣 𑀢𑀢𑁆𑀣 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀯𑁄𑀲𑀕𑁆𑀕𑁄. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀧𑀼𑀭𑁂 𑀘𑀺𑀢𑁆𑀢𑀫𑀘𑀸𑀭𑀺 𑀘𑀸𑀭𑀺𑀓𑀁, 𑀬𑁂𑀦𑀺𑀘𑁆𑀙𑀓𑀁 ¶ 𑀬𑀢𑁆𑀣𑀓𑀸𑀫𑀁 𑀬𑀣𑀸𑀲𑀼𑀔’’𑀦𑁆𑀢𑀺 (𑀥. 𑀧. 𑁩𑁨𑁬), ‘‘𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫) 𑀘.

𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀸𑀤𑀺 ¶ 𑀘 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀸𑀕𑀢𑀫𑁂𑀯𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 ‘‘𑀲𑀩𑁆𑀩𑀸𑀓𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀆𑀕𑀢𑀫𑁆𑀧𑀺 𑀅𑀢𑁆𑀣𑁂𑀯𑀸𑀢𑀺 𑀳𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀕𑀘𑀭𑀺𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀢𑀺 𑀢𑀢𑁆𑀣 𑀯𑀺𑀦𑀺𑀥𑀸𑀬 𑀪𑀸𑀯𑀁 𑀧𑀝𑀺𑀧𑀚𑁆𑀚𑀦𑁂𑀦 𑀅𑀧𑁆𑀧𑀫𑀸𑀤𑀓𑀸𑀭𑀺𑀦𑁄. 𑀪𑀺𑀦𑁆𑀦𑀮𑀓𑁆𑀔𑀡𑀸 𑀇𑀭𑀺𑀬𑀸𑀧𑀣𑀸𑀤𑀬𑁄𑀢𑀺 𑀘𑀸𑀢𑀼𑀭𑀺𑀬𑁂𑀦 𑀅𑀘𑀸𑀢𑀼𑀭𑀺𑀬𑁂𑀦 𑀲𑀡𑀺𑀓𑀁, 𑀲𑀳𑀲𑀸 𑀘 𑀕𑀫𑀦𑀸𑀤𑀬𑁄. 𑀦 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀦𑁆𑀢𑀺. 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀆𑀤𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀁.

𑁪𑁬. 𑀲𑀧𑁆𑀧𑀸𑀬𑀁 𑀳𑀺𑀢𑀁, 𑀓𑀺𑀮𑁂𑀲𑀯𑀺𑀖𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀥𑁄𑀢𑀯𑁂𑀤𑀺𑀓𑀦𑁆𑀢𑀺 𑀅𑀧𑀭𑀺𑀲𑀼𑀤𑁆𑀥𑀧𑀭𑀺𑀓𑁆𑀔𑁂𑀧𑀯𑁂𑀤𑀺𑀓𑀁. 𑀪𑀽𑀫𑀝𑁆𑀞𑀓𑀦𑁆𑀢𑀺 𑀪𑀽𑀫𑀺𑀢𑀮𑁂𑀬𑁂𑀯 𑀉𑀝𑁆𑀞𑀸𑀧𑀺𑀢𑀁 𑀉𑀧𑀭𑀺𑀫𑀢𑀮𑀭𑀳𑀺𑀢𑀁. 𑀏𑀓𑀢𑁄 𑀑𑀦𑀢𑀲𑁆𑀲 𑀧𑀩𑁆𑀩𑀢𑀧𑀸𑀤𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁄 𑀅𑀓𑀢𑀪𑀺𑀢𑁆𑀢𑀺𑀪𑀽𑀫𑀺𑀧𑀭𑀺𑀓𑀫𑁆𑀫𑁄 𑀅𑀓𑀢𑀧𑀩𑁆𑀪𑀸𑀭𑁄. 𑀚𑀢𑀼𑀓𑀸𑀪𑀭𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀸𑀳𑀺 𑀑𑀮𑀫𑁆𑀩𑀫𑀸𑀦𑀫𑀼𑀔𑀸𑀳𑀺 𑀔𑀼𑀤𑁆𑀤𑀓𑀯𑀕𑁆𑀕𑀼𑀮𑀻𑀳𑀺 𑀧𑀭𑀺𑀧𑀼𑀡𑁆𑀡𑀁. 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀦𑁆𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀁. 𑀉𑀚𑁆𑀚𑀗𑁆𑀕𑀮𑀁 𑀮𑀽𑀔𑀥𑀽𑀲𑀭𑀁 𑀙𑀸𑀬𑀽𑀤𑀓𑀭𑀳𑀺𑀢𑀁. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀪𑀬𑁂𑀦 𑀲𑀸𑀲𑀗𑁆𑀓𑀁. 𑀤𑀼𑀭𑀽𑀧𑀦𑁆𑀢𑀺 𑀯𑀺𑀭𑀽𑀧𑀁. 𑀤𑀼𑀩𑁆𑀩𑀡𑁆𑀡𑀦𑁆𑀢𑀺 𑀅𑀲𑀼𑀦𑁆𑀤𑀭𑀯𑀡𑁆𑀡𑀁, 𑀤𑀼𑀲𑁆𑀲𑀡𑁆𑀞𑀸𑀦𑀁 𑀯𑀸. 𑀚𑀸𑀮𑀸𑀓𑀸𑀭𑁂𑀦 𑀓𑀢𑀧𑀽𑀯𑀁 𑀚𑀸𑀮𑀧𑀽𑀯𑀁. 𑀲𑀸𑀡𑀺 𑀯𑀺𑀬 𑀔𑀭𑀲𑀫𑁆𑀨𑀲𑁆𑀲𑀦𑁆𑀢𑀺 𑀲𑀸𑀡𑀺𑀨𑀮𑀓𑁄 𑀯𑀺𑀬 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁. 𑀪𑀸𑀭𑀺𑀓𑀪𑀸𑀯𑁂𑀦, 𑀅𑀦𑁆𑀢𑀭𑀦𑁆𑀢𑀭𑀸 𑀢𑀼𑀦𑁆𑀦𑀓𑀭𑀡𑁂𑀦 𑀘 𑀓𑀺𑀘𑁆𑀙𑀧𑀭𑀺𑀳𑀭𑀡𑀁. 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄𑀢𑀺 𑀆𑀡𑀺𑀦𑀸, 𑀕𑀡𑁆𑀞𑀺𑀬𑀸 𑀘 𑀳𑀢𑀲𑁄𑀪𑁄. 𑀇𑀤𑀁 𑀭𑀸𑀕𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁, 𑀏𑀯𑀫𑀲𑁆𑀲 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀤𑀺𑀲𑀸𑀫𑀼𑀔𑀦𑁆𑀢𑀺 𑀤𑀺𑀲𑀸𑀪𑀺𑀫𑀼𑀔𑀁, 𑀅𑀩𑁆𑀪𑁄𑀓𑀸𑀲𑀸𑀪𑀺𑀫𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀓𑀲𑀺𑀡𑀦𑁆𑀢𑀺 𑀫𑀳𑀦𑁆𑀢𑀁 𑀓𑀲𑀺𑀡𑀫𑀡𑁆𑀟𑀮𑀁. 𑀲𑁂𑀲𑀁 𑀲𑁂𑀦𑀸𑀲𑀦𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀫𑁄𑀳𑀘𑀭𑀺𑀢𑀲𑁆𑀲, 𑀢𑀁 𑀤𑁄𑀲𑀘𑀭𑀺𑀢𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀯𑀺𑀢𑀓𑁆𑀓𑀯𑀺𑀥𑀸𑀯𑀦𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀬𑀣𑀸 𑀢𑀁 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲. 𑀤𑀭𑀻𑀫𑀼𑀔𑁂𑀢𑀺 𑀧𑀩𑁆𑀩𑀢𑀯𑀺𑀯𑀭𑁂. 𑀧𑀭𑀺𑀢𑁆𑀢𑀦𑁆𑀢𑀺 𑀲𑀼𑀧𑁆𑀧𑀲𑀭𑀸𑀯𑀫𑀢𑁆𑀢𑀁.

𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀢𑁄 𑀦𑀺𑀤𑀸𑀦𑀧𑀭𑀺𑀘𑁆𑀙𑁂𑀤𑀢𑁄 𑀯𑀺𑀪𑀸𑀯𑀦𑀧𑀭𑀺𑀘𑁆𑀙𑁂𑀤𑀢𑁄 𑀲𑀧𑁆𑀧𑀸𑀬𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀧𑀘𑁆𑀘𑁂𑀓𑀁 𑀧𑀭𑀺𑀘𑁆𑀙𑁂𑀤-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀯𑀺𑀪𑀸𑀯𑀦𑀸𑀢𑀺 ‘‘𑀅𑀬𑀁 𑀭𑀸𑀕𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸 𑀚𑀸𑀦𑀦𑀯𑀺𑀪𑀸𑀯𑀦𑀸. 𑀏𑀓𑀘𑁆𑀘𑀓𑀲𑀺𑀡𑀸𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀫𑀢𑁆𑀢𑀲𑁆𑀲 ¶ 𑀧𑀲𑀗𑁆𑀕𑁂𑀦 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀦 𑀘 𑀢𑀸𑀯 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀆𑀯𑀺𑀓𑀢’’𑀦𑁆𑀢𑀺.

𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁪𑁭. 𑀲𑀗𑁆𑀔𑀸𑀢𑀦𑀺𑀤𑁆𑀤𑁂𑀲𑀢𑁄𑀢𑀺 ¶ 𑀲𑀗𑁆𑀔𑀸𑀢𑀸𑀦𑀁 ‘‘𑀘𑀢𑁆𑀢𑀸𑀮𑀻𑀲𑀸𑀬𑀸’’𑀢𑀺 𑀲𑀗𑁆𑀔𑁆𑀬𑀸𑀯𑀲𑁂𑀦 𑀕𑀳𑀺𑀢𑀸𑀦𑀁 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑀢𑁄. ‘‘𑀏𑀢𑁆𑀣 𑀏𑀢𑁆𑀢𑀓𑀸𑀦𑀺 𑀉𑀧𑀘𑀸𑀭𑀚𑁆𑀛𑀸𑀦𑀸𑀯𑀳𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀅𑀧𑁆𑀧𑀦𑀸𑀚𑁆𑀛𑀸𑀦𑀸𑀯𑀳𑀸𑀦𑀻’’𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀢𑁄. ‘‘𑀏𑀢𑁆𑀢𑀓𑀸𑀦𑀺 𑀏𑀓𑀚𑁆𑀛𑀸𑀦𑀺𑀓𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀤𑀼𑀓𑀢𑀺𑀓𑀚𑁆𑀛𑀸𑀦𑀺𑀓𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀲𑀓𑀮𑀚𑁆𑀛𑀸𑀦𑀺𑀓𑀸𑀦𑀻’’𑀢𑀺 𑀛𑀸𑀦𑀧𑁆𑀧𑀪𑁂𑀤𑀢𑁄. ‘‘𑀏𑀢𑁂𑀲𑀼 𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑁄, 𑀏𑀢𑁂𑀲𑀼 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀁 𑀲𑀫𑀢𑀺𑀓𑁆𑀓𑀫𑀢𑁄. ‘‘𑀏𑀢𑁆𑀢𑀓𑀸𑀦𑁂𑀢𑁆𑀣 𑀯𑀟𑁆𑀠𑁂𑀢𑀩𑁆𑀩𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄. 𑀆𑀭𑀫𑁆𑀫𑀡𑀢𑁄𑀢𑀺 𑀲𑀪𑀸𑀯𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑀯𑀢𑁆𑀢𑀩𑁆𑀩𑀯𑀲𑁂𑀦, 𑀘𑀮𑀺𑀢𑀸𑀘𑀮𑀺𑀢𑀯𑀲𑁂𑀦 𑀘 𑀆𑀭𑀫𑁆𑀫𑀡𑀯𑀺𑀪𑀸𑀕𑀢𑁄. 𑀪𑀽𑀫𑀺𑀢𑁄𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀯𑀺𑀪𑀸𑀕𑀢𑁄. 𑀕𑀳𑀡𑀢𑁄𑀢𑀺 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀕𑀳𑀡𑀯𑀺𑀪𑀸𑀕𑀢𑁄. 𑀧𑀘𑁆𑀘𑀬𑀢𑁄𑀢𑀺 𑀆𑀭𑀼𑀧𑁆𑀧𑀸𑀤𑀻𑀦𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑀪𑀸𑀯𑀢𑁄. 𑀘𑀭𑀺𑀬𑀸𑀦𑀼𑀓𑀽𑀮𑀢𑁄𑀢𑀺 𑀭𑀸𑀕𑀘𑀭𑀺𑀬𑀸𑀤𑀻𑀦𑀁 𑀅𑀦𑀼𑀓𑀽𑀮𑀪𑀸𑀯𑀢𑁄.

𑀓𑀫𑁆𑀫𑀝𑁆𑀞𑀸𑀦𑀸𑀦𑀻𑀢𑀺 𑀆𑀭𑀫𑁆𑀫𑀡𑀪𑀸𑀯𑁂𑀦 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀢𑀺 𑀘𑀢𑀼𑀩𑁆𑀩𑀺𑀥𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀯𑀦𑁆𑀢𑁄, 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑁂𑀲𑀽𑀢𑀺 𑀢𑀺𑀓𑀚𑁆𑀛𑀸𑀦𑀺𑀓𑁂𑀲𑀼 𑀧𑀼𑀭𑀺𑀫𑁂𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼, 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑁂𑀲𑀼 𑀆𑀦𑀸𑀧𑀸𑀦𑀓𑀲𑀺𑀡𑁂𑀲𑀼. 𑀲𑁂𑀲𑁂𑀲𑀽𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑁂𑀲𑀼 𑀏𑀓𑀯𑀻𑀲𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑁂𑀲𑀼.

𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀳𑀤𑀬𑀭𑀽𑀧𑀲𑁆𑀲 𑀲𑀢𑁆𑀢𑀲𑁆𑀲 𑀘𑀺𑀢𑁆𑀢𑀁 𑀆𑀤𑀺𑀓𑀫𑁆𑀫𑀺𑀓𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀓𑀲𑀺𑀡𑀨𑀭𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀲𑀢𑁆𑀢𑀸𑀦𑀜𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀫𑀜𑁆𑀜𑀸𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺. 𑀑𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀞𑀺𑀢𑁄𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀢𑀣𑀸 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀭𑁂𑀦𑁂𑀯 𑀢𑀸𑀦𑀺 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑀢𑁆𑀣 𑀯𑀟𑁆𑀠𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀧𑀦 𑀓𑁄𑀘𑀺 𑀯𑀟𑁆𑀠𑁂𑀬𑁆𑀬, 𑀦 𑀢𑁂𑀦 𑀓𑁄𑀘𑀺 𑀕𑀼𑀡𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀦𑀺𑀲𑀁𑀲𑀸𑀪𑀸𑀯𑀸 𑀘𑀸’’𑀢𑀺. ‘‘𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑀫𑁂𑀯 𑀆𑀦𑀺𑀲𑀁𑀲𑀸𑀪𑀸𑀯𑀁 𑀯𑀺𑀯𑀭𑀢𑀺. 𑀬𑀲𑁆𑀫𑀸 𑀯𑀟𑁆𑀠𑀺𑀢𑁂𑀲𑀼 𑀓𑀼𑀡𑀧𑀭𑀸𑀲𑀺𑀬𑁂𑀯 𑀯𑀟𑁆𑀠𑀢𑀺, 𑀅𑀯𑀟𑁆𑀠𑀺𑀢𑁂𑀧𑀺 𑀓𑀸𑀫𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀸 ¶ 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀆𑀦𑀺𑀲𑀁𑀲𑀸𑀪𑀸𑀯𑁄. 𑀯𑀺𑀪𑀽𑀢𑀸𑀢𑀺 𑀯𑀺𑀧𑀼𑀮𑀸𑀭𑀫𑁆𑀫𑀡𑀢𑀸𑀬 𑀲𑀼𑀧𑀸𑀓𑀝𑀸, 𑀯𑀟𑁆𑀠𑀺𑀢𑀦𑀺𑀫𑀺𑀢𑁆𑀢𑀢𑀸𑀬 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀪𑀸𑀯𑁂𑀦 𑀧𑀭𑀺𑀩𑁆𑀬𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀓𑁂𑀯𑀮𑀦𑁆𑀢𑀺 ¶ 𑀲𑀓𑀮𑀁 𑀅𑀦𑀯𑀲𑁂𑀲𑀁. ‘‘𑀧𑀣𑀯𑀺𑀁 𑀇𑀫’’𑀦𑁆𑀢𑀺 𑀯𑀘𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀁, 𑀦 𑀦𑀺𑀫𑀺𑀢𑁆𑀢𑀲𑁆𑀲 𑀯𑀟𑁆𑀠𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀸𑀪𑀺𑀢𑁆𑀢𑀸𑀢𑀺 𑀲𑀸𑀢𑀺𑀲𑀬𑀁 𑀮𑀸𑀪𑀺𑀢𑀸𑀬, 𑀉𑀓𑁆𑀓𑀁𑀲𑀕𑀢𑀯𑀲𑀺𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀣𑁂𑀭𑁄 𑀳𑀺 𑀧𑀭𑀫𑀸𑀬 𑀯𑀲𑀺𑀧𑀢𑁆𑀢𑀺𑀬𑀸 𑀅𑀲𑁆𑀲𑀫𑀡𑁆𑀟𑀮𑁂 𑀅𑀲𑁆𑀲𑀁 𑀲𑀸𑀭𑁂𑀦𑁆𑀢𑁄 𑀯𑀺𑀬 𑀬𑀢𑁆𑀣 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄𑀧𑀺 𑀞𑀺𑀢𑁄𑀧𑀺 𑀢𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑁂𑀯. 𑀢𑁂𑀦𑀲𑁆𑀲 𑀲𑀫𑀦𑁆𑀢𑀢𑁄 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀺𑀢𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀤𑀺𑀲𑀸𑀲𑀽’’𑀢𑀺𑀆𑀤𑀺.

𑀯𑀼𑀢𑁆𑀢𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑁂 𑀯𑀼𑀢𑁆𑀢𑀸. 𑀫𑀳𑀦𑁆𑀢𑁂𑀢𑀺 𑀯𑀺𑀧𑀼𑀮𑁂. 𑀦𑀺𑀦𑁆𑀦𑀣𑀮𑀸𑀤𑀺𑀯𑀲𑁂𑀦 𑀳𑀺 𑀏𑀓𑀤𑁂𑀲𑁂 𑀅𑀝𑁆𑀞𑀢𑁆𑀯𑀸 𑀲𑀫𑀦𑁆𑀢𑀢𑁄 𑀕𑀳𑀡𑀯𑀲𑁂𑀦 𑀲𑀓𑀮𑀲𑀭𑀻𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀁 𑀫𑀳𑀦𑁆𑀢𑀁 𑀳𑁄𑀢𑀺. 𑀫𑀳𑀦𑁆𑀢𑁂 𑀯𑀸 𑀲𑀭𑀻𑀭𑁂. 𑀅𑀧𑁆𑀧𑀓𑁂𑀢𑀺 𑀲𑀭𑀻𑀭𑀲𑁆𑀲 𑀏𑀓𑀤𑁂𑀲𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀬𑁄𑀚𑀦𑀸. 𑀅𑀧𑁆𑀧𑀓𑁂 𑀯𑀸 𑀔𑀼𑀤𑁆𑀤𑀓𑁂 𑀤𑀸𑀭𑀓𑀲𑀭𑀻𑀭𑁂. 𑀏𑀢𑀦𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀆𑀤𑀻𑀦𑀯𑀦𑁆𑀢𑀺 ‘‘𑀅𑀲𑀼𑀪𑀭𑀸𑀲𑀺 𑀏𑀯 𑀯𑀟𑁆𑀠𑀢𑀺, 𑀦 𑀘 𑀓𑁄𑀘𑀺 𑀆𑀦𑀺𑀲𑀁𑀲𑁄’’𑀢𑀺 𑀯𑀼𑀢𑁆𑀢𑀁 𑀆𑀤𑀻𑀦𑀯𑀁.

𑀲𑁂𑀲𑀸𑀦𑀺𑀧𑀺 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀻𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀧𑀢𑁆𑀢𑀺𑀢𑁄 𑀯𑀺𑀯𑀭𑀺𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀺𑀘𑀼𑀧𑀺𑀡𑁆𑀟𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀯𑀸𑀢𑀲𑀗𑁆𑀖𑀸𑀢𑀲𑀦𑁆𑀦𑀺𑀲𑁆𑀲𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀸𑀢𑀭𑀸𑀲𑀺𑀬𑁂𑀯 𑀯𑀟𑁆𑀠𑀢𑀻’’𑀢𑀺. 𑀑𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀦𑀸𑀲𑀺𑀓𑀕𑁆𑀕𑀫𑀼𑀔𑀦𑀺𑀫𑀺𑀢𑁆𑀢𑀸𑀤𑀺𑀑𑀓𑀸𑀲𑁂𑀦 𑀲𑀧𑀭𑀺𑀘𑁆𑀙𑁂𑀤𑀁. 𑀯𑀸𑀬𑁄𑀓𑀲𑀺𑀡𑀯𑀟𑁆𑀠𑀦𑁂 𑀯𑀺𑀬 𑀦 𑀏𑀢𑁆𑀣 𑀓𑁄𑀘𑀺 𑀕𑀼𑀡𑁄, 𑀓𑁂𑀯𑀮𑀁 𑀯𑀸𑀢𑀯𑀟𑁆𑀠𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀸𑀤𑀻𑀦𑀯𑀢𑁆𑀢𑀸’’𑀢𑀺. 𑀢𑁂𑀲𑀦𑁆𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀭𑀫𑁆𑀫𑀡𑀁. 𑀦 𑀘 𑀢𑁂𑀦 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀢𑁂𑀦 𑀲𑀢𑁆𑀢𑀭𑀸𑀲𑀺𑀯𑀟𑁆𑀠𑀦𑁂𑀦 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀟𑁆𑀠𑀦𑁂 𑀯𑀺𑀬 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀧𑀭𑀺𑀕𑁆𑀕𑀳𑀯𑀲𑁂𑀦𑀸𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀪𑀸𑀯𑀦𑀸𑀯𑀺𑀲𑀬𑀲𑁆𑀲 𑀧𑀭𑀺𑀕𑁆𑀕𑀳𑀯𑀲𑁂𑀦, 𑀦 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀏𑀓𑀸𑀯𑀸𑀲𑀤𑁆𑀯𑀺𑀆𑀯𑀸𑀲𑀸𑀤𑀺𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬𑀁. 𑀬𑀤𑀬𑀦𑁆𑀢𑀺 𑀬𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀅𑀬𑀁 𑀬𑁄𑀕𑀻. 𑀲𑀻𑀫𑀸𑀲𑀫𑁆𑀪𑁂𑀤𑁂𑀦𑁂𑀯 𑀳𑁂𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀼𑀧𑁆𑀧𑀢𑁆𑀢𑀺, 𑀦 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸. 𑀬𑀤𑀺 𑀏𑀯𑀁 𑀓𑀣𑀁 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀸 𑀛𑀸𑀦𑀲𑁆𑀲𑀸𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸𑀧𑁂𑀢𑁆𑀣 𑀧𑀭𑀺𑀕𑁆𑀕𑀳𑀯𑀲𑁂𑀦𑀸’’𑀢𑀺, 𑀓𑀢𑀺𑀧𑀬𑁂 𑀲𑀢𑁆𑀢𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀫𑁂𑀢𑁆𑀢𑀸𑀤𑀬𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀩𑀳𑀼𑀓𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀢𑀺 𑀅𑀢𑁆𑀣𑁄. 𑀆𑀓𑀸𑀲𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀢𑁆𑀢𑀸 𑀦 𑀯𑀟𑁆𑀠𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀯𑀓𑁆𑀔𑀢𑀺 𑀯𑀸 𑀬𑀁 𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀭𑀺𑀓𑀧𑁆𑀧𑀚𑀫𑁂𑀯 𑀆𑀭𑀫𑁆𑀫𑀡𑀁 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑀸, 𑀦 𑀇𑀢𑀭𑀦𑁆𑀢𑀺 𑀆𑀳 ‘‘𑀦 𑀳𑀺 𑀲𑀓𑁆𑀓𑀸 𑀲𑀪𑀸𑀯𑀥𑀫𑁆𑀫𑀁 ¶ 𑀯𑀟𑁆𑀠𑁂𑀢𑀼’’𑀦𑁆𑀢𑀺 ¶ . 𑀆𑀭𑀼𑀧𑁆𑀧𑀸𑀦𑀁 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂, 𑀯𑀺𑀧𑀼𑀮𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀘 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀸𑀦𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀺 𑀤𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀅𑀦𑀺𑀫𑀺𑀢𑁆𑀢𑀢𑁆𑀢𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀪𑀸𑀯𑀸.

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀲𑁂𑀲𑀸𑀦𑀺 𑀅𑀝𑁆𑀞𑀸𑀭𑀲. 𑀲𑁂𑀲𑀸𑀦𑀺 𑀙𑀸𑀢𑀺 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑀸𑀦𑀺 𑀲𑁂𑀲𑀸𑀦𑀺 𑀙. 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀢𑀸𑀬 𑀯𑀺𑀧𑀼𑀩𑁆𑀩𑀓𑀁. 𑀧𑀕𑁆𑀖𑀭𑀫𑀸𑀦𑀮𑁄𑀳𑀺𑀢𑀢𑀸𑀬 𑀮𑁄𑀳𑀺𑀢𑀓𑀁. 𑀓𑀺𑀫𑀻𑀦𑀁 𑀧𑀘𑀮𑀦𑁂𑀦 𑀧𑀼𑀴𑀼𑀯𑀓𑀁, 𑀘𑀮𑀺𑀢𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀯𑀸𑀢𑀧𑀸𑀦𑀯𑀺𑀯𑀭𑀸𑀤𑀻𑀳𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀲𑁆𑀲 𑀲𑀽𑀭𑀺𑀬𑀸𑀮𑁄𑀓𑀸𑀤𑀺𑀓𑀲𑁆𑀲 𑀘𑀮𑀦𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀻𑀢𑀺 𑀑𑀪𑀸𑀲𑀫𑀡𑁆𑀟𑀮𑀸𑀭𑀫𑁆𑀫𑀡𑀫𑁆𑀧𑀺 𑀘𑀮𑀺𑀢𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑁂. 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯𑀸𑀢𑀺 𑀲𑀦𑁆𑀢𑀁 𑀦𑀺𑀘𑁆𑀘𑀮𑀫𑁂𑀯.

𑀤𑁂𑀯𑁂𑀲𑀽𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼, 𑀢𑀢𑁆𑀣 𑀅𑀲𑀼𑀪𑀸𑀦𑀁 𑀧𑀝𑀺𑀓𑀽𑀮𑀲𑁆𑀲 𑀘 𑀆𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀪𑀸𑀯𑀢𑁄 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁.

𑀤𑀺𑀝𑁆𑀞𑁂𑀦𑀸𑀢𑀺 𑀤𑀺𑀝𑁆𑀞𑁂𑀦 𑀯𑀢𑁆𑀣𑀼𑀦𑀸 𑀓𑀸𑀭𑀡𑀪𑀽𑀢𑁂𑀦. 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀉𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀉𑀧𑁆𑀧𑀸𑀤𑁂𑀢𑀩𑁆𑀩𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀪𑀸𑀕𑁂’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀓𑀸𑀬𑀕𑀢𑀸𑀲𑀢𑀺𑀬𑀸. 𑀉𑀘𑁆𑀙𑀼𑀲𑀲𑁆𑀲𑀸𑀤𑀻𑀦𑀁 𑀧𑀢𑁆𑀢𑁂𑀲𑀼 𑀧𑀘𑀮𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀫𑀼𑀔𑁂𑀦 𑀯𑀸 𑀢𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀸𑀬𑁄𑀓𑀲𑀺𑀡𑀁 𑀤𑀺𑀝𑁆𑀞𑀨𑀼𑀝𑁆𑀞𑁂𑀦𑀸’’𑀢𑀺. 𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀆𑀤𑀺𑀓𑀫𑁆𑀫𑀺𑀓𑁂𑀦 𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀦 𑀧𑀝𑁆𑀞𑀧𑁂𑀢𑀩𑁆𑀩𑀸𑀦𑀺, 𑀳𑁂𑀝𑁆𑀞𑀺𑀫𑁂 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂, 𑀓𑀲𑀺𑀡𑁂𑀲𑀼 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀜𑁆𑀘 𑀅𑀦𑀥𑀺𑀕𑀦𑁆𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸.

𑀇𑀫𑁂𑀲𑀼 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂𑀲𑀽𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑁂𑀦 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀸𑀦𑀁, 𑀛𑀸𑀦𑀸𑀦𑀜𑁆𑀘 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀯𑀺𑀳𑀸𑀭𑀲𑁆𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲.

‘‘𑀏𑀓𑀸𑀤𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀅𑀦𑀼𑀓𑀽𑀮𑀸𑀦𑀻’’𑀢𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀩𑁆𑀩𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺. 𑀅𑀦𑀼𑀓𑀽𑀮𑀸𑀦𑀺 𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄. 𑀅𑀝𑁆𑀞 𑀅𑀦𑀼𑀓𑀽𑀮𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑁂𑀲𑁂𑀲𑀼. 𑀏𑀓𑀦𑁆𑀢𑀺 𑀇𑀤𑀁 𑀅𑀦𑀼𑀲𑁆𑀲𑀢𑀺𑀅𑀧𑁂𑀓𑁆𑀔𑀁 𑀅𑀦𑀼𑀲𑁆𑀲𑀢𑀻𑀲𑀼 𑀏𑀓𑀦𑁆𑀢𑀺, 𑀦 𑀫𑁄𑀳𑀘𑀭𑀺𑀢𑀯𑀺𑀢𑀓𑁆𑀓𑀘𑀭𑀺𑀢𑀸𑀧𑁂𑀓𑁆𑀔𑀁 𑀢𑁂𑀲𑀁 𑀅𑀜𑁆𑀜𑀲𑁆𑀲𑀸𑀧𑀺 𑀅𑀦𑀼𑀓𑀽𑀮𑀲𑁆𑀲 𑀅𑀮𑀩𑁆𑀪𑀦𑀢𑁄 ¶ . ‘‘𑀲𑀤𑁆𑀥𑀸𑀘𑀭𑀺𑀢𑀲𑁆𑀲 ¶ 𑀧𑀼𑀭𑀺𑀫𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄’’𑀢𑀺 𑀇𑀤𑀁 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀲𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀁 𑀇𑀫𑀲𑁆𑀲 𑀅𑀢𑀺𑀲𑀧𑁆𑀧𑀸𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑀢𑁄 𑀲𑀩𑁆𑀩𑀘𑀭𑀺𑀢𑀸𑀦𑀁 𑀅𑀦𑀼𑀓𑀽𑀮𑀸𑀦𑀺. 𑀧𑀭𑀺𑀢𑁆𑀢𑀦𑁆𑀢𑀺 𑀲𑀭𑀸𑀯𑀫𑀢𑁆𑀢𑀁, 𑀅𑀧𑁆𑀧𑀫𑀸𑀡𑀦𑁆𑀢𑀺 𑀢𑀢𑁄 𑀅𑀥𑀺𑀓𑀧𑀫𑀸𑀡𑀁. 𑀧𑀭𑀺𑀢𑁆𑀢𑀁 𑀯𑀸 𑀲𑀼𑀧𑁆𑀧𑀲𑀭𑀸𑀯𑀫𑀢𑁆𑀢𑀁, 𑀅𑀧𑁆𑀧𑀫𑀸𑀡𑀁 𑀅𑀥𑀺𑀓𑀧𑀫𑀸𑀡𑀁 𑀔𑀮𑀫𑀡𑁆𑀟𑀮𑀸𑀤𑀺𑀓𑀲𑀺𑀡𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀁.

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸𑀢𑀺 𑀘𑀢𑁆𑀢𑀸𑀭𑁄 𑀫𑀦𑀲𑀺𑀓𑀭𑀡𑀻𑀬𑀸 𑀥𑀫𑁆𑀫𑀸. 𑀉𑀢𑁆𑀢𑀭𑀻𑀢𑀺 𑀲𑀻𑀮𑀲𑀫𑁆𑀧𑀤𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁, 𑀯𑀻𑀭𑀺𑀬𑀁; 𑀧𑀜𑁆𑀜𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀦𑀢𑁄 𑀉𑀧𑀭𑀺. 𑀅𑀲𑀼𑀪𑀸𑀢𑀺 𑀅𑀲𑀼𑀪𑀪𑀸𑀯𑀦𑀸 𑀏𑀓𑀸𑀤𑀲𑀲𑀼 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀪𑀸𑀯𑀦𑀸𑀦𑀼𑀬𑁄𑀕𑀸. 𑀫𑁂𑀢𑁆𑀢𑀸𑀢𑀺 𑀅𑀦𑁄𑀥𑀺𑀲𑁄, 𑀑𑀥𑀺𑀲𑁄 𑀯𑀸 𑀧𑀯𑀢𑁆𑀢𑀸 𑀫𑁂𑀢𑁆𑀢𑀸𑀪𑀸𑀯𑀦𑀸. 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸. 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀉𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 (𑀅. 𑀦𑀺. 𑁩.𑁧𑁩𑁭; 𑀥. 𑀧. 𑁨𑁭𑁭; 𑀫𑀳𑀸𑀦𑀺. 𑁨𑁭) 𑀏𑀯𑀁 𑀧𑀯𑀢𑁆𑀢𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 ‘‘𑀅𑀲𑁆𑀫𑀻’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀯𑀯𑀺𑀥𑀲𑁆𑀲𑀸𑀧𑀺 𑀫𑀸𑀦𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀬. 𑀏𑀢𑁆𑀣 𑀳𑀺 𑀏𑀓𑀲𑁆𑀲𑁂𑀯 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀯𑀼𑀢𑁆𑀢𑀸, 𑀦 𑀏𑀓𑀲𑁆𑀲 𑀘𑀢𑀼𑀘𑀭𑀺𑀬𑀢𑀸𑀬. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀲𑀩𑁆𑀩𑀸𑀦𑀺𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀓𑀼𑀲𑀮𑀯𑀺𑀓𑁆𑀔𑀫𑁆𑀪𑀦𑀸𑀦𑀺 𑀲𑀩𑁆𑀩𑀓𑀼𑀲𑀮𑀧𑀭𑀺𑀩𑁆𑀭𑀽𑀳𑀦𑀸𑀦𑀻’’𑀢𑀺.

𑀏𑀓𑀲𑁆𑀲𑁂𑀯 𑀲𑀢𑁆𑀢 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀘𑀸𑀬𑀲𑁆𑀫𑀸 𑀭𑀸𑀳𑀼𑀮𑁄 𑀲𑀩𑁆𑀩𑀘𑀭𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀘𑀦𑀫𑀢𑁆𑀢𑁂𑀢𑀺 ‘‘𑀅𑀲𑀼𑀓𑀓𑀫𑁆𑀫𑀝𑁆𑀞𑀸𑀦𑀁 𑀅𑀲𑀼𑀓𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀯𑀘𑀦𑀫𑀢𑁆𑀢𑁂. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀢𑀣𑀸𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀧𑀦 ‘‘𑀲𑀩𑁆𑀩𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑀺𑀢𑁄 𑀏𑀯.

𑁪𑁮. ‘‘𑀧𑀺𑀬𑁄 𑀕𑀭𑀽’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁩𑁭) 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸. 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀢𑀺 ‘‘𑀏𑀯𑀁 𑀩𑀳𑀼𑀧𑀭𑀺𑀲𑁆𑀲𑀬𑁄𑀬𑀁 𑀅𑀢𑁆𑀢𑀪𑀸𑀯𑁄 𑀞𑀸𑀦𑁂𑀬𑁂𑀯 𑀫𑀬𑀸 𑀦𑀺𑀬𑁆𑀬𑀸𑀢𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺.

𑀅𑀢𑀚𑁆𑀚𑀦𑀻𑀬𑁄𑀢𑀺 𑀦 𑀢𑀚𑁆𑀚𑁂𑀢𑀩𑁆𑀩𑁄 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀅𑀢𑀚𑁆𑀚𑀦𑀻𑀬𑀪𑀸𑀯𑁄 𑀤𑁄𑀯𑀘𑀲𑁆𑀲𑀢𑀸𑀬 𑀯𑀸 𑀲𑀺𑀬𑀸, 𑀆𑀘𑀭𑀺𑀬𑁂 𑀅𑀦𑀺𑀯𑀺𑀝𑁆𑀞𑀧𑁂𑀫𑀢𑀸𑀬 𑀯𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀩𑁆𑀩𑀘𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀳𑀺 𑀆𑀘𑀭𑀺𑀬𑁂𑀦 𑀢𑀚𑁆𑀚𑀺𑀬𑀫𑀸𑀦𑁄 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺, 𑀬𑁄 𑀯𑀸 ‘‘𑀓𑀺𑀫𑀲𑁆𑀲 ¶ ¶ 𑀲𑀦𑁆𑀢𑀺𑀓𑁂 𑀯𑀸𑀲𑁂𑀦𑀸’’𑀢𑀺 𑀧𑀓𑁆𑀓𑀫𑀢𑀺, 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀅𑀢𑀚𑁆𑀚𑀦𑀻𑀬𑁄. 𑀥𑀫𑁆𑀫𑁂𑀦𑀸𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀥𑀫𑁆𑀫𑁂𑀦. 𑀕𑀽𑀴𑁆𑀳𑀁 𑀕𑀦𑁆𑀣𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑀦𑁆𑀣𑀁, 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀲𑀳𑀺𑀢𑀁 𑀕𑀫𑁆𑀪𑀻𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘.

𑀢𑀼𑀫𑁆𑀳𑀸𑀓𑀫𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑁂𑀢𑀺 ‘‘𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀧𑀢𑀦𑁂𑀦 𑀢𑀼𑀫𑁆𑀳𑀸𑀓𑀁 𑀓𑁄𑀘𑀺 𑀅𑀢𑁆𑀣𑁄 𑀳𑁄𑀢𑀻’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂. 𑀖𑀁𑀲𑁂𑀦𑁆𑀢𑁄𑀢𑀺 ‘‘𑀫𑀦𑀼𑀲𑁆𑀲𑀓𑀓𑁆𑀓𑁂𑀦 𑀢𑀼𑀫𑁆𑀳𑀸𑀓𑀁 𑀓𑁄𑀘𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 𑀖𑀁𑀲𑁂𑀦𑁆𑀢𑁄 𑀦𑀺𑀭𑀯𑀲𑁂𑀲𑀁 𑀅𑀢𑁆𑀢𑀪𑀸𑀯𑀁 𑀔𑁂𑀧𑁂𑀢𑀼𑀁 𑀉𑀲𑁆𑀲𑀳𑁂𑀬𑁆𑀬𑀁. ‘‘𑀫𑀫 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑀼𑀦𑁆𑀥𑀦𑁂𑀦 𑀢𑀼𑀫𑁆𑀳𑀸𑀓𑀁 𑀓𑁄𑀘𑀺 𑀭𑁄𑀕𑀯𑀽𑀧𑀲𑀫𑀸𑀤𑀺𑀓𑁄 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂. 𑀢𑀻𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀆𑀘𑀭𑀺𑀬𑁂 𑀪𑀢𑁆𑀢𑀺𑀧𑀯𑁂𑀤𑀦𑀫𑀼𑀔𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁄 𑀏𑀯 𑀧𑀯𑁂𑀤𑀺𑀢𑁄.

𑁪𑁯. 𑀅𑀜𑁆𑀜𑀢𑁆𑀣 𑀧𑀯𑀢𑁆𑀢𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑀁 𑀆𑀕𑀫𑁆𑀫 𑀬𑀢𑁆𑀣 𑀲𑁂𑀢𑀺, 𑀲𑁄 𑀢𑀲𑁆𑀲 𑀆𑀲𑀬𑁄 ‘‘𑀫𑀺𑀕𑀸𑀲𑀬𑁄’’ 𑀯𑀺𑀬, 𑀆𑀲𑀬𑁄 𑀏𑀯 𑀅𑀚𑁆𑀛𑀸𑀲𑀬𑁄. 𑀲𑁄 𑀤𑀼𑀯𑀺𑀥𑁄 𑀯𑀺𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑁄𑀢𑀺. 𑀢𑀢𑁆𑀣 𑀯𑀺𑀧𑀦𑁆𑀦𑁄 𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀺𑀲𑁆𑀲𑀺𑀢𑁄. 𑀲𑀫𑁆𑀧𑀦𑁆𑀦𑁄 𑀤𑀼𑀯𑀺𑀥𑁄 𑀯𑀝𑁆𑀝𑀦𑀺𑀲𑁆𑀲𑀺𑀢𑁄, 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁄𑀢𑀺. 𑀢𑁂𑀲𑀼 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀅𑀚𑁆𑀛𑀸𑀲𑀬𑁄 ‘‘𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦𑀸’’𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀇𑀤𑀸𑀦𑀺 𑀦𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀮𑁄𑀪𑀸𑀤𑀻𑀦𑀁 𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀳𑀸𑀓𑀸𑀭𑁂𑀳𑀻𑀢𑀺 𑀅𑀮𑀼𑀩𑁆𑀪𑀦𑀸𑀤𑀻𑀳𑀺 𑀙𑀳𑀺 𑀆𑀓𑀸𑀭𑁂𑀳𑀺. 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀁 𑀲𑀻𑀮𑀲𑀫𑁆𑀧𑀤𑀸𑀤𑀻𑀦𑀁 𑀲𑀸𑀥𑀦𑀯𑀲𑁂𑀦, 𑀮𑁄𑀓𑀼𑀢𑁆𑀢𑀭𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀘 𑀲𑀫𑁆𑀧𑀦𑁆𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄, 𑀢𑁂𑀦. 𑀅𑀮𑁄𑀪𑀸𑀤𑀬𑁄 𑀳𑀺 𑀅𑀦𑁂𑀓𑀤𑁄𑀲𑀯𑀺𑀥𑀫𑀦𑀢𑁄, 𑀅𑀦𑁂𑀓𑀕𑀼𑀡𑀸𑀯𑀳𑀢𑁄 𑀘 𑀲𑀢𑁆𑀢𑀸𑀦𑀁 𑀩𑀳𑀼𑀓𑀸𑀭𑀸 𑀯𑀺𑀲𑁂𑀲𑀢𑁄 𑀬𑁄𑀕𑀺𑀦𑁄. 𑀢𑀣𑀸 𑀳𑀺 𑀅𑀮𑁄𑀪𑀸𑀤𑀬𑁄 𑀫𑀘𑁆𑀙𑁂𑀭𑀫𑀮𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 (𑀥. 𑀲. 𑀅𑀝𑁆𑀞. 𑁧 𑀫𑀽𑀮𑀭𑀸𑀲𑀻𑀯𑀡𑁆𑀡𑀦𑀸) 𑁋

‘‘𑀅𑀮𑁄𑀪𑁄 𑀫𑀘𑁆𑀙𑁂𑀭𑀫𑀮𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀅𑀤𑁄𑀲𑁄 𑀤𑀼𑀲𑁆𑀲𑀻𑀮𑁆𑀬𑀫𑀮𑀲𑁆𑀲, 𑀅𑀫𑁄𑀳𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀪𑀸𑀯𑀦𑀸𑀬. 𑀅𑀮𑁄𑀪𑁄 𑀘𑁂𑀢𑁆𑀣 𑀤𑀸𑀦𑀳𑁂𑀢𑀼, 𑀅𑀤𑁄𑀲𑁄 𑀲𑀻𑀮𑀳𑁂𑀢𑀼, 𑀅𑀫𑁄𑀳𑁄 𑀪𑀸𑀯𑀦𑀸𑀳𑁂𑀢𑀼. 𑀢𑁂𑀲𑀼 𑀘 𑀅𑀮𑁄𑀪𑁂𑀦 𑀅𑀦𑀥𑀺𑀓𑀁 𑀕𑀡𑁆𑀳𑀸𑀢𑀺 𑀮𑀼𑀤𑁆𑀥𑀲𑁆𑀲 𑀅𑀥𑀺𑀓𑀕𑁆𑀕𑀳𑀡𑀢𑁄, 𑀅𑀤𑁄𑀲𑁂𑀦 𑀅𑀦𑀽𑀦𑀁 𑀤𑀼𑀝𑁆𑀞𑀲𑁆𑀲 𑀊𑀦𑀕𑁆𑀕𑀳𑀡𑀢𑁄, 𑀅𑀫𑁄𑀳𑁂𑀦 𑀅𑀯𑀺𑀧𑀭𑀻𑀢𑀁 𑀫𑀽𑀴𑁆𑀳𑀲𑁆𑀲 𑀯𑀺𑀧𑀭𑀻𑀢𑀕𑁆𑀕𑀳𑀡𑀢𑁄.

‘‘𑀅𑀮𑁄𑀪𑁂𑀦 ¶ 𑀘𑁂𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀤𑁄𑀲𑀁 𑀤𑁄𑀲𑀢𑁄 𑀥𑀸𑀭𑁂𑀦𑁆𑀢𑁄 𑀤𑁄𑀲𑁂 𑀧𑀯𑀢𑁆𑀢𑀢𑀺, 𑀮𑀼𑀤𑁆𑀥𑁄 𑀳𑀺 𑀤𑁄𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀅𑀤𑁄𑀲𑁂𑀦 𑀯𑀺𑀚𑁆𑀚𑀫𑀸𑀦𑀁 𑀕𑀼𑀡𑀁 𑀕𑀼𑀡𑀢𑁄 𑀥𑀸𑀭𑁂𑀦𑁆𑀢𑁄 𑀕𑀼𑀡𑁂 𑀧𑀯𑀢𑁆𑀢𑀢𑀺, 𑀤𑀼𑀝𑁆𑀞𑁄 𑀳𑀺 𑀕𑀼𑀡𑀁 𑀫𑀓𑁆𑀔𑁂𑀢𑀺. 𑀅𑀫𑁄𑀳𑁂𑀦 𑀬𑀸𑀣𑀸𑀯𑀲𑀪𑀸𑀯𑀁 𑀬𑀸𑀣𑀸𑀯𑀲𑀪𑀸𑀯𑀢𑁄 𑀥𑀸𑀭𑁂𑀦𑁆𑀢𑁄 𑀬𑀸𑀣𑀸𑀯𑀲𑀪𑀸𑀯𑁂 𑀧𑀯𑀢𑁆𑀢𑀢𑀺 ¶ , 𑀫𑀽𑀴𑁆𑀳𑁄 𑀳𑀺 𑀢𑀘𑁆𑀙𑀁 ‘𑀅𑀢𑀘𑁆𑀙’𑀦𑁆𑀢𑀺, 𑀅𑀢𑀘𑁆𑀙𑀜𑁆𑀘 ‘𑀢𑀘𑁆𑀙’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀅𑀮𑁄𑀪𑁂𑀦 𑀘 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁 𑀦 𑀳𑁄𑀢𑀺 𑀮𑀼𑀤𑁆𑀥𑀲𑁆𑀲 𑀧𑀺𑀬𑀲𑀩𑁆𑀪𑀸𑀯𑀢𑁄, 𑀧𑀺𑀬𑀯𑀺𑀧𑁆𑀧𑀬𑁄𑀕𑀸𑀲𑀳𑀦𑀢𑁄 𑀘, 𑀅𑀤𑁄𑀲𑁂𑀦 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀤𑀼𑀓𑁆𑀔𑀁 𑀦 𑀳𑁄𑀢𑀺 𑀤𑀼𑀝𑁆𑀞𑀲𑁆𑀲 𑀅𑀧𑁆𑀧𑀺𑀬𑀲𑀩𑁆𑀪𑀸𑀯𑀢𑁄, 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀸𑀲𑀳𑀦𑀢𑁄 𑀘, 𑀅𑀫𑁄𑀳𑁂𑀦 𑀇𑀘𑁆𑀙𑀺𑀢𑀸𑀮𑀸𑀪𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀅𑀫𑀽𑀴𑁆𑀳𑀲𑁆𑀲 𑀳𑀺 ‘𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀏𑀯𑀫𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀲𑀩𑁆𑀪𑀸𑀯𑀢𑁄.

‘‘𑀅𑀮𑁄𑀪𑁂𑀦 𑀘𑁂𑀢𑁆𑀣 𑀚𑀸𑀢𑀺𑀤𑀼𑀓𑁆𑀔𑀁 𑀦 𑀳𑁄𑀢𑀺 𑀅𑀮𑁄𑀪𑀲𑁆𑀲 𑀢𑀡𑁆𑀳𑀸𑀧𑀝𑀺𑀧𑀓𑁆𑀔𑀢𑁄, 𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸 𑀘 𑀚𑀸𑀢𑀺𑀤𑀼𑀓𑁆𑀔𑀲𑁆𑀲, 𑀅𑀤𑁄𑀲𑁂𑀦 𑀚𑀭𑀸𑀤𑀼𑀓𑁆𑀔𑀁 𑀦 𑀳𑁄𑀢𑀺 𑀢𑀺𑀓𑁆𑀔𑀤𑁄𑀲𑀲𑁆𑀲 𑀔𑀺𑀧𑁆𑀧𑀁 𑀚𑀭𑀸𑀲𑀫𑁆𑀪𑀯𑀢𑁄, 𑀅𑀫𑁄𑀳𑁂𑀦 𑀫𑀭𑀡𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀲𑀫𑁆𑀫𑁄𑀳𑀫𑀭𑀡𑀜𑁆𑀳𑀺 𑀤𑀼𑀓𑁆𑀔𑀁, 𑀦 𑀘 𑀢𑀁 𑀅𑀫𑀽𑀴𑁆𑀳𑀲𑁆𑀲 𑀳𑁄𑀢𑀺. 𑀅𑀮𑁄𑀪𑁂𑀦 𑀘 𑀕𑀳𑀝𑁆𑀞𑀸𑀦𑀁, 𑀅𑀫𑁄𑀳𑁂𑀦 𑀧𑀩𑁆𑀩𑀚𑀺𑀢𑀸𑀦𑀁, 𑀅𑀤𑁄𑀲𑁂𑀦 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀔𑀲𑀁𑀯𑀸𑀲𑀢𑀸 𑀳𑁄𑀢𑀺.

‘‘𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀮𑁄𑀪𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑀧𑀢𑁆𑀢𑀺 𑀦 𑀳𑁄𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀢𑀡𑁆𑀳𑀸𑀬 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀢𑀡𑁆𑀳𑀸𑀬 𑀘 𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄. 𑀅𑀤𑁄𑀲𑁂𑀦 𑀦𑀺𑀭𑀬𑁂 𑀉𑀧𑀧𑀢𑁆𑀢𑀺 𑀦 𑀳𑁄𑀢𑀺, 𑀤𑁄𑀲𑁂𑀦 𑀳𑀺 𑀘𑀡𑁆𑀟𑀚𑀸𑀢𑀺𑀢𑀸𑀬 𑀤𑁄𑀲𑀲𑀤𑀺𑀲𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀤𑁄𑀲𑀲𑁆𑀲 𑀘 𑀧𑀝𑀺𑀧𑀓𑁆𑀔𑁄 𑀅𑀤𑁄𑀲𑁄. 𑀅𑀫𑁄𑀳𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀺, 𑀫𑁄𑀳𑁂𑀦 𑀳𑀺 𑀦𑀺𑀘𑁆𑀘𑀲𑀫𑁆𑀫𑀽𑀴𑁆𑀳𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀫𑁄𑀳𑀧𑀝𑀺𑀧𑀓𑁆𑀔𑁄 𑀘 𑀅𑀫𑁄𑀳𑁄. 𑀏𑀢𑁂𑀲𑀼 𑀘 𑀅𑀮𑁄𑀪𑁄 𑀭𑀸𑀕𑀯𑀲𑁂𑀦 𑀉𑀧𑀕𑀫𑀦𑀲𑁆𑀲 𑀅𑀪𑀸𑀯𑀓𑀭𑁄, 𑀅𑀤𑁄𑀲𑁄 𑀤𑁄𑀲𑀯𑀲𑁂𑀦 𑀅𑀧𑀕𑀫𑀦𑀲𑁆𑀲, 𑀅𑀫𑁄𑀳𑁄 𑀫𑁄𑀳𑀯𑀲𑁂𑀦 𑀅𑀫𑀚𑁆𑀛𑀢𑁆𑀢𑀪𑀸𑀯𑀲𑁆𑀲.

‘‘𑀢𑀻𑀳𑀺𑀧𑀺 ¶ 𑀘𑁂𑀢𑁂𑀳𑀺 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄, 𑀅𑀲𑀼𑀪𑀲𑀜𑁆𑀜𑀸 𑀅𑀧𑁆𑀧𑀫𑀸𑀡𑀲𑀜𑁆𑀜𑀸 𑀥𑀸𑀢𑀼𑀲𑀜𑁆𑀜𑀸𑀢𑀺 𑀇𑀫𑀸 𑀘 𑀢𑀺𑀲𑁆𑀲𑁄 𑀲𑀜𑁆𑀜𑀸𑀬𑁄 𑀳𑁄𑀦𑁆𑀢𑀺. 𑀅𑀮𑁄𑀪𑁂𑀦 𑀧𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀅𑀦𑁆𑀢𑀲𑁆𑀲, 𑀅𑀤𑁄𑀲𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀅𑀦𑁆𑀢𑀲𑁆𑀲 𑀧𑀭𑀺𑀯𑀚𑁆𑀚𑀦𑀁 𑀳𑁄𑀢𑀺, 𑀅𑀫𑁄𑀳𑁂𑀦 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀦𑀁. 𑀢𑀣𑀸 𑀅𑀮𑁄𑀪𑁂𑀦 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀧𑀪𑁂𑀤𑀦𑀁 𑀳𑁄𑀢𑀺, 𑀅𑀤𑁄𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲, 𑀅𑀫𑁄𑀳𑁂𑀦 𑀲𑁂𑀲𑀕𑀦𑁆𑀣𑀤𑁆𑀯𑀬𑀲𑁆𑀲. 𑀧𑀼𑀭𑀺𑀫𑀸𑀦𑀺 𑀘 𑀤𑁆𑀯𑁂 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀦𑀼𑀪𑀸𑀯𑁂𑀦, 𑀧𑀘𑁆𑀙𑀺𑀫𑀸𑀦𑀺 𑀧𑀘𑁆𑀙𑀺𑀫𑀲𑁆𑀲𑁂𑀯 𑀆𑀦𑀼𑀪𑀸𑀯𑁂𑀦 𑀇𑀚𑁆𑀛𑀦𑁆𑀢𑀺.

‘‘𑀅𑀮𑁄𑀪𑁄 ¶ 𑀘𑁂𑀢𑁆𑀣 𑀆𑀭𑁄𑀕𑁆𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀮𑀼𑀤𑁆𑀥𑁄 𑀳𑀺 𑀮𑁄𑀪𑀦𑀻𑀬𑀫𑁆𑀧𑀺 𑀅𑀲𑀧𑁆𑀧𑀸𑀬𑀁 𑀦 𑀲𑁂𑀯𑀢𑀺, 𑀢𑁂𑀦 𑀅𑀭𑁄𑀕𑁄 𑀳𑁄𑀢𑀺. 𑀅𑀤𑁄𑀲𑁄 𑀬𑁄𑀩𑁆𑀩𑀦𑀲𑁆𑀲, 𑀅𑀤𑀼𑀝𑁆𑀞𑁄 𑀳𑀺 𑀯𑀮𑀺𑀢𑀧𑀮𑀺𑀢𑀸𑀯𑀳𑁂𑀦 𑀤𑁄𑀲𑀕𑁆𑀕𑀺𑀦𑀸 𑀅𑀟𑀬𑁆𑀳𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀬𑀼𑀯𑀸 𑀳𑁄𑀢𑀺. 𑀅𑀫𑁄𑀳𑁄 𑀤𑀻𑀖𑀸𑀬𑀼𑀓𑀢𑀸𑀬, 𑀅𑀫𑀽𑀴𑁆𑀳𑁄 𑀳𑀺 𑀳𑀺𑀢𑀸𑀳𑀺𑀢𑀁 𑀜𑀢𑁆𑀯𑀸 𑀅𑀳𑀺𑀢𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄, 𑀳𑀺𑀢𑀜𑁆𑀘 𑀧𑀝𑀺𑀲𑁂𑀯𑀫𑀸𑀦𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺.

‘‘𑀅𑀮𑁄𑀪𑁄 𑀘𑁂𑀢𑁆𑀣 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀘𑀸𑀕𑁂𑀦 𑀪𑁄𑀕𑀧𑀝𑀺𑀮𑀸𑀪𑀢𑁄, 𑀅𑀤𑁄𑀲𑁄 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀬 𑀫𑀺𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀢𑁄, 𑀅𑀧𑀭𑀺𑀳𑀸𑀦𑀢𑁄 𑀘, 𑀅𑀫𑁄𑀳𑁄 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸, 𑀅𑀫𑀽𑀴𑁆𑀳𑁄 𑀳𑀺 𑀅𑀢𑁆𑀢𑀦𑁄 𑀳𑀺𑀢𑀫𑁂𑀯 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀅𑀮𑁄𑀪𑁄 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀤𑁄𑀲𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲, 𑀅𑀫𑁄𑀳𑁄 𑀅𑀭𑀺𑀬𑀯𑀺𑀳𑀸𑀭𑀲𑁆𑀲.

‘‘𑀅𑀮𑁄𑀪𑁂𑀦 𑀘𑁂𑀢𑁆𑀣 𑀲𑀓𑀧𑀓𑁆𑀔𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀼𑀢𑁄 𑀳𑁄𑀢𑀺 𑀢𑁂𑀲𑀁 𑀯𑀺𑀦𑀸𑀲𑁂𑀦 𑀅𑀪𑀺𑀲𑀗𑁆𑀕𑀳𑁂𑀢𑀼𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀸, 𑀅𑀤𑁄𑀲𑁂𑀦 𑀧𑀭𑀧𑀓𑁆𑀔𑁂𑀲𑀼, 𑀅𑀤𑀼𑀝𑁆𑀞𑀲𑁆𑀲 𑀳𑀺 𑀯𑁂𑀭𑀻𑀲𑀼𑀧𑀺 𑀯𑁂𑀭𑀺𑀲𑀜𑁆𑀜𑀸𑀬 𑀅𑀪𑀸𑀯𑀢𑁄, 𑀅𑀫𑁄𑀳𑁂𑀦 𑀉𑀤𑀸𑀲𑀻𑀦𑀧𑀓𑁆𑀔𑁂𑀲𑀼 𑀅𑀫𑀽𑀴𑁆𑀳𑀲𑁆𑀲 𑀲𑀩𑁆𑀩𑀸𑀪𑀺𑀲𑀗𑁆𑀕𑀢𑀸𑀬 𑀅𑀪𑀸𑀯𑀢𑁄.

‘‘𑀅𑀮𑁄𑀪𑁂𑀦 ¶ 𑀘 𑀅𑀦𑀺𑀘𑁆𑀘𑀤𑀲𑁆𑀲𑀦𑀁 𑀳𑁄𑀢𑀺, 𑀮𑀼𑀤𑁆𑀥𑁄 𑀳𑀺 𑀉𑀧𑀪𑁄𑀕𑀸𑀲𑀸𑀬 𑀅𑀦𑀺𑀘𑁆𑀘𑁂𑀧𑀺 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀦 𑀧𑀲𑁆𑀲𑀢𑀺. 𑀅𑀤𑁄𑀲𑁂𑀦 𑀤𑀼𑀓𑁆𑀔𑀤𑀲𑁆𑀲𑀦𑀁, 𑀅𑀤𑁄𑀲𑀚𑁆𑀛𑀸𑀲𑀬𑁄 𑀳𑀺 𑀧𑀭𑀺𑀘𑁆𑀘𑀢𑁆𑀢𑀆𑀖𑀸𑀢𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑁄 𑀲𑀗𑁆𑀔𑀸𑀭𑁂𑀬𑁂𑀯 𑀤𑀼𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀅𑀫𑁄𑀳𑁂𑀦 𑀅𑀦𑀢𑁆𑀢𑀤𑀲𑁆𑀲𑀦𑀁, 𑀅𑀫𑀽𑀴𑁆𑀳𑁄 𑀳𑀺 𑀬𑀸𑀣𑀸𑀯𑀕𑀳𑀡𑀓𑀼𑀲𑀮𑁄 𑀅𑀧𑀭𑀺𑀡𑀸𑀬𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀧𑀭𑀺𑀡𑀸𑀬𑀓𑀢𑁄 𑀩𑀼𑀚𑁆𑀛𑀢𑀺. 𑀬𑀣𑀸 𑀘 𑀏𑀢𑁂𑀳𑀺 𑀅𑀦𑀺𑀘𑁆𑀘𑀤𑀲𑁆𑀲𑀦𑀸𑀤𑀻𑀦𑀺, 𑀏𑀯𑀁 𑀏𑀢𑁂𑀧𑀺 𑀅𑀦𑀺𑀘𑁆𑀘𑀤𑀲𑁆𑀲𑀦𑀸𑀤𑀻𑀳𑀺 𑀳𑁄𑀦𑁆𑀢𑀺. 𑀅𑀦𑀺𑀘𑁆𑀘𑀤𑀲𑁆𑀲𑀦𑁂𑀦 𑀳𑀺 𑀅𑀮𑁄𑀪𑁄 𑀳𑁄𑀢𑀺, 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀤𑁄𑀲𑁄, 𑀅𑀦𑀢𑁆𑀢𑀤𑀲𑁆𑀲𑀦𑁂𑀦 𑀅𑀫𑁄𑀳𑁄. 𑀓𑁄 𑀳𑀺 𑀦𑀸𑀫 ‘𑀅𑀦𑀺𑀘𑁆𑀘𑀫𑀺𑀤’𑀦𑁆𑀢𑀺 𑀲𑀫𑁆𑀫𑀸 𑀜𑀢𑁆𑀯𑀸 𑀢𑀲𑁆𑀲𑀢𑁆𑀣𑀸𑀬 𑀧𑀺𑀳𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀔𑀸𑀭𑁂 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀚𑀸𑀦𑀦𑁆𑀢𑁄 𑀅𑀧𑀭𑀫𑁆𑀧𑀺 𑀅𑀘𑁆𑀘𑀦𑁆𑀢𑀢𑀺𑀔𑀺𑀡𑀁 𑀓𑁄𑀥𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀅𑀢𑁆𑀢𑀲𑀼𑀜𑁆𑀜𑀢𑀜𑁆𑀘 𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀁 𑀲𑀻𑀮𑀲𑀫𑁆𑀧𑀤𑀸𑀤𑀻𑀦𑀁 𑀲𑀸𑀥𑀦𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀸𑀦𑀁, 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀘 𑀲𑀫𑁆𑀧𑀦𑁆𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄’’𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀢𑀺𑀲𑁆𑀲𑀦𑁆𑀦𑀁 𑀩𑁄𑀥𑀻𑀦𑀁 𑀅𑀜𑁆𑀜𑀢𑀭𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀇𑀤𑀸𑀦𑀺 ¶ 𑀢𑁂 𑀅𑀚𑁆𑀛𑀸𑀲𑀬𑁂 𑀧𑀸𑀴𑀺𑀬𑀸𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀚𑁆𑀛𑀸𑀲𑀬𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀉𑀪𑀬𑀁 𑀧𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀙𑀩𑁆𑀩𑀺𑀥𑀸 𑀅𑀚𑁆𑀛𑀸𑀲𑀬𑀸𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀲𑀢𑁆𑀢𑀸𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑀸, 𑀩𑁄𑀥𑀺𑀬𑀸 𑀯𑀸 𑀦𑀺𑀬𑀢𑀪𑀸𑀯𑁂𑀦 𑀲𑀢𑁆𑀢𑀸 𑀮𑀕𑁆𑀕𑀸, 𑀅𑀥𑀺𑀫𑀼𑀢𑁆𑀢𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀣𑀸𑀪𑀺𑀦𑀻𑀳𑀸𑀭𑀁 𑀅𑀢𑁆𑀢𑀦𑀸 𑀧𑀢𑁆𑀢𑀩𑁆𑀩𑀩𑁄𑀥𑀺𑀬𑀸 𑀧𑀭𑀺𑀧𑀸𑀘𑀦𑀸𑀬 𑀪𑀯𑀦𑁆𑀢𑀺. 𑀅𑀮𑁄𑀪𑀚𑁆𑀛𑀸𑀲𑀬𑀸𑀢𑀺 𑀅𑀮𑀼𑀩𑁆𑀪𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸, 𑀆𑀤𑀺𑀢𑁄 ‘‘𑀓𑀣𑀁 𑀦𑀼 𑀔𑁄 𑀫𑀬𑀁 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸 𑀘 𑀅𑀮𑀼𑀤𑁆𑀥𑀸 𑀏𑀯 𑀳𑁂𑀲𑁆𑀲𑀸𑀫𑀸’’𑀢𑀺, 𑀫𑀚𑁆𑀛𑁂 𑀘 𑀅𑀮𑀼𑀩𑁆𑀪𑀦𑀯𑀲𑁂𑀦𑁂𑀯, 𑀧𑀘𑁆𑀙𑀸 𑀘 𑀢𑀲𑁆𑀲𑁂𑀯 𑀭𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸. 𑀮𑁄𑀪𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄𑀢𑀺 𑀮𑀼𑀩𑁆𑀪𑀦𑀮𑀓𑁆𑀔𑀡𑁂 𑀮𑁄𑀪𑁂 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄. 𑀇𑀤𑀁 𑀢𑀲𑁆𑀲 𑀅𑀚𑁆𑀛𑀸𑀲𑀬𑀲𑁆𑀲 𑀏𑀓𑀤𑁂𑀲𑀢𑁄 𑀩𑁆𑀭𑀽𑀳𑀦𑀸𑀓𑀸𑀭𑀤𑀲𑁆𑀲𑀦𑀁. 𑀮𑁄𑀪𑁂 𑀳𑀺 𑀆𑀤𑀻𑀦𑀯𑀁, 𑀅𑀮𑁄𑀪𑁂 𑀘 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀲𑁆𑀲 𑀅𑀮𑁄𑀪𑀚𑁆𑀛𑀸𑀲𑀬𑁄 𑀧𑀭𑀺𑀯𑀟𑁆𑀠𑀢𑀺, 𑀲𑁆𑀯𑀸𑀬𑀁 𑀢𑀢𑁆𑀣 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑀯𑀺𑀥𑀺 𑀯𑀺𑀪𑀸𑀯𑀺𑀢𑁄𑀬𑁂𑀯. 𑀲𑁂𑀲𑀧𑀤𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 ¶ 𑀧𑀦 𑀯𑀺𑀲𑁂𑀲𑁄 𑁋 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀇𑀥 𑀧𑀩𑁆𑀩𑀚𑁆𑀚𑀸. 𑀧𑀯𑀺𑀯𑁂𑀓𑁄 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄, 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘. 𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁. 𑀲𑀩𑁆𑀩𑀪𑀯𑀕𑀢𑀻𑀲𑀽𑀢𑀺 𑀲𑀩𑁆𑀩𑁂𑀲𑀼 𑀪𑀯𑁂𑀲𑀼, 𑀲𑀩𑁆𑀩𑀸𑀲𑀼 𑀘 𑀕𑀢𑀻𑀲𑀼. 𑀢𑀤𑀥𑀺𑀫𑀼𑀢𑁆𑀢𑀢𑀸𑀬𑀸𑀢𑀺 𑀬𑀤𑀢𑁆𑀣𑀁 𑀪𑀸𑀯𑀦𑀸𑀦𑀼𑀬𑁄𑀕𑁄, 𑀬𑀤𑀢𑁆𑀣𑀸 𑀘 𑀧𑀩𑁆𑀩𑀚𑁆𑀚𑀸, 𑀢𑀤𑀥𑀺𑀫𑀼𑀢𑁆𑀢𑁂𑀦. 𑀢𑁂𑀦𑁂𑀯𑀸𑀳 ‘‘𑀲𑀫𑀸𑀥𑀸𑀥𑀺𑀫𑀼𑀢𑁆𑀢𑁂𑀦𑀸’’𑀢𑀺𑀆𑀤𑀺.

𑁫𑁦. ‘‘𑀓𑀺𑀁 𑀘𑀭𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 𑀲𑀘𑁂 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀤𑁂𑀬𑁆𑀬, ‘‘𑀓𑁂 𑀯𑀸 𑀢𑁂 𑀥𑀫𑁆𑀫𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀓𑀺𑀁 𑀯𑀸𑀢𑀺 𑀓𑀺𑀁 𑀅𑀲𑀼𑀪𑀁 𑀯𑀸 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀁 𑀯𑀸 𑀅𑀜𑁆𑀜𑀁 𑀯𑀸. 𑀓𑀺𑀁 𑀢𑁂 𑀫𑀦𑀲𑀺 𑀓𑀭𑁄𑀢𑁄 𑀨𑀸𑀲𑀼 𑀳𑁄𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁂𑀦 𑀲𑀼𑀔𑀁 𑀳𑁄𑀢𑀺. 𑀘𑀺𑀢𑁆𑀢𑀁 𑀦𑀫𑀢𑀻𑀢𑀺 𑀧𑀓𑀢𑀺𑀬𑀸𑀯 𑀅𑀪𑀺𑀭𑀢𑀺𑀯𑀲𑁂𑀦 𑀦𑀫𑀢𑀺. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀭𑀺𑀬𑀸𑀧𑀣𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀧𑀺 𑀳𑀺 𑀦 𑀲𑀩𑁆𑀩𑀲𑁆𑀲 𑀏𑀓𑀁𑀲𑀢𑁄 𑀩𑁆𑀬𑀪𑀺𑀘𑀸𑀭𑀺𑀦𑁄 𑀏𑀯. 𑀢𑀣𑀸 𑀳𑀺 𑀲𑀫𑀼𑀤𑀸𑀘𑀸𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀼𑀢𑁆𑀢𑁄. ‘‘𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀓𑀢𑀺𑀧𑀬𑀤𑀺𑀯𑀲𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺 𑀘 𑀯𑀢𑁆𑀢𑀩𑁆𑀩𑁄.

‘‘𑀧𑀓𑀢𑀺𑀬𑀸 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸’’𑀢𑀺 𑀇𑀤𑀁 𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀼𑀓𑀸𑀫𑁄, 𑀢𑀢𑁆𑀣 𑀲𑀚𑁆𑀛𑀸𑀬𑀯𑀲𑁂𑀦 𑀯𑀸 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀓𑀢𑀧𑀭𑀺𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀁 𑀤𑁆𑀯𑁂 𑀦𑀺𑀲𑀚𑁆𑀚𑀸𑀦𑀻𑀢𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀉𑀡𑁆𑀳𑀸𑀲𑀦𑀸𑀦𑀺. 𑀲𑀚𑁆𑀛𑀸𑀬𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀫𑀼𑀔𑀸𑀯 𑀅𑀥𑀻𑀬𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀲𑁄 𑀘𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀲𑁆𑀲𑀸’’𑀢𑀺. 𑀆𑀕𑀢𑀸𑀕𑀢𑀓𑁆𑀔𑀡𑁂 𑀓𑀣𑁂𑀢𑀩𑁆𑀩𑀁, 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀣𑀯𑀻𑀓𑀲𑀺𑀡𑀦𑁆𑀢𑀺 ¶ 𑀧𑀣𑀯𑀻𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑀁. 𑀓𑀢𑀲𑁆𑀲𑀸𑀢𑀺 𑀓𑀢𑀲𑁆𑀲 𑀓𑀲𑀺𑀡𑀲𑁆𑀲. 𑀢𑀁 𑀢𑀁 𑀆𑀓𑀸𑀭𑀦𑁆𑀢𑀺 𑀆𑀘𑀭𑀺𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀯𑀼𑀘𑁆𑀘𑀫𑀸𑀦𑁂 𑀧𑀤𑀧𑀤𑀢𑁆𑀣𑀸𑀥𑀺𑀧𑁆𑀧𑀸𑀬𑀑𑀧𑀫𑁆𑀫𑀸𑀤𑀺𑀓𑀁 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀢𑀁 𑀢𑀁 𑀆𑀓𑀸𑀭𑀁, 𑀬𑀁 𑀬𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀉𑀧𑀦𑁂𑀢𑁆𑀯𑀸 𑀦𑀺𑀩𑀤𑁆𑀥𑀁 𑀯𑀺𑀬 𑀓𑀢𑁆𑀯𑀸, 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀅𑀧𑀫𑀼𑀲𑁆𑀲𑀦𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸𑀬 𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑁂𑀦. 𑀢𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀦𑀺𑀲𑁆𑀲𑀸𑀬. 𑀇𑀢𑀭𑀲𑁆𑀲𑀸𑀢𑀺 𑀢𑀣𑀸 𑀅𑀕𑀡𑁆𑀳𑀦𑁆𑀢𑀲𑁆𑀲. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀓𑀲𑁆𑀲𑀘𑀺𑀧𑀺 𑀧𑀓𑀸𑀭𑀲𑁆𑀲 𑀢𑀢𑁆𑀣 𑀅𑀲𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀢𑀢𑀺𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁪. 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁧. 𑀨𑀸𑀲𑀼 ¶ ¶ 𑀳𑁄𑀢𑀻𑀢𑀺 𑀆𑀯𑀸𑀲𑀲𑀧𑁆𑀧𑀸𑀬𑀸𑀤𑀺𑀮𑀸𑀪𑁂𑀦 𑀫𑀦𑀲𑀺𑀓𑀸𑀭𑀨𑀸𑀲𑀼𑀢𑀸 𑀪𑀸𑀯𑀦𑀸𑀦𑀼𑀓𑀽𑀮𑀢𑀸 𑀳𑁄𑀢𑀺. 𑀧𑀭𑀺𑀲𑁄𑀥𑁂𑀦𑁆𑀢𑁂𑀦𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀕𑀡𑁆𑀞𑀺𑀝𑁆𑀞𑀸𑀦𑀸𑀦𑀁 𑀙𑀺𑀦𑁆𑀤𑀦𑀯𑀲𑁂𑀦 𑀯𑀺𑀲𑁄𑀥𑁂𑀦𑁆𑀢𑁂𑀦. 𑀅𑀓𑀺𑀮𑀫𑀦𑁆𑀢𑁄𑀬𑁂𑀯𑀸𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑁄 𑀏𑀯. 𑀲𑀢𑀺 𑀳𑀺 𑀓𑀸𑀬𑀓𑀺𑀮𑀫𑀣𑁂 𑀲𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀡𑁆𑀞𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑀢𑁄, 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀤𑀼𑀩𑁆𑀩𑀺𑀦𑀺𑀯𑁂𑀥𑀢𑀸𑀬 𑀕𑀡𑁆𑀞𑀺𑀪𑀽𑀢𑀁 𑀞𑀸𑀦𑀁. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀅𑀢𑁆𑀣𑀲𑁆𑀲, 𑀅𑀥𑀺𑀧𑁆𑀧𑀸𑀬𑀲𑁆𑀲 𑀘 𑀯𑀺𑀪𑀸𑀯𑀦𑁂𑀦 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀪𑀽𑀢𑀁 𑀲𑀼𑀧𑀸𑀓𑀝𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀯𑀺𑀲𑀼𑀤𑁆𑀥𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀁, 𑀦𑀺𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀦𑀼𑀭𑀽𑀧𑀯𑀺𑀳𑀸𑀭𑀯𑀡𑁆𑀡𑀦𑀸

𑁫𑁨. 𑀅𑀜𑁆𑀜𑀢𑀭𑁂𑀦𑀸𑀢𑀺 𑀅𑀜𑁆𑀜𑀢𑀭𑁂𑀦𑀸𑀧𑀺, 𑀧𑀕𑁂𑀯 𑀅𑀦𑁂𑀓𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀦𑁆𑀢𑀪𑀸𑀯𑁄 𑀫𑀳𑀢𑁆𑀢𑀁. 𑀢𑀣𑀸 𑀲𑁂𑀲𑁂𑀲𑀼. 𑀲𑁄𑀡𑁆𑀟𑀯𑀸 𑀲𑁄𑀡𑁆𑀟𑀻. 𑀢𑀣𑀸 𑀧𑀡𑁆𑀡𑀦𑁆𑀢𑀺𑀆𑀤𑀻𑀲𑀼. 𑀩𑁄𑀥𑀺𑀅𑀗𑁆𑀕𑀡𑀸𑀤𑀻𑀲𑀼 𑀓𑀸𑀢𑀩𑁆𑀩𑀁 𑀇𑀥 ‘‘𑀯𑀢𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀸𑀦𑀻𑀬𑀖𑀝𑀁 𑀯𑀸 𑀭𑀺𑀢𑁆𑀢’’𑀦𑁆𑀢𑀺. 𑀦𑀺𑀝𑁆𑀞𑀺𑀢𑀸𑀬𑀸𑀢𑀺 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑀸𑀦𑀁 𑀤𑀸𑀦𑁂𑀦 𑀧𑀭𑀺𑀓𑁆𑀔𑀻𑀡𑀸𑀬. 𑀚𑀺𑀡𑁆𑀡𑀯𑀺𑀳𑀸𑀭𑁂𑀧𑀺 𑀬𑀢𑁆𑀭 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀬𑀲𑁆𑀫𑀸, 𑀬𑀣𑀸𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀼, 𑀫𑀬𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀭𑀽𑀧𑁂 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀮𑀩𑁆𑀪𑀢𑀺, 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀦 𑀦 𑀯𑀼𑀢𑁆𑀢𑁄.

𑀫𑀳𑀸𑀧𑀣𑀯𑀺𑀳𑀸𑀭𑁂𑀢𑀺 𑀫𑀳𑀸𑀧𑀣𑀲𑀫𑀻𑀧𑁂 𑀯𑀺𑀳𑀸𑀭𑁂. 𑀪𑀸𑀚𑀦𑀤𑀸𑀭𑀼𑀤𑁄𑀡𑀺𑀓𑀸𑀤𑀻𑀦𑀻𑀢𑀺 𑀭𑀚𑀦𑀪𑀸𑀚𑀦𑀸𑀦𑀺, 𑀭𑀚𑀦𑀢𑁆𑀣𑀸𑀬 𑀤𑀸𑀭𑀼, 𑀤𑀸𑀭𑀼𑀫𑀬𑀤𑁄𑀡𑀺𑀓𑀸, 𑀭𑀚𑀦𑀧𑀘𑀦𑀝𑁆𑀞𑀸𑀦𑀁, 𑀥𑁄𑀯𑀦𑀨𑀮𑀓𑀦𑁆𑀢𑀺 𑀏𑀯𑀫𑀸𑀤𑀻𑀦𑀺. 𑀲𑀸𑀓𑀳𑀸𑀭𑀺𑀓𑀸𑀢𑀺 𑀲𑀸𑀓𑀳𑀸𑀭𑀺𑀦𑀺𑀬𑁄 𑀇𑀢𑁆𑀣𑀺𑀬𑁄. 𑀯𑀺𑀲𑀪𑀸𑀕𑀲𑀤𑁆𑀤𑁄 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑁄 𑀕𑀻𑀢𑀲𑀤𑁆𑀤𑁄𑀢𑀺 𑀯𑀤𑀦𑁆𑀢𑀺, 𑀓𑁂𑀯𑀮𑁄𑀧𑀺 𑀇𑀢𑁆𑀣𑀺𑀲𑀤𑁆𑀤𑁄 𑀯𑀺𑀲𑀪𑀸𑀕𑀲𑀤𑁆𑀤𑁄 𑀏𑀯. 𑀢𑀢𑁆𑀭𑀸𑀢𑀺 𑀧𑀼𑀧𑁆𑀨𑀯𑀦𑁆𑀢𑁂 𑀯𑀺𑀳𑀸𑀭𑁂. 𑀢𑀸𑀤𑀺𑀲𑁄𑀬𑁂𑀯𑀸𑀢𑀺 ‘‘𑀢𑀢𑁆𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀬𑀸𑀤𑀺𑀲𑁄 𑀧𑀡𑁆𑀡𑀯𑀦𑁆𑀢𑁂 𑀯𑀺𑀳𑀸𑀭𑁂 𑀉𑀧𑀤𑁆𑀤𑀯𑁄 𑀯𑀼𑀢𑁆𑀢𑁄, 𑀢𑀸𑀤𑀺𑀲𑁄𑀬𑁂𑀯. ‘‘𑀧𑀼𑀧𑁆𑀨𑀳𑀸𑀭𑀺𑀓𑀸𑀬𑁄 𑀧𑀼𑀧𑁆𑀨𑀁 𑀑𑀘𑀺𑀦𑀦𑁆𑀢𑀺𑀬𑁄’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀅𑀬𑀫𑀺𑀥 𑀯𑀺𑀲𑁂𑀲𑁄.

𑀧𑀢𑁆𑀣𑀦𑀻𑀬𑁂𑀢𑀺 ¶ 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀧𑀢𑁆𑀣𑁂𑀢𑀩𑁆𑀩𑁂. 𑀢𑁂𑀦𑀸𑀳 ‘‘𑀮𑁂𑀡𑀲𑀫𑁆𑀫𑀢𑁂’’𑀢𑀺. 𑀤𑀓𑁆𑀔𑀺𑀡𑀸𑀕𑀺𑀭𑀻𑀢𑀺 𑀫𑀕𑀥𑀯𑀺𑀲𑀬𑁂 𑀤𑀓𑁆𑀔𑀺𑀡𑀸𑀕𑀺𑀭𑀻𑀢𑀺 𑀯𑀤𑀦𑁆𑀢𑀺.

𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀦𑀺 ¶ 𑀇𑀝𑁆𑀞𑀸𑀦𑀺, 𑀅𑀦𑀺𑀝𑁆𑀞𑀸𑀦𑀺 𑀘. 𑀅𑀦𑀺𑀝𑁆𑀞𑀸𑀦𑀁 𑀳𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀖𑀝𑁂𑀳𑀺 𑀦𑀺𑀖𑀁𑀲𑀦𑁆𑀢𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀩𑁆𑀩𑀽𑀧𑀓𑀭𑀡𑀬𑁄𑀕𑁆𑀕𑀸 𑀭𑀼𑀓𑁆𑀔𑀸 𑀤𑀩𑁆𑀩𑀽𑀧𑀓𑀭𑀡𑀭𑀼𑀓𑁆𑀔𑀸.

𑀬𑁄 𑀧𑀦 𑀯𑀺𑀳𑀸𑀭𑁄. 𑀔𑀮𑀦𑁆𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑀁. 𑀕𑀸𑀯𑁄 𑀭𑀼𑀦𑁆𑀥𑀦𑁆𑀢𑀺 ‘‘𑀲𑀲𑁆𑀲𑀁 𑀔𑀸𑀤𑀺𑀁𑀲𑀽’’𑀢𑀺. 𑀉𑀤𑀓𑀯𑀸𑀭𑀦𑁆𑀢𑀺 𑀓𑁂𑀤𑀸𑀭𑁂𑀲𑀼 𑀲𑀲𑁆𑀲𑀸𑀦𑀁 𑀤𑀸𑀢𑀩𑁆𑀩𑀉𑀤𑀓𑀯𑀸𑀭𑀁. 𑀅𑀬𑀫𑁆𑀧𑀻𑀢𑀺 𑀫𑀳𑀸𑀲𑀗𑁆𑀖𑀪𑁄𑀕𑁄𑀧𑀺 𑀯𑀺𑀳𑀸𑀭𑁄. 𑀯𑀸𑀭𑀺𑀬𑀫𑀸𑀦𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 𑀪𑀺𑀓𑁆𑀔𑀼𑀦𑀸.

𑀲𑀫𑀼𑀤𑁆𑀤𑀲𑀸𑀫𑀼𑀤𑁆𑀤𑀺𑀓𑀦𑀤𑀻𑀦𑀺𑀲𑁆𑀲𑀺𑀢𑀁 𑀉𑀤𑀓𑀧𑀝𑁆𑀝𑀦𑀁. 𑀫𑀳𑀸𑀦𑀕𑀭𑀸𑀦𑀁 𑀆𑀬𑀤𑁆𑀯𑀸𑀭𑀪𑀽𑀢𑀁 𑀅𑀝𑀯𑀺𑀫𑀼𑀔𑀸𑀤𑀺𑀦𑀺𑀲𑁆𑀲𑀺𑀢𑀁 𑀣𑀮𑀧𑀝𑁆𑀝𑀦𑀁. 𑀅𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂𑀦𑀲𑁆𑀲 𑀢𑀢𑁆𑀣 𑀨𑀸𑀲𑀼𑀯𑀺𑀳𑀸𑀭𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀜𑁆𑀜𑀫𑀸𑀦𑀸 𑀭𑀸𑀚𑀫𑀦𑀼𑀲𑁆𑀲𑀸.

𑀲𑀫𑁄𑀲𑀭𑀡𑁂𑀦𑀸𑀢𑀺 𑀇𑀢𑁄 𑀘𑀺𑀢𑁄 𑀲𑀜𑁆𑀘𑀭𑀡𑁂𑀦. 𑀧𑀧𑀸𑀢𑁂𑀢𑀺 𑀧𑀧𑀸𑀢𑀲𑀻𑀲𑁂 𑀞𑀢𑁆𑀯𑀸 𑀕𑀸𑀬𑀺 ‘‘𑀕𑀻𑀢𑀲𑀤𑁆𑀤𑁂𑀦 𑀇𑀥𑀸𑀕𑀢𑀁 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀯𑁂𑀕𑁂𑀦 𑀕𑀳𑁂𑀢𑁆𑀯𑀸𑀢𑀺 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀬𑀸𑀲𑀻’’𑀢𑀺 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸.

𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂, 𑀯𑀺𑀳𑀸𑀭𑀲𑀸𑀫𑀦𑁆𑀢𑀸 𑀯𑀸 𑀦 𑀲𑀓𑁆𑀓𑀸 𑀳𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀤𑁆𑀥𑀼𑀁, 𑀢𑀢𑁆𑀣 𑀯𑀺𑀳𑀸𑀭𑁂 𑀲𑁄 𑀅𑀮𑀸𑀪𑁄 𑀫𑀳𑀸𑀤𑁄𑀲𑁄𑀢𑀺 𑀬𑁄𑀚𑀦𑀸.

𑀧𑀦𑁆𑀣𑀦𑀺𑀦𑁆𑀢𑀺 𑀧𑀦𑁆𑀣𑁂 𑀦𑀻𑀢𑁄 𑀧𑀯𑀢𑁆𑀢𑀺𑀢𑁄𑀢𑀺 𑀧𑀦𑁆𑀣𑀦𑀻, 𑀫𑀕𑁆𑀕𑀦𑀺𑀲𑁆𑀲𑀺𑀢𑁄 𑀯𑀺𑀳𑀸𑀭𑁄. 𑀢𑀁 𑀧𑀦𑁆𑀣𑀦𑀺𑀁. 𑀲𑁄𑀡𑁆𑀟𑀺𑀦𑁆𑀢𑀺 𑀲𑁄𑀡𑁆𑀟𑀺𑀲𑀳𑀺𑀢𑁄 𑀯𑀺𑀳𑀸𑀭𑁄 𑀲𑁄𑀡𑁆𑀟𑀻, 𑀢𑀁 𑀲𑁄𑀡𑁆𑀟𑀺𑀁. 𑀢𑀣𑀸 𑀧𑀡𑁆𑀡𑀦𑁆𑀢𑀺𑀆𑀤𑀻𑀲𑀼. 𑀦𑀕𑀭𑀦𑀺𑀲𑁆𑀲𑀺𑀢𑀁 𑀦𑀕𑀭𑀦𑁆𑀢𑀺 𑀯𑀼𑀢𑁆𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀪𑀻𑀫𑀲𑁂𑀦𑁄 𑀪𑀻𑀫𑁄’’𑀢𑀺. 𑀤𑀸𑀭𑀼𑀦𑀸𑀢𑀺 𑀤𑀸𑀭𑀼𑀦𑀺𑀲𑁆𑀲𑀺𑀢𑁂𑀦 𑀲𑀳. 𑀯𑀺𑀲𑀪𑀸𑀕𑁂𑀦𑀸𑀢𑀺 𑀬𑁄 𑀯𑀺𑀲𑀪𑀸𑀕𑁂𑀳𑀺 𑀯𑀼𑀲𑀻𑀬𑀢𑀺, 𑀯𑀺𑀲𑀪𑀸𑀕𑀸𑀦𑀁 𑀯𑀸 𑀦𑀺𑀯𑀸𑀲𑁄, 𑀲𑁄 𑀯𑀺𑀳𑀸𑀭𑁄 𑀯𑀺𑀲𑀪𑀸𑀕𑁄. 𑀢𑁂𑀦 𑀯𑀺𑀲𑀪𑀸𑀕𑁂𑀦 𑀲𑀤𑁆𑀥𑀺𑀁. 𑀧𑀘𑁆𑀘𑀦𑁆𑀢𑀦𑀺𑀲𑁆𑀲𑀺𑀢𑀜𑁆𑀘 𑀲𑀻𑀫𑀸𑀦𑀺𑀲𑁆𑀲𑀺𑀢𑀜𑁆𑀘 𑀅𑀲𑀧𑁆𑀧𑀸𑀬𑀜𑁆𑀘 𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁. 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺, 𑀢𑀫𑁆𑀧𑀻𑀢𑀺 𑀲𑀩𑁆𑀩𑀢𑁆𑀣 𑀞𑀸𑀦-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀇𑀢𑀺 𑀯𑀺𑀜𑁆𑀜𑀸𑀬𑀸𑀢𑀺 ‘‘𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀸𑀦𑀻’’𑀢𑀺 𑀏𑀯𑀁 𑀯𑀺𑀚𑀸𑀦𑀺𑀢𑁆𑀯𑀸.

𑀅𑀦𑀼𑀭𑀽𑀧𑀯𑀺𑀳𑀸𑀭𑀯𑀡𑁆𑀡𑀦𑀸

𑁫𑁩. 𑀅𑀬𑀁 ¶ 𑀅𑀦𑀼𑀭𑀽𑀧𑁄 𑀦𑀸𑀫𑀸𑀢𑀺 𑀅𑀬𑀁 𑀯𑀺𑀳𑀸𑀭𑁄 𑀪𑀸𑀯𑀦𑀸𑀬 𑀅𑀦𑀼𑀭𑀽𑀧𑁄 𑀦𑀸𑀫. 𑀦𑀸𑀢𑀺𑀤𑀽𑀭𑀦𑁆𑀢𑀺 𑀕𑁄𑀘𑀭𑀝𑁆𑀞𑀸𑀦𑀢𑁄 𑀅𑀟𑁆𑀠𑀕𑀸𑀯𑀼𑀢𑀢𑁄 𑀑𑀭𑀪𑀸𑀕𑀢𑀸𑀬 𑀦 ¶ 𑀅𑀢𑀺𑀤𑀽𑀭𑀁. 𑀦𑀸𑀘𑁆𑀘𑀸𑀲𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦 𑀕𑁄𑀘𑀭𑀝𑁆𑀞𑀸𑀦𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑀢𑀸𑀬 𑀦 𑀅𑀢𑀺𑀆𑀲𑀦𑁆𑀦𑀁. 𑀢𑀸𑀬 𑀘 𑀧𑀦 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀬, 𑀕𑁄𑀘𑀭𑀝𑁆𑀞𑀸𑀦𑀁 𑀧𑀭𑀺𑀲𑁆𑀲𑀬𑀸𑀤𑀺𑀭𑀳𑀺𑀢𑀫𑀕𑁆𑀕𑀢𑀸𑀬 𑀘 𑀕𑀫𑀦𑀲𑁆𑀲 𑀘 𑀆𑀕𑀫𑀦𑀲𑁆𑀲 𑀘 𑀬𑀼𑀢𑁆𑀢𑀭𑀽𑀧𑀢𑁆𑀢𑀸 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁. 𑀤𑀺𑀯𑀲𑀪𑀸𑀕𑁂 𑀫𑀳𑀸𑀚𑀦𑀲𑀁𑀓𑀺𑀡𑁆𑀡𑀢𑀸𑀪𑀸𑀯𑁂𑀦 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁. 𑀅𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁬) 𑀯𑀺𑀬. 𑀭𑀢𑁆𑀢𑀺𑀬𑀁 𑀚𑀦𑀸𑀮𑀸𑀧𑀲𑀤𑁆𑀤𑀸𑀪𑀸𑀯𑁂𑀦 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁. 𑀲𑀩𑁆𑀩𑀤𑀸𑀧𑀺 𑀚𑀦𑀲𑀦𑁆𑀦𑀺𑀧𑀸𑀢𑀦𑀺𑀕𑁆𑀖𑁄𑀲𑀸𑀪𑀸𑀯𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲𑀁. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀅𑀓𑀲𑀺𑀭𑁂𑀦 𑀲𑀼𑀔𑁂𑀦𑁂𑀯. 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀣𑁂𑀭𑀸. 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀯𑀸𑀘𑀼𑀕𑁆𑀕𑀢𑀓𑀭𑀡𑁂𑀦, 𑀲𑀫𑁆𑀫𑀤𑁂𑀯 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀆𑀕𑀫𑀺𑀢𑀪𑀸𑀯𑁂𑀦 𑀘 𑀆𑀕𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑁄 𑀆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀆𑀕𑀢𑀸𑀕𑀫𑀸. 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀸𑀭𑀡𑁂𑀦 𑀥𑀫𑁆𑀫𑀥𑀭𑀸. 𑀯𑀺𑀦𑀬𑀲𑁆𑀲 𑀥𑀸𑀭𑀡𑁂𑀦 𑀯𑀺𑀦𑀬𑀥𑀭𑀸. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀯𑀺𑀦𑀬𑀸𑀦𑀁 𑀫𑀸𑀢𑀺𑀓𑀸𑀬 𑀥𑀸𑀭𑀡𑁂𑀦 𑀫𑀸𑀢𑀺𑀓𑀸𑀥𑀭𑀸. 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀼𑀘𑁆𑀙𑀢𑀺. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀜𑁆𑀳𑀢𑀺 𑀯𑀻𑀫𑀁𑀲𑀢𑀺 𑀯𑀺𑀘𑀸𑀭𑁂𑀢𑀺. 𑀇𑀤𑀁, 𑀪𑀦𑁆𑀢𑁂, 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀧𑀭𑀺𑀧𑀼𑀘𑁆𑀙𑀦𑀧𑀭𑀺𑀧𑀜𑁆𑀳𑀸𑀓𑀸𑀭𑀤𑀲𑁆𑀲𑀦𑀁. 𑀅𑀯𑀺𑀯𑀝𑀜𑁆𑀘𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀤𑁂𑀲𑀦𑁆𑀢𑀭𑀧𑀸𑀴𑀺𑀤𑀲𑁆𑀲𑀦𑁂𑀦 𑀆𑀕𑀫𑀢𑁄 𑀯𑀺𑀯𑀭𑀦𑁆𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀬𑀼𑀢𑁆𑀢𑀺𑀯𑀺𑀪𑀸𑀯𑀦𑁂𑀦 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺. 𑀓𑀗𑁆𑀔𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀢𑀸𑀬 𑀕𑀡𑁆𑀞𑀺𑀝𑁆𑀞𑀸𑀦𑀪𑀽𑀢𑁂𑀲𑀼 𑀧𑀸𑀴𑀺𑀧𑀤𑁂𑀲𑁂𑀲𑀼 𑀬𑀸𑀣𑀸𑀯𑀢𑁄 𑀯𑀺𑀦𑀺𑀘𑁆𑀙𑀬𑀤𑀸𑀦𑁂𑀦 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀢𑁆𑀣 𑀘 ‘‘𑀦𑀸𑀢𑀺𑀤𑀽𑀭𑀁, 𑀦𑀸𑀘𑁆𑀘𑀸𑀲𑀦𑁆𑀦𑀁, 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺 𑀏𑀓𑀁, ‘‘𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲’’𑀦𑁆𑀢𑀺 𑀏𑀓𑀁, ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀏𑀓𑀁, ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸…𑀧𑁂… 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀻’’𑀢𑀺 𑀏𑀓𑀁. 𑀏𑀯𑀁 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀯𑀡𑁆𑀡𑀦𑀸

𑁫𑁪. 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁂 𑀧𑀬𑁄𑀚𑀦𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀕𑁆𑀕𑀴𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀤𑀸𑀦𑀸𑀤𑀺𑀦𑀸 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸. 𑀢𑀦𑁆𑀢𑀘𑁆𑀙𑁂𑀤𑀸𑀤𑀻𑀲𑀼 𑀢𑀼𑀦𑁆𑀦𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁.

𑀪𑀸𑀯𑀦𑀸𑀯𑀺𑀥𑀸𑀦𑀯𑀡𑁆𑀡𑀦𑀸

𑁫𑁫. 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀸𑀢𑀺 ¶ ¶ 𑀅𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀲𑁆𑀲 𑀘𑀢𑁆𑀢𑀸𑀮𑀻𑀲𑀯𑀺𑀥𑀲𑁆𑀲 𑀲𑀩𑁆𑀩𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀲𑁂𑀦. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀧𑀺𑀡𑁆𑀟𑀧𑀸𑀢𑀧𑀭𑀺𑀪𑁄𑀕𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀦, 𑀧𑀺𑀡𑁆𑀟𑀧𑀸𑀢𑀪𑀼𑀢𑁆𑀢𑀸𑀯𑀺𑀦𑀸 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑀸𑀢𑀺 𑀅𑀢𑁆𑀣𑁄. 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀪𑁄𑀚𑀦𑀦𑀺𑀫𑀺𑀢𑁆𑀢𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀆𑀳𑀸𑀭𑁂 𑀳𑀺 𑀆𑀲𑀬𑀁 𑀧𑀯𑀺𑀝𑁆𑀞𑀫𑀢𑁆𑀢𑁂 𑀢𑀲𑁆𑀲 𑀆𑀕𑀦𑁆𑀢𑀼𑀓𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀲𑀺𑀬𑀸 𑀲𑀭𑀻𑀭𑀲𑁆𑀲 𑀓𑁄𑀘𑀺 𑀧𑀭𑀺𑀲𑁆𑀲𑀫𑁄, 𑀢𑀁 𑀯𑀽𑀧𑀲𑀫𑁂𑀢𑁆𑀯𑀸. 𑀢𑀲𑁆𑀫𑀺𑀁 𑀳𑀺 𑀅𑀯𑀽𑀧𑀲𑀦𑁆𑀢𑁂 𑀲𑀭𑀻𑀭𑀔𑁂𑀤𑁂𑀦 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀦 𑀮𑀪𑁂𑀬𑁆𑀬𑀸𑀢𑀺. 𑀧𑀯𑀺𑀯𑀺𑀢𑁆𑀢𑁂𑀢𑀺 𑀚𑀦𑀯𑀺𑀯𑀺𑀢𑁆𑀢𑁂. 𑀲𑀼𑀔𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀦𑀺𑀲𑀚𑁆𑀚𑀸𑀬 𑀲𑀼𑀔𑀦𑀺𑀲𑀺𑀦𑁆𑀦𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀦𑁆𑀢𑀺 𑀬𑀁 ‘‘𑀓𑀢𑀸𑀬 𑀯𑀸’’𑀢𑀺𑀆𑀤𑀺𑀦𑀸 𑀧𑀣𑀯𑀺𑀬𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀇𑀥 𑀯𑀼𑀘𑁆𑀘𑀢𑀺, 𑀯𑀼𑀢𑁆𑀢𑀁 𑀳𑁂𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁.

𑀇𑀤𑀸𑀦𑀺 𑀢𑀁 𑀅𑀝𑁆𑀞𑀓𑀣𑀸𑀧𑀸𑀴𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀣𑀯𑀻𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀣𑀯𑀻𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀧𑀣𑀯𑀻𑀓𑀲𑀺𑀡𑀁 𑀕𑀡𑁆𑀳𑀦𑁆𑀢𑁄 𑀆𑀤𑀺𑀬𑀦𑁆𑀢𑁄, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀪𑀽𑀢𑀁 𑀧𑀣𑀯𑀻𑀓𑀲𑀺𑀡𑀁 𑀉𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀦𑀜𑁆𑀘𑁂𑀢𑁆𑀣 𑀢𑀣𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀣𑀯𑀺𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑁂 𑀧𑀣𑀯𑀻𑀫𑀡𑁆𑀟𑀮𑁂. 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀢𑀢𑁆𑀣 𑀘𑀓𑁆𑀔𑀼𑀦𑀸 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀪𑀸𑀯𑀦𑀸𑀜𑀸𑀡𑁂𑀦 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑀁 𑀧𑀣𑀯𑀻𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺. ‘‘𑀧𑀣𑀯𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀫𑀡𑁆𑀟𑀮𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀓𑀢𑁂𑀢𑀺 𑀯𑀓𑁆𑀔𑀫𑀸𑀦𑀯𑀺𑀥𑀺𑀦𑀸 𑀅𑀪𑀺𑀲𑀗𑁆𑀔𑀢𑁂𑀢𑀺 𑀅𑀢𑁆𑀣𑁄. 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀅𑀓𑀢𑁂𑀢𑀺 𑀧𑀸𑀓𑀢𑀺𑀓𑁂 𑀔𑀮𑀫𑀡𑁆𑀟𑀮𑀸𑀤𑀺𑀓𑁂 𑀧𑀣𑀯𑀻𑀫𑀡𑁆𑀟𑀮𑁂. 𑀲𑀸𑀦𑁆𑀢𑀓𑁂𑀢𑀺 𑀲𑀅𑀦𑁆𑀢𑀓𑁂 𑀏𑀯, 𑀲𑀧𑀭𑀺𑀘𑁆𑀙𑁂𑀤𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑀸𑀯𑀥𑀸𑀭𑀡𑀜𑁆𑀳𑁂𑀢𑀁 𑀯𑀘𑀦𑀁. 𑀢𑀣𑀸 𑀳𑀺 𑀢𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀅𑀦𑀦𑁆𑀢𑀓𑁂’’𑀢𑀺 𑀯𑀼𑀢𑁆𑀢𑀁. 𑀲𑀓𑁄𑀝𑀺𑀬𑁂𑀢𑀺𑀆𑀤𑀻𑀦𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸𑀢𑀺𑀆𑀤𑀻𑀲𑀼 𑀲𑀼𑀧𑁆𑀧𑀲𑀭𑀸𑀯𑀸𑀦𑀺 𑀲𑀫𑀧𑁆𑀧𑀫𑀸𑀡𑀸𑀦𑀺 𑀇𑀘𑁆𑀙𑀺𑀢𑀸𑀦𑀺. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀲𑀭𑀸𑀯𑀫𑀢𑁆𑀢𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀳𑁄𑀢𑀺, 𑀲𑀼𑀧𑁆𑀧𑀫𑀢𑁆𑀢𑀁 𑀢𑀢𑁄 𑀅𑀥𑀺𑀓𑀧𑁆𑀧𑀫𑀸𑀡𑀦𑁆𑀢𑀺. 𑀓𑀺𑀢𑁆𑀢𑀺𑀫𑀁 𑀓𑀲𑀺𑀡𑀫𑀡𑁆𑀟𑀮𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀭𑀸𑀯𑀫𑀢𑁆𑀢𑀁, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀼𑀧𑁆𑀧𑀫𑀢𑁆𑀢𑀁, 𑀦 𑀢𑀢𑁄 𑀅𑀥𑁄, 𑀉𑀤𑁆𑀥𑀁 𑀯𑀸𑀢𑀺 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑀪𑁂𑀤𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀬𑀣𑀸𑀉𑀧𑀝𑁆𑀞𑀺𑀢𑁂 𑀆𑀭𑀫𑁆𑀫𑀡𑁂 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀯𑀟𑁆𑀠𑀺𑀢𑀁 𑀅𑀧𑁆𑀧𑀫𑀸𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀙𑀢𑁆𑀢𑀫𑀢𑁆𑀢𑀫𑁆𑀧𑀺 𑀓𑀲𑀺𑀡𑀫𑀡𑁆𑀟𑀮𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀲𑁄 ¶ 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀻𑀢𑀺 𑀲𑁄 𑀬𑁄𑀕𑀸𑀯𑀘𑀭𑁄 𑀢𑀁 𑀧𑀣𑀯𑀻𑀫𑀡𑁆𑀟𑀮𑀁 𑀲𑀼𑀕𑁆𑀕𑀳𑀺𑀢𑀁 𑀦𑀺𑀫𑀺𑀢𑁆𑀢𑀁 ¶ 𑀓𑀭𑁄𑀢𑀺. 𑀬𑀤𑀸 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀺𑀢𑀓𑁆𑀔𑀡𑁂 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀤𑀸 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺 𑀦𑀸𑀫. 𑀅𑀣𑁂𑀢𑁆𑀣 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀅𑀩𑀳𑀺𑀕𑀢𑁂𑀦 𑀫𑀸𑀦𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺 𑀦𑀸𑀫. 𑀏𑀯𑀁 𑀉𑀧𑀥𑀸𑀭𑀺𑀢𑀁 𑀧𑀦 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀢𑀫𑁂𑀯𑀸𑀭𑀩𑁆𑀪 𑀆𑀲𑁂𑀯𑀦𑀁 𑀪𑀸𑀯𑀦𑀁 𑀩𑀳𑀼𑀮𑀁 𑀧𑀯𑀢𑁆𑀢𑁂𑀦𑁆𑀢𑁄 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀺 𑀦𑀸𑀫. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀏𑀯𑀁 𑀲𑀼𑀕𑁆𑀕𑀳𑀺𑀢𑀓𑀭𑀡𑀸𑀤𑀺𑀦𑀸 𑀲𑀫𑁆𑀫𑀤𑁂𑀯 𑀉𑀧𑀝𑁆𑀞𑀺𑀢𑁂 𑀢𑀲𑁆𑀫𑀺𑀁 𑀧𑀣𑀯𑀻𑀓𑀲𑀺𑀡𑀲𑀜𑁆𑀜𑀺𑀢𑁂 𑀆𑀭𑀫𑁆𑀫𑀡𑁂. 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑀦𑁂𑀢𑁆𑀯𑀸 𑀦𑀺𑀩𑀦𑁆𑀥𑀢𑀺 𑀅𑀜𑁆𑀜𑀸𑀭𑀫𑁆𑀫𑀡𑀢𑁄 𑀯𑀺𑀦𑀺𑀯𑀢𑁆𑀢𑀁 𑀓𑀭𑁄𑀢𑀺. 𑀅𑀤𑁆𑀥𑀸 𑀇𑀫𑀸𑀬𑀸𑀢𑀺𑀆𑀤𑀺 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀤𑀲𑁆𑀲𑀦𑀁.

𑀇𑀤𑀸𑀦𑀺 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀅𑀝𑁆𑀞𑀓𑀣𑀸𑀧𑀸𑀞𑀲𑁆𑀲 𑀅𑀢𑁆𑀣𑀧𑁆𑀧𑀓𑀸𑀲𑀦𑁂𑀦 𑀲𑀤𑁆𑀥𑀺𑀁 𑀪𑀸𑀯𑀦𑀸𑀯𑀺𑀥𑀺𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀅𑀓𑀢𑁂 𑀢𑀸𑀯 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑁂𑀦 𑀅𑀢𑀻𑀢𑀪𑀯𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀧𑀸𑀞𑁂. 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀻𑀢𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀯𑀲𑁂𑀦 𑀯𑀤𑀢𑀺. 𑀧𑀼𑀜𑁆𑀜𑀯𑀢𑁄𑀢𑀺 𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀯𑀢𑁄. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀢𑀸𑀤𑀺𑀲𑁂𑀦𑁂𑀯 𑀉𑀧𑀦𑀺𑀲𑁆𑀲𑀬𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀔𑀮𑀫𑀡𑁆𑀟𑀮𑁂𑀢𑀺 𑀫𑀡𑁆𑀟𑀮𑀸𑀓𑀸𑀭𑁂 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂. 𑀢𑀁𑀞𑀸𑀦𑀧𑁆𑀧𑀫𑀸𑀡𑀫𑁂𑀯𑀸𑀢𑀺 𑀑𑀮𑁄𑀓𑀺𑀢𑀝𑁆𑀞𑀸𑀦𑀧𑁆𑀧𑀫𑀸𑀡𑀫𑁂𑀯.

𑀅𑀯𑀺𑀭𑀸𑀥𑁂𑀢𑁆𑀯𑀸𑀢𑀺 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀼𑀢𑁆𑀢𑀯𑀺𑀥𑀺𑀦𑀸 𑀏𑀯. 𑀦𑀻𑀮𑀧𑀻𑀢𑀮𑁄𑀳𑀺𑀢𑀑𑀤𑀸𑀢𑀲𑀫𑁆𑀪𑁂𑀤𑀯𑀲𑁂𑀦𑀸𑀢𑀺 𑀦𑀻𑀮𑀸𑀤𑀺𑀯𑀡𑁆𑀡𑀸𑀳𑀺 𑀫𑀢𑁆𑀢𑀺𑀓𑀸𑀳𑀺 𑀧𑀘𑁆𑀘𑁂𑀓𑀁, 𑀏𑀓𑀚𑁆𑀛𑀜𑁆𑀘 𑀲𑀁𑀲𑀕𑁆𑀕𑀯𑀲𑁂𑀦. 𑀕𑀗𑁆𑀕𑀸𑀯𑀳𑁂𑀢𑀺 𑀕𑀗𑁆𑀕𑀸𑀲𑁄𑀢𑁂. 𑀲𑀻𑀳𑀴𑀤𑀻𑀧𑁂 𑀓𑀺𑀭 𑀭𑀸𑀯𑀡𑀕𑀗𑁆𑀕𑀸 𑀦𑀸𑀫 𑀦𑀤𑀻, 𑀢𑀲𑁆𑀲𑀸 𑀲𑁄𑀢𑁂𑀦 𑀙𑀺𑀦𑁆𑀦𑀢𑀝𑀝𑁆𑀞𑀸𑀦𑁂 𑀫𑀢𑁆𑀢𑀺𑀓𑀸 𑀅𑀭𑀼𑀡𑀯𑀡𑁆𑀡𑀸. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀕𑀗𑁆𑀕𑀸𑀯𑀳𑁂 𑀫𑀢𑁆𑀢𑀺𑀓𑀸𑀲𑀤𑀺𑀲𑀸𑀬 𑀅𑀭𑀼𑀡𑀯𑀡𑁆𑀡𑀸𑀬𑀸’’𑀢𑀺. 𑀅𑀭𑀼𑀡𑀯𑀡𑁆𑀡𑀸𑀬 𑀅𑀭𑀼𑀡𑀦𑀺𑀪𑀸𑀬, 𑀅𑀭𑀼𑀡𑀧𑁆𑀧𑀪𑀸𑀯𑀡𑁆𑀡𑀸𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀓𑀲𑀺𑀡𑀤𑁄𑀲𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀲𑀺𑀡𑀓𑀭𑀡𑀸𑀤𑀺𑀓𑁂 𑀲𑁂𑀲𑀸𑀓𑀸𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀁𑀳𑀸𑀭𑀺𑀫𑀦𑁆𑀢𑀺 𑀲𑀁𑀳𑀭𑀺𑀢𑀩𑁆𑀩𑀁 𑀕𑀳𑁂𑀢𑁆𑀯𑀸 𑀘𑀭𑀡𑀬𑁄𑀕𑁆𑀕𑀁. 𑀢𑀢𑁆𑀭𑀝𑁆𑀞𑀓𑀦𑁆𑀢𑀺 𑀬𑀢𑁆𑀭 𑀓𑀢𑀁, 𑀢𑀢𑁆𑀣𑁂𑀯 𑀢𑀺𑀝𑁆𑀞𑀦𑀓𑀁. 𑀯𑀼𑀢𑁆𑀢𑀧𑁆𑀧𑀫𑀸𑀡𑀦𑁆𑀢𑀺 ¶ ‘‘𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀁. 𑀯𑀝𑁆𑀝𑀦𑁆𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑀁. 𑀧𑀭𑀺𑀓𑀫𑁆𑀫𑀓𑀸𑀮𑁂𑀢𑀺 𑀦𑀺𑀫𑀺𑀢𑁆𑀢𑀼𑀕𑁆𑀕𑀳𑀡𑀸𑀬 𑀪𑀸𑀯𑀦𑀸𑀓𑀸𑀮𑁂. 𑀏𑀢𑀤𑁂𑀯𑀸𑀢𑀺 𑀬𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑀁, 𑀏𑀢𑀤𑁂𑀯 𑀧𑀫𑀸𑀡𑀁 𑀲𑀦𑁆𑀥𑀸𑀬 ‘‘𑀲𑀼𑀧𑁆𑀧𑀫𑀢𑁆𑀢𑀁 𑀯𑀸 𑀲𑀭𑀸𑀯𑀫𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑁆𑀧𑀁 𑀳𑀺 𑀦𑀸𑀢𑀺𑀫𑀳𑀦𑁆𑀢𑀁, 𑀲𑀭𑀸𑀯𑀜𑁆𑀘 𑀫𑀳𑀦𑁆𑀢𑀁 𑀘𑀸𑀝𑀺𑀧𑀺𑀥𑀸𑀦𑀧𑁆𑀧𑀳𑁄𑀦𑀓𑀦𑁆𑀢𑀺 𑀲𑀫𑀧𑁆𑀧𑀫𑀸𑀡𑀁 𑀳𑁄𑀢𑀺.

𑁫𑁬. 𑀢𑀲𑁆𑀫𑀸𑀢𑀺 ¶ 𑀧𑀭𑀺𑀘𑁆𑀙𑁂𑀤𑀢𑁆𑀣𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀁 𑀯𑀼𑀢𑁆𑀢𑀧𑀫𑀸𑀡𑀁 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸, 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀯𑀸 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀭𑀼𑀓𑁆𑀔𑀧𑀸𑀡𑀺𑀓𑀸𑀢𑀺 𑀓𑀼𑀘𑀦𑁆𑀤𑀦𑀸𑀤𑀺𑀭𑀼𑀓𑁆𑀔𑀧𑀸𑀡𑀺𑀓𑀸 𑀅𑀭𑀼𑀡𑀯𑀡𑁆𑀡𑀲𑁆𑀲 𑀯𑀺𑀲𑀪𑀸𑀕𑀯𑀡𑁆𑀡𑀁 𑀲𑀫𑀼𑀝𑁆𑀞𑀧𑁂𑀢𑀺. 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁. 𑀧𑀓𑀢𑀺𑀭𑀼𑀓𑁆𑀔𑀧𑀸𑀡𑀺𑀓𑀸 𑀧𑀦 𑀧𑀸𑀲𑀸𑀡𑀧𑀸𑀡𑀺𑀓𑀸𑀕𑀢𑀺𑀓𑀸𑀯. 𑀦𑀺𑀦𑁆𑀦𑀼𑀦𑁆𑀦𑀢𑀝𑁆𑀞𑀸𑀦𑀸𑀪𑀸𑀯𑁂𑀦 𑀪𑁂𑀭𑀻𑀢𑀮𑀲𑀤𑀺𑀲𑀁 𑀓𑀢𑁆𑀯𑀸. 𑀢𑀢𑁄 𑀤𑀽𑀭𑀢𑀭𑁂𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀢𑁄 𑀧𑀤𑁂𑀲𑀢𑁄, 𑀧𑀻𑀞𑀢𑁄 𑀘 𑀅𑀜𑁆𑀜𑀲𑁆𑀫𑀺𑀁 𑀆𑀤𑀻𑀦𑀯𑀤𑀲𑁆𑀲𑀦𑀁. 𑀓𑀲𑀺𑀡𑀤𑁄𑀲𑀸𑀢𑀺 𑀳𑀢𑁆𑀣𑀧𑀸𑀡𑀺𑀧𑀤𑀸𑀤𑀬𑁄 𑀇𑀥 𑀓𑀲𑀺𑀡𑀤𑁄𑀲𑀸.

𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀦𑁆𑀢𑀭𑁂 𑀧𑀤𑁂𑀲𑁂, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑁂 𑀧𑀻𑀞𑁂’’𑀢𑀺 𑀘 𑀯𑀼𑀢𑁆𑀢𑀯𑀺𑀥𑀺𑀦𑀸𑀯. 𑀓𑀸𑀫𑁂𑀲𑀼 𑀆𑀤𑀻𑀦𑀯𑀦𑁆𑀢𑀺 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦, 𑀢𑀺𑀡𑀼𑀓𑁆𑀓𑀽𑀧𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦, 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀫𑀳𑀸𑀪𑀺𑀢𑀸𑀧𑀝𑁆𑀞𑁂𑀦, 𑀲𑀼𑀧𑀺𑀦𑀓𑀽𑀧𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦, 𑀬𑀸𑀘𑀺𑀢𑀓𑀽𑀧𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦, 𑀭𑀼𑀓𑁆𑀔𑀨𑀮𑀽𑀧𑀫𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦, 𑀅𑀲𑀺𑀲𑀽𑀦𑀽𑀧𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦, 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦, 𑀲𑀧𑁆𑀧𑀲𑀺𑀭𑀽𑀧𑀫𑀸 𑀲𑀧𑀝𑀺𑀪𑀬𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁪𑁧𑁭; 𑀫. 𑀦𑀺. 𑀅𑀝𑁆𑀞. 𑁧.𑁨𑁩𑁪) ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁪; 𑁨.𑁪𑁨) ‘‘𑀓𑀸𑀫𑀲𑀼𑀔𑀜𑁆𑀘 𑀦𑀸𑀫𑁂𑀢𑀁 𑀩𑀳𑀼𑀧𑀭𑀺𑀲𑁆𑀲𑀬𑀁, 𑀲𑀸𑀲𑀗𑁆𑀓𑀁, 𑀲𑀪𑀬𑀁, 𑀲𑀁𑀓𑀺𑀮𑀺𑀝𑁆𑀞𑀁, 𑀫𑀻𑀴𑁆𑀳𑀧𑀭𑀺𑀪𑁄𑀕𑀲𑀤𑀺𑀲𑀁, 𑀳𑀻𑀦𑀁, 𑀕𑀫𑁆𑀫𑀁, 𑀧𑁄𑀣𑀼𑀚𑁆𑀚𑀦𑀺𑀓𑀁, 𑀅𑀦𑀭𑀺𑀬𑀁, 𑀅𑀦𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑁄𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀓𑀸𑀫𑀦𑀺𑀲𑁆𑀲𑀭𑀡𑁂𑀢𑀺 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀪𑀽𑀢𑁂, 𑀢𑁂𑀳𑀺 𑀯𑀸 𑀦𑀺𑀲𑁆𑀲𑀝𑁂. 𑀅𑀕𑁆𑀕𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀩𑁆𑀩𑀤𑀼𑀓𑁆𑀔𑀲𑀫𑀢𑀺𑀓𑁆𑀓𑀫𑀲𑁆𑀲 𑀉𑀧𑀸𑀬𑀪𑀽𑀢𑁂. 𑀦𑁂𑀓𑁆𑀔𑀫𑁆𑀫𑁂𑀢𑀺 𑀛𑀸𑀦𑁂. 𑀚𑀸𑀢𑀸𑀪𑀺𑀮𑀸𑀲𑁂𑀦 𑀲𑀜𑁆𑀚𑀸𑀢𑀘𑁆𑀙𑀦𑁆𑀤𑁂𑀦. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀪𑀕𑀯𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀢𑀸, 𑀲𑁆𑀯𑀸𑀓𑁆𑀔𑀸𑀢𑁄 ¶ 𑀥𑀫𑁆𑀫𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑀢𑁄’’𑀢𑀺 𑀏𑀯𑀁 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀭𑀢𑀦𑀢𑁆𑀢𑀬𑀯𑀺𑀲𑀬𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸. 𑀦𑁂𑀓𑁆𑀔𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀸, 𑀲𑀉𑀧𑀘𑀸𑀭𑀲𑁆𑀲 𑀛𑀸𑀦𑀲𑁆𑀲, 𑀯𑀺𑀧𑀲𑁆𑀲𑀦𑀸𑀬, 𑀫𑀕𑁆𑀕𑀲𑁆𑀲, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀥𑀺𑀕𑀫𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀧𑀦 𑀧𑀞𑀫𑀚𑁆𑀛𑀸𑀦𑀫𑁂𑀯 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀸𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀦𑁂𑀓𑁆𑀔𑀫𑁆𑀫𑀥𑀫𑁆𑀫𑀸. 𑀬𑀣𑀸𑀳 𑁋

‘‘𑀧𑀩𑁆𑀩𑀚𑁆𑀚𑀸 𑀧𑀞𑀫𑀁 𑀛𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀘 𑀯𑀺𑀧𑀲𑁆𑀲𑀦𑀸;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, ‘𑀦𑁂𑀓𑁆𑀔𑀫𑁆𑀫’𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁧𑁦𑁯);

𑀧𑀯𑀺𑀯𑁂𑀓𑀲𑀼𑀔𑀭𑀲𑀲𑁆𑀲𑀸𑀢𑀺 ¶ 𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀺𑀯𑀺𑀯𑁂𑀓𑀚𑀲𑁆𑀲 𑀲𑀼𑀔𑀭𑀲𑀲𑁆𑀲. 𑀏𑀯𑀫𑁂𑀢𑁂𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺 ‘‘𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁂𑀦 𑀆𑀓𑀸𑀭𑁂𑀦𑀸𑀢𑀺 𑀅𑀢𑀺𑀉𑀫𑁆𑀫𑀻𑀮𑀦𑀅𑀢𑀺𑀫𑀦𑁆𑀤𑀸𑀮𑁄𑀘𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀦𑀸𑀢𑀺𑀉𑀫𑁆𑀫𑀻𑀮𑀦𑀦𑀸𑀢𑀺𑀫𑀦𑁆𑀤𑀸𑀮𑁄𑀘𑀦𑀲𑀗𑁆𑀔𑀸𑀢𑁂𑀦 𑀲𑀫𑁂𑀦 𑀆𑀮𑁄𑀘𑀦𑀸𑀓𑀸𑀭𑁂𑀦. 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁂𑀦𑀸𑀢𑀺 𑀧𑀣𑀯𑀻𑀓𑀲𑀺𑀡𑁂 𑀘𑀓𑁆𑀔𑀼𑀦𑀸 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀫𑀦𑀲𑀸 𑀕𑀡𑁆𑀳𑀦𑁆𑀢𑁂𑀦. 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀢𑀣𑀸𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀯𑀟𑁆𑀠𑁂𑀢𑀩𑁆𑀩𑀁 𑀆𑀲𑁂𑀯𑀺𑀢𑀩𑁆𑀩𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁.

𑀘𑀓𑁆𑀔𑀼 𑀓𑀺𑀮𑀫𑀢𑀺 𑀅𑀢𑀺𑀲𑀼𑀔𑀼𑀫𑀁, 𑀅𑀢𑀺𑀪𑀸𑀲𑀼𑀭𑀜𑁆𑀘 𑀭𑀽𑀧𑀕𑀢𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀯𑀺𑀬. 𑀅𑀢𑀺𑀯𑀺𑀪𑀽𑀢𑀁 𑀳𑁄𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀸𑀯𑀺𑀪𑀸𑀯𑀢𑁄. 𑀢𑀣𑀸 𑀘 𑀯𑀡𑁆𑀡𑀢𑁄 𑀯𑀸 𑀮𑀓𑁆𑀔𑀡𑀢𑁄 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀅𑀯𑀺𑀪𑀽𑀢𑀁 𑀳𑁄𑀢𑀺 𑀕𑀚𑀦𑀺𑀫𑁆𑀫𑀻𑀮𑀦𑁂𑀦 𑀧𑁂𑀓𑁆𑀔𑀦𑁆𑀢𑀲𑁆𑀲 𑀭𑀽𑀧𑀕𑀢𑀁 𑀯𑀺𑀬. 𑀘𑀺𑀢𑁆𑀢𑀜𑁆𑀘 𑀮𑀻𑀦𑀁 𑀳𑁄𑀢𑀺 𑀤𑀲𑁆𑀲𑀦𑁂 𑀫𑀦𑁆𑀤𑀩𑁆𑀬𑀸𑀧𑀸𑀭𑀢𑀸𑀬 𑀓𑁄𑀲𑀚𑁆𑀚𑀧𑀸𑀢𑀢𑁄. 𑀢𑁂𑀦𑀸𑀳 ‘‘𑀏𑀯𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀤𑀲𑁆𑀲𑀺𑀦𑀸 𑀯𑀺𑀬𑀸𑀢𑀺 𑀬𑀣𑀸 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀤𑀲𑁆𑀲𑀻 𑀧𑀼𑀭𑀺𑀲𑁄 𑀦 𑀢𑀢𑁆𑀣 𑀅𑀢𑀺𑀕𑀸𑀴𑁆𑀳𑀁 𑀉𑀫𑁆𑀫𑀻𑀮𑀢𑀺, 𑀦𑀸𑀧𑀺 𑀅𑀢𑀺𑀫𑀦𑁆𑀤𑀁, 𑀦 𑀆𑀤𑀸𑀲𑀢𑀮𑀲𑁆𑀲 𑀯𑀡𑁆𑀡𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀦𑀸𑀧𑀺 𑀮𑀓𑁆𑀔𑀡𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀣 𑀔𑁄 𑀲𑀫𑁂𑀦 𑀆𑀓𑀸𑀭𑁂𑀦 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀫𑀼𑀔𑀦𑀺𑀫𑀺𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀧𑀣𑀯𑀻𑀓𑀲𑀺𑀡𑀁 𑀲𑀫𑁂𑀦 𑀆𑀓𑀸𑀭𑁂𑀦 𑀑𑀮𑁄𑀓𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀧𑁆𑀧𑀲𑀼𑀢𑁄𑀬𑁂𑀯 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑁂𑀦 𑀆𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀦 𑀯𑀡𑁆𑀡𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄𑀢𑀺 𑀬𑁄 𑀢𑀢𑁆𑀣 𑀧𑀣𑀯𑀻𑀓𑀲𑀺𑀡𑁂 𑀅𑀭𑀼𑀡𑀯𑀡𑁆𑀡𑁄, 𑀲𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀦 𑀕𑀳𑀡𑀁 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 ¶ 𑀅𑀯𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀕𑁆𑀕𑀳𑀡𑀁 𑀓𑀢𑀁. 𑀦 𑀮𑀓𑁆𑀔𑀡𑀁 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀬𑀁 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼𑀬𑀸 𑀣𑀤𑁆𑀥𑀮𑀓𑁆𑀔𑀡𑀁, 𑀢𑀁 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁.

𑀤𑀺𑀲𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀯𑀡𑁆𑀡𑀁 𑀅𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺 𑀯𑀢𑁆𑀯𑀸𑀧𑀺 𑀯𑀡𑁆𑀡𑀯𑀲𑁂𑀦𑁂𑀢𑁆𑀣 𑀆𑀪𑁄𑀕𑁄 𑀦 𑀓𑀸𑀢𑀩𑁆𑀩𑁄, 𑀲𑁄 𑀧𑀦 𑀯𑀡𑁆𑀡𑁄 𑀦𑀺𑀲𑁆𑀲𑀬𑀕𑀢𑀺𑀓𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀲𑁆𑀲𑀬𑀲𑀯𑀡𑁆𑀡𑀁 𑀓𑀢𑁆𑀯𑀸’’𑀢𑀺. 𑀦𑀺𑀲𑁆𑀲𑀬𑁂𑀦 𑀲𑀫𑀸𑀦𑀸𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀲𑁄 𑀯𑀡𑁆𑀡𑁄 𑀢𑀸𑀬 𑀧𑀣𑀯𑀺𑀬𑀸 𑀲𑀫𑀸𑀦𑀕𑀢𑀺𑀓𑀁 𑀓𑀢𑁆𑀯𑀸, 𑀯𑀡𑁆𑀡𑁂𑀦 𑀲𑀳𑁂𑀯 ‘‘𑀧𑀣𑀯𑀻’’𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀤𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂𑀢𑀺 𑀧𑀣𑀯𑀻𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀪𑀸𑀯𑁂𑀦 𑀲𑀢𑁆𑀢𑀺𑀢𑁄 𑀅𑀥𑀺𑀓𑀪𑀸𑀯𑁂𑀦 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀁 ‘‘𑀧𑀣𑀯𑀻’’𑀢𑀺 𑀬𑁄 𑀮𑁄𑀓𑀯𑁄𑀳𑀸𑀭𑁄, 𑀢𑀲𑁆𑀫𑀺𑀁 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀧𑀣𑀯𑀻, 𑀧𑀣𑀯𑀻’’𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀬𑀤𑀺 𑀮𑁄𑀓𑀯𑁄𑀳𑀸𑀭𑁂𑀦 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁, 𑀦𑀸𑀫𑀦𑁆𑀢𑀭𑀯𑀲𑁂𑀦𑀧𑀺 𑀧𑀣𑀯𑀻 𑀫𑀦𑀲𑀺 𑀓𑀸𑀢𑀩𑁆𑀩𑀸 𑀪𑀯𑁂𑀬𑁆𑀬𑀸𑀢𑀺, 𑀳𑁄𑀢𑀼, 𑀓𑁄 𑀤𑁄𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀻 𑀫𑁂𑀤𑀺𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀫𑀺𑀘𑁆𑀙𑀢𑀻𑀢𑀺 𑀬𑀁 𑀦𑀸𑀫𑀁 𑀯𑀢𑁆𑀢𑀼𑀁 𑀇𑀘𑁆𑀙𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀬𑀤𑀲𑁆𑀲 𑀲𑀜𑁆𑀜𑀸𑀦𑀼𑀓𑀽𑀮𑀁 ¶ 𑀳𑁄𑀢𑀺 𑀬𑀁 𑀦𑀸𑀫𑀁 𑀅𑀲𑁆𑀲 𑀬𑁄𑀕𑀺𑀦𑁄 𑀧𑀼𑀩𑁆𑀩𑁂 𑀢𑀢𑁆𑀣 𑀕𑀳𑀺𑀢𑀲𑀜𑁆𑀜𑀸𑀯𑀲𑁂𑀦 𑀅𑀦𑀼𑀓𑀽𑀮𑀁 𑀧𑀘𑀼𑀭𑀢𑀸𑀬, 𑀧𑀕𑀼𑀡𑀢𑀸𑀬 𑀯𑀸 𑀆𑀕𑀘𑁆𑀙𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀁. 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁂 𑀓𑀲𑁆𑀲𑀘𑀺 𑀯𑀘𑀻𑀪𑁂𑀤𑁄𑀧𑀺 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀆𑀘𑀭𑀺𑀬𑁂𑀦 𑀯𑀸 𑀯𑀢𑁆𑀢𑀩𑁆𑀩𑀢𑀁 𑀲𑀦𑁆𑀥𑀸𑀬. 𑀓𑀺𑀁 𑀯𑀸 𑀩𑀳𑀼𑀦𑀸, 𑀧𑀸𑀓𑀝𑀪𑀸𑀯𑁄𑀬𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀮𑁂𑀦 𑀉𑀫𑁆𑀫𑀻𑀮𑁂𑀢𑁆𑀯𑀸 𑀓𑀸𑀮𑁂𑀦 𑀦𑀺𑀫𑁆𑀫𑀻𑀮𑁂𑀢𑁆𑀯𑀸𑀢𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀧𑀣𑀯𑀻𑀫𑀡𑁆𑀟𑀮𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀓𑀺𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀼𑀁 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀬𑁂𑀦𑀸𑀓𑀸𑀭𑁂𑀦 𑀑𑀮𑁄𑀓𑁂𑀢𑁆𑀯𑀸 𑀕𑀳𑀺𑀢𑀁, 𑀢𑁂𑀦𑀸𑀓𑀸𑀭𑁂𑀦 𑀧𑀼𑀦 𑀢𑀁 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀁.

𑁫𑁭. 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀕𑁄𑀘𑀭𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀢𑀲𑁆𑀲 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲. 𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀤𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀚𑀸𑀢𑁂𑀧𑀺 𑀧𑀣𑀯𑀻𑀫𑀡𑁆𑀟𑀮𑀁 𑀑𑀮𑁄𑀓𑁂𑀢𑁆𑀯𑀸 𑀪𑀸𑀯𑁂𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸. 𑀲𑀫𑀻𑀧𑀝𑁆𑀞𑁂𑀦 𑀘 𑀦 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀤𑁆𑀤𑀪𑀸𑀯𑀸𑀬 𑀏𑀓𑀧𑀝𑀮𑀺𑀓𑀽𑀧𑀸𑀳𑀦𑀸𑀕𑀳𑀡𑀁, 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀓𑀢𑁆𑀢𑀭𑀤𑀡𑁆𑀟𑀕𑁆𑀕𑀳𑀡𑀁. 𑀲𑀘𑁂 𑀦𑀲𑁆𑀲𑀢𑀺, 𑀅𑀣𑀸𑀦𑁂𑀦 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀓𑁆𑀔𑀫𑀸𑀦𑁂𑀲𑀼 𑀅𑀲𑀧𑁆𑀧𑀸𑀬𑁂𑀲𑀼 𑀓𑁂𑀦𑀘𑀺𑀤𑁂𑀯 𑀅𑀲𑀧𑁆𑀧𑀸𑀬𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀦𑀺𑀫𑀺𑀢𑁆𑀢𑀁 𑀆𑀤𑀸𑀬𑀸𑀢𑀺 𑀬𑀣𑀸𑀚𑀸𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸. 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀆𑀯𑀚𑁆𑀚𑀺𑀢𑀩𑁆𑀩𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀲𑀫𑁆𑀫𑀸 𑀯𑀸 𑀅𑀦𑀼 ¶ 𑀅𑀦𑀼 𑀆𑀳𑀭𑀺𑀢𑀩𑁆𑀩𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀦𑁆𑀢𑀺 𑀢𑀓𑁆𑀓𑀦𑀢𑁄, 𑀲𑀯𑀺𑀲𑁂𑀲𑀁 𑀢𑀓𑁆𑀓𑀦𑀢𑁄 𑀘 ‘‘𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄’’𑀢𑀺 𑀘 𑀏𑀯𑀁 𑀮𑀤𑁆𑀥𑀦𑀸𑀫𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀓𑀺𑀘𑁆𑀘𑁂𑀦 𑀅𑀧𑀭𑀸𑀧𑀭𑀁 𑀯𑀢𑁆𑀢𑀫𑀸𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀳𑀢𑀁, 𑀧𑀭𑀺𑀬𑀸𑀳𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀩𑀮𑀧𑁆𑀧𑀢𑁆𑀢𑀯𑀺𑀢𑀓𑁆𑀓𑁄 𑀫𑀦𑀲𑀺𑀓𑀸𑀭𑁄 𑀩𑀳𑀼𑀮𑀁 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀬𑀣𑀸 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀢𑀺, 𑀏𑀯𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲. 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦. 𑀬𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀯𑀺𑀲𑀤𑀸𑀦𑀺 𑀢𑀺𑀓𑁆𑀔𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀸𑀢𑀺𑀲𑀬𑀣𑀸𑀫𑀧𑁆𑀧𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀩𑀮𑁂𑀳𑀺 𑀮𑀤𑁆𑀥𑀽𑀧𑀢𑁆𑀣𑀫𑁆𑀪𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯 𑀛𑀸𑀦𑀗𑁆𑀕𑀸𑀦𑀺 𑀩𑀳𑀽𑀦𑀺 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁄 𑀏𑀯 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀲𑀤𑁆𑀥𑀺𑀁 𑀢𑀤𑁂𑀓𑀝𑁆𑀞𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀯𑀺𑀤𑀽𑀭𑀻 𑀪𑀯𑀦𑁆𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀢𑀁 𑀆𑀭𑀩𑁆𑀪 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀦𑁆𑀦𑀺𑀲𑀻𑀤𑀦𑁆𑀢𑀻𑀢𑀺 𑀲𑀫𑁆𑀫𑀤𑁂𑀯 𑀲𑀻𑀤𑀦𑁆𑀢𑀺, 𑀉𑀧𑀲𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀲𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲. 𑀅𑀗𑁆𑀕𑀼𑀮𑀺𑀧𑀤𑀧𑀸𑀡𑀺𑀧𑀤𑀸𑀤𑀺𑀓𑁄 𑀓𑀲𑀺𑀡𑀤𑁄𑀲𑁄. 𑀆𑀤𑀸𑀲𑀫𑀡𑁆𑀟𑀮𑀽𑀧𑀫𑀸𑀤𑀻𑀳𑀺 ¶ 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀢𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀢𑀁, 𑀲𑀡𑁆𑀳𑀲𑀼𑀔𑀼𑀫𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀜𑁆𑀘 𑀔𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑁂𑀯 𑀯𑀡𑁆𑀡𑀯𑀦𑁆𑀢𑀁 𑀦 𑀲𑀡𑁆𑀞𑀸𑀦𑀯𑀦𑁆𑀢𑀁 𑀅𑀧𑀭𑀫𑀢𑁆𑀣𑀲𑀪𑀸𑀯𑀢𑁆𑀢𑀸. 𑀈𑀤𑀺𑀲𑀦𑁆𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀯𑀦𑁆𑀢𑀁. 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀦𑁆𑀢𑀺 𑀉𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀸𑀦𑀼𑀧𑀯𑀺𑀝𑁆𑀞𑀁, 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀗𑁆𑀓𑀺𑀢𑀁 𑀯𑀸. 𑀬𑀤𑀺 𑀦 𑀧𑀦𑁂𑀢𑀁 𑀢𑀸𑀤𑀺𑀲𑀁 𑀯𑀡𑁆𑀡𑀸𑀤𑀺𑀯𑀦𑁆𑀢𑀁, 𑀓𑀣𑀁 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁄𑀢𑀺 𑀆𑀳 ‘‘𑀓𑁂𑀯𑀮𑀜𑁆𑀳𑀻’’𑀢𑀺𑀆𑀤𑀺. 𑀲𑀜𑁆𑀜𑀚𑀦𑁆𑀢𑀺 𑀪𑀸𑀯𑀦𑀸𑀲𑀜𑁆𑀜𑀸𑀚𑀦𑀺𑀢𑀁, 𑀪𑀸𑀯𑀦𑀸𑀲𑀜𑁆𑀜𑀸𑀬 𑀲𑀜𑁆𑀚𑀸𑀢𑀫𑀢𑁆𑀢𑀁. 𑀦 𑀳𑀺 𑀅𑀲𑀪𑀸𑀯𑀲𑁆𑀲 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢’’𑀦𑁆𑀢𑀺.

𑁫𑁮. 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀲𑀦𑁆𑀦𑀺𑀲𑀺𑀦𑁆𑀦𑀸𑀯, 𑀦 𑀧𑀦 𑀢𑀤𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑀘𑀸𑀭𑀲𑀫𑀸𑀥𑀺𑀦𑀸’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁄𑀧𑀺 𑀲𑀫𑀸𑀥𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀦𑁆𑀢𑀺 𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑁄 𑀳𑀺 𑀲𑀫𑀸𑀥𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀛𑀸𑀦𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁄, 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺 𑀘𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀇𑀤𑀸𑀦𑀺 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀅𑀯𑀢𑁆𑀣𑀸𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀘𑀸𑀭𑀪𑀽𑀫𑀺𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀪𑀽𑀫𑀺𑀬𑀦𑁆𑀢𑀺 𑀉𑀧𑀘𑀸𑀭𑀸𑀯𑀢𑁆𑀣𑀸𑀬𑀁. 𑀬𑀤𑀺𑀧𑀺 𑀢𑀤𑀸 𑀛𑀸𑀦𑀗𑁆𑀕𑀸𑀦𑀺 𑀧𑀝𑀼𑀢𑀭𑀸𑀦𑀺 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 ¶ 𑀧𑀦 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀢𑁂𑀦𑀸𑀳 ‘‘𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀳𑁄𑀢𑀻’’𑀢𑀺. 𑀧𑀝𑀺𑀮𑀸𑀪𑀪𑀽𑀫𑀺𑀬𑀦𑁆𑀢𑀺 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀯𑀢𑁆𑀣𑀸𑀬𑀁. 𑀢𑀤𑀸 𑀳𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀁 𑀛𑀸𑀦𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀢𑁂𑀦𑀸𑀳 ‘‘𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸’’𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀦 𑀣𑀸𑀫𑀚𑀸𑀢𑀸𑀦𑀻𑀢𑀺 𑀦 𑀚𑀸𑀢𑀣𑀸𑀫𑀸𑀦𑀺, 𑀦 𑀪𑀸𑀯𑀦𑀸𑀩𑀮𑀁 𑀧𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀦𑁆𑀢𑀺 𑀛𑀸𑀦𑀘𑀺𑀢𑁆𑀢𑀁. 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀯𑁂𑀮𑀁 𑀲𑀦𑁆𑀥𑀸𑀬𑀸𑀳. 𑀉𑀧𑀘𑀸𑀭𑀪𑀽𑀫𑀺𑀬𑀁 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀁 𑀬𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸’’𑀢𑀺. 𑀮𑀤𑁆𑀥𑀧𑀭𑀺𑀳𑀸𑀦𑀻𑀢𑀺 𑀮𑀤𑁆𑀥𑀉𑀧𑀘𑀸𑀭𑀚𑁆𑀛𑀸𑀦𑀧𑀭𑀺𑀳𑀸𑀦𑀺. 𑀦𑀺𑀫𑀺𑀢𑁆𑀢𑁂 𑀅𑀯𑀺𑀦𑀲𑁆𑀲𑀦𑁆𑀢𑁂 𑀢𑀤𑀸𑀭𑀫𑁆𑀫𑀡𑀛𑀸𑀦𑀫𑁆𑀧𑀺 𑀅𑀧𑀭𑀺𑀳𑀻𑀦𑀫𑁂𑀯 𑀳𑁄𑀢𑀺, 𑀦𑀺𑀫𑀺𑀢𑁆𑀢𑁂 𑀧𑀦 𑀆𑀭𑀓𑁆𑀔𑀸𑀪𑀸𑀯𑁂𑀦 𑀯𑀺𑀦𑀝𑁆𑀞𑁂 𑀮𑀤𑁆𑀥𑀁 𑀮𑀤𑁆𑀥𑀁 𑀛𑀸𑀦𑀫𑁆𑀧𑀺 𑀯𑀺𑀦𑀲𑁆𑀲𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄. 𑀢𑁂𑀦𑀸𑀳 ‘‘𑀆𑀭𑀓𑁆𑀔𑀫𑁆𑀳𑀻’’𑀢𑀺𑀆𑀤𑀺.

𑀲𑀢𑁆𑀢𑀲𑀧𑁆𑀧𑀸𑀬𑀯𑀡𑁆𑀡𑀦𑀸

𑁫𑁯. ‘‘𑀣𑀸𑀯𑀭𑀜𑁆𑀘 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀣𑀸𑀯𑀭𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀮𑀤𑁆𑀥𑀜𑁆𑀳𑀺 𑀦𑀺𑀫𑀺𑀢𑁆𑀢𑀁 𑀢𑀢𑁆𑀣 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀏𑀓𑀕𑁆𑀕𑀢𑀁 𑀯𑀺𑀦𑁆𑀤𑀦𑁆𑀢𑀲𑁆𑀲 ¶ 𑀣𑀺𑀭𑀁 𑀦𑀸𑀫 𑀳𑁄𑀢𑀺, 𑀲𑀼𑀭𑀓𑁆𑀔𑀺𑀢𑀜𑁆𑀘. 𑀲𑀢𑀺-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀫𑁆𑀧𑀚𑀜𑁆𑀜𑀁, 𑀲𑀫𑀸𑀥𑀺𑀕𑁆𑀕𑀳𑀡𑁂𑀦 𑀯𑀻𑀭𑀺𑀬𑀜𑁆𑀘 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀆𑀯𑀸𑀲𑁂𑀲𑀼. 𑀢𑀻𑀡𑀺 𑀢𑀻𑀡𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀆𑀯𑀸𑀲𑁂 𑀅𑀯𑀼𑀢𑁆𑀣𑀅𑀯𑀼𑀢𑁆𑀣𑀝𑁆𑀞𑀸𑀦𑁂 𑀯𑀲𑀦𑀦𑀺𑀬𑀸𑀫𑁂𑀦 𑀢𑀬𑁄 𑀢𑀬𑁄 𑀤𑀺𑀯𑀲𑁂 𑀯𑀲𑀺𑀢𑁆𑀯𑀸.

𑀉𑀢𑁆𑀢𑀭𑁂𑀦 𑀯𑀸 𑀤𑀓𑁆𑀔𑀺𑀡𑁂𑀦 𑀯𑀸𑀢𑀺 𑀯𑀼𑀢𑁆𑀢𑀁 𑀕𑀫𑀦𑀸𑀕𑀫𑀦𑁂 𑀲𑀽𑀭𑀺𑀬𑀸𑀪𑀺𑀫𑀼𑀔𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺. 𑀲𑀳𑀲𑁆𑀲𑀥𑀦𑀼𑀧𑁆𑀧𑀫𑀸𑀡𑀁 𑀤𑀺𑀬𑀟𑁆𑀠𑀓𑁄𑀲𑀁.

𑀤𑁆𑀯𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸𑀢𑀺 𑀭𑀸𑀚𑀓𑀣𑀸𑀤𑀺𑀓𑁂 (𑀤𑀻. 𑀦𑀺. 𑁧.𑁧𑁭; 𑀫. 𑀦𑀺. 𑁨.𑁨𑁨𑁩; 𑀲𑀁. 𑀦𑀺. 𑁫.𑁧𑁦𑁮𑁦; 𑀅. 𑀦𑀺. 𑁧𑁦.𑁬𑁯; 𑀧𑀸𑀘𑀺. 𑁫𑁦𑁮) 𑀲𑀦𑁆𑀥𑀸𑀬𑀸𑀳. 𑀢𑀸 𑀳𑀺 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀸𑀧𑀺 𑀅𑀭𑀜𑁆𑀜𑀧𑀩𑁆𑀩𑀢𑀦𑀤𑀻𑀤𑀻𑀧𑀓𑀣𑀸 𑀇𑀢𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀸𑀯𑀢𑁄 ‘‘𑀤𑁆𑀯𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸’’𑀢𑀺 𑀯𑀼𑀢𑁆𑀢𑀸. 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀦𑁆𑀢𑀺 ‘‘𑀅𑀧𑁆𑀧𑀺𑀘𑁆𑀙𑀢𑀸, 𑀲𑀦𑁆𑀢𑀼𑀝𑁆𑀞𑀺, 𑀧𑀯𑀺𑀯𑁂𑀓𑁄, 𑀅𑀲𑀁𑀲𑀕𑁆𑀕𑁄, 𑀯𑀻𑀭𑀺𑀬𑀸𑀭𑀫𑁆𑀪𑁄, 𑀲𑀻𑀮, 𑀲𑀫𑀸𑀥𑀺, 𑀧𑀜𑁆𑀜𑀸, 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀇𑀫𑀸𑀦𑀺 𑀅𑀧𑁆𑀧𑀺𑀘𑁆𑀙𑀓𑀣𑀸𑀤𑀻𑀦𑀁 𑀯𑀢𑁆𑀣𑀽𑀦𑀺, 𑀢𑀦𑁆𑀦𑀺𑀲𑁆𑀲𑀺𑀢𑀁 𑀪𑀲𑁆𑀲𑀁 𑀲𑀧𑁆𑀧𑀸𑀬𑀁.

𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄𑀢𑀺 ¶ 𑀦𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄, 𑀢𑀺𑀭𑀘𑁆𑀙𑀸𑀦𑀓𑀣𑀸 𑀯𑀺𑀥𑀼𑀭𑀁 𑀥𑀫𑁆𑀫𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀓𑀣𑀁 𑀓𑀣𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑀲𑀫𑀸𑀥𑀺𑀆𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄. 𑀬𑁄 𑀳𑀺 𑀲𑀫𑀸𑀥𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀲𑀫𑀸𑀥𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀸 𑀧𑀸𑀭𑀁 𑀧𑀢𑁆𑀢𑁄, 𑀲𑁄 𑀇𑀫𑀲𑁆𑀲 𑀬𑁄𑀕𑀺𑀦𑁄 𑀲𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄𑀢𑀺 𑀓𑀸𑀬𑀲𑁆𑀲 𑀲𑀦𑁆𑀢𑀧𑁆𑀧𑀦𑀧𑁄𑀲𑀦𑀧𑁆𑀧𑀲𑀼𑀢𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬; 𑀅. 𑀦𑀺. 𑁫.𑁨𑁦𑁬).

𑀪𑁄𑀚𑀦𑀁 𑀬𑁂𑀪𑀼𑀬𑁆𑀬𑁂𑀦 𑀫𑀥𑀼𑀭𑀫𑁆𑀩𑀺𑀮𑀭𑀲𑀯𑀲𑁂𑀦 𑀲𑀢𑁆𑀢𑀸𑀦𑀁 𑀉𑀧𑀬𑁄𑀕𑀁 𑀕𑀘𑁆𑀙𑀢𑀺 𑀤𑀥𑀺𑀆𑀤𑀻𑀲𑀼 𑀢𑀣𑀸 𑀤𑀲𑁆𑀲𑀦𑀢𑁄. 𑀓𑀝𑀼𑀓𑀸𑀤𑀺𑀭𑀲𑀸 𑀧𑀦 𑀓𑁂𑀯𑀮𑀁 𑀅𑀪𑀺𑀲𑀗𑁆𑀔𑀸𑀭𑀓𑀸 𑀏𑀯𑀸𑀢𑀺 𑀆𑀳 ‘‘𑀓𑀲𑁆𑀲𑀘𑀺 𑀫𑀥𑀼𑀭𑀁, 𑀓𑀲𑁆𑀲𑀘𑀺 𑀅𑀫𑁆𑀩𑀺𑀮𑀁 𑀲𑀧𑁆𑀧𑀸𑀬𑀁 𑀳𑁄𑀢𑀻’’𑀢𑀺.

𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀆𑀥𑀸𑀭𑀪𑀽𑀢𑁂, 𑀯𑀢𑁆𑀢𑀫𑀸𑀦𑁂 𑀯𑀸, 𑀬𑀲𑁆𑀫𑀺𑀁 𑀯𑀸 𑀇𑀭𑀺𑀬𑀸𑀧𑀣𑁂 𑀧𑀯𑀢𑁆𑀢𑀫𑀸𑀦𑀲𑁆𑀲. 𑀦𑀺𑀫𑀺𑀢𑁆𑀢𑀸𑀲𑁂𑀯𑀦𑀩𑀳𑀼𑀮𑀲𑁆𑀲𑀸𑀢𑀺 𑀦𑀺𑀫𑀺𑀢𑁆𑀢𑁂 𑀆𑀲𑁂𑀯𑀦𑀸𑀩𑀳𑀼𑀮𑀲𑁆𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀯𑀺𑀲𑀬𑀪𑀽𑀢𑁂 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀁 ¶ 𑀩𑀳𑀼𑀮𑀁 𑀆𑀲𑁂𑀯𑀦𑁆𑀢𑀲𑁆𑀲, 𑀦𑀺𑀫𑀺𑀢𑁆𑀢𑀲𑁆𑀲 𑀯𑀸 𑀕𑁄𑀘𑀭𑀸𑀲𑁂𑀯𑀦𑀯𑀲𑁂𑀦 𑀆𑀲𑁂𑀯𑀦𑀸𑀩𑀳𑀼𑀮𑀲𑁆𑀲. 𑀬𑁂𑀦 𑀳𑀺 𑀪𑀸𑀯𑁂𑀦𑁆𑀢𑀲𑁆𑀲 𑀪𑀸𑀯𑀦𑀸𑀲𑁂𑀯𑀦𑀸, 𑀢𑁂𑀦 𑀕𑁄𑀘𑀭𑀸𑀲𑁂𑀯𑀦𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺.

𑀤𑀲𑀯𑀺𑀥𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀯𑀡𑁆𑀡𑀦𑀸

𑁬𑁦. 𑀦 𑀳𑁄𑀢𑀺 𑀅𑀧𑁆𑀧𑀦𑀸. 𑀬𑁂𑀦 𑀯𑀺𑀥𑀺𑀦𑀸 𑀅𑀧𑁆𑀧𑀦𑀸𑀬𑀁 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀤𑀲𑀯𑀺𑀥𑁄 𑀯𑀺𑀥𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑁄𑀢𑀺 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀢𑁄 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁬𑁧. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀳𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀭𑀻𑀭𑀁, 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀘 𑀇𑀥 ‘‘𑀯𑀢𑁆𑀣𑀽𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑀸𑀦𑀺 𑀬𑀣𑀸 𑀘𑀺𑀢𑁆𑀢𑀲𑁆𑀲 𑀲𑀼𑀔𑀸𑀯𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀡𑀁 𑀢𑁂𑀲𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦’’𑀦𑁆𑀢𑀺𑀆𑀤𑀺. 𑀲𑀭𑀻𑀭𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑀭𑀻𑀭𑀁 𑀲𑁂𑀤𑀫𑀮𑀕𑁆𑀕𑀳𑀺𑀢𑀁 𑀯𑀸 𑀅𑀜𑁆𑀜𑁂𑀦 𑀯𑀸 𑀅𑀯𑀲𑁆𑀲𑀼𑀢𑀓𑀺𑀘𑁆𑀘𑁂𑀦 𑀯𑀺𑀩𑀸𑀥𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀦𑀸𑀲𑀦𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀧𑀢𑁆𑀢𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑀸𑀬𑀁 𑀦𑀬𑁄 ¶ 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁂𑀦 𑀲𑀗𑁆𑀕𑀳𑀺𑀢𑁄, 𑀧𑀼𑀦 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀁 𑀲𑀗𑁆𑀕𑀳𑀺𑀢𑁄, 𑀲𑁄 𑀘 𑀔𑁄 𑀪𑀸𑀯𑀦𑀸𑀬 𑀆𑀭𑀫𑁆𑀪𑀓𑀸𑀮𑁂. 𑀇𑀥 𑀧𑀦 𑀆𑀭𑀤𑁆𑀥𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑁂 𑀞𑀢𑁆𑀯𑀸 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑀲𑁆𑀲 𑀓𑀸𑀮𑀦𑁆𑀢𑀭𑁂 𑀚𑀸𑀢𑁂 𑀢𑀣𑀸𑀧𑀝𑀺𑀧𑀢𑁆𑀢𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀬 𑀯𑀼𑀢𑁆𑀢𑀸. 𑀅𑀯𑀺𑀲𑀤𑁂 𑀲𑀢𑀺, 𑀯𑀺𑀲𑀬𑀪𑀽𑀢𑁂 𑀯𑀸. 𑀓𑀣𑀁 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀢𑀸𑀦𑀺 𑀯𑀺𑀲𑀬𑁄? 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀦𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀢𑁂 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀲𑀼. 𑀜𑀸𑀡𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑁂. 𑀢𑁂𑀦 ‘‘𑀦 𑀓𑁂𑀯𑀮𑀁 𑀢𑀁 𑀯𑀢𑁆𑀣𑀼𑀬𑁂𑀯, 𑀅𑀣 𑀔𑁄 𑀢𑀲𑁆𑀫𑀺𑀁 𑀅𑀧𑀭𑀺𑀲𑀼𑀤𑁆𑀥𑁂 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑀺𑀢𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀅𑀧𑀭𑀺𑀲𑀼𑀤𑁆𑀥𑀢𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀸, 𑀜𑀸𑀡𑀲𑁆𑀲 𑀘 𑀯𑀺𑀲𑀼𑀁 𑀕𑀳𑀡𑀁 𑀅𑀧𑁆𑀧𑀦𑀸𑀬 𑀩𑀳𑀼𑀓𑀸𑀭𑀢𑁆𑀢𑀸. 𑀢𑀣𑀸 𑀳𑀺 𑀛𑀸𑀦𑀁 ‘‘𑀤𑀦𑁆𑀥𑀸𑀪𑀺𑀜𑁆𑀜𑀁, 𑀔𑀺𑀧𑁆𑀧𑀸𑀪𑀺𑀜𑁆𑀜’’𑀦𑁆𑀢𑀺 𑀜𑀸𑀡𑀫𑀼𑀔𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀦𑀺𑀲𑁆𑀲𑀬𑀦𑀺𑀲𑁆𑀲𑀬𑁄𑀧𑀺 𑀦𑀺𑀲𑁆𑀲𑀬𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬𑀸’’𑀢𑀺. 𑀜𑀸𑀡𑁂 𑀅𑀯𑀺𑀲𑀤𑁂 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀯𑀺𑀬 𑀲𑀫𑀸𑀥𑀺𑀪𑀸𑀯𑀦𑀸𑀧𑀺 𑀧𑀭𑀺𑀤𑀼𑀩𑁆𑀩𑀮𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀲𑀼𑀤𑁆𑀥𑁂𑀦 𑀜𑀸𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁 𑀆𑀳. 𑀯𑀼𑀟𑁆𑀠𑀺𑀁 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦, 𑀯𑀺𑀭𑀽𑀴𑁆𑀳𑀺𑀁 𑀕𑀼𑀡𑀪𑀸𑀯𑁂𑀦, 𑀯𑁂𑀧𑀼𑀮𑁆𑀮𑀁 𑀲𑀩𑁆𑀩𑀲𑁄 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑀤𑁂 𑀧𑀦𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑁄, 𑀢𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁨. 𑀲𑀫𑀪𑀸𑀯𑀓𑀭𑀡𑀦𑁆𑀢𑀺 ¶ 𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀪𑀸𑀯𑀓𑀭𑀡𑀁. 𑀬𑀣𑀸𑀧𑀘𑁆𑀘𑀬𑀁 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑁆𑀲 𑀧𑀝𑀼𑀢𑀭𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀅𑀯𑀺𑀲𑀤𑀢𑀸𑀬, 𑀯𑀻𑀭𑀺𑀬𑀸𑀤𑀻𑀦𑀁 𑀘 𑀲𑀺𑀣𑀺𑀮𑀢𑀸𑀤𑀺𑀦𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀻’’𑀢𑀺. 𑀢𑀢𑁄𑀢𑀺 𑀢𑀲𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀇𑀢𑀭𑁂𑀲𑀜𑁆𑀘 𑀫𑀦𑁆𑀤𑀢𑁆𑀢𑀸. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄, 𑀧𑀕𑁆𑀕𑀳𑁄𑀯 𑀓𑀺𑀘𑁆𑀘𑀁, 𑀧𑀕𑁆𑀕𑀳𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁, 𑀯𑀺𑀓𑁆𑀔𑁂𑀧𑀧𑀝𑀺𑀧𑀓𑁆𑀔𑁄. 𑀬𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀅𑀯𑀺𑀓𑁆𑀔𑁂𑀧𑁄. 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀬𑁂𑀦 𑀬𑀸𑀣𑀸𑀯𑀢𑁄 𑀯𑀺𑀲𑀬𑀲𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀮𑀯𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀅𑀪𑀺𑀪𑀽𑀢𑀢𑁆𑀢𑀸. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀳𑀺 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀦𑁆𑀢𑀸𑀦𑀁 𑀲𑀳𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀭𑀲𑀢𑀸𑀯𑀲𑁂𑀦𑁂𑀯 𑀅𑀢𑁆𑀣𑀲𑀺𑀤𑁆𑀥𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺 ¶ . 𑀢𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸𑀢𑀺 𑀬𑀲𑁆𑀲 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀉𑀴𑀸𑀭𑀢𑀸𑀤𑀺𑀕𑀼𑀡𑁂 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀲𑁆𑀲 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀯𑀺𑀪𑀸𑀕𑀢𑁄 𑀬𑀸𑀣𑀸𑀯𑀢𑁄 𑀯𑀻𑀫𑀁𑀲𑀦𑁂𑀦. 𑀏𑀯𑀜𑁆𑀳𑀺 𑀏𑀯𑀁𑀥𑀫𑁆𑀫𑀢𑀸𑀦𑀬𑁂𑀦 𑀲𑀪𑀸𑀯𑀭𑀲𑀢𑁄 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀲𑀯𑀺𑀧𑁆𑀨𑀸𑀭𑁄 𑀅𑀥𑀺𑀫𑁄𑀓𑁆𑀔𑁄 𑀦 𑀳𑁄𑀢𑀺, ‘‘𑀅𑀬𑀁 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄’’𑀢𑀺 𑀧𑀭𑀺𑀚𑀸𑀦𑀦𑀯𑀲𑁂𑀦 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸. 𑀥𑀼𑀭𑀺𑀬𑀥𑀫𑁆𑀫𑁂𑀲𑀼 𑀳𑀺 𑀬𑀣𑀸 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑁂 𑀧𑀜𑁆𑀜𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀜𑀸𑀬 𑀩𑀮𑀯𑀪𑀸𑀯𑁂 𑀲𑀤𑁆𑀥𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺.

𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀸𑀬 𑀅𑀦𑀦𑀼𑀬𑀼𑀜𑁆𑀚𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀤𑀼𑀯𑀺𑀥𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄, 𑀅𑀢𑁆𑀢𑀦𑁄 𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑀢𑁄 𑀓𑀺𑀘𑁆𑀘𑀼𑀢𑁆𑀢𑀭𑀺𑀬𑁂𑀦, 𑀯𑀻𑀭𑀺𑀬𑀸𑀤𑀻𑀦𑀁 𑀯𑀸 𑀫𑀦𑁆𑀤𑀓𑀺𑀘𑁆𑀘𑀢𑀸𑀬. 𑀢𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑁂 𑀳𑀸𑀧𑀦𑀯𑀺𑀥𑀺 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀬𑀣𑀸 𑀫𑀦𑀲𑀺 𑀓𑀭𑁄𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀓𑀺𑀘𑁆𑀘𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀯𑀻𑀭𑀺𑀬𑀸𑀤𑀻𑀦𑀁 𑀧𑀝𑀼𑀓𑀺𑀘𑁆𑀘𑀪𑀸𑀯𑀸𑀯𑀳𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀢𑁂𑀳𑀺 𑀲𑀫𑀭𑀲𑀁 𑀓𑀭𑁄𑀦𑁆𑀢𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀳𑀸𑀧𑀦𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀽𑀢𑀺 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀢𑀸𑀬 𑀓𑀢𑀸𑀥𑀺𑀓𑀸𑀭𑁄 𑀲𑀢𑁆𑀣𑀼 𑀭𑀽𑀧𑀓𑀸𑀬𑀤𑀲𑁆𑀲𑀦𑀧𑁆𑀧𑀲𑀼𑀢𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁭) 𑀑𑀯𑀤𑀺𑀢𑁆𑀯𑀸 ¶ 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑀺𑀢𑁄𑀧𑀺 𑀢𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀡𑀸𑀫𑀺𑀢𑁄 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑀼𑀁 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 𑀲𑀢𑁆𑀣𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀯𑀺𑀲𑀚𑁆𑀚𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺 𑀯𑀓𑁆𑀓𑀮𑀻’’𑀢𑀺 𑀆𑀳. 𑀲𑁄 𑀢𑁂𑀦 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀤𑁆𑀥𑀸𑀬 𑀧𑀦 𑀩𑀮𑀯𑀪𑀸𑀯𑀢𑁄 ¶ 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀦 𑀑𑀢𑀭𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑀁 𑀧𑀝𑀺𑀧𑀸𑀤𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦’’𑀦𑁆𑀢𑀺.

𑀇𑀢𑀭𑀓𑀺𑀘𑁆𑀘𑀪𑁂𑀤𑀦𑁆𑀢𑀺 𑀉𑀧𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀁. 𑀧𑀲𑁆𑀲𑀤𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀬𑀢𑀺, 𑀏𑀯𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀸 𑀧𑀲𑁆𑀲𑀤𑁆𑀥𑀺𑀆𑀤𑀺𑀪𑀸𑀯𑀦𑀸𑀬 𑀳𑀸𑀬𑀢𑀺, 𑀲𑀫𑀸𑀥𑀺𑀧𑀓𑁆𑀔𑀺𑀬𑀢𑁆𑀢𑀸 𑀢𑀲𑁆𑀲𑀸. 𑀢𑀣𑀸 𑀳𑀺 𑀲𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀯𑀻𑀭𑀺𑀬𑀸𑀤𑀺𑀪𑀸𑀯𑀦𑀸 𑀯𑀺𑀬 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀏𑀓𑀁𑀲𑀢𑁄 𑀳𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺.

𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀽𑀢𑀺 (𑀫𑀳𑀸𑀯. 𑁨𑁪𑁩) 𑀲𑀼𑀓𑀼𑀫𑀸𑀭𑀲𑁆𑀲 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼. 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀻𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀸𑀬𑀁 𑀓𑀺𑀮𑀫𑁂𑀢𑁆𑀯𑀸𑀧𑀺 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄’’𑀢𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀬 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑁄𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺.

𑀲𑁂𑀲𑁂𑀲𑀼𑀧𑀻𑀢𑀺 ¶ 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺. 𑀏𑀓𑀲𑁆𑀲𑀸𑀢𑀺 𑀏𑀓𑁂𑀓𑀲𑁆𑀲. 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄𑀯𑀸𑀬𑀁 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀘𑁆𑀘𑁂𑀓𑀁 𑀅𑀥𑀺𑀫𑀢𑁆𑀢𑀢𑀸𑀬 𑀧𑀦 𑀳𑀸𑀧𑀦𑀯𑀲𑁂𑀦 𑀲𑀫𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀬𑁂𑀲𑀁 𑀯𑀺𑀲𑁂𑀲𑀢𑁄 𑀅𑀲𑀸𑀥𑀸𑀭𑀡𑀢𑁄, 𑀲𑀸𑀥𑀸𑀭𑀡𑀢𑁄 𑀘 𑀲𑀫𑀢𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀲𑀫𑀢𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀽𑀦𑀸𑀦𑀥𑀺𑀓𑀪𑀸𑀯𑀁. 𑀢𑀣𑀸 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 ¶ . 𑀬𑀣𑀸 𑀳𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀥𑀼𑀭𑀺𑀬𑀥𑀫𑁆𑀫𑀪𑀽𑀢𑀸𑀦𑀁 𑀓𑀺𑀘𑁆𑀘𑀢𑁄 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀫𑁂𑀯, 𑀬𑀢𑁄 𑀦𑁂𑀲𑀁 𑀲𑀫𑀥𑀼𑀭𑀢𑀸𑀬 𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀻𑀢𑀺, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀓𑁄𑀲𑀚𑁆𑀚𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀫𑀭𑀲𑀢𑀸𑀬 𑀲𑀢𑀺 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑀦𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑁆𑀢𑀤𑁆𑀯𑀬𑀧𑀸𑀢𑀸𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀅𑀧𑁆𑀧𑀦𑀸 𑀇𑀚𑁆𑀛𑀢𑀺.

‘‘𑀩𑀮𑀯𑀲𑀤𑁆𑀥𑁄 𑀳𑀻’’𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀩𑀮𑀯𑀢𑀺𑀬𑀸 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀯𑀺𑀲𑀤𑀜𑀸𑀡𑁄, 𑀲𑁄 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀦 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑁄. 𑀢𑀣𑀸 𑀳𑀺 𑀲𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀓𑁂𑀭𑀸𑀝𑀺𑀓𑀧𑀓𑁆𑀔𑀦𑁆𑀢𑀺 𑀲𑀸𑀞𑁂𑀬𑁆𑀬𑀧𑀓𑁆𑀔𑀁 𑀪𑀚𑀢𑀺. 𑀲𑀤𑁆𑀥𑀸𑀳𑀻𑀦𑀸𑀬 𑀧𑀜𑁆𑀜𑀸𑀬 𑀅𑀢𑀺𑀥𑀸𑀯𑀦𑁆𑀢𑁄 ‘‘𑀤𑁂𑀬𑁆𑀬𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀧𑁆𑀧𑁂𑀢𑀺 𑀳𑁂𑀢𑀼𑀧𑀝𑀺𑀭𑀽𑀧𑀓𑁂𑀳𑀺 𑀯𑀜𑁆𑀘𑀺𑀢𑁄. 𑀏𑀯𑀁𑀪𑀽𑀢𑁄 𑀧𑀦 𑀲𑀼𑀓𑁆𑀔𑀢𑀓𑁆𑀓𑀯𑀺𑀮𑀼𑀢𑁆𑀢𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀦𑀸𑀤𑀺𑀬𑀢𑀺, 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀻’’𑀢𑀺. 𑀬𑀣𑀸 𑀘𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑀳𑁄 𑀦 𑀅𑀢𑁆𑀣𑀸𑀯𑀳𑁄 𑀅𑀦𑀢𑁆𑀣𑀸𑀯𑀳𑁄 𑀘, 𑀏𑀯𑀫𑀺𑀥𑀸𑀧𑀺 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑀳𑁄 𑀦 𑀅𑀯𑀺𑀓𑁆𑀔𑁂𑀧𑀸𑀯𑀳𑁄 𑀯𑀺𑀓𑁆𑀔𑁂𑀧𑀸𑀯𑀳𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺, 𑀢𑁂𑀦 𑀅𑀧𑁆𑀧𑀦𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀤𑀼𑀪𑀬𑀦𑁆𑀢𑀺 𑀢𑀁 𑀲𑀤𑁆𑀥𑀸𑀧𑀜𑁆𑀜𑀸𑀤𑁆𑀯𑀬𑀁, 𑀲𑀫𑀸𑀥𑀺𑀯𑀻𑀭𑀺𑀬𑀤𑁆𑀯𑀬𑀜𑁆𑀘. 𑀲𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑀭𑀲𑀁 𑀓𑀸𑀢𑀩𑁆𑀩𑀁.

𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲. 𑀏𑀯𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂, 𑀲𑀤𑁆𑀥𑀸𑀬 𑀢𑁂𑀲𑀁 𑀩𑀮𑀯𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀦𑁆𑀢𑁄𑀢𑀺 ‘‘𑀧𑀣𑀯𑀻 𑀧𑀣𑀯𑀻’’𑀢𑀺 𑀫𑀦𑀲𑀺𑀓𑀭𑀡𑀫𑀢𑁆𑀢𑁂𑀦 𑀓𑀣𑀁 𑀛𑀸𑀦𑀼𑀧𑁆𑀧𑀢𑁆𑀢𑀻𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀯𑀺𑀥𑀺 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀳𑀦𑁆𑀢𑁄 𑀲𑀤𑁆𑀥𑀁 𑀚𑀦𑁂𑀦𑁆𑀢𑁄. 𑀑𑀓𑀧𑁆𑀧𑁂𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀑𑀓𑀧𑁆𑀧𑁂𑀦𑁆𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑁄. 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺 𑀲𑀫𑀸𑀥𑀺𑀧𑀥𑀸𑀦𑀢𑁆𑀢𑀸 𑀛𑀸𑀦𑀲𑁆𑀲. 𑀉𑀪𑀺𑀦𑁆𑀦𑀦𑁆𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀦𑀁, 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺𑀦𑁄 𑀅𑀥𑀺𑀫𑀢𑁆𑀢𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀫𑀢𑀸𑀬𑀧𑀻’’𑀢𑀺, 𑀲𑀫𑀪𑀸𑀯𑁂𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀅𑀧𑁆𑀧𑀦𑀸. 𑀢𑀣𑀸 𑀳𑀺 ‘‘𑀳𑁄𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺 ¶ , 𑀮𑁄𑀓𑀼𑀢𑁆𑀢𑀭𑀧𑁆𑀧𑀦𑀸 𑀧𑀦 𑀢𑁂𑀲𑀁 𑀲𑀫𑀪𑀸𑀯𑁂𑀦𑁂𑀯 𑀇𑀘𑁆𑀙𑀺𑀢𑀸. 𑀬𑀣𑀸𑀳 𑁋 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀧𑀝𑀺. 𑀫. 𑁨.𑁧, 𑁫).

𑀬𑀤𑀺 ¶ 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀦𑀁, 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀸 𑀇𑀘𑁆𑀙𑀺𑀢𑀸, 𑀓𑀣𑀁 𑀲𑀢𑀻𑀢𑀺 𑀆𑀳 ‘‘𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀻’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑁂𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁂 𑀕𑀡𑁆𑀳𑀦𑁆𑀢𑁄 ‘‘𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦’’𑀦𑁆𑀢𑀺 𑀆𑀳. 𑀅𑀜𑁆𑀜𑀣𑀸𑀧𑀻𑀢𑀺 𑀘 𑀕𑀳𑁂𑀢𑀩𑁆𑀩𑀸 𑀲𑀺𑀬𑀸. 𑀢𑀣𑀸 𑀳𑀺 ‘‘𑀓𑁄𑀲𑀚𑁆𑀚𑀧𑀓𑁆𑀔𑁂𑀦 𑀲𑀫𑀸𑀥𑀺𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀳𑀻’’𑀢𑀺. 𑀲𑀸 𑀲𑀢𑀺. 𑀲𑀩𑁆𑀩𑁂𑀲𑀼 𑀭𑀸𑀚𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄 𑀲𑀩𑁆𑀩𑀓𑀫𑁆𑀫𑀺𑀓𑁄. 𑀢𑁂𑀦 𑀓𑀸𑀭𑀡𑁂𑀦 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀢𑁆𑀣𑁂𑀦. 𑀆𑀳 𑀅𑀝𑁆𑀞𑀓𑀣𑀸𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀬𑀼𑀢𑁆𑀢𑀸 𑀲𑀩𑁆𑀩𑀢𑁆𑀣𑀺𑀓𑀸, 𑀲𑀩𑁆𑀩𑁂𑀦 𑀯𑀸 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁂𑀦 𑀩𑁄𑀚𑁆𑀛𑀗𑁆𑀕𑀕𑁆𑀕𑀳𑀡𑁂𑀦 𑀅𑀢𑁆𑀣𑁂𑀢𑀩𑁆𑀩𑀸 𑀲𑀩𑁆𑀩𑀢𑁆𑀣𑀺𑀬𑀸, 𑀲𑀩𑁆𑀩𑀢𑁆𑀣𑀺𑀬𑀸𑀯 𑀲𑀩𑁆𑀩𑀢𑁆𑀣𑀺𑀓𑀸. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀢𑀲𑁆𑀲 𑀳𑀺 𑀲𑀢𑀺 𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑁂𑀦𑀸𑀳 ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑁬𑁩. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀦𑀺𑀫𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀲𑁆𑀲 𑀘 𑀦𑀺𑀫𑀺𑀢𑁆𑀢𑀲𑁆𑀲. 𑀘𑀺𑀢𑁆𑀢𑀲𑁆𑀲 𑀳𑀺 𑀲𑀫𑀸𑀳𑀺𑀢𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑀣𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀦𑁆𑀢𑁄𑀬𑁂𑀯 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀲𑁆𑀲𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲𑁂𑀯, 𑀅𑀣 𑀔𑁄 𑀲𑀫𑀣𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀢𑀺 𑀭𑀓𑁆𑀔𑀡𑀓𑁄𑀲𑀮𑁆𑀮𑀁. 𑀇𑀥 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀓𑀣𑀸𑀬𑀁 ‘‘𑀦𑀺𑀫𑀺𑀢𑁆𑀢𑀓𑁄𑀲𑀮𑁆𑀮’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀓𑀭𑀡𑀪𑀸𑀯𑀦𑀸𑀓𑁄𑀲𑀮𑁆𑀮𑀸𑀦𑀁 𑀧𑀕𑁂𑀯 𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪. 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀫𑁄𑀤𑀦𑀲𑀁𑀯𑁂𑀚𑀦𑀯𑀺𑀧𑀭𑀺𑀬𑀸𑀬𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀻𑀦𑀦𑁆𑀢𑀺 𑀲𑀗𑁆𑀓𑀼𑀘𑀺𑀢𑀁 𑀓𑁄𑀲𑀚𑁆𑀚𑀧𑀓𑁆𑀔𑀧𑀢𑀺𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣 ‘‘𑀢𑀬𑁄’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸 𑀧𑀦 𑀢𑁂 𑀪𑀸𑀯𑁂𑀢𑀩𑁆𑀩𑀸, 𑀢𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀓𑀁. 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄𑀢𑀺 𑀧𑀤𑀻𑀧𑁂𑀢𑀼𑀓𑀸𑀫𑁄. 𑀉𑀤𑀓𑀯𑀸𑀢𑀁 𑀤𑀤𑁂𑀬𑁆𑀬𑀸𑀢𑀺 𑀉𑀤𑀓𑀫𑀺𑀲𑁆𑀲𑀁 𑀯𑀸𑀢𑀁 𑀉𑀧𑀦𑁂𑀬𑁆𑀬. 𑀅𑀓𑀸𑀮𑁄𑀢𑀺 𑀦𑀓𑀸𑀮𑁄, 𑀅𑀬𑀼𑀢𑁆𑀢𑀓𑀸𑀮𑁄 𑀯𑀸. 𑀲𑀢𑀺𑀆𑀤𑀺𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀩𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀯𑀸 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺𑀦𑁄 𑀬𑁄𑀕𑀺𑀦𑁄 𑀅𑀗𑁆𑀕𑀦𑁆𑀢𑀺 𑀩𑁄𑀚𑁆𑀛𑀗𑁆𑀕𑁄 ¶ , 𑀧𑀲𑀢𑁆𑀣𑁄, 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 ¶ . 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲. 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀫𑀸𑀥𑀺𑀲𑁆𑀲 𑀢𑀸𑀯 𑀧𑀤𑀢𑁆𑀣𑀮𑀓𑁆𑀔𑀡𑀸𑀦𑀺 𑀳𑁂𑀝𑁆𑀞𑀸 𑀆𑀕𑀢𑀸𑀦𑁂𑀯. 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀲𑀸 𑀧𑀦𑀸𑀬𑀁 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀇𑀥 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀲𑀫𑀼𑀝𑁆𑀞𑀸𑀧𑀬𑀦𑁆𑀢𑀺 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀥𑀫𑁆𑀫𑀸𑀦𑀁, 𑀥𑀫𑁆𑀫𑁂𑀲𑀼 𑀯𑀸 𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄, 𑀧𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀯𑀻𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸, 𑀯𑀺𑀥𑀺𑀦𑀸 𑀯𑀸 𑀈𑀭𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁, 𑀉𑀲𑁆𑀲𑀸𑀳𑁄. 𑀧𑀻𑀡𑁂𑀢𑀺 𑀓𑀸𑀬𑀁, 𑀘𑀺𑀢𑁆𑀢𑀁 𑀘 𑀲𑀦𑁆𑀢𑀧𑁆𑀧𑁂𑀢𑀻𑀢𑀺 𑀧𑀻𑀢𑀺.

𑀬𑀁 𑀬𑀁 𑀲𑀓𑀁 𑀬𑀣𑀸𑀲𑀓𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀢𑀺 𑀅𑀢𑁆𑀣𑁄. 𑀆𑀳𑀸𑀭𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀯𑀲𑁂𑀦. 𑀪𑀸𑀯𑀦𑀸𑀢𑀺 𑀉𑀧𑁆𑀧𑀸𑀤𑀦𑀸, 𑀯𑀟𑁆𑀠𑀦𑀸 𑀘. 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀸. 𑀬𑁂 𑀅𑀓𑀼𑀲𑀮𑀸, 𑀢𑁂 𑀲𑀸𑀯𑀚𑁆𑀚𑀸. 𑀬𑁂 𑀓𑀼𑀲𑀮𑀸, 𑀢𑁂 𑀅𑀦𑀯𑀚𑁆𑀚𑀸. 𑀅𑀓𑀼𑀲𑀮𑀸 𑀳𑀻𑀦𑀸, 𑀇𑀢𑀭𑁂 𑀧𑀡𑀻𑀢𑀸. 𑀓𑀼𑀲𑀮𑀸𑀧𑀺 𑀯𑀸 𑀳𑀻𑀦𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀆𑀭𑀤𑁆𑀥𑀸 𑀳𑀻𑀦𑀸, 𑀇𑀢𑀭𑁂 𑀧𑀡𑀻𑀢𑀸. 𑀓𑀡𑁆𑀳𑀸𑀢𑀺 𑀓𑀸𑀴𑀓𑀸 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸, 𑀲𑀼𑀓𑁆𑀓𑀸𑀢𑀺 𑀑𑀤𑀸𑀢𑀸 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀸. 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀓𑀡𑁆𑀳𑀸, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀲𑀼𑀓𑁆𑀓𑀸. 𑀢𑁂 𑀏𑀯 𑀲𑀧𑁆𑀧𑀝𑀺𑀪𑀸𑀕𑀸. 𑀓𑀡𑁆𑀳𑀸 𑀳𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀲𑀼𑀓𑁆𑀓𑁂𑀳𑀺 𑀲𑀧𑁆𑀧𑀝𑀺𑀪𑀸𑀕𑀸. 𑀢𑀣𑀸 𑀲𑀼𑀓𑁆𑀓𑀸𑀧𑀺 𑀇𑀢𑀭𑁂𑀳𑀺. 𑀅𑀣 𑀯𑀸 𑀓𑀡𑁆𑀳𑀸 𑀘 𑀲𑀼𑀓𑁆𑀓𑀸 𑀘 𑀲𑀧𑁆𑀧𑀝𑀺𑀪𑀸𑀕𑀸 𑀘 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸. 𑀲𑀼𑀔𑀸 𑀳𑀺 𑀯𑁂𑀤𑀦𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀧𑁆𑀧𑀝𑀺𑀪𑀸𑀕𑀸, 𑀤𑀼𑀓𑁆𑀔𑀸 𑀘 𑀯𑁂𑀤𑀦𑀸 𑀲𑀼𑀔𑀸𑀬 𑀲𑀧𑁆𑀧𑀝𑀺𑀪𑀸𑀕𑀸𑀢𑀺. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀦𑀺𑀩𑁆𑀩𑀢𑁆𑀢𑀲𑁆𑀲. 𑀉𑀧𑁆𑀧𑀸𑀤𑀸𑀬𑀸𑀢𑀺 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀉𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀦𑀺𑀩𑁆𑀩𑀢𑁆𑀢𑀲𑁆𑀲. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀯𑀟𑁆𑀠𑀺𑀬𑀸. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀧𑀽𑀭𑀡𑀢𑁆𑀣𑀸𑀬.

𑀢𑀢𑁆𑀣𑀸𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀧𑀸𑀞𑁂. 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀕𑀳𑀡𑁂 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀓𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀦 𑀨𑀼𑀲𑀦𑀸𑀤𑀺𑀓𑀲𑁆𑀲 𑀲𑀪𑀸𑀯𑀮𑀓𑁆𑀔𑀡𑀲𑁆𑀲, 𑀅𑀦𑀺𑀘𑁆𑀘𑀸𑀤𑀺𑀓𑀲𑁆𑀲 𑀲𑀸𑀫𑀜𑁆𑀜𑀮𑀓𑁆𑀔𑀡𑀲𑁆𑀲 𑀘 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦. 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄𑀢𑀺 𑀓𑀼𑀲𑀮𑀸𑀤𑀻𑀦𑀁 𑀢𑀁𑀢𑀁𑀲𑀪𑀸𑀯𑀮𑀓𑁆𑀔𑀡𑀸𑀤𑀺𑀓𑀲𑁆𑀲 𑀬𑀸𑀣𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀚𑀯𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑁄 𑀳𑀺 𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀢𑀸𑀬 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀢𑀤𑀸𑀪𑁄𑀕𑀢𑀸𑀬 𑀆𑀯𑀚𑁆𑀚𑀦𑀸𑀧𑀺 𑀢𑀕𑁆𑀕𑀢𑀺𑀓𑀸𑀯. 𑀭𑀼𑀧𑁆𑀧𑀦𑀮𑀓𑁆𑀔𑀡𑀸𑀤𑀺𑀓𑀫𑁆𑀧𑀺 ¶ 𑀇𑀥 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀓𑀺𑀭𑀺𑀬𑀸𑀬 𑀆𑀤𑀺𑀆𑀭𑀫𑁆𑀪𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁 𑀥𑀺𑀢𑀺𑀲𑀪𑀸𑀯𑀢𑀸𑀬 ‘‘𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀆𑀭𑀫𑁆𑀪𑀥𑀸𑀢𑀽𑀢𑀺 𑀧𑀞𑀫𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀻’’𑀢𑀺. 𑀮𑀤𑁆𑀥𑀸𑀲𑁂𑀯𑀦𑀁 𑀯𑀻𑀭𑀺𑀬𑀁 𑀩𑀮𑀧𑁆𑀧𑀢𑁆𑀢𑀁 ¶ 𑀳𑀼𑀢𑁆𑀯𑀸 𑀧𑀝𑀺𑀧𑀓𑁆𑀔𑀁 𑀯𑀺𑀥𑀫𑀢𑀻𑀢𑀺 𑀆𑀳 ‘‘𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭’’𑀦𑁆𑀢𑀺. 𑀅𑀥𑀺𑀫𑀢𑁆𑀢𑀸𑀥𑀺𑀫𑀢𑁆𑀢𑀢𑀭𑀸𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀥𑀫𑀦𑀲𑀫𑀢𑁆𑀣𑀁 𑀧𑀝𑀼𑀧𑀝𑀼𑀢𑀭𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭’’𑀦𑁆𑀢𑀺. 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀺𑀬𑀸, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀞𑀸𑀦𑀺𑀬𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸. 𑀞𑀸𑀢𑀩𑁆𑀩𑁄 𑀯𑀸 𑀞𑀸𑀦𑀺𑀬𑁄, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀞𑀸𑀦𑀺𑀬𑁄 𑀏𑀢𑁂𑀲𑀽𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸, 𑀅𑀧𑀭𑀸𑀧𑀭𑀁 𑀯𑀢𑁆𑀢𑀫𑀸𑀦𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀼 𑀧𑀻𑀢𑀺𑀬𑁂𑀯 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀻𑀢𑀺𑀬𑀸 𑀏𑀯 𑀏𑀢𑀁 𑀦𑀸𑀫’’𑀦𑁆𑀢𑀺. 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄𑀢𑀺 𑀬𑀣𑀸 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀯𑀟𑁆𑀠𑀢𑀺, 𑀢𑀣𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄.

𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀼𑀘𑁆𑀙𑀓𑀪𑀸𑀯𑁄. 𑀧𑀜𑁆𑀘𑀧𑀺 𑀳𑀺 𑀦𑀺𑀓𑀸𑀬𑁂 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑁂 𑀧𑀭𑀺𑀬𑀼𑀧𑀸𑀲𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲, 𑀢𑁂 𑀯𑀸 𑀲𑀳 𑀅𑀝𑁆𑀞𑀓𑀣𑀸𑀬 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀬𑀁 𑀬𑀁 𑀢𑀢𑁆𑀣 𑀕𑀡𑁆𑀞𑀺𑀝𑁆𑀞𑀸𑀦𑀁, 𑀢𑀁 𑀢𑀁 ‘‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀲𑀗𑁆𑀔𑁂𑀧𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀓𑀸𑀲𑀺𑀢𑀸 𑀏𑀯. 𑀢𑀢𑁆𑀣 𑀧𑀦 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀬𑀪𑀸𑀯𑁂𑀦 𑀆𑀕𑀢𑀸, 𑀇𑀥 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀬𑀪𑀸𑀯𑁂𑀦. 𑀬𑀤𑀕𑁆𑀕𑁂𑀦 𑀳𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀤𑀕𑁆𑀕𑁂𑀦 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀓𑀸 𑀲𑀫𑀸𑀥𑀺𑀲𑁆𑀲 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁯; 𑁫.𑁧𑁦𑁭𑁧) 𑀯𑀼𑀢𑁆𑀢𑀁. 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀦𑀸𑀫 𑀤𑀼𑀧𑁆𑀧𑀜𑁆𑀜𑀸𑀦𑀁 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀫𑀁𑀲𑀦𑀺𑀓𑁆𑀔𑀺𑀢𑁆𑀢𑀲𑀼𑀦𑀔𑀲𑀤𑀺𑀲𑀸𑀦𑀁 𑀫𑁄𑀫𑀽𑀳𑀧𑀼𑀕𑁆𑀕𑀮𑀸𑀦𑀁 𑀤𑀽𑀭𑀢𑁄 𑀧𑀭𑀺𑀘𑁆𑀘𑀚𑀦𑀸. 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀧𑀜𑁆𑀜𑀸𑀬 𑀓𑀢𑀸𑀥𑀺𑀓𑀸𑀭𑀸𑀦𑀁 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀲𑀼 𑀓𑀼𑀲𑀮𑀸𑀦𑀁 𑀅𑀭𑀺𑀬𑀸𑀦𑀁, 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀸𑀦𑀁 𑀯𑀸 𑀫𑀳𑀸𑀧𑀜𑁆𑀜𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀘𑀭𑀺𑀢𑀩𑁆𑀩𑀸𑀦𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀻𑀦𑀁, 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀤𑀻𑀧𑀦𑀸𑀦𑀁 𑀯𑀸 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑀢𑀸, 𑀧𑀜𑁆𑀜𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄.

𑀅𑀧𑀸𑀬𑀸𑀤𑀻𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀚𑀸𑀢𑀺𑀆𑀤𑀺𑀁 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀜𑁆𑀘 𑀤𑀼𑀓𑁆𑀔𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀻𑀭𑀺𑀬𑀸𑀬𑀢𑁆𑀢𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀫𑁄 𑀏𑀯 𑀆𑀦𑀺𑀲𑀁𑀲𑁄, 𑀢𑀲𑁆𑀲 𑀤𑀲𑁆𑀲𑀦𑀲𑀻𑀮𑀢𑀸 𑀯𑀻𑀭𑀺𑀬𑀸𑀬𑀢𑁆𑀢…𑀧𑁂… 𑀤𑀲𑁆𑀲𑀺𑀢𑀸. 𑀲𑀧𑀼𑀩𑁆𑀩𑀪𑀸𑀕𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄 𑀕𑀫𑀦𑀯𑀻𑀣𑀺 𑀕𑀦𑁆𑀢𑀩𑁆𑀩𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀧𑀝𑀺𑀧𑀤𑀸𑀢𑀺 𑀓𑀢𑁆𑀯𑀸 ¶ . 𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀧𑀺𑀡𑁆𑀟𑀸𑀧𑀘𑀸𑀬𑀦𑀢𑀸𑀢𑀺 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑀺 𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀓𑀸𑀭𑀪𑀸𑀯𑀲𑁆𑀲 𑀓𑀭𑀡𑁂𑀦 𑀧𑀺𑀡𑁆𑀟𑀲𑁆𑀲 𑀪𑀺𑀓𑁆𑀔𑀸𑀬 𑀧𑀝𑀺𑀧𑀽𑀚𑀦𑀸. 𑀇𑀢𑀭𑀣𑀸𑀢𑀺 𑀆𑀫𑀺𑀲𑀧𑀽𑀚𑀸𑀬. 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸𑀢𑀺 𑀅𑀮𑀲𑀸𑀦𑀁 𑀪𑀸𑀯𑀦𑀸𑀬 𑀦𑀸𑀫𑀫𑀢𑁆𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀁 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸𑀦𑀁 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀸𑀤𑀺𑀅𑀦𑀼𑀬𑀼𑀜𑁆𑀚𑀦𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀤𑀽𑀭𑀢𑁄 𑀧𑀭𑀺𑀘𑁆𑀘𑀚𑀦𑀸. 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸𑀢𑀺 ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁯; 𑀅. 𑀦𑀺. 𑁩.𑁧𑁬) 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀸. 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀼𑀪𑀸𑀯𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀢𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀢𑀲𑁆𑀫𑀺𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀅𑀥𑀺𑀫𑀼𑀢𑁆𑀢𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸. 𑀏𑀢𑁆𑀣 𑀘 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀘𑁆𑀘𑀬𑀽𑀧𑀲𑀁𑀳𑀸𑀭𑀯𑀲𑁂𑀦, 𑀅𑀧𑀸𑀬𑀸𑀤𑀺𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀬𑁄 𑀲𑀫𑀼𑀢𑁆𑀢𑁂𑀚𑀦𑀯𑀲𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑀸 𑀤𑀝𑁆𑀞𑀩𑁆𑀩𑀸.

𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀣𑀼𑀲𑀔𑀭𑀳𑀤𑀬𑀸 𑀮𑀽𑀔𑀧𑀼𑀕𑁆𑀕𑀮𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀧𑀭𑀺𑀤𑀻𑀧𑀦𑀸 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀸𑀤𑀬𑁄 (𑀤𑀻. 𑀦𑀺. 𑁩.𑁧𑁪𑁧 𑀆𑀤𑀬𑁄) 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀸. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀼𑀲𑀮𑀸𑀤𑀻𑀦𑀁 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑀺𑀚𑁆𑀛𑀦𑀸𑀤𑀺𑀆𑀓𑀸𑀭𑁂𑀳𑀺 𑀘𑁂𑀯 𑀧𑀭𑀺𑀧𑀼𑀘𑁆𑀙𑀓𑀢𑀸𑀤𑀺𑀆𑀓𑀸𑀭𑁂𑀳𑀺 𑀘. 𑀏𑀢𑁂 𑀥𑀫𑁆𑀫𑁂𑀢𑀺 𑀏𑀢𑁂 𑀓𑀼𑀲𑀮𑀸𑀤𑀻𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑁂 𑀘𑁂𑀯 𑀥𑀫𑁆𑀫𑀢𑁆𑀣𑀜𑁆𑀜𑀼𑀢𑀸𑀤𑀺𑀓𑁂 𑀘.

𑁬𑁫. 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀅𑀢𑀺𑀯𑀺𑀬 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀢𑀸𑀤𑀻𑀳𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀁𑀯𑁂𑀚𑀦𑀧𑀫𑁄𑀤𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑁆𑀥𑀢𑀦𑁆𑀢𑀺 𑀲𑀫𑀸𑀥𑀺𑀆𑀤𑀻𑀦𑀁 𑀫𑀦𑁆𑀤𑀢𑀸𑀬 𑀅𑀯𑀽𑀧𑀲𑀦𑁆𑀢𑀁. 𑀤𑀼𑀯𑀽𑀧𑀲𑀫𑀬𑀦𑁆𑀢𑀺 𑀯𑀽𑀧𑀲𑀫𑁂𑀢𑀼𑀁 𑀲𑀫𑀸𑀥𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁.

𑀢𑀁 ¶ 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀅𑀲𑁆𑀲 𑀬𑁄𑀕𑀺𑀦𑁄 𑀧𑀲𑁆𑀲𑀤𑁆𑀥𑀺 𑀲𑀫𑀸𑀥𑀺 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀬𑀣𑀸𑀭𑀳𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀢𑀁 𑀘𑀺𑀢𑁆𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀲𑁆𑀲𑀤𑁆𑀥𑀸𑀓𑀸𑀭𑀁, 𑀲𑀫𑀸𑀳𑀺𑀢𑀸𑀓𑀸𑀭𑀁, 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸𑀓𑀸𑀭𑀜𑁆𑀘 𑀉𑀧𑀮𑀓𑁆𑀔𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸. 𑀢𑀻𑀲𑀼𑀧𑀺 𑀧𑀤𑁂𑀲𑀽𑀢𑀺 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀢𑀻𑀲𑀼𑀧𑀺 𑀯𑀸𑀓𑁆𑀬𑁂𑀲𑀼, 𑀢𑁂𑀳𑀺 𑀯𑀸 𑀧𑀓𑀸𑀲𑀺𑀢𑁂𑀲𑀼 𑀢𑀻𑀲𑀼 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼. 𑀬𑀣𑀸𑀲𑀫𑀸𑀳𑀺𑀢𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑁄 ¶ 𑀲𑀫𑀣𑁄 𑀏𑀯 𑀲𑀫𑀣𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀫𑀣𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀲𑀫𑀣𑀲𑁆𑀲𑁂𑀯𑁂𑀢𑀫𑀥𑀺𑀯𑀘𑀦’’𑀦𑁆𑀢𑀺. 𑀦𑀸𑀦𑀸𑀭𑀫𑁆𑀫𑀡𑁂 𑀧𑀭𑀺𑀩𑁆𑀪𑀫𑀦𑁂𑀦 𑀯𑀺𑀯𑀺𑀥𑀁 𑀅𑀕𑁆𑀕𑀁 𑀏𑀢𑀲𑁆𑀲𑀸𑀢𑀺 𑀩𑁆𑀬𑀕𑁆𑀕𑁄, 𑀯𑀺𑀓𑁆𑀔𑁂𑀧𑁄. 𑀢𑀣𑀸 𑀳𑀺 𑀲𑁄 𑀅𑀦𑀯𑀝𑁆𑀞𑀸𑀦𑀭𑀲𑁄, 𑀪𑀦𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘 𑀯𑀼𑀢𑁆𑀢𑁄. 𑀏𑀓𑀕𑁆𑀕𑀢𑀸𑀪𑀸𑀯𑀢𑁄 𑀩𑁆𑀬𑀕𑁆𑀕𑀧𑀝𑀺𑀧𑀓𑁆𑀔𑁄𑀢𑀺 𑀅𑀩𑁆𑀬𑀕𑁆𑀕𑁄, 𑀲𑀫𑀸𑀥𑀺. 𑀲𑁄 𑀏𑀯 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀢𑀲𑁆𑀲𑁂𑀯 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀯𑀘𑀦’’𑀦𑁆𑀢𑀺.

𑀲𑀭𑀻𑀭𑀸𑀯𑀢𑁆𑀣𑀁 𑀜𑀢𑁆𑀯𑀸 𑀫𑀢𑁆𑀢𑀲𑁄 𑀧𑀭𑀺𑀪𑀼𑀢𑁆𑀢𑁄 𑀧𑀡𑀻𑀢𑀸𑀳𑀸𑀭𑁄 𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀲𑀫𑀼𑀝𑁆𑀞𑀸𑀧𑀦𑁂𑀦 𑀧𑀲𑁆𑀲𑀤𑁆𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀉𑀢𑀼𑀲𑀧𑁆𑀧𑀸𑀬𑀁, 𑀇𑀭𑀺𑀬𑀸𑀧𑀣𑀲𑀧𑁆𑀧𑀸𑀬𑀜𑁆𑀘 𑀲𑁂𑀯𑀺𑀢𑀁, 𑀧𑀬𑁄𑀕𑁄 𑀘 𑀓𑀸𑀬𑀺𑀓𑁄 𑀧𑀯𑀢𑁆𑀢𑀺𑀢𑁄𑀢𑀺 𑀆𑀳 ‘‘𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸’’𑀢𑀺𑀆𑀤𑀺. 𑀧𑀬𑁄𑀕𑀲𑀫𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀲𑀤𑀭𑀣𑀓𑀸𑀬𑀘𑀺𑀢𑁆𑀢𑀸 𑀧𑀼𑀕𑁆𑀕𑀮𑀸 𑀲𑀸𑀭𑀤𑁆𑀥𑀧𑀼𑀕𑁆𑀕𑀮𑀸. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀧𑀲𑁆𑀲𑀤𑁆𑀥𑀓𑀸𑀬𑀸 𑀧𑀼𑀕𑁆𑀕𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀭𑀲𑁆𑀲𑀸𑀤𑀲𑁆𑀲𑀸𑀢𑀺 𑀪𑀸𑀯𑀦𑀲𑁆𑀲𑀸𑀤𑀭𑀳𑀺𑀢𑀲𑁆𑀲. 𑀪𑀸𑀯𑀦𑀸 𑀳𑀺 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀯𑀢𑀻 𑀧𑀯𑀢𑁆𑀢𑀫𑀸𑀦𑀸 𑀘𑀺𑀢𑁆𑀢𑀲𑁆𑀲 𑀅𑀲𑁆𑀲𑀸𑀤𑀁 𑀉𑀧𑀲𑀫𑀲𑀼𑀔𑀁 𑀆𑀯𑀳𑀢𑀺, 𑀢𑀤𑀪𑀸𑀯𑀢𑁄 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀸𑀲𑀁𑀯𑁂𑀕𑀯𑀲𑁂𑀦𑀸𑀢𑀺 𑀲𑀤𑁆𑀥𑀸𑀯𑀲𑁂𑀦, 𑀲𑀁𑀯𑁂𑀕𑀯𑀲𑁂𑀦 𑀘. 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀲𑀫𑁆𑀫𑀤𑁂𑀯 𑀧𑀳𑀁𑀲𑀦𑀢𑀸 𑀲𑀁𑀯𑁂𑀚𑀦𑀧𑀼𑀩𑁆𑀩𑀓𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀪𑀸𑀯𑀦𑀸 𑀘𑀺𑀢𑁆𑀢𑀲𑁆𑀲 𑀢𑁄𑀲𑀦𑀸. 𑀲𑀫𑁆𑀫𑀸𑀧𑀯𑀢𑁆𑀢𑀲𑁆𑀲𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀭𑀳𑁂𑀦, 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀫𑀁, 𑀲𑀯𑀺𑀲𑁂𑀲𑀜𑁆𑀘 𑀧𑀯𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀧𑀯𑀢𑁆𑀢𑀲𑁆𑀲 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲. 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸𑀢𑀺 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸. 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸𑀢𑀺 𑀧𑀞𑀫𑀸𑀤𑀻𑀦𑀺 𑀛𑀸𑀦𑀸𑀦𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀢𑀸𑀤𑀺𑀦𑀸 𑀢𑁂𑀬𑁂𑀯 𑀯𑀺𑀫𑁄𑀓𑁆𑀔𑀸 𑀢𑁂𑀲𑀁 ‘‘𑀏𑀯𑀁 𑀪𑀸𑀯𑀦𑀸, 𑀏𑀯𑀁 𑀲𑀫𑀸𑀧𑀚𑁆𑀚𑀦𑀸, 𑀏𑀯𑀁 𑀅𑀥𑀺𑀝𑁆𑀞𑀸𑀦𑀁, 𑀏𑀯𑀁 𑀯𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀁𑀓𑀺𑀮𑁂𑀲𑁄, 𑀏𑀯𑀁 𑀯𑁄𑀤𑀸𑀦’’𑀦𑁆𑀢𑀺 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀡𑀸.

𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸𑀢𑀺 ¶ 𑀲𑀢𑁆𑀢𑁂𑀲𑀼 𑀧𑀺𑀬𑀝𑁆𑀞𑀸𑀦𑀺𑀬𑁂𑀲𑀼𑀧𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀸. 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀘𑀓𑁆𑀔𑀸𑀤𑀻𑀲𑀼, 𑀩𑀸𑀳𑀺𑀭𑁂𑀲𑀼 𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀸. 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀫𑀫𑀸𑀬𑀦𑀁 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀁. 𑀇𑀫𑁂𑀳𑀸𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀲𑁆𑀲𑀤𑁆𑀥𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀸𑀤𑀺𑀆𑀓𑀸𑀭𑁂𑀳𑀺 𑀘𑁂𑀯 𑀲𑀧𑁆𑀧𑀸𑀬𑀸𑀳𑀸𑀭𑀲𑁂𑀯𑀦𑀸𑀤𑀺𑀆𑀓𑀸𑀭𑁂𑀳𑀺 𑀘. 𑀏𑀢𑁂 𑀥𑀫𑁆𑀫𑁂𑀢𑀺 𑀏𑀢𑁂 𑀧𑀲𑁆𑀲𑀤𑁆𑀥𑀺𑀆𑀤𑀺𑀥𑀫𑁆𑀫𑁂.

𑁬𑁬. 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸𑀢𑀺 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀅𑀧𑁆𑀧𑀪𑀸𑀯𑁂𑀦. 𑀬𑀣𑀸 𑀳𑀺 𑀤𑀸𑀦𑀲𑀻𑀮𑀸𑀦𑀺 𑀅𑀮𑁄𑀪𑀸𑀤𑁄𑀲𑀧𑁆𑀧𑀥𑀸𑀦𑀸𑀦𑀺 ¶ , 𑀏𑀯𑀁 𑀪𑀸𑀯𑀦𑀸 𑀅𑀫𑁄𑀳𑀧𑁆𑀧𑀥𑀸𑀦𑀸 𑀯𑀺𑀲𑁂𑀲𑀢𑁄 𑀅𑀧𑁆𑀧𑀦𑀸𑀯𑀳𑀸. 𑀢𑀢𑁆𑀣 𑀬𑀤𑀸 𑀧𑀜𑁆𑀜𑀸 𑀦 𑀩𑀮𑀯𑀢𑀻 𑀳𑁄𑀢𑀺, 𑀢𑀤𑀸 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀅𑀦𑀪𑀺𑀲𑀗𑁆𑀔𑀢𑁄 𑀯𑀺𑀬 𑀆𑀳𑀸𑀭𑁄 𑀧𑀼𑀭𑀺𑀲𑀲𑁆𑀲 𑀅𑀪𑀺𑀭𑀼𑀘𑀺𑀁 𑀦 𑀚𑀦𑁂𑀢𑀺, 𑀢𑁂𑀦 𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀬𑀤𑀸 𑀘 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀯𑀳𑀸 𑀦 𑀳𑁄𑀢𑀺 𑀲𑀫𑁆𑀫𑀤𑁂𑀯 𑀅𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸, 𑀢𑀤𑀸 𑀉𑀧𑀲𑀫𑀲𑀼𑀔𑀲𑁆𑀲 𑀅𑀮𑀸𑀪𑁂𑀦 𑀘𑀺𑀢𑁆𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑀤𑀼𑀪𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸’’𑀢𑀺𑀆𑀤𑀺. 𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀬𑀣𑀸𑀭𑀳𑀁 𑀲𑀼𑀕𑀢𑀺𑀬𑀁, 𑀤𑀼𑀕𑁆𑀕𑀢𑀺𑀬𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀤𑀜𑁆𑀜𑀫𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀅𑀜𑁆𑀜𑀫𑀜𑁆𑀜𑀯𑀺𑀩𑀸𑀥𑀦𑀸𑀤𑀺𑀳𑁂𑀢𑀼𑀓𑀁 𑀅𑀧𑀸𑀬𑀤𑀼𑀓𑁆𑀔𑀁 𑀤𑀝𑁆𑀞𑀩𑁆𑀩𑀁. 𑀢𑀬𑀺𑀤𑀁 𑀲𑀩𑁆𑀩𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀦𑀺𑀲𑁆𑀲𑀺𑀢𑀁 𑀕𑀳𑀺𑀢𑀦𑁆𑀢𑀺 𑀅𑀢𑀻𑀢𑁂, 𑀅𑀦𑀸𑀕𑀢𑁂 𑀘 𑀓𑀸𑀮𑁂 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀸𑀦𑀺 𑀯𑀺𑀲𑀼𑀁 𑀕𑀳𑀺𑀢𑀸𑀦𑀺. 𑀬𑁂 𑀧𑀦 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄, 𑀢𑀢𑁆𑀣 𑀘 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀚𑀻𑀯𑀺𑀢𑀤𑀼𑀓𑁆𑀔𑀁 𑀅𑀝𑁆𑀞𑀫𑀁 𑀲𑀁𑀯𑁂𑀕𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲. 𑀅𑀮𑀻𑀦𑀦𑁆𑀢𑀺𑀆𑀤𑀻𑀲𑀼 𑀓𑁄𑀲𑀚𑁆𑀚𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀮𑀻𑀦𑀁. 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀢𑀁. 𑀧𑀜𑁆𑀜𑀸𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸, 𑀉𑀧𑀲𑀫𑀲𑀼𑀔𑀸𑀥𑀺𑀕𑀫𑁂𑀦 𑀘 𑀅𑀦𑀺𑀭𑀲𑁆𑀲𑀸𑀤𑀁. 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀯𑀺𑀲𑁂𑀲𑀁 𑀢𑀢𑁄 𑀏𑀯 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁, 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀜𑁆𑀘. 𑀢𑀢𑁆𑀣 𑀅𑀮𑀻𑀦𑀢𑀸𑀬 𑀧𑀕𑁆𑀕𑀳𑁂, 𑀅𑀦𑀼𑀤𑁆𑀥𑀢𑀢𑀸𑀬 𑀦𑀺𑀕𑁆𑀕𑀳𑁂, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑁆𑀧𑀳𑀁𑀲𑀦𑁂 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀢𑀸𑀬 𑀳𑀺 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁. 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁, 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀦𑁆𑀢𑀺 𑀛𑀸𑀦𑀧𑀝𑀺𑀧𑀢𑁆𑀢𑀺𑀁. 𑀲𑀫𑀸𑀥𑀺𑀅𑀥𑀺𑀫𑀼𑀢𑁆𑀢𑀢𑀸𑀢𑀺 𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀦𑁂 𑀛𑀸𑀦𑀸𑀥𑀺𑀕𑀫𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸. 𑀲𑀸 𑀧𑀦 𑀬𑀲𑁆𑀫𑀸 𑀲𑀫𑀸𑀥𑀺𑀁 𑀕𑀭𑀼𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 ¶ 𑀧𑀯𑀢𑁆𑀢𑀺𑀬𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀫𑀸𑀥𑀺𑀕𑀭𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁭. 𑀧𑀝𑀺𑀮𑀤𑁆𑀥𑁂 𑀦𑀺𑀫𑀺𑀢𑁆𑀢𑀲𑁆𑀫𑀺𑀁 𑀏𑀯𑀁 𑀳𑀺 𑀲𑀫𑁆𑀧𑀸𑀤𑀬𑀢𑁄 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀇𑀫𑀁 𑀅𑀧𑁆𑀧𑀦𑀸 𑀲𑀫𑁆𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀢𑀺 𑀅𑀧𑁆𑀧𑀦𑀸. 𑀳𑀺𑀢𑁆𑀯𑀸 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀞𑀸𑀦𑀫𑁂𑀢𑀁 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀮𑀻𑀦𑀼𑀤𑁆𑀥𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑀬𑀁 𑀉𑀧𑀥𑀸𑀭𑁂𑀦𑁆𑀢𑁄. 𑀲𑀫𑀢𑀁 𑀯𑀻𑀭𑀺𑀬𑀲𑁆𑀲𑁂𑀯 𑀯𑀻𑀭𑀺𑀬𑀲𑁆𑀲 𑀲𑀫𑀸𑀥𑀺𑀦𑀸 𑀲𑀫𑀭𑀲𑀢𑀁𑀬𑁂𑀯 𑀬𑁄𑀚𑀬𑁂𑀣. 𑀓𑀣𑀁 𑀧𑀦 𑀬𑁄𑀚𑀬𑁂𑀣𑀸𑀢𑀺 𑀆𑀳 ‘‘𑀈𑀲𑀓𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀮𑀬𑀦𑁆𑀢𑀺 𑀮𑀻𑀦𑀪𑀸𑀯𑀁, 𑀲𑀗𑁆𑀓𑁄𑀘𑀦𑁆𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀁 ¶ , 𑀧𑀕𑁆𑀕𑀡𑁆𑀳𑁂𑀣𑁂𑀯 𑀲𑀫𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀘𑁆𑀘𑀸𑀭𑀤𑁆𑀥𑀁 𑀦𑀺𑀲𑁂𑀥𑁂𑀢𑁆𑀯𑀸 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂’’𑀢𑀺. 𑀓𑀣𑀁 𑀧𑀦 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂𑀢𑀺 𑀆𑀳 ‘‘𑀭𑁂𑀡𑀼𑀫𑁆𑀳𑀻’’𑀢𑀺𑀆𑀤𑀺. 𑀬𑀣𑀸𑀢𑀺 𑀭𑁂𑀡𑀼𑀆𑀤𑀻𑀲𑀼 𑀬𑀣𑀸 𑀫𑀥𑀼𑀓𑀭𑀸𑀤𑀻𑀦𑀁 𑀧𑀯𑀢𑁆𑀢𑀺 𑀉𑀧𑀫𑀸𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀬𑀁 𑀲𑀫𑁆𑀫𑀯𑀡𑁆𑀡𑀺𑀢𑀸, 𑀏𑀯𑀁 𑀮𑀻𑀦𑀼𑀤𑁆𑀥𑀢𑀪𑀸𑀯𑁂𑀳𑀺 𑀫𑁄𑀘𑀬𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑁂𑀦 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀫𑀸𑀦𑀲𑀁 𑀧𑀝𑀺𑀧𑀸𑀤𑀬𑁂 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀪𑀸𑀯𑀦𑀸𑀘𑀺𑀢𑁆𑀢𑀁 𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀧𑀝𑀺𑀧𑀸𑀤𑀦𑀯𑀡𑁆𑀡𑀦𑀸

𑁬𑁮. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀭𑁂𑀡𑀼𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀕𑀸𑀣𑀸𑀤𑁆𑀯𑀬𑁂. 𑀅𑀢𑁆𑀣𑀤𑀻𑀧𑀦𑀸 𑀉𑀧𑀫𑀽𑀧𑀫𑁂𑀬𑁆𑀬𑀢𑁆𑀣𑀯𑀺𑀪𑀸𑀯𑀦𑀸. 𑀅𑀙𑁂𑀓𑁄𑀢𑀺 𑀅𑀓𑀼𑀲𑀮𑁄. 𑀧𑀓𑁆𑀔𑀦𑁆𑀤𑁄𑀢𑀺 𑀥𑀸𑀯𑀺𑀢𑀼𑀁 𑀆𑀭𑀤𑁆𑀥𑁄. 𑀯𑀺𑀓𑀲𑀦𑀓𑁆𑀔𑀡𑁂𑀬𑁂𑀯 𑀲𑀭𑀲𑀁 𑀓𑀼𑀲𑀼𑀫𑀧𑀭𑀸𑀕𑀁 𑀳𑁄𑀢𑀺, 𑀧𑀘𑁆𑀙𑀸 𑀯𑀸𑀢𑀸𑀤𑀻𑀳𑀺 𑀧𑀭𑀺𑀧𑀢𑀢𑀺, 𑀯𑀺𑀭𑀲𑀁 𑀯𑀸 𑀳𑁄𑀢𑀺. 𑀢𑀲𑁆𑀫𑀸 𑀦𑀺𑀯𑀢𑁆𑀢𑀦𑁂 𑀭𑁂𑀡𑀼 𑀔𑀻𑀬𑀢𑀻𑀢𑀺 𑀆𑀳 ‘‘𑀔𑀻𑀡𑁂 𑀭𑁂𑀡𑀼𑀫𑁆𑀳𑀺 𑀲𑀫𑁆𑀧𑀸𑀧𑀼𑀡𑀸𑀢𑀻’’𑀢𑀺. 𑀧𑀼𑀧𑁆𑀨𑀭𑀸𑀲𑀺𑀦𑁆𑀢𑀺 𑀭𑀼𑀓𑁆𑀔𑀲𑀸𑀔𑀸𑀲𑀼 𑀦𑀺𑀲𑁆𑀲𑀺𑀢𑀁 𑀧𑀼𑀧𑁆𑀨𑀲𑀜𑁆𑀘𑀬𑀁.

𑀲𑀮𑁆𑀮𑀓𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀽𑀢𑀺 𑀲𑀮𑁆𑀮𑀓𑀢𑁆𑀢𑀆𑀘𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼. 𑀉𑀤𑀓𑀣𑀸𑀮𑀕𑀢𑁂𑀢𑀺 𑀉𑀤𑀓𑀣𑀸𑀮𑀺𑀬𑀁 𑀞𑀧𑀺𑀢𑁂. 𑀲𑀢𑁆𑀣𑀓𑀫𑁆𑀫𑀦𑁆𑀢𑀺 𑀲𑀺𑀭𑀸𑀯𑁂𑀥𑀦𑀸𑀤𑀺𑀲𑀢𑁆𑀣𑀓𑀫𑁆𑀫𑀁. 𑀨𑀼𑀲𑀺𑀢𑀼𑀫𑁆𑀧𑀺 𑀉𑀧𑁆𑀧𑀮𑀧𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁂𑀦𑀸𑀢𑀺 𑀧𑀼𑀭𑀺𑀫𑀓𑀸 𑀯𑀺𑀬 𑀕𑀭𑀼𑀁, 𑀫𑀦𑁆𑀤𑀜𑁆𑀘 𑀧𑀬𑁄𑀕𑀁 𑀅𑀓𑀢𑁆𑀯𑀸 𑀲𑀫𑀧𑁆𑀧𑀫𑀸𑀡𑁂𑀦 𑀧𑀬𑁄𑀕𑁂𑀦. 𑀢𑀢𑁆𑀣𑀸𑀢𑀺 𑀉𑀧𑁆𑀧𑀮𑀧𑀢𑁆𑀢𑁂. 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑀺𑀧𑁆𑀧𑁄 𑀦𑀺𑀧𑁆𑀨𑀦𑁆𑀦𑀲𑀺𑀧𑁆𑀧𑁄.

𑀫𑀓𑁆𑀓𑀝𑀓𑀲𑀼𑀢𑁆𑀢𑀦𑁆𑀢𑀺 ¶ 𑀮𑀽𑀢𑀲𑀼𑀢𑁆𑀢𑀁. 𑀦𑀺𑀬𑀸𑀫𑀓𑁄 𑀦𑀸𑀯𑀸𑀲𑀸𑀭𑀣𑀻. 𑀮𑀗𑁆𑀓𑀸𑀭𑀦𑁆𑀢𑀺 𑀓𑀺𑀮𑀜𑁆𑀚𑀸𑀤𑀺𑀫𑀬𑀁 𑀦𑀸𑀯𑀸𑀓𑀝𑀲𑀸𑀭𑀓𑀁. 𑀢𑁂𑀮𑁂𑀦 𑀅𑀙𑀟𑁆𑀟𑁂𑀦𑁆𑀢𑁄 𑀦𑀸𑀴𑀺𑀁 𑀧𑀽𑀭𑁂𑀢𑀻𑀢𑀺 𑀲𑀭𑀸𑀯𑀸𑀤𑀺𑀕𑀢𑁂𑀦 𑀢𑁂𑀮𑁂𑀦 𑀅𑀙𑀟𑁆𑀟𑁂𑀦𑁆𑀢𑁄 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑀓𑀁 𑀢𑁂𑀮𑀦𑀸𑀴𑀺𑀁 𑀧𑀽𑀭𑁂𑀢𑀺. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀢𑁂 𑀆𑀤𑀺𑀢𑁄 𑀯𑀼𑀢𑁆𑀢𑀫𑀥𑀼𑀓𑀭𑀲𑀮𑁆𑀮𑀓𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀲𑀼𑀢𑁆𑀢𑀸𑀓𑀟𑁆𑀠𑀓𑀦𑀺𑀬𑀸𑀫𑀓𑀢𑁂𑀮𑀧𑀽𑀭𑀓𑀸 𑀯𑁂𑀕𑁂𑀦 𑀧𑀬𑁄𑀕𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀬𑁄 𑀪𑀺𑀓𑁆𑀔𑀼 ‘‘𑀲𑀻𑀖𑀁 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀕𑀸𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺, 𑀬𑁄 𑀫𑀚𑁆𑀛𑁂 𑀯𑀼𑀢𑁆𑀢𑀫𑀥𑀼𑀓𑀭𑀸𑀤𑀬𑁄 𑀯𑀺𑀬 𑀯𑀻𑀭𑀺𑀬𑀁 𑀦 𑀓𑀭𑁄𑀢𑀺, 𑀇𑀫𑁂 𑀤𑁆𑀯𑁂𑀧𑀺 𑀯𑀻𑀭𑀺𑀬𑀲𑀫𑀢𑀸𑀪𑀸𑀯𑁂𑀦 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑁄 𑀧𑀦 𑀅𑀯𑀲𑀸𑀦𑁂 𑀯𑀼𑀢𑁆𑀢𑀫𑀥𑀼𑀓𑀭𑀸𑀤𑀬𑁄 𑀯𑀺𑀬 𑀲𑀫𑀧𑁆𑀧𑀬𑁄𑀕𑁄, 𑀅𑀬𑀁 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀢𑀺 𑀯𑀻𑀭𑀺𑀬𑀲𑀫𑀢𑀸𑀬𑁄𑀕𑀢𑁄𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀮𑀻𑀦𑀁 𑀪𑀸𑀯𑀦𑀸𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁬𑁯. 𑀏𑀯𑀦𑁆𑀢𑀺 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀲𑁂𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀪𑀸𑀯𑀦𑀸𑀫𑀸𑀦𑀲𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀬𑁂𑀯 𑀞𑀧𑀦𑀯𑀲𑁂𑀦 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀧𑀝𑀺𑀧𑀸𑀤𑀬𑀢𑁄 𑀅𑀲𑁆𑀲 𑀬𑁄𑀕𑀺𑀦𑁄. 𑀇𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀫𑀺𑀚𑁆𑀛𑀺𑀲𑁆𑀲𑀢𑀺, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀬𑁄𑀕𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀯𑀲𑁂𑀦. 𑀲𑁂𑀲𑀸𑀦𑀻𑀢𑀺 𑀲𑁂𑀲𑀸𑀦𑀺 𑀢𑀻𑀡𑀺, 𑀘𑀢𑁆𑀢𑀸𑀭𑀺 𑀯𑀸. 𑀧𑀓𑀢𑀺𑀘𑀺𑀢𑁆𑀢𑁂𑀳𑀻𑀢𑀺 𑀧𑀸𑀓𑀢𑀺𑀓𑁂𑀳𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺. 𑀩𑀮𑀯…𑀧𑁂… 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺 𑀪𑀸𑀯𑀦𑀸𑀩𑀮𑁂𑀦 𑀧𑀝𑀼𑀢𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀓𑀫𑁆𑀫𑀢𑁆𑀢𑀸𑀢𑀺 𑀧𑀝𑀺𑀲𑀗𑁆𑀔𑀸𑀭𑀓𑀢𑁆𑀢𑀸. 𑀬𑀤𑀺 𑀆𑀲𑀦𑁆𑀦𑀢𑁆𑀢𑀸 𑀉𑀧𑀘𑀸𑀭𑀢𑀸, 𑀕𑁄𑀢𑁆𑀭𑀪𑀼𑀦𑁄 𑀏𑀯 𑀉𑀧𑀘𑀸𑀭𑀲𑀫𑀜𑁆𑀜𑀸 𑀲𑀺𑀬𑀸𑀢𑀺 𑀆𑀳 ‘‘𑀲𑀫𑀻𑀧𑀘𑀸𑀭𑀺𑀢𑁆𑀢𑀸 𑀯𑀸’’𑀢𑀺. 𑀅𑀦𑀘𑁆𑀘𑀸𑀲𑀦𑁆𑀦𑁄𑀧𑀺 𑀳𑀺 𑀦𑀸𑀢𑀺𑀤𑀽𑀭𑀧𑀯𑀢𑁆𑀢𑀻 𑀲𑀫𑀻𑀧𑀘𑀸𑀭𑀻 𑀦𑀸𑀫 𑀳𑁄𑀢𑀺. 𑀅𑀧𑁆𑀧𑀦𑀁 𑀉𑀧𑁂𑀘𑁆𑀘 𑀘𑀭𑀦𑁆𑀢𑀻𑀢𑀺 𑀉𑀧𑀘𑀸𑀭𑀸𑀦𑀺. 𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀺 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀭𑀺𑀓𑀫𑁆𑀫𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀭𑀺𑀓𑀫𑁆𑀫𑀼𑀧𑀘𑀸𑀭𑀸𑀦𑀼𑀮𑁄𑀫𑀲𑀜𑁆𑀜𑀺𑀢𑁂𑀲𑀼. 𑀲𑀩𑁆𑀩𑀦𑁆𑀢𑀺𑀫𑀦𑁆𑀢𑀺 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁 𑀯𑀸. 𑀧𑀭𑀺𑀢𑁆𑀢𑀕𑁄𑀢𑁆𑀢𑀸𑀪𑀺𑀪𑀯𑀦𑀢𑁄𑀢𑀺 𑀧𑀭𑀺𑀢𑁆𑀢𑀲𑁆𑀲 𑀕𑁄𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀢𑁄. 𑀕𑀁𑀢𑀸𑀬𑀢𑀻𑀢𑀺 𑀳𑀺 𑀕𑁄𑀢𑁆𑀢𑀁, ‘‘𑀧𑀭𑀺𑀢𑁆𑀢’’𑀦𑁆𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀧𑀭𑀺𑀢𑁆𑀢𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦. 𑀢𑀲𑁆𑀫𑀸 𑀲𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀯𑀺𑀥𑀼𑀭𑀁 𑀓𑀸𑀫𑀢𑀡𑁆𑀳𑀸𑀬 𑀕𑁄𑀘𑀭𑀪𑀽𑀢𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 𑀆𑀯𑁂𑀡𑀺𑀓𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀕𑁆𑀕𑀢𑀕𑁄𑀢𑁆𑀢𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀦𑀢𑁄𑀢𑀺 𑀉𑀧𑁆𑀧𑀸𑀤𑀦𑀢𑁄.

𑀅𑀯𑀺𑀲𑁂𑀲𑁂𑀦 ¶ 𑀲𑀩𑁆𑀩𑁂𑀲𑀁 𑀲𑀩𑁆𑀩𑀸 𑀲𑀫𑀜𑁆𑀜𑀸𑀢𑀺 𑀧𑀞𑀫𑀦𑀬𑁄 𑀕𑀳𑀺𑀢𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦𑀸’’𑀢𑀺𑀆𑀤𑀺. 𑀦𑀸𑀦𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀫𑁂𑀯 𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀞𑀫𑀁 𑀯𑀸 𑀉𑀧𑀘𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁, 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀘𑁂 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑁂. 𑀲𑁆𑀯𑀸𑀬𑀁 𑀅𑀦𑀺𑀬𑀫𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀘 𑀔𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑀤𑀦𑁆𑀥𑀸𑀪𑀺𑀜𑁆𑀜𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀘𑀢𑀼𑀢𑁆𑀣𑀁 𑀅𑀧𑁆𑀧𑁂𑀢𑀺, 𑀤𑀦𑁆𑀥𑀸𑀪𑀺𑀜𑁆𑀜𑀲𑁆𑀲 𑀧𑀜𑁆𑀘𑀫𑀁. 𑀓𑀲𑁆𑀫𑀸 𑀧𑀦 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀦 𑀢𑀢𑁄 𑀧𑀭𑀦𑁆𑀢𑀺 𑀆𑀳 ‘‘𑀢𑀢𑁄 𑀧𑀭𑀁 𑀚𑀯𑀦𑀁 𑀧𑀢𑀢𑀻’’𑀢𑀺. 𑀢𑀢𑁄 𑀧𑀜𑁆𑀘𑀫𑀢𑁄 𑀧𑀭𑀁 𑀙𑀝𑁆𑀞𑀁, 𑀲𑀢𑁆𑀢𑀫𑀜𑁆𑀘 𑀚𑀯𑀦𑀁 𑀧𑀢𑀦𑁆𑀢𑀁 𑀯𑀺𑀬 𑀳𑁄𑀢𑀺 𑀧𑀭𑀺𑀓𑁆𑀔𑀻𑀡𑀚𑀯𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀣𑀸 𑀅𑀮𑀤𑁆𑀥𑀸𑀲𑁂𑀯𑀦𑀁 𑀧𑀞𑀫𑀚𑀯𑀦𑀁 𑀤𑀼𑀩𑁆𑀩𑀮𑀢𑁆𑀢𑀸 𑀕𑁄𑀢𑁆𑀭𑀪𑀼𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀮𑀤𑁆𑀥𑀸𑀲𑁂𑀯𑀦𑀁 𑀧𑀦 𑀩𑀮𑀯𑀪𑀸𑀯𑀢𑁄 ¶ 𑀤𑀼𑀢𑀺𑀬𑀁, 𑀢𑀢𑀺𑀬𑀁 𑀯𑀸 𑀕𑁄𑀢𑁆𑀭𑀪𑀼𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀩𑀮𑀯𑀪𑀸𑀯𑀢𑁄 𑀙𑀝𑁆𑀞𑀁, 𑀲𑀢𑁆𑀢𑀫𑀫𑁆𑀧𑀺 𑀅𑀧𑁆𑀧𑁂𑀢𑀻𑀢𑀺 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀙𑀝𑁆𑀞𑁂𑀧𑀺 𑀲𑀢𑁆𑀢𑀫𑁂𑀧𑀺 𑀅𑀧𑁆𑀧𑀦𑀸 𑀳𑁄𑀢𑀻’’𑀢𑀺. 𑀢𑀦𑁆𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁. 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂𑀳𑀺 𑀅𑀦𑀼𑀧𑀢𑁆𑀣𑀫𑁆𑀪𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄𑀫𑀢𑀺𑀫𑀢𑁆𑀢’’𑀦𑁆𑀢𑀺. ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁨) 𑀧𑀦 𑀲𑀼𑀢𑁆𑀢𑀧𑀤𑀫𑀓𑀸𑀭𑀡𑀁 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑀲𑁆𑀲 𑀩𑀮𑀯𑀪𑀸𑀯𑁂 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀸𑀧𑀺 𑀧𑀞𑀫𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀳𑁄𑀢𑀺, 𑀮𑀤𑁆𑀥𑀸𑀲𑁂𑀯𑀦𑀸 𑀤𑀼𑀢𑀺𑀬𑀘𑁂𑀢𑀦𑀸 𑀬𑀸𑀯 𑀙𑀝𑁆𑀞𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼𑀬𑁂𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀬𑀼𑀢𑁆𑀢𑀺𑀤𑀲𑁆𑀲𑀦𑀫𑀼𑀔𑁂𑀦 𑀦𑀺𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀙𑀝𑁆𑀞𑀲𑀢𑁆𑀢𑀫𑀁 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺 𑀧𑀭𑀺𑀓𑁆𑀔𑀻𑀡𑀚𑀯𑀢𑁆𑀢𑀸, 𑀓𑀣𑀁 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸, 𑀆𑀦𑀦𑁆𑀢𑀭𑀺𑀬𑀸 𑀘 𑀳𑁄𑀢𑀻𑀢𑀺? 𑀦𑀸𑀬𑀁 𑀯𑀺𑀲𑁂𑀲𑁄 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑁂𑀦 𑀩𑀮𑀧𑁆𑀧𑀢𑁆𑀢𑀺𑀬𑀸. 𑀓𑀺𑀜𑁆𑀘𑀭𑀳𑀺 𑀓𑀺𑀭𑀺𑀬𑀸𑀯𑀢𑁆𑀣𑀸𑀯𑀺𑀲𑁂𑀲𑀢𑁄. 𑀓𑀺𑀭𑀺𑀬𑀸𑀯𑀢𑁆𑀣𑀸 𑀳𑀺 𑀆𑀭𑀫𑁆𑀪𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀘 𑀧𑀭𑀺𑀬𑁄𑀲𑀸𑀦𑀸𑀯𑀢𑁆𑀣𑀸𑀬 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀪𑀸𑀯𑁂𑀦 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀤𑀺𑀢𑀸 𑀳𑁄𑀢𑀺, 𑀦 𑀩𑀮𑀯𑀪𑀸𑀯𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀢𑀣𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸𑀢𑀺 𑀘 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀙𑀝𑁆𑀞𑀲𑀢𑁆𑀢𑀫𑀸𑀦𑀁 𑀧𑀧𑀸𑀢𑀸𑀪𑀺𑀫𑀼𑀔𑀢𑀸𑀬 𑀧𑀭𑀺𑀓𑁆𑀔𑀻𑀡𑀚𑀯𑀢𑀸 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑀣𑀸 𑀳𑀺 ‘‘𑀬𑀣𑀸 𑀳𑀺 𑀧𑀼𑀭𑀺𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀸 ¶ 𑀘 𑀧𑀦 𑀅𑀧𑁆𑀧𑀦𑀸. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. 𑀲𑁄 𑀧𑀦𑁂𑀢𑁆𑀣 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀭𑀺𑀫𑀸𑀡𑀘𑀺𑀢𑁆𑀢𑀓𑁆𑀔𑀡𑀢𑀸𑀬, 𑀓𑀢𑁆𑀣𑀘𑀺 𑀅𑀢𑀺𑀇𑀢𑁆𑀢𑀭𑀔𑀡𑀢𑀸𑀬 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑁄. 𑀦 𑀳𑁂𑀢𑁆𑀣 𑀲𑀫𑁆𑀧𑀼𑀡𑁆𑀡𑀚𑀯𑀦𑀯𑀻𑀣𑀺 𑀅𑀤𑁆𑀥𑀸 𑀮𑀩𑁆𑀪𑀢𑀺. 𑀢𑁂𑀦𑁂𑀯𑀸𑀳 ‘‘𑀏𑀢𑁆𑀣 𑀫𑀕𑁆𑀕𑀸𑀦𑀦𑁆𑀢𑀭𑀨𑀮’’𑀦𑁆𑀢𑀺𑀆𑀤𑀺. 𑀲𑁂𑀲𑀝𑁆𑀞𑀸𑀦𑁂𑀲𑀽𑀢𑀺 𑀧𑀞𑀫𑀧𑁆𑀧𑀦𑀸, 𑀮𑁄𑀓𑀺𑀬𑀸𑀪𑀺𑀜𑁆𑀜𑀸, 𑀫𑀕𑁆𑀕𑀓𑁆𑀔𑀡𑁄, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀨𑀮𑀓𑁆𑀔𑀡𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼.

𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀪𑀸𑀯𑀦𑀸𑀓𑁆𑀓𑀫𑁂𑀦 𑀏𑀲 𑀬𑁄𑀕𑀸𑀯𑀘𑀭𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀯𑀺𑀳𑀭𑀢𑀸 𑀘 𑀅𑀦𑁂𑀦 𑀢𑀤𑁂𑀯 𑀧𑀞𑀫𑀁 𑀛𑀸𑀦𑀁 𑀅𑀥𑀺𑀕𑀢𑀁 𑀳𑁄𑀢𑀺 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀛𑀸𑀦𑀧𑀸𑀞𑁂. 𑀯𑀺𑀯𑀺𑀘𑁆𑀘𑀺𑀢𑁆𑀯𑀸𑀢𑀺 𑀯𑀺𑀲𑀼𑀁 𑀳𑀼𑀢𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀓𑁆𑀓𑀫𑀺𑀢𑁆𑀯𑀸’’𑀢𑀺, 𑀧𑀚𑀳𑀦𑀯𑀲𑁂𑀦 𑀅𑀧𑀲𑀓𑁆𑀓𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀏𑀢𑁆𑀣 ‘‘𑀯𑀺𑀯𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀯𑀺𑀯𑁂𑀘𑀦𑀁 𑀛𑀸𑀦𑀓𑁆𑀔𑀡𑁂 𑀓𑀸𑀫𑀸𑀦𑀁 𑀅𑀪𑀸𑀯𑀫𑀢𑁆𑀢𑀁 𑀯𑀼𑀢𑁆𑀢𑀁. ‘‘𑀯𑀺𑀯𑀺𑀘𑁆𑀘𑁂𑀯𑀸’’𑀢𑀺 𑀧𑀦 𑀇𑀫𑀺𑀦𑀸 𑀏𑀓𑀁𑀲𑀢𑁄 𑀓𑀸𑀫𑀸𑀦𑀁 𑀯𑀺𑀯𑁂𑀘𑁂𑀢𑀩𑁆𑀩𑀢𑀸𑀤𑀻𑀧𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀢𑀸 𑀛𑀸𑀦𑀲𑁆𑀲, 𑀓𑀸𑀫𑀯𑀺𑀯𑁂𑀓𑀲𑁆𑀲 𑀘 𑀛𑀸𑀦𑀸𑀥𑀺𑀕𑀫𑀽𑀧𑀸𑀬𑀢𑀸 ¶ 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄𑀪𑀸𑀲𑁄 𑀯𑀺𑀬𑀸’’𑀢𑀺 𑀏𑀢𑁂𑀦 𑀬𑀣𑀸 𑀧𑀤𑀻𑀧𑁄𑀪𑀸𑀲𑀸𑀪𑀸𑀯𑁂𑀦 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀸𑀭𑀸𑀪𑀺𑀪𑀯𑁄, 𑀏𑀯𑀁 𑀛𑀸𑀦𑀸𑀪𑀸𑀯𑁂𑀦 𑀲𑀢𑁆𑀢𑀲𑀦𑁆𑀢𑀢𑀺𑀬𑀁 𑀓𑀸𑀫𑀸𑀪𑀺𑀪𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀢𑀦𑁆𑀢𑀺 𑀧𑀼𑀩𑁆𑀩𑀧𑀤𑁂𑀬𑁂𑀯 𑀅𑀯𑀥𑀸𑀭𑀡𑀯𑀘𑀦𑀁. 𑀦 𑀔𑁄 𑀧𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀓𑀸𑀫𑁂𑀳𑀺 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀲𑁆𑀲 𑀅𑀓𑀢𑀢𑁆𑀢𑀸. 𑀦𑀺𑀲𑁆𑀲𑀭𑀦𑁆𑀢𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀦𑀺𑀲𑁆𑀲𑀭𑀡𑀁. 𑀓𑁂 𑀦𑀺𑀕𑁆𑀕𑀘𑁆𑀙𑀦𑁆𑀢𑀺? 𑀓𑀸𑀫𑀸, 𑀢𑁂𑀲𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁 𑀧𑀳𑀸𑀦𑀁 𑀢𑀦𑁆𑀦𑀺𑀲𑁆𑀲𑀭𑀡𑀁, 𑀢𑀢𑁄. 𑀓𑀣𑀁 𑀧𑀦 𑀲𑀫𑀸𑀦𑁂 𑀯𑀺𑀓𑁆𑀔𑀫𑁆𑀪𑀦𑁂 𑀓𑀸𑀫𑀸𑀦𑀫𑁂𑀯𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀦 𑀩𑁆𑀬𑀸𑀧𑀸𑀤𑀸𑀤𑀻𑀦𑀦𑁆𑀢𑀺 𑀘𑁄𑀤𑀦𑀁 𑀬𑀼𑀢𑁆𑀢𑀺𑀢𑁄, 𑀆𑀕𑀫𑀢𑁄 𑀘 𑀲𑁄𑀥𑁂𑀢𑀼𑀁 ‘‘𑀓𑀸𑀫𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 𑀲𑀓𑀮𑀲𑁆𑀲𑀧𑀺 𑀓𑀸𑀫𑀪𑀯𑀲𑁆𑀲 𑀲𑀫𑀢𑀺𑀓𑁆𑀓𑀫𑀧𑀝𑀺𑀧𑀤𑀸𑀪𑀸𑀯𑀢𑁄. 𑀢𑁂𑀦 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀓𑀸𑀫𑀧𑀭𑀺𑀜𑁆𑀜𑀸𑀪𑀸𑀯𑀫𑀸𑀳. 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄𑀢𑀺 𑀯𑀓𑁆𑀔𑀫𑀸𑀦𑀯𑀺𑀪𑀸𑀕𑀲𑁆𑀲 𑀓𑀺𑀮𑁂𑀲𑀓𑀸𑀫𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀪𑀸𑀯𑀢𑁄. 𑀢𑁂𑀦 𑀬𑀣𑀸 𑀫𑁂𑀢𑁆𑀢𑀸 𑀩𑁆𑀬𑀸𑀧𑀸𑀤𑀲𑁆𑀲, 𑀓𑀭𑀼𑀡𑀸 𑀯𑀺𑀳𑀺𑀁𑀲𑀸𑀬, 𑀏𑀯𑀫𑀺𑀤𑀁 𑀛𑀸𑀦𑀁 𑀓𑀸𑀫𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀫𑀢𑁆𑀢𑀦𑁄 𑀧𑀯𑀢𑁆𑀢𑀺𑀬𑀸, 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀘 𑀓𑀸𑀫𑀭𑀸𑀕𑀢𑁄, 𑀓𑀸𑀫𑀥𑀸𑀢𑀼𑀢𑁄 ¶ 𑀘 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀢𑁆𑀢𑀸 𑀇𑀤𑀁 𑀛𑀸𑀦𑀁 𑀯𑀺𑀲𑁂𑀲𑀢𑁄 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀕𑀢𑁄 𑀏𑀯𑀸𑀢𑀺 𑀆𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀓𑀸𑀫𑀜𑁆𑀘𑁂𑀢𑀫𑀢𑁆𑀣𑀁 𑀤𑀻𑀧𑁂𑀢𑀼𑀁 𑀧𑀼𑀭𑀺𑀫𑀧𑀤𑁂𑀬𑁂𑀯 𑀅𑀯𑀥𑀸𑀭𑀡𑀁 𑀕𑀳𑀺𑀢𑀁, 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀢𑀁 𑀕𑀳𑁂𑀢𑀩𑁆𑀩𑀫𑁂𑀯 𑀢𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀢𑁆𑀢𑀭𑀧𑀤𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑀢𑁄. 𑀏𑀲 𑀦𑀺𑀬𑀫𑁄. 𑀲𑀸𑀥𑀸𑀭𑀡𑀯𑀘𑀦𑁂𑀦𑀸𑀢𑀺 𑀅𑀯𑀺𑀲𑁂𑀲𑀯𑀘𑀦𑁂𑀦. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄. 𑀘𑀺𑀢𑁆𑀢𑀓𑀸𑀬𑀉𑀧𑀥𑀺𑀯𑀺𑀯𑁂𑀓𑀸 𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀬𑁄. 𑀢𑀬𑁄 𑀏𑀯 𑀇𑀥 𑀛𑀸𑀦𑀓𑀣𑀸𑀬𑀁 𑀤𑀝𑁆𑀞𑀩𑁆𑀩𑀸 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄.

𑀦𑀺𑀤𑁆𑀤𑁂𑀲𑁂𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧, 𑁭). 𑀢𑀢𑁆𑀣 𑀳𑀺 ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀓𑀺𑀮𑁂𑀲𑀓𑀸𑀫𑀸 𑀘𑀸’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀬𑀸 𑀭𑀽𑀧𑀸…𑀧𑁂… 𑀫𑀦𑀸𑀧𑀺𑀬𑀸 𑀨𑁄𑀝𑁆𑀞𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀓𑀸𑀫𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀢𑁂 𑀧𑀦 𑀓𑀸𑀫𑀻𑀬𑀦𑁆𑀢𑀻𑀢𑀺 𑀓𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣𑁂𑀯𑀸𑀢𑀺 𑀦𑀺𑀤𑁆𑀤𑁂𑀲𑁂 𑀏𑀯. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁪). 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀤𑀼𑀩𑁆𑀩𑀮𑁄 𑀮𑁄𑀪𑁄 𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄, 𑀢𑀢𑁄 𑀩𑀮𑀯𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀩𑀳𑀮𑀭𑀸𑀕𑁄 𑀙𑀦𑁆𑀤𑀭𑀸𑀕𑁄. 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀲𑀗𑁆𑀓𑀧𑁆𑀧𑁂𑀢𑀺 𑀏𑀢𑁂𑀦𑀸𑀢𑀺 𑀲𑀗𑁆𑀓𑀧𑁆𑀧𑁄, 𑀢𑀣𑀸𑀧𑀯𑀢𑁆𑀢𑁄 𑀮𑁄𑀪𑁄, 𑀢𑀢𑁄 𑀩𑀮𑀯𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀲𑀗𑁆𑀓𑀧𑁆𑀧𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀲𑀗𑁆𑀓𑀧𑁆𑀧𑀭𑀸𑀕𑁄𑀢𑀺. 𑀲𑁆𑀯𑀸𑀬𑀁 ¶ 𑀧𑀪𑁂𑀤𑁄 𑀏𑀓𑀲𑁆𑀲𑁂𑀯 𑀮𑁄𑀪𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦, 𑀅𑀯𑀢𑁆𑀣𑀸𑀪𑁂𑀤𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀻𑀩𑀤𑁆𑀤𑁄’’𑀢𑀺. 𑀇𑀫𑁂 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑁂𑀦𑁆𑀢𑀻𑀢𑀺 𑀓𑀸𑀫𑀸, 𑀓𑀸𑀫𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸.

𑀏𑀯𑀜𑁆𑀳𑀺 𑀲𑀢𑀻𑀢𑀺 𑀏𑀯𑀁 𑀉𑀪𑀬𑁂𑀲𑀫𑁆𑀧𑀺 𑀓𑀸𑀫𑀸𑀦𑀁 𑀲𑀗𑁆𑀕𑀳𑁂 𑀲𑀢𑀺. 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀻𑀢𑀺 ‘‘𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯𑀸’’𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀬𑀼𑀚𑁆𑀚𑀫𑀸𑀦𑀢𑁆𑀣𑀦𑁆𑀢𑀭𑀲𑀫𑀼𑀘𑁆𑀘𑀬𑀢𑁆𑀣𑁄 𑀧𑀺-𑀲𑀤𑁆𑀤𑁄, 𑀦 𑀓𑀺𑀮𑁂𑀲𑀓𑀸𑀫𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀲𑁆𑀫𑀸? 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀲𑁆𑀲 𑀤𑀼𑀢𑀺𑀬𑀧𑀤𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑀯𑀺𑀯𑁂𑀓𑁂𑀦. 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀯𑁂𑀓𑀤𑀻𑀧𑀦𑀢𑁄. 𑀧𑀼𑀭𑀺𑀫𑁂𑀦𑀸𑀢𑀺 𑀓𑀸𑀬𑀯𑀺𑀯𑁂𑀓𑁂𑀦. 𑀏𑀢𑁆𑀣𑀸𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂, 𑀇𑀢𑁄 𑀯𑀸 𑀦𑀺𑀤𑁆𑀥𑀸𑀭𑀺𑀢𑁂 𑀯𑀺𑀯𑁂𑀓𑀤𑁆𑀯𑀬𑁂. 𑀅𑀓𑀼𑀲𑀮-𑀲𑀤𑁆𑀤𑁂𑀦 𑀬𑀤𑀺𑀧𑀺 ¶ 𑀓𑀺𑀮𑁂𑀲𑀓𑀸𑀫𑀸, 𑀲𑀩𑁆𑀩𑀸𑀓𑀼𑀲𑀮𑀸𑀧𑀺 𑀯𑀸 𑀕𑀳𑀺𑀢𑀸, 𑀲𑀩𑁆𑀩𑀣𑀸 𑀧𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄’’𑀢𑀺. 𑀤𑀼𑀢𑀺𑀬𑁂𑀦𑀸𑀢𑀺 𑀘 𑀘𑀺𑀢𑁆𑀢𑀯𑀺𑀯𑁂𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀦𑁄 𑀧𑀳𑀸𑀦𑀁 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁. 𑀮𑁄𑀮𑀪𑀸𑀯𑁄 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀭𑀽𑀧𑀸𑀤𑀻𑀲𑀼 𑀢𑀡𑁆𑀳𑀼𑀧𑁆𑀧𑀸𑀤𑁄, 𑀢𑀲𑁆𑀲 𑀳𑁂𑀢𑀼 𑀯𑀢𑁆𑀣𑀼𑀓𑀸𑀫𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸. 𑀩𑀸𑀮𑀪𑀸𑀯𑁄 𑀅𑀯𑀺𑀚𑁆𑀚𑀸, 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀺 𑀯𑀸, 𑀢𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀲𑀩𑁆𑀩𑁂𑀧𑀺 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀳𑁂𑀢𑀼. 𑀓𑀸𑀫𑀕𑀼𑀡𑀸𑀥𑀺𑀕𑀫𑀳𑁂𑀢𑀼𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀲𑀼𑀤𑁆𑀥𑀧𑀬𑁄𑀕𑁄 𑀳𑁄𑀢𑀻𑀢𑀺 𑀢𑀩𑁆𑀩𑀺𑀯𑁂𑀓𑁂𑀦 𑀧𑀬𑁄𑀕𑀲𑀼𑀤𑁆𑀥𑀺 𑀯𑀺𑀪𑀸𑀯𑀺𑀢𑀸. 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁄𑀥𑀦𑁂𑀦, 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑀁𑀯𑀟𑁆𑀠𑀦𑁂𑀦 𑀘 𑀅𑀚𑁆𑀛𑀸𑀲𑀬𑀯𑀺𑀲𑁄𑀥𑀦𑀁 𑀆𑀲𑀬𑀧𑁄𑀲𑀦𑀁. 𑀓𑀸𑀫𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁.

𑀅𑀦𑁂𑀓𑀪𑁂𑀤𑁄𑀢𑀺 𑀓𑀸𑀫𑀸𑀲𑀯𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀺𑀯𑀲𑁂𑀦, 𑀭𑀽𑀧𑀢𑀡𑁆𑀳𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀧𑁆𑀧𑀪𑁂𑀤𑁄. 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯𑀸𑀢𑀺 𑀓𑀸𑀫𑀲𑀪𑀸𑀯𑁄𑀬𑁂𑀯 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄, 𑀦𑀸𑀧𑀺 𑀓𑀼𑀲𑀮𑀘𑁆𑀙𑀦𑁆𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀛𑀸𑀦𑀧𑀝𑀺𑀧𑀓𑁆𑀔𑀢𑁄𑀢𑀺 𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀢𑀁𑀳𑁂𑀢𑀼 𑀢𑀦𑁆𑀦𑀺𑀫𑀺𑀢𑁆𑀢𑀁 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀅𑀓𑀼𑀲𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑀼𑀁 𑀲𑀭𑀽𑀧𑁂𑀦 𑀕𑀳𑀺𑀢𑁄. 𑀬𑀤𑀺 𑀓𑀺𑀮𑁂𑀲𑀓𑀸𑀫𑁄𑀯 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀦𑁂𑀓𑀪𑁂𑀤𑀢𑁄’’𑀢𑀺𑀆𑀤𑀺.

𑀅𑀜𑁆𑀜𑁂𑀲𑀫𑁆𑀧𑀺 𑀤𑀺𑀝𑁆𑀞𑀺𑀫𑀸𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀻𑀦𑀁, 𑀢𑀁𑀲𑀳𑀺𑀢𑀨𑀲𑁆𑀲𑀸𑀤𑀻𑀦𑀜𑁆𑀘. 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀉𑀧𑀭𑀺𑀛𑀸𑀦𑀗𑁆𑀕𑀸𑀦𑀺, 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀢𑀧𑁆𑀧𑀘𑁆𑀘𑀦𑀻𑀓𑀦𑀻𑀯𑀭𑀡𑀯𑀘𑀦𑀁. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺 𑀢𑁂𑀲𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀢𑁄. 𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 ¶ 𑀧𑀝𑀺𑀧𑀓𑁆𑀔𑁄 𑀭𑀸𑀕𑀧𑁆𑀧𑀡𑀺𑀥𑀺𑀬𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄, 𑀦𑀸𑀦𑀸𑀭𑀫𑁆𑀫𑀡𑁂𑀳𑀺 𑀧𑀮𑁄𑀪𑀺𑀢𑀲𑁆𑀲 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀢𑁄 𑀘. 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀸 𑀧𑀸𑀫𑁄𑀚𑁆𑀚𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑁂𑀫𑀢𑁆𑀢𑀸. 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁄 𑀬𑁄𑀦𑀺𑀲𑁄 𑀲𑀗𑁆𑀓𑀧𑁆𑀧𑀦𑀯𑀲𑁂𑀦 𑀲𑀯𑀺𑀧𑁆𑀨𑀸𑀭𑀧𑀯𑀢𑁆𑀢𑀺𑀢𑁄. 𑀲𑀼𑀔𑀁 𑀅𑀯𑀽𑀧𑀲𑀫𑀸𑀦𑀼𑀢𑀸𑀧𑀲𑀪𑀸𑀯𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑀁 𑀯𑀽𑀧𑀲𑀦𑁆𑀢𑀲𑀻𑀢𑀮𑀲𑀪𑀸𑀯𑀢𑁆𑀢𑀸. 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄 𑀆𑀭𑀫𑁆𑀫𑀡𑁂 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀜𑁆𑀜𑀸𑀧𑀝𑀺𑀭𑀽𑀧𑀲𑀪𑀸𑀯𑀢𑁆𑀢𑀸. 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁂𑀦 𑀤𑁂𑀲𑀺𑀢𑀁 𑀧𑀺𑀝𑀓𑀸𑀦𑀁 𑀲𑀁𑀯𑀡𑁆𑀡𑀦𑀸 𑀧𑁂𑀝𑀓𑀁, 𑀢𑀲𑁆𑀫𑀺𑀁 𑀧𑁂𑀝𑀓𑁂.

𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲𑀸𑀢𑀺 ¶ 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀯𑀺𑀲𑁂𑀲𑀯𑀺𑀲𑀬𑀲𑁆𑀲. 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀦𑁆𑀢𑀺 𑀩𑁆𑀬𑀸𑀧𑀸𑀤𑀯𑀺𑀯𑁂𑀓𑀯𑀘𑀦𑁂𑀦 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 (𑀤𑀻. 𑀦𑀺. 𑁩.𑁩𑁪𑁦; 𑀅. 𑀦𑀺. 𑁯.𑁨𑁯; 𑀯𑀺𑀪. 𑁯𑁬𑁦) 𑀆𑀤𑀺𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀯𑀺𑀲𑀬𑀲𑁆𑀲 𑀤𑁄𑀲𑀲𑁆𑀲, 𑀫𑁄𑀳𑀸𑀥𑀺𑀓𑁂𑀳𑀺 𑀣𑀺𑀦𑀫𑀺𑀤𑁆𑀥𑀸𑀤𑀻𑀳𑀺 𑀯𑀺𑀯𑁂𑀓𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀤𑀼𑀓𑁆𑀔𑀸𑀤𑀺𑀧𑀼𑀩𑁆𑀩𑀦𑁆𑀢𑀸𑀤𑀺𑀪𑁂𑀤𑀯𑀺𑀲𑀬𑀲𑁆𑀲 𑀫𑁄𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀢𑀤𑁂𑀓𑀝𑁆𑀞𑀣𑀺𑀦𑀫𑀺𑀤𑁆𑀥𑀸𑀤𑀺𑀯𑀺𑀓𑁆𑀔𑀫𑁆𑀪𑀓𑀜𑁆𑀘𑁂𑀢𑀁 𑀲𑀩𑁆𑀩𑀸𑀓𑀼𑀲𑀮𑀧𑀝𑀺𑀧𑀓𑁆𑀔𑀲𑀪𑀸𑀯𑀢𑁆𑀢𑀸. 𑀲𑀩𑁆𑀩𑀓𑀼𑀲𑀮𑀸𑀦𑀁 𑀢𑁂𑀦 𑀲𑀪𑀸𑀯𑁂𑀦 𑀲𑀩𑁆𑀩𑀸𑀓𑀼𑀲𑀮𑀧𑁆𑀧𑀳𑀸𑀬𑀓𑀁 𑀳𑁄𑀢𑀺, 𑀳𑁄𑀦𑁆𑀢𑀫𑁆𑀧𑀺 𑀓𑀸𑀫𑀭𑀸𑀕𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀲𑀪𑀸𑀯𑀫𑁂𑀯 𑀳𑁄𑀢𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀦𑀻𑀯𑀭𑀡𑀸𑀓𑀼𑀲𑀮𑀫𑀽𑀮𑀸𑀤𑀻𑀦𑀁 ‘‘𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀆𑀳.

𑁭𑁧. 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑀸𑀘𑀺 𑀯𑀲𑀯𑀢𑁆𑀢𑀺𑀢𑀸𑀢𑀺 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 ‘‘𑀯𑀺𑀢𑀓𑁆𑀓𑀦𑀁 𑀈𑀤𑀺𑀲𑀫𑀺𑀤’’𑀦𑁆𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀭𑀺𑀓𑀧𑁆𑀧𑀦𑀦𑁆𑀢𑀺 𑀆𑀳 ‘‘𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑀩𑀮𑁂𑀦 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀭𑀼𑀴𑁆𑀳𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀓𑁄𑀘𑀺 𑀭𑀸𑀚𑀯𑀮𑁆𑀮𑀪𑀁, 𑀢𑀁𑀲𑀫𑁆𑀩𑀦𑁆𑀥𑀺𑀦𑀁 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀆𑀭𑁄𑀳𑀢𑀺 𑀅𑀦𑀼𑀧𑀯𑀺𑀲𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀬𑀤𑀺 𑀏𑀯𑀁, 𑀓𑀣𑀁 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺? 𑀯𑀺𑀢𑀓𑁆𑀓𑀩𑀮𑁂𑀦𑁂𑀯. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀘𑀬𑁂𑀦 𑀢𑁂𑀦 𑀯𑀺𑀦𑀸𑀧𑀺 𑀦𑀺𑀭𑀸𑀲𑀗𑁆𑀓𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀭𑀺𑀘𑀬𑁂𑀦 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀧𑀭𑀺𑀘𑀬𑁂𑀦𑀸𑀢𑀺 𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀯𑀺𑀢𑀓𑁆𑀓𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀧𑀭𑀺𑀘𑀬𑁂𑀦. 𑀯𑀺𑀢𑀓𑁆𑀓𑀲𑁆𑀲 𑀳𑀺 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀭𑀼𑀳𑀡𑀁 𑀘𑀺𑀭𑀧𑀭𑀺𑀘𑀺𑀢𑀁. 𑀢𑁂𑀦 𑀢𑀁 𑀓𑀤𑀸𑀘𑀺 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀢𑀢𑁆𑀣 𑀧𑀯𑀢𑁆𑀢𑀢𑁂𑀯. 𑀬𑀣𑀸 𑀢𑀁 𑀜𑀸𑀡𑀲𑀳𑀺𑀢𑀁 𑀳𑀼𑀢𑁆𑀯𑀸 𑀲𑀫𑁆𑀫𑀲𑀦𑀯𑀲𑁂𑀦 𑀘𑀺𑀭𑀧𑀭𑀺𑀘𑀺𑀢𑀁 𑀓𑀤𑀸𑀘𑀺 𑀜𑀸𑀡𑀯𑀺𑀭𑀳𑀺𑀢𑀫𑁆𑀧𑀺 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀬𑀣𑀸 𑀯𑀸 𑀓𑀺𑀮𑁂𑀲𑀲𑀳𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀲𑀩𑁆𑀩𑀲𑁄 ¶ 𑀓𑀺𑀮𑁂𑀲𑀭𑀳𑀺𑀢𑀫𑁆𑀧𑀺 𑀧𑀭𑀺𑀘𑀬𑁂𑀦 𑀓𑀺𑀮𑁂𑀲𑀯𑀸𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀆𑀤𑀺𑀢𑁄, 𑀅𑀪𑀺𑀫𑀼𑀔𑀁 𑀯𑀸 𑀳𑀦𑀦𑀁 𑀆𑀳𑀦𑀦𑀁. 𑀧𑀭𑀺𑀢𑁄, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀸 𑀆𑀳𑀦𑀦𑀁 𑀧𑀭𑀺𑀬𑀸𑀳𑀦𑀦𑀁. ‘‘𑀭𑀽𑀧𑀁 𑀭𑀽𑀧𑀁, 𑀧𑀣𑀯𑀻 𑀧𑀣𑀯𑀻’’𑀢𑀺 𑀆𑀓𑁄𑀝𑁂𑀦𑁆𑀢𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺 ‘‘𑀆𑀳𑀦𑀦𑀁, 𑀧𑀭𑀺𑀬𑀸𑀳𑀦𑀦’’𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀆𑀦𑀬𑀦𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀉𑀧𑀦𑀬𑀦𑀁, 𑀆𑀓𑀟𑁆𑀠𑀦𑀁 𑀯𑀸.

𑀅𑀦𑀼𑀲𑀜𑁆𑀘𑀭𑀡𑀁 ¶ 𑀅𑀦𑀼𑀧𑀭𑀺𑀩𑁆𑀪𑀫𑀦𑀁. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀲𑀦𑁆𑀢𑀸𑀦𑀫𑁆𑀳𑀺 𑀮𑀩𑁆𑀪𑀫𑀸𑀦𑁄 𑀏𑀯 𑀲𑀦𑁆𑀢𑀸𑀦𑁂 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀫𑀚𑁆𑀚𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀦𑀼𑀫𑀲𑀦𑀁, 𑀧𑀭𑀺𑀫𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀺𑀘𑀸𑀭𑁄 ‘‘𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬, 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑁂. 𑀲𑀳𑀚𑀸𑀢𑀸𑀦𑀁 𑀅𑀦𑀼𑀬𑁄𑀚𑀦𑀁 𑀆𑀭𑀫𑁆𑀫𑀡𑁂 𑀅𑀦𑀼𑀯𑀺𑀘𑀸𑀭𑀡𑀲𑀗𑁆𑀔𑀸𑀢𑀅𑀦𑀼𑀫𑀚𑁆𑀚𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀧𑁆𑀧𑀩𑀦𑁆𑀥𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀲𑁄 ‘‘𑀅𑀦𑀼𑀲𑀦𑁆𑀥𑀸𑀦𑀢𑀸’’𑀢𑀺 (𑀥. 𑀲. 𑁮) 𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦𑁂𑀯 𑀘 ‘‘𑀖𑀡𑁆𑀟𑀸𑀦𑀼𑀭𑀯𑁄 𑀯𑀺𑀬, 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑁄.

𑀓𑀢𑁆𑀣𑀘𑀻𑀢𑀺 𑀧𑀞𑀫𑀚𑁆𑀛𑀸𑀦𑁂, 𑀧𑀭𑀺𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘. 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑀝𑁆𑀞𑁂𑀦, 𑀯𑀺𑀘𑀸𑀭𑀲𑁆𑀲𑁂𑀯 𑀘 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀅𑀦𑀼𑀭𑀯𑀢𑁄 𑀑𑀴𑀸𑀭𑀺𑀓𑁄, 𑀢𑀲𑁆𑀲 𑀘 𑀧𑀼𑀩𑁆𑀩𑀗𑁆𑀕𑀫𑁄 𑀖𑀡𑁆𑀟𑀸𑀪𑀺𑀖𑀸𑀢𑁄 𑀯𑀺𑀬 𑀯𑀺𑀢𑀓𑁆𑀓𑁄. 𑀬𑀣𑀸 𑀳𑀺 𑀖𑀡𑁆𑀟𑀸𑀪𑀺𑀖𑀸𑀢𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑁄𑀢𑀺, 𑀏𑀯𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀺𑀭𑁄𑀧𑀦𑀝𑁆𑀞𑁂𑀦 𑀯𑀺𑀢𑀓𑁆𑀓𑁄 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑁄𑀢𑀺. 𑀅𑀪𑀺𑀖𑀸𑀢-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀅𑀪𑀺𑀖𑀸𑀢𑀚𑁄 𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀧𑁆𑀨𑀸𑀭𑀯𑀸𑀢𑀺 𑀯𑀺𑀘𑀮𑀦𑀬𑀼𑀢𑁆𑀢𑁄 𑀲𑀧𑀭𑀺𑀧𑁆𑀨𑀦𑁆𑀤𑁄. 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀧𑀭𑀺𑀲𑁆𑀲𑀬𑀸𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁. 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀬𑀦𑁆𑀢𑀺 𑀉𑀧𑀘𑀸𑀭𑁂 𑀯𑀸 𑀅𑀧𑁆𑀧𑀦𑀸𑀬𑀁 𑀯𑀸 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀺𑀬𑀁. 𑀢𑀢𑁆𑀣 𑀳𑀺 𑀯𑀺𑀢𑀓𑁆𑀓𑁄 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀧𑀞𑀫𑀸𑀪𑀺𑀦𑀺𑀧𑀸𑀢𑁂. 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀯𑀺𑀢𑀓𑁆𑀓𑀲𑁆𑀲 𑀯𑀺𑀲𑁂𑀲𑁄 𑀅𑀪𑀺𑀦𑀺𑀭𑁄𑀧𑀦𑀸𑀓𑀸𑀭𑁄 𑀑𑀴𑀸𑀭𑀺𑀓𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑁂 𑀧𑀸𑀓𑀝𑁄 𑀳𑁄𑀢𑀺, 𑀢𑀤𑀪𑀸𑀯𑀢𑁄 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀘𑀸𑀭𑀲𑁆𑀲 𑀯𑀺𑀲𑁂𑀲𑁄 𑀅𑀦𑀼𑀫𑀚𑁆𑀚𑀦𑀸𑀓𑀸𑀭𑁄 𑀧𑀸𑀓𑀝𑁄 𑀳𑁄𑀢𑀺.

𑀯𑀸𑀮𑀡𑁆𑀟𑀼𑀧𑀓𑀁 𑀏𑀴𑀓𑀮𑁄𑀫𑀸𑀤𑀻𑀳𑀺 𑀓𑀢𑀘𑀼𑀫𑁆𑀩𑀝𑀓𑀁. 𑀉𑀧𑁆𑀧𑀻𑀴𑀦𑀳𑀢𑁆𑀣𑁄𑀢𑀺 𑀧𑀺𑀡𑁆𑀟𑀲𑁆𑀲 𑀉𑀧𑁆𑀧𑀻𑀴𑀦𑀳𑀢𑁆𑀣𑁄. 𑀢𑀲𑁆𑀲𑁂𑀯 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀳𑀢𑁆𑀣𑁄. 𑀫𑀡𑁆𑀟𑀮𑀦𑁆𑀢𑀺 𑀓𑀁𑀲𑀪𑀸𑀚𑀦𑀸𑀤𑀻𑀲𑀼 𑀓𑀺𑀜𑁆𑀘𑀺 𑀫𑀡𑁆𑀟𑀮𑀁 𑀯𑀝𑁆𑀝𑀮𑁂𑀔𑀁 𑀓𑀭𑁄𑀦𑁆𑀢𑀲𑁆𑀲. 𑀬𑀣𑀸 𑀧𑀼𑀧𑁆𑀨𑀨𑀮𑀲𑀸𑀔𑀸𑀤𑀺𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀭𑀼𑀓𑁆𑀔𑁄 ‘‘𑀲𑀧𑀼𑀧𑁆𑀨𑁄 𑀲𑀨𑀮𑁄’’𑀢𑀺 𑀯𑁄𑀳𑀭𑀻𑀬𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀼𑀓𑁆𑀔𑁄 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀛𑀸𑀦𑀪𑀸𑀯𑀦𑀸𑀬 𑀧𑀼𑀕𑁆𑀕𑀮𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 ¶ ‘‘𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀛𑀸𑀦𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺. 𑀬𑀤𑀺𑀧𑀺 𑀯𑀺𑀪𑀗𑁆𑀕𑁂 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸, 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀯𑀺𑀪𑀗𑁆𑀕𑁂𑀧𑀺 𑀬𑀣𑀸 𑀇𑀥 ‘‘𑀇𑀫𑀺𑀦𑀸 ¶ 𑀘 𑀯𑀺𑀢𑀓𑁆𑀓𑁂𑀦𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑁄, 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄, 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑁄…𑀧𑁂… 𑀤𑀝𑁆𑀞𑀩𑁆𑀩𑁄 𑀛𑀸𑀦𑀲𑀫𑀗𑁆𑀕𑀺𑀦𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀗𑁆𑀕𑀺𑀢𑀸𑀤𑀲𑁆𑀲𑀦𑁂𑀦, 𑀛𑀸𑀦𑀲𑁆𑀲𑁂𑀯 𑀘 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸𑀬 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀯𑁂𑀓𑀸𑀢𑀺 𑀯𑀺𑀯𑁂𑀓𑀸 𑀳𑁂𑀢𑀼𑀪𑀽𑀢𑀸𑀢𑀺 𑀯𑀺𑀯𑁂𑀓-𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀢𑀁 𑀲𑀦𑁆𑀥𑀸𑀬𑀸𑀳. 𑀯𑀺𑀯𑁂𑀓𑁂𑀢𑀺 𑀓𑀢𑁆𑀢𑀼𑀲𑀸𑀥𑀦𑀢𑀁, 𑀓𑀫𑁆𑀫𑀲𑀸𑀥𑀦𑀢𑀁 𑀯𑀸. ‘‘𑀯𑀺𑀯𑀺𑀢𑁆𑀢𑁄’’𑀢𑀺 𑀳𑀺 𑀇𑀫𑀺𑀦𑀸 𑀦𑀻𑀯𑀭𑀡𑁂𑀳𑀺 𑀯𑀺𑀦𑀸𑀪𑀽𑀢𑁄 𑀢𑁂𑀳𑀺 𑀯𑀺𑀯𑁂𑀘𑀺𑀢𑁄𑀢𑀺 𑀘 𑀲𑀸𑀥𑀦𑀤𑁆𑀯𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀫𑁂𑀯𑀸𑀢𑀺.

𑁭𑁨. 𑀧𑀻𑀡𑀬𑀢𑀻𑀢𑀺 𑀢𑀧𑁆𑀧𑁂𑀢𑀺, 𑀯𑀟𑁆𑀠𑁂𑀢𑀺 𑀯𑀸. 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸𑀢𑀺 𑀧𑀭𑀺𑀢𑀼𑀲𑁆𑀲𑀦𑀮𑀓𑁆𑀔𑀡𑀸. 𑀧𑀻𑀡𑀦𑀭𑀲𑀸𑀢𑀺 𑀧𑀭𑀺𑀩𑁆𑀭𑀽𑀳𑀦𑀭𑀲𑀸. 𑀨𑀭𑀡𑀭𑀲𑀸𑀢𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀭𑀲𑀸. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁. 𑀔𑀼𑀤𑁆𑀤𑀺𑀓𑀸 𑀮𑀳𑀼𑀁 𑀮𑁄𑀫𑀳𑀁𑀲𑀦𑀫𑀢𑁆𑀢𑀁 𑀓𑀢𑁆𑀯𑀸 𑀪𑀺𑀦𑁆𑀦𑀸 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀢𑀺. 𑀔𑀡𑀺𑀓𑀸 𑀩𑀳𑀼𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀩𑁆𑀩𑁂𑀕𑀢𑁄 𑀨𑀭𑀡𑀸 𑀦𑀺𑀘𑁆𑀘𑀮𑀢𑁆𑀢𑀸, 𑀘𑀺𑀭𑀝𑁆𑀞𑀺𑀢𑀺𑀓𑀢𑁆𑀢𑀸 𑀘 𑀧𑀡𑀻𑀢𑀢𑀭𑀸. 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸𑀢𑀺 𑀧𑀼𑀡𑁆𑀡𑀯𑀮𑁆𑀮𑀺𑀓𑀯𑀺𑀳𑀸𑀭𑁂 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸. 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑁂 𑀫𑀳𑀸𑀘𑁂𑀢𑀺𑀬𑀁 𑀕𑀳𑀺𑀢𑀸𑀭𑀫𑁆𑀫𑀡𑀯𑀲𑁂𑀦. 𑀘𑀺𑀢𑁆𑀭𑀕𑁂𑀡𑁆𑀟𑀼𑀓𑁄 𑀯𑀺𑀘𑀺𑀢𑁆𑀭𑀸𑀓𑀸𑀭𑁂𑀦 𑀓𑀢𑀕𑁂𑀡𑁆𑀟𑀼𑀓𑁄. 𑀉𑀧𑀦𑀺𑀲𑁆𑀲𑀬𑁂𑀢𑀺 𑀲𑀫𑀻𑀧𑁂, 𑀢𑀲𑁆𑀲 𑀯𑀸 𑀯𑀺𑀳𑀸𑀭𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂, 𑀕𑁄𑀘𑀭𑀝𑁆𑀞𑀸𑀦𑀪𑀽𑀢𑁂𑀢𑀺 𑀅𑀢𑁆𑀣𑁄.

𑀖𑀭𑀸𑀚𑀺𑀭𑁂𑀢𑀺 𑀕𑁂𑀳𑀗𑁆𑀕𑀡𑁂. 𑀧𑀩𑁆𑀩𑀢𑀲𑀺𑀔𑀭𑁂 𑀓𑀢𑀘𑁂𑀢𑀺𑀬𑀁 ‘‘𑀆𑀓𑀸𑀲𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯𑀸𑀢𑀺 𑀘𑁂𑀢𑀺𑀬𑀯𑀦𑁆𑀤𑀦𑀁, 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀉𑀤𑁆𑀤𑀺𑀲𑁆𑀲 ‘‘𑀥𑀜𑁆𑀜𑀸 𑀯𑀢𑀺𑀫𑁂’’𑀢𑀺𑀆𑀤𑀺𑀦𑀸 𑀕𑀳𑀺𑀢𑀓𑀼𑀲𑀮𑀦𑀺𑀫𑀺𑀢𑁆𑀢𑁂𑀦𑁂𑀯 𑀓𑀸𑀭𑀡𑀪𑀽𑀢𑁂𑀦. 𑀕𑀳𑀺𑀢𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀕𑀳𑀺𑀢𑀦𑀺𑀫𑀺𑀢𑁆𑀢𑀁, 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀁, 𑀢𑁂𑀦 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀳. 𑀧𑀓𑁆𑀔𑀦𑁆𑀤𑀦𑁆𑀢𑀺 𑀅𑀦𑀼𑀧𑀯𑀺𑀝𑁆𑀞𑀁. 𑀅𑀦𑀼𑀧𑀭𑀺𑀧𑁆𑀨𑀼𑀝𑀦𑁆𑀢𑀺 𑀅𑀦𑀼 𑀅𑀦𑀼 𑀲𑀫𑀦𑁆𑀢𑀢𑁄 𑀨𑀼𑀝𑀁, 𑀲𑀩𑁆𑀩𑀲𑁄 𑀅𑀦𑀼𑀯𑀺𑀲𑀝𑀦𑁆𑀢𑀺 𑀅𑀢𑁆𑀣𑁄.

𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻. 𑀧𑀭𑀺𑀧𑀸𑀘𑀦𑀯𑀲𑁂𑀦 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻. 𑀅𑀧𑁆𑀧𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯 𑀧𑀻𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀧𑀽𑀭𑀺𑀓𑀸. 𑀔𑀡𑀺𑀓𑀲𑀫𑀸𑀥𑀺𑀧𑀽𑀭𑀺𑀓𑀸 𑀘 𑀉𑀧𑀘𑀸𑀭𑀲𑀫𑀸𑀥𑀺𑀧𑀽𑀭𑀺𑀓𑀸 𑀘 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀯𑀺𑀤𑀽𑀭𑀢𑀭𑀸𑀢𑀺 𑀢𑀤𑀼𑀪𑀬𑀁 𑀅𑀦𑀸𑀫𑀲𑀦𑁆𑀢𑁄 ‘‘𑀢𑀸𑀲𑀼 𑀬𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳 ¶ . 𑀲𑀫𑀸𑀥𑀺𑀲𑀫𑁆𑀧𑀬𑁄𑀕𑀁 𑀕𑀢𑀸𑀢𑀺 𑀧𑀼𑀩𑁆𑀩𑁂 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀲𑀫𑁆𑀧𑀬𑁄𑀕𑀁 𑀕𑀢𑀸.

𑁭𑁩. 𑀲𑀼𑀔𑀬𑀢𑀻𑀢𑀺 ¶ 𑀲𑀼𑀔𑀁, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀮𑀤𑁆𑀥𑀲𑁆𑀲𑀸𑀤𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀁 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀧𑀭𑀺𑀬𑀸𑀬𑀮𑀤𑁆𑀥𑁄 𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼 𑀦𑀺𑀯𑀢𑁆𑀢𑀦𑀢𑁆𑀣𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀪𑀸𑀯𑀲𑀸𑀥𑀦𑀫𑁂𑀯 𑀮𑀩𑁆𑀪𑀢𑀻𑀢𑀺 ‘‘𑀲𑀼𑀔𑀦𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀝𑁆𑀞𑀲𑀪𑀸𑀯𑀢𑁆𑀢𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀯𑀸 𑀅𑀢𑁆𑀢𑀦𑀺 𑀲𑀸𑀤𑀬𑀢𑀻𑀢𑀺 𑀲𑀸𑀢𑀁 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀲𑀸𑀢𑀁 ‘‘𑀫𑀥𑀼𑀭’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀸𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀸𑀢𑀮𑀓𑁆𑀔𑀡𑀁. 𑀉𑀧𑀩𑁆𑀭𑀽𑀳𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀁𑀯𑀟𑁆𑀠𑀦𑀁. 𑀤𑀼𑀓𑁆𑀔𑀁 𑀯𑀺𑀬 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀺𑀬 𑀅𑀦𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀅𑀦𑀼 𑀅𑀦𑀼 𑀕𑀡𑁆𑀳𑀦𑀁, 𑀉𑀧𑀓𑀸𑀭𑀺𑀢𑀸 𑀯𑀸 𑀅𑀦𑀼𑀕𑁆𑀕𑀳𑁄. 𑀓𑀢𑁆𑀣𑀘𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑁂. 𑀧𑀝𑀺𑀮𑀸𑀪𑀢𑀼𑀝𑁆𑀞𑀻𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀢𑀼𑀝𑁆𑀞𑀺. 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀦𑁆𑀢𑀺 𑀧𑀝𑀺𑀮𑀤𑁆𑀥𑀲𑁆𑀲 𑀆𑀭𑀫𑁆𑀫𑀡𑀭𑀲𑀲𑁆𑀲 𑀅𑀦𑀼𑀪𑀯𑀦𑀦𑁆𑀢𑀺 𑀲𑀪𑀸𑀯𑀢𑁄 𑀧𑀻𑀢𑀺𑀲𑀼𑀔𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑀢𑁆𑀣 𑀧𑀻𑀢𑀺, 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀯𑀺𑀢𑀓𑁆𑀓𑀲𑁆𑀲 𑀯𑀺𑀬 𑀇𑀢𑀭𑁂𑀦 𑀧𑀻𑀢𑀺𑀬𑀸 𑀲𑀼𑀔𑁂𑀦 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀫𑀸𑀳. ‘‘𑀬𑀢𑁆𑀣 𑀲𑀼𑀔𑀁, 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀻’’𑀢𑀺 𑀯𑀺𑀘𑀸𑀭𑀲𑁆𑀲 𑀯𑀺𑀬 𑀯𑀺𑀢𑀓𑁆𑀓𑁂𑀦 𑀲𑀼𑀔𑀲𑁆𑀲 𑀧𑀻𑀢𑀺𑀬𑀸 𑀅𑀦𑀘𑁆𑀘𑀦𑁆𑀢𑀲𑀁𑀬𑁄𑀕𑀁. 𑀢𑁂𑀦 𑀅𑀘𑁆𑀘𑀦𑁆𑀢𑀸𑀦𑀘𑁆𑀘𑀦𑁆𑀢𑀲𑀁𑀬𑁄𑀕𑀺𑀢𑀸𑀬 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑀁, 𑀦𑀺𑀭𑀼𑀤𑀓𑀫𑀭𑀼𑀝𑁆𑀞𑀸𑀦𑀁. 𑀯𑀦𑀫𑁂𑀯 𑀯𑀦𑀦𑁆𑀢𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀧𑀝𑀺𑀮𑀸𑀪𑀲𑀫𑀬𑁂, 𑀧𑀝𑀺𑀮𑀤𑁆𑀥𑀲𑁆𑀲 𑀭𑀲𑀸𑀦𑀼𑀪𑀯𑀦𑀲𑀫𑀬𑁂, 𑀯𑀦𑀘𑁆𑀙𑀸𑀬𑀸𑀤𑀻𑀦𑀁 𑀲𑀯𑀦𑀤𑀲𑁆𑀲𑀦𑀲𑀫𑀬𑁂, 𑀧𑀯𑁂𑀲𑀧𑀭𑀺𑀪𑁄𑀕𑀲𑀫𑀬𑁂 𑀘. 𑀧𑀸𑀓𑀝𑀪𑀸𑀯𑀢𑁄𑀢𑀺 𑀬𑀣𑀸𑀓𑁆𑀓𑀫𑀁 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀪𑀽𑀢𑀪𑀸𑀯𑀢𑁄.

𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀯𑁂𑀓𑀚𑀦𑁆𑀢𑀺 𑀛𑀸𑀦𑀁 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀲𑀤𑁆𑀤𑀢𑁄 𑀘 𑀅𑀢𑁆𑀣𑀺𑀅𑀢𑁆𑀣𑀯𑀺𑀲𑁂𑀲𑀢𑁄 ‘‘𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂’’𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑁂 𑀧𑀻𑀢𑀺𑀲𑀼𑀔𑀫𑁂𑀯 𑀯𑀺𑀯𑁂𑀓𑀚𑀁. ‘‘𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀘 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄, 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑀲𑁆𑀲 𑀘 𑀅𑀮𑁄𑀧𑁄 𑀓𑀢𑁄. 𑀮𑁄𑀧𑁂 𑀯𑀸 𑀲𑀢𑀺 ‘‘𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀧𑀸𑀞𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀏𑀢𑁆𑀣 𑀉𑀧-𑀲𑀁-𑀲𑀤𑁆𑀤𑀸 ‘‘𑀉𑀧𑀮𑀩𑁆𑀪𑀢𑀺, 𑀲𑀁𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀭𑀢𑁆𑀣𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀢𑁆𑀯𑀸, 𑀲𑀸𑀥𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀇𑀭𑀺𑀬𑀦𑁆𑀢𑀺 𑀓𑀺𑀭𑀺𑀬𑀁. 𑀯𑀼𑀢𑁆𑀢𑀺𑀆𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀧𑀸𑀮𑀦𑀸𑀢𑀺 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑁂𑀳𑀺 𑀭𑀓𑁆𑀔𑀡𑀸.

𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀸𑀤𑀺𑀯𑀡𑁆𑀡𑀦𑀸

𑁭𑁪. 𑀧𑀜𑁆𑀘 ¶ ¶ 𑀅𑀗𑁆𑀕𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁. ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺 𑀏𑀢𑁆𑀣 𑀆𑀳𑀺𑀢-𑀲𑀤𑁆𑀤𑀲𑁆𑀲 𑀯𑀺𑀬 𑀯𑀺𑀧𑁆𑀧𑀳𑀻𑀦-𑀲𑀤𑁆𑀤𑀲𑁆𑀲𑁂𑀢𑁆𑀣 𑀧𑀭𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀳𑀻𑀦𑀦𑁆𑀢𑀺 𑀯𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁. 𑀦𑀦𑀼 𑀅𑀜𑁆𑀜𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀇𑀫𑀺𑀦𑀸 𑀛𑀸𑀦𑁂𑀦 𑀧𑀳𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀛𑀸𑀦𑀮𑀸𑀪𑀺𑀦𑁄𑀧𑀺 𑀅𑀛𑀸𑀦𑀲𑀫𑀗𑁆𑀕𑀺𑀓𑀸𑀮𑁂 𑀛𑀸𑀦𑀧𑀝𑀺𑀧𑀓𑁆𑀔𑀮𑁄𑀪𑀘𑀺𑀢𑁆𑀢𑀸𑀤𑀻𑀦𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀛𑀸𑀦𑀓𑁆𑀔𑀡𑁂’’𑀢𑀺 𑀯𑀼𑀢𑁆𑀢𑀁. 𑀧𑀳𑀻𑀬𑀦𑁆𑀢𑀻𑀢𑀺 𑀯𑀺𑀕𑀘𑁆𑀙𑀦𑁆𑀢𑀺, 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀢𑁆𑀢𑀸𑀭𑀫𑁆𑀫𑀡𑁂𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦 𑀏𑀓𑀲𑀪𑀸𑀯𑁂, 𑀏𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑁂 𑀏𑀓𑀢𑁆𑀢𑀸𑀯𑀳𑁂 𑀯𑀸 𑀆𑀭𑀫𑁆𑀫𑀡𑁂. 𑀢𑀦𑁆𑀢𑀺 𑀢𑀁 𑀦𑀸𑀦𑀸𑀯𑀺𑀲𑀬𑀧𑀮𑁄𑀪𑀺𑀢𑀁 𑀘𑀺𑀢𑁆𑀢𑀁. 𑀓𑀸𑀫𑀥𑀸𑀢𑀼𑀧𑁆𑀧𑀳𑀸𑀦𑀸𑀬𑀸𑀢𑀺 𑀦𑀸𑀦𑀸𑀯𑀺𑀲𑀬𑀲𑀫𑀽𑀧𑀩𑁆𑀬𑀽𑀴𑁆𑀳𑀸𑀬 𑀓𑀸𑀫𑀥𑀸𑀢𑀼𑀬𑀸 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀧𑀝𑀺𑀧𑀤𑀁 𑀛𑀸𑀦𑀁 𑀦𑀧𑁆𑀧𑀝𑀺𑀧𑀚𑁆𑀚𑀢𑀺. 𑀦𑀺𑀭𑀦𑁆𑀢𑀭𑀦𑁆𑀢𑀺 𑀯𑀺𑀓𑁆𑀔𑁂𑀧𑁂𑀦 𑀅𑀦𑀦𑁆𑀢𑀭𑀺𑀢𑀁, 𑀲𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀫𑁆𑀫𑀜𑁆𑀜𑀦𑁆𑀢𑀺 𑀅𑀓𑀫𑁆𑀫𑀦𑀻𑀬𑀁, 𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀅𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀪𑀺𑀪𑀽𑀢𑀁. 𑀧𑀭𑀺𑀩𑁆𑀪𑀫𑀢𑀺 𑀅𑀦𑀯𑀝𑁆𑀞𑀸𑀦𑀢𑁄, 𑀅𑀯𑀝𑁆𑀞𑀸𑀦𑀲𑁆𑀲 𑀲𑀫𑀸𑀥𑀸𑀦𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑀳𑀢𑀦𑁆𑀢𑀺 𑀲𑀸𑀢𑀺𑀲𑀬𑀲𑁆𑀲 𑀯𑀺𑀘𑀸𑀭𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀼 𑀔𑁄 𑀪𑀕𑀯𑀸, 𑀦 𑀦𑀼 𑀔𑁄’’𑀢𑀺, ‘‘𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀫𑀦𑀲𑀺𑀓𑀸𑀭𑁂𑀦, ‘‘𑀛𑀸𑀦𑀁 𑀲𑀺𑀬𑀸 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀘 𑀧𑀯𑀢𑁆𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑀳𑀢𑀁. 𑀦𑀸𑀭𑁄𑀳𑀢𑀺 𑀅𑀧𑁆𑀧𑀝𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑀸. 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀢𑁆𑀢𑀸𑀢𑀺 𑀲𑀫𑀸𑀥𑀺𑀆𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑁂𑀦 𑀛𑀸𑀦𑀸𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁄.

𑀢𑁂𑀳𑀻𑀢𑀺 𑀛𑀸𑀦𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺. 𑀅𑀯𑀺𑀓𑁆𑀔𑁂𑀧𑀸𑀬 𑀲𑀫𑁆𑀧𑀸𑀤𑀺𑀢𑀧𑁆𑀧𑀬𑁄𑀕𑀲𑁆𑀲𑀸𑀢𑀺 𑀢𑀢𑁄 𑀏𑀯𑀁 𑀲𑀫𑀸𑀥𑀸𑀦𑀸𑀬 𑀦𑀺𑀧𑁆𑀨𑀸𑀤𑀺𑀢𑀪𑀸𑀯𑀦𑀸𑀧𑀬𑁄𑀕𑀲𑁆𑀲. 𑀘𑁂𑀢𑀲𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀪𑀸𑀯𑀦𑀸𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸. 𑀧𑀻𑀢𑀺 𑀧𑀻𑀡𑀦𑀁 𑀪𑀸𑀯𑀦𑀸𑀯𑀲𑁂𑀦 𑀢𑀧𑁆𑀧𑀦𑀁. 𑀉𑀧𑀩𑁆𑀭𑀽𑀳𑀦𑀁 𑀪𑀸𑀯𑀦𑀸𑀯𑀲𑁂𑀦 𑀧𑀭𑀺𑀯𑀼𑀤𑁆𑀥𑀺𑀁 𑀘𑁂𑀢𑀲𑁄 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀲𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀦𑁆𑀢𑀺 𑀅𑀯𑀲𑀺𑀝𑁆𑀞𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀳𑀺𑀢𑀁, 𑀲𑀫𑀁 𑀲𑀫𑁆𑀫𑀸 𑀘 𑀆𑀥𑀺𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀯𑀲𑁂𑀦 𑀲𑀫𑀁, 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁. 𑀤𑀽𑀭𑀻𑀪𑀸𑀯𑁂 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑁂𑀦 𑀲𑀫𑁆𑀫𑀸 𑀘 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀕𑁆𑀕𑀢𑀸 𑀳𑀺 𑀲𑀫𑀸𑀥𑀸𑀦𑀓𑀺𑀘𑁆𑀘𑁂𑀦 𑀘𑀺𑀢𑁆𑀢𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑁂𑀦𑁆𑀢𑀻 𑀛𑀸𑀦𑀓𑁆𑀔𑀡𑁂 𑀲𑀸𑀢𑀺𑀲𑀬𑀁 𑀲𑀫𑀸𑀳𑀺𑀢𑁂 𑀓𑀭𑁄𑀢𑀻𑀢𑀺. 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 ¶ . 𑀏𑀢𑁂𑀲𑀼 ¶ 𑀯𑀺𑀢𑀓𑁆𑀓𑀸𑀤𑀻𑀲𑀼 𑀛𑀸𑀦𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺 𑀢𑀢𑁆𑀣𑁂𑀯 𑀛𑀸𑀦𑀯𑁄𑀳𑀸𑀭𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀦𑀸𑀧𑀺 𑀉𑀧𑀫𑀸𑀯𑀲𑁂𑀦 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺.

𑀧𑀓𑀢𑀺𑀘𑀺𑀢𑁆𑀢𑀢𑁄𑀢𑀺 𑀧𑀸𑀓𑀢𑀺𑀓𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀢𑁄. 𑀲𑀼𑀯𑀺𑀲𑀤𑁂𑀦𑀸𑀢𑀺 𑀲𑀼𑀝𑁆𑀞𑀼 𑀯𑀺𑀲𑀤𑁂𑀦, 𑀧𑀝𑀼𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀸𑀯𑀬𑀯𑀯𑀦𑁆𑀢𑀁, 𑀅𑀦𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀨𑀼𑀝𑀦𑁆𑀢𑀺 𑀅𑀲𑀫𑁆𑀨𑀼𑀝𑁆𑀞𑀁. 𑀆𑀭𑀫𑁆𑀫𑀡𑁂𑀲𑀼 𑀨𑀼𑀲𑀺𑀢𑀸𑀢𑀺 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀦𑁆𑀢𑀢𑁄 𑀆𑀭𑀫𑁆𑀫𑀡𑀁 𑀨𑀭𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀛𑀸𑀦𑀧𑀸𑀞𑁂 𑀅𑀕𑁆𑀕𑀳𑀺𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀕𑀳𑀺𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀛𑀸𑀦𑀗𑁆𑀕𑁂𑀲𑀼. 𑀦 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀲𑀭𑀽𑀧𑀢𑁄 𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀸𑀫𑀜𑁆𑀜𑀢𑁄 𑀧𑀦 𑀛𑀸𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸𑀢𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀅𑀗𑁆𑀕𑀫𑁂𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀬𑁂𑀦 𑀯𑀺𑀢𑀓𑁆𑀓𑀸𑀤𑀻𑀳𑀺 𑀲𑀳 𑀯𑀢𑁆𑀢𑀦𑁆𑀢𑀁 𑀥𑀫𑁆𑀫𑀁 𑀤𑀻𑀧𑁂𑀢𑀼𑀁 𑀢𑀲𑁆𑀲 𑀧𑀓𑀸𑀲𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑁄 𑀓𑀢𑁄. 𑀲𑁄 𑀏𑀯 𑀅𑀥𑀺𑀧𑁆𑀧𑀸𑀬𑁄 𑀢𑁂𑀦 𑀪𑀕𑀯𑀢𑀸 𑀯𑀺𑀪𑀗𑁆𑀕𑁂 ‘‘𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀧𑀓𑀸𑀲𑀺𑀢𑁄. 𑀢𑀲𑁆𑀫𑀸 𑀲𑀸 𑀛𑀸𑀦𑀧𑀸𑀞𑁂 𑀅𑀕𑁆𑀕𑀳𑀺𑀢𑀸𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁.

𑀢𑀺𑀯𑀺𑀥𑀓𑀮𑁆𑀬𑀸𑀡𑀯𑀡𑁆𑀡𑀦𑀸

𑁭𑁫. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦𑀸𑀢𑀺 𑀛𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦. 𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀢𑁂𑀲𑀁𑀬𑁂𑀯 𑀅𑀧𑁆𑀧𑀦𑀸𑀬𑀁 𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑀯𑀲𑁂𑀦.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀓𑀮𑁆𑀬𑀸𑀡𑀢𑀸𑀮𑀓𑁆𑀔𑀡𑀸𑀦𑀁 𑀯𑀺𑀪𑀸𑀯𑀦𑁂. 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀧𑀝𑀺𑀧𑀚𑁆𑀚𑀢𑀺 𑀛𑀸𑀦𑀁 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑁄 𑀧𑀼𑀩𑁆𑀩𑀪𑀸𑀕𑀺𑀬𑁄 𑀪𑀸𑀯𑀦𑀸𑀦𑀬𑁄. 𑀧𑀭𑀺𑀧𑀦𑁆𑀣𑀢𑁄 𑀯𑀺𑀲𑀼𑀚𑁆𑀛𑀦𑀁 𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀬 𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺. 𑀲𑀸 𑀧𑀦𑀸𑀬𑀁 𑀬𑀲𑁆𑀫𑀸 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻’’𑀢𑀺. 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀢𑀺 𑀯𑀺𑀲𑁄𑀥𑁂𑀢𑀩𑁆𑀩𑀢𑀸𑀤𑀻𑀦𑀁 𑀅𑀪𑀸𑀯𑀢𑁄 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀸. 𑀲𑀸 𑀧𑀦𑀸𑀬𑀁 𑀯𑀺𑀲𑁂𑀲𑀢𑁄 𑀛𑀸𑀦𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀮𑀩𑁆𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂’’𑀢𑀺. 𑀲𑀫𑁆𑀧𑀳𑀁𑀲𑀦𑀸𑀢𑀺 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀲𑀸𑀥𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀭𑀺𑀬𑁄𑀤𑀧𑀦𑀸. 𑀲𑀸 𑀧𑀦 𑀬𑀲𑁆𑀫𑀸 𑀛𑀸𑀦𑀲𑁆𑀲 𑀑𑀲𑀸𑀦𑀓𑁆𑀔𑀡𑁂 𑀧𑀸𑀓𑀝𑀸 𑀳𑁄𑀢𑀺 ¶ , 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀻𑀢𑀺 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀚𑁆𑀛𑀦𑀸𑀓𑀸𑀭𑁄 ¶ , 𑀫𑀚𑁆𑀛𑀺𑀫𑀲𑁆𑀲 𑀲𑀫𑀣𑀦𑀺𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀚𑁆𑀚𑀦𑀸𑀓𑀸𑀭𑁄, 𑀢𑀢𑁆𑀣 𑀧𑀓𑁆𑀔𑀦𑁆𑀤𑀦𑀸𑀓𑀸𑀭𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀛𑀸𑀦𑀲𑁆𑀲 𑀆𑀤𑀺𑀢𑁄 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀧𑁆𑀧𑀦𑀸𑀧𑀢𑁆𑀢𑀺𑀮𑀓𑁆𑀔𑀡𑀸𑀦𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀯𑀺𑀦𑀸 𑀅𑀧𑁆𑀧𑀦𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀅𑀲𑀢𑀺 𑀘 𑀅𑀧𑁆𑀧𑀦𑀸𑀬 𑀢𑀤𑀪𑀸𑀯𑀢𑁄. 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀲𑀫𑁆𑀧𑀦𑁆𑀦𑀮𑀓𑁆𑀔𑀡𑀢𑁆𑀢𑀸 𑀘 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘. 𑀇𑀫𑀺𑀦𑀸 𑀦𑀬𑁂𑀦 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀮𑀓𑁆𑀔𑀡𑀸𑀦𑀜𑁆𑀘 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀫𑁆𑀪𑀭𑀻𑀬𑀢𑀺 𑀛𑀸𑀦𑀁 𑀏𑀢𑁂𑀦𑀸𑀢𑀺 𑀲𑀫𑁆𑀪𑀸𑀭𑁄, 𑀦𑀸𑀦𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀁. 𑀲𑀳 𑀲𑀫𑁆𑀪𑀸𑀭𑁂𑀦𑀸𑀢𑀺 𑀲𑀲𑀫𑁆𑀪𑀸𑀭𑁄, 𑀲𑁄 𑀏𑀯 𑀲𑀲𑀫𑁆𑀪𑀸𑀭𑀺𑀓𑁄. 𑀉𑀧𑀘𑀸𑀭𑁄𑀢𑀺 𑀏𑀓𑀸𑀯𑀚𑁆𑀚𑀦𑀽𑀧𑀘𑀸𑀭𑀫𑀸𑀳. 𑀧𑀕𑁆𑀕𑀳𑀸𑀤𑀺𑀓𑀺𑀘𑁆𑀘𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀪𑀸𑀯𑀦𑀸𑀬 𑀏𑀯 𑀲𑀸𑀥𑀺𑀢𑀢𑁆𑀢𑀸 𑀬𑀸 𑀢𑀢𑁆𑀣 𑀏𑀓𑀸𑀯𑀚𑁆𑀚𑀦𑀽𑀧𑀘𑀸𑀭𑁂 𑀲𑀺𑀤𑁆𑀥𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸, 𑀲𑀸 𑀛𑀸𑀦𑀓𑁆𑀔𑀡𑁂 𑀧𑀭𑀺𑀩𑁆𑀭𑀽𑀳𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫 𑀅𑀧𑁆𑀧𑀦𑀸’’𑀢𑀺. 𑀬𑀣𑀸𑀥𑀺𑀕𑀢𑀁 𑀛𑀸𑀦𑀁 𑀦𑀺𑀲𑁆𑀲𑀸𑀬 𑀬𑁄 𑀧𑀳𑀝𑁆𑀞𑀸𑀓𑀸𑀭𑁄 𑀘𑀺𑀢𑁆𑀢𑀲𑁆𑀲 𑀧𑀭𑀺𑀢𑁄𑀲𑁄, 𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀧𑀯𑀢𑁆𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑁆𑀧𑀳𑀁𑀲𑀦𑀸 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺. 𑀏𑀓𑁂𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀢𑁂 𑀳𑀺 𑀏𑀯𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑁂 𑀯𑀡𑁆𑀡𑀬𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀢𑀺 𑀅𑀚𑁆𑀛𑀸𑀦𑀥𑀫𑁆𑀫𑁂𑀳𑀺 𑀛𑀸𑀦𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀦𑀸𑀫 𑀓𑀢𑀁 𑀳𑁄𑀢𑀺. 𑀦 𑀳𑀺 𑀪𑀽𑀫𑀦𑁆𑀢𑀭𑀁 𑀪𑀽𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀳𑁄𑀢𑀺. 𑀧𑀸𑀴𑀺𑀬𑀸 𑀘𑁂𑀢𑀁 𑀯𑀺𑀭𑀼𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀪𑀸𑀯𑁂𑀦, 𑀏𑀓𑀕𑁆𑀕𑀢𑀸𑀬 𑀘 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀢𑀤𑀦𑀼𑀕𑀼𑀡𑀁 𑀏𑀓𑀢𑁆𑀢𑀁 𑀕𑀢𑀦𑁆𑀢𑀺 𑀏𑀓𑀢𑁆𑀢𑀕𑀢𑀁, 𑀲𑀲𑀫𑁆𑀧𑀬𑀼𑀢𑁆𑀢𑀁 𑀅𑀧𑁆𑀧𑀦𑀸𑀧𑀢𑁆𑀢𑀘𑀺𑀢𑁆𑀢𑀁. 𑀢𑀲𑁆𑀲𑁂𑀯 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀢𑀸𑀤𑀺 𑀅𑀦𑀦𑁆𑀢𑀭𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁𑀬𑁂𑀯 𑀅𑀧𑁆𑀧𑀦𑀸𑀘𑀺𑀢𑁆𑀢𑀓𑁆𑀔𑀡𑁂 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀆𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀕𑀫𑀦𑀯𑀲𑁂𑀦𑀸𑀢𑀺 𑀧𑀭𑀺𑀓𑀫𑁆𑀫𑀸𑀕𑀫𑀦𑀯𑀲𑁂𑀦. 𑀅𑀦𑀢𑀺𑀯𑀢𑁆𑀢𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀦𑁆𑀤𑁆𑀭𑀺𑀬𑁂𑀓𑀭𑀲𑀢𑀸𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀸𑀲𑁂𑀯𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀬𑁄𑀤𑀸𑀧𑀓𑀲𑁆𑀲𑀸𑀢𑀺 𑀧𑀭𑀺𑀲𑁄𑀥𑀓𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀲𑁆𑀲. 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑀫𑁂𑀯 𑀘𑁂𑀢𑁆𑀣 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀯𑀸𑀭𑁂, 𑀘𑀢𑀼𑀧𑀜𑁆𑀘𑀘𑀺𑀢𑁆𑀢𑀧𑀭𑀺𑀫𑀸𑀡𑀸𑀬 𑀅𑀧𑁆𑀧𑀦𑀸𑀯𑀻𑀣𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀺𑀧𑀦𑁆𑀣𑀢𑁄. 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀻𑀢𑀺 𑀬𑀤𑀺𑀧𑀺 𑀆𑀕𑀫𑀦𑀁 𑀕𑀳𑁂𑀢𑀼𑀁 𑀅𑀯𑀺𑀲𑁂𑀲𑁂𑀦 𑀯𑀺𑀬 𑀯𑀼𑀢𑁆𑀢𑀁, 𑀧𑀭𑀺𑀓𑀫𑁆𑀫𑀯𑀺𑀲𑀼𑀤𑁆𑀥𑀺𑀢𑁄 𑀧𑀦 𑀅𑀧𑁆𑀧𑀦𑀸𑀯𑀺𑀲𑀼𑀤𑁆𑀥𑀺 𑀲𑀸𑀢𑀺𑀲𑀬𑀸𑀯. 𑀢𑁂𑀦𑀸𑀳 ‘‘𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺𑀆𑀤𑀺. 𑀆𑀯𑀭𑀡𑀯𑀺𑀭𑀳𑀺𑀢𑀁 𑀳𑀼𑀢𑁆𑀯𑀸𑀢𑀺 𑀬𑁂𑀦𑀸𑀯𑀭𑀡𑁂𑀦 ¶ 𑀆𑀯𑀝𑀢𑁆𑀢𑀸 𑀘𑀺𑀢𑁆𑀢𑀁 𑀢𑀢𑁄 𑀧𑀼𑀩𑁆𑀩𑁂 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀯𑀺𑀯𑀺𑀢𑁆𑀢𑀁 𑀳𑀼𑀢𑁆𑀯𑀸, 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀻𑀦𑀼𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑀸𑀦𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀸𑀦𑀁 𑀅𑀦𑀼𑀧𑀕𑀫𑀦𑁂𑀦 𑀫𑀚𑁆𑀛𑀺𑀫𑁄, 𑀲𑀯𑀺𑀲𑁂𑀲𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀯𑀽𑀧𑀲𑀫𑀦𑀢𑁄 ¶ 𑀲𑀫𑀣𑁄, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀫𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯𑀸’’𑀢𑀺. 𑀢𑀤𑀦𑀦𑁆𑀢𑀭𑀁 𑀧𑀦 𑀧𑀼𑀭𑀺𑀫𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀧𑀼𑀭𑀺𑀫𑀁 𑀘𑀺𑀢𑁆𑀢𑀁, 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀲𑀦𑁆𑀢𑀢𑀺𑀧𑀭𑀺𑀡𑀸𑀫𑀦𑀬𑁂𑀦𑀸𑀢𑀺 𑀬𑀣𑀸 ‘‘𑀢𑀤𑁂𑀯 𑀔𑀻𑀭𑀁 𑀤𑀥𑀺𑀲𑀫𑁆𑀧𑀦𑁆𑀦’’𑀦𑁆𑀢𑀺, 𑀏𑀯𑀁 𑀲𑀢𑀺𑀧𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀪𑀸𑀯𑀪𑁂𑀤𑁂, 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀪𑁂𑀤𑁂 𑀘 𑀏𑀓𑀺𑀲𑁆𑀲𑀸 𑀏𑀯 𑀲𑀦𑁆𑀢𑀢𑀺𑀬𑀸 𑀧𑀭𑀺𑀡𑀸𑀫𑀽𑀧𑀕𑀫𑀦𑀦𑀬𑁂𑀦 𑀏𑀓𑀢𑁆𑀢𑀦𑀬𑀯𑀲𑁂𑀦. 𑀢𑀣𑀢𑁆𑀢𑀦𑁆𑀢𑀺 𑀢𑀣𑀪𑀸𑀯𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑀪𑀸𑀯𑀁. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀝𑀺𑀧𑀚𑁆𑀚𑀫𑀸𑀦𑀢𑁆𑀢𑀸. 𑀬𑀲𑁆𑀫𑀺𑀜𑁆𑀳𑀺 𑀔𑀡𑁂 𑀢𑀣𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀣𑀢𑁆𑀢𑀼𑀧𑀕𑀫𑀦𑁂𑀦 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀪𑀸𑀯𑀽𑀧𑀕𑀫𑀦𑁂𑀦 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫. 𑀧𑀼𑀭𑀺𑀫𑀘𑀺𑀢𑁆𑀢𑁂𑀢𑀺 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑁂. 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑀦𑀺𑀧𑁆𑀨𑀸𑀤𑀺𑀓𑀸𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀧𑀭𑀺𑀧𑀦𑁆𑀣𑀯𑀺𑀲𑀼𑀤𑁆𑀥𑀺𑀫𑀚𑁆𑀛𑀺𑀫𑀲𑀫𑀣𑀧𑀝𑀺𑀧𑀢𑁆𑀢𑀺𑀧𑀓𑁆𑀔𑀦𑁆𑀤𑀦𑀸𑀓𑀸𑀭𑀸𑀦𑀁 𑀦𑀺𑀧𑁆𑀨𑀸𑀤𑀺𑀓𑀸, 𑀢𑁂𑀦𑀸𑀓𑀸𑀭𑁂𑀦 𑀦𑀺𑀧𑁆𑀨𑀚𑁆𑀚𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀬𑁂𑀯 𑀳𑀺 𑀆𑀓𑀸𑀭𑀸 𑀧𑀘𑁆𑀘𑀬𑀯𑀺𑀲𑁂𑀲𑀢𑁄 𑀛𑀸𑀦𑀓𑁆𑀔𑀡𑁂 𑀦𑀺𑀧𑁆𑀨𑀚𑁆𑀚𑀫𑀸𑀦𑀸 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻’’𑀢𑀺 𑀮𑀤𑁆𑀥𑀲𑀫𑀜𑁆𑀜𑀸 𑀛𑀸𑀦𑀲𑁆𑀲 𑀢𑀁 𑀯𑀺𑀲𑁂𑀲𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀸 𑀯𑀺𑀬 𑀯𑀼𑀢𑁆𑀢𑀸. 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀢𑁆𑀢𑀮𑀸𑀪𑀯𑁂𑀮𑀸𑀬𑀫𑁂𑀯. 𑀬𑀤𑀺 𑀏𑀯𑀁, 𑀓𑀣𑀁 𑀢𑁂 𑀆𑀓𑀸𑀭𑀸 𑀦𑀺𑀧𑁆𑀨𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀆𑀕𑀫𑀦𑀯𑀲𑁂𑀦𑀸’’𑀢𑀺.

𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲. ‘‘𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺 𑀧𑀸𑀴𑀺𑀬𑀁 (𑀧𑀝𑀺. 𑀫. 𑁧.𑁧𑁫𑁮) 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀆𑀕𑀢𑀸𑀢𑀺 ‘‘𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄’’𑀢𑀺 𑀆𑀳. 𑀲𑀫𑀣𑀧𑀝𑀺𑀧𑀢𑁆𑀢𑀺𑀢𑀣𑀢𑁆𑀢𑀼𑀧𑀕𑀫𑀦𑀜𑁆𑀘 𑀇𑀥 𑀲𑀫𑀣𑀪𑀸𑀯𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀲𑀫𑀣𑀪𑀸𑀯𑀽𑀧𑀕𑀫𑀦𑁂𑀦𑀸’’𑀢𑀺. 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 ‘‘𑀓𑀣𑀁 𑀦𑀼 𑀔𑁄 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀚𑀳𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀇𑀤𑀸𑀦𑀺 𑀲𑀫𑀣𑀧𑀝𑀺𑀧𑀢𑁆𑀢𑀺𑀬𑀸 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀪𑀸𑀯𑁂𑀦 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀛𑀸𑀦𑀘𑀺𑀢𑁆𑀢𑀲𑁆𑀲. 𑀧𑀭𑀺𑀧𑀦𑁆𑀣𑀯𑀺𑀲𑀼𑀤𑁆𑀥𑀺𑀫𑀚𑁆𑀛𑀺𑀫𑀲𑀫𑀣𑀧𑀝𑀺𑀧𑀢𑁆𑀢𑀺𑀧𑀓𑁆𑀔𑀦𑁆𑀤𑀦𑁂𑀳𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀺𑀢𑁂 𑀛𑀸𑀦𑀘𑀺𑀢𑁆𑀢𑁂 𑀮𑀤𑁆𑀥𑁄𑀓𑀸𑀲𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀲𑀫𑀯𑀸𑀳𑀺𑀢𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀢𑁂 𑀅𑀦𑀼𑀩𑁆𑀭𑀽𑀳𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀬𑁂 ¶ 𑀧𑀦𑁂𑀢𑁂 𑀬𑀼𑀕𑀦𑀤𑁆𑀥𑀥𑀫𑁆𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀛𑀸𑀦𑀘𑀺𑀢𑁆𑀢𑁂. 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀯𑀲𑁂𑀦 𑀓𑀺𑀘𑁆𑀘𑀓𑀭𑀡𑀢𑁄 𑀬𑀼𑀕𑁂 𑀦𑀤𑁆𑀥𑀸 𑀩𑀤𑁆𑀥𑀸 𑀯𑀺𑀬 𑀬𑀼𑀕𑀦𑀤𑁆𑀥𑀸. 𑀯𑀺𑀫𑀼𑀢𑁆𑀢𑀺𑀭𑀲𑁂𑀦𑀸𑀢𑀺 𑀯𑀺𑀫𑀼𑀘𑁆𑀘𑀦𑀓𑀺𑀘𑁆𑀘𑁂𑀦, 𑀯𑀺𑀫𑀼𑀘𑁆𑀘𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀸. 𑀏𑀲 𑀬𑁄𑀕𑀻. 𑀯𑀸𑀳𑀬𑀢𑀻𑀢𑀺 𑀧𑀯𑀢𑁆𑀢𑁂𑀢𑀺. 𑀅𑀲𑁆𑀲𑀸𑀢𑀺 𑀛𑀸𑀦𑀘𑀺𑀢𑁆𑀢𑀲𑁆𑀲. 𑀢𑀲𑁆𑀫𑀺𑀁 𑀔𑀡𑁂𑀢𑀺 𑀪𑀗𑁆𑀕𑀓𑁆𑀔𑀡𑁂. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀢𑀻𑀢𑁂 𑀳𑀺 𑀞𑀺𑀢𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀆𑀲𑁂𑀯𑀦𑀸 ¶ 𑀧𑀯𑀢𑁆𑀢𑀢𑀺 𑀦𑀸𑀫. 𑀢𑁂 𑀆𑀓𑀸𑀭𑀸𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀸𑀤𑀬𑁄 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀸. 𑀆𑀲𑁂𑀯𑀦𑀸𑀧𑀺 𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀻𑀦𑀁 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑁄𑀬𑁂𑀯. 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀽𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀲𑀫𑀭𑀲𑀢𑀸𑀬 𑀅𑀓𑀭𑀡𑀁 𑀪𑀸𑀯𑀦𑀸𑀬 𑀲𑀁𑀓𑀺𑀮𑁂𑀲𑁄, 𑀓𑀭𑀡𑀁 𑀯𑁄𑀤𑀸𑀦𑀁. 𑀢𑀣𑀸 𑀲𑁂𑀲𑁂𑀲𑀼𑀧𑀺. 𑀏𑀯𑀫𑁂𑀢𑁂𑀲𑀼 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀢𑀁 𑀢𑀁 𑀆𑀤𑀻𑀦𑀯𑀁 𑀤𑁄𑀲𑀁 𑀆𑀦𑀺𑀲𑀁𑀲𑀁 𑀕𑀼𑀡𑀁 𑀧𑀼𑀭𑁂𑀢𑀭𑀁 𑀧𑀸𑀝𑀺𑀳𑀸𑀭𑀺𑀬𑀜𑀸𑀡𑁂𑀦 𑀤𑀺𑀲𑁆𑀯𑀸 𑀬𑀣𑀸 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀸𑀤𑀬𑁄 𑀳𑁄𑀦𑁆𑀢𑀺, 𑀢𑀣𑀸 𑀪𑀸𑀯𑀦𑀸𑀬 𑀲𑀫𑁆𑀧𑀳𑀁𑀲𑀺𑀢𑀢𑁆𑀢𑀸 𑀢𑁂𑀦𑁂𑀯 𑀜𑀸𑀡𑁂𑀦 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀯𑀺𑀲𑁄𑀥𑀦𑀁 𑀳𑁂𑀢𑁆𑀣 𑀲𑀫𑁆𑀧𑀳𑀁𑀲𑀦𑀁. 𑀢𑁂 𑀆𑀓𑀸𑀭𑀸 𑀬𑀲𑁆𑀫𑀸 𑀦𑀺𑀧𑁆𑀨𑀦𑁆𑀦𑀸, 𑀢𑀲𑁆𑀫𑀸 ‘‘𑀥𑀫𑁆𑀫𑀸𑀦𑀁…𑀧𑁂… 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀮𑀓𑁆𑀔𑀡𑀲𑀁𑀯𑀡𑁆𑀡𑀦𑀸𑀬 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

‘‘𑀬𑀲𑁆𑀫𑀸 𑀉𑀧𑁂𑀓𑁆𑀔𑀸𑀯𑀲𑁂𑀦 𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀻’’𑀢𑀺 𑀓𑁄 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀲𑀫𑁆𑀧𑀳𑀁𑀲𑀦𑀸𑀯 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀸, 𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀬𑀲𑁆𑀫𑀸 𑀉𑀧𑁂𑀓𑁆𑀔𑀸𑀯𑀲𑁂𑀦 𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑀸𑀯𑀦𑀸𑀘𑀺𑀢𑁆𑀢𑁂. 𑀉𑀧𑁂𑀓𑁆𑀔𑀸𑀯𑀲𑁂𑀦 𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀅𑀧𑁆𑀧𑀦𑀸𑀓𑀸𑀮𑁂 𑀪𑀸𑀯𑀦𑀸𑀬 𑀲𑀫𑀧𑁆𑀧𑀯𑀢𑁆𑀢𑀺𑀬𑀸, 𑀧𑀝𑀺𑀧𑀓𑁆𑀔𑀲𑁆𑀲 𑀘 𑀧𑀳𑀸𑀦𑀢𑁄 𑀧𑀕𑁆𑀕𑀳𑀸𑀤𑀻𑀲𑀼 𑀩𑁆𑀬𑀸𑀧𑀸𑀭𑀲𑁆𑀲 𑀅𑀓𑀸𑀢𑀩𑁆𑀩𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀯 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀸, 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺 𑀘 𑀆𑀤𑀺. 𑀲𑀸 𑀧𑀦𑀸𑀬𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀜𑀸𑀡𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀳𑁄𑀢𑀺, 𑀯𑀺𑀲𑁂𑀲𑀢𑁄 𑀜𑀸𑀡𑀲𑀸𑀥𑀦𑀢𑁆𑀢𑀸 𑀅𑀧𑁆𑀧𑀦𑀸𑀩𑁆𑀬𑀸𑀧𑀸𑀭𑀲𑁆𑀲𑀸𑀢𑀺 𑀨𑀮𑁂𑀦 𑀓𑀸𑀭𑀡𑀸𑀦𑀼𑀫𑀸𑀦𑀜𑀸𑀬𑁂𑀦. 𑀬𑀲𑁆𑀫𑀸 𑀉𑀧𑁂𑀓𑁆𑀔𑀸𑀯𑀲𑁂𑀦 𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀜𑀸𑀡𑀓𑀺𑀘𑁆𑀘𑀪𑀽𑀢𑀸 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀧𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀬𑀣𑀸 𑀪𑀸𑀯𑀦𑀸𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀧𑀓𑁆𑀔𑁂 𑀦 𑀧𑀢𑀢𑀺, 𑀢𑀣𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀩𑀳𑀼𑀮𑀻𑀓𑀸𑀭𑀯𑀲𑁂𑀦 𑀧𑀕𑁆𑀕𑀳𑀺𑀢𑀁. 𑀲𑀸𑀥𑀼𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀧𑀕𑁆𑀕𑀡𑁆𑀳𑀦𑁆𑀢𑁂𑀦𑀸𑀧𑀺 𑀲𑀫𑀸𑀥𑀺𑀲𑁆𑀲 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀲𑁂𑀦 𑀧𑀕𑁆𑀕𑀳𑀺𑀢𑀢𑁆𑀢𑀸 𑀲𑀓𑁆𑀓𑀘𑁆𑀘𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀑𑀓𑀸𑀲𑀁 ¶ 𑀮𑀪𑀢𑀺. 𑀢𑀁 𑀧𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀉𑀧𑁂𑀓𑁆𑀔𑀸𑀯𑀲𑁂𑀦 𑀧𑀼𑀩𑁆𑀩𑁂 𑀧𑀯𑀢𑁆𑀢𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀦𑀸𑀧𑀜𑁆𑀜𑀸𑀬 𑀓𑀺𑀘𑁆𑀘𑀸𑀥𑀺𑀓𑀢𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀯𑀲𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀏𑀯 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑀲𑁆𑀲𑁂𑀯 𑀦𑀸𑀦𑀸𑀲𑀪𑀸𑀯𑁂𑀳𑀺 𑀦𑀻𑀯𑀭𑀡𑀧𑀫𑀼𑀔𑁂𑀳𑀺 𑀓𑀺𑀮𑁂𑀲𑁂𑀳𑀺 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑁄𑀓𑁆𑀔𑀯𑀲𑁂𑀦 𑀯𑀺𑀫𑀼𑀘𑁆𑀘𑀦𑀯𑀲𑁂𑀦. 𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀯𑀲𑁂𑀦. 𑀯𑀺𑀫𑀼𑀢𑁆𑀢𑀢𑁆𑀢𑀸𑀢𑀺 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀏𑀯. 𑀢𑁂 𑀥𑀫𑁆𑀫𑀸 𑀲𑀤𑁆𑀥𑀸𑀤𑀬𑁄, 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀯𑀻𑀭𑀺𑀬𑀲𑀫𑀸𑀥𑀬𑁄 ¶ 𑀘 𑀏𑀓𑀭𑀲𑀸 𑀲𑀫𑀸𑀦𑀓𑀺𑀘𑁆𑀘𑀸 𑀳𑁄𑀦𑁆𑀢𑀺. 𑀏𑀯𑀫𑀬𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸 𑀦𑀺𑀧𑁆𑀨𑀚𑁆𑀚𑀫𑀸𑀦𑀸 𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ‘‘𑀜𑀸𑀡𑀓𑀺𑀘𑁆𑀘𑀪𑀽𑀢𑀸 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀏𑀯𑀁 𑀢𑀺𑀯𑀺𑀥𑀸𑀬 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀬𑀸 𑀮𑀤𑁆𑀥𑀯𑀺𑀲𑁂𑀲𑀸𑀬 𑀢𑀺𑀯𑀺𑀥𑀸𑀬 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀬 𑀲𑀸𑀢𑀺𑀲𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀼𑀢𑁆𑀢𑀪𑀸𑀯𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀲𑀫𑁆𑀧𑀳𑀁𑀲𑀦𑀸 𑀲𑀺𑀚𑁆𑀛𑀢𑀻𑀢𑀺 𑀆𑀕𑀫𑀦𑀼𑀧𑁂𑀓𑁆𑀔𑀸 𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀤𑀲𑀧𑀺 𑀆𑀓𑀸𑀭𑀸 𑀛𑀸𑀦𑁂 𑀏𑀯 𑀯𑁂𑀤𑀺𑀢𑀩𑁆𑀩𑀸.

𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀬, 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀫𑀢𑁆𑀢𑀁 𑀯𑀸 𑀧𑀞𑀫𑀦𑁆𑀢𑀺 𑀇𑀤𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀤𑁂𑀲𑀦𑀸𑀓𑁆𑀓𑀫𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀞𑀫’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀁, 𑀉𑀧𑁆𑀧𑀦𑁆𑀦𑀦𑁆𑀢𑀺 𑀳𑀺 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀞𑀫𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀞𑀫’’𑀦𑁆𑀢𑀺 𑀇𑀤𑀁 𑀧𑀦 𑀦 𑀏𑀓𑀦𑁆𑀢𑀮𑀓𑁆𑀔𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁬𑁦) 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀇𑀥 𑀦 𑀕𑀳𑀺𑀢𑀁. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑁂 𑀛𑀸𑀦𑁂 𑀇𑀥𑀸𑀥𑀺𑀧𑁆𑀧𑁂𑀢𑀚𑁆𑀛𑀸𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀣𑀯𑀻𑀓𑀲𑀺𑀡𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀲𑁆𑀲 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀉𑀧𑀦𑀺𑀚𑁆𑀛𑀸𑀬𑀦𑀢𑁄. 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄𑀢𑀺 𑀦𑀻𑀯𑀭𑀡𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀤𑀳𑀦𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀚𑀳𑀦𑀢𑁄. 𑀲𑀓𑀮𑀝𑁆𑀞𑁂𑀦𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀓𑀢𑁂 𑀯𑀸 𑀅𑀓𑀢𑁂 𑀯𑀸 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑁂 𑀧𑀣𑀯𑀻𑀪𑀸𑀕𑁂 𑀧𑀣𑀯𑀻𑀫𑀡𑁆𑀟𑀮𑁂 𑀲𑀓𑀮𑀸𑀭𑀫𑁆𑀫𑀡𑀓𑀭𑀡𑀝𑁆𑀞𑁂𑀦. 𑀦 𑀳𑀺 𑀢𑀲𑁆𑀲 𑀏𑀓𑀤𑁂𑀲𑀫𑀸𑀭𑀫𑁆𑀫𑀡𑀁 𑀓𑀭𑀻𑀬𑀢𑀺. 𑀧𑀣𑀯𑀻𑀓𑀲𑀺𑀡𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀦𑀺𑀫𑀺𑀢𑁆𑀢𑀁 𑀧𑀣𑀯𑀻𑀓𑀲𑀺𑀡𑀁 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑀁𑀲𑀳𑀘𑀭𑀡𑀢𑁄 𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀁 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺.

𑀘𑀺𑀭𑀝𑁆𑀞𑀺𑀢𑀺𑀲𑀫𑁆𑀧𑀸𑀤𑀦𑀯𑀡𑁆𑀡𑀦𑀸

𑁭𑁬. 𑀮𑀓𑁆𑀔𑀝𑁆𑀞𑀸𑀦𑁂 𑀞𑀺𑀢𑀁 𑀲𑀭𑁂𑀦 𑀯𑀸𑀮𑀁 𑀯𑀺𑀚𑁆𑀛𑀢𑀻𑀢𑀺 𑀯𑀸𑀮𑀯𑁂𑀥𑀻. 𑀇𑀥 𑀧𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀅𑀁𑀲𑀼𑀁 𑀯𑀺𑀚𑁆𑀛𑀦𑁆𑀢𑁄 ‘‘𑀯𑀸𑀮𑀯𑁂𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 ¶ 𑀯𑀸𑀮𑀯𑁂𑀥𑀺𑀦𑀸. 𑀲𑀽𑀤𑁂𑀦𑀸𑀢𑀺 𑀪𑀢𑁆𑀢𑀓𑀸𑀭𑁂𑀦. ‘‘𑀆𑀓𑀸𑀭𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀓𑀼𑀲𑀮𑁄𑀢𑀺 𑀲𑀼𑀝𑁆𑀞𑀼 𑀙𑁂𑀓𑁄. 𑀥𑀦𑀼𑀕𑁆𑀕𑀳𑁄𑀢𑀺 𑀇𑀲𑁆𑀲𑀸𑀲𑁄. 𑀓𑀫𑁆𑀫𑀦𑁆𑀢𑀺 𑀬𑁄𑀕𑁆𑀬𑀁. 𑀅𑀓𑁆𑀓𑀦𑁆𑀢𑀧𑀤𑀸𑀦𑀦𑁆𑀢𑀺 𑀯𑀺𑀚𑁆𑀛𑀦𑀓𑀸𑀮𑁂 𑀅𑀓𑁆𑀓𑀫𑀦𑀯𑀲𑁂𑀦 𑀧𑀯𑀢𑁆𑀢𑀧𑀤𑀸𑀦𑀁. 𑀆𑀓𑀸𑀭𑀦𑁆𑀢𑀺 𑀥𑀦𑀼𑀚𑀺𑀬𑀸𑀲𑀭𑀸𑀦𑀁 𑀕𑀳𑀺𑀢𑀸𑀓𑀸𑀭𑀁. 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀉𑀧𑀥𑀸𑀭𑁂𑀬𑁆𑀬. 𑀪𑁄𑀚𑀦𑀲𑀧𑁆𑀧𑀸𑀬𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁄 𑀅𑀯𑀼𑀢𑁆𑀢𑀸𑀓𑀸𑀭𑀸𑀦𑀫𑁆𑀧𑀺 𑀲𑀗𑁆𑀕𑀸𑀳𑀓𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀉𑀢𑀼𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀸𑀤𑀻𑀦𑀫𑁆𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀢𑀭𑀼𑀡𑀲𑀫𑀸𑀥𑀺𑀫𑁆𑀳𑀺.

𑀪𑀢𑁆𑀢𑀸𑀭𑀦𑁆𑀢𑀺 ¶ 𑀲𑀸𑀫𑀺𑀦𑀁, 𑀪𑀢𑁆𑀢𑀯𑁂𑀢𑀦𑀸𑀤𑀻𑀳𑀺 𑀧𑁄𑀲𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀺𑀲𑀦𑁆𑀢𑁄𑀢𑀺 𑀪𑁄𑀚𑁂𑀦𑁆𑀢𑁄. 𑀢𑀲𑁆𑀲 𑀭𑀼𑀘𑁆𑀘𑀺𑀢𑁆𑀯𑀸 𑀪𑀼𑀜𑁆𑀚𑀦𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀉𑀧𑀦𑀸𑀫𑁂𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀅𑀬𑀫𑁆𑀧𑀺 𑀬𑁄𑀕𑀻. 𑀅𑀥𑀺𑀕𑀢𑀓𑁆𑀔𑀡𑁂 𑀪𑁄𑀚𑀦𑀸𑀤𑀬𑁄 𑀆𑀓𑀸𑀭𑁂𑀢𑀺 𑀧𑀼𑀩𑁆𑀩𑁂 𑀛𑀸𑀦𑀲𑁆𑀲 𑀅𑀥𑀺𑀕𑀢𑀓𑁆𑀔𑀡𑁂 𑀓𑀺𑀘𑁆𑀘𑀲𑀸𑀥𑀓𑁂 𑀪𑁄𑀚𑀦𑀸𑀤𑀺𑀕𑀢𑁂 𑀆𑀓𑀸𑀭𑁂. 𑀕𑀳𑁂𑀢𑁆𑀯𑀸𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀦𑀝𑁆𑀞𑁂 𑀦𑀝𑁆𑀞𑁂 𑀲𑀫𑀸𑀥𑀺𑀫𑁆𑀳𑀺 𑀧𑀼𑀦𑀧𑁆𑀧𑀼𑀦𑀁 𑀅𑀧𑁆𑀧𑀦𑀸𑀬.

𑀫𑀳𑀸𑀦𑀲𑀯𑀺𑀚𑁆𑀚𑀸𑀧𑀭𑀺𑀘𑀬𑁂𑀦 𑀧𑀡𑁆𑀟𑀺𑀢𑁄. 𑀢𑀢𑁆𑀣 𑀯𑀺𑀲𑀤𑀜𑀸𑀡𑀢𑀸𑀬 𑀩𑁆𑀬𑀢𑁆𑀢𑁄. 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀓𑀑𑀲𑀮𑁆𑀮𑀬𑁄𑀕𑁂𑀦 𑀓𑀼𑀲𑀮𑁄. 𑀦𑀸𑀦𑀘𑁆𑀘𑀬𑁂𑀳𑀻𑀢𑀺 𑀦𑀸𑀦𑀘𑁆𑀘𑀬𑁂𑀳𑀺 𑀦𑀸𑀦𑀸𑀲𑀪𑀸𑀯𑁂𑀳𑀺, 𑀦𑀸𑀦𑀸𑀭𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀫𑁆𑀩𑀺𑀮𑀕𑁆𑀕𑁂𑀳𑀻’’𑀢𑀺𑀆𑀤𑀺. 𑀲𑀽𑀧𑁂𑀳𑀻𑀢𑀺 𑀩𑁆𑀬𑀜𑁆𑀚𑀦𑁂𑀳𑀺. 𑀅𑀫𑁆𑀩𑀺𑀮𑀕𑁆𑀕𑁂𑀳𑀻𑀢𑀺 𑀅𑀫𑁆𑀩𑀺𑀮𑀓𑁄𑀝𑁆𑀞𑀸𑀲𑁂𑀳𑀺, 𑀬𑁂 𑀯𑀸 𑀅𑀫𑁆𑀩𑀺𑀮𑀭𑀲𑀸 𑀳𑀼𑀢𑁆𑀯𑀸 𑀅𑀕𑁆𑀕𑀪𑀽𑀢𑀸, 𑀢𑁂𑀳𑀺 𑀘𑀢𑀼𑀭𑀫𑁆𑀩𑀺𑀮𑀸𑀤𑀺𑀫𑀺𑀲𑁆𑀲𑁂𑀳𑀺. 𑀏𑀲 𑀦𑀬𑁄 𑀢𑀺𑀢𑁆𑀢𑀓𑀕𑁆𑀕𑀸𑀤𑀻𑀲𑀼𑀧𑀺. 𑀔𑀸𑀭𑀺𑀓𑁂𑀳𑀻𑀢𑀺 𑀯𑀸𑀢𑀺𑀗𑁆𑀕𑀡𑀓𑀴𑀻𑀭𑀸𑀤𑀺𑀫𑀺𑀲𑁆𑀲𑁂𑀳𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀓𑀸𑀭𑀁 𑀭𑀼𑀘𑁆𑀘𑀦𑀯𑀲𑁂𑀦 𑀪𑀼𑀜𑁆𑀚𑀦𑀸𑀓𑀸𑀭𑀁. 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀉𑀧𑀭𑀽𑀧𑀭𑀺 𑀕𑀡𑁆𑀳𑀸𑀢𑀺 𑀉𑀧𑀥𑀸𑀭𑁂𑀢𑀺. 𑀇𑀫𑀲𑁆𑀲 𑀯𑀸 𑀲𑀽𑀧𑁂𑀬𑁆𑀬𑀲𑁆𑀲 𑀅𑀢𑁆𑀣𑀸𑀬 𑀳𑀢𑁆𑀣𑀁 𑀅𑀪𑀺𑀳𑀭𑀢𑀺. 𑀅𑀪𑀺𑀳𑀸𑀭𑀸𑀦𑀦𑁆𑀢𑀺 𑀅𑀪𑀺𑀫𑀼𑀔𑁂𑀦 𑀳𑀭𑀺𑀢𑀩𑁆𑀩𑀸𑀦𑀁 𑀧𑀡𑁆𑀡𑀸𑀓𑀸𑀭𑀸𑀦𑀁, 𑀧𑀽𑀚𑀸𑀪𑀺𑀳𑀸𑀭𑀸𑀦𑀁 𑀯𑀸. 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀏𑀯𑀁 𑀫𑁂 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀅𑀳𑁄𑀲𑀻’’𑀢𑀺 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑀺.

𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀸𑀦𑀦𑁆𑀢𑀺 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑀪𑀽𑀢𑀸𑀦𑀁. 𑀥𑀫𑁆𑀫𑀸𑀦𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀥𑀫𑁆𑀫𑀸𑀦𑀁. 𑀲𑀼𑀯𑀺𑀲𑁄𑀥𑀺𑀢𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀯𑀺𑀲𑁄𑀥𑀺𑀢𑀢𑁆𑀢𑀸, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀲𑀫𑁆𑀫𑀤𑁂𑀯 𑀧𑀳𑀻𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀲𑀼𑀪𑀫𑀦𑀲𑀺𑀓𑀸𑀭𑀦𑁂𑀓𑁆𑀔𑀫𑁆𑀫𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑁂𑀓𑁆𑀔𑀫𑁆𑀫𑀕𑀼𑀡𑀤𑀲𑁆𑀲𑀦𑁂𑀦𑀸𑀧𑀺 ¶ 𑀳𑀺 𑀢𑀲𑁆𑀲 𑀯𑀺𑀩𑀦𑁆𑀥𑀪𑀽𑀢𑁂 𑀓𑀸𑀫𑀘𑁆𑀙𑀦𑁆𑀤𑁂 𑀆𑀤𑀻𑀦𑀯𑁄 𑀯𑀺𑀲𑁂𑀲𑀢𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺. 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀓𑀸𑀬𑀤𑀭𑀣𑀁 𑀲𑀸𑀭𑀤𑁆𑀥𑀓𑀸𑀬𑀢𑀁. 𑀢𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀸𑀭𑀫𑁆𑀪𑀦𑀺𑀫𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀦 𑀯𑀺𑀲𑁄𑀥𑀦𑀫𑀸𑀳. 𑀆𑀭𑀫𑁆𑀪𑀥𑀸𑀢𑀼𑀫𑀦𑀲𑀺𑀓𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑀺𑀫𑀺𑀢𑁆𑀢𑀸𑀦𑀁, 𑀆𑀮𑁄𑀓𑀲𑀜𑁆𑀜𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀣𑀦𑀺𑀫𑀺𑀢𑁆𑀢𑀫𑀦𑀲𑀺𑀓𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑁂𑀧𑀺 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑁂𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀺𑀬𑁂, 𑀫𑀤𑀫𑀸𑀦𑀸𑀤𑀺𑀓𑁂 𑀘 𑀲𑀦𑁆𑀥𑀸𑀬𑀸𑀳. 𑀆𑀲𑀬𑀦𑁆𑀢𑀺 𑀯𑀲𑀦𑀓𑀲𑀼𑀲𑀺𑀭𑀁. 𑀲𑀼𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀆𑀲𑀗𑁆𑀓𑀦𑀻𑀬𑀢𑁆𑀢𑀸𑀪𑀸𑀯𑁂𑀦 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀁. 𑀏𑀢𑁆𑀣𑀸𑀳 𑁋 𑀦𑀦𑀼 𑀘𑀸𑀬𑀁 𑀧𑀕𑁂𑀯 𑀓𑀸𑀫𑀸𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑀣𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺, 𑀅𑀣 𑀓𑀲𑁆𑀫𑀸 𑀧𑀼𑀦 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺 𑀕𑀳𑀺𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁. 𑀢𑀁 𑀧𑀦 𑀧𑀳𑀸𑀦𑀫𑀢𑁆𑀢𑀦𑁆𑀢𑀺 𑀛𑀸𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀅𑀢𑀺𑀲𑀬𑀧𑀳𑀸𑀦𑀢𑁆𑀣𑀁 𑀧𑀼𑀦 𑀕𑀳𑀺𑀢𑀁.

𑀉𑀤𑁆𑀥𑀘𑁆𑀘 ¶ 𑀫𑀺𑀤𑁆𑀥𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀣𑀺𑀦𑀜𑁆𑀘 𑀢𑀤𑁂𑀓𑀝𑁆𑀞𑀢𑀸𑀬 𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀦𑁆𑀢𑀕𑀢𑁄𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑀦𑁆𑀢𑀁 𑀲𑀩𑁆𑀩𑀲𑁄 𑀯𑀺𑀲𑁄𑀥𑀺𑀢𑀓𑁄𑀡𑀧𑀭𑀺𑀬𑀦𑁆𑀢𑀁 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑀳𑀺𑀁 𑀭𑀫𑁂𑀢𑀺 𑀢𑀲𑁆𑀫𑀺𑀁 𑀛𑀸𑀦𑁂 𑀭𑀫𑁂𑀬𑁆𑀬 𑀤𑀺𑀯𑀲𑀪𑀸𑀕𑀫𑁆𑀧𑀺 𑀛𑀸𑀦𑀲𑀫𑀗𑁆𑀕𑀻 𑀏𑀯 𑀪𑀯𑁂𑀬𑁆𑀬.

𑀘𑀺𑀢𑁆𑀢𑀪𑀸𑀯𑀦𑀸𑀯𑁂𑀧𑀼𑀮𑁆𑀮𑀢𑁆𑀣𑀦𑁆𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀬 𑀯𑀺𑀧𑀼𑀮𑀪𑀸𑀯𑀸𑀬. 𑀬𑀣𑀸 𑀳𑀺 𑀪𑀸𑀯𑀦𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀏𑀯𑀫𑀲𑁆𑀲 𑀪𑀸𑀯𑀦𑀸𑀯𑀲𑁂𑀦𑁂𑀯 𑀯𑀟𑁆𑀠𑀦𑀫𑁆𑀧𑀺. 𑀢𑀲𑁆𑀫𑀸 𑀏𑀓𑀗𑁆𑀕𑀼𑀮𑀸𑀤𑀺𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀩𑀳𑀼𑀮𑀻𑀓𑀸𑀭𑁂𑀦 𑀛𑀸𑀦𑀁 𑀪𑀸𑀯𑀦𑀸𑀧𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀪𑀸𑀯𑀦𑀸𑀯𑁂𑀧𑀼𑀮𑁆𑀮𑀢𑁆𑀣𑀜𑁆𑀘 𑀬𑀣𑀸𑀮𑀤𑁆𑀥𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀢𑀩𑁆𑀩’’𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲.

𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀦𑀬𑀯𑀡𑁆𑀡𑀦𑀸

𑁭𑁭. 𑀢𑀢𑁆𑀭𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀯𑀟𑁆𑀠𑁂𑀢𑁆𑀯𑀸𑀢𑀺 𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀫𑀢𑁆𑀢𑀺𑀓𑀸𑀬 𑀧𑀢𑁆𑀢𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀧𑀢𑁆𑀢𑀁 𑀯𑀟𑁆𑀠𑁂𑀢𑀺, 𑀏𑀯𑀁 𑀧𑀢𑁆𑀢𑀯𑀟𑁆𑀠𑀦𑀬𑁄𑀕𑁂𑀦 𑀧𑀢𑁆𑀢𑀯𑀟𑁆𑀠𑀦𑀬𑀼𑀢𑁆𑀢𑀺𑀬𑀸 𑀅𑀯𑀟𑁆𑀠𑁂𑀢𑁆𑀯𑀸 𑀧𑀽𑀯𑀺𑀓𑀲𑁆𑀲 𑀧𑀽𑀯𑀯𑀟𑁆𑀠𑀦𑀁. 𑀪𑀢𑁆𑀢𑀲𑁆𑀲 𑀉𑀧𑀭𑀺 𑀪𑀢𑁆𑀢𑀧𑀓𑁆𑀔𑀺𑀧𑀦𑀁 𑀪𑀢𑁆𑀢𑀯𑀟𑁆𑀠𑀦𑀁. 𑀯𑀢𑁆𑀣𑀲𑁆𑀲 𑀢𑀺𑀦𑁆𑀢𑀲𑁆𑀲 𑀅𑀜𑁆𑀙𑀦𑀸𑀤𑀺 𑀤𑀼𑀲𑁆𑀲𑀯𑀟𑁆𑀠𑀦𑀁. 𑀧𑀘𑁆𑀘𑁂𑀓𑀁 𑀬𑁄𑀕-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ¶ 𑀦 𑀯𑀟𑁆𑀠𑁂𑀢𑀩𑁆𑀩𑀁 𑀲𑀧𑀭𑀺𑀘𑁆𑀙𑁂𑀤𑁂 𑀏𑀯 𑀪𑀸𑀯𑀦𑀸𑀧𑀯𑀢𑁆𑀢𑀺𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀸𑀦𑁆𑀢𑀓𑁂 𑀦𑁄 𑀅𑀦𑀦𑁆𑀢𑀓𑁂’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁫𑁫).

𑀳𑀁𑀲𑀧𑁄𑀢𑀓𑀸𑀢𑀺 𑀚𑀯𑀦𑀳𑀁𑀲𑀧𑁄𑀢𑀓𑀸. 𑀉𑀓𑁆𑀓𑀽𑀮𑀁 𑀉𑀦𑁆𑀦𑀢𑀝𑁆𑀞𑀸𑀦𑀁. 𑀯𑀺𑀓𑀽𑀮𑀁 𑀦𑀺𑀦𑁆𑀦𑀝𑁆𑀞𑀸𑀦𑀁. 𑀦𑀤𑀻𑀲𑁄𑀢𑁂𑀦 𑀓𑀢𑀁 𑀯𑀺𑀤𑀼𑀕𑁆𑀕𑀁 𑀦𑀤𑀻𑀯𑀺𑀤𑀼𑀕𑁆𑀕𑀁. 𑀯𑀺𑀲𑀫𑀸𑀓𑀸𑀭𑁂𑀦 𑀞𑀺𑀢𑁄 𑀧𑀩𑁆𑀩𑀢𑀧𑀤𑁂𑀲𑁄 𑀧𑀩𑁆𑀩𑀢𑀯𑀺𑀲𑀫𑁄.

𑀣𑀽𑀮𑀸𑀦𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀸𑀳𑀼𑀮𑁆𑀮𑁂𑀦 𑀯𑀺𑀪𑀽𑀢𑀪𑀸𑀯𑀢𑁄. 𑀤𑀼𑀩𑁆𑀩𑀮𑀸𑀦𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀕𑀼𑀡𑀩𑀮𑀯𑀪𑀸𑀯𑀲𑁆𑀲 𑀅𑀦𑀸𑀧𑀸𑀤𑀺𑀓𑀢𑁆𑀢𑀸. 𑀉𑀧𑀭𑀺 𑀉𑀲𑁆𑀲𑀼𑀓𑁆𑀓𑀦𑀸𑀬𑀸𑀢𑀺 𑀪𑀸𑀯𑀦𑀸𑀬 𑀉𑀧𑀭𑀺 𑀆𑀭𑁄𑀳𑀦𑀸𑀬, 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀸𑀬𑀸𑀢𑀺 𑀅𑀢𑁆𑀣𑁄.

𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑁂 𑀩𑀳𑀼𑀮𑀘𑀸𑀭𑀺𑀦𑀻. 𑀅𑀔𑁂𑀢𑁆𑀢𑀜𑁆𑀜𑀽𑀢𑀺 𑀅𑀕𑁄𑀘𑀭𑀜𑁆𑀜𑀽. 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀸𑀦𑀁 𑀯𑀺𑀲𑁄𑀥𑀦𑀸𑀦𑀪𑀺𑀜𑁆𑀜𑀸𑀢𑀸𑀬 𑀩𑀸𑀮𑁄. 𑀛𑀸𑀦𑀲𑁆𑀲 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑀯𑁂𑀬𑁆𑀬𑀢𑁆𑀢𑀺𑀬𑀲𑁆𑀲 𑀅𑀪𑀸𑀯𑁂𑀦 𑀅𑀩𑁆𑀬𑀢𑁆𑀢𑁄. 𑀉𑀧𑀭𑀺𑀛𑀸𑀦𑀲𑁆𑀲 ¶ 𑀧𑀤𑀝𑁆𑀞𑀸𑀦𑀪𑀸𑀯𑀸𑀦𑀯𑀩𑁄𑀥𑁂𑀦 𑀅𑀔𑁂𑀢𑁆𑀢𑀜𑁆𑀜𑀽. 𑀲𑀩𑁆𑀩𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀓𑁄𑀲𑀮𑁆𑀮𑀸𑀪𑀸𑀯𑁂𑀦 𑀅𑀓𑀼𑀲𑀮𑁄. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑁆𑀲 𑀯𑀸 𑀅𑀦𑀸𑀲𑁂𑀯𑀦𑀸𑀬 𑀩𑀸𑀮𑁄. 𑀅𑀪𑀸𑀯𑀦𑀸𑀬 𑀅𑀩𑁆𑀬𑀢𑁆𑀢𑁄. 𑀅𑀩𑀳𑀼𑀮𑀻𑀓𑀸𑀭𑁂𑀦 𑀅𑀔𑁂𑀢𑁆𑀢𑀜𑁆𑀜𑀽. 𑀲𑀫𑁆𑀫𑀤𑁂𑀯 𑀅𑀦𑀥𑀺𑀝𑁆𑀞𑀸𑀦𑀢𑁄 𑀅𑀓𑀼𑀲𑀮𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀢𑁄 𑀪𑀝𑁆𑀞𑁄𑀢𑀺 𑀉𑀪𑀬𑀢𑁄 𑀛𑀸𑀦𑀢𑁄 𑀪𑀝𑁆𑀞𑁄. 𑀲𑁄 𑀳𑀺 𑀅𑀧𑁆𑀧𑀕𑀼𑀡𑀢𑀸𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀲𑀉𑀲𑁆𑀲𑀸𑀳𑁄𑀧𑀺 𑀯𑀺𑀦𑀸𑀲𑀢𑁄, 𑀅𑀲𑀸𑀫𑀢𑁆𑀣𑀺𑀬𑀢𑁄 𑀘 𑀛𑀸𑀦𑀤𑁆𑀯𑀬𑀢𑁄 𑀧𑀭𑀺𑀳𑀻𑀦𑁄. 𑀘𑀺𑀡𑁆𑀡𑀯𑀲𑀺𑀦𑀸𑀢𑀺 𑀆𑀲𑁂𑀯𑀺𑀢𑀯𑀲𑀺𑀦𑀸.

𑀧𑀜𑁆𑀘𑀯𑀲𑀻𑀓𑀣𑀸𑀯𑀡𑁆𑀡𑀦𑀸

𑁭𑁮. 𑀯𑀲𑀦𑀁 𑀯𑀲𑀻𑀢𑀺 𑀥𑀸𑀢𑀼𑀦𑀺𑀤𑁆𑀤𑁂𑀲𑀢𑀸𑀬 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀲𑀺𑀬𑁄’’𑀢𑀺, 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀆𑀯𑀚𑁆𑀚𑀦𑀸𑀬 𑀯𑀲𑀻, 𑀆𑀯𑀚𑁆𑀚𑀦𑀸𑀯𑀲𑁂𑀦 𑀯𑀸 𑀯𑀲𑀻 𑀆𑀯𑀚𑁆𑀚𑀦𑀯𑀲𑀻. 𑀛𑀸𑀦𑀁 𑀆𑀯𑀚𑁆𑀚𑀺𑀢𑀼𑀁 𑀬𑀢𑁆𑀣 𑀬𑀢𑁆𑀣 𑀧𑀤𑁂𑀲𑁂 𑀇𑀘𑁆𑀙𑀸 𑀬𑀢𑁆𑀣𑀺𑀘𑁆𑀙𑀓𑀁. 𑀬𑀤𑀸 𑀬𑀤𑀸, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀯𑀸 𑀛𑀸𑀦𑀗𑁆𑀕𑁂 𑀇𑀘𑁆𑀙𑀸 𑀬𑀤𑀺𑀘𑁆𑀙𑀓𑀁. 𑀬𑀸𑀯 𑀬𑀸𑀯 𑀇𑀘𑁆𑀙𑀸 𑀬𑀸𑀯𑀤𑀺𑀘𑁆𑀙𑀓𑀁, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. ‘‘𑀬𑀸𑀯𑀸’’𑀢𑀺 𑀘 𑀇𑀤𑀁 𑀩𑀳𑀽𑀦𑀁 𑀚𑀯𑀦𑀯𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀯𑀺𑀬 𑀢𑀣𑀸𑀧𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀏𑀓𑀫𑁂𑀯. 𑀲𑁄 𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀘𑀺𑀢𑁆𑀢𑀓𑁆𑀔𑀡𑁄𑀢𑀺. 𑀆𑀯𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀸𑀦𑁂 𑀬𑀤𑀸 𑀬𑀤𑀸 ¶ 𑀬𑀁 𑀓𑀺𑀜𑁆𑀘𑀺 𑀛𑀸𑀦𑀗𑁆𑀕𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀬𑀣𑀺𑀘𑁆𑀙𑀺𑀢𑀁 𑀓𑀸𑀮𑀁 𑀆𑀯𑀚𑁆𑀚𑀦𑀸𑀬 𑀆𑀯𑀚𑁆𑀚𑀦𑀧𑁆𑀧𑀯𑀢𑁆𑀢𑀺𑀬𑀸 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁, 𑀘𑀺𑀭𑀸𑀬𑀺𑀢𑀢𑁆𑀢𑀁 𑀯𑀸 𑀦𑀢𑁆𑀣𑀺. 𑀏𑀯𑀁 𑀆𑀯𑀚𑁆𑀚𑀦𑀯𑀲𑀻 𑀲𑀺𑀤𑁆𑀥𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀢𑀺 𑀯𑀼𑀝𑁆𑀞𑀸𑀦𑀅𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑀺𑀬𑁄.

𑀅𑀗𑁆𑀕𑀲𑀫𑀼𑀤𑀸𑀬𑀪𑀸𑀯𑀢𑁄 𑀛𑀸𑀦𑀲𑁆𑀲 𑀛𑀸𑀦𑁂 𑀆𑀯𑀚𑁆𑀚𑀦𑀯𑀲𑀺𑀁 𑀦𑀺𑀧𑁆𑀨𑀸𑀤𑁂𑀢𑀼𑀓𑀸𑀫𑁂𑀦 𑀧𑀝𑀺𑀧𑀸𑀝𑀺𑀬𑀸 𑀛𑀸𑀦𑀗𑁆𑀕𑀸𑀦𑀺 𑀆𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀧𑀞𑀫𑀁 𑀯𑀺𑀢𑀓𑁆𑀓𑀁 𑀆𑀯𑀚𑁆𑀚𑀬𑀢𑁄’’𑀢𑀺. 𑀬𑀤𑀺𑀧𑀺 𑀆𑀯𑀚𑁆𑀚𑀦𑀫𑁂𑀯𑁂𑀢𑁆𑀣 𑀇𑀘𑁆𑀙𑀺𑀢𑀁 𑀆𑀯𑀚𑁆𑀚𑀦𑀯𑀲𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀆𑀯𑀚𑁆𑀚𑀦𑀸𑀬 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀚𑀯𑀦𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀢𑀸𑀦𑀺 𑀘 𑀔𑁄 𑀆𑀯𑀚𑁆𑀚𑀦𑀢𑀧𑁆𑀧𑀭𑀢𑀸𑀬 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀬𑀣𑀸𑀯𑀚𑁆𑀚𑀺𑀢𑀛𑀸𑀦𑀗𑁆𑀕𑀸𑀭𑀫𑁆𑀫𑀡𑀸𑀦𑀺 𑀓𑀢𑀺𑀧𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀧𑀭𑀺𑀧𑀼𑀡𑁆𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻’’𑀢𑀺. 𑀘𑀢𑁆𑀢𑀸𑀭𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲. 𑀧𑀜𑁆𑀘 𑀦𑀸𑀢𑀺𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀭𑀦𑁆𑀢𑀭𑀦𑁆𑀢𑀺 𑀯𑀺𑀲𑀪𑀸𑀕𑁂𑀳𑀺 𑀦𑀺𑀭𑀦𑁆𑀢𑀭𑀁. 𑀅𑀬𑀁 𑀧𑀦𑀸𑀢𑀺 𑀪𑀯𑀗𑁆𑀕𑀤𑁆𑀯𑀬𑀦𑁆𑀢𑀭𑀺𑀢𑀸 𑀘𑀢𑀼𑀚𑀯𑀦𑀘𑀺𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀸 𑀆𑀯𑀚𑁆𑀚𑀦𑀯𑀲𑀻. 𑀅𑀜𑁆𑀜𑁂𑀲𑀁 𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁. 𑀏𑀯𑀭𑀽𑀧𑁂 𑀓𑀸𑀮𑁂𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀮𑀳𑀼𑀢𑀭𑀁 𑀆𑀯𑀚𑁆𑀚𑀦𑀯𑀲𑀻𑀦𑀺𑀩𑁆𑀩𑀢𑁆𑀢𑀦𑀓𑀸𑀮𑁂. 𑀲𑀸 𑀘 𑀔𑁄 𑀇𑀢𑁆𑀢𑀭𑀸 𑀧𑀭𑀺𑀢𑁆𑀢𑀓𑀸𑀮𑀸, 𑀦 𑀲𑀢𑁆𑀣𑀼 𑀬𑀫𑀓𑀫𑀳𑀸𑀧𑀸𑀝𑀺𑀳𑀸𑀭𑀺𑀬𑁂 𑀯𑀺𑀬 ¶ 𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀯𑀢𑀻. 𑀢𑀣𑀸 𑀳𑀺 𑀢𑀁 𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀯𑀼𑀢𑁆𑀢𑀁. 𑀅𑀥𑀺𑀕𑀫𑁂𑀦 𑀲𑀫𑀁 𑀲𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀫𑀸 𑀆𑀧𑀚𑁆𑀚𑀦𑀁 𑀧𑀝𑀺𑀧𑀚𑁆𑀚𑀦𑀁 𑀲𑀫𑀸𑀧𑀚𑁆𑀚𑀦𑀁, 𑀛𑀸𑀦𑀲𑀫𑀗𑁆𑀕𑀺𑀢𑀸.

𑀲𑀻𑀖𑀦𑁆𑀢𑀺 𑀏𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀦𑀦𑁆𑀢𑀭𑀁 𑀤𑁆𑀯𑀻𑀲𑀼 𑀪𑀯𑀗𑁆𑀕𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀲𑀫𑀸𑀧𑀚𑁆𑀚𑀦𑀁 𑀲𑀻𑀖𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸. 𑀅𑀬𑀜𑁆𑀘 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬𑀁 𑀮𑀩𑁆𑀪𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸 𑀏𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀺 𑀬𑁂𑀦𑀲𑁆𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭). 𑀇𑀢𑁄 𑀲𑀻𑀖𑀢𑀭𑀸 𑀳𑀺 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫 𑀦𑀢𑁆𑀣𑀺. 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀺 𑀓𑀧𑁄𑀢𑀓𑀦𑁆𑀤𑀭𑀸𑀬𑀁 𑀯𑀺𑀳𑀭𑀦𑁆𑀢𑀲𑁆𑀲 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀬𑀓𑁆𑀔𑁂𑀦 𑀫𑀳𑀦𑁆𑀢𑀫𑁆𑀧𑀺 𑀧𑀩𑁆𑀩𑀢𑀓𑀽𑀝𑀁 𑀧𑀤𑀸𑀮𑁂𑀢𑀼𑀁 𑀲𑀫𑀢𑁆𑀣𑁂 𑀧𑀳𑀸𑀭𑁂 𑀲𑀻𑀲𑁂 𑀤𑀺𑀦𑁆𑀦𑁂 𑀲𑀫𑀸𑀧𑀚𑁆𑀚𑀦𑀫𑁆𑀧𑁂𑀢𑁆𑀣 𑀦𑀺𑀤𑀲𑁆𑀲𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀢𑀤𑀸 𑀣𑁂𑀭𑁄 𑀢𑀲𑁆𑀲 𑀧𑀳𑀭𑀡𑀲𑀫𑀬𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀲𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁩𑁭𑁪). 𑀧𑀸𑀴𑀺𑀬𑀁 𑀧𑀦 ‘‘𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 (𑀉𑀤𑀸. 𑁩𑁪) 𑀯𑀼𑀢𑁆𑀢𑀁. 𑀇𑀫𑁂 𑀧𑀦 𑀣𑁂𑀭𑀸 ¶ ‘‘𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑀫𑀓𑀸𑀮𑀁 𑀢𑁂𑀦 𑀧𑀳𑀸𑀭𑁄 𑀤𑀺𑀦𑁆𑀦𑁄’’𑀢𑀺 𑀯𑀤𑀦𑁆𑀢𑀺.

𑀅𑀘𑁆𑀙𑀭𑀸𑀫𑀢𑁆𑀢𑀦𑁆𑀢𑀺 𑀅𑀗𑁆𑀕𑀼𑀮𑀺𑀨𑁄𑀝𑀫𑀢𑁆𑀢𑀁 𑀔𑀡𑀁. 𑀞𑀧𑁂𑀢𑀼𑀦𑁆𑀢𑀺 𑀲𑁂𑀢𑀼 𑀯𑀺𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀑𑀖𑀁 𑀯𑁂𑀕𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸. 𑀅𑀪𑀺𑀪𑀼𑀬𑁆𑀬 𑀞𑀧𑀦𑀁, 𑀅𑀥𑀺𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀯𑀸 𑀅𑀥𑀺𑀝𑁆𑀞𑀸𑀦𑀁. 𑀢𑀢𑁆𑀣 𑀯𑀲𑀻 𑀅𑀥𑀺𑀝𑁆𑀞𑀸𑀦𑀯𑀲𑀻. 𑀢𑀣𑁂𑀯 𑀮𑀳𑀼𑀁 𑀯𑀼𑀝𑁆𑀞𑀸𑀢𑀼𑀦𑁆𑀢𑀺 𑀅𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀤𑀲𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀮𑀳𑀼𑀁 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸. 𑀪𑀯𑀗𑁆𑀕𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑁂𑀯 𑀳𑁂𑀢𑁆𑀣 𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀏𑀢𑁆𑀣 𑀘 𑀬𑀣𑀸 ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀛𑀸𑀦𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻, 𑀏𑀯𑀁 ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀯𑀲𑁂𑀦 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻 𑀯𑁂𑀤𑀺𑀢𑀩𑁆𑀩𑀸, 𑀬𑀸 𑀲𑀫𑀸𑀧𑀢𑁆𑀢𑀺 ‘‘𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀼𑀪𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀯𑀲𑀻𑀤𑀲𑁆𑀲𑀦𑀢𑁆𑀣𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀫𑁆𑀫𑀺𑀢𑀧𑀩𑁆𑀩𑀢𑁂 𑀢𑀲𑁆𑀲 𑀯𑀺𑀯𑀭𑁂. 𑀓𑀺𑀜𑁆𑀘𑀸𑀧𑀺 𑀏𑀓𑀁𑀬𑁂𑀯 𑀢𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁 𑀬𑁂𑀦 𑀧𑀩𑁆𑀩𑀢𑀁 𑀦𑀺𑀫𑁆𑀫𑀺𑀦𑁂𑀬𑁆𑀬, 𑀅𑀪𑀺𑀜𑁆𑀜𑀸𑀧𑀸𑀤𑀓𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀮𑀳𑀼𑀢𑀭𑀁 𑀞𑀧𑀦𑀁, 𑀯𑀼𑀝𑁆𑀞𑀸𑀦𑀜𑁆𑀘 𑀇𑀥 𑀦𑀺𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀏𑀢𑁆𑀢𑀓𑀸 𑀇𑀤𑁆𑀥𑀺𑀫𑀦𑁆𑀢𑀸 𑀏𑀓𑀁 𑀉𑀧𑀝𑁆𑀞𑀸𑀓𑀁 𑀕𑀭𑀼𑀴𑀢𑁄 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀽’’𑀢𑀺 𑀕𑀸𑀭𑀬𑁆𑀳𑀸 𑀅𑀲𑁆𑀲𑀸𑀫.

𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀸𑀦𑀻𑀢𑀺 ¶ 𑀆𑀯𑀚𑁆𑀚𑀦𑀯𑀲𑀻𑀪𑀸𑀯𑀸𑀬 𑀬𑀣𑀸𑀓𑁆𑀓𑀫𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀛𑀸𑀦𑀗𑁆𑀕𑀸𑀦𑀁 𑀆𑀯𑀚𑁆𑀚𑀦𑀸𑀬 𑀧𑀭𑀢𑁄 𑀬𑀸𑀦𑀺 𑀚𑀯𑀦𑀸𑀦𑀺 𑀧𑀯𑀢𑁆𑀢𑀸𑀦𑀺, 𑀢𑀸𑀦𑀺 𑀢𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺. 𑀬𑀤𑀕𑁆𑀕𑁂𑀦 𑀆𑀯𑀚𑁆𑀚𑀦𑀯𑀲𑀻𑀲𑀺𑀤𑁆𑀥𑀺, 𑀢𑀤𑀕𑁆𑀕𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑀻𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁭𑁯. 𑀦𑀻𑀯𑀭𑀡𑀧𑁆𑀧𑀳𑀸𑀦𑀲𑁆𑀲 𑀢𑀧𑁆𑀧𑀞𑀫𑀢𑀸𑀬 𑀆𑀲𑀦𑁆𑀦𑀦𑀻𑀯𑀭𑀡𑀧𑀘𑁆𑀘𑀢𑁆𑀣𑀺𑀓𑀸. 𑀣𑀽𑀮𑀁 𑀦𑀸𑀫 𑀯𑀺𑀧𑀼𑀮𑀫𑁆𑀧𑀺 𑀨𑁂𑀕𑁆𑀕𑀼 𑀯𑀺𑀬 𑀲𑀼𑀔𑀪𑀜𑁆𑀚𑀦𑀻𑀬𑀦𑁆𑀢𑀺 𑀆𑀳 ‘‘𑀑𑀴𑀸𑀭𑀺𑀓𑀢𑁆𑀢𑀸 𑀅𑀗𑁆𑀕𑀤𑀼𑀩𑁆𑀩𑀮𑀸’’𑀢𑀺. 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀬 𑀅𑀦𑁄𑀴𑀸𑀭𑀺𑀓𑀗𑁆𑀕𑀢𑁆𑀢𑀸, 𑀲𑀦𑁆𑀢𑀥𑀫𑁆𑀫𑀲𑀫𑀗𑁆𑀕𑀺𑀢𑀸𑀬 𑀘 ‘‘𑀲𑀦𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸. 𑀬𑁂 𑀳𑀺 𑀥𑀫𑁆𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑁂 𑀧𑀻𑀢𑀺𑀲𑀼𑀔𑀸𑀤𑀬𑁄, 𑀓𑀸𑀫𑀁 𑀢𑁂 𑀧𑀞𑀫𑀚𑁆𑀛𑀸𑀦𑁂𑀧𑀺 𑀲𑀦𑁆𑀢𑀺, 𑀢𑁂𑀳𑀺 𑀧𑀦 𑀢𑁂 𑀲𑀦𑁆𑀢𑀢𑀭𑀸 𑀘𑁂𑀯 𑀧𑀡𑀻𑀢𑀢𑀭𑀸 𑀘 𑀪𑀯𑀦𑁆𑀢𑀻𑀢𑀺. 𑀦𑀺𑀓𑀦𑁆𑀢𑀺𑀦𑁆𑀢𑀺 𑀦𑀺𑀓𑀸𑀫𑀦𑀁, 𑀅𑀧𑁂𑀓𑁆𑀔𑀦𑁆𑀢𑀺 ¶ 𑀅𑀢𑁆𑀣𑁄. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀔𑁂𑀧𑁂𑀢𑁆𑀯𑀸. 𑀘𑀢𑁆𑀢𑀸𑀭𑀺 𑀧𑀜𑁆𑀘𑀸𑀢𑀺 𑀯𑀸-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑁂𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺𑀬𑁂𑀯, 𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀓𑀸𑀦𑀻𑀢𑀺 𑀅𑀢𑁆𑀣𑁄.

𑁮𑁦. 𑀯𑀽𑀧𑀲𑀫𑀸𑀢𑀺 𑀯𑀽𑀧𑀲𑀫𑀳𑁂𑀢𑀼, 𑀯𑀽𑀧𑀲𑀫𑁄𑀢𑀺 𑀘𑁂𑀢𑁆𑀣 𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁. 𑀅𑀢𑀺𑀓𑁆𑀓𑀫𑁄 𑀅𑀢𑁆𑀣𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀲𑀫𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺. 𑀓𑀢𑀫𑁂𑀲𑀁 𑀧𑀦𑁂𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀓𑀺𑀁 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀉𑀤𑀸𑀳𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀦𑁆𑀢𑀺. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀦𑀢𑁆𑀣𑀺 𑀢𑁂𑀲𑀁 𑀯𑀽𑀧𑀲𑀫𑁄. 𑀦 𑀳𑀺 𑀓𑀤𑀸𑀘𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑀁 𑀅𑀢𑁆𑀣𑀺. 𑀅𑀣 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀁, 𑀏𑀯𑀫𑁆𑀧𑀺 𑀦𑀢𑁆𑀣𑁂𑀯 𑀯𑀽𑀧𑀲𑀫𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑁂𑀲𑀁 𑀢𑀢𑁆𑀣 𑀅𑀪𑀸𑀯𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀞𑀫𑀚𑁆𑀛𑀸𑀦𑀲𑁆𑀲 𑀑𑀴𑀸𑀭𑀺𑀓𑀢𑀸, 𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀲𑀫𑀥𑀺𑀕𑀫𑁄, 𑀦 𑀲𑀪𑀸𑀯𑀢𑁄 𑀅𑀦𑁄𑀴𑀸𑀭𑀺𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺 𑀅𑀬𑀫𑀢𑁆𑀣𑁄 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀢𑁂𑀦 𑀤𑀻𑀧𑀺𑀢𑁄. 𑀢𑀲𑁆𑀫𑀸 ‘‘𑀓𑀺𑀁 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦’’𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀯. 𑀬𑀲𑁆𑀫𑀸 𑀤𑀺𑀝𑁆𑀞𑀸𑀤𑀻𑀦𑀯𑀲𑁆𑀲 𑀢𑀁𑀢𑀁𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀯𑀽𑀧𑀲𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀢𑀓𑁆𑀓𑀸𑀤𑀬𑁄 𑀏𑀯 𑀛𑀸𑀦𑀗𑁆𑀕𑀪𑀽𑀢𑀸 𑀢𑀣𑀸 𑀓𑀭𑀻𑀬𑀦𑁆𑀢𑀺, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄, 𑀢𑀲𑁆𑀫𑀸 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑀸𑀤𑀺𑀯𑀘𑀦𑀁 𑀜𑀸𑀬𑀸𑀕𑀢𑀁. 𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀏𑀢𑁂𑀦 ‘‘𑀏𑀢𑀁 𑀑𑀴𑀸𑀭𑀺𑀓’’𑀦𑁆𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑀁 𑀲𑀼𑀢𑁆𑀢𑁂 𑀆𑀕𑀢𑀁, 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 ¶ 𑀯𑀺𑀢𑀓𑁆𑀓𑀸𑀤𑀻𑀦𑀁, 𑀢𑀁𑀲𑀳𑀕𑀢𑀸𑀦𑀜𑁆𑀘 𑀯𑀽𑀧𑀲𑀫𑀸𑀤𑀺𑀓𑁂 𑀯𑀢𑁆𑀢𑀩𑁆𑀩𑁂 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀅𑀥𑀺𑀓𑀯𑀘𑀦𑀁 𑀅𑀜𑁆𑀜𑀁 𑀅𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀕𑀳𑀺𑀢𑀦𑁆𑀢𑀺 𑀇𑀥 ‘‘𑀬𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀦𑀺 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀗𑁆𑀕𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑀸𑀦𑀻𑀢𑀺 𑀢𑁂𑀲𑀁 𑀏𑀓𑀤𑁂𑀲𑀪𑀽𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀁 𑀢𑀁𑀤𑀻𑀧𑀓𑀁 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑁂𑀧𑀺 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀤𑀺𑀓𑁂 𑀧𑀳𑁂𑀬𑁆𑀬𑀗𑁆𑀕𑀦𑀺𑀤𑁆𑀤𑁂𑀲𑀢𑀸𑀲𑀸𑀫𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀲𑀫𑀽𑀳𑀢𑁄 𑀕𑀳𑀺𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀲𑁆𑀲 𑀢𑀤𑁂𑀓𑀤𑁂𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀬𑀜𑁆𑀘 𑀅𑀢𑁆𑀣𑁄 ¶ 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀦𑀬𑁂𑀦 𑀯𑀼𑀢𑁆𑀢𑁄. 𑀅𑀣 𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀢𑀁𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀥𑀺𑀕𑀫𑀤𑀻𑀧𑀓𑁂𑀦 𑀧𑀻𑀢𑀺𑀯𑀺𑀭𑀸𑀕𑀸𑀤𑀺𑀯𑀘𑀦𑀸𑀦𑀁 𑀧𑀻𑀢𑀺𑀆𑀤𑀺𑀲𑀫𑀢𑀺𑀓𑁆𑀓𑀫𑀸 𑀢𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀁𑀤𑀻𑀧𑀓𑀢𑀸 𑀯𑀼𑀢𑁆𑀢𑀸.

𑀦𑀺𑀬𑀓𑀚𑁆𑀛𑀢𑁆𑀢𑀫𑀥𑀺𑀧𑁆𑀧𑁂𑀢𑀁 𑀦 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀸𑀤𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑀺𑀪𑀗𑁆𑀕𑁂 𑀧𑀦𑀸’’𑀢𑀺𑀆𑀤𑀺. 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬𑀸𑀢𑀺 𑀦𑀻𑀮𑀬𑁄𑀕𑀢𑁄 𑀯𑀢𑁆𑀣𑀁 𑀦𑀻𑀮𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀦 𑀲𑀫𑁆𑀧𑀲𑀸𑀤𑀦𑁂𑀦 𑀬𑁄𑀕𑀸 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀁. 𑀢𑀲𑁆𑀫𑀺𑀁 𑀤𑀲𑁆𑀲𑀺𑀢𑁂 ‘‘𑀲𑀫𑁆𑀧𑀲𑀸𑀤𑀦𑀁 𑀛𑀸𑀦’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀢𑀁𑀬𑁄𑀕𑀸 𑀛𑀸𑀦𑁂 𑀢𑀁𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀅𑀯𑀺𑀭𑁄𑀥𑁄 𑀬𑀼𑀢𑁆𑀢𑁄. 𑀏𑀓𑁄𑀤𑀺𑀪𑀸𑀯𑁂 𑀓𑀣𑀦𑁆𑀢𑀺 𑀏𑀓𑁄𑀤𑀺𑀫𑁆𑀳𑀺 𑀤𑀲𑁆𑀲𑀺𑀢𑁂 𑀏𑀓𑁄𑀤𑀺𑀪𑀸𑀯𑀁 𑀛𑀸𑀦𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀛𑀸𑀦𑀲𑁆𑀲 𑀏𑀓𑁄𑀤𑀺𑀯𑀟𑁆𑀠𑀦𑀢𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀘𑁂? ‘‘𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑁄𑀤𑀺𑀲𑁆𑀲 𑀦𑀺𑀤𑁆𑀤𑁂𑀲𑁄 𑀦 𑀓𑀸𑀢𑀩𑁆𑀩𑁄 𑀲𑀺𑀬𑀸𑀢𑀺 𑀏𑀓𑁄𑀤𑀺𑀪𑀸𑀯𑀲𑀤𑁆𑀤𑁄 𑀏𑀯 𑀲𑀫𑀸𑀥𑀺𑀫𑁆𑀳𑀺 𑀧𑀯𑀢𑁆𑀢𑁄 𑀲𑀫𑁆𑀧𑀲𑀸𑀤𑀦𑀲𑀤𑁆𑀤𑁄 𑀯𑀺𑀬 𑀛𑀸𑀦𑁂 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂𑀢𑀺 ‘‘𑀘𑁂𑀢𑀲𑁄 𑀲𑀫𑁆𑀧𑀲𑀸𑀤𑀬𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀘𑁂𑀢𑀲𑁄’’𑀢𑀺 𑀘 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 ‘‘𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀧𑀓𑁆𑀔𑁂. 𑀘𑁂𑀢𑀲𑁄𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁.

𑀲𑁂𑀝𑁆𑀞𑁄𑀧𑀺 𑀮𑁄𑀓𑁂 ‘‘𑀏𑀓𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀬𑀸𑀯 𑀧𑀭𑁂 𑀏𑀓𑀸𑀳𑀁 𑀢𑁂 𑀓𑀭𑁄𑀫𑀻’’𑀢𑀺𑀆𑀤𑀻𑀲𑀼. 𑀏𑀓𑁄 𑀅𑀤𑀼𑀢𑀺𑀬𑁄 ‘‘𑀏𑀓𑀸𑀓𑀻𑀪𑀺 𑀔𑀼𑀤𑁆𑀤𑀓𑁂𑀳𑀺 𑀚𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀅𑀲𑀳𑀸𑀬𑀢𑁆𑀣𑁄𑀧𑀺 𑀏𑀓-𑀲𑀤𑁆𑀤𑁄 𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸’’𑀢𑀺. 𑀲𑀤𑁆𑀥𑀸𑀤𑀬𑁄𑀧𑀺 𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀢𑁄, 𑀅𑀲𑀸𑀥𑀸𑀭𑀡𑀢𑁄 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯, 𑀲𑀫𑀸𑀥𑀺 𑀧𑀦 𑀛𑀸𑀦𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀓𑀭𑀡𑁂𑀦 𑀲𑀸𑀢𑀺𑀲𑀬𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳.

‘‘𑀲𑀫𑁆𑀧𑀲𑀸𑀤𑀦𑀁 ¶ , 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀯𑀺𑀲𑁂𑀲𑀦𑀤𑁆𑀯𑀬𑀁 𑀛𑀸𑀦𑀲𑁆𑀲 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀕𑀳𑀺𑀢𑀁. 𑀲𑁆𑀯𑀸𑀬𑀫𑀢𑀺𑀲𑀬𑁄 𑀬𑀣𑀸 𑀇𑀫𑀲𑁆𑀫𑀺𑀁 𑀛𑀸𑀦𑁂 𑀮𑀩𑁆𑀪𑀢𑀺, 𑀦 𑀢𑀣𑀸 𑀧𑀞𑀫𑀚𑁆𑀛𑀸𑀦𑁂𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀦𑀼 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑁂 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀯𑀲𑁂𑀦, 𑀅𑀦𑀼𑀫𑀚𑁆𑀚𑀦𑀅𑀦𑀼𑀬𑁄𑀚𑀦𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀸 𑀥𑀫𑁆𑀫𑀸 𑀲𑀢𑀺𑀧𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀧𑀕𑀫𑁂 ¶ 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀓𑀜𑁆𑀘𑀺 𑀔𑁄𑀪𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀢𑁂𑀳𑀺 𑀘 𑀢𑁂 𑀦 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀦 𑀲𑀼𑀧𑁆𑀧𑀲𑀦𑁆𑀦’’𑀦𑁆𑀢𑀺. 𑀔𑀼𑀤𑁆𑀤𑀺𑀓𑀸 𑀊𑀫𑀺𑀬𑁄 𑀯𑀻𑀘𑀺𑀬𑁄. 𑀫𑀳𑀢𑀺𑀬𑁄 𑀢𑀭𑀗𑁆𑀕𑀸. 𑀲𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑁂, 𑀯𑀻𑀭𑀺𑀬𑀲𑀫𑀢𑀸𑀬 𑀘 𑀢𑁂𑀦𑁂𑀯 𑀔𑁄𑀪𑁂𑀦, 𑀲𑀫𑁆𑀧𑀲𑀸𑀤𑀸𑀪𑀸𑀯𑁂𑀦 𑀘 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄 𑀩𑀳𑀮𑁂 𑀯𑀺𑀬 𑀚𑀮𑁂 𑀫𑀘𑁆𑀙𑁄. 𑀬𑀣𑀸𑀯𑀼𑀢𑁆𑀢𑀓𑁆𑀔𑁄𑀪𑁄 𑀏𑀯 𑀧𑀮𑀺𑀩𑁄𑀥𑁄. 𑀏𑀯𑀁 𑀯𑀼𑀢𑁆𑀢𑁂𑀦𑀸𑀢𑀺 𑀬𑀲𑁆𑀲𑀸 𑀲𑀤𑁆𑀥𑀸𑀬 𑀯𑀲𑁂𑀦 𑀲𑀫𑁆𑀧𑀲𑀸𑀤𑀦𑀁, 𑀬𑀲𑁆𑀲𑀸 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀯𑀲𑁂𑀦 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀘 𑀛𑀸𑀦𑀁 𑀯𑀼𑀢𑁆𑀢𑀁. 𑀢𑀸𑀲𑀁 𑀏𑀯 ‘‘𑀲𑀤𑁆𑀤𑀳𑀦𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲 𑀯𑀺𑀲𑁂𑀲𑀯𑀺𑀪𑀸𑀯𑀦𑀸𑀯𑀲𑁂𑀦 𑀯𑀼𑀢𑁆𑀢𑁂𑀦. 𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑁂𑀦. ‘‘𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄, 𑀲𑀫𑁆𑀧𑀲𑀸𑀤𑀦𑀢𑁄 𑀯𑀸 𑀲𑀫𑁆𑀧𑀲𑀸𑀤𑀦𑀁, 𑀏𑀓𑁄𑀤𑀺𑀁 𑀪𑀸𑀯𑁂𑀢𑀻𑀢𑀺 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀛𑀸𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀦 𑀯𑀺𑀭𑀼𑀚𑁆𑀛𑀢𑀺. 𑀬𑀣𑀸 𑀧𑀦 𑀅𑀯𑀺𑀭𑁄𑀥𑁄, 𑀲𑁄 𑀯𑀼𑀢𑁆𑀢𑁄 𑀏𑀯.

𑁮𑁧. 𑀲𑀦𑁆𑀢𑀸𑀢𑀺 𑀲𑀫𑀁 𑀦𑀺𑀭𑁄𑀥𑀁 𑀕𑀢𑀸. 𑀲𑀫𑀺𑀢𑀸𑀢𑀺 𑀪𑀸𑀯𑀦𑀸𑀬 𑀲𑀫𑀁 𑀕𑀫𑀺𑀢𑀸 𑀦𑀺𑀭𑁄𑀥𑀺𑀢𑀸. 𑀯𑀽𑀧𑀲𑀦𑁆𑀢𑀸𑀢𑀺 𑀢𑀢𑁄 𑀏𑀯 𑀲𑀼𑀝𑁆𑀞𑀼 𑀉𑀧𑀲𑀦𑁆𑀢𑀸. 𑀅𑀢𑁆𑀣𑀗𑁆𑀕𑀢𑀸𑀢𑀺 𑀅𑀢𑁆𑀣𑀁 𑀯𑀺𑀦𑀸𑀲𑀁 𑀕𑀢𑀸. 𑀅𑀩𑁆𑀪𑀢𑁆𑀣𑀗𑁆𑀕𑀢𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑁆𑀧𑀺𑀢𑀸𑀢𑀺 𑀯𑀺𑀦𑀸𑀲𑀁 𑀕𑀫𑀺𑀢𑀸. 𑀲𑁄𑀲𑀺𑀢𑀸𑀢𑀺 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀅𑀪𑀸𑀯𑁂𑀦 𑀲𑁄𑀲𑀁 𑀲𑀼𑀓𑁆𑀔𑀪𑀸𑀯𑀁 𑀇𑀢𑀸. 𑀩𑁆𑀬𑀦𑁆𑀢𑀺𑀓𑀢𑀸𑀢𑀺 𑀯𑀺𑀕𑀢𑀦𑁆𑀢𑀓𑀢𑀸.

𑀅𑀬𑀫𑀢𑁆𑀣𑁄𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀪𑀸𑀯𑁄. 𑀘𑁄𑀤𑀓𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 ‘‘𑀏𑀯𑀫𑁂𑀢𑀁 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄’’𑀢𑀺 𑀯𑀢𑁆𑀯𑀸 ‘‘𑀦 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀢𑀁 𑀯𑀘𑀦𑀁. 𑀢𑀤𑀢𑁆𑀣𑀤𑀻𑀧𑀓𑀦𑁆𑀢𑀺 𑀢𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀽𑀧𑀸𑀬𑀤𑀻𑀧𑀓𑁂𑀦 𑀅𑀚𑁆𑀛𑀢𑁆𑀢𑀲𑀫𑁆𑀧𑀲𑀸𑀤𑀦𑀢𑀸𑀬, 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀢𑀸𑀬 𑀘 𑀳𑁂𑀢𑀼𑀤𑀻𑀧𑀓𑁂𑀦, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀳𑁂𑀢𑀼𑀤𑀻𑀧𑀓𑁂𑀦 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀓𑀺𑀁 𑀧𑀼𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀯𑀘𑀦𑁂𑀦 𑀓𑀢𑁂𑀦𑀸𑀢𑀺? 𑀦, 𑀅𑀤𑀻𑀧𑀺𑀢𑀢𑁆𑀢𑀸. 𑀦 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀳𑀺 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀏𑀢𑁂𑀲𑀁 𑀯𑀽𑀧𑀲𑀫𑀦𑀁, 𑀬𑁂 𑀘 𑀲𑀗𑁆𑀔𑀸𑀭𑁂𑀲𑀼 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀫𑀕𑁆𑀕𑁂𑀲𑀼, 𑀧𑀳𑀻𑀦𑀢𑀡𑁆𑀳𑁂𑀲𑀼 ¶ 𑀘 𑀨𑀮𑁂𑀲𑀼 𑀲𑀗𑁆𑀔𑀸𑀭𑀧𑀯𑀢𑁆𑀢𑀺 𑀳𑁄𑀢𑀺 𑀏𑀯 ¶ , 𑀏𑀯𑀫𑁂𑀯𑀺𑀥𑀸𑀧𑀺 𑀯𑀺𑀓𑁆𑀔𑀫𑁆𑀪𑀺𑀢𑀯𑀺𑀢𑀓𑁆𑀓𑀯𑀺𑀘𑀸𑀭𑀢𑀡𑁆𑀳𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑁆𑀧𑀬𑁄𑀕𑁄 𑀧𑀼𑀭𑀺𑀫𑁂𑀦 𑀦 𑀦𑀺𑀯𑀸𑀭𑀺𑀢𑁄 𑀲𑀺𑀬𑀸𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁, 𑀆𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀅𑀢𑀺𑀓𑁆𑀓𑀫𑁄𑀯 𑀢𑁂𑀲𑀁 𑀯𑀽𑀧𑀲𑀫𑁄𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀫𑁆𑀧𑀻𑀢𑀺 𑀧𑀞𑀫𑀁 𑀛𑀸𑀦𑀫𑁆𑀧𑀺.

‘‘𑀤𑀼𑀢𑀺𑀬𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀤𑀼𑀢𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀦 𑀢𑀣𑀸 𑀇𑀫𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀬𑀣𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂 𑀦𑀻𑀯𑀭𑀡𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀢𑀣𑀸 𑀇𑀫𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦 𑀧𑀳𑀻𑀬𑀦𑁆𑀢𑀺 𑀅𑀲𑀁𑀓𑀺𑀮𑀺𑀝𑁆𑀞𑀲𑀪𑀸𑀯𑀢𑁆𑀢𑀸, 𑀉𑀧𑀘𑀸𑀭𑀪𑀸𑀯𑀦𑀸𑀬 𑀘 𑀢𑁂 𑀧𑀳𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀬𑀤𑀺𑀧𑀺 𑀢𑀸𑀬 𑀢𑁂𑀲𑀼 𑀢𑀡𑁆𑀳𑀸 𑀧𑀳𑀻𑀬𑀢𑀺, 𑀦 𑀧𑀦 𑀲𑀯𑀺𑀲𑁂𑀲𑀁. 𑀲𑀯𑀺𑀲𑁂𑀲𑀜𑁆𑀳𑀺 𑀢𑀢𑁆𑀣 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀅𑀧𑁆𑀧𑀦𑀸𑀬 𑀏𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀦𑀸𑀓𑁆𑀔𑀡𑁂𑀬𑁂𑀯𑀸’’𑀢𑀺𑀆𑀤𑀺. 𑀧𑀳𑀸𑀦𑀗𑁆𑀕𑀢𑀸𑀧𑀺 𑀅𑀢𑀺𑀲𑀬𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀲𑁆𑀲. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀺𑀯𑀗𑁆𑀕𑀫𑁂𑀯𑁂𑀢𑀁 𑀛𑀸𑀦𑀁, 𑀢𑀲𑁆𑀫𑀸. 𑀢𑀦𑁆𑀢𑀺 𑀯𑀺𑀪𑀗𑁆𑀕𑁂 𑀯𑀘𑀦𑀁. 𑀭𑀣𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀁 𑀯𑀺𑀬 𑀲𑀫𑁆𑀧𑀲𑀸𑀤𑁄 𑀛𑀸𑀦𑀲𑁆𑀲 𑀧𑀭𑀺𑀓𑁆𑀔𑀸𑀭𑁄, 𑀦 𑀛𑀸𑀦𑀗𑁆𑀕𑀦𑁆𑀢𑀺 𑀆𑀳 ‘‘𑀲𑀧𑀭𑀺𑀓𑁆𑀔𑀸𑀭𑀁 𑀛𑀸𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁨. 𑀉𑀧𑁆𑀧𑀺𑀮𑀸𑀯𑀺𑀢𑀦𑁆𑀢𑀺 𑀓𑀸𑀫𑀜𑁆𑀘𑀸𑀬𑀁 𑀧𑀭𑀺𑀕𑁆𑀕𑀳𑁂𑀲𑀼 𑀅𑀧𑀭𑀺𑀘𑁆𑀘𑀢𑁆𑀢𑀧𑁂𑀫𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀦𑁄 𑀢𑀡𑁆𑀳𑀸𑀲𑀳𑀕𑀢𑀸𑀬 𑀧𑀻𑀢𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀇𑀥 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀧𑀻𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸𑀧𑀺 𑀲𑀩𑁆𑀩𑀲𑁄 𑀧𑀻𑀢𑀺𑀬𑀁 𑀅𑀯𑀺𑀭𑀢𑁆𑀢𑀁, 𑀲𑀸𑀧𑀺 𑀅𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀺𑀮𑀸𑀯𑀺𑀢𑀁 𑀯𑀺𑀬𑀸𑀢𑀺 𑀯𑀸 𑀉𑀧𑁆𑀧𑀺𑀮𑀸𑀯𑀺𑀢𑀁. 𑀆𑀤𑀻𑀦𑀯𑀁 𑀳𑀺 𑀢𑀢𑁆𑀣 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁩. 𑀯𑀺𑀭𑀚𑁆𑀚𑀦𑀁 𑀯𑀺𑀭𑀸𑀕𑁄. 𑀢𑀁 𑀧𑀦 𑀯𑀺𑀭𑀚𑁆𑀚𑀦𑀁 𑀦𑀺𑀩𑁆𑀩𑀺𑀦𑁆𑀤𑀦𑀫𑀼𑀔𑁂𑀦 𑀳𑀻𑀴𑀦𑀁 𑀯𑀸 𑀢𑀧𑁆𑀧𑀝𑀺𑀩𑀤𑁆𑀥𑀭𑀸𑀕𑀧𑁆𑀧𑀳𑀸𑀦𑀁 𑀯𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸’’𑀢𑀺 𑀆𑀳. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬𑀸𑀢𑀺 ‘‘𑀬𑀤𑁂𑀯 𑀢𑀢𑁆𑀣 𑀧𑀻𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬. 𑀲𑀫𑁆𑀧𑀺𑀡𑁆𑀟𑀦𑀁 𑀲𑀫𑀼𑀘𑁆𑀘𑀬𑁄.

𑀫𑀕𑁆𑀕𑁄𑀢𑀺 𑀉𑀧𑀸𑀬𑁄. 𑀢𑀤𑀥𑀺𑀕𑀫𑀸𑀬𑀸𑀢𑀺 𑀢𑀢𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬.

𑁮𑁪. 𑀉𑀧𑀧𑀢𑁆𑀢𑀺𑀢𑁄𑀢𑀺 ¶ 𑀲𑀫𑀯𑀸𑀳𑀺𑀢𑀪𑀸𑀯𑁂𑀦 𑀧𑀢𑀺𑀭𑀽𑀧𑀢𑁄. 𑀛𑀸𑀦𑀼𑀧𑁂𑀓𑁆𑀔𑀸𑀧𑀺 𑀲𑀫𑀯𑀸𑀳𑀺𑀢𑀫𑁂𑀯 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀫𑀁 𑀧𑀲𑁆𑀲𑀢𑀻’’𑀢𑀺. 𑀯𑀺𑀲𑀤𑀸𑀬𑀸𑀢𑀺 ¶ 𑀧𑀭𑀺𑀩𑁆𑀬𑀢𑁆𑀢𑀸𑀬 𑀲𑀁𑀓𑀺𑀮𑁂𑀲𑀯𑀺𑀕𑀫𑁂𑀦. 𑀯𑀺𑀧𑀼𑀮𑀸𑀬𑀸𑀢𑀺 𑀫𑀳𑀢𑀺𑀬𑀸 𑀲𑀸𑀢𑀺𑀲𑀬𑀁 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀣𑀸𑀫𑀕𑀢𑀸𑀬𑀸𑀢𑀺 𑀧𑀻𑀢𑀺𑀯𑀺𑀕𑀫𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀬.

𑀧𑀭𑀺𑀲𑀼𑀤𑁆𑀥𑀧𑀓𑀢𑀺 𑀔𑀻𑀡𑀸𑀲𑀯𑀧𑀓𑀢𑀺 𑀦𑀺𑀓𑁆𑀓𑀺𑀮𑁂𑀲𑀢𑀸. 𑀲𑀢𑁆𑀢𑁂𑀲𑀼 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀳𑁂𑀢𑀼𑀓𑁄 𑀲𑀫𑀪𑀸𑀯𑀤𑀲𑁆𑀲𑀦𑀸𑀓𑀸𑀭𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸.

𑀲𑀳𑀚𑀸𑀢𑀥𑀫𑁆𑀫𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀪𑀸𑀯𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀅𑀮𑀻𑀦𑀸𑀦𑀼𑀤𑁆𑀥𑀢𑀸 𑀦𑀺𑀭𑀲𑁆𑀲𑀸𑀤𑀢𑀸𑀬 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀩𑁆𑀬𑀸𑀧𑀸𑀭𑀸𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸.

𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀧𑀸𑀢𑀭𑀳𑀺𑀢𑀁 𑀫𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀁 𑀉𑀧𑁂𑀓𑁆𑀔𑀸. 𑀢𑀤𑁂𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀢𑀸𑀤𑀺𑀲𑀲𑁆𑀲 𑀯𑀻𑀭𑀺𑀬𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀬 𑀲𑀫𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀉𑀧𑁂𑀓𑁆𑀔𑀻𑀬𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀯𑀻𑀭𑀺𑀬𑀫𑁂𑀯 𑀉𑀧𑁂𑀓𑁆𑀔𑀸 𑀯𑀻𑀭𑀺𑀬𑀼𑀧𑁂𑀓𑁆𑀔𑀸.

‘‘𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀻𑀯𑀭𑀡𑁂…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁭) 𑀏𑀯𑀫𑀸𑀕𑀢𑀸 𑀇𑀫𑀸 𑀅𑀝𑁆𑀞 𑀲𑀫𑀸𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁…𑀧𑁂… 𑀉𑀧𑀸𑀬𑀸𑀲𑀁…𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀕𑀢𑀸 𑀇𑀫𑀸 𑀤𑀲 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁆𑀣 𑀘 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀦𑀺 𑀧𑀝𑀺𑀲𑀗𑁆𑀔𑀸𑀬 𑀲𑀪𑀸𑀯𑀢𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀢𑀺𑀝𑁆𑀞𑀫𑀸𑀦𑀸 𑀦𑀻𑀯𑀭𑀡𑀸𑀤𑀺𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸 𑀢𑁂𑀲𑀁 𑀕𑀳𑀡𑁂 𑀉𑀧𑁆𑀧𑀸𑀤𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑀻 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀕𑀳𑀡𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸.

𑀢𑀢𑁆𑀣 ¶ ¶ 𑀉𑀧𑁆𑀧𑀸𑀤𑀦𑁆𑀢𑀺 𑀧𑀼𑀭𑀺𑀫𑀓𑀫𑁆𑀫𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀇𑀥 𑀉𑀧𑁆𑀧𑀢𑁆𑀢𑀺𑀫𑀸𑀳. 𑀧𑀯𑀢𑁆𑀢𑀦𑁆𑀢𑀺 𑀢𑀣𑀸𑀉𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀺𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀕𑀢𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀆𑀬𑀽𑀳𑀦𑀦𑁆𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺𑀁. 𑀕𑀢𑀺𑀦𑁆𑀢𑀺 𑀬𑀸𑀬 𑀕𑀢𑀺𑀬𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁. 𑀉𑀧𑀧𑀢𑁆𑀢𑀺𑀦𑁆𑀢𑀺 ‘‘𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸’’𑀢𑀺 (𑀧𑀝𑀺. 𑀫. 𑁧.𑁭𑁨) 𑀏𑀢𑁆𑀣 ‘‘𑀉𑀧𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁. 𑀚𑀸𑀢𑀺𑀦𑁆𑀢𑀺 𑀚𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀁 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺𑀁. 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀏𑀢𑁆𑀣 𑀘 𑀉𑀧𑁆𑀧𑀸𑀤𑀸𑀤𑀬𑁄 𑀧𑀜𑁆𑀘𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀯𑀺𑀲𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀲𑁂𑀲𑀸 𑀢𑁂𑀲𑀁 𑀯𑁂𑀯𑀘𑀦𑀯𑀲𑁂𑀦. ‘‘𑀦𑀺𑀩𑁆𑀩𑀢𑁆𑀢𑀺, 𑀚𑀸𑀢𑀻’’𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀉𑀧𑁆𑀧𑀸𑀤𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀘 𑀯𑁂𑀯𑀘𑀦𑀁, ‘‘𑀕𑀢𑀺, 𑀉𑀧𑀧𑀢𑁆𑀢𑀺 𑀘𑀸’’𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀯𑀢𑁆𑀢𑀲𑁆𑀲, 𑀚𑀭𑀸𑀤𑀬𑁄 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀯𑀲𑁂𑀦 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀘𑀢𑀲𑁆𑀲𑁄, 𑀢𑀣𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘𑀢𑀲𑁆𑀲𑁄, 𑀲𑀼𑀜𑁆𑀜𑀢𑀯𑀺𑀳𑀸𑀭𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀯𑀲𑁂𑀦 𑀤𑁆𑀯𑁂𑀢𑀺 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸.

𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀬𑀤𑀢𑁆𑀣𑀻𑀢𑀺 𑀬𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀁 𑀉𑀧𑀮𑀩𑁆𑀪𑀢𑀺. 𑀬𑀁 𑀪𑀽𑀢𑀦𑁆𑀢𑀺 𑀬𑀁 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀢𑀁 𑀧𑀚𑀳𑀢𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀧𑀚𑀳𑀦𑁆𑀢𑁄 𑀲𑀫𑁆𑀫𑀤𑁂𑀯 𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸 𑀢𑀧𑁆𑀧𑀝𑀺𑀩𑀤𑁆𑀥𑀘𑁆𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀢𑀺, 𑀬𑀣𑀸 𑀆𑀬𑀢𑀺𑀁 𑀆𑀤𑀸𑀦𑀁 𑀦 𑀳𑁄𑀢𑀺, 𑀢𑀣𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀚𑀳𑀢𑀺. 𑀢𑀣𑀸𑀪𑀽𑀢𑁄 𑀘 𑀢𑀢𑁆𑀣 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀯𑀺𑀘𑀺𑀦𑀦𑁂𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑁂𑀧𑀺.

𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀫𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀢𑀸𑀬 𑀲𑀫𑀯𑀸𑀳𑀺𑀢𑀪𑀽𑀢𑀸. 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀺𑀲𑀩𑁆𑀩𑀧𑀘𑁆𑀘𑀦𑀻𑀓𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀧𑀘𑁆𑀘𑀦𑀻𑀓𑀧𑀭𑀺𑀲𑀼𑀤𑁆𑀥𑀸. 𑀢𑁂𑀲𑀁 𑀯𑀽𑀧𑀲𑀦𑁆𑀢𑀢𑁆𑀢𑀸 𑀧𑀘𑁆𑀘𑀦𑀻𑀓𑀯𑀽𑀧𑀲𑀫𑀦𑁂𑀧𑀺 𑀅𑀩𑁆𑀬𑀸𑀧𑀸𑀭𑀪𑀽𑀢𑀸 𑀅𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀸, 𑀅𑀩𑁆𑀬𑀸𑀧𑀸𑀭𑀢𑀁 𑀯𑀸 𑀧𑀢𑁆𑀢𑀸.

𑀬𑀤𑀺 𑀅𑀢𑁆𑀣𑀢𑁄 𑀏𑀓𑀸, 𑀓𑀣𑀫𑀬𑀁 𑀪𑁂𑀤𑁄𑀢𑀺 𑀆𑀳 ‘‘𑀢𑁂𑀦 𑀢𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀢𑀺𑀧𑀺 𑀲𑀪𑀸𑀯𑀢𑁄 𑀅𑀪𑁂𑀤𑁂 𑀬𑁂𑀳𑀺 𑀧𑀦 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀲𑁆𑀯𑀸𑀬𑀫𑀺𑀫𑀸𑀲𑀁 𑀅𑀯𑀢𑁆𑀣𑀸𑀪𑁂𑀤𑁄, 𑀢𑁂𑀲𑀁 𑀏𑀓𑀚𑁆𑀛𑀁 𑀅𑀧𑁆𑀧𑀯𑀢𑁆𑀢𑀺𑀢𑁄 𑀦 𑀢𑀸𑀲𑀁 𑀅𑀪𑁂𑀤𑁄, 𑀏𑀓𑀚𑁆𑀛𑀁 𑀯𑀸 𑀧𑀯𑀢𑁆𑀢𑀺, 𑀢𑀲𑁆𑀫𑀸. 𑀢𑁂𑀦𑀸𑀳 ‘‘𑀬𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸’’𑀢𑀺𑀆𑀤𑀺.

𑀏𑀓𑀻𑀪𑀸𑀯𑁄𑀢𑀺 ¶ 𑀏𑀓𑀢𑀸. 𑀲𑀢𑀺𑀧𑀺 𑀫𑀚𑁆𑀛𑀢𑁆𑀢𑀸𑀪𑀸𑀯𑀲𑀸𑀫𑀜𑁆𑀜𑁂 𑀯𑀺𑀲𑀬𑀪𑁂𑀤𑁂𑀦 𑀧𑀦𑀲𑁆𑀲𑀸 𑀪𑁂𑀤𑁄. 𑀬𑀫𑀢𑁆𑀣𑀁 ¶ 𑀲𑀦𑁆𑀥𑀸𑀬 ‘‘𑀓𑀺𑀘𑁆𑀘𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁, 𑀢𑀁 𑀧𑀚𑀳𑀢𑀺, 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀫. 𑀦𑀺. 𑁩.𑁭𑁧; 𑀅. 𑀦𑀺. 𑁭.𑁫𑁫). 𑀢𑀢𑁆𑀣 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀧𑀚𑀳𑀢𑀺. 𑀤𑀺𑀝𑁆𑀞𑀲𑁄𑀯𑀢𑁆𑀢𑀺𑀓𑀢𑁆𑀢𑀬𑀲𑁆𑀲 𑀲𑀩𑁆𑀩𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀯𑀺𑀬 𑀤𑀺𑀝𑁆𑀞𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀪𑀽𑀢𑀲𑁆𑀲 𑀲𑀗𑁆𑀔𑀸𑀭𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑁆𑀲 𑀲𑀼𑀤𑀺𑀝𑁆𑀞𑀢𑁆𑀢𑀸 𑀢𑁂𑀲𑀁 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀲𑀺𑀤𑁆𑀥𑀸𑀬 𑀢𑀣𑀸 𑀤𑀺𑀝𑁆𑀞𑀸𑀤𑀻𑀦𑀯𑀸𑀦𑀁 𑀢𑁂𑀲𑀁 𑀕𑀳𑀡𑁂𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀲𑀺𑀤𑁆𑀥𑀸𑀯 𑀳𑁄𑀢𑀺, 𑀲𑀩𑁆𑀩𑀲𑁄 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀢𑁆𑀢𑀸 𑀅𑀚𑁆𑀛𑀸𑀲𑀬𑀲𑁆𑀲.

𑀅𑀦𑀸𑀪𑁄𑀕𑀭𑀲𑀸𑀢𑀺 𑀧𑀡𑀻𑀢𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀯𑀦𑀢𑀺𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀺 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀁 𑀢𑀲𑁆𑀫𑀺𑀁 𑀲𑀼𑀔𑁂 𑀅𑀩𑁆𑀬𑀸𑀯𑀝𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀅𑀩𑁆𑀬𑀸𑀧𑀸𑀭𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀔𑁄𑀪𑀁, 𑀉𑀧𑁆𑀧𑀺𑀮𑀯𑀜𑁆𑀘 𑀆𑀯𑀳𑀦𑁆𑀢𑁂𑀳𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑁆𑀢𑀸 𑀅𑀧𑀭𑀺𑀩𑁆𑀬𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀓𑀺𑀘𑁆𑀘𑀁. 𑀢𑀤𑀪𑀸𑀯𑀢𑁄 𑀇𑀥 𑀧𑀭𑀺𑀩𑁆𑀬𑀢𑁆𑀢𑀁.

𑀦𑀺𑀝𑁆𑀞𑀺𑀢𑀸 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻’’𑀢𑀺 𑀏𑀢𑀲𑁆𑀲

𑀲𑀩𑁆𑀩𑀲𑁄 𑀅𑀢𑁆𑀣𑀯𑀡𑁆𑀡𑀦𑀸.

𑁮𑁫. ‘‘𑀲𑀭𑀢𑀻𑀢𑀺 𑀲𑀢𑁄’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀫𑀤𑁂𑀯 𑀧𑀚𑀸𑀦𑀸𑀢𑀺. 𑀲𑀭𑀡𑀁 𑀘𑀺𑀦𑁆𑀢𑀦𑀁 𑀉𑀧𑀝𑁆𑀞𑀸𑀦𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀭𑀡𑀮𑀓𑁆𑀔𑀡𑀸. 𑀲𑀫𑁆𑀫𑀼𑀲𑁆𑀲𑀦𑀧𑀝𑀺𑀧𑀓𑁆𑀔𑁄 𑀅𑀲𑀫𑁆𑀫𑀼𑀲𑁆𑀲𑀦𑀁, 𑀢𑀁 𑀓𑀺𑀘𑁆𑀘𑀁 𑀏𑀢𑀺𑀲𑁆𑀲𑀸𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸. 𑀓𑀺𑀮𑁂𑀲𑁂𑀳𑀺 𑀆𑀭𑀓𑁆𑀔𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀢𑀢𑁄 𑀯𑀸 𑀆𑀭𑀓𑁆𑀔𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀲𑀫𑁆𑀫𑀼𑀬𑁆𑀳𑀦𑀁 𑀲𑀫𑁆𑀫𑀤𑁂𑀯 𑀧𑀚𑀸𑀦𑀦𑀁, 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑁄 𑀯𑀸 𑀅𑀲𑀫𑁆𑀫𑁄𑀳𑁄. 𑀢𑀻𑀭𑀡𑀁 𑀓𑀺𑀘𑁆𑀘𑀲𑁆𑀲 𑀧𑀸𑀭𑀕𑀫𑀦𑀁. 𑀧𑀯𑀺𑀘𑀬𑁄 𑀯𑀻𑀫𑀁𑀲𑀸.

𑀓𑀸𑀫𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀻𑀦𑀺 𑀉𑀧𑀸𑀤𑀸𑀬 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺𑀧𑀺 𑀲𑀼𑀔𑀼𑀫𑀸𑀦𑁂𑀯, 𑀇𑀫𑀁 𑀧𑀦 𑀉𑀧𑀭𑀺𑀛𑀸𑀦𑀁 𑀉𑀧𑀸𑀤𑀸𑀬 ‘‘𑀑𑀴𑀸𑀭𑀺𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀘 𑀑𑀴𑀸𑀭𑀺𑀓𑀢𑀸 𑀯𑀺𑀢𑀓𑁆𑀓𑀸𑀤𑀺𑀣𑀽𑀮𑀗𑁆𑀕𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 ‘‘𑀩𑀳𑀼𑀘𑁂𑀢𑀲𑀺𑀓𑀢𑀸𑀬𑀸’’𑀢𑀺 𑀘 𑀯𑀤𑀦𑁆𑀢𑀺 ¶ . 𑀕𑀢𑀺 𑀲𑀼𑀔𑀸 𑀳𑁄𑀢𑀺 𑀢𑀢𑁆𑀣 𑀛𑀸𑀦𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀩𑁆𑀬𑀢𑁆𑀢𑀁 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀁 ‘‘𑀇𑀤𑀁 𑀦𑀸𑀫 𑀤𑀼𑀓𑁆𑀓𑀭𑀁 𑀓𑀭𑀻𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑁂𑀦 𑀲𑀼𑀔𑀼𑀫𑀢𑁆𑀢𑀸𑀢𑀺 𑀅𑀬𑀫𑀢𑁆𑀣𑁄 𑀓𑀸𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀧𑀺 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 ¶ 𑀅𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁂𑀲𑀼 𑀧𑀻𑀢𑀺𑀲𑀼𑀔𑁂𑀲𑀼 𑀧𑀻𑀢𑀺𑀲𑀗𑁆𑀔𑀸𑀢𑀲𑁆𑀲 𑀑𑀴𑀸𑀭𑀺𑀓𑀗𑁆𑀕𑀲𑁆𑀲 𑀧𑀳𑀸𑀦𑁂𑀦 𑀲𑀼𑀔𑀼𑀫𑀢𑀸𑀬 𑀇𑀥 𑀲𑀸𑀢𑀺𑀲𑀬𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑁆𑀬𑀸𑀧𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀲𑀲𑁆𑀲𑀸’’𑀢𑀺𑀆𑀤𑀺. 𑀧𑀼𑀦𑀤𑁂𑀯 𑀧𑀻𑀢𑀺𑀁 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀳𑀸𑀦𑀪𑀸𑀕𑀺𑀬𑀁 𑀛𑀸𑀦𑀁 𑀲𑀺𑀬𑀸 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀲𑀫𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸’’𑀢𑀺. ‘‘𑀇𑀤𑀜𑁆𑀘 𑀅𑀢𑀺𑀫𑀥𑀼𑀭𑀁 𑀲𑀼𑀔’’𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀲𑀦𑁆𑀥𑀸𑀬𑀸𑀳. 𑀅𑀢𑀺𑀫𑀥𑀼𑀭𑀢𑀸 𑀘𑀲𑁆𑀲 𑀧𑀳𑀸𑀲𑁄𑀤𑀕𑁆𑀬𑀲𑀪𑀸𑀯𑀸𑀬 𑀧𑀻𑀢𑀺𑀬𑀸 𑀅𑀪𑀸𑀯𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀦𑁆𑀢𑀺 ‘‘𑀲𑀢𑁄, 𑀲𑀫𑁆𑀧𑀚𑀸𑀦𑁄’’𑀢𑀺 𑀧𑀤𑀤𑁆𑀯𑀬𑀁.

𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑀲𑁆𑀫𑀸 𑀢𑀲𑁆𑀲 𑀛𑀸𑀦𑀲𑀫𑀗𑁆𑀕𑀺𑀦𑁄 𑀬𑀁 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀁 𑀲𑁄 𑀧𑀝𑀺𑀲𑀁𑀯𑁂𑀤𑁂𑀬𑁆𑀬. 𑀬𑀁 𑀯𑀸 𑀢𑀦𑁆𑀢𑀺 𑀅𑀣 𑀯𑀸 𑀬𑀁 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁. 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀢𑀢𑁄 𑀲𑀫𑀼𑀝𑁆𑀞𑀺𑀢𑁂𑀦 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀅𑀲𑁆𑀲 𑀛𑀸𑀦𑀲𑀫𑀗𑁆𑀕𑀺𑀦𑁄 𑀭𑀽𑀧𑀓𑀸𑀬𑁄 𑀬𑀲𑁆𑀫𑀸 𑀨𑀼𑀝𑁄. 𑀬𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀨𑀼𑀝𑀢𑁆𑀢𑀸 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀛𑀸𑀦𑀲𑀫𑀗𑁆𑀕𑀻 𑀓𑀸𑀬𑀺𑀓𑀁 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬. 𑀢𑀲𑁆𑀫𑀸 𑀏𑀢𑀁 𑀘𑁂𑀢𑀲𑀺𑀓𑀓𑀸𑀬𑀺𑀓𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀆𑀳𑀸’’𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀦𑀸𑀫𑀓𑀸𑀬𑁂𑀦 𑀘𑁂𑀢𑀲𑀺𑀓𑀲𑀼𑀔𑀁, 𑀓𑀸𑀬𑀺𑀓𑀲𑀼𑀔𑀳𑁂𑀢𑀼𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀦 𑀓𑀸𑀬𑀺𑀓𑀲𑀼𑀔𑀜𑁆𑀘 𑀛𑀸𑀦𑀲𑀫𑀗𑁆𑀕𑀻 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀝𑀢𑁆𑀢𑀸𑀢𑀺 𑀩𑁆𑀬𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀉𑀤𑀓𑁂𑀦 𑀨𑀼𑀝𑀲𑀭𑀻𑀭𑀲𑁆𑀲 𑀢𑀸𑀤𑀺𑀲𑁂 𑀦𑀸𑀢𑀺𑀧𑀘𑁆𑀘𑀦𑀻𑀓𑁂 𑀯𑀸𑀢𑀸𑀤𑀺𑀨𑁄𑀝𑁆𑀞𑀩𑁆𑀩𑁂 𑀨𑀼𑀝𑁂 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁂𑀢𑁂𑀳𑀺 𑀨𑀼𑀝𑀲𑀭𑀻𑀭𑀲𑁆𑀲𑀸𑀢𑀺. 𑀅𑀧𑀭𑁄 𑀦𑀬𑁄 𑁋 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀏𑀢𑁆𑀣 𑀓𑀣𑀫𑀸𑀪𑁄𑀕𑁂𑀦 𑀯𑀺𑀦𑀸 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸𑀢𑀺 𑀘𑁄𑀤𑀦𑀸𑀬𑀁 ‘‘𑀓𑀺𑀜𑁆𑀘𑀸𑀧𑀺…𑀧𑁂… 𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺. 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀲𑁆𑀫𑀸 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀸𑀦𑀺 𑀲𑀳𑀸𑀧𑀺 𑀆𑀪𑁄𑀕𑁂𑀦 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀯𑀸 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁮𑁬. 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀁𑀛𑀸𑀦𑀳𑁂𑀢𑀽’’𑀢𑀺. ‘‘𑀆𑀘𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀓𑀺𑀢𑁆𑀢𑀦𑀢𑁆𑀣𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀲𑀁𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀓𑀺𑀦𑁆𑀢𑀻𑀢𑀺 𑀧𑀲𑀁𑀲𑀦𑀸𑀓𑀸𑀭𑀧𑀼𑀘𑁆𑀙𑀸. 𑀏𑀤𑀺𑀲𑁂𑀲𑀼 ¶ 𑀞𑀸𑀦𑁂𑀲𑀼 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀲𑀫𑁆𑀧𑀚𑀜𑁆𑀜𑀫𑁆𑀧𑀺 𑀕𑀳𑀺𑀢𑀁 𑀳𑁄𑀢𑀻𑀢𑀺 𑀇𑀥 𑀧𑀸𑀴𑀺𑀬𑀁 𑀲𑀢𑀺𑀬𑀸 𑀏𑀯 𑀕𑀳𑀺𑀢𑀢𑁆𑀢𑀸 𑀏𑀯𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 ‘‘𑀲𑀢𑀺𑀫𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀯𑀸.

𑀛𑀸𑀦𑀓𑁆𑀔𑀡𑁂 𑀘𑁂𑀢𑀲𑀺𑀓𑀲𑀼𑀔𑀫𑁂𑀯 𑀮𑀩𑁆𑀪𑀢𑀻𑀢𑀺 ‘‘𑀲𑀼𑀔𑀁 𑀦𑀸𑀫𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑀺𑀬𑀦𑁆𑀢𑀺 ¶ 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀳𑀺 𑀅𑀯𑀺𑀲𑁂𑀲𑁄, 𑀯𑀺𑀲𑁂𑀲𑁄 𑀘 𑀯𑀼𑀢𑁆𑀢𑁄𑀢𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁭. 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺 𑀯𑀢𑁆𑀯𑀸 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀧𑀤𑀦𑁆𑀢𑀭𑀲𑀗𑁆𑀕𑀳𑀺𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀲𑀸𑀢𑀺𑀲𑀬𑀁 𑀲𑀼𑀔𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑀢𑁄. 𑀢𑀸𑀦𑀻𑀢𑀺 𑀅𑀧𑁆𑀧𑀦𑀸𑀯𑀻𑀣𑀺𑀬𑀁 𑀚𑀯𑀦𑀸𑀦𑀺 𑀲𑀦𑁆𑀥𑀸𑀬𑀸𑀳.

𑁮𑁮. ‘‘𑀧𑀼𑀩𑁆𑀩𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀤𑀸 𑀧𑀦 𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀻𑀢𑀺 𑀘𑁄𑀤𑀦𑀸𑀬𑀁 𑀆𑀳 ‘‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂’’𑀢𑀺. 𑀏𑀯𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀳𑀸𑀦𑀓𑁆𑀓𑀫𑁄 𑀦𑀸𑀫 𑀧𑀳𑀸𑀬𑀓𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀝𑀺𑀧𑀸𑀝𑀺. 𑀢𑁂𑀦 𑀧𑀦 𑀯𑀼𑀘𑁆𑀘𑀫𑀸𑀦𑁂 ‘‘𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀲𑁆𑀫𑀸 𑀇𑀢𑁄 𑀅𑀜𑁆𑀜𑀣𑀸 𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺. 𑀅𑀣 𑀓𑀲𑁆𑀫𑀸 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀓𑀢𑁆𑀣 𑀘 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑁄𑀥𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺. 𑀢𑁂𑀦 ‘‘𑀓𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀸𑀬𑀁, ‘‘𑀏𑀢𑁆𑀣𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀛𑀸𑀦𑀸𑀦𑀼𑀪𑀸𑀯𑀦𑀺𑀫𑀺𑀢𑁆𑀢𑀁 𑀳𑀺 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀁 ‘‘𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀲𑀼𑀝𑁆𑀞𑀼 𑀧𑀳𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑁂𑀦 𑀯𑀽𑀧𑀲𑀫𑁄.

𑀦𑀸𑀦𑀸𑀯𑀚𑁆𑀚𑀦𑁂𑀢𑀺 𑀬𑁂𑀦 𑀆𑀯𑀚𑁆𑀚𑀦𑁂𑀦 𑀅𑀧𑁆𑀧𑀦𑀸𑀯𑀻𑀣𑀺, 𑀢𑀢𑁄 𑀪𑀺𑀦𑁆𑀦𑀸𑀯𑀚𑁆𑀚𑀦𑁂, 𑀅𑀦𑁂𑀓𑀸𑀯𑀚𑁆𑀚𑀦𑁂 𑀯𑀸. 𑀅𑀧𑁆𑀧𑀦𑀸𑀯𑀻𑀣𑀺𑀬𑀜𑁆𑀳𑀺 𑀉𑀧𑀘𑀸𑀭𑁄 𑀏𑀓𑀸𑀯𑀚𑁆𑀚𑀦𑁄, 𑀇𑀢𑀭𑁄 𑀅𑀦𑁂𑀓𑀸𑀯𑀚𑁆𑀚𑀦𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀦𑀢𑁄. 𑀯𑀺𑀲𑀫𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑁄 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁄. 𑀧𑀻𑀢𑀺𑀨𑀭𑀡𑁂𑀦𑀸𑀢𑀺 𑀧𑀻𑀢𑀺𑀬𑀸 𑀨𑀭𑀡𑀭𑀲𑀢𑁆𑀢𑀸, 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀯𑀸 𑀧𑀡𑀻𑀢𑀭𑀽𑀧𑀸𑀦𑀁 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 ¶ 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑁄 ‘‘𑀧𑀳𑀻𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 ‘‘𑀧𑀳𑀻𑀦𑀲𑁆𑀲𑀸𑀧𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲𑀸’’𑀢𑀺. 𑀏𑀢𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲 𑀫𑀬𑁆𑀳𑀁 𑀅𑀢𑀺𑀘𑀺𑀭𑀁 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀓𑀸𑀬𑁄𑀧𑀺 𑀓𑀺𑀮𑀫𑀺𑀘𑀺𑀢𑁆𑀢𑀫𑁆𑀧𑀺 𑀉𑀳𑀜𑁆𑀜𑀻’’𑀢𑀺 𑀯𑀘𑀦𑀢𑁄 𑀓𑀸𑀬𑀘𑀺𑀢𑁆𑀢𑀔𑁂𑀤𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑁆𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 ¶ . ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀅𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀪𑀯𑁂𑀬𑁆𑀬.

𑀏𑀢𑁆𑀣 𑀘 𑀬𑀤𑁂𑀓𑁂 ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀛𑀸𑀦𑀮𑀸𑀪𑀻𑀦𑀫𑁆𑀧𑀺 𑀤𑁄𑀫𑀦𑀼𑀲𑁆𑀲𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦 𑀘 𑀅𑀦𑀻𑀯𑀭𑀡𑀲𑀪𑀸𑀯𑁄 𑀮𑁄𑀪𑁄 𑀯𑀺𑀬 𑀤𑁄𑀲𑁄𑀧𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀦 𑀳𑀺 𑀤𑁄𑀲𑁂𑀦 𑀯𑀺𑀦𑀸 𑀤𑁄𑀫𑀦𑀲𑁆𑀲𑀁 𑀧𑀯𑀢𑁆𑀢𑀢𑀺. 𑀦 𑀘𑁂𑀢𑁆𑀣 𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀢𑀢𑁆𑀣 𑀧𑀭𑀺𑀳𑀻𑀦𑀁 𑀛𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀤𑁄𑀫𑀦𑀲𑁆𑀲𑀁 𑀤𑀲𑁆𑀲𑀺𑀢𑀁, 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀛𑀸𑀦𑀮𑀸𑀪𑀻𑀦𑀁 𑀲𑀩𑁆𑀩𑀲𑁄 𑀤𑁄𑀫𑀦𑀲𑁆𑀲𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀧𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀦 𑀳𑁂𑀯 𑀔𑁄 𑀲𑁄 𑀧𑀳𑀻𑀦𑀚𑁆𑀛𑀸𑀦𑁄 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀅𑀦𑀻𑀯𑀭𑀡𑀲𑀪𑀸𑀯𑀲𑁆𑀲 𑀤𑁄𑀲𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀲𑀺𑀬𑀸, 𑀭𑀽𑀧𑀸𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦 𑀘 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 ‘‘𑀅𑀭𑀽𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺𑀆𑀤𑀻𑀲𑀼 𑀩𑁆𑀬𑀸𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀸𑀦𑀺 𑀅𑀦𑀼𑀤𑁆𑀥𑀝𑀸𑀦𑀺. 𑀦 𑀘𑁂𑀢𑁆𑀣 𑀦𑀻𑀯𑀭𑀡𑀢𑁆𑀢𑀸 𑀧𑀭𑀺𑀳𑀸𑀭𑁄, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀫𑁆𑀧𑀺 𑀅𑀦𑀻𑀯𑀭𑀡𑀸𑀦𑀁𑀬𑁂𑀯 𑀦𑀻𑀯𑀭𑀡𑀲𑀤𑀺𑀲𑀢𑀸𑀬 𑀦𑀻𑀯𑀭𑀡𑀧𑀭𑀺𑀬𑀸𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀧𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺, 𑀢𑀫𑁆𑀧𑀺 𑀅𑀓𑀸𑀭𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀘 𑀤𑁄𑀫𑀦𑀲𑁆𑀲𑁂𑀦 𑀛𑀸𑀦𑀢𑁄 𑀧𑀭𑀺𑀳𑀸𑀬𑀦𑀢𑁄. 𑀮𑀳𑀼𑀓𑁂𑀦 𑀧𑀦 𑀧𑀘𑁆𑀘𑀬𑁂𑀦 𑀧𑀭𑀺𑀳𑀻𑀦𑀁 𑀢𑀸𑀤𑀺𑀲𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀇𑀤𑀁 𑀧𑀦 𑀧𑀭𑀺𑀓𑀧𑁆𑀧𑀯𑀘𑀦𑀁 𑀉𑀧𑀘𑀸𑀭𑀓𑁆𑀔𑀡𑁂 𑀤𑁄𑀫𑀦𑀲𑁆𑀲𑀲𑁆𑀲 𑀅𑀧𑁆𑀧𑀳𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬’’𑀦𑁆𑀢𑀺. 𑀬𑀤𑀺 𑀧𑀦 𑀢𑀤𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀞𑀫𑀚𑁆𑀛𑀸𑀦𑀫𑁆𑀧𑀺𑀲𑁆𑀲 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀳𑀻𑀦𑀫𑁆𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀻𑀢𑀺 𑀯𑀺𑀬 𑀦 𑀤𑀽𑀭𑁂𑀢𑀺 𑀓𑀢𑁆𑀯𑀸 ¶ ‘‘𑀆𑀲𑀦𑁆𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀯𑀚𑁆𑀚𑀦𑀽𑀧𑀘𑀸𑀭𑁂 𑀧𑀳𑀻𑀦𑀫𑁆𑀧𑀺 𑀧𑀳𑀸𑀦𑀗𑁆𑀕𑀁 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀸𑀤𑀺𑀲𑀸𑀬 𑀆𑀲𑁂𑀯𑀦𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀬𑀣𑀸 𑀫𑀕𑁆𑀕𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀲𑀤𑀺𑀲𑀸𑀦𑀼𑀧𑀲𑁆𑀲𑀦𑀸𑀯 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀧𑁆𑀧𑀦𑀸𑀯𑀸𑀭𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀸𑀳𑀝𑀸𑀢𑀺 𑀲𑀫𑀸𑀦𑀻𑀢𑀸, 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀅𑀯𑀺𑀪𑀽𑀢𑀢𑀸𑀬 𑀲𑀼𑀔𑀼𑀫𑀸. 𑀢𑀢𑁄 𑀏𑀯 𑀅𑀦𑀼𑀫𑀺𑀦𑀺𑀢𑀩𑁆𑀩𑀲𑀪𑀸𑀯𑀢𑁆𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸. 𑀤𑀼𑀝𑁆𑀞𑀲𑁆𑀲𑀸𑀢𑀺 𑀤𑀼𑀝𑁆𑀞𑀧𑀬𑁄𑀕𑀲𑁆𑀲, 𑀤𑀼𑀤𑁆𑀤𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀸 𑀳𑁄𑀢𑀺 𑀏𑀲𑀸 𑀕𑀸𑀳𑀬𑀺𑀢𑀼𑀁 𑀅𑀜𑁆𑀜𑀸𑀧𑁄𑀳𑀦𑀦𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀤𑀼𑀓𑁆𑀔𑀫𑀲𑀼𑀔𑀸𑀬 ¶ 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀇𑀤𑀫𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀤𑀬𑁄 𑀳𑀺 𑀢𑀲𑁆𑀲𑀸 𑀧𑀘𑁆𑀘𑀬𑀸’’𑀢𑀺. 𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀤𑀬𑁄𑀢𑀺 𑀘 𑀲𑁄𑀧𑀘𑀸𑀭𑀸 𑀧𑀞𑀫𑀚𑁆𑀛𑀸𑀦𑀸𑀤𑀬𑁄𑀯𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸.

𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺. 𑀏𑀢𑀸𑀢𑀺 𑀲𑀼𑀔𑀸𑀤𑀬𑁄 𑀯𑁂𑀤𑀦𑀸.

𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲 𑀧𑀘𑁆𑀘𑀬𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀼𑀔𑀸𑀬 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲 𑀧𑀘𑁆𑀘𑀬𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀤𑀼𑀓𑁆𑀔𑀸𑀬 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺. 𑀲𑀼𑀔𑀸𑀤𑀺𑀖𑀸𑀢𑁂𑀦𑀸𑀢𑀺 𑀲𑀼𑀔𑀸𑀤𑀻𑀦𑀁 𑀧𑀳𑀸𑀦𑁂𑀦. 𑀅𑀲𑁆𑀲 𑀛𑀸𑀦𑀲𑁆𑀲.

𑀦 𑀤𑀼𑀓𑁆𑀔𑀦𑁆𑀢𑀺 𑀅𑀤𑀼𑀓𑁆𑀔𑀁, 𑀤𑀼𑀓𑁆𑀔𑀯𑀺𑀥𑀼𑀭𑀁. 𑀬𑀲𑁆𑀫𑀸 𑀢𑀢𑁆𑀣 𑀤𑀼𑀓𑁆𑀔𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀸𑀪𑀸𑀯𑁂𑀦𑀸’’𑀢𑀺. 𑀅𑀲𑀼𑀔𑀦𑁆𑀢𑀺 𑀏𑀢𑁆𑀣𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦𑀸𑀢𑀺 𑀤𑀼𑀓𑁆𑀔𑀲𑀼𑀔𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦. ‘‘𑀧𑀝𑀺𑀧𑀓𑁆𑀔𑀪𑀽𑀢’’𑀦𑁆𑀢𑀺 𑀇𑀤𑀁 𑀇𑀥 𑀢𑀢𑀺𑀬𑀯𑁂𑀤𑀦𑀸𑀬 𑀤𑀼𑀓𑁆𑀔𑀸𑀤𑀻𑀦𑀁 𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀺𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀲𑁆𑀲 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀲𑁆𑀲, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀁 𑀯𑀸 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸. 𑀢𑀢𑁄 𑀏𑀯 𑀫𑀚𑁆𑀛𑀢𑁆𑀢𑀭𑀲𑀸. 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀦 𑀯𑀺𑀪𑀽𑀢𑀸𑀓𑀸𑀭𑀸 ¶ , 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀫𑀺𑀕𑀕𑀢𑀫𑀕𑁆𑀕𑁄 𑀯𑀺𑀬 𑀢𑁂𑀳𑀺 𑀅𑀦𑀼𑀫𑀸𑀢𑀩𑁆𑀩𑀸 𑀅𑀯𑀺𑀪𑀽𑀢𑀸𑀓𑀸𑀭𑁄𑀧𑀝𑁆𑀞𑀸𑀦𑀸. 𑀲𑀼𑀔𑀦𑀺𑀭𑁄𑀥𑁄 𑀦𑀸𑀫 𑀇𑀥 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁄, 𑀲𑁄 𑀧𑀤𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀲𑀼𑀔𑀦𑀺𑀭𑁄𑀥𑀧𑀤𑀝𑁆𑀞𑀸𑀦𑀸.

𑁮𑁯. ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’𑀦𑁆𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑁂𑀢𑀁 𑀲𑀫𑀸𑀲𑀧𑀤𑀦𑁆𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’𑀦𑁆𑀢𑀺. 𑀲𑀩𑁆𑀩𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑀭𑀺𑀲𑀼𑀤𑁆𑀥𑀸𑀬 𑀧𑀘𑁆𑀘𑀦𑀻𑀓𑀲𑀫𑀦𑁂𑀧𑀺 𑀅𑀩𑁆𑀬𑀸𑀯𑀝𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀢𑀺 𑀲𑀫𑁆𑀧𑀳𑀁𑀲𑀦𑀧𑀜𑁆𑀜𑀸 𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑀸, 𑀲𑀼𑀯𑀺𑀲𑀤𑀸 𑀘 𑀳𑁄𑀢𑀻𑀢𑀺 𑀆𑀳 ‘‘𑀬𑀸 𑀘 𑀢𑀲𑁆𑀲𑀸 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀲𑀸 𑀉𑀧𑁂𑀓𑁆𑀔𑀸𑀬 𑀓𑀢𑀸, 𑀦 𑀅𑀜𑁆𑀜𑁂𑀦𑀸’’𑀢𑀺. 𑀬𑀤𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀇𑀥 ‘‘𑀉𑀧𑁂𑀓𑁆𑀔𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀓𑀣𑀁 𑀲𑀢𑀺𑀬𑁂𑀯 ‘‘𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺.

𑀏𑀯𑀫𑁆𑀧𑀺 ¶ 𑀓𑀲𑁆𑀫𑀸 𑀅𑀬𑀫𑁂𑀯 𑀲𑀢𑀺 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀢𑀻𑀲𑀼 𑀛𑀸𑀦𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀧𑀘𑁆𑀘𑀦𑀻𑀓𑀸𑀪𑀺𑀪𑀯𑀢𑁄, 𑀲𑀳𑀸𑀬𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀘 𑀅𑀧𑀸𑀭𑀺𑀲𑀼𑀤𑁆𑀥𑀺, 𑀢𑀣𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁. 𑀢𑀤𑀪𑀸𑀯𑀢𑁄 𑀇𑀥 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀇𑀫𑀫𑀢𑁆𑀣𑀁 𑀭𑀽𑀧𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸𑀢𑀺 𑀲𑀽𑀭𑀺𑀬𑀧𑁆𑀧𑀪𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑀢𑁆𑀢𑀸. 𑀅𑀢𑀺𑀓𑁆𑀔𑀢𑀸𑀬 𑀘𑀦𑁆𑀤𑀮𑁂𑀔𑀸 𑀯𑀺𑀬 𑀭𑀢𑁆𑀢𑀺𑀧𑀺 𑀲𑁄𑀫𑁆𑀫𑀲𑀪𑀸𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀫𑁂𑀯 𑀘 𑀘𑀦𑁆𑀤𑀮𑁂𑀔𑀸 𑀲𑀫𑀼𑀚𑁆𑀚𑀮𑀢𑀻𑀢𑀺 𑀲𑀸 𑀢𑀲𑁆𑀲𑀸 𑀲𑀪𑀸𑀕𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀸’’𑀢𑀺 𑀆𑀳.

‘‘𑀏𑀓𑀯𑀻𑀣𑀺𑀬’’𑀦𑁆𑀢𑀺 𑀇𑀤𑀁 𑀢𑀢𑁆𑀣 𑀲𑁄𑀫𑀦𑀲𑁆𑀲𑀲𑁆𑀲 𑀏𑀓𑀁𑀲𑁂𑀦 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀦 𑀢𑀢𑁄 𑀧𑀼𑀭𑀺𑀫𑀢𑀭𑁂𑀲𑀼 𑀏𑀓𑀁𑀲𑁂𑀦 𑀪𑀸𑀯𑀢𑁄. 𑀬𑀣𑀸 𑀧𑀦 𑀯𑀺𑀢𑀓𑁆𑀓𑀸𑀤𑀬𑁄 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀦𑁆𑀢𑀺, 𑀦 𑀢𑁂𑀲𑀁 𑀏𑀓𑀯𑀻𑀣𑀺𑀬𑀁 𑀧𑀼𑀭𑀺𑀫𑀚𑀯𑀦𑁂𑀲𑀼, 𑀦 𑀏𑀯𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀘𑀢𑀼𑀓𑁆𑀓𑀚𑁆𑀛𑀸𑀦𑁂𑀢𑀺 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀚𑁆𑀛𑀸𑀦𑀘𑀢𑀼𑀓𑁆𑀓𑁂.

𑀧𑀜𑁆𑀘𑀓𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁯𑁦. 𑀢𑀢𑁆𑀣𑀸𑀢𑀺 𑀧𑀞𑀫𑀚𑁆𑀛𑀸𑀦𑁂. 𑀘𑀢𑀼𑀓𑁆𑀓𑀦𑀬𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀬𑀸𑀢𑀺 𑀘𑀢𑀼𑀓𑁆𑀓𑀦𑀬𑀲𑀫𑁆𑀩𑀦𑁆𑀥𑀺𑀦𑀺 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀬. 𑀢𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀁 ¶ ‘‘𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁, 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀘 𑀏𑀯𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀜𑁆𑀘𑁂𑀯 𑀢𑀢𑀺𑀬𑀜𑁆𑀘 𑀳𑁄𑀢𑀺 𑀅𑀪𑀺𑀥𑀫𑁆𑀫𑁂𑀢𑀺 (𑀥. 𑀲. 𑁧𑁬𑁮) 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀦 𑀲𑀭𑀽𑀧𑀢𑁄 𑀧𑀜𑁆𑀘𑀓𑀦𑀬𑁄 𑀦 𑀕𑀳𑀺𑀢𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀦𑀬𑀤𑁆𑀯𑀬𑀯𑀺𑀪𑀸𑀕𑁄 𑀕𑀳𑀺𑀢𑁄𑀢𑀺? 𑀅𑀪𑀺𑀥𑀫𑁆𑀫𑁂 𑀦𑀬𑀤𑁆𑀯𑀬𑀯𑀲𑁂𑀦 𑀛𑀸𑀦𑀸𑀦𑀁 𑀤𑁂𑀲𑀺𑀢𑀢𑁆𑀢𑀸. 𑀓𑀲𑁆𑀫𑀸 𑀘 𑀢𑀢𑁆𑀣 𑀢𑀣𑀸 𑀢𑀸𑀦𑀺 𑀤𑁂𑀲𑀺𑀢𑀸𑀦𑀺? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀢𑁄, 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀘. 𑀲𑀦𑁆𑀦𑀺𑀧𑀢𑀺𑀢𑀤𑁂𑀯𑀧𑀭𑀺𑀲𑀸𑀬 𑀓𑀺𑀭 𑀬𑁂𑀲𑀁 𑀬𑀣𑀸𑀤𑁂𑀲𑀺𑀢𑁂 𑀧𑀞𑀫𑀚𑁆𑀛𑀸𑀦𑁂 𑀯𑀺𑀢𑀓𑁆𑀓𑁄 𑀏𑀯 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀇𑀢𑀭𑁂 𑀲𑀦𑁆𑀢𑀢𑁄. 𑀢𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀘 𑀘𑀢𑀼𑀭𑀗𑁆𑀕𑀺𑀓𑀁 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀛𑀸𑀦𑀁 𑀤𑁂𑀲𑀺𑀢𑀁. 𑀬𑁂𑀲𑀁 𑀯𑀺𑀘𑀸𑀭𑁄, 𑀬𑁂𑀲𑀁 𑀧𑀻𑀢𑀺, 𑀬𑁂𑀲𑀁 𑀲𑀼𑀔𑀁 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀲𑀺, 𑀇𑀢𑀭𑁂 𑀲𑀦𑁆𑀢𑀢𑁄. 𑀢𑁂𑀲𑀁 𑀢𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀢𑀢𑀺𑀬𑀸𑀤𑀻𑀦𑀺 𑀛𑀸𑀦𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀅𑀬𑀁 𑀢𑀸𑀯 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄.

𑀬𑀲𑁆𑀲𑀸 𑀧𑀦 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀪𑀕𑀯𑀸 𑀬𑀲𑁆𑀫𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀜𑀸𑀡𑀫𑀳𑀦𑁆𑀢𑀢𑀸𑀬 ¶ 𑀤𑁂𑀲𑀦𑀸𑀬 𑀲𑀼𑀓𑀼𑀲𑀮𑁄 𑀬𑀁 𑀬𑀁 𑀅𑀗𑁆𑀕𑀁 𑀮𑀩𑁆𑀪𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀬𑀣𑀸𑀭𑀼𑀘𑀺𑀁 𑀤𑁂𑀲𑀦𑀁 𑀦𑀺𑀬𑀸𑀫𑁂𑀦𑁆𑀢𑁄 𑀘𑀢𑀼𑀓𑁆𑀓𑀦𑀬𑀯𑀲𑁂𑀦, 𑀧𑀜𑁆𑀘𑀓𑀦𑀬𑀯𑀲𑁂𑀦 𑀘. 𑀢𑀢𑁆𑀣 𑀘 𑀧𑀜𑁆𑀘𑀗𑁆𑀕𑀺𑀓𑀁 𑀧𑀞𑀫𑀁, 𑀘𑀢𑀼𑀭𑀗𑁆𑀕𑀺𑀓𑀁 𑀤𑀼𑀢𑀺𑀬𑀁, 𑀢𑀺𑀯𑀗𑁆𑀕𑀺𑀓𑀁 𑀢𑀢𑀺𑀬𑀁, 𑀤𑀼𑀯𑀗𑁆𑀕𑀺𑀓𑀁 𑀘𑀢𑀼𑀢𑁆𑀣𑀁, 𑀤𑀼𑀯𑀗𑁆𑀕𑀺𑀓𑀫𑁂𑀯 𑀧𑀜𑁆𑀘𑀫𑀁 𑀛𑀸𑀦𑀁 𑀤𑁂𑀲𑁂𑀲𑀻𑀢𑀺 𑀅𑀬𑀁 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀏𑀢𑁆𑀣 𑀘 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀁 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀧𑀓𑁆𑀔𑀺𑀓𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀁 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁧𑁬𑁮). 𑀓𑀲𑁆𑀫𑀸? 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀲𑀢𑁆𑀢𑀸𑀯𑀸𑀲𑀨𑀮𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀫𑀸𑀦𑀨𑀮𑀢𑁆𑀢𑀸, 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀚𑀸𑀢𑀢𑁆𑀢𑀸 𑀘. 𑀧𑀞𑀫𑀚𑁆𑀛𑀸𑀦𑀫𑁂𑀯 𑀳𑀺 ‘‘𑀓𑀸𑀫𑁂𑀳𑀺 𑀅𑀓𑀼𑀲𑀮𑁂𑀳𑀺 𑀘 𑀯𑀺𑀯𑀺𑀢𑁆𑀢’’𑀦𑁆𑀢𑀺 𑀢𑀤𑀪𑀸𑀯𑀸 𑀦 𑀇𑀥 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦𑀸𑀧𑀺 ‘‘𑀯𑀺𑀯𑁂𑀓𑀚’’𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀲𑀼 𑀘 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀺 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀪𑀚𑀦𑁆𑀢𑀺 𑀯𑀺𑀢𑀓𑁆𑀓𑀯𑀽𑀧𑀲𑀫𑀸 𑀯𑀺𑀘𑀸𑀭𑀯𑀽𑀧𑀲𑀫𑀸 𑀅𑀯𑀺𑀢𑀓𑁆𑀓𑀢𑁆𑀢𑀸, 𑀅𑀯𑀺𑀘𑀸𑀭𑀢𑁆𑀢𑀸 𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬𑀧𑀺 𑀧𑀜𑁆𑀘𑀓𑀦𑀬𑁄 𑀮𑀩𑁆𑀪𑀢𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀦𑀦𑀼 𑀲𑀼𑀢𑁆𑀢𑀦𑁆𑀢𑁂 𑀘𑀢𑁆𑀢𑀸𑀭𑀺𑀬𑁂𑀯 𑀛𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀻𑀢𑀺 𑀧𑀜𑁆𑀘𑀓𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺? 𑀦, ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁦𑁫) 𑀲𑀫𑀸𑀥𑀺𑀢𑁆𑀢𑀬𑀸𑀧𑀤𑁂𑀲𑁂𑀦 𑀧𑀜𑁆𑀘𑀓𑀦𑀬𑀲𑁆𑀲 ¶ 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀘𑀢𑀼𑀓𑁆𑀓𑀦𑀬𑀦𑀺𑀲𑁆𑀲𑀺𑀢𑁄 𑀧𑀦 𑀓𑀢𑁆𑀯𑀸 𑀧𑀜𑁆𑀘𑀓𑀦𑀬𑁄 𑀯𑀺𑀪𑀢𑁆𑀢𑁄𑀢𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬𑀧𑀺 𑀧𑀜𑁆𑀘𑀓𑀦𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀳𑀺 𑀯𑀺𑀢𑀓𑁆𑀓𑀲𑁆𑀲, 𑀯𑀺𑀘𑀸𑀭𑀲𑁆𑀲, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 ‘‘𑀅𑀯𑀺𑀢𑀓𑁆𑀓𑀁, 𑀅𑀯𑀺𑀘𑀸𑀭’’𑀦𑁆𑀢𑀺 𑀘 𑀯𑀺𑀦𑀸, 𑀲𑀳 𑀘 𑀯𑀺𑀘𑀸𑀭𑁂𑀦 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑁂𑀦 𑀅𑀯𑀺𑀢𑀓𑁆𑀓𑀁, 𑀲𑀳, 𑀯𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀯𑀺𑀘𑀸𑀭𑀧𑁆𑀧𑀳𑀸𑀦𑁂𑀦 𑀅𑀯𑀺𑀘𑀸𑀭𑀦𑁆𑀢𑀺 𑀅𑀯𑀺𑀢𑀓𑁆𑀓𑀁, 𑀅𑀯𑀺𑀘𑀸𑀭𑀁, 𑀅𑀯𑀺𑀢𑀓𑁆𑀓𑀜𑁆𑀘 𑀅𑀯𑀺𑀘𑀸𑀭𑀜𑁆𑀘𑀸𑀢𑀺 𑀯𑀸 𑀢𑀺𑀯𑀺𑀥𑀫𑁆𑀧𑀺 𑀲𑀓𑁆𑀓𑀸 𑀲𑀗𑁆𑀕𑀳𑁂𑀢𑀼𑀁.

𑀤𑀼𑀢𑀺𑀬𑀦𑁆𑀢𑀺 𑀘 𑀯𑀺𑀢𑀓𑁆𑀓𑀭𑀳𑀺𑀢𑁂, 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑁂 𑀘 𑀜𑀸𑀬𑀸𑀕𑀢𑀸 𑀤𑁂𑀲𑀦𑀸 𑀤𑀼𑀢𑀺𑀬𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸, 𑀯𑀺𑀘𑀸𑀭𑀫𑀢𑁆𑀢𑀭𑀳𑀺𑀢𑁂𑀧𑀺 𑀤𑁆𑀯𑀬𑀧𑁆𑀧𑀳𑀸𑀦𑀸𑀥𑀺𑀕𑀢𑀲𑀫𑀸𑀦𑀥𑀫𑁆𑀫𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀜𑁆𑀘𑀓𑀦𑀬𑀦𑀺𑀤𑁆𑀤𑁂𑀲𑁂 𑀤𑀼𑀢𑀺𑀬𑁂 𑀯𑀽𑀧𑀲𑀦𑁆𑀢𑁄𑀧𑀺 𑀯𑀺𑀢𑀓𑁆𑀓𑁄 𑀲𑀳𑀸𑀬𑀪𑀽𑀢𑀯𑀺𑀘𑀸𑀭𑀸𑀯𑀽𑀧𑀲𑀫𑁂𑀦 𑀦 𑀲𑀫𑁆𑀫𑀸 𑀯𑀽𑀧𑀲𑀦𑁆𑀢𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑁂 𑀯𑀺𑀬 𑀯𑀺𑀘𑀸𑀭𑀯𑀽𑀧𑀲𑀫𑁂𑀦𑁂𑀯 𑀢𑀤𑀼𑀧𑀲𑀫𑀁, 𑀲𑁂𑀲𑀥𑀫𑁆𑀫𑀸𑀦𑀁 𑀲𑀫𑀸𑀦𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀢𑀢𑀺𑀬𑀁 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑁂𑀦 𑀦𑀺𑀩𑁆𑀩𑀺𑀲𑁂𑀲𑀁 𑀯𑀺𑀪𑀢𑁆𑀢𑀁. 𑀤𑀼𑀯𑀺𑀥𑀲𑁆𑀲𑀸𑀧𑀺 𑀲𑀳𑀸𑀬𑀯𑀺𑀭𑀳𑁂𑀦, 𑀅𑀜𑁆𑀜𑀣𑀸 𑀘 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑀁, 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀢𑁆𑀢𑀜𑁆𑀘 𑀲𑀫𑀸𑀦𑀦𑁆𑀢𑀺 𑀲𑀫𑀸𑀦𑀥𑀫𑁆𑀫𑀢𑁆𑀢𑀸𑀧𑀺 𑀤𑀼𑀢𑀺𑀬𑀦𑁆𑀢𑀺 𑀦𑀺𑀤𑁆𑀤𑁂𑀲𑁄 ¶ . 𑀯𑀺𑀘𑀸𑀭𑀫𑀢𑁆𑀢𑀫𑁆𑀧𑀺 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀭𑀳𑀺𑀢𑀁 𑀯𑀺𑀬 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁧𑁬𑁮) 𑀅𑀯𑀺𑀢𑀓𑁆𑀓𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀺𑀪𑀢𑁆𑀢𑀁. 𑀧𑀞𑀫𑀚𑁆𑀛𑀸𑀦𑁂 𑀯𑀸 𑀲𑀳𑀘𑀸𑀭𑀻𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀏𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑁆𑀭𑀝𑁆𑀞𑀫𑁂𑀯 𑀤𑁄𑀲𑀢𑁄 𑀤𑀺𑀲𑁆𑀯𑀸 𑀉𑀪𑀬𑀫𑁆𑀧𑀺 𑀲𑀳𑀸𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀜𑁆𑀘𑀓𑀦𑀬𑁂 𑀢𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀢𑀺𑀬𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸. 𑀧𑀞𑀫𑀢𑁄 𑀅𑀦𑀦𑁆𑀢𑀭𑀪𑀸𑀯𑁂𑀦 𑀧𑀦𑀲𑁆𑀲 𑀤𑀼𑀢𑀺𑀬𑀪𑀸𑀯𑁄 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀲𑀭𑀽𑀧𑀢𑁄 𑀧𑀜𑁆𑀘𑀓𑀦𑀬𑁄 𑀦 𑀯𑀺𑀪𑀢𑁆𑀢𑁄𑀢𑀺? 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺.

𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀘𑀢𑀼𑀢𑁆𑀣𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁫. 𑀲𑁂𑀲𑀓𑀲𑀺𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀆𑀧𑁄𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁧. 𑀬𑀣𑀸𑀯𑀺𑀢𑁆𑀣𑀸𑀭𑀺𑀢𑀲𑁆𑀲 ¶ ¶ 𑀅𑀢𑁆𑀣𑀲𑁆𑀲 𑀅𑀢𑀺𑀤𑁂𑀲𑁄𑀧𑀺 𑀯𑀺𑀢𑁆𑀣𑀸𑀭𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀓𑀣𑀸 𑀳𑁄𑀢𑀻’’𑀢𑀺. 𑀆𑀧𑁄𑀓𑀲𑀺𑀡𑀦𑁆𑀢𑀺 𑀆𑀧𑁄𑀓𑀲𑀺𑀡𑀚𑁆𑀛𑀸𑀦𑀁, 𑀆𑀧𑁄𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑀁 𑀯𑀸. 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀢𑁆𑀢𑀓𑀫𑁆𑀧𑀻𑀢𑀺 ‘‘𑀓𑀢𑁂 𑀯𑀸 𑀅𑀓𑀢𑁂 𑀯𑀸𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸. 𑀲𑀸𑀫𑀼𑀤𑁆𑀤𑀺𑀓𑁂𑀦 𑀮𑁄𑀡𑀼𑀤𑀓𑁂𑀦 𑀪𑀭𑀺𑀢𑁄 𑀚𑀮𑀸𑀲𑀬𑁄 𑀮𑁄𑀡𑀻. 𑀦𑀻𑀮𑀸𑀤𑀺𑀯𑀡𑁆𑀡𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 ‘‘𑀲𑀼𑀤𑁆𑀥𑀯𑀢𑁆𑀣𑁂𑀦 𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀦𑁆𑀢𑀺 𑀪𑀽𑀫𑀺𑀁 𑀲𑀫𑁆𑀧𑀢𑁆𑀢𑀁. 𑀢𑀣𑀸𑀭𑀽𑀧𑀦𑁆𑀢𑀺 𑀬𑀸𑀤𑀺𑀲𑀁 𑀆𑀓𑀸𑀲𑀚𑀁 𑀉𑀤𑀓𑀁, 𑀢𑀸𑀤𑀺𑀲𑀁. 𑀢𑁂𑀦𑀸𑀳 ‘‘𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮’’𑀦𑁆𑀢𑀺, 𑀬𑀁 𑀧𑀦 𑀉𑀤𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀯𑀡𑁆𑀡𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀣𑀯𑀻𑀓𑀲𑀺𑀡𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀮𑀓𑁆𑀔𑀡𑀁 𑀧𑀦 𑀇𑀥 𑀧𑀕𑁆𑀖𑀭𑀡𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀣𑀯𑀻𑀓𑀲𑀺𑀡𑀪𑀸𑀯𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀢𑀭𑀗𑁆𑀕𑀼𑀝𑁆𑀞𑀸𑀦𑀸𑀤𑀺, 𑀨𑁂𑀡𑀫𑀺𑀲𑁆𑀲𑀢𑀸𑀤𑀺 𑀘 𑀇𑀥 𑀓𑀲𑀺𑀡𑀤𑁄𑀲𑁄. 𑀲𑁄𑀢𑀺 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲.

𑀢𑁂𑀚𑁄𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁨. 𑀲𑀺𑀦𑀺𑀤𑁆𑀥𑀸𑀦𑀺 𑀲𑀺𑀦𑁂𑀳𑀯𑀦𑁆𑀢𑀸𑀦𑀺. 𑀲𑀸𑀭𑀤𑀸𑀭𑀽𑀦𑀺 𑀦 𑀨𑁂𑀕𑁆𑀕𑀼𑀤𑀸𑀭𑀽𑀦𑀺. 𑀚𑀸𑀮𑀸𑀬 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀲𑀺𑀦𑀺𑀤𑁆𑀥𑀲𑀸𑀭𑀤𑀸𑀭𑀼𑀕𑁆𑀕𑀳𑀡𑀁. 𑀖𑀝𑀺𑀓𑀁 𑀖𑀝𑀺𑀓𑀁 𑀓𑀢𑁆𑀯𑀸𑀢𑀺 𑀔𑀦𑁆𑀥𑀲𑁄 𑀓𑀭𑀺𑀢𑁆𑀯𑀸. 𑀆𑀮𑀺𑀫𑁆𑀧𑁂𑀢𑁆𑀯𑀸𑀢𑀺 𑀚𑀸𑀮𑁂𑀢𑁆𑀯𑀸. 𑀖𑀦𑀚𑀸𑀮𑀸𑀬𑀸𑀢𑀺 𑀅𑀯𑀺𑀭𑀴𑀯𑀲𑁂𑀦 𑀧𑀯𑀢𑁆𑀢𑀅𑀕𑁆𑀕𑀺𑀚𑀸𑀮𑀸𑀬𑀁.

𑀧𑀢𑀦𑀲𑀤𑀺𑀲𑀦𑁆𑀢𑀺 𑀧𑀢𑀫𑀸𑀦𑀲𑀤𑀺𑀲𑀁. 𑀅𑀓𑀢𑁂 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸 𑀓𑀲𑀺𑀡𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀅𑀦𑀪𑀺𑀲𑀗𑁆𑀔𑀢𑁂 𑀓𑁂𑀯𑀮𑁂 𑀢𑁂𑀚𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲.

𑀯𑀸𑀬𑁄𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁩. 𑀯𑀼𑀢𑁆𑀢𑀜𑁆𑀳𑁂𑀢𑀦𑁆𑀢𑀺 ¶ 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 ‘‘𑀢𑀲𑁆𑀫𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀉𑀘𑁆𑀙𑀕𑁆𑀕𑀦𑁆𑀢𑀺 𑀉𑀘𑁆𑀙𑀼𑀔𑁂𑀢𑁆𑀢𑁂 𑀬𑀣𑀸𑀞𑀺𑀢𑀸𑀦𑀁 𑀅𑀕𑁆𑀕𑀁. 𑀏𑀭𑀺𑀢𑀦𑁆𑀢𑀺 ¶ 𑀯𑀸𑀢𑁂𑀦 𑀘𑀮𑀺𑀢𑀁. 𑀲𑀫𑁂𑀭𑀺𑀢𑀦𑁆𑀢𑀺 𑀲𑀩𑁆𑀩𑀲𑁄 𑀘𑀮𑀺𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀯𑀸𑀬𑁄𑀓𑀲𑀺𑀡𑀁…𑀧𑁂… 𑀉𑀧𑀮𑀓𑁆𑀔𑁂𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀢𑀲𑁆𑀫𑀸. 𑀲𑀫𑀲𑀻𑀲𑀝𑁆𑀞𑀺𑀢𑀦𑁆𑀢𑀺 𑀉𑀧𑀭𑀺 𑀧𑀢𑁆𑀢𑀸𑀦𑀁 𑀯𑀲𑁂𑀦 𑀲𑀫𑀲𑀻𑀲𑀁 𑀳𑀼𑀢𑁆𑀯𑀸 𑀞𑀺𑀢𑀁. 𑀯𑁂𑀴𑀼𑀁 𑀯𑀸 𑀭𑀼𑀓𑁆𑀔𑀁 𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀫𑀲𑀻𑀲𑀁 𑀞𑀺𑀢𑀁 𑀖𑀦𑀧𑀢𑁆𑀢𑀯𑁂𑀴𑀼𑀁 𑀯𑀸 𑀖𑀦𑀧𑀢𑁆𑀢𑀭𑀼𑀓𑁆𑀔𑀁 𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀗𑁆𑀕𑀼𑀮𑀸𑀤𑀺𑀧𑁆𑀧𑀫𑀸𑀡𑁂𑀲𑀼 𑀓𑁂𑀲𑁂𑀲𑀼 𑀭𑀲𑁆𑀲𑀪𑀸𑀯𑀢𑁄, 𑀤𑀻𑀖𑀢𑀭𑁂𑀲𑀼 𑀑𑀮𑀫𑁆𑀩𑀦𑀢𑁄, 𑀯𑀺𑀭𑀴𑁂𑀲𑀼 𑀅𑀦𑀼𑀧𑁆𑀧𑀯𑁂𑀲𑀢𑁄 𑀯𑀸𑀢𑀧𑁆𑀧𑀳𑀸𑀭𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀕𑁆𑀕𑀳𑀡𑀁, 𑀖𑀦𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀧𑀳𑀭𑀢𑀻𑀢𑀺 𑀲𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀉𑀘𑁆𑀙𑀕𑁆𑀕𑀸𑀤𑀻𑀦𑀁 𑀧𑀘𑀮𑀦𑀸𑀓𑀸𑀭𑀕𑁆𑀕𑀳𑀡𑀫𑀼𑀔𑁂𑀦 𑀢𑁂𑀲𑀁 𑀧𑀳𑀸𑀭𑀓𑁂 𑀯𑀸𑀢𑀲𑀗𑁆𑀖𑀸𑀢𑁂 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀢𑀢𑁆𑀣 𑀲𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀓𑀸𑀬𑀧𑀤𑁂𑀲𑀲𑁆𑀲 𑀲𑀗𑁆𑀖𑀝𑁆𑀝𑀦𑀯𑀲𑁂𑀦 𑀧𑀯𑀢𑁆𑀢𑁂 𑀯𑀸𑀬𑀼𑀧𑀺𑀡𑁆𑀟𑁂 𑀲𑀗𑁆𑀖𑀝𑁆𑀝𑀦𑀸𑀓𑀸𑀭𑀕𑁆𑀕𑀳𑀡𑀫𑀼𑀔𑁂𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. ‘‘𑀉𑀲𑀼𑀫𑀯𑀝𑁆𑀝𑀺𑀲𑀤𑀺𑀲’’𑀦𑁆𑀢𑀺 𑀏𑀢𑁂𑀦 𑀧𑀼𑀭𑀺𑀫𑀓𑀲𑀺𑀡𑀲𑁆𑀲 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀦𑀺𑀫𑀺𑀢𑁆𑀢𑀲𑁆𑀲 𑀲𑀁𑀯𑀺𑀕𑁆𑀕𑀳𑀢𑀁 𑀤𑀲𑁆𑀲𑁂𑀢𑀺. ‘‘𑀦𑀺𑀘𑁆𑀘𑀮’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀮𑀪𑀸𑀯𑁄𑀬𑁂𑀯 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀢𑁄 𑀇𑀫𑀲𑁆𑀲 𑀯𑀺𑀲𑁂𑀲𑁄𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀉𑀲𑀼𑀫𑀯𑀝𑁆𑀝𑀺𑀲𑀤𑀺𑀲𑀢𑀸𑀯 𑀯𑀺𑀪𑀸𑀯𑀺𑀢𑀸 𑀳𑁄𑀢𑀺.

𑀦𑀻𑀮𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁪. 𑀅𑀜𑁆𑀚𑀦𑀭𑀸𑀚𑀺𑀯𑀝𑁆𑀝𑀸𑀤𑀺 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸. 𑀢𑀣𑀸𑀭𑀽𑀧𑀁 𑀫𑀸𑀮𑀸𑀕𑀘𑁆𑀙𑀦𑁆𑀢𑀺 𑀅𑀯𑀺𑀭𑀴𑀯𑀺𑀓𑀲𑀺𑀢𑀦𑀻𑀮𑀯𑀡𑁆𑀡𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑀁 𑀧𑀼𑀧𑁆𑀨𑀕𑀘𑁆𑀙𑀁. 𑀇𑀢𑀭𑁂𑀦𑀸𑀢𑀺 𑀅𑀓𑀢𑀸𑀥𑀺𑀓𑀸𑀭𑁂𑀦. 𑀕𑀺𑀭𑀺𑀓𑀡𑁆𑀡𑀺𑀓𑀕𑁆𑀕𑀳𑀦𑁂𑀦 𑀦𑀻𑀮𑀁 𑀕𑀺𑀭𑀺𑀓𑀡𑁆𑀡𑀺𑀓𑀫𑀸𑀳. 𑀓𑀭𑀡𑁆𑀟𑀧𑀝𑀮𑀁 𑀲𑀫𑀼𑀕𑁆𑀕𑀧𑀺𑀥𑀸𑀦𑀁. 𑀧𑀢𑁆𑀢𑁂𑀳𑀺𑀬𑁂𑀯𑀸𑀢𑀺 𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀓𑁂𑀲𑀭𑀯𑀡𑁆𑀝𑀸𑀦𑀺 𑀅𑀧𑀦𑁂𑀢𑁆𑀯𑀸 𑀓𑁂𑀯𑀮𑁂𑀳𑀺 𑀧𑀢𑁆𑀢𑁂𑀳𑀺𑀬𑁂𑀯. 𑀧𑀽𑀭𑁂𑀢𑀩𑁆𑀩𑀦𑁆𑀢𑀺 𑀦𑀻𑀮𑀯𑀡𑁆𑀡𑀁 𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀪𑀡𑁆𑀟𑀺𑀓𑀁 𑀯𑀺𑀬 𑀩𑀦𑁆𑀥𑀺𑀢𑁆𑀯𑀸 𑀬𑀣𑀸 𑀦𑀻𑀮𑀫𑀡𑁆𑀟𑀮𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀘𑀗𑁆𑀓𑁄𑀝𑀓𑀁 𑀯𑀸 𑀓𑀭𑀡𑁆𑀟𑀧𑀝𑀮𑀁 𑀯𑀸 𑀧𑀽𑀭𑁂𑀢𑀩𑁆𑀩𑀁. 𑀫𑀼𑀔𑀯𑀝𑁆𑀝𑀺𑀬𑀁 𑀯𑀸 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀘𑀗𑁆𑀓𑁄𑀝𑀓𑀲𑁆𑀲, 𑀓𑀭𑀡𑁆𑀟𑀧𑀝𑀮𑀲𑁆𑀲 𑀯𑀸 𑀫𑀼𑀔𑀯𑀝𑁆𑀝𑀺𑀬𑀁 𑀩𑀦𑁆𑀥𑀺𑀢𑀩𑁆𑀩𑀁. 𑀫𑀡𑀺𑀢𑀸𑀮𑀯𑀡𑁆𑀝𑀁 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁 𑀢𑀸𑀮𑀯𑀡𑁆𑀝𑀁.

𑀧𑀻𑀢𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁫. 𑀧𑀻𑀢𑀓𑀲𑀺𑀡𑁂 𑀫𑀸𑀮𑀸𑀕𑀘𑁆𑀙𑀦𑁆𑀢𑀺 𑀇𑀓𑁆𑀓𑀝𑀸𑀤𑀺𑀫𑀸𑀮𑀸𑀕𑀘𑁆𑀙𑀁. 𑀳𑀭𑀺𑀢𑀸𑀮𑀁, 𑀫𑀦𑁄𑀲𑀺𑀮𑀸 𑀯𑀸 𑀥𑀸𑀢𑀼. 𑀧𑀢𑁆𑀢𑀗𑁆𑀕𑀧𑀼𑀧𑁆𑀨𑁂𑀳𑀻𑀢𑀺 ¶ 𑀧𑀢𑁆𑀢𑀗𑁆𑀕𑀦𑀸𑀫𑀺𑀓𑀸 𑀧𑀻𑀢𑀯𑀡𑁆𑀡𑀧𑀼𑀧𑁆𑀨𑀸 𑀏𑀓𑀸 𑀕𑀘𑁆𑀙𑀚𑀸𑀢𑀺, 𑀢𑀲𑁆𑀲 𑀧𑀼𑀧𑁆𑀨𑁂𑀳𑀺. 𑀆𑀲𑀦𑀧𑀽𑀚𑀦𑁆𑀢𑀺 𑀘𑁂𑀢𑀺𑀬𑀗𑁆𑀕𑀡𑁂 𑀓𑀢𑀁 𑀆𑀲𑀦𑀧𑀽𑀚𑀁 ¶ . 𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀓𑀼𑀮𑀺𑀓𑀺𑀗𑁆𑀓𑀺𑀭𑀸𑀢𑀧𑀼𑀧𑁆𑀨𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀮𑁄𑀳𑀺𑀢𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁬. 𑀮𑁄𑀳𑀺𑀢𑀫𑀡𑀺 𑀮𑁄𑀳𑀺𑀢𑀗𑁆𑀕𑀫𑀡𑀺𑀆𑀤𑀺. 𑀮𑁄𑀳𑀺𑀢𑀥𑀸𑀢𑀼 𑀕𑁂𑀭𑀼𑀓𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀸𑀤𑀺.

𑀑𑀤𑀸𑀢𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁭. 𑀑𑀤𑀸𑀢𑀓𑀲𑀺𑀡𑁂 𑀫𑀸𑀮𑀸𑀕𑀘𑁆𑀙𑀦𑁆𑀢𑀺 𑀦𑀦𑁆𑀤𑀺𑀬𑀸𑀯𑀢𑁆𑀢𑀸𑀤𑀺𑀫𑀸𑀮𑀸𑀕𑀘𑁆𑀙𑀁. 𑀥𑀸𑀢𑀼 𑀓𑀓𑁆𑀓𑀝𑀺𑀫𑀼𑀢𑁆𑀢𑀲𑁂𑀢𑀺𑀓𑀸𑀤𑀺.

𑀆𑀮𑁄𑀓𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁮. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦𑀸𑀢𑀺 𑀬𑀣𑀸 𑀲𑀽𑀭𑀺𑀬𑀸𑀮𑁄𑀓𑀸𑀤𑀺𑀯𑀲𑁂𑀦 𑀑𑀪𑀸𑀲𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀑𑀪𑀸𑀲𑀫𑀡𑁆𑀟𑀮𑀲𑁆𑀲 𑀦 𑀘𑀺𑀭𑀝𑁆𑀞𑀺𑀢𑀺𑀢𑀸𑀬 𑀢𑀣𑀸 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦. 𑀖𑀝𑀫𑀼𑀔𑁂𑀦 𑀦𑀺𑀕𑁆𑀕𑀘𑁆𑀙𑀦𑀓𑀑𑀪𑀸𑀲𑀲𑁆𑀲 𑀫𑀳𑀦𑁆𑀢𑀪𑀸𑀯𑀢𑁄 ‘‘𑀖𑀝𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀪𑀺𑀢𑁆𑀢𑀺𑀫𑀼𑀔𑀦𑁆𑀢𑀺 𑀪𑀺𑀢𑁆𑀢𑀺𑀅𑀪𑀺𑀫𑀼𑀔𑀁. 𑀉𑀝𑁆𑀞𑀺𑀢𑀫𑀡𑁆𑀟𑀮𑀲𑀤𑀺𑀲𑀦𑁆𑀢𑀺 𑀪𑀺𑀢𑁆𑀢𑀺𑀆𑀤𑀻𑀲𑀼 𑀉𑀝𑁆𑀞𑀺𑀢𑀧𑀸𑀓𑀢𑀺𑀓𑀆𑀮𑁄𑀓𑀫𑀡𑁆𑀟𑀮𑀲𑀤𑀺𑀲𑀁. 𑀖𑀦𑀯𑀺𑀧𑁆𑀧𑀲𑀦𑁆𑀦𑀁 𑀆𑀮𑁄𑀓𑀧𑀼𑀜𑁆𑀚𑀲𑀤𑀺𑀲𑀦𑁆𑀢𑀺 𑀪𑀕𑀯𑀢𑁄 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬 𑀩𑀳𑀮𑁄, 𑀯𑀺𑀧𑁆𑀧𑀲𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀼𑀜𑁆𑀚𑀪𑀽𑀢𑁄 𑀆𑀮𑁄𑀓𑁄 𑀅𑀢𑁆𑀣𑀺 𑀘𑁂, 𑀢𑀁𑀲𑀤𑀺𑀲𑁄𑀢𑀺 𑀅𑀢𑁆𑀣𑁄.

𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁯𑁯. 𑀙𑀺𑀤𑁆𑀤𑀲𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀬𑁂𑀳𑀺 𑀪𑀺𑀢𑁆𑀢𑀺𑀧𑀭𑀺𑀬𑀦𑁆𑀢𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀢𑀁 𑀙𑀺𑀤𑁆𑀤𑀁, 𑀢𑀁𑀲𑀤𑀺𑀲𑀁, 𑀢𑁂𑀦𑀯𑀸𑀓𑀸𑀭𑁂𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀟𑁆𑀠𑀺𑀬𑀫𑀸𑀦𑀫𑁆𑀧𑀺 𑀦 𑀯𑀟𑁆𑀠𑀢𑀻’’𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲 𑀅𑀯𑀟𑁆𑀠𑀦𑀻𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁆𑀧𑀺 𑀳𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀺𑀬𑀫𑀸𑀦𑀁 𑀦 𑀯𑀟𑁆𑀠𑀢𑀺𑀬𑁂𑀯. 𑀲𑀢𑀺𑀧𑀺 𑀘 𑀯𑀟𑁆𑀠𑁂𑀢𑀼𑀓𑀸𑀫𑀢𑀸𑀬𑀁 𑀯𑀟𑁆𑀠𑀦𑀸 𑀦 𑀲𑀫𑁆𑀪𑀯𑀢𑀺 𑀪𑀸𑀯𑀦𑀸𑀬 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸. 𑀪𑀸𑀯𑀦𑀸𑀯𑀲𑁂𑀦 𑀳𑀺 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀸 ¶ . 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀪𑀸𑀯𑀦𑀸 𑀣𑀺𑀭𑀸𑀢𑀺 𑀓𑀢𑁆𑀯𑀸 ‘‘𑀯𑀟𑁆𑀠𑀺𑀬𑀫𑀸𑀦𑀁 𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀺 ¶ 𑀧𑀸𑀴𑀺𑀬𑀁 ‘‘𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀛𑀸𑀦𑀸𑀭𑀫𑁆𑀫𑀡𑀸𑀦𑀺 𑀅𑀝𑁆𑀞𑁂𑀯 𑀓𑀲𑀺𑀡𑀸𑀦𑀺 𑀲𑀭𑀽𑀧𑀢𑁄 𑀆𑀕𑀢𑀸𑀦𑀺, 𑀑𑀤𑀸𑀢𑀓𑀲𑀺𑀡𑁂 𑀧𑀦 𑀆𑀮𑁄𑀓𑀓𑀲𑀺𑀡𑀁, 𑀆𑀓𑀸𑀲𑀓𑀲𑀺𑀡𑁂 𑀘 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀇𑀢𑀺 𑀓𑀲𑀺𑀡𑀸𑀦𑀺 𑀤𑀲𑀩𑀮𑁄, 𑀤𑀲 𑀬𑀸𑀦𑀺 𑀅𑀯𑁄𑀘𑀸’’𑀢𑀺. 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀅𑀲𑀸𑀥𑀸𑀭𑀡𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀲𑀺𑀡𑁂 𑀧𑀝𑀺𑀦𑀺𑀬𑀢𑀫𑁂𑀯 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀲𑀸𑀥𑀸𑀭𑀡𑀢𑁄, 𑀲𑀸𑀥𑀸𑀭𑀡𑀢𑁄 𑀘 𑀢𑀢𑁆𑀣 𑀢𑀢𑁆𑀣 𑀧𑀓𑀺𑀡𑁆𑀡𑀓𑀁 𑀯𑀺𑀲𑀝𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀚𑀸𑀦𑀺𑀢𑀩𑁆𑀩𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁧𑁦𑁦. 𑀆𑀤𑀺𑀪𑀸𑀯𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀣𑀯𑀻𑀧𑀓𑁆𑀔𑀺𑀬𑀲𑁆𑀲 𑀯𑀢𑁆𑀣𑀼𑀦𑁄 𑀦𑀺𑀫𑁆𑀫𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀓𑀧𑁆𑀧𑀦𑀁 𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀆𑀓𑀸𑀲𑁂 𑀯𑀸 𑀉𑀤𑀓𑁂 𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀦𑀬𑁂𑀦𑀸𑀢𑀺 𑀦𑀻𑀮𑀸𑀤𑀺𑀯𑀡𑁆𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀦𑀬𑁂𑀦𑁂𑀯. 𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀭𑀻𑀭𑀢𑁄 𑀉𑀤𑀓𑀥𑀸𑀭𑀸𑀦𑀺𑀫𑁆𑀫𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀬𑀤𑁂𑀯 𑀲𑁄 𑀇𑀘𑁆𑀙𑀢𑀺 𑀢𑀲𑁆𑀲 𑀟𑀳𑀦𑀲𑀫𑀢𑁆𑀣𑀢𑀸𑀢𑀺 𑀩𑀳𑀽𑀲𑀼 𑀓𑀧𑁆𑀧𑀸𑀲𑀧𑀺𑀘𑀼𑀲𑀸𑀭𑀤𑀸𑀭𑀼𑀆𑀤𑀻𑀲𑀼 𑀏𑀓𑀚𑁆𑀛𑀁 𑀭𑀸𑀲𑀺𑀪𑀽𑀢𑁂𑀲𑀼 𑀞𑀺𑀢𑁂𑀲𑀼 𑀬𑀁 𑀬𑀤𑁂𑀯 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀟𑀳𑀦𑀲𑀫𑀢𑁆𑀣𑀢𑀸. 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀯𑀸𑀬𑀼𑀕𑀢𑀺𑀬𑀸 𑀕𑀫𑀦𑀁 𑀯𑀸𑀬𑀼𑀕𑀢𑀺𑀕𑀫𑀦𑀁, 𑀅𑀢𑀺𑀲𑀻𑀖𑀕𑀫𑀦𑀁. 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀬𑀤𑀺𑀘𑁆𑀙𑀺𑀢𑀤𑁂𑀲𑀦𑁆𑀢𑀭𑀁 𑀧𑀸𑀧𑀼𑀡𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀼𑀯𑀡𑁆𑀡𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀦𑀸 𑀲𑀼𑀯𑀡𑁆𑀡𑀪𑀸𑀯𑀸𑀥𑀺𑀝𑁆𑀞𑀸𑀦𑀁 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 (𑀧𑀸𑀭𑀸. 𑁬𑁧𑁯-𑁬𑁨𑁦) 𑀢𑀺𑀡𑀡𑁆𑀟𑀼𑀧𑀕𑀧𑀸𑀲𑀸𑀤𑀸𑀤𑀻𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀦𑀬𑁂𑀦.

𑀯𑀡𑁆𑀡𑀓𑀲𑀺𑀡𑁂𑀲𑀼 ¶ 𑀢𑀢𑁆𑀣 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀻𑀮𑁄𑀪𑀸𑀲𑀦𑀺𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀼𑀤𑁆𑀤𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀲𑀩𑁆𑀩𑀸𑀦𑁂𑀯 ¶ 𑀤𑀲𑀧𑀺 𑀓𑀲𑀺𑀡𑀸𑀦𑀺. 𑀇𑀫𑀁 𑀧𑀪𑁂𑀤𑀁 𑀮𑀪𑀦𑁆𑀢𑀻𑀢𑀺 𑀇𑀫𑀁 𑀯𑀟𑁆𑀠𑀦𑀸𑀤𑀺𑀯𑀺𑀲𑁂𑀲𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀓𑁄𑀢𑀺 𑀏𑀓𑀘𑁆𑀘𑁄. 𑀲𑀜𑁆𑀚𑀸𑀦𑀸𑀢𑀻𑀢𑀺 𑀪𑀸𑀯𑀦𑀸𑀧𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀆𑀧𑁄𑀓𑀲𑀺𑀡’’𑀦𑁆𑀢𑀺𑀆𑀤𑀺𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀉𑀧𑀭𑀺𑀕𑀕𑀦𑀢𑀮𑀸𑀪𑀺𑀫𑀼𑀔𑀁 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀧𑀸𑀴𑀺𑀧𑀤𑀸𑀦𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀯𑀟𑁆𑀠𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀫𑁂𑀯 𑀓𑀲𑀺𑀡𑀁 𑀯𑀟𑁆𑀠𑁂𑀢𑀻’’𑀢𑀺. 𑀳𑁂𑀝𑁆𑀞𑀸𑀪𑀽𑀫𑀺𑀢𑀮𑀸𑀪𑀺𑀫𑀼𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀩𑁆𑀩𑁂 𑀯𑀟𑁆𑀠𑀦𑀓𑀸𑀮𑁂 𑀧𑀬𑁄𑀚𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀯𑀟𑁆𑀠𑁂𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀤𑀸𑀦𑀺 ‘‘𑀢𑁂𑀦 𑀢𑁂𑀦 𑀯𑀸 𑀓𑀸𑀭𑀡𑁂𑀦 𑀏𑀯𑀁 𑀧𑀲𑀸𑀭𑁂𑀢𑀻’’𑀢𑀺 𑀆𑀳, 𑀓𑀲𑀺𑀡𑀁 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀺𑀦𑁆𑀢𑀺 𑀆𑀳 ‘‘𑀆𑀮𑁄𑀓𑀫𑀺𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀓𑀸𑀫𑁄’’𑀢𑀺. 𑀉𑀤𑁆𑀥𑀜𑁆𑀘𑁂 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄 𑀉𑀤𑁆𑀥𑀁 𑀆𑀮𑁄𑀓𑀁 𑀧𑀲𑀸𑀭𑁂𑀢𑀺, 𑀅𑀥𑁄 𑀘𑁂 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄 𑀅𑀥𑁄 𑀆𑀮𑁄𑀓𑀁 𑀧𑀲𑀸𑀭𑁂𑀢𑀺, 𑀲𑀫𑀦𑁆𑀢𑀢𑁄 𑀘𑁂 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄 𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀧𑀲𑀸𑀭𑁂𑀢𑀺, 𑀏𑀯𑀫𑀬𑀁 𑀓𑀲𑀺𑀡𑀦𑁆𑀢𑀺 𑀅𑀢𑁆𑀣𑁄.

𑀏𑀓𑀲𑁆𑀲𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀲. 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑀦𑀢𑁆𑀣𑀦𑁆𑀢𑀺 𑀅𑀜𑁆𑀜𑀓𑀲𑀺𑀡𑀪𑀸𑀯𑀸𑀦𑀼𑀧𑀕𑀫𑀦𑀤𑀻𑀧𑀦𑀢𑁆𑀣𑀁, 𑀦 𑀅𑀜𑁆𑀜𑀁 𑀧𑀣𑀯𑀻𑀆𑀤𑀺. 𑀦 𑀳𑀺 𑀉𑀤𑀓𑁂𑀦 𑀞𑀺𑀢𑀝𑁆𑀞𑀸𑀦𑁂 𑀲𑀲𑀫𑁆𑀪𑀸𑀭𑀧𑀣𑀯𑀻 𑀅𑀢𑁆𑀣𑀺. 𑀅𑀜𑁆𑀜𑁄 𑀓𑀲𑀺𑀡𑀲𑀫𑁆𑀪𑁂𑀤𑁄𑀢𑀺 𑀆𑀧𑁄𑀓𑀲𑀺𑀡𑀸𑀤𑀺𑀦𑀸 𑀲𑀗𑁆𑀓𑀭𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀆𑀧𑁄𑀓𑀲𑀺𑀡𑀸𑀤𑀻𑀲𑀼 𑀲𑁂𑀲𑀓𑀲𑀺𑀡𑁂𑀲𑀼. 𑀏𑀓𑀤𑁂𑀲𑁂 𑀅𑀝𑁆𑀞𑀢𑁆𑀯𑀸 𑀅𑀦𑀯𑀲𑁂𑀲𑁂𑀦 𑀨𑀭𑀡𑀧𑁆𑀧𑀫𑀸𑀡𑀲𑁆𑀲 𑀅𑀕𑁆𑀕𑀳𑀡𑀢𑁄 𑀨𑀭𑀡𑀁 𑀅𑀧𑁆𑀧𑀫𑀸𑀡𑀁. 𑀢𑁂𑀦𑁂𑀯 𑀳𑀺 𑀦𑁂𑀲𑀁 𑀓𑀲𑀺𑀡𑀲𑀫𑀜𑁆𑀜𑀸. 𑀢𑀣𑀸 𑀘𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀘𑁂𑀢𑀲𑀸 𑀨𑀭𑀦𑁆𑀢𑁄𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑁂𑀦 𑀆𑀮𑀫𑁆𑀩𑀦𑀁 𑀓𑀭𑁄𑀦𑁆𑀢𑁄. 𑀪𑀸𑀯𑀦𑀸𑀘𑀺𑀢𑁆𑀢𑀜𑁆𑀳𑀺 𑀓𑀲𑀺𑀡𑀁 𑀧𑀭𑀺𑀢𑁆𑀢𑀁 𑀯𑀸 𑀯𑀺𑀧𑀼𑀮𑀁 𑀯𑀸 𑀏𑀓𑀓𑁆𑀔𑀡𑁂 𑀲𑀓𑀮𑀫𑁂𑀯 𑀫𑀦𑀲𑀺 𑀓𑀭𑁄𑀢𑀺, 𑀦 𑀏𑀓𑀤𑁂𑀲𑀦𑁆𑀢𑀺.

𑁧𑁦𑁧. 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑀫𑀗𑁆𑀕𑀺𑀦𑁄𑀢𑀺 𑀧𑀜𑁆𑀘𑀲𑀼 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀫𑀦𑁆𑀦𑀸𑀕𑀢𑀸. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀅𑀓𑀺𑀭𑀺𑀬𑀤𑀺𑀝𑁆𑀞𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀻𑀢𑀺 𑀢𑀻𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀦𑀺𑀬𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀡𑁆𑀟𑀓𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀧𑀡𑁆𑀟𑀓𑀸 𑀘. 𑀓𑀸𑀫𑀜𑁆𑀘𑁂𑀢𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀢𑀺𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀼𑀢𑁆𑀢𑀸. 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 ¶ , 𑀤𑁆𑀯𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀘. 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀫𑁆𑀧𑀺 𑀳𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄, 𑀛𑀸𑀦𑀧𑀝𑀺𑀮𑀸𑀪𑁄 ¶ 𑀘 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀧𑀺 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀏𑀯.

𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬𑀦𑁆𑀢𑀺 𑀫𑀕𑁆𑀕𑀲𑁆𑀲 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸𑀬𑀁 𑀯𑀺𑀧𑀲𑁆𑀲𑀦𑀸𑀬𑀁. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀭𑀳𑀺𑀢𑀸’’𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀫𑁂𑀯 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀢𑁆𑀢𑀭𑀓𑀼𑀭𑀼𑀓𑀸𑀧𑀺 𑀫𑀦𑀼𑀲𑁆𑀲𑀸 𑀫𑀸𑀭𑀸𑀤𑀬𑁄 𑀯𑀺𑀬 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸 𑀦𑀺𑀩𑁆𑀩𑀼𑀢𑀺𑀙𑀦𑁆𑀤𑀭𑀳𑀺𑀢𑀢𑁆𑀢𑀸. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑀸. ‘‘𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀬𑀲𑁆𑀲 𑀪𑀯𑀗𑁆𑀕𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀸𑀤𑀓𑀁 𑀦 𑀳𑁄𑀢𑀺, 𑀲𑁄𑀧𑀺 𑀤𑀼𑀧𑁆𑀧𑀜𑁆𑀜𑁄𑀬𑁂𑀯𑀸’’𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀳𑀺 𑀪𑀯𑀗𑁆𑀕𑁂 𑀯𑀢𑁆𑀢𑀫𑀸𑀦𑁂 𑀢𑀁𑀲𑀦𑁆𑀢𑀢𑀺𑀬𑀁 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀢𑀲𑁆𑀲 𑀧𑀸𑀤𑀓𑀁 𑀦𑀸𑀫 𑀳𑁄𑀢𑀺.

𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼, 𑀲𑀼𑀔𑀯𑀺𑀧𑀸𑀓𑀥𑀫𑁆𑀫𑁂𑀲𑀼 𑀯𑀸. 𑀑𑀓𑁆𑀓𑀫𑀺𑀢𑀼𑀦𑁆𑀢𑀺 𑀅𑀥𑀺𑀕𑀦𑁆𑀢𑀼𑀁. 𑀓𑀲𑀺𑀡𑁂𑀬𑁂𑀯𑀸𑀢𑀺 𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑁂𑀬𑁂𑀯. 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀸𑀯𑀭𑀡𑀲𑀫𑀦𑁆𑀦𑀸𑀕𑀢𑀸𑀤𑀻𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑁂 𑀯𑀺𑀧𑀸𑀓𑀦𑁆𑀢𑀭𑀸𑀬𑀸𑀤𑀬𑁄 𑀏𑀯𑀁 𑀅𑀢𑁆𑀣𑀚𑀸𑀦𑀺𑀓𑀭𑀸, 𑀅𑀦𑀢𑁆𑀣𑀳𑁂𑀢𑀼𑀪𑀽𑀢𑀸 𑀘, 𑀢𑀲𑁆𑀫𑀸. 𑀢𑀺𑀡𑁆𑀡𑀫𑁂𑀯 𑀘𑁂𑀢𑁆𑀣 𑀅𑀦𑁆𑀢𑀭𑀸𑀬𑀸𑀦𑀁 𑀕𑀳𑀡𑀁 𑀇𑀢𑀭𑀲𑁆𑀲 𑀲𑀧𑁆𑀧𑀝𑀺𑀓𑀸𑀭𑀢𑁆𑀢𑀸, 𑀓𑀫𑁆𑀫𑀦𑁆𑀢𑀭𑀸𑀬𑀧𑀓𑁆𑀔𑀺𑀓𑀢𑁆𑀢𑀸 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀚𑁆𑀚𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀤𑁆𑀥𑀦𑁆𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀁, 𑀭𑀢𑀦𑀢𑁆𑀢𑀬𑀲𑀤𑁆𑀥𑀜𑁆𑀘. 𑀙𑀦𑁆𑀤𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁂 𑀢𑀺𑀩𑁆𑀩𑀓𑀢𑁆𑀢𑀼𑀓𑀫𑁆𑀬𑀢𑀸𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑁆𑀙𑀦𑁆𑀤𑀁. 𑀧𑀜𑁆𑀜𑀦𑁆𑀢𑀺 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀁. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀬𑀣𑀸 𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀢𑀣𑀸 𑀧𑀭𑀺𑀩𑁆𑀭𑀽𑀳𑁂𑀢𑁆𑀯𑀸. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀘 𑀦 𑀯𑀺𑀪𑀢𑁆𑀢𑀁.

𑀲𑁂𑀲𑀓𑀲𑀺𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁬. 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀧𑀤𑀢𑁆𑀣𑀯𑀡𑁆𑀡𑀦𑀸

𑁧𑁦𑁨. ‘‘𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑁂𑀲𑀽’’𑀢𑀺 ¶ ¶ 𑀇𑀤𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀁 𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀪𑀽𑀢𑀓𑀣𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀲𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑀲𑁆𑀲 𑀅𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦 𑀓𑁂𑀯𑀮𑀁 𑀫𑀢𑀲𑀭𑀻𑀭’’𑀦𑁆𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁨). 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀢𑀺 𑀚𑀻𑀯𑀺𑀢𑀓𑁆𑀔𑀬𑀢𑁄 𑀉𑀧𑀭𑀺 𑀫𑀭𑀡𑀢𑁄 𑀧𑀭𑀁. 𑀲𑀫𑀼𑀕𑁆𑀕𑀢𑁂𑀦𑀸𑀢𑀺 𑀉𑀝𑁆𑀞𑀺𑀢𑁂𑀦. 𑀉𑀤𑁆𑀥𑀼𑀫𑀸𑀢𑀢𑁆𑀢𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀥𑀼𑀫𑀸𑀢𑀢𑁆𑀢𑀸 𑀲𑀽𑀦𑀢𑁆𑀢𑀸. 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀦𑁆𑀢𑀺 𑀓-𑀓𑀸𑀭𑁂𑀦 𑀧𑀤𑀯𑀟𑁆𑀠𑀦𑀫𑀸𑀳 𑀅𑀦𑀢𑁆𑀣𑀦𑁆𑀢𑀭𑀢𑁄 𑀬𑀣𑀸 ‘‘𑀧𑀻𑀢𑀓𑀁 𑀮𑁄𑀳𑀺𑀢𑀓’’𑀦𑁆𑀢𑀺. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸. 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀁 𑀉𑀤𑁆𑀥𑀼𑀫𑀸𑀢𑀓𑀦𑁆𑀢𑀺 𑀓𑀼𑀘𑁆𑀙𑀦𑀢𑁆𑀣𑁂 𑀯𑀸 𑀅𑀬𑀁 𑀓-𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀯. 𑁨𑁮𑁫; 𑀧𑀭𑀺. 𑁩𑁨𑁫; 𑀤𑀻. 𑀦𑀺. 𑁨.𑁧𑁪𑁯; 𑀅. 𑀦𑀺. 𑁫.𑁨𑁧𑁩). 𑀢𑀣𑀸𑀭𑀽𑀧𑀲𑁆𑀲𑀸𑀢𑀺 ‘‘𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀭𑀽𑀧𑀁 𑀯𑀼𑀢𑁆𑀢𑀁, 𑀢𑀣𑀸𑀭𑀽𑀧𑀲𑁆𑀲.

𑀲𑁂𑀢𑀭𑀢𑁆𑀢𑁂𑀳𑀺 𑀧𑀭𑀺𑀪𑀺𑀦𑁆𑀦𑀁 𑀯𑀺𑀫𑀺𑀲𑁆𑀲𑀺𑀢𑀁 𑀦𑀻𑀮𑀁 𑀯𑀺𑀦𑀻𑀮𑀁, 𑀧𑀼𑀭𑀺𑀫𑀯𑀡𑁆𑀡𑀯𑀺𑀧𑀭𑀺𑀡𑀸𑀫𑀪𑀽𑀢𑀁 𑀯𑀸 𑀦𑀻𑀮𑀁 𑀯𑀺𑀦𑀻𑀮𑀁.

𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀓𑀸𑀓𑀓𑀗𑁆𑀓𑀸𑀤𑀻𑀳𑀺. 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀯𑀦𑁆𑀢𑀧𑀼𑀩𑁆𑀩𑀁, 𑀢𑀳𑀁 𑀢𑀳𑀁 𑀧𑀕𑁆𑀖𑀭𑀦𑁆𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀥𑀸𑀭𑀺𑀢𑀦𑁆𑀢𑀺 𑀯𑀺𑀯𑀝𑀁 𑀉𑀕𑁆𑀖𑀸𑀝𑀺𑀢𑀁. 𑀔𑀺𑀢𑁆𑀢𑀦𑁆𑀢𑀺 𑀙𑀟𑁆𑀟𑀺𑀢𑀁, 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀔𑀸𑀤𑀦𑁂𑀦 𑀲𑀭𑀻𑀭𑀲𑀗𑁆𑀖𑀸𑀢𑀢𑁄 𑀮𑀼𑀜𑁆𑀘𑀺𑀢𑁆𑀯𑀸 𑀢𑀳𑀁 𑀢𑀳𑀁 𑀙𑀟𑁆𑀟𑀺𑀢𑀁. 𑀯𑀺𑀯𑀺𑀥𑀁 𑀔𑀺𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀺𑀢𑁆𑀢𑀁.

𑀧𑀼𑀭𑀺𑀫𑀦𑀬𑁂𑀦𑀸𑀢𑀺 ‘‘𑀯𑀺𑀯𑀺𑀥𑀁 𑀔𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦. 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸𑀢𑀺 𑀯𑁂𑀭𑀻𑀳𑀺 𑀔𑀕𑁆𑀕𑀓𑀭𑀯𑀸𑀮𑀸𑀤𑀺𑀦𑀸 ¶ 𑀲𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀜𑁆𑀜𑁂𑀦 𑀳𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦.

𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁂𑀳𑀺 𑀓𑀺𑀫𑀻𑀳𑀺 𑀧𑀕𑁆𑀖𑀭𑀦𑁆𑀢𑀓𑀺𑀫𑀺𑀓𑀼𑀮𑀁 𑀧𑀼𑀴𑀯𑀓𑀦𑁆𑀢𑀺 𑀆𑀳 ‘‘𑀓𑀺𑀫𑀺𑀧𑀭𑀺𑀧𑀼𑀡𑁆𑀡𑀲𑁆𑀲𑀸’’𑀢𑀺.

𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 ¶ 𑀆𑀫𑀓𑀲𑀼𑀲𑀸𑀦𑀸𑀤𑀻𑀲𑀼 𑀙𑀟𑁆𑀟𑀺𑀢𑀸𑀲𑀼𑀪𑀸𑀦𑀺. 𑀦𑀺𑀲𑁆𑀲𑀸𑀬𑀸𑀢𑀺 𑀧𑀝𑀺𑀘𑁆𑀘 𑀢𑀸𑀦𑀺𑀧𑀺 𑀆𑀭𑀩𑁆𑀪. 𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁. 𑀏𑀢𑀸𑀦𑁂𑀯 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑁂𑀯 𑀦𑀸𑀫𑀸𑀦𑀺.

𑀉𑀤𑁆𑀥𑀼𑀫𑀸𑀢𑀓𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁧𑁦𑁩. 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀢𑀺 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦. 𑀢𑁂𑀦𑀸𑀢𑀺 𑀆𑀘𑀭𑀺𑀬𑁂𑀦. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀅𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀣𑀸𑀬𑀸𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀡𑁆𑀳𑀦𑀢𑁆𑀣𑀸𑀬, 𑀅𑀲𑀼𑀪𑁂 𑀯𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲 𑀅𑀢𑁆𑀣𑀸𑀬. 𑀕𑀫𑀦𑀯𑀺𑀥𑀸𑀦𑀦𑁆𑀢𑀺 𑀕𑀫𑀦𑀯𑀺𑀥𑀺. 𑀬𑁂𑀦 𑀯𑀺𑀥𑀺𑀦𑀸 𑀕𑀦𑁆𑀢𑀩𑁆𑀩𑀁, 𑀲𑁄 𑀯𑀺𑀥𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀁 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀧𑁆𑀧𑀦𑀸𑀯𑀺𑀥𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑁧𑁦𑁪. 𑀢𑀸𑀯𑀤𑁂𑀯𑀸𑀢𑀺 𑀲𑀼𑀢𑀓𑁆𑀔𑀡𑁂𑀬𑁂𑀯. 𑀅𑀢𑀺𑀢𑁆𑀣𑁂𑀦 𑀧𑀼𑀡𑁆𑀡𑀦𑀤𑀻𑀆𑀤𑀺𑀁 𑀧𑀓𑁆𑀔𑀦𑁆𑀤𑀦𑁆𑀢𑁂𑀦 𑀯𑀺𑀬 𑀅𑀦𑀼𑀧𑀯𑀺𑀲𑀦𑁆𑀢𑁂𑀦 𑀯𑀺𑀬. 𑀓𑁂𑀤𑀸𑀭𑀓𑁄𑀝𑀺𑀬𑀸𑀢𑀺 𑀓𑁂𑀤𑀸𑀭𑀫𑀭𑀺𑀬𑀸𑀤𑀸𑀬. 𑀯𑀺𑀲𑀪𑀸𑀕𑀭𑀽𑀧𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀺𑀓𑀸𑀤𑀺𑀯𑀺𑀲𑀪𑀸𑀕𑀯𑀢𑁆𑀣𑀼𑀭𑀽𑀧𑀁. 𑀲𑀭𑀻𑀭𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀓𑀴𑁂𑀯𑀭𑀁. 𑀅𑀥𑀼𑀦𑀸𑀫𑀢𑀦𑁆𑀢𑀺 𑀅𑀘𑀺𑀭𑀫𑀢𑀁 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀁 𑀅𑀧𑁆𑀧𑀢𑁆𑀢𑀁. 𑀢𑀓𑁆𑀓𑀬𑀢𑀻𑀢𑀺 𑀲𑀫𑁆𑀪𑀸𑀯𑁂𑀢𑀺 𑀪𑀸𑀭𑀺𑀬𑀁 𑀓𑀢𑁆𑀯𑀸 𑀦 𑀫𑀜𑁆𑀜𑀢𑀺.

𑁧𑁦𑁫. 𑀭𑀽𑀧𑀲𑀤𑁆𑀤𑀸𑀤𑀻𑀢𑀺 𑀏𑀢𑁆𑀣 𑀅𑀫𑀦𑀼𑀲𑁆𑀲𑀸𑀦𑀁 𑀭𑀽𑀧𑁂𑀳𑀺, 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀲𑀤𑁆𑀤𑀸𑀤𑀻𑀳𑀺, 𑀅𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀯𑀸 𑀭𑀽𑀧𑀲𑀤𑁆𑀤𑀸𑀤𑀻𑀳𑀺. 𑀢𑀣𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀦𑁆𑀢𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀪𑀺𑀪𑀽𑀢𑀲𑁆𑀲𑀸𑀢𑀺 𑀪𑁂𑀭𑀯𑀸𑀤𑀺𑀪𑀸𑀯𑁂𑀦 𑀅𑀦𑀺𑀝𑁆𑀞𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀅𑀪𑀺𑀪𑀽𑀢𑀲𑁆𑀲 𑀅𑀚𑁆𑀛𑁄𑀢𑁆𑀣𑀝𑀲𑁆𑀲. 𑀦 𑀧𑀝𑀺𑀲𑀡𑁆𑀞𑀸𑀢𑀻𑀢𑀺 𑀯𑀺𑀤𑀸𑀳𑀯𑀲𑁂𑀦 𑀆𑀲𑀬𑁂 𑀦 𑀢𑀺𑀝𑁆𑀞𑀢𑀺, 𑀉𑀘𑁆𑀙𑀟𑁆𑀟𑁂𑀢𑀩𑁆𑀩𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁄𑀢𑀺 𑀅𑀫𑀦𑀼𑀲𑁆𑀲𑀸𑀤𑀻𑀦𑀁 𑀯𑀲𑁂𑀦 𑀯𑀸 𑀅𑀜𑁆𑀜𑀣𑀸 𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑁄 𑀆𑀩𑀸𑀥𑁄 𑀳𑁄𑀢𑀺. 𑀲𑁄𑀢𑀺 𑀲𑀗𑁆𑀖𑀢𑁆𑀣𑁂𑀭𑁄, 𑀅𑀪𑀺𑀜𑁆𑀜𑀸𑀢𑀪𑀺𑀓𑁆𑀔𑀼 𑀯𑀸. 𑀬𑀲𑁆𑀲𑀸𑀦𑁂𑀦 𑀆𑀭𑁄𑀘𑀺𑀢𑀁, 𑀲𑁄. 𑀓𑀢𑀓𑀫𑁆𑀫𑀸𑀢𑀺 𑀓𑀢𑀣𑁂𑀬𑁆𑀬𑀓𑀫𑁆𑀫𑀸. 𑀅𑀓𑀢𑀓𑀫𑁆𑀫𑀸𑀢𑀺 𑀣𑁂𑀬𑁆𑀬𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑀸. 𑀓𑀢𑀓𑀫𑁆𑀫𑀸 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀢𑁂𑀢𑀺 𑀓𑀢𑀓𑀫𑁆𑀫𑀸 𑀘𑁄𑀭𑀸. 𑀲𑀳 𑀑𑀟𑁆𑀠𑁂𑀦𑀸𑀢𑀺 𑀲𑀳𑁄𑀟𑁆𑀠𑀁, 𑀣𑁂𑀦𑁂𑀢𑁆𑀯𑀸 𑀕𑀳𑀺𑀬𑀫𑀸𑀦𑀪𑀡𑁆𑀟𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀚𑀫𑀸𑀦𑁄𑀢𑀺 𑀬𑀜𑁆𑀜𑀁 𑀬𑀚𑀦𑁆𑀢𑁄 ¶ 𑀬𑀜𑁆𑀜𑀲𑀸𑀫𑀺𑀓𑁄. ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸.

𑀏𑀯𑀁 ¶ 𑀕𑀫𑀦𑀯𑀺𑀥𑀸𑀦𑀁 𑀏𑀓𑀤𑁂𑀲𑁂𑀦 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀉𑀕𑁆𑀕𑀡𑁆𑀳𑀦𑀳𑁂𑀢𑀼. 𑀏𑀓𑁄𑀢𑀺 𑀅𑀬𑀁 𑀏𑀓-𑀲𑀤𑁆𑀤𑁄 𑀅𑀲𑀳𑀸𑀬𑀢𑁆𑀣𑁄, 𑀦 𑀅𑀜𑁆𑀜𑀸𑀤𑀺𑀅𑀢𑁆𑀣𑁄𑀢𑀺 ‘‘𑀅𑀤𑀼𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀸𑀦𑀁 𑀏𑀓𑀁𑀲𑀢𑁄 𑀲𑀫𑀼𑀤𑀺𑀢𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀁 𑀲𑀩𑁆𑀩𑀢𑁆𑀣𑀓𑀪𑀸𑀯𑀢𑁄, 𑀦 𑀢𑀣𑀸 𑀲𑀦𑁆𑀥𑀺𑀆𑀤𑀺𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀡𑁆𑀡𑀢𑁄𑀧𑀻’’𑀢𑀺𑀆𑀤𑀺𑀦𑀸 𑀙𑀲𑀼 𑀞𑀸𑀦𑁂𑀲𑀼 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄 𑀕𑀳𑀺𑀢𑁄. 𑀧𑀼𑀦 𑀏𑀓𑁄 𑀅𑀤𑀼𑀢𑀺𑀬𑁄𑀢𑀺𑀆𑀤𑀺 𑀕𑀳𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀬𑁄𑀕𑀺𑀦𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀩𑁆𑀪𑀸𑀕𑀺𑀬𑀜𑁆𑀜𑁂𑀯𑀸𑀢𑀺 𑀢𑀧𑁆𑀧𑀓𑁆𑀔𑀺𑀬𑀁𑀬𑁂𑀯 𑀅𑀲𑀼𑀪𑀦𑀺𑀫𑀺𑀢𑁆𑀢𑀫𑀦𑀲𑀺𑀓𑀸𑀭𑀲𑀳𑀺𑀢𑀫𑁂𑀯. 𑀆𑀲𑀦𑀁 𑀧𑀜𑁆𑀜𑀧𑁂𑀢𑀻𑀢𑀺 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺. 𑀬𑀁 𑀧𑀦 ‘‘𑀅𑀲𑀼𑀪𑀦𑀺𑀫𑀺𑀢𑁆𑀢𑀤𑀺𑀲𑀸𑀪𑀺𑀫𑀼𑀔𑁂 𑀪𑀽𑀫𑀺𑀧𑁆𑀧𑀤𑁂𑀲𑁂’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁧𑁩) 𑀯𑀓𑁆𑀔𑀢𑀺, 𑀢𑀫𑁆𑀧𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀓𑁂𑀯𑀮𑁂𑀦 𑀤𑀺𑀲𑀸𑀪𑀺𑀫𑀼𑀔𑀪𑀸𑀯𑁂𑀦 𑀓𑀺𑀜𑁆𑀘𑀺 𑀇𑀚𑁆𑀛𑀢𑀺.

𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀲𑁆𑀲 𑀲𑀫𑀦𑁆𑀢𑀸 𑀧𑀸𑀲𑀸𑀡𑀸𑀤𑀺𑀦𑀺𑀫𑀺𑀢𑁆𑀢𑀲𑀮𑁆𑀮𑀓𑁆𑀔𑀡𑀸. 𑀅𑀲𑀫𑁆𑀫𑁄𑀳𑀢𑁆𑀣𑀸𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀉𑀧𑀝𑁆𑀞𑀺𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑀫𑁆𑀫𑁄𑀳𑀯𑀺𑀕𑀫𑀢𑁆𑀣𑀸. 𑀏𑀓𑀸𑀤𑀲𑀯𑀺𑀥𑁂𑀦𑀸𑀢𑀺 𑀯𑀡𑁆𑀡𑀸𑀤𑀺𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁂𑀦. 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑁄𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀦𑀺𑀩𑀦𑁆𑀥𑀦𑀢𑁆𑀣𑁄. 𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀬𑀸 𑀲𑀫𑁆𑀫𑀤𑁂𑀯 𑀧𑀝𑀺𑀧𑀸𑀤𑀦𑀢𑁆𑀣𑀸. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀅𑀥𑀺𑀕𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀡𑁆𑀳𑀦𑀁 𑀅𑀭𑀺𑀬𑀫𑀕𑁆𑀕𑀧𑀤𑀝𑁆𑀞𑀸𑀦𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀅𑀥𑀺𑀕𑀫𑀼𑀧𑀸𑀬𑁄, 𑀬𑀲𑁆𑀫𑀸 𑀯𑀸 ‘‘𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀘𑀺𑀢𑁆𑀢𑀲𑀜𑁆𑀜𑀢𑁆𑀢𑀢𑁆𑀣𑀸𑀬𑀸𑀢𑀺 𑀲𑀭𑀻𑀭𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑁂𑀦, 𑀲𑀁𑀯𑁂𑀕𑀚𑀦𑀦𑁂𑀦 𑀘 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀲𑀜𑁆𑀜𑀢𑁆𑀢𑀺𑀅𑀢𑁆𑀣𑀁 𑀲𑀜𑁆𑀜𑀸𑀧𑀦𑀢𑁆𑀣𑀁. ‘‘𑀘𑀺𑀢𑁆𑀢𑀲𑀜𑁆𑀜𑀢𑀢𑁆𑀣𑀸𑀬𑀸’’𑀢𑀺 𑀯𑀸 𑀧𑀸𑀞𑁄, 𑀓𑀺𑀮𑁂𑀲𑀯𑀲𑁂𑀦 𑀅𑀲𑀁𑀬𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀁𑀬𑀫𑀦𑀢𑁆𑀣𑀁 𑀤𑀫𑀦𑀢𑁆𑀣𑀁, 𑀦 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑁂𑀦 𑀲𑀻𑀲𑀪𑀽𑀢𑁂𑀦, 𑀢𑀁 𑀉𑀢𑁆𑀢𑀫𑀗𑁆𑀕𑀁 𑀧𑀥𑀸𑀦𑀁 𑀓𑀸𑀭𑀡𑀁 𑀓𑀢𑁆𑀯𑀸. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀧𑀓𑀢𑀺𑀬𑀸 𑀅𑀢𑁆𑀢𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀧𑀭𑀺𑀳𑀭𑀺𑀬𑀫𑀸𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁. ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀢𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑁂𑀯𑀸’’𑀢𑀺. 𑀲𑀽𑀧𑀝𑁆𑀞𑀺𑀢𑀪𑀸𑀯𑀲𑀫𑁆𑀧𑀸𑀤𑀦𑁂𑀦𑀸𑀢𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀪𑀸𑀯𑀲𑁆𑀲 𑀲𑀫𑁆𑀧𑀸𑀤𑀦𑁂𑀦. 𑀏𑀯𑀁 ¶ 𑀳𑀺 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 𑀦𑀸𑀫 𑀳𑁄𑀢𑀺. 𑀩𑀳𑀺𑀤𑁆𑀥𑀸 ¶ 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂𑀬𑁂𑀯 𑀧𑀯𑀢𑁆𑀢𑀫𑀸𑀦𑀁 𑀫𑀸𑀦𑀲𑀁 𑀅𑀩𑀳𑀺𑀕𑀢𑀁 𑀦𑀸𑀫. 𑀢𑀣𑀸𑀪𑀽𑀢𑁂𑀦 𑀘𑀸𑀦𑁂𑀦 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑁆𑀧𑀯𑀢𑁆𑀢𑀓𑀺𑀘𑁆𑀘𑀸𑀦𑀺 𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀫𑀦𑀘𑁆𑀙𑀝𑁆𑀞𑀸𑀦𑀁…𑀧𑁂… 𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀤𑁆𑀯𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀯𑀺𑀳𑀸𑀭𑁂 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀅𑀲𑀼𑀓𑀤𑀺𑀲𑀸𑀬 𑀇𑀤𑀁 𑀤𑁆𑀯𑀸𑀭𑀁, 𑀢𑀢𑁄 𑀏𑀯 𑀢𑀸𑀬 𑀤𑀺𑀲𑀸𑀬 𑀲𑀮𑁆𑀮𑀓𑁆𑀔𑀺𑀢𑁂𑀦 𑀅𑀲𑀼𑀓𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻𑀢𑀺 𑀤𑁆𑀯𑀸𑀭𑀁 𑀉𑀧𑀥𑀸𑀭𑁂𑀢𑀩𑁆𑀩𑀁. 𑀢𑀢𑁄𑀢𑀺 𑀤𑁆𑀯𑀸𑀭𑀲𑀮𑁆𑀮𑀓𑁆𑀔𑀡𑀢𑁄 𑀧𑀘𑁆𑀙𑀸. 𑀬𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀢𑀺 𑀲𑀬𑀁. 𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀦𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀕𑀡𑁆𑀳𑀦𑀝𑁆𑀞𑀸𑀦𑀁. 𑀆𑀳𑀸𑀭𑀁 𑀙𑀟𑁆𑀟𑀸𑀧𑁂𑀬𑁆𑀬𑀸𑀢𑀺 𑀯𑀫𑀦𑀁 𑀓𑀸𑀭𑀸𑀧𑁂𑀬𑁆𑀬. 𑀓𑀡𑁆𑀝𑀓𑀝𑁆𑀞𑀸𑀦𑀦𑁆𑀢𑀺 𑀓𑀡𑁆𑀝𑀓𑀯𑀦𑁆𑀢𑀁 𑀞𑀸𑀦𑀁.

𑁧𑁦𑁭. 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀓𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀸𑀬𑀢𑀻𑀢𑀺 𑀉𑀧𑀝𑁆𑀞𑀸𑀢𑀺. 𑀓𑀫𑁆𑀫𑀦𑀺𑀬𑀦𑁆𑀢𑀺 𑀪𑀸𑀯𑀦𑀸𑀬 𑀓𑀫𑁆𑀫𑀓𑁆𑀔𑀫𑀁. 𑀉𑀩𑁆𑀩𑀸𑀴𑁆𑀳𑀲𑁆𑀲𑀸𑀢𑀺 𑀩𑀸𑀥𑀺𑀢𑀲𑁆𑀲. 𑀯𑀺𑀥𑀸𑀯𑀢𑀻𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀲𑀭𑀢𑀺. 𑀉𑀓𑁆𑀓𑀫𑁆𑀫𑀸𑀢𑀺 𑀉𑀚𑀼𑀓𑀁 𑀅𑀦𑀼𑀯𑀸𑀢𑀢𑁄 𑀅𑀧𑀓𑁆𑀓𑀫𑁆𑀫. 𑀫𑀢𑀓𑀴𑁂𑀯𑀭𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀪𑀬𑀢𑁄 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀅𑀘𑁆𑀘𑀸𑀲𑀦𑁆𑀦𑁂 𑀪𑀬𑀫𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀅𑀦𑀼𑀧𑀸𑀤𑀦𑁆𑀢𑀺 𑀧𑀸𑀤𑀲𑀫𑀻𑀧𑀁. 𑀬𑀢𑁆𑀣 𑀞𑀺𑀢𑀲𑁆𑀲 𑀲𑀼𑀔𑁂𑀦 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑀸, 𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀨𑀸𑀲𑀼𑀓𑀝𑁆𑀞𑀸𑀦𑀁.

𑁧𑁦𑁮. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄. 𑀧𑀼𑀦 𑀲𑀫𑀦𑁆𑀢𑀸𑀢𑀺 𑀲𑀸𑀫𑀦𑁆𑀢𑀸 𑀲𑀫𑀻𑀧𑁂. 𑀓𑀘𑁆𑀙𑀓𑁄𑀢𑀺 𑀓𑀸𑀴𑀓𑀘𑁆𑀙𑀓𑁄, ‘‘𑀧𑀺𑀮𑀓𑁆𑀔𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀧𑀻𑀢𑀦𑁄𑀢𑀺 𑀧𑀺𑀧𑁆𑀧𑀮𑀺𑀭𑀼𑀓𑁆𑀔𑁄. 𑀲𑀺𑀦𑁆𑀤𑀻𑀢𑀺 𑀔𑀼𑀤𑁆𑀤𑀓𑀔𑀚𑁆𑀚𑀼𑀭𑀻. 𑀓𑀭𑀫𑀦𑁆𑀤𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀲𑀸𑀫𑀸𑀢𑀺 𑀲𑀸𑀫𑀮𑀢𑀸. 𑀓𑀸𑀴𑀯𑀮𑁆𑀮𑀻𑀢𑀺 𑀓𑀸𑀴𑀯𑀡𑁆𑀡𑀸 𑀅𑀧𑀢𑁆𑀢𑀺𑀓𑀸 𑀏𑀓𑀸 𑀮𑀢𑀸𑀚𑀸𑀢𑀺. 𑀧𑀽𑀢𑀺𑀮𑀢𑀸𑀢𑀺 𑀚𑀻𑀯𑀦𑀯𑀮𑁆𑀮𑀺, 𑀬𑀸 ‘‘𑀕𑀮𑁄𑀘𑀻’’𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁯. 𑀢𑀁 𑀦𑀺𑀫𑀺𑀢𑁆𑀢𑀓𑀭𑀡𑀸𑀤𑀺 𑀇𑀥𑁂𑀯 𑀬𑀣𑀸𑀯𑀼𑀢𑁆𑀢𑁂 𑀧𑀸𑀲𑀸𑀡𑀸𑀤𑀺𑀦𑀺𑀫𑀺𑀢𑁆𑀢𑀓𑀭𑀡𑁂 𑀏𑀯 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦𑀁. 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀻𑀢𑀺 𑀲𑀳 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀅𑀲𑀼𑀪𑀁 𑀧𑀸𑀲𑀸𑀡𑀸𑀤𑀺𑀦𑀺𑀫𑀺𑀢𑁆𑀢𑁂𑀦 𑀲𑀳 𑀓𑀭𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀣 𑀯𑀸 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀧𑀸𑀲𑀸𑀡𑀸𑀤𑀺𑀦𑀺𑀫𑀺𑀢𑁆𑀢𑀜𑁆𑀘 𑀲𑀳 𑀏𑀓𑀚𑁆𑀛𑀁 𑀓𑀭𑁄𑀦𑁆𑀢𑁄 𑀯𑀯𑀢𑁆𑀣𑀧𑁂𑀦𑁆𑀢𑁄 ‘‘𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑁄. 𑀲𑀫𑀸𑀦𑀓𑀸𑀮𑀢𑀸𑀤𑀻𑀧𑀓𑁂𑀦 𑀳𑀺 𑀲𑀳-𑀲𑀤𑁆𑀤𑁂𑀦 𑀅𑀬𑀁 𑀲𑀫𑀸𑀲𑁄 𑀬𑀣𑀸 ‘‘𑀲𑀘𑀓𑁆𑀓𑀁 𑀤𑁂𑀳𑀻’’𑀢𑀺. 𑀢𑀬𑀺𑀤𑀁 𑀦𑀺𑀫𑀺𑀢𑁆𑀢𑀓𑀭𑀡𑀁 𑀅𑀧𑀭𑀸𑀧𑀭𑀁 𑀲𑀮𑁆𑀮𑀓𑁆𑀔𑀡𑁂𑀦 ¶ 𑀳𑁄𑀢𑀺, 𑀦 𑀏𑀓𑀯𑀸𑀭𑀫𑁂𑀯𑀸𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀯𑀯𑀢𑁆𑀣𑀧𑁂𑀦𑁆𑀢𑁄 𑀳𑀺 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀻’’𑀢𑀺. 𑀤𑁆𑀯𑁂𑀢𑀺 𑀧𑀸𑀲𑀸𑀡𑀸𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀺. 𑀲𑀫𑀸𑀲𑁂𑀢𑁆𑀯𑀸 𑀲𑀗𑁆𑀕𑀳𑁂𑀢𑁆𑀯𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸. 𑀲𑀸𑀭𑀫𑁆𑀫𑀡𑀦𑁆𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀧𑀸𑀲𑀸𑀡𑀸𑀤𑀺𑀁 𑀲𑀫𑀸𑀦𑀸𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀳 𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀏𑀓𑀸𑀭𑀫𑁆𑀫𑀡𑀁 𑀯𑀺𑀬 𑀉𑀪𑀬𑀁 ¶ 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀏𑀓𑀚𑁆𑀛𑀁 𑀯𑀺𑀬 𑀘 𑀅𑀧𑀭𑀸𑀧𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀧𑀸𑀲𑀸𑀡𑀸𑀤𑀺𑀁, 𑀅𑀲𑀼𑀪𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀤𑁆𑀯𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀦𑀺𑀬𑁄𑀢𑀺 𑀲𑀓𑁄. 𑀯𑀡𑀺𑀢𑀦𑁆𑀢𑀺 𑀲𑀽𑀦𑀁. 𑀲𑀪𑀸𑀯𑁂𑀦 𑀲𑀭𑀲𑁂𑀦𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀮𑀓𑁆𑀔𑀡𑁂𑀦, 𑀧𑀭𑁂𑀲𑀁 𑀚𑀺𑀕𑀼𑀘𑁆𑀙𑀼𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀦 𑀘, 𑀲𑀪𑀸𑀯𑁄 𑀏𑀯 𑀯𑀸 𑀢𑀣𑀸 𑀦𑀺𑀧𑁆𑀨𑀚𑁆𑀚𑀦𑀢𑁄 ‘‘𑀭𑀲𑁄’’𑀢𑀺 𑀯𑀼𑀢𑁆𑀢𑁄.

𑁧𑁧𑁦. 𑀙𑀩𑁆𑀩𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀡𑁆𑀡𑀸𑀤𑀺𑀦𑀸 𑀙𑀧𑁆𑀧𑀓𑀸𑀭𑁂𑀦 𑀢𑀸𑀯 𑀉𑀤𑁆𑀥𑀼𑀫𑀸𑀢𑀓𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀓𑁂𑀘𑀺 ‘‘𑀓𑀴𑁂𑀯𑀭𑀲𑁆𑀲 𑀤𑀻𑀖𑀭𑀲𑁆𑀲𑀸𑀤𑀺𑀧𑁆𑀧𑀫𑀸𑀡𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀯𑀺𑀥𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺. 𑀮𑀺𑀗𑁆𑀕𑀢𑁄𑀢𑀺 𑀏𑀢𑁆𑀣 𑀮𑀺𑀗𑁆𑀕𑀁 𑀦𑀸𑀫 𑀯𑀬𑁄 𑀮𑀺𑀗𑁆𑀕𑀁, 𑀦 𑀣𑀦𑀫𑀲𑁆𑀲𑀼𑀆𑀤𑀺 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀞𑀺𑀢𑀲𑁆𑀲 𑀲𑀢𑁆𑀢𑀲𑁆𑀲 𑀇𑀤𑀁 𑀲𑀭𑀻𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀥𑀼𑀫𑀸𑀢𑀓𑀲𑀡𑁆𑀞𑀸𑀦𑀯𑀲𑁂𑀦𑁂𑀯, 𑀦 𑀧𑀸𑀓𑀢𑀺𑀓𑀲𑀡𑁆𑀞𑀸𑀦𑀯𑀲𑁂𑀦. 𑀏𑀢𑁂𑀦 𑀬𑀤𑀺 𑀢𑀢𑁆𑀣 𑀓𑁄𑀘𑀺 𑀅𑀦𑀼𑀤𑁆𑀥𑀼𑀫𑀸𑀢𑀓𑀪𑀸𑀯𑀧𑁆𑀧𑀢𑁆𑀢𑁄 𑀧𑀤𑁂𑀲𑁄 𑀲𑀺𑀬𑀸, 𑀲𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀑𑀴𑀸𑀭𑀺𑀓𑀸𑀯𑀬𑀯𑀯𑀲𑁂𑀦 𑀇𑀤𑀁 𑀲𑀡𑁆𑀞𑀸𑀦𑀯𑀯𑀢𑁆𑀣𑀸𑀦𑀁, 𑀦 𑀲𑀼𑀔𑀼𑀫𑀸𑀯𑀬𑀯𑀯𑀲𑁂𑀦𑀸𑀢𑀺 𑀲𑀻𑀲𑀲𑀡𑁆𑀞𑀸𑀦𑀸𑀤𑀺𑀓𑀁 𑀦𑀯𑀯𑀺𑀥𑀫𑁂𑀯 𑀲𑀡𑁆𑀞𑀸𑀦𑀁 𑀕𑀳𑀺𑀢𑀁.

𑀇𑀫𑀺𑀲𑁆𑀲𑀸 𑀤𑀺𑀲𑀸𑀬𑀸𑀢𑀺 𑀇𑀫𑀺𑀲𑁆𑀲𑀸 𑀧𑀼𑀭𑀢𑁆𑀣𑀺𑀫𑀸𑀬, 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑀸𑀬 𑀤𑀺𑀲𑀸𑀬, 𑀅𑀦𑀼𑀤𑀺𑀲𑀸𑀬 𑀯𑀸 𑀞𑀺𑀢𑁄𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀳𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀦𑀸𑀫 𑀪𑀽𑀫𑀺𑀧𑁆𑀧𑀤𑁂𑀲𑁂 𑀇𑀫𑀲𑁆𑀲 𑀓𑀴𑁂𑀯𑀭𑀲𑁆𑀲 𑀳𑀢𑁆𑀣𑀸 𑀞𑀺𑀢𑀸𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀅𑀥𑁄 𑀧𑀸𑀤𑀢𑀮𑁂𑀦𑀸𑀢𑀺𑀆𑀤𑀺 𑀦𑀸𑀪𑀺𑀬𑀸 𑀳𑁂𑀝𑁆𑀞𑀸 𑀅𑀥𑁄, 𑀢𑀢𑁄 𑀉𑀤𑁆𑀥𑀁 𑀉𑀧𑀭𑀻𑀢𑀺 𑀇𑀫𑀲𑁆𑀲 𑀯𑀯𑀢𑁆𑀣𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀭𑀺𑀘𑁆𑀙𑁂𑀤𑁄 𑀳𑁂𑀝𑁆𑀞𑀸 𑀅𑀗𑁆𑀕𑀼𑀮𑀺𑀅𑀕𑁆𑀕𑁂𑀦 𑀉𑀧𑀭𑀺 𑀅𑀁𑀲𑀓𑀽𑀝𑀲𑀦𑁆𑀥𑀺𑀦𑀸 𑀢𑀺𑀭𑀺𑀬𑀁 𑀢𑀘𑀧𑀭𑀺𑀬𑀦𑁆𑀢𑁂𑀦 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀧𑀸𑀤𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼𑀧𑀺. 𑀬𑀢𑁆𑀢𑀓𑀁 𑀯𑀸 𑀧𑀦 𑀞𑀸𑀦𑀁 𑀕𑀡𑁆𑀳𑀢𑀻𑀢𑀺 𑀲𑀘𑁂 𑀲𑀩𑁆𑀩𑀁 𑀲𑀭𑀻𑀭𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀤𑁂𑀲𑁄 𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑁄, 𑀲𑁄 ¶ 𑀬𑀢𑁆𑀢𑀓𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀉𑀤𑁆𑀥𑀼𑀫𑀸𑀢𑀓𑀯𑀲𑁂𑀦 𑀜𑀸𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀢𑀢𑁆𑀢𑀓𑀫𑁂𑀯 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀫𑁂𑀯. 𑀇𑀤𑀁 𑀈𑀤𑀺𑀲𑀦𑁆𑀢𑀺 𑀇𑀤𑀁 𑀳𑀢𑁆𑀣𑀸𑀤𑀺𑀓𑀁 𑀈𑀤𑀺𑀲𑀁 𑀏𑀯𑀫𑀸𑀓𑀸𑀭𑀁. 𑀉𑀤𑁆𑀥𑀼𑀫𑀸𑀢𑀓𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀯𑀺𑀲𑀪𑀸𑀕𑁂 𑀲𑀭𑀻𑀭𑁂 𑀆𑀭𑀫𑁆𑀫𑀡𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑁄 𑀦 𑀉𑀧𑀝𑁆𑀞𑀸𑀢𑀺 𑀦 𑀔𑀸𑀬𑀢𑀺, 𑀲𑀼𑀪𑀢𑁄 𑀉𑀧𑀝𑁆𑀞𑀳𑁂𑀬𑁆𑀬. 𑀢𑁂𑀦𑀸𑀳 ‘‘𑀯𑀺𑀧𑁆𑀨𑀦𑁆𑀤𑀦𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, 𑀓𑀺𑀮𑁂𑀲𑀧𑀭𑀺𑀧𑁆𑀨𑀦𑁆𑀤𑀦𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀕𑁆𑀖𑀸𑀝𑀺𑀢𑀸𑀧𑀻𑀢𑀺 ¶ 𑀉𑀤𑁆𑀥𑀼𑀫𑀸𑀢𑀪𑀸𑀯𑀧𑁆𑀧𑀢𑁆𑀢𑀸𑀧𑀺, 𑀲𑀩𑁆𑀩𑀲𑁄 𑀓𑀼𑀣𑀺𑀢𑀲𑀭𑀻𑀭𑀸𑀧𑀻𑀢𑀺 𑀯𑀸 𑀅𑀢𑁆𑀣𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀞𑀫𑀧𑀸𑀭𑀸𑀚𑀺𑀓𑁂 (𑀧𑀸𑀭𑀸. 𑁬𑁭 𑀆𑀤𑀬𑁄) 𑀯𑀺𑀦𑀻𑀢𑀯𑀢𑁆𑀣𑀽𑀳𑀺 𑀤𑀻𑀧𑁂𑀢𑀩𑁆𑀩𑁄.

𑁧𑁧𑁧. 𑀆𑀲𑁂𑀯𑀺𑀢𑀓𑀫𑁆𑀫𑀝𑁆𑀞𑀸𑀦𑁄𑀢𑀺 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂 𑀓𑀢𑀧𑀭𑀺𑀘𑀬𑁄. 𑀲𑁄𑀲𑀸𑀦𑀺𑀓𑀗𑁆𑀕𑀸𑀤𑀻𑀦𑀁 𑀯𑀲𑁂𑀦 𑀧𑀭𑀺𑀳𑀢𑀥𑀼𑀢𑀗𑁆𑀕𑁄. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀧𑀭𑀺𑀫𑀤𑁆𑀤𑀺𑀢𑀫𑀳𑀸𑀪𑀽𑀢𑁄. 𑀲𑀮𑀓𑁆𑀔𑀡𑀢𑁄 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑀸𑀭𑁄. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀲𑁂𑀦 𑀯𑀯𑀢𑁆𑀣𑀸𑀧𑀺𑀢𑀦𑀸𑀫𑀭𑀽𑀧𑁄. 𑀲𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀉𑀓𑁆𑀓𑀁𑀲𑀦𑁂𑀦 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀩𑀮𑁂𑀦 𑀉𑀕𑁆𑀖𑀸𑀝𑀺𑀢𑀲𑀢𑁆𑀢𑀲𑀜𑁆𑀜𑁄. 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀦𑁂𑀦 𑀓𑀢𑀲𑀫𑀡𑀥𑀫𑁆𑀫𑁄. 𑀢𑀢𑁄 𑀏𑀯 𑀲𑀩𑁆𑀩𑀲𑁄 𑀓𑀼𑀲𑀮𑀯𑀸𑀲𑀦𑀸𑀬, 𑀓𑀼𑀲𑀮𑀪𑀸𑀯𑀦𑀸𑀬 𑀘 𑀧𑀽𑀭𑀡𑁂𑀦 𑀯𑀸𑀲𑀺𑀢𑀯𑀸𑀲𑀦𑁄 𑀪𑀸𑀯𑀺𑀢𑀪𑀸𑀯𑀦𑁄. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀓𑀼𑀲𑀮𑀩𑀻𑀚𑁂𑀦 𑀲𑀩𑀻𑀚𑁄. 𑀜𑀸𑀡𑀲𑁆𑀲 𑀧𑀭𑀺𑀧𑀓𑁆𑀓𑀪𑀸𑀯𑁂𑀦 𑀜𑀸𑀡𑀼𑀢𑁆𑀢𑀭𑁄. 𑀬𑀣𑀸𑀯𑀼𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀸𑀦𑀁 𑀢𑀦𑀼𑀓𑀭𑀡𑁂𑀦 𑀅𑀧𑁆𑀧𑀓𑀺𑀮𑁂𑀲𑁄. 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑁂𑀬𑁂𑀯𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀅𑀲𑀼𑀪𑀲𑁆𑀲 𑀬𑀢𑁆𑀣 𑀬𑀢𑁆𑀣 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑁂 𑀏𑀯, 𑀢𑀸𑀤𑀺𑀲𑀲𑁆𑀲 𑀓𑀸𑀮𑀯𑀺𑀲𑁂𑀲𑁄, 𑀅𑀲𑀼𑀪𑀲𑁆𑀲 𑀧𑀤𑁂𑀲𑀯𑀺𑀲𑁂𑀲𑁄 𑀯𑀸 𑀅𑀧𑁂𑀓𑁆𑀔𑀺𑀢𑀩𑁆𑀩𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦𑁄 𑀘𑁂 𑀏𑀯𑀁 𑀉𑀧𑀝𑁆𑀞𑀸𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑀼𑀭𑀺𑀲𑀯𑀺𑀲𑁂𑀲𑀲𑁆𑀲 𑀯𑀺𑀬 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑁄 𑀘𑁂 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀙𑀩𑁆𑀩𑀺𑀥𑁂𑀦𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸𑀓𑀸𑀭𑁂𑀦 𑀯𑀡𑁆𑀡𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁂𑀦. 𑀧𑀼𑀦𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀯𑀺𑀥𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀦 𑀧𑀜𑁆𑀘𑀯𑀺𑀥𑀢𑀁. 𑀙𑀩𑁆𑀩𑀺𑀥𑁂𑀦 𑀳𑀺 𑀧𑀼𑀩𑁆𑀩𑁂 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀯𑀺𑀳𑀺𑀢𑀁.

𑁧𑁧𑁨. 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀢𑁄𑀢𑀺 𑀲𑀩𑁆𑀩𑁂𑀧𑀺 𑀲𑀦𑁆𑀥𑀬𑁄 𑀢𑀤𑀸𑀧𑀺 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀪𑀸𑀯𑁂𑀦 𑀬𑁂𑀪𑀼𑀬𑁆𑀬𑁂𑀦 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀬𑁂 𑀧𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀢𑁂 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀥𑀼𑀫𑀸𑀢𑀓𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀬𑁄 𑀤𑀓𑁆𑀔𑀺𑀡𑀳𑀢𑁆𑀣𑀲𑀦𑁆𑀥𑀻𑀢𑀺 𑀅𑀁𑀲𑀓𑀧𑁆𑀧𑀭𑀫𑀡𑀺𑀩𑀦𑁆𑀥𑀸𑀦𑀁 𑀯𑀲𑁂𑀦 ¶ 𑀢𑀬𑁄 𑀤𑀓𑁆𑀔𑀺𑀡𑀳𑀢𑁆𑀣𑀲𑀦𑁆𑀥𑀬𑁄. 𑀢𑀣𑀸 𑀯𑀸𑀫𑀳𑀢𑁆𑀣𑀲𑀦𑁆𑀥𑀬𑁄. 𑀓𑀝𑀺𑀚𑀡𑁆𑀡𑀼𑀕𑁄𑀧𑁆𑀨𑀓𑀸𑀦𑀁 𑀯𑀲𑁂𑀦 𑀢𑀬𑁄 𑀤𑀓𑁆𑀔𑀺𑀡𑀧𑀸𑀤𑀲𑀦𑁆𑀥𑀬𑁄. 𑀢𑀣𑀸 𑀯𑀸𑀫𑀧𑀸𑀤𑀲𑀦𑁆𑀥𑀬𑁄. 𑀏𑀓𑁄 𑀓𑀝𑀺𑀲𑀦𑁆𑀥𑀻𑀢𑀺 𑀓𑀝𑀺𑀬𑀸 𑀲𑀤𑁆𑀥𑀺𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀳𑀢𑁆𑀣𑀦𑁆𑀢𑀭𑀦𑁆𑀢𑀺 𑀤𑀓𑁆𑀔𑀺𑀡𑀳𑀢𑁆𑀣𑀤𑀓𑁆𑀔𑀺𑀡𑀧𑀲𑁆𑀲𑀸𑀦𑀁, 𑀯𑀸𑀫𑀳𑀢𑁆𑀣𑀯𑀸𑀫𑀧𑀲𑁆𑀲𑀸𑀦𑀜𑁆𑀘 𑀅𑀦𑁆𑀢𑀭𑀁 𑀯𑀺𑀯𑀭𑀁. 𑀧𑀸𑀤𑀦𑁆𑀢𑀭𑀦𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀯𑁂𑀫𑀚𑁆𑀛𑀁. 𑀉𑀤𑀭𑀦𑁆𑀢𑀭𑀦𑁆𑀢𑀺 𑀦𑀸𑀪𑀺𑀝𑁆𑀞𑀸𑀦𑀲𑀜𑁆𑀜𑀺𑀢𑀁 𑀓𑀼𑀘𑁆𑀙𑀺𑀯𑁂𑀫𑀚𑁆𑀛𑀁, 𑀉𑀤𑀭𑀲𑁆𑀲 𑀯𑀸 𑀅𑀩𑁆𑀪𑀦𑁆𑀢𑀭𑀁. 𑀓𑀡𑁆𑀡𑀦𑁆𑀢𑀭𑀦𑁆𑀢𑀺 𑀓𑀡𑁆𑀡𑀙𑀺𑀤𑁆𑀤𑀁. 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀦𑀸𑀲𑀘𑁆𑀙𑀺𑀤𑁆𑀤𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀓𑁆𑀔𑀻𑀦𑀁, 𑀫𑀼𑀔𑀲𑁆𑀲 𑀘 𑀯𑀲𑁂𑀦𑀸𑀧𑀺 𑀯𑀺𑀯𑀭𑀁 𑀮𑀩𑁆𑀪𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀓𑁆𑀔𑀻𑀦𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀦𑁆𑀢𑀢𑁄𑀢𑀺 𑀏𑀯𑀁 𑀲𑀦𑁆𑀥𑀺𑀆𑀤𑀺𑀢𑁄 𑀉𑀤𑁆𑀥𑀼𑀫𑀸𑀢𑀓𑀁 𑀯𑀯𑀢𑁆𑀣𑀧𑁂𑀦𑁆𑀢𑀲𑁆𑀲 𑀘𑁂 𑀦𑀺𑀫𑀺𑀢𑁆𑀢𑀁 𑀉𑀧𑀢𑀺𑀝𑁆𑀞𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀲𑀫𑀦𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀦𑁆𑀢𑀺 𑀯𑀯𑀢𑁆𑀣𑀸𑀧𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑀮𑀲𑀭𑀻𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀜𑀸𑀡𑀁 𑀘𑀸𑀭𑁂𑀢𑁆𑀯𑀸𑀢𑀺 𑀲𑀩𑁆𑀩𑀢𑁆𑀣𑀓𑀫𑁂𑀯 𑀲𑀭𑀻𑀭𑀁 ¶ 𑀆𑀯𑀚𑁆𑀚𑁂𑀢𑁆𑀯𑀸 𑀢𑀢𑁆𑀣 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑀳𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀁 𑀆𑀭𑀩𑁆𑀪 𑀦𑀺𑀭𑀦𑁆𑀢𑀭𑀁 𑀪𑀸𑀯𑀦𑀸𑀜𑀸𑀡𑀁 𑀧𑀯𑀢𑁆𑀢𑁂𑀢𑁆𑀯𑀸. 𑀬𑀁 𑀞𑀸𑀦𑀦𑁆𑀢𑀺 𑀏𑀯𑀁 𑀧𑀦 𑀜𑀸𑀡𑀁 𑀘𑀸𑀭𑁂𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀭𑀻𑀭𑁂 𑀬𑁄 𑀧𑀤𑁂𑀲𑁄 𑀯𑀺𑀪𑀽𑀢𑁄 𑀳𑀼𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀓𑀸𑀭𑁂𑀦 𑀯𑀺𑀪𑀽𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀺. 𑀉𑀤𑀭𑀧𑀭𑀺𑀬𑁄𑀲𑀸𑀦𑀁 𑀉𑀧𑀭𑀺𑀫𑀲𑀭𑀻𑀭𑀁.

𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑁧𑁧𑁩. 𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 𑀯𑀺𑀦𑀺𑀘𑁆𑀙𑀬𑀲𑀳𑀺𑀢𑀸 𑀅𑀢𑁆𑀣𑀯𑀡𑁆𑀡𑀦𑀸. 𑀬𑀣𑀸𑀯𑀼𑀢𑁆𑀢𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦𑀸𑀢𑀺 𑀯𑀡𑁆𑀡𑀸𑀤𑀺𑀢𑁄, 𑀲𑀦𑁆𑀥𑀺𑀆𑀤𑀺𑀢𑁄 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀯𑀲𑁂𑀦. 𑀲𑀼𑀝𑁆𑀞𑀼 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀳𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀢𑀫𑁂𑀯 𑀦𑀺𑀫𑀺𑀢𑁆𑀢𑀲𑁆𑀲 𑀲𑀼𑀝𑁆𑀞𑀼 𑀕𑀳𑀡𑀸𑀓𑀸𑀭𑀁 𑀉𑀧𑀤𑀺𑀲𑀦𑁆𑀢𑁄 ‘‘𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀬𑀣𑀸 ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀸𑀤𑀭𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀼𑀝𑁆𑀞𑀼 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀅𑀲𑀼𑀪𑀁 𑀧𑀞𑀫𑀁 𑀆𑀯𑀚𑁆𑀚𑀺𑀢𑀁, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣 𑀆𑀯𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦. 𑀲𑀸𑀥𑀼𑀓𑀁 𑀉𑀧𑀥𑀸𑀭𑁂𑀢𑀩𑁆𑀩𑀜𑁆𑀘𑁂𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑀜𑁆𑀘𑀸𑀢𑀺 𑀲𑀓𑁆𑀓𑀘𑁆𑀘𑀁 𑀲𑀢𑀺𑀬𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀜𑁆𑀘𑁂𑀯 𑀧𑀜𑁆𑀜𑀸𑀬 𑀦𑀺𑀘𑁆𑀙𑁂𑀢𑀩𑁆𑀩𑀜𑁆𑀘. 𑀲𑀢𑀺 𑀳𑀺 ‘‘𑀥𑀸𑀭𑀡𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀥𑀸𑀭𑀡𑀜𑁆𑀘𑁂𑀢𑁆𑀣 𑀲𑀮𑁆𑀮𑀓𑁆𑀔𑀡𑀁. 𑀧𑀜𑁆𑀜𑀸 ‘‘𑀧𑀯𑀺𑀘𑀬𑁄’’𑀢𑀺 (𑀥. 𑀲. 𑁧𑁬) 𑀦𑀺𑀤𑁆𑀤𑀺𑀝𑁆𑀞𑀸, 𑀧𑀯𑀺𑀘𑀬𑁄 𑀘𑁂𑀢𑁆𑀣 𑀦𑀺𑀘𑁆𑀙𑀬𑁄𑀢𑀺. 𑀅𑀣 𑀯𑀸 𑀉𑀧𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀉𑀧𑀮𑀓𑁆𑀔𑁂𑀢𑀩𑁆𑀩𑀁 ¶ . 𑀦 𑀳𑀺 𑀓𑀤𑀸𑀘𑀺 𑀲𑀢𑀺𑀭𑀳𑀺𑀢𑀸 𑀧𑀜𑁆𑀜𑀸 𑀅𑀢𑁆𑀣𑀺. 𑀯𑀯𑀢𑁆𑀣𑀧𑁂𑀢𑀩𑁆𑀩𑀦𑁆𑀢𑀺 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀧𑀜𑁆𑀜𑀸𑀲𑀳𑀺𑀢𑀸 𑀏𑀯 𑀳𑀺 𑀲𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀦 𑀢𑀩𑁆𑀩𑀺𑀭𑀳𑀺𑀢𑀸. 𑀅𑀤𑁆𑀥𑀓𑁆𑀔𑀺𑀅𑀧𑀗𑁆𑀕𑀸𑀤𑀺𑀯𑀲𑁂𑀦𑀸𑀧𑀺 𑀑𑀮𑁄𑀓𑀦𑀁 𑀅𑀢𑁆𑀣𑀻𑀢𑀺 ‘‘𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀭𑀺𑀩𑁆𑀬𑀢𑁆𑀢𑀫𑁂𑀯 𑀑𑀮𑁄𑀓𑀦𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀦𑀁, 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑀦𑀜𑁆𑀘 𑀅𑀧𑀭𑀸𑀧𑀭𑀁 𑀅𑀦𑁂𑀓𑀯𑀸𑀭𑀁 𑀓𑀭𑁄𑀦𑁆𑀢𑀲𑁆𑀲. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑁂 𑀉𑀕𑁆𑀕𑀡𑁆𑀳𑀦𑀦𑀺𑀫𑀺𑀢𑁆𑀢𑀁. 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀕𑀳𑀺𑀢𑀁. 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺 𑀦 𑀧𑀫𑀼𑀝𑁆𑀞𑀁 𑀳𑁄𑀢𑀺, 𑀏𑀯𑀁 𑀕𑀳𑀺𑀢𑀁. 𑀏𑀓𑀲𑀤𑀺𑀲𑀦𑁆𑀢𑀺 𑀲𑀫𑀸𑀦𑀲𑀤𑀺𑀲𑀁. 𑀲𑀫𑀸𑀦𑀢𑁆𑀣𑁄 𑀳𑀺 𑀅𑀬𑀁 𑀏𑀓-𑀲𑀤𑁆𑀤𑁄, 𑀬𑀣𑀸 ‘‘𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸, 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸, 𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂 𑀯𑀸’’𑀢𑀺.

𑀆𑀕𑀫𑀦𑀓𑀸𑀮𑁂𑀢𑀺 𑀯𑀺𑀳𑀸𑀭𑀢𑁄 𑀲𑀼𑀲𑀸𑀦𑀁 𑀉𑀤𑁆𑀤𑀺𑀲𑁆𑀲 𑀆𑀕𑀫𑀦𑀓𑀸𑀮𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀤𑀻𑀧𑀺𑀢𑀫𑁆𑀧𑀺 𑀅𑀢𑁆𑀣𑀁 ‘‘𑀏𑀓𑀓𑁂𑀦𑀸’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀓𑀫𑁆𑀫𑀝𑁆𑀞𑀸𑀦𑀁. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀏𑀓𑁂, 𑀢𑀤𑀬𑀼𑀢𑁆𑀢𑀁. 𑀉𑀧𑀝𑁆𑀞𑀺𑀢𑀦𑀺𑀫𑀺𑀢𑁆𑀢𑀁 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ¶ 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀭𑀫𑀦𑀲𑀺𑀓𑀸𑀭𑁄 𑀭𑀜𑁆𑀜𑁄 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀯𑀺𑀤𑁂𑀲𑀕𑀫𑀦𑀁 𑀯𑀺𑀬𑀸𑀢𑀺. 𑀆𑀕𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀢𑁂𑀦.

𑁧𑁧𑁪. 𑀅𑀯𑁂𑀮𑀸𑀬𑀦𑁆𑀢𑀺 𑀲𑀜𑁆𑀛𑀸𑀯𑁂𑀮𑀸𑀤𑀺𑀅𑀬𑀼𑀢𑁆𑀢𑀯𑁂𑀮𑀸𑀬𑀁. 𑀩𑀻𑀪𑀘𑁆𑀙𑀦𑁆𑀢𑀺 𑀯𑀺𑀭𑀽𑀧𑀁. 𑀪𑁂𑀭𑀯𑀸𑀭𑀫𑁆𑀫𑀡𑀦𑁆𑀢𑀺 𑀯𑁂𑀢𑀸𑀴𑀲𑀤𑀺𑀲𑀁 𑀪𑀬𑀸𑀦𑀓𑀁 𑀯𑀺𑀲𑀬𑀁. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀪𑀻𑀭𑀼𑀓𑀧𑀼𑀭𑀺𑀲𑁄 𑀯𑀺𑀬 𑀧𑀺𑀲𑀸𑀘𑀸𑀤𑀺𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀢𑁆𑀢𑁄. 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬𑀸𑀢𑀺 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀺𑀬 𑀏𑀓𑀘𑁆𑀘𑁄 𑀳𑁄𑀢𑀺. 𑀛𑀸𑀦𑀯𑀺𑀩𑁆𑀪𑀦𑁆𑀢𑀓𑁄𑀢𑀺 𑀛𑀸𑀦𑀢𑁄 𑀯𑀺𑀘𑁆𑀘𑀼𑀢𑀓𑁄 𑀲𑀻𑀮𑀯𑀺𑀩𑁆𑀪𑀦𑁆𑀢𑀓𑀫𑀦𑁆𑀢𑀯𑀺𑀩𑁆𑀪𑀦𑁆𑀢𑀓𑀸 𑀯𑀺𑀬. 𑀲𑀦𑁆𑀣𑀫𑁆𑀪𑁂𑀢𑁆𑀯𑀸𑀢𑀺 𑀉𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀸𑀲𑀯𑀽𑀧𑀲𑀫𑀦𑁂𑀦 𑀯𑀺𑀕𑀢𑀓𑀫𑁆𑀧𑀢𑀸𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸. 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀦𑁆𑀢𑀺𑀆𑀤𑀺 𑀲𑀦𑁆𑀣𑀫𑁆𑀪𑀦𑀲𑁆𑀲 𑀉𑀧𑀸𑀬𑀤𑀲𑁆𑀲𑀦𑀁. 𑀫𑀢𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑀓𑀁 𑀦𑀸𑀫 𑀦𑀢𑁆𑀣𑀺 𑀅𑀲𑀢𑀺 𑀢𑀸𑀤𑀺𑀲𑁂 𑀫𑀦𑁆𑀢𑀧𑁆𑀧𑀬𑁄𑀕𑁂. 𑀲𑁄𑀧𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀫𑀧𑁆𑀧𑀢𑁆𑀢𑁂 𑀅𑀯𑀺𑀦𑀝𑁆𑀞𑀭𑀽𑀧𑁂 𑀏𑀯 𑀇𑀚𑁆𑀛𑀢𑀺, 𑀢𑀣𑀸 𑀤𑁂𑀯𑀢𑀸𑀥𑀺𑀕𑁆𑀕𑀳𑁄, 𑀦 𑀏𑀯𑀭𑀽𑀧𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀜𑁆𑀜𑀚𑁄𑀢𑀺 𑀪𑀸𑀯𑀦𑀸𑀧𑀭𑀺𑀓𑀧𑁆𑀧𑀲𑀜𑁆𑀜𑀸𑀬 𑀚𑀸𑀢𑁄. 𑀢𑀢𑁄 𑀏𑀯 𑀲𑀜𑁆𑀜𑀸𑀲𑀫𑁆𑀪𑀯𑁄 𑀲𑀜𑁆𑀜𑀸𑀫𑀢𑁆𑀢𑀲𑀫𑀼𑀝𑁆𑀞𑀸𑀦𑁄. 𑀢𑀸𑀲𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀦𑁆𑀢𑀸𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀦𑁄𑀤𑁂𑀢𑁆𑀯𑀸 𑀯𑀽𑀧𑀲𑀫𑁂𑀢𑁆𑀯𑀸 ¶ . ‘‘𑀇𑀤𑀸𑀦𑀺 𑀢𑀯 𑀧𑀭𑀺𑀲𑁆𑀲𑀫𑁄 𑀲𑀧𑁆𑀨𑀮𑁄 𑀚𑀸𑀢𑁄’’𑀢𑀺 𑀳𑀸𑀲𑀁 𑀧𑀻𑀢𑀺𑀁 𑀧𑀫𑁄𑀤𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀘𑀺𑀢𑁆𑀢𑀁 𑀲𑀜𑁆𑀘𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀢𑀩𑁆𑀩𑀁 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁. 𑀲𑀫𑁆𑀧𑀸𑀤𑁂𑀦𑁆𑀢𑁄𑀢𑀺 𑀲𑀸𑀥𑁂𑀦𑁆𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑁄. 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀦𑀺𑀩𑀦𑁆𑀥𑀢𑀻𑀢𑀺 𑀪𑀸𑀯𑀦𑀁 𑀬𑀣𑀸𑀯𑀼𑀢𑁆𑀢𑁂 𑀦𑀺𑀫𑀺𑀢𑁆𑀢𑁂 𑀉𑀧𑀦𑁂𑀦𑁆𑀢𑁄 𑀦𑀺𑀩𑀦𑁆𑀥𑀢𑀺. 𑀬𑁄𑀕𑀓𑀫𑁆𑀫𑀁 𑀳𑀺 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 ‘‘𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀬𑁄𑀕𑀓𑀫𑁆𑀫𑀲𑁆𑀲 𑀯𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀬𑀣𑀸𑀉𑀧𑀝𑁆𑀞𑀺𑀢𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀢𑀁 𑀪𑀸𑀯𑀦𑀸𑀘𑀺𑀢𑁆𑀢𑁂 𑀉𑀧𑀦𑀺𑀩𑀦𑁆𑀥𑀢𑀺. 𑀢𑀁 𑀧𑀦𑀲𑁆𑀲 𑀉𑀧𑀦𑀺𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀘𑀺𑀢𑁆𑀢𑀁 𑀲𑀜𑁆𑀘𑀭𑀸𑀧𑁂𑀢𑀩𑁆𑀩𑀁. 𑀏𑀯𑀁 ‘‘𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑁄𑀕𑀺𑀦𑁄, 𑀢𑀲𑁆𑀲 𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀲𑀼𑀪𑀲𑁆𑀲. 𑀫𑀸𑀦𑀲𑀁 𑀘𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁧𑁧𑁫. ‘‘𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸’’𑀢𑀺 𑀧𑀤𑀲𑁆𑀲 ‘‘𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀬𑀸 𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸’’𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁, 𑀢𑀲𑁆𑀲𑀸 𑀘 𑀲𑀫𑁆𑀧𑀝𑀺𑀧𑀸𑀤𑀦𑀯𑀺𑀥𑀺𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀺𑀫𑀻𑀢𑀺 𑀧𑀓𑁆𑀔𑀲𑁆𑀲 𑀓𑀢𑀫𑀻, 𑀓𑀺𑀁 𑀤𑀼𑀢𑀺𑀬𑀸, 𑀢𑀢𑀺𑀬𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀸𑀢𑀺 𑀅𑀢𑁆𑀣𑁄. 𑀢𑀼𑀡𑁆𑀳𑀻𑀪𑀽𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀧𑀭𑀺𑀳𑀭𑀡𑀢𑁆𑀣𑀁. 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀳𑀺 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀸𑀲𑀦𑀲𑀫𑁆𑀧𑀝𑀺𑀧𑀢𑁆𑀢𑀺. 𑀦𑀲𑁆𑀲𑀢𑀻𑀢𑀺 𑀦 𑀤𑀺𑀲𑁆𑀲𑀢𑀺 ¶ , 𑀦 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀆𑀕𑀦𑁆𑀢𑀼𑀓𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀅𑀯𑀲𑁂𑀲𑀸𑀦𑀺𑀧𑀻’’𑀢𑀺 𑀯𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀕𑀳𑁂𑀢𑀼𑀁 𑀧𑀼𑀦 𑀆𑀕𑀦𑁆𑀢𑀼𑀓𑀕𑁆𑀕𑀳𑀡𑀁 𑀓𑀢𑀁. 𑀕𑀫𑀺𑀓𑀯𑀢𑁆𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀯𑀸𑀲𑀺𑀓𑀅𑀦𑀼𑀫𑁄𑀤𑀦𑀧𑀺𑀡𑁆𑀟𑀘𑀸𑀭𑀺𑀓𑀅𑀦𑀼𑀫𑁄𑀤𑀦𑀧𑀺𑀡𑁆𑀟𑀘𑀸𑀭𑀺𑀓𑀆𑀭𑀜𑁆𑀜𑀺𑀓𑀲𑁂𑀦𑀸𑀲𑀦𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁫𑁬) 𑀳𑀺 𑀆𑀕𑀢𑀸𑀦𑀺 𑀫𑀳𑀸𑀯𑀢𑁆𑀢𑀸𑀦𑀺 𑀇𑀥 ‘‘𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂 𑀧𑀦 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀸𑀮𑁂 𑀘 𑀘𑀭𑀺𑀢𑀩𑁆𑀩𑀸𑀦𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑀫𑁆𑀪𑀯𑀢𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺. 𑀦𑀺𑀫𑀺𑀢𑁆𑀢𑀁 𑀯𑀸 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀲𑀼𑀲𑀸𑀦𑁂 𑀞𑀺𑀢𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀸𑀧𑀕𑀫𑁂𑀦 𑀅𑀦𑁆𑀢𑀭𑀥𑀸𑀬𑀢𑀺. 𑀢𑁂𑀦𑀸𑀳 ‘‘𑀉𑀤𑁆𑀥𑀼𑀫𑀸𑀢𑀓’’𑀦𑁆𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀢𑁂𑀦 ¶ 𑀓𑀸𑀭𑀡𑁂𑀦, 𑀇𑀫𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀼𑀁 𑀕𑀫𑀦𑁂 𑀯𑀺𑀬 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁂𑀧𑀺 𑀬𑀣𑀸𑀲𑀮𑁆𑀮𑀓𑁆𑀔𑀺𑀢𑀤𑀺𑀲𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀁 𑀬𑀸𑀯 𑀦𑀺𑀫𑀺𑀢𑁆𑀢𑀯𑀺𑀦𑀸𑀲𑀸 𑀧𑀯𑀢𑁆𑀢𑀺𑀢𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑁂𑀦 𑀉𑀧𑀥𑀸𑀭𑀡𑀢𑁆𑀣𑀁. 𑀲𑀢𑀺 𑀳𑀺 𑀢𑀲𑁆𑀲 𑀦𑀺𑀭𑀦𑁆𑀢𑀭𑀽𑀧𑀥𑀸𑀭𑀡𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀺𑀢𑀸𑀓𑀸𑀭𑁄 𑀲𑀫𑀣𑀦𑀺𑀫𑀺𑀢𑁆𑀢𑀲𑁆𑀲 𑀕𑀳𑀡𑁂 𑀘𑀺𑀢𑁆𑀢𑀲𑁆𑀲 𑀲𑀫𑀸𑀳𑀺𑀢𑀸𑀓𑀸𑀭𑁄 𑀯𑀺𑀬 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯𑀁…𑀧𑁂… 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺. 𑀧𑀼𑀭𑀺𑀫𑀸𑀓𑀸𑀭𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀧𑀸𑀓𑀝𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀢𑁆𑀢𑀸 𑀧𑀼𑀭𑀺𑀫𑀸𑀓𑀸𑀭𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄 𑀪𑀸𑀯𑀦𑀸𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺.

𑁧𑁧𑁬. 𑀉𑀤𑁆𑀥𑀼𑀫𑀸𑀢𑀓𑀁 𑀦𑀸𑀫 𑀅𑀢𑀺𑀯𑀺𑀬 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀁 𑀩𑀻𑀪𑀘𑁆𑀙𑀁 𑀪𑀬𑀸𑀦𑀓𑀜𑁆𑀘, 𑀏𑀯𑀭𑀽𑀧𑁂 𑀆𑀭𑀫𑁆𑀫𑀡𑁂 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀏𑀯𑀁 𑀆𑀩𑀤𑁆𑀥𑀧𑀭𑀺𑀓𑀫𑁆𑀫𑀲𑁆𑀲 𑀣𑀺𑀭𑀻𑀪𑀽𑀢𑀲𑁆𑀲𑁂𑀯 𑀬𑁄𑀕𑀺𑀦𑁄 𑀅𑀥𑀺𑀧𑁆𑀧𑀸𑀬𑁄 𑀲𑀫𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀏𑀯𑀫𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑀸. 𑀢𑀁 𑀭𑀓𑁆𑀔𑁂𑀬𑁆𑀬𑀸𑀢𑀺 ‘‘𑀅𑀤𑁆𑀥𑀸 𑀇𑀫𑀺𑀦𑀸 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀯𑀺𑀬 𑀢𑀁 𑀫𑀡𑀺𑀭𑀢𑀦𑀁 𑀭𑀓𑁆𑀔𑁂𑀬𑁆𑀬. 𑀘𑀢𑀼𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄𑀢𑀺𑀆𑀤𑀺 𑀦𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀲𑀼𑀮𑀪𑀢𑀸𑀤𑀲𑁆𑀲𑀦𑀁. 𑀢𑀢𑁆𑀣 𑀘𑀢𑀼𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄𑀢𑀺 𑀘𑀢𑀼𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑁄, 𑀘𑀢𑀼𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀧𑀭𑀺𑀳𑀭𑀦𑁆𑀢𑁄. 𑀇𑀢𑀭𑀸𑀦𑀻𑀢𑀺 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑀸𑀦𑀺 𑀅𑀦𑀼𑀲𑁆𑀲𑀢𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀻𑀦𑀺. 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀁 𑀬𑀣𑀸𑀮𑀤𑁆𑀥𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁. ‘‘𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀭𑀓𑁆𑀔𑀡𑀯𑀺𑀥𑀺𑀁 𑀧𑀼𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀢𑁆𑀢𑀺𑀝𑁆𑀞𑀸𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁧𑁭. 𑀦𑀸𑀦𑀸 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀦𑀸𑀦𑀸𑀓𑀭𑀡𑀁, 𑀪𑁂𑀤𑁄. 𑀩𑀻𑀪𑀘𑁆𑀙𑀁 𑀪𑁂𑀭𑀯𑀤𑀲𑁆𑀲𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺 𑀫𑀦𑀲𑀺𑀓𑀸𑀭𑀲𑁆𑀲 ¶ 𑀅𑀦𑀼𑀴𑀸𑀭𑀢𑀸𑀬, 𑀅𑀦𑀼𑀧𑀲𑀦𑁆𑀢𑀢𑀸𑀬 𑀘 𑀆𑀭𑀫𑁆𑀫𑀡𑀲𑁆𑀲. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 ‘‘𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀣𑀽𑀮𑀗𑁆𑀕𑀧𑀘𑁆𑀘𑀗𑁆𑀕𑀧𑀼𑀭𑀺𑀲𑁄 𑀯𑀺𑀬 𑀉𑀧𑀝𑁆𑀞𑀸𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀩𑀳𑀺𑀤𑁆𑀥𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀢𑁄 𑀩𑀳𑀺𑀤𑁆𑀥𑀸. 𑀓𑀸𑀫𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀅𑀲𑀼𑀪𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀸𑀫𑀲𑀜𑁆𑀜𑀸𑀬 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀫𑀦𑀲𑀺𑀓𑀸𑀭𑀲𑁆𑀲𑁂𑀯 𑀅𑀪𑀸𑀯𑀸. 𑀅𑀫𑀦𑀲𑀺𑀓𑀸𑀭𑀸𑀢𑀺 𑀯𑀸 𑀫𑀦𑀲𑀺𑀓𑀸𑀭𑀧𑀝𑀺𑀧𑀓𑁆𑀔𑀳𑁂𑀢𑀼. 𑀬𑀸𑀬 𑀳𑀺 𑀓𑀸𑀫𑀲𑀜𑁆𑀜𑀸𑀬 𑀯𑀲𑁂𑀦 𑀲𑀢𑁆𑀢𑀸 𑀓𑀸𑀫𑁂 𑀫𑀦𑀲𑀺 𑀓𑀭𑁄𑀦𑁆𑀢𑀺, 𑀢𑀲𑁆𑀲𑀸 𑀧𑀝𑀺𑀧𑀓𑁆𑀔𑀪𑀽𑀢𑀸 𑀅𑀲𑀼𑀪𑀲𑀜𑁆𑀜𑀸 𑀓𑀸𑀫𑀸𑀦𑀁 𑀅𑀫𑀦𑀲𑀺𑀓𑀸𑀭𑁄, 𑀢𑀦𑁆𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ¶ ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻’’𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀳𑀺 𑀅𑀲𑀼𑀪𑀲𑀜𑁆𑀜𑀸𑀬 𑀲𑀤𑁆𑀥𑀺𑀁 𑀩𑀮𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀅𑀦𑀼𑀭𑁄𑀥𑀫𑀽𑀮𑀓𑁄 𑀆𑀖𑀸𑀢𑁄 𑀫𑀽𑀮𑀓𑀸𑀭𑀡𑁂 𑀯𑀺𑀓𑁆𑀔𑀫𑁆𑀪𑀺𑀢𑁂 𑀯𑀺𑀓𑁆𑀔𑀫𑁆𑀪𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀦𑀬…𑀧𑁂… 𑀧𑀳𑀻𑀬𑀢𑀻’’𑀢𑀺. 𑀦 𑀳𑀺 𑀓𑀤𑀸𑀘𑀺 𑀧𑀳𑀻𑀦𑀸𑀦𑀼𑀦𑀬𑀲𑁆𑀲 𑀩𑁆𑀬𑀸𑀧𑀸𑀤𑁄 𑀲𑀫𑁆𑀪𑀯𑀢𑀺. 𑀬𑀣𑀸𑀯𑀼𑀢𑁆𑀢𑀅𑀲𑀼𑀪𑀲𑀜𑁆𑀜𑀸𑀲𑀳𑀕𑀢𑀸 𑀳𑀺 𑀧𑀻𑀢𑀺 𑀲𑀸𑀢𑀺𑀲𑀬𑀸 𑀧𑀯𑀢𑁆𑀢𑀫𑀸𑀦𑀸𑀯 𑀩𑁆𑀬𑀸𑀧𑀸𑀤𑀁 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀢𑀣𑀸 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀬𑀸𑀢𑀺 𑀬𑀣𑀸 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀢𑀸𑀬. 𑀯𑀻𑀭𑀺𑀬𑀜𑁆𑀳𑀺 𑀧𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀯𑀺𑀬 𑀲𑀯𑀺𑀧𑁆𑀨𑀸𑀭𑀢𑀸𑀬 𑀣𑀺𑀦𑀫𑀺𑀤𑁆𑀥𑀁 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺.

𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀘𑁆𑀙𑀸𑀦𑀼𑀢𑀸𑀧𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀤𑀭𑀣𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀘𑀺𑀢𑁆𑀢𑀲𑁆𑀲 𑀦𑀺𑀩𑁆𑀩𑀼𑀢𑀢𑀸. 𑀢𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀲𑀻𑀮𑀁, 𑀢𑀁𑀲𑀳𑀕𑀢𑀸 𑀢𑀤𑀼𑀧𑀦𑀺𑀲𑁆𑀲𑀬𑀸 𑀘 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀸𑀤𑀬𑁄 𑀲𑀪𑀸𑀯𑀢𑁄, 𑀳𑁂𑀢𑀼𑀢𑁄 𑀘 𑀲𑀦𑁆𑀢𑀲𑀪𑀸𑀯𑀸, 𑀢𑁂𑀲𑀁 𑀅𑀦𑀼𑀬𑀼𑀜𑁆𑀚𑀦𑁂𑀦 𑀅𑀯𑀽𑀧𑀲𑀦𑁆𑀢𑀲𑀪𑀸𑀯𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻𑀢𑀺 𑀆𑀳 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀦𑁆𑀢𑀥𑀫𑁆𑀫𑀸𑀦𑀼𑀬𑁄𑀕𑀯𑀲𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻’’𑀢𑀺. 𑀪𑀸𑀯𑀦𑀸𑀬 𑀳𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀺𑀬𑀸 𑀬𑀁 𑀲𑀸𑀢𑀺𑀲𑀬𑀁 𑀲𑀼𑀔𑀁 𑀮𑀩𑁆𑀪𑀢𑀺, 𑀢𑀁 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀅𑀥𑀺𑀕𑀢𑀯𑀺𑀲𑁂𑀲𑀲𑁆𑀲𑀸𑀢𑀺 𑀬𑀣𑀸𑀥𑀺𑀕𑀢𑀲𑁆𑀲 𑀪𑀸𑀯𑀦𑀸𑀯𑀺𑀲𑁂𑀲𑀲𑁆𑀲. 𑀧𑀘𑁆𑀘𑀓𑁆𑀔𑀢𑀸𑀬𑀸𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀬𑁄𑀕𑀺𑀦𑁄 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀏𑀯𑀭𑀽𑀧𑀺𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑁂𑀲𑁂𑀢𑀻’’𑀢𑀺 𑀧𑀝𑀺𑀧𑀢𑁆𑀢𑀺𑀤𑁂𑀲𑀓𑁂 𑀲𑀢𑁆𑀣𑀭𑀺. 𑀧𑀝𑀺𑀧𑀢𑁆𑀢𑀺𑀬𑀦𑁆𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀚𑁆𑀛𑀸𑀦𑀧𑀝𑀺𑀧𑀢𑁆𑀢𑀺𑀬𑀁. 𑀧𑀝𑀺𑀧𑀢𑁆𑀢𑀺𑀨𑀮𑁂𑀢𑀺 𑀢𑀸𑀬 𑀲𑀸𑀥𑁂𑀢𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀨𑀮𑁂. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺 𑀥𑀫𑁆𑀫𑀦𑁆𑀯𑀬𑀯𑀺𑀘𑀸𑀭𑀸𑀳𑀺𑀢𑀩𑀮𑁂𑀦 𑀯𑀺𑀘𑀸𑀭𑀩𑀮𑁂𑀦. 𑀇𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀧𑀳𑀻𑀬𑀦𑁆𑀢𑀻𑀢𑀺 𑀏𑀯𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀧𑀝𑀺𑀮𑀸𑀪𑀲𑀫𑀓𑀸𑀮𑀫𑁂𑀯 𑀳𑁂𑀝𑁆𑀞𑀸 𑀧𑀯𑀢𑁆𑀢𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀧𑁆𑀨𑀦𑁆𑀦𑁂𑀳𑀺 𑀲𑀫𑀸𑀥𑀺𑀆𑀤𑀻𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀦 𑀳𑀺 𑀧𑀝𑀺𑀧𑀓𑁆𑀔𑁂𑀦 𑀯𑀺𑀦𑀸 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑀁 𑀲𑀫𑁆𑀪𑀯𑀢𑀺, 𑀧𑀝𑀺𑀧𑀓𑁆𑀔𑀸 ¶ 𑀘 𑀲𑀫𑀸𑀥𑀺𑀆𑀤𑀬𑁄 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁. 𑀬𑀣𑀸𑀳 𑀧𑁂𑀝𑀓𑁂 ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄’’𑀢𑀺𑀆𑀤𑀺.

𑀢𑁂𑀦𑁂𑀯 ¶ 𑀘 ‘‘𑀇𑀫𑁂𑀳𑀺 𑀢𑁂𑀲𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦’’𑀦𑁆𑀢𑀺 𑀧𑀳𑀸𑀦𑀧𑀭𑀺𑀤𑀻𑀧𑀦𑀫𑀼𑀔𑁂𑀦 𑀛𑀸𑀦𑀗𑁆𑀕𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀺𑀜𑁆𑀜𑁂𑀯 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀫𑀺𑀜𑁆𑀜𑁂𑀯 𑀘𑀸𑀢𑀺 𑀬𑀁 𑀢𑀁 𑀬𑀣𑀸𑀉𑀧𑀝𑁆𑀞𑀺𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀬 𑀉𑀧𑀝𑁆𑀞𑀺𑀢𑀁, 𑀢𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀪𑀽𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁, 𑀢𑀲𑁆𑀫𑀺𑀜𑁆𑀜𑁂𑀯 𑀦𑀺𑀫𑀺𑀢𑁆𑀢𑁂. 𑀘𑁂𑀢𑀲𑁄𑀢𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲. 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄𑀢𑀺 𑀆𑀭𑁄𑀧𑀦𑀮𑀓𑁆𑀔𑀡𑁄, 𑀅𑀧𑁆𑀧𑀦𑀸𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀸𑀦𑀼𑀫𑀚𑁆𑀚𑀦𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀅𑀦𑀼𑀯𑀺𑀘𑀭𑀡𑀁. 𑀆𑀭𑀫𑁆𑀫𑀡𑁂 𑀳𑀺 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲𑀽𑀧𑀭𑀺 𑀅𑀦𑀼𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀯𑀺𑀘𑀸𑀭𑀲𑁆𑀲 𑀅𑀦𑀼𑀯𑀺𑀘𑀸𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀅𑀦𑀼𑀫𑀚𑁆𑀚𑀦𑀓𑀺𑀘𑁆𑀘𑀁. 𑀯𑀺𑀲𑁂𑀲𑁄 𑀏𑀯 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀯𑀺𑀲𑁂𑀲𑀸𑀥𑀺𑀕𑀫𑁄, 𑀧𑀝𑀺𑀮𑀤𑁆𑀥𑁄 𑀘 𑀲𑁄 𑀯𑀺𑀲𑁂𑀲𑀸𑀥𑀺𑀕𑀫𑁄 𑀘𑀸𑀢𑀺 𑀧𑀝𑀺…𑀧𑁂… 𑀕𑀫𑁄, 𑀢𑀧𑁆𑀧𑀘𑁆𑀘𑀬𑀸 𑀢𑀁𑀳𑁂𑀢𑀼𑀓𑀸 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸𑀥𑀺𑀕𑀫𑀧𑀘𑁆𑀘𑀬𑀸 𑀧𑀻𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀧𑀻𑀢𑀺𑀲𑀳𑀺𑀢𑀘𑀺𑀢𑁆𑀢𑀲𑁆𑀲. 𑀧𑀲𑁆𑀲𑀤𑁆𑀥𑀺𑀲𑀫𑁆𑀪𑀯𑀢𑁄𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻𑀦𑀁 𑀲𑀁𑀲𑀺𑀚𑁆𑀛𑀦𑀢𑁄. ‘‘𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀲𑁆𑀲𑀤𑁆𑀥𑀺𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀳𑁂𑀢𑀼𑀓𑀁 𑀲𑀼𑀔𑀁 ‘‘𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀻’’𑀢𑀺 𑀯𑀘𑀦𑀢𑁄. 𑀲𑀼𑀔𑀦𑀺𑀫𑀺𑀢𑁆𑀢𑀸 𑀲𑀼𑀔𑀧𑀘𑁆𑀘𑀬𑀸 𑀏𑀓𑀕𑁆𑀕𑀢𑀸. ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑀅. 𑀦𑀺. 𑁩.𑁯𑁬; 𑁧𑁧.𑁧𑁨) 𑀳𑀺 𑀯𑀼𑀢𑁆𑀢𑀁. 𑀇𑀢𑀺 𑀛𑀸𑀦𑀗𑁆𑀕𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀏𑀯𑀁 𑀏𑀢𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀢𑀲𑁆𑀫𑀺𑀁𑀬𑁂𑀯 𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀞𑀫𑀚𑁆𑀛𑀸𑀦𑀧𑀝𑀺𑀩𑀺𑀫𑁆𑀩𑀪𑀽𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀪𑀽𑀢𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀧𑀝𑀺𑀮𑀸𑀪𑀲𑀫𑀓𑀸𑀮𑀫𑁂𑀯 𑀉𑀧𑀘𑀸𑀭𑀚𑁆𑀛𑀸𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀦𑀻𑀮𑀓𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁧𑁧𑁮. 𑀯𑀺𑀦𑀻𑀮𑀓𑀸𑀤𑀻𑀲𑀼𑀧𑀺 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀢𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀲𑀳 𑀯𑀺𑀦𑀺𑀘𑁆𑀙𑀬𑁂𑀦, 𑀅𑀥𑀺𑀧𑁆𑀧𑀸𑀬𑁂𑀦 𑀘𑀸𑀢𑀺 𑀲𑀯𑀺𑀦𑀺𑀘𑁆𑀙𑀬𑀸𑀥𑀺𑀧𑁆𑀧𑀸𑀬𑀁. 𑀢𑀁 𑀲𑀩𑁆𑀩𑀁 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀩𑀭𑀓𑀩𑀭𑀯𑀡𑁆𑀡𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀲𑀩𑀮𑀯𑀡𑁆𑀡𑀁. 𑀉𑀲𑁆𑀲𑀤𑀯𑀲𑁂𑀦𑀸𑀢𑀺 𑀭𑀢𑁆𑀢𑀲𑁂𑀢𑀦𑀻𑀮𑀯𑀡𑁆𑀡𑁂𑀲𑀼 𑀉𑀲𑁆𑀲𑀤𑀲𑁆𑀲 𑀯𑀡𑁆𑀡𑀲𑁆𑀲 𑀯𑀲𑁂𑀦.

𑀲𑀦𑁆𑀦𑀺𑀲𑀺𑀦𑁆𑀦𑀦𑁆𑀢𑀺 ¶ 𑀦𑀺𑀘𑁆𑀘𑀮𑀪𑀸𑀯𑁂𑀦𑁂𑀯 𑀲𑀩𑁆𑀩𑀲𑁄 𑀣𑀺𑀭𑀢𑀁.

𑀘𑁄𑀭𑀸𑀝𑀯𑀺𑀬𑀦𑁆𑀢𑀺 𑀘𑁄𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀅𑀭𑀜𑁆𑀜𑁂. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀖𑀸𑀢𑀦𑁂. 𑀙𑀺𑀦𑁆𑀦𑀧𑀼𑀭𑀺𑀲𑀝𑁆𑀞𑀸𑀦𑁂𑀢𑀺 𑀙𑀺𑀦𑁆𑀦𑀧𑀼𑀭𑀺𑀲𑀯𑀦𑁆𑀢𑁂 𑀞𑀸𑀦𑁂. 𑀦𑀸𑀦𑀸𑀤𑀺𑀲𑀸𑀬𑀁 𑀧𑀢𑀺𑀢𑀫𑁆𑀧𑀻𑀢𑀺 ¶ 𑀙𑀺𑀦𑁆𑀦𑀁 𑀳𑀼𑀢𑁆𑀯𑀸 𑀲𑀭𑀻𑀭𑀲𑁆𑀲 𑀔𑀡𑁆𑀟𑀤𑁆𑀯𑀬𑀁 𑀯𑀺𑀲𑀼𑀁 𑀤𑀺𑀲𑀸𑀲𑀼 𑀧𑀢𑀺𑀢𑀫𑁆𑀧𑀺. 𑀏𑀓𑀸𑀯𑀚𑁆𑀚𑀦𑁂𑀦𑀸𑀢𑀺 𑀏𑀓𑀲𑀫𑀦𑁆𑀦𑀸𑀳𑀸𑀭𑁂𑀦. 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀏𑀓𑀚𑁆𑀛𑀁 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺. 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀢𑀻𑀢𑀺 𑀅𑀚𑁂𑀕𑀼𑀘𑁆𑀙𑀺𑀢𑀁 𑀉𑀧𑀕𑀘𑁆𑀙𑁂𑀬𑁆𑀬 𑀲𑁂𑀬𑁆𑀬𑀣𑀸𑀧𑀺 𑀙𑀯𑀟𑀸𑀳𑀓𑁄. 𑀲𑀳𑀢𑁆𑀣𑀸 𑀅𑀧𑀭𑀸𑀫𑀲𑀦𑁂 𑀚𑀺𑀕𑀼𑀘𑁆𑀙𑀸 𑀲𑀡𑁆𑀞𑀸𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀤𑀡𑁆𑀟𑀓𑁂𑀦 𑀯𑀸…𑀧𑁂… 𑀉𑀧𑀦𑀸𑀫𑁂𑀢𑀩𑁆𑀩’’𑀦𑁆𑀢𑀺. 𑀯𑀺𑀘𑁆𑀙𑀺𑀤𑁆𑀤𑀓𑀪𑀸𑀯𑀧𑀜𑁆𑀜𑀸𑀬𑀦𑀢𑁆𑀣𑀁 𑀏𑀓𑀗𑁆𑀕𑀼𑀮𑀦𑁆𑀢𑀭𑀓𑀭𑀡𑀁. 𑀉𑀧𑀦𑀸𑀫𑁂𑀢𑀩𑁆𑀩𑀦𑁆𑀢𑀺 𑀉𑀧𑀦𑁂𑀢𑀩𑁆𑀩𑀁.

𑀔𑀸𑀬𑀺𑀢𑀲𑀤𑀺𑀲𑀫𑁂𑀯𑀸𑀢𑀺 𑀔𑀸𑀬𑀺𑀢𑀸𑀲𑀼𑀪𑀲𑀤𑀺𑀲𑀫𑁂𑀯. 𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑀦𑁆𑀢𑀺 𑀯𑀺𑀯𑀺𑀥𑀁 𑀔𑀺𑀢𑁆𑀢𑀁 𑀲𑀭𑀻𑀭𑀸𑀯𑀬𑀯𑀁 𑀅𑀗𑁆𑀕𑀼𑀮𑀦𑁆𑀢𑀭𑀁 𑀅𑀗𑁆𑀕𑀼𑀮𑀦𑁆𑀢𑀭𑀁. 𑀓𑀢𑁆𑀯𑀸 𑀯𑀸𑀢𑀺 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀤𑀡𑁆𑀟𑀓𑁂𑀦 𑀯𑀸 𑀲𑀬𑀁 𑀓𑀢𑁆𑀯𑀸 𑀯𑀸.

𑀮𑀤𑁆𑀥𑀧𑁆𑀧𑀳𑀸𑀭𑀸𑀦𑀦𑁆𑀢𑀺 𑀮𑀤𑁆𑀥𑀸𑀯𑀼𑀥𑀧𑁆𑀧𑀳𑀸𑀭𑀸𑀦𑀁 𑀫𑀼𑀔𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀼𑀔𑀢𑁄𑀢𑀺 𑀧𑀳𑀸𑀭𑀸𑀤𑀺𑀫𑀼𑀔𑀢𑁄. 𑀧𑀕𑁆𑀖𑀭𑀫𑀸𑀦𑀓𑀸𑀮𑁂𑀢𑀺 𑀮𑁄𑀳𑀺𑀢𑀁 𑀧𑀕𑁆𑀖𑀭𑀫𑀸𑀦𑀓𑀸𑀮𑁂. 𑀮𑁄𑀳𑀺𑀢𑀓𑀁 𑀮𑀩𑁆𑀪𑀢𑀻𑀢𑀺 𑀬𑁄𑀚𑀦𑀸.

𑀢𑀦𑁆𑀢𑀺 𑀧𑀼𑀴𑀯𑀓𑀁. 𑀢𑁂𑀲𑀽𑀢𑀺 𑀲𑁄𑀡𑀸𑀤𑀺𑀲𑀭𑀻𑀭𑁂𑀲𑀼. 𑀅𑀝𑁆𑀞𑀺𑀓𑀦𑁆𑀢𑀺 𑀅𑀝𑁆𑀞𑀺𑀓𑀅𑀲𑀼𑀪𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀩𑁆𑀩𑁂 𑀉𑀤𑁆𑀥𑀼𑀫𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑁧𑁧𑁯. 𑀢𑀦𑁆𑀢𑀺 𑀅𑀝𑁆𑀞𑀺𑀓𑀁. 𑀦 𑀉𑀧𑀝𑁆𑀞𑀸𑀢𑀻𑀢𑀺 𑀲𑀪𑀸𑀯𑀢𑁄 𑀦 𑀉𑀧𑀝𑁆𑀞𑀸𑀢𑀺, 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀦 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀑𑀤𑀸𑀢𑀓𑀲𑀺𑀡𑀲𑀫𑁆𑀪𑁂𑀤𑁄 𑀳𑁄𑀢𑀻’’𑀢𑀺. 𑀅𑀝𑁆𑀞𑀺𑀓𑁂 𑀧𑀞𑀫𑀯𑀬𑀸𑀤𑀺𑀲𑀁𑀮𑀓𑁆𑀔𑀡𑀁 𑀦 𑀲𑀓𑁆𑀓𑀸𑀢𑀺 ‘‘𑀮𑀺𑀗𑁆𑀕𑀦𑁆𑀢𑀺 𑀇𑀥 𑀳𑀢𑁆𑀣𑀸𑀤𑀻𑀦𑀁 𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀧𑀦 ‘‘𑀅𑀬𑀁 𑀤𑀳𑀭𑀲𑁆𑀲, 𑀅𑀬𑀁 𑀬𑁄𑀩𑁆𑀩𑀦𑁂 𑀞𑀺𑀢𑀲𑁆𑀲, 𑀅𑀬𑀁 𑀅𑀯𑀬𑀯𑁂𑀳𑀺 𑀯𑀼𑀤𑁆𑀥𑀺𑀧𑀢𑁆𑀢𑀺𑀲𑁆𑀲𑀸’’𑀢𑀺 𑀏𑀯𑀁 𑀯𑀬𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀯, 𑀅𑀩𑁆𑀬𑀸𑀧𑀺𑀢𑀸𑀬 𑀧𑀦 𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺𑀧𑀺 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀬𑀁 𑀲𑀦𑁆𑀥𑀺𑀢𑁄 𑀯𑀯𑀢𑁆𑀣𑀸𑀧𑀦𑀁 𑀮𑀩𑁆𑀪𑀢𑀺, 𑀅𑀝𑁆𑀞𑀺𑀓𑁂 𑀧𑀦 𑀦 𑀮𑀩𑁆𑀪𑀢𑀻𑀢𑀺 𑀢𑀲𑁆𑀲 𑀅𑀦𑀺𑀬𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀓𑀫𑀯𑀺𑀮𑀗𑁆𑀖𑀦𑀁 𑀓𑀢𑁆𑀯𑀸 ‘‘𑀢𑀲𑁆𑀲 𑀢𑀲𑁆𑀲 𑀅𑀝𑁆𑀞𑀺𑀦𑁄 𑀦𑀺𑀦𑁆𑀦𑀝𑁆𑀞𑀸𑀦𑀣𑀮𑀝𑁆𑀞𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀦𑁆𑀦𑀝𑁆𑀞𑀸𑀦𑀁 𑀦𑀸𑀫 𑀅𑀝𑁆𑀞𑀺𑀦𑁄 𑀯𑀺𑀦𑀢𑀧𑁆𑀧𑀤𑁂𑀲𑁄. 𑀣𑀮𑀝𑁆𑀞𑀸𑀦𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁄. 𑀖𑀝𑀺𑀢𑀖𑀝𑀺𑀢𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀅𑀦𑀼𑀧𑀕𑀢𑀦𑁆𑀳𑀸𑀭𑀼𑀩𑀦𑁆𑀥𑀸𑀦𑀁, 𑀇𑀢𑀭𑁂𑀲𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑀺𑀝𑁆𑀞𑀝𑁆𑀞𑀸𑀦𑀯𑀲𑁂𑀦. 𑀅𑀦𑁆𑀢𑀭𑀯𑀲𑁂𑀦𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑀭𑀯𑀲𑁂𑀦, 𑀲𑀼𑀲𑀺𑀭𑀯𑀲𑁂𑀦 𑀘. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀓𑀮𑀸𑀬 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸𑀬, 𑀲𑀩𑁆𑀩𑀲𑁆𑀫𑀺𑀁 𑀯𑀸 𑀅𑀝𑁆𑀞𑀺𑀓𑁂.

𑁧𑁨𑁦. 𑀏𑀢𑁆𑀣𑀸𑀢𑀺 ¶ ¶ 𑀏𑀢𑀲𑁆𑀫𑀺𑀁 𑀅𑀝𑁆𑀞𑀺𑀓𑀸𑀲𑀼𑀪𑁂. 𑀬𑀼𑀚𑁆𑀚𑀫𑀸𑀦𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀬𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀬𑀢𑁆𑀣 𑀬𑀼𑀚𑁆𑀚𑀢𑀺, 𑀢𑀁 𑀢𑀢𑁆𑀣 𑀉𑀕𑁆𑀕𑀡𑁆𑀳𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀉𑀧𑀮𑀓𑁆𑀔𑁂𑀢𑀩𑁆𑀩𑀁. 𑀲𑀓𑀮𑀸𑀬𑀸𑀢𑀺 𑀅𑀦𑀯𑀲𑁂𑀲𑀪𑀸𑀕𑀸𑀬 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀸𑀬. 𑀲𑀫𑁆𑀧𑀚𑁆𑀚𑀢𑀺 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀯𑀲𑁂𑀦. 𑀢𑁂𑀲𑀽𑀢𑀺 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀝𑁆𑀞𑀺𑀓𑁂𑀲𑀼. 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀢𑀦𑁆𑀢𑀺 ‘‘𑀏𑀓𑀲𑀤𑀺𑀲𑀫𑁂𑀯𑀸’’𑀢𑀺 𑀯𑀘𑀦𑀁. 𑀏𑀓𑀲𑁆𑀫𑀺𑀁 𑀅𑀝𑁆𑀞𑀺𑀓𑁂 𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀬𑀣𑀸 𑀯𑀺𑀦𑀻𑀮𑀓𑀸𑀤𑀻𑀲𑀼 𑀉𑀪𑀺𑀦𑁆𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀯𑀡𑁆𑀡𑀯𑀺𑀲𑁂𑀲𑀢𑁄, 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀢𑁄, 𑀲𑀯𑀺𑀯𑀭𑀸𑀯𑀺𑀯𑀭𑀢𑁄, 𑀘𑀮𑀸𑀘𑀮𑀢𑁄 𑀘 𑀯𑀺𑀲𑁂𑀲𑁄 𑀮𑀩𑁆𑀪𑀢𑀺, 𑀦 𑀏𑀯𑀫𑁂𑀢𑀲𑁆𑀲𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀏𑀓𑀝𑁆𑀞𑀺𑀓𑁂𑀧𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀩𑀻𑀪𑀘𑁆𑀙𑁂𑀦𑀸𑀢𑀺 𑀲𑀼𑀯𑀺𑀪𑀽𑀢𑀅𑀝𑁆𑀞𑀺𑀭𑀽𑀧𑀢𑁆𑀢𑀸 𑀅𑀝𑁆𑀞𑀺𑀪𑀸𑀯𑁂𑀦𑁂𑀯 𑀯𑀺𑀭𑀽𑀧𑁂𑀦. 𑀪𑀬𑀸𑀦𑀓𑁂𑀦𑀸𑀢𑀺 𑀢𑁂𑀦𑁂𑀯 𑀧𑀸𑀓𑀢𑀺𑀓𑀲𑀢𑁆𑀢𑀸𑀦𑀁 𑀪𑀬𑀸𑀯𑀳𑁂𑀦. 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀓𑁂𑀦𑀸𑀢𑀺 𑀲𑀡𑁆𑀳𑀫𑀝𑁆𑀞𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄, 𑀪𑀸𑀯𑀦𑀸𑀬 𑀘 𑀲𑀯𑀺𑀲𑁂𑀲𑀢𑁆𑀢𑀸 𑀧𑀻𑀢𑀺𑀬𑀸, 𑀲𑁄𑀫𑀦𑀲𑁆𑀲𑀲𑁆𑀲 𑀘 𑀉𑀧𑁆𑀧𑀸𑀤𑀓𑁂𑀦. 𑀢𑁂𑀦𑁂𑀯𑀸𑀳 ‘‘𑀉𑀧𑀘𑀸𑀭𑀸𑀯𑀳𑀢𑁆𑀢𑀸’’𑀢𑀺.

𑀇𑀫𑀲𑁆𑀫𑀺𑀁 𑀑𑀓𑀸𑀲𑁂𑀢𑀺 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀤𑁆𑀯𑀸𑀭𑀁 𑀤𑀢𑁆𑀯𑀸 𑀯𑀸𑀢𑀺 ‘‘𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀤𑀺𑀝𑁆𑀞𑁂 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁂 𑀏𑀯 𑀅𑀝𑁆𑀞𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 ‘‘𑀤𑀼𑀯𑀺𑀥𑀁 𑀇𑀥 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀯𑀺𑀪𑀸𑀕𑀲𑁆𑀲 𑀤𑁆𑀯𑀸𑀭𑀁 𑀤𑀢𑁆𑀯𑀸𑀯 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀺𑀓𑀧𑁆𑀧𑀦𑁆𑀢𑀺 ‘‘𑀲𑀼𑀪’’𑀦𑁆𑀢𑀺 𑀯𑀺𑀓𑀧𑁆𑀧𑁂𑀦 𑀦𑀺𑀩𑁆𑀩𑀺𑀓𑀧𑁆𑀧𑀁, 𑀅𑀲𑀼𑀪𑀦𑁆𑀢𑁆𑀯𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀘𑀸𑀭𑁂𑀢𑁆𑀯𑀸𑀢𑀺 ‘‘𑀏𑀓𑀲𑁆𑀫𑀺𑀁 𑀅𑀝𑁆𑀞𑀺𑀓𑁂 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀘𑀸𑀭𑁂𑀢𑁆𑀯𑀸.

𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲𑀸𑀢𑀺 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀻𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲. 𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀤𑀦𑁆𑀢𑀝𑁆𑀞𑀺𑀓𑀫𑀢𑁆𑀢𑀤𑀲𑁆𑀲𑀦𑁂𑀦 𑀲𑀓𑀮𑀲𑁆𑀲𑀸𑀧𑀺 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀭𑀻𑀭𑀲𑁆𑀲 𑀅𑀝𑁆𑀞𑀺𑀲𑀗𑁆𑀖𑀸𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀏𑀢𑁆𑀣 𑀅𑀝𑁆𑀞𑀺𑀓𑀓𑀫𑁆𑀫𑀝𑁆𑀞𑀸𑀦𑁂 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀯𑀺𑀲𑁂𑀲𑀯𑀺𑀪𑀸𑀯𑀦𑀸𑀦𑀺 𑀉𑀤𑀸𑀳𑀭𑀡𑀸𑀦𑀺.

𑀲𑀼𑀪𑀕𑀼𑀡𑁄𑀢𑀺 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀼𑀧𑀭𑀺𑀲𑀼𑀤𑁆𑀥𑀕𑀼𑀡𑁄. 𑀤𑀲𑀲𑀢𑀮𑁄𑀘𑀦𑁂𑀦𑀸𑀢𑀺 𑀲𑀳𑀲𑁆𑀲𑀓𑁆𑀔𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦. 𑀲𑁄 𑀳𑀺 𑀏𑀓𑀸𑀲𑀦𑁂𑀦𑁂𑀯 𑀲𑀳𑀲𑁆𑀲𑀅𑀢𑁆𑀣𑀸𑀦𑀁 𑀯𑀺𑀘𑀸𑀭𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀲𑀳𑀲𑁆𑀲𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀣𑀼𑀢𑀓𑀺𑀢𑁆𑀢𑀻𑀢𑀺 ‘‘𑀬𑁄 𑀥𑀻𑀭𑁄 𑀲𑀩𑁆𑀩𑀥𑀺 𑀤𑀦𑁆𑀢𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁫𑁮) 𑀅𑀪𑀺𑀢𑁆𑀣𑀼𑀢𑀓𑀺𑀢𑁆𑀢𑀺𑀲𑀤𑁆𑀤𑁄.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁧𑁨𑁧. 𑀉𑀚𑀼𑀧𑀝𑀺𑀧𑀓𑁆𑀔𑁂𑀦 ¶ ¶ 𑀧𑀳𑀻𑀦𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀢𑁆𑀢𑀸’’𑀢𑀺. 𑀅𑀲𑀼𑀪𑀧𑁆𑀧𑀪𑁂𑀤𑁄𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀅𑀲𑀼𑀪𑀯𑀺𑀪𑀸𑀕𑁄. 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀲𑀭𑀻𑀭𑀲𑁆𑀲 𑀅𑀢𑁆𑀢𑀦𑁄 𑀲𑀪𑀸𑀯𑀽𑀧𑀕𑀫𑀦𑀯𑀲𑁂𑀦. 𑀲𑀭𑀻𑀭𑀜𑁆𑀳𑀺 𑀯𑀺𑀦𑀲𑁆𑀲𑀫𑀸𑀦𑀁 𑀅𑀜𑁆𑀜𑀭𑀽𑀧𑁂𑀦 𑀞𑀺𑀢𑀲𑁆𑀲 𑀭𑀓𑁆𑀔𑀲𑀲𑁆𑀲 𑀯𑀺𑀬 𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀯𑀺𑀦𑀲𑁆𑀲𑀢𑀺. 𑀭𑀸𑀕𑀘𑀭𑀺𑀢𑀪𑁂𑀤𑀯𑀲𑁂𑀦𑀸𑀢𑀺 𑀭𑀸𑀕𑀘𑀭𑀺𑀢𑀯𑀺𑀪𑀸𑀕𑀯𑀲𑁂𑀦. 𑀬𑀤𑀺 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀬𑀫𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄; 𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀓𑀣𑀁 𑀦𑀯𑀧𑁆𑀧𑀪𑁂𑀤𑁄𑀢𑀺? 𑀲𑁄 𑀲𑀭𑀲𑀢𑁄 𑀏𑀯 𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑁄, 𑀅𑀬𑀁 𑀧𑀦 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺. 𑀢𑀢𑁆𑀣 𑀘 𑀇𑀥𑀸𑀕𑀢𑁂𑀲𑀼 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀏𑀓𑀘𑁆𑀘𑀸𑀦𑁂𑀯 𑀕𑀳𑀺𑀢𑀸𑀦𑀺, 𑀅𑀝𑁆𑀞𑀺𑀓𑀜𑁆𑀘 𑀧𑀜𑁆𑀘𑀯𑀺𑀥𑀸 𑀯𑀺𑀪𑀢𑁆𑀢𑀁. 𑀢𑀸𑀦𑀺 𑀘 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀇𑀫𑀸𑀦𑀺 𑀲𑀫𑀣𑀯𑀲𑁂𑀦𑀸𑀢𑀺 𑀧𑀸𑀓𑀝𑁄𑀬𑀁 𑀪𑁂𑀤𑁄𑀢𑀺.

𑀇𑀫𑁂𑀲𑀁 𑀧𑀦 𑀤𑀲𑁆𑀲𑀦𑀫𑁆𑀧𑀺 𑀅𑀲𑀼𑀪𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀢𑀺𑀧𑀺 𑀅𑀯𑀺𑀲𑁂𑀲𑀢𑁄 𑀭𑀸𑀕𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀪𑀸𑀯𑁂 𑀬𑀁 𑀯𑀼𑀢𑁆𑀢𑀁 ‘‘𑀭𑀸𑀕𑀘𑀭𑀺𑀢𑀪𑁂𑀤𑀯𑀲𑁂𑀦 𑀘𑀸’’𑀢𑀺, 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀽𑀦𑀪𑀸𑀯𑁂𑀦 𑀲𑀼𑀲𑀡𑁆𑀞𑀺𑀢𑀫𑁆𑀧𑀺 𑀲𑀭𑀻𑀭𑀁 𑀤𑀼𑀲𑁆𑀲𑀡𑁆𑀞𑀺𑀢𑀫𑁂𑀯 𑀳𑁄𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀲𑀭𑀻𑀭𑁂 𑀲𑀡𑁆𑀞𑀸𑀦𑀯𑀺𑀧𑀢𑁆𑀢𑀺𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀲𑀭𑀻𑀭𑀲𑀡𑁆𑀞𑀸𑀦𑀯𑀺𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁄’’𑀢𑀺. 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀁 𑀭𑀢𑁆𑀢𑁄 𑀲𑀡𑁆𑀞𑀸𑀦𑀭𑀸𑀕𑀻, 𑀢𑀲𑁆𑀲 𑀲𑀧𑁆𑀧𑀸𑀬𑀁 𑀲𑀡𑁆𑀞𑀸𑀦𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀼𑀧𑀸𑀬𑀪𑀸𑀯𑀢𑁄. 𑀓𑀸𑀬𑁄 𑀏𑀯 𑀓𑀸𑀬𑀯𑀡𑁄, 𑀢𑀢𑁆𑀣 𑀧𑀝𑀺𑀩𑀤𑁆𑀥𑀲𑁆𑀲 𑀦𑀺𑀲𑁆𑀲𑀺𑀢𑀲𑁆𑀲. 𑀲𑀼𑀲𑀺𑀭𑀪𑀸𑀯𑀧𑁆𑀧𑀓𑀸𑀲𑀦𑀢𑁄𑀢𑀺 𑀲𑀼𑀲𑀺𑀭𑀲𑁆𑀲 𑀯𑀺𑀯𑀭𑀲𑁆𑀲 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀢𑁄. 𑀲𑀭𑀻𑀭𑁂 𑀖𑀦𑀪𑀸𑀯𑀭𑀸𑀕𑀺𑀦𑁄𑀢𑀺 𑀲𑀭𑀻𑀭𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀣𑀺𑀭𑀪𑀸𑀯𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑀯𑀢𑁄. 𑀯𑀺𑀓𑁆𑀔𑁂𑀧𑀧𑁆𑀧𑀓𑀸𑀲𑀦𑀢𑁄𑀢𑀺 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀓𑁆𑀔𑁂𑀧𑀲𑁆𑀲 𑀧𑀓𑀸𑀲𑀦𑀢𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀮𑀻𑀮𑀸𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀈𑀤𑀺𑀲𑀸𑀦𑀁 𑀓𑀺𑀭 𑀅𑀦𑀯𑀝𑁆𑀞𑀺𑀢𑀭𑀽𑀧𑀸𑀦𑀁 𑀅𑀯𑀬𑀯𑀸𑀦𑀁 𑀓𑁄 𑀮𑀻𑀴𑀸𑀯𑀺𑀮𑀸𑀲𑁄𑀢𑀺 𑀯𑀺𑀭𑀸𑀕𑀲𑀫𑁆𑀪𑀯𑀢𑁄. 𑀲𑀗𑁆𑀖𑀸𑀢𑀪𑁂𑀤𑀯𑀺𑀓𑀸𑀭𑀧𑁆𑀧𑀓𑀸𑀲𑀦𑀢𑁄𑀢𑀺 𑀲𑀗𑁆𑀖𑀸𑀢𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀁𑀳𑀢𑀪𑀸𑀯𑀲𑁆𑀲 𑀲𑀼𑀲𑀫𑁆𑀩𑀦𑁆𑀥𑀢𑀸𑀬 𑀪𑁂𑀤𑁄 𑀏𑀯 𑀯𑀺𑀓𑀸𑀭𑁄 𑀲𑀗𑁆𑀖𑀸𑀢𑀪𑁂𑀤𑀯𑀺𑀓𑀸𑀭𑁄, 𑀢𑀲𑁆𑀲 𑀧𑀓𑀸𑀲𑀦𑀢𑁄. 𑀮𑁄𑀳𑀺𑀢𑀁 𑀫𑀓𑁆𑀔𑀺𑀢𑀁 𑀳𑀼𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀮𑁄𑀳𑀺𑀢𑀫𑀓𑁆𑀔𑀺𑀢𑀧𑀝𑀺𑀓𑁆𑀓𑀽𑀮𑀪𑀸𑀯𑁄, 𑀢𑀲𑁆𑀲 𑀧𑀓𑀸𑀲𑀦𑀢𑁄. 𑀫𑀫𑀢𑁆𑀢𑀭𑀸𑀕𑀺𑀦𑁄𑀢𑀺 ‘‘𑀫𑀫 𑀅𑀬’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑀯𑀢𑁄. 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀭𑀸𑀕𑀺𑀦𑁄𑀢𑀺 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀬𑀁 𑀭𑀚𑁆𑀚𑀦𑀲𑀻𑀮𑀲𑁆𑀲.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀓𑁂 𑀧𑀞𑀫𑀚𑁆𑀛𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀤𑀼𑀢𑀺𑀬𑀸𑀤𑀻𑀦𑀻𑀢𑀺 𑀅𑀦𑀼𑀬𑁄𑀕𑀁 ¶ 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀅𑀧𑀭𑀺𑀲𑀡𑁆𑀞𑀺𑀢𑀚𑀮𑀸𑀬𑀸𑀢𑀺 𑀲𑁄𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑀫𑀦𑁆𑀢𑀢𑁄 𑀅𑀝𑁆𑀞𑀺𑀢𑀚𑀮𑀸𑀬 𑀅𑀲𑀦𑁆𑀦𑀺𑀲𑀺𑀦𑁆𑀦𑀲𑀮𑀺𑀮𑀸𑀬. 𑀅𑀭𑀺𑀢𑁆𑀢𑀩𑀮𑁂𑀦𑀸𑀢𑀺 𑀧𑀸𑀚𑀦𑀤𑀡𑁆𑀟𑀩𑀮𑁂𑀦. 𑀤𑀼𑀩𑁆𑀩𑀮𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲𑀸𑀢𑀺 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀦 𑀅𑀢𑁆𑀢𑀦𑀺 𑀘𑀺𑀢𑁆𑀢𑀁 𑀞𑀧𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀢𑀸. 𑀧𑀝𑀺𑀓𑁆𑀓𑀽𑀮𑁂 𑀳𑀺 𑀆𑀭𑀫𑁆𑀫𑀡𑁂 𑀲𑀭𑀲𑀢𑁄 𑀘𑀺𑀢𑁆𑀢𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁂𑀦 𑀧𑀦 𑀯𑀺𑀢𑀓𑁆𑀓𑁂𑀦 𑀅𑀪𑀺𑀦𑀺𑀭𑁄𑀧𑀺𑀬𑀫𑀸𑀦𑀫𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀮𑀪𑀢𑀺. 𑀦 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦𑀸𑀢𑀺 𑀯𑀺𑀢𑀓𑁆𑀓𑀭𑀳𑀺𑀢𑀸𑀦𑀺 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀸𑀦𑀺 𑀢𑀢𑁆𑀣 𑀧𑀢𑀺𑀝𑁆𑀞𑀁 𑀦 𑀮𑀪𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀢𑀓𑁆𑀓𑀩𑀮𑁂𑀦𑁂𑀯𑀸’’𑀢𑀺𑀆𑀤𑀺.

𑀬𑀤𑀺 𑀧𑀝𑀺𑀓𑁆𑀓𑀽𑀮𑀪𑀸𑀯𑀢𑁄 𑀉𑀤𑁆𑀥𑀼𑀫𑀸𑀢𑀸𑀤𑀺𑀆𑀭𑀫𑁆𑀫𑀡𑁂 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀧𑀞𑀫𑀚𑁆𑀛𑀸𑀦𑁂𑀦𑀸𑀧𑀺 𑀢𑀢𑁆𑀣 𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀦𑀁 𑀲𑀫𑁆𑀪𑀯𑁄 𑀬𑀼𑀢𑁆𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀝𑀺𑀓𑁆𑀓𑀽𑀮𑁂𑀧𑀺 𑀘 𑀏𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀦𑀻𑀯𑀭𑀡𑀲𑀦𑁆𑀢𑀸𑀧𑀭𑁄𑀕𑀯𑀽𑀧𑀲𑀫𑀸𑀦𑀁 𑀬𑀣𑀸𑀓𑁆𑀓𑀫𑀁 𑀧𑀼𑀧𑁆𑀨𑀘𑁆𑀙𑀟𑁆𑀟𑀓, 𑀯𑀫𑀦𑀯𑀺𑀭𑁂𑀘𑀦𑀉𑀧𑀫𑀸 𑀬𑁄𑀚𑁂𑀢𑀩𑁆𑀩𑀸.

𑁧𑁨𑁨. 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀤𑀲𑀥𑀸 𑀯𑀯𑀢𑁆𑀣𑀺𑀢𑀫𑁆𑀧𑀺 𑀲𑀪𑀸𑀯𑀢𑁄 𑀏𑀓𑀯𑀺𑀥𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀲𑀯𑀺𑀥𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀲𑁆𑀯𑀸𑀬𑀁 𑀲𑀪𑀸𑀯𑁄 𑀬𑀣𑀸 𑀅𑀯𑀺𑀜𑁆𑀜𑀸𑀡𑀓𑁂𑀲𑀼, 𑀏𑀯𑀁 𑀲𑀯𑀺𑀜𑁆𑀜𑀸𑀡𑀓𑁂𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀢𑀲𑁆𑀫𑀸 𑀢𑀢𑁆𑀣𑀸𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀢𑁄 𑀪𑀸𑀯𑀦𑀸 𑀇𑀚𑁆𑀛𑀢𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑁂𑀢𑀁 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂. 𑀅𑀮𑀗𑁆𑀓𑀸𑀭𑁂𑀦𑀸𑀢𑀺 𑀧𑀝𑀺𑀚𑀕𑁆𑀕𑀦𑀧𑀼𑀩𑁆𑀩𑀓𑁂𑀦 𑀅𑀮𑀗𑁆𑀓𑀭𑀡𑁂𑀦. 𑀦 𑀧𑀜𑁆𑀜𑀸𑀬𑀢𑀺 𑀧𑀘𑀼𑀭𑀚𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑀺𑀭𑁂𑀓𑀢𑀺𑀲𑀢𑀅𑀝𑁆𑀞𑀺𑀓𑀲𑀫𑀼𑀲𑁆𑀲𑀬𑀁 𑀤𑀦𑁆𑀢𑀝𑁆𑀞𑀺𑀓𑁂𑀳𑀺 𑀲𑀤𑁆𑀥𑀺𑀁, 𑀢𑁂𑀳𑀺 𑀧𑀦 𑀯𑀺𑀦𑀸 ‘‘𑀢𑀺𑀫𑀢𑁆𑀢𑀸𑀦𑀺 𑀅𑀝𑁆𑀞𑀺𑀲𑀢𑀸𑀦𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁯𑁦) 𑀓𑀸𑀬𑀕𑀢𑀸𑀲𑀢𑀺𑀬𑀁 𑀯𑀓𑁆𑀔𑀢𑀺. 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀦𑁆𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀙𑀺𑀤𑁆𑀤𑀯𑀦𑁆𑀢𑀁. 𑀫𑁂𑀤𑀓𑀣𑀸𑀮𑀺𑀓𑀸 𑀫𑁂𑀤𑀪𑀭𑀺𑀢𑀪𑀸𑀚𑀦𑀁. 𑀦𑀺𑀘𑁆𑀘𑀼𑀕𑁆𑀖𑀭𑀺𑀢𑀧𑀕𑁆𑀖𑀭𑀺𑀢𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁 𑀉𑀧𑀭𑀺, 𑀳𑁂𑀝𑁆𑀞𑀸 𑀘 𑀯𑀺𑀲𑁆𑀲𑀯𑀦𑁆𑀢𑀁. 𑀯𑁂𑀫𑀢𑁆𑀢𑀦𑁆𑀢𑀺 𑀦𑀸𑀦𑀢𑁆𑀢𑀁. 𑀦𑀸𑀦𑀸𑀯𑀢𑁆𑀣𑁂𑀳𑀻𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀢𑁆𑀣𑁂𑀳𑀺. 𑀳𑀺𑀭𑀺𑀬𑀸 𑀮𑀚𑁆𑀚𑀸𑀬 𑀓𑁄𑀧𑀦𑀢𑁄 𑀯𑀺𑀦𑀸𑀲𑀦𑀢𑁄 𑀳𑀺𑀭𑀺𑀓𑁄𑀧𑀺𑀦𑀁, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀫𑀕𑁆𑀕𑀁. 𑀬𑀸𑀣𑀸𑀯𑀲𑀭𑀲𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀪𑀸𑀯𑀁. 𑀬𑀸𑀣𑀸𑀯𑀢𑁄 𑀭𑀲𑀻𑀬𑀢𑀺 𑀜𑀸𑀬𑀢𑀻𑀢𑀺 𑀳𑀺 𑀭𑀲𑁄, 𑀲𑀪𑀸𑀯𑁄. 𑀭𑀢𑀺𑀦𑁆𑀢𑀺 𑀅𑀪𑀺𑀭𑀢𑀺𑀁 𑀅𑀪𑀺𑀭𑀼𑀘𑀺𑀁. 𑀅𑀢𑁆𑀢𑀲𑀺𑀦𑁂𑀳𑀲𑀗𑁆𑀔𑀸𑀢𑁂𑀦 ¶ 𑀭𑀸𑀕𑁂𑀦 𑀭𑀢𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑀭𑀸𑀕𑀭𑀢𑁆𑀢𑀸. 𑀯𑀺𑀳𑀜𑁆𑀜𑀫𑀸𑀦𑁂𑀦𑀸𑀢𑀺 𑀇𑀘𑁆𑀙𑀺𑀢𑀸𑀮𑀸𑀪𑁂𑀦 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑁂𑀦.

𑀓𑀺𑀁𑀲𑀼𑀓𑀦𑁆𑀢𑀺 𑀧𑀸𑀮𑀺𑀪𑀤𑁆𑀤𑀓𑀁, 𑀧𑀮𑀸𑀲𑁄𑀢𑀺 𑀓𑁂𑀘𑀺, 𑀲𑀺𑀫𑁆𑀩𑀮𑀻𑀢𑀺 𑀅𑀧𑀭𑁂. 𑀅𑀢𑀺𑀮𑁄𑀮𑀼𑀧𑁄𑀢𑀺 𑀅𑀢𑀺𑀯𑀺𑀬 𑀮𑁄𑀮𑀲𑀪𑀸𑀯𑁄 ¶ . 𑀅𑀤𑀼𑀦𑁆𑀢𑀺 𑀏𑀢𑀁. 𑀦𑀦𑁆𑀢𑀺 𑀓𑁂𑀲𑀸𑀤𑀺𑀲𑀭𑀻𑀭𑀓𑁄𑀝𑁆𑀞𑀸𑀲𑀁. 𑀫𑀼𑀘𑁆𑀙𑀺𑀢𑀸𑀢𑀺 𑀫𑁄𑀳𑀺𑀢𑀸, 𑀫𑀼𑀘𑁆𑀙𑀸𑀧𑀸𑀧𑀺𑀓𑀸𑀬 𑀯𑀸 𑀢𑀡𑁆𑀳𑀸𑀬 𑀯𑀲𑁂𑀦 𑀫𑀼𑀘𑁆𑀙𑀁 𑀧𑀢𑁆𑀢𑀸. 𑀲𑀪𑀸𑀯𑀦𑁆𑀢𑀺 𑀧𑀝𑀺𑀓𑁆𑀓𑀽𑀮𑀪𑀸𑀯𑀁.

𑀉𑀓𑁆𑀓𑀭𑀽𑀧𑀫𑁄𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀝𑁆𑀞𑀸𑀦𑀲𑀫𑁄, 𑀯𑀘𑁆𑀘𑀓𑀽𑀧𑀲𑀫𑁄 𑀯𑀸. 𑀘𑀓𑁆𑀔𑀼𑀪𑀽𑀢𑁂𑀳𑀻𑀢𑀺 𑀘𑀓𑁆𑀔𑀼𑀁 𑀧𑀢𑁆𑀢𑁂𑀳𑀺 𑀧𑀝𑀺𑀮𑀤𑁆𑀥𑀧𑀜𑁆𑀜𑀸𑀘𑀓𑁆𑀔𑀼𑀓𑁂𑀳𑀺, 𑀮𑁄𑀓𑀲𑁆𑀲 𑀯𑀸 𑀘𑀓𑁆𑀔𑀼𑀪𑀽𑀢𑁂𑀳𑀺. 𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁄.

𑀤𑀩𑁆𑀩𑀚𑀸𑀢𑀺𑀓𑁂𑀦𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀧𑀝𑀺𑀮𑀤𑁆𑀥𑀼𑀁 𑀪𑀩𑁆𑀩𑀭𑀽𑀧𑁂𑀦. 𑀬𑀢𑁆𑀣 𑀬𑀢𑁆𑀣 𑀲𑀭𑀻𑀭𑁂, 𑀲𑀭𑀻𑀭𑀲𑁆𑀲 𑀯𑀸 𑀬𑀢𑁆𑀣 𑀬𑀢𑁆𑀣 𑀓𑁄𑀝𑁆𑀞𑀸𑀲𑁂. 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 𑀅𑀲𑀼𑀪𑀸𑀓𑀸𑀭𑀲𑁆𑀲 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀡𑁆𑀳𑀦𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀁 𑀧𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀣𑀸𑀮𑀤𑁆𑀥𑁂 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑁂 𑀞𑀺𑀢𑁂𑀦 𑀢𑀫𑁂𑀯 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁂𑀦 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀁 𑀧𑀸𑀧𑁂𑀢𑀩𑁆𑀩𑀁. 𑀅𑀥𑀺𑀕𑀢𑀧𑁆𑀧𑀦𑁄 𑀳𑀺 𑀧𑀞𑀫𑀚𑁆𑀛𑀸𑀦𑁂 𑀞𑀺𑀢𑁄 𑀢𑀫𑁂𑀯 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑀻𑀢𑀺.

𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀙𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁭. 𑀙𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁨𑁩. 𑀅𑀲𑀼𑀪𑀸𑀦𑀦𑁆𑀢𑀭𑀦𑁆𑀢𑀺 ¶ ¶ 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀦𑁆𑀢𑀭𑀁. 𑀅𑀦𑀼𑀲𑁆𑀲𑀢𑀻𑀲𑀽𑀢𑀺 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂𑀲𑀼. ‘‘𑀅𑀦𑀼 𑀅𑀦𑀼 𑀲𑀢𑀺 𑀅𑀦𑀼𑀲𑁆𑀲𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀯𑀢𑁆𑀯𑀸 𑀦 𑀏𑀢𑁆𑀣 𑀅𑀦𑀼-𑀲𑀤𑁆𑀤𑀬𑁄𑀕𑁂𑀦 𑀲𑀢𑀺-𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺𑀬𑁂𑀯 𑀅𑀦𑀼𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀦𑀸𑀬𑀫𑀦𑀼-𑀲𑀤𑁆𑀤𑁄 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀲𑀼 𑀉𑀧-𑀲𑀤𑁆𑀤𑁄 𑀯𑀺𑀬 𑀅𑀦𑀢𑁆𑀣𑀓𑁄, 𑀦𑀸𑀧𑀺 ‘‘𑀲𑀜𑁆𑀚𑀸𑀦𑀦𑀁 𑀧𑀚𑀸𑀦𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀁-𑀲𑀤𑁆𑀤𑀸𑀤𑀬𑁄 𑀯𑀺𑀬 𑀅𑀢𑁆𑀣𑀦𑁆𑀢𑀭𑀤𑀻𑀧𑀓𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀫𑁆𑀳𑀺𑀬𑁂𑀯 𑀯𑀸 𑀧𑀯𑀢𑁆𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀘 𑀅𑀦𑀼𑀲𑁆𑀲𑀢𑀺𑀬𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀼𑀭𑀽𑀧𑀢𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀓𑀲𑁆𑀲𑁂𑀯 𑀅𑀦𑀼𑀭𑀽𑀧𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀦𑀼𑀭𑀽𑀧𑀸’’𑀢𑀺 𑀯𑀼𑀢𑁆𑀢𑀁, 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀓𑀼𑀮𑀧𑀼𑀢𑁆𑀢𑀲𑁆𑀲. 𑀅𑀦𑀼𑀭𑀽𑀧𑀢𑀸 𑀦𑀸𑀫 𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲 𑀅𑀦𑀼𑀭𑀽𑀧𑀢𑀸𑀬 𑀏𑀯 𑀳𑁄𑀢𑀻𑀢𑀺 𑀧𑀯𑀢𑁆𑀢𑀓𑀲𑁆𑀲𑁂𑀯 𑀅𑀦𑀼𑀭𑀽𑀧𑀢𑀸 𑀯𑀼𑀢𑁆𑀢𑀸, 𑀦 𑀉𑀪𑀬𑀲𑁆𑀲. 𑀅𑀦𑀼𑀭𑀽𑀧𑀸𑀢𑀺 𑀘 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀦𑁆𑀢𑀺 𑀬𑁂 𑀕𑀼𑀡𑁂 𑀉𑀧𑀸𑀤𑀸𑀬 𑀪𑀕𑀯𑀢𑀺 ‘‘𑀩𑀼𑀤𑁆𑀥𑁄’’𑀢𑀺 𑀧𑀜𑁆𑀜𑀢𑁆𑀢𑀺, 𑀢𑁂 𑀕𑀼𑀡𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀫𑀥𑀺𑀯𑀘𑀦’’𑀦𑁆𑀢𑀺. 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸. 𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀲𑀤𑁆𑀥𑀺𑀁 𑀦𑀯𑀯𑀺𑀥𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁. 𑀦𑀦𑀼 𑀘 𑀦𑀺𑀩𑁆𑀩𑀸𑀦𑀁 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀦 𑀯𑀓𑁆𑀔𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀓𑁆𑀔𑀢𑀺, 𑀥𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀫𑀕𑁆𑀕𑀨𑀮𑁂𑀳𑀺 𑀲𑀤𑁆𑀥𑀺𑀁 𑀇𑀥 𑀧𑀸𑀴𑀺𑀬𑀸 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀲𑁆𑀲𑀸𑀧𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀅𑀲𑀗𑁆𑀔𑀢𑀸𑀫𑀢𑀸𑀤𑀺𑀪𑀸𑀯𑁂𑀦 𑀧𑀦 𑀫𑀕𑁆𑀕𑀨𑀮𑁂𑀳𑀺 𑀯𑀺𑀲𑀺𑀝𑁆𑀞𑀢𑀸𑀬 𑀢𑀲𑁆𑀲 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀦 𑀕𑀳𑀡𑀁 𑀓𑀢𑀁. 𑀲𑀻𑀮𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀁 𑀧𑀦 𑀢𑀺𑀲𑁆𑀲𑀦𑁆𑀦𑀁 𑀅𑀦𑀼𑀲𑁆𑀲𑀢𑀻𑀦𑀁 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀦 𑀕𑀳𑀡𑀁 𑀬𑁄𑀕𑀸𑀯𑀘𑀭𑀲𑁆𑀲 𑀅𑀢𑁆𑀢𑀦𑁄 𑀏𑀯 𑀲𑀻𑀮𑀲𑁆𑀲 𑀘𑀸𑀕𑀲𑁆𑀲 𑀲𑀤𑁆𑀥𑀸𑀤𑀻𑀦𑀜𑁆𑀘 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀭𑀽𑀧𑀓𑀸𑀬𑀁 𑀕𑀢𑀸𑀢𑀺 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑀁 𑀆𑀭𑀩𑁆𑀪 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸. 𑀓𑀸𑀬𑁂𑀢𑀺 𑀓𑀸𑀬𑁂 𑀯𑀺𑀲𑀬𑀪𑀽𑀢𑁂. 𑀓𑁄𑀝𑁆𑀞𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬𑀸𑀢𑀺 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀧𑀝𑀺𑀓𑁆𑀓𑀽𑀮𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬. 𑀇𑀢𑁄 𑀧𑀼𑀭𑀺𑀫𑀸𑀲𑀼 𑀲𑀢𑁆𑀢𑀲𑀼 𑀅𑀦𑀼𑀲𑁆𑀲𑀢𑀻𑀲𑀼 𑀦𑀢𑁆𑀣𑀺 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 ¶ , 𑀇𑀥 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀦𑀺𑀫𑀺𑀢𑁆𑀢-𑀕𑁆𑀕𑀳𑀡𑀁. 𑀢𑀣𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀉𑀧𑀲𑀫𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁨𑁪. 𑀅𑀯𑁂𑀘𑁆𑀘 ¶ 𑀩𑀼𑀤𑁆𑀥𑀕𑀼𑀡𑁂 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀧𑀲𑀸𑀤𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄, 𑀅𑀭𑀺𑀬𑀫𑀕𑁆𑀕𑁂𑀦 𑀆𑀕𑀢𑀧𑁆𑀧𑀲𑀸𑀤𑁄, 𑀢𑀁𑀲𑀤𑀺𑀲𑁄𑀧𑀺 𑀯𑀸 𑀬𑁄 𑀤𑀺𑀝𑁆𑀞𑀺𑀕𑀢𑀯𑀸𑀢𑁂𑀳𑀺 𑀅𑀘𑀮𑁄 𑀅𑀲𑀫𑁆𑀧𑀓𑀫𑁆𑀧𑀺𑀬𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦. 𑀢𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲. 𑀧𑀢𑀺𑀭𑀽𑀧𑀲𑁂𑀦𑀸𑀲𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑀅𑀝𑁆𑀞𑀸𑀭𑀲𑀤𑁄𑀲𑀯𑀚𑁆𑀚𑀺𑀢𑁂 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑁂𑀦𑀸𑀲𑀦𑁂. 𑀭𑀳𑁄𑀕𑀢𑁂𑀦𑀸𑀢𑀺 𑀭𑀳𑀲𑀺 𑀕𑀢𑁂𑀦. 𑀢𑁂𑀦 𑀓𑀸𑀬𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀲𑀮𑁆𑀮𑀻𑀦𑁂𑀦𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀧𑀝𑀺𑀲𑀮𑁆𑀮𑀻𑀦𑁂𑀦, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀲𑀮𑁆𑀮𑀻𑀦𑁂𑀦, 𑀲𑀼𑀲𑀺𑀮𑀺𑀝𑁆𑀞𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀆𑀕𑀢𑀦𑀬𑁂𑀦.

𑀲𑁄 𑀪𑀕𑀯𑀸𑀢𑀺 𑀏𑀢𑁆𑀣 𑀲𑁄𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄. 𑀪𑀕𑀯𑀸𑀢𑀺 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁯𑁮, 𑁨𑁧𑁦; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨). 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀁. 𑀅𑀭𑀳𑀦𑁆𑀢𑀺𑀆𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺𑀧𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺 𑀅𑀦𑀼𑀲𑁆𑀲𑀭𑀢𑀻’’𑀢𑀺 𑀆𑀳. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁 𑀇𑀢𑀺𑀧𑁂𑀢𑀁 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀇𑀢𑀺-𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦𑁂𑀲𑀁 𑀩𑀳𑀼𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀸𑀦𑀺 𑀘 𑀕𑀼𑀡𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀸𑀦𑀺 𑀪𑀸𑀯𑁂𑀦𑁆𑀢𑁂𑀦 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳.

𑁧𑁨𑁫. 𑀤𑀽𑀭𑀢𑀸 𑀦𑀸𑀫 𑀆𑀲𑀦𑁆𑀦𑀢𑀸 𑀯𑀺𑀬 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀻𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂’’𑀢𑀺 𑀆𑀳, 𑀲𑀼𑀝𑁆𑀞𑀼 𑀯𑀺𑀤𑀽𑀭𑀪𑀸𑀯𑁂𑀦𑁂𑀯 𑀯𑀺𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀲𑀸 𑀧𑀦𑀲𑁆𑀲 𑀓𑀺𑀮𑁂𑀲𑀢𑁄 𑀤𑀽𑀭𑀢𑀸 𑀢𑁂𑀲𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸’’𑀢𑀺. 𑀦𑀦𑀼 𑀅𑀜𑁆𑀜𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁 𑀢𑁂 𑀧𑀳𑀻𑀦𑀸 𑀏𑀯𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀯𑀸𑀲𑀦𑀸𑀦’’𑀦𑁆𑀢𑀺. 𑀦 𑀳𑀺 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑁂 𑀧𑀳𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 ¶ , 𑀏𑀢𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 ¶ 𑀪𑀕𑀯𑀢𑁄 𑀅𑀭𑀳𑀢𑁆𑀢𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀓𑀸 𑀧𑀦𑀸𑀬𑀁 𑀯𑀸𑀲𑀦𑀸 𑀦𑀸𑀫? 𑀧𑀳𑀻𑀦𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀧𑀬𑁄𑀕𑀲𑀤𑀺𑀲𑀧𑀬𑁄𑀕𑀳𑁂𑀢𑀼𑀪𑀽𑀢𑁄 𑀓𑀺𑀮𑁂𑀲𑀦𑀺𑀳𑀺𑀢𑁄 𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑁄 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 (𑀧𑀸𑀭𑀸. 𑁬𑁨𑁧) 𑀯𑀲𑀮𑀲𑀫𑀼𑀤𑀸𑀘𑀸𑀭𑀦𑀺𑀫𑀺𑀢𑁆𑀢𑀁 𑀯𑀺𑀬. 𑀓𑀣𑀁 𑀧𑀦 ‘‘𑀆𑀭𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀮𑁂𑀲𑁂𑀳𑀻’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀬𑁄𑀚𑁂𑀢𑀩𑁆𑀩𑀢𑁄, ‘‘𑀆𑀭𑀓𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁧.𑁪𑁩𑁪) 𑀲𑀼𑀢𑁆𑀢𑀧𑀤𑀸𑀦𑁂𑀢𑁆𑀣 𑀉𑀤𑀸𑀳𑀭𑀺𑀢𑀩𑁆𑀩𑀸𑀦𑀺. 𑀆𑀭𑀓𑀸𑀢𑀺 𑀘𑁂𑀢𑁆𑀣 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀓-𑀓𑀸𑀭𑀲𑁆𑀲 𑀘 𑀳-𑀓𑀸𑀭𑀁, 𑀲𑀸𑀦𑀼𑀲𑀸𑀭𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 ‘‘𑀲𑁄 𑀢𑀢𑁄 𑀆𑀭𑀓𑀸 𑀦𑀸𑀫𑀸’’𑀢𑀺 𑀕𑀸𑀣𑀸𑀩𑀦𑁆𑀥𑀫𑀸𑀳. 𑀢𑀢𑁆𑀣 𑀲𑀫𑀜𑁆𑀚𑀦𑀲𑀻𑀮𑁄 𑀲𑀫𑀗𑁆𑀕𑀻, 𑀦 𑀲𑀫𑀗𑁆𑀕𑀺𑀢𑀸 𑀅𑀲𑀫𑀗𑁆𑀕𑀺𑀢𑀸 𑀅𑀲𑀫𑀦𑁆𑀦𑀸𑀕𑀫𑁄 𑀅𑀲𑀳𑀯𑀼𑀢𑁆𑀢𑀺𑀢𑀸.

𑁧𑁨𑁬. 𑀅𑀦𑀢𑁆𑀣𑀘𑀭𑀡𑁂𑀦 𑀓𑀺𑀮𑁂𑀲𑀸 𑀏𑀯 𑀅𑀭𑀬𑁄𑀢𑀺 𑀓𑀺𑀮𑁂𑀲𑀸𑀭𑀬𑁄. ‘‘𑀅𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀺𑀳𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁨𑁭. 𑀬𑀜𑁆𑀘𑁂𑀢𑀁 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀣𑀘𑀓𑁆𑀓𑀲𑁆𑀲 𑀦𑀸𑀪𑀺 𑀯𑀺𑀬 𑀫𑀽𑀮𑀸𑀯𑀬𑀯𑀪𑀽𑀢𑀁 𑀅𑀦𑁆𑀢𑁄, 𑀩𑀳𑀺 𑀘 𑀲𑀫𑀯𑀝𑁆𑀞𑀺𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀁 𑀤𑁆𑀯𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀻’’𑀢𑀺. 𑀦𑀸𑀪𑀺𑀬𑀸, 𑀦𑁂𑀫𑀺𑀬𑀸 𑀘 𑀲𑀫𑁆𑀩𑀦𑁆𑀥𑀸 𑀅𑀭𑀲𑀤𑀺𑀲𑀸 𑀧𑀘𑁆𑀘𑀬𑀨𑀮𑀪𑀽𑀢𑁂𑀳𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀚𑀭𑀸𑀫𑀭𑀡𑁂𑀳𑀺 𑀲𑀫𑁆𑀩𑀦𑁆𑀥𑀸 𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀭’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀭𑀺𑀬𑀦𑁆𑀢𑀪𑀸𑀯𑁂𑀦 𑀧𑀸𑀓𑀝𑀁 𑀚𑀭𑀸𑀫𑀭𑀡𑀦𑁆𑀢𑀺 𑀢𑀁 𑀦𑁂𑀫𑀺𑀝𑁆𑀞𑀸𑀦𑀺𑀬𑀁 𑀓𑀢𑁆𑀯𑀸 𑀆𑀳 ‘‘𑀚𑀭𑀸𑀫𑀭𑀡𑀦𑁂𑀫𑀻’’𑀢𑀺. 𑀬𑀣𑀸 𑀘 𑀭𑀣𑀘𑀓𑁆𑀓𑀧𑀯𑀢𑁆𑀢𑀺𑀬𑀸 𑀧𑀥𑀸𑀦𑀓𑀸𑀭𑀡𑀁 𑀅𑀓𑁆𑀔𑁄, 𑀏𑀯𑀁 𑀲𑀁𑀲𑀸𑀭𑀘𑀓𑁆𑀓𑀧𑀯𑀢𑁆𑀢𑀺𑀬𑀸 𑀆𑀲𑀯𑀲𑀫𑀼𑀤𑀬𑁄𑀢𑀺 𑀆𑀳 ‘‘𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸’’𑀢𑀺. 𑀆𑀲𑀯𑀸 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀆𑀲𑀯𑀲𑀫𑀼𑀤𑀬𑁄. 𑀬𑀣𑀸𑀳 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩). 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀧𑁆𑀧𑀪𑁂𑀤𑁄 𑀓𑀸𑀫𑀪𑀯𑀸𑀤𑀺𑀓𑁄 𑀢𑀺𑀪𑀯𑁄 𑀏𑀯 𑀭𑀣𑁄, 𑀢𑀲𑁆𑀫𑀺𑀁 𑀢𑀺𑀪𑀯𑀭𑀣𑁂. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀲𑀫𑀁, 𑀲𑀩𑁆𑀩𑀲𑁄 𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑁄𑀚𑀺𑀢𑀦𑁆𑀢𑀺 𑀲𑀫𑀸𑀬𑁄𑀚𑀺𑀢𑀁. 𑀆𑀤𑀺𑀭𑀳𑀺𑀢𑀁 𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁.

‘‘𑀔𑀦𑁆𑀥𑀸𑀦𑀜𑁆𑀘 ¶ 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, ‘𑀲𑀁𑀲𑀸𑀭𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯) 𑁋

𑀏𑀯𑀁 ¶ 𑀯𑀼𑀢𑁆𑀢𑀲𑀁𑀲𑀸𑀭𑁄𑀯 𑀲𑀁𑀲𑀸𑀭𑀘𑀓𑁆𑀓𑀁. 𑀅𑀦𑁂𑀦𑀸𑀢𑀺 𑀪𑀕𑀯𑀢𑀸. 𑀩𑁄𑀥𑀺𑀫𑀡𑁆𑀟𑁂𑀢𑀺 𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀫𑀡𑁆𑀟𑀪𑀸𑀯𑀧𑁆𑀧𑀢𑁆𑀢𑁂 𑀞𑀸𑀦𑁂, 𑀓𑀸𑀮𑁂 𑀯𑀸. 𑀯𑀻𑀭𑀺𑀬𑀧𑀸𑀤𑁂𑀳𑀻𑀢𑀺 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀓𑁆𑀔𑀺𑀬𑁂𑀲𑀼 𑀲𑀦𑁆𑀦𑀺𑀭𑀼𑀫𑁆𑀪𑀦𑀲𑀦𑁆𑀦𑀺𑀓𑁆𑀔𑀺𑀧𑀦𑀓𑀺𑀘𑁆𑀘𑀢𑀸𑀬 𑀤𑁆𑀯𑀺𑀥𑀸 𑀧𑀯𑀢𑁆𑀢𑁂𑀳𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀳𑀺 𑀧𑀸𑀤𑁂𑀳𑀺. 𑀲𑀻𑀮𑀧𑀣𑀯𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦 𑀲𑀻𑀮𑀫𑁂𑀯 𑀧𑀣𑀯𑀻, 𑀢𑀲𑁆𑀲𑀁. 𑀧𑀢𑀺𑀝𑁆𑀞𑀸𑀬𑀸𑀢𑀺 𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀲𑀤𑁆𑀥𑀸𑀳𑀢𑁆𑀣𑁂𑀦𑀸𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀤𑀸𑀦𑀲𑀸𑀥𑀦𑀢𑁄 𑀲𑀤𑁆𑀥𑀸𑀯 𑀳𑀢𑁆𑀣𑁄, 𑀢𑁂𑀦. 𑀓𑀫𑁆𑀫𑀓𑁆𑀔𑀬𑀓𑀭𑀦𑁆𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀔𑀬𑀓𑀭𑀡𑀢𑁄 𑀓𑀫𑁆𑀫𑀓𑁆𑀔𑀬𑀓𑀭𑀁. 𑀜𑀸𑀡𑀨𑀭𑀲𑀼𑀦𑁆𑀢𑀺 𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀫𑀕𑁆𑀕𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸.

𑁧𑁨𑁮. 𑀏𑀯𑀁 ‘‘𑀅𑀭𑀸𑀦𑀁 𑀳𑀢𑀢𑁆𑀢𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀭𑀖𑀸𑀢𑁂 𑀲𑀁𑀲𑀸𑀭𑀁 𑀘𑀓𑁆𑀓𑀁 𑀯𑀺𑀬 𑀘𑀓𑁆𑀓𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀓𑁆𑀓𑀫𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀫𑀢𑀕𑁆𑀕𑀁 𑀲𑀁𑀲𑀸𑀭𑀯𑀝𑁆𑀝𑀦𑁆𑀢𑀺 𑀅𑀦𑀼 𑀅𑀦𑀼 𑀅𑀫𑀢𑀕𑁆𑀕𑀁 𑀅𑀯𑀺𑀜𑁆𑀜𑀸𑀢𑀓𑁄𑀝𑀺𑀓𑀁 𑀲𑀁𑀲𑀸𑀭𑀫𑀡𑁆𑀟𑀮𑀁. 𑀲𑁂𑀲𑀸 𑀤𑀲 𑀥𑀫𑁆𑀫𑀸 𑀲𑀗𑁆𑀔𑀸𑀭𑀸𑀤𑀬𑁄 𑀚𑀸𑀢𑀺𑀧𑀭𑀺𑀬𑁄𑀲𑀸𑀦𑀸 𑀅𑀭𑀸. 𑀓𑀣𑀁? 𑀦𑀸𑀪𑀺𑀬𑀸 𑀅𑀯𑀺𑀚𑁆𑀚𑀸𑀬 𑀫𑀽𑀮𑀢𑁄, 𑀦𑁂𑀫𑀺𑀬𑀸 𑀚𑀭𑀸𑀫𑀭𑀡𑁂𑀦 𑀅𑀦𑁆𑀢𑀢𑁄 𑀲𑀫𑁆𑀩𑀦𑁆𑀥𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀢𑁆𑀢𑀸 𑀘𑀸’’𑀢𑀺. 𑀤𑀼𑀓𑁆𑀔𑀸𑀤𑀻𑀲𑀽𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑁂𑀲𑀼. 𑀢𑀢𑁆𑀣 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸, 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁄 𑀘, 𑀲𑁂𑀲𑁂𑀲𑀼 𑀧𑀝𑀺𑀘𑁆𑀙𑀸𑀤𑀦𑀢𑁄𑀯. 𑀤𑀼𑀓𑁆𑀔𑀦𑁆𑀢𑀺 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀓𑀸𑀫𑀪𑀯𑀸𑀤𑀺𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸 𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀁 𑀅𑀯𑀺𑀚𑁆𑀚𑀁, 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂 𑀢𑀻𑀲𑀼 𑀪𑀯𑁂𑀲𑀼 𑀲𑀗𑁆𑀔𑀸𑀭𑀸𑀤𑀺𑀓𑁂 𑀘 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀪𑀯𑁂 𑀅𑀯𑀺𑀚𑁆𑀚𑀸𑀢𑀺 𑀓𑀸𑀫𑀪𑀯𑁂 𑀆𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀓𑀸𑀫𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀁, 𑀓𑀸𑀫𑀪𑀯𑁂 𑀯𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀬𑁂 𑀲𑀗𑁆𑀔𑀸𑀭𑀸, 𑀢𑁂𑀲𑀁 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀢𑀸𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀲𑀼 𑀲𑀳𑀚𑀸𑀢𑀲𑁆𑀲 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 ¶ , 𑀅𑀲𑀳𑀚𑀸𑀢𑀲𑁆𑀲 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀤𑀺𑀯𑀲𑁂𑀦, 𑀦𑀸𑀦𑀦𑁆𑀢𑀭𑀲𑁆𑀲 𑀧𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 ¶ . 𑀧𑀘𑁆𑀘𑀬𑁄 𑀳𑁄𑀢𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀏𑀢𑁆𑀣 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑁆𑀧𑀧𑀜𑁆𑀘𑁄 𑀳𑁄𑀢𑀺, 𑀲𑀬𑀫𑁂𑀯 𑀘 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺 𑀦 𑀦𑀁 𑀯𑀺𑀢𑁆𑀣𑀸𑀭𑀬𑀸𑀫.

𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑀸𑀬𑀢𑀦𑀸𑀦𑀁. 𑀏𑀓𑀲𑁆𑀲𑀸𑀬𑀢𑀦𑀲𑁆𑀲𑀸𑀢𑀺 𑀫𑀦𑀸𑀬𑀢𑀦𑀲𑁆𑀲. 𑀇𑀫𑀺𑀦𑀸 𑀦𑀬𑁂𑀦 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀢𑀢𑁆𑀣 𑀲𑀸 𑀲𑀸 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀢𑁆𑀣 𑀢𑀢𑁆𑀣 𑀓𑀸𑀫𑀪𑀯𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀸 𑀢𑀡𑁆𑀳𑀸.

𑀢𑀡𑁆𑀳𑀸𑀤𑀺𑀫𑀽𑀮𑀺𑀓𑀸 𑀓𑀣𑀸 𑀅𑀢𑀺𑀲𑀁𑀔𑀺𑀢𑁆𑀢𑀸𑀢𑀺 𑀢𑀁, 𑀉𑀧𑀸𑀤𑀸𑀦𑀪𑀯𑁂 𑀘 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀓𑀸𑀫𑀢𑀡𑁆𑀳𑀸𑀧𑀯𑀢𑁆𑀢𑀺𑀫𑀸𑀳. 𑀢𑀣𑀸 ‘‘𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀳𑀺. 𑀲𑀸 𑀧𑀦 𑀢𑀡𑁆𑀳𑀸 𑀬𑀲𑁆𑀫𑀸 𑀪𑀼𑀲𑀫𑀸𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀓𑀸𑀫𑀼𑀧𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸’’𑀢𑀺. 𑀢𑀣𑁂𑀯𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯.

𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂 𑀲𑀫𑁆𑀧𑀢𑁆𑀢𑀺𑀁. ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮 𑀣𑁄𑀓 𑀯𑀺𑀲𑀤𑀺𑀲𑀁) 𑀯𑀘𑀦𑀢𑁄 𑀪𑀯𑀭𑀸𑀕𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑀫𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀻𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀇𑀥𑁂𑀓𑀘𑁆𑀘𑁄 ‘‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀲𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑀺𑀪𑀯𑁂 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀲𑁄 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁄 ‘‘𑀭𑀽𑀧𑀻 𑀫𑀦𑁄𑀫𑀬𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑁄 ‘‘𑀅𑀭𑀽𑀧𑀪𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀳𑀺𑀬𑁂𑀯 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀧𑀺 𑀬𑁄𑀚𑀦𑀸 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀲𑁂𑀦𑀸𑀧𑀺 ¶ 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁄 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 ‘‘𑀅𑀲𑀼𑀤𑁆𑀥𑀺𑀫𑀕𑁆𑀕𑀁 𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀧𑀭𑀸𑀫𑀲𑀦𑁆𑀢𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀬𑁆𑀯𑀸𑀬𑀁 𑀲𑀁𑀲𑀸𑀭𑀘𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀸𑀫𑀪𑀯𑁂 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 ¶ 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄, 𑀢𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀅𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀲𑀗𑁆𑀔𑀸𑀭𑀸 𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀸, 𑀏𑀯𑀁 𑀅𑀯𑀺𑀚𑁆𑀚𑀸𑀧𑀺 𑀓𑀸𑀫𑀸𑀲𑀯𑀸𑀤𑀺𑀦𑀸 𑀲𑀳𑁂𑀢𑀼𑀓𑀸 𑀏𑀯𑀸𑀢𑀺 𑀆𑀳 ‘‘𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀢𑀺 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀸𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑁂, 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀁. 𑀧𑀜𑁆𑀜𑀸𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀧𑀓𑀸𑀭𑀢𑁄 𑀚𑀸𑀦𑀦𑀸. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀯𑀩𑁄𑀥𑁄. 𑀇𑀤𑀜𑁆𑀘 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀬𑀲𑁆𑀫𑀸 𑀅𑀤𑁆𑀥𑀸𑀢𑁆𑀢𑀬𑁂 𑀓𑀗𑁆𑀔𑀸𑀫𑀮𑀯𑀺𑀢𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀏𑀢𑁂𑀦 ‘‘𑀅𑀯𑀺𑀚𑁆𑀚𑀸 𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀬𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. ‘‘𑀲𑀗𑁆𑀔𑀸𑀭𑀸 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁬) 𑀲𑀩𑁆𑀩𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.

𑀲𑀁𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀳𑁂𑀢𑀼, 𑀯𑀺𑀧𑀸𑀓𑁄 𑀘. 𑀳𑁂𑀢𑀼 𑀯𑀺𑀧𑀸𑀓𑁄𑀢𑀺 𑀯𑀸 𑀲𑀁𑀔𑀺𑀧𑁆𑀧𑀢𑀻𑀢𑀺 𑀲𑀗𑁆𑀔𑁂𑀧𑁄, 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀲𑀗𑁆𑀔𑁂𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀏𑀓𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂 𑀧𑀦 𑀲𑀗𑁆𑀔𑁂𑀧𑀸 𑀅𑀢𑀻𑀢𑁂 𑀳𑁂𑀢𑀼, 𑀏𑀢𑀭𑀳𑀺 𑀯𑀺𑀧𑀸𑀓𑁄, 𑀏𑀢𑀭𑀳𑀺 𑀳𑁂𑀢𑀼, 𑀆𑀬𑀢𑀺𑀁 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀓𑀸𑀮𑀯𑀺𑀪𑀸𑀕𑁂𑀦 𑀘𑀢𑁆𑀢𑀸𑀭𑁄 𑀚𑀸𑀢𑀸. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑀗𑁆𑀔𑁂𑀧𑁄 𑀘𑁂𑀢𑁆𑀣 𑀅𑀢𑀻𑀢𑁄 𑀅𑀤𑁆𑀥𑀸’’𑀢𑀺𑀆𑀤𑀺. 𑀲𑀗𑁆𑀔𑁂𑀧-𑀲𑀤𑁆𑀤𑁄 𑀯𑀸 𑀪𑀸𑀕𑀸𑀥𑀺𑀯𑀘𑀦𑀦𑁆𑀢𑀺 𑀅𑀢𑀻𑀢𑁄 𑀳𑁂𑀢𑀼𑀪𑀸𑀕𑁄 𑀧𑀞𑀫𑁄 𑀲𑀗𑁆𑀔𑁂𑀧𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀓𑀺𑀮𑁂𑀲𑀓𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑀢𑁄, 𑀢𑁂𑀳𑀺 𑀯𑀺𑀦𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀲𑀓𑀺𑀘𑁆𑀘𑀸𑀓𑀭𑀡𑀢𑁄 𑀘. 𑀓𑀫𑁆𑀫𑀁 𑀢𑀡𑁆𑀳𑀸 𑀘 𑀢𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀁 𑀳𑀼𑀢𑁆𑀯𑀸 𑀯𑀝𑁆𑀝𑀦𑀢𑁆𑀣𑁂𑀦 𑀓𑀫𑁆𑀫𑀯𑀝𑁆𑀝𑀁.

𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀦𑀁 𑀚𑀸𑀢𑀺𑀚𑀭𑀸𑀪𑀗𑁆𑀕𑀸𑀯𑀢𑁆𑀣𑀸 ‘‘𑀚𑀸𑀢𑀺𑀚𑀭𑀸𑀫𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀚𑀸𑀢𑀺𑀚𑀭𑀸𑀫𑀭𑀡𑀸𑀧𑀤𑁂𑀲𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 ¶ 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸’’𑀢𑀺. 𑀇𑀫𑁂𑀢𑀺 𑀯𑀺𑀜𑁆𑀜𑀸𑀡𑀸𑀤𑀬𑁄. 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀢𑁄 𑀪𑀸𑀯𑀻𑀦𑀁 𑀅𑀦𑀸𑀕𑀢𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀢𑁂𑀢𑀺 𑀅𑀯𑀺𑀚𑁆𑀚𑀸𑀤𑀬𑁄. 𑀆𑀓𑀸𑀭𑀢𑁄𑀢𑀺 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀕𑀳𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸, 𑀢𑀢𑁄 𑀆𑀓𑀸𑀭𑀢𑁄. 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀅𑀢𑀻𑀢𑁂𑀳𑁂𑀢𑀼𑀧𑀜𑁆𑀘𑀓𑀸𑀤𑀺𑀪𑁂𑀤𑀢𑁄.

𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀻𑀢𑀺 𑀳𑁂𑀢𑀼𑀢𑁄 𑀨𑀮𑀲𑁆𑀲 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀪𑀽𑀢𑁄 𑀏𑀓𑁄 𑀲𑀦𑁆𑀥𑀺. 𑀢𑀣𑀸 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑀸. 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑀸 𑀧𑀦 𑀨𑀮𑀢𑁄 𑀳𑁂𑀢𑀼𑀦𑁄 ¶ 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀨𑀮𑀳𑁂𑀢𑀼𑀲𑀫𑁆𑀩𑀦𑁆𑀥𑀪𑀽𑀢𑁄 𑀏𑀓𑁄 𑀲𑀦𑁆𑀥𑀺. 𑀨𑀮𑀪𑀽𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀜𑁆𑀜𑀲𑁆𑀲 𑀳𑁂𑀢𑀼𑀲𑀪𑀸𑀯𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀢𑁂𑀦𑀸𑀳 ‘‘𑀘𑀢𑀼𑀲𑀗𑁆𑀔𑁂𑀧’’𑀦𑁆𑀢𑀺𑀆𑀤𑀺. 𑀲𑀩𑁆𑀩𑀸𑀓𑀸𑀭𑀢𑁄𑀢𑀺 𑀇𑀥 𑀯𑀼𑀢𑁆𑀢𑁂𑀳𑀺, 𑀅𑀯𑀼𑀢𑁆𑀢𑁂𑀳𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁨𑁫 𑀆𑀤𑀬𑁄), 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀤𑀻𑀲𑀼 𑀘 𑀆𑀕𑀢𑁂𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺. 𑀚𑀸𑀦𑀸𑀢𑀻𑀢𑀺 𑀅𑀯𑀩𑀼𑀚𑁆𑀛𑀢𑀺. 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀁. 𑀢𑀦𑁆𑀢𑀺 𑀢𑀁 𑀚𑀸𑀦𑀦𑀁. 𑀜𑀸𑀢𑀝𑁆𑀞𑁂𑀦𑀸𑀢𑀺 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀦𑀝𑁆𑀞𑁂𑀦. 𑀧𑀚𑀸𑀦𑀦𑀝𑁆𑀞𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦.

𑀇𑀤𑀸𑀦𑀺 𑀬𑀤𑀢𑁆𑀣𑀫𑀺𑀤𑀁 𑀪𑀯𑀘𑀓𑁆𑀓𑀁 𑀇𑀥𑀸𑀦𑀻𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂 𑀥𑀫𑁆𑀫𑁂𑀢𑀺 𑀢𑁂 𑀅𑀯𑀺𑀚𑁆𑀚𑀸𑀤𑀺𑀓𑁂 𑀥𑀫𑁆𑀫𑁂. 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸𑀢𑀺 𑀫𑀳𑀸𑀯𑀚𑀺𑀭𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂𑀳𑀺 𑀅𑀭𑁂 𑀳𑀦𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀬𑀤𑀸 𑀪𑀕𑀯𑀸 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺, 𑀢𑀤𑀸 𑀅𑀭𑁂 𑀳𑀦𑀢𑀺 𑀦𑀸𑀫. 𑀢𑀢𑁄 𑀧𑀭𑀁 𑀧𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀳𑀦𑀺 𑀯𑀺𑀳𑀦𑀺 𑀯𑀺𑀤𑁆𑀥𑀁𑀲𑁂𑀲𑀻’’𑀢𑀺.

𑁧𑁨𑁯. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀘𑁂𑀢𑀦𑁂 𑀘𑀓𑁆𑀓𑀭𑀢𑀦𑁂 𑀉𑀧𑁆𑀧𑀦𑁆𑀦𑁂 𑀢𑀢𑁆𑀣𑁂𑀯 𑀮𑁄𑀓𑁄 𑀧𑀽𑀚𑀁 𑀓𑀭𑁄𑀢𑀺, 𑀅𑀜𑁆𑀜𑀢𑁆𑀣 𑀧𑀽𑀚𑀸𑀯𑀺𑀲𑁂𑀲𑀸 𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂’’𑀢𑀺𑀆𑀤𑀺𑀫𑀸𑀳. 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑁂𑀲𑀁 𑀅𑀫𑀳𑁂𑀲𑀓𑁆𑀔𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀓𑀭𑀺𑀬𑀫𑀸𑀦𑀸𑀦𑀁 𑀦𑀸𑀢𑀺𑀉𑀴𑀸𑀭𑀸𑀦𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀁 𑀅𑀭𑀳𑀪𑀸𑀯𑁂 ¶ 𑀓𑀸 𑀦𑀸𑀫 𑀓𑀣𑀸. 𑀅𑀢𑁆𑀣𑀸𑀦𑀼𑀭𑀽𑀧𑀦𑁆𑀢𑀺 𑀅𑀭𑀳𑀢𑁆𑀢𑀢𑁆𑀣𑀲𑁆𑀲 𑀅𑀦𑀼𑀭𑀽𑀧𑀁 𑀅𑀦𑁆𑀯𑀢𑁆𑀣𑀁.

𑁧𑁩𑁦. 𑀅𑀲𑀺𑀮𑁄𑀓𑀪𑀬𑁂𑀦𑀸𑀢𑀺 𑀅𑀓𑀺𑀢𑁆𑀢𑀺𑀪𑀬𑁂𑀦. 𑀭𑀳𑁄 𑀧𑀸𑀧𑀁 𑀓𑀭𑁄𑀦𑁆𑀢𑀺 ‘‘𑀫𑀸 𑀦𑀁 𑀓𑁄𑀘𑀺 𑀚𑀜𑁆𑀜𑀸’’𑀢𑀺 𑀏𑀲 𑀪𑀕𑀯𑀸 𑀦 𑀓𑀤𑀸𑀘𑀺 𑀓𑀭𑁄𑀢𑀺 𑀧𑀸𑀧𑀳𑁂𑀢𑀽𑀦𑀁 𑀩𑁄𑀥𑀺𑀫𑀡𑁆𑀟𑁂 𑀏𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀅𑀧𑀭𑁄 𑀦𑀬𑁄 𑁋 𑀆𑀭𑀓𑀸𑀢𑀺 𑀅𑀭𑀳𑀁, 𑀲𑀼𑀯𑀺𑀤𑀽𑀭𑀪𑀸𑀯𑀢𑁄𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀼𑀢𑁄 𑀧𑀦 𑀲𑀼𑀯𑀺𑀤𑀽𑀭𑀪𑀸𑀯𑀢𑁄𑀢𑀺? 𑀬𑁂 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸, 𑀢𑀢𑁄 𑀏𑀯 𑀅𑀧𑁆𑀧𑀳𑀻𑀦𑀭𑀸𑀕𑀤𑁄𑀲𑀫𑁄𑀳𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀤𑀲𑁆𑀲𑀸𑀯𑀺𑀦𑁄 𑀅𑀧𑁆𑀧𑀝𑀺𑀧𑀦𑁆𑀦𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸 𑀘, 𑀢𑀢𑁄 𑀲𑀼𑀯𑀺𑀤𑀽𑀭𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑁂𑀘𑁂𑀧𑀺 ¶ 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀅𑀲𑁆𑀲 𑀧𑀸𑀤𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄, 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄. 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀁 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑁄 𑀫𑀁 𑀦 𑀧𑀲𑁆𑀲𑀢𑀻’’𑀢𑀺 (𑀇𑀢𑀺𑀯𑀼. 𑁯𑁨).

𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸 𑀳𑀺 𑀲𑀘𑁂𑀧𑀺 𑀲𑀸𑀬𑀁 𑀧𑀸𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸𑀯𑀘𑀭𑀸𑀯 𑀲𑀺𑀬𑀼𑀁, 𑀦 𑀢𑁂 𑀢𑀸𑀯𑀢𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀸, 𑀢𑀣𑀸 𑀲𑀢𑁆𑀣𑀸𑀧𑀺 𑀦𑁂𑀲𑀁. 𑀇𑀢𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀭𑀓𑀸 𑀤𑀽𑀭𑁂𑀢𑀺 𑀅𑀭𑀳𑀁.

‘‘𑀲𑀫𑁆𑀫𑀸 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂 𑀦𑀺𑀳𑀻𑀦𑀸𑀲𑀬𑀸 𑀦𑀭𑀸;

𑀆𑀭𑀓𑀸 𑀢𑁂𑀳𑀺 𑀪𑀕𑀯𑀸, 𑀤𑀽𑀭𑁂 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺.

𑀢𑀣𑀸 𑀆𑀭𑀓𑀸𑀢𑀺 𑀅𑀭𑀳𑀁, 𑀆𑀲𑀦𑁆𑀦𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀧𑀦 𑀆𑀲𑀦𑁆𑀦𑀪𑀸𑀯𑀢𑁄𑀢𑀺? 𑀬𑁂 𑀪𑀸𑀯𑀺𑀢𑀓𑀸𑀬𑀸 𑀪𑀸𑀯𑀺𑀢𑀲𑀻𑀮𑀸 𑀪𑀸𑀯𑀺𑀢𑀘𑀺𑀢𑁆𑀢𑀸 𑀪𑀸𑀯𑀺𑀢𑀧𑀜𑁆𑀜𑀸, 𑀢𑀢𑁄 𑀏𑀯 𑀧𑀳𑀻𑀦𑀭𑀸𑀕𑀤𑁄𑀲𑀫𑁄𑀳𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑀲𑁆𑀲𑀸𑀯𑀺𑀦𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑀢𑁄 𑀆𑀲𑀦𑁆𑀦𑀪𑀸𑀯𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑁄𑀚𑀦𑀲𑀢𑁂 ¶ 𑀘𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬, 𑀲𑁄 𑀘 𑀳𑁄𑀢𑀺 𑀅𑀦𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀦 𑀢𑀺𑀩𑁆𑀩𑀲𑀸𑀭𑀸𑀕𑁄 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄. 𑀅𑀣 𑀔𑁄 𑀲𑁄 𑀲𑀦𑁆𑀢𑀺𑀓𑁂𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀁 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀇𑀢𑀺𑀯𑀼. 𑁯𑁨).

𑀢𑀣𑀸𑀭𑀽𑀧𑀸 𑀳𑀺 𑀧𑀼𑀕𑁆𑀕𑀮𑀸 𑀲𑀢𑁆𑀣𑀼 𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑀺𑀓𑀸𑀧𑀺 𑀳𑁄𑀦𑁆𑀢𑀺, 𑀦 𑀢𑀸𑀯𑀢𑀸 𑀢𑁂 ‘‘𑀲𑀢𑁆𑀣𑀼 𑀤𑀽𑀭𑀘𑀸𑀭𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀸, 𑀢𑀣𑀸 𑀲𑀢𑁆𑀣𑀸𑀧𑀺 𑀦𑁂𑀲𑀁. 𑀇𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀭𑀓𑀸 𑀆𑀲𑀦𑁆𑀦𑁂𑀢𑀺 𑀅𑀭𑀳𑀁.

𑀬𑁂 ¶ 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀲𑀼𑀧𑁆𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸;

𑀆𑀭𑀓𑀸 𑀢𑁂𑀳𑀺 𑀆𑀲𑀦𑁆𑀦𑁂, 𑀢𑁂𑀦𑀸𑀧𑀺 𑀅𑀭𑀳𑀁 𑀚𑀺𑀦𑁄.

𑀬𑁂 𑀇𑀫𑁂 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀦𑀢𑁆𑀣𑀁 𑀆𑀯𑀳𑀦𑁆𑀢𑀺. 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀏𑀓𑀁𑀲𑁂𑀦𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀘, 𑀢𑁂 𑀅𑀢𑁆𑀢𑀳𑀺𑀢𑀁, 𑀧𑀭𑀳𑀺𑀢𑀜𑁆𑀘 𑀧𑀭𑀺𑀧𑀽𑀭𑁂𑀢𑀼𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀲𑀸𑀥𑀽𑀳𑀺 𑀤𑀽𑀭𑀢𑁄 𑀭𑀳𑀺𑀢𑀩𑁆𑀩𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸 𑀧𑀳𑀸𑀢𑀩𑁆𑀩𑀸𑀢𑀺 𑀭𑀳𑀸 𑀦𑀸𑀫, 𑀢𑁂 𑀘 𑀬𑀲𑁆𑀫𑀸 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸. 𑀬𑀣𑀸𑀳 𑁋

‘‘𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁄 𑀧𑀳𑀻𑀦𑁄 𑀤𑁄𑀲𑁄 𑀫𑁄𑀳𑁄, 𑀲𑀩𑁆𑀩𑁂𑀧𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺 (𑀧𑀸𑀭𑀸. 𑁯-𑁧𑁦 𑀅𑀢𑁆𑀣𑀢𑁄 𑀲𑀫𑀸𑀦𑀁).

𑀢𑀲𑁆𑀫𑀸 𑀲𑀩𑁆𑀩𑀲𑁄 𑀦 𑀲𑀦𑁆𑀢𑀺 𑀏𑀢𑀲𑁆𑀲 𑀭𑀳𑀸𑀢𑀺 𑀅𑀭𑀳𑁄𑀢𑀺 𑀯𑀢𑁆𑀢𑀩𑁆𑀩𑁂 𑀑𑀓𑀸𑀭𑀲𑁆𑀲 𑀲𑀸𑀦𑀼𑀲𑀸𑀭𑀁 𑀅-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀸𑀧𑀥𑀫𑁆𑀫𑀸 𑀭𑀳𑀸 𑀦𑀸𑀫, 𑀲𑀸𑀥𑀽𑀳𑀺 𑀭𑀳𑀺𑀢𑀩𑁆𑀩𑀢𑁄;

𑀢𑁂𑀲𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸, 𑀪𑀕𑀯𑀸 𑀅𑀭𑀳𑀁 𑀫𑀢𑁄.

𑀬𑁂 𑀢𑁂 𑀲𑀩𑁆𑀩𑀲𑁄 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀸 𑀧𑀳𑀻𑀦𑀓𑀺𑀮𑁂𑀲𑀸 𑀪𑀸𑀯𑀺𑀢𑀫𑀕𑁆𑀕𑀸 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸, 𑀬𑁂 𑀘 𑀲𑁂𑀓𑁆𑀔𑀸 𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀅𑀦𑀼𑀢𑁆𑀢𑀭𑀁 ¶ 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀸 𑀯𑀺𑀳𑀭𑀦𑁆𑀢𑀺, 𑀬𑁂 𑀘 𑀧𑀭𑀺𑀲𑀼𑀤𑁆𑀥𑀧𑀬𑁄𑀕𑀸 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑀸 𑀲𑀤𑁆𑀥𑀸𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀧𑀼𑀕𑁆𑀕𑀮𑀸, 𑀢𑁂𑀳𑀺 𑀦 𑀭𑀳𑀺𑀢𑀩𑁆𑀩𑁄 𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑁄, 𑀢𑁂 𑀘 𑀪𑀕𑀯𑀢𑀸𑀢𑀺 𑀅𑀭𑀳𑀁. 𑀢𑀣𑀸 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀢𑁆𑀣𑀸𑀭𑀸 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀲𑀢𑁆𑀣𑀼 𑀥𑀫𑁆𑀫𑀲𑀭𑀻𑀭𑁂𑀦 𑀅𑀯𑀺𑀭𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀬𑀣𑀸𑀳 𑀆𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯,

𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄;

𑀦𑀫𑀲𑁆𑀲𑀫𑀸𑀦𑁄 ¶ 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁,

𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁.

‘‘𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘,

𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄,

𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀻’’𑀢𑀺. (𑀲𑀼. 𑀦𑀺. 𑁧𑁧𑁪𑁮-𑁧𑁧𑁪𑁯);

𑀢𑁂𑀦𑁂𑀯 𑀘 𑀢𑁂 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀦𑁆𑀢𑀺. 𑀬𑀣𑀸𑀳 𑁋

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁮; 𑀅. 𑀦𑀺. 𑁧.𑁨𑁭𑁬).

𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀭𑀺 𑀦𑀺𑀘𑁆𑀘𑀮𑀲𑀤𑁆𑀥𑀸 𑀏𑀯 𑀳𑁄𑀦𑁆𑀢𑀺. 𑀇𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁂𑀳𑀺 𑀧𑀼𑀭𑀺𑀲𑀯𑀺𑀲𑁂𑀲𑁂𑀳𑀺 𑀅𑀯𑀺𑀭𑀳𑀺𑀢𑀩𑁆𑀩𑀢𑁄, 𑀢𑁂𑀲𑀜𑁆𑀘 𑀅𑀯𑀺𑀭𑀳𑀦𑀢𑁄 𑀦 𑀲𑀦𑁆𑀢𑀺 𑀏𑀢𑀲𑁆𑀲 𑀭𑀳𑀸 𑀧𑀭𑀺𑀘𑁆𑀘𑀚𑀦𑀓𑀸, 𑀦𑀢𑁆𑀣𑀺 𑀯𑀸 𑀏𑀢𑀲𑁆𑀲 𑀭𑀳𑁄 𑀲𑀸𑀥𑀽𑀳𑀺 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀢𑀸𑀢𑀺 𑀅𑀭𑀳𑀁.

‘‘𑀬𑁂 𑀲𑀘𑁆𑀙𑀺𑀓𑀢𑀲𑀤𑁆𑀥𑀫𑁆𑀫𑀸, 𑀅𑀭𑀺𑀬𑀸 𑀲𑀼𑀤𑁆𑀥𑀕𑁄𑀘𑀭𑀸;

𑀦 𑀢𑁂𑀳𑀺 𑀭𑀳𑀺𑀢𑁄 𑀳𑁄𑀢𑀺, 𑀦𑀸𑀣𑁄 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺.

𑀭𑀳𑁄𑀢𑀺 𑀘 𑀕𑀫𑀦𑀁 𑀯𑀼𑀘𑁆𑀘𑀢𑀺, 𑀪𑀕𑀯𑀢𑁄 𑀘 𑀦𑀸𑀦𑀸𑀕𑀢𑀻𑀲𑀼 𑀧𑀭𑀺𑀩𑁆𑀪𑀫𑀦𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑁂 𑀕𑀫𑀦𑀁 𑀦𑀢𑁆𑀣𑀺 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀩𑁆𑀩𑀲𑁄 𑀲𑀲𑀫𑁆𑀪𑀸𑀭𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀬𑀣𑀸𑀳 𑁋

‘‘𑀬𑁂𑀦 ¶ 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀏𑀯𑀁 ¶ 𑀦𑀢𑁆𑀣𑀺 𑀏𑀢𑀲𑁆𑀲 𑀭𑀳𑁄𑀕𑀫𑀦𑀁 𑀕𑀢𑀻𑀲𑀼 𑀧𑀘𑁆𑀘𑀸𑀚𑀸𑀢𑀻𑀢𑀺𑀧𑀺 𑀅𑀭𑀳𑀁.

𑀭𑀳𑁄 𑀯𑀸 𑀕𑀫𑀦𑀁 𑀬𑀲𑁆𑀲, 𑀲𑀁𑀲𑀸𑀭𑁂 𑀦𑀢𑁆𑀣𑀺 𑀲𑀩𑁆𑀩𑀲𑁄;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀅𑀭𑀳𑀁 𑀲𑀼𑀕𑀢𑁄 𑀫𑀢𑁄.

𑀧𑀸𑀲𑀁𑀲𑀢𑁆𑀢𑀸 𑀯𑀸 𑀪𑀕𑀯𑀸 𑀅𑀭𑀳𑀁. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀧𑀲𑀁𑀲𑀸𑀬𑀁 𑀅𑀭𑀳-𑀲𑀤𑁆𑀤𑀁 𑀯𑀡𑁆𑀡𑁂𑀦𑁆𑀢𑀺. 𑀧𑀸𑀲𑀁𑀲𑀪𑀸𑀯𑁄 𑀘 𑀪𑀕𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄. 𑀢𑀣𑀸 𑀳𑁂𑀲 𑀅𑀦𑀼𑀢𑁆𑀢𑀭𑁂𑀦 𑀲𑀻𑀮𑁂𑀦 𑀅𑀦𑀼𑀢𑁆𑀢𑀭𑁂𑀦 𑀲𑀫𑀸𑀥𑀺𑀦𑀸 𑀅𑀦𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀅𑀦𑀼𑀢𑁆𑀢𑀭𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀕𑀼𑀡𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 𑀤𑁂𑀯𑁂𑀳𑀺 𑀩𑁆𑀭𑀳𑁆𑀫𑁂𑀳𑀺 𑀪𑀕𑀯𑀢𑀸 𑀯𑀸 𑀧𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁄. 𑀇𑀢𑀺 𑀧𑀸𑀲𑀁𑀲𑀢𑁆𑀢𑀸𑀧𑀺 𑀪𑀕𑀯𑀸 𑀅𑀭𑀳𑀁.

𑀕𑀼𑀡𑁂𑀳𑀺 𑀲𑀤𑀺𑀲𑁄 𑀦𑀢𑁆𑀣𑀺, 𑀬𑀲𑁆𑀫𑀸 𑀮𑁄𑀓𑁂 𑀲𑀤𑁂𑀯𑀓𑁂;

𑀢𑀲𑁆𑀫𑀸 𑀧𑀸𑀲𑀁𑀲𑀺𑀬𑀢𑁆𑀢𑀸𑀧𑀺, 𑀅𑀭𑀳𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑀏𑀯𑀁 𑀲𑀩𑁆𑀩𑀣𑀸𑀧𑀺 𑁋

‘‘𑀆𑀭𑀓𑀸 𑀫𑀦𑁆𑀤𑀩𑀼𑀤𑁆𑀥𑀻𑀦𑀁, 𑀆𑀭𑀓𑀸 𑀘 𑀯𑀺𑀚𑀸𑀦𑀢𑀁;

𑀭𑀳𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸, 𑀯𑀺𑀤𑀽𑀦𑀫𑀭𑀳𑁂𑀬𑁆𑀬𑀢𑁄;

𑀪𑀯𑁂𑀲𑀼 𑀘 𑀭𑀳𑀸𑀪𑀸𑀯𑀸, 𑀧𑀸𑀲𑀁𑀲𑀸 𑀅𑀭𑀳𑀁 𑀚𑀺𑀦𑁄’’𑀢𑀺.

𑁧𑁩𑁧. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀲𑀫𑁆𑀩𑀼𑀤𑁆𑀥𑁄𑀢𑀺 𑀳𑀺 𑀏𑀢𑁆𑀣 𑀲𑀁-𑀲𑀤𑁆𑀤𑁄 ‘‘𑀲𑀬’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀓𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀯𑀲𑁂𑀲𑀸𑀦𑀁 𑀜𑁂𑀬𑁆𑀬𑀥𑀫𑁆𑀫𑀸𑀦𑀁. 𑀓𑀣𑀁 𑀧𑀦𑁂𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑁄 ¶ 𑀮𑀩𑁆𑀪𑀢𑀻𑀢𑀺? 𑀏𑀓𑀤𑁂𑀲𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀯 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀣𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑀸 𑀓𑀢𑁆𑀢𑀭𑀺 𑀏𑀯 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄. ‘‘𑀲𑀫𑁆𑀫𑀸 𑀲𑀸𑀫𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀇𑀥 𑀲𑀤𑁆𑀤𑀢𑁄 𑀮𑀩𑁆𑀪𑀢𑀺, ‘‘𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀧𑀦 𑀅𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀦 𑀳𑀺 𑀩𑀼𑀚𑁆𑀛𑀦𑀓𑀺𑀭𑀺𑀬𑀸 𑀅𑀯𑀺𑀲𑀬𑀸 𑀬𑀼𑀚𑁆𑀚𑀢𑀺.

𑀇𑀤𑀸𑀦𑀺 ¶ 𑀢𑀲𑁆𑀲𑀸 𑀯𑀺𑀲𑀬𑀁 ‘‘𑀲𑀩𑁆𑀩𑀥𑀫𑁆𑀫𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑁂𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑁂. 𑀓𑁂 𑀧𑀦 𑀢𑁂𑀢𑀺? 𑀘𑀢𑀼𑀲𑀘𑁆𑀘𑀥𑀫𑁆𑀫𑁂. 𑀅𑀪𑀺𑀜𑁆𑀜𑁂𑀬𑁆𑀬𑀢𑁄 𑀩𑀼𑀤𑁆𑀥𑁄𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀩𑀼𑀚𑁆𑀛𑀺. 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬, 𑀅𑀥𑀺𑀕𑀫𑀓𑁆𑀔𑀡𑁂 𑀫𑀕𑁆𑀕𑀧𑀜𑁆𑀜𑀸𑀬, 𑀅𑀧𑀭𑀪𑀸𑀕𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀳𑀺 𑀅𑀜𑁆𑀜𑀸𑀲𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂𑀢𑀺 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀫𑀸𑀳. 𑀧𑀳𑀸𑀢𑀩𑁆𑀩𑁂𑀢𑀺 𑀲𑀫𑀼𑀤𑀬𑀧𑀓𑁆𑀔𑀺𑀬𑁂. 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀧𑀦 𑀲𑁄𑀧𑀸𑀤𑀺𑀲𑁂𑀲𑀸𑀤𑀺𑀓𑀁 𑀧𑀭𑀺𑀬𑀸𑀬𑀲𑀺𑀤𑁆𑀥𑀁 𑀪𑁂𑀤𑀁 𑀕𑀳𑁂𑀢𑁆𑀯𑀸 𑀓𑀢𑁄, 𑀉𑀤𑁆𑀤𑁂𑀲𑁄 𑀯𑀸 𑀅𑀬𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀦𑁆𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀘𑀓𑁆𑀔𑀼𑀁 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀉𑀤𑁆𑀤𑁂𑀲𑁄 𑀘 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀣𑀧𑀭𑀺𑀘𑁆𑀙𑁂𑀤𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀓𑀭𑀻𑀬𑀢𑀺. 𑀉𑀤𑁆𑀤𑁂𑀲𑁂𑀦 𑀳𑀺 𑀉𑀤𑁆𑀤𑀺𑀲𑀺𑀬𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭-𑁮). 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀢𑀺 𑀯𑀸 𑀨𑀮𑀯𑀺𑀫𑀼𑀢𑁆𑀢𑀻𑀦𑀫𑁆𑀧𑀺 𑀕𑀳𑀡𑀁, 𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯𑀸𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀜𑁆𑀘 𑀪𑀸𑀯𑁂𑀢𑀩𑁆𑀩𑁂𑀢𑀺 𑀏𑀢𑁆𑀣 𑀛𑀸𑀦𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀕𑀸𑀣𑀸𑀬𑀁 𑀪𑀸𑀯𑁂𑀢𑀩𑁆𑀩𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀬𑀲𑁆𑀫𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀫𑀬𑀸 𑀩𑀼𑀤𑁆𑀥𑀸𑀦𑀺, 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀓𑀺𑀜𑁆𑀘𑀺 𑀜𑁂𑀬𑁆𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀩𑀼𑀤𑁆𑀥𑁄𑀲𑁆𑀫𑀺, 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁨. 𑀏𑀯𑀁 𑀲𑀘𑁆𑀘𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑁂𑀳𑀺, 𑀔𑀦𑁆𑀥𑀸𑀤𑀻𑀳𑀺 𑀘 𑀲𑀘𑁆𑀘𑀯𑀲𑁂𑀦𑁂𑀯 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀽𑀮𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀲𑀦𑁆𑀢𑁂𑀲𑀼𑀧𑀺 𑀅𑀯𑀺𑀚𑁆𑀚𑀸𑀤𑀻𑀲𑀼 𑀅𑀜𑁆𑀜𑁂𑀲𑀼 𑀓𑀸𑀭𑀡𑁂𑀲𑀼 𑀢𑁂𑀲𑀫𑁆𑀧𑀺 𑀫𑀽𑀮𑀪𑀽𑀢𑀓𑀸𑀭𑀡𑀪𑀸𑀯𑁂𑀦. 𑀢𑀡𑁆𑀳𑀸 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑀸𑀯𑀳𑁂𑀢𑀼𑀢𑁄, 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀘 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀬 𑀧𑀥𑀸𑀦𑀓𑀸𑀭𑀡𑀁. 𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀉𑀧𑁆𑀧𑀸𑀤𑀺𑀓𑀸. 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸 𑀢𑀡𑁆𑀳𑀸. 𑀉𑀪𑀺𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 ¶ , 𑀢𑀁𑀲𑀫𑀼𑀤𑀬𑀲𑁆𑀲 𑀘. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀦𑀺𑀭𑁄𑀥𑀧𑀚𑀸𑀦𑀦𑀸𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀭𑁄𑀥𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀸. 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦𑀸𑀢𑀺 ‘‘𑀘𑀓𑁆𑀔𑀼𑀁 𑀘𑀓𑁆𑀔𑀼𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀦𑀺𑀤𑁆𑀥𑀸𑀭𑀡𑁂𑀦 ¶ . 𑀢𑀡𑁆𑀳𑀸𑀬𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀲𑀩𑁆𑀪𑀸𑀯𑀢𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑁆𑀢𑁄𑀕𑀥𑀢𑁆𑀢𑀸 𑀘 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 𑀢𑀡𑁆𑀳𑀸𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀓𑀲𑀺𑀡𑀸𑀦𑀻𑀢𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀺. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀢𑀺 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸, 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑀸𑀦𑀺 𑀘. 𑀦𑀯 𑀪𑀯𑀸𑀢𑀺 𑀓𑀸𑀫𑀪𑀯𑀸𑀤𑀬𑁄 𑀢𑀬𑁄, 𑀲𑀜𑁆𑀜𑀻𑀪𑀯𑀸𑀤𑀬𑁄 𑀢𑀬𑁄, 𑀏𑀓𑀯𑁄𑀓𑀸𑀭𑀪𑀯𑀸𑀤𑀬𑁄 𑀢𑀬𑁄𑀢𑀺 𑀦𑀯 𑀪𑀯𑀸. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀸𑀭𑀫𑁆𑀫𑀡𑀯𑀺𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀯𑀺𑀧𑀸𑀓𑀚𑁆𑀛𑀸𑀦𑀸𑀦𑀁 𑀯𑀸 𑀏𑀢𑀁 𑀕𑀳𑀡𑀁. 𑀏𑀢𑁆𑀣 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀢𑀡𑁆𑀳𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀧𑀦 𑀬𑀢𑁆𑀣 𑀢𑁂 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀸.

𑀅𑀦𑀼𑀩𑀼𑀤𑁆𑀥𑁄𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 𑀩𑀼𑀤𑁆𑀥𑁄. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀬𑀲𑁆𑀫𑀸 𑀲𑀸𑀫𑀜𑁆𑀜𑀢𑁄, 𑀯𑀺𑀲𑁂𑀲𑀢𑁄 𑀘 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑁂 𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀓𑀺𑀦𑁆𑀢𑀺 𑀆𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸’’𑀢𑀺, 𑀲𑀩𑁆𑀩𑀲𑁆𑀲𑀧𑀺 𑀜𑁂𑀬𑁆𑀬𑀲𑁆𑀲 𑀲𑀩𑁆𑀩𑀸𑀓𑀸𑀭𑀢𑁄 𑀅𑀯𑀺𑀧𑀭𑀻𑀢𑀁 𑀲𑀬𑀫𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀲𑁆𑀲 𑀧𑀭𑁄𑀧𑀤𑁂𑀲𑀭𑀳𑀺𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀥𑀺𑀕𑀫𑁄 𑀤𑀲𑁆𑀲𑀺𑀢𑁄.

𑀦𑀦𑀼 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀜𑁆𑀜𑀁 𑀅𑀦𑀸𑀯𑀭𑀡𑀜𑀸𑀡𑀁, 𑀅𑀜𑁆𑀜𑀣𑀸 ‘‘𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀩𑀼𑀤𑁆𑀥𑀜𑀸𑀡𑀸𑀦𑀻’’𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁭𑁩) 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺, 𑀯𑀺𑀲𑀬𑀧𑀯𑀢𑁆𑀢𑀺𑀪𑁂𑀤𑀯𑀲𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀤𑁆𑀯𑀺𑀥𑀸 𑀯𑀼𑀢𑁆𑀢𑀢𑁆𑀢𑀸. 𑀏𑀓𑀫𑁂𑀯 𑀳𑀺 𑀢𑀁 𑀜𑀸𑀡𑀁 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀯𑀺𑀲𑀬𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣 𑀘 𑀆𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 ‘‘𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀲𑀩𑁆𑀩𑀁 𑀲𑀗𑁆𑀔𑀢𑀫𑀲𑀗𑁆𑀔𑀢𑀁 𑀅𑀦𑀯𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣 𑀆𑀯𑀭𑀡𑀁 𑀦𑀢𑁆𑀣𑀻𑀢𑀺 𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁧𑁧𑁯). 𑀢𑀲𑁆𑀫𑀸 𑀦𑀢𑁆𑀣𑀺 𑀦𑁂𑀲𑀁 𑀅𑀢𑁆𑀣𑀢𑁄 𑀪𑁂𑀤𑁄, 𑀏𑀓𑀦𑁆𑀢𑁂𑀦 𑀘𑁂𑀢𑀁 𑀏𑀯𑀫𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀸𑀦𑀁 𑀲𑀸𑀥𑀸𑀭𑀡𑀢𑀸, 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀅𑀡𑀼𑀫𑀢𑁆𑀢𑀫𑁆𑀧𑀺 𑀆𑀯𑀭𑀡𑀁 𑀅𑀢𑁆𑀣𑀺, 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀘 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂 𑀬𑀢𑁆𑀣 𑀢𑀁 𑀦 𑀧𑀯𑀢𑁆𑀢𑀢𑀺, 𑀢𑀢𑁆𑀣𑀸𑀯𑀭𑀡𑀲𑀩𑁆𑀪𑀸𑀯𑀢𑁄 𑀅𑀦𑀸𑀯𑀭𑀡𑀪𑀸𑀯𑁄𑀬𑁂𑀯 𑀦 𑀲𑀺𑀬𑀸. 𑀅𑀣 𑀯𑀸 𑀧𑀦 𑀳𑁄𑀢𑀼 ¶ 𑀅𑀜𑁆𑀜𑀫𑁂𑀯 𑀅𑀦𑀸𑀯𑀭𑀡𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄, 𑀇𑀥 𑀧𑀦 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 ¶ 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀲 𑀘𑀸𑀥𑀺𑀕𑀫𑁂𑀦 𑀪𑀕𑀯𑀸 ‘‘𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀯𑀺𑀤𑀽, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘 𑀯𑀼𑀘𑁆𑀘𑀢𑀺 𑀦 𑀲𑀓𑀺𑀁𑀬𑁂𑀯 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁨) ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 ‘‘𑀩𑀼𑀤𑁆𑀥𑁄’’𑀢𑀺. 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀜𑀸𑀡𑀲𑀫𑀥𑀺𑀕𑀫𑁂𑀦 𑀳𑀺 𑀪𑀕𑀯𑀢𑁄 𑀲𑀦𑁆𑀢𑀸𑀦𑁂 𑀅𑀦𑀯𑀲𑁂𑀲𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀢𑀸 𑀅𑀳𑁄𑀲𑀻𑀢𑀺.

𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑀺𑀤𑀁 𑀜𑀸𑀡𑀁 𑀧𑀯𑀢𑁆𑀢𑀫𑀸𑀦𑀁 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀓𑀫𑁂𑀦𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀅𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀜𑁆𑀘 𑀏𑀓𑀚𑁆𑀛𑀁 𑀉𑀧𑀝𑁆𑀞𑀸𑀦𑁂 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀧𑀝𑀺𑀯𑀺𑀪𑀸𑀕𑁂𑀦𑀸𑀯𑀩𑁄𑀥𑁄 𑀦 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀢𑁆𑀢𑀸𑀓𑀸𑀭𑁂𑀦 𑀯𑀺𑀬 𑀲𑀩𑁆𑀩𑀥𑀫𑁆𑀫𑀸 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑁂𑀧𑀺 ‘‘𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀞𑀺𑀢𑀮𑀓𑁆𑀔𑀡𑀯𑀺𑀲𑀬𑀁 𑀯𑀺𑀓𑀧𑁆𑀧𑀭𑀳𑀺𑀢𑀁 𑀲𑀩𑁆𑀩𑀓𑀸𑀮𑀁 𑀩𑀼𑀤𑁆𑀥𑀸𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 ‘𑀲𑀩𑁆𑀩𑀯𑀺𑀤𑀽’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 ‘𑀘𑀭𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀢𑀺𑀝𑁆𑀞𑀦𑁆𑀢𑁄𑀧𑀺 𑀲𑀫𑀸𑀳𑀺𑀢𑁄’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀼𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀤𑁄𑀲𑀸𑀦𑀸𑀢𑀺𑀯𑀢𑁆𑀢𑀺, 𑀞𑀺𑀢𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑀸𑀬 𑀘 𑀅𑀢𑀻𑀢𑀸𑀦𑀸𑀕𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀁 𑀢𑀤𑀪𑀸𑀯𑀢𑁄 𑀏𑀓𑀤𑁂𑀲𑀯𑀺𑀲𑀬𑀫𑁂𑀯 𑀪𑀕𑀯𑀢𑁄 𑀜𑀸𑀡𑀁 𑀲𑀺𑀬𑀸. 𑀢𑀲𑁆𑀫𑀸 𑀲𑀓𑀺𑀁𑀬𑁂𑀯 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺.

𑀅𑀣 𑀓𑀫𑁂𑀦 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀁 𑀧𑀯𑀢𑁆𑀢𑀢𑀺? 𑀏𑀯𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦, 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀜𑁂𑀬𑁆𑀬𑁂 𑀓𑀫𑁂𑀦 𑀕𑀬𑁆𑀳𑀫𑀸𑀦𑁂 𑀢𑀲𑁆𑀲 𑀅𑀦𑀯𑀲𑁂𑀲𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺, 𑀅𑀧𑀭𑀺𑀬𑀦𑁆𑀢𑀪𑀸𑀯𑀢𑁄 𑀜𑁂𑀬𑁆𑀬𑀲𑁆𑀲. 𑀬𑁂 𑀧𑀦 ‘‘𑀅𑀢𑁆𑀣𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 ‘𑀲𑁂𑀲𑁂𑀧𑀺 𑀏𑀯’𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑁂𑀦 𑀲𑀩𑁆𑀩𑀜𑁆𑀜𑀽 𑀪𑀕𑀯𑀸, 𑀢𑀜𑁆𑀘 𑀜𑀸𑀡𑀁 𑀦 𑀅𑀦𑀼𑀫𑀸𑀦𑀺𑀓𑀁 𑀲𑀁𑀲𑀬𑀸𑀪𑀸𑀯𑀢𑁄. 𑀲𑀁𑀲𑀬𑀸𑀦𑀼𑀩𑀤𑁆𑀥𑀁 𑀳𑀺 𑀮𑁄𑀓𑁂 𑀅𑀦𑀼𑀫𑀸𑀦𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀦 𑀬𑀼𑀢𑁆𑀢𑀁. 𑀲𑀩𑁆𑀩𑀲𑁆𑀲 𑀳𑀺 𑀅𑀧𑁆𑀧𑀘𑁆𑀘𑀓𑁆𑀔𑀪𑀸𑀯𑁂 𑀅𑀢𑁆𑀣𑀸𑀯𑀺𑀲𑀁𑀯𑀸𑀤𑀦𑁂𑀦 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 ¶ 𑀓𑀢𑁆𑀯𑀸 ‘‘𑀲𑁂𑀲𑁂𑀧𑀺 𑀏𑀯’’𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀬𑀜𑁆𑀳𑀺 𑀢𑀁 𑀲𑁂𑀲𑀁, 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀦𑁆𑀢𑀺.

𑀅𑀣 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁, 𑀢𑀲𑁆𑀲 𑀲𑁂𑀲𑀪𑀸𑀯𑁄 𑀏𑀯 𑀦 𑀲𑀺𑀬𑀸𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸 ¶ ? 𑀅𑀯𑀺𑀲𑀬𑀯𑀺𑀘𑀸𑀭𑀡𑀪𑀸𑀯𑀢𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 ‘‘𑀩𑀼𑀤𑁆𑀥𑀯𑀺𑀲𑀬𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀬𑁄 𑀘𑀺𑀦𑁆𑀢𑁂𑀬𑁆𑀬, 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀬𑀁𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀲𑀓𑀮𑀁, 𑀏𑀓𑀤𑁂𑀲𑁄 𑀯𑀸, 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀦𑀺𑀘𑁆𑀘𑀲𑀫𑀸𑀥𑀸𑀦𑀜𑁆𑀘 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀘 𑀲𑀓𑀮𑀲𑁆𑀲 𑀅𑀯𑀺𑀲𑀬𑀪𑀸𑀯𑁂 𑀢𑀲𑁆𑀲 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸 𑀦 𑀲𑀺𑀬𑀸, 𑀏𑀓𑀦𑁆𑀢𑁂𑀦𑁂𑀯 𑀲𑀸 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑁆𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀝𑀺𑀩𑀤𑁆𑀥𑀸’’𑀢𑀺 𑀯𑀘𑀦𑀢𑁄. 𑀅𑀢𑀻𑀢𑀸𑀦𑀸𑀕𑀢𑀯𑀺𑀲𑀬𑀫𑁆𑀧𑀺 𑀪𑀕𑀯𑀢𑁄 𑀜𑀸𑀡𑀁 𑀅𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀕𑁆𑀕𑀳𑀡𑀯𑀺𑀭𑀳𑀺𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀫𑁂𑀯.

𑀦𑀦𑀼 𑀘 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀬𑀤𑀸 𑀲𑀓𑀮𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁, 𑀢𑀤𑀸 𑀲𑀓𑀺𑀁𑀬𑁂𑀯 𑀲𑀓𑀮𑀯𑀺𑀲𑀬𑀢𑀸𑀬 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀤𑁄𑀲𑀸𑀦𑀸𑀢𑀺𑀯𑀢𑁆𑀢𑀺𑀬𑁂𑀯𑀸𑀢𑀺? 𑀦, 𑀢𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀯𑀺𑀲𑁄𑀥𑀺𑀢𑁄 𑀳𑀺 𑀲𑁄 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺. 𑀅𑀜𑁆𑀜𑀣𑀸 𑀧𑀘𑀼𑀭𑀚𑀦𑀜𑀸𑀡𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀜𑀸𑀡𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀢𑀸 𑀦 𑀲𑀺𑀬𑀸. 𑀢𑀲𑁆𑀫𑀸 𑀲𑀓𑀮𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀢𑀁 𑀏𑀓𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀬 𑀲𑀼𑀯𑀯𑀢𑁆𑀣𑀸𑀧𑀺𑀢𑁂𑀬𑁂𑀯 𑀢𑁂 𑀥𑀫𑁆𑀫𑁂 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫). 𑀏𑀯𑀫𑁂𑀓𑀚𑁆𑀛𑀁, 𑀯𑀺𑀲𑀼𑀁, 𑀲𑀓𑀺𑀁, 𑀓𑀫𑁂𑀦 𑀯𑀸 𑀇𑀘𑁆𑀙𑀸𑀦𑀼𑀭𑀽𑀧𑀁 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑁧𑁩𑁩. 𑀯𑀺𑀚𑁆𑀚𑀸𑀳𑀻𑀢𑀺 𑀏𑀢𑁆𑀣 𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀯𑀺𑀚𑁆𑀚𑀸, 𑀬𑀸𑀣𑀸𑀯𑀢𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀓𑁆𑀔𑀲𑁆𑀲 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀢𑀫𑁄𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀧𑀤𑀸𑀮𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀅𑀢𑁆𑀢𑀦𑁄 𑀯𑀺𑀲𑀬𑀲𑁆𑀲 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀧𑀺 𑀯𑀺𑀚𑁆𑀚𑀸. 𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀯𑀸, 𑀅𑀯𑀺𑀓𑀮𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀺𑀲𑁆𑀲𑀦𑁆𑀦𑀁, 𑀅𑀝𑁆𑀞𑀦𑁆𑀦𑀁 𑀘 𑀯𑀺𑀚𑁆𑀚𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀕𑀳𑀡𑀁 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀦𑀸𑀫 𑀲𑀤𑁆𑀥𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀩𑀸𑀳𑀼𑀲𑀘𑁆𑀘𑀁 𑀯𑀻𑀭𑀺𑀬𑀁 𑀲𑀢𑀺 𑀧𑀜𑁆𑀜𑀸 𑀘. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀥 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁧𑁧). 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀻𑀮𑀸𑀤𑀬𑁄 𑀧𑀦𑁆𑀦𑀭𑀲𑁂𑀯 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑁂𑀬𑁂𑀯 𑀳𑀻’’𑀢𑀺𑀆𑀤𑀺 ¶ . 𑀢𑁂𑀦 𑀢𑁂𑀲𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀢𑁄 𑀦𑀺𑀩𑁆𑀩𑀸𑀦𑀼𑀧𑀕𑀫𑀦𑁂 𑀏𑀓𑀁𑀲𑀢𑁄 𑀲𑀸𑀥𑀦𑀪𑀸𑀯𑀫𑀸𑀳. 𑀇𑀤𑀸𑀦𑀺 𑀢𑀤𑀢𑁆𑀣𑀲𑀸𑀥𑀦𑀸𑀬 𑀆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀦𑀦𑀼 𑀘𑀸𑀬𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸 𑀲𑀸𑀯𑀓𑁂𑀲𑀼𑀧𑀺 𑀮𑀩𑁆𑀪𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀮𑀩𑁆𑀪𑀢𑀺, 𑀦 𑀧𑀦 𑀢𑀣𑀸, 𑀬𑀣𑀸 𑀪𑀕𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀭𑀡𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲, 𑀲𑁄 𑀘𑁂𑀢𑁆𑀣 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸 𑀲𑀸𑀥𑀸𑀭𑀡𑀪𑀸𑀯𑁄𑀢𑀺 𑀆𑀳 ‘‘𑀘𑀭𑀡𑀲𑀫𑁆𑀧𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸’’𑀢𑀺. 𑀬𑀣𑀸 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑁂 𑀦𑀺𑀬𑁄𑀚𑀦𑀁 𑀧𑀜𑁆𑀜𑀸𑀬 𑀯𑀺𑀦𑀸 𑀦 𑀳𑁄𑀢𑀺, 𑀏𑀯𑀁 𑀦𑁂𑀲𑀁 𑀅𑀢𑁆𑀣𑀸𑀦𑀢𑁆𑀣𑀚𑀸𑀦𑀦𑀁 𑀲𑀢𑁆𑀣𑀼 𑀓𑀭𑀼𑀡𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀉𑀪𑀬𑀫𑁆𑀧𑀺 𑀉𑀪𑀬𑀢𑁆𑀣 𑀲𑀓𑀺𑀘𑁆𑀘𑀓𑀫𑁂𑀯 𑀲𑀺𑀬𑀸. 𑀬𑀢𑁆𑀣 𑀧𑀦 𑀬𑀲𑁆𑀲𑀸 𑀧𑀥𑀸𑀦𑀪𑀸𑀯𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀲𑀩𑁆𑀩𑀜𑁆𑀜𑀼𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀢𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀬𑀣𑀸 𑀅𑀜𑁆𑀜𑁄𑀧𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀢𑁂𑀦 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯𑀸𑀬𑀁 𑀆𑀯𑁂𑀡𑀺𑀓𑀸 𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀧𑀦𑀸𑀬𑀁 𑀲𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀲𑀸𑀯𑀓𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣 𑀘 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀲𑀢𑁆𑀣𑀼 𑀧𑀜𑁆𑀜𑀸𑀫𑀳𑀢𑁆𑀢𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺, 𑀘𑀭𑀡𑀲𑀫𑁆𑀧𑀤𑀸𑀬 𑀓𑀭𑀼𑀡𑀸𑀫𑀳𑀢𑁆𑀢𑀁. 𑀢𑁂𑀲𑀼 𑀧𑀜𑁆𑀜𑀸𑀬 𑀪𑀕𑀯𑀢𑁄 𑀥𑀫𑁆𑀫𑀭𑀚𑁆𑀚𑀧𑁆𑀧𑀢𑁆𑀢𑀺, 𑀓𑀭𑀼𑀡𑀸𑀬 𑀥𑀫𑁆𑀫𑀲𑀁𑀯𑀺𑀪𑀸𑀕𑁄. 𑀧𑀜𑁆𑀜𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀺𑀤𑀸, 𑀓𑀭𑀼𑀡𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀲𑀳𑀦𑀁. 𑀧𑀜𑁆𑀜𑀸𑀬 𑀧𑀭𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀁, 𑀓𑀭𑀼𑀡𑀸𑀬 𑀧𑀭𑀤𑀼𑀓𑁆𑀔𑀧𑀢𑀺𑀓𑀸𑀭𑀸𑀭𑀫𑁆𑀪𑁄. 𑀧𑀜𑁆𑀜𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀪𑀸𑀯𑁄, 𑀓𑀭𑀼𑀡𑀸𑀬 𑀢𑀤𑀥𑀺𑀕𑀫𑁄. 𑀧𑀜𑁆𑀜𑀸𑀬 𑀲𑀬𑀁 𑀢𑀭𑀡𑀁, 𑀓𑀭𑀼𑀡𑀸𑀬 𑀧𑀭𑁂𑀲𑀁 𑀢𑀸𑀭𑀡𑀁. 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺, 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀺𑀘𑁆𑀘𑀲𑀺𑀤𑁆𑀥𑀺. 𑀓𑀭𑀼𑀡𑀸𑀬 𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀲𑀁𑀲𑀸𑀭𑀸𑀪𑀺𑀫𑀼𑀔𑀪𑀸𑀯𑁄, 𑀧𑀜𑁆𑀜𑀸𑀬 𑀢𑀢𑁆𑀣 𑀅𑀦𑀪𑀺𑀭𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀧𑀭𑁂𑀲𑀁 𑀅𑀪𑀺𑀁𑀲𑀸𑀧𑀦𑀁 ¶ , 𑀧𑀜𑁆𑀜𑀸𑀬 𑀲𑀬𑀁 𑀧𑀭𑁂𑀳𑀺 𑀅𑀪𑀸𑀬𑀦𑀁. 𑀓𑀭𑀼𑀡𑀸𑀬 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺, 𑀧𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁄 𑀧𑀭𑀁 𑀭𑀓𑁆𑀔𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀅𑀧𑀭𑀦𑁆𑀢𑀧𑁄, 𑀧𑀜𑁆𑀜𑀸𑀬 𑀅𑀦𑀢𑁆𑀢𑀦𑁆𑀢𑀧𑁄. 𑀢𑁂𑀦 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀮𑁄𑀓𑀦𑀸𑀣𑀢𑀸, 𑀧𑀜𑁆𑀜𑀸𑀬 𑀅𑀢𑁆𑀢𑀦𑀸𑀣𑀢𑀸. 𑀓𑀭𑀼𑀡𑀸𑀬 𑀘𑀲𑁆𑀲 𑀦𑀺𑀦𑁆𑀦𑀢𑀸𑀪𑀸𑀯𑁄, 𑀧𑀜𑁆𑀜𑀸𑀬 𑀉𑀦𑁆𑀦𑀫𑀸𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼 𑀚𑀦𑀺𑀢𑀸𑀦𑀼𑀕𑁆𑀕𑀳𑁄 𑀧𑀜𑁆𑀜𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀢𑁆𑀣 𑀯𑀺𑀭𑀢𑁆𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀬 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀓𑀭𑀼𑀡𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀲𑀢𑁆𑀢𑀸𑀦𑀼𑀕𑁆𑀕𑀳𑀸𑀬 𑀧𑀯𑀢𑁆𑀢𑁄. 𑀬𑀣𑀸 𑀳𑀺 𑀓𑀭𑀼𑀡𑀸 𑀪𑀕𑀯𑀢𑁄 𑀲𑀺𑀦𑁂𑀳𑀲𑁄𑀓𑀯𑀺𑀭𑀳𑀺𑀢𑀸, 𑀏𑀯𑀁 𑀧𑀜𑁆𑀜𑀸 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀯𑀺𑀦𑀺𑀫𑀼𑀢𑁆𑀢𑀸𑀢𑀺 ¶ 𑀅𑀜𑁆𑀜𑀫𑀜𑁆𑀜𑀯𑀺𑀲𑁄𑀥𑀺𑀢𑀸 𑀧𑀭𑀫𑀯𑀺𑀲𑀼𑀤𑁆𑀥𑀸 𑀕𑀼𑀡𑀯𑀺𑀲𑁂𑀲𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀳𑀺 𑀧𑀓𑀸𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁪. 𑀕𑀫𑀦𑀫𑁆𑀧𑀺 𑀳𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀕𑀢𑁂 𑀞𑀺𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁧𑁪; 𑁨.𑁩𑁭𑁬). 𑀲𑁄𑀪𑀦𑀦𑁆𑀢𑀺 𑀲𑀼𑀪𑀁. 𑀲𑀼𑀪𑀪𑀸𑀯𑁄 𑀯𑀺𑀲𑀼𑀤𑁆𑀥𑀢𑀸𑀬, 𑀯𑀺𑀲𑀼𑀤𑁆𑀥𑀢𑀸 𑀤𑁄𑀲𑀯𑀺𑀕𑀫𑁂𑀦𑀸𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀫𑀦𑀯𑀚𑁆𑀚’’𑀦𑁆𑀢𑀺. 𑀕𑀫𑀦𑀜𑁆𑀘 𑀦𑀸𑀫 𑀩𑀳𑀼𑀯𑀺𑀥𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁 𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑁄’’𑀢𑀺 𑀆𑀳. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀕𑀢𑀺 𑀅𑀥𑀺𑀕𑀫𑁄𑀢𑀺 𑀓𑀢𑁆𑀯𑀸 ‘‘𑀕𑀢𑀁, 𑀕𑀫𑀦’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀳𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑁂𑀫𑀁 𑀤𑀺𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀲𑀚𑁆𑀚𑀫𑀸𑀦𑁄𑀢𑀺 𑀧𑀭𑀺𑀧𑀦𑁆𑀣𑀸𑀪𑀸𑀯𑁂𑀦 𑀲𑀼𑀕𑀢𑀺𑀕𑀫𑀦𑁂𑀧𑀺 𑀅𑀲𑀚𑁆𑀚𑀦𑁆𑀢𑁄 𑀲𑀗𑁆𑀕𑀁 𑀅𑀓𑀭𑁄𑀦𑁆𑀢𑁄, 𑀧𑀕𑁂𑀯 𑀇𑀢𑀭𑀢𑁆𑀣. 𑀅𑀣 𑀯𑀸 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀺𑀧𑁆𑀧𑀪𑀺𑀜𑁆𑀜𑀸𑀯𑀲𑁂𑀦𑁂𑀯 𑀘𑀢𑀼𑀦𑁆𑀦𑀫𑁆𑀧𑀺 𑀫𑀕𑁆𑀕𑀸𑀦𑀁 𑀧𑀝𑀺𑀮𑀤𑁆𑀥𑀪𑀸𑀯𑀢𑁄 𑀅𑀲𑀚𑁆𑀚𑀫𑀸𑀦𑁄 𑀅𑀲𑀚𑁆𑀚𑀦𑁆𑀢𑁄 𑀕𑀢𑁄. 𑀬𑀁 𑀕𑀫𑀦𑀁 𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀫𑀦𑀢𑁆𑀣𑀁 𑀅𑀧𑀳𑀭𑀢𑀺, 𑀲𑀩𑁆𑀩𑀜𑁆𑀘 𑀅𑀦𑀼𑀢𑁆𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀆𑀯𑀳𑀢𑀺, 𑀢𑀤𑁂𑀯 𑀲𑁄𑀪𑀦𑀁 𑀦𑀸𑀫. 𑀢𑁂𑀦 𑀘 𑀪𑀕𑀯𑀸 𑀕𑀢𑁄𑀢𑀺 𑀆𑀳 ‘‘𑀇𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀕𑀢𑁄’’𑀢𑀺 𑀲𑁄𑀪𑀦𑀢𑁆𑀣𑁄 𑀲𑀼-𑀲𑀤𑁆𑀤𑁄𑀢𑀺 𑀓𑀢𑁆𑀯𑀸.

𑀅𑀲𑀼𑀦𑁆𑀤𑀭𑀸𑀦𑀁 𑀤𑀼𑀓𑁆𑀔𑀸𑀦𑀁 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀅𑀘𑁆𑀘𑀦𑁆𑀢𑀲𑀼𑀔𑀢𑁆𑀢𑀸 𑀏𑀓𑀦𑁆𑀢𑀢𑁄 𑀲𑀼𑀦𑁆𑀤𑀭𑀁 𑀦𑀸𑀫 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀜𑁆𑀘𑁂𑀲 𑀞𑀸𑀦𑀁 𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀫. 𑀦𑀺. 𑁨.𑁨𑁧𑁫; 𑀥. 𑀧. 𑁨𑁦𑁩-𑁨𑁦𑁪). 𑀲𑀫𑁆𑀫𑀸𑀢𑀺 𑀲𑀼𑀝𑁆𑀞𑀼. 𑀲𑀼𑀝𑁆𑀞𑀼 𑀕𑀫𑀦𑀜𑁆𑀘 𑀦𑀸𑀫 𑀧𑀝𑀺𑀧𑀓𑁆𑀔𑁂𑀦 𑀅𑀦𑀪𑀺𑀪𑀽𑀢𑀲𑁆𑀲 𑀕𑀫𑀦𑀦𑁆𑀢𑀺 𑀆𑀳 ‘‘𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄’’𑀢𑀺. 𑀇𑀤𑀜𑁆𑀘 𑀲𑀺𑀔𑀸𑀧𑁆𑀧𑀢𑁆𑀢𑀁 𑀲𑀫𑁆𑀫𑀸𑀕𑀫𑀦𑀁, 𑀬𑀸𑀬 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 𑀲𑀺𑀤𑁆𑀥𑀁, 𑀲𑀸𑀧𑀺 𑀲𑀫𑁆𑀫𑀸𑀕𑀫𑀦𑀫𑁂𑀯𑀸𑀢𑀺 𑀏𑀯𑀫𑁆𑀧𑀺 ¶ 𑀪𑀕𑀯𑀸 𑀲𑀼𑀕𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸 𑀯𑀸 𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀲𑀫𑁆𑀧𑀸𑀧𑀦𑁂 𑀅𑀯𑀺𑀧𑀭𑀻𑀢𑀧𑀝𑀺𑀧𑀢𑁆𑀢𑀺𑀬𑀸. ‘‘𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄’’𑀢𑀺 𑀏𑀢𑁂𑀦 𑀫𑀳𑀸𑀩𑁄𑀥𑀺𑀬𑀸 𑀧𑀝𑀺𑀧𑀤𑀸 𑀅𑀯𑀺𑀪𑀸𑀕𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀩𑁆𑀩𑀤𑀸 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀦𑁆𑀢𑀺 𑀇𑀫𑁂 𑀅𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀕𑀢𑁄’’𑀢𑀺 𑀏𑀢𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀢𑀺𑀁 𑀤𑀲𑁆𑀲𑁂𑀢𑀺. ‘‘𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀇𑀫𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀕𑀢𑁄’’𑀢𑀺 𑀏𑀢𑁂𑀦 𑀅𑀭𑀺𑀬𑀫𑀕𑁆𑀕𑀕𑀢𑀺𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀭𑀸𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀲𑁆𑀲𑁂𑀯 𑀪𑀸𑀲𑀦𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂, 𑀲𑀸𑀥𑁂𑀢𑀩𑁆𑀩𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣𑀁. 𑀅𑀢𑁆𑀣𑀫𑀼𑀔𑁂𑀦 𑀳𑀺 𑀯𑀸𑀘𑀸𑀬 𑀅𑀪𑀽𑀢𑀢𑀸, 𑀪𑀽𑀢𑀢𑀸 𑀯𑀸. 𑀅𑀢𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀪𑀽𑀢𑀦𑁆𑀢𑀺 ¶ 𑀯𑀸 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀢𑀘𑁆𑀙𑀦𑁆𑀢𑀺 𑀅𑀢𑀣𑀸𑀓𑀸𑀭𑀁 𑀅𑀜𑁆𑀜𑀣𑀸𑀲𑀦𑁆𑀢𑀁. 𑀅𑀦𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦, 𑀲𑀫𑁆𑀧𑀭𑀸𑀬𑀺𑀓𑁂𑀦 𑀯𑀸 𑀅𑀦𑀢𑁆𑀣𑁂𑀦 𑀲𑀜𑁆𑀳𑀺𑀢𑀁, 𑀅𑀦𑀢𑁆𑀣𑀸𑀯𑀳𑀁. 𑀦 𑀅𑀢𑁆𑀣𑁄𑀢𑀺 𑀅𑀦𑀢𑁆𑀣𑁄, 𑀅𑀢𑁆𑀣𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀅𑀪𑀸𑀯𑁄 𑀘, 𑀢𑁂𑀦 𑀲𑀜𑁆𑀳𑀺𑀢𑀁, 𑀧𑀺𑀲𑀼𑀡𑀯𑀸𑀘𑀁, 𑀲𑀫𑁆𑀨𑀧𑁆𑀧𑀮𑀸𑀧𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀧𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀧𑀞𑀫𑀸 𑀯𑀸𑀘𑀸 𑀲𑀻𑀮𑀯𑀦𑁆𑀢𑀁 ‘‘𑀤𑀼𑀲𑁆𑀲𑀻𑀮𑁄’’𑀢𑀺, 𑀅𑀘𑀡𑁆𑀟𑀸𑀮𑀸𑀤𑀺𑀫𑁂𑀯 ‘‘𑀘𑀡𑁆𑀟𑀸𑀮𑁄’’𑀢𑀺𑀆𑀤𑀺𑀦𑀸 𑀪𑀸𑀲𑀫𑀸𑀦𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀤𑀼𑀢𑀺𑀬𑀸 𑀤𑀼𑀲𑁆𑀲𑀻𑀮𑀁 ‘‘𑀤𑀼𑀲𑁆𑀲𑀻𑀮𑁄’’𑀢𑀺, 𑀘𑀡𑁆𑀟𑀸𑀮𑀸𑀤𑀺𑀫𑁂𑀯 ‘‘𑀘𑀡𑁆𑀟𑀸𑀮𑁄’’𑀢𑀺𑀆𑀤𑀺𑀦𑀸 𑀅𑀯𑀺𑀦𑀬𑁂𑀦 𑀪𑀸𑀲𑀫𑀸𑀦𑀲𑁆𑀲. 𑀢𑀢𑀺𑀬𑀸 𑀦𑁂𑀭𑀬𑀺𑀓𑀸𑀤𑀺𑀓𑀲𑁆𑀲 𑀦𑁂𑀭𑀬𑀺𑀓𑀸𑀤𑀺𑀪𑀸𑀯𑀯𑀺𑀪𑀸𑀯𑀦𑀻𑀓𑀣𑀸 𑀬𑀣𑀸 ‘‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄’’𑀢𑀺𑀆𑀤𑀺𑀓𑀸 (𑀘𑀽𑀴𑀯. 𑁩𑁪𑁮). 𑀘𑀢𑀼𑀢𑁆𑀣𑀻 ‘‘𑀯𑁂𑀤𑀯𑀺𑀳𑀺𑀢𑁂𑀦 𑀬𑀜𑁆𑀜𑀯𑀺𑀥𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀢𑀁 𑀲𑀼𑀕𑀢𑀺𑀁 𑀆𑀯𑀳𑀢𑀻’’𑀢𑀺 𑀮𑁄𑀓𑀲𑁆𑀲 𑀩𑁆𑀬𑀸𑀫𑁄𑀳𑀦𑀓𑀣𑀸. 𑀧𑀜𑁆𑀘𑀫𑀻 𑀪𑀽𑀢𑁂𑀦 𑀧𑁂𑀲𑀼𑀜𑁆𑀜𑀽𑀧𑀲𑀁𑀳𑀸𑀭𑀸𑀤𑀺𑀓𑀣𑀸. 𑀙𑀝𑁆𑀞𑀸 𑀬𑀼𑀢𑁆𑀢𑀧𑁆𑀧𑀢𑁆𑀢𑀝𑁆𑀞𑀸𑀦𑁂 𑀧𑀯𑀢𑁆𑀢𑀺𑀢𑀸 𑀤𑀸𑀦𑀲𑀻𑀮𑀸𑀤𑀺𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀫𑀸 𑀕𑀤𑀢𑁆𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀪𑀽𑀢𑀸𑀤𑀺𑀁 𑀯𑀚𑁆𑀚𑁂𑀢𑁆𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀜𑁆𑀳𑀺𑀢𑀁 𑀧𑀺𑀬𑀁 𑀫𑀦𑀸𑀧𑀁 𑀢𑀢𑁄 𑀏𑀯 𑀲𑀫𑁆𑀫𑀸 𑀲𑀼𑀝𑁆𑀞𑀼 𑀕𑀤𑀦𑀢𑁄 𑀲𑀼𑀕𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀆𑀧𑀸𑀣𑀕𑀫𑀦𑀫𑀢𑁆𑀢𑁂𑀦 𑀓𑀲𑁆𑀲𑀘𑀺 𑀅𑀧𑁆𑀧𑀺𑀬𑀫𑁆𑀧𑀺 𑀳𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀺𑀬𑀁 𑀫𑀦𑀸𑀧𑀫𑁂𑀯 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸.

𑀅𑀧𑀺𑀘 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁 𑀪𑀤𑁆𑀤𑀓𑀁 ¶ . 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺𑀤𑁄𑀲𑀭𑀳𑀺𑀢𑀯𑀺𑀮𑀸𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀁 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑀯𑀚𑁆𑀚𑀢𑀸𑀬, 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀢𑀸𑀬 𑀘 𑀲𑁄𑀪𑀦𑀫𑁂𑀯. 𑀅𑀣 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀬𑀁 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀫𑁆𑀫𑀸 𑀧𑀘𑁆𑀘𑀓𑁆𑀔𑀢𑁄 𑀕𑀢𑁄 𑀅𑀩𑁆𑀪𑀜𑁆𑀜𑀸𑀲𑀻𑀢𑀺 𑀲𑀼𑀕𑀢𑁄.

𑁧𑁩𑁫. 𑀲𑀩𑁆𑀩𑀣𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀬𑁄 𑀬𑁄 𑀮𑁄𑀓𑁄 𑀬𑀣𑀸 𑀬𑀣𑀸 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀢𑀣𑀸. 𑀢𑁂 ¶ 𑀧𑀦 𑀧𑀓𑀸𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀪𑀸𑀯𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀯𑀢𑁄𑀢𑀺 𑀤𑀼𑀓𑁆𑀔𑀲𑀪𑀸𑀯𑀢𑁄. 𑀲𑀩𑁆𑀩𑁄 𑀳𑀺 𑀮𑁄𑀓𑁄 𑀤𑀼𑀓𑁆𑀔𑀲𑀪𑀸𑀯𑁄. 𑀬𑀣𑀸𑀳 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀫𑀳𑀸𑀯. 𑁧𑁪; 𑀤𑀻. 𑀦𑀺. 𑁨.𑁩𑁮𑁭). 𑀲𑀫𑀼𑀤𑀬𑀢𑁄𑀢𑀺 𑀬𑀢𑁄 𑀲𑁄 𑀲𑀫𑀼𑀤𑁂𑀢𑀺, 𑀢𑀢𑁄 𑀢𑀡𑁆𑀳𑀸𑀤𑀺𑀢𑁄. 𑀦𑀺𑀭𑁄𑀥𑀢𑁄𑀢𑀺 𑀬𑀢𑁆𑀣 𑀲𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀯𑀺𑀲𑀗𑁆𑀔𑀸𑀭𑀢𑁄. 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 𑀬𑁂𑀦 𑀯𑀺𑀥𑀺𑀦𑀸 𑀲𑁄 𑀦𑀺𑀭𑁄𑀥𑁄 𑀧𑀢𑁆𑀢𑀩𑁆𑀩𑁄, 𑀢𑀢𑁄 𑀅𑀭𑀺𑀬𑀫𑀕𑁆𑀕𑀢𑁄, 𑀇𑀢𑁄 𑀅𑀜𑁆𑀜𑀲𑁆𑀲 𑀧𑀓𑀸𑀭𑀲𑁆𑀲 𑀅𑀪𑀸𑀯𑀸.

𑀇𑀢𑀺 ‘‘𑀲𑀩𑁆𑀩𑀣𑀸 𑀮𑁄𑀓𑀁 𑀅𑀯𑁂𑀤𑀻’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀲𑀸𑀥𑀓𑀁 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀣 𑀔𑁄 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦 𑀚𑀸𑀬𑀢𑀻’’𑀢𑀺𑀆𑀤𑀺𑀦𑀸 𑀉𑀚𑀼𑀓𑀁 𑀚𑀸𑀢𑀺𑀆𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀧𑀤𑀤𑁆𑀯𑀬𑁂𑀦 𑀅𑀧𑀭𑀸𑀧𑀭𑀁 𑀘𑀯𑀦𑀼𑀧𑀧𑀚𑁆𑀚𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀓𑁂𑀘𑀺 𑀧𑀦 ‘‘𑀦 𑀚𑀸𑀬𑀢𑀻𑀢𑀺𑀆𑀤𑀺 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀑𑀧𑀧𑀸𑀢𑀺𑀓𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀢𑀦𑁆𑀢𑀺 𑀚𑀸𑀢𑀺𑀆𑀤𑀺𑀭𑀳𑀺𑀢𑀁. 𑀕𑀫𑀦𑁂𑀦𑀸𑀢𑀺 𑀧𑀤𑀲𑀸 𑀕𑀫𑀦𑁂𑀦. 𑀜𑀸𑀢𑁂𑀬𑁆𑀬𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀁. ‘‘𑀜𑀸𑀢𑀸𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀜𑀸𑀢𑀸 𑀅𑀬𑀁 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀸𑀫𑀁 ¶ 𑀧𑀸𑀤𑀕𑀫𑀦𑁂𑀦 𑀕𑀦𑁆𑀢𑁆𑀯𑀸 𑀮𑁄𑀓𑀲𑁆𑀲𑀦𑁆𑀢𑀁 𑀜𑀸𑀢𑀼𑀁, 𑀤𑀝𑁆𑀞𑀼𑀁, 𑀧𑀢𑁆𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀅𑀧𑀺𑀘 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂 𑀢𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀲𑀜𑁆𑀜𑀺𑀫𑁆𑀳𑀻𑀢𑀺 𑀲𑀜𑁆𑀜𑀸𑀲𑀳𑀺𑀢𑁂. 𑀢𑀢𑁄 𑀏𑀯 𑀲𑀫𑀦𑀓𑁂 𑀲𑀯𑀺𑀜𑁆𑀜𑀸𑀡𑀓𑁂. 𑀅𑀯𑀺𑀜𑁆𑀜𑀸𑀡𑀓𑁂 𑀧𑀦 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀫𑀼𑀤𑀸𑀬𑀫𑀢𑁆𑀢𑁂 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀢𑀲𑁆𑀲 𑀮𑁄𑀓𑀲𑁆𑀲 𑀦𑀺𑀭𑀼𑀚𑁆𑀛𑀦𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸. 𑀅𑀤𑁂𑀲𑀫𑁆𑀧𑀺 𑀳𑀺 𑀢𑀁 𑀬𑁂𑀲𑀁 𑀦𑀺𑀭𑁄𑀥𑁄, 𑀢𑁂𑀲𑀁 𑀯𑀲𑁂𑀦 𑀉𑀧𑀘𑀸𑀭𑀢𑁄, 𑀤𑁂𑀲𑀢𑁄𑀧𑀺 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁧; 𑀫. 𑀦𑀺. 𑁧.𑁧𑁩𑁪; 𑀯𑀺𑀪. 𑁨𑁦𑁪).

𑀕𑀫𑀦𑁂𑀦𑀸𑀢𑀺 𑀧𑀸𑀓𑀢𑀺𑀓𑀕𑀫𑀦𑁂𑀦. 𑀮𑁄𑀓𑀲𑁆𑀲𑀦𑁆𑀢𑁄𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑀓𑀺𑀭𑀺𑀬𑀸𑀳𑁂𑀢𑀼𑀪𑀽𑀢𑀁 𑀦𑀺𑀩𑁆𑀩𑀸𑀦𑀁. 𑀓𑀼𑀤𑀸𑀘𑀦𑀦𑁆𑀢𑀺 𑀓𑀤𑀸𑀘𑀺𑀧𑀺. 𑀅𑀧𑀢𑁆𑀯𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀅𑀦𑀥𑀺𑀕𑀦𑁆𑀢𑁆𑀯𑀸. 𑀧𑀫𑁄𑀘𑀦𑀦𑁆𑀢𑀺 𑀧𑀫𑀼𑀢𑁆𑀢𑀺 𑀦𑀺𑀲𑁆𑀲𑀭𑀡𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀮𑁄𑀓𑀲𑁆𑀲𑀦𑁆𑀢𑀁 𑀅𑀧𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸. 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀮𑁄𑀓𑀯𑀺𑀤𑀽𑀢𑀺 𑀲𑀪𑀸𑀯𑀸𑀤𑀺𑀢𑁄 𑀲𑀩𑁆𑀩𑀁 𑀮𑁄𑀓𑀁 𑀚𑀸𑀦𑀦𑁆𑀢𑁄. 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄. 𑀮𑁄𑀓𑀦𑁆𑀢𑀕𑀽𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀮𑁄𑀓𑀁 𑀯𑀺𑀤𑀺𑀢𑁆𑀯𑀸 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀮𑁄𑀓𑀦𑁆𑀢𑀕𑀽. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄. 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸, 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 ¶ 𑀯𑀸 𑀅𑀪𑀺𑀲𑀫𑀺𑀢𑀢𑁆𑀢𑀸 𑀲𑀫𑀺𑀢𑀸𑀯𑀻. 𑀦𑀸𑀲𑀻𑀲𑀢𑀺 𑀦 𑀧𑀢𑁆𑀣𑁂𑀢𑀺. 𑀬𑀣𑀸 𑀇𑀫𑀁 𑀮𑁄𑀓𑀁, 𑀏𑀯𑀁 𑀧𑀭𑀜𑁆𑀘 𑀮𑁄𑀓𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸.

𑁧𑁩𑁬. 𑀏𑀯𑀁 𑀬𑀤𑀺𑀧𑀺 𑀮𑁄𑀓𑀯𑀺𑀤𑀼𑀢𑀸 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑀺𑀢𑀸 𑀲𑀪𑀸𑀯𑀢𑁄 𑀤𑀲𑁆𑀲𑀺𑀢𑀢𑁆𑀢𑀸, 𑀮𑁄𑀓𑁄 𑀧𑀦 𑀏𑀓𑀤𑁂𑀲𑁂𑀦𑁂𑀯 𑀯𑀼𑀢𑁆𑀢𑁄𑀢𑀺 𑀢𑀁 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘 𑀢𑀬𑁄 𑀮𑁄𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄, 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑀮𑁄𑀓𑁄. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑁄, 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀁, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄𑀢𑀺. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀫𑀽𑀳𑁄, 𑀲𑀦𑁆𑀢𑀸𑀦𑁄 𑀘 𑀑𑀓𑀸𑀲𑀮𑁄𑀓𑁄 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀢𑀲𑀸, 𑀣𑀸𑀯𑀭𑀸 𑀘, 𑀢𑁂𑀲𑀜𑁆𑀘 𑀑𑀓𑀸𑀲𑀪𑀽𑀢𑁄𑀢𑀺. 𑀢𑀤𑀸𑀥𑀸𑀭𑀢𑀸𑀬 𑀳𑁂𑀲 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀉𑀪𑀬𑁂𑀧𑀺 𑀔𑀦𑁆𑀥𑀸 𑀲𑀗𑁆𑀔𑀸𑀭𑀮𑁄𑀓𑁄 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀻𑀬𑀦𑁆𑀢𑀺, 𑀮𑀼𑀚𑁆𑀚𑀦𑁆𑀢𑀺 𑀧𑀮𑀼𑀚𑁆𑀚𑀦𑁆𑀢𑀺 𑀘𑀸𑀢𑀺. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸𑀢𑀺 ¶ 𑀅𑀢𑁆𑀣𑁄. 𑀧𑀘𑁆𑀘𑀬𑀢𑁆𑀣𑁄 𑀳𑁂𑀢𑁆𑀣 𑀆𑀳𑀸𑀭-𑀲𑀤𑁆𑀤𑁄 ‘‘𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁨𑁩𑁨) 𑀯𑀺𑀬. 𑀏𑀯𑀁 𑀳𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀲𑀸 𑀧𑀦𑀸𑀬𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀥𑀫𑁆𑀫𑁄, 𑀦 𑀲𑀢𑁆𑀢𑀥𑀫𑁆𑀫𑁄𑀢𑀺 𑀆𑀳 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀬𑀤𑀺 𑀏𑀯𑀁 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀏𑀓𑀥𑀫𑁆𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀅. 𑀦𑀺. 𑁧𑁦.𑁨𑁭). 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘 𑀧𑀭𑀺𑀓𑀧𑁆𑀧𑀦𑀸 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀯𑀺𑀲𑀬𑀸, 𑀦 𑀲𑀗𑁆𑀔𑀸𑀭𑀯𑀺𑀲𑀬𑀸𑀢𑀺 𑀆𑀳 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 𑀧𑀭𑀺𑀩𑁆𑀪𑀫𑀦𑁆𑀢𑀺. 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸𑀢𑀺 𑀢𑁂𑀲𑀁 𑀧𑀭𑀺𑀩𑁆𑀪𑀫𑀦𑁂𑀦𑁂𑀯 𑀢𑀸 𑀤𑀺𑀲𑀸 𑀧𑀪𑀲𑁆𑀲𑀭𑀸 𑀳𑀼𑀢𑁆𑀯𑀸 𑀯𑀺𑀭𑁄𑀘𑀦𑁆𑀢𑀺. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀢𑀢𑁆𑀢𑀓𑀁 𑀲𑀳𑀲𑁆𑀲𑀧𑁆𑀧𑀓𑀸𑀭𑁄 𑀑𑀓𑀸𑀲𑀮𑁄𑀓𑁄, 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀬𑁄𑀢𑀺 𑀅𑀢𑁆𑀣𑁄. ‘‘𑀢𑀸𑀯 𑀲𑀳𑀲𑁆𑀲𑀯𑀸’’𑀢𑀺 𑀯𑀸 𑀧𑀸𑀞𑁄.

𑀢𑀫𑁆𑀧𑀻𑀢𑀺 ¶ 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀮𑁄𑀓𑀁. 𑀢𑀣𑀸 𑀳𑀺𑀲𑁆𑀲 𑀲𑀩𑁆𑀩𑀣𑀸𑀧𑀺 𑀯𑀺𑀤𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀮𑁄𑀓𑁄𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀬𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀢𑀸𑀬 𑀲𑀩𑁆𑀩𑁄 𑀲𑀗𑁆𑀔𑀸𑀭𑀮𑁄𑀓𑁄 𑀏𑀓𑁄 𑀏𑀓𑀯𑀺𑀥𑁄 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀤𑁆𑀯𑁂 𑀮𑁄𑀓𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀺𑀩𑁆𑀩𑀸𑀦𑀲𑁆𑀲 𑀅𑀕𑁆𑀕𑀳𑀡𑀁, 𑀢𑀲𑁆𑀲 𑀅𑀮𑁄𑀓𑀲𑀪𑀸𑀯𑀢𑁆𑀢𑀸. 𑀦𑀦𑀼 𑀘 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀮𑁄𑀓𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸𑀦𑀁 𑀇𑀥 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀣 𑀯𑀸 ‘‘𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻’’𑀢𑀺 ¶ 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀤𑀲𑀸𑀬𑀢𑀦𑀸𑀦𑀻𑀢𑀺 𑀤𑀲 𑀭𑀽𑀧𑀸𑀬𑀢𑀦𑀸𑀦𑀺.

𑀏𑀢𑁆𑀣 𑀘 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀯𑀘𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸. 𑀢𑀸𑀬 𑀘 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀤𑀼𑀓𑁆𑀔𑀸𑀦𑀢𑁆𑀢𑀢𑀸 𑀘 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀻𑀡𑀺𑀧𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀢𑁂 𑀘 𑀅𑀢𑁆𑀣𑀢𑁄 𑀨𑀲𑁆𑀲𑀸𑀤𑀬𑁄. 𑀭𑀽𑀧𑀦𑁆𑀢𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀺, 𑀢𑀸𑀦𑀺 𑀘 𑀅𑀢𑁆𑀣𑀢𑁄 𑀧𑀣𑀯𑀻𑀆𑀤𑀬𑁄𑀢𑀺 𑀅𑀯𑀺𑀲𑁂𑀲𑁂𑀦𑁂𑀯 𑀲𑀮𑀓𑁆𑀔𑀡𑀢𑁄 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸. 𑀢𑀕𑁆𑀕𑀳𑀡𑁂𑀦𑁂𑀯 𑀬𑁂 𑀢𑁂𑀲𑀁 𑀯𑀺𑀲𑁂𑀲𑀸 𑀓𑀼𑀲𑀮𑀸𑀤𑀬𑁄, 𑀳𑁂𑀢𑀼𑀆𑀤𑀬𑁄 𑀘, 𑀢𑁂𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀇𑀢𑀺 𑀅𑀬𑀁 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄’’𑀢𑀺.

𑀆𑀕𑀫𑁆𑀫 𑀘𑀺𑀢𑁆𑀢𑀁 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄 𑀫𑀺𑀕𑀸𑀲𑀬𑁄 𑀯𑀺𑀬. 𑀬𑀣𑀸 𑀫𑀺𑀕𑁄 𑀕𑁄𑀘𑀭𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀦𑀕𑀳𑀦𑁂 𑀲𑀬𑀢𑀻𑀢𑀺 𑀲𑁄 𑀢𑀲𑁆𑀲 𑀆𑀲𑀬𑁄, 𑀏𑀯𑀁 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑀁 𑀆𑀕𑀫𑁆𑀫 𑀬𑀢𑁆𑀣 𑀲𑁂𑀢𑀺, 𑀲𑁄 𑀢𑀲𑁆𑀲 𑀆𑀲𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀤𑁆𑀤𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀢𑁆𑀢𑀸 𑀇𑀫𑀸 𑀏𑀯 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄 𑀲𑀦𑁆𑀦𑀺𑀲𑁆𑀲𑀺𑀢𑀸. 𑀬𑀣𑀸𑀳 ‘‘𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁆𑀯𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀜𑁆𑀘 𑀦𑀢𑁆𑀣𑀺𑀢𑀜𑁆𑀘𑀸’’𑀢𑀺 ¶ (𑀲𑀁. 𑀦𑀺. 𑁨.𑁧𑁫). 𑀅𑀢𑁆𑀣𑀺𑀢𑀸𑀢𑀺 𑀳𑀺 𑀲𑀲𑁆𑀲𑀢𑀕𑁆𑀕𑀸𑀳𑁄 𑀅𑀥𑀺𑀧𑁆𑀧𑁂𑀢𑁄, 𑀦𑀢𑁆𑀣𑀺𑀢𑀸𑀢𑀺 𑀉𑀘𑁆𑀙𑁂𑀤𑀕𑁆𑀕𑀸𑀳𑁄. 𑀅𑀬𑀁 𑀢𑀸𑀯 𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀆𑀲𑀬𑁄. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀦 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺, 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀤𑀼𑀯𑀺𑀥𑁄 𑀆𑀲𑀬𑁄.

𑀆𑀲𑀬𑀁 𑀚𑀸𑀦𑀸𑀢𑀻𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀘 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁, 𑀢𑁂𑀲𑀜𑁆𑀘 𑀜𑀸𑀡𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀸𑀫𑀁 ¶ 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺, 𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺’’𑀆𑀤𑀺 (𑀧𑀝𑀺. 𑀫. 𑁧.𑁧𑁧𑁩).

𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑁂 𑀧𑀦 𑀢𑁂? 𑀭𑀸𑀕𑀸𑀤𑀬𑁄 𑀲𑀢𑁆𑀢 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸, 𑀅𑀢𑀻𑀢𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀥𑀫𑁆𑀫𑀸𑀦𑀁 𑀓𑀸𑀮𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀺. 𑀢𑀁 𑀲𑀢𑁆𑀢𑀯𑀺𑀥𑀁 𑀅𑀦𑀼𑀲𑀬𑀁 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀦𑁆𑀢𑀸𑀦𑁂 𑀧𑀭𑁄𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀚𑀸𑀦𑀸𑀢𑀺.

𑀘𑀭𑀺𑀢𑀦𑁆𑀢𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀁. 𑀢𑀁 𑀳𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁧𑁪, 𑁮𑁧𑁭) 𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀅𑀣 𑀯𑀸 𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸 𑀧𑀦 𑀭𑀸𑀕𑀤𑁄𑀲𑀫𑁄𑀳𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀯𑀲𑁂𑀦 𑀙 𑀫𑀽𑀮𑀘𑀭𑀺𑀬𑀸, 𑀢𑀸𑀲𑀁 𑀅𑀧𑀭𑀺𑀬𑀦𑁆𑀢𑁄 𑀅𑀦𑁆𑀢𑀭𑀪𑁂𑀤𑁄, 𑀲𑀁𑀲𑀕𑁆𑀕𑀪𑁂𑀤𑁄 𑀧𑀦 𑀢𑁂𑀲𑀝𑁆𑀞𑀺𑀯𑀺𑀥𑁄. 𑀢𑀁 𑀘𑀭𑀺𑀢𑀁 𑀲𑀪𑀸𑀯𑀢𑁄 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀢𑁄 𑀲𑀫𑀼𑀝𑁆𑀞𑀸𑀦𑀢𑁄 𑀨𑀮𑀢𑁄 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀏𑀯𑀫𑀸𑀤𑀺𑀦𑀸 𑀧𑀓𑀸𑀭𑁂𑀦 𑀚𑀸𑀦𑀸𑀢𑀺.

𑀅𑀥𑀺𑀫𑀼𑀢𑁆𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼. 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀻𑀢𑀺. 𑀬𑀸𑀬 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀬𑁂𑀯 𑀲𑁂𑀯𑀦𑁆𑀢𑀺, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀘 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂𑀬𑁂𑀯. 𑀲𑀸 𑀅𑀚𑁆𑀛𑀸𑀲𑀬𑀥𑀸𑀢𑀼 𑀅𑀚𑁆𑀛𑀸𑀲𑀬𑀲𑀪𑀸𑀯𑁄 𑀅𑀥𑀺𑀫𑀼𑀢𑁆𑀢𑀺. 𑀢𑀁 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺 ‘‘𑀇𑀫𑀲𑁆𑀲 𑀅𑀥𑀺𑀫𑀼𑀢𑁆𑀢𑀺 𑀳𑀻𑀦𑀸, 𑀇𑀫𑀲𑁆𑀲 𑀧𑀡𑀻𑀢𑀸’’𑀢𑀺, 𑀢𑀢𑁆𑀣𑀸𑀧𑀺 ‘‘𑀇𑀫𑀲𑁆𑀲 𑀫𑀼𑀤𑀼, 𑀇𑀫𑀲𑁆𑀲 𑀫𑀼𑀤𑀼𑀢𑀭𑀸, 𑀇𑀫𑀲𑁆𑀲 𑀫𑀼𑀤𑀼𑀢𑀫𑀸’’𑀢𑀺𑀆𑀤𑀺𑀦𑀸. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀳𑀺 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀸𑀤𑀺𑀦𑀸 𑀬𑀣𑀸𑀭𑀳𑀁 𑀅𑀥𑀺𑀫𑀼𑀢𑁆𑀢𑀺𑀬𑀸 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀸𑀤𑀺𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀬𑀁 (𑀯𑀺𑀪. 𑀅𑀝𑁆𑀞. 𑁮𑁧𑁮, 𑁮𑁨𑁦) ‘‘𑀳𑁂𑀝𑁆𑀞𑀸 ¶ 𑀕𑀳𑀺𑀢𑀸𑀧𑀺 𑀅𑀥𑀺𑀫𑀼𑀢𑁆𑀢𑀺 𑀇𑀥 𑀲𑀢𑁆𑀢𑀸𑀦𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀕𑀳𑀺𑀢𑀸’’𑀢𑀺.

𑀅𑀧𑁆𑀧𑀭𑀚𑀁 𑀅𑀓𑁆𑀔𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀧𑁆𑀧𑀁 𑀯𑀸 𑀭𑀚𑀁 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀦𑀼𑀲𑁆𑀲𑀤𑀭𑀸𑀕𑀸𑀤𑀺𑀭𑀚𑀸 𑀲𑀢𑁆𑀢𑀸, 𑀢𑁂 𑀅𑀧𑁆𑀧𑀭𑀚𑀓𑁆𑀔𑁂. 𑀫𑀳𑀸𑀭𑀚𑀓𑁆𑀔𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀲𑁆𑀲𑀤𑀭𑀸𑀕𑀸𑀤𑀺𑀭𑀚𑀸 𑀫𑀳𑀸𑀭𑀚𑀓𑁆𑀔𑀸.

𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀢𑀺 ¶ 𑀢𑀺𑀔𑀺𑀡𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀢𑀺 𑀫𑀼𑀤𑀼𑀓𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀉𑀧𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺. 𑀲𑁆𑀯𑀸𑀓𑀸𑀭𑁂𑀢𑀺 𑀲𑀼𑀦𑁆𑀤𑀭𑀸𑀓𑀸𑀭𑁂 𑀓𑀮𑁆𑀬𑀸𑀡𑀧𑀓𑀢𑀺𑀓𑁂, 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑁂𑀢𑀺 𑀅𑀢𑁆𑀣𑁄. 𑀲𑀼𑀯𑀺𑀜𑁆𑀜𑀸𑀧𑀬𑁂𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀼𑀓𑀭𑁂 𑀲𑀤𑁆𑀥𑁂, 𑀧𑀜𑁆𑀜𑀯𑀦𑁆𑀢𑁂 𑀘. 𑀪𑀩𑁆𑀩𑁂 𑀅𑀪𑀩𑁆𑀩𑁂𑀢𑀺 𑀏𑀢𑁆𑀣 𑀪𑀩𑁆𑀩𑁂𑀢𑀺 𑀓𑀫𑁆𑀫𑀸𑀯𑀭𑀡𑀓𑀺𑀮𑁂𑀲𑀸𑀯𑀭𑀡𑀯𑀺𑀧𑀸𑀓𑀸𑀯𑀭𑀡𑀭𑀳𑀺𑀢𑁂. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀤𑁆𑀯𑀸𑀓𑀸𑀭𑀤𑀼𑀯𑀺𑀜𑁆𑀜𑀸𑀧𑀬𑀸𑀪𑀩𑁆𑀩𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 ‘‘𑀇𑀫𑀲𑁆𑀲 𑀭𑀸𑀕𑀭𑀚𑁄 𑀅𑀧𑁆𑀧𑁄, 𑀇𑀫𑀲𑁆𑀲 𑀤𑁄𑀲𑀭𑀚𑁄 𑀅𑀧𑁆𑀧𑁄’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀭𑀚𑀓𑁆𑀔𑁂𑀲𑀼 𑀚𑀸𑀦𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀪𑀕𑀯𑀸 𑀅𑀧𑀭𑀺𑀫𑀸𑀡𑁂 𑀲𑀢𑁆𑀢𑁂 𑀆𑀲𑀬𑀸𑀤𑀺𑀢𑁄 𑀅𑀦𑀯𑀲𑁂𑀲𑁂𑀢𑁆𑀯𑀸 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄.

𑀦𑀦𑀼 𑀘 𑀲𑀢𑁆𑀢𑁂𑀲𑀼 𑀧𑀫𑀸𑀡𑀸𑀤𑀺𑀧𑀺 𑀚𑀸𑀦𑀺𑀢𑀩𑁆𑀩𑁄 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀢𑀲𑁆𑀲 𑀧𑀦 𑀚𑀸𑀦𑀦𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬𑀸𑀢𑀺 𑀇𑀥 𑀦 𑀕𑀳𑀺𑀢𑀁, 𑀪𑀕𑀯𑀢𑁄 𑀧𑀦 𑀢𑀫𑁆𑀧𑀺 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀫𑁂𑀯, 𑀧𑀬𑁄𑀚𑀦𑀸𑀪𑀸𑀯𑀸 𑀤𑁂𑀲𑀦𑀁 𑀦𑀸𑀭𑀼𑀴𑁆𑀳𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑁋 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁧𑁨𑁧).

𑁧𑁩𑁭. 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀓𑀯𑀸𑀴𑀦𑁆𑀢𑀺 𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀦𑁂𑀫𑀺𑀫𑀡𑁆𑀟𑀮𑀲𑀤𑀺𑀲𑁂𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀘𑀓𑁆𑀓𑀯𑀸𑀴’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑀺𑀁𑀲𑀲𑀢𑀸𑀦𑀺 𑀘𑀸𑀢𑀺 𑀘𑀢𑀼𑀅𑀥𑀺𑀓𑀸𑀦𑀺 𑀢𑀺𑀁𑀲𑀲𑀢𑀸𑀦𑀺, 𑀢𑀻𑀡𑀺𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺𑀲𑀢𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄 ¶ . 𑀅𑀟𑁆𑀠𑀼𑀟𑁆𑀠𑀸𑀦𑀻𑀢𑀺 𑀉𑀧𑀟𑁆𑀠𑀘𑀢𑀼𑀢𑁆𑀣𑀸𑀦𑀺, 𑀢𑀻𑀡𑀺𑀲𑀢𑀸𑀦𑀺, 𑀧𑀜𑁆𑀜𑀸𑀲𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀦𑀳𑀼𑀢𑀸𑀦𑀻𑀢𑀺 𑀤𑀲𑀲𑀳𑀲𑁆𑀲𑀸𑀦𑀺. 𑀲𑀗𑁆𑀔𑀸𑀢𑀸𑀢𑀺 𑀓𑀣𑀺𑀢𑀸. 𑀲𑀡𑁆𑀞𑀺𑀢𑀻𑀢𑀺 𑀳𑁂𑀝𑁆𑀞𑀸, 𑀉𑀧𑀭𑀺𑀢𑁄 𑀘𑀸𑀢𑀺 𑀲𑀩𑁆𑀩𑀲𑁄 𑀞𑀺𑀢𑀺.

𑀏𑀯𑀁 𑀲𑀡𑁆𑀞𑀺𑀢𑁂𑀢𑀺 𑀏𑀯𑀫𑀯𑀝𑁆𑀞𑀺𑀢𑁂. 𑀏𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑁂. 𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯𑀸𑀢𑀺 𑀢𑀢𑁆𑀢𑀓𑀫𑁂𑀯 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺𑀬𑁂𑀯 𑀉𑀩𑁆𑀩𑁂𑀥𑁄 ¶ . 𑀦 𑀓𑁂𑀯𑀮𑀁 𑀘𑁂𑀢𑁆𑀣 𑀉𑀩𑁆𑀩𑁂𑀥𑁄𑀯, 𑀅𑀣 𑀔𑁄 𑀆𑀬𑀸𑀫𑀯𑀺𑀢𑁆𑀣𑀸𑀭𑀸𑀧𑀺𑀲𑁆𑀲 𑀢𑀢𑁆𑀢𑀓𑀸𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀺𑀦𑁂𑀭𑀼, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀸 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑁂𑀦, 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑀸’’𑀢𑀺 (𑀅. 𑀦𑀺. 𑁭.𑁬𑁬).

𑀢𑀢𑁄𑀢𑀺 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀸, 𑀉𑀧𑀭𑀺 𑀘 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄. 𑀉𑀧𑀟𑁆𑀠𑀼𑀧𑀟𑁆𑀠𑁂𑀦𑀸𑀢𑀺 𑀉𑀧𑀟𑁆𑀠𑁂𑀦 𑀉𑀧𑀟𑁆𑀠𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀢𑀢𑁆𑀢𑀓𑀫𑁂𑀯 𑀘 𑀉𑀧𑀭𑀺 𑀉𑀕𑁆𑀕𑀢𑁄 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁄, 𑀏𑀓𑀯𑀻𑀲 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀢𑀢𑁆𑀢𑀓𑀫𑁂𑀯 𑀘 𑀉𑀧𑀭𑀺 𑀉𑀕𑁆𑀕𑀢𑁄 𑀈𑀲𑀥𑀭𑁄 𑀧𑀩𑁆𑀩𑀢𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀉𑀧𑀟𑁆𑀠𑀼𑀧𑀟𑁆𑀠𑀧𑀫𑀸𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁄 𑀬𑀸𑀯 𑀘𑀓𑁆𑀓𑀯𑀸𑀴𑀧𑀸𑀤𑀫𑀽𑀮𑀸 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄, 𑀏𑀯𑀁 𑀬𑀸𑀯 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑀸𑀢𑀺 𑀳𑁂𑀝𑁆𑀞𑀸 𑀲𑀺𑀦𑁂𑀭𑀼𑀧𑀫𑀸𑀡𑀢𑁄 𑀉𑀧𑀟𑁆𑀠𑀧𑀫𑀸𑀡𑁄𑀧𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁄 𑀧𑀣𑀯𑀺𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀏𑀯𑀁 𑀈𑀲𑀥𑀭𑀸𑀤𑀬𑁄𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄’’𑀢𑀺 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁪; 𑀅. 𑀦𑀺. 𑁮.𑁧𑁯). 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀻𑀦𑀁 𑀅𑀦𑁆𑀢𑀭𑁂 𑀲𑀻𑀤𑀦𑁆𑀢𑀭𑀲𑀫𑀼𑀤𑁆𑀤𑀸 𑀦𑀸𑀫. 𑀢𑁂 𑀯𑀺𑀢𑁆𑀣𑀸𑀭𑀢𑁄 𑀬𑀣𑀸𑀓𑁆𑀓𑀫𑀁 𑀲𑀺𑀦𑁂𑀭𑀼𑀆𑀤𑀻𑀦𑀁 𑀅𑀘𑁆𑀘𑀼𑀕𑁆𑀕𑀢𑀲𑀫𑀸𑀦𑀧𑀭𑀺𑀫𑀸𑀡𑀸𑀢𑀺 𑀯𑀤𑀦𑁆𑀢𑀺. 𑀩𑁆𑀭𑀳𑀸𑀢𑀺 𑀫𑀳𑀦𑁆𑀢𑁄.

𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄𑀢𑀺 𑀧𑀭𑀺𑀓𑁆𑀔𑀺𑀧𑀦𑀯𑀲𑁂𑀦 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄 𑀞𑀺𑀢𑀸. 𑀲𑀺𑀦𑁂𑀭𑀼𑀁 𑀢𑀸𑀯 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀬𑀼𑀕𑀦𑁆𑀥𑀭𑁄, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀈𑀲𑀥𑀭𑁄. 𑀏𑀯𑀁 𑀢𑀁 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸 ‘‘𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄’’𑀢𑀺 𑀯𑀼𑀢𑁆𑀢𑀸.

𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄𑀢𑀺 𑀳𑀺𑀫𑀯𑀸 𑀧𑀩𑁆𑀩𑀢𑁄 𑀧𑀜𑁆𑀘 𑀬𑁄𑀚𑀦𑀸𑀦𑀁 𑀲𑀢𑀸𑀦𑀺 𑀉𑀘𑁆𑀘𑁄 𑀉𑀩𑁆𑀩𑁂𑀥𑁄. 𑀦𑀕𑀯𑁆𑀳𑀬𑀸𑀢𑀺 𑀦𑀕-𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑀸 𑀭𑀼𑀓𑁆𑀔𑀸𑀪𑀺𑀥𑀸𑀦𑀸. 𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥𑀲𑀸𑀔𑀸𑀬𑀸𑀫𑀸𑀢𑀺’ 𑀉𑀩𑁆𑀩𑁂𑀥𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥𑀸𑀬𑀸𑀫𑀸, 𑀉𑀩𑁆𑀩𑁂𑀥𑀢𑁄, 𑀲𑀫𑀦𑁆𑀢𑀢𑁄 𑀘 𑀧𑀜𑁆𑀜𑀸𑀲𑀬𑁄𑀚𑀦𑀲𑀸𑀔𑀸𑀬𑀸𑀫𑀸 ¶ 𑀘. 𑀢𑀢𑁄 𑀏𑀯 𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀬𑀲𑁆𑀲𑀸 𑀫𑀳𑀦𑁆𑀢𑀢𑀸 𑀓𑀧𑁆𑀧𑀝𑁆𑀞𑀸𑀬𑀺𑀢𑀸𑀤𑀺𑀧𑁆𑀧𑀓𑀸𑀭𑁂𑀦 𑀧𑀪𑀸𑀯𑁂𑀦.

𑀕𑀭𑀼𑀴𑀸𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁄 𑀲𑀺𑀦𑁂𑀭𑀼𑀲𑁆𑀲 𑀤𑀼𑀢𑀺𑀬𑀧𑀭𑀺𑀪𑀡𑁆𑀟𑁂 𑀧𑀢𑀺𑀝𑁆𑀞𑀺𑀢𑁄.

𑀲𑀺𑀭𑀻𑀲𑁂𑀦𑀸𑀢𑀺 ¶ 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁. 𑀲𑀢𑁆𑀢𑀫𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀲𑀺𑀭𑀻𑀲𑁄 𑀪𑀯𑀢𑀺 𑀲𑀢𑁆𑀢𑀫𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀘𑀡𑁆𑀟𑀫𑀡𑁆𑀟𑀮𑀁 𑀳𑁂𑀝𑁆𑀞𑀸, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀧𑀭𑀺. 𑀢𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀘𑀦𑁆𑀤𑀫𑀡𑁆𑀟𑀮𑀁 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀯𑀺𑀓𑀮𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀺. 𑀢𑀸𑀦𑀺 𑀬𑁄𑀚𑀦𑀦𑁆𑀢𑀭𑀺𑀓𑀸𑀦𑀺 𑀬𑀼𑀕𑀦𑁆𑀥𑀭𑀕𑁆𑀕𑀧𑀫𑀸𑀡𑁂 𑀆𑀓𑀸𑀲𑁂 𑀯𑀺𑀘𑀭𑀦𑁆𑀢𑀺. 𑀅𑀲𑀼𑀭𑀪𑀯𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀸. 𑀅𑀯𑀻𑀘𑀺 𑀚𑀫𑁆𑀩𑀼𑀤𑀻𑀧𑀲𑁆𑀲. 𑀚𑀫𑁆𑀩𑀼𑀤𑀻𑀧𑁄 𑀲𑀓𑀝𑀲𑀡𑁆𑀞𑀸𑀦𑁄. 𑀅𑀧𑀭𑀕𑁄𑀬𑀸𑀦𑀁 𑀆𑀤𑀸𑀲𑀲𑀡𑁆𑀞𑀸𑀦𑁄. 𑀧𑀼𑀩𑁆𑀩𑀯𑀺𑀤𑁂𑀳𑁄 𑀅𑀤𑁆𑀥𑀘𑀦𑁆𑀤𑀲𑀡𑁆𑀞𑀸𑀦𑁄. 𑀉𑀢𑁆𑀢𑀭𑀓𑀼𑀭𑀼 𑀧𑀻𑀞𑀲𑀡𑁆𑀞𑀸𑀦𑁄. 𑀢𑀁𑀢𑀁𑀦𑀺𑀯𑀸𑀲𑀻𑀦𑀁, 𑀢𑀁𑀢𑀁𑀧𑀭𑀺𑀯𑀸𑀭𑀤𑀻𑀧𑀯𑀸𑀲𑀻𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀁 𑀫𑀼𑀔𑀫𑁆𑀧𑀺 𑀢𑀁𑀢𑀁𑀲𑀡𑁆𑀞𑀸𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀤𑀦𑁆𑀢𑀭𑁂𑀲𑀽𑀢𑀺 𑀢𑁂𑀲𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂𑀲𑀼. 𑀢𑀺𑀡𑁆𑀡𑀁 𑀳𑀺 𑀧𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀆𑀲𑀦𑁆𑀦𑀪𑀸𑀯𑁂𑀦 𑀞𑀧𑀺𑀢𑀸𑀦𑀁 𑀅𑀦𑁆𑀢𑀭𑀲𑀤𑀺𑀲𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀦𑀺𑀭𑀬𑁄.

𑀅𑀦𑀦𑁆𑀢𑀸𑀦𑀻𑀢𑀺 𑀅𑀧𑀭𑀺𑀫𑀸𑀡𑀸𑀦𑀺, ‘‘𑀏𑀢𑁆𑀢𑀓𑀸𑀦𑀻’’𑀢𑀺 𑀅𑀜𑁆𑀜𑁂𑀳𑀺 𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺. 𑀪𑀕𑀯𑀸 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀺 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄, 𑀅𑀦𑀦𑁆𑀢𑁄 𑀲𑀢𑁆𑀢𑀦𑀺𑀓𑀸𑀬𑁄, 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀻’’𑀢𑀺 𑀢𑀺𑀯𑀺𑀥𑀫𑁆𑀧𑀺 𑀅𑀦𑀦𑁆𑀢𑀁 𑀩𑀼𑀤𑁆𑀥𑀜𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀲𑀬𑀫𑁆𑀧𑀺 𑀅𑀦𑀦𑁆𑀢𑀢𑁆𑀢𑀸. 𑀬𑀸𑀯𑀢𑀓𑀁 𑀳𑀺 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀻’’𑀢𑀺. 𑀅𑀦𑀦𑁆𑀢𑀢𑀸 𑀘𑀲𑁆𑀲 𑀅𑀦𑀦𑁆𑀢𑀜𑁂𑀬𑁆𑀬𑀧𑀝𑀺𑀯𑀺𑀚𑁆𑀛𑀦𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑁆𑀢𑀸. 𑀦𑀦𑀼 𑀘𑁂𑀢𑁆𑀣 𑀯𑀺𑀯𑀝𑁆𑀝𑀸𑀤𑀻𑀦𑀫𑁆𑀧𑀺 𑀯𑀺𑀤𑀺𑀢𑀢𑀸 𑀯𑀢𑁆𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀯𑀢𑁆𑀢𑀩𑁆𑀩𑀁, 𑀲𑀸 𑀧𑀦 𑀧𑀭𑀢𑁄 𑀅𑀪𑀺𑀜𑁆𑀜𑀸𑀓𑀣𑀸𑀬𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀕𑀳𑀺𑀢𑀸.

𑁧𑁩𑁮. 𑀅𑀢𑁆𑀢𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁂𑀢𑀁. 𑀕𑀼𑀡𑁂𑀳𑀺 𑀅𑀢𑁆𑀢𑀦𑀸 𑀯𑀺𑀲𑀺𑀝𑁆𑀞𑀢𑀭𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀭-𑀕𑁆𑀕𑀳𑀡𑀁 𑀘𑁂𑀢𑁆𑀣 ‘‘𑀅𑀦𑀼𑀢𑁆𑀢𑀭𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑀢𑀸𑀬 𑀓𑀢𑀁, 𑀦 𑀯𑀺𑀲𑀺𑀝𑁆𑀞𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀸𑀬. 𑀲𑀤𑁂𑀯𑀓𑁂 𑀳𑀺 𑀮𑁄𑀓𑁂 𑀲𑀤𑀺𑀲𑀓𑀧𑁆𑀧𑁄𑀧𑀺 𑀦𑀸𑀫 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀦𑀢𑁆𑀣𑀺, 𑀓𑀼𑀢𑁄 𑀲𑀤𑀺𑀲𑁄. 𑀯𑀺𑀲𑀺𑀝𑁆𑀞𑁂 𑀧𑀦 𑀓𑀸 ¶ 𑀓𑀣𑀸. 𑀓𑀲𑁆𑀲𑀘𑀻𑀢𑀺 𑀓𑀲𑁆𑀲𑀘𑀺𑀧𑀺. 𑀅𑀪𑀺𑀪𑀯𑀢𑀻𑀢𑀺 𑀲𑀻𑀮𑀲𑀫𑁆𑀧𑀤𑀸𑀬 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀳𑀺𑀭𑁄𑀢𑁆𑀢𑀧𑁆𑀧𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁, 𑀯𑀺𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀧𑀜𑁆𑀜𑀸𑀦𑀜𑁆𑀘 𑀉𑀓𑁆𑀓𑀁𑀲𑀧𑁆𑀧𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀯𑀸𑀲𑀦𑀧𑀝𑀺𑀧𑀓𑁆𑀔𑀲𑁆𑀲 𑀧𑀳𑀻𑀦𑀢𑁆𑀢𑀸 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀻𑀮𑀕𑀼𑀡𑁄. 𑀢𑁂𑀦 𑀪𑀕𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀜𑁆𑀜𑀤𑀢𑁆𑀣𑀼 𑀅𑀪𑀺𑀪𑀼𑀬𑁆𑀬 ¶ 𑀧𑀯𑀢𑁆𑀢𑀢𑀺, 𑀦 𑀲𑀬𑀁 𑀓𑁂𑀦𑀘𑀺 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀫𑀸𑀥𑀺𑀕𑀼𑀡𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀲𑀻𑀮𑀸𑀤𑀬𑁄 𑀘𑁂𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀦 𑀮𑁄𑀓𑀺𑀬𑀁 𑀓𑀸𑀫𑀸𑀯𑀘𑀭𑀫𑁂𑀯.

𑀬𑀤𑀺 𑀏𑀯𑀁, 𑀓𑀣𑀁 𑀢𑁂𑀦 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀪𑀺𑀪𑀯𑀢𑀻𑀢𑀺? 𑀢𑀲𑁆𑀲𑀸𑀧𑀺 𑀆𑀦𑀼𑀪𑀸𑀯𑀢𑁄 𑀅𑀲𑀤𑀺𑀲𑀢𑁆𑀢𑀸. 𑀢𑀫𑁆𑀧𑀺 𑀳𑀺 𑀯𑀺𑀲𑀬𑀢𑁄, 𑀧𑀯𑀢𑁆𑀢𑀺𑀢𑁄, 𑀧𑀯𑀢𑁆𑀢𑀺 𑀆𑀓𑀸𑀭𑀢𑁄 𑀘 𑀉𑀢𑁆𑀢𑀭𑀺𑀢𑀭𑀫𑁂𑀯. 𑀢𑀁 𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀢𑁆𑀣𑀼 𑀯𑀺𑀫𑀼𑀢𑁆𑀢𑀺𑀕𑀼𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀜𑁆𑀘 𑀅𑀢𑀓𑁆𑀓𑀸𑀯𑀘𑀭𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀁 𑀲𑀯𑀺𑀲𑀬𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀼𑀝𑁆𑀞𑀼 𑀧𑀸𑀓𑀝𑀁 𑀯𑀺𑀪𑀽𑀢𑀢𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑀫𑁆𑀫𑀤𑁂𑀯 𑀘 𑀯𑀲𑀻𑀪𑀸𑀯𑀲𑁆𑀲 𑀧𑀸𑀧𑀺𑀢𑀢𑁆𑀢𑀸, 𑀪𑀯𑀗𑁆𑀕𑀧𑀭𑀺𑀯𑀸𑀲𑀲𑁆𑀲 𑀘 𑀅𑀢𑀺𑀧𑀭𑀺𑀢𑁆𑀢𑀓𑀢𑁆𑀢𑀸 𑀮𑀳𑀼𑀁 𑀮𑀳𑀼𑀁 𑀧𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑀺𑀲𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑀫𑁄𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑁂𑀦 𑀲𑀫𑀸 𑀲𑀤𑀺𑀲𑀸𑀢𑀺 𑀅𑀲𑀫𑁄. 𑀢𑀣𑀸 𑀅𑀲𑀫𑁂𑀳𑀺 𑀅𑀢𑀻𑀢𑀸𑀦𑀸𑀕𑀢𑀩𑀼𑀤𑁆𑀥𑁂𑀳𑀺 𑀲𑀫𑁄, 𑀅𑀲𑀫𑀸 𑀯𑀸 𑀲𑀫𑀸 𑀏𑀢𑀲𑁆𑀲𑀸𑀢𑀺 𑀅𑀲𑀫𑀲𑀫𑁄. 𑀲𑀻𑀮𑀸𑀤𑀺𑀕𑀼𑀡𑁂𑀦 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀫𑀸𑀢𑀺 𑀅𑀧𑁆𑀧𑀝𑀺𑀫𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀉𑀧𑀫𑀸𑀫𑀢𑁆𑀢𑀁 𑀧𑀝𑀺𑀫𑀸, 𑀲𑀤𑀺𑀲𑀽𑀧𑀫𑀸 𑀧𑀝𑀺𑀪𑀸𑀕𑁄, 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀞𑀺𑀢𑁄 𑀧𑀝𑀺𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀦 𑀔𑁄 𑀧𑀦𑀸𑀳𑀁 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀫𑀫 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀮𑁄𑀓𑀁 𑀧𑀲𑁆𑀲𑀦𑁆𑀢𑁄𑀧𑀺 𑀢𑀢𑁆𑀣 𑀲𑀤𑁂𑀯𑀓𑁂…𑀧𑁂… 𑀧𑀚𑀸𑀬 𑀅𑀢𑁆𑀢𑀦𑀸 𑀅𑀢𑁆𑀢𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀁 𑀲𑀫𑁆𑀧𑀦𑁆𑀦𑀢𑀭𑀲𑀻𑀮𑀁 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀦 𑀔𑁄 𑀧𑀦 𑀧𑀲𑁆𑀲𑀸𑀫𑀺, 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀻𑀢𑀺 𑀏𑀢𑁆𑀣 𑁋

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 ¶ 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑁧𑁦.𑁧𑁫; 𑀇𑀢𑀺𑀯𑀼𑁯𑁦) 𑁋

𑀇𑀤𑀁 ¶ 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀲𑀤𑁂𑀯𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁪; 𑀤𑀻. 𑀦𑀺. 𑁩.𑁧𑁮𑁮) 𑁋

𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀆𑀤𑀺𑀓𑀸 𑀕𑀸𑀣𑀸𑀬𑁄𑀢𑀺 𑀏𑀢𑁆𑀣 𑁋

‘‘𑀅𑀳𑀁 𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄. (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧);

‘‘𑀤𑀦𑁆𑀢𑁄 𑀤𑀫𑀬𑀢𑀁 𑀲𑁂𑀝𑁆𑀞𑁄, 𑀲𑀦𑁆𑀢𑁄 𑀲𑀫𑀬𑀢𑀁 𑀇𑀲𑀺;

𑀫𑀼𑀢𑁆𑀢𑁄 𑀫𑁄𑀘𑀬𑀢𑀁 𑀅𑀕𑁆𑀕𑁄, 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄. (𑀇𑀢𑀺𑀯𑀼. 𑁧𑁧𑁨);

‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦,

𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀲𑀤𑀺𑀲𑁄 𑀘 𑀯𑀺𑀚𑁆𑀚𑀢𑀺;

𑀬𑀫𑀸𑀳𑀼 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀕𑁆𑀕𑀢𑀁 𑀕𑀢𑁄,

𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀨𑀮𑁂𑀲𑀺𑀦’’𑀦𑁆𑀢𑀺. (𑀯𑀺. 𑀯. 𑁧𑁦𑁪𑁭; 𑀓𑀣𑀸. 𑁭𑁯𑁯) 𑁋

𑀏𑀯𑀫𑀸𑀤𑀺𑀓𑀸 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁩𑁯. 𑀤𑀫𑁂𑀢𑀻𑀢𑀺 𑀲𑀫𑁂𑀢𑀺, 𑀓𑀸𑀬𑀲𑀫𑀸𑀤𑀻𑀳𑀺 𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀓𑀸𑀬𑀲𑀫𑀸𑀤𑀻𑀳𑀺 𑀬𑁄𑀚𑀦𑀁 𑀬𑀣𑀸𑀭𑀳𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀤𑀫𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 ¶ 𑀤𑀫𑀦𑀸𑀭𑀳𑀸. 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀦 𑀫𑀦𑀼𑀲𑁆𑀲𑀸𑀢𑀺 𑀅𑀫𑀦𑀼𑀲𑁆𑀲𑀸. 𑀢𑀁𑀲𑀤𑀺𑀲𑀢𑀸 𑀏𑀢𑁆𑀣 𑀚𑁄𑀢𑀻𑀬𑀢𑀺, 𑀢𑁂𑀦 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺 𑀬𑀓𑁆𑀔𑀸𑀤𑀬𑁄 ‘‘𑀅𑀫𑀦𑀼𑀲𑁆𑀲𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀬𑁂 𑀓𑁂𑀘𑀺 𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂. 𑀢𑀣𑀸 𑀳𑀺 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁, 𑀬𑀓𑁆𑀔𑀸𑀤𑀬𑁄 𑀏𑀯 𑀘 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀧𑀮𑀸𑀮𑁄 𑀳𑀺𑀫𑀯𑀦𑁆𑀢𑀯𑀸𑀲𑀻. 𑀘𑀽𑀴𑁄𑀤𑀭𑀫𑀳𑁄𑀤𑀭𑀸 𑀦𑀸𑀕𑀤𑀻𑀧𑀯𑀸𑀲𑀺𑀦𑁄. 𑀅𑀕𑁆𑀕𑀺𑀲𑀺𑀔𑀥𑀽𑀫𑀲𑀺𑀔𑀸 𑀲𑀻𑀳𑀴𑀤𑀻𑀧𑀯𑀸𑀲𑀺𑀦𑁄. 𑀦𑀺𑀩𑁆𑀩𑀺𑀲𑀸 𑀓𑀢𑀸 𑀤𑁄𑀲𑀯𑀺𑀲𑀲𑁆𑀲 𑀯𑀺𑀦𑁄𑀤𑀦𑁂𑀦. 𑀢𑁂𑀦𑀸𑀳 ‘‘𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀺𑀢𑀸’’𑀢𑀺. 𑀓𑀽𑀝𑀤𑀦𑁆𑀢𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀖𑁄𑀝𑀫𑀼𑀔𑀉𑀧𑀸𑀮𑀺𑀕𑀳𑀧𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀓𑀤𑁂𑀯𑀭𑀸𑀚𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀚𑀓𑀮𑀸𑀧𑀬𑀓𑁆𑀔𑀩𑀓𑀩𑁆𑀭𑀳𑁆𑀫𑀸𑀤𑀻𑀦𑀁 ¶ 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀘𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀓𑁂𑀲𑀺𑀲𑀼𑀢𑁆𑀢𑀁. 𑀯𑀺𑀦𑀻𑀢𑀸 𑀯𑀺𑀘𑀺𑀢𑁆𑀭𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁 𑀬𑀣𑀸𑀭𑀳𑀁 𑀲𑀡𑁆𑀳𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀯𑀺𑀦𑀬𑀲𑁆𑀲 𑀤𑀻𑀧𑀦𑀢𑁄.

𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀻𑀢𑀺 ‘‘𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀞𑀫𑀚𑁆𑀛𑀸𑀦𑀁, 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀤𑀼𑀢𑀺𑀬𑀚𑁆𑀛𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀆𑀘𑀺𑀓𑁆𑀔𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑁂 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑀫𑀣𑀁 𑀅𑀦𑀼𑀧𑀕𑀢𑀸 𑀧𑀼𑀭𑀺𑀲𑀤𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑁂 𑀧𑀦 𑀯𑀺𑀧𑁆𑀧𑀓𑀢𑀤𑀫𑁆𑀫𑀪𑀸𑀯𑀸 𑀲𑀩𑁆𑀩𑀣𑀸 𑀤𑀫𑁂𑀢𑀩𑁆𑀩𑀢𑀁 𑀦𑀸𑀢𑀺𑀯𑀢𑁆𑀢𑀸, 𑀢𑁂 𑀲𑀢𑁆𑀢𑁂 𑀲𑀦𑁆𑀥𑀸𑀬 ‘‘𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀧𑀺 𑀳𑀺 𑀧𑀼𑀭𑀺𑀲𑀤𑀫𑁆𑀫𑀸 𑀏𑀯𑀸𑀢𑀺, 𑀬𑀢𑁄 𑀦𑁂 𑀲𑀢𑁆𑀣𑀸 𑀤𑀫𑁂𑀢𑀺.

𑀅𑀢𑁆𑀣𑀧𑀤𑀦𑁆𑀢𑀺 𑀅𑀢𑁆𑀣𑀸𑀪𑀺𑀩𑁆𑀬𑀜𑁆𑀚𑀓𑀧𑀤𑀁, 𑀯𑀸𑀓𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀸𑀓𑁆𑀬𑁂𑀦 𑀳𑀺 𑀅𑀢𑁆𑀣𑀸𑀪𑀺𑀩𑁆𑀬𑀢𑁆𑀢𑀺, 𑀦 𑀦𑀸𑀫𑀸𑀤𑀺𑀧𑀤𑀫𑀢𑁆𑀢𑁂𑀦. 𑀏𑀓𑀧𑀤𑀪𑀸𑀯𑁂𑀦 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀢𑁆𑀣𑀼 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀅𑀝𑁆𑀞 𑀤𑀺𑀲𑀸𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸 𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀧𑀺 𑀅𑀲𑀁𑀓𑀺𑀡𑁆𑀡𑀪𑀸𑀯𑁂𑀦 𑀤𑀺𑀲𑁆𑀲𑀦𑁆𑀢𑀺 𑀅𑀧𑀤𑀺𑀲𑁆𑀲𑀦𑁆𑀢𑀻𑀢𑀺 𑀤𑀺𑀲𑀸, 𑀤𑀺𑀲𑀸 𑀯𑀺𑀬𑀸𑀢𑀺 𑀯𑀸 𑀤𑀺𑀲𑀸. 𑀅𑀲𑀚𑁆𑀚𑀫𑀸𑀦𑀸𑀢𑀺 𑀦 𑀲𑀚𑁆𑀚𑀫𑀸𑀦𑀸 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀦𑀺𑀲𑁆𑀲𑀗𑁆𑀕𑀘𑀸𑀭𑀸. 𑀥𑀸𑀯𑀦𑁆𑀢𑀺 𑀚𑀯𑀦𑀯𑀼𑀢𑁆𑀢𑀺𑀬𑁄𑀕𑀢𑁄. 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺, 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀸𑀭𑀸 𑀧𑀦 𑀤𑀫𑀺𑀢𑀸 𑀧𑀼𑀭𑀺𑀲𑀤𑀫𑁆𑀫𑀸 𑀏𑀓𑀺𑀭𑀺𑀬𑀸𑀧𑀣𑁂𑀦𑁂𑀯 𑀅𑀝𑁆𑀞 𑀤𑀺𑀲𑀸 𑀥𑀸𑀯𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀓𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀸’’𑀢𑀺. 𑀅𑀝𑁆𑀞 𑀤𑀺𑀲𑀸𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀮𑁄𑀓𑀺𑀬𑁂𑀳𑀺 𑀅𑀕𑀢𑀧𑀼𑀩𑁆𑀩𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑀺𑀲𑀁, 𑀅𑀫𑀢𑀤𑀺𑀲𑀜𑁆𑀘 𑀧𑀓𑁆𑀔𑀦𑁆𑀤𑀦𑀢𑁄.

𑁧𑁪𑁦. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁄, 𑀇𑀥𑀮𑁄𑀓𑀢𑁆𑀣𑁄 ¶ . 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀫𑀸 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀦𑀺𑀩𑁆𑀩𑀸𑀦𑀁. 𑀢𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺. 𑀬𑀣𑀸𑀭𑀳𑀦𑁆𑀢𑀺 𑀬𑀣𑀸𑀦𑀼𑀭𑀽𑀧𑀁. 𑀢𑁂𑀲𑀼 𑀅𑀢𑁆𑀣𑁂𑀲𑀼 𑀬𑁄 𑀬𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀅𑀭𑀳𑀢𑀺, 𑀢𑀤𑀦𑀼𑀭𑀽𑀧𑀁. 𑀅𑀦𑀼𑀲𑀸𑀲𑀢𑀻𑀢𑀺 𑀯𑀺𑀦𑁂𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀢𑀺, 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑁂𑀦 𑀯𑀸𑀡𑀺𑀚𑁆𑀚𑀸𑀬 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑁄 𑀚𑀦𑀲𑀫𑀽𑀳𑁄. 𑀳𑀺𑀢𑀼𑀧𑀤𑁂𑀲𑀸𑀤𑀺𑀯𑀲𑁂𑀦 𑀧𑀭𑀺𑀧𑀸𑀮𑁂𑀢𑀩𑁆𑀩𑁄 𑀲𑀸𑀲𑀺𑀢𑀩𑁆𑀩𑁄 𑀲𑁄 𑀏𑀢𑀲𑁆𑀲 ¶ 𑀅𑀢𑁆𑀣𑀻𑀢𑀺 𑀲𑀢𑁆𑀣𑀸, 𑀲𑀢𑁆𑀣𑀯𑀸𑀳𑁄. 𑀲𑁄 𑀯𑀺𑀬 𑀪𑀕𑀯𑀸𑀢𑀺 𑀆𑀳 ‘‘𑀲𑀢𑁆𑀣𑀸 𑀯𑀺𑀬𑀸𑀢𑀺 𑀲𑀢𑁆𑀣𑀸, 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄’’𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀸𑀴𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀲𑀢𑁆𑀣𑀯𑀸𑀳𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀣𑁂𑀢𑀺 𑀲𑀢𑁆𑀣𑀺𑀓𑁂 𑀚𑀦𑁂. 𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑁄 𑀅𑀭𑀜𑁆𑀜𑀧𑁆𑀧𑀤𑁂𑀲𑁄. 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀇𑀢𑀭𑁄𑀧𑀺 𑀅𑀭𑀜𑁆𑀜𑀧𑁆𑀧𑀤𑁂𑀲𑁄 𑀢𑀣𑀸 𑀯𑀼𑀘𑁆𑀘𑀢𑀺. 𑀘𑁄𑀭𑀓𑀦𑁆𑀢𑀸𑀭𑀦𑁆𑀢𑀺 𑀘𑁄𑀭𑁂𑀳𑀺 𑀅𑀥𑀺𑀝𑁆𑀞𑀺𑀢𑀓𑀦𑁆𑀢𑀸𑀭𑀁. 𑀢𑀣𑀸 𑀯𑀸𑀴𑀓𑀦𑁆𑀢𑀸𑀭𑀁. 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀦𑁆𑀢𑀺 𑀤𑀼𑀮𑁆𑀮𑀪𑀪𑀺𑀓𑁆𑀔𑀁 𑀓𑀦𑁆𑀢𑀸𑀭𑀁. 𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀉𑀢𑁆𑀢𑀸𑀭𑁂𑀢𑀻𑀢𑀺𑀆𑀤𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀉𑀢𑁆𑀢𑀸𑀭𑁂𑀢𑀻𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀉𑀧𑀦𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀦𑀺𑀢𑁆𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀸𑀫𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀧𑀢𑀸𑀭𑁂𑀢𑀻𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀭𑁂𑀢𑀺, 𑀳𑀢𑁆𑀣𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀬 𑀢𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁆𑀧𑁂𑀢𑀁 𑀢𑀸𑀭𑀡𑀼𑀢𑁆𑀢𑀸𑀭𑀡𑀸𑀤𑀺𑀔𑁂𑀫𑀝𑁆𑀞𑀸𑀦𑁂 𑀞𑀧𑀦𑀫𑁂𑀯𑀸𑀢𑀺 𑀆𑀳 ‘‘𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀻’’𑀢𑀺. 𑀲𑀢𑁆𑀢𑁂𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂. 𑀫𑀳𑀸𑀕𑀳𑀦𑀢𑀸𑀬, 𑀫𑀳𑀸𑀦𑀢𑁆𑀣𑀢𑀸𑀬, 𑀤𑀼𑀦𑁆𑀦𑀺𑀢𑁆𑀣𑀭𑀡𑀢𑀸𑀬 𑀘 𑀚𑀸𑀢𑀺𑀬𑁂𑀯 𑀓𑀦𑁆𑀢𑀸𑀭𑁄 𑀚𑀸𑀢𑀺𑀓𑀦𑁆𑀢𑀸𑀭𑁄, 𑀢𑀁 𑀚𑀸𑀢𑀺𑀓𑀦𑁆𑀢𑀸𑀭𑀁.

𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑀲𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀤𑁂𑀯𑀫𑀦𑀼𑀲𑁆𑀲𑀸 𑀏𑀯 𑀳𑀺 𑀉𑀓𑁆𑀓𑀝𑁆𑀞𑀲𑀢𑁆𑀢𑀸, 𑀦 𑀢𑀺𑀭𑀘𑁆𑀙𑀸𑀦𑀸𑀤𑀬𑁄. 𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀲𑁆𑀲 𑀬𑁄𑀕𑁆𑀬𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦. 𑀏𑀢𑀦𑁆𑀢𑀺 ‘‘𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀏𑀢𑀁 𑀯𑀘𑀦𑀁. 𑀪𑀕𑀯𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀬𑀣𑀸 ‘‘𑀉𑀧𑀚𑁆𑀛𑀸𑀬𑀢𑁄 𑀅𑀚𑁆𑀛𑁂𑀢𑀻’’𑀢𑀺, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂𑀢𑀺 𑀯𑀸 𑀅𑀢𑁆𑀣𑁄. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀲𑁆𑀲 𑀩𑀮𑀯𑀓𑀸𑀭𑀡𑀁.

𑀕𑀕𑁆𑀕𑀭𑀸𑀬𑀸𑀢𑀺 𑀕𑀕𑁆𑀕𑀭𑀸𑀬 𑀦𑀸𑀫 𑀭𑀜𑁆𑀜𑁄 𑀤𑁂𑀯𑀺𑀬𑀸, 𑀢𑀸𑀬 𑀯𑀸 𑀓𑀸𑀭𑀺𑀢𑀢𑁆𑀢𑀸 ‘‘𑀕𑀕𑁆𑀕𑀭𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬. 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀥𑀫𑁆𑀫𑀲𑀜𑁆𑀜𑀸𑀬 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺, 𑀕𑀡𑁆𑀳𑀦𑁆𑀢𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀧𑀚𑁆𑀚𑀺. 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀢𑀲𑁆𑀲 𑀲𑀻𑀲𑁂 𑀤𑀡𑁆𑀟𑀲𑁆𑀲 𑀞𑀧𑀺𑀢𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀢𑀢𑁆𑀣 𑀤𑀡𑁆𑀟𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀡𑁆𑀟𑀽𑀓𑁄𑀧𑀺 𑀤𑀡𑁆𑀟𑁂 𑀞𑀧𑀺𑀢𑁂𑀧𑀺 ¶ 𑀉𑀧𑁆𑀧𑀻𑀴𑀺𑀢𑁂𑀧𑀺 𑀥𑀫𑁆𑀫𑀕𑀢𑁂𑀦 𑀧𑀲𑀸𑀤𑁂𑀦 𑀯𑀺𑀲𑁆𑀲𑀭𑀫𑀓𑀭𑁄𑀦𑁆𑀢𑁄𑀯 𑀓𑀸𑀮𑀫𑀓𑀸𑀲𑀺. 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀅𑀬𑀁 𑀥𑀫𑁆𑀫𑀢𑀸, 𑀬𑀸 ‘‘𑀓𑀼𑀢𑁄𑀳𑀁 𑀇𑀥 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀫𑀓𑀸𑀲𑀺’’𑀦𑁆𑀢𑀺 𑀆𑀯𑀚𑁆𑀚𑀦𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀪𑀯𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀆𑀳 ‘‘𑀅𑀭𑁂 𑀅𑀳𑀫𑁆𑀧𑀺 𑀦𑀸𑀫 𑀇𑀥 𑀦𑀺𑀩𑁆𑀩𑀢𑁆𑀢𑁄’’𑀢𑀺 ¶ . 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺 𑀓𑀢𑀜𑁆𑀜𑀼𑀢𑀸𑀲𑀁𑀯𑀟𑁆𑀠𑀺𑀢𑁂𑀦 𑀧𑁂𑀫𑀕𑀸𑀭𑀯𑀩𑀳𑀼𑀫𑀸𑀦𑁂𑀦.

𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑀫𑀳𑀸𑀚𑀦𑀲𑁆𑀲 𑀓𑀫𑁆𑀫𑀨𑀮𑀁, 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀓𑀸𑀫𑁄 ‘‘𑀓𑁄 𑀫𑁂 𑀯𑀦𑁆𑀤𑀢𑀻’’𑀢𑀺 𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀢𑀢𑁆𑀣 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄, 𑀓𑀢𑀫𑁄𑀢𑀺 𑀅𑀢𑁆𑀣𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. ‘‘𑀬𑀲𑀲𑀸’’𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦, 𑀧𑀭𑀺𑀘𑁆𑀙𑁂𑀤𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀲𑀼𑀦𑁆𑀤𑀭𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀲𑀩𑁆𑀩𑀸 𑀤𑀲𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄, 𑀘𑀦𑁆𑀤𑁄 𑀯𑀺𑀬, 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀼𑀭𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. ‘‘𑀉𑀤𑀓𑁂’’𑀢𑀺 𑀇𑀤𑀁 𑀢𑀤𑀸 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁. ‘‘𑀉𑀤𑀓𑁂 𑀫𑀡𑁆𑀟𑀽𑀓𑁄’’𑀢𑀺 𑀏𑀢𑁂𑀦 𑀉𑀤𑁆𑀥𑀫𑀸𑀬𑀺𑀓𑀸𑀤𑀺𑀓𑀲𑁆𑀲 𑀣𑀮𑁂 𑀫𑀡𑁆𑀟𑀽𑀓𑀲𑁆𑀲 𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑀼𑀦𑁆𑀦𑀁 𑀖𑀸𑀲𑁂𑀲𑀦𑀝𑁆𑀞𑀸𑀦𑀁. 𑀇𑀥 𑀧𑀦 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄, 𑀯𑀸𑀭𑀺 𑀉𑀤𑀓𑀁 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀯𑀸𑀭𑀺𑀕𑁄𑀘𑀭𑁄. 𑀉𑀤𑀓𑀘𑀸𑀭𑀻𑀧𑀺 𑀳𑀺 𑀓𑁄𑀘𑀺 𑀓𑀘𑁆𑀙𑀧𑀸𑀤𑀺 𑀅𑀯𑀸𑀭𑀺𑀕𑁄𑀘𑀭𑁄𑀧𑀺 𑀳𑁄𑀢𑀻𑀢𑀺 ‘‘𑀯𑀸𑀭𑀺𑀕𑁄𑀘𑀭𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀤𑁂𑀲𑁂𑀦𑁆𑀢𑀲𑁆𑀲 𑀢𑀯 𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀲𑀼𑀡𑀦𑁆𑀢𑀲𑁆𑀲. 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀯𑀥𑀺 𑀯𑀘𑁆𑀙𑀧𑀸𑀮𑀓𑁄𑀢𑀺 𑀯𑀘𑁆𑀙𑁂 𑀭𑀓𑁆𑀔𑀦𑁆𑀢𑁄 𑀕𑁄𑀧𑀸𑀮𑀤𑀸𑀭𑀓𑁄 𑀫𑀫 𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸 𑀤𑀡𑁆𑀟𑀫𑁄𑀮𑀼𑀩𑁆𑀪 𑀢𑀺𑀝𑁆𑀞𑀦𑁆𑀢𑁄 𑀫𑀫 𑀲𑀻𑀲𑁂 𑀤𑀡𑁆𑀟𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀫𑀁 𑀫𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑀲𑀺𑀢𑀁 𑀓𑀢𑁆𑀯𑀸𑀢𑀺 ‘‘𑀢𑀣𑀸 𑀧𑀭𑀺𑀢𑁆𑀢𑀢𑀭𑁂𑀦𑀸𑀧𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀏𑀯𑀁 𑀅𑀢𑀺𑀯𑀺𑀬 𑀉𑀴𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀸𑀲𑀼𑀭𑀢𑀭𑀥𑀯𑀮𑀯𑀺𑀧𑁆𑀨𑀼𑀭𑀦𑁆𑀢𑀤𑀲𑁆𑀲𑀦𑀓𑀺𑀭𑀡𑀸𑀯𑀮𑀻𑀳𑀺 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀁 𑀧𑀤𑁂𑀲𑀁 𑀑𑀪𑀸𑀲𑁂𑀦𑁆𑀢𑁄 𑀲𑀺𑀢𑀁 𑀓𑀢𑁆𑀯𑀸. 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀳𑀺 𑀲𑁄 𑁋

‘‘𑀫𑀼𑀳𑀼𑀢𑁆𑀢𑀁 ¶ 𑀘𑀺𑀢𑁆𑀢𑀧𑀲𑀸𑀤𑀲𑁆𑀲, 𑀇𑀤𑁆𑀥𑀺𑀁 𑀧𑀲𑁆𑀲 𑀬𑀲𑀜𑁆𑀘 𑀫𑁂;

𑀆𑀦𑀼𑀪𑀸𑀯𑀜𑁆𑀘 𑀫𑁂 𑀧𑀲𑁆𑀲, 𑀯𑀡𑁆𑀡𑀁 𑀧𑀲𑁆𑀲 𑀚𑀼𑀢𑀺𑀜𑁆𑀘 𑀫𑁂.

‘‘𑀬𑁂 ¶ 𑀘 𑀢𑁂 𑀤𑀻𑀖𑀫𑀤𑁆𑀥𑀸𑀦𑀁, 𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀕𑁄𑀢𑀫;

𑀧𑀢𑁆𑀢𑀸 𑀢𑁂 𑀅𑀘𑀮𑀝𑁆𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺. (𑀯𑀺. 𑀯. 𑁮𑁫𑁯-𑁮𑁬𑁦);

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁪𑁧. 𑀬𑀁 𑀧𑀦 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑀁. 𑀢𑀣𑀸 𑀓𑀺𑀜𑁆𑀘𑀻𑀢𑀺. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀻𑀢𑀺 𑀜𑁂𑀬𑁆𑀬𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀓𑀢𑀁 𑀳𑁄𑀢𑀺. 𑀧𑀦𑀸𑀢𑀺 𑀯𑀸 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄 𑀦𑀺𑀧𑀸𑀢𑁄. 𑀢𑁂𑀦 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀢𑁆𑀣𑀼 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁄 𑀯𑀼𑀢𑁆𑀢𑁄. ‘‘𑀩𑀼𑀤𑁆𑀥𑁄’’𑀢𑀺 𑀧𑀦 𑀇𑀫𑀺𑀦𑀸 𑀢𑀤𑀜𑁆𑀜𑀲𑁆𑀲𑀧𑀺 𑀜𑁂𑀬𑁆𑀬𑀲𑁆𑀲𑀸𑀯𑀩𑁄𑀥𑁄. 𑀧𑀼𑀭𑀺𑀫𑁂𑀦 𑀯𑀸 𑀲𑀢𑁆𑀣𑀼 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁄, 𑀧𑀘𑁆𑀙𑀺𑀫𑁂𑀦 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑁄. 𑀧𑀻𑀢𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀲𑁂𑀲𑁄 𑀚𑁄𑀢𑀻𑀬𑀢𑀺. 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑁄𑀓𑁆𑀔𑁄, 𑀅𑀕𑁆𑀕𑀫𑀕𑁆𑀕𑁄. 𑀢𑀲𑁆𑀲 𑀅𑀦𑁆𑀢𑁄 𑀅𑀕𑁆𑀕𑀨𑀮𑀁, 𑀢𑀢𑁆𑀣 𑀪𑀯𑀁 𑀢𑀲𑁆𑀫𑀺𑀁 𑀮𑀤𑁆𑀥𑁂 𑀮𑀤𑁆𑀥𑀩𑁆𑀩𑀢𑁄 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀜𑀸𑀡𑀁. 𑀏𑀯𑀁 𑀧𑀯𑀢𑁆𑀢𑁄𑀢𑀺 𑀏𑀢𑁆𑀣 𑁋

‘‘𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀦𑀺. 𑁧𑁯𑁨) 𑁋

𑀅𑀬𑀁 ¶ 𑀦𑀺𑀤𑁆𑀤𑁂𑀲𑀧𑀸𑀴𑀺𑀦𑀬𑁄. 𑀬𑀲𑁆𑀫𑀸 𑀘𑁂𑀢𑁆𑀣 𑀢𑀲𑁆𑀲𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 𑀪𑁂𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀏𑀓𑁂𑀦𑀸𑀧𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁄 𑀯𑀸’’𑀢𑀺 𑀅𑀦𑀺𑀬𑀫𑀢𑁆𑀣𑁄 𑀯𑀸-𑀲𑀤𑁆𑀤𑁄 𑀯𑀼𑀢𑁆𑀢𑁄.

𑀢𑀢𑁆𑀣 ¶ 𑀬𑀣𑀸 𑀮𑁄𑀓𑁂 𑀅𑀯𑀕𑀦𑁆𑀢𑀸 ‘‘𑀅𑀯𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦. 𑀬𑀣𑀸 𑀧𑀡𑁆𑀡𑀲𑁄𑀲𑀸 𑀯𑀸𑀢𑀸 ‘‘𑀧𑀡𑁆𑀡𑀲𑀼𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦, 𑀳𑁂𑀢𑀼𑀅𑀢𑁆𑀣𑁄 𑀘𑁂𑀢𑁆𑀣 𑀅𑀦𑁆𑀢𑁄𑀦𑀻𑀢𑁄.

𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑀼𑀚𑁆𑀛𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄𑀢𑀺 𑀅𑀜𑁆𑀜𑁂𑀦 𑀅𑀩𑁄𑀥𑀦𑀻𑀢𑁄 𑀲𑀬𑀫𑁂𑀯 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀦𑀸𑀦𑀸𑀕𑀼𑀡𑀯𑀺𑀲𑀯𑀦𑀢𑁄 𑀧𑀤𑀼𑀫𑀫𑀺𑀯 𑀯𑀺𑀓𑀲𑀦𑀝𑁆𑀞𑁂𑀦 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄𑀢𑀺 𑀏𑀯𑀫𑀸𑀤𑀻𑀳𑀺 𑀙𑀳𑀺 𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀓𑁆𑀔𑀬𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀬 𑀲𑀩𑁆𑀩𑀓𑀺𑀮𑁂𑀲𑀦𑀺𑀤𑁆𑀤𑀓𑁆𑀔𑀬𑀯𑀺𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄𑀢𑀺 𑀕𑀫𑀦𑀢𑁆𑀣𑀸𑀦𑀁 𑀩𑀼𑀤𑁆𑀥𑀺𑀅𑀢𑁆𑀣𑀢𑀸𑀬 𑀩𑀼𑀤𑁆𑀥𑀺𑀅𑀢𑁆𑀣𑀸𑀦𑀫𑁆𑀧𑀺 𑀕𑀫𑀦𑀢𑁆𑀣𑀢𑀸 𑀮𑀩𑁆𑀪𑀢𑀻𑀢𑀺 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄𑀢𑀺 𑀦 𑀧𑀭𑁂𑀳𑀺 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄, 𑀅𑀣 𑀔𑁄 𑀲𑀬𑀫𑁂𑀯 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁 𑀩𑁄𑀥𑁄𑀢𑀺 𑀅𑀦𑀢𑁆𑀣𑀦𑁆𑀢𑀭𑀁. 𑀢𑀢𑁆𑀣 𑀬𑀣𑀸 𑀭𑀢𑁆𑀢𑀕𑀼𑀡𑀬𑁄𑀕𑀢𑁄 𑀭𑀢𑁆𑀢𑁄 𑀧𑀝𑁄, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀬𑁄𑀕𑀢𑁄 𑀩𑀼𑀤𑁆𑀥𑁄𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀦𑁆𑀢𑀺𑀆𑀤𑀺 𑀅𑀢𑁆𑀣𑀸𑀦𑀼𑀕𑀢𑀸𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀩𑁄𑀥𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀪𑀕𑀯𑀸 𑀩𑀼𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁨. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀕𑀼𑀡𑀯𑀺𑀲𑀺𑀝𑁆𑀞𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑁂𑀳𑀺 𑀉𑀢𑁆𑀢𑀫𑀲𑁆𑀲 𑀕𑀭𑀼𑀦𑁄 𑀕𑀸𑀭𑀯𑀯𑀲𑁂𑀦 𑀯𑀼𑀢𑁆𑀢𑀯𑀘𑀦𑀫𑀺𑀤𑀁 𑀪𑀕𑀯𑀸𑀢𑀺. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑁄 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 ¶ 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬, 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀘 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺.

𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄. 𑀢𑀲𑁆𑀫𑀸 𑀬𑁄 ‘‘𑀪𑀕𑀯𑀸’’𑀢𑀺 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄, 𑀕𑀭𑀼𑀓𑀭𑀡𑀁 𑀯𑀸 𑀲𑀸𑀢𑀺𑀲𑀬𑀁 𑀅𑀭𑀳𑀢𑀻𑀢𑀺 𑀕𑀸𑀭𑀯𑀬𑀼𑀢𑁆𑀢𑁄, 𑀕𑀸𑀭𑀯𑀸𑀭𑀳𑁄𑀢𑀺 𑀅𑀢𑁆𑀣𑁄.

𑀕𑀼𑀡𑀯𑀺𑀲𑁂𑀲𑀳𑁂𑀢𑀼𑀓𑀁 ¶ ‘‘𑀪𑀕𑀯𑀸’’𑀢𑀺 𑀇𑀤𑀁 𑀪𑀕𑀯𑀢𑁄 𑀦𑀸𑀫𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑀼𑀓𑀸𑀫𑁄 𑀦𑀸𑀫𑀁𑀬𑁂𑀯 𑀢𑀸𑀯 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀩𑁆𑀩𑀺𑀥𑀁 𑀯𑀸 𑀦𑀸𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀯𑀢𑁆𑀣𑀺𑀓𑀦𑁆𑀢𑀺 𑀅𑀯𑀢𑁆𑀣𑀸𑀬 𑀯𑀺𑀤𑀺𑀢𑀁 𑀢𑀁 𑀢𑀁 𑀅𑀯𑀢𑁆𑀣𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀁 𑀯𑁄𑀳𑀭𑀺𑀢𑀁. 𑀢𑀣𑀸 𑀮𑀺𑀗𑁆𑀕𑀺𑀓𑀁 𑀢𑁂𑀦 𑀢𑁂𑀦 𑀮𑀺𑀗𑁆𑀕𑁂𑀦 𑀯𑁄𑀳𑀭𑀺𑀢𑀁. 𑀦𑁂𑀫𑀺𑀢𑁆𑀢𑀺𑀓𑀦𑁆𑀢𑀺 𑀦𑀺𑀫𑀺𑀢𑁆𑀢𑀢𑁄 𑀆𑀕𑀢𑀁. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀬𑀤𑀺𑀘𑁆𑀙𑀸𑀬 𑀧𑀯𑀢𑁆𑀢𑀁, 𑀬𑀤𑀺𑀘𑁆𑀙𑀸𑀬 𑀆𑀕𑀢𑀁 𑀬𑀤𑀺𑀘𑁆𑀙𑀓𑀁. 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀩𑀸𑀮𑁄, 𑀬𑀼𑀯𑀸, 𑀯𑀼𑀟𑁆𑀠𑁄𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀤𑀼𑀢𑀺𑀬𑁂𑀦 𑀫𑀼𑀡𑁆𑀟𑀻, 𑀚𑀝𑀻𑀢𑀺 𑀏𑀯𑀫𑀸𑀤𑀺𑀁, 𑀢𑀢𑀺𑀬𑁂𑀦 𑀩𑀳𑀼𑀲𑁆𑀲𑀼𑀢𑁄, 𑀥𑀫𑁆𑀫𑀓𑀣𑀺𑀓𑁄, 𑀛𑀸𑀬𑀻𑀢𑀺 𑀏𑀯𑀫𑀸𑀤𑀺𑀁, 𑀘𑀢𑀼𑀢𑁆𑀣𑁂𑀦 𑀅𑀖𑀫𑀭𑀺𑀲𑀦𑀁 𑀧𑀸𑀯𑀘𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀦𑁂𑀫𑀺𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀦 𑀫𑀳𑀸𑀫𑀸𑀬𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀇𑀤𑀁 𑀦𑀸𑀫𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀓𑁆𑀔𑀡𑁂𑀬𑁂𑀯 𑀚𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀅𑀲𑀸𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸’’𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀨𑀚𑁆𑀚𑀫𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀩𑀼𑀤𑁆𑀥𑀕𑀼𑀡𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀦𑀺𑀧𑁆𑀨𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓’’𑀦𑁆𑀢𑀺. 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀸 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀸 𑀧𑀜𑁆𑀜𑀢𑁆𑀢𑀺. 𑀬𑀁𑀕𑀼𑀡𑀦𑀺𑀫𑀺𑀢𑁆𑀢𑀸 𑀳𑀺 𑀲𑀸, 𑀢𑁂 𑀲𑀢𑁆𑀣𑀼 𑀧𑀘𑁆𑀘𑀓𑁆𑀔𑀪𑀽𑀢𑀸𑀢𑀺 𑀕𑀼𑀡𑀸 𑀯𑀺𑀬 𑀲𑀸𑀧𑀺 𑀲𑀘𑁆𑀙𑀺𑀓𑀢𑀸 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀭𑁂𑀲𑀁 𑀯𑁄𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪𑁩. 𑀯𑀤𑀦𑁆𑀢𑀻𑀢𑀺 ¶ 𑀫𑀳𑀸𑀣𑁂𑀭𑀲𑁆𑀲 𑀕𑀭𑀼𑀪𑀸𑀯𑀢𑁄 𑀩𑀳𑀼𑀯𑀘𑀦𑁂𑀦𑀸𑀳, 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀸 𑀓𑀢𑀫𑀦𑀼𑀯𑀸𑀤𑀁 𑀲𑀦𑁆𑀥𑀸𑀬. 𑀇𑀲𑁆𑀲𑀭𑀺𑀬𑀸𑀤𑀺𑀪𑁂𑀤𑁄 𑀪𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀕𑀻. 𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀁 𑀪𑀕𑁆𑀕𑀁 𑀅𑀓𑀸𑀲𑀺, 𑀪𑀕𑁆𑀕𑀯𑀸𑀢𑀺 𑀅𑀢𑁆𑀣𑁄. 𑀩𑀳𑀽𑀳𑀺 𑀜𑀸𑀬𑁂𑀳𑀻𑀢𑀺 𑀓𑀸𑀬𑀪𑀸𑀯𑀦𑀸𑀤𑀺𑀓𑁂𑀳𑀺 𑀅𑀦𑁂𑀓𑁂𑀳𑀺 𑀪𑀸𑀯𑀦𑀸𑀓𑁆𑀓𑀫𑁂𑀳𑀺. 𑀲𑀼𑀪𑀸𑀯𑀺𑀢𑀢𑁆𑀢𑀦𑁄𑀢𑀺 𑀲𑀫𑁆𑀫𑀤𑁂𑀯 𑀪𑀸𑀯𑀺𑀢𑀲𑀪𑀸𑀯𑀲𑁆𑀲. 𑀧𑀘𑁆𑀘𑀢𑁆𑀢𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁.

𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀏𑀢𑁆𑀣𑀸𑀬𑀁 𑀦𑀺𑀤𑁆𑀤𑁂𑀲𑀦𑀬𑁄 𑁋

‘‘𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁. 𑀅𑀧𑀺𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀢𑀡𑁆𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 ¶ 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁩).

𑀏𑀢𑁆𑀣 ¶ 𑀘 ‘‘𑀕𑀸𑀭𑀯𑀸𑀥𑀺𑀯𑀘𑀦’’𑀦𑁆𑀢𑀺𑀆𑀤𑀻𑀦𑀺 𑀬𑀤𑀺𑀧𑀺 𑀕𑀸𑀣𑀸𑀬𑀁 𑀆𑀕𑀢𑀧𑀤𑀸𑀦𑀼𑀓𑁆𑀓𑀫𑁂𑀦 𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀬𑀣𑀸𑀭𑀳𑀁 𑀧𑀦 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀺𑀤𑁆𑀤𑁂𑀲𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀕𑀭𑀽𑀦𑀁 𑀕𑀭𑀼𑀪𑀸𑀯𑀯𑀸𑀘𑀓𑀁 𑀯𑀘𑀦𑀁. 𑀪𑀚𑀻𑀢𑀺 𑀪𑀸𑀕𑀲𑁄 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀯𑀺𑀪𑀚𑀻’’𑀢𑀺. 𑀥𑀫𑁆𑀫𑀭𑀢𑀦𑀦𑁆𑀢𑀺 𑀫𑀕𑁆𑀕𑀨𑀮𑀸𑀤𑀺𑀅𑀭𑀺𑀬𑀥𑀫𑁆𑀫𑀭𑀢𑀦𑀁. 𑀧𑀼𑀦 𑀪𑀚𑀻𑀢𑀺 𑀲𑁂𑀯𑀺. 𑀪𑀸𑀕𑀻𑀢𑀺 𑀪𑀸𑀕𑀥𑁂𑀬𑁆𑀬𑀯𑀸. 𑀧𑀼𑀦 𑀪𑀸𑀕𑀻𑀢𑀺 𑀪𑀚𑀦𑀲𑀻𑀮𑁄. 𑀅𑀢𑁆𑀣𑀭𑀲𑀲𑁆𑀲𑀸𑀢𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀭𑀲𑀲𑁆𑀲. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀳𑀺 𑀞𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲, 𑀲𑀼𑀡𑀦𑁆𑀢𑀲𑁆𑀲 𑀘 𑀢𑀤𑀢𑁆𑀣𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀅𑀢𑁆𑀣𑀭𑀲𑁄. 𑀥𑀫𑁆𑀫𑀁 𑀆𑀭𑀩𑁆𑀪 𑀥𑀫𑁆𑀫𑀭𑀲𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤’’𑀦𑁆𑀢𑀺 (𑀅. 𑀦𑀺. 𑁬.𑁧𑁦). 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲𑀸𑀢𑀺 𑀯𑀺𑀫𑀼𑀢𑁆𑀢𑀺𑀪𑀽𑀢𑀲𑁆𑀲, 𑀯𑀺𑀫𑀼𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀯𑀸 𑀭𑀲𑀲𑁆𑀲. 𑀲𑀜𑁆𑀜𑀸𑀪𑀸𑀯𑀦𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁. 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 ‘‘𑀪𑀕𑀯𑀸’’𑀢𑀺 𑀲𑀤𑁆𑀤𑀲𑀺𑀤𑁆𑀥𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁪. 𑀬𑀤𑀺𑀧𑀺 ‘‘𑀪𑀸𑀕𑁆𑀬𑀯𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 ‘‘𑀪𑀕𑀻 𑀪𑀚𑀻’’𑀢𑀺 𑀦𑀺𑀤𑁆𑀤𑁂𑀲𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑁄 𑀏𑀯, 𑀢𑀣𑀸𑀧𑀺 𑀧𑀤𑀲𑀺𑀤𑁆𑀥𑀺 𑀅𑀢𑁆𑀣𑀯𑀺𑀪𑀸𑀕𑀅𑀢𑁆𑀣𑀬𑁄𑀚𑀦𑀸𑀤𑀺𑀲𑀳𑀺𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄 𑀢𑀢𑁄 𑀅𑀜𑁆𑀜𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄’’𑀢𑀺. 𑀆𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀡𑁆𑀡𑀯𑀺𑀓𑀸𑀭𑁄 ¶ , 𑀯𑀡𑁆𑀡𑀮𑁄𑀧𑁄, 𑀥𑀸𑀢𑀼𑀅𑀢𑁆𑀣𑁂𑀦 𑀦𑀺𑀬𑁄𑀚𑀦𑀜𑁆𑀘𑀸𑀢𑀺 𑀇𑀫𑀁 𑀢𑀺𑀯𑀺𑀥𑀁 𑀮𑀓𑁆𑀔𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀤𑁆𑀤𑀦𑀬𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀦𑀬𑁂𑀦. 𑀧𑀺𑀲𑁄𑀤𑀭𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀆𑀓𑀢𑀺𑀕𑀡𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸’’𑀢𑀺. 𑀧𑀓𑁆𑀔𑀺𑀧𑀦𑀫𑁂𑀯 𑀮𑀓𑁆𑀔𑀡𑀁. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀓𑀭𑀡𑀁 𑀳𑀺 𑀧𑀓𑁆𑀔𑀺𑀧𑀦𑀁. 𑀧𑀸𑀭𑀧𑁆𑀧𑀢𑁆𑀢𑀦𑁆𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀧𑀸𑀭𑀫𑀺𑀪𑀸𑀯𑀧𑁆𑀧𑀢𑁆𑀢𑀁. 𑀪𑀸𑀕𑁆𑀬𑀦𑁆𑀢𑀺 𑀓𑀼𑀲𑀮𑀁. 𑀢𑀢𑁆𑀣 𑀫𑀕𑁆𑀕𑀓𑀼𑀲𑀮𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁, 𑀇𑀢𑀭𑀁 𑀮𑁄𑀓𑀺𑀬𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁, 𑀇𑀢𑀭𑀫𑁆𑀧𑀺 𑀯𑀸 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀭𑀺𑀬𑀸𑀬𑀢𑁄 𑀮𑁄𑀓𑀼𑀢𑁆𑀢𑀭𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁 𑀲𑀺𑀬𑀸.

𑀮𑁄𑀪𑀸𑀤𑀬𑁄 𑀏𑀓𑀓𑀯𑀲𑁂𑀦 𑀕𑀳𑀺𑀢𑀸. 𑀢𑀣𑀸 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑁄 𑀯𑀺𑀧𑀮𑁆𑀮𑀸𑀲𑀪𑀸𑀯𑀲𑀸𑀫𑀜𑁆𑀜𑁂𑀦, 𑀅𑀳𑀺𑀭𑀺𑀓𑀸𑀤𑀬𑁄 𑀤𑀼𑀓𑀯𑀲𑁂𑀦. 𑀮𑁄𑀪𑀸𑀤𑀬𑁄 𑀘 𑀧𑀼𑀦 ‘‘𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮’’𑀦𑁆𑀢𑀺 𑀢𑀺𑀓𑀯𑀲𑁂𑀦 𑀕𑀳𑀺𑀢𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺-𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀭𑀸𑀕𑀫𑀮𑀸𑀤𑀺𑀭𑀸𑀕𑀯𑀺𑀲𑀫𑀸𑀤𑀺𑀓𑀸𑀫𑀲𑀜𑁆𑀜𑀸𑀤𑀺𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀢𑀡𑁆𑀳𑀸𑀧𑀧𑀜𑁆𑀘𑀸𑀤𑀬𑁄 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀸𑀤𑀬𑁄. 𑀲𑀼𑀪𑀲𑀜𑁆𑀜𑀸𑀤𑀺𑀓𑀸 𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀸. ‘‘𑀘𑀻𑀯𑀭𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢 ¶ , 𑀲𑁂𑀦𑀸𑀲𑀦, 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸’’𑀢𑀺 (𑀅. 𑀦𑀺. 𑁪.𑁯) 𑀏𑀯𑀫𑀸𑀕𑀢𑀸 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸. ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀺, 𑀥𑀫𑁆𑀫𑁂, 𑀲𑀗𑁆𑀖𑁂, 𑀲𑀺𑀓𑁆𑀔𑀸𑀬, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀆𑀳𑀢𑀘𑀺𑀢𑁆𑀢𑁄 𑀔𑀻𑀮𑀚𑀸𑀢𑁄’’𑀢𑀺 (𑀤𑀻. 𑀦𑀺. 𑁩.𑁩𑁧𑁯; 𑀫. 𑀦𑀺. 𑁧.𑁧𑁮𑁫; 𑀅. 𑀦𑀺. 𑁫.𑁨𑁦𑁫; 𑁯.𑁭𑁧; 𑀯𑀺𑀪. 𑁯𑁪𑁧) 𑀏𑀯𑀫𑀸𑀕𑀢𑀸𑀦𑀺 𑀧𑀜𑁆𑀘 𑀘𑁂𑀢𑁄𑀔𑀻𑀮𑀸𑀦𑀺. ‘‘𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀆𑀕𑀢𑀸 𑀧𑀜𑁆𑀘 𑀯𑀺𑀦𑀺𑀩𑀦𑁆𑀥𑀸. 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀬𑁄 𑀧𑀜𑁆𑀘𑀸𑀪𑀺𑀦𑀦𑁆𑀤𑀦𑀸. 𑀓𑁄𑀥𑁄, 𑀫𑀓𑁆𑀔𑁄, 𑀇𑀲𑁆𑀲𑀸, 𑀲𑀸𑀞𑁂𑀬𑁆𑀬𑀁, 𑀧𑀸𑀧𑀺𑀘𑁆𑀙𑀢𑀸, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄𑀢𑀺 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 𑀢𑀡𑁆𑀳𑀸𑀓𑀸𑀬𑀸.

𑀓𑀸𑀫𑀭𑀸𑀕𑀧𑀝𑀺𑀖𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀪𑀯𑀭𑀸𑀕𑀫𑀸𑀦𑀸𑀯𑀺𑀚𑁆𑀚𑀸 𑀲𑀢𑁆𑀢𑀸𑀦𑀼𑀲𑀬𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸. ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑀸, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀸𑀤𑀬𑁄’’𑀢𑀺 (𑀤𑀻. 𑀦𑀺. 𑁨.𑁧𑁦𑁩; 𑁩.𑁩𑁫𑁯) 𑀏𑀢𑁂 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸. 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 ¶ , 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬 ‘‘𑀅𑀲𑁆𑀫𑀻’’𑀢𑀺 𑀳𑁄𑀢𑀺, ‘‘𑀇𑀢𑁆𑀣𑀲𑁆𑀫𑀻’’𑀢𑀺, ‘‘𑀏𑀯𑀲𑁆𑀫𑀻’’𑀢𑀺, ‘‘𑀅𑀜𑁆𑀜𑀣𑀸𑀲𑁆𑀫𑀻’’𑀢𑀺, ‘‘𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀇𑀢𑁆𑀣𑀁 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀏𑀯𑀁 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀅𑀜𑁆𑀜𑀣𑀸 𑀪𑀯𑀺𑀲𑁆𑀲’’𑀦𑁆𑀢𑀺, ‘‘𑀅𑀲𑀲𑁆𑀫𑀻’’𑀢𑀺, ‘‘𑀲𑀸𑀢𑀲𑁆𑀫𑀻’’𑀢𑀺, ‘‘𑀲𑀺𑀬’’𑀦𑁆𑀢𑀺, ‘‘𑀇𑀢𑁆𑀣𑀁 𑀲𑀺𑀬’’𑀦𑁆𑀢𑀺, ‘‘𑀏𑀯𑀁 𑀲𑀺𑀬’’𑀦𑁆𑀢𑀺, ‘‘𑀅𑀜𑁆𑀜𑀣𑀸 𑀲𑀺𑀬’’𑀦𑁆𑀢𑀺, ‘‘𑀅𑀧𑀸𑀳𑀁 𑀲𑀺𑀬’’𑀦𑁆𑀢𑀺, ‘‘𑀅𑀧𑀸𑀳𑀁 𑀇𑀢𑁆𑀣𑀁 𑀲𑀺𑀬’’𑀦𑁆𑀢𑀺, ‘‘𑀅𑀧𑀸𑀳𑀁 𑀏𑀯𑀁 𑀲𑀺𑀬’’𑀦𑁆𑀢𑀺, ‘‘𑀅𑀧𑀸𑀳𑀁 𑀅𑀜𑁆𑀜𑀣𑀸 𑀲𑀺𑀬’’𑀦𑁆𑀢𑀺 𑀳𑁄𑀢𑀻𑀢𑀺 𑀅𑀝𑁆𑀞𑀸𑀭𑀲, 𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬 ‘‘𑀇𑀫𑀺𑀦𑀸 𑀅𑀲𑁆𑀫𑀻’’𑀢𑀺 𑀳𑁄𑀢𑀺, ‘‘𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻’’𑀢𑀺, ‘‘𑀇𑀫𑀺𑀦𑀸 𑀏𑀯𑀲𑁆𑀫𑀻’’𑀢𑀺, ‘‘𑀇𑀫𑀺𑀦𑀸 𑀅𑀜𑁆𑀜𑀣𑀸𑀲𑁆𑀫𑀻’’𑀢𑀺𑀆𑀤𑀺𑀓𑀸 (𑀯𑀺𑀪. 𑁯𑁭𑁫-𑁯𑁭𑁬) 𑀯𑀼𑀢𑁆𑀢𑀦𑀬𑀸 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲, 𑀅𑀢𑀻𑀢𑀸 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺.

𑀧𑀪𑁂𑀤-𑀲𑀤𑁆𑀤𑁄 ¶ 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀮𑁄𑀪𑀧𑁆𑀧𑀪𑁂𑀤𑀸 𑀤𑁄𑀲𑀧𑁆𑀧𑀪𑁂𑀤𑀸 𑀬𑀸𑀯 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤𑀸𑀢𑀺. 𑀲𑀩𑁆𑀩𑀸𑀦𑀺 𑀲𑀢𑁆𑀢𑀸𑀦𑀁 𑀤𑀭𑀣𑀧𑀭𑀺𑀴𑀸𑀳𑀓𑀭𑀸𑀦𑀺 𑀓𑀺𑀮𑁂𑀲𑀸𑀦𑀁 𑀅𑀦𑁂𑀓𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺 𑀅𑀪𑀜𑁆𑀚𑀻𑀢𑀺 𑀬𑁄𑀚𑀦𑀸. 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑀢𑁄 𑀳𑀺 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀪𑀸𑀕𑀢𑁄 𑀘 𑀅𑀦𑀦𑁆𑀢𑀧𑁆𑀧𑀪𑁂𑀤𑀸 𑀓𑀺𑀮𑁂𑀲𑀸𑀢𑀺. 𑀲𑀗𑁆𑀔𑁂𑀧𑀢𑁄𑀢𑀺 𑀏𑀢𑁆𑀣 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀓𑀺𑀮𑁂𑀲𑀫𑀸𑀭𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀁, 𑀲𑀳𑀸𑀬𑀯𑁂𑀓𑀮𑁆𑀮𑀓𑀭𑀡𑀯𑀲𑁂𑀦 𑀲𑀩𑁆𑀩𑀣𑀸 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀁, 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀫𑀸𑀭𑀜𑁆𑀘 𑀅𑀪𑀜𑁆𑀚𑀺 𑀪𑀕𑁆𑀕𑁂 𑀅𑀓𑀸𑀲𑀺. 𑀧𑀭𑀺𑀲𑁆𑀲𑀬𑀸𑀦𑀦𑁆𑀢𑀺 𑀉𑀧𑀤𑁆𑀤𑀯𑀸𑀦𑀁. 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀫𑀸𑀭𑀡𑀝𑁆𑀞𑁂𑀦 𑀯𑀺𑀩𑀸𑀥𑀦𑀝𑁆𑀞𑁂𑀦 𑀓𑀺𑀮𑁂𑀲𑀸𑀯 𑀫𑀸𑀭𑁄𑀢𑀺 𑀓𑀺𑀮𑁂𑀲𑀫𑀸𑀭𑁄. 𑀯𑀥𑀓𑀝𑁆𑀞𑁂𑀦 𑀔𑀦𑁆𑀥𑀸𑀯 𑀫𑀸𑀭𑁄𑀢𑀺 𑀔𑀦𑁆𑀥𑀫𑀸𑀭𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀯𑀥𑀓𑀁 𑀭𑀽𑀧𑀁 ‘𑀯𑀥𑀓𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁮𑁫). 𑀚𑀸𑀢𑀺𑀚𑀭𑀸𑀤𑀺𑀫𑀳𑀸𑀩𑁆𑀬𑀲𑀦𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀪𑀺𑀲𑀗𑁆𑀔𑀸𑀭𑁄𑀯 𑀫𑀸𑀭𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄. 𑀲𑀁𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀕𑀼𑀡𑀫𑀸𑀭𑀡𑀝𑁆𑀞𑁂𑀦 𑀤𑁂𑀯𑀧𑀼𑀢𑁆𑀢𑁄𑀯 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄. 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑁆𑀲, 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀜𑁆𑀘 𑀚𑀸𑀦𑀺𑀓𑀭𑀡𑁂𑀦 𑀫𑀳𑀸𑀩𑀸𑀥𑀭𑀽𑀧𑀢𑁆𑀢𑀸 𑀫𑀘𑁆𑀘𑀼 𑀏𑀯 𑀫𑀸𑀭𑁄𑀢𑀺 𑀫𑀘𑁆𑀘𑀼𑀫𑀸𑀭𑁄.

𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀥𑀭𑀲𑁆𑀲𑀸𑀢𑀺 𑀅𑀦𑁂𑀓𑀲𑀢𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀳𑀢𑁄 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺, 𑀇𑀢𑀭𑀸𑀲𑀁 𑀨𑀮𑀲𑀫𑁆𑀧𑀤𑀸𑀦𑀁 𑀫𑀽𑀮𑀪𑀸𑀯𑀢𑁄, 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀘. 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺, 𑀧𑀳𑀸𑀦𑀲𑀫𑁆𑀧𑀤𑀸𑀧𑀼𑀩𑁆𑀩𑀓𑀢𑁆𑀢𑀸 𑀜𑀸𑀡𑀲𑀫𑁆𑀧𑀤𑀸𑀤𑀻𑀦𑀁. 𑀪𑀸𑀕𑁆𑀬𑀯𑀢𑀸𑀬 𑀮𑁄𑀓𑀺𑀬𑀸𑀦𑀁 𑀩𑀳𑀼𑀫𑀢𑀪𑀸𑀯𑁄. 𑀪𑀕𑁆𑀕𑀤𑁄𑀲𑀢𑀸𑀬 𑀧𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄𑀢𑀺 𑀬𑁄𑀚𑀦𑀸. 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀜𑁆𑀜𑀯𑀦𑁆𑀢𑀁 𑀳𑀺 𑀕𑀳𑀝𑁆𑀞𑀸 𑀔𑀢𑁆𑀢𑀺𑀬𑀸𑀤𑀬𑁄 𑀅𑀪𑀺𑀕𑀘𑁆𑀙𑀦𑁆𑀢𑀺, 𑀧𑀳𑀻𑀦𑀤𑁄𑀲𑀁 𑀧𑀩𑁆𑀩𑀚𑀺𑀢𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 ¶ ‘‘𑀤𑁄𑀲𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀅𑀪𑀺𑀕𑀢𑀸𑀦𑀜𑁆𑀘 𑀦𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄, 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀲𑀩𑁆𑀪𑀸𑀯𑀢𑁄. 𑀭𑀽𑀧𑀓𑀸𑀬𑀁 𑀢𑀲𑁆𑀲 𑀧𑀲𑀸𑀤𑀘𑀓𑁆𑀔𑀼𑀦𑀸, 𑀥𑀫𑁆𑀫𑀓𑀸𑀬𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀤𑀼𑀓𑁆𑀔𑀤𑁆𑀯𑀬𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄 𑀉𑀧𑀕𑀢𑀸𑀦𑀜𑁆𑀘 𑀢𑁂𑀲𑀁 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸, ‘‘𑀧𑀼𑀩𑁆𑀩𑁂 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀫𑀬𑀸 𑀅𑀬𑀁 ¶ 𑀮𑁄𑀓𑀕𑁆𑀕𑀪𑀸𑀯𑁄 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑀦𑁂𑀦 𑀅𑀪𑀺𑀕𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀲𑀁𑀬𑁄𑀚𑀦𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺.

𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑀲𑀻𑀪𑀸𑀯𑀸𑀧𑀸𑀤𑀦𑀁, 𑀬𑁂𑀦 𑀧𑀝𑀺𑀓𑁆𑀓𑀽𑀮𑀸𑀤𑀻𑀲𑀼 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀢𑀸𑀤𑀺𑀯𑀺𑀳𑀸𑀭𑀲𑀺𑀤𑁆𑀥𑀺, 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀆𑀤𑀺𑀓𑁄 𑀇𑀤𑁆𑀥𑀺𑀯𑀺𑀥𑁄𑀧𑀺 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀫𑁂𑀯 𑀘𑀺𑀢𑁆𑀢𑀪𑀸𑀯𑀦𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀇𑀚𑁆𑀛𑀦𑀢𑁄. 𑀅𑀡𑀺𑀫𑀸𑀮𑀖𑀺𑀫𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀺𑀫𑀸 𑀧𑀢𑁆𑀢𑀺 𑀧𑀸𑀓𑀫𑁆𑀫𑀁 𑀈𑀲𑀺𑀢𑀸 𑀯𑀲𑀺𑀢𑀸 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸𑀢𑀺 𑀇𑀫𑁂 𑀙𑀧𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀓𑀸𑀬𑀲𑁆𑀲 𑀅𑀡𑀼𑀪𑀸𑀯𑀓𑀭𑀡𑀁 𑀅𑀡𑀺𑀫𑀸. 𑀮𑀳𑀼𑀪𑀸𑀯𑁄 𑀮𑀖𑀺𑀫𑀸 𑀆𑀓𑀸𑀲𑁂 𑀧𑀤𑀲𑀸 𑀕𑀫𑀦𑀸𑀤𑀺𑀦𑀸. 𑀫𑀳𑀢𑁆𑀢𑀁 𑀫𑀳𑀺𑀫𑀸 𑀓𑀸𑀬𑀲𑁆𑀲 𑀫𑀳𑀦𑁆𑀢𑀢𑀸𑀧𑀸𑀤𑀦𑀁. 𑀇𑀝𑁆𑀞𑀤𑁂𑀲𑀧𑁆𑀧𑀢𑁆𑀢𑀺 𑀧𑀢𑁆𑀢𑀺. 𑀅𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀇𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑀁 𑀧𑀸𑀓𑀫𑁆𑀫𑀁. 𑀲𑀬𑀁𑀯𑀲𑀺𑀢𑀸 𑀇𑀲𑁆𑀲𑀭𑀪𑀸𑀯𑁄 𑀈𑀲𑀺𑀢𑀸. 𑀇𑀤𑁆𑀥𑀺𑀯𑀺𑀥𑁂 𑀯𑀲𑀻𑀪𑀸𑀯𑁄 𑀯𑀲𑀺𑀢𑀸. 𑀆𑀓𑀸𑀲𑁂𑀦 𑀯𑀸 𑀕𑀘𑁆𑀙𑀢𑁄, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀭𑁄𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀯𑁄𑀲𑀸𑀦𑀧𑁆𑀧𑀢𑁆𑀢𑀺 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸. ‘‘𑀓𑀼𑀫𑀸𑀭𑀓𑀭𑀽𑀧𑀸𑀤𑀺𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀫𑀺𑀤𑀁 𑀅𑀝𑁆𑀞𑀯𑀺𑀥𑀁 𑀮𑁄𑀓𑀺𑀬𑀲𑀫𑁆𑀫𑀢𑀁 𑀇𑀲𑁆𑀲𑀭𑀺𑀬𑀁. 𑀢𑀁 𑀧𑀦 𑀪𑀕𑀯𑀢𑁄 𑀇𑀤𑁆𑀥𑀺𑀯𑀺𑀥𑀦𑁆𑀢𑁄𑀕𑀥𑀁, 𑀅𑀦𑀜𑁆𑀜𑀲𑀸𑀥𑀸𑀭𑀡𑀜𑁆𑀘𑀸𑀢𑀺 𑀆𑀳 ‘‘𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀢𑁆𑀣𑀻’’𑀢𑀺.

𑀓𑁂𑀲𑀜𑁆𑀘𑀺 𑀧𑀤𑁂𑀲𑀯𑀼𑀢𑁆𑀢𑀺, 𑀅𑀬𑀣𑀸𑀪𑀽𑀢𑀕𑀼𑀡𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀅𑀧𑀭𑀺𑀲𑀼𑀤𑁆𑀥𑁄 𑀘 𑀬𑀲𑁄 𑀳𑁄𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥 𑀅𑀥𑀺𑀕𑀢𑀲𑀢𑁆𑀣𑀼𑀕𑀼𑀡𑀸𑀦𑀁 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀸𑀦𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀬𑀲𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀆𑀳 ‘‘𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄’’𑀢𑀺. 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀢𑁆𑀢𑀸 𑀏𑀯 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄. 𑀅𑀦𑀯𑀲𑁂𑀲𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻 𑀲𑀩𑁆𑀩𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑁄𑀪𑀸. ‘‘𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀬𑀁 𑀬𑀁 𑀏𑀢𑁂𑀦 𑀮𑁄𑀓𑀦𑀸𑀣𑁂𑀦 𑀇𑀘𑁆𑀙𑀺𑀢𑀁 𑀫𑀦𑁄𑀯𑀘𑀻𑀧𑀡𑀺𑀥𑀸𑀦𑀯𑀲𑁂𑀦, 𑀧𑀢𑁆𑀣𑀺𑀢𑀁 𑀓𑀸𑀬𑀧𑀡𑀺𑀥𑀸𑀦𑀯𑀲𑁂𑀦. 𑀢𑀣𑁂𑀯𑀸𑀢𑀺 𑀧𑀡𑀺𑀥𑀸𑀦𑀸𑀦𑀼𑀭𑀽𑀧𑀫𑁂𑀯. 𑀯𑀻𑀭𑀺𑀬𑀧𑀸𑀭𑀫𑀺𑀪𑀸𑀯𑀧𑁆𑀧𑀢𑁆𑀢𑁄, 𑀅𑀭𑀺𑀬𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄.

𑀪𑁂𑀤𑁂𑀳𑀻𑀢𑀺 𑀲𑀩𑁆𑀩𑀢𑁆𑀢𑀺𑀓𑀤𑀼𑀓𑀧𑀤𑀲𑀁𑀳𑀺𑀢𑁂𑀳𑀺 𑀧𑀪𑁂𑀤𑁂𑀳𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 ¶ 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀆𑀕𑀢𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄𑀯 𑀲𑀗𑁆𑀕𑀳𑀺𑀢𑀸, 𑀅𑀣 𑀔𑁄 𑀲𑀗𑁆𑀕𑀳𑀸𑀤𑀬𑁄, 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀬𑁄, 𑀞𑀧𑀦𑀸𑀤𑀬𑁄 ¶ , 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀻𑀴𑀦𑀝𑁆𑀞𑁄 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀲𑁆𑀲 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀗𑁆𑀔𑀢𑀝𑁆𑀞𑁄 𑀲𑀫𑁂𑀘𑁆𑀘𑀲𑀫𑁆𑀪𑀽𑀬𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄. 𑀲𑀦𑁆𑀢𑀸𑀧𑀝𑁆𑀞𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀻𑀳𑀺 𑀲𑀦𑁆𑀢𑀧𑁆𑀧𑀦𑀁 𑀧𑀭𑀺𑀤𑀳𑀦𑀁. 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀚𑀭𑀸𑀬, 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀦𑀁. 𑀦𑀺𑀤𑀸𑀦𑀝𑁆𑀞𑁄 ‘‘𑀇𑀤𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀦𑀺𑀤𑀤𑀦𑁆𑀢𑀲𑁆𑀲 𑀯𑀺𑀬 𑀲𑀫𑀼𑀝𑁆𑀞𑀸𑀧𑀦𑀁. 𑀲𑀁𑀬𑁄𑀕𑀝𑁆𑀞𑁄 𑀲𑀁𑀲𑀸𑀭𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀦𑀁. 𑀧𑀮𑀺𑀩𑁄𑀥𑀝𑁆𑀞𑁄 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀦𑀺𑀯𑀸𑀭𑀡𑀁. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀲𑀩𑁆𑀩𑀽𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀪𑀸𑀯𑀢𑁆𑀢𑀸 𑀢𑀢𑁄 𑀯𑀺𑀦𑀺𑀲𑁆𑀲𑀝𑀢𑀸, 𑀢𑀦𑁆𑀦𑀺𑀲𑁆𑀲𑀭𑀡𑀦𑀺𑀫𑀺𑀢𑁆𑀢𑀢𑀸 𑀯𑀸. 𑀯𑀺𑀯𑁂𑀓𑀝𑁆𑀞𑁄 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀲𑀁𑀬𑀼𑀢𑁆𑀢𑀢𑀸. 𑀅𑀲𑀗𑁆𑀔𑀢𑀝𑁆𑀞𑁄 𑀓𑁂𑀦𑀘𑀺𑀧𑀺 𑀧𑀘𑁆𑀘𑀬𑁂𑀦 𑀅𑀦𑀪𑀺𑀲𑀗𑁆𑀔𑀢𑀢𑀸. 𑀅𑀫𑀢𑀝𑁆𑀞𑁄 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀫𑀭𑀡𑀸𑀪𑀸𑀯𑁄, 𑀲𑀢𑁆𑀢𑀸𑀦𑀁 𑀫𑀭𑀡𑀸𑀪𑀸𑀯𑀳𑁂𑀢𑀼𑀢𑀸 𑀯𑀸. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄. 𑀳𑁂𑀢𑀼𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀪𑀸𑀯𑁄. 𑀤𑀲𑁆𑀲𑀦𑀝𑁆𑀞𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀁. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀥𑀺𑀧𑀘𑁆𑀘𑀓𑀭𑀡𑀁, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄 𑀯𑀸 𑀯𑀺𑀲𑁂𑀲𑀢𑁄 𑀫𑀕𑁆𑀕𑀸𑀥𑀺𑀧𑀢𑀺𑀯𑀘𑀦𑀢𑁄. 𑀲𑀢𑀺𑀧𑀺 𑀳𑀺 𑀛𑀸𑀦𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂 ‘‘𑀛𑀸𑀦𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀺𑀁 𑀅𑀯𑀢𑁆𑀯𑀸 ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀢𑁆𑀣𑀺 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂 𑀯𑀺𑀲𑁂𑀲𑁄’’𑀢𑀺. 𑀏𑀢𑁂 𑀘 𑀧𑀻𑀴𑀦𑀸𑀤𑀬𑁄 𑀲𑁄𑀴𑀲𑀸𑀓𑀸𑀭𑀸 𑀦𑀸𑀫. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀜𑁆𑀜𑁂𑀲𑀼 𑀭𑁄𑀕𑀕𑀡𑁆𑀞𑀸𑀤𑀺𑀆𑀓𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀏𑀢𑁂𑀯 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀻𑀢𑀺? 𑀲𑀮𑀓𑁆𑀔𑀡𑀢𑁄 𑀘 𑀲𑀘𑁆𑀘𑀦𑁆𑀢𑀭𑀤𑀲𑁆𑀲𑀦𑀢𑁄 𑀘 𑀆𑀯𑀺𑀪𑀸𑀯𑀢𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀭𑀢𑁄 𑀲𑀘𑁆𑀘𑀓𑀣𑀸𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀤𑀺𑀩𑁆𑀩𑀯𑀺𑀳𑀸𑀭𑁄 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀫𑁂𑀢𑁆𑀢𑀸𑀤𑀺𑀚𑁆𑀛𑀸𑀦𑀸𑀦𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀅𑀭𑀺𑀬𑀯𑀺𑀳𑀸𑀭𑁄. 𑀓𑀸𑀫𑁂𑀳𑀺 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀸𑀯𑀲𑁂𑀦 𑀏𑀓𑀻𑀪𑀸𑀯𑁄 𑀓𑀸𑀬𑀯𑀺𑀯𑁂𑀓𑁄. 𑀧𑀞𑀫𑀚𑁆𑀛𑀸𑀦𑀸𑀤𑀺𑀦𑀸 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑀢𑀸 𑀘𑀺𑀢𑁆𑀢𑀯𑀺𑀯𑁂𑀓𑁄. 𑀉𑀧𑀥𑀺𑀯𑀺𑀯𑁂𑀓𑁄 𑀦𑀺𑀩𑁆𑀩𑀸𑀦𑀁. 𑀅𑀜𑁆𑀜𑁂𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀤𑀺𑀓𑁂.

𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀪𑀯𑁂𑀲𑀼 𑀧𑀭𑀺𑀩𑁆𑀪𑀫𑀦𑀁, 𑀲𑁄 𑀘 𑀢𑀡𑁆𑀳𑀸𑀧𑁆𑀧𑀥𑀸𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦’’𑀦𑁆𑀢𑀺. 𑀯𑀦𑁆𑀢𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑀼𑀔𑁂𑀦 𑀉𑀕𑁆𑀕𑀺𑀭𑀺𑀢𑀁 𑀧𑀼𑀦 𑀅𑀧𑀘𑁆𑀘𑀸𑀯𑀫𑀦𑀯𑀲𑁂𑀦 𑀙𑀟𑁆𑀟𑀺𑀢𑀁. 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸…𑀧𑁂… 𑀫𑁂𑀔𑀮𑀸’’𑀢𑀺.

𑀅𑀧𑀭𑁄 ¶ ¶ 𑀦𑀬𑁄 𑁋 𑀪𑀸𑀕𑀯𑀸𑀢𑀺 𑀪𑀕𑀯𑀸, 𑀪𑀢𑀯𑀸𑀢𑀺 𑀪𑀕𑀯𑀸, 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸, 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄.

𑀢𑀢𑁆𑀣 𑀓𑀣𑀁 𑀪𑀸𑀕𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀕𑀼𑀡𑀓𑁄𑀝𑁆𑀞𑀸𑀲𑀸, 𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀢𑀣𑀸𑀕𑀢𑀲𑁆𑀲 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁, 𑀲𑀤𑁆𑀥𑀸 𑀯𑀻𑀭𑀺𑀬𑀁, 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺, 𑀢𑀬𑁄 𑀲𑀫𑁆𑀫𑀸𑀯𑀺𑀢𑀓𑁆𑀓𑀸, 𑀢𑀺𑀲𑁆𑀲𑁄 𑀅𑀦𑀯𑀚𑁆𑀚𑀲𑀜𑁆𑀜𑀸, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺, 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀲𑀜𑁆𑀜𑀸, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑀸, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑀸, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸, 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀤𑁂𑀲𑀦𑀸, 𑀲𑀢𑁆𑀢𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸, 𑀅𑀝𑁆𑀞𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸, 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑀸, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸, 𑀅𑀝𑁆𑀞𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸, 𑀦𑀯 𑀲𑀜𑁆𑀜𑀸, 𑀦𑀯 𑀦𑀸𑀦𑀢𑁆𑀢𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀸𑀭𑀡𑀸 𑀥𑀫𑁆𑀫𑀸, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑀲 𑀅𑀲𑁂𑀓𑁆𑀔𑀥𑀫𑁆𑀫𑀸, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸, 𑀤𑁆𑀯𑀸𑀤𑀲 ¶ 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀲𑁄𑀴𑀲 𑀅𑀧𑀭𑀦𑁆𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺 ¶ , 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺, 𑀧𑀭𑁄𑀧𑀜𑁆𑀜𑀸𑀲 𑀓𑀼𑀲𑀮𑀥𑀫𑁆𑀫𑀸, 𑀲𑀢𑁆𑀢𑀲𑀢𑁆𑀢𑀢𑀺𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺, 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑁂𑀤𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸 𑀕𑀼𑀡𑀪𑀸𑀕𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀕𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀢𑀸𑀯 𑀪𑀸𑀕𑀯𑀸𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀲𑀻𑀮𑀸𑀤𑀬𑁄 𑀲𑀩𑁆𑀩𑁂, 𑀕𑀼𑀡𑀪𑀸𑀕𑀸 𑀅𑀲𑁂𑀲𑀢𑁄;

𑀯𑀺𑀚𑁆𑀚𑀦𑁆𑀢𑀺 𑀲𑀼𑀕𑀢𑁂 𑀢𑀲𑁆𑀫𑀸, ‘‘𑀪𑀕𑀯𑀸’’𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀣𑀁 𑀪𑀢𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀓𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀭𑀺𑀧𑀽𑀭𑁂𑀢𑀩𑁆𑀩𑀸 𑀤𑀸𑀦𑀧𑀸𑀭𑀫𑀻, 𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀲𑀘𑁆𑀘𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀦𑀬𑀦, 𑀥𑀦, 𑀭𑀚𑁆𑀚, 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸, 𑀧𑀼𑀩𑁆𑀩𑀬𑁄𑀕𑁄, 𑀧𑀼𑀩𑁆𑀩𑀘𑀭𑀺𑀬𑀸, 𑀥𑀫𑁆𑀫𑀓𑁆𑀔𑀸𑀦𑀁, 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀢𑀺 𑀏𑀯𑀫𑀸𑀤𑀬𑁄, 𑀲𑀗𑁆𑀔𑁂𑀧𑀢𑁄 𑀯𑀸 𑀲𑀩𑁆𑀩𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑀜𑀸𑀡𑀲𑀫𑁆𑀪𑀸𑀭𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸, 𑀢𑁂 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑀸𑀦𑀺 𑀬𑀣𑀸 𑀳𑀸𑀦𑀪𑀸𑀕𑀺𑀬𑀸, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸, 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀦𑁆𑀢𑀺, 𑀅𑀣 𑀔𑁄 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀅𑀦𑀯𑀲𑁂𑀲𑀢𑁄 𑀪𑀢𑀸 𑀲𑀫𑁆𑀪𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀢-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸. 𑀅𑀣 𑀯𑀸 𑀪𑀢𑀯𑀸𑀢𑀺 𑀢𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦 𑀪𑀭𑀺 𑀲𑀫𑁆𑀪𑀭𑀺, 𑀧𑀭𑀺𑀧𑀽𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀪𑀢𑀯𑀸𑀢𑀺 𑀪𑀕𑀯𑀸.

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 ¶ 𑀲𑀩𑁆𑀩𑁂, 𑀤𑀸𑀦𑀧𑀸𑀭𑀫𑀺𑀆𑀤𑀺𑀓𑁂;

𑀲𑀫𑁆𑀪𑀸𑀭𑁂 𑀪𑀢𑀯𑀸 𑀦𑀸𑀣𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄.

𑀓𑀣𑀁 ¶ 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀬𑁂 𑀢𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀪𑀸𑀕𑀸, 𑀢𑁂 𑀅𑀦𑀯𑀲𑁂𑀲𑀢𑁄 𑀮𑁄𑀓𑀳𑀺𑀢𑀢𑁆𑀣𑀁, 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀦𑀺𑀘𑁆𑀘𑀓𑀧𑁆𑀧𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀦𑀺 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀻𑀢𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂𑀲𑀼, 𑀓𑀼𑀲𑀮𑀸𑀤𑀻𑀲𑀼, 𑀔𑀦𑁆𑀥𑀸𑀤𑀻𑀲𑀼 𑀘 𑀬𑁂 𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀸 𑀘𑀢𑀼𑀩𑁆𑀩𑀺𑀥𑀸 𑀅𑀪𑀺𑀲𑀫𑀬𑀪𑀸𑀕𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 ‘‘𑀘𑀓𑁆𑀔𑀼𑀁 𑀧𑀭𑀺𑀜𑁆𑀜𑁂𑀬𑁆𑀬𑀁…𑀧𑁂… 𑀚𑀭𑀸𑀫𑀭𑀡𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀳𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨𑁧) 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀪𑁂𑀤𑀸 𑀪𑀸𑀯𑁂𑀢𑀩𑁆𑀩𑀪𑀸𑀕𑀸 𑀘 𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀯𑀦𑀺 𑀪𑀚𑀺 𑀬𑀣𑀸𑀭𑀳𑀁 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀦𑀁 𑀯𑀲𑁂𑀦 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀬𑁂 𑀇𑀫𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀕𑀼𑀡𑀪𑀸𑀕𑀸, ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀢𑁂 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀧𑀢𑀺𑀝𑁆𑀞𑀧𑁂𑀬𑁆𑀬’’𑀦𑁆𑀢𑀺 𑀫𑀳𑀸𑀓𑀭𑀼𑀡𑀸𑀬 𑀯𑀦𑀺 𑀅𑀪𑀺𑀧𑀢𑁆𑀣𑀬𑀺, 𑀲𑀸 𑀘𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀸𑀯𑀳𑀸 𑀅𑀳𑁄𑀲𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀜𑁂𑀬𑁆𑀬𑀲𑀫𑀸𑀧𑀢𑁆𑀢𑀺-𑀕𑀼𑀡𑀪𑀸𑀕𑁂 𑀢𑀣𑀸𑀕𑀢𑁄;

𑀪𑀚𑀺 𑀧𑀢𑁆𑀣𑀬𑀺 𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀪𑀕𑀯𑀸 𑀢𑀢𑁄.

𑀓𑀣𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀲𑀫𑀸𑀲𑀢𑁄 𑀢𑀸𑀯 𑀓𑀢𑀧𑀼𑀜𑁆𑀜𑁂𑀳𑀺 𑀧𑀬𑁄𑀕𑀲𑀫𑁆𑀧𑀦𑁆𑀦𑁂𑀳𑀺 𑀬𑀣𑀸𑀯𑀺𑀪𑀯𑀁 𑀪𑀚𑀻𑀬𑀦𑁆𑀢𑀻𑀢𑀺 𑀪𑀕𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀮𑁄𑀓𑀺𑀬𑁂 𑀢𑀸𑀯 𑀢𑀣𑀸𑀕𑀢𑁄 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀬𑀢𑁆𑀣 𑀧𑀢𑀺𑀝𑁆𑀞𑀸𑀬 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂 𑀲𑀫𑀦𑁆𑀦𑀸𑀦𑁂𑀦𑁆𑀢𑁄 𑀩𑀼𑀤𑁆𑀥𑀥𑀫𑁆𑀫𑁂 𑀧𑀭𑀺𑀧𑀸𑀘𑁂𑀲𑀺. 𑀩𑀼𑀤𑁆𑀥𑀪𑀽𑀢𑁄 ¶ 𑀧𑀦 𑀢𑁂 𑀦𑀺𑀭𑀯𑀚𑁆𑀚𑀲𑀼𑀔𑀽𑀧𑀲𑀁𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀮𑁄𑀓𑀼𑀢𑁆𑀢𑀭𑁂𑀧𑀺 𑀯𑀦𑀺 𑀪𑀚𑀺 𑀲𑁂𑀯𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀤𑁂𑀲𑀭𑀚𑁆𑀚𑀇𑀲𑁆𑀲𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀤𑁂𑀯𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀲𑁂𑀦, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 𑀘 𑀅𑀦𑁂𑀓𑀯𑀺𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀪𑀕𑁂 𑀯𑀦𑀺 𑀪𑀚𑀺 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀸 ¶ 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀮𑁄𑀓𑁂, 𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀧𑀼𑀣𑀽;

𑀲𑀩𑁆𑀩𑀸 𑀢𑀸 𑀪𑀚𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄.

𑀓𑀣𑀁 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸? 𑀪𑀢𑁆𑀢𑀸 𑀤𑀴𑁆𑀳𑀪𑀢𑁆𑀢𑀺𑀓𑀸 𑀅𑀲𑁆𑀲 𑀩𑀳𑀽 𑀅𑀢𑁆𑀣𑀻𑀢𑀺 𑀪𑀢𑁆𑀢𑀯𑀸. 𑀢𑀣𑀸𑀕𑀢𑁄 𑀳𑀺 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺 𑀪𑀸𑀯𑀢𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀯𑀺𑀲𑁂𑀲𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁂𑀦 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀺𑀦𑀸𑀲𑀼𑀯𑀺𑀧𑀼𑀮𑁂𑀦, 𑀲𑀼𑀯𑀺𑀲𑀼𑀤𑁆𑀥𑁂𑀦 𑀘 𑀣𑀼𑀢𑀺𑀖𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀆𑀤𑀻𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄, 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀦𑀺𑀭𑀢𑀺𑀲𑀬𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀪𑀸𑀯𑀢𑁄 𑀘 ‘‘𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄’’𑀢𑀺 𑀏𑀯𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀩𑁆𑀩𑀣𑀸𑀧𑀺 𑀧𑀲𑀸𑀤𑀸𑀯𑀳𑀪𑀸𑀯𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀲𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀆𑀤𑀭𑀩𑀳𑀼𑀫𑀸𑀦𑀕𑀸𑀭𑀯𑀸𑀬𑀢𑀦𑀢𑀸𑀬 𑀧𑀭𑀫𑀧𑁂𑀫𑀲𑀫𑁆𑀪𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂 𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀸 𑀢𑁂𑀲𑀁 𑀲𑀫𑁆𑀪𑀢𑁆𑀢𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸𑀢𑀺. 𑀢𑀣𑀸 𑀳𑀺 𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀧𑀺 𑀢𑀢𑁆𑀣 𑀧𑀲𑀸𑀤𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀲 𑀯𑀸 𑀆𑀡𑀁 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘‘𑀲𑁂𑀬𑁆𑀬𑀣𑀸𑀧𑀺 ¶ , 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫) 𑀘.

𑀏𑀯𑀁 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑀲𑁆𑀲 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸.

𑀕𑀼𑀡𑀸𑀢𑀺𑀲𑀬𑀬𑀼𑀢𑁆𑀢𑀲𑁆𑀲 ¶ , 𑀬𑀲𑁆𑀫𑀸 𑀮𑁄𑀓𑀳𑀺𑀢𑁂𑀲𑀺𑀦𑁄;

𑀲𑀫𑁆𑀪𑀢𑁆𑀢𑀸 𑀩𑀳𑀯𑁄 𑀲𑀢𑁆𑀣𑀼, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀺.

𑀓𑀣𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑀪𑀽𑀢𑁄𑀧𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀪𑀕𑀲𑀗𑁆𑀔𑀸𑀢𑀁 𑀲𑀺𑀭𑀺𑀁, 𑀇𑀲𑁆𑀲𑀭𑀺𑀬𑀁, 𑀬𑀲𑀜𑁆𑀘 𑀯𑀫𑀺 𑀉𑀕𑁆𑀕𑀺𑀭𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺. 𑀢𑀣𑀸 𑀳𑀺𑀲𑁆𑀲 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑀓𑀸𑀮𑁂 (𑀚𑀸. 𑁧.𑁧𑁫.𑁨𑁧𑁧 𑀆𑀤𑀬𑁄) 𑀳𑀢𑁆𑀣𑀺𑀧𑀸𑀮𑀓𑀼𑀫𑀸𑀭𑀓𑀸𑀮𑁂 (𑀚𑀸. 𑁧.𑁧𑁫.𑁩𑁩𑁭 𑀆𑀤𑀬𑁄) 𑀅𑀬𑁄𑀖𑀭𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁧.𑁧𑁫.𑁩𑁬𑁩 𑀆𑀤𑀬𑁄) 𑀫𑀽𑀕𑀧𑀓𑁆𑀔𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁨.𑁨𑁨.𑁧 𑀆𑀤𑀬𑁄) 𑀘𑀽𑀴𑀲𑀼𑀢𑀲𑁄𑀫𑀓𑀸𑀮𑁂𑀢𑀺 (𑀚𑀸. 𑁨.𑁧𑁭.𑁧𑁯𑁫 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦 𑀤𑁂𑀯𑀭𑀚𑁆𑀚𑀲𑀤𑀺𑀲𑀸𑀬 𑀭𑀚𑁆𑀚𑀲𑀺𑀭𑀺𑀬𑀸 𑀧𑀭𑀺𑀘𑁆𑀘𑀢𑁆𑀢𑀅𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀘𑀭𑀺𑀫𑀢𑁆𑀢𑀪𑀸𑀯𑁂𑀧𑀺 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑀲𑀤𑀺𑀲𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀁 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀜𑁆𑀘 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀦𑀺𑀭𑀧𑁂𑀓𑁆𑀔𑁄 𑀧𑀳𑀸𑀬 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀇𑀫𑁂 𑀲𑀺𑀭𑀺𑀆𑀤𑀺𑀓𑁂 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀸 𑀲𑁄𑀪𑀸 𑀓𑀧𑁆𑀧𑀝𑁆𑀞𑀺𑀬𑀪𑀸𑀯𑀢𑁄. 𑀢𑁂𑀧𑀺 𑀪𑀕𑀯𑀸 𑀯𑀫𑀺 𑀢𑀦𑁆𑀦𑀺𑀯𑀸𑀲𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀦𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀻𑀢𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀬𑀲𑁆𑀫𑀸, 𑀬𑀲𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀧𑀳𑀸𑀲𑀺 𑀮𑁄𑀓𑀘𑀺𑀢𑁆𑀢𑀜𑁆𑀘, 𑀲𑀼𑀕𑀢𑁄 𑀪𑀕𑀯𑀸 𑀢𑀢𑁄.

𑀓𑀣𑀁 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀪𑀸𑀕𑀸 𑀦𑀸𑀫 𑀲𑀪𑀸𑀯𑀥𑀫𑁆𑀫𑀓𑁄𑀝𑁆𑀞𑀸𑀲𑀸, 𑀢𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀭𑀽𑀧𑀯𑁂𑀤𑀦𑀸𑀤𑀺𑀯𑀲𑁂𑀦, 𑀅𑀢𑀻𑀢𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀯𑀺𑀥𑀸, 𑀢𑁂 𑀘 𑀪𑀕𑀯𑀸 ‘‘𑀲𑀩𑁆𑀩𑀁 𑀧𑀧𑀜𑁆𑀘𑀁, 𑀲𑀩𑁆𑀩𑀁 𑀬𑁄𑀕𑀁, 𑀲𑀩𑁆𑀩𑀁 ¶ 𑀕𑀦𑁆𑀣𑀁, 𑀲𑀩𑁆𑀩𑀁 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀫𑀢𑀁 𑀥𑀸𑀢𑀼𑀁 𑀲𑀫𑀥𑀺𑀕𑀘𑁆𑀙𑀦𑁆𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺 𑀦 𑀧𑀘𑁆𑀘𑀸𑀯𑀫𑀺. 𑀢𑀣𑀸 𑀳𑁂𑀲 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀣𑀯𑀺𑀁 𑀆𑀧𑀁 𑀢𑁂𑀚𑀁 𑀯𑀸𑀬𑀁, 𑀘𑀓𑁆𑀔𑀼𑀁 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀁 𑀓𑀸𑀬𑀁 𑀫𑀦𑀁, 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁, 𑀭𑀽𑀧𑀢𑀡𑁆𑀳𑀁 ¶ …𑀧𑁂… 𑀥𑀫𑁆𑀫𑀢𑀡𑁆𑀳𑀁, 𑀭𑀽𑀧𑀯𑀺𑀢𑀓𑁆𑀓𑀁…𑀧𑁂… 𑀥𑀫𑁆𑀫𑀯𑀺𑀢𑀓𑁆𑀓𑀁, 𑀭𑀽𑀧𑀯𑀺𑀘𑀸𑀭𑀁…𑀧𑁂… 𑀥𑀫𑁆𑀫𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦𑀧𑀺 𑀲𑀩𑁆𑀩𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀅𑀦𑀯𑀲𑁂𑀲𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁂𑀦 𑀙𑀟𑁆𑀟𑀬𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀬𑀁 𑀢𑀁, 𑀆𑀦𑀦𑁆𑀤, 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀢𑀣𑀸𑀕𑀢𑁄 𑀧𑀼𑀦 𑀧𑀘𑁆𑀘𑀸𑀯𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁩).

𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀕𑁂 𑀯𑀫𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀳𑀻𑀦𑀧𑀡𑀻𑀢𑁂 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑀼𑀔𑁂𑀦 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺 𑀧𑀚𑀳𑀺, 𑀧𑀭𑁂𑀲𑀜𑁆𑀘 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸 (𑀫. 𑀦𑀺. 𑁧.𑁨𑁪𑁦). 𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁪𑁦).

𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺-𑀥𑀫𑁆𑀫𑀪𑁂𑀤𑀸 𑀫𑀳𑁂𑀲𑀺𑀦𑀸;

𑀓𑀡𑁆𑀳𑀸 𑀲𑀼𑀓𑁆𑀓𑀸 𑀬𑀢𑁄 𑀯𑀦𑁆𑀢𑀸, 𑀢𑀢𑁄𑀧𑀺 𑀪𑀕𑀯𑀸 𑀫𑀢𑁄.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄’’𑀢𑀺.

𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀗𑁆𑀔𑁂𑀧𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀸 𑀩𑀼𑀤𑁆𑀥𑀕𑀼𑀡𑀸, 𑀢𑀸𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀳𑀸𑀦𑀲𑀫𑁆𑀧𑀤𑀸𑀜𑀸𑀡𑀲𑀫𑁆𑀧𑀤𑀸𑀪𑁂𑀤𑀢𑁄 𑀤𑀼𑀯𑀺𑀥𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸𑀤𑀻𑀦𑀁 𑀢𑀤𑀯𑀺𑀦𑀸𑀪𑀸𑀯𑁂𑀦 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀬𑁄𑀕𑀸𑀲𑀬𑀪𑁂𑀤𑀢𑁄 ¶ 𑀤𑀼𑀯𑀺𑀥𑀸. 𑀢𑀢𑁆𑀣 𑀧𑀬𑁄𑀕𑀢𑁄 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀽𑀧𑀤𑁂𑀲𑁄, 𑀆𑀲𑀬𑀢𑁄 𑀧𑀝𑀺𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑁂𑀲𑀺𑀢𑀸, 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀸𑀤𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘, 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸𑀧𑀺 𑀅𑀢𑁆𑀣𑀘𑀭𑀺𑀬𑀸 ¶ 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀪𑀸𑀯𑀦𑀯𑀲𑁂𑀦 𑀧𑀸𑀴𑀺𑀬𑀁 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀅𑀭𑀳’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀳𑀸𑀦𑀲𑀫𑁆𑀧𑀤𑀸𑀯𑀲𑁂𑀦 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀯𑀺𑀤𑀽’’𑀢𑀺 𑀘 𑀇𑀫𑁂𑀳𑀺 𑀧𑀤𑁂𑀳𑀺 𑀜𑀸𑀡𑀲𑀫𑁆𑀧𑀤𑀸𑀯𑀲𑁂𑀦. 𑀦𑀦𑀼 𑀘 ‘‘𑀮𑁄𑀓𑀯𑀺𑀤𑀽’’𑀢𑀺 𑀇𑀫𑀺𑀦𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸 𑀯𑀺𑀪𑀸𑀯𑀻𑀬𑀢𑀻𑀢𑀺? 𑀲𑀘𑁆𑀘𑀁 𑀯𑀺𑀪𑀸𑀯𑀻𑀬𑀢𑀺, 𑀅𑀢𑁆𑀣𑀺 𑀧𑀦 𑀯𑀺𑀲𑁂𑀲𑁄, ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀪𑀸𑀯𑁄 𑀯𑀺𑀪𑀸𑀯𑀺𑀢𑁄, ‘‘𑀮𑁄𑀓𑀯𑀺𑀤𑀽’’𑀢𑀺 𑀧𑀦 𑀇𑀫𑀺𑀦𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀻𑀦𑀫𑁆𑀧𑀺 𑀆𑀦𑀼𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺. ‘‘𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀸𑀧𑀺 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸. ‘‘𑀲𑀼𑀕𑀢𑁄’’𑀢𑀺 𑀧𑀦 𑀇𑀫𑀺𑀦𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸. ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀪𑀕𑀯𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸. ‘‘𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀢𑁆𑀯𑀸 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑀸𑀧𑀺 𑀩𑀼𑀚𑁆𑀛𑀺 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀩𑁄𑀥𑁂𑀲𑀻’’𑀢𑀺𑀆𑀤𑀺. ‘‘𑀪𑀕𑀯𑀸’’𑀢𑀺 𑀘 𑀇𑀫𑀺𑀦𑀸𑀧𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀲𑀩𑁆𑀩𑀸 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸.

𑀅𑀧𑀭𑁄 𑀦𑀬𑁄 𑁋 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸 𑀩𑀼𑀤𑁆𑀥𑀕𑀼𑀡𑀸. 𑀢𑀢𑁆𑀣 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀮𑁄𑀓𑀯𑀺𑀤𑀽’’𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀨𑀮𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸. ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀇𑀫𑁂𑀳𑀺 𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀧𑀓𑀸𑀲𑀺𑀢𑀸. ‘‘𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀨𑀮𑀯𑀲𑁂𑀦, 𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀘 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸. ‘‘𑀲𑀼𑀕𑀢𑁄 𑀪𑀕𑀯𑀸’’𑀢𑀺 𑀧𑀦 𑀇𑀫𑁂𑀳𑀺 𑀧𑀤𑁂𑀳𑀺 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁫. 𑀢𑀲𑁆𑀲𑀸𑀢𑀺 ¶ 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀬𑁄𑀕𑀺𑀦𑁄. 𑀏𑀯𑀦𑁆𑀢𑀺 ‘‘𑀢𑀢𑁆𑀭𑀸𑀬𑀁 𑀦𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀲𑀫𑀬𑁂. 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀦𑁆𑀢𑀺 𑀭𑀸𑀕𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀁, 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑁂𑀳𑀺 𑀭𑀸𑀕𑁂𑀳𑀺 𑀲𑀳𑀺𑀢𑀁 𑀘𑀺𑀢𑁆𑀢𑀁 𑀅𑀭𑀜𑁆𑀜𑀫𑀺𑀯 𑀘𑁄𑀭𑁂𑀳𑀺 𑀢𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑀢𑁄, 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀯𑀸 𑀭𑀸𑀕𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀢𑀁 𑀢𑀁𑀲𑀳𑀺𑀢𑁂 𑀘𑀺𑀢𑁆𑀢𑁂 𑀉𑀧𑀘𑀭𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀭𑀸𑀕𑁂𑀦𑀸𑀢𑀺 𑀭𑀸𑀕𑁂𑀦 𑀳𑁂𑀢𑀼𑀦𑀸𑀢𑀺 ¶ 𑀅𑀢𑁆𑀣𑁄. 𑀉𑀚𑀼𑀕𑀢𑀫𑁂𑀯𑀸𑀢𑀺 𑀧𑀕𑁂𑀯 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀧𑀦𑀻𑀢𑀢𑁆𑀢𑀸, 𑀘𑀺𑀢𑁆𑀢𑀲𑁆𑀲 𑀘 𑀅𑀦𑀼𑀚𑀼𑀪𑀸𑀯𑀓𑀭𑀸𑀦𑀁 𑀫𑀸𑀬𑀸𑀤𑀻𑀦𑀁 𑀅𑀪𑀸𑀯𑀢𑁄, 𑀭𑀸𑀕𑀸𑀤𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀸𑀯𑁂𑀦 𑀯𑀸 𑀑𑀦𑀢𑀺𑀉𑀦𑁆𑀦𑀢𑀺𑀯𑀺𑀭𑀳𑀢𑁄 𑀉𑀚𑀼𑀪𑀸𑀯𑀫𑁂𑀯 𑀓𑀢𑀁. 𑀅𑀣 𑀯𑀸 𑀉𑀚𑀼𑀕𑀢𑀫𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀻𑀣𑀺𑀁 𑀑𑀢𑀺𑀡𑁆𑀡𑀢𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀕𑀫𑀦𑀢𑁄 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀉𑀚𑀼𑀪𑀸𑀯𑀫𑁂𑀯 𑀕𑀢𑀁. 𑀢𑀣𑀸𑀕𑀢𑀁 𑀆𑀭𑀩𑁆𑀪𑀸𑀢𑀺 𑀢𑀣𑀸𑀕𑀢𑀕𑀼𑀡𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸.

𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀅𑀲𑁆𑀲. ‘‘𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀯𑀺𑀢𑀓𑁆𑀓𑀬𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀦𑁆𑀢𑀺 ‘‘𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀩𑀼𑀤𑁆𑀥𑀕𑀼𑀡𑀧𑁄𑀡𑀸𑀢𑀺 𑀩𑀼𑀤𑁆𑀥𑀕𑀼𑀡𑀦𑀺𑀦𑁆𑀦𑀸. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀏𑀢𑁂𑀦 𑀩𑀼𑀤𑁆𑀥𑀕𑀼𑀡𑀲𑀗𑁆𑀔𑀸𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀢𑀓𑁆𑀓𑀸𑀳𑀢𑀁, 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁, 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀫𑀚𑁆𑀚𑀦𑀜𑁆𑀘 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀸𑀯𑀦𑀸𑀯𑀲𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀦𑀺𑀧𑁆𑀨𑀸𑀤𑀺𑀓𑀸 𑀩𑀮𑀯𑀢𑀻 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀻𑀢𑀺𑀲𑀳𑀺𑀢𑀘𑀺𑀢𑁆𑀢𑀲𑁆𑀲. 𑀓𑀸𑀬𑀘𑀺𑀢𑁆𑀢𑀤𑀭𑀣𑀸𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀲𑀼𑀔𑀼𑀫𑀸𑀯𑀢𑁆𑀣𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀸 𑀓𑀺𑀮𑁂𑀲𑀸. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀲𑀦𑁆𑀦𑀺𑀲𑀻𑀤𑀦𑁆𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀏𑀓𑀓𑁆𑀔𑀡𑁂𑀢𑀺 𑀬𑀤𑀸 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸 𑀪𑀸𑀯𑀦𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀢𑀤𑀸 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀲𑀼𑀯𑀺𑀲𑀤𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀪𑀸𑀯𑀦𑀸𑀬 𑀧𑀕𑀼𑀡𑀢𑀸𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀸𑀢𑀺𑀲𑀬𑀁 𑀧𑀝𑀼𑀓𑀺𑀘𑁆𑀘𑀸𑀯 𑀳𑁄𑀦𑁆𑀢𑀺, 𑀩𑀮𑀯𑀢𑀻 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺𑀧𑀤𑀝𑁆𑀞𑀸𑀦𑀸 𑀧𑀲𑁆𑀲𑀤𑁆𑀥𑀺 𑀲𑀯𑀺𑀲𑁂𑀲𑀸 𑀚𑀸𑀬𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀁 𑀲𑀼𑀔𑀁 𑀣𑀺𑀭𑀢𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑀼𑀔𑁂𑀦 𑀅𑀦𑀼𑀩𑁆𑀭𑀽𑀳𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑁂 𑀲𑀫𑁆𑀫𑀤𑁂𑀯 𑀲𑀫𑀸𑀥𑀺𑀬𑀢𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀧𑀼𑀩𑁆𑀩𑀪𑀸𑀕𑁂 𑀯𑀺𑀢𑀓𑁆𑀓𑀸𑀤𑀬𑁄 𑀉𑀧𑀭𑀽𑀧𑀭𑀺 𑀧𑀝𑀼𑀧𑀝𑀼𑀢𑀭𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀪𑀸𑀯𑀦𑀸𑀬 𑀫𑀚𑁆𑀛𑀺𑀫𑀲𑀫𑀣𑀧𑀝𑀺𑀧𑀢𑁆𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀏𑀓𑀭𑀲𑀪𑀸𑀯𑁂𑀦 𑀧𑀝𑀼𑀢𑀫𑀸𑀦𑀺 𑀳𑀼𑀢𑁆𑀯𑀸 𑀏𑀓𑀓𑁆𑀔𑀡𑁂 𑀛𑀸𑀦𑀗𑁆𑀕𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀁 ¶ , 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺…𑀧𑁂… 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁬.𑁧𑁦).

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀛𑀸𑀦𑀁 𑀅𑀧𑁆𑀧𑀦𑀸𑀧𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀦 𑀕𑀫𑁆𑀪𑀻𑀭𑀢𑀸𑀬𑀸’’𑀢𑀺𑀆𑀤𑀺. 𑀕𑀫𑁆𑀪𑀻𑀭𑁂 𑀳𑀺 𑀆𑀭𑀫𑁆𑀫𑀡𑁂 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀧𑀢𑀺𑀢𑀦𑀸𑀯𑀸 𑀯𑀺𑀬 𑀲𑀫𑀣𑀪𑀸𑀯𑀦𑀸 𑀧𑀢𑀺𑀝𑁆𑀞𑀁 ¶ 𑀦 𑀮𑀪𑀢𑀺, ‘‘𑀕𑀫𑁆𑀪𑀻𑀭𑀢𑀸𑀬𑀸’’𑀢𑀺 𑀘 𑀇𑀫𑀺𑀦𑀸 𑀲𑀪𑀸𑀯𑀥𑀫𑁆𑀫𑀢𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀲𑀪𑀸𑀯𑀥𑀫𑁆𑀫𑁄 𑀳𑀺 𑀕𑀫𑁆𑀪𑀻𑀭𑁄 𑀦 𑀧𑀜𑁆𑀜𑀢𑁆𑀢𑀺. 𑀦𑀦𑀼 𑀘 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑁄 𑀕𑀬𑁆𑀳𑀢𑀻𑀢𑀺? 𑀲𑀘𑁆𑀘𑀁 𑀕𑀬𑁆𑀳𑀢𑀺 𑀧𑀼𑀩𑁆𑀩𑀪𑀸𑀕𑁂, 𑀪𑀸𑀯𑀦𑀸𑀬 𑀧𑀦 𑀯𑀟𑁆𑀠𑀫𑀸𑀦𑀸𑀬 𑀧𑀜𑁆𑀜𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀯𑁂𑀬𑁂𑀯 𑀘𑀺𑀢𑁆𑀢𑀁 𑀢𑀺𑀝𑁆𑀞𑀢𑀺. 𑀦𑀦𑀼 𑀘 𑀲𑀪𑀸𑀯𑀥𑀫𑁆𑀫𑁂𑀧𑀺 𑀓𑀢𑁆𑀣𑀘𑀺 𑀅𑀧𑁆𑀧𑀦𑀸 𑀲𑀫𑀺𑀚𑁆𑀛𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑀸𑀤𑀻𑀢𑀺? 𑀲𑀘𑁆𑀘𑀁 𑀲𑀫𑀺𑀚𑁆𑀛𑀢𑀺, 𑀢𑀜𑁆𑀘 𑀔𑁄 𑀏𑀓𑀧𑁆𑀧𑀓𑀸𑀭𑁂 𑀆𑀭𑀫𑁆𑀫𑀡𑁂, 𑀇𑀤𑀁 𑀧𑀦 𑀦𑀸𑀦𑀧𑁆𑀧𑀓𑀸𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀸𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬𑀸’’𑀢𑀺 𑀆𑀳. 𑀏𑀯𑀫𑁆𑀧𑀺 𑀬𑀣𑀸 𑀦𑀸𑀦𑀧𑁆𑀧𑀓𑀸𑀭𑁂𑀲𑀼 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀦𑀸𑀯𑀲𑁂𑀦 𑀪𑀸𑀯𑀦𑀸 𑀅𑀯𑀢𑀺𑀝𑁆𑀞𑀢𑀺, 𑀏𑀯𑀫𑀺𑀥 𑀓𑀲𑁆𑀫𑀸 𑀦 𑀳𑁄𑀢𑀻𑀢𑀺? 𑀯𑀺𑀲𑀫𑁄𑀬𑀁 𑀉𑀧𑀜𑁆𑀜𑀸𑀲𑁄. 𑀢𑀢𑁆𑀣 𑀳𑀺 𑀲𑀢𑀺𑀧𑀺 𑀓𑁄𑀝𑁆𑀞𑀸𑀲𑀩𑀳𑀼𑀪𑀸𑀯𑁂 𑀏𑀓𑀧𑁆𑀧𑀓𑀸𑀭𑁂𑀦𑁂𑀯 𑀪𑀸𑀯𑀦𑀸 𑀯𑀢𑁆𑀢𑀢𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑁆𑀲𑁂𑀯 𑀕𑀳𑀡𑀢𑁄, 𑀇𑀥 𑀧𑀦 𑀦𑀸𑀦𑀧𑁆𑀧𑀓𑀸𑀭𑁂𑀦 𑀕𑀼𑀡𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁆𑀢𑀸, 𑀦 𑀅𑀬𑀫𑁂𑀓𑀲𑁆𑀫𑀺𑀁𑀬𑁂𑀯 𑀕𑀼𑀡𑁂 𑀞𑀸𑀢𑀼𑀁 𑀲𑀓𑁆𑀓𑁄𑀢𑀺 𑀪𑀸𑀯𑀦𑀸𑀩𑀮𑁂𑀦 𑀧𑀘𑁆𑀘𑀓𑁆𑀔𑀢𑁄 𑀩𑀼𑀤𑁆𑀥𑀕𑀼𑀡𑁂𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 ‘‘𑀅𑀥𑀺𑀫𑀼𑀢𑁆𑀢𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀉𑀧𑀘𑀸𑀭𑀧𑁆𑀧𑀢𑁆𑀢𑀁 𑀛𑀸𑀦𑀁 𑀳𑁄𑀢𑀺, 𑀓𑀣𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀤𑁂𑀢’’𑀦𑁆𑀢𑀺𑀆𑀤𑀺.

𑀲𑀕𑀸𑀭𑀯𑁄 𑀳𑁄𑀢𑀺 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀢𑁆𑀣𑀼 𑀕𑀼𑀡𑀲𑀭𑀻𑀭𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀉𑀧𑀝𑁆𑀞𑀳𑀦𑀢𑁄. 𑀢𑀢𑁄𑀬𑁂𑀯 𑀲𑀤𑁆𑀥𑀸𑀯𑁂𑀧𑀼𑀮𑁆𑀮𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀤𑀺𑀲𑀁 𑀲𑀤𑁆𑀥𑀸𑀫𑀳𑀢𑁆𑀢𑀁. 𑀩𑀼𑀤𑁆𑀥𑀕𑀼𑀡𑀸𑀦𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀪𑀸𑀯𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 𑀲𑀢𑀺𑀯𑁂𑀧𑀼𑀮𑁆𑀮𑀁. 𑀢𑁂𑀲𑀁 𑀧𑀭𑀫𑀕𑀫𑁆𑀪𑀻𑀭𑀢𑀸𑀬, 𑀦𑀸𑀦𑀧𑁆𑀧𑀓𑀸𑀭𑀢𑀸𑀬 𑀘 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁. 𑀢𑁂𑀲𑀁 𑀉𑀴𑀸𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀢𑀸𑀬 𑀧𑀼𑀜𑁆𑀜𑀯𑁂𑀧𑀼𑀮𑁆𑀮𑀜𑁆𑀘 𑀅𑀥𑀺𑀕𑀘𑁆𑀙𑀢𑀺. 𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀳𑁄𑀢𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀢𑁆𑀢𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸. 𑀪𑀬𑀪𑁂𑀭𑀯𑀲𑀳𑁄 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀪𑀬𑀪𑁂𑀭𑀯𑀸𑀪𑀺𑀪𑀯𑀦𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀦𑀼𑀲𑁆𑀲𑀭𑁂𑀣 𑀲𑀫𑁆𑀩𑀼𑀤𑁆𑀥𑀁, 𑀪𑀬𑀁 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸’’𑀢𑀺 (𑀲𑀁. 𑀦𑀺. 𑁧.𑁨𑁪𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁). 𑀤𑀼𑀓𑁆𑀔𑀸𑀥𑀺𑀯𑀸𑀲𑀦𑀲𑀫𑀢𑁆𑀣𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀭𑀻𑀭𑀤𑀼𑀓𑁆𑀔𑀲𑁆𑀲 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀲𑁆𑀲 𑀯𑀺𑀬 𑀯𑀺𑀦𑀺𑀯𑀝𑁆𑀝𑀦𑀢𑁄 ¶ . 𑀲𑀁𑀯𑀸𑀲𑀲𑀜𑁆𑀜𑀦𑁆𑀢𑀺 𑀲𑀳𑀯𑀸𑀲𑀲𑀜𑁆𑀜𑀁. 𑀩𑀼𑀤𑁆𑀥𑀪𑀽𑀫𑀺𑀬𑀁 𑀘𑀺𑀢𑁆𑀢𑀁 𑀦𑀫𑀢𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀫𑀳𑀦𑁆𑀢𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀉𑀧𑀝𑁆𑀞𑀸𑀦𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀬 𑀲𑀩𑁆𑀩𑀤𑀸 𑀩𑀼𑀤𑁆𑀥𑀕𑀼𑀡𑀸𑀦𑀁 𑀘𑀺𑀢𑁆𑀢𑁂 𑀯𑀺𑀧𑀭𑀺𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀼𑀔𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀢𑁄 𑀯𑀺𑀬𑀸’’𑀢𑀺. 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀇𑀫𑀸𑀬 𑀪𑀸𑀯𑀦𑀸𑀬 𑀉𑀧𑀭𑀺 𑀢𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀘𑁆𑀘𑀸𑀦𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀲𑀼𑀕𑀢𑀺𑀧𑀭𑀸𑀬𑀡𑁄𑀢𑀺 𑀲𑀼𑀕𑀢𑀺𑀲𑀫𑁆𑀧𑀭𑀸𑀬𑁄.

𑀅𑀧𑁆𑀧𑀫𑀸𑀤𑀦𑁆𑀢𑀺 𑀅𑀧𑁆𑀧𑀫𑀚𑁆𑀚𑀦𑀁 𑀲𑀓𑁆𑀓𑀘𑁆𑀘𑀁 𑀅𑀦𑀼𑀬𑁄𑀕𑀁. 𑀓𑀬𑀺𑀭𑀸𑀣𑀸𑀢𑀺 𑀓𑀭𑁂𑀬𑁆𑀬. 𑀲𑀼𑀫𑁂𑀥𑀲𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄 ¶ . 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀲𑀫𑀢𑁆𑀣𑁂𑀦 𑀲𑀢𑁆𑀣𑀭𑀺 𑀲𑀕𑀸𑀭𑀯𑀪𑀸𑀯𑀸𑀤𑀺𑀳𑁂𑀢𑀼𑀪𑀽𑀢𑁂𑀦 𑀫𑀳𑀢𑀸 𑀲𑀸𑀫𑀢𑁆𑀣𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸𑀬.

𑁨. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁬. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀦𑁆𑀢𑀺 𑀏𑀢𑁆𑀣 𑀧𑀤𑀢𑁆𑀣𑁄, 𑀲𑀪𑀸𑀯𑀢𑁆𑀣𑁄 𑀘 𑀆𑀤𑀺𑀢𑁄 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀪𑀸𑀯𑀦𑀸𑀯𑀺𑀥𑀸𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀧𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀬 ‘‘𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀫𑀦𑁆𑀦𑀸𑀕𑀢𑁂𑀦𑀸’’𑀢𑀺 𑀦 𑀯𑀼𑀢𑁆𑀢𑀁. 𑀦𑀦𑀼 𑀏𑀢𑀸 𑀧𑀝𑀺𑀧𑀸𑀝𑀺𑀬𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄 𑀅𑀭𑀺𑀬𑀲𑀸𑀯𑀓𑀸𑀦𑀁 𑀯𑀲𑁂𑀦 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀇𑀚𑁆𑀛𑀦𑁆𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀫𑀦𑁆𑀦𑀸𑀕𑀢𑁂𑀦𑀸’’𑀢𑀺 𑀇𑀥 𑀦 𑀯𑀼𑀢𑁆𑀢𑀁, 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀦 𑀲𑀼𑀔𑁂𑀦 𑀇𑀚𑁆𑀛𑀦𑁆𑀢𑀻𑀢𑀺. 𑀢𑀣𑀸𑀧𑀺 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑁂𑀯.

𑁧𑁪𑁭. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀇𑀢𑀭𑁂𑀲𑀽𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀸𑀤𑀺𑀧𑀤𑁂𑀲𑀼. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀯𑀸𑀢𑀺 𑀅𑀯𑀥𑀸𑀭𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀸𑀤𑀺𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀭𑀺𑀬𑀸𑀬𑀢𑁄 𑀧𑀦𑁂𑀢𑁂 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀧𑀺 𑀲𑀫𑁆𑀪𑀯𑀦𑁆𑀢𑁂𑀯. 𑀢𑀣𑀸 𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀩𑀳𑀼𑀲𑁆𑀲𑀼𑀢𑁂𑀦 𑀆𑀕𑀢𑀸𑀕𑀫𑁂𑀦 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁂𑀦 𑀧𑀜𑁆𑀜𑀯𑀢𑀸 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀯𑀺𑀲𑁂𑀲𑀢𑁄 𑀲𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀆𑀘𑀭𑀺𑀬𑀧𑀬𑀺𑀭𑀼𑀧𑀸𑀲𑀦𑀸𑀬 𑀯𑀺𑀦𑀸 𑀦 𑀮𑀩𑁆𑀪𑀸𑀢𑀺 𑀘𑁂? 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀧𑀺 𑀲𑀫𑀸𑀦𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀲𑀺𑀚𑁆𑀛𑀦𑀢𑁄, 𑀢𑀣𑀸 𑀲𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑁂𑀧𑀺. ‘‘𑀲𑀦𑁆𑀤𑀺𑀝𑁆𑀞𑀺𑀬𑀸 𑀚𑀬𑀢𑀻’’𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀢𑀺𑀢𑁆𑀣𑀺𑀬𑀦𑀺𑀫𑁆𑀫𑀤𑁆𑀤𑀦𑁂 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀢𑀺 ¶ , 𑀓𑀺𑀮𑁂𑀲𑀚𑀬𑁂 𑀧𑀭𑀺𑀬𑀸𑀬𑀢𑁄 𑀧𑀭𑀫𑁆𑀧𑀭𑀸𑀳𑁂𑀢𑀼𑀪𑀸𑀯𑀢𑁄. ‘‘𑀲𑀦𑁆𑀤𑀺𑀝𑁆𑀞𑀁 𑀅𑀭𑀳𑀢𑀻’’𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑁂𑀯, 𑀲𑀩𑁆𑀩𑀲𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀧𑀭𑀺𑀩𑁆𑀭𑀽𑀳𑀦𑀜𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀜𑁆𑀜𑁄𑀕𑀸𑀬, 𑀲𑀉𑀧𑀸𑀤𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀦𑀼𑀧𑀸𑀤𑀸𑀦𑀸𑀬. 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 ‘𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’’’𑀦𑁆𑀢𑀺 (𑀘𑀽𑀴𑀯. 𑁪𑁦𑁬; 𑀅. 𑀦𑀺. 𑁮.𑁫𑁩), ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸’’𑀢𑀺 (𑀫. 𑀦𑀺. 𑁧.𑁨𑁪𑁦) 𑀘 𑀏𑀯𑀫𑀸𑀤𑀻𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀓𑀸𑀮𑀺𑀓𑀸𑀥𑀺𑀕𑀫𑀼𑀧𑀸𑀬𑀢𑀸𑀬 𑀅𑀓𑀸𑀮𑀺𑀓𑁄. 𑀯𑀺𑀚𑁆𑀚𑀫𑀸𑀦𑀢𑀸𑀧𑀭𑀺𑀲𑀼𑀤𑁆𑀥𑀢𑀸𑀳𑀺 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄. 𑀢𑀢𑁄 𑀏𑀯 𑀯𑀝𑁆𑀝𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 ¶ 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀬𑀦𑀁, 𑀘𑀺𑀢𑁆𑀢𑀲𑁆𑀲 𑀯𑀸 𑀢𑀢𑁆𑀣 𑀉𑀧𑀦𑀬𑀦𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀧𑀭𑀺𑀘𑀬𑁂𑀦 𑀲𑀫𑁆𑀫𑀤𑁂𑀯 𑀅𑀢𑁆𑀣𑀯𑁂𑀤𑀁, 𑀥𑀫𑁆𑀫𑀯𑁂𑀤𑀜𑁆𑀘 𑀮𑀪𑀦𑁆𑀢𑁂𑀳𑀺 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀏𑀯𑀁 𑀲𑀦𑁆𑀤𑀺𑀝𑁆𑀞𑀺𑀓𑀸𑀤𑀺𑀧𑀤𑁂𑀲𑀼 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀦𑀲𑀺𑀓𑀸𑀭𑁄 𑀬𑀼𑀚𑁆𑀚𑀢𑁂𑀯.

𑀲𑀸𑀢𑀺 𑀕𑀸𑀣𑀸. 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀲𑀼𑀦𑁆𑀤𑀭𑀢𑁆𑀢𑀸. 𑀥𑀫𑁆𑀫𑀲𑁆𑀲𑀸𑀢𑀺 𑀲𑀸𑀲𑀦𑀥𑀫𑁆𑀫𑀲𑁆𑀲. 𑀓𑀺𑀜𑁆𑀘𑀸𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀓𑁄𑀘𑀺 𑀦𑀢𑁆𑀣𑀺, 𑀬𑁂𑀲𑀼 𑀧𑀦 𑀅𑀯𑀬𑀯𑁂𑀲𑀼 𑀲𑀫𑀼𑀤𑀸𑀬𑀭𑀽𑀧𑁂𑀦 𑀅𑀯𑁂𑀓𑁆𑀔𑀺𑀢𑁂𑀲𑀼 ‘‘𑀕𑀸𑀣𑀸’’𑀢𑀺 𑀲𑀫𑀜𑁆𑀜𑀸, 𑀢𑀁 𑀢𑀢𑁄 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀲𑀁𑀲𑀸𑀫𑀺𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑁂𑀦 𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸’’𑀢𑀺𑀆𑀤𑀺𑀫𑀸𑀳. ‘‘𑀏𑀓𑀸𑀦𑀼𑀲𑀦𑁆𑀥𑀺𑀓’’𑀦𑁆𑀢𑀺 𑀇𑀤𑀁 𑀦𑀸𑀢𑀺𑀩𑀳𑀼𑀯𑀺𑀪𑀸𑀕𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀦 𑀢𑁂𑀦𑁂𑀯 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀸𑀕𑀸 𑀮𑀩𑁆𑀪𑀦𑁆𑀢𑀻𑀢𑀺. 𑀦𑀺𑀤𑀸𑀦𑁂𑀦𑀸𑀢𑀺 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀤𑀺𑀅𑀧𑀤𑀺𑀲𑀦𑀮𑀓𑁆𑀔𑀡𑁂𑀦 𑀦𑀺𑀤𑀸𑀦𑀕𑀦𑁆𑀣𑁂𑀦. 𑀦𑀺𑀕𑀫𑀦𑁂𑀦𑀸𑀢𑀺 ‘‘𑀇𑀤𑀫𑀯𑁄𑀘𑀸’’𑀢𑀺𑀆𑀤𑀺𑀓𑁂𑀦 (𑀲𑀁. 𑀦𑀺. 𑁧.𑁨𑁪𑁯), ‘‘𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭) 𑀯𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑀦𑀺𑀕𑀫𑀦𑁂𑀦.

𑀅𑀬𑀁 𑀓𑀣𑀸 𑀯𑀺𑀲𑁂𑀲𑀢𑁄 𑀲𑀼𑀢𑁆𑀢𑀧𑀺𑀝𑀓𑀲𑀁𑀯𑀡𑁆𑀡𑀦𑀸𑀢𑀺 𑀓𑀢𑁆𑀯𑀸 𑀲𑀼𑀢𑁆𑀢𑀧𑀺𑀝𑀓𑀯𑀲𑁂𑀦 𑀥𑀫𑁆𑀫𑀲𑁆𑀲 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑀧𑀺𑀝𑀓𑀯𑀺𑀦𑀬𑀧𑀺𑀝𑀓𑀸𑀦𑀁 𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑀺𑀤𑀸𑀦𑀲𑀉𑀧𑁆𑀧𑀢𑁆𑀢𑀺𑀓𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑀺𑀤𑀸𑀦𑀲𑀉𑀧𑁆𑀧𑀢𑁆𑀢𑀺𑀓𑀢𑁆𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀺𑀤𑀸𑀦𑁂𑀦 𑀲𑀦𑀺𑀤𑀸𑀦𑀢𑀸𑀬, 𑀲𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀢𑀸𑀬 ¶ 𑀘. 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸, 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀪𑀸𑀯𑁂𑀦 𑀧𑀜𑁆𑀜𑀸𑀧𑀺𑀬𑀫𑀸𑀦𑀲𑁆𑀲 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑀸𑀦𑀲𑁆𑀲 𑀅𑀦𑀼𑀭𑀽𑀧𑀢𑁄. 𑀅𑀢𑁆𑀣𑀲𑁆𑀲𑀸𑀢𑀺 𑀤𑁂𑀲𑀺𑀬𑀫𑀸𑀦𑀲𑁆𑀲 𑀘 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼 (𑀲𑀁. 𑀦𑀺. 𑁧.𑁨𑁪𑁯)? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁯𑁫) 𑀢𑀢𑁆𑀣 𑀢𑀢𑁆𑀣 𑀳𑁂𑀢𑀽𑀧𑀫𑀸𑀕𑀳𑀡𑁂𑀦 𑀳𑁂𑀢𑀼𑀤𑀸𑀳𑀭𑀡𑀬𑀼𑀢𑁆𑀢𑀢𑁄.

𑀏𑀯𑀁 𑀲𑀼𑀢𑁆𑀢𑀯𑀺𑀦𑀬𑀯𑀲𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑀮𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀲𑀦𑀥𑀫𑁆𑀫𑁄𑀢𑀺 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 ¶ 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦) 𑁋

𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀧𑀓𑀸𑀲𑀓𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄 𑀲𑀻𑀮𑀫𑀽𑀮𑀓𑀢𑁆𑀢𑀸 𑀲𑀸𑀲𑀦𑀲𑁆𑀲. 𑀲𑀫𑀣𑀸𑀤𑀻𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 𑀢𑁂𑀲𑀁 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀫𑀚𑁆𑀛𑀪𑀸𑀯𑀢𑁄. 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 𑀢𑀤𑀥𑀺𑀕𑀫𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄. 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦𑀸𑀫 𑀧𑀜𑁆𑀜𑀸𑀬 𑀳𑁄𑀢𑀺, 𑀢𑀲𑁆𑀲𑀸 𑀘 𑀲𑀻𑀮𑀁, 𑀲𑀫𑀸𑀥𑀺 𑀘 𑀫𑀽𑀮𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀻𑀳𑀺 𑀆𑀤𑀺𑀓𑀮𑁆𑀬𑀸𑀡𑁄’’𑀢𑀺. 𑀧𑀜𑁆𑀜𑀸 𑀧𑀦 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑀯𑀲𑁂𑀦 𑀤𑀼𑀯𑀺𑀥𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀕𑀡𑁆𑀳𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄’’𑀢𑀺 𑀆𑀳. 𑀢𑀲𑁆𑀲 𑀦𑀺𑀧𑁆𑀨𑀢𑁆𑀢𑀺 𑀨𑀮𑀁, 𑀓𑀺𑀘𑁆𑀘𑀁 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸, 𑀢𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺. 𑀨𑀮𑀕𑁆𑀕𑀳𑀡𑁂𑀦 𑀯𑀸 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑀸𑀳, 𑀇𑀢𑀭𑁂𑀦 𑀇𑀢𑀭𑀁, 𑀢𑀤𑀼𑀪𑀬𑀜𑁆𑀘 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀑𑀲𑀸𑀦𑀦𑁆𑀢𑀺 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺.

𑀩𑀼𑀤𑁆𑀥𑀲𑁆𑀲 𑀲𑀼𑀩𑁄𑀥𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸, 𑀢𑀸𑀬 𑀆𑀤𑀺𑀓𑀮𑁆𑀬𑀸𑀡𑁄 𑀢𑀧𑁆𑀧𑀪𑀯𑀢𑁆𑀢𑀸. 𑀲𑀩𑁆𑀩𑀲𑁄 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑁄𑀤𑀸𑀦𑀁, 𑀧𑀸𑀭𑀺𑀧𑀽𑀭𑀻 𑀘 𑀥𑀫𑁆𑀫𑀲𑀼𑀥𑀫𑁆𑀫𑀢𑀸, 𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 𑀢𑀁𑀲𑀭𑀻𑀭𑀢𑁆𑀢𑀸. 𑀲𑀢𑁆𑀣𑀸𑀭𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺, 𑀢𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄, 𑀢𑀸𑀬 𑀲𑀸𑀲𑀦𑀲𑁆𑀲 𑀮𑁄𑀓𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄. 𑀢𑀦𑁆𑀢𑀺 𑀲𑀸𑀲𑀦𑀥𑀫𑁆𑀫𑀁. 𑀢𑀣𑀢𑁆𑀢𑀸𑀬𑀸𑀢𑀺 𑀬𑀣𑀢𑁆𑀢𑀸𑀬 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀣𑀢𑁆𑀢𑀸𑀬 𑀢𑀣𑀪𑀸𑀯𑀸𑀬. 𑀲𑁄 𑀧𑀦 𑀅𑀪𑀺𑀲𑀫𑁆𑀩𑁄𑀥𑀺 𑀧𑀘𑁆𑀘𑁂𑀓𑀩𑁄𑀥𑀺 𑀲𑀸𑀯𑀓𑀩𑁄𑀥𑀻𑀢𑀺 𑀢𑀺𑀯𑀺𑀥𑁄 ¶ , 𑀇𑀢𑁄 𑀅𑀜𑁆𑀜𑀣𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁆𑀣 𑀲𑀩𑁆𑀩𑀕𑀼𑀡𑁂𑀳𑀺 𑀅𑀕𑁆𑀕𑀪𑀸𑀯𑀢𑁄, 𑀇𑀢𑀭𑀩𑁄𑀥𑀺𑀤𑁆𑀯𑀬𑀫𑀽𑀮𑀢𑀸𑀬 𑀘 𑀧𑀞𑀫𑀸𑀬 𑀩𑁄𑀥𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑀢𑀸, 𑀕𑀼𑀡𑁂𑀳𑀺 𑀯𑁂𑀫𑀚𑁆𑀛𑀪𑀸𑀯𑀢𑁄 𑀤𑀼𑀢𑀺𑀬𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑀢𑀸, 𑀢𑀤𑀼𑀪𑀬𑀸𑀯𑀭𑀢𑀸𑀬, 𑀢𑀤𑁄𑀲𑀸𑀦𑀢𑀸𑀬 𑀘 𑀲𑀸𑀲𑀦𑀥𑀫𑁆𑀫𑀲𑁆𑀲 𑀢𑀢𑀺𑀬𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀸 𑀯𑀼𑀢𑁆𑀢𑀸.

𑀏𑀲𑁄𑀢𑀺 𑀲𑀸𑀲𑀦𑀥𑀫𑁆𑀫𑁄. 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄𑀢𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑁆𑀪𑀯𑀢𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀬𑀣𑀸 𑀬𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 ¶ , 𑀢𑀣𑀸 𑀢𑀣𑀸 𑀲𑁄 𑀢𑀢𑁆𑀣 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀮𑀪𑀢𑀺 𑀥𑀫𑁆𑀫𑀯𑁂𑀤’’𑀦𑁆𑀢𑀺 (𑀅. 𑀦𑀺. 𑁫.𑁨𑁬).

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀧𑀜𑁆𑀘𑀲𑁆𑀲 𑀦𑀻𑀯𑀭𑀡𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁧𑁯) 𑁋

𑀘 𑀆𑀤𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄𑀢𑀺 𑀲𑀫𑀣𑀲𑀼𑀔𑀲𑁆𑀲 𑀘 𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑁆𑀲 𑀘 𑀲𑀫𑁆𑀧𑀸𑀤𑀦𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁭𑁯; 𑀫. 𑀦𑀺. 𑁨.𑁧𑁩𑁮).

𑀢𑀣𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺 𑀘. (𑀥. 𑀧. 𑁩𑁭𑁪, 𑁩𑁭𑁩);

𑀢𑀣𑀸𑀧𑀝𑀺𑀧𑀦𑁆𑀦𑁄𑀢𑀺 𑀬𑀣𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀁 𑀆𑀯𑀳𑀢𑀺, 𑀬𑀣𑀸 𑀯𑀸 𑀲𑀢𑁆𑀣𑀸𑀭𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀲𑀸𑀲𑀦𑀥𑀫𑁆𑀫𑁄. 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀲𑁆𑀲 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑁂𑀧𑀲𑁆𑀲 𑀆𑀯𑀳𑀦𑀢𑁄. 𑀏𑀲 𑀪𑀕𑀯𑀸 𑀯𑀼𑀢𑁆𑀢𑀦𑀬𑁂𑀦 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁, 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑁄𑀚𑀦𑀸.

𑀢𑀢𑁆𑀣 ¶ 𑀅𑀯𑀺𑀲𑁂𑀲𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀲𑀓𑀮𑁄 𑀘 𑀢𑀦𑁆𑀢𑀺𑀥𑀫𑁆𑀫𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀢𑀫𑁂𑀲𑀸𑀦𑀁 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺𑀆𑀤𑀺 (𑀧𑀸𑀭𑀸. 𑁧𑁮). 𑀲𑀩𑁆𑀩𑀲𑀺𑀓𑁆𑀔𑀸𑀦𑀁 𑀫𑀡𑁆𑀟𑀪𑀽𑀢𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑀁 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁 ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 (𑀫𑀳𑀸𑀯. 𑁨𑁩; 𑀲𑀁. 𑀦𑀺. 𑁫.𑁧𑁮𑁬). 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀬𑀣𑀸𑀭𑀳𑀁. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀳𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀧𑀦𑁆𑀦𑀢𑁆𑀣𑀢𑀸𑀬. 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁄 𑀳𑀺 𑀇𑀥 𑀲𑀳-𑀲𑀤𑁆𑀤𑁄. 𑀇𑀢𑀭𑀁 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀸𑀢𑁆𑀣𑀁, 𑀲𑀩𑁆𑀬𑀜𑁆𑀚𑀦𑀜𑁆𑀘. 𑀬𑁂 𑀧𑀦𑁂𑀢𑁆𑀣 ‘‘𑀯𑀘𑀦𑀲𑀪𑀸𑀯𑀁 𑀲𑀸𑀢𑁆𑀣𑀁, 𑀅𑀢𑁆𑀣𑀲𑀪𑀸𑀯𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁, 𑀢𑀣𑀸 𑀯𑀺𑀪𑀢𑁆𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀲𑀤𑁆𑀤𑀢𑁆𑀣𑀸 𑀳𑀺 𑀅𑀪𑀺𑀦𑁆𑀦𑀭𑀽𑀧𑀸 𑀯𑀺𑀬 𑀳𑀼𑀢𑁆𑀯𑀸 𑀯𑀺𑀦𑀺𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀳𑀺 𑀦𑁂𑀲𑀁 𑀮𑁄𑀓𑀺𑀬𑀸𑀫𑀺𑀲𑁆𑀲𑀻𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀺. 𑀲𑀢𑀺𑀧𑀺 𑀯𑀸 𑀪𑁂𑀤𑁂 ‘‘𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀏𑀢𑁆𑀣 𑀬𑀤𑀺 𑀢𑀼𑀮𑁆𑀬𑀬𑁄𑀕𑁄 𑀅𑀥𑀺𑀧𑁆𑀧𑁂𑀢𑁄 ‘‘𑀲𑀧𑀼𑀢𑁆𑀢𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀏𑀯𑀁 𑀲𑀢𑀺 ‘‘𑀅𑀢𑁆𑀣𑀧𑀝𑀺𑀲𑀭𑀡𑀸, 𑀪𑀺𑀓𑁆𑀔𑀯𑁂, 𑀳𑁄𑀣, 𑀫𑀸 𑀩𑁆𑀬𑀜𑁆𑀚𑀦𑀧𑀝𑀺𑀲𑀭𑀡𑀸’’𑀢𑀺 𑀅𑀢𑁆𑀣𑀧𑁆𑀧𑀥𑀸𑀦𑀯𑀸𑀤𑁄 𑀩𑀸𑀥𑀺𑀢𑁄 𑀲𑀺𑀬𑀸, 𑀅𑀣 𑀯𑀺𑀚𑁆𑀚𑀫𑀸𑀦𑀢𑀸𑀫𑀢𑁆𑀢𑀁 ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺 𑀅𑀕𑁆𑀕𑀳𑀺𑀢𑀸 𑀲𑀺𑀬𑀸. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀢𑁆𑀣 𑀦𑁂𑀢𑁆𑀢𑀺𑀦𑀬𑁂𑀦𑀸𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀸𑀲𑀦…𑀧𑁂… 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺𑀧𑀺 𑀦𑁂𑀢𑁆𑀢𑀺𑀬𑀁 𑀩𑁆𑀬𑀜𑁆𑀚𑀦𑀫𑀼𑀔𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 ‘‘𑀅𑀓𑁆𑀔𑀭𑀁 𑀧𑀤’’𑀦𑁆𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁪 𑀤𑁆𑀯𑀸𑀤𑀲𑀧𑀤) 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀇𑀥 𑀧𑀦 𑀧𑀸𑀴𑀺𑀬𑀁 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀅𑀢𑁆𑀣𑀧𑀤𑀸𑀦𑀺𑀬𑁂𑀯 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀓𑀸𑀲𑀦𑀁 𑀤𑀻𑀧𑀦𑀁 𑀲𑀗𑁆𑀓𑀸𑀲𑀦𑀁 ‘‘𑀫𑀜𑁆𑀜𑀫𑀸𑀦𑁄 𑀪𑀺𑀓𑁆𑀔𑀼 𑀩𑀤𑁆𑀥𑁄 𑀫𑀸𑀭𑀲𑁆𑀲, 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁪) 𑀯𑀺𑀬. 𑀢𑀢𑁆𑀢𑀓𑁂𑀦 𑀳𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀯𑀺𑀤𑁆𑀥𑀁. 𑀢𑁂𑀦𑀸𑀳 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸’’𑀢𑀺𑀆𑀤𑀺. 𑀧𑀞𑀫𑀁 𑀓𑀸𑀲𑀦𑀁 𑀧𑀓𑀸𑀲𑀦𑀁. 𑀆𑀤𑀺𑀓𑀫𑁆𑀫𑀲𑁆𑀫𑀺𑀁 𑀳𑀺 𑀅𑀬𑀁 𑀧𑀲𑀤𑁆𑀤𑁄 ‘‘𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁨𑁦) 𑀯𑀺𑀬. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀁 𑀘𑁂𑀢𑀁 𑀧𑀤𑀤𑁆𑀯𑀬𑀁 𑀉𑀤𑁆𑀤𑁂𑀲𑀪𑀸𑀯𑀢𑁄. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀳𑀺 𑀲𑀗𑁆𑀔𑁂𑀧𑀢𑁄 𑀧𑀞𑀫𑀜𑁆𑀘 𑀯𑀼𑀢𑁆𑀢𑀫𑀢𑁆𑀣𑀁 𑀧𑀝𑀺𑀧𑀚𑁆𑀚𑀢𑀺 ¶ . 𑀲𑀁𑀔𑀺𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁, 𑀲𑀓𑀺𑀁 𑀯𑀼𑀢𑁆𑀢𑀲𑁆𑀲 𑀧𑀼𑀦 𑀯𑀘𑀦𑀜𑁆𑀘 𑀯𑀺𑀯𑀭𑀡𑀯𑀺𑀪𑀚𑀦𑀸𑀦𑀺. 𑀬𑀣𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀲𑀓𑀺𑀁𑀬𑁂𑀯 𑀘 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀯𑀺𑀢𑁆𑀣𑀸𑀭𑀢𑁄 𑀯𑀺𑀯𑀭𑀡𑀯𑀲𑁂𑀦, 𑀯𑀺𑀪𑀚𑀦𑀯𑀲𑁂𑀦 𑀘 𑀧𑀼𑀦 𑀯𑀘𑀦𑀁. 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀫𑁂𑀢𑀁 𑀧𑀤𑀤𑁆𑀯𑀬𑀁 𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀯𑀺𑀯𑀝𑀲𑁆𑀲 𑀯𑀺𑀢𑁆𑀣𑀸𑀭𑀢𑀭𑀸𑀪𑀺𑀥𑀸𑀦𑀁, 𑀯𑀺𑀪𑀢𑁆𑀢𑀲𑁆𑀲 𑀘 𑀧𑀓𑀸𑀭𑁂𑀳𑀺 𑀜𑀸𑀧𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀸𑀧𑀦𑀸𑀦𑀺. 𑀬𑀣𑀸 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁨) 𑀯𑀺𑀯𑀝𑀯𑀺𑀪𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 ¶ (𑀥. 𑀲. 𑁨) 𑀉𑀢𑁆𑀢𑀸𑀦𑀻𑀓𑀺𑀭𑀺𑀬𑀸, 𑀧𑀜𑁆𑀜𑀸𑀧𑀦𑀸 𑀘. 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀫𑁂𑀢𑀁 𑀧𑀤𑀤𑁆𑀯𑀬𑀁 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑀢𑁄. ‘‘𑀧𑀜𑁆𑀜𑀸𑀧𑀦𑀧𑀝𑁆𑀞𑀧𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀓𑀸𑀲𑀦𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄’’𑀢𑀺𑀧𑀺 𑀧𑀸𑀞𑁄.

𑀓𑀣𑀁 𑀧𑀦𑀸𑀬𑀁 𑀧𑀸𑀞𑀯𑀺𑀓𑀧𑁆𑀧𑁄 𑀚𑀸𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀦𑁂𑀢𑁆𑀢𑀺𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀧𑀼𑀭𑀺𑀫𑀧𑀸𑀞𑁄. 𑀢𑀢𑁆𑀣 𑀳𑀺 𑁋

‘‘𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸,

𑀯𑀺𑀯𑀭𑀡𑀸 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀺;

𑀏𑀢𑁂𑀳𑀺 𑀙𑀳𑀺 𑀧𑀤𑁂𑀳𑀺,

𑀅𑀢𑁆𑀣𑁄 𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺. (𑀦𑁂𑀢𑁆𑀢𑀺. 𑁪 𑀤𑁆𑀯𑀸𑀤𑀲𑀧𑀤) 𑁋

𑀤𑁂𑀲𑀦𑀸𑀳𑀸𑀭𑀬𑁄𑀚𑀦𑀸𑀬 𑀘 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 ‘‘𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀁. 𑀧𑀘𑁆𑀙𑀺𑀫𑁄 𑀧𑀦 ‘‘𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺 ‘𑀧𑀲𑁆𑀲𑀣𑀸’𑀢𑀺 𑀘𑀸𑀳𑀸’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑀓𑀢𑁄. 𑀏𑀯𑀜𑁆𑀘 𑀦𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀸𑀞𑀸𑀦𑀁 𑀯𑀺𑀲𑁂𑀲𑁄, 𑀦 𑀅𑀢𑁆𑀣𑀢𑁄. 𑀢𑀣𑀸 𑀳𑀺 𑀲𑀗𑁆𑀔𑁂𑀧𑀢𑁄 ‘‘𑀧𑀞𑀫𑀁 𑀜𑀸𑀧𑀦𑀁 𑀧𑀜𑁆𑀜𑀸𑀧𑀦𑀁, 𑀧𑀞𑀫𑀫𑁂𑀯 𑀞𑀧𑀦𑀁 𑀧𑀝𑁆𑀞𑀧𑀦’’𑀦𑁆𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀧𑀤𑁂𑀳𑀺 𑀅𑀢𑁆𑀣𑀢𑁄 𑀅𑀯𑀺𑀲𑀺𑀝𑁆𑀞𑀸𑀦𑀺. 𑀬𑀜𑁆𑀘 𑀧𑀼𑀭𑀺𑀫𑀧𑀸𑀞𑁂 𑀙𑀝𑁆𑀞𑀁 𑀧𑀤𑀁 ‘‘𑀧𑀓𑀸𑀭𑀢𑁄 𑀜𑀸𑀧𑀦’’𑀦𑁆𑀢𑀺 𑀧𑀜𑁆𑀜𑀸𑀧𑀦𑀁 𑀯𑀼𑀢𑁆𑀢𑀁, 𑀢𑀁 𑀤𑀼𑀢𑀺𑀬𑀧𑀸𑀞𑁂 𑀧𑀓𑀸𑀲𑀦𑀧𑀤𑁂𑀦 ‘‘𑀦𑀺𑀩𑁆𑀩𑀺𑀲𑁂𑀲𑀁 𑀧𑀓𑀸𑀭𑀢𑁄 𑀓𑀸𑀲𑀦’’𑀦𑁆𑀢𑀺 𑀓𑀢𑁆𑀯𑀸. 𑀬𑀲𑁆𑀫𑀸 𑀜𑀸𑀧𑀦𑀓𑀸𑀲𑀦𑀸𑀦𑀺 𑀅𑀢𑁆𑀣𑀸𑀯𑀪𑀸𑀲𑀦𑀲𑀪𑀸𑀯𑀢𑀸𑀬 𑀅𑀪𑀺𑀦𑁆𑀦𑀸𑀦𑀺, 𑀲𑀩𑁆𑀩𑁂𑀲𑀜𑁆𑀘 𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀲𑁆𑀲 𑀢𑁄𑀲𑀦𑀁, 𑀩𑀼𑀤𑁆𑀥𑀺𑀬𑀸 𑀘 𑀦𑀺𑀲𑀸𑀦𑀁 𑀬𑀸𑀣𑀸𑀯𑀢𑁄 𑀯𑀢𑁆𑀣𑀼𑀲𑀪𑀸𑀯𑀸𑀯𑀪𑀸𑀲𑀦𑁂 𑀚𑀸𑀬𑀢𑀻𑀢𑀺. 𑀏𑀯𑀁 𑀅𑀢𑁆𑀣𑀧𑀤𑀭𑀽𑀧𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀲𑁆𑀲 𑀬𑀣𑀸𑀯𑀼𑀢𑁆𑀢𑀙𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁 𑀲𑀸𑀲𑀦𑀁.

𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸𑀢𑀺 ¶ 𑀏𑀢𑁆𑀣 𑀉𑀘𑁆𑀘𑀸𑀭𑀡𑀯𑁂𑀮𑀸𑀬𑀁 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂 𑀯𑀡𑁆𑀡𑁄 𑀅𑀓𑁆𑀔𑀭𑀁. ‘‘𑀏𑀓𑀓𑁆𑀔𑀭𑀁 𑀧𑀤𑀁 𑀅𑀓𑁆𑀔𑀭’’𑀦𑁆𑀢𑀺 𑀏𑀓𑁂 ‘‘𑀆 𑀏𑀯𑀁 𑀓𑀺𑀭 𑀢’’𑀦𑁆𑀢𑀺𑀆𑀤𑀻𑀲𑀼 𑀆-𑀓𑀸𑀭𑀸𑀤𑀬𑁄 𑀯𑀺𑀬. ‘‘𑀯𑀺𑀲𑀼𑀤𑁆𑀥𑀓𑀭𑀡𑀸𑀦𑀁 𑀫𑀦𑀲𑀸 𑀤𑁂𑀲𑀦𑀸𑀯𑀸𑀘𑀸𑀬 𑀅𑀓𑁆𑀔𑀭𑀡𑀢𑁄 𑀅𑀓𑁆𑀔𑀭’’𑀦𑁆𑀢𑀺 𑀅𑀜𑁆𑀜𑁂. 𑀯𑀺𑀪𑀢𑁆𑀢𑀺𑀬𑀦𑁆𑀢𑀁 𑀅𑀢𑁆𑀣𑀜𑀸𑀧𑀦𑀢𑁄 𑀧𑀤𑀁. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀧𑀤𑀸𑀪𑀺𑀳𑀺𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. ‘‘𑀓𑀺𑀭𑀺𑀬𑀸𑀧𑀤𑀁 𑀅𑀩𑁆𑀬𑀬𑀓𑀸𑀭𑀓𑀯𑀺𑀲𑁂𑀲𑀦𑀬𑀼𑀢𑁆𑀢𑀁 𑀯𑀸𑀓𑁆𑀬’’𑀦𑁆𑀢𑀺 𑀳𑀺 𑀯𑀤𑀦𑁆𑀢𑀺. 𑀧𑀓𑀸𑀭𑀢𑁄 𑀯𑀸𑀓𑁆𑀬𑀯𑀺𑀪𑀸𑀕𑁄 ¶ 𑀆𑀓𑀸𑀭𑁄. 𑀆𑀓𑀸𑀭𑀸𑀪𑀺𑀳𑀺𑀢𑀁 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀦𑀺𑀩𑁆𑀩𑀘𑀦𑀯𑀺𑀢𑁆𑀣𑀸𑀭𑁄 𑀦𑀺𑀲𑁆𑀲𑁂𑀲𑀼𑀧𑀤𑁂𑀲𑀢𑁄 𑀦𑀺𑀤𑁆𑀤𑁂𑀲𑁄. 𑀏𑀢𑁂𑀲𑀁 𑀅𑀓𑁆𑀔𑀭𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀢𑀸𑀬 𑀲𑀩𑁆𑀬𑀜𑁆𑀚𑀦𑀁.

𑀢𑀢𑁆𑀭𑀸𑀬𑀫𑀲𑁆𑀲 𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺 𑀘 𑁋 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺, 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀺, 𑀢𑀣𑀸 𑀅𑀓𑁆𑀔𑀭𑁂𑀳𑀺 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀤𑁂𑀳𑀺 𑀯𑀺𑀦𑁂𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀁, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀧𑀜𑁆𑀘𑁂𑀢𑁆𑀯𑀸 𑀆𑀓𑀸𑀭𑁂𑀳𑀺 𑀯𑀺𑀦𑁂𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑀺𑀭𑀼𑀢𑁆𑀢𑀻𑀳𑀺 𑀦𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀳𑀺 𑀯𑀺𑀦𑁂𑀢𑀺 𑀦𑁂𑀬𑁆𑀬𑀁. 𑀏𑀯𑀜𑁆𑀘𑀸𑀬𑀁 𑀥𑀫𑁆𑀫𑁄 𑀉𑀕𑁆𑀖𑀝𑀺𑀬𑀫𑀸𑀦𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀁 𑀯𑀺𑀦𑁂𑀢𑀺, 𑀯𑀺𑀧𑀜𑁆𑀘𑀺𑀬𑀫𑀸𑀦𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑀺𑀬𑁆𑀬𑀫𑀸𑀦𑁄 𑀦𑁂𑀬𑁆𑀬𑀁. 𑀢𑀢𑁆𑀣 𑀉𑀕𑁆𑀖𑀝𑀦𑀸 𑀆𑀤𑀺, 𑀯𑀺𑀧𑀜𑁆𑀘𑀦𑀸 𑀫𑀚𑁆𑀛𑁂, 𑀦𑀬𑀦𑀫𑀦𑁆𑀢𑁂. 𑀏𑀯𑀁 𑀢𑀻𑀲𑀼 𑀓𑀸𑀮𑁂𑀲𑀼 𑀢𑀺𑀥𑀸 𑀤𑁂𑀲𑀺𑀢𑁄 𑀤𑁄𑀲𑀢𑁆𑀢𑀬𑀯𑀺𑀥𑀫𑀦𑁄 𑀕𑀼𑀡𑀢𑁆𑀢𑀬𑀸𑀯𑀳𑁄 𑀢𑀺𑀯𑀺𑀥𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑁄𑀢𑀺. 𑀏𑀯𑀫𑁆𑀧𑀺 𑀢𑀺𑀯𑀺𑀥𑀓𑀮𑁆𑀬𑀸𑀡𑁄𑀬𑀁 𑀥𑀫𑁆𑀫𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 ‘‘𑀲𑀸𑀢𑁆𑀣𑁄 𑀲𑀩𑁆𑀬𑀜𑁆𑀚𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄 ‘‘𑀧𑀭𑀺𑀧𑀼𑀡𑁆𑀡𑁄, 𑀧𑀭𑀺𑀲𑀼𑀤𑁆𑀥𑁄’’𑀢𑀺 𑀘.

𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀅𑀢𑁆𑀣𑁄. 𑀥𑀫𑁆𑀫𑁄 𑀢𑀦𑁆𑀢𑀺. 𑀧𑀝𑀺𑀯𑁂𑀥𑁄 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀤𑁂𑀲𑀦𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀢𑁂 𑀧𑀦𑁂𑀢𑁂 𑀅𑀢𑁆𑀣𑀸𑀤𑀬𑁄 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀅𑀣 𑀯𑀸 𑀅𑀢𑁆𑀣𑁄 𑀦𑀸𑀫 𑀳𑁂𑀢𑀼𑀨𑀮𑀁. 𑀥𑀫𑁆𑀫𑁄 𑀳𑁂𑀢𑀼. 𑀤𑁂𑀲𑀦𑀸 𑀧𑀜𑁆𑀜𑀢𑁆𑀢𑀺, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀁. 𑀧𑀝𑀺𑀯𑁂𑀥𑁄 𑀅𑀪𑀺𑀲𑀫𑀬𑁄, 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄, 𑀢𑁂𑀲𑀁 𑀢𑁂𑀲𑀁 𑀯𑀸 𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀢𑁂𑀧𑀺 𑀘𑁂𑀢𑁂 𑀅𑀢𑁆𑀣𑀸𑀤𑀬𑁄 𑀬𑀲𑁆𑀫𑀸 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀧𑁆𑀧𑀜𑁆𑀜𑁂𑀳𑀺 ¶ 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀤𑀼𑀓𑁆𑀔𑁄𑀕𑀸𑀳𑀸, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀲𑀼 𑀧𑀝𑀺𑀯𑁂𑀥𑀲𑁆𑀲𑀸𑀧𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀕𑀼𑀡𑀤𑀻𑀧𑀦𑀢𑁄. 𑀢𑀸𑀲𑀁 𑀥𑀫𑁆𑀫𑀤𑁂𑀲𑀦𑀸𑀦𑀁 𑀩𑁆𑀬𑀜𑁆𑀚𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀢𑀸𑀲𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀢𑁄.

𑀅𑀢𑁆𑀣𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀇𑀫𑀺𑀲𑁆𑀲𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀬 𑀅𑀢𑁆𑀣𑀯𑀺𑀲𑀬𑀢𑁆𑀢𑀸 𑀆𑀳 ‘‘𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣’’𑀦𑁆𑀢𑀺, 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀅𑀲𑀢𑀺 𑀢𑀤𑀪𑀸𑀯𑀢𑁄. 𑀥𑀫𑁆𑀫𑁄𑀢𑀺 𑀢𑀦𑁆𑀢𑀺 ¶ . 𑀦𑀺𑀭𑀼𑀢𑁆𑀢𑀻𑀢𑀺 𑀢𑀦𑁆𑀢𑀺𑀧𑀤𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀘𑀦𑀁. 𑀢𑀢𑁆𑀣 𑀧𑀪𑁂𑀤𑀕𑀢𑀸𑀦𑀺 𑀜𑀸𑀡𑀸𑀦𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀆𑀳 ‘‘𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀩𑁆𑀬𑀜𑁆𑀚𑀦𑀦𑁆𑀢𑀺, 𑀅𑀲𑀢𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄. 𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀭𑀺𑀓𑁆𑀔𑀓𑀚𑀦𑀸𑀦𑀁 𑀓𑀺𑀁𑀓𑀼𑀲𑀮𑀕𑀯𑁂𑀲𑀻𑀦𑀁 𑀧𑀲𑀸𑀤𑀸𑀯𑀳𑀁, 𑀢𑀲𑁆𑀫𑀸 𑀲𑀸𑀢𑁆𑀣𑀁. 𑀅𑀢𑁆𑀣𑀲𑀫𑁆𑀧𑀦𑁆𑀦𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑀸. 𑀲𑀸𑀢𑁆𑀣𑀓𑀢𑀸 𑀧𑀦𑀲𑁆𑀲 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑀸𑀬, 𑀲𑀸 𑀧𑀭𑀫𑀕𑀫𑁆𑀪𑀻𑀭𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄’’𑀢𑀺𑀆𑀤𑀺 (𑀫𑀳𑀸𑀯. 𑁮). 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑀲𑁆𑀫𑀸 𑀮𑁄𑀓𑀺𑀬𑀚𑀦𑀲𑁆𑀲 𑀧𑀲𑀸𑀤𑀸𑀯𑀳𑀁, 𑀢𑀲𑁆𑀫𑀸 𑀲𑀩𑁆𑀬𑀜𑁆𑀚𑀦𑀁. 𑀮𑁄𑀓𑀺𑀬𑀚𑀦𑁄 𑀳𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀢𑀼𑀲𑁆𑀲𑀢𑀺, 𑀇𑀥𑀸𑀧𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁. 𑀲𑀩𑁆𑀬𑀜𑁆𑀚𑀦𑀢𑀸 𑀧𑀦𑀲𑁆𑀲 𑀲𑀤𑁆𑀥𑁂𑀬𑁆𑀬𑀢𑀸𑀬, 𑀲𑀸 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀲𑀸𑀢𑁆𑀣’’𑀦𑁆𑀢𑀺 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀢𑀁 𑀆𑀳, 𑀢𑀢𑁄 𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀁. 𑀲𑀤𑁆𑀥𑁂𑀬𑁆𑀬𑀢𑁄 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀤𑁆𑀥𑀸𑀧𑀤𑀝𑁆𑀞𑀸𑀦𑀢𑀸𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀢𑀁, 𑀢𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀅𑀕𑀸𑀥𑀸𑀧𑀸𑀭𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀅𑀜𑁆𑀜𑀣𑀸 𑀢𑀤𑀪𑀸𑀯𑀢𑁄. 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀼𑀩𑁄𑀥𑀲𑀤𑁆𑀤𑀢𑀸𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀧𑀭𑀫𑀕𑀫𑁆𑀪𑀻𑀭𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀯𑁂𑀦𑁂𑀬𑁆𑀬𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀸𑀧𑀸𑀤𑀦𑀢𑁄. 𑀲𑀩𑁆𑀩𑁄𑀧𑁂𑀲 𑀧𑀞𑀫𑀲𑁆𑀲 𑀅𑀢𑁆𑀣𑀤𑁆𑀯𑀬𑀲𑁆𑀲 𑀧𑀪𑁂𑀤𑁄 𑀤𑀝𑁆𑀞𑀩𑁆𑀩𑁄, 𑀢𑀣𑀸 𑀘𑁂𑀯 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀺𑀢𑀁. 𑀢𑀣𑀸 𑀳𑁂𑀢𑁆𑀣 ¶ 𑀯𑀺𑀓𑀧𑁆𑀧𑀲𑁆𑀲, 𑀲𑀫𑀼𑀘𑁆𑀘𑀬𑀲𑁆𑀲 𑀯𑀸 𑀅𑀕𑁆𑀕𑀳𑀡𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲𑀸𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀯𑁄𑀤𑀸𑀦𑀢𑁆𑀣𑀲𑁆𑀲 𑀅𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬. 𑀅𑀧𑀦𑁂𑀢𑀩𑁆𑀩𑀲𑁆𑀲𑀸𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀲𑁆𑀲.

𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸, 𑀢𑀦𑁆𑀦𑀺𑀫𑀺𑀢𑁆𑀢𑀁. 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀅𑀥𑀺𑀕𑀫𑀯𑁂𑀬𑁆𑀬𑀢𑁆𑀢𑀺𑀬𑀲𑀩𑁆𑀪𑀸𑀯𑀢𑁄 𑀲𑀸𑀢𑁆𑀣𑀁 𑀓𑀧𑀺𑀮𑀯𑀢𑀸𑀤𑀺 𑀯𑀺𑀬 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀁 𑀅𑀳𑀼𑀢𑁆𑀯𑀸 𑀅𑀢𑁆𑀣𑀲𑀫𑁆𑀧𑀦𑁆𑀦𑀦𑁆𑀢𑀺 𑀓𑀢𑁆𑀯𑀸. 𑀧𑀭𑀺𑀬𑀢𑁆𑀢𑀺𑀬𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀭𑀺𑀘𑀬𑁂𑀦. 𑀆𑀕𑀫𑀩𑁆𑀬𑀢𑁆𑀢𑀺𑀢𑁄𑀢𑀺 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑁂𑀲𑀼 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑀲𑁆𑀲 𑀯𑀺𑀬 𑀲𑀫𑁆𑀫𑁄𑀳𑀁 𑀅𑀚𑀦𑁂𑀢𑁆𑀯𑀸 𑀩𑀸𑀳𑀼𑀲𑀘𑁆𑀘𑀯𑁂𑀬𑁆𑀬𑀢𑁆𑀢𑀺𑀬𑀲𑀩𑁆𑀪𑀸𑀯𑀢𑁄 𑀲𑀩𑁆𑀬𑀜𑁆𑀘𑀦𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀆𑀕𑀫𑀩𑁆𑀬𑀢𑁆𑀢𑀻𑀢𑀺. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄𑀢𑀺 𑀲𑀻𑀮𑀸𑀤𑀻𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀳𑀺 𑀅𑀯𑀺𑀭𑀳𑀺𑀢𑀢𑁆𑀢𑀸. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀅𑀦𑀯𑀲𑁂𑀲𑁂𑀦 𑀲𑀫𑀦𑁆𑀢𑀢𑁄 𑀧𑀼𑀡𑁆𑀡𑀁 𑀧𑀽𑀭𑀺𑀢𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄𑀢𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑀢𑁄. 𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀸𑀬. 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄𑀢𑀺 𑀓𑀣𑀜𑁆𑀘𑀺𑀧𑀺 𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀦𑀺𑀲𑁆𑀲𑀬𑀦𑀢𑁄.

𑀏𑀯𑀁 ¶ 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀅𑀧𑀤𑁂𑀲𑁂𑀦 𑀲𑀢𑁆𑀣𑀼 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀯𑀲𑁂𑀦 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀯𑀲𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑀢𑁄 𑀯𑀸 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑁄’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀫𑀸𑀧𑀚𑁆𑀚𑀢𑀻𑀢𑀺 𑀢𑁂𑀲𑀁 𑀥𑀫𑁆𑀫𑁂 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑀺𑀓𑀢𑁆𑀢𑀸𑀪𑀸𑀯𑀢𑁄 𑀏𑀓𑀁𑀲𑁂𑀦 𑀅𑀧𑀸𑀬𑀽𑀧𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀅𑀪𑀸𑀯𑀢𑁄. 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀅𑀢𑀫𑁆𑀫𑀬𑀢𑀸𑀪𑀸𑀯𑀢𑁄, 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀏𑀓𑀘𑁆𑀘𑀬𑀜𑁆𑀜𑀓𑀺𑀭𑀺𑀬𑀸𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀜𑁆𑀜𑀸𑀡𑀸𑀤𑀻𑀦𑀁 𑀢𑀢𑁄 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸𑀪𑀸𑀯𑀢𑁄 𑀯𑀺𑀧𑀭𑀻𑀢𑁄 𑀏𑀯 𑀳𑁄𑀢𑀺. 𑀢𑁂𑀦𑀸𑀢𑀺 𑀅𑀢𑁆𑀣𑀲𑁆𑀲 𑀯𑀺𑀧𑀮𑁆𑀮𑀸𑀲𑀸𑀧𑀚𑁆𑀚𑀦𑁂𑀦. 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀢𑀣𑀸𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄𑀢𑀺 𑀓𑀫𑁆𑀫𑀦𑁆𑀢𑀭𑀸𑀬𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀦𑁆𑀢𑀭𑀸𑀬𑀺𑀓𑀪𑀸𑀯𑀲𑁆𑀲 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀦𑀁 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀲𑁆𑀲 𑀓𑀤𑀸𑀘𑀺𑀧𑀺 𑀅𑀦𑀢𑀺𑀯𑀢𑁆𑀢𑀦𑀢𑁄.

𑀦𑀺𑀩𑁆𑀩𑀸𑀦𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀲𑀩𑁆𑀩𑀲𑀗𑁆𑀔𑀢𑀯𑀺𑀦𑀺𑀲𑁆𑀲𑀝𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀭𑀽𑀧𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀲𑁆𑀲𑀭𑀡𑀽𑀧𑀸𑀬𑀪𑀽𑀢𑀸𑀬 𑀲𑀧𑀼𑀩𑁆𑀩𑀪𑀸𑀕𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 ¶ 𑀅𑀓𑁆𑀔𑀸𑀢𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀧𑀝𑀺𑀧𑀤𑀸𑀦𑀼𑀭𑀽𑀧𑀲𑁆𑀲𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀪𑀽𑀢𑀸 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂𑀦𑀸𑀧𑀺 𑀓𑀺𑀮𑁂𑀲𑁂𑀳𑀺 𑀅𑀦𑀸𑀫𑀲𑀦𑀻𑀬𑀸 𑀬𑀸𑀤𑀺𑀲𑀻 𑀧𑀝𑀺𑀧𑀤𑀸, 𑀢𑀤𑀦𑀼𑀭𑀽𑀧𑀲𑁆𑀲. 𑀲𑀼𑀧𑀜𑁆𑀜𑀢𑁆𑀢𑀸𑀢𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀧𑁆𑀧𑀪𑁂𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀳𑀸𑀬𑀺𑀓𑀪𑀸𑀯𑁂𑀦 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯 𑀯𑀺𑀳𑀺𑀢𑀸. 𑀲𑀁𑀲𑀦𑁆𑀤𑀢𑀺 𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀢𑀸𑀬 𑀲𑀫𑁂𑀢𑀺. 𑀏𑀯𑀁 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀧𑀝𑀺𑀧𑀤𑀸𑀧𑀝𑀺𑀧𑀚𑁆𑀚𑀦𑀻𑀬𑀪𑀸𑀯𑁂𑀳𑀺 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀢𑀸𑀬 𑀲𑁆𑀯𑀸𑀓𑁆𑀔𑀸𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀯𑀺𑀥𑀲𑁆𑀲𑀸𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀧𑀘𑁆𑀘𑁂𑀓𑀁 𑀲𑁆𑀯𑀸𑀓𑁆𑀔𑀸𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀺𑀬𑀫𑀕𑁆𑀕𑁄 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀢𑀤𑁆𑀯𑀬𑀦𑁆𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀁, 𑀓𑀸𑀫𑀲𑀼𑀔𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁, 𑀮𑀻𑀦𑀼𑀤𑁆𑀥𑀘𑁆𑀘𑀁, 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀦𑁆𑀢𑀺 𑀏𑀯𑀁 𑀧𑀪𑁂𑀤𑀁 𑀅𑀦𑁆𑀢𑀤𑁆𑀯𑀬𑀁. 𑀅𑀦𑀼𑀧𑀕𑀫𑁆𑀫𑀸𑀢𑀺 𑀅𑀦𑀼𑀧𑀕𑀦𑁆𑀢𑁆𑀯𑀸, 𑀅𑀦𑀼𑀧𑀕𑀫𑀦𑀳𑁂𑀢𑀼 𑀯𑀸. 𑀧𑀝𑀺𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀸𑀦𑀻𑀢𑀺 𑀲𑀼𑀝𑁆𑀞𑀼 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀸𑀦𑀺, 𑀧𑀝𑀺𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀳𑀻𑀦𑀤𑁄𑀲𑀸𑀦𑀺. 𑀲𑀲𑁆𑀲𑀢𑀸𑀤𑀺𑀲𑀪𑀸𑀯𑀯𑀲𑁂𑀦𑀸𑀢𑀺 ‘‘𑀲𑀲𑁆𑀲𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀫𑀢𑀜𑁆𑀘 𑀢𑀸𑀡𑀜𑁆𑀘 𑀮𑁂𑀡𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀲𑁆𑀲𑀢𑀸𑀤𑀺𑀪𑀸𑀯𑀓𑀺𑀢𑁆𑀢𑀦𑀯𑀲𑁂𑀦.

𑁧𑁪𑁮. ‘‘𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑀁 𑀓𑀭𑁄𑀦𑁆𑀢𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀦 𑀲𑀸𑀫𑀁 𑀤𑀝𑁆𑀞𑀩𑁆𑀩𑁄’’𑀢𑀺 𑀇𑀫𑀺𑀦𑀸 ‘‘𑀅𑀭𑀺𑀬𑀫𑀕𑁆𑀕𑁂𑀦 𑀫𑀫 𑀭𑀸𑀕𑀸𑀤𑀬𑁄 𑀧𑀳𑀻𑀦𑀸’’𑀢𑀺 𑀲𑀬𑀁 𑀅𑀢𑁆𑀢𑀦𑀸 𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺 𑀏𑀯 𑀲𑀦𑁆𑀤𑀺𑀝𑁆𑀞𑀺𑀓𑁄.

𑀢𑁂𑀦 ¶ 𑀢𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀧𑀭𑀲𑀤𑁆𑀥𑀸𑀬 𑀧𑀭𑀲𑁆𑀲 𑀲𑀤𑁆𑀤𑀳𑀦𑁂𑀦 𑀧𑀭𑀦𑁂𑀬𑁆𑀬𑁂𑀦 𑀕𑀦𑁆𑀢𑀩𑁆𑀩𑀢𑀁 𑀳𑀺𑀢𑁆𑀯𑀸 𑀜𑀸𑀧𑁂𑀢𑀩𑁆𑀩𑀢𑀁 𑀧𑀳𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀓𑀭𑀡𑀪𑀽𑀢𑁂𑀦. 𑀧𑀲𑀢𑁆𑀣𑀸 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀺 𑀬𑀣𑀸 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀅𑀭𑀺𑀬𑀫𑀕𑁆𑀕𑁄 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀦𑁆𑀤𑀺𑀝𑁆𑀞𑀺𑀬𑀸 𑀓𑀺𑀮𑁂𑀲𑁂 𑀚𑀬𑀢𑀺, 𑀅𑀭𑀺𑀬𑀨𑀮𑀁 𑀢𑀸𑀬 𑀏𑀯 𑀅𑀢𑁆𑀢𑀦𑁄 𑀓𑀸𑀭𑀡𑀪𑀽𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑁂𑀦 𑀅𑀢𑁆𑀢𑀦𑁄 𑀯𑀺𑀲𑀬𑀻𑀪𑀽𑀢𑀸𑀬 𑀲𑀦𑁆𑀤𑀺𑀝𑁆𑀞𑀺𑀬𑀸 𑀓𑀺𑀮𑁂𑀲𑁂 𑀚𑀬𑀢𑀻𑀢𑀺 𑀬𑁄𑀚𑀦𑀸.

𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀫𑀕𑁆𑀕𑀥𑀫𑁆𑀫𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑁄. 𑀨𑀮𑀫𑁆𑀧𑀺 𑀳𑁂𑀝𑁆𑀞𑀺𑀫𑀁 𑀲𑀓𑀤𑀸𑀕𑀸𑀫𑀺𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑀭𑀺 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀧𑀭𑀺𑀬𑀸𑀬𑀢𑁄 ‘‘𑀤𑀺𑀲𑁆𑀲𑀫𑀸𑀦𑁄 𑀯𑀝𑁆𑀝𑀪𑀬𑀁 𑀦𑀺𑀯𑀢𑁆𑀢𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺.

𑁧𑁪𑁯. 𑀦𑀸𑀲𑁆𑀲 ¶ 𑀓𑀸𑀮𑁄𑀢𑀺 𑀦𑀸𑀲𑁆𑀲 𑀆𑀕𑀫𑁂𑀢𑀩𑁆𑀩𑁄 𑀓𑀸𑀮𑁄 𑀅𑀢𑁆𑀣𑀺. 𑀬𑀣𑀸 𑀳𑀺 𑀮𑁄𑀓𑀺𑀬𑀓𑀼𑀲𑀮𑀲𑁆𑀲 ‘‘𑀉𑀧𑀧𑀚𑁆𑀚𑁂, 𑀅𑀧𑀭𑀧𑀭𑀺𑀬𑀸𑀬𑁂’’𑀢𑀺𑀆𑀤𑀺𑀦𑀸 𑀨𑀮𑀤𑀸𑀦𑀁 𑀧𑀢𑀺 𑀆𑀕𑀫𑁂𑀢𑀩𑁆𑀩𑁄 𑀓𑀸𑀮𑁄 𑀅𑀢𑁆𑀣𑀺, 𑀦 𑀏𑀯𑀫𑁂𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀧𑀜𑁆𑀘𑀸𑀳𑀸’’𑀢𑀺𑀆𑀤𑀺. 𑀧𑀓𑀝𑁆𑀞𑁄𑀢𑀺 𑀤𑀽𑀭𑁄. 𑀨𑀮𑀤𑀸𑀦𑀁 𑀧𑀢𑀺 𑀓𑀸𑀮𑁄 𑀧𑀓𑀝𑁆𑀞𑁄 𑀅𑀲𑁆𑀲𑀸𑀢𑀺 𑀓𑀸𑀮𑀺𑀓𑁄, 𑀓𑀸𑀮𑀦𑁆𑀢𑀭𑀨𑀮𑀤𑀸𑀬𑀻. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀨𑀮𑀤𑀸𑀦𑁂’’𑀢𑀺. 𑀧𑀢𑁆𑀢𑁄𑀢𑀺 𑀉𑀧𑀦𑀻𑀢𑁄. 𑀇𑀤𑀦𑁆𑀢𑀺 ‘‘𑀅𑀓𑀸𑀮𑀺𑀓𑁄’’𑀢𑀺 𑀧𑀤𑀁.

𑁧𑁫𑁦. 𑀯𑀺𑀥𑀺𑀦𑁆𑀢𑀺 𑀯𑀺𑀥𑀸𑀦𑀁, ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀏𑀯𑀁𑀧𑀯𑀢𑁆𑀢𑀯𑀺𑀥𑀺𑀯𑀘𑀦𑀁. 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀢𑀺 𑀓𑀺𑀮𑁂𑀲𑀫𑀮𑀯𑀺𑀭𑀳𑁂𑀦 𑀲𑀩𑁆𑀩𑀣𑀸 𑀯𑀺𑀲𑀼𑀤𑁆𑀥𑀢𑁆𑀢𑀸. 𑀅𑀫𑀦𑀼𑀜𑁆𑀜𑀫𑁆𑀧𑀺 𑀓𑀤𑀸𑀘𑀺 𑀧𑀬𑁄𑀚𑀦𑀯𑀲𑁂𑀦 𑀬𑀣𑀸𑀲𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀤𑀲𑁆𑀲𑁂𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀦𑀼𑀜𑁆𑀜𑀪𑀸𑀯𑀧𑁆𑀧𑀓𑀸𑀲𑀦𑁂𑀦𑀸’’𑀢𑀺.

𑁧𑁫𑁧. 𑀉𑀧𑀦𑁂𑀢𑀩𑁆𑀩𑁄𑀢𑀺 𑀉𑀧𑀦𑁂𑀬𑁆𑀬𑁄, 𑀉𑀧𑀦𑁂𑀬𑁆𑀬𑁄𑀯 𑀑𑀧𑀦𑁂𑀬𑁆𑀬𑀺𑀓𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀉𑀧𑀦𑁂𑀢𑀩𑁆𑀩𑁄𑀢𑀺 𑀑𑀧𑀦𑁂𑀬𑁆𑀬𑀺𑀓𑁄’’𑀢𑀺. 𑀘𑀺𑀢𑁆𑀢𑁂 𑀉𑀧𑀦𑀬𑀦𑀁 𑀉𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀇𑀤𑀁 𑀲𑀗𑁆𑀔𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀬𑀼𑀚𑁆𑀚𑀢𑀻’’𑀢𑀺. 𑀘𑀺𑀢𑁆𑀢𑁂 𑀉𑀧𑀦𑀬𑀦𑀦𑁆𑀢𑀺 𑀧𑀦 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀽𑀧𑀦𑀬𑀦𑁂 𑀅𑀥𑀺𑀧𑁆𑀧𑁂𑀢𑁂 𑀅𑀲𑀗𑁆𑀔𑀢𑁂𑀧𑀺 𑀬𑀼𑀚𑁆𑀚𑁂𑀬𑁆𑀬 ‘‘𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑀁 𑀉𑀧𑀦𑀬𑀦𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄’’𑀢𑀺. 𑀅𑀮𑁆𑀮𑀻𑀬𑀦𑀦𑁆𑀢𑀺 𑀨𑀼𑀲𑀦𑀁. 𑀦𑀺𑀩𑁆𑀩𑀸𑀦𑀁 𑀉𑀧𑀦𑁂𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫𑁨. 𑀯𑀺𑀜𑁆𑀜𑀽𑀳𑀻𑀢𑀺 ¶ 𑀯𑀺𑀤𑀽𑀳𑀺, 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀏𑀓𑀁𑀲𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀬𑁄 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀻’’𑀢𑀺. ‘‘𑀧𑀘𑁆𑀘𑀢𑁆𑀢’’𑀦𑁆𑀢𑀺 𑀏𑀢𑀲𑁆𑀲 ‘‘𑀧𑀢𑀺 𑀅𑀢𑁆𑀢𑀦𑀻’’𑀢𑀺 𑀪𑀼𑀫𑁆𑀫𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀢𑁆𑀢𑀦𑀺 𑀅𑀢𑁆𑀢𑀦𑀻’’𑀢𑀺. 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀪𑀸𑀯𑀺𑀢𑁄 𑀫𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀫𑁂’’𑀢𑀺 𑀇𑀫𑀺𑀦𑀸 ‘‘𑀧𑀘𑁆𑀘𑀢𑁆𑀢’’𑀦𑁆𑀢𑀺 𑀧𑀤𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀅𑀦𑁆𑀯𑀬𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀩𑁆𑀬𑀢𑀺𑀭𑁂𑀓𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀇𑀤𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀸𑀮𑀸𑀦𑀁 𑀧𑀦 𑀅𑀯𑀺𑀲𑀬𑁄 𑀘𑁂𑀲𑀸’’𑀢𑀺 𑀆𑀳.

𑀏𑀯𑀁 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑀼𑀭𑀽𑀧𑀤𑁂𑀲𑀦𑀸𑀬 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀤𑀁 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀢𑁆𑀢𑀸𑀢𑀺 𑀬𑀲𑁆𑀫𑀸 ¶ 𑀅𑀬𑀁 𑀥𑀫𑁆𑀫𑁄 𑀯𑀼𑀢𑁆𑀢𑀦𑀬𑁂𑀦 𑀲𑀸𑀫𑀁 𑀤𑀝𑁆𑀞𑀩𑁆𑀩𑁄, 𑀲𑀦𑁆𑀤𑀺𑀝𑁆𑀞𑀺𑀬𑀸 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑁂𑀢𑀺, 𑀲𑀦𑁆𑀤𑀲𑁆𑀲𑀦𑀜𑁆𑀘 𑀅𑀭𑀳𑀢𑀺, 𑀢𑀲𑁆𑀫𑀸 𑀲𑁆𑀯𑀸𑀓𑁆𑀔𑀸𑀢𑁄 𑀤𑀼𑀭𑀓𑁆𑀔𑀸𑀢𑁂 𑀢𑀺𑀢𑁆𑀣𑀺𑀬𑀥𑀫𑁆𑀫𑁂 𑀢𑀤𑀪𑀸𑀯𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁫𑁩. 𑀢𑀲𑁆𑀲𑁂𑀯𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁩. 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁫𑁪. 𑀅𑀭𑀺𑀬𑀲𑀗𑁆𑀖𑀕𑀼𑀡𑀸𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄, 𑀲𑀤𑁂𑀯𑀓𑁂𑀦 𑀘 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀅𑀭𑀡𑀻𑀬𑀢𑁄 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘, 𑀅𑀭𑀺𑀬𑀸𑀦𑀁 𑀯𑀸 𑀲𑀗𑁆𑀖𑁄 𑀅𑀭𑀺𑀬𑀲𑀗𑁆𑀖𑁄, 𑀢𑀲𑁆𑀲 𑀕𑀼𑀡𑀸.

𑁧𑁫𑁫. 𑀬𑀁 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 ‘‘𑀲𑀼𑀝𑁆𑀞𑀼 𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀭𑀺𑀬𑀫𑀕𑁆𑀕𑀧𑀝𑀺𑀧𑀤𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 𑀧𑀚𑀳𑀦𑀢𑁄 𑀧𑀬𑁄𑀚𑀦𑀸𑀪𑀸𑀯𑀸 𑀲𑀬𑀫𑁆𑀧𑀺 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀸, 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀏𑀓𑀁𑀲𑀢𑁄 𑀅𑀦𑀼𑀮𑁄𑀫𑀻𑀢𑀺. 𑀢𑀢𑁄 𑀏𑀯 𑀅𑀧𑀘𑁆𑀘𑀦𑀻𑀓𑀸, 𑀅𑀦𑀼𑀥𑀫𑁆𑀫𑀪𑀽𑀢𑀸 𑀘, 𑀢𑀲𑁆𑀲𑀸 𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀅𑀭𑀺𑀬𑀲𑀗𑁆𑀖𑁄 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀝𑁆𑀞𑀼 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀦𑀺𑀯𑀢𑁆𑀢𑀺𑀧𑀝𑀺𑀧𑀤’’𑀦𑁆𑀢𑀺 𑀇𑀫𑀺𑀦𑀸 𑀉𑀚𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀦𑁂 𑀳𑀺 𑀲𑀢𑀺 𑀉𑀚𑀼𑀧𑁆𑀧𑀝𑀺𑀧𑀢𑁆𑀢𑀺 𑀦 𑀳𑁄𑀢𑀺. ‘‘𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤’’𑀦𑁆𑀢𑀺 ¶ 𑀇𑀫𑀺𑀦𑀸 𑀜𑀸𑀬𑀧𑁆𑀧𑀝𑀺𑀧𑀢𑁆𑀢𑀺𑀁. 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀲𑁆𑀲 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀮𑁄𑀫𑀦𑁂𑀦, 𑀅𑀧𑀘𑁆𑀘𑀦𑀻𑀓𑀢𑀸𑀬 𑀘𑀲𑁆𑀲𑀸 𑀜𑀸𑀬𑀢𑁄. ‘‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑀤𑀻𑀧𑀦𑀢𑁄. 𑀏𑀢𑁂𑀦 𑀧𑀞𑀫𑀧𑀤𑀲𑁆𑀲 𑀧𑀧𑀜𑁆𑀘𑀦𑀺𑀤𑁆𑀤𑁂𑀲𑁄, 𑀇𑀢𑀭𑀸𑀦𑀺 𑀢𑀻𑀡𑀺 𑀧𑀤𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺.

𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁂𑀦 𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀪𑀸𑀯𑀸𑀯𑀳𑀁 𑀲𑀯𑀦𑀁 𑀲𑀓𑁆𑀓𑀘𑁆𑀘𑀲𑀯𑀦𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸’’𑀢𑀺, 𑀢𑁂𑀦 𑀅𑀭𑀺𑀬𑀸 𑀏𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀢𑁆𑀣𑀼 𑀲𑀸𑀯𑀓𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀢𑀸𑀬𑀸𑀢𑀺 𑀅𑀭𑀺𑀬𑁂𑀦 𑀲𑀻𑀮𑁂𑀦, 𑀅𑀭𑀺𑀬𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀲𑀫𑀸𑀦𑀪𑀸𑀯𑁂𑀦. 𑀅𑀭𑀺𑀬𑀸𑀦𑀜𑁆𑀳𑀺 𑀲𑀻𑀮𑀤𑀺𑀝𑁆𑀞𑀺𑀬𑁄 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀫𑀕𑁆𑀕𑁂𑀦𑀸𑀕𑀢𑀢𑁆𑀢𑀸. 𑀢𑁂𑀦 ¶ 𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀸𑀧𑀺 𑀲𑀁𑀳𑀢𑀸𑀯. 𑀢𑁂𑀦𑀸𑀳 ‘‘𑀲𑀗𑁆𑀖𑀸𑀢𑀪𑀸𑀯𑀫𑀸𑀧𑀦𑁆𑀦𑁄’’𑀢𑀺. 𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀧𑀸𑀧𑀥𑀫𑁆𑀫𑀲𑀫𑀼𑀘𑁆𑀙𑁂𑀤𑁂𑀦 𑀉𑀚𑀼. 𑀢𑀢𑁄 𑀏𑀯 𑀕𑁄𑀫𑀼𑀢𑁆𑀢𑀯𑀗𑁆𑀓𑀸𑀪𑀸𑀯𑁂𑀦 𑀅𑀯𑀗𑁆𑀓𑀸. 𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑀸𑀪𑀸𑀯𑁂𑀦 𑀅𑀓𑀼𑀝𑀺𑀮𑀸. 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀸𑀪𑀸𑀯𑁂𑀦 𑀅𑀚𑀺𑀫𑁆𑀳𑀸. 𑀅𑀯𑀗𑁆𑀓𑀸𑀤𑀺𑀪𑀸𑀯𑁂𑀦 𑀯𑀸 𑀉𑀚𑀼. 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀸. 𑀅𑀧𑀡𑁆𑀡𑀓𑀪𑀸𑀯𑁂𑀦 𑀜𑀸𑀬𑀢𑀺 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄. 𑀯𑀝𑁆𑀝𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀸𑀬 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸. 𑀅𑀦𑀼𑀭𑀽𑀧𑀢𑁆𑀢𑀸 𑀲𑀸𑀫𑀻𑀘𑀺 𑀑𑀧𑀸𑀬𑀺𑀓𑀸𑀢𑀺𑀧𑀺 𑀲𑀗𑁆𑀔𑀁 𑀲𑀫𑀜𑁆𑀜𑀁 𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀢𑀸𑀬 𑀲𑀫𑀗𑁆𑀕𑀺𑀢𑀸𑀬 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 ‘‘𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀓𑀢𑁆𑀯𑀸. 𑀯𑀢𑁆𑀢𑀫𑀸𑀦𑀢𑁆𑀣𑁄 𑀳𑀺 𑀅𑀬𑀁 𑀧𑀝𑀺𑀧𑀦𑁆𑀦-𑀲𑀤𑁆𑀤𑁄 𑀬𑀣𑀸 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 (𑀧𑀼. 𑀧. 𑁨𑁦𑁬). 𑀅𑀢𑀻𑀢𑀁 𑀧𑀝𑀺𑀧𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀤𑀢𑀺. 𑀉𑀪𑀬𑁂𑀦 𑀘 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑀸’’𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑀳𑀺𑀢𑀸𑀦𑀁 𑀲𑀫𑀽𑀳𑁄 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀆𑀤𑀺𑀧𑀤𑀢𑁆𑀣𑀦𑀺𑀤𑁆𑀤𑁂𑀲𑀪𑀸𑀯𑁂𑀦 𑀇𑀢𑀭𑀧𑀤𑀸𑀦𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀯𑁄𑀫𑀺𑀲𑁆𑀲𑀓𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀲𑀢𑁆𑀣𑀸𑀭𑀸 𑀬𑀣𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸 𑀅𑀦𑀼𑀲𑀸𑀲𑀦𑀻𑀅𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀡𑁆𑀡𑀓𑀧𑀝𑀺𑀧𑀤𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀧𑀝𑀺𑀧𑀤𑀁, 𑀅𑀦𑀯𑀚𑁆𑀚𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑁂 𑀤𑀼𑀢𑀺𑀬𑀧𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦𑀦𑀼 𑀘 𑀤𑀼𑀢𑀺𑀬𑀧𑀤𑁂𑀦 𑀲𑀫𑁆𑀩𑀦𑁆𑀥𑁂𑀧𑀺 𑀧𑀞𑀫𑀁 𑀧𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦 𑀢𑀲𑁆𑀲 𑀧𑀞𑀫𑀁 𑀅𑀧𑁂𑀓𑁆𑀔𑀺𑀢𑀢𑁆𑀢𑀸. 𑀲𑀸 𑀧𑀦 𑀲𑀸𑀯𑀓𑀸𑀦𑀁 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀤𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀦𑁆𑀦𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 ¶ . 𑀉𑀪𑀬𑀲𑁆𑀲𑀸𑀧𑀺 𑀯𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀲𑀸𑀥𑀦𑀢𑁆𑀢𑀸 𑀉𑀪𑀬𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀺-𑀲𑀤𑁆𑀤𑁂𑀦 𑀉𑀪𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀓𑀺𑀮𑁂𑀲𑀚𑀺𑀫𑁆𑀳𑀯𑀲𑁂𑀦 𑀅𑀦𑁆𑀢𑀤𑁆𑀯𑀬𑀕𑀸𑀳𑁄𑀢𑀺 𑀲𑀩𑁆𑀩𑀲𑁄 𑀢𑀁 𑀧𑀳𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸 𑀓𑀸𑀬𑀸𑀤𑀺𑀯𑀗𑁆𑀓𑀧𑁆𑀧𑀳𑀸𑀬𑀺𑀦𑀻 𑀉𑀚𑀼𑀧𑁆𑀧𑀝𑀺𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬…𑀧𑁂… 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺.

𑀜𑀸𑀬𑁄 𑀦𑀸𑀫 𑀬𑀼𑀢𑁆𑀢𑀧𑁆𑀧𑀢𑁆𑀢𑀧𑀝𑀺𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘, 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀢𑀸𑀬 𑀆𑀤𑀺𑀢𑁆𑀢𑀁 𑀘𑁂𑀮𑀁, 𑀲𑀻𑀲𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀆𑀳 ‘‘𑀜𑀸𑀬𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀦𑀺𑀩𑁆𑀩𑀸𑀬𑀦𑀓𑀺𑀭𑀺𑀬𑀸𑀫𑀼𑀔𑁂𑀦 𑀘𑁂𑀢𑁆𑀣 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ¶ , 𑀫𑀕𑁆𑀕𑀜𑀸𑀡𑀸𑀤𑀻𑀳𑀺 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀲𑀘𑁆𑀙𑀺𑀓𑀭𑀻𑀬𑀢𑀺 𑀘𑀸𑀢𑀺 𑀜𑀸𑀬𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀧𑀭𑁂𑀳𑀺 𑀓𑀬𑀺𑀭𑀫𑀸𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀭𑀳𑀦𑁆𑀢𑀻𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀸𑀭𑀳𑀸.

𑁧𑁫𑁬. 𑀬𑀤𑀺𑀤𑀦𑁆𑀢𑀺 𑀅𑀦𑁆𑀢𑁄𑀕𑀥𑀮𑀺𑀗𑁆𑀕𑀯𑀘𑀦𑀪𑁂𑀤𑁄 𑀦𑀺𑀧𑀸𑀢𑁄𑀢𑀺 𑀢𑀲𑁆𑀲 𑀯𑀘𑀦𑀪𑁂𑀤𑁂𑀦 𑀅𑀢𑁆𑀣𑀫𑀸𑀳 ‘‘𑀬𑀸 𑀇𑀫𑀸𑀦𑀻’’𑀢𑀺. 𑀏𑀯𑀦𑁆𑀢𑀺 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀇𑀢𑀭𑀸𑀦𑀺 𑀢𑀻𑀡𑀺 𑀬𑀼𑀕𑀴𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀴𑀸𑀦𑀺 𑀳𑁄𑀦𑁆𑀢𑀻’’𑀢𑀺. 𑀏𑀢𑀦𑁆𑀢𑀺 𑀏𑀢𑀁 ‘‘𑀧𑀼𑀭𑀺𑀲𑀧𑀼𑀕𑁆𑀕𑀮𑀸’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁 𑀧𑀤𑀁. 𑀧𑀼𑀭𑀺𑀲𑀸 𑀘 𑀢𑁂 𑀧𑀼𑀕𑁆𑀕𑀮𑀸 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀸. 𑀢𑀢𑁆𑀣 ‘‘𑀧𑀼𑀭𑀺𑀲𑀸’’𑀢𑀺 𑀇𑀫𑀺𑀦𑀸 𑀧𑀞𑀫𑀸𑀬 𑀧𑀓𑀢𑀺𑀬𑀸 𑀕𑀳𑀡𑀁, ‘‘𑀧𑀼𑀕𑁆𑀕𑀮𑀸’’𑀢𑀺 𑀧𑀦 𑀤𑀼𑀢𑀺𑀬𑀸𑀬𑀧𑀺 𑀲𑀢𑁆𑀢𑀲𑀸𑀫𑀜𑁆𑀜𑁂𑀦𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀓𑀻𑀤𑀺𑀲𑀸𑀦𑀁? 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀤𑀸𑀢𑀩𑁆𑀩𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀁 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀺𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 ‘‘𑀆𑀳𑀼𑀦’’𑀦𑁆𑀢𑀺 𑀲𑀫𑀜𑁆𑀜𑀸 𑀲𑀺𑀬𑀸. 𑀆𑀳𑀼𑀦𑀁 𑀅𑀭𑀳𑀢𑀻𑀢𑀺 𑀯𑀸 𑀆𑀳𑀼𑀦𑁂𑀬𑁆𑀬𑁄. 𑀲𑀓𑁆𑀓𑀸𑀤𑀻𑀦𑀫𑁆𑀧𑀺 𑀯𑀸 𑀆𑀳𑀯𑀦𑀦𑁆𑀢𑀺 𑀲𑀓𑁆𑀓𑀸𑀤𑀻𑀳𑀺𑀧𑀺 𑀤𑀺𑀬𑁆𑀬𑀫𑀸𑀦𑀁 𑀤𑀸𑀦𑀁. 𑀬𑀢𑁆𑀣 𑀳𑀼𑀢𑀁 𑀫𑀳𑀧𑁆𑀨𑀮𑀦𑁆𑀢𑀺 𑀬𑀲𑁆𑀫𑀺𑀁 𑀆𑀯𑀳𑀦𑀻𑀬𑀕𑁆𑀕𑀺𑀫𑁆𑀳𑀺 𑀳𑀼𑀢𑀁 𑀤𑀥𑀺𑀆𑀤𑀺 𑀆𑀳𑀼𑀦𑁂𑀬𑁆𑀬𑀕𑁆𑀕𑀺𑀕𑀳𑀧𑀢𑀕𑁆𑀕𑀺𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀻𑀲𑀼 𑀳𑀼𑀢𑀢𑁄 𑀉𑀴𑀸𑀭𑀨𑀮𑀦𑁆𑀢𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺. 𑀳𑀼𑀢𑀦𑁆𑀢𑀺 𑀤𑀺𑀦𑁆𑀦𑀁. 𑀦𑀺𑀓𑀸𑀬𑀦𑁆𑀢𑀭𑁂𑀢𑀺 𑀲𑀩𑁆𑀩𑀢𑁆𑀣𑀺𑀓𑀯𑀸𑀤𑀺𑀦𑀺𑀓𑀸𑀬𑁂.

𑀞𑀧𑁂𑀢𑁆𑀯𑀸 𑁧𑁬𑁫 𑀢𑁂𑀢𑀺 𑀢𑁂 𑀧𑀺𑀬𑀫𑀦𑀸𑀧𑁂 𑀜𑀸𑀢𑀺𑀫𑀺𑀢𑁆𑀢𑁂 𑀅𑀧𑀦𑁂𑀢𑁆𑀯𑀸, 𑀢𑁂𑀲𑀁 𑀅𑀤𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀏𑀲𑁄. 𑀏𑀓𑀩𑀼𑀤𑁆𑀥𑀦𑁆𑀢𑀭𑁂 𑀘 𑀤𑀺𑀲𑁆𑀲𑀢𑀻𑀢𑀺 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀯𑀻𑀢𑀺𑀯𑀢𑁆𑀢𑁂 𑀤𑀺𑀲𑁆𑀲𑀢𑀺. 𑀘-𑀲𑀤𑁆𑀤𑁂𑀦 𑀓𑀤𑀸𑀘𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀯𑀻𑀢𑀺𑀯𑀢𑁆𑀢𑁂𑀢𑀺 𑀤𑀲𑁆𑀲𑁂𑀢𑀺. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀯𑁄𑀫𑀺𑀲𑁆𑀲𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀜𑁆𑀘𑁂𑀢𑀁. 𑀧𑀺𑀬𑀫𑀦𑀸𑀧𑀢𑁆𑀢𑀓𑀭𑀥𑀫𑁆𑀫𑀸 𑀦𑀸𑀫 𑀲𑀻𑀮𑀸𑀤𑀬𑁄, 𑀢𑁂 𑀅𑀭𑀺𑀬𑀲𑀗𑁆𑀖𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸. 𑀅𑀬𑀁 𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀜𑀸𑀢𑀺𑀫𑀺𑀢𑁆𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀫𑀸𑀕𑀘𑁆𑀙𑀦𑁆𑀢𑀺, 𑀅𑀦𑀯𑀝𑁆𑀞𑀺𑀢𑀸 𑀘 𑀢𑁂𑀲𑀼 𑀧𑀺𑀬𑀫𑀦𑀸𑀧𑀢𑀸, 𑀦 𑀏𑀯𑀫𑀭𑀺𑀬𑀲𑀗𑁆𑀖𑁄. 𑀢𑀲𑁆𑀫𑀸 𑀲𑀗𑁆𑀖𑁄𑀯 𑀧𑀸𑀳𑀼𑀦𑁂𑀬𑁆𑀬𑁄𑀢𑀺. 𑀧𑀼𑀩𑁆𑀩𑀓𑀸𑀭𑀦𑁆𑀢𑀺 𑀅𑀕𑁆𑀕𑀓𑀺𑀭𑀺𑀬𑀁. 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀸𑀢𑀺 𑀆𑀤𑀭𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀺𑀦𑀸, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀓𑁆𑀓𑀘𑁆𑀘𑀓𑀭𑀡𑀸𑀤𑀺𑀦𑀸 ¶ 𑀘 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦. 𑀲𑁆𑀯𑀸𑀬𑀁 𑀧𑀸𑀳𑀯𑀦𑀻𑀬-𑀲𑀤𑁆𑀤𑁄 ‘‘𑀧𑀸𑀳𑀼𑀦𑁂𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺 𑀧𑀭𑀺𑀬𑀸𑀬𑀪𑀸𑀯𑁂𑀦.

𑀤𑀓𑁆𑀔𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀸. 𑀢𑀣𑀸𑀪𑀸𑀯𑀓𑀭𑀡𑁂𑀦 𑀤𑀓𑁆𑀔𑀺𑀡𑀁 𑀅𑀭𑀳𑀢𑀺. 𑀬𑀣𑀸 𑀉𑀴𑀸𑀭𑀸𑀢𑀺𑀯𑀺𑀧𑀼𑀮𑀼𑀤𑁆𑀭𑀬𑀮𑀸𑀪𑁂𑀦 𑀯𑀺𑀲𑁄𑀥𑀺𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀤𑀓𑁆𑀔𑀺𑀡𑀸 𑀯𑀺𑀧𑀼𑀮𑀨𑀮𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀧𑁆𑀨𑀮𑀓𑀭𑀡𑀢𑀸𑀬 𑀯𑀺𑀲𑁄𑀥𑁂𑀢𑀻’’𑀢𑀺.

𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀅𑀜𑁆𑀚𑀮𑀺 𑀓𑀭𑀡𑀻𑀬𑀸 𑀏𑀢𑁆𑀣𑀸𑀢𑀺 𑀅𑀜𑁆𑀚𑀮𑀺𑀓𑀭𑀡𑀻𑀬𑁄.

𑀬𑀤𑀺𑀧𑀺 𑀧𑀸𑀴𑀺𑀬𑀁 ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀁 𑀯𑀺𑀲𑀺𑀝𑁆𑀞𑀦𑁆𑀢𑀺 𑀳𑀺 𑀅𑀦𑀼𑀢𑁆𑀢𑀭𑀁. 𑀲𑀫𑀫𑁆𑀧𑀺𑀲𑁆𑀲 𑀧𑀦 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀤𑀺𑀲’’𑀦𑁆𑀢𑀺 𑀆𑀳. 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀩𑀻𑀚𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀢𑀸𑀬𑀢𑀺 𑀭𑀓𑁆𑀔𑀢𑀺, 𑀔𑀺𑀧𑀦𑁆𑀢𑀺 𑀯𑀧𑀦𑁆𑀢𑀺 𑀏𑀢𑁆𑀣 𑀩𑀻𑀚𑀸𑀦𑀻𑀢𑀺 𑀯𑀸 𑀔𑁂𑀢𑁆𑀢𑀁, 𑀓𑁂𑀤𑀸𑀭𑀸𑀤𑀺, 𑀔𑁂𑀢𑁆𑀢𑀁 𑀯𑀺𑀬 𑀔𑁂𑀢𑁆𑀢𑀁, 𑀧𑀼𑀜𑁆𑀜𑀸𑀦𑀁 𑀔𑁂𑀢𑁆𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁. 𑀲𑁂𑀲𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁪. 𑀲𑀻𑀮𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁫𑁮. 𑀅𑀳𑁄 𑀯𑀢 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺, 𑀅𑀳𑁄 𑀯𑀢 𑀅𑀘𑁆𑀙𑀺𑀤𑁆𑀤𑀸𑀦𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀅𑀳𑁄 𑀯𑀢𑀸𑀢𑀺 𑀘 𑀲𑀫𑁆𑀪𑀸𑀯𑀦𑁂 𑀦𑀺𑀧𑀸𑀢𑁄. 𑀢𑁂𑀦𑀸𑀳 ‘‘𑀅𑀔𑀡𑁆𑀟𑀢𑀸𑀤𑀺𑀕𑀼𑀡𑀯𑀲𑁂𑀦𑀸’’𑀢𑀺. 𑀅𑀔𑀡𑁆𑀟𑀪𑀸𑀯𑀸𑀤𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀲𑁆𑀲 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀸𑀦𑀺 𑀧𑀺𑀬𑀫𑀦𑀸𑀧𑀪𑀸𑀯𑀸𑀯𑀳𑀦𑁂𑀦 𑀓𑁂𑀯𑀮𑀁 𑀫𑁂𑀢𑁆𑀢𑀸𑀬 𑀧𑀤𑀝𑁆𑀞𑀸𑀦𑀁 𑀳𑁄𑀦𑁆𑀢𑀺, 𑀦 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀻’’𑀢𑀺. 𑀘𑀸𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑁂𑀲𑀦𑁆𑀢𑀺 ¶ 𑀲𑀻𑀮𑀸𑀤𑀻𑀦𑀁. 𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀤𑀸𑀦𑁂 𑀲𑀫𑀸𑀤𑀸𑀦𑀓𑁆𑀓𑀫𑁂𑀦, 𑀏𑀓𑀚𑁆𑀛𑀁 𑀲𑀫𑀸𑀤𑀸𑀦𑁂 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀲𑀻𑀮𑀸𑀦𑀁 𑀆𑀤𑀺𑀅𑀦𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀯𑀢𑁆𑀣𑀦𑁆𑀢𑁂, 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬, 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀁 𑀘𑁂𑀢𑀁. 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀉𑀤𑀸𑀳𑀭𑀡𑀸𑀦𑀺. 𑀯𑀺𑀦𑀺𑀯𑁂𑀥𑀯𑀲𑁂𑀦 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀦𑀺𑀯𑀺𑀤𑁆𑀥𑀲𑀸𑀝𑀓𑁄. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀕𑀸𑀯𑀻 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑀮𑀭𑀳𑀺𑀢𑀸𑀦𑀺 𑀯𑀸 𑀅𑀲𑀩𑀮𑀸𑀦𑀺. 𑀢𑀣𑀸 𑀅𑀓𑀫𑁆𑀫𑀸𑀲𑀸𑀦𑀺. 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑁄 𑀳𑁂𑀝𑁆𑀞𑀸 𑀲𑀻𑀮𑀓𑀣𑀸𑀬𑀁 𑀯𑀼𑀢𑁆𑀢𑁄 𑀏𑀯. 𑀓𑁄𑀥𑀽𑀧𑀦𑀸𑀳𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀓𑁆𑀔𑀧𑀴𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀢𑀺𑀫𑀸𑀦𑀸𑀤𑀬𑁄 𑀕𑀳𑀺𑀢𑀸. 𑀢𑀸𑀦𑀺𑀬𑁂𑀯 𑀅𑀔𑀡𑁆𑀟𑀸𑀤𑀺𑀕𑀼𑀡𑀸𑀦𑀺 𑀲𑀻𑀮𑀸𑀦𑀺. 𑀲𑀻𑀮𑀲𑁆𑀲 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 ¶ 𑀫𑁄𑀘𑀦𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀸𑀯𑀸𑀧𑀸𑀤𑀦𑀁. 𑀢𑀢𑁄 𑀏𑀯 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀲𑁂𑀭𑀻 𑀲𑀬𑀁𑀯𑀲𑀻 𑀪𑀼𑀚𑀺𑀲𑁆𑀲𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑁂𑀦 𑀪𑀼𑀚𑀺𑀲𑁆𑀲𑀸𑀦𑀻’’𑀢𑀺. ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑁂𑀬𑁆𑀬𑀁 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺, ‘‘𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀅𑀬𑀁 𑀢𑁂 𑀲𑀻𑀮𑁂𑀲𑀼 𑀤𑁄𑀲𑁄𑀢𑀺 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀯𑀺𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑁂𑀦 𑀧𑀭𑀸𑀫𑀝𑁆𑀞𑀼𑀁 𑀅𑀦𑀼𑀤𑁆𑀥𑀁𑀲𑁂𑀢𑀼𑀁. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀧𑁆𑀧𑀬𑁄𑀚𑀦𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.

𑁧𑁫𑁯. 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄𑀢𑀺 𑀲𑀻𑀮𑀥𑀦𑀁 𑀦𑀺𑀲𑁆𑀲𑀸𑀬 𑀧𑀝𑀺𑀮𑀤𑁆𑀥𑀲𑀫𑀸𑀤𑀸𑀦𑀢𑁆𑀢𑀸 𑀲𑀸𑀢𑀺𑀲𑀬𑀁 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑁄𑀢𑀺. 𑀲𑀪𑀸𑀕𑀯𑀼𑀢𑁆𑀢𑀻𑀢𑀺 𑀲𑀫𑁆𑀧𑀦𑁆𑀦𑀲𑀻𑀮𑁂𑀳𑀺 𑀲𑀪𑀸𑀕𑀯𑀼𑀢𑁆𑀢𑀺𑀓𑁄, 𑀢𑀸𑀬 𑀏𑀯 𑀯𑀸 𑀲𑀺𑀓𑁆𑀔𑀸𑀬 𑀲𑀪𑀸𑀕𑀯𑀼𑀢𑁆𑀢𑀺. 𑀬𑁄 𑀳𑀺 𑀲𑀺𑀓𑁆𑀔𑀸𑀕𑀸𑀭𑀯𑀭𑀳𑀺𑀢𑁄, 𑀲𑁄 𑀢𑀸𑀬 𑀯𑀺𑀲𑀪𑀸𑀕𑀯𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺 𑀯𑀺𑀮𑁄𑀫𑀦𑀢𑁄. 𑀬𑀣𑀸 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀙𑀺𑀤𑁆𑀤𑀁 𑀦 𑀳𑁄𑀢𑀺, 𑀏𑀯𑀁 𑀥𑀫𑁆𑀫𑀸𑀫𑀺𑀲𑁂𑀳𑀺 𑀧𑀝𑀺𑀲𑀦𑁆𑀣𑀭𑀡𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑀢𑁆𑀢𑀸 𑀏𑀯 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺. 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀪𑀬𑀸𑀦𑀺 𑀇𑀫𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀸𑀦𑀻𑀢𑀺 𑀆𑀳 ‘‘𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑀯𑀺𑀭𑀳𑀺𑀢𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁫. 𑀘𑀸𑀕𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁦. 𑀧𑀓𑀢𑀺𑀬𑀸𑀢𑀺 𑀲𑀪𑀸𑀯𑁂𑀦. 𑀘𑀸𑀕𑀸𑀥𑀺𑀫𑀼𑀢𑁆𑀢𑁂𑀦𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂𑀦 𑀢𑀦𑁆𑀦𑀺𑀦𑁆𑀦𑁂𑀦 𑀢𑀧𑁆𑀧𑁄𑀡𑁂𑀦. 𑀦𑀺𑀘𑁆𑀘𑀁 𑀲𑀤𑀸 𑀧𑀯𑀢𑁆𑀢𑀸 𑀤𑀸𑀦𑀲𑀁𑀯𑀺𑀪𑀸𑀕𑀸 𑀬𑀲𑁆𑀲 𑀲𑁄 𑀦𑀺𑀘𑁆𑀘𑀧𑀯𑀢𑁆𑀢𑀤𑀸𑀦𑀲𑀁𑀯𑀺𑀪𑀸𑀕𑁄, 𑀢𑁂𑀦. 𑀇𑀥𑀸𑀧𑀺 ‘‘𑀧𑀓𑀢𑀺𑀬𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀁 𑀧𑀭𑀲𑁆𑀲 𑀧𑀝𑀺𑀬𑀢𑁆𑀢𑀁 𑀤𑀺𑀬𑁆𑀬𑀢𑀺, 𑀢𑀁 𑀤𑀸𑀦𑀁. 𑀬𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀲𑀁𑀯𑀺𑀪𑀚𑀢𑀺, 𑀲𑁄 𑀲𑀁𑀯𑀺𑀪𑀸𑀕𑁄. 𑀇𑀢𑁄 𑀤𑀸𑀦𑀺 𑀧𑀪𑀼𑀢𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀺 𑀅𑀚𑁆𑀚𑀢𑀕𑁆𑀕𑁂 𑀅𑀚𑁆𑀚𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸. 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀤𑀸𑀦𑀲𑀫𑀸𑀤𑀸𑀦𑀁 𑀓𑀢𑁆𑀯𑀸 ¶ . 𑀢𑀁𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀪𑀸𑀯𑀦𑀸𑀭𑀫𑁆𑀪𑀤𑀺𑀯𑀲𑁂. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀤𑀸𑀦𑁂 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺𑀕𑀼𑀡𑀯𑀲𑁂𑀦𑀸𑀢𑀺 𑀯𑀺𑀕𑀢𑀸𑀦𑀺 𑀫𑀮𑀫𑀘𑁆𑀙𑁂𑀭𑀸𑀦𑀺 𑀏𑀢𑀲𑁆𑀫𑀸𑀢𑀺 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁄, 𑀘𑀸𑀕𑁄, 𑀢𑀲𑁆𑀲 𑀪𑀸𑀯𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸. 𑀢𑀤𑀸𑀤𑀻𑀦𑀁 𑀕𑀼𑀡𑀸𑀦𑀁, 𑀲𑀫𑁆𑀧𑀢𑁆𑀢𑀻𑀦𑀁, 𑀆𑀦𑀺𑀲𑀁𑀲𑀸𑀦𑀁 𑀯𑀸 𑀯𑀲𑁂𑀦.

𑀲𑀢𑀁 ¶ 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀦𑁆𑀢𑀺 𑀲𑀸𑀥𑀽𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑀁 𑀧𑀯𑁂𑀡𑀺𑀁 𑀅𑀦𑀼 𑀅𑀦𑀼 𑀓𑀫𑀦𑁆𑀢𑁄 𑀑𑀓𑁆𑀓𑀫𑀦𑁆𑀢𑁄, 𑀅𑀯𑁄𑀓𑁆𑀓𑀫𑀦𑁆𑀢𑁄 𑀯𑀸. 𑀬𑁂 𑀇𑀫𑁂 𑀤𑀸𑀬𑀓𑀲𑁆𑀲 𑀮𑀸𑀪𑀸 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀧𑀝𑀺𑀪𑀸𑀦𑀸𑀤𑀬𑁄, 𑀧𑀺𑀬𑀪𑀸𑀯𑀸𑀤𑀬𑁄 𑀘 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑀸 𑀧𑀓𑀺𑀢𑁆𑀢𑀺𑀢𑀸. 𑀫𑀦𑀼𑀲𑁆𑀲𑀢𑁆𑀢𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 𑀇𑀦𑁆𑀤𑁆𑀭𑀺𑀬𑀧𑀸𑀝𑀯𑀪𑀸𑀯𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀫𑀘𑁆𑀙𑁂𑀭𑀫𑀮𑁂𑀦𑀸𑀢𑀺 𑀫𑀘𑁆𑀙𑁂𑀭𑀲𑀗𑁆𑀔𑀸𑀢𑁂𑀦 𑀫𑀮𑁂𑀦. 𑀅𑀣 𑀯𑀸 𑀫𑀘𑁆𑀙𑁂𑀭𑀜𑁆𑀘 𑀫𑀮𑀜𑁆𑀘 𑀫𑀘𑁆𑀙𑁂𑀭𑀫𑀮𑀁, 𑀢𑁂𑀦 𑀫𑀘𑁆𑀙𑁂𑀭𑁂𑀦 𑀘𑁂𑀯 𑀮𑁄𑀪𑀸𑀤𑀺𑀫𑀮𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀧𑀚𑀸𑀬𑀦𑀯𑀲𑁂𑀦𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦. 𑀓𑀡𑁆𑀳𑀥𑀫𑁆𑀫𑀸𑀦𑀦𑁆𑀢𑀺 𑀮𑁄𑀪𑀸𑀤𑀺𑀏𑀓𑀦𑁆𑀢𑀓𑀸𑀴𑀓𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁. 𑀯𑀺𑀕𑀢𑀢𑁆𑀢𑀸𑀢𑀺 𑀧𑀳𑀻𑀦𑀢𑁆𑀢𑀸. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁄𑀢𑀺 𑀕𑁂𑀳𑀁 𑀆𑀯𑀲𑀦𑁆𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀫𑀸𑀦𑀲𑁆𑀲. 𑀦𑀺𑀲𑁆𑀲𑀬𑀯𑀺𑀳𑀸𑀭𑀦𑁆𑀢𑀺 𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀢𑀩𑁆𑀩𑀯𑀺𑀳𑀸𑀭𑀁, 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀅𑀕𑀸𑀭𑀁 𑀆𑀯𑀲𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑁂 𑀅𑀪𑀺𑀪𑀼𑀬𑁆𑀬.

𑀬𑁄 𑀓𑀺𑀜𑁆𑀘𑀺 𑀤𑁂𑀦𑁆𑀢𑁄𑀧𑀺 𑀲𑀸𑀧𑁂𑀓𑁆𑀔𑁄𑀯 𑀤𑁂𑀢𑀺, 𑀲𑁄 𑀫𑀼𑀢𑁆𑀢𑀘𑀸𑀕𑁄 𑀦 𑀳𑁄𑀢𑀺, 𑀅𑀬𑀁 𑀧𑀦 𑀦 𑀏𑀯𑀦𑁆𑀢𑀺 ‘‘𑀫𑀼𑀢𑁆𑀢𑀘𑀸𑀕𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁆𑀲𑀝𑁆𑀞𑀘𑀸𑀕𑁄𑀢𑀺 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀸𑀡𑀸𑀢𑀺𑀧𑀸𑀢𑀩𑀳𑀼𑀮𑁄 𑀧𑀼𑀕𑁆𑀕𑀮𑁄 ‘‘𑀮𑁄𑀳𑀺𑀢𑀧𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀤𑀸𑀦𑀩𑀳𑀼𑀮𑁄 𑀧𑀼𑀕𑁆𑀕𑀮𑁄 ‘‘𑀧𑀬𑀢𑀧𑀸𑀡𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀸𑀢𑀼𑀁 𑀲𑀤𑀸 𑀥𑁄𑀢𑀳𑀢𑁆𑀣𑁄𑀬𑁂𑀯𑀸’’𑀢𑀺 𑀆𑀳. 𑀢𑀢𑁆𑀣 𑀲𑀤𑀸𑀢𑀺 𑀦𑀺𑀘𑁆𑀘𑀁, 𑀅𑀪𑀺𑀡𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀘𑁆𑀘𑀸𑀕𑁄𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀥𑀺𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀁 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑁂 𑀬𑀸𑀘𑀦𑀓𑀸. 𑀬𑀸𑀘𑀦𑁂 𑀬𑁄𑀕𑁄 𑀬𑀸𑀘𑀦𑀬𑁄𑀕𑁄, 𑀧𑀭𑁂𑀳𑀺 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀸𑀚𑁂𑀦 𑀬𑀼𑀢𑁆𑀢𑁄𑀢𑀺 𑀤𑀸𑀦𑁂𑀦 𑀬𑀼𑀢𑁆𑀢𑁄 𑀲𑀤𑀸 𑀧𑀭𑀺𑀘𑁆𑀘𑀚𑀦𑀢𑁄. 𑀉𑀪𑀬𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀤𑀸𑀦𑁂, 𑀲𑀁𑀯𑀺𑀪𑀸𑀕𑁂 𑀘 𑀭𑀢𑁄 𑀅𑀪𑀺𑀭𑀢𑁄.

𑁧𑁬𑁧. 𑀬𑀣𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀔𑀡𑁆𑀟𑀢𑀸𑀤𑀺𑀕𑀼𑀡𑀯𑀲𑁂𑀦 𑀅𑀢𑁆𑀢𑀦𑁄 𑀲𑀻𑀮𑀲𑁆𑀲 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀲𑀻𑀮𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀏𑀯𑀁 𑀧𑀭𑀺𑀲𑀼𑀤𑁆𑀥𑀉𑀴𑀸𑀭𑀧𑀭𑀺𑀘𑁆𑀘𑀸𑀕𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀫𑁂𑀯 ¶ 𑀅𑀢𑁆𑀢𑀦𑁄 𑀧𑀭𑀺𑀘𑁆𑀘𑀸𑀕𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀪𑀸𑀯𑀦𑀸 𑀇𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺𑀕𑀼𑀡𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀪𑀺𑀬𑁆𑀬𑁄𑀲𑁄𑀢𑀺 ¶ 𑀉𑀧𑀭𑀺𑀧𑀺. 𑀫𑀢𑁆𑀢𑀸𑀬 𑀧𑀫𑀸𑀡𑀲𑁆𑀲 𑀫𑀳𑀢𑀺𑀬𑀸 𑀫𑀢𑁆𑀢𑀸𑀬, 𑀯𑀺𑀧𑀼𑀮𑁂𑀦 𑀧𑀫𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀸𑀕𑀸𑀥𑀺𑀫𑀼𑀢𑁆𑀢𑁄𑀢𑀺 𑀧𑀭𑀺𑀘𑁆𑀘𑀸𑀕𑁂 𑀅𑀥𑀺𑀫𑀼𑀢𑁆𑀢𑁄 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁄. 𑀢𑀢𑁄 𑀏𑀯 𑀅𑀮𑁄𑀪𑀚𑁆𑀛𑀸𑀲𑀬𑁄 𑀓𑀢𑁆𑀣𑀘𑀺𑀧𑀺 𑀅𑀦𑀪𑀺𑀲𑀗𑁆𑀕𑀘𑀺𑀢𑁆𑀢𑁄. 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀧𑀭𑀺𑀘𑁆𑀘𑀸𑀕𑁄 𑀳𑁄𑀢𑀻𑀢𑀺 𑀫𑁂𑀢𑁆𑀢𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀅𑀦𑀼𑀮𑁄𑀫𑀓𑀸𑀭𑀻 𑀅𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺. 𑀯𑀺𑀲𑀸𑀭𑀤𑁄𑀢𑀺 𑀯𑀺𑀲𑀤𑁄 𑀅𑀢𑁆𑀢𑀦𑁄𑀯 𑀕𑀼𑀡𑁂𑀦 𑀓𑀢𑁆𑀣𑀘𑀺𑀧𑀺 𑀅𑀫𑀗𑁆𑀓𑀼𑀪𑀽𑀢𑁄 𑀅𑀪𑀺𑀪𑀼𑀬𑁆𑀬 𑀯𑀺𑀳𑀸𑀭𑀻. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁬. 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁨. 𑀅𑀭𑀺𑀬𑀫𑀕𑁆𑀕𑀯𑀲𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀯𑀲𑁂𑀦. 𑀲𑀫𑀼𑀤𑀸𑀕𑀢𑁂𑀳𑀻𑀢𑀺 𑀲𑀫𑁆𑀫𑀤𑁂𑀯 𑀢𑀤𑀼𑀧𑁆𑀧𑀢𑁆𑀢𑀺𑀢𑁄 𑀉𑀤𑁆𑀥𑀁 𑀆𑀕𑀢𑁂𑀳𑀺. 𑀬𑀸𑀤𑀺𑀲𑀸 𑀳𑀺 𑀅𑀭𑀺𑀬𑀸𑀦𑀁 𑀲𑀦𑁆𑀢𑀸𑀦𑁂 𑀮𑁄𑀓𑀺𑀬𑀸𑀧𑀺 𑀲𑀤𑁆𑀥𑀸𑀤𑀬𑁄, 𑀦 𑀢𑀸𑀤𑀺𑀲𑀸 𑀓𑀤𑀸𑀘𑀺𑀧𑀺 𑀧𑁄𑀣𑀼𑀚𑁆𑀚𑀦𑀺𑀓𑀸 𑀲𑀤𑁆𑀥𑀸𑀤𑀬𑁄. 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀏𑀢𑁂𑀲𑀦𑁆𑀢𑀺 𑀘𑀢𑀼𑀫𑀳𑀸𑀭𑀸𑀚𑀸, 𑀢𑁂 𑀏𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀢𑁂𑀢𑁆𑀢𑀺𑀁𑀲 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀢𑀢𑁆𑀣𑀽𑀧𑀧𑀦𑁆𑀦𑀸𑀢𑀺 𑀢𑀁𑀲𑀳𑀘𑀭𑀺𑀢𑀁 𑀞𑀸𑀦𑀁 𑀢𑀸𑀯𑀢𑀺𑀁𑀲𑀁, 𑀢𑀦𑁆𑀦𑀺𑀯𑀸𑀲𑀺𑀦𑁄𑀧𑀺 𑀤𑁂𑀯𑀸 𑀢𑀁𑀲𑀳𑀘𑀭𑀡𑀢𑁄 𑀏𑀯 𑀢𑀸𑀯𑀢𑀺𑀁𑀲𑀸. 𑀤𑀼𑀓𑁆𑀔𑀢𑁄 𑀬𑀸𑀢𑀸 𑀅𑀧𑀬𑀸𑀢𑀸𑀢𑀺 𑀬𑀸𑀫𑀸. 𑀢𑀼𑀲𑀸𑀬 𑀧𑀻𑀢𑀺𑀬𑀸 𑀇𑀢𑀸 𑀉𑀧𑀕𑀢𑀸𑀢𑀺 𑀢𑀼𑀲𑀺𑀢𑀸. 𑀪𑁄𑀕𑀸𑀦𑀁 𑀦𑀺𑀫𑁆𑀫𑀸𑀦𑁂 𑀭𑀢𑀺 𑀏𑀢𑁂𑀲𑀦𑁆𑀢𑀺 𑀦𑀺𑀫𑁆𑀫𑀸𑀦𑀭𑀢𑀺𑀦𑁄. 𑀧𑀭𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄. 𑀩𑁆𑀭𑀳𑁆𑀫𑀸𑀦𑀁 𑀓𑀸𑀬𑁄 𑀲𑀫𑀽𑀳𑁄 𑀩𑁆𑀭𑀳𑁆𑀫𑀓𑀸𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀢𑁆𑀣 𑀪𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀢𑀢𑀼𑀢𑁆𑀢𑀭𑀻𑀢𑀺 𑀢𑀢𑁄 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀳𑀺 𑀉𑀢𑁆𑀢𑀭𑀺, 𑀉𑀧𑀭𑀺 𑀧𑀭𑀺𑀢𑁆𑀢𑀸𑀪𑀸𑀤𑀺𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 ‘‘𑀬𑀣𑀸𑀭𑀽𑀧𑀸𑀬 𑀫𑀕𑁆𑀕𑁂𑀦𑀸𑀕𑀢𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸 𑀢𑀸 𑀤𑁂𑀯𑀢𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸 𑀘 𑀲𑀁𑀯𑀺𑀚𑁆𑀚𑀢𑀻’’𑀢𑀺 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀓𑁆𑀔𑀺𑀁 𑀑𑀢𑀸𑀭𑁂𑀦𑁆𑀢𑁂𑀦 𑀯𑀺𑀬 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸.

𑀬𑀤𑀺 𑀏𑀯𑀁 𑀲𑀼𑀢𑁆𑀢𑁂 (𑀅. 𑀦𑀺. 𑁬.𑁧𑁦) 𑀉𑀪𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀼𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀢𑁆𑀢𑀦𑁄 𑀘, 𑀢𑀸𑀲𑀜𑁆𑀘 𑀤𑁂𑀯𑀢𑀸𑀦’’𑀦𑁆𑀢𑀺 𑀉𑀪𑀬𑀁 𑀲𑀫𑀥𑀼𑀭𑀁 𑀯𑀺𑀬 𑀲𑀼𑀢𑁆𑀢𑁂 (𑀅. 𑀦𑀺. 𑁬.𑁧𑁦) 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁. 𑀅𑀣 ¶ 𑀔𑁄 𑀢𑀁 ‘‘𑀤𑁂𑀯𑀢𑀸𑀦𑀁 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘𑀸’’𑀢𑀺𑀆𑀤𑀺𑀯𑀘𑀦𑀁. 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀦𑁆𑀢𑀺 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀭𑀢𑁄 𑀧𑀤𑀁 ¶ 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀓𑀺𑀫𑀢𑁆𑀣𑀁 𑀧𑀦 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑀦𑀦𑁆𑀢𑀺 𑀆𑀳 ‘‘𑀤𑁂𑀯𑀢𑀸𑀦𑀁 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀻𑀳𑀺 𑀲𑀫𑀸𑀦𑀕𑀼𑀡𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀲𑀼𑀢𑁆𑀢𑁂 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀯𑀁 𑀅𑀢𑁆𑀣𑁄 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀬𑀜𑁆𑀳𑀻’’𑀢𑀺𑀆𑀤𑀺.

𑁧𑁬𑁩. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀻𑀮𑀘𑀸𑀕𑀸𑀦𑀼𑀲𑁆𑀲𑀢𑀻𑀲𑀼 𑀯𑀺𑀬 𑀇𑀥𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀛𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀬𑀼𑀢𑁆𑀢𑀁, 𑀢𑀲𑁆𑀫𑀸. 𑀧𑀼𑀩𑁆𑀩𑀪𑀸𑀕𑁂 𑀪𑀸𑀯𑀦𑀸𑀭𑀫𑁆𑀪𑁂. 𑀅𑀧𑀭𑀪𑀸𑀕𑁂𑀢𑀺 𑀬𑀣𑀸 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀁 𑀇𑀚𑁆𑀛𑀢𑀺, 𑀢𑀣𑀸 𑀪𑀸𑀯𑀦𑀸𑀓𑀸𑀮𑁂. 𑀬𑀤𑀺 𑀅𑀢𑁆𑀢𑀦𑁄 𑀏𑀯 𑀇𑀥 𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸, 𑀓𑀣𑀫𑀬𑀁 𑀤𑁂𑀯𑀢𑀸𑀦𑀼𑀲𑁆𑀲𑀢𑀻𑀢𑀺 𑀆𑀳 ‘‘𑀤𑁂𑀯𑀢𑀸𑀦𑀁 𑀕𑀼𑀡𑀲𑀤𑀺𑀲𑀲𑀤𑁆𑀥𑀸𑀤𑀺𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑀸’’𑀢𑀺. 𑀢𑁂𑀦 𑀲𑀤𑀺𑀲𑀓𑀧𑁆𑀧𑀦𑀸𑀬 𑀅𑀬𑀁 𑀪𑀸𑀯𑀦𑀸 ‘‘𑀤𑁂𑀯𑀢𑀸𑀦𑀼𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀸, 𑀦 𑀤𑁂𑀯𑀢𑀸𑀦𑀁, 𑀢𑀸𑀲𑀁 𑀕𑀼𑀡𑀸𑀦𑀁 𑀯𑀸 𑀅𑀦𑀼𑀲𑁆𑀲𑀭𑀡𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀧𑀯𑀢𑁆𑀢𑀁 𑀤𑁂𑀯𑀢𑀸𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀉𑀧𑀸𑀤𑀸𑀬 ‘‘𑀤𑁂𑀯𑀢𑀸𑀦𑀼𑀲𑁆𑀲𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀼𑀩𑁆𑀩𑀪𑀸𑀕𑁂 𑀤𑁂𑀯𑀢𑀸 𑀆𑀭𑀩𑁆𑀪 𑀧𑀯𑀢𑁆𑀢𑀘𑀺𑀢𑁆𑀢𑀯𑀲𑁂𑀦𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁧𑁬𑁪. 𑀏𑀢𑀸𑀲𑀦𑁆𑀢𑀺 𑀏𑀢𑀸𑀲𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀁 𑀙𑀦𑁆𑀦𑀁 𑀅𑀦𑀼𑀲𑁆𑀲𑀢𑀻𑀦𑀁. 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀧𑀯𑀢𑁆𑀢𑀤𑁂𑀲𑀦𑀸𑀬𑀁, 𑀫𑀳𑀸𑀦𑀸𑀫𑀲𑀼𑀢𑁆𑀢𑀁 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧) 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀕𑀯𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑀦𑁆𑀢𑀺 𑀪𑀕𑀯𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁. 𑀅𑀢𑁆𑀣𑀯𑁂𑀤𑀦𑁆𑀢𑀺 𑀯𑀸 𑀳𑁂𑀢𑀼𑀨𑀮𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀢𑀼𑀝𑁆𑀞𑀺𑀫𑀸𑀳. 𑀥𑀫𑁆𑀫𑀯𑁂𑀤𑀦𑁆𑀢𑀺 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀢𑀼𑀝𑁆𑀞𑀺𑀁. ‘‘𑀆𑀭𑀓𑀢𑁆𑀢𑀸 𑀅𑀭𑀳’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀳𑀺 𑀬𑀁 𑀢𑀁 𑀪𑀕𑀯𑀢𑁄 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀁, 𑀲𑁄 𑀳𑁂𑀢𑀼. 𑀜𑀸𑀧𑀓𑁄 𑀘𑁂𑀢𑁆𑀣 𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄, 𑀦 𑀓𑀸𑀭𑀓𑁄, 𑀲𑀫𑁆𑀧𑀸𑀧𑀓𑁄 𑀯𑀸. 𑀬𑁄𑀦𑁂𑀦 𑀜𑀸𑀬𑀫𑀸𑀦𑁄 𑀅𑀭𑀳𑀢𑁆𑀢𑀢𑁆𑀣𑁄, 𑀢𑀁 𑀨𑀮𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀳𑁂𑀢𑀼𑀨𑀮𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼𑀧𑀺 ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑁆𑀢𑀸’’𑀢𑀺𑀆𑀤𑀺𑀦𑀸, ‘‘𑀬𑀲𑁆𑀫𑀸 𑀧𑀦 𑀲𑀸 𑀲𑀫𑁆𑀫𑀸𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 𑀘 𑀢𑀢𑁆𑀣 𑀢𑀢𑁆𑀣 𑀳𑁂𑀢𑀼𑀅𑀧𑀤𑁂𑀲𑁄 𑀓𑀢𑁄𑀬𑁂𑀯𑀸𑀢𑀺. 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀳𑁂𑀢𑀼𑀨𑀮𑀲𑀗𑁆𑀔𑀸𑀢𑀕𑀼𑀡𑀽𑀧𑀲𑀁𑀳𑀺𑀢𑀁. 𑀕𑀼𑀡𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂.

𑁧𑁬𑁫. 𑀅𑀭𑀺𑀬𑀲𑀸𑀯𑀓𑀸𑀦𑀜𑁆𑀜𑁂𑀯 ¶ 𑀇𑀚𑁆𑀛𑀦𑁆𑀢𑀻𑀢𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀇𑀚𑁆𑀛𑀦𑁆𑀢𑀺𑀬𑁂𑀯𑀸𑀢𑀺 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁, 𑀅𑀯𑀥𑀸𑀭𑀡𑀜𑁆𑀘 𑀢𑁂𑀲𑀁 𑀲𑀼𑀔𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀢𑁂𑀲𑀁 𑀳𑀻’’𑀢𑀺𑀆𑀤𑀺. 𑀦 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀇𑀚𑁆𑀛𑀦𑁆𑀢𑀻𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 ¶ , 𑀓𑀲𑁆𑀫𑀸 𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀻𑀲𑀼 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧) 𑀩𑀳𑀽𑀲𑀼 𑀲𑀼𑀢𑁆𑀢𑁂𑀲𑀼 𑀅𑀭𑀺𑀬𑀲𑀸𑀯𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺? 𑀢𑁂𑀲𑀁 𑀩𑀳𑀼𑀮𑀯𑀺𑀳𑀸𑀭𑀢𑀸𑀬𑀸𑀢𑀺 𑀆𑀘𑀭𑀺𑀬𑀸.

𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀦𑀺𑀕𑁆𑀕𑀢𑀁 𑀦𑀺𑀲𑁆𑀲𑀝𑀁. 𑀫𑀼𑀢𑁆𑀢𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀁. 𑀯𑀼𑀝𑁆𑀞𑀺𑀢𑀦𑁆𑀢𑀺 𑀅𑀧𑁂𑀢𑀁. 𑀲𑀩𑁆𑀩𑀫𑁂𑀢𑀁 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀕𑁂𑀥𑀫𑁆𑀳𑀸𑀢𑀺 𑀧𑀮𑀺𑀩𑁄𑀥𑀢𑁄. 𑀇𑀤𑀫𑁆𑀧𑀻𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀮𑀤𑁆𑀥𑀁 𑀉𑀧𑀘𑀸𑀭𑀚𑁆𑀛𑀸𑀦𑀫𑀸𑀳. 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀧𑀘𑁆𑀘𑀬𑀁 𑀓𑀢𑁆𑀯𑀸, 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀺.

𑀲𑀫𑁆𑀩𑀸𑀥𑁂𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀲𑀫𑁆𑀧𑀻𑀴𑁂 𑀲𑀁𑀓𑀝𑁂 𑀖𑀭𑀸𑀯𑀸𑀲𑁂. 𑀑𑀓𑀸𑀲𑀸𑀥𑀺𑀕𑀫𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀥𑀺𑀕𑀫𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀑𑀓𑀸𑀲𑁄. 𑀅𑀦𑀼𑀲𑁆𑀲𑀢𑀺𑀬𑁄 𑀏𑀯 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺. 𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑀸𑀢𑀺 𑀯𑀺𑀲𑀼𑀚𑁆𑀛𑀦𑀲𑀪𑀸𑀯𑀸, 𑀯𑀺𑀲𑀼𑀚𑁆𑀛𑀺𑀢𑀼𑀁 𑀯𑀸 𑀪𑀩𑁆𑀩𑀸. 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑀢𑀸𑀬𑀸𑀢𑀺 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀬𑀸 𑀦𑀺𑀩𑁆𑀩𑀸𑀦𑀲𑁆𑀲 𑀪𑀩𑁆𑀩𑀪𑀸𑀯𑁂𑀦. 𑀉𑀧𑀓𑁆𑀓𑀫𑁂𑀦𑀸𑀢𑀺 𑀧𑀬𑁄𑀕𑁂𑀦. 𑀧𑀭𑀺𑀬𑁄𑀤𑀧𑀦𑀸𑀢𑀺 𑀯𑀺𑀲𑁄𑀥𑀦𑀸.

𑁧𑁬𑁬. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀏𑀯𑀁 𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑁂𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲𑁂𑀯 𑀯𑀲𑁂𑀦 𑀙𑀲𑀼 𑀅𑀦𑀼𑀲𑁆𑀲𑀢𑀻𑀲𑀼 𑀤𑁂𑀲𑀺𑀢𑀸𑀲𑀼𑀧𑀺. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀬𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀲𑁆𑀲 𑀩𑀮𑁂𑀦. 𑀧𑀻𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸.

𑀙𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀢𑁆𑀢𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁮. 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀫𑀭𑀡𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁭. 𑀇𑀢𑁄𑀢𑀺 ¶ ¶ 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸. 𑀲𑀸 𑀳𑀺 𑀙𑀲𑀼 𑀅𑀦𑀼𑀲𑁆𑀲𑀢𑀻𑀲𑀼 𑀲𑀩𑁆𑀩𑀧𑀘𑁆𑀙𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀆𑀲𑀦𑁆𑀦𑀸, 𑀧𑀘𑁆𑀘𑀓𑁆𑀔𑀸 𑀘. 𑀅𑀦𑀦𑁆𑀢𑀭𑀸𑀬𑀸𑀢𑀺 𑀢𑀤𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀫𑀭𑀡𑀲𑁆𑀲 𑀲𑀢𑀺 𑀫𑀭𑀡𑀲𑁆𑀲𑀢𑀻𑀢𑀺 𑀫𑀭𑀡𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀫𑀭𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀔𑀦𑁆𑀥𑀸𑀦𑀁 𑀪𑁂𑀤𑁄 ‘‘𑀚𑀭𑀸𑀫𑀭𑀡𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁭𑁧) 𑀯𑀘𑀦𑀢𑁄 𑀘𑀼𑀢𑀺𑀔𑀦𑁆𑀥𑀸𑀦𑀁 𑀯𑀺𑀦𑀸𑀲𑁄 𑀫𑀭𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀯𑀺𑀲𑁂𑀲𑀢𑁄 𑀧𑀦 𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀺𑀦𑀸𑀲𑀪𑀸𑀯𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑀸𑀦𑀁 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑀦𑀺𑀤𑁆𑀤𑁂𑀲𑁂 ‘‘𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄’’𑀢𑀺 (𑀯𑀺𑀪. 𑁨𑁩𑁬; 𑀤𑀻. 𑀦𑀺. 𑁨.𑁩𑁯𑁦; 𑀫. 𑀦𑀺. 𑁧.𑁯𑁨, 𑁧𑁨𑁩). 𑀢𑀢𑁆𑀣 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑀸𑀢𑀺 𑀏𑀓𑁂𑀦 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀲𑁆𑀲 𑀯𑀺𑀘𑁆𑀙𑁂𑀤𑁄 𑀆𑀬𑀼𑀓𑁆𑀔𑀬𑀸𑀤𑀺𑀯𑀲𑁂𑀦 𑀅𑀦𑁆𑀢𑀭𑀥𑀸𑀦𑀁. 𑀲𑀫𑀼𑀘𑁆𑀙𑁂𑀤𑀫𑀭𑀡𑀦𑁆𑀢𑀺 𑀅𑀭𑀳𑀢𑁄 𑀲𑀦𑁆𑀢𑀸𑀦𑀲𑁆𑀲 𑀲𑀩𑁆𑀩𑀲𑁄 𑀉𑀘𑁆𑀙𑁂𑀤𑀪𑀽𑀢𑀁 𑀫𑀭𑀡𑀁. 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑀲𑀗𑁆𑀔𑀸𑀢𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀧𑀯𑀢𑁆𑀢𑀺𑀔𑀡𑀲𑁆𑀲 𑀪𑀗𑁆𑀕𑁄 𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀁 𑀕𑀢𑀁. 𑀔𑀡𑀺𑀓𑀫𑀭𑀡𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀔𑀡𑀯𑀦𑁆𑀢𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀮𑀩𑁆𑀪𑀫𑀸𑀦𑀁 𑀫𑀭𑀡𑀁. 𑀬𑀁 𑀔𑀦𑁆𑀥𑀧𑁆𑀧𑀩𑀦𑁆𑀥𑀁 𑀉𑀧𑀸𑀤𑀸𑀬 𑀭𑀼𑀓𑁆𑀔𑀸𑀤𑀺𑀲𑀫𑀜𑁆𑀜𑀸, 𑀢𑀲𑁆𑀫𑀺𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀧𑀺 𑀅𑀮𑁆𑀮𑀢𑀸𑀤𑀺𑀯𑀺𑀕𑀫𑀦𑀁 𑀦𑀺𑀲𑁆𑀲𑀸𑀬 𑀫𑀢𑀯𑁄𑀳𑀸𑀭𑁄 𑀲𑀫𑁆𑀫𑀼𑀢𑀺𑀫𑀭𑀡𑀁. 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀲𑀫𑀼𑀘𑁆𑀙𑁂𑀤𑀔𑀡𑀺𑀓𑀲𑀫𑁆𑀫𑀼𑀢𑀺𑀫𑀭𑀡𑀁 𑀇𑀥 𑀫𑀭𑀡𑀸𑀦𑀼𑀲𑁆𑀲𑀢𑀺𑀬𑀁 𑀦𑀸𑀥𑀺𑀧𑁆𑀧𑁂𑀢𑀁 𑀅𑀩𑀸𑀳𑀼𑀮𑁆𑀮𑀢𑁄, 𑀅𑀦𑀼𑀧𑀝𑁆𑀞𑀳𑀦𑀢𑁄, 𑀅𑀲𑀁𑀯𑁂𑀕𑀯𑀢𑁆𑀣𑀼𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀥𑀺𑀧𑁆𑀧𑁂𑀢𑀁 𑀲𑀢𑀺𑀬𑀸 𑀆𑀭𑀫𑁆𑀫𑀡𑀪𑀸𑀯𑁂𑀦. 𑀆𑀬𑀼𑀆𑀤𑀻𑀦𑀁 𑀔𑀬𑀓𑀸𑀮𑁂 𑀫𑀭𑀡𑀁 𑀓𑀸𑀮𑀫𑀭𑀡𑀁. 𑀢𑁂𑀲𑀁 𑀅𑀧𑀭𑀺𑀓𑁆𑀔𑀻𑀡𑀓𑀸𑀮𑁂 𑀫𑀭𑀡𑀁 𑀅𑀓𑀸𑀮𑀫𑀭𑀡𑀁. ‘‘𑀓𑀸𑀮𑀫𑀭𑀡𑀁 𑀧𑀼𑀜𑁆𑀜𑀓𑁆𑀔𑀬𑁂𑀦𑀸’’𑀢𑀺 𑀇𑀤𑀁 𑀬𑀣𑀸𑀥𑀺𑀓𑀸𑀭𑀁 𑀲𑀫𑁆𑀧𑀢𑁆𑀢𑀺𑀪𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀯𑀺𑀧𑀢𑁆𑀢𑀺𑀪𑀯𑀯𑀲𑁂𑀦 𑀧𑀦 ‘‘𑀧𑀸𑀧𑀓𑁆𑀔𑀬𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀆𑀬𑀼𑀲𑀦𑁆𑀢𑀸𑀦𑀚𑀦𑀓𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸𑀢𑀺 ¶ 𑀆𑀬𑀼𑀧𑁆𑀧𑀩𑀦𑁆𑀥𑀲𑁆𑀲 𑀧𑀯𑀢𑁆𑀢𑀸𑀧𑀦𑀓𑀸𑀦𑀁 𑀆𑀳𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀁. 𑀯𑀺𑀧𑀓𑁆𑀓𑀯𑀺𑀧𑀸𑀓𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀨𑀮𑀸𑀦𑀼𑀭𑀽𑀧𑀁 𑀤𑀸𑀢𑀩𑁆𑀩𑀯𑀺𑀧𑀸𑀓𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀕𑀢𑀺𑀓𑀸𑀮𑀸𑀳𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦𑀸𑀢𑀺 ¶ 𑀤𑁂𑀯𑀸𑀦𑀁 𑀯𑀺𑀬 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸, 𑀧𑀞𑀫𑀓𑀧𑁆𑀧𑀺𑀬𑀸𑀦𑀁 𑀯𑀺𑀬 𑀓𑀸𑀮𑀲𑀫𑁆𑀧𑀢𑁆𑀢𑀺𑀬𑀸, 𑀉𑀢𑁆𑀢𑀭𑀓𑀼𑀭𑀼𑀓𑀸𑀤𑀻𑀦𑀁 𑀯𑀺𑀬 𑀆𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀉𑀢𑀼𑀲𑀼𑀓𑁆𑀓𑀲𑁄𑀡𑀺𑀢𑀸𑀤𑀺𑀁 𑀧𑀭𑀺𑀕𑁆𑀕𑀬𑁆𑀳𑀢𑀺. 𑀅𑀚𑁆𑀚𑀢𑀦𑀓𑀸𑀮𑀧𑀼𑀭𑀺𑀲𑀸𑀦𑀁 𑀯𑀺𑀬𑀸𑀢𑀺 𑀯𑀺𑀬-𑀲𑀤𑁆𑀤𑁄 𑀅𑀝𑁆𑀞𑀸𑀦𑁂 𑀧𑀝𑁆𑀞𑀧𑀺𑀢𑁄, 𑀅𑀚𑁆𑀚𑀢𑀦𑀓𑀸𑀮𑀧𑀼𑀭𑀺𑀲𑀸𑀦𑀁 𑀯𑀲𑁆𑀲𑀲𑀢𑀫𑀢𑁆𑀢𑀧𑀭𑀺𑀫𑀸𑀡𑀲𑁆𑀲 𑀯𑀺𑀬 𑀆𑀬𑀼𑀦𑁄 𑀔𑀬𑀯𑀲𑁂𑀦𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀳𑀺 𑀅𑀦𑀸𑀕𑀢𑁂𑀧𑀺 𑀧𑀭𑀫𑀸𑀬𑀼𑀦𑁄 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺, 𑀅𑀢𑀻𑀢𑁂 𑀧𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀬 𑀓𑀸𑀮𑀸𑀳𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀪𑀸𑀯𑁂𑀦 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲 𑀧𑀭𑀺𑀫𑀸𑀡𑁄𑀧𑀺 𑀆𑀬𑀼 𑀅𑀳𑁄𑀲𑀺. 𑀅𑀬𑀜𑁆𑀘 𑀯𑀺𑀪𑀸𑀕𑁄 𑀯𑀢𑁆𑀢𑀫𑀸𑀦𑀲𑁆𑀲 𑀅𑀦𑁆𑀢𑀭𑀓𑀧𑁆𑀧𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀮𑀸𑀩𑀼𑀭𑀸𑀚𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀦𑁆𑀤𑀬𑀓𑁆𑀔𑀦𑀦𑁆𑀤𑀫𑀸𑀡𑀯𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀬𑀁 ‘‘𑀓𑀸𑀮𑀫𑀭𑀡𑀁 𑀅𑀓𑀸𑀮𑀫𑀭𑀡𑀁, 𑀢𑀢𑁆𑀣𑀸𑀧𑀺 𑀧𑀼𑀜𑁆𑀜𑀓𑁆𑀔𑀬𑀫𑀭𑀡𑀁 𑀆𑀬𑀼𑀓𑁆𑀔𑀬𑀫𑀭𑀡𑀁 𑀉𑀪𑀬𑀓𑁆𑀔𑀬𑀫𑀭𑀡𑀁 𑀉𑀧𑀓𑁆𑀓𑀫𑀫𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀫𑀭𑀡𑀁, 𑀢𑀁 𑀲𑀩𑁆𑀩𑀫𑁆𑀧𑀺.

𑁧𑁬𑁮. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦. 𑀫𑀦𑀲𑀺𑀓𑀸𑀭𑁄𑀢𑀺 𑀫𑀭𑀡𑀸𑀭𑀫𑁆𑀫𑀡𑁄 𑀫𑀦𑀲𑀺𑀓𑀸𑀭𑁄. 𑀬𑁂𑀦 𑀧𑀦 𑀉𑀧𑀸𑀬𑁂𑀦 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀬𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀬𑀢𑁄𑀢𑀺 𑀅𑀦𑀼𑀧𑀸𑀬𑁂𑀦 𑀲𑀢𑀺𑀁, 𑀲𑀁𑀯𑁂𑀕𑀁, 𑀜𑀸𑀡𑀜𑁆𑀘 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀫𑀭𑀡𑀁 𑀅𑀦𑀼𑀲𑁆𑀲𑀭𑀢𑁄. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀲𑁄𑀓𑀧𑀸𑀫𑁄𑀚𑁆𑀚𑀸𑀦𑀁 𑀉𑀧𑁆𑀧𑀚𑁆𑀚𑀦𑀁, 𑀲𑀁𑀯𑁂𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀁, 𑀲𑀦𑁆𑀢𑀸𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀲𑀢𑀺𑀲𑀁𑀯𑁂𑀕𑀜𑀸𑀡𑀯𑀺𑀳𑀭𑀢𑁄 𑀳𑁄𑀢𑀺. 𑀬𑁄 𑀳𑀺 ‘‘𑀫𑀭𑀡𑀁 𑀦𑀸𑀫𑁂𑀢𑀁 𑀚𑀸𑀢𑀲𑁆𑀲 𑀏𑀓𑀦𑁆𑀢𑀺𑀓’’𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀭𑀢𑀺, 𑀢𑀢𑁆𑀣 𑀲𑀁𑀯𑁂𑀕𑀚𑀸𑀢𑁄 𑀳𑁄𑀢𑀺 𑀲𑀫𑁆𑀧𑀚𑀸𑀦𑁄 𑀘, 𑀢𑀲𑁆𑀲 𑀇𑀝𑁆𑀞𑀚𑀦𑀫𑀭𑀡𑀸𑀤𑀺𑀦𑀺𑀫𑀺𑀢𑁆𑀢𑀁 𑀲𑁄𑀓𑀸𑀤𑀬𑁄 𑀅𑀦𑁄𑀓𑀸𑀲𑀸𑀯. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑀬𑀢𑁄 𑀏𑀢𑁂 𑀤𑁄𑀲𑀸, 𑀢𑀲𑁆𑀫𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀅𑀭𑀜𑁆𑀜𑀲𑀼𑀲𑀸𑀦𑀸𑀤𑀻𑀲𑀼. 𑀳𑀢𑀫𑀢𑀲𑀢𑁆𑀢𑁂𑀢𑀺 𑀘𑁄𑀭𑀸𑀤𑀻𑀳𑀺 𑀳𑀢𑁂, 𑀲𑀭𑀲𑁂𑀦 𑀫𑀢𑁂 𑀘 𑀲𑀢𑁆𑀢𑁂. 𑀤𑀺𑀝𑁆𑀞𑀧𑀼𑀩𑁆𑀩𑀸 𑀲𑀫𑁆𑀧𑀢𑁆𑀢𑀺 𑀬𑁂𑀲𑀁 𑀢𑁂 𑀤𑀺𑀝𑁆𑀞𑀧𑀼𑀩𑁆𑀩𑀲𑀫𑁆𑀧𑀢𑁆𑀢𑀻, 𑀢𑁂𑀲𑀁 𑀤𑀺𑀝𑁆𑀞𑀧𑀼𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁. 𑀬𑁄𑀚𑁂𑀢𑁆𑀯𑀸𑀢𑀺 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀏𑀓𑀘𑁆𑀘𑀲𑁆𑀲𑀸𑀢𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀜𑀸𑀡𑀼𑀢𑁆𑀢𑀭𑀲𑁆𑀲.

𑁧𑁬𑁯. 𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄𑀢𑀺 𑀖𑀸𑀢𑀓𑀲𑁆𑀲 𑀯𑀺𑀬 𑀧𑀢𑀺 𑀧𑀢𑀺 𑀉𑀧𑀝𑁆𑀞𑀸𑀦𑀢𑁄 𑀆𑀲𑀦𑁆𑀦𑀪𑀸𑀯𑀢𑁄. 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄𑀢𑀺 𑀆𑀭𑁄𑀕𑁆𑀬𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁 𑀯𑀺𑀬 𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀚𑁆𑀚𑀦𑀢𑁄. 𑀉𑀧𑀲𑀁𑀳𑀭𑀡𑀢𑁄𑀢𑀺 𑀧𑀭𑁂𑀲𑀁 𑀫𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀫𑀭𑀡𑀲𑁆𑀲 𑀉𑀧𑀦𑀬𑀦𑀢𑁄. 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄𑀢𑀺 𑀲𑀭𑀻𑀭𑀲𑁆𑀲 𑀩𑀳𑀽𑀦𑀁 𑀲𑀸𑀥𑀸𑀭𑀡𑀪𑀸𑀯𑀢𑁄. 𑀆𑀬𑀼𑀤𑀼𑀩𑁆𑀩𑀮𑀢𑁄𑀢𑀺 𑀚𑀻𑀯𑀺𑀢𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀢𑁄. 𑀅𑀦𑀺𑀫𑀺𑀢𑁆𑀢𑀢𑁄𑀢𑀺 𑀫𑀭𑀡𑀲𑁆𑀲 𑀯𑀯𑀢𑁆𑀣𑀺𑀢𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 ¶ . 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀓𑀸𑀮𑀲𑁆𑀲 𑀧𑀭𑀺𑀘𑁆𑀙𑀦𑁆𑀦𑀪𑀸𑀯𑀢𑁄. 𑀔𑀡𑀧𑀭𑀺𑀢𑁆𑀢𑀢𑁄𑀢𑀺 𑀚𑀻𑀯𑀺𑀢𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀪𑀸𑀯𑀢𑁄.

𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄𑀢𑀺 𑀏𑀢𑁆𑀣 𑀯𑀺𑀬-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀥𑀓𑀲𑁆𑀲 𑀯𑀺𑀬 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀸𑀭𑀬𑀫𑀸𑀦𑁄𑀢𑀺 𑀆𑀕𑀼𑀭𑁂𑀦𑁆𑀢𑁄 𑀧𑀳𑀭𑀡𑀸𑀓𑀸𑀭𑀁 𑀓𑀭𑁄𑀦𑁆𑀢𑁄. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀯 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑁄 𑀲𑀫𑀻𑀧𑁂 𑀏𑀯. 𑀚𑀭𑀸𑀫𑀭𑀡𑀁 𑀕𑀳𑁂𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 ‘‘𑀬𑀣𑀸 𑀳𑀺 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀁 𑀉𑀕𑁆𑀕𑀘𑁆𑀙𑀦𑁆𑀢𑀁 𑀧𑀁𑀲𑀼𑀯𑀺𑀭𑀳𑀺𑀢𑀁 𑀦 𑀳𑁄𑀢𑀺, 𑀏𑀯𑀁 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀸 𑀚𑀭𑀸𑀫𑀭𑀡𑀯𑀺𑀭𑀳𑀺𑀢𑀸 𑀦 𑀳𑁄𑀦𑁆𑀢𑀻’’𑀢𑀺 𑀏𑀢𑁆𑀢𑀓𑁂𑀦 𑀉𑀧𑀫𑀸. 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀁 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀧𑀁𑀲𑀼𑀯𑀺𑀭𑀳𑀺𑀢𑀫𑁆𑀧𑀺 𑀪𑀯𑁂𑀬𑁆𑀬, 𑀲𑀢𑁆𑀢𑀸 𑀧𑀦 𑀓𑀣𑀜𑁆𑀘𑀺𑀧𑀺 𑀚𑀭𑀸𑀫𑀭𑀡𑀯𑀺𑀭𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀔𑀡𑀺𑀓𑀫𑀭𑀡𑀁 𑀢𑀸𑀯 𑀉𑀧𑀫𑀸𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀫𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀤𑀺𑀫𑁂 𑀲𑀢𑁆𑀢𑀸 𑀚𑀭𑀸𑀫𑀭𑀡𑀁 𑀕𑀳𑁂𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦𑀺𑀩𑁆𑀩𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀫𑀭𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺. 𑀅𑀯𑀲𑁆𑀲𑀁 𑀫𑀭𑀡𑀢𑁄𑀢𑀺 𑀅𑀯𑀲𑁆𑀲𑀁 𑀫𑀭𑀺𑀢𑀩𑁆𑀩𑀢𑁄, 𑀏𑀓𑀦𑁆𑀢𑁂𑀦 𑀫𑀭𑀡𑀲𑀩𑁆𑀪𑀸𑀯𑀢𑁄 𑀯𑀸. 𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑀢𑁄 𑀆𑀕𑀢𑀸. 𑀳𑀸𑀭𑀳𑀸𑀭𑀺𑀦𑀻𑀢𑀺 𑀧𑀯𑀸𑀳𑁂 𑀧𑀢𑀺𑀢𑀲𑁆𑀲 𑀢𑀺𑀡𑀧𑀡𑁆𑀡𑀸𑀤𑀺𑀓𑀲𑁆𑀲 𑀅𑀢𑀺𑀯𑀺𑀬 𑀳𑀭𑀡𑀲𑀻𑀮𑀸. 𑀲𑀦𑁆𑀤𑀢𑁂𑀯𑀸𑀢𑀺 𑀲𑀯𑀢𑀺 𑀏𑀯. 𑀯𑀢𑁆𑀢𑀢𑁂𑀯𑀸𑀢𑀺 𑀧𑀯𑀸𑀳𑀯𑀲𑁂𑀦 𑀯𑀢𑁆𑀢𑀢𑀺 𑀏𑀯 𑀦 𑀢𑀺𑀝𑁆𑀞𑀢𑀺.

𑀬𑀫𑁂𑀓𑀭𑀢𑁆𑀢𑀺𑀦𑁆𑀢𑀺 𑀬𑀲𑁆𑀲𑀁 𑀏𑀓𑀭𑀢𑁆𑀢𑀺𑀬𑀁, 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸. 𑀧𑀞𑀫𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀕𑀩𑁆𑀪𑁂𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀬𑀁. 𑀫𑀸𑀡𑀯𑁄𑀢𑀺 𑀲𑀢𑁆𑀢𑁄. 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀭𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀭𑀢𑁆𑀢𑀺𑀕𑁆𑀕𑀳𑀡𑀁. 𑀅𑀩𑁆𑀪𑀼𑀝𑁆𑀞𑀺𑀢𑁄𑀯𑀸𑀢𑀺 𑀉𑀝𑁆𑀞𑀺𑀢𑀅𑀩𑁆𑀪𑁄 𑀯𑀺𑀬, 𑀅𑀪𑀺𑀫𑀼𑀔𑀪𑀸𑀯𑁂𑀦 𑀯𑀸 𑀉𑀝𑁆𑀞𑀺𑀢𑁄𑀯 𑀫𑀭𑀡𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀬𑀸𑀢𑀻𑀢𑀺 𑀲𑁄 𑀫𑀸𑀡𑀯𑁄 𑀬𑀸𑀢𑀺, 𑀧𑀞𑀫𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀢𑁂𑀯. 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻𑀢𑀺 𑀲𑁄 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀔𑀡𑀫𑀢𑁆𑀢𑀫𑁆𑀧𑀺 𑀦 𑀦𑀺𑀯𑀢𑁆𑀢𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀫𑀭𑀡𑀁𑀬𑁂𑀯 𑀉𑀧𑀕𑀘𑁆𑀙𑀢𑀺.

𑀓𑀼𑀦𑁆𑀦𑀤𑀻𑀦𑀦𑁆𑀢𑀺 𑀧𑀩𑁆𑀩𑀢𑀢𑁄 𑀧𑀢𑀺𑀢𑀸𑀦𑀁 𑀔𑀼𑀤𑁆𑀤𑀓𑀦𑀤𑀻𑀦𑀁. 𑀧𑀸𑀢𑁄 𑀆𑀧𑁄𑀭𑀲𑀸𑀦𑀼𑀕𑀢𑀩𑀦𑁆𑀥𑀦𑀸𑀦𑀦𑁆𑀢𑀺 𑀧𑀼𑀭𑀺𑀫𑀤𑀺𑀯𑀲𑁂 𑀤𑀺𑀯𑀸 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀅𑀦𑁆𑀢𑁄 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀭𑀢𑁆𑀢𑀺𑀬𑀁 𑀩𑀦𑁆𑀥𑀦𑀫𑀽𑀮𑀁 𑀉𑀧𑀕𑀢𑁂𑀦 𑀆𑀧𑁄𑀭𑀲𑁂𑀦 𑀢𑀺𑀦𑁆𑀢𑀲𑀺𑀣𑀺𑀮𑀩𑀦𑁆𑀥𑀦𑀢𑀸𑀬 𑀧𑀸𑀢𑁄 𑀆𑀧𑁄𑀭𑀲𑀸𑀦𑀼𑀕𑀢𑀩𑀦𑁆𑀥𑀦𑀸𑀦𑀁.

𑀅𑀘𑁆𑀘𑀬𑀦𑁆𑀢𑀻𑀢𑀺 ¶ 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑀼𑀚𑁆𑀛𑀢𑀺. 𑀉𑀤𑀓𑀫𑁂𑀯 𑀑𑀤𑀓𑀁, 𑀉𑀤𑀓𑁄𑀖𑀁 𑀯𑀸 ¶ . 𑀬𑀲𑁆𑀫𑀸 𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀢𑀲𑁆𑀫𑀸 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀬𑀲𑁆𑀫𑀸 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀆𑀬𑀼 𑀔𑀻𑀬𑀢𑀺 𑀫𑀘𑁆𑀘𑀸𑀦𑀁. 𑀧𑀧𑀢𑀢𑁄𑀢𑀺 𑀧𑀧𑀢𑀦𑀢𑁄 𑀪𑀬𑀁 𑀲𑀸𑀫𑀺𑀓𑀸𑀦𑀁 𑀭𑀼𑀓𑁆𑀔𑁂 𑀞𑀢𑁆𑀯𑀸 𑀓𑀫𑁆𑀫𑁂 𑀯𑀺𑀦𑀺𑀬𑀼𑀜𑁆𑀚𑀺𑀢𑀼𑀓𑀸𑀫𑀸𑀦𑀁, 𑀳𑁂𑀝𑁆𑀞𑀸 𑀧𑀯𑀺𑀝𑁆𑀞𑀸𑀦𑀁 𑀯𑀸. 𑀉𑀕𑁆𑀕𑀫𑀦𑀁 𑀧𑀢𑀺 𑀉𑀕𑁆𑀕𑀫𑀦𑀦𑀺𑀫𑀺𑀢𑁆𑀢𑀁. 𑀫𑀸 𑀫𑀁 𑀅𑀫𑁆𑀫 𑀦𑀺𑀯𑀸𑀭𑀬 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁄𑀘𑀺 𑀫𑀺𑀢𑁆𑀢𑀫𑀼𑀔𑀲𑀢𑁆𑀢𑀼𑀭𑀦𑁆𑀥𑀕𑀯𑁂𑀲𑀻 𑀲𑀳 𑀯𑀢𑁆𑀢𑀫𑀸𑀦𑁄𑀧𑀺 𑀦 𑀳𑀦𑁂𑀬𑁆𑀬, 𑀅𑀬𑀁 𑀧𑀦 𑀏𑀓𑀁𑀲𑁂𑀦 𑀳𑀦𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀚𑀸𑀢𑀺𑀬𑀸 𑀆𑀕𑀢𑀢𑁄’’𑀢𑀺 𑀯𑀢𑁆𑀯𑀸 ‘‘𑀚𑀻𑀯𑀺𑀢𑀳𑀭𑀡𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁.

𑁧𑁭𑁦. 𑀦𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀁. 𑀲𑀼𑀔𑀻𑀢𑀺 𑀤𑀺𑀩𑁆𑀩𑀲𑀤𑀺𑀲𑁂𑀳𑀺 𑀪𑁄𑀕𑁂𑀳𑀺, 𑀆𑀥𑀺𑀧𑀢𑁂𑀬𑁆𑀬𑁂𑀦 𑀘 𑀲𑀼𑀔𑀲𑀫𑀗𑁆𑀕𑀻. 𑀤𑁂𑀳𑀩𑀦𑁆𑀥𑁂𑀦𑀸𑀢𑀺 𑀲𑀭𑀻𑀭𑁂𑀦. 𑀅𑀲𑁄𑀓𑁄𑀢𑀺 𑀅𑀲𑁄𑀓𑀫𑀳𑀸𑀭𑀸𑀚𑀸. 𑀲𑁄𑀓𑀫𑀸𑀕𑀢𑁄𑀢𑀺 𑀲𑁄𑀘𑀺𑀢𑀩𑁆𑀩𑀢𑀁 𑀕𑀢𑁄.

𑀆𑀭𑁄𑀕𑁆𑀬𑀁 𑀬𑁄𑀩𑁆𑀩𑀦𑀸𑀦𑀁. 𑀩𑁆𑀬𑀸𑀥𑀺𑀚𑀭𑀸𑀧𑀭𑀺𑀬𑁄𑀲𑀸𑀦𑀢𑀸 𑀚𑀻𑀯𑀺𑀢𑀲𑁆𑀲 𑀫𑀭𑀡𑀧𑀭𑀺𑀬𑁄𑀲𑀸𑀦𑀢𑀸𑀬 𑀉𑀤𑀸𑀳𑀭𑀡𑀯𑀲𑁂𑀦 𑀆𑀦𑀻𑀢𑀸, 𑀧𑀘𑁆𑀘𑀬𑀪𑀸𑀕𑀯𑀲𑁂𑀦 𑀯𑀸. 𑀮𑁄𑀓𑁄𑀬𑁂𑀯 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀬𑀣𑀸 𑀲𑀢𑁆𑀢𑀸𑀯𑀸𑀲𑀸𑀢𑀺, 𑀲𑀦𑁆𑀦𑀺𑀯𑀲𑀺𑀢𑀩𑁆𑀩𑀢𑀸𑀬 𑀯𑀸 𑀲𑀢𑁆𑀢𑀦𑀺𑀓𑀸𑀬𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀅𑀦𑀼𑀕𑀢𑁄𑀢𑀺 𑀅𑀦𑀼𑀩𑀦𑁆𑀥𑁄 𑀧𑀘𑁆𑀘𑀢𑁆𑀣𑀺𑀓𑁂𑀦 𑀯𑀺𑀬. 𑀅𑀦𑀼𑀲𑀝𑁄𑀢𑀺 𑀅𑀦𑀼𑀧𑀯𑀺𑀝𑁆𑀞𑁄 𑀉𑀧𑀯𑀺𑀲𑁂𑀦 𑀯𑀺𑀬. 𑀅𑀪𑀺𑀪𑀽𑀢𑁄𑀢𑀺 𑀅𑀚𑁆𑀛𑁄𑀢𑁆𑀣𑀝𑁄 𑀫𑀤𑁆𑀤𑀳𑀢𑁆𑀣𑀻𑀳𑀺 𑀯𑀺𑀬. 𑀅𑀩𑁆𑀪𑀸𑀳𑀢𑁄𑀢𑀺 𑀧𑀳𑀝𑁄 𑀪𑀽𑀢𑁂𑀳𑀺 𑀯𑀺𑀬.

𑀲𑁂𑀮𑀸𑀢𑀺 𑀲𑀺𑀮𑀸𑀫𑀬𑀸, 𑀦 𑀧𑀁𑀲𑀼𑀆𑀤𑀺𑀫𑀬𑀸. 𑀯𑀺𑀧𑀼𑀮𑀸𑀢𑀺 𑀫𑀳𑀦𑁆𑀢𑀸 𑀅𑀦𑁂𑀓𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀸. 𑀦𑀪𑀁 𑀆𑀳𑀘𑁆𑀘𑀸𑀢𑀺 𑀯𑀺𑀧𑀼𑀮𑀢𑁆𑀢𑀸 𑀏𑀯 𑀆𑀓𑀸𑀲𑀁 𑀅𑀪𑀺𑀯𑀺𑀳𑀘𑁆𑀘 𑀲𑀩𑁆𑀩𑀤𑀺𑀲𑀸𑀲𑀼 𑀨𑀭𑀺𑀢𑁆𑀯𑀸. 𑀅𑀦𑀼𑀧𑀭𑀺𑀬𑁂𑀬𑁆𑀬𑀼𑀦𑁆𑀢𑀺 𑀅𑀦𑀼𑀯𑀺𑀘𑀭𑁂𑀬𑁆𑀬𑀼𑀁. 𑀦𑀺𑀧𑁆𑀧𑁄𑀣𑁂𑀦𑁆𑀢𑀸𑀢𑀺 𑀅𑀢𑁆𑀢𑀦𑀸 𑀆𑀖𑀸𑀢𑀺𑀢𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀸. 𑀅𑀥𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀥𑀺𑀪𑀯𑀦𑁆𑀢𑀺. 𑀓𑀼𑀮𑁂𑀦 𑀯𑀸 𑀭𑀽𑀧𑁂𑀦 𑀯𑀸 𑀲𑀻𑀮𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀲𑀤𑁆𑀥𑀸𑀤𑀻𑀳𑀺 𑀯𑀸 𑀲𑁂𑀝𑁆𑀞𑁄𑀢𑀺 𑀲𑀫𑁆𑀪𑀸𑀯𑀦𑀸𑀬 𑀔𑀢𑁆𑀢𑀺𑀬𑀸𑀤𑀻𑀲𑀼 𑀦 𑀓𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀢𑀺. 𑀢𑁂𑀳𑀺 𑀏𑀯 𑀦𑀺𑀳𑀻𑀦𑁄𑀢𑀺 𑀅𑀯𑀫𑀜𑁆𑀜𑀫𑀸𑀦𑀸𑀬 𑀲𑀼𑀤𑁆𑀤𑀸𑀤𑀻𑀲𑀼 𑀦 𑀓𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀲𑀩𑁆𑀩𑀫𑁂𑀯 𑀅𑀪𑀺𑀫𑀤𑁆𑀤𑀢𑀺 𑀦𑀺𑀫𑁆𑀫𑀣𑀢𑀺. 𑀤𑀡𑁆𑀟𑀸𑀤𑀺𑀉𑀧𑀸𑀬𑀸 𑀘 𑀢𑀢𑁆𑀣 𑀅𑀯𑀺𑀲𑀬𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀢𑁆𑀣 𑀳𑀢𑁆𑀣𑀻𑀦𑀁 𑀪𑀽𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑁆𑀢𑀬𑀼𑀤𑁆𑀥𑁂𑀦𑀸𑀢𑀺 ¶ 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑁂𑀦 𑀫𑀦𑁆𑀢𑀲𑀗𑁆𑀕𑀸𑀫𑀧𑁆𑀧𑀬𑁄𑀕𑁂𑀦. 𑀥𑀦𑁂𑀦𑀸𑀢𑀺 𑀥𑀦𑀤𑀸𑀦𑁂𑀦. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀢𑁆𑀣𑁄. 𑀢𑁂𑀦 𑀲𑀸𑀫𑀁, 𑀪𑁂𑀤𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁭𑁧. 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀉𑀧𑀲𑀁𑀳𑀭𑀡𑀢𑁄𑀢𑀺 𑀧𑀭𑁂𑀳𑀺 𑀫𑀢𑁂𑀳𑀺 𑀲𑀤𑁆𑀥𑀺𑀁 ‘‘𑀢𑁂𑀧𑀺 𑀦𑀸𑀫 𑀫𑀢𑀸, 𑀓𑀺𑀫𑀗𑁆𑀕𑀁 ¶ 𑀧𑀦 𑀫𑀸𑀤𑀺𑀲𑀸’’𑀢𑀺 𑀅𑀢𑁆𑀢𑀦𑁄 𑀫𑀭𑀡𑀲𑁆𑀲 𑀉𑀧𑀦𑀬𑀦𑀢𑁄. 𑀬𑀲𑀫𑀳𑀢𑁆𑀢𑀢𑁄𑀢𑀺 𑀧𑀭𑀺𑀯𑀸𑀭𑀫𑀳𑀢𑁆𑀢𑀢𑁄, 𑀯𑀺𑀪𑀯𑀫𑀳𑀢𑁆𑀢𑀢𑁄 𑀘. 𑀧𑀼𑀜𑁆𑀜𑀫𑀳𑀢𑁆𑀢𑀢𑁄𑀢𑀺 𑀫𑀳𑀸𑀧𑀼𑀜𑁆𑀜𑀪𑀸𑀯𑀢𑁄. 𑀣𑀸𑀫𑀫𑀳𑀢𑁆𑀢𑀢𑁄𑀢𑀺 𑀯𑀻𑀭𑀺𑀬𑀩𑀮𑀫𑀳𑀢𑁆𑀢𑀢𑁄. 𑀬𑀼𑀥𑀺𑀝𑁆𑀞𑀺𑀮𑁄 𑀥𑀫𑁆𑀫𑀧𑀼𑀢𑁆𑀢𑁄. 𑀘𑀸𑀦𑀼𑀭𑁄 𑀬𑁄 𑀩𑀮𑀤𑁂𑀯𑁂𑀦 𑀦𑀺𑀩𑁆𑀩𑀼𑀤𑁆𑀥𑀁 𑀓𑀢𑁆𑀯𑀸 𑀫𑀸𑀭𑀺𑀢𑁄.

𑀲𑀳 𑀇𑀤𑁆𑀥𑀻𑀳𑀻𑀢𑀺 𑀯𑁂𑀚𑀬𑀦𑁆𑀢𑀓𑀫𑁆𑀧𑀦𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑀸𑀤𑀻𑀲𑀼 𑀤𑀺𑀝𑁆𑀞𑀸𑀦𑀼𑀪𑀸𑀯𑀸𑀳𑀺 𑀅𑀢𑁆𑀢𑀦𑁄 𑀇𑀤𑁆𑀥𑀻𑀳𑀺 𑀲𑀤𑁆𑀥𑀺𑀁 𑀫𑀘𑁆𑀘𑀼𑀫𑀼𑀔𑀁 𑀧𑀯𑀺𑀝𑁆𑀞𑁄.

𑀓𑀮𑀁 𑀦𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀧𑀽𑀭𑀡𑀪𑀸𑀕𑀁 𑀦 𑀅𑀕𑁆𑀖𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀬𑀲𑁆𑀫𑀢𑁄 𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀜𑁆𑀜𑀁 𑀲𑁄𑀴𑀲𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀁 𑀪𑀸𑀕𑀁 𑀲𑁄𑀴𑀲𑀥𑀸 𑀕𑀳𑁂𑀢𑁆𑀯𑀸 𑀮𑀤𑁆𑀥𑀁 𑀏𑀓𑀪𑀸𑀕𑀲𑀗𑁆𑀔𑀸𑀢𑀁 𑀓𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀧𑀜𑁆𑀜𑀸 𑀦 𑀅𑀕𑁆𑀖𑀦𑁆𑀢𑀻𑀢𑀺.

𑀲𑀩𑁆𑀩𑀲𑁆𑀲𑀸𑀧𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀫𑀼𑀕𑁆𑀖𑀸𑀢𑁄 𑀜𑀸𑀬𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀳𑁄𑀢𑀻𑀢𑀺 𑀆𑀳 ‘‘𑀜𑀸𑀡𑀯𑀻𑀭𑀺𑀬𑀩𑀮𑁂𑀦𑀸’’𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀯𑀸𑀬𑀸𑀫𑁂𑀲𑀼 𑀳𑀺 𑀲𑀺𑀤𑁆𑀥𑁂𑀲𑀼 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄 𑀲𑀺𑀤𑁆𑀥𑁄𑀯 𑀳𑁄𑀢𑀻𑀢𑀺. 𑀏𑀓𑀸𑀓𑀻𑀪𑀸𑀯𑁂𑀦 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸. 𑀧𑀭𑀢𑁄𑀖𑁄𑀲𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀪𑀽𑀢𑀸 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑀸𑀢𑀺 𑀲𑀬𑀫𑁆𑀪𑀼𑀦𑁄.

𑀳𑀢𑁆𑀣𑀕𑀢𑀲𑀼𑀯𑀡𑁆𑀡𑀯𑀮𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑀁 𑀯𑀁𑀲𑀓𑀴𑀻𑀭𑀲𑁆𑀲 𑀓𑀢𑁆𑀣𑀘𑀺 𑀅𑀲𑀢𑁆𑀢𑀢𑀸𑀢𑀺 𑀏𑀯𑀫𑀸𑀤𑀺𑀓𑀁 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 𑀆𑀕𑀫𑁆𑀫. 𑀯𑀻𑀫𑀁𑀲𑀦𑁆𑀢𑀸𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑀸. 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀝𑁆𑀞𑁂𑀦 𑀫𑀳𑁂𑀲𑀬𑁄. 𑀏𑀓𑀘𑀭𑀺𑀬𑀦𑀺𑀯𑀸𑀲𑁂𑀦𑀸𑀢𑀺 𑀏𑀓𑀘𑀭𑀺𑀬𑀦𑀺𑀯𑀸𑀲𑀫𑀢𑁆𑀢𑁂𑀦, 𑀦 𑀲𑀻𑀮𑀸𑀤𑀺𑀦𑀸. 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀲𑀫𑀸 𑀉𑀧𑀫𑀸 𑀬𑁂𑀲𑀁, 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀁 𑀯𑀸 𑀲𑀫𑀽𑀧𑀫𑀸 𑀬𑁂𑀲𑀁 𑀢𑁂 𑀔𑀕𑁆𑀕𑀲𑀺𑀗𑁆𑀕𑀲𑀫𑀽𑀧𑀫𑀸.

𑀢𑀫𑁆𑀩𑀦𑀔𑀢𑀼𑀗𑁆𑀕𑀦𑀔𑀢𑀸𑀤𑀺𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀤𑀻𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑁄 𑀭𑀽𑀧𑀓𑀸𑀬𑁄 𑀏𑀢𑀲𑁆𑀲𑀸𑀢𑀺 𑀅𑀲𑀻𑀢𑀺…𑀧𑁂… 𑀭𑀽𑀧𑀓𑀸𑀬𑁄. 𑀲𑀳 𑀯𑀸𑀲𑀦𑀸𑀬 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 ¶ 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀭𑀢𑀦𑁂𑀳𑀺 𑀲𑀫𑀺𑀤𑁆𑀥𑁄 𑀥𑀫𑁆𑀫𑀓𑀸𑀬𑁄 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀸𑀭…𑀧𑁂… 𑀥𑀫𑁆𑀫𑀓𑀸𑀬𑁄. 𑀞𑀸𑀦𑀲𑁄𑀢𑀺 𑀢𑀗𑁆𑀔𑀡𑁂𑀬𑁂𑀯.

𑀏𑀯𑀁 ¶ 𑀫𑀳𑀸𑀦𑀼𑀪𑀸𑀯𑀲𑁆𑀲𑀸𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸, 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑀺𑀜𑁆𑀜𑀸𑀬𑀫𑀸𑀦𑀯𑀺𑀧𑀼𑀮𑀸𑀧𑀭𑀺𑀫𑁂𑀬𑁆𑀬𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲, 𑀯𑀲𑀁 𑀦𑀸𑀕𑀢𑀁 𑀅𑀦𑀼𑀧𑀕𑀫𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀭𑀡𑀁 𑀲𑀸𑀫𑀜𑁆𑀜𑀁 𑀏𑀢𑀲𑁆𑀲𑀸𑀢𑀺 𑀫𑀭𑀡𑀲𑀸𑀫𑀜𑁆𑀜𑁄, 𑀢𑀲𑁆𑀲 𑀪𑀸𑀯𑁄 𑀫𑀭𑀡𑀲𑀸𑀫𑀜𑁆𑀜𑀢𑀸, 𑀢𑀸𑀬.

𑁧𑁭𑁨. 𑀓𑀺𑀫𑀺𑀓𑀼𑀮𑀸𑀦𑀦𑁆𑀢𑀺 𑀓𑀺𑀫𑀺𑀲𑀫𑀽𑀳𑀸𑀦𑀁, 𑀓𑀺𑀫𑀺𑀚𑀸𑀢𑀻𑀦𑀁 𑀯𑀸. 𑀚𑀻𑀬𑀦𑁆𑀢𑀻𑀢𑀺 𑀚𑀭𑀁 𑀧𑀸𑀧𑀼𑀡𑀦𑁆𑀢𑀺.

𑀦𑀺𑀓𑁆𑀔𑀦𑁆𑀢𑁂𑀢𑀺 𑀯𑀻𑀢𑀺𑀯𑀢𑁆𑀢𑁂. 𑀧𑀝𑀺𑀳𑀺𑀢𑀸𑀬𑀸𑀢𑀺 𑀧𑀘𑁆𑀘𑀸𑀦𑀼𑀕𑀢𑀸𑀬. 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀲𑀸 𑀬𑀣𑀸𑀯𑀼𑀢𑁆𑀢𑀸 𑀦 𑀓𑁂𑀯𑀮𑀁 𑀓𑀸𑀮𑀓𑀺𑀭𑀺𑀬𑀸𑀯, 𑀅𑀣 𑀔𑁄 𑀫𑀫 𑀅𑀢𑀺𑀤𑀼𑀮𑁆𑀮𑀪𑀁 𑀔𑀡𑀁 𑀮𑀪𑀺𑀢𑁆𑀯𑀸 𑀞𑀺𑀢𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑁆𑀢𑀭𑀸𑀬𑁄 𑀅𑀲𑁆𑀲 𑀪𑀯𑁂𑀬𑁆𑀬. 𑀩𑁆𑀬𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀧𑀢𑁆𑀢𑀺𑀁 𑀕𑀘𑁆𑀙𑁂𑀬𑁆𑀬. 𑀲𑀢𑁆𑀣𑀓𑁂𑀦 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑀦𑁆𑀢𑀦𑀓𑀸 𑀫𑀭𑀡𑀓𑀸𑀮𑁂 𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀦𑀓𑀯𑀸𑀢𑀸 𑀲𑀢𑁆𑀣𑀓𑀯𑀸𑀢𑀸.

𑁧𑁭𑁩. 𑀅𑀩𑀮𑀦𑁆𑀢𑀺 𑀩𑀮𑀳𑀻𑀦𑀁. 𑀤𑀼𑀩𑁆𑀩𑀮𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀤𑀼-𑀲𑀤𑁆𑀤𑁄 ‘‘𑀤𑀼𑀲𑁆𑀲𑀻𑀮𑁄 (𑀅. 𑀦𑀺. 𑁫.𑁨𑁧𑁩; 𑀅. 𑀦𑀺. 𑁧𑁦.𑁭𑁫) 𑀤𑀼𑀧𑁆𑀧𑀜𑁆𑀜𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁪𑁯) 𑀯𑀺𑀬. 𑀢𑀤𑁂𑀢𑀁 𑀆𑀬𑀼. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀸 𑀅𑀧𑀭𑀸𑀧𑀭𑀁 𑀧𑀯𑁂𑀲𑀦𑀺𑀓𑁆𑀔𑀫𑁄𑀯. 𑀩𑀳𑀺 𑀦𑀺𑀓𑁆𑀔𑀦𑁆𑀢𑀦𑀸𑀲𑀺𑀓𑀯𑀸𑀢𑁂 𑀅𑀦𑁆𑀢𑁄 𑀅𑀧𑀯𑀺𑀲𑀦𑁆𑀢𑁂, 𑀧𑀯𑀺𑀝𑁆𑀞𑁂 𑀯𑀸 𑀅𑀦𑀺𑀓𑁆𑀔𑀫𑀦𑁆𑀢𑁂𑀢𑀺 𑀏𑀓𑀲𑁆𑀲𑁂𑀯 𑀧𑀯𑁂𑀲𑀦𑀺𑀓𑁆𑀔𑀫𑁄 𑀯𑀺𑀬 𑀯𑀼𑀢𑁆𑀢𑀁, 𑀢𑀁 𑀦𑀸𑀲𑀺𑀓𑀯𑀸𑀢𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀫𑀢𑁆𑀢𑀢𑀸𑀬 𑀅𑀘𑁆𑀘𑀸𑀲𑀦𑁆𑀦𑀅𑀥𑀺𑀝𑁆𑀞𑀸𑀦𑀸𑀤𑀺𑀦𑀸. 𑀢𑀤𑀪𑀸𑀯𑁄 𑀳𑀺 𑀇𑀭𑀺𑀬𑀸𑀧𑀣𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀸. 𑀅𑀢𑀺𑀲𑀻𑀢𑁂𑀦 𑀅𑀪𑀺𑀪𑀽𑀢𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑀚𑁆𑀚𑀦𑀁 𑀫𑀳𑀺𑀁𑀲𑀭𑀝𑁆𑀞𑀸𑀤𑀻𑀲𑀼 𑀳𑀺𑀫𑀧𑀸𑀢𑀓𑀸𑀮𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀲𑀻𑀢𑁂𑀦 𑀪𑀺𑀦𑁆𑀦𑀲𑀭𑀻𑀭𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀢𑀺𑀉𑀡𑁆𑀳𑁂𑀦 𑀅𑀪𑀺𑀪𑀽𑀢𑀲𑁆𑀲 𑀯𑀺𑀧𑀚𑁆𑀚𑀦𑀁 𑀫𑀭𑀼𑀓𑀦𑁆𑀢𑀸𑀭𑁂 𑀉𑀡𑁆𑀳𑀸𑀪𑀺𑀢𑀢𑁆𑀢𑀸𑀬 𑀧𑀘𑁆𑀙𑀺𑀁, 𑀢𑀢𑁆𑀣 𑀞𑀧𑀺𑀢𑀁 𑀉𑀧𑀭𑀺 𑀲𑀸𑀝𑀓𑀁, 𑀧𑀼𑀢𑁆𑀢𑀜𑁆𑀘 𑀅𑀓𑁆𑀓𑀫𑀺𑀢𑁆𑀯𑀸 𑀫𑀢𑀸𑀬 𑀇𑀢𑁆𑀣𑀺𑀬𑀸 𑀤𑀻𑀧𑁂𑀢𑀩𑁆𑀩𑀁. 𑀫𑀳𑀸𑀪𑀽𑀢𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀸 𑀧𑀓𑁄𑀧𑀸𑀪𑀸𑀯𑁄 ¶ . 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀧𑀓𑁄𑀧𑁂𑀦 𑀲𑀭𑀻𑀭𑀲𑁆𑀲 𑀯𑀺𑀓𑀸𑀭𑀸𑀧𑀢𑁆𑀢𑀺 𑀧𑀭𑀢𑁄 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬𑀁 𑀆𑀕𑀫𑀺𑀲𑁆𑀲𑀢𑀺. 𑀬𑀼𑀢𑁆𑀢𑀓𑀸𑀮𑁂𑀢𑀺 𑀪𑀼𑀜𑁆𑀚𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀔𑀼𑀤𑁆𑀤𑀸𑀪𑀺𑀪𑀽𑀢𑀓𑀸𑀮𑁂.

𑁧𑁭𑁪. 𑀅𑀯𑀯𑀢𑁆𑀣𑀸𑀦𑀢𑁄𑀢𑀺 𑀓𑀸𑀮𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄. 𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑁂𑀢𑁆𑀣 𑀧𑀭𑀺𑀘𑁆𑀙𑁂𑀤𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀦𑀁, 𑀦𑀺𑀘𑁆𑀙𑀬𑁄 𑀘𑀸𑀢𑀺 𑀆𑀳 ‘‘𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄’’𑀢𑀺. 𑀦 𑀦𑀸𑀬𑀭𑁂𑀢𑀺 𑀦 𑀜𑀸𑀬𑀦𑁆𑀢𑀺.

𑀇𑀢𑁄 ¶ 𑀧𑀭𑀦𑁆𑀢𑀺 𑀏𑀢𑁆𑀣 𑀧𑀭𑀦𑁆𑀢𑀺 𑀧𑀭𑀁 𑀅𑀜𑁆𑀜𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀑𑀭𑀓𑀸𑀮𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀭𑀫𑀸𑀬𑀼𑀢𑁄 𑀑𑀭𑀓𑀸𑀮𑀁 𑀏𑀯 𑀘𑁂𑀢𑁆𑀣 ‘‘𑀧𑀭’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁄 𑀧𑀭𑀁 𑀲𑀢𑁆𑀢𑀸𑀦𑀁 𑀚𑀻𑀯𑀦𑀲𑁆𑀲 𑀅𑀪𑀸𑀯𑀢𑁄 ‘‘𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀅𑀩𑁆𑀩𑀼𑀤𑀧𑁂𑀲𑀻𑀢𑀺𑀆𑀤𑀻𑀲𑀼 ‘‘𑀅𑀩𑁆𑀩𑀼𑀤𑀓𑀸𑀮𑁂 𑀧𑁂𑀲𑀺𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀓𑀸𑀮-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀮𑁄𑀢𑀺 𑀇𑀥 𑀧𑀼𑀩𑁆𑀩𑀡𑁆𑀳𑀸𑀤𑀺𑀯𑁂𑀮𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀡𑁆𑀳𑁂𑀧𑀺 𑀳𑀻’’𑀢𑀺𑀆𑀤𑀺. 𑀇𑀥𑁂𑀯 𑀤𑁂𑀳𑁂𑀦 𑀧𑀢𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁂𑀓𑀧𑁆𑀧𑀓𑀸𑀭𑀢𑁄𑀢𑀺 𑀦𑀕𑀭𑁂 𑀚𑀸𑀢𑀸𑀦𑀁 𑀕𑀸𑀫𑁂, 𑀕𑀸𑀫𑁂 𑀚𑀸𑀢𑀸𑀦𑀁 𑀦𑀕𑀭𑁂, 𑀯𑀦𑁂 𑀚𑀸𑀢𑀸𑀦𑀁 𑀚𑀦𑀧𑀤𑁂, 𑀚𑀦𑀧𑀤𑁂 𑀚𑀸𑀢𑀸𑀦𑀁 𑀯𑀦𑁂𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑀢𑁄. 𑀇𑀢𑁄 𑀘𑀼𑀢𑁂𑀦𑀸𑀢𑀺 𑀇𑀢𑁄 𑀕𑀢𑀺𑀢𑁄 𑀘𑀼𑀢𑁂𑀦. 𑀇𑀥 𑀇𑀫𑀺𑀲𑁆𑀲𑀁 𑀕𑀢𑀺𑀬𑀁. 𑀬𑀦𑁆𑀢𑀬𑀼𑀢𑁆𑀢𑀕𑁄𑀡𑁄 𑀯𑀺𑀬𑀸𑀢𑀺 𑀬𑀣𑀸 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀬𑀦𑁆𑀢𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀁 𑀮𑁄𑀓𑁄 𑀕𑀢𑀺𑀧𑀜𑁆𑀘𑀓𑀦𑁆𑀢𑀺 𑀏𑀢𑁆𑀢𑀓𑁂𑀦 𑀉𑀧𑀫𑀸.

𑁧𑁭𑁫. 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺 𑀯𑀲𑁆𑀲𑀲𑀢𑀢𑁄 𑀉𑀧𑀭𑀺 ‘‘𑀤𑀲 𑀯𑀸 𑀯𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀯𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀁 𑀯𑀲𑁆𑀲𑀲𑀢𑀁 𑀅𑀧𑀸𑀧𑀼𑀡𑀦𑁆𑀢𑁄 𑀅𑀧𑁆𑀧𑀓𑀁 𑀯𑀸 𑀚𑀻𑀯𑀢𑀻𑀢𑀺 𑀅𑀢𑁆𑀣𑁄. 𑀕𑀫𑀦𑀻𑀬𑁄𑀢𑀺 𑀕𑀦𑁆𑀥𑀩𑁆𑀩𑁄 𑀉𑀧𑀧𑀚𑁆𑀚𑀦𑀯𑀲𑁂𑀦. 𑀲𑀫𑁆𑀧𑀭𑀸𑀬𑁄𑀢𑀺 𑀧𑀭𑀮𑁄𑀓𑁄.

𑀳𑀻𑀴𑁂𑀬𑁆𑀬𑀸𑀢𑀺 𑀧𑀭𑀺𑀪𑀯𑁂𑀬𑁆𑀬 𑀦 𑀲𑀫𑁆𑀪𑀸𑀯𑁂𑀬𑁆𑀬. 𑀦𑀦𑁆𑀢𑀺 𑀆𑀬𑀼𑀁. 𑀲𑀼𑀧𑁄𑀭𑀺𑀲𑁄𑀢𑀺 𑀲𑀸𑀥𑀼𑀧𑀼𑀭𑀺𑀲𑁄 𑀧𑀜𑁆𑀜𑀯𑀸. 𑀘𑀭𑁂𑀬𑁆𑀬𑀸𑀢𑀺 𑀲𑀼𑀘𑀭𑀺𑀢𑀁 𑀘𑀭𑁂𑀬𑁆𑀬. 𑀢𑁂𑀦𑀸𑀳 ‘‘𑀆𑀤𑀺𑀢𑁆𑀢𑀲𑀻𑀲𑁄𑀯𑀸’’𑀢𑀺.

𑀲𑀢𑁆𑀢𑀳𑀺 𑀉𑀧𑀫𑀸𑀳𑀻𑀢𑀺 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺. 𑀉𑀤𑀓𑁂 𑀉𑀤𑀓𑀧𑀼𑀩𑁆𑀩𑀼𑀴𑀁. 𑀉𑀤𑀓𑁂 ¶ 𑀤𑀡𑁆𑀟𑀭𑀸𑀚𑀺. 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸 𑀤𑀽𑀭𑀗𑁆𑀕𑀫𑀸 𑀲𑀻𑀖𑀲𑁄𑀢𑀸 𑀳𑀸𑀭𑀳𑀸𑀭𑀺𑀦𑀻. 𑀩𑀮𑀯𑀸 𑀧𑀼𑀭𑀺𑀲𑁄 𑀚𑀺𑀯𑁆𑀳𑀕𑁆𑀕𑁂 𑀔𑁂𑀴𑀧𑀺𑀡𑁆𑀟𑀁 𑀲𑀁𑀬𑀽𑀳𑀺𑀢𑁆𑀯𑀸 𑀅𑀓𑀲𑀺𑀭𑁂𑀦𑁂𑀯 𑀯𑀫𑁂𑀬𑁆𑀬. 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀝𑀸𑀳𑁂 𑀫𑀁𑀲𑀧𑁂𑀲𑀺 𑀧𑀓𑁆𑀔𑀺𑀢𑁆𑀢𑀸 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺. 𑀕𑀸𑀯𑀻 𑀯𑀚𑁆𑀛𑀸 𑀆𑀖𑀸𑀢𑀦𑀁 𑀦𑀻𑀬𑀫𑀸𑀦𑀸 𑀬𑀁 𑀬𑀤𑁂𑀯 𑀧𑀸𑀤𑀁 𑀉𑀤𑁆𑀥𑀭𑀢𑀺, 𑀲𑀦𑁆𑀢𑀺𑀓𑁂𑀯 𑀳𑁄𑀢𑀺 𑀯𑀥𑀲𑁆𑀲, 𑀲𑀦𑁆𑀢𑀺𑀓𑁂𑀯 𑀫𑀭𑀡𑀲𑁆𑀲, 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀕𑁄𑀯𑀚𑁆𑀛𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡’’𑀦𑁆𑀢𑀺 (𑀅. 𑀦𑀺. 𑁭.𑁭𑁪) 𑁋

𑀏𑀯𑀫𑀸𑀕𑀢𑀸𑀳𑀺 ¶ 𑀇𑀫𑀸𑀳𑀺 𑀲𑀢𑁆𑀢𑀳𑀺 𑀉𑀧𑀫𑀸𑀳𑀺 𑀅𑀮𑀗𑁆𑀓𑀢𑀁.

𑀭𑀢𑁆𑀢𑀺𑀦𑁆𑀤𑀺𑀯𑀦𑁆𑀢𑀺 𑀏𑀓𑀁 𑀭𑀢𑁆𑀢𑀺𑀦𑁆𑀤𑀺𑀯𑀁. 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀸𑀯𑀳𑀁 𑀲𑀢𑁆𑀣𑀼 𑀑𑀯𑀸𑀤𑀁. 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺 𑀩𑀳𑀼𑀁 𑀯𑀢 𑀫𑀬𑀸 𑀅𑀢𑁆𑀢𑀳𑀺𑀢𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀓𑀢𑀁 𑀪𑀯𑁂𑀬𑁆𑀬. 𑀢𑀤𑀦𑁆𑀢𑀭𑀦𑁆𑀢𑀺 𑀢𑀁 𑀔𑀡𑀁 𑀢𑀢𑁆𑀢𑀓𑀁 𑀯𑁂𑀮𑀁. 𑀏𑀓𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀏𑀓𑀁 𑀤𑀺𑀯𑀲𑀁 𑀬𑀸𑀧𑀦𑀧𑁆𑀧𑀳𑁄𑀦𑀓𑀁 𑀧𑀺𑀡𑁆𑀟𑀧𑀸𑀢𑀁. 𑀤𑀦𑁆𑀥𑀦𑁆𑀢𑀺 𑀫𑀦𑁆𑀤𑀁 𑀘𑀺𑀭𑀸𑀬. 𑀅𑀯𑀺𑀲𑁆𑀲𑀸𑀲𑀺𑀬𑁄 𑀅𑀯𑀺𑀲𑁆𑀲𑀸𑀲𑀦𑀻𑀬𑁄.

𑁧𑁭𑁬. 𑀘𑀺𑀢𑁆𑀢𑁂 𑀥𑀭𑀦𑁆𑀢𑁂𑀬𑁂𑀯 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀯𑁄𑀳𑀸𑀭𑁄, 𑀘𑀺𑀢𑁆𑀢𑀲𑁆𑀲 𑀘 𑀅𑀢𑀺𑀇𑀢𑁆𑀢𑀭𑁄 𑀔𑀡𑁄 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀢𑁄. 𑀬𑀣𑀸𑀳 𑀪𑀕𑀯𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮; 𑀓𑀣𑀸. 𑁩𑁩𑁫). 𑀢𑀲𑁆𑀫𑀸 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀮𑀳𑀼𑀲𑀁 𑀇𑀢𑁆𑀢𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀫𑀢𑁆𑀣𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀭𑀫𑀢𑁆𑀣𑀢𑁄’’𑀢𑀺 𑀇𑀫𑀺𑀦𑀸 𑀬𑀸𑀬𑀁 ‘‘𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀢𑁆𑀢𑀸𑀦𑀁 (𑀤𑀻. 𑀦𑀺. 𑁨.𑁭; 𑀲𑀁. 𑀦𑀺. 𑁧.𑁧𑁪𑁫; 𑀅. 𑀦𑀺. 𑁭.𑁭𑁪) 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀸 𑀧𑀩𑀦𑁆𑀥𑀯𑀺𑀲𑀬𑀢𑁆𑀢𑀸 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀅𑀢𑀺𑀧𑀭𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸 𑀲𑀼𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀼, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ‘𑀅𑀳𑀁 𑀇𑀫𑁂𑀲𑀁…𑀧𑁂… 𑀓𑀢𑀽𑀧𑀸𑀲𑀦𑀸𑀦𑀁 𑀘𑀢𑀼𑀤𑁆𑀤𑀺𑀲𑀸 𑀓𑀡𑁆𑀟𑁂 𑀔𑀺𑀢𑁆𑀢𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀧𑀣𑀯𑀺𑀬𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀬𑀣𑀸 ¶ 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑁄. 𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀬𑀣𑀸 𑀘 𑀬𑀸 𑀤𑁂𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁨𑁮) 𑁋

𑀏𑀯𑀁 𑀯𑀼𑀢𑁆𑀢𑀁 𑀧𑀭𑀺𑀢𑁆𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀭 𑀳𑀺 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺, 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀧𑀭𑀺𑀢𑁆𑀢𑀓𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑁄 𑀔𑀡𑁄 𑀯𑀼𑀢𑁆𑀢𑁄, 𑀘𑀺𑀢𑁆𑀢𑀲𑁆𑀲 𑀧𑀦 𑀅𑀢𑀺𑀯𑀺𑀬 𑀧𑀭𑀺𑀢𑁆𑀢𑀢𑀭𑁄, 𑀬𑀲𑁆𑀲 𑀉𑀧𑀫𑀸𑀧𑀺 𑀦𑀢𑁆𑀣𑀺. 𑀢𑁂𑀦𑁂𑀯𑀸𑀳 ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀉𑀧𑀫𑀸𑀧𑀺 𑀦 𑀲𑀼𑀓𑀭𑀸, 𑀬𑀸𑀯 𑀮𑀳𑀼𑀧𑀭𑀺𑀯𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮). 𑀚𑀻𑀯𑀺𑀢𑀓𑁆𑀔𑀡𑁄𑀢𑀺 𑀚𑀻𑀯𑀦𑀓𑁆𑀔𑀡𑁄. 𑀏𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁄𑀬𑁂𑀯 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑁂𑀯 ¶ 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀚𑀻𑀯𑀦𑀓𑁆𑀔𑀡𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀁. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀦𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀯𑀦𑁆𑀢𑀁. 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑀫𑀢𑁆𑀢𑁂𑀢𑀺 𑀬𑁂𑀦 𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀓𑁆𑀔𑀡𑁂𑀦 ‘‘𑀚𑀻𑀯𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑁄𑀥𑀁 𑀪𑀗𑁆𑀕𑀁 𑀧𑀢𑁆𑀢𑀫𑀢𑁆𑀢𑁂 𑀢𑀁𑀲𑀫𑀗𑁆𑀕𑀻 𑀲𑀢𑁆𑀢𑁄 𑀦𑀺𑀭𑀼𑀤𑁆𑀥𑁄 𑀫𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀚𑀻𑀯𑀦𑀁 𑀦𑀸𑀫 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑀼𑀔𑀤𑀼𑀓𑁆𑀔𑀸𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸. 𑀉𑀧𑁂𑀓𑁆𑀔𑀸𑀧𑀺 𑀳𑀺 𑀲𑀼𑀔𑀤𑀼𑀓𑁆𑀔𑀸𑀲𑀼 𑀏𑀯 𑀅𑀦𑁆𑀢𑁄𑀕𑀥𑀸 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑀢𑁄. 𑀅𑀢𑁆𑀢𑀪𑀸𑀯𑁄𑀢𑀺 𑀚𑀻𑀯𑀺𑀢𑀯𑁂𑀤𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀓𑁂𑀯𑀮𑀸𑀢𑀺 𑀅𑀢𑁆𑀢𑀦𑀸, 𑀦𑀺𑀘𑁆𑀘𑀪𑀸𑀯𑁂𑀦 𑀯𑀸 𑀅𑀯𑁄𑀫𑀺𑀲𑁆𑀲𑀸. 𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸𑀢𑀺 𑀏𑀓𑁂𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳𑀺𑀢𑀸. 𑀮𑀳𑀼𑀲𑁄 𑀯𑀢𑁆𑀢𑀢𑀺 𑀔𑀡𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬 𑀮𑀳𑀼𑀓𑁄 𑀅𑀢𑀺𑀇𑀢𑁆𑀢𑀭𑁄 𑀚𑀻𑀯𑀺𑀢𑀸𑀤𑀻𑀦𑀁 𑀔𑀡𑁄 𑀯𑀢𑁆𑀢𑀢𑀺.

𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲𑀸𑀢𑀺 𑀘𑀯𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀼𑀢𑀺𑀢𑁄 𑀉𑀤𑁆𑀥𑀁 ‘‘𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀬𑁂 𑀔𑀦𑁆𑀥𑀸. 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥𑀸𑀢𑀺 𑀬𑁂 𑀯𑀸 𑀇𑀥 𑀧𑀯𑀢𑁆𑀢𑀺𑀬𑀁 𑀢𑀺𑀝𑁆𑀞𑀦𑁆𑀢𑀲𑁆𑀲 𑀥𑀭𑀦𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀤𑁆𑀥𑀸 𑀔𑀦𑁆𑀥𑀸. 𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀲𑀤𑀺𑀲𑀸. 𑀓𑀣𑀁? 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀥𑀸𑀦𑀸𑀪𑀸𑀯𑁂𑀦 𑀯𑀺𑀕𑀢𑀸. 𑀬𑀣𑀸 ¶ 𑀳𑀺 𑀘𑀼𑀢𑀺𑀔𑀦𑁆𑀥𑀸 𑀦 𑀦𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀔𑀦𑁆𑀥𑀸, 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀚𑀸𑀢𑁄 𑀦 𑀳𑁄𑀢𑀺 𑀅𑀚𑀸𑀢𑁄 𑀦𑀸𑀫 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀯𑀢𑁆𑀢𑀫𑀸𑀦𑁂𑀦 𑀘𑀺𑀢𑁆𑀢𑁂𑀦 𑀚𑀻𑀯𑀢𑀺 𑀚𑀻𑀯𑀫𑀸𑀦𑁄 𑀦𑀸𑀫 𑀳𑁄𑀢𑀺. 𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀯𑀺𑀬 𑀲𑀩𑁆𑀩𑀲𑁆𑀲𑀧𑀺 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀮𑁄𑀓𑁄 𑀧𑀭𑀫𑀢𑁆𑀣𑀢𑁄 𑀫𑀢𑁄 𑀦𑀸𑀫 𑀳𑁄𑀢𑀺 𑀦𑀺𑀭𑀼𑀤𑁆𑀥𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸 𑀬𑀸 𑀢𑀁 𑀢𑀁 𑀥𑀭𑀦𑁆𑀢𑀁 𑀘𑀺𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀢𑀺𑀲𑁆𑀲𑁄 𑀚𑀻𑀯𑀢𑀺, 𑀨𑀼𑀲𑁆𑀲𑁄 𑀚𑀻𑀯𑀢𑀻’’𑀢𑀺 𑀯𑀘𑀦𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀲𑀬𑀪𑀽𑀢𑀸 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺, 𑀲𑀸 𑀏𑀢𑁆𑀣 𑀧𑀭𑀫𑀢𑁆𑀣𑀺𑀬𑀸 𑀧𑀭𑀫𑀢𑁆𑀣𑀪𑀽𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺 (𑀲𑀁. 𑀦𑀺. 𑁧.𑁭𑁬).

𑁧𑁭𑁭. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀆𑀓𑀸𑀭𑁂𑀦. 𑀘𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁. 𑀆𑀲𑁂𑀯𑀦𑀁 𑀮𑀪𑀢𑀻𑀢𑀺 𑀪𑀸𑀯𑀦𑀸𑀲𑁂𑀯𑀦𑀁 ¶ 𑀮𑀪𑀢𑀺, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀁 𑀧𑀳𑀸𑀬 𑀏𑀓𑀢𑁆𑀢𑀯𑀲𑁂𑀦 𑀫𑀭𑀡𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀫𑀭𑀡𑀸𑀭𑀫𑁆𑀫𑀡𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀪𑁂𑀤𑁄 𑀲𑀪𑀸𑀯𑀥𑀫𑁆𑀫𑀕𑀢𑀺𑀓𑁄 𑀏𑀯𑀸𑀢𑀺 𑀆𑀳 ‘‘𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀧𑀦 𑀆𑀭𑀫𑁆𑀫𑀡𑀲𑁆𑀲𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁨𑁦). 𑀲𑀁𑀯𑁂𑀚𑀦𑀻𑀬𑀢𑁆𑀢𑀸𑀢𑀺 𑀲𑀁𑀯𑁂𑀕𑀚𑀦𑀦𑀢𑁄 𑀫𑀳𑀸𑀪𑀽𑀢𑁂𑀲𑀼 𑀫𑀳𑀸𑀯𑀺𑀓𑀸𑀭𑀢𑀸 𑀯𑀺𑀬 𑀕𑀬𑁆𑀳𑀫𑀸𑀦𑀸 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀁 𑀉𑀧𑀭𑀽𑀧𑀭𑀺 𑀉𑀩𑁆𑀩𑁂𑀕𑀫𑁂𑀯 𑀆𑀯𑀳𑀢𑀻𑀢𑀺 𑀢𑀢𑁆𑀣 𑀦 𑀪𑀸𑀯𑀦𑀸𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀤𑀺 𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀅𑀧𑁆𑀧𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀏𑀓𑀘𑁆𑀘𑀸𑀦𑀺 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀘 𑀓𑀣𑀦𑁆𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀯𑀲𑁂𑀦𑀸𑀢𑀺 𑀳𑁂𑀝𑁆𑀞𑀺𑀫𑀯𑀺𑀲𑀼𑀤𑁆𑀥𑀺𑀬𑀸 𑀆𑀦𑀼𑀪𑀸𑀯𑁂𑀦 𑀅𑀥𑀺𑀕𑀢𑀸𑀢𑀺𑀲𑀬𑀸𑀬 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀬, 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀦𑀺𑀩𑁆𑀩𑀺𑀦𑁆𑀤𑀦𑀯𑀺𑀭𑀚𑁆𑀚𑀦𑀸𑀤𑀺𑀯𑀺𑀲𑀁𑀬𑁄𑀕𑀸𑀥𑀺𑀫𑀼𑀢𑁆𑀢𑀺𑀅𑀧𑁆𑀧𑀦𑀸𑀬 𑀘 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀕𑀫𑁄𑀢𑀺 𑀏𑀯𑀁𑀪𑀽𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀲𑁆𑀲 𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀫𑁂𑀯 𑀳𑁄𑀢𑀺. 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀁 𑀢𑀢𑁆𑀣 𑀳𑁄𑀢𑀻𑀢𑀺 𑀅𑀜𑁆𑀜𑁂𑀲𑀁 𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑁄 𑀦𑀢𑁆𑀣𑀺. 𑀬𑀣𑀸𑀲𑀫𑀸𑀳𑀺𑀢𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀫𑁂𑀯 𑀪𑀸𑀯𑀦𑀸𑀬 𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀲𑀪𑀸𑀯𑀥𑀫𑁆𑀫𑁂𑀧𑀺 𑀆𑀭𑀼𑀧𑁆𑀧𑀚𑁆𑀛𑀸𑀦𑀁 𑀅𑀧𑁆𑀧𑁂𑀢𑀻𑀢𑀺.

𑀲𑀢𑀢𑀁 ¶ 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺 𑀲𑀁𑀯𑁂𑀕𑀩𑀳𑀼𑀮𑀢𑁆𑀢𑀸, 𑀢𑀢𑁄 𑀏𑀯𑀲𑁆𑀲 𑀲𑀩𑁆𑀩𑀪𑀯𑁂𑀲𑀼 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀧𑀝𑀺𑀮𑀸𑀪𑁄. 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀚𑀳𑀸𑀢𑀺 𑀫𑀭𑀡𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀢𑀸𑀤𑀲𑁆𑀲𑀦𑀢𑁄. 𑀧𑀸𑀧𑀕𑀭𑀳𑀻 𑀳𑁄𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀝𑀺𑀮𑀸𑀪𑀢𑁄, 𑀢𑀢𑁄 𑀏𑀯 𑀅𑀲𑀦𑁆𑀦𑀺𑀥𑀺𑀩𑀳𑀼𑀮𑀢𑀸, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸 𑀘. 𑀢𑀤𑀦𑀼𑀲𑀸𑀭𑁂𑀦𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀬𑀸𑀦𑀼𑀲𑀸𑀭𑁂𑀦. 𑀅𑀪𑀸𑀯𑀺𑀢𑀫𑀭𑀡𑀸𑀢𑀺 𑀅𑀪𑀸𑀯𑀺𑀢𑀫𑀭𑀡𑀸𑀦𑀼𑀲𑁆𑀲𑀭𑀡𑀸. 𑀅𑀪𑀬𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺 𑀧𑀕𑁂𑀯 𑀫𑀭𑀡𑀲𑀜𑁆𑀜𑀸𑀬 𑀲𑀽𑀧𑀝𑁆𑀞𑀺𑀢𑀢𑁆𑀢𑀸.

𑀓𑀸𑀬𑀕𑀢𑀸𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁭𑁮. 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁄, 𑀢𑀲𑁆𑀫𑀸. 𑀅𑀜𑁆𑀜𑀢𑁆𑀭 𑀢𑀁 𑀞𑀧𑁂𑀢𑁆𑀯𑀸, 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀦 𑀧𑀯𑀢𑁆𑀢𑀧𑀼𑀩𑁆𑀩𑀦𑁆𑀢𑀺 𑀅𑀧𑀯𑀢𑁆𑀢𑀧𑀼𑀩𑁆𑀩𑀁. 𑀢𑀢𑁄 𑀏𑀯 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁. 𑀦𑀦𑀼 𑀘 𑀲𑀼𑀦𑁂𑀢𑁆𑀢𑀲𑀢𑁆𑀣𑀸𑀭𑀸𑀤𑀬𑁄 (𑀅. 𑀦𑀺. 𑁬.𑁫𑁪; 𑁭.𑁬𑁬, 𑁭𑁩), 𑀅𑀜𑁆𑀜𑁂 𑀘 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀲𑀭𑀻𑀭𑀁 ‘‘𑀅𑀲𑀼𑀪’’𑀦𑁆𑀢𑀺 𑀚𑀸𑀦𑀺𑀁𑀲𑀼. 𑀢𑀣𑀸 𑀳𑀺 𑀲𑀼𑀫𑁂𑀥𑀢𑀸𑀧𑀲𑁂𑀦 𑀲𑀭𑀻𑀭𑀁 𑀚𑀺𑀕𑀼𑀘𑁆𑀙𑀦𑁆𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀦𑁆𑀦𑀽𑀦𑀺𑀫𑀁 ¶ 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄’’𑀢𑀺. (𑀩𑀼. 𑀯𑀁. 𑁨.𑁮) 𑁋

𑀆𑀤𑀺. 𑀓𑀸𑀫𑀁 𑀩𑁄𑀥𑀺𑀲𑀢𑁆𑀢𑀸, 𑀅𑀜𑁆𑀜𑁂 𑀘 𑀢𑀸𑀧𑀲𑀸𑀤𑀬𑁄 𑀲𑀭𑀻𑀭𑀁 ‘‘𑀅𑀲𑀼𑀪’’𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀦 𑀧𑀦 𑀦 𑀚𑀸𑀦𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑁆𑀭 𑀩𑀼𑀤𑁆𑀥𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺. 𑀲𑀁𑀯𑁂𑀕𑀸𑀬 𑀲𑀁𑀯𑀢𑁆𑀢𑀢𑀺 𑀬𑀸𑀣𑀸𑀯𑀢𑁄 𑀓𑀸𑀬𑀲𑀪𑀸𑀯𑀧𑁆𑀧𑀯𑁂𑀤𑀦𑀢𑁄. 𑀅𑀢𑁆𑀣𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀬. 𑀬𑁄𑀕𑀓𑁆𑀔𑁂𑀫𑀸𑀬𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀪𑀸𑀯𑀸𑀬. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀢𑁆𑀣 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀸𑀬 𑀘 𑀲𑀢𑁆𑀢𑀝𑁆𑀞𑀸𑀦𑀺𑀬𑀲𑀫𑁆𑀧𑀚𑀜𑁆𑀜𑀸𑀬 𑀘. 𑀜𑀸𑀡𑀤𑀲𑁆𑀲𑀦𑀧𑀝𑀺𑀮𑀸𑀪𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀥𑀺𑀕𑀫𑀸𑀬. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀏𑀢𑁂𑀲𑀁 𑀧𑀘𑁆𑀘𑀓𑁆𑀔𑀓𑀭𑀡𑀸𑀬. 𑀅𑀫𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑀳𑁂𑀢𑀼𑀢𑀸𑀬, 𑀅𑀫𑀢𑀲𑀤𑀺𑀲𑀸𑀢𑀧𑁆𑀧𑀓𑀲𑀼𑀔𑀲𑀳𑀺𑀢𑀢𑀸𑀬 𑀘 𑀓𑀸𑀬𑀕𑀢𑀸𑀲𑀢𑀺 ‘‘𑀅𑀫𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀛𑀸𑀦𑀲𑀫𑀸𑀧𑀚𑁆𑀚𑀦𑁂𑀦 𑀯𑀴𑀜𑁆𑀚𑀦𑁆𑀢𑀺. 𑀧𑀭𑀺𑀳𑀻𑀦𑀦𑁆𑀢𑀺 𑀚𑀺𑀦𑀁. 𑀯𑀺𑀭𑀤𑁆𑀥𑀦𑁆𑀢𑀺 𑀅𑀦𑀥𑀺𑀕𑀫𑁂𑀦 𑀯𑀺𑀭𑀚𑁆𑀛𑀺𑀢𑀁. 𑀆𑀭𑀤𑁆𑀥𑀦𑁆𑀢𑀺 𑀲𑀸𑀥𑀺𑀢𑀁 𑀦𑀺𑀧𑁆𑀨𑀸𑀤𑀺𑀢𑀁. 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀲𑀁𑀲𑀺𑀢𑁆𑀯𑀸 𑀬𑀁 𑀢𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀓𑀢𑁆𑀣 𑀧𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁩 𑀆𑀤𑀬𑁄). 𑀢𑀢𑁆𑀣 𑀳𑀺 ‘‘𑀓𑀣𑀁 𑀪𑀸𑀯𑀺𑀢𑀸 𑀘 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀅𑀬𑀁 𑀤𑁂𑀲𑀦𑀸 𑀆𑀕𑀢𑀸. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀓𑁂𑀦 𑀧𑀓𑀸𑀭𑁂𑀦 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸 𑀪𑀸𑀯𑀺𑀢𑀸, 𑀓𑁂𑀦 𑀘 𑀧𑀓𑀸𑀭𑁂𑀦 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸 𑀆𑀦𑀸𑀧𑀸𑀦𑀚𑁆𑀛𑀸𑀦𑀸𑀤𑀻𑀦𑀁 𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀸, 𑀢𑁂𑀲𑀁 𑀢𑁂𑀲𑀁 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀦𑀁, 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀅𑀭𑀢𑀺𑀭𑀢𑀺𑀲𑀳𑀦𑀢𑀸𑀤𑀻𑀦𑀜𑁆𑀘 𑀲𑀁𑀲𑀺𑀤𑁆𑀥𑀺𑀬𑀸 𑀫𑀳𑀸𑀦𑀺𑀲𑀁𑀲𑀸 𑀘 𑀳𑁄𑀢𑀻𑀢𑀺? 𑀆𑀦𑀸𑀧𑀸𑀦𑀧𑀩𑁆𑀩𑀦𑁆𑀢𑀺 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀸𑀯𑀥𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀥𑀸𑀢𑀼𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑁂𑀦 𑀬𑀤𑀺𑀧𑀺 𑀉𑀧𑀘𑀸𑀭𑀲𑀫𑀸𑀥𑀺 𑀇𑀚𑁆𑀛𑀢𑀺, 𑀲𑀫𑁆𑀫𑀲𑀦𑀯𑀸𑀭𑁄 𑀧𑀦 𑀢𑀢𑁆𑀣 𑀲𑀸𑀢𑀺𑀲𑀬𑁄𑀢𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀫𑁆𑀧𑀺 ‘‘𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’’𑀢𑀺 (𑀤𑀻. 𑀦𑀺. 𑁨.𑁩𑁭𑁯; 𑀫. 𑀦𑀺. 𑁧.𑁧𑁧𑁨) 𑀢𑀢𑁆𑀣 𑀢𑀢𑁆𑀣 𑀅𑀲𑀼𑀪𑀸𑀦𑀺𑀘𑁆𑀘𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀓𑀸𑀬𑁂 𑀆𑀤𑀻𑀦𑀯𑀲𑁆𑀲 𑀯𑀺𑀪𑀸𑀯𑀦𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 ‘‘𑀦𑀯𑀲𑀺𑀯𑀣𑀺𑀓…𑀧𑁂… 𑀯𑀼𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀽𑀢𑀺 𑀏𑀢𑁂𑀲𑀼 𑀲𑀺𑀯𑀣𑀺𑀓𑀧𑀩𑁆𑀩𑁂𑀲𑀼 𑀆𑀕𑀢𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼. 𑀆𑀦𑀸𑀧𑀸𑀦𑀲𑁆𑀲𑀢𑀺𑀯𑀲𑁂𑀦𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸𑀯𑀲𑁂𑀦. 𑀬𑁄 𑀉𑀧𑀭𑀺 ‘‘𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕’’𑀦𑁆𑀢𑀺 𑀫𑀢𑁆𑀣𑀮𑀼𑀗𑁆𑀕𑀓𑁄𑀝𑁆𑀞𑀸𑀲𑁄 𑀕𑀬𑁆𑀳𑀢𑀺, 𑀢𑀁 𑀇𑀥 𑀧𑀸𑀴𑀺𑀬𑀁 (𑀫. 𑀦𑀺. 𑁩.𑁧𑁫𑁪) 𑀅𑀝𑁆𑀞𑀺𑀫𑀺𑀜𑁆𑀚𑁂𑀦𑁂𑀯 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀢𑁆𑀣𑀮𑀼𑀗𑁆𑀕𑀁 𑀅𑀝𑁆𑀞𑀺𑀫𑀺𑀜𑁆𑀚𑁂𑀦 𑀲𑀗𑁆𑀕𑀳𑁂𑀢𑁆𑀯𑀸’’𑀢𑀺 𑀆𑀳 ¶ . 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂. 𑀓𑀸𑀬𑀁 𑀕𑀢𑀸, 𑀓𑀸𑀬𑁂 𑀯𑀸 𑀕𑀢𑀸 𑀲𑀢𑀺 𑀓𑀸𑀬𑀕𑀢𑀸𑀲𑀢𑀻𑀢𑀺 𑀲𑀢𑀺𑀲𑀻𑀲𑁂𑀦 𑀇𑀤𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁭𑁯. 𑀘𑀢𑀼𑀫𑀳𑀸𑀪𑀽𑀢𑀺𑀓𑀦𑁆𑀢𑀺 𑀘𑀢𑀼𑀫𑀳𑀸𑀪𑀽𑀢𑀲𑀦𑁆𑀦𑀺𑀲𑁆𑀲𑀬𑀁. 𑀧𑀽𑀢𑀺𑀓𑀸𑀬𑀦𑁆𑀢𑀺 𑀧𑀽𑀢𑀺𑀪𑀽𑀢𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀓𑀸𑀬𑀁. 𑀞𑀸𑀦𑀕𑀫𑀦𑀸𑀯𑀢𑁆𑀣𑀁 𑀲𑀭𑀻𑀭𑀁 𑀲𑀦𑁆𑀥𑀸𑀬, 𑀢𑀲𑁆𑀲 𑀯𑀸 𑀅𑀯𑀬𑀯𑁂𑀲𑀼 𑀲𑀩𑁆𑀩𑀳𑁂𑀝𑁆𑀞𑀺𑀫𑀁 𑀧𑀸𑀤𑀢𑀮𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸’’𑀢𑀺. 𑀢𑀺𑀭𑀺𑀬𑀁 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀦𑀦𑀼 𑀓𑁂𑀲𑀮𑁄𑀫𑀦𑀔𑀸𑀦𑀁, 𑀢𑀘𑀲𑁆𑀲 𑀘 𑀅𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀅𑀢𑁆𑀣𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀩𑀳𑀼𑀮𑀢𑀸𑀬 𑀧𑀦 𑀓𑀸𑀬𑀲𑁆𑀲 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀘𑁄 𑀧𑀭𑀺𑀬𑀦𑁆𑀢𑁄 𑀅𑀲𑁆𑀲𑀸𑀢𑀺 𑀢𑀘𑀧𑀭𑀺𑀬𑀦𑁆𑀢𑁄𑀢𑀺 𑀏𑀢𑁂𑀦 𑀧𑀦 𑀯𑀘𑀦𑁂𑀦 𑀓𑀸𑀬𑁂𑀓𑀤𑁂𑀲𑀪𑀽𑀢𑁄 𑀢𑀘𑁄 𑀕𑀳𑀺𑀢𑁄 𑀏𑀯, 𑀢𑀧𑁆𑀧𑀝𑀺𑀩𑀤𑁆𑀥𑀸 𑀘 𑀓𑁂𑀲𑀸𑀤𑀬𑁄 𑀢𑀤𑀦𑀼𑀧𑀯𑀺𑀝𑁆𑀞𑀫𑀽𑀮𑀸 𑀢𑀘𑀧𑀭𑀺𑀬𑀦𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 ¶ 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀲𑀫𑀽𑀳𑁄 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀢𑀘𑀧𑀭𑀺𑀬𑀦𑁆𑀢𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀻𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀦𑀺𑀧𑀸𑀢𑀧𑀤𑀁 𑀯𑀸 𑀏𑀢𑀁. 𑀢𑀲𑁆𑀫𑀸 𑀢𑀻𑀲𑀼𑀧𑀺 𑀲𑀗𑁆𑀔𑀸𑀲𑀼 𑀢𑀤𑁂𑀯𑀲𑁆𑀲 𑀭𑀽𑀧𑀁. 𑀢𑁂𑀦𑀸𑀳 ‘‘𑀲𑀁𑀯𑀺𑀚𑁆𑀚𑀦𑁆𑀢𑀻’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑁂𑀳𑀺 𑀲𑀭𑀻𑀭𑁂 𑀓𑀸𑀬-𑀲𑀤𑁆𑀤𑀁 𑀯𑀡𑁆𑀡𑀦𑁆𑀢𑁂𑀳𑀺𑀧𑀺 𑀅𑀲𑀼𑀘𑀺𑀲𑀫𑀼𑀤𑀸𑀬𑀪𑀸𑀯𑁂𑀦𑁂𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀼𑀘𑀺𑀲𑀜𑁆𑀘𑀬𑀢𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀦𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀘𑁆𑀙𑀺𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀪𑀽𑀢𑀢𑁄𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀢𑁆𑀢𑀸. ‘‘𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑁂 𑀧𑀦 𑀢𑁂 𑀧𑀓𑀸𑀭𑀸? 𑀬𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑁂 𑀓𑁂𑀲𑀸𑀤𑀺𑀓𑁂 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀏𑀢𑁂 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸’’𑀢𑀺. 𑀆𑀓𑀸𑀭𑀸 𑀧𑀓𑀸𑀭𑀸𑀢𑀺 𑀳𑀺 𑀏𑀓𑁄 𑀅𑀢𑁆𑀣𑁄𑀢𑀺. 𑀏𑀯𑀁 𑀲𑀫𑁆𑀩𑀦𑁆𑀥𑁄𑀢𑀺 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀔𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂’’𑀢𑀺 𑀧𑀤𑀢𑁆𑀢𑀬𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀭𑀺𑀢𑁄𑀢𑀺 𑀢𑀺𑀭𑀺𑀬𑀁, 𑀲𑀫𑀦𑁆𑀢𑀢𑁄 𑀯𑀸 𑀧𑀸𑀤𑀢𑀮𑀓𑁂𑀲𑀫𑀽𑀮𑁂𑀲𑀼 𑀘 𑀢𑀘𑀲𑁆𑀲 𑀮𑀩𑁆𑀪𑀦𑀢𑁄. 𑀲𑀼𑀘𑀺𑀪𑀸𑀯𑀦𑁆𑀢𑀺 𑀲𑀼𑀘𑀺𑀦𑁄 𑀲𑀩𑁆𑀪𑀸𑀯𑀁, 𑀲𑀼𑀘𑀺𑀫𑁂𑀯 𑀯𑀸.

𑁧𑁮𑁦. 𑀬𑁂𑀦 𑀯𑀺𑀥𑀺𑀦𑀸 𑀉𑀕𑁆𑀕𑀳𑁂 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀲𑀢𑁆𑀢𑀯𑀺𑀥𑁄 𑀯𑀺𑀥𑀺 ‘‘𑀉𑀕𑁆𑀕𑀳𑀓𑁄𑀲𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁. 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀚𑁆𑀛𑀸𑀬𑀦𑁆𑀢𑀸 𑀯𑀸𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀸 𑀏𑀯. 𑀢𑁂𑀲𑀁 𑀓𑀺𑀭 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀫𑀕𑁆𑀕𑁂𑀦𑁂𑀯 ¶ 𑀓𑁄𑀝𑁆𑀞𑀸𑀲𑁂 𑀉𑀧𑀥𑀸𑀭𑁂𑀦𑁆𑀢𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸 𑀯𑀺𑀪𑀽𑀢𑀢𑀭𑀸 𑀳𑀼𑀢𑁆𑀯𑀸 𑀔𑀸𑀬𑀺𑀁𑀲𑀼, 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 𑀲𑀡𑁆𑀞𑀸𑀲𑀺, 𑀢𑁂 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀛𑀸𑀦𑀧𑀸𑀤𑀓𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀤𑀲𑁆𑀲𑀦𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀚𑁆𑀛𑀸𑀬𑀦𑁆𑀢𑀸 𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼’’𑀦𑁆𑀢𑀺.

𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀢𑀘𑀧𑀜𑁆𑀘𑀓𑀸𑀤𑀺𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀧𑀣𑀯𑀻𑀥𑀸𑀢𑀼𑀩𑀳𑀼𑀮𑀪𑀸𑀯𑀢𑁄 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀓𑀭𑀻𑀲𑀸𑀯𑀲𑀸𑀦𑁂 𑀢𑀦𑁆𑀢𑀺𑀆𑀭𑁄𑀧𑀦𑀫𑀸𑀳. 𑀏𑀢𑁆𑀣 𑀘 𑀫𑀁𑀲𑀁, 𑀦𑁆𑀳𑀸𑀭𑀼, 𑀅𑀝𑁆𑀞𑀺, 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀁, 𑀯𑀓𑁆𑀓𑀁 𑀅𑀝𑁆𑀞𑀺𑀫𑀺𑀜𑁆𑀚𑀁, 𑀅𑀝𑁆𑀞𑀺, 𑀦𑁆𑀳𑀸𑀭𑀼, 𑀫𑀁𑀲𑀁, 𑀢𑀘𑁄, 𑀤𑀦𑁆𑀢𑀸, 𑀦𑀔𑀸, 𑀮𑁄𑀫𑀸, 𑀓𑁂𑀲𑀸𑀢𑀺 𑀏𑀯𑀁 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀲𑀼 𑀅𑀦𑀼𑀮𑁄𑀫𑀲𑀚𑁆𑀛𑀸𑀬𑀁 𑀯𑀢𑁆𑀯𑀸 𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁄 𑀧𑀼𑀭𑀺𑀫𑁂𑀳𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀲𑁆𑀯𑀸𑀬𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ¶ (𑀯𑀺𑀪. 𑀅𑀝𑁆𑀞. 𑁩𑁫𑁬) 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀁, 𑀧𑀼𑀭𑀺𑀫𑁂𑀳𑀺 𑀏𑀓𑀢𑁄 𑀢𑀺𑀧𑀜𑁆𑀘𑀸𑀳𑀦𑁆𑀢𑀺 𑀙𑀧𑀜𑁆𑀘𑀸𑀳𑀁 𑀲𑀚𑁆𑀛𑀸𑀬𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀆𑀤𑀺𑀅𑀦𑁆𑀢𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁂𑀧𑀺 𑀳𑀺 𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁄 𑀅𑀦𑁆𑀢𑀺𑀫𑁄 𑀳𑁄𑀢𑀺, 𑀲𑀚𑁆𑀛𑀸𑀬𑀧𑁆𑀧𑀓𑀸𑀭𑀦𑁆𑀢𑀭𑀁 𑀯𑀸 𑀏𑀢𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀳𑀢𑁆𑀣𑀲𑀗𑁆𑀔𑀮𑀺𑀓𑀸𑀢𑀺 𑀅𑀗𑁆𑀕𑀼𑀮𑀺𑀧𑀦𑁆𑀢𑀺𑀫𑀸𑀳.

𑀫𑀦𑀲𑀸 𑀲𑀚𑁆𑀛𑀸𑀬𑁄𑀢𑀺 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑀦𑀫𑀸𑀳, 𑀬𑀁 𑀫𑀸𑀦𑀲𑀁 ‘‘𑀚𑀧𑁆𑀧𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀫𑁆𑀫𑀤𑁂𑀯 𑀅𑀚𑁆𑀛𑀸𑀬𑁄𑀢𑀺 𑀯𑀸 𑀲𑀚𑁆𑀛𑀸𑀬𑁄, 𑀘𑀺𑀦𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀭𑀢𑀭𑀁 𑀲𑀼𑀝𑁆𑀞𑀼 𑀧𑀯𑀢𑁆𑀢𑀦𑁂𑀦 𑀧𑀕𑀼𑀡𑀪𑀽𑀢𑀸 𑀓𑀫𑁆𑀫𑀝𑁆𑀞𑀸𑀦𑀢𑀦𑁆𑀢𑀺 𑀲𑀫𑀸𑀯𑀚𑁆𑀚𑀺𑀢𑁆𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀓𑀢𑁆𑀣𑀘𑀺 𑀅𑀲𑀚𑁆𑀚𑀫𑀸𑀦𑀸 𑀦𑀺𑀭𑀦𑁆𑀢𑀭𑀫𑁂𑀯 𑀉𑀧𑀝𑁆𑀞𑀸𑀢𑀺, 𑀢𑀤𑀦𑀼𑀲𑀸𑀭𑁂𑀦 𑀢𑀤𑀢𑁆𑀣𑁄𑀧𑀺 𑀯𑀺𑀪𑀽𑀢𑀢𑀭𑁄 𑀳𑀼𑀢𑁆𑀯𑀸 𑀔𑀸𑀬𑀢𑀻𑀢𑀺 𑀆𑀳 ‘‘𑀯𑀘𑀲𑀸 𑀲𑀚𑁆𑀛𑀸𑀬𑁄 𑀳𑀺…𑀧𑁂… 𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑀸𑀢𑀺 𑀅𑀲𑀼𑀪𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲.

𑀧𑀝𑀺𑀓𑁆𑀓𑀽𑀮𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀲𑁆𑀲 𑀓𑀲𑁆𑀲𑀘𑀺 𑀯𑀡𑁆𑀡𑀕𑁆𑀕𑀳𑀡𑀫𑀼𑀔𑁂𑀦 𑀓𑁄𑀝𑁆𑀞𑀸𑀲𑀸 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀓𑀲𑁆𑀲𑀘𑀺 𑀲𑀡𑁆𑀞𑀸𑀦𑀕𑁆𑀕𑀳𑀡𑀫𑀼𑀔𑁂𑀦, 𑀓𑀲𑁆𑀲𑀘𑀺 𑀤𑀺𑀲𑀸𑀯𑀺𑀪𑀸𑀕𑀕𑁆𑀕𑀳𑀡𑀫𑀼𑀔𑁂𑀦, 𑀓𑀲𑁆𑀲𑀘𑀺 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀕𑁆𑀕𑀳𑀡𑀫𑀼𑀔𑁂𑀦, 𑀓𑀲𑁆𑀲𑀘𑀺 𑀲𑀩𑁆𑀩𑀲𑁄 𑀧𑀭𑀺𑀘𑁆𑀙𑀺𑀚𑁆𑀚𑀕𑁆𑀕𑀳𑀡𑀫𑀼𑀔𑁂𑀦𑀸𑀢𑀺 𑀯𑀡𑁆𑀡𑀸𑀤𑀺𑀢𑁄 𑀲𑀮𑁆𑀮𑀓𑁆𑀔𑀡𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀸𑀯𑀳𑀁 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳.

𑀅𑀢𑁆𑀢𑀦𑁄 𑀪𑀸𑀕𑁄 𑀲𑀪𑀸𑀕𑁄, 𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑁂𑀤𑁄 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀳𑁂𑀝𑁆𑀞𑀼𑀧𑀭𑀺𑀢𑀺𑀭𑀺𑀬𑀧𑀭𑀺𑀬𑀦𑁆𑀢𑁂𑀳𑀺, 𑀲𑀓𑁄𑀝𑁆𑀞𑀸𑀲𑀺𑀓𑀓𑁂𑀲𑀦𑁆𑀢𑀭𑀸𑀤𑀻𑀳𑀺 ¶ 𑀘 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄. 𑀅𑀫𑀺𑀲𑁆𑀲𑀓𑀢𑀸𑀯𑀲𑁂𑀦𑀸𑀢𑀺 𑀓𑁄𑀝𑁆𑀞𑀸𑀲𑀦𑁆𑀢𑀭𑁂𑀳𑀺 𑀅𑀯𑁄𑀫𑀺𑀲𑁆𑀲𑀓𑀢𑀸𑀯𑀲𑁂𑀦. 𑀅𑀲𑀪𑀸𑀕𑁄 𑀳𑀺 𑀇𑀥 ‘‘𑀯𑀺𑀲𑀪𑀸𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀯𑀺𑀭𑀼𑀤𑁆𑀥𑀲𑀪𑀸𑀕𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀓𑁂𑀲𑀸𑀤𑀺𑀲𑀤𑁆𑀤𑀢𑁄 𑀏𑀯 𑀮𑀩𑁆𑀪𑀢𑀺. 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 ‘‘𑀓𑁂𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀓𑁂𑀲𑀸 𑀦 𑀳𑁄𑀦𑁆𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀓𑁂 𑀧𑀦 𑀢𑁂 𑀅𑀓𑁂𑀲𑀸? 𑀮𑁄𑀫𑀸𑀤𑀬𑁄, 𑀦 𑀘 𑀖𑀝𑀸𑀤𑀻𑀲𑀼 𑀧𑀲𑀗𑁆𑀕𑁄𑀧𑀓𑀭𑀡𑁂𑀦𑁂𑀯 𑀢𑁂𑀲𑀁 𑀦𑀺𑀯𑀢𑁆𑀢𑀺𑀢𑀢𑁆𑀢𑀸.

𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑁂𑀯 𑀓𑀣𑀺𑀢𑀁 𑀥𑀸𑀢𑀼𑀯𑀺𑀪𑀸𑀕𑀲𑁆𑀲 𑀲𑀸𑀫𑀜𑁆𑀜𑀢𑁄𑀧𑀺 𑀅𑀕𑀳𑀺𑀢𑀢𑁆𑀢𑀸. 𑀢𑀢𑁆𑀣𑁂𑀯 𑀯𑀺𑀲𑀼𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀘 𑀥𑀸𑀢𑀼𑀯𑀺𑀪𑀗𑁆𑀕𑁄 𑀧𑀓𑁆𑀓𑀼𑀲𑀸𑀢𑀺𑀲𑀼𑀢𑁆𑀢𑀁 ¶ (𑀫. 𑀦𑀺. 𑁩.𑁩𑁪𑁨) 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀥𑀸𑀢𑀼𑀯𑀺𑀪𑀗𑁆𑀕𑀧𑀸𑀴𑀺 (𑀯𑀺𑀪. 𑁧𑁭𑁨 𑀆𑀤𑀬𑁄) 𑀘. 𑀬𑀲𑁆𑀲 𑀯𑀡𑁆𑀡𑀢𑁄 𑀉𑀧𑀝𑁆𑀞𑀸𑀢𑀺 𑀓𑁂𑀲𑀸𑀤𑀺, 𑀢𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀛𑀸𑀦𑀸𑀦𑀺 𑀓𑁂𑀲𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀜𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑀤𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀥𑀸𑀢𑀼𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑁂. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁩 𑀆𑀤𑀬𑁄) 𑀳𑀺 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀕𑀳𑁂𑀢𑁆𑀯𑀸 𑀇𑀥 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸 𑀦𑀺𑀤𑁆𑀤𑀺𑀲𑀻𑀬𑀢𑀺.

𑁧𑁮𑁧. 𑀦 𑀏𑀓𑀦𑁆𑀢𑀭𑀺𑀓𑀸𑀬𑀸𑀢𑀺 𑀏𑀓𑀦𑁆𑀢𑀭𑀺𑀓𑀸𑀬𑀧𑀺 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀧𑀕𑁂𑀯 𑀤𑁆𑀯𑀦𑁆𑀢𑀭𑀺𑀓𑀸𑀤𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀦 𑀧𑀸𑀧𑀼𑀡𑀸𑀢𑀺 𑀏𑀓𑀦𑁆𑀢𑀭𑀺𑀓𑀸𑀬 𑀫𑀦𑀲𑀺 𑀓𑀭𑁄𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀑𑀓𑁆𑀓𑀫𑀦𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁂 𑀫𑀕𑁆𑀕𑁂. 𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺 𑀕𑀳𑁂𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀝𑁆𑀞𑀸𑀦𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀢𑁄. 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀫𑀦𑀲𑀺𑀓𑀸𑀭𑀫𑀢𑁆𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀪𑀽𑀢𑀁 𑀧𑀦 𑀳𑁄𑀢𑀺 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀲𑁆𑀲 𑀲𑀼𑀝𑁆𑀞𑀼 𑀅𑀲𑀮𑁆𑀮𑀓𑁆𑀔𑀡𑀢𑁄. 𑀢𑀢𑁄 𑀏𑀯 𑀦 𑀯𑀺𑀲𑁂𑀲𑀁 𑀆𑀯𑀳𑀢𑀺.

𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀕𑀘𑁆𑀙𑀢𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀓𑁄𑀝𑁆𑀞𑀸𑀲𑁂 𑀫𑀦𑀲𑀺 𑀓𑀭𑁄𑀢𑁄𑀬𑁂𑀯 𑀯𑀺𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂 𑀲𑀸𑀢𑀺𑀲𑀬𑀁 𑀧𑀸𑀝𑀺𑀓𑁆𑀓𑀽𑀮𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀇𑀫𑀲𑁆𑀲 𑀧𑀦 𑀅𑀢𑀺𑀯𑀺𑀬 𑀤𑀦𑁆𑀥𑀁 𑀫𑀦𑀲𑀺 𑀓𑀭𑁄𑀢𑁄 𑀯𑀺𑀪𑀽𑀢𑀢𑁄 𑀉𑀧𑀝𑁆𑀞𑀸𑀦𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀧𑀝𑀺𑀓𑁆𑀓𑀽𑀮𑀢𑀸𑀬 𑀲𑀡𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺.

𑀩𑀳𑀺𑀤𑁆𑀥𑀸 ¶ 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀢𑀺 ‘‘𑀅𑀲𑀼𑀘𑀺 𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀓𑁂𑀲𑀸𑀤𑀻𑀲𑀼 𑀧𑀯𑀢𑁆𑀢𑁂𑀢𑀩𑁆𑀩𑀁 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀁 𑀳𑀺𑀢𑁆𑀯𑀸 𑀲𑀼𑀪𑀸𑀤𑀺𑀯𑀲𑁂𑀦 𑀕𑀬𑁆𑀳𑀫𑀸𑀦𑀸 𑀓𑁂𑀲𑀸𑀤𑀬𑁄𑀧𑀺 𑀇𑀥 ‘‘𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀫𑁂𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀤𑀬𑁄 𑀳𑀺 𑀦𑀻𑀮𑀸𑀤𑀺𑀯𑀲𑁂𑀦 𑀧𑀼𑀣𑀼𑀲𑀪𑀸𑀯𑀢𑀸𑀬 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀁 𑀦𑀸𑀫, 𑀦𑀸𑀦𑀸𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀫𑀸𑀥𑀸𑀦𑀁 𑀘𑁂𑀢𑀲𑁄 𑀯𑀺𑀭𑀽𑀧𑁄 𑀔𑁂𑀧𑁄𑀢𑀺 𑀯𑀺𑀓𑁆𑀔𑁂𑀧𑁄. 𑀲𑁄 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. 𑀧𑀭𑀺𑀳𑀸𑀬𑀢𑀻𑀢𑀺 𑀳𑀸𑀬𑀢𑀺. 𑀧𑀭𑀺𑀥𑀁𑀲𑀢𑀻𑀢𑀺 𑀯𑀺𑀦𑀲𑁆𑀲𑀢𑀺.

𑀬𑀸 ¶ 𑀅𑀬𑀁 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺𑀓𑀸 𑀮𑁄𑀓𑀲𑀗𑁆𑀓𑁂𑀢𑀸𑀦𑀼𑀕𑀢𑀸. 𑀧𑀡𑁆𑀡𑀢𑁆𑀢𑀻𑀢𑀺 𑀅𑀝𑁆𑀞 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀡𑁆𑀡𑀢𑁆𑀢𑀺. 𑀢𑀁 𑀓𑁂𑀲𑀸𑀤𑀺𑀧𑀡𑁆𑀡𑀢𑁆𑀢𑀺𑀁. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀧𑀝𑀺𑀓𑁆𑀓𑀽𑀮𑀪𑀸𑀯𑀦𑀸𑀬 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀕𑁆𑀖𑀸𑀝𑁂𑀢𑁆𑀯𑀸. 𑀢𑀲𑁆𑀲𑀸 𑀉𑀕𑁆𑀖𑀸𑀝𑀺𑀢𑀢𑁆𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀝𑀺𑀓𑁆𑀓𑀽𑀮𑀢𑁄 𑀉𑀧𑀝𑁆𑀞𑀳𑀦𑁆𑀢𑁂 ‘‘𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑁋 𑀫𑀦𑀼𑀲𑁆𑀲𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀉𑀤𑀧𑀸𑀦𑀁 𑀯𑀺𑀬 𑀓𑁄𑀝𑁆𑀞𑀸𑀲𑀸. 𑀢𑀸𑀮𑀧𑀡𑁆𑀡𑀸𑀤𑀺𑀲𑀜𑁆𑀜𑀸𑀡𑀁 𑀯𑀺𑀬 𑀓𑁂𑀲𑀸𑀤𑀺𑀧𑀜𑁆𑀜𑀢𑁆𑀢𑀺. 𑀢𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀤𑀧𑀸𑀦𑁂 𑀦𑁆𑀳𑀸𑀦𑀧𑀺𑀯𑀦𑀸𑀤𑀺 𑀯𑀺𑀬 𑀬𑁄𑀕𑀸𑀯𑀘𑀭𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑁂𑀲𑀸 𑀮𑁄𑀫𑀸𑀢𑀺 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄. 𑀅𑀪𑀺𑀡𑁆𑀳𑀲𑀜𑁆𑀘𑀸𑀭𑁂𑀦 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀜𑀸𑀡𑁂𑀦 𑀯𑀺𑀦𑀸 𑀉𑀤𑀧𑀸𑀦𑁂 𑀓𑀺𑀘𑁆𑀘𑀓𑀭𑀡𑀁 𑀯𑀺𑀬 𑀬𑁄𑀕𑀸𑀯𑀘𑀭𑀲𑁆𑀲 𑀫𑀦𑀲𑀺𑀓𑀸𑀭𑀩𑀮𑁂𑀦 𑀧𑀡𑁆𑀡𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀪𑀸𑀯𑀦𑀸𑀦𑀼𑀬𑁄𑀕𑁄. 𑀧𑀼𑀩𑁆𑀩𑀪𑀸𑀕𑁂…𑀧𑁂… 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁫𑁪) 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀓𑁂𑀲𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀓𑁄𑀝𑁆𑀞𑀸𑀲𑀸𑀦𑀁 𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀧𑀼𑀩𑁆𑀩𑀪𑀸𑀕𑁂 𑀧𑀸𑀓𑀝𑁄 𑀳𑁄𑀢𑀺. 𑀅𑀣𑀸𑀢𑀺 𑀧𑀘𑁆𑀙𑀸 𑀪𑀸𑀯𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀓𑀸𑀮𑁂. 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀓𑁄𑀝𑁆𑀞𑀸𑀲𑀸𑀦𑀁 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑁂𑀬𑁂𑀯 𑀪𑀸𑀯𑀦𑀸𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀢𑀩𑁆𑀩𑀁.

𑀅𑀦𑀼𑀧𑀼𑀩𑁆𑀩𑁂𑀦 𑀫𑀼𑀜𑁆𑀘𑀦𑀁 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀁, 𑀅𑀦𑀼𑀧𑀝𑁆𑀞𑀳𑀦𑁆𑀢𑀲𑁆𑀲 𑀅𑀦𑀼𑀧𑀝𑁆𑀞𑀳𑀦𑁆𑀢𑀲𑁆𑀲 𑀫𑀼𑀜𑁆𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀅𑀦𑀼𑀧𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺𑀆𑀤𑀺. 𑀧𑀭𑀺𑀬𑁄𑀲𑀸𑀦𑀓𑁄𑀝𑁆𑀞𑀸𑀲𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀢𑀦𑁆𑀢𑀺𑀅𑀦𑀼𑀲𑀸𑀭𑁂𑀦 𑀆𑀤𑀺𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺𑀲𑁆𑀲 𑀫𑀦𑀲𑀸 𑀲𑀚𑁆𑀛𑀸𑀬𑁄 𑀯𑀺𑀬 𑀫𑀦𑀲𑀺𑀓𑀸𑀭𑁄 𑀢𑁂 𑀢𑁂 𑀓𑁄𑀝𑁆𑀞𑀸𑀲𑁂 𑀆𑀫𑀝𑁆𑀞𑀫𑀢𑁆𑀢𑁂 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦. 𑀬𑀤𑀸 𑀧𑀦 𑀦𑁂 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀦𑁆𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀢𑀤𑀸 𑀓𑁂𑀘𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀫𑀦𑀲𑀺𑀓𑀸𑀭𑀓𑀫𑁆𑀫𑀁 𑀢𑀸𑀯 𑀓𑀸𑀢𑀩𑁆𑀩𑀁. 𑀓𑀻𑀯 𑀘𑀺𑀭𑀦𑁆𑀢𑀺? 𑀬𑀸𑀯 𑀤𑁆𑀯𑀻𑀲𑀼 𑀉𑀧𑀝𑁆𑀞𑀺𑀢𑁂𑀲𑀼, 𑀢𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀏𑀓𑁄 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀳𑀢𑀺 𑀢𑀸𑀯.

𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀼𑀝𑁆𑀞𑀺𑀝𑁆𑀞𑀸𑀦𑁂𑀬𑁂𑀯 ¶ 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀏𑀓𑀢𑁆𑀣𑀓𑀢𑀸𑀬 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀫𑁂𑀦 𑀲𑀩𑁆𑀩𑀢𑀸𑀮𑁂𑀲𑀼 𑀧𑀢𑀺𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀁 ¶ , 𑀆𑀤𑀺𑀢𑀸𑀮𑀜𑁆𑀘 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀢𑀢𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀢𑀸𑀬 𑀉𑀓𑁆𑀓𑀼𑀝𑁆𑀞𑀺𑀬𑀸 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀤𑁆𑀯𑁂 𑀪𑀺𑀓𑁆𑀔𑀸𑀢𑀺 𑀤𑁆𑀯𑀻𑀲𑀼 𑀕𑁂𑀳𑁂𑀲𑀼 𑀮𑀤𑁆𑀥𑀪𑀺𑀓𑁆𑀔𑀸.

𑀅𑀧𑁆𑀧𑀦𑀸𑀢𑁄𑀢𑀺 𑀅𑀧𑁆𑀧𑀦𑀸𑀓𑀸𑀭𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀧𑁆𑀧𑀦𑀸 𑀳𑁄𑀦𑁆𑀢𑀺. 𑀓𑀺𑀁 𑀧𑀘𑁆𑀘𑁂𑀓𑀁 𑀓𑁄𑀝𑁆𑀞𑀸𑀲𑁂𑀲𑀼 𑀳𑁄𑀢𑀺 𑀉𑀤𑀸𑀳𑀼 𑀅𑀜𑁆𑀜𑀣𑀸𑀢𑀺 𑀯𑀺𑀘𑀸𑀭𑀡𑀸𑀬𑀁 𑀆𑀳 ‘‘𑀅𑀧𑁆𑀧𑀦𑀸𑀓𑁄𑀝𑁆𑀞𑀸𑀲𑀢𑁄’’𑀢𑀺, 𑀓𑁄𑀝𑁆𑀞𑀸𑀲𑀢𑁄 𑀓𑁄𑀝𑁆𑀞𑀸𑀲𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑁂𑀲𑀸𑀤𑀻𑀲𑀽’’𑀢𑀺𑀆𑀤𑀺.

𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁.

𑀅𑀦𑀼𑀬𑀼𑀢𑁆𑀢𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂𑀦, 𑀪𑀸𑀯𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀉𑀧𑀮𑀓𑁆𑀔𑀺𑀢𑀲𑀫𑀸𑀥𑀸𑀦𑀸𑀓𑀸𑀭𑁄 𑀲𑀫𑀸𑀥𑀺 𑀏𑀯. 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀘𑀺𑀢𑁆𑀢𑁂 𑀓𑀸𑀢𑀩𑁆𑀩𑀁, 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀓𑀸𑀭𑀡𑀁 𑀯𑀸 𑀆𑀭𑀫𑁆𑀫𑀡𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁, 𑀢𑀁 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀞𑀸𑀦𑀁 𑀅𑀢𑁆𑀣𑀻𑀢𑀺 𑀯𑀘𑀦𑀲𑁂𑀲𑁄. 𑀢𑀁 𑀪𑀸𑀯𑀦𑀸 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀏𑀢𑀲𑁆𑀲 𑀲𑀁𑀯𑀢𑁆𑀢𑀦𑀲𑁆𑀲 𑀞𑀸𑀦𑀁 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁 𑀯𑀸 𑀫𑀦𑀲𑀺𑀓𑀭𑀡𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀏𑀢𑀲𑁆𑀲 𑀞𑀸𑀦𑀁 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀦𑁆𑀢𑀺 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀫𑀼𑀤𑀼𑀪𑀽𑀢𑀁, 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀢𑁆𑀢𑀸 𑀏𑀯 𑀓𑀫𑁆𑀫𑀜𑁆𑀜𑀁 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀁. 𑀧𑀪𑀲𑁆𑀲𑀭𑀦𑁆𑀢𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦 𑀧𑀭𑀺𑀲𑀼𑀤𑁆𑀥𑀁, 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀘 𑀧𑀪𑀗𑁆𑀕𑀽𑀢𑀺 𑀓𑀫𑁆𑀫𑀦𑀺𑀬𑀪𑀸𑀯𑀽𑀧𑀕𑀫𑀦𑁂𑀦 𑀦 𑀘 𑀧𑀪𑀺𑀚𑁆𑀚𑀦𑀲𑀪𑀸𑀯𑀁 𑀲𑀼𑀤𑁆𑀥𑀦𑁆𑀢𑀁 𑀯𑀺𑀬 𑀲𑀼𑀯𑀡𑁆𑀡𑀁 𑀯𑀺𑀦𑀺𑀬𑁄𑀕𑀓𑁆𑀔𑀫𑀁. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺.

𑀉𑀓𑁆𑀓𑀁 𑀩𑀦𑁆𑀥𑀢𑀻𑀢𑀺 𑀫𑀽𑀲𑀁 𑀲𑀫𑁆𑀧𑀸𑀤𑁂𑀢𑀺. 𑀆𑀮𑀺𑀫𑁆𑀧𑁂𑀢𑀻𑀢𑀺 𑀆𑀤𑀻𑀧𑁂𑀢𑀺 𑀚𑀸𑀮𑁂𑀢𑀺. 𑀢𑀜𑁆𑀘𑀸𑀢𑀺 𑀢𑀁 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀅𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀅𑀦𑀼𑀪𑁄𑀢𑀺 𑀧𑀳𑁄𑀢𑀺 𑀲𑀸𑀥𑁂𑀢𑀺. 𑀅𑀲𑁆𑀲 𑀯𑀸 𑀲𑀼𑀯𑀡𑁆𑀡𑀲𑁆𑀲 𑀅𑀢𑁆𑀣𑀁 𑀲𑀼𑀯𑀡𑁆𑀡𑀓𑀸𑀭𑁄 𑀅𑀦𑀼𑀪𑁄𑀢𑀺 𑀧𑀸𑀧𑀼𑀡𑀸𑀢𑀺.

𑀅𑀪𑀺𑀜𑁆𑀜𑀸𑀬 𑀇𑀤𑁆𑀥𑀺𑀯𑀺𑀥𑀸𑀤𑀺𑀜𑀸𑀡𑁂𑀦 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺𑀓𑀲𑁆𑀲 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 ¶ . 𑀬𑀲𑁆𑀲 𑀧𑀘𑁆𑀘𑀓𑁆𑀔𑀁 𑀅𑀢𑁆𑀣𑀺, 𑀲𑁄 𑀲𑀓𑁆𑀔𑀺. 𑀲𑀓𑁆𑀔𑀺𑀦𑁄 𑀪𑀩𑁆𑀩𑀢𑀸 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀲𑀓𑁆𑀔𑀺𑀪𑀯𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑁆𑀔𑀺 𑀘 𑀲𑁄 ¶ 𑀪𑀩𑁆𑀩𑁄 𑀘𑀸𑀢𑀺 𑀯𑀸 𑀲𑀓𑁆𑀔𑀺𑀪𑀩𑁆𑀩𑁄. 𑀅𑀬𑀜𑁆𑀳𑀺 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀪𑀩𑁆𑀩𑁄, 𑀢𑀢𑁆𑀣 𑀘 𑀲𑀓𑁆𑀔𑀻𑀢𑀺 𑀲𑀓𑁆𑀔𑀺𑀪𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀢𑀺 𑀲𑀢𑀺 𑀆𑀬𑀢𑀦𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀼𑀩𑁆𑀩𑀳𑁂𑀢𑀼𑀆𑀤𑀺𑀓𑁂 𑀓𑀸𑀭𑀡𑁂 𑀲𑀢𑀺.

𑀲𑀻𑀢𑀺𑀪𑀸𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀁 𑀯𑀸. 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀉𑀤𑁆𑀥𑀝𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀡𑀯𑀲𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀡𑀯𑀲𑁂𑀦 𑀧𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀲𑀫𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀢𑀣𑀸𑀧𑀯𑀢𑁆𑀢𑀺𑀬𑀁 𑀧𑀜𑁆𑀜𑀸𑀬 𑀢𑁄𑀲𑁂𑀢𑀺, 𑀉𑀢𑁆𑀢𑁂𑀚𑁂𑀢𑀺 𑀯𑀸. 𑀬𑀤𑀸 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀦 𑀧𑀓𑁆𑀔𑀦𑁆𑀤𑀢𑀺, 𑀢𑀤𑀸 𑀚𑀸𑀢𑀺𑀆𑀤𑀻𑀦𑀺 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁪𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁭) 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀬𑀤𑀸 𑀧𑀦 𑀘𑀺𑀢𑁆𑀢𑀁 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀯𑀻𑀣𑀺𑀁 𑀑𑀢𑀺𑀡𑁆𑀡𑀁 𑀳𑁄𑀢𑀺, 𑀢𑀤𑀸 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀓𑀜𑁆𑀘𑀺 𑀩𑁆𑀬𑀸𑀧𑀸𑀭𑀁 𑀅𑀓𑀢𑁆𑀯𑀸 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀬𑀼𑀕𑁂𑀲𑀼 𑀲𑀸𑀭𑀣𑀺 𑀯𑀺𑀬 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀉𑀧𑁂𑀓𑁆𑀔𑀓𑁄𑀯 𑀳𑁄𑀢𑀺. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁄𑀢𑀺 𑀧𑀡𑀻𑀢𑁂 𑀉𑀢𑁆𑀢𑀫𑁂 𑀫𑀕𑁆𑀕𑀨𑀮𑁂 𑀅𑀥𑀺𑀫𑀼𑀢𑁆𑀢𑁄 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁄.

𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑀗𑁆𑀔𑀸𑀢𑀁 𑀯𑀺𑀥𑀺𑀁 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑀁 𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀦𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀁 𑀓𑀢𑁆𑀯𑀸. 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀲𑀗𑁆𑀔𑀸𑀢𑀁 𑀯𑀺𑀥𑀺𑀁 𑀲𑀫𑁆𑀫𑀤𑁂𑀯 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀉𑀧𑀥𑀸𑀭𑁂𑀢𑁆𑀯𑀸. 𑀯𑀺𑀲𑁂𑀲𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀪𑀸𑀯𑀦𑀸𑀬 𑀯𑀺𑀲𑁂𑀲𑀁. 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀢𑀦𑁆𑀢𑀺𑀁 𑀧𑀕𑀼𑀡𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀯𑀸𑀘𑀸𑀬, 𑀫𑀦𑀲𑀸 𑀘 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀕𑀡𑁆𑀞𑀺𑀝𑁆𑀞𑀸𑀦𑀦𑁆𑀢𑀺 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀤𑀼𑀩𑁆𑀩𑀺𑀦𑀺𑀪𑁂𑀤𑁄 𑀅𑀭𑀜𑁆𑀜𑀲𑁆𑀲 𑀯𑀸 𑀕𑀳𑀦𑀪𑀽𑀢𑁄 𑀧𑀤𑁂𑀲𑁄 ‘‘𑀕𑀡𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀢𑀦𑁆𑀢𑀺𑀬𑀸 𑀅𑀢𑁆𑀣𑀢𑁄 𑀤𑀼𑀩𑁆𑀩𑀺𑀦𑀺𑀪𑁂𑀤𑁄 𑀕𑀳𑀦𑀪𑀽𑀢𑁄 𑀘 𑀧𑀤𑁂𑀲𑁄 ‘‘𑀕𑀡𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀭𑀺𑀧𑀼𑀘𑁆𑀙𑀦𑀸𑀤𑀺𑀮𑀤𑁆𑀥𑁂𑀦 𑀜𑀸𑀡𑀨𑀭𑀲𑀼𑀦𑀸 𑀙𑀺𑀦𑁆𑀤𑀺𑀢𑁆𑀯𑀸.

𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀦𑀺𑀫𑀺𑀢𑁆𑀢𑀁, 𑀅𑀲𑀼𑀪𑀸𑀓𑀸𑀭𑁄. 𑀏𑀤𑀺𑀲𑁂𑀦 𑀧𑀬𑁄𑀚𑀦𑁂𑀦 𑀮𑀼𑀜𑁆𑀘𑀦𑀫𑁆𑀧𑀺 𑀅𑀦𑀯𑀚𑁆𑀚𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑀼𑀜𑁆𑀘𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀙𑀺𑀦𑁆𑀦𑀝𑁆𑀞𑀸𑀦𑁂𑀢𑀺 𑀫𑀼𑀡𑁆𑀟𑀺𑀢𑀝𑁆𑀞𑀸𑀦𑁂. 𑀯𑀝𑁆𑀝𑀢𑀺𑀬𑁂𑀯 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑁂𑀦 𑀑𑀮𑁄𑀓𑀦𑀢𑁄. 𑀉𑀲𑁆𑀲𑀤𑀯𑀲𑁂𑀦𑀸𑀢𑀺 𑀅𑀨𑀮𑀺𑀢𑀸𑀦𑀁, 𑀨𑀮𑀺𑀢𑀸𑀦𑀁 𑀯𑀸 𑀩𑀳𑀼𑀮𑀢𑀸𑀯𑀲𑁂𑀦. 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁 𑀤𑀲𑁆𑀲𑀦𑀬𑁄𑀕𑁆𑀬𑀢𑀸𑀬 𑀢𑀘𑀧𑀜𑁆𑀘𑀓𑀲𑁆𑀲, 𑀇𑀢𑀭𑁂𑀲𑀼 𑀲𑀼𑀢𑁆𑀯𑀸 𑀘 𑀜𑀢𑁆𑀯𑀸 𑀘 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁.

𑀓𑁄𑀝𑁆𑀞𑀸𑀲𑀯𑀯𑀢𑁆𑀣𑀸𑀧𑀦𑀓𑀣𑀸𑀯𑀡𑁆𑀡𑀦𑀸

𑁧𑁮𑁨. 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸𑀢𑀺 ¶ ¶ 𑀅𑀪𑀺𑀦𑀯𑀸𑀭𑀺𑀝𑁆𑀞𑀨𑀮𑀯𑀡𑁆𑀡𑀸. 𑀓𑀡𑁆𑀡𑀘𑀽𑀴𑀺𑀓𑀸𑀢𑀺 𑀉𑀧𑀭𑀺𑀓𑀡𑁆𑀡𑀲𑀓𑁆𑀔𑀮𑀺𑀓𑀸𑀬 𑀧𑀭𑀪𑀸𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀓𑀣𑀁? 𑀤𑁆𑀯𑁂 𑀓𑁂𑀲𑀸 𑀏𑀓𑀢𑁄 𑀦𑀢𑁆𑀣𑀻𑀢𑀺.

𑀆𑀲𑀬𑁄𑀢𑀺 𑀦𑀺𑀲𑁆𑀲𑀬𑁄, 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄.

𑁧𑁮𑁪. 𑀅𑀲𑀫𑁆𑀪𑀺𑀦𑁆𑀦𑀓𑀸𑀴𑀓𑀸 𑀅𑀜𑁆𑀜𑁂𑀦 𑀯𑀡𑁆𑀡𑁂𑀦 𑀅𑀲𑀫𑁆𑀫𑀺𑀲𑁆𑀲𑀓𑀸𑀴𑀓𑀸.

𑁧𑁮𑁫. 𑀧𑀢𑁆𑀢𑀲𑀤𑀺𑀲𑀢𑁆𑀢𑀸 𑀦𑀔𑀸 𑀏𑀯 𑀦𑀔𑀧𑀢𑁆𑀢𑀸𑀦𑀺. 𑀦𑀔𑀸 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀦𑀔𑀸 𑀏𑀓𑀢𑁄 𑀦𑀢𑁆𑀣𑀻’’𑀢𑀺 𑀆𑀳.

𑁧𑁮𑁬. 𑀤𑀦𑁆𑀢𑀧𑀸𑀴𑀺𑀬𑀸𑀢𑀺 𑀤𑀦𑁆𑀢𑀸𑀯𑀮𑀺𑀬𑀸. 𑀬𑀸𑀦𑀓𑀉𑀧𑀢𑁆𑀣𑀫𑁆𑀪𑀺𑀦𑀻𑀢𑀺 𑀲𑀓𑀝𑀲𑁆𑀲 𑀥𑀼𑀭𑀝𑁆𑀞𑀸𑀦𑁂 𑀉𑀧𑀢𑁆𑀣𑀫𑁆𑀪𑀓𑀤𑀡𑁆𑀟𑁄. 𑀤𑀦𑁆𑀢𑀸𑀦𑀁 𑀆𑀥𑀸𑀭𑀪𑀽𑀢𑀸 𑀅𑀝𑁆𑀞𑀺 𑀳𑀦𑀼𑀓𑀝𑁆𑀞𑀺.

𑁧𑁮𑁭. 𑀲𑀗𑁆𑀓𑀟𑁆𑀠𑀺𑀬𑀫𑀸𑀦𑀸𑀢𑀺 𑀲𑀫𑁆𑀧𑀺𑀡𑁆𑀟𑀺𑀬𑀫𑀸𑀦𑀸. 𑀓𑁄𑀲𑀓𑀸𑀭𑀓𑀓𑁄𑀲𑁄 𑀉𑀧𑀮𑁆𑀮𑀺𑀡𑁆𑀟𑀼𑀧𑁄𑀝𑁆𑀝𑀮𑀓𑀁, 𑀬𑀁 ‘‘𑀓𑁄𑀲𑁂𑀬𑁆𑀬𑀨𑀮’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀼𑀝𑀩𑀦𑁆𑀥𑀉𑀧𑀸𑀳𑀦𑁄 𑀲𑀓𑀮𑀧𑀺𑀝𑁆𑀞𑀺𑀧𑀸𑀤𑀘𑁆𑀙𑀸𑀤𑀦𑀉𑀧𑀸𑀳𑀦𑁄. 𑀆𑀦𑀺𑀲𑀤𑀁 𑀆𑀲𑀦𑀧𑀤𑁂𑀲𑁄. 𑀢𑀽𑀡𑀺𑀭𑁄 𑀲𑀭𑀸𑀯𑀸𑀲𑁄. 𑀕𑀮𑀓𑀜𑁆𑀘𑀼𑀓𑀁 𑀓𑀡𑁆𑀞𑀢𑁆𑀢𑀸𑀡𑀁. 𑀓𑀻𑀝𑀓𑀼𑀮𑀸𑀯𑀓𑀁 𑀔𑀭𑀫𑀼𑀔𑀓𑀼𑀝𑀺.

𑀅𑀦𑀼𑀮𑁄𑀫𑁂𑀦 𑀧𑀝𑀺𑀮𑁄𑀫𑁂𑀦 𑀘𑀸𑀢𑀺 𑀏𑀢𑁆𑀣 𑀅𑀁𑀲𑀧𑀤𑁂𑀲𑀢𑁄 𑀧𑀝𑁆𑀞𑀸𑀬 𑀩𑀸𑀳𑀼𑀦𑁄 𑀧𑀺𑀝𑁆𑀞𑀺𑀧𑀤𑁂𑀲𑁂𑀦 𑀑𑀢𑀭𑀡𑀁 𑀅𑀦𑀼𑀮𑁄𑀫𑁄, 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀩𑀸𑀳𑀼𑀦𑁄 𑀧𑀼𑀭𑀺𑀫𑀪𑀸𑀕𑁂𑀦 𑀆𑀭𑁄𑀳𑀦𑀁 𑀧𑀝𑀺𑀮𑁄𑀫𑁄. 𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀤𑀓𑁆𑀔𑀺𑀡𑀳𑀢𑁆𑀣𑁂 𑀯𑀼𑀢𑁆𑀢𑁂𑀦 𑀦𑀬𑁂𑀦 𑀅𑀦𑀼𑀮𑁄𑀫𑁂𑀦 𑀧𑀝𑀺𑀮𑁄𑀫𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀼𑀫𑀫𑁆𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀑𑀴𑀸𑀭𑀺𑀓𑀘𑀫𑁆𑀫𑀢𑁄 𑀲𑀼𑀔𑀼𑀫𑀁. 𑀅𑀦𑁆𑀢𑁄𑀫𑀼𑀔𑀘𑀫𑁆𑀫𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀯𑀸 𑀢𑀘𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑀁 𑀤𑀼𑀭𑀼𑀧𑀮𑀓𑁆𑀔𑀡𑀻𑀬𑀁, 𑀢𑀁 ‘‘𑀲𑀼𑀔𑀼𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀯𑀼𑀢𑁆𑀢𑀦𑀬𑁂𑀦 𑀜𑀸𑀡𑁂𑀦 𑀢𑀘𑀁 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺. 𑀇𑀥 𑀙𑀯𑀺𑀧𑀺 𑀢𑀘𑀕𑀢𑀺𑀓𑀸 𑀏𑀯𑀸𑀢𑀺 ‘‘𑀢𑀘𑁄 𑀉𑀧𑀭𑀺 𑀆𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄.

𑁧𑁮𑁮. 𑀦𑀺𑀲𑀤𑀧𑁄𑀢𑁄 ¶ ¶ 𑀲𑀺𑀮𑀸𑀧𑀼𑀢𑁆𑀢𑀓𑁄. 𑀉𑀤𑁆𑀥𑀦𑀓𑁄𑀝𑀻𑀢𑀺 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀦 𑀓𑀢𑀉𑀤𑁆𑀥𑀦𑀲𑁆𑀲 𑀓𑁄𑀝𑀺. 𑀢𑀸𑀮𑀕𑀼𑀴𑀧𑀝𑀮𑀁 𑀦𑀸𑀫 𑀧𑀓𑁆𑀓𑀢𑀸𑀮𑀨𑀮𑀮𑀲𑀺𑀓𑀁 𑀢𑀸𑀮𑀧𑀝𑁆𑀝𑀺𑀓𑀸𑀤𑀻𑀲𑀼 𑀮𑀺𑀫𑁆𑀧𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀧𑀝𑀮𑀁. 𑀲𑀼𑀔𑀼𑀫𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀁𑀲𑀢𑁄 𑀲𑀼𑀔𑀼𑀫𑀁. 𑀧𑀡𑁆𑀳𑀺𑀓𑀫𑀁𑀲𑀸𑀤𑀺𑀣𑀽𑀮𑀸𑀦𑀁 𑀲𑀓𑀮𑀲𑀭𑀻𑀭𑀲𑁆𑀲 𑀓𑀺𑀲𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀫𑀁𑀲𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦’’𑀦𑁆𑀢𑀺.

𑁧𑁮𑁯. 𑀚𑀸𑀮𑀸𑀓𑀸𑀭𑁄 𑀓𑀜𑁆𑀘𑀼𑀓𑁄 𑀚𑀸𑀮𑀓𑀜𑁆𑀘𑀼𑀓𑁄. 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀪𑀸𑀯𑁂𑀦𑁂𑀯 𑀦𑁆𑀳𑀸𑀭𑀽 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸.

𑁧𑁯𑁦. 𑀤𑀦𑁆𑀢𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀝𑁆𑀞𑀻𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀁 𑀚𑀡𑁆𑀡𑀼𑀓𑀝𑁆𑀞𑀺, 𑀏𑀓𑀁 𑀊𑀭𑀼𑀝𑁆𑀞𑀻𑀢𑀺 𑀏𑀓-𑀕𑁆𑀕𑀳𑀡𑀁 ‘‘𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂’’𑀢𑀺 𑀅𑀥𑀺𑀓𑀢𑀢𑁆𑀢𑀸. 𑀏𑀯𑀁 𑀢𑀺𑀫𑀢𑁆𑀢𑀸𑀦𑀻𑀢𑀺 𑀏𑀯𑀁 𑀫𑀢𑁆𑀢𑀲𑀤𑁆𑀤𑁂𑀳𑀺 𑀆𑀦𑀺𑀲𑀤𑀝𑁆𑀞𑀺𑀆𑀤𑀻𑀦𑀺 𑀇𑀥 𑀅𑀯𑀼𑀢𑁆𑀢𑀸𑀦𑀺𑀧𑀺 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀢𑀺𑀭𑁂𑀓𑀢𑀺𑀲𑀢𑀅𑀝𑁆𑀞𑀺𑀓𑀲𑀫𑀼𑀲𑁆𑀲𑀬’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁨) 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀓𑀻𑀴𑀸𑀕𑁄𑀴𑀓𑀸𑀦𑀺 𑀲𑀼𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀢𑁆𑀯𑀸 𑀓𑀻𑀴𑀦𑀕𑁄𑀴𑀓𑀸𑀦𑀺. 𑀥𑀦𑀼𑀓𑀤𑀡𑁆𑀟𑁄 𑀤𑀸𑀭𑀓𑀸𑀦𑀁 𑀓𑀻𑀴𑀦𑀓𑀔𑀼𑀤𑁆𑀤𑀓𑀥𑀦𑀼𑀓𑀁. 𑀢𑀢𑁆𑀣 𑀚𑀗𑁆𑀖𑀝𑁆𑀞𑀺𑀓𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀦𑁆𑀢𑀺 𑀚𑀡𑁆𑀡𑀼𑀓𑀝𑁆𑀞𑀺𑀫𑁆𑀳𑀺 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀊𑀭𑀼𑀝𑁆𑀞𑀺𑀦𑀸 𑀧𑀢𑀺𑀝𑁆𑀞𑀺𑀢𑀁 𑀞𑀸𑀦𑀁 𑀬𑀁 𑀓𑀝𑀺𑀝𑁆𑀞𑀺𑀦𑁄, 𑀢𑀁 𑀅𑀕𑁆𑀕𑀘𑁆𑀙𑀺𑀦𑁆𑀦𑀫𑀳𑀸𑀧𑀼𑀦𑁆𑀦𑀸𑀕𑀨𑀮𑀲𑀤𑀺𑀲𑀁.

𑀓𑀼𑀫𑁆𑀪𑀓𑀸𑀭𑁂𑀦 𑀦𑀺𑀧𑁆𑀨𑀸𑀤𑀺𑀢𑀁 𑀉𑀤𑁆𑀥𑀦𑀁 𑀓𑀼𑀫𑁆𑀪𑀓𑀸𑀭𑀺𑀓𑀉𑀤𑁆𑀥𑀦𑀁. 𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀁 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀁 𑀲𑀻𑀲𑀫𑀬𑀁 𑀧𑀝𑁆𑀝𑀓𑀁. 𑀬𑁂𑀦 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺, 𑀢𑀲𑁆𑀫𑀺𑀁 𑀢𑀓𑁆𑀓𑀫𑁆𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑀺𑀢𑀕𑁄𑀴𑀓𑀸 𑀯𑀝𑁆𑀝𑀦𑀸 𑀦𑀸𑀫, 𑀯𑀝𑁆𑀝𑀦𑀸𑀦𑀁 𑀆𑀯𑀴𑀺 𑀯𑀝𑁆𑀝𑀦𑀸𑀯𑀴𑀺.

𑀫𑀡𑁆𑀟𑀮𑀸𑀓𑀸𑀭𑁂𑀦 𑀙𑀺𑀦𑁆𑀦𑀯𑀁𑀲𑀓𑀴𑀻𑀭𑀔𑀡𑁆𑀟𑀸𑀦𑀺 𑀯𑀁𑀲𑀓𑀴𑀻𑀭𑀘𑀓𑁆𑀓𑀮𑀓𑀸𑀦𑀺. 𑀅𑀯𑀮𑁂𑀔𑀦𑀲𑀢𑁆𑀣𑀓𑀁 𑀉𑀘𑁆𑀙𑀼𑀢𑀘𑀸𑀯𑀮𑁂𑀔𑀦𑀲𑀢𑁆𑀣𑀓𑀁.

𑁧𑁯𑁨. 𑀯𑀓𑁆𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀓𑁆𑀓𑀧𑀭𑀺𑀬𑀦𑁆𑀢𑁂𑀦 𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄.

𑁧𑁯𑁩. 𑀬𑀁 ¶ 𑀦𑀺𑀲𑁆𑀲𑀸𑀬𑀸𑀢𑀺 𑀬𑀁 𑀮𑁄𑀳𑀺𑀢𑀁 𑀦𑀺𑀲𑁆𑀲𑀸𑀬, 𑀦𑀺𑀲𑁆𑀲𑀬𑀦𑀺𑀲𑁆𑀲𑀬𑁄𑀧𑀺 ‘‘𑀦𑀺𑀲𑁆𑀲𑀬𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀪𑀯𑀢𑀺 𑀳𑀺 𑀓𑀸𑀭𑀡𑀓𑀸𑀭𑀡𑁂𑀧𑀺 𑀓𑀸𑀭𑀡𑀯𑁄𑀳𑀸𑀭𑁄 𑀬𑀣𑀸 ‘‘𑀘𑁄𑀭𑁂𑀳𑀺 𑀕𑀸𑀫𑁄 𑀤𑀟𑁆𑀠𑁄’’𑀢𑀺. 𑀅𑀣 𑀯𑀸 𑀬𑀲𑁆𑀫𑀺𑀁 𑀭𑀽𑀧𑀓𑀮𑀸𑀧𑁂 𑀳𑀤𑀬𑀯𑀢𑁆𑀣𑀼 ¶ , 𑀢𑀫𑁆𑀧𑀺 𑀮𑁄𑀳𑀺𑀢𑀕𑀢𑀺𑀓𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 ‘‘𑀬𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑁧𑁯𑁪. 𑀧𑀡𑁆𑀟𑀼𑀓𑀥𑀸𑀢𑀼𑀓𑀦𑁆𑀢𑀺 𑀧𑀡𑁆𑀟𑀼𑀲𑀪𑀸𑀯𑀁.

𑁧𑁯𑁫. 𑀧𑀭𑀺𑀬𑁄𑀦𑀳𑀦𑀫𑀁𑀲𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀓𑀫𑀁𑀲𑀁.

𑁧𑁯𑁬. 𑀉𑀤𑀭𑀚𑀺𑀯𑁆𑀳𑀸𑀫𑀁𑀲𑀦𑁆𑀢𑀺 𑀚𑀺𑀯𑁆𑀳𑀸𑀲𑀡𑁆𑀞𑀸𑀦𑀁 𑀉𑀤𑀭𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑁂 𑀢𑀺𑀝𑁆𑀞𑀦𑀓𑀫𑀁𑀲𑀁. ‘‘𑀦𑀻𑀮’’𑀦𑁆𑀢𑀺 𑀯𑀢𑁆𑀯𑀸 𑀦𑀻𑀮𑀁 𑀦𑀸𑀫 𑀩𑀳𑀼𑀥𑀸𑀢𑀼𑀓𑀦𑁆𑀢𑀺 𑀆𑀳 ‘‘𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀯𑀡𑁆𑀡’’𑀦𑁆𑀢𑀺.

𑁧𑁯𑁭. 𑀧𑀧𑁆𑀨𑀸𑀲𑀫𑀁𑀲𑀦𑁆𑀢𑀺 𑀬𑀣𑀸𑀞𑀸𑀦𑁂 𑀏𑀯 𑀮𑀫𑁆𑀩𑀺𑀢𑁆𑀯𑀸 𑀣𑁄𑀓𑀁 𑀧𑀭𑀺𑀯𑀢𑁆𑀢𑀓𑀫𑀁𑀲𑀁. 𑀦𑀺𑀭𑀲𑀦𑁆𑀢𑀺 𑀦𑀺𑀳𑀻𑀦𑀭𑀲𑀁. 𑀦𑀺𑀭𑁄𑀚𑀦𑁆𑀢𑀺 𑀦𑀺𑀧𑁆𑀧𑀪𑀁, 𑀑𑀚𑀸𑀭𑀳𑀺𑀢𑀁 𑀯𑀸.

𑁧𑁯𑁮. 𑀑𑀪𑀕𑁆𑀕𑀸𑀢𑀺 𑀅𑀯𑀪𑀼𑀚𑀺𑀢𑁆𑀯𑀸 𑀞𑀺𑀢𑀸. 𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡𑀦𑁆𑀢𑀺 𑀫𑀭𑀼𑀫𑁆𑀩𑁂𑀳𑀺 𑀓𑀢𑀲𑀼𑀥𑀸𑀯𑀡𑁆𑀡𑀁. ‘‘𑀲𑁂𑀢𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁂𑀢𑀲𑀓𑁆𑀔𑀭𑀯𑀡𑁆𑀡𑀁, 𑀲𑀼𑀥𑀸𑀯𑀡𑁆𑀡𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁧𑁯𑁯. 𑀅𑀦𑁆𑀢𑀲𑁆𑀲 𑀆𑀪𑀼𑀚𑀺𑀢𑁆𑀯𑀸 𑀆𑀪𑀼𑀚𑀺𑀢𑁆𑀯𑀸 𑀞𑀺𑀢𑀧𑁆𑀧𑀤𑁂𑀲𑀸 𑀅𑀦𑁆𑀢𑀪𑁄𑀕𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀩𑀦𑁆𑀥𑀦𑀪𑀽𑀢𑀁 𑀅𑀦𑁆𑀢𑀕𑀼𑀡𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑀕𑀼𑀡𑀦𑁆𑀢𑀺 𑀅𑀦𑁆𑀢𑀪𑁄𑀕𑀝𑁆𑀞𑀸𑀦𑁂𑀲𑀼 𑀩𑀦𑁆𑀥𑀦’’𑀦𑁆𑀢𑀺. 𑀓𑀼𑀤𑁆𑀤𑀸𑀮𑀨𑀭𑀲𑀼𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀁 𑀅𑀦𑁆𑀢𑀪𑁄𑀕𑁂 𑀅𑀕𑀴𑀦𑁆𑀢𑁂 𑀏𑀓𑀢𑁄 𑀆𑀩𑀦𑁆𑀥𑀺𑀢𑁆𑀯𑀸, 𑀓𑀺𑀁 𑀯𑀺𑀬? 𑀬𑀦𑁆𑀢𑀲𑀼𑀢𑁆𑀢𑀓𑀫𑀺𑀯 𑀬𑀦𑁆𑀢𑀨𑀮𑀓𑀸𑀦𑀻𑀢𑀺. 𑀓𑀺𑀫𑀺𑀯 𑀢𑀢𑁆𑀣 𑀞𑀺𑀢𑀦𑁆𑀢𑀺 𑀆𑀳 ‘‘𑀧𑀸𑀤𑀧𑀼𑀜𑁆𑀙𑀦…𑀧𑁂… 𑀞𑀺𑀢’’𑀦𑁆𑀢𑀺. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀆𑀩𑀦𑁆𑀥𑀦𑀲𑁆𑀲, 𑀤𑀼𑀢𑀺𑀬𑀁 𑀞𑀸𑀦𑀸𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁦𑁦. 𑀅𑀲𑀺𑀢𑀁 𑀦𑀸𑀫 𑀪𑀼𑀢𑁆𑀢𑀁 𑀑𑀤𑀦𑀸𑀤𑀺. 𑀧𑀻𑀢𑀁 𑀦𑀸𑀫 𑀧𑀺𑀯𑀦𑀯𑀲𑁂𑀦 𑀅𑀚𑁆𑀛𑁄𑀳𑀝𑀧𑀸𑀦𑀓𑀸𑀤𑀺. 𑀔𑀸𑀬𑀺𑀢𑀁 𑀦𑀸𑀫 𑀲𑀁𑀔𑀸𑀤𑀺𑀢𑀁 𑀧𑀺𑀝𑁆𑀞𑀫𑀽𑀮𑀨𑀮𑀔𑀚𑁆𑀚𑀸𑀤𑀺. 𑀲𑀸𑀬𑀺𑀢𑀁 𑀦𑀸𑀫 𑀅𑀲𑁆𑀲𑀸𑀤𑀺𑀢𑀁 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺.

𑀬𑀢𑁆𑀣𑀸𑀢𑀺 ¶ 𑀬𑀲𑁆𑀫𑀺𑀁 𑀉𑀤𑀭𑁂. 𑀬𑀦𑁆𑀢𑀺 𑀘 𑀉𑀤𑀭𑀫𑁂𑀯 𑀧𑀘𑁆𑀘𑀸𑀫𑀲𑀢𑀺. 𑀬𑀢𑁆𑀣 𑀧𑀸𑀦𑀪𑁄𑀚𑀦𑀸𑀤𑀻𑀦𑀺 𑀧𑀢𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀯𑀸𑀦𑀯𑀫𑀣𑀼 𑀲𑀸𑀭𑀫𑁂𑀬𑁆𑀬𑀯𑀦𑁆𑀢𑀁. 𑀯𑀺𑀯𑁂𑀓𑀦𑁆𑀢𑀺 𑀯𑀺𑀪𑀸𑀕𑀁.

𑁨𑁦𑁧. 𑀳𑁂𑀝𑁆𑀞𑀸𑀦𑀸𑀪𑀺𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀽𑀮𑀸𑀦𑀁 ¶ 𑀅𑀦𑁆𑀢𑀭𑁂𑀢𑀺 𑀧𑀼𑀭𑀺𑀫𑀪𑀸𑀕𑀯𑀲𑁂𑀦 𑀦𑀸𑀪𑀺𑀬𑀸 𑀳𑁂𑀝𑁆𑀞𑀸𑀧𑀤𑁂𑀲𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑀯𑀲𑁂𑀦 𑀳𑁂𑀝𑁆𑀞𑀺𑀫𑀧𑀺𑀝𑁆𑀞𑀺𑀓𑀡𑁆𑀝𑀓𑀸𑀦𑀁 𑀯𑁂𑀫𑀚𑁆𑀛𑁂. 𑀯𑁂𑀴𑀼𑀦𑀸𑀴𑀺𑀓𑀲𑀤𑀺𑀲𑁄 𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁦𑁨. 𑀲𑀫𑁄𑀳𑀺𑀢𑀦𑁆𑀢𑀺 𑀦𑀺𑀘𑀺𑀢𑀁.

𑁨𑁦𑁪. 𑀧𑀽𑀢𑀺𑀪𑀸𑀯𑀁 𑀆𑀧𑀦𑁆𑀦𑀁 𑀓𑀼𑀓𑁆𑀓𑀼𑀝𑀡𑁆𑀟𑀁 𑀧𑀽𑀢𑀺𑀓𑀼𑀓𑁆𑀓𑀼𑀝𑀡𑁆𑀟𑀁. 𑀉𑀤𑁆𑀤𑁂𑀓𑁄 𑀧𑀺𑀢𑁆𑀢𑀸𑀤𑀻𑀳𑀺 𑀯𑀺𑀦𑀸 𑀓𑁂𑀯𑀮𑁄 𑀉𑀤𑁆𑀥𑀗𑁆𑀕𑀫𑀯𑀸𑀢𑁄.

𑁨𑁦𑁫. 𑀆𑀘𑀸𑀫𑁄 𑀅𑀯𑀲𑁆𑀲𑀸𑀯𑀦𑀓𑀜𑁆𑀚𑀺𑀓𑀁.

𑁨𑁦𑁬. 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑁂 𑀢𑁂𑀫𑀬𑀫𑀸𑀦𑀦𑁆𑀢𑀺 𑀏𑀢𑁆𑀣 𑀬𑀓𑀦𑀁 𑀳𑁂𑀝𑁆𑀞𑀸𑀪𑀸𑀕𑀧𑀽𑀭𑀡𑁂𑀦𑁂𑀯 𑀢𑁂𑀫𑁂𑀢𑀺, 𑀇𑀢𑀭𑀸𑀦𑀺 𑀢𑁂𑀲𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀧𑀕𑁆𑀖𑀭𑀡𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁦𑁭. 𑀉𑀢𑀼𑀯𑀺𑀓𑀸𑀭𑁄 𑀉𑀡𑁆𑀳𑀯𑀮𑀸𑀳𑀓𑀸𑀤𑀺𑀳𑁂𑀢𑀼𑀓𑁄. 𑀯𑀺𑀲𑀫𑀘𑁆𑀙𑀺𑀦𑁆𑀦𑁄 𑀪𑀺𑀲𑀸𑀤𑀺𑀓𑀮𑀸𑀧𑁄 𑀯𑀺𑀲𑀫𑀁 𑀉𑀤𑀓𑀁 𑀧𑀕𑁆𑀖𑀭𑀢𑀺, 𑀏𑀯𑀫𑁂𑀯𑀁 𑀲𑀭𑀻𑀭𑀁 𑀓𑁂𑀲𑀓𑀽𑀧𑀸𑀤𑀺𑀯𑀺𑀯𑀭𑁂𑀳𑀺 𑀉𑀧𑀭𑀺, 𑀳𑁂𑀝𑁆𑀞𑀸, 𑀢𑀺𑀭𑀺𑀬𑀜𑁆𑀘 𑀲𑁂𑀤𑀁 𑀯𑀺𑀲𑀫𑀁 𑀧𑀕𑁆𑀖𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀫𑀘𑁆𑀙𑀺𑀦𑁆𑀦-𑀕𑁆𑀕𑀳𑀡𑀁 𑀓𑀢𑀁.

𑁨𑁦𑁮. 𑀯𑀺𑀲𑀫𑀸𑀳𑀸𑀭𑀦𑁆𑀢𑀺 𑀢𑀤𑀸𑀧𑀯𑀢𑁆𑀢𑀫𑀸𑀦𑀲𑀭𑀻𑀭𑀸𑀯𑀢𑁆𑀣𑀸𑀬 𑀅𑀲𑀧𑁆𑀧𑀸𑀬𑀸𑀳𑀸𑀭𑀁, 𑀅𑀢𑀺𑀓𑀝𑀼𑀓𑀅𑀘𑁆𑀘𑀼𑀡𑁆𑀳𑀸𑀤𑀺𑀯𑀺𑀲𑀪𑀸𑀕𑀸𑀳𑀸𑀭𑀁 𑀯𑀸. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁩𑁫𑁬) 𑀧𑀦 ‘‘𑀯𑀺𑀲𑀪𑀸𑀕𑀸𑀳𑀸𑀭’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁 𑀢𑀤𑀸 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀸𑀢𑀽𑀦𑀁 𑀯𑀺𑀲𑀪𑀸𑀕𑀢𑁆𑀢𑀸.

𑁨𑁦𑁯. ‘‘𑀦𑁆𑀳𑀸𑀦𑀓𑀸𑀮𑁂’’𑀢𑀺 𑀇𑀤𑀁 𑀉𑀤𑀓𑀲𑁆𑀲 𑀉𑀧𑀭𑀺 𑀲𑀺𑀦𑁂𑀳𑀲𑁆𑀲 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀺𑀩𑁆𑀪𑀫𑀦𑁆𑀢𑀲𑀺𑀦𑁂𑀳𑀩𑀺𑀦𑁆𑀤𑀼𑀯𑀺𑀲𑀝𑀲𑀡𑁆𑀞𑀸𑀦𑀸𑀢𑀺 𑀯𑀺𑀲𑀝𑀁 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀦𑁆𑀢𑀲𑀺𑀦𑁂𑀳𑀩𑀺𑀦𑁆𑀤𑀼𑀲𑀡𑁆𑀞𑀸𑀦𑀸. 𑀉𑀢𑀼𑀯𑀺𑀲𑀪𑀸𑀕𑁄 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑁄. 𑀥𑀸𑀢𑀼𑀯𑀺𑀲𑀪𑀸𑀕𑁄 𑀅𑀦𑁆𑀢𑁄𑀲𑀫𑀼𑀝𑁆𑀞𑀸𑀦𑁄. 𑀢𑁂 𑀧𑀤𑁂𑀲𑀸𑀢𑀺 𑀢𑁂 𑀳𑀢𑁆𑀣𑀢𑀮𑀸𑀤𑀺𑀧𑀤𑁂𑀲𑀸.

𑁨𑁧𑁦. 𑀓𑀺𑀜𑁆𑀘𑀻𑀢𑀺 ¶ 𑀉𑀡𑁆𑀳𑀸𑀤𑀺𑀭𑀲𑀸𑀦𑀁 𑀅𑀜𑁆𑀜𑀢𑀭𑀁 𑀆𑀳𑀸𑀭𑀯𑀢𑁆𑀣𑀼. 𑀦𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀳𑀤𑀬𑀁 𑀆𑀕𑀺𑀮𑀸𑀬𑀢𑀻𑀢𑀺 𑀯𑀺𑀲𑀪𑀸𑀕𑀸𑀳𑀸𑀭𑀸𑀤𑀺𑀁 𑀧𑀝𑀺𑀘𑁆𑀘 𑀳𑀤𑀬𑀧𑁆𑀧𑀤𑁂𑀲𑁄 𑀯𑀺𑀯𑀢𑁆𑀢𑀢𑀺.

𑁨𑁧𑁧. 𑀤𑀥𑀺𑀦𑁄 ¶ 𑀯𑀺𑀲𑁆𑀲𑀦𑁆𑀤𑀦𑀅𑀘𑁆𑀙𑀭𑀲𑁄 𑀤𑀥𑀺𑀫𑀼𑀢𑁆𑀢𑀁. 𑀕𑀴𑀺𑀢𑁆𑀯𑀸𑀢𑀺 𑀲𑀦𑁆𑀤𑀺𑀢𑁆𑀯𑀸. 𑀢𑀸𑀮𑀼𑀫𑀢𑁆𑀣𑀓𑀯𑀺𑀯𑀭𑁂𑀦 𑀑𑀢𑀭𑀺𑀢𑁆𑀯𑀸𑀢𑀺 𑀫𑀢𑁆𑀣𑀓𑀯𑀺𑀯𑀭𑀢𑁄 𑀆𑀕𑀦𑁆𑀢𑁆𑀯𑀸 𑀢𑀸𑀮𑀼𑀫𑀢𑁆𑀣𑀓𑁂𑀦 𑀑𑀢𑀭𑀺𑀢𑁆𑀯𑀸.

𑁨𑁧𑁨. 𑀢𑁂𑀮𑀁 𑀯𑀺𑀬 𑀲𑀓𑀝𑀲𑁆𑀲 𑀦𑀸𑀪𑀺𑀅𑀓𑁆𑀔𑀲𑀻𑀲𑀸𑀦𑀁 𑀅𑀝𑁆𑀞𑀺𑀲𑀦𑁆𑀥𑀻𑀦𑀁 𑀅𑀩𑁆𑀪𑀜𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸. 𑀓𑀝𑀓𑀝𑀸𑀬𑀦𑁆𑀢𑀻𑀢𑀺 ‘‘𑀓𑀝 𑀓𑀝𑀸’’𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀅𑀦𑀼𑀭𑀯𑀤𑀲𑁆𑀲𑀦𑀁 𑀳𑁂𑀢𑀁. 𑀤𑀼𑀓𑁆𑀔𑀦𑁆𑀢𑀻𑀢𑀺 𑀤𑀼𑀓𑁆𑀔𑀺𑀢𑀸𑀦𑀺 𑀲𑀜𑁆𑀚𑀸𑀢𑀤𑀼𑀓𑁆𑀔𑀸𑀦𑀺 𑀳𑁄𑀦𑁆𑀢𑀺.

𑁨𑁧𑁩. 𑀲𑀫𑀽𑀮𑀓𑀽𑀮𑀫𑀸𑀲𑀁 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀁 𑀅𑀯𑀲𑁆𑀲𑀸𑀯𑁂𑀢𑁆𑀯𑀸 𑀕𑀳𑀺𑀢𑀬𑀽𑀲𑁄 𑀫𑀸𑀲𑀔𑀸𑀭𑁄. 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀙𑀟𑁆𑀟𑀦𑀝𑁆𑀞𑀸𑀦𑀁 𑀘𑀦𑁆𑀤𑀦𑀺𑀓𑀸. 𑀭𑀯𑀡𑀖𑀝𑀁 𑀦𑀸𑀫 𑀧𑀓𑀢𑀺𑀬𑀸 𑀲𑀫𑁆𑀫𑀼𑀔𑀫𑁂𑀯 𑀳𑁄𑀢𑀺. 𑀬𑀲𑁆𑀲 𑀧𑀦 𑀆𑀭𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀤𑀓𑀲𑁆𑀲 𑀧𑀯𑀺𑀲𑀦𑀫𑀼𑀔𑀁 𑀦𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀫𑀼𑀔𑁂 𑀭𑀯𑀡𑀖𑀝𑁂’’𑀢𑀺 𑀯𑀼𑀢𑁆𑀢𑀁. 𑀆𑀬𑀽𑀳𑀦𑀦𑁆𑀢𑀺 𑀲𑀫𑀻𑀳𑀦𑀁.

𑁨𑁧𑁪. 𑀏𑀯𑀜𑁆𑀳𑀻𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀬 𑀉𑀕𑁆𑀕𑀳𑀓𑁄𑀲𑀮𑁆𑀮𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀕𑀫𑀦𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀧𑀝𑀺𑀧𑀢𑁆𑀢𑀺𑀫𑁆𑀧𑀺 𑀦𑀺𑀕𑀫𑀦𑀯𑀲𑁂𑀦 𑀕𑀳𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑀼𑀩𑁆𑀩𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀸𑀯𑀲𑀸𑀦𑁂𑀢𑀺 𑀓𑁂𑀲𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀯𑀢𑁆𑀢𑀸𑀬 𑀪𑀸𑀯𑀦𑀸𑀬 𑀅𑀯𑀲𑀸𑀦𑁂. 𑀅𑀧𑀼𑀩𑁆𑀩𑀸𑀧𑀭𑀺𑀬𑀫𑀺𑀯𑀸𑀢𑀺 𑀏𑀓𑀚𑁆𑀛𑀫𑀺𑀯. 𑀓𑁂𑀲𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀏𑀯𑀫𑀸𑀤𑀺𑀦𑀸 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀢𑁂 𑀥𑀫𑁆𑀫𑀸𑀢𑀺 𑀯𑀡𑁆𑀡𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀸𑀧𑀺𑀢𑀸 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀢𑁄 𑀉𑀧𑀝𑁆𑀞𑀺𑀢𑀸 𑀓𑁄𑀝𑁆𑀞𑀸𑀲𑀥𑀫𑁆𑀫𑀸.

𑀩𑀳𑀺𑀤𑁆𑀥𑀸𑀧𑀻𑀢𑀺 𑀲𑀲𑀦𑁆𑀢𑀸𑀦𑀢𑁄 𑀩𑀳𑀺𑀧𑀺, 𑀧𑀭𑀲𑀦𑁆𑀢𑀸𑀦𑀓𑀸𑀬𑁂𑀧𑀻𑀢𑀺 𑀅𑀢𑁆𑀣𑁄. 𑀫𑀦𑀲𑀺𑀓𑀸𑀭𑀁 𑀉𑀧𑀲𑀁𑀳𑀭𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀁 𑀉𑀧𑀦𑁂𑀢𑀺. 𑀬𑀣𑀸 𑀇𑀤𑀁, 𑀢𑀣𑀸 𑀏𑀢𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀧𑀸𑀓𑀝𑀻𑀪𑀽𑀢𑁂𑀲𑀽𑀢𑀺 𑀬𑀣𑀸 𑀅𑀢𑁆𑀢𑀦𑁄 𑀓𑀸𑀬𑁂, 𑀏𑀯𑀁 𑀧𑀭𑁂𑀲𑀫𑁆𑀧𑀺 𑀓𑀸𑀬𑁂 𑀲𑀩𑁆𑀩𑁂𑀲𑀼 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀯𑀺𑀪𑀽𑀢𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀓𑀲𑀺𑀡𑁂𑀲𑀼 𑀯𑀟𑁆𑀠𑀦𑀲𑀤𑀺𑀲𑁄 𑀬𑁄𑀕𑀺𑀦𑁄 𑀪𑀸𑀯𑀦𑀸𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄.

𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀸𑀤𑀻𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀺𑀪𑀸𑀯𑀺𑀢𑀁 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀢𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑁄 ¶ 𑀓𑀸𑀬𑁂 𑀓𑁂𑀲𑀸𑀤𑀺𑀓𑁂 ‘‘𑀧𑀝𑀺𑀓𑁆𑀓𑀽𑀮𑀸 𑀧𑀝𑀺𑀓𑁆𑀓𑀽𑀮𑀸’’𑀢𑀺 𑀅𑀪𑀺𑀡𑁆𑀳𑀲𑁄 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀬𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑀤𑁆𑀥𑀲𑀫𑀣𑀸𑀦𑀺 𑀯𑀺𑀲𑀤𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀸𑀢𑀺𑀲𑀬𑀁 𑀩𑀮𑀧𑁆𑀧𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀮𑀤𑁆𑀥𑀽𑀧𑀢𑁆𑀣𑀫𑁆𑀪𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀧𑀝𑀼𑀢𑀭𑀸𑀦𑀺 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀲𑀤𑁆𑀥𑀺𑀁 𑀢𑀤𑁂𑀓𑀝𑁆𑀞𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺. 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑁄 𑀢𑀁𑀬𑁂𑀯 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑁄 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀓𑁆𑀓𑀫𑁂𑀦 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑀩𑁆𑀩𑀸𑀓𑀸𑀭𑀢𑁄𑀢𑀺 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸𑀧𑀺. 𑀲𑀸𑀢𑀺 𑀅𑀧𑁆𑀧𑀦𑀸.

𑀬𑀤𑀺 𑀧𑀦𑁂𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀺𑀬 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀺𑀚𑁆𑀛𑀢𑀺, 𑀅𑀣 𑀓𑀲𑁆𑀫𑀸 ‘‘𑀓𑀸𑀬𑀕𑀢𑀸𑀲𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀧𑀞𑀫𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺. 𑀦𑀸𑀦𑀸𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀲𑀼 𑀤𑁆𑀯𑀢𑁆𑀢𑀺𑀁𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀬 𑀲𑀢𑀺𑀬𑀸 𑀓𑀺𑀘𑁆𑀘𑀫𑁂𑀢𑁆𑀣 𑀲𑀸𑀢𑀺𑀲𑀬𑀦𑁆𑀢𑀺 𑀆𑀳 ‘‘𑀲𑀢𑀺𑀩𑀮𑁂𑀦 𑀇𑀚𑁆𑀛𑀦𑀢𑁄’’𑀢𑀺.

𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑁂𑀲𑀼 𑀘 𑀅𑀭𑀢𑀺𑀁, 𑀓𑀸𑀫𑀕𑀼𑀡𑁂𑀲𑀼 𑀘 𑀭𑀢𑀺𑀁 𑀲𑀳𑀢𑀺 𑀅𑀪𑀺𑀪𑀯𑀢𑀻𑀢𑀺 𑀅𑀭𑀢𑀺𑀭𑀢𑀺𑀲𑀳𑁄 𑀲𑀭𑀻𑀭𑀲𑀪𑀸𑀯𑀘𑀺𑀦𑁆𑀢𑀦𑁂𑀦 𑀅𑀦𑀪𑀺𑀭𑀢𑀺𑀬𑀸 𑀧𑀳𑀻𑀦𑀢𑁆𑀢𑀸. 𑀢𑀣𑀸 𑀓𑁄𑀝𑁆𑀞𑀸𑀲𑀪𑀸𑀯𑀦𑀸𑀬 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀪𑀬𑀪𑁂𑀭𑀯𑀁 𑀲𑀳𑀢𑀺, 𑀲𑀻𑀢𑀸𑀤𑀻𑀦𑀜𑁆𑀘 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀅𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀳𑀺 𑀧𑀼𑀭𑀺𑀲𑀲𑁆𑀲 𑀪𑀬𑀪𑁂𑀭𑀯𑀁 𑀳𑁄𑀢𑀺, 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀥𑀺𑀯𑀸𑀲𑀦𑀁. 𑀇𑀫𑀁 𑀧𑀦 𑀓𑁄𑀝𑁆𑀞𑀸𑀲𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀦 𑀓𑁂𑀯𑀮𑀁 𑀧𑀞𑀫𑀚𑁆𑀛𑀸𑀦𑀫𑀢𑁆𑀢𑀫𑁂𑀯, 𑀉𑀢𑁆𑀢𑀭𑀺𑀧𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀬𑀁 𑀢𑀁 𑀏𑀯𑀁 𑀧𑀲𑀁𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀬𑀲𑁆𑀫𑀸 ‘‘𑀓𑀣𑀁 𑀪𑀸𑀯𑀺𑀢𑁄’’𑀢𑀺𑀆𑀤𑀺𑀓𑀸𑀬 𑀧𑀼𑀘𑁆𑀙𑀸𑀧𑀸𑀴𑀺𑀬𑀸 𑀅𑀢𑁆𑀣𑁂 𑀯𑀺𑀪𑀸𑀯𑀺𑀢𑁂 𑀣𑁄𑀫𑀦𑀸𑀧𑀸𑀴𑀺𑀬𑀸𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀬𑁂𑀯 𑀳𑁄𑀢𑀺 𑀪𑁂𑀤𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀢𑀁 𑀮𑀗𑁆𑀖𑀺𑀢𑁆𑀯𑀸 ‘‘𑀓𑀣𑀁 𑀪𑀸𑀯𑀺𑀢𑁄 𑀘𑀸’’𑀢𑀺𑀆𑀤𑀺𑀦𑀸 𑀆𑀭𑀪𑀢𑀺. 𑀢𑀢𑁆𑀣 𑀳𑀺 𑀇𑀢𑁄 𑀧𑀲𑀁𑀲𑀸𑀪𑀸𑀯𑁄 ‘‘𑀅𑀬𑀫𑁆𑀧𑀺 𑀔𑁄’’𑀢𑀺 𑀯𑀘𑀦𑀜𑁆𑀘 𑀯𑀺𑀲𑁂𑀲𑁄. 𑀢𑁂𑀲𑀼 𑀧𑀲𑀁𑀲𑀸𑀪𑀸𑀯𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀧𑀲𑀁𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀲𑀁𑀲𑀸 𑀘 𑀢𑀢𑁆𑀣 𑀅𑀪𑀺𑀭𑀼𑀘𑀺𑀚𑀦𑀦𑁂𑀦 𑀉𑀲𑁆𑀲𑀸𑀳𑀦𑀢𑁆𑀣𑀸. 𑀢𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 ‘‘𑀪𑀕𑀯𑀸 𑀇𑀫𑀁 𑀲𑀫𑀸𑀥𑀺𑀁 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑀁𑀲𑀢𑀺, 𑀲𑀦𑁆𑀢𑁄 ¶ 𑀓𑀺𑀭𑀸𑀬𑀁 𑀲𑀫𑀸𑀥𑀺 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀧𑀸𑀧𑀥𑀫𑁆𑀫𑁂 𑀘 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 𑀲𑀜𑁆𑀚𑀸𑀢𑀸𑀪𑀺𑀭𑀼𑀘𑀬𑁄 𑀉𑀲𑁆𑀲𑀸𑀳𑀚𑀸𑀢𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. ‘‘𑀅𑀬𑀫𑁆𑀧𑀺 𑀔𑁄’’𑀢𑀺 𑀧𑀤𑀲𑁆𑀲 𑀬𑁂 𑀇𑀫𑁂 𑀫𑀬𑀸 𑀦𑀺𑀩𑁆𑀩𑀸𑀦𑀫𑀳𑀸𑀲𑀭𑀲𑁆𑀲 𑀑𑀢𑀭𑀡𑀢𑀺𑀢𑁆𑀣𑀪𑀽𑀢𑀸 𑀓𑀲𑀺𑀡𑀚𑁆𑀛𑀸𑀦𑀅𑀲𑀼𑀪𑀚𑁆𑀛𑀸𑀦𑀸𑀤𑀬𑁄 𑀤𑁂𑀲𑀺𑀢𑀸, 𑀦 𑀓𑁂𑀯𑀮𑀁 𑀢𑁂 𑀏𑀯, 𑀅𑀬𑀫𑁆𑀧𑀺 𑀔𑁄𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀽𑀢𑀁 𑀲𑀫𑀸𑀥𑀺𑀁 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀢𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀆𑀲𑀦𑁆𑀦𑀁, 𑀧𑀘𑁆𑀘𑀓𑁆𑀔𑀜𑁆𑀘 𑀓𑀭𑁄𑀦𑁆𑀢𑁄 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀏𑀯𑀫𑀸𑀳𑀸𑀢𑀺 𑀲𑀫𑁆𑀩𑀦𑁆𑀥𑀫𑀼𑀔𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄𑀴𑀲𑀯𑀢𑁆𑀣𑀼𑀓𑀦𑁆𑀢𑀺 𑀘𑀢𑀽𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲𑀝𑁆𑀞𑀸𑀦𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀧𑀸𑀴𑀺𑀬𑀸 𑀧𑀤𑀢𑁆𑀣𑁄 𑀧𑀺𑀡𑁆𑀟𑀢𑁆𑀣𑁄 𑀉𑀧𑀫𑀸 𑀘𑁄𑀤𑀦𑀸 𑀧𑀭𑀺𑀳𑀸𑀭𑁄 𑀧𑀬𑁄𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑁄. 𑀦𑀺𑀤𑁆𑀤𑁂𑀲𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀲𑁆𑀲𑁂𑀲𑀢𑁄 𑀯𑀺𑀢𑁆𑀣𑀸𑀭𑁄.

𑁨𑁧𑁬. 𑀓𑀣𑀦𑁆𑀢𑀺 𑀇𑀤𑀁 𑀧𑀼𑀘𑁆𑀙𑀦𑀸𑀓𑀸𑀭𑀯𑀺𑀪𑀸𑀯𑀦𑀧𑀤𑀁. 𑀧𑀼𑀘𑁆𑀙𑀸 𑀘𑁂𑀢𑁆𑀣 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀅𑀜𑁆𑀜𑀸𑀲𑀁 𑀅𑀲𑀫𑁆𑀪𑀯𑀢𑁄. 𑀲𑀸 𑀘 𑀉𑀧𑀭𑀺 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸𑀦𑀁 𑀲𑀩𑁆𑀩𑁂𑀲𑀁 𑀧𑀓𑀸𑀭𑀯𑀺𑀲𑁂𑀲𑀸𑀦𑀁 𑀆𑀫𑀲𑀦𑀯𑀲𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣𑀦𑁆𑀢𑀺…𑀧𑁂… 𑀓𑀫𑁆𑀬𑀢𑀸𑀧𑀼𑀘𑁆𑀙𑀸’’𑀢𑀺 𑀆𑀳. 𑀓𑀣𑀁 𑀩𑀳𑀼𑀮𑀻𑀓𑀢𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀣𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀩𑀳𑀼𑀮𑀻𑀓𑀸𑀭𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀩𑀳𑀼𑀮𑀻𑀓𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀢𑀣𑀸𑀧𑀼𑀝𑁆𑀞𑀥𑀫𑁆𑀫𑀦𑀺𑀤𑀲𑁆𑀲𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺. 𑀢𑀣𑀸 𑀲𑀦𑁆𑀢𑀪𑀸𑀯𑀸𑀤𑀬𑁄𑀧𑀺 𑀢𑀲𑁆𑀲 𑀬𑁂𑀳𑀺 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁂𑀳𑀺 𑀲𑀺𑀤𑁆𑀥𑀸, 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀣𑀁 𑀩𑀳𑀼𑀮𑀻𑀓𑀢𑁄…𑀧𑁂… 𑀯𑀽𑀧𑀲𑀫𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁.

‘‘𑀧𑀼𑀦 𑀘 𑀧𑀭𑀁, 𑀉𑀤𑀸𑀬𑀺, 𑀅𑀓𑁆𑀔𑀸𑀢𑀸 𑀫𑀬𑀸 𑀲𑀸𑀯𑀓𑀸𑀦𑀁 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑀸 𑀫𑁂 𑀲𑀸𑀯𑀓𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁪𑁭) 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸 𑀯𑀼𑀘𑁆𑀘𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀯𑀸’’𑀢𑀺 𑀆𑀳. 𑀢𑀢𑁆𑀣 𑀪𑀸𑀯𑀁 𑀯𑀺𑀚𑁆𑀚𑀫𑀸𑀦𑀢𑀁 𑀇𑀢𑁄 𑀕𑀢𑁄𑀢𑀺 𑀪𑀸𑀯𑀺𑀢𑁄, 𑀉𑀧𑁆𑀧𑀸𑀤𑀺𑀢𑁄 𑀧𑀝𑀺𑀮𑀤𑁆𑀥𑀫𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀦𑁆𑀦𑁄 𑀧𑀦 𑀮𑀤𑁆𑀥𑀸𑀲𑁂𑀯𑀦𑁄, 𑀪𑀸𑀯𑀺𑀢𑁄 𑀧𑀕𑀼𑀡𑀪𑀸𑀯𑀁 𑀆𑀧𑀸𑀤𑀺𑀢𑁄, 𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄 ¶ . 𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀤𑀻𑀖𑀭𑀲𑁆𑀲𑀸𑀤𑀺𑀯𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀘𑁆𑀙𑀺𑀚𑁆𑀚𑀕𑀸𑀳𑀺𑀓𑀸𑀬, 𑀢𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸𑀬, 𑀲𑀢𑀺𑀬𑀁 ¶ 𑀧𑀘𑁆𑀘𑀬𑀪𑀽𑀢𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀫𑀸𑀥𑀺𑀲𑁆𑀲 𑀲𑀢𑀺𑀬𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀯𑀘𑀦𑀢𑁄, 𑀤𑀼𑀢𑀺𑀬𑀲𑁆𑀫𑀺𑀁 𑀧𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑁄𑀧𑀺. 𑀉𑀧𑀘𑀸𑀭𑀚𑁆𑀛𑀸𑀦𑀲𑀳𑀕𑀢𑀸 𑀳𑀺 𑀲𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺. 𑀩𑀳𑀼𑀮𑀻𑀓𑀢𑁄𑀢𑀺 𑀩𑀳𑀼𑀮𑀁 𑀧𑀯𑀢𑁆𑀢𑀺𑀢𑁄, 𑀢𑁂𑀦 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀫𑀸𑀳. 𑀬𑁄 𑀳𑀺 𑀯𑀲𑀻𑀪𑀸𑀯𑀁 𑀆𑀧𑀸𑀤𑀺𑀢𑁄, 𑀲𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀢𑁄’’𑀢𑀺. 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧), ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀘 𑀏𑀯𑀫𑀸𑀤𑀻𑀲𑀼 𑀧𑀞𑀫𑀧𑀤𑁂 𑀯𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀆𑀳 ‘‘𑀉𑀪𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀉𑀪𑀬𑀧𑀤𑀦𑀺𑀬𑀫𑁂𑀦 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑀛𑀸𑀦𑀫𑀸𑀳. 𑀢𑀁 𑀳𑀺 𑀅𑀲𑀼𑀪𑁂𑀲𑀼 𑀬𑁄𑀕𑀓𑀫𑁆𑀫𑀪𑀸𑀯𑀢𑁄, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀘 ‘‘𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀓𑁂𑀯𑀮’’𑀦𑁆𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀛𑀸𑀦𑀧𑀝𑀺𑀯𑁂𑀥𑀯𑀲𑁂𑀦. 𑀛𑀸𑀦𑀜𑁆𑀳𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀇𑀚𑁆𑀛𑀦𑁆𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺, 𑀬𑀣𑀸𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀘𑀸𑀢𑀺 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀩𑀻𑀪𑀘𑁆𑀙𑀸𑀭𑀫𑁆𑀫𑀡𑀢𑁆𑀢𑀸. 𑀧𑀝𑀺𑀓𑁆𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦, 𑀮𑁂𑀲𑀦𑁆𑀢𑀭𑁂𑀦 𑀯𑀸. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀺𑀘𑁂𑀢𑀩𑁆𑀩𑀢𑀁 𑀧𑀢𑁆𑀢𑀁 𑀆𑀭𑀫𑁆𑀫𑀡𑀲𑁆𑀲 𑀧𑀭𑀫𑀲𑀼𑀔𑀼𑀫𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀦𑁆𑀢𑁂 𑀳𑀺 𑀲𑀦𑁆𑀦𑀺𑀲𑀺𑀦𑁆𑀦𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀲𑀬𑀫𑁆𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄’’𑀢𑀺, 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀤𑀻𑀧𑁂𑀢𑀩𑁆𑀩𑀸.

𑀦𑀸𑀲𑁆𑀲 𑀲𑀦𑁆𑀢𑀧𑀡𑀻𑀢𑀪𑀸𑀯𑀸𑀯𑀳𑀁 𑀓𑀺𑀜𑁆𑀘𑀺 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄. 𑀅𑀲𑁂𑀘𑀦𑀓𑀢𑁆𑀢𑀸 𑀅𑀦𑀸𑀲𑀺𑀢𑁆𑀢𑀓𑁄. 𑀅𑀦𑀸𑀲𑀺𑀢𑁆𑀢𑀓𑀢𑁆𑀢𑀸 𑀏𑀯 𑀅𑀩𑁆𑀩𑁄𑀓𑀺𑀡𑁆𑀡𑁄 𑀅𑀲𑀫𑁆𑀫𑀺𑀲𑁆𑀲𑁄 𑀧𑀭𑀺𑀓𑀫𑁆𑀫𑀸𑀤𑀺𑀦𑀸. 𑀢𑀢𑁄 𑀏𑀯 𑀧𑀸𑀝𑀺𑀬𑁂𑀓𑁆𑀓𑁄 𑀯𑀺𑀲𑀼𑀁𑀬𑁂𑀯𑁂𑀓𑁄. 𑀆𑀯𑁂𑀡𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀲𑀩𑁆𑀩𑀫𑁂𑀢𑀁 𑀲𑀭𑀲𑀢𑁄 𑀏𑀯 𑀲𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ¶ 𑀯𑀼𑀢𑁆𑀢𑀁. 𑀧𑀭𑀺𑀓𑀫𑁆𑀫𑀁 𑀯𑀸 𑀲𑀦𑁆𑀢𑀪𑀸𑀯𑀦𑀺𑀫𑀺𑀢𑁆𑀢𑀁, 𑀧𑀭𑀺𑀓𑀫𑁆𑀫𑀦𑁆𑀢𑀺 𑀘 𑀓𑀲𑀺𑀡𑀓𑀭𑀡𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀁, 𑀢𑀸𑀤𑀺𑀲𑀁 𑀇𑀥 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀭𑀲𑁆𑀲𑀸𑀤𑀢𑁆𑀢𑀸 𑀅𑀲𑀦𑁆𑀢𑀫𑀧𑁆𑀧𑀡𑀻𑀢𑀁 𑀲𑀺𑀬𑀸. 𑀉𑀧𑀘𑀸𑀭𑁂𑀦 𑀯𑀸 𑀦𑀢𑁆𑀣𑀺 𑀏𑀢𑁆𑀣 𑀲𑀦𑁆𑀢𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀉𑀧𑀘𑀸𑀭𑀓𑁆𑀔𑀡𑁂 𑀦𑀻𑀯𑀭𑀡𑀯𑀺𑀕𑀫𑁂𑀦, 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 ¶ 𑀘 𑀧𑀭𑁂𑀲𑀁 𑀲𑀦𑁆𑀢𑀢𑀸 𑀳𑁄𑀢𑀺, 𑀦 𑀏𑀯𑀫𑀺𑀫𑀲𑁆𑀲. 𑀅𑀬𑀁 𑀧𑀦 𑀆𑀤𑀺𑀲𑀫𑀦𑁆𑀦𑀸…𑀧𑁂… 𑀧𑀡𑀻𑀢𑁄 𑀘𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀅𑀦𑀸𑀲𑀺𑀢𑁆𑀢𑀓𑁄𑀢𑀺 𑀉𑀧𑀲𑁂𑀘𑀦𑁂𑀦 𑀦 𑀆𑀲𑀺𑀢𑁆𑀢𑀓𑁄. 𑀢𑁂𑀦𑀸𑀳 ‘‘𑀑𑀚𑀯𑀦𑁆𑀢𑁄’’𑀢𑀺, 𑀑𑀚𑀯𑀦𑁆𑀢𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀫𑀥𑀽𑀭𑁄𑀢𑀺 𑀇𑀝𑁆𑀞𑁄, 𑀘𑁂𑀢𑀲𑀺𑀓𑀲𑀼𑀔𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦, 𑀉𑀧𑁂𑀓𑁆𑀔𑀸𑀬 𑀯𑀸 𑀲𑀦𑁆𑀢𑀪𑀸𑀯𑁂𑀦 𑀲𑀼𑀔𑀕𑀢𑀺𑀓𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀲𑀭𑀻𑀭𑀢𑀸𑀯𑀲𑁂𑀦 𑀧𑀦 𑀓𑀸𑀬𑀺𑀓𑀲𑀼𑀔𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 𑀤𑀝𑁆𑀞𑀩𑁆𑀩𑀁, 𑀢𑀜𑁆𑀘 𑀔𑁄 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁂. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂’’𑀢𑀺 𑀇𑀤𑀁 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀓𑁆𑀔𑀫𑁆𑀪𑀺𑀢𑁂𑀢𑀺 𑀛𑀸𑀦𑁂𑀦 𑀲𑀓𑀲𑀦𑁆𑀢𑀸𑀦𑀢𑁄 𑀅𑀦𑀻𑀳𑀝𑁂 𑀅𑀧𑁆𑀧𑀳𑀻𑀦𑁂. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀢𑀺 𑀅𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸, 𑀢𑀢𑁄 𑀲𑀫𑁆𑀪𑀽𑀢𑁂. 𑀅𑀯𑀺𑀚𑁆𑀚𑀸𑀧𑀼𑀩𑁆𑀩𑀗𑁆𑀕𑀫𑀸 𑀳𑀺 𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑀸. 𑀔𑀡𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀦𑁂𑀯. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀏𑀢𑁆𑀣 𑀅𑀦𑁆𑀢𑀭𑀥𑀸𑀧𑀦𑀁 𑀯𑀺𑀦𑀸𑀲𑀦𑀁, 𑀢𑀁 𑀧𑀦 𑀛𑀸𑀦𑀓𑀢𑁆𑀢𑀼𑀓𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀓𑁆𑀔𑀫𑁆𑀪𑁂𑀢𑀻’’𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀯𑀺𑀲𑁂𑀲𑁂𑀦 𑀉𑀧𑀲𑀫𑁂𑀢𑀺. 𑀯𑀺𑀲𑁂𑀲𑁂𑀦 𑀉𑀧𑀲𑀫𑀦𑀁 𑀧𑀦 𑀲𑀫𑁆𑀫𑀤𑁂𑀯 𑀉𑀧𑀲𑀫𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀻’’𑀢𑀺.