📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀲𑀼𑀤𑁆𑀥𑀺𑀫𑀕𑁆𑀕-𑀫𑀳𑀸𑀝𑀻𑀓𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁧𑁨. 𑀇𑀤𑁆𑀥𑀺𑀯𑀺𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀅𑀪𑀺𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁩𑁬𑁫. 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 ¶ ¶ 𑀅𑀦𑀦𑁆𑀢𑀭𑀲𑀫𑀸𑀥𑀺𑀓𑀣𑀸𑀬 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀢𑀁 𑀤𑀻𑀧𑁂𑀦𑁆𑀢𑁄 ‘‘𑀅𑀬𑀁 𑀲𑀫𑀸𑀥𑀺𑀪𑀸𑀯𑀦𑀸’’𑀢𑀺 𑀆𑀳. ‘‘𑀅𑀪𑀺𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀼𑀁 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀧𑀬𑁄𑀚𑀦𑀯𑀺𑀲𑁂𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀣𑀺𑀭𑀢𑀭𑀪𑀸𑀯𑁄, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀼𑀔𑀢𑀸 𑀘 𑀲𑀫𑀸𑀥𑀺𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄 𑀏𑀯, 𑀢𑀣𑀸𑀧𑀺 𑀧𑀜𑁆𑀘 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀪𑀸𑀯𑁂𑀦 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸𑀢𑀺 𑀢𑀸𑀲𑀁𑀬𑁂𑀯 𑀯𑀲𑁂𑀦 𑀬𑁄𑀕𑀺𑀦𑁄 𑀅𑀥𑀺𑀕𑀢𑀸𑀦𑀺𑀲𑀁𑀲𑀢𑀸 𑀯𑀼𑀢𑁆𑀢𑀸, 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀣𑀺𑀭𑀢𑀭𑀢𑀸 𑀯𑀼𑀢𑁆𑀢𑀸. 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀯𑀲𑀻𑀪𑀸𑀯𑁄𑀧𑀺 𑀲𑀫𑀸𑀥𑀺𑀲𑁆𑀲𑁂𑀯 𑀯𑀲𑀻𑀪𑀸𑀯𑁄, 𑀢𑀣𑀸 𑀘 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪) 𑀯𑀘𑀦𑀢𑁄 ¶ ‘‘𑀲𑀼𑀔𑁂𑀦𑁂𑀯 𑀧𑀜𑁆𑀜𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀫𑀸𑀥𑀺𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀮𑀸𑀪𑁄 𑀣𑀺𑀭𑀢𑀭𑀢𑀸, 𑀲𑀼𑀔𑁂𑀦𑁂𑀯 𑀘 𑀧𑀜𑁆𑀜𑀸𑀪𑀸𑀯𑀦𑀸 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀓𑀣𑀁 𑀢𑀸𑀯 𑀆𑀭𑀪𑀺𑀲𑁆𑀲𑀸𑀫, 𑀧𑀜𑁆𑀜𑀸𑀪𑀸𑀯𑀦𑀸𑀬 𑀑𑀓𑀸𑀲𑁂 𑀲𑀫𑁆𑀧𑀢𑁆𑀢𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀪𑀕𑀯𑀢𑀸 𑀧𑀜𑁆𑀘 𑀮𑁄𑀓𑀺𑀓𑀸𑀪𑀺𑀜𑁆𑀜𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀫𑀢𑁆𑀢𑀫𑁂𑀯 𑀇𑀥 𑀲𑀸𑀲𑀦𑁂 𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀧𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 𑀉𑀢𑁆𑀢𑀭𑀼𑀢𑁆𑀢𑀭𑀺𑀧𑀡𑀻𑀢𑀧𑀡𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀣𑀜𑁆𑀘.

𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀦𑁆𑀢𑀺 ¶ 𑀇𑀤𑁆𑀥𑀺𑀲𑀗𑁆𑀔𑀸𑀢𑀁 𑀧𑀓𑀢𑀺𑀯𑀡𑁆𑀡𑀚𑀳𑀦𑀓𑀺𑀭𑀺𑀬𑀁, 𑀇𑀤𑀁 𑀇𑀤𑁆𑀥𑀻𑀲𑀼 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸 𑀧𑀥𑀸𑀦𑀢𑀸𑀬 𑀯𑀼𑀢𑁆𑀢𑀁, 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀦𑀜𑁆𑀘𑀸𑀢𑀺 𑀏𑀯𑀁 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀓𑀼𑀩𑁆𑀩𑀦𑀲𑁆𑀲 𑀯𑀺𑀲𑀼𑀁 𑀕𑀳𑀡𑀫𑁆𑀧𑀺 𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯 𑀤𑀝𑁆𑀞𑀩𑁆𑀩𑀁. 𑀆𑀓𑀸𑀲𑀓𑀲𑀺𑀡𑀯𑀲𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦 𑀲𑀫𑁆𑀪𑀯𑀦𑁆𑀢𑀺, 𑀆𑀮𑁄𑀓𑀓𑀲𑀺𑀡𑀜𑁆𑀘 𑀑𑀤𑀸𑀢𑀓𑀲𑀺𑀡𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 ‘‘𑀑𑀤𑀸𑀢𑀓𑀲𑀺𑀡𑀧𑀭𑀺𑀬𑀦𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀓𑀲𑀺𑀡𑀸𑀦𑀼𑀮𑁄𑀫𑀸𑀤𑀺𑀘𑀺𑀢𑁆𑀢𑀧𑀭𑀺𑀤𑀫𑀦𑀯𑀺𑀥𑀺𑀦𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀆𑀓𑀸𑀲𑀦𑀺𑀫𑁆𑀫𑀸𑀦𑀸𑀤𑀺𑀅𑀢𑁆𑀣𑀁 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀅𑀝𑁆𑀞 𑀅𑀝𑁆𑀞𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀓𑀲𑀺𑀡𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀝𑁆𑀞 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀓𑀲𑀺𑀡𑀸𑀦𑀼𑀮𑁄𑀫𑀢𑁄𑀢𑀺 𑀓𑀲𑀺𑀡𑀧𑀝𑀺𑀧𑀸𑀝𑀺𑀢𑁄, 𑀧𑀝𑀺𑀧𑀸𑀝𑀺 𑀘 𑀤𑁂𑀲𑀦𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀛𑀸𑀦𑀸𑀦𑀼𑀮𑁄𑀫𑁄 𑀧𑀦 𑀧𑀝𑀺𑀧𑀢𑁆𑀢𑀺𑀯𑀲𑁂𑀦𑀧𑀺. 𑀉𑀓𑁆𑀓𑀫𑀦𑀁 𑀉𑀓𑁆𑀓𑀦𑁆𑀢𑀁, 𑀉𑀓𑁆𑀓𑀦𑁆𑀢𑀫𑁂𑀯 𑀉𑀓𑁆𑀓𑀦𑁆𑀢𑀺𑀓𑀁, 𑀛𑀸𑀦𑀲𑁆𑀲 𑀉𑀓𑁆𑀓𑀦𑁆𑀢𑀺𑀓𑀁 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀁, 𑀢𑀢𑁄, 𑀛𑀸𑀦𑀮𑀗𑁆𑀖𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀢𑁄 𑀅𑀗𑁆𑀕𑀸𑀢𑀺𑀓𑁆𑀓𑀫𑀢𑁄. 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑀩𑁆𑀩𑀁 𑀬𑀤𑀺𑀘𑁆𑀙𑀓𑀁 𑀬𑀢𑁆𑀣𑀺𑀘𑁆𑀙𑀓𑀁 𑀛𑀸𑀦𑀸𑀦𑀁 𑀲𑀫𑀸𑀧𑀚𑁆𑀚𑀦𑀸𑀤𑀺𑀲𑀼𑀔𑀢𑁆𑀣𑀁, 𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀲𑀮𑁆𑀮𑀓𑁆𑀔𑀡𑀢𑁆𑀣𑀁. 𑀏𑀯𑀜𑁆𑀳𑀺𑀲𑁆𑀲 𑀢𑀢𑁆𑀣 𑀯𑀺𑀲𑀯𑀺𑀢𑀸 𑀲𑀫𑀺𑀚𑁆𑀛𑀢𑀻𑀢𑀺.

𑁩𑁬𑁬. 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀓𑀺𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀉𑀤𑀸𑀳𑀼 𑀏𑀓𑁂𑀓𑀦𑁆𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀢𑁄 𑀯𑀺𑀲𑁂𑀲𑁄 𑀦 𑀲𑀺𑀬𑀸, 𑀅𑀣 𑀏𑀓𑁂𑀓𑀁 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄. 𑀦𑀸𑀬𑀁 𑀤𑁄𑀲𑁄 𑀆𑀪𑁄𑀕𑀯𑀲𑁂𑀦 𑀢𑁂𑀲𑀁 𑀯𑀺𑀲𑁂𑀲𑀲𑀺𑀤𑁆𑀥𑀺𑀢𑁄. 𑀬𑀤𑀸 𑀳𑀺 𑀓𑀲𑀺𑀡𑀸𑀦𑀼𑀮𑁄𑀫𑀫𑁂𑀯 𑀆𑀪𑀼𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀓𑀲𑀺𑀡𑁂 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀢𑀺, 𑀦 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀁, 𑀢𑀤𑀸 𑀓𑀲𑀺𑀡𑀸𑀦𑀼𑀮𑁄𑀫𑁄. 𑀬𑀤𑀸 𑀧𑀦 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀁 𑀆𑀪𑀼𑀚𑀺𑀢𑁆𑀯𑀸 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀢𑀺, 𑀢𑀤𑀸 𑀅𑀗𑁆𑀕𑀲𑀗𑁆𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸 𑀦𑀬𑁂𑀦 𑀓𑀲𑀺𑀡𑀸𑀦𑀼𑀮𑁄𑀫𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀓𑀲𑀺𑀡𑀸𑀦𑀼𑀮𑁄𑀫𑀁 𑀦𑀸𑀫 𑀘𑀺𑀢𑁆𑀢𑀧𑀭𑀺𑀤𑀫𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀣𑁂𑀯𑀸𑀢𑀺 ¶ ‘‘𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀻’’𑀢𑀺 𑀏𑀢𑀲𑁆𑀲 𑀉𑀧𑀲𑀁𑀳𑀸𑀭𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀧𑀝𑀺𑀮𑁄𑀫𑀢𑁄 𑀘𑁂𑀢𑁆𑀣 𑀧𑀝𑀺𑀧𑀸𑀝𑀺. 𑀢𑁂𑀦𑀸𑀳 ‘‘𑀧𑀝𑀺𑀮𑁄𑀫𑀓𑁆𑀓𑀫𑁂𑀦𑀸’’𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀞𑀫𑀁 𑀑𑀤𑀸𑀢𑀓𑀲𑀺𑀡𑁂 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀮𑁄𑀳𑀺𑀢𑀓𑀲𑀺𑀡𑁂𑀢𑀺 𑀬𑀸𑀯 𑀧𑀣𑀯𑀻𑀓𑀲𑀺𑀡𑀸 𑀯𑀢𑁆𑀢𑀩𑁆𑀩𑀸.

𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑀦𑁆𑀢𑀺 ‘‘𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁 𑀩𑀳𑀼𑀮𑀸𑀓𑀸𑀭𑀫𑀸𑀳.

𑀢𑀢𑁆𑀣𑁂𑀯𑀸𑀢𑀺 ¶ 𑀧𑀣𑀯𑀻𑀓𑀲𑀺𑀡𑁂𑀬𑁂𑀯. 𑀢𑀢𑁄𑀢𑀺 𑀧𑀘𑁆𑀙𑀸 𑀢𑀢𑀺𑀬𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀁. 𑀢𑀤𑁂𑀯𑀸𑀢𑀺 𑀧𑀣𑀯𑀻𑀓𑀲𑀺𑀡𑀫𑁂𑀯. 𑀢𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀢𑀢𑁄 𑀧𑀣𑀯𑀻𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀺𑀢𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀢𑀁 𑀮𑀗𑁆𑀖𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑁂 𑀧𑀯𑀢𑁆𑀢𑀺𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀧𑀣𑀯𑀻𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀓𑀲𑀺𑀡𑀁 𑀧𑀣𑀯𑀻𑀓𑀲𑀺𑀡𑀧𑀓𑁆𑀔𑀺𑀓𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀲𑀺𑀡𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀅𑀣 𑀯𑀸 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀓𑀲𑁆𑀲𑀘𑀺 𑀉𑀓𑁆𑀓𑀫𑀦𑀁 𑀇𑀥 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀁 𑀦𑀸𑀫𑀸𑀢𑀺 𑀆𑀳 ‘‘𑀓𑀲𑀺𑀡𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀦𑁆𑀢𑀺 𑀏𑀢𑁆𑀣 𑀇𑀘𑁆𑀙𑀺𑀢𑀁 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀁, 𑀉𑀓𑁆𑀓𑀫𑀦𑀲𑁆𑀲 𑀘 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀓𑀲𑀺𑀡’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀧𑀓𑀸𑀭𑀁 𑀲𑀳 𑀦𑀺𑀲𑁆𑀲𑀬𑁂𑀦 𑀲𑁂𑀲𑀓𑀲𑀺𑀡𑁂𑀲𑀼 𑀅𑀢𑀺𑀤𑀺𑀲𑀦𑁆𑀢𑁄 ‘‘𑀏𑀯𑀁 𑀆𑀧𑁄𑀓𑀲𑀺𑀡𑀸𑀤𑀺…𑀧𑁂… 𑀓𑀸𑀢𑀩𑁆𑀩𑀸’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺𑀆𑀤𑀺. 𑀬𑀣𑀸 𑀧𑀞𑀫𑀚𑁆𑀛𑀸𑀦𑀫𑀽𑀮𑀓𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀫𑀽𑀮𑀓𑀫𑁆𑀧𑀺 𑀢𑀁 𑀬𑀣𑀸𑀭𑀳𑀁 𑀤𑀲𑁆𑀲𑁂𑀢𑀩𑁆𑀩𑀁.

𑀢𑀤𑁂𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀫𑁂𑀯. 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑁂𑀧𑀺 𑀆𑀧𑁄𑀓𑀲𑀺𑀡𑀸𑀤𑀺𑀫𑀽𑀮𑀺𑀓𑀸 𑀬𑁄𑀚𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀢𑀩𑁆𑀩𑀸, 𑀢𑀣𑀸 𑀬𑀣𑀸𑀭𑀳𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀫𑀽𑀮𑀺𑀓𑀸.

𑀮𑁄𑀳𑀺𑀢𑀓𑀲𑀺𑀡𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀮𑁄𑀳𑀺𑀢𑀓𑀲𑀺𑀡𑀁 𑀆𑀯𑀚𑁆𑀚𑁂𑀦𑁆𑀢𑁄 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀢𑀲𑁆𑀲 𑀉𑀕𑁆𑀖𑀸𑀝𑀦𑁂𑀦 𑀉𑀧𑀝𑁆𑀞𑀺𑀢𑁂 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀅𑀫𑀦𑀲𑀺𑀓𑀸𑀭𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀧𑀼𑀩𑁆𑀩𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑀕𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺.

𑀇𑀢𑀭𑁂𑀲𑀦𑁆𑀢𑀺 𑀅𑀯𑀲𑀺𑀝𑁆𑀞𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁. 𑀦 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀅𑀗𑁆𑀕𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀢𑀸𑀦𑀺 ¶ 𑀧𑀣𑀯𑀻𑀓𑀲𑀺𑀡𑁂 𑀧𑀯𑀢𑁆𑀢𑀦𑁆𑀢𑀺. 𑀬𑀁 𑀧𑀦 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀯𑀘𑀦𑁂 ‘‘𑀦𑀻𑀮𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀬𑀣𑀸𑀮𑀸𑀪𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀭𑀺𑀬𑀸𑀬𑁂𑀦 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀬𑀣𑀸 𑀅𑀗𑁆𑀕𑀲𑀗𑁆𑀓𑀦𑁆𑀢𑀺 𑀭𑀽𑀧𑀚𑁆𑀛𑀸𑀦𑁂𑀲𑀼 𑀏𑀯 𑀮𑀩𑁆𑀪𑀢𑀺, 𑀏𑀯𑀁 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀏𑀯 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺. 𑀢𑀲𑁆𑀲 𑀢𑀲𑁆𑀲𑁂𑀯 𑀳𑀺 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀭𑁂 𑀧𑀯𑀢𑁆𑀢𑀺 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀓𑀲𑀺𑀡𑁂𑀲𑀼 𑀏𑀓𑀲𑁆𑀲𑁂𑀯 𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀁 𑀦𑀸𑀫𑀸’’𑀢𑀺.

𑀬𑀣𑀸 ¶ 𑀧𑀦 ‘‘𑀲𑀩𑁆𑀩𑀓𑀲𑀺𑀡𑁂𑀲𑀽’’𑀢𑀺 𑀇𑀫𑀺𑀦𑀸 𑀆𑀓𑀸𑀲𑀯𑀺𑀜𑁆𑀜𑀸𑀡𑀓𑀲𑀺𑀡𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀇𑀥 𑀅𑀝𑁆𑀞𑀦𑁆𑀦𑀁𑀬𑁂𑀯 𑀓𑀲𑀺𑀡𑀸𑀦𑀁 𑀅𑀥𑀺𑀕𑀢𑀢𑁆𑀢𑀸, 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀅𑀭𑀽𑀧𑀚𑁆𑀛𑀸𑀦𑀁 ‘‘𑀏𑀓𑀁 𑀛𑀸𑀦’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀁 𑀯𑀲𑁂𑀦 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀻𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀬𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁, 𑀢𑀤𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀻𑀢𑀓𑀲𑀺𑀡𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀤𑁆𑀯𑀬𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀦𑁆𑀢𑀭𑀺𑀓𑀯𑀲𑁂𑀦𑀸𑀢𑀺 𑀅𑀜𑁆𑀜𑀢𑁆𑀣𑁄 𑀅𑀦𑁆𑀢𑀭-𑀲𑀤𑁆𑀤𑁄. 𑀅𑀦𑁆𑀢𑀭𑀫𑁂𑀯 𑀅𑀦𑁆𑀢𑀭𑀺𑀓𑀁, 𑀏𑀓𑀚𑁆𑀛𑀁 𑀅𑀦𑁆𑀢𑀭𑀺𑀓𑀁 𑀏𑀢𑀲𑁆𑀫𑀺𑀦𑁆𑀢𑀺 𑀏𑀓𑀦𑁆𑀢𑀭𑀺𑀓𑀁, 𑀛𑀸𑀦𑀲𑀫𑀸𑀧𑀚𑁆𑀚𑀦𑀁, 𑀢𑀲𑁆𑀲 𑀯𑀲𑁂𑀦. 𑀬𑀣𑀸 𑀅𑀗𑁆𑀕𑀸𑀦𑀁, 𑀆𑀭𑀫𑁆𑀫𑀡𑀲𑁆𑀲 𑀘 𑀏𑀓𑀚𑁆𑀛𑀁 𑀅𑀜𑁆𑀜𑀣𑀸 𑀯𑀺𑀲𑁂𑀲𑁄 𑀳𑁄𑀢𑀺, 𑀢𑀣𑀸 𑀲𑀫𑀸𑀧𑀚𑁆𑀚𑀦𑀯𑀲𑁂𑀦𑀸𑀢𑀺. 𑀲𑁄 𑀧𑀦 𑀯𑀺𑀲𑁂𑀲𑁄 𑀳𑁂𑀝𑁆𑀞𑀺𑀫𑀸𑀦𑀁 𑀢𑁂𑀲𑀁 𑀅𑀗𑁆𑀕𑀸𑀭𑀫𑁆𑀫𑀡𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀯𑀲𑁂𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀦𑁆𑀢𑀭𑀺𑀓𑀯𑀲𑁂𑀦 𑀅𑀗𑁆𑀕𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀜𑁆𑀘 𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀇𑀤𑀁 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀅𑀗𑁆𑀕𑁂𑀲𑀼, ‘‘𑀇𑀤𑀁 𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑁂𑀲𑀼 𑀘 𑀯𑀯𑀢𑁆𑀣𑀸𑀧𑀺𑀢𑁂𑀲𑀼 𑀏𑀓𑀚𑁆𑀛𑀁 𑀢𑁂𑀲𑀁 𑀯𑀯𑀢𑁆𑀣𑀸𑀧𑀦𑁂 𑀦 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀅𑀬𑀁 𑀯𑀺𑀥𑀺 𑀦𑀸𑀪𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀸𑀤𑀻𑀲𑀼 𑀧𑀝𑀺𑀮𑁄𑀫𑀓𑁆𑀓𑀫𑁂𑀦, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀘 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀫𑁆𑀧𑀺 𑀛𑀸𑀦𑀸𑀤𑀻𑀦𑀁 𑀉𑀓𑁆𑀓𑀫𑀦𑀁 𑀦 𑀉𑀤𑁆𑀥𑀝𑀁, 𑀢𑁂𑀳𑀺 𑀦𑀬𑁂𑀳𑀺 𑀯𑀺𑀦𑀸𑀧𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁 𑀇𑀚𑁆𑀛𑀢𑀻𑀢𑀺 𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁 𑀯𑀸 𑀢𑁂 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁬𑁭. 𑀅𑀪𑀸𑀯𑀺𑀢𑀪𑀸𑀯𑀦𑁄 𑀛𑀸𑀦𑀸𑀪𑀺𑀜𑁆𑀜𑀸𑀲𑀼 𑀅𑀓𑀢𑀸𑀥𑀺𑀓𑀸𑀭𑁄. 𑀢𑀢𑁆𑀣 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑁄𑀧𑀻𑀢𑀺 𑀓𑁂𑀘𑀺. 𑀆𑀤𑀺𑀪𑀽𑀢𑀁 𑀬𑁄𑀕𑀓𑀫𑁆𑀫𑀁 𑀆𑀤𑀺𑀓𑀫𑁆𑀫𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀤𑀺𑀓𑀫𑁆𑀫𑀺𑀓𑁄, 𑀧𑀼𑀩𑁆𑀩𑁂 𑀅𑀓𑀢𑀧𑀭𑀺𑀘𑀬𑁄 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄. 𑀢𑁂𑀦𑀸𑀳 ‘‘𑀬𑁄𑀕𑀸𑀯𑀘𑀭𑁄’’𑀢𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑁆𑀧𑀺 𑀪𑀸𑀭𑁄𑀢𑀺 𑀤𑁄𑀲𑀯𑀺𑀯𑀚𑁆𑀚𑀦𑀸𑀤𑀺𑀯𑀺𑀥𑀺𑀦𑀸 𑀓𑀲𑀺𑀡𑀫𑀡𑁆𑀟𑀮𑁂 𑀧𑀝𑀺𑀧𑀢𑁆𑀢𑀺 𑀬𑀸𑀯 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀁, 𑀢𑀫𑁆𑀧𑀺 𑀦𑀸𑀫 𑀪𑀸𑀭𑁄, 𑀧𑀕𑁂𑀯 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀁 ¶ . 𑀢𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁, 𑀪𑀸𑀯𑀦𑀜𑁆𑀘 𑀯𑀟𑁆𑀠𑁂𑀢𑁆𑀯𑀸. 𑀦 𑀳𑀺 𑀪𑀸𑀯𑀦𑀸𑀬 𑀯𑀺𑀦𑀸𑀯 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀁 𑀮𑀩𑁆𑀪𑀢𑀺. 𑀓𑁂𑀘𑀺 𑀉𑀧𑀘𑀸𑀭𑀲𑀫𑀸𑀥𑀺𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀤𑀺𑀲𑀸𑀧𑀺 𑀩𑀳𑀽 𑀳𑁄𑀦𑁆𑀢𑁂𑀯𑀸𑀢𑀺 𑀆𑀳 ‘‘𑀅𑀧𑁆𑀧𑀦𑀸𑀥𑀺𑀕𑀫𑁄 𑀪𑀸𑀭𑁄’’𑀢𑀺. 𑀅𑀧𑁆𑀧𑀦𑀸𑀥𑀺𑀕𑀫𑁄𑀢𑀺 𑀯𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀥𑀺𑀕𑀫𑀫𑀸𑀳. 𑀅𑀜𑁆𑀜𑁄𑀯 𑀲𑀫𑀸𑀧𑀢𑁆𑀢𑀻𑀦𑀁 𑀉𑀧𑀦𑀺𑀲𑁆𑀲𑀬𑁄 ¶ , 𑀅𑀜𑁆𑀜𑁄 𑀅𑀪𑀺𑀜𑁆𑀜𑀸𑀦𑀦𑁆𑀢𑀺 𑀆𑀳 ‘‘𑀧𑀭𑀺𑀤𑀫𑀺𑀢𑀘𑀺𑀢𑁆𑀢𑀲𑁆𑀲𑀸𑀧𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀦𑀸𑀫 𑀪𑀸𑀭𑁄’’𑀢𑀺. 𑀔𑀺𑀧𑁆𑀧𑀁 𑀦𑀺𑀲𑀦𑁆𑀢𑀺 𑀦𑀺𑀲𑀸𑀫𑀦𑀁 𑀛𑀸𑀦𑀘𑀓𑁆𑀔𑀼𑀦𑀸 𑀧𑀣𑀯𑀻𑀓𑀲𑀺𑀡𑀸𑀤𑀺𑀛𑀸𑀦𑀸𑀭𑀫𑁆𑀫𑀡𑀲𑁆𑀲 𑀤𑀲𑁆𑀲𑀦𑀁 𑀏𑀢𑀲𑁆𑀲𑀸𑀢𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺, 𑀲𑀻𑀖𑀢𑀭𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀸, 𑀢𑀲𑁆𑀲 𑀪𑀸𑀯𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁄. 𑀅𑀫𑁆𑀩𑀢𑀭𑀼𑀦𑀺𑀘𑀺𑀢𑀁 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀸𑀤𑀻𑀳𑀺 𑀑𑀢𑀺𑀡𑁆𑀡𑀝𑁆𑀞𑀸𑀦𑀁 𑀣𑁂𑀭𑀫𑁆𑀩𑀢𑁆𑀣𑀮𑀁. 𑀬𑀣𑀸 𑀧𑀝𑀺𑀧𑀓𑁆𑀔𑀯𑀺𑀚𑀬𑀸𑀬 𑀬𑁄𑀥𑀸𑀚𑀻𑀯𑀸 𑀦𑀺𑀫𑁆𑀫𑀮𑀫𑁂𑀯 𑀅𑀲𑀺𑀢𑁄𑀫𑀭𑀸𑀤𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀏𑀯𑀁 𑀪𑀺𑀓𑁆𑀔𑀼𑀦𑀸𑀧𑀺 𑀓𑀺𑀮𑁂𑀲𑀯𑀺𑀚𑀬𑀸𑀬 𑀦𑀺𑀫𑁆𑀫𑀮𑀸𑀯 𑀛𑀸𑀦𑀸𑀪𑀺𑀜𑁆𑀜𑀸 𑀯𑀴𑀜𑁆𑀚𑀺𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀢𑀺𑀝𑁆𑀞𑀸𑀪𑀸𑀯𑁄𑀢𑀺 𑀇𑀥 𑀧𑀭𑀲𑁆𑀲 𑀉𑀧𑀤𑁆𑀤𑀯𑀽𑀧𑀲𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀳𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑀢𑁄𑀧𑀺 𑀕𑀭𑀼𑀢𑀭𑀁 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀯𑀺𑀥𑀸𑀢𑀩𑁆𑀩𑀢𑁄 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀢𑁆𑀢𑀸. 𑀢𑀁 𑀧𑀦 𑀭𑀓𑁆𑀔𑀺𑀢𑀢𑁆𑀣𑁂𑀭𑀦𑀺𑀤𑀲𑁆𑀲𑀦𑁂𑀦𑁂𑀯 𑀲𑀺𑀤𑁆𑀥𑀫𑁆𑀧𑀺 𑀢𑀢𑁄 𑀕𑀭𑀼𑀢𑀭𑁂𑀦 𑀅𑀗𑁆𑀕𑀸𑀭𑀯𑀲𑁆𑀲𑀧𑀭𑀺𑀢𑁆𑀢𑀸𑀡𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀕𑀺𑀭𑀺𑀪𑀡𑁆𑀟𑀯𑀸𑀳𑀦𑀧𑀽𑀚𑀸𑀬…𑀧𑁂… 𑀣𑁂𑀭𑁄 𑀯𑀺𑀬𑀸’’𑀢𑀺 𑀆𑀳. 𑀕𑀺𑀭𑀺𑀪𑀡𑁆𑀟𑀯𑀸𑀳𑀦𑀧𑀽𑀚𑀸 𑀦𑀸𑀫 𑀘𑁂𑀢𑀺𑀬𑀕𑀺𑀭𑀺𑀫𑀸𑀤𑀺𑀁 𑀓𑀢𑁆𑀯𑀸 𑀲𑀓𑀮𑀤𑀻𑀧𑁂, 𑀲𑀫𑀼𑀤𑁆𑀤𑁂 𑀘 𑀬𑀸𑀯 𑀬𑁄𑀚𑀦𑀸 𑀫𑀳𑀢𑀻 𑀤𑀻𑀧𑀧𑀽𑀚𑀸. 𑀧𑀣𑀯𑀺𑀁 𑀫𑀸𑀧𑁂𑀢𑁆𑀯𑀸𑀢𑀺 𑀫𑀸𑀭𑁂𑀦 𑀧𑀯𑀢𑁆𑀢𑀺𑀢𑀁 𑀅𑀗𑁆𑀕𑀸𑀭𑀯𑀲𑁆𑀲𑀁 𑀨𑀼𑀮𑀺𑀗𑁆𑀕𑀫𑀢𑁆𑀢𑁂𑀦𑀧𑀺 𑀬𑀸𑀯 𑀫𑀦𑀼𑀲𑁆𑀲𑁂 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯𑀤𑁂𑀯 𑀆𑀓𑀸𑀲𑁂 𑀧𑀣𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸.

𑀩𑀮𑀯𑀧𑀼𑀩𑁆𑀩𑀬𑁄𑀕𑀸𑀦𑀦𑁆𑀢𑀺 𑀕𑀭𑀼𑀢𑀭𑀽𑀧𑀦𑀺𑀲𑁆𑀲𑀬𑀸𑀦𑀁, 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀳𑁂𑀢𑀼𑀪𑀽𑀢𑀫𑀳𑀸𑀪𑀺𑀦𑀻𑀳𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀲𑀸𑀯𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀏𑀓𑀘𑁆𑀘𑁂 𑀫𑀳𑀸𑀲𑀸𑀯𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀸𑀯𑀦𑀸𑀦𑀼𑀓𑁆𑀓𑀫𑁄 𑀬𑀣𑀸𑀯𑀼𑀢𑁆𑀢𑀁 𑀘𑀺𑀢𑁆𑀢𑀧𑀭𑀺𑀤𑀫𑀦𑀁. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀞𑀸𑀦𑀸𑀞𑀸𑀦𑀜𑀸𑀡𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀲𑁂𑀲𑀸𑀪𑀺𑀜𑁆𑀜𑀸𑀦𑀫𑁂𑀯. 𑀲𑀸𑀯𑀓𑀸𑀦𑀫𑁆𑀧𑀺 𑀳𑀺 𑀞𑀸𑀦𑀸𑀞𑀸𑀦𑀜𑀸𑀡𑀸𑀤𑀻𑀦𑀺 𑀧𑀤𑁂𑀲𑀯𑀲𑁂𑀦 𑀇𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀁 𑀪𑀸𑀯𑀦𑀸𑀦𑀼𑀓𑁆𑀓𑀫𑀁 𑀯𑀺𑀦𑀸 𑀅𑀪𑀺𑀜𑁆𑀜𑀸𑀬𑁄 𑀇𑀚𑁆𑀛𑀦𑁆𑀢𑀺, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸. 𑀅𑀕𑁆𑀕𑀺𑀥𑀫𑀦𑀸𑀤𑀻𑀳𑀻𑀢𑀺 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑀦𑀓𑁄𑀝𑁆𑀝𑀦𑀸𑀤𑀻𑀳𑀺. 𑀬𑀣𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀮𑀸𑀔𑀸𑀓𑀸𑀭𑀸𑀤𑀻𑀦𑀁 𑀮𑀸𑀔𑀸𑀓𑁄𑀝𑁆𑀝𑀦𑀸𑀤𑀺𑀁 𑀅𑀯𑀼𑀢𑁆𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀙𑀦𑁆𑀤…𑀧𑁂… 𑀯𑀲𑁂𑀦𑀸𑀢𑀺 ‘‘𑀙𑀦𑁆𑀤𑀯𑀢𑁄 𑀘𑁂 𑀅𑀪𑀺𑀜𑁆𑀜𑀸 𑀲𑀺𑀚𑁆𑀛𑀢𑀺, 𑀫𑀬𑁆𑀳𑀫𑁆𑀧𑀺 𑀲𑀺𑀚𑁆𑀛𑀢𑀻’’𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀲𑀻𑀲𑀁 𑀥𑀼𑀭𑀁 𑀚𑁂𑀝𑁆𑀞𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸, 𑀙𑀦𑁆𑀤𑀁 𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀪𑀸𑀯𑀦𑀸𑀬 𑀫𑀼𑀔𑀁 𑀓𑀢𑁆𑀯𑀸 𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑀯𑀲𑁂𑀦. 𑀏𑀲𑁂𑀯 ¶ 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀯𑀲𑁂𑀦𑀸’’𑀢𑀺 𑀇𑀤𑀁 𑀅𑀝𑁆𑀞𑀲𑀼𑀧𑀺 𑀲𑀫𑀸𑀧𑀢𑁆𑀢𑀻𑀲𑀼 𑀲𑀸𑀢𑀺𑀲𑀬𑀁 𑀯𑀲𑀻𑀪𑀸𑀯𑀸𑀧𑀸𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀘 𑀔𑁄 𑀆𑀤𑀺𑀓𑀫𑁆𑀫𑀺𑀓𑀯𑀲𑁂𑀦, 𑀦 ¶ 𑀓𑀢𑀸𑀥𑀺𑀓𑀸𑀭𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀼𑀩𑁆𑀩𑀳𑁂𑀢𑀼…𑀧𑁂… 𑀯𑀝𑁆𑀝𑀢𑀻’’𑀢𑀺. 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲 𑀳𑀺 𑀬𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸, 𑀢𑀢𑁆𑀣𑁂𑀯 𑀲𑀸𑀢𑀺𑀲𑀬𑀁 𑀘𑀺𑀡𑁆𑀡𑀯𑀲𑀺𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂 𑀘𑀺𑀡𑁆𑀡𑀯𑀲𑀺𑀦𑀸’’𑀢𑀺 𑀯𑀘𑀦𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀦𑀸𑀧𑀺 𑀅𑀪𑀺𑀜𑁆𑀜𑀸 𑀇𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀫𑁆𑀧𑀺 𑀬𑀤𑀺 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀼𑀢𑁆𑀢𑀫𑁂𑀯. 𑀅𑀣𑁂𑀢𑀭𑀲𑁆𑀲, 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀬𑀣𑀸𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀬𑁂𑀦 𑀯𑀺𑀥𑀺𑀦𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀇𑀤𑁆𑀥𑀺𑀯𑀺𑀥𑀦𑀺𑀧𑁆𑀨𑀸𑀤𑀦𑁂.

𑁩𑁬𑁮. 𑀢𑀢𑁆𑀭𑀸𑀢𑀺 𑀘 𑀢𑀤𑁂𑀯 𑀧𑀘𑁆𑀘𑀸𑀫𑀲𑀢𑀺. 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦𑁂𑀯𑀸𑀢𑀺 𑀧𑀸𑀴𑀺𑀕𑀢𑀺𑀬𑀸 𑀅𑀦𑀼𑀲𑀭𑀡𑁂𑀦𑁂𑀯, 𑀧𑀸𑀞𑀲𑀁𑀯𑀡𑁆𑀡𑀦𑀸𑀦𑀼𑀓𑁆𑀓𑀫𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀯𑀢𑁆𑀯𑀸 ‘‘𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁄 𑀬𑁄𑀕𑀻’’𑀢𑀺. ‘‘𑀏𑀯𑀁 𑀲𑀫𑀸𑀳𑀺𑀢𑁂’’𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀳𑁂𑀝𑁆𑀞𑀸𑀛𑀸𑀦𑀢𑁆𑀢𑀬𑀸𑀥𑀺𑀕𑀫𑀧𑀝𑀺𑀧𑀸𑀝𑀺𑀲𑀺𑀤𑁆𑀥𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀸𑀦𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀆𑀳 ‘‘𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢’’𑀦𑁆𑀢𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲, 𑀢𑀲𑁆𑀲 𑀘 𑀅𑀥𑀺𑀕𑀫𑀓𑁆𑀓𑀫𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀬𑁂𑀦 𑀲𑀫𑀸𑀥𑀸𑀦𑀸𑀦𑀼𑀓𑁆𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀮𑀤𑁆𑀥𑁄, 𑀢𑀤𑀼𑀪𑀬𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀫𑀺𑀦𑀸…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀬𑀤𑀺𑀧𑀺 ‘‘𑀏𑀯’’𑀦𑁆𑀢𑀺 𑀇𑀤𑀁 𑀆𑀕𑀫𑀦𑀲𑀫𑀸𑀥𑀺𑀦𑀸 𑀲𑀤𑁆𑀥𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀸𑀦𑀁 𑀤𑀻𑀧𑁂𑀢𑀺. 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀫𑀸𑀥𑀺 𑀏𑀯 𑀧𑀦 𑀇𑀤𑁆𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀥𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂’’𑀢𑀺. 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀩𑁆𑀪𑀸𑀯𑁂𑀦. 𑀲𑀩𑁆𑀩𑀧𑀘𑁆𑀘𑀦𑀻𑀓𑀥𑀫𑁆𑀫𑀽𑀧𑀓𑁆𑀓𑀺𑀮𑁂𑀲𑀧𑀭𑀺𑀲𑀼𑀤𑁆𑀥𑀸𑀬 𑀳𑀺 𑀧𑀘𑁆𑀘𑀦𑀻𑀓𑀲𑀫𑀦𑁂𑀧𑀺 𑀅𑀩𑁆𑀬𑀸𑀯𑀝𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀼𑀧𑀭𑀺𑀲𑀼𑀤𑁆𑀥𑀸, 𑀲𑀼𑀯𑀺𑀲𑀤𑀸 𑀘 𑀳𑁄𑀦𑁆𑀢𑀺, 𑀲𑀢𑀺𑀲𑀻𑀲𑁂𑀦 𑀧𑀦 𑀢𑀢𑁆𑀣 𑀤𑁂𑀲𑀦𑀸 𑀓𑀢𑀸𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂’’𑀢𑀺. 𑀧𑀭𑀺𑀲𑀼𑀤𑁆𑀥𑀺𑀬𑀸 𑀏𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀧𑀭𑀺𑀬𑁄𑀤𑀸𑀢𑀢𑀸 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀧𑀪𑀲𑁆𑀲𑀭𑀢𑀸 𑀯𑀺𑀬𑀸𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦𑀸𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀁, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀭𑀸𑀕𑀤𑁄𑀲𑀧𑀘𑁆𑀘𑀬𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦. ‘‘𑀲𑀼𑀔𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲, 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀬𑀣𑀸 𑀭𑀸𑀕𑀸𑀤𑀬𑁄 𑀘𑁂𑀢𑀲𑁄 𑀫𑀮𑀸𑀲𑀼𑀘𑀺𑀪𑀸𑀯𑁂𑀦 ‘‘𑀅𑀗𑁆𑀕𑀡𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀉𑀧𑀕𑀦𑁆𑀢𑁆𑀯𑀸 ¶ 𑀓𑀺𑀮𑁂𑀲𑀦𑀝𑁆𑀞𑁂𑀦 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀆𑀳 ‘‘𑀅𑀦𑀗𑁆𑀕𑀡𑀢𑁆𑀢𑀸𑀬𑁂𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂’’𑀢𑀺. 𑀢𑁂𑀦𑀸𑀳 ‘‘𑀅𑀗𑁆𑀕𑀡𑁂𑀦 𑀳𑀺 𑀢𑀁 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀻’’𑀢𑀺, 𑀯𑀺𑀩𑀸𑀥𑀻𑀬𑀢𑀺 𑀉𑀧𑀢𑀸𑀧𑀻𑀬𑀢𑀻𑀢𑀺 ¶ 𑀅𑀢𑁆𑀣𑁄. 𑀲𑀼𑀪𑀸𑀯𑀺𑀢𑀢𑁆𑀢𑀸𑀢𑀺 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑁂𑀦 𑀲𑀼𑀝𑁆𑀞𑀼 𑀪𑀸𑀯𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂’’𑀢𑀺, 𑀆𑀯𑀚𑁆𑀚𑀦𑀸𑀤𑀺𑀦𑀸 𑀧𑀜𑁆𑀘𑀥𑀸, 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀸 𑀧𑀭𑀺𑀤𑀫𑀦𑁂𑀦 𑀯𑀲𑀯𑀢𑁆𑀢𑀺𑀢𑀁 𑀉𑀧𑀕𑀢𑁂𑀢𑀺 𑀅𑀢𑁆𑀣𑁄. 𑀯𑀲𑁂 𑀯𑀢𑁆𑀢𑀫𑀸𑀦𑀁 𑀳𑀺 𑀘𑀺𑀢𑁆𑀢𑀁 𑀧𑀕𑀼𑀡𑀪𑀸𑀯𑀸𑀧𑀢𑁆𑀢𑀺𑀬𑀸 𑀲𑀼𑀧𑀭𑀺𑀫𑀤𑁆𑀤𑀺𑀢𑀁 𑀯𑀺𑀬 𑀘𑀫𑁆𑀫𑀁, 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬 𑀘 𑀮𑀸𑀔𑀸 𑀫𑀼𑀤𑀼𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀓𑁆𑀔𑀫𑁂𑀢𑀺 𑀯𑀺𑀓𑀼𑀩𑁆𑀩𑀦𑀸𑀤𑀺𑀇𑀤𑁆𑀥𑀺𑀓𑀫𑁆𑀫𑀓𑁆𑀔𑀫𑁂. 𑀢𑀜𑁆𑀘 𑀉𑀪𑀬𑀦𑁆𑀢𑀺 𑀫𑀼𑀤𑀼𑀢𑀸𑀓𑀫𑁆𑀫𑀦𑀺𑀬𑀤𑁆𑀯𑀬𑀁.

𑀦𑀸𑀳𑀦𑁆𑀢𑀺𑀆𑀤𑀻𑀲𑀼 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄. 𑀅𑀳𑀦𑁆𑀢𑀺 𑀲𑀢𑁆𑀣𑀸 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀅𑀜𑁆𑀜𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀘𑀺𑀢𑁆𑀢𑀢𑁄 𑀅𑀜𑁆𑀜𑀁. 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀏𑀓𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄𑀧𑀺 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀬𑀁 𑀯𑀲𑀻𑀪𑀸𑀯𑀸𑀧𑀸𑀤𑀦𑁂𑀦 𑀪𑀸𑀯𑀺𑀢𑀁, 𑀢𑀣𑀸 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑁂𑀦 𑀩𑀳𑀼𑀮𑀻𑀓𑀢𑀁, 𑀏𑀯𑀁 𑀲𑀯𑀺𑀲𑁂𑀲𑀫𑀼𑀤𑀼𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀁, 𑀓𑀫𑁆𑀫𑀓𑁆𑀔𑀫𑀢𑀸𑀬 𑀓𑀫𑁆𑀫𑀦𑀺𑀬𑀜𑁆𑀘 𑀳𑁄𑀢𑀺. 𑀬𑀣𑀬𑀺𑀤𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄, 𑀢𑁂𑀲𑀜𑁆𑀘 𑀧𑀘𑁆𑀘𑀓𑁆𑀔𑀢𑀸𑀬 𑀏𑀯𑀫𑀸𑀳𑀸𑀢𑀺. 𑀬𑀣𑀸 𑀬𑀣𑀸𑀯𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀢𑀸𑀤𑀬𑁄 𑀦 𑀯𑀺𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁.

𑀢𑀢𑁆𑀣 𑀅𑀯𑀝𑁆𑀞𑀺𑀢𑀁 𑀇𑀥 ‘‘𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀢𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑁂, 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺. 𑀬𑀣𑀸 𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀮𑀓𑁆𑀔𑀻𑀬𑀦𑁆𑀢𑀺, 𑀏𑀯𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀧𑀺 𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸𑀳𑀺 𑀮𑀓𑁆𑀔𑀻𑀬𑀢𑀻𑀢𑀺, 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 ‘‘𑀞𑀺𑀢𑁂’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀓𑀸𑀭𑀡𑁂𑀦 𑀨𑀮𑀁 𑀦𑀺𑀤𑁆𑀥𑀭𑀻𑀬𑀢𑀺, 𑀏𑀯𑀁 𑀨𑀮𑁂𑀦𑀸𑀧𑀺 𑀓𑀸𑀭𑀡𑀁 𑀦𑀺𑀤𑁆𑀥𑀭𑀻𑀬𑀢𑀻𑀢𑀺 𑀦𑀺𑀘𑁆𑀘𑀮𑀪𑀸𑀯𑁂𑀦 𑀅𑀯𑀝𑁆𑀞𑀸𑀦𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺. 𑀲𑀸 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦, 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀫𑀦𑀺𑀬𑀢𑀸𑀬 𑀘 𑀲𑀫𑁆𑀪𑀯𑀦𑁆𑀢𑀻 𑀲𑀤𑁆𑀥𑀸𑀤𑀺𑀩𑀮𑀸𑀦𑀁 𑀆𑀦𑀼𑀪𑀸𑀯𑁂𑀦 𑀳𑁄𑀢𑀻𑀢𑀺 ‘‘𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀏𑀯𑀁 𑀲𑀼𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁 𑀏𑀢𑀁 𑀘𑀺𑀢𑁆𑀢𑀁 𑀏𑀓𑀁𑀲𑁂𑀦 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀲𑀤𑁆𑀥𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀩𑀮𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀅𑀲𑁆𑀲𑀤𑁆𑀥𑀺𑀬𑁂𑀦𑀸𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀳𑁂𑀢𑀼𑀦𑀸 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀓𑀫𑁆𑀧𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀉𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀢𑀺. 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺𑀆𑀤𑀻𑀲𑀼𑀧𑀺 ¶ 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀯𑀲𑀻𑀪𑀸𑀯𑀸𑀧𑀸𑀤𑀦𑀧𑀭𑀺𑀤𑀫𑀦𑀲𑀸𑀥𑀦𑁂𑀦 𑀯𑀻𑀭𑀺𑀬𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁂 𑀅𑀲𑀫𑁆𑀫𑁄𑀲𑀲𑀸𑀥𑀺𑀓𑀸𑀬, 𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀫𑀸𑀦𑀸𑀬 𑀲𑀢𑀺𑀬𑀸 ¶ 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀢𑁆𑀣𑁂𑀯 𑀅𑀯𑀺𑀓𑁆𑀔𑁂𑀧𑀲𑀸𑀥𑀦𑁂𑀦 𑀲𑀫𑀸𑀥𑀸𑀦𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀲𑁆𑀲𑀸 𑀏𑀯 𑀪𑀸𑀯𑀦𑀸𑀬 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑀸𑀦𑀁 𑀧𑀚𑀸𑀦𑀦𑀮𑀓𑁆𑀔𑀡𑀸𑀬 𑀧𑀜𑁆𑀜𑀸𑀬 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀑𑀪𑀸𑀲𑀕𑀢𑀦𑁆𑀢𑀺 𑀜𑀸𑀡𑁄𑀪𑀸𑀲𑀲𑀳𑀕𑀢𑀁. 𑀑𑀪𑀸𑀲𑀪𑀽𑀢𑁂𑀦 𑀳𑀺 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀸𑀦𑀲𑀁𑀯𑀤𑁆𑀥𑀺𑀢𑁂𑀦 𑀜𑀸𑀡𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀬𑀸𑀣𑀸𑀯𑀢𑁄 𑀧𑀲𑁆𑀲𑀦𑁆𑀢𑁄 𑀢𑀢𑁄 𑀉𑀢𑁆𑀭𑀲𑀦𑁆𑀢𑁄 𑀑𑀢𑁆𑀢𑀧𑁆𑀧𑀦𑁆𑀢𑁄 𑀢𑀁 𑀅𑀥𑀺𑀪𑀯𑀢𑀺, 𑀦 𑀢𑁂𑀦 𑀅𑀪𑀺𑀪𑀽𑀬𑀢𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀻’’𑀢𑀺. 𑀏𑀢𑁂𑀦 𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀳𑀺𑀭𑁄𑀢𑁆𑀢𑀧𑁆𑀧𑀩𑀮𑀁 𑀤𑀲𑁆𑀲𑁂𑀢𑀺.

𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀢𑀸, 𑀧𑀭𑀺𑀲𑀼𑀤𑁆𑀥𑀢𑀸, 𑀧𑀭𑀺𑀬𑁄𑀤𑀸𑀢𑀢𑀸, 𑀅𑀦𑀗𑁆𑀕𑀡𑀢𑀸, 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀢𑀸, 𑀫𑀼𑀤𑀼𑀪𑀸𑀯𑁄, 𑀓𑀫𑁆𑀫𑀦𑀺𑀬𑀢𑀸, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑀸 𑀞𑀺𑀢𑀢𑀸, 𑀲𑀫𑀸𑀳𑀺𑀢𑀲𑁆𑀲 𑀯𑀸 𑀘𑀺𑀢𑁆𑀢𑀲𑁆𑀲 𑀇𑀫𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 ‘‘𑀲𑀫𑀸𑀳𑀺𑀢𑁂’’𑀢𑀺 𑀇𑀫𑀁 𑀅𑀗𑁆𑀕𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀺𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑁄 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀺𑀅𑀢𑁆𑀣𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀢𑀤𑀪𑀺𑀫𑀼𑀔𑀁 𑀓𑀭𑀡𑀬𑁄𑀕𑁆𑀕𑀁. 𑀢𑁂𑀦𑀸𑀳 ‘‘𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑀓𑀸𑀫𑀁 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀏𑀯 𑀧𑀞𑀫𑀚𑁆𑀛𑀸𑀦𑀲𑀫𑀥𑀺𑀕𑀫𑁄, 𑀯𑀺𑀢𑀓𑁆𑀓𑀸𑀤𑀺𑀓𑁂 𑀯𑀽𑀧𑀲𑀫𑁂 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁄, 𑀢𑀣𑀸𑀧𑀺 𑀦 𑀢𑀣𑀸 𑀢𑁂𑀳𑀺 𑀤𑀽𑀭𑀻𑀪𑀽𑀢𑀸 𑀅𑀧𑁂𑀢𑀸 𑀯𑀸 𑀬𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄, 𑀘𑁂𑀢𑀲𑁄 𑀫𑀮𑀻𑀦𑀪𑀸𑀯𑀲𑀗𑁆𑀔𑀸𑀢𑀉𑀧𑁆𑀧𑀺𑀮𑀸𑀪𑁄𑀕𑀓𑀭𑁂𑀳𑀺 𑀦𑀻𑀯𑀭𑀡𑀸𑀤𑀻𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀺𑀬𑀸 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀺, 𑀧𑀭𑀺𑀬𑁄𑀤𑀸𑀢𑀢𑀸 𑀘 𑀬𑀼𑀢𑁆𑀢𑀸𑀢𑀺 𑀆𑀳 ‘‘𑀦𑀻𑀯𑀭𑀡…𑀧𑁂… 𑀧𑀭𑀺𑀬𑁄𑀤𑀸𑀢𑁂’’𑀢𑀺. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀦𑁆𑀢𑀺 𑀛𑀸𑀦𑀧𑀝𑀺𑀮𑀸𑀪𑀳𑁂𑀢𑀼𑀓𑀸𑀦𑀁 𑀛𑀸𑀦𑀧𑀝𑀺𑀮𑀸𑀪𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 ‘‘𑀅𑀳𑁄 𑀯𑀢 𑀫𑀫𑁂𑀯 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀁 𑀫𑀸𑀦𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀻𑀦𑀁. 𑀅𑀪𑀺𑀚𑁆𑀛𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦𑀸𑀧𑀺 𑀢𑁂𑀲𑀁𑀬𑁂𑀯 𑀲𑀗𑁆𑀕𑀳𑁄. 𑀅𑀪𑀺𑀚𑁆𑀛𑀸 𑀘𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑁂𑀦 𑀅𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸, 𑀫𑀸𑀦𑀸𑀤𑀬𑁄 𑀘 𑀢𑀤𑁂𑀓𑀝𑁆𑀞𑀸 𑀤𑀝𑁆𑀞𑀩𑁆𑀩𑀸 ¶ ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸. 𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀧𑀦 𑀦𑀻𑀯𑀭𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸, 𑀓𑀣𑀁 𑀧𑀦 𑀧𑀞𑀫𑀚𑁆𑀛𑀸𑀦𑁂𑀦 𑀅𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀇𑀥 𑀯𑀺𑀕𑀘𑁆𑀙𑀦𑁆𑀢𑀻𑀢𑀺? ‘‘𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀸’’𑀢𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀧𑀭𑀸𑀫𑀝𑁆𑀞𑀪𑀸𑀯𑀤𑀲𑁆𑀲𑀦𑀢𑁄. 𑀬𑁂 𑀧𑀦𑁂𑀢𑁆𑀣 ‘‘𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀺𑀚𑁆𑀛𑀸𑀤𑀻𑀦’’𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑁄𑀧𑀅𑀧𑀘𑁆𑀘𑀬𑀓𑀆𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀬𑁄 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀧𑀸𑀞𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦’’𑀦𑁆𑀢𑀺 ¶ 𑀧𑀸𑀞𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀢𑀣𑀸 𑀧𑀸𑀞𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸 𑀘 𑀦𑀻𑀯𑀭𑀡𑀸 𑀘𑁂𑀯 𑀢𑀤𑁂𑀓𑀝𑁆𑀞𑀸 𑀘 𑀢𑁂𑀲𑀁 𑀤𑀽𑀭𑀻𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀅𑀪𑀸𑀯𑀯𑀺𑀕𑀫𑀘𑁄𑀤𑀦𑀸𑀬 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸. 𑀦𑀦𑀼 𑀘 𑀅𑀦𑀗𑁆𑀕𑀡𑀲𑀼𑀢𑁆𑀢- (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑀢𑁆𑀣𑀲𑀼𑀢𑁆𑀢𑁂𑀲𑀼 (𑀫. 𑀦𑀺. 𑁧.𑁭𑁦 𑀆𑀤𑀬𑁄) 𑀅𑀬𑀫𑀢𑁆𑀣𑁄 𑀦 𑀮𑀩𑁆𑀪𑀢𑀺, 𑀑𑀴𑀸𑀭𑀺𑀓𑀸𑀦𑀁𑀬𑁂𑀯 𑀧𑀸𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸? 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀼𑀔𑀼𑀫𑀸𑀬𑁂𑀯 𑀢𑁂 𑀕𑀳𑀺𑀢𑀸, 𑀅𑀗𑁆𑀕𑀡𑀽𑀧𑀓𑁆𑀓𑀺𑀮𑁂𑀲𑀢𑀸𑀲𑀸𑀫𑀜𑁆𑀜𑁂𑀦 𑀧𑀦𑁂𑀢𑁆𑀣 𑀲𑀼𑀢𑁆𑀢𑀸𑀦𑀁 𑀅𑀧𑀤𑀺𑀲𑀦𑀁. 𑀢𑀣𑀸 𑀳𑀺 ‘‘𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀼𑀢𑁆𑀢𑀯𑀲𑁂𑀦𑀸𑀢𑀺. 𑀅𑀯𑀲𑁆𑀲𑀁 𑀘𑁂 𑀢𑀫𑁂𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀅𑀥𑀺𑀕𑀢𑀚𑁆𑀛𑀸𑀦𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀇𑀘𑁆𑀙𑀸𑀯𑀘𑀭𑀸𑀦𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄.

𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑁂𑀦𑀸𑀢𑀺 𑀇𑀤𑁆𑀥𑀺𑀬𑀸 𑀧𑀸𑀤𑀓𑀪𑀸𑀯𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀲𑁆𑀲 𑀉𑀧𑀕𑀫𑀦𑁂𑀦. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀇𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀯𑀲𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀪𑀸𑀯𑀦𑀸𑀬 𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦𑀸𑀢𑀺 𑀢𑀢𑁄 𑀏𑀯 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀉𑀢𑁆𑀢𑀫𑀝𑁆𑀞𑁂𑀦, 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀘 𑀧𑀡𑀻𑀢𑀪𑀸𑀯𑀲𑁆𑀲 𑀉𑀧𑀕𑀫𑀦𑁂𑀦. 𑀉𑀪𑀬𑀜𑁆𑀘𑁂𑀢𑀁 𑀞𑀺𑀢𑀺𑀬𑀸 𑀓𑀸𑀭𑀡𑀯𑀘𑀦𑀁 𑀧𑀭𑀺𑀧𑀼𑀡𑁆𑀡𑀸𑀬 𑀪𑀸𑀯𑀦𑀸𑀬 𑀧𑀡𑀻𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 ‘‘𑀞𑀺𑀢𑁂’’𑀢𑀺. ‘‘𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 𑀇𑀤𑀁 𑀞𑀺𑀢𑀺𑀬𑀸 𑀯𑀺𑀲𑁂𑀲𑀦𑀁. 𑀢𑁂𑀦𑀸𑀳 ‘‘𑀬𑀣𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑁂’’𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 𑀉𑀪𑀬𑀫𑁂𑀓𑀁 𑀅𑀗𑁆𑀕𑀁, ‘‘𑀲𑀫𑀸𑀳𑀺𑀢𑁂’’𑀢𑀺 𑀧𑀦 𑀇𑀤𑀫𑁆𑀧𑀺 𑀏𑀓𑀫𑀗𑁆𑀕𑀁. 𑀢𑁂𑀦𑁂𑀯𑀲𑁆𑀲 𑀧𑀞𑀫𑀯𑀺𑀓𑀧𑁆𑀧𑀢𑁄 𑀯𑀺𑀲𑁂𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺.

𑀤𑀲𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁩𑁬𑁯. 𑀦𑀺𑀧𑁆𑀨𑀢𑁆𑀢𑀺𑀅𑀢𑁆𑀣𑁂𑀦𑀸𑀢𑀺 𑀲𑀺𑀚𑁆𑀛𑀦𑀝𑁆𑀞𑁂𑀦. 𑀧𑀝𑀺𑀮𑀸𑀪𑀝𑁆𑀞𑁂𑀦𑀸𑀢𑀺 𑀧𑀸𑀧𑀼𑀡𑀦𑀝𑁆𑀞𑁂𑀦. 𑀢𑀦𑁆𑀢𑀺 𑀓𑀸𑀫𑀺𑀢𑀁 𑀯𑀢𑁆𑀣𑀼𑀁. 𑀲𑀫𑀺𑀚𑁆𑀛𑀢𑀻𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀧𑀩𑁆𑀩𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀛𑀸𑀦𑀫𑀕𑁆𑀕𑀸 ¶ 𑀇𑀥 𑀦𑁂𑀓𑁆𑀔𑀫𑁆𑀫𑀁. 𑀇𑀚𑁆𑀛𑀢𑀻𑀢𑀺 𑀧𑀸𑀧𑀼𑀡𑀻𑀬𑀢𑀺. 𑀧𑀝𑀺𑀳𑀭𑀢𑀻𑀢𑀺 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀬𑀲𑁆𑀫𑀸 𑀧𑀝𑀺𑀧𑀓𑁆𑀔𑀁 𑀳𑀭𑀢𑀺 𑀅𑀧𑀦𑁂𑀢𑀺, 𑀢𑀲𑁆𑀫𑀸 𑀧𑀸𑀝𑀺𑀳𑀸𑀭𑀺𑀬𑀁. 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀁 𑀳𑀭𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀦𑁂𑀓𑁆𑀔𑀫𑁆𑀫𑀸𑀤𑀺, 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀬𑀣𑀸 ‘‘𑀯𑁂𑀓𑀢𑀁, 𑀯𑁂𑀲𑀫’’𑀦𑁆𑀢𑀺 𑀘.

𑀇𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀦𑀺𑀧𑁆𑀨𑀚𑁆𑀚𑀦𑀝𑁆𑀞𑁂𑀦. 𑀉𑀧𑀸𑀬𑀲𑀫𑁆𑀧𑀤𑀸𑀬𑀸𑀢𑀺 𑀲𑀫𑁆𑀧𑀦𑁆𑀦𑀉𑀧𑀸𑀬𑀲𑁆𑀲, 𑀜𑀸𑀬𑀸𑀭𑀫𑁆𑀪𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀢𑀻𑀢𑀺 𑀧𑀲𑀯𑁂𑀢𑀺. 𑀲𑀻𑀮𑀯𑀸𑀢𑀺 𑀆𑀘𑀸𑀭𑀲𑀻𑀮𑁂𑀦 𑀲𑀻𑀮𑀯𑀸. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 ¶ 𑀲𑀼𑀦𑁆𑀤𑀭𑀥𑀫𑁆𑀫𑁄. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀲𑀻𑀮𑀯𑀸. 𑀤𑀸𑀦𑀸𑀤𑀺𑀲𑁂𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀧𑀡𑀺𑀤𑀳𑀺𑀲𑁆𑀲𑀢𑀻𑀢𑀺 𑀧𑀢𑁆𑀣𑁂𑀲𑁆𑀲𑀢𑀺.

𑀇𑀚𑁆𑀛𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺, 𑀉𑀓𑁆𑀓𑀁𑀲𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀢𑀺𑀲𑀬𑀦𑀺𑀧𑁆𑀨𑀚𑁆𑀚𑀦𑀧𑀝𑀺𑀮𑀸𑀪𑀲𑀺𑀚𑁆𑀛𑀦𑀩𑀼𑀤𑁆𑀥𑀺𑀅𑀢𑁆𑀣𑁂 𑀳𑀺 𑀇𑀤𑁆𑀥𑀺 𑀯𑀼𑀢𑁆𑀢𑀸. 𑀲𑀸 𑀤𑀲𑀯𑀺𑀥𑀸𑀢𑀺 𑀲𑀩𑁆𑀩𑀸 𑀇𑀤𑁆𑀥𑀺𑀬𑁄 𑀆𑀦𑁂𑀢𑁆𑀯𑀸 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁 𑀇𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀩𑀳𑀼𑀪𑀸𑀯𑀸𑀤𑀺𑀓𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀳𑀦𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀥𑀺𑀝𑁆𑀞𑀸𑀦𑀸. 𑀯𑀺𑀯𑀺𑀥𑀁 𑀭𑀽𑀧𑀦𑀺𑀫𑁆𑀫𑀸𑀦𑀲𑀗𑁆𑀔𑀸𑀢𑀁 𑀓𑀼𑀩𑁆𑀩𑀦𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀯𑀺𑀓𑀼𑀩𑁆𑀩𑀦𑀸. 𑀫𑀦𑁄𑀫𑀬𑀸𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀫𑀦𑁄𑀫𑀬𑀸. 𑀜𑀸𑀡𑀲𑁆𑀲 𑀯𑀺𑀧𑁆𑀨𑀸𑀭𑁄 𑀯𑁂𑀕𑀸𑀬𑀺𑀢𑀢𑁆𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀜𑀸𑀡𑀯𑀺𑀧𑁆𑀨𑀸𑀭𑀸. 𑀅𑀭𑀺𑀬𑀸𑀦𑀁 𑀅𑀬𑀦𑁆𑀢𑀺 𑀅𑀭𑀺𑀬𑀸. 𑀬𑀢𑁄 𑀓𑀼𑀢𑁄𑀘𑀺 𑀓𑀫𑁆𑀫𑀯𑀺𑀧𑀸𑀓𑀢𑁄 𑀚𑀸𑀢𑀸 𑀇𑀤𑁆𑀥𑀺 𑀓𑀫𑁆𑀫𑀯𑀺𑀧𑀸𑀓𑀚𑀸. 𑀲𑀸𑀢𑀺𑀲𑀬𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀸 𑀇𑀤𑁆𑀥𑀺 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺, 𑀇𑀢𑀭𑀸 𑀬𑀤𑀸 𑀢𑀤𑀸 𑀧𑀼𑀜𑁆𑀜𑀲𑁆𑀲 𑀯𑀺𑀧𑀘𑁆𑀘𑀦𑀓𑀸𑀮𑁂𑀢𑀺 𑀏𑀯𑀁 𑀯𑀸 𑀇𑀫𑀸𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀣𑀩𑁆𑀩𑀦𑀯𑀺𑀚𑁆𑀚𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀯𑀺𑀚𑁆𑀚𑀸𑀫𑀬𑀸. 𑀲𑀫𑁆𑀫𑀸𑀧𑀬𑁄𑀕𑁄 𑀉𑀧𑀸𑀬𑀧𑀬𑁄𑀕𑁄 𑀜𑀸𑀬𑀸𑀭𑀫𑁆𑀪𑁄.

𑁩𑁭𑁦. 𑀧𑀓𑀢𑀺𑀬𑀸 𑀏𑀓𑁄𑀢𑀺 𑀲𑀪𑀸𑀯𑁂𑀦 𑀏𑀓𑁄. 𑀩𑀳𑀼𑀓𑀦𑁆𑀢𑀺 𑀩𑀳𑀼𑀁. 𑀢𑁂𑀦 𑀅𑀕𑁆𑀕𑀳𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀲𑁆𑀲 𑀅𑀦𑁂𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀧𑀭𑀺𑀘𑁆𑀙𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀯𑀚𑁆𑀚𑀢𑀻𑀢𑀺 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀆𑀪𑁄𑀕𑁂𑀦 𑀆𑀪𑀼𑀚𑀢𑀺 𑀪𑀸𑀯𑀺𑀭𑀽𑀧𑁂 𑀢𑁂𑀦 𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻𑀢𑀺 𑀢𑀣𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑁂 𑀩𑀳𑀼𑀓𑁂 𑀅𑀥𑀺𑀝𑁆𑀞𑀸𑀢𑀺, 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳𑁂𑀯 𑀩𑀳𑀼𑀪𑀸𑀯𑀸𑀧𑀢𑁆𑀢𑀺𑀢𑁄 𑀩𑀳𑀼𑀪𑀸𑀯𑀸𑀧𑀸𑀤𑀓𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀧𑀯𑀢𑁆𑀢𑁂𑀦𑁆𑀢𑁄 𑀘 𑀢𑀣𑀸 𑀅𑀥𑀺𑀝𑁆𑀞𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀦𑁆𑀢𑀺 ¶ 𑀧𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄, 𑀢𑁂𑀦 𑀲𑀩𑁆𑀩𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀧𑁆𑀧𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑀸𑀢𑀺 ‘‘𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁦) 𑀏𑀯𑀁 𑀯𑀼𑀢𑁆𑀢𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸.

𑁩𑁭𑁧. 𑀧𑀓𑀢𑀺𑀯𑀡𑁆𑀡𑀦𑁆𑀢𑀺 𑀧𑀓𑀢𑀺𑀲𑀡𑁆𑀞𑀸𑀦𑀁 𑀅𑀢𑁆𑀢𑀦𑁄 𑀧𑀸𑀓𑀢𑀺𑀓𑀭𑀽𑀧𑀁. 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀧𑀼𑀩𑁆𑀩𑀓𑀲𑁆𑀲 𑀓𑀼𑀫𑀸𑀭𑀓𑀯𑀡𑁆𑀡𑀸𑀤𑀺𑀯𑀡𑁆𑀡𑀯𑀺𑀓𑀸𑀭𑀲𑁆𑀲 𑀯𑀲𑁂𑀦.

𑁩𑁭𑁨. 𑀇𑀫𑀫𑁆𑀳𑀸 𑀓𑀸𑀬𑀸𑀢𑀺 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 ‘‘𑀇𑀫𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀸 𑀪𑀺𑀓𑁆𑀔𑀼𑀲𑁆𑀲 𑀓𑀭𑀚𑀓𑀸𑀬𑀸. 𑀅𑀜𑁆𑀜𑀁 𑀓𑀸𑀬𑀦𑁆𑀢𑀺 𑀅𑀜𑁆𑀜𑀁 𑀇𑀤𑁆𑀥𑀺𑀫𑀬𑀁 𑀓𑀸𑀬𑀁. 𑀢𑀢𑁄 𑀏𑀯 𑀇𑀤𑁆𑀥𑀺𑀫𑀬𑀭𑀽𑀧𑀯𑀦𑁆𑀢𑀢𑀸𑀬 𑀭𑀽𑀧𑀺𑀁. 𑀅𑀪𑀺𑀜𑁆𑀜𑀸𑀫𑀦𑁂𑀦 ¶ 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀁. 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀺𑀧𑁆𑀨𑀚𑁆𑀚𑀦𑀯𑀲𑁂𑀦. 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀳𑀺 𑀬𑀣𑀸 𑀫𑀦𑁄𑀫𑀬𑁄 𑀓𑀸𑀬𑁄 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀣𑀸 𑀧𑀯𑀢𑁆𑀢𑀺 𑀫𑀦𑁄𑀫𑀬𑀺𑀤𑁆𑀥𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀤𑀺 𑀏𑀯𑀁 𑀓𑀣𑀫𑀬𑀫𑁂𑀯 𑀫𑀦𑁄𑀫𑀬𑀺𑀤𑁆𑀥𑀻𑀢𑀺? 𑀭𑀼𑀴𑁆𑀳𑀻𑀯𑁂𑀲𑀸 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸 ‘‘𑀫𑀦𑁄𑀫𑀬𑁄 𑀅𑀢𑁆𑀢𑀪𑀸𑀯𑁄’’𑀢𑀺, 𑀬𑀣𑀸 𑀯𑀸 ‘‘𑀕𑁄𑀲𑀫𑀜𑁆𑀜𑀸 𑀯𑀺𑀲𑀸𑀡𑀸𑀤𑀺𑀫𑀢𑀺 𑀧𑀺𑀡𑁆𑀟𑁂’’. 𑀅𑀣 𑀯𑀸 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀦𑁆𑀢𑁂, 𑀇𑀤𑁆𑀥𑀺𑀫𑀢𑀸 𑀘 𑀏𑀓𑀦𑁆𑀢𑀲𑀤𑀺𑀲𑁂 𑀇𑀫𑀲𑁆𑀫𑀺𑀁 𑀦𑀺𑀫𑁆𑀫𑀸𑀦𑁂 𑀲𑀼𑀧𑀸𑀓𑀝𑁄 𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑁄𑀢𑀺 𑀬𑀣𑀸 𑀲𑀸𑀢𑀺𑀲𑀬𑁄 𑀫𑀦𑁄𑀫𑀬𑀯𑁄𑀳𑀸𑀭𑁄, 𑀦 𑀢𑀣𑀸 𑀅𑀜𑁆𑀜𑀸𑀲𑀼 𑀅𑀥𑀺𑀝𑁆𑀞𑀸𑀦𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀻𑀲𑀼 𑀲𑀫𑀜𑁆𑀜𑀦𑁆𑀢𑀭𑀯𑀦𑁆𑀢𑀸𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁭𑁩. 𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂, 𑀢𑀢𑁄𑀧𑀺 𑀯𑀸 𑀧𑀼𑀩𑁆𑀩𑁂 𑀅𑀦𑁆𑀢𑀺𑀫𑀪𑀯𑀺𑀓𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬. 𑀧𑀘𑁆𑀙𑀸 𑀯𑀸 𑀬𑀸𑀯 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸. 𑀢𑀗𑁆𑀔𑀡𑁂 𑀯𑀸 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀲𑀫𑀬𑁂. 𑀜𑀸𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄𑀢𑀺 𑀲𑀽𑀭𑀺𑀬𑀲𑁆𑀲 𑀉𑀝𑁆𑀞𑀺𑀢𑀝𑁆𑀞𑀸𑀦𑁂, 𑀲𑀫𑀦𑁆𑀢𑀢𑁄 𑀘 𑀆𑀮𑁄𑀓𑀓𑀭𑀡𑀲𑀫𑀢𑁆𑀣𑀢𑀸 𑀯𑀺𑀬 𑀢𑀲𑁆𑀲𑁂𑀯 𑀜𑀸𑀡𑀲𑁆𑀲 𑀆𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀲𑁄 𑀧𑀳𑀸𑀢𑀩𑁆𑀩𑀧𑀳𑀸𑀦𑀪𑀸𑀯𑁂𑀢𑀩𑁆𑀩𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑁄. 𑀯𑀢𑁆𑀣𑀽𑀦𑀺 𑀧𑀦 𑀅𑀦𑀦𑁆𑀢𑀭𑀸𑀬𑀢𑀸𑀯𑀲𑁂𑀦 𑀆𑀕𑀢𑀸𑀦𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑀺𑀬𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀬. 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀲𑁆𑀲 𑀳𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀓𑁆𑀔𑀡𑁂 𑀢𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀧𑀓𑀺𑀡𑁆𑀡𑀓𑀲𑀫𑁆𑀫𑀲𑀦𑀯𑀸𑀭𑁂 𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀸𑀫𑀁 𑀏𑀢𑁆𑀢𑀓𑀸𑀬 𑀲𑀗𑁆𑀔𑁂𑀧𑀓𑀣𑀸𑀬𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑁄 𑀧𑀓𑀸𑀲𑀺𑀢𑁄𑀯 ¶ , 𑀯𑀺𑀢𑁆𑀣𑀸𑀭𑀓𑀣𑀸𑀬 𑀧𑀦 𑀯𑀺𑀪𑀽𑀢𑀢𑀭𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀩𑁆𑀩’’𑀦𑁆𑀢𑀺.

𑀕𑀩𑁆𑀪𑀕𑀢𑀲𑁆𑀲𑁂𑀯𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑀸𑀓𑀼𑀮𑀢𑁆𑀣𑁂𑀭𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦.

𑀤𑀸𑀭𑀼𑀪𑀸𑀭𑀁 𑀓𑀢𑁆𑀯𑀸𑀢𑀺 𑀤𑀸𑀭𑀼𑀪𑀸𑀭𑀁 𑀲𑀓𑀝𑁂 𑀓𑀢𑁆𑀯𑀸, 𑀆𑀭𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀲𑀓𑀝𑀫𑀽𑀮𑁂𑀢𑀺 𑀲𑀓𑀝𑀲𑀫𑀻𑀧𑁂. 𑀯𑀸𑀴𑀬𑀓𑁆𑀔𑀸𑀦𑀼𑀘𑀭𑀺𑀢𑁂𑀢𑀺 𑀓𑀼𑀭𑀼𑀭𑁂𑀳𑀺 𑀬𑀓𑁆𑀔𑁂𑀳𑀺 𑀅𑀦𑀼𑀯𑀺𑀘𑀭𑀺𑀢𑀩𑁆𑀩𑁂. 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀜𑁆𑀳𑀺 𑀭𑀸𑀚𑀕𑀳𑀦𑀕𑀭𑀁.

𑁩𑁭𑁪. 𑀲𑀫𑀸𑀥𑀺𑀢𑁄𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀢𑁄. 𑀧𑀼𑀩𑁆𑀩𑁂𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀓𑁆𑀔𑀡𑁂. 𑀧𑀘𑁆𑀙𑀸𑀢𑀺 𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂. 𑀢𑀗𑁆𑀔𑀡𑁂𑀢𑀺 𑀲𑀫𑀸𑀧𑀦𑁆𑀦𑀓𑁆𑀔𑀡𑁂. 𑀲𑀫𑀣𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 ¶ 𑀛𑀸𑀦𑁂 𑀲𑀫𑀸𑀥𑀺𑀢𑁂𑀚𑁂𑀦 𑀦𑀺𑀩𑁆𑀩𑀢𑁆𑀢𑁄 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀧𑀭𑀺𑀲𑁆𑀲𑀬𑀲𑀳𑀦𑀸𑀤𑀺𑀓𑁄 𑀯𑀺𑀲𑁂𑀲𑁄.

𑀓𑀧𑁄𑀢𑀓𑀦𑁆𑀤𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀅𑀭𑀜𑁆𑀜𑀯𑀺𑀳𑀸𑀭𑁂. 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸𑀢𑀺 𑀘𑀦𑁆𑀤𑀸𑀮𑁄𑀓𑀯𑀢𑀺𑀬𑀸 𑀭𑀢𑁆𑀢𑀺𑀬𑀸. 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀻𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀬𑀲𑁆𑀲𑀸𑀢𑀺 𑀧𑀳𑀸𑀭𑀲𑁆𑀲. 𑀢𑀲𑁆𑀲𑀸𑀢𑀺 𑀬𑀓𑁆𑀔𑀲𑁆𑀲. 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑀲𑁆𑀲 𑀉𑀓𑁆𑀓𑀁𑀲𑀕𑀢𑀢𑁆𑀢𑀸 𑀣𑁂𑀭𑁄 𑀢𑀲𑁆𑀫𑀺𑀁 𑀧𑀳𑀭𑀦𑁆𑀢𑁂 𑀏𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀻𑀢𑀺 𑀆𑀳 ‘‘𑀧𑀳𑀭𑀡𑀲𑀫𑀬𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀲𑀻’’𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺 (𑀉𑀤𑀸. 𑁩𑁪) 𑀯𑀼𑀢𑁆𑀢𑀁. 𑀇𑀫𑁂 𑀧𑀦 𑀣𑁂𑀭𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑀫𑀓𑀸𑀮𑀁 𑀢𑁂𑀦 𑀧𑀳𑀸𑀭𑁄 𑀤𑀺𑀦𑁆𑀦𑁄𑀢𑀺 𑀯𑀤𑀦𑁆𑀢𑀺.

𑀲𑀜𑁆𑀚𑀻𑀯𑀢𑁆𑀣𑁂𑀭𑀦𑁆𑀢𑀺 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀤𑀼𑀢𑀺𑀬𑀁 𑀅𑀕𑁆𑀕𑀲𑀸𑀯𑀓𑀁 𑀫𑀳𑀸𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀆𑀬𑀲𑁆𑀫𑀸 𑀅𑀭𑀜𑁆𑀜𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺. 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦 𑀛𑀸𑀬𑀺𑀢𑁆𑀣, 𑀲𑀭𑀻𑀭𑁂 𑀓𑀸 𑀓𑀣𑀸. 𑀢𑁂𑀦𑁂𑀯 𑀳𑀺 𑀣𑁂𑀭𑁄 ‘‘𑀲𑀜𑁆𑀚𑀻𑀯𑁄’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀬𑀫𑀲𑁆𑀲𑀸𑀢𑀺 𑀅𑀲𑁆𑀲 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀬𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀅𑀕𑁆𑀕𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑁄, 𑀅𑀬𑀁 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 ¶ 𑀇𑀤𑁆𑀥𑀻𑀢𑀺 𑀬𑁄𑀚𑀦𑀸. 𑀓𑀣𑀁 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩…𑀧𑁂… 𑀦𑀺𑀩𑁆𑀩𑀢𑁆𑀢𑀢𑁆𑀢𑀸’’𑀢𑀺.

𑀧𑀞𑀫𑀁 𑀞𑀧𑀺𑀢𑀪𑀡𑁆𑀟𑀓𑀲𑁆𑀲𑀸𑀢𑀺 𑀲𑀩𑁆𑀩𑀧𑀞𑀫𑀁 𑀞𑀧𑀺𑀢𑀪𑀡𑁆𑀟𑀓𑀲𑁆𑀲. 𑀢𑀜𑁆𑀳𑀺 𑀕𑀳𑀡𑀓𑀸𑀮𑁂 𑀲𑀩𑁆𑀩𑀧𑀘𑁆𑀙𑀺𑀫𑀁 𑀕𑀬𑁆𑀳𑀢𑀺. 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 ‘‘𑀏𑀢𑁆𑀢𑀓𑁂 𑀓𑀸𑀮𑁂 𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀪𑀻𑀢𑀸 𑀯𑀺𑀭𑀯𑀺𑀁𑀲𑀽𑀢𑀺 𑀭𑀢𑁆𑀢𑀦𑁆𑀥𑀓𑀸𑀭𑁂 𑀭𑀽𑀧𑀤𑀲𑁆𑀲𑀦𑁂𑀦 ‘‘𑀧𑀺𑀲𑀸𑀘𑁄 𑀉𑀝𑁆𑀞𑀳𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸. 𑀏𑀢𑁆𑀢𑀓𑁂𑀳𑀺 𑀦𑀸𑀫 𑀪𑀡𑁆𑀟𑀓𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑁄 𑀦𑀺𑀩𑁆𑀩𑀺𑀓𑀸𑀭𑁄 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑁄, 𑀅𑀳𑁄 𑀯𑀺𑀯𑁂𑀓𑀯𑀸𑀲𑀻’’𑀢𑀺 𑀘 𑀣𑁂𑀭𑀕𑀢𑁂𑀦 𑀧𑀲𑀸𑀤𑁂𑀦.

𑀢𑀢𑁆𑀢𑀢𑁂𑀮𑀓𑀝𑀸𑀳𑀦𑁆𑀢𑀺 𑀆𑀥𑀸𑀭𑀲𑀻𑀲𑁂𑀦 𑀆𑀥𑁂𑀬𑁆𑀬𑀫𑀸𑀳, 𑀓𑀝𑀸𑀳𑁂 𑀢𑀢𑁆𑀢𑀢𑁂𑀮𑀁 𑀓𑀝𑀸𑀳𑁂𑀦 𑀆𑀲𑀺𑀜𑁆𑀘𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀯𑀝𑁆𑀝𑀫𑀸𑀦𑀦𑁆𑀢𑀺 𑀓𑀢𑁆𑀣𑀘𑀺𑀧𑀺 𑀅𑀮𑀕𑁆𑀕𑀦𑀯𑀲𑁂𑀦 𑀪𑀲𑁆𑀲𑀦𑁆𑀢𑀁.

𑀲𑀧𑀭𑀺𑀯𑀸𑀭𑀸𑀢𑀺 𑀧𑀜𑁆𑀘𑀳𑀺 𑀇𑀢𑁆𑀣𑀺𑀲𑀢𑁂𑀳𑀺 𑀲𑀧𑀭𑀺𑀯𑀸𑀭𑀸. 𑀭𑀸𑀚𑀸𑀦𑀁 𑀫𑁂𑀢𑁆𑀢𑀸𑀬 𑀨𑀭𑀻𑀢𑀺 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀸𑀲𑀫𑀸𑀧𑀢𑁆𑀢𑀺𑀬𑀸 ¶ 𑀭𑀸𑀚𑀸𑀦𑀁 𑀨𑀼𑀲𑀺. 𑀔𑀺𑀧𑀺𑀢𑀼𑀦𑁆𑀢𑀺 𑀯𑀺𑀚𑁆𑀛𑀺𑀢𑀼𑀁. 𑀑𑀭𑁄𑀧𑁂𑀢𑀼𑀦𑁆𑀢𑀺 𑀲𑀭𑀲𑀦𑁆𑀦𑀸𑀳𑀁 𑀧𑀝𑀺𑀲𑀁𑀳𑀭𑀺𑀢𑀼𑀁.

𑁩𑁭𑁫. 𑀧𑀝𑀺𑀓𑁆𑀓𑀽𑀮𑀸𑀤𑀻𑀲𑀽𑀢𑀺 𑀅𑀦𑀺𑀝𑁆𑀞𑀸𑀤𑀻𑀲𑀼. 𑀅𑀦𑀺𑀝𑁆𑀞𑀁 𑀳𑀺 𑀧𑀝𑀺𑀓𑁆𑀓𑀽𑀮𑀁, 𑀅𑀫𑀦𑀼𑀜𑁆𑀜𑀫𑁆𑀧𑀺 ‘‘𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀝𑀺𑀓𑁆𑀓𑀽𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀽𑀮𑀸𑀭𑀫𑁆𑀫𑀡𑁂. 𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄. 𑀢𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀽𑀮𑀸𑀧𑀝𑀺𑀓𑁆𑀓𑀽𑀮𑀪𑁂𑀤𑁂 𑀯𑀢𑁆𑀣𑀼𑀲𑁆𑀫𑀺𑀁. 𑀲𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀲𑀢𑀺𑀫𑀸. 𑀲𑀫𑁆𑀧𑀚𑀸𑀦𑁄𑀢𑀺 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀚𑀸𑀦𑀓𑀸𑀭𑀻. 𑀅𑀬𑀦𑁆𑀢𑀺 𑀅𑀬𑀁 𑀧𑀝𑀺𑀓𑁆𑀓𑀽𑀮𑀸𑀤𑀺𑀯𑀢𑁆𑀣𑀽𑀲𑀼 𑀅𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻𑀯𑀺𑀳𑀸𑀭𑀸𑀤𑀺𑀓𑀸 𑀔𑀻𑀡𑀸𑀲𑀯𑀸𑀦𑀁 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀲𑀺𑀤𑁆𑀥𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀢𑀸. 𑀢𑁂𑀦𑀸𑀳 ‘‘𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸𑀦𑀁…𑀧𑁂… 𑀯𑀼𑀘𑁆𑀘𑀢𑀻’’𑀢𑀺.

𑀅𑀦𑀺𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑁆𑀢𑀲𑀜𑁆𑀜𑀺𑀢𑁂 𑀫𑁂𑀢𑁆𑀢𑀸𑀨𑀭𑀡𑀁 𑀯𑀸 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀕𑀽𑀣𑀸𑀤𑀺𑀓𑁂 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀓𑀭𑁄𑀦𑁆𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻𑀢𑀺 𑀳𑀺𑀢𑁂𑀲𑀺𑀢𑀸𑀬, 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑀸𑀬 𑀘 𑀦 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀳𑀼𑀢𑁆𑀯𑀸 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺. 𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀜𑀸𑀢𑀺𑀫𑀺𑀢𑁆𑀢𑀸𑀤𑀺𑀓𑁂. 𑀓𑁂𑀲𑀸𑀤𑀺𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀫𑀢𑁆𑀢𑀫𑁂𑀯𑀸𑀢𑀺 𑀅𑀲𑀼𑀪𑀨𑀭𑀡𑀁 𑀯𑀸 𑀅𑀲𑀼𑀪𑀫𑀦𑀲𑀺𑀓𑀸𑀭𑀁 𑀯𑀸. 𑀢𑀢𑁆𑀣 𑀭𑀽𑀧𑀥𑀫𑁆𑀫𑀚𑀸𑀢𑀁 𑀅𑀦𑀺𑀘𑁆𑀘𑀦𑁆𑀢𑀺 𑀆𑀤𑀺𑀅𑀢𑁆𑀣𑁄 𑀇𑀢𑀺-𑀲𑀤𑁆𑀤𑁄, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀫𑀦𑀲𑀺𑀓𑀸𑀭𑀁 ¶ 𑀯𑀸 𑀓𑀭𑁄𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀧𑀝𑀺𑀓𑁆𑀓𑀽𑀮𑀸𑀧𑀝𑀺𑀓𑁆𑀓𑀽𑀮𑁂𑀲𑀽𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀺 𑀯𑀢𑁆𑀣𑀽𑀦𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀏𑀲 𑀦𑀬𑁄 𑀇𑀢𑀭𑀢𑁆𑀣. 𑀬𑀁 𑀯𑀸 𑀲𑀢𑁆𑀢𑀸𑀦𑀁 𑀧𑀞𑀫𑀁 𑀧𑀝𑀺𑀓𑁆𑀓𑀽𑀮𑀢𑁄 𑀉𑀧𑀝𑁆𑀞𑀺𑀢𑀫𑁂𑀯 𑀧𑀘𑁆𑀙𑀸 𑀅𑀧𑀝𑀺𑀓𑁆𑀓𑀽𑀮𑀢𑁄 𑀉𑀧𑀢𑀺𑀝𑁆𑀞𑀢𑀺, 𑀬𑀜𑁆𑀘 𑀅𑀧𑀝𑀺𑀓𑁆𑀓𑀽𑀮𑀢𑁄 𑀉𑀧𑀝𑁆𑀞𑀺𑀢𑀫𑁂𑀯 𑀧𑀘𑁆𑀙𑀸 𑀧𑀝𑀺𑀓𑁆𑀓𑀽𑀮𑀢𑁄 𑀉𑀧𑀢𑀺𑀝𑁆𑀞𑀢𑀺, 𑀢𑀤𑀼𑀪𑀬𑁂𑀧𑀺 𑀔𑀻𑀡𑀸𑀲𑀯𑁄 𑀲𑀘𑁂 𑀆𑀓𑀗𑁆𑀔𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀅𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀸 𑀯𑀺𑀳𑀭𑁂𑀬𑁆𑀬, 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀸𑀢𑀺 𑀅𑀬𑀫𑀭𑀺𑀬𑀺𑀤𑁆𑀥𑀺 𑀯𑀼𑀢𑁆𑀢𑀸.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 ‘‘𑀘𑀓𑁆𑀔𑀽’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦, 𑀘𑀓𑁆𑀔𑀼𑀦𑀸 𑀯𑀸 𑀓𑀸𑀭𑀡𑀪𑀽𑀢𑁂𑀦, 𑀤𑁆𑀯𑀸𑀭𑀪𑀽𑀢𑁂𑀦 𑀯𑀸 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸. 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻𑀢𑀺 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀲𑁆𑀲𑀸𑀬𑀁 𑀧𑀝𑀺𑀓𑁆𑀔𑁂𑀧𑁄, 𑀦 𑀦𑁂𑀓𑁆𑀔𑀫𑁆𑀫𑀧𑀓𑁆𑀔𑀺𑀓𑀸𑀬 𑀓𑀺𑀭𑀺𑀬𑀸𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬. 𑀙𑀴𑀗𑁆𑀕𑀼𑀧𑁂𑀓𑁆𑀔𑀦𑁆𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀮𑀓𑁆𑀔𑀡𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀬𑀸 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸’’𑀢𑀺 𑀮𑀤𑁆𑀥𑀦𑀸𑀫𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀁. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀧𑀝𑀺𑀲𑀫𑁆𑀪𑀺𑀤𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁭𑁬. 𑀧𑀓𑁆𑀔𑀻𑀆𑀤𑀻𑀦𑀦𑁆𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸𑀢𑀺 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀘𑀓𑁆𑀔𑀼𑀯𑀺𑀲𑀼𑀤𑁆𑀥𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀸𑀯𑁂𑀦 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀺𑀓𑀸𑀦𑀁. 𑀛𑀸𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀧𑀢𑁆𑀢𑀁 𑀛𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀯𑀺𑀧𑀲𑁆𑀲𑀦𑀸𑀧𑀺 𑀉𑀓𑁆𑀓𑀁𑀲𑀕𑀢𑀸 𑀉𑀩𑁆𑀩𑁂𑀕𑀧𑀻𑀢𑀺𑀲𑀳𑀺𑀢𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀫𑀢𑁆𑀢𑀸𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀁 𑀯𑀸’’𑀢𑀺. ‘‘𑀧𑀞𑀫𑀓𑀧𑁆𑀧𑀺𑀓𑀸𑀦’’𑀦𑁆𑀢𑀺 𑀇𑀤𑀁 ‘‘𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀦𑀩𑁆𑀩𑀲𑀼𑀫𑀸𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑁩𑁭𑁭. 𑀯𑁂𑀳𑀸𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸. 𑀘𑀓𑁆𑀓𑀯𑀢𑁆𑀢𑀻 𑀳𑀺 𑀘𑀓𑁆𑀓𑀭𑀢𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀢𑁄 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀲𑀺𑀦𑁂𑀭𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀅𑀦𑀼𑀲𑀁𑀬𑀸𑀬𑀢𑀻𑀢𑀺. 𑀅𑀲𑁆𑀲𑀩𑀦𑁆𑀥𑀸𑀢𑀺 𑀅𑀲𑁆𑀲𑀧𑀸𑀮𑀸, 𑀬𑁂 𑀅𑀲𑁆𑀲𑀸𑀦𑀁 𑀬𑀯𑀤𑀸𑀬𑀓𑀸. 𑀢𑀣𑀸 𑀕𑁄𑀩𑀦𑁆𑀥𑀸.

𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸𑀬 𑀅𑀢𑀺𑀧𑀧𑀜𑁆𑀘𑁄 𑀳𑁄𑀢𑀻𑀢𑀺 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺𑀁 𑀮𑀓𑁆𑀔𑀡𑀢𑁄 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀧𑀭𑀺𑀧𑀸𑀓𑀁 𑀕𑀢𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀇𑀚𑁆𑀛𑀦𑀓𑀯𑀺𑀲𑁂𑀲𑁄’’𑀢𑀺 ¶ 𑀯𑀢𑁆𑀯𑀸𑀧𑀺 𑀚𑁄𑀢𑀺𑀓𑀸𑀤𑀻𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀯𑀡𑁆𑀡𑀧𑀩𑁆𑀩𑀢𑁄𑀢𑀺 𑀲𑀩𑁆𑀩𑀲𑀼𑀯𑀡𑁆𑀡𑀫𑀬𑁄 𑀧𑀩𑁆𑀩𑀢𑁄. 𑀢𑀲𑁆𑀲 𑀓𑀺𑀭 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑁂 𑀑𑀥𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀓𑀲𑀻𑀢𑀸𑀫𑀢𑁆𑀢𑁂𑀢𑀺 𑀏𑀢𑁆𑀣 𑀲𑀻𑀢𑀸 𑀦𑀸𑀫 𑀓𑀲𑀦𑀯𑀲𑁂𑀦 𑀦𑀗𑁆𑀕𑀮𑀲𑁆𑀲 𑀕𑀢𑀫𑀕𑁆𑀕𑁄. 𑀢𑀼𑀫𑁆𑀩𑀁 𑀦𑀸𑀫 𑀆𑀴𑁆𑀳𑀓𑀁. 𑀘𑀼𑀤𑁆𑀤𑀲 𑀫𑀕𑁆𑀕𑀸𑀢𑀺 𑀘𑀢𑀼𑀤𑁆𑀤𑀲 𑀓𑀲𑀦𑀫𑀕𑁆𑀕𑀸.

𑁩𑁭𑁮. 𑀯𑀺𑀚𑁆𑀚𑀁 𑀧𑀭𑀺𑀚𑀧𑀺𑀢𑁆𑀯𑀸𑀢𑀺 𑀕𑀦𑁆𑀥𑀸𑀭𑀻𑀯𑀺𑀚𑁆𑀚𑀸𑀤𑀺𑀓𑀁 𑀅𑀢𑁆𑀢𑀦𑁄 𑀯𑀺𑀚𑁆𑀚𑀁 𑀓𑀢𑀽𑀧𑀘𑀸𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀦𑁆𑀢𑀧𑀞𑀦𑀓𑁆𑀓𑀫𑁂𑀦 𑀧𑀞𑀺𑀢𑁆𑀯𑀸.

𑁩𑁭𑁯. 𑀲𑀫𑁆𑀫𑀸𑀧𑀬𑁄𑀕𑁂𑀦𑀸𑀢𑀺 𑀉𑀧𑀸𑀬𑀧𑀬𑁄𑀕𑁂𑀦, 𑀬𑀣𑀸 𑀬𑀣𑀺𑀘𑁆𑀙𑀺𑀢𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀢𑀜𑀸𑀬𑀸𑀭𑀫𑁆𑀪𑁂𑀦. 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀓𑀫𑁆𑀫𑀲𑁆𑀲. 𑀏𑀢𑁆𑀣 𑀘𑀸𑀢𑀺 ‘‘𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑁆𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁮) 𑀇𑀫𑀺𑀲𑁆𑀲𑀸 𑀤𑀲𑀫𑀸𑀬 𑀇𑀤𑁆𑀥𑀺𑀬𑀸 𑀦𑀺𑀤𑁆𑀤𑁂𑀲𑁂𑀧𑀺. 𑀧𑀼𑀭𑀺𑀫𑀧𑀸𑀴𑀺𑀲𑀤𑀺𑀲𑀸𑀯𑀸’’𑀢𑀺 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀇𑀤𑁆𑀥𑀺𑀆𑀤𑀻𑀦𑀁 𑀦𑀺𑀤𑁆𑀤𑁂𑀲𑀲𑀤𑀺𑀲𑀸𑀯. 𑀲𑀓𑀝𑀩𑁆𑀬𑀽𑀳𑀸𑀤𑀺𑀓𑀭𑀡𑀯𑀲𑁂𑀦𑀸𑀢𑀺 𑀲𑀓𑀝𑀩𑁆𑀬𑀽𑀳𑀘𑀓𑁆𑀓𑀩𑁆𑀬𑀽𑀳𑀧𑀤𑀼𑀫𑀩𑁆𑀬𑀽𑀳𑀸𑀤𑀻𑀦𑀁 𑀲𑀁𑀯𑀺𑀥𑀸𑀦𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀯𑀺𑀲𑁂𑀲𑁄𑀢𑀺 ¶ 𑀲𑀫𑁆𑀩𑀦𑁆𑀥𑁄. 𑀕𑀡𑀺𑀢𑀕𑀦𑁆𑀥𑀩𑁆𑀩𑀸𑀤𑀺 𑀲𑀺𑀧𑁆𑀧𑀓𑀫𑁆𑀫𑀁. 𑀲𑀮𑁆𑀮𑀓𑀢𑁆𑀢𑀓𑀸𑀤𑀺 𑀯𑁂𑀚𑁆𑀚𑀓𑀫𑁆𑀫𑀁. 𑀇𑀭𑀼𑀩𑁆𑀩𑁂𑀤𑀸𑀤𑀻𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁.

‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁩𑁮; 𑀫. 𑀦𑀺. 𑁧.𑁧𑁪𑁭; 𑀲𑀁. 𑀦𑀺. 𑁫.𑁮𑁩𑁪; 𑀧𑀝𑀺. 𑀫. 𑁧.𑁧𑁦𑁨; 𑁩.𑁧𑁦) 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀏𑀯 𑀕𑀳𑀺𑀢𑀢𑁆𑀢𑀸 𑀆𑀳 ‘‘𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺𑀬𑁂𑀯 𑀆𑀕𑀢𑀸’’𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀅𑀪𑀺𑀜𑁆𑀜𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑁂, 𑀇𑀤𑁆𑀥𑀺𑀯𑀺𑀥𑀲𑀗𑁆𑀔𑀸𑀢𑁂 𑀯𑀸 𑀅𑀢𑁆𑀣𑁂.

𑁩𑁮𑁦. ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁫𑁧) 𑀓𑁄𑀝𑁆𑀞𑀸𑀲𑀢𑁆𑀣𑁄 𑀯𑀺𑀥𑀲𑀤𑁆𑀤𑁄, ‘‘𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁩.𑁧𑁩) 𑀯𑀺𑀓𑀧𑁆𑀧𑀢𑁆𑀣𑁄, 𑀢𑀤𑀼𑀪𑀬𑀫𑁆𑀧𑁂𑀢𑁆𑀣 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑁆𑀥𑀺𑀯𑀺𑀥𑀸𑀬𑀸𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀸𑀬, 𑀇𑀤𑁆𑀥𑀺𑀯𑀺𑀓𑀧𑁆𑀧𑀸𑀬 𑀯𑀸’’𑀢𑀺. 𑀇𑀤𑁆𑀥𑀺 𑀳𑀺 𑀅𑀪𑀺𑀜𑁆𑀜𑀸𑀲𑀼 𑀏𑀓𑁄 𑀓𑁄𑀝𑁆𑀞𑀸𑀲𑁄, 𑀯𑀓𑁆𑀔𑀫𑀸𑀦𑁂𑀳𑀺 𑀪𑁂𑀤𑁂𑀳𑀺 𑀅𑀦𑁂𑀓𑀧𑁆𑀧𑀪𑁂𑀤𑀸 𑀘. 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀲𑁆𑀲 𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑀲𑁆𑀲, 𑀘𑀺𑀢𑁆𑀢𑀧𑀭𑀺𑀤𑀫𑀦𑀲𑁆𑀲 𑀲𑀫𑀸𑀳𑀺𑀢𑀢𑀸𑀤𑀺𑀧𑁆𑀧𑀓𑀸𑀭𑀲𑁆𑀲 𑀘 𑀯𑀲𑁂𑀦. ‘‘𑀇𑀤𑁆𑀥𑀺𑀯𑀺𑀥𑀸𑀬𑀸’’𑀢𑀺 𑀢𑀤𑀢𑁆𑀣𑀲𑁆𑀲 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀤𑁆𑀥𑀺𑀯𑀺𑀥𑀸𑀥𑀺𑀕𑀫𑀢𑁆𑀣𑀸𑀬𑀸’’𑀢𑀺. ‘‘𑀓𑀲𑀺𑀡𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸’’𑀢𑀺 𑀇𑀤𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀁 ¶ 𑀲𑀫𑀸𑀦𑀲𑀦𑁆𑀢𑀸𑀦𑀢𑀸𑀬 𑀯𑀼𑀢𑁆𑀢𑀁, 𑀦 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀓𑀲𑀺𑀡𑀸𑀭𑀫𑁆𑀫𑀡𑀢𑁆𑀢𑀸. 𑀇𑀤𑁆𑀥𑀺𑀯𑀺𑀥𑀸𑀪𑀺𑀫𑀼𑀔𑀁 𑀧𑁂𑀲𑁂𑀢𑀻𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑁆𑀲 𑀇𑀤𑁆𑀥𑀺𑀯𑀺𑀥𑀲𑁆𑀲 𑀅𑀪𑀺𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑁂𑀢𑀺. 𑀬𑀁 𑀳𑀺 ‘‘𑀲𑀢𑀁 𑀳𑁄𑀫𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀦𑀁, 𑀢𑀤𑁂𑀯𑀲𑁆𑀲 𑀅𑀪𑀺𑀦𑀻𑀳𑀭𑀡𑀁, 𑀇𑀤𑁆𑀥𑀺𑀯𑀺𑀥𑀸𑀪𑀺𑀫𑀼𑀔𑀧𑁂𑀲𑀦𑀜𑁆𑀘 𑀢𑀣𑁂𑀯 𑀇𑀤𑁆𑀥𑀺𑀯𑀺𑀥𑀲𑁆𑀲 𑀧𑀯𑀢𑁆𑀢𑀦𑀢𑁄 𑀅𑀪𑀺𑀦𑀺𑀦𑁆𑀦𑀸𑀫𑀦𑀁 𑀇𑀥 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀇𑀤𑁆𑀥𑀺𑀯𑀺𑀥𑁂 𑀅𑀥𑀺𑀫𑀼𑀢𑁆𑀢𑀻𑀢𑀺 𑀆𑀳 ‘‘𑀅𑀥𑀺𑀕𑀦𑁆𑀢𑀩𑁆𑀩𑀇𑀤𑁆𑀥𑀺𑀧𑁄𑀡𑀁 𑀇𑀤𑁆𑀥𑀺𑀧𑀩𑁆𑀪𑀸𑀭𑀁 𑀓𑀭𑁄𑀢𑀻’’𑀢𑀺. 𑀇𑀥 𑀧𑀘𑁆𑀘𑀦𑀼𑀪𑀯𑀦𑀨𑀼𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀢𑁆𑀢𑀺𑀧𑀭𑀺𑀬𑀸𑀬𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀅𑀲𑁆𑀲𑀸𑀢𑀺 𑀇𑀤𑁆𑀥𑀺𑀯𑀺𑀥𑀲𑁆𑀲.

𑀏𑀓𑁄𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀁 𑀩𑀳𑀼𑀪𑀸𑀯𑀁 𑀉𑀧𑀸𑀤𑀸𑀬 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑁄 𑀳𑀺𑀲𑁆𑀲 𑀧𑀝𑀺𑀬𑁄𑀕𑀻 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻’’𑀢𑀺. 𑀲𑁄 𑀘 𑀔𑁄 𑀩𑀳𑀼𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀞𑀺𑀢𑀲𑁆𑀲 𑀅𑀦𑁆𑀢𑀭𑀸𑀯 𑀏𑀓𑀪𑀸𑀯𑀽𑀧𑀕𑀫𑁄. 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀧𑀦 𑀲𑀭𑀲𑁂𑀦𑁂𑀯 𑀏𑀓𑀪𑀸𑀯𑀽𑀧𑀕𑀫𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄 𑀅𑀦𑀺𑀤𑁆𑀥𑀺𑀦𑀺𑀫𑁆𑀫𑀸𑀦𑀪𑀸𑀯𑀢𑁄. 𑀢𑀫𑁆𑀧𑀺 𑀧𑀼𑀩𑁆𑀩𑁂 𑀓𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀺𑀤𑁆𑀥𑀢𑁆𑀢𑀸 𑀇𑀤𑁆𑀥𑀸𑀦𑀼𑀪𑀸𑀯𑁄𑀬𑁂𑀯𑀸𑀢𑀺 𑀓𑁂𑀘𑀺. 𑀅𑀝𑁆𑀞𑀸𑀦𑁂 𑀯𑀸𑀬𑀁 𑀧𑀺-𑀲𑀤𑁆𑀤𑁄, 𑀏𑀓𑁄 𑀳𑀼𑀢𑁆𑀯𑀸 𑀩𑀳𑀼𑀥𑀸𑀧𑀺 𑀳𑁄𑀢𑀺, 𑀩𑀳𑀼𑀥𑀸 𑀳𑀼𑀢𑁆𑀯𑀸 𑀏𑀓𑁄𑀧𑀺 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀧𑀺-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀁 𑀏𑀓𑀪𑀸𑀯𑀁 𑀉𑀧𑀸𑀤𑀸𑀬 ¶ ‘‘𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄’’𑀢𑀺 𑀯𑀢𑁆𑀯𑀸 ‘‘𑀲𑁄 𑀳𑀻’’𑀢𑀺𑀆𑀤𑀺 𑀲𑀩𑁆𑀩𑀁 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀩𑀳𑀼𑀪𑀸𑀯𑀦𑀺𑀫𑁆𑀫𑀸𑀦𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀽𑀦𑀁 𑀲𑀦𑁆𑀢𑀺𑀓𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀳𑀽𑀦𑀁 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀢𑀦𑀸 𑀦𑀺𑀫𑁆𑀫𑀺𑀢𑀸𑀦𑀁 𑀩𑀳𑀽𑀦𑀁 𑀲𑀫𑀻𑀧𑁂, 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 ‘‘𑀥𑀫𑁆𑀫𑀁 𑀯𑀸 𑀓𑀣𑁂𑀢𑀼𑀓𑀸𑀫𑁄’’𑀢𑀺 𑀏𑀯𑀫𑀸𑀤𑀺 𑀲𑀗𑁆𑀕𑀬𑁆𑀳𑀢𑀺. ‘‘𑀜𑀸𑀡𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄 𑀏𑀯𑀁 𑀳𑁄𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁩𑁮𑁧. 𑀪𑀯𑀢𑀺 𑀏𑀢𑁆𑀣 𑀇𑀤𑁆𑀥𑀻𑀢𑀺 𑀪𑀽𑀫𑀺𑀬𑁄, 𑀛𑀸𑀦𑀸𑀦𑀺. 𑀏𑀢𑁆𑀣𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀯𑁂𑀓𑀢𑁄 𑀚𑀸𑀢𑀸 𑀪𑀽𑀫𑀺 𑀯𑀺𑀯𑁂𑀓𑀚𑀪𑀽𑀫𑀺. 𑀯𑀺𑀯𑁂𑀓𑀚𑀁 𑀳𑀺 𑀧𑀞𑀫𑀁 𑀛𑀸𑀦𑀁 𑀦𑀻𑀯𑀭𑀡𑀯𑀺𑀯𑁂𑀓𑀲𑀫𑁆𑀪𑀽𑀢𑀢𑁆𑀢𑀸. 𑀧𑀻𑀢𑀺𑀲𑀼𑀔𑀪𑀽𑀢𑀸 𑀪𑀽𑀫𑀺 𑀧𑀻𑀢𑀺𑀲𑀼𑀔𑀪𑀽𑀫𑀺. 𑀤𑀼𑀢𑀺𑀬𑀚𑁆𑀛𑀸𑀦𑀜𑁆𑀳𑀺 𑀧𑀻𑀢𑀺𑀲𑀼𑀔𑀪𑀽𑀫𑀺𑀪𑀽𑀢𑀜𑁆𑀘𑁂𑀯 𑀧𑀻𑀢𑀺𑀲𑀼𑀔𑀲𑀜𑁆𑀚𑀸𑀢𑀜𑁆𑀘 𑀲𑀫𑀸𑀥𑀺𑀯𑀲𑁂𑀦. 𑀉𑀧𑀭𑀺 𑀤𑁆𑀯𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑁆𑀥𑀺𑀮𑀸𑀪𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀅𑀥𑀺𑀕𑀫𑀸𑀬. 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀁 𑀮𑀪𑀫𑀸𑀦𑀸𑀬, 𑀩𑀳𑀼𑀮𑀻𑀓𑀭𑀡𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀯𑀺𑀯𑀺𑀥𑀭𑀽𑀧𑀓𑀸𑀭𑀡𑀸𑀬, 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸𑀢𑀺 𑀅𑀢𑁆𑀣𑁄 ¶ . 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀯𑀺𑀯𑀺𑀥𑀸𑀦𑀺𑀲𑀁𑀲𑀧𑀲𑀯𑀦𑀸𑀬. 𑀇𑀤𑁆𑀥𑀺𑀯𑀲𑀺𑀢𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀆𑀤𑀺𑀪𑀸𑀯𑀸𑀯𑀳𑀯𑀲𑀻𑀪𑀸𑀯𑀢𑁆𑀣𑀸𑀬. 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬𑀸𑀢𑀺 𑀇𑀤𑁆𑀥𑀺𑀬𑀸 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀯𑀺𑀕𑀢𑀲𑀁𑀓𑀺𑀮𑁂𑀲𑀢𑀸𑀬 𑀲𑀼𑀝𑁆𑀞𑀼 𑀯𑀺𑀲𑀸𑀭𑀤𑀪𑀸𑀯𑀸𑀬. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀢𑀸𑀯 𑀇𑀤𑁆𑀥𑀺𑀬𑀸 𑀪𑀽𑀫𑀺 𑀳𑁄𑀢𑀼 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁄, 𑀇𑀢𑀭𑀸𑀦𑀺 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀻𑀡𑀺 𑀛𑀸𑀦𑀸𑀦𑀺 𑀲𑀫𑁆𑀪𑀸𑀭𑀪𑀽𑀫𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀨𑀭𑀡𑁂𑀦, 𑀧𑀞𑀫𑀤𑀼𑀢𑀺𑀬𑁂𑀲𑀼 𑀧𑀻𑀢𑀺𑀨𑀭𑀡𑁂𑀦 𑀲𑀼𑀔𑀨𑀭𑀡𑁂𑀦 𑀘 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀬𑀣𑀸𑀭𑀳𑀯𑀲𑁂𑀦 𑀬𑁄𑀚𑀦𑀸. 𑀨𑀭𑀡𑀁 𑀘𑁂𑀢𑁆𑀣 𑀛𑀸𑀦𑀲𑁆𑀲 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀲𑀸𑀢𑀺𑀲𑀬𑀸𑀦𑀁 𑀧𑀻𑀢𑀺𑀲𑀼𑀔𑀸𑀦𑀁 𑀯𑀲𑁂𑀦 𑀛𑀸𑀦𑀧𑁆𑀧𑀘𑁆𑀘𑀬𑀸𑀤𑀺𑀦𑀸 𑀲𑀳𑀚𑀸𑀢𑀦𑀸𑀫𑀓𑀸𑀬𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀁, 𑀭𑀽𑀧𑀓𑀸𑀬𑀲𑁆𑀲 𑀘 𑀢𑀁𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀧𑀭𑀺𑀧𑁆𑀨𑀼𑀝𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁪𑁨𑁭). 𑀲𑀼𑀔𑀲𑀜𑁆𑀜𑀦𑁆𑀢𑀺 𑀛𑀸𑀦𑀲𑀼𑀔𑁂𑀦 𑀲𑀳𑀕𑀢𑀁 𑀲𑀜𑁆𑀜𑀁. 𑀮𑀳𑀼𑀲𑀜𑁆𑀜𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀮𑀳𑀼𑀢𑀸𑀲𑀳𑀕𑀢𑀁 𑀲𑀜𑁆𑀜𑀁. 𑀑𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀢𑁂𑀲𑀼 𑀳𑀺 𑀛𑀸𑀦𑁂𑀲𑀼 𑀲𑀸𑀢𑀺𑀲𑀬𑀸𑀬 𑀮𑀳𑀼𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑁄 𑀬𑁄𑀕𑀻 𑀢𑀁 𑀲𑀫𑁄𑀓𑁆𑀓𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀦𑀺𑀤𑁆𑀤𑁂𑀲𑁄. 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀮𑀳𑀼𑀢𑀸 𑀯𑀺𑀦𑀸𑀧𑀺 𑀇𑀤𑁆𑀥𑀺𑀬𑀸 𑀆𑀓𑀸𑀲𑀁 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀧𑁆𑀧𑀢𑁆𑀢𑀸 𑀯𑀺𑀬 𑀳𑁄𑀢𑀺. 𑀮𑀳𑀼𑀪𑀸𑀯𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑀸𑀧𑀺 𑀕𑀳𑀺𑀢𑀸 𑀏𑀯. 𑀢𑁂𑀦𑀸𑀳 ‘‘𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀓𑀸𑀬𑁄 𑀳𑀼𑀢𑁆𑀯𑀸’’𑀢𑀺.

𑀇𑀫𑀺𑀦𑀸 ¶ 𑀧𑀭𑀺𑀬𑀸𑀬𑁂𑀦𑀸𑀢𑀺 𑀢𑀺𑀡𑁆𑀡𑀁 𑀛𑀸𑀦𑀸𑀦𑀁 𑀲𑀫𑀸𑀧𑀚𑁆𑀚𑀦𑁂𑀦 𑀲𑀼𑀔𑀮𑀳𑀼𑀪𑀸𑀯𑀧𑁆𑀧𑀢𑁆𑀢𑀦𑀸𑀫𑀭𑀽𑀧𑀓𑀸𑀬𑀲𑁆𑀲 𑀲𑀢𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑁂 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀼𑀔𑁂𑀦𑁂𑀯 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀧𑀓𑀢𑀺𑀪𑀽𑀫𑀺𑀬𑀸 𑀳𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀲𑀫𑁆𑀪𑀸𑀭𑀪𑀽𑀫𑀺𑀬𑁄 𑀧𑀸𑀓𑀸𑀭𑀲𑁆𑀲 𑀦𑁂𑀫𑀺𑀧𑁆𑀧𑀤𑁂𑀲𑁄 𑀯𑀺𑀬𑀸𑀢𑀺.

𑁩𑁮𑁨. 𑀇𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀤𑁆𑀥𑀺𑀧𑀸𑀤𑀸𑀢𑀺 𑀏𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺. 𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀧𑀸𑀤𑁄𑀢𑀺 𑀧𑀢𑀺𑀝𑁆𑀞𑀸, 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺. 𑀅𑀬𑀁 𑀢𑀸𑀯 𑀅𑀝𑁆𑀞𑀓𑀣𑀸𑀦𑀬𑁄. 𑀢𑀢𑁆𑀣 𑀇𑀤𑁆𑀥𑀺-𑀲𑀤𑁆𑀤𑀲𑁆𑀲 𑀧𑀞𑀫𑁄 𑀓𑀢𑁆𑀢𑀼𑀅𑀢𑁆𑀣𑁄, 𑀤𑀼𑀢𑀺𑀬𑁄 𑀓𑀭𑀡𑀢𑁆𑀣𑁄 ¶ 𑀯𑀼𑀢𑁆𑀢𑁄. 𑀧𑀸𑀤-𑀲𑀤𑁆𑀤𑀲𑁆𑀲 𑀏𑀓𑁄 𑀓𑀭𑀡𑀢𑁆𑀣𑁄𑀯. 𑀧𑀚𑁆𑀚𑀺𑀢𑀩𑁆𑀩𑀸𑀯 𑀇𑀤𑁆𑀥𑀺 𑀯𑀼𑀢𑁆𑀢𑀸, 𑀦 𑀘 𑀇𑀚𑁆𑀛𑀦𑁆𑀢𑀻, 𑀧𑀚𑁆𑀚𑀺𑀢𑀩𑁆𑀩𑀸 𑀘 𑀇𑀤𑁆𑀥𑀺 𑀧𑀚𑁆𑀚𑀦𑀓𑀭𑀡𑁂𑀦 𑀧𑀸𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀸 𑀳𑁄𑀢𑀻𑀢𑀺 𑀧𑀞𑀫𑁂𑀦 𑀅𑀢𑁆𑀣𑁂𑀦 ‘‘𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀇𑀤𑁆𑀥𑀺𑀓𑀺𑀭𑀺𑀬𑀸𑀓𑀭𑀡𑁂𑀦 𑀲𑀸𑀥𑁂𑀢𑀩𑁆𑀩𑀸𑀯 𑀯𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀇𑀤𑁆𑀥𑀺 𑀧𑀚𑁆𑀚𑀦𑀓𑀺𑀭𑀺𑀬𑀸𑀓𑀭𑀡𑁂𑀦 𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀤𑁆𑀯𑀺𑀦𑁆𑀦𑀁 𑀓𑀭𑀡𑀸𑀦𑀁 𑀦 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀲𑀫𑁆𑀪𑀯𑀢𑀻𑀢𑀺 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 ‘‘𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀲𑁆𑀫𑀸 𑀧𑀞𑀫𑁂𑀦𑀢𑁆𑀣𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑁄, 𑀤𑀼𑀢𑀺𑀬𑁂𑀦 𑀲𑀸𑀫𑀺𑀯𑀘𑀦𑀲𑀫𑀸𑀲𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀲𑀫𑀸𑀲𑁄 𑀬𑀼𑀢𑁆𑀢𑁄, 𑀬𑀣𑀸𑀯𑀼𑀢𑁆𑀢𑁄𑀧𑀺 𑀯𑀸, 𑀧𑀸𑀤𑀲𑁆𑀲 𑀇𑀚𑁆𑀛𑀫𑀸𑀦𑀓𑁄𑀝𑁆𑀞𑀸𑀲𑀇𑀚𑁆𑀛𑀦𑀓𑀭𑀡𑀽𑀧𑀸𑀬𑀪𑀸𑀯𑀢𑁄.

𑀧𑀼𑀩𑁆𑀩𑀪𑀸𑀕𑀙𑀦𑁆𑀤𑀯𑀲𑁂𑀦 𑀙𑀦𑁆𑀤𑀳𑁂𑀢𑀼𑀓𑁄. 𑀲𑀫𑁆𑀧𑀬𑀼𑀢𑁆𑀢𑀙𑀦𑁆𑀤𑀯𑀲𑁂𑀦 𑀙𑀦𑁆𑀤𑀸𑀥𑀺𑀓𑁄. 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀏𑀯 𑀧𑀦 𑀲𑀳𑀚𑀸𑀢𑀙𑀦𑁆𑀤𑀲𑁆𑀲𑀸𑀧𑀺 𑀅𑀥𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 ‘‘𑀙𑀦𑁆𑀤𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀙𑀦𑁆𑀤𑀸𑀥𑀺𑀧𑀢𑀺𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀅𑀥𑀺𑀧𑀢𑀺-𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀲𑀫𑀸𑀲𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀙𑀦𑁆𑀤𑀳𑁂𑀢𑀼𑀓𑁄 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀧𑀥𑀸𑀦𑀪𑀽𑀢𑀸𑀢𑀺 𑀯𑀻𑀭𑀺𑀬𑀪𑀽𑀢𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀢𑀲𑀗𑁆𑀔𑀸𑀭𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀦 𑀧𑀥𑀸𑀦𑀕𑁆𑀕𑀳𑀡𑀁. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀫𑁆𑀧𑀺 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀅𑀜𑁆𑀜𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀁. 𑀧𑀥𑀸𑀦𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀦 𑀯𑀻𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀬𑁄 𑀧𑀦 ‘‘𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀏𑀯𑀁 𑀲𑀫𑀸𑀲𑀬𑁄𑀚𑀦𑀸𑀯𑀲𑁂𑀦 𑀧𑀸𑀤𑀲𑁆𑀲 𑀉𑀧𑀸𑀬𑀢𑁆𑀣𑀢𑀁 𑀕𑀳𑁂𑀢𑁆𑀯𑀸 𑀇𑀤𑁆𑀥𑀺𑀧𑀸𑀤𑀢𑁆𑀣𑁄 ¶ 𑀯𑀼𑀢𑁆𑀢𑁄, 𑀲𑁄 𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀁 𑀓𑀢𑁆𑀢𑀼𑀓𑀭𑀡𑀺𑀤𑁆𑀥𑀺𑀪𑀸𑀯𑀁 ‘‘𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁫𑁭) 𑀯𑀸 𑀅𑀪𑀺𑀥𑀫𑁆𑀫𑁂 𑀆𑀕𑀢𑀢𑁆𑀢𑀸 𑀙𑀦𑁆𑀤𑀸𑀤𑀻𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺 𑀲𑀸𑀥𑁂𑀢𑀩𑁆𑀩𑀸𑀬 𑀯𑀼𑀤𑁆𑀥𑀺𑀬𑀸 𑀓𑀢𑁆𑀢𑀺𑀤𑁆𑀥𑀺𑀪𑀸𑀯𑀁, 𑀙𑀦𑁆𑀤𑀸𑀤𑀻𑀦𑀁 𑀓𑀭𑀡𑀺𑀤𑁆𑀥𑀺𑀪𑀸𑀯𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁂 ‘‘𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀲𑀫𑀸𑀥𑀺𑀯𑀺𑀲𑁂𑀲𑀦𑀁 𑀯𑀻𑀭𑀺𑀬𑀸𑀥𑀺𑀧𑀢𑀺 𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀻𑀢𑀺. 𑀤𑀼𑀢𑀺𑀬𑀁 𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀁. 𑀤𑁆𑀯𑁂 𑀏𑀯 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺 𑀲𑀫𑀸𑀥𑀺 ¶ , 𑀧𑀥𑀸𑀦𑀲𑀗𑁆𑀔𑀸𑀭𑁄 𑀘. 𑀙𑀦𑁆𑀤𑀸𑀤𑀬𑁄 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀧𑀦 𑀧𑀥𑀸𑀦𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑀺𑀢𑁄, 𑀦 𑀙𑀦𑁆𑀤𑀸𑀤𑀻𑀳𑀻𑀢𑀺 𑀦 𑀇𑀥 𑀯𑀻𑀭𑀺𑀬𑀸𑀥𑀺𑀧𑀢𑀺𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 𑀞𑀺𑀢𑀫𑁂𑀯 𑀲𑀫𑀦𑁆𑀦𑀸𑀕𑀫𑀗𑁆𑀕𑀯𑀲𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀸𑀧𑀺 𑀤𑁆𑀯𑀻𑀳𑀺 𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀲𑀫𑀸𑀥𑀺, 𑀢𑀣𑀸 𑀯𑀺𑀲𑀺𑀝𑁆𑀞𑁂𑀦𑁂𑀯 𑀘 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀥𑀸𑀦𑀲𑀗𑁆𑀔𑀸𑀭𑁄, 𑀲𑁂𑀲𑀥𑀫𑁆𑀫𑀸 𑀘, 𑀢𑀲𑁆𑀫𑀸 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀦𑀪𑀸𑀯𑁄 𑀘 𑀙𑀦𑁆𑀤𑀸𑀤𑀻𑀦𑀁 𑀢𑀁𑀢𑀁𑀅𑀯𑀲𑁆𑀲𑀬𑀯𑀲𑁂𑀦 𑀳𑁄𑀢𑀻𑀢𑀺.

𑀅𑀣 𑀯𑀸𑀢𑀺𑀆𑀤𑀺𑀦𑀸 𑀦𑀺𑀲𑁆𑀲𑀬𑀝𑁆𑀞𑁂𑀧𑀺 𑀧𑀸𑀤-𑀲𑀤𑁆𑀤𑁂 𑀉𑀧𑀸𑀬𑀝𑁆𑀞𑁂𑀦 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁫𑁭) 𑀙𑀦𑁆𑀤𑀸𑀤𑀻𑀦𑀫𑁂𑀯 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀘 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸𑀯 (𑀯𑀺𑀪. 𑁪𑁬𑁨) 𑀉𑀤𑁆𑀤𑁂𑀲𑀁 𑀓𑀢𑁆𑀯𑀸𑀧𑀺 𑀧𑀼𑀦 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑀺 𑀲𑀼𑀢𑁆𑀢𑁂, 𑀅𑀪𑀺𑀥𑀫𑁆𑀫𑁂 𑀘 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁, 𑀅𑀜𑁆𑀜𑀣𑀸 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀳𑁄𑀢𑀻𑀢𑀺.

𑁩𑁮𑁩. 𑀙𑀦𑁆𑀤𑀸𑀤𑀻𑀦𑀺 𑀅𑀝𑁆𑀞𑀸𑀢𑀺 𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀏𑀯𑀁 𑀙𑀦𑁆𑀤𑀸𑀤𑀻𑀦𑀺 𑀅𑀝𑁆𑀞. 𑀓𑀸𑀫𑀁 𑀘𑁂𑀢𑁆𑀣 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀲𑀫𑀸𑀥𑀺 𑀲𑀫𑀸𑀥𑀺 𑀏𑀯, 𑀢𑀣𑀸𑀧𑀺 𑀇𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀢𑀸𑀙𑀦𑁆𑀤𑀲𑀳𑀺𑀢𑁄𑀯 𑀲𑀫𑀸𑀥𑀺 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀓𑁂𑀯𑀮𑁄. 𑀏𑀯𑀁 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀬𑁄𑀧𑀺. 𑀢𑀲𑁆𑀫𑀸 𑀙𑀦𑁆𑀤𑀸𑀤𑀺𑀲𑀳𑀺𑀢𑀸 𑀏𑀢𑁂 𑀘𑀢𑁆𑀢𑀸𑀭𑁄 𑀘 𑀲𑀫𑀸𑀥𑀻, 𑀙𑀦𑁆𑀤𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀧𑀚𑁆𑀚𑀢𑀺 𑀇𑀤𑁆𑀥𑀺 𑀏𑀢𑁂𑀳𑀺 𑀧𑀸𑀧𑀼𑀡𑀻𑀬𑀢𑀺, 𑀲𑀬𑀁 𑀯𑀸 𑀧𑀚𑁆𑀚𑀦𑁆𑀢𑀺 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀤𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀙𑀦𑁆𑀤𑁄 𑀦 𑀲𑀫𑀸𑀥𑀻’’𑀢𑀺𑀆𑀤𑀺, 𑀢𑀁 𑀬𑀤𑀺𑀧𑀺 𑀙𑀦𑁆𑀤𑀸𑀤𑀬𑁄 𑀲𑀫𑀸𑀥𑀺𑀲𑀳𑀺𑀢𑀸𑀯 𑀇𑀤𑁆𑀥𑀺𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀢𑀣𑀸𑀧𑀺 𑀯𑀺𑀲𑀼𑀁 ¶ 𑀦𑁂𑀲𑀁 𑀧𑀤𑀪𑀸𑀯𑀤𑀲𑁆𑀲𑀦𑀁. 𑀏𑀓𑀢𑁄 𑀦𑀺𑀬𑀼𑀢𑁆𑀢𑁄𑀯, 𑀦 𑀏𑀓𑁂𑀓𑁄 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀬𑀼𑀢𑁆𑀢𑁄𑀯𑀸𑀢𑀺 𑀲𑀳𑀺𑀢𑁄 𑀏𑀯, 𑀦 𑀯𑀺𑀬𑀼𑀢𑁆𑀢𑁄.

𑁩𑁮𑁪. 𑀅𑀦𑁄𑀦𑀢𑀦𑁆𑀢𑀺 𑀦 𑀑𑀦𑀢𑀁, 𑀯𑀻𑀭𑀺𑀬𑁂𑀦 𑀧𑀕𑁆𑀕𑀳𑀺𑀢𑀢𑁆𑀢𑀸 𑀅𑀮𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻’’𑀢𑀺, 𑀓𑁄𑀲𑀚𑁆𑀚𑀦𑀺𑀫𑀺𑀢𑁆𑀢𑀁 𑀦 𑀘𑀮𑀢𑀻𑀢𑀺 ¶ 𑀅𑀢𑁆𑀣𑁄. 𑀉𑀤𑁆𑀥𑀁 𑀦𑀢𑀁 𑀉𑀦𑁆𑀦𑀢𑀁, 𑀉𑀤𑁆𑀥𑀢𑀁 𑀯𑀺𑀓𑁆𑀔𑀺𑀢𑁆𑀢𑀁. 𑀦 𑀉𑀦𑁆𑀦𑀢𑀁 𑀅𑀦𑀼𑀦𑁆𑀦𑀢𑀁, 𑀅𑀯𑀺𑀓𑁆𑀔𑀺𑀢𑁆𑀢𑀁 𑀲𑀫𑀸𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻’’𑀢𑀺. 𑀅𑀪𑀺𑀲𑀗𑁆𑀕𑀯𑀲𑁂𑀦 𑀦𑀢𑀁 𑀅𑀪𑀺𑀦𑀢𑀁, 𑀦 𑀅𑀪𑀺𑀦𑀢𑀁 𑀅𑀦𑀪𑀺𑀦𑀢𑀁, 𑀅𑀭𑀢𑁆𑀢𑀁. 𑀅𑀧𑀕𑀫𑀦𑀯𑀲𑁂𑀦 𑀦𑀢𑀁 𑀅𑀧𑀦𑀢𑀁, 𑀓𑁄𑀥𑀯𑀲𑁂𑀦 𑀯𑀺𑀫𑀼𑀔𑀁. 𑀦 𑀅𑀧𑀦𑀢𑀁 𑀅𑀦𑀧𑀦𑀢𑀁, 𑀅𑀤𑀼𑀝𑁆𑀞𑀁. 𑀤𑀺𑀝𑁆𑀞𑀺𑀬𑀸 ‘‘𑀅𑀳𑀁, 𑀫𑀫’’𑀦𑁆𑀢𑀺 𑀦𑀺𑀲𑁆𑀲𑀬𑀯𑀲𑁂𑀦 𑀦 𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀦𑀺𑀲𑁆𑀲𑀺𑀢𑀁. 𑀙𑀦𑁆𑀤𑀭𑀸𑀕𑀯𑀲𑁂𑀦 𑀦 𑀧𑀝𑀺𑀩𑀤𑁆𑀥𑀦𑁆𑀢𑀺 𑀅𑀧𑁆𑀧𑀝𑀺𑀩𑀤𑁆𑀥𑀁. 𑀭𑀸𑀕𑁄 𑀓𑁂𑀯𑀮𑀁 𑀆𑀲𑀢𑁆𑀢𑀺𑀫𑀢𑁆𑀢𑀁, 𑀙𑀦𑁆𑀤𑀭𑀸𑀕𑁄 𑀧𑀦 𑀩𑀳𑀮𑀓𑀺𑀮𑁂𑀲𑁄. 𑀢𑀣𑀸 𑀳𑀺𑀲𑁆𑀲 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀆𑀭𑀫𑁆𑀫𑀡𑀁 𑀧𑀝𑀺𑀩𑀤𑁆𑀥𑀫𑁂𑀯. 𑀯𑀺𑀧𑁆𑀧𑀫𑀼𑀢𑁆𑀢𑀦𑁆𑀢𑀺 𑀯𑀺𑀲𑁂𑀲𑀢𑁄 𑀧𑀫𑀼𑀢𑁆𑀢𑀁. 𑀛𑀸𑀦𑀸𑀦𑀁 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑀸𑀬 𑀆𑀳 ‘‘𑀓𑀸𑀫𑀭𑀸𑀕𑁂’’𑀢𑀺. 𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀯𑀺𑀯𑀺𑀢𑁆𑀢𑀁 𑀲𑀁𑀓𑀺𑀮𑁂𑀲𑀢𑁄, 𑀦 𑀯𑀸 𑀲𑀁𑀬𑀼𑀢𑁆𑀢𑀁 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺. 𑀯𑀺𑀫𑀭𑀺𑀬𑀸𑀤𑀺𑀓𑀢𑀁 𑀓𑀺𑀮𑁂𑀲𑀫𑀭𑀺𑀬𑀸𑀤𑀸𑀬, 𑀬𑀣𑀸 𑀈𑀲𑀓𑀫𑁆𑀧𑀺 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀦 𑀳𑁄𑀢𑀺, 𑀢𑀣𑀸 𑀧𑀝𑀺𑀧𑀦𑁆𑀦𑀁. 𑀏𑀓𑀢𑁆𑀢𑀕𑀢𑀦𑁆𑀢𑀺 𑀏𑀓𑀕𑁆𑀕𑀢𑀁 𑀉𑀧𑀕𑀢𑀁 𑀅𑀘𑁆𑀘𑀦𑁆𑀢𑀫𑁂𑀯 𑀲𑀫𑀸𑀳𑀺𑀢𑀁. 𑀢𑀢𑁄 𑀏𑀯 𑀦𑀸𑀦𑀢𑁆𑀢𑀓𑀺𑀮𑁂𑀲𑁂𑀳𑀺 𑀦𑀸𑀦𑀸𑀲𑀪𑀸𑀯𑁂𑀳𑀺 𑀓𑀺𑀮𑁂𑀲𑁂𑀳𑀺 𑀦 𑀇𑀜𑁆𑀚𑀢𑀺.

𑀏𑀲 𑀅𑀢𑁆𑀣𑁄𑀢𑀺 𑀓𑁄𑀲𑀚𑁆𑀚𑀸𑀤𑀺𑀦𑀺𑀫𑀺𑀢𑁆𑀢𑀁. 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀦𑁂𑀜𑁆𑀚𑀦𑀢𑁆𑀣𑁄 𑀲𑀺𑀤𑁆𑀥𑁄 𑀏𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑀢𑁆𑀢𑀸. 𑀧𑀼𑀦 𑀯𑀼𑀢𑁆𑀢𑁄𑀢𑀺 𑀇𑀤𑁆𑀥𑀺𑀬𑀸 𑀪𑀽𑀫𑀺𑀧𑀸𑀤𑀧𑀤𑀤𑀲𑁆𑀲𑀦𑀧𑁆𑀧𑀲𑀗𑁆𑀕𑁂𑀦 ‘‘𑀇𑀫𑀸𑀦𑀺 𑀫𑀽𑀮𑀸𑀦𑀺 𑀦𑀸𑀫𑀸’’𑀢𑀺 𑀫𑀽𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀯𑀼𑀢𑁆𑀢𑁄. 𑀧𑀼𑀭𑀺𑀫𑁄𑀢𑀺 ‘‘𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀙𑀥𑀸 𑀤𑀲𑁆𑀲𑀺𑀢𑀦𑀬𑁄. 𑀅𑀬𑀦𑁆𑀢𑀺 𑀅𑀥𑀼𑀦𑀸 𑀲𑁄𑀴𑀲𑀥𑀸 𑀤𑀲𑁆𑀲𑀺𑀢𑀦𑀬𑁄. 𑀲𑀼𑀢𑁆𑀢𑀦𑀬𑁂, 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂 𑀘 𑀤𑀲𑁆𑀲𑀺𑀢𑁂 𑀢𑀢𑁆𑀣 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀦 𑀅𑀤𑀲𑁆𑀲𑀺𑀢𑁂𑀢𑀺 𑀆𑀳 ‘‘𑀉𑀪𑀬𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣’’𑀦𑁆𑀢𑀺.

𑁩𑁮𑁫. 𑀜𑀸𑀡𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄𑀢𑀺 ‘‘𑀓𑀣𑀁 𑀧𑀦𑀸𑀬𑀁 𑀏𑀯𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀯𑀼𑀢𑁆𑀢𑀧𑀤𑀁 𑀉𑀤𑁆𑀥𑀭𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬𑀸’’𑀢𑀺. 𑀏𑀢𑁆𑀣 𑀅𑀦𑀼𑀧𑀼𑀩𑁆𑀩𑁂𑀦 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬𑀸𑀢𑀺 𑀓𑁂𑀘𑀺, 𑀢𑀁 𑀅𑀬𑀼𑀢𑁆𑀢𑀁. 𑀬𑀣𑀺𑀘𑁆𑀙𑀺𑀢𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀢𑁆𑀣𑀜𑁆𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀘 𑀅𑀪𑀺𑀜𑁆𑀜𑀸𑀧𑀸𑀤𑀓𑀁, 𑀦 𑀇𑀢𑀭𑀸𑀦𑀺. 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 ‘‘𑀲𑀢𑀁 𑀳𑁄𑀫𑀻’’𑀢𑀺𑀆𑀤𑀺𑀦𑀸 ¶ 𑀘𑀺𑀦𑁆𑀢𑀦𑀫𑁂𑀯𑁂𑀢𑁆𑀣 𑀧𑀭𑀺𑀓𑀫𑁆𑀫𑀓𑀭𑀡𑀁, 𑀢𑀣𑀸𑀯𑀚𑁆𑀚𑀦𑀫𑁂𑀯 𑀘 𑀆𑀯𑀚𑁆𑀚𑀦𑀁. 𑀤𑀼𑀢𑀺𑀬𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀢𑀢𑀺𑀬𑀫𑁆𑀧𑀺, 𑀢𑀢𑁄 𑀪𑀺𑀬𑁆𑀬𑁄𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀬𑀣𑀸 𑀳𑀺 𑀛𑀸𑀦𑀪𑀸𑀯𑀦𑀸, 𑀏𑀯𑀫𑀪𑀺𑀜𑁆𑀜𑀸𑀪𑀸𑀯𑀦𑀸𑀧𑀺. ‘‘𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭’’𑀦𑁆𑀢𑀺 𑀇𑀤𑀫𑁆𑀧𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀏𑀓𑁂𑀓𑀲𑁆𑀲 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀲𑀢𑀸𑀭𑀫𑁆𑀫𑀡𑀢𑀸 ¶ 𑀤𑀝𑁆𑀞𑀩𑁆𑀩𑀸 ‘‘𑀲𑀢𑀁 𑀳𑁄𑀫𑀻’’𑀢𑀺 𑀧𑀯𑀢𑁆𑀢𑀦𑀢𑁄. 𑀲𑀳𑀲𑁆𑀲𑀸𑀭𑀫𑁆𑀫𑀡𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀡𑁆𑀡𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀯𑀡𑁆𑀡𑀯𑀲𑁂𑀦. 𑀦𑁄 𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀢𑀺 𑀦 𑀲𑀢𑁆𑀢𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀢𑀁 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀫𑀺𑀯𑀸𑀢𑀺 𑀇𑀯𑀕𑁆𑀕𑀳𑀡𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑁆𑀲 𑀛𑀸𑀦𑀘𑀺𑀢𑁆𑀢𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀲𑀤𑀺𑀲𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀅𑀧𑁆𑀧𑀦𑀸𑀪𑀸𑀯𑀢𑁄. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀛𑀸𑀦𑀯𑀦𑁆𑀢𑀁, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁.

𑁩𑁮𑁬. 𑀬𑀤𑀺 𑀏𑀯𑀁 ‘‘𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀘𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀬𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀭𑀸𑀧𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀫𑁆𑀧𑀺. 𑀆𑀯𑀚𑁆𑀚𑀢𑀻𑀢𑀺 ‘‘𑀩𑀳𑀼𑀓𑀁 𑀆𑀯𑀚𑁆𑀚𑀢𑀻’’𑀢𑀺 𑀇𑀤𑀁 𑀧𑀸𑀞𑀧𑀤𑀁 𑀧𑀭𑀺𑀓𑀫𑁆𑀫𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀆𑀯𑀚𑁆𑀚𑀦𑀯𑀲𑁂𑀦. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀻𑀢𑀺 𑀅𑀪𑀺𑀜𑁆𑀜𑀸𑀜𑀸𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀓𑀸𑀫𑀸𑀯𑀘𑀭𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦. 𑀦 𑀳𑀺 𑀢𑀲𑁆𑀲 𑀢𑀸𑀤𑀺𑀲𑁄 𑀆𑀦𑀼𑀪𑀸𑀯𑁄 𑀅𑀢𑁆𑀣𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲𑁂𑀯 𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀫𑀸. 𑀅𑀬𑀫𑀥𑀺𑀝𑁆𑀞𑀸𑀦𑀓𑁆𑀓𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀓𑀁 𑀆𑀯𑀚𑁆𑀚𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀧𑀦𑀯𑀲𑁂𑀦𑀸𑀢𑀺 𑀦𑀺𑀧𑁆𑀨𑀸𑀤𑀦𑀯𑀲𑁂𑀦.

𑀓𑀸𑀬𑀲𑀓𑁆𑀔𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀦 𑀓𑁂𑀯𑀮𑀁 𑀯𑀘𑀦𑀫𑀢𑁆𑀢𑀫𑁂𑀯, 𑀅𑀣 𑀔𑁄 𑀅𑀬𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻𑀢𑀺 𑀲𑀓𑁆𑀔𑀺𑀤𑀲𑁆𑀲𑀦𑀢𑁆𑀣𑀁.

𑀓𑁄𑀓𑀦𑀤𑀦𑁆𑀢𑀺 𑀧𑀤𑀼𑀫𑀯𑀺𑀲𑁂𑀲𑀦𑀁 𑀬𑀣𑀸 ‘‘𑀓𑁄𑀓𑀸𑀲𑀓’’𑀦𑁆𑀢𑀺. 𑀢𑀁 𑀓𑀺𑀭 𑀩𑀳𑀼𑀧𑀢𑁆𑀢𑀁, 𑀯𑀡𑁆𑀡𑀲𑀫𑁆𑀧𑀦𑁆𑀦𑀁, 𑀅𑀢𑀺𑀯𑀺𑀬 𑀲𑀼𑀕𑀦𑁆𑀥𑀜𑁆𑀘 𑀳𑁄𑀢𑀺. 𑀧𑀸𑀢𑁄𑀢𑀺 𑀧𑀕𑁂𑀯. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁 𑀧𑀸𑀢𑁄 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀨𑀼𑀮𑁆𑀮𑀁 𑀯𑀺𑀓𑀲𑀺𑀢𑀁 𑀅𑀯𑀻𑀢𑀕𑀦𑁆𑀥𑀁 𑀲𑀺𑀬𑀸 𑀯𑀺𑀭𑁄𑀘𑀫𑀸𑀦𑀁, 𑀏𑀯𑀁 𑀲𑀭𑀻𑀭𑀕𑀦𑁆𑀥𑁂𑀦, 𑀕𑀼𑀡𑀕𑀦𑁆𑀥𑁂𑀦 𑀘 𑀲𑀼𑀕𑀦𑁆𑀥𑀁 𑀲𑀭𑀤𑀓𑀸𑀮𑁂 𑀅𑀦𑁆𑀢𑀮𑀺𑀓𑁆𑀔𑁂 𑀆𑀤𑀺𑀘𑁆𑀘𑀫𑀺𑀯 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀢𑀧𑀦𑁆𑀢𑀁 𑀅𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀚𑀼𑀢𑀺𑀢𑀸𑀬 𑀅𑀗𑁆𑀕𑀻𑀭𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀸𑀢𑀺.

𑀅𑀪𑀩𑁆𑀩𑁄𑀢𑀺 𑀧𑀝𑀺𑀧𑀢𑁆𑀢𑀺𑀲𑀸𑀭𑀫𑀺𑀤𑀁 𑀲𑀸𑀲𑀦𑀁, 𑀧𑀝𑀺𑀧𑀢𑁆𑀢𑀺 𑀘 𑀧𑀭𑀺𑀬𑀢𑁆𑀢𑀺𑀫𑀽𑀮𑀺𑀓𑀸, 𑀢𑁆𑀯𑀜𑁆𑀘 𑀧𑀭𑀺𑀬𑀢𑁆𑀢𑀺𑀁 𑀉𑀕𑁆𑀕𑀳𑁂𑀢𑀼𑀁 ¶ 𑀅𑀲𑀫𑀢𑁆𑀣𑁄, 𑀢𑀲𑁆𑀫𑀸 𑀅𑀪𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀩𑁆𑀩𑁄 𑀦𑀸𑀫 𑀦 𑀳𑁄𑀢𑀺 𑀯𑀸𑀲𑀥𑀼𑀭𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀢𑁄.

𑀪𑀺𑀓𑁆𑀔𑀽𑀢𑀺 𑀧𑀩𑁆𑀩𑀚𑀺𑀢𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁, 𑀪𑀸𑀯𑀺𑀦𑀁 𑀯𑀸 𑀪𑀺𑀓𑁆𑀔𑀼𑀪𑀸𑀯𑀁 𑀉𑀧𑀸𑀤𑀸𑀬 𑀬𑀣𑀸 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺 (𑀲𑀼. 𑀦𑀺. 𑁪𑁧𑁦). 𑀧𑀺𑀮𑁄𑀢𑀺𑀓𑀔𑀡𑁆𑀟𑀦𑁆𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀘𑁄𑀴𑀔𑀡𑁆𑀟𑀁 ¶ . 𑀭𑀚𑁄 𑀳𑀭𑀢𑀻𑀢𑀺 𑀭𑀚𑁄𑀳𑀭𑀡𑀁. 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀤𑀸𑀲𑀺 𑀢𑀢𑁆𑀣 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑀢𑁆𑀢𑀸. 𑀢𑀣𑀸 𑀳𑀺 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑁄 ‘‘𑀅𑀢𑁆𑀢𑀪𑀸𑀯𑀲𑁆𑀲 𑀧𑀦𑀸𑀬𑀁 𑀤𑁄𑀲𑁄’’𑀢𑀺 𑀅𑀲𑀼𑀪𑀲𑀜𑁆𑀜𑀁, 𑀅𑀦𑀺𑀘𑁆𑀘𑀲𑀜𑁆𑀜𑀜𑁆𑀘 𑀧𑀝𑀺𑀮𑀪𑀺𑀢𑁆𑀯𑀸 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀦𑀸 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀧𑀝𑀺𑀧𑀸𑀝𑀺𑀬𑀸 𑀯𑀺𑀧𑀲𑁆𑀲𑀦𑀁 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀲𑀫𑀻𑀧𑀁 𑀧𑀸𑀧𑁂𑀲𑀺. 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀺𑀓𑀸 𑀪𑀸𑀲𑀺𑀢𑀕𑀸𑀣𑀸 𑀑𑀪𑀸𑀲𑀕𑀸𑀣𑀸.

𑀭𑀸𑀕𑁄 𑀭𑀚𑁄 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂, 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺 ‘‘𑀭𑀚𑁄’’𑀢𑀺. 𑀓𑀲𑁆𑀫𑀸? 𑀘𑀺𑀢𑁆𑀢𑀲𑁆𑀲 𑀫𑀮𑀻𑀦𑀪𑀸𑀯𑀓𑀭𑀡𑀢𑁄. 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 ‘‘𑀭𑀚𑁄’’𑀢𑀺. 𑀏𑀢𑀁 𑀭𑀚𑀦𑁆𑀢𑀺 𑀏𑀢𑀁 𑀭𑀸𑀕𑀲𑀗𑁆𑀔𑀸𑀢𑀁 𑀭𑀚𑀁. 𑀯𑀺𑀧𑁆𑀧𑀚𑀳𑀺𑀢𑁆𑀯𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀯𑀺𑀲𑁂𑀲𑀢𑁄 𑀧𑀚𑀳𑀦𑀳𑁂𑀢𑀼. 𑀧𑀡𑁆𑀟𑀺𑀢𑀸 𑀯𑀺𑀳𑀭𑀦𑁆𑀢𑀺 𑀢𑁂𑀢𑀺 𑀢𑁂 𑀧𑀚𑀳𑀦𑀓𑀸 𑀧𑀡𑁆𑀟𑀺𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀯𑀻𑀢𑀭𑀚𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀭𑀸𑀕𑀸𑀤𑀺𑀭𑀚𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀘𑀺𑀢𑁆𑀢𑀫𑁆𑀳𑀺 𑀲𑀁𑀓𑀺𑀮𑀺𑀝𑁆𑀞𑀫𑁆𑀳𑀺, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀘𑀺𑀢𑁆𑀢𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁧𑁦𑁦; 𑀇𑀢𑀺𑀯𑀼. 𑀅𑀝𑁆𑀞. 𑁮𑁮);

𑀙𑀴𑀪𑀺𑀜𑁆𑀜𑀸𑀕𑀳𑀡𑁂𑀦 𑀕𑀳𑀺𑀢𑀸𑀬 𑀙𑀴𑀪𑀺𑀜𑁆𑀜𑀸𑀬 𑀯𑀺𑀪𑀸𑀯𑀺𑀢𑁂𑀧𑀺 𑀅𑀭𑀺𑀬𑀫𑀕𑁆𑀕𑁂 𑀅𑀦𑀼𑀢𑁆𑀢𑀭𑀪𑀸𑀯𑀲𑀸𑀫𑀜𑁆𑀜𑁂𑀦 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳 ‘‘𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸’’𑀢𑀺.

𑀧𑀢𑁆𑀢𑀲𑁆𑀲 𑀧𑀺𑀤𑀳𑀦𑀸𑀓𑀸𑀭𑁂𑀦 𑀳𑀢𑁆𑀣𑀁 𑀞𑀧𑁂𑀦𑁆𑀢𑁄 ‘‘𑀳𑀢𑁆𑀣𑀁 𑀧𑀺𑀤𑀳𑀻’’𑀢𑀺 𑀯𑀼𑀢𑁆𑀢𑁄. 𑀳𑀢𑁆𑀣𑀦𑁆𑀢𑀺 𑀯𑀸 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀳𑀢𑁆𑀣𑁂𑀦 𑀧𑀺𑀤𑀳𑀻𑀢𑀺 𑀅𑀢𑁆𑀣𑁄.

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀦𑁆𑀢𑀺 ¶ 𑀲𑀳𑀲𑁆𑀲𑀥𑀸. 𑀲𑀳𑀲𑁆𑀲𑀥𑀸 𑀳𑀺 𑀅𑀢𑁆𑀢𑀸𑀦𑀁 𑀏𑀓𑀘𑀺𑀢𑁆𑀢𑁂𑀦𑁂𑀯 𑀦𑀺𑀫𑁆𑀫𑀺𑀦𑀦𑁆𑀢𑁄𑀧𑀺 𑀲𑀳𑀲𑁆𑀲𑀯𑀸𑀭𑀁 𑀦𑀺𑀫𑁆𑀫𑀺𑀦𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀅𑀲𑀢𑀺𑀧𑀺 𑀓𑀺𑀭𑀺𑀬𑀸𑀩𑁆𑀬𑀸𑀯𑀼𑀢𑁆𑀢𑀺𑀬𑀁 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀫𑁆𑀩𑀯𑀦𑁂𑀢𑀺 𑀅𑀫𑁆𑀩𑀯𑀦𑁂 𑀓𑀢𑀯𑀺𑀳𑀸𑀭𑁂. 𑀭𑀫𑁆𑀫𑁂𑀢𑀺 𑀭𑀫𑀡𑀻𑀬𑁂. 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸, 𑀢𑀸𑀯 𑀦𑀺𑀲𑀻𑀤𑀻𑀢𑀺 𑀬𑁄𑀚𑀦𑀸.

𑀅𑀦𑀺𑀬𑀫𑁂𑀢𑁆𑀯𑀸𑀢𑀺 𑀯𑀡𑁆𑀡𑀸𑀯𑀬𑀯𑀲𑀭𑀻𑀭𑀸𑀯𑀬𑀯𑀧𑀭𑀺𑀓𑁆𑀔𑀸𑀭𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀤𑀻𑀳𑀺 𑀦𑀺𑀬𑀫𑀁 𑀅𑀓𑀢𑁆𑀯𑀸. 𑀦𑀸𑀦𑀸𑀯𑀡𑁆𑀡𑁂𑀢𑀺 𑀦𑀸𑀦𑀸𑀓𑀸𑀭𑁂 𑀬𑀣𑀸𑀯𑀼𑀢𑁆𑀢𑀯𑀡𑁆𑀡𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑁂. 𑀫𑀺𑀲𑁆𑀲𑀓𑀓𑁂𑀲𑁂𑀢𑀺 𑀧𑀮𑀺𑀢𑁂𑀳𑀺 𑀫𑀺𑀲𑁆𑀲𑀺𑀢𑀓𑁂𑀲𑁂. 𑀉𑀧𑀟𑁆𑀠𑀭𑀢𑁆𑀢𑀯𑀡𑁆𑀡𑀉𑀧𑀟𑁆𑀠𑀧𑀡𑁆𑀟𑀼𑀯𑀡𑁆𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀡𑁆𑀡𑀦𑁆𑀢𑀺 𑀏𑀯𑀁 𑀉𑀧𑀟𑁆𑀠𑀭𑀢𑁆𑀢𑀘𑀻𑀯𑀭𑁂. 𑀧𑀤𑀯𑀲𑁂𑀦 𑀅𑀢𑁆𑀣𑀲𑁆𑀲 ¶ , 𑀕𑀫𑀦𑀯𑀲𑁂𑀦 𑀧𑀸𑀴𑀺𑀬𑀸 𑀪𑀡𑀦𑀁 𑀧𑀤𑀪𑀸𑀡𑀁. 𑀧𑀭𑀺𑀓𑀣𑀸𑀤𑀺𑀯𑀲𑁂𑀦 𑀥𑀫𑁆𑀫𑀲𑁆𑀲 𑀓𑀣𑀦𑀁 𑀥𑀫𑁆𑀫𑀓𑀣𑀸. 𑀲𑀭𑁂𑀦 𑀪𑀜𑁆𑀜𑀁 𑀲𑀼𑀢𑁆𑀢𑀸𑀤𑀻𑀦𑀁 𑀉𑀘𑁆𑀘𑀸𑀭𑀡𑀁 𑀲𑀭𑀪𑀜𑁆𑀜𑀁. 𑀅𑀧𑀭𑁂𑀧𑀻𑀢𑀺 𑀯𑀼𑀢𑁆𑀢𑀸𑀓𑀸𑀭𑀢𑁄 𑀅𑀜𑁆𑀜𑁂𑀧𑀺 𑀤𑀻𑀖𑀭𑀲𑁆𑀲𑀓𑀺𑀲𑀣𑀽𑀮𑀸𑀤𑀺𑀓𑁂 𑀦𑀸𑀦𑀧𑁆𑀧𑀓𑀸𑀭𑀓𑁂. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀓𑀸𑀭𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀬𑀣𑀸 𑀇𑀘𑁆𑀙𑀺𑀢𑀸, 𑀢𑀁𑀢𑀁𑀧𑀓𑀸𑀭𑀸𑀬𑁂𑀯 𑀳𑁄𑀦𑁆𑀢𑀺. 𑀬𑀢𑁆𑀢𑀓𑀸 𑀳𑀺 𑀯𑀺𑀲𑁂𑀲𑀸 𑀯𑀡𑁆𑀡𑀸𑀤𑀺𑀯𑀲𑁂𑀦 𑀢𑁂𑀲𑀼 𑀇𑀘𑁆𑀙𑀺𑀢𑀸, 𑀢𑀢𑁆𑀢𑀓𑀯𑀺𑀲𑁂𑀲𑀯𑀦𑁆𑀢𑁄𑀯 𑀢𑁂 𑀳𑁄𑀦𑁆𑀢𑀺. 𑀢𑁂 𑀧𑀦 𑀢𑀣𑀸 𑀩𑀳𑀼𑀥𑀸 𑀪𑀺𑀦𑁆𑀦𑀸𑀓𑀸𑀭𑁂𑀧𑀺 𑀯𑀡𑁆𑀡𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀫𑁂𑀯 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀅𑀬𑀁 𑀳𑀺𑀲𑁆𑀲 𑀆𑀦𑀼𑀪𑀸𑀯𑁄 𑁋 𑀬𑀣𑀸 𑀏𑀓𑀸𑀯 𑀘𑁂𑀢𑀦𑀸 𑀦𑀸𑀦𑀸𑀯𑀺𑀲𑁂𑀲𑀯𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀢𑁆𑀣 𑀪𑀯𑀧𑀢𑁆𑀣𑀦𑀸 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀘 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀘𑁂, 𑀇𑀥𑀸𑀧𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀘 𑀇𑀤𑁆𑀥𑀺𑀯𑀺𑀲𑀬𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀩𑀳𑀼𑀪𑀸𑀯𑀦𑀺𑀫𑁆𑀫𑀸𑀦𑁂 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑀦𑀬𑁄 𑀯𑀼𑀢𑁆𑀢𑁄, 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺 𑀅𑀥𑀺𑀝𑁆𑀞𑀸𑀦𑁂𑀲𑀼.

𑀇𑀢𑀺 𑀅𑀯𑀺𑀲𑁂𑀲𑀁 𑀅𑀢𑀺𑀤𑁂𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀯𑀺𑀲𑁂𑀲𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀇𑀘𑁆𑀙𑀦𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 ‘‘𑀇𑀤𑁆𑀥𑀺𑀫𑀸’’𑀢𑀺 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀅𑀦𑁆𑀢𑀭𑀸𑀯𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀯. 𑀧𑀸𑀤𑀓𑀚𑁆𑀛𑀸𑀦𑀦𑁆𑀢𑀺𑀆𑀤𑀺 𑀧𑀭𑀺𑀓𑀫𑁆𑀫𑀓𑀭𑀡𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀇𑀢𑀭𑀁 𑀧𑀦 𑀅𑀢𑀺𑀤𑁂𑀲𑁂𑀦𑁂𑀯 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑁄𑀢𑀺 ‘‘𑀏𑀓𑁄 𑀳𑁄𑀫𑀻’’𑀢𑀺 𑀅𑀦𑁆𑀢𑀭𑀸 𑀅𑀥𑀺𑀝𑁆𑀞𑀸𑀦𑀁 𑀅𑀓𑀭𑁄𑀦𑁆𑀢𑁄. ‘‘𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀲𑀢𑀁 𑀳𑁄𑀫𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁂𑀦 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀬𑀫𑁂𑀯 𑀏𑀓𑁄 𑀳𑁄𑀢𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀏𑀢𑁆𑀣 𑀘 𑀧𑀭𑀺𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀸𑀦𑀁 𑀇𑀤𑁆𑀥𑀺𑀫𑀸 𑀯𑀡𑁆𑀡𑀯𑀲𑁂𑀦 𑀲𑀬𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀢𑁂𑀲𑀼 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀺 ¶ 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀺. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀁 𑀲𑀫𑁆𑀧𑀢𑀺𑀯𑀢𑁆𑀢𑀫𑀸𑀦𑀸𑀭𑀫𑁆𑀫𑀡𑀁 𑀅𑀥𑀺𑀝𑁆𑀞𑀸𑀦𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸𑀢𑀺 𑀯𑀤𑀦𑁆𑀢𑀺.

𑁩𑁮𑁭. ‘‘𑀆𑀯𑀺𑀪𑀸𑀯’’𑀦𑁆𑀢𑀺 𑀧𑀤𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀳𑁄𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀦 𑀬𑀼𑀚𑁆𑀚𑀢𑀺 𑀉𑀧𑀬𑁄𑀕𑀯𑀘𑀦𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀢𑀣𑀸 𑀯𑀓𑁆𑀔𑀫𑀸𑀦𑁂𑀦 𑀘 𑀕𑀘𑁆𑀙𑀢𑀺-𑀲𑀤𑁆𑀤𑁂𑀦 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀆𑀯𑀺𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀦𑀸𑀫𑀧𑀤𑀜𑁆𑀘 𑀓𑀺𑀭𑀺𑀬𑀸𑀧𑀤𑀸𑀧𑁂𑀓𑁆𑀔𑀦𑁆𑀢𑀺 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀸𑀘𑀺𑀦𑀸 𑀓𑀭𑁄𑀢𑀺-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀆𑀳 ‘‘𑀆𑀯𑀺𑀪𑀸𑀯𑀁 𑀓𑀭𑁄𑀢𑀻’’𑀢𑀺. 𑀢𑀺𑀭𑁄𑀪𑀸𑀯𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄 ¶ . 𑀬𑀤𑀺 𑀏𑀯𑀁 𑀓𑀣𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀤𑀫𑁂𑀯 𑀳𑀻’’𑀢𑀺𑀆𑀤𑀺. 𑀓𑀸𑀫𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀆𑀯𑀺𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀅𑀦𑀸𑀯𑀝𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁧𑁧) 𑀆𑀕𑀢𑀁, 𑀢𑀫𑁆𑀧𑀺 𑀇𑀤𑀫𑁂𑀯 𑀆𑀯𑀺𑀪𑀸𑀯𑀓𑀭𑀡𑀁, 𑀢𑀺𑀭𑁄𑀪𑀸𑀯𑀓𑀭𑀡𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀧𑀤𑀸𑀦𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀦𑁆𑀥𑀓𑀸𑀭𑀦𑁆𑀢𑀺 𑀭𑀢𑁆𑀢𑀦𑁆𑀥𑀓𑀸𑀭𑀁, 𑀤𑀺𑀯𑀸𑀧𑀺 𑀯𑀸 𑀩𑀺𑀮𑀕𑀼𑀳𑀸𑀤𑀺𑀕𑀢𑀁 𑀅𑀦𑁆𑀥𑀓𑀸𑀭𑀁. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀓𑀼𑀝𑁆𑀝𑀓𑀯𑀸𑀝𑀸𑀤𑀺𑀦𑀸 𑀧𑀝𑀺𑀘𑁆𑀙𑀸𑀤𑀺𑀢𑀁. 𑀅𑀦𑀸𑀧𑀸𑀣𑀦𑁆𑀢𑀺 𑀤𑀽𑀭𑀢𑀸𑀲𑀼𑀔𑀼𑀫𑀢𑀭𑀢𑀸𑀤𑀺𑀦𑀸 𑀦 𑀆𑀧𑀸𑀣𑀕𑀢𑀁. 𑀅𑀬𑀦𑁆𑀢𑀺 𑀇𑀤𑁆𑀥𑀺𑀫𑀸. 𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀤𑀽𑀭𑁂 𑀞𑀺𑀢𑁄𑀧𑀺 𑀅𑀢𑁆𑀢𑀸 𑀯𑀸 𑀧𑀭𑁄 𑀯𑀸 𑀬𑀣𑀸 𑀤𑀺𑀲𑁆𑀲𑀢𑀻𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀆𑀮𑁄𑀓𑀚𑀸𑀢𑀦𑁆𑀢𑀺 𑀆𑀮𑁄𑀓𑀪𑀽𑀢𑀁, 𑀚𑀸𑀢𑀸𑀮𑁄𑀓𑀁 𑀯𑀸.

𑁩𑁮𑁮. 𑀏𑀢𑀁 𑀧𑀦 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀆𑀯𑀺𑀪𑀸𑀯𑀧𑀸𑀝𑀺𑀳𑀸𑀭𑀺𑀬𑀫𑀸𑀳. 𑀓𑁂𑀦 𑀓𑀢𑀧𑀼𑀩𑁆𑀩𑀦𑁆𑀢𑀺 𑀢𑀢𑁆𑀣 𑀓𑀸𑀬𑀲𑀓𑁆𑀔𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀢𑀸𑀯 𑀓𑀸𑀬𑀲𑀓𑁆𑀔𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀪𑀕𑀯𑀢𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑁂 𑀧𑀲𑁆𑀲𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄, 𑀢𑀣𑀸 ‘‘𑀬𑀸𑀯 𑀅𑀯𑀻𑀘𑀺𑀁 𑀤𑀲𑁆𑀲𑁂𑀲𑀻’’𑀢𑀺. 𑀆𑀓𑀸𑀲𑀕𑀢𑁂𑀲𑀼 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀯𑀺𑀫𑀸𑀦𑁂𑀲𑀼 𑀉𑀧𑀭𑀽𑀧𑀭𑀺𑀯𑀺𑀫𑀸𑀦𑀁 𑀩𑁆𑀬𑀯𑀥𑀸𑀬𑀓𑁂𑀲𑀼 𑀩𑁆𑀬𑀽𑀳𑀺𑀬𑀫𑀸𑀦𑁂𑀲𑀼 𑀢𑀕𑁆𑀕𑀢𑀁 𑀆𑀓𑀸𑀲𑀁 𑀩𑁆𑀬𑀽𑀴𑁆𑀳𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀜𑁆𑀘 𑀤𑁆𑀯𑀺𑀥𑀸 𑀯𑀺𑀬𑀽𑀳𑀺𑀢𑁆𑀯𑀸’’𑀢𑀺.

𑀅𑀬𑀫𑀢𑁆𑀣𑁄𑀢𑀺 𑀆𑀯𑀺𑀪𑀸𑀯𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀲𑀢𑁆𑀣𑀸𑀭𑀸 𑀓𑀢𑀪𑀸𑀯𑁄. 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀧𑀝𑀺𑀧𑀢𑁆𑀢𑀺𑀆𑀯𑀚𑁆𑀚𑀦𑀁 𑀩𑀼𑀤𑁆𑀥𑀧𑁆𑀧𑀯𑁂𑀡𑀺𑀬𑀸 𑀅𑀦𑀼𑀧𑀸𑀮𑀦𑀢𑁆𑀣𑀁. ‘‘𑀏𑀓𑁂𑀦 𑀧𑀸𑀤𑁂𑀦𑀸’’𑀢𑀺𑀆𑀤𑀺 𑀢𑀺𑀯𑀺𑀓𑁆𑀓𑀫𑀤𑀲𑁆𑀲𑀦𑀁. 𑀦𑀬𑀁 𑀤𑁂𑀢𑀺 𑀬𑀲𑁆𑀲 𑀦𑀬𑀲𑁆𑀲 𑀅𑀦𑀼𑀲𑀸𑀭𑁂𑀦 𑀯𑀸𑀘𑀦𑀸𑀫𑀕𑁆𑀕𑀁 𑀞𑀧𑁂𑀲𑀺.

𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀦𑀸𑀫 𑀅𑀦𑀸𑀣𑀧𑀺𑀡𑁆𑀟𑀺𑀓𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸.

𑀲𑀺𑀦𑁂𑀭𑀼𑀧𑀩𑁆𑀩𑀢𑀁 ¶ 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀁 𑀧𑀭𑀺𑀲𑀸𑀬 𑀤𑀺𑀲𑁆𑀲𑀫𑀸𑀦𑀭𑀽𑀧𑀁𑀬𑁂𑀯 𑀓𑀢𑁆𑀯𑀸 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸. 𑀦𑀦𑁆𑀢𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀁.

𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑀲𑁆𑀲 𑀑𑀓𑀸𑀲𑀮𑁄𑀓𑀲𑁆𑀲, 𑀢𑀁𑀦𑀺𑀯𑀸𑀲𑀺𑀲𑀢𑁆𑀢𑀮𑁄𑀓𑀲𑁆𑀲 𑀘 𑀯𑀺𑀯𑀝𑀪𑀸𑀯𑀓𑀭𑀡𑀧𑀸𑀝𑀺𑀳𑀸𑀭𑀺𑀬𑀁 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫. 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀲𑀳𑀫𑁆𑀧𑀢𑀺𑀫𑀳𑀸𑀩𑁆𑀭𑀳𑁆𑀫𑀸.

𑀧𑀲𑁆𑀲𑀣 ¶ 𑀢𑀸𑀯 𑀅𑀧𑀡𑁆𑀡𑀓𑀧𑀝𑀺𑀧𑀤𑀸𑀬 𑀨𑀮𑀦𑁆𑀢𑀺 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀼 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀬𑁂𑀦 𑀲𑀕𑁆𑀕𑀲𑀼𑀔𑁂𑀦 𑀧𑀮𑁄𑀪𑁂𑀢𑁆𑀯𑀸, 𑀦 𑀧𑀦 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀦𑁆𑀦𑀪𑀸𑀯𑀸𑀧𑀸𑀤𑀦𑁂𑀦.

𑁩𑁮𑁯. 𑀬𑀣𑀸 𑀆𑀯𑀺𑀪𑀸𑀯𑀓𑀭𑀡𑁂 𑀆𑀮𑁄𑀓𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀆𑀮𑁄𑀓𑀦𑀺𑀫𑁆𑀫𑀸𑀦𑀸𑀬, 𑀏𑀯𑀁 𑀢𑀺𑀭𑁄𑀪𑀸𑀯𑀓𑀭𑀡𑁂 𑀅𑀦𑁆𑀥𑀓𑀸𑀭𑀦𑀺𑀫𑁆𑀫𑀸𑀦𑀸𑀬 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀓𑀸𑀫𑀜𑁆𑀘𑁂𑀢𑀁 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀦𑀸𑀕𑀢𑀁, ‘‘𑀯𑀺𑀯𑀝𑀁 𑀆𑀯𑀝’’𑀦𑁆𑀢𑀺 (𑀧𑀝𑀺. 𑀫. 𑁩.𑁧𑁧) 𑀧𑀦 𑀯𑀘𑀦𑀢𑁄 𑀅𑀢𑁆𑀣𑀢𑁄 𑀆𑀕𑀢𑀫𑁂𑀯. 𑀑𑀤𑀸𑀢𑀓𑀲𑀺𑀡𑀦𑁆𑀢𑁄𑀕𑀥𑀁 𑀯𑀸 𑀆𑀮𑁄𑀓𑀓𑀲𑀺𑀡𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀦𑁆𑀥𑀓𑀸𑀭𑀦𑁆𑀢𑀺 𑀅𑀦𑁆𑀥𑀓𑀸𑀭𑀯𑀦𑁆𑀢𑀁.

𑁩𑁯𑁦. 𑀅𑀯𑀲𑁂𑀲𑁂 𑀇𑀝𑁆𑀝𑀺𑀬𑀢𑁆𑀣𑁂𑀭𑀸𑀤𑀺𑀓𑁂.

𑁩𑁯𑁧. 𑀧𑀸𑀓𑀝𑁄 𑀇𑀤𑁆𑀥𑀺𑀫𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀓𑀝𑀁, 𑀧𑀸𑀓𑀝𑀜𑁆𑀘 𑀢𑀁 𑀧𑀸𑀝𑀺𑀳𑀸𑀭𑀺𑀬𑀜𑁆𑀘𑀸𑀢𑀺 𑀧𑀸𑀓𑀝𑀧𑀸𑀝𑀺𑀳𑀸𑀭𑀺𑀬𑀁. 𑀦 𑀏𑀢𑁆𑀣 𑀇𑀤𑁆𑀥𑀺𑀫𑀸 𑀧𑀸𑀓𑀝𑁄𑀢𑀺 𑀅𑀧𑀸𑀓𑀝𑀁, 𑀅𑀧𑀸𑀓𑀝𑀜𑁆𑀘 𑀢𑀁 𑀧𑀸𑀝𑀺𑀳𑀸𑀭𑀺𑀬𑀜𑁆𑀘𑀸𑀢𑀺 𑀅𑀧𑀸𑀓𑀝𑀧𑀸𑀝𑀺𑀳𑀸𑀭𑀺𑀬𑀁. 𑀇𑀤𑁆𑀥𑀺𑀫𑀢𑁄 𑀏𑀯 𑀳𑀺 𑀧𑀸𑀓𑀝𑀸𑀧𑀸𑀓𑀝𑀪𑀸𑀯𑁂𑀦𑀸𑀬𑀁 𑀪𑁂𑀤𑁄, 𑀦 𑀧𑀸𑀝𑀺𑀳𑀸𑀭𑀺𑀬𑀲𑁆𑀲. 𑀦 𑀳𑀺 𑀢𑀁 𑀅𑀧𑀸𑀓𑀝𑀁 𑀅𑀢𑁆𑀣𑀺.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸, 𑀢𑀢𑁄 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀇𑀤𑁆𑀥𑀺𑀲𑀗𑁆𑀔𑀸𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁. 𑀆𑀴𑀺𑀦𑁆𑀤𑁂𑀢𑀺 𑀧𑀫𑀼𑀔𑁂. 𑀑𑀓𑀸𑀲𑁂𑀳𑀻𑀢𑀺 𑀧𑀓𑀺𑀭. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺 𑀇𑀤𑁆𑀥𑀺𑀧𑀬𑁄𑀕𑀁. 𑀅𑀪𑀺𑀲𑀗𑁆𑀔𑀸𑀲𑀻𑀢𑀺 𑀅𑀪𑀺𑀲𑀗𑁆𑀔𑀭𑀺, 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀸𑀮𑀘𑁆𑀙𑀺𑀕𑁆𑀕𑀴𑁂𑀦𑀸𑀢𑀺 𑀓𑀼𑀜𑁆𑀘𑀺𑀓𑀘𑁆𑀙𑀺𑀤𑁆𑀤𑁂𑀦. 𑀅𑀕𑁆𑀕𑀴𑀦𑁆𑀢𑀭𑀺𑀓𑀸𑀬𑀸𑀢𑀺 𑀧𑀺𑀝𑁆𑀞𑀲𑀗𑁆𑀖𑀸𑀢𑀸𑀦𑀁 𑀅𑀦𑁆𑀢𑀭𑁂𑀦.

𑀅𑀦𑁆𑀢𑀭𑀳𑀺𑀢𑁄𑀢𑀺 𑀅𑀦𑁆𑀢𑀭𑀥𑀸𑀬𑀺𑀢𑀼𑀓𑀸𑀫𑁄. 𑀩𑀓𑁄 𑀩𑁆𑀭𑀳𑁆𑀫𑀸 𑀬𑀣𑀸 𑀅𑀦𑁆𑀢𑀭𑀥𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀓𑀢𑁆𑀯𑀸 𑀪𑀕𑀯𑀸 𑀲𑀬𑀁 𑀢𑀲𑁆𑀲, 𑀩𑁆𑀭𑀳𑁆𑀫𑀕𑀡𑀲𑁆𑀲 𑀘 𑀅𑀦𑀸𑀧𑀸𑀣𑀪𑀸𑀯𑀕𑀫𑀦𑁂𑀦 𑀅𑀦𑁆𑀢𑀭𑀳𑀺𑀢𑁄 𑀳𑀼𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 ¶ 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑀺𑀪𑀸𑀯𑁄 𑀯𑀸 𑀦𑀢𑁆𑀣𑀺𑀪𑀸𑀯𑁄 𑀯𑀸 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺 𑀏𑀯𑀁 𑀩𑁆𑀭𑀳𑁆𑀫𑀕𑀡𑀲𑁆𑀲 𑀯𑀘𑀦𑁄𑀓𑀸𑀲𑁄 𑀫𑀸 𑀳𑁄𑀢𑀽𑀢𑀺 ‘‘𑀪𑀯𑁂𑀯𑀸𑀳’’𑀦𑁆𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀪𑀯𑁂𑀯𑀸𑀳𑀁 𑀪𑀬𑀁 𑀤𑀺𑀲𑁆𑀯𑀸𑀢𑀺 𑀅𑀳𑀁 𑀪𑀯𑁂 𑀲𑀁𑀲𑀸𑀭𑁂 𑀚𑀸𑀢𑀺𑀚𑀭𑀸𑀤𑀺𑀪𑁂𑀤𑀁 𑀪𑀬𑀁 𑀤𑀺𑀲𑁆𑀯𑀸 𑀏𑀯. 𑀪𑀯𑀜𑁆𑀘 𑀯𑀺𑀪𑀯𑁂𑀲𑀺𑀦𑀦𑁆𑀢𑀺 𑀇𑀫𑀜𑁆𑀘 𑀓𑀸𑀫𑀪𑀯𑀸𑀤𑀺𑀁 𑀢𑀺𑀯𑀺𑀥𑀫𑁆𑀧𑀺 ¶ 𑀲𑀢𑁆𑀢𑀪𑀯𑀁, 𑀯𑀺𑀪𑀯𑁂𑀲𑀺𑀦𑀁 𑀯𑀺𑀪𑀯𑀁 𑀕𑀯𑁂𑀲𑀫𑀸𑀦𑀫𑁆𑀧𑀺 𑀧𑀭𑀺𑀬𑁂𑀲𑀫𑀸𑀦𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂 𑀏𑀯 𑀤𑀺𑀲𑁆𑀯𑀸. 𑀪𑀯𑀁 𑀦𑀸𑀪𑀺𑀯𑀤𑀺𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀺𑀜𑁆𑀘𑀺 𑀪𑀯𑀁 𑀦 𑀅𑀪𑀺𑀯𑀤𑀺𑀁 𑀦 𑀕𑀳𑁂𑀲𑀺𑀁. 𑀦𑀦𑁆𑀤𑀺𑀜𑁆𑀘 𑀦 𑀉𑀧𑀸𑀤𑀺𑀬𑀺𑀦𑁆𑀢𑀺 𑀪𑀯𑀢𑀡𑁆𑀳𑀁 𑀦 𑀉𑀧𑀕𑀘𑁆𑀙𑀺𑀁, 𑀦 𑀅𑀕𑁆𑀕𑀳𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁯𑁨. 𑀅𑀮𑀕𑁆𑀕𑀫𑀸𑀦𑁄𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀫𑀦𑁂𑀦 𑀓𑀼𑀝𑁆𑀝𑀸𑀤𑀻𑀲𑀼 𑀓𑀢𑁆𑀣𑀘𑀺 𑀦 𑀮𑀕𑁆𑀕𑀫𑀸𑀦𑁄. 𑀆𑀯𑀚𑁆𑀚𑀺𑀢𑁆𑀯𑀸 𑀓𑀢𑀧𑀭𑀺𑀓𑀫𑁆𑀫𑁂𑀦𑀸𑀢𑀺 𑀬𑀲𑁆𑀲 𑀧𑀭𑀢𑁄 𑀕𑀦𑁆𑀢𑀼𑀓𑀸𑀫𑁄, 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 ‘‘𑀆𑀓𑀸𑀲𑁄 𑀳𑁄𑀢𑀼, 𑀆𑀓𑀸𑀲𑁄 𑀳𑁄𑀢𑀽’’𑀢𑀺 𑀏𑀯𑀁 𑀓𑀢𑀧𑀭𑀺𑀓𑀫𑁆𑀫𑁂𑀦 𑀇𑀤𑁆𑀥𑀺𑀫𑀢𑀸. 𑀧𑀸𑀓𑀸𑀭𑀧𑀩𑁆𑀩𑀢𑀸𑀧𑁂𑀓𑁆𑀔𑀸𑀬 ‘‘𑀲𑀼𑀲𑀺𑀭𑁄, 𑀙𑀺𑀤𑁆𑀤𑁄’’𑀢𑀺 𑀘 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀩𑁆𑀩𑁂𑀥𑀯𑀲𑁂𑀦 𑀧𑀯𑀢𑁆𑀢𑀁 𑀯𑀺𑀯𑀭𑀁 𑀲𑀼𑀲𑀺𑀭𑀁. 𑀢𑀺𑀭𑀺𑀬𑀁 𑀧𑀯𑀢𑁆𑀢𑀁 𑀙𑀺𑀤𑁆𑀤𑀁.

𑀬𑀢𑁆𑀣 𑀓𑀢𑁆𑀣𑀘𑀺 𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀲𑀺𑀡𑁂 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀆𑀓𑀸𑀲𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑀻𑀪𑀸𑀯𑁄𑀬𑁂𑀯 𑀧𑀫𑀸𑀡’’𑀦𑁆𑀢𑀺. 𑀢𑀲𑁆𑀫𑀸 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀤𑁂𑀯 𑀳𑁄𑀢𑀺. 𑀏𑀢𑁂𑀦 𑀧𑀣𑀯𑀺𑀬𑀸 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑁂 𑀆𑀧𑁄𑀓𑀲𑀺𑀡𑀲𑀫𑀸𑀧𑀚𑁆𑀚𑀦𑀁, 𑀉𑀤𑀓𑀸𑀤𑀻𑀲𑀼 𑀧𑀣𑀯𑀻𑀦𑀺𑀫𑁆𑀫𑀸𑀦𑁂 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀚𑁆𑀚𑀦𑀁 𑀦 𑀏𑀓𑀦𑁆𑀢𑀢𑁄 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀦𑁆𑀢𑀺 𑀏𑀢𑀁 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀫𑀦𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑁂 𑀆𑀓𑀸𑀲𑀓𑀲𑀺𑀡𑀲𑀫𑀸𑀧𑀚𑁆𑀚𑀦𑀁 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀁 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀆𑀓𑀸𑀲𑀓𑀲𑀺𑀡𑀯𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀯𑀺𑀯𑀝𑀓𑀭𑀡’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺𑀆𑀤𑀺𑀪𑀸𑀯𑁄 ‘‘𑀆𑀓𑀸𑀲𑁂 𑀯𑀸 𑀉𑀤𑀓𑁂 𑀯𑀸 𑀧𑀣𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀤𑀲𑀸 𑀕𑀫𑀦𑀁 𑀇𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 𑀬𑀁 𑀧𑀓𑀺𑀡𑁆𑀡𑀓𑀦𑀬𑁂 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

‘‘𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀤𑁆𑀥𑀁 𑀲𑀼𑀩𑀤𑁆𑀥𑀁 𑀯𑀺𑀬 𑀤𑀴𑁆𑀳𑀻𑀓𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀯𑀸 𑀢𑁂𑀦 𑀧𑀬𑁄𑀚𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀆𑀓𑀸𑀲𑁄 𑀳𑁄𑀢𑀺𑀬𑁂𑀯𑀸𑀢𑀺 𑀲𑀘𑁂𑀧𑀺 𑀓𑀺𑀜𑁆𑀘𑀺 𑀅𑀦𑁆𑀢𑀭𑀸 𑀉𑀧𑀝𑁆𑀞𑀺𑀢𑀁 𑀧𑀩𑁆𑀩𑀢𑀸𑀤𑀺 𑀲𑀺𑀬𑀸, 𑀢𑀫𑁆𑀧𑀺 ‘‘𑀆𑀓𑀸𑀲𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 ¶ 𑀆𑀓𑀸𑀲𑁄 𑀳𑁄𑀢𑀺𑀬𑁂𑀯. 𑀇𑀤𑀫𑁆𑀧𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀦𑀫𑀢𑁆𑀢𑀁, 𑀢𑀸𑀤𑀺𑀲𑀲𑁆𑀲 𑀉𑀧𑀝𑁆𑀞𑀸𑀦𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁯𑁩. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀣𑀯𑀺𑀬𑀸 𑀉𑀤𑀓𑀪𑀸𑀯𑀸𑀥𑀺𑀝𑁆𑀞𑀸𑀦𑁂 𑀅𑀬𑀁 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀢𑁆𑀢𑀺𑀯𑀺𑀪𑀸𑀯𑀺𑀦𑀻 𑀧𑀸𑀴𑀺 ¶ . 𑀧𑀭𑀢𑁄 ‘‘𑀢𑀢𑁆𑀭𑀸𑀬𑀁 𑀧𑀸𑀴𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄𑀢𑀺 𑀇𑀤𑁆𑀥𑀺𑀫𑀸. 𑀅𑀥𑀺𑀝𑁆𑀞𑀸𑀦𑀓𑀸𑀮𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀧𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀧𑀓𑀢𑀺𑀬𑀸 𑀉𑀤𑀓𑀁 𑀅𑀦𑀺𑀫𑁆𑀫𑀸𑀦𑀉𑀤𑀓𑀁.

𑁩𑁯𑁪. 𑀯𑀺𑀧𑀭𑀻𑀢𑀦𑁆𑀢𑀺 𑀬𑀁 𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀅𑀓𑁆𑀓𑀫𑀦𑁆𑀢𑁄 𑀦 𑀲𑀁𑀲𑀻𑀤𑀢𑀺, 𑀢𑀁 𑀧𑀦𑁂𑀢𑁆𑀣 𑀇𑀤𑁆𑀥𑀺𑀬𑀸 𑀧𑀣𑀯𑀻𑀦𑀺𑀫𑁆𑀫𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀁.

𑁩𑁯𑁫. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀙𑀺𑀦𑁆𑀦𑀧𑀓𑁆𑀔𑁄, 𑀅𑀲𑀜𑁆𑀚𑀸𑀢𑀧𑀓𑁆𑀔𑁄 𑀯𑀸 𑀲𑀓𑀼𑀡𑁄 𑀟𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀧𑀓𑁆𑀔𑀻 𑀲𑀓𑀼𑀡𑁄’’𑀢𑀺 (𑀧𑀝𑀺. 𑀫. 𑁩.𑁧𑁧) 𑀧𑀓𑁆𑀔𑀻-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀲𑀓𑀼𑀡𑁄 𑀯𑀼𑀢𑁆𑀢𑁄𑀢𑀺 ‘‘𑀧𑀓𑁆𑀔𑁂𑀳𑀺 𑀬𑀼𑀢𑁆𑀢𑀲𑀓𑀼𑀡𑁄’’𑀢𑀺 𑀆𑀳. 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 ‘‘𑀧𑀣𑀯𑀻 𑀳𑁄𑀢𑀽’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸.

𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀅𑀦𑁆𑀢𑀮𑀺𑀓𑁆𑀔𑀲𑀜𑁆𑀜𑀺𑀢𑁂 𑀆𑀓𑀸𑀲𑁂. 𑀬𑀢𑁆𑀣 𑀬𑀢𑁆𑀣 𑀳𑀺 𑀆𑀯𑀭𑀡𑀁 𑀦𑀢𑁆𑀣𑀺, 𑀢𑀁 𑀢𑀁 ‘‘𑀆𑀓𑀸𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀘 𑀇𑀤𑁆𑀥𑀺𑀫𑀸 𑀦 𑀧𑀣𑀯𑀺𑀬𑀸 𑀆𑀲𑀦𑁆𑀦𑁂 𑀆𑀓𑀸𑀲𑁂 𑀕𑀘𑁆𑀙𑀢𑀺. 𑀬𑀢𑁆𑀣 𑀧𑀦 𑀧𑀓𑁆𑀔𑀻𑀦𑀁 𑀅𑀕𑁄𑀘𑀭𑁄, 𑀢𑀢𑁆𑀣 𑀕𑀘𑁆𑀙𑀢𑀺, 𑀢𑀸𑀤𑀺𑀲𑀜𑁆𑀘 𑀮𑁄𑀓𑁂 ‘‘𑀅𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀮𑀺𑀓𑁆𑀔𑀲𑀜𑁆𑀜𑀺𑀢𑁂 𑀆𑀓𑀸𑀲𑁂’’𑀢𑀺.

𑀣𑁂𑀭𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄. 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀧𑀼𑀦 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁. 𑀦𑀦𑀼 𑀲𑀫𑀸𑀳𑀺𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀇𑀤𑁆𑀥𑀺𑀫𑀢𑁄 𑀧𑀸𑀝𑀺𑀳𑀸𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀘𑀺𑀢𑁆𑀢𑀁 𑀅𑀘𑁆𑀘𑀦𑁆𑀢𑀁 𑀲𑀫𑀸𑀳𑀺𑀢𑀫𑁂𑀯 𑀳𑁄𑀢𑀺, 𑀦 𑀅𑀜𑁆𑀜𑀤𑀸 𑀯𑀺𑀬 𑀅𑀲𑀫𑀸𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦 𑀣𑁂𑀭𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀧𑀼𑀩𑁆𑀩𑁂 𑀳𑀺 𑀧𑀣𑀯𑀻𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀣𑀯𑀺𑀁 𑀅𑀥𑀺𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀇𑀤𑀸𑀦𑀺 𑀧𑀦 𑀆𑀓𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀆𑀓𑀸𑀲𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀫𑁂𑀯. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀢𑀺𑀭𑁄𑀓𑀼𑀝𑁆𑀝𑀧𑀸𑀝𑀺𑀳𑀸𑀭𑀺𑀬𑁂 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀢𑀢𑁆𑀣 𑀓𑀼𑀝𑁆𑀝𑀸𑀤𑀺 ‘‘𑀆𑀓𑀸𑀲𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀆𑀓𑀸𑀲𑁄 𑀳𑁄𑀢𑀺, 𑀏𑀯𑀁 𑀇𑀥𑀸𑀧𑀺 𑀧𑀩𑁆𑀩𑀢𑀭𑀼𑀓𑁆𑀔𑀸𑀤𑀺𑀁 𑀅𑀥𑀺𑀝𑁆𑀞𑀸𑀦𑁂𑀦 𑀆𑀓𑀸𑀲𑀁 𑀓𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀭𑁄𑀓𑀼𑀝𑁆𑀝𑀧𑀸𑀝𑀺𑀳𑀸𑀭𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀘𑁂 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁩𑁯𑁨) 𑀢𑀢𑁆𑀣 ¶ 𑀯𑀼𑀢𑁆𑀢𑀦𑀬𑁂𑀦. 𑀏𑀢𑁂𑀦 ‘‘𑀧𑀼𑀭𑀺𑀫𑀸𑀥𑀺𑀝𑁆𑀞𑀸𑀦𑀩𑀮𑁂𑀦𑁂𑀯 𑀘𑀲𑁆𑀲 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀧𑀩𑁆𑀩𑀢𑁄 𑀯𑀸 𑀭𑀼𑀓𑁆𑀔𑁄 𑀯𑀸 𑀉𑀢𑀼𑀫𑀬𑁄 𑀉𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀯𑁂𑀢’’𑀦𑁆𑀢𑀺 𑀦𑀸𑀕𑀸𑀤𑀻𑀳𑀺 𑀓𑀬𑀺𑀭𑀫𑀸𑀦𑁄 𑀯𑀺𑀩𑀦𑁆𑀥𑁄 𑀕𑀫𑀦𑀦𑁆𑀢𑀭𑀸𑀬𑀁 𑀦 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀑𑀓𑀸𑀲𑁂𑀢𑀺 𑀚𑀦𑀯𑀺𑀯𑀺𑀢𑁆𑀢𑁂 𑀬𑀼𑀢𑁆𑀢𑀝𑁆𑀞𑀸𑀦𑁂. 𑀧𑀸𑀓𑀝𑁄 𑀳𑁄𑀢𑀺 𑀆𑀓𑀸𑀲𑀘𑀸𑀭𑀻 𑀅𑀬𑀁 𑀲𑀫𑀡𑁄𑀢𑀺.

𑁩𑁯𑁬. 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀕𑁆𑀕𑀳𑀡𑀁 𑀧𑀞𑀫𑀓𑀧𑁆𑀧𑀯𑀲𑁂𑀦 𑀓𑀢𑀁, 𑀢𑀢𑁄 𑀧𑀭𑀁 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀧𑀣𑀯𑀺𑀬𑀸 𑀉𑀲𑁆𑀲𑀺𑀢𑀪𑀸𑀯𑁂𑀦 𑀢𑀢𑁄 𑀓𑀢𑀺𑀧𑀬𑀬𑁄𑀚𑀦𑀽𑀦𑀢𑀸 𑀲𑀺𑀬𑀸, 𑀅𑀧𑁆𑀧𑀓𑀁 𑀅𑀥𑀺𑀓𑀁 𑀯𑀸 𑀊𑀦𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀢𑀻𑀲𑀼 𑀤𑀻𑀧𑁂𑀲𑀼 𑀏𑀓𑀓𑁆𑀔𑀡𑁂 𑀆𑀮𑁄𑀓𑀓𑀭𑀡𑁂𑀦𑀸𑀢𑀺 𑀬𑀤𑀸 𑀬𑀲𑁆𑀫𑀺𑀁 𑀤𑀻𑀧𑁂 𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑀺, 𑀢𑀤𑀸 𑀢𑀢𑁄 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀸 𑀧𑀘𑁆𑀙𑀺𑀫𑁂 𑀉𑀤𑁂𑀦𑁆𑀢𑀸 𑀳𑀼𑀢𑁆𑀯𑀸 𑀆𑀮𑁄𑀓𑀓𑀭𑀡𑁂𑀦. 𑀅𑀜𑁆𑀜𑀚𑁄𑀢𑀻𑀦𑀁 𑀯𑀸 𑀅𑀪𑀺𑀪𑀯𑀦𑁂𑀦, 𑀤𑀼𑀤𑁆𑀤𑀲𑀢𑀸𑀬 𑀘 𑀫𑀳𑀺𑀤𑁆𑀥𑀺𑀓𑁂. 𑀲𑀢𑁆𑀢𑀸𑀦𑀁 𑀲𑀻𑀢𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑁂𑀦, 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀦𑀁 𑀧𑀭𑀺𑀩𑁆𑀭𑀽𑀳𑀦𑁂𑀦 𑀘 𑀫𑀳𑀸𑀦𑀼𑀪𑀸𑀯𑁂. 𑀙𑀼𑀧𑀢𑀻𑀢𑀺 𑀨𑀼𑀲𑀢𑀺. 𑀧𑀭𑀺𑀫𑀚𑁆𑀚𑀢𑀻𑀢𑀺 𑀳𑀢𑁆𑀣𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀦𑁆𑀢𑁄 𑀖𑀁𑀲𑁂𑀢𑀺. 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦𑁂𑀯𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦. 𑀏𑀯-𑀓𑀸𑀭𑁂𑀦 𑀧𑀸𑀤𑀓𑀚𑁆𑀛𑀸𑀦𑀯𑀺𑀲𑁂𑀲𑀁 𑀦𑀺𑀯𑀢𑁆𑀢𑁂𑀢𑀺, 𑀦 𑀅𑀥𑀺𑀝𑁆𑀞𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀦𑀢𑁆𑀣𑁂𑀢𑁆𑀣 𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀦𑀺𑀬𑀫𑁄’’𑀢𑀺. 𑀢𑀺𑀭𑁄𑀓𑀼𑀝𑁆𑀝𑀧𑀸𑀝𑀺𑀳𑀸𑀭𑀺𑀬𑀸𑀤𑀻𑀲𑀼 𑀯𑀺𑀬 𑀇𑀫𑀲𑁆𑀫𑀺𑀁 𑀦𑀸𑀫 𑀓𑀲𑀺𑀡𑁂 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀦 𑀏𑀢𑁆𑀣 𑀓𑁄𑀘𑀺 𑀦𑀺𑀬𑀫𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀓𑀺𑀜𑁆𑀘𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 ‘‘𑀇𑀥 𑀲𑁄 𑀇𑀤𑁆𑀥𑀺𑀫𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁩.𑁧𑁦-𑁧𑁧) 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀫𑀡𑁆𑀟𑀮𑀁. 𑀭𑀽𑀧𑀕𑀢𑀁 𑀳𑀢𑁆𑀣𑀧𑀸𑀲𑁂𑀢𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑀁 𑀭𑀽𑀧𑀕𑀢𑀁, 𑀳𑀢𑁆𑀣𑀧𑀸𑀲𑁂 𑀯𑀸 𑀭𑀽𑀧𑀕𑀢𑀁. 𑀳𑀢𑁆𑀣𑀁 𑀯𑀸 𑀯𑀟𑁆𑀠𑁂𑀢𑁆𑀯𑀸 𑀧𑀭𑀸𑀫𑀲𑀢𑀻𑀢𑀺 𑀬𑁄𑀚𑀦𑀸.

𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀲𑁆𑀲𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑁆𑀲 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁. 𑀬𑀼𑀢𑁆𑀢𑀺𑀬𑀸 𑀧𑀦𑁂𑀢𑁆𑀣 𑀉𑀧𑀸𑀤𑀺𑀦𑁆𑀦𑀓𑀲𑁆𑀲𑀧𑀺 𑀯𑀟𑁆𑀠𑀦𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺. 𑀅𑀢𑁆𑀢𑀦𑁄 𑀅𑀡𑀼𑀫𑀳𑀦𑁆𑀢𑀪𑀸𑀯𑀸𑀧𑀸𑀤𑀦𑁂 𑀉𑀧𑀸𑀤𑀺𑀦𑁆𑀦𑀓𑀲𑁆𑀲 𑀳𑀸𑀧𑀦𑀁 𑀯𑀺𑀬 𑀯𑀟𑁆𑀠𑀦𑀫𑁆𑀧𑀺 𑀮𑀩𑁆𑀪𑀢𑁂𑀯. 𑀬𑀣𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑁂𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀲𑀳𑀯𑀢𑁆𑀣𑀼𑀦𑀸 𑀣𑁂𑀭𑀯𑀸𑀤𑀁 𑀆𑀳𑀭𑀺𑀢𑁆𑀯𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀆𑀳𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀺𑀁 𑀧𑀦 𑀦 𑀳𑁄𑀢𑀺, 𑀳𑁄𑀢𑀺𑀬𑁂𑀯𑀸𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑁂 𑀳𑀺 𑀧𑀝𑀺𑀲𑁂𑀥𑀸 ¶ 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺. ‘‘𑀢𑀤𑀸 𑀫𑀳𑀦𑁆𑀢𑀁 𑀳𑁄𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀺𑀬𑀸’’𑀢𑀺 𑀇𑀤𑀁 𑀬𑀣𑀸𑀥𑀺𑀓𑀢𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀔𑀼𑀤𑁆𑀤𑀓𑀪𑀸𑀯𑀸𑀧𑀸𑀤𑀦𑀫𑁆𑀧𑁂𑀢𑁆𑀣 𑀮𑀩𑁆𑀪𑀢𑁂𑀯.

𑀦𑀦𑁆𑀤𑁄𑀧𑀦𑀦𑁆𑀤𑀦𑀸𑀕𑀤𑀫𑀦𑀓𑀣𑀸𑀯𑀡𑁆𑀡𑀦𑀸

𑀑𑀮𑁄𑀓𑁂𑀲𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀯𑀲𑁂𑀦 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺. 𑀮𑁄𑀓𑀺𑀬𑀁 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑀮𑀓𑁆𑀔𑀡𑀁 𑀲𑀸𑀲𑀦𑀸𑀯𑀢𑀸𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀧𑁆𑀧𑀲𑀦𑁆𑀦𑁄’’𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀧𑀲𑀸𑀤𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀓𑁄 𑀦𑀼 𑀔𑁄…𑀧𑁂… 𑀯𑀺𑀯𑁂𑀘𑁂𑀬𑁆𑀬𑀸’’𑀢𑀺.

𑀢𑀁 𑀤𑀺𑀯𑀲𑀦𑁆𑀢𑀺 𑀬𑀤𑀸 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀢𑀁 𑀤𑀺𑀯𑀲𑀪𑀸𑀕𑀁. 𑀆𑀧𑀸𑀦𑀪𑀽𑀫𑀺𑀁 𑀲𑀚𑁆𑀚𑀬𑀺𑀁𑀲𑀽𑀢𑀺 𑀬𑀢𑁆𑀣 𑀲𑁄 𑀦𑀺𑀲𑀺𑀦𑁆𑀦𑁄 𑀪𑁄𑀚𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀢𑀁 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁 𑀲𑀺𑀢𑁆𑀢𑀁 𑀲𑀫𑁆𑀫𑀝𑁆𑀞𑀁 𑀪𑁄𑀚𑀦𑀽𑀧𑀓𑀭𑀡𑀽𑀧𑀦𑀬𑀦𑀸𑀤𑀺𑀦𑀸 𑀲𑀚𑁆𑀚𑀬𑀺𑀁𑀲𑀼 𑀧𑀝𑀺𑀬𑀸𑀤𑁂𑀲𑀼𑀁. 𑀢𑀺𑀯𑀺𑀥𑀦𑀸𑀝𑀓𑁂𑀳𑀻𑀢𑀺 𑀯𑀥𑀽𑀓𑀼𑀫𑀸𑀭𑀺𑀓𑀜𑁆𑀜𑀸𑀯𑀢𑁆𑀣𑀸𑀳𑀺 𑀢𑀺𑀯𑀺𑀥𑀸𑀳𑀺 𑀦𑀸𑀝𑀓𑀺𑀢𑁆𑀣𑀻𑀳𑀺. 𑀑𑀮𑁄𑀓𑀬𑀫𑀸𑀦𑁄𑀢𑀺 𑀧𑁂𑀓𑁆𑀔𑀦𑁆𑀢𑁄, 𑀯𑀺𑀘𑀸𑀭𑁂𑀦𑁆𑀢𑁄 𑀯𑀸.

𑀉𑀧𑀭𑀽𑀧𑀭𑀻𑀢𑀺 𑀫𑀢𑁆𑀣𑀓𑀫𑀢𑁆𑀣𑀓𑁂. 𑀪𑀯𑀦𑁂𑀦𑀸𑀢𑀺 𑀪𑀯𑀦𑀧𑀤𑁂𑀲𑁂𑀦. 𑀪𑁄𑀕𑁂𑀳𑀻𑀢𑀺 𑀲𑀭𑀻𑀭𑀪𑁄𑀕𑁂𑀳𑀺. 𑀅𑀯𑀓𑀼𑀚𑁆𑀚𑁂𑀦𑀸𑀢𑀺 𑀦𑀺𑀓𑀼𑀚𑁆𑀚𑀺𑀢𑁂𑀦. 𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀢𑀸𑀯𑀢𑀺𑀁𑀲𑀪𑀯𑀦𑀲𑁆𑀲 𑀧𑀤𑁂𑀲𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺, 𑀏𑀯𑀁 𑀧𑀭𑀺𑀬𑀸𑀤𑀸𑀬.

𑀲𑀺𑀦𑁂𑀭𑀼𑀧𑀭𑀺𑀪𑀡𑁆𑀟𑀦𑁆𑀢𑀺 𑀲𑀺𑀦𑁂𑀭𑀼𑀫𑁂𑀔𑀮𑀁. 𑀲𑀺𑀦𑁂𑀭𑀼𑀲𑁆𑀲 𑀓𑀺𑀭 𑀲𑀫𑀦𑁆𑀢𑀢𑁄 𑀩𑀳𑀮𑀢𑁄, 𑀧𑀼𑀣𑀼𑀮𑀢𑁄 𑀘 𑀧𑀜𑁆𑀘𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀧𑀭𑀺𑀪𑀡𑁆𑀟𑀸𑀦𑀺 𑀢𑀸𑀯𑀢𑀺𑀁𑀲𑀪𑀯𑀦𑀲𑁆𑀲 𑀆𑀭𑀓𑁆𑀔𑀸𑀬 𑀦𑀸𑀕𑁂𑀳𑀺, 𑀕𑀭𑀼𑀴𑁂𑀳𑀺, 𑀓𑀼𑀫𑁆𑀪𑀡𑁆𑀟𑁂𑀳𑀺, 𑀬𑀓𑁆𑀔𑁂𑀳𑀺 𑀘 𑀅𑀥𑀺𑀝𑁆𑀞𑀺𑀢𑀸𑀦𑀺, 𑀢𑀸𑀦𑀺 𑀧𑀭𑀺𑀪𑀡𑁆𑀟𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀧𑀭𑀺𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀳𑀺 𑀓𑀺𑀭 𑀲𑀺𑀦𑁂𑀭𑀼𑀲𑁆𑀲 𑀉𑀧𑀟𑁆𑀠𑀁 𑀧𑀭𑀺𑀬𑀸𑀤𑀺𑀦𑁆𑀦𑀁.

𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸𑀢𑀺 𑀫𑀦𑀼𑀲𑁆𑀲𑀭𑀽𑀧𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸. 𑀩𑀸𑀥𑀢𑀻𑀢𑀺 𑀔𑁂𑀤𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺.

𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸𑀢𑀺 𑀲𑀼𑀔𑀼𑀫𑀢𑁆𑀢𑀪𑀸𑀯𑀦𑀺𑀫𑁆𑀫𑀸𑀦𑁂𑀦 𑀦𑀸𑀕𑀭𑀽𑀧𑀁 𑀯𑀺𑀚𑀳𑀺𑀢𑁆𑀯𑀸. 𑀫𑀼𑀔𑀁 𑀯𑀺𑀯𑀭𑀺 ‘‘𑀫𑀼𑀔𑀕𑀢𑀁 ¶ 𑀲𑀫𑀡𑀁 𑀲𑀁𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀧𑀸𑀘𑀻𑀦𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘𑀸𑀢𑀺 𑀦𑀸𑀕𑀲𑁆𑀲 𑀢𑀣𑀸𑀦𑀺𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀝𑁆𑀞𑀼 𑀲𑀢𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀢𑁆𑀣𑀫𑀸𑀳 ‘‘𑀫𑀦𑀲𑀺 𑀓𑀭𑁄𑀳𑀻’’𑀢𑀺.

𑀆𑀤𑀺𑀢𑁄 ¶ 𑀧𑀝𑁆𑀞𑀸𑀬 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀬𑀸𑀦𑀻𑀢𑀺 𑀢𑀤𑀸 𑀣𑁂𑀭𑁂𑀦 𑀓𑀢𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀁 𑀧𑀦 𑀞𑀸𑀦𑀦𑁆𑀢𑀺 𑀇𑀫𑀁 𑀦𑀸𑀲𑀸𑀯𑀸𑀢𑀯𑀺𑀲𑁆𑀲𑀚𑁆𑀚𑀦𑀓𑀸𑀭𑀡𑀁.

𑀅𑀦𑀼𑀩𑀦𑁆𑀥𑀻𑀢𑀺 ‘‘𑀦 𑀲𑀓𑁆𑀓𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀲𑁆𑀲 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀝𑀺𑀧𑀳𑀭𑀺𑀢𑀼’’𑀦𑁆𑀢𑀺 𑀪𑀬𑁂𑀦 𑀧𑀮𑀸𑀬𑀦𑁆𑀢𑀁 𑀅𑀦𑀼𑀩𑀦𑁆𑀥𑀺.

𑀏𑀓𑀧𑀝𑀺𑀧𑀸𑀝𑀺𑀬𑀸𑀢𑀺 𑀏𑀓𑀸𑀬 𑀧𑀝𑀺𑀧𑀸𑀝𑀺𑀬𑀸, 𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯𑀸𑀢𑀺 𑀬𑀸 𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀲𑁆𑀲𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑁆𑀲 𑀯𑀟𑁆𑀠𑀺, 𑀅𑀬𑀫𑁂𑀯. 𑀏𑀢𑁆𑀣 𑀏𑀤𑀺𑀲𑁂 𑀳𑀢𑁆𑀣𑀯𑀟𑁆𑀠𑀦𑀸𑀤𑀺𑀧𑀸𑀝𑀺𑀳𑀸𑀭𑀺𑀬𑁂 𑀬𑀼𑀢𑁆𑀢𑀺 𑀬𑀼𑀢𑁆𑀢𑀭𑀽𑀧𑀸 𑀘𑀺𑀢𑁆𑀢𑀢𑁄, 𑀉𑀢𑀼𑀢𑁄 𑀯𑀸 𑀉𑀧𑀸𑀤𑀺𑀦𑁆𑀦𑀓𑀭𑀽𑀧𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀅𑀣 𑀯𑀸 𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀲𑀓𑀮𑀫𑁂𑀯 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀫𑁆𑀧𑀺 𑀢𑀲𑁆𑀲 𑀢𑀣𑀸 𑀯𑀟𑁆𑀠𑀺 𑀦 𑀬𑀼𑀚𑁆𑀚𑀢𑀺 𑀏𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀟𑁆𑀠𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀲𑀦𑁆𑀢𑀸𑀦𑁂 𑀉𑀧𑀸𑀤𑀺𑀦𑁆𑀦𑀁, 𑀅𑀦𑀼𑀧𑀸𑀤𑀺𑀦𑁆𑀦𑀜𑁆𑀘 𑀲𑀫𑁆𑀪𑀺𑀦𑁆𑀦𑀁 𑀯𑀺𑀬 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀅𑀢𑁆𑀣𑀢𑁄 𑀅𑀲𑀫𑁆𑀪𑀺𑀦𑁆𑀦𑀫𑁂𑀯. 𑀢𑀢𑁆𑀣 𑀬𑀣𑀸 𑀆𑀴𑁆𑀳𑀓𑀫𑀢𑁆𑀢𑁂 𑀔𑀻𑀭𑁂 𑀅𑀦𑁂𑀓𑀸𑀴𑁆𑀳𑀓𑁂 𑀉𑀤𑀓𑁂 𑀆𑀲𑀺𑀢𑁆𑀢𑁂 𑀬𑀤𑀺𑀧𑀺 𑀔𑀻𑀭𑀁 𑀲𑀩𑁆𑀩𑁂𑀦 𑀲𑀫𑁆𑀪𑀺𑀦𑁆𑀦𑀁 𑀲𑀩𑁆𑀩𑀢𑁆𑀣𑀓𑀫𑁂𑀯 𑀮𑀫𑁆𑀩𑀫𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀣𑀸𑀧𑀺 𑀦 𑀢𑀢𑁆𑀣 𑀔𑀻𑀭𑀁 𑀯𑀟𑁆𑀠𑀢𑀺, 𑀉𑀤𑀓𑀫𑁂𑀯 𑀯𑀟𑁆𑀠𑀢𑀺, 𑀏𑀯𑀫𑁂𑀯𑀁 𑀬𑀤𑀺𑀧𑀺 𑀉𑀧𑀸𑀤𑀺𑀦𑁆𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀜𑁆𑀘 𑀲𑀫𑁆𑀪𑀺𑀦𑁆𑀦𑀁 𑀯𑀺𑀬 𑀧𑀯𑀢𑁆𑀢𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀁 𑀦 𑀯𑀟𑁆𑀠𑀢𑀺, 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀘𑀺𑀢𑁆𑀢𑀚𑀁, 𑀢𑀤𑀦𑀼𑀲𑀸𑀭𑁂𑀦 𑀉𑀢𑀼𑀚𑀜𑁆𑀘 𑀯𑀟𑁆𑀠𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁄𑀢𑀺 𑀲𑁄 𑀇𑀤𑁆𑀥𑀺𑀫𑀸. 𑀏𑀯𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀳𑀢𑁆𑀣𑀁 𑀯𑀸 𑀯𑀟𑁆𑀠𑁂𑀢𑁆𑀯𑀸 𑀢𑁂 𑀯𑀸 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂 𑀓𑀢𑁆𑀯𑀸. 𑀧𑀸𑀤𑀝𑁆𑀞𑀧𑀦𑀸𑀤𑀺𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑁄𑀧𑀺 𑀇𑀤𑁆𑀥𑀺𑀫𑀸. 𑀢𑀣𑁂𑀯𑀸𑀢𑀺 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁄 𑀧𑀼𑀩𑁆𑀩𑁂 𑀯𑀺𑀬. 𑀢𑀣𑀽𑀧𑀫𑀫𑁂𑀢𑀦𑁆𑀢𑀺 𑀬𑀣𑀸 𑀉𑀤𑀓𑀧𑀼𑀡𑁆𑀡𑀸𑀲𑀼 𑀦𑀸𑀦𑀸𑀧𑀸𑀢𑀻𑀲𑀼 𑀩𑀳𑀽𑀳𑀺 𑀦𑀸𑀦𑀸𑀘𑀦𑁆𑀤𑀫𑀡𑁆𑀟𑀮𑁂𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀦 𑀢𑁂𑀦 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀕𑀫𑀦𑀸𑀤𑀺𑀉𑀧𑀭𑁄𑀥𑁄, 𑀩𑀳𑀽𑀦𑀜𑁆𑀘 𑀧𑀘𑁆𑀘𑁂𑀓𑀁 𑀤𑀲𑁆𑀲𑀦𑀁 𑀇𑀚𑁆𑀛𑀢𑀺, 𑀢𑀣𑀽𑀧𑀫𑀫𑁂𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀕𑀫𑀦𑀸𑀤𑀺𑀉𑀧𑀭𑁄𑀥𑀸𑀪𑀸𑀯𑀢𑁄, 𑀩𑀳𑀽𑀦𑀜𑁆𑀘 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀢𑀢𑁆𑀣 𑀇𑀤𑁆𑀥𑀺𑀧𑀬𑁄𑀕𑀲𑁆𑀲 𑀬𑀣𑀺𑀘𑁆𑀙𑀺𑀢𑀁 𑀲𑀫𑀺𑀚𑁆𑀛𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁯𑁭. 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀅𑀪𑀺𑀯𑀺𑀥𑀺𑀯𑀲𑁂𑀦 𑀧𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸, 𑀦 𑀫𑀭𑀺𑀬𑀸𑀤𑀯𑀲𑁂𑀦. 𑀢𑀣𑀸 𑀳𑁂𑀲 𑀩𑁆𑀭𑀳𑁆𑀫𑀮𑁄𑀓𑁂 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀧𑀸𑀴𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺.

𑀬𑀸𑀯 ¶ 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀦 𑀩𑁆𑀭𑀳𑁆𑀫𑀮𑁄𑀓𑀲𑁆𑀲𑁂𑀯 𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀕𑀫𑀦𑀫𑁂𑀯, 𑀅𑀣 𑀔𑁄 ¶ 𑀅𑀜𑁆𑀜𑀣𑀸 𑀅𑀜𑁆𑀜𑀫𑁆𑀧𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀧𑀦 𑀤𑀽𑀭𑀸𑀯𑀥𑀺𑀦𑀺𑀤𑀲𑁆𑀲𑀦𑀫𑁂𑀢𑀁, 𑀢𑀲𑁆𑀫𑀸 ‘‘𑀲𑀘𑁂 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑀸 𑀳𑁄𑀢𑀻’’𑀢𑀺 𑀯𑀢𑁆𑀯𑀸𑀧𑀺 𑀇𑀢𑀭𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑀺𑀓𑁂𑀧𑀺 𑀤𑀽𑀭𑁂 𑀅𑀥𑀺𑀝𑁆𑀞𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀲𑁆𑀲 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀲𑀗𑁆𑀕𑀳𑁄, 𑀦 𑀯𑀼𑀢𑁆𑀢𑀲𑁆𑀲𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀯𑀲𑀸𑀦𑁂𑀢𑀺𑀆𑀤𑀺𑀦𑀸 𑀢𑀺𑀯𑀺𑀓𑁆𑀓𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸, 𑀅𑀜𑁆𑀜𑀢𑁆𑀣 𑀧𑀦 𑀮𑀓𑁆𑀔𑀡𑀸𑀦𑀺𑀲𑀁𑀲𑀢𑀸. 𑀢𑀤𑀼𑀪𑀬𑀁 𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀦𑀻𑀮𑀫𑀸𑀢𑀺𑀓𑀦𑁆𑀢𑀺 𑀦𑀻𑀮𑀯𑀡𑁆𑀡𑁄𑀤𑀓𑀫𑀸𑀢𑀺𑀓𑀁.

𑀫𑀳𑀸𑀩𑁄𑀥𑀺𑀦𑁆𑀢𑀺 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀫𑀳𑀸𑀩𑁄𑀥𑀺𑀁. 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀦𑁆𑀢𑀺𑀓𑁂 𑀅𑀓𑀸𑀲𑀻𑀢𑀺 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀧𑀣𑀯𑀺𑀁, 𑀲𑀫𑀼𑀤𑁆𑀤𑀜𑁆𑀘 𑀲𑀁𑀔𑀺𑀧𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀲𑀦𑁆𑀢𑀺𑀓𑁂 𑀅𑀓𑀸𑀲𑀺.

𑀦𑀓𑁆𑀔𑀢𑁆𑀢𑀤𑀺𑀯𑀲𑁂𑀢𑀺 𑀫𑀳𑀤𑀺𑀯𑀲𑁂. 𑀘𑀦𑁆𑀤𑀧𑀽𑀯𑁂𑀢𑀺 𑀘𑀦𑁆𑀤𑀲𑀤𑀺𑀲𑁂 𑀘𑀦𑁆𑀤𑀫𑀡𑁆𑀟𑀮𑀸𑀓𑀸𑀭𑁂 𑀧𑀽𑀯𑁂. 𑀏𑀓𑀧𑀢𑁆𑀢𑀧𑀽𑀭𑀫𑀢𑁆𑀢𑀫𑀓𑀸𑀲𑀻𑀢𑀺 𑀬𑀣𑀸 𑀢𑁂 𑀧𑀫𑀸𑀡𑀢𑁄 𑀲𑀭𑀽𑀧𑁂𑀦𑁂𑀯 𑀅𑀦𑁆𑀢𑁄𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀓𑀸𑀲𑀺.

𑀓𑀸𑀓𑀯𑀮𑀺𑀬𑀯𑀢𑁆𑀣𑀼𑀲𑁆𑀫𑀺𑀜𑁆𑀘 ‘‘𑀪𑀕𑀯𑀸 𑀣𑁄𑀓𑀁 𑀩𑀳𑀼𑀁 𑀅𑀓𑀸𑀲𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀁 𑀧𑀦 𑀯𑀢𑁆𑀣𑀼𑀁 𑀲𑀗𑁆𑀔𑁂𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸.

𑀕𑀗𑁆𑀕𑀸𑀢𑀻𑀭𑁂𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀕𑀗𑁆𑀕𑀸𑀦𑀤𑀺𑀬𑀸 𑀢𑀻𑀭𑁂. 𑀲𑀜𑁆𑀜𑀁 𑀅𑀤𑀸𑀲𑀻𑀢𑀺 𑀬𑀣𑀸 𑀢𑁂 𑀬𑀣𑀸𑀥𑀺𑀝𑁆𑀞𑀺𑀢𑀁 𑀲𑀧𑁆𑀧𑀺𑀁 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀲𑀜𑁆𑀜𑀁 𑀅𑀤𑀸𑀲𑀺.

𑀢𑀲𑁆𑀲𑀸𑀢𑀺 𑀬𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄, 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀁 𑀧𑀲𑁆𑀲𑀢𑀺. 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀩𑁆𑀭𑀳𑁆𑀫𑀼𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀻𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀩𑁆𑀭𑀳𑁆𑀫𑀼𑀦𑁄 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀓𑀭𑀚𑀓𑀸𑀬𑀲𑁆𑀲 𑀯𑀲𑁂𑀦𑀸𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀭𑀽𑀧𑀓𑀸𑀬𑀲𑁆𑀲 𑀯𑀲𑁂𑀦. ‘‘𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀻’’𑀢𑀺 𑀏𑀢𑁆𑀣 𑀓𑀺𑀁 𑀢𑀁 𑀘𑀺𑀢𑁆𑀢𑀁, 𑀓𑀣𑀁 𑀯𑀸 𑀧𑀭𑀺𑀡𑀸𑀫𑀦𑀦𑁆𑀢𑀺 𑀆𑀳 ‘‘𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀸𑀬𑁂 𑀆𑀭𑁄𑀧𑁂𑀢𑀻’’𑀢𑀺. 𑀓𑀣𑀁 ¶ 𑀧𑀦 𑀓𑀸𑀬𑁂 𑀆𑀭𑁄𑀧𑁂𑀢𑀻𑀢𑀺 𑀆𑀳 ‘‘𑀓𑀸𑀬𑀸𑀦𑀼𑀕𑀢𑀺𑀓𑀁 𑀓𑀭𑁄𑀢𑀻’’𑀢𑀺. 𑀏𑀯𑀫𑁆𑀧𑀺 𑀲𑀤𑁆𑀤𑀤𑀦𑁆𑀥𑀭𑁄𑀯𑀸𑀬𑀦𑁆𑀢𑀺 𑀯𑀘𑀦𑀧𑀣𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄 𑀆𑀳 ‘‘𑀤𑀦𑁆𑀥𑀕𑀫𑀦’’𑀦𑁆𑀢𑀺. 𑀓𑀭𑁄𑀢𑀻𑀢𑀺 ¶ 𑀲𑀫𑁆𑀩𑀦𑁆𑀥𑁄. 𑀓𑀸𑀬𑀕𑀫𑀦𑀁 𑀳𑀺 𑀤𑀦𑁆𑀥𑀁, 𑀤𑀦𑁆𑀥𑀫𑀳𑀸𑀪𑀽𑀢𑀧𑀘𑁆𑀘𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑀢𑀸𑀬 𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑁄 𑀬𑁄𑀕𑀻 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀇𑀤𑀁 𑀘𑀺𑀢𑁆𑀢𑀁 𑀓𑀸𑀬𑁄 𑀯𑀺𑀬 𑀤𑀦𑁆𑀥𑀕𑀫𑀦𑀁 𑀳𑁄𑀢𑀽’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀣𑀸 𑀧𑀭𑀺𑀓𑀫𑁆𑀫𑀓𑀭𑀡𑀁 𑀳𑀺 𑀲𑀦𑁆𑀥𑀸𑀬 ‘‘𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀓𑀫𑁆𑀫𑀁 𑀧𑀦 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄 𑀢𑀁 𑀘𑀺𑀢𑁆𑀢𑀁 𑀓𑀸𑀬𑁂 𑀆𑀭𑁄𑀧𑁂𑀢𑀺, 𑀓𑀸𑀬𑀸𑀦𑀼𑀕𑀢𑀺𑀓𑀁 𑀤𑀦𑁆𑀥𑀕𑀫𑀦𑀁 𑀓𑀭𑁄𑀢𑀺.

𑀲𑀼𑀔𑀲𑀜𑁆𑀜𑀦𑁆𑀢𑀺 𑀲𑀼𑀔𑀲𑀳𑀕𑀢𑀁 𑀲𑀜𑁆𑀜𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀦𑀺𑀤𑁆𑀤𑁂𑀲𑁄. 𑀮𑀳𑀼𑀪𑀸𑀯𑁂𑀦 𑀲𑀜𑁆𑀜𑀸𑀢𑀦𑁆𑀢𑀺 𑀮𑀳𑀼𑀲𑀜𑁆𑀜𑀁. 𑀓𑀣𑀁 𑀧𑀦 𑀇𑀤𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀲𑀼𑀔𑀲𑀜𑁆𑀜𑀸𑀬 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀲𑀼𑀔𑀲𑀜𑁆𑀜𑀸 𑀦𑀸𑀫 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸’’𑀢𑀺. 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀢𑀦𑁆𑀢𑀺 𑀯𑀸 𑀲𑀼𑀔𑀲𑀜𑁆𑀜𑀁. 𑀢𑁂𑀦𑁂𑀯𑀸𑀳 ‘‘𑀉𑀧𑁂𑀓𑁆𑀔𑀸 𑀳𑀺 𑀲𑀦𑁆𑀢𑀁 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀏𑀓𑀦𑁆𑀢𑀕𑀭𑀼𑀓𑁂𑀳𑀺 𑀦𑀻𑀯𑀭𑀡𑁂𑀳𑀺, 𑀑𑀴𑀸𑀭𑀺𑀓𑁂𑀳𑀺 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑁂𑀳𑀺 𑀘 𑀯𑀺𑀢𑀓𑁆𑀓𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀮𑀳𑀼𑀪𑀸𑀯𑀲𑁆𑀲 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀬𑁂𑀯…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀁 𑀑𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀢𑀁 𑀲𑀼𑀔𑀮𑀳𑀼𑀲𑀜𑁆𑀜𑀁 𑀅𑀦𑀼𑀧𑁆𑀧𑀢𑁆𑀢𑀲𑁆𑀲. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀕𑀦𑁆𑀢𑀼𑀓𑀸𑀫𑀢𑀸 𑀏𑀯 𑀏𑀢𑁆𑀣 𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀫𑀦𑁂 𑀬𑀁 𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀁 𑀉𑀤𑁆𑀤𑀺𑀲𑁆𑀲 𑀕𑀦𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀧𑀭𑀺𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀦𑀺 𑀏𑀯 𑀧𑀫𑀸𑀡𑀁, 𑀢𑀸𑀯𑀢𑀸 𑀕𑀫𑀦𑀁 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀫𑀕𑁆𑀕𑀦𑀺𑀫𑁆𑀫𑀸𑀦𑀯𑀸𑀬𑀼𑀅𑀥𑀺𑀝𑁆𑀞𑀸𑀦𑁂𑀳𑀺 𑀯𑀺𑀦𑀸𑀧𑀺 𑀇𑀘𑁆𑀙𑀺𑀢𑀤𑁂𑀲𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀲𑀢𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 𑀓𑀭𑀚𑀓𑀸𑀬𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸. 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑀻𑀢𑀺 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑀺 𑀢𑀕𑁆𑀕𑀢𑀺𑀓𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀓𑀭𑁄𑀢𑀺 𑀲𑀻𑀖𑀕𑀫𑀦’’𑀦𑁆𑀢𑀺. 𑀘𑀺𑀢𑁆𑀢𑀕𑀫𑀦𑀦𑁆𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀸𑀳. 𑀇𑀤𑀁 𑀧𑀦 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀧𑀭𑀺𑀡𑀸𑀫𑀦𑀧𑀸𑀝𑀺𑀳𑀸𑀭𑀺𑀬𑀁. 𑀘𑀺𑀢𑁆𑀢𑀕𑀫𑀦𑀫𑁂𑀯𑀸𑀢𑀺 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀫𑀦𑀫𑁂𑀯. 𑀓𑀣𑀁 𑀧𑀦 𑀓𑀸𑀬𑁄 𑀤𑀦𑁆𑀥𑀧𑁆𑀧𑀯𑀢𑁆𑀢𑀺𑀓𑁄 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑀸 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑁄 𑀳𑁄𑀢𑀻𑀢𑀺? 𑀦 𑀲𑀩𑁆𑀩𑀣𑀸 𑀲𑀫𑀸𑀦𑀕𑀢𑀺𑀓𑁄. 𑀬𑀣𑁂𑀯 𑀳𑀺 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂 𑀘𑀺𑀢𑁆𑀢𑀁 𑀲𑀩𑁆𑀩𑀣𑀸 𑀓𑀸𑀬𑁂𑀦 𑀲𑀫𑀸𑀦𑀕𑀢𑀺𑀓𑀁 𑀦 𑀳𑁄𑀢𑀺. 𑀦 𑀳𑀺 𑀢𑀤𑀸 𑀘𑀺𑀢𑁆𑀢𑀁 𑀲𑀪𑀸𑀯𑀲𑀺𑀤𑁆𑀥𑁂𑀦 𑀅𑀢𑁆𑀢𑀦𑁄 𑀔𑀡𑁂𑀦 𑀅𑀯𑀢𑁆𑀢𑀺𑀢𑁆𑀯𑀸 𑀕𑀭𑀼𑀯𑀼𑀢𑁆𑀢𑀺𑀓𑀲𑁆𑀲 𑀭𑀽𑀧𑀥𑀫𑁆𑀫𑀲𑁆𑀲 𑀔𑀡𑁂𑀦 𑀯𑀢𑁆𑀢𑀢𑀺. ‘‘𑀇𑀤𑀁 𑀘𑀺𑀢𑁆𑀢𑀁 𑀅𑀬𑀁 𑀓𑀸𑀬𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀦 𑀅𑀥𑀺𑀝𑁆𑀞𑀸𑀦𑁂𑀦 ¶ 𑀤𑀦𑁆𑀥𑀕𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀯𑀢𑁆𑀢𑀦𑀢𑁄 𑀬𑀸𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺, 𑀢𑀸𑀯 𑀓𑀸𑀬𑀕𑀢𑀺𑀅𑀦𑀼𑀮𑁄𑀫𑁂𑀦𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀓𑀸𑀬𑀕𑀢𑀺𑀬𑀸 𑀧𑀭𑀺𑀡𑀸𑀫𑀺𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀁 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀧𑀕𑁂𑀯 𑀲𑀼𑀔𑀮𑀳𑀼𑀲𑀜𑁆𑀜𑀸𑀬 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀺𑀤𑁆𑀥𑀺𑀧𑀸𑀤𑀸𑀦𑀁 𑀯𑀺𑀬 𑀤𑀦𑁆𑀥𑀁 𑀅𑀯𑀢𑁆𑀢𑀺𑀢𑁆𑀯𑀸 𑀬𑀣𑀸 𑀮𑀳𑀼𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑁂𑀳𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄 𑀓𑀸𑀬𑁄 𑀘𑀺𑀢𑁆𑀢𑀕𑀢𑀺𑀬𑀸 𑀧𑀭𑀺𑀡𑀸𑀫𑀺𑀢𑁄 𑀦𑀸𑀫 𑀳𑁄𑀢𑀺, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀬𑀸.

𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬𑀸’’𑀢𑀺 𑀇𑀤𑀫𑁆𑀧𑀺 𑀉𑀧𑀫𑀸𑀯𑀘𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀯𑀲𑁆𑀲𑀁 𑀘𑁂𑀢𑀁 𑀏𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀸𑀞𑁂𑀳𑀺, 𑀯𑀺𑀦𑀬𑀅𑀝𑁆𑀞𑀓𑀣𑀸𑀬 𑀘 𑀯𑀺𑀭𑁄𑀥𑁄 𑀲𑀺𑀬𑀸, 𑀥𑀫𑁆𑀫𑀢𑀸 𑀘 𑀯𑀺𑀮𑁄𑀫𑀺𑀢𑀸. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀻’’𑀢𑀺 (𑀅. 𑀦𑀺. 𑁧.𑁧𑁧 𑀆𑀤𑀬𑁄) 𑀳𑀺 𑀏𑀢𑁆𑀣 𑀅𑀜𑁆𑀜𑀕𑀳𑀡𑁂𑀦 𑀭𑀽𑀧𑀥𑀫𑁆𑀫𑀸 𑀕𑀳𑀺𑀢𑀸 𑀅𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬. 𑀅𑀪𑀺𑀥𑀫𑁆𑀫𑁂 (𑀧𑀝𑁆𑀞𑀸. 𑁧.𑁧.𑁧𑁦-𑁧𑁧) 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀫𑁂𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀲𑁆𑀲𑁂𑀯. 𑀬𑀢𑁆𑀣 𑀬𑀢𑁆𑀣 𑀘 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺. 𑀦𑀢𑁆𑀣𑀺 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁, 𑀦 𑀘 𑀲𑀪𑀸𑀯𑁄 𑀅𑀜𑁆𑀜𑀣𑀸 𑀳𑁄𑀢𑀻𑀢𑀺. 𑀦 𑀳𑀺 𑀇𑀤𑁆𑀥𑀺𑀩𑀮𑁂𑀦 𑀥𑀫𑁆𑀫𑀸𑀦𑀁 𑀓𑁂𑀦𑀘𑀺 𑀮𑀓𑁆𑀔𑀡𑀁 𑀅𑀜𑁆𑀜𑀣𑀢𑁆𑀢𑀁 𑀓𑀸𑀢𑀼𑀁 𑀲𑀓𑁆𑀓𑀸, 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀧𑀦 𑀓𑀸𑀢𑀼𑀁 𑀲𑀓𑁆𑀓𑀸. ‘‘𑀢𑀻𑀲𑀼𑀧𑀺 𑀔𑀡𑁂𑀲𑀽’’𑀢𑀺 𑀇𑀤𑀫𑁆𑀧𑀺 𑀕𑀫𑀦𑀸𑀭𑀫𑁆𑀪𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀕𑀫𑀦𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀣𑁂𑀭𑁄𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀣𑁂𑀭𑁄. 𑀇𑀥𑀸𑀢𑀺 𑀇𑀤𑀁 𑀧𑀸𑀝𑀺𑀳𑀸𑀭𑀺𑀬𑀁 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀧𑀸𑀞𑁂. 𑀲𑀬𑀁 𑀕𑀫𑀦𑀫𑁂𑀯 𑀆𑀕𑀢𑀁 ‘‘𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕’’𑀦𑁆𑀢𑀺, 𑀲𑀩𑁆𑀩𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸𑀯 𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀼𑀘𑀺𑀯𑀲𑁂𑀦𑀸𑀢𑀺 𑀇𑀘𑁆𑀙𑀸𑀯𑀲𑁂𑀦. 𑀅𑀜𑁆𑀜𑀫𑁆𑀧𑀻𑀢𑀺 𑀪𑀕𑀯𑀢𑀸 𑀓𑀭𑀺𑀬𑀫𑀸𑀦𑀢𑁄 𑀅𑀜𑁆𑀜𑀫𑁆𑀧𑀺 𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀅𑀬𑀜𑁆𑀘𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀬𑀤𑀺 𑀲𑀸𑀯𑀓𑀦𑀺𑀫𑁆𑀫𑀺𑀢𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀢𑀸 𑀦𑀢𑁆𑀣𑀺, ‘‘𑀲𑀘𑁂 𑀧𑀦 𑀦𑀸𑀦𑀸𑀯𑀡𑁆𑀡𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺? 𑀢𑀁 𑀢𑀣𑀸 𑀢𑀣𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀢𑁂 𑀢𑁂 𑀯𑀡𑁆𑀡𑀯𑀬𑀸𑀤𑀺𑀯𑀺𑀲𑁂𑀲𑀸 𑀧𑀭𑀺𑀓𑀫𑁆𑀫𑀸𑀦𑀼𑀭𑀽𑀧𑀁 𑀇𑀚𑁆𑀛𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀥 𑀧𑀦 𑀬𑀣𑀸𑀥𑀺𑀝𑁆𑀞𑀺𑀢𑁂 𑀦𑀺𑀫𑁆𑀫𑀺𑀢𑀭𑀽𑀧𑁂 𑀲𑀘𑁂 𑀲𑀸𑀯𑀓𑁄 ‘‘𑀇𑀫𑁂 𑀯𑀺𑀲𑁂𑀲𑀸 𑀳𑁄𑀦𑁆𑀢𑀽’’𑀢𑀺 ¶ 𑀇𑀘𑁆𑀙𑀢𑀺, 𑀦 𑀇𑀚𑁆𑀛𑀢𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀇𑀚𑁆𑀛𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀇𑀤𑀸𑀦𑀺 𑀬𑀸𑀦𑀺 𑀢𑀸𑀦𑀺 ‘‘𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁦) 𑀧𑀸𑀴𑀺𑀬𑀸 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺 ‘‘𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀻’’𑀢𑀺𑀆𑀤𑀻𑀦𑀺 𑀘𑀼𑀤𑁆𑀤𑀲 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 ¶ , 𑀢𑀢𑁆𑀣 𑀲𑀺𑀔𑀸𑀧𑁆𑀧𑀢𑁆𑀢𑀁 𑀓𑀸𑀬𑁂𑀦 𑀯𑀲𑀯𑀢𑁆𑀢𑀦𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑁂𑀦 ‘‘𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀭𑀽𑀧𑀤𑀲𑁆𑀲𑀦𑀁, ‘‘𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀲𑀤𑁆𑀤𑀲𑀯𑀦𑀁, ‘‘𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀘𑀺𑀢𑁆𑀢𑀚𑀸𑀦𑀦𑀦𑁆𑀢𑀺 𑀏𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀲𑁄𑀢𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀢𑁆𑀢𑀼𑀓𑀁 𑀤𑀲𑁆𑀲𑀦𑀲𑀯𑀦𑀚𑀸𑀦𑀦𑀓𑀺𑀭𑀺𑀬𑀁 𑀧𑀭𑀸𑀫𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑁄 𑀧𑀭𑁂𑀲𑀼 𑀲𑀦𑁆𑀢𑀺𑀝𑁆𑀞𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀫𑁆𑀧𑀺𑀲𑁆𑀲𑀸𑀢𑀺 𑀬𑀫𑁆𑀧𑀺 𑀅𑀲𑁆𑀲. 𑀬𑁄𑀕𑀺𑀦𑁄 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀜𑁆𑀘 𑀔𑁄𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀯𑀺𑀲𑁂𑀲𑀢𑁆𑀣𑁄 𑀯𑀸, 𑀢𑁂𑀦 𑀅𑀬𑀫𑁂𑀯𑁂𑀢𑁆𑀣 𑀓𑀸𑀬𑁂𑀦 𑀯𑀲𑀯𑀢𑁆𑀢𑀦𑀧𑀸𑀝𑀺𑀳𑀸𑀭𑀺𑀬𑁂𑀲𑀼 𑀉𑀓𑁆𑀓𑀝𑁆𑀞𑀢𑀭𑀦𑁆𑀢𑀺 𑀤𑀻𑀧𑁂𑀢𑀺. 𑀓𑀲𑁆𑀫𑀸? ‘‘𑀅𑀬𑀁 𑀦𑀼 𑀔𑁄 𑀇𑀤𑁆𑀥𑀺𑀫𑀸, 𑀅𑀬𑀁 𑀦𑀼 𑀔𑁄 𑀦𑀺𑀫𑁆𑀫𑀺𑀢𑁄’’𑀢𑀺 𑀏𑀓𑀘𑁆𑀘𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀆𑀲𑀗𑁆𑀓𑀼𑀧𑁆𑀧𑀸𑀤𑀦𑀢𑁄. 𑀬𑀤𑀕𑁆𑀕𑁂𑀦 𑀘𑁂𑀢𑀁 𑀅𑀥𑀺𑀝𑁆𑀞𑀺𑀢𑀁 𑀯𑀺𑀲𑁂𑀲𑀢𑁄 𑀫𑀦𑁄𑀫𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀕𑁆𑀕𑁂𑀦 𑀉𑀓𑁆𑀓𑀝𑁆𑀞𑀢𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺 𑀦𑀸𑀫𑀸’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀇𑀥 𑀲𑁂𑀲𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀲𑁂𑀲𑀁…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑁩𑁯𑁮. 𑀇𑀤𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀓𑀸𑀫𑀫𑀺𑀫𑀸𑀧𑀺 𑀤𑁆𑀯𑁂 𑀇𑀤𑁆𑀥𑀺𑀬𑁄 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀇𑀚𑁆𑀛𑀦𑁆𑀢𑀺, 𑀢𑀣𑀸𑀧𑀺 𑀇𑀤𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀇𑀫𑀸𑀲𑀁 𑀦𑀸𑀦𑀸𑀓𑀭𑀡𑀁 𑀯𑀺𑀲𑁂𑀲𑁄. 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀭𑀽𑀧𑀁 𑀯𑀺𑀚𑀳𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸, 𑀧𑀭𑁂𑀲𑀁 𑀅𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀫𑀸𑀭𑀓𑀯𑀡𑁆𑀡𑀦𑁆𑀢𑀺 𑀓𑀼𑀫𑀸𑀭𑀓𑀲𑀡𑁆𑀞𑀸𑀦𑀁. 𑀤𑀲𑁆𑀲𑁂𑀢𑀻𑀢𑀺 𑀢𑀣𑀸 𑀯𑀺𑀓𑀼𑀩𑁆𑀩𑀦𑁆𑀢𑁄 𑀅𑀢𑁆𑀢𑀦𑀺 𑀤𑀲𑁆𑀲𑁂𑀢𑀺. 𑀦𑀸𑀕𑀯𑀡𑁆𑀡𑀁 𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀳𑀢𑁆𑀣𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀳𑀢𑁆𑀣𑀺𑀁 𑀤𑀲𑁆𑀲𑁂𑀢𑀺. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀇𑀥 ‘‘𑀳𑀢𑁆𑀣𑀺𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀯𑀼𑀢𑁆𑀢𑀁. 𑀬𑀁 𑀧𑀦 𑀓𑁂𑀘𑀺 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀯𑀘𑀦𑀁 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸’’𑀢𑀺 𑀯𑀘𑀦𑁂𑀦 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀪𑀸𑀯𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀓𑀢𑀺𑀭𑀽𑀧𑀲𑁆𑀲 𑀅𑀜𑁆𑀜𑁂𑀲𑀁 𑀅𑀤𑀲𑁆𑀲𑀦𑀁, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀭𑁄𑀥𑀦𑀁. 𑀏𑀯𑀁 𑀲𑀢𑀺 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀳𑀢𑁆𑀣𑀺𑀁 𑀤𑀲𑁆𑀲𑁂𑀢𑀻’’𑀢𑀺 ¶ 𑀯𑀼𑀘𑁆𑀘𑀫𑀸𑀦𑁂 𑀓𑁄 𑀏𑀢𑁆𑀣 𑀯𑀺𑀭𑁄𑀥𑁄, 𑀅𑀢𑁆𑀢𑀦𑀸 𑀧𑀦 𑀳𑀢𑁆𑀣𑀺𑀯𑀡𑁆𑀡𑁄 𑀳𑀼𑀢𑁆𑀯𑀸 𑀩𑀳𑀺𑀤𑁆𑀥𑀸𑀧𑀺 𑀳𑀢𑁆𑀣𑀺𑀁 𑀤𑀲𑁆𑀲𑀦𑁆𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀦𑁂𑀯𑀸𑀳 ‘‘𑀩𑀳𑀺𑀤𑁆𑀥𑀸𑀧𑀺 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀪𑀸𑀯𑁂𑀦 𑀘 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀧𑀸𑀴𑀺𑀬𑀜𑁆𑀘 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸𑀢𑀺𑀆𑀤𑀻𑀲𑀼 𑀅𑀦𑀺𑀬𑀫𑀢𑁆𑀣𑁄 𑀯𑀸-𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑁂𑀲𑀼 𑀏𑀓𑁂𑀓𑀲𑁆𑀲𑁂𑀯 𑀓𑀭𑀡𑀤𑀲𑁆𑀲𑀦𑀢𑁆𑀣𑀁. 𑀳𑀢𑁆𑀣𑀺𑀫𑁆𑀧𑀻𑀢𑀺𑀆𑀤𑀻𑀲𑀼 𑀧𑀦 𑀳𑀢𑁆𑀣𑀺𑀆𑀤𑀻𑀦𑀁 𑀩𑀳𑀽𑀦𑀁 𑀏𑀓𑀚𑁆𑀛𑀁 𑀓𑀸𑀢𑀩𑁆𑀩𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀫𑀼𑀘𑁆𑀘𑀬𑀢𑁆𑀣𑁄 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑁂𑀦 ‘‘𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀻𑀲𑀼 𑀤𑀼𑀢𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀇𑀤𑁆𑀥𑀺𑀫𑀢𑁄 ¶ 𑀅𑀢𑁆𑀢𑀦𑁄 𑀓𑀼𑀫𑀸𑀭𑀓𑀸𑀓𑀸𑀭𑁂𑀦 𑀧𑀭𑁂𑀲𑀁 𑀤𑀲𑁆𑀲𑀦𑀁 𑀓𑀼𑀫𑀸𑀭𑀓𑀯𑀡𑁆𑀡𑀦𑀺𑀫𑁆𑀫𑀸𑀦𑀁, 𑀦 𑀏𑀢𑁆𑀣 𑀓𑀺𑀜𑁆𑀘𑀺 𑀅𑀧𑀼𑀩𑁆𑀩𑀁 𑀧𑀣𑀯𑀻𑀆𑀤𑀺𑀯𑀢𑁆𑀣𑀼 𑀦𑀺𑀧𑁆𑀨𑀸𑀤𑀻𑀬𑀢𑀻𑀢𑀺 𑀓𑀲𑀺𑀡𑀦𑀺𑀬𑀫𑁂𑀦 𑀧𑀬𑁄𑀚𑀦𑀸𑀪𑀸𑀯𑀢𑁄 ‘‘𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀯𑀸 𑀯𑀢𑁆𑀣𑀼𑀦𑀺𑀧𑁆𑀨𑀸𑀤𑀦𑁂 𑀬𑀣𑀸𑀭𑀳𑀁 𑀢𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦𑁂𑀯 𑀇𑀚𑁆𑀛𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀓𑀲𑀺𑀡𑀦𑀺𑀬𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑁂𑀯. 𑀓𑀼𑀫𑀸𑀭𑀓𑀯𑀡𑁆𑀡𑀜𑁆𑀳𑀺 𑀤𑀲𑁆𑀲𑁂𑀦𑁆𑀢𑁂𑀦 𑀦𑀻𑀮𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀩𑁆𑀩𑀁 𑀲𑀺𑀬𑀸, 𑀧𑀻𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀡𑁆𑀡𑀁 𑀯𑀸. 𑀢𑀣𑀸 𑀲𑀢𑀺 𑀦𑀻𑀮𑀸𑀤𑀺𑀓𑀲𑀺𑀡𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀆𑀧𑀦𑁆𑀦𑁄𑀯 𑀓𑀲𑀺𑀡𑀦𑀺𑀬𑀫𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀫𑀥𑀺𑀝𑁆𑀞𑀺𑀢𑁂 𑀬𑀤𑁂𑀓𑁂 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁩𑁮; 𑀫. 𑀦𑀺. 𑁧.𑁧𑁪𑁭; 𑀲𑀁. 𑀦𑀺. 𑁫.𑁮𑁪𑁨; 𑀧𑀝𑀺. 𑀫. 𑁩.𑁧𑁦) 𑀪𑀸𑀯𑁄𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀓𑀲𑀺𑀡𑀦𑀺𑀤𑁆𑀤𑁂𑀲𑁂𑀦 𑀇𑀥 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀦𑀺𑀤𑁆𑀤𑁂𑀲𑁂 ‘‘𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀢𑁄’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀯𑀺𑀭𑁄𑀥𑀁 𑀆𑀲𑀗𑁆𑀓𑀦𑁆𑀢𑀺, 𑀲𑁄 𑀅𑀦𑁄𑀓𑀸𑀲𑁄𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀫𑁆𑀫𑀺𑀦𑀺𑀢𑀩𑁆𑀩𑀪𑀸𑀯𑁂𑀦 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑁄𑀢𑀺 𑀅𑀢𑁆𑀢𑀦𑁄 𑀓𑀼𑀫𑀸𑀭𑀓𑀯𑀡𑁆𑀡𑁄, 𑀦 𑀧𑀦 𑀅𑀢𑁆𑀢𑀦𑁄 𑀤𑀳𑀭𑀓𑀸𑀮𑁂 𑀓𑀼𑀫𑀸𑀭𑀓𑀯𑀡𑁆𑀡𑁄𑀢𑀺. 𑀦𑀸𑀕𑀸𑀤𑀺𑀯𑀡𑁆𑀡𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀩𑁆𑀬𑀸𑀧𑀻 𑀏𑀯𑀸𑀢𑀺 𑀬𑀤𑁂𑀓𑁂 ‘‘𑀦𑀸𑀕𑀸𑀤𑀺𑀦𑀺𑀫𑁆𑀫𑀸𑀦𑁂 𑀦 𑀬𑀼𑀚𑁆𑀚𑀢𑀺 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀧𑁄𑀳𑀢𑀁 𑀤𑀝𑁆𑀞𑀩𑁆𑀩𑀁.

𑀩𑀳𑀺𑀤𑁆𑀥𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺𑀆𑀤𑀺 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸𑀧𑀺 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 ‘‘𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸’’𑀢𑀺𑀆𑀤𑀺 𑀯𑀺𑀬 𑀅𑀚𑁆𑀛𑀢𑁆𑀢𑀫𑁂𑀯 𑀓𑀼𑀫𑀸𑀭𑀓𑀯𑀡𑁆𑀡𑀸𑀤𑀻𑀦𑀁 𑀤𑀲𑁆𑀲𑀦𑀯𑀲𑁂𑀦𑀸𑀢𑀺. 𑀬𑀁 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁩𑁯𑁯. 𑀓𑀸𑀬𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀅𑀬𑀁 𑀓𑀸𑀬𑁄 𑀲𑀼𑀲𑀺𑀭𑁄 𑀳𑁄𑀢𑀽’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 ‘‘𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬𑀸’’𑀢𑀺 𑀇𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑀫𑀸𑀳. 𑀅𑀜𑁆𑀜𑀁 𑀓𑀸𑀬𑀦𑁆𑀢𑀺 𑀬𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀦𑀺𑀫𑁆𑀫𑀺𑀦𑀺𑀢𑀼𑀓𑀸𑀫𑁄, 𑀢𑀁. 𑀫𑀼𑀜𑁆𑀚𑀫𑁆𑀳𑀸𑀢𑀺 𑀫𑀼𑀜𑁆𑀚𑀢𑀺𑀡𑀢𑁄. 𑀈𑀲𑀺𑀓𑀦𑁆𑀢𑀺 𑀢𑀲𑁆𑀲 𑀓𑀡𑁆𑀟𑀁. 𑀓𑁄𑀲𑀺𑀬𑀸𑀢𑀺 𑀅𑀲𑀺𑀓𑁄𑀲𑀢𑁄. 𑀓𑀭𑀡𑁆𑀟𑀸𑀬𑀸𑀢𑀺 𑀧𑁂𑀴𑀸𑀬, 𑀦𑀺𑀫𑁆𑀫𑁄𑀓𑀢𑁄𑀢𑀺 𑀘 𑀯𑀤𑀦𑁆𑀢𑀺. 𑀅𑀩𑁆𑀩𑀸𑀳𑀢𑀻𑀢𑀺 𑀉𑀤𑁆𑀥𑀭𑀢𑀺. 𑀧𑀯𑀸𑀳𑁂𑀬𑁆𑀬𑀸𑀢𑀺 𑀆𑀓𑀟𑁆𑀠𑁂𑀬𑁆𑀬.

𑀇𑀤𑁆𑀥𑀺𑀯𑀺𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀤𑁆𑀯𑀸𑀤𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁩. 𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸

𑁪𑁦𑁦. 𑀢𑀢𑁆𑀣𑀸𑀢𑀺 ¶ ¶ 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀦𑀺𑀤𑁆𑀤𑁂𑀲𑁂. 𑀅𑀪𑀺𑀜𑁆𑀜𑀸𑀧𑀸𑀴𑀺𑀬𑀸 𑀳𑀺 𑀦𑀺𑀤𑁆𑀤𑁂𑀲𑀫𑀼𑀔𑁂𑀦 𑀅𑀪𑀺𑀜𑁆𑀜𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀯𑀺𑀥𑀺 𑀯𑀺𑀥𑀻𑀬𑀢𑀺. 𑀅𑀪𑀺𑀜𑁆𑀜𑀸𑀲𑀻𑀲𑁂𑀦𑁂𑀢𑁆𑀣 𑀅𑀪𑀺𑀜𑁆𑀜𑀸𑀧𑀸𑀴𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀢𑁄 𑀧𑀭𑀸𑀲𑀼 𑀘 𑀢𑀻𑀲𑀼 𑀅𑀪𑀺𑀜𑁆𑀜𑀸𑀲𑀽’’𑀢𑀺. 𑀢𑀢𑁄 𑀧𑀭𑀸𑀲𑀽𑀢𑀺 𑀘 𑀲𑀢𑁆𑀣𑀼𑀦𑁄 𑀤𑁂𑀲𑀦𑀸𑀓𑁆𑀓𑀫𑀁, 𑀅𑀢𑁆𑀢𑀦𑁄 𑀘 𑀉𑀤𑁆𑀤𑁂𑀲𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀁. 𑀦 𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑀸 𑀇𑀫𑀺𑀦𑀸𑀯 𑀓𑀫𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀸𑀴𑀺𑀬𑀁, 𑀲𑁂𑀲𑀸𑀪𑀺𑀜𑁆𑀜𑀸𑀧𑀸𑀴𑀺𑀬𑀜𑁆𑀘𑀸𑀢𑀺 𑀲𑀩𑁆𑀩𑀢𑁆𑀣. 𑀢𑀢𑁆𑀭𑀸𑀢𑀺 𑀯𑀸𑀓𑁆𑀬𑁄𑀧𑀜𑁆𑀜𑀸𑀲𑁂 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀢𑁆𑀭 𑀯𑀸 𑀬𑀣𑀸𑀯𑀼𑀢𑁆𑀢𑀧𑀸𑀞𑁂. 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸𑀢𑀺 𑀤𑀺𑀩𑁆𑀩𑁂 𑀪𑀯𑀸𑀢𑀺 𑀤𑀺𑀩𑁆𑀩𑀸, 𑀤𑁂𑀯𑀸𑀦𑀁 𑀲𑁄𑀢𑀥𑀸𑀢𑀼, 𑀢𑀸𑀬 𑀤𑀺𑀩𑁆𑀩𑀸𑀬 𑀲𑀤𑀺𑀲𑀢𑁆𑀢𑀸. 𑀇𑀤𑀸𑀦𑀺 𑀢𑀁 𑀤𑀺𑀩𑁆𑀩𑀲𑀤𑀺𑀲𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑁂𑀯𑀸𑀦𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀤𑁆𑀥𑀸𑀩𑀳𑀼𑀮𑀢𑀸𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀘𑀭𑀺𑀢𑀢𑁆𑀢𑀸 𑀲𑀼𑀘𑀭𑀺𑀢𑁂𑀦 𑀤𑁂𑀯𑀽𑀧𑀧𑀢𑁆𑀢𑀺𑀚𑀦𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀸𑀢𑀭𑁄𑀕𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀧𑀮𑀺𑀩𑀼𑀤𑁆𑀥𑀸𑀢𑀺 𑀅𑀦𑀼𑀧𑀤𑁆𑀤𑀼𑀢𑀸. 𑀧𑀺𑀢𑁆𑀢𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸, 𑀓𑀫𑁆𑀫𑀲𑁆𑀲 𑀘 𑀉𑀴𑀸𑀭𑀢𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀓𑁆𑀓𑀺𑀮𑁂𑀲𑀤𑁄𑀲𑀭𑀳𑀺𑀢𑀁 𑀳𑀺 𑀓𑀫𑁆𑀫𑀁 𑀢𑀺𑀡𑀸𑀤𑀺𑀤𑁄𑀲𑀭𑀳𑀺𑀢𑀁 𑀯𑀺𑀬 𑀲𑀲𑁆𑀲𑀁 𑀉𑀴𑀸𑀭𑀨𑀮𑀁 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀳𑁄𑀢𑀺. 𑀓𑀸𑀭𑀡𑀽𑀧𑀘𑀸𑀭𑁂𑀦 𑀘𑀲𑁆𑀲 𑀨𑀮𑀁 𑀢𑀣𑀸 𑀯𑁄𑀳𑀭𑀻𑀬𑀢𑀺, 𑀬𑀣𑀸 ‘‘𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁧𑁨; 𑀫. 𑀦𑀺. 𑁨.𑁮𑁧; 𑀅. 𑀦𑀺. 𑁪.𑁨𑁩𑁩). 𑀤𑀽𑀭𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀼𑀔𑀼𑀫𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀲𑀸𑀤𑀲𑁄𑀢𑀥𑀸𑀢𑀽𑀢𑀺 𑀘𑀢𑀼𑀫𑀳𑀸𑀪𑀽𑀢𑀸𑀦𑀁 𑀧𑀲𑀸𑀤𑀮𑀓𑁆𑀔𑀡𑀸 𑀲𑁄𑀢𑀥𑀸𑀢𑀼.

𑀯𑀻𑀭𑀺𑀬𑀸𑀭𑀫𑁆𑀪𑀯𑀲𑁂𑀦𑁂𑀯 𑀇𑀚𑁆𑀛𑀦𑀢𑁄 𑀲𑀩𑁆𑀩𑀸𑀧𑀺 𑀓𑀼𑀲𑀮𑀪𑀸𑀯𑀦𑀸 𑀯𑀻𑀭𑀺𑀬𑀪𑀸𑀯𑀦𑀸, 𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀸 𑀯𑀸 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀧𑀺 𑀯𑀺𑀲𑁂𑀲𑀢𑁄 𑀯𑀻𑀭𑀺𑀬𑀪𑀸𑀯𑀦𑀸, 𑀢𑀲𑁆𑀲𑀸 𑀆𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀸. 𑀜𑀸𑀡𑀫𑀬𑀸 𑀲𑁄𑀢𑀥𑀸𑀢𑀼 𑀜𑀸𑀡𑀲𑁄𑀢𑀥𑀸𑀢𑀼. 𑀢𑀸𑀤𑀺𑀲𑀸𑀬𑁂𑀯𑀸𑀢𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬, 𑀤𑀽𑀭𑁂𑀧𑀺 𑀲𑀼𑀔𑀼𑀫𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀢𑀸𑀬 𑀘 𑀢𑀁𑀲𑀤𑀺𑀲𑀸 𑀏𑀯 ¶ . 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀪𑀽𑀫𑀻𑀦𑀁 𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸, 𑀇𑀫𑀺𑀦𑀸 𑀓𑀸𑀭𑀡𑀯𑀲𑁂𑀦𑀲𑁆𑀲𑀸 𑀤𑀺𑀩𑁆𑀩𑀪𑀸𑀯𑀫𑀸𑀳. 𑀬𑀁 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 ¶ 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀉𑀓𑁆𑀓𑀁𑀲𑀕𑀢𑀁 𑀧𑀸𑀤𑀓𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀤𑀺𑀩𑁆𑀩𑀯𑀺𑀳𑀸𑀭𑀁 𑀲𑀦𑁆𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀤𑀺𑀩𑁆𑀩𑀯𑀺𑀳𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀯𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀁 𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀯𑀦𑀝𑁆𑀞𑁂𑀦𑀸𑀢𑀺 𑀲𑀤𑁆𑀤𑀕𑀳𑀡𑀝𑁆𑀞𑁂𑀦. 𑀬𑀸𑀣𑀸𑀯𑀢𑁄 𑀳𑀺 𑀲𑀤𑁆𑀤𑀽𑀧𑀮𑀤𑁆𑀥𑀺 𑀲𑀤𑁆𑀤𑀲𑀪𑀸𑀯𑀸𑀯𑀩𑁄𑀥𑁄 𑀲𑀯𑀦𑀁. 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀲𑀪𑀸𑀯𑀥𑀸𑀭𑀡𑀸𑀤𑀻𑀲𑀼 𑀥𑀸𑀢𑀼𑀅𑀢𑁆𑀣𑁂𑀲𑀼 𑀅𑀢𑁆𑀢𑀲𑀼𑀜𑁆𑀜𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀸 𑀲𑀢𑁆𑀣𑀼 𑀥𑀸𑀢𑀼𑀤𑁂𑀲𑀦𑀸𑀢𑀺 𑀆𑀳 ‘‘𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀘𑀸’’𑀢𑀺. 𑀲𑁄𑀢𑀥𑀸𑀢𑀼𑀓𑀺𑀘𑁆𑀘𑀁 𑀲𑀤𑁆𑀤𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑀤𑁆𑀤𑀲𑀦𑁆𑀦𑀺𑀝𑁆𑀞𑀸𑀦𑀧𑀘𑁆𑀘𑀬𑀢𑀸 𑀘.

𑀜𑀸𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦𑁂𑀯𑀸𑀢𑀺 𑀆𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸𑀬𑀸’’𑀢𑀺. 𑀫𑀸𑀦𑀼𑀲𑀺𑀓𑀸 𑀫𑀦𑀼𑀲𑁆𑀲 𑀲𑀦𑁆𑀢𑀓𑀸, 𑀫𑀁𑀲𑀲𑁄𑀢𑀥𑀸𑀢𑀼, 𑀤𑀺𑀩𑁆𑀩𑀯𑀺𑀤𑀽𑀭𑀸𑀤𑀺𑀯𑀺𑀲𑀬𑀕𑁆𑀕𑀳𑀡𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀅𑀢𑀺𑀓𑁆𑀓𑀦𑁆𑀢𑀁 𑀫𑀸𑀦𑀼𑀲𑀺𑀓𑀁 𑀏𑀢𑀸𑀬𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸. 𑀢𑁂𑀦𑀸𑀳 ‘‘𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀤𑀲𑀯𑀦𑁂𑀦𑀸’’𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀽𑀧𑀘𑀸𑀭𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀉𑀧𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁, 𑀧𑀓𑀢𑀺𑀬𑀸 𑀲𑁄𑀢𑀤𑁆𑀯𑀸𑀭𑁂𑀦 𑀕𑀳𑁂𑀢𑀩𑁆𑀩𑀁 𑀯𑀺𑀲𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀤𑁆𑀤𑀲𑀯𑀦𑁂𑀦𑀸’’𑀢𑀺. 𑀤𑀺𑀩𑁆𑀩𑁂𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁂. 𑀢𑁂 𑀧𑀦 𑀯𑀺𑀲𑁂𑀲𑀢𑁄 𑀤𑁂𑀯𑀸𑀦𑀁 𑀓𑀣𑀸 𑀲𑀤𑁆𑀤𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑁂𑀯𑀸𑀦𑀁 𑀲𑀤𑁆𑀤𑁂’’𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀏𑀢𑁂𑀢𑀺 𑀫𑀸𑀦𑀼𑀲𑀸, 𑀢𑁂 𑀫𑀸𑀦𑀼𑀲𑁂. 𑀏𑀯𑀁 𑀤𑁂𑀯𑀫𑀦𑀼𑀲𑁆𑀲𑀲𑀤𑁆𑀤𑀸𑀦𑀁𑀬𑁂𑀯 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀤𑁂𑀲𑀧𑀭𑀺𑀬𑀸𑀤𑀸𑀦’’𑀦𑁆𑀢𑀺, 𑀏𑀓𑀤𑁂𑀲𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁂𑀳𑀲𑀦𑁆𑀦𑀺𑀲𑁆𑀲𑀺𑀢𑀸 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀲𑀦𑁆𑀦𑀺𑀲𑁆𑀲𑀺𑀢𑀸. 𑀦𑀺𑀧𑁆𑀧𑀤𑁂𑀲𑀧𑀭𑀺𑀬𑀸𑀤𑀸𑀦𑀁 𑀞𑀸𑀦𑀪𑁂𑀤𑀕𑁆𑀕𑀳𑀡𑀫𑀼𑀔𑁂𑀦 𑀲𑀯𑀺𑀜𑁆𑀜𑀸𑀡𑀓𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀲𑀤𑁆𑀤𑀲𑁆𑀲 𑀅𑀦𑀯𑀲𑁂𑀲𑁂𑀦 𑀲𑀗𑁆𑀕𑀡𑁆𑀳𑀦𑀢𑁄.

𑀅𑀬𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼. 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀘𑀺𑀢𑁆𑀢𑁂𑀦𑀸𑀢𑀺 𑀧𑀭𑀺𑀓𑀫𑁆𑀫𑀪𑀽𑀢𑀸𑀯𑁂𑀡𑀺𑀓𑀲𑀫𑀸𑀥𑀺𑀘𑀺𑀢𑁆𑀢𑁂𑀦, 𑀤𑀺𑀩𑁆𑀩𑀲𑁄𑀢𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀓𑁆𑀔𑀡𑀺𑀓𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀫𑁆𑀫𑀲𑀫𑀸𑀥𑀺 𑀦𑀸𑀫 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀉𑀧𑀘𑀸𑀭𑀸𑀯𑀢𑁆𑀣𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀸 𑀧𑀦 𑀦𑀸𑀦𑀸𑀯𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑁄𑀴𑀸𑀭𑀺𑀓𑀲𑀤𑁆𑀤𑀤𑀲𑁆𑀲𑀦𑀢𑁆𑀣𑀁 𑀲𑀻𑀳𑀸𑀤𑀻𑀦𑀁 𑀲𑀤𑁆𑀤𑁄 𑀧𑀞𑀫𑀁 𑀕𑀳𑀺𑀢𑁄. 𑀢𑀺𑀬𑁄𑀚𑀦𑀫𑀢𑁆𑀣𑀓𑁂𑀧𑀺 𑀓𑀺𑀭 𑀓𑁂𑀲𑀭𑀲𑀻𑀳𑀲𑁆𑀲 𑀲𑀻𑀳𑀦𑀸𑀤𑀲𑀤𑁆𑀤𑁄 𑀲𑀼𑀬𑁆𑀬𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀫𑁂𑀖𑀲𑀤𑁆𑀤𑀩𑁆𑀬𑀕𑁆𑀖𑀲𑀤𑁆𑀤𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀬𑀣𑀸 𑀑𑀴𑀸𑀭𑀺𑀓𑀲𑀤𑁆𑀤𑀸𑀯𑀚𑁆𑀚𑀦𑀁 𑀬𑀸𑀯𑀤𑁂𑀯 𑀲𑀼𑀔𑀼𑀫𑀲𑀤𑁆𑀤𑀸𑀯𑀚𑁆𑀚𑀦𑀽𑀧𑀸𑀬𑀤𑀲𑁆𑀲𑀦𑀢𑁆𑀣𑀁, 𑀢𑀣𑀸 𑀲𑀤𑁆𑀤𑀕𑁆𑀕𑀳𑀡𑀪𑀸𑀯𑀦𑀸𑀩𑀮𑁂𑀦 𑀲𑀼𑀔𑀼𑀫𑀢𑀭𑀲𑀤𑁆𑀤𑀕𑁆𑀕𑀳𑀡𑀲𑀁𑀲𑀺𑀤𑁆𑀥𑀺𑀢𑁄.

𑀏𑀯𑀁 ¶ 𑀆𑀲𑀦𑁆𑀦𑀲𑀤𑁆𑀤𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀤𑀽𑀭𑀤𑀽𑀭𑀢𑀭𑀲𑀤𑁆𑀤𑀕𑁆𑀕𑀳𑀡𑀫𑁆𑀧𑀺 𑀲𑀫𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀢𑁆𑀣𑀺𑀫𑀸𑀬 ¶ 𑀤𑀺𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀤𑀺𑀲𑀸𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀤𑁆𑀤𑀸𑀦𑀁 𑀫𑀦𑀲𑀺𑀓𑀸𑀭𑀯𑀺𑀥𑀺 𑀆𑀭𑀤𑁆𑀥𑁄. 𑀢𑀢𑁆𑀣 𑀲𑀤𑁆𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀲𑀤𑁆𑀤𑁄 𑀏𑀯 𑀲𑀤𑁆𑀤𑀦𑀺𑀫𑀺𑀢𑁆𑀢𑀁, 𑀬𑁄 𑀯𑀸 𑀬𑀣𑀸𑀯𑀼𑀢𑁆𑀢𑁄 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑁄 𑀲𑀤𑁆𑀤𑀸𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀓𑀸𑀭𑁄, 𑀢𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀑𑀴𑀸𑀭𑀺𑀓𑀸𑀦𑀫𑁆𑀧𑀺 𑀲𑀼𑀔𑀼𑀫𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩’’𑀦𑁆𑀢𑀺, 𑀢𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀲𑀫𑁆𑀫𑀢𑁂𑀲𑀼𑀧𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀲𑀩𑁆𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀜𑁆𑀘 𑀲𑀩𑁆𑀩𑀁 𑀲𑀼𑀔𑀼𑀫𑁂 𑀜𑀸𑀡𑀧𑀭𑀺𑀘𑀬𑀤𑀲𑁆𑀲𑀦𑀢𑁆𑀣𑀁 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀤𑀦𑀺𑀫𑀺𑀢𑁆𑀢𑀲𑁆𑀲 𑀅𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀢𑁆𑀢𑀸 ‘‘𑀲𑀤𑁆𑀤𑁄𑀯 𑀲𑀤𑁆𑀤𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀬𑀫𑁂𑀯 𑀧𑀓𑁆𑀔𑁄 𑀜𑀸𑀬𑀸𑀕𑀢𑁄𑀢𑀺 𑀓𑁂𑀘𑀺, 𑀢𑀁 𑀦 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀦𑀁 𑀲𑀤𑁆𑀤𑀸𑀦𑀁 𑀯𑀡𑁆𑀡𑀸𑀭𑀫𑁆𑀫𑀡𑁂𑀦 𑀜𑀸𑀡𑁂𑀦 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀸𑀦𑀁 𑀯𑀺𑀬 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀢𑁄. 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑀸𑀯𑁄 𑀘𑁂𑀢𑁆𑀣 𑀲𑀤𑁆𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀬𑁄𑀕𑀺𑀦𑁄. 𑀢𑁂 𑀲𑀤𑁆𑀤𑀸𑀢𑀺 𑀬𑁂 𑀲𑀩𑁆𑀩𑁄𑀴𑀸𑀭𑀺𑀓𑀢𑁄 𑀧𑀪𑀼𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀼𑀔𑀼𑀫𑀸 𑀲𑀤𑁆𑀤𑀸 𑀆𑀯𑀚𑁆𑀚𑀺𑀢𑀸, 𑀢𑁂. 𑀧𑀸𑀓𑀢𑀺𑀓𑀘𑀺𑀢𑁆𑀢𑀲𑁆𑀲𑀸𑀧𑀻𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀧𑀺. 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀘𑀺𑀢𑁆𑀢𑀲𑁆𑀲𑀸𑀢𑀺 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑀦𑀢𑁆𑀣𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀲𑀤𑁆𑀤𑀁 𑀆𑀭𑀩𑁆𑀪 𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀓𑁆𑀔𑀡𑀺𑀓𑀲𑀫𑀸𑀥𑀺𑀘𑀺𑀢𑁆𑀢𑀲𑁆𑀲. 𑀧𑀼𑀩𑁆𑀩𑁂𑀧𑀺 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀺𑀢𑀢𑁆𑀢𑀸 𑀅𑀢𑀺𑀯𑀺𑀬 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑁂𑀲𑀼 𑀲𑀤𑁆𑀤𑁂𑀲𑀽𑀢𑀺 𑀬𑁂 𑀧𑀭𑀺𑀓𑀫𑁆𑀫𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁 𑀩𑀳𑀽 𑀲𑀤𑁆𑀤𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀲𑀤𑁆𑀤𑁂𑀲𑀼. 𑀅𑀜𑁆𑀜𑀢𑀭𑀦𑁆𑀢𑀺 𑀬𑀢𑁆𑀣𑀲𑁆𑀲 𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀅𑀪𑀺𑀡𑁆𑀳𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁄, 𑀢𑀁 𑀏𑀓𑀁 𑀲𑀤𑁆𑀤𑀁. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀅𑀧𑁆𑀧𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀭𑀁. 𑀢𑀲𑁆𑀫𑀺𑀁 𑀲𑁄𑀢𑁂𑀢𑀺 𑀢𑀲𑁆𑀫𑀺𑀁 𑀜𑀸𑀡𑀲𑁄𑀢𑁂. 𑀧𑀢𑀺𑀢𑁄 𑀳𑁄𑀢𑀻𑀢𑀺 𑀤𑀺𑀩𑁆𑀩𑀲𑁄𑀢𑀥𑀸𑀢𑀼 𑀅𑀦𑁆𑀢𑁄𑀕𑀥𑀸 𑀳𑁄𑀢𑀺 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀮𑀸𑀪𑀻 𑀦𑀸𑀫 𑀳𑁄𑀢𑀺, 𑀦 𑀤𑀸𑀦𑀺𑀲𑁆𑀲 𑀢𑀤𑀢𑁆𑀣𑀁 𑀪𑀸𑀯𑀦𑀸𑀪𑀺𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀁. 𑀣𑀸𑀫𑀚𑀸𑀢𑀦𑁆𑀢𑀺 𑀚𑀸𑀢𑀣𑀸𑀫𑀁 𑀤𑀴𑁆𑀳𑀪𑀸𑀯𑀧𑁆𑀧𑀢𑁆𑀢𑀁. 𑀯𑀟𑁆𑀠𑁂𑀢𑀩𑁆𑀩𑀁 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑀁. 𑀓𑀺𑀦𑁆𑀢𑀺 𑀓𑀺𑀢𑁆𑀢𑀓𑀦𑁆𑀢𑀺 𑀆𑀳 ‘‘𑀏𑀢𑁆𑀣𑀦𑁆𑀢𑀭𑁂 𑀲𑀤𑁆𑀤𑀁 𑀲𑀼𑀡𑀸𑀫𑀻𑀢𑀺 𑀏𑀓𑀗𑁆𑀕𑀼𑀮𑀫𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺. 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀳𑀺 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀢𑀽’’𑀢𑀺 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀢𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 ¶ . 𑀲𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀕𑀢𑁂 𑀲𑀤𑁆𑀤𑁂 𑀆𑀯𑀚𑁆𑀚𑀢𑀺, 𑀲𑀼𑀪𑀸𑀯𑀺𑀢𑀪𑀸𑀯𑀦𑀢𑁆𑀢𑀸 𑀢𑀢𑁆𑀣 𑀅𑀜𑁆𑀜𑀢𑀭𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀼𑀦𑀧𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀫𑁂𑀯. 𑀢𑀢𑁄 𑀏𑀯 𑀳𑀺 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑁂𑀦 𑀨𑀼𑀝𑁆𑀞𑁄𑀓𑀸𑀲𑀩𑁆𑀪𑀦𑁆𑀢𑀭𑀕𑀢𑁂𑀧𑀺 𑀲𑀤𑁆𑀤𑁂 𑀲𑀼𑀡𑀸𑀢𑀺𑀬𑁂𑀯𑀸𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀤𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀼𑀔𑀼𑀫𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀓𑀢𑀁.

𑀏𑀯𑀁 ¶ 𑀲𑀼𑀡𑀦𑁆𑀢𑁄𑀯𑀸𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀯𑀦𑁂𑀦 𑀯𑀲𑀻𑀓𑀢𑀸𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀬𑀣𑀸𑀯𑀚𑁆𑀚𑀺𑀢𑁂 𑀲𑀤𑁆𑀤𑁂 𑀲𑀼𑀡𑀦𑁆𑀢𑁄 𑀏𑀯. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁂𑀧𑀺 𑀢𑁂 𑀲𑀤𑁆𑀤𑁂 𑀧𑀘𑁆𑀘𑁂𑀓𑀁 𑀯𑀢𑁆𑀣𑀼𑀪𑁂𑀤𑁂𑀦 𑀯𑀯𑀢𑁆𑀣𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺.

𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁦𑁧. 𑀧𑀭𑀺𑀬𑀸𑀢𑀻𑀢𑀺 𑀲𑀭𑀸𑀕𑀸𑀤𑀺𑀯𑀺𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺 𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. ‘‘𑀧𑀭𑀲𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀧𑀭-𑀲𑀤𑁆𑀤𑁄 𑀅𑀜𑁆𑀜𑀢𑁆𑀣𑁄𑀢𑀺 𑀆𑀳 ‘‘𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀢𑁆𑀢𑀸𑀦’’𑀦𑁆𑀢𑀺, 𑀬𑀣𑀸 𑀳𑀺 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸. 𑀬𑁄 𑀅𑀢𑁆𑀢𑀸 𑀦 𑀳𑁄𑀢𑀺, 𑀲𑁄 𑀧𑀭𑁄𑀢𑀺. 𑀲𑀢𑁆𑀢𑀸𑀦𑀦𑁆𑀢𑀺 𑀘𑁂𑀢𑁆𑀣 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸𑀢𑀺 𑀲𑀢𑁆𑀢𑀸. 𑀢𑀲𑁆𑀲𑀸 𑀧𑀦 𑀧𑀜𑁆𑀜𑀢𑁆𑀢𑀺𑀬𑀸 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂 𑀦𑀺𑀭𑀼𑀴𑁆𑀳𑀢𑁆𑀢𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑀸𑀧𑀺 𑀲𑀢𑁆𑀢𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀸. ‘‘𑀧𑀼’’𑀦𑁆𑀢𑀺 𑀦𑀭𑀓𑀁, 𑀢𑀢𑁆𑀣 𑀕𑀮𑀦𑁆𑀢𑀺 𑀧𑀧𑀢𑀦𑁆𑀢𑀻𑀢𑀺 𑀧𑀼𑀕𑁆𑀕𑀮𑀸, 𑀧𑀸𑀧𑀓𑀸𑀭𑀺𑀦𑁄. 𑀇𑀢𑀭𑁂𑀧𑀺 𑀲𑀁𑀲𑀸𑀭𑁂 𑀲𑀁𑀲𑀸𑀭𑀺𑀦𑁄 𑀢𑀁𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀧𑀼𑀕𑁆𑀕𑀮𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀯𑀸 𑀢𑀢𑁆𑀣 𑀢𑀢𑁆𑀣 𑀉𑀧𑀧𑀢𑁆𑀢𑀺𑀬𑀸 𑀧𑀽𑀭𑀡𑀢𑁄, 𑀅𑀦𑀺𑀘𑁆𑀘𑀢𑀸𑀯𑀲𑁂𑀦 𑀕𑀮𑀦𑀢𑁄 𑀘 𑀧𑀼𑀕𑁆𑀕𑀮𑀸𑀢𑀺 𑀦𑁂𑀭𑀼𑀢𑁆𑀢𑀸.

𑀏𑀢𑀜𑁆𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 ‘‘𑀏𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀲𑁂𑀦 𑀇𑀚𑁆𑀛𑀢𑀻’’𑀢𑀺 𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀏𑀢𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀦𑁂 𑀧𑀭𑀺𑀓𑀫𑁆𑀫𑀁, 𑀢𑀲𑁆𑀫𑀸 𑀢𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀅𑀥𑀺𑀕𑀢𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 ¶ . 𑀳𑀤𑀬𑀭𑀽𑀧𑀦𑁆𑀢𑀺 𑀦 𑀳𑀤𑀬𑀯𑀢𑁆𑀣𑀼, 𑀅𑀣 𑀔𑁄 𑀳𑀤𑀬𑀫𑀁𑀲𑀧𑁂𑀲𑀺. 𑀬𑀁 𑀩𑀳𑀺 𑀓𑀫𑀮𑀫𑀓𑀼𑀴𑀲𑀡𑁆𑀞𑀸𑀦𑀁, 𑀅𑀦𑁆𑀢𑁄 𑀓𑁄𑀲𑀸𑀢𑀓𑀻𑀨𑀮𑀲𑀤𑀺𑀲𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀮𑁄𑀳𑀺𑀢𑀁 𑀢𑀺𑀝𑁆𑀞𑀢𑀺. 𑀳𑀤𑀬𑀯𑀢𑁆𑀣𑀼 𑀧𑀦 𑀇𑀫𑀁 𑀮𑁄𑀳𑀺𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺. 𑀓𑀣𑀁 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀤𑀲𑁆𑀲𑀦𑁂𑀦 𑀅𑀭𑀽𑀧𑀁 𑀘𑀺𑀢𑁆𑀢𑀁 𑀧𑀭𑀺𑀬𑁂𑀲𑀢𑀻𑀢𑀺 𑀆𑀳 ‘‘𑀬𑀤𑀸 𑀳𑀻’’𑀢𑀺𑀆𑀤𑀺. 𑀓𑀣𑀁 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀘𑀺𑀢𑁆𑀢𑀯𑀼𑀢𑁆𑀢𑀺𑀬𑀸 𑀓𑀫𑁆𑀫𑀚𑀲𑁆𑀲 𑀮𑁄𑀳𑀺𑀢𑀲𑁆𑀲 𑀯𑀺𑀯𑀺𑀥𑀯𑀡𑁆𑀡𑀪𑀸𑀯𑀸𑀧𑀢𑁆𑀢𑀻𑀢𑀺? 𑀓𑁄 𑀯𑀸 𑀏𑀯𑀫𑀸𑀳 ‘‘𑀓𑀫𑁆𑀫𑀚𑀫𑁂𑀯 𑀢𑀁 𑀮𑁄𑀳𑀺𑀢’’𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑁆𑀲𑀸𑀧𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀭𑀽𑀧𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀏𑀯𑀫𑁆𑀧𑀺 𑀬𑀁 𑀢𑀢𑁆𑀣 𑀅𑀘𑀺𑀢𑁆𑀢𑀚𑀁, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀡𑁆𑀡𑀪𑁂𑀤𑁂𑀦 ¶ 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀪𑀯𑀺𑀢𑀩𑁆𑀩𑀁, 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀁 𑀢𑀤𑀦𑀼𑀯𑀢𑁆𑀢𑀦𑀢𑁄. 𑀬𑀣𑀸 𑀳𑀺 𑀕𑀫𑀦𑀸𑀤𑀻𑀲𑀼 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀉𑀢𑀼𑀓𑀫𑁆𑀫𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀳𑀺 𑀅𑀦𑀼𑀯𑀢𑁆𑀢𑀻𑀬𑀦𑁆𑀢𑀺, 𑀅𑀜𑁆𑀜𑀣𑀸 𑀓𑀸𑀬𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀚𑀭𑀽𑀧𑀁 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀺 𑀅𑀦𑀼𑀯𑀢𑁆𑀢𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀧𑀲𑀸𑀤𑀓𑁄𑀥𑀯𑁂𑀮𑀸𑀲𑀼 𑀘𑀓𑁆𑀔𑀼𑀲𑁆𑀲 𑀯𑀡𑁆𑀡𑀪𑁂𑀤𑀸𑀧𑀢𑁆𑀢𑀺𑀬𑁂𑀯 𑀘 𑀢𑀤𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀬𑁂𑀲𑀦𑁆𑀢𑁂𑀦𑀸𑀢𑀺 𑀧𑀞𑀫𑀁 𑀢𑀸𑀯 𑀅𑀦𑀼𑀫𑀸𑀦𑀢𑁄 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀕𑀯𑁂𑀲𑀦𑁆𑀢𑁂𑀦. 𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀳𑀺 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀬𑁄𑀕𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀭𑀲𑁆𑀲 𑀳𑀤𑀬𑀫𑀁𑀲𑀧𑁂𑀲𑀺𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀤𑀲𑁆𑀲𑀦𑁂𑀦 ‘‘𑀇𑀤𑀸𑀦𑀺 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀯𑀸 ‘‘𑀤𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀯𑀸 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺 𑀯𑀸 𑀦𑀬𑀕𑁆𑀕𑀸𑀳𑀯𑀲𑁂𑀦𑀧𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀓𑀸𑀮𑀲𑀢𑀫𑁆𑀧𑀺 𑀓𑀸𑀮𑀲𑀳𑀲𑁆𑀲𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀳𑀤𑀬𑀮𑁄𑀳𑀺𑀢𑀯𑀡𑁆𑀡𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀇𑀤𑀸𑀦𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀬𑀁 𑀢𑀤𑀸 𑀧𑀯𑀢𑁆𑀢𑀢𑀻𑀢𑀺 𑀯𑀯𑀢𑁆𑀣𑀸𑀧𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀢𑁂𑀲𑀁 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺, 𑀘𑀢𑁆𑀢𑀸𑀭𑀺 𑀯𑀸 𑀧𑀭𑀺𑀓𑀫𑁆𑀫𑀸𑀤𑀺𑀲𑀫𑀜𑁆𑀜𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁. 𑀢𑀢𑁆𑀣 𑀬𑀁 𑀅𑀦𑁆𑀢𑁂𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀇𑀤𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁. 𑀢𑀜𑁆𑀳𑀺 𑀬𑀢𑁆𑀣𑀸𑀦𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑀁, 𑀢𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 ¶ 𑀧𑀯𑀢𑁆𑀢𑀢𑀺 𑀭𑀽𑀧𑀁 𑀯𑀺𑀬 𑀘 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀲𑀤𑁆𑀤𑀁 𑀯𑀺𑀬 𑀘 𑀤𑀺𑀩𑁆𑀩𑀲𑁄𑀢𑀜𑀸𑀡𑀁. 𑀢𑀢𑁄 𑀧𑀭𑀁 𑀧𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀭𑀸𑀕𑀸𑀤𑀺𑀯𑀯𑀢𑁆𑀣𑀸𑀧𑀦𑀁 𑀳𑁄𑀢𑀺 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀧𑀦𑀁 𑀯𑀺𑀬. 𑀏𑀯𑀫𑀥𑀺𑀕𑀢𑀲𑁆𑀲 𑀧𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀣𑀸𑀫𑀕𑀫𑀦𑀯𑀺𑀥𑀸𑀦𑀫𑁆𑀧𑀺 𑀅𑀥𑀺𑀕𑀫𑀦𑀯𑀺𑀥𑀸𑀦𑀲𑀤𑀺𑀲𑀫𑁂𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸 𑀢𑁂𑀦…𑀧𑁂… 𑀣𑀸𑀫𑀕𑀢𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀣𑀸𑀫𑀕𑀢𑁂 𑀳𑀻𑀢𑀺𑀆𑀤𑀺 𑀣𑀸𑀫𑀕𑀢𑀸𑀦𑀺𑀲𑀁𑀲𑀤𑀲𑁆𑀲𑀦𑀁. 𑀲𑀩𑁆𑀩𑀫𑁆𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀦𑁆𑀢𑀺 𑀘𑀢𑀼𑀧𑀡𑁆𑀡𑀸𑀲𑀯𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁. ‘‘𑀲𑀩𑁆𑀩𑀫𑁆𑀧𑀻’’𑀢𑀺 𑀧𑀤𑀁 ‘‘𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀦 𑀧𑀜𑁆𑀘𑀤𑀲𑀯𑀺𑀥𑀫𑁆𑀧𑀺 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁, 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀚𑀸𑀦𑀸𑀢𑀻𑀢𑀺 𑀲𑀭𑀸𑀕𑀸𑀤𑀺𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀣𑀼𑀚𑁆𑀚𑀦𑀯𑀲𑁂𑀦𑀸𑀬𑀁 𑀅𑀪𑀺𑀜𑁆𑀜𑀸𑀓𑀣𑀸𑀢𑀺 𑀮𑁄𑀓𑀼𑀢𑁆𑀢𑀭𑀁 𑀘𑀺𑀢𑁆𑀢𑀁 𑀇𑀥 𑀅𑀦𑀼𑀤𑁆𑀥𑀝𑀁. 𑀢𑀫𑁆𑀧𑀺 ¶ 𑀳𑀺 𑀉𑀧𑀭𑀺𑀫𑁄, 𑀲𑀤𑀺𑀲𑁄 𑀯𑀸 𑀅𑀭𑀺𑀬𑁄 𑀳𑁂𑀝𑁆𑀞𑀺𑀫𑀲𑁆𑀲, 𑀲𑀤𑀺𑀲𑀲𑁆𑀲 𑀘 𑀘𑀺𑀢𑁆𑀢𑀫𑁆𑀧𑀺 𑀧𑀚𑀸𑀦𑀸𑀢𑀺 𑀏𑀯. 𑀢𑁂𑀦𑀸𑀳 ‘‘𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀲𑀗𑁆𑀓𑀫𑀦𑁆𑀢𑁄𑀢𑀺 𑀜𑀸𑀡𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀏𑀓𑀘𑁆𑀘𑀜𑁆𑀳𑀺 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀧𑀭𑀺𑀓𑀫𑁆𑀫𑁂𑀦 𑀯𑀺𑀦𑀸 𑀢𑀤𑀜𑁆𑀜𑀁 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑁄 ‘‘𑀘𑀺𑀢𑁆𑀢𑀸 𑀘𑀺𑀢𑁆𑀢𑀁 𑀲𑀗𑁆𑀓𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀯𑀺𑀦𑀸𑀧𑀺 𑀳𑀤𑀬𑀭𑀽𑀧𑀤𑀲𑁆𑀲𑀦𑁂𑀦𑀸’’𑀢𑀺. 𑀳𑀤𑀬𑀭𑀽𑀧𑀤𑀲𑁆𑀲𑀦𑀸𑀤𑀺𑀯𑀺𑀥𑀸𑀦𑀁 𑀳𑀺 𑀆𑀤𑀺𑀓𑀫𑁆𑀫𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂, 𑀘𑀢𑀼𑀯𑁄𑀓𑀸𑀭𑀪𑀯𑁂𑀧𑀺 𑀯𑀸. 𑀦 𑀓𑀢𑁄 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑁄 𑀅𑀪𑀺𑀦𑀺𑀯𑁂𑀲𑁄 𑀏𑀢𑁂𑀦𑀸𑀢𑀺 𑀅𑀓𑀢𑀸𑀪𑀺𑀦𑀺𑀯𑁂𑀲𑁄, 𑀢𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀓𑀣𑀸𑀢𑀺 ‘‘𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀭𑀺𑀓𑀫𑁆𑀫𑀓𑀣𑀸.

𑀅𑀯𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁. 𑀏𑀯𑀁 𑀅𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕’’𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑁆𑀧𑀘𑁆𑀘𑀬𑀢𑀁𑀳𑁂𑀢𑀼𑀓𑀢𑀸𑀳𑀺 𑀭𑀸𑀕𑁂𑀦 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀪𑀸𑀯𑀢𑁄 ‘‘𑀯𑀻𑀢𑀭𑀸𑀕’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀲𑁂𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀭𑀸𑀕𑁂𑀦 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀦𑀢𑁆𑀣𑁂𑀯 𑀲𑀭𑀸𑀕𑀢𑀸, 𑀢𑀁𑀦𑀺𑀫𑀺𑀢𑁆𑀢𑀓𑀢𑀸𑀬 𑀧𑀦 𑀲𑀺𑀬𑀸 𑀢𑀁𑀲𑀳𑀺𑀢𑀢𑀸𑀮𑁂𑀲𑁄𑀢𑀺 𑀦𑀢𑁆𑀣𑁂𑀯 𑀯𑀻𑀢𑀭𑀸𑀕𑀢𑀸𑀧𑀻𑀢𑀺 𑀤𑀼𑀓𑀯𑀺𑀦𑀺𑀫𑀼𑀢𑁆𑀢𑀢𑀸𑀯 𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀻’’𑀢𑀺. 𑀬𑀤𑀺 𑀏𑀯𑀁 𑀧𑀤𑁂𑀲𑀺𑀓𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀤𑀼𑀓𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑁂𑀲𑀁. 𑀬𑁂 𑀧𑀦 ‘‘𑀧𑀝𑀺𑀧𑀓𑁆𑀔𑀪𑀸𑀯𑁂 𑀅𑀲𑀢𑀺𑀧𑀺 𑀲𑀫𑁆𑀧𑀬𑁄𑀕𑀸𑀪𑀸𑀯𑁄 𑀏𑀯𑁂𑀢𑁆𑀣 𑀧𑀫𑀸𑀡𑀁 𑀏𑀓𑀘𑁆𑀘𑀅𑀩𑁆𑀬𑀸𑀓𑀢𑀸𑀦𑀁 𑀯𑀺𑀬𑀸’’𑀢𑀺 𑀲𑁂𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀫𑁆𑀧𑀺 𑀯𑀻𑀢𑀭𑀸𑀕𑀢𑀁 𑀧𑀝𑀺𑀚𑀸𑀦𑀦𑁆𑀢𑀺 ¶ , 𑀢𑁂 𑀲𑀦𑁆𑀥𑀸𑀬𑀸𑀳 ‘‘𑀓𑁂𑀘𑀺 𑀧𑀦 𑀣𑁂𑀭𑀸 𑀢𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀻’’𑀢𑀺. 𑀲𑀤𑁄𑀲𑀤𑀼𑀓𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀦𑀬𑁂𑀦𑀸𑀢𑀺 𑀆𑀯𑁂𑀡𑀺𑀓𑀦𑀬𑁂𑀦, 𑀢𑀤𑀜𑁆𑀜𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀯𑀺𑀬 𑀮𑁄𑀪𑀤𑁄𑀲𑁂𑀳𑀺 𑀅𑀫𑀺𑀲𑁆𑀲𑀺𑀢𑀲𑁆𑀲 𑀫𑁄𑀳𑀲𑁆𑀲𑁂𑀯 𑀲𑀩𑁆𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑁂𑀲𑀼 𑀲𑀳 𑀫𑁄𑀳𑁂𑀦𑁂𑀯𑀸𑀢𑀺 𑀲𑀫𑁄𑀳𑀁 𑀧𑀞𑀫𑀦𑀬𑁂, 𑀤𑀼𑀢𑀺𑀬𑀦𑀬𑁂 𑀧𑀦 𑀲𑀳𑁂𑀯 𑀫𑁄𑀳𑁂𑀦𑀸𑀢𑀺 𑀲𑀫𑁄𑀳𑀦𑁆𑀢𑀺 𑀏𑀯𑀁 𑀉𑀢𑁆𑀢𑀭𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀢𑁄 𑀤𑁆𑀯𑀻𑀲𑀼 𑀦𑀬𑁂𑀲𑀼 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀕𑀢𑀁 𑀧𑀯𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀸𑀦𑀼𑀕𑀢𑀁 𑀧𑀜𑁆𑀘𑀯𑀺𑀥𑀁 𑀲𑀲𑀗𑁆𑀔𑀸𑀭𑀺𑀓𑀸𑀓𑀼𑀲𑀮𑀘𑀺𑀢𑁆𑀢𑀁 𑀲𑀁𑀔𑀺𑀢𑁆𑀢𑀁, 𑀆𑀭𑀫𑁆𑀫𑀡𑁂 𑀲𑀗𑁆𑀓𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀦𑀬𑁂𑀦 𑀉𑀤𑁆𑀥𑀘𑁆𑀘𑀸𑀦𑀼𑀕𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀧𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀘𑀺𑀢𑁆𑀢𑀁, 𑀬𑀢𑁆𑀣 𑀯𑀸 𑀉𑀤𑁆𑀥𑀘𑁆𑀘𑀁 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀣𑀸𑀫𑀚𑀸𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬, 𑀯𑀺𑀧𑀼𑀮𑀨𑀮𑀢𑀸𑀬, 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀘 𑀫𑀳𑀦𑁆𑀢𑀪𑀸𑀯𑀁 𑀕𑀢𑀁, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀧𑀜𑁆𑀜𑁂𑀳𑀺 𑀕𑀢𑀁 𑀧𑀝𑀺𑀧𑀦𑁆𑀦𑀦𑁆𑀢𑀺 𑀫𑀳𑀕𑁆𑀕𑀢𑀁. 𑀅𑀯𑀲𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀁. 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑁂𑀳𑀺 𑀲𑀳 𑀉𑀢𑁆𑀢𑀭𑁂𑀳𑀻𑀢𑀺 𑀲𑀉𑀢𑁆𑀢𑀭𑀁. 𑀉𑀢𑁆𑀢𑀺𑀡𑁆𑀡𑀦𑁆𑀢𑀺 𑀉𑀢𑁆𑀢𑀭𑀁, 𑀮𑁄𑀓𑁂 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑀢𑁄 𑀉𑀢𑁆𑀢𑀭𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀢𑀢𑁄 𑀏𑀯 𑀦𑀢𑁆𑀣𑀺 ¶ 𑀏𑀢𑀲𑁆𑀲 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁. 𑀉𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀧𑁆𑀧𑀢𑁆𑀢𑁂𑀦 𑀲𑀫𑀸𑀥𑀺𑀦𑀸 𑀲𑀫𑁆𑀫𑀤𑁂𑀯 𑀆𑀳𑀺𑀢𑀦𑁆𑀢𑀺 𑀲𑀫𑀸𑀳𑀺𑀢𑀁. 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁. 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀁 𑀫𑀳𑀕𑁆𑀕𑀢𑀘𑀺𑀢𑁆𑀢𑀁. 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀘𑀺𑀢𑁆𑀢𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀁 𑀨𑀮𑀘𑀺𑀢𑁆𑀢𑀁. 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀫𑁆𑀧𑀺 𑀢𑀤𑀼𑀪𑀬𑀫𑁂𑀯. 𑀓𑀸𑀫𑀁 𑀓𑀸𑀦𑀺𑀘𑀺 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀤𑀻𑀦𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀧𑁆𑀧𑀢𑁆𑀢𑀸𑀦𑀺 𑀧𑀦 𑀦 𑀳𑁄𑀦𑁆𑀢𑀺 𑀢𑀸𑀤𑀺𑀲𑀓𑀺𑀘𑁆𑀘𑀸𑀬𑁄𑀕𑀢𑁄. 𑀧𑀸𑀴𑀺𑀬𑀁 𑀆𑀕𑀢𑀲𑀭𑀸𑀕𑀸𑀤𑀺𑀪𑁂𑀤𑀯𑀲𑁂𑀦 𑀘𑁂𑀯 𑀢𑁂𑀲𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀘 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺.

𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀲𑁆𑀲 𑀯𑀸 𑀅𑀦𑀼𑀲𑁆𑀲𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀢𑀁 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀢𑁄 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀺 𑀬𑀁 𑀜𑀸𑀡𑀁, 𑀢𑀤𑀢𑁆𑀣𑀸𑀬𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀢𑀸𑀯 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀲𑀢𑀺𑀜𑀸𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀼𑀩𑁆𑀩𑁂’’𑀢𑀺 𑀇𑀤𑀁 𑀧𑀤𑀁 ‘‘𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀅𑀢𑀻𑀢𑀪𑀯𑀯𑀺𑀲𑀬𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀢𑀻𑀢𑀚𑀸𑀢𑀻𑀲𑀽’’𑀢𑀺 𑀦𑀺𑀯𑀸𑀲-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄, 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀘 𑀦𑀺𑀯𑀲𑀺𑀢𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸’’𑀢𑀺. 𑀦𑀺𑀯𑀼𑀢𑁆𑀣𑀢𑀸 𑀘𑁂𑀢𑁆𑀣 𑀲𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑀸, 𑀢𑀣𑀸𑀪𑀽𑀢𑀸 𑀘 𑀢𑁂 𑀅𑀦𑀼 𑀅𑀦𑀼 𑀪𑀽𑀢𑀸 𑀚𑀸𑀢𑀸 𑀧𑀯𑀢𑁆𑀢𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀯𑀼𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸’’𑀢𑀺. 𑀏𑀯𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀯𑀲𑁂𑀦 𑀦𑀺𑀯𑀸𑀲-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀲𑁂𑀲𑁂𑀦 𑀯𑀢𑁆𑀢𑀼𑀁 ‘‘𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀦𑀺𑀯𑀼𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀕𑁄𑀘𑀭𑀦𑀺𑀯𑀸𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁄𑀘𑀭𑀪𑀽𑀢𑀸𑀧𑀺 𑀳𑀺 𑀕𑁄𑀘𑀭𑀸𑀲𑁂𑀯𑀦𑀸𑀬 𑀆𑀲𑁂𑀯𑀺𑀢𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀦𑀼𑀪𑀽𑀢𑀸 𑀦𑀺𑀯𑀼𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀢𑁂 𑀧𑀦 𑀤𑀼𑀯𑀺𑀥𑀸 𑀲𑀧𑀭𑀯𑀺𑀜𑁆𑀜𑀸𑀡𑀕𑁄𑀘𑀭𑀢𑀸𑀬𑀸𑀢𑀺 𑀉𑀪𑀬𑁂𑀧𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 ‘‘𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸’’𑀢𑀺 𑀯𑀢𑁆𑀯𑀸 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺 𑀯𑀘𑀦𑀁 𑀬𑁂 𑀢𑁂 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀢𑁆𑀣𑀥𑀫𑁆𑀫𑀸, 𑀢𑁂 𑀦 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀡𑀫𑀢𑁆𑀢𑀸, 𑀅𑀣 𑀔𑁄 𑀬𑀣𑀸 𑀧𑀼𑀩𑁆𑀩𑁂 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀯𑀡𑁆𑀡𑀮𑀺𑀗𑁆𑀕𑀸𑀳𑀸𑀭𑀸𑀤𑀺𑀯𑀺𑀲𑁂𑀲𑁂𑀳𑀺 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀸, 𑀢𑀣𑁂𑀯𑁂𑀢𑀁 ¶ 𑀜𑀸𑀡𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀡𑁆𑀳𑀸𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀦𑀺𑀯𑀼𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄𑀯 𑀯𑀺𑀜𑁆𑀜𑀸𑀡𑁂𑀦, 𑀅𑀣 𑀔𑁄 𑀧𑀭𑁂𑀲𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸𑀧𑀺 𑀯𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀧𑀭𑁂𑀲𑀫𑁆𑀧𑀺 𑀯𑀸 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺. 𑀢𑀲𑁆𑀲 𑀘 𑀕𑀳𑀡𑁂 𑀧𑀬𑁄𑀚𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀩𑁆𑀩𑀁. 𑀢𑁂 𑀘 𑀔𑁄 𑀬𑀲𑁆𑀫𑀸 𑀅𑀪𑀻𑀢𑀸𑀲𑀼 𑀏𑀯 𑀚𑀸𑀢𑀻𑀲𑀼 𑀅𑀜𑁆𑀜𑁂𑀳𑀺 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀢𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑀸𑀧𑀺 𑀳𑁄𑀦𑁆𑀢𑀺. 𑀬𑁂 𑀳𑀺 𑀢𑁂 𑀯𑀺𑀜𑁆𑀜𑀸𑀢𑀸, 𑀢𑁂𑀲𑀁 𑀢𑀤𑀸 𑀯𑀢𑁆𑀢𑀫𑀸𑀦𑀲𑀦𑁆𑀢𑀸𑀦𑀸𑀦𑀼𑀲𑀸𑀭𑁂𑀦 𑀢𑁂𑀲𑀫𑁆𑀧𑀺 𑀅𑀢𑀻𑀢𑁂 𑀧𑀯𑀢𑁆𑀢𑀺 𑀜𑀸𑀬𑀢𑀻𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀽’’𑀢𑀺 𑀯𑀼𑀢𑁆𑀢𑀁. 𑀙𑀺𑀦𑁆𑀦𑀯𑀝𑀼𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀼𑀲𑁆𑀲𑀭𑀡𑀸𑀦𑀺 𑀕𑀬𑁆𑀳𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀙𑀺𑀦𑁆𑀦𑀯𑀝𑀼𑀫𑀓𑀸 𑀧𑀦 𑀲𑀩𑁆𑀩𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 ¶ 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀁 𑀦𑀸𑀫 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀲𑁆𑀲𑀭𑀡𑀁, 𑀲𑀸 𑀧𑀦 𑀧𑀝𑀺𑀧𑀢𑁆𑀢𑀺 𑀲𑀗𑁆𑀔𑁂𑀧𑀢𑁄 𑀙𑀴𑀸𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀸𑀢𑀺 𑀢𑀸𑀦𑀺 𑀇𑀥 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀦𑀺, 𑀢𑁂 𑀧𑀦𑁂𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑀸, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀆𑀳 ‘‘𑀢𑁂 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀦𑁆𑀢𑀻’’𑀢𑀺. 𑀦 𑀳𑀺 𑀅𑀢𑀻𑀢𑁂 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀏𑀯𑀁 𑀯𑀺𑀧𑀲𑁆𑀲𑀺𑀁𑀲𑀼, 𑀏𑀯𑀁 𑀫𑀕𑁆𑀕𑀁 𑀪𑀸𑀯𑁂𑀲𑀼𑀁, 𑀏𑀯𑀁 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀸𑀓𑀁𑀲𑀼, 𑀏𑀯𑀁 𑀯𑁂𑀦𑁂𑀬𑁆𑀬𑁂 𑀯𑀺𑀦𑁂𑀲𑀼𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀤𑀸 𑀅𑀜𑁆𑀜𑁂𑀲𑀁 𑀜𑀸𑀡𑀲𑁆𑀲 𑀕𑀢𑀺 𑀅𑀢𑁆𑀣𑀻𑀢𑀺. 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀅𑀦𑁂𑀓𑀯𑀺𑀥𑀦𑁆𑀢𑀺 𑀦𑀸𑀦𑀸𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀁. 𑀧𑀓𑀸𑀭𑁂𑀳𑀻𑀢𑀺 𑀦𑀸𑀫𑀕𑁄𑀢𑁆𑀢𑀸𑀤𑀺𑀆𑀓𑀸𑀭𑁂𑀳𑀺 𑀲𑀤𑁆𑀥𑀺𑀁, 𑀲𑀳𑀬𑁄𑀕𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀧𑀯𑀢𑁆𑀢𑀺𑀢𑀁 𑀤𑁂𑀲𑀦𑀸𑀯𑀲𑁂𑀦. 𑀢𑁂𑀦𑀸𑀳 ‘‘𑀲𑀁𑀯𑀡𑁆𑀡𑀺𑀢’’𑀦𑁆𑀢𑀺, 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀦𑀺𑀯𑀸𑀲’’𑀦𑁆𑀢𑀺 𑀅𑀦𑁆𑀢𑁄𑀕𑀥𑀪𑁂𑀤𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀦𑁆𑀢𑀺 𑀢𑁂 𑀪𑁂𑀤𑁂 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦’’𑀦𑁆𑀢𑀺 𑀆𑀳. 𑀲𑀸𑀯𑀓𑀲𑁆𑀲𑁂𑀯𑁂𑀢𑀁 𑀅𑀦𑀼𑀲𑁆𑀲𑀭𑀡𑀁, 𑀦 𑀲𑀢𑁆𑀣𑀼𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀔𑀦𑁆𑀥𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸’’𑀢𑀺. 𑀔𑀦𑁆𑀥𑀧𑀝𑀺𑀧𑀸𑀝𑀺 𑀔𑀦𑁆𑀥𑀸𑀦𑀁 𑀅𑀦𑀼𑀓𑁆𑀓𑀫𑁄. 𑀲𑀸 𑀘 𑀔𑁄 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀝𑀺𑀧𑀸𑀝𑀺𑀯𑀲𑁂𑀦. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀇𑀭𑀺𑀬𑀸𑀧𑀣𑀧𑀝𑀺𑀧𑀸𑀝𑀺 𑀔𑀦𑁆𑀥𑀧𑀝𑀺𑀧𑀸𑀝𑀻’’𑀢𑀺 𑀯𑀤𑀦𑁆𑀢𑀺. 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀜𑀸𑀡𑀕𑀢𑀺𑀬𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸. 𑀢𑀺𑀢𑁆𑀣𑀺𑀬𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀢𑁂 𑀧𑀦 𑀓𑀫𑁆𑀫𑀯𑀸𑀤𑀺𑀦𑁄 𑀓𑀺𑀭𑀺𑀬𑀯𑀸𑀤𑀺𑀦𑁄 𑀢𑀸𑀧𑀲𑀸𑀤𑀬𑁄. 𑀞𑀧𑁂𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂 𑀇𑀢𑀭𑁂 𑀲𑀢𑁆𑀣𑀼 𑀲𑀸𑀯𑀓𑀸 𑀧𑀓𑀢𑀺𑀲𑀸𑀯𑀓𑀸.

𑀬𑀲𑁆𑀫𑀸 𑀢𑀺𑀢𑁆𑀣𑀺𑀬𑀸𑀦𑀁 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀏𑀯 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀆𑀕𑀢𑀁, 𑀢𑀲𑁆𑀫𑀸 ¶ ‘‘𑀦 𑀢𑀢𑁄 𑀧𑀭’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀬𑁄𑀕𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀩𑀮𑀯𑀧𑀜𑁆𑀜𑀢𑁆𑀢𑀸𑀢𑀺 𑀏𑀢𑁆𑀣 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀺𑀬𑁂𑀯 𑀧𑀜𑁆𑀜𑀸𑀬 𑀩𑀮𑀯𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀜𑁆𑀳𑁂𑀢𑁆𑀣 𑀦𑁂𑀲𑀁 𑀲𑀸𑀥𑀸𑀭𑀡𑀓𑀸𑀭𑀡𑀁. 𑀏𑀢𑁆𑀢𑀓𑁄𑀢𑀺 𑀓𑀧𑁆𑀧𑀸𑀦𑀁 𑀮𑀓𑁆𑀔𑀁, 𑀢𑀤𑀥𑀺𑀓𑀁 𑀏𑀓𑀁, 𑀤𑁆𑀯𑁂 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀓𑀸𑀮𑀯𑀲𑁂𑀦 𑀏𑀯𑀁𑀧𑀭𑀺𑀫𑀸𑀡𑁄 𑀬𑀣𑀸𑀓𑁆𑀓𑀫𑀁 𑀢𑁂𑀲𑀁 𑀫𑀳𑀸𑀲𑀸𑀯𑀓𑀅𑀕𑁆𑀕𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀼𑀜𑁆𑀜𑀜𑀸𑀡𑀸𑀪𑀺𑀦𑀻𑀳𑀸𑀭𑁄 𑀲𑀸𑀯𑀓𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀺𑀢𑀸 𑀲𑀫𑀺𑀢𑀸. 𑀬𑀤𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀓𑀸𑀮𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑁂𑀲𑀁 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀯𑀺𑀪𑀸𑀕𑁄, 𑀏𑀯𑀁 𑀲𑀦𑁆𑀢𑁂 ¶ 𑀩𑀼𑀤𑁆𑀥𑀸𑀦𑀫𑁆𑀧𑀺 𑀯𑀺𑀲𑀬𑀧𑀭𑀺𑀘𑁆𑀙𑁂𑀤𑀢𑀸 𑀆𑀧𑀦𑁆𑀦𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀩𑀼𑀤𑁆𑀥𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀫𑁆𑀧𑀺 𑀯𑀺𑀲𑀬𑁂 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀬𑀁 𑀬𑀁 𑀜𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀚𑀸𑀦𑀦𑁆𑀢𑀺 𑀏𑀯. 𑀅𑀣 𑀯𑀸 𑀲𑀢𑀺𑀧𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀓𑀸𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀸𑀤𑀺𑀦𑀸 𑀲𑀸𑀢𑀺𑀲𑀬𑀢𑁆𑀢𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀅𑀢𑀻𑀢𑁂 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀏𑀯𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀅𑀦𑀸𑀕𑀢𑁂 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀯𑀺𑀬.

𑀏𑀯𑀁 𑀙𑀦𑁆𑀦𑀁 𑀚𑀦𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀓𑀸𑀮𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀢𑁄 𑀆𑀦𑀼𑀪𑀸𑀯𑀯𑀺𑀲𑁂𑀲𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀢𑁆𑀣𑀺𑀬𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺 𑀅𑀦𑀸𑀫𑀲𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀏𑀯 𑀕𑀳𑀡𑀯𑀲𑁂𑀦. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄, 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀓𑀢𑀺𑀲𑀸𑀯𑀓𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀗𑁆𑀓𑀫𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 ‘‘𑀩𑀮𑀯𑀧𑀜𑁆𑀜𑀢𑁆𑀢𑀸’’𑀢𑀺 𑀳𑁂𑀢𑀼𑀦𑀸 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀗𑁆𑀓𑀫𑀦𑀁 𑀯𑁂𑀫𑀚𑁆𑀛𑀤𑀲𑁆𑀲𑀦𑁂 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀜𑀸𑀡𑀩𑀮𑀤𑀲𑁆𑀲𑀦𑀢𑁆𑀣𑀁 𑀧𑀦𑁂𑀢𑁆𑀣 𑀯𑀼𑀢𑁆𑀢𑀁.

𑀢𑀁 𑀢𑀁 𑀧𑀸𑀓𑀝𑀫𑁂𑀯𑀸𑀢𑀺 𑀬𑀣𑀸 𑀦𑀸𑀫 𑀲𑀭𑀤𑀲𑀫𑀬𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀘𑀢𑀼𑀭𑀢𑀦𑀺𑀓𑁂 𑀕𑁂𑀳𑁂 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀭𑀽𑀧𑀕𑀢𑀁 𑀲𑀼𑀧𑀸𑀓𑀝𑀫𑁂𑀯 𑀳𑁄𑀢𑀻𑀢𑀺 𑀮𑁄𑀓𑀲𑀺𑀤𑁆𑀥𑀫𑁂𑀢𑀁, 𑀲𑀺𑀬𑀸 𑀧𑀦 𑀢𑀲𑁆𑀲 𑀲𑀼𑀔𑀼𑀫𑀢𑀭𑀢𑀺𑀭𑁄𑀳𑀺𑀢𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀕𑀢𑀲𑁆𑀲 𑀅𑀕𑁄𑀘𑀭𑀢𑀸. 𑀦𑀢𑁆𑀣𑁂𑀯 𑀩𑀼𑀤𑁆𑀥𑀸𑀦𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀕𑁄𑀘𑀭𑀢𑀸, 𑀅𑀣 𑀔𑁄 𑀢𑀁 𑀜𑀸𑀡𑀸𑀮𑁄𑀓𑁂𑀦 𑀑𑀪𑀸𑀲𑀺𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀼𑀧𑀸𑀓𑀝𑀁 𑀲𑀼𑀯𑀺𑀪𑀽𑀢𑀫𑁂𑀯 ¶ 𑀳𑁄𑀢𑀺 𑀢𑀣𑀸 𑀜𑁂𑀬𑁆𑀬𑀸𑀯𑀭𑀡𑀲𑁆𑀲 𑀲𑀼𑀧𑀳𑀻𑀦𑀢𑁆𑀢𑀸. 𑀧𑁂𑀬𑁆𑀬𑀸𑀮𑀧𑀸𑀴𑀺𑀁 𑀯𑀺𑀬 𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀬𑀣𑀸 𑀧𑁂𑀬𑁆𑀬𑀸𑀮𑀧𑀸𑀴𑀺𑀁 𑀧𑀞𑀦𑁆𑀢𑀸 ‘‘𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦’’𑀦𑁆𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀫𑁂𑀯 𑀕𑀡𑁆𑀳𑀦𑁆𑀢𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀺, 𑀦 𑀅𑀦𑀼𑀧𑀤𑀁, 𑀏𑀯𑀁 𑀅𑀦𑁂𑀓𑀸𑀧𑀺 𑀓𑀧𑁆𑀧𑀓𑁄𑀝𑀺𑀬𑁄 𑀲𑀗𑁆𑀔𑀺𑀧𑀺𑀢𑁆𑀯𑀸. 𑀬𑀁 𑀬𑀁 𑀇𑀘𑁆𑀙𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀧𑁆𑀧𑁂, 𑀬𑀲𑁆𑀫𑀺𑀁 𑀪𑀯𑁂 𑀬𑀁 ¶ 𑀬𑀁 𑀚𑀸𑀦𑀺𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀏𑀯 𑀜𑀸𑀡𑁂𑀦 𑀑𑀓𑁆𑀓𑀫𑀦𑁆𑀢𑀸. 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦 𑀲𑀻𑀳𑀕𑀢𑀺𑀧𑀢𑀦𑀯𑀲𑁂𑀦 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀺. 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀴𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀧𑀝𑀺𑀧𑀸𑀤𑀦𑀯𑀲𑁂𑀦 𑀓𑀢𑀯𑀸𑀮𑀯𑁂𑀥𑀧𑀭𑀺𑀘𑀬𑀲𑁆𑀲. 𑀲𑀭𑀪𑀗𑁆𑀕𑀲𑀤𑀺𑀲𑀲𑁆𑀲𑀸𑀢𑀺 𑀲𑀭𑀪𑀗𑁆𑀕𑀩𑁄𑀥𑀺𑀲𑀢𑁆𑀢𑀲𑀤𑀺𑀲𑀲𑁆𑀲 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄). 𑀮𑀓𑁆𑀔𑀝𑁆𑀞𑀸𑀦𑀲𑁆𑀲 𑀅𑀧𑁆𑀧𑀢𑁆𑀢𑀯𑀲𑁂𑀦 𑀦 𑀲𑀚𑁆𑀚𑀢𑀺. 𑀅𑀢𑀺𑀓𑁆𑀓𑀫𑀦𑀧𑀲𑁆𑀲𑀕𑀫𑀦𑀯𑀲𑁂𑀦 𑀦 𑀯𑀺𑀭𑀚𑁆𑀛𑀢𑀺.

𑀔𑀚𑁆𑀚𑀼𑀧𑀦𑀓𑀧𑁆𑀧𑀪𑀸𑀲𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀜𑀸𑀡𑀲𑁆𑀲 𑀅𑀢𑀺𑀯𑀺𑀬 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀔𑀚𑁆𑀚𑁄𑀢𑁄𑀪𑀸𑀲𑀲𑀫𑀁 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀉𑀧𑀝𑁆𑀞𑀸𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀤𑀻𑀧𑀧𑁆𑀧𑀪𑀸𑀲𑀤𑀺𑀲𑀦𑁆𑀢𑀺 𑀧𑀸𑀓𑀢𑀺𑀓𑀤𑀻𑀧𑀸𑀮𑁄𑀓𑀲𑀤𑀺𑀲𑀁. 𑀉𑀓𑁆𑀓𑀸𑀧𑀪𑀸 𑀫𑀳𑀸𑀉𑀫𑁆𑀫𑀼𑀓𑀸𑀮𑁄𑀓𑁄. 𑀑𑀲𑀥𑀺𑀢𑀸𑀭𑀓𑀧𑁆𑀧𑀪𑀸𑀢𑀺 𑀉𑀲𑁆𑀲𑀦𑁆𑀦𑀸 𑀧𑀪𑀸 𑀏𑀢𑀸𑀬 𑀥𑀻𑀬𑀢𑀻𑀢𑀺 𑀑𑀲𑀥𑀺, 𑀑𑀲𑀥𑀻𑀦𑀁 𑀯𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀢𑁆𑀢𑀸 𑀑𑀲𑀥𑀻𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀸𑀬 𑀢𑀸𑀭𑀓𑀸𑀬 𑀧𑀪𑀸. 𑀲𑀭𑀤𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑀁 𑀲𑀯𑀺𑀲𑀬𑁂 𑀲𑀩𑁆𑀩𑀲𑁄 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄.

𑀬𑀝𑁆𑀞𑀺𑀓𑁄𑀝𑀺𑀕𑀫𑀦𑀁 𑀯𑀺𑀬 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸 𑀅𑀫𑀼𑀜𑁆𑀘𑀦𑀢𑁄. 𑀓𑀼𑀦𑁆𑀦𑀤𑀻𑀦𑀁 𑀅𑀢𑀺𑀓𑁆𑀓𑀫𑀦𑀸𑀬 𑀏𑀓𑁂𑀦𑁂𑀯 𑀭𑀼𑀓𑁆𑀔𑀤𑀡𑁆𑀟𑁂𑀦 𑀓𑀢𑀲𑀗𑁆𑀓𑀫𑁄 𑀤𑀡𑁆𑀟𑀓𑀲𑁂𑀢𑀼. 𑀘𑀢𑀽𑀳𑀺, 𑀧𑀜𑁆𑀘𑀳𑀺 𑀯𑀸 𑀚𑀦𑁂𑀳𑀺 𑀕𑀦𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄 𑀨𑀮𑀓𑁂 𑀅𑀢𑁆𑀣𑀭𑀺𑀢𑁆𑀯𑀸 𑀆𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀲𑀗𑁆𑀓𑀫𑁄 𑀚𑀗𑁆𑀖𑀲𑁂𑀢𑀼. 𑀚𑀗𑁆𑀖𑀲𑀢𑁆𑀣𑀲𑁆𑀲 𑀕𑀫𑀦𑀬𑁄𑀕𑁆𑀕𑁄 𑀲𑀗𑁆𑀓𑀫𑁄 𑀚𑀗𑁆𑀖𑀲𑁂𑀢𑀼 𑀚𑀗𑁆𑀖𑀫𑀕𑁆𑀕𑁄 𑀯𑀺𑀬. 𑀲𑀓𑀝𑀲𑁆𑀲 𑀕𑀫𑀦𑀬𑁄𑀕𑁆𑀕𑁄 𑀲𑀗𑁆𑀓𑀫𑁄 𑀲𑀓𑀝𑀲𑁂𑀢𑀼 𑀲𑀓𑀝𑀫𑀕𑁆𑀕𑁄 𑀯𑀺𑀬. 𑀫𑀳𑀢𑀸 𑀚𑀗𑁆𑀖𑀲𑀢𑁆𑀣𑁂𑀦 𑀕𑀦𑁆𑀢𑀩𑁆𑀩𑀫𑀕𑁆𑀕𑁄 𑀫𑀳𑀸𑀚𑀗𑁆𑀖𑀫𑀕𑁆𑀕𑁄. 𑀩𑀳𑀽𑀳𑀺 𑀯𑀻𑀲𑀸𑀬 𑀯𑀸 𑀢𑀺𑀁𑀲𑀸𑀬 𑀯𑀸 𑀲𑀓𑀝𑁂𑀳𑀺 𑀏𑀓𑀚𑁆𑀛𑀁 𑀕𑀦𑁆𑀢𑀩𑁆𑀩𑀫𑀕𑁆𑀕𑁄 𑀫𑀳𑀸𑀲𑀓𑀝𑀫𑀕𑁆𑀕𑁄.

𑀇𑀫𑀲𑁆𑀫𑀺𑀁 𑀧𑀦 𑀅𑀥𑀺𑀓𑀸𑀭𑁂𑀢𑀺 ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀘𑀺𑀢𑁆𑀢𑀲𑀻𑀲𑁂𑀦 𑀲𑀸𑀯𑀓𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀲𑀫𑀸𑀥𑀺𑀪𑀸𑀯𑀦𑀸𑀥𑀺𑀓𑀸𑀭𑁂.

𑁪𑁦𑁩. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀸𑀯𑀓𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸. 𑀏𑀯𑀦𑁆𑀢𑀺 𑀬𑀣𑀸 𑀢𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀏𑀯𑀁 𑀅𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁂𑀦. 𑀳𑁂𑀝𑁆𑀞𑀸 𑀢𑀻𑀲𑀼 𑀛𑀸𑀦𑁂𑀲𑀼 𑀬𑀣𑀸𑀭𑀳𑀁 𑀧𑀻𑀢𑀺𑀲𑀼𑀔𑁂𑀳𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 ¶ 𑀲𑀫𑁆𑀧𑀻𑀦𑀦𑀸𑀬 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀬𑀸𑀬 𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀅𑀦𑀼𑀲𑁆𑀲𑀭𑀡𑀸𑀭𑀫𑁆𑀪𑁄, 𑀲𑀸 𑀇𑀥 𑀲𑀩𑁆𑀩𑀧𑀘𑁆𑀙𑀺𑀫𑀸 𑀦𑀺𑀲𑀚𑁆𑀚𑀸. 𑀢𑀢𑁄 𑀆𑀲𑀦𑀧𑀜𑁆𑀜𑀸𑀧𑀦𑀦𑁆𑀢𑀺 𑀢𑀢𑁄 𑀦𑀺𑀲𑀚𑁆𑀚𑀸𑀬 𑀧𑀼𑀭𑀺𑀫𑀓𑀁 𑀆𑀲𑀦𑀧𑀜𑁆𑀜𑀸𑀧𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 ¶ . 𑀪𑁄𑀚𑀦𑀓𑀸𑀮𑁄𑀢𑀺𑀆𑀤𑀻𑀲𑀼 𑀓𑀸𑀮𑀲𑀻𑀲𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀢𑀓𑀺𑀘𑁆𑀘𑀫𑀸𑀳. 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀦𑁆𑀤𑀦𑀓𑀸𑀮𑁄𑀢𑀺 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀘𑁂𑀢𑀺𑀬𑀩𑁄𑀥𑀻𑀦𑀁 𑀯𑀦𑁆𑀤𑀦𑀓𑀸𑀮𑁄. 𑀲𑀓𑀮𑀁 𑀭𑀢𑁆𑀢𑀺𑀦𑁆𑀤𑀺𑀯𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁.

𑀓𑀺𑀜𑁆𑀘𑀺 𑀓𑀺𑀘𑁆𑀘𑀁. 𑀏𑀢𑁆𑀢𑀓𑁂𑀦𑀸𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑁂𑀦. 𑀧𑀸𑀤𑀓𑀚𑁆𑀛𑀸𑀦𑀜𑁆𑀳𑀺 𑀲𑀢𑁆𑀣𑀓𑀲𑁆𑀲 𑀯𑀺𑀬 𑀦𑀺𑀲𑀸𑀦𑀲𑀺𑀮𑀸 𑀲𑀢𑀺𑀧𑀜𑁆𑀜𑀸𑀦𑀫𑁆𑀧𑀺 𑀦𑀺𑀲𑀺𑀢𑀪𑀸𑀯𑀸𑀯𑀳𑀁. 𑀬𑀁 𑀢𑀲𑁆𑀲, 𑀢𑀸 𑀢𑀁 𑀲𑀫𑀸𑀧𑀚𑁆𑀚𑀦𑁂𑀦 𑀧𑀭𑀫𑀦𑁂𑀧𑀓𑁆𑀓𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀻𑀧𑁂 𑀚𑀮𑀺𑀢𑁂 𑀯𑀺𑀬 𑀧𑀸𑀓𑀝𑀁 𑀳𑁄𑀢𑀻’’𑀢𑀺, 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀭𑀺𑀫𑀪𑀯𑁂𑀢𑀺 𑀇𑀫𑀲𑁆𑀲 𑀪𑀯𑀲𑁆𑀲 𑀅𑀦𑀦𑁆𑀢𑀭𑁂 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂. 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀁. 𑀢𑀜𑁆𑀘 𑀔𑁄 𑀧𑀞𑀫𑀁 𑀭𑀽𑀧𑀁 𑀆𑀯𑀚𑁆𑀚𑀺𑀢𑁆𑀯𑀸 𑀦𑀸𑀫𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀧𑀞𑀫𑀁 𑀦𑀸𑀫𑀁 𑀆𑀯𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀭𑀽𑀧𑀦𑁆𑀢𑀺 𑀅𑀧𑀭𑁂. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺. 𑀧𑀡𑁆𑀟𑀺𑀢𑁄 𑀦𑀸𑀫 𑀇𑀫𑀺𑀲𑁆𑀲𑀸 𑀅𑀪𑀺𑀜𑁆𑀜𑀸𑀪𑀸𑀯𑀦𑀸𑀬 𑀓𑀢𑀸𑀥𑀺𑀓𑀸𑀭𑁄.

‘‘𑀅𑀜𑁆𑀜𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀇𑀤𑀁 𑀅𑀜𑁆𑀜𑀲𑁆𑀫𑀸 𑀓𑀫𑁆𑀫𑀪𑀯𑀸 𑀅𑀜𑁆𑀜𑁄 𑀉𑀧𑀧𑀢𑁆𑀢𑀺𑀪𑀯𑁄 𑀉𑀧𑁆𑀧𑀦𑁆𑀦𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀭𑀪𑀸𑀯𑀢𑁄. 𑀅𑀜𑁆𑀜𑀣𑀸 𑀏𑀓𑀪𑀯𑁂𑀧𑀺 𑀅𑀜𑁆𑀜𑀫𑀜𑁆𑀜𑀫𑁂𑀯 𑀦𑀸𑀫𑀭𑀽𑀧𑀁 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀭𑀼𑀤𑁆𑀥𑀜𑁆𑀘 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁. 𑀢𑁂𑀦𑁂𑀯𑀸𑀳 𑁋

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸’’𑀢𑀺. (𑀫𑀳𑀸𑀦𑀺. 𑁩𑁯);

𑀢𑀁 𑀞𑀸𑀦𑀦𑁆𑀢𑀺 𑀢𑀁 𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀁. 𑀆𑀳𑀼𑀦𑁆𑀤𑀭𑀺𑀓𑀦𑁆𑀢𑀺 𑀲𑀫𑀦𑁆𑀢𑀢𑁄, 𑀉𑀧𑀭𑀺 𑀘 𑀖𑀦𑀲𑀜𑁆𑀙𑀦𑁆𑀦𑀁 𑀲𑀫𑁆𑀩𑀸𑀥𑀝𑁆𑀞𑀸𑀦𑀁. 𑀅𑀦𑁆𑀥𑀢𑀫𑀫𑀺𑀯𑀸𑀢𑀺 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀯𑀺𑀬.

𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀢𑁆𑀣𑀸𑀬𑀸𑀢𑀺 𑀓𑀽𑀝𑀸𑀕𑀸𑀭𑀲𑁆𑀲 𑀓𑀽𑀝𑀢𑁆𑀣𑀸𑀬. 𑀓𑀽𑀝𑀸𑀕𑀸𑀭𑀲𑁆𑀲 𑀓𑀡𑁆𑀡𑀺𑀓𑀸 𑀯𑀺𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀫𑀳𑀸𑀭𑀼𑀓𑁆𑀔𑁄 𑀯𑀺𑀬 𑀧𑀼𑀭𑀺𑀫𑀪𑀯𑁂 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀦𑀸𑀫𑀭𑀽𑀧𑀁, 𑀲𑀸𑀔𑀸𑀧𑀮𑀸𑀲𑀸 𑀯𑀺𑀬 𑀢𑁂𑀦 𑀲𑀫𑁆𑀩𑀦𑁆𑀥𑀁 𑀇𑀫𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀨𑀭𑀲𑀼𑀥𑀸𑀭𑀸 𑀯𑀺𑀬 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 ¶ , 𑀓𑀫𑁆𑀫𑀸𑀭𑀲𑀸𑀮𑀸 𑀯𑀺𑀬 𑀧𑀸𑀤𑀓𑀚𑁆𑀛𑀸𑀦𑀦𑁆𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀝𑁆𑀞𑀨𑀸𑀮𑀓𑁄𑀧𑀫𑀸𑀧𑀺 ‘‘𑀬𑀣𑀸 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀑𑀤𑀦𑀧𑀘𑀦𑀸𑀤𑀺𑀅𑀢𑁆𑀣𑀁 𑀫𑀳𑀦𑁆𑀢𑀁 𑀤𑀸𑀭𑀼𑀁 𑀨𑀸𑀮𑁂𑀦𑁆𑀢𑁄 𑀢𑀲𑁆𑀲 𑀢𑀘𑀨𑁂𑀕𑁆𑀕𑀼𑀫𑀢𑁆𑀢𑀨𑀸𑀮𑀦𑁂 𑀨𑀭𑀲𑀼𑀥𑀸𑀭𑀸𑀬 𑀯𑀺𑀧𑀦𑁆𑀦𑀸𑀬 𑀫𑀳𑀦𑁆𑀢𑀁 𑀤𑀸𑀭𑀼𑀁 𑀨𑀸𑀮𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀓𑁂𑀲𑁄𑀳𑀸𑀭𑀓𑀽𑀧𑀫𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 ¶ 𑀦𑀸𑀫 𑀦 𑀳𑁄𑀢𑀺 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸𑀪𑀸𑀯𑀸. 𑀢𑀦𑁆𑀢𑀺 𑀧𑀘𑁆𑀙𑀺𑀫𑀦𑀺𑀲𑀚𑁆𑀚𑀢𑁄 𑀧𑀪𑀼𑀢𑀺 𑀬𑀸𑀯 𑀧𑀝𑀺𑀲𑀦𑁆𑀥𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀪𑀸𑀯𑁂𑀦 𑀧𑀯𑀢𑁆𑀢𑀲𑀫𑀸𑀥𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀜𑀸𑀡𑀁. 𑀢𑀁 𑀭𑀽𑀧𑀸𑀯𑀘𑀭𑀁 𑀲𑀦𑁆𑀥𑀸𑀬 𑀦 𑀬𑀼𑀚𑁆𑀚𑀢𑀻𑀢𑀺 𑀢𑀁 𑀢𑁂𑀲𑀁 𑀯𑀘𑀦𑀁 𑀅𑀢𑀻𑀢𑀁𑀲𑀜𑀸𑀡𑀁 𑀘𑁂, 𑀭𑀽𑀧𑀸𑀯𑀘𑀭𑀁 𑀅𑀥𑀺𑀧𑁆𑀧𑁂𑀢𑀁 𑀦 𑀬𑀼𑀚𑁆𑀚𑀢𑀺 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀜𑀸𑀡𑀲𑁆𑀲 𑀓𑀸𑀫𑀸𑀯𑀘𑀭𑀪𑀸𑀯𑀢𑁄. 𑀦 𑀳𑀺 𑀅𑀦𑀦𑁆𑀢𑀭𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀑𑀭𑀢𑁄 𑀧𑀯𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀭𑀩𑁆𑀪 𑀭𑀽𑀧𑀸𑀯𑀘𑀭𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀆𑀕𑀢𑀁 𑀅𑀢𑁆𑀣𑀺. 𑀬𑁂𑀲𑀁 𑀚𑀯𑀦𑀸𑀦𑀁 𑀧𑀼𑀭𑀺𑀫𑀸𑀦𑀻𑀢𑀺 𑀬𑁄𑀚𑀦𑀸. 𑀬𑀤𑀸 𑀧𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫𑀸𑀢𑀺 𑀓𑀸𑀫𑀁 𑀅𑀦𑀦𑁆𑀢𑀭𑀲𑁆𑀲 𑀪𑀯𑀲𑁆𑀲 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀦𑀸𑀫𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀁 𑀤𑀲𑁆𑀲𑀺𑀢𑀁, 𑀢𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀜𑀸𑀡𑀲𑀸𑀫𑀜𑁆𑀜𑀲𑁆𑀲 𑀚𑁄𑀢𑀺𑀢𑀪𑀸𑀯𑀢𑁄. 𑀬𑀣𑁂𑀯 𑀳𑀺 𑀢𑀢𑁄 𑀦𑀸𑀫𑀭𑀽𑀧𑀢𑁄 𑀧𑀪𑀼𑀢𑀺 𑀲𑀩𑁆𑀩𑁂 𑀅𑀢𑀻𑀢𑀸 𑀔𑀦𑁆𑀥𑀸, 𑀔𑀦𑁆𑀥𑀧𑀝𑀺𑀩𑀤𑁆𑀥𑀸 𑀘 𑀲𑀩𑁆𑀩𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀏𑀯𑀁 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁. 𑀢𑁂𑀦𑀸𑀳 ‘‘𑀢𑁂𑀦 𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀢𑀺𑀬𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀻’’𑀢𑀺.

𑁪𑁦𑁪. 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀪𑀯𑀁. 𑀲𑁄 𑀳𑀺 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀦𑁆𑀢𑁄𑀕𑀥𑀥𑀫𑁆𑀫𑀧𑁆𑀧𑀪𑁂𑀤𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑁄 𑀇𑀥 𑀚𑀸𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀏𑀓𑀫𑁆𑀧𑀺…𑀧𑁂… 𑀔𑀦𑁆𑀥𑀲𑀦𑁆𑀢𑀸𑀦’’𑀦𑁆𑀢𑀺. 𑀧𑀭𑀺𑀳𑀸𑀬𑀫𑀸𑀦𑁄𑀢𑀺 𑀔𑀻𑀬𑀫𑀸𑀦𑁄 𑀯𑀺𑀦𑀲𑁆𑀲𑀫𑀸𑀦𑁄. 𑀓𑀧𑁆𑀧𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀮𑁄, 𑀢𑀤𑀸 𑀧𑀯𑀢𑁆𑀢𑀫𑀸𑀦𑀲𑀗𑁆𑀔𑀸𑀭𑀯𑀲𑁂𑀦𑀲𑁆𑀲 𑀧𑀭𑀺𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 ‘‘𑀓𑀸𑀮𑀁 𑀔𑁂𑀧𑁂𑀢𑀻’’𑀢𑀺, ‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸’’𑀢𑀺 (𑀚𑀸. 𑁧.𑁨.𑁧𑁯𑁦) 𑀘 𑀆𑀤𑀻𑀲𑀼 𑀓𑀸𑀮𑀲𑁆𑀲𑀸𑀧𑀺 𑀔𑀬𑁄 𑀯𑀼𑀘𑁆𑀘𑀢𑀺, 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀲𑀁𑀯𑀝𑁆𑀝𑀦𑀁 𑀯𑀺𑀦𑀲𑁆𑀲𑀦𑀁 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀢𑁄 𑀉𑀤𑁆𑀥𑀁 𑀢𑀣𑀸 𑀞𑀸𑀬𑀻 𑀲𑀁𑀯𑀝𑁆𑀝𑀝𑁆𑀞𑀸𑀬𑀻. 𑀢𑀁𑀫𑀽𑀮𑀓𑀢𑁆𑀢𑀸𑀢𑀺 𑀢𑀁𑀧𑀼𑀩𑁆𑀩𑀓𑀢𑁆𑀢𑀸. 𑀯𑀺𑀯𑀝𑁆𑀝𑀦𑀁 𑀦𑀺𑀩𑁆𑀩𑀢𑁆𑀢𑀦𑀁, 𑀯𑀟𑁆𑀠𑀦𑀁 𑀯𑀸 𑀯𑀺𑀯𑀝𑁆𑀝𑁄.

𑀢𑁂𑀚𑁄𑀲𑀁𑀯𑀝𑁆𑀝𑁄 𑀆𑀧𑁄𑀲𑀁𑀯𑀝𑁆𑀝𑁄 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺 𑀏𑀯𑀁 𑀲𑀁𑀯𑀝𑁆𑀝𑀲𑀻𑀫𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀝𑁆𑀝𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢𑀣𑀸 ¶ 𑀅𑀯𑀢𑁆𑀯𑀸 ‘‘𑀆𑀧𑁄𑀲𑀁𑀯𑀝𑁆𑀝𑁄 𑀢𑁂𑀚𑁄𑀲𑀁𑀯𑀝𑁆𑀝𑁄 ¶ 𑀯𑀸𑀬𑁄𑀲𑀁𑀯𑀝𑁆𑀝𑁄’’𑀢𑀺 𑀯𑀘𑀦𑀁 𑀲𑀁𑀯𑀝𑁆𑀝𑀓𑀫𑀳𑀸𑀪𑀽𑀢𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀺𑀬𑀸𑀢𑀺 𑀓𑁂𑀘𑀺. 𑀲𑀁𑀯𑀝𑁆𑀝𑀸𑀦𑀼𑀧𑀼𑀩𑁆𑀩𑀺𑀬𑀸𑀢𑀺 𑀅𑀧𑀭𑁂. 𑀆𑀧𑁂𑀦 𑀲𑀁𑀯𑀝𑁆𑀝𑁄 𑀆𑀧𑁄𑀲𑀁𑀯𑀝𑁆𑀝𑁄. 𑀲𑀁𑀯𑀝𑁆𑀝𑀲𑀻𑀫𑀸𑀢𑀺 𑀲𑀁𑀯𑀝𑁆𑀝𑀫𑀭𑀺𑀬𑀸𑀤𑀸.

𑀲𑀁𑀯𑀝𑁆𑀝𑀢𑀻𑀢𑀺 𑀯𑀺𑀦𑀲𑁆𑀲𑀢𑀺. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁, 𑀢𑀻𑀲𑀼𑀧𑀺 𑀲𑀁𑀯𑀝𑁆𑀝𑀓𑀸𑀮𑁂𑀲𑀽𑀢𑀺 𑀅𑀢𑁆𑀣𑁄.

‘‘𑀏𑀓𑀁 𑀩𑀼𑀤𑁆𑀥𑀔𑁂𑀢𑁆𑀢’’𑀦𑁆𑀢𑀺 𑀇𑀥 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀢𑀓𑁂 𑀞𑀸𑀦𑁂 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀜𑀸𑀡𑀸𑀦𑀼𑀪𑀸𑀯𑁄 𑀧𑀼𑀜𑁆𑀜𑀨𑀮𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀭𑀲𑁂𑀦𑁂𑀯 𑀧𑀣𑀯𑀻 𑀯𑀺𑀚𑀫𑁆𑀪𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀔𑁂𑀢𑁆𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀚𑀸𑀢𑀺𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢’’𑀦𑁆𑀢𑀺. 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀻𑀢𑀺 𑀇𑀥 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀆𑀡𑀸𑀔𑁂𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀜𑁆𑀜𑀁 𑀘𑀓𑁆𑀓𑀯𑀸𑀴𑀁 𑀕𑀢𑁄𑀧𑀺 𑀓𑀢𑀧𑀭𑀺𑀢𑁆𑀢𑁄 𑀏𑀯 𑀳𑁄𑀢𑀺. 𑀅𑀣 𑀯𑀸 𑀢𑀢𑁆𑀣 𑀏𑀓𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑁂 𑀓𑀢𑁂 𑀆𑀡𑀸𑀔𑁂𑀢𑁆𑀢𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑁆𑀯𑁂𑀯 𑀧𑀭𑀺𑀢𑁆𑀢𑀸𑀦𑀼𑀪𑀸𑀯𑁄 𑀢𑀢𑁆𑀣 𑀤𑁂𑀯𑀢𑀸𑀳𑀺 𑀧𑀭𑀺𑀢𑁆𑀢𑀸𑀡𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁄. 𑀬𑀁 𑀯𑀺𑀲𑀬𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀭𑁂𑀦 𑀅𑀪𑀺𑀯𑀺𑀜𑁆𑀜𑀸𑀧𑀦𑀁, 𑀅𑀢𑁆𑀢𑀦𑁄 𑀭𑀽𑀧𑀤𑀲𑁆𑀲𑀦𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀼𑀢𑁆𑀢𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑁂 𑀯𑀺𑀲𑀬𑀔𑁂𑀢𑁆𑀢𑁂. 𑀬𑀁 𑀬𑀁 𑀢𑀣𑀸𑀕𑀢𑁄 𑀆𑀓𑀗𑁆𑀔𑀢𑀺, 𑀢𑀁 𑀢𑀁 𑀚𑀸𑀦𑀸𑀢𑀺 𑀆𑀓𑀗𑁆𑀔𑀸𑀫𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀜𑀸𑀡𑀲𑁆𑀲. 𑀲𑀡𑁆𑀞𑀳𑀦𑁆𑀢𑀦𑁆𑀢𑀺 𑀯𑀺𑀯𑀝𑁆𑀝𑀫𑀸𑀦𑀁 𑀚𑀸𑀬𑀫𑀸𑀦𑀁.

𑁪𑁦𑁫. 𑀕𑁄𑀔𑀸𑀬𑀺𑀢𑀓𑀫𑀢𑁆𑀢𑁂𑀲𑀽𑀢𑀺 𑀕𑁄𑀳𑀺 𑀔𑀸𑀤𑀺𑀢𑀩𑁆𑀩𑀧𑁆𑀧𑀫𑀸𑀡𑁂𑀲𑀼. 𑀬𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂. 𑀧𑀼𑀧𑁆𑀨𑀨𑀮𑀽𑀧𑀚𑀻𑀯𑀺𑀦𑀺𑀬𑁄 𑀘 𑀤𑁂𑀯𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁂𑀲𑀦𑁆𑀢𑀺 ‘‘𑀯𑀲𑁆𑀲𑀽𑀧𑀚𑀻𑀯𑀺𑀦𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀢𑁆𑀢𑀸𑀦𑀁. 𑀢𑀢𑁆𑀣𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂. 𑀲𑁄 𑀘 𑀔𑁄 𑀧𑀭𑀺𑀢𑁆𑀢𑀸𑀪𑀸𑀤𑀺𑀩𑁆𑀭𑀳𑁆𑀫𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺 𑀯𑀢𑁆𑀯𑀸 𑀛𑀸𑀦𑀧𑁆𑀧𑀝𑀺𑀮𑀸𑀪𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑁄𑀓𑀁 𑀩𑁆𑀬𑀽𑀳𑁂𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀻𑀢𑀺 𑀮𑁄𑀓𑀩𑁆𑀬𑀽𑀳𑀸. 𑀢𑁂 𑀓𑀺𑀭 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀲𑀁𑀯𑁂𑀕𑀚𑀸𑀢𑀸, 𑀲𑀫𑁆𑀪𑀫𑀧𑁆𑀧𑀢𑁆𑀢𑀸 ¶ 𑀘 𑀳𑀼𑀢𑁆𑀯𑀸 𑀢𑁂𑀲𑀁 𑀆𑀲𑀦𑁆𑀦𑁂 𑀞𑀸𑀦𑁂 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀲𑀺𑀔𑀸𑀩𑀦𑁆𑀥𑀲𑁆𑀲 𑀫𑀼𑀢𑁆𑀢𑀢𑀸𑀬 𑀫𑀼𑀢𑁆𑀢𑀲𑀺𑀭𑀸. 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀽𑀬𑀫𑀸𑀦𑀓𑁂𑀲𑀢𑀸𑀬 𑀯𑀺𑀓𑀺𑀡𑁆𑀡𑀓𑁂𑀲𑀸. 𑀮𑁄𑀓𑀯𑀺𑀦𑀸𑀲𑀪𑀬𑁂𑀦 𑀲𑁄𑀓𑀯𑀦𑁆𑀢𑀘𑀺𑀢𑁆𑀢𑀢𑀸𑀬 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄. 𑀫𑀸𑀭𑀺𑀲𑀸𑀢𑀺 𑀤𑁂𑀯𑀸𑀦𑀁 ¶ 𑀧𑀺𑀬𑀲𑀫𑀼𑀤𑀸𑀘𑀸𑀭𑁄. 𑀓𑀣𑀁 𑀧𑀦𑁂𑀢𑁂 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀚𑀸𑀦𑀦𑁆𑀢𑀻𑀢𑀺? 𑀥𑀫𑁆𑀫𑀢𑀸𑀬 𑀲𑀜𑁆𑀘𑁄𑀤𑀺𑀢𑀸𑀢𑀺 𑀆𑀘𑀭𑀺𑀬𑀸. 𑀢𑀸𑀤𑀺𑀲𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑁂𑀦𑀸𑀢𑀺 𑀏𑀓𑁂. 𑀩𑁆𑀭𑀳𑁆𑀫𑀤𑁂𑀯𑀢𑀸𑀳𑀺 𑀉𑀬𑁆𑀬𑁄𑀚𑀺𑀢𑀸𑀢𑀺 𑀅𑀧𑀭𑁂.

𑀫𑁂𑀢𑁆𑀢𑀸𑀤𑀻𑀦𑀻𑀢𑀺 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑀸𑀤𑀻𑀦𑀺 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺. 𑀤𑁂𑀯𑀮𑁄𑀓𑁂𑀢𑀺 𑀓𑀸𑀫𑀤𑁂𑀯𑀮𑁄𑀓𑁂. 𑀤𑁂𑀯𑀸𑀦𑀁 𑀓𑀺𑀭 𑀲𑀼𑀔𑀲𑀫𑁆𑀨𑀲𑁆𑀲𑀯𑀸𑀢𑀕𑁆𑀕𑀳𑀡𑀧𑀭𑀺𑀘𑀬𑁂𑀦 𑀯𑀸𑀬𑁄𑀓𑀲𑀺𑀡𑁂 𑀛𑀸𑀦𑀸𑀦𑀺 𑀲𑀼𑀔𑁂𑀦𑁂𑀯 𑀇𑀚𑁆𑀛𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀻’’𑀢𑀺. 𑀢𑀤𑀜𑁆𑀜𑁂 𑀧𑀦𑀸𑀢𑀺 𑀆𑀧𑀸𑀬𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣𑀸𑀢𑀺 𑀤𑁂𑀯𑀮𑁄𑀓𑁂.

𑀤𑀼𑀢𑀺𑀬𑁄 𑀲𑀽𑀭𑀺𑀬𑁄𑀢𑀺 𑀤𑀼𑀢𑀺𑀬𑀁 𑀲𑀽𑀭𑀺𑀬𑀫𑀡𑁆𑀟𑀮𑀁. 𑀲𑀢𑁆𑀢𑀲𑀽𑀭𑀺𑀬𑀦𑁆𑀢𑀺 𑀲𑀢𑁆𑀢𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀲𑀼𑀢𑁆𑀢𑀁. 𑀧𑀓𑀢𑀺𑀲𑀽𑀭𑀺𑀬𑁂𑀢𑀺 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀲𑀽𑀭𑀺𑀬𑀯𑀺𑀫𑀸𑀦𑁂. 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀬𑀣𑀸 𑀅𑀜𑁆𑀜𑁂 𑀓𑀸𑀫𑀸𑀯𑀘𑀭𑀤𑁂𑀯𑀸, 𑀏𑀯𑀁 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄𑀧𑀺 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀢𑀺, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀦 𑀧𑀪𑀲𑁆𑀲𑀭𑀢𑀭𑀜𑁆𑀘𑁂𑀯 𑀢𑁂𑀚𑀯𑀦𑁆𑀢𑀢𑀭𑀜𑁆𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑀁 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀅𑀜𑁆𑀜𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀧𑀭𑁂. 𑀕𑀗𑁆𑀕𑀸 𑀬𑀫𑀼𑀦𑀸 𑀲𑀭𑀪𑀽 𑀅𑀘𑀺𑀭𑀯𑀢𑀻 𑀫𑀳𑀻𑀢𑀺 𑀇𑀫𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄.

𑀧𑀪𑀯𑀸𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸. 𑀳𑀁𑀲𑀧𑀸𑀢𑀦𑁄𑀢𑀺 𑀫𑀦𑁆𑀤𑀸𑀓𑀺𑀦𑀺𑀫𑀸𑀳.

𑀦 𑀲𑀡𑁆𑀞𑀸𑀢𑀻𑀢𑀺 𑀦 𑀢𑀺𑀝𑁆𑀞𑀢𑀺.

𑀧𑀭𑀺𑀬𑀸𑀤𑀺𑀦𑁆𑀦𑀲𑀺𑀦𑁂𑀳𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀲𑀺𑀦𑁂𑀳𑀁. 𑀬𑀸𑀬 𑀆𑀧𑁄𑀥𑀸𑀢𑀼𑀬𑀸 𑀢𑀢𑁆𑀣 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼 𑀆𑀩𑀦𑁆𑀥𑀢𑁆𑀢𑀸 𑀲𑀫𑁆𑀧𑀺𑀡𑁆𑀟𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸 𑀙𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁂𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀬𑀣𑀸 𑀘𑀺𑀤𑀦𑁆𑀢𑀺 𑀬𑀣𑀸 𑀘 𑀇𑀤𑀁 𑀘𑀓𑁆𑀓𑀯𑀸𑀴𑀁. 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺𑀧𑀻𑀢𑀺 𑀯𑀺𑀧𑀢𑁆𑀢𑀺𑀫𑀳𑀸𑀫𑁂𑀖𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀇𑀥 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀓𑀧𑁆𑀧𑀯𑀼𑀝𑁆𑀞𑀸𑀦𑀁, 𑀢𑀁 𑀢𑀢𑁆𑀣 𑀅𑀢𑀺𑀤𑀺𑀲𑀢𑀺.

𑀧𑀮𑀼𑀚𑁆𑀚𑀺𑀢𑁆𑀯𑀸𑀢𑀺 𑀙𑀺𑀚𑁆𑀚𑀺𑀢𑁆𑀯𑀸. 𑀲𑀗𑁆𑀔𑀸𑀭𑀕𑀢𑀦𑁆𑀢𑀺 𑀪𑀽𑀢𑀼𑀧𑀸𑀤𑀸𑀬𑀧𑁆𑀧𑀪𑁂𑀤𑀁 𑀲𑀗𑁆𑀔𑀸𑀭𑀚𑀸𑀢𑀁. 𑀲𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸𑀢𑀺 𑀛𑀸𑀧𑁂𑀢𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸. 𑀲𑀬𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀲𑀫𑀸𑀦𑀁 𑀇𑀦𑁆𑀥𑀦𑀸𑀪𑀸𑀯𑀢𑁄 𑀙𑀸𑀭𑀺𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀟𑁆𑀟𑀳𑀺𑀢𑁆𑀯𑀸 𑀯𑀽𑀧𑀲𑀫𑀢𑀻𑀢𑀺 𑀆𑀳 ‘‘𑀲𑀧𑁆𑀧𑀺…𑀧𑁂… 𑀦𑀺𑀩𑁆𑀩𑀸𑀬𑀢𑀻’’𑀢𑀺.

𑁪𑁦𑁬. 𑀤𑀻𑀖𑀲𑁆𑀲 ¶ 𑀅𑀤𑁆𑀥𑀼𑀦𑁄𑀢𑀺 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑀗𑁆𑀔𑀸𑀢𑀲𑁆𑀲 𑀤𑀻𑀖𑀲𑁆𑀲 𑀓𑀸𑀮𑀲𑁆𑀲 𑀅𑀘𑁆𑀘𑀬𑁂𑀦 ¶ . 𑀢𑀸𑀮𑀓𑁆𑀔𑀦𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀓𑀲𑀸𑀮𑀸𑀤𑀺𑀭𑀼𑀓𑁆𑀔𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀖𑀦𑀁 𑀓𑀭𑁄𑀢𑀻𑀢𑀺 𑀯𑀺𑀲𑀭𑀺𑀢𑀼𑀁 𑀅𑀤𑀢𑁆𑀯𑀸 𑀧𑀺𑀡𑁆𑀟𑀺𑀢𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀯𑀝𑀼𑀫’’𑀦𑁆𑀢𑀺, 𑀯𑀝𑁆𑀝𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀦𑁆𑀢𑀺 𑀉𑀤𑀓𑀁. 𑀅𑀲𑁆𑀲𑀸𑀢𑀺 𑀯𑀸𑀢𑀲𑁆𑀲. 𑀯𑀺𑀯𑀭𑀁 𑀤𑁂𑀢𑀻𑀢𑀺 𑀬𑀣𑀸 𑀖𑀦𑀁 𑀓𑀭𑁄𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀏𑀯𑀁 𑀢𑀢𑁆𑀣 𑀅𑀦𑁆𑀢𑀭𑀁 𑀤𑁂𑀢𑀺. 𑀧𑀭𑀺𑀓𑁆𑀔𑀬𑀫𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑁄𑀖𑀪𑀽𑀢𑁂𑀦 𑀯𑀸𑀢𑁂𑀦 𑀧𑀭𑀺𑀲𑁄𑀲𑀺𑀬𑀫𑀸𑀦𑀢𑀸𑀬 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀁. 𑀩𑁆𑀭𑀳𑁆𑀫𑀮𑁄𑀓𑁄 𑀧𑀸𑀢𑀼𑀪𑀯𑀢𑀻𑀢𑀺 𑀬𑁄𑀚𑀦𑀸. 𑀩𑁆𑀭𑀳𑁆𑀫𑀮𑁄𑀓𑁄𑀢𑀺 𑀘 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀫𑀸𑀳. 𑀉𑀧𑀭𑀺 𑀘𑀢𑀼𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀝𑁆𑀞𑀸𑀦𑁂𑀢𑀺 𑀬𑀸𑀫𑀤𑁂𑀯𑀮𑁄𑀓𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀪𑀯𑀦𑀸𑀦𑀁 𑀧𑀦 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀸𑀦𑀺 𑀧𑀣𑀯𑀻𑀲𑀫𑁆𑀩𑀦𑁆𑀥𑀢𑀸𑀬 𑀦 𑀢𑀸𑀯 𑀧𑀸𑀢𑀼𑀪𑀯𑀦𑁆𑀢𑀺.

𑀭𑀼𑀦𑁆𑀥𑀦𑁆𑀢𑀻𑀢𑀺 𑀬𑀣𑀸 𑀳𑁂𑀝𑁆𑀞𑀸 𑀦 𑀪𑀲𑁆𑀲𑀢𑀺, 𑀏𑀯𑀁 𑀦𑀺𑀭𑁄𑀥𑁂𑀦𑁆𑀢𑀺.

‘‘𑀧𑀞𑀫𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀇𑀤𑀁 𑀆𑀬𑀼𑀓𑁆𑀔𑀬𑀲𑁆𑀲 𑀲𑀫𑁆𑀪𑀯𑀤𑀲𑁆𑀲𑀦𑀁, 𑀢𑁂𑀦 𑀤𑁆𑀯𑀺𑀦𑁆𑀦𑀁, 𑀘𑀢𑀼𑀦𑁆𑀦𑀁, 𑀅𑀝𑁆𑀞𑀦𑁆𑀦𑀁 𑀯𑀸 𑀓𑀧𑁆𑀧𑀸𑀦𑀁 𑀆𑀤𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀢𑁄. 𑀧𑀭𑀺𑀢𑁆𑀢𑀸𑀪𑀅𑀧𑁆𑀧𑀫𑀸𑀡𑀸𑀪𑀸𑀧𑀺 𑀳𑀺 𑀆𑀪𑀲𑁆𑀲𑀭𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. ‘‘𑀢𑁂 𑀳𑁄𑀦𑁆𑀢𑀺 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸’’𑀢𑀺 𑀇𑀤𑀁 𑀉𑀧𑀘𑀸𑀭𑀚𑁆𑀛𑀸𑀦𑀧𑀼𑀜𑁆𑀜𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑀸𑀬 𑀯𑀼𑀢𑁆𑀢𑀁. 𑀆𑀮𑀼𑀧𑁆𑀧𑀓𑀸𑀭𑀓𑀦𑁆𑀢𑀺 𑀆𑀮𑁄𑀧𑀁 𑀓𑀢𑁆𑀯𑀸 𑀓𑀢𑁆𑀯𑀸𑀢𑀺 𑀯𑀤𑀦𑁆𑀢𑀺, 𑀆𑀮𑀼𑀧𑁆𑀧𑀦𑀁 𑀯𑀺𑀮𑁄𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀳𑀝𑁆𑀞𑀢𑀼𑀝𑁆𑀞𑀸𑀢𑀺 𑀅𑀢𑀺𑀯𑀺𑀬 𑀳𑀝𑁆𑀞𑀸 𑀉𑀧𑁆𑀧𑀺𑀮𑀸𑀯𑀺𑀢𑀘𑀺𑀢𑁆𑀢𑀸. 𑀦𑀸𑀫𑀁 𑀓𑀭𑁄𑀦𑁆𑀢𑀻𑀢𑀺 𑀢𑀣𑀸 𑀯𑁄𑀳𑀭𑀦𑁆𑀢𑀺.

𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸𑀢𑀺 𑀏𑀢𑁆𑀣 𑀤𑀻𑀧𑀲𑀫𑀼𑀤𑁆𑀤𑀸𑀧𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀦𑁆𑀦𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀫𑀼𑀤𑁆𑀤𑀸, 𑀲𑀫𑀲𑀫𑀝𑁆𑀞𑀸𑀦𑁂 𑀤𑀻𑀧𑀸’’𑀢𑀺. 𑀣𑀽𑀧𑀣𑀽𑀧𑀸𑀢𑀺 𑀉𑀦𑁆𑀦𑀢𑀼𑀦𑁆𑀦𑀢𑀸.

𑀅𑀢𑀺𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑁆𑀢𑀺, 𑀳𑀻𑀴𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 ‘‘𑀏𑀓𑀘𑁆𑀘𑁂 𑀯𑀡𑁆𑀡𑀯𑀦𑁆𑀢𑁄 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁨𑁩) 𑀯𑀼𑀢𑁆𑀢𑁂𑀦 𑀦𑀬𑁂𑀦𑁂𑀯. 𑀧𑀤𑀸𑀮𑀢𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀮𑀢𑀸𑀚𑀸𑀢𑀺. 𑀢𑀲𑁆𑀲𑀸 𑀓𑀺𑀭 𑀧𑀸𑀭𑀸𑀲𑀯𑀚𑀸𑀢𑀺 𑀕𑀴𑁄𑀘𑀻𑀢𑀺 𑀯𑀤𑀦𑁆𑀢𑀺. 𑀅𑀓𑀝𑁆𑀞𑁂 𑀏𑀯 𑀪𑀽𑀫𑀺𑀧𑁆𑀧𑀤𑁂𑀲𑁂 𑀧𑀘𑁆𑀘𑀦𑀓𑁄 𑀅𑀓𑀝𑁆𑀞𑀧𑀸𑀓𑁄. 𑀅𑀓𑀡𑁄𑀢𑀺 𑀓𑀼𑀡𑁆𑀟𑀓𑀭𑀳𑀺𑀢𑁄.

𑀲𑀼𑀫𑀦𑀲𑀗𑁆𑀔𑀸𑀢𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄 ¶ 𑀲𑀼𑀫𑀦𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄. 𑀬𑁄 𑀬𑁄 𑀭𑀲𑁄 𑀏𑀢𑀲𑁆𑀲𑀸𑀢𑀺 𑀬𑀁𑀬𑀁𑀭𑀲𑁄, 𑀑𑀤𑀦𑁄, 𑀢𑀁 𑀬𑀁𑀬𑀁𑀭𑀲𑀁, 𑀬𑀸𑀤𑀺𑀲𑀭𑀲𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀲𑀧𑀣𑀯𑀻, 𑀪𑀽𑀫𑀺𑀧𑀧𑁆𑀧𑀝𑀓𑁄, 𑀧𑀤𑀸𑀮𑀢𑀸 𑀘 ¶ 𑀧𑀭𑀺𑀪𑀼𑀢𑁆𑀢𑀸 𑀲𑀼𑀥𑀸𑀳𑀸𑀭𑁄 𑀯𑀺𑀬 𑀔𑀼𑀤𑁆𑀤𑀁 𑀯𑀺𑀦𑁄𑀤𑁂𑀢𑁆𑀯𑀸 𑀭𑀲𑀳𑀭𑀡𑀻𑀳𑀺 𑀭𑀲𑀫𑁂𑀯 𑀩𑁆𑀭𑀽𑀳𑁂𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀯𑀢𑁆𑀣𑀼𑀦𑁄 𑀲𑀼𑀔𑀼𑀫𑀪𑀸𑀯𑁂𑀦 𑀦𑀺𑀲𑁆𑀲𑀦𑁆𑀤𑀸, 𑀲𑀼𑀔𑀼𑀫𑀪𑀸𑀯𑁂𑀦𑁂𑀯 𑀕𑀳𑀡𑀺𑀦𑁆𑀥𑀦𑀫𑁂𑀯 𑀘 𑀳𑁄𑀦𑁆𑀢𑀺. 𑀑𑀤𑀦𑁄 𑀧𑀦 𑀧𑀭𑀺𑀪𑀼𑀢𑁆𑀢𑁄 𑀭𑀲𑀁 𑀯𑀟𑁆𑀠𑁂𑀦𑁆𑀢𑁄𑀧𑀺 𑀯𑀢𑁆𑀣𑀼𑀦𑁄 𑀑𑀴𑀸𑀭𑀺𑀓𑀪𑀸𑀯𑁂𑀦 𑀦𑀺𑀲𑁆𑀲𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀲𑁆𑀲𑀸𑀯𑀁, 𑀓𑀲𑀝𑀜𑁆𑀘 𑀉𑀧𑁆𑀧𑀸𑀤𑁂𑀢𑀻𑀢𑀺 𑀆𑀳 ‘‘𑀢𑀢𑁄 𑀧𑀪𑀼𑀢𑀺 𑀫𑀼𑀢𑁆𑀢𑀓𑀭𑀻𑀲𑀁 𑀲𑀜𑁆𑀚𑀸𑀬𑀢𑀻’’𑀢𑀺. 𑀧𑀼𑀭𑀺𑀫𑀢𑁆𑀢𑀪𑀸𑀯𑁂𑀲𑀼 𑀧𑀯𑀢𑁆𑀢𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀼𑀪𑀸𑀯𑁂𑀦 𑀬𑀸𑀯 𑀲𑀢𑁆𑀢𑀲𑀦𑁆𑀢𑀸𑀦𑁂 𑀓𑀸𑀫𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀯𑁂𑀕𑁄 𑀦 𑀲𑀫𑀺𑀢𑁄, 𑀦 𑀢𑀸𑀯 𑀩𑀮𑀯𑀓𑀸𑀫𑀭𑀸𑀕𑀽𑀧𑀦𑀺𑀲𑁆𑀲𑀬𑀸𑀦𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀤𑀸 𑀧𑀦𑀲𑁆𑀲 𑀯𑀺𑀘𑁆𑀙𑀺𑀦𑁆𑀦𑀢𑀸𑀬 𑀩𑀮𑀯𑀓𑀸𑀫𑀭𑀸𑀕𑁄 𑀮𑀤𑁆𑀥𑀸𑀯𑀲𑀭𑁄 𑀅𑀳𑁄𑀲𑀺, 𑀢𑀤𑀸 𑀢𑀤𑀼𑀧𑀦𑀺𑀲𑁆𑀲𑀬𑀸𑀦𑀺 𑀢𑀸𑀦𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂𑀲𑀼 𑀲𑀜𑁆𑀚𑀸𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀲𑀲𑁆𑀲…𑀧𑁂… 𑀧𑀸𑀢𑀼𑀪𑀯𑀢𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀭 𑀲𑀼𑀤’’𑀦𑁆𑀢𑀺𑀆𑀤𑀺.

𑀅𑀮𑀲𑀚𑀸𑀢𑀺𑀓𑀲𑁆𑀲𑀸𑀢𑀺 𑀲𑀚𑁆𑀚𑀼𑀓𑀫𑁂𑀯 𑀢𑀡𑁆𑀟𑀼𑀮𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀤𑀺𑀯𑀲𑀲𑁆𑀲𑀢𑁆𑀣𑀸𑀬 𑀕𑀳𑀡𑁂𑀦 𑀅𑀮𑀲𑀧𑀓𑀢𑀺𑀓𑀲𑁆𑀲.

𑀅𑀦𑀼𑀢𑁆𑀣𑀼𑀦𑀦𑁆𑀢𑀻𑀢𑀺 𑀅𑀦𑀼𑀲𑁄𑀘𑀦𑁆𑀢𑀺. 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫𑀸𑀢𑀺 𑀲𑀫𑀦𑀼𑀚𑀸𑀦𑁂𑀬𑁆𑀬𑀸𑀫. 𑀦𑁄𑀢𑀺 𑀅𑀫𑁆𑀳𑁂𑀲𑀼. 𑀲𑀫𑁆𑀫𑀸𑀢𑀺 𑀲𑀫𑁆𑀫𑀤𑁂𑀯 𑀬𑀣𑀸𑀭𑀳𑀁. 𑀔𑀻𑀬𑀺𑀢𑀩𑁆𑀩𑀦𑁆𑀢𑀺 𑀔𑀻𑀬𑀦𑀸𑀭𑀳𑀁 𑀦𑀺𑀦𑁆𑀤𑀦𑀻𑀬𑀁. 𑀕𑀭𑀳𑀺𑀢𑀩𑁆𑀩𑀦𑁆𑀢𑀺 𑀳𑀻𑀴𑁂𑀢𑀩𑁆𑀩𑀁.

𑀅𑀬𑀫𑁂𑀯 𑀪𑀕𑀯𑀸 𑀧𑀝𑀺𑀩𑀮𑁄 𑀧𑀕𑁆𑀕𑀳𑀦𑀺𑀕𑁆𑀕𑀳𑀁 𑀓𑀸𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀭𑀜𑁆𑀚𑁂𑀢𑀻𑀢𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀫𑁆𑀫𑀤𑁂𑀯 𑀭𑀫𑁂𑀢𑀺 𑀧𑀻𑀡𑁂𑀢𑀺.

𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳𑀁. 𑀯𑀻𑀲𑀢𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳𑀦𑁆𑀢𑀺 𑀓𑁂𑀘𑀺. 𑀲𑁂𑀲𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀸𑀮𑀢𑁄 𑀢𑁂𑀦 𑀲𑀫𑀧𑁆𑀧𑀫𑀸𑀡𑀸𑀦𑁂𑀯.

𑁪𑁦𑁭. 𑀫𑀳𑀸𑀥𑀸𑀭𑀸𑀳𑀻𑀢𑀺 𑀢𑀸𑀮𑀲𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸𑀳𑀺 𑀫𑀳𑀢𑀻𑀳𑀺 𑀔𑀸𑀭𑀼𑀤𑀓𑀥𑀸𑀭𑀸𑀳𑀺. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀲𑁄. 𑀧𑀣𑀯𑀺𑀢𑁄𑀢𑀺 𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀧𑀪𑀼𑀢𑀺. 𑀢𑁂𑀦 𑀳𑀺 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀉𑀤𑀓𑁂 ¶ 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀯𑀺𑀮𑀻𑀬𑀦𑁆𑀢𑁂𑀯, 𑀢𑀲𑁆𑀫𑀸 𑀧𑀣𑀯𑀻𑀲𑀦𑁆𑀥𑀸𑀭𑀼𑀤𑀓𑁂𑀦 𑀲𑀤𑁆𑀥𑀺𑀁 𑀏𑀓𑀽𑀤𑀓𑀫𑁂𑀯 𑀢𑀁 𑀳𑁄𑀢𑀻𑀢𑀺 𑀓𑁂𑀘𑀺. 𑀅𑀧𑀭𑁂 ‘‘𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀓𑁆𑀔𑀦𑁆𑀥𑀜𑁆𑀘 𑀉𑀤𑀓𑀲𑀦𑁆𑀥𑀸𑀭𑀓𑀁 𑀯𑀸𑀬𑀼𑀓𑁆𑀔𑀦𑁆𑀥𑀜𑁆𑀘 𑀅𑀦𑀯𑀲𑁂𑀲𑀢𑁄 𑀯𑀺𑀦𑀸𑀲𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀲𑀬𑀫𑁂𑀯 𑀏𑀓𑁄𑀖𑀪𑀽𑀢𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁. 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀧𑀭𑀺𑀢𑁆𑀢𑀸𑀪𑀅𑀧𑁆𑀧𑀫𑀸𑀡𑀸𑀪𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂, 𑀢𑀬𑀺𑀤𑀁 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺 𑀆𑀭𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀙𑀧𑀺 𑀩𑁆𑀭𑀳𑁆𑀫𑀮𑁄𑀓𑁂’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀲𑀼𑀪𑀓𑀺𑀡𑁆𑀳𑁂𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 ¶ 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀸 𑀉𑀧𑀮𑀓𑁆𑀔𑀡𑀁. 𑀧𑀭𑀺𑀢𑁆𑀢𑀸𑀲𑀼𑀪𑀅𑀧𑁆𑀧𑀫𑀸𑀡𑀸𑀲𑀼𑀪𑁂𑀧𑀺 𑀳𑀺 𑀆𑀳𑀘𑁆𑀘 𑀉𑀤𑀓𑀁 𑀢𑀺𑀝𑁆𑀞𑀢𑀺. 𑀳𑁂𑀝𑁆𑀞𑀸 ‘‘𑀆𑀪𑀲𑁆𑀲𑀭𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀦𑁆𑀢𑀺 𑀢𑀁 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀁. 𑀉𑀤𑀓𑀸𑀦𑀼𑀕𑀢𑀦𑁆𑀢𑀺 𑀉𑀤𑀓𑁂𑀦 𑀅𑀦𑀼𑀕𑀢𑀁 𑀨𑀼𑀝𑁆𑀞𑀁. 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸.

𑀇𑀤𑀫𑁂𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺 𑀇𑀤𑀁 𑀲𑀁𑀯𑀝𑁆𑀝𑀲𑀗𑁆𑀔𑀸𑀢𑀁 𑀓𑀧𑁆𑀧𑀲𑁆𑀲 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁.

𑁪𑁦𑁮. 𑀣𑀽𑀮𑀭𑀚𑁂 𑀅𑀧𑀕𑀢𑁂 𑀏𑀯 𑀧𑀣𑀯𑀻𑀦𑀺𑀲𑁆𑀲𑀺𑀢𑀁 𑀲𑀡𑁆𑀳𑀭𑀚𑀁 𑀅𑀧𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁄 𑀲𑀡𑁆𑀳𑀭𑀚’’𑀦𑁆𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀲𑀫𑀝𑁆𑀞𑀸𑀦𑁂 𑀞𑀺𑀢𑀫𑀳𑀸𑀭𑀼𑀓𑁆𑀔𑁂’’𑀢𑀺 𑀇𑀤𑀁 𑀧𑀞𑀫𑀁 𑀲𑀫𑀼𑀝𑁆𑀞𑀸𑀧𑁂𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀫𑁆𑀧𑀻𑀢𑀺 𑀫𑀳𑀸𑀧𑀣𑀯𑀺𑀬𑀸 𑀯𑀺𑀧𑀭𑀺𑀯𑀢𑁆𑀢𑀦𑁂𑀦𑁂𑀯 𑀯𑀺𑀧𑀭𑀺𑀯𑀢𑁆𑀢𑀺𑀢𑀁 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀫𑁆𑀧𑀺 𑀯𑀸𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺. 𑀢𑁂 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀤𑀬𑁄. 𑀅𑀪𑀺𑀳𑀦𑁆𑀢𑁆𑀯𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀲𑀺𑀦𑁂𑀭𑀼𑀁 𑀅𑀜𑁆𑀜𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀘𑀓𑁆𑀓𑀯𑀸𑀴𑀸𑀤𑀻𑀳𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀫𑀯𑀲𑁂𑀦 𑀖𑀝𑁆𑀝𑁂𑀢𑁆𑀯𑀸. 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀦𑁆𑀢𑀺 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀁, 𑀢𑀁𑀲𑀦𑁆𑀥𑀸𑀭𑀓𑀯𑀸𑀢𑀦𑁆𑀢𑀺 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑀺𑀦𑀲𑁆𑀲𑀢𑀺 𑀅𑀯𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀸𑀪𑀸𑀯𑀢𑁄.

𑁪𑁦𑁯. 𑀬𑀤𑀺𑀧𑀺 𑀲𑀗𑁆𑀔𑀸𑀭𑀸𑀦𑀁 𑀅𑀳𑁂𑀢𑀼𑀓𑁄 𑀲𑀭𑀲𑀦𑀺𑀭𑁄𑀥𑁄 𑀯𑀺𑀦𑀸𑀲𑀓𑀸𑀪𑀸𑀯𑀢𑁄, 𑀲𑀦𑁆𑀢𑀸𑀦𑀦𑀺𑀭𑁄𑀥𑁄 𑀧𑀦 𑀳𑁂𑀢𑀼𑀯𑀺𑀭𑀳𑀺𑀢𑁄 𑀦𑀢𑁆𑀣𑀺 𑀬𑀣𑀸 𑀢𑀁 𑀲𑀢𑁆𑀢𑀓𑀸𑀬𑁂𑀲𑀽𑀢𑀺. 𑀪𑀸𑀚𑀦𑀮𑁄𑀓𑀲𑁆𑀲𑀸𑀧𑀺 𑀲𑀳𑁂𑀢𑀼𑀓𑁂𑀦 𑀯𑀺𑀦𑀸𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀓𑀸𑀭𑀡𑀸 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺. 𑀇𑀢𑀭𑁄 𑀬𑀣𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀩𑀮𑁂𑀦 𑀧𑀞𑀫𑀁 𑀮𑁄𑀓𑁄 𑀯𑀺𑀯𑀝𑁆𑀝𑀢𑀺, 𑀏𑀯𑀁 𑀢𑁂𑀲𑀁 𑀧𑀸𑀧𑀩𑀮𑁂𑀦 𑀲𑀁𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑀼𑀲𑀮𑀫𑀽𑀮𑀓𑀸𑀭𑀡𑀸’’𑀢𑀺 𑀆𑀳. 𑀬𑀣𑀸 𑀳𑀺 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀅𑀥𑀺𑀓𑀪𑀸𑀯𑁂𑀦 𑀬𑀣𑀸𑀓𑁆𑀓𑀫𑀁 𑀭𑁄𑀕𑀦𑁆𑀢𑀭𑀓𑀧𑁆𑀧𑁄, 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁄, 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭𑀓𑀧𑁆𑀧𑁄𑀢𑀺 𑀇𑀫𑁂 𑀢𑀺𑀯𑀺𑀥𑀸 ¶ 𑀅𑀦𑁆𑀢𑀭𑀓𑀧𑁆𑀧𑀸 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 𑀚𑀸𑀬𑀦𑁆𑀢𑀺, 𑀏𑀯𑀫𑁂𑀢𑁂 𑀬𑀣𑀸𑀯𑀼𑀢𑁆𑀢𑀸 𑀢𑀬𑁄 𑀲𑀁𑀯𑀝𑁆𑀝𑀸 𑀭𑀸𑀕𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑁂𑀦𑁂𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑀼𑀲𑀮𑀫𑀽𑀮𑁂𑀲𑀼 𑀳𑀻’’𑀢𑀺𑀆𑀤𑀺𑀫𑀸𑀳. 𑀉𑀲𑁆𑀲𑀦𑁆𑀦𑀢𑀭𑁂𑀢𑀺 𑀅𑀢𑀺𑀯𑀺𑀬 𑀉𑀲𑁆𑀲𑀦𑁆𑀦𑁂. 𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀥𑀺𑀓𑀢𑀭𑀤𑁄𑀲𑁂𑀦 𑀯𑀺𑀬 𑀢𑀺𑀓𑁆𑀔𑀢𑀭𑁂𑀦 𑀔𑀸𑀭𑀼𑀤𑀓𑁂𑀦 𑀯𑀺𑀦𑀸𑀲𑁄 𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀻’’𑀢𑀺. 𑀧𑀸𑀓𑀝𑀲𑀢𑁆𑀢𑀼𑀲𑀤𑀺𑀲𑀲𑁆𑀲 𑀤𑁄𑀲𑀲𑁆𑀲 𑀅𑀕𑁆𑀕𑀺𑀲𑀤𑀺𑀲𑀢𑀸, 𑀅𑀧𑀸𑀓𑀝𑀲𑀢𑁆𑀢𑀼𑀲𑀤𑀺𑀲𑀲𑁆𑀲 𑀭𑀸𑀕𑀲𑁆𑀲 𑀔𑀸𑀭𑀼𑀤𑀓𑀲𑀤𑀺𑀲𑀢𑀸 𑀘 𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸, 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦𑀸’’𑀢𑀺 ¶ 𑀓𑁂𑀘𑀺𑀯𑀸𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀸𑀕𑁄 𑀲𑀢𑁆𑀢𑀸𑀦𑀁 𑀩𑀳𑀼𑀮𑀁 𑀧𑀯𑀢𑁆𑀢𑀢𑀻𑀢𑀺 𑀭𑀸𑀕𑀯𑀲𑁂𑀦 𑀩𑀳𑀼𑀲𑁄 𑀮𑁄𑀓𑀯𑀺𑀦𑀸𑀲𑁄.

𑁪𑁧𑁦. 𑀏𑀯𑀁 𑀧𑀲𑀗𑁆𑀕𑁂𑀦 𑀲𑀁𑀯𑀝𑁆𑀝𑀸𑀤𑀺𑀓𑁂 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀥𑀺𑀓𑀢𑀁 𑀦𑁂𑀲𑀁 𑀅𑀦𑀼𑀲𑁆𑀲𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁.

‘‘𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂’’𑀢𑀺 𑀇𑀤𑀁 𑀲𑀁𑀯𑀝𑁆𑀝𑀓𑀧𑁆𑀧𑀲𑁆𑀲 𑀆𑀤𑀺𑀢𑁄 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁧.𑁨𑁪𑁪) 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀳𑀺 𑀇𑀫𑀲𑁆𑀲 𑀓𑀢𑀺𑀧𑀬𑀁 𑀓𑀸𑀮𑀁 𑀪𑀯𑀸𑀤𑀻𑀲𑀼 𑀲𑀁𑀲𑀭𑀡𑀁 𑀉𑀧𑀮𑀩𑁆𑀪𑀢𑀻𑀢𑀺. 𑀲𑀁𑀯𑀝𑁆𑀝𑀓𑀧𑁆𑀧𑁂 𑀯𑀸 𑀯𑀝𑁆𑀝𑀫𑀸𑀦𑁂𑀲𑀼 𑀪𑀯𑀸𑀤𑀻𑀲𑀼 𑀇𑀫𑀲𑁆𑀲 𑀉𑀧𑀧𑀢𑁆𑀢𑀺 𑀅𑀳𑁄𑀲𑀺, 𑀢𑀁𑀤𑀲𑁆𑀲𑀦𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀘 𑀅𑀦𑀺𑀬𑀫𑀢𑁆𑀣𑁂𑀦 𑀇𑀢𑀭𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀪𑀯𑁂 𑀯𑀸𑀢𑀺𑀆𑀤𑀻𑀲𑀼 𑀓𑀸𑀫𑀸𑀤𑀺𑀪𑀯𑁂 𑀯𑀸 𑀅𑀡𑁆𑀟𑀚𑀸𑀤𑀺𑀬𑁄𑀦𑀺𑀬𑀸 𑀯𑀸 𑀤𑁂𑀯𑀸𑀤𑀺 𑀕𑀢𑀺𑀬𑀸 𑀯𑀸 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀆𑀤𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀔𑀢𑁆𑀢𑀺𑀬𑀸𑀤𑀺 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸. 𑀆𑀲𑀺𑀦𑁆𑀢𑀺 𑀅𑀳𑁄𑀲𑀺𑀁. 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀯𑀡𑁆𑀡𑀯𑀺𑀧𑀢𑁆𑀢𑀺𑀁 𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀕𑀺𑀳𑀺𑀓𑀸𑀮𑁂. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸 𑀢𑀸𑀧𑀲𑀸𑀤𑀺𑀓𑀸𑀮𑁂. 𑀲𑀸𑀫𑀺𑀲𑀸 𑀕𑁂𑀳𑀲𑁆𑀲𑀺𑀢𑀸 𑀲𑁄𑀫𑀦𑀲𑁆𑀲𑀸𑀤𑀬𑁄. 𑀦𑀺𑀭𑀸𑀫𑀺𑀲𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀯𑁂𑀓𑀚𑀲𑀫𑀸𑀥𑀺𑀚𑀲𑀼𑀔𑀸𑀤𑀻𑀦𑀁 𑀲𑀗𑁆𑀕𑀳𑁄.

‘‘𑀅𑀫𑀼𑀢𑁆𑀭𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄𑀬𑀁, 𑀩𑁆𑀬𑀸𑀧𑀦𑀺𑀘𑁆𑀙𑀸𑀮𑁄𑀧𑁄 𑀯𑀸, 𑀅𑀫𑀼𑀢𑁆𑀭 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀦𑁆𑀢𑀺 𑀏𑀢𑁆𑀣 ¶ 𑀆𑀭𑁄𑀳𑀦𑁆𑀢𑀲𑁆𑀲𑀸𑀢𑀺 𑀧𑀝𑀺𑀮𑁄𑀫𑀢𑁄 𑀜𑀸𑀡𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀆𑀭𑁄𑀳𑀦𑁆𑀢𑀲𑁆𑀲. 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀦 𑀅𑀦𑀼𑀲𑁆𑀲𑀭𑀡𑀁. 𑀇𑀢𑀻𑀢𑀺 𑀯𑀼𑀢𑁆𑀢𑀢𑁆𑀣𑀦𑀺𑀤𑀲𑁆𑀲𑀦𑀁. 𑀢𑀜𑁆𑀘 𑀔𑁄 𑀬𑀣𑀸𑀭𑀳𑀢𑁄, 𑀦 𑀬𑀣𑀸𑀦𑀼𑀧𑀼𑀩𑁆𑀩𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀫𑀕𑁄𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀯𑀡𑁆𑀡𑀸𑀤𑀻𑀳𑀻𑀢𑀺 𑀯𑀡𑁆𑀡𑀸𑀳𑀸𑀭𑀯𑁂𑀤𑀬𑀺𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑁂𑀳𑀺. 𑀑𑀤𑀸𑀢𑁄𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀏𑀯𑀫𑀸𑀤𑀺 𑀏𑀯𑀁𑀧𑀓𑀸𑀭𑀦𑀸𑀦𑀢𑁆𑀢𑀢𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀢𑀽𑀧𑀧𑀸𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁪𑁧𑁧. 𑀘𑀼𑀢𑀺𑀬𑀸𑀢𑀺 ¶ 𑀘𑀯𑀦𑁂. 𑀉𑀧𑀧𑀸𑀢𑁂𑀢𑀺 𑀉𑀧𑀧𑀚𑁆𑀚𑀦𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁, 𑀘𑀼𑀢𑀺𑀓𑁆𑀔𑀡𑀲𑀸𑀫𑀦𑁆𑀢𑀸, 𑀉𑀧𑀧𑀢𑁆𑀢𑀺𑀓𑁆𑀔𑀡𑀲𑀸𑀫𑀦𑁆𑀢𑀸 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸’’𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧). 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦𑁂𑀯 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘 𑀜𑀸𑀬𑀢𑀻𑀢𑀺 𑀆𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 ‘‘𑀲𑁄𑀢𑀥𑀸𑀢𑀽’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀘 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀇𑀥 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩’’𑀦𑁆𑀢𑀺, 𑀓𑀲𑀺𑀡𑀸𑀮𑁄𑀓𑀸𑀦𑀼𑀕𑁆𑀕𑀳𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸, 𑀲𑀬𑀁 𑀜𑀸𑀡𑀸𑀮𑁄𑀓𑀨𑀭𑀡𑀪𑀸𑀯𑁂𑀦 𑀘 𑀫𑀳𑀸𑀚𑀼𑀢𑀺𑀓𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀚𑀼𑀢𑀺𑀓𑀫𑁆𑀧𑀺 𑀳𑀺 ‘‘𑀤𑀺𑀩𑁆𑀩’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀤𑀺𑀩𑁆𑀩𑀫𑀺𑀤𑀁 𑀩𑁆𑀬𑀫𑁆𑀳’’𑀦𑁆𑀢𑀺𑀆𑀤𑀻𑀲𑀼. 𑀫𑀳𑀸𑀕𑀢𑀺𑀓𑀢𑁆𑀢𑀸𑀢𑀺 𑀫𑀳𑀦𑀻𑀬𑀕𑀫𑀦𑀢𑁆𑀢𑀸, 𑀯𑀺𑀫𑁆𑀳𑀬𑀦𑀻𑀬𑀧𑀯𑀢𑁆𑀢𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁆𑀳𑀬𑀦𑀻𑀬𑀸 𑀳𑀺𑀲𑁆𑀲 𑀧𑀯𑀢𑁆𑀢𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑀢𑁄. ‘‘𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸’’𑀢𑀺 𑀘 𑀳𑀻𑀦𑀽𑀧𑀫𑀸𑀤𑀲𑁆𑀲𑀦𑀁 𑀤𑁂𑀯𑀢𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀢𑁄𑀧𑀺 𑀇𑀫𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁆𑀢𑀸. 𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀸𑀬 𑀬𑁄𑀕𑀺𑀦𑁄 𑀧𑀭𑀺𑀓𑀫𑁆𑀫𑀓𑀭𑀡𑀁 𑀢𑀧𑁆𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀲𑁆𑀲 𑀅𑀢𑁆𑀣𑀢𑁄 𑀢𑀲𑁆𑀲 𑀯𑀺𑀚𑀬𑀺𑀘𑁆𑀙𑀸 𑀦𑀸𑀫 𑀳𑁄𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 𑀘 𑀇𑀤𑁆𑀥𑀺𑀫𑀸 𑀤𑁂𑀯𑀢𑀸𑀦𑀁 𑀯𑀘𑀦𑀕𑁆𑀕𑀳𑀡𑀓𑁆𑀔𑀫𑀦𑀥𑀫𑁆𑀫𑀤𑀸𑀦𑀯𑀲𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀬𑁄 𑀯𑀺𑀬 𑀤𑀸𑀦𑀕𑁆𑀕𑀳𑀡𑀮𑀓𑁆𑀔𑀡𑁂, 𑀯𑁄𑀳𑀸𑀭𑁂 𑀘 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀏𑀯𑀁 𑀯𑀺𑀳𑀸𑀭𑀯𑀺𑀚𑀬𑀺𑀘𑁆𑀙𑀸𑀯𑁄𑀳𑀸𑀭𑀚𑀼𑀢𑀺𑀕𑀢𑀺𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀇𑀫𑀲𑁆𑀲 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀪𑀸𑀯𑀲𑀺𑀤𑁆𑀥𑀺𑀢𑁄 ¶ . 𑀲𑀤𑁆𑀤𑀯𑀺𑀤𑀽 𑀘 𑀢𑁂𑀲𑀼 𑀏𑀯 𑀅𑀢𑁆𑀣𑁂𑀲𑀼 𑀤𑀺𑀯𑀼-𑀲𑀤𑁆𑀤𑀁 𑀇𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀭𑀽𑀧𑀤𑀲𑁆𑀲𑀦𑀪𑀸𑀯𑁂𑀦. 𑀘𑀓𑁆𑀔𑀼𑀦𑀸 𑀳𑀺 𑀲𑀢𑁆𑀢𑀸 𑀭𑀽𑀧𑀁 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀫𑀁𑀲𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀲𑀬𑀫𑁂𑀯 𑀢𑀢𑁄 𑀲𑀸𑀢𑀺𑀲𑀬𑀁 𑀘𑀓𑁆𑀔𑀼𑀓𑀺𑀘𑁆𑀘𑀓𑀸𑀭𑀻𑀢𑀺 𑀆𑀳 ‘‘𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀽’’𑀢𑀺. ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺 𑀧𑀭𑀢𑁄 𑀉𑀧𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀢𑁄 𑀏𑀢𑁆𑀣𑁂𑀯𑀸𑀬𑀁 𑀲𑀢𑁆𑀢𑁄 𑀉𑀘𑁆𑀙𑀺𑀦𑁆𑀦𑁄, 𑀏𑀯𑀫𑀺𑀢𑀭𑁂𑀧𑀻𑀢𑀺. 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺 𑀮𑀸𑀪𑀻 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀓𑁄 𑀯𑀺𑀬. 𑀩𑀼𑀤𑁆𑀥𑀧𑀼𑀢𑁆𑀢𑀸 𑀧𑀲𑁆𑀲𑀦𑁆𑀢𑀺𑀬𑁂𑀯𑀸𑀢𑀺 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁, 𑀦 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀁. 𑀏𑀯𑀁 𑀳𑀺 𑀚𑀬𑀤𑁆𑀤𑀺𑀲𑀚𑀸𑀢𑀓𑀸𑀤𑀻𑀳𑀺 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄 𑀳𑁄𑀢𑀺.

𑀫𑀦𑀼𑀲𑁆𑀲𑀸𑀦𑀁 ¶ 𑀇𑀤𑀦𑁆𑀢𑀺 𑀫𑀸𑀦𑀼𑀲𑀓𑀁, 𑀫𑀦𑀼𑀲𑁆𑀲𑀸𑀦𑀁 𑀕𑁄𑀘𑀭𑀪𑀽𑀢𑀁 𑀭𑀽𑀧𑀸𑀭𑀫𑁆𑀫𑀡𑀁. 𑀢𑀤𑀜𑁆𑀜𑀲𑁆𑀲 𑀧𑀦 𑀤𑀺𑀩𑁆𑀩𑀢𑀺𑀭𑁄𑀳𑀺𑀢𑀸𑀢𑀺𑀲𑀼𑀔𑀼𑀫𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀲𑁆𑀲 𑀤𑀲𑁆𑀲𑀦𑀢𑁄 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁. 𑀏𑀯𑀭𑀽𑀧𑀜𑁆𑀘 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦𑀸’’𑀢𑀺. 𑀏𑀯𑀁 𑀯𑀺𑀲𑀬𑀫𑀼𑀔𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑀬𑀻𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑀼𑀲𑀓𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀫𑀁𑀲𑀘𑀓𑁆𑀔𑀸𑀢𑀺𑀓𑁆𑀓𑀫𑁄 𑀢𑀲𑁆𑀲 𑀓𑀺𑀘𑁆𑀘𑀸𑀢𑀺𑀓𑁆𑀓𑀫𑁂𑀦𑁂𑀯 𑀤𑀝𑁆𑀞𑀩𑁆𑀩𑁄.

𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦𑀧𑀺. 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸 𑀔𑀡𑀲𑁆𑀲 𑀅𑀢𑀺𑀇𑀢𑁆𑀢𑀭𑀢𑀸𑀬 𑀅𑀢𑀺𑀲𑀼𑀔𑀼𑀫𑀢𑀸𑀬 𑀓𑁂𑀲𑀜𑁆𑀘𑀺 𑀭𑀽𑀧𑀲𑁆𑀲. 𑀅𑀧𑀺𑀘 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀢𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀽𑀢𑀁, 𑀦 𑀘 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑁂𑀳𑀺 𑀯𑀺𑀦𑀸 𑀫𑀳𑀕𑁆𑀕𑀢𑀲𑁆𑀲 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀪𑀺𑀚𑁆𑀚𑀫𑀸𑀦𑀁 𑀯𑀸. 𑀢𑀲𑁆𑀫𑀸 ‘‘𑀘𑀼𑀢𑀽𑀧𑀧𑀸𑀢𑀓𑁆𑀔𑀡𑁂 𑀭𑀽𑀧𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁. 𑀬𑀤𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑀫𑁂𑀯, 𑀅𑀣 𑀓𑀲𑁆𑀫𑀸 ‘‘𑀲𑀢𑁆𑀢𑁂 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀭𑀽𑀧𑀤𑀲𑁆𑀲𑀦𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀕𑀳𑀡𑀲𑁆𑀲 𑀯𑀸 𑀓𑀸𑀭𑀡𑀪𑀸𑀯𑀢𑁄 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺𑀧𑀺 𑀓𑁂𑀘𑀺. 𑀢𑁂 𑀘𑀯𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀭𑀽𑀧𑁂𑀢𑀺 𑀦 𑀘𑀼𑀢𑀽𑀧𑀧𑀸𑀢𑀓𑁆𑀔𑀡𑀲𑀫𑀗𑁆𑀕𑀺𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑁄𑀳𑀽𑀧𑀦𑀺𑀲𑁆𑀲𑀬𑀁 𑀦𑀸𑀫 𑀓𑀫𑁆𑀫𑀁 𑀦𑀺𑀳𑀻𑀦𑀁 𑀦𑀺𑀳𑀻𑀦𑀨𑀮𑀁 𑀳𑁄𑀢𑀻𑀢𑀺 𑀆𑀳 ‘‘𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑀩𑁆𑀩𑀺𑀧𑀭𑀻𑀢𑁂𑀢𑀺 𑀢𑀲𑁆𑀲 𑀳𑀻𑀴𑀺𑀢𑀸𑀤𑀺𑀪𑀸𑀯𑀲𑁆𑀲 𑀯𑀺𑀧𑀭𑀻𑀢𑁂 ¶ , 𑀅𑀳𑀻𑀴𑀺𑀢𑁂 𑀅𑀦𑁄𑀳𑀻𑀴𑀺𑀢𑁂 𑀅𑀦𑁄𑀜𑁆𑀜𑀸𑀢𑁂 𑀅𑀦𑀯𑀜𑁆𑀜𑀸𑀢𑁂 𑀘𑀺𑀢𑁆𑀢𑀻𑀓𑀢𑁂𑀢𑀺 𑀅𑀢𑁆𑀣𑁄. 𑀲𑀼𑀯𑀡𑁆𑀡𑁂𑀢𑀺 𑀲𑀼𑀦𑁆𑀤𑀭𑀯𑀡𑁆𑀡𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀅𑀲𑀼𑀦𑁆𑀤𑀭𑀯𑀡𑁆𑀡𑁂. 𑀲𑀸 𑀧𑀦𑀸𑀬𑀁 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸 𑀬𑀣𑀸𑀓𑁆𑀓𑀫𑀁 𑀓𑀫𑁆𑀫𑀲𑁆𑀲 𑀅𑀤𑁄𑀲𑀤𑁄𑀲𑀽𑀧𑀦𑀺𑀲𑁆𑀲𑀬𑀢𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺. 𑀲𑀼𑀦𑁆𑀤𑀭𑀁 𑀕𑀢𑀺𑀁 𑀕𑀢𑀸 𑀲𑀼𑀕𑀢𑀸𑀢𑀺 𑀆𑀳 ‘‘𑀲𑀼𑀕𑀢𑀺𑀕𑀢𑁂’’𑀢𑀺, 𑀲𑀼𑀕𑀢𑀺𑀁 𑀉𑀧𑀧𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀅𑀮𑁄𑀪𑀚𑁆𑀛𑀸𑀲𑀬𑀸 𑀲𑀢𑁆𑀢𑀸 𑀯𑀤𑀜𑁆𑀜𑀽 𑀯𑀺𑀕𑀢𑀫𑀘𑁆𑀙𑁂𑀭𑀸 𑀅𑀮𑁄𑀪𑀽𑀧𑀦𑀺𑀲𑁆𑀲𑀬𑁂𑀦 𑀓𑀫𑁆𑀫𑀼𑀦𑀸 𑀲𑀼𑀪𑀕𑀸 𑀲𑀫𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂’’𑀢𑀺. 𑀤𑀼𑀓𑁆𑀔𑀁 𑀕𑀢𑀺𑀁 𑀕𑀢𑀸 𑀤𑀼𑀕𑁆𑀕𑀢𑀸𑀢𑀺 𑀆𑀳 ‘‘𑀤𑀼𑀕𑁆𑀕𑀢𑀺𑀕𑀢𑁂’’𑀢𑀺. 𑀮𑁄𑀪𑀚𑁆𑀛𑀸𑀲𑀬𑀸 𑀲𑀢𑁆𑀢𑀸 𑀮𑀼𑀤𑁆𑀥𑀸 𑀫𑀘𑁆𑀙𑀭𑀺𑀦𑁄 𑀮𑁄𑀪𑀽𑀧𑀦𑀺𑀲𑁆𑀲𑀬𑁂𑀦 𑀓𑀫𑁆𑀫𑀼𑀦𑀸 𑀤𑀼𑀕𑁆𑀕𑀢𑀸 𑀤𑀼𑀭𑀼𑀧𑁂𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂’’𑀢𑀺.

𑀉𑀧𑀘𑀺𑀢𑀦𑁆𑀢𑀺 𑀨𑀮𑀸𑀯𑀳𑀪𑀸𑀯𑁂𑀦 𑀓𑀢𑀁. 𑀬𑀣𑀸 𑀓𑀢𑀁 𑀳𑀺 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀁. 𑀘𑀯𑀫𑀸𑀦𑁂𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀲𑀬𑀫𑀼𑀔𑁂𑀦 𑀯𑀺𑀲𑀬𑀻𑀩𑁆𑀬𑀸𑀧𑀸𑀭𑀫𑀸𑀳. 𑀧𑀼𑀭𑀺𑀫𑁂𑀳𑀻𑀢𑀺 𑀯𑀸 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀤𑀻𑀳𑀻𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ¶ . 𑀢𑀲𑁆𑀫𑀸 ‘‘𑀤𑀺𑀩𑁆𑀩𑁂𑀦…𑀧𑁂… 𑀧𑀲𑁆𑀲𑀢𑀻’’𑀢𑀺 𑀇𑀫𑁂𑀳𑀺, ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀘 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀫𑀺𑀦𑀸 𑀧𑀦 𑀧𑀤𑁂𑀦𑀸𑀢𑀺 ‘‘𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀯𑀸𑀓𑁆𑀬𑁂𑀦. 𑀇𑀥 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀘 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻 𑀦𑁂𑀭𑀬𑀺𑀓𑁂 𑀘 𑀲𑀢𑁆𑀢𑁂 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀞𑀺𑀢𑁄. 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀢𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀜𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀓𑀺𑀁 𑀦𑀼 𑀔𑁄𑀢𑀺𑀆𑀤𑀺 𑀫𑀦𑀲𑀺𑀓𑀸𑀭𑀯𑀺𑀥𑀺𑀤𑀲𑁆𑀲𑀦𑀁. 𑀏𑀯𑀁 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀫𑁂𑀯. ‘‘𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀁 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀯𑀺𑀦𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀘𑁂𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀫𑀳𑀕𑁆𑀕𑀢𑀪𑀸𑀯𑁄 𑀏𑀯 𑀦 𑀲𑀺𑀬𑀸. 𑀤𑁂𑀯𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑁂𑀭𑀬𑀺𑀓𑀤𑁂𑀯𑀕𑁆𑀕𑀳𑀡𑀁 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀆𑀓𑀗𑁆𑀔𑀫𑀸𑀦𑁄 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 ¶ 𑀅𑀜𑁆𑀜𑀕𑀢𑀺𑀓𑁂𑀲𑀼𑀧𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺𑀬𑁂𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧), ‘‘𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧) 𑀘. 𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁. 𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀺𑀢𑁆𑀢𑀮𑀢𑀸𑀯𑀦𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀬𑀣𑀸 𑀘𑀺𑀫𑀲𑁆𑀲𑀸𑀢𑀺 𑀬𑀣𑀸 𑀘 𑀇𑀫𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀺, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀻𑀢𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀸𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀻’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 𑀦𑀺𑀭𑀬𑀸𑀤𑀺𑀅𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸, 𑀦𑁂𑀭𑀬𑀺𑀓𑀸𑀤𑀺𑀓𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀢𑁂𑀳𑀺 𑀧𑀼𑀩𑁆𑀩𑁂 𑀆𑀬𑀽𑀳𑀺𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀸𑀤𑀺𑀓𑀁 𑀓𑀫𑁆𑀫𑀁 𑀢𑀸𑀤𑀺𑀲𑁂𑀦 𑀲𑀫𑀸𑀤𑀸𑀦𑁂𑀦, 𑀢𑀚𑁆𑀚𑁂𑀦 𑀘 𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀓𑁆𑀔𑀢𑁂 𑀘𑀺𑀢𑁆𑀢𑁂 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺, 𑀏𑀯𑀁 𑀬𑀲𑁆𑀲 𑀬𑀲𑁆𑀲 𑀲𑀢𑁆𑀢𑀲𑁆𑀲 𑀲𑀫𑀦𑀦𑁆𑀢𑀭𑀸 𑀅𑀦𑀸𑀕𑀢𑀁 𑀅𑀢𑁆𑀢𑀪𑀸𑀯𑀁 𑀜𑀸𑀢𑀼𑀓𑀸𑀫𑁄 𑀢𑀁 𑀢𑀁 𑀑𑀤𑀺𑀲𑁆𑀲 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀅𑀢𑀻𑀢𑁂, 𑀏𑀢𑀭𑀳𑀺 𑀯𑀸 𑀆𑀬𑀽𑀳𑀺𑀢𑀁 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀤𑀺𑀲𑁆𑀯𑀸 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀅𑀦𑀸𑀕𑀢𑀁 𑀅𑀢𑁆𑀢𑀪𑀸𑀯𑀁 𑀜𑀸𑀢𑀼𑀓𑀸𑀫𑁄 𑀢𑀸𑀤𑀺𑀲𑁂𑀦 𑀲𑀫𑀸𑀤𑀸𑀦𑁂𑀦, 𑀢𑀚𑁆𑀚𑁂𑀦 𑀘 𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀓𑁆𑀔𑀢𑁂 𑀘𑀺𑀢𑁆𑀢𑁂 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. 𑀏𑀲𑁂𑀯 𑀦𑀬𑁄 𑀢𑀢𑁄 𑀧𑀭𑁂𑀲𑀼𑀧𑀺 ¶ 𑀅𑀢𑁆𑀢𑀪𑀸𑀯𑁂𑀲𑀼. 𑀏𑀢𑀁 𑀅𑀦𑀸𑀕𑀢𑀁𑀲𑀜𑀸𑀡𑀁 𑀦𑀸𑀫. 𑀬𑀲𑁆𑀫𑀸 𑀏𑀢𑀁 𑀤𑁆𑀯𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀲𑀢𑀺𑀬𑁂𑀯 𑀲𑀺𑀚𑁆𑀛𑀢𑀺, 𑀦𑀸𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀻’’𑀢𑀺.

𑀓𑀸𑀬𑁂𑀦 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀤𑀼𑀝𑁆𑀞𑀁 𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀘𑁄𑀧𑀦𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺. 𑀇𑀢𑀭𑁂𑀲𑀽𑀢𑀺 𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀲𑀼. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀓𑀢𑀽𑀧𑀘𑀺𑀢𑀁, 𑀅𑀲𑀢𑀺𑀲𑁆𑀲 𑀅𑀦𑁆𑀢𑀭𑀼𑀧𑀘𑁆𑀙𑁂𑀤𑁂 𑀯𑀺𑀧𑀸𑀓𑀸𑀭𑀳𑀪𑀸𑀯𑀲𑁆𑀲 𑀅𑀯𑀺𑀕𑀘𑁆𑀙𑀦𑀢𑁄 𑀲𑁄 𑀢𑁂𑀦 𑀲𑀳𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸’’𑀢𑀺. ‘‘𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬 𑀧𑀼𑀢𑁆𑀢𑀸𑀦𑀁, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑀺𑀬 𑀘 𑀦𑀺𑀲𑁆𑀲𑀺𑀢𑀓𑀸𑀦𑀁 𑀅𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀕𑀭𑀳𑀓𑀸 𑀉𑀧𑀯𑀸𑀤𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀕𑀼𑀡𑀧𑀭𑀺𑀥𑀁𑀲𑀦𑁂𑀦𑀸𑀢𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀕𑀼𑀡𑀸𑀦𑀁 𑀯𑀺𑀤𑁆𑀥𑀁𑀲𑀦𑁂𑀦, 𑀯𑀺𑀦𑀸𑀲𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ¶ 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸𑀧𑀺 𑀉𑀧𑀯𑀸𑀤𑁄 𑀕𑀼𑀡𑀧𑀭𑀺𑀥𑀁𑀲𑀦𑀫𑁂𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁. 𑀕𑀼𑀡𑀸𑀢𑀺 𑀧𑀦𑁂𑀢𑁆𑀣 𑀛𑀸𑀦𑀸𑀤𑀺𑀯𑀺𑀲𑁂𑀲𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀻𑀮𑀧𑀭𑀺𑀥𑀁𑀲𑀦𑀁 𑀯𑀺𑀲𑀼𑀁 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄’’𑀢𑀺𑀆𑀤𑀺. 𑀲𑀫𑀡𑀥𑀫𑁆𑀫𑁄𑀢𑀺 𑀘 𑀲𑀻𑀮𑀲𑀁𑀬𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀚𑀸𑀦𑀁 𑀯𑀸𑀢𑀺 𑀬𑀁 𑀉𑀧𑀯𑀤𑀢𑀺, 𑀢𑀲𑁆𑀲 𑀅𑀭𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄 𑀯𑀸. 𑀅𑀚𑀸𑀦𑀁 𑀯𑀸𑀢𑀺 𑀅𑀚𑀸𑀦𑀦𑁆𑀢𑁄 𑀯𑀸. 𑀚𑀸𑀦𑀦𑀁 𑀅𑀚𑀸𑀦𑀦𑀁 𑀘𑁂𑀢𑁆𑀣 𑀅𑀧𑁆𑀧𑀫𑀸𑀡𑀁, 𑀅𑀭𑀺𑀬𑀪𑀸𑀯𑁄 𑀏𑀯 𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀻’’𑀢𑀺. ‘‘𑀅𑀭𑀺𑀬𑁄’’𑀢𑀺 𑀧𑀦 𑀅𑀚𑀸𑀦𑀢𑁄 𑀅𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲𑁂𑀯 𑀢𑀢𑁆𑀣 𑀅𑀭𑀺𑀬𑀕𑀼𑀡𑀸𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑀲𑁆𑀲 𑀕𑀼𑀡𑀧𑀭𑀺𑀥𑀁𑀲𑀦𑀁 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀭𑀺𑀬𑀽𑀧𑀯𑀸𑀤𑁄 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺 𑀔𑀫𑀸𑀧𑀦𑁂𑀦, 𑀦 𑀅𑀦𑀦𑁆𑀢𑀭𑀺𑀬𑀁 𑀯𑀺𑀬 𑀅𑀢𑁂𑀓𑀺𑀘𑁆𑀙𑀁.

𑀭𑀼𑀚𑁆𑀛𑀢𑀻𑀢𑀺 𑀢𑀼𑀤𑀢𑀺, 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀁 𑀣𑁂𑀭𑀁, 𑀢𑀁 𑀯𑀸 𑀓𑀺𑀭𑀺𑀬𑀁. 𑀚𑀸𑀦𑀦𑁆𑀢𑁄 𑀏𑀯 𑀣𑁂𑀭𑁄 ‘‘𑀅𑀢𑁆𑀣𑀺 𑀢𑁂, 𑀆𑀯𑀼𑀲𑁄, 𑀧𑀢𑀺𑀝𑁆𑀞𑀸’’𑀢𑀺 𑀧𑀼𑀘𑁆𑀙𑀺. 𑀇𑀢𑀭𑁄𑀧𑀺 𑀲𑀘𑁆𑀘𑀸𑀪𑀺𑀲𑀫𑀬𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀺 𑀆𑀳 ‘‘𑀲𑁄𑀢𑀸𑀧𑀦𑁆𑀦𑁄 𑀅𑀳’’𑀦𑁆𑀢𑀺. 𑀣𑁂𑀭𑁄 𑀢𑀁 𑀓𑀭𑀼𑀡𑀸𑀬𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀆𑀯𑀺𑀓𑀸𑀲𑀺.

𑀲𑀘𑁂 𑀦𑀯𑀓𑀢𑀭𑀸 𑀳𑁄𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽. 𑀲𑀫𑁆𑀫𑀼𑀔𑀸 𑀅𑀔𑀫𑀸𑀧𑁂𑀦𑁆𑀢𑁂𑀧𑀻𑀢𑀺 𑀧𑀼𑀭𑀢𑁄 𑀔𑀫𑀸𑀧𑀦𑁂 𑀅𑀲𑀫𑁆𑀪𑀯𑀦𑁆𑀢𑁂𑀧𑀺. ‘‘𑀅𑀔𑀫𑀦𑁆𑀢𑁂’’𑀢𑀺 𑀯𑀸 𑀧𑀸𑀞𑁄. 𑀢𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀦𑁆𑀢𑀺 𑀧𑀽𑀚𑀸𑀓𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳.

𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 ¶ 𑀲𑀫𑀸𑀤𑀸𑀦𑀸𑀦𑀺, 𑀓𑀫𑁆𑀫𑀸𑀦𑀺 𑀲𑀫𑀸𑀤𑀸𑀦𑀸𑀦𑀺 𑀬𑁂𑀲𑀁, 𑀢𑁂 𑀓𑀫𑁆𑀫𑀲𑀫𑀸𑀤𑀸𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀫𑁆𑀫𑀲𑀫𑀸𑀤𑀸𑀦𑀸, 𑀳𑁂𑀢𑀼𑀅𑀢𑁆𑀣𑀁 𑀯𑀸 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑁂 𑀓𑀫𑁆𑀫𑁂𑀲𑀼 𑀲𑀫𑀸𑀤𑀸𑀧𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑀬𑀺𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀕𑁆𑀕𑀫𑀕𑁆𑀕𑀝𑁆𑀞𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀜𑁆𑀜𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀏𑀯𑀁𑀲𑀫𑁆𑀧𑀤𑀦𑁆𑀢𑀺 𑀬𑀣𑀸 𑀢𑀁 𑀅𑀯𑀲𑁆𑀲𑀫𑁆𑀪𑀸𑀯𑀻, 𑀏𑀯𑀫𑀺𑀤𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀅𑀭𑀺𑀬𑀽𑀧𑀯𑀸𑀤𑀁 𑀲𑀦𑁆𑀥𑀸𑀬 ‘‘𑀧𑀼𑀦 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀦 𑀯𑀓𑁆𑀔𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫, ‘‘𑀧𑀼𑀦 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀢𑁆𑀢𑀁 𑀧𑀚𑀳𑀢𑀺 𑀦𑀸𑀫, ‘‘𑀧𑀼𑀦 𑀏𑀯𑀭𑀽𑀧𑀺𑀁 𑀤𑀺𑀝𑁆𑀞𑀺𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀚𑀳𑀦𑁆𑀢𑁄 𑀤𑀺𑀝𑁆𑀞𑀺𑀁 𑀧𑀚𑀳𑀢𑀺 𑀦𑀸𑀫, 𑀢𑀣𑀸 𑀅𑀓𑀭𑁄𑀦𑁆𑀢𑁄 𑀦𑁂𑀯 𑀧𑀚𑀳𑀢𑀺, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀬𑀣𑀸𑀪𑀢𑀁 ¶ 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂𑀢𑀺 𑀬𑀣𑀸 𑀦𑀺𑀭𑀬𑀧𑀸𑀮𑁂𑀳𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀬𑁂 𑀞𑀧𑀺𑀢𑁄, 𑀏𑀯𑀁 𑀦𑀺𑀭𑀬𑁂 𑀞𑀧𑀺𑀢𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀺, 𑀬𑀢𑁄 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑁄𑀧𑀺 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺.

‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺, 𑀅𑀬𑀜𑁆𑀘𑁂𑀯 𑀓𑀸𑀬𑁄, 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁪𑁭) 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀇𑀥 𑀓𑀸𑀬-𑀲𑀤𑁆𑀤𑁄 𑀔𑀦𑁆𑀥𑀧𑀜𑁆𑀘𑀓𑀯𑀺𑀲𑀬𑁄𑀢𑀺 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸’’𑀢𑀺. 𑀅𑀯𑀻𑀢𑀭𑀸𑀕𑀲𑁆𑀲 𑀫𑀭𑀡𑀢𑁄 𑀧𑀭𑀁 𑀦𑀸𑀫 𑀪𑀯𑀦𑁆𑀢𑀭𑀽𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀓𑁆𑀔𑀦𑁆𑀥𑀕𑁆𑀕𑀳𑀡𑁂’’𑀢𑀺. 𑀬𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀉𑀧𑀘𑁆𑀙𑁂𑀤𑁂𑀦𑁂𑀯 𑀓𑀸𑀬𑁄 𑀪𑀺𑀚𑁆𑀚𑀢𑀻𑀢𑀺 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸’’𑀢𑀺.

𑀏𑀢𑀺 𑀇𑀫𑀲𑁆𑀫𑀸 𑀲𑀼𑀔𑀦𑁆𑀢𑀺 𑀅𑀬𑁄, 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸’’𑀢𑀺. 𑀅𑀬𑀦𑁆𑀢𑀺 𑀏𑀢𑀲𑁆𑀫𑀸 𑀲𑀼𑀔𑀸𑀦𑀻𑀢𑀺 𑀆𑀬𑁄, 𑀧𑀼𑀜𑁆𑀜𑀓𑀫𑁆𑀫𑀸𑀤𑀺𑀲𑀼𑀔𑀲𑀸𑀥𑀦𑀁. 𑀢𑁂𑀦𑀸𑀳 ‘‘𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸’’𑀢𑀺. 𑀇𑀬𑀢𑀺 𑀅𑀲𑁆𑀲𑀸𑀤𑀺𑀬𑀢𑀻𑀢𑀺 𑀅𑀬𑁄, 𑀅𑀲𑁆𑀲𑀸𑀤𑁄𑀢𑀺 𑀆𑀳 ‘‘𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄’’𑀢𑀺.

𑀦𑀸𑀕𑀭𑀸𑀚𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀲𑀼𑀭𑀲𑀤𑀺𑀲𑀦𑁆𑀢𑀺 𑀧𑁂𑀢𑀸𑀲𑀼𑀭𑀲𑀤𑀺𑀲𑀁. 𑀲𑁄𑀢𑀺 𑀅𑀲𑀼𑀭𑀓𑀸𑀬𑁄. 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀲𑀫𑁆𑀧𑀢𑁆𑀢𑀺𑀲𑀫𑀼𑀲𑁆𑀲𑀬𑁂𑀳𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀲𑀼𑀝𑁆𑀞𑀼 𑀘𑀭𑀺𑀢𑀁, 𑀲𑁄𑀪𑀦𑀁 𑀯𑀸 𑀘𑀭𑀺𑀢𑀁 𑀅𑀦𑀯𑀚𑁆𑀚𑀢𑁆𑀢𑀸’’𑀢𑀺𑀆𑀤𑀺𑀦𑀸 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀧𑀭𑀺𑀬𑀸𑀬𑁂𑀦.

𑀦𑀺𑀕𑀫𑀦𑀯𑀘𑀦𑀁 ¶ 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀦𑁆𑀢𑀺 𑀓𑀢𑁆𑀯𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄𑀢𑀺 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸…𑀧𑁂… 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀲𑀗𑁆𑀔𑁂𑀧𑀢𑁆𑀣𑁄.

𑁪𑁧𑁨. 𑀓𑀲𑀺𑀡𑀸𑀭𑀫𑁆𑀫𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀲𑀺𑀡𑀸𑀦𑀁 𑀯𑀲𑁂𑀦 𑀓𑀲𑀺𑀡𑀸𑀭𑀫𑁆𑀫𑀡𑀁. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 ‘‘𑀘𑀼𑀤𑁆𑀤𑀲𑀯𑀺𑀥𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀪𑀽𑀫𑀺𑀧𑀸𑀤𑀧𑀤𑀫𑀽𑀮𑀲𑀫𑁆𑀧𑀸𑀤𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀪𑀺𑀫𑀼𑀔𑀁 𑀧𑁂𑀲𑀦𑀸𑀭𑀳𑀁 𑀧𑁂𑀲𑀦𑀬𑁄𑀕𑁆𑀕𑀁 𑀓𑀢𑁆𑀯𑀸. 𑀆𑀲𑀦𑁆𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑀻𑀧𑀪𑀽𑀢𑀁 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀕𑀼𑀡𑀢𑀭𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀜𑁆𑀘 𑀯𑀟𑁆𑀠𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀉𑀧𑀘𑀸𑀭𑀚𑁆𑀛𑀸𑀦𑀕𑁄𑀘𑀭𑀁 𑀓𑀢𑁆𑀯𑀸 ¶ 𑀯𑀟𑁆𑀠𑁂𑀢𑁆𑀯𑀸 𑀞𑀧𑁂𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀟𑁆𑀠𑀺𑀢𑁂 𑀓𑀲𑀺𑀡𑀸𑀭𑀫𑁆𑀫𑀡𑁂. 𑀅𑀧𑁆𑀧𑀦𑀸𑀢𑀺 𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀸. 𑀦 𑀳𑀺 𑀅𑀓𑀢𑀧𑀭𑀺𑀓𑀫𑁆𑀫𑀲𑁆𑀲 𑀅𑀪𑀺𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀦𑀸 𑀇𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀬𑀁 𑀳𑁄𑀢𑀻’’𑀢𑀺, 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀭𑀺𑀓𑀫𑁆𑀫𑀦𑀺𑀲𑁆𑀲𑀬𑀦𑁆𑀢𑀺 𑀧𑀭𑀺𑀓𑀫𑁆𑀫𑀲𑁆𑀲 𑀢𑀁 𑀓𑀲𑀺𑀡𑀸𑀭𑀫𑁆𑀫𑀡𑀁 𑀅𑀧𑀲𑁆𑀲𑀬𑁄 𑀦 𑀳𑁄𑀢𑀺. 𑀢𑀣𑀸 𑀲𑀢𑀺 𑀭𑀽𑀧𑀤𑀲𑁆𑀲𑀦𑀁 𑀦 𑀲𑀺𑀬𑀸. 𑀇𑀫𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑁂𑀚𑁄𑀓𑀲𑀺𑀡𑀸𑀤𑀻𑀲𑀼 𑀢𑀻𑀲𑀼 𑀓𑀲𑀺𑀡𑁂𑀲𑀼. 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀼𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀉𑀧𑀘𑀸𑀭𑀚𑁆𑀛𑀸𑀦𑀧𑀯𑀢𑁆𑀢𑀺𑀬𑀸 𑀳𑀺 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺. 𑀢𑀢𑁆𑀣𑀸𑀢𑀺 𑀓𑀲𑀺𑀡𑀦𑀺𑀤𑁆𑀤𑁂𑀲𑁂.

𑀅𑀦𑁆𑀢𑁄𑀬𑁂𑀯 𑀭𑀽𑀧𑀕𑀢𑀁 𑀧𑀲𑁆𑀲𑀺𑀢𑀩𑁆𑀩𑀁 𑀦 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀅𑀢𑀺𑀓𑁆𑀓𑀫𑀢𑀻𑀢𑀺 𑀇𑀥 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀓𑀲𑀺𑀡𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀢𑀁 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀦 𑀧𑀯𑀢𑁆𑀢𑀢𑀺. 𑀓𑀲𑀺𑀡𑀸𑀮𑁄𑀓𑀯𑀲𑁂𑀦 𑀘 𑀭𑀽𑀧𑀕𑀢𑀤𑀲𑁆𑀲𑀦𑀁, 𑀓𑀲𑀺𑀡𑀸𑀮𑁄𑀓𑁄 𑀘 𑀧𑀭𑀺𑀓𑀫𑁆𑀫𑀯𑀲𑁂𑀦𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀧𑀭𑀺𑀓𑀫𑁆𑀫𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀬𑀸 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁄 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀫𑁆𑀧𑀺 𑀦 𑀤𑀺𑀲𑁆𑀲𑀢𑀻’’𑀢𑀺. 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀅𑀢𑀺𑀓𑁆𑀓𑀫𑀢𑀺, 𑀧𑀭𑀺𑀓𑀫𑁆𑀫𑀫𑀢𑀺𑀓𑁆𑀓𑀦𑁆𑀢𑀲𑁆𑀲 𑀓𑀲𑀺𑀡𑀸𑀭𑀫𑁆𑀫𑀡𑀁 𑀜𑀸𑀡𑀁 𑀦 𑀳𑁄𑀢𑀻𑀢𑀺 𑀭𑀽𑀧𑀕𑀢𑀁 𑀦 𑀤𑀺𑀲𑁆𑀲𑀢𑀺, 𑀓𑀣𑀁 𑀧𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀣𑀸𑀦𑁂𑀦𑀸’’𑀢𑀺𑀆𑀤𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀪𑀺𑀡𑁆𑀳𑀁 𑀆𑀮𑁄𑀓𑀲𑁆𑀲 𑀨𑀭𑀡𑀯𑀲𑁂𑀦 𑀆𑀮𑁄𑀓𑁄 𑀣𑀸𑀫𑀕𑀢𑁄 𑀳𑁄𑀢𑀺 𑀘𑀺𑀭𑀝𑁆𑀞𑀸𑀬𑀻. 𑀢𑀣𑀸 𑀘 𑀲𑀢𑀺 𑀢𑀢𑁆𑀣 𑀲𑀼𑀘𑀺𑀭𑀫𑁆𑀧𑀺 𑀭𑀽𑀧𑀕𑀢𑀁 𑀧𑀲𑁆𑀲𑀢𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀆𑀮𑁄𑀓𑁄…𑀧𑁂… 𑀳𑁄𑀢𑀻’’𑀢𑀺.

𑀲𑁆𑀯𑀸𑀬𑀫𑀢𑁆𑀣𑁄 𑀢𑀺𑀡𑀼𑀓𑁆𑀓𑀽𑀧𑀫𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀢𑁆𑀢𑀺𑀁 𑀢𑀺𑀡𑀼𑀓𑁆𑀓𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀧𑀯𑁂𑀲𑀦𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁. 𑀣𑀸𑀫𑀕𑀢𑀸𑀮𑁄𑀓𑀲𑁆𑀲 ¶ 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀞𑀸𑀦𑀦𑁆𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀲𑀺𑀡𑀁 𑀯𑀟𑁆𑀠𑀺𑀢𑀁, 𑀣𑀸𑀫𑀕𑀢𑀲𑁆𑀲 𑀆𑀮𑁄𑀓𑀲𑁆𑀲 𑀢𑀢𑁆𑀢𑀓𑀁 𑀨𑀭𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀁.

𑀅𑀦𑀸𑀧𑀸𑀣𑀕𑀢𑀦𑁆𑀢𑀺 𑀆𑀧𑀸𑀣𑀕𑀫𑀦𑀬𑁄𑀕𑁆𑀬𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀸𑀤𑀺 𑀧𑀦 𑀢𑀤𑀪𑀸𑀯𑀢𑁄 𑀢𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀫𑁂𑀯. 𑀢𑀤𑁂𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀫𑁂𑀯 ¶ . 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀭𑀽𑀧𑀫𑀸𑀭𑀩𑁆𑀪 𑀧𑀯𑀢𑁆𑀢𑀘𑀺𑀢𑁆𑀢𑁂𑀲𑀼. 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀦𑁆𑀢𑀺 𑀭𑀽𑀧𑀁 𑀲𑀪𑀸𑀯𑀢𑁄 𑀯𑀺𑀪𑀸𑀯𑀦𑀲𑀫𑀢𑁆𑀣𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬. 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀻𑀢𑀺 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀸𑀦𑀺 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀳𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀸𑀦𑀺𑀧𑀺 𑀦 𑀬𑀸𑀣𑀸𑀯𑀢𑁄 𑀢𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀸𑀦𑀺 𑀯𑀺𑀬.

𑀢𑀁 𑀧𑀦𑁂𑀢𑀁 𑀤𑀺𑀩𑁆𑀩𑀘𑀓𑁆𑀔𑀼. 𑀧𑀭𑀺𑀧𑀦𑁆𑀣𑁄𑀢𑀺 𑀅𑀦𑁆𑀢𑀭𑀸𑀬𑀺𑀓𑁄. 𑀛𑀸𑀦𑀯𑀺𑀩𑁆𑀪𑀦𑁆𑀢𑀓𑁄𑀢𑀺 𑀛𑀸𑀦𑀼𑀫𑁆𑀫𑀢𑁆𑀢𑀓𑁄 𑀛𑀸𑀦𑀪𑀸𑀯𑀦𑀸𑀫𑀼𑀔𑁂𑀦 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑁄. 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀤𑀺𑀩𑁆𑀩𑀘𑀓𑁆𑀔𑀼 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀲𑀦𑁆𑀢𑁄𑀲𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀯𑀲𑁂𑀦 𑀯𑀸 𑀲𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁.

‘‘𑀏𑀯𑀁 𑀧𑀲𑁆𑀲𑀺𑀢𑀼𑀓𑀸𑀫𑁂𑀦𑀸’’𑀢𑀺𑀆𑀤𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀦𑀸𑀦𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀜𑁆𑀘𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀜𑁆𑀘 𑀤𑀲𑁆𑀲𑀺𑀢𑀁, 𑀦 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀼𑀢𑀽𑀧𑀧𑀸𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁪𑁧𑁩. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁩𑁮𑁪, 𑁪𑁩𑁧-𑁪𑁩𑁩; 𑀧𑀸𑀭𑀸. 𑁧𑁨-𑁧𑁪) 𑀬𑀣𑀸𑀤𑀲𑁆𑀲𑀺𑀢𑀧𑀸𑀴𑀺𑀕𑀢𑀺𑀁, 𑀢𑀲𑁆𑀲𑀸 𑀅𑀢𑁆𑀣𑀯𑀺𑀯𑀭𑀡𑀦𑀬𑀜𑁆𑀘 𑀧𑀘𑁆𑀘𑀸𑀫𑀲𑀢𑀺. 𑀲𑀘𑁆𑀘𑁂𑀲𑀼 𑀯𑀺𑀬 𑀅𑀭𑀺𑀬𑀲𑀘𑁆𑀘𑀸𑀦𑀺 𑀔𑀦𑁆𑀥𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀦𑁆𑀢𑁄𑀕𑀥𑀸. 𑀢𑀤𑀼𑀪𑀬𑁂 𑀘 𑀲𑀪𑀸𑀯𑀢𑁄, 𑀲𑀫𑀼𑀤𑀬𑀢𑁄, 𑀅𑀢𑁆𑀣𑀗𑁆𑀕𑀫𑀢𑁄, 𑀅𑀲𑁆𑀲𑀸𑀤𑀢𑁄, 𑀆𑀤𑀻𑀦𑀯𑀢𑁄, 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀣𑀸𑀪𑀽𑀢𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 ¶ 𑀧𑀝𑀺𑀯𑀺𑀚𑁆𑀛𑀺 𑀧𑀯𑁂𑀤𑁂𑀲𑀺 𑀯𑀸𑀢𑀺 𑀲𑀸𑀢𑀺𑀲𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸𑀯𑀩𑁄𑀥𑁂𑀦 𑀪𑀕𑀯𑀸𑀯 𑀣𑁄𑀫𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀤𑀽’’𑀢𑀺. 𑀜𑀢𑁆𑀯𑀸 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀲𑀽𑀢𑀺 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼. 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀁 𑀕𑀳𑀺𑀢𑀢𑁆𑀢𑀸 ‘‘𑀧𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀏𑀢𑀸𑀲𑀼 𑀳𑀻’’𑀢𑀺𑀆𑀤𑀺.

𑀢𑀢𑁆𑀣 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀻𑀢𑀺 𑀧𑀭𑀺𑀯𑀸𑀭𑀜𑀸𑀡𑀸𑀦𑀺. 𑀬𑀣𑀸 𑀳𑀺 𑀲𑀺𑀦𑁂𑀭𑀼𑀲𑁆𑀲 𑀧𑀭𑀺𑀯𑀸𑀭𑀝𑁆𑀞𑀸𑀦𑀸𑀦𑀺 𑀬𑀸𑀦𑀺 𑀢𑀁𑀲𑀺𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀦𑀺 𑀫𑁂𑀔𑀮𑀝𑁆𑀞𑀸𑀦𑀸𑀦𑀺 𑀧𑀭𑀺𑀪𑀡𑁆𑀟𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀇𑀫𑀸𑀦𑀺𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀺𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀦𑀺 𑀢𑀲𑁆𑀲 𑀧𑀭𑀺𑀪𑀡𑁆𑀟𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀥𑀸𑀕𑀢𑀸𑀦𑀻𑀢𑀺 𑀏𑀢𑁆𑀣 𑀇𑀥𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁄 ¶ 𑀅𑀜𑁆𑀜𑁂𑀲𑀼 𑀧𑀦 𑀲𑀸𑀫𑀜𑁆𑀜𑀨𑀮𑀸𑀤𑀻𑀲𑀼 𑀫𑀦𑁄𑀫𑀬𑀜𑀸𑀡𑀫𑁆𑀧𑀺 𑀯𑀺𑀲𑀼𑀁 𑀅𑀪𑀺𑀜𑁆𑀜𑀸𑀜𑀸𑀡𑀪𑀸𑀯𑁂𑀦 𑀆𑀕𑀢𑀁.

‘‘𑀢𑁂𑀲𑀽’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀦𑀁 𑀓𑀺𑀁 𑀢𑀺𑀓𑀸𑀦𑀁, 𑀉𑀤𑀸𑀳𑀼 𑀆𑀭𑀫𑁆𑀫𑀡𑀸𑀦𑀦𑁆𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀺𑀓𑀸𑀦𑀁, 𑀢𑀤𑀬𑀼𑀢𑁆𑀢𑀁. 𑀦 𑀳𑀺 𑀢𑀺𑀓𑁂𑀲𑀼 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀅𑀣 𑀆𑀭𑀫𑁆𑀫𑀡𑀸𑀦𑀁, 𑀢𑀫𑁆𑀧𑀺 𑀅𑀬𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀘𑁆𑀘𑀸𑀫𑀲𑀦𑀁 𑀬𑀼𑀢𑁆𑀢𑀦𑁆𑀢𑀺. 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀪𑀯𑀢𑀼 𑀢𑀸𑀯 𑀢𑀺𑀓𑀸𑀦𑀁, 𑀦𑀦𑀼 𑀯𑀼𑀢𑁆𑀢𑀁 ‘‘𑀦 𑀳𑀺 𑀢𑀺𑀓𑁂𑀲𑀼 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀻’’𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄 𑀢𑀺𑀓𑀯𑁄𑀳𑀸𑀭𑁂𑀦 𑀆𑀭𑀫𑁆𑀫𑀡𑀸𑀦𑀁𑀬𑁂𑀯 𑀕𑀬𑁆𑀳𑀫𑀸𑀦𑀢𑁆𑀢𑀸. 𑀅𑀣 𑀯𑀸 𑀧𑀦 𑀳𑁄𑀢𑀼 𑀆𑀭𑀫𑁆𑀫𑀡𑀸𑀦𑀁, 𑀦𑀦𑀼 𑀯𑀼𑀢𑁆𑀢𑀁 ‘‘𑀦 𑀳𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀘𑁆𑀘𑀸𑀫𑀲𑀦𑀁 𑀬𑀼𑀢𑁆𑀢’’𑀦𑁆𑀢𑀺? 𑀅𑀬𑀫𑁆𑀧𑀺 𑀦 𑀤𑁄𑀲𑁄 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯𑀸𑀢𑀺.

𑁪𑁧𑁪. 𑀅𑀲𑀢𑀺𑀧𑀺 𑀯𑀢𑁆𑀣𑀼𑀪𑁂𑀤𑁂 𑀪𑀽𑀫𑀺𑀓𑀸𑀮𑀲𑀦𑁆𑀢𑀸𑀦𑀪𑁂𑀤𑀯𑀲𑁂𑀦 𑀪𑀺𑀦𑁆𑀦𑁂𑀲𑀼 𑀲𑀢𑁆𑀢𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀢𑀺𑀓𑀯𑀲𑁂𑀦 𑀳𑁂𑀲 𑀪𑁂𑀤𑁄 𑀕𑀳𑀺𑀢𑁄. 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀫𑀕𑁆𑀕𑀸𑀭𑀫𑁆𑀫𑀡𑀢𑀸𑀬 𑀅𑀪𑀸𑀯𑀢𑁄 𑀇𑀥 𑀫𑀕𑁆𑀕𑀸𑀭𑀫𑁆𑀫𑀡𑀢𑀺𑀓𑁄 𑀦 𑀮𑀩𑁆𑀪𑀢𑀺. 𑀢𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀁. 𑀓𑀸𑀬𑀁 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀉𑀧𑀬𑁄𑀕𑀮𑀤𑁆𑀥𑀦𑁆𑀢𑀺 𑀮𑀤𑁆𑀥𑀉𑀧𑀬𑁄𑀕𑀯𑀘𑀦𑀁. 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀻’’𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀓𑀸𑀬𑀸𑀭𑀫𑁆𑀫𑀡𑀢𑁄’’𑀢𑀺, 𑀭𑀽𑀧𑀓𑀸𑀬𑀲𑁆𑀲 𑀯𑀡𑁆𑀡𑀸𑀭𑀫𑁆𑀫𑀡𑀢𑁄𑀢𑀺 𑀅𑀢𑁆𑀣𑁄.

𑀢𑀤𑁂𑀯 𑀘𑀺𑀢𑁆𑀢𑀦𑁆𑀢𑀺 𑀬𑀤𑁂𑀯 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂 𑀯𑀼𑀢𑁆𑀢𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁, 𑀢𑀤𑁂𑀯. 𑀭𑀸𑀫𑀕𑀸𑀫𑁂 𑀘𑁂𑀢𑀺𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀲𑀼 𑀲𑀢𑁆𑀢𑀲𑀼 𑀘𑁂𑀢𑀺𑀬𑁂𑀲𑀼 𑀥𑀸𑀢𑀼𑀬𑁄 𑀇𑀤𑁆𑀥𑀺𑀬𑀸 𑀆𑀳𑀭𑀺𑀢𑁆𑀯𑀸 𑀭𑀸𑀚𑀕𑀳𑁂 𑀪𑀽𑀫𑀺𑀖𑀭𑀫𑀡𑁆𑀟𑀧𑁂 𑀓𑀢𑀁 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑀁. ‘‘𑀇𑀫𑁂 𑀕𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀕𑀦𑁆𑀥𑀸𑀤𑀺𑀓𑁂 𑀕𑀳𑁂𑀢𑁆𑀯𑀸𑀧𑀺 𑀅𑀲𑀼𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀁 ¶ 𑀅𑀦𑀸𑀕𑀢𑀫𑁂𑀯 𑀦𑁂𑀲𑀁 𑀭𑀽𑀧𑀁 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺 𑀅𑀦𑀸𑀕𑀢𑀸𑀥𑀺𑀝𑁆𑀞𑀸𑀦𑀢𑁆𑀢𑀸. 𑀯𑀢𑁆𑀢𑀦𑀺𑀬𑀲𑁂𑀦𑀸𑀲𑀦𑀁 𑀦𑀸𑀫 𑀯𑀺𑀜𑁆𑀛𑀸𑀝𑀯𑀺𑀬𑀁 𑀯𑀺𑀳𑀸𑀭𑁄. 𑀤𑀥𑀺𑀭𑀲𑀦𑁆𑀢𑀺 𑀤𑀥𑀺𑀫𑀡𑁆𑀟𑁄, 𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀦𑀸𑀕𑀢𑀁 𑀤𑀥𑀺𑀯𑀡𑁆𑀡𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀢𑁄.

𑀲𑀓𑀸𑀬𑀘𑀺𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀘.

𑁪𑁧𑁫. 𑀲𑀤𑁆𑀤𑁄 𑀘 𑀧𑀭𑀺𑀢𑁆𑀢𑁄 𑀲𑀩𑁆𑀩𑀲𑁆𑀲 𑀭𑀽𑀧𑀲𑁆𑀲 𑀓𑀸𑀫𑀸𑀯𑀘𑀭𑀪𑀸𑀯𑀢𑁄. 𑀯𑀺𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯.

𑁪𑁧𑁬. 𑀲𑁄𑀢𑀸𑀧𑀦𑁆𑀦𑀲𑁆𑀲 ¶ 𑀘𑀺𑀢𑁆𑀢𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀆𑀯𑁂𑀡𑀺𑀓𑀁 𑀘𑀺𑀢𑁆𑀢𑀁. 𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀯 𑀅𑀭𑀳𑀢𑁄 𑀦𑁂𑀢𑀩𑁆𑀩𑀦𑁆𑀢𑀺 ‘‘𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀦𑁄 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀕𑀸𑀫𑀻 𑀅𑀭𑀳𑀢𑁄’’𑀢𑀺 𑀏𑀯𑀁 𑀦𑁂𑀢𑀩𑁆𑀩𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁 𑀚𑀸𑀦𑀸𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀦𑀭𑀺𑀬𑀸𑀦𑀁. 𑀅𑀜𑁆𑀜𑁄𑀧𑀺 𑀘 𑀉𑀧𑀭𑀺𑀫𑁄 𑀅𑀦𑀸𑀕𑀸𑀫𑀺𑀆𑀤𑀺 𑀳𑁂𑀝𑁆𑀞𑀺𑀫𑀲𑁆𑀲 𑀲𑀓𑀤𑀸𑀕𑀸𑀫𑀺𑀆𑀤𑀺𑀓𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀢𑀻𑀢𑀲𑁆𑀲, 𑀅𑀦𑀸𑀕𑀢𑀲𑁆𑀲 𑀘 𑀧𑀭𑀲𑁆𑀲 𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑀁 𑀲𑀫𑁆𑀪𑀯𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀧𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺 ‘‘𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺. 𑀇𑀢𑀭𑁄 𑀬𑀢𑁆𑀣 𑀲𑀫𑁆𑀪𑀯𑀢𑀺, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀸𑀯 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀢𑀺𑀯𑀺𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀧𑁆𑀧𑀢𑁆𑀢𑀦𑁆𑀢𑀺 𑀉𑀧𑁆𑀧𑀸𑀤𑀁, 𑀞𑀺𑀢𑀺𑀁, 𑀪𑀗𑁆𑀕𑀜𑁆𑀘 𑀧𑀢𑁆𑀢𑀁, 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀸 𑀭𑀽𑀧𑀲𑀦𑁆𑀢𑀢𑀺𑀯𑀸𑀭𑀸 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀝𑁆𑀞𑀸𑀦𑀢𑁄 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲 𑀧𑀕𑁂𑀯 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀬 𑀬𑀸𑀯 𑀭𑀽𑀧𑀕𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑀢𑁆𑀣 𑀉𑀧𑀟𑁆𑀠𑀯𑁂𑀮𑀸 𑀅𑀯𑀺𑀪𑀽𑀢𑀯𑀸𑀭𑀸, 𑀉𑀧𑀟𑁆𑀠𑀯𑁂𑀮𑀸 𑀯𑀺𑀪𑀽𑀢𑀯𑀸𑀭𑀸, 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑁂 𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀦 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀏𑀓𑀘𑁆𑀘𑀲𑁆𑀲 𑀲𑀻𑀖𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀻𑀢𑀺 ‘‘𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀏𑀓𑀕𑁆𑀕𑀳𑀡𑀫𑁆𑀧𑀺 𑀓𑀢𑀁, 𑀅𑀢𑀺𑀧𑀭𑀺𑀢𑁆𑀢𑀲𑀪𑀸𑀯𑀉𑀢𑀼𑀆𑀤𑀺𑀲𑀫𑀼𑀝𑁆𑀞𑀸𑀦𑀸 𑀯𑀸 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀻𑀭𑁂 𑀅𑀓𑁆𑀓𑀦𑁆𑀢𑀉𑀤𑀓𑀮𑁂𑀔𑀸 𑀦𑀸𑀫 𑀓𑀸𑀮𑀼𑀲𑁆𑀲𑀺𑀬𑀁 𑀕𑀢𑀸 𑀢𑀻𑀭𑀲𑀫𑀻𑀧𑁂 𑀉𑀤𑀓𑀭𑀸𑀚𑀺. 𑀬𑀸𑀯 𑀦 𑀯𑀺𑀧𑁆𑀧𑀲𑀻𑀤𑀢𑀻𑀢𑀺 ¶ 𑀓𑀸𑀮𑀼𑀲𑁆𑀲𑀺𑀬𑀯𑀺𑀕𑀫𑁂𑀦 𑀬𑀸𑀯 𑀯𑀺𑀧𑁆𑀧𑀲𑀦𑁆𑀦𑀸 𑀦 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀅𑀢𑀺𑀦𑁆𑀢𑁂 𑀢𑀻𑀭𑁂 𑀅𑀮𑁆𑀮𑀧𑀸𑀤𑁂𑀦 𑀅𑀓𑁆𑀓𑀦𑁆𑀢𑁂 𑀬𑀸𑀯 𑀧𑀸𑀤𑁂 𑀉𑀤𑀓𑀮𑁂𑀔𑀸 𑀦 𑀯𑀺𑀧𑁆𑀧𑀲𑀻𑀤𑀢𑀺, 𑀦 𑀲𑀁𑀲𑀻𑀤𑀢𑀺, 𑀦 𑀯𑀽𑀧𑀲𑀫𑁆𑀫𑀢𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑁂 𑀧𑀦𑁂𑀢𑁂 𑀓𑀺𑀭𑀺𑀬𑀸𑀪𑁂𑀤𑁂𑀦 𑀯𑀼𑀢𑁆𑀢𑀸 𑀓𑀸𑀮𑀯𑀺𑀲𑁂𑀲𑀸, 𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑀲𑀫𑀸, 𑀊𑀦𑀸𑀥𑀺𑀓𑀪𑀸𑀕𑀯𑀦𑁆𑀢𑁄𑀯 𑀤𑀝𑁆𑀞𑀩𑁆𑀩𑀸. 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀓𑀸𑀫𑀸𑀯𑀘𑀭𑀚𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀇𑀢𑀭𑀚𑀯𑀦𑀯𑀲𑁂𑀦. 𑀦 𑀳𑀺 𑀢𑁂 𑀧𑀭𑀺𑀫𑀺𑀢𑀓𑀸𑀮𑀸, 𑀅𑀦𑀦𑁆𑀢𑀭𑀸 𑀧𑀯𑀢𑁆𑀢𑀪𑀯𑀗𑁆𑀕𑀸𑀤𑀬𑁄𑀧𑀺 𑀢𑀤𑀦𑁆𑀢𑁄𑀕𑀥𑀸𑀯 𑀤𑀝𑁆𑀞𑀩𑁆𑀩𑀸. 𑀢𑀤𑀼𑀪𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀤𑁆𑀯𑀬𑀁.

𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀁. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀥𑀫𑁆𑀫𑀚𑀸𑀢𑀁 𑀏𑀢𑀭𑀳𑀻𑀢𑀺 𑀯𑀢𑁆𑀢𑀩𑁆𑀩𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀫𑀦𑁄𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀜𑁆𑀜𑀸𑀡𑀫𑀸𑀳. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀫𑀦𑁄𑀢𑀺 𑀯𑀸 𑀫𑀦𑀸𑀬𑀢𑀦𑀁. 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸𑀤𑀬𑁄 ¶ 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀏𑀢𑀁 𑀉𑀪𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀺𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀯𑀲𑁂𑀦 𑀧𑀝𑀺𑀩𑀤𑁆𑀥𑀁 𑀳𑁄𑀢𑀺. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀳𑀺 𑀅𑀪𑀺𑀦𑀦𑁆𑀤𑀢𑀺. 𑀢𑀣𑀸𑀪𑀽𑀢𑁄 𑀘 𑀯𑀢𑁆𑀣𑀼𑀧𑀭𑀺𑀜𑁆𑀜𑀸𑀬 𑀅𑀪𑀸𑀯𑀢𑁄 𑀢𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀓𑀟𑁆𑀠𑀻𑀬𑀢𑀺. 𑀏𑀢𑁆𑀣 𑀘 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀁 ‘‘𑀏𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀫. 𑀦𑀺. 𑁩.𑁨𑁮𑁪) 𑀆𑀕𑀢𑀢𑁆𑀢𑀸 𑀢𑀢𑁆𑀣 𑀧𑀯𑀢𑁆𑀢𑁄 𑀙𑀦𑁆𑀤𑀭𑀸𑀕𑁄 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄, 𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀲𑀦𑁆𑀥𑀸𑀬 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑁂…𑀧𑁂… 𑀲𑀁𑀳𑀻𑀭𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳. ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁨𑁭𑁨, 𑁨𑁮𑁫) 𑀏𑀢𑁆𑀣𑀸𑀧𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀯𑀺𑀧𑀲𑁆𑀲𑀺𑀢𑀩𑁆𑀩𑀥𑀫𑁆𑀫𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀯𑀺𑀧𑀲𑁆𑀲𑀦𑀸𑀯 𑀦 𑀲𑀫𑁆𑀪𑀯𑁂𑀬𑁆𑀬. ‘‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀸𑀴𑀺𑀬𑀁 𑀆𑀕𑀢’’𑀦𑁆𑀢𑀺 𑀦 𑀯𑀼𑀢𑁆𑀢𑀁 𑀢𑀲𑁆𑀲 𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀅𑀦𑀸𑀕𑀢𑀢𑁆𑀢𑀸.

𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀧𑀭𑀘𑀺𑀢𑁆𑀢𑀲𑁆𑀲𑀧𑀺 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄𑀢𑀺 𑀬𑀼𑀢𑁆𑀢𑀺𑀤𑀲𑁆𑀲𑀦𑀁. 𑀬𑀣𑀸 𑀆𑀓𑀸𑀲𑁂𑀢𑀺𑀆𑀤𑀺 𑀲𑀤𑀺𑀲𑀽𑀤𑀸𑀳𑀭𑀡𑀁. 𑀢𑀁 𑀧𑀦 𑀢𑁂𑀲𑀁 𑀯𑀘𑀦𑀁 𑀅𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀫𑀕𑁆𑀕𑀨𑀮𑀯𑀻𑀣𑀺𑀢𑁄 𑀅𑀜𑁆𑀜𑀢𑁆𑀣 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀧𑁆𑀧𑀢𑁆𑀢𑀺𑀤𑁄𑀲𑀢𑁄𑀢𑀺 𑀬𑀼𑀢𑁆𑀢𑀺𑀯𑀘𑀦𑀁.

𑀬𑀤𑀺 𑀏𑀯𑀁 𑀓𑀣𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦𑀸’’𑀢𑀺𑀆𑀤𑀺 ¶ . 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀚𑀯𑀦𑀯𑀸𑀭𑁂𑀦 𑀤𑀻𑀧𑁂𑀢𑀩𑁆𑀩𑀁, 𑀦 𑀲𑀓𑀮𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀼𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀭𑀸𑀬𑀁 𑀤𑀻𑀧𑀦𑀸𑀢𑀺𑀆𑀤𑀺 𑀚𑀯𑀦𑀯𑀸𑀭𑀲𑁆𑀲 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀤𑀻𑀧𑀦𑀫𑀼𑀔𑁂𑀦 𑀇𑀤𑁆𑀥𑀺𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀻𑀧𑀦𑀁. 𑀇𑀢𑀭𑀸𑀦𑀻𑀢𑀺 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀺. 𑀏𑀢𑁆𑀣 𑀘 ‘‘𑀓𑁂𑀘𑀻’’𑀢𑀺 𑀬𑀤𑀺𑀧𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀅𑀥𑀺𑀧𑁆𑀧𑁂𑀢𑀸, 𑀢𑁂 𑀧𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀁 𑀦 𑀇𑀘𑁆𑀙𑀦𑁆𑀢𑀻𑀢𑀺 ‘‘𑀞𑀺𑀢𑀺𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀬𑁂 ‘‘𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 ‘‘𑀞𑀺𑀢𑀺𑀓𑁆𑀔𑀡𑁂 𑀯𑀸 𑀪𑀗𑁆𑀕𑀓𑁆𑀔𑀡𑁂 𑀯𑀸 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀯𑀘𑀦𑀁 𑀦 𑀲𑀫𑁂𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀔𑀡𑀤𑁆𑀯𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀭𑀘𑀺𑀢𑁆𑀢𑁂𑀦 𑀲𑀳 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺. 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀏𑀓𑀤𑁂𑀲𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀏𑀓𑀤𑁂𑀲𑀁 𑀅𑀢𑀻𑀢𑀸𑀭𑀫𑁆𑀫𑀡𑀁 𑀆𑀧𑀚𑁆𑀚𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀭𑀸𑀲𑀺𑀯𑀲𑁂𑀦 𑀫𑀳𑀸𑀚𑀦𑀲𑁆𑀲 ¶ 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂’’𑀢𑀺, 𑀏𑀢𑁆𑀣 𑀘 𑀫𑀳𑀸𑀚𑀦𑁄 𑀅𑀢𑁆𑀣𑀢𑁄 𑀧𑀭𑁂 𑀅𑀦𑁂𑀓𑀧𑀼𑀕𑁆𑀕𑀮𑀸𑀢𑀺 ‘‘𑀧𑀭𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑀦𑀧𑁆𑀧𑀯𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀅𑀣𑀸𑀧𑀺 𑀧𑀭𑀲𑁆𑀲𑀸𑀢𑀺 𑀫𑀳𑀸𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑁂𑀬𑁆𑀬, 𑀢𑀣𑀸𑀧𑀺 𑀢𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀸 𑀘𑀺𑀢𑁆𑀢𑀭𑀸𑀲𑀺𑀁 𑀆𑀯𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀁 𑀅𑀬𑀼𑀢𑁆𑀢𑀁. 𑀦 𑀳𑀺 𑀭𑀸𑀲𑀺𑀆𑀯𑀚𑁆𑀚𑀦𑀁 𑀏𑀓𑀤𑁂𑀲𑀸𑀯𑀚𑁆𑀚𑀦𑀁 𑀳𑁄𑀢𑀻𑀢𑀺, 𑀢𑀲𑁆𑀫𑀸 𑀢𑁂𑀳𑀺 ‘‘𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁.

𑀬𑀁 𑀧𑀦 𑀢𑁂 𑀯𑀤𑀦𑁆𑀢𑀺 ‘‘𑀬𑀲𑁆𑀫𑀸 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀸𑀢𑀼𑀓𑀸𑀫𑁄 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀺, 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀸𑀫𑀜𑁆𑀜𑁂𑀦𑁂𑀯 𑀘𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑀁, 𑀘𑀢𑀼𑀦𑁆𑀦𑀁 𑀯𑀸 𑀧𑀭𑀺𑀓𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀭𑀘𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀢𑀺 𑀯𑀺𑀪𑀸𑀯𑁂𑀢𑀺 𑀭𑀽𑀧𑀁 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸. 𑀢𑀢𑁄 𑀧𑀭𑀁 𑀧𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀭𑀸𑀕𑀸𑀤𑀺𑀯𑀯𑀢𑁆𑀣𑀸𑀦𑀁 𑀳𑁄𑀢𑀺 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀦𑀁 𑀯𑀺𑀬. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀳𑀤𑀬𑀯𑀢𑁆𑀣𑀼𑀭𑀽𑀧𑀲𑁆𑀲 𑀲𑀢𑁆𑀢𑀲𑁆𑀲 𑀅𑀪𑀺𑀫𑀼𑀔𑀻𑀪𑀽𑀢𑀲𑁆𑀲 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦 𑀘𑀺𑀢𑁆𑀢𑀁 𑀆𑀯𑀚𑁆𑀚𑀬𑀫𑀸𑀦𑀁 𑀆𑀯𑀚𑁆𑀚𑀦𑀁 𑀅𑀪𑀺𑀫𑀼𑀔𑀻𑀪𑀽𑀢𑀁 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀆𑀯𑀚𑁆𑀚𑁂𑀢𑀺. 𑀧𑀭𑀺𑀓𑀫𑁆𑀫𑀸𑀦𑀺 𑀘 𑀢𑀁 𑀢𑀁 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀚𑀸𑀦𑀦𑀧𑀭𑀺𑀓𑀫𑁆𑀫𑀸𑀦𑀺 ¶ 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀦 𑀯𑀺𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑀁 𑀢𑁂𑀦 𑀲𑀳 𑀏𑀓𑀓𑁆𑀔𑀡𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀲𑀦𑁆𑀢𑀸𑀦𑀲𑁆𑀲 𑀲𑀦𑁆𑀢𑀸𑀦𑀕𑁆𑀕𑀳𑀡𑀢𑁄 𑀏𑀓𑀢𑁆𑀢𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀻𑀦𑀺 ‘‘𑀘𑀺𑀢𑁆𑀢’’𑀦𑁆𑀢𑁆𑀯𑁂𑀯 𑀧𑀯𑀢𑁆𑀢𑀸𑀦𑀺. 𑀢𑀜𑁆𑀘 𑀘𑀺𑀢𑁆𑀢𑀫𑁂𑀯, 𑀬𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀯𑀺𑀪𑀸𑀯𑀺𑀢𑀁. 𑀢𑀲𑁆𑀫𑀸 𑀲𑀫𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀦 𑀅𑀦𑀺𑀝𑁆𑀞𑁂 𑀫𑀕𑁆𑀕𑀨𑀮𑀯𑀻𑀣𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀦𑀸𑀦𑀸𑀭𑀫𑁆𑀫𑀡𑀢𑀸 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀜𑁆𑀘 𑀧𑀭𑀺𑀓𑀫𑁆𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀢𑀻𑀢𑀢𑁆𑀢𑀺𑀓𑁄 𑀘 𑀏𑀯𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀅𑀜𑁆𑀜𑀣𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀇𑀥 𑀯𑀼𑀘𑁆𑀘𑀫𑀸𑀦𑁂 𑀅𑀢𑀻𑀢𑀸𑀦𑀸𑀕𑀢𑀸𑀦𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀆𑀧𑀚𑁆𑀚𑁂𑀬𑁆𑀬. 𑀢𑀣𑀸 𑀘 𑀲𑀢𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀁 𑀯𑀼𑀢𑁆𑀢𑀁. ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀢𑀻𑀢𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭 ¶ …𑀧𑁂… 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲𑀸’’𑀢𑀺𑀆𑀤𑀺 𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁫) 𑀦 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑁆𑀯𑁂𑀯 𑀘 𑀅𑀦𑀦𑁆𑀢𑀭𑀸𑀢𑀻𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀢𑀻𑀢𑀸𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀦 𑀘 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬𑀁 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁮-𑁧𑁯) 𑀆𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀲𑁆𑀲 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀢𑁆𑀣𑀢𑀸 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀳𑀺 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀬𑀤𑀸 𑀧𑀦 ‘‘𑀬𑀁 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀧𑀯𑀢𑁆𑀢𑀁, 𑀢𑀁 𑀚𑀸𑀦𑀸𑀫𑀺. 𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀚𑀸𑀦𑀸𑀫𑀻’’𑀢𑀺 𑀯𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀤𑀸 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀦𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀘 𑀅𑀢𑀻𑀢𑀸𑀦𑀸𑀕𑀢𑀸𑀭𑀫𑁆𑀫𑀡𑀸𑀦𑁂𑀯 𑀳𑁄𑀦𑁆𑀢𑀺 𑀆𑀯𑀚𑁆𑀚𑀦𑁂𑀦𑁂𑀯 𑀯𑀺𑀪𑀸𑀕𑀲𑁆𑀲 𑀓𑀢𑀢𑁆𑀢𑀸.

𑀬𑁂 𑀧𑀦 ‘‘𑀇𑀤𑁆𑀥𑀺𑀫𑀸 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄 𑀆𑀯𑀚𑁆𑀚𑁂𑀢𑀺, 𑀆𑀯𑀚𑁆𑀚𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺, 𑀬𑁂𑀲𑀁 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀘 𑀢𑀸𑀦𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺 𑀅𑀤𑁆𑀥𑀸𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀦𑀸𑀦𑀸𑀭𑀫𑁆𑀫𑀡𑀢𑀸𑀪𑀸𑀯𑁄 𑀯𑀺𑀬 𑀏𑀓𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀦𑀸𑀕𑀢𑁂𑀲𑀼𑀧𑀺 𑀘𑀺𑀢𑁆𑀢𑁂𑀲𑀼 𑀆𑀯𑀚𑁆𑀚𑀺𑀢𑁂𑀲𑀼 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀦𑀸𑀦𑀸𑀭𑀫𑁆𑀫𑀡𑀢𑀸 𑀦 𑀲𑀺𑀬𑀸. 𑀢𑁂𑀦 𑀘𑀢𑀼𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀦𑀸𑀕𑀢𑁂 𑀆𑀯𑀚𑁆𑀚𑀺𑀢𑁂 ¶ 𑀅𑀦𑀸𑀕𑀢𑀸𑀭𑀫𑁆𑀫𑀡𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀲𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀯𑀸𑀤𑁄 ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀅𑀦𑀼𑀤𑁆𑀥𑀝𑀢𑁆𑀢𑀸, 𑀕𑀡𑀦𑀸𑀬 𑀘 ‘‘𑀆𑀲𑁂𑀯𑀦𑁂 𑀢𑀻𑀡𑀻’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁩𑁯) 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀺𑀚𑁆𑀛𑀢𑀺. 𑀦 𑀳𑀺 𑀓𑀼𑀲𑀮𑀓𑀺𑀭𑀺𑀬𑀸𑀫𑀳𑀕𑁆𑀕𑀢𑀁 𑀅𑀦𑀸𑀲𑁂𑀯𑀦𑀁 𑀅𑀢𑁆𑀣𑀻𑀢𑀺. 𑀏𑀢𑀲𑁆𑀲 𑀘 𑀯𑀸𑀤𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑁄 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀢𑀸𑀯𑀘𑀦𑀲𑁆𑀲 𑀦 𑀲𑀺𑀚𑁆𑀛𑀢𑀺, ‘‘𑀬𑀁 𑀧𑀯𑀢𑁆𑀢𑀁, 𑀧𑀯𑀢𑁆𑀢𑀺𑀲𑁆𑀲𑀢𑀺 𑀘𑀸’’𑀢𑀺 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀕𑀳𑀡𑁂 𑀆𑀯𑀚𑁆𑀚𑀦𑀲𑁆𑀲 𑀅𑀦𑀸𑀕𑀢𑀕𑁆𑀕𑀳𑀡𑀸𑀪𑀸𑀯𑀁, 𑀢𑀤𑀪𑀸𑀯𑀸 𑀚𑀯𑀦𑀸𑀦𑀫𑁆𑀧𑀺 𑀯𑀢𑁆𑀢𑀫𑀸𑀦𑀕𑁆𑀕𑀳𑀡𑀸𑀪𑀸𑀯𑀜𑁆𑀘 𑀲𑀦𑁆𑀥𑀸𑀬𑁂𑀯 𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀢𑀤𑀸 𑀳𑀺 𑀪𑀯𑀗𑁆𑀕𑀘𑀮𑀦𑀸𑀦𑀦𑁆𑀢𑀭𑀁 𑀅𑀪𑀺𑀫𑀼𑀔𑀻𑀪𑀽𑀢𑀫𑁂𑀯 𑀘𑀺𑀢𑁆𑀢𑀁 𑀆𑀭𑀩𑁆𑀪 𑀆𑀯𑀚𑁆𑀚𑀦𑀸 𑀧𑀯𑀢𑁆𑀢𑀢𑀻𑀢𑀺 𑀚𑀸𑀦𑀦𑀘𑀺𑀢𑁆𑀢𑀲𑁆𑀲𑀧𑀺 𑀯𑀢𑁆𑀢𑀫𑀸𑀦𑀸𑀭𑀫𑁆𑀫𑀡𑀪𑀸𑀯𑁂 𑀆𑀯𑀚𑁆𑀚𑀦𑀚𑀸𑀦𑀦𑀘𑀺𑀢𑁆𑀢𑀸𑀦𑀁 𑀲𑀳𑀝𑁆𑀞𑀸𑀦𑀤𑁄𑀲𑀸𑀧𑀢𑁆𑀢𑀺𑀬𑀸, 𑀭𑀸𑀲𑀺𑀏𑀓𑀤𑁂𑀲𑀸𑀯𑀚𑁆𑀚𑀦𑀧𑀝𑀺𑀯𑁂𑀥𑁂 ¶ 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀯𑀚𑁆𑀚𑀦𑀚𑀸𑀦𑀦𑁂 𑀘 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀤𑁄𑀲𑀸𑀧𑀢𑁆𑀢𑀺𑀬𑀸 𑀘 𑀬𑀁 𑀯𑀼𑀢𑁆𑀢𑀁 ‘‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺, 𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀧𑀢𑁆𑀢𑀺𑀁, 𑀓𑀸𑀮𑀯𑀲𑁂𑀦 𑀘 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀦𑀸𑀦𑀸𑀭𑀫𑁆𑀫𑀡𑀢𑀸𑀪𑀸𑀯𑀁 𑀤𑀺𑀲𑁆𑀯𑀸 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀯𑀢𑁆𑀢𑀫𑀸𑀦𑀢𑀁 𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀢𑀫𑁆𑀧𑀺 𑀯𑀘𑀦𑀁 𑀧𑀼𑀭𑀺𑀫𑀯𑀸𑀤𑀺𑀦𑁄 𑀦𑀸𑀦𑀼𑀚𑀸𑀦𑁂𑀬𑁆𑀬𑀼𑀁. 𑀢𑀲𑁆𑀫𑀺𑀁 𑀳𑀺 𑀲𑀢𑀺 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸 𑁧.𑁧.𑁪𑁧𑁭) 𑀯𑀺𑀬 𑀅𑀜𑁆𑀜𑀧𑀤𑀲𑀗𑁆𑀕𑀳𑀺𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀺𑀥𑀸𑀦𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀆𑀯𑀚𑁆𑀚𑀦𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀦𑁆𑀢𑀺.

𑀓𑀲𑁆𑀫𑀸 𑀧𑀦𑁂𑀯𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀺𑀘𑀸𑀭𑀺𑀢𑀸, 𑀦𑀦𑀼 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀦𑀸𑀕𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁨) 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂𑀲𑀼 ‘‘𑀅𑀢𑀻𑀢𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀦𑀸𑀕𑀢𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀉𑀧𑁆𑀧𑀸𑀤𑀺𑀦𑁄 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁭.𑁩) 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁩) 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁮.𑁩), 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 ‘‘𑀉𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 ¶ 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁭.𑁨) 𑀏𑀢𑁆𑀢𑀓𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀧𑀯𑀢𑁆𑀢𑁂𑀬𑁆𑀬, 𑀧𑀼𑀭𑀺𑀫𑁂𑀲𑀼 𑀯𑀺𑀬 𑀇𑀢𑀭𑁂𑀲𑀼 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀲𑀘𑁆𑀘𑀁 𑀓𑀢𑁆𑀢𑀩𑁆𑀩𑀁, 𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀦 𑀢𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀬 𑀧𑀸𑀴𑀺𑀬𑀸 𑀯𑀺𑀜𑁆𑀜𑀸𑀬𑀢𑀺.

‘‘𑀅𑀢𑀻𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄 ¶ 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁦-𑁨𑁨) 𑀏𑀢𑁂𑀲𑀁 𑀳𑀺 𑀯𑀺𑀪𑀗𑁆𑀕𑁂𑀲𑀼 ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀅𑀦𑀸𑀕𑀢𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁦-𑁨𑁨) 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀢𑁂𑀦𑁂𑀯𑀸𑀬𑀁 𑀯𑀺𑀘𑀸𑀭𑀡𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁭. 𑀢𑁂𑀲𑀦𑁆𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀜𑀸𑀡𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑀁 𑀔𑀦𑁆𑀥𑀁 𑀯𑀸 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀁 𑀯𑀸 𑀦 𑀚𑀸𑀦𑀸𑀢𑀻’’𑀢𑀺. 𑀢𑀢𑁆𑀣 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀁 𑀦𑀸𑀫𑀕𑁄𑀢𑁆𑀢𑀸𑀤𑀺. 𑀬𑀤𑀺 𑀏𑀯𑀁 𑀓𑀣𑀁 𑀫𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 𑀆𑀳 ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀭𑀺𑀬𑀸𑀬𑀢𑁄 𑀫𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀘𑁂𑀢𑀦𑀸𑀫𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁, 𑀢𑀣𑀸 𑀳𑀺 𑀢𑀁 ‘‘𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀲𑀽𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑀫𑁆𑀧𑀺 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀫𑁂𑀯. 𑀔𑀦𑁆𑀥𑁂𑀳𑀺 𑀯𑀺𑀲𑀬𑀻𑀓𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀅𑀢𑀻𑀢𑁂 𑀩𑀼𑀤𑁆𑀥𑀸 𑀫𑀕𑁆𑀕𑀁 𑀪𑀸𑀯𑀬𑀺𑀁𑀲𑀼, 𑀨𑀮𑀁 𑀲𑀘𑁆𑀙𑀸𑀓𑀁𑀲𑀼, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀽𑀢𑀺 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀧𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁧𑁪𑁨𑁧). 𑀢𑀢𑁆𑀣 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀫𑀕𑁆𑀕𑀨𑀮𑁂𑀲𑀼 𑀜𑀸𑀡𑁂𑀲𑀼 𑀧𑀯𑀢𑁆𑀢𑀦𑁆𑀢𑀺. 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀲𑀼 𑀅𑀧𑁆𑀧𑀫𑀸𑀡𑀥𑀫𑁆𑀫𑁂𑀲𑀼 𑀜𑀸𑀡𑁂𑀲𑀽𑀢𑀺 𑀫𑀕𑁆𑀕𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀁 𑀲𑀸𑀥𑁂𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀅𑀧𑁆𑀧𑀫𑀸𑀡𑀸 𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 ¶ 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀇𑀘𑁆𑀘𑁂𑀯 (𑀧𑀝𑁆𑀞𑀸. 𑁯.𑁧𑁨.𑁫𑁮) 𑀳𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀏𑀯 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑁂 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀦𑀺𑀤𑀲𑁆𑀲𑀺𑀢𑀸.

𑀓𑀼𑀲𑀮𑀸 ¶ 𑀔𑀦𑁆𑀥𑀸𑀢𑀺 𑀇𑀤𑁆𑀥𑀺𑀯𑀺𑀥𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀸𑀕𑀢𑀁𑀲𑀜𑀸𑀡𑀸𑀧𑁂𑀓𑁆𑀔𑁄 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄, 𑀦 𑀘𑁂𑀢𑁄𑀧𑀭𑀺𑀬𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀸𑀧𑁂𑀓𑁆𑀔𑀸𑀢𑀺 𑀢𑁂𑀲𑀁 𑀘𑀢𑀼𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀪𑀸𑀯𑀲𑁆𑀲 𑀅𑀲𑀸𑀥𑀓𑁄𑀢𑀺 𑀘𑁂? 𑀦, 𑀅𑀜𑁆𑀜𑀢𑁆𑀣 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁬.𑁭𑁨), ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀔𑀦𑁆𑀥𑀸 𑀘 𑀯𑀺𑀢𑀓𑁆𑀓𑁄 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁬.𑁭𑁩) 𑀘 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀧𑁂𑀓𑁆𑀔𑀸𑀧𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀢𑁄. 𑀏𑀯𑀫𑁆𑀧𑀺 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘𑀸’’𑀢𑀺𑀆𑀤𑀻𑀲𑀼 𑀅𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀢𑀸 𑀦 𑀲𑀺𑀚𑁆𑀛𑀢𑀻𑀢𑀺? 𑀦, 𑀢𑀢𑁆𑀣 𑀅𑀯𑀘𑀦𑀲𑁆𑀲 𑀅𑀜𑁆𑀜𑀓𑀸𑀭𑀡𑀢𑁆𑀢𑀸. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀳𑀺 𑀓𑀫𑁆𑀫𑀲𑀁𑀲𑀝𑁆𑀞𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀓𑀫𑁆𑀫𑀫𑀼𑀔𑁂𑀦 𑀕𑀬𑁆𑀳𑀢𑀺. 𑀢𑀜𑁆𑀳𑀺 𑀬𑀣𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀭𑀺𑀫𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀯𑀺𑀢𑀓𑁆𑀓𑀸𑀤𑀺𑀯𑀺𑀪𑀸𑀕𑀁, 𑀲𑀭𑀸𑀕𑀸𑀤𑀺𑀯𑀺𑀪𑀸𑀕𑀜𑁆𑀘 𑀘𑀺𑀢𑁆𑀢𑀁 𑀯𑀺𑀪𑀸𑀯𑁂𑀢𑀺, 𑀦 𑀏𑀯𑀁 𑀯𑀺𑀪𑀸𑀕𑀁 𑀯𑀺𑀪𑀸𑀯𑁂𑀢𑀺. 𑀓𑀫𑁆𑀫𑀯𑀲𑁂𑀦𑁂𑀯 𑀧𑀦 𑀲𑀫𑀼𑀤𑀸𑀬𑀁 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀔𑀦𑁆𑀥𑀸 𑀘 𑀯𑀺𑀘𑀸𑀭𑁄 𑀘𑀸’’𑀢𑀺𑀆𑀤𑀺𑀓𑁂 𑀯𑀺𑀪𑀸𑀕𑀓𑀭𑀡𑁂 𑀢𑀁 𑀦 𑀯𑀼𑀢𑁆𑀢𑀁, 𑀦 𑀘𑀢𑀼𑀓𑁆𑀔𑀦𑁆𑀥𑀸𑀦𑀸𑀭𑀫𑁆𑀫𑀡𑀢𑁄𑀢𑀺. 𑀇𑀤𑀁 𑀧𑀦𑀲𑁆𑀲 𑀅𑀓𑀸𑀭𑀡𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣𑀸𑀧𑀺 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸’’𑀢𑀺 𑀧𑀞𑀦𑁆𑀢𑀺 𑀏𑀯. 𑀦 𑀳𑀺 𑀢𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀪𑀸𑀕𑀁 𑀯𑀺𑀬 𑀲𑀯𑀺𑀢𑀓𑁆𑀓𑀸𑀤𑀺𑀯𑀺𑀪𑀸𑀕𑀁 𑀓𑀫𑁆𑀫𑀁 𑀯𑀺𑀪𑀸𑀯𑁂𑀢𑀼𑀁 𑀅𑀲𑀫𑀢𑁆𑀣𑀁. 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀯𑀺𑀪𑀸𑀯𑀦𑀫𑁆𑀧𑀺 𑀳𑀺 𑀮𑁄𑀪𑀸𑀤𑀺𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀯𑀺𑀪𑀸𑀕𑀯𑀺𑀲𑁂𑀲𑀯𑀺𑀪𑀸𑀯𑀦𑀁 𑀳𑁄𑀢𑀻𑀢𑀺.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀦𑀸𑀫𑀕𑁄𑀢𑁆𑀢𑀁 𑀧𑀦 𑀔𑀦𑁆𑀥𑀽𑀧𑀦𑀺𑀩𑀦𑁆𑀥𑁄 𑀲𑀫𑁆𑀫𑀼𑀢𑀺𑀲𑀺𑀤𑁆𑀥𑁄 𑀩𑁆𑀬𑀜𑁆𑀚𑀦𑀢𑁆𑀣𑁄, 𑀦 𑀩𑁆𑀬𑀜𑁆𑀚𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑀲𑁆𑀲𑀸𑀬𑀁 𑀅𑀢𑁆𑀢𑀦𑁄 𑀫𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀦 𑀩𑁆𑀬𑀜𑁆𑀚𑀦’’𑀦𑁆𑀢𑀺, 𑀢𑀲𑁆𑀲 𑀲𑀫𑀢𑁆𑀣𑀦𑀁 ‘‘𑀩𑁆𑀬𑀜𑁆𑀚𑀦𑀜𑁆𑀳𑀻’’𑀢𑀺𑀆𑀤𑀺.

𑁪𑁧𑁯. 𑀓𑀸𑀫𑀸𑀯𑀘𑀭𑁂 ¶ 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀓𑁆𑀔𑀦𑁆𑀥𑀚𑀸𑀦𑀦𑀫𑀸𑀳.

𑁪𑁨𑁦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀯𑀲𑁂𑀦 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀁, 𑀆𑀭𑀫𑁆𑀫𑀡𑀯𑀺𑀘𑀸𑀭𑁂. ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀜𑁆𑀘𑁂𑀯 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀜𑁆𑀘𑀸’’𑀢𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ¶ 𑀬𑀁 𑀯𑀼𑀢𑁆𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁, 𑀢𑀁 ‘‘𑀓𑀸𑀮𑁂𑀦…𑀧𑁂… 𑀳𑁄𑀢𑀺𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀦𑀸𑀫 𑀯𑀺𑀲𑀼𑀁 𑀏𑀓𑀁 𑀅𑀢𑁆𑀣𑀺, 𑀦𑀸𑀧𑀺 𑀢𑀁 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀁 𑀓𑀭𑀻𑀬𑀢𑀻𑀢𑀺. 𑀬𑀤𑀺 𑀏𑀯𑀁 𑀢𑀺𑀓𑁄 𑀏𑀯 𑀦 𑀧𑀽𑀭𑀢𑀺 𑀧𑀤𑀤𑁆𑀯𑀬𑀸𑀲𑀗𑁆𑀕𑀳𑀺𑀢𑀲𑁆𑀲 𑀢𑀢𑀺𑀬𑀲𑁆𑀲 𑀅𑀢𑁆𑀣𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄, 𑀦, 𑀧𑀓𑀸𑀭𑀪𑁂𑀤𑀯𑀺𑀲𑀬𑀢𑁆𑀢𑀸 𑀢𑀺𑀓𑀦𑀺𑀤𑁆𑀤𑁂𑀲𑀲𑁆𑀲. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂 𑀏𑀯 𑀢𑀺𑀧𑁆𑀧𑀓𑀸𑀭𑁂𑀧𑀺 𑀥𑀫𑁆𑀫𑁂’’𑀢𑀺 𑀯𑀼𑀢𑁆𑀢𑀁. 𑀢𑁂 𑀏𑀯 𑀅𑀚𑁆𑀛𑀢𑁆𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁂𑀧𑀺 𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 ‘‘𑀢𑁂 𑀏𑀯 𑀥𑀫𑁆𑀫𑁂’’𑀢𑀺 𑀅𑀯𑀢𑁆𑀯𑀸 ‘‘𑀢𑀺𑀧𑁆𑀧𑀓𑀸𑀭𑁂’’𑀢𑀺 𑀯𑀘𑀦𑀁 𑀧𑀓𑀸𑀭𑀪𑁂𑀤𑀦𑀺𑀩𑀦𑁆𑀥𑀦𑀸 𑀅𑀬𑀁 𑀢𑀺𑀓𑀤𑁂𑀲𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀳𑀺 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀦𑀁 𑀤𑁂𑀲𑀦𑀸 𑀬𑀣𑀸𑀭𑀳𑀁 𑀥𑀫𑁆𑀫𑀸𑀦𑀁 𑀚𑀸𑀢𑀺𑀲𑀫𑁆𑀧𑀬𑁄𑀕𑀧𑁆𑀧𑀳𑀸𑀦𑀲𑀺𑀓𑁆𑀔𑀸𑀪𑀽𑀫𑀺𑀆𑀭𑀫𑁆𑀫𑀡𑀧𑁆𑀧𑀪𑁂𑀤𑀦𑀺𑀬𑀫𑀓𑀸𑀮𑀸𑀤𑀺𑀪𑁂𑀤𑀦𑀺𑀩𑀦𑁆𑀥𑀦𑀸, 𑀦 𑀏𑀯𑀫𑀬𑀁 𑀚𑀸𑀢𑀺𑀆𑀤𑀺𑀪𑁂𑀤𑀦𑀺𑀩𑀦𑁆𑀥𑀦𑀸, 𑀦𑀸𑀧𑀺 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀳𑁂𑀢𑀼𑀤𑀼𑀓𑀸𑀤𑀺𑀤𑁂𑀲𑀦𑀸 𑀯𑀺𑀬 𑀲𑀪𑀸𑀯𑀸𑀤𑀺𑀪𑁂𑀤𑀦𑀺𑀩𑀦𑁆𑀥𑀦𑀸, 𑀅𑀣 𑀔𑁄 𑀧𑀓𑀸𑀭𑀪𑁂𑀤𑀦𑀺𑀩𑀦𑁆𑀥𑀦𑀸. 𑀧𑀜𑁆𑀘𑁂𑀯 𑀳𑀺 𑀔𑀦𑁆𑀥𑀸 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀁 𑀉𑀧𑀸𑀤𑀸𑀬 ‘‘𑀅𑀚𑁆𑀛𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀁 𑀉𑀧𑀸𑀤𑀸𑀬 ‘‘𑀩𑀳𑀺𑀤𑁆𑀥𑀸’’𑀢𑀺, 𑀢𑀤𑀼𑀪𑀬𑀁 𑀉𑀧𑀸𑀤𑀸𑀬 ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸’’𑀢𑀺. 𑀢𑁂𑀦𑀸𑀳 ‘‘𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸’’𑀢𑀺 (𑀥. 𑀲. 𑁧𑁪𑁩𑁫). 𑀦𑀦𑀼 𑀘𑁂𑀢𑁆𑀣 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄, 𑀧𑀓𑀸𑀭𑀦𑁆𑀢𑀭𑀲𑁆𑀲 𑀘 𑀅𑀦𑀸𑀫𑀝𑁆𑀞𑀢𑁆𑀢𑀸 𑀢𑀢𑀺𑀬𑁄 𑀭𑀸𑀲𑀺 𑀦𑀢𑁆𑀣𑀻𑀢𑀺? 𑀦𑀬𑀺𑀤𑀫𑁂𑀯𑀁. 𑀬𑀤𑀺𑀧𑀺 𑀳𑀺 𑀧𑀞𑀫𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀤𑀼𑀢𑀺𑀬𑀧𑀤𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀪𑀸𑀯𑀥𑀫𑁆𑀫𑀸 𑀧𑀤𑀤𑁆𑀯𑀬𑁂𑀦𑁂𑀯 𑀧𑀭𑀺𑀕𑁆𑀕𑀳𑀺𑀢𑀸, 𑀢𑁂𑀳𑀺 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑀺𑀢𑀥𑀫𑁆𑀫𑁂 𑀏𑀓𑀚𑁆𑀛𑀁 𑀕𑀳𑀡𑀯𑀲𑁂𑀦 𑀢𑀢𑀺𑀬𑀧𑀤𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁂𑀯 𑀢𑀢𑀺𑀬𑁄 𑀭𑀸𑀲𑀺. 𑀦 𑀳𑀺 𑀲𑀫𑀼𑀤𑀸𑀬𑁄 𑀅𑀯𑀬𑀯𑁄 𑀳𑁄𑀢𑀺, 𑀪𑀺𑀦𑁆𑀦𑀯𑀢𑁆𑀣𑀼𑀓𑁂 𑀧𑀦 𑀥𑀫𑁆𑀫𑁂 𑀅𑀥𑀺𑀝𑁆𑀞𑀸𑀦𑀪𑁂𑀤𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀚𑁆𑀛𑀁 𑀕𑀳𑀡𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁, 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸 𑀚𑀸𑀦𑀦𑀓𑀸𑀮𑁂𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀢𑁂𑀭𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁪. 𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁪𑁨𑁧. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 ¶ ¶ 𑀉𑀧𑀘𑀸𑀭𑀸𑀓𑀸𑀭𑁄, 𑀅𑀧𑁆𑀧𑀦𑀸𑀓𑀸𑀭𑁄, 𑀯𑀲𑀻𑀪𑀸𑀯𑀸𑀓𑀸𑀭𑁄, 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑀸𑀓𑀸𑀭𑁄, 𑀭𑀽𑀧𑀸𑀤𑀻𑀳𑀺 𑀯𑀺𑀭𑀚𑁆𑀚𑀦𑀸𑀓𑀸𑀭𑁄, 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀲𑁆𑀲 𑀧𑀭𑀺𑀤𑀫𑀦𑀸𑀓𑀸𑀭𑁄, 𑀧𑀜𑁆𑀘𑀯𑀺𑀥𑀆𑀦𑀺𑀲𑀁𑀲𑀸𑀥𑀺𑀕𑀫𑀸𑀓𑀸𑀭𑁄𑀢𑀺 𑀏𑀯𑀫𑀸𑀤𑀺𑀦𑀸 𑀲𑀩𑁆𑀩𑁂𑀦 𑀪𑀸𑀯𑀦𑀸𑀓𑀸𑀭𑁂𑀦.

𑀢𑀤𑀦𑀦𑁆𑀢𑀭𑀸𑀢𑀺 ‘‘𑀘𑀺𑀢𑁆𑀢𑀁 𑀧𑀜𑁆𑀜’’𑀦𑁆𑀢𑀺 𑀏𑀯𑀁 𑀤𑁂𑀲𑀦𑀸𑀓𑁆𑀓𑀫𑁂𑀦, 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀘 𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀅𑀦𑀦𑁆𑀢𑀭𑀸. 𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀲𑀫𑀸𑀥𑀺𑀪𑀸𑀯𑀦𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 𑀏𑀯𑀁 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑀢𑁆𑀢𑀸, 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀸 ‘‘𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀢𑁆𑀣’’𑀦𑁆𑀢𑀺 𑀏𑀯𑀁 𑀅𑀢𑀺𑀯𑀺𑀬 𑀲𑀗𑁆𑀔𑁂𑀧𑁂𑀦 𑀪𑀸𑀲𑀺𑀢𑀢𑁆𑀢𑀸 𑀅𑀬𑀁 𑀲𑀸 𑀧𑀜𑁆𑀜𑀸𑀢𑀺 𑀲𑀪𑀸𑀯𑀢𑁄 𑀯𑀺𑀜𑁆𑀜𑀸𑀢𑀼𑀫𑁆𑀧𑀺 𑀢𑀸𑀯 𑀦 𑀲𑀼𑀓𑀭𑀸. 𑀪𑀸𑀯𑀦𑀸𑀯𑀺𑀥𑀸𑀦𑀲𑁆𑀲 𑀧𑀦 𑀅𑀤𑀲𑁆𑀲𑀺𑀢𑀢𑁆𑀢𑀸 𑀧𑀕𑁂𑀯 𑀪𑀸𑀯𑁂𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀘𑁆𑀙𑀦𑀝𑁆𑀞𑁂𑀦 𑀧𑀜𑁆𑀳𑀸, 𑀓𑀫𑁆𑀫𑀁 𑀓𑀺𑀭𑀺𑀬𑀸 𑀓𑀭𑀡𑀁, 𑀧𑀜𑁆𑀳𑀸𑀯 𑀓𑀫𑁆𑀫𑀁 𑀧𑀜𑁆𑀳𑀸𑀓𑀫𑁆𑀫𑀁, 𑀧𑀼𑀘𑁆𑀙𑀦𑀧𑀬𑁄𑀕𑁄𑀢𑀺 𑀅𑀢𑁆𑀣𑁄.

𑀓𑀸 𑀧𑀜𑁆𑀜𑀸𑀢𑀺 𑀲𑀭𑀽𑀧𑀧𑀼𑀘𑁆𑀙𑀸. 𑀓𑁂𑀦𑀝𑁆𑀞𑁂𑀦 𑀧𑀜𑁆𑀜𑀸𑀢𑀺 𑀓𑁂𑀦 𑀅𑀢𑁆𑀣𑁂𑀦 𑀧𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺, ‘‘𑀧𑀜𑁆𑀜𑀸’’𑀢𑀺 𑀧𑀤𑀁 𑀓𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀧𑀦𑀸𑀬𑀁 𑀧𑀜𑁆𑀜𑀸 𑀲𑀪𑀸𑀯𑀢𑁄, 𑀓𑀺𑀘𑁆𑀘𑀢𑁄, 𑀉𑀧𑀝𑁆𑀞𑀸𑀦𑀸𑀓𑀸𑀭𑀢𑁄, 𑀆𑀲𑀦𑁆𑀦𑀓𑀸𑀭𑀡𑀢𑁄 𑀘 𑀓𑀣𑀁 𑀚𑀸𑀦𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀓𑀸𑀦𑀲𑁆𑀲𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺. 𑀓𑀢𑀺𑀯𑀺𑀥𑀸𑀢𑀺 𑀧𑀪𑁂𑀤𑀧𑀼𑀘𑁆𑀙𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀼𑀘𑁆𑀙𑀸 𑀦 𑀕𑀳𑀺𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀮𑁄𑀓𑀼𑀢𑁆𑀢𑀭𑀸𑀬 𑀢𑀸𑀯 𑀧𑀜𑁆𑀜𑀸𑀬 𑀦𑀢𑁆𑀣𑁂𑀯 𑀲𑀁𑀓𑀺𑀮𑁂𑀲𑁄. 𑀅𑀲𑀢𑀺 𑀘 𑀢𑀲𑁆𑀫𑀺𑀁 𑀓𑀼𑀢𑁄 𑀯𑁄𑀤𑀸𑀦𑀧𑀼𑀘𑁆𑀙𑀸𑀢𑀺 𑀢𑀤𑀼𑀪𑀬𑀁 𑀦 𑀕𑀳𑀺𑀢𑀁. 𑀮𑁄𑀓𑀺𑀬𑀸𑀬 𑀧𑀦 𑀢𑀸𑀦𑀺 𑀪𑀸𑀯𑀦𑀸𑀯𑀺𑀥𑀸𑀦𑁂 𑀏𑀯 𑀅𑀦𑁆𑀢𑁄𑀕𑀥𑀸𑀦𑀻𑀢𑀺 𑀓𑀢𑁆𑀯𑀸 𑀯𑀺𑀲𑀼𑀁 𑀦 𑀕𑀳𑀺𑀢𑀸𑀦𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀅𑀦𑁆𑀢𑁄𑀕𑀥𑀢𑁆𑀢𑀸 ¶ , 𑀲𑀫𑀸𑀥𑀺𑀪𑀸𑀯𑀦𑀸𑀬𑀁 𑀯𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀤𑀺𑀝𑁆𑀞𑀸𑀦𑀺𑀲𑀁𑀲𑁂 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀜𑁆𑀜𑀸𑀪𑀸𑀯𑀦𑀸𑀬 𑀓𑁄 𑀆𑀦𑀺𑀲𑀁𑀲𑁄’’𑀢𑀺.

𑁪𑁨𑁨. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁, 𑀢𑀲𑁆𑀲 𑀯𑀸 𑀧𑀜𑁆𑀳𑀸𑀓𑀫𑁆𑀫𑀲𑁆𑀲. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀺𑀯𑀭𑀡𑀁. 𑀧𑀼𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀅𑀯𑀺𑀪𑀸𑀯𑀺𑀢𑀢𑁆𑀢𑀸 𑀦𑀺𑀕𑀽𑀴𑁆𑀳𑁄 𑀫𑀼𑀝𑁆𑀞𑀺𑀬𑀁 𑀓𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 ¶ 𑀯𑀺𑀯𑀭𑀡𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀽𑀢𑀪𑀸𑀯𑀓𑀭𑀡𑀢𑁄. 𑀓𑀸 𑀧𑀜𑁆𑀜𑀸𑀢𑀺 𑀓𑀸𑀫𑀜𑁆𑀘𑀸𑀬𑀁 𑀲𑀭𑀽𑀧𑀧𑀼𑀘𑁆𑀙𑀸, 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀧𑀦 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀯𑀺𑀪𑀸𑀕𑁄 𑀢𑀸𑀯 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀁𑀤𑀲𑁆𑀲𑀦𑁂𑀦 𑀘 𑀅𑀬𑀫𑀸𑀤𑀻𑀦𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀜𑀸 𑀩𑀳𑀼𑀯𑀺𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀳𑀼𑀯𑀺𑀥𑀸𑀢𑀺 𑀓𑀼𑀲𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀸. 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀅𑀢𑁆𑀣𑀚𑀸𑀧𑀺𑀓𑀸𑀤𑀺𑀪𑁂𑀤𑁂𑀦, 𑀲𑀼𑀢𑀫𑀬𑀜𑀸𑀡𑀸𑀤𑀺𑀪𑁂𑀤𑁂𑀦 𑀘 𑀦𑀸𑀦𑀸𑀯𑀺𑀥𑀸. 𑀢𑀁 𑀲𑀩𑁆𑀩𑀦𑁆𑀢𑀺 𑀢𑀁 𑀅𑀦𑀯𑀲𑁂𑀲𑀁 𑀧𑀜𑁆𑀜𑀸𑀯𑀺𑀪𑀸𑀕𑀁. 𑀦 𑀲𑀸𑀥𑁂𑀬𑁆𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀲𑀤𑁆𑀥𑀺𑀁 𑀫𑀕𑁆𑀕𑀪𑀸𑀯𑀦𑀸 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀣𑁄. 𑀢𑀸𑀬 𑀳𑀺 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑀁, 𑀢𑀜𑁆𑀘 𑀦 𑀲𑀸𑀥𑁂𑀬𑁆𑀬. 𑀅𑀦𑀯𑀲𑁂𑀲𑀢𑁄 𑀳𑀺 𑀧𑀜𑁆𑀜𑀸𑀧𑀪𑁂𑀤𑁂 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁂 ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀽’’𑀢𑀺𑀆𑀤𑀺𑀓𑁄 (𑀯𑀺𑀪. 𑁭𑁫𑁧) 𑀲𑀩𑁆𑀩𑁄 𑀜𑀸𑀡𑀯𑀢𑁆𑀣𑀼 𑀯𑀺𑀪𑀗𑁆𑀕𑁂, 𑀲𑀼𑀢𑁆𑀢𑀦𑁆𑀢𑁂𑀲𑀼 𑀘 𑀢𑀢𑁆𑀣 𑀢𑀢𑁆𑀣 𑀆𑀕𑀢𑁄 𑀧𑀜𑁆𑀜𑀸𑀧𑀪𑁂𑀤𑁄. 𑀲𑀓𑀮𑁄𑀧𑀺 𑀯𑀸 𑀅𑀪𑀺𑀥𑀫𑁆𑀫𑀦𑀬𑁄 𑀆𑀳𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀣𑀸 𑀘 𑀲𑀢𑀺 𑀬𑁆𑀯𑀸𑀬𑀁 𑀇𑀥 𑀧𑀜𑁆𑀜𑀸𑀪𑀸𑀯𑀦𑀸𑀯𑀺𑀥𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸𑀬 𑀑𑀓𑀸𑀲𑁄𑀯 𑀦 𑀪𑀯𑁂𑀬𑁆𑀬. 𑀓𑀺𑀜𑁆𑀘 𑀬𑁆𑀯𑀸𑀬𑀁 𑀞𑀸𑀦𑀸𑀞𑀸𑀦𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀸𑀤𑀺𑀯𑀺𑀲𑀬𑁂 𑀧𑀜𑁆𑀜𑀸𑀬 𑀧𑀯𑀢𑁆𑀢𑀺𑀪𑁂𑀤𑁄, 𑀲𑁄𑀧𑀺 𑀬𑀣𑀸𑀭𑀳𑀁 𑀲𑀤𑁆𑀥𑀺𑀁 𑀨𑀮𑀸𑀨𑀮𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀲𑀺𑀬𑀸. 𑀲𑁄 𑀘 𑀧𑀦 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁄 𑀅𑀜𑁆𑀜𑀤𑀢𑁆𑀣𑀼 𑀯𑀺𑀓𑁆𑀔𑁂𑀧𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀬𑀣𑀸 𑀢𑀁 𑀅𑀯𑀺𑀲𑀬𑁂. 𑀢𑁂𑀦𑀸𑀳 ‘‘𑀉𑀢𑁆𑀢𑀭𑀺 𑀘 𑀯𑀺𑀓𑁆𑀔𑁂𑀧𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺. 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮-𑀕𑁆𑀕𑀳𑀡𑁂𑀦 𑀤𑀼𑀯𑀺𑀥𑀫𑁆𑀧𑀺 𑀅𑀩𑁆𑀬𑀸𑀓𑀢𑀁 𑀦𑀺𑀯𑀢𑁆𑀢𑁂𑀢𑀺, 𑀢𑀣𑀸 ‘‘𑀅𑀢𑁆𑀣𑀺 𑀲𑀁𑀓𑀺𑀮𑀺𑀝𑁆𑀞𑀧𑀜𑁆𑀜𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀯𑀺𑀧𑀲𑁆𑀲𑀦𑀸𑀜𑀸𑀡-𑀕𑁆𑀕𑀳𑀡𑁂𑀦 𑀲𑁂𑀲𑀓𑀼𑀲𑀮𑀧𑀜𑁆𑀜𑀸.

𑁪𑁨𑁩. 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀸𑀓𑀸𑀭𑀯𑀺𑀲𑀺𑀝𑁆𑀞𑀦𑁆𑀢𑀺 𑀲𑀜𑁆𑀚𑀸𑀦𑀦𑀸𑀓𑀸𑀭𑀯𑀺𑀚𑀸𑀦𑀦𑀸𑀓𑀸𑀭𑁂𑀳𑀺 𑀲𑀸𑀢𑀺𑀲𑀬𑀁. 𑀬𑀢𑁄 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀦𑀁 𑀚𑀸𑀦𑀦𑀪𑀸𑀯𑁄 𑀯𑀺𑀲𑀬𑀕𑁆𑀕𑀳𑀡𑀸𑀓𑀸𑀭𑁄. 𑀲𑁄 𑀳𑀺 𑀦𑁂𑀲𑀁 𑀲𑀫𑀸𑀦𑁄, 𑀦 𑀲𑀜𑁆𑀚𑀸𑀦𑀦𑀸𑀤𑀺𑀆𑀓𑀸𑀭𑁄. 𑀧𑀻𑀢𑀓𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀤𑀻𑀖𑀁 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀓𑁂 𑀲𑀜𑁆𑀜𑀸𑀬 𑀕𑀳𑁂𑀢𑀩𑁆𑀩𑀸𑀓𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀲𑀜𑁆𑀚𑀸𑀦𑀦𑀁 𑀦𑀸𑀫 ‘‘𑀦𑀻𑀮𑀁 𑀧𑀻𑀢’’𑀦𑁆𑀢𑀺𑀆𑀤𑀺𑀓𑀁 𑀆𑀭𑀫𑁆𑀫𑀡𑁂 𑀯𑀺𑀚𑁆𑀚𑀫𑀸𑀦𑀁 𑀯𑀸 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀲𑀜𑁆𑀜𑀸𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀚𑀸𑀦𑀦𑀁. 𑀢𑀣𑀸 𑀳𑁂𑀲𑀸 𑀧𑀼𑀦 𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸. 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀯𑀺𑀚𑀸𑀦𑀦𑀧𑀚𑀸𑀦𑀦𑀸𑀓𑀸𑀭𑁂 𑀦𑀺𑀯𑀢𑁆𑀢𑁂𑀢𑀺, 𑀏𑀯-𑀲𑀤𑁆𑀤𑁂𑀦 𑀓𑀤𑀸𑀘𑀺𑀧𑀺 𑀇𑀫𑀺𑀲𑁆𑀲𑀸 𑀢𑁂 𑀯𑀺𑀲𑁂𑀲𑀸 ¶ 𑀦𑀢𑁆𑀣𑁂𑀯𑀸𑀢𑀺 𑀅𑀯𑀥𑀸𑀭𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 ¶ . 𑀢𑀢𑁆𑀣 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀫𑁆𑀧𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀜𑁆𑀜𑀸 𑀓𑀼𑀢𑁄 𑀧𑀜𑁆𑀜𑀸𑀓𑀺𑀘𑁆𑀘𑀁 𑀓𑀭𑁂𑀬𑁆𑀬𑀸𑀢𑀺 ‘‘𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀧𑀸𑀢𑀼𑀪𑀸𑀯’’𑀦𑁆𑀢𑀺. 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀦 𑀢𑀢𑁆𑀣 𑀲𑀜𑁆𑀜𑀸 𑀯𑀺𑀬 𑀦𑀻𑀮𑀧𑀻𑀢𑀸𑀤𑀺𑀓𑀲𑁆𑀲 𑀲𑀜𑁆𑀚𑀸𑀦𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀢𑀢𑁆𑀣 𑀅𑀜𑁆𑀜𑀜𑁆𑀘 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺. 𑀓𑀣𑀁 𑀧𑀦 𑀯𑀺𑀜𑁆𑀜𑀸𑀡𑀁 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀻𑀢𑀺? 𑀧𑀜𑁆𑀜𑀸𑀬 𑀤𑀲𑁆𑀲𑀺𑀢𑀫𑀕𑁆𑀕𑁂𑀦. 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀳𑀺 𑀅𑀦𑁂𑀓𑀯𑀸𑀭𑀁 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀧𑀕𑀼𑀡𑀪𑀸𑀯𑀢𑁄 𑀧𑀭𑀺𑀘𑀬𑀯𑀲𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀯𑀺𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺, 𑀬𑀣𑀸 𑀢𑀁 𑀧𑀕𑀼𑀡𑀲𑁆𑀲 𑀕𑀦𑁆𑀣𑀲𑁆𑀲 𑀲𑀚𑁆𑀛𑀸𑀬𑀦𑁂 𑀜𑀸𑀬𑀸𑀕𑀢𑀸𑀧𑀺 𑀯𑀸𑀭𑀸 𑀦 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑁆𑀢𑀺 𑀘 𑀮𑀓𑁆𑀔𑀡𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀝𑀺𑀯𑀺𑀚𑁆𑀛𑀦𑀁. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀧𑀝𑀺𑀧𑀸𑀝𑀺𑀬𑀸 𑀆𑀬𑀽𑀳𑀺𑀢𑁆𑀯𑀸. 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀲𑀫𑁆𑀩𑁄𑀥𑀲𑀪𑀸𑀯𑀢𑁆𑀢𑀸. 𑀯𑀼𑀢𑁆𑀢𑀦𑀬𑀯𑀲𑁂𑀦𑀸𑀢𑀺 𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀦𑀬𑀯𑀲𑁂𑀦 𑀆𑀭𑀫𑁆𑀫𑀡𑀜𑁆𑀘 𑀚𑀸𑀦𑀸𑀢𑀺, 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀺. 𑀅𑀢𑁆𑀢𑀦𑁄 𑀧𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀆𑀦𑀼𑀪𑀸𑀯𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀜𑁆𑀘 𑀧𑀸𑀧𑁂𑀢𑀺.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀚𑀸𑀢𑀩𑀼𑀤𑁆𑀥𑀻𑀢𑀺 𑀅𑀲𑀜𑁆𑀚𑀸𑀢𑀩𑁆𑀬𑀯𑀳𑀸𑀭𑀩𑀼𑀤𑁆𑀥𑀺. 𑀉𑀧𑀪𑁄𑀕𑀧𑀭𑀺𑀪𑁄𑀕𑀦𑁆𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀁, 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀽𑀦𑀁 𑀧𑀝𑀺𑀮𑀸𑀪𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀙𑁂𑀓𑁄𑀢𑀺 𑀫𑀳𑀸𑀲𑀸𑀭𑁄. 𑀓𑀽𑀝𑁄𑀢𑀺 𑀓𑀳𑀸𑀧𑀡𑀧𑀢𑀺𑀭𑀽𑀧𑀓𑁄 𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑁄. 𑀅𑀤𑁆𑀥𑀲𑀸𑀭𑁄𑀢𑀺 𑀉𑀧𑀟𑁆𑀠𑀕𑁆𑀖𑀦𑀓𑁄. 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀧𑀸𑀤𑀲𑀸𑀭 𑀲𑀫𑀲𑀸𑀭𑀧𑀭𑁄𑀧𑀸𑀤𑀲𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀢𑁂 𑀧𑀓𑀸𑀭𑁂𑀢𑀺 𑀇𑀦𑁆𑀤𑀚𑀸𑀮𑀸𑀚𑀸𑀢𑀺𑀧𑀼𑀧𑁆𑀨𑀸𑀤𑀺𑀧𑁆𑀧𑀓𑀸𑀭𑁂 𑀘𑁂𑀯 𑀙𑁂𑀓𑀸𑀤𑀺𑀧𑁆𑀧𑀓𑀸𑀭𑁂 𑀘.

𑀲𑀜𑁆𑀜𑀸 𑀳𑀻𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀲𑀜𑁆𑀜𑀸 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀧𑀺𑀡𑁆𑀟𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀢𑁄 𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀻 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀲𑀸 ‘‘𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸’’ 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀡𑀁 𑀆𑀭𑀫𑁆𑀫𑀡𑁂 𑀏𑀓𑀘𑁆𑀘𑀯𑀺𑀲𑁂𑀲𑀕𑀳𑀡𑀲𑀫𑀢𑁆𑀣𑀢𑀸𑀬 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸 𑀆𑀭𑀫𑁆𑀫𑀡𑁂 𑀅𑀦𑀯𑀲𑁂𑀲𑀯𑀺𑀲𑁂𑀲𑀸𑀯𑀩𑁄𑀥𑀢𑁄 𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀻 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦𑀸𑀦𑀧𑁆𑀧𑀓𑀸𑀭𑀢𑁄 ¶ 𑀚𑀸𑀦𑀦’’𑀦𑁆𑀢𑀺 𑀇𑀫𑀺𑀦𑀸 𑀜𑁂𑀬𑁆𑀬𑀥𑀫𑁆𑀫𑀸 𑀧𑀘𑁆𑀘𑁂𑀓𑀁 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀢𑁂𑀲𑀁 𑀬𑀸𑀣𑀸𑀯𑀢𑁄 𑀅𑀯𑀩𑁄𑀥𑁄 𑀧𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫).

𑀬𑀢𑁆𑀣𑀸𑀢𑀺 ¶ 𑀬𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂. 𑀦 𑀢𑀢𑁆𑀣 𑀏𑀓𑀁𑀲𑁂𑀦 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀧𑀜𑁆𑀜𑀸 𑀏𑀓𑀦𑁆𑀢𑁂𑀦 𑀦 𑀳𑁄𑀢𑀺. 𑀦 𑀳𑀺 𑀤𑀼𑀳𑁂𑀢𑀼𑀓𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀢𑀺 𑀅𑀯𑀺𑀬𑀼𑀢𑁆𑀢𑀸. 𑀢𑁂𑀳𑀻𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀳𑀺. 𑀬𑀣𑀸 𑀳𑀺 𑀲𑀼𑀔𑀁 𑀧𑀻𑀢𑀺𑀬𑀸 𑀦 𑀦𑀺𑀬𑀫𑀢𑁄 𑀅𑀯𑀺𑀬𑀼𑀢𑁆𑀢𑀁, 𑀏𑀯𑀁 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀺 𑀧𑀜𑁆𑀜𑀸𑀬 𑀦 𑀦𑀺𑀬𑀫𑀢𑁄 𑀅𑀯𑀺𑀬𑀼𑀢𑁆𑀢𑀸𑀢𑀺. 𑀬𑀣𑀸 𑀧𑀦 𑀧𑀻𑀢𑀺 𑀲𑀼𑀔𑁂𑀦 𑀦𑀺𑀬𑀫𑀢𑁄 𑀅𑀯𑀺𑀬𑀼𑀢𑁆𑀢𑀸, 𑀏𑀯𑀁 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀳𑀺 𑀦𑀺𑀬𑀫𑀢𑁄 𑀅𑀯𑀺𑀬𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀯𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑁂𑀲𑀼 𑀇𑀫𑁂𑀲𑀼 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀢𑁂𑀲𑀁 𑀯𑀺𑀦𑀺𑀩𑁆𑀪𑁄𑀕𑁄 𑀤𑀼𑀓𑁆𑀓𑀭𑁄𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀓𑀳𑀸𑀧𑀡𑀤𑀲𑁆𑀲𑀦𑀁 𑀦𑀺𑀤𑀲𑁆𑀲𑀺𑀢𑀦𑁆𑀢𑀺. 𑀢𑁂𑀲𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀁𑀬𑁂𑀯 𑀯𑀘𑀦𑀦𑁆𑀢𑀭𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀥𑀫𑁆𑀫𑁂𑀲𑀼𑀧𑀺 𑀢𑀸𑀯 𑀦𑀸𑀦𑀸𑀦𑀤𑀻𑀦𑀁 𑀉𑀤𑀓𑀲𑁆𑀲, 𑀦𑀸𑀦𑀸𑀢𑁂𑀮𑀲𑁆𑀲 𑀯𑀸 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀣𑀺𑀢𑀲𑁆𑀲 ‘‘𑀇𑀤𑀁 𑀅𑀲𑀼𑀓𑀸𑀬 𑀦𑀤𑀺𑀬𑀸 𑀉𑀤𑀓𑀁, 𑀇𑀤𑀁 𑀅𑀲𑀼𑀓𑀢𑁂𑀮’’𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁 𑀤𑀼𑀓𑁆𑀓𑀭𑀁, 𑀓𑀺𑀫𑀗𑁆𑀕𑀁 𑀧𑀦 𑀅𑀭𑀽𑀧𑀥𑀫𑁆𑀫𑁂𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑁪𑁨𑁪. 𑀥𑀫𑁆𑀫𑀸𑀦𑀁 𑀲𑀓𑁄 𑀪𑀸𑀯𑁄, 𑀲𑀫𑀸𑀦𑁄 𑀘 𑀪𑀸𑀯𑁄 𑀥𑀫𑁆𑀫𑀲𑀪𑀸𑀯𑁄. 𑀢𑀢𑁆𑀣 𑀧𑀞𑀫𑁂𑀦 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀮𑀓𑁆𑀔𑀡𑀁 𑀕𑀳𑀺𑀢𑀁, 𑀤𑀼𑀢𑀺𑀬𑁂𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀢𑀤𑀼𑀪𑀬𑀲𑁆𑀲 𑀘 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀦𑀮𑀓𑁆𑀔𑀡𑀸 𑀧𑀜𑁆𑀜𑀸𑀢𑀺 𑀆𑀳 ‘‘𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺. 𑀖𑀝𑀧𑀝𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀩𑀸𑀳𑀺𑀭𑀦𑁆𑀥𑀓𑀸𑀭𑀲𑁆𑀲 𑀤𑀻𑀧𑀸𑀮𑁄𑀓𑀸𑀤𑀺 𑀯𑀺𑀬 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀤𑁆𑀥𑀁𑀲𑀦𑀭𑀲𑀸. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀯 𑀳𑀺 𑀧𑀜𑁆𑀜𑀸𑀮𑁄𑀓𑁄 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀏𑀯𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀏𑀯 𑀥𑀫𑁆𑀫𑀲𑀪𑀸𑀯𑁂𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀓𑀸𑀭𑀡𑀪𑀽𑀢𑀸 𑀯𑀸 𑀲𑀬𑀁 𑀨𑀮𑀪𑀽𑀢𑀁 𑀅𑀲𑀫𑁆𑀫𑁄𑀳𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀏𑀯𑀫𑁆𑀧𑀺 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀲𑀫𑀸𑀥𑀺 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀲𑀼𑀢𑁆𑀢𑀧𑀤𑀁 𑀦𑀺𑀩𑀦𑁆𑀥𑀦𑀪𑀸𑀯𑁂𑀦 𑀆𑀕𑀢𑀁 (𑀲𑀁. 𑀦𑀺. 𑁩.𑁫, 𑁯𑁯; 𑀲𑀁. 𑀦𑀺. 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪).

𑀧𑀜𑁆𑀜𑀸𑀧𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁪𑁨𑁫. 𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑁄 ¶ 𑀦𑀸𑀫 𑀧𑀜𑁆𑀜𑀸𑀬 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄, 𑀦 𑀢𑁂𑀦𑀲𑁆𑀲𑀸 𑀓𑁄𑀘𑀺 𑀯𑀺𑀪𑀸𑀕𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑁂𑀦 𑀢𑀸𑀯 𑀏𑀓𑀯𑀺𑀥𑀸’’𑀢𑀺. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀮𑁄𑀓𑁂 𑀦𑀺𑀬𑀼𑀢𑁆𑀢𑀸, 𑀢𑀢𑁆𑀣 𑀯𑀸 𑀯𑀺𑀤𑀺𑀢𑀸𑀢𑀺 𑀮𑁄𑀓𑀺𑀬𑀸. 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀮𑁄𑀓𑀢𑁄 𑀉𑀢𑁆𑀢𑀭𑀸 𑀉𑀢𑁆𑀢𑀺𑀡𑁆𑀡𑀸𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀮𑁄𑀓𑀼𑀢𑁆𑀢𑀭𑀸𑀧𑀺 ¶ 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑀸𑀬𑁄𑀧𑀺 𑀢𑀲𑁆𑀲𑀸 𑀮𑀩𑁆𑀪𑀢𑁂𑀯𑀸𑀢𑀺 𑀮𑁄𑀓𑀼𑀢𑁆𑀢𑀭-𑀕𑁆𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀺. 𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀧𑀺 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀆𑀲𑀯𑀸𑀢𑀺 𑀅𑀦𑀸𑀲𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀤𑀼𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀯𑀲𑁂𑀦𑀸𑀢𑀺 𑀦𑀸𑀫𑀯𑀯𑀢𑁆𑀣𑀸𑀦𑀯𑀲𑁂𑀦, 𑀭𑀽𑀧𑀯𑀯𑀢𑁆𑀣𑀸𑀦𑀯𑀲𑁂𑀦 𑀘. 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 𑀤𑀲𑁆𑀲𑀦𑀜𑁆𑀘, 𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀪𑀯𑀦𑁆𑀢𑀺 𑀏𑀢𑁆𑀣, 𑀲𑀬𑀫𑁆𑀧𑀺 𑀯𑀸 𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀅𑀧𑀸𑀢𑀼𑀪𑀸𑀯𑀦𑁆𑀢𑀺 𑀪𑀽𑀫𑀺 𑀘𑀸𑀢𑀺 𑀤𑀲𑁆𑀲𑀦𑀪𑀽𑀫𑀺, 𑀧𑀞𑀫𑀫𑀕𑁆𑀕𑁄. 𑀲𑁂𑀲𑀫𑀕𑁆𑀕𑀢𑁆𑀢𑀬𑀁 𑀧𑀦 𑀬𑀲𑁆𑀫𑀸 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀺𑀜𑁆𑀘𑀺 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀪𑀸𑀯𑀦𑀸 𑀘 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀪𑀽𑀫𑀺 𑀘𑀸𑀢𑀺 𑀪𑀸𑀯𑀦𑀸𑀪𑀽𑀫𑀺. 𑀢𑀢𑁆𑀣 𑀧𑀜𑁆𑀜𑀸 𑀤𑀲𑁆𑀲𑀦𑀪𑀽𑀫𑀺𑀪𑀸𑀯𑀦𑀸𑀪𑀽𑀫𑀺𑀯𑀲𑁂𑀦 𑀤𑀼𑀯𑀺𑀥𑀸𑀢𑀺 𑀯𑀼𑀢𑁆𑀢𑀸. 𑀲𑀼𑀢𑀸𑀤𑀺𑀦𑀺𑀭𑀧𑁂𑀓𑁆𑀔𑀸𑀬 𑀘𑀺𑀦𑁆𑀢𑀸𑀬 𑀦𑀺𑀩𑁆𑀩𑀢𑁆𑀢𑀸 𑀘𑀺𑀦𑁆𑀢𑀸𑀫𑀬𑀸. 𑀏𑀯𑀁 𑀲𑀼𑀢𑀫𑀬𑀸, 𑀪𑀸𑀯𑀦𑀸𑀫𑀬𑀸 𑀘. 𑀫𑀬𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀆𑀬𑁂 𑀯𑀟𑁆𑀠𑀺𑀬𑀁 𑀓𑁄𑀲𑀮𑁆𑀮𑀁 𑀆𑀬𑀓𑁄𑀲𑀮𑁆𑀮𑀁, 𑀅𑀧𑀸𑀬𑁂 𑀅𑀯𑀟𑁆𑀠𑀺𑀬𑀁 𑀓𑁄𑀲𑀮𑁆𑀮𑀁 𑀅𑀧𑀸𑀬𑀓𑁄𑀲𑀮𑁆𑀮𑀁, 𑀉𑀧𑀸𑀬𑁂 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑁂 𑀓𑁄𑀲𑀮𑁆𑀮𑀁 𑀉𑀧𑀸𑀬𑀓𑁄𑀲𑀮𑁆𑀮𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑁄𑀲𑀮𑁆𑀮𑀧𑀤𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀧𑀝𑀺𑀧𑀚𑁆𑀚𑀦𑀁 𑀏𑀢𑀺𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀸𑀪𑀺𑀦𑀺𑀯𑁂𑀲𑀸. 𑀏𑀯𑀁 𑀩𑀳𑀺𑀤𑁆𑀥𑀸𑀪𑀺𑀦𑀺𑀯𑁂𑀲𑀸, 𑀉𑀪𑀬𑀸𑀪𑀺𑀦𑀺𑀯𑁂𑀲𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑁪𑁨𑁬. 𑀮𑁄𑀓𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸, 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀺𑀯𑀺𑀲𑀼𑀤𑁆𑀥𑀺𑀘𑀢𑀼𑀓𑁆𑀓𑀲𑀗𑁆𑀕𑀳𑀺𑀢𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀸𑀬𑁂𑀲𑀼 𑀧𑀯𑀢𑁆𑀢𑀸 𑀲𑀫𑀜𑁆𑀜𑀸 𑀢𑀤𑁂𑀓𑀤𑁂𑀲𑁂𑀲𑀼𑀧𑀺 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺, 𑀧𑀘𑁆𑀘𑁂𑀓𑀫𑁆𑀧𑀺 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀫𑀕𑁆𑀕𑀲𑀫𑀜𑁆𑀜𑀸𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁.

𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 ¶ 𑀧𑀤𑀢𑁆𑀣𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀤𑀼𑀓𑁆𑀓𑀭𑀯𑀘𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀧𑀦𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯𑀸’’𑀢𑀺. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀤𑀼𑀓𑀸𑀤𑀻𑀲𑀼𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀤𑀺𑀕𑁆𑀕𑀳𑀡𑀫𑁂𑀯 𑀯𑀺𑀲𑁂𑀲𑁄, 𑀅𑀢𑁆𑀣𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀧𑀜𑁆𑀜𑀸𑀢𑀺 𑀆𑀳 ‘‘𑀏𑀲𑁂𑀯 𑀦𑀬𑁄’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀑𑀖𑀦𑀻𑀬𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀑𑀖𑀦𑀻𑀬𑀸𑀤𑀺𑀤𑀼𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀫𑀕𑁆𑀕𑀘𑀺𑀢𑁆𑀢𑀸𑀦𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀺𑀓𑀸𑀦𑀺 𑀘𑀸𑀢𑀺 𑀏𑀯𑀁 𑀲𑁄𑀴𑀲𑀲𑀼 𑀫𑀕𑁆𑀕𑀘𑀺𑀢𑁆𑀢𑁂𑀲𑀼. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀫𑀳𑀕𑁆𑀕𑀢𑀧𑀜𑁆𑀜𑀸 𑀦 𑀕𑀳𑀺𑀢𑀸.

𑁪𑁨𑁭. 𑀅𑀢𑁆𑀢𑀦𑁄 𑀘𑀺𑀦𑁆𑀢𑀸𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀦𑀯𑀚𑁆𑀚𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑁂 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸 ¶ 𑀅𑀢𑁆𑀢𑀦𑁄 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦𑁂𑀯. 𑀲𑀼𑀢𑀯𑀲𑁂𑀦𑀸𑀢𑀺 𑀬𑀣𑀸𑀲𑀼𑀢𑀲𑁆𑀲 𑀧𑀭𑁄𑀧𑀤𑁂𑀲𑀲𑁆𑀲 𑀯𑀲𑁂𑀦. 𑀬𑀣𑀸 𑀢𑀣𑀸 𑀯𑀸𑀢𑀺 𑀧𑀭𑀢𑁄 𑀉𑀧𑀤𑁂𑀲𑀁 𑀲𑀼𑀢𑁆𑀯𑀸 𑀯𑀸 𑀅𑀲𑀼𑀢𑁆𑀯𑀸 𑀯𑀸 𑀲𑀬𑀫𑁂𑀯 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲. ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸’’𑀢𑀺 𑀇𑀤𑀁 𑀲𑀺𑀔𑀸𑀧𑁆𑀧𑀢𑁆𑀢𑀪𑀸𑀯𑀦𑀸𑀫𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀧𑀦 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯 𑀪𑀸𑀯𑀦𑀸𑀫𑀬𑀸’’𑀢𑀺.

𑀬𑁄𑀕𑀯𑀺𑀳𑀺𑀢𑁂𑀲𑀽𑀢𑀺 𑀧𑀜𑁆𑀜𑀸𑀯𑀺𑀳𑀺𑀢𑁂𑀲𑀼 𑀧𑀜𑁆𑀜𑀸𑀧𑀭𑀺𑀡𑀸𑀫𑀺𑀢𑁂𑀲𑀼 𑀉𑀧𑀸𑀬𑀲𑀫𑁆𑀧𑀸𑀤𑀺𑀢𑁂𑀲𑀼. 𑀓𑀫𑁆𑀫𑀸𑀬𑀢𑀦𑁂𑀲𑀽𑀢𑀺 𑀏𑀢𑁆𑀣 𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁, 𑀓𑀫𑁆𑀫𑀜𑁆𑀘 𑀢𑀁 𑀆𑀬𑀢𑀦𑀜𑁆𑀘 𑀆𑀚𑀻𑀯𑀸𑀦𑀦𑁆𑀢𑀺 𑀯𑀸 𑀓𑀫𑁆𑀫𑀸𑀬𑀢𑀦𑀁. 𑀏𑀲 𑀦𑀬𑁄 𑀲𑀺𑀧𑁆𑀧𑀸𑀬𑀢𑀦𑁂𑀲𑀼𑀧𑀺. 𑀢𑀢𑁆𑀣 𑀤𑀼𑀯𑀺𑀥𑀁 𑀓𑀫𑁆𑀫𑀁 𑀳𑀻𑀦𑀜𑁆𑀘 𑀯𑀟𑁆𑀠𑀓𑀻𑀓𑀫𑁆𑀫𑀸𑀤𑀺, 𑀉𑀓𑁆𑀓𑀝𑁆𑀞𑀜𑁆𑀘 𑀓𑀲𑀺𑀯𑀸𑀡𑀺𑀚𑀸𑀤𑀺. 𑀲𑀺𑀧𑁆𑀧𑀫𑁆𑀧𑀺 𑀤𑀼𑀯𑀺𑀥𑀁 𑀳𑀻𑀦𑀜𑁆𑀘 𑀦𑀴𑀓𑀸𑀭𑀲𑀺𑀧𑁆𑀧𑀸𑀤𑀺, 𑀉𑀓𑁆𑀓𑀝𑁆𑀞𑀜𑁆𑀘 𑀫𑀼𑀤𑁆𑀤𑀸𑀕𑀡𑀦𑀸𑀤𑀺. 𑀯𑀺𑀚𑁆𑀚𑀸𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁. 𑀢𑀁 𑀥𑀫𑁆𑀫𑀺𑀓𑀫𑁂𑀯 𑀦𑀸𑀕𑀫𑀡𑁆𑀟𑀮𑀧𑀭𑀺𑀢𑁆𑀢𑀨𑀼𑀥𑀫𑀦𑀓𑀫𑀦𑁆𑀢𑀲𑀤𑀺𑀲𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀸 𑀩𑁄𑀥𑀺𑀲𑀢𑁆𑀢𑀲𑀤𑀺𑀲𑀸 𑀫𑀦𑀼𑀲𑁆𑀲𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀁 𑀆𑀓𑀗𑁆𑀔𑀦𑁆𑀢𑀸 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀸𑀦𑀺 𑀧𑀲𑁆𑀲𑀦𑁆𑀢𑀺, 𑀦 𑀯𑀸 𑀓𑀢𑀸𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀦 𑀓𑀣𑁂𑀦𑁆𑀢𑀸𑀦𑀁 𑀲𑀼𑀡𑀦𑁆𑀢𑀺. 𑀅𑀣 𑀔𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀭𑁄𑀦𑁆𑀢𑀺, 𑀧𑀜𑁆𑀜𑀯𑀦𑁆𑀢𑁂𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀢𑀸𑀦𑀺𑀧𑀺 𑀅𑀜𑁆𑀜𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀭𑁄𑀦𑁆𑀢𑁂𑀳𑀺 𑀓𑀢𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀺.

𑀓𑀫𑁆𑀫𑀲𑁆𑀲𑀓𑀢𑀦𑁆𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀲𑀢𑁆𑀢𑀸𑀦𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑀜𑀸𑀡𑀁. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀁 𑀳𑀺 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 ‘‘𑀲𑀘𑁆𑀘𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁆𑀣𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺𑀧𑀺 ¶ 𑀕𑀳𑀺𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀦𑀸𑀦𑀦𑁆𑀢𑀭𑀺𑀬𑀓𑀪𑀸𑀯𑀢𑁄. 𑀬𑀁 𑀳𑀺 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸𑀢𑀺. 𑀬𑀁 𑀏𑀯𑀭𑀽𑀧𑀺𑀦𑁆𑀢𑀺 𑀬𑀁 𑀏𑀯𑀁 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑀪𑀸𑀯𑀁. 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑀺. 𑀲𑀸 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀅𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑁂𑀦 𑀅𑀦𑀼𑀮𑁄𑀫𑀦𑀢𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸𑀬 𑀫𑀕𑁆𑀕𑀲𑀘𑁆𑀘𑀲𑁆𑀲, 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀯𑀺𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀦𑀼𑀮𑁄𑀫𑀺𑀓𑀸. 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀓𑀸𑀭𑀡𑀸𑀦𑀺 𑀔𑀫𑀢𑀺 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀻𑀢𑀺 𑀔𑀦𑁆𑀢𑀺. 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺. 𑀭𑁄𑀘𑁂𑀢𑀻𑀢𑀺 𑀭𑀼𑀘𑀺. 𑀫𑀼𑀦𑀸𑀢𑀻𑀢𑀺 𑀫𑀼𑀢𑀺. 𑀧𑁂𑀓𑁆𑀔𑀢𑀻𑀢𑀺 𑀧𑁂𑀓𑁆𑀔𑀸. 𑀢𑁂 𑀘 𑀓𑀫𑁆𑀫𑀸𑀬𑀢𑀦𑀸𑀤𑀬𑁄 𑀥𑀫𑁆𑀫𑀸 𑀏𑀢𑀸𑀬 𑀦𑀺𑀚𑁆𑀛𑀸𑀬𑀫𑀸𑀦𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀥𑀫𑁆𑀫𑀦𑀺𑀚𑁆𑀛𑀸𑀦𑀔𑀦𑁆𑀢𑀺. 𑀧𑀭𑀢𑁄 𑀅𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀅𑀜𑁆𑀜𑀲𑁆𑀲 𑀉𑀧𑀤𑁂𑀲𑀯𑀘𑀦𑀁 𑀅𑀲𑀼𑀢𑁆𑀯𑀸 𑀲𑀬𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄 𑀧𑀝𑀺𑀮𑀪𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀅𑀪𑀺𑀜𑁆𑀜𑀸𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣𑀸𑀧𑀺 ¶ 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀤𑁆𑀯𑀺𑀦𑁆𑀦𑀁𑀬𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀁, 𑀲𑁂𑀲𑀧𑀜𑁆𑀜𑀸 𑀲𑀩𑁆𑀩𑁂𑀲𑀫𑁆𑀧𑀺 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀭𑀢𑁄 𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀧𑀭𑁂𑀦 𑀓𑀭𑀺𑀬𑀫𑀸𑀦𑀸𑀦𑀺 𑀯𑀸 𑀓𑀢𑀸𑀦𑀺 𑀯𑀸 𑀤𑀺𑀲𑁆𑀯𑀸𑀧𑀺 𑀧𑀭𑀲𑁆𑀲 𑀓𑀣𑀬𑀫𑀸𑀦𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀮𑀤𑁆𑀥𑀸 𑀲𑀩𑁆𑀩𑀸 𑀧𑀭𑀢𑁄 𑀲𑀼𑀢𑁆𑀯𑀸𑀯 𑀧𑀝𑀺𑀮𑀤𑁆𑀥𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀺𑀲𑁆𑀲, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀜𑁆𑀜𑀸 𑀇𑀥 ‘‘𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀲𑀸𑀢𑀺 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁫𑁩) 𑀯𑀼𑀢𑁆𑀢𑀧𑀜𑁆𑀜𑀸. 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀢𑀺 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀲𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀢𑀺 𑀬𑀸 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀧𑀜𑁆𑀜𑀸 𑀯𑀼𑀢𑁆𑀢𑀸, 𑀲𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀢𑀺 𑀫𑀕𑁆𑀕𑀧𑀜𑁆𑀜𑀁 𑀲𑀦𑁆𑀥𑀸𑀬𑀸𑀳. 𑀲𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀁 𑀅𑀕𑀡𑁆𑀳𑀦𑁆𑀢𑀻𑀧𑀺 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀧𑀸𑀭𑀺𑀧𑀽𑀭𑀺𑀬𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀢𑀣𑀮𑀓𑁆𑀔𑀡𑀁 𑀯𑀺𑀲𑁂𑀲𑀢𑁄 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑁆𑀭𑀪𑀼𑀜𑀸𑀡𑀁 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀫𑀕𑁆𑀕𑀲𑁆𑀲 𑀧𑀦 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀢𑁆𑀢𑀸 𑀦 𑀯𑀺𑀧𑀲𑁆𑀲𑀦𑀸𑀯𑁄𑀳𑀸𑀭𑀁 𑀮𑀪𑀢𑀺.

𑀅𑀬𑀦𑁆𑀢𑀺 𑀏𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀆𑀬𑁄, 𑀯𑀼𑀤𑁆𑀥𑀺. 𑀢𑀢𑁆𑀣 𑀓𑁄𑀲𑀮𑁆𑀮𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀢𑁆𑀣𑀳𑀸𑀦𑀺𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀮𑀓𑁆𑀔𑀡𑁂 𑀆𑀬𑁂 𑀓𑁄𑀲𑀮𑁆𑀮𑀁 𑀓𑀼𑀲𑀮𑀢𑀸 𑀦𑀺𑀧𑀼𑀡𑀢𑀸.

𑀢𑀁 ¶ 𑀧𑀦 𑀏𑀓𑀦𑁆𑀢𑀺𑀓𑀁 𑀆𑀬𑀓𑁄𑀲𑀮𑁆𑀮𑀁 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀬𑀸 𑀇𑀫𑁂𑀲𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀧𑀳𑀸𑀦𑁂𑀲𑀼, 𑀓𑀼𑀲𑀮𑀥𑀫𑁆𑀫𑀸𑀦𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀲𑀼 𑀧𑀜𑁆𑀜𑀸, 𑀇𑀤𑀁 𑀆𑀬𑀓𑁄𑀲𑀮𑁆𑀮𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺.

𑀯𑀼𑀤𑁆𑀥𑀺𑀮𑀓𑁆𑀔𑀡𑀸 𑀆𑀬𑀢𑁄 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑁄, 𑀅𑀯𑀼𑀤𑁆𑀥𑀺. 𑀢𑀢𑁆𑀣 𑀓𑁄𑀲𑀮𑁆𑀮𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑀳𑀸𑀦𑀺𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀮𑀓𑁆𑀔𑀡𑁂 𑀅𑀧𑀸𑀬𑁂 𑀓𑁄𑀲𑀮𑁆𑀮𑀁 𑀓𑀼𑀲𑀮𑀢𑀸 𑀅𑀧𑀸𑀬𑀓𑁄𑀲𑀮𑁆𑀮𑀁. 𑀢𑀫𑁆𑀧𑀺 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀬𑀸 𑀇𑀫𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑁂𑀲𑀼, 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀲𑀼 𑀧𑀜𑁆𑀜𑀸, 𑀇𑀤𑀁 𑀅𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀆𑀬𑀓𑁄𑀲𑀮𑁆𑀮𑀁 𑀢𑀸𑀯 𑀧𑀜𑁆𑀜𑀸 𑀳𑁄𑀢𑀼, 𑀅𑀧𑀸𑀬𑀓𑁄𑀲𑀮𑁆𑀮𑀁 𑀓𑀣𑀁 𑀧𑀜𑁆𑀜𑀸 𑀦𑀸𑀫 𑀚𑀸𑀢𑀸𑀢𑀺? 𑀏𑀯𑀁 𑀫𑀜𑁆𑀜𑀢𑀺 ‘‘𑀅𑀧𑀸𑀬𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫 𑀲𑀺𑀬𑀸’’𑀢𑀺, 𑀢𑀁 𑀧𑀦 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀓𑀲𑁆𑀫𑀸? 𑀧𑀜𑁆𑀜𑀯𑀸 𑀏𑀯 𑀳𑀺 ‘‘𑀫𑀬𑁆𑀳𑀁 𑀏𑀯𑀁 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 ¶ 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀯𑀟𑁆𑀠𑀦𑁆𑀢𑀻’’𑀢𑀺 𑀧𑀚𑀸𑀦𑀸𑀢𑀺, 𑀲𑁄 𑀏𑀯𑀁 𑀜𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑁂 𑀅𑀓𑀼𑀲𑀮𑁂 𑀦 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑁂 𑀧𑀚𑀳𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀼𑀲𑀮𑁂 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀧𑀸𑀧𑁂𑀢𑀺. 𑀏𑀯𑀁 𑀅𑀧𑀸𑀬𑀓𑁄𑀲𑀮𑁆𑀮𑀫𑁆𑀧𑀺 𑀧𑀜𑁆𑀜𑀸 𑀏𑀯𑀸𑀢𑀺.

𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀸𑀦𑀁 𑀢𑀁𑀢𑀁𑀳𑀺𑀢𑀲𑀼𑀔𑀥𑀫𑁆𑀫𑀸𑀦𑀁. 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀦𑁆𑀢𑀺 𑀅𑀘𑁆𑀘𑀸𑀬𑀺𑀓𑁂 𑀓𑀺𑀘𑁆𑀘𑁂 𑀯𑀸 𑀪𑀬𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀢𑀺𑀓𑀺𑀘𑁆𑀙𑀦𑀢𑁆𑀣𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀯𑀢𑁆𑀢𑀁. 𑀞𑀸𑀦𑁂𑀦 𑀉𑀧𑁆𑀧𑀢𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀁, 𑀞𑀸𑀦𑀲𑁄 𑀏𑀯 𑀉𑀧𑁆𑀧𑀚𑁆𑀚𑀦𑀓𑀁. 𑀢𑀢𑁆𑀭𑀼𑀧𑀸𑀬𑀸𑀢𑀺 𑀢𑀢𑁆𑀭 𑀢𑀢𑁆𑀭 𑀓𑀭𑀡𑀻𑀬𑁂 𑀉𑀧𑀸𑀬𑀪𑀽𑀢𑀸.

𑀕𑀳𑁂𑀢𑁆𑀯𑀸𑀢𑀺 ‘‘𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀉𑀪𑀬𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸’’𑀢𑀺 𑀉𑀪𑀬𑀁 𑀅𑀦𑀼𑀧𑀼𑀩𑁆𑀩𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀅𑀣 𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀩𑁆𑀩𑁂𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀯𑀺𑀪𑀸𑀕𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀅𑀬𑀁 𑀧𑀦 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀫𑀳𑀸𑀧𑀼𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄.

𑁪𑁨𑁮. 𑀤𑀼𑀓𑁆𑀔𑀲𑀘𑁆𑀘𑀁 𑀆𑀭𑀩𑁆𑀪𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀯𑀺𑀥𑀁𑀲𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀜𑀸𑀡𑀁 𑀤𑀼𑀓𑁆𑀔𑁂 𑀜𑀸𑀡𑀁. 𑀤𑀼𑀓𑁆𑀔𑀲𑀫𑀼𑀤𑀬𑀁 𑀆𑀭𑀩𑁆𑀪𑀸𑀢𑀺 ¶ 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑀺 𑀘𑀢𑀼𑀲𑀘𑁆𑀘𑀁 𑀆𑀭𑀩𑁆𑀪 𑀧𑀯𑀢𑁆𑀢𑀜𑀸𑀡𑀁 𑀦𑀸𑀫, 𑀢𑀢𑀺𑀬𑀁 𑀧𑀦 𑀫𑀕𑁆𑀕𑀜𑀸𑀡𑀁, 𑀇𑀢𑀭𑀲𑀘𑁆𑀘𑀸𑀦𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺 𑀧𑀸𑀓𑀝𑀫𑁂𑀯.

‘‘𑀅𑀢𑁆𑀣𑀸𑀤𑀻𑀲𑀼 𑀧𑀪𑁂𑀤𑀕𑀢𑀸𑀦𑀺 𑀜𑀸𑀡𑀸𑀦𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀯𑀲𑁂𑀦𑁂𑀯 𑀯𑀺𑀯𑀭𑀺𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀬𑀁 𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁, 𑀅𑀬𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀳𑀺 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀸 𑀢𑀩𑁆𑀩𑀺𑀲𑀬𑀸𑀦𑀁 𑀅𑀢𑁆𑀣𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀺𑀪𑁂𑀤𑁂𑀳𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀩𑁆𑀩𑀸𑀦𑀫𑁆𑀧𑀺 ¶ 𑀲𑀫𑁆𑀧𑀸𑀧𑀓𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀅𑀭𑀻𑀬𑀢𑀺, 𑀅𑀥𑀺𑀕𑀫𑁆𑀫𑀢𑀻𑀢𑀺 𑀅𑀢𑁆𑀣𑁄. ‘‘𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀲𑀫𑁆𑀪𑀽𑀢’’𑀦𑁆𑀢𑀺 𑀏𑀢𑁂𑀦 𑀲𑀘𑁆𑀘𑀳𑁂𑀢𑀼𑀥𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀆𑀕𑀢𑀸𑀦𑀺 𑀤𑀼𑀓𑁆𑀔𑀸𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀦𑀺𑀩𑁆𑀩𑀸𑀦𑀁, 𑀧𑀭𑀺𑀬𑀢𑁆𑀢𑀺𑀯𑀸𑀭𑁂 𑀪𑀸𑀲𑀺𑀢𑀢𑁆𑀣𑁄, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸 𑀘𑀸𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀁 𑀏𑀯 𑀯𑀲𑁂𑀦 𑀧𑀜𑁆𑀘 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀳𑀢𑀻𑀢𑀺 𑀯𑀺𑀤𑀳𑀢𑀺, 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀆𑀤𑀻𑀦𑀁 𑀲𑀸𑀥𑀸𑀭𑀡𑀫𑁂𑀢𑀁 𑀦𑀺𑀩𑁆𑀩𑀘𑀦𑀁. 𑀢𑀤𑀢𑁆𑀣𑀁 𑀧𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀯𑀢𑁆𑀢𑁂𑀢𑀺 𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀯𑀸 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀧𑀼𑀭𑀺𑀫𑁄 𑀅𑀢𑁆𑀣𑁄 𑀫𑀕𑁆𑀕𑀯𑀚𑁆𑀚𑁂𑀲𑀼 𑀤𑀝𑁆𑀞𑀩𑁆𑀩𑁄. 𑀪𑀸𑀲𑀺𑀢𑀫𑁆𑀧𑀺 𑀳𑀺 𑀅𑀯𑀩𑁄𑀥𑀦𑀯𑀲𑁂𑀦 𑀅𑀢𑁆𑀣𑀁 𑀧𑀯𑀢𑁆𑀢𑁂𑀢𑀺, 𑀫𑀕𑁆𑀕𑁄 𑀧𑀦 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑀻𑀢𑀺 𑀢𑀲𑁆𑀫𑀺𑀁 𑀧𑀘𑁆𑀙𑀺𑀫𑁄 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀳𑀺 𑀧𑀢𑁆𑀢𑀩𑁆𑀩𑁄 𑀅𑀢𑁆𑀣𑁄, 𑀪𑀸𑀲𑀺𑀢𑀢𑁆𑀣𑁄 𑀜𑀸𑀧𑁂𑀢𑀩𑁆𑀩𑁄 𑀅𑀢𑁆𑀣𑁄, 𑀇𑀢𑀭𑁄 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄 𑀅𑀢𑁆𑀣𑁄𑀢𑀺 𑀏𑀯𑀁 𑀢𑀺𑀯𑀺𑀥𑁄 𑀳𑁄𑀢𑀺.

‘‘𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀽’’𑀢𑀺 𑀏𑀢𑁂𑀦 𑀲𑀘𑁆𑀘𑀳𑁂𑀢𑀼𑀥𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀆𑀕𑀢𑀸𑀦𑀺 𑀲𑀫𑀼𑀤𑀬𑀸𑀤𑀻𑀦𑀺 𑀕𑀳𑀺𑀢𑀸𑀦𑀺, 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀫𑀕𑁆𑀕𑁄, 𑀧𑀭𑀺𑀬𑀢𑁆𑀢𑀺𑀯𑀸𑀭𑁂 𑀪𑀸𑀲𑀺𑀢𑀁, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀁 𑀏𑀯 𑀯𑀲𑁂𑀦 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 ¶ 𑀫𑀕𑁆𑀕𑁄 𑀲𑀫𑁆𑀧𑀸𑀧𑀓𑁄, 𑀪𑀸𑀲𑀺𑀢𑀁 𑀜𑀸𑀧𑀓𑁄, 𑀇𑀢𑀭𑀁 𑀦𑀺𑀩𑁆𑀩𑀢𑁆𑀢𑀓𑁄𑀢𑀺 𑀏𑀯𑀁 𑀢𑀺𑀯𑀺𑀥𑁄 𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀓𑀺𑀭𑀺𑀬𑀸𑀦𑀁 𑀅𑀯𑀺𑀧𑀸𑀓𑀢𑀸𑀬 𑀥𑀫𑁆𑀫𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁 𑀯𑀺𑀧𑀸𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑀪𑀸𑀯𑁄𑀧𑀺 𑀦 𑀯𑀢𑁆𑀢𑀩𑁆𑀩𑁄? 𑀦, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀢𑁄. 𑀏𑀯𑀁 𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀅𑀢𑁆𑀣𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀯𑀺𑀧𑀸𑀓𑀲𑁆𑀲 𑀧𑀦 𑀧𑀥𑀸𑀦𑀳𑁂𑀢𑀼𑀢𑀸𑀬 𑀧𑀸𑀓𑀝𑀪𑀸𑀯𑀢𑁄 𑀥𑀫𑁆𑀫𑀪𑀸𑀯𑁄 𑀏𑀯 𑀢𑁂𑀲𑀁 𑀯𑀼𑀢𑁆𑀢𑁄. 𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀥𑀫𑁆𑀫𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀲𑁆𑀲 𑀧𑀦 𑀳𑁂𑀢𑀼𑀪𑀸𑀯𑀲𑁆𑀲𑀸𑀪𑀸𑀯𑀢𑁄 𑀥𑀫𑁆𑀫𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀅𑀧𑀺𑀘 ‘‘𑀅𑀬𑀁 𑀇𑀫𑀲𑁆𑀲 𑀧𑀘𑁆𑀘𑀬𑁄, 𑀅𑀬𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄’’𑀢𑀺 𑀏𑀢𑀁 𑀪𑁂𑀤𑀫𑀓𑀢𑁆𑀯𑀸 𑀓𑁂𑀯𑀮𑀁 𑀓𑀼𑀲𑀮𑀸𑀓𑀼𑀲𑀮𑁂, 𑀯𑀺𑀧𑀸𑀓𑀓𑀺𑀭𑀺𑀬𑀸𑀥𑀫𑁆𑀫𑁂 𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀥𑀫𑁆𑀫𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄𑀢𑀺 𑀬𑁆𑀯𑀸𑀬𑀁 𑀅𑀢𑁆𑀣𑀥𑀫𑁆𑀫𑀸𑀦𑀁 𑀧𑀜𑁆𑀘𑀥𑀸 𑀯𑀺𑀪𑀚𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀅𑀬𑀫𑁂𑀯 𑀅𑀪𑀺𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂’’𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀲𑀪𑀸𑀯𑀯𑀸𑀘𑀓𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺, 𑀅𑀯𑀺𑀧𑀭𑀻𑀢𑀦𑀺𑀭𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀩𑁆𑀬𑀪𑀺𑀘𑀸𑀭𑀻 𑀯𑁄𑀳𑀸𑀭𑁄’’𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀦𑁂 𑀧𑀝𑀺𑀦𑀺𑀬𑀢𑀲𑀫𑁆𑀩𑀦𑁆𑀥𑁄 𑀲𑀤𑁆𑀤𑀯𑁄𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀤𑀪𑀺𑀮𑀸𑀧𑁂𑀢𑀺 𑀢𑀲𑁆𑀲 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀜𑁆𑀜𑀺𑀢𑀲𑁆𑀲 ¶ 𑀅𑀩𑁆𑀬𑀪𑀺𑀘𑀸𑀭𑀺𑀯𑁄𑀳𑀸𑀭𑀲𑁆𑀲 𑀅𑀪𑀺𑀮𑀸𑀧𑀦𑁂. 𑀲𑀸 𑀧𑀦𑀸𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀫𑀸𑀕𑀥𑀪𑀸𑀲𑀸. 𑀅𑀢𑁆𑀣𑀢𑁄 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀆𑀘𑀭𑀺𑀬𑀸. 𑀅𑀧𑀭𑁂 𑀧𑀦 𑀬𑀤𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸, 𑀏𑀯𑀁 𑀲𑀢𑀺 𑀧𑀜𑁆𑀜𑀢𑁆𑀢𑀺 𑀅𑀪𑀺𑀮𑀧𑀺𑀢𑀩𑁆𑀩𑀸, 𑀦 𑀯𑀘𑀦𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀦 𑀘 𑀯𑀘𑀦𑀢𑁄 𑀅𑀜𑁆𑀜𑀁 𑀅𑀪𑀺𑀮𑀧𑀺𑀢𑀩𑁆𑀩𑀁 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀺. 𑀅𑀣 𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀩𑁄𑀥𑁂𑀢𑀩𑁆𑀩𑀁 𑀅𑀪𑀺𑀮𑀧𑀺𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 𑀅𑀢𑁆𑀣𑀥𑀫𑁆𑀫𑀸𑀦𑀫𑁆𑀧𑀺 𑀩𑁄𑀥𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀫𑁆𑀧𑀺 𑀦𑀺𑀭𑀼𑀢𑁆𑀢𑀺𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀨𑀲𑁆𑀲𑁄𑀢𑀺 𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀨𑀲𑁆𑀲𑀁 𑀨𑀲𑁆𑀲𑀸𑀢𑀺 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀤𑀲𑁆𑀲𑀺𑀢𑁄𑀯𑀸𑀬𑀫𑀢𑁆𑀣𑁄. 𑀦 𑀘 𑀅𑀯𑀘𑀦𑀁 𑀏𑀯𑀁𑀧𑀓𑀸𑀭𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀯𑀘𑀦𑀪𑀽𑀢𑀸𑀬 𑀏𑀯 𑀢𑀲𑁆𑀲𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑁂 𑀉𑀘𑁆𑀘𑀸𑀭𑀡𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, ‘‘𑀏𑀯𑀫𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸 ¶ 𑀦𑀸𑀫 𑀚𑀸𑀢𑀸, 𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀫𑀦𑁄𑀤𑁆𑀯𑀸𑀭𑁂 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁪𑁯) 𑀘 𑀯𑀘𑀦𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀅𑀜𑁆𑀜𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀬𑀣𑀸 𑀧𑀦 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀫𑀦𑀼𑀲𑁆𑀲𑀸𑀤𑀺𑀲𑀤𑁆𑀤𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀢𑀁𑀢𑀁𑀲𑀤𑁆𑀤𑀯𑀺𑀪𑀸𑀯𑀓𑀁, 𑀏𑀯𑀁 𑀲𑀪𑀸𑀯𑀸𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀁 𑀢𑀁𑀯𑀺𑀪𑀸𑀯𑀓𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀧𑀸𑀴𑀺𑀯𑀺𑀭𑁄𑀥𑁄. ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸’’𑀢𑀺 𑀘 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑀸𑀭𑀫𑁆𑀫𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲𑀸’’𑀢𑀺 𑀦 𑀦𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀜𑁆𑀳𑀺 𑀜𑀸𑀡𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀢𑀁𑀢𑀁𑀲𑀤𑁆𑀤𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀦𑁆𑀢𑀭𑀁 𑀢𑀁𑀢𑀁𑀧𑀪𑁂𑀤𑀦𑀺𑀘𑁆𑀙𑀬𑀳𑁂𑀢𑀼𑀪𑀸𑀯𑀢𑁄 𑀦𑀺𑀭𑀼𑀢𑁆𑀢𑀺𑀁 𑀪𑀺𑀦𑁆𑀤𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀪𑁂𑀤𑀕𑀢𑀫𑁆𑀧𑀺 𑀳𑁄𑀢𑀻𑀢𑀺.

𑀲𑀩𑁆𑀩𑀢𑁆𑀣 𑀜𑀸𑀡𑀦𑁆𑀢𑀺 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀁, 𑀲𑀩𑁆𑀩𑀫𑁆𑀧𑀺 𑀜𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀜𑀸𑀡𑀸𑀭𑀫𑁆𑀫𑀡𑀁 𑀜𑀸𑀡’’𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀯𑀸 𑀲𑀩𑁆𑀩𑁂𑀲𑀼 𑀅𑀢𑁆𑀣𑀸𑀤𑀻𑀲𑀼, 𑀢𑀻𑀲𑀼, 𑀘𑀢𑀽𑀲𑀼𑀧𑀺 𑀯𑀸 𑀧𑀯𑀢𑁆𑀢𑀢𑁆𑀢𑀸, 𑀓𑀼𑀲𑀮𑀓𑀺𑀭𑀺𑀬𑀸𑀪𑀽𑀢𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀥𑀫𑁆𑀫𑀢𑁆𑀣𑀪𑀸𑀯𑀢𑁄 𑀢𑀻𑀲𑀼 𑀏𑀯 𑀯𑀸 𑀧𑀯𑀢𑁆𑀢𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀕𑁄𑀘𑀭𑀓𑀺𑀘𑁆𑀘𑀸𑀤𑀺𑀯𑀲𑁂𑀦𑀸𑀢𑀺 𑀲𑀕𑁄𑀘𑀭𑀲𑁆𑀲, 𑀓𑀺𑀘𑁆𑀘𑀸𑀤𑀺𑀓𑀲𑁆𑀲 𑀘 𑀯𑀲𑁂𑀦 ‘‘𑀇𑀤𑀁 𑀜𑀸𑀡𑀁 𑀇𑀤𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀇𑀫𑀺𑀦𑀸 𑀦𑀸𑀫 ¶ 𑀓𑀺𑀘𑁆𑀘𑁂𑀦𑀸’’𑀢𑀺 𑀚𑀸𑀦𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀮𑀓𑁆𑀔𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀪𑀽𑀫𑀺𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀢𑁂𑀦𑁂𑀯𑀸𑀳 ‘‘𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺𑀆𑀤𑀺.

𑁪𑁨𑁯. 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑁂𑀲𑀁 𑀬𑀸𑀣𑀸𑀯𑀢𑁄 𑀢𑀁𑀢𑀁𑀧𑀪𑁂𑀤𑀸𑀯𑀩𑁄𑀥𑀦𑀲𑀫𑀢𑁆𑀣𑀢𑀁 𑀉𑀧𑀕𑀘𑁆𑀙𑀦𑁆𑀢𑀺.

𑀫𑀳𑀸𑀲𑀸𑀯𑀓𑀸𑀦𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀁 𑀕𑀢𑀸𑀢𑀺 𑀲𑀸𑀫𑀜𑁆𑀜𑀯𑀺𑀥𑀺𑀦𑀸 𑀤𑀲𑁆𑀲𑀺𑀢𑀫𑀢𑁆𑀣𑀁 𑀅𑀧𑀯𑀸𑀤𑁂𑀦 𑀦𑀺𑀯𑀢𑁆𑀢𑁂𑀢𑀼𑀁 𑀆𑀦𑀦𑁆𑀤𑀢𑁆𑀣𑁂𑀭-𑀕𑁆𑀕𑀳𑀡𑀁 𑀓𑀢𑀁.

𑀏𑀢𑀸 𑀧𑀝𑀺𑀲𑀫𑁆𑀪𑀺𑀤𑀸. 𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀕𑀫𑀦𑀁 𑀅𑀧𑁆𑀧𑀯𑀺𑀲𑀬𑀁, 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀩𑀳𑀼𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀅𑀥𑀺𑀕𑀫𑁄 𑀦𑀸𑀫 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻’’𑀢𑀺, 𑀲𑀸𑀢𑀺𑀲𑀬𑀁 𑀯𑀸 𑀅𑀥𑀺𑀕𑀫𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀲𑁂𑀓𑁆𑀔𑁂𑀦 𑀧𑀢𑁆𑀢𑀸𑀦𑀫𑁆𑀧𑀺 𑀳𑀺 𑀇𑀫𑀸𑀲𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀤𑀪𑀸𑀯𑀸𑀥𑀺𑀕𑀫𑁄𑀢𑀺 ¶ . 𑀧𑀼𑀩𑁆𑀩𑀬𑁄𑀕𑁄 𑀯𑀺𑀬 𑀧𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀅𑀭𑀳𑀢𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑀸𑀬 𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀻𑀢𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀬𑀣𑀸𑀬𑁄𑀕𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑀸𑀬 𑀓𑀸𑀭𑀡𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀢𑁆𑀣𑀥𑀫𑁆𑀫𑀸𑀤𑀻𑀦𑀁 𑀅𑀦𑀯𑀲𑁂𑀲𑀲𑀗𑁆𑀕𑀡𑁆𑀳𑀦𑀢𑁄 𑀩𑀼𑀤𑁆𑀥𑀯𑀘𑀦𑀯𑀺𑀲𑀬𑀸 𑀏𑀯 𑀧𑀭𑀺𑀬𑀢𑁆𑀢𑀺𑀆𑀤𑀬𑁄 𑀤𑀲𑁆𑀲𑀺𑀢𑀸. 𑀧𑀸𑀴𑀺𑀬𑀸 𑀲𑀚𑁆𑀛𑀸𑀬𑁄 𑀧𑀭𑀺𑀬𑀸𑀧𑀼𑀡𑀦𑀁, 𑀢𑀤𑀢𑁆𑀣𑀲𑀯𑀦𑀁 𑀲𑀯𑀦𑀁, 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀜𑀸𑀢𑀼𑀁 𑀇𑀘𑁆𑀙𑀸 𑀧𑀭𑀺𑀧𑀼𑀘𑁆𑀙𑀸𑀢𑀺 𑀆𑀳 ‘‘𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀕𑀡𑁆𑀞𑀺𑀧𑀤𑀅𑀢𑁆𑀣𑀧𑀤𑀯𑀺𑀦𑀺𑀘𑁆𑀙𑀬𑀓𑀣𑀸’’𑀢𑀺, 𑀧𑀤𑀢𑁆𑀣𑀢𑁄, 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀤𑀼𑀯𑀺𑀜𑁆𑀜𑁂𑀬𑁆𑀬𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀓𑀣𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀳𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑁄, 𑀢𑀁 𑀕𑀡𑁆𑀞𑀺𑀧𑀤𑀁, 𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑁄, 𑀢𑀁 𑀅𑀢𑁆𑀣𑀧𑀤𑀁. 𑀆𑀤𑀺-𑀲𑀤𑁆𑀤𑁂𑀦 𑀔𑀦𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁂 𑀓𑀣𑀸𑀫𑀕𑁆𑀕𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀸𑀯𑀦𑀸𑀦𑀼𑀬𑁄𑀕𑀲𑀳𑀺𑀢𑀁 𑀕𑀢𑀁, 𑀧𑀘𑁆𑀘𑀸𑀕𑀢𑀜𑁆𑀘 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑁄, 𑀢𑀲𑁆𑀲 𑀪𑀸𑀯𑁄, 𑀢𑁂𑀦 𑀕𑀢𑀧𑀘𑁆𑀘𑀸𑀕𑀢𑀺𑀓𑀪𑀸𑀯𑁂𑀦. 𑀯𑀲𑀦𑀝𑁆𑀞𑀸𑀦𑀢𑁄 𑀬𑀸𑀯 𑀕𑁄𑀘𑀭𑀕𑀸𑀫𑁄, 𑀢𑀢𑁄 𑀘 𑀬𑀸𑀯 𑀯𑀲𑀦𑀝𑁆𑀞𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀸𑀯 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀲𑀫𑀻𑀧𑀦𑁆𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑀸𑀳. 𑀢𑀜𑁆𑀳𑀺 𑀢𑁂𑀲𑀁 𑀲𑀫𑀻𑀧𑀧𑁆𑀧𑀯𑀢𑁆𑀢𑀁.

𑀲𑀢𑁆𑀣𑁂𑀲𑀽𑀢𑀺 𑀅𑀦𑀯𑀚𑁆𑀚𑁂𑀲𑀼 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁂𑀲𑀼 𑀕𑀦𑁆𑀣𑁂𑀲𑀼. 𑀢𑀣𑀸 𑀲𑀺𑀧𑁆𑀧𑀸𑀬𑀢𑀦𑁂𑀲𑀽𑀢𑀺 𑀏𑀢𑁆𑀣𑀸𑀧𑀺. 𑀧𑀼𑀩𑁆𑀩𑀓𑀸𑀮𑁂 𑀏𑀓𑀲𑀢𑀭𑀸𑀚𑀽𑀦𑀁 𑀤𑁂𑀲𑀪𑀸𑀲𑀸 𑀏𑀓𑀲𑀢𑀯𑁄𑀳𑀸𑀭𑀸. 𑀥𑀫𑁆𑀫𑀧𑀤𑁂 (𑀥. 𑀧. 𑁧 𑀆𑀤𑀬𑁄) 𑀬𑀫𑀓𑀯𑀕𑁆𑀕𑁄 𑀑𑀧𑀫𑁆𑀫𑀯𑀕𑁆𑀕𑁄𑀢𑀺 𑀯𑀤𑀦𑁆𑀢𑀺, 𑀫𑀽𑀮𑀧𑀡𑁆𑀡𑀸𑀲𑁂 (𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄; 𑁪𑁩𑁯 𑀆𑀤𑀬𑁄) 𑀬𑀫𑀓𑀯𑀕𑁆𑀕𑁄 𑀑𑀧𑀫𑁆𑀫𑀯𑀕𑁆𑀕𑁄 𑀏𑀯𑀸𑀢𑀺 𑀅𑀧𑀭𑁂. 𑀲𑀼𑀢𑀧𑀝𑀺𑀪𑀸𑀦𑀩𑀳𑀼𑀮𑀸𑀦𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀦𑀁 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁.

𑀲𑀩𑁆𑀩𑀸𑀦𑀻𑀢𑀺 ¶ 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘, 𑀧𑀘𑁆𑀙𑀸 𑀯𑀼𑀢𑁆𑀢𑀸𑀦𑀺 𑀅𑀝𑁆𑀞𑀧𑀺 𑀯𑀸. 𑀲𑁂𑀓𑁆𑀔𑀨𑀮𑀯𑀺𑀫𑁄𑀓𑁆𑀔𑀧𑀭𑀺𑀬𑁄𑀲𑀸𑀦𑁂 𑀪𑀯𑀸 𑀲𑁂𑀓𑁆𑀔𑀨𑀮𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀸. 𑀞𑀸𑀦𑀸𑀞𑀸𑀦𑀜𑀸𑀡𑀩𑀮𑀸𑀤𑀻𑀦𑀺 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑁂𑀲𑀼 𑀲𑀓𑀺𑀘𑁆𑀘𑀢𑁄 𑀧𑀸𑀓𑀝𑀢𑀭𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀲 𑀩𑀮𑀸𑀦𑀺 𑀯𑀺𑀬𑀸’’𑀢𑀺, 𑀅𑀜𑁆𑀜𑁂 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀬𑁄𑀧𑀺 𑀲𑀩𑁆𑀩𑁂 𑀪𑀕𑀯𑀢𑁄 𑀕𑀼𑀡𑀯𑀺𑀲𑁂𑀲𑀸 𑀅𑀲𑁂𑀓𑁆𑀔𑀨𑀮𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀸 𑀏𑀯.

𑀧𑀜𑁆𑀜𑀸𑀪𑀽𑀫𑀺-𑀫𑀽𑀮-𑀲𑀭𑀻𑀭𑀯𑀯𑀢𑁆𑀣𑀸𑀦𑀯𑀡𑁆𑀡𑀦𑀸

𑁪𑁩𑁦. 𑀇𑀫𑀸𑀬 𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀪𑀽𑀫𑀺 𑀲𑀮𑁆𑀮𑀓𑁆𑀔𑀡𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀆𑀳𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯𑀁 𑀩𑀳𑀼𑀥𑀫𑁆𑀫𑀸 𑀪𑀽𑀫𑀺𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀺, 𑀦𑀦𑀼 𑀔𑀦𑁆𑀥𑀸𑀤𑀻𑀲𑀼 𑀏𑀓𑁂𑀦𑀸𑀧𑀺 ¶ 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀻𑀢𑀺? 𑀦, 𑀢𑀺𑀯𑀺𑀥𑀲𑀢𑁆𑀢𑀸𑀦𑀼𑀕𑁆𑀕𑀳𑀢𑁆𑀣𑀁 𑀔𑀦𑁆𑀥𑀸𑀤𑀺𑀢𑁆𑀢𑀬𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀲𑀩𑁆𑀩𑀲𑀸𑀥𑀸𑀭𑀡𑁄 𑀅𑀦𑀼𑀕𑁆𑀕𑀳𑁄 𑀦 𑀓𑀢𑁄 𑀲𑀺𑀬𑀸. 𑀢𑀺𑀯𑀺𑀥𑀸 𑀳𑀺 𑀲𑀢𑁆𑀢𑀸 𑀭𑀽𑀧𑀲𑀫𑁆𑀫𑀽𑀴𑁆𑀳𑀸 𑀅𑀭𑀽𑀧𑀲𑀫𑁆𑀫𑀽𑀴𑁆𑀳𑀸 𑀉𑀪𑀬𑀲𑀫𑁆𑀫𑀽𑀴𑁆𑀳𑀸𑀢𑀺. 𑀢𑁂𑀲𑀼 𑀬𑁂 𑀅𑀭𑀽𑀧𑀲𑀫𑁆𑀫𑀽𑀴𑁆𑀳𑀸, 𑀢𑀤𑀢𑁆𑀣𑀁 𑀔𑀦𑁆𑀥𑀸𑀦𑀁 𑀕𑀳𑀡𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀘𑀢𑀼𑀥𑀸 𑀯𑀺𑀪𑀢𑁆𑀢𑀢𑁆𑀢𑀸. 𑀬𑁂 𑀭𑀽𑀧𑀲𑀫𑁆𑀫𑀽𑀴𑁆𑀳𑀸, 𑀢𑀤𑀢𑁆𑀣𑀁 𑀆𑀬𑀢𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀅𑀤𑁆𑀥𑁂𑀓𑀸𑀤𑀲𑀥𑀸 𑀯𑀺𑀪𑀢𑁆𑀢𑀢𑁆𑀢𑀸. 𑀬𑁂 𑀧𑀦 𑀉𑀪𑀬𑀲𑀫𑁆𑀫𑀽𑀴𑁆𑀳𑀸, 𑀢𑀤𑀢𑁆𑀣𑀁 𑀥𑀸𑀢𑀽𑀦𑀁 𑀉𑀪𑀬𑁂𑀲𑀫𑁆𑀧𑀺 𑀯𑀺𑀪𑀢𑁆𑀢𑀢𑁆𑀢𑀸. 𑀢𑀣𑀸 𑀇𑀦𑁆𑀤𑁆𑀭𑀺𑀬𑀪𑁂𑀤𑁂𑀦 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸, 𑀲𑀁𑀔𑀺𑀢𑁆𑀢𑀭𑀼𑀘𑀻 𑀫𑀚𑁆𑀛𑀺𑀫𑀭𑀼𑀘𑀻 𑀯𑀺𑀢𑁆𑀣𑀸𑀭𑀭𑀼𑀘𑀻𑀢𑀺 𑀘 𑀢𑀺𑀯𑀺𑀥𑀸 𑀲𑀢𑁆𑀢𑀸, 𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀬𑀣𑀸𑀓𑁆𑀓𑀫𑀁 𑀔𑀦𑁆𑀥𑀸𑀤𑀺𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀁 𑀧𑀦 𑀓𑀸𑀫𑀁 𑀏𑀢𑁂 𑀥𑀫𑁆𑀫𑀸 𑀇𑀲𑁆𑀲𑀭𑀸 𑀯𑀺𑀬 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀇𑀲𑁆𑀲𑀭𑀺𑀬𑀁 𑀆𑀥𑀺𑀧𑀘𑁆𑀘𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀢𑀁 𑀧𑀦 𑀦𑁂𑀲𑀁 𑀥𑀫𑁆𑀫𑀲𑀪𑀸𑀯𑀲𑀺𑀤𑁆𑀥𑀁, 𑀦 𑀏𑀢𑁆𑀣 𑀓𑀲𑁆𑀲𑀘𑀺 𑀯𑀲𑀻𑀪𑀸𑀯𑁄 ‘‘𑀲𑀼𑀜𑁆𑀜𑀸 𑀏𑀢𑁂 𑀅𑀯𑀲𑀯𑀢𑁆𑀢𑀺𑀦𑁄’’𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁. 𑀢𑀁 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀯𑀲𑁂𑀦 𑀤𑀺𑀝𑁆𑀞𑀫𑁂𑀯 𑀉𑀧𑀓𑀸𑀭𑀸𑀯𑀳𑀁, 𑀦 𑀅𑀜𑁆𑀜𑀣𑀸𑀢𑀺 𑀲𑀘𑁆𑀘𑀸𑀤𑀺𑀤𑁆𑀯𑀬𑀁 𑀕𑀳𑀺𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑀥𑀫𑁆𑀫𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀫𑀽𑀮𑀁 𑀧𑀢𑀺𑀝𑁆𑀞𑀸𑀪𑀸𑀯𑀢𑁄. 𑀲𑀢𑀺 𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀜𑁆𑀘 𑀅𑀬𑀁 𑀧𑀜𑁆𑀜𑀸 𑀫𑀽𑀮𑀚𑀸𑀢𑀸 𑀳𑁄𑀢𑀺, 𑀦𑀸𑀲𑀢𑀻𑀢𑀺. 𑀲𑀭𑀻𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀩𑁆𑀩𑀢𑁄. 𑀇𑀫𑀺𑀲𑁆𑀲𑀸 𑀳𑀺 𑀧𑀜𑁆𑀜𑀸𑀬 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀧𑀸𑀤𑀧𑀸𑀡𑀺𑀲𑀻𑀲𑀝𑁆𑀞𑀸𑀦𑀺𑀬𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑀸 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑀽𑀧𑀮𑀓𑁆𑀔𑀡𑀦𑀬𑁂𑀦 ‘‘𑀲𑀭𑀻𑀭’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁩𑁧. 𑀧𑀜𑁆𑀘 𑀔𑀦𑁆𑀥𑀸𑀢𑀺 𑀏𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀬𑀲𑁆𑀫𑀸 𑀘𑁂𑀢𑁆𑀣 𑀔𑀦𑁆𑀥-𑀲𑀤𑁆𑀤𑁄 𑀭𑀸𑀲𑀝𑁆𑀞𑁄 ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫𑁧; 𑁬.𑁩𑁭) 𑀯𑀺𑀬, 𑀢𑀲𑁆𑀫𑀸 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑀁 ¶ 𑀲𑀩𑁆𑀩𑀁 𑀭𑀽𑀧𑀁 𑀭𑀸𑀲𑀺𑀯𑀲𑁂𑀦 𑀩𑀼𑀤𑁆𑀥𑀺𑀬𑀸 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀭𑀽𑀧𑀫𑁂𑀯 𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀢𑀻𑀳𑀺 𑀔𑀦𑁆𑀥𑁂𑀳𑀺 𑀇𑀡𑀁 𑀤𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑁄𑀝𑁆𑀞𑀸𑀲𑀝𑁆𑀞𑁂 𑀧𑀦 𑀔𑀦𑁆𑀥-𑀲𑀤𑁆𑀤𑁂 𑀦𑀺𑀩𑁆𑀩𑀸𑀦𑀲𑁆𑀲𑀸𑀧𑀺 𑀔𑀦𑁆𑀥𑀦𑁆𑀢𑀭𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀸𑀪𑀸𑀯𑀢𑁄. 𑀦 𑀳𑀺 𑀏𑀓𑀲𑁆𑀲 𑀦𑀺𑀘𑁆𑀘𑀲𑁆𑀲 𑀲𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁄 𑀅𑀢𑁆𑀣𑀻𑀢𑀺. 𑀧𑀞𑀫𑁂𑀦𑀢𑁆𑀣𑁂𑀦 𑀭𑀽𑀧𑀭𑀸𑀲𑀻𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑁂𑀦 𑀭𑀽𑀧𑀓𑁄𑀝𑁆𑀞𑀸𑀲𑁄𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸 𑀧𑀦𑁂𑀢𑁂 𑀔𑀦𑁆𑀥𑀸 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸 𑀇𑀫𑀺𑀦𑀸 𑀏𑀯 𑀘 𑀓𑀫𑁂𑀦𑀸𑀢𑀺? 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀪𑀢𑁆𑀢𑀓𑀸𑀭𑀓𑀪𑀼𑀜𑁆𑀚𑀓𑀯𑀺𑀓𑀧𑁆𑀧𑀤𑀲𑁆𑀲𑀦𑀢𑁄 ¶ , 𑀬𑀣𑁄𑀴𑀸𑀭𑀺𑀓𑀬𑀣𑀸𑀲𑀁𑀓𑀺𑀮𑁂𑀲𑀽𑀧𑀤𑁂𑀲𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀯𑀸𑀤𑀫𑀽𑀮𑀳𑁂𑀢𑀼𑀪𑀸𑀯𑀁 𑀲𑀁𑀲𑀸𑀭𑀳𑁂𑀢𑀼𑀢𑀁, 𑀓𑀫𑁆𑀫𑀳𑁂𑀢𑀼𑀢𑀜𑁆𑀘 𑀘𑀺𑀦𑁆𑀢𑁂𑀢𑁆𑀯𑀸 𑀯𑁂𑀤𑀦𑀸𑀲𑀜𑁆𑀜𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀺𑀲𑀼𑀁 𑀔𑀦𑁆𑀥𑀪𑀸𑀯𑁂𑀦 𑀤𑁂𑀲𑀺𑀢𑀸.

𑀭𑀽𑀧𑀓𑁆𑀔𑀦𑁆𑀥𑀓𑀣𑀸𑀯𑀡𑁆𑀡𑀦𑀸

𑁪𑁩𑁨. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀦𑁆𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀦𑀁. 𑀬𑀁-𑀲𑀤𑁆𑀤𑁂𑀦 𑀳𑀺 𑀲𑀦𑀺𑀧𑀸𑀢𑁂𑀦 𑀓𑀺𑀁-𑀲𑀤𑁆𑀤𑁂𑀦 𑀘 𑀕𑀳𑀺𑀢𑁂𑀦 𑀅𑀦𑀺𑀬𑀫𑀢𑁆𑀣𑀢𑀸𑀬 𑀅𑀢𑀺𑀧𑁆𑀧𑀲𑀗𑁆𑀕𑁂 𑀆𑀧𑀦𑁆𑀦𑁂 𑀢𑀁 𑀭𑀼𑀧𑁆𑀧𑀦𑀲𑀤𑁆𑀤𑁄 𑀦𑀺𑀯𑀢𑁆𑀢𑁂𑀢𑀺, 𑀢𑁂𑀦 𑀭𑀽𑀧𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀕𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀲𑀻𑀢𑀸𑀤𑀻𑀳𑀻𑀢𑀺 𑀲𑀻𑀢𑀼𑀡𑁆𑀳𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀤𑀻𑀳𑀺. 𑀳𑁂𑀢𑀼𑀅𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀭𑀼𑀧𑁆𑀧𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀭𑀼𑀧𑁆𑀧𑀦𑀮𑀓𑁆𑀔𑀡𑀁. 𑀥𑀫𑁆𑀫𑁄 𑀏𑀯 𑀥𑀫𑁆𑀫𑀚𑀸𑀢𑀁. 𑀭𑀼𑀧𑁆𑀧𑀦𑀜𑁆𑀘𑁂𑀢𑁆𑀣 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺. 𑀦𑀦𑀼 𑀘 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀕𑀫𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀮𑀩𑁆𑀪𑀢𑀻𑀢𑀺? 𑀲𑀘𑁆𑀘𑀁 𑀮𑀩𑁆𑀪𑀢𑀺, 𑀦 𑀧𑀦 𑀯𑀺𑀪𑀽𑀢𑀢𑀭𑀁. 𑀯𑀺𑀪𑀽𑀢𑀢𑀭𑀁 𑀳𑁂𑀢𑁆𑀣 𑀭𑀼𑀧𑁆𑀧𑀦𑀁 𑀅𑀥𑀺𑀧𑁆𑀧𑁂𑀢𑀁 𑀲𑀻𑀢𑀸𑀤𑀺𑀕𑁆𑀕𑀳𑀡𑀢𑁄. 𑀬𑀤𑀺 𑀏𑀯𑀁, 𑀓𑀣𑀁 𑀩𑁆𑀭𑀳𑁆𑀫𑀮𑁄𑀓𑁂 𑀭𑀽𑀧𑀲𑀫𑀜𑁆𑀜𑀸? 𑀢𑀢𑁆𑀣𑀸𑀧𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀳𑁄𑀢𑀺𑀬𑁂𑀯 𑀭𑀽𑀧𑀲𑀫𑀜𑁆𑀜𑀸, 𑀅𑀦𑀼𑀕𑁆𑀕𑀸𑀳𑀓𑀧𑀘𑁆𑀘𑀬𑀯𑀲𑁂𑀦 𑀯𑀸. 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀪𑀺𑀦𑁆𑀦𑁂 𑀪𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀢𑀁 𑀭𑀼𑀧𑁆𑀧𑀦𑀦𑁆𑀢𑀺 𑀅𑀜𑁆𑀜𑁂. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀭𑀽𑀧𑀬𑀢𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀻𑀢𑀺 𑀭𑀽𑀧𑀁, 𑀧𑀼𑀭𑀺𑀫𑀧𑀓𑁆𑀔𑁂 𑀧𑀦 𑀭𑀼𑀧𑁆𑀧𑀢𑀻𑀢𑀺. 𑀲𑀗𑁆𑀖𑀝𑁆𑀝𑀦𑁂𑀦 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀁 𑀭𑀼𑀧𑁆𑀧𑀦𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀓𑁂𑀘𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀭𑀽𑀧𑀥𑀫𑁆𑀫𑁂𑀲𑀼 𑀭𑀽𑀧𑀲𑀫𑀜𑁆𑀜𑀸𑀬 𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀺 𑀲𑀗𑁆𑀖𑀝𑁆𑀝𑀦𑀸𑀪𑀸𑀯𑀢𑁄. 𑀧𑀝𑀺𑀖𑀸𑀢𑁄 𑀭𑀼𑀧𑁆𑀧𑀦𑀦𑁆𑀢𑀺 𑀅𑀧𑀭𑁂. 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀭𑀸𑀲𑀝𑁆𑀞𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀯𑀤𑀢𑀺.

𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄𑀢𑀺 ¶ 𑀏𑀢𑁆𑀣 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀪𑀯𑀢𑀺 𑀏𑀢𑁆𑀣 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀪𑀽𑀢𑀁. 𑀪𑀽𑀢𑀸𑀦𑀺 𑀉𑀧𑀸𑀤𑀺𑀬𑀢𑁂𑀯, 𑀦 𑀧𑀦 𑀲𑀬𑀁 𑀢𑁂𑀳𑀺, 𑀅𑀜𑁆𑀜𑁂𑀳𑀺 𑀯𑀸 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀸𑀬𑀁.

𑀓𑀸𑀫𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀘𑀦𑀢𑁆𑀣𑀸𑀤𑀺𑀢𑁄𑀧𑀺 𑀪𑀽𑀢𑀸𑀦𑀺 𑀯𑀺𑀪𑀸𑀯𑀺𑀢𑀸𑀦𑁂𑀯, 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀦 𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀯𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀻’’𑀢𑀺. 𑀢𑀢𑁆𑀣 𑀧𑀤𑀝𑁆𑀞𑀸𑀦𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀧𑀤𑀝𑁆𑀞𑀸𑀦𑀢𑁄 𑀧𑀦𑀸’’𑀢𑀺𑀆𑀤𑀺. 𑀅𑀯𑀘𑀦𑀜𑁆𑀘 𑀢𑀲𑁆𑀲 𑀢𑀲𑁆𑀲𑀢𑁆𑀣𑀲𑁆𑀲 𑀧𑀘𑁆𑀘𑀬𑀢𑁄𑀢𑀺 𑀏𑀢𑁆𑀣 𑀧𑀓𑀸𑀭𑀦𑁆𑀢𑀭𑁂𑀦 𑀯𑀺𑀪𑀸𑀯𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀸𑀧𑀻𑀢𑀺 𑀘𑀢𑀲𑁆𑀲𑁄𑀧𑀺 𑀥𑀸𑀢𑀼𑀬𑁄. 𑀆𑀧𑁄𑀲𑀗𑁆𑀕𑀳𑀺𑀢𑀸𑀬 𑀢𑁂𑀚𑁄𑀦𑀼𑀧𑀸𑀮𑀺𑀢𑀸𑀬 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸𑀬 ¶ 𑀏𑀯 𑀧𑀣𑀯𑀻𑀥𑀸𑀢𑀼𑀬𑀸 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀲𑀸 𑀲𑁂𑀲𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸, 𑀏𑀯𑀫𑀺𑀢𑀭𑀸𑀧𑀻𑀢𑀺 𑀆𑀳 ‘‘𑀅𑀯𑀲𑁂𑀲𑀥𑀸𑀢𑀼𑀢𑁆𑀢𑀬𑀧𑀤𑀝𑁆𑀞𑀸𑀦𑀸’’𑀢𑀺.

𑀘𑀢𑀼𑀯𑀻𑀲𑀢𑀺𑀯𑀺𑀥𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀩𑀮𑀭𑀽𑀧𑀸𑀤𑀻𑀦𑀁 𑀧𑀝𑀺𑀲𑁂𑀥𑀦𑀢𑁆𑀣𑁄. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀢𑀻𑀢𑀺 𑀳𑀺 𑀅𑀬𑀁 𑀘𑀓𑁆𑀔𑀢𑀺-𑀲𑀤𑁆𑀤𑁄 ‘‘𑀫𑀥𑀼𑀁 𑀘𑀓𑁆𑀔𑀢𑀺, 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀲𑁆𑀲𑀸𑀤𑀦𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑀓𑁆𑀔𑀼𑀁 𑀔𑁄, 𑀫𑀸𑀕𑀡𑁆𑀟𑀺𑀬, 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑀼𑀤𑀺𑀢’’𑀦𑁆𑀢𑀺 (𑀫. 𑀦𑀺. 𑁨.𑁨𑁦𑁯). 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 ‘‘𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁩𑁩; 𑀥. 𑀲. 𑀅𑀝𑁆𑀞. 𑁬𑁦𑁦). 𑀲𑀢𑀺𑀧𑀺 𑀲𑁄𑀢𑀸𑀤𑀻𑀦𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂 𑀦𑀺𑀭𑀼𑀴𑁆𑀳𑀢𑁆𑀢𑀸 𑀤𑀲𑁆𑀲𑀦𑁂 𑀏𑀯 𑀘𑀓𑁆𑀔𑀼-𑀲𑀤𑁆𑀤𑁄 𑀧𑀯𑀢𑁆𑀢𑀢𑀺 𑀧𑀤𑀼𑀫𑀸𑀤𑀻𑀲𑀼 𑀧𑀗𑁆𑀓𑀚𑀸𑀤𑀺𑀲𑀤𑁆𑀤𑀸 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀘𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀅𑀪𑀺𑀩𑁆𑀬𑀢𑁆𑀢𑀁 𑀯𑀤𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀪𑀸𑀯𑁂𑀢𑀺 𑀘𑀸’’𑀢𑀺 (𑀫𑀳𑀸𑀦𑀺. 𑀅𑀝𑁆𑀞. 𑁧𑁩; 𑀯𑀺𑀪. 𑀅𑀝𑁆𑀞. 𑁧𑁫𑁪) 𑀯𑀼𑀢𑁆𑀢𑀁. 𑀢𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀯𑀺𑀪𑀸𑀯𑀦𑀢𑁆𑀣𑀢𑀸𑀧𑀺 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀼𑀡𑀸𑀢𑀺 𑀏𑀢𑁂𑀦, 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀬𑀁 𑀯𑀸 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀖𑀸𑀬𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀭𑀲𑀕𑁆𑀕𑀳𑀡𑀫𑀽𑀮𑀓𑀢𑁆𑀢𑀸 𑀅𑀚𑁆𑀛𑁄𑀳𑀭𑀡𑀲𑁆𑀲 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀆𑀳𑀸𑀭𑀭𑀲𑁄 𑀚𑀻𑀯𑀺𑀢𑀁, 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄 𑀅𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑀁 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 𑀓𑀸𑀫𑀭𑀸𑀕𑀦𑀺𑀤𑀸𑀦𑀓𑀫𑁆𑀫𑀚𑀦𑀺𑀢𑁂𑀲𑀼, 𑀓𑀸𑀫𑀭𑀸𑀕𑀲𑁆𑀲 𑀘 𑀯𑀺𑀲𑁂𑀲𑀧𑀘𑁆𑀘𑀬𑁂𑀲𑀼 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑁂𑀲𑀼 𑀓𑀸𑀬𑀲𑁆𑀲 𑀯𑀺𑀲𑁂𑀲𑀢𑁄 𑀲𑀸𑀲𑀯𑀧𑀘𑁆𑀘𑀬𑀢𑁆𑀢𑀸. 𑀢𑁂𑀦 𑀳𑀺 𑀨𑁄𑀝𑁆𑀞𑀩𑁆𑀩𑀲𑀼𑀔𑀁 𑀅𑀲𑁆𑀲𑀸𑀤𑁂𑀦𑁆𑀢𑀸 𑀲𑀢𑁆𑀢𑀸 𑀫𑁂𑀣𑀼𑀦𑀫𑁆𑀧𑀺 𑀲𑁂𑀯𑀦𑁆𑀢𑀺. 𑀓𑀸𑀬𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀓𑀸 𑀯𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀩𑀮𑀯𑀓𑀸𑀫𑀸𑀲𑀯𑀸𑀤𑀺𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 𑀲𑀸𑀲𑀯𑀸𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄 𑀯𑀼𑀢𑁆𑀢𑁄. 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀭𑀽𑀧𑀫𑀺𑀯 𑀧𑀓𑀸𑀲𑀁 𑀓𑀭𑁄𑀢𑀺 𑀲𑀯𑀺𑀕𑁆𑀕𑀳𑀫𑀺𑀯 ¶ 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀧𑀓𑀸𑀲𑀦𑀢𑁆𑀣𑁄 𑀏𑀯 𑀭𑀽𑀧𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄, 𑀉𑀤𑀸𑀳𑀭𑀻𑀬𑀢𑀺, 𑀲𑀓𑁂𑀳𑀺 𑀯𑀸 𑀧𑀘𑁆𑀘𑀬𑁂𑀳𑀺 𑀲𑀧𑁆𑀧𑀻𑀬𑀢𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀉𑀧𑀦𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄, 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀺 𑀅𑀧𑀸𑀓𑀝𑀁 ‘‘𑀇𑀤𑀁 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺 𑀧𑀓𑀸𑀲𑁂𑀢𑀺 ¶ , 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀧𑀼𑀧𑁆𑀨𑀨𑀮𑀸𑀤𑀺𑀁 ‘‘𑀇𑀤𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀲𑁄, 𑀅𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀺𑀬𑀸𑀯 𑀇𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀢𑀣𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁. 𑀚𑀻𑀯𑀦𑁆𑀢𑀺 𑀢𑁂𑀦 𑀲𑀳𑀚𑀸𑀢𑀥𑀫𑁆𑀫𑀸𑀢𑀺 𑀚𑀻𑀯𑀺𑀢𑀁, 𑀢𑀤𑁂𑀯 𑀇𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀳𑀤𑀬𑀜𑁆𑀘 𑀢𑀁 𑀯𑀢𑁆𑀣𑀼 𑀘, 𑀳𑀤𑀬𑀲𑁆𑀲 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀳𑀤𑀬𑀯𑀢𑁆𑀣𑀼. 𑀘𑁄𑀧𑀦𑀓𑀸𑀬𑀪𑀸𑀯𑀢𑁄 𑀓𑀸𑀬𑁄 𑀘 𑀲𑁄 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄 𑀯𑀺𑀜𑁆𑀜𑀢𑁆𑀢𑀺 𑀘𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀘𑁄𑀧𑀦𑀯𑀸𑀘𑀸𑀪𑀸𑀯𑀢𑁄, 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄 𑀘 𑀯𑀘𑀻 𑀘 𑀲𑀸 𑀯𑀺𑀜𑁆𑀜𑀢𑁆𑀢𑀺 𑀘𑀸𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀯𑀺𑀕𑁆𑀕𑀳𑀸𑀪𑀸𑀯𑀢𑁄 𑀦 𑀓𑀲𑁆𑀲𑀢𑀺, 𑀓𑀲𑀺𑀢𑀼𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀦 𑀯𑀸 𑀓𑀸𑀲𑀢𑀺 𑀤𑀺𑀩𑁆𑀩𑀢𑀻𑀢𑀺 𑀅𑀓𑀸𑀲𑀁, 𑀅𑀓𑀸𑀲𑀫𑁂𑀯 𑀆𑀓𑀸𑀲𑀁, 𑀢𑀤𑁂𑀯 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀆𑀓𑀸𑀲𑀥𑀸𑀢𑀼. 𑀭𑀽𑀧𑀲𑁆𑀲𑀸𑀢𑀺 𑀦𑀺𑀧𑁆𑀨𑀦𑁆𑀦𑀭𑀽𑀧𑀲𑁆𑀲. 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸. 𑀲𑀬𑀁 𑀅𑀦𑀺𑀧𑁆𑀨𑀦𑁆𑀦𑀢𑀸𑀬 ‘‘𑀭𑀽𑀧𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀺𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸. 𑀧𑀞𑀫𑀁, 𑀉𑀧𑀭𑀺 𑀘 𑀘𑀬𑁄 𑀧𑀯𑀢𑁆𑀢𑀺 𑀉𑀧𑀘𑀬𑁄. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀲𑀫𑁆𑀩𑀦𑁆𑀥𑀸 𑀢𑀢𑀺 𑀧𑀯𑀢𑁆𑀢𑀺 𑀲𑀦𑁆𑀢𑀢𑀺. 𑀅𑀦𑀺𑀘𑁆𑀘𑀲𑁆𑀲 𑀯𑀺𑀦𑀸𑀲𑀺𑀦𑁄 𑀪𑀸𑀯𑁄 𑀅𑀦𑀺𑀘𑁆𑀘𑀢𑀸. 𑀓𑀩𑀮𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄. 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀏𑀯𑀁 𑀢𑀸𑀯 𑀉𑀧𑀸𑀤𑀸𑀬𑀭𑀽𑀧𑀁 𑀲𑀤𑁆𑀤𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀓𑀫𑀢𑁄 𑀧𑀦 𑀲𑀩𑁆𑀩𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀫𑀽𑀮𑀪𑀽𑀢𑀢𑁆𑀢𑀸 𑀧𑀞𑀫𑀁 𑀪𑀽𑀢𑀭𑀽𑀧𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀇𑀢𑀭𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁂𑀦 𑀅𑀢𑁆𑀢𑀪𑀸𑀯𑀲𑀫𑀜𑁆𑀜𑀸𑀬 𑀫𑀽𑀮𑀪𑀸𑀯𑀢𑁄 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘 𑀆𑀤𑀺𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀢𑁂𑀲𑀁 𑀯𑀺𑀲𑀬𑀻𑀦𑀁 𑀇𑀫𑁂 𑀯𑀺𑀲𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 𑀭𑀽𑀧𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀨𑁄𑀝𑁆𑀞𑀩𑁆𑀩𑀁 𑀧𑀦 𑀅𑀦𑀼𑀧𑀸𑀤𑀸𑀭𑀽𑀧𑀢𑁆𑀢𑀸, 𑀪𑀽𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀘 𑀇𑀥 𑀦 𑀕𑀳𑀺𑀢𑀁. 𑀲𑁆𑀯𑀸𑀬𑀁 𑀅𑀢𑁆𑀢𑀪𑀸𑀯𑁄 𑀇𑀫𑁂𑀳𑀺 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀉𑀤𑁆𑀤𑀺𑀝𑁆𑀞𑀁. ‘‘𑀇𑀫𑀺𑀦𑀸 𑀚𑀻𑀯𑀢𑀻’’𑀢𑀺 𑀯𑁄𑀳𑀸𑀭𑀁 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲 𑀇𑀫𑀁 𑀦𑀺𑀲𑁆𑀲𑀸𑀬 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀁 𑀅𑀢𑁆𑀢𑀳𑀺𑀢𑀸𑀤𑀺𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀳𑀤𑀬𑀯𑀢𑁆𑀣𑀼. 𑀢𑀲𑁆𑀲 𑀇𑀫𑀸𑀲𑀁 𑀯𑀲𑁂𑀦 𑀲𑀩𑁆𑀩𑁂 𑀓𑀸𑀬𑀯𑀘𑀻𑀧𑀬𑁄𑀕𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁. 𑀇𑀫𑀸𑀬 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑁄, 𑀅𑀜𑁆𑀚𑀲𑁄 𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀓𑀸𑀲𑀥𑀸𑀢𑀼. 𑀇𑀫𑁂𑀳𑀺𑀲𑁆𑀲 𑀲𑀼𑀔𑀧𑁆𑀧𑀯𑀢𑁆𑀢𑀺, 𑀉𑀧𑁆𑀧𑀢𑁆𑀢𑀺𑀆𑀤𑀬𑁄 ¶ 𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀮𑀳𑀼𑀢𑀸𑀤𑀬𑁄. 𑀲𑀩𑁆𑀩𑁄 𑀘𑀸𑀬𑀁 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀦𑁆𑀢𑀸𑀦𑁄 𑀇𑀫𑀺𑀦𑀸 𑀉𑀧𑀢𑁆𑀣𑀫𑁆𑀪𑀻𑀬𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪𑁩𑁩. 𑀇𑀤𑀸𑀦𑀺 ¶ 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀮𑀓𑁆𑀔𑀡𑀸𑀤𑀺𑀢𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀉𑀧𑀸𑀤𑀸𑀭𑀽𑀧𑁂𑀲𑀼. 𑀭𑀽𑀧𑁂, 𑀭𑀽𑀧𑀲𑁆𑀲 𑀯𑀸 𑀅𑀪𑀺𑀖𑀸𑀢𑁄 𑀭𑀽𑀧𑀸𑀪𑀺𑀖𑀸𑀢𑁄, 𑀢𑀁 𑀅𑀭𑀳𑀢𑀻𑀢𑀺 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑁄, 𑀭𑀽𑀧𑀸𑀪𑀺𑀖𑀸𑀢𑁄 𑀳𑁄𑀢𑀼 𑀯𑀸 𑀫𑀸 𑀯𑀸 𑀏𑀯𑀁𑀲𑀪𑀸𑀯𑁄 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑁄, 𑀏𑀯𑀁𑀮𑀓𑁆𑀔𑀡𑀁 𑀘𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁄 𑀏𑀯 𑀘𑀓𑁆𑀔𑀼𑀧𑀲𑀸𑀤𑁄 𑀭𑀽𑀧𑀸𑀪𑀺𑀳𑀦𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀓𑁂𑀯𑀮𑁄. 𑀢𑀲𑁆𑀫𑀸 𑀢𑀁𑀲𑀪𑀸𑀯𑀢𑀸𑀯 𑀧𑀫𑀸𑀡𑀁, 𑀦 𑀭𑀽𑀧𑀸𑀪𑀺𑀖𑀸𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀢𑀸 𑀯𑀼𑀢𑁆𑀢𑀸 𑀬𑀣𑀸 𑀯𑀺𑀧𑀸𑀓𑀸𑀭𑀳𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺. 𑀅𑀪𑀺𑀖𑀸𑀢𑁄 𑀘 𑀯𑀺𑀲𑀬𑀯𑀺𑀲𑀬𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀫𑀼𑀔𑀻𑀪𑀸𑀯𑁄 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑀁 𑀅𑀪𑀺𑀖𑀸𑀢𑁄 𑀯𑀺𑀬𑀸𑀢𑀺 𑀓𑀢𑁆𑀯𑀸. 𑀲𑁄 𑀭𑀽𑀧𑁂 𑀘𑀓𑁆𑀔𑀼𑀲𑁆𑀲, 𑀭𑀽𑀧𑀲𑁆𑀲 𑀯𑀸 𑀘𑀓𑁆𑀔𑀼𑀫𑁆𑀳𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀁 𑀘𑀓𑁆𑀔𑀼 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀭𑀽𑀧𑀫𑁆𑀳𑀺 𑀲𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸’’𑀢𑀺, ‘‘𑀬𑀫𑁆𑀳𑀺 𑀘𑀓𑁆𑀔𑀼𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸’’𑀢𑀺 (𑀥. 𑀲. 𑁫𑁯𑁭) 𑀘 𑀆𑀤𑀺. 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀤𑀸𑀦𑀪𑀽𑀢𑀸 𑀓𑀸𑀫𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀘 𑀢𑀤𑀸𑀬𑀢𑀦𑀺𑀓𑀪𑀯𑀧𑀢𑁆𑀣𑀦𑀸𑀪𑀸𑀯𑀢𑁄 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀯𑁄𑀳𑀸𑀭𑀁 𑀅𑀭𑀳𑀢𑀻𑀢𑀺 𑀤𑀼𑀢𑀺𑀬𑀦𑀬𑁄 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑁄. 𑀢𑀢𑁆𑀣 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺. 𑀏𑀯𑀁𑀯𑀺𑀥𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀤𑀝𑁆𑀞𑀼𑀓𑀸𑀫𑀢𑀸…𑀧𑁂… 𑀧𑀲𑀸𑀤𑁄, 𑀏𑀯𑀁𑀮𑀓𑁆𑀔𑀡𑀁 𑀘𑀓𑁆𑀔𑀼. 𑀢𑀲𑁆𑀲 𑀢𑀲𑁆𑀲 𑀳𑀺 𑀪𑀯𑀲𑁆𑀲 𑀫𑀽𑀮𑀓𑀸𑀭𑀡𑀪𑀽𑀢𑀸 𑀢𑀡𑁆𑀳𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀬𑀢𑀦𑀯𑀺𑀲𑀬𑀸𑀧𑀺 𑀦𑀸𑀫 𑀳𑁄𑀢𑀻𑀢𑀺 𑀓𑀸𑀫𑀢𑀡𑁆𑀳𑀸𑀤𑀻𑀦𑀁 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀯𑁄𑀳𑀸𑀭𑀸𑀭𑀳𑀢𑀸 𑀯𑀼𑀢𑁆𑀢𑀸.

𑀤𑀝𑁆𑀞𑀼𑀓𑀸𑀫𑀢𑀸𑀢𑀺 𑀳𑀺 𑀤𑀝𑁆𑀞𑀼𑀫𑀺𑀘𑁆𑀙𑀸, 𑀭𑀽𑀧𑀢𑀡𑁆𑀳𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀤𑀝𑁆𑀞𑀼𑀓𑀸𑀫𑀢𑀸𑀬, 𑀲𑁂𑀲𑀸𑀦𑀜𑁆𑀘 𑀢𑀁𑀢𑀁𑀅𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑀢𑁄 𑀲𑀢𑀺 𑀧𑀼𑀭𑀺𑀫𑀦𑀺𑀩𑁆𑀩𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀅𑀲𑀢𑀺 𑀧𑀦 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀪𑀸𑀯𑁄𑀬𑁂𑀯 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀢𑁄 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀁 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀢𑁄 𑀯𑀺𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀉𑀧𑁆𑀧𑀦𑁆𑀦𑀢𑀸 𑀅𑀢𑁆𑀣𑀺𑀢𑀸 𑀧𑀭𑀺𑀬𑀸𑀬𑁂𑀳𑀺 𑀯𑀼𑀘𑁆𑀘𑀢𑀺 ‘‘𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 ¶ 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁫𑁬), ‘‘𑀲𑀦𑁆𑀢𑀁 ¶ 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄’𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁨; 𑀫. 𑀦𑀺. 𑁧.𑁧𑁧𑁫) 𑀘 𑀏𑀯𑀫𑀸𑀤𑀻𑀲𑀼.

𑀭𑀽𑀧𑁂𑀲𑀼 𑀧𑀼𑀕𑁆𑀕𑀮𑀲𑁆𑀲, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀆𑀯𑀺𑀜𑁆𑀙𑀦𑀭𑀲𑀁. 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄. 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑀤𑀝𑁆𑀞𑀸𑀦𑀁 𑀬𑁂𑀲𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄, 𑀢𑁂𑀯𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸. 𑀏𑀢𑁆𑀣 𑀘 𑀢𑀁𑀢𑀁𑀅𑀢𑁆𑀢𑀪𑀸𑀯𑀦𑀺𑀧𑁆𑀨𑀸𑀤𑀓𑀲𑀸𑀥𑀸𑀭𑀡𑀓𑀫𑁆𑀫𑀯𑀲𑁂𑀦 𑀧𑀼𑀭𑀺𑀫𑀁 𑀘𑀓𑁆𑀔𑀼𑀮𑀓𑁆𑀔𑀡𑀁 𑀯𑀼𑀢𑁆𑀢𑀁 𑀓𑀸𑀭𑀡𑀯𑀺𑀲𑁂𑀲𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸. ‘‘𑀏𑀯𑀭𑀽𑀧𑀁 𑀦𑀸𑀫 𑀫𑁂 𑀘𑀓𑁆𑀔𑀼 𑀳𑁄𑀢𑀽’’𑀢𑀺 𑀏𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑀆𑀯𑁂𑀡𑀺𑀓𑀓𑀫𑁆𑀫𑀯𑀲𑁂𑀦 𑀤𑀼𑀢𑀺𑀬𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀢𑀺𑀧𑀺 𑀧𑀦 𑀧𑀜𑁆𑀘𑀦𑁆𑀦𑀁 𑀧𑀲𑀸𑀤𑀪𑀸𑀯𑀲𑀸𑀫𑀜𑁆𑀜𑁂 𑀲𑀯𑀺𑀲𑀬𑀸𑀯𑀪𑀸𑀲𑀦𑀲𑀗𑁆𑀔𑀸𑀢𑀲𑁆𑀲 𑀧𑀲𑀸𑀤𑀩𑁆𑀬𑀸𑀧𑀸𑀭𑀲𑁆𑀲 𑀯𑀲𑁂𑀦 𑀧𑀼𑀭𑀺𑀫𑀁 𑀯𑀼𑀢𑁆𑀢𑀁. 𑀧𑀲𑀸𑀤𑀓𑀸𑀭𑀡𑀲𑁆𑀲 𑀲𑀢𑀺𑀧𑀺 𑀓𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂, 𑀏𑀓𑀢𑁆𑀢𑁂 𑀯𑀸 𑀅𑀢𑁆𑀢𑀦𑁄 𑀓𑀸𑀭𑀡𑀪𑁂𑀤𑁂𑀦 𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀤𑀼𑀢𑀺𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄𑀢𑀸𑀤𑀻𑀦𑀁 𑀮𑀓𑁆𑀔𑀡𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣𑀸𑀳 𑁋 𑀘𑀓𑁆𑀔𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀁 𑀏𑀓𑀓𑀫𑁆𑀫𑀼𑀦𑀸 𑀉𑀧𑁆𑀧𑀢𑁆𑀢𑀺, 𑀉𑀤𑀸𑀳𑀼 𑀦𑀸𑀦𑀸𑀓𑀫𑁆𑀫𑀼𑀦𑀸𑀢𑀺? 𑀉𑀪𑀬𑀣𑀸𑀧𑀻𑀢𑀺 𑀧𑁄𑀭𑀸𑀡𑀸. 𑀢𑀢𑁆𑀣 𑀦𑀸𑀦𑀸𑀓𑀫𑁆𑀫𑀼𑀦𑀸 𑀢𑀸𑀯 𑀉𑀧𑁆𑀧𑀢𑁆𑀢𑀺𑀬𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀸𑀭𑀡𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀏𑀓𑀓𑀫𑁆𑀫𑀼𑀦𑀸 𑀧𑀦 𑀉𑀧𑁆𑀧𑀢𑁆𑀢𑀺𑀬𑀁 𑀓𑀣𑀁 𑀦𑁂𑀲𑀁 𑀯𑀺𑀲𑁂𑀲𑁄𑀢𑀺? 𑀓𑀸𑀭𑀡𑀲𑁆𑀲 𑀪𑀺𑀦𑁆𑀦𑀢𑁆𑀢𑀸 𑀏𑀯. 𑀢𑀁𑀢𑀁𑀪𑀯𑀧𑀢𑁆𑀣𑀦𑀸𑀪𑀽𑀢𑀸 𑀳𑀺 𑀢𑀡𑁆𑀳𑀸 𑀢𑀁𑀢𑀁𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬𑀢𑀦𑀸𑀪𑀺𑀮𑀸𑀲𑀢𑀸𑀬 𑀲𑀬𑀁 𑀯𑀺𑀘𑀺𑀢𑁆𑀢𑀭𑀽𑀧𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑁂𑀤𑀢𑀁 𑀯𑀺𑀤𑀳𑀢𑀺. 𑀬𑀢𑁄 𑀢𑀤𑀸𑀳𑀺𑀢𑀯𑀺𑀲𑁂𑀲𑀁 𑀢𑀁 𑀢𑀣𑀸𑀭𑀽𑀧𑀲𑀫𑀢𑁆𑀣𑀢𑀸𑀬𑁄𑀕𑁂𑀦𑀸𑀦𑁂𑀓𑀭𑀽𑀧𑀸𑀧𑀦𑁆𑀦𑀁 𑀯𑀺𑀬 𑀅𑀦𑁂𑀓𑀁 𑀯𑀺𑀲𑀺𑀝𑁆𑀞𑀲𑀪𑀸𑀯𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀦 𑀘𑁂𑀢𑁆𑀣 𑀲𑀫𑀢𑁆𑀣𑀢𑀸 𑀲𑀫𑀢𑁆𑀣𑀪𑀸𑀯𑀢𑁄 𑀅𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸 𑀓𑀸𑀭𑀡𑀯𑀺𑀲𑁂𑀲𑁂𑀦 𑀆𑀳𑀺𑀢𑀯𑀺𑀲𑁂𑀲𑀲𑁆𑀲 𑀯𑀺𑀲𑀺𑀝𑁆𑀞𑀨𑀮𑀦𑀺𑀧𑁆𑀨𑀸𑀤𑀦𑀬𑁄𑀕𑁆𑀬𑀢𑀸𑀫𑀢𑁆𑀢𑀢𑁄. 𑀅𑀬𑀜𑁆𑀘 𑀏𑀓𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀳𑁂𑀢𑀼𑀢𑀸𑀯𑀺𑀲𑁂𑀲𑀬𑁄𑀕𑁄 𑀬𑀼𑀢𑁆𑀢𑀺𑀢𑁄, 𑀆𑀕𑀫𑀦𑀢𑁄 𑀘 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀧𑀺𑀘 𑀏𑀓𑀲𑁆𑀲𑁂𑀯 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑁄𑀴𑀲𑀸𑀤𑀺𑀯𑀺𑀧𑀸𑀓𑀘𑀺𑀢𑁆𑀢𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀢𑀸 𑀯𑀼𑀘𑁆𑀘𑀢𑀺. 𑀮𑁄𑀓𑁂𑀧𑀺 𑀏𑀓𑀲𑁆𑀲𑁂𑀯 𑀲𑀸𑀮𑀺𑀩𑀻𑀚𑀲𑁆𑀲 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀢𑀡𑁆𑀟𑀼𑀮𑀆𑀢𑀡𑁆𑀟𑀼𑀮𑀨𑀮𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀢𑀸 𑀤𑀺𑀲𑁆𑀲𑀢𑁂𑀯, 𑀓𑀺𑀁 𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬. 𑀬𑀢𑁄 𑀓𑀫𑁆𑀫𑀨𑀮𑀁 𑀘𑀓𑁆𑀔𑀸𑀤𑀻𑀦𑀺, 𑀓𑀫𑁆𑀫𑀯𑀺𑀧𑀸𑀓𑁄 𑀘 𑀲𑀩𑁆𑀩𑀲𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀜𑀸𑀡𑀲𑁆𑀲 𑀯𑀺𑀲𑀬𑁄𑀢𑀺.

𑁪𑁩𑁪. 𑀓𑁂𑀘𑀻𑀢𑀺 ¶ 𑀫𑀳𑀸𑀲𑀗𑁆𑀖𑀺𑀓𑁂𑀲𑀼 𑀏𑀓𑀘𑁆𑀘𑁂. 𑀢𑁂𑀲𑀼 𑀳𑀺 𑀯𑀲𑀼𑀥𑀫𑁆𑀫𑁄 𑀏𑀯𑀁 𑀯𑀤𑀢𑀺 ‘‘𑀘𑀓𑁆𑀔𑀼𑀫𑁆𑀳𑀺 𑀢𑁂𑀚𑁄 𑀅𑀥𑀺𑀓𑀁, 𑀲𑁄𑀢𑁂 𑀯𑀸𑀬𑀼, 𑀖𑀸𑀦𑁂 𑀧𑀣𑀯𑀻, 𑀚𑀺𑀯𑁆𑀳𑀸𑀬 𑀆𑀧𑁄, 𑀓𑀸𑀬𑁂 𑀲𑀩𑁆𑀩𑁂𑀧𑀺 𑀲𑀫𑀸’’𑀢𑀺. 𑀘𑀓𑁆𑀔𑀸𑀤𑀻𑀲𑀼 𑀢𑁂𑀚𑀸𑀤𑀺𑀅𑀥𑀺𑀓𑀢𑀸 𑀦𑀸𑀫 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀢𑀤𑀥𑀺𑀓𑀢𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀚𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 ¶ 𑀧𑀲𑀸𑀤𑁄 𑀘𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑁄 𑀲𑀩𑁆𑀩𑁂𑀲𑀦𑁆𑀢𑀺 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄, 𑀦𑀦𑀼 𑀢𑁂𑀚𑀸𑀤𑀺𑀅𑀥𑀺𑀓𑀸𑀦𑀜𑁆𑀘 𑀪𑀽𑀢𑀸𑀦𑀁 𑀧𑀲𑀸𑀤𑀸 𑀲𑀩𑁆𑀩𑁂𑀲𑀁𑀬𑁂𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀤𑀁 𑀧𑀦 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀯𑀘𑀦𑀁 𑀲𑀫𑀸𑀦𑀸𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀲𑁆𑀲 𑀏𑀓𑀤𑁂𑀲𑀸𑀥𑀺𑀓𑀪𑀸𑀯𑀲𑁆𑀲 𑀦𑀺𑀯𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀚𑀸𑀤𑀻𑀦𑀁 𑀳𑀺 𑀧𑀘𑁆𑀘𑁂𑀓𑀁 𑀅𑀥𑀺𑀓𑀪𑀸𑀯𑁂 𑀯𑀺𑀬 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁 𑀯𑀸 𑀅𑀥𑀺𑀓𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀸𑀥𑀺𑀓𑀪𑀸𑀯𑁂𑀦𑁂𑀯 𑀏𑀓𑀓𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸𑀬 𑀑𑀫𑀢𑁆𑀢𑀢𑀸𑀬𑀧𑀺 𑀓𑀸𑀬𑀧𑁆𑀧𑀲𑀸𑀤𑁄 𑀦 𑀳𑁄𑀢𑀻𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀢𑀲𑁆𑀫𑀸 𑀘𑀢𑀼𑀦𑁆𑀦𑀫𑁆𑀧𑀺 𑀪𑀽𑀢𑀸𑀦𑀁 𑀲𑀫𑀪𑀸𑀯𑁂𑀦 𑀓𑀸𑀬𑀧𑁆𑀧𑀲𑀸𑀤𑁄 𑀳𑁄𑀢𑀻𑀢𑀺 𑀲𑀩𑁆𑀩𑀲𑀤𑁆𑀤𑁄 𑀇𑀥 𑀲𑀫𑀪𑀸𑀯𑀤𑀻𑀧𑀓𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀚𑀸𑀤𑀻𑀦𑀦𑁆𑀢𑀺 𑀧𑀤𑀻𑀧𑀲𑀗𑁆𑀔𑀸𑀢𑀲𑁆𑀲 𑀢𑁂𑀚𑀲𑁆𑀲 𑀑𑀪𑀸𑀲𑀭𑀽𑀧𑁂𑀦, 𑀯𑀸𑀬𑀼𑀲𑁆𑀲 𑀲𑀤𑁆𑀤𑁂𑀦, 𑀧𑀣𑀯𑀺𑀬𑀸 𑀕𑀦𑁆𑀥𑁂𑀦, 𑀔𑁂𑀴𑀲𑀗𑁆𑀔𑀸𑀢𑀲𑁆𑀲 𑀉𑀤𑀓𑀲𑁆𑀲 𑀭𑀲𑁂𑀦𑀸𑀢𑀺 𑀧𑀼𑀭𑀺𑀫𑀯𑀸𑀤𑁂, 𑀧𑀘𑁆𑀙𑀺𑀫𑀯𑀸𑀤𑁂 𑀘 𑀬𑀣𑀸𑀬𑁄𑀕𑀁 𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀺 𑀅𑀦𑀼𑀕𑁆𑀕𑀬𑁆𑀳𑀪𑀸𑀯𑀢𑁄, 𑀭𑀽𑀧𑀸𑀤𑀻𑀦𑀁 𑀕𑀳𑀡𑁂 𑀉𑀧𑀓𑀸𑀭𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀸𑀤𑀺𑀲𑀳𑀓𑀸𑀭𑀻𑀓𑀸𑀭𑀡𑀲𑀳𑀺𑀢𑀸𑀦𑀁𑀬𑁂𑀯 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀤𑀺𑀅𑀯𑀪𑀸𑀲𑀦𑀲𑀫𑀢𑁆𑀣𑀢𑀸, 𑀯𑀺𑀯𑀭𑀲𑁆𑀲 𑀘 𑀲𑁄𑀢𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑁆𑀲𑀬𑀪𑀸𑀯𑁄 𑀕𑀼𑀡𑁄𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀢𑁂𑀚𑀸𑀤𑀻𑀦𑀁 𑀯𑀺𑀬 𑀧𑀦 𑀯𑀺𑀯𑀭𑀲𑁆𑀲 𑀪𑀽𑀢𑀪𑀸𑀯𑀸𑀪𑀸𑀯𑀢𑁄 𑀬𑀣𑀸𑀬𑁄𑀕-𑀕𑁆𑀕𑀳𑀡𑀁. 𑀅𑀣 𑀯𑀸 𑀭𑀽𑀧𑀸𑀤𑀬𑁄 𑀯𑀺𑀬 𑀯𑀺𑀯𑀭𑀫𑁆𑀧𑀺 𑀪𑀽𑀢𑀕𑀼𑀡𑁄𑀢𑀺 𑀧𑀭𑀸𑀥𑀺𑀧𑁆𑀧𑀸𑀬𑁂 𑀢𑁂𑀚𑀲𑁆𑀲 𑀆𑀮𑁄𑀓𑀭𑀽𑀧𑁂𑀦, 𑀆𑀓𑀸𑀲𑀲𑀗𑁆𑀔𑀸𑀢𑀲𑁆𑀲 𑀯𑀺𑀯𑀭𑀲𑁆𑀲 𑀲𑀤𑁆𑀤𑁂𑀦, 𑀯𑀸𑀬𑀼𑀲𑁆𑀲 𑀕𑀦𑁆𑀥𑁂𑀦, 𑀉𑀤𑀓𑀲𑁆𑀲 𑀭𑀲𑁂𑀦, 𑀧𑀣𑀯𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀦𑀸𑀢𑀺 𑀏𑀯𑀁 𑀬𑀣𑀸𑀬𑁄𑀕𑀁 𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀻𑀢𑀺 𑀬𑁄𑀚𑀦𑀸.

𑀭𑀽𑀧𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀅𑀕𑁆𑀕𑀺𑀫𑁆𑀳𑀺 𑀭𑀽𑀧𑀲𑁆𑀲 𑀧𑀪𑀲𑁆𑀲𑀭𑀲𑁆𑀲, 𑀯𑀸𑀬𑀼𑀫𑁆𑀳𑀺 𑀲𑀤𑁆𑀤𑀲𑁆𑀲 𑀲𑀪𑀸𑀯𑁂𑀦 𑀲𑀼𑀬𑁆𑀬𑀫𑀸𑀦𑀲𑁆𑀲, 𑀧𑀣𑀯𑀺𑀬𑀸 𑀲𑀼𑀭𑀪𑀺𑀆𑀤𑀺𑀦𑁄 𑀕𑀦𑁆𑀥𑀲𑁆𑀲, 𑀆𑀧𑁂 𑀘 𑀭𑀲𑀲𑁆𑀲 𑀫𑀥𑀼𑀭𑀲𑁆𑀲𑀸𑀢𑀺 𑀇𑀫𑁂𑀲𑀁 𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁄 ‘‘𑀭𑀽𑀧𑀸𑀤𑀬𑁄 𑀢𑁂𑀲𑀁 𑀕𑀼𑀡𑀸’’𑀢𑀺 𑀧𑀞𑀫𑀯𑀸𑀤𑀻 𑀆𑀳𑀸𑀢𑀺. 𑀢𑀲𑁆𑀲𑁂𑀯 ‘‘𑀇𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀭𑀫𑀸𑀳. 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀤𑀼𑀢𑀺𑀬𑀯𑀸𑀤𑀺𑀦𑁄𑀧𑀺 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺. 𑀅𑀣 𑀯𑀸 𑀭𑀽𑀧𑀸𑀤𑀺𑀯𑀺𑀲𑁂𑀲𑀕𑀼𑀡𑁂𑀳𑀺 𑀢𑁂𑀚𑀆𑀓𑀸𑀲𑀧𑀣𑀯𑀻𑀆𑀧𑀯𑀸𑀬𑀽𑀳𑀺 𑀘𑀓𑁆𑀔𑀸𑀤𑀻𑀦𑀺 𑀓𑀢𑀸𑀦𑀻𑀢𑀺 𑀯𑀤𑀦𑁆𑀢𑀲𑁆𑀲 𑀓𑀡𑀸𑀤𑀲𑁆𑀲 𑀯𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ¶ 𑀢𑀁 𑀦𑀺𑀕𑁆𑀕𑀳𑁂𑀢𑀼𑀁 ‘‘𑀅𑀣𑀸𑀧𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑀯𑁂 𑀉𑀧𑀮𑀩𑁆𑀪𑀫𑀸𑀦𑁄𑀧𑀺 𑀕𑀦𑁆𑀥𑁄 𑀧𑀣𑀯𑀺𑀬𑀸 𑀆𑀧𑁄𑀲𑀁𑀬𑀼𑀢𑁆𑀢𑀸𑀬 𑀓𑀧𑁆𑀧𑀸𑀲𑀢𑁄 𑀯𑀺𑀲𑀤𑀺𑀲𑀸𑀬𑀸𑀢𑀺 𑀦 𑀓𑀧𑁆𑀧𑀸𑀲𑀕𑀦𑁆𑀥𑀲𑁆𑀲 𑀅𑀥𑀺𑀓𑀪𑀸𑀯𑀸𑀧𑀢𑁆𑀢𑀻𑀢𑀺 𑀘𑁂? 𑀦, 𑀅𑀦𑀪𑀺𑀪𑀽𑀢𑀢𑁆𑀢𑀸. 𑀆𑀲𑀯𑁂 𑀳𑀺 𑀉𑀤𑀓𑀲𑀁𑀬𑀼𑀢𑁆𑀢𑀸 𑀧𑀣𑀯𑀻 𑀉𑀤𑀓𑁂𑀦 𑀅𑀪𑀺𑀪𑀽𑀢𑀸, 𑀦 𑀓𑀧𑁆𑀧𑀸𑀲𑀧𑀣𑀯𑀻𑀢𑀺 𑀢𑀲𑁆𑀲 𑀏𑀯 𑀕𑀦𑁆𑀥𑁂𑀦 𑀅𑀥𑀺𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀉𑀡𑁆𑀳𑁄𑀤𑀓𑀲𑀁𑀬𑀼𑀢𑁆𑀢𑁄 𑀘 𑀅𑀕𑁆𑀕𑀺 𑀉𑀧𑀮𑀩𑁆𑀪𑀦𑀻𑀬𑁄 𑀫𑀳𑀦𑁆𑀢𑁄𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀨𑀲𑁆𑀲𑁄 𑀯𑀺𑀬 𑀯𑀡𑁆𑀡𑁄𑀧𑀺 𑀧𑀪𑀲𑁆𑀲𑀭𑁄 𑀉𑀧𑀮𑀩𑁆𑀪𑁂𑀬𑁆𑀬𑀸𑀢𑀺 𑀉𑀡𑁆𑀳𑁄𑀤𑀓𑁂 𑀯𑀡𑁆𑀡𑀢𑁄 𑀅𑀕𑁆𑀕𑀺𑀦𑀸 𑀅𑀦𑀪𑀺𑀲𑀫𑁆𑀩𑀦𑁆𑀥𑀲𑁆𑀲 𑀲𑀻𑀢𑁄𑀤𑀓𑀲𑁆𑀲 𑀯𑀡𑁆𑀡𑁄 𑀧𑀭𑀺𑀳𑀸𑀬𑁂𑀣. 𑀢𑀲𑁆𑀫𑀸𑀢𑀺 𑀏𑀢𑀲𑁆𑀲 𑀉𑀪𑀬𑀲𑁆𑀲 𑀅𑀪𑀸𑀯𑀸. 𑀢𑀤𑀪𑀸𑀯𑁂𑀦 𑀳𑀺 𑀭𑀽𑀧𑀸𑀤𑀻𑀦𑀁 𑀢𑁂𑀚𑀸𑀤𑀺𑀯𑀺𑀲𑁂𑀲𑀕𑀼𑀡𑀢𑀸 𑀦𑀺𑀯𑀢𑁆𑀢𑀺𑀢𑀸. 𑀢𑀦𑁆𑀦𑀺𑀯𑀢𑁆𑀢𑀦𑁂𑀦 ‘‘𑀢𑁂𑀚𑀸𑀤𑀻𑀦𑀁 𑀕𑀼𑀡𑁂𑀳𑀺 𑀭𑀽𑀧𑀸𑀤𑀻𑀳𑀺 𑀅𑀦𑀼𑀕𑁆𑀕𑀬𑁆𑀳𑀪𑀸𑀯𑀢𑁄’’𑀢𑀺 𑀇𑀤𑀁 𑀓𑀸𑀭𑀡𑀁 𑀦𑀺𑀯𑀢𑁆𑀢𑀺𑀢𑀦𑁆𑀢𑀺 𑀏𑀯𑀁 ¶ 𑀧𑀭𑀫𑁆𑀧𑀭𑀸𑀬 𑀉𑀪𑀬𑀸𑀪𑀸𑀯𑁄 𑀯𑀺𑀲𑁂𑀲𑀧𑀭𑀺𑀓𑀧𑁆𑀧𑀦𑀧𑀳𑀸𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸 𑀧𑀳𑀸𑀬𑁂𑀢’’𑀦𑁆𑀢𑀺𑀆𑀤𑀺. 𑀏𑀓𑀓𑀮𑀸𑀧𑁂𑀧𑀺 𑀭𑀽𑀧𑀭𑀲𑀸𑀤𑀬𑁄 𑀯𑀺𑀲𑀤𑀺𑀲𑀸, 𑀓𑁄 𑀧𑀦 𑀯𑀸𑀤𑁄 𑀦𑀸𑀦𑀸𑀓𑀮𑀸𑀧𑁂 𑀘𑀓𑁆𑀔𑀸𑀤𑀬𑁄 𑀪𑀽𑀢𑀯𑀺𑀲𑁂𑀲𑀸𑀪𑀸𑀯𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 𑀭𑀽𑀧𑀭𑀲𑀸𑀤𑀺𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁.

𑀬𑀤𑀺 𑀪𑀽𑀢𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀓𑀺𑀁 𑀧𑀦 𑀘𑀓𑁆𑀔𑀸𑀤𑀺𑀯𑀺𑀲𑁂𑀲𑀲𑁆𑀲 𑀓𑀸𑀭𑀡𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀧𑀜𑁆𑀘𑀸𑀬𑀢𑀦𑀺𑀓𑀢𑁆𑀢𑀪𑀸𑀯𑀪𑀯𑀧𑁆𑀧𑀢𑁆𑀣𑀦𑀸𑀦𑀺𑀧𑁆𑀨𑀦𑁆𑀦𑀁 𑀘𑀓𑁆𑀔𑀸𑀤𑀺𑀯𑀺𑀲𑁂𑀲𑀳𑁂𑀢𑀼𑀢𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀸𑀥𑀸𑀭𑀡𑀦𑁆𑀢𑀺 𑀘 𑀓𑀫𑁆𑀫𑀯𑀺𑀲𑁂𑀲𑁄𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑀁 𑀬𑁂𑀦 𑀯𑀺𑀲𑁂𑀲𑁂𑀦 𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀬𑁄, 𑀢𑁂𑀦𑁂𑀯 𑀲𑁄𑀢𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑀸𑀪𑀸𑀯𑀧𑁆𑀧𑀢𑁆𑀢𑀺𑀢𑁄. ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀕𑁆𑀕𑀢𑀸 𑀘𑁂𑀢𑀦𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁭𑁮) 𑀯𑀘𑀦𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀏𑀓𑀸 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦𑀸𑀦𑀸𑀘𑁂𑀢𑀦𑀸𑀬 𑀳𑀺 𑀢𑀤𑀸 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀁 𑀲𑀢𑀺 𑀧𑀭𑀺𑀢𑁆𑀢𑁂𑀦 𑀘 𑀫𑀳𑀕𑁆𑀕𑀢𑁂𑀦 𑀘 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀝𑀢𑁆𑀢𑀸𑀭𑀽𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀦 𑀘𑁂𑀓𑀸 𑀧𑀝𑀺𑀲𑀦𑁆𑀥𑀺 𑀅𑀦𑁂𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀳𑁄𑀢𑀻𑀢𑀺 𑀲𑀺𑀤𑁆𑀥𑀫𑁂𑀓𑁂𑀦 𑀓𑀫𑁆𑀫𑁂𑀦 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺.

𑁪𑁩𑁫. 𑀅𑀦𑀮𑁆𑀮𑀻𑀦𑁄 𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀮𑁆𑀮𑀻𑀦𑀦𑀺𑀲𑁆𑀲𑀬𑁄, 𑀭𑀽𑀧𑀲𑀤𑁆𑀤𑀲𑀗𑁆𑀔𑀸𑀢𑁄 𑀯𑀺𑀲𑀬𑁄. 𑀕𑀦𑁆𑀥𑀭𑀲𑀸𑀦𑀁 𑀦𑀺𑀲𑁆𑀲𑀬𑀸 𑀖𑀸𑀦𑀚𑀺𑀯𑁆𑀳𑀸𑀦𑀁 𑀦𑀺𑀲𑁆𑀲𑀬𑁂 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 ¶ 𑀢𑁂 𑀦𑀺𑀲𑁆𑀲𑀬𑀯𑀲𑁂𑀦 𑀅𑀮𑁆𑀮𑀻𑀦𑀸. 𑀨𑁄𑀝𑁆𑀞𑀩𑁆𑀩𑀁 𑀲𑀬𑀁 𑀓𑀸𑀬𑀦𑀺𑀲𑁆𑀲𑀬𑀅𑀮𑁆𑀮𑀻𑀦𑀁 𑀪𑀽𑀢𑀢𑁆𑀢𑀸. 𑀅𑀧𑀭𑁄 𑀦𑀬𑁄 𑁋 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀧𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀓𑀸𑀦𑀺 𑀲𑀸𑀦𑁆𑀢𑀭𑁂, 𑀅𑀥𑀺𑀓𑁂 𑀘 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀲𑁄𑀢𑀫𑁆𑀧𑀺 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀸𑀳𑀻𑀢𑀺 𑀓𑁂𑀘𑀺. 𑀬𑀤𑀺 𑀲𑁄𑀢𑀁 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀺, 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀲𑀺𑀬𑀸. 𑀦 𑀳𑀺 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀧𑀸𑀴𑀺𑀬𑀜𑁆𑀘 𑀅𑀯𑀺𑀲𑁂𑀲𑁂𑀦 𑀲𑀤𑁆𑀤𑀸𑀭𑀫𑁆𑀫𑀡𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑁄 𑀯𑀼𑀢𑁆𑀢𑁄. 𑀓𑀺𑀜𑁆𑀘 𑀤𑀺𑀲𑀸𑀤𑁂𑀲𑀯𑀯𑀢𑁆𑀣𑀸𑀦𑀜𑁆𑀘 𑀲𑀤𑁆𑀤𑀲𑁆𑀲 𑀦 𑀲𑀺𑀬𑀸, 𑀅𑀢𑁆𑀢𑀦𑁄 𑀯𑀺𑀲𑀬𑀺𑀧𑀤𑁂𑀲𑀲𑁆𑀲 𑀏𑀯 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑁄 𑀯𑀺𑀬. 𑀢𑀲𑁆𑀫𑀸 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄 𑀲𑀤𑁆𑀤𑁄, 𑀢𑀢𑁆𑀣𑁂𑀯 𑀞𑀺𑀢𑁄. 𑀲𑀘𑁂 𑀲𑁄𑀢𑀧𑀣𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀦𑀦𑀼 𑀤𑀽𑀭𑁂 𑀞𑀺𑀢𑁂𑀳𑀺 𑀭𑀚𑀓𑀸𑀤𑀺𑀲𑀤𑁆𑀤𑀸 𑀘𑀺𑀭𑁂𑀦 𑀲𑀼𑀬𑁆𑀬𑀦𑁆𑀢𑀻𑀢𑀺? 𑀦 𑀤𑀽𑀭𑀸𑀲𑀦𑁆𑀦𑀸𑀦𑀁 𑀬𑀣𑀸𑀧𑀸𑀓𑀝𑁂 𑀲𑀤𑁆𑀤𑁂 𑀕𑀳𑀡𑀯𑀺𑀲𑁂𑀲𑀢𑁄. 𑀬𑀣𑀸 𑀳𑀺 𑀤𑀽𑀭𑀸𑀲𑀦𑁆𑀦𑀸𑀦𑀁 𑀯𑀘𑀦𑀲𑀤𑁆𑀤𑁂 𑀬𑀣𑀸𑀧𑀸𑀓𑀝𑁂 𑀕𑀳𑀡𑀯𑀺𑀲𑁂𑀲𑀢𑁄 𑀆𑀓𑀸𑀭𑀯𑀺𑀲𑁂𑀲𑀸𑀦𑀁 𑀅𑀕𑁆𑀕𑀳𑀡𑀁, 𑀕𑀳𑀡𑀜𑁆𑀘 𑀳𑁄𑀢𑀺, 𑀏𑀯𑀁 𑀭𑀚𑀓𑀸𑀤𑀺𑀲𑀤𑁆𑀤𑁂𑀧𑀺 𑀆𑀲𑀦𑁆𑀦𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀯𑀲𑀸𑀦𑀸 𑀓𑀫𑁂𑀦 𑀧𑀸𑀓𑀝𑀻𑀪𑀽𑀢𑁂, 𑀤𑀽𑀭𑀲𑁆𑀲 𑀘 𑀅𑀯𑀲𑀸𑀦𑁂, 𑀫𑀚𑁆𑀛𑁂 𑀯𑀸 𑀧𑀺𑀡𑁆𑀟𑀯𑀲𑁂𑀦 𑀧𑀯𑀢𑁆𑀢𑀺𑀧𑀸𑀓𑀝𑀻𑀪𑀽𑀢𑁂 𑀦𑀺𑀘𑁆𑀙𑀬𑀕𑁆𑀕𑀳𑀡𑀸𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀧𑀯𑀢𑁆𑀢𑀸𑀦𑀁 𑀯𑀺𑀲𑁂𑀲𑀢𑁄 𑀮𑀳𑀼𑀓𑀁 𑀲𑀼𑀢𑁄 ‘‘𑀘𑀺𑀭𑁂𑀦 𑀲𑀼𑀢𑁄’’𑀢𑀺 𑀅𑀥𑀺𑀫𑀸𑀦𑁄 𑀳𑁄𑀢𑀺. 𑀲𑁄 𑀧𑀦 𑀲𑀤𑁆𑀤𑁄 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀦𑁆𑀦𑀺𑀲𑁆𑀲𑀺𑀢𑁄𑀯 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀲𑁄𑀢𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺 ¶ . 𑀬𑀤𑀺 𑀲𑀤𑁆𑀤𑀲𑁆𑀲 𑀪𑀽𑀢𑀧𑀭𑀫𑁆𑀧𑀭𑀸𑀬 𑀲𑀫𑀦𑁆𑀢𑀢𑁄 𑀧𑀯𑀢𑁆𑀢𑀺 𑀦𑀢𑁆𑀣𑀺, 𑀓𑀣𑀁 𑀧𑀝𑀺𑀖𑁄𑀲𑀼𑀧𑁆𑀧𑀢𑁆𑀢𑀻𑀢𑀺? 𑀤𑀽𑀭𑁂 𑀞𑀺𑀢𑁄𑀧𑀺 𑀲𑀤𑁆𑀤𑁄 𑀅𑀜𑁆𑀜𑀢𑁆𑀣 𑀧𑀝𑀺𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀸, 𑀪𑀸𑀚𑀦𑀸𑀤𑀺𑀘𑀮𑀦𑀲𑁆𑀲 𑀘 𑀅𑀬𑁄𑀓𑀦𑁆𑀢𑁄 𑀯𑀺𑀬 𑀅𑀬𑁄𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁩𑁬. 𑀧𑀼𑀩𑁆𑀩𑁂 𑀮𑀓𑁆𑀔𑀡𑀸𑀤𑀺𑀦𑀸 𑀯𑀺𑀪𑀸𑀯𑀺𑀢𑀫𑁆𑀧𑀺 𑀘𑀓𑁆𑀔𑀼𑀁 𑀞𑀺𑀢𑀝𑁆𑀞𑀸𑀦𑀸𑀤𑀺𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀘𑀓𑁆𑀔𑀼 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘𑀓𑁆𑀔𑀼 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘-𑀓𑀸𑀭𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦𑀲𑁆𑀲 𑀯𑀼𑀘𑁆𑀘𑀫𑀸𑀦𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀭𑀽𑀧𑁂𑀲𑀼. ‘‘𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑁂’’𑀢𑀺 𑀏𑀢𑁂𑀦 𑀅𑀯𑀲𑁂𑀲𑀁 𑀓𑀡𑁆𑀳𑀫𑀡𑁆𑀟𑀮𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁆𑀦𑁂𑀳𑀫𑀺𑀯 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀸𑀳𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀢𑀦𑁆𑀦𑀺𑀲𑁆𑀲𑀺𑀢𑁂𑀳𑁂𑀯 𑀆𑀬𑀼𑀯𑀡𑁆𑀡𑀸𑀤𑀻𑀳𑀺 𑀅𑀦𑀼𑀧𑀸𑀮𑀺𑀢𑀁 𑀧𑀭𑀺𑀯𑀸𑀭𑀺𑀢𑀁 𑀢𑀺𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑁂𑀳𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 ¶ 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀲𑀢𑁆𑀢𑀅𑀓𑁆𑀔𑀺𑀧𑀝𑀮𑀩𑁆𑀬𑀸𑀧𑀦𑀯𑀘𑀦𑁂𑀦𑁂𑀯 𑀘𑀓𑁆𑀔𑀼𑀲𑁆𑀲 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀫𑀸𑀡𑀢𑁄 𑀊𑀓𑀸𑀲𑀺𑀭𑀫𑀢𑁆𑀢𑀦𑁆𑀢𑀺 𑀊𑀓𑀸𑀲𑀺𑀭𑀫𑀢𑁆𑀢𑁂 𑀧𑀤𑁂𑀲𑁂 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼𑀪𑀸𑀯𑀁 𑀦𑀺𑀲𑁆𑀲𑀬𑀪𑀸𑀯𑀢𑁄 𑀆𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑀸𑀦𑀁 𑀤𑁆𑀯𑀸𑀭𑀪𑀸𑀯𑀁 𑀲𑀫𑀯𑀲𑀭𑀝𑁆𑀞𑀸𑀦𑀢𑁄. 𑀢𑀁 𑀧𑀦𑁂𑀢𑀁 𑀘𑀓𑁆𑀔𑀼 𑀅𑀥𑀺𑀝𑁆𑀞𑀸𑀦𑀪𑁂𑀤𑀢𑁄, 𑀢𑀢𑁆𑀣𑀸𑀧𑀺 𑀧𑀘𑁆𑀘𑁂𑀓𑀁 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀢𑁄 𑀅𑀦𑁂𑀓𑀫𑁆𑀧𑀺 𑀲𑀫𑀸𑀦𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀆𑀯𑀚𑁆𑀚𑀦𑀸𑀬 𑀏𑀓𑀢𑁆𑀢𑀸, 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀲𑁆𑀲𑁂𑀯 𑀘 𑀓𑀺𑀘𑁆𑀘𑀓𑀭𑀢𑁆𑀢𑀸 𑀏𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀩𑀳𑀽𑀲𑀼 𑀓𑀣𑀫𑁂𑀓𑀲𑁆𑀲𑁂𑀯 𑀓𑀺𑀘𑁆𑀘𑀓𑀭𑀢𑁆𑀢𑀁. 𑀬𑀁 𑀢𑀢𑁆𑀣 𑀯𑀺𑀲𑀤𑀁 𑀳𑀼𑀢𑁆𑀯𑀸 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀁, 𑀢𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀨𑁄𑀝𑁆𑀞𑀩𑁆𑀩𑀯𑀺𑀲𑁂𑀲𑁄 𑀯𑀺𑀬 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂.

𑀫𑀦𑀼𑀧𑀲𑁆𑀲𑀢𑀻𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀣 𑀯𑀸 𑀫𑀦𑀽𑀢𑀺 𑀫𑀘𑁆𑀘𑁄.

𑀅𑀗𑁆𑀕𑀼𑀮𑀺𑀯𑁂𑀥𑀓𑀁 𑀅𑀗𑁆𑀕𑀼𑀮𑀻𑀬𑀓𑀁.

𑀯𑀺𑀲𑀫𑀚𑁆𑀛𑀸𑀲𑀬𑀢𑀸𑀬 𑀘𑀓𑁆𑀔𑀼 𑀯𑀫𑁆𑀫𑀺𑀓𑀙𑀺𑀤𑁆𑀤𑀸𑀪𑀺𑀭𑀢𑀲𑀧𑁆𑀧𑁄 𑀯𑀺𑀬, 𑀩𑀺𑀮𑀚𑁆𑀛𑀸𑀲𑀬𑀢𑀸𑀬 𑀲𑁄𑀢𑀁 𑀉𑀤𑀓𑀩𑀺𑀮𑀸𑀪𑀺𑀭𑀢𑀓𑀼𑀫𑁆𑀪𑀻𑀮𑁄 𑀯𑀺𑀬, 𑀆𑀓𑀸𑀲𑀚𑁆𑀛𑀸𑀲𑀬𑀢𑀸𑀬 𑀖𑀸𑀦𑀁 𑀅𑀚𑀝𑀸𑀓𑀸𑀲𑀸𑀪𑀺𑀭𑀢𑀧𑀓𑁆𑀔𑀻 𑀯𑀺𑀬, 𑀕𑀸𑀫𑀚𑁆𑀛𑀸𑀲𑀬𑀢𑀸𑀬 𑀚𑀺𑀯𑁆𑀳𑀸 𑀕𑀸𑀫𑀸𑀪𑀺𑀭𑀢𑀓𑀼𑀓𑁆𑀓𑀼𑀭𑁄 𑀯𑀺𑀬, 𑀉𑀧𑀸𑀤𑀺𑀦𑁆𑀦𑀓𑀚𑁆𑀛𑀸𑀲𑀬𑀢𑀸𑀬 𑀓𑀸𑀬𑁄 𑀆𑀫𑀓𑀲𑀼𑀲𑀸𑀦𑀸𑀪𑀺𑀭𑀢𑀲𑀺𑀗𑁆𑀕𑀸𑀮𑁄 𑀯𑀺𑀬 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀫𑁆𑀫𑀺…𑀧𑁂… 𑀤𑀝𑁆𑀞𑀩𑁆𑀩𑀸’’𑀢𑀺 𑀆𑀳. 𑀯𑀺𑀲𑀫𑀚𑁆𑀛𑀸𑀲𑀬𑀢𑀸 𑀘 𑀘𑀓𑁆𑀔𑀼𑀲𑁆𑀲 𑀯𑀺𑀲𑀫𑀚𑁆𑀛𑀸𑀲𑀬𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀘𑀓𑁆𑀔𑀼𑀫𑀢𑁄 𑀯𑀸 𑀧𑀼𑀕𑁆𑀕𑀮𑀲𑁆𑀲 ¶ 𑀅𑀚𑁆𑀛𑀸𑀲𑀬𑀯𑀲𑁂𑀦 𑀘𑀓𑁆𑀔𑀼 𑀯𑀺𑀲𑀫𑀚𑁆𑀛𑀸𑀲𑀬𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀩𑁆𑀩𑁄𑀧𑀺 𑀘 𑀬𑀣𑀸𑀯𑀼𑀢𑁆𑀢𑁄 𑀧𑀧𑀜𑁆𑀘𑁄 𑀲𑁄𑀢𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑁄.

𑁪𑁩𑁭. 𑀘𑀓𑁆𑀔𑀼𑀫𑁆𑀳𑀺, 𑀘𑀓𑁆𑀔𑀼𑀲𑁆𑀲 𑀯𑀸 𑀧𑀝𑀺𑀳𑀦𑀦𑀁 𑀘𑀓𑁆𑀔𑀼𑀧𑀝𑀺𑀳𑀦𑀦𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁. 𑀧𑀝𑀺𑀳𑀦𑀦𑀜𑁆𑀘𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑁄 𑀅𑀪𑀺𑀖𑀸𑀢𑁄𑀯. 𑀯𑀺𑀲𑀬𑀪𑀸𑀯𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸. 𑀓𑀸𑀫𑀁 𑀲𑀸 𑀏𑀯 𑀕𑁄𑀘𑀭𑀢𑀸, 𑀢𑀣𑀸𑀧𑀺 𑀯𑀺𑀲𑀬𑀕𑁄𑀘𑀭𑀸𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀅𑀦𑀜𑁆𑀜𑀢𑁆𑀣𑀪𑀸𑀯𑁄, 𑀢𑀩𑁆𑀩𑀳𑀼𑀮𑀘𑀸𑀭𑀺𑀢𑀸 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲. 𑀯𑀺𑀲𑀬𑀪𑀸𑀯𑁂 𑀘𑀲𑁆𑀲 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑀢𑁆𑀣 𑀧𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀆𑀤𑀺𑀓𑁂.

𑁪𑁩𑁮. 𑀇𑀢𑁆𑀣𑀺𑀬𑀸 ¶ 𑀪𑀸𑀯𑁄, ‘‘𑀇𑀢𑁆𑀣𑀻’’𑀢𑀺 𑀯𑀸 𑀪𑀯𑀢𑀺 𑀏𑀢𑁂𑀦 𑀘𑀺𑀢𑁆𑀢𑀁, 𑀅𑀪𑀺𑀥𑀸𑀦𑀜𑁆𑀘𑀸𑀢𑀺 𑀇𑀢𑁆𑀣𑀺𑀪𑀸𑀯𑁄, 𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑀁. 𑀢𑀢𑁄 𑀏𑀯 ‘‘𑀇𑀢𑁆𑀣𑀻’’𑀢𑀺 𑀢𑀁𑀲𑀳𑀺𑀢𑀁 𑀲𑀦𑁆𑀢𑀸𑀦𑀁 𑀧𑀓𑀸𑀲𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀻𑀢𑀺 𑀧𑀓𑀸𑀲𑀦𑀭𑀲’’𑀦𑁆𑀢𑀺. 𑀯𑀝𑁆𑀝𑀁𑀲𑀢𑀸 𑀅𑀯𑀺𑀲𑀤𑀳𑀢𑁆𑀣𑀧𑀸𑀤𑀸𑀤𑀺𑀢𑀸 𑀘 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀣𑀦𑀫𑀁𑀲𑀸𑀯𑀺𑀲𑀤𑀢𑀸, 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀢𑀸, 𑀓𑁂𑀲𑀩𑀦𑁆𑀥𑀦𑀁, 𑀯𑀢𑁆𑀣𑀕𑁆𑀕𑀳𑀡𑀜𑁆𑀘 ‘‘𑀇𑀢𑁆𑀣𑀻’’𑀢𑀺 𑀲𑀜𑁆𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁. 𑀤𑀳𑀭𑀓𑀸𑀮𑁂𑀧𑀺 𑀲𑀼𑀧𑁆𑀧𑀓𑀫𑀼𑀲𑀮𑀓𑀸𑀤𑀻𑀳𑀺 𑀓𑀻𑀴𑀸, 𑀫𑀢𑁆𑀢𑀺𑀓𑀢𑀓𑁆𑀓𑁂𑀦 𑀲𑀼𑀢𑁆𑀢𑀓𑀦𑁆𑀢𑀦𑀸𑀤𑀺 𑀘 𑀇𑀢𑁆𑀣𑀺𑀓𑀼𑀢𑁆𑀢𑀁, 𑀇𑀢𑁆𑀣𑀺𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀲𑀤𑀝𑁆𑀞𑀸𑀦𑀕𑀫𑀦𑀸𑀤𑀺𑀓𑁄 𑀆𑀓𑀸𑀭𑁄 𑀇𑀢𑁆𑀣𑀸𑀓𑀧𑁆𑀧𑁄. 𑀅𑀧𑀭𑁄 𑀦𑀬𑁄 𑁋 𑀇𑀢𑁆𑀣𑀻𑀦𑀁 𑀫𑀼𑀢𑁆𑀢𑀓𑀭𑀡𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀲𑀭𑀸𑀥𑀺𑀧𑁆𑀧𑀸𑀬𑀸 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁. 𑀅𑀯𑀺𑀲𑀤𑀝𑁆𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀔𑀸𑀤𑀦𑀪𑁄𑀚𑀦𑀸𑀤𑀺𑀓𑀸 𑀇𑀢𑁆𑀣𑀺𑀓𑀼𑀢𑁆𑀢𑀁. 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀇𑀢𑁆𑀣𑀸𑀓𑀧𑁆𑀧𑁄. 𑀇𑀫𑀸𑀦𑀺 𑀘 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀬𑀣𑀸𑀲𑀓𑀁 𑀓𑀫𑁆𑀫𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺𑀧𑀺 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀏𑀯 𑀲𑀦𑁆𑀢𑀸𑀦𑁂 𑀢𑀁𑀢𑀤𑀸𑀓𑀸𑀭𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀏𑀯 𑀘 𑀓𑀸𑀭𑀡𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀥𑀺𑀧𑀢𑀺𑀪𑀸𑀯𑁂𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀢𑀸 𑀯𑀼𑀢𑁆𑀢𑀸, 𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀲𑀦𑁆𑀢𑀸𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀭𑀽𑀧𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀣𑀸 𑀅𑀦𑀼𑀧𑁆𑀧𑀸𑀤𑀦𑀢𑁄, 𑀇𑀢𑁆𑀣𑀺𑀕𑁆𑀕𑀳𑀡𑀲𑁆𑀲 𑀘 𑀢𑁂𑀲𑀁 𑀭𑀽𑀧𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄.

𑀬𑀲𑁆𑀫𑀸 𑀧𑀦 𑀪𑀸𑀯𑀤𑀲𑀓𑁂𑀧𑀺 𑀭𑀽𑀧𑀸𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀚𑀦𑀓𑀁, 𑀦𑀸𑀧𑀺 𑀅𑀦𑀼𑀧𑀸𑀮𑀓𑀁, 𑀉𑀧𑀢𑁆𑀣𑀫𑁆𑀪𑀓𑀁 𑀯𑀸, 𑀦 𑀘 𑀅𑀜𑁆𑀜𑁂𑀲𑀁 𑀓𑀮𑀸𑀧𑀭𑀽𑀧𑀸𑀦𑀁, 𑀢𑀲𑁆𑀫𑀸 𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀲𑀓𑀮𑀸𑀧𑀭𑀽𑀧𑀸𑀦𑀁, 𑀆𑀳𑀸𑀭𑁄 𑀯𑀺𑀬 𑀯𑀸 𑀓𑀮𑀸𑀧𑀦𑁆𑀢𑀭𑀭𑀽𑀧𑀸𑀦𑀜𑁆𑀘 ‘‘𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁄’’𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀧𑀘𑁆𑀘𑀬𑀦𑁆𑀢𑀭𑀸𑀥𑀻𑀦𑀸𑀦𑀺 𑀮𑀺𑀗𑁆𑀕𑀸𑀤𑀻𑀦𑀺, 𑀢𑀲𑁆𑀫𑀸 𑀬𑀢𑁆𑀣𑀲𑁆𑀲 𑀆𑀥𑀺𑀧𑀘𑁆𑀘𑀁, 𑀢𑀁𑀲𑀤𑀺𑀲𑁂𑀲𑀼 𑀫𑀢𑀘𑀺𑀢𑁆𑀢𑀓𑀢𑀭𑀽𑀧𑁂𑀲𑀼𑀧𑀺 𑀢𑀁𑀲𑀡𑁆𑀞𑀸𑀦𑀢𑀸 𑀤𑀺𑀲𑁆𑀲𑀢𑀺. 𑀏𑀲 𑀦𑀬𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀧𑀺. 𑀬𑀁 𑀧𑀦𑁂𑀢𑁆𑀣 𑀯𑀺𑀲𑀤𑀺𑀲𑀁, 𑀢𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁 ¶ . 𑀢𑀬𑀺𑀤𑀁 𑀤𑁆𑀯𑀬𑀁 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀳 𑀦 𑀧𑀯𑀢𑁆𑀢𑀢𑀺 ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’’𑀢𑀺𑀆𑀤𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀯𑀘𑀦𑀢𑁄, 𑀢𑀲𑁆𑀫𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀧𑀦 ‘‘𑀲𑀭𑀻𑀭𑁂𑀓𑀤𑁂𑀲𑀯𑀼𑀢𑁆𑀢𑀺 𑀪𑀸𑀯𑀭𑀽𑀧’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀫𑀺𑀘𑁆𑀙𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀼𑀪𑀬𑀫𑁆𑀧𑀺…𑀧𑁂… 𑀩𑁆𑀬𑀸𑀧𑀓𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀬𑀤𑀺 𑀏𑀯𑀁 𑀓𑀸𑀬𑀧𑁆𑀧𑀲𑀸𑀤𑁂𑀦 𑀲𑀗𑁆𑀓𑀭𑁄 𑀲𑀺𑀬𑀸𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀦 𑀘 𑀓𑀸𑀬𑀧𑁆𑀧𑀲𑀸𑀤𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺𑀧𑀺 ¶ 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀺𑀢𑀸𑀬 𑀓𑀸𑀬𑀧𑁆𑀧𑀲𑀸𑀤𑁂𑀦 𑀅𑀝𑁆𑀞𑀺𑀢𑁄𑀓𑀸𑀲𑁂 𑀞𑀺𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀦𑀸𑀧𑀚𑁆𑀚𑀢𑀺, 𑀢𑁂𑀦 𑀧𑀦 𑀪𑀺𑀦𑁆𑀦𑀦𑀺𑀲𑁆𑀲𑀬𑀢𑁆𑀢𑀸 𑀞𑀺𑀢𑁄𑀓𑀸𑀲𑁂 𑀞𑀺𑀢𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀦𑀸𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀯 𑀘𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸. ‘‘𑀭𑀽𑀧𑀭𑀲𑀸𑀤𑀬𑁄 𑀯𑀺𑀬𑀸’’𑀢𑀺 𑀏𑀢𑁂𑀦 𑀲𑀫𑀸𑀦𑀦𑀺𑀲𑁆𑀲𑀬𑁂𑀲𑀼𑀧𑀺 𑀦𑀸𑀫 𑀲𑀗𑁆𑀓𑀭𑁄 𑀦𑀢𑁆𑀣𑀺 𑀮𑀓𑁆𑀔𑀡𑀪𑁂𑀤𑀢𑁄, 𑀓𑀺𑀫𑀗𑁆𑀕𑀁 𑀧𑀦 𑀪𑀺𑀦𑁆𑀦𑀦𑀺𑀲𑁆𑀲𑀬𑀲𑀪𑀸𑀯𑁂𑀲𑀽𑀢𑀺 𑀤𑀲𑁆𑀲𑁂𑀢𑀺.

𑁪𑁩𑁯. 𑀲𑀳𑀚𑀭𑀽𑀧𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀭𑀽𑀧𑀸𑀦𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀏𑀓𑀦𑁆𑀢𑀓𑀫𑁆𑀫𑀚𑀢𑁆𑀢𑀸 𑀲𑀳𑀚-𑀕𑁆𑀕𑀳𑀡𑁂𑀦𑁂𑀯 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀫𑁆𑀧𑀺 𑀓𑀫𑁆𑀫𑀚𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀓𑀫𑁆𑀫𑀚-𑀕𑁆𑀕𑀳𑀡𑀁 𑀦 𑀓𑀢𑀁. 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀝𑁆𑀞𑀸𑀬𑀺𑀦𑁄𑀧𑀺 𑀓𑀫𑁆𑀫𑀚𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀢𑀁 𑀅𑀦𑀼𑀧𑀸𑀮𑀓𑀁, 𑀢𑀲𑁆𑀫𑀸 𑀲𑀳𑀚𑀭𑀽𑀧𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀁. 𑀦 𑀳𑀺 𑀓𑀫𑁆𑀫𑀚𑀸𑀦𑀁 𑀓𑀫𑁆𑀫𑀁𑀬𑁂𑀯 𑀞𑀺𑀢𑀺𑀳𑁂𑀢𑀼 𑀪𑀯𑀺𑀢𑀼𑀁 𑀅𑀭𑀳𑀢𑀺 𑀆𑀳𑀸𑀭𑀚𑀸𑀤𑀻𑀦𑀁 𑀆𑀳𑀸𑀭𑀸𑀤𑀺 𑀯𑀺𑀬. 𑀓𑀺𑀁 𑀓𑀸𑀭𑀡𑀸? 𑀢𑀗𑁆𑀔𑀡𑀸𑀪𑀸𑀯𑀢𑁄. 𑀢𑁂𑀲𑀦𑁆𑀢𑀺 𑀲𑀳𑀚𑀭𑀽𑀧𑀸𑀦𑀁. 𑀧𑀯𑀢𑁆𑀢𑀦𑀁 𑀬𑀸𑀧𑀦𑀁. 𑀞𑀧𑀦𑀁 𑀞𑀺𑀢𑀺𑀳𑁂𑀢𑀼𑀢𑀸. 𑀅𑀢𑁆𑀢𑀦𑀸 𑀅𑀦𑀼𑀧𑀸𑀮𑀦𑀯𑀲𑁂𑀦 𑀬𑀸𑀧𑁂𑀢𑀩𑁆𑀩𑀸𑀦𑀺 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀺 𑀪𑀽𑀢𑀸𑀦𑀺 𑀏𑀢𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀬𑀸𑀧𑀬𑀺𑀢𑀩𑁆𑀩𑀪𑀽𑀢𑀧𑀤𑀝𑁆𑀞𑀸𑀦𑀁. 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀯𑀢𑁆𑀢𑀦𑀭𑀲𑀸𑀤𑀺𑀫𑁂𑀯 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯. 𑀅𑀲𑀢𑀺 𑀅𑀦𑀼𑀧𑀸𑀮𑁂𑀢𑀩𑁆𑀩𑁂 𑀉𑀧𑁆𑀧𑀮𑀸𑀤𑀺𑀫𑁆𑀳𑀺 𑀓𑀺𑀁 𑀉𑀤𑀓𑀁 𑀅𑀦𑀼𑀧𑀸𑀮𑁂𑀬𑁆𑀬. 𑀬𑀤𑀺 𑀓𑀫𑁆𑀫𑀚𑀸𑀦𑀁 𑀞𑀺𑀢𑀺𑀳𑁂𑀢𑀼𑀫𑀦𑁆𑀢𑀭𑁂𑀦 𑀞𑀺𑀢𑀺 𑀦 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑁄 𑀞𑀺𑀢𑀺𑀳𑁂𑀢𑀽𑀢𑀺 𑀆𑀳 ‘‘𑀲𑀬’’𑀦𑁆𑀢𑀺𑀆𑀤𑀺. 𑀬𑀤𑀺 𑀓𑀫𑁆𑀫𑀚𑀸𑀦𑀁 𑀞𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁, 𑀅𑀣 𑀓𑀲𑁆𑀫𑀸 𑀲𑀩𑁆𑀩𑀓𑀸𑀮𑀁 𑀦 𑀞𑀧𑁂𑀢𑀻𑀢𑀺 𑀆𑀳 ‘‘𑀦 𑀪𑀗𑁆𑀕𑀢𑁄’’𑀢𑀺𑀆𑀤𑀺. 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀧𑀸𑀮𑀦𑀸𑀤𑀺𑀓𑀲𑁆𑀲 𑀲𑀸𑀥𑀦𑀢𑁄. 𑀢𑀁 𑀲𑀸𑀥𑀦𑀜𑁆𑀘 𑀚𑀻𑀯𑀫𑀸𑀦𑀢𑀸𑀯𑀺𑀲𑁂𑀲𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑁆𑀲 𑀳𑀺 𑀫𑀢𑀭𑀽𑀧𑀢𑁄 𑀓𑀫𑁆𑀫𑀚𑀲𑁆𑀲, 𑀢𑀤𑀦𑀼𑀩𑀦𑁆𑀥𑀪𑀽𑀢𑀲𑁆𑀲 𑀘 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀢𑁄 𑀯𑀺𑀲𑁂𑀲𑁄, 𑀦 𑀓𑁂𑀯𑀮𑀁 𑀔𑀡𑀝𑁆𑀞𑀺𑀢𑀺𑀬𑀸 𑀏𑀯, 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲𑀸𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀢𑀭𑀣𑀸 𑀆𑀬𑀼𑀓𑁆𑀔𑀬𑀢𑁄 𑀫𑀭𑀡𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺.

𑁪𑁪𑁦. 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀳𑀤𑀬𑀯𑀢𑁆𑀣𑀽𑀢𑀺 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺? 𑀆𑀕𑀫𑀢𑁄, 𑀬𑀼𑀢𑁆𑀢𑀺𑀢𑁄 𑀘. ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 ¶ 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 ¶ (𑀧𑀝𑁆𑀞𑀸. 𑁧.𑁧.𑁮) 𑀏𑀯𑀫𑀸𑀤𑀺 𑀆𑀕𑀫𑁄. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀭𑀽𑀧𑀓𑀡𑁆𑀟𑁂 𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀢𑀢𑁆𑀣 𑀅𑀯𑀘𑀦𑀁 𑀅𑀜𑁆𑀜𑀓𑀸𑀭𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀤𑁂𑀲𑀦𑀸𑀪𑁂𑀤𑁄. 𑀬𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀏𑀓𑀦𑁆𑀢𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀺, 𑀦 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁. 𑀦𑀺𑀲𑁆𑀲𑀺𑀢𑀯𑀲𑁂𑀦 𑀘 𑀯𑀢𑁆𑀣𑀼𑀤𑀼𑀓𑀸𑀤𑀺𑀤𑁂𑀲𑀦𑀸 𑀧𑀯𑀢𑁆𑀢𑀸 ‘‘𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼, 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮𑁪). 𑀬𑀫𑁆𑀧𑀺 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀓𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼𑀧𑀺 𑀦 𑀢𑀤𑀦𑀼𑀕𑀼𑀡𑀸 𑀆𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀭𑀽𑀧𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀤𑀼𑀓𑀸 𑀪𑀺𑀦𑁆𑀦𑀕𑀢𑀺𑀓𑀸 𑀲𑀺𑀬𑀼𑀦𑁆𑀢𑀺 𑀏𑀓𑀭𑀲𑀸 𑀤𑁂𑀲𑀦𑀸 𑀦 𑀪𑀯𑁂𑀬𑁆𑀬. 𑀏𑀓𑀭𑀲𑀜𑁆𑀘 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀇𑀥 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑁄. 𑀢𑀲𑁆𑀫𑀸 𑀢𑀢𑁆𑀣 𑀳𑀤𑀬𑀯𑀢𑁆𑀣𑀼 𑀦 𑀯𑀼𑀢𑁆𑀢𑀁, 𑀦 𑀅𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀼𑀢𑁆𑀢𑀺 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀦𑀺𑀧𑁆𑀨𑀦𑁆𑀦𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀬𑀁 𑀥𑀸𑀢𑀼𑀤𑁆𑀯𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀸𑀤𑀻𑀦𑀁, 𑀑𑀚𑀸𑀬 𑀘 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀢𑁄 𑀩𑀳𑀺𑀧𑀺 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄 𑀦 𑀢𑀁𑀦𑀺𑀲𑁆𑀲𑀬𑀢𑀸 𑀬𑀼𑀚𑁆𑀚𑀢𑀺, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀢𑀤𑀼𑀪𑀬𑀭𑀳𑀺𑀢𑁂𑀧𑀺 𑀲𑀦𑁆𑀢𑀸𑀦𑁂 𑀥𑀸𑀢𑀼𑀤𑁆𑀯𑀬𑀤𑀲𑁆𑀲𑀦𑀢𑁄 𑀦 𑀢𑀁𑀦𑀺𑀲𑁆𑀲𑀬𑀢𑀸 𑀬𑀼𑀚𑁆𑀚𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀧𑀺 𑀅𑀜𑁆𑀜𑀓𑀺𑀘𑁆𑀘𑀁 𑀯𑀺𑀚𑁆𑀚𑀢𑀻𑀢𑀺 𑀦 𑀢𑀁𑀦𑀺𑀲𑁆𑀲𑀬𑀢𑀸 𑀬𑀼𑀚𑁆𑀚𑀢𑀺 𑀏𑀯𑀸𑀢𑀺 𑀧𑀸𑀭𑀺𑀲𑁂𑀲𑀢𑁄 𑀳𑀤𑀬𑀯𑀢𑁆𑀣𑀼, 𑀢𑁂𑀲𑀁 𑀦𑀺𑀲𑁆𑀲𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀦𑀺𑀧𑁆𑀨𑀦𑁆𑀦𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀬𑀁 𑀥𑀸𑀢𑀼𑀤𑁆𑀯𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀪𑀸𑀯𑀢𑁄. 𑀬𑀁 𑀬𑀜𑁆𑀳𑀺 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺, 𑀢𑀁 𑀢𑀁 𑀦𑀺𑀧𑁆𑀨𑀦𑁆𑀦𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀬𑀁 𑀤𑀺𑀝𑁆𑀞𑀁 𑀬𑀣𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺. ‘‘𑀧𑀜𑁆𑀘𑀯𑁄𑀓𑀸𑀭𑀪𑀯𑁂’’𑀢𑀺 𑀘 𑀯𑀺𑀲𑁂𑀲𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀓𑀢𑀁. 𑀫𑀦𑁄𑀥𑀸𑀢𑀼 𑀧𑀦 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀢𑁆𑀣𑁂𑀯. 𑀦𑀦𑀼 𑀘 𑀇𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀬𑀢𑀸𑀬𑀧𑀺 𑀲𑀸𑀥𑀦𑀢𑁄 𑀯𑀺𑀭𑀼𑀤𑁆𑀥𑁄 𑀳𑁂𑀢𑀼 𑀆𑀧𑀚𑁆𑀚𑀢𑀻𑀢𑀺? 𑀦 𑀤𑀺𑀝𑁆𑀞𑀩𑀸𑀥𑀦𑀢𑁄. 𑀤𑀺𑀝𑁆𑀞𑀁 𑀳𑁂𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀬 𑀥𑀸𑀢𑀼𑀤𑁆𑀯𑀬𑀲𑁆𑀲 𑀯𑀢𑁆𑀣𑀼𑀦𑁄 𑀫𑀦𑁆𑀤𑀢𑀺𑀓𑁆𑀔𑀸𑀤𑀺𑀅𑀦𑀦𑀼𑀯𑀺𑀥𑀸𑀦𑀁. 𑀢𑀣𑀸 𑀳𑀺𑀲𑁆𑀲 𑀧𑀸𑀴𑀺𑀬𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸 𑀦 𑀯𑀼𑀢𑁆𑀢𑀸. 𑀢𑁂𑀦 𑀢𑀤𑀦𑀼𑀯𑀺𑀥𑀸𑀦𑀲𑀗𑁆𑀔𑀸𑀢𑀸 𑀇𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀬𑀢𑀸 𑀩𑀸𑀥𑀻𑀬𑀢𑀺. 𑀳𑁄𑀢𑀼 𑀥𑀸𑀢𑀼𑀤𑁆𑀯𑀬𑀦𑀺𑀲𑁆𑀲𑀬𑁄 𑀳𑀤𑀬𑀯𑀢𑁆𑀣𑀼, 𑀉𑀧𑀸𑀤𑀸𑀬𑀭𑀽𑀧𑀜𑁆𑀘, 𑀏𑀢𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁, 𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀁, 𑀳𑀤𑀬𑀧𑀤𑁂𑀲𑁂 𑀞𑀺𑀢𑀫𑁂𑀯𑀸𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑀢𑁆𑀣𑀼𑀭𑀽𑀧𑀪𑀸𑀯𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀘𑀓𑁆𑀔𑀼 𑀯𑀺𑀬, 𑀢𑀢𑁄 𑀏𑀯 ¶ 𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀁, 𑀯𑀢𑁆𑀣𑀼𑀭𑀽𑀧𑀪𑀸𑀯𑀢𑁄𑀢𑀺 𑀘 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀳𑀤𑀬𑀲𑁆𑀲 𑀔𑀺𑀚𑁆𑀚𑀦𑀢𑁄 𑀢𑀢𑁆𑀣𑁂𑀢𑀫𑀯𑀝𑁆𑀞𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀸𑀲𑀜𑁆𑀜𑁂𑀯 𑀥𑀸𑀢𑀽𑀦𑀦𑁆𑀢𑀺 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁𑀬𑁂𑀯 ¶ . 𑀦𑀺𑀲𑁆𑀲𑀬𑀪𑀸𑀯𑀢𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀳𑀦𑁆𑀢𑀁 𑀯𑀺𑀬 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀉𑀩𑁆𑀩𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁪𑁪𑁧. 𑀅𑀪𑀺𑀓𑁆𑀓𑀫𑁄 𑀆𑀤𑀺 𑀬𑁂𑀲𑀁 𑀢𑁂 𑀅𑀪𑀺𑀓𑁆𑀓𑀫𑀸𑀤𑀻. 𑀆𑀤𑀺-𑀲𑀤𑁆𑀤𑁂𑀦 𑀧𑀝𑀺𑀓𑁆𑀓𑀫𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀉𑀓𑁆𑀔𑁂𑀧𑀦𑀅𑀯𑁂𑀓𑁆𑀔𑁂𑀧𑀦𑀸𑀤𑀺𑀓𑀸 𑀲𑀩𑁆𑀩𑀸 𑀓𑀺𑀭𑀺𑀬𑀸 𑀧𑀭𑀺𑀕𑁆𑀕𑀬𑁆𑀳𑀢𑀺. 𑀢𑁂𑀲𑀁 𑀅𑀪𑀺𑀓𑁆𑀓𑀫𑀸𑀤𑀻𑀦𑀁 𑀧𑀯𑀢𑁆𑀢𑀓𑀁 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀬𑀲𑁆𑀲𑀸 𑀲𑀸 𑀅𑀪𑀺𑀓𑁆𑀓𑀫𑀸𑀤𑀺𑀧𑁆𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀯𑀸𑀬𑁄𑀥𑀸𑀢𑀼. 𑀢𑀲𑁆𑀲𑀸 𑀬𑀁 𑀲𑀳𑀚𑀭𑀽𑀧𑀓𑀸𑀬𑀲𑁆𑀲 𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀲𑀗𑁆𑀔𑀸𑀢𑀁 𑀓𑀺𑀘𑁆𑀘𑀁, 𑀢𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁄 𑀆𑀓𑀸𑀭𑀯𑀺𑀲𑁂𑀲𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀪𑀺𑀓𑁆𑀓𑀫𑀸𑀤𑀺…𑀧𑁂… 𑀓𑀸𑀬𑀯𑀺𑀜𑁆𑀜𑀢𑁆𑀢𑀻’’𑀢𑀺.

𑀓𑀲𑁆𑀲 𑀧𑀦 𑀆𑀓𑀸𑀭𑀯𑀺𑀓𑀸𑀭𑁄𑀢𑀺? 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀸𑀦𑀁 𑀘𑀺𑀢𑁆𑀢𑀚𑀫𑀳𑀸𑀪𑀽𑀢𑀸𑀦𑀁. 𑀓𑀺𑀁 𑀢𑀁 𑀲𑀸𑀫𑀢𑁆𑀣𑀺𑀬𑀁? 𑀘𑀺𑀢𑁆𑀢𑀚𑀢𑀸, 𑀉𑀧𑀸𑀤𑀸𑀬𑀭𑀽𑀧𑀢𑀸 𑀘. 𑀅𑀣 𑀯𑀸 𑀯𑀸𑀬𑁄𑀥𑀸𑀢𑀼𑀬𑀸 𑀆𑀓𑀸𑀭𑀯𑀺𑀓𑀸𑀭𑁄 𑀲𑀳𑀚…𑀧𑁂… 𑀧𑀘𑁆𑀘𑀬𑁄𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀭𑀽𑀧𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀉𑀧𑀸𑀤𑀸𑀬𑀭𑀽𑀧𑀁 𑀏𑀓𑀪𑀽𑀢𑀲𑀦𑁆𑀦𑀺𑀲𑁆𑀲𑀬𑀁 𑀅𑀢𑁆𑀣𑀺. ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀦𑀸𑀬𑀁 𑀤𑁄𑀲𑁄 𑀘𑀢𑀼𑀦𑁆𑀦𑀁 𑀯𑀺𑀓𑀸𑀭𑁄 𑀘𑀢𑀽𑀲𑀼 𑀏𑀓𑀲𑁆𑀲𑀸𑀧𑀺 𑀳𑁄𑀢𑀺 𑀘𑀢𑀼𑀲𑀸𑀥𑀸𑀭𑀡𑀥𑀦𑀁 𑀯𑀺𑀬. 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀢𑀸𑀬 𑀘 𑀓𑀮𑀸𑀧𑀲𑁆𑀲 ‘‘𑀯𑀸𑀬𑁄𑀥𑀸𑀢𑀼𑀬𑀸’’𑀢𑀺 𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀯𑀁 𑀅𑀥𑀺𑀓𑀢𑀸 𑀘 𑀲𑀸𑀫𑀢𑁆𑀣𑀺𑀬𑀢𑁄, 𑀦 𑀧𑀫𑀸𑀡𑀢𑁄. 𑀅𑀜𑁆𑀜𑀣𑀸 𑀳𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀸 𑀦 𑀬𑀼𑀚𑁆𑀚𑁂𑀬𑁆𑀬. 𑀯𑀸𑀬𑁄𑀥𑀸𑀢𑀼𑀬𑀸 𑀏𑀯𑀸𑀢𑀺 𑀓𑁂𑀘𑀺. 𑀢𑁂𑀲𑀁 𑀫𑀢𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀭𑀽𑀧𑀢𑀸 𑀤𑀼𑀭𑀼𑀧𑀧𑀸𑀤𑀸. 𑀦 𑀳𑀺 𑀏𑀓𑀲𑁆𑀲 𑀯𑀺𑀓𑀸𑀭𑁄 𑀘𑀢𑀼𑀦𑁆𑀦𑀁 𑀳𑁄𑀢𑀺. 𑀲𑀸 𑀧𑀦𑀸𑀬𑀁 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀫𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑁂𑀦 𑀫𑀦𑁄𑀤𑁆𑀯𑀸𑀭𑀚𑀯𑀦𑁂𑀦 𑀕𑀬𑁆𑀳𑀢𑀺. 𑀨𑀦𑁆𑀤𑀫𑀸𑀦𑀯𑀡𑁆𑀡𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺. 𑀢𑀲𑁆𑀲 𑀘 𑀢𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀕𑀳𑀡𑀁 𑀳𑁄𑀢𑀻𑀢𑀺 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀢𑁄. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’’𑀢𑀺 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 ¶ 𑀤𑀺𑀝𑁆𑀞𑀁, 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀧𑀦 𑀤𑀺𑀝𑁆𑀞𑀁. 𑀢𑀲𑁆𑀫𑀸 𑀨𑀦𑁆𑀤𑀫𑀸𑀦𑀯𑀡𑁆𑀡𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀜𑀸𑀧𑀓𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀜𑀸𑀧𑀓𑁄 𑀘 𑀳𑁂𑀢𑀼 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀲𑀬𑀁 𑀕𑀳𑀺𑀢𑁄 𑀏𑀯 𑀜𑀸𑀧𑁂𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀢𑀸𑀫𑀢𑁆𑀢𑁂𑀦𑀸𑀢𑀺 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁆𑀧𑀺 𑀅𑀦𑀼𑀫𑀸𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀯𑀺𑀲𑀬𑀢𑁆𑀢𑀫𑀦𑀸𑀧𑀦𑁆𑀦𑀸, 𑀲𑀤𑁆𑀤𑀸 𑀦𑁂𑀯𑀢𑁆𑀣𑀩𑁄𑀥𑀓𑀸;

𑀦 𑀲𑀢𑁆𑀢𑀸𑀫𑀢𑁆𑀢𑀢𑁄 𑀅𑀢𑁆𑀣𑁂, 𑀢𑁂 𑀅𑀜𑁆𑀜𑀸𑀢𑀸 𑀧𑀓𑀸𑀲𑀓𑀸’’𑀢𑀺.

𑀬𑀤𑀺 ¶ 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀓𑀸𑀭𑀡𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲, 𑀓𑀲𑁆𑀫𑀸 𑀅𑀕𑁆𑀕𑀳𑀺𑀢𑀲𑀗𑁆𑀓𑁂𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀦 𑀳𑁄𑀢𑀻𑀢𑀺? 𑀦 𑀓𑁂𑀯𑀮𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲 𑀓𑀸𑀭𑀡𑀁, 𑀅𑀣 𑀔𑁄 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀜𑁆𑀘 𑀇𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀲𑀩𑁆𑀩𑀸𑀯 𑀯𑀸𑀬𑁄𑀥𑀸𑀢𑀽 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀓𑀭𑁄𑀦𑁆𑀢𑀻𑀢𑀺? 𑀦𑀬𑀺𑀤𑀫𑁂𑀯𑀁. 𑀲𑀢𑁆𑀢𑀫𑀚𑀯𑀦𑀲𑀫𑁆𑀪𑀽𑀢𑀸 𑀳𑀺 𑀯𑀸𑀬𑁄𑀥𑀸𑀢𑀼 𑀧𑀼𑀭𑀺𑀫𑀚𑀯𑀦𑀲𑀫𑁆𑀪𑀽𑀢𑀸 𑀯𑀸𑀬𑁄𑀥𑀸𑀢𑀼𑀬𑁄 𑀉𑀧𑀣𑀫𑁆𑀪𑀓𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀮𑀬𑀢𑀺 𑀘𑀺𑀢𑁆𑀢𑀚𑀭𑀽𑀧𑀁, 𑀦 𑀇𑀢𑀭𑀸. 𑀇𑀢𑀭𑀸 𑀧𑀦 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀁 𑀓𑀭𑁄𑀦𑁆𑀢𑀺𑀬𑁄 𑀢𑀲𑁆𑀲𑀸 𑀉𑀧𑀓𑀸𑀭𑀸𑀬 𑀳𑁄𑀦𑁆𑀢𑀺. 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀏𑀯 𑀘𑀮𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑁂 𑀘 𑀓𑀢𑁆𑀢𑀼𑀪𑀸𑀯𑁄 𑀲𑀫𑀸𑀭𑁄𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀧𑀸𑀭𑀢𑀸, 𑀔𑀡𑀺𑀓𑀢𑀸 𑀘 𑀦 𑀲𑀺𑀬𑀸. 𑀲𑀢𑁆𑀢𑀳𑀺 𑀬𑀼𑀕𑁂𑀳𑀺 𑀆𑀓𑀟𑁆𑀠𑀺𑀢𑀩𑁆𑀩𑀲𑀓𑀝𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑀲𑁆𑀲𑀺𑀢𑀁. 𑀘𑀺𑀢𑁆𑀢𑀚𑀭𑀽𑀧𑁂 𑀧𑀦 𑀘𑀮𑀦𑁆𑀢𑁂 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀉𑀢𑀼𑀓𑀫𑁆𑀫𑀸𑀳𑀸𑀭𑀚𑀭𑀽𑀧𑀫𑁆𑀧𑀺 𑀘𑀮𑀢𑀺 𑀦𑀤𑀻𑀲𑁄𑀢𑁂 𑀧𑀓𑁆𑀔𑀺𑀢𑁆𑀢𑀲𑀼𑀓𑁆𑀔𑀕𑁄𑀫𑀬𑀧𑀺𑀡𑁆𑀟𑀁 𑀯𑀺𑀬 𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀁 𑀘𑀮𑀦𑀓𑀭𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀢𑀺? 𑀦𑀬𑀺𑀤𑀫𑁂𑀯𑀁, 𑀢𑀣𑀸 𑀘𑀮𑀬𑀺𑀢𑀼𑀫𑀲𑀓𑁆𑀓𑀼𑀡𑀦𑁆𑀢𑀺𑀬𑁄𑀧𑀺 𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀓𑀭𑀸 𑀧𑀞𑀫𑀚𑀯𑀦𑀸𑀤𑀺𑀲𑀫𑁆𑀪𑀽𑀢𑀸𑀧𑀺 𑀯𑀸𑀬𑁄𑀥𑀸𑀢𑀼𑀬𑁄 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦𑀸𑀬𑀁 𑀅𑀪𑀺𑀓𑁆𑀓𑀫𑀸𑀤𑀺𑀁 𑀧𑀯𑀢𑁆𑀢𑁂𑀢𑀼𑀓𑀸𑀫𑁄, 𑀢𑀤𑀪𑀺𑀫𑀼𑀔𑀯𑀺𑀓𑀸𑀭𑀲𑀩𑁆𑀪𑀸𑀯𑀢𑁄. 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻 𑀳𑀺 𑀯𑀺𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀯𑀘𑀦𑀁 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀕𑁆𑀕𑀳𑀡𑀫𑀼𑀔𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀅𑀥𑀺𑀧𑁆𑀧𑀸𑀬𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀭𑀲𑀸’’𑀢𑀺.

𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀲𑁆𑀲 ¶ 𑀳𑁂𑀢𑀼𑀪𑀽𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀓𑀸𑀭𑀪𑀸𑀯𑀢𑁄 𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀧𑀤𑀝𑁆𑀞𑀸𑀦𑀸𑀢𑀺 𑀘 𑀯𑀸𑀬𑁄𑀥𑀸𑀢𑀼𑀬𑀸 𑀓𑀺𑀘𑁆𑀘𑀸𑀥𑀺𑀓𑀢𑀸𑀬 𑀯𑀼𑀢𑁆𑀢𑀁. 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸𑀢𑀺 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀓𑀭𑀡𑀪𑀽𑀢𑁂𑀦 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀪𑀸𑀯𑀢𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀓𑀺𑀁 𑀯𑀺𑀜𑁆𑀜𑀸𑀧𑁂𑀢𑀺? 𑀅𑀥𑀺𑀧𑁆𑀧𑀸𑀬𑀁. 𑀓𑁂𑀦? 𑀓𑀸𑀬𑁂𑀦. 𑀓𑀻𑀤𑀺𑀲𑁂𑀦? 𑀯𑀺𑀧𑁆𑀨𑀦𑁆𑀤𑀫𑀸𑀦𑁂𑀦𑀸𑀢𑀺. 𑀤𑀼𑀢𑀺𑀬𑀦𑀬𑁂 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀢𑁆𑀣𑀸𑀯𑀩𑁄𑀥𑀦𑀲𑀫𑀢𑁆𑀣𑁄 𑀯𑀘𑀻𑀯𑀺𑀲𑁂𑀲𑁄 𑀯𑀘𑀻𑀪𑁂𑀤𑁄. 𑀢𑁂𑀦 𑀯𑀸𑀬𑀼𑀯𑀦𑀧𑁆𑀧𑀢𑀺𑀦𑀤𑀻𑀖𑁄𑀲𑀸𑀤𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀲 𑀧𑀯𑀢𑁆𑀢𑀓𑀁 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀬𑀲𑁆𑀲𑀸 𑀲𑀸 𑀯𑀘𑀻𑀪𑁂𑀤𑀧𑁆𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀧𑀣𑀯𑀻𑀥𑀸𑀢𑀼. 𑀢𑀲𑁆𑀲𑀸 𑀬𑀁 𑀉𑀧𑀸𑀤𑀺𑀦𑁆𑀦𑀲𑀗𑁆𑀔𑀸𑀢𑀲𑁆𑀲 ¶ 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀖𑀝𑁆𑀝𑀦𑀲𑀜𑁆𑀜𑀺𑀢𑀁 𑀓𑀺𑀘𑁆𑀘𑀁, 𑀢𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁄 𑀆𑀓𑀸𑀭𑀯𑀺𑀲𑁂𑀲𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀘𑀻𑀪𑁂…𑀧𑁂… 𑀯𑀘𑀻𑀯𑀺𑀜𑁆𑀜𑀢𑁆𑀢𑀻’’𑀢𑀺.

𑀇𑀤𑀸𑀦𑀺 ‘‘𑀓𑀲𑁆𑀲 𑀧𑀦 𑀆𑀓𑀸𑀭𑀯𑀺𑀓𑀸𑀭𑁄’’𑀢𑀺𑀆𑀤𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 ‘‘𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀲𑀼𑀬𑁆𑀬𑀫𑀸𑀦𑀲𑀤𑁆𑀤𑀲𑀯𑀦𑀸𑀦𑀦𑁆𑀢𑀭’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀥 𑀘 𑀣𑀫𑁆𑀪𑀦𑀸𑀤𑀻𑀦𑀁 𑀅𑀪𑀸𑀯𑀢𑁄 ‘‘𑀲𑀢𑁆𑀢𑀫𑀚𑀯𑀦𑀲𑀫𑁆𑀪𑀽𑀢𑀸’’𑀢𑀺𑀆𑀤𑀺𑀦𑀬𑁄 𑀦 𑀮𑀩𑁆𑀪𑀢𑀺. 𑀖𑀝𑁆𑀝𑀦𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀖𑀝𑁆𑀝𑀦𑀜𑁆𑀘 𑀧𑀞𑀫𑀚𑀯𑀦𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀖𑀝𑁆𑀝𑀦𑀁 𑀧𑀘𑁆𑀘𑀬𑀯𑀲𑁂𑀦 𑀪𑀽𑀢𑀓𑀮𑀸𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀢𑀭𑀼𑀧𑁆𑀧𑀸𑀤𑁄. 𑀘𑀮𑀦𑀁 𑀏𑀓𑀲𑁆𑀲𑀸𑀧𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀸𑀤𑀧𑀭𑀫𑁆𑀧𑀭𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀬𑀣𑀸 𑀘 𑀯𑀸𑀬𑁄𑀥𑀸𑀢𑀼𑀬𑀸 𑀘𑀮𑀦𑀁 𑀓𑀺𑀘𑁆𑀘𑀁, 𑀏𑀯𑀁 𑀧𑀣𑀯𑀻𑀥𑀸𑀢𑀼𑀬𑀸 𑀖𑀝𑁆𑀝𑀦𑀁. 𑀢𑁂𑀦𑁂𑀯𑀸𑀳 ‘‘𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀣𑀸 𑀳𑀻𑀢𑀺𑀆𑀤𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀦𑀁 𑀅𑀦𑀼𑀫𑀸𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀪𑀸𑀯𑀯𑀺𑀪𑀸𑀯𑀦𑀁. 𑀬𑀣𑀸 𑀳𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀩𑀤𑁆𑀥𑀕𑁄𑀲𑀻𑀲𑀸𑀤𑀺𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀕𑁄𑀲𑀻𑀲𑀸𑀤𑀻𑀦𑀁 𑀉𑀤𑀓𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑀲𑀜𑁆𑀜𑀸𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀤𑀓𑀕𑁆𑀕𑀳𑀡𑀁 𑀳𑁄𑀢𑀺, 𑀏𑀯𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀲𑀫𑀼𑀘𑁆𑀘𑀸𑀭𑀺𑀬𑀫𑀸𑀦𑀯𑀡𑁆𑀡𑀲𑀤𑁆𑀤𑁂 𑀕𑀳𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑀳𑀡𑀽𑀧𑀦𑀺𑀲𑁆𑀲𑀬𑀲𑀳𑀺𑀢𑀸𑀬 𑀲𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀕𑁆𑀕𑀳𑀡𑀁 𑀳𑁄𑀢𑀺.

𑁪𑁪𑁨. 𑀭𑀽𑀧𑀸𑀦𑀺 ¶ 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀲𑀬𑀁 𑀯𑀸 𑀢𑁂𑀳𑀺 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀭𑀽𑀧𑀸𑀦𑀁 𑀯𑀸 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀁 𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀢𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀸. 𑀅𑀬𑀁 𑀳𑀺 𑀆𑀓𑀸𑀲𑀥𑀸𑀢𑀼 𑀢𑀁 𑀢𑀁 𑀭𑀽𑀧𑀓𑀮𑀸𑀧𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀧𑀭𑀺𑀬𑀦𑁆𑀢𑀧𑁆𑀧𑀓𑀸𑀲𑀦𑀭𑀲𑀸’’𑀢𑀺. 𑀅𑀢𑁆𑀣𑀢𑁄 𑀧𑀦 𑀬𑀲𑁆𑀫𑀸 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀫𑀭𑀺𑀬𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑁂𑀯 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀳𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀲𑀫𑁆𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀲𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯. 𑀅𑀜𑁆𑀜𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀦 𑀲𑀺𑀬𑀸 𑀢𑁂𑀲𑀁 𑀪𑀽𑀢𑀸𑀦𑀁 𑀩𑁆𑀬𑀸𑀧𑀺𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀩𑁆𑀬𑀸𑀧𑀺𑀢𑀸 𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺 (𑀥. 𑀲. 𑁬𑁩𑁭, 𑁭𑁨𑁪). 𑀓𑀡𑁆𑀡𑀘𑁆𑀙𑀺𑀤𑁆𑀤𑀫𑀼𑀔𑀯𑀺𑀯𑀭𑀸𑀤𑀺𑀯𑀲𑁂𑀦 𑀘 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸. 𑀬𑁂𑀲𑀁 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑀢𑁆𑀣𑁂𑀯 𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑀪𑀸𑀯𑁂𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑀸’’𑀢𑀺. ‘‘𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀽’’𑀢𑀺𑀆𑀤𑀺𑀦𑀸 𑀆𑀓𑀸𑀲𑀥𑀸𑀢𑀼𑀬𑀸 𑀢𑀁𑀢𑀁𑀓𑀮𑀸𑀧𑀸𑀦𑀁 𑀓𑀮𑀸𑀧𑀦𑁆𑀢𑀭𑁂𑀳𑀺 𑀅𑀲𑀗𑁆𑀓𑀭𑀓𑀸𑀭𑀡𑀢𑀁 𑀤𑀲𑁆𑀲𑁂𑀢𑀺.

𑁪𑁪𑁩. 𑀅𑀤𑀦𑁆𑀥𑀢𑀸𑀢𑀺 ¶ 𑀅𑀕𑀭𑀼𑀢𑀸. 𑀯𑀺𑀦𑁄𑀤𑀦𑀁 𑀯𑀺𑀓𑁆𑀔𑀺𑀧𑀦𑀁, 𑀅𑀧𑀦𑀬𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣𑀤𑁆𑀥𑀢𑀸𑀢𑀺 𑀅𑀓𑀣𑀺𑀦𑀢𑀸. 𑀅𑀢𑁆𑀢𑀦𑁄 𑀫𑀼𑀤𑀼𑀪𑀸𑀯𑁂𑀦𑁂𑀯 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸. 𑀫𑀼𑀤𑀼 𑀳𑀺 𑀓𑀢𑁆𑀣𑀘𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀝𑀺𑀧𑀓𑁆𑀔𑁂 𑀅-𑀓𑀸𑀭𑁄 𑀤𑀦𑁆𑀥𑀢𑀸𑀤𑀺𑀳𑁂𑀢𑀽𑀦𑀁 𑀧𑀝𑀺𑀧𑀓𑁆𑀔𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀮𑀳𑀼𑀢𑀸𑀤𑀻𑀦𑀦𑁆𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 ‘‘𑀲𑀢𑁆𑀢𑀸𑀧𑀝𑀺𑀲𑁂𑀥𑁂’’𑀢𑀺 𑀯𑀤𑀦𑁆𑀢𑀺. 𑀲𑀭𑀻𑀭𑁂𑀦 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀦𑀁 𑀅𑀦𑀼𑀓𑀽𑀮𑀢𑀸𑀲𑀗𑁆𑀔𑀸𑀢𑀓𑀫𑁆𑀫𑀜𑁆𑀜𑀪𑀸𑀯𑁄 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸. 𑀅𑀓𑀫𑁆𑀫𑀜𑁆𑀜𑀁 𑀤𑀼𑀩𑁆𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀫𑁆𑀫𑀜𑁆𑀜𑀢𑀸 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸.

𑀮𑀳𑀼𑀢𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀚𑀳𑀦𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀸 𑀯𑀼𑀢𑁆𑀢𑀸𑀢𑀺 𑀢𑀁𑀢𑀁𑀯𑀺𑀓𑀸𑀭𑀸𑀥𑀺𑀓𑀭𑀽𑀧𑁂𑀳𑀺 𑀢𑀁𑀦𑀸𑀦𑀢𑁆𑀢𑀧𑁆𑀧𑀓𑀸𑀲𑀦𑀢𑁆𑀣𑀁 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀥𑀸𑀢𑀼𑀓𑁆𑀔𑁄𑀪𑁄 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀧𑀓𑁄𑀧𑁄, 𑀭𑀲𑀸𑀤𑀺𑀥𑀸𑀢𑀽𑀦𑀁 𑀯𑀸 𑀯𑀺𑀓𑀸𑀭𑀸𑀯𑀢𑁆𑀣𑀸. 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀧𑀺 𑀅𑀢𑁆𑀣𑀢𑁄 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀥𑀸𑀢𑀽𑀦𑀁𑀬𑁂𑀯 𑀯𑀺𑀓𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀸 𑀲𑀧𑁆𑀧𑀸𑀬𑀉𑀢𑀼𑀆𑀳𑀸𑀭𑀸𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸. 𑀢𑁂 𑀘 𑀢𑀁𑀢𑀁𑀯𑀺𑀓𑀸𑀭𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄 𑀯𑀼𑀢𑁆𑀢𑀸, 𑀅𑀯𑀺𑀲𑁂𑀲𑁂𑀦 𑀧𑀦 ¶ 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸. 𑀬𑀢𑁄 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀚𑀳𑀦𑀁, 𑀇𑀤𑁆𑀥𑀺𑀯𑀴𑀜𑁆𑀚𑀦𑀸𑀤𑀻𑀲𑀼 𑀯𑀺𑀬 𑀯𑀲𑀯𑀢𑁆𑀢𑀦𑀁 𑀫𑀤𑁆𑀤𑀯𑀧𑁆𑀧𑀓𑀸𑀭𑁄. 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀕𑀳𑀡𑀜𑁆𑀘𑁂𑀢𑁆𑀣 𑀫𑀼𑀤𑀼𑀓𑀫𑁆𑀫𑀜𑁆𑀜𑀲𑀤𑀺𑀲𑀭𑀽𑀧𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀫𑀼𑀤𑀼𑀢𑀸𑀓𑀫𑁆𑀫𑀜𑁆𑀜𑀢𑀸𑀲𑀩𑁆𑀪𑀸𑀯𑀢𑁄. 𑀦 𑀳𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑀦𑁆𑀢𑀸𑀦𑁂 𑀮𑀳𑀼𑀢𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀧𑀺 𑀭𑀽𑀧𑀪𑀯𑁂 𑀦 𑀲𑀦𑁆𑀢𑀺 𑀤𑀦𑁆𑀥𑀢𑁆𑀢𑀓𑀭𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀸𑀪𑀸𑀯𑀢𑁄. 𑀲𑀢𑀺 𑀳𑀺 𑀢𑀸𑀤𑀺𑀲𑁂 𑀥𑀸𑀢𑀼𑀓𑁆𑀔𑁄𑀪𑁂 𑀢𑀧𑁆𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸𑀳𑀺 𑀮𑀳𑀼𑀢𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑁂𑀘𑀺, 𑀢𑀁 𑀅𑀓𑀸𑀭𑀡𑀁. 𑀦 𑀳𑀺 𑀯𑀽𑀧𑀲𑀫𑁂𑀢𑀩𑁆𑀩𑀧𑀘𑁆𑀘𑀦𑀻𑀓𑀸𑀧𑁂𑀓𑁆𑀔𑁄 𑀢𑀩𑁆𑀩𑀺𑀭𑁄𑀥𑀺𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄, 𑀢𑀣𑀸 𑀲𑀢𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀅𑀪𑀸𑀯𑁄𑀯 𑀲𑀺𑀬𑀸. 𑀓𑀲𑁆𑀫𑀸 𑀧𑀦 𑀓𑀫𑁆𑀫𑀚𑀭𑀽𑀧𑁂𑀲𑀼 𑀮𑀳𑀼𑀢𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺? 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀸𑀧𑁂𑀓𑁆𑀔𑀢𑁆𑀢𑀸. 𑀅𑀜𑁆𑀜𑀣𑀸 𑀲𑀩𑁆𑀩𑀤𑀸𑀪𑀸𑀯𑀻𑀳𑀺 𑀮𑀳𑀼𑀢𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸𑀢𑀺.

𑁪𑁪𑁪. 𑀆𑀤𑀺 𑀘𑀬𑁄, 𑀈𑀲𑀁 𑀯𑀸 𑀘𑀬𑁄𑀢𑀺 𑀆𑀘𑀬𑁄, 𑀬𑀣𑀸𑀧𑀘𑁆𑀘𑀬𑀁 𑀢𑀢𑁄 𑀢𑀢𑁄 𑀆𑀕𑀢𑀲𑁆𑀲 𑀯𑀺𑀬 𑀘𑀬𑁄𑀢𑀺 𑀯𑀸 𑀆𑀘𑀬𑁄, 𑀢𑀤𑀼𑀪𑀬𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀆𑀘𑀬𑁄 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀆𑀘𑀬𑀮𑀓𑁆𑀔𑀡𑁄. 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀧𑀞𑀫𑀼𑀧𑁆𑀧𑀸𑀤𑁄, 𑀯𑀟𑁆𑀠𑀺 𑀘 ‘‘𑀉𑀧𑀜𑁆𑀜𑀢𑁆𑀢𑀁 𑀉𑀧𑀲𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧-𑀲𑀤𑁆𑀤𑀲𑁆𑀲 𑀧𑀞𑀫𑀽𑀧𑀭𑀺𑀅𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀢𑁄. 𑀧𑀼𑀩𑁆𑀩𑀦𑁆𑀢𑀢𑁄𑀢𑀺 𑀧𑀼𑀩𑁆𑀩𑀓𑁄𑀝𑁆𑀞𑀸𑀲𑀢𑁄, 𑀅𑀦𑀸𑀕𑀢𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀚𑁆𑀚𑀫𑀸𑀦𑁂 𑀭𑀽𑀧𑀥𑀫𑁆𑀫𑁂 𑀉𑀧𑁆𑀧𑀸𑀤𑁄 𑀅𑀦𑀸𑀕𑀢𑀓𑁆𑀔𑀡𑀢𑁄 𑀉𑀫𑁆𑀫𑀼𑀚𑁆𑀚𑀸𑀧𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄’’𑀢𑀺. 𑀢𑀣𑀸 𑀲𑁄 ‘‘𑀇𑀫𑁂 𑀭𑀽𑀧𑀥𑀫𑁆𑀫𑀸’’𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀯𑀺𑀬 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸 ‘‘𑀉𑀧𑀭𑀺𑀘𑀬𑁄 𑀉𑀧𑀘𑀬𑁄’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 ¶ 𑀯𑁂𑀤𑀺𑀢𑀩𑁆𑀩𑀸. 𑀧𑀯𑀢𑁆𑀢𑀺𑀮𑀓𑁆𑀔𑀡𑀸𑀢𑀺 𑀭𑀽𑀧𑀸𑀦𑀁 𑀧𑀯𑀢𑁆𑀢𑀦𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸𑀢𑀺 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀅𑀦𑀼 𑀅𑀦𑀼 𑀧𑀩𑀦𑁆𑀥𑀦𑀓𑀺𑀘𑁆𑀘𑀸. 𑀢𑀢𑁄 𑀏𑀯 𑀅𑀦𑀼𑀧𑀘𑁆𑀙𑁂𑀤𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀉𑀪𑀬𑀫𑁆𑀧𑀻𑀢𑀺 𑀉𑀧𑀘𑀬𑁄 𑀲𑀦𑁆𑀢𑀢𑀻𑀢𑀺 𑀉𑀪𑀬𑀫𑁆𑀧𑀺. 𑀚𑀸𑀢𑀺𑀭𑀽𑀧𑀲𑁆𑀲𑁂𑀯𑀸𑀢𑀺 𑀭𑀽𑀧𑀼𑀧𑁆𑀧𑀸𑀤𑀲𑁆𑀲𑁂𑀯 𑀅𑀥𑀺𑀯𑀘𑀦𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀪𑀚𑁆𑀚 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀆𑀓𑀸𑀭𑀦𑀸𑀦𑀢𑁆𑀢𑀢𑁄’’𑀢𑀺, 𑀚𑀸𑀢𑀺𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄𑀢𑀺 𑀅𑀢𑁆𑀣𑁄. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀯𑀺𑀪𑀚𑁆𑀚𑀓𑀣𑀦𑁂 𑀓𑀸𑀭𑀡𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀧𑀯𑀢𑁆𑀢𑀺𑀆𑀓𑀸𑀭𑀦𑀸𑀦𑀢𑁆𑀢𑀢𑁄 𑀚𑀸𑀢𑀺𑀭𑀽𑀧𑀲𑁆𑀲 𑀪𑁂𑀤𑁄, 𑀦 𑀲𑀪𑀸𑀯𑀢𑁄𑀢𑀺 ¶ ? 𑀦𑀺𑀤𑁆𑀤𑁂𑀲𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀆𑀬𑀢𑀦𑀸𑀦𑀦𑁆𑀢𑀺 𑀬𑁄 𑀅𑀟𑁆𑀠𑁂𑀓𑀸𑀤𑀲𑀦𑁆𑀦𑀁 𑀭𑀽𑀧𑀸𑀬𑀢𑀦𑀸𑀦𑀁 𑀆𑀤𑀺𑀘𑀬𑀢𑁆𑀢𑀸 ‘‘𑀆𑀘𑀬𑁄’’𑀢𑀺 𑀯𑀼𑀢𑁆𑀢𑁄. 𑀲𑁄 𑀏𑀯 𑀉𑀧𑀘𑀬𑁄 𑀧𑀞𑀫𑀼𑀧𑁆𑀧𑀸𑀤𑀪𑀸𑀯𑀢𑁄 𑀉𑀧-𑀲𑀤𑁆𑀤𑁄 𑀧𑀞𑀫𑀢𑁆𑀣𑁄𑀢𑀺 𑀓𑀢𑁆𑀯𑀸. 𑀬𑁄 𑀧𑀦 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀉𑀧𑀭𑀺 𑀘𑀬𑀢𑁆𑀢𑀸 𑀉𑀧𑀘𑀬𑁄, 𑀲𑀸 𑀏𑀯 𑀲𑀦𑁆𑀢𑀢𑀺 𑀅𑀦𑀼𑀧𑀩𑀦𑁆𑀥𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑀢𑁄. 𑀅𑀣 𑀯𑀸 𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄 𑀧𑀞𑀫𑀪𑀸𑀯𑁂𑀦 𑀉𑀧𑀮𑀓𑁆𑀔𑀺𑀢𑁄 𑀉𑀧𑁆𑀧𑀸𑀤𑁄, 𑀲𑁄 𑀧𑀦 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀉𑀧𑀭𑀺 𑀘𑀬𑀢𑁆𑀢𑀸 𑀉𑀧𑀘𑀬𑁄, 𑀯𑀟𑁆𑀠𑀻𑀢𑀺 𑀅𑀢𑁆𑀣𑁄. 𑀉𑀧𑀘𑀬𑁄 𑀯𑀟𑁆𑀠𑀺𑀪𑀸𑀯𑁂𑀦 𑀉𑀧𑀮𑀓𑁆𑀔𑀺𑀢𑁄 𑀉𑀧𑁆𑀧𑀸𑀤𑁄, 𑀲𑀸 𑀏𑀯 𑀲𑀦𑁆𑀢𑀢𑀺 𑀧𑀩𑀦𑁆𑀥𑀸𑀓𑀸𑀭𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀝𑁆𑀞𑀓𑀣𑀸𑀬𑀫𑁆𑀧𑀻’’𑀢𑀺𑀆𑀤𑀺.

𑀢𑀢𑁆𑀣 𑀏𑀯𑀁 𑀓𑀺𑀁 𑀓𑀣𑀺𑀢𑀦𑁆𑀢𑀺 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁪𑁧) 𑀦𑀺𑀤𑁆𑀤𑁂𑀲𑁂𑀦 𑀓𑀺𑀁 𑀅𑀢𑁆𑀣𑀚𑀸𑀢𑀁 𑀓𑀣𑀺𑀢𑀁 𑀳𑁄𑀢𑀺? 𑀆𑀬𑀢𑀦𑁂𑀦 𑀆𑀘𑀬𑁄 𑀓𑀣𑀺𑀢𑁄. 𑀆𑀘𑀬𑀼𑀧𑀘𑀬𑀲𑀦𑁆𑀢𑀢𑀺𑀬𑁄 𑀳𑀺 𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑁂𑀦 𑀆𑀘𑀬𑁄 𑀏𑀯𑀸𑀢𑀺 𑀆𑀬𑀢𑀦𑁂𑀳𑀺 𑀆𑀘𑀬𑀸𑀤𑀻𑀦𑀁 𑀧𑀓𑀸𑀲𑀺𑀢𑀢𑁆𑀢𑀸 𑀢𑁂𑀳𑀺 𑀆𑀘𑀬𑁄 𑀓𑀣𑀺𑀢𑁄. 𑀆𑀬𑀢𑀦𑀸𑀦𑀁 𑀆𑀘𑀬𑀸𑀤𑀺𑀯𑀘𑀦𑁂𑀦𑁂𑀯 𑀆𑀘𑀬𑀲𑀪𑀸𑀯𑀸𑀦𑀺 𑀉𑀧𑁆𑀧𑀸𑀤𑀥𑀫𑁆𑀫𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀆𑀘𑀬𑁂𑀦 𑀢𑀁𑀧𑀓𑀢𑀺𑀓𑀁 𑀆𑀬𑀢𑀦𑀁 𑀓𑀣𑀺𑀢𑀁. 𑀮𑀓𑁆𑀔𑀡𑀜𑁆𑀳𑀺 𑀉𑀧𑁆𑀧𑀸𑀤𑁄, 𑀦 𑀭𑀽𑀧𑀭𑀽𑀧𑀦𑁆𑀢𑀺.

𑀭𑀽𑀧𑀧𑀭𑀺𑀧𑀸𑀓𑁄 𑀭𑀽𑀧𑀥𑀫𑁆𑀫𑀸𑀦𑀁 𑀚𑀺𑀡𑁆𑀡𑀢𑀸. 𑀉𑀧𑀦𑀬𑀦𑀭𑀲𑀸𑀢𑀺 𑀪𑀗𑁆𑀕𑀼𑀧𑀦𑀬𑀦𑀓𑀺𑀘𑁆𑀘𑀸. 𑀲𑀪𑀸𑀯𑀸𑀦𑀧𑀕𑀫𑁂𑀧𑀻𑀢𑀺 𑀓𑀓𑁆𑀔𑀴𑀢𑀸𑀤𑀺𑀲𑀪𑀸𑀯𑀲𑁆𑀲 𑀅𑀯𑀺𑀕𑀫𑁂𑀧𑀺. 𑀞𑀺𑀢𑀺𑀓𑁆𑀔𑀡𑁂 𑀳𑀺 𑀚𑀭𑀸, 𑀦 𑀘 𑀢𑀤𑀸 𑀥𑀫𑁆𑀫𑁄 𑀲𑀪𑀸𑀯𑀁 𑀯𑀺𑀚𑀳𑀢𑀺 𑀦𑀸𑀫. 𑀦𑀯𑀪𑀸𑀯𑁄 𑀉𑀧𑁆𑀧𑀸𑀤𑀸𑀯𑀢𑁆𑀣𑀸, 𑀢𑀲𑁆𑀲 𑀅𑀧𑀕𑀫𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀦𑀯𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. ‘‘𑀅𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺 𑀇𑀤𑀁 𑀢𑁂𑀲𑀁 𑀚𑀭𑀸𑀬 𑀲𑀼𑀝𑁆𑀞𑀼 𑀧𑀝𑀺𑀘𑁆𑀙𑀦𑁆𑀦𑀢𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀳𑀺 𑀔𑀡𑀺𑀓𑀚𑀭𑀸 𑀧𑀝𑀺𑀘𑁆𑀙𑀦𑁆𑀦𑀸 𑀏𑀯, 𑀬𑀸 𑀅𑀯𑀻𑀘𑀺𑀚𑀭𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀏𑀲 𑀯𑀺𑀓𑀸𑀭𑁄𑀢𑀺 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀺𑀓𑀸𑀭𑀫𑀸𑀳. 𑀲𑁄 𑀳𑀺 𑀅𑀭𑀽𑀧𑀥𑀫𑁆𑀫𑁂𑀲𑀼 𑀦 𑀮𑀩𑁆𑀪𑀢𑀺. 𑀬𑀸 𑀅𑀯𑀻𑀘𑀺𑀚𑀭𑀸 𑀦𑀸𑀫, 𑀢𑀲𑁆𑀲𑀸𑀧𑀺 ¶ 𑀏𑀲 𑀯𑀺𑀓𑀸𑀭𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀚𑀭𑀸𑀬 𑀯𑀻𑀘𑀻𑀢𑀺 𑀅𑀯𑀻𑀘𑀺𑀚𑀭𑀸, 𑀦𑀯𑀪𑀸𑀯𑀢𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀢𑁄 𑀲𑀩𑁆𑀩𑀲𑁄 ‘‘𑀪𑀺𑀚𑁆𑀚𑀦’’𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀸𑀢𑀺 𑀧𑀭𑀺𑀪𑁂𑀤𑀮𑀓𑁆𑀔𑀡𑀸. 𑀦𑀺𑀘𑁆𑀘𑀁 𑀦𑀸𑀫 𑀥𑀼𑀯𑀁, 𑀭𑀽𑀧𑀁 𑀧𑀦 𑀔𑀡𑀪𑀗𑁆𑀕𑀺𑀢𑀸𑀬 𑀬𑁂𑀦 𑀪𑀗𑁆𑀕𑁂𑀦 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀲𑁄 𑀅𑀦𑀺𑀘𑁆𑀘𑀲𑁆𑀲 𑀪𑀸𑀯𑁄𑀢𑀺 𑀅𑀦𑀺𑀘𑁆𑀘𑀢𑀸. 𑀲𑀸 𑀧𑀦 𑀬𑀲𑁆𑀫𑀸 𑀞𑀺𑀢𑀺𑀧𑁆𑀧𑀢𑁆𑀢𑀁 𑀭𑀽𑀧𑀁 𑀯𑀺𑀦𑀸𑀲𑀪𑀸𑀯𑁂𑀦 ¶ 𑀲𑀁𑀲𑀻𑀤𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀁𑀲𑀻𑀤𑀦𑀭𑀲𑀸’’𑀢𑀺. 𑀬𑀲𑁆𑀫𑀸 𑀘 𑀲𑀸 𑀭𑀽𑀧𑀥𑀫𑁆𑀫𑀸𑀦𑀁 𑀪𑀗𑁆𑀕𑀪𑀸𑀯𑀢𑁄 𑀔𑀬𑀯𑀬𑀸𑀓𑀸𑀭𑁂𑀦𑁂𑀯 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀔𑀬𑀯𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺.

𑁪𑁪𑁫. 𑀑𑀚𑀸𑀮𑀓𑁆𑀔𑀡𑁄𑀢𑀺 𑀏𑀢𑁆𑀣 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀭𑀲𑀲𑁆𑀲 𑀲𑀸𑀭𑁄 𑀉𑀧𑀣𑀫𑁆𑀪𑀩𑀮𑀓𑀭𑁄 𑀪𑀽𑀢𑀦𑀺𑀲𑁆𑀲𑀺𑀢𑁄 𑀏𑀓𑁄 𑀯𑀺𑀲𑁂𑀲𑁄 𑀑𑀚𑀸. 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄. 𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄, 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦 𑀲𑀯𑀢𑁆𑀣𑀼𑀓𑀁 𑀑𑀚𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀁 𑀆𑀳𑀸𑀭𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑀸𑀳𑀸𑀭𑁄 𑀭𑀽𑀧𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀧𑀦 𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀢𑁂𑀦𑀸𑀳 ‘‘𑀭𑀽𑀧𑀸𑀳𑀭𑀡𑀭𑀲𑁄’’𑀢𑀺. 𑀢𑀢𑁄 𑀏𑀯 𑀑𑀚𑀝𑁆𑀞𑀫𑀓𑀭𑀽𑀧𑀼𑀧𑁆𑀧𑀸𑀤𑀦𑁂𑀦 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀉𑀧𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀑𑀚𑀸𑀬 𑀭𑀽𑀧𑀸𑀳𑀭𑀡𑀓𑀺𑀘𑁆𑀘𑀁 𑀩𑀸𑀳𑀺𑀭𑀸𑀥𑀻𑀦𑀦𑁆𑀢𑀺 𑀆𑀳 ‘‘𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄’’𑀢𑀺.

𑁪𑁪𑁬. 𑀩𑀮𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀩𑀮𑀁 𑀦𑀸𑀫 𑀅𑀢𑁆𑀣𑀺, 𑀲𑀫𑁆𑀪𑀯𑁄 𑀦𑀸𑀫 𑀅𑀢𑁆𑀣𑀺, 𑀭𑁄𑀕𑁄 𑀦𑀸𑀫 𑀅𑀢𑁆𑀣𑀺, ‘‘𑀚𑀸𑀢𑀺 𑀲𑀜𑁆𑀚𑀸𑀢𑀻’’𑀢𑀺 (𑀯𑀺𑀪. 𑁧𑁯𑁧) 𑀯𑀘𑀦𑀢𑁄 𑀚𑀸𑀢𑀺 𑀦𑀸𑀫 𑀅𑀢𑁆𑀣𑀺, 𑀢𑁂𑀳𑀺𑀧𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀯𑀺𑀦𑀸 𑀅𑀪𑀸𑀯𑀢𑁄 𑀉𑀧𑀸𑀤𑀸𑀬𑀭𑀽𑀧𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀁. 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀏𑀯𑀁 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀫𑀺𑀤𑁆𑀥𑀁 𑀭𑀽𑀧𑀫𑁂𑀯 𑀦 𑀳𑁄𑀢𑀺 𑀦𑀻𑀯𑀭𑀡𑁂𑀲𑀼 𑀤𑁂𑀲𑀺𑀢𑀢𑁆𑀢𑀸. 𑀬𑀲𑁆𑀲 𑀳𑀺 𑀦𑀻𑀯𑀭𑀡𑁂𑀲𑀼 𑀤𑁂𑀲𑀦𑀸, 𑀢𑀁 𑀦 𑀭𑀽𑀧𑀁 𑀬𑀣𑀸 𑀓𑀸𑀫𑀘𑁆𑀙𑀦𑁆𑀤𑁄. 𑀲𑀺𑀬𑀸 𑀧𑀦𑁂𑀢𑀁 𑀤𑀼𑀯𑀺𑀥𑀁 𑀫𑀺𑀤𑁆𑀥𑀁 𑀭𑀽𑀧𑀁, 𑀅𑀭𑀽𑀧𑀜𑁆𑀘𑀸𑀢𑀺. 𑀢𑀢𑁆𑀣 𑀬𑀁 𑀅𑀭𑀽𑀧𑀁, 𑀢𑀁 𑀦𑀻𑀯𑀭𑀡𑁂𑀲𑀼 𑀤𑁂𑀲𑀺𑀢𑀁 ‘‘𑀦 𑀭𑀽𑀧’’𑀦𑁆𑀢𑀺? 𑀢𑀁 𑀦, 𑀯𑀺𑀲𑁂𑀲𑀯𑀘𑀦𑀸𑀪𑀸𑀯𑀢𑁄. 𑀦 𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀫𑀺𑀤𑁆𑀥𑀁 𑀦𑀻𑀯𑀭𑀡𑁂𑀲𑀼 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀫𑀺𑀤𑁆𑀥𑀲𑁆𑀲 𑀤𑀼𑀯𑀺𑀥𑀢𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸𑀧𑀺 𑀦 𑀲𑀓𑁆𑀓𑀸 𑀦𑀻𑀯𑀭𑀡𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀼𑀁. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 ‘‘𑀬𑀁 𑀢𑀁 𑀅𑀭𑀽𑀧𑀢𑁄 𑀅𑀜𑁆𑀜𑀁 𑀫𑀺𑀤𑁆𑀥𑀁 𑀧𑀭𑀺𑀓𑀧𑁆𑀧𑀺𑀢𑀁, 𑀢𑀫𑁆𑀧𑀺 𑀦𑀻𑀯𑀭𑀡𑀁 𑀫𑀺𑀤𑁆𑀥𑀲𑀪𑀸𑀯𑀢𑁆𑀢𑀸 𑀇𑀢𑀭𑀁 𑀫𑀺𑀤𑁆𑀥𑀁 𑀯𑀺𑀬𑀸’’𑀢𑀺.

𑀪𑀯𑀢𑀼 ¶ 𑀦𑀻𑀯𑀭𑀡𑀁, 𑀓𑁄 𑀯𑀺𑀭𑁄𑀥𑁄𑀢𑀺 𑀘𑁂? 𑀦𑀻𑀯𑀭𑀡𑀜𑁆𑀘 𑀧𑀳𑀸𑀢𑀩𑁆𑀩𑀁. 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 ‘‘𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺 (𑀲𑀼. 𑀦𑀺. 𑁫𑁪𑁬) 𑀯𑀘𑀦𑀢𑁄. 𑀅𑀧𑁆𑀧𑀳𑀸𑀢𑀩𑁆𑀩𑀜𑁆𑀘 𑀭𑀽𑀧𑀁 ‘‘𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁, 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄, 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁, 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘. 𑀇𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 ¶ (𑀥. 𑀲. 𑁧𑁪𑁦𑁭) 𑀯𑀘𑀦𑀢𑁄. 𑀦 𑀘𑁂𑀢𑁆𑀣 𑀢𑀤𑀸𑀭𑀫𑁆𑀫𑀡𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁩𑁪) 𑀯𑀺𑀬 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀢𑀣𑀸 𑀧𑀳𑀸𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀫𑀸 𑀦 𑀫𑀺𑀤𑁆𑀥𑀁 𑀭𑀽𑀧𑀁. 𑀬𑀤𑀺 𑀫𑀺𑀤𑁆𑀥𑀲𑁆𑀲 𑀭𑀽𑀧𑀪𑀸𑀯𑀁 𑀦 𑀲𑀫𑁆𑀧𑀝𑀺𑀘𑁆𑀙𑀣, 𑀓𑀣𑀁 𑀪𑀕𑀯𑀢𑁄 𑀦𑀺𑀤𑁆𑀤𑀸. 𑀫𑀺𑀤𑁆𑀥𑀜𑁆𑀳𑀺 ‘‘𑀦𑀺𑀤𑁆𑀤𑀸𑀧𑀘𑀮𑀸𑀬𑀺𑀓𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑀢𑁆𑀢𑀸 𑀦𑀺𑀤𑁆𑀤𑀸𑀢𑀺? 𑀦 𑀫𑀺𑀤𑁆𑀥𑀁 𑀦𑀺𑀤𑁆𑀤𑀸, 𑀦𑀺𑀤𑁆𑀤𑀸𑀳𑁂𑀢𑀼𑀪𑀸𑀯𑀢𑁄 𑀧𑀦 𑀢𑀁 ‘‘𑀦𑀺𑀤𑁆𑀤𑀸’’𑀢𑀺 𑀯𑀺𑀪𑀢𑁆𑀢𑀁 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺. 𑀏𑀯𑀫𑁆𑀧𑀺 𑀦𑀺𑀤𑁆𑀤𑀸𑀳𑁂𑀢𑀼𑀦𑁄 𑀫𑀺𑀤𑁆𑀥𑀲𑁆𑀲 𑀅𑀪𑀸𑀯𑀢𑁄 𑀓𑀣𑀁 𑀪𑀕𑀯𑀢𑁄 𑀦𑀺𑀤𑁆𑀤𑀸𑀢𑀺? 𑀦𑀺𑀤𑁆𑀤𑀸 𑀪𑀕𑀯𑀢𑁄 𑀲𑀭𑀻𑀭𑀕𑀺𑀮𑀸𑀦𑀺𑀬𑀸, 𑀦 𑀫𑀺𑀤𑁆𑀥𑁂𑀦. 𑀲𑀸 𑀘 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁨) 𑀯𑀘𑀦𑀢𑁄. 𑀦 𑀘𑁂𑀢𑁆𑀣 𑀏𑀯𑀫𑀯𑀥𑀸𑀭𑀡𑀁 𑀫𑀺𑀤𑁆𑀥𑀫𑁂𑀯 𑀦𑀺𑀤𑁆𑀤𑀸𑀳𑁂𑀢𑀽𑀢𑀺, 𑀦𑀺𑀤𑁆𑀤𑀸𑀳𑁂𑀢𑀼 𑀏𑀯 𑀫𑀺𑀤𑁆𑀥𑀦𑁆𑀢𑀺 𑀏𑀯𑀫𑀯𑀥𑀸𑀭𑀡𑀸. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀅𑀢𑁆𑀣𑀺 𑀦𑀺𑀤𑁆𑀤𑀸𑀳𑁂𑀢𑀼, 𑀓𑁄 𑀧𑀦 𑀲𑁄𑀢𑀺? 𑀲𑀭𑀻𑀭𑀕𑀺𑀮𑀸𑀦𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀤𑁆𑀤𑀸 𑀪𑀕𑀯𑀢𑁄 𑀲𑀭𑀻𑀭𑀕𑀺𑀮𑀸𑀦𑀺𑀬𑀸, 𑀦 𑀫𑀺𑀤𑁆𑀥𑁂𑀦𑀸’’𑀢𑀺.

𑀦𑀺𑀤𑁆𑀤𑀸 𑀘 𑀪𑀕𑀯𑀢𑁄 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁 𑀅𑀕𑁆𑀕𑀺𑀯𑁂𑀲𑁆𑀲𑀦…𑀧𑁂… 𑀤𑀺𑀯𑀸 𑀲𑀼𑀧𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀯𑀘𑀦𑀢𑁄. 𑀇𑀢𑁄𑀧𑀺 𑀦 𑀫𑀺𑀤𑁆𑀥𑀁 𑀭𑀽𑀧𑀁 𑀲𑀫𑁆𑀧𑀬𑁄𑀕𑀯𑀘𑀦𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 (𑀥. 𑀲. 𑁧𑁧𑁭𑁬). 𑀦 𑀘𑁂𑀢𑁆𑀣 𑀬𑀣𑀸𑀮𑀸𑀪𑀪𑀯𑀦𑀁? 𑀲𑀓𑁆𑀓𑀸 𑀧𑀘𑁆𑀘𑁂𑀢𑀼𑀁 ‘‘𑀲𑀓𑁆𑀔𑀭𑀓𑀣𑀮𑀺𑀓𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁪𑁯) 𑀯𑀺𑀬 𑀅𑀧𑁆𑀧𑀲𑀺𑀤𑁆𑀥𑀢𑀸𑀬 𑀭𑀽𑀧𑀪𑀸𑀯𑀲𑁆𑀲. 𑀲𑀺𑀤𑁆𑀥𑁂 𑀳𑀺 𑀢𑀲𑁆𑀲 𑀭𑀽𑀧𑀪𑀸𑀯𑁂 𑀲𑀫𑁆𑀪𑀯𑀢𑁄 𑀬𑀣𑀸𑀮𑀸𑀪𑀧𑀘𑁆𑀘𑀬𑁄 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀇𑀢𑁄𑀧𑀺 𑀦 𑀭𑀽𑀧𑀁 𑀫𑀺𑀤𑁆𑀥𑀁 𑀆𑀭𑀼𑀧𑁆𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀲𑁆𑀫𑀸 ‘‘𑀦 𑀫𑀺𑀤𑁆𑀥𑀁 𑀭𑀽𑀧’’𑀦𑁆𑀢𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀲𑀼𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯.

𑀇𑀢𑀭𑁂𑀲𑀽𑀢𑀺 ¶ 𑀩𑀮𑀭𑀽𑀧𑀸𑀤𑀻𑀲𑀼. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀭𑁄𑀕𑀲𑁆𑀲 𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁄 𑀥𑀸𑀢𑀼𑀓𑁆𑀔𑁄𑀪𑁄 𑀆𑀲𑀦𑁆𑀦𑀓𑀸𑀭𑀡𑀁, 𑀧𑀕𑁂𑀯 𑀇𑀢𑀭𑀲𑁆𑀲. 𑀲𑁄 𑀘 𑀅𑀢𑁆𑀣𑀢𑁄 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀸𑀯𑀢𑁆𑀣𑀸𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀏𑀯 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀭𑁄𑀕𑀭𑀽𑀧𑀁 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸’’𑀢𑀺. 𑀉𑀧𑀘𑀬𑀲𑀦𑁆𑀢𑀢𑀺𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀭𑀽𑀧𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀢𑁄. 𑀉𑀧𑀸𑀤𑀸𑀯𑀢𑁆𑀣𑀸𑀬 ¶ 𑀘 𑀅𑀜𑁆𑀜𑀸 𑀚𑀸𑀢𑀺 𑀦𑀸𑀫 𑀦𑀢𑁆𑀣𑁂𑀯. 𑀲𑀫𑁆𑀪𑀯𑁄 𑀓𑀸𑀫𑀥𑀸𑀢𑀼𑀬𑀁 𑀏𑀓𑀘𑁆𑀘𑀺𑀬𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀧𑀘𑁆𑀘𑀬𑁄 𑀆𑀧𑁄𑀥𑀸𑀢𑀼𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀲𑀫𑁆𑀪𑀯𑀭𑀽𑀧𑀁 𑀆𑀧𑁄𑀥𑀸𑀢𑀼𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸’’𑀢𑀺. 𑀓𑀸𑀬𑀩𑀮𑀁 𑀦𑀸𑀫 𑀅𑀢𑁆𑀣𑀢𑁄 𑀯𑀸𑀬𑁄𑀥𑀸𑀢𑀼𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄 𑀢𑀲𑁆𑀲𑀸 𑀯𑀺𑀧𑁆𑀨𑀸𑀭𑀪𑀸𑀯𑀢𑁄. 𑀬𑀢𑁄 𑀦𑀁 ‘‘𑀧𑀸𑀡𑀩𑀮’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀦𑀸𑀳 ‘‘𑀩𑀮𑀭𑀽𑀧𑀁 𑀯𑀸𑀬𑁄𑀥𑀸𑀢𑀼𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸’’𑀢𑀺. 𑀓𑀲𑁆𑀫𑀸 𑀧𑀦 𑀦𑁂𑀲𑀁 𑀅𑀬𑀣𑀸𑀓𑁆𑀓𑀫𑀢𑁄 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺? 𑀯𑀺𑀲𑀼𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀦𑀸𑀤𑀭𑀤𑀲𑁆𑀲𑀦𑀢𑁆𑀣𑀁, 𑀫𑀺𑀤𑁆𑀥𑀧𑀝𑀺𑀓𑁆𑀔𑁂𑀧𑁄 𑀯𑀸 𑀫𑀳𑀸𑀧𑀜𑁆𑀳𑁄𑀢𑀺 𑀧𑀞𑀫𑀁 𑀓𑀢𑁄. 𑀢𑀤𑀦𑀼𑀲𑀸𑀭𑁂𑀦 𑀧𑀝𑀺𑀮𑁄𑀫𑀦𑀬𑁂𑀦 𑀇𑀢𑀭𑁂𑀲𑀫𑁆𑀧𑀺 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀇𑀢𑀻’’𑀢𑀺 𑀇𑀤𑀁 ‘‘𑀅𑀝𑁆𑀞𑀯𑀻𑀲𑀢𑀺𑀯𑀺𑀥’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀇𑀫𑀺𑀦𑀸 𑀯𑀼𑀢𑁆𑀢𑀓𑁆𑀓𑀫𑁂𑀦 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀻𑀢𑀺. 𑀲𑁄 𑀘 𑀔𑁄 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯𑀸𑀢𑀺 𑀅𑀦𑀽𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀥𑀺𑀓𑀪𑀸𑀯𑁄 𑀧𑀦 𑀤𑀲𑁆𑀲𑀺𑀢𑁄 𑀏𑀯.

𑁪𑁪𑁭. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀺 𑀳𑀺𑀦𑁄𑀢𑀺 𑀏𑀢𑁂𑀦 𑀧𑀢𑀺𑀝𑁆𑀞𑀳𑀢𑀻𑀳𑀺 𑀳𑁂𑀢𑀼, 𑀫𑀽𑀮𑀝𑁆𑀞𑁂𑀦 𑀮𑁄𑀪𑀸𑀤𑀺𑀓𑁄, 𑀅𑀮𑁄𑀪𑀸𑀤𑀺𑀓𑁄 𑀘, 𑀢𑀸𑀤𑀺𑀲𑁄 𑀳𑁂𑀢𑀼 𑀦 𑀳𑁄𑀢𑀻𑀢𑀺 𑀦𑀳𑁂𑀢𑀼. 𑀦𑀸𑀲𑁆𑀲 𑀳𑁂𑀢𑀼 𑀅𑀢𑁆𑀣𑀻𑀢𑀺 𑀅𑀳𑁂𑀢𑀼𑀓𑀁, 𑀲𑀳𑁂𑀢𑀼𑀓𑀧𑀝𑀺𑀬𑁄𑀕𑀺𑀪𑀸𑀯𑀢𑁄 𑀳𑁂𑀢𑀼𑀦𑀸 𑀲𑀳 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀳𑁂𑀢𑀼𑀓𑀫𑁂𑀯 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀬 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁. 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀳𑀺 𑀲𑀤𑁆𑀤𑀢𑁆𑀣𑀦𑀸𑀦𑀢𑁆𑀢𑁂𑀦 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑀼𑀓𑀦𑁆𑀢𑀭𑀤𑁂𑀲𑀦𑀸 𑀳𑁄𑀢𑀻𑀢𑀺 𑀤𑀼𑀓𑀧𑀤𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀲𑀳 𑀧𑀘𑁆𑀘𑀬𑁂𑀦𑀸𑀢𑀺 𑀲𑀧𑁆𑀧𑀘𑁆𑀘𑀬𑀁. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀮𑁄𑀓𑁂 𑀦𑀺𑀬𑀼𑀢𑁆𑀢𑀁, 𑀯𑀺𑀤𑀺𑀢𑀦𑁆𑀢𑀺 𑀯𑀸 𑀮𑁄𑀓𑀺𑀬𑀁. 𑀆 𑀪𑀯𑀕𑁆𑀕𑀁, 𑀆 𑀕𑁄𑀢𑁆𑀭𑀪𑀼𑀁 𑀯𑀸 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀁, 𑀆𑀲𑀯𑁂𑀳𑀺 𑀆𑀮𑀫𑁆𑀩𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀁𑀬𑁄𑀚𑀦𑀻𑀬𑀁 𑀑𑀖𑀦𑀻𑀬𑀁 𑀬𑁄𑀕𑀦𑀻𑀬𑀁 𑀦𑀻𑀯𑀭𑀡𑀻𑀬𑀁 𑀲𑀁𑀓𑀺𑀮𑁂𑀲𑀺𑀓𑀁 𑀧𑀭𑀸𑀫𑀝𑁆𑀞𑀁 𑀅𑀘𑁂𑀢𑀲𑀺𑀓𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀦𑀭𑀽𑀧𑀸𑀯𑀘𑀭𑀁 𑀦𑀅𑀭𑀽𑀧𑀸𑀯𑀘𑀭𑀁 𑀦𑀅𑀧𑀭𑀺𑀬𑀸𑀧𑀦𑁆𑀦𑀁 𑀅𑀦𑀺𑀬𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀅𑀦𑀺𑀘𑁆𑀘𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀢𑀁 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀸 ¶ , 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀥𑀫𑁆𑀫𑀸, 𑀢𑁂𑀲𑀼 𑀪𑀯𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀘𑀓𑁆𑀔𑀸𑀤𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀅𑀚𑁆𑀛𑀢𑁆𑀢𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀁 𑀬𑀣𑀸 𑀯𑁂𑀦𑀬𑀺𑀓𑁄𑀢𑀺 ¶ (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮) 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀪𑀸𑀯𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓’’𑀦𑁆𑀢𑀺. 𑀲𑁂𑀲𑀁 𑀢𑁂𑀯𑀻𑀲𑀢𑀺𑀯𑀺𑀥𑀁. ‘‘𑀢𑀢𑁄 𑀩𑀸𑀳𑀺𑀭𑀢𑁆𑀢𑀸’’𑀢𑀺 𑀇𑀤𑀁 𑀅𑀚𑁆𑀛𑀢𑁆𑀢𑀺𑀓𑀮𑀓𑁆𑀔𑀡𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀖𑀝𑁆𑀝𑀦𑀯𑀲𑁂𑀦𑀸𑀢𑀺 𑀯𑀺𑀲𑀬𑀻, 𑀯𑀺𑀲𑀬𑁄 𑀘 𑀳𑀼𑀢𑁆𑀯𑀸 𑀲𑀗𑁆𑀖𑀝𑁆𑀝𑀦𑀯𑀲𑁂𑀦. 𑀲𑁂𑀲𑀁 𑀲𑁄𑀴𑀲𑀯𑀺𑀥𑀁. 𑀯𑀺𑀧𑀭𑀻𑀢𑀢𑁆𑀢𑀸𑀢𑀺 𑀖𑀝𑁆𑀝𑀦𑀯𑀲𑁂𑀦 𑀅𑀕𑀳𑁂𑀢𑀩𑁆𑀩𑀢𑁄. 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀲𑀪𑀸𑀯𑀢𑁆𑀢𑀸𑀢𑀺 𑀲𑀼𑀔𑀼𑀫𑀪𑀸𑀯𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀢𑁆𑀢𑀸. 𑀜𑀸𑀡𑀲𑁆𑀲 𑀆𑀲𑀦𑁆𑀦𑁂 𑀦 𑀳𑁄𑀢𑀻𑀢𑀺 𑀤𑀽𑀭𑁂. 𑀢𑁂𑀭𑀲 𑀳𑀤𑀬𑀯𑀢𑁆𑀣𑀼𑀧𑀭𑀺𑀬𑁄𑀲𑀸𑀦𑀸𑀦𑀺. 𑀲𑀪𑀸𑀯𑁂𑀦𑁂𑀯𑀸𑀢𑀺 ‘‘𑀭𑀽𑀧𑀲𑁆𑀲 𑀧𑀭𑀺𑀘𑁆𑀙𑁂𑀤𑁄, 𑀭𑀽𑀧𑀲𑁆𑀲 𑀯𑀺𑀓𑀸𑀭𑁄, 𑀭𑀽𑀧𑀲𑁆𑀲 𑀉𑀧𑀘𑀬𑁄’’𑀢𑀺𑀆𑀤𑀺𑀦𑀸 𑀅𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀓𑀓𑁆𑀔𑀴𑀢𑁆𑀢𑀸𑀤𑀺𑀦𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀩𑁆𑀩𑀢𑁄. 𑀲𑁂𑀲𑀁 𑀤𑀲𑀯𑀺𑀥𑀁. 𑀢𑀩𑁆𑀩𑀺𑀧𑀭𑀻𑀢𑀢𑀸𑀬𑀸𑀢𑀺 𑀲𑀪𑀸𑀯𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀩𑁆𑀩𑀢𑁄. 𑀲𑁄𑀢𑀸𑀤𑀻𑀦𑀫𑁆𑀧𑀺 𑀘𑀓𑁆𑀔𑀼𑀦𑁄 𑀯𑀺𑀬 𑀧𑀲𑀦𑁆𑀦𑀲𑀪𑀸𑀯𑀢𑁆𑀢𑀸 𑀏𑀯 𑀬𑀣𑀸𑀲𑀓𑀁 𑀯𑀺𑀲𑀬𑀕𑁆𑀕𑀳𑀡𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀸𑀤𑀺…𑀧𑁂… 𑀧𑀲𑀸𑀤𑀭𑀽𑀧’’𑀦𑁆𑀢𑀺. 𑀯𑀺𑀧𑀭𑀻𑀢𑀢𑁆𑀢𑀸𑀢𑀺 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀢𑁆𑀢𑀸. 𑀅𑀥𑀺𑀧𑀢𑀺𑀬𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀘𑀓𑁆𑀔𑀸𑀤𑀻𑀦𑀁 𑀢𑀸𑀯 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀥𑀺𑀧𑀢𑁂𑀬𑁆𑀬𑀁 𑀢𑁂𑀲𑀁 𑀧𑀝𑀼𑀫𑀦𑁆𑀤𑀪𑀸𑀯𑀸𑀦𑀼𑀯𑀢𑁆𑀢𑀦𑀢𑁄, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀲𑁆𑀲 𑀲𑀓𑀺𑀘𑁆𑀘𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀳𑀚𑀭𑀽𑀧𑀸𑀦𑀼𑀧𑀸𑀮𑀦𑁂. 𑀢𑀤𑀼𑀪𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀉𑀧𑀸𑀤𑀺𑀦𑁆𑀦𑀢𑁆𑀢𑀸𑀢𑀺 𑀕𑀳𑀺𑀢𑀢𑁆𑀢𑀸. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀜𑁆𑀳𑀺 ‘‘𑀫𑀫𑁂𑀢𑀁 𑀨𑀮𑀁’’𑀦𑁆𑀢𑀺 𑀓𑀫𑁆𑀫𑀼𑀦𑀸 𑀕𑀳𑀺𑀢𑀁 𑀯𑀺𑀬 𑀳𑁄𑀢𑀺 𑀅𑀧𑀝𑀺𑀓𑁆𑀔𑁂𑀧𑀢𑁄.

𑁪𑁪𑁮. 𑀲𑀦𑀺𑀤𑀲𑁆𑀲𑀦𑀓𑀫𑁆𑀫𑀚𑀸𑀤𑀻𑀦𑀁 𑀢𑀺𑀓𑀸𑀦𑀦𑁆𑀢𑀺 𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀲𑁆𑀲, 𑀓𑀫𑁆𑀫𑀚𑀸𑀤𑀺𑀢𑁆𑀢𑀺𑀓𑀸𑀦𑀜𑁆𑀘. 𑀑𑀴𑀸𑀭𑀺𑀓𑁂𑀢𑀺 𑀤𑁆𑀯𑀸𑀤𑀲𑀯𑀺𑀥𑁂 𑀑𑀴𑀸𑀭𑀺𑀓𑀭𑀽𑀧𑁂. 𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑀁, 𑀧𑀝𑀺𑀳𑀦𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀳 𑀧𑀝𑀺𑀖𑁂𑀦𑀸𑀢𑀺 𑀲𑀧𑁆𑀧𑀝𑀺𑀖𑀁, 𑀲𑀦𑀺𑀤𑀲𑁆𑀲𑀦𑀜𑁆𑀘 𑀢𑀁 𑀲𑀧𑁆𑀧𑀝𑀺𑀖𑀜𑁆𑀘𑀸𑀢𑀺 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁. 𑀢𑀢𑁆𑀣 𑀬𑀲𑁆𑀲 𑀤𑀝𑁆𑀞𑀩𑁆𑀩𑀪𑀸𑀯𑁄 𑀅𑀢𑁆𑀣𑀺, 𑀢𑀁 𑀲𑀦𑀺𑀤𑀲𑁆𑀲𑀦𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀪𑀸𑀯𑁄𑀯 𑀤𑀝𑁆𑀞𑀩𑁆𑀩𑀪𑀸𑀯𑁄. 𑀢𑀲𑁆𑀲 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀥𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀯𑀺𑀲𑁂𑀲𑁄, 𑀲𑁄 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀁 𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀬𑁄 𑀲𑀬𑀁, 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁, 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀁 𑀧𑀢𑀦𑀁, 𑀲𑁄 𑀧𑀝𑀺𑀳𑀦𑀦𑀪𑀸𑀯𑁄, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀓𑀸𑀭𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 ¶ 𑀯𑀺𑀲𑀬𑁂𑀲𑀼 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺. 𑀲𑁂𑀲𑀁 𑀏𑀓𑀸𑀤𑀲𑀯𑀺𑀥𑀁 𑀑𑀴𑀸𑀭𑀺𑀓𑀭𑀽𑀧𑀁. 𑀢𑀜𑁆𑀳𑀺 𑀲𑀦𑀺𑀤𑀲𑁆𑀲𑀦𑀢𑁆𑀢𑀸𑀪𑀸𑀯𑀢𑁄 𑀅𑀦𑀺𑀤𑀲𑁆𑀲𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀧𑁆𑀧𑀝𑀺𑀖𑀁. 𑀉𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁. 𑀓𑀫𑁆𑀫𑀢𑁄 𑀚𑀸𑀢𑀦𑁆𑀢𑀺 𑀏𑀢𑁆𑀣 𑀬𑀁 𑀏𑀓𑀦𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺, 𑀳𑀤𑀬𑀜𑁆𑀘𑀸𑀢𑀺 𑀦𑀯𑀯𑀺𑀥𑀁 𑀭𑀽𑀧𑀁, 𑀬𑀜𑁆𑀘 𑀦𑀯𑀯𑀺𑀥𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀦𑀯𑀯𑀺𑀥𑀫𑁂𑀯 𑀭𑀽𑀧𑀦𑁆𑀢𑀺 ¶ 𑀏𑀯𑀁 𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑀺 𑀓𑀫𑁆𑀫𑀢𑁄 𑀉𑀧𑁆𑀧𑀚𑁆𑀚𑀦𑀢𑁄 𑀓𑀫𑁆𑀫𑀚𑀁. 𑀬𑀜𑁆𑀳𑀺 𑀚𑀸𑀢𑀜𑁆𑀘 𑀬𑀜𑁆𑀘 𑀚𑀸𑀬𑀢𑀺 𑀬𑀜𑁆𑀘 𑀚𑀸𑀬𑀺𑀲𑁆𑀲𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 ‘‘𑀓𑀫𑁆𑀫𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀤𑀼𑀤𑁆𑀥𑀦𑁆𑀢𑀺. 𑀢𑀤𑀜𑁆𑀜𑀧𑀘𑁆𑀘𑀬𑀚𑀸𑀢𑀦𑁆𑀢𑀺 𑀓𑀫𑁆𑀫𑀢𑁄 𑀅𑀜𑁆𑀜𑀧𑀘𑁆𑀘𑀬𑀢𑁄 𑀚𑀸𑀢𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀁. 𑀦𑀓𑀼𑀢𑁄𑀘𑀺𑀚𑀸𑀢𑀦𑁆𑀢𑀺 𑀮𑀓𑁆𑀔𑀡𑀭𑀽𑀧𑀫𑀸𑀳. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁, 𑀲𑀤𑁆𑀤𑁄, 𑀆𑀓𑀸𑀲𑀥𑀸𑀢𑀼, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀻𑀢𑀺 𑀏𑀢𑀁 𑀧𑀜𑁆𑀘𑀤𑀲𑀯𑀺𑀥𑀁 𑀭𑀽𑀧𑀁 𑀘𑀺𑀢𑁆𑀢𑀚𑀁. 𑀆𑀓𑀸𑀲𑀥𑀸𑀢𑀼, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀻𑀢𑀺 𑀏𑀢𑀁 𑀤𑁆𑀯𑀸𑀤𑀲𑀯𑀺𑀥𑀁 𑀭𑀽𑀧𑀁 𑀆𑀳𑀸𑀭𑀚𑀁. 𑀏𑀢𑁆𑀣 𑀲𑀤𑁆𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀭𑀲𑀯𑀺𑀥𑀁 𑀭𑀽𑀧𑀁 𑀉𑀢𑀼𑀢𑁄 𑀲𑀫𑀼𑀝𑁆𑀞𑀺𑀢𑀁 𑀉𑀢𑀼𑀚𑀁. 𑀲𑁂𑀲𑀁 𑀓𑀫𑁆𑀫𑀚𑀢𑀺𑀓𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁪𑁯. 𑀤𑀺𑀝𑁆𑀞𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦, 𑀭𑀽𑀧𑀭𑀽𑀧𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦, 𑀯𑀢𑁆𑀣𑀸𑀤𑀺𑀘𑀢𑀼𑀓𑁆𑀓𑀯𑀲𑁂𑀦𑀸𑀢𑀺 𑀧𑀸𑀝𑁂𑀓𑁆𑀓𑀁 𑀘𑀢𑀼𑀓𑁆𑀓𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀬𑀁 𑀭𑀽𑀧𑀸𑀬𑀢𑀦𑀁 𑀅𑀤𑀓𑁆𑀔𑀺 𑀬𑀁 𑀧𑀲𑁆𑀲𑀢𑀺 𑀬𑀁 𑀤𑀓𑁆𑀔𑀺𑀲𑁆𑀲𑀢𑀺 𑀬𑀁 𑀧𑀲𑁆𑀲𑁂𑀬𑁆𑀬, 𑀢𑀁 𑀲𑀩𑁆𑀩𑀁 𑀤𑀺𑀝𑁆𑀞𑀁 𑀦𑀸𑀫 𑀤𑀺𑀝𑁆𑀞𑀲𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄 𑀬𑀣𑀸 𑀤𑀼𑀤𑁆𑀥𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀤𑀲𑁆𑀲𑀦𑀯𑀺𑀲𑀬𑀢𑁆𑀢𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀲𑀯𑀦𑀯𑀺𑀲𑀬𑀢𑁆𑀢𑀸𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀢𑁆𑀢𑀬𑀦𑁆𑀢𑀺 𑀕𑀦𑁆𑀥𑁄 𑀭𑀲𑁄 𑀨𑁄𑀝𑁆𑀞𑀩𑁆𑀩𑀦𑁆𑀢𑀺 𑀏𑀢𑀁 𑀢𑀬𑀁. 𑀫𑀼𑀢𑀁 𑀦𑀸𑀫 𑀫𑀼𑀢𑁆𑀯𑀸 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀢𑁆𑀢𑀸’’𑀢𑀺.

𑀓𑀺𑀫𑀺𑀤𑀁 𑀨𑁄𑀝𑁆𑀞𑀩𑁆𑀩𑀁 𑀦𑀸𑀫𑀸𑀢𑀺? 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀼𑀢𑁆𑀢𑀬𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼 𑀅𑀕𑁆𑀕𑀳𑀺𑀢𑀸, 𑀦𑀦𑀼 𑀲𑀻𑀢𑀢𑀸 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀺, 𑀲𑀸 𑀘 𑀆𑀧𑁄𑀥𑀸𑀢𑀽𑀢𑀺? 𑀲𑀘𑁆𑀘𑀁 𑀕𑀬𑁆𑀳𑀢𑀺, 𑀦 𑀧𑀦 𑀲𑀸 𑀆𑀧𑁄𑀥𑀸𑀢𑀼. 𑀓𑀺𑀜𑁆𑀘𑀭𑀳𑀻𑀢𑀺? 𑀢𑁂𑀚𑁄𑀥𑀸𑀢𑀼 𑀏𑀯. 𑀫𑀦𑁆𑀤𑁂 𑀳𑀺 𑀉𑀡𑁆𑀳𑀪𑀸𑀯𑁂 𑀲𑀻𑀢𑀩𑀼𑀤𑁆𑀥𑀺. 𑀦 𑀳𑀺 𑀲𑀻𑀢𑀁 𑀦𑀸𑀫 𑀓𑁄𑀘𑀺 𑀕𑀼𑀡𑁄 𑀅𑀢𑁆𑀣𑀺, 𑀓𑁂𑀯𑀮𑀁 𑀧𑀦 𑀉𑀡𑁆𑀳𑀪𑀸𑀯𑀲𑁆𑀲 𑀫𑀦𑁆𑀤𑀢𑀸𑀬 𑀲𑀻𑀢𑀢𑀸𑀪𑀺𑀫𑀸𑀦𑁄. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀅𑀦𑀯𑀝𑁆𑀞𑀺𑀢𑀢𑁆𑀢𑀸 𑀲𑀻𑀢𑀩𑀼𑀤𑁆𑀥𑀺𑀬𑀸 𑀬𑀣𑀸 𑀧𑀸𑀭𑀸𑀧𑀸𑀭𑁂. 𑀢𑀣𑀸 𑀳𑀺 𑀖𑀫𑁆𑀫𑀓𑀸𑀮𑁂 𑀆𑀢𑀧𑁂 𑀞𑀺𑀢𑀸𑀦𑀁 𑀙𑀸𑀬𑀁 𑀧𑀯𑀺𑀝𑁆𑀞𑀸𑀦𑀁 𑀲𑀻𑀢𑀩𑀼𑀤𑁆𑀥𑀺 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀦 𑀧𑀣𑀯𑀻𑀕𑀩𑁆𑀪𑀢𑁄 𑀉𑀝𑁆𑀞𑀺𑀢𑀸𑀦𑀁 𑀉𑀡𑁆𑀳𑀩𑀼𑀤𑁆𑀥𑀺. 𑀬𑀤𑀺 𑀳𑀺 𑀲𑀻𑀢𑀢𑀸 𑀆𑀧𑁄𑀥𑀸𑀢𑀼 𑀲𑀺𑀬𑀸, 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀉𑀧𑀮𑀩𑁆𑀪𑁂𑀬𑁆𑀬, 𑀦 𑀘 𑀉𑀧𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 𑀦 𑀆𑀧𑁄𑀥𑀸𑀢𑀼 𑀲𑀻𑀢𑀢𑀸𑀢𑀺 ¶ . 𑀇𑀤𑀜𑁆𑀘 𑀪𑀽𑀢𑀸𑀦𑀁 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀁 𑀇𑀘𑁆𑀙𑀦𑁆𑀢𑀸𑀦𑀁 𑀉𑀢𑁆𑀢𑀭𑀁, 𑀅𑀦𑀺𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀧𑀦 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀓𑀺𑀘𑁆𑀘𑀤𑀲𑁆𑀲𑀦𑁂𑀦 𑀲𑀪𑀸𑀕𑀯𑀼𑀢𑁆𑀢𑀺𑀢𑀸𑀬 𑀲𑀸𑀥𑀺𑀢𑀸𑀬 𑀉𑀢𑁆𑀢𑀭𑀫𑁂𑀯. 𑀬𑁂 𑀧𑀦 ‘‘𑀯𑀸𑀬𑁄𑀥𑀸𑀢𑀼𑀬𑀸 𑀮𑀓𑁆𑀔𑀡𑀁 𑀲𑀻𑀢𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀇𑀤𑀫𑁂𑀯 𑀉𑀢𑁆𑀢𑀭𑀁. 𑀬𑀤𑀺 𑀳𑀺 𑀯𑀸𑀬𑁄𑀥𑀸𑀢𑀼 𑀲𑀻𑀢𑀢𑀸 𑀲𑀺𑀬𑀸, 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀲𑀻𑀢𑀢𑀸 𑀉𑀧𑀮𑀩𑁆𑀪𑁂𑀬𑁆𑀬, 𑀦 𑀘 𑀉𑀧𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 𑀦 𑀯𑀸𑀬𑁄𑀥𑀸𑀢𑀼 𑀲𑀻𑀢𑀢𑀸𑀢𑀺. 𑀬𑁂𑀲𑀁 𑀧𑀦 𑀤𑁆𑀭𑀯𑀢𑀸 𑀆𑀧𑁄𑀥𑀸𑀢𑀼, 𑀲𑀸 𑀘 𑀨𑀼𑀲𑀺𑀢𑁆𑀯𑀸 ¶ 𑀕𑀬𑁆𑀳𑀢𑀻𑀢𑀺 𑀤𑀲𑁆𑀲𑀦𑀁. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀤𑁆𑀭𑀯𑀪𑀸𑀯𑁄𑀧𑀺 𑀨𑀼𑀲𑀻𑀬𑀢𑀻𑀢𑀺 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀥𑀺𑀫𑀸𑀦𑀫𑀢𑁆𑀢𑀁 𑀲𑀡𑁆𑀞𑀸𑀦𑀁 𑀯𑀺𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀼𑀭𑀸𑀢𑀦𑁂𑀳𑀺 𑁋

‘‘𑀤𑁆𑀭𑀯𑀢𑀸 𑀲𑀳𑀯𑀼𑀢𑁆𑀢𑀻𑀦𑀺, 𑀢𑀻𑀡𑀺 𑀪𑀽𑀢𑀸𑀦𑀺 𑀲𑀫𑁆𑀨𑀼𑀲𑀁;

‘𑀤𑁆𑀭𑀯𑀢𑀁 𑀲𑀫𑁆𑀨𑀼𑀲𑀸𑀫𑀻’𑀢𑀺, 𑀮𑁄𑀓𑁄𑀬𑀫𑀪𑀺𑀫𑀜𑁆𑀜𑀢𑀺.

‘‘𑀨𑀼𑀲𑀁 𑀪𑀽𑀢𑀸𑀦𑀺 𑀲𑀡𑁆𑀞𑀸𑀦𑀁, 𑀫𑀦𑀲𑀸 𑀕𑀡𑁆𑀳𑀢𑁂 𑀬𑀣𑀸;

‘𑀧𑀘𑁆𑀘𑀓𑁆𑀔𑀢𑁄 𑀨𑀼𑀲𑀸𑀫𑀻’𑀢𑀺, 𑀜𑀸𑀢𑀩𑁆𑀩𑀸 𑀤𑁆𑀭𑀯𑀢𑀸 𑀢𑀣𑀸’’𑀢𑀺.

𑀲𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀸𑀤𑀺𑀲𑀢𑁆𑀢𑀯𑀺𑀥𑀁 𑀭𑀽𑀧𑀁 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀁 𑀏𑀓𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁. 𑀯𑀺𑀜𑁆𑀜𑀸𑀡𑀲𑁆𑀲𑁂𑀯𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲𑁂𑀯. 𑀅𑀯𑀥𑀸𑀭𑀡𑁂𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑁂 𑀦𑀺𑀬𑀫𑀸𑀪𑀸𑀯𑀢𑁄 𑀦 𑀯𑀺𑀜𑁆𑀜𑀸𑀢𑀭𑀽𑀧𑀢𑀸𑀢𑀺 𑀲𑀗𑁆𑀓𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀧𑀦𑁂𑀢𑁆𑀣 𑀭𑀽𑀧𑀭𑀽𑀧𑀁 𑀦𑀸𑀫𑀸𑀢𑀺 𑀬𑀤𑁂𑀢𑁆𑀣 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂 𑀭𑀽𑀧𑁂 ‘‘𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀭𑀽𑀧𑀁, 𑀢𑀤𑁂𑀯 𑀭𑀽𑀧𑀮𑀓𑁆𑀔𑀡𑀬𑁄𑀕𑀢𑁄 𑀭𑀽𑀧𑀁. 𑀭𑀼𑀧𑁆𑀧𑀦𑀁 𑀭𑀽𑀧𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀬𑀣𑀸 𑀅𑀭𑀺𑀲𑀲𑁄𑀢𑀺, 𑀭𑀽𑀧𑀕𑀼𑀡𑀬𑁄𑀕𑀢𑁄 𑀯𑀸 𑀬𑀣𑀸 𑀦𑀻𑀮𑀕𑀼𑀡𑀬𑁄𑀕𑀢𑁄 𑀦𑀻𑀮𑀁 𑀯𑀢𑁆𑀣𑀦𑁆𑀢𑀺. 𑀲𑁆𑀯𑀸𑀬𑀁 𑀭𑀽𑀧𑀲𑀤𑁆𑀤𑁄 𑀭𑀼𑀴𑁆𑀳𑀺𑀬𑀸 𑀅𑀢𑀁𑀲𑀪𑀸𑀯𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀅𑀧𑀭𑁂𑀦 𑀭𑀽𑀧𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀭𑀽𑀧’’𑀦𑁆𑀢𑀺 𑀬𑀣𑀸 𑀢𑀺𑀮𑀢𑁂𑀮𑀁, 𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁫𑁩𑁯) 𑀘, 𑀭𑀼𑀧𑁆𑀧𑀦𑀲𑀪𑀸𑀯𑀁 𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁, 𑀆𑀓𑀸𑀲𑀥𑀸𑀢𑀼𑀆𑀤𑀻𑀦𑀁 𑀓𑀣𑀁 𑀭𑀽𑀧𑀪𑀸𑀯𑁄𑀢𑀺? 𑀦𑀺𑀧𑁆𑀨𑀦𑁆𑀦𑀭𑀽𑀧𑀲𑁆𑀲 𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀮𑀓𑁆𑀔𑀡𑀪𑀸𑀯𑀢𑁄 𑀢𑀕𑁆𑀕𑀢𑀺𑀓𑀫𑁂𑀯𑀸𑀢𑀺 ‘‘𑀭𑀽𑀧’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑀯𑀲𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀢𑁆𑀣𑀼, 𑀘𑀺𑀢𑁆𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀥𑀸𑀭𑀪𑀽𑀢𑀁 𑀭𑀽𑀧𑀁. 𑀢𑀁 𑀧𑀦 𑀙𑀩𑁆𑀩𑀺𑀥𑀁. 𑀢𑀢𑁆𑀣 𑀳𑀤𑀬𑀭𑀽𑀧𑀁 𑀯𑀢𑁆𑀣𑀼 𑀏𑀯 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀦 𑀤𑁆𑀯𑀸𑀭𑀁 𑀅𑀜𑁆𑀜𑀦𑀺𑀲𑁆𑀲𑀬𑀸𑀦𑀁 𑀘𑀓𑁆𑀔𑀸𑀤𑀺 𑀯𑀺𑀬. 𑀬𑀣𑀸 𑀳𑀺 𑀘𑀓𑁆𑀔𑀸𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀧𑀯𑀢𑁆𑀢𑀺𑀬𑀸 𑀤𑁆𑀯𑀸𑀭𑀁 𑀳𑁄𑀦𑁆𑀢𑀺, 𑀦 ¶ 𑀏𑀯𑀁 𑀳𑀤𑀬𑀯𑀢𑁆𑀣𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀧𑀦𑁂𑀢𑁆𑀣 𑀳𑀤𑀬𑀭𑀽𑀧𑀁 𑀦𑀸𑀫, 𑀢𑀁 𑀯𑀢𑁆𑀣𑀼, 𑀦 𑀤𑁆𑀯𑀸𑀭’’𑀦𑁆𑀢𑀺. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀤𑁆𑀯𑀸𑀭𑀁 𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑀢𑁄. 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀢𑁄 𑀦 𑀯𑀢𑁆𑀣𑀼. 𑀧𑀲𑀸𑀤𑀭𑀽𑀧𑀁 𑀯𑀢𑁆𑀣𑀼 𑀘𑁂𑀯 𑀅𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀓𑀲𑁆𑀲, 𑀤𑁆𑀯𑀸𑀭𑀜𑁆𑀘 𑀅𑀜𑁆𑀜𑀦𑀺𑀲𑁆𑀲𑀺𑀢𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀓𑀲𑁆𑀲. 𑀲𑁂𑀲𑀁 𑀏𑀓𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀦𑁂𑀯 𑀯𑀢𑁆𑀣𑀼 𑀦 𑀘 𑀤𑁆𑀯𑀸𑀭𑀁.

𑁪𑁫𑁦. 𑀏𑀓𑀢𑁄 ¶ 𑀏𑀯 𑀚𑀸𑀢𑀁 𑀏𑀓𑀚𑀁. 𑀦𑀦𑀼 𑀘 𑀏𑀓𑀢𑁄 𑀏𑀯 𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀭𑀽𑀧𑀚𑀦𑀓𑀧𑀘𑁆𑀘𑀬𑁂𑀲𑀼 𑀏𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀭𑀽𑀧𑀼𑀧𑁆𑀧𑀢𑁆𑀢𑀺 𑀭𑀽𑀧𑀚𑀦𑀓𑀢𑁄 𑀅𑀜𑁆𑀜𑀁 𑀧𑀘𑁆𑀘𑀬𑀁 𑀅𑀧𑁂𑀓𑁆𑀔𑀢𑀺. 𑀤𑁆𑀯𑀺𑀚𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀦𑁆𑀢𑀺 𑀇𑀫𑁂𑀲𑀁 𑀧𑀪𑁂𑀤𑀸𑀦𑀁 𑀯𑀲𑁂𑀦. 𑀓𑀫𑁆𑀫𑀚𑀫𑁂𑀯𑀸𑀢𑀺 𑀓𑀫𑁆𑀫𑀢𑁄 𑀏𑀯 𑀚𑀸𑀢𑀁. 𑀘𑀺𑀢𑁆𑀢𑀚𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀺𑀢𑁆𑀢𑀢𑁄 𑀘 𑀉𑀢𑀼𑀢𑁄 𑀘 𑀚𑀸𑀢𑀦𑁆𑀢𑀺 𑀓𑀸𑀮𑁂𑀦 𑀘𑀺𑀢𑁆𑀢𑀢𑁄, 𑀓𑀸𑀮𑁂𑀦 𑀉𑀢𑀼𑀢𑁄𑀢𑀺 𑀏𑀯𑀁 𑀘𑀺𑀢𑁆𑀢𑀢𑁄 𑀘 𑀉𑀢𑀼𑀢𑁄 𑀘 𑀚𑀸𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀁 𑀤𑁆𑀯𑀺𑀚𑀁 𑀤𑁆𑀯𑀻𑀳𑀺 𑀚𑀸𑀢𑀦𑁆𑀢𑀺. 𑀧𑀭𑀢𑁄 𑀤𑁆𑀯𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑁆𑀤𑀸𑀬𑀢𑀦𑀫𑁂𑀯𑀸𑀢𑀺 𑀏𑀢𑁆𑀣 𑀬𑀁 𑀘𑀺𑀢𑁆𑀢𑀚𑀁 𑀲𑀤𑁆𑀤𑀸𑀬𑀢𑀦𑀁, 𑀢𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀫𑁂𑀯𑀸𑀢𑀺 𑀏𑀓𑁂. 𑀅𑀯𑀺𑀜𑁆𑀜𑀢𑁆𑀢𑀺𑀓𑁄𑀧𑀺 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄𑀢𑀺 𑀧𑁄𑀭𑀸𑀡𑀸.

𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀳𑀺 𑀏𑀯𑀁 𑀧𑀯𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀤𑁆𑀤𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀦𑀸𑀧𑀺 𑀉𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺 ‘‘𑀓𑀸𑀬𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀦 𑀲𑀤𑁆𑀤𑁂𑀦 𑀲𑀳 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀦𑁆𑀢𑁂 𑀘𑀺𑀢𑁆𑀢𑀚𑁂𑀦𑀸𑀧𑀺 𑀲𑀤𑁆𑀤𑀦𑀯𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀲𑁄 𑀘 𑀯𑀸𑀤𑁄 ‘‘𑀲𑀤𑁆𑀤𑁄 𑀘 𑀳𑁄𑀢𑀺, 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀘𑀸’’𑀢𑀺 𑀯𑀺𑀭𑀼𑀤𑁆𑀥𑀫𑁂𑀯𑁂𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀳𑀺 𑀲𑀗𑁆𑀕𑀳𑀓𑀸𑀭𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀅𑀧𑀭𑁂 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀡𑁆𑀡𑁂𑀦𑁆𑀢𑀺. 𑀓𑀣𑀁? ‘‘𑀚𑀺𑀯𑁆𑀳𑀸𑀢𑀸𑀮𑀼𑀘𑀮𑀦𑀸𑀤𑀺𑀓𑀁 𑀯𑀺𑀢𑀓𑁆𑀓𑀲𑀫𑀼𑀝𑁆𑀞𑀺𑀢𑀁 𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀫𑁂𑀯 𑀲𑀼𑀔𑀼𑀫𑀲𑀤𑁆𑀤𑀁 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸 𑀆𑀤𑀺𑀲𑀢𑀻’’𑀢𑀺 𑀲𑀼𑀢𑁆𑀢𑁂, 𑀧𑀝𑁆𑀞𑀸𑀦𑁂 𑀘 𑀑𑀴𑀸𑀭𑀺𑀓𑀁 𑀲𑀤𑁆𑀤𑀁 𑀲𑀦𑁆𑀥𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀲𑁆𑀲 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸𑀢𑀺. 𑀢𑀁 𑀘𑀢𑀼𑀚𑀁. 𑀅𑀯𑀲𑁂𑀲𑀦𑁆𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀦 𑀲𑀤𑁆𑀥𑀺𑀁 𑀆𑀓𑀸𑀲𑀥𑀸𑀢𑀼𑀫𑀸𑀳.

𑀮𑀓𑁆𑀔𑀡𑀭𑀽𑀧𑀁 ¶ 𑀧𑀦 𑀦𑀓𑀼𑀢𑁄𑀘𑀺𑀚𑀸𑀢𑀦𑁆𑀢𑀺 𑀓𑀼𑀢𑁄𑀘𑀺𑀧𑀺 𑀧𑀘𑁆𑀘𑀬𑀢𑁄 𑀦 𑀚𑀸𑀢𑀁, 𑀦𑀸𑀧𑀺 𑀲𑀬𑀫𑁂𑀯 𑀚𑀸𑀢𑀁 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀲𑀬𑀫𑁂𑀯 𑀚𑀸𑀢𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄. 𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀮𑀓𑁆𑀔𑀡𑀭𑀽𑀧𑀁 𑀦 𑀚𑀸𑀬𑀢𑀻𑀢𑀺? 𑀮𑀓𑁆𑀔𑀡𑀸𑀪𑀸𑀯𑀢𑁄. 𑀉𑀧𑁆𑀧𑀢𑁆𑀢𑀺𑀫𑀦𑁆𑀢𑀸𑀦𑀁 𑀳𑀺 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀚𑀸𑀢𑀺𑀆𑀤𑀻𑀦𑀺 𑀮𑀓𑁆𑀔𑀡𑀸𑀦𑀺 𑀯𑀺𑀚𑁆𑀚𑀦𑁆𑀢𑀺, 𑀦 𑀏𑀯𑀁 𑀚𑀸𑀢𑀺𑀆𑀤𑀻𑀦𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀢𑀩𑁆𑀩𑀫𑁂𑀢𑀁 𑀚𑀸𑀢𑀺𑀆𑀤𑀻𑀦𑀺 𑀦 𑀚𑀸𑀬𑀦𑁆𑀢𑀻𑀢𑀺. 𑀲𑀺𑀬𑀸 𑀧𑀦𑁂𑀢𑀁 ‘‘𑀚𑀸𑀢𑀺𑀆𑀤𑀻𑀦𑀁 𑀚𑀸𑀢𑀺𑀆𑀤𑀻𑀦𑀺 𑀮𑀓𑁆𑀔𑀡𑀸𑀦𑀺 𑀯𑀺𑀚𑁆𑀚𑀦𑁆𑀢𑀻’’𑀢𑀺? 𑀢𑀁 𑀦, 𑀓𑀲𑁆𑀫𑀸? 𑀢𑀣𑀸 𑀲𑀢𑀺 𑀅𑀦𑀯𑀝𑁆𑀞𑀸𑀦𑀸𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀚𑀸𑀢𑀺𑀆𑀤𑀻𑀦𑀺 𑀚𑀸𑀢𑀺𑀆𑀤𑀺𑀫𑀦𑁆𑀢𑀸𑀦𑀺 𑀲𑀺𑀬𑀼𑀁, 𑀢𑀸𑀦𑀺𑀧𑀺 𑀚𑀸𑀢𑀺𑀆𑀤𑀺𑀫𑀦𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀚𑀸𑀢𑀺𑀆𑀤𑀺𑀫𑀦𑁆𑀢𑀸𑀦𑀻𑀢𑀺 𑀅𑀦𑀯𑀝𑁆𑀞𑀸𑀦𑀫𑁂𑀯 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁 ‘‘𑀚𑀸𑀢𑀺𑀆𑀤𑀻𑀦𑀺 ¶ 𑀦 𑀚𑀸𑀬𑀦𑁆𑀢𑀻’’𑀢𑀺. 𑀢𑁂𑀦𑀸𑀳 ‘‘𑀦 𑀳𑀺 𑀉𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀅𑀢𑁆𑀣𑀺, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀧𑀭𑀺𑀧𑀸𑀓𑀪𑁂𑀤𑀫𑀢𑁆𑀢𑀁 𑀇𑀢𑀭𑀤𑁆𑀯𑀬’’𑀦𑁆𑀢𑀺, 𑀚𑀭𑀸𑀫𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 ‘‘𑀉𑀧𑁆𑀧𑀸𑀤𑁄 𑀦𑀢𑁆𑀣𑀻’’𑀢𑀺 𑀏𑀢𑁂𑀦 𑀉𑀧𑁆𑀧𑀸𑀤𑀲𑁆𑀲 𑀚𑀭𑀸𑀫𑀭𑀡𑀸𑀪𑀸𑀯𑀫𑀸𑀳. 𑀅𑀲𑀢𑀺 𑀉𑀧𑁆𑀧𑀸𑀤𑁂 𑀓𑀼𑀢𑁄 𑀚𑀭𑀸𑀫𑀭𑀡𑀦𑁆𑀢𑀺 𑀫𑀢𑁆𑀢𑀕𑁆𑀕𑀳𑀡𑁂𑀦 𑀚𑀭𑀸𑀫𑀭𑀡𑀲𑁆𑀲 𑀉𑀧𑁆𑀧𑀸𑀤𑀸𑀪𑀸𑀯𑀫𑁆𑀧𑀺. 𑀬𑀤𑀺 𑀏𑀯𑀁 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺 𑀚𑀸𑀢𑀢𑀸𑀯𑀘𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀬𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀤𑀺𑀝𑁆𑀞𑀢𑁆𑀢𑀸𑀢𑀺 𑀬𑁂 𑀢𑁂 𑀘𑀺𑀢𑁆𑀢𑀸𑀤𑀬𑁄 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀭𑀽𑀧𑀸𑀦𑀁 𑀚𑀦𑀓𑀧𑀘𑁆𑀘𑀬𑀸, 𑀢𑁂𑀲𑀁 𑀢𑀤𑀼𑀧𑁆𑀧𑀸𑀤𑀦𑀁 𑀧𑀢𑀺 𑀅𑀦𑀼𑀧𑀭𑀢𑀩𑁆𑀬𑀸𑀧𑀸𑀭𑀸𑀦𑀁 𑀬𑁄 𑀲𑁄 𑀧𑀘𑁆𑀘𑀬𑀪𑀸𑀯𑀽𑀧𑀮𑀓𑁆𑀔𑀡𑀻𑀬𑁄 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁄, 𑀢𑀤𑀸 𑀚𑀸𑀬𑀫𑀸𑀦𑀸𑀦𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺 𑀧𑀘𑁆𑀘𑀬𑀢𑁄 𑀚𑀸𑀢𑀢𑁆𑀢𑀁 𑀧𑀸𑀴𑀺𑀬𑀁 𑀅𑀦𑀼𑀜𑁆𑀜𑀸𑀢𑀁 𑀬𑀣𑀸 𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸𑀤𑀺 𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁂𑀳𑀺 𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀭𑀽𑀧𑀸𑀤𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀓𑁆𑀔𑀡𑁂 𑀉𑀧𑀮𑀩𑁆𑀪𑀫𑀸𑀦𑀸 𑀭𑀽𑀧𑀸𑀤𑀬𑁄 𑀢𑀢𑁄 𑀧𑀼𑀭𑁂, 𑀧𑀘𑁆𑀙𑀸 𑀘 𑀅𑀦𑀼𑀧𑀮𑀩𑁆𑀪𑀫𑀸𑀦𑀸 𑀢𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀚𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀺 𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺 𑀚𑀸𑀢𑀢𑀸 𑀲𑀺𑀤𑁆𑀥𑀸, 𑀅𑀣 𑀓𑀲𑁆𑀫𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀚𑀸𑀬𑀫𑀸𑀦𑀥𑀫𑁆𑀫𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀬𑀤𑀺 𑀳𑀺 𑀥𑀫𑁆𑀫𑁄 𑀯𑀺𑀬 𑀉𑀧𑀮𑀩𑁆𑀪𑁂𑀬𑁆𑀬 𑀚𑀸𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁄𑀯 𑀢𑀲𑁆𑀲𑀸 𑀓𑀼𑀢𑁄𑀘𑀺 𑀚𑀸𑀢𑀪𑀸𑀯𑁄, 𑀦 𑀏𑀯𑀫𑀼𑀧𑀮𑀩𑁆𑀪𑀢𑀺, 𑀅𑀣 𑀔𑁄 𑀯𑀺𑀓𑀸𑀭𑀪𑀸𑀯𑁂𑀦. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦𑀸’’𑀢𑀺.

𑀢𑀤𑀸 𑀓𑀺𑀭 𑀲𑁄𑀢𑀽𑀦𑀁 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 ‘‘𑀅𑀬𑀁 𑀚𑀸𑀢𑀺 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀧𑀪𑀯𑁄, 𑀲𑀬𑀜𑁆𑀘 𑀦 𑀓𑀼𑀢𑁄𑀘𑀺 𑀚𑀸𑀬𑀢𑀺 𑀬𑀣𑀸 𑀢𑀁 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀻’’𑀢𑀺, 𑀢𑀁 ¶ 𑀦𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀯𑀺𑀥𑀫𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀓𑀼𑀢𑁄𑀘𑀺 𑀧𑀘𑁆𑀘𑀬𑀢𑁄 𑀚𑀸𑀢𑀜𑁆𑀘 𑀓𑀢𑁆𑀯𑀸 𑀤𑁂𑀲𑁂𑀲𑀺, 𑀦 𑀧𑀦 𑀚𑀭𑀸𑀫𑀭𑀡𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀅𑀤𑀲𑁆𑀲𑀦𑀢𑁄. 𑀬𑀤𑀺 𑀏𑀯𑀁 𑀓𑀣𑀁 ‘‘𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀯𑀼𑀢𑁆𑀢𑀁? 𑀬𑀲𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀧𑀸𑀓𑀪𑀗𑁆𑀕𑀢𑀸𑀬 𑀢𑁂𑀲𑀼 𑀲𑀦𑁆𑀢𑁂𑀲𑀼 𑀳𑁄𑀦𑁆𑀢𑀺, 𑀦 𑀅𑀲𑀦𑁆𑀢𑁂𑀲𑀼. 𑀦 𑀳𑀺 𑀅𑀚𑀸𑀢𑀁 𑀧𑀭𑀺𑀧𑀘𑁆𑀘𑀢𑀺, 𑀪𑀺𑀚𑁆𑀚𑀢𑀺 𑀯𑀸, 𑀢𑀲𑁆𑀫𑀸 𑀢𑀁 𑀚𑀸𑀢𑀺𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 ‘‘𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀧𑀭𑀺𑀬𑀸𑀬𑁂𑀦 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀁. 𑀬𑁄 𑀧𑀦𑁂𑀢𑁆𑀣 𑀓𑀸𑀫𑀪𑀯𑀸𑀤𑀻𑀲𑀼 𑀓𑀫𑁆𑀫𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀬𑁄𑀦𑀺𑀯𑀺𑀪𑀸𑀕𑀢𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑀺𑀬𑀜𑁆𑀘 𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁄 𑀯𑀢𑁆𑀢𑀩𑁆𑀩𑁄, 𑀲𑁄 𑀧𑀭𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀭𑀽𑀧𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀬𑀁 ¶ 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀤𑀻𑀧𑀓𑁂𑀦 𑀧𑀤𑀤𑁆𑀯𑀬𑁂𑀦 𑀯𑁂𑀤𑀬𑀺𑀢𑀲𑁆𑀲 𑀩𑀳𑀼𑀪𑁂𑀤𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀼𑀘𑁆𑀘𑀫𑀸𑀦𑀁 𑀭𑀸𑀲𑀝𑁆𑀞𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀯𑁂𑀤𑀬𑀺𑀢𑀁 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀁. 𑀲𑀩𑁆𑀩𑀁 𑀢𑀁 𑀥𑀫𑁆𑀫𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀧𑀼𑀩𑁆𑀩𑁂 𑀯𑀸 𑀭𑀽𑀧𑀓𑁆𑀔𑀦𑁆𑀥𑀓𑀣𑀸𑀬𑀁 𑀯𑀼𑀢𑁆𑀢𑀁 𑀅𑀥𑀺𑀓𑀸𑀭𑀢𑁄 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀲𑀩𑁆𑀩𑀁 𑀢𑀁 𑀩𑀼𑀤𑁆𑀥𑀺𑀬𑀸 𑀏𑀓𑀢𑁄 𑀓𑀢𑁆𑀯𑀸. 𑀏𑀯𑀜𑁆𑀳𑀺 𑀭𑀸𑀲𑀝𑁆𑀞𑀲𑁆𑀲 𑀲𑀫𑁆𑀪𑀯𑁄. 𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀲𑀜𑁆𑀚𑀸𑀦𑀦𑀁, ‘‘𑀦𑀻𑀮𑀁 𑀧𑀻𑀢𑀁 𑀤𑀻𑀖𑀁 𑀭𑀲𑁆𑀲’’𑀦𑁆𑀢𑀺 (𑀥. 𑀲. 𑁬𑁧𑁫) 𑀘 𑀆𑀤𑀺𑀦𑀸 𑀲𑀜𑁆𑀜𑀼𑀧𑁆𑀧𑀸𑀤𑀯𑀲𑁂𑀦 𑀚𑀸𑀦𑀦𑀁 𑀕𑀳𑀡𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁. 𑀅𑀪𑀺𑀲𑀗𑁆𑀔𑀭𑀡𑀁 𑀆𑀬𑀽𑀳𑀦𑀁 𑀩𑁆𑀬𑀸𑀧𑀸𑀭𑀸𑀧𑀢𑁆𑀢𑀺, 𑀅𑀪𑀺𑀲𑀦𑁆𑀤𑀳𑀦𑀁 𑀯𑀸, 𑀉𑀪𑀬𑀣𑀸𑀧𑀺 𑀘𑁂𑀢𑀦𑀸𑀧𑀥𑀸𑀦𑀢𑀸𑀬 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀏𑀯𑀁 𑀯𑀼𑀢𑁆𑀢𑀁 ‘‘𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡’’𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁧) 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸. 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼𑀁 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀬𑁂𑀦 𑀲𑀜𑁆𑀚𑀸𑀦𑀦𑀸𑀓𑀸𑀭𑀯𑀺𑀲𑀺𑀝𑁆𑀞𑁂𑀦 𑀆𑀓𑀸𑀭𑁂𑀦 𑀯𑀺𑀲𑀬𑀁 𑀕𑀡𑁆𑀳𑀸𑀢𑀺, 𑀢𑀁 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺𑀲𑀗𑁆𑀔𑀸𑀢𑀁 𑀯𑀺𑀚𑀸𑀦𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀯𑀺𑀚𑀸𑀦𑀦𑀮𑀓𑁆𑀔𑀡𑀁. 𑀇𑀢𑀭𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀡𑁂𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀢𑁄, 𑀲𑀫𑀸𑀦𑀚𑀸𑀢𑀺𑀆𑀤𑀺𑀯𑀺𑀪𑀸𑀕𑀢𑁄 𑀘.

𑀅𑀢𑁆𑀢𑀦𑀸 ¶ ‘‘𑀯𑀺𑀚𑀸𑀦𑀦𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀢𑀁, 𑀬𑀤𑀺𑀤𑀁 𑀲𑀪𑀸𑀯𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀚𑀸𑀦𑀦𑀮𑀓𑁆𑀔𑀡’’𑀦𑁆𑀢𑀺 𑀪𑀸𑀯𑀲𑀸𑀥𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀪𑀸𑀯𑀸 𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀢𑀲𑁆𑀲𑁂𑀯 𑀓𑀢𑁆𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁, 𑀢𑀤𑁂𑀯 𑀘𑀺𑀦𑁆𑀢𑀦𑀸𑀤𑀺𑀅𑀢𑁆𑀣𑁂𑀦 𑀘𑀺𑀢𑁆𑀢𑀁, 𑀫𑀦𑀦𑀝𑁆𑀞𑁂𑀦 𑀫𑀦𑁄𑀢𑀺 𑀧𑀭𑀺𑀬𑀸𑀬𑀢𑁄𑀧𑀺 𑀦𑀁 𑀩𑁄𑀥𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀔𑀦𑁆𑀥𑀢𑁄, 𑀪𑁂𑀤𑀢𑁄, 𑀧𑀭𑀺𑀬𑀸𑀬𑀢𑁄 𑀘 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀺.

𑀚𑀸𑀬𑀦𑁆𑀢𑀺 𑀏𑀢𑁆𑀣 𑀯𑀺𑀲𑀤𑀺𑀲𑀸𑀧𑀺 𑀲𑀤𑀺𑀲𑀸𑀓𑀸𑀭𑀸𑀢𑀺 𑀚𑀸𑀢𑀺, 𑀲𑀫𑀸𑀦𑀸𑀓𑀸𑀭𑁄. 𑀲𑀸 𑀧𑀦𑀸𑀬𑀁 𑀚𑀸𑀢𑀺 𑀓𑀸𑀫𑀁 𑀅𑀦𑁂𑀓𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀸, 𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀜𑁆𑀘𑀸’’𑀢𑀺 𑀆𑀳. 𑀢𑀢𑁆𑀣 𑀓𑀼𑀲𑀮𑀝𑁆𑀞𑁂𑀦 𑀓𑀼𑀲𑀮𑀁. 𑀓𑁄𑀬𑀁 𑀓𑀼𑀲𑀮𑀝𑁆𑀞𑁄 𑀦𑀸𑀫? 𑀆𑀭𑁄𑀕𑁆𑀬𑀝𑁆𑀞𑁄 𑀅𑀦𑀯𑀚𑁆𑀚𑀝𑁆𑀞𑁄 𑀲𑀼𑀔𑀯𑀺𑀧𑀸𑀓𑀝𑁆𑀞𑁄. 𑀆𑀭𑁄𑀕𑁆𑀬𑀝𑁆𑀞𑁂𑀦𑀸𑀧𑀺 𑀳𑀺 𑀓𑀼𑀲𑀮𑀁 𑀯𑀼𑀘𑁆𑀘𑀢𑀺 ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯). 𑀅𑀦𑀯𑀚𑁆𑀚𑀝𑁆𑀞𑁂𑀦𑀸𑀧𑀺 ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀼𑀲𑀮𑁄 𑀓𑀸𑀬𑀲𑀫𑀸𑀘𑀸𑀭𑁄? 𑀬𑁄 𑀔𑁄, 𑀫𑀳𑀸𑀭𑀸𑀚 ¶ , 𑀅𑀦𑀯𑀚𑁆𑀚𑁄 𑀓𑀸𑀬𑀲𑀫𑀸𑀘𑀸𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁬𑁧). 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦𑀸𑀧𑀺 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦). 𑀓𑀼𑀲𑀮𑀘𑀺𑀢𑁆𑀢𑀜𑁆𑀳𑀺 𑀭𑀸𑀕𑀸𑀤𑀻𑀦𑀁 𑀘𑁂𑀢𑀲𑀺𑀓𑀭𑁄𑀕𑀸𑀦𑀁 𑀅𑀯𑀚𑁆𑀚𑀲𑀪𑀸𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀢𑁄 𑀘 𑀅𑀭𑁄𑀕𑀁, 𑀅𑀦𑀯𑀚𑁆𑀚𑀁, 𑀲𑀼𑀔𑀯𑀺𑀧𑀸𑀓𑀜𑁆𑀘𑀸𑀢𑀺.

𑀲𑀤𑁆𑀤𑀢𑁆𑀣𑀢𑁄 𑀧𑀦 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀢𑀺 𑀘𑀮𑀬𑀢𑀺 𑀓𑀫𑁆𑀫𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀧𑀸𑀧𑀥𑀫𑁆𑀫𑀸, 𑀢𑁂 𑀓𑀼𑀲𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀮𑀸𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀁. 𑀬𑀣𑀸 𑀯𑀸 𑀓𑀼𑀲𑁄 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑀤𑁂𑀲𑀁 𑀮𑀼𑀦𑀸𑀢𑀺, 𑀏𑀯𑀫𑀺𑀤𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀯𑀲𑁂𑀦 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀓𑀼𑀲𑁄 𑀯𑀺𑀬 𑀮𑀼𑀦𑀸𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀮𑀦𑀢𑁄 𑀲𑀁𑀯𑀭𑀡𑀢𑁄 𑀓𑀼𑀲𑀮𑀁. 𑀓𑀼𑀲𑀮𑀥𑀫𑁆𑀫𑀯𑀲𑁂𑀦 𑀳𑀺 𑀅𑀓𑀼𑀲𑀮𑀸 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦, 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑀸𑀧𑀸𑀤𑀦𑁂𑀦 𑀘 𑀫𑀦𑀘𑁆𑀙𑀝𑁆𑀞𑁂𑀲𑀼 𑀤𑁆𑀯𑀸𑀭𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸 𑀳𑁄𑀦𑁆𑀢𑀺. 𑀓𑀼𑀘𑁆𑀙𑀺𑀢𑁂 𑀯𑀸 𑀧𑀸𑀧𑀥𑀫𑁆𑀫𑁂 𑀲𑀮𑀬𑀢𑀺 𑀓𑀫𑁆𑀧𑁂𑀢𑀺 𑀅𑀧𑀦𑁂𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 ¶ 𑀲𑀸𑀦𑀢𑁄 𑀦𑀺𑀲𑀸𑀦𑀢𑁄 𑀢𑁂𑀚𑀦𑀢𑁄 𑀓𑀼𑀲𑀸, 𑀤𑁄𑀲𑀮𑁄𑀪𑀸𑀤𑀬𑁄. 𑀤𑁄𑀲𑀸𑀤𑀻𑀦𑀜𑁆𑀳𑀺 𑀯𑀲𑁂𑀦 𑀘𑁂𑀢𑀦𑀸𑀬 𑀢𑀺𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀢𑀸, 𑀢𑁂 𑀓𑀼𑀲𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀅𑀦𑁆𑀢𑀓𑀭𑀡𑀢𑁄 𑀯𑀺𑀦𑀸𑀲𑀦𑀢𑁄 𑀓𑀼𑀲𑀸𑀦𑀺, 𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀳𑀺 𑀮𑀸𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀁. ‘‘𑀓𑀼’’ 𑀇𑀢𑀺 𑀯𑀸 𑀪𑀽𑀫𑀺 𑀯𑀼𑀘𑁆𑀘𑀢𑀺, 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀢𑀁𑀲𑀤𑀺𑀲𑀲𑁆𑀲 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀭𑀽𑀧𑀸𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀅𑀦𑀼𑀤𑀳𑀦𑁂𑀦 𑀯𑀺𑀦𑀸𑀲𑀦𑀢𑁄 𑀓𑀼𑀁 𑀲𑀺𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀭𑀸𑀕𑀸𑀤𑀬𑁄, 𑀢𑁂 𑀯𑀺𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑁆𑀲 𑀮𑀯𑀦𑀢𑁄 𑀙𑀺𑀦𑁆𑀤𑀦𑀢𑁄 𑀓𑀼𑀲𑀮𑀁. 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸 𑀅𑀘𑁆𑀘𑀦𑁆𑀢𑀫𑁂𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺.

𑀦 𑀓𑀼𑀲𑀮𑀦𑁆𑀢𑀺 𑀅𑀓𑀼𑀲𑀮𑀁, 𑀓𑀼𑀲𑀮𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀦 𑀓𑀼𑀲𑀮𑀦𑁆𑀢𑀺 𑀳𑀺 𑀓𑀼𑀲𑀮𑀧𑀝𑀺𑀓𑁆𑀔𑁂𑀧𑁂𑀦 𑀅𑀓𑀼𑀲𑀮𑀧𑀤𑀲𑁆𑀲 𑀅𑀯𑀬𑀯𑀪𑁂𑀤𑁂𑀦 𑀅𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂 𑀬𑀣𑀸 𑀬𑀁 𑀥𑀫𑁆𑀫𑀚𑀸𑀢𑀁 𑀦 𑀅𑀭𑁄𑀕𑀁, 𑀦 𑀅𑀦𑀯𑀚𑁆𑀚𑀁, 𑀦 𑀲𑀼𑀔𑀯𑀺𑀧𑀸𑀓𑀁, 𑀦 𑀘 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁, 𑀢𑀁 𑀅𑀓𑀼𑀲𑀮𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀏𑀯𑀁 𑀬𑀁 𑀦 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀲𑀪𑀸𑀯𑀁, 𑀦 𑀓𑀼𑀲𑀸𑀦𑀁 𑀮𑀯𑀦𑀲𑀪𑀸𑀯𑀁, 𑀦 𑀓𑀼𑀲𑁂𑀦 𑀓𑀼𑀲𑁂𑀳𑀺 𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀁, 𑀦 𑀘 𑀓𑀼𑀲𑁄 𑀯𑀺𑀬 𑀮𑀯𑀦𑀓𑀁, 𑀢𑀁 𑀅𑀓𑀼𑀲𑀮𑀁 𑀦𑀸𑀫𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀓𑀼𑀲𑀮𑀁 𑀅𑀓𑀼𑀲𑀮𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀁, 𑀬𑀢𑁄 𑀘𑁂𑀢𑀲𑀺𑀓𑀭𑁄𑀕𑀧𑀝𑀺𑀧𑀓𑁆𑀔𑀸𑀤𑀺𑀪𑀸𑀯𑀢𑁄 𑀅𑀭𑁄𑀕𑀸𑀤𑀺𑀧𑀭𑀺𑀬𑀸𑀬𑁂𑀦𑀧𑀺 ¶ 𑀩𑁄𑀥𑀺𑀢𑀁, 𑀢𑀲𑁆𑀫𑀸 𑀅𑀓𑀼𑀲𑀮𑀁 𑀧𑀦 𑀓𑀼𑀲𑀮𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀓𑀼𑀲𑀮𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀢𑀁 𑀧𑀦 𑀬𑀣𑀸𑀓𑁆𑀓𑀫𑀁 𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑀪𑀸𑀯𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀦 𑀩𑁆𑀬𑀸𑀓𑀢𑀦𑁆𑀢𑀺 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀼𑀲𑀮𑀪𑀸𑀯𑁄 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀝𑁆𑀞𑁄. 𑀅𑀓𑀼𑀲𑀮𑀪𑀸𑀯𑁄 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁄, 𑀢𑀤𑀼𑀪𑀬𑀪𑀸𑀯𑁂𑀦 𑀅𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦𑁂𑀯 𑀅𑀭𑁄𑀕𑀲𑀭𑁄𑀕𑀸𑀤𑀺𑀪𑀸𑀯𑁂𑀦 𑀘 𑀅𑀯𑀼𑀢𑁆𑀢𑀢𑀸 𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 ‘‘𑀓𑀼𑀲𑀮𑀁 𑀅𑀓𑀼𑀲𑀮’’𑀦𑁆𑀢𑀺 𑀘 𑀯𑀢𑁆𑀯𑀸 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦𑁂𑀯 𑀅𑀯𑀼𑀢𑁆𑀢𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀓𑀸𑀭𑀦𑁆𑀢𑀭𑁂𑀦. 𑀅𑀯𑀼𑀢𑁆𑀢𑀢𑀸 𑀘𑁂𑀢𑁆𑀣 𑀦 𑀢𑀣𑀸 𑀅𑀯𑀢𑁆𑀢𑀩𑁆𑀩𑀢𑀸𑀫𑀢𑁆𑀢𑁂𑀦, 𑀅𑀣 𑀔𑁄 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯𑀢𑀸𑀬 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑁂𑀢𑀁 ‘‘𑀅𑀯𑀺𑀧𑀸𑀓𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁪𑁫𑁨. 𑀪𑀽𑀫𑀺𑀪𑁂𑀤𑀢𑁄𑀢𑀺 𑀪𑀯𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀸𑀢𑀺 𑀪𑀽𑀫𑀺, 𑀞𑀸𑀦𑀁, 𑀅𑀯𑀢𑁆𑀣𑀸 𑀘. 𑀅𑀯𑀢𑁆𑀣𑀸𑀧𑀺 𑀳𑀺 𑀅𑀯𑀢𑁆𑀣𑀸𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀺𑀬 𑀕𑀬𑁆𑀳𑀢𑀺, 𑀏𑀯𑀁 𑀦𑁂𑀲𑀁 𑀲𑀼𑀔𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 ¶ . 𑀢𑀢𑁆𑀣 𑀮𑁄𑀓𑀺𑀬𑀸 𑀪𑀽𑀫𑀺 𑀞𑀸𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀮𑁄𑀓𑀼𑀢𑁆𑀢𑀭𑀸 𑀅𑀯𑀢𑁆𑀣𑀸𑀯𑀲𑁂𑀦. 𑀮𑁄𑀓𑀺𑀬𑀸 𑀯𑀸 𑀞𑀸𑀦𑀸𑀯𑀢𑁆𑀣𑀸𑀯𑀲𑁂𑀦, 𑀮𑁄𑀓𑀼𑀢𑁆𑀢𑀭𑀸 𑀅𑀯𑀢𑁆𑀣𑀸𑀯𑀲𑁂𑀦𑁂𑀯. 𑀓𑀸𑀫𑀸𑀯𑀘𑀭𑀦𑁆𑀢𑀺 𑀏𑀢𑁆𑀣 𑀯𑀢𑁆𑀣𑀼𑀓𑀸𑀫𑁄 𑀓𑀺𑀮𑁂𑀲𑀓𑀸𑀫𑁄𑀢𑀺 𑀤𑁆𑀯𑁂 𑀓𑀸𑀫𑀸. 𑀢𑁂𑀲𑀼 𑀯𑀢𑁆𑀣𑀼𑀓𑀸𑀫𑁄 𑀯𑀺𑀲𑁂𑀲𑀢𑁄 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀫𑀻𑀬𑀦𑁆𑀢𑀻𑀢𑀺, 𑀓𑀺𑀮𑁂𑀲𑀓𑀸𑀫𑁄 𑀢𑀡𑁆𑀳𑀸 𑀓𑀸𑀫𑁂𑀢𑀻𑀢𑀺. 𑀢𑁂 𑀤𑁆𑀯𑁂𑀧𑀺 𑀲𑀳𑀺𑀢𑀸 𑀳𑀼𑀢𑁆𑀯𑀸 𑀬𑀢𑁆𑀣 𑀅𑀯𑀘𑀭𑀦𑁆𑀢𑀺, 𑀢𑀁 𑀓𑀸𑀫𑀸𑀯𑀘𑀭𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀏𑀓𑀸𑀤𑀲𑀯𑀺𑀥𑁄 𑀓𑀸𑀫𑀪𑀯𑁄. 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀢𑀢𑁆𑀣 𑀅𑀯𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑀸𑀫𑀸𑀯𑀘𑀭𑀁 𑀏𑀓𑀲𑁆𑀲 𑀅𑀯𑀘𑀭𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸. 𑀏𑀯𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀭𑀽𑀧𑀢𑀡𑁆𑀳𑀸 𑀭𑀽𑀧𑀁, 𑀅𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀦𑁆𑀢𑀺 𑀓𑀢𑁆𑀯𑀸. 𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀅𑀯𑀘𑀭𑀁, 𑀓𑀸𑀫𑀲𑁆𑀲 𑀅𑀯𑀘𑀭𑀁 𑀓𑀸𑀫𑀸𑀯𑀘𑀭𑀁. 𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀮𑁄𑀓𑀢𑁄 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁 𑀓𑀼𑀲𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀢𑀭𑀁 𑀧𑀦 𑀮𑁄𑀓𑀢𑁄 𑀉𑀢𑁆𑀢𑀺𑀡𑁆𑀡𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁.

𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄𑀢𑀺 𑀏𑀢𑁆𑀣 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀪𑁂𑀤𑁄 𑀢𑀸𑀯 𑀬𑀼𑀢𑁆𑀢𑁄 𑀢𑁂𑀲𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸, 𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁄 𑀧𑀦 𑀓𑀣𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄 𑀜𑀸𑀡𑀲𑀗𑁆𑀔𑀸𑀭𑀓𑀢𑁄 𑀪𑁂𑀤𑁄𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁄, 𑀲𑁄 𑀘 𑀢𑁂𑀲𑀁 𑀪𑀸𑀯𑀸𑀪𑀸𑀯𑀓𑀢𑁄𑀢𑀺 𑀓𑀢𑁆𑀯𑀸. 𑀲𑁄𑀪𑀦𑀁 𑀫𑀦𑁄, 𑀲𑀼𑀦𑁆𑀤𑀭𑀁 𑀯𑀸 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀲𑀼𑀫𑀦𑁄, 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁, 𑀫𑀸𑀦𑀲𑀺𑀓𑀲𑀼𑀔𑀸 𑀯𑁂𑀤𑀦𑀸 𑀭𑀼𑀴𑁆𑀳𑀺𑀬𑀸, 𑀲𑁄𑀫𑀦𑀲𑁆𑀲𑁂𑀦 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀲𑀳𑀕𑀢𑀁 𑀧𑀯𑀢𑁆𑀢𑀁 𑀲𑀁𑀲𑀝𑁆𑀞𑀁, 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸 𑀘𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀝𑁆𑀞𑀸𑀭𑀫𑁆𑀫𑀡𑁂 𑀳𑀺 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑁄𑀢𑀺. 𑀦𑀦𑀼 𑀘 𑀇𑀝𑁆𑀞𑀸𑀭𑀫𑁆𑀫𑀡𑀁 𑀮𑁄𑀪𑀲𑁆𑀲 𑀯𑀢𑁆𑀣𑀼, 𑀓𑀣𑀁 ¶ 𑀢𑀢𑁆𑀣 𑀓𑀼𑀲𑀮𑀁 𑀳𑁄𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁 𑀇𑀝𑁆𑀞𑁂𑀧𑀺 𑀆𑀪𑁄𑀕𑀸𑀤𑀺𑀯𑀲𑁂𑀦 𑀓𑀼𑀲𑀮𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀬𑀲𑁆𑀲 𑀳𑀺 𑀘𑀢𑀼𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀲𑀫𑀸𑀬𑁄𑀕𑀸𑀤𑀺𑀯𑀲𑁂𑀦 𑀬𑁄𑀦𑀺𑀲𑁄𑀯 𑀆𑀪𑁄𑀕𑁄 𑀳𑁄𑀢𑀺, 𑀓𑀼𑀲𑀮𑀫𑁂𑀯 𑀘 𑀫𑀬𑀸 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀓𑀭𑀡𑁂 𑀘𑀺𑀢𑁆𑀢𑀁 𑀦𑀺𑀬𑀫𑀺𑀢𑀁, 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀢𑁄 𑀘 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑀓𑀭𑀡𑁂 𑀏𑀯 𑀧𑀭𑀺𑀡𑀸𑀫𑀺𑀢𑀁, 𑀅𑀪𑀺𑀡𑁆𑀳𑀓𑀭𑀡𑀯𑀲𑁂𑀦 𑀘 𑀲𑀫𑀼𑀤𑀸𑀘𑀭𑀺𑀢𑀁, 𑀢𑀲𑁆𑀲 𑀇𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀮𑁄𑀪𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁.

𑀜𑀸𑀡𑁂𑀦 ¶ 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁. 𑀏𑀓𑀼𑀧𑁆𑀧𑀸𑀤𑀸𑀤𑀬𑁄 𑀏𑀯 𑀘𑁂𑀢𑁆𑀣 𑀧𑀓𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀫𑁆𑀫𑀽𑀧𑀧𑀢𑁆𑀢𑀺𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀓𑀸𑀭𑀡𑀁. 𑀬𑁄 𑀳𑀺 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀦𑀯𑀚𑁆𑀚𑀸𑀦𑀺 𑀲𑀺𑀧𑁆𑀧𑀸𑀬𑀢𑀦𑀓𑀫𑁆𑀫𑀸𑀬𑀢𑀦𑀯𑀺𑀚𑁆𑀚𑀝𑁆𑀞𑀸𑀦𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀏𑀯𑀫𑀸𑀤𑀺𑀓𑀁 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀅𑀩𑁆𑀬𑀸𑀧𑀚𑁆𑀚𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀉𑀧𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀲𑁆𑀲 𑀢𑀢𑁆𑀣 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺, 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄, 𑀅𑀣 𑀔𑁄 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀪𑀸𑀕𑀻 (𑀅. 𑀦𑀺. 𑁪.𑁧𑁯𑁧) 𑀳𑁄𑀢𑀻’’𑀢𑀺. 𑀢𑀣𑀸 𑀧𑀜𑁆𑀜𑀸𑀤𑀲𑀓𑀧𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀦 𑀧𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀢𑀲𑁆𑀲 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀁 𑀦𑀺𑀲𑁆𑀲𑀸𑀬 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑁄𑀕𑀸 𑀯𑁂 𑀚𑀸𑀬𑀢𑁂 𑀪𑀽𑀭𑀺, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄’’𑀢𑀺 (𑀥. 𑀧. 𑁨𑁮𑁨). 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀲𑀫𑀼𑀲𑁆𑀲𑀸𑀳𑀚𑀦𑀺𑀢𑀁 𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑀁 𑀲𑀗𑁆𑀔𑀭𑀡𑀁 𑀲𑀗𑁆𑀔𑀸𑀭𑁄, 𑀲𑁄 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑀸𑀭𑀁. 𑀢𑁂𑀦 𑀧𑀦 𑀲𑀳 𑀲𑀗𑁆𑀔𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀲𑀲𑀗𑁆𑀔𑀸𑀭𑀁. 𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀺𑀭𑀳𑀺𑀢𑀦𑁆𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁. 𑀯𑀺𑀧𑁆𑀧𑀬𑁄𑀕𑁄𑀢𑀺 𑀘𑁂𑀢𑁆𑀣 𑀜𑀸𑀡𑀲𑁆𑀲 𑀅𑀪𑀸𑀯𑁄 𑀅𑀧𑁆𑀧𑀯𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑁂𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀯𑁂𑀤𑀬𑀫𑀸𑀦𑀸𑀧𑀺 𑀆𑀭𑀫𑁆𑀫𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀫𑀚𑁆𑀛𑀢𑁆𑀢𑀢𑀸𑀓𑀸𑀭𑀲𑀡𑁆𑀞𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑁂𑀢𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀦𑁆𑀢𑀺 𑀉𑀧𑁂𑀓𑁆𑀔𑀸. 𑀅𑀣 𑀯𑀸 𑀇𑀝𑁆𑀞𑁂 𑀘 𑀅𑀦𑀺𑀝𑁆𑀞𑁂 𑀘 𑀆𑀭𑀫𑁆𑀫𑀡𑁂 𑀧𑀓𑁆𑀔𑀧𑀸𑀢𑀸𑀪𑀸𑀯𑁂𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀅𑀦𑀼𑀪𑀯𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀢𑀸𑀬 𑀲𑀳𑀕𑀢𑀦𑁆𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀲𑀓𑀸𑀮𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀕𑁆𑀕𑀳𑀡𑁂𑀦 𑀲𑀤𑁆𑀥𑀸𑀩𑀳𑀼𑀮𑀢𑀸, 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸, 𑀓𑀼𑀲𑀮𑀓𑀺𑀭𑀺𑀬𑀸𑀬 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸, 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀢𑀸, 𑀏𑀓𑀸𑀤𑀲 ¶ 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 ‘‘𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺𑀆𑀤𑀻𑀦𑀁 (𑀫. 𑀦𑀺. 𑁧.𑁪𑁪𑁧; 𑁨.𑁯𑁫) 𑀦𑀯𑀦𑁆𑀦𑀁𑀬𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀢𑁆𑀣𑀽𑀦𑀁 𑀕𑀳𑀡𑀁, 𑀅𑀣 𑀔𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀤𑀻𑀦𑀫𑁆𑀧𑀺 ¶ 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀢𑀜𑁆𑀘 𑀔𑁄 𑀲𑀳𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑀯𑀲𑁂𑀦 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧-𑁨) 𑀯𑀺𑀬 𑀲𑀫𑁆𑀧𑀬𑁄𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀲𑀁𑀲𑀻𑀤𑀦𑁆𑀢𑁄𑀢𑀺 𑀲𑀺𑀮𑁄𑀓𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀁 𑀲𑀁𑀲𑀻𑀤𑀁 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀦𑁆𑀢𑁄, 𑀢𑁂𑀦 𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀲𑁆𑀲𑀸𑀳𑀺𑀢𑁄𑀢𑀺 𑀓𑁂𑀦𑀘𑀺𑀧𑀺 𑀦 𑀉𑀲𑁆𑀲𑀸𑀳𑀺𑀢𑁄. 𑀲𑀭𑀲𑀢𑁄 𑀳𑀺 𑀧𑀼𑀜𑁆𑀜𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀺𑀤𑀁. 𑀧𑀭𑁂𑀳𑀻𑀢𑀺 𑀧𑀦 𑀧𑀸𑀓𑀝𑀼𑀲𑁆𑀲𑀸𑀳𑀦𑀤𑀲𑁆𑀲𑀦𑀁.

𑀤𑀸𑀦𑀸𑀤𑀻𑀦𑀻𑀢𑀺 𑀤𑀸𑀦𑀁 𑀲𑀻𑀮𑀁 𑀬𑀸𑀯 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀇𑀫𑀸𑀦𑀺 𑀤𑀸𑀦𑀸𑀤𑀻𑀦𑀺 𑀤𑀲 𑀧𑀼𑀜𑁆𑀜𑀸𑀦𑀺, 𑀤𑀸𑀦𑀸𑀤𑀻𑀦𑀻𑀢𑀺 𑀯𑀸 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀬𑀸𑀦𑀺 𑀇𑀢𑀭𑁂𑀲𑀫𑁆𑀧𑀺 𑀲𑀢𑁆𑀢𑀦𑁆𑀦𑀁 𑀏𑀢𑁆𑀣𑁂𑀯𑀦𑁆𑀢𑁄𑀕𑀥𑀢𑁆𑀢𑀸. 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀲𑀦𑁆𑀢𑀸𑀦𑀁 𑀧𑀼𑀦𑀦𑁆𑀢𑀺, 𑀧𑀼𑀚𑁆𑀚𑀁 𑀪𑀯𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀯𑀸 𑀧𑀼𑀜𑁆𑀜𑀸𑀦𑀺. 𑀅𑀲𑁆𑀲 𑀧𑀼𑀜𑁆𑀜𑀘𑁂𑀢𑀦𑀸𑀲𑀫𑀗𑁆𑀕𑀺𑀦𑁄. 𑀅𑀫𑀼𑀢𑁆𑀢𑀘𑀸𑀕𑀢𑀸 𑀤𑁂𑀬𑁆𑀬𑀥𑀫𑁆𑀫𑁂 𑀲𑀸𑀧𑁂𑀓𑁆𑀔𑀘𑀺𑀢𑁆𑀢𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀻𑀮𑀲𑀫𑀸𑀤𑀸𑀦𑀸𑀤𑀻𑀲𑀼 𑀅𑀦𑀥𑀺𑀫𑀼𑀢𑁆𑀢𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀤𑁂𑀯𑀸𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀦𑀸 𑀲𑀤𑀺𑀲𑀢𑀸𑀬 𑀯𑀼𑀢𑁆𑀢𑀁. 𑀲𑀤𑀺𑀲𑀫𑁆𑀧𑀺 𑀳𑀺 ‘‘𑀢𑀤𑁂𑀯𑀸’’𑀢𑀺 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂𑀢𑀺 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀲𑁆𑀲𑀸𑀳𑀦𑀧𑀬𑁄𑀕𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀏𑀢𑀦𑁆𑀢𑀺 ‘‘𑀲𑀗𑁆𑀔𑀸𑀭𑁄’’𑀢𑀺 𑀏𑀢𑀁 𑀧𑀤𑀁. 𑀧𑀼𑀩𑁆𑀩𑀧𑀬𑁄𑀕𑀲𑁆𑀲𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀁 𑀲𑀗𑁆𑀓𑁄𑀘𑁂 𑀚𑀸𑀬𑀫𑀸𑀦𑁂 𑀢𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀲𑀫𑀼𑀲𑁆𑀲𑀸𑀳𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀬𑁄𑀕𑀲𑁆𑀲, 𑀧𑀼𑀩𑁆𑀩𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀲𑁄 𑀲𑀗𑁆𑀔𑀸𑀭𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀧𑀼𑀩𑁆𑀩𑀓𑀸𑀮𑀺𑀓𑀢𑁆𑀢𑀸. ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁪𑁧; 𑁨.𑁯𑁫) 𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀩𑀸𑀮-𑀕𑁆𑀕𑀳𑀡𑀁. 𑀲𑀁𑀲𑀻𑀤𑀦𑀼𑀲𑁆𑀲𑀸𑀳𑀦𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀳𑀲𑀸-𑀕𑀳𑀡𑀁. 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑀣𑀸𑀭𑀽𑀧𑀘𑁂𑀢𑁄𑀲𑀗𑁆𑀔𑀸𑀭𑀸𑀤𑀬𑁄𑀧𑀺 𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀸𑀬 𑀓𑀸𑀭𑀡𑀁 𑀳𑁄𑀦𑁆𑀢𑀺𑀬𑁂𑀯𑀸𑀢𑀺.

𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀢𑀬𑀺𑀤𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀘𑀺𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀬𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀁 𑀯𑀸 𑀢𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ¶ 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀬𑀤𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀤𑀸 𑀲𑁄𑀴𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 ¶ 𑀨𑀮𑀦𑁆𑀢𑀺. 𑀬𑀤𑀸 𑀧𑀦 𑀤𑀼𑀳𑁂𑀢𑀼𑀓𑀁, 𑀢𑀤𑀸 𑀤𑁆𑀯𑀸𑀤𑀲 𑀢𑀺𑀳𑁂𑀢𑀼𑀓𑀯𑀚𑁆𑀚𑀸𑀦𑀺. 𑀅𑀳𑁂𑀢𑀼𑀓𑀁 𑀧𑀦 𑀧𑀝𑀺𑀲𑀦𑁆𑀥𑀺𑀁 𑀢𑀺𑀳𑁂𑀢𑀼𑀓𑀸𑀦𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑁂𑀯, 𑀤𑀼𑀳𑁂𑀢𑀼𑀓𑀸𑀦𑀺 𑀧𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀤𑀸𑀦𑀓𑀸𑀮𑁂 𑀤𑁆𑀯𑀸𑀤𑀲, 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀤𑀸𑀦𑀓𑀸𑀮𑁂 𑀅𑀝𑁆𑀞 𑀨𑀮𑀦𑁆𑀢𑀺. 𑀢𑀺𑀳𑁂𑀢𑀼𑀓𑀸 𑀧𑀦 𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑁂𑀳𑀺 𑀦 𑀳𑁄𑀢𑀺𑀬𑁂𑀯. ‘‘𑀅𑀝𑁆𑀞 𑀨𑀮𑀦𑁆𑀢𑀻’’𑀢𑀺 𑀘𑁂𑀢𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑀓𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀧𑀦 𑀓𑀫𑁆𑀫𑀼𑀦𑀸 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀯𑀘𑀦𑀢𑁄 𑀲𑀳𑁂𑀢𑀼𑀓𑀫𑁆𑀧𑀺 𑀯𑀺𑀧𑀸𑀓𑀘𑀺𑀢𑁆𑀢𑀁 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀳𑁄𑀢𑀺𑀬𑁂𑀯. 𑀇𑀫𑀲𑁆𑀫𑀺𑀁 𑀘 𑀧𑀓𑁆𑀔𑁂 𑀩𑀮𑀯𑀢𑀸 𑀧𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀁, 𑀤𑀼𑀩𑁆𑀩𑀮𑁂𑀦 𑀲𑀲𑀗𑁆𑀔𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀧𑀦 𑀆𑀕𑀫𑀦𑀢𑁄 𑀘 𑀯𑀺𑀧𑀸𑀓𑀲𑁆𑀲 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀪𑀸𑀯𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀤𑁆𑀯𑀸𑀤𑀲, 𑀅𑀝𑁆𑀞 𑀘 𑀨𑀮𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀢𑀺𑀥𑀸 𑀨𑀮𑀁 𑀤𑀤𑀦𑁆𑀢𑀜𑁆𑀘𑁂𑀢𑀁 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀉𑀧𑀧𑀢𑁆𑀢𑀺𑀁, 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀪𑁄𑀕𑀲𑀫𑁆𑀧𑀤𑀜𑁆𑀘 𑀓𑀭𑁄𑀢𑀺. 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 𑀳𑀺 𑀬𑀁 𑀤𑁂𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀪𑁄𑀕𑀚𑀸𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯 𑀨𑀮𑀁. 𑀦 𑀳𑀺 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑀁 𑀨𑀮𑀁 𑀅𑀢𑁆𑀣𑀻𑀢𑀺.

𑀭𑀽𑀧𑀸𑀯𑀘𑀭𑀁 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀢𑁂𑀦 𑀬𑀣𑀸 𑀓𑀸𑀫𑀸𑀯𑀘𑀭𑀁 𑀓𑀺𑀮𑁂𑀲𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀫𑀢𑁆𑀢𑀓𑀭𑀁, 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀓𑀭𑀁. 𑀬𑀣𑀸 𑀯𑀸 𑀢𑀁 𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀥𑀸 𑀪𑀺𑀚𑁆𑀚𑀢𑀺, 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀢𑀢𑁄 𑀅𑀜𑁆𑀜𑀣𑀸 𑀯𑀸𑀢𑀺 𑀯𑀓𑁆𑀔𑀫𑀸𑀦𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀢𑀁 𑀧𑀦𑁂𑀢𑀁 𑀲𑀯𑀢𑁆𑀣𑀼𑀓𑀁, 𑀲𑀸𑀲𑀯𑀁, 𑀯𑀺𑀦𑀻𑀯𑀭𑀡𑀜𑁆𑀘 𑀭𑀽𑀧𑀸𑀯𑀘𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀯𑀢𑁆𑀣𑀼𑀓𑀁 𑀏𑀯𑀸’’𑀢𑀺 𑀳𑀺 𑀇𑀫𑀺𑀦𑀸 𑀅𑀭𑀽𑀧𑀸𑀯𑀘𑀭𑀁 𑀦𑀺𑀯𑀢𑁆𑀢𑁂𑀢𑀺, ‘‘𑀲𑀸𑀲𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀞𑀫𑀫𑀕𑁆𑀕𑀘𑀺𑀢𑁆𑀢𑀁, ‘‘𑀯𑀺𑀦𑀻𑀯𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀖𑀲𑀳𑀺𑀢𑀤𑁆𑀯𑀬𑀁. 𑀓𑀢𑁆𑀣𑀘𑀺 𑀧𑀜𑁆𑀘 𑀛𑀸𑀦𑀗𑁆𑀕𑀸𑀦𑀺, 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀤𑁆𑀯𑁂, 𑀓𑀢𑁆𑀣𑀘𑀺 𑀅𑀧𑀭𑀸𑀦𑀺 𑀤𑁆𑀯𑁂𑀢𑀺 𑀏𑀯𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀛𑀸𑀦𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁧.𑁭𑁯 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯. 𑀢𑀬𑀺𑀤𑀁 𑀪𑀸𑀯𑀦𑀸𑀫𑀬𑀫𑁂𑀯 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀆𑀮𑀫𑁆𑀩𑀺𑀢𑁆𑀯𑀸 𑀬𑀣𑀸𑀭𑀳𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀧𑀦𑁂𑀢𑀁 𑀬𑀣𑀸𑀓𑁆𑀓𑀫𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀲𑀼 𑀲𑁄𑀴𑀲𑀲𑀼𑀧𑀺 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀭𑀽𑀧𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀸𑀤𑀺𑀦𑀸 ¶ 𑀲𑀫𑀥𑀺𑀕𑀦𑁆𑀢𑀩𑁆𑀩𑀁 𑀅𑀭𑀽𑀧𑀸𑀯𑀘𑀭𑀁. 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸𑀲𑀫𑀸𑀥𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀳𑀺. 𑀓𑀭𑀡𑁂 𑀳𑀺 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀭𑀽𑀧𑀸𑀦𑀁 𑀯𑀸 𑀬𑁄 𑀆𑀭𑀫𑁆𑀫𑀡𑀸𑀤𑀺𑀓𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀬𑁄𑀕𑁄 𑀬𑁄𑀕𑀪𑁂𑀤𑁄, 𑀢𑀲𑁆𑀲 𑀯𑀲𑁂𑀦. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 𑀳𑁂𑀝𑁆𑀞𑀸 𑀆𑀭𑀼𑀧𑁆𑀧𑀓𑀣𑀸𑀬𑀁 ¶ (𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁫 𑀆𑀤𑀬𑁄) 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀧𑀞𑀫𑀦𑁆𑀢𑀺 𑀧𑀞𑀫𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀦𑀺𑀫𑀸𑀦𑀺 𑀪𑀸𑀯𑀦𑀸𑀫𑀬𑀸𑀦𑁂𑀯 𑀳𑀼𑀢𑁆𑀯𑀸 𑀬𑀣𑀸𑀦𑀼𑀧𑀼𑀩𑁆𑀩𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁, 𑀦𑀢𑁆𑀣𑀺𑀪𑀸𑀯𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑀸𑀦𑀺 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀢𑀽𑀲𑀼 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀻𑀦𑀺. 𑀲𑁂𑀲𑀁 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀙𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀲𑀫𑀥𑀺𑀕𑀦𑁆𑀢𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀁. 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀘𑀢𑀼𑀫𑀕𑁆𑀕𑀲𑀫𑁆𑀧𑀬𑁄𑀕𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀫𑁆𑀧𑀬𑁄𑀕𑀢𑁄. 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀘𑁂𑀢𑀁 𑀪𑀸𑀯𑀦𑀸𑀫𑀬𑀫𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀮𑀫𑁆𑀩𑀺𑀢𑁆𑀯𑀸 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀦𑀸𑀫𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀢𑁆𑀢𑀪𑀯𑀸𑀤𑀺𑀪𑀯𑀽𑀧𑀧𑀢𑁆𑀢𑀺𑀦𑀺𑀯𑀢𑁆𑀢𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁫𑁩. 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀏𑀢𑁆𑀣 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀫𑁆𑀧𑀺 𑀅𑀓𑀼𑀲𑀮𑀁 𑀇𑀘𑁆𑀙𑀦𑁆𑀢𑀻𑀢𑀺 𑀢𑁂𑀲𑀁 𑀫𑀢𑀺𑀦𑀺𑀲𑁂𑀥𑀦𑀢𑁆𑀣𑀁 𑀓𑀸𑀫𑀸𑀯𑀘𑀭𑀕𑁆𑀕𑀳𑀡𑀁. 𑀫𑀳𑀕𑁆𑀕𑀢𑀪𑀽𑀫𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀫𑁆𑀧𑀺 𑀢𑀢𑁆𑀣 𑀭𑀽𑀧𑀥𑀸𑀢𑀼𑀬𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀦𑁆𑀢𑀫𑁆𑀧𑀺 𑀏𑀓𑀦𑁆𑀢𑁂𑀦 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀁. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺? 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀓𑀣𑀁 𑀯𑀼𑀢𑁆𑀢𑀁? ‘‘𑀓𑀸𑀫𑀢𑀡𑁆𑀳𑀸 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑀢𑁄, 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀅𑀯𑀘𑀭𑀁, 𑀓𑀸𑀫𑀲𑁆𑀲 𑀅𑀯𑀘𑀭𑀁 𑀓𑀸𑀫𑀸𑀯𑀘𑀭’’𑀦𑁆𑀢𑀺. 𑀏𑀢𑁆𑀣 𑀳𑀺 𑀓𑀸𑀫𑀢𑀡𑁆𑀳𑀸𑀯𑀺𑀲𑀬𑀢𑀸 ‘‘𑀓𑀸𑀫𑀸𑀯𑀘𑀭𑀪𑀸𑀯𑀲𑁆𑀲 𑀓𑀸𑀭𑀡𑀁’’ 𑀯𑀼𑀢𑁆𑀢𑀸 𑀬𑀣𑀸 𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀯𑀺𑀲𑀬𑀢𑀸 ‘‘𑀭𑀽𑀧𑀸𑀭𑀽𑀧𑀸𑀯𑀘𑀭𑀪𑀸𑀯𑀲𑁆𑀲’’. 𑀏𑀓𑀁𑀲𑁂𑀦 𑀘𑁂𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀩𑁆𑀬𑀸𑀧𑀺𑀮𑀓𑁆𑀔𑀡𑀁 𑀦 𑀲𑀺𑀬𑀸. 𑀬𑀤𑀺 𑀳𑀺 𑀆𑀮𑀫𑁆𑀩𑀺𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀪𑀽𑀫𑀺𑀯𑀯𑀢𑁆𑀣𑀸𑀦𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀢𑀺 𑀅𑀦𑀸𑀭𑀫𑁆𑀫𑀡𑀸𑀦𑀁 𑀲𑀗𑁆𑀕𑀳𑁄 𑀦 𑀲𑀺𑀬𑀸. 𑀅𑀣 𑀯𑀺𑀧𑀸𑀓𑀤𑀸𑀦𑀯𑀲𑁂𑀦, 𑀏𑀯𑀫𑁆𑀧𑀺 𑀅𑀯𑀺𑀧𑀸𑀓𑀸𑀦𑀁 𑀲𑀗𑁆𑀕𑀳𑁄 𑀦 𑀲𑀺𑀬𑀸. 𑀢𑀲𑁆𑀫𑀸 𑀆𑀮𑀫𑁆𑀩𑀡𑀥𑀫𑁆𑀫𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀸 𑀓𑀸𑀢𑀩𑁆𑀩𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀦 𑀮𑁄𑀓𑀢𑁄 𑀉𑀢𑁆𑀢𑀺𑀡𑁆𑀡𑀢𑀸𑀬 𑀮𑁄𑀓𑀼𑀢𑁆𑀢𑀭𑀢𑀸, 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀧𑀭𑀺𑀬𑀸𑀧𑀦𑁆𑀦𑀸𑀢𑀺 ¶ 𑀘 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀢𑀡𑁆𑀳𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀆𑀧𑀦𑁆𑀦𑀸, 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘𑁂𑀢𑁆𑀣 𑀓𑀸𑀫𑀢𑀡𑁆𑀳𑀸 𑀓𑀢𑀫𑀸? 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀭𑀫𑁆𑀫𑀡𑀸 𑀢𑀡𑁆𑀳𑀸, 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀓𑀢𑀫𑁂? 𑀓𑀸𑀫𑀢𑀡𑁆𑀳𑀸𑀯𑀺𑀲𑀬𑀸𑀢𑀺 𑀇𑀢𑀭𑁂𑀢𑀭𑀲𑀦𑁆𑀦𑀺𑀲𑁆𑀲𑀬𑀢𑀸𑀤𑁄𑀲𑁄𑀢𑀺? 𑀦𑀬𑀺𑀤𑀫𑁂𑀯𑀁 𑀅𑀯𑀻𑀘𑀺𑀆𑀤𑀺𑀏𑀓𑀆𑀤𑀲𑁄𑀓𑀸𑀲𑀦𑀺𑀦𑁆𑀦𑀢𑀸𑀬 𑀓𑀜𑁆𑀘𑀺 𑀢𑀡𑁆𑀳𑀁 𑀓𑀸𑀫𑀢𑀡𑁆𑀳𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀢𑀁𑀲𑀪𑀸𑀯𑀸𑀬 𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑁂𑀦 ¶ 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 𑀉𑀧𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 (𑀥. 𑀲. 𑁯𑁮𑁫 𑀆𑀤𑀬𑁄) ‘‘𑀏𑀢𑁆𑀣𑀸𑀯𑀘𑀭𑀸’’𑀢𑀺 𑀯𑀘𑀦𑀁 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀸𑀬 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀤𑁄𑀓𑀸𑀲𑀢𑀸 𑀘 𑀢𑀡𑁆𑀳𑀸𑀬 𑀢𑀦𑁆𑀦𑀺𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸.

𑀫𑀽𑀮𑀢𑁄 𑀢𑀺𑀯𑀺𑀥𑀦𑁆𑀢𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀮𑁄𑀪𑀸𑀤𑀻𑀦𑀺, 𑀢𑁂𑀲𑀁 𑀯𑀲𑁂𑀦 𑀢𑀁𑀲𑀳𑀺𑀢𑀫𑁆𑀧𑀺 𑀢𑀺𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀓𑀸𑀭𑀡𑀢𑁆𑀢𑀸 𑀫𑀽𑀮𑀫𑀺𑀯𑀸𑀢𑀺 𑀫𑀽𑀮𑀸𑀦𑀺, 𑀮𑁄𑀪𑁄 𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀮𑁄𑀪𑀫𑀽𑀮𑀁. 𑀅𑀲𑀸𑀥𑀸𑀭𑀡𑁂𑀦 𑀦𑀺𑀤𑁆𑀤𑁂𑀲𑁄 𑀬𑀣𑀸 𑀪𑁂𑀭𑀺𑀲𑀤𑁆𑀤𑁄, 𑀬𑀯𑀗𑁆𑀓𑀼𑀭𑁄𑀢𑀺. 𑀢𑀣𑀸 𑀤𑁄𑀲𑀫𑀽𑀮𑀁. 𑀫𑁄𑀳𑁄 𑀏𑀯 𑀫𑀽𑀮𑀁 𑀇𑀫𑀲𑁆𑀲, 𑀦𑀸𑀜𑁆𑀜𑀦𑁆𑀢𑀺 𑀫𑁄𑀳𑀫𑀽𑀮𑀁.

𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀭𑀪𑁂𑀤𑀢𑁄𑀢𑀺 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀪𑁂𑀤𑀢𑁄 𑀤𑀺𑀝𑁆𑀞𑀺𑀕𑀢𑀪𑁂𑀤𑀢𑁄 𑀲𑀗𑁆𑀔𑀸𑀭𑀪𑁂𑀤𑀢𑁄𑀢𑀺 𑀧𑀘𑁆𑀘𑁂𑀓𑀁 𑀪𑁂𑀤𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀕𑀽𑀣𑀕𑀢𑀁, 𑀫𑀼𑀢𑁆𑀢𑀕𑀢’’𑀦𑁆𑀢𑀺 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀬𑀣𑀸. 𑀅𑀣 𑀯𑀸 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀢𑀸𑀬 𑀤𑀺𑀝𑁆𑀞𑀺𑀬𑀸 𑀕𑀢𑀫𑁂𑀯, 𑀦 𑀏𑀢𑁆𑀣 𑀕𑀦𑁆𑀢𑀩𑁆𑀩𑀯𑀢𑁆𑀣𑀼 𑀢𑀣𑀸 𑀲𑀪𑀸𑀯𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀢𑀬𑀺𑀤𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁨, 𑁨𑁦𑁩, 𑁪𑁨𑁭; 𑁩.𑁨𑁭-𑁨𑁯) 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄 𑀮𑁄𑀪𑁂𑀦𑁂𑀯 𑀲𑀤𑁆𑀥𑀺𑀁 𑀧𑀯𑀢𑁆𑀢𑀢𑀺, 𑀦 𑀤𑁄𑀲𑁂𑀦.

𑀬𑀤𑀸𑀳𑀻𑀢𑀺𑀆𑀤𑀺 𑀮𑁄𑀪𑀫𑀽𑀮𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀆𑀤𑀺𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁. 𑀢𑀸𑀬 𑀳𑀺 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀲𑀢𑁆𑀢𑀸 ‘‘𑀏𑀢𑀸𑀯𑀓𑁄 𑀚𑀻𑀯𑀯𑀺𑀲𑀬𑁄 𑀬𑀸𑀯 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑁄’’𑀢𑀺 𑀧𑀭𑀮𑁄𑀓𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑀺 𑀬𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀲 𑀧𑀦𑁆𑀣𑁄 𑀧𑀕𑁂𑀯 𑀯𑀺𑀳𑀺𑀢𑁄 𑀤𑁂𑀯𑀬𑀸𑀦𑁂, 𑀬𑁂𑀦 𑀬𑀦𑁆𑀢𑀺 𑀧𑀼𑀢𑁆𑀢𑀯𑀦𑁆𑀢𑁄 𑀯𑀺𑀲𑁄𑀓𑀸. 𑀢𑀁 𑀧𑀲𑁆𑀲𑀦𑁆𑀢𑀺 𑀧𑀲𑀯𑁄, 𑀧𑀓𑁆𑀔𑀺𑀦𑁄 𑀘, 𑀢𑁂𑀦 𑀢𑁂 𑀫𑀸𑀢𑀭𑀺𑀧𑀺 𑀫𑀺𑀣𑀼𑀦𑀁 𑀘𑀭𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀁 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁄𑀢𑀺 𑀏𑀯𑀫𑀸𑀤𑀺𑀓𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀸𑀫𑁂 ¶ 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀯𑀡𑁆𑀡𑀳𑀭𑀡𑀫𑁂𑀯 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀸𑀯𑀚𑁆𑀚𑀁, 𑀇𑀢𑀭𑀁 𑀅𑀦𑀯𑀚𑁆𑀚𑀁. 𑀕𑀭𑀽𑀦𑀁, 𑀕𑀼𑀦𑁆𑀦𑀁, 𑀅𑀢𑁆𑀢𑀦𑁄, 𑀚𑀻𑀯𑀺𑀢𑀲𑁆𑀲, 𑀯𑀺𑀯𑀸𑀳𑀲𑁆𑀲 𑀘 𑀅𑀢𑁆𑀣𑀸𑀬 𑀫𑀼𑀲𑀸𑀯𑀸𑀤𑁄 𑀅𑀦𑀯𑀚𑁆𑀚𑁄, 𑀇𑀢𑀭𑁄 𑀲𑀸𑀯𑀚𑁆𑀚𑁄. 𑀕𑀭𑀼𑀆𑀤𑀻𑀦𑀁 𑀅𑀢𑁆𑀣𑀸𑀬 𑀧𑁂𑀲𑀼𑀜𑁆𑀜𑀳𑀭𑀡𑀁 𑀅𑀦𑀯𑀚𑁆𑀚𑀁, 𑀇𑀢𑀭𑀁 𑀲𑀸𑀯𑀚𑁆𑀚𑀁. 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀓𑀣𑀸 𑀧𑀸𑀧𑀯𑀽𑀧𑀲𑀫𑀸𑀬 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀓𑁂 𑀫𑀺𑀘𑁆𑀙𑀸𑀕𑀸𑀳𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀻𑀢𑀺 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑀸𑀦𑀺. 𑀲𑀪𑀸𑀯𑀢𑀺𑀓𑁆𑀔𑁂𑀦𑀸𑀢𑀺 𑀮𑁄𑀪𑀲𑁆𑀲, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 ¶ 𑀯𑀸 𑀯𑀲𑁂𑀦 𑀲𑀭𑀲𑁂𑀦𑁂𑀯 𑀢𑀺𑀔𑀺𑀡𑁂𑀦 𑀓𑀼𑀭𑀽𑀭𑁂𑀦. 𑀫𑀦𑁆𑀤𑁂𑀦𑀸𑀢𑀺 𑀤𑀦𑁆𑀥𑁂𑀦 𑀅𑀢𑀺𑀔𑀺𑀡𑁂𑀦. 𑀢𑀸𑀤𑀺𑀲𑀁 𑀧𑀦 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀲𑀫𑀼𑀲𑁆𑀲𑀸𑀳𑀦𑁂𑀦 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀫𑀼𑀲𑁆𑀲𑀸𑀳𑀺𑀢𑁂𑀦𑀸’’𑀢𑀺. 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀢𑀻𑀢𑀺 𑀯𑀸-𑀲𑀤𑁆𑀤𑁂𑀦 𑀢𑀣𑀸𑀧𑀯𑀢𑁆𑀢𑀦𑀓𑀫𑀼𑀲𑀸𑀯𑀸𑀤𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀫𑀸𑀦𑀁 𑀯𑀸 𑀅𑀦𑀼𑀪𑀼𑀬𑁆𑀬𑀫𑀸𑀦𑀸𑀦𑀁. 𑀯𑀸-𑀲𑀤𑁆𑀤𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀯𑀸 𑀅𑀬𑀣𑀸𑀥𑀺𑀧𑁆𑀧𑁂𑀢𑀢𑀸𑀬 𑀬𑀁 𑀮𑀤𑁆𑀥𑀁, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀕𑀳𑀡𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀤𑀼𑀯𑀺𑀥𑀫𑁂𑀯 𑀳𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀪𑁂𑀤𑀸𑀪𑀸𑀯𑀢𑁄. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 ‘‘𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀅𑀲𑀸𑀥𑀸𑀭𑀡𑀥𑀫𑁆𑀫𑁂𑀳𑀺 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀣𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀽𑀢𑀺 𑀧𑀸𑀡𑀸𑀢𑀺𑀧𑀸𑀢𑀦𑀸𑀤𑀻𑀲𑀼. 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀨𑀭𑀼𑀲𑀲𑀫𑁆𑀨𑀧𑁆𑀧𑀮𑀸𑀧𑀩𑁆𑀬𑀸𑀧𑀸𑀤𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀪𑀸𑀯𑀢𑀺𑀓𑁆𑀔𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀅𑀲𑀗𑁆𑀔𑀸𑀭𑀫𑁂𑀯 𑀳𑁄𑀢𑀺, 𑀇𑀢𑀭𑀁 𑀲𑀲𑀗𑁆𑀔𑀸𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂’’𑀢𑀺. 𑀫𑀦𑁆𑀤𑀁 𑀧𑀦 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀏𑀓𑀁𑀲𑁂𑀦 𑀲𑀲𑀗𑁆𑀔𑀸𑀭𑀫𑁂𑀯𑀸𑀢𑀺 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀬𑀁 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀧𑀯𑀢𑁆𑀢𑀢𑀺, 𑀢𑀁 𑀫𑀦𑁆𑀤𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑁄𑀳𑁂𑀓𑀳𑁂𑀢𑀼𑀓𑀁 𑀘𑀺𑀢𑁆𑀢𑀁 𑀫𑀽𑀮𑀦𑁆𑀢𑀭𑀯𑀺𑀭𑀳𑀢𑁄 𑀅𑀢𑀺𑀫𑀽𑀴𑁆𑀳𑀁, 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀬𑁄𑀕𑀢𑁄 𑀘𑀜𑁆𑀘𑀮𑀜𑁆𑀘𑀸𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯 𑀳𑁄𑀢𑀺, 𑀦 𑀢𑀲𑁆𑀲 𑀓𑀤𑀸𑀘𑀺𑀧𑀺 𑀲𑀪𑀸𑀯𑀢𑀺𑀓𑁆𑀔𑀢𑀸 𑀅𑀢𑁆𑀣𑀺. 𑀆𑀭𑀫𑁆𑀫𑀡𑁂 𑀳𑀺 𑀲𑀁𑀲𑀧𑁆𑀧𑀦𑀯𑀲𑁂𑀦, 𑀯𑀺𑀓𑁆𑀔𑀺𑀧𑀦𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀲𑁆𑀲 𑀘𑀺𑀢𑁆𑀢𑀤𑁆𑀯𑀬𑀲𑁆𑀲 𑀓𑀻𑀤𑀺𑀲𑁂 𑀓𑀺𑀘𑁆𑀘𑁂 𑀲𑀪𑀸𑀯𑀢𑀺𑀓𑁆𑀔𑀢𑀸𑀬, 𑀉𑀲𑁆𑀲𑀸𑀳𑁂𑀢𑀩𑁆𑀩𑀢𑀸𑀬 𑀯𑀸 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀦 𑀢𑀢𑁆𑀣 𑀲𑀗𑁆𑀔𑀸𑀭𑀪𑁂𑀤𑁄 𑀅𑀢𑁆𑀣𑀺. 𑀅𑀜𑁆𑀜𑁂𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀉𑀤𑁆𑀥𑀘𑁆𑀘𑀁 𑀯𑀺𑀲𑁂𑀲𑀢𑁄 𑀏𑀢𑁆𑀣𑁂𑀯 𑀩𑀮𑀯𑀁, 𑀢𑀢𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀧𑀥𑀸𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀯 𑀉𑀤𑁆𑀥𑀘𑁆𑀘𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺. 𑀢𑀣𑀸 𑀳𑀺 𑀧𑀸𑀴𑀺𑀬𑀁 (𑀥. 𑀲. 𑁪𑁨𑁭) 𑀇𑀥 𑀲𑀭𑀽𑀧𑀢𑁄 ¶ 𑀉𑀤𑁆𑀥𑀘𑁆𑀘𑀁 𑀆𑀕𑀢𑀁, 𑀏𑀯𑀁 𑀅𑀲𑀸𑀥𑀸𑀭𑀡𑀧𑀥𑀸𑀦𑀥𑀫𑁆𑀫𑀯𑀲𑁂𑀦 𑀫𑁄𑀳𑀫𑀽𑀮𑀁 ‘‘𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁, 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀤𑀼𑀯𑀺𑀥𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑀦𑁆𑀦𑀺𑀝𑁆𑀞𑀸𑀦𑀁 𑀲𑀁𑀲𑀬𑁄. 𑀯𑀺𑀓𑁆𑀔𑁂𑀧𑁄 𑀅𑀯𑀽𑀧𑀲𑀫𑁄, 𑀪𑀦𑁆𑀢𑀢𑀸𑀢𑀺 𑀅𑀢𑁆𑀣𑁄.

𑀢𑀬𑀺𑀤𑀁 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀁 𑀯𑀸 𑀢𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀬𑀣𑀸𑀭𑀳𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀧𑀣𑀯𑀲𑁂𑀦 𑀘𑁂𑀯 𑀓𑀫𑁆𑀫𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ¶ 𑀞𑀧𑁂𑀢𑁆𑀯𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀲𑁂𑀲𑀁 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀘𑀢𑀽𑀲𑀼𑀧𑀺 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀼𑀕𑀢𑀺𑀬𑀫𑁆𑀧𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑁂𑀯𑀸𑀢𑀺. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦 𑀓𑀸𑀭𑀡𑀁 𑀲𑀩𑁆𑀩𑀤𑀼𑀩𑁆𑀩𑀮𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀅𑀥𑀺𑀫𑁄𑀓𑁆𑀔𑀲𑀩𑁆𑀪𑀸𑀯𑀢𑁄 𑀢𑀢𑁄 𑀩𑀮𑀯𑀦𑁆𑀢𑀫𑁆𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦 𑀤𑁂𑀢𑀻𑀢𑀺? 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸. 𑀇𑀤𑀁 𑀳𑀺 𑀧𑀝𑀺𑀲𑀦𑁆𑀥𑀺𑀁 𑀤𑁂𑀦𑁆𑀢𑀁 𑀅𑀧𑀸𑀬𑁂𑀲𑀼 𑀤𑀤𑁂𑀬𑁆𑀬, 𑀅𑀧𑀸𑀬𑀕𑀫𑀦𑀻𑀬𑀜𑁆𑀘 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀦𑁆𑀢𑀺 𑀢𑀢𑁆𑀣 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀁 𑀦 𑀤𑁂𑀢𑀺, 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀦𑀁 𑀧𑀦𑀲𑁆𑀲 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀲𑁆𑀲 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁩𑁦 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀘𑀦𑀢𑁄.

𑀅𑀧𑀭𑁂 𑀧𑀦𑀸𑀳𑀼 𑁋 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀲𑀳𑀸𑀬𑀲𑀩𑁆𑀪𑀸𑀯𑀢𑁄 𑀉𑀪𑀬𑀯𑀺𑀧𑀸𑀓𑀫𑁆𑀧𑀺 𑀤𑁂𑀢𑀺, 𑀦 𑀲𑁂𑀓𑁆𑀔𑀲𑁆𑀲 𑀢𑀤𑀪𑀸𑀯𑀢𑁄𑀢𑀺. 𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀬𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀯𑀼𑀢𑁆𑀢𑀁, 𑀓𑀺𑀁 𑀢𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀉𑀤𑀸𑀳𑀼 𑀦𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀧𑀝𑁆𑀞𑀸𑀦𑁂 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀅𑀣 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂 ‘‘𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩’’𑀫𑀺𑀘𑁆𑀘𑀲𑁆𑀲 𑀯𑀺𑀪𑀗𑁆𑀕𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀤𑀺 𑀢𑀩𑁆𑀩𑀺𑀭𑀼𑀤𑁆𑀥𑀲𑀪𑀸𑀯𑀢𑀸𑀬 𑀢𑀢𑁆𑀣 𑀦 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀫𑁆𑀧𑀺 𑀢𑀲𑁆𑀫𑀺𑀁 𑀢𑀺𑀓𑁂 𑀢𑀲𑁆𑀲 𑀦𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀓𑀺𑀁 𑀓𑀸𑀭𑀡𑀁? 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑁩𑁬𑁫 𑀆𑀤𑀬𑁄) 𑀆𑀕𑀢𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀬𑁄𑀕𑀢𑁄 𑀓𑀲𑁆𑀲𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀸, 𑀬𑀣𑀸 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀅𑀢𑀻𑀢𑀸𑀤𑀻𑀦𑀁 𑀦𑀯𑀢𑁆𑀢𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸, 𑀏𑀯𑀫𑁂𑀢𑀲𑁆𑀲𑀸𑀧𑀺. 𑀅𑀣 𑀯𑀸 𑀪𑀸𑀯𑀦𑀸𑀬 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲𑀸𑀧𑀺 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑁂 𑀯𑀢𑁆𑀢𑀫𑀸𑀦𑀲𑁆𑀲 ¶ 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑀪𑀸𑀯𑀲𑀸𑀫𑀜𑁆𑀜𑀢𑁄, 𑀲𑀸𑀯𑀚𑁆𑀚𑀢𑁄 𑀘 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀦𑀢𑁆𑀣𑀺 𑀦𑀯𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑀤𑁄𑀲𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀯𑀲𑁂𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄𑀧𑀺 𑀦 𑀯𑀼𑀢𑁆𑀢𑁄. 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀲𑀳𑀸𑀬𑀯𑁂𑀓𑀮𑁆𑀮𑀫𑀢𑁆𑀢𑀫𑁂𑀯 𑀤𑀲𑁆𑀲𑀦𑁂𑀦 𑀓𑀢𑀁, 𑀦 𑀓𑁄𑀘𑀺𑀧𑀺 𑀪𑀸𑀯𑁄 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀢𑀲𑁆𑀲 𑀆𑀧𑀸𑀤𑀺𑀢𑁄𑀢𑀺 𑀏𑀓𑀦𑁆𑀢𑁂𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀅𑀣 𑀯𑀸 𑀅𑀧𑀸𑀬𑀕𑀫𑀦𑀻𑀬𑀪𑀸𑀯𑀸𑀧𑁂𑀓𑁆𑀔𑀁 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀯𑀘𑀦𑀦𑁆𑀢𑀺 𑀢𑀤𑀪𑀸𑀯𑀢𑁄 𑀢𑀁 𑀯𑀺𑀪𑀚𑀦𑀁 𑀯𑀼𑀢𑁆𑀢𑀦𑁆𑀢𑀺.

𑁪𑁫𑁪. ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀩𑁆𑀬𑀸𑀓𑀢𑀁 𑀯𑀺𑀧𑀸𑀓’’𑀦𑁆𑀢𑀺 𑀆𑀤𑀺𑀓𑁄 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀢𑀢𑁄 𑀏𑀯 𑀅𑀥𑀺𑀓𑀢𑀸𑀩𑁆𑀬𑀸𑀓𑀢𑀸𑀧𑁂𑀓𑁆𑀔𑀸𑀬 𑀤𑀼𑀯𑀺𑀥𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀫𑁆𑀧𑀺 𑀅𑀩𑁆𑀬𑀸𑀓𑀢𑀪𑀸𑀯𑀢𑁄 ¶ 𑀢𑀁 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁄 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀳𑁂𑀢𑀼𑀓𑀢𑀸 𑀲𑀳𑁂𑀢𑀼𑀓𑀢𑀸 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀯𑀲𑁂𑀦, 𑀦 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀯𑀲𑁂𑀦. 𑀯𑀺𑀧𑀸𑀓𑀲𑁆𑀲 𑀳𑀺 𑀲𑀳𑁂𑀢𑀼𑀓𑀢𑀸 𑀲𑀳𑁂𑀢𑀼𑀓𑀓𑀫𑁆𑀫𑀯𑀲𑁂𑀦 𑀲𑀺𑀚𑁆𑀛𑀫𑀸𑀦𑀸𑀧𑀺 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀯𑀲𑁂𑀦𑁂𑀯 𑀯𑀼𑀘𑁆𑀘𑀢𑀺, 𑀅𑀜𑁆𑀜𑀣𑀸 𑀅𑀳𑁂𑀢𑀼𑀓𑀸𑀦𑀫𑁆𑀧𑀺 𑀲𑀳𑁂𑀢𑀼𑀓𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀓𑀲𑁆𑀫𑀸 𑀧𑀦 𑀲𑀳𑁂𑀢𑀼𑀓𑀲𑁆𑀲 𑀅𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺? 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀓𑀺𑀜𑁆𑀘 𑀆𑀭𑀫𑁆𑀫𑀡𑀸𑀪𑀺𑀦𑀺𑀧𑀸𑀢𑀫𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀯𑀺𑀜𑁆𑀜𑀸𑀡𑁂𑀲𑀼 𑀬𑀣𑀸 𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑁄 𑀦 𑀲𑀫𑁆𑀪𑀯𑀢𑀺, 𑀏𑀯𑀁 𑀫𑀦𑁆𑀤𑀢𑀭𑀫𑀦𑁆𑀤𑀓𑀺𑀘𑁆𑀘𑁂𑀲𑀼 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑁂𑀲𑀽𑀢𑀺 𑀳𑁂𑀢𑀽𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄𑀧𑀺 𑀦𑁂𑀲𑀁 𑀅𑀳𑁂𑀢𑀼𑀓𑀢𑀸 𑀤𑀝𑁆𑀞𑀩𑁆𑀩𑀸.

𑀫𑀦𑁄𑀯𑀺𑀜𑁆𑀜𑀸𑀡𑀢𑁄 𑀉𑀧𑁆𑀧𑀚𑁆𑀚𑀦𑀯𑀺𑀲𑀺𑀝𑁆𑀞𑀫𑀦𑀦𑀓𑀺𑀘𑁆𑀘𑀸𑀦𑀁 𑀅𑀪𑀸𑀯𑀢𑁄 𑀫𑀦𑁄𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀼.

𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀳𑀼𑀢𑁆𑀯𑀸 𑀭𑀽𑀧𑀲𑁆𑀲 𑀯𑀺𑀚𑀸𑀦𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁. 𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀯𑀘𑀦𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀅𑀜𑁆𑀜𑀁 𑀯𑀺𑀜𑁆𑀜𑀸𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀯𑀺𑀚𑀸𑀦𑀦𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑁂 𑀨𑀲𑁆𑀲𑀸𑀤𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀘𑀓𑁆𑀔𑀼𑀭𑀽𑀧𑀕𑁆𑀕𑀳𑀡𑁂𑀦 𑀦𑀺𑀲𑁆𑀲𑀬𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑁂𑀢𑀺 𑀉𑀪𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀢𑁆𑀢𑀸. 𑀬𑀤𑀺 𑀳𑀺 𑀘𑀓𑁆𑀔𑀼 𑀦𑀸𑀫 𑀦 𑀲𑀺𑀬𑀸, 𑀅𑀦𑁆𑀥𑀸𑀧𑀺 𑀭𑀽𑀧𑀁 𑀧𑀲𑁆𑀲𑁂𑀬𑁆𑀬𑀼𑀁, 𑀦 𑀘 𑀧𑀲𑁆𑀲𑀦𑁆𑀢𑀺. 𑀬𑀤𑀺 𑀘 𑀦𑀻𑀮𑀸𑀤𑀺𑀭𑀽𑀧𑀁 𑀦𑀸𑀫 𑀦 𑀲𑀺𑀬𑀸, 𑀤𑁂𑀲𑀸𑀤𑀺𑀦𑀺𑀬𑀫𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀅𑀢𑁆𑀣𑁂𑀯 𑀘 𑀦𑀺𑀬𑀫𑁄, 𑀏𑀓𑀦𑁆𑀢𑀲𑀸𑀭𑀫𑁆𑀫𑀡𑀢𑀸 𑀘 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀸𑀢𑀺 ‘‘𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀦𑀻𑀮𑀸𑀤𑀺𑀆𑀪𑀸𑀲𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻’’𑀢𑀺 𑀏𑀯𑀁 ¶ 𑀧𑀯𑀢𑁆𑀢𑁄 𑀯𑀸𑀤𑁄 𑀫𑀺𑀘𑁆𑀙𑀸𑀯𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫; 𑀲𑀁. 𑀦𑀺. 𑁨.𑁪𑁪; 𑁪.𑁬𑁦; 𑀓𑀣𑀸. 𑁪𑁬𑁫).

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀘𑀦𑀪𑁂𑀤𑁄 𑀓𑀢𑁄𑀢𑀺? 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀁 𑀧𑀦 𑀅𑀦𑁂𑀓𑀫𑁂𑀯 𑀲𑀁𑀳𑀢𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀓𑀺𑀁 𑀧𑀦 𑀓𑀸𑀭𑀡𑀁 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀁 𑀧𑀦 𑀅𑀦𑁂𑀓𑀫𑁂𑀯𑀸𑀢𑀺? 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀢𑁄. 𑀘𑀓𑁆𑀔𑀼 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲 𑀪𑀸𑀯𑀢𑁄, 𑀅𑀲𑀢𑀺 𑀅𑀪𑀸𑀯𑀢𑁄. 𑀬𑀢𑁄 𑀢𑀁 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀦𑀺𑀲𑁆𑀲𑀬𑀢𑀸 𑀘𑀲𑁆𑀲 𑀦 𑀏𑀓𑀤𑁂𑀲𑁂𑀦 𑀅𑀮𑁆𑀮𑀻𑀬𑀦𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀸 𑀅𑀭𑀽𑀧𑀪𑀸𑀯𑀢𑁄, 𑀅𑀣 𑀔𑁄 𑀕𑀭𑀼𑀭𑀸𑀚𑀸𑀤𑀻𑀲𑀼 𑀲𑀺𑀲𑁆𑀲𑀭𑀸𑀚𑀧𑀼𑀭𑀺𑀲𑀸𑀤𑀻𑀦𑀁 𑀯𑀺𑀬 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀇𑀢𑀭𑁂 𑀧𑀦 𑀧𑀘𑁆𑀘𑀬𑀸 𑀢𑁂𑀦 ¶ 𑀢𑁂𑀦 𑀯𑀺𑀲𑁂𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑁆𑀯𑀸𑀬𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀏𑀓𑀲𑁆𑀫𑀺𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀭𑀽𑀧𑀁 𑀧𑀦 𑀬𑀤𑀺𑀧𑀺 𑀘𑀓𑁆𑀔𑀼 𑀯𑀺𑀬 𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀼𑀭𑁂𑀢𑀭𑀁 𑀳𑀼𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂𑀬𑁂𑀯 𑀉𑀧𑀓𑀸𑀭𑀓𑀢𑁆𑀢𑀸, 𑀢𑀣𑀸𑀧𑀺 𑀅𑀦𑁂𑀓𑀫𑁂𑀯 𑀲𑀁𑀳𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀬𑀜𑁆𑀳𑀺 𑀧𑀘𑁆𑀘𑀬𑀥𑀫𑁆𑀫𑀁 𑀲𑀪𑀸𑀯𑀪𑀽𑀢𑀁, 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀫𑀢𑁆𑀢𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀜𑁆𑀜𑁂𑀲𑀜𑁆𑀘 𑀲𑀢𑀺𑀧𑀺 𑀧𑀘𑁆𑀘𑀬𑀪𑀸𑀯𑁂 𑀲𑁄 𑀢𑀲𑁆𑀲 𑀲𑀸𑀭𑀫𑁆𑀫𑀡𑀲𑀪𑀸𑀯𑀢𑀸𑀬 𑀬𑀁 𑀓𑀺𑀜𑁆𑀘𑀺 𑀅𑀦𑀸𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀑𑀮𑀼𑀩𑁆𑀪 𑀧𑀯𑀢𑁆𑀢𑀺𑀓𑀸𑀭𑀡𑀢𑀸𑀬 𑀆𑀮𑀫𑁆𑀩𑀦𑀻𑀬𑀢𑁄 𑀆𑀭𑀫𑁆𑀫𑀡𑀁 𑀦𑀸𑀫. 𑀢𑀲𑁆𑀲 𑀬𑀲𑁆𑀫𑀸 𑀬𑀣𑀸 𑀢𑀣𑀸 𑀲𑀪𑀸𑀯𑀽𑀧𑀮𑀤𑁆𑀥𑀺𑀯𑀲𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀮𑀸𑀪𑁄, 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀲𑀸 𑀘𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑀪𑀸𑀯𑀽𑀧𑀮𑀤𑁆𑀥𑀺, 𑀦 𑀏𑀓𑀤𑁆𑀯𑀺𑀓𑀮𑀸𑀧𑀕𑀢𑀯𑀡𑁆𑀡𑀯𑀲𑁂𑀦 𑀳𑁄𑀢𑀺, 𑀦𑀸𑀧𑀺 𑀓𑀢𑀺𑀧𑀬𑀓𑀮𑀸𑀧𑀕𑀢𑀯𑀡𑁆𑀡𑀯𑀲𑁂𑀦, 𑀅𑀣 𑀔𑁄 𑀆𑀪𑁄𑀕𑀸𑀦𑀼𑀭𑀽𑀧𑀁 𑀆𑀧𑀸𑀣𑀕𑀢𑀯𑀡𑁆𑀡𑀯𑀲𑁂𑀦𑀸𑀢𑀺 𑀅𑀦𑁂𑀓𑀫𑁂𑀯 𑀭𑀽𑀧𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀭𑀽𑀧𑁂 𑀘𑀸’’𑀢𑀺 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀺.

𑀬𑀁 ¶ 𑀧𑀦 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁨) 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀬𑀸𑀤𑀺𑀲𑀁 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀸𑀤𑀺𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀻𑀤𑀺𑀲𑀁 𑀧𑀦 𑀢𑀦𑁆𑀢𑀺? 𑀲𑀫𑀼𑀤𑀺𑀢𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀆𑀬𑀢𑀦𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀲𑀮𑁆𑀮𑀓𑁆𑀔𑀡𑀸𑀭𑀫𑁆𑀫𑀡𑀸, 𑀦 𑀤𑀩𑁆𑀩𑀲𑀮𑁆𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺, 𑀢𑀫𑁆𑀧𑀺 𑀬𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀦 𑀘𑁂𑀢𑁆𑀣 𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀢𑀸 𑀆𑀲𑀗𑁆𑀓𑀺𑀢𑀩𑁆𑀩𑀸 𑀲𑀫𑀼𑀤𑀸𑀬𑀸𑀪𑁄𑀕𑀲𑁆𑀲𑁂𑀯𑀸𑀪𑀸𑀯𑀢𑁄. 𑀲𑀫𑀼𑀤𑀺𑀢𑀸 𑀧𑀦 𑀯𑀡𑁆𑀡𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀣𑀁 𑀧𑀦 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀸 𑀲𑀫𑀼𑀤𑀺𑀢𑀸 𑀆𑀭𑀫𑁆𑀫𑀡𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑀺 𑀧𑀘𑁆𑀘𑁂𑀓𑀁 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑁆𑀥𑀸 𑀲𑀫𑀼𑀤𑀺𑀢𑀸 𑀧𑀲𑁆𑀲𑀦𑁆𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀸𑀦𑀁 𑀲𑀺𑀯𑀺𑀓𑀸𑀯𑀳𑀦𑀸𑀤𑀻𑀲𑀼 𑀲𑀫𑀢𑁆𑀣𑀢𑀸𑀬 𑀤𑀲𑁆𑀲𑀦𑀢𑁄. 𑀓𑁂𑀲𑀸𑀤𑀻𑀦𑀜𑁆𑀘 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀸𑀦𑀁 𑀧𑀘𑁆𑀘𑁂𑀓𑀁 𑀯𑀡𑁆𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀫𑀼𑀤𑀺𑀢𑀸𑀦𑀁 𑀯𑀡𑁆𑀡𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀪𑀺𑀬𑁆𑀬𑁄𑀧𑀺 𑀢𑁂𑀲𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸 𑀧𑀭𑀺𑀩𑁆𑀬𑀢𑁆𑀢𑀸. 𑀏𑀢𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀭𑀫𑀸𑀡𑀼𑀭𑀽𑀧𑀁 𑀆𑀭𑀫𑁆𑀫𑀡𑀁, 𑀉𑀤𑀸𑀳𑀼 𑀢𑀁𑀲𑀫𑀼𑀤𑀸𑀬𑁄𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘𑀸’’𑀢𑀺𑀆𑀤𑀻𑀲𑀼𑀧𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬) 𑀏𑀲𑁂𑀯 ¶ 𑀦𑀬𑁄. 𑀏𑀯𑀁 𑀉𑀪𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀯𑀺𑀪𑀸𑀯𑀦𑀁 𑀓𑀢𑀁, 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁.

𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀦𑁆𑀢𑀺 𑀭𑀽𑀧𑀸𑀬𑀢𑀦𑀫𑀢𑁆𑀢𑀲𑁆𑀲𑁂𑀯 𑀆𑀭𑀫𑁆𑀫𑀡𑀓𑀭𑀡𑀭𑀲𑀁. 𑀫𑀢𑁆𑀢𑀲𑀤𑁆𑀤𑁂𑀦 𑀬𑀣𑀸 𑀆𑀭𑀫𑁆𑀫𑀡𑀦𑁆𑀢𑀭𑀁 𑀦𑀺𑀯𑀢𑁆𑀢𑁂𑀢𑀺, 𑀏𑀯𑀁 𑀭𑀽𑀧𑀸𑀬𑀢𑀦𑁂𑀧𑀺 𑀮𑀩𑁆𑀪𑀫𑀸𑀦𑁂 𑀏𑀓𑀘𑁆𑀘𑁂 𑀯𑀺𑀲𑁂𑀲𑁂 𑀦𑀺𑀯𑀢𑁆𑀢𑁂𑀢𑀺. 𑀦 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀡𑁆𑀡𑀫𑀢𑁆𑀢𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀢𑀢𑁆𑀣 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑁂 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄 𑀢𑀤𑀪𑀺𑀫𑀼𑀔𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀦𑀦𑁆𑀢𑀭𑀯𑀺𑀕𑀢𑀸 𑀅𑀭𑀽𑀧𑀥𑀫𑁆𑀫𑀸 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀉𑀧𑀓𑀸𑀭𑀓𑀸 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀥𑀫𑁆𑀫𑀸 𑀯𑀺𑀬 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀕𑀳𑀺𑀢𑀁 ¶ 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀢𑀤𑀦𑀦𑁆𑀢𑀭𑀫𑁂𑀯 𑀅𑀧𑀭𑀺𑀧𑀢𑀦𑁆𑀢𑀁 𑀓𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻 𑀕𑀡𑁆𑀳𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑀭𑀲𑀸’’𑀢𑀺. 𑀢𑀣𑀸𑀪𑀸𑀯𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀤𑀸𑀘𑀺 𑀧𑀜𑁆𑀘𑀦𑁆𑀦𑀁, 𑀢𑀢𑁄 𑀯𑀸 𑀓𑀢𑀺𑀧𑀬𑀸𑀦𑀁 𑀯𑀺𑀚𑀸𑀦𑀦𑀲𑀪𑀸𑀯𑀸𑀧𑀺 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸 𑀯𑀼𑀢𑁆𑀢𑀸 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄, 𑀙𑀲𑁆𑀯𑁂𑀯 𑀯𑀸 𑀇𑀢𑀭𑁂𑀲𑀁 𑀆𑀭𑀫𑁆𑀫𑀡𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀲𑀦𑁆𑀢𑀻𑀭𑀡𑀸𑀤𑀺𑀓𑀺𑀘𑁆𑀘𑀸𑀢𑀺 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸 𑀯𑀸, 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸’’𑀢𑀺 𑀇𑀤𑀁 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀏𑀓𑀦𑁆𑀢𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀢𑀁𑀢𑀁𑀅𑀦𑀦𑁆𑀢𑀭𑀸𑀢𑀻𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀧𑀤𑀝𑁆𑀞𑀸𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀲𑁆𑀲𑀸 𑀪𑁂𑀤𑁄𑀢𑀺 𑀢𑀲𑁆𑀲𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 ‘‘𑀤𑀼𑀯𑀺𑀥𑀸’’𑀢𑀺 𑀯𑀼𑀢𑁆𑀢𑀸𑀬 𑀤𑀼𑀯𑀺𑀥𑀢𑀸𑀲𑀗𑁆𑀔𑀸𑀢𑁄 𑀪𑁂𑀤𑁄. 𑀏𑀓𑀦𑁆𑀢𑀫𑀺𑀝𑁆𑀞𑀸𑀭𑀫𑁆𑀫𑀡𑁂𑀢𑀺 𑀏𑀓𑀦𑁆𑀢𑁂𑀦𑁂𑀯 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂, 𑀅𑀢𑀺𑀯𑀺𑀬 𑀇𑀝𑁆𑀞𑀸𑀭𑀫𑁆𑀫𑀡𑁂𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀤𑁆𑀯𑀸𑀭𑁂 𑀘𑁂𑀯 𑀚𑀯𑀦𑀸𑀯𑀲𑀸𑀦𑁂 𑀘𑀸𑀢𑀺 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑁂 𑀲𑀫𑁆𑀧𑀝𑀺𑀘𑁆𑀙𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀅𑀦𑁆𑀢𑀭𑀸𑀴𑀁 𑀞𑀸𑀦𑀁, 𑀇𑀢𑀭𑀢𑁆𑀭 𑀚𑀯𑀦𑀪𑀯𑀗𑁆𑀕𑀸𑀦𑀦𑁆𑀢𑀺 𑀏𑀯𑀁 𑀤𑁆𑀯𑀺𑀞𑀸𑀦𑀸 𑀳𑁄𑀢𑀺. 𑀇𑀢𑀭𑀸𑀬𑀧𑀺 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀬𑀣𑀸𑀯𑀼𑀢𑁆𑀢𑀫𑁂𑀯 𑀞𑀸𑀦𑀁, 𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀸𑀮𑁂 𑀧𑀦 𑀘𑀼𑀢𑀺𑀪𑀯𑀗𑁆𑀕𑀸𑀦𑀁 ¶ 𑀅𑀦𑁆𑀢𑀭𑀸𑀴𑀁 𑀧𑀝𑀺𑀲𑀦𑁆𑀥𑀺𑀬𑀸, 𑀧𑀝𑀺𑀲𑀦𑁆𑀥𑀺𑀆𑀯𑀚𑁆𑀚𑀦𑀸𑀦𑀁 𑀢𑀤𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀸𑀦𑀁 𑀚𑀯𑀦𑀸𑀯𑀚𑁆𑀚𑀦𑀸𑀦𑀁 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀜𑁆𑀘 𑀅𑀦𑁆𑀢𑀭𑀸𑀴𑀁 𑀪𑀯𑀗𑁆𑀕𑀲𑁆𑀲, 𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀻𑀦𑀁 𑀚𑀯𑀦𑀧𑀝𑀺𑀲𑀦𑁆𑀥𑀻𑀦𑀁 𑀯𑀸 𑀅𑀦𑁆𑀢𑀭𑀸𑀴𑀁 𑀘𑀼𑀢𑀺𑀬𑀸 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀙𑀲𑀽𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀦𑀸𑀢𑀺𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀪𑀽𑀢𑀸𑀦𑀁 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀩𑀮𑀯𑀪𑀸𑀯𑀢𑁄 𑀓𑀸𑀬𑀯𑀺𑀜𑁆𑀜𑀸𑀡𑀁 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀁. 𑀉𑀧𑀸𑀤𑀸𑀭𑀽𑀧𑀸𑀦𑀁𑀬𑁂𑀯 𑀖𑀝𑁆𑀝𑀦𑀸 𑀤𑀼𑀩𑁆𑀩𑀮𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺. 𑀢𑁂𑀦𑀸𑀳 ‘‘𑀲𑁂𑀲𑀁 𑀉𑀧𑁂𑀓𑁆𑀔𑀸𑀬𑀼𑀢𑁆𑀢’’𑀦𑁆𑀢𑀺. 𑀲𑁂𑀲𑀁 𑀙𑀩𑁆𑀩𑀺𑀥𑀫𑁆𑀧𑀺.

𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸 𑀘𑁂𑀯 𑀅𑀮𑁄𑀪𑀸𑀤𑁄𑀲𑀸 𑀘 𑀅𑀮𑁄𑀪𑀸𑀤𑀬𑁄, 𑀢𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀯𑀺𑀧𑀸𑀓𑀳𑁂𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀅𑀮𑁄𑀪𑀸𑀤𑀺𑀯𑀺𑀧𑀸𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀁. 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀲𑁄𑀫𑀦𑀲𑁆𑀲𑀸𑀤𑀺𑀪𑁂𑀤𑀢𑁄𑀢𑀺 𑀬𑀣𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁, 𑀏𑀯𑀫𑀺𑀤𑀫𑁆𑀧𑀻𑀢𑀺 𑀅𑀝𑁆𑀞𑀯𑀺𑀥𑀢𑀸𑀬 𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀫𑀸𑀯𑀘𑀭𑀪𑀸𑀯𑀢𑁄 𑀳𑀻𑀦𑀸𑀤𑀺𑀢𑁄, 𑀬𑁄𑀦𑀻𑀲𑀼 𑀉𑀧𑁆𑀧𑀢𑁆𑀢𑀺𑀢𑁄 𑀘 𑀲𑀤𑀺𑀲𑀫𑁂𑀯, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄 𑀧𑀦 𑀆𑀭𑀫𑁆𑀫𑀡𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀯𑀺𑀲𑀤𑀺𑀲𑀁. 𑀢𑀣𑀸 ¶ 𑀳𑀺 𑀓𑀼𑀲𑀮𑀁 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀇𑀤𑀁, 𑀯𑀺𑀧𑀸𑀓𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸. 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀯𑀲𑁂𑀦 𑀧𑀦 𑀇𑀫𑀲𑁆𑀲𑀸𑀧𑀺 𑀅𑀢𑁆𑀣𑁂𑀯 𑀧𑀯𑀢𑁆𑀢𑀺𑀪𑁂𑀤𑁄 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀫𑀳𑀸𑀯𑀺𑀧𑀸𑀓𑀸𑀦𑀁 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀬𑀣𑀸 𑀧𑀦 𑀓𑀼𑀲𑀮𑀁 𑀕𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀜𑁆𑀘, 𑀦 𑀏𑀯𑀫𑀺𑀤𑀁 𑀢𑀤𑁂𑀓𑀤𑁂𑀲𑁂 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀢𑁄, 𑀏𑀓𑀘𑁆𑀘𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀯𑀺𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀙𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀧𑀭𑀺𑀢𑁆𑀢𑀸𑀤𑀺𑀅𑀢𑀻𑀢𑀸𑀤𑀺𑀅𑀚𑁆𑀛𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼.

𑀆𑀕𑀫𑀦𑀸𑀤𑀺𑀯𑀲𑁂𑀦𑀸𑀢𑀺 𑀆𑀕𑀫𑀦𑀧𑀘𑁆𑀘𑀬𑀯𑀲𑁂𑀦. 𑀢𑀢𑁆𑀣 𑀏𑀓𑀘𑁆𑀘𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀫𑀼𑀔𑁂 𑀘𑀮𑀺𑀢𑁂 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀘𑀮𑀦𑀁 𑀯𑀺𑀬 𑀅𑀲𑀗𑁆𑀔𑀸𑀭𑀲𑁆𑀲 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑁄 𑀅𑀲𑀗𑁆𑀔𑀸𑀭𑁄, 𑀲𑀲𑀗𑁆𑀔𑀸𑀭𑀲𑁆𑀲 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑁄 𑀲𑀲𑀗𑁆𑀔𑀸𑀭𑁄𑀢𑀺 𑀏𑀯𑀁 𑀆𑀕𑀫𑀦𑀯𑀲𑁂𑀦. 𑀏𑀓𑀘𑁆𑀘𑀸𑀦𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀩𑀮𑀯𑀦𑁆𑀢𑁂𑀳𑀺 𑀯𑀺𑀪𑀽𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀓𑀫𑁆𑀫𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑁄 𑀅𑀲𑀗𑁆𑀔𑀸𑀭𑁄, 𑀤𑀼𑀩𑁆𑀩𑀮𑁂𑀳𑀺 𑀲𑀲𑀗𑁆𑀔𑀸𑀭𑁄𑀢𑀺 𑀏𑀯𑀁 𑀧𑀘𑁆𑀘𑀬𑀯𑀲𑁂𑀦. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁. 𑀢𑁂𑀲𑀁 𑀳𑀺 𑀯𑀲𑁂𑀦 𑀓𑀼𑀲𑀮𑀢𑁄 𑀯𑀺𑀧𑀸𑀓𑀲𑁆𑀲 𑀯𑀺𑀲𑁂𑀲𑀸𑀪𑀸𑀯𑁄. 𑀦𑀺𑀭𑀼𑀲𑁆𑀲𑀸𑀳𑀦𑁆𑀢𑀺 𑀏𑀢𑁆𑀣 𑀉𑀲𑁆𑀲𑀸𑀳𑁄 𑀦𑀸𑀫 𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑀲𑀦𑁆𑀢𑀸𑀦𑁂 ¶ 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀲𑀗𑁆𑀔𑀸𑀢𑁄 𑀩𑁆𑀬𑀸𑀧𑀸𑀭𑁄, 𑀲𑁄 𑀯𑀺𑀧𑀸𑀓𑁂𑀲𑀼 𑀦𑀢𑁆𑀣𑀻𑀢𑀺 𑀢𑀁 𑀦𑀺𑀭𑀼𑀲𑁆𑀲𑀸𑀳𑀁. 𑀓𑀼𑀲𑀮𑁂𑀲𑀼 𑀧𑀦 𑀅𑀪𑀺𑀜𑁆𑀜𑀸𑀯𑀲𑀧𑀯𑀢𑁆𑀢𑁂𑀲𑀼𑀧𑀺 𑀅𑀢𑁆𑀣𑁂𑀯𑀸𑀢𑀺 𑀢𑀁 𑀲𑀉𑀲𑁆𑀲𑀸𑀳𑀁.

𑀮𑁄𑀪𑀸𑀤𑀻𑀦𑀁 𑀏𑀓𑀦𑁆𑀢𑀲𑀸𑀯𑀚𑁆𑀚𑀢𑀸𑀬 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀸𑀦𑀁 𑀦𑀢𑁆𑀣𑀺 𑀯𑀺𑀧𑀸𑀓𑀪𑀸𑀯𑁄, 𑀅𑀮𑁄𑀪𑀸𑀤𑀻𑀦𑀫𑁆𑀧𑀺 𑀏𑀓𑀦𑁆𑀢𑀅𑀦𑀯𑀚𑁆𑀚𑀲𑀪𑀸𑀯𑀸𑀦𑀁 𑀓𑀸𑀭𑀡𑀲𑁆𑀲 𑀢𑀩𑁆𑀩𑀺𑀥𑀼𑀭𑀢𑀸𑀬 𑀦𑀢𑁆𑀣𑁂𑀯 𑀅𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁄𑀢𑀺 𑀆𑀳 ‘‘𑀅𑀓𑀼𑀲𑀮𑀯𑀺𑀧𑀸𑀓𑀁 𑀅𑀳𑁂𑀢𑀼𑀓𑀫𑁂𑀯𑀸’’𑀢𑀺. 𑀬𑀣𑀸 𑀅𑀢𑀺𑀇𑀝𑁆𑀞𑁂, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀆𑀭𑀫𑁆𑀫𑀡𑁂 𑀯𑁂𑀤𑀦𑀸𑀪𑁂𑀤𑀲𑀩𑁆𑀪𑀸𑀯𑀢𑁄 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀤𑀼𑀯𑀺𑀥𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺, 𑀦 𑀏𑀯𑀁 𑀅𑀢𑀺𑀅𑀦𑀺𑀝𑁆𑀞𑁂, 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀆𑀭𑀫𑁆𑀫𑀡𑁂 𑀯𑁂𑀤𑀦𑀸𑀪𑁂𑀤𑁄 𑀅𑀢𑁆𑀣𑀻𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀓𑀫𑁂𑀯𑀸𑀢𑀺 ‘‘𑀲𑀢𑁆𑀢𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑀺 𑀳𑀺 𑀢𑀢𑁆𑀣 𑀯𑁂𑀤𑀦𑀸𑀪𑁂𑀤𑁂 𑀅𑀢𑀺𑀅𑀦𑀺𑀝𑁆𑀞𑁂 𑀤𑁄𑀫𑀦𑀲𑁆𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀘 𑀧𑀝𑀺𑀖𑁂𑀦 𑀯𑀺𑀦𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀤𑀼𑀓𑁆𑀔𑀲𑀳𑀕𑀢𑀢𑀸 𑀓𑀼𑀲𑀮𑀯𑀺𑀧𑀸𑀓𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁂𑀓𑁆𑀔𑀸 𑀳𑀻𑀦𑀸𑀢𑀺 𑀏𑀓𑀦𑁆𑀢𑀦𑀺𑀳𑀻𑀦𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀧𑀺 𑀲𑀫𑀸𑀦𑀸 𑀳𑀻𑀦𑀸 𑀏𑀯 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀁 𑀯𑀺𑀬 ¶ 𑀦𑀸𑀢𑀺𑀢𑀺𑀔𑀺𑀡𑀸’’𑀢𑀺. 𑀬𑀣𑀸 𑀤𑀼𑀓𑁆𑀔𑀁 𑀅𑀢𑀺𑀯𑀺𑀬 𑀢𑀺𑀔𑀺𑀡𑀁 𑀓𑀝𑀼𑀓𑀁, 𑀦 𑀏𑀯𑀫𑀬𑀁, 𑀢𑀣𑀸𑀧𑀺 𑀤𑀼𑀓𑁆𑀔𑀲𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀦 𑀳𑀺 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑁄 𑀅𑀤𑀼𑀓𑁆𑀔𑁄 𑀳𑁄𑀢𑀺. 𑀉𑀧𑁂𑀓𑁆𑀔𑀸𑀪𑀸𑀯𑁄 𑀘𑀲𑁆𑀲 𑀩𑀮𑀯𑀢𑀸 𑀩𑀸𑀥𑀺𑀬𑀫𑀸𑀦𑀲𑁆𑀲 𑀧𑀝𑀺𑀧𑁆𑀧𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀤𑀼𑀩𑁆𑀩𑀮𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑁂𑀦 𑀓𑀭𑀺𑀬𑀫𑀸𑀦𑀩𑀸𑀥𑀸𑀬 𑀉𑀧𑁂𑀓𑁆𑀔𑀦𑀸 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀢𑀭𑁂𑀲𑀽𑀢𑀺 𑀓𑀼𑀲𑀮𑀯𑀺𑀧𑀸𑀓𑁂𑀲𑀼.

𑀭𑀽𑀧𑀸𑀯𑀘𑀭𑀦𑁆𑀢𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁. 𑀯𑀺𑀧𑀸𑀓𑀓𑀣𑀸 𑀳𑁂𑀲𑀸𑀢𑀺. 𑀓𑀼𑀲𑀮𑀁 𑀯𑀺𑀬𑀸𑀢𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀯𑀺𑀬. 𑀦 𑀳𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀢𑀤𑀜𑁆𑀜𑀓𑀼𑀲𑀮𑀲𑀤𑀺𑀲𑁄. 𑀅𑀧𑀺𑀘 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸 𑀏𑀢𑁂, 𑀬𑀤𑀺𑀤𑀁 ‘‘𑀓𑀼𑀲𑀮𑀁, 𑀯𑀺𑀧𑀸𑀓𑁄’’𑀢𑀺 𑀘. 𑀢𑀲𑁆𑀫𑀸 𑀬𑀣𑀸 ‘‘𑀫𑀸𑀢𑀭𑀁 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀫𑀸𑀢𑀭𑀦𑁆𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀲𑀺𑀤𑁆𑀥𑀫𑁂𑀯𑁂𑀢𑀁, 𑀏𑀯𑀁 𑀇𑀥𑀸𑀧𑀻𑀢𑀺 𑀅𑀢𑁆𑀢𑀦𑁄 𑀓𑀼𑀲𑀮𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀲𑀤𑀺𑀲𑀢𑀸 𑀘𑁂𑀢𑁆𑀣 𑀥𑀫𑁆𑀫𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀬𑁂 𑀨𑀲𑁆𑀲𑀸𑀤𑀬𑁄 𑀓𑀼𑀲𑀮𑁂 𑀮𑀩𑁆𑀪𑀦𑁆𑀢𑀺, 𑀢𑁂 𑀯𑀺𑀧𑀸𑀓𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀬𑀲𑁆𑀫𑀺𑀁 𑀘 𑀆𑀭𑀫𑁆𑀫𑀡𑁂 𑀓𑀼𑀲𑀮𑀁 𑀧𑀯𑀢𑁆𑀢𑀢𑀺, 𑀢𑀢𑁆𑀣𑁂𑀯 𑀅𑀬𑀁 𑀯𑀺𑀧𑀸𑀓𑁄𑀧𑀺 𑀧𑀯𑀢𑁆𑀢𑀢𑀺. 𑀬𑀁 𑀧𑀦𑁂𑀢𑁆𑀣 𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑀁 𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀁, 𑀢𑀲𑁆𑀲 𑀯𑀺𑀧𑀸𑀓𑁄 𑀏𑀯 𑀦𑀢𑁆𑀣𑀺. 𑀓𑀲𑁆𑀫𑀸 𑀦𑀢𑁆𑀣𑀺? 𑀅𑀲𑀫𑁆𑀪𑀯𑀢𑁄, 𑀆𑀦𑀺𑀲𑀁𑀲𑀪𑀽𑀢𑀢𑁆𑀢𑀸 𑀘. 𑀢𑀜𑁆𑀳𑀺 𑀯𑀺𑀧𑀸𑀓𑀁 𑀤𑁂𑀦𑁆𑀢𑀁 𑀭𑀽𑀧𑀸𑀯𑀘𑀭𑀫𑁂𑀯 𑀤𑀤𑁂𑀬𑁆𑀬. 𑀦 𑀳𑀺 𑀅𑀜𑁆𑀜𑀪𑀽𑀫𑀺𑀓𑀁 𑀓𑀫𑁆𑀫𑀁 𑀅𑀜𑁆𑀜𑀪𑀽𑀫𑀺𑀓𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸 𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀯𑀼𑀢𑁆𑀢𑀸𑀢𑀺 𑀦 𑀢𑀁 𑀅𑀜𑁆𑀜𑀁 𑀆𑀭𑀩𑁆𑀪 ¶ 𑀧𑀯𑀢𑁆𑀢𑀢𑀺. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀆𑀭𑀫𑁆𑀫𑀡𑀜𑁆𑀘 𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑀲𑀫𑁆𑀪𑀯𑁄. 𑀛𑀸𑀦𑀲𑁆𑀲 𑀆𑀦𑀺𑀲𑀁𑀲𑀪𑀽𑀢𑀜𑁆𑀘 𑀤𑀸𑀦𑀸𑀤𑀻𑀦𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀘𑁆𑀘𑀬𑀮𑀸𑀪𑁄 𑀯𑀺𑀬𑀸𑀢𑀺.

𑀧𑀯𑀢𑁆𑀢𑀺𑀢𑁄 𑀧𑀦 𑀯𑀺𑀧𑀸𑀓𑀲𑁆𑀲, 𑀓𑀼𑀲𑀮𑀲𑁆𑀲 𑀘 𑀅𑀢𑁆𑀣𑁂𑀯 𑀪𑁂𑀤𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀁 𑀯𑀺𑀬 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀤𑀺𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁. 𑀧𑀯𑀢𑁆𑀢𑀺𑀪𑁂𑀤𑁄 𑀯𑀼𑀢𑁆𑀢𑀦𑀬𑁄𑀯 𑀚𑀯𑀦𑀯𑀲𑁂𑀦, 𑀧𑀝𑀺𑀲𑀦𑁆𑀥𑀺𑀆𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀦𑀢𑁄.

𑀘𑀢𑀼𑀫𑀕𑁆𑀕𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀢𑁆𑀢𑀸𑀢𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀨𑀮𑀢𑁆𑀢𑀸, 𑀘𑀢𑀼𑀩𑁆𑀩𑀺𑀥𑀲𑀸𑀫𑀜𑁆𑀜𑀨𑀮𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀯𑀻𑀣𑀺𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑀭𑀺𑀫𑀸𑀡𑀁 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀯𑀢𑁆𑀢𑀺𑀬𑀸 ‘‘𑀤𑁆𑀯𑀺𑀥𑀸 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁆𑀧𑀻𑀢𑀺 𑀢𑁂𑀯𑀻𑀲𑀢𑀺𑀯𑀺𑀥𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀁, 𑀧𑀜𑁆𑀘𑀯𑀺𑀥𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁, 𑀘𑀢𑀼𑀩𑁆𑀩𑀺𑀥𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁, 𑀘𑀢𑀼𑀩𑁆𑀩𑀺𑀥𑀫𑁂𑀯 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀙𑀢𑁆𑀢𑀺𑀁𑀲𑀯𑀺𑀥𑀁 𑀳𑁄𑀢𑀺.

𑀪𑀽𑀫𑀺𑀪𑁂𑀤𑀢𑁄 ¶ 𑀢𑀺𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀮𑁄𑀓𑀼𑀢𑁆𑀢𑀭𑀜𑁆𑀳𑀺 𑀓𑀺𑀭𑀺𑀬𑀘𑀺𑀢𑁆𑀢𑀁 𑀦𑀢𑁆𑀣𑀺 𑀏𑀓𑀦𑁆𑀢𑁂𑀦 𑀅𑀦𑀦𑁆𑀢𑀭𑀯𑀺𑀧𑀸𑀓𑀤𑀸𑀬𑀺𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀽’’𑀢𑀺 (𑀔𑀼. 𑀧𑀸. 𑁬.𑁫; 𑀲𑀼. 𑀦𑀺. 𑁨𑁨𑁮). 𑀳𑁄𑀢𑀼 𑀢𑀸𑀯 𑀲𑁂𑀓𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀦𑀼𑀢𑁆𑀢𑀭𑀁 𑀓𑀼𑀲𑀮𑀁 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀦𑀬𑀦𑀢𑁄 𑀲𑀨𑀮𑀁, 𑀅𑀭𑀳𑀢𑁄 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀦𑀬𑀦𑀢𑁄 𑀦𑀺𑀧𑁆𑀨𑀮𑀁, 𑀢𑀲𑁆𑀲 𑀓𑀺𑀭𑀺𑀬𑀪𑀸𑀯𑁄 𑀓𑀲𑁆𑀫𑀸 𑀦 𑀇𑀘𑁆𑀙𑀺𑀢𑁄𑀢𑀺? 𑀇𑀘𑁆𑀙𑀺𑀢𑀩𑁆𑀩𑁄 𑀲𑀺𑀬𑀸. 𑀬𑀤𑀺 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀲𑀓𑀺𑀁𑀬𑁂𑀯 𑀧𑀦 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀧𑀯𑀢𑁆𑀢𑀢𑀺. 𑀬𑀤𑀺 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑁂𑀬𑁆𑀬, 𑀫𑀕𑁆𑀕𑀘𑀺𑀢𑁆𑀢𑀁 𑀅𑀭𑀳𑀢𑁄𑀧𑀺 𑀧𑀯𑀢𑁆𑀢𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀓𑀺𑀭𑀺𑀬𑀘𑀺𑀢𑁆𑀢𑀁 𑀲𑀺𑀬𑀸, 𑀦 𑀘𑁂𑀢𑀁 𑀅𑀢𑁆𑀣𑀺 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀦𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀁. 𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑀦𑁆𑀢𑀺 𑀘 𑀓𑀺𑀭𑀺𑀬𑀸𑀫𑀢𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀓𑀼𑀲𑀮𑀸𑀓𑀼𑀲𑀮𑀁 𑀯𑀺𑀬 𑀓𑀺𑀜𑁆𑀘𑀺 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀓𑀺𑀭𑀺𑀬𑀸𑀫𑀢𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀓𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀢𑀁 𑀯𑀺𑀧𑀸𑀓𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀢𑁆𑀣 𑀳𑀺 𑀬𑀤𑁂𑀢𑀁 𑀆𑀯𑀚𑁆𑀚𑀦𑀤𑁆𑀯𑀬𑀁, 𑀢𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑁂𑀧𑀺 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀁 𑀅𑀦𑀸𑀲𑁂𑀯𑀦𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑀢𑁄 𑀅𑀩𑀻𑀚𑀲𑀸𑀫𑀢𑁆𑀣𑀺𑀬𑀁 𑀯𑀺𑀬 𑀧𑀼𑀧𑁆𑀨𑀁 𑀅𑀨𑀮𑀫𑁂𑀯 𑀳𑁄𑀢𑀺. 𑀬𑀁 𑀧𑀦 𑀉𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀬𑀁 𑀲𑀦𑁆𑀢𑀢𑀺𑀬𑀁 𑀧𑀯𑀢𑁆𑀢𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀫𑀽𑀮𑀸𑀬 𑀮𑀢𑀸𑀬 𑀧𑀼𑀧𑁆𑀨𑀁 𑀯𑀺𑀬 𑀨𑀮𑀤𑀸𑀬𑀺 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄 ¶ 𑀓𑀺𑀭𑀺𑀬𑀳𑁂𑀢𑀼𑀦𑀸 𑀦𑀸𑀫 𑀅𑀮𑁄𑀪𑀸𑀤𑀺𑀦𑀸𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀮𑁄𑀪𑀸𑀤𑀺𑀓𑀺𑀭𑀺𑀬𑀳𑁂𑀢𑀼𑀯𑀺𑀭𑀳𑀺𑀢’’𑀦𑁆𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀼𑀭𑁂𑀘𑀭𑀸 𑀳𑀼𑀢𑁆𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑀼𑀭𑁂𑀘𑀭𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸. 𑀅𑀬𑀁 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀢𑁄 𑀉𑀧𑁆𑀧𑀦𑁆𑀦𑀸𑀧𑀺 𑀯𑀺𑀲𑀺𑀝𑁆𑀞𑀫𑀦𑀦𑀓𑀺𑀘𑁆𑀘𑀸𑀪𑀸𑀯𑁂𑀦 𑀫𑀦𑁄𑀫𑀢𑁆𑀢𑀸 𑀥𑀸𑀢𑀽𑀢𑀺 𑀫𑀦𑁄𑀥𑀸𑀢𑀼. 𑀢𑀣𑀸 𑀳𑁂𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀸𑀢𑀼𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁧𑁭) 𑀆𑀕𑀫𑀺𑀲𑁆𑀲𑀢𑀺. 𑀆𑀯𑀚𑁆𑀚𑀦𑀭𑀲𑀸𑀢𑀺 𑀆𑀪𑁄𑀕𑀭𑀲𑀸, 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀸 𑀧𑀼𑀭𑀺𑀫𑀸𑀓𑀸𑀭𑀢𑁄 𑀅𑀜𑁆𑀜𑀣𑀸 𑀑𑀡𑁄𑀚𑀦𑀭𑀲𑀸. 𑀪𑀯𑀗𑁆𑀕𑀯𑀺𑀘𑁆𑀙𑁂𑀤𑀧𑀤𑀝𑁆𑀞𑀸𑀦𑀸𑀢𑀺 𑀪𑀯𑀗𑁆𑀕𑀲𑀦𑁆𑀢𑀸𑀦𑀯𑀺𑀘𑁆𑀙𑁂𑀤𑀧𑀤𑀝𑁆𑀞𑀸𑀦𑀸. 𑀅𑀧𑀼𑀩𑁆𑀩𑀸𑀭𑀫𑁆𑀫𑀡𑀸 𑀲𑀓𑀺𑀤𑁂𑀯 𑀧𑀯𑀢𑁆𑀢𑀫𑀸𑀦𑀸 𑀲𑀩𑁆𑀩𑀣𑀸 𑀯𑀺𑀲𑀬𑀭𑀲𑀁 𑀅𑀦𑀼𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀇𑀝𑁆𑀞𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀯 𑀳𑁄𑀢𑀺.

𑀲𑀸𑀥𑀸𑀭𑀡𑀸𑀢𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀸𑀥𑀸𑀭𑀡𑀸. 𑀅𑀲𑀸𑀥𑀸𑀭𑀡𑀸𑀢𑀺 𑀅𑀲𑁂𑀓𑁆𑀔𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀸. 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀭𑀲𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁 𑀯𑀯𑀢𑁆𑀣𑀧𑁂𑀦𑁆𑀢𑀻 𑀯𑀺𑀬 𑀧𑀯𑀢𑁆𑀢𑀦𑀢𑁄 𑀯𑁄𑀝𑁆𑀞𑀩𑁆𑀩𑀦𑀭𑀲𑀸, 𑀫𑀦𑁄𑀤𑁆𑀯𑀸𑀭𑁂 ¶ 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀆𑀯𑀚𑁆𑀚𑀦𑀭𑀲𑀸. 𑀢𑀣𑀸𑀪𑀸𑀯𑁂𑀦 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀬𑀣𑀸𑀓𑁆𑀓𑀫𑀁 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑁄𑀝𑁆𑀞𑀩𑁆𑀩𑀦𑀓𑀸𑀮𑁂 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀆𑀯𑀚𑁆𑀚𑀦𑀓𑀸𑀮𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀯𑀗𑁆𑀕𑀲𑁆𑀲𑀸𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀸𑀧𑀕𑀫𑁄 𑀏𑀢𑀺𑀲𑁆𑀲𑀸 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀅𑀳𑁂𑀢𑀼𑀓…𑀧𑁂… 𑀧𑀤𑀝𑁆𑀞𑀸𑀦𑀸’’𑀢𑀺.

𑀅𑀭𑀳𑀢𑀦𑁆𑀢𑀺 𑀅𑀭𑀳𑀢𑀁𑀬𑁂𑀯 𑀅𑀲𑀸𑀥𑀸𑀭𑀡𑀪𑀸𑀯𑀢𑁄. 𑀅𑀦𑀼𑀴𑀸𑀭𑁂𑀲𑀽𑀢𑀺 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀧𑁂𑀢𑀭𑀽𑀧𑀸𑀤𑀻𑀲𑀼, 𑀅𑀜𑁆𑀜𑁂𑀲𑀼 𑀯𑀸 𑀅𑀧𑁆𑀧𑀡𑀻𑀢𑁂𑀲𑀼 𑀯𑀢𑁆𑀣𑀽𑀲𑀼. 𑀳𑀲𑀺𑀢𑀼𑀧𑁆𑀧𑀸𑀤𑀦𑀭𑀲𑀸𑀢𑀺 𑀳𑀲𑀺𑀢𑀲𑁆𑀲𑁂𑀯 𑀉𑀧𑁆𑀧𑀸𑀤𑀦𑀭𑀲𑀸. 𑀢𑀣𑀸 𑀳𑀺 𑀢𑀁 𑀘𑀺𑀢𑁆𑀢𑀁 ‘‘𑀳𑀲𑀺𑀢𑀼𑀧𑁆𑀧𑀸𑀤𑀦’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑁂𑀲𑀁 𑀳𑀲𑀺𑀢𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀸𑀦𑀁 𑀅𑀪𑀸𑀯𑀢𑁄. 𑀅𑀜𑁆𑀜𑀸𑀦𑀺𑀧𑀺 𑀳𑀺 𑀤𑁆𑀯𑀸𑀤𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀧𑀭𑀺𑀢𑁆𑀢𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀁 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀳𑀲𑀺𑀢𑀼𑀧𑁆𑀧𑀸𑀤𑀓𑀸𑀦𑀺 𑀯𑀺𑀚𑁆𑀚𑀦𑁆𑀢𑀺, 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀯𑀺𑀘𑀸𑀭𑀡𑀧𑀜𑁆𑀜𑀸𑀯𑀺𑀭𑀳𑀺𑀢𑀁 𑀧𑀭𑀺𑀢𑁆𑀢𑁂𑀲𑀼 𑀅𑀧𑁆𑀧𑀡𑀻𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀭𑀳𑀦𑁆𑀢𑀸𑀦𑀁 𑀲𑁄𑀫𑀦𑀲𑁆𑀲𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀪𑀕𑀯𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀅𑀢𑀻𑀢𑀁𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀯𑀢𑁆𑀯𑀸 ‘‘𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀯𑀺𑀘𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀓𑁂 ¶ . 𑀢𑀢𑁆𑀣 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁆𑀧𑀺 𑀪𑀕𑀯𑀢𑁄 𑀲𑀺𑀢𑀓𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀸𑀕𑀢𑀁𑀲𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀅𑀦𑀼𑀯𑀢𑁆𑀢𑀓𑀢𑁆𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑁂𑀯𑀸𑀢𑀺 𑀏𑀯𑀁 𑀧𑀦 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂 𑀲𑀢𑀺 𑀦 𑀓𑁄𑀘𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀁 𑀯𑀺𑀭𑁄𑀥𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀲𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘 𑀏𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀜𑁆𑀜𑀲𑁆𑀲𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺 𑀦 𑀬𑀼𑀚𑁆𑀚𑁂𑀬𑁆𑀬. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀢𑀁𑀲𑀫𑀼𑀝𑁆𑀞𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀦𑀪𑀸𑀯𑁄 𑀯𑀺𑀩𑀦𑁆𑀥𑀢𑀻𑀢𑀺. 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄.

𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺 𑀅𑀬𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸, 𑀅𑀭𑀳𑀢𑀁 𑀉𑀧𑁆𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑁄𑀢𑀺 𑀉𑀪𑀬𑁂𑀲𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀲𑀫𑀼𑀧𑀮𑀓𑁆𑀔𑀺𑀢𑁄 𑀏𑀢𑁆𑀣 𑀓𑀼𑀲𑀮𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀲𑁂𑀲𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀯𑀺𑀧𑀸𑀓𑀲𑁆𑀲𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀓𑀺𑀭𑀺𑀬𑀪𑀸𑀯𑀧𑁆𑀧𑀲𑀗𑁆𑀕𑁄 ¶ 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀺. 𑀧𑀭𑀢𑁄 𑀓𑀼𑀲𑀮𑀢𑁄 𑀯𑀺𑀲𑁂𑀲𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁪𑁫𑁫. 𑀲𑀩𑁆𑀩𑀸𑀦𑀺𑀧𑀺 𑀓𑀼𑀲𑀮𑀸𑀓𑀼𑀲𑀮𑀩𑁆𑀬𑀸𑀓𑀢𑀸𑀦𑀺 𑀏𑀓𑀽𑀦𑀦𑀯𑀼𑀢𑀺 𑀯𑀺𑀜𑁆𑀜𑀸𑀡𑀸𑀦𑀺 𑀳𑁄𑀦𑁆𑀢𑀺 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀓𑀺𑀘𑁆𑀘𑀁 𑀦𑀸𑀫 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀤𑀺𑀦𑀸 𑀆𑀓𑀸𑀭𑁂𑀦 𑀧𑀯𑀢𑁆𑀢𑀺 𑀏𑀯. 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀦𑁆𑀢𑀻’’𑀢𑀺.

𑀆𑀦𑀼𑀪𑀸𑀯𑁂𑀦𑀸𑀢𑀺 𑀲𑀸𑀫𑀢𑁆𑀣𑀺𑀬𑁂𑀦. 𑀓𑀢𑀽𑀧𑀘𑀺𑀢𑀁 𑀳𑀺 𑀓𑀫𑁆𑀫𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀧𑀸𑀓𑀁 𑀤𑁂𑀦𑁆𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀯𑀺𑀲𑁆𑀲𑀚𑁆𑀚𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀤𑁂𑀯𑀫𑀦𑀼𑀲𑁆𑀲𑁂𑀲𑀽𑀢𑀺 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘. 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀁 𑀦𑀸𑀫 𑀓𑀢𑀽𑀧𑀘𑀺𑀢𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀫𑁆𑀫𑀁, 𑀢𑀜𑁆𑀘 𑀔𑁄 𑀯𑀺𑀧𑀸𑀓𑀤𑀸𑀦𑀸𑀬 𑀮𑀤𑁆𑀥𑁄𑀓𑀸𑀲𑀁. 𑀢𑁂𑀦𑀸𑀳 ‘‘𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺. 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀘𑁂𑀢𑀦𑀸𑀬 𑀧𑀘𑁆𑀘𑀬𑀪𑀽𑀢𑀁 𑀤𑁂𑀬𑁆𑀬𑀥𑀫𑁆𑀫𑀸𑀤𑀺. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀬𑀁 𑀕𑀢𑀺𑀁 𑀉𑀧𑀧𑀚𑁆𑀚𑀢𑀺, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀸𑀬𑀢𑀦𑀁. 𑀧𑀡𑁆𑀟𑀓𑀸𑀤𑀺𑀪𑀸𑀯𑀦𑁆𑀢𑀺 𑀧𑀡𑁆𑀟𑀓𑀫𑀽𑀕𑀫𑀫𑁆𑀫𑀦𑀸𑀤𑀺𑀪𑀸𑀯𑀁. 𑀤𑀼𑀩𑁆𑀩𑀮𑀲𑁆𑀲 𑀤𑁆𑀯𑀺𑀳𑁂𑀢𑀼𑀓𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀪𑀽𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀤𑀼𑀩𑁆𑀩𑀮…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀦𑁂𑀲𑀦𑁆𑀢𑀺 𑀪𑀸𑀯𑀺𑀢𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀦𑀁 𑀲𑀢𑁆𑀢𑀸𑀦𑀁. 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀅𑀢𑁆𑀢𑀦𑁄 𑀓𑀫𑁆𑀫𑀸𑀭𑀫𑁆𑀫𑀡𑀫𑁂𑀯.

𑀏𑀯𑀁 ¶ 𑀢𑀸𑀯𑁂𑀢𑁆𑀣𑀸𑀢𑀺 𑀏𑀢𑁆𑀣 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀲𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀪𑀯𑀸𑀮𑀫𑁆𑀩𑀦𑀸𑀤𑀺𑀯𑀺𑀪𑀸𑀕𑁂𑀦 𑀧𑀦 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀬𑀁 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀢𑀁 𑀢𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀲𑀼 𑀬𑀁 𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀢𑀁 𑀢𑀁 𑀅𑀦𑀦𑁆𑀢𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀩𑀦𑁆𑀥𑀫𑀸𑀦𑀁. 𑀢𑀲𑁆𑀲 𑀢𑀲𑁆𑀲𑁂𑀯𑀸𑀢𑀺 𑀬𑀲𑁆𑀲 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀢𑀲𑁆𑀲𑁂𑀯. 𑀢𑀲𑁆𑀫𑀺𑀜𑁆𑀜𑁂𑀯𑀸𑀢𑀺 𑀓𑀫𑁆𑀫𑀸𑀤𑀺𑀓𑁂 𑀏𑀯. 𑀓𑀫𑁆𑀫𑀜𑁆𑀘𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀲𑁆𑀫𑀺𑀁 𑀓𑀫𑁆𑀫𑁂, 𑀅𑀣 𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘, 𑀢𑀲𑁆𑀫𑀺𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑁂 𑀕𑀢𑀺𑀦𑀺𑀫𑀺𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀬𑀸𑀤𑀺𑀲𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀳𑁂𑀢𑀼𑀢𑁄, 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄 𑀘 𑀢𑀸𑀤𑀺𑀲𑀫𑁂𑀯. 𑀲𑀦𑁆𑀢𑀸𑀦𑀯𑀺𑀦𑀺𑀯𑀢𑁆𑀢𑀓𑁂𑀢𑀺 𑀪𑀯𑀗𑁆𑀕𑀲𑀦𑁆𑀢𑀸𑀦𑀲𑁆𑀲 𑀯𑀺𑀦𑀺𑀯𑀢𑁆𑀢𑀦𑀓𑁂. 𑀅𑀜𑁆𑀜𑀲𑁆𑀫𑀺𑀁 𑀆𑀯𑀚𑁆𑀚𑀦𑀲𑀗𑁆𑀔𑀸𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂. 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑁂𑀦𑁂𑀯 𑀲𑀼𑀧𑀺𑀦𑀤𑀲𑁆𑀲𑀦𑀁 ¶ 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀧𑀺𑀦𑀁 𑀅𑀧𑀲𑁆𑀲𑀢𑁄’’𑀢𑀺. 𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑀫𑁆𑀧𑀺 𑀧𑀯𑀢𑁆𑀢𑀢𑀺𑀬𑁂𑀯, 𑀢𑀣𑀸 𑀳𑀺𑀤𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀜𑁆𑀜𑁂𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀪𑀽𑀢𑀸𑀦𑀁𑀬𑁂𑀯.

𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀆𑀭𑀫𑁆𑀫𑀡𑀕𑀳𑀡𑀓𑁆𑀔𑀫𑀸𑀦𑀻𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑀸𑀦𑀺. 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀓𑀸𑀮𑁂 𑀯𑀺𑀬 𑀳𑀺 𑀩𑀳𑀺𑀦𑀺𑀓𑁆𑀔𑀦𑁆𑀢𑀓𑀸𑀮𑁂𑀧𑀺 𑀦 𑀢𑀸𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀓𑀺𑀘𑁆𑀘𑀓𑀸𑀦𑀺 𑀳𑁄𑀦𑁆𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀧𑀦 𑀯𑀺𑀲𑀤𑀪𑀸𑀯𑀁 𑀧𑀢𑁆𑀢𑀓𑀸𑀮𑁂 𑀏𑀯 𑀲𑀓𑀺𑀘𑁆𑀘𑀓𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺. 𑀆𑀧𑀸𑀣𑀕𑀢𑁂𑀢𑀺 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀺𑀢𑁂. 𑀢𑀫𑁂𑀯 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀺𑀢𑀁 𑀭𑀽𑀧𑀁 𑀧𑀝𑀺𑀘𑁆𑀘 𑀖𑀝𑁆𑀝𑀦𑀸 𑀧𑀘𑁆𑀘𑀬𑀁 𑀮𑀤𑁆𑀥𑀸. 𑀖𑀝𑁆𑀝𑀦𑀸𑀢𑀺 𑀧𑀝𑀺𑀖𑀸𑀢𑁄, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀲𑁂𑀲𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁂 𑀘𑀓𑁆𑀔𑀼𑀲𑁆𑀲 𑀯𑀺𑀲𑀬𑁂 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀯𑀺𑀲𑀬𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁂𑀦 𑀅𑀦𑀼𑀕𑁆𑀕𑀳𑁄, 𑀉𑀧𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀖𑀝𑁆𑀝𑀦𑀸𑀦𑀦𑁆𑀢𑀭𑀁. 𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦𑀸𑀢𑀺 𑀖𑀝𑁆𑀝𑀦𑀸𑀩𑀮𑁂𑀦. 𑀪𑀯𑀗𑁆𑀕𑀘𑀮𑀦𑀦𑁆𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀧𑀓𑀫𑁆𑀧𑀦𑀁, 𑀢𑀣𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸 𑀯𑀺𑀲𑀤𑀺𑀲𑀲𑁆𑀲 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸𑀯𑀢𑁆𑀣𑀸𑀳𑁂𑀢𑀼𑀢𑀸𑀬 𑀘𑀮𑀦𑀁 𑀯𑀺𑀬𑀸𑀢𑀺 ‘‘𑀘𑀮𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀲𑀺𑀤𑁆𑀥𑀸𑀬 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀫𑀼𑀔𑀻𑀪𑀸𑀯𑁂𑀦 𑀧𑀲𑀸𑀤𑀲𑁆𑀲 𑀢𑀸𑀯 𑀖𑀝𑁆𑀝𑀦𑀸 𑀳𑁄𑀢𑀼, 𑀅𑀜𑁆𑀜𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀦 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁 𑀓𑀣𑀁 𑀳𑁄𑀢𑀻𑀢𑀺? 𑀢𑀁𑀲𑀫𑁆𑀩𑀦𑁆𑀥𑀪𑀸𑀯𑀢𑁄. 𑀪𑁂𑀭𑀺𑀢𑀮𑁂 𑀞𑀧𑀺𑀢𑀸𑀲𑀼 𑀲𑀓𑁆𑀔𑀭𑀸𑀲𑀼 𑀏𑀓𑀺𑀲𑁆𑀲𑀸 𑀲𑀓𑁆𑀔𑀭𑀸𑀬 𑀖𑀝𑀺𑀢𑀸𑀬 𑀢𑀤𑀜𑁆𑀜𑀲𑀓𑁆𑀔𑀭𑀸𑀬𑀁 𑀞𑀺𑀢𑀫𑀓𑁆𑀔𑀺𑀓𑀸 𑀘𑀮𑀦𑀁 𑀘𑁂𑀢𑁆𑀣 𑀉𑀤𑀸𑀳𑀭𑀡𑀦𑁆𑀢𑀺. 𑀢𑀤𑁂𑀯 𑀭𑀽𑀧𑀦𑁆𑀢𑀺 𑀢𑀤𑁂𑀯 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀆𑀧𑀸𑀣𑀕𑀢𑀁 𑀭𑀽𑀧𑀸𑀬𑀢𑀦𑀁. 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀫𑀸𑀦𑀸 𑀯𑀺𑀬𑀸𑀢𑀺 𑀪𑀯𑀗𑁆𑀕𑀲𑀦𑁆𑀢𑀸𑀦𑀁 𑀯𑀺𑀘𑁆𑀙𑀺𑀦𑁆𑀤𑀦𑁆𑀢𑀻 ¶ 𑀯𑀺𑀬. 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀢𑁄 𑀪𑀯𑀗𑁆𑀕𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀯𑀺𑀲𑀬𑀕𑁆𑀕𑀳𑀡𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀤𑀲𑁆𑀲𑀦𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢𑀸𑀦𑀺 𑀅𑀯𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀕𑀳𑀡𑀁 𑀉𑀤𑁆𑀤𑁂𑀲𑁂 𑀤𑁆𑀯𑀺𑀦𑁆𑀦𑀁 𑀆𑀯𑀚𑁆𑀚𑀦𑀸𑀦𑀁 𑀆𑀯𑀚𑁆𑀚𑀦𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀢𑁆𑀢𑀸.

𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁. 𑀬𑁂 𑀳𑀤𑀬𑀯𑀢𑁆𑀣𑀼 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺 𑀦𑀸𑀦𑀼𑀚𑀸𑀦𑀦𑁆𑀢𑀺, 𑀢𑁂𑀲𑀁 ‘‘𑀲𑀫𑁆𑀧𑀝𑀺𑀘𑁆𑀙𑀦𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺 𑀆𑀕𑀢𑀸. 𑀦 𑀳𑀺 𑀲𑀓𑁆𑀓𑀸 𑀧𑀸𑀴𑀺𑀁 𑀧𑀝𑀺𑀲𑁂𑀥𑁂𑀢𑀼𑀁.

‘‘𑀲𑀘𑁂 ¶ 𑀫𑀳𑀦𑁆𑀢𑀁 𑀳𑁄𑀢𑀻’’𑀢𑀺 𑀇𑀤𑀁 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀼𑀤𑁆𑀤𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀜𑁆𑀳𑀺 𑀆𑀭𑀫𑁆𑀫𑀡𑀫𑀺𑀥 ‘‘𑀫𑀳𑀦𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀢𑀺𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀳𑀼𑀢𑁆𑀯𑀸 𑀆𑀧𑀸𑀣𑀕𑀫𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸𑀯𑀯𑀢𑁆𑀣𑀸𑀧𑀺𑀢𑁂𑀢𑀺 𑀯𑁄𑀝𑁆𑀞𑀩𑁆𑀩𑀦𑁂𑀦 𑀯𑀼𑀢𑁆𑀢𑀸𑀓𑀸𑀭𑁂𑀦 𑀓𑀢𑀯𑀯𑀢𑁆𑀣𑀸𑀧𑀦𑁂. 𑀆𑀯𑀚𑁆𑀚𑀦𑀸𑀬, 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀯𑀲𑁂𑀲𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀦’’𑀦𑁆𑀢𑀺 𑀅𑀯𑀲𑁂𑀲𑀕𑁆𑀕𑀳𑀡𑀁 𑀓𑀢𑀁. 𑀙 𑀲𑀢𑁆𑀢 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 ‘‘𑀧𑀜𑁆𑀘 𑀯𑀸’’𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀢𑁆𑀢𑀫𑀼𑀘𑁆𑀙𑀺𑀢𑀸𑀤𑀺𑀓𑀸𑀮𑁂 𑀳𑀺 𑀧𑀜𑁆𑀘𑀧𑀺 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺.

𑀢𑀸𑀦𑀺𑀬𑁂𑀯𑀸𑀢𑀺 ‘‘𑀅𑀝𑁆𑀞𑀦𑁆𑀦𑀁 𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁪𑁫𑁫) 𑀯𑀼𑀢𑁆𑀢𑀸𑀦𑀺 𑀏𑀓𑀽𑀦𑀢𑀺𑀁𑀲 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺𑀬𑁂𑀯. 𑀇𑀢𑁄 𑀅𑀜𑁆𑀜𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀯𑀓𑀸𑀭𑀕𑁆𑀕𑀳𑀡𑀁. ‘‘𑀕𑁄𑀢𑁆𑀭𑀪𑀽𑀢𑁄’’𑀢𑀺 𑀇𑀤𑀁 𑀕𑁄𑀢𑁆𑀭𑀪𑀼𑀝𑁆𑀞𑀸𑀦𑀺𑀬𑀸𑀦𑀁 𑀧𑀭𑀺𑀓𑀫𑁆𑀫𑀯𑁄𑀤𑀸𑀦𑀸𑀦𑀫𑁆𑀧𑀺 𑀕𑀳𑀡𑀁, 𑀦 𑀕𑁄𑀢𑁆𑀭𑀪𑀼𑀦𑁄 𑀏𑀯. 𑀨𑀮𑀘𑀺𑀢𑁆𑀢𑀸𑀦𑀻𑀢𑀺 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀓𑀨𑀮𑀘𑀺𑀢𑁆𑀢𑀸𑀦𑀺. 𑀬𑀁 𑀬𑀁 𑀮𑀤𑁆𑀥𑀧𑀘𑁆𑀘𑀬𑀦𑁆𑀢𑀺 𑀬𑀁 𑀬𑀁 𑀚𑀯𑀦𑀁 𑀭𑀽𑀧𑀸𑀯𑀘𑀭𑀚𑀯𑀦𑀸𑀤𑀺𑀯𑀲𑁂𑀦 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀧𑀘𑁆𑀘𑀬𑀁.

𑀅𑀢𑀺𑀫𑀳𑀦𑁆𑀢𑀦𑁆𑀢𑀺 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁. 𑀢𑀢𑁆𑀣 𑀳𑀺 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀢𑁆𑀣. 𑀯𑀺𑀪𑀽𑀢𑀦𑁆𑀢𑀺 𑀲𑀼𑀧𑀸𑀓𑀝𑀁, 𑀢𑀜𑁆𑀘 𑀓𑀸𑀫𑀸𑀯𑀘𑀭𑀫𑁂𑀯. 𑀢𑀢𑁆𑀣 𑀳𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀓𑀸𑀫𑀸𑀯𑀘𑀭𑀚𑀯𑀦𑀸𑀯𑀲𑀸𑀦𑁂𑀢𑀺 𑀓𑀸𑀫𑀸𑀯𑀘𑀭𑀚𑀯𑀦𑀲𑁆𑀲𑁂𑀯 𑀅𑀯𑀲𑀸𑀦𑁂. 𑀦 𑀳𑀺 𑀢𑀁 𑀓𑀸𑀫𑀢𑀡𑁆𑀳𑀸𑀳𑁂𑀢𑀼𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀺 𑀅𑀚𑀦𑀓𑀢𑁆𑀢𑀸, 𑀚𑀦𑀓𑀸𑀲𑀤𑀺𑀲𑀢𑁆𑀢𑀸 𑀘. 𑀬𑀣𑀸 𑀕𑁂𑀳𑀢𑁄 𑀩𑀳𑀺 𑀕𑀦𑁆𑀢𑀼𑀓𑀸𑀫𑁄 𑀢𑀭𑀼𑀡𑀤𑀸𑀭𑀓𑁄 𑀚𑀦𑀓𑀁, 𑀚𑀦𑀓𑀲𑀤𑀺𑀲𑀁 𑀯𑀸 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀜𑁆𑀜𑀁, 𑀏𑀯𑀫𑀺𑀤𑀫𑁆𑀧𑀺 ¶ . 𑀢𑀢𑁆𑀣𑀸𑀧𑀺 𑀦 𑀲𑀩𑁆𑀩𑀲𑁆𑀫𑀸 𑀚𑀯𑀦𑀸 𑀲𑀩𑁆𑀩𑀁 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀲𑁆𑀲 𑀦𑀺𑀬𑀫𑁂𑀢𑀩𑁆𑀩𑀢𑁄, 𑀆𑀭𑀫𑁆𑀫𑀡𑁂𑀦 𑀘 𑀯𑁂𑀤𑀦𑀸𑀬 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀢𑁄. 𑀢𑀢𑁆𑀣𑀸𑀬𑀁 𑀦𑀺𑀬𑀫𑁄 𑁋 𑀧𑀭𑀺𑀢𑁆𑀢𑀓𑀼𑀲𑀮𑀮𑁄𑀪𑀫𑁄𑀳𑀫𑀽𑀮𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀦𑀁 𑀅𑀜𑁆𑀜𑀢𑀭𑀸𑀦𑀦𑁆𑀢𑀭𑀁 𑀅𑀢𑀺𑀫𑀳𑀢𑀺 𑀯𑀺𑀲𑀬𑁂 𑀧𑀜𑁆𑀘𑀦𑁆𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀁 𑀅𑀜𑁆𑀜𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀭𑀺𑀢𑁆𑀢𑀓𑀼𑀲𑀮𑀸𑀓𑀼𑀲𑀮𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀦𑀁 𑀅𑀜𑁆𑀜𑀢𑀭𑀸𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀙𑀦𑁆𑀦𑀁 𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑀁 𑀧𑀯𑀢𑁆𑀢𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀦𑀦𑁆𑀢𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀬𑀺𑀤𑀁 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀧𑀼𑀭𑀺𑀫𑀓𑀫𑁆𑀫𑀯𑀲𑁂𑀦𑀸’’𑀢𑀺 𑀇𑀤𑀁 𑀢𑀤𑀸𑀭𑀫𑁆𑀫𑀡𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀦 ¶ 𑀳𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀫𑁂𑀯 𑀓𑀫𑁆𑀫𑀁 𑀢𑀤𑀸𑀭𑀫𑁆𑀫𑀡𑀁 𑀚𑀦𑁂𑀢𑀺, 𑀅𑀣 𑀔𑁄 𑀅𑀜𑁆𑀜𑀓𑀫𑁆𑀫𑀫𑁆𑀧𑀺. 𑀢𑀁 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀬𑀺𑀦𑀸 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀤𑀸𑀭𑀫𑁆𑀫𑀡𑀢𑁄 𑀯𑀺𑀲𑀤𑀺𑀲𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺. ‘‘𑀚𑀯𑀦𑀘𑀺𑀢𑁆𑀢𑀯𑀲𑁂𑀦𑀸’’𑀢𑀺 𑀇𑀤𑀁 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁. ‘‘𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀁 𑀦𑀺𑀬𑀫𑁂𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀜𑁆𑀳𑀺 𑀅𑀢𑁆𑀢𑀦𑁄 𑀉𑀓𑁆𑀓𑀝𑁆𑀞𑀢𑀭𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀬𑁄 𑀬𑁄 𑀧𑀘𑁆𑀘𑀬𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼 𑀬𑁄 𑀬𑁄 𑀢𑀤𑀸𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀲𑀫𑀯𑁂𑀢𑁄 𑀳𑁄𑀢𑀺. 𑀓𑀺𑀜𑁆𑀘𑀺 𑀅𑀦𑁆𑀢𑀭𑀦𑁆𑀢𑀺 𑀓𑀺𑀜𑁆𑀘𑀺 𑀔𑀡𑀦𑁆𑀢𑀭𑀁. 𑀉𑀤𑀓𑀫𑀺𑀯𑀸𑀢𑀺 𑀧𑀝𑀺𑀲𑁄𑀢𑀁 𑀕𑀘𑁆𑀙𑀦𑁆𑀢𑀁 𑀉𑀤𑀓𑀫𑀺𑀯.

𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁 𑀯𑀸𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞 𑀯𑀸 𑀤𑀲 𑀯𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁧𑁧) 𑀯𑀺𑀬. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁𑀬𑁂𑀯 𑀧𑀦 𑀯𑀡𑁆𑀡𑁂𑀦𑁆𑀢𑀺. 𑀯𑀺𑀧𑀸𑀓𑀘𑀺𑀢𑁆𑀢𑀢𑁆𑀢𑀸, 𑀆𑀯𑀚𑁆𑀚𑀦𑀲𑁆𑀲 𑀘 𑀯𑀺𑀤𑀽𑀭𑀢𑁆𑀢𑀸, 𑀫𑀽𑀮𑀪𑀯𑀗𑁆𑀕𑀸𑀤𑀺𑀪𑀯𑀗𑁆𑀕𑀲𑀸𑀫𑀜𑁆𑀜𑀲𑀩𑁆𑀪𑀸𑀯𑀢𑁄 𑀘 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀸𑀭𑀳𑀁 𑀲𑀫𑀸𑀦𑀁 𑀢𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀘𑁆𑀘𑀢𑀺 𑀏𑀓𑀲𑁆𑀲 𑀆𑀭𑀫𑁆𑀫𑀡𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀓𑀸𑀫𑀸𑀯𑀘𑀭𑀁, 𑀑𑀝𑁆𑀞𑀫𑀼𑀔’’𑀦𑁆𑀢𑀺 𑀘 𑀬𑀣𑀸. 𑀏𑀢𑁆𑀣 𑀘 𑀓𑁂𑀘𑀺 ‘‘𑀧𑀝𑁆𑀞𑀸𑀦𑁂 ‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁬) 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀏𑀯 𑀅𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢’’𑀦𑁆𑀢𑀺 𑀓𑀺𑀭𑀺𑀬𑀸𑀚𑀯𑀦𑀸𑀦𑀦𑁆𑀢𑀭𑀁 𑀦 𑀇𑀘𑁆𑀙𑀦𑁆𑀢𑀺. 𑀯𑀺𑀧𑁆𑀨𑀸𑀭𑀯𑀦𑁆𑀢𑀁 𑀳𑀺 𑀚𑀯𑀦𑀁 𑀦𑀸𑀯𑀁 𑀯𑀺𑀬 𑀦𑀤𑀻𑀲𑁄𑀢𑁄 𑀪𑀯𑀗𑁆𑀕𑀁 𑀅𑀦𑀼𑀩𑀦𑁆𑀥𑀢𑀺, 𑀦 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀲𑀦𑁆𑀢𑀯𑀼𑀢𑁆𑀢𑀺𑀓𑀺𑀭𑀺𑀬𑀚𑀯𑀦𑀁 𑀧𑀡𑁆𑀡𑀧𑀼𑀝𑀁 𑀯𑀺𑀬 𑀦𑀤𑀻𑀲𑁄𑀢𑁄𑀢𑀺. 𑀢𑀬𑀺𑀤𑀁 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀢𑁆𑀣𑀘𑀺 𑀅𑀯𑀘𑀦𑀁 𑀤𑀺𑀲𑁆𑀲𑀢𑀺, 𑀬𑀣𑀸 𑀢𑀁 𑀥𑀫𑁆𑀫𑀲𑀗𑁆𑀕𑀳𑁂 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀮𑀩𑁆𑀪𑀫𑀸𑀦𑁄𑀧𑀺 𑀅𑀥𑀺𑀧𑀢𑀺 𑀦 𑀯𑀼𑀢𑁆𑀢𑁄. 𑀬𑀜𑁆𑀘 𑀧𑀡𑁆𑀡𑀧𑀼𑀝𑀁 𑀦𑀺𑀤𑀲𑁆𑀲𑀺𑀢𑀁, 𑀢𑀫𑁆𑀧𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀦 𑀲𑀫𑀸𑀦𑀁. 𑀦𑀸𑀯𑀸𑀧𑀡𑁆𑀡𑀧𑀼𑀝𑀸𑀦𑀜𑁆𑀳𑀺 𑀦𑀤𑀻𑀲𑁄𑀢𑀲𑁆𑀲 𑀆𑀯𑀝𑁆𑀝𑀦𑀁, 𑀕𑀢𑀺 𑀘 𑀯𑀺𑀲𑀤𑀺𑀲𑀻𑀢𑀺 𑀦𑀸𑀯𑀸𑀬 𑀦𑀤𑀻𑀲𑁄𑀢𑀲𑁆𑀲 𑀅𑀦𑀼𑀩𑀦𑁆𑀥𑀦𑀁, 𑀧𑀡𑁆𑀡𑀧𑀼𑀝𑀲𑁆𑀲 𑀅𑀦𑀦𑀼𑀩𑀦𑁆𑀥𑀦𑀜𑁆𑀘 𑀬𑀼𑀚𑁆𑀚𑀢𑀺, 𑀇𑀥 𑀧𑀦 𑀓𑀺𑀭𑀺𑀬𑀚𑀯𑀦𑁂𑀢𑀭𑀚𑀯𑀦𑀸𑀦𑀁 𑀪𑀯𑀗𑁆𑀕𑀲𑁄𑀢𑀲𑁆𑀲 ¶ 𑀆𑀯𑀝𑁆𑀝𑀦𑀁, 𑀕𑀢𑀺 𑀘 𑀲𑀤𑀺𑀲𑀻𑀢𑀺 𑀏𑀢𑀲𑁆𑀲 𑀅𑀦𑀦𑀼𑀩𑀦𑁆𑀥𑀦𑀁, 𑀇𑀢𑀭𑀲𑁆𑀲 𑀅𑀦𑀼𑀩𑀦𑁆𑀥𑀦𑀜𑁆𑀘 𑀦 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀪𑀯𑀗𑁆𑀕𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀪𑀯𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀥 𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑁂 𑀘𑀼𑀢𑀺𑀧𑀺 𑀦 𑀳𑁄𑀢𑀺𑀬𑁂𑀯. 𑀤𑀲𑁆𑀲𑀦𑀸𑀤𑀻𑀦𑀻𑀢𑀺 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀸𑀦𑀺. 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀲𑀦𑁆𑀥𑀺𑀢𑁄 𑀪𑀯𑀗𑁆𑀕𑀫𑁂𑀯, 𑀪𑀯𑀗𑁆𑀕𑀢𑁄 𑀆𑀯𑀚𑁆𑀚𑀦𑀫𑁂𑀯𑀸𑀢𑀺 ¶ 𑀏𑀯𑀁 𑀧𑀯𑀢𑁆𑀢𑀘𑀺𑀢𑁆𑀢𑀦𑀺𑀬𑀫𑀯𑀲𑁂𑀦𑁂𑀯. 𑀢𑀫𑁆𑀧𑀻𑀢𑀺 𑀘𑀼𑀢𑀺𑀘𑀺𑀢𑁆𑀢𑀫𑁆𑀧𑀺. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀯𑀺𑀬 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀫𑁂𑀯 𑀳𑁄𑀢𑀺 𑀅𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑀢𑁄.

𑀪𑀯𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀽𑀢𑀺 𑀢𑀻𑀲𑀼 𑀪𑀯𑁂𑀲𑀼, 𑀧𑀜𑁆𑀘𑀲𑀼 𑀕𑀢𑀻𑀲𑀼, 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼, 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘. 𑀬𑁄 𑀧𑀦𑁂𑀢𑁆𑀣 𑀅𑀘𑀺𑀢𑁆𑀢𑀓𑁄, 𑀲𑁄 𑀇𑀥 𑀦 𑀕𑀳𑁂𑀢𑀩𑁆𑀩𑁄 𑀯𑀺𑀜𑁆𑀜𑀸𑀡𑀓𑀣𑀸𑀪𑀸𑀯𑀢𑁄. ‘‘𑀏𑀢𑁆𑀣𑀸’’𑀢𑀺 𑀇𑀤𑀁 ‘‘𑀲𑀁𑀲𑀭𑀫𑀸𑀦𑀸𑀦𑀁 𑀲𑀢𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑁆𑀣 𑀏𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀲𑀁𑀲𑀭𑀫𑀸𑀦𑁂𑀲𑀼 𑀲𑀢𑁆𑀢𑁂𑀲𑀼 𑀬𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀦𑁆𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 𑀅𑀭𑀳𑀢𑁄 𑀦𑀺𑀭𑀼𑀤𑁆𑀥𑀫𑁂𑀯 𑀳𑁄𑀢𑀺 𑀘𑀺𑀢𑁆𑀢𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀢𑁄.

𑀇𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀯𑁂𑀤𑀦𑀸𑀓𑁆𑀔𑀦𑁆𑀥𑀓𑀣𑀸𑀯𑀡𑁆𑀡𑀦𑀸

𑁪𑁫𑁬. 𑀯𑁂𑀤𑁂𑀦 𑀅𑀦𑀼𑀪𑀯𑀦𑀸𑀓𑀸𑀭𑁂𑀦 𑀅𑀬𑀺𑀢𑀁 𑀧𑀯𑀢𑁆𑀢𑀁 𑀯𑁂𑀤𑀬𑀺𑀢𑀁, 𑀯𑁂𑀤𑀬𑀺𑀢𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀚𑀸𑀢𑀁 𑀯𑁂𑀤𑀬𑀺𑀢𑀮𑀓𑁆𑀔𑀡𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀯𑁂𑀤𑀦𑀸 𑀏𑀯𑀸𑀢𑀺 𑀆𑀳 ‘‘𑀯𑁂𑀤𑀬𑀺𑀢𑀮𑀓𑁆𑀔𑀡𑀁 𑀦𑀸𑀫 𑀯𑁂𑀤𑀦𑀸𑀯𑀸’’𑀢𑀺. 𑀅𑀣 𑀯𑀸 𑀯𑁂𑀤𑀬𑀺𑀢𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀓𑀧𑁆𑀧𑀦𑀸𑀲𑀺𑀤𑁆𑀥𑀁 𑀪𑁂𑀤𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀯𑀲𑁂𑀦𑀸𑀧𑀺 𑀯𑁂𑀤𑀦𑀸𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑁂𑀤𑀬𑀺𑀢𑀮𑀓𑁆𑀔𑀡𑀁 𑀦𑀸𑀫 𑀯𑁂𑀤𑀦𑀸𑀯𑀸’’𑀢𑀺. 𑀯𑁂𑀤𑀬𑀢𑀺 𑀯𑁂𑀤𑀬𑀢𑀻𑀢𑀺 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦 𑀯𑀘𑀦𑀁 𑀯𑁂𑀤𑀦𑀸𑀬 𑀲𑀯𑀺𑀲𑀬𑁂 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀲𑀪𑀸𑀯𑀥𑀫𑁆𑀫𑀢𑁄 𑀅𑀜𑁆𑀜𑁄 𑀓𑀢𑁆𑀢𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀇𑀢𑀻𑀢𑀺 𑀅𑀦𑀺𑀬𑀫𑀢𑁄 𑀳𑁂𑀢𑀼𑀅𑀢𑁆𑀣𑁄. 𑀔𑁄𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀢𑀲𑁆𑀲 𑀦𑀺𑀬𑀫𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀬𑀣𑀸𑀧𑀘𑁆𑀘𑀬𑀁 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

‘‘𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀦 ¶ 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀇𑀤𑀁 𑀓𑀼𑀲𑀮𑀸𑀬 𑀯𑁂𑀤𑀦𑀸𑀬 𑀉𑀧𑀮𑀓𑁆𑀔𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀓𑀼𑀲𑀮𑀸 𑀯𑁂𑀤𑀦𑀸, 𑀲𑀩𑁆𑀩𑀸 𑀲𑀸 𑀓𑀼𑀲𑀮𑁂𑀦 𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺, 𑀦 𑀧𑀦 𑀢𑀲𑁆𑀲𑀸 𑀓𑀼𑀲𑀮𑀪𑀸𑀯𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀓𑀼𑀲𑀮𑁂𑀦 𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑁄𑀕𑀢𑁄 𑀓𑀼𑀲𑀮𑀸𑀬 𑀯𑁂𑀤𑀦𑀸𑀬 𑀓𑀼𑀲𑀮𑀪𑀸𑀯𑁄, 𑀅𑀣 ¶ 𑀔𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑀢𑁄. 𑀢𑁂𑀦𑀸𑀳 ‘‘𑀚𑀸𑀢𑀺𑀯𑀲𑁂𑀦𑀸’’𑀢𑀺. 𑀅𑀓𑀼𑀲𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀢𑀺𑀯𑀺𑀥𑀸, 𑀏𑀯𑀁 𑀬𑀸𑀯 𑀏𑀓𑀽𑀦𑀦𑀯𑀼𑀢𑀺𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀪𑀸𑀯𑀪𑁂𑀤𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀪𑀽𑀫𑀺𑀆𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀓𑁂𑀯𑀮𑀁 𑀲𑀪𑀸𑀯𑀓𑀢𑀪𑁂𑀤𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄.

‘‘𑀧𑀜𑁆𑀘𑀯𑀺𑀥𑀸’’𑀢𑀺 𑀯𑀢𑁆𑀯𑀸 𑀢𑀁 𑀧𑀜𑁆𑀘𑀯𑀺𑀥𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀓𑀸𑀬𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀮𑀤𑁆𑀥𑀲𑁆𑀲𑀸𑀤𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀡𑀢𑀺 𑀯𑀸 𑀓𑀸𑀬𑀺𑀓𑀁 𑀆𑀩𑀸𑀥𑀦𑁆𑀢𑀺 𑀲𑀼𑀔𑀁. 𑀲𑀼𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀔𑀦𑁆𑀢𑀺 𑀅𑀧𑀭𑁂. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁, 𑀓𑀸𑀬𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀡𑀢𑀺 𑀯𑀸 𑀓𑀸𑀬𑀺𑀓𑀁 𑀅𑀲𑁆𑀲𑀸𑀤𑀦𑁆𑀢𑀺 𑀤𑀼𑀓𑁆𑀔𑀁. 𑀤𑀼𑀓𑁆𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑁆𑀢𑀺 𑀅𑀧𑀭𑁂. 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀦𑀁 𑀲𑀤𑁆𑀤𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀤𑁄𑀫𑀦𑀲𑁆𑀲𑀲𑁆𑀲 𑀲𑁄𑀫𑀦𑀲𑁆𑀲𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀁 𑀧𑀦 𑀓𑀸𑀭𑀡𑀁 𑀫𑀸𑀦𑀲𑁂𑀢𑀭𑀲𑀸𑀢𑀸𑀲𑀸𑀢𑀯𑀲𑁂𑀦 𑀲𑀼𑀔𑀁, 𑀤𑀼𑀓𑁆𑀔𑀜𑁆𑀘 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺, 𑀉𑀧𑁂𑀓𑁆𑀔𑀸 𑀧𑀦 𑀫𑀸𑀦𑀲𑀻, 𑀇𑀢𑀭𑀸 𑀘 𑀏𑀓𑀥𑀸𑀯 𑀯𑀼𑀢𑁆𑀢𑀸𑀢𑀺? 𑀪𑁂𑀤𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀅𑀦𑀼𑀕𑁆𑀕𑀳𑀽𑀧𑀖𑀸𑀢𑀓𑀢𑀸𑀬 𑀲𑀼𑀔𑀤𑀼𑀓𑁆𑀔𑀸𑀦𑀺 𑀅𑀜𑁆𑀜𑀣𑀸 𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀳𑀫𑀼𑀧𑀖𑀸𑀢𑀜𑁆𑀘 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀫𑀦𑀲𑁄, 𑀦 𑀏𑀯𑀫𑀼𑀧𑁂𑀓𑁆𑀔𑀸. 𑀢𑀲𑁆𑀫𑀸 𑀪𑁂𑀤𑀸𑀪𑀸𑀯𑀢𑁄 𑀏𑀓𑀥𑀸𑀯 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸𑀢𑀺.

𑀢𑀢𑁆𑀣 𑀬𑁂𑀦 𑀲𑀪𑀸𑀯𑀪𑁂𑀤𑁂𑀦 𑀯𑁂𑀤𑀦𑀸 𑀧𑀜𑁆𑀘𑀯𑀺𑀥𑀸, 𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑁂 𑀲𑀼𑀧𑀸𑀓𑀝𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀓𑀼𑀲𑀮𑀯𑀺𑀧𑀸𑀓𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸 𑀅𑀥𑀺𑀓𑀭𑀡𑀻𑀫𑀢𑁆𑀣𑀓𑁂 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀅𑀬𑁄𑀓𑀽𑀝𑁂𑀦 𑀧𑀳𑀭𑀦𑁆𑀢𑀲𑁆𑀲 𑀧𑀺𑀘𑀼𑀧𑀺𑀡𑁆𑀟𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀽𑀝𑀁 𑀅𑀥𑀺𑀓𑀭𑀡𑀺𑀁 𑀕𑀡𑁆𑀳𑀸𑀢𑀺, 𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺, 𑀏𑀯𑀁 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀩𑀮𑀯𑀪𑀸𑀯𑀢𑁄 𑀇𑀝𑁆𑀞𑁂, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀆𑀭𑀫𑁆𑀫𑀡𑁂 𑀓𑀸𑀬𑀯𑀺𑀜𑁆𑀜𑀸𑀡𑀁 𑀲𑀼𑀔𑀲𑀳𑀕𑀢𑀁 𑀳𑁄𑀢𑀺. 𑀅𑀦𑀺𑀝𑁆𑀞𑁂, 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀤𑀼𑀓𑁆𑀔𑀲𑀳𑀕𑀢𑀦𑁆𑀢𑀺 𑀆𑀳 ‘‘𑀓𑀼𑀲𑀮…𑀧𑁂… 𑀤𑀼𑀓𑁆𑀔’’𑀦𑁆𑀢𑀺. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀧𑀜𑁆𑀘 𑀓𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀳𑁄𑀦𑁆𑀢𑀺, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀯𑀲𑁂𑀦, 𑀲𑁂𑀲𑀸𑀦𑀺 𑀢𑁂𑀭𑀲 𑀓𑀸𑀫𑀸𑀯𑀘𑀭𑀸𑀦𑀺, 𑀅𑀝𑁆𑀞 𑀭𑀽𑀧𑀸𑀯𑀘𑀭𑀸𑀦𑀺, 𑀤𑁆𑀯𑀢𑁆𑀢𑀺𑀁𑀲 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀬𑀣𑀸𑀭𑀳𑀁 ¶ 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀧𑀸𑀤𑀓𑀸𑀤𑀺𑀯𑀲𑁂𑀦 ¶ 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑁄𑀫𑀦𑀲𑁆𑀲𑀁 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺. 𑀤𑁄𑀫𑀦𑀲𑁆𑀲𑀁 𑀤𑁆𑀯𑀻𑀳𑀺 𑀅𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦.

𑀅𑀯𑀲𑁂𑀲𑀧𑀜𑁆𑀘𑀧𑀜𑁆𑀜𑀸𑀲𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀙𑀲𑀝𑁆𑀞𑀺 𑀯𑀺𑀜𑁆𑀜𑀸𑀡𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀬 𑀧𑀜𑁆𑀘𑀧𑀜𑁆𑀜𑀸𑀲𑀸𑀬. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀦𑀺𑀩𑁆𑀩𑀺𑀓𑀧𑁆𑀧𑀓𑀸𑀦𑀺 𑀲𑀼𑀔𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸𑀦𑀺𑀧𑀺 𑀤𑁆𑀯𑀺𑀦𑁆𑀦𑀁 𑀧𑀺𑀘𑀼𑀧𑀺𑀡𑁆𑀟𑀸𑀦𑀁 𑀯𑀺𑀬 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀫𑀦𑁆𑀤𑀪𑀸𑀯𑀢𑁄 𑀘𑀓𑁆𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞𑀧𑀺 𑀯𑀺𑀜𑁆𑀜𑀸𑀡𑀸𑀦𑀺 𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀣𑀸 𑀩𑀮𑀯𑀧𑀘𑁆𑀘𑀬𑀢𑀸𑀬 𑀲𑀼𑀔𑀤𑀼𑀓𑁆𑀔𑀸𑀦𑀁 𑀢𑁂𑀲𑀜𑁆𑀘 𑀢𑀤𑀪𑀸𑀯𑀢𑁄. 𑀅𑀧𑀼𑀩𑁆𑀩𑀸𑀭𑀫𑁆𑀫𑀡𑀦𑀺𑀲𑁆𑀲𑀬𑀧𑁆𑀧𑀯𑀢𑁆𑀢𑀻𑀦𑀺 𑀆𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀯𑀺𑀜𑁆𑀜𑀸𑀡𑀸𑀦𑀺, 𑀅𑀲𑀤𑀺𑀲𑀸𑀦𑀦𑁆𑀢𑀭𑀧𑁆𑀧𑀘𑁆𑀘𑀬𑀁 𑀓𑀺𑀭𑀺𑀬𑀸𑀭𑀫𑁆𑀪𑀲𑁆𑀲 𑀆𑀤𑀺𑀪𑀽𑀢𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀓𑀸𑀬𑀤𑀼𑀓𑁆𑀔𑀧𑀥𑀸𑀦𑀢𑀸𑀬 𑀅𑀓𑀼𑀲𑀮𑀨𑀮𑀲𑁆𑀲 𑀢𑀤𑀼𑀧𑀦𑀺𑀲𑁆𑀲𑀬𑀪𑀽𑀢𑀁 𑀅𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀆𑀤𑀺, 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀻𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀓𑀫𑁆𑀫𑀯𑀲𑁂𑀦 𑀯𑀸 𑀯𑀺𑀧𑀸𑀓𑀸𑀦𑀼𑀪𑀯𑀦𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀅𑀤𑀼𑀓𑁆𑀔𑀫𑀲𑀼𑀔𑀪𑀸𑀯𑁄 𑀬𑀼𑀢𑁆𑀢𑁄. 𑀲𑀢𑀺 𑀘 𑀯𑀺𑀧𑀸𑀓𑀪𑀽𑀢𑀸𑀬 𑀉𑀧𑁂𑀓𑁆𑀔𑀸𑀬 𑀲𑀼𑀔𑀤𑀼𑀓𑁆𑀔𑀫𑀚𑁆𑀛𑀢𑁆𑀢𑀪𑀸𑀯𑁂 𑀓𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀓𑀼𑀲𑀮𑀯𑀺𑀧𑀸𑀓𑀸𑀬 𑀇𑀝𑁆𑀞𑀪𑀸𑀯𑁄, 𑀅𑀓𑀼𑀲𑀮𑀯𑀺𑀧𑀸𑀓𑀸𑀬 𑀅𑀦𑀺𑀝𑁆𑀞𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀲𑀺𑀝𑁆𑀞𑀸𑀦𑀺 𑀧𑀦 𑀲𑀢𑁆𑀢𑀢𑀺𑀁𑀲 𑀯𑀺𑀜𑁆𑀜𑀸𑀡𑀸𑀦𑀺 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀧𑀸𑀤𑀓𑀸𑀤𑀺𑀯𑀲𑁂𑀦 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀯𑀺𑀜𑁆𑀜𑀸𑀡𑁂𑀳𑀺 𑀉𑀧𑁂𑀓𑁆𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀮𑀓𑁆𑀔𑀡𑀁 𑀦𑀸𑀫 𑀥𑀫𑁆𑀫𑀸𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀪𑀸𑀯𑁄, 𑀅𑀦𑀼𑀪𑀯𑀦𑀜𑁆𑀘 𑀲𑀩𑁆𑀩𑀯𑁂𑀤𑀦𑀸𑀦𑀁 𑀲𑀸𑀥𑀸𑀭𑀡𑀮𑀓𑁆𑀔𑀡𑀦𑁆𑀢𑀺 𑀢𑀁 𑀧𑀝𑀺𑀦𑀺𑀬𑀢𑁂𑀦 𑀆𑀭𑀫𑁆𑀫𑀡𑁂𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔’’𑀦𑁆𑀢𑀺 𑀢𑀲𑁆𑀲 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄. 𑀪𑀼𑀲𑀁 𑀩𑁆𑀭𑀽𑀳𑀦𑀁 𑀯𑀟𑁆𑀠𑀦𑀁 𑀉𑀧𑀩𑁆𑀭𑀽𑀳𑀦𑀁. 𑀢𑀬𑀺𑀤𑀁 𑀓𑀸𑀫𑀜𑁆𑀘 𑀘𑁂𑀢𑀲𑀺𑀓𑀲𑀼𑀔𑁂𑀧𑀺 𑀮𑀩𑁆𑀪𑀢𑀺, 𑀢𑀁 𑀧𑀦 𑀲𑀯𑀺𑀓𑀧𑁆𑀧𑀓𑀁 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀧𑀺 𑀳𑁄𑀢𑀺. 𑀇𑀤𑀦𑁆𑀢𑀼 𑀦𑀺𑀩𑁆𑀩𑀺𑀓𑀧𑁆𑀧𑀓𑀁 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀢𑀢𑁄 𑀲𑀸𑀢𑀺𑀲𑀬𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲’’𑀦𑁆𑀢𑀺. 𑀅𑀲𑁆𑀲𑀸𑀤𑀺𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀸𑀯𑁂𑀤𑀦𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀲𑀸𑀤𑁄’’𑀢𑀺 ¶ (𑀲𑀁. 𑀦𑀺. 𑁩.𑁨𑁬). 𑀓𑀸𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀓𑀸𑀬𑁂 𑀪𑀯𑁄 𑀓𑀸𑀬𑀺𑀓𑁄, 𑀲𑁄 𑀏𑀯 𑀅𑀲𑁆𑀲𑀸𑀤𑁄 𑀢𑀣𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀓𑀸𑀬𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁 𑀅𑀦𑀜𑁆𑀜𑀯𑀢𑁆𑀣𑀼𑀓𑀢𑁆𑀢𑀸.

𑀤𑀼𑀓𑁆𑀔𑀲𑁆𑀲 𑀮𑀓𑁆𑀔𑀡𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀪𑀸𑀯𑀢𑁄 ¶ , 𑀧𑀭𑀺𑀓𑀧𑁆𑀧𑀢𑁄 𑀯𑀸 𑀇𑀝𑁆𑀞𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀪𑀯𑀦𑀮𑀓𑁆𑀔𑀡𑀁 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁. 𑀢𑁂𑀦𑀸𑀳 ‘‘𑀬𑀣𑀸 𑀢𑀣𑀸 𑀯𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲’’𑀦𑁆𑀢𑀺, 𑀬𑀣𑀸𑀪𑀽𑀢𑁂𑀦 𑀯𑀸 𑀅𑀬𑀣𑀸𑀪𑀽𑀢𑁂𑀦 𑀯𑀸 𑀇𑀝𑁆𑀞𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑀲𑁆𑀲 𑀲𑀁𑀪𑀼𑀜𑁆𑀚𑀦𑀭𑀲𑀁, 𑀧𑀘𑁆𑀘𑀦𑀼𑀪𑀯𑀦𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀇𑀤𑀁 ‘‘𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁩𑁭𑁬; 𑀅. 𑀦𑀺. 𑁧𑁧.𑁧𑁨) 𑀲𑀼𑀢𑁆𑀢𑀧𑀤𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁, 𑀢𑀁 𑀧𑀦 𑀦𑀺𑀭𑀸𑀫𑀺𑀲𑀲𑁄𑀫𑀦𑀲𑁆𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀲𑁄𑀫𑀦𑀲𑁆𑀲𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀤𑁄𑀫𑀦𑀲𑁆𑀲𑀲𑁆𑀲 𑀮𑀓𑁆𑀔𑀡𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀤𑁄𑀫𑀦𑀲𑁆𑀲𑀲𑁆𑀲 𑀓𑀸𑀫𑀥𑀸𑀢𑀼𑀬𑀁 𑀉𑀧𑁆𑀧𑀚𑁆𑀚𑀦𑀢𑁄 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀢𑀸 𑀢𑀢𑁄 𑀯𑀺𑀲𑁂𑀲𑁄.

𑀫𑀚𑁆𑀛𑀢𑁆𑀢𑀲𑁆𑀲, 𑀆𑀭𑀫𑁆𑀫𑀡𑀲𑁆𑀲 𑀫𑀚𑁆𑀛𑀢𑁆𑀢𑀁 𑀯𑀸 𑀯𑁂𑀤𑀬𑀺𑀢𑀁 𑀅𑀦𑀼𑀪𑀯𑀦𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀫𑀚𑁆𑀛𑀢𑁆𑀢𑀯𑁂𑀤𑀬𑀺𑀢𑀮𑀓𑁆𑀔𑀡𑀸. 𑀫𑀚𑁆𑀛𑀢𑁆𑀢𑀸𑀦𑀼𑀪𑀯𑀦𑀢𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀸𑀢𑀺𑀉𑀧𑀩𑁆𑀭𑀽𑀳𑀦𑀫𑀺𑀮𑀸𑀧𑀦𑀭𑀲𑀸. ‘‘𑀲𑀦𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺 𑀇𑀤𑀁 𑀅𑀦𑀯𑀚𑁆𑀚𑀸𑀬 𑀦𑀺𑀭𑀸𑀫𑀺𑀲𑀸𑀬 𑀉𑀧𑁂𑀓𑁆𑀔𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀲𑀩𑁆𑀩𑀸𑀬.

𑀇𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀲𑀜𑁆𑀜𑀸𑀓𑁆𑀔𑀦𑁆𑀥𑀓𑀣𑀸𑀯𑀡𑁆𑀡𑀦𑀸

𑁪𑁫𑁭. 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁 𑀦𑀸𑀫 𑀲𑀜𑁆𑀜𑀸𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀫𑀁 𑀯𑁂𑀤𑀦𑀸𑀬𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀺, 𑀢𑀲𑁆𑀲𑀸 𑀧𑀦 𑀲𑀪𑀸𑀯𑀢𑁄 𑀪𑀺𑀦𑁆𑀦𑀢𑁆𑀢𑀸 𑀓𑀸𑀬𑀘𑀺 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀺 𑀓𑀸𑀬𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀜𑀸𑀬 𑀧𑀦 𑀈𑀤𑀺𑀲𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀦 𑀳𑀺 𑀢𑀁 𑀯𑀺𑀜𑁆𑀜𑀸𑀡𑀁…𑀧𑁂… 𑀲𑀜𑁆𑀜𑀸𑀬𑀸’’𑀢𑀺.

𑀲𑀩𑁆𑀩𑀸𑀯𑀸𑀢𑀺 𑀘𑀢𑀼𑀪𑀽𑀫𑀺𑀓𑀸𑀧𑀺. 𑀅𑀣 𑀯𑀸 𑀬𑀣𑀸 𑀯𑁂𑀤𑀦𑀸 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸 𑀪𑁂𑀤𑀦𑀮𑀓𑁆𑀔𑀡𑀸𑀤𑀺𑀢𑁄 𑀯𑀼𑀢𑁆𑀢𑀸, 𑀦 𑀏𑀯𑀫𑀬𑀁, 𑀅𑀬𑀁 𑀧𑀦 𑀲𑀩𑁆𑀩𑀸𑀯 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 ¶ . 𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀲𑀜𑁆𑀚𑀸𑀦𑀦𑀁 𑀲𑀜𑁆𑀜𑀁 𑀓𑀢𑁆𑀯𑀸 𑀚𑀸𑀦𑀦𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸. 𑀢𑀣𑀸 𑀳𑀺 𑀲𑀸 𑀅𑀪𑀺𑀜𑁆𑀜𑀸𑀡𑁂𑀦 𑀲𑀜𑁆𑀚𑀸𑀦𑀦𑀢𑁄 ¶ 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀫𑀺𑀢𑁆𑀢𑁂𑀦 𑀳𑀺 𑀧𑀼𑀦 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸. 𑀢𑀲𑁆𑀲𑀸 𑀯𑀟𑁆𑀠𑀓𑀺𑀲𑁆𑀲 𑀤𑀸𑀭𑀼𑀫𑁆𑀳𑀺 𑀅𑀪𑀺𑀜𑁆𑀜𑀸𑀡𑀁 𑀓𑀢𑁆𑀯𑀸 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀧𑀘𑁆𑀘𑀸𑀪𑀺𑀚𑀸𑀦𑀦𑀓𑀸𑀮𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀢𑀤𑁂𑀯𑁂𑀢’’𑀦𑁆𑀢𑀺𑀆𑀤𑀺. 𑀧𑀼𑀦 𑀲𑀜𑁆𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑁄 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑁄, 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀧𑀼𑀦…𑀧𑁂… 𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀓𑀭𑀡𑀁, 𑀧𑀼𑀦…𑀧𑁂… 𑀓𑀭𑀡𑀁, 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀪𑀽𑀢𑀁 𑀯𑀸 𑀦𑀺𑀫𑀺𑀢𑁆𑀢𑀓𑀭𑀡𑀁 𑀧𑀼𑀦…𑀧𑁂… 𑀓𑀭𑀡𑀁, 𑀢𑀤𑀲𑁆𑀲𑀸 𑀓𑀺𑀘𑁆𑀘𑀦𑁆𑀢𑀺 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸. 𑀧𑀼𑀦𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀓𑀭𑀡𑀁 𑀦𑀺𑀫𑀺𑀢𑁆𑀢𑀓𑀸𑀭𑀺𑀓𑀸𑀬, 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑀦𑁆𑀢𑀺𑀬𑀸 𑀘 𑀲𑀩𑁆𑀩𑀸𑀬 𑀲𑀜𑁆𑀜𑀸𑀬 𑀲𑀫𑀸𑀦𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀪𑀺𑀦𑀺𑀯𑁂𑀲𑀓𑀭𑀡𑀁 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁨, 𑁨𑁦𑁩, 𑁪𑁨𑁭; 𑀫. 𑀦𑀺. 𑁩.𑁨𑁭-𑁨𑁯) 𑀲𑀜𑁆𑀜𑀸𑀪𑀺𑀦𑀺𑀯𑁂𑀲𑀫𑀢𑁆𑀢𑁂𑀦𑁂𑀯 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸 𑀅𑀯𑀺𑀓𑀧𑁆𑀧𑀲𑀪𑀸𑀯𑀢𑁆𑀢𑀸. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀜𑁆𑀜𑀸 𑀜𑀸𑀡𑀫𑁂𑀯 𑀅𑀦𑀼𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀪𑀺𑀦𑀺𑀯𑁂𑀲𑀓𑀸𑀭𑀺𑀓𑀸, 𑀯𑀺𑀧𑀭𑀻𑀢𑀕𑁆𑀕𑀸𑀳𑀺𑀓𑀸 𑀘 𑀦 𑀳𑁄𑀢𑀺. 𑀏𑀢𑁂𑀦𑁂𑀯 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀢𑀸 𑀘 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀭𑀸𑀕𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀜𑁆𑀜𑀸𑀬 𑀭𑀸𑀕𑀸𑀤𑀺𑀅𑀦𑀼𑀯𑀢𑁆𑀢𑀺𑀓𑀪𑀸𑀯𑁄𑀢𑀺.

𑀇𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀓𑀣𑀸𑀯𑀡𑁆𑀡𑀦𑀸

𑁪𑁫𑁮. 𑀭𑀸𑀲𑀺𑀓𑀭𑀡𑀮𑀓𑁆𑀔𑀡𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑀦𑀮𑀓𑁆𑀔𑀡𑀁, 𑀢𑀢𑁄 𑀲𑀗𑁆𑀔𑀸𑀭𑀸 𑀆𑀬𑀽𑀳𑀦𑀭𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀘𑁂𑀢𑀦𑀸𑀧𑀥𑀸𑀦𑀢𑀸𑀬 𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸 𑀏𑀯𑀁 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀓𑀺𑀁 𑀧𑀦 𑀢𑀦𑁆𑀢𑀺 𑀲𑀗𑁆𑀔𑀸𑀭𑀸𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀬𑀣𑀸 𑀅𑀢𑁆𑀢𑀦𑁄 𑀨𑀮𑀁 𑀲𑀗𑁆𑀔𑀢𑀁 𑀲𑀫𑁆𑀫𑀤𑁂𑀯 𑀦𑀺𑀧𑁆𑀨𑀦𑁆𑀦𑀁 𑀳𑁄𑀢𑀺, 𑀏𑀯𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀨𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀏𑀢𑁆𑀣 𑀯𑀺𑀧𑁆𑀨𑀸𑀭𑁄 𑀦𑀸𑀫 𑀯𑀺𑀧𑁆𑀨𑀸𑀭𑀯𑀦𑁆𑀢𑀢𑀸, 𑀢𑀲𑁆𑀫𑀸 𑀲𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀦𑀺𑀬𑀫𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀦𑀺𑀬𑀢𑀸. 𑀲𑀭𑀽𑀧𑁂𑀦 𑀆𑀕𑀢𑀸𑀢𑀺 𑀏𑀯𑀁 𑀧𑀺𑀝𑁆𑀞𑀺𑀯𑀢𑁆𑀢𑀓𑁂 𑀅𑀓𑀢𑁆𑀯𑀸 𑀧𑀸𑀴𑀺𑀬𑀸 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸. 𑀓𑀤𑀸𑀘𑀺𑀤𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀦 𑀦𑀺𑀬𑀢𑀸𑀢𑀺 𑀅𑀦𑀺𑀬𑀢𑀸. 𑀬𑀤𑀺𑀧𑀺 𑀅𑀦𑀺𑀬𑀢𑀸 𑀏𑀓𑀚𑁆𑀛𑀁 ¶ 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀺𑀁 𑀧𑀦 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀬 ‘‘𑀙𑀢𑁆𑀢𑀺𑀁𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀘 𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

𑁪𑁫𑁯. 𑀨𑀼𑀲𑀢𑀻𑀢𑀺 ¶ 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀬𑀁 𑀢𑀢𑁆𑀣 𑀓𑀸𑀭𑀡𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀨𑀼𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀨𑀲𑁆𑀲𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀳𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸 𑀢𑀁 𑀨𑀼𑀲𑀦𑀮𑀓𑁆𑀔𑀡𑁂𑀦 𑀨𑀲𑁆𑀲𑁂𑀦 𑀨𑀼𑀲𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀆𑀭𑀫𑁆𑀫𑀡𑀨𑀼𑀲𑀦𑀫𑀢𑁆𑀢𑀁 𑀯𑀸 𑀨𑀲𑁆𑀲𑁄𑀢𑀺 𑀲𑀸𑀥𑀦𑀢𑁆𑀢𑀬𑀫𑁆𑀧𑀺 𑀬𑀼𑀚𑁆𑀚𑀢𑁂𑀯. 𑀲𑀪𑀸𑀯𑀥𑀫𑁆𑀫𑁂𑀲𑀼 𑀓𑀢𑁆𑀢𑀼𑀓𑀭𑀡𑀲𑀸𑀥𑀦𑀯𑀘𑀦𑀁 𑀢𑀤𑀸𑀓𑀸𑀭𑀲𑀫𑀸𑀭𑁄𑀧𑀦𑀢𑁄 𑀧𑀭𑀺𑀬𑀸𑀬𑀓𑀣𑀸, 𑀪𑀸𑀯𑀲𑀸𑀥𑀦𑀯𑀘𑀦𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀨𑀼𑀲𑀦𑀮𑀓𑁆𑀔𑀡𑁄’’𑀢𑀺. 𑀅𑀬𑀜𑁆𑀳𑀻𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀲𑀫𑀢𑁆𑀣𑀦𑀁. 𑀬𑀤𑀺 𑀅𑀬𑀁 𑀥𑀫𑁆𑀫𑁄 𑀘𑁂𑀢𑀲𑀺𑀓𑁄, 𑀲𑁆𑀯𑀸𑀬𑀁 𑀅𑀭𑀽𑀧𑀥𑀫𑁆𑀫𑁄 𑀲𑀫𑀸𑀦𑁄 𑀓𑀣𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑀸𑀤𑀺𑀓𑁄 𑀘 𑀳𑁄𑀢𑀻𑀢𑀺 𑀅𑀦𑁆𑀢𑁄𑀮𑀻𑀦𑀁 𑀘𑁄𑀤𑀦𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀲𑁄𑀥𑀦𑀢𑁆𑀣𑀁 ‘‘𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻’’𑀢𑀺 𑀇𑀫𑀺𑀦𑀸 𑀅𑀭𑀽𑀧𑀲𑁆𑀲𑀸𑀧𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀘 𑀢𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀅𑀫𑁆𑀩𑀺𑀮𑀅𑀫𑁆𑀩𑀧𑀓𑁆𑀓𑀸𑀤𑀺𑀁 𑀔𑀸𑀤𑀦𑁆𑀢𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀭𑀲𑁆𑀲 𑀔𑁂𑀴𑀼𑀧𑁆𑀧𑀢𑁆𑀢𑀺, 𑀧𑀭𑀁 𑀯𑀺𑀩𑀸𑀥𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀤𑀬𑀸𑀮𑀼𑀓𑀲𑁆𑀲 𑀲𑀭𑀻𑀭𑀓𑀫𑁆𑀧𑀦𑀁, 𑀭𑀼𑀓𑁆𑀔𑀲𑀸𑀔𑀕𑁆𑀕𑁂 𑀤𑀼𑀝𑁆𑀞𑀺𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀪𑀻𑀭𑀼𑀓𑀧𑀼𑀭𑀺𑀲𑀲𑁆𑀲 𑀚𑀗𑁆𑀖𑀘𑀮𑀦𑀁, 𑀧𑀺𑀲𑀸𑀘𑀸𑀤𑀺𑀪𑀸𑀬𑀺𑀢𑀩𑁆𑀩𑀁 𑀤𑀺𑀲𑁆𑀯𑀸 𑀊𑀭𑀼𑀔𑀫𑁆𑀪𑁄𑀢𑀺 𑀏𑀯𑀫𑀸𑀤𑀻𑀲𑀼 𑀧𑀭𑀺𑀩𑁆𑀬𑀢𑁆𑀢𑀸 𑀳𑁄𑀢𑀺.

𑀏𑀓𑀤𑁂𑀲𑁂𑀦𑀸𑀢𑀺 𑀓𑀝𑁆𑀞𑀤𑁆𑀯𑀬𑀸𑀤𑀺 𑀯𑀺𑀬 𑀅𑀢𑁆𑀢𑀦𑁄 𑀏𑀓𑀧𑀲𑁆𑀲𑁂𑀦. 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀻𑀢𑀺 𑀅𑀲𑀁𑀲𑀺𑀮𑀺𑀬𑀫𑀸𑀦𑁄𑀧𑀺. 𑀭𑀽𑀧𑀲𑀤𑁆𑀤𑁂𑀳𑀺 𑀲𑀳 𑀨𑀲𑁆𑀲𑀲𑁆𑀲 𑀲𑀸𑀫𑀜𑁆𑀜𑀁 𑀅𑀦𑀮𑁆𑀮𑀻𑀬𑀫𑀸𑀦𑀲𑀗𑁆𑀖𑀝𑁆𑀝𑀦𑀫𑁂𑀯, 𑀦 𑀯𑀺𑀲𑀬𑀪𑀸𑀯𑁄. 𑀬𑀣𑀸 𑀭𑀽𑀧𑀲𑀤𑁆𑀤𑀸 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀦𑀮𑁆𑀮𑀻𑀬𑀫𑀸𑀦𑀸 𑀏𑀯 ‘‘𑀨𑀼𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸, 𑀏𑀯𑀁 𑀨𑀲𑁆𑀲𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑀨𑀼𑀲𑀦𑀲𑀗𑁆𑀖𑀝𑁆𑀝𑀦𑀸𑀦𑀻𑀢𑀺. 𑀲𑀗𑁆𑀖𑀝𑁆𑀝𑀦𑀜𑁆𑀘 𑀨𑀲𑁆𑀲𑀲𑁆𑀲 𑀘𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀲𑀦𑁆𑀦𑀺𑀧𑀢𑀦𑀪𑀸𑀯𑁄 𑀏𑀯. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀻’’𑀢𑀺. 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑀢𑀸 𑀯𑀼𑀢𑁆𑀢𑀸, 𑀯𑀢𑁆𑀣𑀸𑀭𑀫𑁆𑀫𑀡𑀲𑀦𑁆𑀦𑀺𑀧𑀸𑀢𑁂𑀦 𑀯𑀸 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀲𑀫𑁆𑀧𑀢𑁆𑀢𑀺𑀓𑁄 𑀨𑀲𑁆𑀲𑁄 𑀲𑀗𑁆𑀖𑀝𑁆𑀝𑀦𑀭𑀲𑁄 𑀯𑀼𑀢𑁆𑀢𑁄. 𑀬𑀣𑀸 ‘‘𑀤𑁆𑀯𑁂 𑀧𑀸𑀡𑀻 𑀯𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀲𑀼 (𑀫𑀺. 𑀧. 𑁨.𑁩.𑁮) 𑀧𑀸𑀡𑀺𑀲𑁆𑀲 𑀧𑀸𑀡𑀺𑀫𑁆𑀳𑀺 𑀲𑀗𑁆𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑀸 𑀭𑀽𑀧𑀥𑀫𑁆𑀫𑀸, 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀗𑁆𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄 𑀤𑀝𑁆𑀞𑀩𑁆𑀩𑁄. ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁪; 𑁪.𑁬𑁦) 𑀯𑀘𑀦𑀢𑁄 𑀘𑀓𑁆𑀔𑀼𑀭𑀽𑀧𑀯𑀺𑀜𑁆𑀜𑀸𑀡𑀸𑀤𑀻𑀦𑀁 ¶ 𑀲𑀗𑁆𑀕𑀢𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑁄 𑀢𑀤𑀦𑀼𑀭𑀽𑀧𑁄 𑀲𑀫𑀦𑁆𑀦𑀸𑀳𑀸𑀭𑁄 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁄. 𑀇𑀦𑁆𑀤𑁆𑀭𑀺𑀬𑀲𑁆𑀲 𑀢𑀤𑀪𑀺𑀫𑀼𑀔𑀪𑀸𑀯𑁄, 𑀆𑀯𑀚𑁆𑀚𑀦𑀸𑀬 𑀘 𑀆𑀭𑀫𑁆𑀫𑀡𑀓𑀭𑀡𑀁 𑀯𑀺𑀲𑀬𑀲𑁆𑀲 𑀧𑀭𑀺𑀓𑁆𑀔𑀢𑀢𑀸 𑀅𑀪𑀺𑀲𑀗𑁆𑀔𑀢𑀢𑀸, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀦𑀺𑀘𑁆𑀘𑀫𑁆𑀫𑀸 𑀕𑀸𑀯𑀻 𑀬𑀁 𑀬𑀁 𑀞𑀸𑀦𑀁 𑀉𑀧𑀕𑀢𑀸, 𑀢𑀢𑁆𑀣 𑀢𑀢𑁆𑀣 𑀤𑀼𑀓𑁆𑀔𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀨𑀲𑁆𑀲𑁂 𑀲𑀢𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑁂𑀯. 𑀯𑁂𑀤𑀦𑀸 𑀘 𑀤𑀼𑀓𑁆𑀔𑀲𑀮𑁆𑀮𑀸𑀤𑀺𑀲𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦 𑀦𑀺𑀘𑁆𑀘𑀫𑁆𑀫𑀕𑀸𑀯𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄’’𑀢𑀺.

𑁪𑁬𑁦. 𑀅𑀪𑀺𑀲𑀦𑁆𑀤𑀳𑀢𑀺 ¶ 𑀧𑀩𑀦𑁆𑀥𑀢𑀺 𑀧𑀯𑀢𑁆𑀢𑁂𑀢𑀺. 𑀘𑁂𑀢𑀦𑀸𑀪𑀸𑀯𑁄 𑀩𑁆𑀬𑀸𑀧𑀸𑀭𑀪𑀸𑀯𑁄. 𑀆𑀬𑀽𑀳𑀦𑀁 𑀘𑁂𑀢𑀬𑀦𑀁 𑀈𑀭𑀺𑀬𑀦𑀁. 𑀲𑀁𑀯𑀺𑀤𑀳𑀦𑀁 𑀯𑀺𑀘𑀸𑀭𑀡𑀁. 𑀆𑀬𑀽𑀳𑀦𑀭𑀲𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀬𑀣𑀸𑀲𑀓𑀁 𑀓𑀺𑀘𑁆𑀘𑀧𑁆𑀧𑀲𑀼𑀢𑀸 𑀳𑁄𑀦𑁆𑀢𑀻𑀢𑀺 𑀲𑀸 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀺𑀓𑀸 𑀯𑀼𑀢𑁆𑀢𑀸. 𑀚𑁂𑀝𑁆𑀞𑀲𑀺𑀲𑁆𑀲𑁄 𑀧𑀭𑁂 𑀲𑀚𑁆𑀛𑀸𑀬𑀦𑁂 𑀉𑀬𑁆𑀬𑁄𑀚𑁂𑀦𑁆𑀢𑁄 𑀲𑀬𑀫𑁆𑀧𑀺 𑀲𑀚𑁆𑀛𑀸𑀬𑀢𑀺. 𑀫𑀳𑀸𑀯𑀟𑁆𑀠𑀓𑀺𑀫𑁆𑀳𑀺 𑀯𑀟𑁆𑀠𑀓𑀺𑀓𑀫𑁆𑀫𑀁 𑀓𑀸𑀢𑀼𑀫𑀸𑀭𑀤𑁆𑀥𑁂 𑀇𑀢𑀭𑁂𑀧𑀺 𑀓𑀭𑁄𑀦𑁆𑀢𑀺𑀬𑁂𑀯. 𑀉𑀲𑁆𑀲𑀸𑀳𑀦𑀪𑀸𑀯𑁂𑀦𑀸𑀢𑀺 𑀆𑀤𑀭𑀓𑀭𑀡𑀪𑀸𑀯𑁂𑀦. 𑀲𑀸 𑀳𑀺 𑀲𑀬𑀁 𑀆𑀤𑀭𑀪𑀽𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀤𑀭𑀬𑀢𑀻𑀢𑀺. 𑀆𑀬𑀽𑀳𑀦𑀯𑀲𑁂𑀦 𑀉𑀲𑁆𑀲𑀸𑀳𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀯𑀻𑀭𑀺𑀬𑀼𑀲𑁆𑀲𑀸𑀳𑀯𑀲𑁂𑀦.

𑁪𑁬𑁧. 𑀯𑀻𑀭𑀪𑀸𑀯𑁄𑀢𑀺 𑀬𑁂𑀦 𑀯𑀻𑀭𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀥𑀺𑀦𑀸 𑀈𑀭𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀉𑀲𑁆𑀲𑀸𑀳𑁄, 𑀢𑀁𑀢𑀁𑀓𑀺𑀘𑁆𑀘𑀲𑀫𑀸𑀭𑀫𑁆𑀪𑁄, 𑀧𑀭𑀓𑁆𑀓𑀫𑁄 𑀯𑀸. 𑀉𑀧𑀢𑁆𑀣𑀫𑁆𑀪𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀥𑀸𑀭𑀡𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁, 𑀲𑀫𑁆𑀧𑀕𑁆𑀕𑀡𑁆𑀳𑀦𑀁 𑀯𑀸. 𑀲𑀁𑀲𑀻𑀤𑀦𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄 𑀅𑀲𑀁𑀲𑀻𑀤𑀦𑀁, 𑀦 𑀲𑀁𑀲𑀻𑀤𑀦𑀸𑀪𑀸𑀯𑀫𑀢𑁆𑀢𑀦𑁆𑀢𑀺 𑀅𑀲𑀁𑀲𑀻𑀤𑀦𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺. 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀦𑁆𑀢𑀺 𑀅𑀝𑁆𑀞𑀲𑀁𑀯𑁂𑀕𑀧𑀼𑀩𑁆𑀩𑀺𑀓𑀸𑀬 (𑀅. 𑀦𑀺. 𑀅𑀝𑁆𑀞. 𑁧.𑁧.𑁪𑁧𑁮) 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. ‘‘𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀺, 𑀫𑀕𑁆𑀕𑁄 𑀕𑀢𑁄, 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀓𑀫𑁆𑀫𑀁 𑀓𑀢𑀁, 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸, 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑁄 𑀦 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀢𑀺…𑀧𑁂… 𑀧𑀸𑀭𑀺𑀧𑀽𑀭𑀺’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀳𑀺𑀢𑀸𑀦𑀺 𑀅𑀝𑁆𑀞 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀺, 𑀢𑀁𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺.

𑁪𑁬𑁨. 𑀅𑀢𑁆𑀢𑀦𑀸 ¶ 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀁 𑀚𑀻𑀯𑀺𑀢𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀢𑀜𑁆𑀘 𑀦𑁂𑀲𑀁 𑀚𑀻𑀯𑀦𑀦𑁆𑀢𑀺 𑀢𑀁 𑀢𑀲𑁆𑀲 𑀓𑀸𑀭𑀡𑀪𑀸𑀯𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀻𑀯𑀦𑁆𑀢𑀺 𑀢𑁂𑀦𑀸’’𑀢𑀺. 𑀢𑀫𑁆𑀧𑀺 𑀘𑀲𑁆𑀲 𑀅𑀢𑁆𑀣𑀢𑁄 𑀚𑀻𑀯𑀦𑀫𑁂𑀯𑀸𑀢𑀺 𑀆𑀳 ‘‘𑀚𑀻𑀯𑀦𑀫𑀢𑁆𑀢𑀫𑁂𑀯 𑀯𑀸 𑀢’’𑀦𑁆𑀢𑀺.

𑁪𑁬𑁩. 𑀆𑀥𑀺𑀬𑀢𑀻𑀢𑀺 𑀞𑀧𑁂𑀢𑀺. 𑀅𑀯𑀺𑀲𑀸𑀭𑁄 𑀅𑀢𑁆𑀢𑀦𑁄 𑀏𑀯 𑀅𑀯𑀺𑀲𑀭𑀡𑀲𑀪𑀸𑀯𑁄. 𑀅𑀯𑀺𑀓𑁆𑀔𑁂𑀧𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀢𑀸. 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀥𑀫𑁆𑀫𑁄 𑀅𑀯𑀺𑀓𑁆𑀔𑁂𑀧𑁄𑀢𑀺. 𑀅𑀯𑀽𑀧𑀲𑀫𑀮𑀓𑁆𑀔𑀡𑀲𑁆𑀲 𑀯𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀧𑀓𑁆𑀔𑀢𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑀲𑀫𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀺𑀲𑁂𑀲𑀢𑁄𑀢𑀺 𑀬𑁂𑀪𑀼𑀬𑁆𑀬𑁂𑀦. 𑀲𑀼𑀔𑀯𑀺𑀭𑀳𑀺𑀢𑁄𑀧𑀺 𑀳𑀺 𑀅𑀢𑁆𑀣𑀺 𑀲𑀫𑀸𑀥𑀻𑀢𑀺. 𑀤𑀻𑀧𑀘𑁆𑀘𑀺𑀦𑀺𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀦𑀞𑀺𑀢𑀺𑀪𑀸𑀯𑀁 𑀲𑀫𑀸𑀥𑀺𑀲𑁆𑀲 𑀤𑀲𑁆𑀲𑁂𑀢𑀺.

𑁪𑁬𑁪. 𑀲𑀤𑁆𑀤𑀳𑀦𑁆𑀢𑀺 ¶ 𑀏𑀢𑀸𑀬𑀸𑀢𑀺 𑀲𑀤𑁆𑀤𑀳𑀦𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀤𑁆𑀥𑀸𑀬 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀢𑀣𑀸𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀤𑀳𑀢𑀻𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀲𑀤𑁆𑀤𑀳𑀦𑀁 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀧𑀢𑁆𑀢𑀺𑀬𑀸𑀬𑀦𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀤𑁆𑀤𑀳𑀦𑀮𑀓𑁆𑀔𑀡𑀸. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀏𑀯𑀫𑁂𑀢𑀦𑁆𑀢𑀺 𑀓𑀧𑁆𑀧𑀦𑀮𑀓𑁆𑀔𑀡𑀸. 𑀓𑀸𑀮𑀼𑀲𑁆𑀲𑀺𑀬𑀫𑀮𑀁 𑀯𑀺𑀥𑀫𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀸 𑀧𑀲𑀸𑀤𑀦𑀁 𑀅𑀦𑀸𑀯𑀺𑀮𑀪𑀸𑀯𑀓𑀭𑀡𑀁 𑀭𑀲𑁄 𑀏𑀢𑀺𑀲𑁆𑀲𑀸𑀢𑀺 𑀧𑀲𑀸𑀤𑀦𑀭𑀲𑀸. 𑀧𑀓𑁆𑀔𑀦𑁆𑀤𑀦𑀁 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀧𑀯𑀺𑀲𑀦𑀁. 𑀅𑀓𑀸𑀮𑀼𑀲𑀪𑀸𑀯𑁄 𑀅𑀓𑀸𑀮𑀼𑀲𑁆𑀲𑀺𑀬𑀁, 𑀅𑀦𑀸𑀯𑀺𑀮𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀲𑀸𑀤𑀦𑀻𑀬𑀝𑁆𑀞𑀸𑀦𑁂𑀲𑀼 𑀧𑀲𑀸𑀤𑀯𑀺𑀧𑀭𑀻𑀢𑀁 𑀅𑀓𑀼𑀲𑀮𑀁 𑀅𑀲𑁆𑀲𑀤𑁆𑀥𑀺𑀬𑀁, 𑀫𑀺𑀘𑁆𑀙𑀸𑀥𑀺𑀫𑀼𑀢𑁆𑀢𑀺 𑀘, 𑀢𑀧𑁆𑀧𑀘𑁆𑀘𑀦𑀻𑀓𑁄𑀯 𑀧𑀲𑀸𑀤𑀪𑀽𑀢𑁄 𑀯𑀢𑁆𑀣𑀼𑀕𑀢𑁄 𑀦𑀺𑀘𑁆𑀙𑀬𑁄 𑀅𑀥𑀺𑀫𑀼𑀢𑁆𑀢𑀺, 𑀦 𑀬𑁂𑀯𑀸𑀧𑀦𑀓𑀸𑀥𑀺𑀫𑁄𑀓𑁆𑀔𑁄. 𑀭𑀢𑀦𑀢𑁆𑀢𑀬𑀁, 𑀓𑀫𑁆𑀫𑀁, 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼. 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑀦𑀲𑀤𑁆𑀥𑀫𑁆𑀫𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑁄 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀓𑀼𑀲𑀮𑀥𑀫𑁆𑀫𑀸𑀦𑀁 𑀆𑀤𑀸𑀦𑁂 𑀳𑀢𑁆𑀣𑀁 𑀯𑀺𑀬, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀤𑀸𑀦𑁂 𑀯𑀺𑀢𑁆𑀢𑀁 𑀯𑀺𑀬, 𑀅𑀫𑀢𑀓𑀲𑀺𑀨𑀮𑀨𑀮𑀦𑁂 𑀩𑀻𑀚𑀁 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑁪𑁬𑁫. 𑀲𑀭𑀦𑁆𑀢𑀺 𑀢𑀸𑀬𑀸𑀢𑀺 𑀲𑀭𑀡𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀢𑀺𑀬𑀸 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀢𑀣𑀸𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀲𑀭𑀢𑀻𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬 𑀧𑀺𑀮𑀯𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀧𑀸𑀲𑀸𑀡𑀲𑁆𑀲 𑀯𑀺𑀬 𑀦𑀺𑀘𑁆𑀘𑀮𑀲𑁆𑀲 ¶ 𑀆𑀭𑀫𑁆𑀫𑀡𑀲𑁆𑀲 𑀞𑀧𑀦𑀁 𑀲𑀭𑀡𑀁 𑀅𑀲𑀫𑁆𑀫𑀼𑀝𑁆𑀞𑀢𑀸𑀓𑀭𑀡𑀁 𑀅𑀧𑀺𑀮𑀸𑀧𑀦𑀁. 𑀲𑀫𑁆𑀫𑁄𑀲𑀧𑀘𑁆𑀘𑀦𑀻𑀓𑀁 𑀓𑀺𑀘𑁆𑀘𑀁 𑀅𑀲𑀫𑁆𑀫𑁄𑀲𑁄, 𑀦 𑀲𑀫𑁆𑀫𑁄𑀲𑀸𑀪𑀸𑀯𑀫𑀢𑁆𑀢𑀁. ‘‘𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸’’𑀢𑀺 (𑀅. 𑀦𑀺. 𑁧𑁦.𑁨𑁦) 𑀯𑀘𑀦𑀢𑁄 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀯𑀺𑀲𑀬𑁂 𑀅𑀪𑀺𑀫𑀼𑀔𑁄 𑀪𑀯𑀢𑀺 𑀏𑀢𑀸𑀬𑀸𑀢𑀺 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑁄, 𑀲𑀢𑀺. 𑀲𑀢𑀺𑀬𑀸 𑀯𑀢𑁆𑀣𑀼𑀪𑀽𑀢𑀸 𑀓𑀸𑀬𑀸𑀤𑀬𑁄𑀯 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀸𑀦𑀺, 𑀲𑀢𑀺 𑀏𑀯 𑀯𑀸 𑀧𑀼𑀭𑀺𑀫𑀸 𑀧𑀘𑁆𑀙𑀺𑀫𑀸𑀬 𑀧𑀤𑀝𑁆𑀞𑀸𑀦𑀁.

𑁪𑁬𑁬. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀻𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀳𑀺𑀭𑀺𑀬𑀢𑀻𑀢𑀺 𑀮𑀚𑁆𑀚𑀸𑀓𑀸𑀭𑁂𑀦 𑀚𑀺𑀕𑀼𑀘𑁆𑀙𑀢𑀺. 𑀢𑁂𑀳𑀺𑀬𑁂𑀯𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺𑀬𑁂𑀯. 𑀑𑀢𑁆𑀢𑀧𑁆𑀧𑀢𑀻𑀢𑀺 𑀉𑀩𑁆𑀩𑀺𑀚𑁆𑀚𑀢𑀺. 𑀳𑀺𑀭𑀻 𑀧𑀸𑀧𑀥𑀫𑁆𑀫𑁂 𑀕𑀽𑀣𑀁 𑀯𑀺𑀬 𑀧𑀲𑁆𑀲𑀦𑁆𑀢𑀻 𑀚𑀺𑀕𑀼𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻’’𑀢𑀺. 𑀑𑀢𑁆𑀢𑀧𑁆𑀧𑀁 𑀢𑁂 𑀉𑀡𑁆𑀳𑀁 𑀯𑀺𑀬 𑀧𑀲𑁆𑀲𑀦𑁆𑀢𑀁 𑀢𑀢𑁄 𑀉𑀢𑁆𑀢𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧’’𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 𑀮𑀚𑁆𑀚𑀸𑀓𑀸𑀭𑁂𑀦, 𑀉𑀢𑁆𑀢𑀸𑀲𑀸𑀓𑀸𑀭𑁂𑀦 𑀘. 𑀅𑀢𑁆𑀢𑀕𑀸𑀭𑀯𑀧𑀤𑀝𑁆𑀞𑀸𑀦𑀸 𑀳𑀺𑀭𑀻 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸𑀬, 𑀅𑀢𑁆𑀢𑀸𑀥𑀺𑀧𑀢𑀺𑀢𑀸𑀬 𑀘. 𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀢𑀸𑀬, 𑀮𑁄𑀓𑀸𑀥𑀺𑀧𑀢𑀺𑀢𑀸𑀬 𑀘. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀅𑀢𑁆𑀢𑀸𑀦𑀁 ¶ 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀘 𑀳𑀺𑀭𑀺𑀑𑀢𑁆𑀢𑀧𑁆𑀧𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦𑁂𑀢𑁂𑀲𑀁 𑀓𑀤𑀸𑀘𑀺 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑁄𑀕𑀸. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀮𑁄𑀓𑀧𑀸𑀮𑀓𑀸𑀢𑀺 𑀏𑀢𑁆𑀣 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁨.𑁯; 𑀇𑀢𑀺𑀯𑀼. 𑁪𑁨) 𑀲𑀼𑀢𑁆𑀢𑀧𑀤𑀁 𑀅𑀢𑁆𑀢𑀸𑀥𑀺𑀧𑀢𑀺, 𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑁂 𑀘 ‘‘𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸, 𑀲𑁄 𑀮𑁄𑀓𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸’’𑀢𑀺 (𑀅. 𑀦𑀺. 𑁩.𑁪𑁦) 𑀘 𑀲𑀼𑀢𑁆𑀢𑀧𑀤𑀸𑀦𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀦𑀺.

𑁪𑁬𑁭. 𑀬𑀲𑁆𑀫𑀸 𑀮𑁄𑀪𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄𑀢𑀺 𑀬𑁂 𑀥𑀫𑁆𑀫𑀸 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀯𑀸 𑀲𑀢𑁆𑀢𑀸 𑀢𑁂𑀦 𑀦 𑀮𑀼𑀩𑁆𑀪𑀦𑁆𑀢𑀺, 𑀲𑀬𑀁 𑀓𑀤𑀸𑀘𑀺𑀧𑀺 𑀦 𑀮𑀼𑀩𑁆𑀪𑀢𑁂𑀯, 𑀅𑀢𑁆𑀣𑀢𑁄 𑀯𑀸 𑀅𑀮𑀼𑀩𑁆𑀪𑀦𑀸𑀓𑀸𑀭𑁄 𑀏𑀯 𑀘 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀮𑀼𑀩𑁆𑀪𑀦𑁆𑀢𑀻’’𑀢𑀺𑀆𑀤𑀺. 𑀏𑀲𑁂𑀯 𑀦𑀬𑁄𑀢𑀺 ‘‘𑀦 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀓𑀸𑀭𑀓𑀢𑁆𑀢𑀬𑀬𑁄𑀚𑀦𑀁 𑀅𑀢𑀺𑀤𑀺𑀲𑀢𑀺. 𑀅𑀕𑁂𑀥𑁄 𑀅𑀕𑀺𑀚𑁆𑀛𑀦𑀁 𑀅𑀦𑀪𑀺𑀓𑀗𑁆𑀔𑀦𑀁. 𑀅𑀮𑀕𑁆𑀕𑀪𑀸𑀯𑁄 𑀅𑀦𑀸𑀲𑀢𑁆𑀢𑀢𑀸. 𑀅𑀧𑀭𑀺𑀕𑁆𑀕𑀳𑁄 𑀓𑀲𑁆𑀲𑀘𑀺 𑀯𑀢𑁆𑀣𑀼𑀦𑁄 𑀫𑀫𑀢𑁆𑀢𑀯𑀲𑁂𑀦 𑀅𑀲𑀗𑁆𑀕𑀳𑁄. 𑀅𑀦𑀮𑁆𑀮𑀻𑀦𑁄 𑀪𑀸𑀯𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀮𑁆𑀮𑀻𑀦𑀪𑀸𑀯𑁄. 𑀏𑀯𑀜𑁆𑀳𑀺 𑀉𑀧𑀫𑀸𑀬 𑀲𑀫𑁂𑀢𑀺.

𑁪𑁬𑁮. 𑀘𑀡𑁆𑀟𑀺𑀓𑀲𑁆𑀲 ¶ 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁, 𑀓𑁄𑀧𑁄. 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀘𑀡𑁆𑀟𑀺𑀓𑁆𑀓𑀁, 𑀅𑀩𑁆𑀬𑀸𑀧𑀸𑀤𑁄. 𑀅𑀯𑀺𑀭𑁄𑀥𑁄 𑀅𑀯𑀺𑀕𑁆𑀕𑀳𑁄. 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀅𑀦𑀼𑀯𑀢𑁆𑀢𑀓𑁄. 𑀯𑀺𑀦𑀬𑀭𑀲𑁄𑀢𑀺 𑀯𑀺𑀦𑀬𑀦𑀭𑀲𑁄. 𑀲𑁄𑀫𑁆𑀫𑀪𑀸𑀯𑁄 𑀫𑁂𑀚𑁆𑀚𑀦𑀯𑀲𑁂𑀦 𑀳𑀺𑀮𑀸𑀤𑀦𑀻𑀬𑀢𑀸.

𑁪𑁬𑁯. 𑀥𑀫𑁆𑀫𑀸𑀦𑀁 𑀬𑁄 𑀬𑁄 𑀲𑀪𑀸𑀯𑁄 𑀬𑀣𑀸𑀲𑀪𑀸𑀯𑁄, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀁 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑁄. 𑀅𑀓𑁆𑀔𑀮𑀺𑀢𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀝𑀺𑀯𑁂𑀥𑁄 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑁄. 𑀯𑀺𑀲𑀬𑀲𑁆𑀲 𑀑𑀪𑀸𑀲𑀦𑀁 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑀁 𑀯𑀺𑀲𑀬𑁄𑀪𑀸𑀲𑀦𑀁. 𑀓𑀢𑁆𑀣𑀘𑀺𑀧𑀺 𑀯𑀺𑀲𑀬𑁂 𑀅𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦𑁂𑀯 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑀢𑀸𑀬 𑀯𑀸 𑀢𑀤𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀧𑀢𑀺𑀝𑁆𑀞𑀸𑀪𑀽𑀢𑀸, 𑀦 𑀢𑁂𑀲𑀁 𑀓𑀼𑀲𑀮𑀪𑀸𑀯𑀲𑀸𑀥𑀦𑁂𑀦. 𑀬𑀤𑀺 𑀳𑀺 𑀢𑁂𑀲𑀁 𑀓𑀼𑀲𑀮𑀪𑀸𑀯𑁄 𑀓𑀼𑀲𑀮𑀫𑀽𑀮𑀧𑀝𑀺𑀩𑀤𑁆𑀥𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀢𑀸 𑀦 𑀲𑀺𑀬𑀸. 𑀦 𑀳𑀺 𑀢𑁂 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀦𑁆𑀢𑀺, 𑀦 𑀘 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧). 𑀬𑀣𑀸 𑀘 𑀓𑀼𑀲𑀮𑀪𑀸𑀯𑁄, 𑀏𑀯𑀁 𑀅𑀩𑁆𑀬𑀸𑀓𑀢𑀪𑀸𑀯𑁄𑀧𑀺 𑀅𑀩𑁆𑀬𑀸𑀓𑀢𑀫𑀽𑀮𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸. 𑀢𑀣𑀸 𑀲𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀁 ¶ 𑀅𑀩𑁆𑀬𑀸𑀓𑀢𑀪𑀸𑀯𑁄 𑀏𑀯 𑀦 𑀲𑀺𑀬𑀸, 𑀅𑀓𑀼𑀲𑀮𑁂𑀲𑀼 𑀘 𑀬𑀢𑁆𑀣 𑀏𑀓𑀁𑀬𑁂𑀯 𑀫𑀽𑀮𑀁, 𑀢𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀺𑀬𑀸, 𑀉𑀪𑀬𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀦 𑀫𑀽𑀮𑀧𑁆𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀅𑀣 𑀔𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄. 𑀢𑁂𑀲𑀁 𑀧𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀸𑀦𑀺 𑀫𑀽𑀮𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁭𑁦. 𑀧𑀲𑁆𑀲𑀫𑁆𑀪𑀦𑀁 𑀤𑀭𑀣𑀯𑀽𑀧𑀲𑀫𑁄. 𑀓𑀸𑀬𑀲𑀤𑁆𑀤𑁄 𑀲𑀫𑀽𑀳𑀯𑀸𑀘𑀻, 𑀲𑁄 𑀘 𑀔𑁄 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀯𑀲𑁂𑀦𑀸𑀢𑀺 𑀆𑀳 ‘‘𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀧𑀲𑁆𑀲𑀤𑁆𑀥𑀺 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸’’𑀢𑀺𑀆𑀤𑀺 (𑀥. 𑀲. 𑁪𑁦). 𑀤𑀭𑀣𑁄 𑀲𑀸𑀭𑀫𑁆𑀪𑁄, 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸𑀦𑀁 𑀉𑀤𑁆𑀥𑀘𑁆𑀘𑀸𑀥𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀢𑀣𑀸𑀧𑀯𑀢𑁆𑀢𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑁂𑀦 𑀧𑀭𑀺𑀴𑀸𑀳𑀧𑀭𑀺𑀧𑁆𑀨𑀦𑁆𑀤𑀯𑀺𑀭𑀳𑀺𑀢𑁄 𑀲𑀻𑀢𑀺𑀪𑀸𑀯𑁄 𑀅𑀧𑀭𑀺𑀧𑁆𑀨𑀦𑁆𑀤𑀲𑀻𑀢𑀺𑀪𑀸𑀯𑁄. 𑀉𑀤𑁆𑀥𑀘𑁆𑀘𑀧𑁆𑀧𑀥𑀸𑀦𑀸 𑀓𑀺𑀮𑁂𑀲𑀸 ¶ 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀸, 𑀉𑀤𑁆𑀥𑀘𑁆𑀘𑀁 𑀯𑀸 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀕𑀭𑀼𑀪𑀸𑀯𑁄 𑀤𑀦𑁆𑀥𑀢𑀸, 𑀣𑀺𑀦𑀫𑀺𑀤𑁆𑀥𑀸𑀥𑀺𑀓𑀸𑀦𑀁, 𑀢𑀣𑀸𑀧𑀯𑀢𑁆𑀢𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑀦𑁆𑀥𑀢𑀸𑀬 𑀧𑀝𑀺𑀧𑀓𑁆𑀔𑁄 𑀅𑀤𑀦𑁆𑀥𑀢𑀸, 𑀦 𑀤𑀦𑁆𑀥𑀢𑀸𑀬 𑀅𑀪𑀸𑀯𑀫𑀢𑁆𑀢𑀁.

𑀣𑀤𑁆𑀥𑀪𑀸𑀯𑁄 𑀣𑀫𑁆𑀪𑁄, 𑀤𑀺𑀝𑁆𑀞𑀺𑀫𑀸𑀦𑀸𑀥𑀺𑀓𑀸𑀦𑀁, 𑀢𑀧𑁆𑀧𑀥𑀸𑀦𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀢𑀁 𑀦𑀸𑀫𑀁. 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀢𑁄 𑀏𑀯 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀅𑀧𑁆𑀧𑀝𑀺𑀳𑀢𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀅𑀧𑁆𑀧𑀝𑀺𑀖𑀸𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁, 𑀦 𑀓𑀫𑁆𑀫𑀜𑁆𑀜𑀁 𑀅𑀓𑀫𑁆𑀫𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀅𑀓𑀫𑁆𑀫𑀜𑁆𑀜𑀪𑀸𑀯𑁄, 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀁 𑀅𑀬𑁄𑀕𑁆𑀬𑀢𑀸. 𑀅𑀢𑁆𑀣𑀢𑁄 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀢𑀧𑁆𑀧𑀥𑀸𑀦𑀸 𑀯𑀸 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸. 𑀓𑀫𑁆𑀫𑀜𑁆𑀜𑀪𑀸𑀯𑁂𑀦𑁂𑀯 𑀲𑀫𑁆𑀧𑀦𑁆𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀅𑀯𑀲𑁂𑀲𑀦𑀻𑀯𑀭𑀡𑀸𑀤𑀬𑁄. 𑀯𑀺𑀦𑀺𑀩𑀦𑁆𑀥𑀦𑀺𑀫𑁆𑀫𑀤𑁆𑀤𑀦𑁂𑀦 𑀲𑀼𑀔𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀢𑀸𑀬 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸. 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀬𑀣𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀅𑀧𑀕𑀢𑀓𑀸𑀴𑀓𑀸 𑀅𑀮𑀗𑁆𑀓𑀸𑀭𑀯𑀺𑀓𑀢𑀺𑀯𑀺𑀦𑀺𑀬𑁄𑀕𑀓𑁆𑀔𑀫𑀸, 𑀏𑀯𑀫𑀬𑀫𑁆𑀧𑀺 𑀲𑀁𑀓𑀺𑀮𑁂𑀲𑀯𑀺𑀕𑀫𑁂𑀦 𑀳𑀺𑀢𑀓𑀺𑀭𑀺𑀬𑀸𑀯𑀺𑀦𑀺𑀬𑁄𑀕𑀓𑁆𑀔𑀫𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀁, 𑀅𑀲𑁆𑀲𑀤𑁆𑀥𑀺𑀬𑀸𑀤𑀺, 𑀢𑀤𑁂𑀓𑀝𑁆𑀞𑀸 𑀘 𑀧𑀸𑀧𑀥𑀫𑁆𑀫𑀸. 𑀕𑁂𑀮𑀜𑁆𑀜𑀧𑀝𑀺𑀧𑀓𑁆𑀔𑁄 𑀅𑀕𑁂𑀮𑀜𑁆𑀜𑀁 ¶ , 𑀢𑀩𑁆𑀪𑀸𑀯𑁄 𑀮𑀓𑁆𑀔𑀡𑀁 𑀏𑀢𑀸𑀲𑀦𑁆𑀢𑀺 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸. 𑀬𑀣𑀸𑀯𑀼𑀢𑁆𑀢𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑁆𑀤𑀦𑁂𑀦𑁂𑀯 𑀦𑀢𑁆𑀣𑀺 𑀏𑀢𑀸𑀲𑀁 𑀆𑀤𑀻𑀦𑀯𑁄 𑀤𑁄𑀲𑁄, 𑀦 𑀯𑀸 𑀏𑀢𑀸 𑀆𑀤𑀻𑀦𑀁 𑀓𑀧𑀡𑀁 𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀭𑀸𑀤𑀻𑀦𑀯𑀸, 𑀢𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺, 𑀢𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀸𑀬𑀲𑀫𑁆𑀩𑀦𑁆𑀥𑀻, 𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑀻 𑀘 𑀉𑀚𑀼𑀪𑀸𑀯𑁄𑀢𑀺 𑀮𑀓𑁆𑀔𑀺𑀢𑀩𑁆𑀩𑀢𑀸𑀬 𑀓𑀸𑀬𑀘𑀺𑀢𑁆𑀢𑀅𑀚𑁆𑀚𑀯𑀮𑀓𑁆𑀔𑀡𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀦𑀗𑁆𑀕𑀮𑀲𑀻𑀲𑀘𑀦𑁆𑀤𑀓𑁄𑀝𑀺𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸𑀲𑀗𑁆𑀔𑀸𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀸𑀦𑀁 𑀦𑀺𑀫𑁆𑀫𑀤𑁆𑀤𑀦𑀢𑁄 𑀓𑀸𑀬𑀘𑀺𑀢𑁆𑀢𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸. 𑀢𑀢𑁄 𑀏𑀯 𑀲𑀩𑁆𑀩𑀣𑀸𑀧𑀺 𑀅𑀚𑀺𑀫𑁆𑀳𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀅𑀚𑀺𑀫𑁆𑀳𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸. ‘‘𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀸 ¶ 𑀅𑀓𑀼𑀲𑀮𑀸 𑀔𑀦𑁆𑀥𑀸, 𑀢𑀤𑁂𑀓𑀝𑁆𑀞𑀸 𑀘 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀓𑀸. 𑀏𑀢𑁆𑀣 𑀘 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀘𑀺𑀢𑁆𑀢𑀫𑁂𑀯 𑀧𑀲𑁆𑀲𑀤𑁆𑀥𑀁, 𑀮𑀳𑀼, 𑀫𑀼𑀤𑀼, 𑀓𑀫𑁆𑀫𑀜𑁆𑀜𑀁, 𑀧𑀕𑀼𑀡𑀁, 𑀉𑀚𑀼 𑀘 𑀳𑁄𑀢𑀺. 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀧𑀦 𑀭𑀽𑀧𑀓𑀸𑀬𑁄𑀧𑀺. 𑀢𑁂𑀦𑁂𑀯𑁂𑀢𑁆𑀣 𑀪𑀕𑀯𑀢𑀸 𑀥𑀫𑁆𑀫𑀸𑀦𑀁 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸, 𑀦 𑀲𑀩𑁆𑀩𑀢𑁆𑀣.

𑁪𑁭𑁧. 𑀙𑀦𑁆𑀤𑀦𑀁 𑀙𑀦𑁆𑀤𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸. ‘‘𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁬𑁪) 𑀧𑀦 𑀢𑀡𑁆𑀳𑀸𑀧𑀺 𑀯𑀼𑀘𑁆𑀘𑀢𑀺, ‘‘𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀻’’𑀢𑀺𑀆𑀤𑀻𑀲𑀼 (𑀯𑀺𑀪. 𑁪𑁩𑁨) 𑀯𑀻𑀭𑀺𑀬𑀫𑁆𑀧𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀓𑀢𑁆𑀢𑀼𑀓𑀸𑀫𑀢𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀢𑁆𑀢𑀼𑀓𑀸𑀫𑀢𑀸 𑀯𑀼𑀘𑁆𑀘𑀢𑀺 𑀓𑀭𑀡𑀺𑀘𑁆𑀙𑀸. 𑀘𑁂𑀢𑀲𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀲𑀸𑀭𑀫𑁆𑀫𑀡𑀢𑁆𑀢𑀸 𑀓𑀭𑀡𑀺𑀘𑁆𑀙𑀸 𑀦𑀸𑀫 𑀆𑀮𑀫𑁆𑀩𑀦𑀲𑁆𑀲 𑀆𑀮𑀫𑁆𑀩𑀺𑀢𑀼𑀓𑀸𑀫𑀢𑀸𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀆𑀭𑀫𑁆𑀫𑀡𑀓𑀭𑀡𑀺𑀘𑁆𑀙𑀸𑀮𑀓𑁆𑀔𑀡𑁄 𑀙𑀦𑁆𑀤𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀘. 𑀬𑀤𑀕𑁆𑀕𑁂𑀦 𑀧𑀦𑀸𑀬𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀢𑀤𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯 𑀏𑀓𑀸𑀭𑀫𑁆𑀫𑀡𑀢𑀸𑀬 𑀢𑁂𑀦 𑀢𑁂𑀲𑀁. 𑀢𑁂𑀦𑁂𑀯𑀸𑀳 ‘‘𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑀸𑀬𑀁 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄’’𑀢𑀺. 𑀲𑁆𑀯𑀸𑀬𑀁 𑀓𑀼𑀲𑀮𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀘𑁆𑀙𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀢𑁆𑀢𑀸.

𑁪𑁭𑁨. 𑀅𑀥𑀺𑀫𑀼𑀘𑁆𑀘𑀦𑀁 𑀆𑀭𑀫𑁆𑀫𑀡𑁂 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀧𑀲𑀸𑀤𑀦𑀯𑀲𑁂𑀦. 𑀬𑀣𑀸 𑀢𑀣𑀸 𑀯𑀸 𑀳𑀺 𑀆𑀭𑀫𑁆𑀫𑀡𑁂 𑀦𑀺𑀘𑁆𑀙𑀬𑀦𑀁 𑀅𑀥𑀺𑀫𑀼𑀘𑁆𑀘𑀦𑀁 𑀅𑀦𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼, 𑀤𑀸𑀦𑀸𑀤𑀻𑀲𑀼 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀸, 𑀲𑀤𑁆𑀥𑀸 𑀧𑀦 𑀧𑀲𑀸𑀤𑀦𑀻𑀬𑁂𑀲𑀼 𑀧𑀲𑀸𑀤𑀸𑀥𑀺𑀫𑁄𑀓𑁆𑀔𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀬𑀣𑀸 𑀲𑀦𑁆𑀢𑀻𑀭𑀺𑀢𑁂 𑀅𑀢𑁆𑀣𑁂 𑀦𑀺𑀘𑁆𑀙𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀧𑀭𑀢𑁄 𑀢𑁆𑀢𑀫𑀸𑀦𑀸𑀦𑀁 𑀢𑀣𑀸 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀤𑀺 𑀏𑀯𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀓𑀣𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀏𑀓𑀁𑀲𑁂𑀦𑁂𑀯 𑀲𑀁𑀲𑀧𑁆𑀧𑀦𑀸𑀓𑀸𑀭𑀲𑁆𑀲 ¶ 𑀧𑀘𑁆𑀘𑀬𑀢𑀸𑀬 𑀤𑀝𑁆𑀞𑀩𑁆𑀩𑀁. 𑀤𑀸𑀭𑀓𑀲𑁆𑀲 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀧𑁆𑀧𑀦𑀲𑁆𑀲 ‘‘𑀓𑀭𑀺𑀲𑁆𑀲𑀸𑀫𑀺 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀺𑀘𑁆𑀙𑀬𑀲𑁆𑀲 𑀧𑀝𑀺𑀧𑀓𑁆𑀔𑀓𑀺𑀭𑀺𑀬𑀸 𑀅𑀲𑀁𑀲𑀧𑁆𑀧𑀦𑀁, 𑀬𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀬𑀁 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄 𑀅𑀥𑀺𑀫𑁄𑀓𑁆𑀔𑁄, 𑀢𑁂𑀲𑀁 𑀆𑀭𑀫𑁆𑀫𑀡𑀥𑀫𑁆𑀫𑁄 𑀏𑀯 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑁄.

𑁪𑁭𑁩. 𑀓𑀺𑀭𑀺𑀬𑀸 ¶ 𑀓𑀸𑀭𑁄𑀢𑀺 𑀓𑀸𑀭𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀢𑀫𑀸𑀳. 𑀫𑀦𑀫𑁆𑀳𑀺 𑀓𑀸𑀭𑁄𑀢𑀺 𑀫𑀦𑀲𑀺 𑀆𑀭𑀫𑁆𑀫𑀡𑀲𑁆𑀲 𑀓𑀭𑀡𑀁. 𑀬𑁂𑀦 𑀳𑀺 𑀫𑀦𑁄 𑀆𑀭𑀫𑁆𑀫𑀡𑁂 𑀓𑀭𑀻𑀬𑀢𑀺 𑀆𑀭𑀫𑁆𑀫𑀡𑁂𑀦𑀲𑁆𑀲 𑀲𑀁𑀬𑁄𑀚𑀦𑀢𑁄, 𑀢𑀢𑁄 𑀏𑀯 𑀢𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀫𑀦𑀲𑀺 𑀓𑀭𑀻𑀬𑀢𑀻𑀢𑀺. 𑀧𑀼𑀭𑀺𑀫𑀫𑀦𑀢𑁄𑀢𑀺 𑀪𑀯𑀗𑁆𑀕𑀫𑀦𑀢𑁄. 𑀯𑀺𑀲𑀤𑀺𑀲𑀫𑀦𑀦𑁆𑀢𑀺 𑀯𑀻𑀣𑀺𑀚𑀯𑀦𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀯𑀻𑀣𑀺𑀚𑀯𑀦𑀧𑀝𑀺𑀧𑀸𑀤𑀓𑁂 𑀤𑀲𑁆𑀲𑁂𑀢𑀺.

𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀲𑀸𑀭𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑁄 𑀲𑀸𑀭𑀡𑀮𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀲𑀢𑀺𑀬𑀸 𑀅𑀲𑀫𑁆𑀫𑀼𑀲𑁆𑀲𑀦𑀯𑀲𑁂𑀦 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸, 𑀫𑀦𑀲𑀺𑀓𑀸𑀭𑀲𑁆𑀲 𑀧𑀦 𑀲𑀁𑀬𑁄𑀚𑀦𑀯𑀲𑁂𑀦 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀘𑀦𑀁 𑀇𑀢𑀭𑀫𑀦𑀲𑀺𑀓𑀸𑀭𑀸𑀦𑀁 𑀢𑀤𑀜𑁆𑀜𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑀸𑀫𑀢𑁆𑀢𑀁 𑀚𑁄𑀢𑁂𑀢𑀻𑀢𑀺 𑀢𑀣𑀸𑀚𑁄𑀢𑀺𑀢𑀁 𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀑𑀢𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀣𑀺𑀧𑀝𑀺𑀧𑀸𑀤𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁭𑁪. 𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀼 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂𑀲𑀼. 𑀅𑀦𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀳𑀺 𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀉𑀤𑀸𑀲𑀺𑀦𑀪𑀸𑀯𑀢𑁄 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸𑀢𑀺 𑀲𑀫𑀁 𑀅𑀯𑀺𑀲𑀫𑀁 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀦𑀮𑀓𑁆𑀔𑀡𑀸. 𑀉𑀤𑀸𑀲𑀺𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑁂𑀢𑀺, 𑀬𑀣𑀸 𑀭𑀸𑀚𑀸 𑀢𑀼𑀡𑁆𑀳𑀻 𑀦𑀺𑀲𑀺𑀦𑁆𑀦𑁄𑀧𑀺 𑀅𑀢𑁆𑀣𑀓𑀭𑀡𑁂 𑀥𑀫𑁆𑀫𑀝𑁆𑀞𑁂 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀅𑀧𑁆𑀧𑀫𑀢𑁆𑀢𑁂 𑀧𑀯𑀢𑁆𑀢𑁂𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑀸 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀓𑀺𑀘𑁆𑀘𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁, 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑁄 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀢𑀲𑁆𑀲𑀸 𑀓𑀺𑀘𑁆𑀘𑀫𑁂𑀯. 𑀬𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁄𑀢𑀺, 𑀢𑀲𑁆𑀲𑀸𑀧𑀺 𑀢𑀣𑀸𑀧𑀯𑀢𑁆𑀢𑀦𑀫𑁂𑀯𑀸𑀢𑀺 𑀦𑀸𑀬𑀁 𑀤𑁄𑀲𑁄. ‘‘𑀇𑀤𑀁 𑀦𑀺𑀳𑀻𑀦𑀓𑀺𑀘𑁆𑀘𑀁 𑀳𑁄𑀢𑀼, 𑀇𑀤𑀁 𑀅𑀢𑀺𑀭𑁂𑀓𑀢𑀭𑀓𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀓𑁆𑀔𑀧𑀸𑀢𑀯𑀲𑁂𑀦 𑀯𑀺𑀬 𑀧𑀯𑀢𑁆𑀢𑀺 𑀧𑀓𑁆𑀔𑀧𑀸𑀢𑁄, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀅𑀦𑀺𑀬𑀢𑁂𑀲𑀼 𑀇𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀘𑁂𑀢𑀲𑀺𑀓𑀦𑁆𑀢𑀭𑀪𑀸𑀯𑁂𑀦 𑀇𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀤𑁄𑀲𑁄𑀬𑁂𑀯 𑀫𑁂𑀢𑁆𑀢𑀸. 𑀢𑀣𑀸 ¶ 𑀳𑀺 𑀲𑁄𑀬𑁂𑀯 ‘‘𑀫𑁂𑀢𑁆𑀢𑀸 𑀫𑁂𑀢𑁆𑀢𑀸𑀬𑀦𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁬𑁨) 𑀦𑀺𑀤𑁆𑀤𑀺𑀝𑁆𑀞𑁄. 𑀉𑀧𑁂𑀓𑁆𑀔𑀸𑀢𑀺 𑀬𑀁 𑀉𑀧𑁂𑀓𑁆𑀔𑀁 𑀫𑁂𑀢𑁆𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑀺, 𑀲𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬𑁂𑀯.

𑁪𑁭𑁫. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀦𑁆𑀢𑀺 ¶ 𑀧𑀭𑀧𑀸𑀡𑀧𑀭𑀥𑀦𑀧𑀭𑀇𑀢𑁆𑀣𑀺𑀆𑀤𑀻𑀦𑀁. 𑀅𑀫𑀤𑁆𑀤𑀦𑀁 𑀫𑀤𑁆𑀤𑀦𑀧𑀝𑀺𑀧𑀓𑁆𑀔𑀪𑀸𑀯𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀓𑀺𑀭𑀺𑀬𑀸𑀧𑀤𑁂𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁄 𑀏𑀯 𑀲𑀗𑁆𑀓𑁄𑀘𑀦𑀓𑀺𑀭𑀺𑀬𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑀺𑀭𑀢𑀺𑀬𑁄 𑀤𑀼𑀘𑁆𑀘𑀭𑀺𑀢𑀯𑀢𑁆𑀣𑀼𑀦𑁄 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀬𑀼𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀤𑀼𑀘𑁆𑀘𑀭𑀺𑀢𑀲𑁆𑀲, 𑀯𑀺𑀭𑀢𑀻𑀦𑀜𑁆𑀘 𑀲𑁄𑀭𑀘𑁆𑀘𑀯𑀲𑁂𑀦 𑀲𑀗𑁆𑀓𑁄𑀘𑀦𑀁, 𑀅𑀓𑀺𑀭𑀺𑀬𑀸𑀦𑀜𑁆𑀘 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀚𑀺𑀕𑀼𑀘𑁆𑀙𑀦𑀸𑀤𑀺𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁪𑁭𑁬. 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀢𑁂 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀅𑀜𑁆𑀜𑀣𑀸 𑀅𑀝𑁆𑀞𑀢𑀺𑀁𑀲𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀣𑀸 𑀘𑀺𑀢𑁆𑀢𑀁, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀤𑀼𑀢𑀺𑀬𑁂 𑀲𑀲𑀗𑁆𑀔𑀸𑀭𑀸 𑀏𑀯𑀸𑀢𑀺 𑀆𑀳 ‘‘𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺. 𑀅𑀯𑀲𑁂𑀲𑀸 𑀧𑀞𑀫𑁂 𑀯𑀼𑀢𑁆𑀢𑀥𑀫𑁆𑀫𑀸.

𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀓𑀣𑀁 𑀓𑀭𑀼𑀡𑀸𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺? 𑀧𑀼𑀩𑁆𑀩𑀪𑀸𑀕𑀪𑀸𑀯𑀢𑁄. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀏𑀯 𑀳𑀺 𑀓𑀭𑀼𑀡𑀸𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀦 𑀳𑁄𑀦𑁆𑀢𑀺, 𑀢𑀢𑁄 𑀅𑀜𑁆𑀜𑀢𑁆𑀣 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺 𑀳𑁄𑀦𑁆𑀢𑀻𑀢𑀺 𑀆𑀘𑀭𑀺𑀬𑀸.

𑀲𑀼𑀯𑀺𑀲𑀼𑀤𑁆𑀥𑀲𑁆𑀲 𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀘𑀺𑀢𑁆𑀢𑀲𑀫𑀸𑀥𑀸𑀦𑀯𑀲𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀧𑁆𑀧𑀯𑀢𑁆𑀢𑀺, 𑀦 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑁄𑀥𑀦𑀯𑀲𑁂𑀦, 𑀦𑀸𑀧𑀺 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦𑀸𑀢𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀭𑀢𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬’’𑀦𑁆𑀢𑀺. 𑀢𑀢𑁄𑀢𑀺 𑀭𑀽𑀧𑀸𑀯𑀘𑀭𑀧𑀞𑀫𑁂 𑀯𑀼𑀢𑁆𑀢𑀘𑁂𑀢𑀲𑀺𑀓𑀢𑁄. 𑀢𑁂𑀬𑁂𑀯𑀸𑀢𑀺 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑁂 𑀯𑀼𑀢𑁆𑀢𑀘𑁂𑀢𑀲𑀺𑀓𑀸 𑀏𑀯. 𑀬𑀤𑀺 𑀏𑀯 𑀭𑀽𑀧𑀸𑀯𑀘𑀭𑀢𑁄 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀬𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄’’𑀢𑀺.

𑀧𑀞𑀫𑀚𑁆𑀛𑀸𑀦𑀺𑀓𑁂𑀢𑀺 𑀧𑀞𑀫𑀚𑁆𑀛𑀸𑀦𑀯𑀢𑀺. 𑀫𑀕𑁆𑀕𑀯𑀺𑀜𑁆𑀜𑀸𑀡𑁂𑀢𑀺 𑀘𑀢𑀼𑀩𑁆𑀩𑀺𑀥𑁂𑀧𑀺 𑀫𑀕𑁆𑀕𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀪𑁂𑀤𑁂 𑀫𑀕𑁆𑀕𑀯𑀺𑀜𑁆𑀜𑀸𑀡𑁂𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀓𑀺𑀁 𑀅𑀯𑀺𑀲𑁂𑀲𑁂𑀦𑀸𑀢𑀺 𑀘𑁄𑀤𑀦𑀸𑀬𑀦𑁂 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀭𑀼𑀡𑀸𑀫𑀼𑀤𑀺𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀕𑁆𑀕𑀯𑀺𑀜𑁆𑀜𑀸𑀡𑀸𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀜𑁆𑀘 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀦 𑀢𑀸𑀲𑀁 𑀢𑀢𑁆𑀣 𑀲𑀫𑁆𑀪𑀯𑁄. 𑀫𑀕𑁆𑀕𑀥𑀫𑁆𑀫𑁂𑀲𑀼 𑀘 𑀧𑀸𑀤𑀓𑀸𑀤𑀺𑀦𑀺𑀬𑀫𑁂𑀦 ¶ 𑀓𑀤𑀸𑀘𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀺𑀭𑀳𑁄 𑀲𑀺𑀬𑀸 ¶ , 𑀦 𑀧𑀦 𑀯𑀺𑀭𑀢𑀺𑀯𑀺𑀭𑀳𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀯𑀢𑁆𑀢𑀦𑀢𑁄𑀢𑀺 𑀦𑀺𑀬𑀢𑀯𑀺𑀭𑀢𑀺𑀢𑀸.

𑁪𑁭𑁮. 𑀦 𑀳𑀺𑀭𑀺𑀬𑀢𑀺 𑀦 𑀮𑀚𑁆𑀚𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁄 𑀯𑀸. ‘‘𑀅𑀳𑀺𑀭𑀺𑀓𑁆𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀓𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀳𑀺𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀦 𑀑𑀢𑁆𑀢𑀧𑁆𑀧’’𑀦𑁆𑀢𑀺 𑀑𑀢𑁆𑀢𑀧𑁆𑀧𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀥𑀫𑁆𑀫𑀫𑀸𑀳. 𑀅𑀚𑀺𑀕𑀼𑀘𑁆𑀙𑀦𑀁 𑀅𑀳𑀻𑀴𑀦𑀁. 𑀅𑀮𑀚𑁆𑀚𑀸 𑀅𑀯𑀺𑀭𑀺𑀴𑀸. 𑀢𑁂𑀳𑁂𑀯𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀏𑀯. 𑀅𑀲𑀸𑀭𑀚𑁆𑀚𑀁 𑀦𑀺𑀩𑁆𑀪𑀬𑀢𑀸. 𑀅𑀦𑀼𑀢𑁆𑀢𑀸𑀲𑁄 𑀅𑀲𑀫𑁆𑀪𑀫𑁄. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀅𑀮𑀚𑁆𑀚𑀦𑀸𑀓𑀸𑀭𑁂𑀦 𑀧𑀸𑀧𑀸𑀦𑀁 𑀓𑀭𑀡𑀭𑀲𑀁 𑀅𑀳𑀺𑀭𑀺𑀓𑀁, 𑀅𑀦𑀼𑀢𑁆𑀢𑀸𑀲𑀸𑀓𑀸𑀭𑁂𑀦 𑀅𑀦𑁄𑀢𑁆𑀢𑀧𑁆𑀧𑀁, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀧𑀸𑀧𑀢𑁄 𑀅𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀅𑀢𑁆𑀢𑀦𑀺, 𑀧𑀭𑁂𑀲𑀼 𑀘 𑀅𑀕𑀸𑀭𑀯𑀧𑀤𑀝𑁆𑀞𑀸𑀦𑀸𑀦𑀺. 𑀕𑀸𑀫𑀲𑀽𑀓𑀭𑀲𑁆𑀲 𑀯𑀺𑀬 𑀅𑀲𑀼𑀘𑀺𑀢𑁄 𑀓𑀺𑀮𑁂𑀲𑀸𑀲𑀼𑀘𑀺𑀢𑁄 𑀅𑀚𑀺𑀕𑀼𑀘𑁆𑀙𑀦𑀁 𑀅𑀳𑀺𑀭𑀺𑀓𑁂𑀦 𑀳𑁄𑀢𑀺, 𑀲𑀮𑀪𑀲𑁆𑀲 𑀯𑀺𑀬 𑀅𑀕𑁆𑀕𑀺𑀢𑁄 𑀧𑀸𑀧𑀢𑁄 𑀅𑀦𑀼𑀢𑁆𑀢𑀸𑀲𑁄 𑀅𑀦𑁄𑀢𑁆𑀢𑀧𑁆𑀧𑁂𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁭𑁯. 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀮𑀼𑀩𑁆𑀪𑀦𑁆𑀢𑀻𑀢𑀺 𑀅𑀪𑀺𑀕𑀺𑀚𑁆𑀛𑀦𑁆𑀢𑀺. 𑀫𑀼𑀬𑁆𑀳𑀦𑁆𑀢𑀻𑀢𑀺 𑀦 𑀩𑀼𑀚𑁆𑀛𑀦𑁆𑀢𑀺. 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 ‘‘𑀫𑀫 𑀇𑀤’’𑀦𑁆𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀁, 𑀦 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀁. 𑀅𑀪𑀺𑀲𑀗𑁆𑀕𑁄 𑀅𑀪𑀺𑀫𑀼𑀔𑀪𑀸𑀯𑁂𑀦 𑀆𑀲𑀢𑁆𑀢𑀺. 𑀅𑀧𑀭𑀺𑀘𑁆𑀘𑀸𑀕𑁄 𑀅𑀯𑀺𑀚𑀳𑀦𑀁, 𑀤𑀼𑀫𑁆𑀫𑁄𑀘𑀦𑀻𑀬𑀢𑀸 𑀯𑀸. 𑀅𑀲𑁆𑀲𑀸𑀤𑀤𑀲𑁆𑀲𑀦𑀁 𑀅𑀲𑁆𑀲𑀸𑀤𑀤𑀺𑀝𑁆𑀞𑀺. ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀘 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨, 𑁫𑁪, 𑁫𑁭) 𑀳𑀺 𑀯𑀼𑀢𑁆𑀢𑀁.

𑁪𑁮𑁦. 𑀥𑀫𑁆𑀫𑀲𑀪𑀸𑀯𑀲𑁆𑀲 𑀬𑀸𑀣𑀸𑀯𑀢𑁄 𑀅𑀤𑀲𑁆𑀲𑀦𑀁 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑁄. 𑀅𑀜𑁆𑀜𑀸𑀡𑀁 𑀜𑀸𑀡𑀧𑀝𑀺𑀧𑀓𑁆𑀔𑁄. 𑀲𑀫𑁆𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀢𑀸 𑀅𑀲𑀫𑁆𑀧𑀝𑀺𑀯𑁂𑀥𑁄. 𑀬𑀣𑀸 𑀜𑀸𑀡𑀁 𑀆𑀭𑀫𑁆𑀫𑀡𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀮𑀩𑁆𑀪𑀢𑀺, 𑀫𑁄𑀳𑀲𑁆𑀲 𑀢𑀣𑀸 𑀧𑀯𑀢𑁆𑀢𑀺 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀁. 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀯𑀸 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀦𑁆𑀥𑀓𑀭𑀡𑀁 𑀅𑀦𑁆𑀥𑀓𑀸𑀭𑁄, 𑀢𑀣𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑁪𑁮𑁧. 𑀫𑀺𑀘𑁆𑀙𑀸𑀢𑀺 𑀥𑀫𑁆𑀫𑀲𑀪𑀸𑀯𑀲𑁆𑀲 𑀯𑀺𑀧𑀭𑀻𑀢𑀁, 𑀦𑀺𑀘𑁆𑀘𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑁄 𑀅𑀦𑀼𑀧𑀸𑀬𑀸𑀪𑀺𑀦𑀺𑀯𑁂𑀲𑁄 𑀉𑀧𑁆𑀧𑀣𑀸𑀪𑀺𑀦𑀺𑀯𑁂𑀲𑁄. 𑀥𑀫𑁆𑀫𑀲𑀪𑀸𑀯𑀁 ¶ 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑀁 ¶ 𑀧𑀭𑀸𑀫𑀸𑀲𑁄. 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁨, 𑁨𑁦𑁩; 𑁩.𑁨𑁭-𑁨𑁯) 𑀅𑀪𑀺𑀦𑀺𑀯𑀺𑀲𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄.

𑁪𑁮𑁨. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀉𑀤𑁆𑀥𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀸, 𑀲𑁄 𑀥𑀫𑁆𑀫𑁄 𑀉𑀤𑁆𑀥𑀘𑁆𑀘𑀁. 𑀅𑀯𑀽𑀧𑀲𑀫𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑀅𑀧𑁆𑀧𑀲𑀦𑁆𑀦𑀪𑀸𑀯𑀫𑀸𑀳. 𑀅𑀦𑀯𑀝𑁆𑀞𑀸𑀦𑀭𑀲𑀦𑁆𑀢𑀺 𑀘𑀮𑀦𑀓𑀺𑀘𑁆𑀘𑀁. 𑀪𑀦𑁆𑀢𑀢𑁆𑀢𑀦𑁆𑀢𑀺 𑀧𑀭𑀺𑀩𑁆𑀪𑀫𑀦𑀸𑀓𑀸𑀭𑀁. 𑀘𑁂𑀢𑀲𑁄 𑀅𑀯𑀽𑀧𑀲𑀫𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀪𑀼𑀫𑁆𑀫𑀁, 𑀅𑀯𑀽𑀧𑀲𑀫𑀧𑀘𑁆𑀘𑀬𑀪𑀽𑀢𑀁 𑀆𑀭𑀫𑁆𑀫𑀡𑀁 𑀯𑀸 ‘‘𑀅𑀯𑀽𑀧𑀲𑀫𑁄’’𑀢𑀺 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑀦𑀺𑀳𑀻𑀦𑀢𑀸𑀬 ‘‘𑀅𑀓𑀼𑀲𑀮𑀪𑀸𑀯𑁂𑀦 𑀘 𑀮𑀸𑀫𑀓𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁪𑁮𑁩. 𑀣𑀺𑀦𑀫𑀺𑀤𑁆𑀥𑀫𑁂𑀢𑁆𑀣 𑀅𑀦𑀺𑀬𑀢𑀁, 𑀦 𑀫𑀸𑀦𑀸𑀤𑀻𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀺𑀬𑀢𑀢𑀸 𑀘 𑀏𑀢𑁆𑀣 𑀤𑀼𑀢𑀺𑀬𑀘𑀺𑀢𑁆𑀢𑁂 𑀧𑀞𑀫𑀸𑀓𑀼𑀲𑀮𑀢𑁄 𑀯𑀺𑀲𑁂𑀲𑁄.

𑀅𑀦𑀼𑀲𑁆𑀲𑀸𑀳𑀦𑀸𑀯𑀲𑀻𑀤𑀦𑀪𑀸𑀯𑁂𑀦 𑀲𑀁𑀳𑀢𑀪𑀸𑀯𑁄 𑀣𑀺𑀦𑀁, 𑀢𑁂𑀦 𑀬𑁄𑀕𑀢𑁄 𑀘𑀺𑀢𑁆𑀢𑀁 𑀣𑀺𑀦𑀁, 𑀢𑀲𑁆𑀲 𑀪𑀸𑀯𑁄𑀢𑀺 𑀣𑀺𑀦𑀢𑀸. 𑀅𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀯𑀲𑁂𑀦 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀁. 𑀬𑀲𑁆𑀫𑀸 𑀢𑀢𑁄 𑀏𑀯 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑁂𑀥𑀺𑀢𑀸 𑀯𑀺𑀳𑀢𑀲𑀸𑀫𑀢𑁆𑀣𑀺𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀺𑀤𑁆𑀥𑀦𑀢𑀸 𑀫𑀺𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀲𑁆𑀲𑀸𑀳𑀮𑀓𑁆𑀔𑀡𑀦𑁆𑀢𑀺 𑀉𑀲𑁆𑀲𑀸𑀳𑀧𑀝𑀺𑀧𑀓𑁆𑀔𑀮𑀓𑁆𑀔𑀡𑀁. 𑀯𑀻𑀭𑀺𑀬𑀲𑁆𑀲 𑀅𑀯𑀦𑁄𑀤𑀦𑀁 𑀔𑀺𑀧𑀦𑀁 𑀯𑀻𑀭𑀺𑀬𑀸𑀯𑀦𑁄𑀤𑀦𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀁𑀲𑀻𑀤𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀢𑁂𑀲𑀁 𑀯𑀸 𑀲𑀁𑀲𑀻𑀤𑀦𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀓𑀸𑀫𑀁 𑀣𑀺𑀦𑀫𑁆𑀧𑀺 𑀅𑀓𑀫𑁆𑀫𑀜𑁆𑀜𑀲𑀪𑀸𑀯𑀫𑁂𑀯, 𑀢𑀁 𑀧𑀦 𑀘𑀺𑀢𑁆𑀢𑀲𑁆𑀲, 𑀫𑀺𑀤𑁆𑀥𑀁 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’’𑀢𑀺 (𑀥. 𑀲. 𑁧𑁧𑁬𑁨-𑁧𑁧𑁬𑁩) 𑀘 𑀆𑀤𑀺𑀦𑀸 𑀇𑀫𑁂𑀲𑀁 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄. 𑀑𑀦𑀳𑀦𑀁 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀁 𑀧𑀺𑀤𑀳𑀦𑀁. 𑀮𑀻𑀦𑀢𑀸 𑀮𑀻𑀦𑀸𑀓𑀸𑀭𑁄 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀲𑀗𑁆𑀓𑁄𑀘𑁄. 𑀬𑀲𑁆𑀫𑀸 𑀣𑀺𑀦𑁂𑀦 𑀘𑀺𑀢𑁆𑀢𑀲𑁆𑀲𑁂𑀯 𑀲𑀁𑀳𑀦𑀦𑀁 𑀳𑁄𑀢𑀺, 𑀫𑀺𑀤𑁆𑀥𑁂𑀦 𑀧𑀦 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲𑀸𑀧𑀺, 𑀢𑀲𑁆𑀫𑀸 𑀢𑀁 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀅𑀭𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀅𑀭𑁄𑀘𑀦𑀸. 𑀯𑀺𑀚𑀫𑁆𑀪𑀺𑀓𑀸 𑀯𑀺𑀚𑀫𑁆𑀪𑀦𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀓𑀸𑀭𑀡𑀪𑀽𑀢𑀸 𑀲𑀁𑀓𑀺𑀮𑁂𑀲𑀧𑁆𑀧𑀯𑀢𑁆𑀢𑀺. 𑀅𑀭𑀢𑀺𑀯𑀺𑀚𑀫𑁆𑀪𑀺𑀓𑀸𑀤𑀻𑀲𑀽𑀢𑀺 ¶ 𑀘 𑀆𑀤𑀺-𑀲𑀤𑁆𑀤𑁂𑀦 𑀢𑀦𑁆𑀤𑀺𑀆𑀤𑀻𑀦𑀁 𑀕𑀳𑀡𑀁. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁.

𑀅𑀯𑀲𑁂𑀲𑀸 ¶ 𑀲𑁄𑀴𑀲. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄 𑀳𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀭𑀲𑁂𑀯 𑀳𑁄𑀦𑁆𑀢𑀺. 𑀧𑀝𑁆𑀞𑀸𑀦𑁂 𑀳𑀺 ‘‘𑀲𑀁𑀬𑁄𑀚𑀦𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀁𑀬𑁄𑀚𑀦𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀸𑀫𑀭𑀸𑀕𑁂𑀦, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀖𑁂𑀦 𑀘 𑀫𑀸𑀦𑁄 𑀯𑀺𑀘𑀺𑀓𑀺𑀘𑁆𑀙𑀸 𑀪𑀯𑀭𑀸𑀕𑁄𑀢𑀺 𑀢𑀬𑁄𑀧𑁂𑀢𑁂 𑀲𑀓𑀤𑀸𑀕𑀸𑀫𑀺𑀦𑁄 𑀲𑀁𑀬𑁄𑀚𑀦𑀸𑀦𑀁 𑀲𑀁𑀬𑁄𑀚𑀦𑁂𑀳𑀺 𑀤𑀲𑀯𑀺𑀥𑀸 𑀬𑁄𑀚𑀦𑀸𑀢𑀺 𑀤𑀲𑁆𑀲𑀺𑀢𑀸𑀬 𑀤𑀲𑀯𑀺𑀥𑀸𑀬 𑀬𑁄𑀚𑀦𑀸𑀬 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀫𑀸𑀦𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁪.𑁧) 𑀯𑀢𑁆𑀯𑀸 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁪.𑁧) 𑀢𑀣𑀸 ‘‘𑀫𑀸𑀦𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 (𑀧𑀝𑁆𑀞𑀸 𑁩.𑁪.𑁧) 𑀯𑀢𑁆𑀯𑀸 ‘‘𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁪.𑁧) 𑀘 𑀏𑀯𑀫𑀸𑀕𑀢𑀸𑀳𑀺 𑀬𑁄𑀚𑀦𑀸𑀳𑀺 𑀫𑀸𑀦𑀲𑁆𑀲 𑀅𑀦𑀺𑀬𑀢𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀬𑀤𑀺 𑀳𑀺 𑀫𑀸𑀦𑁄 𑀦𑀺𑀬𑀢𑁄 𑀲𑀺𑀬𑀸, 𑀓𑀸𑀫𑀭𑀸𑀕𑀲𑁆𑀲 𑀫𑀸𑀦𑀭𑀳𑀺𑀢𑀸 𑀧𑀯𑀢𑁆𑀢𑀺 𑀦 𑀲𑀺𑀬𑀸, 𑀢𑀣𑀸 𑀪𑀯𑀭𑀸𑀕𑀲𑁆𑀲. 𑀏𑀯𑀁 𑀲𑀢𑀺 𑀧𑀝𑁆𑀞𑀸𑀦𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀸𑀫𑀭𑀸𑀕𑁂𑀦 𑀬𑁄𑀚𑀦𑀸 𑀦 𑀲𑀺𑀬𑀸, 𑀢𑀺𑀓𑁆𑀔𑀢𑁆𑀢𑀼𑀁𑀬𑁂𑀯 𑀲𑀺𑀬𑀸. 𑀪𑀯𑀭𑀸𑀕𑀫𑀽𑀮𑀺𑀓𑀸 𑀘 𑀦 𑀲𑀺𑀬𑀸. 𑀏𑀯𑀜𑁆𑀘 𑀲𑀁𑀬𑁄𑀚𑀦𑀸𑀦𑀁 𑀲𑀁𑀬𑁄𑀚𑀦𑁂𑀳𑀺 𑀅𑀝𑁆𑀞𑀯𑀺𑀥𑁂𑀦 𑀬𑁄𑀚𑀦𑀸 𑀲𑀺𑀬𑀸, 𑀦 𑀤𑀲𑀯𑀺𑀥𑁂𑀦. 𑀤𑀲𑀯𑀺𑀥𑀸𑀯 𑀘 𑀤𑀲𑁆𑀲𑀺𑀢𑀸𑀢𑀺. 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀉𑀘𑁆𑀘𑀢𑁄 𑀦𑀫𑀦𑀁 𑀉𑀦𑁆𑀦𑀢𑀺. 𑀉𑀦𑁆𑀦𑀫𑀦𑀯𑀲𑁂𑀦𑁂𑀯 𑀲𑀁𑀧𑀕𑁆𑀕𑀳𑀭𑀲𑁄. 𑀦 𑀯𑀻𑀭𑀺𑀬𑀁 𑀯𑀺𑀬 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑁂 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦. 𑀑𑀫𑀸𑀦𑀲𑁆𑀲𑀸𑀧𑀺 𑀅𑀢𑁆𑀢𑀸𑀦𑀁 𑀅𑀯𑀁 𑀓𑀢𑁆𑀯𑀸 𑀕𑀳𑀡𑀫𑁆𑀧𑀺 𑀲𑀫𑁆𑀧𑀕𑁆𑀕𑀳𑀡𑀯𑀲𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀢𑀼 𑀯𑀼𑀘𑁆𑀘𑀢𑀺 𑀅𑀘𑁆𑀘𑀼𑀕𑁆𑀕𑀢𑀥𑀚𑁄, 𑀇𑀥 𑀧𑀦 𑀓𑁂𑀢𑀼 𑀯𑀺𑀬𑀸𑀢𑀺 𑀓𑁂𑀢𑀼, 𑀉𑀴𑀸𑀭𑀢𑀫𑀸𑀤𑀺𑀪𑀸𑀯𑁄. 𑀢𑀁 𑀓𑁂𑀢𑀼𑀪𑀸𑀯𑀲𑀗𑁆𑀔𑀸𑀢𑀁 𑀓𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 𑀓𑁂𑀢𑀼𑀓𑀫𑁆𑀬𑀁, 𑀘𑀺𑀢𑁆𑀢𑀁. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀓𑁂𑀢𑀼𑀓𑀫𑁆𑀬𑀁, 𑀲𑀸 𑀓𑁂𑀢𑀼𑀓𑀫𑁆𑀬𑀢𑀸. ‘‘𑀅𑀳’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁄 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀲𑀤𑀺𑀲𑀻 𑀧𑀯𑀢𑁆𑀢𑀻𑀢𑀺 𑀲𑁄 𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀦 𑀧𑀯𑀢𑁆𑀢𑀢𑀺, 𑀅𑀢𑁆𑀢𑀲𑀺𑀦𑁂𑀳𑀲𑀦𑁆𑀦𑀺𑀲𑁆𑀲𑀬𑁄 𑀘𑀸𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄’’𑀢𑀺.

𑀏𑀢𑁆𑀣𑀸𑀧𑀺 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀣𑀺𑀦𑀫𑀺𑀤𑁆𑀥𑀁 𑀆𑀓𑀟𑁆𑀠𑀢𑀺.

𑁪𑁮𑁫. 𑀤𑀼𑀲𑁆𑀲𑀦𑁆𑀢𑀻𑀢𑀺 𑀩𑁆𑀬𑀸𑀧𑀚𑁆𑀚𑀦𑁆𑀢𑀺. 𑀘𑀡𑁆𑀟𑀺𑀓𑁆𑀓𑀁 𑀓𑀼𑀚𑁆𑀛𑀦𑀁. 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦, 𑀯𑀺𑀭𑀽𑀧𑀲𑀁𑀲𑀧𑁆𑀧𑀦𑀓𑀅𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀘 𑀯𑀺𑀲𑀧𑁆𑀧𑀦𑀭𑀲𑁄. 𑀓𑀸𑀬𑀲𑁆𑀲 ¶ 𑀯𑀺𑀚𑁆𑀛𑀢𑁆𑀢𑀪𑀸𑀯𑀸𑀧𑀸𑀤𑀦𑀢𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄. 𑀤𑀼𑀲𑁆𑀲𑀦𑀁 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀘 𑀉𑀧𑀪𑁄𑀕𑀨𑀮𑀓𑀸𑀮𑁂𑀲𑀼 𑀅𑀦𑀺𑀝𑁆𑀞𑀢𑁆𑀢𑀸 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀕𑁆𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺.

𑁪𑁮𑁬. 𑀬𑀁 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀇𑀲𑁆𑀲𑀸𑀓𑀭𑀡𑀁, 𑀲𑀸 𑀇𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀲𑁆𑀲𑀸𑀬𑀦𑀸 𑀇𑀲𑁆𑀲𑀸’’𑀢𑀺 ¶ . 𑀉𑀲𑀽𑀬𑀦𑀁 𑀅𑀲𑀳𑀦𑀁. 𑀢𑀢𑁆𑀣𑁂𑀯𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀏𑀯. 𑀅𑀪𑀺𑀭𑀢𑀺𑀧𑀝𑀺𑀧𑀓𑁆𑀔𑀪𑀽𑀢𑀁 𑀇𑀲𑁆𑀲𑀸𑀬 𑀓𑀺𑀘𑁆𑀘𑀁, 𑀦 𑀅𑀪𑀺𑀭𑀢𑀺𑀬𑀸 𑀅𑀪𑀸𑀯𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀦𑀪𑀺𑀭𑀢𑀺𑀭𑀲𑀸’’𑀢𑀺.

𑁪𑁮𑁭. 𑀫𑀘𑁆𑀙𑀭𑀬𑁄𑀕𑁂𑀦 ‘‘𑀫𑀘𑁆𑀙𑀭𑀻’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀫𑀘𑁆𑀙𑀭𑀺𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀫𑀘𑁆𑀙𑀭𑀪𑀸𑀯𑁄 𑀫𑀘𑁆𑀙𑀭𑀺𑀬’’𑀦𑁆𑀢𑀺. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀦 𑀫𑀸 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀅𑀜𑁆𑀜𑁂𑀲𑀁 𑀳𑁄𑀢𑀼, 𑀫𑀬𑁆𑀳𑀫𑁂𑀯 𑀳𑁄𑀢𑀽𑀢𑀺 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑁄𑀭𑀸𑀡𑀸. 𑀢𑀁 𑀫𑀘𑁆𑀙𑀭𑀺𑀬𑀁 𑀯𑀼𑀘𑁆𑀘𑀫𑀸𑀦𑀸𑀦𑀺 𑀮𑀓𑁆𑀔𑀡𑀸𑀤𑀻𑀦𑀺 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁 𑀧𑀭𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀓𑀭𑀡𑁂𑀦 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀓𑀝𑀼𑀓𑀸𑀓𑀸𑀭𑀕𑀢𑀺 𑀓𑀝𑀼𑀓𑀜𑁆𑀘𑀼𑀓𑀢𑀸. 𑀅𑀢𑁆𑀢𑀲𑀫𑁆𑀧𑀢𑁆𑀢𑀺 𑀆𑀯𑀸𑀲𑀸𑀤𑀺.

𑁪𑁮𑁮. 𑀓𑀼𑀓𑀢𑀦𑁆𑀢𑀺 𑀏𑀢𑁆𑀣 𑀅𑀓𑀢𑀫𑁆𑀧𑀺 𑀓𑀼𑀓𑀢𑀫𑁂𑀯. 𑀏𑀯𑀜𑁆𑀳𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 ‘‘𑀬𑀁 𑀫𑀬𑀸 𑀦 𑀓𑀢𑀁, 𑀢𑀁 𑀓𑀼𑀓𑀢’’𑀦𑁆𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲’’𑀦𑁆𑀢𑀺. 𑀏𑀯𑀁 𑀓𑀢𑀸𑀓𑀢𑀁 𑀤𑀼𑀘𑁆𑀘𑀭𑀺𑀢𑀁, 𑀲𑀼𑀘𑀭𑀺𑀢𑀜𑁆𑀘 𑀓𑀼𑀓𑀢𑀁, 𑀢𑀁 𑀆𑀭𑀩𑁆𑀪 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀧𑀦 𑀘𑀺𑀢𑁆𑀢𑀁 𑀢𑀁𑀲𑀳𑀘𑀭𑀺𑀢𑀢𑀸𑀬 𑀇𑀥 ‘‘𑀓𑀼𑀓𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀙𑀸 𑀅𑀦𑀼𑀢𑀸𑀧𑀦𑀁 𑀯𑀺𑀩𑀸𑀥𑀦𑀁 𑀧𑀘𑁆𑀙𑀸𑀦𑀼𑀢𑀸𑀧𑁄. 𑀬𑀣𑀸𑀧𑀯𑀢𑁆𑀢𑀲𑁆𑀲 𑀓𑀢𑀸𑀓𑀢𑀸𑀓𑀸𑀭𑀯𑀺𑀲𑀺𑀝𑁆𑀞𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀲𑁆𑀲 𑀅𑀦𑀼𑀲𑁄𑀘𑀦𑀯𑀲𑁂𑀦 𑀯𑀺𑀭𑀽𑀧𑀁 𑀧𑀝𑀺𑀲𑀭𑀡𑀁 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀧𑀭𑀸𑀬𑀢𑁆𑀢𑀢𑀸𑀳𑁂𑀢𑀼𑀢𑀸𑀬 𑀤𑀸𑀲𑀩𑁆𑀬𑀫𑀺𑀯 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀤𑀸𑀲𑀩𑁆𑀬𑁂 𑀲𑀢𑀺 𑀤𑀸𑀲𑁄 𑀧𑀭𑀸𑀬𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑁂 𑀲𑀢𑀺 𑀢𑀁𑀲𑀫𑀗𑁆𑀕𑀻. 𑀦 𑀳𑀺 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀼𑀲𑀮𑁂 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣 𑀯𑀸 𑀓𑀢𑀸𑀓𑀢𑀸𑀓𑀼𑀲𑀮𑀓𑀼𑀲𑀮𑀸𑀦𑀼𑀲𑁄𑀘𑀦𑁂 𑀆𑀬𑀢𑁆𑀢𑀢𑀸𑀬 𑀢𑀤𑀼𑀪𑀬𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀢𑀁𑀲𑀫𑀗𑁆𑀕𑀻 𑀳𑁄𑀢𑀻𑀢𑀺 𑀢𑀁 𑀤𑀸𑀲𑀩𑁆𑀬𑀁 𑀯𑀺𑀬 𑀳𑁄𑀢𑀻𑀢𑀺.

𑀅𑀦𑀺𑀬𑀢𑁂𑀲𑀼 𑀇𑀲𑁆𑀲𑀸𑀤𑀻𑀲𑀼 𑀣𑀺𑀦𑀫𑀺𑀤𑁆𑀥𑀲𑀫𑁆𑀪𑀯𑁄𑀯 𑀘𑀸𑀢𑀺 𑀘-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁪𑁯𑁦. 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑁄𑀢𑀺 ¶ 𑀔𑀡𑀝𑁆𑀞𑀺𑀢𑀺𑀫𑀢𑁆𑀢𑁄. ‘‘𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬𑀸’’𑀢𑀺 𑀳𑀺 𑀏𑀯𑀁 𑀯𑀼𑀢𑁆𑀢𑀘𑀺𑀢𑁆𑀢𑀝𑁆𑀞𑀺𑀢𑀺 𑀯𑀺𑀬 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑁄 𑀦𑀺𑀘𑁆𑀙𑀬𑀸𑀪𑀸𑀯𑁂𑀦 𑀅𑀲𑀡𑁆𑀞𑀳𑀦𑀢𑁄 𑀘𑁂𑀢𑀲𑁄 𑀧𑀯𑀢𑁆𑀢𑀺𑀧𑀘𑁆𑀘𑀬𑀫𑀢𑁆𑀢𑀢𑀸𑀬 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑁄. 𑀢𑁂𑀦𑀸𑀳 ‘‘𑀤𑀼𑀩𑁆𑀩𑀮𑁄 𑀲𑀫𑀸𑀥𑀻’’𑀢𑀺. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀘𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀓𑀺𑀘𑁆𑀙𑀸𑀪𑀸𑀯𑀢𑁄𑀢𑀺 𑀢𑀤𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀺. ‘‘𑀏𑀯𑀁 𑀦𑀼 𑀔𑁄, 𑀦𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀲𑀁𑀲𑀧𑁆𑀧𑀦𑀯𑀲𑁂𑀦 𑀲𑁂𑀢𑀻𑀢𑀺 𑀲𑀁𑀲𑀬𑁄. 𑀓𑀫𑁆𑀧𑀦𑀭𑀲𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀓𑀫𑁆𑀧𑀦𑀓𑀺𑀘𑁆𑀘𑀸. 𑀉𑀤𑁆𑀥𑀘𑁆𑀘𑀜𑁆𑀳𑀺 𑀅𑀢𑁆𑀢𑀦𑀸 𑀕𑀳𑀺𑀢𑀸𑀓𑀸𑀭𑁂 ¶ 𑀏𑀯 𑀞𑀢𑁆𑀯𑀸 𑀪𑀫𑀢𑀻𑀢𑀺 𑀏𑀓𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀯𑀺𑀧𑁆𑀨𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦 𑀬𑀤𑀺𑀧𑀺 𑀭𑀽𑀧𑀸𑀤𑀻𑀲𑀼 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸𑀧𑀺 ‘‘𑀏𑀯𑀁 𑀦𑀼 𑀔𑁄, 𑀦𑀦𑀼 𑀔𑁄, 𑀇𑀤𑀁 𑀦𑀼 𑀔𑁄, 𑀅𑀜𑁆𑀜𑀁 𑀦𑀼 𑀔𑁄’’𑀢𑀺 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀸𑀓𑀸𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀓𑀫𑁆𑀧𑀦𑀁 𑀳𑁄𑀢𑀻𑀢𑀺. 𑀅𑀦𑀺𑀘𑁆𑀙𑀬𑀁 𑀤𑁆𑀯𑁂𑀴𑁆𑀳𑀓𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀦𑁂𑀓𑀁𑀲𑀲𑁆𑀲 𑀆𑀭𑀫𑁆𑀫𑀡𑁂 𑀦𑀸𑀦𑀸𑀲𑀪𑀸𑀯𑀲𑁆𑀲 𑀕𑀳𑀡𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀅𑀦𑁂𑀓𑀁𑀲𑀕𑀸𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑁪𑁯𑁧. 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀢𑁆𑀢𑀸. 𑀦𑀦𑀼 𑀘 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸𑀧𑀺 𑀯𑀺𑀧𑀸𑀓𑀸 𑀳𑁄𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀳𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸’’𑀢𑀺. 𑀯𑀺𑀭𑀢𑀺𑀬𑁄𑀧𑀺 𑀯𑀺𑀧𑀸𑀓𑁂𑀲𑀼 𑀦 𑀲𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀦𑀦𑀼 𑀓𑁂𑀲𑀼𑀘𑀺 𑀯𑀺𑀧𑀸𑀓𑁂𑀲𑀼 𑀯𑀺𑀭𑀢𑀺𑀬𑁄𑀧𑀺 𑀲𑀦𑁆𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺, 𑀢𑁂𑀦 𑀮𑁄𑀓𑀺𑀬𑀯𑀺𑀧𑀸𑀓𑁂𑀲𑀼 𑀯𑀺𑀭𑀢𑀺𑀬𑁄 𑀦 𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑁂𑀲𑀦𑁆𑀢𑀺 𑀭𑀽𑀧𑀸𑀯𑀘𑀭𑀸𑀤𑀺𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁. 𑀚𑀦𑁂𑀢𑀩𑁆𑀩𑀚𑀦𑀓𑀲𑀫𑁆𑀩𑀦𑁆𑀥𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁.

𑁪𑁯𑁨. 𑀢𑁂𑀢𑀺 𑀢𑁂 𑀅𑀳𑁂𑀢𑀼𑀓𑀓𑀺𑀭𑀺𑀬𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸 𑀅𑀳𑁂𑀢𑀼𑀓𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀲𑀦𑁆𑀢𑀻𑀭𑀡𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸 𑀳𑀲𑀺𑀢𑀼𑀧𑁆𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸 𑀯𑁄𑀝𑁆𑀞𑀩𑁆𑀩𑀦𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀼𑀲𑀮…𑀧𑁂… 𑀲𑀫𑀸𑀦𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀮𑀩𑁆𑀪𑀫𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀲𑀩𑁆𑀪𑀸𑀯𑀢𑁄 𑀩𑀮𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀳𑁄𑀢𑀺 ‘‘𑀯𑀻𑀭𑀺𑀬𑀦𑁆𑀢𑀁 𑀩𑀮’’𑀦𑁆𑀢𑀺 𑀓𑀢𑁆𑀯𑀸.

𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀳𑀺 ¶ 𑀏𑀯 𑀅𑀭𑀳𑀦𑁆𑀢𑀸𑀦𑀁 𑀯𑀺𑀭𑀫𑀦𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀯𑀺𑀭𑀢𑀺𑀬𑁄 𑀦 𑀲𑀦𑁆𑀢𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀬𑁄’’𑀢𑀺. 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀓𑀺𑀭𑀺𑀬𑀲𑀗𑁆𑀔𑀸𑀭𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀳𑀺 𑀯𑀺𑀭𑀢𑀺𑀓𑀢𑁄 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀫𑀳𑀕𑁆𑀕𑀢𑁂𑀲𑀼 𑀧𑀦 𑀢𑀸𑀤𑀺𑀲𑁄𑀧𑀺 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀩𑁆𑀩𑀸𑀓𑀸𑀭𑁂𑀦𑀧𑀻’’𑀢𑀺, 𑀥𑀫𑁆𑀫𑀢𑁄, 𑀆𑀭𑀫𑁆𑀫𑀡𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄𑀢𑀺 𑀲𑀩𑁆𑀩𑀧𑀓𑀸𑀭𑁂𑀦𑀧𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀓𑀣𑀸𑀯𑀡𑁆𑀡𑀦𑀸

𑀅𑀪𑀺𑀥𑀫𑁆𑀫𑀦𑁆𑀢𑁄𑀕𑀥𑀫𑁆𑀧𑀺 ¶ 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀲𑀼𑀢𑁆𑀢𑀦𑁆𑀢𑀦𑀬𑁄 𑀏𑀯, 𑀏𑀓𑀦𑁆𑀢𑀅𑀪𑀺𑀥𑀫𑁆𑀫𑀦𑀬𑁄 𑀧𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑁆𑀢𑀺 𑀆𑀳 ‘‘𑀅𑀪𑀺𑀥𑀫𑁆𑀫𑁂 𑀧𑀤𑀪𑀸𑀚𑀦𑀻𑀬𑀦𑀬𑁂𑀦𑀸’’𑀢𑀺.

𑁪𑁯𑁩. 𑀪𑀕𑀯𑀢𑀸 𑀧𑀦 𑀏𑀯𑀁 𑀔𑀦𑁆𑀥𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸 𑀇𑀫𑀸𑀬𑀧𑀺 𑀧𑀸𑀴𑀺𑀬𑀸 𑀯𑀲𑁂𑀦 𑀔𑀦𑁆𑀥𑀸𑀦𑀁 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀅𑀦𑀺𑀬𑀫𑀤𑀲𑁆𑀲𑀦𑀁. 𑀓𑀺𑀜𑁆𑀘𑀻𑀢𑀺 𑀧𑀓𑀸𑀭𑀪𑁂𑀤𑀁 𑀆𑀫𑀲𑀺𑀢𑁆𑀯𑀸 𑀅𑀦𑀺𑀬𑀫𑀤𑀲𑁆𑀲𑀦𑀁. 𑀉𑀪𑀬𑁂𑀦𑀸𑀧𑀺 𑀅𑀢𑀻𑀢𑀁 𑀯𑀸…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀬𑀸𑀤𑀺𑀲𑀁 𑀯𑀸 𑀢𑀸𑀤𑀺𑀲𑀁 𑀯𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑀸𑀭𑀳𑀁 𑀲𑀩𑁆𑀩𑀁 𑀩𑁆𑀬𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦’’𑀦𑁆𑀢𑀺. 𑀏𑀯𑀁 𑀧𑀦 𑀅𑀜𑁆𑀜𑁂𑀲𑀼𑀧𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑀸𑀭𑀳𑁂𑀲𑀼 𑀧𑀲𑀗𑁆𑀕𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀅𑀢𑀺𑀘𑁆𑀘 𑀧𑀯𑀢𑁆𑀢𑀦𑀢𑁄 𑀅𑀢𑀺𑀧𑁆𑀧𑀲𑀗𑁆𑀕𑀲𑁆𑀲 𑀦𑀺𑀬𑀫𑀦𑀢𑁆𑀣𑀁 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀦𑁆𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀦’’𑀦𑁆𑀢𑀺 𑀆𑀳. 𑀬𑀁 𑀓𑀺𑀜𑁆𑀘𑀻𑀢𑀺 𑀘 𑀬𑀁-𑀲𑀤𑁆𑀤𑀁 𑀏𑀓𑀁 𑀧𑀤𑀁, 𑀲𑀦𑀺𑀧𑀸𑀢𑀁 𑀓𑀺𑀁-𑀲𑀤𑁆𑀤𑀜𑁆𑀘 𑀏𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀦𑀺𑀬𑀫𑁂𑀓𑀢𑁆𑀣𑀤𑀻𑀧𑀦𑀢𑁄 ‘‘𑀧𑀤𑀤𑁆𑀯𑀬𑁂𑀦𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀭𑀽𑀧𑀲𑁆𑀲. 𑀅𑀢𑀻𑀢𑀸𑀤𑀺𑀦𑀸 𑀯𑀺𑀪𑀸𑀕𑀁 𑀆𑀭𑀪𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺𑀆𑀤𑀺𑀦𑀸.

𑁪𑁯𑁪. 𑀅𑀤𑁆𑀥𑀸𑀲𑀦𑁆𑀢𑀢𑀺𑀲𑀫𑀬𑀔𑀡𑀯𑀲𑁂𑀦𑀸𑀢𑀺 𑀏𑀢𑁆𑀣 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀮𑁂 𑀅𑀤𑁆𑀥𑀸-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑁂𑀧𑀺 ‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁭𑁨, 𑁨𑁭𑁫, 𑁨𑁭𑁬, 𑁨𑁭𑁭) 𑀅𑀤𑁆𑀥𑀸𑀯𑀲𑁂𑀦𑁂𑀯 𑀅𑀢𑀻𑀢𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. ‘‘𑀢𑀬𑁄𑀫𑁂, ¶ 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸, 𑀓𑀢𑀫𑁂 𑀢𑀬𑁄? 𑀅𑀢𑀻𑀢𑁄 𑀅𑀤𑁆𑀥𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁩) 𑀧𑀦 𑀧𑀭𑀫𑀢𑁆𑀣𑀢𑁄 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁄 𑀅𑀤𑁆𑀥𑀸 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀯𑀲𑁂𑀦 𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀳𑀺 ‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀚𑀸𑀢𑀁…𑀧𑁂… 𑀧𑀸𑀢𑀼𑀪𑀽𑀢𑀁. 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀲𑀗𑁆𑀔𑀸’’𑀢𑀺 (𑀲𑀁. 𑀦𑀺. 𑁩.𑁬𑁨) 𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸, 𑀢𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀅𑀢𑀻𑀢𑀸𑀦𑀸𑀕𑀢𑀢𑀸 𑀯𑀼𑀢𑁆𑀢𑀸. 𑀢𑀤𑀜𑁆𑀜𑀲𑀼𑀢𑁆𑀢𑁂𑀲𑀼 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀢𑀻𑀢𑀸𑀤𑀺𑀓𑁄 𑀅𑀤𑁆𑀥𑀸 𑀯𑀼𑀢𑁆𑀢𑁄𑀢𑀺 𑀲𑁄 𑀏𑀯 𑀇𑀥𑀸𑀧𑀺 ‘‘𑀅𑀤𑁆𑀥𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑁄.

𑀲𑀻𑀢𑀁 𑀲𑀻𑀢𑀲𑁆𑀲 𑀲𑀪𑀸𑀕𑁄, 𑀢𑀣𑀸 𑀉𑀡𑁆𑀳𑀁 𑀉𑀡𑁆𑀳𑀲𑁆𑀲. 𑀬𑀁 𑀧𑀦 𑀲𑀻𑀢𑀁, 𑀉𑀡𑁆𑀳𑀁 𑀯𑀸 𑀲𑀭𑀻𑀭𑁂 𑀲𑀦𑁆𑀦𑀺𑀧𑀢𑀺𑀢𑀁 ¶ 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀏𑀓𑀸𑀓𑀸𑀭𑀁, 𑀢𑀁 𑀏𑀓𑁄 𑀉𑀢𑀽𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀪𑀸𑀕𑀉𑀢𑀼𑀦𑁄 𑀅𑀦𑁂𑀓𑀢𑁆𑀢𑀸 𑀏𑀓-𑀕𑁆𑀕𑀳𑀡𑀁 𑀓𑀢𑀁, 𑀏𑀯𑀁 𑀆𑀳𑀸𑀭𑁂𑀧𑀺. 𑀏𑀓𑀯𑀻𑀣𑀺𑀏𑀓𑀚𑀯𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀧𑀜𑁆𑀘𑀙𑀝𑁆𑀞𑀤𑁆𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀦𑁆𑀢𑀢𑀺𑀲𑀫𑀬𑀓𑀣𑀸 𑀯𑀺𑀧𑀲𑁆𑀲𑀓𑀸𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 𑀅𑀝𑁆𑀞𑀓𑀣𑀸𑀲𑀼 𑀓𑀣𑀺𑀢𑀸. 𑀚𑀦𑀓𑁄 𑀳𑁂𑀢𑀼, 𑀉𑀧𑀣𑀫𑁆𑀪𑀓𑁄 𑀧𑀘𑁆𑀘𑀬𑁄, 𑀢𑁂𑀲𑀁 𑀉𑀧𑁆𑀧𑀸𑀤𑀦𑀁, 𑀉𑀧𑀢𑁆𑀣𑀫𑁆𑀪𑀦𑀜𑁆𑀘 𑀓𑀺𑀘𑁆𑀘𑀁. 𑀬𑀣𑀸 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀁, 𑀧𑀣𑀯𑀻𑀆𑀤𑀻𑀦𑀜𑁆𑀘 𑀢𑀤𑀼𑀧𑀢𑁆𑀣𑀫𑁆𑀪𑀦𑀁, 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁, 𑀆𑀳𑀸𑀭𑀸𑀤𑀻𑀦𑀁 𑀢𑀤𑀼𑀧𑀢𑁆𑀣𑀫𑁆𑀪𑀦𑀁, 𑀏𑀯𑀁 𑀏𑀓𑁂𑀓𑀲𑁆𑀲 𑀓𑀮𑀸𑀧𑀲𑁆𑀲, 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀚𑀦𑀓𑀸𑀦𑀁 𑀓𑀫𑁆𑀫𑀸𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀽𑀢𑀸𑀦𑀁, 𑀉𑀧𑀢𑁆𑀣𑀫𑁆𑀪𑀓𑀸𑀦𑀜𑁆𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀓𑀺𑀘𑁆𑀘𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀉𑀢𑀼𑀆𑀤𑀻𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀲𑀫𑁆𑀪𑀯𑀢𑁄 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁄 𑀯𑀼𑀢𑁆𑀢𑁄, 𑀓𑀫𑁆𑀫𑀲𑁆𑀲 𑀧𑀦 𑀏𑀓𑀪𑀯𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀦𑀢𑁆𑀣𑀻𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀯𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀬𑀤𑀸 𑀧𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁 𑀳𑁄𑀢𑀺, 𑀢𑀤𑀸 𑀩𑀮𑀯𑀢𑀸 𑀅𑀓𑀼𑀲𑀮𑁂𑀦 𑀧𑀼𑀭𑀺𑀲𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀤𑀼𑀩𑁆𑀩𑀮𑁂𑀦 𑀓𑀼𑀲𑀮𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀺. 𑀤𑀼𑀩𑁆𑀩𑀮𑁂𑀦 𑀘 𑀅𑀓𑀼𑀲𑀮𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀩𑀮𑀯𑀢𑀸 𑀓𑀼𑀲𑀮𑁂𑀦 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀻𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀫𑁆𑀧𑀺 𑀅𑀢𑁆𑀣𑁂𑀯 𑀯𑀺𑀲𑀪𑀸𑀕𑀢𑀸𑀢𑀺 𑀢𑁂𑀲𑀫𑁆𑀧𑀺 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁄 𑀲𑀫𑁆𑀪𑀯𑀢𑀺, 𑀲𑁄 𑀧𑀦 𑀦 𑀲𑀩𑁆𑀩𑀓𑀸𑀮𑀺𑀓𑁄𑀢𑀺 𑀦 𑀕𑀳𑀺𑀢𑁄.

𑀢𑀁𑀢𑀁𑀲𑀫𑀬𑀦𑁆𑀢𑀺 𑀏𑀓𑀫𑀼𑀳𑀼𑀢𑁆𑀢𑀸𑀤𑀺𑀓𑁄 𑀲𑁄 𑀲𑁄 𑀲𑀫𑀬𑁄 𑀏𑀢𑀲𑁆𑀲𑀸𑀢𑀺 𑀢𑀁𑀢𑀁𑀲𑀫𑀬𑀁, 𑀭𑀽𑀧𑀁, 𑀢𑀁𑀢𑀁𑀲𑀫𑀬𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄 ¶ 𑀧𑀼𑀩𑁆𑀩𑁂𑀢𑀺 𑀢𑀢𑁄 𑀔𑀡𑀢𑁆𑀢𑀬𑀲𑁆𑀲 𑀧𑀭𑀺𑀬𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂. 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀸𑀕𑀢𑀁. 𑀧𑀘𑁆𑀙𑀸𑀢𑀺 𑀢𑀢𑁄 𑀧𑀘𑁆𑀙𑀸. 𑀔𑀡𑀢𑁆𑀢𑀬𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑀻𑀢𑀁. 𑀬𑀲𑁆𑀲 𑀳𑁂𑀢𑀼𑀓𑀺𑀘𑁆𑀘𑀁, 𑀧𑀘𑁆𑀘𑀬𑀓𑀺𑀘𑁆𑀘𑀜𑁆𑀘 𑀦𑀺𑀝𑁆𑀞𑀺𑀢𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀁, 𑀢𑀁 𑀅𑀢𑀻𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀳𑁂𑀢𑀼𑀓𑀺𑀘𑁆𑀘𑀁, 𑀉𑀧𑁆𑀧𑀦𑁆𑀦𑀨𑀮𑀢𑁆𑀢𑀸 𑀦𑀺𑀝𑁆𑀞𑀺𑀢𑀜𑁆𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀧𑀘𑁆𑀘𑀬𑀓𑀺𑀘𑁆𑀘𑀁. 𑀧𑀣𑀯𑀻𑀆𑀤𑀻𑀦𑀁 𑀲𑀦𑁆𑀥𑀸𑀭𑀡𑀸𑀤𑀺𑀓𑀁, 𑀨𑀲𑁆𑀲𑀸𑀤𑀻𑀦𑀁 𑀨𑀼𑀲𑀦𑀸𑀤𑀺𑀓𑀜𑁆𑀘 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀲𑀓𑀺𑀘𑁆𑀘𑀁, 𑀲𑀓𑀺𑀘𑁆𑀘𑀲𑁆𑀲 𑀓𑀭𑀡𑀓𑁆𑀔𑀡𑁄 𑀲𑀓𑀺𑀘𑁆𑀘𑀓𑁆𑀔𑀡𑁄, 𑀲𑀳 𑀯𑀸 𑀓𑀺𑀘𑁆𑀘𑁂𑀦 𑀲𑀓𑀺𑀘𑁆𑀘𑀁, 𑀬𑀲𑁆𑀫𑀺𑀁 𑀔𑀡𑁂 𑀲𑀓𑀺𑀘𑁆𑀘𑀁 𑀭𑀽𑀧𑀁 𑀯𑀸 𑀅𑀭𑀽𑀧𑀁 𑀯𑀸 𑀳𑁄𑀢𑀺, 𑀲𑁄 𑀲𑀓𑀺𑀘𑁆𑀘𑀓𑁆𑀔𑀡𑁄, 𑀢𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀏𑀢𑁆𑀣 𑀘 𑀔𑀡𑀸𑀤𑀺𑀓𑀣𑀸𑀬𑀁 ‘‘𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁, 𑀧𑀘𑁆𑀙𑀸 𑀅𑀢𑀻𑀢’’𑀦𑁆𑀢𑀺 𑀯𑀘𑀦𑀁 𑀅𑀤𑁆𑀥𑀸𑀤𑀻𑀲𑀼 𑀯𑀺𑀬 𑀪𑁂𑀤𑀸𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀁. 𑀅𑀤𑁆𑀥𑀸𑀤𑀺𑀯𑀲𑁂𑀦 𑀳𑀺 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀅𑀢𑀻𑀢𑀸 𑀅𑀜𑁆𑀜𑁂 𑀅𑀦𑀸𑀕𑀢𑀸 𑀅𑀜𑁆𑀜𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀮𑀩𑁆𑀪𑀦𑁆𑀢𑀺, 𑀔𑀡𑀸𑀤𑀺𑀯𑀲𑁂𑀦 𑀧𑀦 𑀦𑀢𑁆𑀣𑀺 𑀥𑀫𑁆𑀫𑀢𑁄 𑀪𑁂𑀤𑁄, 𑀓𑀸𑀮𑀢𑁄 𑀏𑀯 𑀪𑁂𑀤𑁄. 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄 ¶ , 𑀔𑀡𑀢𑁆𑀢𑀬𑁂 𑀯𑀢𑁆𑀢𑀫𑀸𑀦𑁄, 𑀢𑀢𑁄 𑀧𑀭𑀁 𑀅𑀢𑀻𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀸, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺 𑀯𑀺𑀬 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀢𑀻𑀢𑀫𑀦𑀸𑀕𑀢𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀢𑀸𑀪𑀸𑀯𑀢𑁄.

𑁪𑁯𑁫. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀁 𑀲𑀦𑁆𑀥𑀸𑀬 ‘‘𑀯𑀼𑀢𑁆𑀢𑀦𑀬𑁄 𑀏𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀅𑀧𑀭𑀺𑀢𑀼𑀲𑁆𑀲𑀫𑀸𑀦𑁂𑀦 𑀬𑀤𑀺𑀧𑀺 𑀢𑀢𑁆𑀣 𑀅𑀚𑁆𑀛𑀢𑁆𑀢𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀲𑀤𑁆𑀤𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀅𑀢𑁆𑀣𑁂𑀯 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑀸𑀦𑀁, 𑀩𑀳𑀺𑀤𑁆𑀥𑀸𑀩𑀸𑀳𑀺𑀭𑀲𑀤𑁆𑀤𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀪𑁂𑀤𑁄. 𑀢𑀣𑀸 𑀳𑀺 𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑁄 𑀲𑀧𑀭𑀲𑀦𑁆𑀢𑀸𑀦𑀺𑀓𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀩𑀸𑀳𑀺𑀭𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀺, 𑀅𑀚𑁆𑀛𑀢𑁆𑀢𑀲𑀤𑁆𑀤𑁄 𑀧𑀦 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀲𑀦𑁆𑀢𑀸𑀦𑀺𑀓𑁂𑀲𑁆𑀯𑁂𑀯 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀢𑀢𑁄 𑀅𑀜𑁆𑀜𑁂𑀲𑀼 𑀩𑀳𑀺𑀤𑁆𑀥𑀸𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑀦𑀬𑁂. 𑀦𑀺𑀬𑀓𑀚𑁆𑀛𑀢𑁆𑀢𑀫𑁆𑀧𑀺 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀚𑁆𑀛𑀢𑁆𑀢𑀺𑀓𑀫𑁂𑀯, 𑀧𑀭𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀩𑀸𑀳𑀺𑀭𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁯𑁬. 𑀳𑀻𑀦𑀧𑀡𑀻𑀢𑀪𑁂𑀤𑁄 𑀧𑀭𑀺𑀬𑀸𑀬𑀢𑁄, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑁂𑀯 𑀲𑀼𑀤𑀲𑁆𑀲𑀻𑀦𑀁 𑀭𑀽𑀧𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑀪𑀽𑀢𑁂. 𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀳𑀻𑀦𑀁 𑀅𑀦𑀺𑀝𑁆𑀞𑀪𑀸𑀯𑀢𑁄. 𑀬𑀁 𑀓𑀼𑀲𑀮𑀯𑀺𑀧𑀸𑀓𑀁, 𑀢𑀁 𑀧𑀡𑀻𑀢𑀁 𑀇𑀝𑁆𑀞𑀪𑀸𑀯𑀢𑁄. 𑀬𑀣𑀸 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑁄 𑀲𑀬𑀁 𑀅𑀦𑀺𑀝𑁆𑀞𑁄 𑀅𑀦𑀺𑀝𑁆𑀞𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀇𑀝𑁆𑀞𑁂, 𑀏𑀯𑀁 𑀓𑀼𑀲𑀮𑀯𑀺𑀧𑀸𑀓𑁄𑀧𑀺 𑀲𑀬𑀁 𑀇𑀝𑁆𑀞𑁄 𑀇𑀝𑁆𑀞𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀦𑀺𑀝𑁆𑀞𑁂. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀅𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦 ¶ 𑀅𑀦𑀺𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀺𑀪𑀢𑁆𑀢𑀸, 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀇𑀝𑁆𑀞𑀫𑁂𑀯. 𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦 𑀇𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀺𑀪𑀢𑁆𑀢𑀸. 𑀓𑀼𑀲𑀮𑀓𑀫𑁆𑀫𑀚𑀜𑁆𑀳𑀺 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀇𑀝𑁆𑀞𑀫𑁂𑀯𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁬) 𑀘.

𑀢𑀢𑁆𑀣 𑀫𑀦𑀸𑀧𑀸𑀦𑀺𑀧𑀺 𑀓𑀸𑀦𑀺𑀘𑀺 𑀳𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀅𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑀦𑁆𑀢𑀺, 𑀦 𑀧𑀦 𑀢𑀸𑀦𑀺 𑀢𑁂𑀲𑀁𑀬𑁂𑀯 𑀳𑀢𑁆𑀣𑀺𑀆𑀤𑀻𑀦𑀁 𑀲𑀼𑀔𑀲𑁆𑀲 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲 𑀢𑀲𑁆𑀲𑁂𑀯 𑀳𑀺 𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑀸 𑀓𑀢𑁂𑀦 𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀼𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀼𑀓𑁆𑀔𑀲𑁆𑀲. 𑀢𑀲𑁆𑀫𑀸 𑀓𑀫𑁆𑀫𑀚𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀓𑀫𑁆𑀫𑀓𑀸𑀭𑀓𑀲𑀢𑁆𑀢𑀲𑁆𑀲 𑀯𑀲𑁂𑀦 𑀬𑁄𑀚𑀦𑀸𑀭𑀳𑀸 𑀲𑀺𑀬𑀸. 𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀓𑀼𑀲𑀮𑀓𑀫𑁆𑀫𑀚𑀁 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺, 𑀦 𑀘 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑀓𑀫𑁆𑀫𑀚𑀁 𑀇𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺, 𑀢𑁂𑀦 ¶ 𑀅𑀓𑀼𑀲𑀮𑀓𑀫𑁆𑀫𑀚𑀫𑁆𑀧𑀺 𑀲𑁄𑀪𑀦𑀁 𑀧𑀭𑀲𑀢𑁆𑀢𑀸𑀦𑀁 𑀇𑀝𑁆𑀞𑀁 𑀅𑀢𑁆𑀣𑀻𑀢𑀺 𑀅𑀦𑀼𑀜𑁆𑀜𑀸𑀢𑀁 𑀪𑀯𑀺𑀲𑁆𑀲𑀢𑀺, 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀲𑀩𑁆𑀩𑁂𑀲𑀁 𑀇𑀝𑁆𑀞𑀫𑁂𑀯𑀸𑀢𑀺.

𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀦 𑀓𑁂𑀲𑀜𑁆𑀘𑀺 𑀫𑀦𑀼𑀲𑁆𑀲𑀭𑀽𑀧𑀁 𑀅𑀫𑀦𑀸𑀧𑀁, 𑀬𑀢𑁄 𑀢𑁂 𑀤𑀺𑀲𑁆𑀯𑀸𑀯 𑀧𑀮𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀢𑀸𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸 𑀪𑀸𑀬𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀢𑀁 𑀭𑀽𑀧𑀁 𑀆𑀭𑀩𑁆𑀪 𑀓𑀼𑀲𑀮𑀯𑀺𑀧𑀸𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀲𑁆𑀲 𑀧𑀦 𑀧𑀼𑀜𑁆𑀜𑀲𑁆𑀲 𑀅𑀪𑀸𑀯𑀸 𑀦 𑀢𑁂𑀲𑀁 𑀢𑀢𑁆𑀣 𑀅𑀪𑀺𑀭𑀢𑀺 𑀳𑁄𑀢𑀺. 𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀧𑀦 𑀅𑀦𑀺𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀺𑀬 𑀅𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀘 𑀇𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀳𑀢𑁆𑀣𑀺𑀆𑀤𑀻𑀦𑀫𑁆𑀧𑀺 𑀳𑀺 𑀅𑀓𑀼𑀲𑀮𑀓𑀫𑁆𑀫𑀚𑀁 𑀫𑀦𑀼𑀲𑁆𑀲𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀁, 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀺𑀢𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲. 𑀇𑀝𑁆𑀞𑀸𑀭𑀫𑁆𑀫𑀡𑁂𑀦 𑀧𑀦 𑀯𑁄𑀫𑀺𑀲𑁆𑀲𑀓𑀢𑁆𑀢𑀸 𑀅𑀧𑁆𑀧𑀓𑀁 𑀅𑀓𑀼𑀲𑀮𑀓𑀫𑁆𑀫𑀚𑀁 𑀩𑀳𑀼𑀮𑀁 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀯𑀺𑀧𑀸𑀓𑀁 𑀧𑀦 𑀦 𑀲𑀓𑁆𑀓𑀸 𑀯𑀜𑁆𑀘𑁂𑀢𑀼𑀦𑁆𑀢𑀺 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀦𑀺𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺, 𑀢𑀁 𑀭𑀽𑀧𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑀢𑁄 𑀓𑀸𑀫𑀕𑀼𑀡𑀲𑀤𑀺𑀲𑀢𑀸𑀬 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀇𑀝𑁆𑀞𑀸𑀦𑁂𑀯 𑀳𑀺 𑀭𑀽𑀧𑀸𑀤𑀻𑀦𑀺 ‘‘𑀓𑀸𑀫𑀕𑀼𑀡𑀸’’𑀢𑀺 𑀧𑀸𑀴𑀺𑀬𑀁 (𑀫. 𑀦𑀺. 𑁧.𑁧𑁬𑁪-𑁧𑁬𑁫, 𑁧𑁭𑁭-𑁧𑁭𑁮, 𑁨𑁮𑁭; 𑁨.𑁧𑁫𑁫, 𑁨𑁮𑁦; 𑁩.𑁫𑁭, 𑁧𑁯𑁦; 𑀲𑀁. 𑀦𑀺. 𑁫.𑁩𑁦) 𑀯𑀼𑀢𑁆𑀢𑀸𑀦𑀺. 𑀓𑀸𑀫𑀕𑀼𑀡𑀯𑀺𑀲𑀪𑀸𑀕𑀸 𑀯𑀸 𑀭𑀽𑀧𑀸𑀤𑀬𑁄 ‘‘𑀓𑀸𑀫𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀸 𑀅𑀲𑀺𑀯𑁂 𑀲𑀺𑀯𑁄𑀢𑀺 𑀯𑁄𑀳𑀸𑀭𑁄 𑀯𑀺𑀬, 𑀲𑀩𑁆𑀩𑀸𑀦𑀺 𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀺 𑀭𑀽𑀧𑀸𑀤𑀻𑀦𑀺 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀢𑁄 𑀓𑀸𑀫𑀕𑀼𑀡𑀸 𑀏𑀯. 𑀯𑀼𑀢𑁆𑀢𑀜𑁆𑀳𑀺 ‘‘𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩). 𑀅𑀢𑀺𑀲𑀬𑁂𑀦 𑀧𑀦 𑀓𑀫𑀦𑀻𑀬𑀢𑁆𑀢𑀸 𑀲𑀼𑀢𑁆𑀢𑁂𑀲𑀼 𑀓𑀸𑀫𑀕𑀼𑀡𑀸𑀢𑀺 𑀇𑀝𑁆𑀞𑀭𑀽𑀧𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺.

𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 ¶ 𑀅𑀪𑀺𑀤𑁂𑀲𑁂𑀦 𑀮𑀓𑁆𑀔𑀡𑀢𑁄 𑀤𑀽𑀭𑀲𑀦𑁆𑀢𑀺𑀓𑀁 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀑𑀓𑀸𑀲𑀢𑁄𑀧𑁂𑀢𑁆𑀣 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀓𑀺𑀢𑁆𑀢𑀓𑀢𑁄 𑀧𑀝𑁆𑀞𑀸𑀬 𑀭𑀽𑀧𑀁 𑀑𑀓𑀸𑀲𑀯𑀲𑁂𑀦 𑀲𑀦𑁆𑀢𑀺𑀓𑁂 𑀦𑀸𑀫, 𑀓𑀺𑀢𑁆𑀢𑀓𑀢𑁄 𑀧𑀦 𑀧𑀝𑁆𑀞𑀸𑀬 𑀤𑀽𑀭𑁂 𑀦𑀸𑀫? 𑀧𑀓𑀢𑀺𑀓𑀣𑀸𑀬 𑀓𑀣𑁂𑀦𑁆𑀢𑀸𑀦𑀁 𑀤𑁆𑀯𑀸𑀤𑀲 𑀳𑀢𑁆𑀣𑀸 𑀲𑀯𑀦𑀽𑀧𑀘𑀸𑀭𑁄 𑀦𑀸𑀫, 𑀢𑀲𑁆𑀲 𑀑𑀭𑀢𑁄 𑀲𑀦𑁆𑀢𑀺𑀓𑁂, 𑀧𑀭𑀢𑁄 𑀤𑀽𑀭𑁂. 𑀢𑀢𑁆𑀣 𑀲𑀼𑀔𑀼𑀫𑀭𑀽𑀧𑀁 𑀤𑀽𑀭𑁂 𑀳𑁄𑀦𑁆𑀢𑀁 𑀮𑀓𑁆𑀔𑀡𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀤𑀽𑀭𑁂 𑀳𑁄𑀢𑀺, 𑀲𑀦𑁆𑀢𑀺𑀓𑁂 𑀳𑁄𑀦𑁆𑀢𑀁 𑀧𑀦 𑀑𑀓𑀸𑀲𑀢𑁄𑀯 𑀲𑀦𑁆𑀢𑀺𑀓𑁂 𑀳𑁄𑀢𑀺, 𑀦 𑀮𑀓𑁆𑀔𑀡𑀢𑁄. 𑀑𑀴𑀸𑀭𑀺𑀓𑀭𑀽𑀧𑀁 𑀲𑀦𑁆𑀢𑀺𑀓𑁂 𑀳𑁄𑀦𑁆𑀢𑀁 𑀮𑀓𑁆𑀔𑀡𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀲𑀦𑁆𑀢𑀺𑀓𑁂 𑀳𑁄𑀢𑀺, 𑀤𑀽𑀭𑁂 𑀳𑁄𑀦𑁆𑀢𑀁 𑀑𑀓𑀸𑀲𑀢𑁄𑀯 𑀳𑁄𑀢𑀺, 𑀦 𑀮𑀓𑁆𑀔𑀡𑀢𑁄. ‘‘𑀉𑀧𑀸𑀤𑀸𑀬𑀼𑀧𑀸𑀤𑀸𑀬𑀸’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀭𑀽𑀧𑀁 𑀲𑀦𑁆𑀢𑀺𑀓𑁂 𑀦𑀸𑀫, 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀧𑀺 𑀧𑀭𑀲𑁆𑀲 𑀤𑀽𑀭𑁂. 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀲𑁆𑀲 𑀲𑀦𑁆𑀢𑀺𑀓𑁂, 𑀩𑀳𑀺 𑀞𑀺𑀢𑀲𑁆𑀲 𑀤𑀽𑀭𑁂𑀢𑀺 ¶ 𑀏𑀯𑀁 𑀅𑀦𑁆𑀢𑁄𑀕𑀩𑁆𑀪𑀧𑀫𑀼𑀔𑀧𑀭𑀺𑀯𑁂𑀡𑀲𑀗𑁆𑀖𑀸𑀭𑀸𑀫𑀲𑀻𑀫𑀸𑀕𑀸𑀫𑀔𑁂𑀢𑁆𑀢𑀚𑀦𑀧𑀤𑀭𑀚𑁆𑀚𑀲𑀫𑀼𑀤𑁆𑀤𑀘𑀓𑁆𑀓𑀯𑀸𑀴𑁂𑀲𑀼 𑀢𑀤𑀦𑁆𑀢𑁄𑀕𑀢𑀩𑀳𑀺𑀕𑀢𑀸𑀦𑀁 𑀯𑀲𑁂𑀦 𑀤𑀽𑀭𑀲𑀦𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁯𑁭. 𑀢𑀤𑁂𑀓𑀚𑁆𑀛𑀦𑁆𑀢𑀺 𑀢𑀁 𑀏𑀓𑀚𑁆𑀛𑀁 𑀏𑀓𑀢𑁄. 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸𑀢𑀺 𑀲𑀁𑀳𑀭𑀺𑀢𑁆𑀯𑀸, 𑀲𑀫𑀽𑀳𑀁 𑀯𑀸 𑀓𑀢𑁆𑀯𑀸. 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀔𑁂𑀧𑀁 𑀓𑀢𑁆𑀯𑀸. ‘‘𑀲𑀩𑁆𑀩𑀫𑁆𑀧𑀺 𑀭𑀽𑀧𑀁…𑀧𑁂… 𑀤𑀲𑁆𑀲𑀺𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀭𑀽𑀧𑀔𑀦𑁆𑀥𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀭𑀽𑀧𑀢𑁄 𑀅𑀜𑁆𑀜𑁄 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫 𑀅𑀢𑁆𑀣𑀻’’𑀢𑀺.

𑁪𑁯𑁮. 𑀭𑀸𑀲𑀺𑀪𑀸𑀯𑀽𑀧𑀕𑀫𑀦𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀢𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀲𑀦𑁆𑀢𑀢𑀺𑀯𑀲𑁂𑀦, 𑀔𑀡𑀸𑀤𑀺𑀯𑀲𑁂𑀦 𑀘𑀸𑀢𑀺 𑀏𑀢𑁆𑀣 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀲𑁆𑀲 𑀅𑀯𑀘𑀦𑀁 𑀲𑀼𑀔𑀸𑀤𑀺𑀯𑀲𑁂𑀦 𑀪𑀺𑀦𑁆𑀦𑀸𑀬 𑀅𑀢𑀻𑀢𑀸𑀤𑀺𑀪𑀸𑀯𑀯𑀘𑀦𑀢𑁄. 𑀦 𑀳𑀺 𑀲𑀼𑀔𑀸 𑀏𑀯 𑀅𑀤𑁆𑀥𑀸𑀯𑀲𑁂𑀦, 𑀲𑀫𑀬𑀯𑀲𑁂𑀦 𑀘 𑀅𑀢𑀻𑀢𑀸𑀤𑀺𑀓𑀸 𑀳𑁄𑀢𑀺, 𑀢𑀣𑀸 𑀤𑀼𑀓𑁆𑀔𑀸 𑀏𑀯, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀏𑀯 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀤𑀺𑀪𑀸𑀯𑁂𑀦 𑀪𑀺𑀦𑁆𑀦𑀸, 𑀢𑁂𑀦 𑀯𑁂𑀤𑀦𑀸𑀲𑀫𑀼𑀤𑀸𑀬𑁄 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀲𑀫𑀼𑀤𑀸𑀬𑀲𑁆𑀲 𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸, 𑀯𑁂𑀤𑀦𑁂𑀓𑀤𑁂𑀲𑀸 𑀧𑀦 𑀕𑀬𑁆𑀳𑀫𑀸𑀦𑀸 𑀲𑀦𑁆𑀢𑀢𑀺𑀔𑀡𑁂𑀳𑀺 𑀧𑀭𑀺𑀘𑁆𑀙𑁂𑀤𑀁 𑀅𑀭𑀳𑀦𑁆𑀢𑀺 𑀢𑀣𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀏𑀓𑀲𑀦𑁆𑀢𑀢𑀺𑀬𑀁 𑀧𑀦 𑀲𑀼𑀔𑀸𑀤𑀻𑀲𑀼 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂𑀲𑀼 𑀬𑁄 𑀪𑁂𑀤𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀲𑁆𑀲 𑀏𑀓𑀧𑁆𑀧𑀓𑀸𑀭𑀲𑁆𑀲 ¶ 𑀧𑀸𑀓𑀝𑀲𑁆𑀲 𑀧𑀭𑀺𑀘𑁆𑀙𑁂𑀤𑀺𑀓𑀸 𑀢𑀁𑀲𑀳𑀺𑀢𑀤𑁆𑀯𑀸𑀭𑀸𑀮𑀫𑁆𑀩𑀦𑀧𑁆𑀧𑀯𑀢𑁆𑀢𑀸, 𑀅𑀯𑀺𑀘𑁆𑀙𑁂𑀤𑁂𑀦 𑀢𑀤𑀼𑀧𑁆𑀧𑀸𑀤𑀓𑁂𑀓𑀯𑀺𑀥𑀯𑀺𑀲𑀬𑀲𑀫𑀸𑀬𑁄𑀕𑀧𑁆𑀧𑀯𑀢𑁆𑀢𑀸 𑀘 𑀲𑀦𑁆𑀢𑀢𑀺 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀢𑀲𑁆𑀲𑀸 𑀪𑁂𑀤𑀦𑁆𑀢𑀭𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀪𑀸𑀯𑁂𑀦 𑀕𑀳𑀡𑀁 𑀓𑀢𑀁, 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄 𑀯𑀸 𑀅𑀭𑀽𑀧𑀥𑀫𑁆𑀫𑀸 𑀧𑀭𑀺𑀯𑀢𑁆𑀢𑀦𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀅𑀭𑀳𑀦𑁆𑀢𑀻𑀢𑀺 𑀲𑀦𑁆𑀢𑀢𑀺𑀔𑀡𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀏𑀓𑀯𑀺𑀥𑀯𑀺𑀲𑀬𑀲𑀫𑀸𑀬𑁄𑀕𑀧𑁆𑀧𑀯𑀢𑁆𑀢𑀸 𑀤𑀺𑀯𑀲𑀫𑁆𑀧𑀺 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑀲𑁆𑀲, 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀯𑀢𑁆𑀢𑀲𑀤𑁆𑀥𑀸𑀤𑀺𑀲𑀳𑀺𑀢𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀢𑁆𑀢𑀕𑀢𑀸’’𑀢𑀺 𑀏𑀢𑁂𑀦 𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀺.

𑁪𑁯𑁯. 𑀲𑀩𑁆𑀬𑀸𑀧𑀸𑀭𑀲𑀉𑀲𑁆𑀲𑀸𑀳𑀲𑀯𑀺𑀧𑀸𑀓𑀢𑀸 𑀓𑀼𑀲𑀮𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀸𑀥𑀸𑀭𑀡𑀸𑀢𑀺 𑀅𑀲𑀸𑀥𑀸𑀭𑀡𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀚𑁆𑀚𑀓𑀺𑀭𑀺𑀬𑀳𑁂𑀢𑀼𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀯𑀚𑁆𑀚𑀓𑀺𑀭𑀺𑀬𑀳𑁂𑀢𑀼𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀕𑀸𑀭𑀬𑁆𑀳𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀢𑁄. 𑀓𑀺𑀮𑁂𑀲𑀲𑀦𑁆𑀢𑀸𑀧𑀪𑀸𑀯𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁂𑀦 𑀲𑀤𑀭𑀣𑀪𑀸𑀯𑀢𑁄 ¶ . 𑀯𑀽𑀧𑀲𑀦𑁆𑀢𑀲𑀪𑀸𑀯𑀸𑀬 𑀓𑀼𑀲𑀮𑀸𑀬 𑀯𑁂𑀤𑀦𑀸𑀬 𑀑𑀴𑀸𑀭𑀺𑀓𑀸. 𑀲𑀩𑁆𑀬𑀸𑀧𑀸𑀭𑀢𑁄𑀢𑀺 𑀲𑀈𑀳𑀢𑁄. 𑀢𑁂𑀦 𑀬𑀣𑀸 𑀧𑀯𑀢𑁆𑀢𑀫𑀸𑀦𑀸𑀬𑀲𑁆𑀲𑀸 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀧𑀯𑀢𑁆𑀢𑀺𑀁 𑀯𑀤𑀦𑁆𑀢𑁄 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀬𑁄𑀕𑁆𑀬𑀢𑀫𑀸𑀳. 𑀲𑀉𑀲𑁆𑀲𑀸𑀳𑀢𑁄𑀢𑀺 𑀲𑀲𑀢𑁆𑀢𑀺𑀢𑁄, 𑀢𑁂𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀁. 𑀲𑀯𑀺𑀧𑀸𑀓𑀢𑁄𑀢𑀺 𑀯𑀺𑀧𑀸𑀓𑀲𑀩𑁆𑀪𑀸𑀯𑀢𑁄, 𑀢𑁂𑀦 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑀲𑁆𑀲𑀸 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀁. 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀯𑀺𑀧𑀸𑀓𑀥𑀫𑁆𑀫𑀢𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀓𑀸𑀬𑀓𑀫𑁆𑀫𑀸𑀤𑀺𑀩𑁆𑀬𑀸𑀧𑀸𑀭𑀲𑀩𑁆𑀪𑀸𑀯𑀢𑁄 𑀯𑀸 𑀲𑀩𑁆𑀬𑀸𑀧𑀸𑀭𑀢𑁄, 𑀚𑀯𑀦𑀼𑀲𑁆𑀲𑀸𑀳𑀯𑀲𑁂𑀦 𑀲𑀉𑀲𑁆𑀲𑀸𑀳𑀢𑁄, 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀯𑀺𑀧𑀸𑀓𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀻𑀧𑀺 𑀓𑀺𑀭𑀺𑀬𑀸 𑀓𑀼𑀲𑀮𑀸 𑀯𑀺𑀬 𑀲𑀩𑁆𑀬𑀸𑀧𑀸𑀭𑀸, 𑀲𑀉𑀲𑁆𑀲𑀸𑀳𑀸 𑀏𑀯 𑀘 𑀳𑁄𑀢𑀻𑀢𑀺 𑀢𑀤𑀼𑀪𑀬𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀯𑀸𑀭𑁂 ‘‘𑀲𑀯𑀺𑀧𑀸𑀓𑀢𑁄’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑀩𑁆𑀬𑀸𑀩𑀚𑁆𑀛𑀢𑁄𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑀢𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄𑀢𑀺 𑀅𑀦𑀯𑀚𑁆𑀚𑀓𑀺𑀭𑀺𑀬𑀳𑁂𑀢𑀼𑀢𑁄, 𑀓𑀺𑀮𑁂𑀲𑀲𑀦𑁆𑀢𑀸𑀧𑀸𑀪𑀸𑀯𑀢𑁄, 𑀅𑀩𑁆𑀬𑀸𑀩𑀚𑁆𑀛𑀢𑁄 𑀘 𑀯𑀽𑀧𑀲𑀦𑁆𑀢𑀯𑀼𑀢𑁆𑀢𑀻𑀢𑀺 𑀏𑀯𑀁 𑀅𑀓𑀼𑀲𑀮𑀸𑀬 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀢𑁄. 𑀬𑀣𑀸𑀬𑁄𑀕𑀦𑁆𑀢𑀺 𑀬𑁄𑀕𑀸𑀦𑀼𑀭𑀽𑀧𑀁. 𑀢𑀻𑀲𑀼 𑀓𑀸𑀭𑀡𑁂𑀲𑀼 𑀬𑀁 𑀬𑀁 𑀬𑀲𑁆𑀲𑀸 𑀬𑀲𑁆𑀲𑀸 𑀬𑀼𑀚𑁆𑀚𑀢𑀺, 𑀢𑀤𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀓𑀼𑀲𑀮𑀯𑁂𑀤𑀦𑀸𑀳𑀺 𑀯𑀺𑀧𑀸𑀓𑀩𑁆𑀬𑀸𑀓𑀢𑀸𑀬 𑀢𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀑𑀴𑀸𑀭𑀺𑀓𑀸. 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀬 𑀲𑀯𑀺𑀧𑀸𑀓𑀢𑁄 𑀲𑀯𑀺𑀧𑀸𑀓𑀢𑀸𑀯𑀺𑀲𑀺𑀝𑁆𑀞𑀲𑀩𑁆𑀬𑀸𑀧𑀸𑀭𑀲𑀉𑀲𑁆𑀲𑀸𑀳𑀢𑁄 𑀯𑀸𑀢𑀺. 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀺𑀧𑀸𑀓𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀧𑀸𑀭𑀢𑁄 ¶ , 𑀅𑀦𑀼𑀲𑁆𑀲𑀸𑀳𑀢𑁄, 𑀅𑀯𑀺𑀧𑀸𑀓𑀢𑁄 𑀘 𑀢𑀸𑀳𑀺 𑀓𑀼𑀲𑀮𑀸𑀓𑀼𑀲𑀮𑀯𑁂𑀤𑀦𑀸𑀳𑀺 𑀲𑀼𑀔𑀼𑀫𑀸. 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀅𑀯𑀺𑀧𑀸𑀓𑀢𑁄, 𑀅𑀯𑀺𑀧𑀸𑀓𑀢𑀸𑀯𑀺𑀲𑀺𑀝𑁆𑀞𑀲𑀩𑁆𑀬𑀸𑀧𑀸𑀭𑀲𑀉𑀲𑁆𑀲𑀸𑀳𑀢𑁄 𑀯𑀸𑀢𑀺 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸𑀬 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦. 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀸 𑀳𑀺 𑀓𑀫𑁆𑀫𑀧𑀝𑀺𑀩𑀺𑀫𑁆𑀩𑀪𑀽𑀢𑀸 𑀘 𑀓𑀸𑀬𑀓𑀫𑁆𑀫𑀸𑀤𑀺𑀩𑁆𑀬𑀸𑀧𑀸𑀭𑀯𑀺𑀭𑀳𑀢𑁄 𑀦𑀺𑀭𑀼𑀲𑁆𑀲𑀸𑀳𑀸 𑀯𑀺𑀧𑀸𑀓𑀸. 𑀲𑀉𑀲𑁆𑀲𑀸𑀳𑀸 𑀘 𑀓𑀺𑀭𑀺𑀬𑀸 𑀅𑀯𑀺𑀧𑀸𑀓𑀥𑀫𑁆𑀫𑀸. 𑀲𑀯𑀺𑀧𑀸𑀓𑀥𑀫𑁆𑀫𑀸 𑀳𑀺 𑀲𑀕𑀩𑁆𑀪𑀸 𑀯𑀺𑀬 𑀑𑀴𑀸𑀭𑀺𑀓𑀸𑀢𑀺.

𑁫𑁦𑁦. 𑀦𑀺𑀭𑀲𑁆𑀲𑀸𑀤𑀢𑁄𑀢𑀺 𑀅𑀲𑁆𑀲𑀸𑀤𑀸𑀪𑀸𑀯𑀢𑁄 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄. 𑀲𑀯𑀺𑀧𑁆𑀨𑀸𑀭𑀢𑁄𑀢𑀺 𑀲𑀧𑀭𑀺𑀧𑁆𑀨𑀦𑁆𑀤𑀢𑁄, 𑀅𑀦𑀼𑀧𑀲𑀦𑁆𑀢𑀢𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀯𑀦𑀢𑁄𑀢𑀺 𑀅𑀚𑁆𑀛𑁄𑀢𑁆𑀣𑀭𑀡𑀢𑁄. 𑀲𑀼𑀔𑀸𑀬 𑀫𑀚𑁆𑀛𑀢𑁆𑀢𑀢𑀸 𑀦𑀢𑁆𑀣𑀺, 𑀉𑀧𑁂𑀓𑁆𑀔𑀸𑀬 𑀲𑀸𑀢𑀢𑀸. 𑀲𑀦𑁆𑀢𑀢𑀸𑀤𑀬𑁄 𑀧𑀦 𑀲𑀩𑁆𑀩𑀢𑁆𑀣 𑀲𑀼𑀔𑀼𑀧𑁂𑀓𑁆𑀔𑀸𑀲𑀼 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀬𑀣𑀸𑀬𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀸𑀓𑀝𑀢𑁄𑀢𑀺 𑀲𑀼𑀔𑀺𑀢𑁄 𑀤𑀼𑀓𑁆𑀔𑀺𑀢𑁄𑀢𑀺 𑀤𑀺𑀲𑁆𑀯𑀸𑀧𑀺 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀯𑀺𑀪𑀽𑀢𑀪𑀸𑀯𑀢𑁄. 𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸.

𑁫𑁦𑁧. 𑀅𑀲𑀫𑀸𑀧𑀦𑁆𑀦𑀲𑀫𑀸𑀧𑀦𑁆𑀦-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀪𑀽𑀫𑀺𑀯𑀲𑁂𑀦𑀸𑀧𑀺 𑀯𑁂𑀤𑀦𑀸𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀭𑀸 𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸.

𑀑𑀖𑀦𑀺𑀬𑀢𑁄𑀢𑀺 ¶ 𑀑𑀖𑁂𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄. 𑀢𑀣𑀸 𑀬𑁄𑀕𑀦𑀺𑀬𑀢𑁄, 𑀕𑀦𑁆𑀣𑀦𑀺𑀬𑀢𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀕𑀦𑁆𑀣𑁄𑀯 𑀕𑀦𑁆𑀣𑀦𑀁, 𑀢𑀲𑁆𑀲 𑀳𑀺𑀢𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀦𑀢𑁄𑀢𑀺 𑀕𑀦𑁆𑀣𑀦𑀺𑀬𑀁. 𑀏𑀯𑀁 𑀦𑀻𑀯𑀭𑀡𑀺𑀬𑀁, 𑀉𑀧𑀸𑀤𑀸𑀦𑀺𑀬𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀓𑀺𑀮𑁂𑀲𑁂 𑀦𑀺𑀬𑀼𑀢𑁆𑀢𑀸, 𑀲𑀁𑀓𑀺𑀮𑁂𑀲𑀁 𑀯𑀸 𑀅𑀭𑀳𑀦𑁆𑀢𑀻𑀢𑀺 𑀲𑀁𑀓𑀺𑀮𑁂𑀲𑀺𑀓𑀸. 𑀲𑀸 𑀅𑀦𑀸𑀲𑀯𑀸.

𑁫𑁦𑁨. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀬. 𑀲𑀫𑁆𑀪𑁂𑀤𑁄𑀢𑀺 𑀲𑀗𑁆𑀓𑀭𑁄. ‘‘𑀑𑀴𑀸𑀭𑀺𑀓𑀸, 𑀲𑀼𑀔𑀼𑀫𑀸’’𑀢𑀺 𑀘 𑀯𑀼𑀢𑁆𑀢𑀸𑀦𑀫𑁆𑀧𑀺 𑀚𑀸𑀢𑀺𑀆𑀤𑀺𑀯𑀲𑁂𑀦 𑀧𑀼𑀦 𑀲𑀼𑀔𑀼𑀫𑁄𑀴𑀸𑀭𑀺𑀓𑀪𑀸𑀯𑀸𑀧𑀢𑁆𑀢𑀺𑀤𑁄𑀲𑁄 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀧𑀭𑀺𑀳𑀭𑀺𑀢𑀩𑁆𑀩𑁄. 𑀚𑀸𑀢𑀺𑀯𑀲𑁂𑀦 𑀲𑀼𑀔𑀼𑀫𑀸𑀬 𑀯𑁂𑀤𑀦𑀸𑀬 𑀲𑀪𑀸𑀯𑀧𑀼𑀕𑁆𑀕𑀮𑀮𑁄𑀓𑀺𑀬𑀯𑀲𑁂𑀦 𑀑𑀴𑀸𑀭𑀺𑀓𑀢𑀁 𑀧𑀸𑀴𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀼𑀔𑀸𑀤𑀬𑁄𑀧𑀻𑀢𑀺 𑀏𑀢𑁆𑀣 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀚𑀸𑀢𑀺𑀯𑀲𑁂𑀦 𑀑𑀴𑀸𑀭𑀺𑀓𑀸, 𑀲𑀪𑀸𑀯𑀯𑀲𑁂𑀦 𑀲𑀼𑀔𑀼𑀫𑀸. 𑀓𑀼𑀲𑀮𑀚𑁆𑀛𑀸𑀦𑀲𑀳𑀕𑀢𑀸 𑀲𑀼𑀔𑀸 𑀯𑁂𑀤𑀦𑀸 𑀚𑀸𑀢𑀺𑀯𑀲𑁂𑀦 𑀑𑀴𑀸𑀭𑀺𑀓𑀸, 𑀲𑀫𑀸𑀧𑀦𑁆𑀦𑀲𑁆𑀲 𑀯𑁂𑀤𑀦𑀸𑀢𑀺 𑀓𑀢𑁆𑀯𑀸 𑀧𑀼𑀕𑁆𑀕𑀮𑀯𑀲𑁂𑀦 𑀲𑀼𑀔𑀼𑀫𑀸𑀢𑀺 𑀏𑀯𑀫𑀸𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀦 𑀧𑀭𑀸𑀫𑀲𑀺𑀢𑀩𑁆𑀩𑁄’’𑀢𑀺 𑀏𑀢𑁂𑀦 𑀚𑀸𑀢𑀺𑀆𑀤𑀬𑁄 ¶ 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀅𑀜𑁆𑀜𑀫𑀜𑁆𑀜𑀁 𑀅𑀯𑁄𑀫𑀺𑀲𑁆𑀲𑀓𑀸 𑀏𑀯 𑀕𑀳𑁂𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀪𑁂𑀤𑀲𑁆𑀲 𑀧𑀭𑀺𑀳𑀸𑀭𑁄, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀅𑀩𑁆𑀬𑀸𑀓𑀢𑀫𑀼𑀔𑁂𑀦, 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀫𑀼𑀔𑁂𑀦𑀧𑀺, 𑀬𑀣𑀸 𑀘 𑀚𑀸𑀢𑀺𑀫𑀼𑀔𑁂𑀦, 𑀏𑀯𑀁 𑀲𑀪𑀸𑀯𑀸𑀤𑀺𑀫𑀼𑀔𑁂𑀦𑀧𑀺 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺 𑀅𑀢𑀺𑀤𑀺𑀲𑀢𑀺.

𑀇𑀤𑀸𑀦𑀺 𑀚𑀸𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑁂𑀲𑀼𑀧𑀺 𑀫𑀺𑀣𑁄 𑀅𑀓𑀼𑀲𑀮𑀸𑀤𑀻𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. ‘‘𑀦𑀺𑀲𑁆𑀲𑀬𑀤𑀳𑀦𑀢𑁄’’𑀢𑀺 𑀇𑀫𑀺𑀦𑀸 𑀤𑁄𑀲𑀲𑀳𑀕𑀢𑀸𑀬 𑀧𑀸𑀓𑀝𑀁 𑀓𑀼𑀭𑀽𑀭𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦𑀺𑀬𑀢𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁂𑀦 𑀦𑀺𑀬𑀢𑀸, 𑀆𑀦𑀦𑁆𑀢𑀭𑀺𑀬𑀪𑀸𑀯𑀧𑁆𑀧𑀢𑁆𑀢𑀸 𑀓𑀧𑁆𑀧𑀢𑀺𑀝𑁆𑀞𑀦𑀓𑀯𑀺𑀧𑀸𑀓𑀢𑀸𑀬 𑀓𑀧𑁆𑀧𑀝𑁆𑀞𑀺𑀢𑀺𑀓𑀸 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀯𑀺𑀬. 𑀅𑀲𑀗𑁆𑀔𑀸𑀭𑀺𑀓𑀸 𑀲𑀪𑀸𑀯𑀢𑀺𑀔𑀺𑀡𑀢𑀸𑀬 𑀑𑀴𑀸𑀭𑀺𑀓𑀸. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀑𑀴𑀸𑀭𑀺𑀓𑀸. 𑀲𑀸𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀦𑀺𑀬𑀢𑀸 𑀑𑀴𑀸𑀭𑀺𑀓𑀸, 𑀢𑀢𑁄 𑀓𑀧𑁆𑀧𑀝𑁆𑀞𑀺𑀢𑀺𑀓𑀸, 𑀢𑀢𑁄 𑀅𑀲𑀗𑁆𑀔𑀸𑀭𑀺𑀓𑀸𑀢𑀺 𑀢𑀺𑀯𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀏𑀓𑀚𑁆𑀛𑀁 𑀯𑀼𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀬𑁄𑀚𑁂𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀇𑀢𑀭𑀸 𑀲𑀼𑀔𑀼𑀫𑀸’’𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀤𑁄𑀲𑀲𑀳𑀕𑀢𑀸, 𑀮𑁄𑀪𑀲𑀳𑀕𑀢𑀸𑀢𑀺 𑀅𑀪𑁂𑀤𑁂𑀦. 𑀅𑀓𑀼𑀲𑀮𑀸 𑀩𑀳𑀼𑀯𑀺𑀧𑀸𑀓𑀸 𑀤𑁄𑀲𑀼𑀲𑁆𑀲𑀦𑁆𑀦𑀢𑀸𑀬 𑀑𑀴𑀸𑀭𑀺𑀓𑀸. 𑀢𑀣𑀸 𑀓𑀼𑀲𑀮𑀸 𑀅𑀧𑁆𑀧𑀯𑀺𑀧𑀸𑀓𑀸. 𑀫𑀦𑁆𑀤𑀤𑁄𑀲𑀢𑁆𑀢𑀸 𑀅𑀓𑀼𑀲𑀮𑀸 𑀅𑀧𑁆𑀧𑀯𑀺𑀧𑀸𑀓𑀸 𑀲𑀼𑀔𑀼𑀫𑀸. 𑀢𑀣𑀸 𑀓𑀼𑀲𑀮𑀸 𑀩𑀳𑀼𑀯𑀺𑀧𑀸𑀓𑀸.

𑀑𑀴𑀸𑀭𑀺𑀓𑀲𑀼𑀔𑀼𑀫𑀦𑀺𑀓𑀦𑁆𑀢𑀺𑀯𑀢𑁆𑀣𑀼𑀪𑀸𑀯𑀢𑁄 𑀓𑀸𑀫𑀸𑀯𑀘𑀭𑀸𑀤𑀻𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀏𑀓𑀦𑁆𑀢𑀲𑀼𑀔𑀼𑀫𑀸𑀯. 𑀢𑀢𑁆𑀣𑀸𑀧𑀺 𑀘 𑀯𑀺𑀪𑀸𑀕𑀁 𑀧𑀭𑀢𑁄 𑀯𑀓𑁆𑀔𑀢𑀺. 𑀪𑀸𑀯𑀦𑀸𑀫𑀬𑀸𑀧𑀻𑀢𑀺 𑀪𑀸𑀯𑀦𑀸𑀫𑀬𑀸𑀬 𑀪𑁂𑀤𑀦𑁂𑀦 ¶ 𑀤𑀸𑀦𑀲𑀻𑀮𑀫𑀬𑀸𑀦𑀫𑁆𑀧𑀺 𑀪𑁂𑀤𑀦𑀁 𑀦𑀬𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀸𑀯𑀦𑀸𑀬 𑀧𑀕𑀼𑀡𑀩𑀮𑀯𑀓𑀸𑀮𑀸𑀤𑀻𑀲𑀼 𑀓𑀤𑀸𑀘𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀫𑀦𑀲𑀺𑀓𑀸𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀯𑀦𑀸𑀫𑀬𑀸𑀧𑀺 𑀤𑀼𑀳𑁂𑀢𑀼𑀓𑀸’’𑀢𑀺. 𑀢𑀁𑀢𑀁𑀪𑀽𑀫𑀺𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑁂𑀤𑀦𑀸𑀲𑀽𑀢𑀺 𑀏𑀢𑁆𑀣 ‘‘𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀑𑀴𑀸𑀭𑀺𑀓𑀸, 𑀭𑀽𑀧𑀸𑀯𑀘𑀭𑀸 𑀲𑀼𑀔𑀼𑀫𑀸’’𑀢𑀺𑀆𑀤𑀺𑀦𑀸 𑀬𑀸𑀯 𑀅𑀭𑀳𑀢𑁆𑀢𑀨𑀮𑀸 𑀦𑁂𑀢𑀩𑁆𑀩𑀁. ‘‘𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸 𑀑𑀴𑀸𑀭𑀺𑀓𑀸, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀲𑀼𑀔𑀼𑀫𑀸’’𑀢𑀺𑀆𑀤𑀺𑀦𑀸 𑀓𑀸𑀫𑀸𑀯𑀘𑀭𑀸 𑀘 ‘‘𑀤𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀑𑀴𑀸𑀭𑀺𑀓𑀸, 𑀲𑀻𑀮𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀲𑀼𑀔𑀼𑀫𑀸’’𑀢𑀺𑀆𑀤𑀺𑀦𑀸 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸 𑀦𑁂𑀢𑀩𑁆𑀩𑀁. 𑀬𑀣𑀸 𑀘 𑀚𑀸𑀢𑀺𑀓𑁄𑀝𑁆𑀞𑀸𑀲𑁂 𑀅𑀬𑀁 𑀯𑀺𑀪𑀸𑀕𑁄, 𑀏𑀯𑀁 𑀲𑀪𑀸𑀯𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀸𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀩𑁆𑀩𑁄 ¶ 𑀘𑀸𑀬𑀁 𑀯𑀺𑀪𑀸𑀕𑁄 𑀮𑀓𑁆𑀔𑀡𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀑𑀓𑀸𑀲𑀯𑀲𑁂𑀦 𑀘𑀸𑀧𑀻’’𑀢𑀺𑀆𑀤𑀺. 𑀲𑀼𑀔𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀲𑀼 𑀪𑀽𑀫𑀻𑀲𑀼. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀬𑀸 𑀬𑀸 𑀯𑁂𑀤𑀦𑀸 𑀬𑀢𑁆𑀣 𑀬𑀢𑁆𑀣 𑀮𑀩𑁆𑀪𑀢𑀺, 𑀢𑀤𑀦𑀼𑀭𑀽𑀧𑀁. 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀬𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪 𑀯𑁂𑀤𑀦𑀸 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀯𑀲𑁂𑀦𑀸𑀧𑀺. 𑀳𑀻𑀦𑀯𑀢𑁆𑀣𑀼𑀓𑀸𑀢𑀺 𑀳𑀻𑀦𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀗𑁆𑀕𑀼𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑁂𑀤𑀦𑀸 𑀳𑀻𑀦𑀯𑀢𑁆𑀣𑀼𑀓𑀢𑀸𑀬 𑀑𑀴𑀸𑀭𑀺𑀓𑀸. 𑀲𑀸𑀮𑀺𑀫𑀁𑀲𑁄𑀤𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀡𑀻𑀢𑀯𑀢𑁆𑀣𑀼𑀓𑀢𑀸𑀬 𑀲𑀼𑀔𑀼𑀫𑀸𑀢𑀺.

𑁫𑁦𑁩. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀲𑀩𑁆𑀩𑀁 𑀧𑀸𑀴𑀺𑀕𑀢𑀺𑀁 𑀆𑀫𑀲𑀢𑀺. 𑀚𑀸𑀢𑀺𑀆𑀤𑀺𑀯𑀲𑁂𑀦 𑀅𑀲𑀫𑀸𑀦𑀓𑁄𑀝𑁆𑀞𑀸𑀲𑀢𑀸 𑀯𑀺𑀲𑀪𑀸𑀕𑀢𑀸. 𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀤𑀺𑀯𑀲𑁂𑀦 𑀅𑀲𑀤𑀺𑀲𑀓𑀺𑀘𑁆𑀘𑀢𑀸 𑀅𑀲𑀁𑀲𑀝𑁆𑀞𑀢𑀸, 𑀦 𑀅𑀲𑀫𑁆𑀧𑀬𑁄𑀕𑁄. 𑀬𑀤𑀺 𑀲𑀺𑀬𑀸, 𑀤𑀽𑀭𑀯𑀺𑀧𑀭𑀺𑀬𑀸𑀬𑁂𑀦 𑀲𑀦𑁆𑀢𑀺𑀓𑀁 𑀳𑁄𑀢𑀻𑀢𑀺 𑀲𑀁𑀲𑀝𑁆𑀞𑀢𑀸 𑀲𑀦𑁆𑀢𑀺𑀓𑀢𑀸 𑀆𑀧𑀚𑁆𑀚𑀢𑀺, 𑀦 𑀘 𑀯𑁂𑀤𑀦𑀸𑀬 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑁄 𑀅𑀢𑁆𑀣𑀺. 𑀲𑀦𑁆𑀢𑀺𑀓𑀧𑀤𑀯𑀡𑁆𑀡𑀦𑀸𑀬 𑀘 ‘‘𑀲𑀪𑀸𑀕𑀢𑁄 𑀘 𑀲𑀭𑀺𑀓𑁆𑀔𑀢𑁄 𑀘𑀸’’𑀢𑀺 𑀯𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀤𑀺𑀲𑀲𑀪𑀸𑀯𑀢𑀸 𑀅𑀲𑀭𑀺𑀓𑁆𑀔𑀢𑀸. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑁂𑀤𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑀢𑁆𑀢𑀩𑁆𑀩𑁂𑀲𑀼 𑀲𑀩𑁆𑀩𑁂𑀲𑀼 𑀯𑀸𑀭𑁂𑀲𑀼. 𑀚𑀸𑀢𑀺𑀆𑀤𑀺𑀯𑀲𑁂𑀦 𑀲𑀫𑀸𑀦𑀓𑁄𑀝𑁆𑀞𑀸𑀲𑀢𑀸 𑀲𑀪𑀸𑀕𑀢𑀸, 𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀤𑀺𑀯𑀲𑁂𑀦 𑀧𑀦 𑀲𑀤𑀺𑀲𑀲𑀪𑀸𑀯𑀢𑀸 𑀲𑀭𑀺𑀓𑁆𑀔𑀢𑀸. 𑀢𑁂𑀦𑀸𑀳 ‘‘𑀅𑀓𑀼𑀲𑀮𑀸 𑀧𑀦…𑀧𑁂… 𑀲𑀦𑁆𑀢𑀺𑀓𑁂’’𑀢𑀺.

𑀇𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑁫𑁦𑁪. 𑀏𑀢𑀦𑁆𑀢𑀺 ¶ 𑀏𑀯𑀁 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀁. 𑀜𑀸𑀡𑀪𑁂𑀤𑀢𑁆𑀣𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀜𑀸𑀡𑀧𑁆𑀧𑀪𑁂𑀤𑀢𑁆𑀣𑀁. 𑀓𑀫𑀢𑁄𑀢𑀺 𑀤𑁂𑀲𑀦𑀸𑀓𑁆𑀓𑀫𑀢𑁄, 𑀬𑁂𑀦 𑀓𑀸𑀭𑀡𑁂𑀦𑀸𑀬𑀁 𑀤𑁂𑀲𑀦𑀸𑀓𑁆𑀓𑀫𑁄 𑀓𑀢𑁄, 𑀢𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀢𑁄𑀢𑀺 𑀪𑁂𑀤𑀢𑁄, 𑀔𑀦𑁆𑀥𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀯𑀺𑀪𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀽𑀦𑀸𑀥𑀺𑀓𑀢𑁄𑀢𑀺 𑀧𑀜𑁆𑀘𑀪𑀸𑀯𑀢𑁄. 𑀉𑀧𑀫𑀸𑀢𑁄𑀢𑀺 𑀉𑀧𑀫𑀸𑀳𑀺 𑀉𑀧𑀫𑁂𑀢𑀩𑁆𑀩𑀢𑁄. 𑀤𑀝𑁆𑀞𑀩𑁆𑀩𑀢𑁄 𑀤𑁆𑀯𑀺𑀥𑀸𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀢𑁄. 𑀧𑀲𑁆𑀲𑀦𑁆𑀢𑀲𑁆𑀲𑀢𑁆𑀣𑀲𑀺𑀤𑁆𑀥𑀺𑀢𑁄𑀢𑀺 ¶ 𑀬𑀣𑀸 𑀧𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀢𑁄. 𑀯𑀺𑀪𑀸𑀯𑀺𑀦𑀸𑀢𑀺 𑀧𑀜𑁆𑀜𑀯𑀢𑀸.

𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀧𑀝𑀺𑀧𑀸𑀝𑀺. ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁮, 𑁯) 𑀧𑀞𑀫𑀁 𑀧𑀳𑀸𑀢𑀩𑁆𑀩𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀁 𑀧𑀳𑀸𑀢𑀩𑁆𑀩𑀸 𑀤𑀼𑀢𑀺𑀬𑀁 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀧𑀳𑀸𑀦𑀓𑁆𑀓𑀫𑁄. 𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀧𑀝𑀺𑀧𑀚𑁆𑀚 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸, 𑀢𑀣𑀸 𑀢𑀢𑁄 𑀧𑀭𑀸𑀧𑀻𑀢𑀺 𑀆𑀳 ‘‘𑀲𑀻𑀮𑀯𑀺𑀲𑀼𑀤𑁆𑀥𑀺…𑀧𑁂… 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄’’𑀢𑀺, 𑀅𑀦𑀼𑀧𑀼𑀩𑁆𑀩𑀧𑀡𑀻𑀢𑀸 𑀪𑀽𑀫𑀺𑀬𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀯𑀢𑁆𑀣𑀺𑀢𑀸𑀢𑀺 𑀅𑀬𑀁 𑀪𑀽𑀫𑀺𑀓𑁆𑀓𑀫𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀓𑁄 (𑀯𑀺𑀪. 𑁩𑁫𑁫) 𑀏𑀓𑀓𑁆𑀔𑀡𑁂𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀲𑀫𑁆𑀪𑀯𑀢𑁄 𑀤𑁂𑀲𑀦𑀸𑀓𑁆𑀓𑀫𑁄 𑀘. 𑀤𑀸𑀦𑀓𑀣𑀸𑀤𑀬𑁄 𑀅𑀦𑀼𑀧𑀼𑀩𑁆𑀩𑀼𑀓𑁆𑀓𑀁𑀲𑀢𑁄 𑀓𑀣𑀺𑀢𑀸, 𑀉𑀧𑁆𑀧𑀢𑁆𑀢𑀺𑀆𑀤𑀺𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀧𑀦 𑀤𑀸𑀦𑀸𑀤𑀻𑀦𑀁 𑀇𑀥 𑀤𑁂𑀲𑀦𑀸𑀓𑁆𑀓𑀫𑀯𑀘𑀦𑀁. 𑀉𑀧𑁆𑀧𑀢𑁆𑀢𑀺𑀆𑀤𑀺𑀯𑀯𑀢𑁆𑀣𑀸𑀦𑀳𑁂𑀢𑀼𑀓𑀢𑀸𑀬 𑀳𑀺 ‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀻’’𑀢𑀺𑀆𑀤𑀺𑀓𑀸 (𑀲𑀁. 𑀦𑀺. 𑁧.𑁨𑁩𑁫; 𑀓𑀣𑀸. 𑁬𑁯𑁨) 𑀤𑁂𑀲𑀦𑀸𑀧𑀺 𑀲𑀫𑀸𑀦𑀸 𑀉𑀧𑁆𑀧𑀢𑁆𑀢𑀺𑀆𑀤𑀺𑀓𑀫𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀸𑀪𑀸𑀯𑁂𑀦 𑀧𑀦 𑀅𑀦𑁂𑀓𑁂𑀲𑀁 𑀯𑀘𑀦𑀸𑀦𑀁 𑀲𑀳𑀧𑀯𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 𑀬𑁂𑀦 𑀓𑁂𑀦𑀘𑀺 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀤𑁂𑀲𑁂𑀢𑀩𑁆𑀩𑀢𑀸𑀬 𑀢𑁂𑀦 𑀢𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀤𑁂𑀲𑀦𑀸𑀫𑀢𑁆𑀢𑀲𑁆𑀲𑁂𑀯 𑀓𑀫𑁄 𑀤𑁂𑀲𑀦𑀸𑀓𑁆𑀓𑀫𑁄 𑀤𑀝𑁆𑀞𑀩𑁆𑀩𑁄. 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀧𑀞𑀫𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀢𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀅𑀧𑁆𑀧𑀳𑀸𑀢𑀩𑁆𑀩𑀢𑁄𑀢𑀺 𑀔𑀦𑁆𑀥𑁂𑀲𑀼 𑀏𑀓𑀘𑁆𑀘𑀸𑀦𑀁 𑀧𑀳𑀸𑀢𑀩𑁆𑀩𑀢𑀸𑀯 𑀦𑀢𑁆𑀣𑀺, 𑀓𑀼𑀢𑁄 𑀧𑀳𑀸𑀦𑀓𑁆𑀓𑀫𑁄. 𑀲𑀢𑀺 𑀳𑀺 𑀲𑀩𑁆𑀩𑁂𑀲𑀁 𑀧𑀳𑀸𑀢𑀩𑁆𑀩𑀢𑀸𑀬 𑀧𑀳𑀸𑀦𑀓𑁆𑀓𑀫𑁂𑀦 𑀦𑁂𑀲𑀁 𑀤𑁂𑀲𑀦𑀸 𑀲𑀺𑀬𑀸. 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄. ‘‘𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑁂𑀤𑀦𑀸𑀤𑀻𑀦𑀁 𑀅𑀦𑀺𑀬𑀢𑀪𑀽𑀫𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀦𑀺𑀬𑀢𑀪𑀽𑀫𑀺𑀓𑀸𑀦𑀜𑁆𑀳𑀺 𑀪𑀽𑀫𑀺𑀓𑁆𑀓𑀫𑁄 𑀲𑀫𑁆𑀪𑀯𑁂𑀬𑁆𑀬.

𑀅𑀪𑁂𑀤𑁂𑀦𑀸𑀢𑀺 𑀭𑀽𑀧𑀸𑀤𑀻𑀦𑀁 𑀪𑁂𑀤𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀏𑀓𑀚𑁆𑀛𑀁 𑀧𑀺𑀡𑁆𑀟𑀕𑁆𑀕𑀳𑀡𑁂𑀦. 𑀅𑀢𑁆𑀢𑀕𑀸𑀳𑀧𑀢𑀺𑀢𑀦𑁆𑀢𑀺 𑀅𑀢𑁆𑀢𑀕𑀸𑀳𑀲𑀗𑁆𑀔𑀸𑀢𑁂 𑀤𑀺𑀝𑁆𑀞𑁄𑀖𑁂 𑀦𑀺𑀧𑀢𑀺𑀢𑀁. 𑀲𑀫𑀽𑀳𑀖𑀦𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑁂𑀦𑀸𑀢𑀺 𑀭𑀽𑀧𑀢𑁄 𑀅𑀭𑀽𑀧𑀁 𑀯𑀺𑀯𑁂𑀘𑁂𑀦𑁆𑀢𑁄 𑀭𑀽𑀧𑀸𑀭𑀽𑀧𑀲𑀫𑀽𑀳𑁂 ¶ 𑀖𑀦𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑀤𑀲𑁆𑀲𑀦𑁂𑀦. 𑀘𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀯𑀺𑀲𑀬𑀪𑀽𑀢𑀦𑁆𑀢𑀺 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀪𑀽𑀢𑀁 𑀭𑀽𑀧𑀓𑁆𑀔𑀦𑁆𑀥𑀁 𑀯𑀤𑀢𑀺. 𑀬𑀸 𑀏𑀢𑁆𑀣 𑀇𑀝𑁆𑀞𑀁, 𑀅𑀦𑀺𑀝𑁆𑀞𑀜𑁆𑀘 𑀭𑀽𑀧𑀁 𑀲𑀁𑀯𑁂𑀤𑁂𑀢𑀺, 𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀭𑀽𑀧𑀲𑀁𑀯𑁂𑀤𑀦𑀺𑀓𑀁 𑀯𑁂𑀤𑀦𑀁 𑀤𑁂𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀦𑀫𑁆𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀲𑀪𑀸𑀯𑀢𑁆𑀢𑀸 𑀇𑀝𑁆𑀞𑀸𑀦𑀺𑀝𑁆𑀞𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦. 𑀲𑀜𑁆𑀜𑀸𑀬 𑀕𑀳𑀺𑀢𑀸𑀓𑀸𑀭𑁂 ¶ 𑀯𑀺𑀲𑀬𑁂 𑀅𑀪𑀺𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀜𑁆𑀜𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀸𑀭𑀓𑁂’’𑀢𑀺. 𑀬𑀣𑀸 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑁄 𑀧𑀸𑀓𑀝𑁄, 𑀦 𑀢𑀣𑀸 𑀯𑁂𑀤𑀦𑀸𑀤𑀻𑀦𑀦𑁆𑀢𑀺 𑀆𑀳 ‘‘𑀯𑁂𑀤𑀦𑀸𑀤𑀻𑀦𑀁 𑀦𑀺𑀲𑁆𑀲𑀬’’𑀦𑁆𑀢𑀺. ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸 (𑀥. 𑀧. 𑁧-𑁨), 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁬𑁨), 𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁧𑁮𑁧 𑀏𑀭𑀓𑀧𑀢𑁆𑀣𑀦𑀸𑀕𑀭𑀸𑀚𑀯𑀢𑁆𑀣𑀼) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀁 𑀅𑀥𑀺𑀧𑀢𑀺.

𑁫𑁦𑁫. 𑀭𑀽𑀧𑀓𑁆𑀔𑀦𑁆𑀥𑁂 ‘‘𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬’’𑀦𑁆𑀢𑀺 𑀯𑀘𑀦𑀁 𑀅𑀦𑀸𑀲𑀯𑀸𑀦𑀁 𑀥𑀫𑁆𑀫𑀸𑀦𑀁 𑀲𑀩𑁆𑀪𑀸𑀯𑀢𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀁𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀁, 𑀦 𑀅𑀦𑀸𑀲𑀯𑀭𑀽𑀧𑀦𑀺𑀯𑀢𑁆𑀢𑀦𑀢𑁆𑀣𑀁.

𑀅𑀦𑀸𑀲𑀯𑀸𑀯 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀸𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀅𑀦𑀸𑀲𑀯𑀸 𑀔𑀦𑁆𑀥𑁂𑀲𑁆𑀯𑁂𑀯 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀩𑁆𑀩𑁂𑀧𑁂𑀢𑁂 𑀔𑀦𑁆𑀥𑀸𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺.

𑁫𑁦𑁬. 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀲𑀪𑀸𑀕𑁂𑀦 𑀏𑀓𑀚𑁆𑀛𑀁 𑀲𑀗𑁆𑀕𑀳𑁄 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑁄. 𑀲𑀪𑀸𑀕𑀲𑀪𑀸𑀯𑁂𑀦 𑀳𑀺 𑀲𑀗𑁆𑀕𑀬𑁆𑀳𑀫𑀸𑀦𑀸 𑀲𑀩𑁆𑀩𑀲𑀗𑁆𑀔𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀭𑀼𑀧𑁆𑀧𑀦𑀸𑀤𑀺𑀲𑀸𑀫𑀜𑁆𑀜𑁂𑀦 𑀲𑀫𑀸𑀦𑀓𑁄𑀝𑁆𑀞𑀸𑀲𑀸 𑀲𑀪𑀸𑀕𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀁 𑀆𑀬𑀽𑀳𑀦𑀭𑀲𑀸𑀬 𑀘𑁂𑀢𑀦𑀸𑀬 𑀩𑀮𑀯𑀦𑁆𑀢𑀺 𑀲𑀸 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀸. 𑀅𑀜𑁆𑀜𑁂 𑀘 𑀭𑀼𑀧𑁆𑀧𑀦𑀸𑀤𑀺𑀯𑀺𑀲𑁂𑀲𑀮𑀓𑁆𑀔𑀡𑀭𑀳𑀺𑀢𑀸 𑀨𑀲𑁆𑀲𑀸𑀤𑀬𑁄 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀲𑀸𑀫𑀜𑁆𑀜𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀨𑀼𑀲𑀦𑀸𑀤𑀬𑁄 𑀧𑀦 𑀲𑀪𑀸𑀯𑀸 𑀯𑀺𑀲𑀼𑀁 𑀔𑀦𑁆𑀥𑀲𑀤𑁆𑀤𑀯𑀘𑀦𑀻𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀜𑁆𑀜𑀼𑀦𑀸 𑀢𑀣𑀸𑀕𑀢𑁂𑀦 𑀨𑀲𑁆𑀲𑀓𑁆𑀔𑀦𑁆𑀥𑀸𑀤𑀬𑁄 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂 𑀏𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀦𑀺𑀲𑁆𑀲𑀸𑀬 𑀧𑀝𑀺𑀘𑁆𑀘, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺 𑀏𑀯𑀫𑀸𑀤𑀺𑀲𑀼𑀢𑁆𑀢𑀸𑀦𑀜𑁆𑀘 𑀯𑀲𑁂𑀦 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀲𑁆𑀲 𑀏𑀢𑀧𑁆𑀧𑀭𑀫𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁂𑀦 𑀘 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀯𑀲𑁂𑀦 𑀘 𑀔𑀦𑁆𑀥𑁂 𑀏𑀯 𑀦𑀺𑀲𑁆𑀲𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀦 𑀯𑀢𑁆𑀢𑀩𑁆𑀩𑀸 𑀘 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀔𑀦𑁆𑀥𑀦𑀺𑀩𑁆𑀩𑀸𑀦𑀯𑀚𑁆𑀚𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀽𑀧𑀦𑁆𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀁 𑀥𑀫𑁆𑀫𑀚𑀸𑀢𑀫𑀸𑀳. 𑀯𑁂𑀤𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁩𑁫𑁫) 𑀯𑀘𑀦𑀢𑁄 ¶ 𑀅𑀜𑁆𑀜𑁂𑀲𑀜𑁆𑀘 𑀔𑀦𑁆𑀥𑀲𑀤𑁆𑀤𑀯𑀘𑀦𑀻𑀬𑀸𑀦𑀁 ¶ 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀩𑁆𑀪𑀸𑀯𑀢𑁄 𑀦 𑀧𑀜𑁆𑀘𑁂𑀯𑀸𑀢𑀺 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀼𑀫𑀸𑀳 ‘‘𑀅𑀜𑁆𑀜𑁂𑀲𑀁 𑀢𑀤𑀯𑀭𑁄𑀥𑀢𑁄’’𑀢𑀺.

𑁫𑁦𑁭. 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀯𑀲𑀦𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀯𑀸𑀲𑀝𑁆𑀞𑀸𑀦𑀢𑁄’’𑀢𑀺. 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀯𑁂𑀤𑀦𑀸𑀬 𑀆𑀩𑀸𑀥𑀓𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀸𑀤𑀺𑀤𑀼𑀓𑁆𑀔𑀲𑁆𑀲 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀕𑀸𑀳𑀺𑀓𑀸 𑀢𑀁𑀢𑀁𑀲𑀗𑁆𑀓𑀧𑁆𑀧𑀫𑀽𑀮𑀪𑀽𑀢𑀸 𑀲𑀜𑁆𑀜𑀸 𑀲𑀫𑀼𑀝𑁆𑀞𑀸𑀦𑀁. 𑀧𑀺𑀢𑁆𑀢𑀸𑀤𑀺 𑀯𑀺𑀬 𑀭𑁄𑀕𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀁. 𑀉𑀢𑀼𑀪𑁄𑀚𑀦𑀯𑀺𑀲𑀫𑀢𑀸𑀯𑀺𑀲𑀫𑀧𑀭𑀺𑀳𑀸𑀭𑀸𑀤𑀺 𑀯𑀺𑀬 𑀫𑀽𑀮𑀓𑀸𑀭𑀡𑀁 𑀦𑀺𑀤𑀸𑀦𑀁. 𑀘𑀺𑀢𑁆𑀢𑀲𑁆𑀲 𑀅𑀗𑁆𑀕𑀪𑀽𑀢𑀸 𑀘𑁂𑀢𑀲𑀺𑀓𑀸𑀢𑀺 𑀯𑀺𑀜𑁆𑀜𑀸𑀡𑀁 𑀕𑀺𑀮𑀸𑀦𑀽𑀧𑀫𑀁 𑀯𑀼𑀢𑁆𑀢𑀁. 𑀓𑀼𑀝𑁆𑀞𑀭𑁄𑀕𑀯𑀢𑁄 𑀲𑀺𑀦𑀺𑀬𑁆𑀳𑀦𑀁 𑀢𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑀺𑀬 𑀩𑀸𑀮𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀦𑀸𑀤𑀼𑀓𑁆𑀔𑀸𑀯𑀳𑀸 𑀅𑀲𑀧𑁆𑀧𑀸𑀬𑀲𑁂𑀯𑀦𑀲𑀤𑀺𑀲𑀻. 𑀯𑁂𑀤𑀦𑀢𑁆𑀢𑀸𑀬𑀸𑀢𑀺 𑀯𑁂𑀤𑀦𑀸𑀲𑀪𑀸𑀯𑀢𑁆𑀣𑀁, 𑀯𑁂𑀤𑀦𑀢𑁆𑀢𑀮𑀸𑀪𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀝𑁆𑀞𑀸𑀦𑀢𑀸𑀬, 𑀪𑁄𑀚𑀦𑀸𑀥𑀸𑀭𑀢𑀸𑀬 𑀘 𑀘𑀸𑀭𑀓𑀽𑀧𑀫𑀁, 𑀪𑀸𑀚𑀦𑀽𑀧𑀫𑀜𑁆𑀘 𑀭𑀽𑀧𑀁. 𑀲𑀼𑀪𑀲𑀜𑁆𑀜𑀸𑀤𑀺𑀯𑀲𑁂𑀦 𑀯𑁂𑀤𑀦𑀸𑀓𑀸𑀭𑀡𑀲𑁆𑀲 𑀳𑁂𑀢𑀼𑀪𑀸𑀯𑀢𑁄, 𑀯𑁂𑀤𑀦𑀸𑀪𑁄𑀚𑀦𑀲𑁆𑀲 𑀙𑀸𑀤𑀸𑀧𑀦𑀢𑁄 𑀘 𑀅𑀧𑀭𑀸𑀥𑀽𑀧𑀫𑀸, 𑀩𑁆𑀬𑀜𑁆𑀚𑀦𑀽𑀧𑀫𑀸 𑀘 𑀲𑀜𑁆𑀜𑀸. 𑀯𑁂𑀤𑀦𑀸𑀳𑁂𑀢𑀼𑀢𑁄 𑀓𑀸𑀭𑀡𑀓𑀸𑀭𑀓𑀽𑀧𑀫𑁄, 𑀧𑀭𑀺𑀯𑁂𑀲𑀓𑀽𑀧𑀫𑁄 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀪𑀢𑁆𑀢𑀓𑀸𑀭𑁄 𑀏𑀯 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀯𑀺𑀲𑀢𑀻𑀢𑀺 𑀧𑀭𑀺𑀯𑁂𑀲𑀓𑀕𑁆𑀕𑀳𑀡𑀁. 𑀯𑁂𑀤𑀦𑀸𑀬 𑀯𑀺𑀩𑀸𑀥𑀺𑀢𑀩𑁆𑀩𑀢𑁄, 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀢𑁄 𑀘 𑀅𑀧𑀭𑀸𑀥𑀺𑀓𑀽𑀧𑀫𑀁, 𑀪𑀼𑀜𑁆𑀚𑀓𑀽𑀧𑀫𑀜𑁆𑀘 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁.

𑁫𑁦𑁮. ‘‘𑀧𑀜𑁆𑀘 𑀯𑀥𑀓𑀸 𑀧𑀘𑁆𑀘𑀢𑁆𑀣𑀺𑀓𑀸 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀲𑀻𑀯𑀺𑀲𑀽𑀧𑀫𑁂 (𑀲𑀁. 𑀦𑀺. 𑁪.𑁨𑁩𑁮) 𑀯𑀥𑀓𑀸𑀢𑀺 𑀯𑀼𑀢𑁆𑀢𑀸, ‘‘𑀪𑀸𑀭𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀪𑀸𑀭𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁨𑁨) 𑀪𑀸𑀭𑀸𑀢𑀺, ‘‘𑀅𑀢𑀻𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀭𑀽𑀧𑁂𑀦 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀭𑀽𑀧𑁂𑀦 𑀔𑀚𑁆𑀚𑀸𑀫𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑀁 𑀭𑀽𑀧𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁, 𑀅𑀦𑀸𑀕𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀭𑀽𑀧𑁂𑀦 𑀔𑀚𑁆𑀚𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺…𑀧𑁂… 𑀔𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁭𑁯) 𑀔𑀚𑁆𑀚𑀦𑀻𑀬𑀧𑀭𑀺𑀬𑀸𑀬𑁂 𑀔𑀸𑀤𑀓𑀸𑀢𑀺, ‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁫) 𑀬𑀫𑀓𑀲𑀼𑀢𑁆𑀢𑁂 𑀅𑀦𑀺𑀘𑁆𑀘𑀸𑀤𑀺𑀓𑀸𑀢𑀺. 𑀬𑀤𑀺𑀧𑀺 ‘‘𑀇𑀥 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀔𑀦𑁆𑀥𑀸𑀢𑀺 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀁, 𑀩𑀸𑀳𑀼𑀮𑁆𑀮𑁂𑀦 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀢𑀤𑀦𑁆𑀢𑁄𑀕𑀥𑀸𑀦𑀁 𑀤𑀝𑁆𑀞𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀯𑀺𑀘𑀸𑀭𑁄 𑀳𑁂𑀲𑁄𑀢𑀺.

𑀨𑁂𑀡𑀧𑀺𑀡𑁆𑀟𑁄 ¶ 𑀯𑀺𑀬𑀸𑀢𑀺𑀆𑀤𑀻𑀲𑀼 𑀭𑀽𑀧𑀸𑀤𑀻𑀦𑀁 𑀏𑀯𑀁 𑀨𑁂𑀡𑀧𑀺𑀡𑁆𑀟𑀸𑀤𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸, 𑀬𑀣𑀸 𑀨𑁂𑀡𑀧𑀺𑀡𑁆𑀟𑁄 ¶ 𑀦𑀺𑀲𑁆𑀲𑀸𑀭𑁄 𑀧𑀭𑀺𑀤𑀼𑀩𑁆𑀩𑀮𑁄 𑀅𑀕𑀬𑁆𑀳𑀼𑀧𑀕𑁄; 𑀕𑀳𑀺𑀢𑁄𑀧𑀺 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀦 𑀲𑀸𑀥𑁂𑀢𑀺, 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄 𑀅𑀦𑁂𑀓𑀲𑀦𑁆𑀥𑀺𑀲𑀗𑁆𑀖𑀝𑀺𑀢𑁄 𑀩𑀳𑀽𑀦𑀁 𑀧𑀸𑀡𑀓𑀸𑀦𑀁 𑀆𑀯𑀸𑀲𑁄 𑀅𑀦𑀼𑀧𑀼𑀩𑁆𑀩𑀽𑀧𑀘𑀺𑀢𑁄 𑀲𑀩𑁆𑀩𑀸𑀯𑀢𑁆𑀣𑀦𑀺𑀧𑀸𑀢𑀻 𑀅𑀯𑀲𑁆𑀲𑀁𑀪𑁂𑀤𑀻, 𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀦𑀺𑀲𑁆𑀲𑀸𑀭𑀁 𑀨𑁂𑀕𑁆𑀕𑀼 𑀯𑀺𑀬, 𑀲𑀼𑀔𑀪𑀜𑁆𑀚𑀦𑀻𑀬𑀢𑁄 𑀤𑀼𑀩𑁆𑀩𑀮𑀁, 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀥𑀼𑀯𑀦𑁆𑀢𑀺 𑀯𑀸 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀦 𑀕𑀳𑁂𑀢𑀩𑁆𑀩𑀁, 𑀕𑀳𑀺𑀢𑀫𑁆𑀧𑀺 𑀢𑀣𑀸 𑀦 𑀳𑁄𑀢𑀺, 𑀩𑀳𑀼𑀙𑀺𑀤𑁆𑀤𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀲𑀗𑁆𑀖𑀝𑀺𑀢𑀁 𑀅𑀦𑁂𑀓𑀓𑀺𑀫𑀺𑀓𑀼𑀮𑀸𑀯𑀸𑀲𑀁 𑀓𑀮𑀮𑀸𑀤𑀺𑀯𑀲𑁂𑀦 𑀅𑀦𑀼𑀧𑀼𑀩𑁆𑀩𑀽𑀧𑀘𑀺𑀢𑀁 𑀓𑀮𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀯𑀺𑀦𑀲𑁆𑀲𑀢𑀺, 𑀅𑀯𑀲𑁆𑀲𑀫𑁂𑀯 𑀘 𑀪𑀺𑀚𑁆𑀚𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁯𑁫; 𑀯𑀺𑀪. 𑀅𑀝𑁆𑀞. 𑁨𑁬 𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸) 𑀧𑀦 𑀧𑀭𑀺𑀫𑀤𑁆𑀤𑀦𑀸𑀲𑀳𑀦𑀫𑁂𑀯 𑀉𑀧𑀫𑀽𑀧𑀫𑁂𑀬𑁆𑀬𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄.

𑀬𑀣𑀸 𑀧𑀼𑀩𑁆𑀩𑀼𑀴𑁄 𑀦𑀺𑀲𑁆𑀲𑀸𑀭𑁄 𑀧𑀭𑀺𑀤𑀼𑀩𑁆𑀩𑀮𑁄 𑀅𑀕𑀬𑁆𑀳𑀼𑀧𑀕𑁄, 𑀕𑀳𑀺𑀢𑁄𑀧𑀺 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀢𑀣𑀸 𑀯𑁂𑀤𑀦𑀸𑀧𑀺. 𑀬𑀣𑀸 𑀘 𑀧𑀼𑀩𑁆𑀩𑀼𑀴𑁄, 𑀉𑀤𑀓𑀢𑀮𑀁, 𑀉𑀤𑀓𑀩𑀺𑀦𑁆𑀤𑀼𑀁, 𑀉𑀤𑀓𑀚𑀮𑁆𑀮𑀺𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀕𑀳𑀡𑀯𑀸𑀢𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀚𑀸𑀬𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀯𑀢𑁆𑀣𑀼𑀁, 𑀆𑀭𑀫𑁆𑀫𑀡𑀁, 𑀓𑀺𑀮𑁂𑀲𑀚𑀮𑁆𑀮𑀁, 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀳𑀺 𑀉𑀤𑀓𑀢𑀮𑁂 𑀩𑀺𑀦𑁆𑀤𑀼𑀦𑀺𑀧𑀸𑀢𑀚𑀦𑀺𑀢𑁄 𑀯𑀸𑀢𑁄 𑀉𑀤𑀓𑀚𑀮𑁆𑀮𑀺𑀓𑀲𑀗𑁆𑀔𑀸𑀢𑀁 𑀉𑀤𑀓𑀮𑀲𑀺𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀴𑀁 𑀦𑀸𑀫 𑀓𑀭𑁄𑀢𑀺, 𑀏𑀯𑀁 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑀸𑀧𑀸𑀣𑀕𑀫𑀦𑀚𑀦𑀺𑀢𑁄 𑀨𑀲𑁆𑀲𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑀁 𑀓𑀺𑀮𑁂𑀲𑀚𑀮𑁆𑀮𑀁 𑀲𑀳𑀓𑀸𑀭𑀻𑀧𑀘𑁆𑀘𑀬𑀪𑀸𑀯𑁂𑀦 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀯𑁂𑀤𑀦𑀁 𑀦𑀸𑀫 𑀓𑀭𑁄𑀢𑀺. 𑀇𑀤𑀜𑁆𑀘 𑀓𑀺𑀮𑁂𑀲𑁂𑀳𑀺 𑀫𑀽𑀮𑀓𑀸𑀭𑀡𑀪𑀽𑀢𑁂𑀳𑀺, 𑀆𑀭𑀫𑁆𑀫𑀡𑀲𑁆𑀲𑀸𑀤𑀦𑀪𑀽𑀢𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀁 𑀯𑀝𑁆𑀝𑀕𑀢𑀁 𑀯𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀊𑀦𑁂𑀳𑀺𑀧𑀺 𑀧𑀦 𑀉𑀧𑁆𑀧𑀚𑁆𑀚𑀢𑁂𑀯. 𑀇𑀥 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑀸 𑀉𑀧𑀫𑁄𑀧𑀫𑁂𑀬𑁆𑀬𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄.

𑀬𑀣𑀸 𑀧𑀦 𑀫𑀭𑀻𑀘𑀺𑀓𑀸 𑀅𑀲𑀸𑀭𑀸 𑀅𑀕𑀬𑁆𑀳𑀼𑀧𑀕𑀸. 𑀦 𑀳𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀸𑀢𑀼𑀁 𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀪𑀸𑀚𑀦𑀁 𑀯𑀸 𑀧𑀽𑀭𑁂𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀲𑀜𑁆𑀜𑀸𑀧𑀺 𑀅𑀲𑀸𑀭𑀸 𑀅𑀕𑀬𑁆𑀳𑀼𑀧𑀕𑀸. 𑀬𑀣𑀸 𑀘 𑀫𑀭𑀻𑀘𑀺𑀓𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀲𑀜𑁆𑀚𑀸𑀢𑀽𑀫𑀺𑀯𑁂𑀕𑀸 𑀯𑀺𑀬 𑀔𑀸𑀬𑀦𑁆𑀢𑀻 𑀫𑀳𑀸𑀚𑀦𑀁 𑀯𑀺𑀧𑁆𑀧𑀮𑀫𑁆𑀩𑁂𑀢𑀺, 𑀏𑀯𑀁 𑀲𑀜𑁆𑀜𑀸𑀧𑀺 ‘‘𑀦𑀻𑀮𑀁 𑀧𑀻𑀢𑀁 𑀤𑀻𑀖𑀁 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸 𑀲𑀪𑀸𑀯𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 ‘‘𑀲𑀼𑀪𑀁 𑀲𑀼𑀔𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀮𑁄𑀓𑀁 𑀯𑀺𑀧𑁆𑀧𑀮𑀫𑁆𑀩𑁂𑀢𑀺.

𑀬𑀣𑀸 ¶ 𑀓𑀤𑀮𑀺𑀓𑁆𑀔𑀦𑁆𑀥𑁄 𑀅𑀲𑀸𑀭𑁄 𑀅𑀕𑀬𑁆𑀳𑀼𑀧𑀕𑁄. 𑀦 𑀳𑀺 𑀢𑀁 𑀕𑀳𑁂𑀢𑁆𑀯𑀸 𑀕𑁄𑀧𑀸𑀦𑀲𑀻𑀆𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀦𑁂𑀢𑀼𑀁 𑀲𑀓𑁆𑀓𑀸, 𑀉𑀧𑀦𑀻𑀢𑀫𑁆𑀧𑀺 𑀢𑀣𑀸 𑀦 𑀳𑁄𑀢𑀺, 𑀩𑀳𑀼𑀯𑀝𑁆𑀝𑀺𑀲𑀫𑁄𑀥𑀸𑀦𑁄 𑀘 𑀳𑁄𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 ¶ 𑀅𑀲𑀸𑀭𑁄 𑀅𑀕𑀬𑁆𑀳𑀼𑀧𑀕𑁄. 𑀦 𑀳𑀺 𑀢𑀁 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑀸, 𑀕𑀳𑀺𑀢𑀫𑁆𑀧𑀺 𑀢𑀣𑀸 𑀦 𑀳𑁄𑀢𑀺, 𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑁄 𑀘. 𑀅𑀜𑁆𑀜𑀤𑁂𑀯 𑀳𑀺 𑀨𑀲𑁆𑀲𑀲𑁆𑀲 𑀮𑀓𑁆𑀔𑀡𑀁, 𑀅𑀜𑁆𑀜𑀁 𑀘𑁂𑀢𑀦𑀸𑀤𑀻𑀦𑀁, 𑀢𑁂 𑀧𑀦 𑀲𑀩𑁆𑀩𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀘 𑀫𑀸𑀬𑀸 𑀅𑀲𑀸𑀭𑀸 𑀅𑀕𑀬𑁆𑀳𑀼𑀧𑀕𑀸. 𑀦 𑀳𑀺 𑀢𑀁 𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀼𑀁 𑀲𑀓𑁆𑀓𑀸, 𑀇𑀢𑁆𑀢𑀭𑀸 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀫𑀡𑀺𑀆𑀤𑀺𑀫𑁂𑀯 𑀫𑀡𑀺𑀆𑀤𑀺𑀭𑀽𑀧𑁂𑀦 𑀤𑀲𑁆𑀲𑁂𑀦𑁆𑀢𑀻 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀲𑀸𑀭𑀁 𑀇𑀢𑁆𑀢𑀭𑀁 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀆𑀕𑀘𑁆𑀙𑀦𑁆𑀢𑀁 𑀯𑀺𑀬, 𑀕𑀘𑁆𑀙𑀦𑁆𑀢𑀁 𑀯𑀺𑀬, 𑀞𑀺𑀢𑀁 𑀯𑀺𑀬, 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀘 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑀺, 𑀅𑀜𑁆𑀜𑀤𑁂𑀯 𑀘𑀺𑀢𑁆𑀢𑀁 𑀆𑀕𑀫𑀦𑁂, 𑀅𑀜𑁆𑀜𑀁 𑀕𑀫𑀦𑀸𑀤𑀻𑀲𑀽𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸𑀲𑀤𑀺𑀲𑀁.

𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀲𑀼𑀪𑀸𑀤𑀺𑀲𑀪𑀸𑀯𑀸 𑀏𑀯 𑀲𑀁𑀓𑀺𑀮𑁂𑀲𑀸𑀲𑀼𑀘𑀺𑀯𑀢𑁆𑀣𑀼𑀪𑀸𑀯𑀸𑀤𑀺𑀢𑁄𑀢𑀺 𑀅𑀲𑀼𑀪𑀸𑀤𑀺𑀢𑁄 𑀤𑀝𑁆𑀞𑀩𑁆𑀩𑀸 𑀏𑀯, 𑀢𑀣𑀸𑀧𑀺 𑀓𑀢𑁆𑀣𑀘𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀲𑀼𑀔𑀕𑁆𑀕𑀳𑀡𑀻𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑁂𑀲𑀢𑁄 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑀼𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀓𑀭𑀸𑀢𑀺 𑀢𑁂𑀲𑀁 𑀕𑁄𑀘𑀭𑀪𑀸𑀯𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀲𑀼𑀪𑀸𑀤𑀺𑀪𑀸𑀯𑁂𑀦 𑀤𑀝𑁆𑀞𑀩𑁆𑀩𑀢𑀸 𑀯𑀼𑀢𑁆𑀢𑀸.

𑁫𑁦𑁯. 𑀔𑀦𑁆𑀥𑁂𑀳𑀺 𑀦 𑀯𑀺𑀳𑀜𑁆𑀜𑀢𑀺 𑀧𑀭𑀺𑀯𑀺𑀤𑀺𑀢𑀲𑀪𑀸𑀯𑀢𑁆𑀢𑀸. 𑀯𑀺𑀧𑀲𑁆𑀲𑀓𑁄𑀧𑀺 𑀢𑁂𑀲𑀁 𑀯𑀺𑀧𑀢𑁆𑀢𑀺𑀬𑀁 𑀦 𑀤𑀼𑀓𑁆𑀔𑀫𑀸𑀧𑀚𑁆𑀚𑀢𑀺, 𑀔𑀻𑀡𑀸𑀲𑀯𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂 𑀳𑀺 𑀆𑀬𑀢𑀺𑀫𑁆𑀧𑀺 𑀔𑀦𑁆𑀥𑁂𑀳𑀺 𑀦 𑀩𑀸𑀥𑀻𑀬𑀦𑁆𑀢𑀻𑀢𑀺.

𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 ‘‘𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀲𑀁. 𑀦𑀺. 𑁩.𑁫𑁬,𑁫𑁭) 𑀯𑀘𑀦𑀢𑁄 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑁄 𑀢𑀲𑁆𑀲 𑀲𑀫𑀼𑀤𑀬𑀪𑀽𑀢𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀧𑀺 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀜𑀸𑀢𑀧𑀭𑀺𑀜𑁆𑀜𑀸. 𑀢𑀲𑁆𑀲 𑀘 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀳𑁄𑀢𑀻𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀧𑀭𑀺𑀜𑁆𑀜𑀢𑁆𑀢𑀬𑁂 𑀲𑀺𑀚𑁆𑀛𑀦𑁆𑀢𑁂 𑀇𑀫𑁂 𑀯𑀺𑀧𑀮𑁆𑀮𑀸𑀲𑀸𑀤𑀬𑁄 𑀯𑀺𑀥𑀫𑀻𑀬𑀦𑁆𑀢𑀺 𑀏𑀯𑀸𑀢𑀺 𑀆𑀳 ‘‘𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀫𑀭𑀸𑀕𑀪𑀽𑀢𑀁 𑀅𑀪𑀺𑀚𑁆𑀛𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣’’𑀦𑁆𑀢𑀺. 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀁 𑀳𑁄𑀢𑀺 ¶ , 𑀓𑀸𑀫𑀭𑀸𑀕𑀫𑀼𑀔𑁂𑀦 𑀯𑀸 𑀲𑀩𑁆𑀩𑀮𑁄𑀪𑀧𑁆𑀧𑀳𑀸𑀦𑀁 𑀯𑀤𑀢𑀺. 𑀦 𑀉𑀧𑀸𑀤𑀺𑀬𑀢𑀺 𑀦 𑀕𑀡𑁆𑀳𑀢𑀺 𑀦 𑀉𑀧𑁆𑀧𑀸𑀤𑁂𑀢𑀺.

‘‘𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁩𑁯; 𑀫𑀳𑀸𑀯. 𑁧; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑁄 𑀢𑀲𑁆𑀲𑀸 𑀧𑀘𑁆𑀘𑀬𑀪𑀽𑀢𑁂 𑀨𑀲𑁆𑀲𑀸𑀳𑀸𑀭𑁂𑀧𑀺 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀆𑀳𑀸𑀭𑀧𑀭𑀺𑀚𑀸𑀦𑀦𑁂 𑀯𑀼𑀢𑁆𑀢𑀦𑀬𑁂𑀦 𑀨𑀲𑁆𑀲𑀧𑀭𑀺𑀚𑀸𑀦𑀦𑀁 𑀬𑁄𑀚𑁂𑀢𑀩𑁆𑀩𑀁. 𑀯𑁂𑀤𑀦𑀸𑀬 𑀤𑀼𑀓𑁆𑀔𑀢𑁄 𑀤𑀲𑁆𑀲𑀦𑁂𑀦 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺. 𑀲𑀼𑀔𑀢𑁆𑀣𑀫𑁂𑀯 𑀪𑀯𑀧𑀢𑁆𑀣𑀦𑀸 𑀳𑁄𑀢𑀻𑀢𑀺 𑀯𑁂𑀤𑀦𑀸𑀬 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄 𑀪𑀯𑁄𑀖𑀁 𑀉𑀢𑁆𑀢𑀭𑀢𑀺. 𑀢𑀢𑁄 𑀏𑀯 𑀪𑀯𑀬𑁄𑀕𑁂𑀦 𑀯𑀺𑀲𑀁𑀬𑀼𑀚𑁆𑀚𑀢𑀺. 𑀪𑀯𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀳𑁄𑀢𑀺, 𑀲𑀩𑁆𑀩𑀯𑁂𑀤𑀦𑀁 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑁂𑀦 𑀅𑀧𑀼𑀩𑁆𑀩𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀺𑀢𑀁, 𑀲𑀼𑀔𑀁 𑀯𑀸 𑀯𑀺𑀦𑀸𑀲𑀺𑀢𑀁 𑀦 𑀘𑀺𑀦𑁆𑀢𑁂𑀢𑀺, 𑀢𑀢𑁄 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺 (𑀥. 𑀲. 𑁧𑁨𑁩𑁭; 𑀯𑀺𑀪. 𑁯𑁦𑁯) 𑀆𑀖𑀸𑀢𑀯𑀢𑁆𑀣𑀼𑀧𑁆𑀧𑀳𑀸𑀦𑀢𑁄 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺. ‘‘𑀲𑀼𑀔𑀩𑀳𑀼𑀮𑁂 𑀲𑀼𑀕𑀢𑀺𑀪𑀯𑁂 𑀲𑀼𑀤𑁆𑀥𑀻’’𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀳𑀺 𑀲𑀼𑀤𑁆𑀥𑀺𑀁 𑀧𑀭𑀸𑀫𑀲𑀦𑁆𑀢𑁄 𑀲𑀼𑀔𑀧𑀢𑁆𑀣𑀦𑀸𑀯𑀲𑁂𑀦𑁂𑀯 𑀧𑀭𑀸𑀫𑀲𑀢𑀻𑀢𑀺 𑀯𑁂𑀤𑀦𑀸𑀬 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄𑀧𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺.

𑀫𑀦𑁄𑀲𑀜𑁆𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑁂 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀢𑀜𑁆𑀘 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀢𑀻𑀭𑁂𑀢𑀺 𑀘𑀸𑀢𑀺 ‘‘𑀲𑀜𑁆𑀜𑀁 𑀲𑀗𑁆𑀔𑀸𑀭𑁂…𑀧𑁂… 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀲𑀗𑁆𑀔𑀸𑀭𑁂 𑀅𑀦𑀢𑁆𑀢𑀸𑀢𑀺 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀤𑀺𑀝𑁆𑀞𑀺𑀫𑀽𑀮𑀓𑀢𑁆𑀢𑀸 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀅𑀢𑁆𑀢𑀤𑀺𑀝𑁆𑀞𑀺𑀁 𑀯𑀺𑀬 𑀲𑀩𑁆𑀩𑀤𑀺𑀝𑁆𑀞𑀺𑀬𑁄𑀧𑀺 𑀯𑀺𑀥𑀫𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑁄𑀖𑀁 𑀉𑀢𑁆𑀢𑀭𑀢𑀺…𑀧𑁂… 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀻’’𑀢𑀺 𑀆𑀳.

𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀢𑀺𑀲𑁆𑀲𑁄𑀧𑀺 𑀅𑀦𑀼𑀧𑀲𑁆𑀲𑀦𑀸 𑀉𑀲𑁆𑀲𑀼𑀓𑁆𑀓𑀦𑁆𑀢𑁄 𑀢𑀻𑀳𑀺𑀧𑀺 𑀧𑀭𑀺𑀜𑁆𑀜𑀸𑀳𑀺 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀺. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺. 𑀢𑀢𑁆𑀣 𑀦𑀺𑀘𑁆𑀘𑀕𑁆𑀕𑀸𑀳𑀩𑀸𑀳𑀼𑀮𑁆𑀮𑀢𑁄 𑀅𑀯𑀺𑀚𑁆𑀚𑀸𑀬 𑀯𑀺𑀜𑁆𑀜𑀸𑀡𑁂 𑀖𑀦𑀕𑀳𑀡𑀁 𑀳𑁄𑀢𑀻𑀢𑀺 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀅𑀯𑀺𑀚𑁆𑀚𑁄𑀖𑀁 𑀉𑀢𑁆𑀢𑀭𑀢𑀺. 𑀢𑀢𑁄 𑀏𑀯 𑀅𑀯𑀺𑀚𑁆𑀚𑀸𑀬𑁄𑀕𑁂𑀦 𑀯𑀺𑀲𑀁𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁂𑀦 𑀅𑀦𑀸𑀲𑀯𑁄 𑀘 𑀳𑁄𑀢𑀺. 𑀫𑁄𑀳𑀩𑀮𑁂𑀦𑁂𑀯 𑀲𑀻𑀮𑀩𑁆𑀩𑀢𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀢𑀁 𑀧𑀚𑀳𑀦𑁆𑀢𑁄 ‘‘𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺.

‘‘𑀬𑀜𑁆𑀘 ¶ 𑀔𑁄 𑀇𑀤𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀻𑀖𑀭𑀢𑁆𑀢𑀁 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 ¶ 𑀧𑀭𑀸𑀫𑀝𑁆𑀞𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁨) 𑁋

𑀯𑀘𑀦𑀢𑁄 𑀬𑀣𑀸 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑀺, 𑀏𑀯𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀻𑀢𑀺.

𑀏𑀯𑀁 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀧𑀮𑁆𑀮𑀸𑀲𑀸𑀤𑀺𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀥𑀫𑀦𑀼𑀧𑀸𑀬𑀪𑀸𑀯𑀢𑁄 𑀏𑀯𑀁 𑀯𑀺𑀧𑀼𑀮𑀼𑀤𑀬𑀁. 𑀯𑀥𑀓𑀸𑀤𑀺𑀯𑀲𑁂𑀦𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀸𑀤𑀺𑀯𑀲𑁂𑀦. 𑀧𑀲𑁆𑀲𑁂𑀬𑁆𑀬𑀸𑀢𑀺 𑀜𑀸𑀡𑀤𑀲𑁆𑀲𑀦𑁂𑀦 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑁂𑀬𑁆𑀬.

𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀘𑀼𑀤𑁆𑀤𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁫. 𑀆𑀬𑀢𑀦𑀥𑀸𑀢𑀼𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀆𑀬𑀢𑀦𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁫𑁧𑁦. ‘‘𑀔𑀦𑁆𑀥𑀸𑀬𑀢𑀦𑀸’’𑀢𑀺𑀆𑀤𑀺𑀦𑀸 ¶ ¶ 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑀸𑀦𑀺 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀢𑁆𑀯𑀸 𑀕𑀡𑀦𑀧𑀭𑀺𑀘𑁆𑀙𑁂𑀤𑁂𑀦𑀸𑀳 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺. 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀧𑀭𑀢𑁄 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺 𑀦𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀁.

𑀅𑀢𑁆𑀣𑁄 𑀦𑀸𑀫 𑀲𑀤𑁆𑀤𑀢𑁆𑀣𑁄, 𑀪𑀸𑀯𑀢𑁆𑀣𑁄 𑀧𑀦 𑀮𑀓𑁆𑀔𑀡𑀫𑁂𑀯. 𑀲𑁄 𑀧𑀦 𑀲𑀤𑁆𑀤𑀢𑁆𑀣𑁄 𑀤𑀼𑀯𑀺𑀥𑁄 𑁋 𑀅𑀲𑀸𑀥𑀸𑀭𑀡𑁄 𑀲𑀸𑀥𑀸𑀭𑀡𑁄𑀢𑀺. 𑀢𑀢𑁆𑀣 𑀅𑀲𑀸𑀥𑀸𑀭𑀡𑁄 𑀘𑀓𑁆𑀔𑀸𑀤𑀺𑀲𑀤𑁆𑀤𑀢𑁆𑀣𑁄, 𑀲𑀸𑀥𑀸𑀭𑀡𑁄 𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀤𑁆𑀯𑀸𑀤𑀲𑀦𑁆𑀦𑀫𑁆𑀧𑀺 𑀲𑀫𑀸𑀦𑀢𑁆𑀢𑀸.

𑀢𑁂𑀲𑀼 𑀅𑀲𑀸𑀥𑀸𑀭𑀡𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑁂𑀲𑀢𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑁂𑀲𑀢𑁄𑀢𑀺 𑀯𑀺𑀲𑁂𑀲𑀢𑁆𑀣𑀢𑁄, 𑀘𑀓𑁆𑀔𑀸𑀤𑀺𑀲𑀤𑁆𑀤𑀢𑁆𑀣𑀢𑁄𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀤𑁂𑀢𑀻𑀢𑀺 𑀘𑀓𑁆𑀔𑀢𑀺-𑀲𑀤𑁆𑀤𑁄 ‘‘𑀫𑀥𑀼𑀁 𑀘𑀓𑁆𑀔𑀢𑀺, 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑀺 𑀭𑀲𑀲𑀸𑀬𑀦𑀢𑁆𑀣𑁄 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. ‘‘𑀘𑀓𑁆𑀔𑀼𑀁 𑀔𑁄 𑀧𑀦, 𑀫𑀸𑀕𑀡𑁆𑀟𑀺𑀬, 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢’’𑀦𑁆𑀢𑀺 (𑀫. 𑀦𑀺. 𑁨.𑁨𑁦𑁯) 𑀯𑀘𑀦𑀢𑁄 𑀘𑀓𑁆𑀔𑀼 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺. 𑀲𑀢𑀺𑀧𑀺 𑀲𑁄𑀢𑀸𑀤𑀻𑀦𑀁 𑀲𑀤𑁆𑀤𑀸𑀭𑀸𑀫𑀢𑀸𑀤𑀺𑀪𑀸𑀯𑁂 𑀬𑁄 ‘‘𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁯𑁭) 𑀧𑀸𑀴𑀺𑀬𑀁, ‘‘𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑁬𑁦𑁦; 𑀯𑀺𑀲𑀼𑀤𑁆𑀥𑀺. 𑁨.𑁪𑁩𑁩) 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑁄 𑀅𑀢𑁆𑀣𑀯𑀺𑀲𑁂𑀲𑁄, 𑀢𑀢𑁆𑀣𑁂𑀯 𑀦𑀺𑀭𑀼𑀴𑁆𑀳𑀢𑁆𑀢𑀸 𑀘𑀓𑁆𑀔𑀼𑀫𑁆𑀳𑀺 𑀏𑀯 𑀘𑀓𑁆𑀔𑀼𑀲𑀤𑁆𑀤𑁄 𑀧𑀯𑀢𑁆𑀢𑀢𑀺 𑀕𑀯𑀸𑀤𑀻𑀲𑀼 𑀕𑁄𑀲𑀤𑁆𑀤𑀸𑀤𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀲𑀤𑁆𑀤𑀮𑀓𑁆𑀔𑀡𑀲𑀺𑀤𑁆𑀥𑀲𑁆𑀲 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. 𑀘𑀓𑁆𑀔𑀢𑀻𑀢𑀺 𑀳𑀺 𑀆𑀘𑀺𑀓𑁆𑀔𑀢𑀺, 𑀅𑀪𑀺𑀩𑁆𑀬𑀢𑁆𑀢𑀁 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀢𑁆𑀢𑀲𑁆𑀲 𑀘 𑀯𑀤𑀦𑁆𑀢𑀲𑁆𑀲 𑀯𑀺𑀬 𑀲𑀫𑀯𑀺𑀲𑀫𑀯𑀺𑀪𑀸𑀯𑀦𑀫𑁂𑀯 ¶ 𑀆𑀘𑀺𑀓𑁆𑀔𑀦𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄’’𑀢𑀺, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀯𑀺𑀪𑀸𑀯𑀦𑀢𑁆𑀣𑀢𑀸 𑀘 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀭𑀢𑁆𑀢𑀤𑀼𑀝𑁆𑀞𑀸𑀤𑀺𑀓𑀸𑀮𑁂𑀲𑀼 𑀓𑀓𑀡𑁆𑀝𑀓𑀭𑀽𑀧𑀁 𑀯𑀺𑀬, 𑀉𑀤𑁆𑀤𑀭𑀽𑀧𑀁 𑀯𑀺𑀬 𑀘 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀭𑀽𑀧𑀬𑀢𑀺 𑀭𑀽𑀧𑀫𑀺𑀯 𑀧𑀓𑀸𑀲𑀁 𑀓𑀭𑁄𑀢𑀺, 𑀲𑀯𑀺𑀕𑁆𑀕𑀳𑀫𑀺𑀯 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀢𑁆𑀣𑀸𑀭𑀡𑀁 𑀯𑀸 ¶ 𑀭𑀽𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, 𑀯𑀺𑀢𑁆𑀣𑀸𑀭𑀡𑀜𑁆𑀘 𑀧𑀓𑀸𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀧𑀓𑀸𑀲𑀦𑀢𑁆𑀣𑁄 𑀏𑀯 𑀭𑀽𑀧𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀯𑀡𑁆𑀡𑀯𑀸𑀘𑀓𑀲𑁆𑀲 𑀭𑀽𑀧𑀲𑀤𑁆𑀤𑀲𑁆𑀲 𑀭𑀽𑀧𑀬𑀢𑀻𑀢𑀺 𑀦𑀺𑀩𑁆𑀩𑀘𑀦𑀁, 𑀭𑀽𑀧𑀓𑁆𑀔𑀦𑁆𑀥𑀯𑀸𑀘𑀓𑀲𑁆𑀲 𑀭𑀼𑀧𑁆𑀧𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀉𑀤𑀸𑀳𑀭𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁂 𑀯𑀘𑀦𑀲𑀤𑁆𑀤𑁄 𑀏𑀯 𑀕𑀳𑀺𑀢𑁄 𑀲𑀺𑀬𑀸, 𑀦 𑀘 𑀯𑀘𑀦𑀲𑀤𑁆𑀤𑁄 𑀏𑀯𑁂𑀢𑁆𑀣 𑀲𑀤𑁆𑀤𑁄, 𑀅𑀣 𑀔𑁄 𑀲𑀩𑁆𑀩𑁄𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺. 𑀲𑀧𑁆𑀧𑀢𑀻𑀢𑀺 𑀲𑀓𑁂𑀳𑀺 𑀧𑀘𑁆𑀘𑀬𑁂𑀳𑀺 𑀲𑀧𑁆𑀧𑀻𑀬𑀢𑀺, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀕𑀫𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀲𑀽𑀘𑀬𑀢𑀻𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀅𑀧𑀸𑀓𑀝𑀁 𑀕𑀦𑁆𑀥𑀯𑀲𑁂𑀦 ‘‘𑀇𑀤𑀁 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺 𑀧𑀓𑀸𑀲𑁂𑀢𑀺, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀧𑀼𑀧𑁆𑀨𑀸𑀤𑀺𑀯𑀢𑁆𑀣𑀼𑀁 ‘‘𑀏𑀢𑁆𑀣 𑀧𑀼𑀧𑁆𑀨𑀫𑀢𑁆𑀣𑀺, 𑀘𑀫𑁆𑀧𑀓𑀸𑀤𑀺𑀨𑀮𑀫𑀢𑁆𑀣𑀺, 𑀅𑀫𑁆𑀩𑀸𑀤𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀲𑀕𑁆𑀕𑀳𑀡𑀫𑀽𑀮𑀓𑀢𑁆𑀢𑀸 𑀅𑀚𑁆𑀛𑁄𑀳𑀭𑀡𑀲𑁆𑀲 𑀚𑀻𑀯𑀺𑀢𑀳𑁂𑀢𑀼𑀫𑁆𑀳𑀺 𑀆𑀳𑀸𑀭𑀭𑀲𑁂 𑀦𑀺𑀦𑁆𑀦𑀢𑀸𑀬 𑀚𑀻𑀯𑀺𑀢𑀁 𑀅𑀯𑁆𑀳𑀬𑀢𑀻𑀢𑀺 𑀚𑀺𑀯𑁆𑀳𑀸 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀯𑀼𑀢𑁆𑀢𑁄 𑀅𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑀁 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 𑀓𑀸𑀫𑀭𑀸𑀕𑀦𑀺𑀤𑀸𑀦𑀓𑀫𑁆𑀫𑀚𑀦𑀺𑀢𑁂𑀲𑀼, 𑀓𑀸𑀫𑀭𑀸𑀕𑀲𑁆𑀲 𑀘 𑀯𑀺𑀲𑁂𑀲𑀧𑀘𑁆𑀘𑀬𑁂𑀲𑀼 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑁂𑀲𑀼 𑀓𑀸𑀬𑀲𑁆𑀲 𑀯𑀺𑀲𑁂𑀲𑀢𑀭𑀲𑀸𑀲𑀯𑀧𑀘𑁆𑀘𑀬𑀢𑁆𑀢𑀸. 𑀢𑁂𑀦 𑀳𑀺 𑀨𑁄𑀝𑁆𑀞𑀩𑁆𑀩𑀲𑀼𑀔𑀁 𑀅𑀲𑁆𑀲𑀸𑀤𑁂𑀦𑁆𑀢𑀸 𑀲𑀢𑁆𑀢𑀸 𑀫𑁂𑀣𑀼𑀦𑀫𑁆𑀧𑀺 𑀲𑁂𑀯𑀦𑁆𑀢𑀺. 𑀉𑀧𑁆𑀧𑀢𑁆𑀢𑀺𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀓𑀸𑀬𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀓𑀸 𑀯𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀩𑀮𑀯𑀓𑀸𑀫𑀸𑀲𑀯𑀸𑀤𑀺𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 𑀲𑀸𑀲𑀯𑀸𑀢𑀺 𑀯𑀼𑀢𑁆𑀢𑀸𑀢𑀺 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀫𑀼𑀦𑀸𑀢𑀻𑀢𑀺 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑁄 𑀯𑀺𑀬, 𑀫𑀳𑀸𑀢𑀼𑀮𑀸𑀬 𑀥𑀸𑀭𑀬𑀫𑀸𑀦𑁄 𑀯𑀺𑀬 𑀘 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀢𑁂 𑀇𑀢𑀺 𑀯𑀸 𑀫𑀦𑁄, 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀬𑁂 𑀯𑀺𑀲𑁂𑀲𑀮𑀓𑁆𑀔𑀡𑁂𑀦 𑀆𑀬𑀢𑀦𑀲𑀤𑁆𑀤𑀧𑀭𑀸 𑀯𑀢𑁆𑀢𑀩𑁆𑀩𑀸, 𑀢𑁂 𑀘𑀓𑁆𑀔𑀸𑀤𑀬𑁄 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀢𑀢𑁄 𑀅𑀜𑁆𑀜𑁂 𑀫𑀦𑁄𑀕𑁄𑀘𑀭𑀪𑀽𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑁂𑀯 𑀏𑀓𑀸𑀬𑀢𑀦𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀬𑀣𑀸 𑀳𑀺 𑀑𑀴𑀸𑀭𑀺𑀓𑀯𑀢𑁆𑀣𑀸𑀭𑀫𑁆𑀫𑀡𑀫𑀦𑀦𑀲𑀗𑁆𑀔𑀸𑀢𑁂𑀳𑀺 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑁂𑀳𑀺 𑀧𑀼𑀭𑀺𑀫𑀸𑀦𑀺 𑀧𑀸𑀓𑀝𑀸𑀦𑀺, 𑀢𑀣𑀸 𑀅𑀧𑀸𑀓𑀝𑀸 𑀘 𑀅𑀜𑁆𑀜𑁂 𑀫𑀦𑁄𑀕𑁄𑀘𑀭𑀸 𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀦 𑀥𑀸𑀭𑁂𑀦𑁆𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑁄 𑀥𑀫𑁆𑀫𑀲𑀤𑁆𑀤𑁄. 𑀥𑀸𑀭𑀻𑀬𑀦𑁆𑀢𑀺 𑀲𑀸𑀫𑀜𑁆𑀜𑀭𑀽𑀧𑁂𑀦 𑀅𑀯𑀥𑀸𑀭𑀻𑀬𑀦𑁆𑀢𑀻𑀢𑀺 𑀯𑀸 𑀥𑀫𑁆𑀫𑀸. 𑀬𑀣𑀸 𑀳𑀺 𑀭𑀽𑀧𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑁄 𑀏𑀯 𑀬𑀣𑀸𑀲𑀓𑀁 ¶ 𑀲𑀪𑀸𑀯𑀢𑁄 𑀯𑀺𑀜𑁆𑀜𑀸𑀬𑀦𑁆𑀢𑀺 ¶ , 𑀦 𑀏𑀯𑀫𑁂𑀢𑁂, 𑀏𑀢𑁂 𑀧𑀦 𑀅𑀦𑁂𑀓𑀥𑀫𑁆𑀫𑀪𑀸𑀯𑀢𑁄, 𑀲𑀸𑀥𑀸𑀭𑀡𑀢𑁄, 𑀲𑀪𑀸𑀯𑀲𑀸𑀫𑀜𑁆𑀜𑀢𑁄𑀧𑀺 𑀫𑀦𑀲𑀸 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺.

𑁫𑁧𑁧. 𑀲𑁂𑀦 𑀲𑁂𑀦𑀸𑀢𑀺 𑀲𑀓𑁂𑀦 𑀲𑀓𑁂𑀦. 𑀉𑀝𑁆𑀞𑀳𑀦𑁆𑀢𑀻𑀢𑀺 𑀉𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀯𑀸𑀬𑀫𑀦𑁆𑀢𑀻𑀢𑀺 𑀉𑀲𑁆𑀲𑀳𑀦𑁆𑀢𑀺, 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀘 𑀅𑀢𑁆𑀣𑁂 𑀆𑀬𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀬𑀢𑀦𑀸𑀦𑀻𑀢𑀺 𑀅𑀥𑀺𑀓𑀭𑀡𑀢𑁆𑀣𑁄 𑀆𑀬𑀢𑀦𑀲𑀤𑁆𑀤𑁄, 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀓𑀢𑁆𑀢𑀼𑀅𑀢𑁆𑀣𑁄. 𑀢𑁂 𑀘𑀸𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑁂 𑀥𑀫𑁆𑀫𑁂. 𑀢𑁂 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀲𑀼 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀬𑀸. 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀮𑀻𑀦𑀸𑀦𑀺 𑀅𑀧𑀸𑀓𑀝𑀸𑀦𑀺 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀧𑀢𑁆𑀣𑀭𑁂𑀦𑁆𑀢𑀺 𑀧𑀸𑀓𑀝𑀸𑀦𑀺 𑀓𑀭𑁄𑀦𑁆𑀢𑀺, 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀲𑀁𑀲𑀸𑀭𑀤𑀼𑀓𑁆𑀔𑀁. 𑀦 𑀦𑀺𑀯𑀢𑁆𑀢𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀦 𑀦𑀺𑀭𑀼𑀚𑁆𑀛𑀢𑀺. 𑀆𑀬𑀢𑀦𑀁 𑀆𑀬𑀢𑀦𑀦𑁆𑀢𑀺 𑀆𑀫𑁂𑀟𑀺𑀢𑀯𑀘𑀦𑀁 𑀅𑀲𑁆𑀲𑀸 𑀲𑀫𑀜𑁆𑀜𑀸𑀬 𑀘𑀓𑁆𑀔𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑁫𑁧𑁨. 𑀏𑀯𑀁 𑀅𑀯𑀬𑀯𑀪𑁂𑀤𑀯𑀲𑁂𑀦 𑀆𑀬𑀢𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀭𑀺𑀬𑀸𑀬𑀢𑁄𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀸𑀥𑀼𑀨𑀮𑀪𑀭𑀺𑀢𑀢𑀸𑀬, 𑀅𑀧𑀭𑀺𑀲𑁆𑀲𑀬𑀢𑀸𑀬 𑀘 𑀫𑀦𑁄𑀭𑀫𑁆𑀫𑁂.

𑀢𑀢𑁆𑀣 𑀦𑀺𑀯𑀲𑀦𑁆𑀢𑀻𑀢𑀺 𑀦𑀺𑀯𑀲𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺. 𑀬𑀢𑁆𑀣 𑀲𑀼𑀯𑀡𑁆𑀡𑀭𑀢𑀦𑀸𑀤𑀻𑀦𑀺 𑀦𑀺𑀯𑀼𑀢𑁆𑀣𑀸𑀦𑀺 𑀯𑀺𑀬 𑀆𑀓𑀺𑀡𑁆𑀡𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀢𑁂𑀲𑀁 𑀆𑀓𑀭𑁄, 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘𑀓𑁆𑀔𑀸𑀤𑀻𑀲𑀽𑀢𑀺 𑀢𑁂 𑀢𑁂𑀲𑀁 𑀆𑀓𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀸𑀤𑀻𑀲𑀼 𑀘…𑀧𑁂… 𑀆𑀓𑀭𑁄’’𑀢𑀺. 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀫𑀦𑁄 𑀫𑀦𑁄𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀢𑁂𑀲𑀁 𑀤𑁆𑀯𑀸𑀭𑀪𑀸𑀯𑁄 𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀳𑀼𑀢𑁆𑀯𑀸 𑀏𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀅𑀦𑁂𑀓𑁂 𑀏𑀓𑀚𑁆𑀛𑀁 𑀢𑀢𑁆𑀣 𑀮𑀩𑁆𑀪𑀫𑀸𑀦𑀸 𑀲𑀫𑁄𑀲𑀝𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀲𑀫𑁄𑀲𑀭𑀡𑀢𑁄’’𑀢𑀺. 𑀦 𑀳𑀺 𑀥𑀫𑁆𑀫𑀸𑀦𑀁 𑀅𑀦𑀸𑀕𑀢𑀤𑁆𑀥𑁂 𑀯𑀺𑀚𑁆𑀚𑀫𑀸𑀦𑀢𑀸𑀮𑁂𑀲𑁄𑀧𑀺 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂’’𑀢𑀺 (𑀫𑀳𑀸𑀦𑀺. 𑁧𑁦). 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀢𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀏𑀯 𑀉𑀧𑁆𑀧𑀢𑁆𑀢𑀺𑀢𑁄. 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁂 𑀘𑀓𑁆𑀔𑀸𑀤𑀺𑀓𑁂 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀧𑁆𑀧𑀢𑁆𑀢𑀺𑀤𑁂𑀲𑁄 𑀦𑀸𑀫 𑀅𑀢𑁆𑀣𑀺. 𑀬𑀤𑀕𑁆𑀕𑁂𑀦 𑀯𑀸 𑀢𑁂 ¶ 𑀢𑁂𑀲𑀁 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀽𑀢𑀸, 𑀢𑀤𑀕𑁆𑀕𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑁄. 𑀦 𑀳𑀺 𑀧𑀘𑁆𑀘𑀬𑀪𑀸𑀯𑀫𑀦𑁆𑀢𑀭𑁂𑀦 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀆𑀥𑀸𑀭𑀸𑀥𑁂𑀬𑁆𑀬𑀪𑀸𑀯𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀸𑀯𑁂𑀦𑀸’’𑀢𑀺. 𑀩𑁆𑀬𑀢𑀺𑀭𑁂𑀓𑀧𑀥𑀸𑀦𑀢𑀸𑀬 𑀓𑀸𑀭𑀡𑀮𑀓𑁆𑀔𑀡𑀲𑁆𑀲 ‘‘𑀢𑁂𑀲𑀁 𑀅𑀪𑀸𑀯𑁂 𑀅𑀪𑀸𑀯𑀢𑁄’’ 𑀇𑀘𑁆𑀘𑁂𑀯𑀸𑀳, 𑀦 ‘‘𑀪𑀸𑀯𑁂 𑀪𑀸𑀯𑀢𑁄’’𑀢𑀺.

𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦𑀸𑀢𑀺 ¶ ‘‘𑀘𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸, ‘‘𑀆𑀬𑀢𑀦𑀢𑁄 𑀆𑀬𑀸𑀦𑀁 𑀢𑀦𑀦𑀢𑁄’’𑀢𑀺𑀆𑀤𑀺𑀦𑀸, ‘‘𑀦𑀺𑀯𑀸𑀲𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀢𑁆𑀣𑁂𑀦. 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀩𑀳𑀼𑀪𑀸𑀯𑀢𑁄 𑀬𑁂𑀪𑀼𑀬𑁆𑀬𑁂𑀦 𑀘 𑀢𑁂 𑀩𑀳𑀽 𑀏𑀯 𑀳𑀼𑀢𑁆𑀯𑀸 𑀓𑀺𑀘𑁆𑀘𑀓𑀭𑀸𑀢𑀺 ‘‘𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄.

𑁫𑁧𑁩. 𑀢𑀣𑀸 𑀢𑀣𑀸 𑀮𑀓𑁆𑀔𑀺𑀢𑀩𑁆𑀩𑀢𑁄 𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀮𑀓𑁆𑀔𑀡𑀁, 𑀲𑀪𑀸𑀯𑁄.

𑀢𑀸𑀯𑀪𑀸𑀯𑀢𑁄𑀢𑀺 𑀢𑀢𑁆𑀢𑀓𑀢𑁄, 𑀢𑁂𑀦 𑀅𑀦𑀽𑀦𑀸𑀥𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸 𑀅𑀥𑀺𑀓𑀪𑀸𑀯𑀢𑁄 𑀘𑁄𑀤𑀦𑀸 𑀦𑀢𑁆𑀣𑀺, 𑀲𑀮𑀓𑁆𑀔𑀡𑀥𑀸𑀭𑀡𑀁 𑀧𑀦 𑀲𑀩𑁆𑀩𑁂𑀲𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀊𑀦𑀘𑁄𑀤𑀦𑀸 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀸𑀤𑀬𑁄𑀧𑀺 𑀳𑀻’’𑀢𑀺𑀆𑀤𑀺. 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀺𑀢𑁆𑀯𑀸 𑀧𑀯𑀢𑁆𑀢𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄. 𑀘𑀮𑀦𑀯𑀲𑁂𑀦 𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀏𑀯 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀆𑀯𑀚𑁆𑀚𑀦𑀲𑁆𑀲𑀸𑀧𑀺 𑀓𑀸𑀭𑀡𑀪𑀽𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄…𑀧𑁂… 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭’’𑀦𑁆𑀢𑀺. 𑀅𑀲𑀸𑀥𑀸𑀭𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁. 𑀲𑀢𑀺𑀧𑀺 𑀅𑀲𑀸𑀥𑀸𑀭𑀡𑀪𑀸𑀯𑁂 𑀘𑀓𑁆𑀔𑀸𑀤𑀻𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀸𑀬𑀢𑀦𑁂𑀦 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀺 𑀯𑀸 𑀅𑀲𑀸𑀥𑀸𑀭𑀡𑀢𑀁 𑀲𑀦𑁆𑀥𑀸𑀬 ‘‘𑀅𑀲𑀸𑀥𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑁫𑁧𑁪. 𑀬𑁂𑀪𑀼𑀬𑁆𑀬𑀲𑀳𑀼𑀧𑁆𑀧𑀢𑁆𑀢𑀺𑀆𑀤𑀻𑀳𑀺 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀻𑀲𑀼 𑀅𑀬𑀼𑀢𑁆𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀓𑀲𑁆𑀲𑀘𑀺 𑀓𑀤𑀸𑀘𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀆𑀤𑀺 (𑀬𑀫. 𑀅𑀝𑁆𑀞. 𑀆𑀬𑀢𑀦𑀬𑀫𑀓 𑁧𑁮-𑁨𑁧). 𑀢𑀲𑁆𑀫𑀸 𑀆𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀦 𑀧𑀳𑀸𑀦𑀓𑁆𑀓𑀫𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁄, 𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀅𑀓𑀼𑀲𑀮𑀸𑀦𑀁 𑀏𑀓𑀘𑁆𑀘𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀧𑀚𑁆𑀚𑀦𑀻𑀬𑀢𑁄 ¶ , 𑀦 𑀪𑀽𑀫𑀺𑀓𑁆𑀓𑀫𑁄 𑀅𑀟𑁆𑀠𑁂𑀓𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀢𑁆𑀢𑀸, 𑀇𑀢𑀭𑁂𑀲𑀜𑁆𑀘 𑀘𑀢𑀼𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀏𑀓𑀘𑁆𑀘𑀲𑁆𑀲 𑀮𑁄𑀓𑀼𑀢𑁆𑀢𑀭𑀪𑀸𑀯𑀢𑁄 𑀘𑀸𑀢𑀺. ‘‘𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀻’’𑀢𑀺 𑀏𑀢𑁂𑀦 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁂𑀦, 𑀯𑀺𑀲𑀬𑀻𑀪𑀸𑀯𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺, 𑀢𑁂𑀲𑀼𑀧𑀺 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑁂𑀲𑀼 𑀧𑀸𑀓𑀝𑀢𑁆𑀢𑀸 𑀧𑀞𑀫𑀢𑀭𑀁 𑀘𑀓𑁆𑀔𑀸𑀬𑀢𑀦𑀁 𑀤𑁂𑀲𑀺𑀢𑀦𑁆𑀢𑀺.

𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀻𑀢𑀺 𑀏𑀢𑁆𑀣 𑀩𑀳𑀼𑀧𑀓𑀸𑀭𑀢𑁆𑀢𑀸𑀪𑀸𑀯𑁂𑀦 𑀘𑀓𑁆𑀔𑀼𑀲𑁄𑀢𑁂𑀳𑀺 𑀧𑀼𑀭𑀺𑀫𑀢𑀭𑀁 𑀅𑀤𑁂𑀲𑁂𑀢𑀩𑁆𑀩𑀸𑀦𑀺, 𑀲𑀳 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀏𑀓𑁂𑀦 𑀓𑀫𑁂𑀦 𑀤𑁂𑀲𑁂𑀢𑀩𑁆𑀩𑀸𑀦𑀻𑀢𑀺 𑀖𑀸𑀦𑀸𑀤𑀺𑀓𑁆𑀓𑀫𑁂𑀦 𑀤𑁂𑀲𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀅𑀜𑁆𑀜𑀣𑀸𑀧𑀺 𑀳𑀺 𑀤𑁂𑀲𑀺𑀢𑁂𑀲𑀼 𑀦 𑀦 𑀲𑀓𑁆𑀓𑀸 𑀘𑁄𑀤𑁂𑀢𑀼𑀁, 𑀦 𑀘 𑀲𑀓𑁆𑀓𑀸 𑀩𑁄𑀥𑁂𑀢𑀩𑁆𑀩𑀸𑀦𑀺 𑀦 𑀤𑁂𑀲𑁂𑀢𑀼𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀢𑁄 𑀲𑀼𑀧𑀸𑀓𑀝𑀸𑀦𑀻𑀢𑀺, 𑀫𑀦𑀸𑀬𑀢𑀦𑀁 𑀧𑀦 𑀓𑀺𑀜𑁆𑀘𑀺 𑀧𑀘𑁆𑀘𑀼𑀦𑁆𑀦𑀸𑀭𑀫𑁆𑀫𑀡𑀁…𑀧𑁂… 𑀓𑀺𑀜𑁆𑀘𑀺 𑀬𑀸𑀯 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼𑀧𑀺 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀘𑀢𑁆𑀢𑀸𑀭𑀺 𑀧𑀞𑀫𑀁 𑀯𑀼𑀢𑁆𑀢𑀸𑀦𑀺, 𑀢𑀢𑁄 𑀪𑀽𑀢𑀭𑀽𑀧𑀸𑀭𑀫𑁆𑀫𑀡𑀁. 𑀉𑀧𑀸𑀤𑀸𑀭𑀽𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀤𑀽𑀭𑀢𑀭𑁂 𑀤𑀽𑀭𑁂, 𑀲𑀻𑀖𑀢𑀭𑀁 𑀲𑀻𑀖𑀜𑁆𑀘 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀤𑀻𑀧𑀦𑀢𑁆𑀣𑀁 𑀘𑀓𑁆𑀔𑀸𑀤𑀻𑀦𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀘𑀓𑁆𑀔𑀼𑀲𑁄𑀢𑀤𑁆𑀯𑀬𑀜𑁆𑀳𑀺 𑀤𑀽𑀭𑀕𑁄𑀘𑀭𑀦𑁆𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁, 𑀢𑀢𑁆𑀭𑀸𑀧𑀺 𑀘𑀓𑁆𑀔𑀼 𑀤𑀽𑀭𑀢𑀭𑀕𑁄𑀘𑀭𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀲𑁆𑀲𑀦𑁆𑀢𑁄𑀧𑀺 𑀳𑀺 𑀤𑀽𑀭𑀢𑀭𑁂 𑀦𑀤𑀻𑀲𑁄𑀢𑀁, 𑀦 𑀢𑀲𑁆𑀲 𑀲𑁄𑀢𑀧𑀝𑀺𑀖𑀸𑀢𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀖𑀸𑀦𑀚𑀺𑀯𑁆𑀳𑀸𑀲𑀼𑀧𑀺 𑀖𑀸𑀦𑀁 𑀲𑀻𑀖𑀢𑀭𑀯𑀼𑀢𑁆𑀢𑀻𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁 𑀧𑀼𑀭𑀢𑁄 𑀞𑀧𑀺𑀢𑀫𑀢𑁆𑀢𑀲𑁆𑀲𑀧𑀺 𑀪𑁄𑀚𑀦𑀲𑁆𑀲 𑀕𑀦𑁆𑀥𑁄 𑀕𑀬𑁆𑀳𑀢𑀻𑀢𑀺. 𑀬𑀣𑀸𑀞𑀸𑀦𑀁 𑀯𑀸 𑀢𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀭𑀻𑀭𑁂 𑀲𑀩𑁆𑀩𑀼𑀧𑀭𑀺 𑀘𑀓𑁆𑀔𑀼𑀲𑁆𑀲 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀲 𑀅𑀥𑁄 𑀲𑁄𑀢𑀲𑁆𑀲, 𑀢𑀲𑁆𑀲 𑀅𑀥𑁄 𑀖𑀸𑀦𑀲𑁆𑀲, 𑀢𑀲𑁆𑀲 𑀅𑀥𑁄 𑀚𑀺𑀯𑁆𑀳𑀸𑀬, 𑀢𑀣𑀸 𑀓𑀸𑀬𑀲𑁆𑀲 𑀬𑁂𑀪𑀼𑀬𑁆𑀬𑀢𑁄, 𑀫𑀦𑁄 𑀧𑀦 𑀅𑀭𑀽𑀧𑀺𑀪𑀸𑀯𑀢𑁄 𑀲𑀩𑁆𑀩𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀢𑀁𑀢𑀁𑀕𑁄𑀘𑀭𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀏𑀯𑀫𑁆𑀧𑀺 𑀇𑀫𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀕𑁄𑀘𑀭𑁄 𑀯𑀺𑀲𑀬𑁄 𑀏𑀢𑀲𑁆𑀲𑀸𑀢𑀺 𑀕𑁄𑀘𑀭𑀯𑀺𑀲𑀬𑁄, 𑀫𑀦𑁄. 𑀓𑀲𑁆𑀲 𑀧𑀦 𑀕𑁄𑀘𑀭𑁄 𑀏𑀢𑀲𑁆𑀲 𑀯𑀺𑀲𑀬𑁄? 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺. 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑁆𑀲 𑀯𑀯𑀢𑁆𑀣𑀺𑀢𑀪𑀸𑀯𑀢𑁄 𑀲𑀯𑀺𑀪𑀢𑁆𑀢𑀺𑀪𑀸𑀯𑀢𑁄. 𑀏𑀢𑁂𑀦 𑀘𑀓𑁆𑀔𑀸𑀤𑀺𑀅𑀦𑀦𑁆𑀢𑀭𑀁 𑀭𑀽𑀧𑀸𑀤𑀺𑀯𑀘𑀦𑀲𑁆𑀲 𑀘 𑀓𑀸𑀭𑀡𑀫𑀸𑀳.

𑁫𑁧𑁫. 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀕𑀡𑀦𑀲𑀗𑁆𑀕𑀳𑀯𑀲𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀪𑀸𑀯𑀲𑀫𑀸𑀦𑀢𑀸𑀯𑀲𑁂𑀦. 𑀧𑀘𑁆𑀘𑀬𑀪𑁂𑀤𑁄 𑀓𑀫𑁆𑀫𑀸𑀤𑀺𑀪𑁂𑀤𑁄. 𑀤𑀸𑀦𑀸𑀤𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 ¶ 𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑁆𑀲, 𑀢𑀲𑁆𑀲 𑀘 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀸𑀦𑀁, 𑀩𑀸𑀳𑀺𑀭𑀸𑀦𑀜𑁆𑀘 𑀧𑀘𑁆𑀘𑀬𑀸𑀦𑀁 𑀪𑁂𑀤𑁂𑀦 𑀘𑀓𑁆𑀔𑀸𑀬𑀢𑀦𑀁 𑀪𑀺𑀦𑁆𑀦𑀁 𑀯𑀺𑀲𑀤𑀺𑀲𑀁 𑀳𑁄𑀢𑀻𑀢𑀺. 𑀦𑀺𑀭𑀬𑀸𑀤𑀺𑀓𑁄, 𑀅𑀧𑀤𑀸𑀤𑀺𑀕𑀢𑀺𑀦𑀸𑀦𑀸𑀓𑀭𑀡𑀜𑁆𑀘 𑀕𑀢𑀺𑀪𑁂𑀤𑁄 𑀕𑀢𑀻𑀦𑀁, 𑀕𑀢𑀻𑀲𑀼 𑀯𑀸 𑀪𑁂𑀤𑁄𑀢𑀺 𑀓𑀢𑁆𑀯𑀸. 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑁄, 𑀔𑀢𑁆𑀢𑀺𑀬𑀸𑀤𑀺𑀓𑁄 𑀘 𑀦𑀺𑀓𑀸𑀬𑀪𑁂𑀤𑁄. 𑀢𑀁𑀢𑀁𑀲𑀢𑁆𑀢𑀲𑀦𑁆𑀢𑀸𑀦𑀪𑁂𑀤𑁄 𑀧𑀼𑀕𑁆𑀕𑀮𑀪𑁂𑀤𑁄. 𑀬𑀸 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀅𑀦𑀦𑁆𑀢𑀧𑁆𑀧𑀪𑁂𑀤𑀢𑀸 𑀯𑀼𑀢𑁆𑀢𑀸, 𑀲𑁄 𑀏𑀯 𑀳𑀤𑀬𑀯𑀢𑁆𑀣𑀼𑀲𑁆𑀲 𑀪𑁂𑀤𑁄 𑀢𑀸𑀤𑀺𑀲𑀪𑁂𑀤𑀸𑀦𑀸𑀢𑀺𑀯𑀢𑁆𑀢𑀦𑀢𑁄. 𑀢𑀢𑁄 𑀫𑀦𑀸𑀬𑀢𑀦𑀲𑁆𑀲 𑀅𑀦𑀦𑁆𑀢𑀧𑁆𑀧𑀪𑁂𑀤𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀬𑀲𑁆𑀫𑀸 𑀛𑀸𑀦𑀯𑀺𑀭𑀳𑀺𑀢𑀁 𑀦𑀸𑀫 𑀮𑁄𑀓𑀼𑀢𑁆𑀢𑀭𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀏𑀓𑀸𑀲𑀻𑀢𑀺𑀬𑀸 𑀮𑁄𑀓𑀺𑀬𑀘𑀺𑀢𑁆𑀢𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀳 ‘‘𑀏𑀓𑀯𑀻𑀲𑀼𑀢𑁆𑀢𑀭𑀲𑀢𑀧𑁆𑀧𑀪𑁂𑀤𑀜𑁆𑀘𑀸’’𑀢𑀺. 𑀯𑀢𑁆𑀣𑀽𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼. 𑀢𑀧𑁆𑀧𑀪𑁂𑀤𑁂𑀦 𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀧𑁆𑀧𑀪𑁂𑀤𑀁. 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀛𑀸𑀦𑀸𑀥𑀺𑀧𑀢𑀺𑀪𑀽𑀫𑀺𑀆𑀭𑀫𑁆𑀫𑀡𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀻𑀮𑀁 𑀦𑀻𑀮𑀲𑁆𑀲 𑀲𑀪𑀸𑀕𑀁, 𑀅𑀜𑁆𑀜𑀁 𑀯𑀺𑀲𑀪𑀸𑀕𑀁. 𑀧𑀘𑁆𑀘𑀬𑁄 𑀓𑀫𑁆𑀫𑀸𑀤𑀺. 𑀢𑀢𑁆𑀣𑀸𑀧𑀺 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸, 𑀲𑀻𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 ¶ 𑀘 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀲𑀤𑁆𑀤𑁂𑀦 𑀕𑀢𑀺𑀦𑀺𑀓𑀸𑀬𑀪𑁂𑀤𑁄. 𑀲𑀪𑀸𑀯𑀦𑀸𑀦𑀢𑁆𑀢𑀪𑁂𑀤𑀢𑁄𑀢𑀺 𑀲𑀼𑀔𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀏𑀯𑀫𑀸𑀤𑀺𑀓𑁄 𑀲𑀪𑀸𑀯𑀪𑁂𑀤𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑁄𑀢𑀲𑀫𑁆𑀨𑀲𑁆𑀲𑀚𑀸𑀢𑀺 𑀏𑀯𑀫𑀸𑀤𑀺𑀓𑀁 𑀦𑀸𑀦𑀢𑁆𑀢𑀁.

𑁫𑁧𑁬. ‘‘𑀅𑀦𑀸𑀕𑀫𑀦𑀢𑁄 𑀅𑀦𑀺𑀕𑁆𑀕𑀫𑀦𑀢𑁄’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑀲𑀭𑀽𑀧𑀢𑁆𑀢𑀸 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀓𑀼𑀢𑁄𑀘𑀺 𑀦𑀸𑀕𑀘𑁆𑀙𑀦𑁆𑀢𑀺, 𑀯𑀬𑀢𑁄 𑀘 𑀉𑀤𑁆𑀥𑀁 𑀦 𑀓𑀢𑁆𑀣𑀘𑀺 𑀕𑀘𑁆𑀙𑀦𑁆𑀢𑀺, 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂𑀧𑀺 𑀇𑀢𑁆𑀢𑀭𑀓𑀸𑀮𑀢𑀸𑀬 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺. 𑀲𑀧𑀭𑀺𑀧𑁆𑀨𑀦𑁆𑀤𑀓𑀺𑀭𑀺𑀬𑀸𑀯𑀲𑁂𑀦 𑀈𑀳𑀦𑀁 𑀈𑀳𑀸, 𑀘𑀺𑀦𑁆𑀢𑀦𑀯𑀲𑁂𑀦 𑀩𑁆𑀬𑀸𑀧𑀸𑀭𑀦𑀁 𑀩𑁆𑀬𑀸𑀧𑀸𑀭𑁄, 𑀢𑀢𑁆𑀣 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀻’’𑀢𑀺. 𑀈𑀳𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘 𑀢𑀸𑀦𑀻’’𑀢𑀺𑀆𑀤𑀺. 𑀉𑀪𑀬𑀫𑁆𑀧𑀺 𑀧𑀦 𑀈𑀳𑀸 𑀘 𑀳𑁄𑀢𑀺 𑀩𑁆𑀬𑀸𑀧𑀸𑀭𑁄 𑀘𑀸𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁. 𑀥𑀫𑁆𑀫𑀢𑀸𑀯𑀸𑀢𑀺 𑀲𑀪𑀸𑀯𑁄 𑀏𑀯, 𑀓𑀸𑀭𑀡𑀲𑀫𑀢𑁆𑀣𑀢𑀸 𑀯𑀸 𑀈𑀳𑀸𑀩𑁆𑀬𑀸𑀧𑀸𑀭𑀭𑀳𑀺𑀢𑀸𑀦𑀁 𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀥𑀫𑁆𑀫𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 ‘‘𑀬’’𑀦𑁆𑀢𑀺 𑀏𑀢𑀲𑁆𑀲 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑁆𑀪𑀯𑀦𑀯𑀺𑀲𑁂𑀲𑀦𑀁 𑀬𑀁-𑀲𑀤𑁆𑀤𑁄. ‘‘𑀲𑀼𑀜𑁆𑀜𑁄 𑀕𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀯𑀘𑀦𑀢𑁄 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬 ¶ 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀦𑁆𑀦𑀧𑀸𑀦𑀲𑀳𑀺𑀢𑀦𑁆𑀢𑀺 𑀕𑀳𑀺𑀢𑁂 𑀲𑀼𑀜𑁆𑀜𑀕𑀸𑀫𑁂 𑀬𑀁 𑀬𑀤𑁂𑀯 𑀪𑀸𑀚𑀦𑀁 𑀧𑀭𑀸𑀫𑀲𑀻𑀬𑀢𑀺, 𑀢𑀁 𑀢𑀁 𑀭𑀺𑀢𑁆𑀢𑀓𑀁𑀬𑁂𑀯 𑀧𑀭𑀸𑀫𑀲𑀻𑀬𑀢𑀺, 𑀏𑀯𑀁 𑀥𑀼𑀯𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑀸𑀦𑀺 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸𑀦𑀺 𑀭𑀺𑀢𑁆𑀢𑀓𑀸𑀦𑁂𑀯 𑀏𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀢𑁂𑀦𑀸𑀳 ‘‘𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁆𑀢𑀸’’𑀢𑀺. 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀓𑀪𑀸𑀯𑁂𑀦 𑀭𑀽𑀧𑀸𑀤𑀻𑀦𑀺 𑀘𑀓𑁆𑀔𑀸𑀤𑀻𑀦𑀁 𑀅𑀪𑀺𑀖𑀸𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀳𑀺𑀲𑀼𑀲𑀼𑀫𑀸𑀭𑀧𑀓𑁆𑀔𑀻𑀓𑀼𑀓𑁆𑀓𑀼𑀭𑀲𑀺𑀗𑁆𑀕𑀸𑀮𑀫𑀓𑁆𑀓𑀝𑀸 𑀙 𑀧𑀸𑀡𑀓𑀸. 𑀯𑀺𑀲𑀫𑀩𑀺𑀮𑀸𑀓𑀸𑀲𑀕𑀸𑀫𑀲𑀼𑀲𑀸𑀦𑀯𑀦𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸. 𑀢𑀢𑁆𑀣 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑁂𑀳𑀺 𑀘𑀓𑁆𑀔𑀸𑀤𑀻𑀳𑀺 𑀯𑀺𑀲𑀫𑀪𑀸𑀯𑀩𑀺𑀮𑀸𑀓𑀸𑀲𑀕𑀸𑀫𑀲𑀼𑀲𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑀺𑀲𑀽𑀧𑀸𑀤𑀺𑀦𑁆𑀦𑀥𑀫𑁆𑀫𑀯𑀦𑀪𑀸𑀯𑁂𑀳𑀺 𑀅𑀪𑀺𑀭𑀫𑀺𑀢𑀢𑁆𑀢𑀸 𑀭𑀽𑀧𑀸𑀤𑀻𑀦𑀁 𑀯𑀺𑀲𑀫𑀸𑀤𑀺𑀲𑀤𑀺𑀲𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀢𑀺 𑀆𑀬𑀢𑀦𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀫𑀼𑀔𑀯𑀡𑁆𑀡𑀦𑀸.

𑀥𑀸𑀢𑀼𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁫𑁧𑁭. 𑀘𑀓𑁆𑀔𑀼𑀲𑁆𑀲 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 𑀓𑀸𑀭𑀡𑀪𑀽𑀢𑀲𑁆𑀲 𑀯𑀺𑀜𑁆𑀜𑀸𑀡𑀁. 𑀓𑀸𑀫𑀁 𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑀸𑀤𑀬𑁄𑀧𑀺 ¶ 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀓𑀸𑀭𑀡𑀸, 𑀢𑁂 𑀧𑀦 𑀲𑀸𑀥𑀸𑀭𑀡𑀓𑀸𑀭𑀡𑀁, 𑀘𑀓𑁆𑀔𑀼 𑀅𑀲𑀸𑀥𑀸𑀭𑀡𑀦𑁆𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄 𑀬𑀣𑀸 𑀪𑁂𑀭𑀺𑀲𑀤𑁆𑀤𑁄, 𑀬𑀯𑀗𑁆𑀓𑀼𑀭𑁄𑀢𑀺. 𑀢𑀣𑀸 𑀳𑀺 𑀘𑀓𑁆𑀔𑀼 𑀧𑀼𑀕𑁆𑀕𑀮𑀦𑁆𑀢𑀭𑀸𑀲𑀸𑀥𑀸𑀭𑀡𑀁, 𑀦𑀻𑀮𑀸𑀤𑀺𑀲𑀩𑁆𑀩𑀭𑀽𑀧𑀲𑀸𑀥𑀸𑀭𑀡𑀜𑁆𑀘𑀸𑀢𑀺 𑀲𑀸𑀫𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀁.

𑀯𑀺𑀤𑀳𑀢𑀻𑀢𑀺 𑀏𑀯𑀁 𑀏𑀯𑀜𑁆𑀘 𑀢𑀬𑀸 𑀧𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀯𑀺𑀦𑀺𑀬𑀼𑀜𑁆𑀚𑀫𑀸𑀦𑀁 𑀯𑀺𑀬 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀤𑀳𑀢𑀻𑀢𑀺 𑀘 𑀥𑀸𑀢𑁆𑀯𑀢𑁆𑀣𑁄 𑀏𑀯 𑀯𑀺𑀲𑀺𑀝𑁆𑀞𑁄 𑀉𑀧𑀲𑀕𑁆𑀕𑁂𑀦 𑀤𑀻𑀧𑀻𑀬𑀢𑀻𑀢𑀺 𑀯𑀺𑀦𑀸𑀧𑀺 𑀉𑀧𑀲𑀕𑁆𑀕𑁂𑀦 𑀥𑀸𑀢𑀽𑀢𑀺 𑀏𑀲 𑀲𑀤𑁆𑀤𑁄 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀢𑁆𑀢𑀼𑀓𑀫𑁆𑀫𑀪𑀸𑀯𑀓𑀭𑀡𑀸𑀥𑀺𑀓𑀭𑀡𑁂𑀲𑀼 𑀘 𑀥𑀸𑀢𑀼𑀲𑀤𑁆𑀤𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 𑀧𑀜𑁆𑀘𑀸𑀧𑀺 𑀢𑁂 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀸 𑀥𑀸𑀢𑀼𑀬𑁄 𑀲𑀁𑀲𑀸𑀭𑀤𑀼𑀓𑁆𑀔𑀁 𑀦 𑀯𑀺𑀤𑀳𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀥𑀁𑀲𑁂𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀮𑁄𑀓𑀺𑀬𑀸’’𑀢𑀺 𑀯𑀺𑀲𑁂𑀲𑀺𑀢𑀁. 𑀯𑀯𑀢𑁆𑀣𑀺𑀢𑀸𑀢𑀺 𑀅𑀯𑀢𑁆𑀣𑀺𑀢𑀸, 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀅𑀲𑀁𑀓𑀺𑀡𑁆𑀡𑀸. 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀲𑀼𑀯𑀡𑁆𑀡𑀸𑀤𑀻𑀦𑀁 𑀩𑀻𑀚𑀪𑀽𑀢𑀸 𑀲𑁂𑀮𑀸𑀤𑀬𑁄. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀏𑀢𑁆𑀣 𑀓𑁂𑀘𑀺 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀲𑀼 𑀥𑀸𑀢𑀽𑀲𑀼 𑀬𑁄 𑀬𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑀤𑀦𑀼𑀭𑀽𑀧’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 ‘‘𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀅𑀢𑁆𑀣𑀯𑀲𑁂𑀦 𑀘𑁂𑀢𑀁 𑀬𑀣𑀸𑀲𑀫𑁆𑀪𑀯𑀕𑁆𑀕𑀳𑀡𑀁 𑀓𑀢𑀁, 𑀦 𑀥𑀸𑀢𑀼𑀯𑀲𑁂𑀦 ¶ . 𑀓𑀸𑀫𑀁 𑀧𑀜𑁆𑀘𑀧𑀺 𑀅𑀢𑁆𑀣𑀸 𑀘𑀓𑁆𑀔𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀣𑀸𑀧𑀺 𑀘𑀓𑁆𑀔𑀸𑀤𑀻𑀲𑀼 𑀬𑀲𑁆𑀲 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀬𑀤𑀸 𑀓𑀢𑁆𑀢𑀼𑀯𑀘𑀦𑀺𑀘𑁆𑀙𑀸, 𑀦 𑀢𑀤𑀸 𑀓𑀫𑁆𑀫𑀪𑀸𑀯𑁄. 𑀬𑀤𑀸 𑀧𑀦 𑀓𑀫𑁆𑀫𑀯𑀘𑀦𑀺𑀘𑁆𑀙𑀸, 𑀦 𑀢𑀤𑀸 𑀓𑀢𑁆𑀢𑀼𑀪𑀸𑀯𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀬𑀣𑀸𑀲𑀫𑁆𑀪𑀯𑀕𑁆𑀕𑀳𑀡𑀁. 𑀢𑁂𑀦𑀸𑀳 ‘‘𑀇𑀢𑀺 𑀘𑀓𑁆𑀔𑀸𑀤𑀻𑀲𑀽’’𑀢𑀺𑀆𑀤𑀺.

𑁫𑁧𑁮. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣𑀸𑀧𑀺 𑀥𑀸𑀢𑀻𑀢𑀺 𑀥𑀸𑀢𑀽𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀥𑀸𑀭𑀡𑀢𑁆𑀣𑁄 𑀥𑀸-𑀲𑀤𑁆𑀤𑁄𑀢𑀺 𑀓𑀢𑁆𑀯𑀸. 𑀓𑀢𑁆𑀢𑀼𑀅𑀢𑁆𑀣𑁄𑀧𑀺 𑀘𑀸𑀬𑀁 𑀧𑀼𑀭𑀺𑀫𑁂𑀦 𑀅𑀲𑀤𑀺𑀲𑁄 𑀯𑀺𑀥𑀸𑀦𑀥𑀸𑀭𑀡𑀢𑁆𑀣𑀸𑀦𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸. 𑀦𑀺𑀲𑁆𑀲𑀢𑁆𑀢𑀲𑀪𑀸𑀯𑀫𑀢𑁆𑀢𑀥𑀸𑀭𑀡𑀜𑁆𑀘 𑀥𑀸𑀢𑀼𑀲𑀤𑁆𑀤𑀲𑁆𑀲 𑀧𑀥𑀸𑀦𑁄 𑀅𑀢𑁆𑀣𑁄𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣 𑀲𑀻𑀳𑀲𑀤𑁆𑀤𑁄 𑀯𑀺𑀬 𑀓𑁂𑀲𑀭𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑀸 𑀧𑀼𑀭𑀺𑀲𑁂 𑀲𑁂𑀮𑀸𑀯𑀬𑀯𑁂𑀲𑀼 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼𑀲𑀤𑁆𑀤𑁄 𑀘𑀓𑁆𑀔𑀸𑀤𑀻𑀲𑀼 𑀉𑀧𑀘𑀭𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘 𑀜𑀸𑀡𑀜𑁂𑀬𑁆𑀬𑀸𑀦𑀺, 𑀢𑁂𑀲𑀁 𑀅𑀯𑀬𑀯𑀸 𑀢𑀧𑁆𑀧𑀪𑁂𑀤𑀪𑀽𑀢𑀸 𑀥𑀸𑀢𑀼𑀬𑁄 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀸. 𑀢𑀢𑁆𑀣 𑀜𑀸𑀡𑀧𑁆𑀧𑀪𑁂𑀤𑁄 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄, 𑀜𑁂𑀬𑁆𑀬𑀧𑁆𑀧𑀪𑁂𑀤𑁄 𑀅𑀝𑁆𑀞𑀸𑀭𑀲𑀸𑀧𑀻𑀢𑀺 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀫𑀢𑁆𑀢𑀸 𑀥𑀸𑀢𑀼𑀬𑁄 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀜𑀸𑀡𑁂𑀦 𑀜𑀸𑀢𑀩𑁆𑀩𑁄 𑀲𑀪𑀸𑀯𑁄 𑀅𑀯𑀺𑀧𑀭𑀻𑀢𑁄 𑀥𑀸𑀢𑀼𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑁄 𑀜𑀸𑀡𑀜𑁂𑀬𑁆𑀬𑁄, 𑀦 𑀤𑀺𑀝𑁆𑀞𑀺𑀆𑀤𑀻𑀳𑀺 𑀯𑀺𑀧𑀭𑀻𑀢𑀕𑁆𑀕𑀸𑀳𑀓𑁂𑀳𑀺 𑀜𑁂𑀬𑁆𑀬𑁄𑀢𑀺 𑀅𑀢𑁆𑀣𑁄, 𑀢𑀲𑁆𑀲 𑀜𑀸𑀡𑀜𑁂𑀬𑁆𑀬𑀲𑁆𑀲 𑀅𑀯𑀬𑀯𑀸 𑀘𑀓𑁆𑀔𑀸𑀤𑀬𑁄, 𑀯𑀺𑀲𑀪𑀸𑀕𑀮𑀓𑁆𑀔𑀡𑀸𑀯𑀬𑀯𑁂𑀲𑀼 𑀭𑀲𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼𑀲𑀤𑁆𑀤𑁄 𑀢𑀸𑀤𑀺𑀲𑁂𑀲𑀼 𑀅𑀜𑁆𑀜𑀸𑀯𑀬𑀯𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀉𑀧𑀘𑀭𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀭𑀲𑀸𑀤𑀻𑀲𑀼 𑀯𑀺𑀬 𑀯𑀸 𑀘𑀓𑁆𑀔𑀸𑀤𑀻𑀲𑀼𑀧𑀺 𑀦𑀺𑀭𑀼𑀴𑁆𑀳𑁄 𑀏𑀯. ‘‘𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀏𑀢𑁂𑀦 𑀦𑀺𑀚𑁆𑀚𑀻𑀯𑀫𑀢𑁆𑀢𑀧𑀤𑀢𑁆𑀣𑁂 𑀥𑀸𑀢𑀼𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑀁 𑀤𑀲𑁆𑀲𑁂𑀢𑀺. 𑀙 𑀥𑀸𑀢𑀼𑀬𑁄 𑀏𑀢𑀲𑁆𑀲𑀸𑀢𑀺 𑀙𑀥𑀸𑀢𑀼𑀭𑁄. 𑀬𑁄 𑀮𑁄𑀓𑁂 𑀧𑀼𑀭𑀺𑀲𑁄𑀢𑀺 𑀥𑀫𑁆𑀫𑀲𑀫𑀼𑀤𑀸𑀬𑁄 ¶ 𑀯𑀼𑀘𑁆𑀘𑀢𑀺, 𑀲𑁄 𑀙𑀥𑀸𑀢𑀼𑀭𑁄 𑀙𑀦𑁆𑀦𑀁 𑀧𑀣𑀯𑀻𑀆𑀤𑀻𑀦𑀁 𑀦𑀺𑀚𑁆𑀚𑀻𑀯𑀫𑀢𑁆𑀢𑀸𑀦𑀁 𑀲𑀪𑀸𑀯𑀸𑀦𑀁 𑀲𑀫𑀼𑀤𑀸𑀬𑀫𑀢𑁆𑀢𑁄, 𑀦 𑀏𑀢𑁆𑀣 𑀚𑀻𑀯𑁄 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁫𑁧𑁯. 𑀘𑀓𑁆𑀔𑀸𑀤𑀻𑀦𑀁 𑀓𑀫𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀢𑀺 𑀇𑀥𑁂𑀓𑁂𑀓𑀲𑁆𑀫𑀺𑀁 𑀢𑀺𑀓𑁂 𑀢𑀺𑀡𑁆𑀡𑀁 𑀥𑀸𑀢𑀽𑀦𑀁 𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦𑀸’’𑀢𑀺. 𑀳𑁂𑀢𑀼𑀨𑀮𑀸𑀦𑀁 𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁄 𑀏𑀯, 𑀫𑀦𑁄𑀥𑀫𑁆𑀫𑀥𑀸𑀢𑀽𑀦𑀜𑁆𑀘 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀦𑀸𑀧𑀺, 𑀇𑀢𑀭𑀲𑁆𑀲 𑀲𑀩𑁆𑀩𑀸𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 ¶ 𑀘, 𑀥𑀫𑁆𑀫𑀥𑀸𑀢𑀼 𑀧𑀦 𑀯𑁂𑀤𑀦𑀸𑀤𑀺𑀓𑀸 𑀲𑀳𑀚𑀸𑀢𑀸 𑀲𑀳𑀚𑀸𑀢𑀸𑀤𑀺𑀦𑀸, 𑀅𑀲𑀳𑀚𑀸𑀢𑀸 𑀅𑀦𑀦𑁆𑀢𑀭𑀸𑀤𑀺𑀦𑀸, 𑀉𑀧𑀦𑀺𑀲𑁆𑀲𑀬𑁂𑀦, 𑀆𑀭𑀫𑁆𑀫𑀡𑀸𑀤𑀺𑀦𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑁆𑀯𑀸𑀭𑀪𑀽𑀢𑀫𑀦𑁄𑀯𑀲𑁂𑀦 𑀯𑀸. 𑀤𑁆𑀯𑀸𑀭𑀪𑀽𑀢𑀫𑀦𑁄𑀧𑀺 𑀳𑀺 𑀲𑀼𑀢𑁆𑀢𑁂𑀲𑀼 𑀫𑀦𑁄𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀲𑁆𑀲𑀸 𑀯𑀸 𑀫𑀦𑁄𑀥𑀸𑀢𑀼𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀳𑁂𑀢𑀽𑀢𑀺 𑀧𑀘𑁆𑀘𑀬𑁄 𑀅𑀥𑀺𑀧𑁆𑀧𑁂𑀢𑁄, 𑀨𑀮𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺𑀆𑀤𑀺.

𑁫𑁨𑁦. 𑀲𑀩𑁆𑀩𑀸𑀲𑀁 𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀆𑀪𑀸𑀥𑀸𑀢𑀼𑀆𑀤𑀻𑀦𑀁 𑀧𑀜𑁆𑀘𑀢𑀺𑀁𑀲𑀸𑀬 𑀥𑀸𑀢𑀽𑀦𑀁 𑀯𑀲𑁂𑀦. 𑀅𑀧𑀭𑀫𑀢𑁆𑀣𑀲𑀪𑀸𑀯𑀲𑁆𑀲 𑀧𑀭𑀫𑀢𑁆𑀣𑀲𑀪𑀸𑀯𑁂𑀲𑀼 𑀦 𑀓𑀤𑀸𑀘𑀺 𑀅𑀦𑁆𑀢𑁄𑀕𑀥𑀢𑀸 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦’’𑀦𑁆𑀢𑀺.

𑀘𑀦𑁆𑀤𑀸𑀪𑀸𑀲𑀽𑀭𑀺𑀬𑀸𑀪𑀸𑀤𑀺𑀓𑀸 𑀯𑀡𑁆𑀡𑀦𑀺𑀪𑀸 𑀏𑀯𑀸𑀢𑀺 𑀆𑀳 ‘‘𑀭𑀽𑀧𑀥𑀸𑀢𑀼𑀬𑁂𑀯 𑀳𑀺 𑀆𑀪𑀸𑀥𑀸𑀢𑀽’’𑀢𑀺. 𑀭𑀽𑀧𑀸𑀤𑀺𑀧𑀝𑀺𑀩𑀤𑁆𑀥𑀸𑀢𑀺 𑀭𑀸𑀕𑀯𑀢𑁆𑀣𑀼𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 ‘‘𑀭𑀽𑀧𑀸𑀤𑀬𑁄 𑀏𑀯𑀸’’𑀢𑀺 𑀅𑀯𑀢𑁆𑀯𑀸 𑀧𑀝𑀺𑀩𑀤𑁆𑀥𑀯𑀘𑀦𑀁 𑀯𑀼𑀢𑁆𑀢𑀁. 𑀅𑀲𑀢𑀺𑀧𑀺 𑀭𑀸𑀕𑀯𑀢𑁆𑀣𑀼𑀪𑀸𑀯𑁂 𑀓𑀼𑀲𑀮𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀲𑀼𑀪𑀥𑀸𑀢𑀽𑀢𑀺 𑀤𑀼𑀢𑀺𑀬𑁄 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀲𑁂𑀲𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀥𑀸𑀢𑀼𑀤𑁆𑀯𑀬𑀦𑀺𑀭𑁄𑀥𑀫𑀢𑁆𑀢𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀭𑁄𑀥𑀫𑀢𑁆𑀢𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀺𑀭𑁄𑀥𑀪𑀸𑀯𑀢𑁄. 𑀢𑀤𑀜𑁆𑀜𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄 𑀯𑀺𑀬 𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀽𑀦𑀁 𑀦𑀺𑀭𑁄𑀥𑁄 𑀲𑀫𑀸𑀧𑀢𑁆𑀢𑀺𑀩𑀮𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀥𑀸𑀢𑀼𑀤𑁆𑀯𑀬𑀕𑁆𑀕𑀳𑀡𑀁.

‘‘𑀥𑀫𑁆𑀫𑀥𑀸𑀢𑀼𑀫𑀢𑁆𑀢’’𑀦𑁆𑀢𑀺 𑀇𑀤𑀁 𑀓𑀸𑀫𑀥𑀸𑀢𑀼𑀬𑀸 𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀓𑀸𑀫𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑁄, 𑀆𑀭𑀫𑁆𑀫𑀡𑀓𑀭𑀡𑁂𑀦 𑀯𑀸 𑀓𑀸𑀫𑀕𑀼𑀡𑁄𑀧𑀲𑀁𑀳𑀺𑀢𑁄. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀬𑁂 𑀏𑀢𑀲𑁆𑀫𑀺𑀁 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑁂 𑀑𑀓𑀸𑀲𑁂. 𑀑𑀕𑀸𑀴𑁆𑀳𑀸 𑀳𑀼𑀢𑁆𑀯𑀸 𑀅𑀥𑁄𑀪𑀸𑀕𑁂 𑀘 𑀑𑀓𑀸𑀲𑁂 𑀘𑀭𑀦𑁆𑀢𑀻𑀢𑀺 𑀏𑀢𑁆𑀣𑀸𑀯𑀘𑀭𑀸. 𑀅𑀜𑁆𑀜𑀢𑁆𑀣 𑀘𑀭𑀦𑁆𑀢𑀸𑀧𑀺 𑀬𑀣𑀸𑀯𑀼𑀢𑁆𑀢𑁂 𑀏𑀯 𑀞𑀸𑀦𑁂 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸.

𑀦𑁂𑀓𑁆𑀔𑀫𑁆𑀫𑀥𑀸𑀢𑀼 ¶ 𑀥𑀫𑁆𑀫𑀥𑀸𑀢𑀼 𑀏𑀯 𑀯𑀺𑀢𑀓𑁆𑀓𑀧𑀓𑁆𑀔𑁂. 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀢𑁄, 𑀲𑀻𑀮𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀢𑁄, 𑀧𑀩𑁆𑀩𑀚𑁆𑀚𑀢𑁄 𑀘 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀸 𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸. 𑀯𑀺𑀳𑀺𑀁𑀲𑀸𑀥𑀸𑀢𑀼 𑀘𑁂𑀢𑀦𑀸, 𑀧𑀭𑀯𑀺𑀳𑁂𑀞𑀦𑀘𑁆𑀙𑀦𑁆𑀤𑁄 𑀯𑀸. 𑀅𑀯𑀺𑀳𑀺𑀁𑀲𑀸 𑀓𑀭𑀼𑀡𑀸.

𑀳𑀻𑀦𑀸𑀢𑀺 ¶ 𑀳𑀻𑀴𑀺𑀢𑀸. 𑀧𑀡𑀻𑀢𑀸𑀢𑀺 𑀲𑀫𑁆𑀪𑀸𑀯𑀺𑀢𑀸. ‘‘𑀦𑀸𑀢𑀺𑀳𑀻𑀴𑀺𑀢𑀸 𑀦𑀸𑀢𑀺𑀲𑀫𑁆𑀪𑀸𑀯𑀺𑀢𑀸 𑀫𑀚𑁆𑀛𑀺𑀫𑀸’’𑀢𑀺 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀆𑀕𑀢𑀸 𑀳𑀻𑀦𑀤𑀼𑀓𑀢𑁄 𑀏𑀯 𑀦𑀻𑀳𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀸 𑀥𑀸𑀢𑀼 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀪𑁄𑀧𑀻𑀢𑀺 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄.

𑀯𑀺𑀜𑁆𑀜𑀸𑀡𑀥𑀸𑀢𑀼 𑀬𑀤𑀺𑀧𑀺 𑀙𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑀺𑀪𑀢𑁆𑀢𑀸, 𑀢𑀣𑀸𑀧𑀺 𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀧𑀘𑁆𑀙𑀸𑀘𑀸𑀭𑀺𑀓𑀢𑁆𑀢𑀸 𑀫𑀦𑁄𑀥𑀸𑀢𑀼 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀗𑁆𑀔𑁂𑀧𑁄𑀬𑁂𑀯𑀸’’𑀢𑀺. 𑀅𑀦𑁂𑀓𑁂𑀲𑀁 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀦𑀁, 𑀢𑀸𑀲𑀼 𑀘 𑀏𑀓𑁂𑀓𑀺𑀲𑁆𑀲𑀸 𑀦𑀸𑀦𑀧𑁆𑀧𑀓𑀸𑀭𑀢𑀸𑀬 𑀦𑀸𑀦𑀸𑀥𑀸𑀢𑀽𑀦𑀁 𑀯𑀲𑁂𑀦 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀮𑁄𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀝𑁆𑀞𑀸𑀭𑀲𑀥𑀸𑀢𑀼𑀧𑁆𑀧𑀪𑁂𑀤𑀫𑀢𑁆𑀢𑀫𑁂𑀯𑀸’’𑀢𑀺.

𑁫𑁨𑁧. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦𑀸𑀢𑀺 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁, 𑀓𑁂𑀲𑀼𑀘𑀺 ‘‘𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦𑀸’’𑀢𑀺. 𑀢𑀢𑁆𑀣 𑀦 𑀘𑀓𑁆𑀔𑀸𑀤𑀻𑀦𑀁 𑀓𑁂𑀯𑀮𑁂𑀦 𑀥𑀸𑀢𑀼𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄 𑀯𑀺𑀚𑀸𑀦𑀦𑀲𑀪𑀸𑀯𑀲𑁆𑀲 𑀧𑀪𑁂𑀤𑀯𑀘𑀦𑀢𑁄. 𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀤𑁆𑀤𑁂𑀦 𑀘 𑀲𑀫𑁆𑀩𑀦𑁆𑀥𑁂 𑀓𑀭𑀺𑀬𑀫𑀸𑀦𑁂 𑀤𑁆𑀯𑁂 𑀫𑀦𑁄𑀕𑀳𑀡𑀸𑀦𑀺 𑀦 𑀓𑀸𑀢𑀩𑁆𑀩𑀸𑀦𑀺. 𑀦 𑀳𑀺 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀦𑁆𑀢𑀺. 𑀅𑀦𑁆𑀢𑀭𑀸 𑀯𑀸 𑀫𑀦𑁄𑀥𑀸𑀢𑀼𑀕𑀳𑀡𑀁 𑀅𑀓𑀢𑁆𑀯𑀸 ‘‘𑀘𑀓𑁆𑀔𑀼…𑀧𑁂… 𑀓𑀸𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁 𑀅𑀢𑀼𑀮𑁆𑀬𑀬𑁄𑀕𑁂 𑀤𑁆𑀯𑀦𑁆𑀤𑀲𑀫𑀸𑀲𑀸𑀪𑀸𑀯𑀢𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀸𑀞𑁄 𑀲𑀺𑀬𑀸 ‘‘𑀘𑀓𑁆𑀔𑀼…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦𑀸’’𑀢𑀺. 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀯𑀸𑀤𑀺𑀦𑁄 𑀢𑀲𑁆𑀲 𑀏𑀓𑀫𑁂𑀓𑀲𑁆𑀲 𑀅𑀢𑁆𑀢𑀲𑁆𑀲 𑀅𑀤𑁆𑀯𑀬𑀢𑀁, 𑀦𑀺𑀘𑁆𑀘𑀢𑁆𑀢𑀜𑁆𑀘 𑀧𑀯𑁂𑀤𑁂𑀦𑁆𑀢𑀻𑀢𑀺 𑀅𑀦𑁂𑀓𑀢𑀸𑀦𑀺𑀘𑁆𑀘𑀢𑀸𑀧𑀓𑀸𑀲𑀦𑀁 𑀢𑁂𑀲𑀁 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀸𑀬 𑀳𑁄𑀢𑀺. 𑀔𑀦𑁆𑀥𑀸𑀬𑀢𑀦𑀤𑁂𑀲𑀦𑀸 𑀲𑀗𑁆𑀔𑁂𑀧𑀤𑁂𑀲𑀦𑀸, 𑀇𑀦𑁆𑀤𑁆𑀭𑀺𑀬𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀸, 𑀢𑀤𑀼𑀪𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 𑀅𑀦𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸 𑀥𑀸𑀢𑀼𑀤𑁂𑀲𑀦𑀸. 𑀅𑀪𑀺𑀥𑀫𑁆𑀫𑁂 𑀯𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 (𑀯𑀺𑀪. 𑁧𑁭𑁨 𑀆𑀤𑀬𑁄) 𑀯𑀼𑀢𑁆𑀢𑀸 𑀥𑀸𑀢𑀼𑀤𑁂𑀲𑀦𑀸 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀦𑀸, 𑀆𑀪𑀸𑀥𑀸𑀢𑀼𑀆𑀤𑀻𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀅𑀦𑁆𑀢𑀸𑀦𑀁 𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀸 𑀅𑀢𑀺𑀯𑀺𑀢𑁆𑀣𑀸𑀭𑀤𑁂𑀲𑀦𑀸, 𑀢𑀤𑀼𑀪𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 𑀅𑀦𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸.

𑀅𑀲𑁆𑀲 ¶ 𑀪𑀕𑀯𑀢𑁄. 𑀲𑀤𑁆𑀥𑀫𑁆𑀫𑀢𑁂𑀚𑀲𑀸 𑀯𑀺𑀳𑀢𑀁 𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁.

𑁫𑁨𑁨. 𑀲𑀗𑁆𑀔𑀢𑁄𑀢𑀺 ¶ 𑀕𑀡𑀦𑀢𑁄. 𑀚𑀸𑀢𑀺𑀢𑁄𑀢𑀺 𑀘𑀓𑁆𑀔𑀼𑀪𑀸𑀯𑀲𑀸𑀫𑀜𑁆𑀜𑀢𑁄. 𑀅𑀣 𑀯𑀸 𑀚𑀸𑀢𑀺𑀢𑁄𑀢𑀺 𑀘𑀓𑁆𑀔𑀼𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀧𑀲𑀸𑀤𑁄’’𑀢𑀺. 𑀯𑀻𑀲𑀢𑀺 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀯𑁂𑀤𑀦𑀸𑀤𑀻𑀦𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀢𑁄. 𑀲𑁂𑀲𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀺𑀜𑁆𑀜𑀸𑀡𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀩𑁆𑀬𑀸𑀓𑀢𑀸𑀧𑁂𑀓𑁆𑀔𑀸𑀬 𑀲𑁂𑀲𑀕𑁆𑀕𑀳𑀡𑀁, 𑀓𑀼𑀲𑀮𑀸𑀓𑀼𑀲𑀮𑀁 𑀧𑀦 𑀲𑀩𑁆𑀩𑀲𑁄 𑀅𑀕𑁆𑀕𑀳𑀺𑀢𑀫𑁂𑀯𑀸𑀢𑀺.

𑁫𑁨𑁩. 𑀢𑀸 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀬𑁄 𑀧𑀜𑁆𑀘𑀧𑀺.

𑀧𑀼𑀭𑀺𑀫𑁂𑀳𑁂𑀯𑀸𑀢𑀺 𑀅𑀦𑀦𑁆𑀢𑀭𑀸𑀤𑀻𑀳𑀺 𑀏𑀯. 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀲𑁂𑀯𑀦𑀧𑀘𑁆𑀘𑀬𑁂𑀦𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀥𑀫𑁆𑀫𑀥𑀸𑀢𑀽𑀢𑀺 𑀧𑀦 𑀲𑀳𑀚𑀸𑀢𑁄 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀲𑀳𑀚𑀸𑀢…𑀧𑁂… 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀅𑀯𑀺𑀕𑀢𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑀣𑀸𑀭𑀳𑀁 𑀳𑁂𑀢𑀼𑀅𑀥𑀺𑀧𑀢𑀺𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑁄 𑀲𑀗𑁆𑀕𑀬𑁆𑀳𑀢𑀺. 𑀢𑁂𑀦𑀸𑀳 ‘‘𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀏𑀓𑀘𑁆𑀘𑀸 𑀘 𑀥𑀫𑁆𑀫𑀥𑀸𑀢𑀼 𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀧𑁆𑀧𑀓𑀸𑀭𑀸, 𑀬𑀸 𑀘 𑀲𑀫𑁆𑀧𑀬𑁄𑀕𑀸𑀦𑀦𑁆𑀢𑀭𑀪𑀸𑀯𑀸𑀤𑀻𑀦𑀁 𑀅𑀪𑀸𑀯𑁂𑀦 𑀆𑀭𑀫𑁆𑀫𑀡𑀓𑀭𑀡𑁂 𑀬𑁄𑀕𑁆𑀬𑀸. 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀧𑀸𑀓𑀯𑀚𑁆𑀚𑀦𑀢𑁆𑀣𑀁 ‘‘𑀏𑀓𑀘𑁆𑀘𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑀁, 𑀫𑀦𑁄𑀤𑁆𑀯𑀸𑀭𑀺𑀓𑀸 𑀧𑀦 𑀯𑀺𑀧𑀸𑀓𑀸𑀧𑀺 𑀢𑀤𑀸𑀭𑀫𑁆𑀫𑀡𑀪𑀽𑀢𑀸 𑀏𑀓𑀘𑁆𑀘𑀁 𑀥𑀫𑁆𑀫𑀥𑀸𑀢𑀼𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺. 𑀅𑀣 𑀯𑀸 ‘‘𑀏𑀓𑀘𑁆𑀘𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀇𑀤𑀁 𑀲𑀩𑁆𑀩𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀅𑀪𑀺𑀜𑁆𑀜𑀸𑀤𑁆𑀯𑀬𑀁 𑀆𑀭𑀼𑀧𑁆𑀧𑀤𑁆𑀯𑀬𑀦𑁆𑀢𑀺 𑀏𑀯𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀮𑁄𑀓𑀼𑀢𑁆𑀢𑀭𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀦 𑀏𑀓𑀘𑁆𑀘𑀸 𑀥𑀫𑁆𑀫𑀥𑀸𑀢𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀘𑀓𑁆𑀔𑀸𑀤𑀻𑀦𑀁 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀥𑀫𑁆𑀫𑀢𑁄 𑀅𑀢𑀺𑀭𑁂𑀓𑁂𑀧𑀺 𑀧𑀘𑁆𑀘𑀬𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀆𑀮𑁄𑀓𑀸𑀤𑀬𑁄𑀢𑀺 𑀆𑀮𑁄𑀓𑁄 𑀦𑀸𑀫 𑀲𑀽𑀭𑀺𑀬𑀸𑀮𑁄𑀓𑀸𑀤𑀺. 𑀢𑀲𑁆𑀲 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀏𑀯𑀁 𑀲𑁂𑀲𑀸𑀦𑀺𑀧𑀺.

𑀯𑀺𑀯𑀭𑀁 𑀦𑀸𑀫 𑀯𑀺𑀲𑁂𑀲𑀢𑁄 𑀲𑁄𑀢𑀩𑀺𑀮𑀁. 𑀯𑀸𑀬𑀼 𑀕𑀦𑁆𑀥𑀽𑀧𑀲𑀁𑀳𑀭𑀡𑀓𑀯𑀸𑀢𑁄. 𑀆𑀧𑁄 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀆𑀳𑀸𑀭𑀲𑁆𑀲 𑀢𑁂𑀫𑀦𑀓𑀉𑀤𑀓𑀁. 𑀧𑀣𑀯𑀻 𑀓𑀸𑀬𑀧𑁆𑀧𑀲𑀸𑀤𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀧𑀣𑀯𑀻𑀥𑀸𑀢𑀼. 𑀪𑀯𑀗𑁆𑀕𑀫𑀦𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀺𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀫𑀦𑀲𑀺𑀓𑀸𑀭𑁄 𑀆𑀯𑀚𑁆𑀚𑀦𑀫𑀦𑀲𑀺𑀓𑀸𑀭𑁄.

𑁫𑁨𑁪. 𑀅𑀯𑀺𑀲𑁂𑀲𑀢𑁄 ¶ ¶ 𑀤𑀝𑁆𑀞𑀩𑁆𑀩𑀸𑀓𑀸𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀆𑀳 ‘‘𑀲𑀩𑁆𑀩𑀸 𑀏𑀯𑀸’’𑀢𑀺. 𑀯𑀺𑀲𑁂𑀲𑀢𑁄 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀯𑀺𑀘𑀸𑀭𑁄 𑀏𑀲𑁄𑀢𑀺 ‘‘𑀲𑀗𑁆𑀔𑀢𑀸’’𑀢𑀺 𑀯𑀺𑀲𑁂𑀲𑀺𑀢𑀁. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑀦𑁆𑀢𑁄𑀦𑀸𑀫 𑀅𑀢𑀻𑀢𑁄 𑀅𑀤𑁆𑀥𑀸, 𑀅𑀧𑀭𑀦𑁆𑀢𑁄 𑀦𑀸𑀫 𑀅𑀦𑀸𑀕𑀢𑁄. 𑀉𑀪𑀬𑀢𑁆𑀣 𑀘 𑀲𑀗𑁆𑀔𑀢𑀸 𑀥𑀸𑀢𑀼𑀬𑁄 𑀲𑀪𑀸𑀯𑀯𑀺𑀯𑀺𑀢𑁆𑀢𑀸 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀪𑀸𑀯𑀢𑁆𑀢𑀸. 𑀧𑀼𑀩𑁆𑀩𑀦𑁆𑀢𑁄 𑀯𑀸 𑀲𑀪𑀸𑀯𑀥𑀫𑁆𑀫𑀲𑁆𑀲 𑀉𑀤𑀬𑁄 𑀢𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀅𑀧𑀭𑀦𑁆𑀢𑁄 𑀯𑀬𑁄 𑀢𑀢𑁄 𑀧𑀭𑀁 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄𑀢𑀺 𑀧𑀸𑀓𑀸𑀪𑀸𑀯𑀢𑁄 𑀯𑀺𑀤𑁆𑀥𑀁𑀲𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀤𑀸𑀢𑀼 𑀲𑀤𑁆𑀤𑀲𑁆𑀲 𑀯𑀺𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀆𑀤𑀸𑀲𑀢𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀦𑁆𑀢𑀁 𑀦𑀸𑀫 𑀉𑀘𑁆𑀙𑀼𑀬𑀦𑁆𑀢𑀁. 𑀘𑀓𑁆𑀓𑀬𑀝𑁆𑀞𑀻𑀢𑀺 𑀢𑀺𑀮𑀫𑀦𑁆𑀣𑀁 𑀆𑀳. 𑀲𑁄 𑀳𑀺 𑀅𑀘𑀓𑁆𑀓𑀩𑀦𑁆𑀥𑁄𑀧𑀺 𑀢𑀁𑀲𑀤𑀺𑀲𑀢𑀸𑀬 𑀘𑀓𑁆𑀓𑀬𑀝𑁆𑀞𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀘𑀓𑁆𑀓𑀩𑀦𑁆𑀥𑀫𑁂𑀯 𑀯𑀸 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀁. 𑀇𑀫𑀸𑀳𑀺 𑀘 𑀉𑀧𑀫𑀸𑀳𑀺 𑀦𑀺𑀚𑁆𑀚𑀻𑀯𑀸𑀦. 𑀪𑁂𑀭𑀺𑀢𑀮𑀤𑀡𑁆𑀟𑀸𑀤𑀻𑀦𑀁 𑀲𑀫𑀸𑀬𑁄𑀕𑁂, 𑀦𑀺𑀚𑁆𑀚𑀻𑀯𑀸𑀦𑀁 𑀲𑀤𑁆𑀤𑀸𑀤𑀻𑀦𑀁 𑀯𑀺𑀬 𑀦𑀺𑀚𑁆𑀚𑀻𑀯𑀸𑀦𑀁 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀲𑀫𑀸𑀬𑁄𑀕𑁂 𑀦𑀺𑀚𑁆𑀚𑀻𑀯𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀯𑀢𑁆𑀢𑀻𑀢𑀺 𑀓𑀸𑀭𑀡𑀨𑀮𑀸𑀦𑀁 𑀥𑀸𑀢𑀼𑀫𑀢𑁆𑀢𑀢𑀁, 𑀓𑀸𑀭𑀓𑀯𑁂𑀤𑀓𑀯𑀺𑀭𑀳𑀜𑁆𑀘 𑀤𑀲𑁆𑀲𑁂𑀢𑀺.

𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬𑀸𑀢𑀺 𑀦𑀺𑀚𑁆𑀚𑀻𑀯𑀲𑁆𑀲 𑀓𑀲𑁆𑀲𑀘𑀺 𑀓𑁂𑀘𑀺 𑀦𑀺𑀚𑁆𑀚𑀻𑀯𑀸 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀫𑀦𑁄𑀥𑀸𑀢𑀼𑀬𑁂𑀯 𑀯𑀸 𑀅𑀢𑁆𑀢𑀦𑁄 𑀔𑀡𑀁 𑀅𑀦𑀢𑀺𑀯𑀢𑁆𑀢𑀦𑁆𑀢𑀻 𑀅𑀢𑁆𑀢𑀦𑁄 𑀔𑀡 𑀅𑀦𑀢𑀺𑀯𑀢𑁆𑀢𑀦𑁆𑀢𑀸𑀦𑀁𑀬𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀧𑀼𑀭𑁂𑀘𑀭𑀸𑀦𑀼𑀘𑀭𑀸𑀪𑀺𑀲𑀦𑁆𑀥𑀺𑀬𑀁 𑀅𑀦𑀦𑁆𑀢𑀭𑀧𑀼𑀩𑁆𑀩𑀓𑀸𑀮𑀸𑀧𑀭𑀓𑀸𑀮𑀢𑀸𑀬 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀙𑀦𑁆𑀦𑀜𑁆𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀏𑀓𑀚𑁆𑀛𑀁 𑀅𑀦𑁂𑀓𑀸𑀦𑀦𑁆𑀢𑀭𑀧𑀘𑁆𑀘𑀬𑀸𑀪𑀸𑀯𑀢𑁄 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀅𑀪𑀸𑀯𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀸𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀪𑀸𑀯𑀢𑁄 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀧𑀺 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀙𑀴𑀸𑀭𑀫𑁆𑀫𑀡𑀲𑀦𑁆𑀦𑀺𑀥𑀸𑀦𑁂 𑀫𑀦𑀲𑀺𑀓𑀸𑀭𑀫𑀦𑁆𑀢𑀭𑁂𑀦𑀸𑀧𑀺 𑀙𑀴𑀸𑀭𑀫𑁆𑀫𑀡𑀽𑀧𑀮𑀤𑁆𑀥𑀺 𑀲𑀺𑀬𑀸, 𑀦 𑀘 𑀳𑁄𑀢𑀺, 𑀢𑀲𑁆𑀫𑀸 𑀤𑀲𑁆𑀲𑀦𑀸𑀤𑀺𑀅𑀦𑀦𑁆𑀢𑀭𑀁 𑀲𑀯𑀦𑀸𑀤𑀻𑀦𑀁 𑀅𑀪𑀸𑀯𑁄 𑀯𑀺𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀦 𑀤𑀲𑁆𑀲𑀦𑀸𑀤𑀻𑀦𑀺, 𑀦 𑀘 𑀤𑀲𑁆𑀲𑀦𑀸𑀤𑀺𑀅𑀦𑀦𑁆𑀢𑀭𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺. 𑀢𑀢𑁆𑀣 𑀪𑀯𑀗𑁆𑀕𑀲𑁆𑀲, 𑀤𑀲𑁆𑀲𑀦𑀸𑀤𑀻𑀦𑀜𑁆𑀘 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀤𑀲𑁆𑀲𑀦𑀸𑀤𑀻𑀦𑀺, 𑀤𑀲𑁆𑀲𑀦𑀸𑀤𑀻𑀦𑀁 𑀅𑀦𑀦𑁆𑀢𑀭𑀜𑁆𑀘 𑀲𑀯𑀦𑀸𑀤𑀻𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀤𑀲𑁆𑀲𑀦𑀸𑀤𑀻𑀦𑀁, 𑀧𑀦 𑀲𑀦𑁆𑀢𑀻𑀭𑀫𑀡𑀲𑁆𑀲 𑀘 𑀅𑀪𑀺𑀦𑁆𑀦𑀯𑀺𑀲𑀬𑀢𑀸𑀬 𑀤𑀲𑁆𑀲𑀦𑀸𑀤𑀺𑀅𑀦𑀦𑁆𑀢𑀭𑀁 𑀦 𑀫𑀦𑀸𑀯𑀺𑀜𑁆𑀜𑀸𑀡𑀤𑀸𑀢𑀼 𑀳𑁄𑀢𑀻𑀢𑀺 𑀅𑀬𑀼𑀢𑁆𑀢𑀦𑁆𑀢𑀺 ¶ ? 𑀦𑀬𑀺𑀤𑀫𑁂𑀯𑀁 𑀦𑀺𑀬𑀢𑀸𑀦𑀺𑀬𑀢𑀯𑀺𑀲𑀬𑀸𑀦𑀁 𑀪𑀺𑀦𑁆𑀦𑀯𑀺𑀲𑀬𑀪𑀸𑀯𑀼𑀧𑀧𑀢𑁆𑀢𑀺𑀢𑁄. 𑀬𑀤𑀺 𑀘 𑀤𑀲𑁆𑀲𑀦𑀸𑀤𑀺𑀅𑀦𑀦𑁆𑀢𑀭𑀁 𑀓𑀸𑀘𑀺 𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸𑀧𑀺 𑀤𑀲𑁆𑀲𑀦𑀸𑀤𑀺𑀤𑁆𑀯𑀸𑀭𑀢𑀸𑀬 ¶ 𑀤𑀲𑁆𑀲𑀦𑀸𑀤𑀺𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀯 𑀲𑀺𑀬𑀸, 𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀢𑁄 𑀘 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀥𑀼𑀭𑀁 𑀘𑀺𑀦𑁆𑀢𑀦𑀁 𑀫𑀦𑀦𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑀁 𑀫𑀦𑀦𑀓𑀺𑀘𑁆𑀘𑀸𑀧𑀭𑀺𑀘𑁆𑀘𑀸𑀕𑁄 𑀯𑀺𑀬 𑀤𑀲𑁆𑀲𑀦𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀤𑀲𑁆𑀲𑀦𑀓𑀺𑀘𑁆𑀘𑀸𑀧𑀭𑀺𑀘𑁆𑀘𑀸𑀕𑁄 𑀆𑀧𑀚𑁆𑀚𑀢𑀺. 𑀢𑀣𑀸 𑀢𑀤𑀦𑀦𑁆𑀢𑀭𑀲𑁆𑀲𑀸𑀢𑀺 𑀲𑀩𑁆𑀩𑀸𑀬𑀧𑀺 𑀤𑀲𑁆𑀲𑀦𑀯𑀺𑀜𑁆𑀜𑀸𑀡𑀪𑀸𑀯𑀢𑁄 𑀘 𑀯𑀺𑀜𑁆𑀜𑀸𑀡𑀓𑀸𑀬𑀸 𑀦 𑀪𑀯𑁂𑀬𑁆𑀬𑀼𑀁.

𑀬𑀣𑀸 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀫𑀦𑁄𑀥𑀸𑀢𑀼, 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀏𑀯𑀁 𑀤𑀲𑁆𑀲𑀦𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀫𑀦𑁄𑀥𑀸𑀢𑀼, 𑀢𑀢𑁄 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀳𑁄𑀦𑁆𑀢𑀻𑀢𑀺 𑀘𑁂? 𑀦, 𑀫𑀦𑁄𑀥𑀸𑀢𑀼𑀬𑀸 𑀤𑀲𑁆𑀲𑀦𑀥𑀸𑀢𑀼𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀬𑀣𑀸 𑀳𑀺 𑀫𑀦𑀲𑁄 𑀦𑀺𑀩𑁆𑀩𑀺𑀲𑁂𑀲𑀸𑀯𑀢𑁆𑀣𑀸 𑀫𑀦𑀦𑀫𑀢𑁆𑀢𑀢𑀸𑀬 𑀫𑀦𑁄𑀥𑀸𑀢𑀼, 𑀏𑀯𑀁 𑀤𑀲𑁆𑀲𑀦𑀲𑁆𑀲 𑀦𑀺𑀩𑁆𑀩𑀺𑀲𑁂𑀲𑀸𑀯𑀢𑁆𑀣𑀸 𑀤𑀲𑁆𑀲𑀦𑀫𑀢𑁆𑀢𑀢𑀸𑀬 𑀤𑀲𑁆𑀲𑀦𑀥𑀸𑀢𑀼 𑀲𑀺𑀬𑀸. 𑀢𑀜𑁆𑀘 𑀘𑀓𑁆𑀔𑀽𑀯𑀺𑀜𑁆𑀜𑀸𑀡𑀁 𑀭𑀽𑀧𑀯𑀺𑀲𑀬𑀦𑁆𑀢𑀺 𑀲𑀤𑁆𑀤𑀸𑀤𑀺𑀯𑀺𑀲𑀬𑀸𑀪𑁄𑀕𑀸𑀪𑀸𑀯𑀢𑁄 𑀲𑀯𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀲𑀫𑁆𑀪𑀯𑁄. 𑀢𑀢𑁄 𑀘 𑀭𑀽𑀧𑀸𑀭𑀫𑁆𑀫𑀡𑀧𑀲𑀼𑀢𑀫𑁂𑀯 𑀯𑀺𑀜𑁆𑀜𑀸𑀡𑀁 𑀲𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀬 𑀤𑀲𑁆𑀲𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀲𑀫𑀸𑀦𑀯𑀢𑁆𑀣𑀼𑀪𑀸𑀯𑀧𑁆𑀧𑀲𑀗𑁆𑀕𑀢𑁄, 𑀅𑀜𑁆𑀜𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀯𑀺𑀜𑁆𑀜𑀸𑀡𑀁 𑀦 𑀲𑀺𑀬𑀸, 𑀦 𑀘𑁂𑀢𑀁 𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑀺𑀬 𑀉𑀧𑁂𑀓𑁆𑀔𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁, 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀘 𑀩𑁆𑀬𑀯𑀥𑀸𑀬𑀺𑀓𑀸 𑀫𑀦𑁄𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀦 𑀘𑀲𑁆𑀲𑀸 𑀉𑀧𑁂𑀓𑁆𑀔𑀸𑀬 𑀯𑀺𑀬 𑀅𑀤𑀼𑀓𑁆𑀔𑀫𑀲𑀼𑀔𑀢𑀸 𑀅𑀤𑀲𑁆𑀲𑀦𑀸𑀤𑀺𑀅𑀫𑀦𑀦𑀢𑀸, 𑀅𑀢 𑀔𑁄 𑀫𑀦𑀦𑀓𑀺𑀘𑁆𑀘𑀸𑀯𑀺𑀲𑁂𑀲𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑀪𑀸𑀕𑀢𑀸. 𑀫𑀦𑁄 𑀳𑀺 𑀳𑀤𑀬𑀯𑀢𑁆𑀣𑀼𑀫𑁆𑀳𑀺 𑀯𑀢𑁆𑀢𑀫𑀸𑀦𑁄 𑀅𑀜𑁆𑀜𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀲𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀉𑀲𑀼𑀫𑀫𑀢𑁆𑀢𑁂 𑀫𑀦𑀦𑀫𑀢𑁆𑀢𑁂 𑀞𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀅𑀜𑁆𑀜𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀘 𑀉𑀝𑁆𑀞𑀳𑀦𑁆𑀢𑁄 𑀅𑀕𑁆𑀕𑀺 𑀯𑀺𑀬 𑀉𑀲𑀼𑀫𑀫𑀢𑁆𑀢𑁂 𑀉𑀝𑁆𑀞𑀳𑀢𑀺. 𑀧𑀘𑁆𑀘𑀬𑀸𑀦𑀼𑀭𑀽𑀧𑀧𑀯𑀢𑁆𑀢𑀺𑀓𑀸𑀦𑀺 𑀘 𑀫𑀦𑀦𑀫𑀢𑁆𑀢𑀸𑀦𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀦𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀝𑀺𑀖𑀲𑀜𑁆𑀜𑀸𑀲𑀳𑀕𑀢𑀸𑀦𑀜𑁆𑀳𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀦𑀧𑀝𑀺𑀖𑀸𑀢𑀚𑀢𑀸𑀬 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀓𑀺𑀘𑁆𑀘𑀁, 𑀫𑀦𑀦𑀮𑀓𑁆𑀔𑀡𑀺𑀦𑁆𑀤𑁆𑀭𑀺𑀬𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀘 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀯𑀺𑀘𑀺𑀦𑁆𑀢𑀦𑀸𑀲𑀫𑁆𑀪𑀽𑀢𑀢𑀸𑀬 𑀢𑀤𑀦𑀼𑀭𑀽𑀧𑀸𑀘𑀺𑀦𑁆𑀢𑀦𑀸. 𑀢𑀲𑁆𑀫𑀸 𑀅𑀪𑀺𑀦𑀺𑀧𑀸𑀢𑀧𑁆𑀧𑀘𑁆𑀘𑀬𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑀩𑀮𑁂𑀦 𑀪𑀯𑀗𑁆𑀕𑀮𑀓𑁆𑀔𑀡𑀁 𑀘𑀺𑀢𑁆𑀢𑀁 𑀘𑀮𑀦𑀸𑀯𑀢𑁆𑀣𑀁 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑀁 𑀘𑀺𑀦𑁆𑀢𑀦𑀸𑀯𑀺𑀲𑁂𑀲𑀯𑀺𑀭𑀳𑀢𑁄 𑀅𑀪𑀺𑀦𑀺𑀧𑀸𑀢𑀸𑀦𑀼𑀕𑀼𑀡𑀁 𑀘𑀺𑀦𑁆𑀢𑀦𑀸𑀯𑀲𑀸𑀦𑀁 𑀫𑀦𑀦𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺.

𑀤𑀲𑁆𑀲𑀦𑀸𑀤𑀺𑀧𑀺 ¶ 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀁 𑀤𑀼𑀢𑀺𑀬𑀁 𑀔𑀡𑀁 𑀅𑀦𑀢𑀺𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀸𑀦𑀼𑀕𑀼𑀡𑀁 𑀘𑀺𑀦𑁆𑀢𑀦𑀸𑀫𑀦𑀦𑀲𑀫𑀜𑁆𑀜𑀸𑀯𑀺𑀭𑀳𑀢𑁄 𑀤𑀲𑁆𑀲𑀦𑀸𑀤𑀺𑀅𑀪𑀺𑀦𑀺𑀧𑀸𑀢𑀯𑀺𑀲𑁂𑀲𑀯𑀺𑀘𑀺𑀢𑁆𑀢𑀁 𑀘𑀺𑀢𑁆𑀢𑀪𑀸𑀯𑀸𑀤𑀺𑀦𑀸 𑀲𑀫𑀸𑀦𑀁 𑀘𑀺𑀦𑁆𑀢𑀦𑀸𑀤𑀺𑀫𑀦𑀦𑀫𑀢𑁆𑀢𑀁 𑀅𑀜𑁆𑀜𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀯𑀢𑁆𑀣𑀼𑀓𑀺𑀘𑁆𑀘𑁂𑀳𑀺 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀓𑀸𑀬𑀲𑀗𑁆𑀕𑀳𑀺𑀢𑀸𑀧𑀺 𑀫𑀦𑁄𑀥𑀸𑀢𑀼 𑀫𑀦𑁄𑀤𑁆𑀯𑀸𑀭𑀦𑀺𑀓𑁆𑀔𑀫𑀧𑀯𑁂𑀲𑀪𑀽𑀢𑀸 𑀆𑀭𑀫𑁆𑀫𑀡𑀦𑁆𑀢𑀭𑁂 𑀤𑁆𑀯𑀸𑀭𑀦𑁆𑀢𑀭𑀫𑀦𑀲𑀺𑀓𑀸𑀭𑀢𑀩𑁆𑀩𑀺𑀲𑀬𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁂𑀦 ¶ 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀬𑀣𑀸𑀓𑁆𑀓𑀫𑀁 𑀧𑀼𑀭𑁂𑀘𑀭𑀸, 𑀅𑀦𑀼𑀘𑀭𑀸𑀢𑀺 𑀘 𑀯𑀼𑀢𑁆𑀢𑀸. 𑀲𑀸 𑀧𑀦𑀸𑀬𑀁 𑀲𑀢𑀺𑀧𑀺 𑀯𑀺𑀜𑁆𑀜𑀸𑀡𑀪𑀸𑀯𑁂 𑀫𑀦𑀲𑁄 𑀲𑀫𑁆𑀪𑀽𑀬 𑀯𑀺𑀲𑀺𑀝𑁆𑀞𑀫𑀦𑀦𑀓𑀺𑀘𑁆𑀘𑀸𑀪𑀸𑀯𑀢𑁄 𑀥𑀸𑀢𑀼𑀪𑀸𑀯𑀲𑀸𑀫𑀜𑁆𑀜𑁂𑀦 𑀫𑀦𑁄𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀘 𑀳𑁂𑀢𑀼𑀦𑀸 𑀫𑀢𑁆𑀢-𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀬𑁄𑀕𑀢𑁄 𑀫𑀦𑁄𑀫𑀢𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀓𑀸𑀬𑀲𑀗𑁆𑀕𑀳𑁄𑀧𑀺 𑀘𑀲𑁆𑀲𑀸 𑀬𑀼𑀚𑁆𑀚𑀢𑀺 𑀏𑀯. 𑀅𑀜𑁆𑀜𑀯𑀺𑀜𑁆𑀜𑀸𑀡𑁂𑀳𑀺 𑀧𑀦 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀘 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀫𑀦𑁄𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀸𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀧𑀦 𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀲𑁂𑀲𑀦𑀁 𑀫𑀦𑁄𑀕𑀳𑀡𑀁. 𑀥𑀸𑀢𑀼𑀯𑀺𑀲𑁂𑀲𑀦𑀢𑁆𑀣𑁂 𑀘 𑀫𑀦𑁄𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂 𑀯𑀺𑀜𑁆𑀜𑀸𑀡𑀯𑀺𑀲𑁂𑀲𑀦𑀁 𑀤𑁆𑀯𑀸𑀭𑀪𑀽𑀢𑀫𑀦𑁄𑀤𑀲𑁆𑀲𑀦𑀫𑁂𑀯𑀸𑀢𑀺 𑀤𑁆𑀯𑀸𑀭𑀲𑀫𑀜𑁆𑀜𑀸𑀭𑀳𑀢𑁆𑀢𑀸 𑀦 𑀫𑀦𑁄𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀫𑀦𑁄𑀤𑁆𑀯𑀸𑀭𑀦𑁆𑀢𑁄𑀕𑀥𑀁, 𑀦 𑀘 𑀤𑀲𑁆𑀲𑀦𑀸𑀤𑀺𑀧𑀼𑀭𑁂𑀘𑀭𑀸𑀦𑀼𑀘𑀭𑀦𑁆𑀢𑀺 𑀫𑀦𑀲𑁄 𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑀲𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘 𑀫𑀦𑁄𑀤𑁆𑀯𑀸𑀭𑀲𑀫𑀜𑁆𑀜𑀸𑀭𑀳𑀁, 𑀲𑀯𑀺𑀲𑁂𑀲𑀜𑁆𑀘 𑀢𑀲𑁆𑀲 𑀫𑀦𑀦𑀓𑀺𑀘𑁆𑀘𑀁, 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀜𑁆𑀘𑀸𑀢𑀺 𑀫𑀢𑁆𑀢𑀲𑀤𑁆𑀤𑀲𑁆𑀲 𑀮𑁄𑀧𑀫𑀦𑁆𑀢𑀭𑁂𑀦 ‘‘𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺, 𑀦𑀺𑀚𑁆𑀚𑀻𑀯𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑀲𑀮𑁆𑀮𑀫𑀺𑀯 𑀲𑀽𑀮𑀫𑀺𑀯 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀲𑀫𑀸𑀬𑁄𑀕𑀢𑁄 𑀤𑀝𑁆𑀞𑀩𑁆𑀩𑁄. 𑀯𑁂𑀤𑀦𑀸𑀲𑀮𑁆𑀮𑀲𑀽𑀮𑀬𑁄𑀕𑀸𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑀲𑀮𑁆𑀮𑀲𑀽𑀮𑀬𑁄𑀕𑀢𑁄. 𑀆𑀢𑀼𑀭𑀸 𑀯𑀺𑀬𑀸𑀢𑀺 𑀢𑁂𑀦 𑀆𑀢𑀼𑀭𑀺𑀪𑀽𑀢𑀸 𑀧𑀼𑀕𑁆𑀕𑀮𑀸 𑀯𑀺𑀬. 𑀆𑀲𑀸𑀬𑁂𑀯 𑀤𑀼𑀓𑁆𑀔𑀁 𑀆𑀲𑀸𑀤𑀼𑀓𑁆𑀔𑀁, 𑀆𑀲𑀸𑀯𑀺𑀖𑀸𑀢𑀁 𑀤𑀼𑀓𑁆𑀔𑀁 𑀯𑀸. 𑀲𑀜𑁆𑀜𑀸 𑀳𑀺 𑀅𑀲𑀼𑀪𑀸𑀤𑀺𑀓𑀫𑁆𑀧𑀺 𑀲𑀼𑀪𑀸𑀤𑀺𑀢𑁄 𑀲𑀚𑁆𑀚𑀸𑀦𑀦𑁆𑀢𑀻 𑀆𑀲𑀁, 𑀢𑀲𑁆𑀲𑀸 𑀘 𑀯𑀺𑀖𑀸𑀢𑀁 𑀆𑀲𑀻𑀲𑀺𑀢𑀲𑀼𑀪𑀸𑀤𑀺𑀅𑀲𑀺𑀤𑁆𑀥𑀺𑀬𑀸 𑀚𑀦𑁂𑀢𑀻𑀢𑀺. 𑀯𑀦𑀫𑀺𑀕𑁄 𑀢𑀺𑀡𑀧𑀼𑀭𑀺𑀲𑀁 𑀧𑀼𑀭𑀺𑀲𑁄𑀢𑀺 𑀕𑀡𑁆𑀳𑀦𑁆𑀢𑁄 𑀅𑀬𑀣𑀸𑀪𑀽𑀘𑁆𑀘𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀓𑁄, 𑀢𑀣𑀸 𑀲𑀜𑁆𑀜𑀸𑀧𑀻𑀢𑀺 𑀆𑀳 ‘‘𑀯𑀦𑀫𑀺𑀕𑁄 𑀯𑀺𑀬𑀸’’𑀢𑀺. 𑀓𑀫𑁆𑀫𑀧𑀥𑀸𑀦𑀸 𑀲𑀗𑁆𑀔𑀸𑀭𑀸𑀢𑀺 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀸𑀢𑀺𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑁄𑀢𑀺 𑀅𑀢𑁆𑀢𑀦𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑁂𑀦 𑀚𑀸𑀢𑀺𑀤𑀼𑀓𑁆𑀔𑁂𑀦 𑀅𑀦𑀼𑀩𑀦𑁆𑀥𑀢𑀸. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺 𑀳𑀺 𑀚𑀸𑀢𑀺𑀤𑀼𑀓𑁆𑀔𑀦𑁆𑀢𑀺. 𑀧𑀤𑀼𑀫𑀁 𑀯𑀺𑀬 𑀤𑀺𑀲𑁆𑀲𑀫𑀸𑀦𑀁 𑀔𑀼𑀭𑀘𑀓𑁆𑀓𑀁 𑀯𑀺𑀬 𑀭𑀽𑀧𑀫𑁆𑀧𑀺 ¶ 𑀇𑀢𑁆𑀣𑀺𑀆𑀤𑀺𑀪𑀸𑀯𑁂𑀦 𑀤𑀺𑀲𑁆𑀲𑀫𑀸𑀦𑀁 𑀦𑀸𑀦𑀸𑀯𑀺𑀥𑀼𑀧𑀤𑁆𑀤𑀯𑀁 𑀚𑀦𑁂𑀢𑀺. 𑀲𑀩𑁆𑀩𑁂 𑀅𑀦𑀢𑁆𑀣𑀸 𑀭𑀸𑀕𑀸𑀤𑀬𑁄, 𑀚𑀸𑀢𑀺𑀆𑀤𑀬𑁄 𑀘 𑀯𑀺𑀲𑀬𑀪𑀽𑀢𑀸, 𑀅𑀦𑀼𑀧𑀲𑀦𑁆𑀢𑀸, 𑀲𑀧𑁆𑀧𑀝𑀺𑀪𑀬𑀸 𑀘𑀸𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀅𑀫𑀢𑀸𑀤𑀺𑀢𑁄 𑀤𑀝𑁆𑀞𑀩𑁆𑀩𑀸.

𑀯𑀯𑀢𑁆𑀣𑀸𑀦𑀸𑀪𑀸𑀯𑁄 ‘‘𑀇𑀤𑀫𑁂𑀯 𑀇𑀫𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺 𑀦𑀺𑀬𑀫𑀸𑀪𑀸𑀯𑁄, 𑀢𑁂𑀦 𑀬𑀣𑀸 𑀅𑀭𑀜𑁆𑀜𑀫𑀓𑁆𑀓𑀝𑁄 𑀓𑁂𑀦𑀘𑀺 𑀅𑀦𑀺𑀯𑀸𑀭𑀺𑀢𑁄 𑀕𑀳𑀺𑀢𑀁 𑀏𑀓𑀁 𑀭𑀼𑀓𑁆𑀔𑀲𑀸𑀔𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀢𑀫𑁆𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀦𑁆𑀢𑀺 𑀓𑀢𑁆𑀣𑀘𑀺 𑀅𑀦𑀯𑀝𑁆𑀞𑀺𑀢𑁄 𑀧𑀭𑀺𑀩𑁆𑀪𑀫𑀢𑀺, 𑀏𑀯𑀁 𑀕𑀳𑀺𑀢𑀁 𑀏𑀓𑀁 𑀆𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁, 𑀢𑀫𑁆𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀦𑁆𑀢𑀺 𑀅𑀦𑀯𑀝𑁆𑀞𑀺𑀢𑀢𑀸, 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸 𑀘 𑀫𑀓𑁆𑀓𑀝𑀲𑀫𑀸𑀦𑀢𑀸𑀢𑀺 ¶ 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀺𑀯𑁂𑀥𑀯𑀺𑀤𑁆𑀥𑁄𑀧𑀺 𑀉𑀧𑁆𑀧𑀣𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀤𑀼𑀝𑁆𑀞𑀲𑁆𑀲𑁄 𑀅𑀲𑁆𑀲𑀔𑀴𑀼𑀗𑁆𑀓𑁄. 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀢𑁄𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀇𑀘𑁆𑀙𑀺𑀢𑀸𑀭𑀫𑁆𑀫𑀡𑁂 𑀦𑀺𑀧𑀸𑀢𑀺𑀪𑀸𑀯𑀢𑁄. 𑀦𑀸𑀦𑀸𑀯𑁂𑀲𑀥𑀸𑀭𑀻 𑀭𑀗𑁆𑀕𑀦𑀝𑁄.

𑀆𑀬𑀢𑀦𑀤𑀸𑀢𑀼𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀦𑁆𑀦𑀭𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁬. 𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀇𑀦𑁆𑀤𑁆𑀭𑀺𑀬𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁫𑁨𑁫. 𑀩𑀸𑀯𑀻𑀲𑀢𑀻𑀢𑀺 ¶ ¶ 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀺 𑀢𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀪𑀸𑀯𑁂 𑀢𑀁𑀤𑁆𑀯𑀸𑀭𑀺𑀓𑁂𑀳𑀺 𑀅𑀢𑁆𑀢𑀦𑁄 𑀇𑀦𑁆𑀤𑀪𑀸𑀯𑀁 𑀧𑀭𑀫𑀺𑀲𑁆𑀲𑀭𑀪𑀸𑀯𑀁 𑀓𑀸𑀭𑀬𑀢𑀻𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀢𑀜𑁆𑀳𑀺 𑀢𑁂 𑀭𑀽𑀧𑀕𑁆𑀕𑀳𑀡𑁂 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑁂𑀢𑀺, 𑀢𑁂 𑀘 𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺. 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀯𑀺𑀚𑀸𑀦𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀇𑀢𑁆𑀣𑀺𑀪𑀸𑀯𑀮𑀓𑁆𑀔𑀡𑁂, 𑀧𑀭𑀺𑀲𑀪𑀸𑀯𑀮𑀓𑁆𑀔𑀡𑁂, 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑁂, 𑀲𑀼𑀔𑀮𑀓𑁆𑀔𑀡𑁂, 𑀤𑀼𑀓𑁆𑀔𑀮𑀓𑁆𑀔𑀡𑁂, 𑀲𑁄𑀫𑀦𑀲𑁆𑀲𑀮𑀓𑁆𑀔𑀡𑁂, 𑀤𑁄𑀫𑀦𑀲𑁆𑀲𑀮𑀓𑁆𑀔𑀡𑁂, 𑀉𑀧𑁂𑀓𑁆𑀔𑀸𑀮𑀓𑁆𑀔𑀡𑁂, 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂, 𑀧𑀕𑁆𑀕𑀳𑀮𑀓𑁆𑀔𑀡𑁂, 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂, 𑀤𑀲𑁆𑀲𑀦𑀮𑀓𑁆𑀔𑀡𑁂, 𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑁂 𑀚𑀸𑀦𑀦𑀮𑀓𑁆𑀔𑀡𑁂, 𑀜𑀸𑀢𑀸𑀦𑀁 𑀏𑀯 𑀥𑀫𑁆𑀫𑀸𑀦𑀁 𑀧𑀼𑀦 𑀆𑀚𑀸𑀦𑀦𑁂 𑀅𑀜𑁆𑀜𑀸𑀢𑀸𑀯𑀺𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑀯𑀺𑀚𑀸𑀦𑀺𑀬𑀸𑀢𑀺 𑀯𑀺𑀚𑀸𑀦𑁂𑀬𑁆𑀬. 𑀪𑀽𑀫𑀺𑀢𑁄 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀧𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀢𑀸𑀯𑀢𑁆𑀯𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀁 𑀧𑀦 𑀢𑀸𑀯𑀢𑁆𑀯𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀲𑀫𑁆𑀫𑀲𑀦𑀼𑀧𑀕𑀸𑀦𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑀢𑁄 𑀤𑀝𑁆𑀞𑀩𑁆𑀩𑀢𑀸 𑀇𑀥 𑀦 𑀕𑀳𑀺𑀢𑀸.

𑀧𑀼𑀩𑁆𑀩𑀪𑀸𑀕𑁂𑀢𑀺 𑀅𑀭𑀺𑀬𑀫𑀕𑁆𑀕𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀅𑀦𑀜𑁆𑀜𑀸𑀢𑀦𑁆𑀢𑀺 𑀦 𑀅𑀜𑁆𑀜𑀸𑀢𑀁 𑀦 𑀅𑀥𑀺𑀕𑀢𑀁. 𑀦𑀺𑀘𑁆𑀘𑀢𑀸𑀬 𑀦𑀢𑁆𑀣𑀺 𑀏𑀢𑀲𑁆𑀲 𑀫𑀢𑀁 𑀪𑀗𑁆𑀕𑁄, 𑀦 𑀯𑀸 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀫𑀭𑀡𑀦𑁆𑀢𑀺 𑀅𑀫𑀢𑀁, 𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑀜𑁆𑀘𑀸𑀢𑀺 𑀅𑀫𑀢𑀧𑀤𑀁 𑀦𑀺𑀩𑁆𑀩𑀸𑀦𑀁. ‘‘𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀏𑀢𑁂𑀦 𑀧𑀼𑀩𑁆𑀩𑀪𑀸𑀕𑀯𑀲𑁂𑀦𑁂𑀢𑀁 𑀇𑀦𑁆𑀤𑁆𑀭𑀺𑀬𑀁 𑀏𑀯𑀁 𑀯𑁄𑀳𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀚𑀸𑀦𑀦𑀢𑁄𑀢𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀚𑀸𑀦𑀦𑀢𑁄. 𑀬𑁂𑀦 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀸 𑀅𑀜𑁆𑀜𑀸𑀢𑀸𑀯𑀺𑀦𑁄 𑀳𑁄𑀦𑁆𑀢𑀺 ¶ , 𑀲𑁄 𑀅𑀜𑁆𑀜𑀸𑀢𑀸𑀯𑀺𑀪𑀸𑀯𑁄 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀚𑀸𑀦𑀦𑀔𑀻𑀡𑀸𑀲𑀯𑀲𑁆𑀲 𑀪𑀸𑀯𑀪𑀽𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀢𑁄 ‘‘𑀔𑀻𑀡𑀸𑀲𑀯𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀯𑀼𑀢𑁆𑀢𑀁.

𑀮𑀺𑀗𑁆𑀕𑁂𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀻𑀢𑀺 𑀮𑀺𑀗𑁆𑀕𑀁, 𑀮𑀺𑀗𑁆𑀕𑀻𑀬𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀮𑀺𑀗𑁆𑀕𑀁. 𑀓𑀺𑀁 𑀮𑀺𑀗𑁆𑀕𑁂𑀢𑀺, 𑀓𑀺𑀁 𑀯𑀸 𑀮𑀺𑀗𑁆𑀕𑀻𑀬𑀢𑀻𑀢𑀺? 𑀇𑀦𑁆𑀤𑀁, 𑀇𑀦𑁆𑀤𑁄 𑀯𑀸. 𑀇𑀦𑁆𑀤𑀲𑁆𑀲 𑀮𑀺𑀗𑁆𑀕 𑀇𑀦𑁆𑀤𑀮𑀺𑀗𑁆𑀕𑀁, 𑀇𑀦𑁆𑀤𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑁄 𑀢𑀁𑀲𑀪𑀸𑀯𑁄 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄, 𑀇𑀦𑁆𑀤𑀮𑀺𑀗𑁆𑀕𑀫𑁂𑀯 𑀯𑀸 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 ¶ 𑀅𑀢𑁆𑀣𑁄𑀢𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄. 𑀲𑀚𑁆𑀚𑀺𑀢𑀁 𑀉𑀧𑁆𑀧𑀸𑀤𑀺𑀢𑀦𑁆𑀢𑀺 𑀲𑀺𑀝𑁆𑀞𑀁, 𑀇𑀦𑁆𑀤𑁂𑀦 𑀲𑀺𑀝𑁆𑀞𑀁 𑀇𑀦𑁆𑀤𑀲𑀺𑀝𑁆𑀞𑀁. 𑀚𑀼𑀝𑁆𑀞𑀁 𑀲𑁂𑀯𑀺𑀢𑀁. 𑀓𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀇𑀦𑁆𑀤𑀲𑁆𑀲 𑀮𑀺𑀗𑁆𑀕𑀸𑀦𑀺, 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀓𑀫𑁆𑀫𑀚𑀸𑀦𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀦 𑀅𑀜𑁆𑀜𑀸𑀦𑀺, 𑀢𑁂 𑀘 𑀤𑁆𑀯𑁂 𑀅𑀢𑁆𑀣𑀸 𑀓𑀫𑁆𑀫𑁂 𑀏𑀯 𑀬𑁄𑀚𑁂𑀢𑀩𑁆𑀩𑀸, 𑀇𑀢𑀭𑁂 𑀘 𑀪𑀕𑀯𑀢𑀺 𑀏𑀯𑀸𑀢𑀺 𑀆𑀳 ‘‘𑀬𑀣𑀸𑀬𑁄𑀕’’𑀦𑁆𑀢𑀺. 𑀢𑁂𑀦𑀸𑀢𑀺 𑀪𑀕𑀯𑀢𑁄, 𑀓𑀫𑁆𑀫𑀲𑁆𑀲 𑀘 𑀇𑀦𑁆𑀤𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺 𑀜𑀸𑀧𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀨𑀮𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀻𑀳𑀺 𑀓𑀸𑀭𑀡𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀅𑀯𑀩𑁄𑀥𑀢𑁄. ‘‘𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁯.𑁩𑁫) 𑀕𑁄𑀘𑀭𑀓𑀭𑀡𑀫𑁆𑀧𑀺 𑀆𑀲𑁂𑀯𑀦𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬𑀸’’𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀕𑁄𑀘𑀭𑀺𑀓𑀸𑀢𑀩𑁆𑀩𑀢𑁆𑀢𑁂𑀧𑀺 ‘‘𑀓𑀸𑀦𑀺𑀘𑀻’’𑀢𑀺 𑀯𑀘𑀦𑀁 𑀅𑀯𑀺𑀧𑀲𑁆𑀲𑀺𑀢𑀩𑁆𑀩𑀸𑀦𑀁 𑀩𑀳𑀼𑀮𑀁 𑀫𑀦𑀲𑀺𑀓𑀭𑀡𑁂𑀦 𑀅𑀦𑀸𑀲𑁂𑀯𑀦𑀻𑀬𑀢𑁆𑀢𑀸. 𑀧𑀘𑁆𑀘𑀯𑁂𑀓𑁆𑀔𑀦𑀸𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀼 𑀳𑁄𑀢𑀻𑀢𑀺. ‘‘𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁭𑁦) 𑀪𑀸𑀯𑀦𑀸 𑀆𑀲𑁂𑀯𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 𑀪𑀸𑀯𑁂𑀢𑀩𑁆𑀩𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬𑀸’’𑀢𑀺.

𑀆𑀥𑀺𑀧𑀘𑁆𑀘𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄. 𑀅𑀲𑀢𑀺𑀧𑀺 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂 𑀅𑀜𑁆𑀜𑀸𑀓𑀸𑀭𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑁂𑀳𑀺 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁂 𑀆𑀥𑀺𑀧𑀘𑁆𑀘𑀁. 𑀇𑀫𑀲𑁆𑀫𑀺𑀁 𑀘 𑀅𑀢𑁆𑀣𑁂 𑀇𑀦𑁆𑀤𑀦𑁆𑀢𑀺 𑀧𑀭𑀺𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀺𑀘𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀘𑀓𑁆𑀔𑀸𑀤𑀻𑀲𑀼 𑀤𑀲𑁆𑀲𑀺𑀢𑁂𑀦 𑀦𑀬𑁂𑀦 𑀅𑀜𑁆𑀜𑁂𑀲𑀜𑁆𑀘 𑀚𑀻𑀯𑀺𑀢𑀸𑀤𑀻𑀦𑀁 𑀢𑀤𑀦𑀼𑀯𑀢𑁆𑀢𑀻𑀲𑀼 𑀆𑀥𑀺𑀧𑀘𑁆𑀘𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑀅𑀫𑁄𑀳𑁄𑀬𑁂𑀯 𑀦 𑀯𑀺𑀲𑀼𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸, 𑀢𑀲𑁆𑀫𑀸 𑀢𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀓𑀣𑀸𑀬𑀁 𑀯𑀺𑀪𑀸𑀯𑀺𑀢𑀸𑀦𑀺 𑀮𑀓𑁆𑀔𑀡𑀸𑀤𑀻𑀦𑀺 𑀢𑁂𑀲𑀜𑁆𑀘 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀸𑀦𑀺 𑀢𑀢𑁆𑀣 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀮𑀓𑁆𑀔𑀡𑀸𑀤𑀻𑀳𑀺 𑀅𑀭𑀽𑀧𑁂𑀦𑁂𑀯 𑀆𑀕𑀢𑀸𑀦𑀺.

𑁫𑁨𑁬. 𑀲𑀢𑁆𑀢𑀸𑀦𑀁 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀸𑀥𑀸𑀭𑀡𑀁, 𑀧𑀤𑀸𑀦𑀜𑁆𑀘 𑀧𑀬𑁄𑀚𑀦𑀦𑁆𑀢𑀺 ¶ 𑀆𑀳 ‘‘𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀬𑀸’’𑀢𑀺𑀆𑀤𑀺. 𑀅𑀜𑁆𑀜𑁂𑀲𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀲𑀢𑀺𑀧𑀺 𑀅𑀢𑁆𑀢𑀪𑀸𑀯𑀧𑀜𑁆𑀜𑀸𑀧𑀦𑀸𑀬 𑀫𑀽𑀮𑀪𑀸𑀯𑀢𑁄 𑀘𑀓𑁆𑀔𑀸𑀤𑀻𑀦𑀁 𑀲𑀸𑀢𑀺𑀲𑀬𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀦𑁆𑀤𑀺𑀬𑀸𑀤𑀻𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁧𑁯). 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀤𑁂𑀲𑀦𑀸𑀓𑁆𑀓𑀫𑁄 𑀯𑀼𑀢𑁆𑀢𑁄𑀢𑀺 ¶ 𑀇𑀥𑀸𑀧𑀺 ‘‘𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀇𑀦𑁆𑀤𑁆𑀭𑀺𑀬𑀬𑀫𑀓𑀤𑁂𑀲𑀦𑀸𑀬 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧 𑀆𑀤𑀬𑁄) 𑀲𑀫𑁂𑀢𑀺. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁧𑁯 𑀆𑀤𑀬𑁄) 𑀧𑀦 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀅𑀚𑁆𑀛𑀸𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀅𑀦𑀼𑀧𑀸𑀮𑀓𑀪𑀸𑀯𑀤𑀻𑀧𑀦𑀢𑁆𑀣𑀁 𑀢𑁂𑀲 𑀫𑀚𑁆𑀛𑁂 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀘 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀁. 𑀬𑀸𑀯 𑀘 𑀤𑀼𑀯𑀺𑀥𑀢𑁆𑀢𑀪𑀸𑀯𑀸𑀦𑀼𑀧𑀸𑀮𑀓𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀯 𑀤𑀼𑀓𑁆𑀔𑀪𑀽𑀢𑀸𑀦𑀁 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁, 𑀢𑁂𑀦 𑀘 𑀘𑀓𑁆𑀔𑀸𑀤𑀻𑀦𑀁 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀁 𑀜𑀸𑀧𑁂𑀢𑀺. 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀢𑀲𑁆𑀲𑁂𑀯𑀸𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯. 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸𑀢𑀺 𑀪𑀸𑀯𑀦𑀸𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀸𑀦𑁆𑀢𑀭𑀸 𑀳𑀺 𑀪𑀸𑀯𑀦𑀸𑀢𑀺.

𑀪𑁂𑀤𑁄𑀢𑀺 𑀇𑀥 𑀲𑀪𑀸𑀯𑀢𑁄 𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀲𑁂𑀲𑀸𑀦𑀁 𑀅𑀪𑁂𑀤𑁄’’𑀢𑀺. 𑀦𑀦𑀼 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀲𑀪𑀸𑀯𑁄, 𑀢𑁂𑀦𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀪𑁂𑀤𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀲𑁆𑀲 𑀧𑀦 𑀭𑀽𑀧𑀸𑀭𑀽𑀧𑀲𑀪𑀸𑀯𑀓𑀢𑁄 𑀪𑁂𑀤𑁄 𑀕𑀳𑀺𑀢𑁄, 𑀦 𑀏𑀯𑀁 𑀲𑁂𑀲𑀸𑀦𑀁 𑀓𑁄𑀘𑀺 𑀪𑁂𑀤𑁄 𑀅𑀢𑁆𑀣𑀻𑀢𑀺 𑀢𑁂𑀲𑀁 𑀅𑀪𑁂𑀤𑁄𑀢𑀺 𑀪𑁂𑀤𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀦𑀦𑀼 𑀘𑁂𑀢𑁆𑀣 𑀯𑁂𑀤𑀦𑀸, 𑀧𑀜𑁆𑀜𑀸 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀸𑀢𑀺? 𑀦, 𑀬𑀣𑀸 𑀤𑁂𑀲𑀺𑀢𑁂𑀲𑀼 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀪𑁂𑀤𑀸𑀪𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑁫𑁨𑁭. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀲𑀢𑀺𑀧𑀺 𑀧𑀼𑀭𑁂𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀫𑁂𑀯 𑀓𑀺𑀘𑁆𑀘𑀁 𑀓𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸, 𑀇𑀦𑁆𑀤𑁆𑀭𑀺𑀬𑀓𑀣𑀸𑀬 𑀘 𑀅𑀥𑀺𑀓𑀢𑀢𑁆𑀢𑀸. 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀆𑀓𑀸𑀭𑁄 𑀅𑀢𑁆𑀢𑀸𑀓𑀸𑀭𑁄, 𑀢𑀲𑁆𑀲 𑀅𑀦𑀼𑀯𑀢𑁆𑀢𑀸𑀧𑀦𑀁 𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀢𑁆𑀢𑀸𑀧𑀦𑀁. 𑀢𑁂𑀦𑀸𑀳 ‘‘𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀲𑀗𑁆𑀔𑀸𑀢𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀢𑁆𑀢𑀸𑀧𑀦’’𑀦𑁆𑀢𑀺. 𑀅𑀣 𑀯𑀸 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀘 𑀅𑀢𑁆𑀢𑀸𑀓𑀸𑀭𑀲𑁆𑀲 𑀘 𑀅𑀦𑀼𑀯𑀢𑁆𑀢𑀸𑀧𑀦𑀁 𑀢𑀺𑀓𑁆𑀔…𑀧𑁂… 𑀯𑀢𑁆𑀢𑀸𑀧𑀦𑀁. 𑀯𑀺𑀲𑀼𑀁 𑀅𑀢𑁆𑀢𑀸𑀓𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀭𑀽𑀧𑀸𑀯𑀪𑀸𑀲𑀦𑀸𑀤𑀺𑀓𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀳𑀺 𑀭𑀽𑀧𑀸𑀪𑀺𑀳𑀦𑀦𑀬𑁄𑀕𑁆𑀬𑀢𑀸𑀲𑀗𑁆𑀔𑀸𑀢𑁂 𑀭𑀽𑀧𑀸𑀯𑀪𑀸𑀲𑀦𑀲𑀸𑀫𑀢𑁆𑀣𑀺𑀬𑁂 𑀅𑀲𑀢𑀺 𑀦 𑀓𑀤𑀸𑀘𑀺𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀫𑁆𑀪𑀯𑀢𑀺. 𑀏𑀲 𑀦𑀬𑁄 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺. 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑀸𑀯𑀢𑁆𑀢𑀸𑀧𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑁂𑀲𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀩𑁆𑀩𑀲𑁂𑀦𑁂𑀯 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺 𑀘𑁂𑀢𑀲𑀺𑀓𑀪𑀸𑀯𑀢𑁄 ¶ , 𑀦 𑀢𑁂𑀲𑀁 𑀯𑀲𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 ¶ . 𑀅𑀬𑀜𑁆𑀳𑀺𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀲𑀩𑁆𑀩𑀢𑁆𑀣 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀓𑀸𑀭𑁄 𑀅𑀦𑀼𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀧𑀺 𑀅𑀦𑀼𑀧𑁆𑀧𑀸𑀤𑀦𑁂, 𑀅𑀦𑀼𑀧𑀢𑁆𑀣𑀫𑁆𑀪𑀦𑁂 𑀘 𑀢𑀧𑁆𑀧𑀘𑁆𑀘𑀬𑀸𑀦𑀁 𑀢𑀧𑁆𑀧𑀯𑀢𑁆𑀢𑀦𑁂 𑀦𑀺𑀫𑀺𑀢𑁆𑀢𑀪𑀸𑀯𑁄 𑀅𑀦𑀼𑀯𑀺𑀥𑀸𑀦𑀁.

𑀙𑀸𑀤𑁂𑀢𑁆𑀯𑀸 𑀨𑀭𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀚𑁄𑀢𑁆𑀣𑀭𑀺𑀢𑁆𑀯𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀢𑀺, 𑀲𑀳𑀚𑀸𑀢𑀥𑀫𑁆𑀫𑀸 𑀘 𑀢𑀲𑁆𑀲𑀸 𑀯𑀲𑁂𑀦 𑀲𑀼𑀔𑀤𑀼𑀓𑁆𑀔𑀩𑀸𑀯𑀧𑁆𑀧𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀬𑀣𑀸𑀲𑀓𑀁 𑀑𑀴𑀸𑀭𑀺𑀓𑀸𑀓𑀸𑀭𑀸𑀦𑀼𑀧𑀸𑀧𑀦’’𑀦𑁆𑀢𑀺. 𑀅𑀲𑀦𑁆𑀢𑀲𑁆𑀲, 𑀅𑀧𑀡𑀻𑀢𑀲𑁆𑀲𑀧𑀺 𑀅𑀓𑀼𑀲𑀮𑀢𑀩𑁆𑀩𑀺𑀧𑀸𑀓𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀬𑀣𑀸𑀭𑀳𑀁 𑀫𑀚𑁆𑀛𑀢𑁆𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀸𑀦𑀚𑀸𑀢𑀺𑀬𑁂𑀳𑀺 𑀯𑀸 𑀲𑀼𑀔𑀤𑀼𑀓𑁆𑀔𑁂𑀳𑀺 𑀲𑀦𑁆𑀢𑀧𑀡𑀻𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀦𑁆𑀢𑀺 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀁. 𑀧𑀲𑀦𑁆𑀦𑀸𑀓𑀸𑀭𑀸𑀤𑀸𑀢𑀺 𑀧𑀲𑀦𑁆𑀦𑀧𑀕𑁆𑀕𑀳𑀺𑀢𑀉𑀧𑀝𑁆𑀞𑀺𑀢𑀲𑀫𑀸𑀳𑀺𑀢𑀤𑀲𑁆𑀲𑀦𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀬𑀣𑀸𑀓𑁆𑀓𑀫𑀁 𑀲𑀤𑁆𑀥𑀸𑀤𑀻𑀦𑀁. 𑀩𑁆𑀬𑀸𑀧𑀸𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀺𑀘𑁆𑀘𑀁 𑀤𑀲𑁆𑀲𑀺𑀢𑀁. 𑀢𑁂𑀦𑁂𑀯 𑀘 𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀢𑀁𑀢𑀁𑀲𑀁𑀬𑁄𑀚𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀓𑀺𑀘𑁆𑀘𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺. 𑀓𑀢𑀲𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀲𑁆𑀲 𑀓𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀫𑀢𑀸𑀪𑀺𑀫𑀼𑀔𑀫𑁂𑀯 𑀢𑀩𑁆𑀪𑀸𑀯𑀧𑀘𑁆𑀘𑀬𑁄 𑀘 𑀳𑁄𑀢𑀺, 𑀦 𑀇𑀢𑀭𑀸𑀦𑀺 𑀯𑀺𑀬 𑀓𑀺𑀘𑁆𑀘𑀦𑁆𑀢𑀭𑀧𑀲𑀼𑀢𑀁. 𑀢𑁂𑀦𑀸𑀳 ‘‘𑀅𑀫𑀢𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀬𑀢𑀸 𑀘𑀸’’𑀢𑀺.

𑁫𑁨𑁮. 𑀪𑀽𑀫𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀉𑀢𑁆𑀢𑀸𑀦𑀢𑁆𑀣𑁄 𑀏𑀯. 𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦 𑀏𑀢𑁆𑀢𑀓𑁂𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀏𑀯 𑀘 𑀯𑀼𑀢𑁆𑀢𑀸𑀦𑀻𑀢𑀺? 𑀆𑀥𑀺𑀧𑀘𑁆𑀘𑀝𑁆𑀞𑀯𑀲𑁂𑀦, 𑀆𑀥𑀺𑀧𑀘𑁆𑀘𑀁 𑀦𑀸𑀫 𑀇𑀲𑁆𑀲𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑁂𑀢𑀁. 𑀢𑀬𑀺𑀤𑀁 𑀆𑀥𑀺𑀧𑀘𑁆𑀘𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂, 𑀨𑀮𑁂 𑀘𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀓𑀲𑁆𑀫𑀸 𑀦 𑀮𑀩𑁆𑀪𑀢𑀺? 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀸 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀢𑀺 𑀲𑀺𑀬𑀸 𑀨𑀮𑀳𑁂𑀢𑀼𑀥𑀫𑁆𑀫𑁂𑀲𑀼 𑀅𑀦𑀼𑀯𑀢𑁆𑀢𑀦𑀸𑀦𑀼𑀯𑀢𑁆𑀢𑀦𑀻𑀬𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀅𑀢𑁆𑀣𑀺 𑀢𑁂𑀲𑀁 𑀯𑀺𑀲𑁂𑀲𑁄. 𑀲𑁆𑀯𑀸𑀬𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀘𑀓𑁆𑀔𑀸𑀤𑀻𑀦𑀁 𑀲𑀺𑀤𑁆𑀥𑀫𑀸𑀥𑀺𑀧𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁧𑁯) 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄𑀬𑁂𑀯. 𑀅𑀧𑀺𑀘 𑀔𑀦𑁆𑀥𑀧𑀜𑁆𑀘𑀓𑁂 𑀬𑀸𑀬𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀸 𑀯𑀺𑀲𑁂𑀲𑀦𑀺𑀲𑁆𑀲𑀬𑁄 ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’’𑀢𑀺 𑀢𑀸𑀦𑀺 𑀢𑀸𑀯 𑀆𑀥𑀺𑀧𑀘𑁆𑀘𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂…𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺𑀢𑁄 (𑀯𑀺𑀪. 𑁨𑁧𑁯) 𑀯𑀼𑀢𑁆𑀢𑀸𑀦𑀺. 𑀲𑁆𑀯𑀸𑀬𑀁 𑀅𑀢𑁆𑀢𑀪𑀸𑀯𑁄 𑀇𑀫𑁂𑀲𑀁 𑀯𑀲𑁂𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀲𑀫𑀜𑁆𑀜𑀁 𑀮𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ¶ 𑀪𑀸𑀯𑀤𑁆𑀯𑀬𑀁. 𑀢𑀬𑀺𑀫𑁂 𑀉𑀧𑀸𑀤𑀺𑀦𑁆𑀦𑀥𑀫𑁆𑀫𑀸 𑀬𑁂𑀦 𑀥𑀫𑁆𑀫𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀅𑀬𑀁 𑀲𑁄 𑀥𑀫𑁆𑀫𑁄 𑀢𑁂𑀲𑀁 𑀞𑀺𑀢𑀺𑀳𑁂𑀢𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑁆𑀯𑀸𑀬𑀁 𑀲𑀢𑁆𑀢𑀲𑀜𑁆𑀜𑀺𑀢𑁄 𑀥𑀫𑁆𑀫𑀧𑀼𑀜𑁆𑀚𑁄 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀇𑀫𑀸𑀳𑀺 𑀯𑁂𑀤𑀦𑀸𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 ¶ 𑀤𑀲𑁆𑀲𑀦𑀢𑁆𑀣𑀁 𑀯𑁂𑀤𑀦𑀸𑀧𑀜𑁆𑀘𑀓𑀁. 𑀢𑀢𑁄 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀯𑁄𑀤𑀸𑀦𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀁. 𑀲𑀫𑁆𑀪𑀯𑀯𑁄𑀤𑀸𑀦𑀲𑀫𑁆𑀪𑀸𑀭𑀸 𑀇𑀫𑁂𑀳𑀺 𑀯𑀺𑀲𑀼𑀚𑁆𑀚𑀦𑁆𑀢𑀺, 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀢𑀻𑀡𑀺 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀢𑁆𑀣 ‘‘𑀆𑀥𑀺𑀧𑀘𑁆𑀘𑀢𑁆𑀢𑀁 𑀉𑀧𑀸𑀤𑀸𑀬𑀸’’𑀢𑀺 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕𑀳𑀡𑀁.

𑀅𑀣 𑀯𑀸 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀦𑀁 𑀦𑀺𑀲𑁆𑀲𑀭𑀸𑀤𑀺𑀤𑀲𑁆𑀲𑀦𑀢𑁆𑀢𑀫𑁆𑀧𑀺 𑀏𑀢𑀸𑀦𑀺𑀬𑁂𑀯 𑀯𑀼𑀢𑁆𑀢𑀸𑀦𑀺. 𑀧𑀯𑀢𑁆𑀢𑀺𑀬𑀸 𑀳𑀺 𑀯𑀺𑀲𑁂𑀲𑀢𑁄 𑀫𑀽𑀮𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺. 𑀬𑀣𑀸𑀳 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺 (𑀲𑀼. 𑀦𑀺. 𑁧𑁭𑁧). 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑀭𑀸𑀕𑀦𑀺𑀫𑀺𑀢𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀓𑀸𑀬𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀺𑀡𑁆𑀡𑀁 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁦𑁮; 𑀫𑀺. 𑀧. 𑁪.𑁧.𑁬). 𑀅𑀯𑀝𑁆𑀞𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀢𑁂𑀦 𑀅𑀦𑀼𑀧𑀸𑀮𑁂𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸’’𑀢𑀺𑀆𑀤𑀺 (𑀥. 𑀲. 𑁧𑁯). 𑀉𑀧𑀪𑁄𑀕𑁄 𑀯𑁂𑀤𑀦𑀸𑀳𑀺. 𑀯𑁂𑀤𑀦𑀸𑀯𑀲𑁂𑀦 𑀳𑀺 𑀇𑀝𑁆𑀞𑀸𑀤𑀺𑀲𑀩𑁆𑀩𑀯𑀺𑀲𑀬𑀽𑀧𑀪𑁄𑀕𑁄. 𑀬𑀣𑀸𑀳 ‘‘𑀯𑁂𑀤𑀬𑀢𑀺 𑀯𑁂𑀤𑀬𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁦). 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑀲𑀫𑀼𑀧𑁆𑀧𑀸𑀤𑀝𑁆𑀞𑀺𑀢𑀺𑀲𑀫𑁆𑀪𑁄𑀕𑀤𑀲𑁆𑀲𑀦𑀢𑁆𑀢𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀬𑀸𑀯 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀬𑀣𑀸 𑀘𑁂𑀢𑀸𑀦𑀺 𑀧𑀯𑀢𑁆𑀢𑀺𑀬𑀸, 𑀏𑀯𑀁 𑀇𑀢𑀭𑀸𑀦𑀺 𑀦𑀺𑀯𑀢𑁆𑀢𑀺𑀬𑀸. 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀯𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑁄. 𑀉𑀧𑁆𑀧𑀸𑀤𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑁂𑀦 𑀢𑀲𑁆𑀲 𑀦𑀺𑀯𑀢𑁆𑀢𑀺𑀯𑀲𑁂𑀦 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀅𑀯𑀝𑁆𑀞𑀸𑀦𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦, 𑀉𑀧𑀪𑁄𑀕𑁄 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀅𑀕𑁆𑀕𑀨𑀮𑀲𑀫𑀼𑀧𑀪𑁄𑀕𑀢𑁄. 𑀔𑀻𑀡𑀸𑀲𑀯𑀸𑀳𑀺 𑀯𑀺𑀲𑀯𑀺𑀢𑀸𑀬 𑀦𑀺𑀩𑁆𑀩𑀼𑀢𑀺𑀲𑀼𑀔𑀁 𑀧𑀭𑀺𑀪𑀼𑀚𑁆𑀚𑀦𑁆𑀢𑀺. 𑀏𑀯𑀫𑁆𑀧𑀺 𑀏𑀢𑀸𑀦𑀺 𑀏𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀜𑁆𑀜𑁂𑀲𑀁 𑀅𑀕𑁆𑀕𑀳𑀡𑀁. 𑀇𑀫𑀺𑀦𑀸𑀯 𑀦𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄𑀧𑀺 𑀲𑀁𑀯𑀡𑁆𑀡𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀇𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁫𑁨𑁯. 𑀅𑀭𑀺𑀬𑀲𑀤𑁆𑀤𑁂𑀦 ¶ ¶ 𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀲𑀘𑁆𑀘𑀲𑀤𑁆𑀤𑁂𑀦 𑀉𑀤𑁆𑀥𑀺𑀝𑁆𑀞𑀸𑀦𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀆𑀤. 𑀲𑀫𑀸𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺. 𑀅𑀭𑀺𑀬𑀲𑀘𑁆𑀘𑁂𑀲𑀼 𑀯𑀸 𑀯𑀺𑀘𑀸𑀭𑀺𑀢𑁂𑀲𑀼 𑀇𑀢𑀭𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑀺𑀘𑀸𑀭𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀘 𑀪𑀽𑀫𑀺𑀪𑀽𑀢𑀸𑀦𑀺, 𑀅𑀭𑀺𑀬𑀲𑀘𑁆𑀘𑀸𑀦𑁂𑀯𑀸𑀢𑀺 𑀘 𑀓𑀢𑁆𑀯𑀸 ‘‘𑀲𑀘𑁆𑀘𑀸𑀦𑀻’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀲𑀸𑀲𑀦𑀓𑁆𑀓𑀫𑁄𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸 𑀯𑀸. 𑀲𑀓𑀮𑀜𑁆𑀳𑀺 𑀲𑀸𑀲𑀦𑀁 𑀪𑀕𑀯𑀢𑁄 𑀯𑀘𑀦𑀁 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀢𑀲𑁆𑀫𑀸 𑀲𑀘𑁆𑀘𑁂𑀲𑀼 𑀓𑀫𑀢𑀺, 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀯𑀸 𑀲𑀸𑀲𑀦𑀁 𑀏𑀢𑁂𑀲𑀼 𑀓𑀫𑀢𑀺, 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀓𑀫𑀢𑀺 𑀏𑀢𑁆𑀣𑀸𑀢𑀺 𑀓𑀫𑁄, 𑀓𑀺𑀁 𑀓𑀫𑀢𑀺? 𑀲𑀸𑀲𑀦𑀁. 𑀲𑀸𑀲𑀦𑀲𑁆𑀲 𑀓𑀫𑁄 ‘‘𑀲𑀸𑀲𑀦𑀓𑁆𑀓𑀫𑁄’’𑀢𑀺 𑀲𑀘𑁆𑀘𑀸𑀦𑀺 𑀲𑀸𑀲𑀦𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀤𑁂𑀲𑀦𑀸 𑀘 𑀢𑀩𑁆𑀩𑁄𑀳𑀸𑀭𑁂𑀦𑀸𑀢𑀺.

𑀢𑀣𑀸𑀢𑀺 𑀢𑀁𑀲𑀪𑀸𑀯𑀸 𑀤𑀼𑀓𑁆𑀔𑀸𑀤𑀺𑀲𑀪𑀸𑀯𑀸. 𑀅𑀯𑀺𑀢𑀣𑀸𑀢𑀺 𑀅𑀫𑀼𑀲𑀸𑀲𑀪𑀸𑀯𑀸 𑀩𑀸𑀥𑀦𑀸𑀤𑀺𑀪𑀸𑀯𑁂𑀦 𑀪𑀽𑀢𑀲𑀪𑀸𑀯𑀸. 𑀅𑀦𑀜𑁆𑀜𑀣𑀸𑀢𑀺 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀸 𑀅𑀩𑀸𑀥𑀦𑀸𑀤𑀺𑀆𑀓𑀸𑀭𑀯𑀺𑀯𑀺𑀢𑁆𑀢𑀸. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀢𑀦𑁆𑀦𑀺𑀫𑀺𑀢𑁆𑀢𑀢𑀸𑀳𑀺 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀧𑀻𑀴𑀦𑀝𑁆𑀞𑁄. 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄 𑀲𑀗𑁆𑀔𑀢𑀝𑁆𑀞𑁄. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀢𑀦𑁆𑀦𑀺𑀫𑀺𑀢𑁆𑀢𑀢𑀸𑀳𑀺 𑀧𑀭𑀺𑀤𑀳𑀦𑀁, 𑀓𑀺𑀮𑁂𑀲𑀤𑀸𑀳𑀲𑀫𑀸𑀬𑁄𑀕𑁄 𑀯𑀸 𑀲𑀦𑁆𑀢𑀸𑀧𑀝𑁆𑀞𑁄. 𑀚𑀭𑀸𑀬, 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀤𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸 𑀯𑀺𑀧𑀭𑀺𑀡𑀸𑀫𑀝𑁆𑀞𑁄. 𑀏𑀢𑁆𑀣 𑀘 𑀧𑀻𑀴𑀦𑀝𑁆𑀞𑁄 𑀤𑀼𑀓𑁆𑀔𑀲𑁆𑀲 𑀲𑀭𑀲𑁂𑀦𑁂𑀯 𑀆𑀯𑀺𑀪𑀯𑀦𑀸𑀓𑀸𑀭𑁄, 𑀇𑀢𑀭𑁂 𑀬𑀣𑀸𑀓𑁆𑀓𑀫𑀁 𑀲𑀫𑀼𑀤𑀬𑀫𑀕𑁆𑀕𑀦𑀺𑀭𑁄𑀥𑀤𑀲𑁆𑀲𑀦𑁂𑀳𑀺 𑀆𑀯𑀺𑀪𑀯𑀦𑀸𑀓𑀸𑀭𑀸𑀢𑀺 𑀅𑀬𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑁄. 𑀢𑀢𑁆𑀭𑀢𑁆𑀭𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀩𑁆𑀬𑀸𑀧𑀺𑀢𑁆𑀯𑀸 𑀊𑀳𑀦𑀁 𑀭𑀸𑀲𑀺𑀓𑀭𑀡𑀁 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁 𑀆𑀬𑀽𑀳𑀦𑀁 𑀆𑀓𑀸𑀭𑀲𑁆𑀲 𑀩𑁆𑀬𑀸𑀧𑀦𑀢𑁆𑀣𑀢𑁆𑀢𑀸. 𑀆𑀕𑀘𑁆𑀙𑀢𑀺 𑀲𑀫𑀼𑀤𑀬𑀢𑁄𑀢𑀺 𑀯𑀸 𑀆𑀬𑀁, 𑀤𑀼𑀓𑁆𑀔𑀁, 𑀢𑀲𑁆𑀲 𑀊𑀳𑀦𑀁 𑀧𑀯𑀢𑁆𑀢𑀦𑀁 𑀆𑀬𑀽𑀳𑀦𑀁, 𑀅𑀬𑀁 𑀲𑀭𑀲𑁂𑀦𑁂𑀯 𑀆𑀯𑀺𑀪𑀯𑀦𑀸𑀓𑀸𑀭𑁄. 𑀦𑀺𑀤𑀤𑀸𑀢𑀺 𑀤𑀼𑀓𑁆𑀔𑀦𑁆𑀢𑀺 𑀦𑀺𑀤𑀸𑀦𑀁, ‘‘𑀇𑀤𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑀁 𑀯𑀺𑀬 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀦𑀺𑀤𑀸𑀦𑀝𑁆𑀞𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑁄. 𑀲𑀁𑀲𑀸𑀭𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀦𑀁 𑀲𑀁𑀬𑁄𑀕𑀝𑁆𑀞𑁄 ¶ . 𑀫𑀕𑁆𑀕𑀸𑀥𑀺𑀕𑀫𑀦𑀦𑀺𑀯𑀸𑀭𑀡𑀁 𑀧𑀮𑀺𑀩𑁄𑀥𑀝𑁆𑀞𑁄. 𑀇𑀫𑁂 𑀘 𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑀸 𑀦𑀺𑀭𑁄𑀥𑀫𑀕𑁆𑀕𑀤𑀲𑁆𑀲𑀦𑁂𑀳𑀺 𑀆𑀯𑀺𑀪𑀯𑀦𑀸𑀓𑀸𑀭𑀸. 𑀦𑀺𑀲𑁆𑀲𑀭𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣, 𑀲𑀬𑀫𑁂𑀯 𑀯𑀸 𑀦𑀺𑀲𑁆𑀲𑀝𑀁 𑀯𑀺𑀲𑀁𑀬𑀼𑀢𑁆𑀢𑀁 𑀲𑀩𑁆𑀩𑀲𑀗𑁆𑀔𑀢𑁂𑀳𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀪𑀸𑀯𑀢𑁄𑀢𑀺 𑀦𑀺𑀲𑁆𑀲𑀭𑀦𑀁. 𑀅𑀬𑀫𑀲𑁆𑀲 ¶ 𑀲𑀪𑀸𑀯𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑁄, 𑀇𑀢𑀭𑁂 𑀯𑀺𑀯𑁂𑀓𑀸𑀲𑀗𑁆𑀔𑀸𑀢𑀸𑀫𑀢𑀝𑁆𑀝𑀸, 𑀲𑀫𑀼𑀤𑀬𑀓𑁆𑀔𑀭𑀅𑀧𑀘𑁆𑀘𑀬𑀅𑀯𑀺𑀦𑀸𑀲𑀺𑀢𑀸 𑀯𑀸 𑀲𑀫𑀼𑀤𑀬𑀫𑀕𑁆𑀕𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑀸.

𑀲𑀁𑀲𑀸𑀭𑀢𑁄 𑀦𑀺𑀕𑁆𑀕𑀫𑀦𑀁 𑀦𑀺𑀬𑁆𑀬𑀸𑀦𑀁. 𑀅𑀬𑀫𑀲𑁆𑀲 𑀲𑀭𑀲𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑁄. 𑀧𑀭𑀺𑀩𑁄𑀥𑀽𑀧𑀘𑁆𑀙𑁂𑀤𑀦𑁂𑀦 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄𑀯 𑀦𑀺𑀩𑁆𑀩𑀸𑀦𑀦𑀺𑀫𑀺𑀢𑁆𑀢𑀢𑁆𑀢𑀸 𑀫𑀕𑁆𑀕𑀲𑁆𑀲 𑀳𑁂𑀢𑀼𑀝𑁆𑀞𑁄. 𑀧𑀜𑁆𑀜𑀸𑀧𑀥𑀸𑀦𑀢𑁆𑀢𑀸 𑀘𑀲𑁆𑀲 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁, 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀁 𑀯𑀸 𑀤𑀲𑁆𑀲𑀦𑀝𑁆𑀞𑁄. 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂, 𑀓𑀺𑀮𑁂𑀲𑀤𑀼𑀓𑁆𑀔𑀲𑀦𑁆𑀢𑀸𑀧𑀯𑀽𑀧𑀲𑀫𑀦𑁂 𑀘 𑀆𑀥𑀺𑀧𑀘𑁆𑀘𑀁 𑀓𑀭𑁄𑀦𑁆𑀢𑀺 𑀫𑀕𑁆𑀕𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀽𑀢𑀺 𑀲𑁄 𑀫𑀕𑁆𑀕𑀲𑁆𑀲 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀯𑀺𑀲𑁂𑀲𑀢𑁄 𑀯𑀸 𑀆𑀮𑀫𑁆𑀩𑀦𑀸𑀥𑀺𑀧𑀢𑀺𑀪𑀽𑀢𑀸 𑀫𑀕𑁆𑀕𑀥𑀫𑁆𑀫𑀸 𑀳𑁄𑀦𑁆𑀢𑀺 ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁬) 𑀯𑀘𑀦𑀢𑁄𑀢𑀺 𑀲𑁄 𑀢𑁂𑀲𑀁 𑀆𑀓𑀸𑀭𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀏𑀢𑁂 𑀳𑁂𑀢𑀼𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑀸 𑀲𑀫𑀼𑀤𑀬𑀦𑀺𑀭𑁄𑀥𑀤𑀼𑀓𑁆𑀔𑀤𑀲𑁆𑀲𑀦𑁂𑀳𑀺 𑀆𑀯𑀺𑀪𑀯𑀦𑀸𑀓𑀸𑀭𑀸. 𑀏𑀯𑀫𑀸𑀤𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀅𑀪𑀺𑀲𑀫𑁂𑀢𑀩𑁆𑀩𑀝𑁆𑀞𑁄. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄. 𑀅𑀣 𑀯𑀸 𑀅𑀪𑀺𑀲𑀫𑀬𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄 𑀅𑀪𑀺𑀲𑀫𑀬𑀝𑁆𑀞𑁄. 𑀲𑁄 𑀘𑁂𑀢𑁆𑀣 𑀅𑀪𑀺𑀲𑀫𑁂𑀢𑀩𑁆𑀩𑁂𑀦 𑀧𑀻𑀴𑀦𑀸𑀤𑀺𑀦𑀸 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁫𑁩𑁦. 𑀓𑀼𑀘𑁆𑀙𑀺𑀢𑀁 𑀔𑀁 𑀤𑀼𑀓𑁆𑀔𑀁, 𑀕𑀸𑀭𑀬𑁆𑀳𑀁 𑀳𑀼𑀢𑁆𑀯𑀸 𑀅𑀲𑀸𑀭𑀦𑁆𑀢𑀺 𑀅𑀢𑁆𑀣𑁄.

‘‘𑀲𑀫𑀸𑀕𑀫𑁄 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 𑀓𑁂𑀯𑀮𑀲𑁆𑀲 𑀆𑀕𑀫𑀲𑀤𑁆𑀤𑀲𑁆𑀲, 𑀏𑀢-𑀲𑀤𑁆𑀤𑀲𑁆𑀲 𑀘 𑀧𑀬𑁄𑀕𑁂 𑀲𑀁𑀬𑁄𑀕𑀢𑁆𑀣𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀲𑀁-𑀲𑀤𑁆𑀤𑀲𑁆𑀲 𑀘 𑀲𑀁𑀬𑁄𑀕𑁂 𑀉𑀧𑀮𑀩𑁆𑀪𑀦𑀢𑁄 ‘‘𑀲𑀁𑀬𑁄𑀕𑀁 𑀤𑀻𑀧𑁂𑀢𑀻’’𑀢𑀺 𑀆𑀳 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀢𑀤𑀢𑁆𑀣𑀚𑁄𑀢𑀓𑀢𑀸𑀲𑀺𑀤𑁆𑀥𑀺𑀢𑁄. 𑀉𑀧𑁆𑀧𑀦𑁆𑀦𑀁 𑀉𑀤𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬-𑀲𑀤𑁆𑀤𑁄 𑀕𑀢𑀺𑀅𑀢𑁆𑀣𑁂 𑀲𑀺𑀤𑁆𑀥𑁄 𑀳𑁂𑀢𑀼𑀲𑀤𑁆𑀤𑁄𑀯𑀺𑀬 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀅𑀢𑁆𑀢𑀦𑁄 𑀨𑀮𑀦𑀺𑀧𑁆𑀨𑀸𑀤𑀦𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀺, 𑀏𑀢𑀺 𑀯𑀸 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀅𑀬𑁄𑀢𑀺, 𑀲𑀁𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀲𑀫𑀼𑀤𑀬𑁄𑀢𑀺. 𑀏𑀢𑁆𑀣 𑀯𑀺𑀲𑀼𑀁 𑀧𑀬𑀼𑀚𑁆𑀚𑀫𑀸𑀦𑀸𑀧𑀺 𑀉𑀧𑀲𑀕𑁆𑀕𑀲𑀤𑁆𑀤𑀸 𑀲𑀥𑀸𑀢𑀼𑀓𑀁 𑀲𑀁𑀬𑁄𑀕𑀢𑁆𑀣𑀁, 𑀉𑀧𑁆𑀧𑀸𑀤𑀢𑁆𑀣𑀜𑁆𑀘 𑀤𑀻𑀧𑁂𑀦𑁆𑀢𑀺, 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀅𑀪𑀸𑀯𑁄 ¶ 𑀏𑀢𑁆𑀣 𑀭𑁄𑀥𑀲𑁆𑀲𑀸𑀢𑀺 𑀦𑀺𑀭𑁄𑀥𑁄’’𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑀥𑀺𑀕𑀢𑁂 𑀢𑀲𑁆𑀫𑀺𑀁 𑀢𑀤𑀥𑀺𑀕𑀫𑀢𑁄 𑀧𑀼𑀕𑁆𑀕𑀮𑀲𑁆𑀲 𑀭𑁄𑀥𑀸𑀪𑀸𑀯𑁄 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀭𑁄𑀥𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀦𑀺𑀯𑀢𑁆𑀢𑀺𑀬𑀸 𑀅𑀥𑀺𑀕𑀢𑀢𑁆𑀢𑀸𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀅𑀪𑀸𑀯𑁄 𑀏𑀢𑀲𑁆𑀫𑀺𑀁 𑀭𑁄𑀥𑀲𑁆𑀲𑀸𑀢𑀺 𑀦𑀺𑀭𑁄𑀥𑁄 𑀇𑀘𑁆𑀘𑁂𑀯 𑀧𑀤𑀲𑀫𑀸𑀲𑁄. 𑀤𑀼𑀓𑁆𑀔𑀸𑀪𑀸𑀯𑁄 𑀧𑀦𑁂𑀢𑁆𑀣 𑀧𑀼𑀕𑁆𑀕𑀮𑀲𑁆𑀲, 𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯. 𑀅𑀦𑀼𑀧𑁆𑀧𑀸𑀤𑁄 𑀏𑀯 𑀦𑀺𑀭𑁄𑀥𑁄 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀆𑀬𑀢𑀺𑀁 𑀪𑀯𑀸𑀤𑀻𑀲𑀼 𑀅𑀧𑁆𑀧𑀯𑀢𑁆𑀢𑀺, 𑀦 𑀧𑀦 𑀪𑀗𑁆𑀕𑁄𑀢𑀺 𑀪𑀗𑁆𑀕𑀯𑀸𑀘𑀓𑀁 𑀦𑀺𑀭𑁄𑀥𑀲𑀤𑁆𑀤𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 ¶ 𑀅𑀦𑀼𑀧𑁆𑀧𑀸𑀤𑀯𑀸𑀘𑀓𑀁 𑀕𑀡𑁆𑀳𑀸𑀢𑀺. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀸𑀭𑀡𑁂 𑀨𑀮𑀽𑀧𑀘𑀸𑀭𑀁 𑀓𑀢𑁆𑀯𑀸 𑀦𑀺𑀭𑁄𑀥𑀧𑀘𑁆𑀘𑀬𑁄 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑁄.

𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀧𑀼𑀕𑁆𑀕𑀮𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀤𑀧𑁆𑀧𑀢𑁆𑀢𑀺𑀬𑀸. 𑀦𑀦𑀼 𑀘 𑀲𑀸 𑀏𑀯 𑀤𑀼𑀓𑁆𑀔𑀦𑀺𑀭𑁄𑀤𑀧𑁆𑀧𑀢𑁆𑀢𑀻𑀢𑀺 𑀢𑀲𑁆𑀲𑀸 𑀏𑀯 𑀲𑀸 𑀧𑀝𑀺𑀧𑀤𑀸𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺? 𑀦 𑀧𑀼𑀕𑁆𑀕𑀮𑀸𑀥𑀺𑀕𑀫𑀲𑁆𑀲 𑀧𑀢𑁆𑀢𑀺𑀪𑀸𑀯𑁂𑀦, 𑀬𑁂𑀳𑀺 𑀲𑁄 𑀅𑀥𑀺𑀕𑀘𑁆𑀙𑀢𑀺, 𑀢𑁂𑀲𑀁 𑀓𑀸𑀭𑀡𑀪𑀽𑀢𑀸𑀦𑀁 𑀧𑀝𑀺𑀧𑀤𑀸𑀪𑀸𑀯𑁂𑀦 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑀘𑁆𑀙𑀺 𑀓𑀺𑀭𑀺𑀬𑀸𑀲𑀘𑁆𑀙𑀺𑀓𑀭𑀡𑀥𑀫𑁆𑀫𑀸𑀦𑀜𑁆𑀳𑀺 𑀅𑀜𑁆𑀜𑀢𑁆𑀣𑀸𑀪𑀸𑀯𑁂𑀧𑀺 𑀧𑀼𑀕𑁆𑀕𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀥𑀫𑁆𑀫𑀪𑀸𑀯𑁂𑀳𑀺 𑀦𑀸𑀦𑀢𑁆𑀢𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀅𑀣 𑀯𑀸 𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀦𑀺𑀝𑁆𑀞𑀸𑀦𑀁 𑀨𑀮𑀁, 𑀲𑀬𑀜𑁆𑀘 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀪𑀽𑀢𑀁, 𑀢𑀲𑁆𑀲 𑀅𑀪𑀺𑀲𑀫𑀬𑀪𑀽𑀢𑀸𑀬 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀤𑀢𑀸 𑀤𑀝𑁆𑀞𑀩𑁆𑀩𑀸.

𑁫𑁩𑁧. 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀧𑀝𑀺𑀯𑀺𑀤𑁆𑀥𑀓𑀸𑀮𑁂 𑀧𑀯𑀢𑁆𑀢𑀁 𑀩𑀼𑀤𑁆𑀥𑀸𑀤𑀺𑀯𑁄𑀳𑀸𑀭𑀁 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁪𑁧𑁦) 𑀯𑀺𑀬 𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀉𑀧𑀘𑀸𑀭𑁄𑀢𑀺 𑀧𑀼𑀭𑀺𑀫𑀓𑀸𑀮𑁂𑀧𑀺 𑀆𑀭𑁄𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂 𑀳𑀺 𑀩𑀼𑀤𑁆𑀥𑀸𑀤𑀬𑁄 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀏𑀢𑁆𑀣 𑀅𑀭𑀺𑀬𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀕𑀢𑁂𑀦 𑀳𑀺 𑀲𑀬𑀁 𑀅𑀥𑀺𑀕𑀢𑀢𑁆𑀢𑀸, 𑀧𑀯𑁂𑀤𑀺𑀢𑀢𑁆𑀢𑀸, 𑀢𑀢𑁄 𑀏𑀯 𑀘 𑀅𑀜𑁆𑀜𑁂𑀳𑀺 𑀅𑀥𑀺𑀕𑀫𑀦𑀻𑀭𑀢𑁆𑀢𑀸 𑀢𑀸𑀦𑀺 𑀢𑀲𑁆𑀲 𑀳𑁄𑀦𑁆𑀢𑀻𑀢𑀺. 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀧𑀻𑀢𑀺 𑀏𑀢𑁆𑀣 𑀅𑀭𑀺𑀬𑀲𑀸𑀥𑀓𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀺𑀬𑀸𑀦𑀺 𑀲𑀘𑁆𑀘𑀸𑀦𑀻𑀢𑀺𑀧𑀻𑀢𑀺 𑀏𑀢𑁆𑀣 𑀅𑀯𑀺𑀢𑀣𑀪𑀸𑀯𑁂𑀦 𑀅𑀭𑀡𑀻𑀬𑀢𑁆𑀢𑀸 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑀸𑀦𑀺, 𑀅𑀭𑀺𑀬𑀲𑀫𑀜𑁆𑀜𑀸 𑀯𑀸 𑀅𑀯𑀺𑀲𑀁𑀯𑀸𑀤𑀓𑁂 𑀅𑀯𑀺𑀢𑀣𑁂 𑀦𑀺𑀭𑀼𑀴𑁆𑀳𑀸 𑀤𑀝𑁆𑀞𑀩𑁆𑀩𑀸.

𑁫𑁩𑁨. 𑀩𑀸𑀥𑀦𑀮𑀓𑁆𑀔𑀡𑀦𑁆𑀢𑀺 ¶ 𑀏𑀢𑁆𑀣 𑀤𑀼𑀓𑁆𑀔𑀤𑀼𑀓𑁆𑀔𑀢𑀦𑁆𑀦𑀺𑀫𑀺𑀢𑁆𑀢𑀪𑀸𑀯𑁄, 𑀉𑀤𑀬𑀯𑀬𑀧𑀝𑀺𑀧𑀻𑀴𑀺𑀢𑀪𑀸𑀯𑁄 𑀯𑀸 𑀩𑀸𑀥𑀦𑀁. 𑀪𑀯𑀸𑀤𑀻𑀲𑀼 𑀚𑀸𑀢𑀺𑀆𑀤𑀺𑀯𑀲𑁂𑀦, 𑀘𑀓𑁆𑀔𑀼𑀭𑁄𑀕𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀤𑀸 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀦𑀫𑁂𑀯 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀸𑀧𑀦𑀁, 𑀢𑀤𑀲𑁆𑀲 𑀓𑀺𑀘𑁆𑀘𑀁 𑀭𑀲𑁄𑀢𑀺 𑀲𑀦𑁆𑀢𑀸𑀧𑀦𑀭𑀲𑀁. 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀲𑀁𑀲𑀸𑀭𑀯𑀺𑀫𑁄𑀓𑁆𑀔𑁂𑀲𑀼 𑀧𑀯𑀢𑁆𑀢𑀺 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀢𑀺 𑀏𑀢𑀲𑁆𑀫𑀸 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀼𑀭𑀺𑀫𑀪𑀯𑁂𑀦 𑀧𑀘𑁆𑀙𑀺𑀫𑀪𑀯𑁄 𑀖𑀝𑀺𑀢𑁄 𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀪𑀸𑀯𑁄. ‘‘𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂, 𑀦𑀺𑀩𑁆𑀩𑀢𑁆𑀢𑀢𑀺 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 (𑀥. 𑀧. 𑁩𑁩𑁮; 𑀦𑁂𑀢𑁆𑀢𑀺. 𑁩𑁦) 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀦𑀁 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀁. 𑀪𑀯𑀦𑀺𑀲𑁆𑀲𑀭𑀡𑀦𑀺𑀯𑀸𑀭𑀡𑀁 𑀧𑀮𑀺𑀩𑁄𑀥𑁄. 𑀢𑀡𑁆𑀳𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀲𑀩𑁆𑀩𑀤𑀼𑀓𑁆𑀔𑀲𑀦𑁆𑀢𑀢𑀸 𑀲𑀦𑁆𑀢𑀺. 𑀅𑀘𑁆𑀘𑀼𑀢𑀺𑀭𑀲𑀦𑁆𑀢𑀺 𑀅𑀘𑁆𑀘𑀼𑀢𑀺𑀲𑀫𑁆𑀧𑀢𑁆𑀢𑀺𑀓𑀁 𑀅𑀘𑀯𑀦𑀓𑀺𑀘𑁆𑀘𑀁 𑀯𑀸. 𑀓𑀺𑀘𑁆𑀘𑀦𑁆𑀢𑀺 𑀘 𑀘𑀯𑀦𑀸𑀪𑀸𑀯𑀁 ¶ 𑀓𑀺𑀘𑁆𑀘𑀫𑀺𑀯 𑀓𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁, 𑀅𑀘𑀯𑀦𑀜𑁆𑀘𑀲𑁆𑀲 𑀲𑀪𑀸𑀯𑀸𑀧𑀭𑀺𑀘𑁆𑀘𑀚𑀦𑀁 𑀅𑀯𑀺𑀓𑀸𑀭𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀢𑀸𑀬 𑀅𑀯𑀺𑀕𑁆𑀕𑀳𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀦𑀼𑀲𑀬𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀲𑀁𑀲𑀸𑀭𑀘𑀸𑀭𑀓𑀢𑁄 𑀦𑀺𑀕𑁆𑀕𑀫𑀦𑀽𑀧𑀸𑀬𑀪𑀸𑀯𑁄 𑀦𑀺𑀬𑁆𑀬𑀸𑀦𑀁. 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀭𑀡𑀁. 𑀦𑀺𑀫𑀺𑀢𑁆𑀢𑀢𑁄, 𑀧𑀯𑀢𑁆𑀢𑀢𑁄 𑀘 𑀘𑀺𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑁫𑁩𑁩. 𑀅𑀲𑀼𑀯𑀡𑁆𑀡𑀸𑀤𑀺 𑀲𑀼𑀯𑀡𑁆𑀡𑀸𑀤𑀺 𑀯𑀺𑀬 𑀤𑀺𑀲𑁆𑀲𑀫𑀸𑀦𑀁 𑀫𑀸𑀬𑀸𑀢𑀺 𑀯𑀢𑁆𑀣𑀼𑀲𑀩𑁆𑀪𑀸𑀯𑀸 𑀢𑀲𑁆𑀲𑀸 𑀯𑀺𑀧𑀭𑀻𑀢𑀢𑀸 𑀯𑀼𑀢𑁆𑀢𑀸. 𑀉𑀤𑀓𑀁 𑀯𑀺𑀬 𑀤𑀺𑀲𑁆𑀲𑀫𑀸𑀦𑀸 𑀧𑀦 𑀫𑀭𑀻𑀘𑀺 𑀉𑀧𑀕𑀢𑀸𑀦𑀁 𑀢𑀼𑀘𑁆𑀙𑀸. 𑀯𑀢𑁆𑀣𑀼𑀫𑀢𑁆𑀢𑀫𑁆𑀧𑀺 𑀢𑀲𑁆𑀲𑀸 𑀦 𑀤𑀺𑀲𑁆𑀲𑀢𑀻𑀢𑀺 𑀯𑀺𑀲𑀁𑀯𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀫𑀭𑀻𑀘𑀺𑀫𑀸𑀬𑀸𑀅𑀢𑁆𑀢𑀯𑀺𑀥𑀼𑀭𑁄 𑀪𑀸𑀯𑁄 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄. 𑀅𑀭𑀺𑀬𑀜𑀸𑀡𑀲𑁆𑀲𑀸𑀢𑀺 𑀅𑀭𑀺𑀬𑀲𑁆𑀲 𑀅𑀯𑀺𑀢𑀣𑀕𑁆𑀕𑀸𑀳𑀓𑀲𑁆𑀲 𑀜𑀸𑀡𑀲𑁆𑀲, 𑀢𑁂𑀦 𑀧𑀝𑀺𑀯𑁂𑀥𑀜𑀸𑀡𑀁 𑀯𑀺𑀬 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀲𑀁 𑀕𑁄𑀘𑀭𑀪𑀸𑀯𑁄 𑀧𑀝𑀺𑀯𑀺𑀚𑁆𑀚𑀺𑀢𑀩𑁆𑀩𑀢𑀸, 𑀆𑀭𑀫𑁆𑀫𑀡𑀪𑀸𑀯𑁄 𑀘 𑀤𑀝𑁆𑀞𑀩𑁆𑀩𑁄. 𑀅𑀕𑁆𑀕𑀺𑀮𑀓𑁆𑀔𑀡𑀁 𑀉𑀡𑁆𑀳𑀢𑁆𑀢𑀁. 𑀢𑀜𑁆𑀳𑀺 𑀓𑀢𑁆𑀣𑀘𑀺 𑀓𑀝𑁆𑀞𑀸𑀤𑀺𑀉𑀧𑀸𑀤𑀸𑀦𑀪𑁂𑀤𑁂 𑀯𑀺𑀲𑀁𑀯𑀸𑀤𑀓𑀁, 𑀯𑀺𑀧𑀭𑀻𑀢𑀁, 𑀅𑀪𑀽𑀢𑀁 𑀯𑀸𑀓𑀤𑀸𑀘𑀺𑀧𑀺 𑀦 𑀳𑁄𑀢𑀺. ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄’’𑀢𑀺 (𑀅. 𑀦𑀺. 𑁩.𑁩𑁯; 𑁫.𑁫𑁭) 𑀏𑀯𑀁 𑀯𑀼𑀢𑁆𑀢𑀸 𑀚𑀸𑀢𑀺𑀆𑀤𑀺𑀓𑀸 𑀮𑁄𑀓𑀧𑀓𑀢𑀺. 𑀏𑀓𑀘𑁆𑀘𑀸𑀦𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀢𑀺𑀭𑀺𑀬𑀁 𑀤𑀻𑀖𑀢𑀸, 𑀫𑀦𑀼𑀲𑁆𑀲𑀸𑀤𑀻𑀦𑀁 𑀉𑀤𑁆𑀥𑀁 𑀤𑀻𑀖𑀢𑀸, 𑀯𑀼𑀤𑁆𑀥𑀺𑀦𑀺𑀝𑁆𑀞𑀁 𑀧𑀢𑁆𑀢𑀸𑀦𑀁 𑀧𑀼𑀦 𑀅𑀯𑀟𑁆𑀠𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀸 𑀘 𑀮𑁄𑀓𑀧𑀓𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀲𑀼 𑀧𑀘𑁆𑀙𑀺𑀫𑁄 𑀢𑀣𑀢𑀸. 𑀧𑀞𑀫𑁄 𑀅𑀯𑀺𑀢𑀣𑀢𑀸, 𑀫𑀚𑁆𑀛𑀺𑀫𑁄 𑀅𑀦𑀜𑁆𑀜𑀢𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄,

𑀤𑀼𑀓𑁆𑀔𑀸 ¶ 𑀅𑀜𑁆𑀜𑀁 𑀦 𑀩𑀸𑀥𑀓 𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀡𑁆𑀳𑀸𑀧𑀺 𑀚𑀸𑀢𑀺 𑀯𑀺𑀬 𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀢𑀸𑀬 𑀩𑀸𑀥𑀺𑀓𑀸𑀢𑀺? 𑀦, 𑀩𑀸𑀥𑀓𑀧𑁆𑀧𑀪𑀯𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀏𑀯𑀫𑁆𑀳𑀺 𑀧𑀯𑀢𑁆𑀢𑀺, 𑀧𑀯𑀢𑁆𑀢𑀺𑀳𑁂𑀢𑀼 𑀘 𑀅𑀲𑀗𑁆𑀓𑀭𑀢𑁄 𑀩𑁄𑀥𑀺𑀢𑀸 𑀳𑁄𑀦𑁆𑀢𑀺. 𑀅𑀣 𑀯𑀸 𑀚𑀸𑀢𑀺𑀆𑀤𑀻𑀦𑀁 𑀯𑀺𑀬 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁄, 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀘 𑀩𑀸𑀥𑀓𑀢𑀸, 𑀦 𑀤𑀼𑀓𑁆𑀔𑀧𑁆𑀧𑀪𑀯𑀢𑀸𑀢𑀺 𑀦𑀢𑁆𑀣𑀺 𑀢𑀡𑁆𑀳𑀸𑀬 𑀧𑀪𑀯𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀸𑀬 𑀩𑀸𑀥𑀓𑀪𑀸𑀯𑀧𑀲𑀗𑁆𑀕𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀸 𑀅𑀜𑁆𑀜𑀁 𑀦 𑀩𑀸𑀥𑀓’’𑀦𑁆𑀢𑀺. 𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦𑀸𑀢𑀺 𑀤𑀼𑀓𑁆𑀔𑀁 𑀩𑀸𑀥𑀓𑀫𑁂𑀯, 𑀤𑀼𑀓𑁆𑀔𑀫𑁂𑀯 𑀩𑀸𑀥𑀓𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸𑀧𑀺 𑀩𑀸𑀥𑀓𑀢𑁆𑀢𑀸𑀯𑀥𑀸𑀭𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦𑀸𑀢𑀺 𑀳𑀺 𑀩𑀸𑀥𑀓𑀲𑁆𑀲, 𑀩𑀸𑀥𑀓𑀢𑁆𑀢𑁂 𑀘 𑀦𑀺𑀬𑀸𑀫𑁂𑀦. 𑀬𑀢𑀸 𑀩𑀸𑀥𑀓𑀢𑁆𑀢𑀲𑁆𑀲 𑀤𑀼𑀓𑁆𑀔𑁂 𑀦𑀺𑀬𑀢𑀢𑀸, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀘 𑀩𑀸𑀥𑀓𑀢𑁆𑀢𑁂 𑀦𑀺𑀬𑀢𑀢𑀸𑀢𑀺.

𑀢𑀁 𑀯𑀺𑀦𑀸 𑀦𑀸𑀜𑁆𑀜𑀢𑁄𑀢𑀺 𑀲𑀢𑀺𑀧𑀺 𑀅𑀯𑀲𑁂𑀲𑀓𑀺𑀮𑁂𑀲𑀅𑀯𑀲𑁂𑀲𑀸𑀓𑀼𑀲𑀮𑀲𑀸𑀲𑀯𑀓𑀼𑀲𑀮𑀫𑀽𑀮𑀸𑀯𑀲𑁂𑀲𑀲𑀸𑀲𑀯𑀓𑀼𑀲𑀮𑀥𑀫𑁆𑀫𑀸𑀦𑀁 ¶ 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁂 𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀢𑁂𑀲𑀁 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁄 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀯𑀺𑀦𑀸𑀧𑀺 𑀢𑀡𑁆𑀳𑀸𑀬 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁄 𑀅𑀢𑁆𑀣𑀺 𑀓𑀼𑀲𑀮𑁂𑀳𑀺 𑀯𑀺𑀦𑀸 𑀅𑀓𑀼𑀲𑀮𑁂𑀳𑀺 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑁂𑀳𑀺 𑀯𑀺𑀦𑀸 𑀓𑀸𑀫𑀸𑀯𑀘𑀭𑀸𑀤𑀻𑀳𑀺 𑀘 𑀢𑀡𑁆𑀳𑀸𑀬 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸. 𑀲𑀦𑁆𑀢𑀪𑀸𑀯𑀲𑁆𑀲, 𑀲𑀦𑁆𑀢𑀪𑀸𑀯𑁂 𑀯𑀸 𑀦𑀺𑀬𑀸𑀫𑁄 𑀲𑀦𑁆𑀢𑀪𑀸𑀯𑀦𑀺𑀬𑀸𑀫𑁄, 𑀢𑁂𑀦 𑀲𑀦𑁆𑀢𑀪𑀸𑀯𑀦𑀺𑀬𑀸𑀫𑁂𑀦. 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸𑀢𑀺 𑀤𑁆𑀯𑀺𑀥𑀸𑀧𑀺 𑀦𑀺𑀬𑀸𑀫𑁂𑀦 𑀢𑀘𑁆𑀙𑁄 𑀦𑀺𑀬𑁆𑀬𑀸𑀦𑀪𑀸𑀯𑁄 𑀏𑀢𑀲𑁆𑀲, 𑀦 𑀫𑀺𑀘𑁆𑀙𑀸𑀫𑀕𑁆𑀕𑀲𑁆𑀲 𑀯𑀺𑀬 𑀯𑀺𑀧𑀭𑀻𑀢𑀢𑀸𑀬, 𑀦 𑀮𑁄𑀓𑀺𑀬𑀫𑀕𑁆𑀕𑀲𑁆𑀲 𑀯𑀺𑀬 𑀯𑀸 𑀅𑀦𑁂𑀓𑀦𑁆𑀢𑀺𑀓𑀢𑀸𑀬 𑀅𑀢𑀘𑁆𑀙𑁄𑀢𑀺 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑁄, 𑀫𑀕𑁆𑀕𑁄, 𑀢𑀲𑁆𑀲 𑀪𑀸𑀯𑁄 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀁, 𑀢𑀲𑁆𑀫𑀸 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀤𑁆𑀯𑀺𑀥𑀸𑀧𑀺 𑀦𑀺𑀬𑀸𑀫𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀸’’𑀢𑀺𑀆𑀤𑀺.

𑁫𑁩𑁪. 𑀲𑀘𑁆𑀘𑀲𑀤𑁆𑀤𑀲𑁆𑀲 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀉𑀤𑁆𑀥𑀭𑀡𑀁, 𑀲𑀫𑁆𑀪𑀯𑀦𑁆𑀢𑁂 𑀯𑀸 𑀅𑀢𑁆𑀣𑁂 𑀯𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀁 𑀦𑀺𑀤𑁆𑀥𑀸𑀭𑀡𑀁 𑀅𑀢𑁆𑀣𑀼𑀤𑁆𑀯𑀸𑀭𑁄. 𑀯𑀺𑀭𑀢𑀺𑀲𑀘𑁆𑀘𑁂𑀢𑀺 𑀫𑀼𑀲𑀸𑀯𑀸𑀤𑀯𑀺𑀭𑀢𑀺𑀬𑀁. 𑀦 𑀳𑀺 𑀅𑀜𑁆𑀜𑀯𑀺𑀭𑀢𑀻𑀲𑀼 𑀲𑀘𑁆𑀘𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄. 𑀬𑁂 𑀧𑀦 ‘‘𑀯𑀺𑀭𑀢𑀺𑀲𑀘𑁆𑀘𑀁 𑀲𑀫𑀸𑀤𑀸𑀦𑀯𑀺𑀭𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀦 𑀲𑀫𑀸𑀤𑀸𑀦𑀫𑀢𑁆𑀢𑀁 𑀯𑀺𑀭𑀢𑀺𑀲𑀘𑁆𑀘𑀁, 𑀅𑀣 𑀔𑁄 𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑀁. 𑀢𑀁 𑀧𑀦 𑀧𑀝𑀺𑀜𑁆𑀜𑀸𑀲𑀘𑁆𑀘𑀁 𑀫𑀼𑀲𑀸𑀯𑀸𑀤𑀯𑀺𑀭𑀢𑀺𑀬𑁂𑀯 𑀳𑁄𑀢𑀺. ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁨-𑁨𑁦𑁩, 𑁪𑁨𑁭; 𑁩.𑁨𑁭-𑁨𑁯) 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 ‘‘𑀲𑀘𑁆𑀘’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑀯𑀼𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀲𑀘𑁆𑀘𑀁. 𑀅𑀫𑁄𑀲𑀥𑀫𑁆𑀫𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀧𑀭𑀫𑀢𑁆𑀣𑀲𑀘𑁆𑀘𑀁. ‘‘𑀅𑀫𑁄𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁, 𑀢𑀤𑀭𑀺𑀬𑀸 𑀲𑀘𑁆𑀘𑀢𑁄 𑀯𑀺𑀤𑀽’’𑀢𑀺 (𑀲𑀼. 𑀦𑀺. 𑁭𑁬𑁩) 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀦 𑀢𑀁𑀲𑀫𑁆𑀧𑀸𑀧𑀓𑀲𑁆𑀲 ¶ 𑀘 𑀫𑀕𑁆𑀕𑀲𑁆𑀲 𑀧𑀚𑀸𑀦𑀦𑀸 𑀧𑀝𑀺𑀯𑁂𑀥𑁄 𑀅𑀯𑀺𑀯𑀸𑀤𑀓𑀸𑀭𑀡𑀦𑁆𑀢𑀺 𑀤𑁆𑀯𑀬𑀫𑁆𑀧𑀺 ‘‘𑀏𑀓𑀁 𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀺, 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦’’𑀦𑁆𑀢𑀺 𑀇𑀫𑀺𑀲𑁆𑀲𑀸 (𑀲𑀼. 𑀦𑀺. 𑁮𑁯𑁦; 𑀫𑀳𑀸𑀦𑀺. 𑁧𑁧𑁯) 𑀕𑀸𑀣𑀸𑀬 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁.

𑁫𑁩𑁫. ‘‘𑀦𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀚𑀸𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀅𑀭𑀺𑀬𑀲𑀘𑁆𑀘𑀪𑀸𑀯𑁂 𑀅𑀯𑀺𑀧𑀭𑀻𑀢𑀢𑀁 𑀤𑀲𑁆𑀲𑁂𑀢𑀺 𑀏𑀓𑀦𑁆𑀢𑁂𑀦𑁂𑀯 𑀩𑀸𑀥𑀓𑀪𑀸𑀯𑀢𑁄. ‘‘𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀅𑀭𑀺𑀬𑀲𑀘𑁆𑀘𑀪𑀸𑀯𑀲𑁆𑀲 𑀚𑀸𑀢𑀺𑀆𑀤𑀻𑀲𑀼 𑀦𑀺𑀬𑀢𑀢𑀁 𑀤𑀲𑁆𑀲𑁂𑀢𑀺 𑀅𑀦𑀜𑁆𑀜𑀢𑁆𑀣𑀪𑀸𑀯𑀢𑁄. 𑀲𑀘𑁂𑀧𑀺 𑀓𑀣𑀜𑁆𑀘𑀺 𑀓𑁄𑀘𑀺 𑀏𑀯𑀁𑀘𑀺𑀢𑁆𑀢𑁄 𑀆𑀕𑀘𑁆𑀙𑁂𑀬𑁆𑀬, 𑀧𑀜𑁆𑀜𑀸𑀧𑀦𑁂 𑀧𑀦 𑀲𑀳𑀥𑀫𑁆𑀫𑁂𑀦 𑀜𑀸𑀧𑀦𑁂 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑁂 𑀲𑀫𑀢𑁆𑀣𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀫𑁂𑀢𑀁…𑀧𑁂… 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀺𑀆𑀤𑀻𑀦𑀁 𑀅𑀦𑀜𑁆𑀜𑀣𑀢𑀸 𑀅𑀜𑁆𑀜𑀲𑁆𑀲 𑀘 𑀢𑀢𑀸𑀪𑀽𑀢𑀲𑁆𑀲 𑀅𑀪𑀸𑀯𑁄𑀬𑁂𑀯𑁂𑀢𑁆𑀣 𑀞𑀸𑀦𑀸𑀪𑀸𑀯𑁄. 𑀲𑀘𑁂𑀧𑀺 𑀓𑁄𑀘𑀺 𑀆𑀕𑀘𑁆𑀙𑁂𑀬𑁆𑀬 𑀆𑀕𑀘𑁆𑀙𑀢𑀼, 𑀞𑀸𑀦𑀁 𑀧𑀦 𑀦𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣 𑀲𑀼𑀢𑁆𑀢𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀢𑀺𑀬𑀲𑀼𑀢𑁆𑀢𑁂𑀧𑀺. 𑀢𑀢𑁆𑀣 𑀧𑀦 ¶ 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦𑁂𑀯 𑀲𑀢𑁆𑀢𑀸𑀦𑀁 𑀚𑀸𑀢𑀺𑀆𑀤𑀻𑀦𑀁 𑀧𑀢𑁆𑀢𑀺, 𑀲𑀫𑁆𑀫𑀼𑀔𑀻𑀪𑀸𑀯𑁄 𑀘 𑀳𑁄𑀢𑀻𑀢𑀺 𑀲𑀫𑁆𑀧𑀢𑁆𑀢𑀢𑁆𑀢𑀸, 𑀧𑀘𑁆𑀘𑀓𑁆𑀔𑀢𑀸 𑀘 𑀧𑀞𑀫𑀢𑀸, 𑀬𑀢𑁄 𑀢𑀁 𑀪𑀕𑀯𑀢𑀸 𑀧𑀞𑀫𑀁 𑀤𑁂𑀲𑀺𑀢𑀁, 𑀢𑀦𑁆𑀦𑀺𑀫𑀺𑀢𑁆𑀢𑀢𑀸 𑀤𑀼𑀢𑀺𑀬𑀢𑀸, 𑀢𑀤𑀼𑀧𑀲𑀫𑀢𑀸 𑀢𑀢𑀺𑀬𑀢𑀸, 𑀢𑀁𑀲𑀫𑁆𑀧𑀸𑀧𑀓𑀢𑀸 𑀘𑀢𑀼𑀢𑁆𑀣𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀏𑀢𑀧𑀭𑀫𑀢𑁄’’𑀢𑀺 𑀏𑀢𑁂𑀦 𑀘𑀢𑀽𑀳𑀺 𑀅𑀭𑀺𑀬𑀲𑀘𑁆𑀘𑁂𑀳𑀺 𑀧𑀯𑀢𑁆𑀢𑀺𑀆𑀤𑀻𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀫𑀸𑀳. 𑀦𑀺𑀩𑁆𑀩𑀼𑀢𑀺𑀓𑀸𑀫𑁂𑀦 𑀧𑀭𑀺𑀚𑀸𑀦𑀦𑀸𑀤𑀻𑀳𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁 𑀦𑀢𑁆𑀢𑀺, 𑀥𑀫𑁆𑀫𑀜𑀸𑀡𑀓𑀺𑀘𑁆𑀘𑀁 𑀯𑀸 𑀇𑀢𑁄 𑀅𑀜𑁆𑀜𑀁 𑀦𑀢𑁆𑀣𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀺 𑀘 𑀏𑀢𑀧𑀭𑀫𑀸𑀦𑁂𑀯𑀸𑀢𑀺 𑀘𑀢𑁆𑀢𑀸𑀭𑀺𑀬𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀡𑁆𑀳𑀸𑀬 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀦𑀁 𑀯𑀲𑁂𑀦 𑀢𑀡𑁆𑀳𑀸𑀯𑀢𑁆𑀣𑀼𑀆𑀤𑀻𑀦𑀁 𑀏𑀢𑀧𑀭𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀆𑀮𑀬𑁂 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂, 𑀲𑀓𑀮𑀯𑀢𑁆𑀣𑀼𑀓𑀸𑀫𑀲𑀗𑁆𑀔𑀸𑀢𑁂, 𑀪𑀯𑀢𑁆𑀢𑀬𑀲𑀗𑁆𑀔𑀸𑀢𑁂 𑀯𑀸 𑀤𑀼𑀓𑁆𑀔𑁂 𑀤𑁄𑀲𑀤𑀲𑁆𑀲𑀸𑀯𑀻𑀦𑀁 𑀯𑀲𑁂𑀦 𑀆𑀮𑀬𑀸𑀤𑀻𑀦𑀁 𑀏𑀢𑁂𑀧𑀭𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁.

𑁫𑁩𑁬. ‘‘𑀑𑀴𑀸𑀭𑀺𑀓𑀢𑁆𑀢𑀸’’𑀢𑀺 𑀇𑀤𑀁 𑀚𑀸𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀪𑀸𑀯𑀲𑁆𑀲 𑀧𑀘𑀼𑀭𑀚𑀦𑀧𑀸𑀓𑀝𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀭𑀺𑀬𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀓𑀸𑀭𑀁. 𑀢𑀦𑁆𑀢𑀺 𑀤𑀼𑀓𑁆𑀔𑀁. 𑀅𑀓𑀢𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁, 𑀅𑀦𑀺𑀧𑁆𑀨𑀸𑀤𑀺𑀢𑀓𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀭𑀡𑁂 𑀳𑀺 𑀲𑀺𑀤𑁆𑀥𑁂 𑀨𑀮𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. ‘‘𑀦𑁂𑀯 𑀅𑀓𑀢𑀁 𑀆𑀕𑀘𑁆𑀙𑀢𑀻’’𑀢𑀺 𑀘 𑀇𑀫𑀺𑀦𑀸 𑀅𑀳𑁂𑀢𑀼𑀯𑀸𑀤𑀁 ¶ 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀢𑁄’’𑀢𑀺 𑀏𑀢𑁂𑀦 𑀧𑀚𑀸𑀧𑀢𑀺𑀧𑀼𑀭𑀺𑀲𑀧𑀓𑀢𑀺𑀓𑀸𑀮𑀸𑀤𑀺𑀯𑀸𑀤𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦𑀸’’𑀢𑀺 𑀏𑀢𑁂𑀦 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀚𑀦𑀺𑀢𑀲𑁆𑀲 𑀲𑀁𑀯𑁂𑀕𑀲𑁆𑀲 𑀲𑀁𑀯𑀟𑁆𑀠𑀦𑀫𑀸𑀳. 𑀤𑀼𑀓𑁆𑀔𑀲𑁆𑀲 𑀳𑀺 𑀲𑀳𑁂𑀢𑀼𑀓𑀪𑀸𑀯𑀲𑀯𑀲𑁂𑀦 𑀩𑀮𑀯𑀲𑀁𑀯𑁂𑀕𑁄 𑀚𑀸𑀬𑀢𑀺 𑀬𑀸𑀯𑀸𑀬𑀁 𑀳𑁂𑀢𑀼, 𑀢𑀸𑀯 𑀇𑀤𑀁 𑀤𑀼𑀓𑁆𑀔𑀁 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀢𑀻𑀢𑀺. 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀦𑀺𑀭𑁄𑀥𑀦𑁆𑀢𑀺 𑀲𑀁𑀯𑁂𑀕𑀚𑀸𑀢𑀲𑁆𑀲 𑀅𑀲𑁆𑀲𑀸𑀲𑀁 𑀚𑀦𑁂𑀢𑀼𑀁 𑀦𑀺𑀭𑁄𑀥𑀲𑀘𑁆𑀘𑀫𑀸𑀳. 𑀦𑀺𑀩𑁆𑀩𑀺𑀦𑁆𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀳𑀺 𑀦𑀺𑀭𑁄𑀥𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀅𑀢𑀺𑀯𑀺𑀬 𑀅𑀢𑀺𑀯𑀺𑀬 𑀅𑀲𑁆𑀲𑀸𑀲𑀁 𑀲𑀜𑁆𑀚𑀦𑁂𑀢𑀺.

𑁫𑁩𑁭. 𑀬𑁂 𑀢𑁂 𑀚𑀸𑀢𑀺𑀆𑀤𑀬𑁄 𑀥𑀫𑁆𑀫𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑁆𑀬𑀸𑀥𑀺 𑀦 𑀕𑀳𑀺𑀢𑁄𑀢𑀺? 𑀅𑀦𑁂𑀓𑀦𑁆𑀢𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑁄 𑀓𑀤𑀸𑀘𑀺, 𑀓𑁂𑀲𑀜𑁆𑀘𑀺 𑀘 𑀦𑀢𑁆𑀣𑀺. 𑀬𑀣𑀸𑀳 ‘‘𑀢𑀬𑁄 𑀭𑁄𑀕𑀸 𑀧𑀼𑀭𑁂 𑀆𑀲𑀼𑀁, 𑀇𑀘𑁆𑀙𑀸 𑀅𑀦𑀲𑀦𑀁 𑀚𑀭𑀸’’𑀢𑀺 (𑀲𑀼. 𑀦𑀺. 𑁩𑁧𑁩). 𑀩𑀸𑀓𑀼𑀮𑀢𑁆𑀢𑁂𑀭𑀸𑀤𑀻𑀦𑀁 𑀲𑁄 𑀦𑀸𑀳𑁄𑀲𑀺𑀬𑁂𑀯, 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀯𑀸 𑀩𑁆𑀬𑀸𑀥𑀺 𑀏𑀢𑁆𑀣 𑀳𑀺𑀢𑁄𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀫𑀢𑁆𑀣𑀢𑁄 𑀳𑀺 𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀩𑁆𑀬𑀸𑀥𑀻𑀢𑀺. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 ‘‘𑀤𑁆𑀯𑀸𑀤𑀲 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀢𑀡𑁆𑀳𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 ¶ 𑀅𑀜𑁆𑀜𑁂 𑀅𑀦𑁆𑀢𑁄𑀕𑀥𑀪𑁂𑀤𑁂 𑀅𑀦𑀸𑀫𑀲𑀺𑀢𑁆𑀯𑀸 𑀏𑀓𑀭𑀽𑀧𑁂𑀦 𑀕𑀳𑀺𑀢𑀸𑀧𑀺 𑀢𑀡𑁆𑀳𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀸, 𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀸 𑀓𑁂𑀯𑀮𑀁 𑀓𑀸𑀫𑀲𑁆𑀲𑀸𑀤𑀪𑀽𑀢𑀸 𑀘𑀸𑀢𑀺 𑀢𑀺𑀥𑀸𑀯 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀸. ‘‘𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀫𑀕𑁆𑀕𑀲𑀘𑁆𑀘𑀪𑀸𑀯𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸𑀧𑀺 𑀲𑀪𑀸𑀯𑀢𑁄 𑀪𑀺𑀦𑁆𑀦𑀸 𑀏𑀯 𑀢𑁂 𑀥𑀫𑁆𑀫𑀸𑀢𑀺 𑀆𑀳 ‘‘𑀅𑀝𑁆𑀞 𑀥𑀫𑁆𑀫𑀸’’𑀢𑀺.

𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑀚𑀸𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀪𑀯𑁂𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑁄 𑀥𑀫𑁆𑀫𑀧𑁆𑀧𑀩𑀦𑁆𑀥𑁄 𑀪𑀯𑁄, 𑀢𑀲𑁆𑀫𑀺𑀁 𑀪𑀯𑁂. 𑀲𑁄 𑀳𑀺 𑀚𑀸𑀬𑀢𑀺 𑀏𑀢𑁆𑀣 𑀬𑁄𑀦𑀺𑀕𑀢𑀺𑀆𑀤𑀺𑀯𑀺𑀪𑀸𑀕𑁄𑀢𑀺 𑀚𑀸𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀚𑀸𑀬𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀲𑀫𑀸𑀦𑀦𑁆𑀯𑀬𑀸𑀢𑀺 𑀚𑀸𑀢𑀺, 𑀦𑀺𑀓𑀸𑀬𑁄. 𑀲𑀗𑁆𑀔𑀢𑀮𑀓𑁆𑀔𑀡𑁂𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀸𑀤𑁂. 𑀲𑁄 𑀳𑀺 𑀚𑀦𑀦𑀝𑁆𑀞𑁂𑀦 𑀚𑀸𑀢𑀺. 𑀧𑀝𑀺𑀲𑀦𑁆𑀥𑀺𑀬𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀓𑁆𑀔𑀡𑁂 ¶ . 𑀲𑀫𑁆𑀧𑀸𑀢𑀺𑀚𑀸𑀢𑁄𑀢𑀺 𑀏𑀢𑁆𑀣 𑀚𑀸𑀢𑀺𑀲𑀤𑁆𑀤𑁂𑀦 𑀮𑀩𑁆𑀪𑀫𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀲𑀗𑁆𑀔𑀸𑀢𑀁 𑀚𑀸𑀬𑀦𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀲𑀽𑀢𑀺𑀬’’𑀦𑁆𑀢𑀺, 𑀅𑀪𑀺𑀚𑀸𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀬𑀢𑀺 𑀏𑀢𑀸𑀬 𑀔𑀢𑁆𑀢𑀺𑀬𑀸𑀤𑀺𑀲𑀫𑀜𑁆𑀜𑀸𑀢𑀺 𑀚𑀸𑀢𑀺, 𑀓𑀼𑀮𑀁.

𑁫𑁩𑁮. 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁄 𑀕𑀩𑁆𑀪𑁄 𑀲𑁂𑀬𑁆𑀬𑀸 𑀏𑀢𑁂𑀲𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸, 𑀅𑀡𑁆𑀟𑀚𑀸, 𑀚𑀮𑀸𑀩𑀼𑀚𑀸 𑀘. 𑀇𑀢𑀭𑁂𑀲𑀦𑁆𑀢𑀺 𑀲𑀁𑀲𑁂𑀤𑀚𑀸𑀦𑀁, 𑀑𑀧𑀧𑀸𑀢𑀺𑀓𑀸𑀦𑀜𑁆𑀘. 𑀅𑀬𑀫𑁆𑀧𑀺 𑀘𑀸𑀢𑀺 ‘‘𑀧𑀝𑀺𑀲𑀦𑁆𑀥𑀺𑀔𑀦𑁆𑀥𑁂𑀲𑁆𑀯𑁂𑀯𑀸’’𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀓𑀣𑀸𑀧𑀺, 𑀧𑀕𑁂𑀯 ‘‘𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀓𑀣𑀸𑀬𑀁. 𑀢𑁂𑀦𑀸𑀳 ‘‘𑀢𑁂𑀲𑀁 𑀢𑁂𑀲𑀁 𑀧𑀞𑀫𑀧𑀸𑀢𑀼𑀪𑀸𑀯𑁄 𑀚𑀸𑀢𑀻’’𑀢𑀺.

𑀉𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀕𑀬𑁆𑀳𑀢𑀻𑀢𑀺 𑀉𑀫𑁆𑀫𑀼𑀚𑁆𑀚𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀯𑀓𑁆𑀔𑀫𑀸𑀦𑀯𑀺𑀪𑀸𑀕𑀁 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑁫𑁩𑁯. ‘‘𑀓𑀲𑁆𑀫𑀸 𑀧𑀦𑀸’’𑀢𑀺 𑀯𑀤𑀢𑁄 𑀘𑁄𑀤𑀓𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀏𑀓𑀦𑁆𑀢𑀤𑀼𑀓𑁆𑀔𑁂 𑀦𑀺𑀭𑀬𑁂 𑀢𑀸𑀯 𑀚𑀸𑀢𑀺𑀤𑀼𑀓𑁆𑀔𑀸 𑀳𑁄𑀢𑀼, 𑀅𑀜𑁆𑀜𑀸𑀲𑀼𑀧𑀺 𑀯𑀸 𑀤𑀼𑀕𑁆𑀕𑀢𑀻𑀲𑀼 𑀧𑀸𑀧𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑁄 𑀲𑀼𑀔𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀲𑀼 ¶ 𑀧𑀦 𑀲𑀼𑀕𑀢𑀻𑀲𑀼 𑀓𑀣𑀦𑁆𑀢𑀺. 𑀇𑀢𑀭𑁄 ‘‘𑀦𑀸𑀬𑀁 𑀚𑀸𑀢𑀺 𑀲𑀪𑀸𑀯𑀤𑀼𑀓𑁆𑀔𑀯𑀲𑁂𑀦 𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸, 𑀦 𑀳𑀺 𑀓𑀸𑀘𑀺 𑀧𑀝𑀺𑀲𑀦𑁆𑀥𑀺 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀢𑁆𑀣𑀺, 𑀅𑀣 𑀔𑁄 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁂𑀓𑁂𑀲𑀁 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀅𑀤𑀼𑀓𑁆𑀔𑀲𑀪𑀸𑀯𑀫𑁆𑀧𑀺 𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀼𑀓𑁆𑀔𑀲𑀪𑀸𑀯𑀁 𑀤𑀼𑀓𑁆𑀔𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸 𑀭𑀽𑀧𑀭𑀽𑀧𑀦𑁆𑀢𑀺.

𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄𑀢𑀺 ‘‘𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀦𑀸𑀳𑁄𑀲𑀻’’𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄.

‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬, 𑁭𑁭, 𑁮𑁫; 𑁨.𑁪.𑁧, 𑁪) 𑀯𑀘𑀦𑀢𑁄 𑀢𑁂𑀪𑀽𑀫𑀓𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀁, 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀉𑀤𑀬𑀩𑁆𑀩𑀬𑀧𑁆𑀧𑀝𑀺𑀧𑀸𑀴𑀺𑀢𑀢𑁆𑀢𑀸’’𑀢𑀺. 𑀬𑀜𑁆𑀳𑀺 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀺𑀢𑀁, 𑀢𑀁 𑀤𑀼𑀓𑁆𑀔𑀫𑀦𑀢𑀸𑀬 𑀤𑀼𑀓𑁆𑀔𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑁂𑀪𑀽𑀫𑀓𑀕𑁆𑀕𑀳𑀡𑀁.

𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀤𑁄𑀫𑀲𑁆𑀲𑀼𑀧𑀸𑀬𑀸𑀲𑁂 𑀯𑀤𑀢𑀺. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁯𑁦) 𑀤𑀼𑀓𑁆𑀔𑀲𑀘𑁆𑀘𑀯𑀺𑀪𑀗𑁆𑀕𑁂 𑀆𑀕𑀢𑀁.

𑀪𑀕𑀯𑀢𑀸𑀧𑀻𑀢𑀺 ¶ 𑀅𑀦𑀸𑀯𑀭𑀡𑀜𑀸𑀡𑀯𑀢𑀸 𑀅𑀘𑁆𑀘𑀭𑀺𑀬𑀸𑀧𑀭𑀺𑀫𑁂𑀬𑁆𑀬𑀤𑁂𑀲𑀦𑀸𑀓𑁄𑀲𑀮𑁆𑀮𑀯𑀢𑀸 𑀪𑀕𑀯𑀢𑀸𑀧𑀺. 𑀉𑀧𑀫𑀸𑀯𑀲𑁂𑀦𑀢𑀺 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸𑀤𑀺𑀉𑀧𑀫𑀸𑀯𑀲𑁂𑀦.

𑁫𑁪𑁦. 𑀧𑀼𑀡𑁆𑀟𑀭𑀻𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀫𑀡𑀺𑀓𑀦𑀓𑀭𑀚𑀢𑀧𑀯𑀸𑀴𑀸𑀤𑀺𑀭𑀢𑀦𑀲𑀦𑁆𑀦𑀺𑀘𑁆𑀘𑀬𑁂, 𑀦𑀸𑀧𑀺 𑀅𑀡𑁆𑀟𑀚𑀫𑁂𑀡𑁆𑀟𑀚𑀯𑀸𑀬𑀚𑀸𑀢𑀺𑀓𑁂 𑀲𑀼𑀪𑀫𑀦𑀼𑀜𑁆𑀜𑀲𑀬𑀦𑀢𑀮𑁂, 𑀦𑀸𑀧𑀺 𑀭𑀢𑀦𑀫𑀬𑀓𑀼𑀝𑁆𑀝𑀺𑀫𑀫𑀦𑁄𑀳𑀭𑁂 𑀧𑀸𑀲𑀸𑀤𑀢𑀮𑁂, 𑀦𑀸𑀧𑀺 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀓𑀼𑀲𑀼𑀫𑁄𑀧𑀳𑀸𑀭𑀯𑀢𑀺 𑀧𑀸𑀲𑀸𑀤𑀽𑀧𑀘𑀸𑀭𑁂, 𑀦𑀸𑀧𑀺 𑀫𑀼𑀢𑁆𑀢𑀸𑀚𑀸𑀮𑀲𑀤𑀺𑀲𑀯𑀸𑀮𑀺𑀓𑀸𑀯𑀺𑀓𑀺𑀡𑁆𑀡𑁂 𑀯𑀺𑀯𑀺𑀝𑀗𑁆𑀕𑀡𑁂, 𑀦𑀸𑀧𑀺 𑀳𑀭𑀺𑀢𑀓𑀫𑁆𑀩𑀮𑀲𑀤𑀺𑀲𑀫𑀼𑀤𑀼𑀲𑀤𑁆𑀤𑀮𑀲𑀫𑁄𑀢𑀮𑁂 𑀪𑀽𑀫𑀺𑀪𑀸𑀕𑁂𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀭𑀫𑀲𑀫𑁆𑀩𑀸𑀥𑁂𑀢𑀺 𑀅𑀢𑀺𑀯𑀺𑀬 𑀲𑀫𑁆𑀩𑀸𑀥𑁂. 𑀢𑀺𑀩𑁆𑀩𑀦𑁆𑀥𑀓𑀸𑀭𑁂𑀢𑀺 𑀩𑀳𑀮𑀦𑁆𑀥𑀓𑀸𑀭𑁂. 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀭𑀼𑀳𑀺𑀭𑀕𑀽𑀣𑁄𑀤𑀭𑀺𑀬𑀸𑀤𑀺 𑀦𑀸𑀦𑀸𑀓𑀼𑀡𑀧𑀲𑀫𑁆𑀩𑀸𑀥𑁂. 𑀫𑀸𑀢𑀸 𑀬𑀤𑀺 𑀯𑀻𑀲𑀢𑀺𑀯𑀲𑁆𑀲𑀸, 𑀅𑀣 𑀢𑀺𑀁𑀲, 𑀘𑀢𑁆𑀢𑀸𑀮𑀻𑀲𑀸𑀤𑀺𑀯𑀲𑁆𑀲𑀸, 𑀢𑀢𑁆𑀢𑀓𑀁 𑀓𑀸𑀮𑀁 𑀅𑀥𑁄𑀢𑀯𑀘𑁆𑀘𑀓𑀽𑀧𑀲𑀤𑀺𑀲𑀢𑀸𑀬 𑀅𑀥𑀺𑀫𑀢𑁆𑀢𑀚𑁂𑀕𑀼𑀘𑁆𑀙𑁂. 𑀧𑀽𑀢𑀺𑀫𑀘𑁆𑀙𑀸 𑀤𑀺 𑀲𑀩𑁆𑀩𑀁 𑀦 𑀲𑀤𑀺𑀲𑀽𑀧𑀫𑁆𑀫𑀁 𑀢𑀲𑁆𑀲 𑀯𑀸𑀢𑀸𑀤𑀺𑀯𑀲𑁂𑀦 𑀏𑀓𑀘𑁆𑀘𑀤𑀼𑀕𑁆𑀕𑀦𑁆𑀥𑀸𑀧𑀕𑀫𑀲𑀩𑁆𑀪𑀸𑀯𑀢𑁄. 𑀤𑀲 𑀫𑀸𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁, 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀏𑀓𑀘𑁆𑀘𑀸𑀦𑀁 𑀢𑀢𑁆𑀣𑀸𑀯𑀝𑁆𑀞𑀸𑀦𑀲𑀫𑁆𑀪𑀯𑀢𑁄 ¶ . 𑀅𑀢𑁆𑀢𑀦𑁄 𑀅𑀥𑁄𑀫𑀼𑀔𑀁 𑀞𑀧𑀺𑀢𑀲𑀗𑁆𑀓𑀼𑀘𑀺𑀢𑀳𑀢𑁆𑀣𑀤𑁆𑀯𑀬𑀲𑁆𑀲 𑀉𑀓𑁆𑀓𑀼𑀝𑀺𑀓𑀲𑁆𑀲𑁂𑀯 𑀦𑀺𑀲𑀻𑀤𑀢𑁄 𑀲𑀫𑀺𑀚𑁆𑀚𑀦𑀧𑁆𑀧𑀲𑀸𑀭𑀡𑀸𑀤𑀺𑀭𑀳𑀺𑀢𑁄.

𑀅𑀪𑀺𑀫𑀼𑀔𑀁 𑀓𑀟𑁆𑀠𑀦𑀁 𑀆𑀓𑀟𑁆𑀠𑀦𑀁. 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀓𑀟𑁆𑀠𑀦𑀁 𑀧𑀭𑀺𑀓𑀟𑁆𑀠𑀦𑀁. 𑀳𑁂𑀝𑁆𑀞𑀸 𑀥𑀼𑀦𑀦𑀁 𑀑𑀥𑀽𑀦𑀦𑀁. 𑀦𑀺𑀥𑀸𑀬 𑀦𑀺𑀥𑀸𑀬 𑀥𑀽𑀦𑀦𑀁 𑀦𑀺𑀤𑁆𑀥𑀽𑀦𑀦𑀁. 𑀆𑀓𑀟𑁆𑀠𑀦𑀸𑀤𑀺𑀲𑀤𑀺𑀲𑀜𑁆𑀘𑁂𑀢𑁆𑀣 ‘‘𑀆𑀓𑀟𑁆𑀠𑀦𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀢𑀭𑀼𑀡𑀯𑀡𑀲𑀤𑀺𑀲𑀁 𑀅𑀢𑀺𑀯𑀺𑀬 𑀲𑀼𑀔𑀼𑀫𑀸𑀮𑀁 𑀕𑀩𑁆𑀪𑀕𑀢𑀁 𑀲𑀭𑀻𑀭𑀁 𑀲𑀻𑀢𑀸𑀤𑀺𑀅𑀧𑁆𑀧𑀓𑀫𑁆𑀧𑀺 𑀦 𑀲𑀳𑀢𑀻𑀢𑀺 𑀲𑀻𑀢𑀦𑀭𑀓𑀽𑀧𑀧𑀦𑁆𑀦𑀢𑀸𑀤𑀺 𑀦𑀺𑀤𑀲𑁆𑀲𑀺𑀢𑀁. 𑀢𑀜𑁆𑀳𑀺 𑀢𑀲𑁆𑀲 𑀅𑀢𑀺𑀯𑀺𑀬 𑀲𑀻𑀢𑀁, 𑀅𑀢𑀺𑀯𑀺𑀬 𑀉𑀡𑁆𑀳𑀜𑁆𑀘 𑀳𑀼𑀢𑁆𑀯𑀸 𑀉𑀧𑀢𑀺𑀝𑁆𑀞𑀢𑀺. 𑀲𑀭𑀻𑀭𑀁 𑀯𑀸𑀲𑀺𑀬𑀸𑀤𑀻𑀳𑀺 𑀢𑀘𑁆𑀙𑁂𑀢𑁆𑀯𑀸 𑀔𑀸𑀭𑀸𑀯𑀲𑁂𑀘𑀦𑀓𑀭𑀡𑀁 𑀔𑀸𑀭𑀸𑀧𑀝𑀺𑀘𑁆𑀙𑀓𑀁. 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂𑀢𑀺 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑀁 𑀢𑀢𑀺𑀬𑀁 𑀆𑀯𑀝𑁆𑀝𑀁 𑀲𑀦𑁆𑀥𑀸𑀬𑀸𑀳.

𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀉𑀤𑁆𑀥𑀁𑀧𑀸𑀤𑀅𑀥𑁄𑀲𑀻𑀲𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀇𑀤𑀁 𑀯𑀺𑀚𑀸𑀬𑀦𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀬𑁂𑀦 𑀫𑀭𑀡𑀤𑀼𑀓𑁆𑀔𑁂𑀦 𑀘 𑀅𑀝𑁆𑀝𑀺𑀢𑀸 𑀯𑁂𑀤𑀦𑀸𑀧𑁆𑀧𑀢𑁆𑀢𑀸 𑀲𑀢𑁆𑀢𑀸 𑀓𑀢𑀺𑀧𑀬𑀫𑀸𑀲𑀫𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀧𑀯𑀢𑁆𑀢𑀺𑀁 𑀯𑀺𑀲𑁆𑀲𑀭𑀦𑁆𑀢𑀺, 𑀫𑀳𑀦𑁆𑀥𑀓𑀸𑀭𑀁 𑀫𑀳𑀸𑀯𑀺𑀤𑀼𑀕𑁆𑀕𑀁 𑀧𑀓𑁆𑀔𑀦𑁆𑀥𑀸 𑀯𑀺𑀬 𑀳𑁄𑀦𑁆𑀢𑀺.

𑀯𑀥𑁂𑀦𑁆𑀢𑀲𑁆𑀲𑀸𑀢𑀺 ¶ 𑀲𑁄𑀘𑀦𑀧𑀭𑀺𑀤𑁂𑀯𑀦𑀲𑀻𑀲𑀧𑀝𑀺𑀳𑀦𑀦𑀸𑀤𑀺𑀦𑀸 𑀩𑀸𑀥𑁂𑀦𑁆𑀢𑀲𑁆𑀲. 𑀔𑀼𑀧𑁆𑀧𑀺𑀧𑀸𑀲𑀸 𑀳𑀺 𑀆𑀢𑀧𑀸𑀯𑀝𑁆𑀞𑀸𑀦𑀸𑀤𑀺𑀦𑀸 𑀘 𑀆𑀢𑀸𑀧𑀦𑀁. 𑀧𑀜𑁆𑀘𑀕𑁆𑀕𑀺𑀢𑀸𑀧𑀦𑀸𑀤𑀺𑀦𑀸 𑀧𑀭𑀺𑀢𑀸𑀧𑀦𑀁.

𑀇𑀫𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀢𑁆𑀢𑀯𑀺𑀥𑀲𑁆𑀲. 𑀲𑀩𑁆𑀩𑀲𑁆𑀲𑀸𑀧𑀻𑀢𑀺 𑀕𑀩𑁆𑀪𑀓𑀸𑀮𑀸𑀤𑀻𑀲𑀼 𑀢𑀸𑀧𑀦𑀫𑀤𑁆𑀤𑀦𑀸𑀤𑀺𑀦𑀺𑀭𑀬𑀕𑁆𑀕𑀺𑀤𑀸𑀳𑀸𑀤𑀺𑀲𑀜𑁆𑀚𑀦𑀺𑀢𑀲𑁆𑀲 𑀲𑀓𑀮𑀲𑁆𑀲𑀸𑀧𑀺. 𑀯𑀢𑁆𑀣𑀼𑀫𑁂𑀯 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀚𑀸𑀬𑁂𑀣 𑀦𑁄 𑀘𑁂’’𑀢𑀺𑀆𑀤𑀺.

𑁫𑁪𑁧. 𑀯𑀺𑀘𑀺𑀢𑁆𑀢𑀦𑁆𑀢𑀺 𑀯𑀺𑀯𑀺𑀥𑀁, 𑀅𑀘𑁆𑀙𑀭𑀺𑀬𑀁 𑀯𑀸.

𑀇𑀢𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀚𑀭𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁨. 𑀲𑀗𑁆𑀔𑀸𑀢𑀮𑀓𑁆𑀔𑀡𑀦𑁆𑀢𑀺 ¶ ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺 (𑀲𑀁. 𑀦𑀺. 𑁩.𑁩𑁮; 𑀅. 𑀦𑀺. 𑁩.𑁪𑁭; 𑀓𑀣𑀸. 𑁨𑁧𑁪) 𑀯𑀼𑀢𑁆𑀢𑀁 𑀔𑀡𑀺𑀓𑀚𑀭𑀁 𑀲𑀦𑁆𑀥𑀸𑀬𑀸𑀳. 𑀔𑀡𑁆𑀟𑀺𑀘𑁆𑀘𑀸𑀤𑀺𑀲𑀫𑁆𑀫𑀢𑁄𑀢𑀺 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀯𑀮𑀺𑀢𑁆𑀢𑀘𑀢𑀸𑀤𑀺𑀦𑀸 𑀲𑀫𑀜𑁆𑀜𑀢𑁄. 𑀲𑀸𑀢𑀺 𑀔𑀦𑁆𑀥𑀧𑀼𑀭𑀸𑀡𑀪𑀸𑀯𑀲𑀜𑁆𑀜𑀺𑀢𑀸 𑀧𑀸𑀓𑀝𑀚𑀭𑀸. 𑀔𑀦𑁆𑀥𑀧𑀭𑀺𑀧𑀸𑀓𑁄 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀧𑀼𑀭𑀸𑀡𑀪𑀸𑀯𑁄.

𑀇𑀢𑀺 𑀚𑀭𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀫𑀭𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁩. 𑀲𑀗𑁆𑀔𑀢𑀮𑀓𑁆𑀔𑀡𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀯𑀬𑀲𑀜𑁆𑀜𑀺𑀢𑀁 𑀔𑀡𑀺𑀓𑀫𑀭𑀡𑀫𑀸𑀳. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀔𑀡𑀺𑀓𑀫𑀭𑀡𑀁 𑀲𑀦𑁆𑀥𑀸𑀬, ‘‘𑀚𑀭𑀸𑀫𑀭𑀡𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁭𑁧) 𑀏𑀢𑁆𑀣 ‘‘𑀫𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀘𑁂𑀤𑀲𑀜𑁆𑀜𑀺𑀢𑀁 𑀧𑀸𑀓𑀝𑀫𑀭𑀡𑀁. ‘‘𑀘𑀯𑀦’’𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀢𑀸𑀬 𑀘𑀼𑀢𑀺𑀮𑀓𑁆𑀔𑀡𑀁. 𑀯𑀺𑀬𑁄𑀕𑀭𑀲𑀦𑁆𑀢𑀺 𑀬𑀣𑀸𑀥𑀺𑀕𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀯𑀺𑀬𑁄𑀚𑀦𑀭𑀲𑀁. 𑀬𑀣𑀽𑀧𑀧𑀦𑁆𑀦𑀸𑀬 𑀕𑀢𑀺𑀬𑀸 𑀯𑀺𑀧𑁆𑀧𑀯𑀸𑀲𑀯𑀲𑁂𑀦 𑀕𑀬𑁆𑀳𑀢𑀻𑀢𑀺 𑀕𑀢𑀺𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀧𑀸𑀧𑀲𑁆𑀲𑀸𑀢𑀺 𑀧𑀸𑀧𑀬𑁄𑀕𑁂𑀦 𑀧𑀸𑀧𑀲𑁆𑀲, 𑀉𑀧𑀘𑀺𑀢𑀧𑀸𑀧𑀓𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀸𑀧𑀓𑀫𑁆𑀫𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀸𑀧𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀫𑀭𑀡𑀓𑀸𑀮𑁂 𑀉𑀧𑀝𑁆𑀞𑀺𑀢𑀁 ¶ 𑀅𑀓𑀼𑀲𑀮𑀯𑀺𑀧𑀸𑀓𑀸𑀭𑀫𑁆𑀫𑀡𑀁. 𑀢𑀫𑁆𑀳𑀺 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀓𑀲𑁆𑀲𑀘𑀺 𑀅𑀦𑀼𑀪𑀯𑀦𑁆𑀢𑀲𑁆𑀲 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀳𑁄𑀢𑀺. 𑀪𑀤𑁆𑀤𑀲𑁆𑀲𑀸𑀢𑀺 𑀪𑀤𑁆𑀤𑀓𑀫𑁆𑀫𑀲𑁆𑀲, 𑀓𑀢𑀓𑀼𑀲𑀮𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀦 𑀓𑀸𑀫𑀁 𑀇𑀝𑁆𑀞𑀫𑁂𑀯 𑀆𑀭𑀫𑁆𑀫𑀡𑀁 𑀉𑀧𑀝𑁆𑀞𑀸𑀢𑀺, 𑀧𑀺𑀬𑀯𑀺𑀧𑁆𑀧𑀬𑁄𑀕𑀯𑀢𑁆𑀣𑀼𑀓𑀁 𑀧𑀦 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀆𑀭𑀫𑁆𑀫𑀡𑀁 𑀉𑀧𑀝𑁆𑀞𑀸𑀢𑀺, 𑀧𑀺𑀬𑀯𑀺𑀧𑁆𑀧𑀬𑁄𑀕𑀯𑀢𑁆𑀣𑀼𑀓𑀁 𑀧𑀦 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀅𑀲𑀳𑀦𑁆𑀢𑀲𑁆𑀲 𑀯𑀺𑀬𑁄𑀕𑀁 𑀧𑀺𑀬𑀯𑀢𑁆𑀣𑀼𑀓’’𑀦𑁆𑀢𑀺. 𑀅𑀯𑀺𑀲𑁂𑀲𑀢𑁄𑀢𑀺 𑀧𑀸𑀧𑀲𑁆𑀲, 𑀪𑀤𑁆𑀤𑀲𑁆𑀲 𑀘 𑀲𑀸𑀫𑀜𑁆𑀜𑀢𑁄. ‘‘𑀅𑀯𑀺𑀲𑁂𑀲𑀢𑁄’’𑀢𑀺 𑀯𑀢𑁆𑀯𑀸𑀧𑀺 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀯𑀘𑀦𑀁 𑀢𑀁 𑀇𑀤𑀁 𑀤𑀼𑀓𑁆𑀔𑀁 𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀸𑀦𑀁 𑀏𑀓𑀘𑁆𑀘𑀸𑀦𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀯𑀺𑀢𑀼𑀚𑁆𑀚𑀫𑀸𑀦𑀫𑀫𑁆𑀫𑀸𑀦𑀦𑁆𑀢𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀯𑀘𑁆𑀙𑁂𑀤𑀓𑀯𑀸𑀬𑀼𑀦𑀸 𑀯𑀺𑀚𑁆𑀛𑀺𑀬𑀫𑀸𑀦𑀫𑀫𑁆𑀫𑀝𑁆𑀞𑀸𑀦𑀸𑀦𑀁.

𑀇𑀢𑀺 𑀫𑀭𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀲𑁄𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁪. 𑀲𑁄𑀢𑀺 ¶ 𑀲𑁄𑀓𑁄. 𑀅𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀫𑁂𑀯 𑀳𑁄𑀢𑀺 𑀘𑁂𑀢𑀲𑀺𑀓𑀦𑁆𑀢𑀭𑀸𑀪𑀸𑀯𑀢𑁄. 𑀤𑁄𑀫𑀦𑀲𑁆𑀲𑀯𑀺𑀲𑁂𑀲𑁄 𑀧𑀦 𑀳𑁄𑀢𑀺 𑀯𑀺𑀲𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄𑀢𑀺 𑀢𑀁 𑀯𑀺𑀲𑁂𑀲𑀁 𑀮𑀓𑁆𑀔𑀡𑀸𑀤𑀺𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄 𑀦𑀺𑀚𑁆𑀛𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀧𑀭𑀺𑀚𑁆𑀛𑀸𑀧𑀦𑀁 𑀭𑀸𑀕𑀤𑁄𑀲𑀧𑀭𑀺𑀴𑀸𑀳𑀯𑀺𑀲𑀺𑀝𑁆𑀞𑀁 𑀤𑀳𑀦𑀁. 𑀓𑀢𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀅𑀦𑀼𑀲𑁄𑀘𑀦𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀯𑀺𑀲𑀬𑀁 𑀓𑁂𑀯𑀮𑀁 𑀘𑀺𑀢𑁆𑀢𑀲𑀦𑁆𑀣𑀸𑀧𑀪𑀽𑀢𑀁 𑀅𑀦𑀼𑀲𑁄𑀘𑀦𑀁 𑀲𑁄𑀓𑁄𑀢𑀺 𑀅𑀦𑀼𑀲𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁆𑀢𑁂𑀧𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀯𑀺𑀲𑀧𑀻𑀢𑀁 𑀲𑀮𑁆𑀮𑀁 𑀯𑀺𑀲𑀲𑀮𑁆𑀮𑀁. 𑀲𑁄𑀓𑀯𑀲𑁂𑀦 𑀅𑀢𑀺𑀲𑀸𑀭𑀸𑀤𑀺 𑀩𑁆𑀬𑀸𑀥𑀺𑀧𑀺 𑀳𑁄𑀢𑀺, 𑀲𑁄𑀓𑀩𑀳𑀼𑀮𑀲𑁆𑀲 𑀲𑀭𑀻𑀭𑀁 𑀦 𑀘𑀺𑀭𑀲𑁆𑀲𑁂𑀯 𑀚𑀻𑀭𑀢𑀺, 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑁄 𑀫𑀭𑀡𑀫𑁆𑀧𑀺 𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀲𑀫𑀸𑀯𑀳𑀢𑀺 𑀘 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑀪𑁂𑀤𑀦’’𑀦𑁆𑀢𑀺.

𑀇𑀢𑀺 𑀲𑁄𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁫. 𑀯𑀘𑀻𑀧𑀮𑀸𑀧𑁄𑀢𑀺 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄, 𑀲𑁄 𑀅𑀢𑁆𑀣𑀢𑁄 𑀲𑀤𑁆𑀤𑁄 𑀏𑀯. 𑀪𑀺𑀬𑁆𑀬𑁄𑀢𑀺 𑀲𑁄𑀓𑀤𑀼𑀓𑁆𑀔𑀢𑁄 𑀉𑀧𑀭𑀺. 𑀲𑁄𑀓𑀲𑀫𑀼𑀝𑁆𑀞𑀸𑀦𑁄 𑀳𑀺 𑀧𑀭𑀺𑀤𑁂𑀯𑁄.

𑀇𑀢𑀺 𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁬. 𑀚𑀸𑀢𑀺𑀆𑀤𑀻𑀦𑀫𑁆𑀧𑀺 ¶ 𑀬𑀣𑀸𑀭𑀳𑀁 𑀤𑀼𑀓𑁆𑀔𑀯𑀢𑁆𑀣𑀼𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀳𑀺 𑀲𑀢𑀺𑀧𑀺 𑀤𑀼𑀓𑁆𑀔𑀪𑀸𑀯𑁂 𑀓𑀸𑀬𑀲𑁆𑀲 𑀧𑀻𑀴𑀦𑀯𑀲𑁂𑀦 𑀇𑀤𑀁 𑀲𑀯𑀺𑀲𑁂𑀲𑀁 𑀤𑀼𑀓𑁆𑀔𑀫𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀦𑁆𑀢𑀺 𑀯𑀺𑀲𑁂𑀲𑀢𑁄 𑀯𑀼𑀢𑁆𑀢’’𑀦𑁆𑀢𑀺.

𑀇𑀢𑀺 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁭. 𑀫𑀦𑁄𑀯𑀺𑀖𑀸𑀢𑀭𑀲𑀦𑁆𑀢𑀺 ¶ 𑀩𑁆𑀬𑀸𑀧𑀸𑀤𑀲𑀫𑁆𑀧𑀬𑁄𑀕𑀯𑀲𑁂𑀦 𑀫𑀦𑀲𑁄 𑀯𑀺𑀳𑀜𑁆𑀜𑀦𑀓𑀺𑀘𑁆𑀘𑀁. 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑀫𑀗𑁆𑀕𑀺𑀦𑁄. 𑀆𑀯𑀝𑁆𑀝𑀦𑁆𑀢𑀻𑀢𑀺 𑀆𑀫𑀼𑀔𑀁 𑀯𑀝𑁆𑀝𑀦𑁆𑀢𑀺, 𑀬𑀁𑀤𑀺𑀲𑀸𑀪𑀺𑀫𑀼𑀔𑀁 𑀧𑀢𑀺𑀢𑀸, 𑀢𑀁𑀤𑀺𑀲𑀸𑀪𑀺𑀫𑀼𑀔𑀸 𑀏𑀯 𑀯𑀝𑁆𑀝𑀦𑁆𑀢𑀺. 𑀯𑀺𑀯𑀝𑁆𑀝𑀦𑁆𑀢𑀻𑀢𑀺 𑀯𑀺𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀯𑀝𑁆𑀝𑀦𑁆𑀢𑀺. 𑀉𑀤𑁆𑀥𑀁𑀧𑀸𑀤𑀁 𑀧𑀧𑀢𑀦𑁆𑀢𑀻𑀢𑀺 𑀉𑀤𑁆𑀥𑀁𑀫𑀼𑀔𑀧𑀸𑀤𑀸 𑀳𑀼𑀢𑁆𑀯𑀸 𑀧𑀢𑀦𑁆𑀢𑀺. 𑀲𑀢𑁆𑀣𑀁 𑀆𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀯𑀺𑀚𑁆𑀛𑀦𑀪𑁂𑀤𑀦𑀯𑀲𑁂𑀦 𑀲𑀢𑁆𑀣𑀁 𑀉𑀧𑀦𑁂𑀦𑁆𑀢𑀺.

𑀇𑀢𑀺 𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁮. 𑀤𑁄𑀲𑁄𑀬𑁂𑀯𑀸𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀬𑀸𑀲𑀦𑀯𑀲𑁂𑀦 𑀤𑁄𑀲𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀅𑀢𑁆𑀣𑁄, 𑀬𑀢𑁄 𑀪𑀼𑀲𑁄 𑀆𑀬𑀸𑀲𑁄𑀢𑀺 𑀉𑀧𑀸𑀬𑀸𑀲𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀪𑀼𑀲𑀫𑀸𑀤𑀸𑀦𑀁 𑀉𑀧𑀸𑀤𑀸𑀦𑀦𑁆𑀢𑀺. 𑀏𑀓𑁄 𑀥𑀫𑁆𑀫𑁄𑀢𑀺 𑀘𑀼𑀤𑁆𑀤𑀲𑀳𑀺 𑀅𑀓𑀼𑀲𑀮𑀘𑁂𑀢𑀲𑀺𑀓𑁂𑀳𑀺 𑀅𑀜𑁆𑀜𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄, 𑀬𑀁 ‘‘𑀯𑀺𑀲𑀸𑀤𑁄’’𑀢𑀺 𑀘 𑀯𑀤𑀦𑁆𑀢𑀺. 𑀦𑀺𑀢𑁆𑀣𑀼𑀦𑀦𑀯𑀲𑁂𑀦 𑀲𑀫𑁆𑀧𑀚𑁆𑀚𑀦𑀢𑁄 𑀦𑀺𑀢𑁆𑀣𑀼𑀦𑀦𑀭𑀲𑁄, 𑀓𑀸𑀬𑁂 𑀯𑀸 𑀦𑀺𑀢𑁆𑀣𑀼𑀦𑀦𑀓𑀭𑀡𑀓𑀺𑀘𑁆𑀘𑁄. ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄’’𑀢𑀺 𑀯𑀢𑁆𑀯𑀸 𑀲𑁄 𑀧𑀦𑁂𑀢𑁆𑀣 𑀲𑀸𑀢𑀺𑀲𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀧𑀭𑀺𑀤𑀳𑀦𑀢𑁄, 𑀓𑀸𑀬𑀯𑀺𑀲𑀸𑀤𑀦𑀢𑁄 𑀘𑀸’’𑀢𑀺 𑀆𑀳.

𑀏𑀢𑁂 𑀘 𑀲𑁄𑀓𑀧𑀭𑀺𑀤𑁂𑀯𑀼𑀧𑀸𑀬𑀸𑀲𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀦𑀸, 𑀲𑀳 𑀘 𑀬𑀣𑀸𑀧𑀘𑁆𑀘𑀬𑀁 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀓𑁄 𑀯𑀺𑀬𑀸𑀢𑀺 𑀭𑀚𑀦𑀸𑀤𑀺𑀦𑁄 𑀧𑀘𑀺𑀢𑀩𑁆𑀩𑀯𑀢𑁆𑀣𑀼𑀦𑁄 𑀧𑀸𑀓𑁄 𑀯𑀺𑀬.

𑀇𑀢𑀺 𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁪𑁯. 𑀲𑀫𑁄𑀥𑀸𑀦𑀁 ¶ ¶ 𑀲𑀫𑀸𑀕𑀫𑁄. 𑀓𑀸𑀬𑀺𑀓𑀤𑀼𑀓𑁆𑀔𑀘𑀺𑀢𑁆𑀢𑀯𑀺𑀖𑀸𑀢𑀸𑀤𑀺𑀅𑀦𑀢𑁆𑀣𑀸𑀦𑀁 𑀅𑀢𑁆𑀣𑀺𑀪𑀸𑀯𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀦𑀢𑁆𑀣𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀢𑁂𑀲𑀁 𑀅𑀧𑁆𑀧𑀺𑀬𑀸𑀦𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑀬𑁄𑀕𑀲𑀗𑁆𑀔𑀸𑀢𑁄 𑀉𑀧𑀓𑁆𑀓𑀫𑁄 𑀢𑀤𑀼𑀧𑀓𑁆𑀓𑀫𑁄, 𑀢𑀢𑁄 𑀲𑀫𑁆𑀪𑀽𑀢𑁄 𑀢𑀤𑀼𑀧𑀓𑁆𑀓𑀫𑀲𑀫𑁆𑀪𑀽𑀢𑁄.

𑀇𑀢𑀺 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀺𑀬𑀯𑀺𑀧𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁫𑁦. 𑀉𑀧𑀤𑁆𑀤𑀯𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀩𑁆𑀬𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀇𑀢𑀺 𑀧𑀺𑀬𑀯𑀺𑀧𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀇𑀘𑁆𑀙𑀺𑀢𑀸𑀮𑀸𑀪𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁫𑁧. 𑀇𑀘𑁆𑀙𑀺𑀢𑀸𑀮𑀸𑀪𑁄 𑀦𑀸𑀫 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀮𑀸𑀪𑁄. ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀧𑀦 𑀇𑀘𑁆𑀙𑀺𑀢𑀸𑀮𑀸𑀪𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀳𑁄 𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀘𑁆𑀙𑀸𑀯𑀸𑀢𑀺 𑀏𑀢𑁆𑀣 𑀇𑀘𑁆𑀙𑀸𑀲𑀳𑀺𑀢𑁄 𑀅𑀮𑀸𑀪𑁄𑀯𑀸𑀢𑀺 𑀘 𑀯𑀤𑀦𑁆𑀢𑀺. 𑀢𑀧𑁆𑀧𑀭𑀺𑀬𑁂𑀲𑀦𑀭𑀲𑀸𑀢𑀺 𑀢𑁂𑀲𑀁 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀽𑀦𑀁 𑀧𑀭𑀺𑀬𑁂𑀲𑀦𑀭𑀲𑀸. 𑀅𑀧𑁆𑀧𑀢𑁆𑀢𑀺 𑀅𑀮𑀸𑀪𑁄.

𑀇𑀢𑀺 𑀇𑀘𑁆𑀙𑀺𑀢𑀸𑀮𑀸𑀪𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁫𑁨. 𑀬𑀁 ¶ 𑀯𑀼𑀢𑁆𑀢𑀫𑀺𑀥𑀸𑀢𑀺 𑀇𑀥 𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀬𑀁 𑀲𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀅𑀯𑀼𑀢𑁆𑀢𑀦𑁆𑀢𑀺 𑀅𑀜𑁆𑀜𑀢𑁆𑀣 𑀤𑀼𑀓𑁆𑀔𑀓𑁆𑀔𑀦𑁆𑀥𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀫𑁆𑀧𑀺 𑀇𑀥 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀁. 𑀢𑀜𑁆𑀘 𑀲𑀩𑁆𑀩𑀁 𑀇𑀫𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀯𑀺𑀦𑀸 𑀦 𑀮𑀩𑁆𑀪𑀢𑀻𑀢𑀺 𑀢𑀢𑁆𑀣 𑀔𑀦𑁆𑀥𑀲𑀦𑁆𑀦𑀺𑀲𑁆𑀲𑀬𑀫𑁂𑀯 𑀤𑀼𑀓𑁆𑀔𑀁 𑀔𑀦𑁆𑀥𑁂 𑀯𑀺𑀩𑀸𑀥𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀦𑁆𑀤𑀦𑀫𑀺𑀯 𑀧𑀸𑀯𑀓𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 ¶ 𑀯𑀸 𑀮𑀓𑁆𑀔𑀁 𑀧𑀳𑀭𑀡𑀧𑀳𑀸𑀭𑀲𑁆𑀲 𑀯𑀢𑁆𑀣𑀼, 𑀏𑀯𑀁 𑀔𑀦𑁆𑀥𑀸 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲. 𑀬𑀣𑀸 𑀘 𑀕𑁄𑀭𑀽𑀧𑀁 𑀟𑀁𑀲𑀫𑀓𑀲𑀸𑀤𑀺𑀯𑀺𑀩𑀸𑀥𑀸𑀬, 𑀬𑀣𑀸 𑀘 𑀔𑁂𑀢𑁆𑀢𑀁 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀮𑀸𑀬𑀦𑀲𑁆𑀲, 𑀕𑀸𑀫𑁄 𑀘 𑀕𑀸𑀫𑀖𑀸𑀢𑀓𑀯𑀺𑀩𑀸𑀥𑀸𑀬, 𑀏𑀯𑀁 𑀔𑀦𑁆𑀥𑀸 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑀓𑁆𑀔𑀫𑀺𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀪𑀼𑀬𑁆𑀬𑁂𑀦 𑀮𑁄𑀓𑁂 𑀯𑀺𑀩𑀸𑀥𑀓𑀸 𑀯𑀺𑀩𑀸𑀥𑁂𑀢𑀩𑁆𑀩𑀸𑀥𑀻𑀦𑀸 𑀦 𑀳𑁄𑀦𑁆𑀢𑀺, 𑀇𑀫𑁂 𑀧𑀦 𑀯𑀺𑀩𑀸𑀥𑁂𑀢𑀩𑁆𑀩𑀸𑀥𑀻𑀦𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀡𑀮𑀢𑀸𑀤𑀻𑀦𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀁 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀆𑀤𑀺 𑀦𑀸𑀫 𑀓𑀲𑁆𑀲𑀘𑀺 𑀦𑀢𑁆𑀣𑀺, 𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀧𑀦 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀆𑀤𑀺𑀤𑀼𑀓𑁆𑀔𑀁 𑀚𑀸𑀢𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀭𑀺𑀬𑁄𑀲𑀸𑀦𑀤𑀼𑀓𑁆𑀔𑀁 𑀫𑀭𑀡’’𑀦𑁆𑀢𑀺. 𑀦 𑀳𑁂𑀢𑁆𑀣 𑀲𑀫𑀼𑀘𑁆𑀙𑁂𑀤𑀫𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀫𑀭𑀡𑀲𑁆𑀲 𑀅𑀦𑁆𑀢𑀺𑀓𑁂 𑀆𑀲𑀦𑁆𑀦𑁂 𑀚𑀸𑀢𑀁 𑀤𑀼𑀓𑁆𑀔𑀁 𑀫𑀸𑀭𑀡𑀦𑁆𑀢𑀺𑀓𑀤𑀼𑀓𑁆𑀔𑀁. 𑀧𑀭𑀺𑀤𑀬𑁆𑀳𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀮𑀸𑀮𑀧𑁆𑀧𑀦𑀁 𑀅𑀢𑀺𑀯𑀺𑀬 𑀯𑀺𑀧𑁆𑀧𑀮𑀸𑀧𑁄. 𑀅𑀦𑀼𑀢𑁆𑀣𑀼𑀦𑀦𑀁 𑀅𑀦𑁆𑀢𑁄 𑀦𑀺𑀚𑁆𑀛𑀸𑀬𑀦𑀁. 𑀏𑀓𑀫𑁂𑀓𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀁 𑀅𑀦𑁆𑀢𑀭𑀪𑁂𑀤𑀪𑀺𑀦𑁆𑀦𑀸𑀦𑀁, 𑀚𑀸𑀢𑀺𑀆𑀤𑀻𑀦𑀫𑁂𑀯 𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀸𑀦𑀁 𑀯𑀸 𑀏𑀓𑀫𑁂𑀓𑀁. 𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀫𑀸𑀲𑁂𑀢𑁆𑀯𑀸, 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀯𑀸 𑀲𑀗𑁆𑀔𑁂𑀧𑀁 𑀓𑀢𑁆𑀯𑀸.

𑀇𑀢𑀺 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸.

𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁫𑁫𑁩. 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀬𑀣𑀸 𑀯𑀸 𑀅𑀧𑀽𑀧𑀪𑀓𑁆𑀔𑀦𑀲𑀻𑀮𑁄 𑀆𑀧𑀽𑀧𑀺𑀓𑁄, 𑀏𑀯𑀁 𑀧𑀼𑀦𑀩𑁆𑀪𑀯𑀓𑀭𑀡𑀲𑀻𑀮𑀸, 𑀧𑀼𑀦𑀩𑁆𑀪𑀯𑀁 𑀯𑀸 𑀨𑀮𑀁 𑀅𑀭𑀳𑀢𑀺, 𑀲𑁄 𑀯𑀸 𑀏𑀢𑀺𑀲𑁆𑀲𑀸 𑀧𑀬𑁄𑀚𑀦𑀦𑁆𑀢𑀺 𑀧𑁄𑀦𑁄𑀪𑀯𑀺𑀓𑀸. 𑀦𑀦𑁆𑀤𑀦𑀢𑁄, 𑀭𑀜𑁆𑀚𑀦𑀢𑁄 𑀘 𑀦𑀦𑁆𑀤𑀻𑀭𑀸𑀕𑀪𑀸𑀯𑀁 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀅𑀧𑀘𑁆𑀘𑀓𑁆𑀔𑀸𑀬 𑀯𑀼𑀢𑁆𑀢𑀺𑀬𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸. 𑀢𑀸𑀬 𑀘 𑀲𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀪𑀯𑀸𑀤𑀺𑀓𑁂 𑀓𑀺𑀫𑀺𑀓𑀻𑀝𑀧𑀝𑀗𑁆𑀕𑀸𑀤𑀺𑀅𑀢𑁆𑀢𑀪𑀸𑀯𑁂𑀧𑀺 𑀦𑀦𑁆𑀤𑀦𑁆𑀢𑀺, 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑀽𑀢𑀸𑀬 𑀭𑀜𑁆𑀚𑀦𑁆𑀢𑀺 𑀘𑀸𑀢𑀺 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻. 𑀢𑁂𑀦𑀸𑀳 ‘‘𑀦𑀦𑁆𑀤𑀻𑀭𑀸𑀕𑁂𑀦 𑀲𑀳𑀕𑀢𑀸’’𑀢𑀺𑀆𑀤𑀺. 𑀢𑀩𑁆𑀪𑀸𑀯𑀢𑁆𑀣𑁄 𑀳𑀺 𑀏𑀲 𑀲𑀳𑀕𑀢𑀲𑀤𑁆𑀤𑁄. 𑀓𑀸𑀫𑀪𑀯𑀯𑀺𑀪𑀯𑀪𑁂𑀤𑀯𑀲𑁂𑀦 ¶ 𑀧𑀯𑀢𑁆𑀢𑀺𑀬𑀸 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 𑀢𑀡𑁆𑀳𑀸𑀪𑀸𑀯𑁂𑀦𑁂𑀯 𑀏𑀓𑀪𑀸𑀯𑀕𑁆𑀕𑀳𑀡𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀓𑀲𑁆𑀲𑀘𑀺𑀧𑀺 𑀲𑀢𑁆𑀢𑀲𑁆𑀲 𑀓𑁂𑀦𑀘𑀺 𑀲𑀤𑀺𑀲𑀢𑀸𑀪𑀸𑀯𑀢𑁄 𑀢𑀁𑀢𑀁𑀯𑀺𑀘𑀺𑀢𑁆𑀢𑀪𑀸𑀯𑀚𑀦𑀓𑀓𑀫𑁆𑀫𑀦𑀺𑀧𑁆𑀨𑀸𑀤𑀦𑁂𑀦 ¶ 𑀅𑀢𑀺𑀯𑀺𑀘𑀺𑀢𑁆𑀢𑀲𑀪𑀸𑀯𑀸 𑀲𑀓𑀮𑀲𑁆𑀲 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀢𑀡𑁆𑀳𑀸𑀯 𑀲𑀫𑀼𑀤𑀬𑀲𑀘𑁆𑀘𑀁 𑀯𑀼𑀢𑁆𑀢𑀸𑀢𑀺? 𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀢𑁄. 𑀅𑀯𑀺𑀚𑁆𑀚𑀸 𑀳𑀺 𑀪𑀯𑁂𑀲𑀼 𑀆𑀤𑀻𑀦𑀯𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻, 𑀤𑀺𑀝𑁆𑀞𑀺𑀆𑀤𑀺𑀉𑀧𑀸𑀤𑀸𑀦𑀜𑁆𑀘 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀦𑀺𑀯𑀺𑀲𑀫𑀸𑀦𑀁 𑀢𑀡𑁆𑀳𑀁 𑀅𑀪𑀺𑀯𑀟𑁆𑀠𑁂𑀦𑁆𑀢𑀻 𑀤𑁄𑀲𑀸𑀤𑀬𑁄𑀧𑀺 𑀓𑀫𑁆𑀫𑀲𑁆𑀲 𑀓𑀸𑀭𑀡𑀁 𑀳𑁄𑀦𑁆𑀢𑀺, 𑀢𑀡𑁆𑀳𑀸 𑀧𑀦 𑀢𑀁𑀢𑀁𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑀓𑀼𑀮𑀪𑁄𑀕𑀺𑀲𑁆𑀲𑀭𑀺𑀬𑀸𑀤𑀺𑀯𑀺𑀘𑀺𑀢𑁆𑀢𑀢𑀁 𑀅𑀪𑀺𑀧𑀢𑁆𑀣𑁂𑀦𑁆𑀢𑀻, 𑀓𑀫𑁆𑀫𑀯𑀺𑀘𑀺𑀢𑁆𑀢𑀢𑀸𑀬 𑀉𑀧𑀦𑀺𑀲𑁆𑀲𑀬𑀢𑀁 𑀓𑀫𑁆𑀫𑀲𑁆𑀲 𑀘 𑀲𑀳𑀸𑀬𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀻 𑀪𑀯𑀸𑀤𑀺𑀯𑀺𑀘𑀺𑀢𑁆𑀢𑀢𑀁 𑀦𑀺𑀬𑀫𑁂𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀢𑁄 𑀅𑀜𑁆𑀜𑁂𑀲𑀼𑀧𑀺 𑀅𑀯𑀺𑀚𑁆𑀚𑀸𑀉𑀧𑀸𑀤𑀸𑀦𑀓𑀫𑁆𑀫𑀸𑀤𑀻𑀲𑀼 𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑁩.𑁩𑁭𑁪) 𑀅𑀪𑀺𑀥𑀫𑁆𑀫𑁂 (𑀯𑀺𑀪. 𑁨𑁦𑁩) 𑀘 𑀅𑀯𑀲𑁂𑀲𑀓𑀺𑀮𑁂𑀲𑀸𑀓𑀼𑀲𑀮𑀫𑀽𑀮𑀸𑀤𑀻𑀲𑀼 𑀯𑀼𑀢𑁆𑀢𑁂𑀲𑀼 𑀤𑀼𑀓𑁆𑀔𑀳𑁂𑀢𑀽𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀢𑀡𑁆𑀳𑀸𑀯 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀲𑀫𑀼𑀤𑀬𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸.

𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁫𑁫𑁪. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀬𑀤𑀕𑁆𑀕𑁂𑀦 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀸, 𑀢𑀤𑀕𑁆𑀕𑁂𑀦 𑀢𑀲𑁆𑀲𑀸𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁. 𑀲𑀢𑀺 𑀳𑀺 𑀧𑀥𑀸𑀦𑀳𑁂𑀢𑀼𑀦𑀺𑀭𑁄𑀥𑁂 𑀢𑀤𑀜𑁆𑀜𑀳𑁂𑀢𑀽 𑀦𑀺𑀭𑀼𑀤𑁆𑀥𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀩𑁆𑀬𑀸𑀥𑀺𑀦𑀺𑀫𑀺𑀢𑁆𑀢𑀯𑀽𑀧𑀲𑀫𑀦𑁂𑀦 𑀩𑁆𑀬𑀸𑀥𑀺𑀯𑀽𑀧𑀲𑀫𑁄 𑀯𑀺𑀬 𑀳𑁂𑀢𑀼𑀦𑀺𑀭𑁄𑀥𑁂𑀦 𑀨𑀮𑀦𑀺𑀭𑁄𑀥𑁄𑀢𑀺 𑀆𑀳 ‘‘𑀲𑀫𑀼𑀤𑀬𑀦𑀺𑀭𑁄𑀥𑁂𑀦 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺. 𑀦 𑀅𑀜𑁆𑀜𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀦𑁆𑀢𑀺𑀓𑀢𑀁 𑀤𑀲𑁆𑀲𑁂𑀢𑀺.

𑀅𑀦𑀼𑀧𑀤𑁆𑀤𑀯𑁂𑀢𑀺 𑀧𑀸𑀡𑀓𑀯𑀺𑀚𑁆𑀛𑀦𑀲𑀢𑁆𑀣𑀧𑁆𑀧𑀳𑀸𑀭𑀸𑀤𑀺𑀉𑀧𑀤𑁆𑀤𑀯𑀭𑀳𑀺𑀢𑁂. 𑀢𑀢𑁄 𑀏𑀯 𑀤𑀴𑁆𑀳𑁂 𑀣𑀺𑀭𑁂. 𑀲𑀸𑀔𑀸𑀤𑀺𑀙𑁂𑀤𑀦𑁂𑀦 𑀙𑀺𑀦𑁆𑀦𑁄𑀧𑀺. 𑀢𑀡𑁆𑀳𑀸𑀦𑀼𑀲𑀬𑁂𑀢𑀺 𑀓𑀸𑀫𑀭𑀸𑀕𑀪𑀯𑀭𑀸𑀕𑀸𑀦𑀼𑀲𑀬𑁂. 𑀅𑀦𑀽𑀳𑀢𑁂𑀢𑀺 𑀅𑀲𑀫𑀼𑀧𑀖𑀸𑀝𑀺𑀢𑁂.

𑀬𑀣𑀸 𑀲𑀻𑀳𑁄 𑀬𑁂𑀦𑀢𑁆𑀢𑀦𑀺 𑀲𑀭𑁄 𑀔𑀺𑀢𑁆𑀢𑁄, 𑀢𑀢𑁆𑀣𑁂𑀯 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀢𑀺, 𑀦 𑀲𑀭𑁂, 𑀢𑀣𑀸 𑀩𑀼𑀤𑁆𑀥𑀸𑀦𑀁 𑀓𑀸𑀭𑀡𑁂 ¶ 𑀧𑀝𑀺𑀧𑀢𑁆𑀢𑀺, 𑀦 𑀨𑀮𑁂. 𑀬𑀣𑀸 𑀧𑀦 𑀲𑀸𑀭𑀫𑁂𑀬𑁆𑀬𑀸 𑀓𑁂𑀦𑀘𑀺 𑀮𑁂𑀟𑁆𑀟𑀼𑀧𑁆𑀧𑀳𑀸𑀭𑁂 𑀤𑀺𑀦𑁆𑀦𑁂 𑀪𑀼𑀲𑁆𑀲𑀦𑁆𑀢𑀸 𑀮𑁂𑀟𑁆𑀟𑀼𑀁 𑀔𑀸𑀤𑀦𑁆𑀢𑀺, 𑀦 ¶ 𑀧𑀳𑀸𑀭𑀤𑀸𑀬𑀓𑁂 𑀉𑀝𑁆𑀞𑀳𑀦𑁆𑀢𑀺, 𑀏𑀯𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀓𑁆𑀔𑀁 𑀦𑀺𑀭𑁄𑀥𑁂𑀢𑀼𑀓𑀸𑀫𑀸 𑀓𑀸𑀬𑀘𑁆𑀙𑁂𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀦 𑀓𑀺𑀮𑁂𑀲𑀦𑀺𑀭𑁄𑀥𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁫𑁫. 𑀯𑀺𑀭𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀺 𑀙𑀺𑀚𑁆𑀚𑀢𑀺 𑀲𑀫𑀼𑀤𑀬𑁄 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄. 𑀯𑀺𑀭𑀚𑁆𑀚𑀦𑀁 𑀧𑀮𑀼𑀚𑁆𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁 𑀯𑀺𑀭𑀸𑀕𑁄𑀢𑀺 𑀧𑀳𑀸𑀦𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀳𑀸𑀦𑀧𑀭𑀺𑀬𑀸𑀬𑁄 𑀯𑀺𑀭𑀸𑀕𑀲𑀤𑁆𑀤𑁄, 𑀦𑀺𑀭𑁄𑀥𑀲𑀤𑁆𑀤𑁄 𑀘, 𑀢𑀲𑁆𑀫𑀸. 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀢𑁄 𑀅𑀲𑁂𑀲𑁄 𑀯𑀺𑀭𑀸𑀕𑁄 𑀅𑀲𑁂𑀲𑁄 𑀦𑀺𑀭𑁄𑀥𑁄𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀘𑀸𑀕𑀸𑀤𑀺𑀧𑀤𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀯𑀤𑀢𑀺 𑀲𑀩𑁆𑀩𑀸𑀦𑁂𑀯 𑀏𑀢𑀸𑀦𑀻𑀢𑀺. 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀦 𑀤𑀼𑀓𑁆𑀔𑀲𑁆𑀲 𑀦𑀺𑀭𑀼𑀚𑁆𑀛𑀦𑀫𑀢𑁆𑀢𑀁, 𑀢𑀲𑁆𑀫𑀸 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀤𑀺𑀧𑀤𑀸𑀦𑀺𑀧𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀻𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 𑀯𑀺𑀭𑀸𑀕𑀸𑀤𑀺𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑁂 𑀬𑀼𑀚𑁆𑀚𑀦𑁆𑀢𑀺, 𑀢𑀁𑀤𑀲𑁆𑀲𑀦𑀁. 𑀢𑀢𑁆𑀣 𑀢𑀁 𑀆𑀕𑀫𑁆𑀫𑀸𑀢𑀺 𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀢𑁆𑀯𑀸. 𑀢𑀡𑁆𑀳𑀸 𑀯𑀺𑀭𑀚𑁆𑀚𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀯𑀲𑁂𑀦 𑀢𑀡𑁆𑀳𑀸 𑀯𑀺𑀭𑀚𑁆𑀚𑀻𑀬𑀢𑀺. 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑁄𑀥𑀻𑀬𑀢𑀺, 𑀢𑁂𑀦 𑀯𑀺𑀭𑀸𑀕𑀦𑀺𑀭𑁄𑀥𑀲𑀤𑁆𑀤𑀸𑀦𑀁 𑀅𑀥𑀺𑀓𑀭𑀡𑀲𑀸𑀥𑀦𑀢𑀫𑀸𑀳. 𑀢𑀤𑁂𑀯𑀸𑀢𑀺 𑀦𑀺𑀩𑁆𑀩𑀸𑀦𑀫𑁂𑀯. 𑀘𑀸𑀕𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀘𑀸𑀕𑀸𑀤𑀺𑀳𑁂𑀢𑀼𑀁 𑀨𑀮𑀯𑁄𑀳𑀸𑀭𑁂𑀦 𑀯𑀤𑀢𑀺. ‘‘𑀓𑀸𑀫𑀕𑀼𑀡𑀸𑀮𑀬𑁂𑀲𑀽’’𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, ‘‘𑀓𑀸𑀫𑀕𑀼𑀡𑀸𑀮𑀬𑀸𑀤𑀻𑀲𑀽’’𑀢𑀺 𑀧𑀦 𑀧𑀸𑀞𑁄.

𑁫𑁫𑁬. 𑀢𑀬𑀺𑀤𑀦𑁆𑀢𑀺𑀆𑀤𑀺 𑀦 𑀧𑁄𑀭𑀸𑀡𑀧𑀸𑀞𑁄, 𑀲𑀘𑁆𑀘𑀢𑁆𑀣𑀤𑀻𑀧𑀦𑁂 𑀧𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀢𑀢𑁄 𑀆𑀦𑁂𑀢𑁆𑀯𑀸 𑀧𑀘𑁆𑀙𑀸 𑀞𑀧𑀺𑀢𑀁. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺𑀧𑀺 𑀮𑀓𑁆𑀔𑀡𑀸𑀤𑀻𑀦𑀺 𑀧𑀼𑀦𑀧𑀺 𑀯𑀼𑀢𑁆𑀢𑀸𑀦𑀺. 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦𑀺𑀩𑁆𑀩𑀺𑀦𑁆𑀦𑀫𑀸𑀦𑀲𑀲𑁆𑀲 𑀅𑀲𑁆𑀲𑀸𑀲𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀲𑁆𑀲𑀸𑀲𑀓𑀭𑀡𑀭𑀲𑀁. 𑀭𑀸𑀕𑀸𑀤𑀺𑀲𑀩𑁆𑀩𑀧𑀧𑀜𑁆𑀘𑀯𑀽𑀧𑀲𑀫𑀦𑀺𑀫𑀺𑀢𑁆𑀢𑀢𑀸𑀬 𑀦𑀺𑀧𑁆𑀧𑀧𑀜𑁆𑀘𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀦𑀺𑀧𑁆𑀧𑀧𑀜𑁆𑀘𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑁫𑁫𑁭. 𑀦𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀬𑀤𑀺 𑀲𑀸𑀫𑀜𑁆𑀜𑀢𑁄 𑀧𑀝𑀺𑀜𑁆𑀜𑀸, 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀲𑀢𑀺 𑀧𑀝𑀺𑀜𑁆𑀜𑀸𑀯𑀺𑀭𑁄𑀥𑁄. 𑀅𑀣 𑀧𑀭𑀸𑀪𑀺𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑀺, 𑀏𑀯𑀁 𑀲𑀢𑀺 𑀥𑀫𑁆𑀫𑀺𑀅𑀲𑀺𑀤𑁆𑀥𑀺, 𑀢𑀢𑁄 𑀘 𑀦𑀺𑀲𑁆𑀲𑀬𑀸𑀲𑀺𑀤𑁆𑀥𑁄 𑀳𑁂𑀢𑀼. 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄𑀢𑀺 𑀓𑀺𑀁 𑀧𑀘𑁆𑀘𑀓𑁆𑀔𑀢𑁄, 𑀉𑀤𑀸𑀳𑀼 𑀅𑀦𑀼𑀫𑀸𑀦𑀢𑁄? 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀘𑀓𑁆𑀔𑀸𑀤𑀻𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀸, 𑀤𑀼𑀢𑀺𑀬𑀲𑁆𑀫𑀺𑀁 𑀧𑀭𑀁 𑀧𑀢𑀺 𑀅𑀲𑀺𑀤𑁆𑀥𑁄 𑀳𑁂𑀢𑀼. 𑀢𑁂𑀦𑀸𑀳 ‘‘𑀦, 𑀉𑀧𑀸𑀬𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀺𑀦𑁄 𑀏𑀯 𑀅𑀭𑀺𑀬𑀸 𑀧𑀭𑁂𑀲𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀘 𑀅𑀭𑀳𑀸 𑀏𑀯 𑀲𑀩𑁆𑀩𑁂𑀲𑀁, 𑀦 𑀲𑀩𑁆𑀩𑁂, 𑀏𑀯𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 ¶ ¶ 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀪𑀽𑀢𑁂𑀦 𑀉𑀧𑀸𑀬𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑀯𑀘𑀦𑀁 𑀘𑁂𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀧𑀬𑁄𑀕𑀯𑀘𑀦𑀁. 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁫𑁫𑁮. 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀅𑀭𑀺𑀬𑁂𑀳𑀺 𑀉𑀧𑀮𑀩𑁆𑀪𑀦𑀻𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀁𑀲𑀸𑀭𑀢𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺 𑀲𑀩𑁆𑀩𑀲𑀫𑀬𑀲𑀺𑀤𑁆𑀥𑁄𑀬𑀁 𑀦𑀬𑁄. 𑀢𑀢𑁆𑀣 𑀲𑀸𑀲𑀦𑀺𑀓𑀫𑁂𑀯 𑀦𑀺𑀲𑁆𑀲𑀸𑀬 𑀯𑀤𑀢𑀺 ‘‘𑀧𑀝𑀺𑀧𑀢𑁆𑀢𑀺𑀬𑀸 𑀯𑀜𑁆𑀘𑀼𑀪𑀸𑀯𑀸𑀧𑀚𑁆𑀚𑀦𑀢𑁄’’𑀢𑀺. 𑀢𑁂𑀦𑀸𑀳 ‘‘𑀅𑀲𑀢𑀺 𑀳𑀻’’𑀢𑀺𑀆𑀤𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀸𑀬𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀗𑁆𑀕𑀫𑀸𑀬. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑀲𑁆𑀲𑀸 𑀧𑀥𑀸𑀦𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀸 𑀧𑀞𑀫𑀁 𑀤𑁂𑀲𑀦𑀸𑀭𑀼𑀴𑁆𑀳𑀸, 𑀦 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀦 𑀘𑀸𑀬𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀯𑀜𑁆𑀛𑀸, 𑀦𑀺𑀩𑁆𑀩𑀸𑀦𑀧𑀸𑀧𑀦𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀢𑁄. 𑀢𑀯 𑀫𑀢𑁂𑀦 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀪𑀸𑀯𑀢𑁄 𑀯𑀜𑁆𑀛𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀅𑀪𑀸𑀯𑀧𑀸𑀧𑀓𑀢𑁆𑀢𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀫𑀼𑀔𑁂𑀦 𑀔𑀦𑁆𑀥𑀸𑀦𑀁 𑀅𑀪𑀸𑀯𑀲𑀫𑁆𑀧𑀸𑀧𑀓𑀪𑀸𑀯𑀢𑁄, 𑀦 𑀯𑀜𑁆𑀛𑀪𑀸𑀯𑀸𑀧𑀢𑁆𑀢𑀻𑀢𑀺 𑀘𑁂 𑀯𑀤𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀦 𑀇𑀢𑀺 𑀧𑀝𑀺𑀓𑁆𑀔𑁂𑀧𑁂. 𑀬𑀁 𑀢𑀬𑀸 ‘‘𑀅𑀪𑀸𑀯𑀧𑀸𑀧𑀓𑀢𑁆𑀢𑀸’’𑀢𑀺 𑀯𑀤𑀦𑁆𑀢𑁂𑀦 𑀔𑀦𑁆𑀥𑀸𑀪𑀸𑀯𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀦. 𑀓𑀲𑁆𑀫𑀸? 𑀅𑀢𑀻𑀢𑀸𑀦𑀸𑀕𑀢𑀸𑀪𑀸𑀯𑁂𑀧𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀅𑀢𑀻𑀢𑀸𑀦𑀸𑀕𑀢𑀸 𑀳𑀺 𑀔𑀦𑁆𑀥𑀸 𑀦 𑀲𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀅𑀪𑀸𑀯𑁂 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀢𑀁 𑀦𑀸𑀫 𑀲𑀺𑀬𑀸, 𑀲𑁄 𑀧𑀦 𑀦𑀢𑁆𑀣𑀻𑀢𑀺. 𑀦 𑀓𑁂𑀯𑀮𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀫𑁂𑀯, 𑀅𑀣 𑀔𑁄 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀻𑀢𑀺 𑀢𑀺𑀬𑀤𑁆𑀥𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀅𑀪𑀸𑀯𑁄 𑀦𑀺𑀩𑁆𑀩𑀸𑀦𑀁. 𑀦 𑀳𑀺 𑀢𑀁 𑀏𑀓𑀤𑁂𑀲𑀸𑀪𑀸𑀯𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀯𑀢𑁆𑀢𑀫𑀸𑀦𑀸 𑀘𑁂, 𑀦 𑀦 𑀲𑀦𑁆𑀢𑀺, 𑀦 𑀲𑀦𑁆𑀢𑀺 𑀘𑁂, 𑀦 𑀯𑀢𑁆𑀢𑀫𑀸𑀦𑀸𑀢𑀺 ‘‘𑀯𑀢𑁆𑀢𑀫𑀸𑀦𑀸, 𑀦 𑀲𑀦𑁆𑀢𑀺 𑀘𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀺𑀤𑁆𑀥𑀫𑁂𑀢𑀦𑁆𑀢𑀺 𑀆𑀳 ‘‘𑀦, 𑀢𑁂𑀲𑀁…𑀧𑁂… 𑀧𑀚𑁆𑀚𑀦𑀢𑁄’’𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀤𑀺 𑀯𑀢𑁆𑀢𑀫𑀸𑀦𑀸𑀪𑀸𑀯𑁄 𑀦𑀺𑀩𑁆𑀩𑀸𑀦𑀁, 𑀬𑀤𑀸 𑀅𑀭𑀺𑀬𑀫𑀕𑁆𑀕𑁄 𑀯𑀢𑁆𑀢𑀢𑀺, 𑀢𑀤𑀸 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀔𑀦𑁆𑀥𑀸 𑀯𑀢𑁆𑀢𑀫𑀸𑀦𑀸𑀢𑀺 𑀓𑀢𑁆𑀯𑀸 𑀢𑀤𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑁄 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀫𑀸𑀦…𑀧𑁂… 𑀤𑁄𑀲𑀢𑁄’’𑀢𑀺 𑀆𑀳. 𑀦 𑀫𑀬𑀁 𑀲𑀩𑁆𑀩𑁂𑀲𑀁𑀬𑁂𑀯 𑀅𑀯𑀢𑁆𑀢𑀫𑀸𑀦𑀢𑀸𑀬 𑀦𑀺𑀩𑁆𑀩𑀸𑀦𑀁 𑀯𑀤𑀸𑀫. 𑀓𑀺𑀜𑁆𑀘𑀭𑀳𑀻𑀢𑀺, 𑀢𑀤𑀸 𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀢𑀫𑀸𑀦𑀢𑁆𑀢𑀸, 𑀢𑀲𑁆𑀫𑀸 𑀦 𑀤𑁄𑀲𑁄 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑁄𑀢𑀺? 𑀬𑀤𑀺 𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀢𑀫𑀸𑀦𑀢𑀸𑀲𑀗𑁆𑀔𑀸𑀢𑁄 𑀅𑀪𑀸𑀯𑁄 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀲𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺 ¶ 𑀫𑀕𑁆𑀕𑀓𑁆𑀔𑀡𑀢𑁄 𑀧𑀼𑀩𑁆𑀩𑁂𑀧𑀺 𑀢𑀤𑀪𑀸𑀯𑀲𑀺𑀤𑁆𑀥𑀺𑀢𑁄. 𑀢𑁂𑀦𑀸𑀳 ‘‘𑀅𑀭𑀺𑀬𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀫𑀸 𑀅𑀓𑀸𑀭𑀡𑀫𑁂𑀢𑀦𑁆𑀢𑀺 𑀬𑀲𑁆𑀫𑀸 𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑀸, 𑀅𑀪𑀸𑀯𑀫𑀢𑁆𑀢𑀢𑀸, 𑀧𑀝𑀺𑀧𑀢𑁆𑀢𑀺𑀬𑀸 𑀯𑀜𑁆𑀛𑀪𑀸𑀯𑁄, 𑀅𑀢𑀻𑀢𑀸𑀦𑀸𑀕𑀢𑀸𑀪𑀸𑀯𑁂 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀘 𑀆𑀧𑀚𑁆𑀚𑀢𑀺, 𑀯𑀢𑁆𑀢𑀫𑀸𑀦𑀸𑀦𑀁 𑀅𑀪𑀸𑀯𑁄𑀧𑀺 𑀦 𑀲𑀫𑁆𑀪𑀯𑀢𑀺 ¶ , 𑀧𑀕𑁂𑀯 𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀢𑀫𑀸𑀦𑀢𑀸, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀦𑀺𑀭𑀢𑁆𑀣𑀓𑀪𑀸𑀯𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑀲𑀸𑀥𑀦𑀢𑁆𑀣𑀁 𑀬𑀤𑀺𑀤𑀁 ‘‘𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄, 𑀅𑀪𑀸𑀯𑀧𑀸𑀧𑀓𑀢𑁆𑀢𑀸, 𑀢𑀤𑀸 𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀢𑀫𑀸𑀦𑀢𑁆𑀢𑀸’’𑀢𑀺 𑀘 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀅𑀓𑀸𑀭𑀡𑀫𑁂𑀢𑀁, 𑀅𑀬𑀼𑀢𑁆𑀢𑀺𑀭𑁂𑀲𑀸𑀢𑀺 𑀅𑀢𑁆𑀣𑁄.

𑁫𑁫𑁯. 𑀆𑀤𑀺𑀯𑀘𑀦𑀢𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀲𑀺𑀝𑁆𑀞𑀁 𑀚𑀫𑁆𑀩𑀼𑀔𑀸𑀤𑀓𑀲𑀼𑀢𑁆𑀢𑀧𑀤𑁂𑀲𑀁 (𑀲𑀁. 𑀦𑀺. 𑁪.𑁩𑁧𑁪 𑀆𑀤𑀬𑁄), 𑀅𑀜𑁆𑀜𑀫𑁆𑀧𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀦𑀺𑀤𑁆𑀤𑁂𑀲𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺, 𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺? 𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀚𑀫𑁆𑀩𑀼𑀔𑀸𑀤𑀓𑀲𑀼𑀢𑁆𑀢𑁂 (𑀲𑀁. 𑀦𑀺. 𑁪.𑁩𑁧𑁪 𑀆𑀤𑀬𑁄), ‘‘𑀢𑀢𑁆𑀣 𑀓𑀢𑀫𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼? 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 (𑀯𑀺𑀪. 𑁧𑁮𑁪) 𑀆𑀬𑀢𑀦𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀅𑀲𑀗𑁆𑀔𑀢𑀲𑀪𑀸𑀯𑁄 𑀥𑀫𑁆𑀫𑁄. 𑀬𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺. 𑀆𑀕𑀫𑁆𑀫𑀸𑀢𑀺 𑀘 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀦𑀺𑀩𑁆𑀩𑀺𑀦𑁆𑀦𑀲𑁆𑀲 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀲𑁆𑀲 𑀕𑁄𑀢𑁆𑀭𑀪𑀼𑀦𑀸 𑀯𑀺𑀯𑀝𑁆𑀝𑀺𑀢𑀫𑀸𑀦𑀲𑀲𑁆𑀲 𑀫𑀕𑁆𑀕𑁂𑀦 𑀲𑀘𑁆𑀙𑀺𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀺𑀭𑀺𑀬𑀫𑀸𑀦𑀜𑁆𑀳𑀺 𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀜𑁆𑀘 𑀧𑀝𑀺𑀘𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀽𑀢𑁂 𑀘 𑀢𑀲𑁆𑀫𑀺𑀁 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀭𑀫𑀕𑀢𑀺𑀪𑀸𑀯𑁂𑀦 𑀘 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀢𑀺𑀝𑁆𑀞𑀸𑀬 𑀔𑀬𑀲𑀗𑁆𑀔𑀸𑀢𑁄 𑀫𑀕𑁆𑀕𑁄 𑀭𑀸𑀕𑀸𑀤𑀬𑁄 𑀔𑁂𑀧𑁂𑀢𑀻𑀢𑀺 𑀢𑀁𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀕𑀫𑀦𑀸𑀪𑀸𑀯𑀸 𑀢𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀓𑀁𑀲𑁂𑀦 𑀘𑁂𑀢𑀁 𑀏𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀇𑀢𑀭𑀣𑀸 𑀬𑀣𑀸𑀭𑀼𑀢𑀯𑀲𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀩𑀳𑀽 𑀤𑁄𑀲𑀸 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀳𑀢𑁆𑀢𑀲𑁆𑀲𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀜𑁆𑀳𑀺 𑀅𑀕𑁆𑀕𑀨𑀮𑀧𑀫𑀼𑀔𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺 𑀦 𑀢𑀲𑁆𑀲 𑀭𑀸𑀕𑀸𑀤𑀺𑀔𑀬𑀫𑀢𑁆𑀢𑀢𑀸 𑀬𑀼𑀢𑁆𑀢𑀸. 𑀢𑀫𑁆𑀧𑀺 𑀳𑀺…𑀧𑁂… 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀬𑀣𑀸 𑀭𑀸𑀕𑀸𑀤𑀻𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀭𑀳𑀢𑁆𑀢𑀁 ‘‘𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀢𑁆𑀢𑀸. 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 ‘‘𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 ¶ 𑀇𑀫𑀲𑁆𑀲𑀸𑀧𑀺 𑀲𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀩𑁆𑀩𑀸𑀦𑀲𑁆𑀲 𑀭𑀸𑀕𑀸𑀤𑀺𑀓𑁆𑀔𑀬𑀫𑀢𑁆𑀢𑀢𑀸𑀬 𑀩𑀳𑀽𑀤𑁄𑀲𑀸 𑀆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘 𑀪𑀺𑀬𑁆𑀬𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀇𑀢𑁆𑀢𑀭𑀓𑀸𑀮𑀸𑀤𑀺𑀧𑁆𑀧𑀢𑁆𑀢𑀺𑀤𑁄𑀲𑀢𑁄𑀢𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀢𑀸𑀬 𑀧𑀭𑀺𑀢𑁆𑀢𑀓𑀸𑀮𑀢𑀸, 𑀲𑀗𑁆𑀔𑀢𑀮𑀓𑁆𑀔𑀡𑀢𑀸, 𑀧𑀬𑁄𑀕𑁂𑀦 𑀯𑀺𑀦𑀸 𑀲𑀭𑀲𑁂𑀦𑁂𑀯 𑀅𑀥𑀺𑀕𑀦𑁆𑀥𑀩𑁆𑀩𑀢𑀸, 𑀭𑀸𑀕𑀸𑀤𑀻𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸, 𑀆𑀤𑀺𑀢𑁆𑀢𑀢𑀸, 𑀤𑀼𑀓𑁆𑀔𑀢𑀸, 𑀅𑀦𑀼𑀧𑀲𑀦𑁆𑀢𑀢𑀸, 𑀩𑀳𑀼𑀪𑀸𑀯𑁄, 𑀑𑀴𑀸𑀭𑀺𑀓𑀢𑀸, 𑀕𑁄𑀢𑁆𑀭𑀪𑀼𑀫𑀕𑁆𑀕𑀸𑀦𑀁 𑀅𑀦𑀸𑀭𑀫𑁆𑀫𑀡𑀢𑀸𑀢𑀺 𑀏𑀯𑀫𑀸𑀤𑀺𑀤𑁄𑀲𑀸𑀧𑀚𑁆𑀚𑀦𑀢𑁄 ¶ . 𑀭𑀸𑀕𑀲𑁆𑀲𑁂𑀯 𑀔𑀬𑁄 𑀭𑀸𑀕𑀓𑁆𑀔𑀬𑁄, 𑀦 𑀤𑁄𑀲𑀸𑀤𑀻𑀦𑀁. 𑀢𑀣𑀸 𑀤𑁄𑀲𑀓𑁆𑀔𑀬𑀸𑀤𑀬𑁄𑀧𑀻𑀢𑀺 𑀅𑀜𑁆𑀜𑁄 𑀭𑀸𑀕𑀓𑁆𑀔𑀬𑁄, 𑀅𑀜𑁆𑀜𑁄 𑀤𑁄𑀲𑀓𑁆𑀔𑀬𑁄, 𑀅𑀜𑁆𑀜𑁄 𑀫𑁄𑀳𑀓𑁆𑀔𑀬𑁄𑀢𑀺 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀔𑀬𑀪𑀽𑀢𑀸𑀦𑀺 𑀢𑀻𑀡𑀺 𑀦𑀺𑀩𑁆𑀩𑀸𑀦𑀸𑀦𑀺, 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀔𑀬𑁂 𑀘𑀢𑁆𑀢𑀸𑀭𑀺, 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀔𑀬𑁂 𑀧𑀜𑁆𑀘, 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀁 𑀔𑀬𑁂 𑀙, 𑀲𑀢𑁆𑀢𑀦𑁆𑀦𑀁 𑀅𑀦𑀼𑀲𑀬𑀸𑀦𑀁 𑀔𑀬𑁂 𑀲𑀢𑁆𑀢, 𑀅𑀝𑁆𑀞𑀦𑁆𑀦𑀁 𑀫𑀺𑀘𑁆𑀙𑀢𑁆𑀢𑀸𑀦𑀁 𑀔𑀬𑁂 𑀅𑀝𑁆𑀞, 𑀦𑀯𑀦𑁆𑀦𑀁 𑀢𑀡𑁆𑀳𑀸𑀫𑀽𑀮𑀓𑀸𑀦𑀁 𑀔𑀬𑁂 𑀦𑀯, 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑁂 𑀤𑀲, 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀲𑁆𑀲 𑀔𑀬𑁂 𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀭𑀸𑀕𑀸𑀤𑀺𑀓𑁆𑀔𑀬𑁄 𑀦𑀸𑀫 𑀅𑀦𑁆𑀥𑀩𑀸𑀮𑀸𑀦𑀫𑁆𑀧𑀺 𑀧𑀸𑀓𑀝𑁄, 𑀅𑀦𑁆𑀢𑀫𑀲𑁄 𑀤𑀻𑀧𑀺𑀫𑀺𑀕𑀫𑀓𑁆𑀓𑀝𑀸𑀤𑀻𑀦𑀫𑁆𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀑𑀴𑀸𑀭𑀺𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺. 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀓𑁆𑀔𑀬𑀲𑁆𑀲 𑀅𑀪𑀸𑀯𑀢𑁄, 𑀫𑀕𑁆𑀕𑀓𑁆𑀔𑀡𑁂 𑀘 𑀅𑀔𑀻𑀡𑀢𑁆𑀢𑀸, 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀘 𑀅𑀲𑀫𑁆𑀪𑀯𑁄 𑀏𑀯. 𑀢𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀢𑁄𑀢𑀺 𑀲𑀩𑁆𑀩𑀧𑀭𑀺𑀬𑁄𑀲𑀸𑀦𑀲𑁆𑀲 𑀭𑀸𑀕𑀸𑀤𑀺𑀓𑁆𑀔𑀬𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀢𑁄. 𑀬𑀢𑁄 𑀔𑀬𑀢𑁄 𑀧𑀝𑁆𑀞𑀸𑀬 𑀭𑀸𑀕𑀸𑀤𑀻𑀦𑀁 𑀧𑀯𑀢𑁆𑀢𑀺 𑀦 𑀳𑁄𑀢𑀺, 𑀲𑁄 ‘‘𑀅𑀬𑀁 𑀦𑀸𑀫𑀸’’𑀢𑀺 𑀦𑀺𑀬𑀫𑁂𑀢𑀩𑁆𑀩𑁄 𑀫𑀕𑁆𑀕𑀨𑀮𑀜𑀸𑀡𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀦 𑀢𑀸𑀤𑀺𑀲𑀲𑁆𑀲 𑀔𑀬𑀲𑁆𑀲 𑀅𑀪𑀸𑀯𑀢𑁄’’𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑁄 𑀧𑀘𑁆𑀙𑀺𑀫𑀪𑀯𑀢𑁄 𑀢𑀢𑀺𑀬𑀢𑁆𑀢𑀪𑀸𑀯𑁂𑀬𑁂𑀯 𑀭𑀸𑀕𑀸𑀤𑀻𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀛𑀸𑀦𑀪𑀸𑀯𑀦𑀸𑀬 𑀢𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀦𑁆𑀦𑁄, 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀇𑀥𑀸𑀕𑀢𑁄𑀧𑀺 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄𑀯 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀬𑁄 𑀘 𑀧𑀞𑀫𑀯𑀬𑁂 𑀏𑀯 𑀭𑀸𑀕𑀸𑀤𑀺𑀢𑁄 𑀦𑀺𑀩𑁆𑀩𑀺𑀦𑁆𑀦𑁄 𑀢𑁂 𑀘 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀘𑁆𑀙𑀺𑀫𑀯𑀬𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑁂𑀲𑀁 𑀭𑀸𑀕𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀦𑀺𑀭𑁄𑀥𑀲𑀤𑀺𑀲𑀢𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀬𑁂𑀯 𑀦𑀺𑀭𑁄𑀥𑁄. 𑀢𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀲𑀺𑀬𑀼𑀁, 𑀦 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑀸𑀤𑀺𑀲𑀲𑁆𑀲 𑀔𑀬𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑁄. 𑀢𑀲𑁆𑀲𑀸𑀧𑀺 𑀇𑀢𑁆𑀢𑀭𑀓𑀸𑀮𑀢𑀸𑀤𑀺𑀤𑁄𑀲𑀲𑀫𑀸𑀬𑁄𑀕𑁄 𑀏𑀯𑀸𑀢𑀺 𑀆𑀳 ‘‘𑀪𑀸𑀯𑁂𑀧𑀺 𑀘𑀸’’𑀢𑀺𑀆𑀤𑀺 ¶ .

𑀬𑀤𑀺 ‘‘𑀔𑀬𑁄’’𑀢𑀺 𑀯𑀘𑀦𑀢𑁄 𑀬𑀢𑁄 𑀔𑀬𑀢𑁄 𑀧𑀝𑁆𑀞𑀸𑀬 𑀭𑀸𑀕𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺, 𑀢𑀁 𑀔𑀬𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀫𑀜𑁆𑀜𑀲𑀺, 𑀏𑀯𑀁 𑀲𑀢𑀺 ‘‘𑀔𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨; 𑁧𑁩𑁮𑁨) ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀘 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀻𑀢𑀺 𑀫𑀕𑁆𑀕𑀲𑁆𑀲𑀸𑀧𑀺 𑀦𑀺𑀩𑁆𑀩𑀸𑀦𑀪𑀸𑀯𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑀲𑁆𑀲 𑀘𑀸’’𑀢𑀺𑀆𑀤𑀺𑀫𑀸𑀳.

𑀬𑀣𑀸 𑀦𑀺𑀭𑀼𑀤𑁆𑀥𑀸 𑀦 𑀲𑀦𑁆𑀢𑀺, 𑀏𑀯𑀁 𑀅𑀦𑀼𑀧𑁆𑀧𑀦𑁆𑀦𑀸𑀧𑀻𑀢𑀺 𑀅𑀪𑀸𑀯𑀲𑀸𑀫𑀜𑁆𑀜𑀢𑁄 𑀦𑀺𑀭𑁄𑀥𑀲𑀤𑀺𑀲𑀢𑀸𑀬 𑀅𑀦𑀼𑀧𑁆𑀧𑀢𑁆𑀢𑀺 𑀏𑀯 𑀦𑀺𑀭𑁄𑀥𑁄 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄. 𑀅𑀬𑀜𑁆𑀳𑀺 𑀫𑀕𑁆𑀕𑁂𑀦 𑀔𑁂𑀧𑁂𑀢𑀩𑁆𑀩𑀸𑀓𑀸𑀭𑁄, 𑀬𑀤𑀺𑀤𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀦𑁆𑀢𑀺 ‘‘𑀔𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺. 𑀢𑀁 𑀇𑀢𑀭𑀔𑀬𑀢𑁄 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀲𑀗𑁆𑀔𑀸𑀢𑀲𑁆𑀲 𑀧𑀦 𑀔𑀬𑀲𑁆𑀲𑀸’’𑀢𑀺 𑀆𑀳. 𑀅𑀦𑀺𑀧𑁆𑀨𑀦𑁆𑀦𑀢𑀸 𑀧𑀦 𑀢𑀲𑁆𑀲 𑀔𑀬𑀲𑁆𑀲 ¶ 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀓𑁆𑀔𑀬𑀓𑀭𑀲𑁆𑀲 𑀳𑀺 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀢𑁄 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑀤𑀼𑀧𑀘𑀸𑀭𑁂𑀦𑀸𑀢𑀺 𑀅𑀢𑁆𑀣𑀢𑁄 𑀨𑀮𑀪𑀽𑀢𑀔𑀬𑀯𑁄𑀳𑀸𑀭𑁂𑀦. 𑀨𑀮𑀽𑀧𑀘𑀸𑀭𑁂𑀦 𑀳𑀺 𑀓𑀸𑀭𑀡𑀁 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀆𑀬𑀼 𑀖𑀢𑀁, 𑀲𑁂𑀫𑁆𑀳𑁄 𑀕𑀼𑀴𑁄’’𑀢𑀺 𑀘.

𑀅𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. ‘‘𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁬𑁪, 𑁬𑁬-𑁬𑁭; 𑀫. 𑀦𑀺. 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭-𑁮) 𑀧𑀘𑁆𑀘𑀯𑁂𑀓𑁆𑀔𑀢𑁄 𑀪𑀕𑀯𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀸𑀯𑀳𑀦𑀢𑁄. ‘‘𑀢𑀜𑁆𑀳𑀺 𑀢𑁂, 𑀫𑀸𑀕𑀡𑁆𑀟𑀺𑀬, 𑀅𑀭𑀺𑀬𑀁 𑀘𑀓𑁆𑀔𑀼𑀁 𑀦𑀢𑁆𑀣𑀺, 𑀬𑁂𑀦 𑀢𑁆𑀯𑀁 𑀅𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀆𑀭𑁄𑀕𑁆𑀬𑀁 𑀚𑀸𑀦𑁂𑀬𑁆𑀬𑀸𑀲𑀺, 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 (𑀫. 𑀦𑀺. 𑁨.𑁨𑁧𑁮) 𑀯𑀘𑀦𑀢𑁄 𑀅𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀁.

𑁫𑁬𑁦. 𑀬𑀤𑀺 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀲𑀪𑀸𑀯𑀥𑀫𑁆𑀫𑁄 𑀅𑀢𑁆𑀣𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁄 𑀘, 𑀅𑀣 𑀓𑀲𑁆𑀫𑀸 𑀘𑀢𑀼𑀫𑀳𑀸𑀧𑀣𑁂 𑀲𑀪𑀸 𑀯𑀺𑀬 𑀲𑀩𑁆𑀩𑀲𑀸𑀥𑀸𑀭𑀡𑀸 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀫𑀕𑁆𑀕𑀲𑀫𑀗𑁆𑀕𑀺𑀦𑀸 𑀧𑀢𑁆𑀢𑀩𑁆𑀩𑀢𑁄 𑀅𑀲𑀸𑀥𑀸𑀭𑀡’’𑀦𑁆𑀢𑀺. ‘‘𑀅𑀲𑀼𑀓𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀯𑀁 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀅𑀧𑁆𑀧𑀪𑀯𑀁. 𑀫𑀕𑁆𑀕𑀪𑀸𑀯𑁂𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀢𑁆𑀣𑀺𑀪𑀸𑀯𑁂. 𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑁄 𑀮𑀤𑁆𑀥𑀩𑁆𑀩𑀢𑁄.

𑀅𑀡𑀼𑀆𑀤𑀻𑀦𑀦𑁆𑀢𑀺 𑀅𑀡𑀼𑀧𑀓𑀢𑀺𑀓𑀸𑀮𑀧𑀼𑀭𑀺𑀲𑀸𑀤𑀻𑀦𑀁. 𑀦𑀺𑀘𑁆𑀘𑀪𑀸𑀯𑀸𑀧𑀢𑁆𑀢𑀻𑀢𑀺 𑀲𑀲𑁆𑀲𑀢𑀪𑀸𑀯𑀲𑀺𑀤𑁆𑀥𑀺. 𑀓𑀽𑀝𑀝𑁆𑀞𑀦𑀺𑀘𑁆𑀘𑀢𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀳𑁂𑀢𑀼𑀦𑁄 𑀅𑀪𑀸𑀯𑀸𑀢𑀺 𑀉𑀧𑀧𑀢𑁆𑀢𑀺𑀬𑀸 𑀲𑀸𑀥𑀦𑀳𑁂𑀢𑀼𑀦𑁄 𑀅𑀪𑀸𑀯𑀸. 𑀦𑀺𑀘𑁆𑀘𑀸 𑀢𑁂 𑀅𑀡𑀼𑀆𑀤𑀬𑁄. 𑀦𑀺𑀩𑁆𑀩𑀸𑀦𑀲𑁆𑀲 ¶ 𑀦𑀺𑀘𑁆𑀘𑀢𑁆𑀢𑀸𑀢𑀺 𑀅𑀧𑁂𑀓𑁆𑀔𑀥𑀫𑁆𑀫𑀢𑁆𑀢𑀸𑀢𑀺 𑀳𑁂𑀢𑀼𑀮𑀓𑁆𑀔𑀡𑀸𑀦𑀼𑀧𑀧𑀢𑁆𑀢𑀺. ‘‘𑀅𑀡𑀼𑀆𑀤𑀻𑀦𑀁 𑀅𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀏𑀢𑁂𑀦 ‘‘𑀦𑀺𑀘𑁆𑀘𑀸 𑀅𑀡𑀼𑀆𑀤𑀬𑁄’’𑀢𑀺 𑀧𑀝𑀺𑀜𑁆𑀜𑀸𑀬 𑀥𑀫𑁆𑀫𑀺𑀅𑀲𑀺𑀤𑁆𑀥𑀺, 𑀢𑀢𑁄 𑀘 𑀦𑀺𑀲𑁆𑀲𑀬𑀸𑀲𑀺𑀤𑁆𑀥𑁄 𑀳𑁂𑀢𑀽𑀢𑀺 𑀤𑀲𑁆𑀲𑁂𑀢𑀺.

𑁫𑁬𑁧. 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀢𑀺 ‘‘𑀅𑀧𑁆𑀧𑀪𑀯𑀢𑁆𑀢𑀸’’𑀢𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀁 𑀳𑁂𑀢𑀼𑀁 𑀲𑀦𑁆𑀥𑀸𑀬𑀸𑀳. 𑀅𑀧𑁆𑀧𑀪𑀯𑀢𑀸 𑀘𑀲𑁆𑀲 𑀅𑀧𑀘𑁆𑀘𑀬𑀢𑀸𑀬 𑀤𑀝𑁆𑀞𑀩𑁆𑀩𑀸, 𑀢𑀸𑀬 𑀢𑀲𑁆𑀲 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑁄. ‘‘𑀭𑀽𑀧𑀲𑀪𑀸𑀯𑀸𑀢𑀺𑀓𑁆𑀓𑀫𑀢𑁄’’𑀢𑀺 𑀏𑀢𑁂𑀦 𑀬𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀲𑀪𑀸𑀯𑁄, 𑀧𑀝𑀺𑀖𑀸𑀢𑀯𑀦𑁆𑀢𑀢𑀸𑀬 𑀓𑀮𑀸𑀧𑀲𑁄 𑀯𑀼𑀢𑁆𑀢𑀺𑀬𑀸 𑀧𑀤𑁂𑀲𑀲𑀫𑁆𑀩𑀦𑁆𑀥𑁄 𑀘 𑀲𑀪𑀸𑀯𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀲𑁆𑀲 𑀓𑀢𑁆𑀣𑀘𑀺 𑀧𑀝𑀺𑀖𑀸𑀢𑁄, 𑀲𑀧𑁆𑀧𑀤𑁂𑀲𑀢𑀸 𑀘 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀦𑀺𑀩𑁆𑀩𑀸𑀦𑀁 ‘‘𑀅𑀲𑀼𑀓𑀤𑀺𑀲𑀸𑀬, 𑀅𑀲𑀼𑀓𑀤𑁂𑀲𑁂’’𑀢𑀺 𑀯𑀸 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀬𑀢𑁄 𑀢𑀁 𑀅𑀧𑁆𑀧𑀢𑀺𑀝𑁆𑀞𑀫𑁂𑀯𑀸𑀢𑀺.

‘‘𑀅𑀲𑀺𑀣𑀺𑀮 ¶ …𑀧𑁂… 𑀕𑀫𑀦𑀻𑀬𑀢𑁄’’𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀭𑀺𑀬𑀸𑀦𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. ‘‘𑀲𑀩𑁆𑀩𑀜𑁆𑀜𑀼𑀯𑀘𑀦𑀢𑁄’’𑀢𑀺 𑀏𑀢𑁂𑀦 𑀢𑀤𑀜𑁆𑀜𑁂𑀲𑀁 𑀅𑀦𑀼𑀫𑀸𑀦𑀲𑀺𑀤𑁆𑀥𑀢𑀁, 𑀢𑀤𑀼𑀪𑀬𑁂𑀦 ‘‘𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄’’𑀢𑀺 𑀧𑀦𑀲𑁆𑀲 𑀳𑁂𑀢𑀼𑀦𑁄 𑀅𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀧𑀭𑀫𑀢𑁆𑀣𑁂𑀦 𑀦𑀸𑀯𑀺𑀚𑁆𑀚𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀬𑀣𑀸𑀭𑀤𑁆𑀥𑀫𑀢𑁆𑀣𑀁 𑀦𑀺𑀕𑀫𑁂𑀢𑁆𑀯𑀸 𑀢𑀤𑀢𑁆𑀣𑀲𑀸𑀥𑀦𑀁 𑀆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺-. 𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀦𑁆𑀢𑀺 (𑀉𑀤𑀸. 𑁭𑁩; 𑀦𑁂𑀢𑁆𑀢𑀺. 𑁪𑁧) 𑀘𑀢𑁆𑀢𑀸𑀭𑀺𑀧𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀯𑁂𑀤𑀦𑀸𑀤𑀬𑁄 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑀲𑀗𑁆𑀔𑀸𑀢𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀦 𑀚𑀸𑀢𑀁 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀚𑀸𑀢𑀁. 𑀓𑀸𑀭𑀡𑁂𑀦 𑀯𑀺𑀦𑀸, 𑀲𑀬𑀫𑁂𑀯 𑀘 𑀦 𑀪𑀽𑀢𑀁 𑀦 𑀧𑀸𑀢𑀼𑀪𑀽𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀪𑀽𑀢𑀁. 𑀏𑀯𑀁 𑀅𑀚𑀸𑀢𑀢𑁆𑀢𑀸, 𑀅𑀪𑀽𑀢𑀢𑁆𑀢𑀸 𑀘 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀓𑀢𑀦𑁆𑀢𑀺 𑀅𑀓𑀢𑀁. 𑀚𑀸𑀢𑀪𑀽𑀢𑀓𑀢𑀪𑀸𑀯𑁄 𑀘 𑀦𑀸𑀫 𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀦 𑀅𑀲𑀗𑁆𑀔𑀢𑀪𑀸𑀯𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀲𑀗𑁆𑀔𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑀢𑁄 𑀯𑀸 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀁, 𑀢𑀣𑀸 𑀦 𑀲𑀗𑁆𑀔𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀭𑀳𑀺𑀢𑀦𑁆𑀢𑀺 𑀘 𑀅𑀲𑀗𑁆𑀔𑀢𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑁂 𑀧𑀝𑀺𑀲𑀺𑀤𑁆𑀥𑁂 ‘‘𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬 𑀲𑀺𑀬𑀸 𑀦𑀼 𑀔𑁄 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀏𑀢𑀁 𑀓𑀢’’𑀦𑁆𑀢𑀺 𑀆𑀲𑀗𑁆𑀓𑀸𑀬𑀁 𑀓𑁂𑀦𑀘𑀺 𑀦 𑀓𑀢𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀧𑀘𑁆𑀘𑀬𑀫𑁆𑀧𑀺 𑀲𑀫𑀸𑀦𑀁 ‘‘𑀲𑀬𑀫𑁂𑀯 𑀦𑀼 𑀔𑁄 𑀇𑀤𑀁 𑀪𑀽𑀢𑀁 𑀧𑀸𑀢𑀼𑀪𑀽𑀢’’𑀦𑁆𑀢𑀺 ¶ 𑀆𑀲𑀗𑁆𑀓𑀸𑀬𑀁 𑀢𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘𑁂𑀢𑀲𑁆𑀲 𑀅𑀲𑀗𑁆𑀔𑀢𑀸𑀓𑀢𑀸𑀪𑀽𑀢𑀪𑀸𑀯𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑀸𑀢𑀺𑀥𑀫𑁆𑀫𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 𑀲𑀢𑁆𑀣𑀸 𑀧𑀭𑀫𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀧𑀯𑁂𑀤𑁂𑀲𑀺. 𑀧𑀯𑁂𑀤𑁂𑀦𑁆𑀢𑁄 𑀘 ‘‘𑀅𑀳𑀁 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀲𑁆𑀲𑀸𑀫𑀻’’𑀢𑀺 𑀦 𑀅𑀢𑁆𑀢𑀦𑁄 𑀆𑀡𑀸𑀫𑀢𑁆𑀢𑁂𑀦 𑀧𑀯𑁂𑀤𑁂𑀲𑀺, 𑀅𑀧𑀺𑀘 𑀔𑁄 𑀧𑀦 𑀧𑀤𑀧𑀭𑀫𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀬𑀼𑀢𑁆𑀢𑀺𑀢𑁄𑀧𑀺 𑀧𑀯𑁂𑀤𑁂𑀲𑀺. 𑀬𑀣𑀸𑀳 𑁋

‘‘𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀦𑀬𑀺𑀥 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺 (𑀉𑀤𑀸. 𑁭𑁩; 𑀦𑁂𑀢𑁆𑀢𑀺. 𑁪𑁧).

𑀢𑀲𑁆𑀲𑀢𑁆𑀣𑁄 ¶ 𑁋 𑀪𑀺𑀓𑁆𑀔𑀯𑁂, 𑀬𑀤𑀺 𑀅𑀚𑀸𑀢𑀸𑀤𑀺𑀲𑀪𑀸𑀯𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀦 𑀅𑀪𑀯𑀺𑀲𑁆𑀲 𑀦 𑀲𑀺𑀬𑀸, 𑀇𑀥 𑀮𑁄𑀓𑁂 𑀚𑀸𑀢𑀸𑀤𑀺𑀲𑀪𑀸𑀯𑀲𑁆𑀲 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀦𑀯𑀲𑁂𑀲𑀯𑀽𑀧𑀲𑀫𑁄 𑀦 𑀧𑀜𑁆𑀜𑀸𑀬𑁂𑀬𑁆𑀬 𑀦 𑀉𑀧𑀮𑀩𑁆𑀪𑁂𑀬𑁆𑀬 𑀦 𑀲𑀫𑁆𑀪𑀯𑁂𑀬𑁆𑀬. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀅𑀦𑀯𑀲𑁂𑀲𑀁 𑀲𑀁𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀢𑁂𑀦𑁂𑀢𑁆𑀣 𑀲𑀩𑁆𑀩𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀧𑀕𑀫𑁄 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀕𑀫𑀦𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀕𑀫𑁂𑀢𑀼𑀁 ‘‘𑀬𑀲𑁆𑀫𑀸 𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀬𑀲𑁆𑀫𑀸 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭-𑁮). 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻 (𑀉𑀤𑀸. 𑁭𑁧). 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 (𑀤𑀻. 𑀦𑀺. 𑁨.𑁬𑁪, 𑁬𑁭; 𑀫. 𑀦𑀺. 𑁨.𑁩𑁩𑁭; 𑀲𑀁. 𑀦𑀺. 𑁨.𑁧𑁭𑁨; 𑀫𑀳𑀸𑀯. 𑁭-𑁮). 𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁪.𑁩𑁬𑁬) 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢’’𑀦𑁆𑀢𑀺 (𑀉𑀤𑀸. 𑁭𑁩; 𑀦𑁂𑀢𑁆𑀢𑀺. 𑁪𑁧) 𑀇𑀫𑀺𑀦𑀸 𑀘 𑀲𑀼𑀢𑁆𑀢𑀧𑀤𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀲𑀩𑁆𑀪𑀸𑀯𑁄 𑀲𑀩𑁆𑀩𑀮𑁄𑀓𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 ¶ 𑀬𑀤𑀺𑀧𑀺 𑀓𑀢𑁆𑀣 𑀅𑀧𑀘𑁆𑀘𑀓𑁆𑀔𑀓𑀸𑀭𑀻𑀦𑀫𑁆𑀧𑀺 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸𑀦𑀁 𑀯𑀺𑀜𑁆𑀜𑀽𑀦𑀁 𑀲𑀁𑀲𑀬𑁄 𑀦𑀢𑁆𑀣𑀺𑀬𑁂𑀯. 𑀬𑁂 𑀧𑀦 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀦𑁄 𑀧𑀼𑀕𑁆𑀕𑀮𑀸, 𑀢𑁂𑀲𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀢𑁆𑀣𑀁 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸.

𑀬𑀣𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀲𑀉𑀢𑁆𑀢𑀭𑀸𑀦𑀁 𑀓𑀸𑀫𑀸𑀦𑀁, 𑀭𑀽𑀧𑀸𑀦𑀜𑁆𑀘 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀁 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀪𑀸𑀯𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂𑀦 𑀦𑀺𑀲𑁆𑀲𑀭𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀜𑁆𑀘 𑀢𑀁 𑀦𑀺𑀲𑁆𑀲𑀭𑀡𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀅𑀧𑀺𑀘 𑀅𑀦𑀼𑀮𑁄𑀫𑀜𑀸𑀡𑀁 𑀓𑀺𑀮𑁂𑀲𑁂 𑀢𑀤𑀗𑁆𑀕𑀯𑀲𑁂𑀦 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀜𑀸𑀡𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦. 𑀇𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲, 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀲𑁆𑀲 𑀘 𑀜𑀸𑀡𑀲𑁆𑀲 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄 𑀢𑁂𑀲𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀭𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼.

𑀢𑀣𑀸 ¶ ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀉𑀤𑀸. 𑁭𑁩; 𑀦𑁂𑀢𑁆𑀢𑀺. 𑁪𑁧) 𑀏𑀯𑀫𑀸𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑀚𑁄𑀢𑀓𑀯𑀘𑀦𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸. 𑀬𑀜𑁆𑀳𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀅𑀯𑀺𑀧𑀭𑀻𑀢𑀢𑁆𑀣𑀁 𑀬𑀣𑀸 𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁩𑁫𑁩, 𑁩𑁫𑁬; 𑀥. 𑀧. 𑁨𑁭𑁭-𑁨𑁭𑁯; 𑀣𑁂𑀭𑀕𑀸. 𑁬𑁭𑁬-𑁬𑁭𑁮; 𑀦𑁂𑀢𑁆𑀢𑀺. 𑁫), 𑀢𑀣𑀸 𑀦𑀺𑀩𑁆𑀩𑀸𑀦𑀲𑀤𑁆𑀤𑁄 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀬𑀣𑀸𑀪𑀽𑀢𑀧𑀭𑀫𑀢𑁆𑀣𑀯𑀺𑀲𑀬𑁄 𑀉𑀧𑀘𑀸𑀭𑀯𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀲𑁂𑀬𑁆𑀬𑀣𑀸𑀧𑀺 𑀲𑀻𑀳𑀲𑀤𑁆𑀤𑁄𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀬𑀼𑀢𑁆𑀢𑀺𑀢𑁄𑀧𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀬𑀤𑀺 𑀧𑀦 𑀦𑀺𑀩𑁆𑀩𑀸𑀦𑀁 𑀅𑀪𑀸𑀯𑀫𑀢𑁆𑀢𑀫𑁂𑀯 𑀲𑀺𑀬𑀸, 𑀢𑀲𑁆𑀲 ‘‘𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄’’𑀢𑀺 (𑀤𑀻. 𑀦𑀺. 𑁨.𑁬𑁪, 𑁬𑁭; 𑀫. 𑀦𑀺. 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭-𑁮) 𑀕𑀫𑁆𑀪𑀻𑀭𑀸𑀤𑀺𑀢𑀸, ‘‘𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁬𑁬) 𑀅𑀲𑀗𑁆𑀔𑀢𑀸𑀤𑀺𑀢𑀸, ‘‘𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀅𑀧𑀘𑁆𑀘𑀬𑀸𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀺𑀢𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀦 𑀳𑀺 𑀅𑀪𑀸𑀯𑀲𑁆𑀲 ¶ 𑀓𑁄𑀘𑀺 𑀲𑀪𑀸𑀯𑁄 𑀅𑀢𑁆𑀣𑀺, 𑀬𑁂𑀦 𑀲𑁄 𑀕𑀫𑁆𑀪𑀻𑀭𑀸𑀲𑀗𑁆𑀔𑀢𑀸𑀤𑀺𑀆𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑁂𑀬𑁆𑀬. 𑀅𑀪𑀸𑀯𑁄 𑀳𑀺 𑀅𑀪𑀸𑀯𑁄 𑀏𑀯, 𑀓𑀼𑀢𑁄 𑀢𑀲𑁆𑀲 𑀕𑀫𑁆𑀪𑀻𑀭𑀸𑀲𑀗𑁆𑀔𑀸𑀢𑀸𑀤𑀺𑀪𑀸𑀯𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀸𑀬𑀫𑀪𑀸𑀯𑁄 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸𑀦𑀁 𑀏𑀓𑁄 𑀯𑀸 𑀪𑀯𑁂𑀬𑁆𑀬 𑀅𑀦𑁂𑀓𑁄 𑀯𑀸. 𑀬𑀤𑀺 𑀏𑀓𑁄, 𑀏𑀓𑁂𑀦𑁂𑀯 𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀪𑀸𑀯𑁄 𑀓𑀢𑁄, 𑀲𑀘𑁆𑀙𑀺𑀓𑀢𑁄 𑀘𑀸𑀢𑀺 𑀅𑀜𑁆𑀜𑀲𑁆𑀲, 𑀅𑀜𑁆𑀜𑁂𑀲𑀜𑁆𑀘 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸𑀢𑀺 𑀦 𑀲𑀺𑀬𑀸 𑀫𑀕𑁆𑀕𑀩𑀳𑀼𑀢𑀸, 𑀏𑀓𑀚𑁆𑀛𑀜𑁆𑀘 𑀲𑀩𑁆𑀩𑀲𑀢𑁆𑀢𑀸𑀦𑀁 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀆𑀧𑀚𑁆𑀚𑀢𑀺. 𑀲𑀺𑀬𑀸 𑀧𑀦𑁂𑀯𑀁 𑀏𑀓𑁄 𑀏𑀯 𑀲𑁄 𑀦𑀺𑀩𑁆𑀩𑀸𑀦𑀲𑀜𑁆𑀜𑀺𑀢𑁄 𑀓𑀺𑀮𑁂𑀲𑀸𑀪𑀸𑀯𑁄, 𑀲𑁄 𑀧𑀦 𑀦 𑀫𑀕𑁆𑀕𑁂𑀳𑀺 𑀓𑀸𑀢𑀩𑁆𑀩𑁄, 𑀅𑀣 𑀔𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀢𑀺 𑀯𑀺𑀲𑁂𑀲𑀢𑁄 𑀫𑀕𑁆𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺, 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀸𑀦𑀢𑁄𑀢𑀺 𑀏𑀓𑁄𑀧𑀺 𑀫𑀕𑁆𑀕𑁄 𑀦 𑀲𑀺𑀬𑀸. 𑀅𑀲𑀢𑀺 𑀘 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀦𑀢𑁄 𑀓𑀺𑀮𑁂𑀲𑀸𑀪𑀸𑀯𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀫𑀢𑁆𑀣𑀺𑀬𑀸 𑀲𑀺𑀬𑀸, 𑀅𑀣 𑀧𑀦 𑀫𑀕𑁆𑀕𑀸𑀦𑀁 𑀲𑀦𑁆𑀢𑀸𑀦𑀕𑀢𑀲𑀁𑀬𑁄𑀚𑀦𑀢𑁆𑀢𑀬𑀧𑁆𑀧𑀳𑀸𑀦𑀸𑀤𑀺𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀢𑀸𑀬 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀧𑀸𑀝𑀺𑀬𑁂𑀓𑁆𑀓𑀁 𑀓𑀺𑀮𑁂𑀲𑀸𑀪𑀸𑀯𑁄. 𑀏𑀯𑀁 𑀲𑀢𑀺 𑀲𑀪𑀸𑀯𑀧𑀪𑁂𑀤𑁂𑀦 𑀯𑀺𑀦𑀸 𑀦 𑀩𑀳𑀼𑀪𑀸𑀯𑁄𑀢𑀺 𑀲𑁄 𑀓𑀺𑀮𑁂𑀲𑀓𑁆𑀔𑀬𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄 𑀲𑀪𑀸𑀯𑀥𑀫𑁆𑀫𑁄 𑀏𑀯 𑀲𑀺𑀬𑀸.

𑀬𑁂𑀲𑀁 𑀅𑀪𑀸𑀯𑁄, 𑀢𑀧𑁆𑀧𑀪𑁂𑀤𑁂𑀦 𑀅𑀪𑀸𑀯𑁂 𑀪𑁂𑀤𑁄𑀧𑀘𑀸𑀭𑁄𑀢𑀺 𑀘𑁂? 𑀬𑁂𑀲𑀁 𑀅𑀪𑀸𑀯𑁄, 𑀢𑁂𑀲𑀁 𑀲𑀲𑀪𑀸𑀯𑀢𑀸𑀬 𑀢𑀲𑁆𑀲 𑀲𑀪𑀸𑀯𑁄𑀧𑀘𑀸𑀭𑁄𑀧𑀺 𑀲𑀺𑀬𑀸. 𑀢𑀣𑀸 𑀘 𑀢𑁂 𑀲𑀁𑀓𑀺𑀮𑁂𑀲𑀲𑀗𑁆𑀔𑀢𑀢𑀸𑀤𑀺𑀢𑁄 𑀓𑀺𑀮𑁂𑀲𑀲𑀗𑁆𑀔𑀢𑀢𑀸𑀤𑀺𑀉𑀧𑀘𑀸𑀭𑀸𑀧𑀺 ¶ 𑀲𑀺𑀬𑀼𑀁. 𑀦𑁄 𑀘𑁂 𑀢𑁂 𑀇𑀘𑁆𑀙𑀺𑀢𑀸, 𑀢𑀧𑁆𑀧𑀪𑁂𑀤𑁂𑀦 𑀪𑁂𑀤𑁄𑀧𑀘𑀸𑀭𑁄𑀧𑀺 𑀦 𑀇𑀘𑁆𑀙𑀺𑀢𑀩𑁆𑀩𑁄. 𑀦 𑀘 𑀧𑀳𑁄𑀢𑀺 𑀉𑀧𑀘𑀭𑀺𑀢𑁄 𑀩𑀳𑀼𑀪𑀸𑀯𑁄 𑀅𑀢𑁆𑀣𑀢𑁄 𑀩𑀳𑀼𑀪𑀸𑀯𑀸𑀬. 𑀦 𑀳𑀺 𑀚𑀮𑀁 𑀅𑀦𑀮𑀦𑁆𑀢𑀺 𑀉𑀧𑀘𑀭𑀺𑀢𑀁 𑀤𑀳𑀢𑀺, 𑀧𑀘𑀢𑀺 𑀯𑀸. 𑀏𑀓𑀢𑁆𑀢𑀧𑀜𑁆𑀳𑀫𑁆𑀧𑀺 𑀘𑀸𑀬𑀫𑀪𑀸𑀯𑁄 𑀅𑀲𑀪𑀸𑀯𑀢𑀸𑀬 𑀦 𑀲𑀳𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀦𑀢𑁆𑀣𑀺𑀪𑀸𑀯𑀲𑀸𑀫𑀜𑁆𑀜𑀢𑁄 𑀅𑀪𑁂𑀤𑀯𑁄𑀳𑀸𑀭𑁄 𑀬𑀼𑀢𑁆𑀢𑀭𑀽𑀧𑁄𑀢𑀺. 𑀏𑀓𑀢𑁆𑀢𑁂 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯 𑀤𑁄𑀲𑀸, 𑀩𑀳𑀼𑀪𑀸𑀯𑁂 𑀧𑀦 𑀲𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀺𑀤𑁆𑀥𑀸 𑀲𑀪𑀸𑀯𑀥𑀫𑁆𑀫𑀢𑀸. 𑀲𑀪𑀸𑀯𑀥𑀫𑁆𑀫𑀢𑁆𑀢𑁂𑀧𑀺 𑀘 𑀩𑀳𑀼𑀪𑀸𑀯𑁄 𑀯𑀺𑀬 𑀪𑀸𑀯𑀁 𑀪𑀸𑀯𑁄𑀧𑀺 𑀩𑀳𑀼𑀪𑀸𑀯𑀁 𑀦 𑀩𑁆𑀬𑀪𑀺𑀘𑀭𑁂𑀬𑁆𑀬𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀪𑀸𑀯𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀘𑁂? 𑀦 𑀩𑀳𑀼𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀬𑀤𑀺 𑀳𑀺 𑀬𑀣𑀸 𑀓𑀓𑁆𑀔𑀴𑀢𑀸 𑀪𑀸𑀯𑀁, 𑀏𑀯𑀁 𑀪𑀸𑀯𑁄𑀧𑀺 𑀓𑀓𑁆𑀔𑀴𑀢𑀁 𑀦 𑀩𑁆𑀬𑀪𑀺𑀘𑀭𑁂𑀬𑁆𑀬. 𑀏𑀯𑀁 𑀲𑀢𑀺 𑀲𑀩𑁆𑀩𑁂𑀲𑀁 𑀪𑀸𑀯𑀸𑀦𑀁 𑀧𑀣𑀯𑀻𑀪𑀸𑀯𑀸𑀧𑀢𑁆𑀢𑀺𑀢𑁄 𑀓𑀼𑀢𑁄 𑀪𑀸𑀯𑀲𑁆𑀲 𑀩𑀳𑀼𑀪𑀸𑀯𑁄, 𑀢𑀲𑁆𑀫𑀸 𑀮𑁄𑀓𑀯𑁄𑀳𑀸𑀭𑀸𑀦𑀁 𑀯𑀺𑀘𑀺𑀢𑁆𑀢𑀢𑀸𑀬 𑀬𑀤𑀺𑀧𑀺 𑀩𑀳𑀼𑀢𑀸 𑀪𑀸𑀯𑀸𑀧𑁂𑀓𑁆𑀔𑀸, 𑀪𑀸𑀯𑀢𑀸 𑀧𑀦 𑀦 𑀩𑀳𑀼𑀢𑀸𑀧𑁂𑀓𑁆𑀔𑀸𑀢𑀺 𑀦 𑀪𑀸𑀯𑀲𑁆𑀲 𑀲𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀪𑀸𑀯𑁄 ‘‘𑀏𑀓𑀸 𑀦𑀺𑀝𑁆𑀞𑀸 ¶ 𑀦 𑀧𑀼𑀣𑀼 𑀦𑀺𑀝𑁆𑀞𑀸’’𑀢𑀺 𑀯𑀘𑀦𑀢𑁄. 𑀏𑀓𑀲𑁆𑀫𑀺𑀁𑀬𑁂𑀯 𑀘 𑀤𑀲𑁆𑀲𑀦𑀪𑀸𑀯𑀦𑀸𑀤𑁆𑀯𑀬𑀁 𑀲𑀫𑁆𑀪𑀯𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀸𑀦𑀪𑀸𑀯𑁂 𑀲𑀢𑁆𑀢𑀲𑀦𑁆𑀢𑀸𑀦𑀦𑀺𑀬𑀢𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀲𑀗𑁆𑀔𑀢𑀢𑀸𑀤𑀺𑀤𑁄𑀲𑀸𑀦𑀢𑀺𑀯𑀢𑁆𑀢𑀺𑀬𑁂𑀯, 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀸 𑀫𑀕𑁆𑀕𑀓𑀺𑀘𑁆𑀘𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁄. 𑀢𑀲𑁆𑀲 𑀘 𑀏𑀓𑀢𑁆𑀢𑁂 𑀦 𑀫𑀕𑁆𑀕𑀩𑀳𑀼𑀢𑀸 𑀓𑀺𑀘𑁆𑀘𑀦𑁆𑀢𑀭𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀫𑀕𑁆𑀕𑀩𑀳𑀼𑀪𑀸𑀯𑁄 𑀘 𑀫𑀕𑁆𑀕𑁂𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀸𑀝𑀯𑀧𑀸𑀝𑀯𑀧𑀸𑀝𑀯𑀢𑀭𑀧𑀸𑀝𑀯𑀢𑀫𑀪𑀸𑀯𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀪𑁂𑀤𑁂𑀦 𑀳𑁄𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀪𑀸𑀯𑀥𑀫𑁆𑀫𑀢𑁆𑀢𑁂 𑀏𑀯 𑀲𑀺𑀬𑀸. 𑀅𑀪𑀸𑀯𑁄𑀧𑀺 𑀘 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀲𑀓𑀺𑀘𑁆𑀘𑀓𑀢𑀸𑀬 𑀓𑀸𑀢𑀩𑁆𑀩𑁄 𑀏𑀯 𑀲𑀺𑀬𑀸, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. 𑀓𑁄 𑀳𑀺 𑀲𑀪𑀸𑀯𑁄 𑀅𑀪𑀸𑀯𑀲𑁆𑀲? 𑀬𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀘𑁂 𑀦𑀺𑀩𑁆𑀩𑀸𑀦𑀁 𑀏𑀓𑁂𑀦𑁂𑀯 𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁄 𑀏𑀓𑁄 𑀅𑀪𑀺𑀦𑁆𑀦𑁄 𑀓𑀸𑀢𑀩𑁆𑀩𑁄 𑀆𑀧𑀦𑁆𑀦𑁄. 𑀅𑀜𑁆𑀜𑀣𑀸 𑀫𑀕𑁆𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑁂 𑀦𑀺𑀩𑁆𑀩𑀸𑀦𑀲𑁆𑀲 𑀘𑀢𑀼𑀩𑁆𑀩𑀺𑀥𑀪𑀸𑀯𑀧𑁆𑀧𑀲𑀗𑁆𑀕𑁄, 𑀦𑀺𑀩𑁆𑀩𑀸𑀦𑀯𑀺𑀲𑁂𑀲𑀧𑁆𑀧𑀲𑀗𑁆𑀕𑁄 𑀘 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀫𑀕𑁆𑀕𑀓𑀺𑀘𑁆𑀘𑀲𑁆𑀲 𑀏𑀓𑀢𑁆𑀢𑁂𑀦 𑀫𑀕𑁆𑀕𑀩𑀳𑀼𑀢𑀸 𑀲𑀺𑀬𑀸. 𑀩𑀳𑀼𑀪𑀸𑀯𑁂 𑀧𑀦 𑀢𑁂𑀲𑀁 𑀲𑁄 𑀯𑀼𑀢𑁆𑀢𑀦𑀬𑁂𑀦 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑀢𑁄𑀢𑀺 𑀲𑀺𑀤𑁆𑀥𑀸 𑀦𑀺𑀩𑁆𑀩𑀸𑀦𑀲𑁆𑀲 𑀲𑀪𑀸𑀯𑀥𑀫𑁆𑀫𑀢𑀸. 𑀔𑀬𑀸𑀥𑀺𑀕𑀦𑁆𑀢𑀩𑁆𑀩𑀢𑀸𑀬 𑀧𑀦𑁂𑀢𑀁 ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀔𑀬𑁂 𑀜𑀸𑀡’’𑀦𑁆𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨; 𑁧𑁩𑁮𑁨) 𑀳𑀺 𑀯𑀘𑀦𑀢𑁄 𑀅𑀭𑀺𑀬𑀫𑀕𑁆𑀕𑁄 𑀔𑀬𑁄 𑀦𑀸𑀫. 𑀢𑁂𑀦 𑀘𑁂𑀢𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀇𑀢𑀺 𑀦𑀺𑀭𑁄𑀥𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸.

𑀫𑀕𑁆𑀕𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁫𑁬𑁨. 𑀅𑀝𑁆𑀞 ¶ 𑀥𑀫𑁆𑀫𑀸𑀢𑀺 ‘‘𑀓𑀢𑀫𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 (𑀯𑀺𑀪. 𑁨𑁦𑁫) 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁂 𑀆𑀕𑀢𑀸, 𑀢𑀫𑁂𑀯 𑀘 𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀉𑀤𑁆𑀤𑁂𑀲𑀯𑀲𑁂𑀦 𑀇𑀥 𑀘 𑀯𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀥𑀫𑁆𑀫𑀸 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀸, 𑀦 𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀸, 𑀓𑀺𑀫𑀢𑁆𑀣𑀺𑀬𑀁 𑀧𑀦 𑀇𑀥 𑀓𑀣𑀦𑀦𑁆𑀢𑀺 𑀆𑀳 ‘‘𑀇𑀥 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀫𑀸𑀦𑀸𑀦’’𑀦𑁆𑀢𑀺 𑀇𑀤𑀁 𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀭𑀢𑀺𑀬𑁄 𑀦𑀸𑀦𑀸𑀓𑁆𑀔𑀡𑀺𑀓𑀸 𑀏𑀯 ¶ 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑁂𑀲𑀫𑀕𑁆𑀕𑀥𑀫𑁆𑀫𑀸 𑀧𑀦 𑀢𑀢𑁆𑀣𑀸𑀧𑀺 𑀏𑀓𑀚𑁆𑀛𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯. 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀦𑁆𑀢𑀺 𑀧𑀝𑀺𑀧𑀓𑁆𑀔𑀲𑀫𑀼𑀕𑁆𑀖𑀸𑀢𑀸𑀤𑀺𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀲𑁆𑀲 𑀅𑀯𑀩𑁄𑀥𑀦𑀢𑁆𑀣𑀁. 𑀯𑀺𑀢𑁆𑀣𑀸𑀭𑀢𑁄 𑀫𑀕𑁆𑀕𑀓𑀣𑀸 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁄’’𑀢𑀺. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀬𑀣𑀸 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀏𑀯𑀁 𑀲𑀩𑁆𑀩𑀲𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀧𑀽𑀭𑀡𑀯𑀲𑁂𑀦 𑀧𑀝𑀺𑀧𑀦𑁆𑀦𑀲𑁆𑀲. 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀬𑁄𑀕𑀲𑁆𑀲 𑀲𑀩𑁆𑀪𑀸𑀯𑀢𑁄 𑀬𑁄𑀕𑀺𑀦𑁄. 𑀓𑀸𑀫𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑁂 𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀮𑁂𑀲𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺, 𑀯𑀺𑀚𑁆𑀚𑀸𑀬 𑀧𑀦 𑀅𑀯𑀺𑀚𑁆𑀚𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀢𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀺𑀕𑁆𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀥𑀸𑀢𑀼𑀧𑁆𑀧𑀓𑀸𑀲𑀦𑀭𑀲𑀸𑀢𑀺 𑀧𑀭𑀫𑀢𑁆𑀣𑀧𑀓𑀸𑀲𑀦𑀭𑀲𑀸, 𑀘𑀢𑀼𑀲𑀘𑁆𑀘𑀯𑀺𑀪𑀸𑀯𑀦𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀸𑀓𑀸𑀭𑁄 𑀲𑀸𑀢𑀺𑀲𑀬𑀁 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀓𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀢𑁆𑀯𑀸𑀧𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸.

𑀢𑀣𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀦𑁄𑀢𑀺 𑀬𑀣𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑁄 𑀳𑁄𑀢𑀺, 𑀢𑀣𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀦𑁄. 𑀏𑀯𑀜𑁆𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄𑀢𑀺 𑀇𑀫𑀫𑀢𑁆𑀣𑀁 𑀢𑀣𑀸-𑀲𑀤𑁆𑀤𑁄 𑀉𑀧𑀲𑀁𑀳𑀭𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀸. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀦𑀺𑀖𑀸𑀢𑀓𑀦𑁆𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑀫𑀼𑀘𑁆𑀙𑁂𑀤𑀓𑀁. 𑀅𑀧𑁆𑀧𑀦𑀸𑀭𑀲𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀅𑀧𑁆𑀧𑀦𑀸𑀓𑀺𑀘𑁆𑀘𑁄.

𑀢𑀣𑀸 𑀧𑀲𑁆𑀲𑀢𑁄 𑀯𑀺𑀢𑀓𑁆𑀓𑀬𑀢𑁄 𑀘𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀲𑁆𑀲𑀢𑁄, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑀬𑀢𑁄. 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀫𑀼𑀕𑁆𑀖𑀸𑀢𑀺𑀓𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀲𑀫𑀼𑀘𑁆𑀙𑁂𑀤𑀺𑀓𑀸. 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 ¶ 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀺𑀦𑀺𑀤𑁆𑀥𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀢𑀺 𑀆𑀳 ‘‘𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸’’𑀢𑀺. 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺𑀧𑀺 𑀲𑀫𑀼𑀝𑁆𑀞𑀸𑀦𑀲𑀪𑀸𑀯𑀸 𑀯𑀼𑀢𑁆𑀢𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬.

𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀢𑀲𑁆𑀫𑀺𑀁 𑀲𑀢𑀺 𑀯𑀺𑀲𑀼𑀚𑁆𑀛𑀦𑀢𑁄 𑀯𑀺𑀲𑀼𑀤𑁆𑀥𑀺𑀪𑀽𑀢𑀸. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀼𑀢𑁆𑀢𑀺𑀬𑀸 ¶ . 𑀜𑀸𑀬𑀸𑀚𑀻𑀯𑀲𑁆𑀲 𑀅𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀸𑀬 𑀲𑀫𑁆𑀫𑀸𑀚𑀻𑀯𑀺𑀓𑀸𑀬 𑀧𑀯𑀢𑁆𑀢𑀺𑀳𑁂𑀢𑀼𑀢𑀸𑀬 𑀜𑀸𑀬𑀸𑀚𑀻𑀯𑀧𑀯𑀢𑁆𑀢𑀺𑀭𑀲𑁄. 𑀇𑀫𑀲𑁆𑀲 𑀳𑀺 𑀧𑀯𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀫𑀺𑀘𑁆𑀙𑀸𑀚𑀻𑀯𑁄 𑀦 𑀧𑀯𑀢𑁆𑀢𑀢𑀻𑀢𑀺.

𑀲𑀩𑁆𑀩𑀸𑀓𑀼𑀲𑀮𑀯𑀺𑀤𑁆𑀥𑀁𑀲𑀓𑁄𑀧𑀺 𑀲𑀫𑁆𑀫𑀸𑀯𑀸𑀬𑀸𑀫𑁄 𑀉𑀚𑀼𑀧𑀝𑀺𑀧𑀓𑁆𑀔𑀤𑀲𑁆𑀲𑀦𑀯𑀲𑁂𑀦 𑀓𑁄𑀲𑀚𑁆𑀚𑀲𑀫𑀼𑀘𑁆𑀙𑁂𑀤𑀓𑁄 𑀯𑀼𑀢𑁆𑀢𑁄. 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄𑀧𑀺 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀳𑁄. 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀆𑀓𑀸𑀭𑀼𑀧𑀥𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀼𑀪𑀲𑀜𑁆𑀜𑀸𑀤𑀺𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀓𑁆𑀔𑀦𑁆𑀥𑀸 𑀫𑀺𑀘𑁆𑀙𑀸𑀲𑀢𑀺, 𑀢𑀲𑁆𑀲𑀸 𑀯𑀺𑀤𑁆𑀥𑀁𑀲𑀦𑁄 𑀫𑀺𑀘𑁆𑀙𑀸𑀲𑀢𑀺𑀯𑀺𑀦𑀺𑀤𑁆𑀥𑀼𑀦𑀦𑁄. 𑀅𑀲𑀫𑁆𑀫𑁄𑀲𑁄𑀢𑀺 𑀲𑀫𑁆𑀫𑁄𑀲𑀯𑀺𑀤𑁆𑀥𑀁𑀲𑀦𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑁄. 𑀆𑀭𑀫𑁆𑀫𑀡𑀲𑁆𑀲 𑀬𑀣𑀸𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀁 𑀉𑀧𑀝𑁆𑀞𑀸𑀦𑀁. ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺, ‘‘𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸’’𑀢𑀺 (𑀤𑀻. 𑀦𑀺. 𑁩.𑁩𑁪𑁮) 𑀘 𑀯𑀘𑀦𑀢𑁄 𑀯𑀺𑀲𑁂𑀲𑀢𑁄 𑀲𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀆𑀭𑀓𑁆𑀔𑀸𑀢𑀺 𑀆𑀳 ‘‘𑀲𑀢𑀺𑀬𑀸 𑀲𑀁𑀭𑀓𑁆𑀔𑀺𑀬𑀫𑀸𑀦𑀘𑀺𑀢𑁆𑀢𑀲𑁆𑀲𑀸’’𑀢𑀺.

𑁫𑁬𑁩. 𑀲𑀘𑁆𑀘𑀜𑀸𑀡𑀲𑁆𑀲𑀸𑀢𑀺 𑀲𑀘𑁆𑀘𑀸𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀜𑀸𑀡𑀲𑁆𑀲, 𑀦 𑀧𑀝𑀺𑀯𑁂𑀥𑀜𑀸𑀡𑀁 𑀯𑀺𑀬 𑀲𑀓𑀺𑀤𑁂𑀯 𑀩𑀼𑀚𑁆𑀛𑀢𑀺, 𑀅𑀣 𑀔𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀅𑀦𑀼 𑀅𑀦𑀼 𑀩𑁄𑀥𑁄 𑀅𑀦𑀼𑀩𑁄𑀥𑁄, 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀅𑀦𑀼𑀕𑀢𑁄 𑀯𑀸 𑀩𑁄𑀥𑁄 𑀅𑀦𑀼𑀩𑁄𑀥𑁄, 𑀢𑀤𑁂𑀯 𑀜𑀸𑀡𑀦𑁆𑀢𑀺 𑀅𑀦𑀼𑀩𑁄𑀥𑀜𑀸𑀡𑀁. 𑀦 𑀳𑀺 𑀢𑀁 𑀧𑀘𑁆𑀘𑀓𑁆𑀔𑀢𑁄 𑀩𑀼𑀚𑁆𑀛𑀢𑀺, 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀧𑀦 𑀓𑀧𑁆𑀧𑀦𑀫𑀼𑀔𑁂𑀦 𑀩𑀼𑀚𑁆𑀛𑀢𑀺. 𑀓𑀺𑀘𑁆𑀘𑀢𑁄𑀢𑀺 𑀧𑀭𑀺𑀚𑀸𑀦𑀦𑀸𑀤𑀺𑀢𑁄. 𑀢𑀁𑀓𑀺𑀘𑁆𑀘𑀓𑀭𑀡𑁂𑀦𑁂𑀯 𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀺 𑀯𑀺𑀬 𑀢𑀸𑀦𑀺𑀧𑀺 𑀢𑀲𑁆𑀲 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀲𑀗𑁆𑀔𑀸𑀭𑁂𑀳𑀺 𑀧𑀢𑀺𑀮𑀻𑀬𑀫𑀸𑀦𑀫𑀸𑀦𑀲𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀕𑁆𑀕𑀜𑀸𑀡𑀁 𑀯𑀺𑀲𑀗𑁆𑀔𑀸𑀭𑀁 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀤𑀼𑀓𑁆𑀔𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀤𑀼𑀓𑁆𑀔𑀕𑀢𑀜𑁆𑀘 𑀢𑀡𑁆𑀳𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀜𑁆𑀘 𑀲𑀘𑁆𑀙𑀺𑀓𑀭𑁄𑀢𑀺 𑀨𑀼𑀲𑀢𑀺. 𑀆𑀤𑀺𑀘𑁆𑀘𑁄 𑀯𑀺𑀬 𑀧𑀪𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀳𑀺 𑀲𑀳 𑀲𑀫𑀼𑀧𑁆𑀧𑀦𑁆𑀦𑀁 𑀢𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀦 𑀘 𑀲𑀗𑁆𑀔𑀸𑀭𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀦 𑀜𑀸𑀡𑁂𑀦 𑀏𑀢𑀁 𑀲𑀩𑁆𑀩𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑁂𑀳𑀺 𑀅𑀯𑀼𑀝𑁆𑀞𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀏𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀁 𑀢𑀁 𑀜𑀸𑀡𑀁 𑀤𑀼𑀓𑁆𑀔𑀸𑀤𑀻𑀦𑀺 𑀯𑀺𑀪𑀸𑀯𑁂𑀢𑀺 ¶ 𑀢𑀢𑁆𑀣 𑀲𑀫𑁆𑀫𑁄𑀳𑀦𑀺𑀯𑀢𑁆𑀢𑀦𑁂𑀦𑀸𑀢𑀺 ‘‘𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀓𑀧𑀝𑀺𑀯𑁂𑀥𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻𑀢𑀺 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀤𑀲𑁆𑀲𑀺𑀦𑁄 𑀅𑀜𑁆𑀜𑀢𑁆𑀢𑀬𑀤𑀲𑁆𑀲𑀺𑀢𑀸𑀯𑀺𑀘𑀸𑀭𑀡𑀸𑀬𑀁 𑀢𑀁𑀲𑀸𑀥𑀦𑀢𑁆𑀣𑀁 𑀆𑀬𑀲𑁆𑀫𑀢𑀸 ¶ 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀆𑀦𑀻𑀢𑀢𑁆𑀢𑀸, 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑁂𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀅𑀜𑁆𑀜𑀢𑁆𑀢𑀬𑀤𑀲𑁆𑀲𑀦𑀲𑁆𑀲 𑀬𑁄𑀚𑀺𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑁂 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀘𑁆𑀙𑀸 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀺𑀦𑁄 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀺𑀢𑀸 𑀦 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀸. 𑀬𑁄𑀚𑀺𑀢𑀸 𑀘 𑀲𑀸 ‘‘𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦). 𑀮𑁄𑀓𑀺𑀬𑀁 𑀲𑀘𑁆𑀘𑀜𑀸𑀡𑀁. 𑀢𑀢𑁆𑀣 𑀮𑁄𑀓𑀺𑀬𑀜𑀸𑀡𑁂. 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑁄 𑀅𑀪𑀺𑀪𑀯𑁄 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑁄, 𑀢𑀲𑁆𑀲 𑀯𑀲𑁂𑀦. 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀤𑀲𑁆𑀲𑀦𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀮𑁄𑀓𑀲𑀫𑀼𑀤𑀬𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫) 𑀯𑀘𑀦𑀢𑁄 𑀲𑀫𑀼𑀤𑀬𑀤𑀲𑁆𑀲𑀦𑀁 𑀳𑁂𑀢𑀼𑀨𑀮𑀧𑀩𑀦𑁆𑀥𑀸𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀮𑁄𑀓𑀦𑀺𑀭𑁄𑀥𑀁 𑀔𑁄…𑀧𑁂… 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀅𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫) 𑀯𑀘𑀦𑀢𑁄 𑀦𑀺𑀭𑁄𑀥𑀤𑀲𑁆𑀲𑀦𑀁 𑀳𑁂𑀢𑀼𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑀤𑀲𑁆𑀲𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀢𑁆𑀢𑀓𑀸𑀭𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀦𑀢𑁄 𑀫𑀕𑁆𑀕𑀤𑀲𑁆𑀲𑀦𑀁 ‘‘𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁂, 𑀦𑀢𑁆𑀣𑀺 𑀧𑀭𑀓𑀸𑀭𑁂, 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂’’𑀢𑀺𑀆𑀤𑀺𑀓𑀁 (𑀤𑀻. 𑀦𑀺. 𑁧.𑁧𑁬𑁮) 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. ‘‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀦𑀢𑁆𑀣𑀺 𑀳𑁂𑀢𑀼…𑀧𑁂… 𑀯𑀺𑀲𑀼𑀤𑁆𑀥𑀺𑀬𑀸, 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀓𑀸 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁧𑁦𑁧, 𑁨𑁨𑁭; 𑀲𑀁. 𑀦𑀺. 𑁩.𑁨𑁧𑁨) 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀘 𑀇𑀥 𑀅𑀓𑀺𑀭𑀺𑀬𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀸𑀧𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀤𑀲𑁆𑀲𑀦𑁂𑀦 𑀧𑀳𑀻𑀬𑀢𑀻𑀢𑀺. 𑀤𑀼𑀓𑁆𑀔𑁂 𑀜𑀸𑀡𑀁 𑀲𑀫𑀼𑀤𑀬𑀨𑀮𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀤𑁆𑀥𑀼𑀯𑀸𑀤𑀺𑀪𑀸𑀯𑀁 𑀧𑀲𑁆𑀲𑀢𑀻𑀢𑀺 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺.

𑀇𑀲𑁆𑀲𑀭𑁄 𑀮𑁄𑀓𑀁 𑀧𑀯𑀢𑁆𑀢𑁂𑀢𑀺 𑀲𑀚𑁆𑀚𑁂𑀢𑀺 𑀦𑀺𑀯𑀢𑁆𑀢𑁂𑀢𑀺 𑀲𑀁𑀳𑀭𑀢𑀻𑀢𑀺 𑀇𑀲𑁆𑀲𑀭𑀓𑀸𑀭𑀡𑀺𑀦𑁄 𑀯𑀤𑀦𑁆𑀢𑀺. 𑀧𑀥𑀸𑀦𑀢𑁄 𑀮𑁄𑀓𑁄 𑀆𑀯𑀺 𑀪𑀯𑀢𑀺, 𑀢𑀢𑁆𑀣𑁂𑀯 𑀘 𑀧𑀢𑀺𑀮𑀻𑀬𑀢𑀻𑀢𑀺 𑀧𑀥𑀸𑀦𑀓𑀸𑀭𑀡𑀺𑀦𑁄.

‘‘𑀓𑀸𑀮𑁄 ¶ 𑀓𑀭𑁄𑀢𑀺 𑀪𑀽𑀢𑀸𑀦𑀺, 𑀓𑀸𑀮𑁄 𑀲𑀁𑀳𑀭𑀢𑀻 𑀧𑀚𑀸;

𑀓𑀸𑀮𑁄 𑀲𑀼𑀢𑁆𑀢𑁂 𑀚𑀸𑀕𑀭𑀢𑀺, 𑀓𑀸𑀮𑁄 𑀳𑀺 𑀤𑀼𑀭𑀢𑀺𑀓𑁆𑀓𑀫𑁄’’𑀢𑀺. 𑁋

𑀓𑀸𑀮𑀯𑀸𑀤𑀺𑀦𑁄. 𑀓𑀡𑁆𑀝𑀓𑀲𑁆𑀲 𑀢𑀺𑀔𑀺𑀡𑀪𑀸𑀯𑁄 𑀯𑀺𑀬, 𑀓𑀧𑀺𑀝𑁆𑀞𑀨𑀮𑀸𑀤𑀻𑀦𑀁 𑀧𑀭𑀺𑀫𑀡𑁆𑀟𑀮𑀢𑀸 𑀯𑀺𑀬, 𑀫𑀺𑀕𑀧𑀓𑁆𑀔𑀺𑀲𑀭𑀻𑀲𑀧𑀸𑀤𑀻𑀦𑀁 𑀯𑀺𑀘𑀺𑀢𑁆𑀢𑀢𑀸 𑀯𑀺𑀬 𑀘 𑀲𑀪𑀸𑀯𑁂𑀦𑁂𑀯 𑀮𑁄𑀓𑁄 𑀲𑀫𑁆𑀪𑁄𑀢𑀺, 𑀯𑀺𑀪𑁄𑀢𑀺 𑀘𑀸𑀢𑀺 𑀲𑀪𑀸𑀯𑀯𑀸𑀤𑀺𑀦𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀡𑀽𑀳𑀺 ¶ 𑀮𑁄𑀓𑁄 𑀧𑀯𑀢𑁆𑀢𑀢𑀺, 𑀲𑀩𑁆𑀩𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀮𑁄𑀓𑁄 𑀦𑀺𑀬𑀢𑁄 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺𑀲𑀤𑀺𑀲𑁄, 𑀦 𑀏𑀢𑁆𑀣 𑀓𑀲𑁆𑀲𑀘𑀺 𑀧𑀼𑀭𑀺𑀲𑀓𑀸𑀭𑁄𑀢𑀺 𑀦𑀺𑀬𑀢𑀺𑀯𑀸𑀤𑀺𑀦𑁄.

‘‘𑀬𑀤𑀺𑀘𑁆𑀙𑀸𑀬 𑀧𑀯𑀢𑁆𑀢𑀦𑁆𑀢𑀺, 𑀬𑀤𑀺𑀘𑁆𑀙𑀸𑀬 𑀦𑀺𑀯𑀢𑁆𑀢𑀭𑁂;

𑀬𑀤𑀺𑀘𑁆𑀙𑀸𑀬 𑀲𑀼𑀔𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀬𑀸𑀤𑀺𑀘𑁆𑀙𑀓𑀻 𑀧𑀚𑀸’’𑀢𑀺. 𑁋

𑀬𑀤𑀺𑀘𑁆𑀙𑀸𑀯𑀸𑀤𑀺𑀦𑁄, 𑀬𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀯𑀸𑀤𑀺𑀦𑁄𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀫𑀸𑀤𑀺𑀅𑀓𑀸𑀭𑀡𑀯𑀸𑀤𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀭𑀸𑀫𑀼𑀤𑀓𑀆𑀴𑀸𑀭𑀸𑀤𑀻𑀦𑀁 𑀯𑀺𑀬, 𑀅𑀭𑀽𑀧𑀮𑁄𑀓𑁂 𑀦𑀺𑀕𑀡𑁆𑀞𑀸𑀦𑀁 𑀯𑀺𑀬 𑀘 𑀮𑁄𑀓𑀣𑀽𑀧𑀺𑀓𑀸𑀬𑀁 𑀅𑀧𑀯𑀕𑁆𑀕𑁄 𑀫𑁄𑀓𑁆𑀔𑁄𑀢𑀺 𑀕𑀳𑀡𑀁 𑀅𑀧𑀯𑀕𑁆𑀕𑀕𑀸𑀳𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀥𑀸𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑀺, 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀁, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁄𑀓𑀢𑀸, 𑀲𑀫𑀻𑀧𑀢𑀸, 𑀲𑀁𑀬𑁄𑀕𑁄, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀯𑀫𑀸𑀤𑀻𑀦𑀁 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀧𑀥𑀸𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀫𑀳𑀢𑀸𑀤𑀺𑀪𑀸𑀯𑁂𑀦 𑀅𑀧𑀭𑀺𑀡𑀸𑀫𑁄, 𑀅𑀦𑀪𑀺𑀩𑁆𑀬𑀢𑁆𑀢𑀺 𑀯𑀸. ‘‘𑀅𑀳𑀫𑀜𑁆𑀜𑁄, 𑀧𑀓𑀢𑀺 𑀅𑀜𑁆𑀜𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀚𑀸𑀦𑀦𑁂𑀦 𑀅𑀢𑁆𑀢𑀲𑀼𑀔𑀤𑀼𑀓𑁆𑀔𑀫𑁄𑀳𑁂𑀲𑀼 𑀅𑀯𑀺𑀪𑀸𑀕𑀕𑁆𑀕𑀳𑀡𑁂 𑀓𑀺𑀭 𑀦𑀺𑀯𑀢𑁆𑀢𑀺𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀥𑀸𑀦𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀲𑁄 𑀯𑀺𑀫𑁄𑀓𑁆𑀔𑁄𑀢𑀺 𑀓𑀸𑀧𑀺𑀮𑀸. 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀺𑀲𑀼𑀔𑀤𑀼𑀓𑁆𑀔𑀇𑀘𑁆𑀙𑀸𑀤𑁄𑀲𑀧𑁆𑀧𑀬𑀢𑁆𑀢𑀥𑀫𑁆𑀫𑀸𑀥𑀫𑁆𑀫𑀲𑀗𑁆𑀔𑀸𑀭𑁂𑀳𑀺 𑀦𑀯𑀳𑀺 𑀅𑀢𑁆𑀢𑀕𑀼𑀡𑁂𑀳𑀺 𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀓𑀡𑀸𑀤𑀫𑀢𑀸𑀦𑀼𑀲𑀸𑀭𑀺𑀦𑁄. 𑀲𑀮𑁄𑀓𑀢𑀸 𑀩𑁆𑀭𑀳𑁆𑀫𑀼𑀦𑀸 𑀲𑀫𑀸𑀦𑀮𑁄𑀓𑀢𑀸. 𑀲𑀫𑀻𑀧𑀢𑀸 𑀢𑀲𑁆𑀲 𑀲𑀫𑀻𑀧𑀧𑁆𑀧𑀯𑀢𑁆𑀢𑀺𑀢𑀸. 𑀲𑀁𑀬𑁄𑀕𑁄 𑀢𑁂𑀦 𑀏𑀓𑀻𑀪𑀸𑀯𑀽𑀧𑀕𑀫𑀦𑀁. ‘‘𑀇𑀦𑁆𑀤𑁆𑀭𑀺𑀬𑀢𑀧𑁆𑀧𑀦𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸𑀤𑀻𑀳𑀺 𑀯𑀺𑀦𑀸 𑀅𑀧𑀯𑀕𑁆𑀕𑁄 𑀦𑀢𑁆𑀣𑀻’’𑀢𑀺 𑀕𑀳𑁂𑀢𑁆𑀯𑀸 𑀢𑀣𑀸 𑀧𑀯𑀢𑁆𑀢𑀦𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄. 𑀅𑀦𑀲𑀦𑀓𑁂𑀲𑀮𑀼𑀜𑁆𑀘𑀦𑀸𑀤𑀺𑀢𑀧𑀘𑀭𑀺𑀬𑀸𑀬 𑀦𑀕𑁆𑀕𑀲𑀻𑀮𑀕𑁄𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀸𑀤𑀻𑀳𑀺 𑀘 𑀅𑀢𑁆𑀢𑀧𑀭𑀺𑀢𑀸𑀧𑀦𑁂𑀦 𑀫𑁄𑀓𑁆𑀔𑁄 𑀳𑁄𑀢𑀻𑀢𑀺 𑀅𑀢𑁆𑀢𑀓𑀺𑀮𑀫𑀣𑁄.

𑀲𑁆𑀯𑀸𑀬𑀁 𑀲𑀩𑁆𑀩𑁄 𑀫𑀺𑀘𑁆𑀙𑀸𑀕𑀸𑀳𑁄 𑀲𑀘𑁆𑀘𑀜𑀸𑀡𑁂 𑀲𑀢𑀺 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀮𑁄𑀓𑁂 𑀮𑁄𑀓𑀧𑁆𑀧𑀪𑀯𑁂’’𑀢𑀺 𑀕𑀸𑀣𑀫𑀸𑀳𑀸𑀢𑀺.

𑀜𑀸𑀡𑀓𑀺𑀘𑁆𑀘𑀢𑁄 𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁬𑁪. 𑀲𑁂𑀲𑀸 ¶ ¶ 𑀲𑀩𑁆𑀩𑀥𑀫𑁆𑀫𑀸𑀢𑀺 𑀲𑁂𑀲𑀸 𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀥𑀫𑁆𑀫𑀸. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀲𑁂𑀦 𑀤𑁆𑀯𑀸𑀤𑀲𑀢𑀺𑀓𑀸 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀯𑀸 𑀆𑀕𑀢𑀦𑀬𑁂𑀦 𑀓𑀸𑀮𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀢𑀤𑀸𑀫𑀲𑀦𑁂 𑀳𑀺 𑀅𑀝𑁆𑀞𑀲𑀢𑀁 𑀳𑁄𑀦𑁆𑀢𑀺. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀏𑀓𑀓𑀢𑁆𑀢𑀸 𑀓𑁂𑀦𑀘𑀺 𑀅𑀲𑀫𑁆𑀫𑀺𑀲𑁆𑀲𑀁, 𑀓𑀼𑀢𑁄 𑀢𑀤𑀦𑁆𑀢𑁄𑀕𑀥𑀧𑁆𑀧𑀪𑁂𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀸𑀤𑀻𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀲𑀢𑀺𑀧𑀺 𑀓𑀺𑀘𑁆𑀘𑀦𑀸𑀦𑀢𑁆𑀢𑁂 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀼𑀔𑁂𑀦 𑀢𑀤𑀦𑁆𑀢𑁄𑀕𑀥𑀢𑀸 𑀯𑀼𑀢𑁆𑀢𑀸.

𑀢𑀬𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀮𑁄𑀓𑀺𑀬𑀓𑁆𑀔𑀡𑁂 𑀅𑀮𑁄𑀪𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀫𑁆𑀧𑀬𑁄𑀕𑀯𑀲𑁂𑀦 𑀪𑀺𑀦𑁆𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀮𑁄𑀪𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀫𑀼𑀘𑁆𑀙𑁂𑀤𑀦𑀯𑀲𑁂𑀦 𑀢𑀬𑁄𑀢𑀺 𑀏𑀓𑁄𑀧𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀫𑁆𑀫𑀸𑀯𑀸𑀘𑀸𑀤𑀻𑀲𑀼. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀦𑀁 𑀧𑀦 𑀪𑀸𑀯𑁂 𑀲𑀫𑁆𑀫𑀸𑀆𑀚𑀻𑀯𑀲𑀫𑁆𑀪𑀯𑀢𑁄 𑀢𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀪𑀯𑀦𑁆𑀢𑀭𑁂𑀧𑀺 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀭𑀺𑀬𑁂𑀳𑀺 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀅𑀭𑀺𑀬𑀓𑀦𑁆𑀢𑀸𑀦𑀁 𑀲𑀫𑁆𑀫𑀸𑀯𑀸𑀘𑀸𑀤𑀺𑀲𑀻𑀮𑀸𑀦𑀁 𑀕𑀳𑀡𑁂𑀦 𑀬𑁂𑀦 𑀲𑀤𑁆𑀥𑀸𑀳𑀢𑁆𑀣𑁂𑀦 𑀢𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀲𑁄 𑀲𑀤𑁆𑀥𑀸𑀳𑀢𑁆𑀣𑁄 𑀕𑀳𑀺𑀢𑁄 𑀏𑀯 𑀳𑁄𑀢𑀻𑀢𑀺 𑀢𑀢𑁄 𑀅𑀦𑀜𑁆𑀜𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀸𑀦𑀺 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀙𑀦𑁆𑀤𑁄 𑀧𑀦 𑀲𑀤𑁆𑀥𑀸𑀦𑀼𑀕𑀼𑀡𑁄𑀢𑀺 𑀓𑀢𑁆𑀯𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑁆𑀲𑀸𑀧𑀺 𑀢𑀤𑀦𑁆𑀢𑁄𑀕𑀥𑀢𑀸 𑀯𑀼𑀢𑁆𑀢𑀸. 𑀢𑁂𑀲𑀁 𑀅𑀢𑁆𑀣𑀺𑀢𑀸𑀬𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀻𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄 𑀢𑀺𑀯𑀺𑀥𑁂𑀦𑀸𑀧𑀺 𑀲𑀻𑀮𑁂𑀦 𑀢𑁂 𑀢𑀬𑁄𑀧𑀺 𑀕𑀳𑀺𑀢𑀸𑀢𑀺 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸. 𑀘𑀺𑀢𑁆𑀢𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀁 𑀯𑀤𑀢𑀺. ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀳𑀺 𑀘𑀺𑀢𑁆𑀢𑀫𑀼𑀔𑁂𑀦 𑀲𑀫𑀸𑀥𑀺 𑀯𑀼𑀢𑁆𑀢𑁄𑀢𑀺 𑀲𑀫𑀸𑀥𑀺𑀫𑀼𑀔𑁂𑀦 𑀘𑀺𑀢𑁆𑀢𑀫𑁆𑀧𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬 𑀧𑀦 𑀲𑀫𑀸𑀥𑀺𑀧𑀺 𑀅𑀥𑀺𑀫𑀢𑁆𑀢𑁄 𑀳𑁄𑀢𑀻𑀢𑀺 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀸𑀤𑀺𑀯𑀘𑀦𑀁 𑀯𑀺𑀬 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄𑀢𑀺 𑀅𑀯𑀢𑁆𑀯𑀸 𑀇𑀥 ‘‘𑀘𑀺𑀢𑁆𑀢𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀲𑀁. 𑀦𑀺. 𑁫.𑁩𑁭𑁬; 𑀅. 𑀦𑀺. 𑁩.𑁯𑁬; 𑁧𑁧.𑁧𑁨) 𑀯𑀘𑀦𑀢𑁄 𑀲𑀫𑀸𑀥𑀺𑀉𑀧𑀓𑀸𑀭𑀸 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀬𑁄, 𑀢𑀲𑁆𑀫𑀸 𑀲𑀫𑀸𑀥𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀉𑀧𑁂𑀓𑁆𑀔𑀸 𑀧𑀦 𑀲𑀫𑀸𑀥𑀺𑀉𑀧𑀓𑀸𑀭𑀓𑀢𑁄, 𑀢𑀁𑀲𑀤𑀺𑀲𑀓𑀺𑀘𑁆𑀘𑀢𑁄 𑀘. 𑀢𑀲𑁆𑀫𑀸 𑀲𑀫𑀸𑀥𑀺𑀲𑀻𑀲𑁂𑀦 𑀏𑀢𑁂𑀲𑀁 𑀅𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁬𑁫. 𑀪𑀸𑀭𑁄 ¶ 𑀯𑀺𑀬 𑀤𑀼𑀓𑁆𑀔𑀲𑀘𑁆𑀘𑀁 𑀯𑀺𑀖𑀸𑀢𑀓𑀢𑁆𑀢𑀸, 𑀲𑀁𑀳𑀭𑀡𑀻𑀬𑀯𑀲𑁂𑀦 𑀯𑀺𑀳𑀦𑁆𑀢𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀪𑀸𑀭𑀸𑀤𑀸𑀦𑀫𑀺𑀯 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀉𑀧𑁆𑀧𑀚𑁆𑀚𑀦𑀓𑀯𑀺𑀖𑀸𑀢𑀲𑁆𑀲 𑀳𑁂𑀢𑀼𑀪𑀸𑀯𑀢𑁄. 𑀪𑀸𑀭𑀦𑀺𑀓𑁆𑀔𑁂𑀧𑀦𑀫𑀺𑀯 𑀧𑀯𑀢𑁆𑀢𑀺𑀤𑀼𑀓𑁆𑀔𑀯𑀽𑀧𑀲𑀫𑀪𑀸𑀯𑀢𑁄 ¶ . 𑀭𑁄𑀕𑁄 𑀯𑀺𑀬, 𑀤𑀼𑀩𑁆𑀪𑀺𑀓𑁆𑀔𑀫𑀺𑀯 𑀘 𑀩𑀸𑀥𑀓𑀢𑁆𑀢𑀸. 𑀭𑁄𑀕𑀦𑀺𑀤𑀸𑀦𑀁 𑀯𑀺𑀬, 𑀤𑀼𑀩𑁆𑀩𑀼𑀝𑁆𑀞𑀺 𑀯𑀺𑀬 𑀘 𑀧𑀪𑀯𑀮𑀓𑁆𑀔𑀡𑀢𑁆𑀢𑀸. 𑀤𑀼𑀩𑁆𑀩𑀼𑀝𑁆𑀞𑀻𑀢𑀺 𑀘 𑀅𑀯𑀲𑁆𑀲𑀦𑀁 𑀯𑀸 𑀅𑀢𑀺𑀯𑀲𑁆𑀲𑀦𑀁 𑀯𑀸. 𑀭𑁄𑀕𑀯𑀽𑀧𑀲𑀫𑁄 𑀯𑀺𑀬, 𑀲𑀼𑀪𑀺𑀓𑁆𑀔𑀫𑀺𑀯 𑀘 𑀲𑀦𑁆𑀢𑀺𑀮𑀓𑁆𑀔𑀡𑀢𑁆𑀢𑀸, 𑀲𑀼𑀔𑀪𑀸𑀯𑀢𑁄. ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀥. 𑀧. 𑁨𑁦𑁩-𑁨𑁦𑁪) 𑀳𑀺 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀫𑀺𑀯, 𑀲𑀼𑀯𑀼𑀝𑁆𑀞𑀺 𑀯𑀺𑀬 𑀘 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀧𑀘𑁆𑀙𑁂𑀤𑀢𑁄, 𑀢𑀲𑁆𑀲 𑀘 𑀅𑀧𑀕𑀫𑀽𑀧𑀸𑀬𑀪𑀸𑀯𑀢𑁄. 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀜𑁆𑀳𑀺 𑀫𑀕𑁆𑀕𑀲𑀘𑁆𑀘𑀁. 𑀅𑀦𑀺𑀝𑁆𑀞𑀪𑀸𑀯𑀢𑁄, 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀢𑁄 𑀘 𑀤𑀼𑀓𑁆𑀔𑀁 𑀯𑁂𑀭𑀺𑀯𑀺𑀲𑀭𑀼𑀓𑁆𑀔𑀪𑀬𑀑𑀭𑀺𑀫𑀢𑀻𑀭𑀽𑀧𑀫𑀁. 𑀯𑁂𑀭𑀁 𑀩𑁆𑀬𑀸𑀧𑀸𑀤𑁄, 𑀧𑀘𑁆𑀘𑀢𑁆𑀣𑀺𑀓𑀪𑀸𑀯𑁄 𑀯𑀸. 𑀯𑁂𑀭𑀲𑀫𑀼𑀕𑁆𑀖𑀸𑀢𑁄 𑀯𑁂𑀭𑀯𑀽𑀧𑀲𑀫𑁄 𑀫𑁂𑀢𑁆𑀢𑀸. 𑀯𑁂𑀭𑀲𑀫𑀼𑀕𑁆𑀖𑀸𑀢𑀼𑀧𑀸𑀬𑁄 𑀲𑀗𑁆𑀕𑀳𑀯𑀢𑁆𑀣𑀽𑀦𑀺.

𑀉𑀧𑀫𑀸𑀢𑁄 𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁬𑁬. 𑀏𑀲 𑀦𑀬𑁄 𑀲𑀫𑀼𑀤𑀬𑀸𑀤𑀻𑀲𑀽𑀢𑀺 𑀅𑀢𑁆𑀣𑀺 𑀘𑁂𑀢𑁆𑀣 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁, 𑀅𑀢𑁆𑀣𑀺 𑀅𑀭𑀺𑀬𑀲𑀘𑁆𑀘𑀁, 𑀦 𑀲𑀫𑀼𑀤𑀬𑁄, 𑀅𑀢𑁆𑀣𑀺 𑀲𑀫𑀼𑀤𑀬𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀅𑀢𑁆𑀣𑀺 𑀦𑁂𑀯 𑀲𑀫𑀼𑀤𑀬𑁄 𑀦 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀲𑁂𑀲𑀲𑀘𑁆𑀘𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀦 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀸𑀲𑀗𑁆𑀔𑀢𑀦𑀺𑀬𑁆𑀬𑀸𑀦𑀪𑀸𑀯𑀸𑀪𑀸𑀯𑀢𑁄. 𑀇𑀢𑀭𑀁 𑀧𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀦𑁆𑀢𑀺 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀤𑁆𑀯𑀬𑀫𑀸𑀳. 𑀲𑀺𑀬𑀸 𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘𑀢𑁄’’𑀢𑀺. 𑀢𑀣𑀢𑁆𑀢𑁂𑀦𑀸𑀢𑀺 𑀢𑀣𑀲𑀪𑀸𑀯𑁂𑀦, 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀢𑀁 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 ‘‘𑀲𑀺𑀬𑀸 𑀤𑀼𑀓𑁆𑀔𑀁, 𑀦 𑀅𑀭𑀺𑀬𑀲𑀘𑁆𑀘𑀁, 𑀲𑀺𑀬𑀸 𑀅𑀭𑀺𑀬𑀲𑀘𑁆𑀘𑀁, 𑀦 𑀤𑀼𑀓𑁆𑀔’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀲𑀘𑁆𑀘𑀲𑀤𑁆𑀤𑀧𑀭𑀸 𑀳𑀺 𑀤𑀼𑀓𑁆𑀔𑀸𑀤𑀺𑀲𑀤𑁆𑀤𑀸 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀁 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀅𑀭𑀺𑀬𑀲𑀘𑁆𑀘𑀲𑀤𑁆𑀤𑀸𑀦𑀧𑁂𑀓𑁆𑀔𑀁 𑀤𑀼𑀓𑁆𑀔𑀲𑀤𑁆𑀤𑀁 𑀲𑀦𑁆𑀥𑀸𑀬 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀸𑀫𑀜𑁆𑀜𑀨𑀮𑀥𑀫𑁆𑀫𑀸𑀦𑀁 𑀆𑀤𑀺𑀧𑀤𑀲𑀗𑁆𑀕𑀳𑁄 𑀯𑀼𑀢𑁆𑀢𑁄, 𑀅𑀭𑀺𑀬𑀲𑀘𑁆𑀘𑀲𑀤𑁆𑀤𑀸𑀧𑁂𑀓𑁆𑀔𑀁 𑀧𑀦 𑀲𑀦𑁆𑀥𑀸𑀬 𑀘𑀢𑀼𑀢𑁆𑀣𑀧𑀤𑀲𑀗𑁆𑀕𑀳𑁄.

𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀬𑀣𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀤𑀬𑁄 𑀏𑀓𑀗𑁆𑀕𑀯𑀺𑀓𑀮𑀸, 𑀏𑀯𑀁 𑀅𑀳𑀼𑀢𑁆𑀯𑀸 𑀲𑀩𑁆𑀩𑀗𑁆𑀕𑀬𑁄𑀕𑁂𑀦 𑀤𑀼𑀓𑁆𑀔𑀢𑀸𑀬 𑀘𑁂𑀯 𑀅𑀭𑀺𑀬𑀲𑀘𑁆𑀘𑀢𑀸𑀬 𑀘𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀡𑁆𑀳𑀸𑀬𑀧𑀺 𑀲𑀗𑁆𑀕𑀳𑁄 𑀲𑀺𑀬𑀸𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀜𑁆𑀜𑀢𑁆𑀭 𑀢𑀡𑁆𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲𑀸 𑀯𑀺𑀲𑀼𑀁 𑀅𑀭𑀺𑀬𑀲𑀘𑁆𑀘𑀪𑀸𑀯𑀢𑁄. 𑀲𑀫𑀼𑀤𑀬𑀸𑀤𑀻𑀲𑀼 𑀅𑀯𑀲𑁂𑀲𑀓𑀺𑀮𑁂𑀲𑀸𑀤𑀬𑁄 𑀧𑀪𑀯𑀝𑁆𑀞𑁂𑀦 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀅𑀬𑀦𑁆𑀢𑀺 𑀓𑀢𑁆𑀯𑀸 ¶ . 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀲𑀫𑀼𑀤𑀬𑁄. 𑀇𑀢𑀭𑀁 𑀧𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀲𑀫𑀼𑀤𑀬𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀝𑁆𑀞𑁂𑀦, 𑀦 𑀧𑀦 𑀬𑀲𑁆𑀲 𑀧𑀳𑀸𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀢𑀡𑁆𑀳𑀸𑀲𑀫𑀼𑀤𑀬𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘 𑀬𑀲𑁆𑀲 𑀧𑀳𑀸𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦 𑀦𑁂𑀯 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘 𑀦𑀺𑀭𑁄𑀥𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀲𑀫𑀼𑀤𑀬𑁄 ¶ 𑀅𑀭𑀺𑀬𑀲𑀘𑁆𑀘𑀁, 𑀦 𑀦𑀺𑀭𑁄𑀥𑁄. 𑀇𑀢𑀭𑀁 𑀧𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀦𑀺𑀭𑁄𑀥𑁄 𑀔𑀡𑀦𑀺𑀭𑁄𑀥𑀲𑀩𑁆𑀪𑀸𑀯𑀢𑁄, 𑀦 𑀧𑀦 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀦𑀺𑀭𑁄𑀥𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀭𑀺𑀬𑀫𑀕𑁆𑀕𑀢𑁄 𑀅𑀜𑁆𑀜𑀸𑀦𑀺 𑀫𑀕𑁆𑀕𑀸𑀦𑀺 𑀫𑀕𑁆𑀕𑁄, 𑀦 𑀅𑀭𑀺𑀬𑀲𑀘𑁆𑀘𑀁. 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀁, 𑀦 𑀫𑀕𑁆𑀕𑁄. 𑀇𑀢𑀭𑀁 𑀧𑀦 𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀫𑀕𑁆𑀕𑁄 𑀪𑀯𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀸𑀯𑀢𑁄, 𑀦 𑀧𑀦 𑀬𑀲𑁆𑀲 𑀪𑀸𑀯𑀦𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸 𑀫𑀕𑁆𑀕𑁄 𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀢𑀼𑀓𑁆𑀓𑀢𑁄 𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁬𑁭. 𑀲𑀼𑀜𑁆𑀜𑀸𑀦𑀻𑀢𑀺 𑀯𑁂𑀤𑀓𑀸𑀤𑀻𑀳𑀺 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀔𑀜𑁆𑀳𑀺 𑀯𑁂𑀤𑀦𑀻𑀬𑀫𑁆𑀧𑀺 𑀲𑀦𑁆𑀢𑀁 𑀯𑁂𑀤𑀓𑀭𑀳𑀺𑀢𑀁, 𑀓𑁂𑀯𑀮𑀁 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑁂 𑀤𑀼𑀓𑁆𑀔𑀁 𑀯𑁂𑀤𑁂𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺.

‘‘𑀤𑀼𑀓𑁆𑀔𑀫𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁄𑀘𑀺 𑀤𑀼𑀓𑁆𑀔𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀻𑀢𑀺 𑀲𑀫𑀼𑀤𑀬𑀲𑀘𑁆𑀘𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀓𑀫𑁆𑀫𑀯𑀝𑁆𑀝𑀲𑀗𑁆𑀕𑀳𑀢𑁄 𑀓𑀸𑀭𑀓𑀲𑁆𑀲 𑀯𑀸 𑀤𑀼𑀓𑁆𑀔𑀲𑀘𑁆𑀘𑀲𑀪𑀸𑀯𑀫𑀸𑀳. 𑀓𑀸𑀢𑀩𑁆𑀩𑀸𑀧𑀺 𑀳𑀺 𑀓𑀺𑀭𑀺𑀬𑀸 𑀓𑀸𑀭𑀓𑀭𑀳𑀺𑀢𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀢𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀤𑀼𑀓𑁆𑀔𑀲𑀜𑁆𑀜𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀓𑀺𑀭𑀺𑀬𑀁 𑀓𑀭𑁄𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀦𑀺𑀩𑁆𑀩𑀼𑀢𑀕𑀫𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀫𑀕𑁆𑀕𑁄 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀕𑁆𑀕𑀫𑀢𑁆𑀣𑀻’’𑀢𑀺 𑀑𑀓𑀸𑀭𑀲𑁆𑀲 𑀅𑀪𑀸𑀯𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀕𑀫𑀓𑁄𑀢𑀺 𑀦𑀺𑀩𑁆𑀩𑀼𑀢𑀺𑀁 𑀕𑀦𑁆𑀢𑀸.

𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀝𑁆𑀞𑁂𑀦 𑀲𑀸𑀲𑀯𑀢𑀸 𑀅𑀲𑀼𑀪𑀢𑀸𑀢𑀺 𑀓𑀢𑁆𑀯𑀸 𑀅𑀦𑀸𑀲𑀯𑀢𑁆𑀢𑀸 𑀦𑀺𑀭𑁄𑀥𑀫𑀕𑁆𑀕𑀸 𑀲𑀼𑀪𑀸 𑀏𑀯. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀭𑀺𑀬𑀸𑀬𑁂𑀦 𑀲𑀫𑀼𑀤𑀬𑀸𑀤𑀺𑀪𑀸𑀯𑁄 𑀘 𑀅𑀢𑁆𑀣𑀺 ¶ , 𑀦 𑀧𑀦 𑀦𑀺𑀭𑁄𑀥𑀪𑀸𑀯𑁄, 𑀦𑀺𑀭𑁄𑀥𑀲𑁆𑀲 𑀯𑀸 𑀦 𑀤𑀼𑀓𑁆𑀔𑀸𑀤𑀺𑀪𑀸𑀯𑁄𑀢𑀺 𑀦𑀺𑀭𑁄𑀥𑀸𑀯𑀲𑁂𑀲𑀢𑁆𑀢𑀬𑀸𑀦𑀁 𑀦 𑀅𑀜𑁆𑀜𑀫𑀜𑁆𑀜𑀲𑀫𑀗𑁆𑀕𑀺𑀢𑀸𑀢𑀺 𑀆𑀳 ‘‘𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 𑀯𑀸’’𑀢𑀺𑀆𑀤𑀺.

𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄𑀢𑀺 𑀧𑁄𑀦𑁄𑀪𑀯𑀺𑀓𑀸𑀬 𑀢𑀡𑁆𑀳𑀸𑀬 𑀧𑀼𑀦𑀩𑁆𑀪𑀯𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀯𑀸 𑀧𑀓𑀢𑀺𑀯𑀸𑀤𑀻𑀦𑀁 𑀯𑀺𑀓𑀸𑀭𑀸 𑀅𑀯𑀺𑀓𑀸𑀭𑀺𑀪𑀸𑀯𑀢𑁄, 𑀧𑀼𑀩𑁆𑀩𑁂 𑀧𑀢𑀺𑀧𑀮𑀻𑀦𑀸 𑀘 𑀧𑀓𑀢𑀺𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀏𑀯𑀁 𑀲𑀫𑀼𑀤𑀬𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀪𑀸𑀯𑁂𑀦 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄’’𑀢𑀺 ¶ . 𑀫𑀕𑁆𑀕𑁂 𑀘 𑀦𑀺𑀭𑁄𑀥𑀲𑁆𑀲 𑀅𑀪𑀸𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀅𑀯𑀺𑀪𑀢𑁆𑀢𑁂𑀳𑀺 𑀯𑀺𑀓𑀸𑀭𑁂𑀳𑀺 𑀫𑀳𑀸𑀳𑀗𑁆𑀓𑀸𑀭𑀢𑀫𑁆𑀫𑀢𑁆𑀢𑀯𑀺𑀲𑁂𑀲𑀺𑀦𑁆𑀤𑁆𑀭𑀺𑀬𑀪𑀽𑀢𑀯𑀺𑀲𑁂𑀲𑁂𑀳𑀺 𑀧𑀓𑀢𑀺𑀪𑀸𑀯𑁂𑀦𑁂𑀯 𑀞𑀺𑀢𑁂𑀳𑀺 𑀧𑀓𑀢𑀺 𑀲𑀕𑀩𑁆𑀪𑀸 𑀇𑀘𑁆𑀙𑀺𑀢𑀸 𑀧𑀓𑀢𑀺𑀯𑀸𑀤𑀻𑀳𑀺, 𑀏𑀯𑀁 𑀦 𑀨𑀮𑁂𑀦 𑀲𑀕𑀩𑁆𑀪𑁄 𑀳𑁂𑀢𑀽𑀢𑀺 𑀅𑀢𑁆𑀣𑁄. ‘‘𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸’’𑀢𑀺 𑀏𑀢𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀇𑀥 𑀢𑀦𑁆𑀢𑀽𑀲𑀼 𑀧𑀝𑁄, 𑀓𑀧𑀸𑀮𑁂𑀲𑀼 𑀖𑀝𑁄, 𑀩𑀻𑀭𑀡𑁂𑀲𑀼 𑀓𑀝𑁄 𑀤𑁆𑀯𑀻𑀲𑀼 𑀅𑀡𑀽𑀲𑀼 𑀤𑁆𑀯𑀺𑀅𑀡𑀼𑀓’’𑀦𑁆𑀢𑀺𑀆𑀤𑀺𑀦𑀸 𑀇𑀥 𑀯𑀼𑀤𑁆𑀥𑀺𑀯𑁄𑀳𑀸𑀭𑀚𑀦𑀓𑁄 𑀅𑀯𑀺𑀲𑀼𑀁 𑀲𑀺𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀫𑀯𑀸𑀬𑁄, 𑀢𑁂𑀦 𑀲𑀫𑀯𑀸𑀬𑁂𑀦 𑀓𑀸𑀭𑀡𑁂𑀲𑀼 𑀤𑁆𑀯𑀻𑀲𑀼 𑀅𑀡𑀽𑀲𑀼 𑀤𑁆𑀯𑀺𑀅𑀡𑀼𑀓𑀁 𑀨𑀮𑀁 𑀲𑀫𑀯𑁂𑀢𑀁 𑀏𑀓𑀻𑀪𑀽𑀢𑀫𑀺𑀯 𑀲𑀫𑁆𑀩𑀤𑁆𑀥𑀁, 𑀢𑀻𑀲𑀼 𑀅𑀡𑀽𑀲𑀼 𑀢𑀺𑀅𑀡𑀼𑀓𑀦𑁆𑀢𑀺 𑀏𑀯𑀁 𑀫𑀳𑀸𑀧𑀣𑀯𑀻𑀫𑀳𑀸𑀉𑀤𑀓𑀫𑀳𑀸𑀅𑀕𑁆𑀕𑀺𑀫𑀳𑀸𑀯𑀸𑀢𑀓𑁆𑀔𑀦𑁆𑀥𑀧𑀭𑀺𑀬𑀦𑁆𑀢𑀁 𑀨𑀮𑀁 𑀅𑀢𑁆𑀢𑀦𑁄 𑀓𑀸𑀭𑀡𑁂𑀲𑀼 𑀲𑀫𑀯𑁂𑀢𑀦𑁆𑀢𑀺 𑀲𑀫𑀯𑀸𑀬𑀯𑀸𑀤𑀺𑀦𑁄 𑀯𑀤𑀦𑁆𑀢𑀺. 𑀏𑀯𑀁 𑀧𑀦 𑀯𑀤𑀦𑁆𑀢𑁂𑀳𑀺 𑀅𑀧𑀭𑀺𑀫𑀸𑀡𑁂𑀲𑀼 𑀓𑀸𑀭𑀡𑁂𑀲𑀼 𑀫𑀳𑀸𑀧𑀭𑀺𑀫𑀸𑀡𑀁 𑀏𑀓𑀁 𑀨𑀮𑀁 𑀲𑀫𑀯𑁂𑀢𑀁 𑀅𑀢𑁆𑀢𑀦𑁄 𑀅𑀦𑁆𑀢𑁄𑀕𑀥𑁂𑀳𑀺 𑀓𑀸𑀭𑀡𑁂𑀳𑀺 𑀲𑀕𑀩𑁆𑀪𑀁 𑀅𑀲𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀺𑀥 𑀲𑀫𑀯𑀸𑀬𑀸𑀪𑀸𑀯𑀸 𑀨𑀮𑁂 𑀳𑁂𑀢𑀼 𑀦𑀢𑁆𑀣𑀻𑀢𑀺 𑀳𑁂𑀢𑀼𑀲𑀼𑀜𑁆𑀜𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀜𑁆𑀜𑀢𑁄 𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀫𑀕𑁆𑀕𑀦𑀺𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸.

𑀏𑀓𑀯𑀺𑀥𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑁫𑁬𑁮. 𑀧𑀯𑀢𑁆𑀢𑀺𑀪𑀸𑀯𑀢𑁄𑀢𑀺 𑀲𑀁𑀲𑀸𑀭𑀲𑁆𑀲 𑀧𑀯𑀢𑁆𑀢𑀺𑀪𑀸𑀯𑀢𑁄. 𑀘𑀢𑀼𑀆𑀳𑀸𑀭𑀪𑁂𑀤𑀢𑁄𑀢𑀺 𑀘𑀢𑀼𑀆𑀳𑀸𑀭𑀧𑁆𑀧𑀘𑁆𑀘𑀬𑀯𑀺𑀲𑁂𑀲𑀢𑁄. 𑀏𑀢𑁂𑀦 𑀘𑀢𑁆𑀢𑀸𑀭𑁄 𑀓𑀩𑀴𑀻𑀓𑀸𑀭𑀸𑀤𑀺𑀆𑀳𑀸𑀭𑀯𑀺𑀲𑁂𑀲𑁂, 𑀅𑀚𑁆𑀛𑁄𑀳𑀭𑀡𑀻𑀬𑀯𑀢𑁆𑀣𑀼, 𑀲𑀴𑀸𑀬𑀢𑀦, 𑀅𑀯𑀺𑀚𑁆𑀚𑀸, 𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂 𑀢𑀧𑁆𑀧𑀘𑁆𑀘𑀬𑀪𑀽𑀢𑀥𑀫𑁆𑀫𑀯𑀺𑀲𑁂𑀲𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺 ¶ , 𑀑𑀚𑀝𑁆𑀞𑀫𑀓𑀭𑀽𑀧, 𑀯𑁂𑀤𑀦𑀸, 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡, 𑀦𑀸𑀫𑀭𑀽𑀧𑀲𑀗𑁆𑀔𑀸𑀢𑁂 𑀢𑀦𑁆𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀯𑀺𑀲𑁂𑀲𑁂 𑀘.

𑀧𑀯𑀢𑁆𑀢𑀓𑀪𑀸𑀯𑀢𑁄 𑀧𑀯𑀢𑁆𑀢𑀺𑀤𑀼𑀓𑁆𑀔𑀲𑁆𑀲. 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑁂𑀤𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀅𑀪𑀺𑀦𑀦𑁆𑀤𑀦𑀪𑁂𑀤𑁄, 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦𑀸𑀧𑀻𑀢𑀺 𑀯𑀤𑀦𑁆𑀢𑀺. 𑀭𑀽𑀧𑀢𑀡𑁆𑀳𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀅𑀦𑁂𑀓𑀪𑁂𑀤𑀢𑁆𑀢𑀸 𑀙 𑀢𑀡𑁆𑀳𑀸𑀓𑀸𑀬𑀸, 𑀢𑁂𑀲𑀁 𑀪𑁂𑀤𑀢𑁄.

𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀺, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀢𑀦𑁆𑀦𑀺𑀲𑁆𑀲𑀭𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀯𑀽𑀧𑀲𑀫𑁄 𑀢𑀁𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀬𑀸𑀯 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀢𑀸𑀯 𑀲𑁂𑀲𑀢𑀁, 𑀢𑀢𑁄 𑀧𑀭𑀁 𑀅𑀦𑀯𑀲𑁂𑀲𑀢𑀜𑁆𑀘 ¶ 𑀉𑀧𑀸𑀤𑀸𑀬 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼, 𑀦𑀺𑀭𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀤𑁆𑀯𑀺𑀥𑀸 𑀯𑁄𑀳𑀭𑀻𑀬𑀢𑀺. 𑀬𑀣𑀸 𑀘𑀸𑀬𑀁 𑀪𑁂𑀤𑁄 𑀯𑁄𑀳𑀸𑀭𑀢𑁄, 𑀏𑀯𑀫𑀺𑀢𑀭𑁂𑀧𑀻𑀢𑀺 𑀢𑁂 𑀓𑀢𑀺𑀧𑀬𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀯𑀺𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀏𑀓𑀲𑁆𑀲 𑀲𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀓𑀼𑀢𑁄 𑀪𑁂𑀤𑁄𑀢𑀺.

𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑁂𑀤𑀢𑁄𑀢𑀺 𑀏𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀯𑀺𑀧𑀲𑁆𑀲𑀦𑀸, 𑀇𑀢𑀭𑁂 𑀲𑀫𑀣𑀸𑀢𑀺 𑀯𑀤𑀦𑁆𑀢𑀺. 𑀲𑀻𑀮𑀫𑁆𑀧𑀺 𑀳𑀺 𑀲𑀫𑀣𑀲𑁆𑀲 𑀉𑀧𑀓𑀸𑀭𑀓𑀢𑁆𑀢𑀸 𑀲𑀫𑀣𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀬𑀸𑀦𑀤𑁆𑀯𑀬𑀲𑁆𑀲 𑀯𑀲𑁂𑀦 𑀮𑀤𑁆𑀥𑁄 𑀫𑀕𑁆𑀕𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸𑀢𑀺 𑀆𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀬𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀲𑀧𑁆𑀧𑀤𑁂𑀲𑀢𑁆𑀢𑀸𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀓𑀤𑁂𑀲𑁄 𑀳𑀺 𑀧𑀤𑀺𑀲𑁆𑀲𑀢𑀺 𑀅𑀯𑀬𑀯𑀪𑀸𑀯𑁂𑀦 𑀅𑀧𑀤𑀺𑀲𑀻𑀬𑀢𑀻𑀢𑀺 𑀧𑀤𑁂𑀲𑁄, 𑀅𑀢𑁆𑀢𑀦𑁄 𑀲𑀫𑀼𑀤𑀸𑀬𑀁 𑀧𑀢𑀺 𑀲𑀳 𑀧𑀤𑁂𑀲𑁂𑀦𑀸𑀢𑀺 𑀲𑀧𑁆𑀧𑀤𑁂𑀲𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀲𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯), 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀘 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀸𑀤𑀺𑀲𑀗𑁆𑀕𑀸𑀳𑀓𑀸, 𑀅𑀭𑀺𑀬𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑁄 𑀏𑀯𑀸𑀢𑀺 𑀢𑀤𑁂𑀓𑀤𑁂𑀲𑁄 𑀳𑁄𑀢𑀺.

𑀲𑀚𑀸𑀢𑀺𑀢𑁄𑀢𑀺 𑀲𑀫𑀸𑀦𑀚𑀸𑀢𑀺𑀢𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺𑀆𑀤𑀺𑀪𑁂𑀤𑁂𑀲𑀼 𑀲𑀫𑀸𑀦𑀸𑀬 𑀲𑀻𑀮𑀚𑀸𑀢𑀺𑀬𑀸𑀢𑀺 𑀅𑀢𑁆𑀣𑁄.

𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄 𑀧𑀕𑁆𑀕𑀳𑀓𑀺𑀘𑁆𑀘𑀲𑀸𑀫𑀜𑁆𑀜𑀢𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺 𑀅𑀧𑀺𑀮𑀸𑀧𑀦𑀯𑀲𑁂𑀦 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀲𑀸𑀫𑀜𑁆𑀜𑀢𑁄. 𑀲𑀚𑀸𑀢𑀺𑀢𑁄𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀪𑁂𑀤𑁂𑀲𑀼 𑀲𑀫𑀸𑀦𑀸𑀬 𑀲𑀫𑀸𑀥𑀺𑀚𑀸𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀭𑀺𑀬𑀢𑁄𑀢𑀺 𑀲𑀫𑀸𑀥𑀺𑀅𑀦𑀼𑀭𑀽𑀧𑀓𑀺𑀭𑀺𑀬𑀢𑁄. 𑀢𑀢𑁄 𑀏𑀯 𑀳𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 ¶ 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸’’𑀢𑀺 (𑀫. 𑀦𑀺. 𑁧.𑁪𑁬) 𑀲𑀢𑀺𑀯𑀸𑀬𑀸𑀫𑀸𑀦𑀁 𑀲𑀫𑀸𑀥𑀺𑀲𑁆𑀲 𑀦𑀺𑀫𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀪𑀸𑀯𑁄 𑀯𑀼𑀢𑁆𑀢𑁄.

𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬𑀸𑀢𑀺 ‘‘𑀅𑀦𑀺𑀘𑁆𑀘𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀜𑁆𑀜𑀸𑀓𑀺𑀘𑁆𑀘𑀲𑀤𑀺𑀲𑁂𑀦 𑀓𑀺𑀘𑁆𑀘𑁂𑀦 𑀲𑀫𑀦𑁆𑀢𑀢𑁄 𑀓𑁄𑀝𑁂𑀦𑁆𑀢𑁂𑀦 𑀯𑀺𑀬, ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁮) 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬 𑀊𑀳𑀺𑀢𑁆𑀯𑀸 𑀤𑀺𑀦𑁆𑀦𑀫𑁂𑀯 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀢𑀺. 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀧𑀘𑁆𑀘𑀬𑀪𑀸𑀯𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀧𑀼𑀭𑀺𑀫𑀓𑀸𑀮𑀲𑁆𑀲 𑀯𑀺𑀬 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀲𑀚𑀸𑀢𑀺𑀢𑁄𑀢𑀺 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁮) 𑀲𑀫𑀸𑀦𑀸𑀬 𑀧𑀜𑁆𑀜𑀸𑀚𑀸𑀢𑀺𑀬𑀸. 𑀓𑀺𑀭𑀺𑀬𑀢𑁄𑀢𑀺 𑀏𑀢𑁆𑀣 𑀧𑀜𑁆𑀜𑀸𑀲𑀤𑀺𑀲𑀁 𑀓𑀺𑀘𑁆𑀘𑀁 ‘‘𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀧𑀦 𑀲𑀫𑀸𑀥𑀺𑀉𑀧𑀓𑀸𑀭𑀓𑀁 𑀢𑀤𑀦𑀼𑀭𑀽𑀧𑀓𑀺𑀘𑁆𑀘𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

‘‘𑀲𑀩𑁆𑀩𑀁 ¶ , 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬) 𑀯𑀘𑀦𑀢𑁄 𑀘𑀢𑁆𑀢𑀸𑀭𑀺𑀧𑀺 𑀅𑀪𑀺𑀫𑀼𑀔𑀁 𑀧𑀘𑁆𑀘𑀓𑁆𑀔𑀢𑁄 𑀜𑀸𑀢𑀩𑁆𑀩𑀸𑀦𑀺, 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀯𑀸 𑀜𑀸𑀡𑁂𑀦 𑀜𑀸𑀢𑀩𑁆𑀩𑀸𑀦𑀻𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀺.

𑁫𑁬𑁯. 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀸𑀦𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀪𑀸𑀕𑀸𑀦𑀺, 𑀲𑀤𑀺𑀲𑀭𑀽𑀧𑀸𑀦𑀻𑀢𑀺 𑀅𑀢𑁆𑀣𑁄.

𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀦𑁆𑀢𑀺 𑀅𑀪𑀺𑀲𑀫𑁆𑀪𑀯𑀺𑀢𑀼𑀁 𑀲𑀸𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀭𑀁, 𑀲𑀢𑁆𑀢𑀺𑀯𑀺𑀖𑀸𑀢𑁂𑀦 𑀤𑀼𑀭𑀥𑀺𑀕𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀦𑀦𑁆𑀢𑀺 𑀓𑀡𑁆𑀟𑀁. 𑀅𑀢𑀺𑀧𑀸𑀢𑁂𑀬𑁆𑀬𑀸𑀢𑀺 𑀔𑀺𑀧𑁂𑀬𑁆𑀬. 𑀓𑁄𑀝𑀺𑀬𑀸𑀢𑀺 𑀓𑀡𑁆𑀟𑀲𑁆𑀲 𑀓𑁄𑀝𑀺𑀬𑀸 𑀯𑀸𑀮𑀕𑁆𑀕𑁂𑀦. 𑀓𑁄𑀝𑀺𑀦𑁆𑀢𑀺 𑀯𑀸𑀮𑀲𑁆𑀲𑁂𑀯 𑀓𑁄𑀝𑀺𑀁. 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀧𑀝𑀺𑀫𑀼𑀔𑀪𑀸𑀯𑁂𑀦 𑀯𑀺𑀚𑁆𑀛𑁂𑀬𑁆𑀬.

𑀩𑀸𑀥𑀓𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑁂𑀳𑀺 𑀯𑀯𑀢𑁆𑀣𑀸𑀦𑀁 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁. 𑀤𑀼𑀭𑀯𑀕𑀸𑀳𑀢𑁆𑀣𑁂𑀦 𑀕𑀫𑁆𑀪𑀻𑀭𑀢𑁆𑀢𑀸𑀢𑀺 𑀑𑀴𑀸𑀭𑀺𑀓𑀸 𑀤𑀼𑀓𑁆𑀔𑀲𑀫𑀼𑀤𑀬𑀸. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀳𑀺 𑀤𑀼𑀓𑁆𑀔𑀁, 𑀆𑀳𑀸𑀭𑀸𑀤𑀻𑀲𑀼 𑀘 𑀅𑀪𑀺𑀮𑀸𑀲𑁄 𑀧𑀸𑀓𑀝𑁄. 𑀧𑀻𑀴𑀦𑀸𑀤𑀺𑀆𑀬𑀽𑀳𑀦𑀸𑀤𑀺𑀯𑀲𑁂𑀦 𑀧𑀦 ‘‘𑀇𑀤𑀁 𑀤𑀼𑀓𑁆𑀔𑀁, 𑀇𑀤𑀫𑀲𑁆𑀲 𑀓𑀸𑀭𑀡’’𑀦𑁆𑀢𑀺 𑀬𑀸𑀣𑀸𑀯𑀢𑁄 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀕𑀫𑁆𑀪𑀻𑀭𑀸. 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀢𑁆𑀢𑀸 𑀦𑀺𑀭𑁄𑀥𑀫𑀕𑁆𑀕𑀸 𑀲𑀪𑀸𑀯𑀢𑁄 𑀏𑀯 𑀕𑀫𑁆𑀪𑀻𑀭𑀝𑁆𑀞𑁂𑀦 𑀤𑀼𑀭𑀯𑀕𑀸𑀳𑀸. 𑀢𑁂𑀦𑁂𑀯 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑁂 𑀦𑀢𑁆𑀣𑀺 𑀦𑀺𑀭𑁄𑀥𑀫𑀕𑁆𑀕𑀸𑀦𑀁 𑀅𑀦𑀯𑀕𑀸𑀳𑁄𑀢𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀫𑀕𑁆𑀕𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀢𑀲𑁆𑀲 𑀨𑀮𑀦𑁆𑀢𑀺 𑀅𑀧𑀤𑀺𑀲𑀻𑀬𑀢𑀻𑀢𑀺 𑀆𑀳 ‘‘𑀨𑀮𑀸𑀧𑀤𑁂𑀲𑀢𑁄’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯). 𑀫𑀕𑁆𑀕𑁄𑀧𑀺 𑀦𑀺𑀭𑁄𑀥𑀲𑁆𑀲 𑀲𑀫𑁆𑀧𑀸𑀧𑀓𑀪𑀸𑀯𑀢𑁄 ‘‘𑀳𑁂𑀢𑀽’’𑀢𑀺 ¶ 𑀅𑀧𑀤𑀺𑀲𑀻𑀬𑀢𑀻𑀢𑀺 𑀆𑀳 ‘‘𑀳𑁂𑀢𑀼𑀅𑀧𑀤𑁂𑀲𑀢𑁄’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯).

𑀇𑀢𑀺 𑀏𑀯𑀁 𑀧𑀓𑀸𑀭𑁂𑀳𑀻𑀢𑀺 𑀇𑀢𑀺 𑀯𑀺𑀚𑀜𑁆𑀜𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀇𑀢𑀺𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀓𑀸𑀭𑁂𑀳𑀻𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑀸𑀭𑀡𑀪𑀽𑀢𑁂𑀦 𑀏𑀯.

𑀲𑀪𑀸𑀕𑀯𑀺𑀲𑀪𑀸𑀕𑀢𑁄𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑁄𑀴𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁭. 𑀧𑀜𑁆𑀜𑀸𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁫𑁭𑁦. 𑀇𑀫𑀺𑀲𑁆𑀲𑀸 ¶ ¶ 𑀧𑀜𑁆𑀜𑀸𑀬𑀸𑀢𑀺 𑀇𑀫𑀺𑀲𑁆𑀲𑀸 𑀬𑀣𑀸𑀥𑀺𑀕𑀢𑀸𑀬 𑀯𑀺𑀧𑀲𑁆𑀲𑀦𑀸𑀬. 𑀪𑀽𑀫𑀺𑀪𑀽𑀢𑁂𑀲𑀽𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂𑀲𑀼. 𑀓𑀸𑀫𑀜𑁆𑀘𑀸𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀲𑀫𑀜𑁆𑀜𑀸 𑀧𑀺𑀢𑀸𑀧𑀼𑀢𑁆𑀢𑀲𑀫𑀜𑁆𑀜𑀸 𑀯𑀺𑀬 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀸, 𑀳𑁂𑀢𑀼𑀨𑀮𑀥𑀫𑁆𑀫𑁂𑀲𑀼 𑀧𑀦 𑀬𑀣𑀸𑀓𑁆𑀓𑀫𑀁 𑀯𑀯𑀢𑁆𑀣𑀺𑀢𑀸𑀯𑀸𑀢𑀺 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑁆𑀚 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦𑀸𑀢𑀺 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀆𑀤𑀺𑀲𑀤𑁆𑀤𑁂𑀦. 𑀅𑀯𑀲𑁂𑀲𑀸 𑀳𑁄𑀦𑁆𑀢𑀺, 𑀲𑀁𑀯𑀡𑁆𑀡𑀦𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑁂𑀲𑀁 𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑀅𑀯𑀺𑀚𑁆𑀚𑀸𑀤𑀬𑁄 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀦 𑀲𑀫𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁. 𑀲𑁆𑀯𑀸𑀬𑀫𑀢𑁆𑀣𑁄 𑀇𑀫𑀺𑀦𑀸 𑀲𑀼𑀢𑁆𑀢𑀧𑀤𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀚𑀭𑀸𑀫𑀭𑀡𑀸𑀤𑀬𑁄 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀼𑀮𑁄𑀫𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀥𑀫𑁆𑀫𑀸 𑀤𑀲𑁆𑀲𑀺𑀢𑀸, 𑀧𑀝𑀺𑀮𑁄𑀫𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺? 𑀬𑀢𑁄 𑀢𑁂 𑀧𑀘𑁆𑀘𑀬𑀢𑁄 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀲𑀫𑀦𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁.

𑀦 𑀦𑀺𑀘𑁆𑀘𑀁 𑀦 𑀲𑀲𑁆𑀲𑀢𑀦𑁆𑀢𑀺 𑀅𑀦𑀺𑀘𑁆𑀘𑀁. 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀁. 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸𑀭𑀳𑀁 𑀧𑀘𑁆𑀘𑀬𑀁 𑀦𑀺𑀲𑁆𑀲𑀸𑀬 𑀲𑀳𑀺𑀢𑀫𑁂𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀔𑀬𑀦𑀲𑀪𑀸𑀯𑀁 𑀔𑀬𑀥𑀫𑁆𑀫𑀁. 𑀯𑀬𑀦𑀲𑀪𑀸𑀯𑀁 𑀯𑀬𑀥𑀫𑁆𑀫𑀁. 𑀯𑀺𑀭𑀚𑁆𑀚𑀦𑀲𑀪𑀸𑀯𑀁 𑀧𑀮𑀼𑀚𑁆𑀚𑀦𑀲𑀪𑀸𑀯𑀁 𑀯𑀺𑀭𑀸𑀕𑀥𑀫𑁆𑀫𑀁. 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀁 𑀦𑀺𑀭𑁄𑀥𑀥𑀫𑁆𑀫𑀁. 𑀲𑁂𑀲𑀁 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁫𑁭𑁧. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼. 𑀲𑀗𑁆𑀔𑁂𑀧𑁄𑀢𑀺 𑀅𑀢𑁆𑀣𑀲𑀗𑁆𑀔𑁂𑀧𑁄.

𑀚𑀸𑀢𑀺𑀧𑀘𑁆𑀘𑀬𑀸𑀢𑀺 𑀚𑀸𑀢𑀺𑀲𑀗𑁆𑀔𑀸𑀢𑀸 𑀧𑀘𑁆𑀘𑀬𑀸. 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺 𑀬𑀸𑀬𑀁 𑀚𑀭𑀸𑀫𑀭𑀡𑀲𑁆𑀲 𑀇𑀤𑀧𑁆𑀧𑀘𑁆𑀘𑀬𑀢𑀸 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺, 𑀏𑀲𑀸 𑀥𑀸𑀢𑀼 𑀏𑀲 𑀲𑀪𑀸𑀯𑁄. 𑀲𑀸 ¶ 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂, 𑀉𑀤𑁆𑀥𑀜𑁆𑀘 𑀅𑀯𑀺𑀜𑁆𑀜𑀸𑀬𑀫𑀸𑀦𑁄, 𑀫𑀚𑁆𑀛𑁂 𑀘 𑀯𑀺𑀜𑁆𑀜𑀸𑀬𑀫𑀸𑀦𑁄, 𑀦 𑀢𑀣𑀸𑀕𑀢𑁂𑀳𑀺 𑀉𑀧𑁆𑀧𑀸𑀤𑀺𑀢𑁄, 𑀅𑀣 𑀔𑁄 𑀲𑀫𑁆𑀪𑀯𑀦𑁆𑀢𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀲𑀩𑁆𑀩𑀓𑀸𑀮𑀁 𑀚𑀸𑀢𑀺𑀧𑀘𑁆𑀘𑀬𑀢𑁄 𑀲𑀫𑁆𑀪𑀯𑁄𑀢𑀺 𑀞𑀺𑀢𑀸 𑀏𑀯. 𑀓𑁂𑀯𑀮𑀁 𑀧𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 ¶ 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀢𑁄, ‘‘𑀅𑀬𑀁 𑀥𑀫𑁆𑀫𑁄 𑀢𑀣𑀸𑀕𑀢𑁂𑀦 𑀅𑀥𑀺𑀕𑀢𑁄’’𑀢𑀺 𑀧𑀯𑁂𑀤𑀦𑀢𑁄 𑀘 𑀢𑀣𑀸𑀕𑀢𑁄 ‘‘𑀥𑀫𑁆𑀫𑀲𑁆𑀲𑀸𑀫𑀻’’𑀢𑀺 𑀯𑀼𑀘𑁆𑀘𑀢𑀺 𑀦 𑀅𑀧𑀼𑀩𑁆𑀩𑀲𑁆𑀲 𑀉𑀧𑁆𑀧𑀸𑀤𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺. 𑀲𑀸 𑀏𑀯 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀏𑀢𑁆𑀣 𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑀢𑁄 𑀏𑀯𑀁 𑀅𑀯𑀩𑀼𑀚𑁆𑀛𑀫𑀸𑀦𑀲𑁆𑀲 𑀏𑀢𑀲𑁆𑀲 𑀲𑀪𑀸𑀯𑀲𑁆𑀲, 𑀳𑁂𑀢𑀼𑀦𑁄 𑀯𑀸 𑀢𑀣𑁂𑀯 𑀪𑀸𑀯𑀢𑁄 𑀞𑀺𑀢𑀢𑀸𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀸. 𑀚𑀸𑀢𑀺 𑀯𑀸 𑀚𑀭𑀸𑀫𑀭𑀡𑀲𑁆𑀲 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀧𑀯𑀢𑁆𑀢𑀆𑀬𑀽𑀳𑀦𑀲𑀁𑀬𑁄𑀕𑀧𑀮𑀺𑀩𑁄𑀥𑀲𑀫𑀼𑀤𑀬𑀳𑁂𑀢𑀼𑀧𑀘𑁆𑀘𑀬𑀝𑁆𑀞𑀺𑀢𑀻𑀢𑀺 𑀢𑀤𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦𑀲𑁆𑀲𑀸 𑀞𑀺𑀢𑀢𑀸 ‘‘𑀥𑀫𑁆𑀫𑀝𑁆𑀞𑀺𑀢𑀢𑀸’’𑀢𑀺 𑀨𑀮𑀁 𑀧𑀢𑀺𑀲𑀸𑀫𑀢𑁆𑀣𑀺𑀬𑀢𑁄 𑀳𑁂𑀢𑀼𑀫𑁂𑀯 𑀯𑀤𑀢𑀺.

𑀅𑀣 𑀯𑀸 𑀥𑀸𑀭𑀻𑀬𑀢𑀺 𑀧𑀘𑁆𑀘𑀬𑁂𑀳𑀻𑀢𑀺 𑀥𑀫𑁆𑀫𑁄, 𑀢𑀺𑀝𑁆𑀞𑀢𑀺 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀦𑁆𑀢𑀺 𑀞𑀺𑀢𑀺, 𑀥𑀫𑁆𑀫𑀲𑁆𑀲 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺. 𑀥𑀫𑁆𑀫𑁄𑀢𑀺 𑀯𑀸 𑀓𑀸𑀭𑀡𑀁, 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁆𑀲 𑀞𑀺𑀢𑀺𑀲𑀪𑀸𑀯𑁄, 𑀥𑀫𑁆𑀫𑀢𑁄 𑀘 𑀅𑀜𑁆𑀜𑁄 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑁄. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁫). 𑀥𑀫𑁆𑀫𑀝𑁆𑀞𑀺𑀢𑀺 𑀏𑀯 𑀥𑀫𑁆𑀫𑀝𑁆𑀞𑀺𑀢𑀢𑀸. 𑀲𑀸 𑀏𑀯 𑀥𑀸𑀢𑀼 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀇𑀫𑀲𑁆𑀲 𑀲𑀪𑀸𑀯𑀲𑁆𑀲, 𑀳𑁂𑀢𑀼𑀦𑁄 𑀯𑀸 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑀢𑁄 ‘‘𑀦 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀲𑁆𑀲 𑀢𑀩𑁆𑀪𑀸𑀯𑀸𑀪𑀸𑀯𑀢𑁄 𑀦𑀺𑀬𑀸𑀫𑀢𑀸 𑀯𑀯𑀢𑁆𑀣𑀺𑀢𑀪𑀸𑀯𑁄𑀢𑀺 𑀥𑀫𑁆𑀫𑀦𑀺𑀬𑀸𑀫𑀢𑀸. 𑀨𑀮𑀲𑁆𑀲 𑀯𑀸 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀬𑀸 𑀲𑀢𑀺 𑀲𑀫𑁆𑀪𑀯𑁄 𑀥𑀫𑁆𑀫𑁂 𑀳𑁂𑀢𑀼𑀫𑁆𑀳𑀺 𑀞𑀺𑀢𑀢𑀸𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀸. 𑀅𑀲𑀢𑀺 𑀅𑀲𑀫𑁆𑀪𑀯𑁄 𑀥𑀫𑁆𑀫𑁂 𑀦𑀺𑀬𑀢𑀢𑀸𑀢𑀺 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 𑀏𑀯𑀁 𑀨𑀮𑁂𑀦 𑀳𑁂𑀢𑀼𑀁 𑀯𑀺𑀪𑀸𑀯𑁂𑀢𑀺. 𑀢𑀁 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁦) 𑀯𑀼𑀢𑁆𑀢𑀁 𑀇𑀤𑀧𑁆𑀧𑀘𑁆𑀘𑀬𑀢𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀅𑀪𑀺𑀫𑀼𑀔𑀁 𑀩𑀼𑀚𑁆𑀛𑀢𑀺 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀪𑀺𑀲𑀫𑁂𑀢𑀻𑀢𑀺 𑀢𑀲𑁆𑀲 𑀯𑁂𑀯𑀘𑀦𑀁. 𑀆𑀤𑀺𑀢𑁄 𑀓𑀣𑁂𑀦𑁆𑀢𑁄 𑀆𑀘𑀺𑀓𑁆𑀔𑀢𑀺, 𑀉𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀉𑀤𑁆𑀤𑁂𑀲𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄 𑀤𑁂𑀲𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀧𑀓𑀸𑀭𑁂𑀳𑀺 𑀜𑀸𑀧𑁂𑀦𑁆𑀢𑀸 𑀧𑀜𑁆𑀜𑀧𑁂𑀢𑀺. 𑀧𑀓𑀸𑀭𑁂𑀳𑀺𑀬𑁂𑀯 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀧𑀝𑁆𑀞𑀧𑁂𑀢𑀺. 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀧𑀝𑀺𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺, 𑀯𑀺𑀯𑀝𑀜𑁆𑀳𑀺 𑀯𑀺𑀪𑀢𑁆𑀢𑀜𑁆𑀘 𑀅𑀢𑁆𑀣𑀁 𑀳𑁂𑀢𑀼𑀥𑀸𑀭𑀡𑀤𑀲𑁆𑀲𑀦𑁂𑀳𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀢𑀺. 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑁄 𑀢𑀣𑀸𑀧𑀘𑁆𑀘𑀓𑁆𑀔𑀪𑀽𑀢𑀁 𑀓𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀧𑀲𑁆𑀲𑀣𑀸𑀢𑀺 𑀘𑀸𑀳.

𑁫𑁭𑁨. 𑀧𑀘𑁆𑀘𑀬𑀮𑀓𑁆𑀔𑀡𑁄𑀢𑀺 𑀧𑀘𑁆𑀘𑀬𑀪𑀸𑀯𑀮𑀓𑁆𑀔𑀡𑁄, 𑀧𑀘𑁆𑀘𑀬𑁄𑀢𑀺 𑀯𑀸 𑀮𑀓𑁆𑀔𑀺𑀢𑀩𑁆𑀩𑁄. 𑀧𑀯𑀢𑁆𑀢𑀺𑀤𑀼𑀓𑁆𑀔𑀲𑁆𑀲 ¶ 𑀅𑀦𑀼𑀩𑀦𑁆𑀥𑀸𑀧𑀦𑀓𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀦𑀭𑀲𑁄. 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀲𑁆𑀲 𑀉𑀧𑁆𑀧𑀣𑀪𑀸𑀯𑀢𑁄 𑀓𑀼𑀫𑁆𑀫𑀕𑁆𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀲𑁄 ¶ 𑀧𑀦𑀸𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀬𑀸𑀯𑀢𑁆𑀢𑀓𑁂𑀳𑀺 𑀧𑀘𑁆𑀘𑀬𑁂𑀳𑀺 𑀬𑀁 𑀨𑀮𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀁, 𑀅𑀯𑀺𑀓𑀮𑁂𑀳𑁂𑀯 𑀢𑁂𑀳𑀺 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀢𑀤𑀜𑁆𑀜𑁂𑀦 𑀘 𑀢𑀲𑁆𑀲 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀦𑀽𑀦𑀸𑀥𑀺𑀓𑁂𑀳𑁂𑀯𑀸’’𑀢𑀺. 𑀬𑀣𑀸 𑀢𑀁 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲, 𑀏𑀢𑁂𑀦 𑀢𑀁𑀢𑀁𑀨𑀮𑀦𑀺𑀧𑁆𑀨𑀸𑀤𑀦𑁂𑀦 𑀢𑀲𑁆𑀲𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀢𑀧𑁆𑀧𑀭𑀢𑀸 𑀢𑀣𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀫𑀕𑁆𑀕𑀺𑀦𑁆𑀢𑀺 𑀲𑀫𑁄𑀥𑀸𑀦𑀁, 𑀲𑀫𑀯𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀪𑀯𑀸𑀪𑀸𑀯𑀢𑁄𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑀲𑁆𑀲 𑀅𑀪𑀸𑀯𑀢𑁄. 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀜𑁆𑀳𑀺 𑀲𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑁂 𑀢𑀲𑁆𑀲𑀸 𑀯𑀺𑀢𑀣𑀢𑀸 𑀲𑀺𑀬𑀸. 𑀅𑀜𑁆𑀜𑀥𑀫𑁆𑀫𑀧𑁆𑀧𑀘𑁆𑀘𑀬𑁂𑀳𑀻𑀢𑀺 𑀅𑀜𑁆𑀜𑀲𑁆𑀲 𑀨𑀮𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁂𑀳𑀺. 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀨𑀮𑀥𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀦 𑀳𑀺 𑀓𑀤𑀸𑀘𑀺 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑁂𑀳𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄 𑀅𑀢𑁆𑀣𑀺, 𑀬𑀤𑀺 𑀲𑀺𑀬𑀸, 𑀢𑀲𑁆𑀲𑀸 𑀲𑀸𑀫𑀕𑁆𑀕𑀺𑀬𑀸 𑀅𑀜𑁆𑀜𑀣𑀢𑀸 𑀦𑀸𑀫 𑀲𑀺𑀬𑀸, 𑀦 𑀘𑁂𑀢𑀁 𑀅𑀢𑁆𑀣𑀻𑀢𑀺 ‘‘𑀅𑀦𑀜𑁆𑀜𑀣𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀢𑁄𑀢𑀺 𑀧𑀘𑁆𑀘𑀬𑀪𑀸𑀯𑀢𑁄. 𑀧𑀘𑁆𑀘𑀬𑀲𑀫𑀽𑀳𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁫𑁭𑁩. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀢𑀸-𑀲𑀤𑁆𑀤𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁, 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀦𑁆𑀢𑀭𑀁 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸𑀢𑀺. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀲𑀫𑀽𑀳𑀢𑁆𑀣𑀁 𑀢𑀸-𑀲𑀤𑁆𑀤𑀫𑀸𑀳 𑀬𑀣𑀸 ‘‘𑀚𑀦𑀸𑀦𑀁 𑀲𑀫𑀽𑀳𑁄 𑀚𑀦𑀢𑀸’’𑀢𑀺. 𑀦𑀦𑀼 𑀘 ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁯𑁬) 𑀚𑀸𑀢𑀺𑀲𑀤𑁆𑀤𑀧𑀘𑁆𑀘𑀬𑀲𑀤𑁆𑀤𑀲𑀫𑀸𑀦𑀸𑀥𑀺𑀓𑀭𑀡𑁂𑀦 𑀓𑀺𑀁-𑀲𑀤𑁆𑀤𑁂𑀦 𑀇𑀤𑀁𑀲𑀤𑁆𑀤𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀤𑀲𑁆𑀲𑀦𑀢𑁄 𑀇𑀤𑀧𑁆𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀤𑀺𑀲𑁆𑀲𑀢𑀺, 𑀦 𑀳𑁂𑀢𑁆𑀣 ‘‘𑀇𑀫𑀲𑁆𑀲 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸’’𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀧𑀘𑁆𑀘𑀬𑀢𑁄 𑀚𑀭𑀸𑀫𑀭𑀡𑀲𑀫𑁆𑀪𑀯𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀺 𑀯𑀺𑀤𑀺𑀢𑀪𑀸𑀯𑀢𑁄, 𑀅𑀲𑀫𑁆𑀪𑀯𑀢𑁄 𑀘, 𑀚𑀭𑀸𑀫𑀭𑀡𑀲𑁆𑀲 𑀧𑀦 𑀧𑀘𑁆𑀘𑀬𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀧𑀘𑁆𑀘𑀬-𑀲𑀤𑁆𑀤𑁂𑀦 𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀇𑀤𑀁-𑀲𑀤𑁆𑀤𑀲𑁆𑀲 𑀇𑀫𑀲𑁆𑀫𑀸 𑀧𑀘𑁆𑀘𑀬𑀸𑀢𑀺 𑀧𑀘𑁆𑀘𑀬𑀧𑀼𑀘𑁆𑀙𑀸 𑀬𑀼𑀚𑁆𑀚𑀢𑀺. 𑀲𑀸 𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁂𑀧𑀺 𑀮𑀩𑁆𑀪𑀢𑀺. 𑀢𑀢𑁄 𑀘 𑀅𑀜𑁆𑀜𑀧𑀤𑀢𑁆𑀣𑀯𑀘𑀦𑀺𑀘𑁆𑀙𑀸𑀪𑀸𑀯𑁂 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀮𑀩𑁆𑀪𑀢𑀺.

𑀲𑀸𑀫𑀺𑀯𑀘𑀦𑀲𑀫𑀸𑀲𑁂 𑀧𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦𑀢𑁆𑀣𑀻𑀢𑀺 𑀦 𑀓𑀣𑀜𑁆𑀘𑀺 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀲𑀫𑁆𑀪𑀯𑁄𑀢𑀺? 𑀦𑀬𑀺𑀤𑀫𑁂𑀯𑀁 𑀯𑀘𑀦𑀺𑀘𑁆𑀙𑀦𑁆𑀢𑀭𑀪𑀸𑀯𑀢𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀘𑀦𑀺𑀘𑁆𑀙𑀸 𑀳𑁂𑀲𑀸 ‘‘𑀇𑀤𑀧𑁆𑀧𑀘𑁆𑀘𑀬𑀢𑀸 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁆𑀣. ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 ¶ 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀢𑁆𑀣 𑀧𑀦 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀫𑀢𑁆𑀢𑀧𑀭𑀺𑀧𑀼𑀘𑁆𑀙𑀸, 𑀢𑀲𑁆𑀫𑀸 𑀬𑀣𑀸 𑀇𑀤𑀁-𑀲𑀤𑁆𑀤𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀲𑁂𑀲𑀦𑀢𑀸, 𑀧𑀼𑀘𑁆𑀙𑀺𑀢𑀩𑁆𑀩𑀧𑀘𑁆𑀘𑀬𑀯𑀺𑀲𑁂𑀲𑀦𑀢𑀸 𑀘 𑀳𑁄𑀢𑀺, 𑀢𑀣𑀸 𑀲𑀫𑀸𑀲𑀯𑀺𑀓𑀧𑁆𑀧𑁄 𑀏𑀢𑁆𑀣, 𑀢𑀢𑁆𑀣 𑀘 𑀓𑀸𑀢𑀩𑁆𑀩𑁄𑀢𑀺 𑀦 𑀲𑀫𑀸𑀲𑀦𑁆𑀢𑀭𑀤𑀲𑁆𑀲𑀦𑀁 𑀲𑀸𑀫𑀺𑀯𑀘𑀦𑀲𑀫𑀸𑀲𑀩𑀸𑀥𑀓𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣𑀸𑀧𑀺 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀦 𑀇𑀘𑁆𑀙𑀺𑀢𑁄𑀢𑀺? 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀅𑀲𑀫𑁆𑀪𑀯𑀢𑁄, ‘‘𑀇𑀫𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀅𑀦𑀼𑀭𑀽𑀧𑁄 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄’’𑀢𑀺 𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀬𑁄 𑀧𑀦𑁂𑀢𑁆𑀣 𑀇𑀤𑀁-𑀲𑀤𑁆𑀤𑁂𑀦 𑀕𑀳𑀺𑀢𑁄 𑀅𑀢𑁆𑀣𑁄, 𑀲𑁄 ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀢𑁆𑀣 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄𑀢𑀺 𑀇𑀤𑀁-𑀲𑀤𑁆𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑁄 𑀅𑀪𑀲𑁆𑀲𑀺𑀢𑁆𑀯𑀸 𑀅𑀜𑁆𑀜𑀸𑀲𑀫𑁆𑀪𑀯𑀢𑁄 𑀧𑀘𑁆𑀘𑀬𑁂 𑀅𑀯𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄. 𑀏𑀢𑁆𑀣 𑀧𑀦 𑀇𑀤𑀁-𑀲𑀤𑁆𑀤𑀲𑁆𑀲 𑀢𑀢𑁄 𑀧𑀭𑀺𑀘𑁆𑀘𑀚𑀦𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀲𑀸𑀫𑀺𑀯𑀘𑀦𑀲𑀫𑀸𑀲𑁄 𑀏𑀯. 𑀏𑀯𑀫𑁆𑀧𑀺 𑀦 𑀇𑀤𑀧𑁆𑀧𑀘𑁆𑀘𑀬𑁄 𑀏𑀯 𑀇𑀤𑀧𑁆𑀧𑀘𑁆𑀘𑀬𑀪𑀸𑀯𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑀸𑀦𑀼𑀧𑀧𑀢𑁆𑀢𑀻𑀢𑀺? 𑀦𑀸𑀬𑀁 𑀤𑁄𑀲𑁄 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀅𑀣 𑀯𑀸 𑀧𑀦 𑀳𑁄𑀢𑀼 𑀇𑀤𑀧𑁆𑀧𑀘𑁆𑀘𑀬𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺. 𑀪𑀸𑀯𑁄𑀢𑀺 𑀘𑁂𑀢𑁆𑀣 𑀅𑀯𑀺𑀦𑀸𑀪𑀸𑀯𑀺𑀨𑀮𑀁 𑀧𑀢𑀺 𑀳𑁂𑀢𑀼𑀦𑁄 𑀲𑀢𑁆𑀯𑀁. 𑀢𑀣𑀸 𑀳𑀺 𑀇𑀤𑀧𑁆𑀧𑀘𑁆𑀘𑀬-𑀲𑀤𑁆𑀤𑁄 𑀚𑀸𑀢𑀺𑀆𑀤𑀻𑀲𑀼 𑀦𑀺𑀭𑀼𑀴𑁆𑀳𑁄. 𑀢𑀜𑁆𑀘 𑀇𑀤𑀧𑁆𑀧𑀘𑁆𑀘𑀬𑀲𑀢𑁆𑀯𑀁 𑀇𑀤𑀧𑁆𑀧𑀘𑁆𑀘𑀬𑀢𑁄 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀤𑀺 𑀅𑀜𑁆𑀜𑀁 𑀲𑀺𑀬𑀸, 𑀢𑀁 𑀅𑀯𑀺𑀚𑁆𑀚𑀫𑀸𑀦𑀁 𑀲𑀺𑀬𑀸. 𑀦 𑀳𑀺 𑀲𑀢𑀸 𑀅𑀜𑁆𑀜𑀁 𑀯𑀺𑀚𑁆𑀚𑀫𑀸𑀦𑀁 𑀳𑁄𑀢𑀺. 𑀅𑀣 𑀲𑀢𑁆𑀯𑀁 𑀲𑀁 𑀦𑀸𑀫, 𑀬𑀲𑁆𑀲 𑀲𑀢𑁄 𑀪𑀸𑀯𑁄, 𑀢𑀁 𑀅𑀲𑀁 𑀦𑀸𑀫 𑀲𑀺𑀬𑀸. 𑀦 𑀳𑀺 𑀢𑀁 𑀲𑀢𑁆𑀯𑀁 𑀲𑀪𑀸𑀯𑀁 𑀲𑀢𑁆𑀯𑀢𑁄 𑀅𑀜𑁆𑀜𑀢𑁆𑀢𑀸, 𑀢𑀲𑁆𑀫𑀸 𑀲𑀢𑁄 𑀪𑀸𑀯𑁄 𑀲𑀢𑁆𑀯𑀦𑁆𑀢𑀺 𑀦𑀺𑀤𑁆𑀤𑁂𑀲𑁄 𑀦 𑀬𑀼𑀚𑁆𑀚𑀢𑀺. 𑀦 𑀘 𑀲𑀁-𑀲𑀫𑁆𑀩𑀦𑁆𑀥𑁂𑀦 𑀅𑀲𑀁 𑀲𑀁 𑀦𑀸𑀫 𑀳𑁄𑀢𑀺, 𑀧𑀕𑁂𑀯 𑀲𑀁-𑀲𑀫𑁆𑀩𑀦𑁆𑀥𑁂𑀦. 𑀅𑀲𑀢𑀺 𑀘 𑀲𑀤𑀺𑀢𑀺𑀕𑁆𑀕𑀳𑀡𑀁 𑀯𑀺𑀧𑀭𑀻𑀢𑀕𑁆𑀕𑀸𑀳𑁄𑀢𑀺 𑀦 𑀕𑀳𑀡𑀢𑁄 𑀲𑀁𑀲𑀺𑀤𑁆𑀥𑀺. 𑀲𑀤𑀺𑀲𑀓𑀧𑁆𑀧𑀦𑀸𑀬𑀜𑁆𑀘 𑀫𑀸𑀡𑀯𑀓𑀲𑁆𑀲 𑀲𑀻𑀳𑀪𑀸𑀯𑁄 𑀯𑀺𑀬 𑀦 𑀅𑀲𑀢𑁄 𑀲𑀁-𑀲𑀪𑀸𑀯𑀢𑀸. 𑀬𑀲𑁆𑀫𑀸 𑀧𑀦 𑀇𑀤𑀧𑁆𑀧𑀘𑁆𑀘𑀬𑀪𑀸𑀯𑁄 𑀬𑀣𑀸𑀯𑀼𑀢𑁆𑀢𑀁 𑀲𑀢𑁆𑀯𑀁, 𑀦 𑀅𑀲𑀢𑁆𑀯𑀁. 𑀦𑀸𑀧𑀺 𑀬𑀲𑁆𑀲 𑀢𑀁 𑀲𑀢𑁆𑀯𑀁, 𑀢𑀤𑀲𑀁, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀲𑀭𑀽𑀧𑀁 𑀲𑀪𑀸𑀯𑀦𑁆𑀢𑀭𑁂𑀳𑀺 𑀯𑀺𑀦𑀺𑀯𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀫𑀲𑁆𑀲𑀸𑀬𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀸𑀲𑀫𑁆𑀪𑀯𑁄.

𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀢𑀲𑁆𑀲𑀸𑀧𑀺 𑀳𑁂𑀢𑀼𑀅𑀢𑁆𑀣𑀪𑀸𑀯𑀢𑁄 𑀚𑀸𑀢𑀺𑀆𑀤𑀺𑀧𑀤𑀸𑀦𑀁 𑀏𑀯𑀫𑁂𑀯 𑀳𑁂𑀢𑀼𑀪𑀸𑀯𑀯𑀸𑀘𑀓𑀢𑀸𑀬 𑀳𑁂𑀢𑀼𑀧𑀥𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀓𑀢𑁆𑀯𑀸 ¶ . 𑀢𑀣𑀸 𑀳𑀺 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 ¶ 𑀲𑀫𑀦𑁆𑀦𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺 𑀬𑀸𑀯 ‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺 (𑀲𑀁. 𑀦𑀺. 𑁨.𑁨𑁧-𑁨𑁨) 𑀅𑀦𑁂𑀦 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀧𑀓𑀸𑀲𑀺𑀢𑁄 𑀏𑀯𑀫𑀢𑁆𑀣𑁄. ‘‘𑀓𑀺𑀁 𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸 𑀓𑀺𑀫𑀓𑁆𑀔𑀸𑀬𑀻’’𑀢𑀺 𑀧𑀼𑀝𑁆𑀞𑁂𑀦 𑀆𑀬𑀲𑁆𑀫𑀢𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑁋

‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳;

𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄, 𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄’’𑀢𑀺. (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬) 𑁋

𑀯𑀼𑀢𑁆𑀢𑁄. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀳𑁂𑀢𑀼𑀧𑁆𑀧𑀪𑀯𑀸𑀦𑀁 𑀳𑁂𑀢𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁫𑁭𑁪. 𑀧𑀝𑀺𑀘𑁆𑀘𑀸𑀢𑀺 𑀢𑀁 𑀢𑀁 𑀓𑀸𑀭𑀡𑀁 𑀦𑀺𑀲𑁆𑀲𑀸𑀬. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀺𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄𑀢𑀺 𑀓𑀢𑁆𑀯𑀸. 𑀦𑀺𑀘𑁆𑀘𑀢𑁄 𑀳𑀺 𑀓𑀸𑀭𑀡𑀢𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑁄 𑀯𑀺𑀧𑀭𑀻𑀢𑁄. 𑀢𑁂𑀦𑀸𑀳 ‘‘𑀢𑀺𑀢𑁆𑀣𑀺𑀬…𑀧𑁂… 𑀦𑀺𑀭𑀧𑁂𑀓𑁆𑀔𑁄’’𑀢𑀺. ‘‘𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁩.𑁩𑁮; 𑀅. 𑀦𑀺. 𑁩.𑁪𑁭; 𑀓𑀣𑀸. 𑁨𑁧𑁪) 𑀏𑀯𑀁 𑀯𑀼𑀢𑁆𑀢𑀲𑀗𑁆𑀔𑀢𑀮𑀓𑁆𑀔𑀡𑀢𑁄 𑀅𑀜𑁆𑀜𑁄 ‘‘𑀧𑀘𑁆𑀘𑀬𑀢𑁄 𑀔𑀡𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀘𑁆𑀘𑀬𑀮𑀓𑁆𑀔𑀡𑁄 𑀏𑀓𑁄 𑀆𑀓𑀸𑀭𑁄 𑀉𑀧𑁆𑀧𑀸𑀤𑁄𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀲𑀦𑁆𑀥𑀸𑀬 𑀢𑁂 ‘‘𑀚𑀸𑀢𑀺𑀆𑀤𑀻𑀦𑀁 𑀳𑁂𑀢𑀯𑁄 𑀚𑀸𑀢𑀺𑀆𑀤𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀁 𑀦 𑀬𑀼𑀚𑁆𑀚𑀢𑀻’’𑀢𑀺𑀆𑀤𑀺. 𑀕𑀫𑁆𑀪𑀻𑀭𑀦𑀬𑀸𑀲𑀫𑁆𑀪𑀯𑀢𑁄𑀢𑀺 𑀕𑀫𑁆𑀪𑀻𑀭𑀸𑀦𑀁 𑀦𑀬𑀸𑀦𑀜𑁆𑀘 𑀅𑀲𑀫𑁆𑀪𑀯𑀢𑁄. 𑀲𑀤𑁆𑀤𑀪𑁂𑀤𑀢𑁄𑀢𑀺 𑀲𑀤𑁆𑀤𑀯𑀺𑀦𑀸𑀲𑀢𑁄 𑀲𑀤𑁆𑀤𑀸𑀬𑁄𑀕𑀢𑁄. 𑀲𑀼𑀢𑁆𑀢𑀁 𑀦𑀢𑁆𑀣𑀺 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑁂𑀳𑀺 (𑀲𑀁. 𑀦𑀺. 𑁨.𑁧, 𑁨𑁦) 𑀉𑀧𑁆𑀧𑀸𑀤𑀫𑀢𑁆𑀢𑀲𑁆𑀲 𑀅𑀧𑁆𑀧𑀓𑀸𑀲𑀺𑀢𑀢𑁆𑀢𑀸. 𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀇𑀤𑀸𑀦𑀺𑀧𑀺 𑀤𑀲𑁆𑀲𑀻𑀬𑀢𑀺. 𑀢𑀁 𑀉𑀧𑁆𑀧𑀸𑀤𑀫𑀢𑁆𑀢𑀁. 𑀯𑀺𑀳𑀭𑀸𑀫𑀺 𑀢𑀲𑁆𑀫𑀺𑀁 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀳𑀭𑀸𑀫𑀻𑀢𑀺 𑀯𑀸 𑀓𑀸𑀮𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀯𑀺𑀳𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑀯𑀺𑀳𑀸𑀭𑁂. 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀬𑀥𑀫𑁆𑀫𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀧𑀘𑁆𑀘𑀬𑀸𑀓𑀸𑀭𑁄 𑀧𑀘𑁆𑀘𑀬𑀪𑀸𑀯𑁄, 𑀢𑀲𑁆𑀲 𑀤𑀲𑁆𑀲𑀦𑁂𑀦. 𑀇𑀥 𑀧𑀦 𑀯𑁂𑀤𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ¶ ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺𑀆𑀤𑀺. 𑀯𑁂𑀤𑀦𑀸𑀦𑀁𑀬𑁂𑀯 𑀳𑀺 𑀧𑀘𑁆𑀘𑀬𑀁 𑀧𑀲𑁆𑀲𑀦𑁆𑀢𑁂𑀦 𑀯𑀼𑀢𑁆𑀢𑀯𑀺𑀳𑀸𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀏𑀓𑀤𑁂𑀲𑀫𑁂𑀯 𑀧𑀲𑁆𑀲𑀢𑁄 𑀯𑀺𑀳𑀸𑀭𑁄𑀢𑀺 ¶ 𑀓𑀢𑁆𑀯𑀸 𑀧𑀤𑁂𑀲𑀯𑀺𑀳𑀸𑀭𑁄 𑀚𑀸𑀢𑁄, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀯𑀺𑀳𑀸𑀭𑁄. 𑀢𑀜𑁆𑀳𑀺 𑀦𑀺𑀧𑁆𑀧𑀤𑁂𑀲𑀢𑁄 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀏𑀓𑁂. 𑀧𑀤𑁂𑀲𑀯𑀺𑀳𑀸𑀭𑀲𑀼𑀢𑁆𑀢𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺 𑀢𑀲𑁆𑀲 𑀯𑁂𑀤𑀦𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀫𑀦𑀲𑀺𑀓𑀸𑀭𑀯𑀺𑀪𑀸𑀯𑀦𑀢𑁄.

𑀮𑁄𑀓𑁄 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀮𑁄𑀓𑀲𑀫𑀼𑀤𑀬𑁄, 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀕𑀡𑁄, 𑀦 𑀮𑁄𑀓𑀲𑀫𑀼𑀤𑀬𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺. 𑀦𑀢𑁆𑀣𑀺𑀢𑀸𑀢𑀺 𑀲𑀩𑁆𑀩𑀲𑁄 𑀅𑀪𑀸𑀯𑁄, 𑀦𑀭𑀦𑁆𑀯𑀬𑀯𑀺𑀦𑀸𑀲𑁄 𑀉𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺𑀢𑀸𑀲𑀳𑀘𑀭𑀡𑀢𑁄 𑀧𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀢𑁆𑀣𑀺𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀘𑁆𑀘𑀬𑀸𑀦𑀼𑀧𑀭𑀫𑁄 𑀧𑀘𑁆𑀘𑀬𑀸𑀦𑀁 𑀅𑀯𑀺𑀘𑁆𑀙𑁂𑀤𑁄. 𑀬𑀣𑀸 𑀳𑀺 𑀅𑀢𑀻𑀢𑀳𑁂𑀢𑀼𑀧𑀜𑁆𑀘𑀓𑀲𑀦𑁆𑀦𑀺𑀲𑁆𑀲𑀬𑁂𑀦 𑀏𑀢𑀭𑀳𑀺𑀨𑀮𑀧𑀜𑁆𑀘𑀓𑀁 𑀯𑀺𑀬 𑀳𑁂𑀢𑀼𑀧𑀜𑁆𑀘𑀓𑀫𑁆𑀧𑀺 𑀳𑁄𑀢𑀺, 𑀏𑀯𑀁 𑀏𑀢𑀭𑀳𑀺𑀳𑁂𑀢𑀼𑀧𑀜𑁆𑀘𑀓𑀲𑀦𑁆𑀦𑀺𑀲𑁆𑀲𑀬𑁂𑀦 𑀆𑀬𑀢𑀺𑀁𑀨𑀮𑀧𑀜𑁆𑀘𑀓𑀫𑁆𑀧𑀺 𑀪𑀯𑀺𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀸𑀦𑀼𑀧𑀭𑀫𑁂 𑀨𑀮𑀸𑀦𑀼𑀧𑀭𑀫𑀢𑁄’’𑀢𑀺.

𑀢𑀁 𑀕𑀫𑁆𑀪𑀻𑀭𑀢𑁆𑀢𑀁 𑀉𑀧𑁆𑀧𑀸𑀤𑀫𑀢𑁆𑀢𑁂 𑀦𑀢𑁆𑀣𑀺 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸. 𑀏𑀓𑀢𑁆𑀢𑀦𑀬𑀸𑀤𑀬𑁄 𑀦𑀬𑀸 𑀲𑀪𑀸𑀯𑀥𑀫𑁆𑀫𑁂𑀲𑀼 𑀮𑀩𑁆𑀪𑀫𑀸𑀦𑀢𑁄 𑀉𑀧𑁆𑀧𑀸𑀤𑀫𑀢𑁆𑀢𑁂 𑀓𑀣𑀜𑁆𑀘𑀺𑀧𑀺 𑀦 𑀮𑀩𑁆𑀪𑁂𑀬𑁆𑀬𑀼𑀦𑁆𑀢𑀺 𑀆𑀳 ‘‘𑀦𑀬𑀘𑀢𑀼𑀓𑁆𑀓𑀁 𑀉𑀧𑁆𑀧𑀸𑀤𑀫𑀢𑁆𑀢𑁂 𑀦𑀢𑁆𑀣𑀻’’𑀢𑀺.

𑁫𑁭𑁫. 𑀲𑀫𑀸𑀦𑁂 𑀓𑀢𑁆𑀢𑀭𑀻𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀓𑀢𑁆𑀢𑀭𑀺 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀬𑁄 𑀓𑀢𑁆𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀧𑀘𑁆𑀘𑀬𑀦𑀓𑀺𑀭𑀺𑀬𑀸𑀬 𑀘 𑀓𑀢𑁆𑀢𑀼𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀬𑀣𑀸 ‘‘𑀦𑁆𑀳𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀪𑀼𑀢𑁆𑀯𑀸 𑀲𑀬𑀢𑀻’’𑀢𑀺. ‘‘𑀧𑀼𑀩𑁆𑀩𑀓𑀸𑀮𑁂’’𑀢𑀺 𑀇𑀤𑀜𑁆𑀘 𑀢𑁆𑀯𑀸𑀲𑀤𑁆𑀤𑀦𑁆𑀢𑀸𑀦𑀁 𑀧𑀤𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀼𑀭𑀺𑀫𑀓𑀸𑀮𑀓𑀺𑀭𑀺𑀬𑀸𑀬 𑀤𑀻𑀧𑀦𑀢𑁄 𑀯𑀼𑀢𑁆𑀢𑀁, 𑀦 𑀇𑀥 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀧𑀼𑀭𑀺𑀫𑀓𑀸𑀮𑀢𑁆𑀣𑀢𑁆𑀢𑀸. 𑀏𑀯𑀜𑁆𑀳𑀺 ‘‘𑀘𑀓𑁆𑀔𑀼𑀁 𑀧𑀝𑀺𑀘𑁆𑀘𑀸’’𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀁 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀲𑀁𑀲𑀦𑁆𑀤𑁂𑀬𑁆𑀬. 𑀅𑀣 𑀯𑀸 𑀓𑀸𑀫𑀜𑁆𑀘𑁂𑀢𑁆𑀣 𑀉𑀪𑀺𑀦𑁆𑀦𑀁 𑀓𑀺𑀭𑀺𑀬𑀸𑀦𑀁 𑀲𑀫𑀓𑀸𑀮𑀢𑀸 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀧𑀼𑀩𑁆𑀩𑁂 𑀧𑀘𑁆𑀘𑀬𑀦𑀓𑀺𑀭𑀺𑀬𑀸𑀬 𑀅𑀲𑀫𑁆𑀪𑀯𑀢𑁄, 𑀢𑀣𑀸𑀧𑀺 𑀨𑀮𑀓𑀺𑀭𑀺𑀬𑀸𑀬 𑀳𑁂𑀢𑀼𑀓𑀺𑀭𑀺𑀬𑀸 𑀧𑀼𑀭𑀺𑀫𑀓𑀸𑀮𑁄 𑀯𑀺𑀬 𑀯𑁄𑀳𑀭𑀺𑀢𑀼𑀁 𑀬𑀼𑀢𑁆𑀢𑀸. 𑀏𑀯𑀫𑁂𑀢𑁆𑀣 𑀳𑁂𑀢𑀼𑀨𑀮𑀯𑀯𑀢𑁆𑀣𑀸𑀦𑀁 𑀲𑀼𑀧𑀸𑀓𑀝𑀁 𑀳𑁄𑀢𑀻𑀢𑀺 𑀉𑀧𑀘𑀸𑀭𑀲𑀺𑀤𑁆𑀥𑀁 𑀧𑀼𑀭𑀺𑀫𑀓𑀸𑀮𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀓𑀸𑀮𑁂’’𑀢𑀺. 𑀅𑀢𑁆𑀣𑀲𑀺𑀤𑁆𑀥𑀺𑀓𑀭𑁄𑀢𑀺 𑀯𑀸𑀓𑁆𑀬𑀢𑁆𑀣𑀧𑀝𑀺𑀯𑀺𑀜𑁆𑀜𑀢𑁆𑀢𑀺𑀓𑀭𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀳𑀺 𑀏𑀢𑁆𑀣 𑀯𑀸𑀓𑁆𑀬𑀢𑁆𑀣𑀸𑀯𑀩𑁄𑀥𑁄 𑀇𑀥 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀧𑀬𑀼𑀚𑁆𑀚𑀫𑀸𑀦𑁄 𑀧𑀝𑀺𑀘𑁆𑀘𑀲𑀤𑁆𑀤𑁄 𑀉𑀧𑁆𑀧𑀸𑀤𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 ¶ 𑀲𑀫𑀸𑀦𑀲𑁆𑀲 ‘‘𑀓𑀢𑁆𑀢𑀼 𑀅𑀪𑀸𑀯𑀢𑁄’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁪; 𑁨.𑁪.𑁬𑁦; 𑀓𑀣𑀸. 𑁪𑁬𑁫) 𑀧𑀘𑁆𑀘𑀬𑀦𑀓𑀺𑀭𑀺𑀬𑀸𑀬, 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀘 𑀯𑀺𑀜𑁆𑀜𑀸𑀡𑀫𑁂𑀯 𑀓𑀢𑁆𑀢𑀸𑀢𑀺 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀮𑀩𑁆𑀪𑀢𑀺.

‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 ¶ 𑀏𑀢𑁆𑀣 𑀧𑀦 𑀉𑀧𑁆𑀧𑀸𑀤𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀢𑀸𑀬 𑀓𑀺𑀭𑀺𑀬𑀸𑀯 𑀯𑀼𑀢𑁆𑀢𑀸𑀢𑀺 𑀲𑀫𑀸𑀦𑀓𑀢𑁆𑀢𑀼𑀮𑀓𑁆𑀔𑀡𑁄 𑀲𑀤𑁆𑀤𑀧𑁆𑀧𑀬𑁄𑀕𑁄 𑀦 𑀲𑀫𑁆𑀪𑀯𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀤𑁆𑀤𑀪𑁂𑀤𑀁 𑀕𑀘𑁆𑀙𑀢𑀻’’𑀢𑀺, 𑀅𑀧𑀲𑀤𑁆𑀤𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀘𑁂𑀢𑁆𑀣 𑀧𑀭𑀸𑀯𑀭𑀬𑁄𑀕𑁄 (𑀧𑀸𑀡𑀺𑀦𑀻 𑁩.𑁪.𑁨𑁦) ‘‘𑀅𑀧𑁆𑀧𑀢𑁆𑀯𑀸 𑀦𑀤𑀺𑀁 𑀧𑀩𑁆𑀩𑀢𑁄, 𑀅𑀢𑀺𑀓𑁆𑀓𑀫𑁆𑀫 𑀧𑀩𑁆𑀩𑀢𑀁 𑀦𑀤𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀦𑀸𑀧𑀺 𑀮𑀓𑁆𑀔𑀡𑀳𑁂𑀢𑀼𑀆𑀤𑀺𑀧𑀬𑁄𑀕𑁄 ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀺, 𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀚𑀸𑀬𑀢𑁂, ‘𑀥’𑀦𑁆𑀢𑀺 𑀓𑀢𑁆𑀯𑀸 𑀤𑀡𑁆𑀟𑁄 𑀧𑀢𑀺𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀦𑁂𑀯𑁂𑀢𑁆𑀣 𑀲𑀤𑁆𑀤𑀪𑁂𑀤𑁄. 𑀦 𑀳𑀺 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀜𑁆𑀜𑁂𑀬𑁆𑀬𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀞𑀺𑀢𑀸𑀦𑀁 𑀫𑀳𑁂𑀲𑀻𑀦𑀁 𑀯𑀘𑀦𑁂 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀯𑀺𑀧𑁆𑀧𑀮𑀸𑀧𑁄 𑀅𑀯𑀲𑀭𑀁 𑀮𑀪𑀢𑀺. 𑀮𑀪𑀢𑀼, 𑀯𑀸𑀓𑁆𑀬𑀢𑁆𑀣𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀢𑁄 ‘‘𑀦𑁆𑀳𑀢𑁆𑀯𑀸 𑀕𑀫𑀦𑀁, 𑀪𑀼𑀢𑁆𑀯𑀸 𑀲𑀬𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺. 𑀏𑀯𑀫𑁆𑀧𑀺 𑀦 𑀘 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀬𑀤𑀺𑀧𑀺 𑀧𑀘𑁆𑀘𑁂𑀓𑀁 𑀧𑀤𑀢𑁆𑀣𑁄 𑀮𑀩𑁆𑀪𑀢𑀺, 𑀯𑀸𑀓𑁆𑀬𑀢𑁆𑀣𑁄 𑀧𑀦 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀤𑀲𑀤𑀸𑀴𑀺𑀫𑀸𑀤𑀺𑀯𑀸𑀓𑁆𑀬𑀸𑀦𑀺 𑀯𑀺𑀬 𑀅𑀲𑀫𑁆𑀩𑀦𑁆𑀥𑀢𑁆𑀣𑀢𑀸𑀬 𑀦𑀺𑀭𑀢𑁆𑀣𑀓𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀸𑀫𑀧𑀤𑁂 𑀯𑀼𑀢𑁆𑀢𑁂 𑀅𑀧𑁆𑀧𑀬𑀼𑀢𑁆𑀢𑀸𑀦𑀺𑀧𑀺 ‘‘𑀅𑀢𑁆𑀣𑀺, 𑀳𑁄𑀢𑀺, 𑀯𑀺𑀚𑁆𑀚𑀢𑀻’’𑀢𑀺 𑀏𑀯𑀭𑀽𑀧𑀸𑀦𑀺 𑀓𑀺𑀭𑀺𑀬𑀸𑀧𑀤𑀸𑀦𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀻𑀢𑀺 𑀜𑀸𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀳𑁄𑀢𑀺𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑀬𑀺𑀲𑁆𑀲𑀸𑀫𑀸’’𑀢𑀺. 𑀇𑀫𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁂𑀲𑀦𑀸𑀧𑀝𑀺𑀜𑁆𑀜𑀸𑀧𑀼𑀘𑁆𑀙𑀸𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑁂𑀲𑀼. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀅𑀜𑁆𑀜𑁂𑀲𑀼𑀧𑀺 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀸𑀭𑁄𑀢𑀺. 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁨.𑁩𑁩𑁭; 𑀲. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭). 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 (𑀤𑀻. 𑀦𑀺. 𑁨.𑁯𑁫; 𑀲𑀁. 𑀦𑀺. 𑁨.𑁬𑁦) 𑀏𑀯𑀫𑀸𑀤𑀻𑀲𑀼𑀧𑀺 𑀏𑀓𑁂𑀦𑀧𑀺 𑀲𑀤𑁆𑀥𑀺𑀁 𑀳𑁄𑀢𑀺-𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀁 𑀦 𑀕𑀘𑁆𑀙𑀢𑀺. 𑀬𑁄𑀕𑀁 𑀦 𑀕𑀘𑁆𑀙𑀢𑀺 𑀢𑀣𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀯𑀼𑀢𑁆𑀢𑀢𑁆𑀢𑀸. ‘‘𑀦 𑀘 𑀉𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺 𑀇𑀤𑀁 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀉𑀧𑁆𑀧𑀸𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀯𑀺𑀦𑀸𑀲𑀲𑁆𑀲 𑀯𑀺𑀦𑀸𑀲𑁄 𑀦𑀢𑁆𑀣𑀺, 𑀏𑀯𑀁 𑀉𑀧𑁆𑀧𑀸𑀤𑀲𑁆𑀲 𑀯𑀺𑀦𑀸𑀲𑁄 𑀯𑀺𑀬 𑀉𑀧𑁆𑀧𑀸𑀤𑁄𑀧𑀺 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀬𑁂𑀦 𑀉𑀧𑁆𑀧𑀸𑀤𑁂𑀦 𑀉𑀧𑁆𑀧𑀸𑀤𑁄 𑀉𑀧𑁆𑀧𑀸𑀤𑀯𑀸, 𑀲𑁄𑀧𑀺 𑀉𑀧𑁆𑀧𑀸𑀤𑀯𑀸𑀢𑀺 ¶ 𑀅𑀦𑀯𑀝𑁆𑀞𑀸𑀦𑀫𑁂𑀯 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀘𑁂 𑀳𑁂𑀬𑁆𑀬𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁, 𑀓𑀣𑀁 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺? 𑀦𑀸𑀬𑀁 𑀤𑁄𑀲𑁄 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀧𑀸𑀢𑀼𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄, 𑀇𑀥 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑀘𑁄𑀤𑀦𑀸𑀢𑀺 𑀓𑀢𑁆𑀯𑀸 𑀳𑁄𑀢𑀺, 𑀚𑀸𑀬𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀘𑁄𑀤𑀦𑀸 𑀓𑀢𑀸 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀦 𑀉𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺.

𑁫𑁭𑁬. 𑀇𑀫𑁂𑀲𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀅𑀯𑀺𑀚𑁆𑀚𑀸𑀤𑀬𑁄, 𑀢𑁂𑀲𑀁 𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀢𑀸 ¶ . 𑀓𑁄 𑀧𑀦 𑀲𑁄 𑀪𑀸𑀯𑁄𑀢𑀺 𑀆𑀳 ‘‘𑀪𑀸𑀯𑁄 𑀘 𑀦𑀸𑀫𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂𑀦𑀸𑀓𑀸𑀭𑁂𑀦 𑀅𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀔𑀸𑀭𑀸𑀤𑀺𑀧𑀸𑀢𑀼𑀪𑀸𑀯𑀳𑁂𑀢𑀽 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁂 𑀯𑀺𑀓𑀸𑀭𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀅𑀬𑀁 𑀲𑀫𑀜𑁆𑀜𑀸𑀢𑀺. 𑀢𑁂𑀲𑀁 𑀯𑀸𑀤𑀻𑀦𑀁 𑀢𑀁 𑀫𑀜𑁆𑀜𑀦𑀁. 𑀳𑁂𑀢𑀼𑀯𑀘𑀦𑀢𑁄𑀢𑀺 𑀳𑁂𑀢𑀼𑀪𑀸𑀯𑀯𑀘𑀦𑀢𑁄.

𑁫𑁭𑁭. 𑀏𑀢𑁆𑀣𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑁂. 𑀲𑀫𑀼𑀧𑁆𑀧𑀸𑀤𑀧𑀥𑀸𑀦𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑁄 𑀲𑀲𑀢𑁆𑀢𑀺𑀓𑁄 𑀳𑁂𑀢𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀜𑁆𑀜𑀢𑁆𑀣 𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀲𑁆𑀲 𑀤𑀲𑁆𑀲𑀦𑀢𑁄 𑀢𑀣𑀸 𑀇𑀥𑀸𑀧𑀺 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀉𑀧𑁆𑀧𑀸𑀤𑁄𑀬𑁂𑀯𑀸𑀬𑀁 𑀯𑀼𑀢𑁆𑀢𑁄, 𑀦 𑀳𑁂𑀢𑀽𑀢𑀺 𑀬𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀇𑀫𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑀲𑁆𑀲 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀽𑀧𑀲𑀫𑁂𑀢𑀩𑁆𑀩𑀸 𑀯𑀺𑀦𑁄𑀤𑁂𑀢𑀩𑁆𑀩𑀸.

𑀤𑁆𑀯𑁂𑀥𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀫𑀽𑀳𑁄 𑀧𑀘𑁆𑀘𑁂𑀢𑀩𑁆𑀩𑀢𑁄 𑀧𑀝𑀺𑀘𑁆𑀘𑁄 𑀘 𑀲𑁄 𑀲𑀳 𑀉𑀧𑁆𑀧𑀚𑁆𑀚𑀦𑀢𑁄 𑀲𑀫𑀼𑀧𑁆𑀧𑀸𑀤𑁄 𑀘, 𑀧𑀝𑀺𑀘𑁆𑀘 𑀯𑀸 𑀓𑀸𑀭𑀡𑀲𑀸𑀫𑀕𑁆𑀕𑀺𑀁 𑀅𑀧𑀘𑁆𑀘𑀓𑁆𑀔𑀸𑀬 𑀲𑀳 𑀉𑀧𑁆𑀧𑀚𑁆𑀚𑀦𑀢𑁄 𑀏𑀯𑀸𑀢𑀺 𑀘 𑀏𑀯𑀁 𑀤𑁆𑀯𑁂𑀥𑀸 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀇𑀤𑀁 𑀯𑀘𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑁄𑀧𑀺 𑀨𑀮𑀽𑀧𑀘𑀸𑀭𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀇𑀘𑁆𑀘𑁂𑀯 𑀯𑀼𑀢𑁆𑀢𑁄𑀢𑀺.

𑀧𑀘𑁆𑀘𑀬𑀢𑀸𑀬𑀸𑀢𑀺 𑀧𑀘𑁆𑀘𑀬𑀲𑀫𑀽𑀳𑀢𑁄. 𑀧𑀯𑀢𑁆𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑁄. 𑀥𑀫𑁆𑀫𑀲𑀫𑀽𑀳𑁄𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀧𑀼𑀜𑁆𑀚𑁄. 𑀧𑀢𑀻𑀬𑀫𑀸𑀦𑁄𑀢𑀺 𑀜𑀸𑀡𑀕𑀢𑀺𑀬𑀸 𑀅𑀪𑀺𑀫𑀼𑀔𑀁 𑀉𑀧𑁂𑀬𑀫𑀸𑀦𑁄, 𑀅𑀪𑀺𑀲𑀫𑀺𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀳𑀺𑀢𑀸𑀬 𑀲𑀼𑀔𑀸𑀬 𑀘𑀸𑀢𑀺 𑀮𑁄𑀓𑀼𑀢𑁆𑀢𑀭𑀳𑀺𑀢𑀸𑀬, 𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀬 𑀘. 𑀲𑀳 𑀉𑀧𑁆𑀧𑀚𑁆𑀚𑀢𑀺 𑀏𑀓𑁂𑀓𑀲𑁆𑀲 𑀓𑀤𑀸𑀘𑀺𑀧𑀺 ¶ 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀲𑀫𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀅𑀳𑁂𑀢𑀼𑀢𑁄, 𑀯𑀺𑀲𑀫𑀳𑁂𑀢𑀼𑀢𑁄 𑀘 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀲𑀳 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀓𑀚𑁆𑀛𑀁 𑀉𑀧𑁆𑀧𑀚𑁆𑀚𑀢𑀺 𑀅𑀦𑁆𑀢𑀫𑀲𑁄 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀦 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑀥𑀫𑁆𑀫𑀲𑀫𑀼𑀤𑀸𑀬𑁂𑀦 𑀓𑁂𑀦𑀘𑀺 𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀬𑁆𑀯𑀸𑀬𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀯𑀼𑀢𑁆𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀫𑀽𑀳𑁄, 𑀢𑀲𑁆𑀲 𑀅𑀬𑀁 𑀅𑀯𑀺𑀚𑁆𑀚𑀸𑀤𑀺𑀓𑁄 𑀳𑁂𑀢𑀼𑀲𑀫𑀽𑀳𑁄. ‘‘𑀢𑀧𑁆𑀧𑀘𑁆𑀘𑀬𑀢𑁆𑀢𑀸’’𑀢𑀺 𑀏𑀢𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀮𑁄𑀓𑁂’’𑀢𑀺𑀆𑀤𑀺. 𑀬𑀣𑀸 𑀳𑀺 𑀮𑁄𑀓𑁂 ‘‘𑀧𑀺𑀢𑁆𑀢𑀁 𑀫𑀣𑀺𑀢𑀁, 𑀲𑀽𑀭𑀸 𑀤𑀥𑀺, 𑀢𑀺𑀧𑀼𑀲𑀁 𑀚𑀭𑁄, 𑀲𑁂𑀫𑁆𑀳𑁄 𑀕𑀼𑀴𑁄, 𑀆𑀬𑀼 𑀖𑀢’’𑀦𑁆𑀢𑀺 𑀘 𑀧𑀘𑁆𑀘𑀬𑁄 𑀨𑀮𑀯𑁄𑀳𑀸𑀭𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀁 𑀨𑀮𑀽𑀧𑀘𑀸𑀭𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁭𑁮. 𑀧𑀝𑀺𑀘𑁆𑀘-𑀲𑀤𑁆𑀤𑁂 ¶ 𑀧𑀝𑀺-𑀲𑀤𑁆𑀤𑁄 𑀅𑀪𑀺𑀫𑀼𑀔𑀢𑁆𑀣𑁄, 𑀇𑀘𑁆𑀘-𑀲𑀤𑁆𑀤𑁄 𑀕𑀫𑁆𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀫𑀼𑀔𑀫𑀺𑀢𑁄’’𑀢𑀺. 𑀓𑀲𑁆𑀲 𑀧𑀦 𑀧𑀝𑀺𑀫𑀼𑀔𑀁, 𑀓𑁂𑀦 𑀯𑀸 𑀇𑀢𑁄, 𑀓𑁄 𑀯𑀸 𑀇𑀢𑁄𑀢𑀺 𑀘𑁄𑀤𑀦𑀢𑁆𑀢𑀬𑁂 𑀧𑀘𑁆𑀙𑀺𑀫𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀳𑁂𑀢𑀼𑀲𑀫𑀽𑀳𑁄’’𑀢𑀺 𑀆𑀳. 𑀢𑀲𑁆𑀫𑀺𑀜𑁆𑀳𑀺 𑀯𑀺𑀲𑁆𑀲𑀝𑁆𑀞𑁂 𑀳𑁂𑀢𑀼𑀲𑀫𑀽𑀳𑁄 𑀦𑀸𑀫 𑀧𑀘𑁆𑀘𑀬𑀲𑀸𑀫𑀕𑁆𑀕𑀻𑀢𑀺 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀝𑀺𑀫𑀼𑀔𑀁, 𑀅𑀜𑁆𑀜𑀫𑀜𑁆𑀜𑁂𑀦𑁂𑀯 𑀘 𑀇𑀢𑁄𑀢𑀺 𑀯𑀺𑀲𑁆𑀲𑀝𑁆𑀞𑁄𑀯𑀸𑀬𑀫𑀢𑁆𑀣𑁄 𑀳𑁄𑀢𑀻𑀢𑀺. 𑀲𑀳𑀺𑀢𑁂𑀢𑀺 𑀲𑀫𑀼𑀤𑀺𑀢𑁂 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑁂. 𑀲𑁄𑀢𑀺 𑀳𑁂𑀢𑀼𑀲𑀫𑀽𑀳𑁄. 𑀲𑀫𑀼𑀧𑁆𑀧𑀸𑀤𑁄 𑀇𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑀧𑀸𑀢𑀼𑀪𑀸𑀯𑀸𑀬𑀸𑀢𑀺 𑀉𑀧𑁆𑀧𑀸𑀤𑀸𑀬. 𑀓𑀸𑀫𑀁 𑀧𑀸𑀴𑀺𑀬𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 (𑀲𑀁. 𑀦𑀺. 𑁨.𑁧; 𑀉𑀤𑀸. 𑁧; 𑀫𑀳𑀸𑀯. 𑁧; 𑀦𑁂𑀢𑁆𑀢𑀺. 𑁨𑁪; 𑀯𑀺𑀪. 𑁨𑁨𑁫) 𑀅𑀯𑀺𑀚𑁆𑀚𑀸𑀯 𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀦 𑀅𑀯𑀺𑀚𑁆𑀚𑀸 𑀏𑀓𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀔𑁄 𑀲𑀳𑀚𑀸𑀢𑀥𑀫𑁆𑀫𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀤𑀬𑁄, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄, 𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀬𑁄 𑀘 𑀥𑀫𑁆𑀫𑀸 𑀬𑀣𑀸𑀭𑀳𑀁 𑀲𑀗𑁆𑀔𑀸𑀭𑀼𑀧𑁆𑀧𑀸𑀤𑀦𑁂 𑀅𑀯𑀺𑀚𑁆𑀚𑀸𑀬 𑀲𑀳𑀓𑀸𑀭𑀻𑀓𑀸𑀭𑀡𑀁 𑀳𑁄𑀦𑁆𑀢𑀺𑀬𑁂𑀯. 𑀏𑀯𑀁 𑀲𑀗𑁆𑀔𑀸𑀭𑀸𑀤𑀬𑁄𑀧𑀺 𑀯𑀺𑀜𑁆𑀜𑀸𑀡𑀸𑀤𑀻𑀦𑀦𑁆𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀤𑀺𑀏𑀓𑁂𑀓𑀳𑁂𑀢𑀼𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀲𑀫𑀽𑀳𑁄’’𑀢𑀺. 𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀝𑁆𑀞𑁂𑀦𑀸𑀢𑀺 𑀢𑀁𑀲𑀫𑀽𑀳𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀳𑁂𑀢𑀼𑀥𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀲𑁆𑀲 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀪𑀸𑀯𑁂𑀦. 𑀅𑀯𑁂𑀓𑀮𑁆𑀮𑀝𑁆𑀞𑁂𑀦𑀸𑀢𑀺 𑀅𑀦𑀽𑀦𑀪𑀸𑀯𑁂𑀦. 𑀢𑀲𑁆𑀫𑀺𑀜𑁆𑀳𑀺 𑀳𑁂𑀢𑀼𑀲𑀫𑀽𑀳𑁂 𑀏𑀓𑀘𑁆𑀘𑀸𑀲𑀸𑀥𑀸𑀭𑀡𑀜𑁆𑀘𑁂𑀢𑀁 𑀨𑀮𑀁, 𑀏𑀓𑀘𑁆𑀘𑁂𑀳𑁂𑀯 𑀘 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀲𑀺𑀬𑀸, 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸 𑀦𑀢𑁆𑀣𑀻𑀢𑀺 𑀧𑀝𑀺𑀫𑀼𑀔𑀕𑀫𑀦𑀸𑀪𑀸𑀯𑀢𑁄 𑀧𑀝𑀺𑀘𑁆𑀘𑀢𑁆𑀣𑁄 𑀦 𑀧𑀭𑀺𑀧𑀽𑀭𑁂𑀬𑁆𑀬𑀸𑀢𑀺. 𑀲𑀸𑀫𑀕𑁆𑀕𑀺𑀅𑀗𑁆𑀕𑀸𑀦𑀦𑁆𑀢𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀅𑀗𑁆𑀕𑀪𑀽𑀢𑀸𑀦𑀁, 𑀲𑀫𑀽𑀳𑀻𑀦𑀦𑁆𑀢𑀺 𑀅𑀢𑁆𑀣𑁄 ¶ . 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀨𑀮𑀥𑀫𑁆𑀫𑀸𑀦𑀁 𑀲𑀳𑀺𑀢𑀢𑀸 𑀦𑀸𑀫 𑀯𑀺𑀲𑀼𑀁 𑀅𑀪𑀸𑀯𑁄, 𑀦 𑀳𑁂𑀢𑀼𑀥𑀫𑁆𑀫𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀥𑀫𑁆𑀫𑁂’’𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀁. 𑀅𑀜𑁆𑀜𑀣𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀢𑀺 𑀯𑀼𑀘𑁆𑀘𑁂𑀬𑁆𑀬.

𑁫𑁭𑁯. 𑀧𑀘𑁆𑀘𑀬𑀢𑀸𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀲𑀫𑀽𑀳𑁄. 𑀅𑀜𑁆𑀜𑁄𑀜𑁆𑀜𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁. 𑀧𑀝𑀺𑀘𑁆𑀘𑀸𑀢𑀺 𑀦𑀺𑀲𑁆𑀲𑀸𑀬 𑀲𑀳𑀓𑀸𑀭𑀻𑀓𑀸𑀭𑀡𑀁 𑀮𑀤𑁆𑀥𑀸. 𑀲𑀫𑀦𑁆𑀢𑀺 𑀅𑀯𑀺𑀲𑀫𑀁 𑀅𑀯𑁂𑀓𑀮𑁆𑀮𑁂𑀦. 𑀲𑀳𑀸𑀢𑀺 𑀏𑀓𑀚𑁆𑀛𑀁. 𑀥𑀫𑁆𑀫𑁂𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂. 𑀬𑀲𑁆𑀫𑀸 𑀉𑀧𑁆𑀧𑀸𑀤𑁂𑀢𑀺, 𑀢𑀢𑁄𑀧𑀺 𑀢𑀲𑁆𑀫𑀸𑀧𑀺. 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀫𑀼𑀦𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀦 𑀅𑀧𑀝𑀺𑀘𑁆𑀘 𑀧𑀝𑀺𑀘𑁆𑀘𑁂𑀯𑀸𑀢𑀺 𑀅𑀯𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀸𑀬𑀁 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀓𑁂𑀓𑀤𑁂𑀲𑀦𑁆𑀢𑀺 𑀨𑀮𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑁂𑀓𑀤𑁂𑀲𑀁, 𑀪𑀸𑀕𑀲𑁄𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 ¶ . 𑀲𑀩𑁆𑀩𑀫𑁂𑀢𑀁 𑀭𑀽𑀧𑀸𑀭𑀽𑀧𑀓𑀮𑀸𑀧𑀼𑀧𑁆𑀧𑀸𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀸𑀦𑀼𑀲𑀸𑀭𑀯𑁄𑀳𑀸𑀭𑀓𑀼𑀲𑀮𑁂𑀦𑀸𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀼𑀕𑀢𑀯𑁄𑀳𑀸𑀭𑀦𑀺𑀧𑀼𑀡𑁂𑀦.

𑁫𑁮𑁦. 𑀧𑀼𑀭𑀺𑀫𑁂𑀦 𑀧𑀤𑁂𑀦𑀸𑀢𑀺 𑀬𑁄𑀚𑀦𑀸. 𑀲𑀲𑁆𑀲𑀢𑀸𑀤𑀻𑀦𑀦𑁆𑀢𑀺 𑀲𑀲𑁆𑀲𑀢𑀪𑀸𑀯𑀸𑀤𑀻𑀦𑀁, 𑀲𑀲𑁆𑀲𑀢𑀯𑀸𑀤𑀸𑀤𑀻𑀦𑀁 𑀯𑀸. 𑀲𑀲𑁆𑀲𑀢𑀲𑀳𑀘𑀭𑀺𑀢𑀸 𑀳𑀺 𑀯𑀸𑀤𑀸𑀧𑀺 𑀲𑀲𑁆𑀲𑀢𑀸𑀤𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺 𑀬𑀣𑀸 ‘‘𑀤𑀼𑀓𑁆𑀔𑀤𑁂𑀲𑀦𑀸 𑀤𑀼𑀓𑁆𑀔’’𑀦𑁆𑀢𑀺. 𑀉𑀘𑁆𑀙𑁂𑀤𑀸𑀤𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀖𑀸𑀢𑁄 𑀯𑀺𑀦𑀸𑀲𑁄, 𑀧𑀳𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀬𑁄𑀢𑀺 𑀅𑀦𑁆𑀢𑀤𑁆𑀯𑀬𑀯𑀺𑀭𑀳𑀺𑀢𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺.

𑀧𑀯𑀢𑁆𑀢𑀺𑀥𑀫𑁆𑀫𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁, 𑀓𑀺𑀮𑁂𑀲𑀯𑀝𑁆𑀝𑀸𑀤𑀻𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 (𑀤𑀻. 𑀦𑀺. 𑁧.𑁩𑁧) 𑀲𑀲𑁆𑀲𑀢𑀯𑀸𑀤𑁄. ‘‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁧𑁦𑁧, 𑁨𑁨𑁭; 𑀲𑀁. 𑀦𑀺. 𑁩.𑁨𑁧𑁨) 𑀅𑀳𑁂𑀢𑀼𑀯𑀸𑀤𑁄. 𑀧𑀓𑀢𑀺 𑀅𑀡𑀼𑀓𑀸𑀮𑀸𑀤𑀺𑀯𑀲𑁂𑀦 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀯𑀺𑀲𑀫𑀳𑁂𑀢𑀼𑀯𑀸𑀤𑁄. 𑀇𑀲𑁆𑀲𑀭𑀧𑀼𑀭𑀺𑀲𑀧𑀚𑀸𑀧𑀢𑀺𑀯𑀸𑀤𑀸 𑀯𑀲𑀯𑀢𑁆𑀢𑀺𑀯𑀸𑀤𑀸. 𑀅𑀳𑁂𑀢𑀼𑀯𑀸𑀤𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑀪𑀸𑀯𑀦𑀺𑀬𑀢𑀺 𑀬𑀤𑀺𑀘𑁆𑀙𑀸𑀯𑀸𑀤𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀘𑀓𑁆𑀔𑀼 𑀏𑀯 𑀘𑀓𑁆𑀔𑀼𑀲𑁆𑀲 𑀓𑀸𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀺𑀓𑁄 𑀯𑀺𑀲𑀫𑀳𑁂𑀢𑀼𑀯𑀸𑀤𑁄. 𑀇𑀲𑁆𑀲𑀭𑀸𑀤𑀺𑀯𑀸𑀤𑁄 𑀅𑀳𑁂𑀢𑀼𑀯𑀸𑀤𑀦𑁆𑀢𑁄𑀕𑀥𑁄. 𑀲𑀪𑀸𑀯𑁂𑀦𑁂𑀯 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀸𑀤𑁄 ‘‘𑀯𑀲𑀯𑀢𑁆𑀢𑀺𑀯𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀓𑀺𑀁 ¶ 𑀳𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀧𑀬𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀼𑀧𑁆𑀧𑀸𑀤𑀧𑀤𑁂𑀦 𑀧𑀭𑀺𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀭𑀺𑀤𑀻𑀧𑀦𑀲𑁆𑀲 𑀧𑀦 𑀅𑀯𑀺𑀧𑀭𑀻𑀢𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀳𑀢𑀸𑀢𑀺 𑀅𑀩𑁆𑀪𑀸𑀳𑀢𑀸. ‘‘𑀧𑀼𑀭𑀺𑀫𑀧𑀼𑀭𑀺𑀫𑀧𑀘𑁆𑀘𑀬𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀯𑀢𑁆𑀢𑀓𑀁 𑀳𑁂𑀢𑀼𑀨𑀮𑀧𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀼𑀢𑁄 𑀉𑀘𑁆𑀙𑁂𑀤𑁄’’𑀢𑀺. 𑀉𑀘𑁆𑀙𑁂𑀤𑀸𑀪𑀸𑀯𑀓𑀣𑀦𑁂𑀦𑁂𑀯 𑀘𑁂𑀢𑁆𑀣 𑀉𑀘𑁆𑀙𑁂𑀤𑀯𑀸𑀤𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲𑀸 𑀢𑀲𑁆𑀲𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑁂. 𑀲𑀦𑁆𑀢𑀢𑀺𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀳𑁂𑀢𑀼𑀨𑀮𑀧𑀩𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀤𑀦𑁂𑀦. 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀢𑁄 𑀉𑀧𑁆𑀧𑀚𑁆𑀚𑀦𑀢𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑁆𑀕𑀫𑁆𑀫 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀢𑁆𑀢𑀺 𑀇𑀥 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀓𑀫𑁆𑀫𑀯𑀝𑁆𑀝𑀲𑁆𑀲, 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀘 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸, 𑀪𑀺𑀦𑁆𑀦𑀓𑀸𑀮𑀢𑁆𑀢𑀸 𑀘 𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀸𑀤𑀧𑁆𑀧𑀳𑀸𑀦𑀁. 𑀓𑀼𑀲𑀮𑀸𑀓𑀼𑀲𑀮𑀓𑁆𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀓𑀸𑀭𑀓𑀯𑁄𑀳𑀸𑀭𑁄, 𑀯𑀺𑀧𑀸𑀓𑀓𑁆𑀔𑀦𑁆𑀥𑀧𑀯𑀢𑁆𑀢𑀺𑀬𑀁 𑀯𑁂𑀤𑀓𑀯𑁄𑀳𑀸𑀭𑁄𑀢𑀺. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 ¶ 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀢𑁆𑀣𑁂𑀯 𑀢𑀲𑁆𑀲 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀅𑀜𑁆𑀜𑁄 𑀓𑀭𑁄𑀢𑀺 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀸𑀤𑀧𑁆𑀧𑀳𑀸𑀦𑀁. 𑀦 𑀳𑀺 𑀓𑀢𑀲𑁆𑀲 𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀯𑀸 𑀅𑀩𑁆𑀪𑀸𑀕𑀫𑁄 𑀅𑀢𑁆𑀣𑀺. ‘‘𑀇𑀢𑁆𑀣𑀻, 𑀧𑀼𑀭𑀺𑀲𑀸’’𑀢𑀺 𑀯𑁄𑀳𑀸𑀭𑁂𑀦 𑀚𑀦𑀧𑀤𑀦𑀺𑀭𑀼𑀢𑁆𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀡𑁆𑀟𑀺𑀢𑀸𑀧𑀺 𑀮𑁄𑀓𑁂 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀆𑀦𑁂𑀢𑀼, 𑀦𑀸𑀫𑀭𑀽𑀧𑀁 𑀆𑀕𑀘𑁆𑀙𑀢𑀽’’𑀢𑀺 𑀅𑀯𑀢𑁆𑀯𑀸 𑀇𑀢𑁆𑀣𑀻, 𑀧𑀼𑀭𑀺𑀲𑁄𑀢𑁆𑀯𑁂𑀯 𑀯𑁄𑀳𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀇𑀢𑁆𑀣𑀻 𑀏𑀯𑀸𑀬𑀁, 𑀧𑀼𑀭𑀺𑀲𑁄 𑀏𑀯𑀸𑀬𑀦𑁆𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 𑀳𑁄𑀢𑀺 𑀅𑀪𑀺𑀦𑀺𑀯𑁂𑀲𑁄. 𑀯𑀺𑀤𑁆𑀤𑀲𑀼𑀦𑁄 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀚𑀸𑀦𑀦𑁆𑀢𑀲𑁆𑀲 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁄 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀦 𑀅𑀪𑀺𑀦𑀺𑀯𑁂𑀲𑁄𑀢𑀺 𑀆𑀳 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀅𑀦𑀪𑀺𑀦𑀺𑀯𑁂𑀲𑁄’’𑀢𑀺. 𑀲𑀫𑀜𑁆𑀜𑀸𑀬𑀸𑀢𑀺 𑀮𑁄𑀓𑀲𑀫𑀜𑁆𑀜𑀸𑀬. 𑀅𑀦𑀢𑀺𑀥𑀸𑀯𑀦𑀦𑁆𑀢𑀺 𑀅𑀦𑀢𑀺𑀓𑁆𑀓𑀫𑀦𑀁. ‘‘𑀲𑀢𑁆𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑁂 ‘‘𑀓𑁄 𑀏𑀢𑁆𑀣 𑀲𑀢𑁆𑀢𑁄, 𑀓𑀺𑀁 𑀭𑀽𑀧𑀁, 𑀉𑀤𑀸𑀳𑀼 𑀯𑁂𑀤𑀦𑀸𑀤𑀬𑁄’’𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦𑁂𑀯 𑀮𑁄𑀓𑀺𑀬𑁂𑀳𑀺 𑀯𑀺𑀬 𑀮𑁄𑀓𑀺𑀬𑁄 𑀅𑀢𑁆𑀣𑁄 𑀲𑀫𑀜𑁆𑀜𑀁 𑀅𑀯𑀺𑀮𑀗𑁆𑀖𑀦𑁆𑀢𑁂𑀦 𑀯𑁄𑀳𑀭𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀧𑀘𑁆𑀘𑁂𑀢𑀼𑀫𑀭𑀳𑀢𑀻𑀢𑀺 𑀧𑀝𑀺𑀘𑁆𑀘𑁄. 𑀬𑁄 𑀳𑀺 𑀦𑀁 𑀧𑀘𑁆𑀘𑁂𑀢𑀺 𑀅𑀪𑀺𑀲𑀫𑁂𑀢𑀺, 𑀢𑀲𑁆𑀲 𑀅𑀘𑁆𑀘𑀦𑁆𑀢𑀫𑁂𑀯 𑀤𑀼𑀓𑁆𑀔𑀯𑀽𑀧𑀲𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀫𑁆𑀫𑀸, 𑀲𑀳 𑀘 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑀼𑀧𑁆𑀧𑀸𑀤𑁄. 𑀧𑀘𑁆𑀘𑀬𑀥𑀫𑁆𑀫𑁄 𑀳𑀺 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀲𑀫𑁆𑀧𑀼𑀡𑁆𑀡𑀫𑁂𑀯 ¶ 𑀉𑀧𑁆𑀧𑀸𑀤𑁂𑀢𑀺, 𑀦 𑀯𑀺𑀓𑀮𑀁. 𑀬𑁂 𑀘 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀺, 𑀢𑁂 𑀲𑀩𑁆𑀩𑁂 𑀲𑀳𑁂𑀯 𑀉𑀧𑁆𑀧𑀸𑀤𑁂𑀢𑀺, 𑀦 𑀏𑀓𑁂𑀓𑀁. 𑀇𑀢𑀺 𑀧𑀝𑀺𑀘𑁆𑀘𑁄 𑀘 𑀲𑁄 𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀣 𑀯𑀸 𑀧𑀝𑀺𑀘𑁆𑀘 𑀧𑀝𑀺𑀫𑀼𑀔𑀁 𑀇𑀢𑁆𑀯𑀸 𑀓𑀸𑀭𑀡𑀲𑀸𑀫𑀕𑁆𑀕𑀺𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀺𑀢𑁂 𑀉𑀧𑁆𑀧𑀸𑀤𑁂𑀢𑀻𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀧𑀝𑀺𑀫𑀼𑀔𑀕𑀫𑀦𑀜𑁆𑀘 𑀧𑀘𑁆𑀘𑀬𑀲𑁆𑀲 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀅𑀗𑁆𑀕𑀪𑀸𑀯𑁂𑀦 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀫𑁂𑀯. 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀘 𑀦 𑀯𑀺𑀦𑀸 𑀢𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸, 𑀅𑀗𑁆𑀕𑀪𑀸𑀯𑀁 𑀅𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀓𑀸𑀭𑀡𑀩𑀳𑀼𑀢𑀸 𑀤𑀲𑁆𑀲𑀺𑀢𑀸, ‘‘𑀲𑀳𑀺𑀢𑁂’’𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀩𑀳𑀼𑀢𑀸. 𑀉𑀪𑀬𑁂𑀦𑀸𑀧𑀺 ‘‘𑀏𑀓𑀁 𑀦 𑀏𑀓𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁭) 𑀧𑀭𑀢𑁄 𑀯𑀼𑀘𑁆𑀘𑀫𑀸𑀦𑁄 𑀲𑀸𑀲𑀦𑀦𑀬𑁄 𑀤𑀻𑀧𑀺𑀢𑁄 𑀳𑁄𑀢𑀺.

𑀅𑀣 𑀯𑀸 𑀧𑀝𑀺𑀘𑁆𑀘 𑀧𑀘𑁆𑀘𑁂𑀢𑀩𑁆𑀩𑀁 𑀧𑀘𑁆𑀘𑀬𑀁 𑀧𑀝𑀺𑀕𑀦𑁆𑀢𑁆𑀯𑀸 𑀦 𑀯𑀺𑀦𑀸 𑀢𑁂𑀦 𑀲𑀫𑁆𑀩𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 (𑀉𑀤𑀸. 𑀅𑀝𑁆𑀞. 𑁧). 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀘𑁂𑀢𑁆𑀣 𑀲𑀫𑀼𑀧𑁆𑀧𑀸𑀤𑀧𑁆𑀧𑀥𑀸𑀦𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑁄 𑀲𑀲𑀢𑁆𑀢𑀺𑀓𑁄 𑀳𑁂𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀧𑀝𑀺𑀘𑁆𑀘𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀘𑁆𑀘𑁂𑀢𑀩𑁆𑀩’’𑀦𑁆𑀢𑀺. 𑀲𑁄 𑀘 𑀧𑀘𑁆𑀘𑀬𑀥𑀫𑁆𑀫𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬’’𑀦𑁆𑀢𑀺. 𑀇𑀤𑀸𑀦𑀺 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳 ‘‘𑀧𑀝𑀺𑀕𑀦𑁆𑀢𑁆𑀯𑀸’’𑀢𑀺. 𑀓𑀸𑀭𑀡𑀲𑁆𑀲 𑀲𑀪𑀸𑀯𑁂𑀦 𑀢𑀧𑁆𑀧𑀝𑀺𑀮𑀸𑀪𑀕𑀢𑀺𑀬𑀸 𑀧𑀢𑁆𑀯𑀸. 𑀓𑀣𑀁 𑀦 𑀯𑀺𑀦𑀸 𑀢𑁂𑀦? 𑀲𑀢𑀺 𑀏𑀯 𑀢𑀲𑁆𑀫𑀺𑀁, 𑀢𑀲𑁆𑀲 𑀘 𑀨𑀮𑀲𑁆𑀲 𑀉𑀧𑁆𑀧𑀸𑀤𑀢𑁄 𑀏𑀯, 𑀦 𑀅𑀜𑁆𑀜𑀣𑀸. 𑀅𑀲𑀢𑀺, 𑀦𑀺𑀭𑁄𑀥𑀢𑁄 𑀘𑀸𑀢𑀺 ¶ 𑀅𑀬𑀁 𑀧𑀘𑁆𑀘𑀬𑀝𑁆𑀞𑀺𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. 𑀢𑁂𑀦𑀸𑀬𑀁 𑀧𑀝𑀺𑀘𑁆𑀘𑀲𑀤𑁆𑀤𑁄 𑀬𑀣𑀸 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀫𑀲𑁆𑀲𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁂 𑀲𑀤𑁆𑀤𑀸 𑀪𑀼𑀫𑁆𑀫𑀦𑀺𑀲𑁆𑀲𑀓𑁆𑀓𑀯𑀘𑀦𑀚𑁄𑀢𑀦𑀻𑀬𑁂𑀦 𑀇𑀤𑀁-𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀳𑁂𑀢𑀼𑀫𑀢𑁄 𑀳𑁂𑀢𑀼𑀆𑀬𑀢𑁆𑀢𑀪𑀸𑀯𑁂𑀦 𑀪𑀸𑀯𑀼𑀧𑁆𑀧𑀸𑀤𑀼𑀢𑁆𑀢𑀭𑀓𑀺𑀭𑀺𑀬𑀸𑀧𑁂𑀓𑁆𑀔𑁂𑀦 𑀬𑀸𑀬𑀲𑁆𑀲 𑀢𑀤𑀸𑀬𑀢𑁆𑀢𑀢𑀸, 𑀢𑀸𑀬 𑀲𑀫𑀢𑁆𑀣𑀢𑀸𑀬 𑀳𑁂𑀢𑀼𑀁 𑀯𑀤𑀦𑁆𑀢𑀺, 𑀏𑀯𑀁 𑀕𑀦𑁆𑀢𑁆𑀯𑀸-𑀲𑀤𑁆𑀤𑀦𑁆𑀢𑀭𑀯𑀘𑀦𑀻𑀬𑁂𑀦 𑀢𑀁𑀯𑀺𑀜𑁆𑀜𑁂𑀬𑁆𑀬𑀲𑁆𑀲𑁂𑀯 𑀧𑀘𑁆𑀘𑀬𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀳𑁂𑀢𑀼𑀫𑀢𑁄 𑀳𑁂𑀢𑀼𑀧𑀘𑁆𑀘𑀬𑀦𑁂𑀦 𑀳𑁂𑀢𑀼𑀆𑀬𑀢𑁆𑀢𑀪𑀸𑀯𑁂𑀦 𑀲𑀫𑀼𑀧𑁆𑀧𑀸𑀤𑀼𑀢𑁆𑀢𑀭𑀓𑀺𑀭𑀺𑀬𑀸𑀧𑁂𑀓𑁆𑀔𑁂𑀦 𑀬𑀸𑀬𑀲𑁆𑀲 𑀢𑀤𑀸𑀬𑀢𑁆𑀢𑀢𑀸, 𑀢𑀸𑀬 𑀲𑀫𑀢𑁆𑀣𑀢𑀸𑀬 𑀳𑁂𑀢𑀼𑀫𑀸𑀳. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀯𑀺𑀚𑁆𑀚𑀸 𑀧𑀝𑀺𑀘𑁆𑀘, 𑀲𑀗𑁆𑀔𑀸𑀭𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁪𑁬) 𑀲𑀗𑁆𑀔𑀸𑀭𑀧𑀺𑀝𑀓𑁂 𑀯𑀼𑀢𑁆𑀢𑀁. 𑀲𑀫𑀢𑁆𑀣𑀢𑀸 𑀘𑁂𑀢𑁆𑀣 𑀦𑀺𑀤𑀸𑀦𑀸𑀤𑀺𑀪𑀸𑀯𑁄. 𑀲𑁄 𑀘 𑀢𑀤𑀯𑀺𑀦𑀸𑀪𑀸𑀯𑀺𑀨𑀮𑀁 𑀧𑀢𑀺 𑀲𑀢𑁆𑀯𑀫𑁂𑀯. 𑀲𑀫𑁆𑀩𑀦𑁆𑀥𑀲𑁆𑀲𑀸𑀢𑀺 𑀘 𑀲𑀁𑀬𑁄𑀚𑀦𑀸𑀦𑀼𑀭𑀽𑀧𑀢𑀸𑀯𑀲𑁂𑀦 𑀚𑀸𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀲𑁆𑀲 𑀚𑀭𑀸𑀫𑀭𑀡𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲. 𑀉𑀧𑁆𑀧𑀸𑀤𑁄𑀢𑀺 𑀉𑀧𑁆𑀧𑀚𑁆𑀚𑀦𑀁. 𑀬𑀤𑀺 𑀏𑀯𑀁 𑀓𑀣𑀁 𑀧𑀝𑀺𑀘𑁆𑀘𑀲𑀤𑁆𑀤𑀧𑁆𑀧𑀬𑁄𑀕𑁄, 𑀦𑀦𑀼 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀧𑀼𑀩𑁆𑀩𑀓𑀸𑀮𑁂 𑀈𑀤𑀺𑀲𑁄 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺? ‘‘𑀪𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀲𑀺𑀢𑁆𑀯𑀸 𑀯𑀧𑀢𑀻’’𑀢𑀺𑀆𑀤𑀻𑀲𑀼 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀬𑁂𑀪𑀼𑀬𑁆𑀬𑀯𑀲𑁂𑀦 𑀤𑀝𑁆𑀞𑀩𑁆𑀩𑀁 ¶ 𑀲𑀫𑀸𑀦𑀸𑀧𑀭𑀓𑀸𑀮𑁂, 𑀅𑀲𑀫𑀸𑀦𑀓𑀢𑁆𑀢𑀼𑀓𑁂 𑀘 𑀤𑀲𑁆𑀲𑀦𑀢𑁄. 𑀲𑀫𑀸𑀦𑀓𑀸𑀮𑁂 𑀢𑀸𑀯 𑁋

‘‘𑀅𑀦𑁆𑀥𑀓𑀸𑀭𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀉𑀤𑀺𑀢𑀸𑀬𑀁 𑀤𑀺𑀯𑀸𑀓𑀭𑁄;

𑀯𑀡𑁆𑀡𑀧𑀜𑁆𑀜𑀸𑀯𑀪𑀸𑀲𑁂𑀳𑀺, 𑀑𑀪𑀸𑀲𑁂𑀢𑁆𑀯𑀸 𑀲𑀫𑀼𑀕𑁆𑀕𑀢𑁄’’𑀢𑀺. 𑁋

𑀉𑀤𑀸𑀳𑀭𑀡𑀁. 𑀓𑁂𑀘𑀺 𑀧𑀦 ‘‘𑀫𑀼𑀔𑀁 𑀩𑁆𑀬𑀸𑀤𑀸𑀬 𑀲𑀬𑀢𑀺, 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑀻’’𑀢𑀺 𑀉𑀤𑀸𑀳𑀭𑀦𑁆𑀢𑀺. 𑀅𑀧𑀭𑁂 ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺.

𑀢𑀢𑁆𑀣 𑀩𑁆𑀬𑀸𑀤𑀸𑀦𑀧𑀭𑀺𑀯𑀢𑁆𑀢𑀦𑀼𑀢𑁆𑀢𑀭𑀓𑀸𑀮𑀪𑀸𑀯𑀺𑀲𑀬𑀦𑀤𑀲𑁆𑀲𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀸 𑀧𑀼𑀩𑁆𑀩𑀼𑀢𑁆𑀢𑀭𑀓𑀸𑀮𑀢𑀸 𑀅𑀢𑁆𑀣𑀺, 𑀲𑀸 𑀘 𑀪𑁂𑀤𑀸𑀦𑀼𑀧𑀮𑀓𑁆𑀔𑀡𑀸 𑀓𑁂𑀳𑀺𑀘𑀺 𑀦 𑀮𑀓𑁆𑀔𑀻𑀬𑀢𑀺. ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺 𑀘 𑀲𑀫𑀸𑀦𑀓𑀸𑀮𑀢𑀸𑀬𑀧𑀺 𑀅𑀚𑁆𑀛𑁂𑀦𑀓𑀣𑀦𑁂𑀳𑀺 𑀧𑀼𑀩𑁆𑀩𑁂𑀧𑀺 𑀦𑀺𑀲𑀚𑁆𑀚𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀧𑀼𑀩𑁆𑀩𑀼𑀢𑁆𑀢𑀭𑀓𑀸𑀮𑀢𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀺. 𑀉𑀤𑀬𑀲𑀫𑀓𑀸𑀮𑀫𑁂𑀯 𑀳𑀺 𑀢𑀦𑁆𑀦𑀺𑀯𑀢𑁆𑀢𑀦𑀺𑀬𑀦𑀺𑀯𑀢𑁆𑀢𑀦𑀦𑁆𑀢𑀺. 𑀅𑀧𑀭𑀓𑀸𑀮𑁂 ‘‘𑀤𑁆𑀯𑀸𑀭𑀫𑀸𑀯𑀭𑀺𑀢𑁆𑀯𑀸 𑀧𑀯𑀺𑀲𑀢𑀺, 𑀆𑀯𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀟𑀓𑁆𑀓𑀘𑁆𑀘 𑀧𑀢𑀺𑀢𑁄 𑀤𑀡𑁆𑀟𑁄’’𑀢𑀺 𑀉𑀤𑀸𑀳𑀭𑀦𑁆𑀢𑀺. 𑀅𑀪𑀺𑀖𑀸𑀢𑀪𑀽𑀢𑀲𑀳𑀚𑀸𑀢𑀸𑀬 𑀧𑀦 𑀅𑀪𑀺𑀖𑀸𑀢𑀚𑀲𑀤𑁆𑀤𑀲𑁆𑀲 𑀲𑀫𑀸𑀦𑀓𑀸𑀮𑀢𑀸 𑀏𑀢𑁆𑀣 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀇𑀥𑀸𑀧𑀺 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀺. 𑀧𑀼𑀭𑀺𑀫𑀢𑀸𑀯𑀘𑀦𑀺𑀘𑁆𑀙𑀸𑀯𑀲𑁂𑀦𑁂𑀯 𑀧𑀦 𑀮𑀓𑁆𑀔𑀡𑀳𑁂𑀢𑀼𑀓𑀺𑀭𑀺𑀬𑀸𑀦𑀁 𑀮𑀓𑁆𑀔𑀡𑀳𑁂𑀢𑀼𑀪𑀸𑀯𑀯𑀘𑀦𑀺𑀘𑁆𑀙𑀸𑀢𑀺 𑀮𑀓𑁆𑀔𑀡𑀪𑀸𑀯𑀢𑁄 𑀧𑀼𑀭𑀺𑀫𑀓𑀸𑀮𑁄 𑀇𑀘𑁆𑀘𑁂𑀯 ‘‘𑀦𑀺𑀳𑀦𑁆𑀢𑁆𑀯𑀸𑀦𑀸’’𑀢𑀺 𑀲𑀤𑁆𑀤𑀲𑀺𑀤𑁆𑀥𑀺 𑀇𑀘𑁆𑀙𑀺𑀢𑀸, 𑀏𑀯𑀜𑁆𑀘 𑀧𑀘𑁆𑀘𑀬𑀦𑀓𑀺𑀭𑀺𑀬𑀸 ¶ 𑀲𑀫𑀼𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀺𑀓𑀸𑀯𑀸𑀢𑀺 𑀧𑀝𑀺𑀘𑁆𑀘-𑀲𑀤𑁆𑀤𑀲𑀺𑀤𑁆𑀥𑀺. 𑀢𑀢𑁆𑀣 𑀬𑀼𑀢𑁆𑀢𑀁 𑀧𑀘𑁆𑀘𑀓𑁆𑀔𑀢𑁄 𑀓𑀢𑁆𑀢𑀼𑀤𑀲𑁆𑀲𑀦𑀢𑁄. 𑀇𑀥 𑀧𑀦 𑀢𑀤𑀪𑀸𑀯𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄. 𑀇𑀥𑀸𑀧𑀺 𑀅𑀦𑀼𑀫𑀸𑀦𑀢𑁄 𑀲𑀺𑀤𑁆𑀥𑁄. 𑀚𑀭𑀸𑀫𑀭𑀡𑀸𑀤𑀺𑀓𑁄 𑀓𑀢𑁆𑀢𑀸 𑀅𑀢𑁆𑀣𑁂𑀯 ‘‘𑀜𑀢𑁆𑀯𑀸 𑀓𑀺𑀭𑀺𑀬𑀢𑁄 𑀯𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀬𑁄𑀕𑀤𑀲𑁆𑀲𑀦𑀢𑁄 𑀅𑀯𑀲𑁆𑀲𑀁 𑀅𑀦𑀼𑀫𑀺𑀬𑀫𑀸𑀦𑁂𑀦 𑀓𑀢𑁆𑀢𑀼𑀦𑀸 𑀈𑀤𑀺𑀲𑁄 𑀲𑀤𑁆𑀤𑀧𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀅𑀲𑀫𑀸𑀦𑁂 𑀧𑀦 𑀓𑀢𑁆𑀢𑀭𑀺 ‘‘𑀧𑀺𑀲𑀸𑀘𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁭𑁧; 𑁨.𑁧𑁮𑁨; 𑀧𑀼. 𑀧. 𑁨𑁦𑁪) 𑀏𑀯𑀫𑀸𑀤𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀢𑀢𑁆𑀣 𑀧𑀺𑀲𑀸𑀘𑀤𑀲𑁆𑀲𑀦𑀸𑀤𑀺𑀧𑀼𑀭𑀺𑀲𑀩𑁆𑀬𑀸𑀧𑀸𑀭𑁄, 𑀏𑀯𑀫𑀺𑀥𑀸𑀧𑀺 𑀧𑀘𑁆𑀘𑀬𑀦𑀁 𑀧𑀘𑁆𑀘𑀬𑀩𑁆𑀬𑀸𑀧𑀸𑀭𑁄 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀸𑀤𑀦𑀁, 𑀢𑀜𑁆𑀘 𑀲𑀢𑁆𑀯𑀁 𑀲𑀫𑀼𑀧𑁆𑀧𑀸𑀤𑁄𑀯𑀸𑀢𑀺 ‘‘𑀧𑀘𑁆𑀘𑀬𑁂 𑀲𑀢𑀺, 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀸’’𑀢𑀺 𑀧𑀘𑁆𑀘𑀬𑀦𑀲𑁆𑀲 𑀲𑀫𑀼𑀧𑁆𑀧𑀸𑀤𑀳𑁂𑀢𑀼𑀢𑀸𑀬 𑀕𑀫𑀓𑁄 𑀲𑀫𑀸𑀦𑀲𑁆𑀲 𑀓𑀢𑁆𑀢𑀼 𑀅𑀪𑀸𑀯𑁂𑀧𑀺 𑀧𑀝𑀺𑀘𑁆𑀘-𑀲𑀤𑁆𑀤𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀧𑀝𑀺𑀘𑁆𑀘𑀲𑀫𑁆𑀩𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀓𑀣𑀁 𑀧𑀘𑁆𑀘𑀬𑁄 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺? 𑀳𑁂𑀝𑁆𑀞𑀸 𑀯𑀺𑀘𑀸𑀭𑀺𑀢𑁄𑀯𑀸𑀬𑀫𑀢𑁆𑀣𑁄. 𑀅𑀧𑀺𑀘 𑀬𑁄𑀬𑀁 𑀲𑀫𑀼𑀧𑁆𑀧𑀸𑀤-𑀲𑀤𑁆𑀤𑀯𑀺𑀪𑀸𑀯𑀺𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀝𑀺𑀘𑁆𑀘𑀲𑀤𑁆𑀤𑀯𑀺𑀪𑀸𑀯𑀺𑀢𑁄 𑀲𑀲𑀢𑁆𑀢𑀺𑀓𑁄 𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀲𑀫𑀼𑀧𑁆𑀧𑀸𑀤𑀸𑀪𑀺𑀫𑀼𑀔𑀢𑀸𑀬 𑀧𑀥𑀸𑀦𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑁄𑀢𑀺.

𑀓𑀺𑀁 𑀧𑀦 𑀓𑀸𑀭𑀡𑀁 𑀲𑀫𑀼𑀧𑁆𑀧𑀸𑀤𑀧𑀥𑀸𑀦𑁂𑀦 𑀯𑀘𑀦𑁂𑀦 𑀲𑀫𑀼𑀧𑁆𑀧𑀸𑀤𑀲𑁆𑀲 𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀦 𑀲𑀳𑁂𑀢𑀼𑀓𑁄 𑀲𑀫𑀼𑀧𑁆𑀧𑀸𑀤𑁄 𑀏𑀯𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑀺𑀝𑁆𑀞𑀲𑁆𑀲 𑀤𑀼𑀓𑁆𑀔𑀲𑁆𑀲 𑀬𑁄 𑀧𑀘𑁆𑀘𑀬𑁄 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂𑀦 𑀢𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸. 𑀓𑀣𑀁? 𑀬𑀣𑀸𑀳 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀻𑀫𑀁𑀲𑀫𑀸𑀦𑁄 𑀧𑀭𑀺𑀯𑀻𑀫𑀁𑀲𑀢𑀺 ‘𑀬𑀁 𑀔𑁄 𑀇𑀤𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀚𑀭𑀸𑀫𑀭𑀡𑀁, 𑀇𑀤𑀁 𑀦𑀼 𑀔𑁄 𑀤𑀼𑀓𑁆𑀔𑀁 𑀓𑀺𑀁 𑀦𑀺𑀤𑀸𑀦𑀁 𑀓𑀺𑀁 𑀲𑀫𑀼𑀤𑀬𑀁 𑀓𑀺𑀁 𑀚𑀸𑀢𑀺𑀓𑀁 𑀓𑀺𑀁 𑀧𑀪𑀯𑀁, 𑀓𑀺𑀲𑁆𑀫𑀺𑀁 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀻’𑀢𑀺. 𑀲𑁄 𑀧𑀭𑀺𑀯𑀻𑀫𑀁𑀲𑀫𑀸𑀦𑁄 𑀏𑀯𑀁 𑀧𑀚𑀸𑀦𑀸𑀢𑀺 ‘𑀬𑀁 𑀔𑁄 𑀇𑀤𑀁…𑀧𑁂… 𑀇𑀤𑀁 𑀔𑁄 𑀤𑀼𑀓𑁆𑀔𑀁 𑀚𑀸𑀢𑀺𑀦𑀺𑀤𑀸𑀦’’’𑀫𑀺𑀘𑁆𑀘𑀸𑀤𑀺𑀦𑀸 (𑀲𑀁. 𑀦𑀺. 𑁨.𑁫𑁧) 𑁋

𑀤𑀺𑀝𑁆𑀞𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀁 𑀧𑀭𑀺𑀯𑀻𑀫𑀁𑀲𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. 𑀢𑀁 𑀧𑀚𑀸𑀦𑀦𑀜𑁆𑀘 𑀦𑀺𑀤𑀸𑀦𑀫𑁆𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺. 𑀬𑀣𑀸 𑀘𑀸𑀳 𑁋

‘‘𑀧𑀼𑀩𑁆𑀩𑁂 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 ‘𑀓𑀺𑀘𑁆𑀙𑀁 ¶ 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘, 𑀅𑀣 𑀘 𑀧𑀦𑀺𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑁆𑀲. 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀚𑀭𑀸𑀫𑀭𑀡𑀲𑁆𑀲𑀸’𑀢𑀺…𑀧𑁂… 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 ‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁦) 𑁋

𑀆𑀤𑀺𑀦𑀸 𑀤𑀺𑀝𑁆𑀞𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑀯𑀻𑀫𑀁𑀲𑀸𑀪𑀺𑀲𑀫𑀬𑀸 𑀯𑀼𑀢𑁆𑀢𑀸. 𑀧𑀘𑁆𑀘𑀬𑁄 𑀳𑀺 𑀜𑀸𑀢𑀩𑁆𑀩𑁄. 𑀢𑀤𑀪𑀺𑀲𑀫𑀬𑀸𑀬𑀢𑁆𑀢𑀜𑁆𑀘 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀧𑀚𑀸𑀦𑀦𑀦𑁆𑀢𑀺 𑀬𑁄 𑀘 𑀜𑀸𑀢𑀩𑁆𑀩𑁄, 𑀲𑁄 𑀧𑀯𑁂𑀤𑁂𑀢𑀩𑁆𑀩𑁄𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑁄 𑀬𑀁 𑀬𑀤𑀺𑀤𑀁 𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑀯𑀺𑀪𑀸𑀯𑀺𑀢𑀁 𑀤𑀺𑀝𑁆𑀞𑀁 𑀤𑀼𑀓𑁆𑀔𑀁, 𑀢𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘𑁂𑀯, 𑀦 𑀅𑀜𑁆𑀜𑀣𑀸𑀢𑀺 𑀏𑀯𑀁 𑀧𑀘𑁆𑀘𑀬𑀯𑀺𑀪𑀸𑀯𑀦𑀢𑁆𑀣𑀁 𑀯𑀼𑀘𑁆𑀘𑀢𑀺. 𑀪𑀯𑀢𑀺 𑀳𑀺 𑀜𑀸𑀢𑀼𑀁, 𑀧𑀯𑁂𑀤𑁂𑀢𑀼𑀜𑁆𑀘 𑀇𑀘𑁆𑀙𑀺𑀢𑀪𑀸𑀯𑁂𑀦 𑀧𑀥𑀸𑀦𑀲𑁆𑀲𑀸𑀧𑀺 𑀓𑁂𑀦𑀘𑀺 𑀯𑀺𑀲𑁂𑀲𑁂𑀦 𑀜𑀸𑀢𑀩𑁆𑀩𑀢𑀸𑀬 𑀅𑀧𑁆𑀧𑀥𑀸𑀦𑀪𑀸𑀯𑁂𑀦 𑀦𑀺𑀤𑁆𑀤𑁂𑀲𑁄 𑀬𑀣𑀸 ¶ ‘‘𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀬𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺. 𑀓𑁄 𑀤𑁂𑀯𑀤𑀢𑁆𑀢𑁄, 𑀬𑀲𑁆𑀲 𑀉𑀘𑁆𑀘𑀢𑀭𑀸𑀦𑀺 𑀕𑁂𑀳𑀸𑀦𑀻’’𑀢𑀺, 𑀏𑀯𑀫𑀺𑀥𑀸𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀦𑀧𑀯𑁂𑀤𑀦𑀝𑁆𑀞𑁂𑀦 𑀦𑀺𑀤𑁆𑀤𑁂𑀲𑁂 𑀲𑀢𑁆𑀢𑀺𑀯𑀺𑀲𑁂𑀲𑁂𑀦 𑀅𑀢𑁆𑀢𑀦𑁄 𑀨𑀮𑁂𑀦 𑀧𑀘𑁆𑀘𑀦𑀻𑀬𑀢𑀸𑀬 𑀜𑀸𑀢𑀩𑁆𑀩𑀪𑀸𑀯𑁂𑀦 ‘‘𑀧𑀝𑀺𑀘𑁆𑀘𑀸’’𑀢𑀺 𑀧𑀭𑀺𑀬𑀸𑀬𑁂𑀦 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄.

𑀬𑁄 𑀘𑀸𑀬𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀓𑁄 𑀦𑀺𑀤𑁆𑀤𑁂𑀲𑁄, 𑀲𑁄 𑀘 𑀲𑀓𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑀬𑀸𑀦𑀁 𑀧𑀯𑁂𑀤𑀦𑀸𑀬 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀧𑀭𑀺𑀬𑁄𑀲𑀸𑀦𑁂𑀧𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀲𑀫𑀼𑀕𑁆𑀖𑀸𑀢𑀁 𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑁂 𑀧𑀘𑁆𑀘𑀬𑁂 𑀢𑀁𑀲𑀫𑀼𑀤𑀬𑀸𑀪𑀺𑀫𑀼𑀔𑁂 𑀓𑀢𑁆𑀯𑀸 𑀦𑀺𑀕𑀫𑀺𑀢𑀸 𑀧𑀘𑁆𑀘𑀬𑀸. 𑀧𑀝𑀺𑀧𑀤𑀸𑀲𑀼𑀢𑁆𑀢𑁂𑀧𑀺 (𑀲𑀁. 𑀦𑀺. 𑁨.𑁩) ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀧𑀝𑀺𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀦 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀺𑀢𑀁 𑀤𑀼𑀓𑁆𑀔𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀁, 𑀅𑀣 𑀔𑁄 𑀤𑀼𑀓𑁆𑀔𑀲𑀫𑀼𑀤𑀬𑀪𑀽𑀢𑀸 𑀧𑀘𑁆𑀘𑀬𑀸𑀢𑀺. 𑀬𑀣𑀸 𑀘 ‘‘𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 (𑀤𑀻. 𑀦𑀺. 𑁩.𑁩𑁩𑁫), 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 (𑀤𑀻. 𑀦𑀺. 𑁩.𑁩𑁫𑁫) 𑀅𑀗𑁆𑀕𑀜𑀸𑀡𑀧𑀝𑀺𑀯𑁂𑀤𑀦𑀢𑁆𑀣𑀢𑁆𑀢𑀸 𑀤𑁂𑀲𑀦𑀸𑀬 𑀲𑀫𑁆𑀫𑀸𑀲𑀫𑀸𑀥𑀺𑀧𑀥𑀸𑀦𑁂𑀳𑀺 𑀲𑀤𑁆𑀤𑁂𑀳𑀺 𑀅𑀗𑁆𑀕𑀜𑀸𑀡𑀧𑀝𑀺𑀯𑁂𑀤𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀲𑀫𑀼𑀧𑁆𑀧𑀸𑀤𑀧𑀥𑀸𑀦𑁂𑀦 𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀝𑀺𑀯𑁂𑀤𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁮𑁧. 𑀬𑀸 𑀧𑀦𑀸𑀬𑀁 𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀓𑁆𑀔𑀺𑀢𑁆𑀢𑀸𑀢𑀺 𑀞𑀧𑀺𑀢𑀸, 𑀤𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀢𑀦𑀦𑀢𑁄 𑀢𑀦𑁆𑀢𑀺, 𑀕𑀦𑁆𑀣𑁄. ‘‘𑀓𑀺𑀁 𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁂𑀦 ¶ ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸 𑀯𑀺𑀪𑀚𑁆𑀚𑀯𑀸𑀤𑀺𑀦𑁄. 𑀢𑁂 𑀳𑀺 𑀲𑀢𑁆𑀣𑀸𑀭𑀸 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑀁 𑀯𑀺𑀪𑀚𑁆𑀚 𑀯𑀼𑀢𑁆𑀢𑀁 𑀅𑀦𑀼𑀯𑀤𑀦𑁆𑀢𑀺, 𑀲𑁄𑀫𑀦𑀲𑁆𑀲𑀸𑀤𑀻𑀦𑀁, 𑀘𑀻𑀯𑀭𑀸𑀤𑀻𑀦𑀜𑁆𑀘 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀪𑀸𑀯𑀁. 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀸𑀤𑁂 𑀯𑀸 𑀯𑀺𑀪𑀚𑁆𑀚 𑀯𑀤𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀻𑀦𑀁 (𑀤𑀻. 𑀦𑀺. 𑁧.𑁩𑁧) 𑀞𑀧𑀦𑀻𑀬𑀸𑀦𑀁 𑀞𑀧𑀦𑀢𑁄, 𑀭𑀸𑀕𑀸𑀤𑀺𑀓𑁆𑀔𑀬𑀲𑁆𑀲 𑀲𑀲𑁆𑀲𑀢𑀲𑁆𑀲, 𑀭𑀸𑀕𑀸𑀤𑀺𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀉𑀘𑁆𑀙𑁂𑀤𑀲𑁆𑀲 𑀘 𑀯𑀘𑀦𑀢𑁄, 𑀦 𑀧𑀦 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸𑀤𑀺𑀓𑁂 𑀢𑀬𑁄 𑀧𑀜𑁆𑀳𑁂 𑀅𑀧𑀦𑁂𑀢𑁆𑀯𑀸 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀫𑁂𑀯 𑀯𑀤𑀦𑁆𑀢𑀺. 𑀯𑀺𑀪𑀚𑁆𑀚𑀯𑀸𑀤𑀻𑀦𑀁 𑀫𑀡𑁆𑀟𑀮𑀁 𑀲𑀫𑀽𑀳𑁄 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁. 𑀯𑀺𑀪𑀚𑁆𑀚𑀯𑀸𑀤𑀺𑀦𑁄 𑀯𑀸 𑀪𑀕𑀯𑀢𑁄 𑀧𑀭𑀺𑀲𑀸 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀯𑀺𑀪𑀚𑁆𑀚 𑀯𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀽𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀢𑁄 𑀪𑀕𑀯𑀸, 𑀢𑀤𑀦𑀼𑀯𑀸𑀤𑀢𑁄 𑀢𑀲𑁆𑀲 𑀲𑀸𑀯𑀓𑀸 𑀘 𑀯𑀺𑀪𑀚𑁆𑀚𑀯𑀸𑀤𑀺𑀦𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀁.

𑀑𑀢𑀭𑀺𑀢𑁆𑀯𑀸𑀢𑀺 ¶ 𑀑𑀕𑀸𑀳𑁂𑀢𑁆𑀯𑀸, 𑀯𑀺𑀪𑀚𑁆𑀚𑀯𑀸𑀤𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀬𑀁 𑀅𑀯𑀺𑀪𑀚𑁆𑀚𑀯𑀸𑀤𑀻 𑀲𑀫𑀸𑀦𑁄 𑀯𑀺𑀪𑀚𑁆𑀚𑀯𑀸𑀤𑀻𑀦𑀁 𑀅𑀦𑁆𑀢𑀭𑁂 𑀞𑀸𑀦𑀫𑀢𑁆𑀢𑁂𑀦 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁 𑀑𑀢𑀺𑀡𑁆𑀡𑁄 𑀦𑀸𑀫 𑀳𑁄𑀢𑀺. 𑀆𑀘𑀭𑀺𑀬𑁂𑀳𑀺 𑀅𑀯𑀼𑀢𑁆𑀢𑀯𑀺𑀧𑀭𑀻𑀢𑀢𑁆𑀣𑀤𑀻𑀧𑀦𑁂𑀦 𑀢𑁂 𑀦𑀅𑀩𑁆𑀪𑀘𑀺𑀓𑁆𑀔𑀦𑁆𑀢𑁂𑀦. 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀳𑁂𑀢𑀼 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑁄, 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀼𑀕𑁆𑀕𑀮𑀯𑀸𑀤𑀸𑀤𑀺𑀓𑁂 𑀘 𑀯𑀤𑀦𑁆𑀢𑁄 𑀲𑀓𑀲𑀫𑀬𑀁 𑀯𑁄𑀓𑁆𑀓𑀫𑀢𑀺 𑀦𑀸𑀫, 𑀢𑀣𑀸 𑀅𑀯𑁄𑀓𑁆𑀓𑀫𑀦𑁆𑀢𑁂𑀦. 𑀧𑀭𑀲𑀫𑀬𑀁 𑀤𑁄𑀲𑀸𑀭𑁄𑀧𑀦𑀩𑁆𑀬𑀸𑀧𑀸𑀭𑀯𑀺𑀭𑀳𑁂𑀦 𑀅𑀦𑀸𑀬𑀽𑀳𑀦𑁆𑀢𑁂𑀦. ‘‘𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀭𑀲𑀫𑀬𑀁 𑀅𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑁂𑀦𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀻𑀦𑀺 (𑀫. 𑀦𑀺. 𑁧.𑁩𑁯𑁬) 𑀯𑀤𑀦𑁆𑀢𑁄 𑀲𑀼𑀢𑁆𑀢𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫, 𑀢𑀣𑀸 𑀅𑀧𑀝𑀺𑀩𑀸𑀳𑀦𑁆𑀢𑁂𑀦. ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭, 𑁪𑁧𑁮), 𑀲𑀼𑀧𑀺𑀦𑀦𑁆𑀢𑁂 𑀓𑀢𑁄 𑀯𑀻𑀢𑀺𑀓𑁆𑀓𑀫𑁄 𑀆𑀧𑀢𑁆𑀢𑀺𑀓𑀭𑁄 𑀳𑁄𑀢𑀻’’𑀢𑀺 𑀘 𑀏𑀯𑀫𑀸𑀤𑀺𑀁 𑀯𑀤𑀦𑁆𑀢𑁄 𑀯𑀺𑀦𑀬𑀁 𑀧𑀝𑀺𑀮𑁄𑀫𑁂𑀢𑀺 𑀦𑀸𑀫, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀢𑀁 𑀅𑀦𑀼𑀮𑁄𑀫𑁂𑀦𑁆𑀢𑁂𑀦. 𑀧𑀝𑀺𑀮𑁄𑀫𑁂𑀦𑁆𑀢𑁄 𑀳𑀺 𑀓𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀦𑁆𑀢𑁄, 𑀥𑀫𑁆𑀫𑀢𑀜𑁆𑀘 𑀯𑀺𑀮𑁄𑀫𑁂𑀦𑁆𑀢𑁄 𑀓𑀼𑀢𑁄 𑀓𑀺𑀮𑁂𑀲𑀯𑀺𑀦𑀬𑀁 𑀅𑀦𑀼𑀮𑁄𑀫𑁂𑀢𑀺. 𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁧𑁮𑁭 𑀆𑀤𑀬𑁄; 𑀅. 𑀦𑀺. 𑁪.𑁧𑁮𑁦) 𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑁂 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀺𑀫𑀳𑀸𑀧𑀤𑁂𑀲𑁂 𑀑𑀮𑁄𑀓𑁂𑀦𑁆𑀢𑁂𑀦. 𑀢𑀤𑁄𑀮𑁄𑀓𑀦𑁂𑀦 𑀳𑀺 𑀲𑀼𑀢𑁆𑀢𑁂, 𑀯𑀺𑀦𑀬𑁂 𑀘 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀢𑀺𑀥𑀸𑀯𑀢𑀺.

𑀥𑀫𑁆𑀫𑀦𑁆𑀢𑀺 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀸𑀴𑀺𑀁. 𑀅𑀢𑁆𑀣𑀦𑁆𑀢𑀺 𑀢𑀤𑀢𑁆𑀣𑀁. 𑀳𑁂𑀢𑀼, 𑀳𑁂𑀢𑀼𑀨𑀮𑀸𑀦𑀺 𑀯𑀸 𑀅𑀬𑀫𑁂𑀢𑁆𑀣 𑀳𑁂𑀢𑀼 𑀥𑀫𑁆𑀫𑁄, 𑀇𑀤𑀫𑁂𑀢𑁆𑀣 𑀳𑁂𑀢𑀼𑀨𑀮𑀁 𑀅𑀢𑁆𑀣𑁄𑀢𑀺. 𑀥𑀫𑁆𑀫𑀦𑁆𑀢𑀺 𑀯𑀸 𑀥𑀫𑁆𑀫𑀢𑀁. 𑀬𑀣𑀸 𑀏𑀓𑁂 ‘‘𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀸𑀳𑁂𑀦𑁆𑀢𑀸 ‘‘𑀦𑀺𑀘𑁆𑀘𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑀁 𑀫𑀺𑀘𑁆𑀙𑀸 𑀤𑀻𑀧𑁂𑀦𑁆𑀢𑀺, 𑀏𑀯𑀁 𑀅𑀤𑀻𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀢𑀦𑁄 𑀨𑀮𑀁 𑀧𑀢𑀺 𑀓𑀸𑀭𑀡𑀲𑁆𑀲 𑀯𑀯𑀢𑁆𑀣𑀺𑀢𑀲𑀪𑀸𑀯𑀁 𑀤𑀻𑀧𑁂𑀦𑁆𑀢𑁂𑀦. 𑀬𑀣𑀸 𑀘 𑀏𑀓𑁂 ‘‘𑀅𑀦𑀺𑀭𑁄𑀥𑀁 𑀅𑀦𑀼𑀧𑁆𑀧𑀸𑀤’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀸𑀳𑁂𑀦𑁆𑀢𑀺, 𑀏𑀯𑀁 𑀕𑀸𑀳𑁂 𑀅𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀲𑀗𑁆𑀕𑀸𑀳𑁂𑀦𑁆𑀢𑁂𑀦. ‘‘𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀳𑀺 (𑀥. 𑀲. 𑁧𑁦𑁬𑁭) 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 ¶ . ‘‘𑀲𑀗𑁆𑀔𑀸𑀭𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀡𑁆𑀳𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀲𑀦𑁆𑀢𑁂𑀦𑀸𑀢𑀺 𑀘 𑀯𑀤𑀦𑁆𑀢𑀺. 𑀧𑀓𑀢𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀫𑁂𑀯.

𑀲𑀘𑁆𑀘𑀦𑁆𑀢𑀺 𑀘𑀢𑀼𑀲𑀘𑁆𑀘𑀁. 𑀲𑀢𑁆𑀢𑁄𑀢𑀺 𑀲𑀢𑁆𑀢𑀲𑀼𑀜𑁆𑀜𑀢𑀸𑀢𑀺 𑀯𑀤𑀦𑁆𑀢𑀺, 𑀲𑀢𑁆𑀢𑀲𑀼𑀜𑁆𑀜𑁂𑀲𑀼 𑀧𑀦 𑀲𑀗𑁆𑀔𑀸𑀭𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄, 𑀲𑀢𑁆𑀢𑀢𑁆𑀣𑀓𑀺𑀘𑁆𑀘𑀲𑀺𑀤𑁆𑀥𑀺 𑀘. 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑁄 𑀏𑀯 𑀘, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄𑀬𑁂𑀯 𑀨𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀯𑀡𑁆𑀡𑀦𑀸𑀬 𑀓𑀸𑀢𑀩𑁆𑀩𑀢𑁆𑀢𑀸, 𑀤𑀼𑀓𑁆𑀓𑀭𑀢𑁆𑀢𑀸 𑀘 𑀧𑀢𑀺𑀝𑁆𑀞𑀁 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀬𑀢𑁆𑀣 𑀞𑀺𑀢𑀲𑁆𑀲 𑀯𑀡𑁆𑀡𑀦𑀸 𑀲𑀼𑀓𑀭𑀸 𑀳𑁄𑀢𑀺, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀪𑀽𑀢𑀁 𑀢𑀁 𑀦𑀬𑀁 𑀅𑀢𑁆𑀢𑀦𑁄𑀬𑁂𑀯 𑀜𑀸𑀡𑀩𑀮𑁂𑀦 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀬𑀁 𑀧𑀦 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀲𑀸𑀲𑀦𑀁 𑀧𑀦𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀥 𑀲𑀸𑀲𑀦𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀫𑀸𑀳, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑁂𑀯 𑀯𑀸. 𑀲𑁄 𑀳𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀸𑀤𑀺𑀦𑀸𑀦𑀸𑀤𑁂𑀲𑀦𑀸𑀦𑀬𑀧𑀝𑀺𑀫𑀡𑁆𑀟𑀺𑀢𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀅𑀚𑁆𑀚𑀸𑀧𑀺 𑀧𑀯𑀢𑁆𑀢𑀢𑀻𑀢𑀺 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀤𑀝𑁆𑀞𑀓𑀣𑀸𑀲𑀗𑁆𑀔𑀸𑀢𑁄 𑀘 𑀧𑀼𑀩𑁆𑀩𑀸𑀘𑀭𑀺𑀬𑀫𑀕𑁆𑀕𑁄. ‘‘𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺 𑀆𑀤𑀭𑀚𑀦𑀦𑁂, 𑀉𑀲𑁆𑀲𑀸𑀳𑀦𑁂 𑀘 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁂, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀅𑀝𑁆𑀞𑀺 𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀓𑀢𑁆𑀯𑀸. 𑀬𑀣𑀸 𑀯𑀸 𑀦 𑀦𑀲𑁆𑀲𑀢𑀺, 𑀏𑀯𑀁 𑀅𑀝𑁆𑀞𑀺𑀕𑀢𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀁 𑀓𑀢𑁆𑀯𑀸. 𑀧𑀼𑀩𑁆𑀩𑀓𑀸𑀮𑀢𑁄 𑀅𑀧𑀭𑀓𑀸𑀮𑁂 𑀪𑀯𑀁 𑀧𑀼𑀩𑁆𑀩𑀸𑀧𑀭𑀺𑀬𑀁. 𑀯𑀺𑀲𑁂𑀲𑀦𑁆𑀢𑀺 𑀧𑀞𑀫𑀸𑀭𑀫𑁆𑀪𑀢𑁄 𑀧𑀪𑀼𑀢𑀺 𑀔𑀡𑁂 𑀔𑀡𑁂 𑀜𑀸𑀡𑀯𑀺𑀲𑁂𑀲𑀁, 𑀓𑀺𑀮𑁂𑀲𑀓𑁆𑀔𑀬𑀯𑀺𑀲𑁂𑀲𑀜𑁆𑀘 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑁫𑁮𑁨. 𑀤𑁂𑀲𑀦𑀸𑀪𑁂𑀤𑀢𑁄𑀢𑀺 𑀤𑁂𑀲𑀦𑀸𑀯𑀺𑀲𑁂𑀲𑀢𑁄. 𑀅𑀢𑁆𑀣𑀢𑁄, 𑀮𑀓𑁆𑀔𑀡𑀸𑀤𑀺𑀢𑁄, 𑀏𑀓𑀯𑀺𑀥𑀸𑀤𑀺𑀢𑁄 𑀘 𑀅𑀢𑁆𑀣𑀮𑀓𑁆𑀔𑀡𑁂𑀓𑀯𑀺𑀥𑀸𑀤𑀺𑀢𑁄 ¶ . 𑀅𑀗𑁆𑀕𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀸𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀢𑁄.

𑀓𑀫𑁆𑀫𑀯𑀺𑀧𑀸𑀓𑀓𑀺𑀮𑁂𑀲𑀯𑀝𑁆𑀝𑀸𑀦𑀁 𑀫𑀽𑀮𑀓𑀸𑀭𑀡𑀢𑁆𑀢𑀸, 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀯𑀺𑀚𑁆𑀚𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀫𑀽𑀮𑀁. 𑀢𑀢𑁆𑀣 𑀯𑀮𑁆𑀮𑀺𑀬𑀸 𑀫𑀽𑀮𑁂 𑀤𑀺𑀝𑁆𑀞𑁂 𑀢𑀢𑁄 𑀧𑀪𑀼𑀢𑀺 𑀯𑀮𑁆𑀮𑀺𑀳𑀭𑀡𑀁 𑀯𑀺𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀫𑀽𑀮𑁂 𑀤𑀺𑀝𑁆𑀞𑁂 𑀢𑀢𑁄 𑀧𑀪𑀼𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑀦 𑀓𑀸𑀢𑀩𑁆𑀩𑀸. 𑀦 𑀳𑀺 𑀪𑀕𑀯𑀢𑁄 𑀇𑀤𑀫𑁂𑀯 𑀤𑀺𑀝𑁆𑀞𑀁, 𑀇𑀤𑀁 𑀅𑀤𑀺𑀝𑁆𑀞𑀦𑁆𑀢𑀺 𑀯𑀺𑀪𑀚𑀦𑀻𑀬𑀁 𑀅𑀢𑁆𑀣𑀺 𑀲𑀩𑁆𑀩𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀫𑀽𑀮𑀢𑁄 𑀧𑀪𑀼𑀢𑀺 𑀧𑀦 𑀯𑀮𑁆𑀮𑀺𑀳𑀭𑀡𑀁 𑀯𑀺𑀬 𑀫𑀽𑀮𑀢𑁄 𑀧𑀪𑀼𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀓𑀢𑀸𑀢𑀺 𑀇𑀤𑀫𑁂𑀢𑁆𑀣 𑀲𑀸𑀫𑀜𑁆𑀜𑀁 ¶ 𑀅𑀥𑀺𑀧𑁆𑀧𑁂𑀢𑀁, 𑀩𑁄𑀥𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀩𑁄𑀥𑁂𑀢𑀩𑁆𑀩𑀪𑀸𑀯𑁂𑀦 𑀫𑀽𑀮𑀸𑀤𑀺𑀤𑀲𑁆𑀲𑀦𑀲𑀸𑀫𑀜𑁆𑀜𑀁 𑀬𑁄𑀚𑁂𑀢𑀩𑁆𑀩𑀁.

𑀢𑀲𑁆𑀲𑀸𑀢𑀺 𑁋

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄…𑀧𑁂… 𑀭𑀚𑀦𑀻𑀬𑁂𑀳𑀺. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀲𑀸𑀭𑀚𑁆𑀚𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺, 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮) 𑁋

𑀏𑀯𑀁 𑀯𑀼𑀢𑁆𑀢𑀲𑁆𑀲. 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺. 𑀢𑀲𑁆𑀲 𑀅𑀪𑀺𑀦𑀦𑁆𑀤𑀢𑁄𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀫𑀼𑀔𑀪𑀸𑀯𑁂𑀦 𑀦𑀦𑁆𑀤𑀢𑁄. 𑀅𑀪𑀺𑀯𑀤𑀢𑁄𑀢𑀺 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀘𑀻𑀪𑁂𑀤𑀓𑀭𑀡𑀧𑀯𑀢𑁆𑀢𑀸𑀬 𑀩𑀮𑀯𑀢𑀡𑁆𑀳𑀸𑀬 ‘‘𑀅𑀳𑀁, 𑀫𑀫𑀸’’𑀢𑀺 𑀅𑀪𑀺𑀯𑀤𑀢𑁄. 𑀢𑀢𑁄 𑀩𑀮𑀯𑀢𑀺𑀬𑀸 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄. 𑀢𑀢𑁄𑀧𑀺 𑀩𑀮𑀯𑀢𑀻 𑀧𑀦 𑀉𑀧𑀸𑀤𑀸𑀦𑀪𑀽𑀢𑀸 𑀢𑀡𑁆𑀳𑀸 𑀦𑀦𑁆𑀤𑀻. 𑀏𑀢𑁆𑀣 𑀘 𑀅𑀪𑀺𑀦𑀦𑁆𑀤𑀦𑀸𑀤𑀺𑀦𑀸 𑀢𑀡𑁆𑀳𑀸 𑀯𑀼𑀢𑁆𑀢𑀸, 𑀦𑀦𑁆𑀤𑀺𑀯𑀘𑀦𑁂𑀦 𑀢𑀧𑁆𑀧𑀘𑁆𑀘𑀬𑀁 𑀉𑀧𑀸𑀤𑀸𑀦𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀦𑁆𑀤𑀺𑀢𑀸𑀢𑀤𑀯𑀺𑀧𑁆𑀧𑀬𑁄𑀕𑀢𑀸𑀳𑀺, 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀪𑀸𑀯𑁂𑀳𑀺 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀺𑀓𑀜𑁆𑀘 𑀢𑀢𑁆𑀣𑁂𑀯 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀁.

𑀯𑀺𑀧𑀸𑀓𑀯𑀝𑁆𑀝𑀪𑀽𑀢𑁂 ¶ 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀨𑀲𑁆𑀲𑀸𑀤𑀺𑀓𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘 𑀑𑀚𑀁 𑀲𑀦𑁆𑀥𑀸𑀬 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀝𑁆𑀝𑀽𑀧𑀣𑀫𑁆𑀪𑀓𑀸 𑀧𑀦 𑀇𑀢𑀭𑁂𑀧𑀺 𑀆𑀳𑀸𑀭𑀸 𑀢𑀡𑁆𑀳𑀸𑀧𑀪𑀯𑁂 𑀢𑀲𑁆𑀫𑀺𑀁 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 ‘‘𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀦𑁆𑀢𑀺.

𑁫𑁮𑁩. 𑀢𑀢𑁄 ¶ 𑀢𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀸𑀲𑀼 𑀤𑁂𑀲𑀦𑀸𑀲𑀼 𑀢𑀢𑁄 𑀢𑀢𑁄 𑀤𑁂𑀲𑀦𑀢𑁄. 𑀜𑀸𑀬𑀧𑁆𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀜𑀸𑀬𑁄𑀢𑀺 𑀫𑀕𑁆𑀕𑁄, 𑀲𑁄 𑀏𑀯 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ‘‘𑀅𑀭𑀺𑀬𑁄 𑀘𑀲𑁆𑀲 𑀜𑀸𑀬𑁄 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁪𑁧; 𑁫.𑁧𑁦𑁨𑁪) 𑀯𑀘𑀦𑀢𑁄. 𑀲𑀬𑀫𑁂𑀯 𑀳𑀺 𑀲𑁄 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸 𑀢𑀣𑀸 𑀢𑀣𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸 𑀢𑀸𑀬 𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀢𑀦𑁄 𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀘𑀢𑀼𑀩𑁆𑀩𑀺𑀥𑀕𑀫𑁆𑀪𑀻𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀢𑀺 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑁂𑀲𑀼 𑀧𑀢𑀺𑀝𑁆𑀞𑀸𑀥𑀺𑀕𑀫𑀦𑁂𑀦 𑀧𑀢𑀺𑀝𑁆𑀞𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀫𑀦𑁆𑀢𑀪𑀤𑁆𑀤𑀓𑀢𑀸, 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺 𑀘 𑀘𑀢𑀼𑀦𑁆𑀦𑀫𑁆𑀧𑀺 𑀤𑁂𑀲𑀦𑀸𑀦𑀁 𑀲𑀫𑀸𑀦𑀁 𑀓𑀸𑀭𑀡𑀦𑁆𑀢𑀺 𑀯𑀺𑀲𑁂𑀲𑀓𑀸𑀭𑀡𑀁 𑀯𑀢𑁆𑀢𑀼𑀓𑀸𑀫𑁄 𑀆𑀳 ‘‘𑀯𑀺𑀲𑁂𑀲𑀢𑁄’’𑀢𑀺. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸, 𑀅𑀲𑁆𑀲 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀯𑀢𑁆𑀢𑀺𑀓𑀸𑀭𑀡𑀯𑀺𑀪𑀸𑀕𑁄 𑀅𑀯𑀺𑀪𑀢𑁆𑀢𑀲𑀪𑀸𑀯𑀸 𑀅𑀯𑀺𑀚𑁆𑀚𑀸𑀤𑀬𑁄𑀯, 𑀓𑀸𑀭𑀡𑀦𑁆𑀢𑀺 𑀯𑀸 𑀕𑀳𑀺𑀢𑀸𑀦𑀁 𑀧𑀓𑀢𑀺𑀆𑀤𑀻𑀦𑀁, 𑀅𑀯𑀺𑀚𑁆𑀚𑀸𑀤𑀻𑀦𑀜𑁆𑀘 𑀅𑀓𑀸𑀭𑀡𑀢𑀸, 𑀓𑀸𑀭𑀡𑀢𑀸 𑀘. 𑀢𑀢𑁆𑀣 𑀲𑀫𑁆𑀫𑀽𑀴𑁆𑀳𑀸 𑀓𑁂𑀘𑀺 𑀅𑀓𑀸𑀭𑀡𑀁 𑀓𑀸𑀭𑀡𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀓𑁂𑀘𑀺 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑀢𑁂𑀲𑀁 𑀬𑀣𑀸𑀲𑀓𑁂𑀳𑀺 𑀅𑀦𑀼𑀭𑀽𑀧𑁂𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀺𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁, 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀆𑀤𑀺, 𑀢𑀢𑁄 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀁, 𑀕𑀩𑁆𑀪𑀲𑁂𑀬𑁆𑀬𑀓𑀸𑀤𑀺𑀯𑀲𑁂𑀦 𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀅𑀢𑁆𑀢𑀪𑀸𑀯𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀦𑀼𑀧𑀼𑀩𑁆𑀩𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘 𑀅𑀦𑀼𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺. 𑀇𑀢𑀭𑀸𑀲𑀁 𑀢𑀤𑀢𑁆𑀣𑀢𑀸𑀲𑀫𑁆𑀪𑀯𑁂𑀧𑀺 𑀦 𑀢𑀸𑀲𑀁 𑀢𑀤𑀢𑁆𑀣𑀫𑁂𑀯 𑀧𑀯𑀢𑁆𑀢𑀺 𑀅𑀢𑁆𑀣𑀦𑁆𑀢𑀭𑀲𑀩𑁆𑀪𑀸𑀯𑀢𑁄. 𑀅𑀬𑀁 𑀧𑀦 𑀢𑀤𑀢𑁆𑀣𑀸 𑀏𑀯𑀸𑀢𑀺 𑀏𑀢𑀺𑀲𑁆𑀲𑀸 𑀢𑀤𑀢𑁆𑀣𑀢𑀸 𑀯𑀼𑀢𑁆𑀢𑀸.

𑀅𑀦𑀼𑀯𑀺𑀮𑁄𑀓𑀬𑀢𑁄 𑀬𑁄 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀯𑀩𑁄𑀥𑀲𑀗𑁆𑀔𑀸𑀢𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀯𑁂𑀥𑁄 𑀧𑀯𑀢𑁆𑀢𑁄, 𑀢𑀤𑀦𑀼𑀲𑀸𑀭𑁂𑀦 𑀢𑀤𑀦𑀼𑀕𑀫𑁂𑀦 𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀚𑀸𑀢𑀺𑀆𑀤𑀺𑀓𑀸𑀭𑀡𑀁 𑀬𑀁 𑀅𑀥𑀺𑀕𑀢𑀁, 𑀢𑀲𑁆𑀲 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀧𑀝𑀺𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀅𑀦𑀼𑀯𑀺𑀮𑁄𑀓𑀬𑀢𑁄 𑀧𑀝𑀺𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀤𑁂𑀲𑁂𑀦𑁆𑀢𑁄𑀧𑀺 𑀳𑀺 𑀪𑀕𑀯𑀸 𑀓𑀺𑀘𑁆𑀙𑀸𑀧𑀦𑁆𑀦𑀁 𑀮𑁄𑀓𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀩𑁆𑀩𑀪𑀸𑀕…𑀧𑁂… 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀤𑁂𑀲𑁂𑀲𑀻𑀢𑀺. 𑀆𑀳𑀸𑀭𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸, 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀅𑀢𑀻𑀢𑀤𑁆𑀥𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ¶ ‘‘𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀅𑀢𑀺𑀳𑀭𑀺𑀢𑁆𑀯𑀸’’𑀢𑀺. 𑀆𑀳𑀸𑀭𑀸 𑀯𑀸 𑀢𑀡𑁆𑀳𑀸𑀬 𑀧𑀪𑀸𑀯𑁂𑀢𑀩𑁆𑀩𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 ¶ , 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀅𑀢𑀻𑀢𑁄𑀢𑀺. 𑀧𑀘𑁆𑀘𑀓𑁆𑀔𑀁 𑀧𑀦 𑀨𑀮𑀁 𑀤𑀲𑁆𑀲𑁂𑀢𑁆𑀯𑀸 𑀢𑀦𑁆𑀦𑀺𑀤𑀸𑀦𑀤𑀲𑁆𑀲𑀦𑀯𑀲𑁂𑀦 𑀨𑀮𑀓𑀸𑀭𑀡𑀧𑀭𑀫𑁆𑀧𑀭𑀤𑀲𑁆𑀲𑀦𑀁 𑀬𑀼𑀚𑁆𑀚𑀢𑀻𑀢𑀺 𑀆𑀳𑀸𑀭𑀸 𑀧𑀼𑀭𑀺𑀫𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀺𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸, 𑀢𑀡𑁆𑀳𑀸𑀤𑀬𑁄 𑀅𑀢𑀻𑀢𑁄, 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀢𑀢𑁄𑀧𑀺 𑀅𑀢𑀻𑀢𑀢𑀭𑁄 𑀲𑀁𑀲𑀸𑀭𑀲𑁆𑀲 𑀅𑀦𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺. 𑀬𑀸𑀯 𑀅𑀢𑀻𑀢𑀤𑁆𑀥𑀸𑀦𑀦𑁆𑀢𑀺 𑀬𑀸𑀯 𑀅𑀢𑀻𑀢𑀢𑀭𑀁 𑀅𑀤𑁆𑀥𑀸𑀦𑀦𑁆𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄𑀢𑀺. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀳𑀸𑀭𑀓𑀸 𑀯𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 ‘‘𑀆𑀳𑀸𑀭𑁂𑀢𑀻𑀢𑀸𑀳𑀁 𑀦 𑀯𑀤𑀸𑀫𑀺…𑀧𑁂… 𑀏𑀯𑀁 𑀧𑀦 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄, 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁨.𑁧𑁨) 𑀯𑀘𑀦𑀢𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀨𑀲𑁆𑀲𑀘𑁂𑀢𑀦𑀸𑀦𑀁, 𑀢𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀢𑁆𑀢𑀸 𑀘 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲. 𑀢𑁂𑀦 𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑀭𑀽𑀧𑀓𑀸𑀬𑀲𑁆𑀲, 𑀢𑀜𑁆𑀘 𑀇𑀘𑁆𑀙𑀦𑁆𑀢𑀲𑁆𑀲 𑀓𑀸𑀫𑀯𑀺𑀜𑁆𑀜𑀸𑀡𑀸𑀬𑀽𑀳𑀦𑀁 𑀳𑁄𑀢𑀺. 𑀪𑁄𑀚𑀦𑀜𑁆𑀳𑀺 𑀲𑀤𑁆𑀥𑀸𑀤𑀻𑀦𑀁, 𑀭𑀸𑀕𑀸𑀤𑀻𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂 𑀓𑀫𑁆𑀫𑀯𑀝𑁆𑀝𑀲𑀗𑁆𑀕𑀳𑀺𑀢𑀸 𑀆𑀳𑀸𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀭𑀺𑀬𑀸𑀬𑁂 𑀧𑀼𑀭𑀺𑀫𑁄𑀬𑁂𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄.

𑀅𑀢𑀻𑀢𑀤𑁆𑀥𑀢𑁄 𑀧𑀪𑀼𑀢𑀺 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨) 𑀅𑀢𑀻𑀢𑁂, 𑀢𑀢𑁄 𑀧𑀭𑀜𑁆𑀘 𑀳𑁂𑀢𑀼𑀨𑀮𑀧𑀝𑀺𑀧𑀸𑀝𑀺𑀁 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀁 𑀆𑀳𑀸𑀭𑀸𑀦𑀁 𑀦𑀺𑀤𑀸𑀦𑀤𑀲𑁆𑀲𑀦𑀯𑀲𑁂𑀦 𑀆𑀭𑁄𑀳𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁂𑀦 𑀯𑀺𑀦𑀸 𑀅𑀩𑀼𑀚𑁆𑀛𑀦𑁆𑀢𑀸𑀦𑀁 𑀢𑀁𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀸 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀢𑀤𑁆𑀥𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀻𑀢𑀺 𑀅𑀦𑀸𑀕𑀢𑀲𑁆𑀲 𑀪𑀯𑀲𑁆𑀲 𑀳𑁂𑀢𑀼𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬. 𑀅𑀦𑀸𑀕𑀢𑀤𑁆𑀥𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀦𑀸𑀕𑀢𑀤𑁆𑀥𑀼𑀦𑁄 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀧𑀘𑁆𑀘𑀓𑁆𑀔𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁂𑀢𑀼𑀁 𑀤𑀲𑁆𑀲𑁂𑀢𑁆𑀯𑀸 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀢𑀲𑁆𑀲 𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸, 𑀧𑀭𑀺𑀬𑁄𑀲𑀸𑀦𑀢𑁄 𑀘 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺 𑀧𑀯𑀢𑁆𑀢𑀸 𑀤𑁂𑀲𑀦𑀸 𑀤𑁆𑀯𑀸𑀤𑀲𑀗𑁆𑀕𑀸, 𑀢𑀢𑁄 𑀏𑀯 𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑀸. 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺 𑀧𑀯𑀢𑁆𑀢𑀸 𑀤𑁂𑀲𑀦𑀸 𑀅𑀝𑁆𑀞𑀗𑁆𑀕𑀸 𑀤𑁆𑀯𑀺𑀲𑀦𑁆𑀥𑀺 𑀢𑀺𑀲𑀗𑁆𑀔𑁂𑀧𑀸. 𑀫𑀚𑁆𑀛𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀧𑀯𑀢𑁆𑀢𑀸 𑀤𑁂𑀲𑀦𑀸 𑀙𑀴𑀗𑁆𑀕𑀸 𑀤𑁆𑀯𑀺𑀲𑀦𑁆𑀥𑀺 𑀢𑀺𑀲𑀗𑁆𑀔𑁂𑀧𑀸. ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁫𑁩, 𑁫𑁭) 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀧𑀯𑀢𑁆𑀢𑀸 𑀤𑁂𑀲𑀦𑀸 𑀏𑀓𑀲𑀦𑁆𑀥𑀺 𑀤𑁆𑀯𑀺𑀲𑀗𑁆𑀔𑁂𑀧𑀸. 𑀏𑀯𑀁 𑀅𑀬𑀁 𑀅𑀦𑁂𑀓𑀗𑁆𑀕𑀸 𑀏𑀯 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀆𑀕𑀢𑀸. 𑀏𑀓𑀗𑁆𑀕𑀯𑀲𑁂𑀦𑀸𑀧𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀮𑀩𑁆𑀪𑀢𑁂𑀯. 𑀬𑀣𑀸𑀳 𑁋

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 ¶ 𑀓𑀭𑁄𑀢𑀺 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’𑀢𑀺. 𑀲𑀼𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸’’𑀢𑀺 (𑀲𑀁. 𑀦𑀺. 𑁨.𑁬𑁨) 𑁋

𑀆𑀤𑀺. 𑀏𑀢𑁆𑀣 𑀳𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀢𑀓𑁄 𑀏𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀢𑀁 𑀯𑀺𑀜𑁆𑀜𑀸𑀬𑀢𑀺 ‘‘𑀏𑀓𑀗𑁆𑀕𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺.

𑀢𑀢𑁆𑀣 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀳𑁄𑀢𑀺. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀪𑀸𑀯𑁂 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀪𑀸𑀯𑀲𑁆𑀲, 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀦𑀺𑀭𑁄𑀥𑀲𑁆𑀲 𑀘 𑀯𑀘𑀦𑁂𑀦 𑀧𑀼𑀭𑀺𑀫𑀲𑁆𑀫𑀺𑀁 𑀧𑀘𑁆𑀘𑀬𑀮𑀓𑁆𑀔𑀡𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀏𑀯, 𑀦 𑀅𑀲𑀢𑀺, 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀏𑀯, 𑀦 𑀦𑀺𑀭𑁄𑀥𑀸’’𑀢𑀺. 𑀢𑁂𑀦𑁂𑀢𑀁 𑀮𑀓𑁆𑀔𑀡𑀁 𑀅𑀦𑁆𑀢𑁄𑀕𑀥𑀦𑀺𑀬𑀫𑀁 𑀇𑀥 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀭𑁄𑀥𑁄𑀢𑀺 𑀘 𑀅𑀯𑀺𑀚𑁆𑀚𑀸𑀤𑀻𑀦𑀁 𑀯𑀺𑀭𑀸𑀕𑀸𑀥𑀺𑀕𑀫𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀅𑀧𑁆𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧; 𑀉𑀤𑀸. 𑁩). 𑀦𑀺𑀭𑁄𑀥𑀯𑀺𑀭𑁄𑀥𑀻 𑀘 𑀉𑀧𑁆𑀧𑀸𑀤𑁄, 𑀬𑁂𑀦 𑀲𑁄 𑀉𑀧𑁆𑀧𑀸𑀤𑀯𑀺𑀭𑁄𑀥𑀺𑀪𑀸𑀯𑁂𑀦 𑀯𑀼𑀢𑁆𑀢𑁄 ‘‘𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀦𑀺𑀭𑁄𑀥𑁄 𑀉𑀧𑁆𑀧𑀸𑀤𑁄 𑀦𑀸𑀫, 𑀲𑁄 𑀘𑁂𑀢𑁆𑀣 𑀅𑀢𑁆𑀣𑀺𑀪𑀸𑀯𑁄𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀇𑀤𑀫𑁂𑀯 𑀳𑀺 𑀮𑀓𑁆𑀔𑀡𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 ‘‘𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀧𑀭𑁂𑀦 𑀧𑀼𑀭𑀺𑀫𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀦 𑀥𑀭𑀫𑀸𑀦𑀢𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀇𑀫𑀲𑁆𑀫𑀺𑀁 𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀫𑀕𑁆𑀕𑁂𑀦 𑀅𑀦𑀺𑀭𑀼𑀤𑁆𑀥𑀪𑀸𑀯𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀫𑀸 𑀘 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀉𑀤𑀸. 𑁨) 𑀤𑁆𑀯𑀺𑀥𑀸𑀧𑀺 𑀉𑀤𑁆𑀤𑀺𑀝𑁆𑀞𑀮𑀓𑁆𑀔𑀡𑀲𑁆𑀲 𑀦𑀺𑀭𑁄𑀥𑀲𑁆𑀲 𑀦𑀺𑀤𑁆𑀤𑁂𑀲𑀁 𑀯𑀤𑀦𑁆𑀢𑁂𑀦 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧; 𑀉𑀤𑀸. 𑁩) 𑀦𑀺𑀭𑁄𑀥𑁄 ¶ 𑀏𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀦𑀢𑁆𑀣𑀺𑀪𑀸𑀯𑁄𑀧𑀺 𑀦𑀺𑀭𑁄𑀥𑁄 𑀏𑀯𑀸𑀢𑀺 𑀦𑀢𑁆𑀣𑀺𑀪𑀸𑀯𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑀺𑀪𑀸𑀯𑁄 𑀅𑀦𑀺𑀭𑁄𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑁆𑀧𑀸𑀤𑀁 𑀯𑀺𑀲𑁂𑀲𑁂𑀢𑀺. 𑀢𑀢𑁄 𑀦 𑀇𑀥 𑀅𑀢𑁆𑀢𑀮𑀸𑀪𑀫𑀢𑁆𑀢𑀁 𑀉𑀧𑁆𑀧𑀸𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀢𑁆𑀣𑀺𑀪𑀸𑀯𑁄 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 ¶ 𑀏𑀯𑀫𑁂𑀢𑀁 𑀮𑀓𑁆𑀔𑀡𑀤𑁆𑀯𑀬𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀲𑀸𑀢𑁆𑀣𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀧𑀦𑀸𑀬𑀁 𑀅𑀦𑀺𑀭𑁄𑀥𑁄 𑀦𑀸𑀫, 𑀬𑁄 𑀅𑀢𑁆𑀣𑀺𑀪𑀸𑀯𑁄, 𑀉𑀧𑁆𑀧𑀸𑀤𑁄𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺? 𑀅𑀧𑁆𑀧𑀳𑀻𑀦𑀪𑀸𑀯𑁄, 𑀅𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀢𑀸𑀧𑁆𑀧𑀳𑀻𑀦𑀸𑀭𑀳𑀢𑀸𑀳𑀺 𑀨𑀮𑀼𑀧𑁆𑀧𑀸𑀤𑀦𑀸𑀭𑀳𑀢𑀸 𑀘. 𑀬𑁂 𑀢𑁂𑀳𑀺 𑀧𑀳𑀸𑀢𑀩𑁆𑀩𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀪𑀸𑀯𑁄, 𑀬𑁂 𑀧𑀦 𑀦 𑀧𑀳𑀸𑀢𑀩𑁆𑀩𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀬𑀸𑀦𑀺 𑀢𑁂𑀲𑀼 𑀲𑀁𑀬𑁄𑀚𑀦𑀸𑀦𑀺 𑀅𑀔𑀻𑀡𑀸𑀲𑀯𑀸𑀦𑀁, 𑀢𑁂𑀲𑀁 𑀅𑀧𑀭𑀺𑀓𑁆𑀔𑀻𑀡𑀢𑀸 𑀘. 𑀅𑀲𑀫𑀼𑀕𑁆𑀖𑀸𑀢𑀺𑀢𑀸𑀦𑀼𑀲𑀬𑀢𑀸𑀬 𑀳𑀺 𑀲𑀲𑀁𑀬𑁄𑀚𑀦𑀸𑀔𑀦𑁆𑀥𑀧𑁆𑀧𑀯𑀢𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀩𑀸𑀮𑀲𑁆𑀲, 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀸, 𑀲𑀸 𑀘 𑀢𑀡𑁆𑀳𑀸 𑀅𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀅𑀘𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀲𑁆𑀫𑀸 𑀩𑀸𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄 𑀳𑁄𑀢𑀺, 𑀲𑁄 𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑁂𑀦𑀸’’𑀢𑀺 (𑀲𑀁. 𑀦𑀺. 𑁨.𑁧𑁯) 𑁋

𑀆𑀤𑀺. 𑀔𑀻𑀡𑀲𑀁𑀬𑁄𑀚𑀦𑀸𑀦𑀁 𑀧𑀦 𑀅𑀯𑀺𑀚𑁆𑀚𑀸𑀬 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀁, 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀁 𑀅𑀪𑀸𑀯𑀢𑁄 𑀉𑀧𑀸𑀤𑀸𑀦𑀪𑀯𑀸𑀦𑀁 𑀦 𑀲𑀫𑁆𑀪𑀯𑁄𑀢𑀺 𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀙𑀦𑁆𑀦𑀦𑁆𑀢𑁆𑀯𑁂𑀯, 𑀨𑀕𑁆𑀕𑀼𑀦, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺 (𑀲𑀁. 𑀦𑀺. 𑁨.𑁧𑁨) 𑁋

𑀆𑀤𑀺. 𑀦 𑀳𑀺 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀢𑁄 𑀉𑀤𑁆𑀥𑀁 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀲𑀴𑀸𑀬𑀢𑀦𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺, 𑀅𑀣 𑀔𑁄 𑀦𑀢𑁆𑀣𑀺𑀢𑀸, 𑀦𑀺𑀭𑁄𑀥𑀲𑀤𑁆𑀤𑀯𑀘𑀦𑀻𑀬𑀢𑀸, 𑀔𑀻𑀡𑀲𑀁𑀬𑁄𑀚𑀦𑀢𑀸𑀢𑀺 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄. 𑀅𑀧𑀺𑀘 𑀘𑀺𑀭𑀓𑀢𑀫𑁆𑀧𑀺 𑀓𑀫𑁆𑀫𑀁 𑀅𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀢𑀸𑀬, 𑀅𑀧𑁆𑀧𑀳𑀻𑀦𑀸𑀭𑀳𑀢𑀸𑀬 𑀘 𑀨𑀮𑀸𑀭𑀳𑀁 𑀲𑀦𑁆𑀢𑀁 𑀏𑀯 𑀦𑀸𑀫 𑀳𑁄𑀢𑀺, 𑀦 𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀁, 𑀦𑀸𑀧𑀺 ¶ 𑀧𑀳𑀻𑀦𑀸𑀭𑀳𑀦𑁆𑀢𑀺 𑀨𑀮𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀼𑀢𑁆𑀢𑀦𑀬𑁂𑀦 𑀨𑀮𑀸𑀭𑀳𑀪𑀸𑀯𑁄 𑀅𑀦𑀺𑀭𑁄𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀦𑀺𑀭𑀼𑀤𑁆𑀥𑀪𑀸𑀯𑁂𑀦𑁂𑀯 𑀳𑀺 𑀬𑁂𑀦 𑀯𑀺𑀦𑀸 𑀨𑀮𑀁 𑀦 𑀲𑀫𑁆𑀪𑀯𑀢𑀺, 𑀢𑀁 𑀓𑀸𑀭𑀡𑀁 𑀅𑀢𑀻𑀢𑀸𑀤𑀺𑀧𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀏𑀯 𑀘 𑀅𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀸𑀧𑀦𑁆𑀦𑁄 𑀧𑀘𑁆𑀘𑀬𑀼𑀧𑁆𑀧𑀸𑀤𑁄 𑀓𑀸𑀮𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀢𑀸𑀬 ¶ 𑀏𑀯 ‘‘𑀇𑀫𑀲𑁆𑀲𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀺𑀬 𑀧𑀕𑁂𑀯 𑀯𑀺𑀚𑁆𑀚𑀫𑀸𑀦𑀲𑁆𑀲 𑀬𑀸 𑀨𑀮𑀼𑀧𑁆𑀧𑀢𑁆𑀢𑀺𑀅𑀪𑀺𑀫𑀼𑀔𑀢𑀸, 𑀲𑀸 ‘‘𑀇𑀫𑀲𑁆𑀲𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀸. 𑀢𑀤𑀸 𑀳𑀺 𑀢𑀢𑁄 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀯𑀢𑁆𑀣𑀁 𑀓𑀸𑀭𑀡𑀁 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀁 𑀉𑀧𑁆𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀢𑀤𑀯𑀢𑁆𑀣𑀦𑁆𑀢𑀺 𑀢𑀤𑀯𑀢𑁆𑀣𑀢𑀸 𑀉𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 ‘‘𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀚𑁆𑀚𑀫𑀸𑀦𑀢𑀸𑀫𑀢𑁆𑀢𑁂𑀦 𑀧𑀘𑁆𑀘𑀬𑀪𑀸𑀯𑀁 𑀯𑀤𑀦𑁆𑀢𑁄 𑀅𑀩𑁆𑀬𑀸𑀧𑀸𑀭𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀸𑀢𑀺 𑀉𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁, 𑀅𑀲𑀩𑁆𑀩𑀓𑀸𑀮𑀪𑀸𑀯𑀺𑀢𑀁, 𑀨𑀮𑀼𑀧𑁆𑀧𑀢𑁆𑀢𑀺𑀅𑀪𑀺𑀫𑀼𑀔𑀢𑀜𑁆𑀘 𑀤𑀻𑀧𑁂𑀦𑁆𑀢𑁄 𑀅𑀦𑀺𑀘𑁆𑀘𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. ‘‘𑀲𑀢𑀺, 𑀦 𑀅𑀲𑀢𑀺, 𑀉𑀧𑁆𑀧𑀸𑀤𑀸, 𑀦 𑀦𑀺𑀭𑁄𑀥𑀸’’𑀢𑀺 𑀧𑀦 𑀳𑁂𑀢𑀼𑀅𑀢𑁆𑀣𑁂𑀳𑀺 𑀪𑀼𑀫𑁆𑀫𑀦𑀺𑀲𑁆𑀲𑀓𑁆𑀓𑀯𑀘𑀦𑁂𑀳𑀺 𑀲𑀫𑀢𑁆𑀣𑀺𑀢𑀁 𑀦𑀺𑀤𑀸𑀦𑀲𑀫𑀼𑀤𑀬𑀚𑀸𑀢𑀺𑀧𑀪𑀯𑀪𑀸𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀅𑀢𑁆𑀣𑀢𑀸 𑀘𑁂𑀢𑁆𑀣 𑀪𑀼𑀫𑁆𑀫𑀯𑀘𑀦𑁂 𑀬𑀲𑁆𑀲 𑀪𑀸𑀯𑁂𑀦 𑀢𑀤𑀯𑀺𑀦𑀸𑀪𑀸𑀯𑀺𑀨𑀮𑀲𑁆𑀲 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀬𑀣𑀸 𑀅𑀥𑀦𑀸𑀦𑀁 𑀥𑀦𑁂 𑀅𑀦𑀦𑀼𑀧𑁆𑀧𑀤𑀻𑀬𑀫𑀸𑀦𑁂 𑀤𑀸𑀮𑀺𑀤𑁆𑀤𑀺𑀬𑀁 𑀯𑁂𑀧𑀼𑀮𑁆𑀮𑀫𑀕𑀫𑀸𑀲𑀺 (𑀤𑀻. 𑀦𑀺. 𑁩.𑁯𑁧), 𑀦𑀺𑀧𑁆𑀨𑀦𑁆𑀦𑁂 𑀲𑀲𑁆𑀲𑁂 𑀲𑀼𑀪𑀺𑀓𑁆𑀔𑀁 𑀚𑀸𑀬𑀢𑀻𑀢𑀺 𑀘. 𑀦𑀺𑀲𑁆𑀲𑀓𑁆𑀓𑀯𑀘𑀦𑀲𑁆𑀲𑀸𑀧𑀺 𑀳𑁂𑀢𑀼𑀅𑀢𑁆𑀣𑀢𑀸 𑀨𑀮𑀲𑁆𑀲 𑀧𑀪𑀯𑁂 𑀧𑀓𑀢𑀺𑀬𑀜𑁆𑀘 𑀧𑀯𑀢𑁆𑀢𑀺𑀬𑀸, 𑀬𑀣𑀸 ‘‘𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤𑀁, 𑀅𑀩𑁆𑀩𑀼𑀤𑀸 𑀚𑀸𑀬𑀢𑁂 𑀧𑁂𑀲𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁫; 𑀓𑀣𑀸. 𑁬𑁯𑁨), ‘‘𑀳𑀺𑀫𑀯𑀢𑀸 𑀕𑀗𑁆𑀕𑀸 𑀧𑀪𑀯𑀢𑀺, 𑀲𑀺𑀗𑁆𑀕𑀢𑁄 𑀲𑀭𑁄 𑀚𑀸𑀬𑀢𑀻’’𑀢𑀺 𑀘. 𑀅𑀯𑀺𑀚𑁆𑀚𑀸𑀤𑀺𑀪𑀸𑀯𑁂𑀦 𑀘 𑀢𑀤𑀯𑀺𑀦𑀸𑀪𑀸𑀯𑀺𑀲𑀗𑁆𑀔𑀸𑀭𑀸𑀤𑀺𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀅𑀯𑀺𑀚𑁆𑀚𑀸𑀤𑀻𑀳𑀺 𑀘 𑀲𑀗𑁆𑀔𑀸𑀭𑀸𑀤𑀬𑁄 𑀧𑀪𑀯𑀦𑁆𑀢𑀺, 𑀧𑀓𑀭𑀻𑀬𑀦𑁆𑀢𑀺 𑀘𑀸𑀢𑀺 𑀢𑁂𑀲𑀁 𑀧𑀪𑀯𑁄, 𑀧𑀓𑀢𑀺 𑀘, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀫𑀲𑁆𑀲𑀼𑀧𑁆𑀧𑀸𑀤𑀸’’𑀢𑀺 𑀳𑁂𑀢𑀼𑀅𑀢𑁆𑀣𑀸 𑀪𑀼𑀫𑁆𑀫𑀦𑀺𑀲𑁆𑀲𑀓𑁆𑀓𑀦𑀺𑀤𑁆𑀤𑁂𑀲𑀸 𑀓𑀢𑀸.

𑀬𑀲𑁆𑀫𑀸 𑀘𑁂𑀢𑁆𑀣 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑀺𑀝𑁆𑀞𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀓𑁄 𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀺𑀪𑀸𑀯𑁄, 𑀉𑀧𑁆𑀧𑀸𑀤𑁄 𑀘 𑀢𑁂𑀲𑀁 ¶ 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀅𑀦𑀺𑀭𑀼𑀤𑁆𑀥𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀪𑀸𑀯𑀁, 𑀉𑀧𑁆𑀧𑀸𑀤𑀜𑁆𑀘 𑀅𑀦𑀺𑀯𑀢𑁆𑀢𑀲𑀪𑀸𑀯𑀢𑀸𑀲𑀗𑁆𑀔𑀸𑀢𑀁, 𑀉𑀤𑀬𑀸𑀯𑀢𑁆𑀣𑀢𑀸𑀲𑀗𑁆𑀔𑀸𑀢𑀁 𑀯𑀸 ‘‘𑀲𑀢𑀺𑀬𑁂𑀯, 𑀦 𑀅𑀲𑀢𑀺, 𑀉𑀧𑁆𑀧𑀸𑀤𑀸 𑀏𑀯, 𑀦 𑀦𑀺𑀭𑁄𑀥𑀸’’𑀢𑀺 𑀅𑀦𑁆𑀢𑁄𑀕𑀥𑀦𑀺𑀬𑀫𑁂𑀳𑀺 𑀯𑀘𑀦𑁂𑀳𑀺 𑀧𑀓𑀸𑀲𑀺𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀺𑀪𑀸𑀯𑁄, 𑀉𑀧𑁆𑀧𑀸𑀤𑁄 𑀘 𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀧𑀺 𑀳𑀺 𑀧𑀝𑁆𑀞𑀸𑀦𑁂 𑀆𑀕𑀢𑀸 𑀳𑁂𑀢𑀼𑀆𑀤𑀬𑁄 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸, 𑀢𑁂𑀧𑀺 𑀏𑀢𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀺𑀲𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀬𑁆𑀯𑀸𑀬𑀁 𑀫𑀽𑀮𑀳𑁂𑀢𑀼𑀦𑀺𑀤𑀸𑀦𑀲𑀫𑁆𑀪𑀯𑀧𑀪𑀯𑀸𑀤𑀺𑀧𑀭𑀺𑀬𑀸𑀬𑁂𑀳𑀺 ¶ , 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀧𑀯𑀢𑁆𑀢𑀝𑁆𑀞𑀺𑀢𑀺 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀆𑀬𑀽𑀳𑀦𑀝𑁆𑀞𑀺𑀢𑀺 𑀲𑀁𑀬𑁄𑀕𑀝𑁆𑀞𑀺𑀢𑀺 𑀧𑀮𑀺𑀩𑁄𑀥𑀝𑁆𑀞𑀺𑀢𑀻𑀢𑀺𑀆𑀤𑀺𑀧𑀭𑀺𑀬𑀸𑀬𑁂𑀳𑀺 𑀘 𑀧𑀓𑀸𑀲𑀺𑀢𑁄 𑀓𑀸𑀭𑀡𑀢𑁆𑀣𑁄, 𑀲𑁄𑀧𑀺 𑀏𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁫𑁮𑁪. 𑀫𑀽𑀮𑀓𑀸𑀭𑀡𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦 𑀅𑀓𑀸𑀭𑀡𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀅𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀅𑀓𑀸𑀭𑀡𑀁 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀧𑀝𑀺𑀩𑀸𑀳𑀺𑀢𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀲𑀯𑀲𑀫𑀼𑀤𑀬𑀸’’𑀢𑀺 𑀲𑀼𑀢𑁆𑀢𑀁 𑀆𑀳𑀭𑀢𑀺. 𑀧𑀭𑀺𑀬𑀸𑀬𑁄 𑀓𑀸𑀭𑀡𑀁. 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀸𑀯𑁄 𑀯𑀝𑁆𑀝𑀳𑁂𑀢𑀼𑀦𑁄 𑀓𑀫𑁆𑀫𑀲𑁆𑀲𑀸𑀧𑀺 𑀳𑁂𑀢𑀼𑀪𑀸𑀯𑁄. 𑀢𑀢𑁆𑀣 𑀪𑀯𑀢𑀡𑁆𑀳𑀸𑀬𑀧𑀺 𑀳𑁂𑀢𑀼𑀪𑀽𑀢𑀸 𑀅𑀯𑀺𑀚𑁆𑀚𑀸, 𑀢𑀸𑀬 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀪𑀯𑁂 𑀢𑀡𑁆𑀳𑀸𑀬 𑀉𑀧𑁆𑀧𑀚𑁆𑀚𑀦𑀢𑁄 𑀅𑀯𑀺𑀚𑁆𑀚𑀸 𑀯𑀺𑀲𑁂𑀲𑁂𑀦 𑀲𑀻𑀲𑀪𑀽𑀢𑀸𑀢𑀺 ‘‘𑀫𑀽𑀮𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸.

𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀫𑀸𑀦𑀸𑀬 𑀉𑀧𑁆𑀧𑀸𑀤𑀯𑀺𑀭𑀳𑀢𑁄 𑀦𑀺𑀘𑁆𑀘𑀢𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀆𑀳 ‘‘𑀏𑀯𑀁 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀢𑁂𑀦 𑀇𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑀸 𑀦𑀢𑁆𑀣𑀻𑀢𑀺 𑀅𑀧𑀜𑁆𑀜𑀸𑀬𑀦𑀢𑁄 𑀧𑀼𑀭𑀺𑀫𑀓𑁄𑀝𑀺𑀅𑀧𑀜𑁆𑀜𑀸𑀬𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁫𑁮𑁫. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀳𑁂𑀢𑀼𑀓𑁆𑀓𑀫𑁂𑀦 𑀨𑀮𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 ‘‘𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄’’𑀢𑀺 𑀯𑀘𑀦𑀁 𑀲𑀤𑁆𑀤𑀮𑀓𑁆𑀔𑀡𑀸𑀯𑀺𑀭𑁄𑀥𑀦𑀢𑁆𑀣𑀁. 𑀧𑀽𑀚𑀺𑀢𑀲𑁆𑀲 𑀳𑀺 𑀤𑁆𑀯𑀦𑁆𑀤𑁂 𑀧𑀼𑀩𑁆𑀩𑀦𑀺𑀧𑀸𑀢𑁄. 𑀲𑀯𑀭𑀸 𑀓𑀺𑀭 𑀫𑀁𑀲𑀲𑁆𑀲 𑀅𑀝𑁆𑀞𑀺𑀦𑀸 𑀅𑀮𑀕𑁆𑀕𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀧𑀸𑀬𑁂𑀢𑁆𑀯𑀸 𑀯𑀺𑀭𑀺𑀢𑁆𑀢𑀁 𑀲𑀽𑀦𑀁 𑀅𑀝𑁆𑀞𑀺𑀢𑁄 𑀫𑀼𑀢𑁆𑀢𑀫𑀁𑀲𑀁 𑀕𑀸𑀯𑀺𑀁 𑀫𑀸𑀭𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀕𑁆𑀕𑀺𑀲𑀦𑁆𑀢𑀸𑀧𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀯𑀚𑁆𑀛𑀕𑀸𑀯𑀻 𑀘 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀢𑀸𑀬 𑀬𑀣𑀸𑀯𑀼𑀢𑁆𑀢𑀁 𑀉𑀡𑁆𑀳𑁄𑀤𑀓𑀧𑀸𑀦𑀁 𑀆𑀭𑀪𑀢𑀺, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄 𑀬𑀣𑀸𑀯𑀼𑀢𑁆𑀢𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀁. 𑀬𑀣𑀸 𑀧𑀦 𑀲𑀸 𑀉𑀡𑁆𑀳𑁄𑀤𑀓𑀧𑀸𑀦𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀡𑁆𑀳𑀸𑀯𑀲𑁂𑀦 𑀲𑀻𑀢𑀼𑀤𑀓𑀧𑀸𑀦𑀁 𑀆𑀭𑀪𑀢𑀺, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄 𑀅𑀯𑀺𑀚𑁆𑀚𑀸𑀬 𑀦𑀸𑀢𑀺𑀩𑀮𑀯𑀪𑀸𑀯𑀢𑁄 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀡𑁆𑀳𑀸𑀯𑀲𑁂𑀦 ¶ 𑀲𑀼𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺. 𑀤𑀼𑀓𑁆𑀔𑁂 𑀳𑀺 𑀅𑀯𑀺𑀚𑁆𑀚𑀁 𑀢𑀡𑁆𑀳𑀸 𑀅𑀦𑀼𑀯𑀢𑁆𑀢𑀢𑀺, 𑀲𑀼𑀔𑁂 𑀢𑀡𑁆𑀳𑀁 𑀅𑀯𑀺𑀚𑁆𑀚𑀸𑀢𑀺.

𑁫𑁮𑁬. 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂. 𑀏𑀓𑀥𑀫𑁆𑀫𑀫𑀽𑀮𑀺𑀓𑀁 𑀤𑁂𑀲𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀼 𑀏𑀓𑁄𑀬𑁂𑀯 𑀥𑀫𑁆𑀫𑁄 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀥𑀫𑁆𑀫𑀫𑀽𑀮𑀺𑀓𑀸, 𑀢𑀁, 𑀢𑀢𑁆𑀣 𑀏𑀓𑀁 𑀏𑀯 𑀥𑀫𑁆𑀫𑀁 𑀫𑀽𑀮𑀁 𑀓𑀢𑁆𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑀻𑀤𑀢𑀺 𑀨𑀮𑀁 𑀏𑀢𑁆𑀣𑀸𑀢𑀺 𑀉𑀧𑀦𑀺𑀲𑀸, 𑀓𑀸𑀭𑀡𑀁, 𑀅𑀯𑀺𑀚𑁆𑀚𑀸 𑀉𑀧𑀦𑀺𑀲𑀸 𑀏𑀢𑁂𑀲𑀦𑁆𑀢𑀺 𑀅𑀯𑀺𑀚𑁆𑀚𑀽𑀧𑀦𑀺𑀲𑀸. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀉𑀧𑀸𑀤𑀸𑀦𑀺𑀬𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁄 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑀁 ¶ 𑀲𑀼𑀔𑀲𑁄𑀫𑀦𑀲𑁆𑀲𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑀲𑁆𑀲. 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑀢𑀸𑀬 𑀩𑀸𑀮𑀮𑀓𑁆𑀔𑀡𑀬𑁄𑀕𑁂𑀦 𑀩𑀸𑀮𑀲𑁆𑀲. 𑀏𑀯𑀦𑁆𑀢𑀺 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀢𑁆𑀢𑀸, 𑀢𑀡𑁆𑀳𑀸𑀲𑀁𑀬𑀼𑀢𑁆𑀢𑀢𑁆𑀢𑀸 𑀘. 𑀅𑀬𑀁 𑀓𑀸𑀬𑁄𑀢𑀺 𑀅𑀬𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑁄 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄 𑀔𑀦𑁆𑀥𑀧𑀜𑁆𑀘𑀓𑀁. ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀯𑀘𑀦𑀢𑁄 𑀨𑀲𑁆𑀲𑀓𑀸𑀭𑀡𑀜𑁆𑀘𑁂𑀢𑀁 𑀯𑀼𑀘𑁆𑀘𑀢𑀻𑀢𑀺 𑀆𑀬𑀢𑀦𑀘𑁆𑀙𑀓𑁆𑀓𑀁 𑀯𑀸. 𑀲𑀫𑀼𑀤𑀸𑀕𑀢𑁄𑀢𑀺 𑀉𑀧𑁆𑀧𑀦𑁆𑀦𑁄. 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀦𑁆𑀢𑀺 𑀩𑀳𑀺𑀤𑁆𑀥𑀸 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄 𑀔𑀦𑁆𑀥𑀧𑀜𑁆𑀘𑀓𑀁, 𑀲𑀴𑀸𑀬𑀢𑀦𑀸𑀦𑀺 𑀯𑀸. 𑀇𑀢𑁆𑀣𑁂𑀢𑀦𑁆𑀢𑀺 𑀇𑀢𑁆𑀣𑀁 𑀏𑀢𑀁. 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀤𑁆𑀯𑀸𑀭𑀸𑀮𑀫𑁆𑀩𑀦𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀦𑀺 𑀤𑁆𑀯𑀬𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄𑀢𑀺 𑀅𑀜𑁆𑀜𑀢𑁆𑀣 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺 𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺, 𑀫𑀳𑀸𑀤𑁆𑀯𑀬𑀁 𑀦𑀸𑀫 𑀓𑀺𑀭𑁂𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀜𑁆𑀜𑀢𑁆𑀣 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁪; 𑁪.𑁬𑁦; 𑀓𑀣𑀸. 𑁪𑁬𑁫) 𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘𑀸𑀢𑀺 𑀯𑀼𑀢𑁆𑀢𑀸𑀦𑀺 𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸. 𑀇𑀥 𑀧𑀦 ‘‘𑀅𑀬𑀜𑁆𑀘𑁂𑀯 𑀓𑀸𑀬𑁄’’𑀢𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑁂 𑀲𑁂𑀲𑀥𑀫𑁆𑀫𑁂 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑁂 𑀏𑀯 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀘𑀓𑁆𑀔𑀸𑀤𑀺𑀓𑀸𑀬𑀁 𑀏𑀓𑀢𑁆𑀢𑁂𑀦 ‘‘𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸, ‘‘𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀏𑀓𑀢𑁆𑀢𑁂𑀦𑁂𑀯 ‘‘𑀩𑀸𑀳𑀺𑀭𑀸𑀬𑀢𑀦’’𑀦𑁆𑀢𑀺 𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀧𑀝𑀺𑀘𑁆𑀘 𑀨𑀲𑁆𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀫𑀳𑀸𑀤𑁆𑀯𑀬𑀫𑁂𑀢𑀦𑁆𑀢𑀺.

𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺, 𑀙𑀳𑀺 𑀆𑀬𑀢𑀦𑁂𑀳𑀺 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄𑀯𑀸𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀁 𑀓𑀸𑀬𑁄’’𑀢𑀺 𑀳𑀺 𑀯𑀼𑀢𑁆𑀢𑀸𑀦𑀺 𑀲𑀦𑀺𑀲𑁆𑀲𑀬𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑀸, ‘‘𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 ¶ 𑀧𑀭𑁂𑀲𑀁. 𑀢𑀣𑀸 𑀅𑀬𑀁 𑀓𑀸𑀬𑁄 𑀅𑀢𑁆𑀢𑀦𑁄 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧𑀁 𑀧𑀭𑁂𑀲𑀁 𑀩𑀸𑀳𑀺𑀭𑀸𑀦𑀻𑀢𑀺. 𑀅𑀜𑁆𑀜𑀣𑀸 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀫𑀢𑁆𑀢𑁂 𑀏𑀯 ‘‘𑀅𑀬𑀁 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁂𑀦 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑁂𑀯 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑀻𑀧𑀦𑀸 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀲𑀴𑁂𑀯𑀸𑀬𑀢𑀦𑀸𑀦𑀻𑀢𑀺 𑀲𑀴𑁂𑀯 𑀨𑀲𑁆𑀲𑀓𑀸𑀭𑀡𑀸𑀦𑀺, 𑀬𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀆𑀬𑀢𑀦𑁂𑀳𑀺 𑀉𑀧𑁆𑀧𑀦𑁆𑀦𑁂𑀦 𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀩𑀸𑀮𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁯) 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀲𑀗𑁆𑀔𑀸𑀭𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑁂 𑀏𑀯 𑀓𑀢𑁆𑀯𑀸 𑀓𑀸𑀬𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀸𑀦𑀺 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀓𑀸𑀬𑁂 𑀲𑀴𑀸𑀬𑀢𑀦𑀸𑀦𑀁 𑀨𑀲𑁆𑀲𑀁 𑀢𑀁𑀦𑀺𑀲𑁆𑀲𑀺𑀢𑀫𑁂𑀯 ¶ 𑀓𑀢𑁆𑀯𑀸 𑀯𑁂𑀤𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀅𑀢𑀻𑀢𑀤𑁆𑀥𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑁄 𑀯𑁂𑀤𑀦𑀸𑀦𑁆𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄. 𑀧𑀼𑀦 𑀘 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑁋

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀩𑀸𑀮𑀲𑁆𑀲, 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀸, 𑀲𑀸 𑀘 𑀢𑀡𑁆𑀳𑀸 𑀅𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀅𑀘𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀢𑀲𑁆𑀫𑀸 𑀩𑀸𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄 𑀳𑁄𑀢𑀺, 𑀲𑁄 𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁯) 𑁋

𑀯𑁂𑀤𑀦𑀸𑀧𑀪𑀯𑀁 𑀲𑀸𑀯𑀺𑀚𑁆𑀚𑀁 𑀢𑀡𑁆𑀳𑀁 𑀤𑀲𑁆𑀲𑁂𑀢𑁆𑀯𑀸, 𑀉𑀧𑀸𑀤𑀸𑀦𑀪𑀯𑁂 𑀘 𑀢𑀦𑁆𑀦𑀺𑀲𑁆𑀲𑀺𑀢𑁂 𑀓𑀢𑁆𑀯𑀸 ‘‘𑀓𑀸𑀬𑀽𑀧𑀕𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀚𑀸𑀢𑀺𑀆𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀉𑀪𑀬𑀫𑀽𑀮𑀯𑀲𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀘 𑀧𑀡𑁆𑀟𑀺𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀧𑀭𑀺𑀓𑁆𑀔𑀬𑀢𑁄 𑀧𑀪𑀼𑀢𑀺 𑀉𑀪𑀬𑀫𑀽𑀮𑀓𑁄 𑀧𑀝𑀺𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺.

𑁫𑁮𑁭. 𑀧𑀽𑀭𑁂𑀢𑀼𑀦𑁆𑀢𑀺 𑀯𑀟𑁆𑀠𑁂𑀢𑀼𑀁, 𑀉𑀧𑀘𑀺𑀦𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀅𑀯𑀺𑀚𑁆𑀚𑀸 ‘‘𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀯𑀺𑀦𑁆𑀤𑀺𑀬𑀲𑁆𑀲 𑀦 𑀳𑁄𑀢𑀻𑀢𑀺 ‘‘𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻’’𑀢𑀺 𑀘. 𑀅𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀺 𑀓𑀢𑁆𑀯𑀸 ¶ 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑀦𑀁 𑀆𑀬𑀢𑀦𑀁. 𑀲𑀫𑁆𑀫𑁄𑀳𑀪𑀸𑀯𑁂𑀦𑁂𑀯 𑀅𑀦𑀪𑀺𑀲𑀫𑀬𑀪𑀽𑀢𑀢𑁆𑀢𑀸 𑀅𑀯𑀺𑀤𑀺𑀢𑀁 𑀅𑀜𑁆𑀜𑀸𑀢𑀁 𑀓𑀭𑁄𑀢𑀺. 𑀅𑀦𑁆𑀢𑀯𑀺𑀭𑀳𑀺𑀢𑁂 𑀚𑀯𑀸𑀧𑁂𑀢𑀻𑀢𑀺 𑀯𑀡𑁆𑀡𑀸𑀕𑀫𑀯𑀺𑀧𑀭𑀺𑀬𑀸𑀬𑀯𑀺𑀓𑀸𑀭𑀯𑀺𑀦𑀸𑀲𑀥𑀸𑀢𑀼𑀅𑀢𑁆𑀣𑀯𑀺𑀲𑁂𑀲𑀬𑁄𑀕𑁂𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀯𑀲𑁂𑀦 𑀅-𑀓𑀸𑀭 𑀯𑀺-𑀓𑀸𑀭 𑀚-𑀓𑀸𑀭𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀯𑀡𑁆𑀡𑀸𑀦𑀁 𑀮𑁄𑀧𑀁, 𑀚-𑀓𑀸𑀭𑀲𑁆𑀲 𑀘 𑀤𑀼𑀢𑀺𑀬𑀲𑁆𑀲𑀸𑀕𑀫𑀁 𑀓𑀢𑁆𑀯𑀸 ‘‘𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀢𑁆𑀣𑀁 𑀯𑀢𑁆𑀯𑀸 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 ‘‘𑀇𑀤𑀁 𑀯𑀢𑁆𑀣𑀼, 𑀇𑀤𑀁 𑀆𑀭𑀫𑁆𑀫𑀡’’𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀜𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀚𑁆𑀚𑀸 𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀯𑀢𑁆𑀣𑀸𑀭𑀫𑁆𑀫𑀡𑀲𑀪𑀸𑀯𑀙𑀸𑀤𑀦𑀢𑁄 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀲𑁆𑀲, 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑀲𑁆𑀲 𑀘 𑀙𑀸𑀤𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀘𑁆𑀙𑀸𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀘𑁆𑀘𑀓𑁆𑀔𑀺𑀢𑁆𑀯𑀸𑀢𑀺 ¶ 𑀧𑀘𑁆𑀘𑀓𑁆𑀔𑀸𑀦𑀁 𑀅𑀓𑀢𑁆𑀯𑀸 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀉𑀧𑀓𑀸𑀭𑀓𑀝𑁆𑀞𑁄 𑀧𑀘𑁆𑀘𑀬𑀝𑁆𑀞𑁄 𑀬𑀣𑀸 𑀧𑀺𑀡𑁆𑀟𑀧𑀸𑀢𑀸𑀤𑀺 𑀲𑀭𑀻𑀭𑀲𑁆𑀲.

𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀬𑀣𑀸 𑀲𑀗𑁆𑀔𑀢𑀁 𑀳𑁄𑀢𑀺, 𑀏𑀯𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀲𑀗𑁆𑀔𑀸𑀭𑀲𑀤𑁆𑀤𑀕𑁆𑀕𑀳𑀡𑁂𑀦 𑀆𑀕𑀢𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸. 𑀬𑀤𑀺𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀧𑀺 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀸, 𑀢𑁂 𑀧𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀥𑀸𑀦𑀸𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀸, 𑀢𑀲𑁆𑀫𑀸 ‘‘𑀤𑀼𑀯𑀺𑀥𑀸’’𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑁂 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸𑀢𑀺 𑀯𑀸 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄. 𑀢𑀤𑁂𑀓𑀤𑁂𑀲𑀸 𑀘 𑀇𑀥 𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀢𑀲𑁆𑀫𑀸 𑀯𑀡𑁆𑀡𑁂𑀢𑀩𑁆𑀩𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁪) 𑀯𑀺𑀢𑀓𑁆𑀓𑀯𑀺𑀘𑀸𑀭𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀜𑁆𑀜𑀸𑀯𑁂𑀤𑀦𑀸𑀯𑀘𑀻𑀲𑀗𑁆𑀔𑀸𑀭𑀸𑀤𑀬𑁄 𑀯𑀼𑀢𑁆𑀢𑀸, 𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁂𑀲𑀼 𑀯𑀼𑀢𑁆𑀢𑀸 𑀓𑀸𑀬𑀲𑀜𑁆𑀘𑁂𑀢𑀦𑀸𑀤𑀬𑁄.

𑀲𑀗𑁆𑀔𑀢𑀲𑀗𑁆𑀔𑀸𑀭𑀸 𑀦𑀸𑀫 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀢𑀢𑁆𑀢𑀸. 𑀲𑀢𑀺𑀧𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀪𑀸𑀯𑁂 ‘‘𑀫𑀫𑁂𑀢𑀁 𑀨𑀮’’𑀦𑁆𑀢𑀺 𑀢𑀢𑁆𑀣𑀸𑀪𑀺𑀫𑀼𑀔𑁂𑀦 𑀯𑀺𑀬 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑁂𑀲𑀼 𑀲𑀸𑀢𑀺𑀲𑀬𑁄 𑀲𑀗𑁆𑀔𑀢𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁭) 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀢𑀸 𑀯𑀼𑀢𑁆𑀢𑀸. 𑀧𑀸𑀴𑀺𑀬𑀁 𑀧𑀦 𑀢𑀣𑀸 𑀆𑀕𑀢𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄 ‘‘𑀢𑁂𑀧𑀺 ¶ …𑀧𑁂… 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀸 𑀉𑀪𑀼𑀆𑀤𑀺𑀲𑀫𑀼𑀝𑁆𑀞𑀸𑀦𑀸𑀧𑀺 𑀲𑀩𑁆𑀩𑀥𑀫𑁆𑀫𑀸. 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀢𑁄. 𑀓𑀸𑀬𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀦𑀯𑀻𑀭𑀺𑀬𑀁 𑀓𑀸𑀬𑀺𑀓𑀯𑀻𑀭𑀺𑀬𑀁. 𑀅𑀪𑀺𑀲𑀗𑁆𑀔𑀸𑀭𑀲𑁆𑀲𑀸𑀢𑀺 𑀧𑀬𑁄𑀕𑀯𑁂𑀕𑀲𑁆𑀲.

𑀯𑀸𑀘𑀁 𑀲𑀗𑁆𑀔𑀭𑁄𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀢𑀺, 𑀘𑀺𑀢𑁆𑀢𑀁 𑀯𑀸 𑀲𑀗𑁆𑀔𑀭𑁄𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀲𑀗𑁆𑀔𑁂𑀧𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀬𑀣𑀸𑀭𑀳𑀁 𑀲𑀗𑁆𑀔𑀭𑁄𑀦𑁆𑀢𑀺, 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀝𑁆𑀞𑀧𑀘𑁆𑀘𑀬𑀝𑁆𑀞𑀸𑀤𑀺𑀫𑀸𑀳.

𑀦𑀫𑀢𑀻𑀢𑀺 𑀏𑀓𑀦𑁆𑀢𑀲𑀸𑀭𑀫𑁆𑀫𑀡𑀢𑀸𑀬 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀢𑀺. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀧𑀺𑀧𑀸𑀲𑀢𑀺, 𑀢𑀡𑁆𑀳𑀸𑀧𑀭𑀺𑀢𑀸𑀧𑀢𑀸𑀬 𑀯𑀸 𑀯𑀺𑀘𑀮𑀢𑀺. 𑀉𑀧𑀸𑀤𑀺𑀬𑀢𑀻𑀢𑀺 𑀤𑀴𑁆𑀳𑀁 𑀆𑀤𑀺𑀬𑀢𑀺. 𑀪𑀯𑀢𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑀁 𑀲𑀦𑁆𑀥𑀸𑀬𑀸𑀳. 𑀪𑀸𑀯𑀬𑀢𑀻𑀢𑀺 𑀓𑀫𑁆𑀫𑀪𑀯𑀁. 𑀘𑀼𑀢𑀺 𑀔𑀦𑁆𑀥𑀸𑀦𑀁 𑀫𑀭𑀡𑀦𑁆𑀢𑀺 ‘‘𑀫𑀭𑀦𑁆𑀢𑀺 𑀏𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀸 𑀯𑁂𑀤𑀦𑀸 ¶ 𑀉𑀧𑁆𑀧𑀸𑀤𑀤𑀼𑀓𑁆𑀔𑀸, 𑀞𑀺𑀢𑀺𑀤𑀼𑀓𑁆𑀔𑀸𑀢𑀺 𑀘 𑀓𑀢𑁆𑀯𑀸 ‘‘𑀤𑁆𑀯𑁂𑀥𑀸 𑀔𑀡𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀬𑀸𑀲𑁄 𑀧𑀭𑀺𑀲𑁆𑀲𑀫𑁄 𑀯𑀺𑀲𑀸𑀤𑁄.

𑀦𑀺𑀤𑁆𑀤𑀺𑀝𑁆𑀞𑀦𑀬𑀤𑀲𑁆𑀲𑀦𑀦𑁆𑀢𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀯𑀺𑀥𑀺𑀲𑀦𑁆𑀤𑀲𑁆𑀲𑀦𑀁. 𑀓𑁂𑀯𑀮-𑀲𑀤𑁆𑀤𑁄 𑀅𑀲𑀫𑁆𑀫𑀺𑀲𑁆𑀲𑀯𑀸𑀘𑀓𑁄 𑀘 𑀳𑁄𑀢𑀺 ‘‘𑀓𑁂𑀯𑀮𑀸 𑀲𑀸𑀮𑀬𑁄’’𑀢𑀺𑀆𑀤𑀻𑀲𑀼, 𑀦𑀺𑀭𑀯𑀲𑁂𑀲𑀯𑀸𑀘𑀓𑁄 𑀘 ‘‘𑀓𑁂𑀯𑀮𑀸 𑀅𑀗𑁆𑀕𑀫𑀕𑀥𑀸’’𑀢𑀺𑀆𑀤𑀻𑀲𑀼, 𑀢𑀲𑁆𑀫𑀸 𑀤𑁆𑀯𑀺𑀥𑀸𑀧𑀺 𑀅𑀢𑁆𑀣𑀁 𑀯𑀤𑀢𑀺. 𑀢𑀢𑁆𑀣 𑀅𑀲𑀫𑁆𑀫𑀺𑀲𑁆𑀲𑀲𑁆𑀲𑀸𑀢𑀺 𑀲𑀼𑀔𑀭𑀳𑀺𑀢𑀲𑁆𑀲. 𑀦 𑀳𑀺 𑀏𑀢𑁆𑀣 𑀓𑀺𑀜𑁆𑀘𑀺 𑀉𑀧𑁆𑀧𑀸𑀤𑀯𑀬𑀭𑀳𑀺𑀢𑀁 𑀅𑀢𑁆𑀣𑀺. 𑀲𑀓𑀮𑀲𑁆𑀲𑀸𑀢𑀺 𑀲𑀩𑁆𑀩𑀪𑀯𑀸𑀤𑀺𑀕𑀢𑀲𑁆𑀲, 𑀲𑀩𑁆𑀩𑀓𑀸𑀮𑀺𑀓𑀲𑁆𑀲 𑀘.

𑁫𑁮𑁮. ‘‘𑀮𑀓𑁆𑀔𑀡𑁂𑀓𑀯𑀺𑀥𑀸𑀤𑀺𑀢𑁄’’𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀧𑀭𑀺𑀲𑀫𑀸𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑀓𑁆𑀔𑀡𑀸𑀤𑀺𑀢𑁄’’𑀢𑀺. 𑀲𑀫𑁆𑀧𑀬𑀼𑀢𑁆𑀢𑁂, 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁂 𑀯𑀸 𑀲𑀫𑁆𑀫𑁄𑀳𑀬𑀢𑀻𑀢𑀺 𑀲𑀫𑁆𑀫𑁄𑀳𑀦𑀭𑀲𑀸. 𑀆𑀭𑀫𑁆𑀫𑀡𑀲𑀪𑀸𑀯𑀲𑁆𑀲 𑀙𑀸𑀤𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀆𑀲𑀯𑀧𑀤𑀝𑁆𑀞𑀸𑀦𑀸. 𑀧𑀝𑀺𑀲𑀦𑁆𑀥𑀺𑀚𑀦𑀦𑀢𑁆𑀣𑀁 𑀆𑀬𑀽𑀳𑀦𑁆𑀢𑀺 𑀩𑁆𑀬𑀸𑀧𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀆𑀬𑀽𑀳𑀦𑀭𑀲𑀸. 𑀭𑀸𑀲𑀺𑀓𑀭𑀡𑀁 𑀯𑀸 𑀆𑀬𑀽𑀳𑀦𑀁. 𑀘𑁂𑀢𑀦𑀸𑀲𑀪𑀸𑀯𑀢𑁆𑀢𑀸 𑀘𑁂𑀢𑀦𑀸 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀘𑁂𑀢𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀦𑀸𑀫𑀭𑀽𑀧𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀧𑀼𑀩𑁆𑀩𑀗𑁆𑀕𑀫𑀭𑀲𑀁. 𑀧𑀼𑀭𑀺𑀫𑀪𑀯𑁂𑀦 𑀲𑀤𑁆𑀥𑀺𑀁 𑀖𑀝𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀯𑀺𑀜𑁆𑀜𑀸𑀡𑁂𑀦 𑀲𑀳, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀲𑀫𑁆𑀧𑀬𑀼𑀚𑁆𑀚𑀢𑀻𑀢𑀺 𑀲𑀫𑁆𑀧𑀬𑁄𑀕𑀭𑀲𑀁. 𑀲𑀫𑀁 𑀧𑀓𑀸𑀭𑁂𑀳𑀺 𑀬𑁄𑀕𑁄 ¶ 𑀲𑀫𑁆𑀧𑀬𑁄𑀕𑁄. 𑀯𑀺𑀲𑀼𑀁 𑀅𑀪𑀸𑀯𑁄 𑀅𑀯𑀺𑀦𑀺𑀩𑁆𑀪𑁄𑀕𑁄. 𑀭𑀽𑀧𑀁 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀯𑀺𑀓𑀺𑀭𑀢𑀻𑀢𑀺 𑀯𑀺𑀓𑀺𑀭𑀡𑀭𑀲𑀁. 𑀢𑀢𑁄 𑀏𑀯 𑀳𑀺 𑀧𑀺𑀲𑀺𑀬𑀫𑀸𑀦𑀸 𑀢𑀡𑁆𑀟𑀼𑀮𑀸𑀤𑀬𑁄 𑀯𑀺𑀓𑀺𑀭𑀦𑁆𑀢𑀺, 𑀘𑀼𑀡𑁆𑀡𑀻𑀪𑀽𑀢𑀸 𑀯𑀺𑀤𑁆𑀥𑀁𑀲𑀦𑁆𑀢𑀺, 𑀦𑀸𑀫𑀲𑁆𑀲 𑀓𑀤𑀸𑀘𑀺 𑀓𑀼𑀲𑀮𑀸𑀤𑀺𑀪𑀸𑀯𑁄𑀧𑀺 𑀅𑀢𑁆𑀣𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀅𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁧𑁧; 𑀯𑀺𑀪. 𑀅𑀝𑁆𑀞. 𑁧𑁭𑁩) 𑀏𑀢𑁆𑀣 𑀯𑀺𑀬 𑀅𑀦𑀸𑀭𑀫𑁆𑀫𑀡𑀢𑀸 𑀯𑀸 𑀅𑀩𑁆𑀬𑀸𑀓𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀆𑀬𑀢𑀦𑀮𑀓𑁆𑀔𑀡𑀦𑁆𑀢𑀺 𑀖𑀝𑁆𑀝𑀦𑀮𑀓𑁆𑀔𑀡𑀁, 𑀆𑀬𑀸𑀦𑀁 𑀢𑀦𑀦𑀮𑀓𑁆𑀔𑀡𑀁 𑀯𑀸. 𑀤𑀲𑁆𑀲𑀦𑀲𑁆𑀲 𑀬𑀣𑀸𑀲𑀓𑀁 𑀯𑀺𑀲𑀬𑀕𑁆𑀕𑀳𑀡𑀲𑁆𑀲 𑀓𑀭𑀡𑀢𑁄 𑀤𑀲𑁆𑀲𑀦𑀭𑀲𑀁. ‘‘𑀤𑀲𑁆𑀲𑀦𑀸𑀤𑀺𑀭𑀲’’𑀦𑁆𑀢𑀺 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀣𑀸𑀭𑀳𑀁 𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀼𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀘𑀓𑁆𑀔𑀸𑀤𑀺𑀧𑀜𑁆𑀘𑀓𑀸𑀧𑁂𑀓𑁆𑀔𑀁. 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁂𑀓𑁆𑀔𑀸𑀬 𑀅𑀦𑀺𑀝𑁆𑀞𑀪𑀸𑀯𑀢𑁄 𑀤𑀼𑀓𑁆𑀔𑁂𑀦, 𑀇𑀢𑀭𑀸𑀬 𑀇𑀝𑁆𑀞𑀪𑀸𑀯𑀢𑁄 𑀲𑀼𑀔𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀳𑁂𑀢𑀼𑀮𑀓𑁆𑀔𑀡𑀸 𑀢𑀡𑁆𑀳𑀸. ‘‘𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻’’𑀢𑀺 (𑀫. 𑀦𑀺. 𑁧.𑁯𑁧, 𑁪𑁬𑁦; 𑀲𑀁. 𑀦𑀺. 𑁫.𑁧𑁦𑁮𑁧; 𑀯𑀺𑀪. 𑁨𑁦𑁩; 𑀫𑀳𑀸𑀯. 𑁧𑁪) 𑀯𑀘𑀦𑀢𑁄 𑀅𑀪𑀺𑀦𑀦𑁆𑀤𑀦𑀭𑀲𑀸. 𑀘𑀺𑀢𑁆𑀢𑀲𑁆𑀲, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀭𑀽𑀧𑀸𑀤𑀻𑀲𑀼 𑀅𑀢𑀺𑀢𑁆𑀢𑀪𑀸𑀯𑁄 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀅𑀢𑀺𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀫𑀼𑀜𑁆𑀘𑀦𑀭𑀲𑀁 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀯𑀲𑁂𑀦. 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 ¶ 𑀳𑀼𑀢𑁆𑀯𑀸 𑀓𑀸𑀫𑀼𑀧𑀸𑀤𑀸𑀦𑀁, 𑀲𑁂𑀲𑀸𑀦𑀺 𑀤𑀺𑀝𑁆𑀞𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀤𑀺𑀝𑁆𑀞𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀪𑀯𑀲𑁆𑀲 𑀮𑀓𑁆𑀔𑀡𑀸𑀤𑀬𑁄 𑀬𑁄𑀚𑁂𑀢𑀩𑁆𑀩𑀸.

𑁫𑁮𑁯. 𑀫𑁄𑀳𑀸𑀤𑀺𑀪𑀸𑀯𑀢𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀦𑀼𑀩𑁄𑀥𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀯𑀲𑁂𑀦 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀅𑀲𑀼𑀪𑀸𑀤𑀻𑀲𑀼 𑀲𑀼𑀪𑀸𑀤𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀯𑀲𑁂𑀦 𑀯𑀸 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺. 𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄𑀢𑀺 𑀤𑁆𑀯𑀸𑀭𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀙𑀲𑀼 𑀤𑁆𑀯𑀸𑀭𑁂𑀲𑀼, 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀘 𑀧𑀯𑀢𑁆𑀢𑀦𑀢𑁄. 𑀅𑀬𑀁 𑀧𑀦 𑀯𑀺𑀪𑀸𑀕𑁄 𑀦 𑀅𑀯𑀺𑀚𑁆𑀚𑀸𑀬 𑀏𑀯, 𑀅𑀜𑁆𑀜𑁂𑀲𑀼𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀅𑀭𑀽𑀧𑀥𑀫𑁆𑀫𑀸𑀦𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀲𑀼𑀧𑀻’’𑀢𑀺.

𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀤𑀺𑀪𑀸𑀯𑀢𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀲𑀁𑀬𑁄𑀚𑀦𑀺𑀬𑀸𑀤𑀺𑀪𑀸𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀢𑀼𑀬𑁄𑀦𑀺𑀲𑀁𑀯𑀢𑁆𑀢𑀦𑀢𑁄𑀢𑀺 𑀘𑀢𑀼𑀬𑁄𑀦𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀦𑀢𑁄.

𑀮𑁄𑀓𑀺𑀬𑀯𑀺𑀪𑀸𑀕𑀸𑀤𑀺𑀪𑀸𑀯𑀢𑁄𑀢𑀺 ¶ 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀩𑁆𑀬𑀸𑀓𑀢𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀢𑀸𑀤𑀺𑀪𑀸𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀢𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀸𑀤𑀺𑀪𑁂𑀤𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀸𑀫𑀁 𑀦𑀸𑀫𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀬𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀏𑀯𑀁 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀻𑀢𑀺 𑀅𑀤𑁆𑀥𑀤𑁆𑀯𑀬𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑀸𑀧𑀺 𑀦𑀬𑀢𑁄 𑀕𑀳𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀸𑀤𑀺𑀢𑁄 𑀢𑀺𑀯𑀺𑀥’’𑀦𑁆𑀢𑀺.

𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁄𑀢𑀺 𑀯𑀺𑀜𑁆𑀜𑀸𑀡𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀯𑀢𑁆𑀢𑀺𑀤𑁂𑀲𑀪𑀸𑀯𑀢𑁄. ‘‘𑀪𑀽𑀢𑀧𑁆𑀧𑀲𑀸𑀤𑀯𑀺𑀜𑁆𑀜𑀸𑀡𑀢𑁄’’𑀢𑀺 𑀧𑀸𑀞𑁄 𑀬𑀼𑀢𑁆𑀢𑁄. ‘‘𑀯𑀺𑀜𑁆𑀜𑀸𑀡𑀸𑀤𑀺𑀢𑁄’’𑀢𑀺 𑀧𑀦 𑀧𑀞𑀦𑁆𑀢𑀺. 𑀏𑀓𑀲𑁂𑀲𑀦𑀬𑁂𑀦 𑀩𑀸𑀳𑀺𑀭𑀸𑀬𑀢𑀦𑀲𑁆𑀲𑀸𑀧𑀺 𑀲𑀗𑁆𑀕𑀳𑁂 𑀲𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀦𑁄𑀪𑀬𑀕𑁄𑀘𑀭𑀦𑁆𑀢𑀺 𑀫𑀦𑀸𑀬𑀢𑀦𑀫𑀸𑀳. 𑀦 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀤𑁂𑀲𑀯𑀲𑁂𑀦 𑀆𑀲𑀦𑁆𑀦𑀢𑀸, 𑀤𑀽𑀭𑀢𑀸 𑀯𑀸 𑀅𑀢𑁆𑀣𑀺 𑀅𑀯𑀺𑀕𑁆𑀕𑀳𑀢𑁆𑀢𑀸, 𑀢𑀲𑁆𑀫𑀸 𑀫𑀦𑀸𑀬𑀢𑀦𑀲𑁆𑀲 𑀕𑁄𑀘𑀭𑁄 𑀫𑀦𑀸𑀬𑀢𑀦𑀁 𑀲𑀫𑁆𑀧𑀢𑁆𑀢𑁄, 𑀅𑀲𑀫𑁆𑀧𑀢𑁆𑀢𑁄 𑀯𑀸𑀢𑀺 𑀦 𑀯𑀼𑀘𑁆𑀘𑀢𑀺. 𑀨𑀲𑁆𑀲𑀸𑀤𑀻𑀦𑀫𑁆𑀧𑀻𑀢𑀺 𑀏𑀢𑁆𑀣 𑀨𑀲𑁆𑀲𑁄 𑀢𑀸𑀯 𑀨𑀼𑀲𑀦𑀲𑀪𑀸𑀯𑀢𑁄, 𑀮𑁄𑀓𑀺𑀬𑀲𑀸𑀲𑀯𑀸𑀤𑀺𑀪𑀸𑀯𑀢𑁄 𑀘 𑀏𑀓𑀯𑀺𑀥𑁄. 𑀧𑀝𑀺𑀖𑀲𑀫𑁆𑀨𑀲𑁆𑀲𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀪𑁂𑀤𑀢𑁄, 𑀲𑀳𑁂𑀢𑀼𑀓𑀸𑀤𑀺𑀪𑀸𑀯𑀢𑁄 𑀘 𑀤𑀼𑀯𑀺𑀥𑁄. 𑀪𑀯𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑁄, 𑀯𑁂𑀤𑀦𑀸𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄 ¶ , 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀢𑁄 𑀘 𑀢𑀺𑀯𑀺𑀥𑁄. 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀧𑀜𑁆𑀘𑀯𑀺𑀥𑁄 𑀘.

𑀯𑁂𑀤𑀦𑀸 𑀅𑀦𑀼𑀪𑀯𑀦𑀮𑀓𑁆𑀔𑀡𑀢𑁄, 𑀮𑁄𑀓𑀺𑀬𑀲𑀸𑀲𑀯𑀸𑀤𑀺𑀪𑀸𑀯𑀢𑁄 𑀘 𑀏𑀓𑀯𑀺𑀥𑀸. 𑀧𑀜𑁆𑀘𑀤𑁆𑀯𑀸𑀭𑀺𑀓𑀫𑀦𑁄𑀤𑁆𑀯𑀸𑀭𑀺𑀓𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀲𑀼𑀔𑀸𑀤𑀺𑀪𑁂𑀤𑀢𑁄 𑀢𑀺𑀯𑀺𑀥𑀸. 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸, 𑀧𑀜𑁆𑀘𑀯𑀺𑀥𑀸 𑀘. 𑀙𑀴𑀸𑀭𑀫𑁆𑀫𑀡𑀪𑁂𑀤𑀢𑁄 𑀙𑀩𑁆𑀩𑀺𑀥𑀸.

𑀢𑀡𑁆𑀳𑀸 𑀮𑁄𑀓𑀲𑁆𑀲 𑀲𑀫𑀼𑀤𑀬𑀪𑀸𑀯𑀢𑁄 𑀏𑀓𑀯𑀺𑀥𑀸. 𑀤𑀼𑀯𑀺𑀥𑀸 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀢𑁄. 𑀢𑀺𑀯𑀺𑀥𑀸 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀪𑁂𑀤𑀢𑁄. 𑀘𑀢𑀼𑀩𑁆𑀩𑀺𑀥𑀸 𑀘𑀢𑀼𑀫𑀕𑁆𑀕𑀧𑀳𑁂𑀬𑁆𑀬𑀢𑁄. 𑀧𑀜𑁆𑀘𑀯𑀺𑀥𑀸 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑀸𑀯𑀢𑁄. 𑀙𑀩𑁆𑀩𑀺𑀥𑀸 𑀙𑀢𑀡𑁆𑀳𑀸𑀓𑀸𑀬𑀪𑁂𑀤𑀢𑁄.

𑀉𑀧𑀸𑀤𑀸𑀦𑀁 𑀏𑀓𑀯𑀺𑀥𑀁 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑀢𑁄. 𑀤𑀼𑀯𑀺𑀥𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀪𑁂𑀤𑀢𑁄. 𑀢𑀺𑀯𑀺𑀥𑀁 𑀪𑀯𑀢𑁆𑀢𑀬𑀽𑀧𑀦𑀺𑀲𑁆𑀲𑀬𑀪𑀸𑀯𑀢𑁄. 𑀘𑀢𑀼𑀩𑁆𑀩𑀺𑀥𑀁 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀪𑁂𑀤𑀢𑁄. 𑀧𑀜𑁆𑀘𑀯𑀺𑀥𑀁 𑀧𑀜𑁆𑀘𑀕𑀢𑀺𑀲𑀁𑀯𑀢𑁆𑀢𑀦𑀢𑁄.

𑀪𑀯𑁄 ¶ 𑀏𑀓𑀯𑀺𑀥𑁄 𑀮𑁄𑀓𑀺𑀬𑀲𑀸𑀲𑀯𑀸𑀤𑀺𑀪𑀸𑀯𑀢𑁄. 𑀤𑀼𑀯𑀺𑀥𑁄 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑁂𑀤𑀢𑁄. 𑀢𑀺𑀯𑀺𑀥𑁄 𑀓𑀸𑀫𑀪𑀯𑀸𑀤𑀺𑀪𑁂𑀤𑀢𑁄. 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀭𑀼𑀧𑀸𑀤𑀸𑀦𑀧𑀘𑁆𑀘𑀬𑀢𑁄. 𑀧𑀜𑁆𑀘𑀯𑀺𑀥𑁄 𑀧𑀜𑁆𑀘𑀕𑀢𑀺𑀲𑀁𑀯𑀢𑁆𑀢𑀦𑀢𑁄. 𑀙𑀩𑁆𑀩𑀺𑀥𑁄 𑀓𑀸𑀫𑀓𑀫𑁆𑀫𑀪𑀯𑀸𑀤𑀺𑀪𑁂𑀤𑀢𑁄. 𑀲𑀢𑁆𑀢𑀯𑀺𑀥𑁄 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀗𑁆𑀕𑀳𑀢𑁄. 𑀅𑀝𑁆𑀞𑀯𑀺𑀥𑁄 𑀘𑀢𑀼𑀭𑀼𑀧𑀸𑀤𑀸𑀦𑀧𑀘𑁆𑀘𑀬𑀓𑀫𑁆𑀫𑀪𑀯𑀸𑀤𑀺𑀪𑁂𑀤𑀢𑁄. 𑀦𑀯𑀯𑀺𑀥𑁄 𑀓𑀸𑀫𑀪𑀯𑀸𑀤𑀺𑀪𑁂𑀤𑀢𑁄.

𑀚𑀸𑀢𑀺 𑀏𑀓𑀯𑀺𑀥𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄. 𑀤𑀼𑀯𑀺𑀥𑀸 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄. 𑀢𑀺𑀯𑀺𑀥𑀸 𑀪𑀯𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑁄. 𑀬𑁄𑀦𑀺𑀕𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸, 𑀧𑀜𑁆𑀘𑀯𑀺𑀥𑀸 𑀘. 𑀇𑀫𑀺𑀦𑀸 𑀦𑀬𑁂𑀦 𑀚𑀭𑀸𑀫𑀭𑀡𑀸𑀤𑀻𑀦𑀫𑁆𑀧𑀺 𑀏𑀓𑀯𑀺𑀥𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁦. 𑀲𑁄𑀓𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀅𑀗𑁆𑀕𑀩𑀳𑀼𑀢𑁆𑀢𑀧𑁆𑀧𑀲𑀗𑁆𑀕𑁂 ‘‘𑀤𑁆𑀯𑀸𑀤𑀲𑁂𑀯𑀸’’𑀢𑀺 𑀅𑀗𑁆𑀕𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀲𑁄𑀓𑀸𑀤𑀬𑁄 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀨𑀮𑁂𑀦 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀁 𑀫𑀽𑀮𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀢𑁂 𑀯𑀼𑀢𑁆𑀢𑀸. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑁄𑀓𑀸𑀤𑀻𑀦𑀁 𑀚𑀭𑀸𑀫𑀭𑀡𑀓𑀸𑀭𑀡𑀢𑀸 𑀯𑀼𑀢𑁆𑀢𑀸, 𑀦 𑀧𑀦 ‘‘𑀓𑀸𑀬𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄’’𑀢𑀺 𑀘 𑀲𑀼𑀢𑁆𑀢𑁂 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀜𑁆𑀘 𑀤𑀼𑀓𑁆𑀔𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀁 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀁 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀲𑀫𑁆𑀪𑀯𑁂 𑀲𑀸𑀥𑀓𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀚𑀭𑀸𑀫𑀭𑀡𑁂𑀦𑁂𑀯 ¶ 𑀲𑁄𑀓𑀸𑀤𑀻𑀦𑀁 𑀏𑀓𑀲𑀗𑁆𑀔𑁂𑀧𑁄 𑀓𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀚𑀸𑀢𑀺𑀧𑀘𑁆𑀘𑀬𑀢𑀸 𑀬𑀼𑀚𑁆𑀚𑀢𑀺. 𑀚𑀭𑀸𑀫𑀭𑀡𑀧𑀘𑁆𑀘𑀬𑀪𑀸𑀯𑁂 𑀳𑀺 𑀅𑀯𑀺𑀚𑁆𑀚𑀸𑀬 𑀏𑀓𑀲𑀗𑁆𑀔𑁂𑀧𑁄 𑀓𑀸𑀢𑀩𑁆𑀩𑁄 𑀲𑀺𑀬𑀸. 𑀚𑀸𑀢𑀺𑀧𑀘𑁆𑀘𑀬𑀸 𑀧𑀦 𑀚𑀭𑀸𑀫𑀭𑀡𑀁 ¶ , 𑀲𑁄𑀓𑀸𑀤𑀬𑁄 𑀘 𑀲𑀫𑁆𑀪𑀯𑀦𑁆𑀢𑀻𑀢𑀺 𑀢𑀢𑁆𑀣 𑀚𑀭𑀸𑀫𑀭𑀡𑀁 𑀏𑀓𑀦𑁆𑀢𑀺𑀓𑀁 𑀅𑀗𑁆𑀕𑀪𑀸𑀯𑁂𑀦 𑀕𑀳𑀺𑀢𑀁. 𑀲𑁄𑀓𑀸𑀤𑀬𑁄 𑀧𑀦 𑀭𑀽𑀧𑀪𑀯𑀸𑀤𑀻𑀲𑀼 𑀅𑀪𑀸𑀯𑀢𑁄 𑀅𑀦𑁂𑀓𑀦𑁆𑀢𑀺𑀓𑀸 𑀓𑁂𑀯𑀮𑀁 𑀧𑀸𑀓𑀝𑁂𑀦 𑀨𑀮𑁂𑀦 𑀅𑀯𑀺𑀚𑁆𑀚𑀸𑀦𑀺𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀸. 𑀢𑁂𑀦 𑀅𑀦𑀸𑀕𑀢𑁂 𑀚𑀸𑀢𑀺𑀬𑀸 𑀲𑀢𑀺 𑀢𑀢𑁄 𑀧𑀭𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀳𑁂𑀢𑀼𑀳𑁂𑀢𑀼𑀪𑀽𑀢𑀸 𑀅𑀯𑀺𑀚𑁆𑀚𑀸 𑀤𑀲𑁆𑀲𑀺𑀢𑀸𑀢𑀺 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀲𑀼𑀢𑁆𑀢𑀜𑁆𑀘 𑀲𑁄𑀓𑀸𑀤𑀻𑀦𑀁 𑀅𑀯𑀺𑀚𑁆𑀚𑀸 𑀓𑀸𑀭𑀡𑀦𑁆𑀢𑀺 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀤𑀝𑁆𑀞𑀩𑁆𑀩𑀁, 𑀦 𑀲𑁄𑀓𑀸𑀤𑀻𑀦𑀁 𑀩𑀸𑀮𑀲𑁆𑀲 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀢𑀸𑀫𑀢𑁆𑀢𑀲𑁆𑀲. ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀳𑀺 𑀯𑀘𑀦𑁂𑀦 𑀅𑀯𑀺𑀚𑁆𑀚𑀸 𑀲𑁄𑀓𑀸𑀤𑀻𑀦𑀁 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀸, 𑀦 𑀘 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀫𑁂𑀯 𑀤𑀼𑀓𑁆𑀔𑀁 𑀤𑀼𑀓𑁆𑀔𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑀚𑀭𑀸𑀫𑀭𑀡𑀫𑁆𑀧𑀺 𑀧𑀘𑁆𑀘𑀬𑁄, 𑀅𑀜𑁆𑀜𑀣𑀸 𑀤𑁆𑀯𑀸𑀤𑀲𑀗𑁆𑀕𑀸𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀲𑁆𑀲 𑀧𑀦 𑀲𑁄 𑀧𑀘𑁆𑀘𑀬𑁄? 𑀲𑁄𑀓𑀸𑀤𑀻𑀦𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀚𑀭𑀸𑀫𑀭𑀡𑀧𑀘𑁆𑀘𑀬𑀸 𑀲𑁄𑀓𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀲𑁄𑀓𑀸𑀤𑀬𑁄 𑀘 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀬𑀲𑁆𑀫𑀸 𑀢𑀤𑀜𑁆𑀜𑁂𑀦𑀧𑀺 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀳𑀻𑀦𑀲𑀁𑀬𑁄𑀚𑀦𑀲𑁆𑀲𑀸𑀧𑀺 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀢𑀸 𑀦 𑀏𑀓𑀁𑀲𑀺𑀓𑀸𑀢𑀺 𑀚𑀸𑀢𑀺𑀧𑀘𑁆𑀘𑀬𑀢𑀸𑀯 𑀯𑀼𑀢𑁆𑀢𑀸. 𑀅𑀣 𑀯𑀸 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀉𑀧𑀧𑀢𑁆𑀢𑀺𑀪𑀯𑁄 𑀲𑀗𑁆𑀕𑀳𑀺𑀢𑁄. 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀧𑀸𑀓𑁄 𑀳𑀺 𑀆𑀬𑀼𑀦𑁄 𑀲𑀁𑀳𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄 𑀘 𑀚𑀭𑀸, 𑀢𑁂𑀲𑀜𑁆𑀘 𑀪𑁂𑀤𑁄 𑀫𑀭𑀡𑀦𑁆𑀢𑀺. 𑀲𑀢𑀺 𑀘 𑀉𑀧𑀧𑀢𑁆𑀢𑀺𑀪𑀯𑁂 𑀢𑀢𑁆𑀣 𑀓𑀢𑀼𑀧𑀘𑀺𑀢𑀁, 𑀧𑁄𑀭𑀸𑀡𑀁 𑀯𑀸 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀸𑀤𑀺𑀉𑀧𑀝𑁆𑀞𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀚𑀭𑀸𑀫𑀭𑀡𑀫𑁆𑀧𑀺 𑀚𑀸𑀢𑀺𑀬𑀸 𑀧𑀘𑁆𑀘𑀬𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀬𑀲𑁆𑀫𑀸 𑀧𑀦 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀏𑀢𑁆𑀣𑁂𑀯 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀚𑀸𑀢𑀺𑀬𑀸 𑀧𑀘𑁆𑀘𑀬𑀢𑀸 𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀧𑀭𑀺𑀬𑀸𑀬𑀲𑀗𑁆𑀕𑀳𑀢𑁄 𑀘 ‘‘𑀚𑀭𑀸𑀫𑀭𑀡𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀁 𑀚𑀭𑀸𑀫𑀭𑀡𑀲𑁆𑀲𑀸𑀧𑀺 𑀧𑀘𑁆𑀘𑀬𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑀸𑀢𑀺 𑀤𑁆𑀯𑀸𑀤𑀲𑀗𑁆𑀕𑀢𑀸 𑀯𑀯𑀢𑁆𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀤𑁆𑀯𑀸𑀤𑀲𑁂𑀯𑀸’’𑀢𑀺𑀆𑀤𑀺. 𑀅𑀬𑀁 𑀢𑀸𑀯𑀸𑀢𑀺 ‘‘𑀤𑁂𑀲𑀦𑀸𑀪𑁂𑀤𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀲𑀦𑁆𑀥𑀸𑀬𑀸𑀳.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀧𑀤𑀓𑀣𑀸𑀯𑀡𑁆𑀡𑀦𑀸

𑁫𑁯𑁧. 𑀅𑀬𑀁 𑀧𑀦𑀸𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁦𑁩) 𑀲𑀼𑀢𑁆𑀢𑀦𑁆𑀢𑁂𑀲𑀼 𑀘𑀢𑀼𑀝𑁆𑀞𑀸𑀦𑀺𑀓𑀸 𑀅𑀯𑀺𑀚𑁆𑀚𑀸 𑀯𑀼𑀢𑁆𑀢𑀸𑀢𑀺 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸’’𑀢𑀺 ¶ 𑀯𑀼𑀢𑁆𑀢𑀁. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 (𑀥. 𑀲. 𑁧𑁧𑁦𑁬) 𑀧𑀦 𑀲𑀼𑀢𑁆𑀢𑀦𑁆𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀣𑀺𑀢𑀸𑀬 𑀏𑀯 𑀅𑀯𑀺𑀚𑁆𑀚𑀸𑀬 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀚𑀸𑀢𑀺𑀢𑁄 𑀓𑀣𑀺𑀢𑀢𑁆𑀢𑀸 𑀢𑀤𑀢𑁆𑀣𑀯𑀡𑁆𑀡𑀦𑀸𑀯𑀲𑁂𑀦 𑀯𑀺𑀪𑀸𑀯𑀦𑀁 𑀓𑀸𑀢𑀼𑀁 ‘‘𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀳𑀸𑀧𑁂𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀁. 𑀯𑀺𑀪𑀚𑀦𑀜𑁆𑀳𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄. ‘‘𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀢𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑁂𑀲𑀝𑁆𑀞𑀸𑀦𑁂𑀲𑀽𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑁂𑀲𑀼, 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀧𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀓𑁂 𑀧𑀸𑀞𑁂. 𑀲𑀸𑀢𑀺 𑀅𑀯𑀺𑀚𑁆𑀚𑀸. 𑀉𑀧𑁆𑀧𑀦𑁆𑀦𑀸𑀢𑀺 𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀸, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. ‘‘𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀭𑀲𑀺𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀪𑀸𑀯𑁄 𑀭𑀲𑁄, 𑀅𑀢𑁆𑀢𑀦𑁄 𑀭𑀲𑁄 𑀲𑀭𑀲𑁄, 𑀬𑀸𑀣𑀸𑀯𑁄 𑀬𑀣𑀸𑀪𑀽𑀢𑁄 𑀲𑀭𑀲𑁄 𑀬𑀸𑀣𑀸𑀯𑀲𑀭𑀲𑁄, 𑀬𑁄 ‘‘𑀧𑀻𑀴𑀦𑀝𑁆𑀞𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁮) 𑀯𑀼𑀢𑁆𑀢𑁄 ¶ 𑀤𑀼𑀓𑁆𑀔𑀲𑀘𑁆𑀘𑀧𑁆𑀧𑀪𑁂𑀤𑀸 𑀏𑀯 𑀘 𑀧𑀼𑀩𑁆𑀩𑀦𑁆𑀢𑀸𑀤𑀬𑁄, 𑀲𑁄 𑀏𑀯 𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁. 𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺.

𑀢𑀤𑀼𑀪𑀬𑀦𑁆𑀢𑀺 𑀧𑀼𑀩𑁆𑀩𑀦𑁆𑀢𑀜𑁆𑀘𑁂𑀯 𑀅𑀧𑀭𑀦𑁆𑀢𑀜𑁆𑀘 𑀅𑀢𑀻𑀢𑀁, 𑀅𑀦𑀸𑀕𑀢𑀜𑁆𑀘 𑀔𑀦𑁆𑀥𑀧𑀜𑁆𑀘𑀓𑀁. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀪𑀸𑀕𑀯𑀦𑁆𑀢𑀢𑀸𑀬 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀪𑀽𑀢𑁄 𑀫𑀚𑁆𑀛𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄. 𑀅𑀬𑀁 𑀅𑀯𑀺𑀚𑁆𑀚𑀸 𑀇𑀫𑁂 𑀲𑀗𑁆𑀔𑀸𑀭𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀤𑀼𑀓𑁆𑀔𑀸𑀤𑀻𑀲𑀼. 𑀬𑀤𑀺𑀧𑀺 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀸𑀤𑀻𑀲𑀼 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀧𑀺 𑀧𑀯𑀢𑁆𑀢𑀢𑀺, 𑀬𑀣𑀸 𑀧𑀦 𑀦𑀺𑀭𑁄𑀥𑀫𑀕𑁆𑀕𑁂 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑁂 𑀚𑀸𑀦𑀺𑀢𑀼𑀓𑀸𑀫𑀲𑁆𑀲 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦, 𑀅𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀭𑁄𑀥𑀫𑀕𑁆𑀕𑀕𑁆𑀕𑀳𑀡𑀓𑀸𑀭𑀡𑀪𑀸𑀯𑁂𑀦 𑀘 𑀧𑀯𑀢𑁆𑀢𑀫𑀸𑀦𑀸 𑀢𑁂 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀲𑀼𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸’’𑀢𑀺. 𑀤𑀼𑀓𑁆𑀔𑀸𑀤𑀺𑀯𑀺𑀲𑀬𑁄 𑀅𑀦𑁆𑀥𑀢𑀫𑀓𑀭𑁄, 𑀮𑁄𑀪𑀸𑀤𑀻𑀦𑀜𑁆𑀘 𑀅𑀦𑁆𑀥𑀢𑀫𑀓𑀭𑀸𑀦𑀁 𑀧𑀘𑁆𑀘𑀬𑀪𑀽𑀢𑁄 𑀅𑀤𑀲𑁆𑀲𑀦𑀸𑀓𑀸𑀭𑁄 𑀅𑀜𑁆𑀜𑀸𑀡𑀁.

𑁫𑁯𑁨. 𑀧𑀼𑀜𑁆𑀜𑀸𑀤𑀬𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄. 𑀢𑀢𑁆𑀣 𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀅𑀧𑀼𑀜𑁆𑀜𑀨𑀮𑀢𑁄, 𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄 𑀘 𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀳𑀺𑀢𑀲𑀼𑀔𑀚𑁆𑀛𑀸𑀲𑀬𑁂𑀦 𑀧𑀼𑀜𑁆𑀜𑀁 𑀓𑀭𑁄𑀢𑀻𑀢𑀺 𑀢𑀦𑁆𑀦𑀺𑀧𑁆𑀨𑀸𑀤𑀦𑁂𑀦 𑀓𑀸𑀭𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑀺, 𑀧𑀼𑀚𑁆𑀚𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀸 𑀧𑀼𑀜𑁆𑀜𑀁. 𑀇𑀢𑀺 𑀧𑀽𑀭𑀓𑁄, 𑀧𑀼𑀚𑁆𑀚𑀦𑀺𑀩𑁆𑀩𑀢𑁆𑀢𑀓𑁄 𑀘 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀼𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀜𑁆𑀜𑀜𑁆𑀘 𑀲𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀅𑀪𑀺𑀲𑀗𑁆𑀔𑀸𑀭𑁄 𑀘𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀧𑀼𑀜𑁆𑀜𑀧𑀝𑀺𑀧𑀓𑁆𑀔𑀢𑁄 𑀅𑀧𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀥𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀢𑀺𑀤𑀽𑀭𑀢𑀸𑀬 𑀦 𑀇𑀜𑁆𑀚𑀢𑀺, 𑀅𑀦𑀺𑀜𑁆𑀚𑀜𑁆𑀘 ¶ 𑀪𑀯𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀓𑀸𑀬𑁂𑀦 𑀧𑀯𑀢𑁆𑀢𑀺𑀢𑁄, 𑀓𑀸𑀬𑀢𑁄 𑀯𑀸 𑀧𑀯𑀢𑁆𑀢𑁄, 𑀓𑀸𑀬𑀲𑁆𑀲 𑀯𑀸 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑁄 𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀕𑀳𑀺𑀢𑁄. 𑀢𑀢𑁆𑀣 𑀳𑀺 ‘‘𑀧𑀼𑀜𑁆𑀜𑀁 𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁫𑁧) 𑀆𑀕𑀢𑀁. 𑀤𑀼𑀢𑀺𑀬𑀢𑁆𑀢𑀺𑀓𑁄 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀲𑁂𑀦. 𑀢𑀢𑁆𑀣 𑀳𑀺 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 (𑀲𑀁. 𑀦𑀺. 𑁨.𑁨𑁮) 𑀯𑀼𑀢𑁆𑀢𑀁.

𑀯𑀺𑀢𑁆𑀣𑀸𑀭𑀢𑁄 𑀧𑀦𑀸𑀢𑀺𑀆𑀤𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀭𑀽𑀧𑀢𑁄, 𑀧𑀪𑁂𑀤𑀢𑁄 𑀘 𑀯𑀺𑀪𑀸𑀯𑀦𑀁. 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸, 𑀦 𑀤𑀸𑀦𑀲𑀻𑀮𑀯𑀲𑁂𑀦𑀸𑀢𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀘𑁂𑀢𑀦𑀸𑀧𑀺 ‘‘𑀪𑀸𑀯𑀦𑀸𑀯𑀲𑁂𑀦𑁂𑀯 ¶ 𑀧𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦 ‘‘𑀪𑀸𑀯𑀦𑀸𑀯𑀲𑁂𑀦𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀅𑀪𑀺𑀜𑁆𑀜𑀸𑀘𑁂𑀢𑀦𑀁 𑀦𑀺𑀯𑀢𑁆𑀢𑁂𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀢𑀸𑀲𑀫𑁆𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑀸𑀬 𑀯𑀺𑀬 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀪𑀸𑀯𑀲𑁆𑀲 𑀘 𑀇𑀘𑁆𑀙𑀺𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀅𑀲𑀗𑁆𑀕𑀳𑁄 𑀏𑀯 𑀲𑀺𑀬𑀸, 𑀦 𑀘 𑀬𑀼𑀢𑁆𑀢𑀁 ‘‘𑀓𑀼𑀲𑀮𑀜𑁆𑀘 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀜𑁆𑀘 𑀦 𑀳𑁄𑀢𑀻’’𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀢𑀤𑀯𑀲𑀺𑀝𑁆𑀞𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁𑀬𑁂𑀯 𑀕𑀳𑀡𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀅𑀓𑀼𑀲𑀮𑀓𑀫𑁆𑀫𑀲𑁆𑀲𑀸𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀇𑀢𑀭𑁂𑀲𑀼 𑀧𑀦𑀸𑀢𑀺 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀲𑀼. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀧𑀯𑀢𑁆𑀢𑀫𑀸𑀦𑀸 𑀇𑀫𑁂𑀳𑀺 𑀤𑁆𑀯𑀸𑀭𑁂𑀳𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. ‘‘𑀲𑀫𑀯𑀻𑀲𑀢𑀺 𑀘𑁂𑀢𑀦𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀬𑀤𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑁄 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬𑀧𑀺 𑀓𑀼𑀲𑀮𑀸𑀬 𑀢𑀣𑀸 𑀧𑀯𑀢𑁆𑀢𑀸𑀬 𑀯𑀘𑀻𑀲𑀗𑁆𑀔𑀸𑀭𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀪𑀺𑀜𑁆𑀜𑀸𑀘𑁂𑀢𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀕𑁆𑀕𑀳𑀡𑁂, 𑀓𑀸𑀬𑀯𑀘𑀻𑀲𑀜𑁆𑀘𑁂𑀢𑀦𑀸𑀕𑁆𑀕𑀳𑀡𑁂 𑀯𑀸. 𑀦 𑀕𑀳𑀺𑀢𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦 𑀕𑀳𑀺𑀢𑀸 ‘‘𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺. 𑀓𑀲𑁆𑀫𑀸 𑀧𑀦 𑀦 𑀳𑁄𑀢𑀺, 𑀦𑀦𑀼 𑀲𑀸𑀧𑀺 𑀓𑀼𑀲𑀮𑀸, 𑀯𑀺𑀧𑀸𑀓𑀥𑀫𑁆𑀫𑀸 𑀘𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀯𑀺𑀚𑁆𑀚𑀫𑀸𑀦𑁂 𑀧𑀦 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀢𑀲𑁆𑀲𑀸 𑀓𑀼𑀲𑀮𑀢𑀸, 𑀯𑀺𑀧𑀸𑀓𑀥𑀫𑁆𑀫𑀢𑀸 𑀘 𑀯𑀼𑀢𑁆𑀢𑀸, 𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂𑀦. 𑀲𑀸 𑀧𑀦 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀻 𑀭𑀽𑀧𑀸𑀯𑀘𑀭𑀫𑁂𑀯 𑀉𑀧𑁆𑀧𑀸𑀤𑁂𑀬𑁆𑀬. 𑀦 𑀳𑀺 𑀅𑀜𑁆𑀜𑀪𑀽𑀫𑀺𑀓𑀁 𑀓𑀫𑁆𑀫𑀁 𑀅𑀜𑁆𑀜𑀪𑀽𑀫𑀺𑀓𑀁 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀅𑀢𑁆𑀢𑀦𑀸 𑀲𑀤𑀺𑀲𑀸𑀭𑀫𑁆𑀫𑀡𑀁 𑀢𑀺𑀝𑁆𑀞𑀸𑀦𑀺𑀓𑀫𑁂𑀯 𑀘 𑀉𑀧𑁆𑀧𑀸𑀤𑁂𑀬𑁆𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑀤𑀺𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀦 𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑁄 𑀅𑀢𑁆𑀣𑀺, 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 ¶ 𑀘 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀯 𑀳𑁄𑀢𑀺. 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀲𑀺𑀡𑁂𑀲𑀼 𑀘 𑀉𑀧𑁆𑀧𑀸𑀤𑀺𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲 𑀆𑀦𑀺𑀲𑀁𑀲𑀪𑀽𑀢𑀸 𑀅𑀪𑀺𑀜𑁆𑀜𑀸. 𑀬𑀣𑀸𑀳 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁩𑁮𑁪-𑁩𑁮𑁬, 𑁪𑁩𑁧-𑁪𑁩𑁩; 𑀧𑀸𑀭𑀸. 𑁧𑁨). 𑀢𑀲𑁆𑀫𑀸 𑀲𑀫𑀸𑀥𑀺𑀨𑀮𑀲𑀤𑀺𑀲𑀸 𑀲𑀸, 𑀦 𑀘 𑀨𑀮𑀁 𑀤𑁂𑀢𑀺. 𑀤𑀸𑀦𑀲𑀻𑀮𑀸𑀦𑀺𑀲𑀁𑀲𑀪𑀽𑀢𑁄 𑀢𑀲𑁆𑀫𑀺𑀁 𑀪𑀯𑁂 𑀧𑀘𑁆𑀘𑀬𑀮𑀸𑀪𑁄 𑀯𑀺𑀬𑀸𑀢𑀺 𑀲𑀸𑀧𑀺 𑀯𑀺𑀧𑀸𑀓𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺.

‘‘𑀬𑀣𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀻’’𑀢𑀺 𑀇𑀤𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀥𑀫𑁆𑀫𑁂 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁫) 𑀯𑀼𑀢𑁆𑀢𑀢𑁆𑀢𑀸 ¶ 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀲𑀸 𑀧𑀦 𑀯𑀺𑀘𑀸𑀭𑀡𑀸 𑀳𑁂𑀝𑁆𑀞𑀸 𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸𑀬𑀁 𑀅𑀓𑀼𑀲𑀮𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀸 𑀏𑀯𑀸𑀢𑀺 𑀢𑀢𑁆𑀣 𑀯𑀺𑀘𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘𑁂𑀢𑁆𑀣 𑀬𑀤𑁂𑀓𑁂 𑀯𑀺𑀪𑀚𑁆𑀚 𑀯𑀤𑀦𑁆𑀢𑀺, 𑀤𑀲𑁆𑀲𑀦𑀪𑀸𑀯𑀦𑀸𑀦𑀁 𑀅𑀪𑀸𑀯𑁂𑀧𑀺 𑀬𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑁂𑀓𑁆𑀔𑀸𑀦𑀜𑁆𑀘 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀢𑀤𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑁂𑀳𑀺 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀅𑀓𑀼𑀲𑀮𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀪𑀸𑀯𑀦𑀸𑀬 𑀅𑀪𑀸𑀯𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑀺𑀦𑁆𑀢𑀸 𑀦𑀢𑁆𑀣𑀺. 𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀫𑀸𑀦𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀧𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀓𑁂𑀦𑀘𑀺 𑀓𑀤𑀸𑀘𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀪𑀯𑁂𑀬𑁆𑀬𑀼𑀁? 𑀦 𑀘 𑀧𑀝𑁆𑀞𑀸𑀦𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀸. 𑀲𑁂𑀓𑁆𑀔𑀸𑀦𑀁 𑀧𑀦 𑀯𑀺𑀚𑁆𑀚𑀫𑀸𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀢𑁂𑀦𑁂𑀯 𑀲𑁂𑀓𑁆𑀔𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀘𑀢𑁆𑀢𑀢𑁆𑀢𑀸 𑀯𑀦𑁆𑀢𑀢𑁆𑀢𑀸 𑀫𑀼𑀢𑁆𑀢𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀉𑀓𑁆𑀔𑁂𑀝𑀺𑀢𑀢𑁆𑀢𑀸 𑀲𑀫𑀼𑀓𑁆𑀔𑁂𑀝𑀺𑀢𑀢𑁆𑀢𑀸 𑀅𑀲𑁆𑀲𑀸𑀤𑀺𑀢𑀩𑁆𑀩𑀸, 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀸 𑀘 𑀦 𑀳𑁄𑀦𑁆𑀢𑀺. 𑀧𑀳𑀻𑀦𑀢𑀸𑀬 𑀏𑀯 𑀲𑁄𑀫𑀦𑀲𑁆𑀲𑀳𑁂𑀢𑀼𑀪𑀽𑀢𑀸, 𑀅𑀯𑀺𑀓𑁆𑀔𑁂𑀧𑀳𑁂𑀢𑀼𑀪𑀽𑀢𑀸 𑀘 𑀦 𑀤𑁄𑀫𑀦𑀲𑁆𑀲𑀁, 𑀉𑀤𑁆𑀥𑀘𑁆𑀘𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀦 𑀢𑁂 𑀢𑁂𑀲𑀁 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑀁, 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀜𑁆𑀘 𑀕𑀘𑁆𑀙𑀦𑁆𑀢𑀺. 𑀦 𑀳𑀺 𑀧𑀳𑀻𑀦𑁂 𑀉𑀧𑀦𑀺𑀲𑁆𑀲𑀸𑀬 𑀅𑀭𑀺𑀬𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁂 𑀉𑀧𑁆𑀧𑀸𑀤𑁂𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦…𑀧𑁂… 𑀧𑀘𑁆𑀘𑀸𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀦𑀺. 𑁮𑁦; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁭). 𑀦 𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸, 𑀇𑀢𑀭𑁂𑀲𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀤𑀺𑀝𑁆𑀞𑀺𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀆𑀭𑀩𑁆𑀪 𑀯𑀺𑀘𑀺𑀓𑀺𑀘𑁆𑀙𑀸 ¶ , 𑀤𑀺𑀝𑁆𑀞𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁭) 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀉𑀤𑁆𑀥𑀘𑁆𑀘𑀸𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀉𑀤𑁆𑀥𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘‘𑀤𑀺𑀝𑁆𑀞𑀺𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁫) 𑀏𑀢𑁆𑀢𑀓𑀫𑁂𑀯 ¶ 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀲𑁆𑀫𑀸 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀢𑁆𑀢𑁂𑀧𑀺 𑀬𑀸𑀤𑀺𑀲𑀸𑀦𑀁 𑀢𑀸𑀳𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀆𑀧𑀸𑀤𑁂𑀢𑀩𑁆𑀩𑀸, 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼 𑀯𑀢𑁆𑀢𑀫𑀸𑀦𑀸 𑀤𑀲𑁆𑀲𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑁂𑀓𑁆𑀔𑁂𑀲𑀼 𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸.

𑀢𑁂𑀲𑀼 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀲𑀳𑀸𑀬𑀯𑀺𑀭𑀳𑀸 𑀯𑀺𑀧𑀸𑀓𑀁 𑀦 𑀚𑀦𑀬𑀦𑁆𑀢𑀻𑀢𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄, 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁, 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀲𑀁𑀬𑁄𑀚𑀦𑀢𑁆𑀢𑀬𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 𑀅𑀧𑀭𑀺𑀓𑁆𑀔𑀻𑀡𑀲𑀳𑀸𑀬𑀸𑀦𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑀺𑀢𑀼𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁, 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀦𑁂𑀯𑀤𑀲𑁆𑀲𑀦𑁂𑀦-𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀢𑀸𑀬 𑀦𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀅𑀧𑁆𑀧𑀳𑀸𑀢𑀩𑁆𑀩𑀸𑀦𑀁 ‘‘𑀦𑁂𑀯𑀤𑀲𑁆𑀲𑀦𑁂𑀦-𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁯) 𑀯𑀼𑀢𑁆𑀢𑀢𑁆𑀢𑀸, 𑀅𑀧𑁆𑀧𑀳𑀸𑀢𑀩𑁆𑀩𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀘 𑀅𑀓𑀼𑀲𑀮𑀸𑀦𑀁.

𑀏𑀯𑀫𑁆𑀧𑀺 𑀢𑁂 𑀇𑀫𑀲𑁆𑀫𑀺𑀁 𑀢𑀺𑀓𑁂 ‘‘𑀦𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀆𑀧𑀚𑁆𑀚𑀦𑁆𑀢𑀻𑀢𑀺? 𑀦𑀸𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀤𑀲𑁆𑀲𑀺𑀢𑀸𑀦𑀁 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀥𑀫𑁆𑀫𑀯𑀲𑁂𑀦 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀓𑀸𑀮𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀸𑀧𑀺 𑀅𑀢𑀻𑀢𑀸 ‘‘𑀦𑀯𑀢𑁆𑀢𑀩𑁆𑀩𑀸’’𑀢𑀺 𑀦 𑀯𑀼𑀢𑁆𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀲𑀗𑁆𑀕𑀳𑀺𑀢𑀲𑁆𑀲 𑀅𑀪𑀸𑀯𑀸 𑀦𑀯𑀢𑁆𑀢𑀩𑁆𑀩𑀢𑀸 𑀦𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀣 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑁄𑀘𑀺 𑀦𑀺𑀬𑁄𑀕𑀢𑁄 𑀦𑀯𑀢𑁆𑀢𑀩𑁆𑀩𑁄 𑀅𑀢𑁆𑀣𑀺, 𑀢𑀢𑁆𑀣 𑀢𑁂𑀲𑀁 𑀘𑀢𑀼𑀢𑁆𑀣𑁄 𑀓𑁄𑀝𑁆𑀞𑀸𑀲𑁄 𑀅𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀤𑁂𑀲𑀼 𑀯𑀺𑀬 𑀢𑀢𑁆𑀣𑀸𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀪𑀚𑀸𑀧𑁂𑀢𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀪𑀚𑀸𑀧𑁂𑀢𑀺 ‘‘𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁪𑁨𑁨). 𑀢𑀤𑀪𑀸𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂, 𑀇𑀥 𑀘 𑀢𑀣𑀸 𑀦 𑀯𑀼𑀢𑁆𑀢𑀸.

𑀅𑀣 ¶ 𑀯𑀸 𑀬𑀣𑀸 𑀲𑀧𑁆𑀧𑀝𑀺𑀖𑁂𑀳𑀺 𑀲𑀫𑀸𑀦𑀲𑀪𑀸𑀯𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 𑀢𑀬𑁄 𑀫𑀳𑀸𑀪𑀽𑀢𑀸 𑀲𑀧𑁆𑀧𑀝𑀺𑀖𑀸𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀫𑀳𑀸𑀪𑀽𑀢𑀸, 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀏𑀓𑀁 𑀫𑀳𑀸𑀪𑀽𑀢’’𑀦𑁆𑀢𑀺 ¶ , 𑀏𑀯𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑀫𑀸𑀦𑀲𑀪𑀸𑀯𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺? 𑀦𑀢𑁆𑀣𑀺 𑀦𑀯𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑁄. 𑀏𑀯𑀜𑁆𑀘 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 𑀧𑀭𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀸𑀕𑁄 𑀘 𑀭𑀸𑀕𑀤𑀺𑀝𑁆𑀞𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀮𑀤𑁆𑀥𑁄 𑀳𑁄𑀢𑀺. 𑀬𑀣𑀸 𑀧𑀦 𑀅𑀨𑁄𑀝𑁆𑀞𑀩𑁆𑀩𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 𑀢𑀬𑁄 𑀫𑀳𑀸𑀪𑀽𑀢𑀸 𑀦 𑀧𑀭𑀫𑀢𑁆𑀣𑀢𑁄 𑀲𑀧𑁆𑀧𑀝𑀺𑀖𑀸, 𑀏𑀯𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀪𑀸𑀯𑀦𑀸𑀭𑀳𑀺𑀢𑀸 𑀧𑀼𑀣𑀼𑀚𑁆𑀚𑀦𑁂𑀲𑀼 𑀯𑀢𑁆𑀢𑀫𑀸𑀦𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 𑀦 𑀧𑀭𑀫𑀢𑁆𑀣𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸 𑀦 𑀯𑀼𑀢𑁆𑀢𑀸. 𑀦 𑀘 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀸. 𑀬𑁂 𑀳𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀸 𑀓𑀺𑀮𑁂𑀲𑀸, 𑀦 𑀢𑁂 𑀤𑀲𑁆𑀲𑀦𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑁆𑀢𑀺. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀧𑀺 𑀧𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀲𑀳𑀸𑀬𑀯𑁂𑀓𑀮𑁆𑀮𑀫𑀢𑁆𑀢𑀫𑁂𑀯 𑀤𑀲𑁆𑀲𑀦𑁂𑀦 𑀓𑀢𑀁, 𑀦 𑀢𑀲𑁆𑀲 𑀓𑁄𑀘𑀺 𑀪𑀸𑀯𑁄 𑀤𑀲𑁆𑀲𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄𑀢𑀺 𑀢𑀲𑁆𑀲 𑀏𑀓𑀦𑁆𑀢𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲𑁂𑀯 𑀲𑀢𑀺 𑀲𑀳𑀸𑀬𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀯𑀘𑀦𑀁, 𑀅𑀲𑀢𑀺 𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺.

𑀢𑀬𑀺𑀤𑀁 𑀲𑀩𑁆𑀩𑀁 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀅𑀳𑁄𑀧𑀼𑀭𑀺𑀲𑀺𑀓𑀸𑀫𑀢𑁆𑀢𑀦𑁆𑀢𑀺 𑀅𑀧𑀭𑁂. 𑀓𑀲𑁆𑀫𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀏𑀓𑀦𑁆𑀢𑁂𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁪𑁦𑁬). 𑀬𑀤𑀺 𑀳𑀺 𑀢𑀁 𑀇𑀘𑁆𑀙𑀺𑀢𑀁 𑀲𑀺𑀬𑀸, 𑀬𑀣𑀸 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 ‘‘𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻’’𑀢𑀺 (𑀥. 𑀲. 𑁧𑁪𑁩𑁩) 𑀯𑀢𑁆𑀯𑀸 𑀯𑀺𑀪𑀚𑁆𑀚 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 ‘‘𑀦𑀺𑀬𑁄𑀕𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀤𑁂𑀬𑁆𑀬. 𑀬𑀸 𑀘 𑀢𑀁 𑀲𑀫𑀢𑁆𑀣𑁂𑀦𑁆𑀢𑁂𑀦 ‘‘𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀸𑀧𑀺 𑀅𑀬𑀼𑀢𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀁 𑀭𑀸𑀕𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀉𑀤𑁆𑀥𑀘𑁆𑀘𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑁄 𑀏𑀯 𑀇𑀘𑁆𑀙𑀺𑀢𑁄𑀢𑀺. 𑀬𑀁 𑀧𑀦 𑀉𑀤𑁆𑀥𑀘𑁆𑀘𑀕𑁆𑀕𑀳𑀡𑁂𑀦 𑀧𑀸𑀴𑀺𑀬𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀢𑀁 𑀲𑀸𑀥𑁂𑀢𑀼𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀦𑀼𑀤𑁆𑀥𑀭𑀡𑀁 𑀦𑀺𑀩𑀦𑁆𑀥𑀦𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀦𑀺𑀩𑀦𑁆𑀥𑀦𑀁 𑀧𑀝𑁆𑀞𑀸𑀦𑁂 𑀲𑀸𑀯𑀲𑁂𑀲𑀧𑀸𑀞𑀤𑀲𑁆𑀲𑀦𑀢𑁄. 𑀢𑀣𑀸 𑀳𑀺 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀦𑀸𑀕𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 ¶ (𑀧𑀝𑁆𑀞𑀸. 𑁨.𑁧𑁮.𑁨) 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 ¶ 𑀓𑀢𑁆𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀉𑀤𑁆𑀥𑀝𑀁.

𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀧𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑁆𑀲 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀓𑀺𑀁 𑀅𑀯𑀺𑀚𑁆𑀚𑀸𑀤𑀺 𑀯𑀺𑀬 𑀤𑀸𑀦𑀲𑀻𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸𑀬𑁂𑀯 𑀯𑀺𑀧𑀸𑀓𑀤𑀸𑀦𑀲𑀸𑀫𑀢𑁆𑀣𑀺𑀬𑀸 𑀞𑀸𑀦𑀯𑀲𑁂𑀦 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀲𑀳𑀸𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺, 𑀉𑀤𑀸𑀳𑀼 𑀓𑀺𑀮𑁂𑀲𑀸 𑀯𑀺𑀬 𑀓𑀫𑁆𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀧𑀢𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀧𑀼𑀭𑀺𑀫𑁄 𑀧𑀓𑁆𑀔𑁄 𑀧𑀳𑀻𑀦𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀢𑁆𑀢𑀸 𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀺𑀦𑁄 𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀲𑁆𑀲 𑀓𑀺𑀭𑀺𑀬𑀪𑀸𑀯𑁄 𑀆𑀧𑀚𑁆𑀚𑀢𑀺 𑀧𑀳𑀻𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀤𑀸𑀦𑀸𑀤𑀺 𑀯𑀺𑀬. 𑀅𑀣 𑀤𑀼𑀢𑀺𑀬𑁄, 𑀢𑀲𑁆𑀲𑀸𑀧𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀺 𑀅𑀧𑀸𑀬𑀕𑀫𑀦𑀻𑀬𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀯𑀺𑀘𑀸𑀭𑀺𑀢𑀦𑀬𑁂𑀦𑁂𑀯 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀧𑀢𑀺 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀅𑀯𑀺𑀭𑀼𑀚𑁆𑀛𑀦𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀧𑀻𑀢𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀢𑀺 𑀲𑀫𑁆𑀧𑀼𑀡𑁆𑀡𑀲𑁆𑀲 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂. 𑀬𑀤𑀺 𑀅𑀧𑀦𑁂𑀢𑀩𑁆𑀩𑀸, 𑀓𑀲𑁆𑀫𑀸 ‘‘𑀲𑀫𑀯𑀻𑀲𑀢𑀺 𑀘𑁂𑀢𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦 𑀲𑀩𑁆𑀩𑀸𑀧𑁂𑀢𑀸 𑀳𑁄𑀦𑁆𑀢𑀻’’𑀢𑀺. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬𑀧𑀺 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀏𑀯𑀁 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀲𑀳 𑀏𑀓𑀯𑀻𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀦, 𑀢𑀣𑀸 𑀅𑀯𑀘𑀦𑀲𑁆𑀲 𑀯𑀼𑀢𑁆𑀢𑀓𑀸𑀭𑀡𑀢𑁆𑀢𑀸. 𑀢𑀁 𑀧𑀦 𑀇𑀢𑀭𑀸𑀯𑀘𑀦𑀲𑁆𑀲𑀸𑀧𑀺 𑀓𑀸𑀭𑀡𑀦𑁆𑀢𑀺 𑀲𑀫𑀸𑀦𑀭𑀽𑀧𑀸𑀬 𑀏𑀓𑀺𑀲𑁆𑀲𑀸 𑀅𑀯𑀘𑀦𑁂 𑀬𑀁 𑀓𑀸𑀭𑀡𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀏𑀓𑀸 𑀦 𑀯𑀼𑀢𑁆𑀢𑀸, 𑀢𑁂𑀦 𑀓𑀸𑀭𑀡𑁂𑀦 𑀯𑀼𑀢𑁆𑀢𑀸𑀬𑀧𑀺 𑀅𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀢𑀺𑀓𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑀢𑁆𑀢𑀺𑀓𑁄. 𑀧𑀼𑀭𑀺𑀫𑀢𑁆𑀢𑀺𑀓𑀦𑁆𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀢𑁆𑀢𑀺𑀓𑀁. 𑀧𑀯𑀺𑀲𑀢𑀻𑀢𑀺 𑀓𑀣𑀁 𑀧𑀯𑀺𑀲𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀳𑀺 𑀅𑀝𑁆𑀞𑀓𑀸𑀫𑀸𑀯𑀘𑀭𑀘𑁂𑀢𑀦𑀸𑀧𑀪𑁂𑀤𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀦𑁆𑀢𑀲𑁆𑀲 𑀲𑀺𑀬𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀦𑁆𑀢𑀲𑁆𑀲 𑀲𑀺𑀬𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀉𑀧𑁆𑀧𑀦𑁆𑀦𑀸 𑀢𑁂𑀭𑀲𑀧𑀺 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀳𑁄𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀤𑁆𑀯𑁂 𑀤𑁆𑀯𑀸𑀭𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀲𑀺𑀬𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘𑀸𑀢𑀺 𑀏𑀯𑀁 𑀤𑀼𑀢𑀺𑀬𑀢𑁆𑀢𑀺𑀓𑁄 𑀧𑀼𑀭𑀺𑀫𑀢𑁆𑀢𑀺𑀓𑀫𑁂𑀯 ¶ 𑀧𑀯𑀺𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑁫𑁯𑁩. 𑀅𑀯𑀺𑀚𑁆𑀚𑀸𑀪𑀸𑀯𑁂 ¶ 𑀪𑀸𑀯𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀅𑀢𑁆𑀣𑀺𑀪𑀸𑀯𑁂 𑀲𑀗𑁆𑀔𑀸𑀭𑀸𑀦𑀁 𑀪𑀸𑀯𑀢𑁄. 𑀦 𑀳𑀺 𑀅𑀯𑀺𑀚𑁆𑀚𑀸𑀬 𑀅𑀲𑀢𑀺 𑀓𑀤𑀸𑀘𑀺 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀺. 𑀇𑀤𑀸𑀦𑀺 𑀢𑀁 𑀅𑀯𑀺𑀚𑁆𑀚𑀸𑀬 𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑀸𑀡𑀁 𑀅𑀧𑁆𑀧𑀳𑀻𑀦𑀁 𑀳𑁄𑀢𑀻’’𑀢𑀺 𑀆𑀳. 𑀢𑁂𑀦 𑀫𑀕𑁆𑀕𑁂𑀦 𑀅𑀦𑀺𑀭𑁄𑀥𑁄 𑀇𑀥 𑀅𑀯𑀺𑀚𑁆𑀚𑀸𑀬 𑀅𑀢𑁆𑀣𑀺𑀪𑀸𑀯𑁄, 𑀦 𑀥𑀭𑀫𑀸𑀦𑀢𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑁄𑀬𑁂𑀯. ‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢’’𑀦𑁆𑀢𑀺 𑀘 𑀇𑀫𑀺𑀦𑀸 𑀜𑀸𑀡𑀸𑀪𑀸𑀯𑀸𑀤𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀬𑀜𑁆𑀳𑀺 𑀅-𑀓𑀸𑀭𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁨) 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁭𑁬) 𑀢𑀁𑀬𑁄𑀕𑀦𑀺𑀯𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. 𑀅𑀪𑀸𑀯𑁄 𑀳𑁂𑀢𑁆𑀣 𑀤𑀻𑀧𑀺𑀢𑁄. ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭) 𑀢𑀁𑀲𑀫𑁆𑀩𑀦𑁆𑀥𑀺𑀢𑀸𑀦𑀺𑀯𑀢𑁆𑀢𑀺𑀬𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀲𑀫𑁆𑀩𑀦𑁆𑀥𑀻𑀢𑀺 𑀅𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀢𑀁𑀲𑀫𑁆𑀩𑀦𑁆𑀥𑀺𑀢𑀸 𑀏𑀢𑁆𑀣 𑀚𑁄𑀢𑀻𑀬𑀢𑀺. ‘‘𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯) 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀤𑀝𑁆𑀞𑀩𑁆𑀩𑀢𑀸. 𑀅𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀺𑀤𑀲𑁆𑀲𑀦𑀁 𑀦 𑀧𑀲𑁆𑀲𑀢𑀻𑀢𑀺 𑀢𑀕𑁆𑀕𑀳𑁂𑀢𑀩𑁆𑀩𑀢𑀸𑀦𑀺𑀯𑀢𑁆𑀢𑀺𑀬𑀁. 𑀢𑀣𑀸 ‘‘𑀅𑀦𑀸𑀲𑀯𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁫). ‘‘𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁦), 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁫𑁫) 𑀢𑀁𑀓𑀺𑀘𑁆𑀘𑀦𑀺𑀯𑀢𑁆𑀢𑀺𑀬𑀁. ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁧), 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁫𑁭) 𑀢𑀩𑁆𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀢𑀤𑀜𑁆𑀜𑀣𑀸 𑀳𑀺 𑀏𑀢𑁆𑀣 𑀧𑀓𑀸𑀲𑀻𑀬𑀢𑀺. ‘‘𑀅𑀫𑀦𑀼𑀲𑁆𑀲𑁄’’𑀢𑀺 (𑀤𑀻. 𑀦𑀺. 𑁨.𑁩𑁨𑁧) 𑀢𑀩𑁆𑀪𑀸𑀯𑀫𑀢𑁆𑀢𑀦𑀺𑀯𑀢𑁆𑀢𑀺𑀬𑀁. 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺 𑀲𑀤𑀺𑀲𑀢𑀸 𑀳𑁂𑀢𑁆𑀣 𑀲𑀽𑀘𑀻𑀬𑀢𑀺. ‘‘𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 (𑀅. 𑀦𑀺. 𑁩.𑁧𑁩, 𑁨𑁭; 𑀧𑀼. 𑀧. 𑁯𑁧, 𑁧𑁨𑁪), 𑀅𑀧𑀼𑀢𑁆𑀢𑁄’’𑀢𑀺 𑀢𑀣𑀸 𑀲𑀫𑁆𑀪𑀸𑀯𑀦𑀻𑀬𑀕𑀼𑀡𑀦𑀺𑀯𑀢𑁆𑀢𑀺𑀬𑀁. 𑀕𑀭𑀳𑀸 𑀳𑀺 𑀏𑀢𑁆𑀣 𑀜𑀸𑀬𑀢𑀺. ‘‘𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯), 𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 𑀢𑀤𑀦𑀧𑁆𑀧𑀪𑀸𑀯𑀦𑀺𑀯𑀢𑁆𑀢𑀺𑀬𑀁. ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁭) 𑀢𑀁𑀲𑀤𑀺𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀅𑀢𑀻𑀢𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸, 𑀉𑀧𑁆𑀧𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁂𑀓𑀤𑁂𑀲𑀦𑀺𑀩𑁆𑀩𑀢𑁆𑀢𑀺𑀬𑀸 𑀆𑀭𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀸, 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀼𑀓𑀽𑀮𑀢𑀸, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀪𑀸𑀯𑁄 𑀏𑀢𑁆𑀣 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁧) 𑀢𑀤𑀧𑀭𑀺𑀬𑁄𑀲𑀸𑀦𑀦𑀺𑀯𑀢𑁆𑀢𑀺𑀬𑀁. 𑀢𑀦𑁆𑀦𑀺𑀝𑁆𑀞𑀸𑀦𑀜𑁆𑀳𑁂𑀢𑁆𑀣 𑀧𑀓𑀸𑀲𑀻𑀬𑀢𑀺. 𑀇𑀫𑁂𑀲𑀁 𑀧𑀦 𑀅𑀢𑁆𑀣𑀸𑀦𑀁 𑀅𑀲𑀫𑁆𑀪𑀯𑀢𑁄 𑀧𑀸𑀭𑀺𑀲𑁂𑀲𑁂𑀦 𑀬𑀣𑀸 𑀓𑀼𑀲𑀮𑀧𑀝𑀺𑀧𑀓𑁆𑀔𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀏𑀯𑀁 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸𑀢𑀺 𑀓𑀢𑁆𑀯𑀸 𑀜𑀸𑀡𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄 𑀅𑀜𑁆𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀔𑀲𑀜𑁆𑀜𑀸𑀬 ¶ 𑀕𑀳𑁂𑀢𑁆𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀳𑀺 𑀯𑀺𑀜𑁆𑀜𑀽𑀳𑀺 𑀤𑀼𑀓𑁆𑀔𑀦𑁆𑀢𑁆𑀯𑁂𑀯 𑀕𑀳𑁂𑀢𑀩𑁆𑀩𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀬 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀏𑀢𑁂𑀦 𑀢𑀢𑁆𑀣 𑀢𑀡𑁆𑀳𑀸𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀆𑀭𑀪𑀢𑀻𑀢𑀺 ¶ 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂𑀢𑀺 𑀢𑀡𑁆𑀳𑀸𑀬 ‘‘𑀲𑀼𑀔𑀁 𑀲𑀼𑀪’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑀢𑁂 𑀧𑀭𑀺𑀓𑁆𑀔𑀢𑁂, 𑀅𑀮𑀗𑁆𑀓𑀢𑁂𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺 𑀅𑀚𑀸𑀦𑀦𑁆𑀢𑁄 𑀩𑀸𑀮𑁄 ‘‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁪𑁨) 𑀧𑀭𑀺𑀢𑀲𑁆𑀲𑀦𑁆𑀢𑁄 𑀓𑀸𑀬𑀲𑀗𑁆𑀔𑀸𑀭𑁂 𑀧𑀭𑀺𑀓𑁆𑀔𑀭𑁄𑀢𑀺. 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂𑀢𑀺 𑀯𑀸 𑀢𑀡𑁆𑀳𑀸𑀬 𑀧𑀭𑀺𑀯𑀸𑀭𑀪𑀽𑀢𑁂. 𑀢𑀡𑁆𑀳𑀸𑀯𑀢𑁆𑀣𑀼𑀁 𑀳𑀺 𑀘𑀓𑁆𑀔𑀸𑀤𑀺𑀁, 𑀭𑀽𑀧𑀸𑀤𑀺𑀜𑁆𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀁𑀲𑀫𑀗𑁆𑀕𑀻𑀦𑀁 𑀤𑁂𑀦𑁆𑀢𑀸 𑀲𑀗𑁆𑀔𑀭𑀸 𑀢𑀡𑁆𑀳𑀸𑀬 𑀉𑀧𑀦𑁂𑀦𑁆𑀢𑀸 𑀢𑀲𑁆𑀲𑀸 𑀧𑀭𑀺𑀯𑀸𑀭𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺. 𑀕𑀢𑀺𑀯𑀺𑀲𑁂𑀲𑁂 𑀩𑁆𑀭𑀳𑁆𑀫𑀮𑁄𑀓𑀸𑀤𑀺𑀓𑁂. 𑀅𑀦𑁂𑀓𑀲𑀢𑀧𑀲𑀼𑀩𑀤𑁆𑀥𑀪𑀺𑀁𑀲𑀦𑁄 𑀯𑀸𑀚𑀧𑁂𑀬𑁆𑀬𑀸𑀤𑀺𑀓𑁄 𑀬𑀜𑁆𑀜𑁄. 𑀅𑀫𑀭𑀡𑀢𑁆𑀣𑀸𑀢𑀺 𑀕𑀳𑀺𑀢𑀸 𑀤𑀼𑀓𑁆𑀓𑀭𑀓𑀺𑀭𑀺𑀬𑀸 𑀅𑀫𑀭𑀢𑀧𑁄. 𑀅𑀫𑀭𑁄 𑀯𑀸 𑀤𑁂𑀯𑁄 𑀯𑀸 𑀪𑀯𑁂𑀬𑁆𑀬𑀁, 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺 𑀧𑀯𑀢𑁆𑀢𑀺𑀢𑀸 𑀯𑀢𑀘𑀭𑀺𑀬𑀸 𑀅𑀫𑀭𑀢𑀧𑁄. 𑀤𑀼𑀓𑁆𑀔𑀢𑁆𑀢𑀸 𑀯𑀸 𑀫𑀭𑁄 𑀫𑀸𑀭𑀓𑁄 𑀢𑀧𑁄 𑀅𑀫𑀭𑀢𑀧𑁄. 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀲𑀤𑁆𑀤𑁄 𑀯𑀺𑀬 𑀫𑀭𑁂 𑀅𑀫𑀭𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀚𑀸𑀢𑀺𑀆𑀤𑀺𑀧𑀧𑀸𑀢𑀤𑀼𑀓𑁆𑀔𑀚𑀦𑀦𑀢𑁄 𑀫𑀭𑀼𑀧𑁆𑀧𑀧𑀸𑀢𑀲𑀤𑀺𑀲𑀢𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸. ‘‘𑀫𑀳𑀸𑀧𑀭𑀺𑀴𑀸𑀳𑀚𑀦𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀤𑀳𑀦𑀝𑁆𑀞𑁂𑀦 𑀢𑀺𑀡𑀼𑀓𑁆𑀓𑀸𑀲𑀤𑀺𑀲𑀢𑀁 𑀧𑀼𑀜𑁆𑀜𑀨𑀮𑀲𑁆𑀲 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀲𑁆𑀲𑀸𑀤𑀢𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀅𑀥𑀺𑀓𑀼𑀝𑁆𑀝𑀦𑀯𑀺𑀦𑀺𑀯𑀺𑀚𑁆𑀛𑀦𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀧𑁆𑀧𑀘𑁆𑀘𑀬𑀦𑁆𑀢𑀺 𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀪𑀸𑀯𑀲𑁆𑀲 𑀲𑀼𑀕𑀢𑀺𑀨𑀮𑀲𑁆𑀲 𑀧𑀘𑁆𑀘𑀬𑀪𑀽𑀢𑀁. 𑀭𑀫𑀡𑀻𑀬𑀪𑀸𑀯𑁂𑀦 𑀘 𑀅𑀲𑁆𑀲𑀸𑀤𑀪𑀸𑀯𑁂𑀦 𑀘 𑀕𑀬𑁆𑀳𑀫𑀸𑀦𑀁 𑀧𑀼𑀜𑁆𑀜𑀨𑀮𑀁 𑀤𑀻𑀧𑀲𑀺𑀔𑀸𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀲𑀤𑀺𑀲𑀁. 𑀢𑀤𑀢𑁆𑀣𑁄 𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀢𑀁𑀦𑀺𑀧𑀸𑀢𑀮𑁂𑀳𑀦𑀲𑀤𑀺𑀲𑁄 𑀯𑀼𑀢𑁆𑀢𑁄. ‘‘𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁯) 𑀲𑀼𑀔𑀲𑀜𑁆𑀜𑀸𑀬 𑀅𑀲𑀼𑀪𑀪𑀸𑀯𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑁂𑀦𑁂𑀯 𑀏𑀓𑀘𑁆𑀘𑀓𑀸𑀫𑀧𑀭𑀺𑀪𑁄𑀕𑁄𑀢𑀺 𑀩𑀸𑀮𑁄 𑀯𑀺𑀬 𑀕𑀽𑀣𑀓𑀻𑀴𑀦𑀁, 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀓𑁄𑀥𑀸𑀭𑀢𑀺𑀅𑀪𑀺𑀪𑀽𑀢𑁄 𑀅𑀲𑀯𑀲𑁄 𑀫𑀭𑀺𑀢𑀼𑀓𑀸𑀫𑁄 𑀯𑀺𑀬 𑀯𑀺𑀲𑀔𑀸𑀤𑀦𑀁 𑀲𑀫𑁆𑀧𑀢𑀺 𑀓𑀺𑀭𑀺𑀬𑀸𑀔𑀡𑁂, 𑀆𑀬𑀢𑀺𑀁 𑀨𑀮𑀓𑁆𑀔𑀡𑁂 𑀘 𑀚𑀺𑀕𑀼𑀘𑁆𑀙𑀦𑀻𑀬𑀁, 𑀤𑀼𑀓𑁆𑀔𑀜𑁆𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺. 𑀮𑁄𑀪𑀲𑀳𑀕𑀢𑀲𑁆𑀲 𑀯𑀸 𑀕𑀽𑀣𑀓𑀻𑀴𑀦𑀲𑀤𑀺𑀲𑀢𑀸, 𑀤𑁄𑀲𑀲𑀳𑀕𑀢𑀲𑁆𑀲 𑀯𑀺𑀲𑀔𑀸𑀤𑀦𑀲𑀤𑀺𑀲𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀪𑀬𑀲𑁆𑀲𑀸𑀧𑀺 𑀧𑀺𑀲𑀸𑀘𑀦𑀕𑀭𑀲𑁆𑀲 𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀺𑀬𑀸 𑀲𑀼𑀔𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁄 𑀯𑀺𑀬 𑀆𑀭𑀼𑀧𑁆𑀧𑀯𑀺𑀧𑀸𑀓𑀸𑀦𑀁 ¶ 𑀦𑀺𑀭𑀦𑁆𑀢𑀭𑀢𑀸𑀬, 𑀅𑀦𑀼𑀧𑀮𑀓𑁆𑀔𑀺𑀬𑀫𑀸𑀦𑀉𑀧𑁆𑀧𑀸𑀤𑀯𑀬𑀸𑀦𑀁 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀅𑀕𑀬𑁆𑀳𑀫𑀸𑀦𑀯𑀺𑀧𑀭𑀺𑀡𑀸𑀫𑀸𑀦𑀁 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀪𑀽𑀢𑀸𑀦𑀫𑁆𑀧𑀺 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁄𑀢𑀺, 𑀢𑁂𑀲𑀁 𑀧𑀺𑀲𑀸𑀘𑀦𑀕𑀭𑀲𑀤𑀺𑀲𑀢𑀸, 𑀢𑀤𑀪𑀺𑀫𑀼𑀔𑀕𑀫𑀦𑀲𑀤𑀺𑀲𑀢𑀸 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀬𑁄𑀚𑁂𑀢𑀩𑁆𑀩𑀸.

𑀅𑀯𑀺𑀚𑁆𑀚𑀸𑀪𑀸𑀯𑀢𑁄𑀯 𑀲𑀗𑁆𑀔𑀸𑀭𑀪𑀸𑀯𑁄, 𑀦 𑀅𑀪𑀸𑀯𑀢𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀪𑀸𑀯𑁂 𑀲𑀗𑁆𑀔𑁂𑀧𑁂𑀦 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀧𑀤𑀁 𑀆𑀪𑀢𑀁 ¶ . 𑀢𑀢𑁆𑀣 𑀅𑀯𑀺𑀤𑁆𑀯𑀸𑀢𑀺 𑀅𑀯𑀺𑀤𑁆𑀤𑀲𑀼. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑁆𑀞𑀸𑀦𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁫𑁯𑁪. 𑀢𑀸𑀯𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀭𑀸𑀧𑁂𑀓𑁆𑀔𑁄 𑀦𑀺𑀧𑀸𑀢𑁄, 𑀢𑁂𑀦 ‘‘𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄’’𑀢𑀺 𑀇𑀤𑀁 𑀢𑀸𑀯 𑀲𑀺𑀤𑁆𑀥𑀁, 𑀇𑀤𑀁 𑀧𑀦 𑀅𑀧𑀭𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀇𑀤𑀁 𑀧𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀬𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀬𑀥𑀫𑁆𑀫𑀸 𑀦𑀸𑀫 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀬𑀣𑀸 𑀯𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀤𑀼𑀪𑀬𑁂𑀲𑀁 𑀩𑀳𑀼𑀪𑀸𑀯𑀢𑁄 𑀅𑀦𑁂𑀓𑀥𑀸𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀬𑀧𑀺 𑀢𑀁 𑀆𑀲𑀗𑁆𑀓𑀦𑁆𑀢𑁄 𑀧𑀼𑀘𑁆𑀙𑀺 ‘‘𑀓𑀢𑀫𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀩𑀳𑀽 𑀲𑀗𑁆𑀔𑀸𑀭𑀸 𑀯𑀼𑀢𑁆𑀢𑀸. 𑀅𑀯𑀺𑀚𑁆𑀚𑀸 𑀘 𑀢𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀲𑀁 𑀏𑀓𑀥𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀏𑀯𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑀬𑀪𑀸𑀯𑁂. 𑀬𑀤𑀺𑀧𑀺 ‘‘𑀓𑀢𑀫𑁂𑀲𑀁 𑀲𑀗𑁆𑀔𑀸𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀸𑀥𑀸𑀭𑀡𑀢𑁄 𑀧𑀼𑀘𑁆𑀙𑀸 𑀆𑀭𑀤𑁆𑀥𑀸, 𑀏𑀓𑀤𑁂𑀲𑁂𑀦 𑀧𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀫𑁂𑀢𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁, 𑀅𑀯𑀺𑀚𑁆𑀚𑀸𑀬 𑀯𑀸 𑀧𑀘𑁆𑀘𑀬𑀪𑀸𑀯𑁂 𑀧𑀼𑀘𑁆𑀙𑀺𑀢𑁂 𑀢𑀧𑁆𑀧𑀲𑀗𑁆𑀕𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀯𑀺𑀲𑀚𑁆𑀚𑁂𑀢𑀼𑀓𑀸𑀫𑁄 𑀧𑀘𑁆𑀘𑀬𑁂 𑀢𑀸𑀯 𑀧𑀸𑀴𑀺𑀦𑀬𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀘 𑀪𑀕𑀯𑀢𑀸 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀯𑀲𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀳𑁂𑀢𑀼𑀦𑁄, 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀺𑀪𑀽𑀢𑀲𑁆𑀲 𑀘 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺. 𑀏𑀯𑀫𑁆𑀧𑀺 𑀲𑁄 𑀏𑀯 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺 𑀧𑀼𑀦 𑀆𑀳 ‘‘𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑁂𑀦 𑀦 𑀇𑀥 𑀳𑁂𑀢𑀼𑀲𑀤𑁆𑀤𑁂𑀦 𑀥𑀫𑁆𑀫𑀕𑁆𑀕𑀳𑀡𑀁 ¶ 𑀓𑀢𑀁, 𑀅𑀣 𑀔𑁄 𑀥𑀫𑁆𑀫𑀲𑁆𑀲 𑀲𑀢𑁆𑀢𑀺𑀯𑀺𑀲𑁂𑀲𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀲𑀦𑁆𑀥𑀸𑀬 ‘‘𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘, 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺 𑀘 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀭𑀢𑁄 𑀧𑀸𑀴𑀺𑀬𑀁 ‘‘𑀳𑁂𑀢𑀽 𑀳𑁂𑀢𑀼…𑀧𑁂… 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧) 𑀢𑁂𑀦 𑀢𑁂𑀦 𑀳𑁂𑀢𑀼𑀪𑀸𑀯𑀸𑀤𑀺𑀉𑀧𑀓𑀸𑀭𑁂𑀦 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑀓𑀢𑁆𑀢𑀁 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁄 𑀳𑀺 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸), ‘‘𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸) 𑀘 𑀏𑀯𑀫𑀸𑀤𑀺𑀦𑀸 𑀥𑀫𑁆𑀫𑀧𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂𑀦 ¶ 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀥𑀫𑁆𑀫𑀲𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀥𑀫𑁆𑀫𑁂𑀳𑁂𑀯 𑀥𑀫𑁆𑀫𑀲𑀢𑁆𑀢𑀺𑀯𑀺𑀪𑀸𑀯𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀥𑀸𑀧𑀺 𑀯𑀸 ‘‘𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸’’𑀢𑀺 𑀥𑀫𑁆𑀫𑁂𑀦𑁂𑀯 𑀥𑀫𑁆𑀫𑀲𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦 𑀳𑀺 ‘‘𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺𑀆𑀤𑀺𑀓𑁄 𑀉𑀤𑁆𑀤𑁂𑀲𑁄 𑀓𑀼𑀲𑀮𑀸𑀤𑀺𑀉𑀤𑁆𑀤𑁂𑀲𑁄 𑀯𑀺𑀬 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀅𑀣 𑀔𑁄 𑀥𑀫𑁆𑀫𑀸𑀦𑀁 𑀉𑀧𑀓𑀸𑀭𑀓𑀪𑀸𑀯𑀧𑁆𑀧𑀥𑀸𑀦𑁄𑀢𑀺.

‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀢𑀩𑁆𑀪𑀸𑀯𑁂𑀦 𑀧𑀘𑁆𑀘𑀬𑀪𑀸𑀯𑀁 𑀆𑀭𑀫𑁆𑀫𑀡𑀸𑀤𑀻𑀲𑀼 𑀅𑀢𑀺𑀤𑀺𑀲𑀢𑀺 ‘‘𑀆𑀭𑀫𑁆𑀫𑀡𑀜𑁆𑀘 𑀢𑀁 𑀧𑀘𑁆𑀘𑀬𑁄 𑀘𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄’’𑀢𑀺, 𑀦 𑀓𑀫𑁆𑀫𑀥𑀸𑀭𑀬𑀫𑀢𑁆𑀢𑀁.

𑁫𑁯𑁫. 𑀯𑀘𑀦𑀸𑀯𑀬𑀯𑁄𑀢𑀺 𑀲𑀸𑀥𑀦𑀸𑀯𑀬𑀯𑀁 𑀲𑀦𑁆𑀥𑀸𑀬𑀸𑀳. 𑀯𑀘𑀦𑀲𑀪𑀸𑀯𑀜𑁆𑀳𑀺 𑀲𑀸𑀥𑀦𑀁 𑀧𑀭𑁂𑀲𑀁 𑀅𑀯𑀺𑀤𑀺𑀢𑀢𑁆𑀣𑀜𑀸𑀧𑀦𑀢𑁄 𑀮𑁄𑀓𑁂 𑀲𑀸𑀥𑀦𑀦𑁆𑀢𑀺 𑀧𑀸𑀓𑀝𑀁 𑀧𑀜𑁆𑀜𑀸𑀢𑀁. 𑀢𑀣𑀸 𑀳𑀺 𑀦𑀁 𑀅𑀯𑀬𑀯𑀮𑀓𑁆𑀔𑀡𑀁, 𑀯𑀘𑀦𑀲𑀪𑀸𑀯𑀜𑁆𑀘 𑀲𑀸𑀥𑀦𑀁, 𑀅𑀯𑀬𑀯𑀧𑀓𑁆𑀔𑀸𑀤𑀻𑀦𑀺 𑀯𑀘𑀦𑀸𑀦𑀺 𑀲𑀸𑀥𑀦𑀦𑁆𑀢𑀺 𑀘 𑀜𑀸𑀬𑀯𑀸𑀤𑀺𑀦𑁄 𑀯𑀤𑀦𑁆𑀢𑀺. 𑀧𑀝𑀺𑀜𑁆𑀜𑀸, 𑀳𑁂𑀢𑀽𑀢𑀺𑀆𑀤𑀻𑀲𑀽𑀢𑀺 𑀧𑀝𑀺𑀜𑁆𑀜𑀸, 𑀳𑁂𑀢𑀼, 𑀉𑀤𑀸𑀳𑀭𑀡, 𑀉𑀧𑀦𑀬, 𑀦𑀺𑀕𑀫𑀦𑀸𑀦𑀺. 𑀉𑀤𑀸𑀳𑀭𑀡𑀲𑀸𑀥𑀫𑁆𑀫𑀺𑀬𑀸 𑀲𑀸𑀥𑁆𑀬𑀲𑀸𑀥𑀦𑀁 𑀳𑁂𑀢𑀼. 𑀯𑀺𑀭𑀽𑀧𑁄 𑀳𑁂𑀢𑀽𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀓𑀸𑀭𑀡𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀮𑀓𑁆𑀔𑀡𑀁, 𑀲𑀫𑁆𑀧𑀸𑀧𑀓𑀮𑀓𑁆𑀔𑀡𑀫𑁆𑀧𑀺 𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀢𑀲𑁆𑀲𑀸𑀧𑀺 𑀲𑀗𑁆𑀕𑀳𑁂𑀢𑀩𑁆𑀩𑀢𑀸𑀬, 𑀜𑀸𑀧𑀓𑀮𑀓𑁆𑀔𑀡𑀁 𑀧𑀦 𑀯𑀘𑀦𑀸𑀯𑀬𑀯𑀕𑁆𑀕𑀳𑀡𑁂𑀦 𑀕𑀳𑀺𑀢𑀁. 𑀓𑀸𑀫𑀁 𑀫𑀽𑀮𑀫𑁆𑀧𑀺 𑀓𑀸𑀭𑀡𑀮𑀓𑁆𑀔𑀡𑀁 𑀓𑀸𑀭𑀡𑀫𑁂𑀯, 𑀓𑀸𑀭𑀡𑀦𑁆𑀢𑀺 𑀧𑀦𑁂𑀢𑁆𑀣 𑀧𑀘𑁆𑀘𑀬𑀳𑁂𑀢𑀼 𑀕𑀳𑀺𑀢𑁄. 𑀫𑀽𑀮𑀦𑁆𑀢𑀺 𑀳𑁂𑀢𑀼𑀳𑁂𑀢𑀽𑀢𑀺 𑀓𑀸𑀭𑀡𑀯𑀺𑀲𑁂𑀲𑀯𑀺𑀲𑀬𑀢𑁆𑀢𑀸 𑀫𑀽𑀮𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁. 𑀏𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀯𑀘𑀦𑀁 𑀯𑀢𑁆𑀢𑀢𑀻𑀢𑀺, 𑀢𑀜𑁆𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀦𑀁 𑀲𑀸𑀥𑀸𑀭𑀡𑀯𑀘𑀦𑀁. 𑀢𑁂𑀦𑁂𑀯𑀸𑀳 ‘‘𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸’’𑀢𑀺. 𑀏𑀓𑀘𑁆𑀘𑁄 𑀳𑀺 𑀧𑀘𑁆𑀘𑀬𑁄 𑀞𑀺𑀢𑀺𑀬𑀸 𑀏𑀯 𑀉𑀧𑀓𑀸𑀭𑀓𑁄 𑀳𑁄𑀢𑀺 𑀬𑀣𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄, 𑀏𑀓𑀘𑁆𑀘𑁄 ¶ 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀬𑀣𑀸 𑀅𑀦𑀦𑁆𑀢𑀭𑀸𑀤𑀺𑀓𑁄, 𑀏𑀓𑀘𑁆𑀘𑁄 𑀉𑀪𑀬𑀲𑁆𑀲 𑀬𑀣𑀸 𑀳𑁂𑀢𑀼𑀆𑀤𑀬𑁄.

𑀉𑀧𑀓𑀸𑀭𑀓𑀮𑀓𑁆𑀔𑀡𑁄𑀢𑀺 𑀘 𑀥𑀫𑁆𑀫𑁂𑀦 𑀥𑀫𑁆𑀫𑀲𑀢𑁆𑀢𑀺𑀁 𑀉𑀧𑀓𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀺𑀦𑁄𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀳𑁂𑀢𑀼, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀳𑀺-𑀲𑀤𑁆𑀤𑁄 𑀫𑀽𑀮𑀲𑀤𑁆𑀤𑁄 𑀯𑀺𑀬 𑀧𑀢𑀺𑀝𑁆𑀞𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀦𑁄𑀢𑀺 𑀯𑀸 𑀏𑀢𑁂𑀦 𑀓𑀫𑁆𑀫𑀦𑀺𑀤𑀸𑀦𑀪𑀽𑀢𑁂𑀦 𑀉𑀤𑁆𑀥𑀁 𑀑𑀚𑀁 𑀅𑀢𑀺𑀳𑀭𑀦𑁆𑀢𑁂𑀦 𑀫𑀽𑀮𑁂𑀦 𑀯𑀺𑀬 𑀧𑀸𑀤𑀧𑁄 𑀢𑀧𑁆𑀧𑀘𑁆𑀘𑀬𑀁 𑀨𑀮𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀳𑁂𑀢𑀼. 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁. 𑀦𑀺𑀤𑀤𑀸𑀢𑀺 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀦𑀺𑀤𑀸𑀦𑀁. 𑀲𑀫𑁆𑀪𑀯𑀢𑀺 𑀢𑀁 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄. 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄𑀢𑀺 𑀧𑀘𑁆𑀘𑀬𑀳𑁂𑀢𑀼𑀲𑀤𑁆𑀤𑁂𑀳𑀺 𑀇𑀢𑀭𑁂𑀲𑀫𑁆𑀧𑀺 𑀲𑀫𑀸𑀦𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀸𑀭𑀡𑀯𑀺𑀲𑁂𑀲𑀯𑀺𑀲𑀬𑁄 ¶ 𑀳𑁂𑀢𑀼𑀲𑀤𑁆𑀤𑁄, 𑀓𑀸𑀭𑀡𑀲𑀸𑀫𑀜𑁆𑀜𑀯𑀺𑀲𑀬𑁄 𑀧𑀘𑁆𑀘𑀬𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀽𑀮𑀝𑁆𑀞𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀳𑁂𑀢𑀼𑀅𑀢𑁆𑀣𑁄, 𑀧𑀘𑁆𑀘𑀬𑀝𑁆𑀞𑁄 𑀘 𑀳𑁂𑀝𑁆𑀞𑀸 𑀧𑀧𑀜𑁆𑀘𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀢𑀁 𑀲𑀗𑁆𑀔𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀔𑁂𑀧𑀢𑁄…𑀧𑁂… 𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺.

𑀬𑀣𑀸 𑀲𑀸𑀮𑀺𑀯𑀻𑀳𑀺𑀩𑀻𑀚𑀸𑀤𑀻𑀦𑀺 𑀢𑀁𑀢𑀁𑀑𑀲𑀥𑀻𑀦𑀁 𑀲𑀸𑀮𑀺𑀯𑀻𑀳𑀺𑀆𑀤𑀺𑀪𑀸𑀯𑀲𑁆𑀲 𑀲𑀸𑀥𑀓𑀸𑀦𑀺, 𑀫𑀡𑀺𑀆𑀤𑀺𑀧𑁆𑀧𑀪𑀸𑀯𑀢𑁆𑀣𑀽𑀦𑀺 𑀘 𑀦𑀻𑀮𑀸𑀤𑀺𑀯𑀡𑁆𑀡𑀸𑀦𑀺 𑀦𑀻𑀮𑀸𑀤𑀺𑀧𑁆𑀧𑀪𑀸𑀲𑀸𑀥𑀓𑀸𑀦𑀺, 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑁄 𑀬𑀣𑀸𑀭𑀳𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑁆𑀲 𑀲𑀸𑀥𑀓𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑁄 𑀲𑀸𑀮𑀺𑀆𑀤𑀻𑀦’’𑀦𑁆𑀢𑀺𑀆𑀤𑀺𑀦𑀸. 𑀆𑀘𑀭𑀺𑀬𑀸𑀦𑀦𑁆𑀢𑀺 𑀘 𑀭𑁂𑀯𑀢𑀸𑀘𑀭𑀺𑀬𑀁 𑀲𑀦𑁆𑀥𑀸𑀬𑀸𑀳. 𑀏𑀯𑀁 𑀲𑀦𑁆𑀢𑁂𑀢𑀺 𑀳𑁂𑀢𑀼𑀧𑀘𑁆𑀘𑀬𑁄 𑀬𑀤𑀺 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄, 𑀏𑀯𑀁 𑀲𑀢𑀺. 𑀦 𑀲𑀫𑁆𑀧𑀚𑁆𑀚𑀢𑀺 𑀦 𑀲𑀺𑀚𑁆𑀛𑀢𑀺. 𑀬𑀣𑀸 𑀓𑀼𑀲𑀮𑀸𑀓𑀼𑀲𑀮𑀳𑁂𑀢𑀼 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀸𑀬 𑀦 𑀧𑀭𑀺𑀬𑀢𑁆𑀢𑁄, 𑀏𑀯𑀁 𑀅𑀩𑁆𑀬𑀸𑀓𑀢𑁄𑀧𑀺 𑀳𑁂𑀢𑀼 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀅𑀩𑁆𑀬𑀸𑀓𑀢𑀪𑀸𑀯𑀸𑀬. 𑀲𑀪𑀸𑀯𑁂𑀦𑁂𑀯 𑀳𑀺 𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀆𑀳 ‘‘𑀦 𑀳𑀺 𑀲𑁄 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀢𑀻’’𑀢𑀺. 𑀳𑁂𑀢𑀼𑀧𑀘𑁆𑀘𑀬𑁄 𑀘 𑀢𑁂𑀲𑀁 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀦 𑀘 𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀦𑀸 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀳𑁂𑀢𑀼𑀦𑀸 𑀅𑀩𑁆𑀬𑀸𑀓𑀢𑀪𑀸𑀯𑀲𑀸𑀥𑀓𑁂𑀦 𑀯𑀺𑀦𑀸 𑀅𑀳𑁂𑀢𑀼𑀓𑀢𑁆𑀢𑀸, 𑀅𑀩𑁆𑀬𑀸𑀓𑀢𑀪𑀸𑀯𑁄 𑀲𑀺𑀤𑁆𑀥𑁄 𑀲𑀪𑀸𑀯𑁂𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧.𑁬𑁭) 𑀯𑀘𑀦𑁂𑀳𑀺 𑀓𑀼𑀲𑀮𑀪𑀸𑀯𑀲𑁆𑀲 ¶ 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀢𑀸 𑀲𑀺𑀤𑁆𑀥𑀸𑀢𑀺 𑀆𑀳 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀪𑀸𑀯𑁄’’𑀢𑀺. 𑀏𑀢𑁂𑀦𑁂𑀯 𑀅𑀓𑀼𑀲𑀮𑀅𑀩𑁆𑀬𑀸𑀓𑀢𑀪𑀸𑀯𑀸𑀧𑀺 𑀓𑀼𑀲𑀮𑀪𑀸𑀯𑁄 𑀯𑀺𑀬 𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀁 𑀧𑀦𑁂𑀓𑁂 𑀫𑀜𑁆𑀜𑁂𑀬𑁆𑀬𑀼𑀁 ‘‘𑀅𑀳𑁂𑀢𑀼𑀓𑀳𑁂𑀢𑀼𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀯𑀺𑀬 𑀲𑀳𑁂𑀢𑀼𑀓𑀳𑁂𑀢𑀽𑀦𑀫𑁆𑀧𑀺 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀅𑀜𑁆𑀜𑁂𑀲𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀧𑀝𑀺𑀩𑀤𑁆𑀥𑁄’’𑀢𑀺, 𑀢𑀲𑁆𑀲 𑀉𑀢𑁆𑀢𑀭𑀁 𑀯𑀢𑁆𑀢𑀼𑀁 ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀮𑁄𑀪𑁄 𑀓𑀼𑀲𑀮𑁄 𑀯𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑁄 𑀯𑀸𑀢𑀺 𑀬𑀤𑀺 𑀅𑀮𑁄𑀪𑁄 𑀲𑀪𑀸𑀯𑀢𑁄 𑀓𑀼𑀲𑀮𑁄, 𑀲𑁄 𑀓𑀼𑀲𑀮𑀲𑀪𑀸𑀯𑀢𑁆𑀢𑀸 𑀅𑀩𑁆𑀬𑀸𑀓𑀢𑁄 𑀦 𑀲𑀺𑀬𑀸. 𑀅𑀣 𑀅𑀩𑁆𑀬𑀸𑀓𑀢𑁄 𑀢𑀁𑀲𑀪𑀸𑀯𑀢𑁆𑀢𑀸 𑀓𑀼𑀲𑀮𑁄 𑀦 𑀲𑀺𑀬𑀸 𑀅𑀮𑁄𑀪𑀲𑀪𑀸𑀯𑀲𑁆𑀲 𑀅𑀤𑁄𑀲𑀢𑁆𑀢𑀸𑀪𑀸𑀯𑁄 𑀯𑀺𑀬. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀉𑀪𑀬𑀣𑀸 𑀳𑁄𑀦𑁆𑀢𑁂𑀲𑀼 𑀲𑀤𑁆𑀥𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑁂𑀢𑀼𑀧𑀝𑀺𑀩𑀤𑁆𑀥𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀧𑀭𑀺𑀬𑁂𑀲𑁂𑀣, 𑀦 𑀲𑀪𑀸𑀯𑀢𑁄, 𑀏𑀯𑀁 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀢𑀸 𑀅𑀜𑁆𑀜𑀧𑀝𑀺𑀩𑀤𑁆𑀥𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀦 𑀲𑀪𑀸𑀯𑀢𑁄𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀽𑀲𑀼 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄’’𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀲𑀸 𑀧𑀦 𑀧𑀭𑀺𑀬𑁂𑀲𑀺𑀬𑀫𑀸𑀦𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑀸 ¶ 𑀳𑁄𑀢𑀻𑀢𑀺 𑀳𑁂𑀢𑀽𑀲𑀼 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬𑀸𑀢𑀺 𑀏𑀢𑁂𑀦 𑀫𑀽𑀮𑀸𑀦𑀺 𑀯𑀺𑀬 𑀫𑀽𑀮𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦𑀸’’𑀢𑀺. 𑀲𑁆𑀯𑀸𑀬𑀁 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀏𑀯𑀁 𑀲𑀢𑁆𑀢𑀥𑀸 𑀧𑀜𑁆𑀳𑀸𑀯𑀸𑀭𑁂 𑀦𑀺𑀤𑁆𑀤𑀺𑀝𑁆𑀞𑁄. 𑀬𑀁 𑀧𑀦 𑀯𑀼𑀢𑁆𑀢𑀁 𑀳𑁂𑀢𑀼𑀓𑀺𑀘𑁆𑀘𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧), 𑀢𑀢𑁆𑀣 𑀧𑀞𑀫𑁄 𑀳𑁂𑀢𑀼𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀧𑀘𑁆𑀘𑀬𑀥𑀫𑁆𑀫𑀦𑀺𑀤𑁆𑀤𑁂𑀲𑁄, 𑀢𑁂𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀦𑀁, 𑀢𑁂𑀦 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀣 𑀔𑁄 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀲𑁆𑀲 ¶ 𑀲𑀸𑀧𑁂𑀓𑁆𑀔𑀢𑁆𑀢𑀸 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀜𑁆𑀜𑀲𑁆𑀲 𑀅𑀧𑁂𑀓𑁆𑀔𑀺𑀢𑀩𑁆𑀩𑀲𑁆𑀲 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀳𑁂𑀢𑀽 𑀅𑀢𑁆𑀢𑀦𑀸𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀸𑀬𑀫𑁂𑀓𑀦𑁆𑀢𑁄. 𑀳𑁂𑀢𑀼𑀲𑀤𑁆𑀤𑁄 𑀳𑀺 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣𑁂𑀯 𑀩𑁆𑀬𑀸𑀯𑀝𑁄 𑀬𑀤𑀸 𑀕𑀬𑁆𑀳𑀢𑀺, 𑀦 𑀢𑀤𑀸 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀁 𑀳𑁄𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀅𑀯𑀺𑀲𑀺𑀝𑁆𑀞𑀸 𑀬𑁂 𑀓𑁂𑀘𑀺 𑀕𑀳𑀺𑀢𑀸 𑀪𑀯𑁂𑀬𑁆𑀬𑀼𑀦𑁆𑀢𑀺. 𑀦𑀦𑀼 𑀘 𑀬𑀣𑀸 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀤𑀼𑀢𑀺𑀬𑁂𑀦 𑀆𑀳𑀸𑀭𑀕𑁆𑀕𑀳𑀡𑁂𑀦, 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀘 𑀯𑀺𑀦𑀸𑀧𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀲𑀺𑀬𑀸𑀢𑀺? 𑀦, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀚𑁆𑀚𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀯𑀚𑁆𑀚𑁂𑀢𑀩𑁆𑀩𑀸𑀪𑀸𑀯𑀢𑁄 𑀳𑀺 𑀢𑀢𑁆𑀣 𑀤𑀼𑀢𑀺𑀬𑁂 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂 𑀅𑀲𑀢𑀺𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀻𑀢𑀺 𑀢𑀁 𑀦 𑀓𑀢𑀁, 𑀇𑀥 𑀧𑀦 𑀯𑀚𑁆𑀚𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀓𑀢𑁆𑀢𑀩𑁆𑀩𑀁 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀲𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀓𑀳𑁂𑀢𑀽𑀢𑀺 𑀯𑀺𑀲𑁂𑀲𑀦𑀲𑁆𑀲 𑀅𑀓𑀢𑀢𑁆𑀢𑀸 𑀬𑁄 𑀓𑁄𑀘𑀺 𑀳𑁂𑀢𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑁂𑀯 𑀳𑁂𑀢𑀼𑀦𑁄 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀧𑀺 𑀢𑀲𑁆𑀲 𑀕𑀳𑀡𑀁 𑀓𑀢𑀁.

𑀅𑀣 𑀯𑀸 𑀅𑀲𑀢𑀺 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦 𑀧𑀦 𑀳𑁂𑀢𑀽𑀦𑀦𑁆𑀢𑀺 𑀏𑀯𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀲𑁄 𑀯𑀼𑀢𑁆𑀢𑁄. 𑀢𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀁 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀁 ¶ 𑀲𑀩𑁆𑀩𑁂𑀲𑀁 𑀳𑁂𑀢𑀽𑀦𑀁, 𑀅𑀜𑁆𑀜𑁂𑀲𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀛𑀸𑀦𑀫𑀕𑁆𑀕𑀸 𑀧𑀢𑀺𑀝𑁆𑀞𑀸𑀫𑀢𑁆𑀢𑀸𑀤𑀺𑀪𑀸𑀯𑁂𑀦 𑀅𑀜𑁆𑀜𑀥𑀫𑁆𑀫𑀦𑀺𑀭𑀧𑁂𑀓𑁆𑀔𑀸, 𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀯𑀺𑀬 𑀲𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 𑀏𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀁 𑀳𑁂𑀢𑀸𑀤𑀺𑀕𑁆𑀕𑀳𑀡𑀁 𑀓𑀢𑀁. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀧𑀦 𑀆𑀳𑀭𑀺𑀢𑀩𑁆𑀩𑀈𑀲𑀺𑀢𑀩𑁆𑀩𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 𑀢𑁂 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸 𑀏𑀯 𑀆𑀳𑀭𑀺𑀢𑀩𑁆𑀩𑁂, 𑀈𑀲𑀺𑀢𑀩𑁆𑀩𑁂 𑀘 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀪𑀽𑀢𑁂, 𑀅𑀜𑁆𑀜𑁂 𑀘 𑀲𑀫𑁆𑀧𑀬𑀼𑀢𑁆𑀢𑀓𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺 𑀢𑀁 𑀢𑀢𑁆𑀣 𑀦 𑀓𑀢𑀁. 𑀇𑀥 𑀘 𑀤𑀼𑀢𑀺𑀬𑁂𑀦 𑀳𑁂𑀢𑀼𑀕𑁆𑀕𑀳𑀡𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀦𑀸, 𑀧𑀘𑁆𑀘𑀬𑀪𑀽𑀢𑁂𑀦𑁂𑀯 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀽𑀦𑀁, 𑀅𑀜𑁆𑀜𑁂𑀲𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀼𑀦 𑀯𑀺𑀲𑁂𑀲𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀜𑁆𑀳𑀸𑀯𑀸𑀭𑁂 ‘‘𑀓𑀼𑀲𑀮𑀸 ¶ 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁯𑁬. 𑀆𑀭𑀫𑁆𑀫𑀡𑀪𑀸𑀯𑁂𑀦𑀸𑀢𑀺 𑀯𑀺𑀲𑀬𑀪𑀸𑀯𑁂𑀦, 𑀆𑀮𑀫𑁆𑀩𑀺𑀢𑀩𑁆𑀩𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀭𑀪𑀺𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀭𑀽𑀧𑀸𑀬𑀢𑀦𑀸𑀤𑀺𑀫𑀢𑁆𑀢𑁂 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀲𑁆𑀫𑀺𑀁 𑀅𑀝𑁆𑀞𑀢𑁆𑀯𑀸 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 (𑀧𑀝𑁆𑀞𑀸 𑁧.𑁧.𑁨) 𑀅𑀦𑀺𑀬𑀫𑁂𑀦 𑀲𑀩𑁆𑀩𑀭𑀽𑀧𑀸𑀬𑀢𑀦𑀸𑀦𑀁…𑀧𑁂… 𑀲𑀩𑁆𑀩𑀥𑀫𑁆𑀫𑀸𑀬𑀢𑀦𑀸𑀦𑀜𑁆𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀸𑀤𑀺𑀪𑁂𑀤𑁂𑀦 𑀙𑀩𑁆𑀩𑀺𑀥𑁂𑀲𑀼 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼 𑀦 𑀓𑁄𑀘𑀺 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑁄 𑀏𑀯. 𑀆𑀮𑀫𑁆𑀩𑀺𑀢𑁆𑀯𑀸𑀢𑀺 𑀕𑀳𑁂𑀢𑁆𑀯𑀸. 𑀏𑀓𑀦𑁆𑀢𑀲𑀸𑀭𑀫𑁆𑀫𑀡𑀪𑀸𑀯𑀢𑁄 𑀅𑀦𑀸𑀭𑀩𑁆𑀪 𑀧𑀯𑀢𑁆𑀢𑀺 𑀏𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀆𑀭𑀩𑁆𑀪𑁂𑀯𑀸’’𑀢𑀺. 𑀲𑁆𑀯𑀸𑀬𑀁 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀏𑀯𑀁 𑀦𑀯𑀧𑁆𑀧𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁭. 𑀚𑁂𑀝𑁆𑀞𑀓𑀝𑁆𑀞𑁂𑀦𑀸𑀢𑀺 𑀧𑀫𑀼𑀔𑀪𑀸𑀯𑁂𑀦. 𑀅𑀢𑁆𑀢𑀸𑀥𑀻𑀦𑀸𑀦𑀜𑁆𑀳𑀺 𑀧𑀢𑀺𑀪𑀽𑀢𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺. 𑀲𑁄 𑀢𑁂𑀲𑀁 𑀧𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑀢𑀺. ‘‘𑀙𑀦𑁆𑀤𑀯𑀢𑁄 𑀓𑀺𑀁 𑀦𑀸𑀫 𑀦 𑀲𑀺𑀚𑁆𑀛𑀢𑀻’’𑀢𑀺𑀆𑀤𑀺𑀓𑀁 𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀦𑁆𑀤𑀸𑀤𑀬𑁄 𑀥𑀼𑀭𑀪𑀽𑀢𑀸 𑀚𑁂𑀝𑁆𑀞𑀓𑀪𑀽𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀸𑀥𑀬𑀫𑀸𑀦𑀸 𑀯𑀲𑁂 𑀯𑀢𑁆𑀢𑀬𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀢𑁂𑀲𑀁 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺 𑀳𑀻𑀦𑀸𑀤𑀺𑀪𑀸𑀯𑁂𑀦 𑀢𑀤𑀦𑀼𑀯𑀢𑁆𑀢𑀦𑀢𑁄, 𑀢𑁂𑀦 𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀕𑀭𑀼𑀓𑀸𑀢𑀩𑁆𑀩𑀫𑁆𑀧𑀺 𑀆𑀭𑀫𑁆𑀫𑀡𑀁 𑀢𑀦𑁆𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀸𑀦𑀁 𑀅𑀲𑁆𑀲𑀸𑀤𑀦𑀧𑀘𑁆𑀘𑀯𑁂𑀓𑁆𑀔𑀡𑀫𑀕𑁆𑀕𑀨𑀮𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀬𑀫𑀸𑀦𑀁 𑀯𑀺𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀁 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀙𑀦𑁆𑀤𑀸𑀥𑀺𑀧𑀢𑀻𑀢𑀺 𑀙𑀦𑁆𑀤𑀲𑀗𑁆𑀔𑀸𑀢𑁄 𑀅𑀥𑀺𑀧𑀢𑀺, 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑀲𑁆𑀲 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸 𑀧𑀦 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ¶ ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧) 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁩) 𑀦𑀬𑁂𑀦 𑀯𑀼𑀢𑁆𑀢𑀦𑁆𑀢𑀺? 𑀏𑀓𑀓𑁆𑀔𑀡𑁂 ¶ 𑀅𑀪𑀸𑀯𑀢𑁄. 𑀳𑁂𑀢𑀯𑁄 𑀳𑀺 𑀤𑁆𑀯𑁂 𑀢𑀬𑁄𑀧𑀺 𑀏𑀓𑀓𑁆𑀔𑀡𑁂 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑀪𑀸𑀯𑀲𑁆𑀲 𑀅𑀯𑀺𑀚𑀳𑀦𑀢𑁄. 𑀅𑀥𑀺𑀧𑀢𑀺 𑀧𑀦 𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄, 𑀦 𑀘 𑀏𑀓𑀓𑁆𑀔𑀡𑁂 𑀩𑀳𑀽 𑀚𑁂𑀝𑁆𑀞𑀓𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀢𑁂𑀲𑀁 𑀏𑀓𑀓𑁆𑀔𑀡𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀻𑀢𑀺 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁.

𑀬𑀁 𑀬𑀁 𑀥𑀫𑁆𑀫𑀦𑁆𑀢𑀺 𑀬𑀁 𑀬𑀁 𑀆𑀭𑀫𑁆𑀫𑀡𑀥𑀫𑁆𑀫𑀁. 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀕𑀭𑀼𑀓𑀸𑀭𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑀦𑀯𑀲𑁂𑀦 𑀯𑀸 𑀕𑀭𑀼𑀓𑀸𑀭𑀺𑀓𑀁 𑀮𑀤𑁆𑀥𑀩𑁆𑀩𑀁 𑀅𑀯𑀺𑀚𑀳𑀺𑀢𑀩𑁆𑀩𑀁 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀢𑁂 𑀢𑁂 𑀕𑀭𑀼𑀓𑀸𑀢𑀩𑁆𑀩𑀸 𑀥𑀫𑁆𑀫𑀸. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑀁𑀢𑀁𑀕𑀭𑀼𑀓𑀸𑀭𑀓𑀥𑀫𑁆𑀫𑀸𑀦𑀁. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁂𑀦. 𑀲𑁆𑀯𑀸𑀬𑀁 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀸𑀭𑀫𑁆𑀫𑀡𑁂𑀳𑀺, 𑀅𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑁂𑀦𑁂𑀯, 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀸𑀭𑀫𑁆𑀫𑀡𑁂𑀳𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑁂𑀦𑁂𑀯𑀸𑀢𑀺 𑀓𑀼𑀲𑀮𑀫𑀽𑀮𑀸 𑀘𑀢𑁆𑀢𑀸𑀭𑁄, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀲𑀳𑀚𑀸𑀢𑀸𑀭𑀫𑁆𑀫𑀡𑁂𑀳𑀺, 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑁂𑀦𑁂𑀯, 𑀢𑀣𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲𑀸𑀢𑀺 𑀅𑀓𑀼𑀲𑀮𑀫𑀽𑀮𑀸 𑀢𑀬𑁄, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀸𑀭𑀫𑁆𑀫𑀡𑁂𑀳𑀺, 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑁂𑀦𑁂𑀯, 𑀢𑀣𑀸 𑀅𑀓𑀼𑀲𑀮𑀲𑁆𑀲𑀸𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑀸 𑀢𑀬𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀤𑀲𑀧𑁆𑀧𑀓𑀸𑀭𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄. 𑀏𑀢𑁆𑀣 𑀘 𑀲𑀢𑁆𑀢𑀥𑀸 𑀲𑀳𑀚𑀸𑀢𑀸𑀥𑀺𑀧𑀢𑀺, 𑀲𑀢𑁆𑀢𑀥𑀸 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁮. 𑀅𑀦𑁆𑀢𑀭𑀸𑀬𑀢𑀻𑀢𑀺 𑀅𑀦𑁆𑀢𑀭𑀁, 𑀩𑁆𑀬𑀯𑀥𑀸𑀬𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀲𑁆𑀲 𑀅𑀦𑁆𑀢𑀭𑀁 𑀯𑀺𑀚𑁆𑀚𑀢𑀻𑀢𑀺 𑀅𑀦𑀦𑁆𑀢𑀭𑁄, 𑀅𑀦𑀦𑁆𑀢𑀭𑁄 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. ‘‘𑀅𑀢𑁆𑀣𑀸𑀦𑀦𑁆𑀢𑀭𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀩𑀳𑀼𑀥𑀸 𑀧𑀧𑀜𑁆𑀘𑀬𑀦𑁆𑀢𑀺, 𑀅𑀲𑀸𑀭𑀁 𑀕𑀦𑁆𑀣𑀯𑀺𑀢𑁆𑀣𑀸𑀭𑀁 𑀓𑀭𑁄𑀦𑁆𑀢𑀺. 𑀬𑀣𑀸 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀦 𑀏𑀯𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸, 𑀏𑀢𑁂 𑀧𑀦 𑀘𑀺𑀢𑁆𑀢𑀦𑀺𑀬𑀫𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀢𑀁 𑀘𑀺𑀢𑁆𑀢𑀦𑀺𑀬𑀫𑀳𑁂𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀺 𑀏𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺𑀆𑀤𑀺 𑀘𑀺𑀢𑁆𑀢𑀦𑀺𑀬𑀫𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀦𑁆𑀢𑀻𑀭𑀡𑀸𑀦𑀦𑁆𑀢𑀭𑀸 𑀯𑁄𑀝𑁆𑀞𑀩𑁆𑀩𑀦𑀁, 𑀘𑀼𑀢𑀺𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀻𑀢𑀺 𑀬𑀲𑁆𑀲 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀬𑀁 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀤𑀦𑀦𑁆𑀢𑀭𑀼𑀧𑁆𑀧𑀸𑀤𑀦𑀺𑀬𑀫𑁄 𑀢𑀁𑀢𑀁𑀲𑀳𑀓𑀸𑀭𑀺𑀧𑀘𑁆𑀘𑀬𑀯𑀺𑀲𑀺𑀝𑁆𑀞𑀲𑁆𑀲 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲𑁂𑀯 𑀯𑀲𑁂𑀦 𑀇𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀢𑁆𑀣𑀸𑀦𑀦𑁆𑀢𑀭𑀢𑀸𑀬𑀸𑀢𑀺 ¶ 𑀅𑀢𑁆𑀣𑁂𑀦 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀅𑀦𑀦𑁆𑀢𑀭𑀢𑀸𑀬. 𑀓𑀸𑀮𑀸𑀦𑀦𑁆𑀢𑀭𑀢𑀸𑀬𑀸𑀢𑀺 𑀓𑀸𑀮𑀪𑁂𑀤𑁂𑀦 𑀅𑀦𑀦𑁆𑀢𑀭𑀢𑀸𑀬 ¶ . 𑀆𑀘𑀭𑀺𑀬𑀸𑀦𑀦𑁆𑀢𑀺 𑀇𑀥𑀸𑀧𑀺 𑀭𑁂𑀯𑀢𑀸𑀘𑀭𑀺𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂, 𑀢𑀲𑁆𑀫𑀺𑀁 𑀯𑀸 𑀬𑀣𑀸𑀯𑀼𑀢𑁆𑀢𑀯𑀺𑀭𑁄𑀥𑁂. 𑀪𑀸𑀯𑀦𑀸𑀩𑀮𑁂𑀦 𑀧𑀦 𑀯𑀸𑀭𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀯𑁂𑀥𑁂 𑀤𑀺𑀦𑁆𑀦𑁂 𑀧𑀼𑀧𑁆𑀨𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀧𑀼𑀧𑁆𑀨𑀦𑀁 𑀦 𑀳𑁄𑀢𑀺, 𑀯𑁂𑀥𑁂 𑀧𑀦 𑀅𑀧𑀦𑀻𑀢𑁂 𑀢𑀸𑀬 𑀏𑀯 𑀲𑀫𑀢𑁆𑀣𑀢𑀸𑀬 𑀧𑀼𑀧𑁆𑀨𑀦𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀪𑀸𑀯𑀦𑀸𑀩𑀮𑁂𑀦 𑀯𑀸𑀭𑀺𑀢𑀢𑁆𑀢𑀸 𑀲𑀫𑀼𑀝𑁆𑀞𑀸𑀧𑀦𑀲𑀫𑀢𑁆𑀣𑀲𑁆𑀲𑁂𑀯 𑀅𑀲𑀫𑀼𑀝𑁆𑀞𑀸𑀧𑀦𑀁, 𑀢𑀲𑁆𑀫𑀺𑀜𑁆𑀘 𑀅𑀧𑀕𑀢𑁂 𑀢𑀸𑀬 𑀏𑀯 𑀲𑀫𑀢𑁆𑀣𑀢𑀸𑀬 𑀲𑀫𑀼𑀝𑁆𑀞𑀸𑀧𑀦𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁆𑀧𑀺 𑀯𑀘𑀦𑀁 𑀓𑀸𑀮𑀸𑀦𑀦𑁆𑀢𑀭𑀢𑀸 𑀦𑀢𑁆𑀣𑀺 𑀲𑀢𑁆𑀢𑀸𑀳𑀸𑀤𑀺𑀦𑀸 𑀓𑀸𑀮𑁂𑀦 𑀅𑀦𑁆𑀢𑀭𑀺𑀢𑀪𑀸𑀯𑀢𑁄. 𑀏𑀢𑀤𑁂𑀯 ‘‘𑀓𑀸𑀮𑀦𑁆𑀢𑀭𑀺𑀢𑀢𑀸 𑀅𑀢𑁆𑀣𑀺’’ 𑀇𑀘𑁆𑀘𑁂𑀯 𑀯𑀤𑀸𑀫. 𑀦𑀦𑀼 𑀘 𑀓𑀸𑀮𑁄 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀦𑁆𑀢𑁄 𑀆𑀳 ‘‘𑀓𑀸𑀮𑀸𑀦𑀦𑁆𑀢𑀭…𑀧𑁂… 𑀮𑀤𑁆𑀥𑀻’’𑀢𑀺.

𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀅𑀢𑁆𑀣𑀢𑁄𑀢𑀺 𑀉𑀧𑀘𑀬𑀲𑀦𑁆𑀢𑀢𑀺𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀧𑀤𑀸𑀦𑀁 𑀯𑀺𑀬 𑀲𑀤𑁆𑀤𑀢𑁆𑀣𑀫𑀢𑁆𑀢𑀢𑁄 𑀦𑀸𑀦𑀸𑀓𑀭𑀡𑀁, 𑀦 𑀯𑀘𑀦𑀻𑀬𑀢𑁆𑀣𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑁄𑀥𑀼𑀧𑁆𑀧𑀸𑀤𑀦𑁆𑀢𑀭𑀸𑀪𑀸𑀯𑀢𑁄 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁄. 𑀭𑀽𑀧𑀓𑀮𑀸𑀧𑀸𑀦𑀁 𑀯𑀺𑀬 𑀲𑀡𑁆𑀞𑀸𑀦𑀸𑀪𑀸𑀯𑀢𑁄, 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀸𑀪𑀸𑀯𑀢𑁄 𑀘 ‘‘𑀇𑀤𑀫𑀺𑀢𑁄 𑀳𑁂𑀝𑁆𑀞𑀸, 𑀉𑀤𑁆𑀥𑀁, 𑀢𑀺𑀭𑀺𑀬’’𑀦𑁆𑀢𑀺 𑀯𑀺𑀪𑀸𑀕𑀸𑀪𑀸𑀯𑀸 𑀅𑀢𑁆𑀢𑀦𑀸 𑀏𑀓𑀢𑁆𑀢𑀫𑀺𑀯 𑀉𑀧𑀦𑁂𑀢𑁆𑀯𑀸 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸. 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀢𑀺 𑀘 𑀅𑀩𑁆𑀬𑀸𑀧𑀸𑀭𑀢𑁆𑀢𑀸 𑀥𑀫𑁆𑀫𑀸𑀦𑀁 𑀬𑀲𑁆𑀫𑀺𑀁 𑀬𑀤𑀸𑀓𑀸𑀭𑁂 𑀦𑀺𑀭𑀼𑀤𑁆𑀥𑁂, 𑀯𑀢𑁆𑀢𑀫𑀸𑀦𑁂 𑀯𑀸 𑀲𑀢𑀺 𑀢𑀁𑀢𑀁𑀯𑀺𑀲𑁂𑀲𑀯𑀦𑁆𑀢𑁄 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑁄𑀯 𑀆𑀓𑀸𑀭𑁄 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯 𑀘 𑀉𑀧𑀸𑀤𑀸𑀬 𑀓𑀸𑀮𑀯𑁄𑀳𑀸𑀭𑁄𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀨𑀮𑀲𑀫𑀸𑀧𑀢𑁆𑀢𑀻𑀦𑀁 ¶ 𑀅𑀲𑀜𑁆𑀜𑀪𑀯𑀸 𑀘𑀯𑀦𑁆𑀢𑀲𑁆𑀲, 𑀧𑀼𑀭𑀺𑀫𑀘𑀼𑀢𑀺𑀧𑀘𑁆𑀙𑀺𑀫𑀧𑀝𑀺𑀲𑀦𑁆𑀥𑀻𑀦𑀜𑁆𑀘 𑀦𑀺𑀭𑁄𑀥𑀼𑀧𑁆𑀧𑀸𑀤𑀦𑀺𑀭𑀦𑁆𑀢𑀭𑀢𑀸𑀬 𑀓𑀸𑀮𑀦𑁆𑀢𑀭𑀢𑀸 𑀦𑀢𑁆𑀣𑀺. 𑀦 𑀳𑀺 𑀢𑁂𑀲𑀁 𑀅𑀦𑁆𑀢𑀭𑀸 𑀅𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀬𑀁 𑀉𑀧𑀸𑀤𑀸𑀬 𑀓𑀸𑀮𑀦𑁆𑀢𑀭𑀢𑀸 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀅𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀓𑀭𑁄𑀢𑀺 𑀅𑀜𑁆𑀜𑀲𑀦𑁆𑀢𑀸𑀦𑀢𑁆𑀢𑀸. 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀬𑁄 𑀳𑀺 𑀤𑁆𑀯𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀲𑀪𑀸𑀯𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀯𑀺𑀲𑀼𑀁𑀬𑁂𑀯 𑀳𑁄𑀦𑁆𑀢𑀺. 𑀏𑀓𑀲𑀦𑁆𑀢𑀢𑀺𑀬𑀜𑁆𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀫𑀚𑁆𑀛𑁂 𑀧𑀯𑀢𑁆𑀢𑀫𑀸𑀦𑀁 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀦𑁆𑀢𑀭𑀓𑀸𑀭𑀓𑀁 𑀳𑁄𑀢𑀺. 𑀢𑀸𑀤𑀺𑀲𑀜𑁆𑀘 𑀓𑀺𑀜𑁆𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀫𑀚𑁆𑀛𑁂 𑀦𑀢𑁆𑀣𑀺, 𑀦 𑀘 𑀅𑀪𑀸𑀯𑁄 𑀅𑀦𑁆𑀢𑀭𑀓𑀸𑀭𑀓𑁄 𑀳𑁄𑀢𑀺 𑀅𑀪𑀸𑀯𑀢𑁆𑀢𑀸 𑀏𑀯. 𑀢𑀲𑁆𑀫𑀸 𑀚𑀯𑀦𑀸𑀦𑀦𑁆𑀢𑀭𑀲𑁆𑀲 𑀚𑀯𑀦𑀲𑁆𑀲 𑀯𑀺𑀬, 𑀪𑀯𑀗𑁆𑀕𑀸𑀦𑀦𑁆𑀢𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀯𑀺𑀬 𑀘 𑀦𑀺𑀭𑀦𑁆𑀢𑀭𑀢𑀸 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀢𑀸 𑀳𑁄𑀢𑀻𑀢𑀺 𑀢𑀣𑀸 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀼𑀢𑀻𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀸. 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀘𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀁 𑀧𑀸𑀓𑀝𑁄𑀢𑀺 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯 𑀯𑀼𑀢𑁆𑀢𑀸 ¶ . 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀕𑀳𑀺𑀢𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀘𑀦𑀁 𑀅𑀮𑀪𑀦𑁆𑀢𑀸𑀦𑀁 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁨.𑁧𑁮.𑁪) 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀦 𑀲𑁄 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀓𑀼𑀲𑀮𑀸𑀤𑀺𑀕𑁆𑀕𑀳𑀡𑀁 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁆𑀕𑀳𑀡𑀁 𑀅𑀧𑀭𑀺𑀘𑁆𑀙𑁂𑀤𑀁. 𑀬𑀢𑁄 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀲𑀫𑀗𑁆𑀕𑀺𑀦𑁄 𑀏𑀯 𑀕𑀳𑀡𑀁 𑀲𑀺𑀬𑀸. 𑀢𑁂𑀦𑁂𑀯 𑀘 𑀅𑀢𑀻𑀢𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀦 𑀲𑀦𑁆𑀢𑀻𑀢𑀺. 𑀢𑀲𑁆𑀲 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲𑀸’’𑀢𑀺 𑀲𑀢𑁆𑀢𑀥𑀸 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁯𑁯. 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀳 𑀉𑀧𑁆𑀧𑀸𑀤𑀦𑀪𑀸𑀯𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀧𑀸𑀓𑀝𑁂𑀦 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑀁 𑀦𑀺𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀜𑁆𑀜𑀣𑀸 𑀧𑀤𑀻𑀧𑀦𑀺𑀤𑀲𑁆𑀲𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬. 𑀧𑀤𑀻𑀧𑁄 𑀳𑀺 𑀧𑀪𑀸𑀲𑀲𑁆𑀲 𑀞𑀺𑀢𑀺𑀬𑀸𑀧𑀺 𑀧𑀘𑁆𑀘𑀬𑁄, 𑀦 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀲𑀳𑀚𑀸𑀢𑀧𑀘𑁆𑀘𑀬𑀢𑀸. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀢𑀲𑁆𑀫𑀺𑀁 𑀳𑀺 𑀔𑀡𑁂 𑀦𑀸𑀫𑀭𑀽𑀧𑀁 𑀑𑀓𑁆𑀓𑀦𑁆𑀢𑀁 𑀯𑀺𑀬 𑀧𑀭𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀇𑀥 𑀫𑀸𑀢𑀼𑀓𑀼𑀘𑁆𑀙𑀺𑀆𑀤𑀺𑀁 𑀧𑀯𑀺𑀲𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑁄 𑀔𑀡𑁄 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀬𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀦𑀸𑀫𑀲𑁆𑀲, 𑀦𑀸𑀫𑀜𑁆𑀘 𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀅𑀪𑀸𑀯𑀢𑁄. 𑀭𑀽𑀧𑀺𑀦𑁄 𑀥𑀫𑁆𑀫𑀸𑀢𑀺 𑀳𑀤𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀬𑀤𑀺𑀧𑀺 𑀧𑀼𑀩𑁆𑀩𑁂 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑁂𑀦 𑀔𑀡𑀦𑁆𑀢𑀭𑁂 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁄 𑀭𑀽𑀧𑀥𑀫𑁆𑀫𑀸𑀦𑀁 𑀦 𑀦𑀺𑀯𑀸𑀭𑀺𑀢𑁄𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀓𑀺𑀜𑁆𑀘𑀺 𑀓𑀸𑀮𑁂𑀢𑀺 𑀓𑁂𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂𑀢𑀺 𑀅𑀢𑁆𑀣𑁄, 𑀢𑁂𑀦 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀓𑁂𑀘𑀺 𑀯𑀢𑁆𑀣𑀼𑀪𑀽𑀢𑀸 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀢𑀺 𑀅𑀜𑁆𑀜𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁, 𑀯𑀢𑁆𑀣𑀼𑀦𑁄 𑀘 𑀧𑀯𑀢𑁆𑀢𑀺𑀬𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 ¶ 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀁 𑀧𑀼𑀩𑁆𑀩𑁂 𑀅𑀦𑀺𑀯𑀸𑀭𑀺𑀢𑀁 𑀦𑀺𑀯𑀸𑀭𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀺𑀜𑁆𑀘𑀺 𑀓𑀸𑀮’’𑀦𑁆𑀢𑀺 𑀯𑀸 ‘‘𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀢𑀣𑀸 𑀅𑀯𑀢𑁆𑀯𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦 𑀓𑀺𑀜𑁆𑀘𑀻𑀢𑀺 𑀉𑀧𑀬𑁄𑀕𑁂𑀓𑀯𑀘𑀦𑀁. ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁂 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁 𑀚𑀸𑀬𑀢𑀺. ‘‘𑀓𑀸𑀮𑁂’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁂 𑀪𑀼𑀫𑁆𑀫𑁂𑀓𑀯𑀘𑀦𑀦𑁆𑀢𑀺 𑀤𑀻𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑁂𑀦 𑀘 ‘‘𑀏𑀓𑁄 𑀔𑀦𑁆𑀥𑁄, 𑀯𑀢𑁆𑀣𑀼 𑀘 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁯) 𑀆𑀤𑀺𑀯𑀘𑀦𑁂𑀦 𑀦𑀸𑀫𑀲𑀳𑀺𑀢𑀁 𑀏𑀯 𑀯𑀢𑁆𑀣𑀼 𑀦𑀸𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀢𑁆𑀢𑀩𑁆𑀩𑁂 𑀆𑀧𑀦𑁆𑀦𑁂 𑀇𑀢𑀭𑁂𑀦 𑀓𑁂𑀯𑀮𑀲𑁆𑀲 𑀘 𑀢𑀣𑀸𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀲𑁆𑀯𑀸𑀬𑀁 𑀲𑀳𑀚𑀸𑀢𑀧𑀘𑁆𑀘𑀬𑁄 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 ¶ , 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁯) 𑀦𑀯𑀯𑀺𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁦𑁦. 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸. 𑀢𑀣𑀸 𑀳𑀺𑀲𑁆𑀲 𑀢𑀺𑀤𑀡𑁆𑀟𑀁 𑀦𑀺𑀤𑀲𑁆𑀲𑀺𑀢𑀁. 𑀉𑀧𑀓𑀸𑀭𑀓𑀢𑀸 𑀘 𑀅𑀜𑁆𑀜𑀫𑀜𑁆𑀜𑀢𑀸𑀯𑀲𑁂𑀦𑁂𑀯 𑀤𑀝𑁆𑀞𑀩𑁆𑀩𑀸, 𑀦 𑀲𑀳𑀚𑀸𑀢𑀢𑀸𑀤𑀺𑀯𑀲𑁂𑀦. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀳𑀺 𑀓𑁄𑀘𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀯𑀺𑀦𑀸 𑀇𑀫𑀲𑁆𑀲 𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀢𑀣𑀸 𑀳𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀘 𑀳𑁄𑀦𑁆𑀢𑁄𑀬𑁂𑀯 𑀳𑀺 𑀓𑁄𑀘𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀤𑀺 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑀢𑀸𑀫𑀢𑁆𑀢𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀲𑀺𑀬𑀸, 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀲𑁆𑀲 𑀉𑀧𑀓𑀸𑀭𑀓𑀸 𑀯𑀢𑁆𑀣𑀼𑀔𑀦𑁆𑀥𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀦 𑀘 𑀢𑀁 𑀇𑀘𑁆𑀙𑀺𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀓𑀸𑀭𑀓𑀢𑀸 𑀘 𑀅𑀜𑁆𑀜𑀫𑀜𑁆𑀜𑀯𑀲𑁂𑀦𑁂𑀯 𑀤𑀝𑁆𑀞𑀩𑁆𑀩𑀸’’𑀢𑀺. 𑀅𑀬𑀜𑁆𑀘 𑀉𑀧𑁆𑀧𑀢𑁆𑀢𑀺𑀬𑀸, 𑀞𑀺𑀢𑀺𑀬𑀸 𑀘 𑀉𑀧𑀓𑀸𑀭𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀢𑀺𑀯𑀺𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁦𑁧. 𑀢𑀭𑀼𑀆𑀤𑀻𑀦𑀁 𑀧𑀣𑀯𑀻 𑀯𑀺𑀬 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀧𑀣𑀯𑀻𑀥𑀸𑀢𑀼 𑀲𑁂𑀲𑀥𑀸𑀢𑀽𑀦𑀁, 𑀘𑀓𑁆𑀔𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀉𑀧𑀓𑀸𑀭𑀓𑀸 𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀧𑀝𑀸𑀤𑀬𑁄 𑀯𑀺𑀬 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀔𑀦𑁆𑀥𑀸𑀤𑀬𑁄 𑀢𑀁𑀢𑀁𑀦𑀺𑀲𑁆𑀲𑀬𑀸𑀦𑀁 𑀔𑀦𑁆𑀥𑀸𑀤𑀻𑀦𑀁. 𑀧𑀣𑀯𑀻𑀥𑀸𑀢𑀼𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯 𑀳𑀺 𑀲𑁂𑀲𑀥𑀸𑀢𑀼𑀬𑁄 𑀉𑀧𑀸𑀤𑀸𑀭𑀽𑀧𑀸𑀦𑀺 𑀯𑀺𑀬 𑀬𑀣𑀸𑀲𑀓𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺.

𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦𑀸𑀢𑀺 ¶ 𑀆𑀥𑀸𑀭𑀸𑀓𑀸𑀭𑁂𑀦. 𑀆𑀥𑀸𑀭𑀸𑀓𑀸𑀭𑁄 𑀘𑁂𑀢𑁆𑀣 𑀢𑁂𑀲𑀁 𑀲𑀸𑀢𑀺𑀲𑀬𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁄 𑀪𑀽𑀢𑀸𑀦𑀺 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀦 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀯𑀺𑀲𑁂𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀘𑀓𑁆𑀔𑀸𑀤𑀻𑀲𑀼 𑀅𑀤𑁂𑀲𑀓𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁄 𑀲𑀫𑁆𑀪𑀯𑀢𑀺. 𑀬𑀤𑀺𑀧𑀺 𑀬𑀁 𑀬𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀪𑀸𑀯𑁄. 𑀬𑁂𑀦 𑀧𑀦 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁂𑀦 𑀘𑀓𑁆𑀔𑀸𑀤𑀻𑀦𑀁 𑀧𑀝𑀼𑀫𑀦𑁆𑀤𑀪𑀸𑀯𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀢𑀤𑀦𑀼𑀯𑀺𑀥𑀸𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀲𑁆𑀯𑀸𑀬𑀫𑀺𑀥 𑀢𑁂𑀲𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀲𑀺𑀤𑁆𑀥𑁄 𑀯𑀺𑀲𑁂𑀲𑁄𑀢𑀺. 𑀏𑀯𑀜𑁆𑀳𑀺 𑀧𑀘𑁆𑀘𑀬𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀯𑀺𑀲𑁂𑀲𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀲𑁆𑀯𑀸𑀬𑀁 𑀦𑀬𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄𑀯. 𑀙𑀝𑁆𑀞𑁄 𑀧𑀦𑀸𑀢𑀺 𑀏𑀢𑁆𑀣 ‘‘𑀭𑀽𑀧𑀺𑀦𑁄 ¶ 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀇𑀤𑀁 𑀦 𑀮𑀩𑁆𑀪𑀢𑀺. 𑀬𑀁 𑀧𑀦𑁂𑀢𑁆𑀣 𑀮𑀩𑁆𑀪𑀢𑀺 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀓𑁂𑀘𑀻’’𑀢𑀺, 𑀢𑀢𑁆𑀣 𑀢𑁂 𑀏𑀯 𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀬𑀁 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑁂𑀭𑀲𑀯𑀺𑀥𑁄. 𑀓𑀣𑀁? 𑀲𑀳𑀚𑀸𑀢𑀢𑁄 𑀓𑀼𑀲𑀮𑀫𑀽𑀮𑀸 𑀢𑀬𑁄, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀸, 𑀅𑀩𑁆𑀬𑀸𑀓𑀢𑀫𑀽𑀮𑁂𑀲𑀼 𑀧𑀦 𑀧𑀼𑀭𑁂𑀚𑀸𑀢𑀁 𑀮𑀩𑁆𑀪𑀢𑀺. 𑀅𑀩𑁆𑀬𑀸𑀓𑀢𑀜𑁆𑀳𑀺 𑀅𑀩𑁆𑀬𑀸𑀓𑀢𑀲𑁆𑀲 𑀲𑀳𑀚𑀸𑀢𑀫𑁆𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀼𑀭𑁂𑀚𑀸𑀢𑀫𑁆𑀧𑀺 𑀓𑀼𑀲𑀮𑀲𑁆𑀲 𑀧𑀼𑀭𑁂𑀚𑀸𑀢𑀫𑁂𑀯, 𑀢𑀣𑀸 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀓𑀼𑀲𑀮𑀲𑁆𑀲, 𑀲𑀳𑀚𑀸𑀢𑀢𑁄 𑀏𑀯 𑀅𑀩𑁆𑀬𑀸𑀓𑀢𑀲𑁆𑀲, 𑀢𑀣𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢’’𑀦𑁆𑀢𑀺 𑀏𑀯𑀁 𑀢𑁂𑀭𑀲.

𑁬𑁦𑁨. 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀺𑀲𑁆𑀲𑀬𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀬𑁄 𑀪𑀼𑀲𑁄 𑀦𑀺𑀲𑁆𑀲𑀬𑁄, 𑀢𑀁 𑀉𑀧𑀦𑀺𑀲𑁆𑀲𑀬𑁄𑀢𑀺 𑀦𑀺𑀤𑁆𑀥𑀸𑀭𑁂𑀢𑀺. 𑀩𑀮𑀯𑀓𑀸𑀭𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄𑀢𑀺 𑀆𑀭𑀫𑁆𑀫𑀡𑀪𑀸𑀯𑀯𑀲𑁂𑀦 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦, 𑀓𑁂𑀯𑀮𑀜𑁆𑀘 𑀩𑀮𑀯𑀦𑁆𑀢𑀁 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀉𑀧𑀓𑀸𑀭𑀓𑁄. 𑀢𑁂𑀦𑀸𑀳 ‘‘𑀲𑁄’’𑀢𑀺𑀆𑀤𑀺.

𑀢𑀢𑁆𑀣 𑀤𑀸𑀦𑀁 𑀤𑀢𑁆𑀯𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀘𑀚𑀺𑀢𑁆𑀯𑀸. 𑀬𑀸𑀬 𑀯𑀸 𑀘𑁂𑀢𑀦𑀸𑀬 𑀲𑁄 𑀤𑀺𑀬𑁆𑀬𑀢𑀺, 𑀲𑀸 𑀘𑁂𑀢𑀦𑀸 𑀤𑀸𑀦𑀁. 𑀤𑀢𑁆𑀯𑀸𑀢𑀺 𑀢𑀁 𑀘𑁂𑀢𑀦𑀁 𑀧𑀭𑀺𑀬𑁄𑀤𑀧𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸. 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀸𑀤𑀺𑀯𑀲𑁂𑀦 𑀦𑀺𑀘𑁆𑀘𑀲𑀻𑀮𑀁 𑀕𑀡𑁆𑀳𑀺𑀢𑁆𑀯𑀸. 𑀇𑀫𑀺𑀦𑀸 𑀲𑀫𑀸𑀤𑀸𑀦𑀯𑀺𑀭𑀢𑀺𑀬𑁂𑀯 𑀤𑀲𑁆𑀲𑀺𑀢𑀸, 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀬𑁄 𑀧𑀦 𑀮𑁄𑀓𑁂 ‘‘𑀲𑀻𑀮’’𑀦𑁆𑀢𑀺 𑀅𑀧𑀸𑀓𑀝𑀢𑁆𑀢𑀸 𑀦 𑀯𑀼𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀸, 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 ¶ 𑀧𑀦 𑀳𑁄𑀦𑁆𑀢𑀺𑀬𑁂𑀯. 𑀢𑀢𑁆𑀣 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺 𑀲𑁂𑀓𑁆𑀔𑀸𑀦𑀁𑀬𑁂𑀯 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀇𑀢𑀭𑁂𑀲𑀁. 𑀉𑀧𑁄𑀲𑀣𑀓𑀫𑁆𑀫𑀦𑁆𑀢𑀺 ‘‘𑀧𑀸𑀡𑀁 𑀦 𑀳𑀦𑁂, 𑀦 𑀘𑀸𑀤𑀺𑀦𑁆𑀦𑀫𑀸𑀤𑀺𑀬𑁂’’𑀢𑀺 (𑀲𑀼. 𑀦𑀺. 𑁪𑁦𑁨) 𑀏𑀯𑀁 𑀯𑀼𑀢𑁆𑀢𑀁 𑀉𑀧𑁄𑀲𑀣𑀲𑀻𑀮𑀁. 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀓𑀼𑀲𑀮𑀁 𑀲𑁂𑀓𑁆𑀔𑁄𑀧𑀺 𑀧𑀼𑀣𑀼𑀚𑁆𑀚𑀦𑁄𑀧𑀺 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀭𑀳𑀸𑀧𑀺 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁂𑀯. 𑀅𑀭𑀳𑀢𑁄𑀧𑀺 𑀳𑀺 𑀧𑀼𑀩𑁆𑀩𑁂 𑀓𑀢𑀁 𑀓𑀼𑀲𑀮𑀁 𑀓𑀼𑀲𑀮𑀫𑁂𑀯. 𑀬𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 ‘‘𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀦 𑀮𑀩𑁆𑀪𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀻𑀢𑀺 ‘‘𑀤𑀢𑁆𑀯𑀸 𑀓𑀢𑁆𑀯𑀸’’𑀢𑀺 𑀳𑀺 𑀆𑀲𑀦𑁆𑀦𑀓𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀺𑀦𑀸 𑀦 𑀆𑀲𑀦𑁆𑀦𑀓𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀤𑀸𑀦𑀸𑀤𑀻𑀳𑀺 𑀯𑀸 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄 𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸. ‘‘𑀛𑀸𑀦𑀁 𑀯𑀼𑀝𑁆𑀞𑀳𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀴𑀺. 𑀲𑁂𑀓𑁆𑀔𑀸 𑀕𑁄𑀢𑁆𑀭𑀪𑀼𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀕𑁄𑀢𑁆𑀭𑀪𑀼𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. ‘‘𑀯𑁄𑀤𑀸𑀦’’𑀦𑁆𑀢𑀺 𑀇𑀤𑀁 𑀧𑀦 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀢𑀁 𑀘𑀺𑀢𑁆𑀢𑀁 𑀯𑁄𑀤𑀸𑀦𑀁 𑀦𑀸𑀫 𑀳𑁄𑀢𑀺. 𑀲𑁂𑀓𑁆𑀔𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 ¶ . 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀕𑁆𑀕𑀨𑀮𑀪𑀯𑀗𑁆𑀕𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀲𑀼𑀤𑁆𑀥𑀫𑀕𑁆𑀕𑀢𑁄𑀬𑁂𑀯 𑀧𑀦 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁪) 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀤𑀺𑀧𑀺 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀇𑀤𑀫𑁆𑀧𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀦𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑁂𑀲𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀦𑀁 𑀦𑀺𑀓𑁆𑀔𑁂𑀧𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀬𑀲𑁆𑀫𑀸 𑀧𑀼𑀭𑀺𑀫𑁄 𑀅𑀩𑁆𑀬𑀸𑀓𑀢𑀥𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑁄, 𑀇𑀢𑀭𑁄 𑀓𑀼𑀲𑀮𑀸𑀤𑀺𑀯𑀲𑁂𑀦𑀧𑀻𑀢𑀺 𑀲𑁄𑀧𑀺 𑀦𑀺𑀓𑁆𑀔𑁂𑀧𑀯𑀺𑀲𑁂𑀲𑁄 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺 𑀲𑀩𑁆𑀩𑁂𑀲𑀼𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀢𑀤𑀼𑀪𑀬𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺𑀆𑀤𑀺 𑀅𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑀁. 𑀬𑀣𑀸 𑀳𑀻𑀢𑀺𑀆𑀤𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀲𑁆𑀲 𑀲𑀫𑁆𑀪𑀯𑀤𑀲𑁆𑀲𑀦𑀁.

𑀧𑀓𑀢𑁄𑀢𑀺 𑀏𑀢𑁆𑀣 𑀧-𑀓𑀸𑀭𑁄 𑀉𑀧𑀲𑀕𑁆𑀕𑁄, 𑀲𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀪𑀸𑀯𑁂𑀦 𑀲𑀼𑀝𑁆𑀞𑀼𑀓𑀢𑀢𑀁 𑀤𑀻𑀧𑁂𑀢𑀺. 𑀢𑀣𑀸 𑀘 𑀓𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀓𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺. 𑀓𑀭𑀡𑀜𑁆𑀘 𑀤𑀼𑀯𑀺𑀥𑀁 𑀦𑀺𑀧𑁆𑀨𑀸𑀤𑀦𑀁, 𑀉𑀧𑀲𑁂𑀯𑀦𑀜𑁆𑀘𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀧𑁆𑀨𑀸𑀤𑀺𑀢𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀧𑁆𑀨𑀸𑀤𑀦𑀁 ¶ 𑀳𑁂𑀢𑀼𑀧𑀘𑁆𑀘𑀬𑀲𑀫𑁄𑀥𑀸𑀦𑁂𑀦 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁. 𑀉𑀧𑀲𑁂𑀯𑀦𑀁 𑀧𑀦 𑀓𑀸𑀬𑁂 𑀅𑀮𑁆𑀮𑀻𑀬𑀸𑀧𑀦𑀯𑀲𑁂𑀦 𑀉𑀧𑀬𑁄𑀕𑀽𑀧𑀲𑁂𑀯𑀦𑀁, 𑀯𑀺𑀚𑀸𑀦𑀦𑀲𑀜𑁆𑀚𑀸𑀦𑀦𑀸𑀤𑀻𑀦𑀁 𑀯𑀲𑁂𑀦 𑀆𑀭𑀫𑁆𑀫𑀡𑀽𑀧𑀲𑁂𑀯𑀦𑀜𑁆𑀘. 𑀢𑁂𑀦𑁂𑀯 𑀅𑀦𑀸𑀕𑀢𑀸𑀦𑀫𑁆𑀧𑀺 𑀉𑀢𑀼𑀲𑀫𑁆𑀧𑀤𑀸𑀤𑀻𑀦𑀁 𑀆𑀭𑀫𑁆𑀫𑀡𑀽𑀧𑀲𑁂𑀯𑀦𑁂𑀦 𑀉𑀧𑀲𑁂𑀯𑀺𑀢𑀸𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀧𑀕𑁂𑀯 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑀸𑀧𑀺 𑀳𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀢𑀼𑀪𑁄𑀚𑀦𑀁 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁮) 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑁄 𑀮𑀩𑁆𑀪𑀢𑀻𑀢𑀺. 𑀧𑀓𑀢𑀺𑀬𑀸 𑀏𑀯𑀸𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀗𑁆𑀓𑀭𑀭𑀳𑀺𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯. 𑀉𑀧𑀦𑀺𑀲𑁆𑀲𑀬𑁄𑀢𑀺 𑀩𑀮𑀯𑀓𑀸𑀭𑀡𑀁 𑀓𑀢𑁆𑀯𑀸. 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑀧𑀜𑁆𑀳𑀸𑀯𑀸𑀭𑁂 𑀆𑀕𑀢𑀦𑀬𑁂𑀦. 𑀧𑀘𑁆𑀘𑀬𑀯𑀸𑀭𑁂 𑀧𑀦 𑁋

‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀓𑁂𑀲𑀜𑁆𑀘𑀺, 𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸𑀦𑀁, 𑀅𑀓𑀼𑀲𑀮𑀸 𑀅𑀓𑀼𑀲𑀮𑀸𑀦𑀁, 𑀓𑀼𑀲𑀮𑀸𑀦𑀁 𑀓𑁂𑀲𑀜𑁆𑀘𑀺, 𑀅𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸𑀦𑀁, 𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸𑀦𑀁, 𑀅𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀦𑀁, 𑀅𑀩𑁆𑀬𑀸𑀓𑀢𑀸 𑀅𑀓𑀼𑀲𑀮𑀸𑀦𑀁 ¶ , 𑀧𑀼𑀕𑁆𑀕𑀮𑁄𑀧𑀺, 𑀲𑁂𑀦𑀸𑀲𑀦𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁯).

𑀢𑀢𑁆𑀣 𑀬𑁂 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀏𑀓𑀦𑁆𑀢𑁂𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑁂𑀲𑀜𑁆𑀘𑀺 𑀓𑀤𑀸𑀘𑀺. 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑁂 𑀧𑀦 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀯𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀯𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁, 𑀦 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑁂𑀦 𑀳𑁄𑀦𑁆𑀢𑀺. 𑀬𑁂𑀲𑀁 𑀉𑀧𑁆𑀧𑀢𑁆𑀢𑀺𑀯𑀺𑀩𑀦𑁆𑀥𑀓𑀸 𑀧𑀘𑁆𑀘𑀬𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂𑀲𑀁 𑀦 𑀪𑀯𑀦𑁆𑀢𑀺, 𑀇𑀢𑀭𑁂𑀲𑀁 𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦 𑀮𑀩𑁆𑀪𑀢𑀺, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁. 𑀲𑀺𑀤𑁆𑀥𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀬𑁂𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 ‘‘𑀓𑁂𑀲𑀜𑁆𑀘𑀻’’𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀓𑀲𑀺𑀡𑀧𑀜𑁆𑀜𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀢𑀸𑀪𑀸𑀯𑀢𑁄 𑀏𑀓𑀘𑁆𑀘𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀩𑁆𑀩𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄, 𑀅𑀦𑀦𑁆𑀢𑀭𑀸𑀢𑀻𑀢𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄, 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀭𑀽𑀧𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 ¶ 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀝𑁆𑀞𑀸𑀦𑀝𑁆𑀞𑀓𑀣𑀸𑀬𑀁 𑀯𑁂𑀤𑀺𑀢𑀩𑁆𑀩𑁄.

𑁬𑁦𑁩. 𑀧𑀞𑀫𑀢𑀭𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀧𑀼𑀭𑁂𑀢𑀭𑀁. 𑀅𑀬𑀜𑁆𑀳𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑀯𑀲𑁂𑀦𑁂𑀯 𑀮𑀩𑁆𑀪𑀢𑀺. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀘 𑀅𑀭𑀽𑀧𑀥𑀫𑁆𑀫𑀸𑀬𑁂𑀯. 𑀢𑁂𑀦𑀸𑀳 ‘‘𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄’’𑀢𑀺. 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀯𑀺𑀦𑀸 𑀉𑀧𑀓𑀸𑀭𑀓𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀼𑀭𑁂𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸. 𑀏𑀯𑀁 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀭𑀽𑀧𑀸𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺 𑀆𑀭𑀫𑁆𑀫𑀡𑀯𑀲𑁂𑀦.

𑀬𑀁 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 ‘‘𑀓𑀺𑀜𑁆𑀘𑀺 𑀓𑀸𑀮𑁂’’𑀢𑀺 𑀧𑀯𑀢𑁆𑀢𑀺𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀓𑀺𑀜𑁆𑀘𑀺 𑀓𑀸𑀮𑁂𑀦’’ 𑀇𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑀯𑀲𑁂𑀦. 𑀬𑀸𑀦𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀤𑀲𑁆𑀲𑀦𑁂𑀦 𑀫𑀦𑁄𑀤𑁆𑀯𑀸𑀭𑁂𑀧𑀺 𑀬𑀁 𑀬𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦 𑀯𑀢𑁆𑀢𑀢𑀺, 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀲𑀩𑁆𑀩𑀁 𑀭𑀽𑀧𑀭𑀽𑀧𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑁆𑀢𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀜𑁆𑀳𑀸𑀯𑀸𑀭𑁂 ‘‘𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀲𑁂𑀓𑁆𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 ¶ 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁪𑁨𑁪). ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁪) 𑀅𑀩𑁆𑀬𑀸𑀓𑀢𑀫𑀽𑀮𑀓𑀸 𑀢𑀬𑁄𑀯 𑀯𑀸𑀭𑀸. 𑀢𑁂 𑀘 𑀧𑀘𑁆𑀘𑁂𑀓𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁, 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑁆𑀢𑀺 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸.

𑁬𑁦𑁪. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀧𑀼𑀭𑁂𑀢𑀭𑀁 𑀲𑀺𑀤𑁆𑀥𑀪𑀸𑀯𑁂 𑀲𑀢𑀺 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀧𑀘𑁆𑀙𑀸𑀚𑀸𑀢𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑁂𑀚𑀸𑀢𑀸𑀦’’𑀦𑁆𑀢𑀺. 𑀅𑀬𑀜𑁆𑀘 𑀦𑀬𑁄 𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀮𑀩𑁆𑀪𑀢𑀺, 𑀦 𑀅𑀭𑀽𑀧𑀥𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺. 𑀬𑀤𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀧𑀼𑀭𑁂𑀢𑀭𑀫𑁂𑀯 𑀚𑀸𑀢𑀸, 𑀓𑀣𑀁 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀉𑀧𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀧𑀘𑁆𑀙𑀸𑀚𑀸𑀢𑁂𑀦 𑀳𑀺 𑀯𑀺𑀦𑀸 𑀲𑀦𑁆𑀢𑀸𑀦𑀸𑀯𑀺𑀘𑁆𑀙𑁂𑀤𑀳𑁂𑀢𑀼𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀬𑁂 𑀧𑀘𑁆𑀙𑀸𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀸, 𑀢𑁂𑀲𑀁 𑀲𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀉𑀧𑀓𑀸𑀭𑀓𑀢𑀸 ¶ 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀢𑀸. 𑀏𑀯𑀁 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀸𑀓𑀸𑀭𑀯𑀺𑀲𑀺𑀝𑁆𑀞𑀸 𑀉𑀧𑀓𑀸𑀭𑀓𑀢𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸𑀘𑁂𑀢𑀦𑀸 𑀯𑀺𑀬𑀸’’𑀢𑀺 𑀏𑀢𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀆𑀳𑀸𑀭𑀸𑀲𑀸 𑀯𑀺𑀬𑀸’’𑀢𑀺 𑀅𑀯𑀢𑁆𑀯𑀸 𑀘𑁂𑀢𑀦𑀸𑀕𑁆𑀕𑀳𑀡𑀁 𑀓𑀢𑀁. 𑀓𑀸𑀬𑀲𑁆𑀲𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀭𑀽𑀧𑀓𑀸𑀬𑀲𑁆𑀲. 𑀲𑀗𑁆𑀔𑁂𑀧𑀢𑁄 𑀞𑀧𑁂𑀢𑁆𑀯𑀸 𑀭𑀽𑀧𑀥𑀫𑁆𑀫𑁂 𑀅𑀯𑀺𑀲𑀺𑀝𑁆𑀞𑁄 𑀅𑀭𑀽𑀧𑀓𑁆𑀔𑀦𑁆𑀥𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄, 𑀅𑀓𑀼𑀲𑀮𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺 𑀘𑀢𑀼𑀩𑁆𑀩𑀺𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁦𑁫. 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀧𑀯𑀢𑁆𑀢𑀦𑀁 𑀆𑀲𑁂𑀯𑀦𑀝𑁆𑀞𑁄, 𑀅𑀢𑁆𑀢𑀲𑀤𑀺𑀲𑀲𑀪𑀸𑀯𑀢𑀸𑀧𑀸𑀤𑀦𑀁 𑀯𑀸𑀲𑀦𑀁 𑀯𑀸. 𑀧𑀼𑀭𑀺𑀫𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬𑀸𑀢𑀺 𑀉𑀕𑁆𑀕𑀳𑀡𑀲𑀯𑀦𑀥𑀸𑀭𑀡𑀸𑀤𑀺𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀲𑁂𑀯𑀦𑀸 𑀯𑀺𑀬. 𑀢𑀻𑀲𑀼 𑀧𑀦 𑀏𑀢𑁂𑀲𑀼 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀯𑀺𑀬 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀩𑁆𑀬𑀸𑀓𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀪𑀺𑀦𑁆𑀦𑀚𑀸𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄𑀢𑀺? 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀸𑀳𑁂𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀪𑀺𑀦𑁆𑀦𑀚𑀸𑀢𑀺𑀓𑀸 𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑀸𑀦𑀁 𑀆𑀲𑁂𑀯𑀦𑀕𑀼𑀡𑁂𑀦 𑀧𑀕𑀼𑀡𑀩𑀮𑀯𑀪𑀸𑀯𑀁 𑀲𑀫𑁆𑀧𑀸𑀤𑁂𑀦𑁆𑀢𑀸 𑀅𑀢𑁆𑀢𑀦𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀕𑀢𑀺𑀁 𑀕𑀸𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀬𑁂 𑀬𑁂𑀲𑀁 𑀯𑀸𑀲𑀦𑀸𑀲𑀗𑁆𑀔𑀸𑀢𑁂𑀦 𑀆𑀲𑁂𑀯𑀦𑀕𑀼𑀡𑁂𑀦 𑀧𑀕𑀼𑀡𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀕𑀢𑀺𑀁 𑀕𑀸𑀳𑁂𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀢𑁂𑀳𑀺 𑀲𑀫𑀸𑀦𑀚𑀸𑀢𑀺𑀓𑁂𑀳𑁂𑀯 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀣 ¶ 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀲𑁆𑀫𑀸 𑀦 𑀕𑀳𑀺𑀢𑀁? 𑀆𑀲𑁂𑀯𑀦𑀸𑀪𑀸𑀯𑀢𑁄. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀜𑁆𑀳𑀺 𑀓𑀫𑁆𑀫𑀯𑀲𑁂𑀦 𑀯𑀺𑀧𑀸𑀓𑀪𑀸𑀯𑀧𑁆𑀧𑀢𑁆𑀢𑀁 𑀓𑀫𑁆𑀫𑀧𑀭𑀺𑀡𑀸𑀫𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀦𑀺𑀭𑀼𑀲𑁆𑀲𑀸𑀳𑀁 𑀤𑀼𑀩𑁆𑀩𑀮𑀁 𑀲𑀦𑁆𑀢𑀁 𑀆𑀲𑁂𑀯𑀦𑀕𑀼𑀡𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀕𑀸𑀳𑁂𑀢𑁆𑀯𑀸 𑀧𑀭𑀺𑀪𑀸𑀯𑁂𑀢𑁆𑀯𑀸 𑀦𑁂𑀯 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀧𑀯𑀢𑁆𑀢𑁂𑀢𑀺, 𑀦 𑀘 𑀧𑀼𑀭𑀺𑀫𑀯𑀺𑀧𑀸𑀓𑀸𑀦𑀼𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀔𑁄 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀁 𑀧𑀢𑀺𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑁂 𑀆𑀲𑁂𑀯𑀦𑀸 𑀦𑀢𑁆𑀣𑀻𑀢𑀺 𑀦 𑀕𑀳𑀺𑀢𑀁. 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀲𑀓𑀫𑁆𑀫𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀆𑀲𑁂𑀯𑀦𑀕𑀼𑀡𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀓𑀼𑀲𑀮𑀸𑀤𑀬𑁄𑀧𑀺 𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺. 𑀦𑀸𑀦𑀸𑀚𑀸𑀢𑀺𑀓𑀢𑁆𑀢𑀸𑀧𑀺 𑀘𑁂𑀢𑁂 𑀢𑀲𑁆𑀲 𑀆𑀲𑁂𑀯𑀦𑀸𑀥𑀸𑀦𑀁 𑀦 ¶ 𑀓𑀭𑁄𑀦𑁆𑀢𑁂𑀯. 𑀪𑀽𑀫𑀺𑀢𑁄, 𑀧𑀦 𑀆𑀭𑀫𑁆𑀫𑀡𑀢𑁄 𑀯𑀸 𑀦𑀸𑀦𑀸𑀚𑀸𑀢𑀺𑀓𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀭𑀺𑀢𑁆𑀢𑀓𑀼𑀲𑀮𑀓𑀺𑀭𑀺𑀬𑀸 𑀫𑀳𑀕𑁆𑀕𑀢𑀓𑀼𑀲𑀮𑀓𑀺𑀭𑀺𑀬𑀸𑀦𑀁, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀜𑁆𑀘 𑀓𑀼𑀲𑀮𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀲𑁆𑀯𑀸𑀬𑀁 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁬) 𑀢𑀺𑀥𑀸𑀯 𑀯𑀼𑀢𑁆𑀢𑁄. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀆𑀯𑀚𑁆𑀚𑀦𑀯𑀚𑁆𑀚𑀺𑀢𑀸 𑀓𑀺𑀭𑀺𑀬𑀥𑀫𑁆𑀫𑀸 𑀕𑀳𑀺𑀢𑀸.

𑁬𑁦𑁬. 𑀘𑀺𑀢𑁆𑀢𑀧𑀬𑁄𑀕𑁄 𑀘𑀺𑀢𑁆𑀢𑀓𑀺𑀭𑀺𑀬𑀸, 𑀆𑀬𑀽𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀓𑀸𑀬𑀯𑀘𑀻𑀧𑀬𑁄𑀕𑁄 𑀯𑀺𑀜𑁆𑀜𑀢𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀧𑀬𑁄𑀕𑁄 𑀘𑁂𑀢𑀦𑀸. 𑀢𑁂𑀦 𑀳𑀺 𑀲𑀸 𑀉𑀧𑁆𑀧𑀦𑁆𑀦𑀓𑀺𑀭𑀺𑀬𑀢𑀸𑀯𑀺𑀲𑀺𑀝𑁆𑀞𑁂 𑀲𑀦𑁆𑀢𑀸𑀦𑁂 𑀲𑁂𑀲𑀧𑀘𑁆𑀘𑀬𑀲𑀫𑀸𑀕𑀫𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀢𑁂𑀦𑁂𑀯 𑀲𑀦𑁆𑀢𑀸𑀦𑀯𑀺𑀲𑁂𑀲𑁂𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀉𑀧𑀓𑀸𑀭𑀺𑀓𑀸 𑀳𑁄𑀢𑀺. 𑀢𑀲𑁆𑀲 𑀳𑀺 𑀓𑀺𑀭𑀺𑀬𑀸𑀪𑀸𑀯𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸. 𑀲𑀳𑀚𑀸𑀢𑀸𑀦𑀁 𑀧𑀦 𑀆𑀬𑀽𑀳𑀦𑀓𑀺𑀭𑀺𑀬𑀸𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀉𑀧𑀓𑀸𑀭𑀺𑀓𑀸𑀢𑀺 𑀓𑀺𑀁 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀦𑁆𑀢𑀺 𑀘 𑀘𑁂𑀢𑀦𑀸𑀓𑀫𑁆𑀫𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀓𑀫𑁆𑀫𑀁 𑀅𑀪𑀺𑀚𑁆𑀛𑀸𑀤𑀺 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀢𑀺𑀧𑀺 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁂 𑀘𑁂𑀢𑀦𑀸𑀯𑀚𑁆𑀚𑀸𑀦𑀁 𑀅𑀢𑀁𑀲𑀪𑀸𑀯𑀢𑁆𑀢𑀸 𑀯𑀺𑀧𑀸𑀓𑀸𑀧𑀺 𑀘𑁂𑀢𑀦𑀸 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯, 𑀲𑁆𑀯𑀸𑀬𑀁 𑀓𑀫𑁆𑀫𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁.

𑁬𑁦𑁭. ‘‘𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦𑀸’’𑀢𑀺 𑀏𑀢𑁂𑀦 𑀲𑀉𑀲𑁆𑀲𑀸𑀳𑁂𑀳𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀲𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀲𑀤𑀺𑀲𑀸𑀦𑀫𑁆𑀧𑀺 𑀅𑀲𑀤𑀺𑀲𑀁 𑀯𑀺𑀧𑀸𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀯𑀺𑀧𑀸𑀓𑀸𑀦𑀁 𑀧𑀬𑁄𑀕𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀸𑀬 𑀧𑀬𑁄𑀕𑁂𑀦, 𑀅𑀜𑁆𑀜𑀣𑀸 𑀯𑀸 𑀲𑁂𑀲𑀧𑀘𑁆𑀘𑀬𑁂𑀲𑀼 𑀲𑀺𑀤𑁆𑀥𑁂𑀲𑀼 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀏𑀯 𑀲𑀺𑀚𑁆𑀛𑀦𑀢𑁄 𑀦𑀺𑀭𑀼𑀲𑁆𑀲𑀸𑀳𑁄 𑀲𑀦𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀓𑀺𑀮𑁂𑀲𑀯𑀽𑀧𑀲𑀦𑁆𑀢𑀪𑀸𑀯𑁄. 𑀢𑀣𑀸𑀲𑀦𑁆𑀢𑀪𑀸𑀯𑀢𑁄 𑀏𑀯 𑀳𑀺 𑀪𑀯𑀗𑁆𑀕𑀸𑀤𑀬𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀸. 𑀧𑀜𑁆𑀘𑀤𑁆𑀯𑀸𑀭𑁂𑀧𑀺 𑀳𑀺 𑀚𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀭𑀽𑀧𑀸𑀤𑀻𑀦𑀁 𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀅𑀪𑀺𑀦𑀺𑀧𑀸𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀫𑀢𑁆𑀢𑀸 𑀧𑀦 𑀯𑀺𑀧𑀸𑀓𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬𑀸𑀢𑀺 ¶ 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀢𑁆𑀣𑀸𑀬. 𑀏𑀢𑁂𑀦 𑀢𑀧𑁆𑀧𑀘𑁆𑀘𑀬𑀯𑀦𑁆𑀢𑀸𑀦𑀁 𑀅𑀯𑀺𑀧𑀸𑀓𑀸𑀦𑀫𑁆𑀧𑀺 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸𑀦𑀼𑀓𑀽𑀮𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑁂𑀢𑀺𑀆𑀤𑀺 𑀧𑀜𑁆𑀳𑀸𑀯𑀸𑀭𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀯𑀸𑀭𑁂 𑀧𑀦 ‘‘𑀯𑀺𑀧𑀸𑀓𑀸 𑀘𑀢𑁆𑀢𑀸𑀭𑁄 ¶ 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧𑁪) 𑀆𑀕𑀢𑀸. 𑀏𑀢𑁆𑀣 𑀘 𑀬𑁂𑀲𑀁 𑀏𑀓𑀦𑁆𑀢𑁂𑀦 𑀯𑀺𑀧𑀸𑀓𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀲𑀁 𑀯𑀲𑁂𑀦 𑀦𑀬𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀆𑀭𑀼𑀧𑁆𑀧𑁂 𑀓𑀸𑀫𑀭𑀽𑀧𑀪𑀽𑀫𑀻𑀲𑀼 𑀯𑀺𑀬 𑀯𑀺𑀧𑀸𑀓𑁄 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁬𑁦𑁮. 𑀲𑀢𑀺𑀧𑀺 𑀚𑀦𑀓𑀪𑀸𑀯𑁂 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀆𑀳𑀸𑀭𑀸𑀦𑀁 𑀧𑀥𑀸𑀦𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀜𑁆𑀳𑀺 𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀅𑀭𑀽𑀧𑀻𑀦𑀁 𑀆𑀳𑀸𑀭𑀸𑀦𑀁, 𑀆𑀳𑀸𑀭𑀚𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀭𑀽𑀧𑀸𑀳𑀸𑀭𑀲𑁆𑀲 𑀘 𑀳𑁄𑀢𑀺. 𑀅𑀲𑀢𑀺𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀽𑀧𑀢𑁆𑀣𑀫𑁆𑀪𑀓𑀭𑀽𑀧𑀸𑀳𑀸𑀭𑀲𑁆𑀲, 𑀅𑀲𑀢𑀺 𑀧𑀦 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂 𑀆𑀳𑀸𑀭𑀸𑀦𑀁 𑀚𑀦𑀓𑀢𑁆𑀢𑀁 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦𑀁. 𑀅𑀣 𑀯𑀸 𑀚𑀦𑀬𑀫𑀸𑀦𑁄𑀧𑀺 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀚𑀦𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑀪𑀸𑀯𑁄 𑀏𑀯 𑀆𑀳𑀸𑀭𑀪𑀸𑀯𑁄𑀢𑀺 ‘‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀭𑀽𑀧𑀸𑀳𑀸𑀭𑁄 𑀅𑀢𑁆𑀢𑀦𑀸 𑀚𑀦𑀺𑀢𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀜𑁆𑀜𑁂𑀦 𑀚𑀦𑀺𑀢𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀸 ‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 ‘‘𑀆𑀳𑀸𑀭𑁄 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀆𑀳𑀸𑀭𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀯𑀺𑀭𑀼𑀤𑁆𑀥𑀫𑁂𑀢’’𑀦𑁆𑀢𑀺 𑀅𑀧𑀭𑁂 𑀦𑀸𑀦𑀼𑀚𑀸𑀦𑀦𑁆𑀢𑀺. 𑀭𑀽𑀧𑀸𑀳𑀸𑀭𑁄 𑀘𑁂𑀢𑁆𑀣 𑀭𑀽𑀧𑀥𑀫𑁆𑀫𑀸𑀦𑀁 𑀏𑀯 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀳𑀸𑀭𑀸 𑀧𑀦 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀺. 𑀢𑀜𑁆𑀘 𑀔𑁄 𑀦 𑀓𑁂𑀯𑀮𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀫𑁂𑀯, 𑀅𑀣 𑀔𑁄 𑀓𑀤𑀸𑀘𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀳𑀸𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁦𑁯. 𑀅𑀥𑀺𑀧𑀢𑀺𑀬𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀯𑀺𑀬 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑁂𑀦 𑀕𑀭𑀼𑀪𑀸𑀯𑁄 𑀅𑀥𑀺𑀧𑀢𑀺𑀬𑀝𑁆𑀞𑁄, 𑀅𑀣 𑀔𑁄 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺, 𑀚𑀻𑀯𑀦𑁂 𑀓𑀫𑁆𑀫𑀚𑀭𑀽𑀧𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀘 𑀚𑀻𑀯𑀦𑁆𑀢𑁂𑀳𑀺, 𑀫𑀦𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺, 𑀲𑀼𑀔𑀺𑀢𑀸𑀤𑀺𑀪𑀸𑀯𑁂 𑀲𑀼𑀔𑀺𑀢𑀸𑀤𑀻𑀳𑀺, 𑀅𑀥𑀺𑀫𑁄𑀓𑁆𑀔𑀧𑀕𑁆𑀕𑀳𑀽𑀧𑀝𑁆𑀞𑀸𑀦𑀸𑀯𑀺𑀓𑁆𑀔𑁂𑀧𑀧𑀚𑀸𑀦𑀦𑁂𑀲𑀼, ‘‘𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀁 𑀆𑀚𑀸𑀦𑀦𑁂, 𑀅𑀜𑁆𑀜𑀸𑀢𑀸𑀯𑀺𑀪𑀸𑀯𑁂 𑀘 𑀲𑀤𑁆𑀥𑀸𑀤𑀺𑀲𑀳𑀚𑀸𑀢𑁂𑀳𑀻𑀢𑀺 𑀏𑀯𑀁 𑀢𑀁𑀢𑀁𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀸𑀤𑀺𑀧𑀘𑁆𑀘𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑀻𑀬𑀢𑀸. 𑀢𑁂𑀲𑀼 𑀳𑀺 𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 𑀇𑀲𑁆𑀲𑀭𑀺𑀬𑀁, 𑀢𑀧𑁆𑀧𑀘𑁆𑀘𑀬𑀸𑀦𑀜𑁆𑀘 𑀢𑀤𑀦𑀼𑀯𑀢𑁆𑀢𑀦𑁂𑀦 𑀢𑀢𑁆𑀣 𑀧𑀯𑀢𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀦 𑀕𑀳𑀺𑀢𑀁, 𑀦𑀦𑀼 𑀘𑁂𑀢𑀫𑁆𑀧𑀺 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀻𑀬𑀢𑀻𑀢𑀺? 𑀲𑀘𑁆𑀘𑀁 𑀅𑀦𑀼𑀯𑀢𑁆𑀢𑀻𑀬𑀢𑀺, 𑀦 𑀧𑀦 𑀧𑀘𑁆𑀘𑀬𑀪𑀸𑀯𑀢𑁄. 𑀬𑀣𑀸 𑀳𑀺 𑀚𑀻𑀯𑀺𑀢𑀸𑀳𑀸𑀭𑀸 ¶ 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀧𑀸𑀮𑀓𑀉𑀧𑀢𑁆𑀣𑀫𑁆𑀪𑀓𑀸 ¶ , 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀪𑀽𑀢𑀸 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀸 𑀮𑀺𑀗𑁆𑀕𑀸𑀤𑀻𑀦𑀁 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀺. 𑀬𑀢𑁄 𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀓𑁂𑀯𑀮𑀁 𑀧𑀦 𑀬𑀣𑀸𑀲𑀓𑁂𑀳𑀺 𑀏𑀯 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀸𑀦𑀁 𑀮𑀺𑀗𑁆𑀕𑀸𑀤𑀻𑀦𑀁 𑀬𑀣𑀸 𑀇𑀢𑁆𑀣𑀺𑀆𑀤𑀺𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂 𑀅𑀧𑁆𑀧𑀯𑀢𑁆𑀢𑀺𑀢𑁄 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸, 𑀇𑀦𑁆𑀤𑁆𑀭𑀺𑀬𑀢𑀸 𑀘 𑀢𑁂𑀲𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀘𑀓𑁆𑀔𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯𑀸𑀢𑀺 𑀏𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀘𑀓𑁆𑀔𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑁬𑁧𑁦. 𑀮𑀓𑁆𑀔𑀡𑀸𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀪𑀽𑀢𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀢𑀓𑁆𑀓𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀁 𑀧𑁂𑀓𑁆𑀔𑀦𑀁, 𑀘𑀺𑀦𑁆𑀢𑀦𑀁 𑀯𑀸 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀆𑀯𑁂𑀡𑀺𑀓𑁄 𑀩𑁆𑀬𑀸𑀧𑀸𑀭𑁄 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁄. ‘‘𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀯𑀘𑀦𑁂𑀦 𑀅𑀛𑀸𑀦𑀗𑁆𑀕𑀸𑀦𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀦𑀺𑀯𑀢𑁆𑀢𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 ‘‘𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑁂 ‘‘𑀞𑀧𑁂𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀯𑁂𑀤𑀦𑀸𑀪𑁂𑀤𑁂𑀲𑀼 𑀧𑀜𑁆𑀘𑀲𑀼 𑀲𑀼𑀔𑀤𑀼𑀓𑁆𑀔𑀤𑁆𑀯𑀬𑀲𑁆𑀲 𑀏𑀓𑀦𑁆𑀢𑁂𑀦 𑀅𑀛𑀸𑀦𑀗𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀛𑀸𑀦𑀗𑁆𑀕𑀝𑁆𑀞𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀲𑀢𑀺𑀧𑀺 𑀯𑀸 𑀛𑀸𑀦𑀗𑁆𑀕𑀯𑁄𑀳𑀸𑀭𑁂 𑀯𑁂𑀤𑀦𑀸𑀪𑁂𑀤𑀤𑁆𑀯𑀬𑀲𑁆𑀲 𑀏𑀓𑀦𑁆𑀢𑁂𑀦 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀧𑀦 𑀬𑀤𑀺𑀧𑀺 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄 𑀅𑀢𑁆𑀣𑀺, 𑀦𑀛𑀸𑀦𑀧𑀘𑁆𑀘𑀬𑀪𑀸𑀯𑁄 𑀧𑀦 𑀦𑀢𑁆𑀣𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀻𑀢𑀺 𑀏𑀢𑁆𑀣 𑀕𑀳𑀡𑀁 𑀓𑀢𑀁. 𑀢𑀢𑁆𑀣 ‘‘𑀲𑀩𑁆𑀩𑀸𑀦𑀺𑀧𑀻’’𑀢𑀺 𑀯𑀘𑀦𑀁 𑀲𑀩𑁆𑀩𑀓𑀼𑀲𑀮𑀸𑀤𑀺𑀪𑁂𑀤𑀲𑀗𑁆𑀕𑀡𑁆𑀳𑀦𑀢𑁆𑀣𑀁, 𑀦 𑀧𑀦 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀲𑀗𑁆𑀕𑀡𑁆𑀳𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂𑀲𑀁 𑀧𑀦 ‘‘𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂 𑀯𑁂𑀤𑀦𑀸𑀢𑁆𑀢𑀬’’𑀦𑁆𑀢𑀺 𑀧𑀸𑀞𑁄, 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑁄 𑀯𑀺𑀘𑀸𑀭𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁬𑁧𑁧. 𑀬𑀢𑁄 𑀢𑀢𑁄 𑀯𑀸𑀢𑀺 𑀲𑀫𑁆𑀫𑀸 𑀯𑀸 𑀫𑀺𑀘𑁆𑀙𑀸 𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀳𑀸𑀯𑀸𑀭𑁂 𑀧𑀦𑀸𑀢𑀺𑀆𑀤𑀺 𑀬𑀤𑀺𑀧𑀺 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀢𑀁𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦 𑀲𑁄 𑀅𑀢𑁆𑀣𑁄 𑀜𑀸𑀧𑀺𑀢𑁄 𑀏𑀯, 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁂 𑀧𑀦 𑀤𑁆𑀯𑁂𑀧𑀺…𑀧𑁂… 𑀦 𑀮𑀩𑁆𑀪𑀦𑁆𑀢𑀺 ‘‘𑀬𑀣𑀸𑀲𑀗𑁆𑀔𑁆𑀬’’𑀦𑁆𑀢𑀺 𑀯𑀘𑀦𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑁆𑀞𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀓𑀣𑀫𑀯𑀺𑀭𑁄𑀥𑁄𑀢𑀺? 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ¶ . 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀏𑀯 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀦 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀽𑀢𑀺 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀮𑀸𑀪𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀏𑀯𑀜𑁆𑀳𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀮𑀸𑀪𑁄 𑀦 𑀦𑀺𑀯𑀸𑀭𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦 𑀲𑀯𑀺𑀢𑀓𑁆𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀛𑀸𑀦𑀧𑀘𑁆𑀘𑀬𑀲𑁆𑀲 𑀲𑀫𑁆𑀪𑀯𑁄 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀺. 𑀢𑀢𑁆𑀣 𑀳𑀺 𑀬𑁂𑀦 𑀅𑀮𑀸𑀪𑁂𑀦 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 ¶ 𑀫𑀦𑁄𑀥𑀸𑀢𑀼𑀆𑀤𑀻𑀦𑀁 𑀲𑀗𑁆𑀕𑀳𑀲𑀼𑀜𑁆𑀜𑀢𑀯𑀸𑀭𑁂𑀲𑀼 𑀛𑀸𑀦𑀁 𑀦 𑀉𑀤𑁆𑀥𑀝𑀁, 𑀢𑀁 𑀅𑀮𑀸𑀪𑀁 𑀲𑀦𑁆𑀥𑀸𑀬 𑀛𑀸𑀦𑀧𑀘𑁆𑀘𑀬𑀲𑁆𑀲𑀧𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀅𑀮𑀸𑀪𑁄 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀲𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑀸𑀤𑀻𑀦𑀁 𑀲𑀳𑀚𑀸𑀢𑁂 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀢𑁆𑀢𑀕𑀢𑀪𑀸𑀯𑀓𑀭𑀡𑀁 𑀉𑀧𑀦𑀺𑀚𑁆𑀛𑀸𑀬𑀦𑀩𑁆𑀬𑀸𑀧𑀸𑀭𑁄 𑀩𑀮𑀯𑀸, 𑀦 𑀢𑀣𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺. 𑀇𑀥 𑀧𑀦 𑀤𑀼𑀩𑁆𑀩𑀮𑀫𑁆𑀧𑀺 𑀉𑀧𑀦𑀺𑀚𑁆𑀛𑀸𑀬𑀦𑀁 𑀬𑀤𑀺 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀦 𑀢𑁂𑀦 𑀉𑀧𑀓𑀸𑀭𑀓𑀢𑀸 𑀦 𑀳𑁄𑀢𑀻𑀢𑀺 𑀲𑀯𑀺𑀢𑀓𑁆𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼𑀧𑀺 𑀛𑀸𑀦𑀧𑀘𑁆𑀘𑀬𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 ‘‘𑀏𑀢𑁂 𑀧𑀦 𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀦 𑀮𑀩𑁆𑀪𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀓𑀣𑀸 𑀦𑀸𑀫 𑀲𑀫𑀦𑁆𑀢𑀧𑀝𑁆𑀞𑀸𑀦𑀦𑀺𑀲𑁆𑀲𑀺𑀢𑀸, 𑀦 𑀥𑀫𑁆𑀫𑀲𑀗𑁆𑀕𑀡𑀻𑀦𑀺𑀲𑁆𑀲𑀺𑀢𑀸𑀢𑀺.

𑁬𑁧𑁨. 𑀲𑀫𑀁 𑀅𑀯𑀺𑀲𑀫𑀁, 𑀲𑀫𑁆𑀫𑀸, 𑀲𑀳 𑀯𑀸 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀢𑀸𑀬 𑀏𑀓𑀻𑀪𑀸𑀯𑀽𑀧𑀕𑀫𑁂𑀦 𑀯𑀺𑀬 𑀉𑀧𑀓𑀸𑀭𑀓𑀢𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀓𑀸 𑀧𑀦 𑀲𑀸 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀢𑀸𑀢𑀺 𑀆𑀳 ‘‘𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦𑀸’’𑀢𑀺. 𑀢𑀢𑁆𑀣 𑀬𑁂 𑀏𑀓𑀯𑀢𑁆𑀣𑀼𑀓𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀏𑀢𑁆𑀢𑀓𑁂 𑀯𑀼𑀘𑁆𑀘𑀫𑀸𑀦𑁂 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀲𑀼 𑀏𑀓𑀁 𑀫𑀳𑀸𑀪𑀽𑀢𑀁 𑀲𑁂𑀲𑀫𑀳𑀸𑀪𑀽𑀢𑀼𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀦 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀺, 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺 𑀓𑀧𑁆𑀧𑁂𑀦𑁆𑀢𑀲𑁆𑀲 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀏𑀓𑀸𑀭𑀫𑁆𑀫𑀡𑀕𑁆𑀕𑀳𑀡𑀁. 𑀬𑁂 𑀏𑀓𑀯𑀢𑁆𑀣𑀼𑀓𑀸, 𑀏𑀓𑀸𑀭𑀫𑁆𑀫𑀡𑀸 𑀘, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀏𑀯𑀫𑁆𑀧𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀤𑀻𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀼𑀧𑁆𑀧𑀸𑀤𑀕𑁆𑀕𑀳𑀡𑀁. 𑀬𑁂 𑀏𑀓𑀯𑀢𑁆𑀣𑀼𑀓𑁂𑀓𑀸𑀭𑀫𑁆𑀫𑀡𑁂𑀓𑀼𑀧𑁆𑀧𑀸𑀤𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀓𑀺𑀁 𑀧𑀦 𑀦𑀸𑀦𑀸𑀦𑀺𑀭𑁄𑀥𑀸𑀧𑀺 𑀏𑀯𑀁𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀺, 𑀉𑀤𑀸𑀳𑀼 𑀏𑀓𑀦𑀺𑀭𑁄𑀥𑀸 𑀏𑀯𑀸𑀢𑀺 𑀯𑀺𑀘𑀸𑀭𑀡𑀸𑀬𑀁 𑀏𑀓𑀦𑀺𑀭𑁄𑀥𑀸 𑀏𑀯 𑀏𑀯𑀁𑀮𑀓𑁆𑀔𑀡𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁.

𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀦𑀺𑀭𑁄𑀥𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀏𑀓𑀲𑁆𑀫𑀺𑀁 𑀔𑀡𑁂 𑀦𑀺𑀭𑀼𑀚𑁆𑀛𑀫𑀸𑀦𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑀺 ¶ 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀅𑀢𑁆𑀣𑀺 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑀸𑀢𑀺 𑀢𑁂𑀲𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀏𑀓𑀸𑀭𑀫𑁆𑀫𑀡𑀕𑁆𑀕𑀳𑀡𑀁. 𑀬𑁂 𑀏𑀓𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀅𑀬𑀜𑁆𑀘 𑀦𑀬𑁄 𑀏𑀓𑀯𑀢𑁆𑀣𑀼𑀓𑁂𑀲𑀼 𑀏𑀯 𑀮𑀩𑁆𑀪𑀢𑀺, 𑀦 𑀦𑀸𑀦𑀸𑀯𑀢𑁆𑀣𑀼𑀓𑁂𑀲𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀓𑀯𑀢𑁆𑀣𑀼𑀓𑀕𑁆𑀕𑀳𑀡𑀁. 𑀬𑁂 𑀏𑀓𑀯𑀢𑁆𑀣𑀼𑀓𑁂𑀓𑀸𑀭𑀫𑁆𑀫𑀡𑁂𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑀸𑀧𑁂𑀓𑁆𑀔𑀸𑀬 𑀘𑁂𑀢𑀁 𑀏𑀓𑀯𑀢𑁆𑀣𑀼𑀓𑀕𑁆𑀕𑀳𑀡𑀁. 𑀆𑀭𑀼𑀧𑁆𑀧𑁂 𑀧𑀦 𑀯𑀢𑁆𑀣𑀼𑀬𑁂𑀯 𑀦𑀢𑁆𑀣𑀻𑀢𑀺 𑀓𑀼𑀢𑁄 𑀏𑀓𑀯𑀢𑁆𑀣𑀼𑀓𑀕𑁆𑀕𑀳𑀡𑀲𑁆𑀲 𑀅𑀯𑀲𑀭𑁄.

𑁬𑁧𑁩. 𑀅𑀜𑁆𑀜𑀫𑀜𑁆𑀜𑀁 ¶ 𑀲𑀫𑁆𑀩𑀦𑁆𑀥𑀢𑀸𑀬 𑀬𑀼𑀢𑁆𑀢𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀯𑀺𑀲𑀁𑀲𑀝𑁆𑀞𑀢𑀸𑀬 𑀦𑀸𑀦𑀢𑁆𑀢𑀽𑀧𑀕𑀫𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀅𑀬𑀜𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀦 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸𑀬 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀯𑀲𑁂𑀦 𑀕𑀳𑁂𑀢𑀩𑁆𑀩𑀸, 𑀅𑀣 𑀔𑁄 𑀯𑀺𑀲𑀼𑀁𑀬𑁂𑀯. 𑀢𑀢𑁆𑀣 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀚𑀸𑀢𑀺𑀬𑀢𑀸𑀬 𑀲𑀫𑀥𑀼𑀭𑀁, 𑀇𑀥 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀚𑀸𑀢𑀺𑀬𑀢𑀸𑀬 𑀯𑀺𑀥𑀼𑀭𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀼𑀢𑁆𑀢𑀸𑀦𑀫𑁆𑀧𑀺…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸’’𑀢𑀺. 𑀦 𑀳𑀺 𑀯𑀢𑁆𑀣𑀼𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀅𑀬𑀼𑀢𑁆𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀅𑀢𑁆𑀣𑀺. 𑀬𑀣𑀸 𑀳𑀺 ‘‘𑀯𑀢𑁆𑀣𑀼 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁪𑁩𑁪) 𑀯𑀢𑁆𑀣𑀼𑀦𑀸, 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀘 𑀬𑀼𑀢𑁆𑀢𑀸𑀦𑀁 𑀅𑀢𑁆𑀣𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄, 𑀦 𑀏𑀯𑀁 𑀅𑀬𑀼𑀢𑁆𑀢𑀸𑀦𑀁 𑀅𑀢𑁆𑀣𑀻𑀢𑀺. 𑀬𑀤𑀺 𑀏𑀯𑀁 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀓𑀲𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀯𑀼𑀢𑁆𑀢𑁄𑀢𑀺? 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀲𑀢𑀺𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑁂 𑀲𑀫𑁆𑀧𑀬𑁄𑀕𑁄 𑀯𑀺𑀬 𑀯𑀺𑀧𑁆𑀧𑀬𑁄𑀕𑁄 (𑀥𑀸𑀢𑀼. 𑁩) 𑀦𑀢𑁆𑀣𑀻𑀢𑀺 𑀦 𑀢𑁂𑀲𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺. 𑀲𑀫𑁆𑀧𑀬𑀼𑀚𑁆𑀚𑀫𑀸𑀦𑀸𑀦𑀜𑁆𑀳𑀺 𑀅𑀭𑀽𑀧𑀸𑀦𑀁 𑀭𑀽𑀧𑁂𑀳𑀺, 𑀭𑀽𑀧𑀸𑀦𑀜𑁆𑀘 𑀢𑁂𑀳𑀺 𑀲𑀺𑀬𑀸 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀭𑀽𑀧𑀸𑀦𑀁 𑀧𑀦 𑀭𑀽𑀧𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀦 𑀢𑁂𑀲𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸.

𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁, 𑀅𑀭𑀽𑀧𑀺𑀦𑁄𑀧𑀺 𑀭𑀽𑀧𑀻𑀦𑀦𑁆𑀢𑀺 𑀏𑀢𑁆𑀣 𑀅𑀭𑀽𑀧𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀘𑀢𑁆𑀢𑀸𑀭𑁄 𑀏𑀯 𑀔𑀦𑁆𑀥𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀦 𑀬𑀣𑀸 ¶ 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀯𑀁 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺. ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 (𑀥𑀸𑀢𑀼. 𑁩) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑁂𑀲𑀼 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀯𑀼𑀢𑁆𑀢𑀜𑁆𑀘 𑀧𑀜𑁆𑀳𑀸𑀯𑀸𑀭𑁂 ‘‘𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁪𑁩𑁪). 𑀭𑀽𑀧𑀺𑀦𑁄 𑀥𑀫𑁆𑀫𑀸𑀢𑀺 𑀘𑁂𑀢𑀁 𑀳𑀤𑀬𑀯𑀢𑁆𑀣𑀼𑀦𑁄 𑀘𑁂𑀯 𑀘𑀓𑁆𑀔𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀙 𑀯𑀢𑁆𑀣𑀽𑀦𑀺𑀬𑁂𑀯 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀭𑀽𑀧𑀸𑀬𑀢𑀦𑀸𑀤𑀬𑁄 𑀧𑀦 𑀆𑀭𑀫𑁆𑀫𑀡𑀥𑀫𑁆𑀫𑀸 𑀓𑀺𑀜𑁆𑀘𑀸𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀧𑀦 𑀦 𑀳𑁄𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀪𑀸𑀯𑀢𑁄. 𑀅𑀭𑀽𑀧𑀓𑁆𑀔𑀦𑁆𑀥𑀸 𑀳𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀺𑀬𑀸 𑀢𑀢𑁆𑀣 𑀆𑀲𑀗𑁆𑀓𑀸 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀇𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀉𑀤𑀸𑀳𑀼 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺? 𑀆𑀭𑀫𑁆𑀫𑀡𑀥𑀫𑁆𑀫𑀸 𑀧𑀦 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀆𑀭𑀫𑁆𑀫𑀡𑀫𑀢𑁆𑀢𑀁 𑀳𑁄𑀦𑁆𑀢𑀻𑀢𑀺 𑀦𑀢𑁆𑀣𑀺 𑀢𑁂𑀲𑀼 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀢𑀺 ¶ 𑀦 𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀲𑀩𑁆𑀪𑀸𑀯𑀢𑁄 𑀯𑀢𑁆𑀣𑀽𑀦𑀺𑀬𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 ‘‘𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁, 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺𑀆𑀤𑀺. 𑀲𑁆𑀯𑀸𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 ‘‘𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀢𑀣𑀸 𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀢𑀣𑀸 𑀅𑀓𑀼𑀲𑀮𑀦𑁆𑀢𑀺 𑀓𑀼𑀲𑀮𑀫𑀽𑀮𑀫𑁂𑀓𑀁, 𑀅𑀓𑀼𑀲𑀮𑀫𑀽𑀮𑀫𑁂𑀓𑀁, 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺 𑀢𑀻𑀡𑀻’’𑀢𑀺 𑀧𑀜𑁆𑀘𑀯𑀺𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁧𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑁂𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑁂𑀦. 𑀢𑁂𑀦 ‘‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 (𑀧𑀼. 𑀧. 𑀘𑀢𑀼𑀓𑁆𑀓𑀉𑀤𑁆𑀤𑁂𑀲 𑁨𑁪) 𑀘 𑀏𑀯𑀫𑀸𑀤𑀻𑀲𑀼 𑀯𑀼𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀽𑀧𑀮𑀩𑁆𑀪𑀫𑀸𑀦𑀢𑀸𑀮𑀓𑁆𑀔𑀡𑀁 𑀅𑀢𑁆𑀣𑀺𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀧𑁆𑀧𑀥𑀸𑀦𑀸 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸𑀢𑀺 𑀆𑀳 ‘‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦𑀸’’𑀢𑀺. 𑀇𑀤𑀜𑁆𑀘 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀯𑀢𑁆𑀣𑀸𑀭𑀫𑁆𑀫𑀡𑀲𑀳𑀚𑀸𑀢𑀸𑀤𑀻𑀦𑀁 𑀲𑀸𑀥𑀸𑀭𑀡𑀁 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀢𑁆𑀢𑀥𑀸 𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄’’𑀢𑀺𑀆𑀤𑀺𑀦𑀸 𑀲𑀳𑀚𑀸𑀢𑀯𑀲𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄𑀤𑀲𑁆𑀲𑀺𑀢𑁄 ¶ , ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀭𑁂𑀚𑀸𑀢𑀯𑀲𑁂𑀦, ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦. 𑀏𑀯𑀫𑀬𑀁 𑀧𑀸𑀞𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀧𑀘𑁆𑀘𑀬𑀯𑀲𑁂𑀦𑁂𑀯 𑀆𑀕𑀢𑁄.

𑀅𑀜𑁆𑀜𑀢𑁆𑀣 𑀧𑀦 𑀢𑀢𑁄 𑀅𑀜𑁆𑀜𑀣𑀸𑀧𑀺 𑀆𑀕𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀳𑀸𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀢𑁂𑀦 𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑀢𑁆𑀢𑀁 𑀯𑀺𑀪𑀸𑀯𑁂𑀢𑀺. 𑀧𑀼𑀭𑀺𑀫𑀧𑀸𑀞𑁂 𑀧𑀦 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑀺 𑀘 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀏𑀓𑀢𑁄, 𑀧𑀼𑀭𑁂𑀢𑀭𑀁, 𑀧𑀘𑁆𑀙𑀸 𑀘 𑀉𑀧𑁆𑀧𑀦𑁆𑀦𑀪𑀸𑀯𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀆𑀳𑀸𑀭𑁄, 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀦 𑀮𑀪𑀦𑁆𑀢𑀺, 𑀢𑀤𑀪𑀸𑀯𑁄 𑀘 𑀢𑁂𑀲𑀁 𑀥𑀫𑁆𑀫𑀲𑀪𑀸𑀯𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀲𑁆𑀯𑀸𑀬𑀁 𑀅𑀢𑁆𑀣𑀺𑀧𑀘𑁆𑀘𑀬𑁄 ‘‘𑀲𑀳𑀚𑀸𑀢𑀢𑁄 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀢𑁄 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀲𑀳𑀚𑀸𑀢𑀢𑁄 𑀏𑀯 𑀓𑀼𑀲𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀺 𑀓𑀼𑀲𑀮𑀫𑀽𑀮𑀸 𑀢𑀬𑁄, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀸. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 𑀧𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀢𑁄 𑀅𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁, 𑀢𑀣𑀸 𑀅𑀓𑀼𑀲𑀮𑀁. 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀓𑀼𑀲𑀮𑀲𑁆𑀲, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀅𑀩𑁆𑀬𑀸𑀓𑀢𑀲𑁆𑀲, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀢𑁄 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀅𑀓𑀼𑀲𑀮𑀲𑁆𑀲, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 ¶ 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀅𑀩𑁆𑀬𑀸𑀓𑀢𑀲𑁆𑀲𑀸’’𑀢𑀺 𑀏𑀯𑀁 𑀢𑁂𑀭𑀲𑀯𑀺𑀥𑁄. 𑀲𑀗𑁆𑀔𑁂𑀧𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀅𑀢𑁆𑀣𑀺𑀧𑀘𑁆𑀘𑀬𑁄, 𑀦 𑀦𑀺𑀩𑁆𑀩𑀸𑀦𑀁. 𑀬𑁄 𑀳𑀺 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑁄 𑀅𑀢𑁆𑀣𑀺𑀪𑀸𑀯𑀁 𑀮𑀪𑀺𑀢𑁆𑀯𑀸 𑀉𑀧𑀓𑀸𑀭𑀓𑁄 𑀳𑁄𑀢𑀺, 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑀁 𑀳𑀼𑀢𑁆𑀯𑀸 𑀅𑀢𑁆𑀣𑀺𑀪𑀸𑀯𑀮𑀸𑀪𑁂𑀦 𑀉𑀧𑀓𑀸𑀭𑀓𑀁 𑀳𑁄𑀢𑀻𑀢𑀺, 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀁 𑀯𑀸 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄 𑀉𑀧𑀓𑀸𑀭𑀓𑀪𑀸𑀯𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺.

𑁬𑁧𑁫. 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀲𑀳𑀪𑀸𑀯𑁄 𑀦𑀢𑁆𑀣𑀻𑀢𑀺 𑀏𑀓𑀲𑁆𑀫𑀺𑀁 𑀨𑀲𑁆𑀲𑀸𑀤𑀺𑀲𑀫𑀼𑀤𑀸𑀬𑁂 𑀲𑀢𑀺 𑀤𑀼𑀢𑀺𑀬𑁄 𑀦 𑀳𑁄𑀢𑀺, 𑀅𑀲𑀢𑀺 𑀧𑀦 𑀳𑁄𑀢𑀻𑀢𑀺 𑀢𑁂𑀦 𑀦𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀦𑀢𑁆𑀣𑀺𑀧𑀘𑁆𑀘𑀬𑀢𑀸. 𑀲𑀢𑀺𑀧𑀺 𑀧𑀼𑀭𑀺𑀫𑀢𑀭𑀘𑀺𑀢𑁆𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑁂 𑀦 𑀢𑁂𑀦 𑀢𑀸𑀦𑀺 𑀦𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀦𑀺, 𑀅𑀦𑀦𑁆𑀢𑀭𑀫𑁂𑀯 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀑𑀓𑀸𑀲𑀁 ¶ 𑀅𑀮𑀪𑀫𑀸𑀦𑀁 𑀦𑀢𑁆𑀣𑀺𑀪𑀸𑀯𑁂𑀦 𑀑𑀓𑀸𑀲𑀁 𑀤𑀤𑀫𑀸𑀦𑀁 𑀯𑀺𑀬 𑀉𑀧𑀓𑀸𑀭𑀓𑀁 𑀳𑁄𑀢𑀻𑀢𑀺 ‘‘𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑁂𑀦 𑀉𑀧𑀓𑀸𑀭𑀓𑀸’’𑀢𑀺 𑀆𑀳. 𑀧𑀝𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁.

‘‘𑀢𑁂 𑀏𑀯𑀸’’𑀢𑀺 𑀏𑀢𑁂𑀦 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑀢𑁄 𑀯𑀺𑀲𑁂𑀲𑀸𑀪𑀸𑀯𑀫𑀸𑀳. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀪𑀸𑀯𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀑𑀓𑀸𑀲𑀤𑀸𑀦𑀁 𑀦𑀢𑁆𑀣𑀺𑀧𑀘𑁆𑀘𑀬𑀢𑀸, 𑀲𑀪𑀸𑀯𑀸𑀯𑀺𑀕𑀫𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀯𑀺𑀕𑀫𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀕𑀢𑀧𑀘𑁆𑀘𑀬𑀢𑀸. 𑀦𑀢𑁆𑀣𑀺𑀢𑀸 𑀘 𑀦𑀺𑀭𑁄𑀥𑀸𑀦𑀦𑁆𑀢𑀭𑀸 𑀲𑀼𑀜𑁆𑀜𑀢𑀸, 𑀯𑀺𑀕𑀢𑀢𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑀸 𑀏𑀯 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀏𑀯 𑀥𑀫𑁆𑀫𑀢𑁄 𑀅𑀯𑀺𑀲𑀺𑀝𑁆𑀞𑀸, 𑀅𑀣 𑀔𑁄 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀬𑀤𑀺𑀧𑀺𑀫𑁂 𑀧𑀘𑁆𑀘𑀬𑀸 𑀥𑀫𑁆𑀫𑀢𑁄 𑀅𑀯𑀺𑀲𑀺𑀝𑁆𑀞𑀸, 𑀢𑀣𑀸𑀧𑀺 𑀅𑀢𑁆𑀣𑀺𑀢𑀸𑀬 𑀲𑀲𑀪𑀸𑀯𑀢𑀸𑀬 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀲𑀪𑀸𑀯𑀸𑀯𑀺𑀕𑀫𑁂𑀦 𑀦𑀺𑀭𑁄𑀥𑀲𑁆𑀲 𑀅𑀧𑁆𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀓𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑀢𑀸𑀢𑀺 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄 𑀥𑀫𑁆𑀫𑀸𑀯𑀺𑀲𑁂𑀲𑁂𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀫𑀢𑁆𑀣𑀢𑀸𑀯𑀺𑀲𑁂𑀲𑀁 𑀲𑀩𑁆𑀩𑀁 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀪𑀕𑀯𑀢𑀸 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀯𑀺𑀲𑁂𑀲𑀸 𑀯𑀼𑀢𑁆𑀢𑀸𑀢𑀺 𑀥𑀫𑁆𑀫𑀲𑁆𑀲𑀸𑀫𑀺𑀫𑁆𑀳𑀺 𑀲𑀤𑁆𑀥𑀸𑀬 ‘‘𑀏𑀯𑀁 𑀯𑀺𑀲𑁂𑀲𑀸 𑀏𑀢𑁂 𑀥𑀫𑁆𑀫𑀸’’𑀢𑀺 𑀲𑀼𑀢𑀫𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑁂𑀳𑀺 𑀢𑀤𑀪𑀺𑀲𑀫𑀬𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄.

𑀏𑀢𑁆𑀣 ¶ 𑀘 𑀆𑀭𑀫𑁆𑀫𑀡𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀆𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯, 𑀇𑀢𑀭𑁂 𑀘𑀼𑀤𑁆𑀤𑀲 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁.

𑀳𑁂𑀢𑀼𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀧𑀘𑁆𑀙𑀸𑀚𑀸𑀢𑀓𑀫𑁆𑀫𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸 𑀏𑀯, 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀫𑁂𑀯, 𑀉𑀪𑀬𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸, 𑀢𑁂 𑀤𑁆𑀯𑁂 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸𑀧𑀺 𑀳𑁄𑀦𑁆𑀢𑀺.

𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀢𑀻𑀢𑀸 𑀏𑀯. 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸 𑀢𑀺𑀓𑀸𑀮𑀺𑀓𑀸, 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀸 𑀘. 𑀓𑀫𑁆𑀫𑀧𑀘𑁆𑀘𑀬𑁄 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀤𑁆𑀯𑀺𑀓𑀸𑀮𑀺𑀓𑁄. 𑀲𑁂𑀲𑀸 𑀧𑀜𑁆𑀘𑀤𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯.

𑀢𑀣𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀧𑀘𑁆𑀘𑀬𑀸, 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄, 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀘𑀸𑀢𑀺 𑀇𑀫𑁂 𑀧𑀘𑁆𑀘𑀬𑀸 𑀚𑀦𑀓𑀸 𑀏𑀯, 𑀦 𑀉𑀧𑀢𑁆𑀣𑀫𑁆𑀪𑀓𑀸. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀉𑀧𑀢𑁆𑀣𑀫𑁆𑀪𑀓𑁄 𑀏𑀯, 𑀦 𑀚𑀦𑀓𑁄 ¶ . 𑀲𑁂𑀲𑀸 𑀚𑀦𑀓𑀸 𑀘 𑀉𑀧𑀢𑁆𑀣𑀫𑁆𑀪𑀓𑀸 𑀘𑀸𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁧𑁬. 𑀧𑀘𑁆𑀘𑀬𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀤𑀼𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑁂𑀦. 𑀅𑀦𑁂𑀓𑀥𑀸𑀢𑀺 𑀲𑀢𑁆𑀢𑀭𑀲𑀥𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀯𑀲𑁂𑀦.

𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦𑀸𑀢𑀺 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀲𑀗𑁆𑀔𑀸𑀢𑀸𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀳𑀕𑀢𑀘𑀺𑀢𑁆𑀢𑁂𑀦. 𑀲𑀫𑁄𑀳𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂𑀢𑀺 𑀧𑀭𑁂𑀲𑀁, 𑀅𑀢𑁆𑀢𑀦𑁄 𑀘 𑀲𑀫𑁄𑀳𑀲𑁆𑀲 𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑀓𑀸𑀮𑁂. 𑀅𑀯𑀺𑀚𑁆𑀚𑀸𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑁄 𑀬𑀸 𑀓𑀸𑀘𑀺 𑀯𑀺𑀧𑀢𑁆𑀢𑀺𑀬𑁄, 𑀲𑀩𑁆𑀩𑀸 𑀢𑀸 𑀫𑁄𑀳𑀫𑀽𑀮𑀺𑀓𑀸𑀢𑀺 𑀘 𑀅𑀯𑀺𑀚𑁆𑀚𑀸𑀬 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬 𑀯𑀺𑀯𑀝𑁆𑀝𑀸𑀪𑀺𑀧𑀢𑁆𑀣𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁. 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑁆𑀢𑀸𑀢𑀺 𑀪𑀯𑀸𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑀽𑀴𑁆𑀳𑀢𑁆𑀢𑀸. 𑀢𑀸𑀦𑁂𑀯 𑀧𑀼𑀜𑁆𑀜𑀸𑀦𑀻𑀢𑀺 𑀢𑀸𑀦𑁂𑀯 𑀬𑀣𑀸𑀯𑀼𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀦𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀭𑀸𑀕𑀸𑀤𑀻𑀦𑀦𑁆𑀢𑀺 ¶ 𑀭𑀸𑀕𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀤𑁄𑀫𑀦𑀲𑁆𑀲𑀸𑀦𑀁. 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀭𑀸𑀕𑀸𑀤𑀻𑀦𑀁 𑀭𑀸𑀕𑀸𑀤𑀺𑀅𑀲𑁆𑀲𑀸𑀤𑀦𑀓𑀸𑀮𑁂𑀲𑀼 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀁 𑀭𑀸𑀕𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀏𑀯 𑀅𑀯𑀺𑀚𑁆𑀚𑀸𑀬 𑀬𑁄𑀚𑁂𑀢𑀩𑁆𑀩𑀁. 𑀅𑀲𑁆𑀲𑀸𑀤𑀦𑀜𑁆𑀘 𑀭𑀸𑀕𑁄, 𑀢𑀤𑀯𑀺𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀻𑀢𑀺 𑀅𑀲𑁆𑀲𑀸𑀤𑀦𑀯𑀘𑀦𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑀁 𑀅𑀯𑀺𑀚𑁆𑀚𑀁 𑀕𑀭𑀼𑀁 𑀓𑀭𑁄𑀦𑁆𑀢𑀻 𑀤𑀺𑀝𑁆𑀞𑀺 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀸𑀕𑀸𑀤𑀻𑀳𑀺 𑀘 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀯𑀼𑀢𑁆𑀢𑁂𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸𑀭𑀫𑁆𑀫𑀡𑀸𑀤𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀦 𑀆𑀤𑀻𑀦𑀯𑀤𑀲𑁆𑀲𑀺𑀦𑁄. 𑀅𑀯𑀺𑀚𑁆𑀚𑀸𑀬 𑀅𑀦𑀸𑀭𑀫𑁆𑀫𑀡𑀲𑁆𑀲, 𑀧𑀞𑀫𑀚𑀯𑀦𑀲𑁆𑀲 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀘𑀦𑁂𑀲𑀼 𑀅𑀯𑀼𑀢𑁆𑀢𑀲𑁆𑀲, 𑀯𑀼𑀢𑁆𑀢𑀲𑁆𑀲 𑀘 𑀲𑀩𑁆𑀩𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀆𑀳.

𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀫𑀢𑀺𑀓𑁆𑀓𑀫𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦.

𑁬𑁧𑁭. 𑀓𑀺𑀁 𑀧𑀦𑀸𑀬𑀦𑁆𑀢𑀺𑀆𑀤𑀺𑀦𑀸 𑀘𑁄𑀤𑀓𑀲𑁆𑀲 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀏𑀢𑁆𑀣 𑀲𑀫𑁆𑀪𑀯𑀦𑁆𑀢𑀺 𑀏𑀯𑀸𑀢𑀺 𑀅𑀯𑀥𑀸𑀭𑀡𑀁 𑀦 𑀬𑀼𑀚𑁆𑀚𑀢𑀺 ¶ , 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑀸𑀪𑀸𑀯𑁂 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀪𑀯𑀸𑀪𑀸𑀯𑀢𑁄. 𑀢𑀣𑀸 𑀲𑀗𑁆𑀔𑀸𑀭𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀅𑀜𑁆𑀜𑁂𑀲𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀲𑁆𑀲 𑀢𑀢𑁄 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀯𑀸𑀓𑁆𑀬𑀲𑁆𑀲 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀏𑀯 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀯𑀥𑀸𑀭𑀡𑁂 𑀕𑀬𑁆𑀳𑀫𑀸𑀦𑁂𑀧𑀺 𑀅𑀬𑀁 𑀤𑁄𑀲𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀮𑁄𑀪𑀸𑀤𑀺𑀓𑀫𑁆𑀫𑀦𑀺𑀤𑀸𑀦𑀉𑀧𑀸𑀤𑀸𑀦𑀯𑀢𑁆𑀣𑀸𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀸𑀤𑀬𑁄 𑀅𑀜𑁆𑀜𑁂𑀧𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺𑀬𑁂𑀯𑀸𑀢𑀺. 𑀢𑀢𑁆𑀣 𑀏𑀓𑀸𑀢𑀺 𑀅𑀲𑀳𑀸𑀬𑀸, 𑀓𑀸𑀭𑀡𑀦𑁆𑀢𑀭𑀦𑀺𑀭𑀧𑁂𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀧𑀺 𑀧𑀘𑁆𑀘𑀬𑀸 𑀲𑀳𑀓𑀸𑀭𑀺𑀓𑀸𑀭𑀡𑀪𑀽𑀢𑀸. 𑀤𑁄𑀲𑀫𑁂𑀢𑁆𑀣 𑀯𑀢𑁆𑀢𑀼𑀓𑀸𑀫𑁄 𑀘𑁄𑀤𑀓𑁄 𑀧𑀼𑀘𑁆𑀙𑀢𑀻𑀢𑀺 𑀜𑀢𑁆𑀯𑀸 𑀆𑀘𑀭𑀺𑀬𑁄 𑀆𑀳 ‘‘𑀓𑀺𑀁 𑀧𑀦𑁂𑀢𑁆𑀣𑀸’’𑀢𑀺. 𑀏𑀢𑁆𑀣 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀦𑁆𑀢𑀭𑁂𑀦 𑀭𑀳𑀺𑀢𑀪𑀸𑀯𑁂 𑀘 𑀲𑀳𑀺𑀢𑀪𑀸𑀯𑁂 𑀘 𑀓𑀺𑀁 𑀧𑀦 𑀯𑀢𑁆𑀢𑀩𑁆𑀩𑀁, 𑀅𑀲𑀫𑀢𑁆𑀢𑀸 𑀢𑁂 𑀘𑁄𑀤𑀦𑀸, 𑀅𑀯𑀲𑀺𑀝𑁆𑀞𑀜𑁆𑀘 𑀢𑀸𑀯 𑀓𑀣𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀤𑁄𑀲𑀧𑁆𑀧𑀲𑀗𑁆𑀕𑁄 𑀯𑀼𑀢𑁆𑀢𑁄. 𑀅𑀦𑀺𑀝𑁆𑀞𑁄 𑀳𑀺 𑀏𑀓𑀓𑀸𑀭𑀡𑀯𑀸𑀤𑁄 𑀲𑀩𑁆𑀩𑀢𑁆𑀣 𑀲𑀩𑁆𑀩𑀓𑀸𑀮𑀁 𑀲𑀫𑁆𑀪𑀯𑀸𑀧𑀢𑁆𑀢𑀺𑀢𑁄, 𑀏𑀓𑀲𑀤𑀺𑀲𑀸𑀲𑀪𑀸𑀯𑀸𑀧𑀢𑁆𑀢𑀺𑀢𑁄 𑀘.

𑀬𑀲𑁆𑀫𑀸 𑀏𑀓𑀁 𑀦 𑀏𑀓𑀢𑁄𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀧𑀸𑀭𑀺𑀲𑁂𑀲𑁂𑀦 𑀅𑀦𑁂𑀓𑀢𑁄 𑀅𑀦𑁂𑀓𑀫𑁂𑀯𑀸𑀢𑀺 𑀏𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑁂 𑀏𑀯 𑀧𑀓𑀸𑀭𑁂 𑀯𑀺𑀚𑁆𑀚𑀫𑀸𑀦𑁂 𑀏𑀓𑀳𑁂𑀢𑀼𑀨𑀮𑀤𑀻𑀧𑀦𑁂 𑀅𑀢𑁆𑀣𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀦 𑀦𑀼𑀧𑀧𑀚𑁆𑀚𑀢𑀺 𑀉𑀧𑀧𑀚𑁆𑀚𑀢𑀺𑀬𑁂𑀯. 𑀏𑀓𑀁 𑀨𑀮𑀁 𑀏𑀓𑀢𑁄 𑀦𑀢𑁆𑀣𑀺, 𑀅𑀦𑁂𑀓𑀫𑁆𑀧𑀺 𑀏𑀓𑀢𑁄 𑀦𑀢𑁆𑀣𑀺. 𑀅𑀦𑁂𑀓𑀢𑁄𑀧𑀺 𑀏𑀓𑀁 𑀨𑀮𑀁 𑀦𑁄 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀦𑁆𑀢𑀺 ¶ ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀓𑀳𑁂𑀢𑀼𑀤𑀻𑀧𑀦𑀁, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀓𑀨𑀮𑀤𑀻𑀧𑀦𑀦𑁆𑀢𑀺 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀁 𑀓𑀢𑀁.

𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲 𑀅𑀦𑀼𑀭𑀽𑀧𑀢𑁄. 𑀏𑀓𑀲𑁆𑀲𑁂𑀯 𑀳𑁂𑀢𑀼𑀦𑁄, 𑀨𑀮𑀲𑁆𑀲 𑀘 𑀤𑀻𑀧𑀦𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀯𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀢𑁄 𑀯𑀸. 𑀢𑀤𑀼𑀪𑀬𑀲𑁆𑀲 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀧𑀥𑀸𑀦𑀢𑀸, 𑀧𑀸𑀓𑀝𑀢𑀸, 𑀅𑀲𑀸𑀥𑀸𑀭𑀡𑀢𑀸 𑀘. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀢𑁂 𑀤𑁂𑀲𑁂𑀢𑀩𑁆𑀩𑁂 𑀅𑀢𑁆𑀣𑁂 𑀩𑀳𑀽𑀲𑀼𑀧𑀺 𑀧𑀭𑀺𑀬𑀸𑀬𑁂𑀲𑀼 𑀮𑀩𑁆𑀪𑀫𑀸𑀦𑁂𑀲𑀼 𑀬𑀣𑀸𑀭𑀼𑀘𑀺𑀢𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀸 𑀤𑁂𑀲𑀦𑀸𑀯𑀺𑀮𑀸𑀲𑀸𑀦𑀼𑀭𑀽𑀧𑀢𑀸. 𑀢𑀢𑁆𑀣 𑀧𑀦 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀬𑁂 𑀯𑁂𑀦𑁂𑀬𑁆𑀬𑀸 𑀩𑀼𑀚𑁆𑀛𑀦𑁆𑀢𑀺, 𑀢𑁂𑀦𑁂𑀯 𑀢𑁂𑀲𑀁 𑀩𑁄𑀥𑀦𑀁, 𑀲𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀢𑀸.

𑀬𑀣𑀸𑀨𑀲𑁆𑀲𑀁 ¶ 𑀯𑁂𑀤𑀦𑀸𑀯𑀯𑀢𑁆𑀣𑀸𑀦𑀢𑁄𑀢𑀺 ‘‘𑀲𑀼𑀔𑀯𑁂𑀤𑀦𑀻𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁧𑁨𑁯), ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁪; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀘 𑀲𑀼𑀔𑀯𑁂𑀤𑀦𑀻𑀬𑀨𑀲𑁆𑀲𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀅𑀦𑀼𑀭𑀽𑀧𑁂𑀦 𑀲𑀼𑀔𑀯𑁂𑀤𑀦𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀯𑁂𑀤𑀦𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀢𑁄. 𑀲𑀫𑀸𑀦𑁂𑀲𑀼𑀧𑀺 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀨𑀲𑁆𑀲𑀯𑀲𑁂𑀦 𑀲𑀼𑀔𑀸𑀤𑀺𑀯𑀺𑀧𑀭𑀺𑀬𑀸𑀬𑀸𑀪𑀸𑀯𑀢𑁄, 𑀲𑀫𑀸𑀦𑁂𑀲𑀼 𑀭𑀽𑀧𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀘𑀓𑁆𑀔𑀸𑀤𑀺𑀲𑀗𑁆𑀖𑀝𑁆𑀝𑀦𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀯𑀺𑀧𑀭𑀺𑀬𑀸𑀬𑀸𑀪𑀸𑀯𑀢𑁄, 𑀅𑀜𑁆𑀜𑀧𑀘𑁆𑀘𑀬𑀲𑀸𑀫𑀜𑁆𑀜𑁂𑀧𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀲𑁂𑀦 𑀲𑀼𑀔𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀻𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀺𑀲𑀗𑁆𑀓𑀭𑀸𑀪𑀸𑀯𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀨𑀲𑁆𑀲𑀲𑁆𑀲 𑀲𑀼𑀔𑀸𑀤𑀻𑀦𑀁 𑀅𑀯𑀺𑀧𑀭𑀻𑀢𑁄 𑀧𑀘𑁆𑀘𑀬𑀪𑀸𑀯𑁄 𑀏𑀯 𑀬𑀣𑀸𑀯𑁂𑀤𑀦𑀁 𑀨𑀲𑁆𑀲𑀯𑀯𑀢𑁆𑀣𑀸𑀦𑀁. 𑀓𑀸𑀭𑀡𑀨𑀮𑀯𑀺𑀲𑁂𑀲𑁂𑀦 𑀯𑀸 𑀨𑀮𑀓𑀸𑀭𑀡𑀯𑀺𑀲𑁂𑀲𑀦𑀺𑀘𑁆𑀙𑀬𑁄 𑀳𑁄𑀢𑀻𑀢𑀺 𑀉𑀪𑀬𑀢𑁆𑀣𑀸𑀧𑀺 𑀦𑀺𑀘𑁆𑀙𑀬𑁄 𑀧𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑁄.

𑀓𑀫𑁆𑀫𑀸𑀤𑀬𑁄𑀢𑀺 𑀓𑀫𑁆𑀫𑀆𑀳𑀸𑀭𑀉𑀢𑀼𑀆𑀤𑀬𑁄 𑀅𑀧𑀸𑀓𑀝𑀸 𑀲𑁂𑀫𑁆𑀳𑀧𑀝𑀺𑀓𑀸𑀭𑁂𑀦 𑀭𑁄𑀕𑀯𑀽𑀧𑀲𑀫𑀦𑀢𑁄. 𑀲𑁂𑀫𑁆𑀳𑀲𑁆𑀲 𑀫𑀦𑁆𑀤𑀪𑀸𑀯𑀸𑀤𑀺𑀦𑀸 𑀘 𑀲𑁂𑀫𑁆𑀳𑀁𑀬𑁂𑀯 𑀧𑀸𑀓𑀝𑀁 𑀓𑀸𑀭𑀡𑀁. 𑀅𑀬𑀫𑀺𑀥 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀤𑀻𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻𑀢𑀺 𑀯𑀘𑀦𑀢𑁄𑀢𑀺 ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 (𑀲𑀁. 𑀦𑀺. 𑁨.𑁫𑁩) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀢𑀡𑁆𑀳𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀦 𑀢𑀲𑁆𑀲𑀸𑀧𑀺 𑀅𑀯𑀺𑀚𑁆𑀚𑀸𑀬 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀆𑀲𑀯𑀲𑀫𑀼𑀤𑀬𑁄𑀢𑀺 𑀘 𑀯𑀘𑀦𑀢𑁄’’𑀢𑀺 𑀆𑀳 ¶ . 𑀢𑀡𑁆𑀳𑀸 𑀯𑀸 𑀘𑀢𑀼𑀭𑀼𑀧𑀸𑀤𑀸𑀦𑀪𑀽𑀢𑀸 𑀓𑀸𑀫𑀸𑀲𑀯𑀤𑀺𑀝𑁆𑀞𑀸𑀲𑀯𑀸 𑀘 𑀲𑀗𑁆𑀔𑀸𑀭𑀲𑁆𑀲 𑀓𑀸𑀭𑀡𑀦𑁆𑀢𑀺 𑀧𑀸𑀓𑀝𑀸 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑀸𑀢𑀺 𑀲𑀼𑀢𑁆𑀢𑀤𑁆𑀯𑀬𑁂𑀦𑀸𑀧𑀺 𑀅𑀯𑀺𑀚𑁆𑀚𑀸𑀬 𑀧𑀸𑀓𑀝𑀁 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄’’𑀢𑀺 (𑀲𑀁. 𑀦𑀺. 𑁨.𑁫𑁩) 𑀳𑀺 𑀯𑀘𑀦𑁂𑀦 𑀪𑀯𑀸𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀓𑀺𑀘𑁆𑀘𑀸 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀬 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀬𑀲𑁆𑀫𑀸 𑀅𑀯𑀺𑀤𑁆𑀯𑀸, 𑀢𑀲𑁆𑀫𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑁂 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 𑀅𑀯𑀺𑀤𑁆𑀤𑀲𑀼𑀪𑀸𑀯𑁄𑀯 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀔𑀻𑀡𑀸𑀲𑀯𑀲𑁆𑀲 𑀲𑀗𑁆𑀔𑀸𑀭𑀸𑀪𑀸𑀯𑀢𑁄, 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀓𑀸𑀭𑀡𑀸𑀦𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀻𑀢𑀺 ¶ 𑀧𑀼𑀜𑁆𑀜𑀪𑀯𑀸𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀦𑁂𑀯 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧; 𑀫𑀳𑀸𑀯. 𑁧; 𑀦𑁂𑀢𑁆𑀢𑀺. 𑁨𑁪) 𑀏𑀢𑁆𑀣 𑀧𑀦 𑀧𑀥𑀸𑀦𑀢𑁆𑀢𑀸, 𑀧𑀸𑀓𑀝𑀢𑁆𑀢𑀸, 𑀅𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀏𑀓𑁂𑀓𑀳𑁂𑀢𑀼𑀨𑀮𑀤𑀻𑀧𑀦𑀧𑀭𑀺𑀳𑀸𑀭𑀯𑀘𑀦𑁂𑀦 𑀲𑀩𑁆𑀩𑀢𑁆𑀣 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺𑀆𑀤𑀻𑀲𑀼 𑀩𑁄𑀥𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀥𑀫𑁆𑀫𑀲𑁆𑀲 𑀩𑁄𑀥𑀦𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁬𑁧𑁮. ‘‘𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀸𑀬𑀸’’𑀢𑀺 𑀏𑀢𑁂𑀦 𑀯𑀺𑀭𑀼𑀤𑁆𑀥𑀪𑀸𑀯𑀁, ‘‘𑀲𑀸𑀯𑀚𑁆𑀚𑀸𑀬𑀸’’𑀢𑀺 𑀏𑀢𑁂𑀦 𑀯𑀺𑀚𑀸𑀢𑀺𑀬𑀪𑀸𑀯𑀁 𑀅𑀯𑀺𑀚𑁆𑀚𑀸𑀬 𑀚𑁄𑀢𑁂𑀢𑀺. 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀳𑀺 𑀇𑀝𑁆𑀞𑀯𑀺𑀧𑀸𑀓𑀢𑀸𑀬, 𑀅𑀦𑀯𑀚𑁆𑀚𑀲𑀪𑀸𑀯𑀢𑀸𑀬 𑀘 𑀢𑀲𑁆𑀲𑀸 𑀯𑀺𑀭𑀼𑀤𑁆𑀥𑀸, 𑀯𑀺𑀚𑀸𑀢𑀺𑀬𑀸 𑀘𑀸𑀢𑀺. 𑀓𑀣𑀁 𑀦 𑀬𑀼𑀚𑁆𑀚𑀺𑀲𑁆𑀲𑀢𑀻𑀢𑀺𑀆𑀤𑀺 𑀲𑀫𑀸𑀥𑀸𑀦𑀁, 𑀢𑁂𑀦 𑀬𑁆𑀯𑀸𑀬𑀁 𑀏𑀓𑀦𑁆𑀢𑀸𑀦𑀺𑀝𑁆𑀞𑀨𑀮𑀢𑀸𑀤𑀺𑀳𑁂𑀢𑀼𑀧𑀤𑁂𑀲𑁄, 𑀢𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀸𑀬𑀁 𑀢𑀬𑀸 𑀘𑁄𑀤𑀦𑀸 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀓𑀢𑀸, 𑀲𑀸 𑀬𑀼𑀢𑁆𑀢𑀸 𑀯𑀺𑀧𑀸𑀓𑀁 𑀧𑀢𑀺. 𑀦 𑀳𑀺 𑀅𑀦𑀺𑀝𑁆𑀞𑀯𑁂𑀧𑀓𑁆𑀓𑀁 𑀓𑀸𑀭𑀡𑀁 𑀇𑀝𑁆𑀞𑀁 𑀨𑀮𑀢𑀺, 𑀇𑀝𑁆𑀞𑀯𑁂𑀧𑀓𑁆𑀓𑀁 𑀯𑀸 𑀅𑀦𑀺𑀝𑁆𑀞𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀮𑀓𑁆𑀔𑀡𑀥𑀫𑁆𑀫𑀸𑀦𑀁 𑀥𑀫𑁆𑀫𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀢𑁆𑀭 𑀘𑀸𑀬𑀁 𑀦𑀺𑀬𑀫𑁄 𑀦𑀢𑁆𑀣𑀺 𑀯𑀺𑀘𑀺𑀢𑁆𑀢𑀭𑀽𑀧𑀢𑁆𑀢𑀸 𑀢𑀲𑁆𑀲𑀸𑀢𑀺. 𑀢𑁂𑀦𑀸𑀳 ‘‘𑀯𑀺𑀭𑀼𑀤𑁆𑀥𑁄 𑀘𑀸’’𑀢𑀺𑀆𑀤𑀺.

𑀢𑀢𑁆𑀣 𑀥𑀫𑁆𑀫𑀸𑀦𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀞𑀸𑀦𑀦𑁆𑀢𑀺 𑀅𑀯𑀝𑁆𑀞𑀸𑀦𑀁. 𑀢𑀲𑁆𑀫𑀸 𑀞𑀸𑀦𑀯𑀺𑀭𑀼𑀤𑁆𑀥𑁄𑀢𑀺 𑀅𑀢𑁆𑀣𑀺𑀢𑀸𑀯𑀺𑀭𑀼𑀤𑁆𑀥𑁄. 𑀓𑁂𑀘𑀺 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀆𑀤𑀻𑀦𑀺𑀞𑀸𑀦𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 ‘‘𑀧𑀼𑀭𑀺𑀫𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀞𑀸𑀦𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄’’𑀢𑀺 𑀦𑀬𑀺𑀤𑀁 𑀏𑀓𑀦𑁆𑀢𑀺𑀓𑀁 𑀲𑀺𑀬𑀸. 𑀪𑀯𑀗𑁆𑀕𑀫𑁆𑀧𑀺 𑀳𑀺 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀚𑀯𑀦𑀁 𑀚𑀯𑀦𑀲𑁆𑀲, 𑀦 𑀘 𑀲𑀺𑀧𑁆𑀧𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀆𑀤𑀺𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀓𑀫𑁆𑀫𑀁 𑀭𑀽𑀧𑀲𑁆𑀲 𑀦𑀫𑀦𑀭𑀼𑀧𑁆𑀧𑀦𑀯𑀺𑀭𑁄𑀥𑀸, 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀸𑀤𑀺𑀯𑀺𑀭𑁄𑀥𑀸 𑀘 𑀲𑀪𑀸𑀯𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄 ¶ . 𑀔𑀻𑀭𑀸𑀤𑀻𑀦𑀺 𑀤𑀥𑀺𑀆𑀤𑀻𑀦𑀁 𑀫𑀥𑀼𑀭𑀫𑁆𑀩𑀺𑀮𑀭𑀲𑀸𑀤𑀺𑀲𑀪𑀸𑀯𑀯𑀺𑀭𑁄𑀥𑀸. 𑀅𑀯𑀺𑀚𑀸𑀦𑀦𑀓𑀺𑀘𑁆𑀘𑁄 𑀆𑀮𑁄𑀓𑁄 𑀯𑀺𑀚𑀸𑀦𑀦𑀓𑀺𑀘𑁆𑀘𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲. 𑀅𑀫𑀤𑀦𑀓𑀺𑀘𑁆𑀘𑀸 𑀘 𑀕𑀼𑀴𑀸𑀤𑀬𑁄 𑀫𑀤𑀦𑀓𑀺𑀘𑁆𑀘𑀲𑁆𑀲 𑀆𑀲𑀯𑀲𑁆𑀲.

𑀕𑁄𑀮𑁄𑀫𑀸𑀯𑀺𑀮𑁄𑀫𑀸𑀤𑀻𑀢𑀺𑀆𑀤𑀻𑀲𑀼 𑀕𑁄𑀮𑁄𑀫𑀸𑀯𑀺𑀮𑁄𑀫𑀸𑀦𑀺 𑀤𑀼𑀩𑁆𑀩𑀸𑀬, 𑀅𑀯𑀻𑀢𑀺 𑀘 𑀭𑀢𑁆𑀢𑀸 𑀏𑀴𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑀸𑀡𑀁 𑀲𑀭𑀲𑁆𑀲. 𑀤𑀥𑀺𑀢𑀺𑀮𑀧𑀺𑀝𑁆𑀞𑀕𑀼𑀴𑀸𑀦𑀺 𑀪𑀽𑀢𑀺𑀡𑀓𑀲𑁆𑀲. 𑀲𑁂𑀯𑀸𑀮𑀁 𑀢𑀡𑁆𑀟𑀼𑀮𑁂𑀬𑁆𑀬𑀓𑀲𑁆𑀲, 𑀔𑀭𑀯𑀴𑀯𑀸 𑀅𑀲𑁆𑀲𑀢𑀭𑀲𑁆𑀲𑀸𑀢𑀺 𑀏𑀯𑀫𑀸𑀤𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁄. 𑀬𑀲𑁆𑀫𑀸 𑀯𑀺𑀧𑀸𑀓𑀸 𑀏𑀯 𑀦, 𑀢𑀲𑁆𑀫𑀸 𑀤𑀼𑀓𑁆𑀔𑀯𑀺𑀧𑀸𑀓𑀸𑀬𑀧𑀺 ¶ 𑀅𑀯𑀺𑀚𑁆𑀚𑀸𑀬 𑀅𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀁 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀢𑁆𑀢𑀁 𑀦 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀢𑀤𑀯𑀺𑀧𑀸𑀓𑀢𑁆𑀢𑁂𑀧𑀺 𑀲𑀸𑀯𑀚𑁆𑀚𑀢𑀸𑀬 𑀢𑀤𑀯𑀺𑀭𑀼𑀤𑁆𑀥𑀸𑀦𑀁, 𑀢𑀁𑀲𑀤𑀺𑀲𑀸𑀦𑀜𑁆𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀫𑁂𑀯 𑀧𑀘𑁆𑀘𑀬𑁄, 𑀦 𑀇𑀢𑀭𑁂𑀲𑀦𑁆𑀢𑀺 𑀏𑀢𑀲𑁆𑀲 𑀧𑀲𑀗𑁆𑀕𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀭𑀼𑀤𑁆𑀥𑁄 𑀘𑀸𑀯𑀺𑀭𑀼𑀤𑁆𑀥𑁄 𑀘, 𑀲𑀤𑀺𑀲𑀸𑀲𑀤𑀺𑀲𑁄 𑀢𑀣𑀸. 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀲𑀺𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀇𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳.

𑁬𑁧𑁯. 𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀫𑀭𑀡𑀦𑁆𑀢𑀺 𑀘𑀼𑀢𑀺𑀁 𑀅𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀇𑀥 𑀘𑀼𑀢𑀺 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀪𑀯𑀸𑀤𑀻𑀲𑀼 𑀭𑀽𑀧𑀸𑀤𑀻𑀦𑀁 𑀔𑀦𑁆𑀥𑀸𑀦𑀁 𑀫𑀭𑀡𑀲𑀜𑁆𑀜𑀺𑀢𑁄 𑀘𑀭𑀺𑀫𑁄 𑀪𑁂𑀤𑁄𑀢𑀺 𑀬𑀸𑀣𑀸𑀯𑀢𑁄 𑀅𑀚𑀸𑀦𑀦𑁆𑀢𑁄. 𑀲𑀢𑁆𑀢𑀲𑁆𑀲 𑀲𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯. 𑀤𑁂𑀳𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀜𑁆𑀜𑁂𑀦 𑀓𑀸𑀬𑁂𑀦 𑀲𑀫𑀸𑀕𑀫𑁄.

𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀯𑀸𑀤𑀻𑀲𑀼 𑀔𑀦𑁆𑀥𑀸𑀦𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀦𑀯𑀲𑀭𑀻𑀭𑀧𑀸𑀢𑀼𑀪𑀸𑀯𑁄𑀢𑀺 𑀇𑀥 𑀚𑀺𑀡𑁆𑀡𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀓𑁆𑀔𑁂𑀧𑁂 𑀧𑀭𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀦𑀯𑀓𑀸𑀬𑀲𑁆𑀲 𑀉𑀧𑁆𑀧𑀸𑀤𑁄. 𑀬𑀣𑁂𑀓𑁂 𑀯𑀤𑀦𑁆𑀢𑀺 𑁋

‘‘𑀯𑀢𑁆𑀣𑀸𑀦𑀺 𑀚𑀺𑀡𑁆𑀡𑀸𑀦𑀺 𑀬𑀣𑀸 𑀧𑀳𑀸𑀬,

𑀦𑀯𑀸𑀦𑀺 𑀕𑀡𑁆𑀳𑀸𑀢𑀺 𑀦𑀭𑁄 𑀧𑀭𑀸𑀦𑀺;

𑀦𑀺𑀓𑁆𑀔𑀺𑀧𑁆𑀧 𑀤𑁂𑀳𑀁 𑀇𑀥 𑀚𑀺𑀡𑁆𑀡𑀫𑁂𑀯𑀁,

𑀕𑀡𑁆𑀳𑀸𑀢𑀺 𑀅𑀢𑁆𑀢𑀸𑀪𑀺𑀦𑀯𑀁 𑀲𑀼𑀔𑁂𑀲𑀻’’𑀢𑀺.

𑀅𑀬𑀁 𑀲𑀢𑁆𑀢𑁄𑀢𑀺 𑀅𑀬𑀫𑀢𑁆𑀢𑀸, 𑀬𑁄 𑀲𑀸𑀫𑀻, 𑀦𑀺𑀯𑀸𑀲𑀻, 𑀓𑀸𑀭𑀓𑁄, 𑀯𑁂𑀤𑀓𑁄 𑀘𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀢𑁆𑀢𑁄 ¶ 𑀫𑀭𑀢𑀺, 𑀲𑀢𑁆𑀢𑁄 𑀉𑀧𑀧𑀚𑁆𑀚𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀆𑀤𑀺-𑀲𑀤𑁆𑀤𑁂𑀦 𑀇𑀲𑁆𑀲𑀭𑀓𑀼𑀢𑁆𑀢𑀩𑁆𑀭𑀳𑁆𑀫𑀓𑀼𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀪𑀸𑀯𑀮𑀓𑁆𑀔𑀡𑀦𑁆𑀢𑀺’𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀁, 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀫𑁂𑀯 𑀯𑀸. 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀁. 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀅𑀢𑁆𑀢𑀦𑀺𑀬𑀢𑁄𑀢𑀺 𑀭𑀽𑀧𑀸𑀤𑀻𑀲𑀼 𑀏𑀓𑀘𑁆𑀘𑀁 𑀅𑀢𑁆𑀢𑀢𑁄, 𑀢𑀤𑀜𑁆𑀜𑀁 𑀅𑀢𑁆𑀢𑀦𑀺𑀬𑀢𑁄.

𑀅𑀢𑁆𑀢𑀸 𑀚𑀸𑀦𑀸𑀢𑀺 𑀯𑀸𑀢𑀺 𑀯𑀺𑀓𑀧𑁆𑀧𑁂𑀢𑀺 𑀓𑀸𑀧𑀺𑀮𑀸𑀤𑀬𑁄 𑀯𑀺𑀬. 𑀦 𑀚𑀸𑀦𑀸𑀢𑀺 𑀯𑀸𑀢𑀺 𑀓𑀸𑀡𑀸𑀤𑀸𑀚𑀻𑀯𑀺𑀓𑀸𑀤𑀬𑁄 𑀯𑀺𑀬. 𑀓𑀸𑀡𑀸𑀤𑁄𑀧𑀺 𑀳𑀺 𑀅𑀢𑁆𑀢𑀸 𑀲𑀪𑀸𑀯𑁂𑀦 𑀦 𑀚𑀸𑀦𑀸𑀢𑀺. 𑀬𑀤𑀸 𑀩𑀼𑀤𑁆𑀥𑀺𑀕𑀼𑀡𑁂𑀦 𑀲𑀁𑀬𑀼𑀚𑁆𑀚𑀢𑀺, 𑀢𑀤𑀸 𑀚𑀸𑀦𑀸𑀢𑀻𑀢𑀺 𑀇𑀘𑁆𑀙𑀢𑀺. 𑀲𑁄 𑀏𑀯 𑀓𑀭𑁄𑀢𑀺 𑀘 𑀓𑀸𑀭𑁂𑀢𑀺 𑀘𑀸𑀢𑀺 𑀬𑁄 𑀧𑀭𑀢𑁆𑀣 𑀲𑀼𑀔𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺, 𑀲𑁄 𑀏𑀯 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀲𑀬𑀁 𑀓𑀭𑁄𑀢𑀺, 𑀅𑀜𑁆𑀜𑀜𑁆𑀘 𑀓𑀸𑀭𑁂𑀢𑀺, 𑀦 𑀅𑀜𑁆𑀜𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀲𑀡𑁆𑀞𑀧𑁂𑀦𑁆𑀢𑀸𑀢𑀺 𑀤𑁆𑀯𑀺𑀅𑀡𑀼𑀓𑀸𑀤𑀺𑀉𑀧𑁆𑀧𑀸𑀤𑀦𑀯𑀲𑁂𑀦, 𑀇𑀘𑁆𑀙𑀸𑀯𑀲𑁂𑀦 𑀘 𑀲𑀫𑁆𑀧𑀸𑀤𑁂𑀦𑁆𑀢𑀸. 𑀲𑁄𑀢𑀺 𑀅𑀢𑁆𑀢𑀲𑀜𑁆𑀜𑀺𑀢𑁄 𑀲𑀢𑁆𑀢𑁄. 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀘𑀓𑁆𑀔𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀲𑀴𑀸𑀬𑀢𑀦𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀳𑁂𑀢𑀁 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀓𑀺𑀘𑁆𑀘𑀁 𑀅𑀢𑁆𑀢𑀦𑁄 𑀩𑁆𑀬𑀸𑀧𑀸𑀭𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀺𑀓𑁄 𑀯𑀺𑀫𑀼𑀬𑁆𑀳𑀢𑀻𑀢𑀺 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀻𑀦𑀁 𑀯𑀺𑀬 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑀁 𑀦𑀺𑀬𑀢𑀺, 𑀦𑀺𑀬𑀢𑀺𑀬𑀸, 𑀦𑀺𑀬𑀢𑀺 𑀏𑀯 𑀯𑀸 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀦𑀺𑀬𑀢𑀺𑀲𑀗𑁆𑀕𑀢𑀺, 𑀢𑀸𑀬 𑀪𑀸𑀯𑁂𑀲𑀼 𑀧𑀭𑀺𑀡𑀢𑀸 𑀫𑀦𑀼𑀲𑁆𑀲𑀤𑁂𑀯𑀯𑀺𑀳𑀗𑁆𑀕𑀸𑀤𑀺𑀪𑀸𑀯𑀁 𑀧𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸. 𑀦𑀺𑀬𑀢𑀺𑀬𑀸, 𑀲𑀗𑁆𑀕𑀢𑀺𑀬𑀸, 𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑁂𑀦 𑀘 𑀧𑀭𑀺𑀡𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑀁 𑀧𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸𑀢𑀺 𑀘 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀏𑀢𑁂𑀳𑀺 𑀘 𑀯𑀺𑀓𑀧𑁆𑀧𑀦𑁂𑀳𑀺 𑀅𑀯𑀺𑀚𑁆𑀚𑀸 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀲𑀢𑁆𑀢𑁂 𑀧𑀼𑀜𑁆𑀜𑀸𑀤𑀻𑀲𑀼 𑀲𑀗𑁆𑀔𑀸𑀭𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀢𑁆𑀢𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑁄’’𑀢𑀺𑀆𑀤𑀺. 𑀧𑀝𑀺𑀧𑀚𑁆𑀚𑀢𑀻𑀢𑀺 𑀉𑀧𑀲𑀗𑁆𑀓𑀫𑀢𑀺.

𑀅𑀧𑀭𑀺𑀡𑀸𑀬𑀓𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀓𑀓𑀮𑁆𑀬𑀸𑀡𑀫𑀺𑀢𑁆𑀢𑀭𑀳𑀺𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀯𑀲𑀸𑀦𑀁 𑀯𑀸 𑀜𑀸𑀡𑀁 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀁 𑀦𑀬𑀢𑀻𑀢𑀺 𑀧𑀭𑀺𑀡𑀸𑀬𑀓𑀁, 𑀢𑁂𑀦 𑀭𑀳𑀺𑀢𑁄 𑀅𑀧𑀭𑀺𑀡𑀸𑀬𑀓𑁄. 𑀥𑀫𑁆𑀫𑀁 𑀜𑀢𑁆𑀯𑀸𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑁂𑀦 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀓𑀁 𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀁 𑀜𑀢𑁆𑀯𑀸, 𑀫𑀕𑁆𑀕𑀜𑀸𑀡𑁂𑀦𑁂𑀯 𑀯𑀸 𑀲𑀩𑁆𑀩𑀥𑀫𑁆𑀫𑀧𑀯𑀭𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀜𑀢𑁆𑀯𑀸. 𑀢𑀁𑀚𑀸𑀦𑀦𑀸𑀬𑀢𑁆𑀢𑀁 𑀧𑀦 𑀲𑁂𑀲𑀲𑀘𑁆𑀘𑀢𑁆𑀢𑀬𑀸𑀪𑀺𑀲𑀫𑀬𑀁 ¶ 𑀲𑀫𑀸𑀦𑀓𑀸𑀮𑀫𑁆𑀧𑀺 𑀢𑀁 𑀧𑀼𑀭𑀺𑀫𑀓𑀸𑀮𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀲𑀩𑁆𑀩𑀲𑁄 𑀅𑀯𑀺𑀚𑁆𑀚𑀽𑀧𑀲𑀫𑀸 𑀉𑀧𑀲𑀦𑁆𑀢𑁄 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀁 𑀞𑀺𑀢𑁄 𑀬𑀸𑀯 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑀢𑁆𑀢𑀺, 𑀢𑀸𑀯 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸𑀬 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀦𑁆𑀢𑁄 𑀘𑀭𑀺𑀲𑁆𑀲𑀢𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀳𑀺 𑀯𑀺𑀳𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁨𑁦. 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀁 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀫𑁂𑀯 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 ‘‘𑀩𑀸𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺 𑀆𑀳. 𑀥𑀸𑀢𑀼𑀓𑀣𑀸𑀬𑀁 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑁂𑀦 𑀬𑁂 𑀥𑀫𑁆𑀫𑀸, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁂𑀦 𑀬𑁂 𑀥𑀫𑁆𑀫𑀸, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀬 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 ¶ 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀔𑀦𑁆𑀥𑁂𑀦, 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺, 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀏𑀓𑁂𑀦𑀸𑀬𑀢𑀦𑁂𑀦, 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁪𑁬𑁬) 𑀯𑀘𑀦𑀢𑁄 𑀲𑀩𑁆𑀩𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀓𑀢𑁄. 𑀬𑀤𑀺 𑀳𑀺 𑀏𑀢𑁆𑀣 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸 𑀲𑀧𑁆𑀧𑀤𑁂𑀲𑀸 𑀲𑀺𑀬𑀼𑀁, ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁩) 𑀇𑀫𑀲𑁆𑀲 𑀯𑀺𑀬 𑀯𑀺𑀲𑀚𑁆𑀚𑀦𑀁 𑀲𑀺𑀬𑀸. 𑀢𑀲𑁆𑀫𑀸 𑀢𑀢𑁆𑀣 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀸𑀤𑀬𑁄 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄 𑀘 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 (𑀯𑀺𑀪. 𑁨𑁪𑁩) 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑀗𑁆𑀔𑀸𑀭𑁄, 𑀅𑀓𑀼𑀲𑀮𑀲𑀗𑁆𑀔𑀸𑀭𑁄 𑀘 𑀯𑀼𑀢𑁆𑀢𑁄𑀢𑀺 𑀏𑀲𑁄 𑀏𑀯 𑀥𑀸𑀢𑀼𑀓𑀣𑀸𑀬𑀁 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀪𑀯𑁄 𑀧𑀦 𑀥𑀸𑀢𑀼𑀓𑀣𑀸𑀬𑀁 𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀕𑀳𑀺𑀢𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 ‘‘𑀓𑀫𑁆𑀫𑀪𑀯𑁄’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁬𑁬) 𑀦𑀬𑁂𑀦 𑀪𑀯𑁄 𑀉𑀤𑁆𑀥𑀝𑁄.

𑀮𑁄𑀓𑀺𑀬𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀩𑀸𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀻’’𑀢𑀺. 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀻𑀢𑀺 𑀬𑀣𑀸𑀅𑀥𑀺𑀓𑀢𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀯𑀝𑁆𑀝𑀓𑀣𑀸𑀬 𑀦 𑀬𑀼𑀚𑁆𑀚𑀦𑁆𑀢𑀻’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀥𑀸𑀢𑀼𑀓𑀣𑀸𑀬𑀁 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀥𑀸𑀢𑀼. 𑁩𑁬𑁨) 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀫𑁆𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺? 𑀢𑀁 𑀬𑀣𑀸𑀥𑀫𑁆𑀫𑀲𑀸𑀲𑀦𑀢𑁆𑀢𑀸 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀧𑀸𑀓𑀢𑁆𑀢𑀺𑀓𑁂 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁩) 𑀯𑀺𑀬 𑀅𑀦𑀯𑀲𑁂𑀲𑀯𑀺𑀧𑀸𑀓𑀥𑀫𑁆𑀫𑀲𑀗𑁆𑀕𑀡𑁆𑀳𑀦𑀯𑀲𑁂𑀦 ¶ 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀧𑀦 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸𑀢𑀺 𑀢𑀢𑁆𑀣 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀩𑁆𑀩𑀸. 𑀢𑀲𑁆𑀫𑀸 𑀢𑀤𑀢𑁆𑀣𑀲𑀁𑀯𑀡𑁆𑀡𑀦𑀸𑀢𑀺 𑀓𑀢𑁆𑀯𑀸 𑀧𑀯𑀢𑁆𑀢𑀺𑀓𑀣𑀸𑀬𑀁 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀯𑀝𑁆𑀝𑀓𑀣𑀸𑀬 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀻’’𑀢𑀺.

𑀬𑀣𑀸 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑁂 𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 ‘‘𑀉𑀧𑀘𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀺𑀧𑀸𑀓𑀤𑀸𑀦𑀬𑁄𑀕𑁆𑀬𑀫𑁂𑀯 𑀲𑀗𑁆𑀔𑀸𑀭𑀁 𑀕𑀡𑁆𑀳𑀦𑁆𑀢𑁄 ‘‘𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂’’𑀢𑀺 𑀆𑀳. 𑀳𑁂𑀢𑀼 𑀦𑀸𑀫 𑀩𑁆𑀬𑀢𑀺𑀭𑁂𑀓𑀧𑁆𑀧𑀥𑀸𑀦𑀦𑁆𑀢𑀺 𑀅𑀪𑀸𑀯-𑀕𑁆𑀕𑀳𑀡𑀁, 𑀢𑁂𑀦 𑀓𑀫𑁆𑀫𑁂 𑀲𑀢𑀺 𑀪𑀸𑀯𑀢𑁄, 𑀅𑀲𑀢𑀺 𑀅𑀪𑀸𑀯𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ¶ . 𑀬𑀣𑀸 𑀧𑀦𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑀸 𑀦 𑀲𑀺𑀤𑁆𑀥𑀸, 𑀦 𑀏𑀯𑀁 𑀯𑀺𑀧𑀸𑀓𑀪𑀸𑀯𑁄. 𑀲𑁄 𑀧𑀦 𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀧𑀸𑀓𑀁𑀳𑁂𑀢’’𑀦𑁆𑀢𑀺. 𑀢𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑀸𑀓𑀪𑀸𑀯𑁂𑀦 𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁆𑀢𑀁 𑀲𑀸𑀥𑁂𑀢𑀺. 𑀢𑀲𑁆𑀲 𑀧𑀦 𑀲𑀸𑀥𑀦𑀢𑁆𑀣𑀁 ‘‘𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀯𑀺𑀧𑀸𑀓𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀯𑀺𑀧𑀸𑀓𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑀤𑀺 𑀓𑀫𑁆𑀫𑀦𑀺𑀭𑀧𑁂𑀓𑁆𑀔𑁄 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀩𑁆𑀭𑀳𑁆𑀫𑀢𑁆𑀢𑀁 𑀉𑀧𑀕𑀢𑀸𑀦𑀁 𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑀸𑀦𑀺 𑀫𑀳𑀸𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀅𑀦𑁄𑀓𑀸𑀲𑁂 𑀞𑀺𑀢𑀸𑀦𑀫𑁆𑀧𑀺. 𑀯𑀺𑀧𑀸𑀓𑀸𑀦𑀻𑀢𑀺 𑀯𑀺𑀜𑁆𑀜𑀸𑀡𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀲𑀩𑁆𑀩𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀔𑀸𑀭𑀸 𑀩𑀳𑀽 𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀪𑁂𑀤𑀢𑁄, 𑀯𑀺𑀜𑁆𑀜𑀸𑀡𑀸𑀦𑀺 𑀘 𑀩𑀳𑀽𑀦𑀺 𑀩𑀸𑀢𑁆𑀢𑀺𑀁𑀲𑀯𑀺𑀥𑀢𑁆𑀢𑀸, 𑀦 𑀘 𑀲𑀩𑁆𑀩𑀢𑁄 𑀲𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀓𑀢𑀭𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀓𑀢𑀭𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑁂’’𑀢𑀺. ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀘 𑀇𑀤𑀁 𑀯𑀺𑀜𑁆𑀜𑀸𑀡𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀫𑀁 𑀔𑀦𑁆𑀥𑀦𑀺𑀤𑁆𑀤𑁂𑀲𑁂𑀧𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁫𑁧 𑀆𑀤𑀬𑁄) 𑀇𑀫𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀁 𑀧𑀦 𑀅𑀢𑀺𑀲𑀁𑀔𑀺𑀢𑁆𑀢𑀁, 𑀦 𑀘 𑀢𑀢𑁆𑀣 𑀦𑁂𑀲𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑀸 𑀯𑀺𑀪𑀸𑀯𑀺𑀢𑀸𑀢𑀺 𑀢𑀁 𑀧𑀯𑀢𑁆𑀢𑀺𑀬𑀁, 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀪𑀯𑀸𑀤𑀻𑀲𑀼 𑀧𑀯𑀢𑁆𑀢𑀦𑀸𑀓𑀸𑀭𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀦𑁄𑀯𑀺𑀜𑁆𑀜𑀸𑀡𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀽𑀫𑁆𑀫𑀁. 𑀫𑀳𑀸𑀯𑀺𑀧𑀸𑀓𑀸𑀦𑀻𑀢𑀺 𑀯𑀺𑀜𑁆𑀜𑀸𑀡𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀫𑀳𑀸𑀯𑀺𑀧𑀸𑀓𑀸𑀢𑀺 𑀧𑀦 𑀧𑀸𑀞𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁬𑁨𑁧. 𑀬𑀁𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀢𑀺 𑀬𑀲𑁆𑀲 𑀬𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦. 𑀬𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 ‘‘𑀬𑀁 𑀬𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀁 𑀉𑀪𑀬𑀢𑁆𑀣 𑀆𑀫𑁂𑀟𑀺𑀢𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. ‘‘𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑀪𑀸𑀯𑁂 𑀯𑀺𑀜𑁆𑀜𑀸𑀡𑀲𑁆𑀲 𑀲𑀩𑁆𑀪𑀸𑀯𑀫𑀢𑁆𑀢𑀁 𑀧𑀯𑁂𑀤𑀺𑀢𑀁, 𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳 ¶ . 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀅𑀦𑀺𑀝𑁆𑀞𑀭𑀽𑀧𑀸𑀤𑀺𑀆𑀧𑀸𑀣𑀕𑀫𑀦𑁂 𑀅𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 ‘‘𑀇𑀫𑀸𑀦𑀺 𑀢𑁂𑀭𑀲…𑀧𑁂… 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑁄𑀓𑀸𑀭𑁄 𑀯𑀺𑀢𑁆𑀣𑀸𑀭𑁄 𑀏𑀢𑁆𑀣𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑁄, 𑀲𑁄 𑀏𑀯 𑀪𑀯𑁄, 𑀏𑀢𑀲𑁆𑀫𑀺𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀳𑁄𑀢𑀺 𑀳𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀸𑀦𑀫𑁆𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄’’𑀢𑀺. 𑀅𑀣 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑁂𑀳𑀺 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀭𑀻𑀬𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑁄, 𑀲𑁄 𑀏𑀯 𑀪𑀯𑁄𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀺𑀬.

‘‘𑀧𑀯𑀢𑁆𑀢𑀺𑀬𑀜𑁆𑀜𑁂𑀯 ¶ 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁.

‘‘𑀬𑁂𑀪𑀼𑀬𑁆𑀬𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀯𑀲𑀸𑀦𑁂’’𑀢𑀺 𑀇𑀤𑀁 𑀧𑀝𑀺𑀖𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄𑀢𑀺 𑀓𑁂𑀘𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀘𑀓𑁆𑀔𑀼𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄. 𑀇𑀝𑁆𑀞𑀁 𑀘𑁂 𑀆𑀭𑀫𑁆𑀫𑀡𑀁, 𑀲𑁄𑀫𑀦𑀲𑁆𑀲𑀢𑀤𑀸𑀭𑀫𑁆𑀫𑀡𑀁 𑀦 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀧𑀭𑁂, 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀫𑁆𑀧𑀺 𑀲𑁄𑀫𑀦𑀲𑁆𑀲𑀢𑀤𑀸𑀭𑀫𑁆𑀫𑀡𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀸𑀚𑀯𑀦𑀸𑀦𑀦𑁆𑀢𑀭𑀫𑁂𑀯 𑀳𑀺 𑀲𑁄𑀫𑀦𑀲𑁆𑀲𑀢𑀤𑀸𑀭𑀫𑁆𑀫𑀡𑀁 𑀦 𑀇𑀘𑁆𑀙𑀦𑁆𑀢𑀺.

𑀬𑀲𑁆𑀫𑀸 𑀧𑀦 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀘 𑀓𑀤𑀸𑀘𑀺 𑀅𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀚𑀯𑀦𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸 𑀢𑀢𑁆𑀣 𑀏𑀓𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀓𑀺𑀁 𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫 𑀚𑀯𑀦𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀓𑀺𑀘𑁆𑀘𑀁, 𑀢𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁂 𑀢𑀣𑀸 𑀆𑀲𑀦𑁆𑀦𑀪𑁂𑀤𑁂 𑀆𑀭𑀫𑁆𑀫𑀡𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 ‘‘𑀲𑀓𑀺𑀁 𑀯𑀸’’𑀢𑀺 𑀇𑀤𑀁 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀸𑀤𑀺 𑀯𑀺𑀬 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀧𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑁫𑁦) 𑀏𑀢𑁆𑀣 𑀳𑀺 𑀯𑀸-𑀲𑀤𑁆𑀤𑀲𑁆𑀲 𑀅𑀪𑀸𑀯𑀸 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑁂𑀦 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀬𑀼𑀚𑁆𑀚𑀢𑀺. ‘‘𑀦𑀺𑀭𑀦𑁆𑀢𑀭𑀁 𑀢𑀺𑀭𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀸’’𑀢𑀺 𑀇𑀥 𑀧𑀦 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀲𑀓𑀺𑀁 𑀏𑀯 𑀘 𑀓𑀤𑀸𑀘𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀲𑀓𑀺𑀁 𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀲𑀓𑀺𑀁 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀘𑀸𑀭𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀧𑀦 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑁂 𑀤𑁆𑀯𑁂 𑀏𑀯 𑀘𑀺𑀢𑁆𑀢𑀯𑀸𑀭𑀸 𑀆𑀕𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀦𑁆𑀢𑀺 𑀯𑀺𑀧𑀸𑀓𑀓𑀣𑀸𑀬𑀁 𑀩𑀮𑀯𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 𑀤𑁆𑀯𑁂𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀯𑀸𑀭𑀸 𑀯𑀼𑀢𑁆𑀢𑀸 ¶ . 𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀇𑀥𑀸𑀧𑀺 𑀯𑀼𑀢𑁆𑀢𑀁 ‘‘𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀧𑀦 𑀢𑀤𑀸𑀭𑀫𑁆𑀫𑀡𑁂 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑀸 𑀆𑀕𑀢𑀸’’𑀢𑀺. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀅𑀦𑀺𑀬𑀢𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀤𑁆𑀯𑀸𑀭𑀁 𑀅𑀦𑀸𑀫𑀲𑀺𑀢𑁆𑀯𑀸 𑀏𑀯 𑀯𑀼𑀢𑁆𑀢𑀁, 𑀢𑀁 𑀅𑀦𑀦𑁆𑀢𑀭𑀁 𑀧𑀭𑀢𑁄 𑀯𑀼𑀢𑁆𑀢𑀲𑀳𑁂𑀢𑀼𑀓𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀁 𑀲𑀤𑀺𑀲𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀅𑀳𑁂𑀢𑀼𑀓𑀤𑁆𑀯𑀬𑀸𑀤𑀻𑀦𑀜𑁆𑀳𑀺 𑀪𑀯𑀗𑁆𑀕𑀪𑀽𑀢𑀸𑀦𑀁 𑀲𑀬𑀫𑁂𑀯 𑀤𑁆𑀯𑀸𑀭𑀢𑁆𑀢𑀸, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀪𑀽𑀢𑀸𑀦𑀜𑁆𑀘 𑀪𑀯𑀗𑁆𑀕𑀲𑀗𑁆𑀔𑀸𑀢𑁂𑀦, 𑀅𑀜𑁆𑀜𑁂𑀦 𑀘 𑀤𑁆𑀯𑀸𑀭𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀦𑀺𑀬𑀢𑀁, 𑀅𑀦𑀺𑀬𑀢𑀁 𑀯𑀸 𑀤𑁆𑀯𑀸𑀭𑀁 𑀏𑀢𑁂𑀲𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀅𑀳𑁂𑀢𑀼𑀓𑀤𑁆𑀯𑀬𑀲𑁆𑀲 𑀧𑀦 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀪𑀽𑀢𑀲𑁆𑀲 𑀤𑁆𑀯𑀸𑀭𑀁 𑀮𑀩𑁆𑀪𑀢𑀺, 𑀢𑀜𑁆𑀘 𑀅𑀦𑀺𑀬𑀢𑀦𑁆𑀢𑀺 𑀢𑀫𑁆𑀧𑀺 𑀕𑀡𑁆𑀳𑀦𑁆𑀢𑁄 ‘‘𑀅𑀦𑀺𑀬𑀢𑀤𑁆𑀯𑀸𑀭𑀸𑀭𑀫𑁆𑀫𑀡𑀝𑁆𑀞𑀸𑀦𑀓𑀺𑀘𑁆𑀘𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀆𑀳. 𑀢𑁂𑀦𑁂𑀯 𑀘𑁂𑀢𑁆𑀣 𑀫𑀳𑀸𑀯𑀺𑀧𑀸𑀓𑀸𑀦𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀪𑀽𑀢𑀸𑀦𑀁 𑀤𑁆𑀯𑀸𑀭𑀁 𑀮𑀩𑁆𑀪𑀢𑀻𑀢𑀺 𑀢𑀢𑁆𑀣𑀸𑀧𑀺 𑀤𑁆𑀯𑀸𑀭𑀕𑁆𑀕𑀳𑀡𑀁 𑀓𑀢𑀁.

𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀧𑀯𑀢𑁆𑀢𑁄 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀢𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀭𑀽𑀧𑀸𑀯𑀘𑀭𑀸𑀦𑀁 𑀦𑀺𑀬𑀢𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀇𑀢𑀭𑀸𑀦𑀺 𑀆𑀭𑀼𑀧𑁆𑀧𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺. 𑀦𑀺𑀬𑀢𑀁 𑀅𑀯𑀢𑁆𑀣𑀼𑀓𑀸𑀦𑀻𑀢𑀺 𑀦𑀺𑀬𑀢𑀸𑀯𑀢𑁆𑀣𑀼𑀓𑀸𑀦𑀺. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀤𑀻𑀲𑀼𑀬𑁂𑀯 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑀢𑁄 𑀦𑀺𑀬𑀢𑀸𑀭𑀫𑁆𑀫𑀡𑀸𑀦𑀺. 𑀢𑀢𑁆𑀭𑀸𑀢𑀺 𑀧𑀯𑀢𑁆𑀢𑀺𑀬𑀁. 𑀅𑀲𑁆𑀲𑀸𑀢𑀺 𑀩𑀸𑀢𑁆𑀢𑀺𑀁𑀲𑀯𑀺𑀥𑀲𑁆𑀲 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲. 𑀢𑁂 𑀢𑁂 𑀲𑀗𑁆𑀔𑀸𑀭𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀲𑀗𑁆𑀔𑀸𑀭𑀸. 𑀓𑀫𑁆𑀫𑀧𑀘𑁆𑀘𑀬𑁂𑀦𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑀸𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦.

𑁬𑁨𑁨. 𑀏𑀯𑀁 𑀧𑀯𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀅𑀦𑀼𑀭𑀽𑀧𑁂𑀦 𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑁂𑀦. 𑀢𑀁 𑀧𑀦 𑀅𑀦𑀼𑀭𑀽𑀧𑀢𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀪𑀯𑀦𑁆𑀢𑀭𑁂𑀦 𑀪𑀯𑀦𑁆𑀢𑀭𑀲𑁆𑀲 𑀲𑀦𑁆𑀥𑀸𑀦𑀁 𑀇𑀥 𑀧𑀝𑀺𑀲𑀦𑁆𑀥𑀻𑀢𑀺 𑀢𑀁 𑀅𑀘𑀺𑀢𑁆𑀢𑀓𑀫𑁆𑀧𑀺 𑀅𑀢𑁆𑀣𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀓𑀢𑀺 𑀧𑀝𑀺𑀲𑀦𑁆𑀥𑀺𑀬𑁄’’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸𑀧𑀺 ‘‘𑀓𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀸 𑀓𑀢𑀸. ‘‘𑀓𑁂𑀦 𑀓𑀢𑁆𑀣𑀸’’𑀢𑀺 𑀓𑁂𑀦 𑀘𑀺𑀢𑁆𑀢𑁂𑀦 𑀓𑀲𑁆𑀫𑀺𑀁 𑀪𑀯𑁂.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀲𑀼. 𑀓𑀼𑀲𑀮𑀯𑀺𑀧𑀸𑀓𑀸𑀬 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 ¶ 𑀲𑀫𑁆𑀩𑀦𑁆𑀥𑁄. 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀻𑀢𑀺 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺 𑀯𑀺𑀲𑁂𑀲𑀦𑀁. 𑀦𑀧𑀼𑀁𑀲𑀓𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 ¶ 𑀫𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀓𑁂𑀘𑀺 𑀧𑀦 𑀏𑀓𑀘𑁆𑀘𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀅𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸 𑀳𑀼𑀢𑁆𑀯𑀸 𑀣𑁄𑀓𑀁 𑀯𑀺𑀘𑀸𑀭𑀡𑀧𑀓𑀢𑀺𑀓𑀸𑀧𑀺 𑀳𑁄𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀢𑀸𑀤𑀺𑀲𑀸𑀦𑀫𑁆𑀧𑀺 𑀇𑀥 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑁄𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑀸𑀲𑀢𑁄, 𑀅𑀲𑀼𑀓𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀅𑀲𑀼𑀓𑀁 𑀆𑀭𑀫𑁆𑀫𑀡𑀦𑁆𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑁂𑀲𑀸𑀦𑀦𑁆𑀢𑀺 𑀭𑀽𑀧𑀸𑀯𑀘𑀭𑀸 𑀧𑀜𑁆𑀘, 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀸 𑀤𑁆𑀯𑁂𑀢𑀺 𑀇𑀫𑀸𑀲𑀁 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀝𑀺𑀲𑀦𑁆𑀥𑀻𑀦𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀘𑀼𑀢𑀺𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺 𑀧𑀝𑀺𑀲𑀦𑁆𑀥𑀺𑀆𑀭𑀫𑁆𑀫𑀡𑁂 𑀏𑀯 𑀧𑀯𑀢𑁆𑀢𑀦𑀢𑁄. 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀯𑀲𑁂𑀦 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑁂𑀲𑀼.

𑁬𑁨𑁩. 𑀢𑀸𑀦𑀻𑀢𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀓𑀫𑁆𑀫𑀸𑀦𑀺. 𑀅𑀲𑁆𑀲𑀸𑀢𑀺 𑀆𑀲𑀦𑁆𑀦𑀫𑀭𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀑𑀮𑀫𑁆𑀩𑀦𑁆𑀢𑀻𑀢𑀺 𑀲𑀸𑀬𑀦𑁆𑀳𑁂 𑀫𑀳𑀦𑁆𑀢𑀸𑀦𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀯𑀺𑀬 𑀪𑀽𑀫𑀺𑀬𑀁 𑀢𑀲𑁆𑀲 𑀘𑀺𑀢𑁆𑀢𑁂 𑀅𑀯𑀮𑀫𑁆𑀩𑀦𑁆𑀢𑀺 𑀉𑀧𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂𑀢𑀺 𑀢𑀲𑁆𑀫𑀺𑀁 𑀘𑀼𑀢𑀺𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑀫𑀢𑁆𑀢𑁂 𑀢𑀲𑁆𑀲 𑀦𑀺𑀭𑁄𑀥𑀲𑀫𑀦𑀦𑁆𑀢𑀭𑀫𑁂𑀯. 𑀢𑀤𑁂𑀯𑀸𑀢𑀺 𑀢𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀚𑀯𑀦𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀪𑀽𑀢𑀁. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀻𑀲𑀼 𑀓𑀺𑀮𑁂𑀲𑁂𑀲𑀼 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀲𑁆𑀯𑁂𑀯 𑀓𑀫𑁆𑀫𑀸𑀤𑀺𑀦𑁄 𑀉𑀧𑀝𑁆𑀞𑀸𑀦𑀁, 𑀢𑀜𑁆𑀘 𑀆𑀭𑀩𑁆𑀪 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀪𑀯𑀦𑁆𑀢𑀭𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢’’𑀦𑁆𑀢𑀺. 𑀲𑀦𑁆𑀢𑀸𑀦𑁂 𑀳𑀺 𑀯𑀺𑀦𑀸𑀫𑀺𑀢𑁂 𑀢𑀤𑁂𑀓𑀤𑁂𑀲𑀪𑀽𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀯𑀺𑀦𑀸𑀫𑀺𑀢𑀫𑁂𑀯 𑀳𑁄𑀢𑀺, 𑀦 𑀘 𑀏𑀓𑀤𑁂𑀲𑀯𑀺𑀦𑀸𑀫𑀺𑀢𑀪𑀸𑀯𑁂𑀦 𑀯𑀺𑀦𑀸 𑀲𑀦𑁆𑀢𑀸𑀦𑀲𑁆𑀲 𑀯𑀺𑀦𑀸𑀫𑀺𑀢𑀢𑀸 𑀅𑀢𑁆𑀣𑀻𑀢𑀺. 𑀲𑀩𑁆𑀩𑀢𑁆𑀣 𑀧𑀦 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀦𑀺𑀦𑁆𑀦𑀸𑀬 𑀘𑀼𑀢𑀺𑀬𑀸 𑀧𑀼𑀭𑀺𑀫𑀚𑀯𑀦𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀇𑀢𑀭𑀸𑀬 𑀘 𑀓𑀼𑀲𑀮𑀸𑀦𑀻𑀢𑀺 𑀦𑀺𑀘𑁆𑀙𑀺𑀦𑀦𑁆𑀢𑀺. ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁄𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀉𑀧𑀧𑀚𑁆𑀚𑁂𑀬𑁆𑀬 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 (𑀲𑀁. 𑀦𑀺. 𑁪.𑁨𑁩𑁫) 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀓𑀼𑀲𑀮𑀁 𑀤𑀼𑀕𑁆𑀕𑀢𑀺𑀬𑀁, 𑀓𑀼𑀲𑀮𑀜𑁆𑀘 𑀲𑀼𑀕𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺. 𑀅𑀭𑀳𑀢𑁄 𑀧𑀦 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀪𑀯𑀼𑀲𑁆𑀲𑀼𑀓𑁆𑀓𑀢𑀸𑀬 𑀓𑀫𑁆𑀫𑀸𑀤𑀺𑀦𑀺𑀫𑀺𑀢𑁆𑀢𑀁 𑀦 𑀉𑀧𑀝𑁆𑀞𑀳𑀢𑀺, 𑀢𑀢𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀅𑀮𑀤𑁆𑀥𑀲𑀳𑀸𑀬𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀁 𑀦 𑀚𑀦𑁂𑀢𑀺.

𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀫𑁆𑀫𑀯𑀲𑁂𑀦𑀸𑀢𑀺 𑀧𑀸𑀧𑀓𑀫𑁆𑀫𑀯𑀲𑁂𑀦, 𑀢𑀤𑀼𑀧𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀭𑀓𑀸𑀤𑀻𑀲𑀼 𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓’’𑀦𑁆𑀢𑀺 𑀇𑀤𑀁 𑀢𑀁𑀲𑀤𑀺𑀲𑀢𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀦 ¶ 𑀳𑀺 𑀲𑁄 𑀏𑀯 𑀦𑀺𑀭𑀬𑀕𑁆𑀕𑀺𑀯𑀡𑁆𑀡𑀸𑀤𑀺 𑀢𑀤𑀸 𑀢𑀲𑁆𑀲 ¶ 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺. 𑀢𑀢𑁆𑀣 𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀢𑁆𑀢𑀭𑀡𑀻𑀲𑀺𑀫𑁆𑀩𑀮𑀺𑀅𑀲𑀺𑀧𑀢𑁆𑀢𑀯𑀦𑀸𑀤𑀺𑀯𑀡𑁆𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀭𑀓𑀸𑀤𑀻𑀲𑀽𑀢𑀺 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀦𑀺𑀩𑀤𑁆𑀥𑀲𑀜𑁆𑀘𑀭𑀡𑀝𑁆𑀞𑀸𑀦𑀧𑀭𑀺𑀬𑀸𑀧𑀦𑁆𑀦𑀯𑀡𑁆𑀡𑀁. 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀓𑀫𑁆𑀫𑀩𑀮𑁂𑀦 𑀉𑀧𑀝𑁆𑀞𑀸𑀧𑀺𑀢𑀯𑀡𑁆𑀡𑀸𑀬𑀢𑀦𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀬, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀯𑀺𑀬 𑀘 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺. 𑀏𑀓𑀁 𑀆𑀯𑀚𑁆𑀚𑀦𑀁, 𑀧𑀜𑁆𑀘 𑀚𑀯𑀦𑀸𑀦𑀺, 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺 𑀢𑀻𑀡𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺.

𑀭𑀸𑀕𑀸𑀤𑀺𑀳𑁂𑀢𑀼𑀪𑀽𑀢𑀁 𑀳𑀻𑀦𑀫𑀸𑀭𑀫𑁆𑀫𑀡𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁 𑀅𑀦𑀺𑀝𑁆𑀞𑀫𑀸𑀭𑀫𑁆𑀫𑀡𑀫𑀸𑀳. 𑀢𑀫𑁆𑀧𑀺 𑀳𑀺 𑀲𑀗𑁆𑀓𑀧𑁆𑀧𑀦𑀯𑀲𑁂𑀦 𑀭𑀸𑀕𑀲𑁆𑀲𑀸𑀧𑀺 𑀳𑁂𑀢𑀼 𑀳𑁄𑀢𑀻𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀚𑀦𑀓𑀓𑀫𑁆𑀫𑀲𑀳𑀚𑀸𑀢𑀸𑀦𑀁 𑀯𑀸 𑀢𑀁𑀲𑀤𑀺𑀲𑀸𑀲𑀦𑁆𑀦𑀘𑀼𑀢𑀺𑀚𑀯𑀦𑀘𑁂𑀢𑀦𑀸𑀲𑀳𑀚𑀸𑀢𑀸𑀦𑀜𑁆𑀘 𑀭𑀸𑀕𑀸𑀤𑀻𑀦𑀁 𑀳𑁂𑀢𑀼𑀪𑀸𑀯𑁄 𑀏𑀯 𑀳𑀻𑀦𑀢𑀸. 𑀢𑀜𑁆𑀳𑀺 𑀧𑀘𑁆𑀙𑀸𑀦𑀼𑀢𑀸𑀧𑀚𑀦𑀓𑀓𑀫𑁆𑀫𑀸𑀦𑀫𑀸𑀭𑀫𑁆𑀫𑀡𑀁 𑀓𑀫𑁆𑀫𑀯𑀲𑁂𑀦 𑀅𑀦𑀺𑀝𑁆𑀞𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀪𑀯𑁂𑀬𑁆𑀬. 𑀅𑀜𑁆𑀜𑀣𑀸 𑀘 𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀅𑀓𑀼𑀲𑀮𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁄 𑀦 𑀪𑀯𑁂𑀬𑁆𑀬. 𑀦 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑁄 𑀇𑀝𑁆𑀞𑀸𑀭𑀫𑁆𑀫𑀡𑁄 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺.

𑀧𑀜𑁆𑀘𑀤𑁆𑀯𑀸𑀭𑁂 𑀘 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀆𑀲𑀦𑁆𑀦𑀓𑀢𑀓𑀫𑁆𑀫𑀸𑀭𑀫𑁆𑀫𑀡𑀲𑀦𑁆𑀢𑀢𑀺𑀬𑀁 𑀉𑀧𑁆𑀧𑀦𑁆𑀦𑀁, 𑀢𑀁𑀲𑀤𑀺𑀲𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀆𑀭𑀫𑁆𑀫𑀡𑀽𑀧𑀝𑁆𑀞𑀸𑀧𑀓𑀁, 𑀢𑀤𑁂𑀯 𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀪𑀯𑁂𑀬𑁆𑀬. 𑀦 𑀘 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀘𑀸𑀭𑀪𑀽𑀢𑀸𑀦𑀺 𑀯𑀺𑀬, 𑀏𑀢𑀲𑁆𑀫𑀺𑀁 𑀢𑀬𑀸 𑀧𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀸𑀦𑀺 𑀯𑀺𑀬 𑀘 𑀧𑀯𑀢𑁆𑀢𑀸𑀦𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀺 𑀚𑀯𑀦𑀸𑀦𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀺 𑀪𑀯𑁂𑀬𑁆𑀬𑀼𑀁. ‘‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 (𑀥. 𑀲. 𑁪𑁩𑁧) 𑀳𑀺 𑀯𑀼𑀢𑁆𑀢𑀁. 𑀢𑀤𑀸 𑀘 𑀢𑀁𑀲𑀫𑀸𑀦𑀯𑀻𑀣𑀺𑀬𑀁 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀦𑀺 𑀓𑀣𑀁 𑀓𑀢𑀽𑀧𑀘𑀺𑀢𑀸𑀦𑀺 𑀲𑀺𑀬𑀼𑀁? 𑀢𑀤𑀸 𑀦 𑀅𑀲𑁆𑀲𑀸𑀤𑀺𑀢𑀸𑀦𑀺. 𑀦 𑀘 𑀮𑁄𑀓𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀺𑀬 𑀲𑀫𑀸𑀦𑀯𑀻𑀣𑀺𑀨𑀮𑀸𑀦𑀺 𑀳𑁄𑀦𑁆𑀢𑀺. ‘‘𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀳𑁄𑀢𑀺 𑀲𑀫𑀸𑀤𑀺𑀦𑁆𑀦𑀸. 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁩) 𑀲𑀼𑀢𑁆𑀢𑁂 𑀫𑀭𑀡𑀓𑀸𑀮𑁂 𑀲𑀫𑀢𑁆𑀢𑀸𑀬 𑀲𑀫𑀸𑀤𑀺𑀦𑁆𑀦𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀳𑀚𑀸𑀢𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀯𑀼𑀢𑁆𑀢𑀁, 𑀦 𑀘 𑀤𑀼𑀩𑁆𑀩𑀮𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺 ¶ 𑀯𑀸 𑀲𑀫𑀢𑁆𑀢𑀸 𑀳𑁄𑀢𑀺 𑀲𑀫𑀸𑀤𑀺𑀦𑁆𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀧𑀝𑀺𑀯𑀺𑀚𑀸𑀦𑀦𑀸𑀤𑀺𑀘𑀯𑀦𑀧𑀭𑀺𑀬𑁄𑀲𑀸𑀦𑀁 𑀓𑀺𑀘𑁆𑀘𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦𑀸𑀢𑀺 ¶ 𑀲𑀩𑁆𑀩𑀲𑁆𑀲𑀧𑁂𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀭𑀡𑁂 𑀲𑀳𑀚𑀯𑀦𑀓𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁬𑁬).

𑀢𑀢𑁆𑀣 𑀳𑀺 𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀫𑁆𑀧𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀘 𑀯𑀼𑀢𑁆𑀢𑀁. 𑀬𑁂𑀲𑀁 𑀧𑀝𑀺𑀯𑀺𑀪𑀸𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀦𑁆𑀯𑁂𑀢𑀺, 𑀢𑁂𑀲𑀁 𑀲𑀸 𑀧𑀯𑀢𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀜𑁆𑀘 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑀁 𑀧𑀦 𑀘𑀯𑀦𑀁, 𑀢𑀤𑀦𑀦𑁆𑀢𑀭𑀸 𑀘 𑀉𑀧𑀧𑀢𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀸 𑀏𑀯 𑀳𑁄𑀢𑀺, 𑀦 𑀲𑀳𑀚𑀯𑀦𑀓𑀯𑀻𑀣𑀺𑀘𑀺𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀇𑀥 𑀧𑀜𑁆𑀘𑀤𑁆𑀯𑀸𑀭𑀺𑀓𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑀸 𑀘𑀼𑀢𑀺, 𑀢𑀤𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀘 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀅𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀭𑀽𑀧𑀸𑀤𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀅𑀯𑀲𑁂𑀲𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀘 𑀉𑀧𑁆𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀁 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁨𑁪. 𑀓𑀡𑁆𑀳𑀧𑀓𑁆𑀔𑁂 𑀲𑀼𑀓𑁆𑀓𑀧𑀓𑁆𑀔𑀁 𑀞𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀬𑀣𑀸 𑀧𑀼𑀩𑁆𑀩𑁂 ‘‘𑀧𑀸𑀧𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑁂 𑀓𑀡𑁆𑀳𑀧𑀓𑁆𑀔𑁂 ‘‘𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸’’𑀢𑀺 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑁄, 𑀏𑀯𑀁 ‘‘𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀦𑀭𑀓𑀸𑀤𑀻𑀲𑀼 𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓𑀁 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀓𑀡𑁆𑀳𑀧𑀓𑁆𑀔𑁂 ‘‘𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀫𑀦𑀼𑀲𑁆𑀲𑀮𑁄𑀓𑁂 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀲𑀗𑁆𑀔𑀸𑀢𑀁, 𑀤𑁂𑀯𑀮𑁄𑀓𑁂 𑀯𑀸 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀯𑀡𑁆𑀡𑀲𑀗𑁆𑀔𑀸𑀢𑀁 𑀲𑀼𑀕𑀢𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀲𑀼𑀓𑁆𑀓𑀧𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬𑀸𑀢𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀸𑀬, 𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀸𑀤𑀺𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬.

𑁬𑁨𑁫. 𑀢𑀜𑁆𑀘 𑀔𑁄𑀢𑀺 𑀬𑀤𑁂𑀢𑀁 ‘‘𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸’’𑀢𑀺 𑀅𑀦𑀺𑀬𑀫𑀦𑀁 𑀓𑀢𑀁, 𑀢𑀜𑁆𑀘 𑀔𑁄. 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀆𑀧𑀸𑀣𑀫𑀸𑀕𑀘𑁆𑀙𑀢𑀺 𑀏𑀓𑀦𑁆𑀢𑀢𑁄 ¶ 𑀅𑀢𑁆𑀢𑀦𑁄 𑀓𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀫𑀳𑀕𑁆𑀕𑀢𑀯𑀺𑀧𑀸𑀓𑀲𑁆𑀲. 𑀲𑀼𑀤𑁆𑀥𑀸𑀬 𑀯𑀸𑀢𑀺 𑀫𑀳𑀕𑁆𑀕𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀚𑀯𑀦𑀯𑀻𑀣𑀺𑀬𑀸, 𑀢𑀤𑀸𑀭𑀫𑁆𑀫𑀡𑀭𑀳𑀺𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀲𑀸 𑀧𑀦 𑀚𑀯𑀦𑀯𑀻𑀣𑀺 𑀫𑀳𑀕𑁆𑀕𑀢𑀯𑀺𑀧𑀸𑀓𑀲𑁆𑀲 𑀉𑀧𑀘𑀸𑀭𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀓𑁂𑀘𑀺 𑀧𑀦 𑀢𑀜𑁆𑀘 𑀯𑀻𑀣𑀺𑀁 𑀫𑀳𑀕𑁆𑀕𑀢𑀸𑀯𑀲𑀸𑀦𑀁 𑀯𑀤𑀦𑁆𑀢𑀺. ‘‘𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀯𑀸’’𑀢𑀺 𑀇𑀤𑀁 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀁, 𑀆𑀭𑀼𑀧𑁆𑀧𑁂𑀲𑀼 ¶ 𑀘 𑀧𑀞𑀫𑀁, 𑀢𑀢𑀺𑀬𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀘𑀢𑀼𑀢𑁆𑀣𑀸 𑀧𑀦 𑀅𑀢𑀻𑀢𑀸𑀭𑀫𑁆𑀫𑀡𑀯𑀘𑀦𑁂𑀦𑁂𑀯 𑀕𑀳𑀺𑀢𑀸.

𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀲𑀗𑁆𑀔𑀸𑀢𑀦𑁆𑀢𑀺𑀆𑀤𑀺𑀦𑀸 𑀯𑀡𑁆𑀡𑁄 𑀏𑀯 𑀕𑀢𑀺𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀆𑀕𑀢𑁄. 𑀢𑀢𑁆𑀣 𑀲𑀤𑁆𑀤𑁄 𑀢𑀸𑀯 𑀅𑀦𑀼𑀧𑀸𑀤𑀺𑀦𑁆𑀦𑀪𑀸𑀯𑁂𑀦 𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀕𑀢𑀺𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀲𑀼 𑀦𑀸𑀕𑀢𑁄𑀢𑀺 𑀬𑀼𑀢𑁆𑀢𑀫𑁂𑀢𑀁, 𑀕𑀦𑁆𑀥𑀸𑀤𑀻𑀦𑀁 𑀧𑀦 𑀅𑀦𑀸𑀕𑀫𑀦𑁂 𑀓𑀸𑀭𑀡𑀁 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀅𑀬𑀁 𑀢𑀸𑀢 𑀢𑀯𑀢𑁆𑀣𑀸𑀬 𑀩𑀼𑀤𑁆𑀥𑀧𑀽𑀚𑀸 𑀓𑀭𑀻𑀬𑀢𑀻𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 𑀧𑀼𑀜𑁆𑀜𑀁 𑀳𑁄𑀢𑀺. 𑀲𑀩𑁆𑀩𑀦𑁆𑀢𑀺𑀫𑀚𑀯𑀦𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀻𑀢𑀺 𑀯𑀤𑀦𑁆𑀢𑀺.

𑁬𑁨𑁬. ‘‘𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀆𑀭𑀼𑀧𑁆𑀧𑀘𑀼𑀢𑀺𑀬𑀸𑀧𑀺 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀫𑀳𑀕𑁆𑀕𑀢𑀲𑁆𑀲 𑀲𑀼𑀕𑀢𑀺𑀬𑀁 𑀞𑀺𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀓𑁂 𑀏𑀯 𑀦𑀬𑁂 𑀅𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺 𑀅𑀯𑀭𑀼𑀤𑁆𑀥𑀸𑀢𑀺? 𑀦, 𑀢𑀢𑁆𑀣 𑀭𑀽𑀧𑀸𑀯𑀘𑀭𑀘𑀼𑀢𑀺𑀅𑀦𑀦𑁆𑀢𑀭𑀸𑀬 𑀏𑀯 𑀧𑀝𑀺𑀲𑀦𑁆𑀥𑀺𑀬𑀸 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀳𑀺 ‘‘𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀫𑀳𑀕𑁆𑀕𑀢𑀘𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀸’’𑀢𑀺𑀆𑀤𑀺𑀦𑀸 𑀢𑁂𑀦 𑀯𑀘𑀦𑁂𑀦 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀏𑀯 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑀼𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀬𑁄𑀚𑀦𑀸𑀬 𑀅𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺 𑀢𑀢𑁆𑀣𑁂𑀯 𑀅𑀯𑀭𑀼𑀤𑁆𑀥𑀸, 𑀅𑀭𑀽𑀧𑀸𑀯𑀘𑀭𑀘𑀼𑀢𑀺𑀅𑀦𑀦𑁆𑀢𑀭𑀸 𑀧𑀦 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺. 𑀅𑀭𑀽𑀧𑀸𑀯𑀘𑀭𑁂 𑀘 𑀉𑀧𑀭𑀽𑀧𑀭𑀺 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀼𑀢𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺. 𑀢𑁂𑀦 𑀢𑀢𑁄 𑀢𑀢𑁆𑀣𑁂𑀯 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀓𑀸𑀫𑀸𑀯𑀘𑀭𑁂 𑀘 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺. 𑀇𑀢𑀭𑀸𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺, 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀘 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀉𑀤𑁆𑀥𑀭𑀡𑀁 𑀓𑀢𑀁.

𑁬𑁨𑁭. 𑀏𑀯𑀁 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀯𑀺𑀥𑀸𑀬 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀘𑀼𑀢𑀺𑀬𑀸 𑀤𑀼𑀯𑀺𑀥𑀸 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺, 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀤𑀼𑀯𑀺𑀥𑀸 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺, 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀘𑀼𑀢𑀺𑀬𑀸 𑀤𑁆𑀯𑀺𑀏𑀓𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀓𑀸𑀫𑀭𑀽𑀧𑀸𑀭𑀽𑀧𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺 ¶ , 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀢𑀣𑁂𑀯 𑀧𑀜𑁆𑀘𑀯𑀺𑀥𑀸, 𑀤𑀼𑀯𑀺𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀧𑀘𑁆𑀘𑁂𑀓𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀫𑀸𑀭𑀼𑀧𑁆𑀧𑀸𑀦𑀁 𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀘 𑀧𑀝𑀺𑀲𑀦𑁆𑀥𑀺 ¶ 𑀤𑀲𑁆𑀲𑀺𑀢𑀸. 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀧𑀦 𑀏𑀓𑀯𑀺𑀥𑀸𑀬 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀤𑀼𑀯𑀺𑀥𑀸 𑀦 𑀤𑀲𑁆𑀲𑀺𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀕𑁆𑀕𑀢𑀺𑀬𑀁 𑀞𑀺𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀯𑀼𑀢𑁆𑀢𑀸 𑀧𑀦 𑁋

𑀤𑁆𑀯𑁂 𑀤𑁆𑀯𑁂 𑀧𑀜𑁆𑀘𑀸𑀣 𑀧𑀜𑁆𑀘𑀝𑁆𑀞, 𑀤𑁆𑀯𑁂 𑀪𑀯𑀸𑀮𑀫𑁆𑀩𑀪𑁂𑀤𑀢𑁄;

𑀘𑀼𑀢𑀺𑀬𑀸 𑀢𑀸𑀤𑀺𑀲𑀸𑀬𑁂𑀢𑀸, 𑀘𑀢𑀼𑀯𑀻𑀲𑀢𑀺 𑀲𑀦𑁆𑀥𑀺𑀬𑁄. (𑀯𑀺𑀪. 𑀫𑀽𑀮𑀝𑀻. 𑁨𑁨𑁭);

𑁬𑁨𑁮. ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁪𑁩𑁧) 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑁄𑀢𑀺 𑀉𑀧𑀦𑀺𑀲𑁆𑀲𑀬𑀪𑀸𑀯𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂𑀦 𑀭𑀽𑀧𑁂𑀦 𑀲𑀳𑀧𑀯𑀢𑁆𑀢𑀺𑀬𑁂𑀯𑁂𑀢𑁆𑀣 𑀯𑀺𑀜𑁆𑀜𑀸𑀡𑀲𑁆𑀲 𑀢𑁂𑀦 𑀫𑀺𑀲𑁆𑀲𑀺𑀢𑀸, 𑀢𑀤𑀪𑀸𑀯𑁄 𑀅𑀫𑀺𑀲𑁆𑀲𑀺𑀢𑀸. 𑀬𑀯𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀏𑀓𑀚𑀸𑀢𑀺𑀲𑀫𑀦𑁆𑀯𑀬𑁂𑀦 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺𑀬𑁄. 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀕𑀦𑁆𑀢𑀩𑁆𑀩𑀸 𑀧𑀸𑀧𑀼𑀡𑀺𑀢𑀩𑁆𑀩𑀸𑀢𑀺 𑀕𑀢𑀺𑀬𑁄. 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀺𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀢𑀺𑀆𑀤𑀺𑀆𑀯𑀸𑀲𑁄 𑀏𑀯 𑀲𑀢𑁆𑀢𑁂𑀳𑀺 𑀆𑀯𑀲𑀺𑀢𑀩𑁆𑀩𑀢𑁄 𑀲𑀢𑁆𑀢𑀸𑀯𑀸𑀲𑁄. 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑀲𑁆𑀲 𑀇𑀥 𑀅𑀲𑀫𑁆𑀪𑀯𑀢𑁄 ‘‘𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀅𑀝𑁆𑀞𑀯𑀺𑀥𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁬𑁨𑁯. 𑀅𑀜𑁆𑀜𑀢𑁆𑀭 𑀚𑀸𑀢𑀺𑀧𑀡𑁆𑀟𑀓𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀏𑀢𑁆𑀣 𑀧𑀞𑀫𑀓𑀧𑁆𑀧𑀺𑀓𑀧𑀝𑀺𑀲𑀦𑁆𑀥𑀺𑀬𑀸𑀧𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀸𑀧𑀺 𑀳𑀺 𑀪𑀸𑀯𑁂𑀦 𑀯𑀺𑀦𑀸𑀯 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀑𑀫𑀢𑁄𑀢𑀺 𑀅𑀯𑀫𑀢𑁄, 𑀅𑀯𑀓𑀁𑀲𑀢𑁄𑀢𑀺 𑀅𑀢𑁆𑀣𑁄. 𑀆𑀤𑀺𑀦𑀸𑀢𑀺 ‘‘𑀫𑀺𑀲𑁆𑀲𑀁 𑀅𑀫𑀺𑀲𑁆𑀲’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀤𑀼𑀓𑁂 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂𑀦 𑀫𑀺𑀲𑁆𑀲𑀯𑀺𑀜𑁆𑀜𑀸𑀡𑁂𑀦. 𑀑𑀫𑀢𑁄 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀧𑀦 𑀅𑀦𑁂𑀓𑁂 𑀓𑀮𑀸𑀧𑀸 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀧𑀺 𑀳𑀺 𑀅𑀦𑁂𑀓𑀕𑀸𑀯𑀼𑀢𑀧𑁆𑀧𑀫𑀸𑀡𑁂𑀦 𑀅𑀦𑁂𑀓𑁂 𑀓𑀮𑀸𑀧𑀸 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑀺𑀁𑀲𑀢𑁄 𑀅𑀥𑀺𑀓𑀸𑀦𑁂𑀯 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀳𑀼𑀚𑀸𑀢𑀏𑀴𑀓𑀲𑁆𑀲 𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸𑀢𑀺 𑀓𑁂𑀘𑀺. 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀚𑀸𑀢𑀺𑀫𑀦𑁆𑀢𑀏𑀴𑀓𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸𑀢𑀺 𑀅𑀧𑀭𑁂. 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀏𑀴𑀓𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸𑀢𑀺 𑀅𑀜𑁆𑀜𑁂. 𑀇𑀫𑀸𑀲𑀼 𑀕𑀢𑀻𑀲𑀼 𑀇𑀫𑀸 𑀬𑁄𑀦𑀺𑀬𑁄 𑀲𑀫𑁆𑀪𑀯𑀦𑁆𑀢𑀺, 𑀇𑀫𑀸𑀲𑀼 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀏𑀯𑀁 𑀬𑁄𑀦𑀻𑀦𑀁 𑀕𑀢𑀺𑀯𑀲𑁂𑀦 𑀲𑀫𑁆𑀪𑀯𑀪𑁂𑀤𑁄.

𑁬𑁩𑁦. 𑀪𑀼𑀫𑁆𑀫𑀯𑀚𑁆𑀚𑁂𑀲𑀽𑀢𑀺 ¶ 𑀪𑀼𑀫𑁆𑀫𑀤𑁂𑀯𑀸𑀦𑀁 𑀯𑀚𑁆𑀚𑀦𑀁 𑀬𑁄𑀦𑀺𑀯𑀺𑀪𑀸𑀕𑀁 𑀧𑀢𑀺 𑀢𑁂𑀲𑀁 𑀫𑀦𑀼𑀲𑁆𑀲𑀲𑀤𑀺𑀲𑀢𑁆𑀢𑀸. 𑀬𑁄𑀦𑀺𑀬𑁄 ¶ 𑀢𑀺𑀲𑁆𑀲𑁄 𑀧𑀼𑀭𑀺𑀫𑀺𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺𑀢𑁆𑀢𑀬𑀧𑀝𑀺𑀓𑁆𑀔𑁂𑀧𑁂𑀦 𑀧𑀘𑁆𑀙𑀺𑀫𑀸 𑀬𑁄𑀦𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀕𑀢𑀺𑀢𑁆𑀢𑀬𑁂𑀢𑀺 𑀫𑀦𑀼𑀲𑁆𑀲𑀧𑁂𑀢𑀢𑀺𑀭𑀘𑁆𑀙𑀸𑀦𑀲𑀜𑁆𑀜𑀺𑀢𑁂 𑀕𑀢𑀺𑀢𑁆𑀢𑀬𑁂. 𑀢𑀜𑁆𑀳𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀅𑀦𑀸𑀫𑀝𑁆𑀞𑀁.

𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘-𑀲𑀤𑁆𑀤𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑁂𑀲𑀼 𑀧𑀼𑀭𑀺𑀫𑀺𑀓𑀸 𑀢𑀺𑀲𑁆𑀲𑁄 𑀬𑁄𑀦𑀺𑀬𑁄 𑀦 𑀲𑀦𑁆𑀢𑀻𑀢𑀺? 𑀅𑀲𑀫𑁆𑀪𑀯𑀢𑁄. 𑀢𑀸𑀲𑀜𑁆𑀳𑀺 𑀦𑀺𑀘𑁆𑀘𑀸𑀢𑀼𑀭𑀪𑀸𑀯𑀢𑁄 𑀓𑀸𑀫𑀲𑁂𑀯𑀸 𑀦𑀢𑁆𑀣𑀻𑀢𑀺 𑀦 𑀢𑀸 𑀅𑀡𑁆𑀟𑀚𑀸𑀤𑀬𑁄 𑀳𑁄𑀦𑁆𑀢𑀺. 𑀓𑀼𑀘𑁆𑀙𑀺𑀬𑀁 𑀢𑀸𑀲𑀁 𑀕𑀩𑁆𑀪𑁄 𑀦𑀸𑀯𑀢𑀺𑀝𑁆𑀞𑀢𑀺 𑀚𑀸𑀮𑀲𑀩𑁆𑀪𑀸𑀯𑀢𑁄𑀢𑀺 𑀓𑁂𑀘𑀺. 𑀅𑀕𑁆𑀕𑀺𑀚𑀸𑀮𑀸𑀬 𑀲𑀦𑁆𑀢𑀧𑁆𑀧𑀫𑀸𑀦𑀲𑀭𑀻𑀭𑀸 𑀏𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀅𑀮𑁆𑀮𑀝𑁆𑀞𑀸𑀦𑁂𑀲𑀼, 𑀧𑀼𑀧𑁆𑀨𑀸𑀤𑀻𑀲𑀼 𑀘 𑀲𑀫𑁆𑀪𑀯𑀸𑀪𑀸𑀯𑀢𑁄 𑀲𑀁𑀲𑁂𑀤𑀚𑀢𑀸𑀧𑀺 𑀢𑀸𑀲𑀁 𑀦𑀢𑁆𑀣𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀦𑀸𑀳 ‘‘𑀑𑀧𑀧𑀸𑀢𑀺𑀓𑀸 𑀏𑀯 𑀳𑀺 𑀢𑁂 𑀳𑁄𑀦𑁆𑀢𑀻’’𑀢𑀺.

𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀼 𑀢𑀸𑀯 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽𑀢𑀺 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀳𑀺 𑀭𑀽𑀧𑀻𑀩𑁆𑀭𑀳𑁆𑀫𑁂 𑀦𑀺𑀤𑁆𑀥𑀸𑀭𑁂𑀢𑀺. 𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀽𑀢𑀺 𑀳𑀺 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀁, 𑀑𑀧𑀧𑀸𑀢𑀺𑀓𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂. 𑀢𑁂𑀦 ‘‘𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀭𑀸𑀲𑀺𑀢𑁄 ‘‘𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀽’’𑀢𑀺 𑀯𑀺𑀲𑁂𑀲𑁂𑀦 𑀢𑀤𑁂𑀓𑀤𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁, 𑀚𑀻𑀯𑀺𑀢𑀦𑀯𑀓𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀓𑁂𑀘𑀺 ‘‘𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀲𑀢𑁆𑀢𑀓𑀸𑀦𑀁, 𑀚𑀻𑀯𑀺𑀢𑀙𑀓𑁆𑀓𑀲𑁆𑀲 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀓𑀮𑀸𑀧𑀸𑀦𑀁 𑀯𑀲𑁂𑀦 𑀭𑀽𑀧𑀪𑀯𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳 𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀥𑀭𑀲𑀸𑀳𑀸𑀭𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀢𑀁 𑀲𑀫𑀢𑁆𑀣𑁂𑀦𑁆𑀢𑀸 ‘‘𑀧𑀸𑀴𑀺𑀬𑀜𑁆𑀳𑀺 ‘𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀧𑀜𑁆𑀘 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀻’𑀢𑀺 (𑀯𑀺𑀪. 𑁧𑁦𑁧𑁫-𑁧𑁦𑁧𑁬) 𑀯𑀼𑀢𑁆𑀢𑀁, 𑀢𑀣𑀸 ‘𑀭𑀽𑀧𑀥𑀸𑀢𑀼𑀬𑀸 𑀙 𑀆𑀬𑀢𑀦𑀸𑀦𑀺, 𑀦𑀯 𑀥𑀸𑀢𑀼𑀬𑁄’𑀢𑀺 𑀲𑀩𑁆𑀩𑀲𑀗𑁆𑀕𑀳𑀓𑀯𑀲𑁂𑀦 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀸𑀬𑀢𑀦𑀥𑀸𑀢𑀼𑀬𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀯𑀺𑀬 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀜𑁆𑀘 𑀢𑀢𑁆𑀣 𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 ‘𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀢𑀢𑁆𑀣 𑀕𑀦𑁆𑀥𑀸𑀬𑀢𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’𑀢𑀺𑀆𑀤𑀺𑀦𑀸 (𑀓𑀣𑀸. 𑁫𑁨𑁦). 𑀦 𑀘 𑀅𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀁 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀯𑀺𑀬 𑀅𑀕𑀦𑁆𑀥𑀭𑀲𑀸𑀬𑀢𑀦𑀸𑀦𑀁 𑀕𑀦𑁆𑀥𑀭𑀲𑀸𑀦𑀁 𑀢𑀢𑁆𑀣 𑀪𑀸𑀯𑁄 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀨𑀼𑀲𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀣𑀯𑀻𑀆𑀤𑀺𑀲𑀪𑀸𑀯𑀲𑁆𑀲 𑀯𑀺𑀬 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀕𑀦𑁆𑀥𑀭𑀲𑀲𑀪𑀸𑀯𑀲𑁆𑀲 ¶ 𑀅𑀪𑀸𑀯𑀸. 𑀬𑀤𑀺 𑀘 𑀖𑀸𑀦𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀓𑀸𑀭𑀡𑀪𑀸𑀯𑁄 𑀦𑀢𑁆𑀣𑀻𑀢𑀺 ‘𑀆𑀬𑀢𑀦𑀸𑀦𑀻’𑀢𑀺 𑀢𑁂 𑀦 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀥𑀸𑀢𑀼𑀲𑀤𑁆𑀤𑁄 𑀧𑀦 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀯𑀸𑀘𑀓𑁄𑀢𑀺 ‘𑀕𑀦𑁆𑀥𑀥𑀸𑀢𑀼 𑀭𑀲𑀥𑀸𑀢𑀽’𑀢𑀺 𑀅𑀯𑀘𑀦𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀥𑀫𑁆𑀫𑀪𑀸𑀯𑁄 𑀘 𑀢𑁂𑀲𑀁 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑁄 𑀲𑀪𑀸𑀯𑀥𑀸𑀭𑀡𑀸𑀤𑀺𑀮𑀓𑁆𑀔𑀡𑀢𑁄 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸. 𑀥𑀫𑁆𑀫𑀸𑀦𑀜𑁆𑀘 𑀆𑀬𑀢𑀦𑀪𑀸𑀯𑁄 𑀏𑀓𑀦𑁆𑀢𑀺𑀓𑁄 ¶ 𑀬𑀫𑀓𑁂 𑀯𑀼𑀢𑁆𑀢𑁄 ‘𑀥𑀫𑁆𑀫𑁄 𑀆𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’𑀢𑀺 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁩). 𑀢𑀲𑁆𑀫𑀸 𑀢𑁂𑀲𑀁 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑀸𑀪𑀸𑀯𑁂𑀧𑀺 𑀓𑁄𑀘𑀺 𑀆𑀬𑀢𑀦𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀬𑀤𑀺 𑀘 𑀨𑁄𑀝𑁆𑀞𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑁄 𑀧𑀣𑀯𑀻𑀆𑀤𑀺𑀪𑀸𑀯𑁄 𑀯𑀺𑀬 𑀕𑀦𑁆𑀥𑀭𑀲𑀪𑀸𑀯𑀢𑁄 𑀅𑀜𑁆𑀜𑁄 𑀢𑁂𑀲𑀁 𑀓𑁄𑀘𑀺 𑀲𑀪𑀸𑀯𑁄 𑀲𑀺𑀬𑀸, 𑀢𑁂𑀲𑀁 𑀥𑀫𑁆𑀫𑀸𑀬𑀢𑀦𑀲𑀗𑁆𑀕𑀳𑁄. 𑀕𑀦𑁆𑀥𑀭𑀲𑀪𑀸𑀯𑁂 𑀧𑀦 𑀆𑀬𑀢𑀦𑀪𑀸𑀯𑁂 𑀘 𑀲𑀢𑀺 ‘𑀕𑀦𑁆𑀥𑁄 𑀘 𑀲𑁄 𑀆𑀬𑀢𑀦𑀜𑁆𑀘 𑀕𑀦𑁆𑀥𑀸𑀬𑀢𑀦𑀁, 𑀭𑀲𑁄 𑀘 𑀲𑁄 𑀆𑀬𑀢𑀦𑀜𑁆𑀘 𑀭𑀲𑀸𑀬𑀢𑀦’𑀦𑁆𑀢𑀺 𑀇𑀤𑀫𑀸𑀧𑀦𑁆𑀦𑀫𑁂𑀯𑀸𑀢𑀺 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑁄 𑀘 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. ‘𑀢𑀬𑁄 𑀆𑀳𑀸𑀭𑀸’𑀢𑀺 𑀘 𑀯𑀘𑀦𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀢𑀢𑁆𑀣 𑀅𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀬𑀣𑀸 𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀣𑀸 𑀭𑀽𑀧𑀕𑀡𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀥𑀫𑁆𑀫𑀢𑀸 𑀦 𑀯𑀺𑀮𑁄𑀫𑀺𑀢𑀸 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀖𑀸𑀦𑀚𑀺𑀯𑁆𑀳𑀸𑀬𑀢𑀦𑀸𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀧𑀺 𑀕𑀦𑁆𑀥𑀭𑀲𑀸 𑀆𑀬𑀢𑀦𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁧𑁫), ‘‘𑀙 𑀆𑀬𑀢𑀦𑀸𑀦𑀻’’𑀢𑀺 (𑀯𑀺𑀪. 𑁯𑁯𑁨) 𑀘 𑀆𑀤𑀺 𑀯𑀼𑀢𑁆𑀢𑀁, ‘‘𑀢𑀬𑁄 𑀆𑀳𑀸𑀭𑀸’’𑀢𑀺 𑀘 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀲𑁆𑀲 𑀆𑀳𑀸𑀭𑀲𑁆𑀲 𑀅𑀪𑀸𑀯𑁂𑀦 𑀑𑀚𑀝𑁆𑀞𑀫𑀓𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀲𑀗𑁆𑀔𑀸𑀢𑀲𑁆𑀲 𑀆𑀳𑀸𑀭𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀕𑀦𑁆𑀥𑀭𑀲𑀸𑀦𑀁, 𑀑𑀚𑀸𑀬 𑀘 𑀅𑀪𑀸𑀯𑀢𑁄. 𑀇𑀢𑀺 𑀯𑀺𑀲𑀬𑀺𑀦𑁄, 𑀓𑀺𑀘𑁆𑀘𑀲𑁆𑀲 𑀘 𑀅𑀪𑀸𑀯𑁂𑀦 𑀯𑀺𑀲𑀬𑁄, 𑀓𑀺𑀘𑁆𑀘𑀯𑀸 𑀘 𑀥𑀫𑁆𑀫𑁄 𑀦 𑀯𑀼𑀢𑁆𑀢𑁄. 𑀬𑀲𑁆𑀫𑀺𑀜𑁆𑀳𑀺 𑀪𑀯𑁂 𑀯𑀺𑀲𑀬𑀻 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀢𑀁𑀳𑁂𑀢𑀼𑀓𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀲𑀬𑀲𑁆𑀲 𑀆𑀬𑀢𑀦𑀪𑀸𑀯𑁄 𑀦𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀅𑀯𑀘𑀦𑀁 𑀬𑀣𑀸 𑀢𑀢𑁆𑀣𑁂𑀯 𑀭𑀽𑀧𑀪𑀯𑁂 𑀧𑀣𑀯𑀻𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀪𑀸𑀯𑁂𑀦. 𑀬𑀲𑁆𑀲 𑀧𑀦 𑀬𑀢𑁆𑀣 𑀯𑀘𑀦𑀁, 𑀢𑀲𑁆𑀲 𑀢𑀢𑁆𑀣 𑀯𑀺𑀲𑀬𑀻𑀲𑀩𑁆𑀪𑀸𑀯𑀳𑁂𑀢𑀼𑀓𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄 𑀯𑀼𑀢𑁆𑀢𑁄 𑀬𑀣𑀸 𑀢𑀢𑁆𑀣𑁂𑀯 𑀭𑀽𑀧𑀸𑀬𑀢𑀦𑀲𑁆𑀲.

𑀬𑀤𑀺 𑀯𑀺𑀲𑀬𑀻𑀲𑀩𑁆𑀪𑀸𑀯𑀳𑁂𑀢𑀼𑀓𑁄 𑀯𑀺𑀲𑀬𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄, 𑀓𑀣𑀫𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺, 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀳𑀺 ¶ 𑀘𑀓𑁆𑀔𑀸𑀬𑀢𑀦𑀁 𑀦𑀢𑁆𑀣𑀺, 𑀅𑀘𑀓𑁆𑀔𑀸𑀬𑀢𑀦𑀪𑀸𑀯𑁂𑀦 𑀘 𑀦𑁂𑀲𑀁 𑀭𑀽𑀧𑀸𑀬𑀢𑀦𑀁 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀭𑀽𑀧𑀥𑀸𑀢𑀼𑀬𑀁 𑀲𑀜𑁆𑀜𑀻𑀦𑀁 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀯𑀘𑀦𑀁, 𑀢𑁂𑀦 𑀭𑀽𑀧𑀸𑀬𑀢𑀦𑀲𑁆𑀲𑀸𑀧𑀺 𑀅𑀯𑀘𑀦𑀦𑁆𑀢𑀺 𑀅𑀲𑀜𑁆𑀜𑀻𑀦𑀁 𑀏𑀓𑀁 𑀆𑀬𑀢𑀦𑀁 𑀯𑀢𑁆𑀢𑀩𑁆𑀩𑀁. 𑀬𑀣𑀸𑀲𑀓𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀪𑀸𑀯𑀸𑀧𑁂𑀓𑁆𑀔𑀸𑀬 𑀬𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀬𑀢𑀦𑀪𑀸𑀯𑁄 𑀅𑀢𑁆𑀣𑀺, 𑀢𑁂𑀲𑀼 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁂𑀲𑀼 𑀢𑀤𑀪𑀸𑀯𑀢𑁄 𑀭𑀽𑀧𑀥𑀸𑀢𑀼𑀬𑀁 𑀲𑀜𑁆𑀜𑀻𑀦𑀁 𑀕𑀦𑁆𑀥𑀸𑀤𑀺𑀓𑁂 𑀯𑀺𑀲𑀼𑀁 𑀆𑀬𑀢𑀦𑀪𑀸𑀯𑁂𑀦 𑀅𑀯𑀢𑁆𑀯𑀸 𑀥𑀫𑁆𑀫𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄, 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀘 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀥𑀫𑁆𑀫𑀸𑀬𑀢𑀦𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 ¶ ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀧𑀸𑀴𑀺𑀬𑀁 (𑀯𑀺𑀪. 𑁧𑁦𑁧𑁫) 𑀯𑀼𑀢𑁆𑀢𑀁. 𑀏𑀢𑀤𑀢𑁆𑀣𑀜𑁆𑀳𑀺 ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀦𑀸𑀫𑀓𑀭𑀡𑀁, 𑀧𑀺𑀝𑁆𑀞𑀺𑀯𑀝𑁆𑀝𑀓𑀸𑀦𑀺 𑀯𑀸 𑀢𑀸𑀦𑀺 𑀓𑀢𑁆𑀯𑀸 ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀬𑁂𑀦 𑀘 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 𑀅𑀲𑀜𑁆𑀜𑀻𑀦𑀁 𑀭𑀽𑀧𑀸𑀬𑀢𑀦𑀁 𑀯𑀼𑀢𑁆𑀢𑀁, 𑀢𑁂𑀦 𑀲𑀜𑁆𑀜𑀻𑀦𑀫𑁆𑀧𑀺 𑀕𑀦𑁆𑀥𑀸𑀤𑀻𑀦𑀁 𑀯𑀺𑀲𑀼𑀁 𑀕𑀳𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀲 𑀦𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁧𑁭) 𑀯𑀼𑀢𑁆𑀢𑀁. 𑀅𑀲𑀢𑀺𑀧𑀺 𑀳𑀺 𑀢𑀢𑁆𑀣 𑀅𑀢𑁆𑀢𑀦𑁄 𑀇𑀦𑁆𑀤𑁆𑀭𑀺𑀬𑁂 𑀭𑀽𑀧𑀲𑁆𑀲 𑀯𑀡𑁆𑀡𑀸𑀬𑀢𑀦𑀲𑀪𑀸𑀯𑀸𑀢𑀺𑀓𑁆𑀓𑀫𑁄 𑀦𑀢𑁆𑀣𑁂𑀯𑀸𑀢𑀺 𑀢𑀁 𑀭𑀽𑀧𑀸𑀬𑀢𑀦𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀘 𑀦𑀬𑀤𑀲𑁆𑀲𑀦𑁂𑀦 𑀕𑀦𑁆𑀥𑀸𑀤𑀻𑀦𑀺 𑀢𑀻𑀡𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀜𑁆𑀜𑀻𑀦𑀁 𑀅𑀝𑁆𑀞 𑀆𑀬𑀢𑀦𑀸𑀦𑀺, 𑀅𑀲𑀜𑁆𑀜𑀻𑀦𑀁 𑀧𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀭𑀽𑀧𑀮𑁄𑀓𑁂 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀣𑀯𑀻𑀆𑀤𑀻𑀦𑀁 𑀩𑁆𑀭𑀳𑁆𑀫𑀸𑀦𑀁 𑀯𑀘𑀻𑀖𑁄𑀲𑁄 𑀏𑀯 𑀦 𑀲𑀺𑀬𑀸. 𑀦 𑀳𑀺 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑀫𑀦𑁆𑀢𑀭𑁂𑀦 𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀦 𑀘 𑀨𑀼𑀲𑀦𑀲𑀪𑀸𑀯𑀸𑀦𑀁 𑀓𑀢𑁆𑀣𑀘𑀺 𑀅𑀨𑀼𑀲𑀦𑀪𑀸𑀯𑀢𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑀗𑁆𑀔𑀸𑀢𑀲𑁆𑀲 𑀘 𑀪𑀽𑀢𑀢𑁆𑀢𑀬𑀲𑁆𑀲 𑀅𑀪𑀸𑀯𑁂 𑀭𑀽𑀧𑀪𑀯𑁂 𑀭𑀽𑀧𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀲𑀫𑁆𑀪𑀯𑁄 𑀏𑀯 𑀦 𑀲𑀺𑀬𑀸. 𑀢𑀲𑁆𑀫𑀸 𑀨𑀼𑀲𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬𑀧𑀺 𑀧𑀣𑀯𑀻𑀆𑀤𑀻𑀦𑀁 𑀢𑀢𑁆𑀣 𑀓𑀸𑀬𑀺𑀦𑁆𑀤𑁆𑀭𑀺𑀬𑀸𑀪𑀸𑀯𑁂𑀦 𑀢𑁂𑀲𑀁 𑀨𑁄𑀝𑁆𑀞𑀩𑁆𑀩𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀥𑀸𑀢𑀼𑀬𑀁 𑀢𑁂𑀲𑀁 𑀲𑀧𑁆𑀧𑀝𑀺𑀖𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀺 (𑀧𑀝𑁆𑀞𑀸. 𑁨.𑁨𑁨.𑁨𑁦).

𑀧𑀝𑀺𑀖𑁄 𑀘 𑀦𑀸𑀫 𑀪𑀽𑀢𑀢𑁆𑀢𑀬𑀲𑁆𑀲 𑀓𑀸𑀬𑀧𑁆𑀧𑀲𑀸𑀤𑀁 𑀧𑀢𑀺 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀖𑀝𑁆𑀝𑀦𑀸𑀤𑁆𑀯𑀸𑀭𑁂𑀦 𑀅𑀪𑀺𑀫𑀼𑀔𑀪𑀸𑀯𑁄, 𑀇𑀥 𑀧𑀦 𑀢𑀁𑀲𑀪𑀸𑀯𑀢𑀸. 𑀲𑁄 𑀘 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑀪𑀸𑀯𑀲𑁆𑀲 𑀖𑀝𑁆𑀝𑀦𑀸𑀬 𑀅𑀪𑀸𑀯𑀢𑁄 𑀦𑀢𑁆𑀣𑀺. 𑀬𑀤𑀺 𑀢𑀢𑁆𑀣 𑀅𑀲𑀢𑀺𑀧𑀺 𑀯𑀺𑀲𑀬𑀺𑀦𑀺 𑀭𑀽𑀧𑀸𑀬𑀢𑀦𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑁂 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 ¶ 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺? 𑀦𑀬𑀤𑀲𑁆𑀲𑀦𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣 𑀭𑀽𑀧𑀸𑀬𑀢𑀦𑀲𑁆𑀲𑁂𑀯 𑀯𑀘𑀦𑀁 𑀓𑀤𑀸𑀘𑀺 𑀅𑀜𑁆𑀜𑀪𑀽𑀫𑀺𑀓𑀸𑀦𑀁 𑀧𑀲𑀸𑀤𑀲𑁆𑀲 𑀯𑀺𑀲𑀬𑀪𑀸𑀯𑀁 𑀲𑀦𑁆𑀥𑀸𑀬, 𑀦 𑀧𑀦 𑀇𑀢𑀭𑁂𑀲𑀁 𑀅𑀪𑀸𑀯𑀢𑁄, 𑀦𑀸𑀧𑀺 𑀧𑀭𑀺𑀬𑀸𑀬𑁂𑀦𑀧𑀺 𑀆𑀬𑀢𑀦𑀪𑀸𑀯𑀸𑀪𑀸𑀯𑀢𑁄. 𑀅𑀲𑀜𑁆𑀜𑀻𑀦𑀜𑁆𑀳𑀺 𑀭𑀽𑀧𑀸𑀬𑀢𑀦𑀁 𑀲𑀫𑀸𑀦𑀢𑀮𑀯𑀸𑀲𑀻𑀦𑀁 𑀯𑁂𑀳𑀧𑁆𑀨𑀮𑀸𑀦𑀁, 𑀉𑀧𑀭𑀺𑀪𑀽𑀫𑀺𑀓𑀸𑀦𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀧𑀲𑀸𑀤𑀲𑁆𑀲 𑀯𑀺𑀲𑀬𑀪𑀸𑀯𑀁 𑀕𑀘𑁆𑀙𑀢𑀺, 𑀦 𑀧𑀦 𑀕𑀦𑁆𑀥𑀭𑀲𑀸𑀢𑀺 𑀢𑁂𑀲𑀁𑀬𑁂𑀯 𑀢𑀢𑁆𑀣 𑀅𑀯𑀘𑀦𑀁 𑀬𑀼𑀢𑁆𑀢𑀁. 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀲𑁂𑀥𑁄 𑀓𑀢𑁄.

𑀬𑀤𑀺𑀧𑀺 ¶ 𑀘𑁂𑀢𑀁 𑀯𑀘𑀦𑀁 𑀢𑀢𑁆𑀣 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀪𑀸𑀯𑀯𑀺𑀪𑀸𑀯𑀦𑀁 𑀦 𑀳𑁄𑀢𑀺, 𑀅𑀢𑁆𑀣𑀺𑀪𑀸𑀯𑀤𑀻𑀧𑀦𑀫𑁆𑀧𑀺 𑀧𑀦 𑀅𑀜𑁆𑀜𑀯𑀘𑀦𑀁 𑀦𑀢𑁆𑀣𑁂𑀯𑀸𑀢𑀺? 𑀦𑀬𑀺𑀤𑀫𑁂𑀯𑀁, 𑀅𑀝𑁆𑀞𑀓𑀣𑀸𑀲𑀼 𑀢𑀢𑁆𑀣 𑀦𑁂𑀲𑀁 𑀅𑀢𑁆𑀣𑀺𑀪𑀸𑀯𑀲𑁆𑀲 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀬𑀜𑁆𑀳𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀸𑀴𑀺𑀬𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀁 𑀧𑀸𑀴𑀺 𑀯𑀺𑀬 𑀧𑀫𑀸𑀡𑀪𑀽𑀢𑀁 𑀅𑀕𑀭𑀳𑀺𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯𑀚𑁆𑀚𑀢𑀦𑀸 𑀆𑀕𑀢𑀢𑁆𑀢𑀸. 𑀢𑀢𑁆𑀣 𑀲𑀺𑀬𑀸 𑁋 𑀬𑀁 𑀧𑀸𑀴𑀺𑀬𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀢𑀁 𑀧𑀫𑀸𑀡𑀁, 𑀇𑀤𑀁 𑀧𑀦 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦𑀬𑀺𑀤𑀫𑁂𑀯𑀁, 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀧𑀝𑀺𑀧𑀸𑀤𑀺𑀢𑀢𑁆𑀢𑀸. 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀸𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀦𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀁 𑀲𑀢𑁆𑀢𑀲𑀼𑀜𑁆𑀜𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑁄 𑀥𑀸𑀢𑀼𑀤𑁂𑀲𑀦𑀸𑀢𑀺 𑀆𑀬𑀢𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀁𑀬𑁂𑀯 𑀥𑀸𑀢𑀼𑀪𑀸𑀯𑀤𑀻𑀧𑀦𑀢𑁄 𑀥𑀸𑀢𑀼𑀪𑀸𑀯𑀲𑁆𑀲𑀸𑀧𑀺 𑀢𑁂𑀲𑀁 𑀅𑀯𑀘𑀦𑀁 𑀬𑀼𑀚𑁆𑀚𑀢𑀺 𑀏𑀯. 𑀢𑀲𑁆𑀫𑀸 𑀬𑀣𑀸 𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀣𑀸 𑀘𑀓𑁆𑀔𑀼𑀤𑀲𑀓𑀸𑀤𑀺𑀯𑀲𑁂𑀦 𑀇𑀥 𑀭𑀽𑀧𑀕𑀡𑀦𑀸 𑀓𑀢𑀸𑀢𑀺 𑀦 𑀏𑀢𑁆𑀣 𑀥𑀫𑁆𑀫𑀢𑀸𑀯𑀺𑀮𑁄𑀫𑀦𑀸𑀲𑀗𑁆𑀓𑀸𑀬 𑀑𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑁂𑀲𑀼 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀑𑀧𑀧𑀸𑀢𑀺𑀓𑁂𑀲𑀼, 𑀲𑀁𑀲𑁂𑀤𑀚𑁂𑀲𑀼 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀑𑀧𑀧𑀸𑀢𑀺𑀓𑀯𑀺𑀲𑁂𑀲𑀦𑀜𑁆𑀳𑁂𑀢𑁆𑀣 𑀅𑀜𑁆𑀜𑀕𑁆𑀕𑀳𑀡𑀁, 𑀦 𑀲𑀁𑀲𑁂𑀤𑀚𑀯𑀺𑀲𑁂𑀲𑀦𑀁 𑀅𑀲𑀫𑁆𑀪𑀯𑀢𑁄. 𑀲𑀢𑀺 𑀳𑀺 𑀲𑀫𑁆𑀪𑀯𑁂, 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀲𑀩𑁆𑀩𑀓𑀸𑀮𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀬𑀣𑀸𑀯𑀼𑀢𑁆𑀢𑀸𑀬 𑀲𑀦𑁆𑀢𑀢𑀺𑀬𑀸 𑀭𑀽𑀧𑀸𑀦𑀁 𑀮𑀩𑁆𑀪𑀦𑀢𑁄 𑀯𑀼𑀢𑁆𑀢𑀁 ‘‘𑀢𑀸𑀦𑀺 𑀘 𑀦𑀺𑀘𑁆𑀘𑀁 𑀤𑁂𑀯𑁂𑀲𑀽’’𑀢𑀺. 𑀦 𑀳𑀺 𑀢𑁂 𑀓𑀤𑀸𑀘𑀺𑀧𑀺 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸, 𑀅𑀪𑀸𑀯𑀓𑀸 𑀘 𑀳𑁄𑀦𑁆𑀢𑀻𑀢𑀺. 𑀘𑀓𑁆𑀔𑀼 𑀦𑁂𑀲𑀁 𑀤𑀲𑀦𑁆𑀦𑀁 𑀧𑀽𑀭𑀡𑁄𑀢𑀺 𑀓𑀢𑁆𑀯𑀸 𑀘𑀓𑁆𑀔𑀼𑀤𑀲𑀓𑁄 𑀦𑀸𑀫, 𑀅𑀲𑀸𑀥𑀸𑀭𑀡𑁂𑀦 𑀯𑀸 𑀘𑀓𑁆𑀔𑀼𑀦𑀸 𑀮𑀓𑁆𑀔𑀺𑀢𑁄 𑀤𑀲𑀓𑁄 𑀘𑀓𑁆𑀔𑀼𑀤𑀲𑀓𑁄. 𑀏𑀯𑀁 𑀲𑁂𑀲𑀸𑀢𑀺 𑀬𑀣𑀸 𑀘𑀓𑁆𑀔𑀼𑀤𑀲𑀓𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑁂𑀲𑀸𑀧𑀺 𑀤𑀲𑀓𑀸 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀁𑀲𑁂𑀤𑀚𑀽𑀧𑀧𑀸𑀢𑀬𑁄𑀦𑀻𑀲𑀼 ¶ , 𑀅𑀯𑀓𑀁𑀲𑀢𑁄 𑀢𑀺𑀁𑀲𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀅𑀯𑀓𑀁𑀲𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀧𑀦𑁂𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀦 𑀳𑀺 𑀧𑀸𑀴𑀺𑀬𑀁 𑀓𑀸𑀫𑀸𑀯𑀘𑀭𑀸𑀦𑀁 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀳𑀺 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑀲𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀯𑀺𑀪. 𑁧𑁦𑁦𑁭). 𑀬𑀤𑀺 𑀳𑀺 𑀅𑀖𑀸𑀦𑀓𑀲𑁆𑀲𑀸𑀧𑀺 𑀉𑀧𑀧𑀢𑁆𑀢𑀺 𑀲𑀺𑀬𑀸, 𑀢𑀺𑀓𑁆𑀔𑀢𑁆𑀢𑀼𑀁 ‘‘𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀺𑀓𑁆𑀔𑀢𑁆𑀢𑀼𑀜𑁆𑀘 ‘‘𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺, 𑀦 𑀘 𑀢𑀁 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀧𑀧𑀢𑁆𑀢𑀺𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀏𑀓𑀸𑀤𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀲𑁆𑀲 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀸𑀦𑀺 𑀏𑀓𑀸𑀤𑀲 𑀆𑀬𑀢𑀦𑀸𑀦𑀺. 𑀓𑀲𑁆𑀲𑀘𑀺 𑀤𑀲𑀸𑀬𑀢𑀦𑀸𑀦𑀻𑀢𑀺 𑀅𑀦𑁆𑀥𑀲𑁆𑀲 𑀘𑀓𑁆𑀔𑀸𑀬𑀢𑀦𑀯𑀚𑁆𑀚𑀸𑀦𑀺. 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀻𑀢𑀺 ¶ 𑀩𑀥𑀺𑀭𑀲𑁆𑀲 𑀲𑁄𑀢𑀸𑀬𑀢𑀦𑀯𑀚𑁆𑀚𑀸𑀦𑀺. 𑀦𑀯𑀸𑀬𑀢𑀦𑀸𑀦𑀻𑀢𑀺 𑀅𑀦𑁆𑀥𑀩𑀥𑀺𑀭𑀲𑁆𑀲 𑀘𑀓𑁆𑀔𑀼𑀲𑁄𑀢𑀸𑀬𑀢𑀦𑀯𑀚𑁆𑀚𑀸𑀦𑀺. 𑀲𑀢𑁆𑀢𑀸𑀬𑀢𑀦𑀸𑀦𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀭𑀽𑀧𑀕𑀦𑁆𑀥𑀭𑀲𑀓𑀸𑀬𑀨𑁄𑀝𑁆𑀞𑀩𑁆𑀩𑀫𑀦𑁄𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀤𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀯𑀺𑀓𑀮𑁄𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀅𑀝𑁆𑀞𑁂𑀯𑀸𑀬𑀢𑀦𑀸𑀦𑀺 𑀲𑀺𑀬𑀼𑀁, 𑀦 𑀘 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀦𑀢𑁆𑀣𑁂𑀯 𑀘𑀓𑁆𑀔𑀼𑀲𑁄𑀢𑀖𑀸𑀦𑀯𑀺𑀓𑀮𑁄. 𑀲𑀢𑀺 𑀘 𑀅𑀖𑀸𑀦𑀓𑀽𑀧𑀧𑀢𑁆𑀢𑀺𑀬𑀁 𑀧𑀼𑀦𑀧𑀺 ‘‘𑀓𑀲𑁆𑀲𑀘𑀺 𑀅𑀧𑀭𑀸𑀦𑀺𑀧𑀺 𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀬𑀣𑀸 𑀅𑀦𑁆𑀥𑀩𑀥𑀺𑀭𑀲𑁆𑀲 𑀯𑀲𑁂𑀦 ‘‘𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀏𑀓𑀯𑀸𑀭𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀦𑁆𑀥𑀸𑀖𑀸𑀦𑀓𑀲𑁆𑀲, 𑀩𑀥𑀺𑀭𑀸𑀖𑀸𑀦𑀓𑀲𑁆𑀲 𑀘 𑀯𑀲𑁂𑀦 ‘‘𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀦𑀯𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺𑀧𑀺 𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀥𑀸𑀢𑀼𑀧𑀸𑀢𑀼𑀪𑀸𑀯𑀸𑀤𑀺𑀧𑀜𑁆𑀳𑀸𑀦𑀺𑀧𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 𑀬𑀣𑀸 ‘‘𑀲𑀢𑁆𑀢𑀢𑀺 𑀉𑀓𑁆𑀓𑀁𑀲𑀢𑁄𑀣 𑀭𑀽𑀧𑀸𑀦𑀻’’𑀢𑀺 𑀧𑀤𑀁 ‘‘𑀲𑀁𑀲𑁂𑀤𑀚𑀽𑀧𑀧𑀸𑀢𑀬𑁄𑀦𑀻𑀲𑀽’’𑀢𑀺 𑀏𑀢𑁆𑀣 𑀬𑁄𑀦𑀺𑀤𑁆𑀯𑀬𑀯𑀲𑁂𑀦 𑀬𑁄𑀚𑀻𑀬𑀢𑀺, 𑀦 𑀏𑀯𑀁 ‘‘𑀅𑀯𑀓𑀁𑀲𑀢𑁄 𑀢𑀺𑀁𑀲𑀸’’𑀢𑀺 𑀇𑀤𑀁. 𑀇𑀤𑀁 𑀧𑀦 𑀲𑀁𑀲𑁂𑀤𑀚𑀬𑁄𑀦𑀺𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸𑀧𑀺 𑀏𑀓𑀤𑁂𑀲𑁄 𑀲𑀫𑁆𑀩𑀦𑁆𑀥𑀁 𑀮𑀪𑀢𑀻𑀢𑀺 𑀲𑀁𑀲𑁂𑀤𑀚𑀲𑁆𑀲 𑀚𑀘𑁆𑀘𑀦𑁆𑀥𑀩𑀥𑀺𑀭𑀅𑀖𑀸𑀦𑀓𑀦𑀧𑀼𑀁𑀲𑀓𑀲𑁆𑀲 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀦 𑀑𑀧𑀧𑀸𑀢𑀺𑀓𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀫𑀥𑀺𑀧𑁆𑀧𑀸𑀬𑁄.

𑀬𑁂 ¶ 𑀧𑀦 ‘‘𑀑𑀧𑀧𑀸𑀢𑀺𑀓𑀲𑁆𑀲 𑀚𑀘𑁆𑀘𑀦𑁆𑀥𑀩𑀥𑀺𑀭𑀅𑀖𑀸𑀦𑀓𑀦𑀧𑀼𑀁𑀲𑀓𑀲𑁆𑀲 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑁄 𑀳𑀺 𑀧𑀫𑀸𑀤𑀧𑀸𑀞𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸𑀬𑀁 ‘‘𑀓𑀸𑀫𑀥𑀸𑀢𑀼𑀬𑀁 𑀧𑀦 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, ‘𑀓𑀲𑁆𑀲𑀘𑀺 𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’𑀢𑀺 𑀯𑀤𑁂𑀬𑁆𑀬𑀸’’𑀢𑀺 (𑀬𑀫. 𑀅𑀝𑁆𑀞. 𑀆𑀬𑀢𑀦𑀬𑀫𑀓 𑁧𑁮-𑁨𑁧) 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦𑀸𑀳𑀼 ‘‘𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀬𑀸𑀯 ‘𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀻’𑀢𑀺 𑀧𑀸𑀴𑀺 𑀑𑀧𑀧𑀸𑀢𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄. 𑀢𑀣𑀸 𑀘 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀬𑀸 𑀅𑀬𑀫𑀢𑁆𑀣𑀯𑀡𑁆𑀡𑀦𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺𑀬𑁂𑀯𑀸’’𑀢𑀺. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀑𑀧𑀧𑀸𑀢𑀺𑀓𑀕𑁆𑀕𑀳𑀡𑁂𑀦 𑀲𑀁𑀲𑁂𑀤𑀚𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 ‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’𑀢𑀺𑀆𑀤𑀻𑀦𑀁 (𑀯𑀺𑀪. 𑁧𑁦𑁦𑁭) 𑀦𑀺𑀤𑁆𑀤𑁂𑀲𑁂 ‘𑀑𑀧𑀧𑀸𑀢𑀺𑀓𑀸𑀦𑀁 𑀧𑁂𑀢𑀸𑀦’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁦𑁦𑁯) 𑀑𑀧𑀧𑀸𑀢𑀺𑀓𑀕𑁆𑀕𑀳𑀡𑀫𑁂𑀯 𑀓𑀢𑀁, 𑀦 𑀲𑀁𑀲𑁂𑀤𑀚𑀕𑁆𑀕𑀳𑀡’’𑀦𑁆𑀢𑀺, 𑀢𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁𑀬𑁂𑀯 𑀲𑀁𑀲𑁂𑀤𑀚𑀸𑀦𑀁 𑀑𑀧𑀧𑀸𑀢𑀺𑀓𑁂𑀲𑀼 𑀲𑀗𑁆𑀕𑀳𑀡𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀁𑀲𑁂𑀤𑀚𑀬𑁄𑀦𑀺𑀓𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑁂𑀦 𑀑𑀧𑀧𑀸𑀢𑀺𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸’’𑀢𑀺, 𑀧𑀥𑀸𑀦𑀸𑀬 ¶ 𑀯𑀸 𑀬𑁄𑀦𑀺𑀬𑀸 𑀲𑀩𑁆𑀩𑀁 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀬𑁄𑀦𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘, 𑀇𑀥 𑀧𑀦 𑀬𑁄𑀦𑀺𑀤𑁆𑀯𑀬𑀁 𑀲𑀭𑀽𑀧𑁂𑀦𑁂𑀯 𑀧𑀓𑀸𑀲𑁂𑀢𑀼𑀁, 𑀲𑀁𑀲𑁂𑀤𑀚𑀬𑁄𑀦𑀺𑀯𑀲𑁂𑀦𑁂𑀯 𑀘 𑀅𑀯𑀓𑀁𑀲𑀢𑁄 𑀭𑀽𑀧𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸 𑀇𑀢𑀭𑀁 𑀅𑀲𑀗𑁆𑀕𑀳𑁂𑀢𑁆𑀯𑀸 ‘‘𑀲𑀁𑀲𑁂𑀤𑀚𑀽𑀧𑀧𑀸𑀢𑀬𑁄𑀦𑀻𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀉𑀓𑁆𑀓𑀁𑀲𑀸𑀯𑀓𑀁𑀲𑀸𑀦𑀁 𑀧𑀦 𑀅𑀦𑁆𑀢𑀭𑁂𑀢𑀺 ‘‘𑀲𑀢𑁆𑀢𑀢𑀺, 𑀢𑀺𑀁𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀭𑀽𑀧𑀲𑁆𑀲 𑀉𑀓𑁆𑀓𑀁𑀲𑀸𑀯𑀓𑀁𑀲𑀧𑀭𑀺𑀘𑁆𑀙𑁂𑀤𑀸𑀦𑀁 𑀫𑀚𑁆𑀛𑁂. 𑀅𑀦𑀼𑀭𑀽𑀧𑀢𑁄 𑀯𑀺𑀓𑀧𑁆𑀧𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀧𑀸𑀬𑁂𑀲𑀼 𑀅𑀦𑁆𑀥𑀲𑁆𑀲 𑀙 𑀘𑀓𑁆𑀔𑀼𑀤𑀲𑀓𑀸𑀪𑀸𑀯𑀢𑁄, 𑀢𑀣𑀸 𑀩𑀥𑀺𑀭𑀲𑁆𑀲 𑀲𑁄𑀢𑀤𑀲𑀓𑀸𑀪𑀸𑀯𑀢𑁄, 𑀅𑀦𑁆𑀥𑀩𑀥𑀺𑀭𑀲𑁆𑀲 𑀧𑀦 𑀧𑀜𑁆𑀘 𑀘𑀓𑁆𑀔𑀼𑀲𑁄𑀢𑀤𑀲𑀓𑀸𑀪𑀸𑀯𑀢𑁄𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀫𑁂𑀯𑀸𑀢𑀺.

𑁬𑁩𑁧. 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀔𑀦𑁆𑀥𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀢𑀸 𑀅𑀪𑁂𑀤𑁄. 𑀅𑀲𑀫𑀸𑀦𑀢𑀸 𑀪𑁂𑀤𑁄.

𑀆𑀭𑀫𑁆𑀫𑀡𑀢𑁄𑀧𑀺 ¶ 𑀅𑀪𑀺𑀦𑁆𑀦𑀸𑀢𑀺 𑀘𑀢𑀽𑀲𑀼 𑀆𑀭𑀼𑀧𑁆𑀧𑁂𑀲𑀼 𑀢𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑁂𑀯 𑀧𑀦 𑀳𑁂𑀝𑁆𑀞𑀸, 𑀭𑀽𑀧𑀪𑀯𑁂 𑀯𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀺. 𑀅𑀭𑀽𑀧𑀪𑀽𑀫𑀺𑀢𑁄 𑀘𑀯𑀺𑀢𑁆𑀯𑀸 𑀳𑁂𑀝𑁆𑀞𑀸 𑀉𑀧𑀧𑀢𑁆𑀢𑀺 𑀦𑀸𑀫 𑀓𑀸𑀫𑀪𑀯𑁂 𑀏𑀯, 𑀢𑀢𑁆𑀣𑀸𑀧𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀏𑀯. 𑀭𑀽𑀧𑀪𑀯𑀢𑁄 𑀧𑀦 𑀘𑀼𑀢𑁄 𑀤𑀼𑀳𑁂𑀢𑀼𑀓𑁄𑀧𑀺 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺. 𑀏𑀯𑀁 𑀦𑀬𑀫𑀢𑁆𑀢𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀆𑀳 ‘‘𑀅𑀬𑀁 𑀢𑀸𑀯 𑀅𑀭𑀽𑀧𑀪𑀽𑀫𑀻𑀲𑀼𑀬𑁂𑀯 𑀦𑀬𑁄’’𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀉𑀧𑀘𑀸𑀭𑀲𑁆𑀲 𑀩𑀮𑀯𑀢𑀸𑀬 𑀢𑀢𑁄 𑀘𑀯𑀺𑀢𑁆𑀯𑀸 𑀤𑀼𑀕𑁆𑀕𑀢𑀺𑀬𑀁 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸’’𑀢𑀺 𑀆𑀳. 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻𑀢𑀺 𑀏𑀢𑁆𑀣 𑀏𑀓𑀘𑁆𑀘𑀕𑁆𑀕𑀳𑀡𑀲𑁆𑀲 𑀧𑀬𑁄𑀚𑀦𑀁 𑀫𑀕𑁆𑀕𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀲𑀼 𑀯𑀼𑀢𑁆𑀢𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸 𑀢𑀺𑀳𑁂𑀢𑀼𑀓𑀸𑀤𑀺𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀁 𑀯𑀺𑀦𑀺𑀧𑀸𑀢𑀺𑀓𑀪𑀸𑀯𑁂𑀦 ‘‘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀼𑀕𑀢𑀺𑀘𑀼𑀢𑀺𑀬𑀸 𑀘 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀦 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀯𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑀁 𑀓𑀢𑀁. 𑀅𑀧𑀸𑀬𑀧𑀝𑀺𑀲𑀦𑁆𑀥𑀺 𑀏𑀯 𑀳𑀺 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀳𑁄𑀢𑀺, 𑀦 𑀲𑀩𑁆𑀩𑀲𑀼𑀕𑀢𑀺𑀘𑀼𑀢𑀺𑀬𑀸𑀢𑀺. 𑀅𑀣 𑀯𑀸 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀤𑀼𑀯𑀺𑀥𑀸 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸, 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀘𑀸𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀯𑀚𑁆𑀚𑁂𑀢𑁆𑀯𑀸 𑀧𑀼𑀭𑀺𑀫𑀁𑀬𑁂𑀯 𑀕𑀳𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺. 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀻𑀢𑀺 𑀤𑀼𑀳𑁂𑀢𑀼𑀓𑀸 𑀘 𑀢𑀺𑀳𑁂𑀢𑀼𑀓𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀸𑀤𑀻𑀦𑀁 𑀯𑀺𑀬 𑀳𑀺 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀺 𑀳𑁄𑀢𑀻𑀢𑀺.

𑀢𑀲𑁆𑀲 ¶ 𑀢𑀲𑁆𑀲 𑀯𑀺𑀧𑀭𑀻𑀢𑀢𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 ‘‘𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺𑀆𑀤𑀻𑀲𑀼 𑀪𑁂𑀤𑀯𑀺𑀲𑁂𑀲𑁂𑀲𑀼 ‘‘𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺𑀆𑀤𑀺𑀦𑀸 𑀬𑀁 𑀬𑀁 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀼𑀚𑁆𑀚𑀫𑀸𑀦𑀫𑀢𑁆𑀢𑀸𑀧𑁂𑀓𑁆𑀔𑀦𑀯𑀲𑁂𑀦 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑀸 𑀪𑀸𑀯𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸. ‘‘𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀻𑀲𑀼 𑀧𑀦 𑀯𑀺𑀧𑀭𑀻𑀢𑀬𑁄𑀚𑀦𑀸 𑀦 𑀓𑀸𑀢𑀩𑁆𑀩𑀸. 𑀦 𑀳𑀺 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀭𑀽𑀧𑀪𑀽𑀫𑀻𑀲𑀼 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺 𑀅𑀢𑁆𑀣𑀺. ‘‘𑀘𑀢𑀼𑀓𑁆𑀔𑀦𑁆𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀻’’𑀢𑀺 𑀏𑀢𑀲𑁆𑀲 𑀯𑀺𑀧𑀭𑀺𑀬𑀸𑀬𑁄 𑀲𑀬𑀫𑁂𑀯 𑀬𑁄𑀚𑀺𑀢𑁄. ‘‘𑀅𑀢𑀻𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀻’’𑀢𑀺 ¶ 𑀏𑀢𑀲𑁆𑀲 𑀘 𑀯𑀺𑀧𑀭𑀺𑀬𑀸𑀬𑁄 𑀦𑀢𑁆𑀣𑀺 𑀏𑀯. 𑀪𑁂𑀤𑀯𑀺𑀲𑁂𑀲𑁄 𑀏𑀯 𑀘 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑀺𑀢𑁄, 𑀅𑀪𑁂𑀤𑀯𑀺𑀲𑁂𑀲𑁄 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀪𑁂𑀤𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄𑀚𑀦𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀘𑀼𑀢𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀸…𑀧𑁂… 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀬 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸’’𑀢𑀺. 𑀘𑀢𑀼𑀓𑁆𑀔𑀦𑁆𑀥𑀸𑀬 𑀧𑀦 𑀘𑀢𑀼𑀓𑁆𑀔𑀦𑁆𑀥𑀸 𑀲𑀬𑀫𑁂𑀯 𑀬𑁄𑀚𑀺𑀢𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀪𑁂𑀤𑀯𑀺𑀲𑁂𑀲𑁄 𑀦 𑀤𑀲𑁆𑀲𑀺𑀢𑁄𑀢𑀺.

𑁬𑁩𑁨. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀏𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀤𑀺𑀲𑀳𑀓𑀸𑀭𑀺𑀓𑀸𑀭𑀡𑀲𑀳𑀺𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀮𑀤𑁆𑀥𑀧𑁆𑀧𑀘𑁆𑀘𑀬𑀁. 𑀩𑀸𑀳𑀺𑀭𑀓𑀓𑀧𑁆𑀧𑀺𑀢𑀲𑁆𑀲 𑀅𑀥𑀺𑀧𑀢𑀺𑀝𑁆𑀞𑀦𑀓𑀲𑁆𑀲 𑀅𑀪𑀸𑀯𑀢𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀲𑀢𑁆𑀢𑁄 𑀦 𑀚𑀻𑀯𑁄’’𑀢𑀺. 𑀉𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺 𑀢𑀣𑀸𑀯𑁄𑀳𑀸𑀭𑀫𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀪𑀯𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲 𑀘𑀸’’𑀢𑀺𑀆𑀤𑀺. 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸𑀢𑀺 𑀢𑀢𑁆𑀣 𑀳𑁂𑀢𑀼𑀁 𑀯𑀺𑀦𑀸. 𑀫𑀦𑀼𑀲𑁆𑀲𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦𑀸𑀢𑀺 𑀫𑀦𑀼𑀲𑁆𑀲𑀘𑀼𑀢𑀺𑀢𑁄 𑀫𑀦𑀼𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦. 𑀏𑀯𑀜𑁆𑀳𑀺 𑀧𑀸𑀓𑀝𑀕𑁆𑀕𑀳𑀡𑀁 𑀉𑀪𑀬𑀯𑀺𑀲𑁂𑀲𑀦𑀁 𑀳𑁄𑀢𑀺. 𑀧𑀸𑀓𑀝𑀢𑀸 𑀘𑁂𑀢𑁆𑀣 𑀢𑀤𑀸𑀲𑀦𑁆𑀦𑀓𑁆𑀔𑀦𑁆𑀥𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸 ‘‘𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁪𑁭) 𑀯𑀺𑀬. 𑀫𑀦𑀼𑀲𑁆𑀲𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦𑀸𑀢𑀺 𑀯𑀸 𑀫𑀦𑀼𑀲𑁆𑀲𑀘𑀼𑀢𑀺𑀢𑁄 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀲𑁆𑀲𑀬𑀁 𑀅𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀅𑀦𑀸𑀲𑁆𑀲𑀸𑀤𑀬𑀫𑀸𑀦𑀁 𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁩𑁨).

𑀲𑀭𑀲𑁂𑀦𑀸𑀢𑀺 𑀲𑀪𑀸𑀯𑁂𑀦, 𑀧𑀭𑀺𑀓𑁆𑀔𑀻𑀡𑀸𑀬𑀼𑀲𑀗𑁆𑀔𑀸𑀭𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀢𑀦𑀸, 𑀧𑀭𑁂𑀦 𑀯𑀸 𑀓𑀢𑁂𑀦 𑀲𑀻𑀲𑀘𑁆𑀙𑁂𑀤𑀦𑀸𑀤𑀺𑀉𑀧𑀓𑁆𑀓𑀫𑁂𑀦. 𑀲𑀩𑁆𑀩𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀻𑀦𑀁 𑀩𑀦𑁆𑀥𑀦𑀸𑀦𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺, 𑀢𑁂𑀲𑀁 𑀙𑁂𑀤𑀓𑀸𑀦𑀁. 𑀲𑀦𑁆𑀦𑀺𑀧𑀸𑀢𑀦𑁆𑀢𑀺 𑀧𑀢𑀦𑀁 𑀧𑀯𑀢𑁆𑀢𑀺. 𑀳𑀤𑀬𑀧𑁆𑀧𑀤𑁂𑀲𑁄𑀧𑀺 𑀅𑀦𑀼𑀓𑁆𑀓𑀫𑁂𑀦 ¶ 𑀲𑀼𑀲𑁆𑀲𑀺𑀢𑁆𑀯𑀸 𑀅𑀧𑁆𑀧𑀸𑀯𑀲𑁂𑀲𑁄 𑀳𑁄𑀢𑀺, 𑀧𑀕𑁂𑀯 𑀓𑀸𑀬𑁄𑀢𑀺 𑀆𑀳 ‘‘𑀓𑀫𑁂𑀦 𑀉𑀧𑀲𑀼𑀲𑁆𑀲𑀫𑀸𑀦𑁂 𑀲𑀭𑀻𑀭𑁂’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀗𑁆𑀔𑀡𑀸𑀯𑀲𑁂𑀲𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺. ‘‘𑀦𑀺𑀭𑀼𑀤𑁆𑀥𑁂𑀲𑀼 𑀘𑀓𑁆𑀔𑀸𑀤𑀻𑀲𑀽’’𑀢𑀺 𑀇𑀤𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀦𑀼𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺 𑀯𑀺𑀬 𑀦𑀺𑀭𑁄𑀥𑁄𑀧𑀺 𑀅𑀦𑀼𑀧𑀼𑀩𑁆𑀩𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀅𑀢𑀺𑀫𑀦𑁆𑀤𑀪𑀸𑀯𑀽𑀧𑀕𑀫𑀦𑀢𑀁 𑀯𑀸 𑀲𑀦𑁆𑀥𑀸𑀬 ‘‘𑀦𑀺𑀭𑀼𑀤𑁆𑀥𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀦 𑀅𑀦𑀯𑀲𑁂𑀲𑀦𑀺𑀭𑁄𑀥𑀁. 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀫𑁆𑀧𑀺 𑀳𑀺 𑀧𑀼𑀩𑁆𑀩𑁂 𑀘𑀼𑀢𑀺 𑀤𑀲𑁆𑀲𑀺𑀢𑀸. 𑀬𑀫𑀓𑁂 𑀘 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 ¶ 𑀯𑀸 𑀧𑀦 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀲𑀘𑀺𑀢𑁆𑀢𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀺, 𑀘𑀓𑁆𑀔𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁨𑁦) 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺.

𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑁂𑀢𑀺 𑀳𑀤𑀬𑀯𑀢𑁆𑀣𑀼𑀧𑀤𑁂𑀲𑀫𑀢𑁆𑀢𑁂. 𑀦 𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀢𑀺. 𑀳𑀤𑀬𑀯𑀢𑁆𑀣𑀼𑀧𑀺 𑀢𑀤𑀸 𑀆𑀢𑀧𑁂 𑀧𑀓𑁆𑀔𑀺𑀢𑁆𑀢𑀳𑀭𑀺𑀢𑀢𑀸𑀮𑀧𑀡𑁆𑀡𑀁 𑀯𑀺𑀬 𑀅𑀧𑁆𑀧𑀸𑀯𑀲𑁂𑀲𑀁 𑀳𑁄𑀢𑀻𑀢𑀺 ‘‘𑀢𑀗𑁆𑀔𑀡𑀸𑀯𑀲𑁂𑀲𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀇𑀢𑀭𑀯𑀢𑁆𑀣𑀽𑀦𑀁 𑀧𑀦 𑀲𑀓𑀺𑀘𑁆𑀘𑀸𑀲𑀫𑀢𑁆𑀣𑀢𑀸𑀬 𑀓𑁂𑀯𑀮𑀁 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯, 𑀢𑀤𑀸 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀗𑁆𑀔𑀡𑀸𑀯𑀲𑁂𑀲𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀫𑀸𑀢𑀼𑀖𑀸𑀢𑀸𑀤𑀺, 𑀫𑀳𑀕𑁆𑀕𑀢𑀫𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀕𑀭𑀼𑀓𑀁 𑀦𑀸𑀫. 𑀲𑀫𑀸𑀲𑁂𑀯𑀺𑀢𑀁 𑀅𑀪𑀺𑀡𑁆𑀳𑀲𑁄 𑀓𑀢𑀁. 𑀆𑀲𑀦𑁆𑀦𑀁 𑀫𑀭𑀡𑀓𑀸𑀮𑁂 𑀓𑀢𑀁, 𑀬𑀤𑀸 𑀢𑀤𑀸 𑀯𑀸 𑀓𑀢𑀫𑁆𑀧𑀺 𑀧𑀭𑀺𑀩𑁆𑀬𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀲𑁆𑀲𑀭𑀺𑀢𑀁. 𑀧𑀼𑀩𑁆𑀩𑀓𑀢𑀁 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁. 𑀮𑀤𑁆𑀥𑁄 𑀅𑀯𑀲𑁂𑀲𑁄 𑀅𑀯𑀺𑀚𑁆𑀚𑀸𑀤𑀺𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀏𑀢𑁂𑀦𑀸𑀢𑀺 𑀮𑀤𑁆𑀥𑀸𑀯𑀲𑁂𑀲𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑁄. 𑀏𑀢𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀓𑀢𑁄𑀓𑀸𑀲𑀁 𑀬𑀣𑀽𑀧𑀘𑀺𑀢𑀁 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀫𑀸𑀳. 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀦𑀸𑀫 𑀬𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀬𑀽𑀳𑀦𑀓𑀸𑀮𑁂 𑀓𑀫𑁆𑀫𑀁 𑀆𑀬𑀽𑀳𑀢𑀺, 𑀢𑀁. 𑀅𑀢𑀻𑀢𑁂 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂𑀧𑀺 𑀳𑀺 𑀓𑀫𑁆𑀫𑁂 𑀓𑀢𑁂 𑀯𑀺𑀧𑀘𑁆𑀘𑀦𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀉𑀧𑀢𑀺𑀝𑁆𑀞𑀢𑀺. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑀦𑀓𑀑𑀓𑀸𑀲𑁂 𑀏𑀓𑁄 𑀯𑀡𑁆𑀡𑁄. 𑀲𑁄 𑀘 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀲𑁆𑀲 ‘‘𑀅𑀕𑁆𑀕𑀺𑀚𑀸𑀮𑀯𑀡𑁆𑀡𑀸𑀤𑀺𑀓𑁄’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀢𑀲𑁆𑀫𑀺𑀁 𑀓𑀫𑁆𑀫𑀸𑀤𑀺𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂.

𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀏𑀯, 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀘 𑀲𑀦𑁆𑀢𑀢𑀺𑀬𑀸 𑀢𑀣𑀸𑀧𑀭𑀺𑀡𑀢𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀯𑀺𑀜𑁆𑀜𑀸𑀡𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸 𑀦𑀸𑀫𑁂𑀢𑀻’’𑀢𑀺. 𑀲𑀳𑀚𑀸𑀢𑀲𑀗𑁆𑀔𑀸𑀭𑀸𑀢𑀺 ¶ 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀸 𑀘𑁂𑀢𑀦𑀸, 𑀲𑀩𑁆𑀩𑁂𑀧𑀺 𑀯𑀸 𑀨𑀲𑁆𑀲𑀸𑀤𑀬𑁄. 𑀢𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑁂 𑀓𑀫𑁆𑀫𑀸𑀤𑀺𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀁 𑀔𑀺𑀧𑀦𑁆𑀢𑀺. 𑀔𑀺𑀧𑀦𑁆𑀢𑀸 𑀯𑀺𑀬 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀁 𑀯𑀺𑀜𑁆𑀜𑀸𑀡𑀁. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀢𑀤𑀸𑀲𑀦𑁆𑀦𑀯𑀺𑀜𑁆𑀜𑀸𑀡𑀸𑀦𑀁 𑀲𑀦𑁆𑀢𑀢𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀉𑀧𑀦𑀻𑀢𑁂𑀓𑀢𑁆𑀢𑀁 ¶ . 𑀢𑀡𑁆𑀳𑀸𑀬 𑀦𑀸𑀫𑀺𑀬𑀫𑀸𑀦𑀁…𑀧𑁂… 𑀧𑀯𑀢𑁆𑀢𑀢𑀻𑀢𑀺 𑀦𑀫𑀦𑀔𑀺𑀧𑀦𑀧𑀼𑀭𑀺𑀫𑀦𑀺𑀲𑁆𑀲𑀬𑀚𑀳𑀦𑀅𑀧𑀭𑀦𑀺𑀲𑁆𑀲𑀬𑀲𑁆𑀲𑀸𑀤𑀦𑀦𑀺𑀲𑁆𑀲𑀬𑀭𑀳𑀺𑀢𑀧𑀯𑀢𑁆𑀢𑀦𑀸𑀦𑀺 𑀲𑀦𑁆𑀢𑀢𑀺𑀯𑀲𑁂𑀦 𑀢𑀲𑁆𑀲𑁂𑀯𑁂𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀘 𑀯𑀤𑀦𑁆𑀢𑁄 ‘‘𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁧.𑁩𑁯𑁬) 𑀇𑀫𑀜𑁆𑀘 𑀫𑀺𑀘𑁆𑀙𑀸𑀕𑀸𑀳𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑀺 𑀳𑀺 𑀦𑀸𑀦𑀢𑁆𑀢𑀦𑀬𑁂 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀢𑁆𑀢𑀦𑀬𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀘 𑀑𑀭𑀺𑀫𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀭𑀚𑁆𑀚𑀼 𑀯𑀺𑀬 𑀧𑀼𑀭𑀺𑀫𑀪𑀯𑀢𑁆𑀢𑀪𑀸𑀯𑀯𑀺𑀦𑀺𑀩𑀤𑁆𑀥𑀁 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁, 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑀦𑀺𑀘𑁆𑀙𑀸 𑀯𑀺𑀬 𑀢𑀡𑁆𑀳𑀸, 𑀅𑀢𑀺𑀓𑁆𑀓𑀫𑀦𑀧𑀬𑁄𑀕𑁄 𑀯𑀺𑀬 𑀔𑀺𑀧𑀦𑀓𑀲𑀗𑁆𑀔𑀸𑀭𑀸, 𑀬𑀣𑀸 𑀘 𑀲𑁄 𑀧𑀼𑀭𑀺𑀲𑁄 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀳𑀫𑀸𑀦𑁄 𑀧𑀭𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀁 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑀬𑀫𑀸𑀦𑁄 𑀯𑀸 𑀅𑀦𑀲𑁆𑀲𑀸𑀤𑀬𑀫𑀸𑀦𑁄 𑀯𑀸 𑀓𑁂𑀯𑀮𑀁 𑀧𑀣𑀯𑀺𑀬𑀁 𑀲𑀓𑀩𑀮𑀧𑀬𑁄𑀕𑁂𑀳𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀪𑀯𑀦𑁆𑀢𑀭𑀢𑁆𑀢𑀪𑀸𑀯𑀯𑀺𑀦𑀺𑀩𑀤𑁆𑀥𑀁 𑀳𑀤𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀲𑁆𑀲𑀸𑀤𑀬𑀫𑀸𑀦𑀁, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀓𑁂𑀯𑀮𑀁 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑁂𑀳𑁂𑀯 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀅𑀲𑁆𑀲𑀸𑀤𑀬𑀫𑀸𑀦𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀁, 𑀧𑀝𑀺𑀮𑀪𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀪𑀯𑀦𑁆𑀢𑀭𑀸𑀤𑀺𑀧𑀝𑀺𑀲𑀦𑁆𑀥𑀸𑀦𑀢𑁄𑀢𑀺 𑀪𑀯𑀦𑁆𑀢𑀭𑀲𑁆𑀲 𑀅𑀜𑁆𑀜𑀪𑀯𑀲𑁆𑀲 𑀆𑀤𑀺𑀧𑀝𑀺𑀲𑀦𑁆𑀥𑀸𑀦𑀪𑀸𑀯𑀢𑁄. 𑀪𑀯𑀦𑁆𑀢𑀭𑀸𑀤𑀬𑁄 𑀯𑀸 𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀦𑁆𑀢𑀭𑀸𑀦𑀺, 𑀢𑁂𑀲𑀁 𑀧𑀝𑀺𑀲𑀦𑁆𑀥𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀢𑀤𑁂𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀧𑀺 𑀇𑀥𑀸𑀕𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀪𑀯𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀓𑀫𑁆𑀫𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀁. 𑀲𑀗𑁆𑀔𑀸𑀭𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀔𑀺𑀧𑀦𑀓𑀲𑀗𑁆𑀔𑀸𑀭𑀸. 𑀦𑀢𑀻𑀢𑀺 𑀦𑀫𑀦𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸. 𑀯𑀺𑀲𑀬𑁄 𑀓𑀫𑁆𑀫𑀸𑀤𑀺.

𑁬𑁩𑁩. 𑀲𑀤𑁆𑀤𑀧𑀝𑀺𑀖𑁄𑀲𑀸𑀤𑀻𑀦𑀁 𑀲𑀢𑀺𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀲𑀦𑁆𑀢𑀸𑀦𑀩𑀦𑁆𑀥𑁄 𑀦 𑀧𑀸𑀓𑀝𑁄𑀢𑀺 𑀢𑁂𑀲𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀸𑀕𑀫𑀦𑀸𑀢𑀻𑀢𑀳𑁂𑀢𑀼𑀲𑀫𑀼𑀧𑁆𑀧𑀸𑀤𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸𑀢𑀺 𑀏𑀢𑁆𑀣 𑀧𑀝𑀺𑀖𑁄𑀲𑁄 𑀲𑀤𑁆𑀤𑀳𑁂𑀢𑀼𑀓𑁄. 𑀧𑀤𑀻𑀧𑁄 𑀧𑀤𑀻𑀧𑀦𑁆𑀢𑀭𑀸𑀤𑀺𑀳𑁂𑀢𑀼𑀓𑁄. 𑀫𑀼𑀤𑁆𑀤𑀸 𑀮𑀜𑁆𑀙𑀦𑀳𑁂𑀢𑀼𑀓𑀸. 𑀙𑀸𑀬𑀸 𑀆𑀤𑀸𑀲𑀸𑀤𑀺𑀅𑀪𑀺𑀫𑀼𑀔𑀫𑀼𑀔𑀸𑀤𑀺𑀳𑁂𑀢𑀼𑀓𑀸. 𑀳𑁄𑀦𑁆𑀢𑀺 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸𑀢𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀤𑁂𑀲𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀳𑁄𑀦𑁆𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸. 𑀏𑀯𑀁 𑀇𑀤𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦 𑀳𑁂𑀢𑀼𑀤𑁂𑀲𑀁 𑀕𑀦𑁆𑀢𑁆𑀯𑀸 𑀢𑀁𑀳𑁂𑀢𑀼𑀓𑀁 𑀳𑁄𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸. 𑀢𑀲𑁆𑀫𑀸 𑀦 𑀇𑀤𑀁 𑀳𑁂𑀢𑀼𑀤𑁂𑀲𑀢𑁄 ¶ 𑀧𑀼𑀭𑀺𑀫𑀪𑀯𑀢𑁄 𑀇𑀥𑀸𑀕𑀢𑀁 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬 𑀲𑀤𑁆𑀤𑀸𑀤𑀺𑀤𑁂𑀲𑀢𑁄, 𑀦𑀸𑀧𑀺 𑀢𑀢𑁆𑀣 𑀳𑁂𑀢𑀼𑀦𑀸 𑀯𑀺𑀦𑀸 𑀉𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀤𑀻𑀳𑀺 𑀯𑀺𑀦𑀸 ¶ 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀳𑁄𑀦𑁆𑀢𑀺 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀧𑀘𑁆𑀘𑀬𑀤𑁂𑀲𑁂 𑀲𑀦𑁆𑀦𑀺𑀳𑀺𑀢𑀸 𑀳𑀼𑀢𑁆𑀯𑀸 𑀢𑀢𑁄 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀦𑀸𑀧𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀏𑀯𑀁 𑀇𑀤𑀫𑁆𑀧𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀦𑀢𑁆𑀣𑀺 𑀏𑀓𑀢𑀸 𑀏𑀓𑀲𑀦𑁆𑀢𑀸𑀦𑁂𑀓𑀢𑁆𑀢𑁂𑀧𑀺 𑀅𑀜𑁆𑀜𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀧𑀸𑀢𑀼𑀪𑀯𑀦𑀢𑁄. 𑀦𑀸𑀧𑀺 𑀦𑀸𑀦𑀢𑀸 𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀧𑀤𑀻𑀧𑁄 𑀯𑀺𑀬. 𑀔𑀡𑀺𑀓𑀸𑀬 𑀳𑀺 𑀧𑀤𑀻𑀧𑀚𑀸𑀮𑀸𑀬 𑀲𑀦𑁆𑀢𑀸𑀦𑁂𑀓𑀢𑁆𑀢𑀁 𑀉𑀧𑀸𑀤𑀸𑀬 𑀲𑁄 𑀏𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀅𑀢𑁆𑀣𑀓𑀺𑀘𑁆𑀘𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. ‘‘𑀬𑀤𑀺 𑀳𑀻’’𑀢𑀺𑀆𑀤𑀺𑀦𑀸 𑀲𑀦𑁆𑀢𑀸𑀦𑀩𑀦𑁆𑀥𑁂 𑀏𑀓𑀦𑁆𑀢𑀁 𑀏𑀓𑀢𑀸𑀬, 𑀦𑀸𑀦𑀢𑀸𑀬 𑀘 𑀅𑀕𑁆𑀕𑀳𑁂𑀢𑀩𑁆𑀩𑀢𑀁, 𑀕𑀳𑀡𑁂 𑀘 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄𑀢𑀺 𑀅𑀢𑀺𑀤𑁂𑀲𑁂𑀦 𑀩𑀻𑀚𑀗𑁆𑀓𑀼𑀭𑀸𑀤𑀻𑀲𑀼 𑀲𑀩𑁆𑀩𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀧𑀺 𑀳𑀺 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀯𑀺𑀜𑁆𑀜𑀸𑀡𑀸𑀦𑀁 𑀏𑀓𑀦𑁆𑀢𑀫𑁂𑀓𑀢𑁆𑀢𑁂 𑀲𑀢𑀺 𑀦 𑀫𑀦𑀼𑀲𑁆𑀲𑀕𑀢𑀺𑀢𑁄 𑀤𑁂𑀯𑀕𑀢𑀺 𑀲𑀫𑁆𑀪𑀽𑀢𑀸 𑀲𑀺𑀬𑀸. 𑀏𑀓𑀦𑁆𑀢𑀦𑀸𑀦𑀢𑁆𑀢𑁂 𑀦 𑀓𑀫𑁆𑀫𑀯𑀢𑁄 𑀨𑀮𑀁 𑀲𑀺𑀬𑀸, 𑀢𑀢𑁄 ‘‘𑀭𑀢𑁆𑀢𑀲𑁆𑀲 𑀩𑀻𑀚𑀁 𑀭𑀢𑁆𑀢𑀲𑁆𑀲 𑀨𑀮’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀯𑀺𑀬 ‘‘𑀪𑀽𑀢𑀧𑀼𑀩𑁆𑀩𑀸𑀳𑀁, 𑀪𑀦𑁆𑀢𑁂, 𑀭𑁄𑀳𑀺𑀢𑀲𑁆𑀲𑁄 𑀦𑀸𑀫 𑀇𑀲𑀺 𑀅𑀳𑁄𑀲𑀺’’𑀦𑁆𑀢𑀺𑀆𑀤𑀺𑀓𑀲𑁆𑀲 (𑀲𑀁. 𑀦𑀺. 𑁧.𑁧𑁦𑁭) 𑀯𑁄𑀳𑀸𑀭𑀲𑁆𑀲 𑀮𑁄𑀧𑁄 𑀲𑀺𑀬𑀸, 𑀢𑀲𑁆𑀫𑀸 𑀏𑀢𑁆𑀣 𑀲𑀦𑁆𑀢𑀸𑀦𑀩𑀦𑁆𑀥𑁂𑀲𑀼 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀦 𑀏𑀓𑀦𑁆𑀢𑀫𑁂𑀓𑀢𑀸 𑀯𑀸 𑀦𑀸𑀦𑀢𑀸 𑀯𑀸 𑀉𑀧𑀕𑀦𑁆𑀢𑀩𑁆𑀩𑀸 𑀦 𑀕𑀳𑁂𑀢𑀩𑁆𑀩𑀸. 𑀏𑀢𑁆𑀣 𑀘 𑀏𑀓𑀦𑁆𑀢𑀏𑀓𑀢𑀸𑀧𑀝𑀺𑀲𑁂𑀥𑁂𑀦 ‘‘𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨𑁨𑁭) 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀺, 𑀏𑀓𑀦𑁆𑀢𑀦𑀸𑀦𑀢𑀸𑀧𑀝𑀺𑀲𑁂𑀥𑁂𑀦 ‘‘𑀧𑀭𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨𑁨𑁭), 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀢𑀸𑀯𑀘𑀦𑁂𑀦 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨𑁨𑁭) 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀺.

𑁬𑁩𑁪. 𑀢𑀢𑁆𑀣𑀸𑀢𑀺 𑀨𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂. 𑀅𑀜𑁆𑀜𑀲𑁆𑀲𑀸𑀢𑀺 𑀬𑁂𑀦 𑀢𑀁 𑀓𑀫𑁆𑀫𑀁 𑀓𑀢𑀁, 𑀢𑀢𑁄 𑀅𑀜𑁆𑀜𑀲𑁆𑀲. 𑀅𑀜𑁆𑀜𑀢𑁄𑀢𑀺 𑀬𑀁 𑀢𑀁 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑀢𑁄 𑀅𑀜𑁆𑀜𑀢𑁄. ‘‘𑀥𑀫𑁆𑀫𑀫𑀢𑁆𑀢𑀁 𑀪𑀯𑀦𑁆𑀢𑀭𑀫𑀼𑀧𑁂𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁩𑁨; 𑀯𑀺𑀪. 𑀅𑀝𑁆𑀞. 𑁨𑁨𑁭; 𑀫𑀳𑀸𑀦𑀺. 𑀅𑀝𑁆𑀞. 𑁨𑁭; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁧𑁦𑁫) 𑀯𑀼𑀢𑁆𑀢𑀢𑁆𑀢𑀸 𑀨𑀮𑀲𑁆𑀲 𑀉𑀧𑀪𑀼𑀜𑁆𑀚𑀓𑁂 𑀘 𑀅𑀲𑀢𑀺 𑀓𑀲𑁆𑀲 𑀢𑀁 𑀨𑀮𑀁 𑀲𑀺𑀬𑀸𑀢𑀺 𑀅𑀦𑀼𑀬𑀼𑀜𑁆𑀚𑁂𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀅𑀦𑀼𑀬𑁄𑀕𑁂.

𑀢𑀢𑁆𑀣𑀸𑀢𑀺 𑀏𑀓𑀲𑀦𑁆𑀢𑀸𑀦𑁂. 𑀬𑀲𑁆𑀫𑀺𑀁 𑀥𑀫𑁆𑀫𑀧𑀼𑀜𑁆𑀚𑁂 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲𑁂𑀯 𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀳𑁂𑀢𑀼𑀨𑀮𑀸𑀦𑀁 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑁂𑀧𑀺 𑀢𑁂𑀦𑁂𑀯 ¶ 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀢𑀁 𑀨𑀮𑀁 ‘‘𑀅𑀜𑁆𑀜𑀲𑁆𑀲, 𑀅𑀜𑁆𑀜𑀢𑁄’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀘𑀢𑀼𑀫𑀥𑀼𑀭𑀅𑀮𑀢𑁆𑀢𑀓𑀭𑀲𑀸𑀤𑀺𑀪𑀸𑀯𑀦𑀸 𑀅𑀫𑁆𑀩𑀫𑀸𑀢𑀼𑀮𑀼𑀗𑁆𑀕𑀸𑀤𑀺𑀩𑀻𑀚𑀸𑀦𑀁 ¶ 𑀅𑀪𑀺𑀲𑀗𑁆𑀔𑀸𑀭𑁄. 𑀏𑀢𑁆𑀣 𑀘 𑀅𑀪𑀺𑀲𑀗𑁆𑀔𑀢𑀁 𑀩𑀻𑀚𑀁 𑀯𑀺𑀬 𑀓𑀫𑁆𑀫𑀯𑀸 𑀲𑀢𑁆𑀢𑁄, 𑀅𑀪𑀺𑀲𑀗𑁆𑀔𑀸𑀭𑁄 𑀯𑀺𑀬 𑀓𑀫𑁆𑀫𑀁, 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀧𑁆𑀧𑀩𑀦𑁆𑀥𑁄 𑀯𑀺𑀬 𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀩𑀦𑁆𑀥𑁄. 𑀢𑀢𑁆𑀣𑀼𑀧𑁆𑀧𑀦𑁆𑀦𑀲𑁆𑀲 𑀫𑀥𑀼𑀭𑀲𑁆𑀲 𑀭𑀢𑁆𑀢𑀓𑁂𑀲𑀭𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀢𑀲𑁆𑀲𑁂𑀯 𑀩𑀻𑀚𑀲𑁆𑀲, 𑀢𑀢𑁄 𑀏𑀯 𑀘 𑀅𑀪𑀺𑀲𑀗𑁆𑀔𑀸𑀭𑀢𑁄 𑀪𑀸𑀯𑁄 𑀯𑀺𑀬 𑀓𑀫𑁆𑀫𑀓𑀸𑀭𑀓𑀲𑁆𑀲𑁂𑀯 𑀲𑀢𑁆𑀢𑀲𑁆𑀲, 𑀢𑀁𑀓𑀫𑁆𑀫𑀢𑁄 𑀏𑀯 𑀘 𑀨𑀮𑀲𑁆𑀲 𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀸𑀮𑀲𑀭𑀻𑀭𑁂 𑀓𑀢𑀁 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀁, 𑀲𑀺𑀧𑁆𑀧𑀲𑀺𑀓𑁆𑀔𑀦𑀁, 𑀑𑀲𑀥𑀧𑁆𑀧𑀬𑁄𑀕𑁄 𑀘 𑀦 𑀯𑀼𑀟𑁆𑀠𑀲𑀭𑀻𑀭𑀁 𑀕𑀘𑁆𑀙𑀦𑁆𑀢𑀺. 𑀅𑀣 𑀘 𑀢𑀦𑁆𑀦𑀺𑀫𑀺𑀢𑁆𑀢𑀁 𑀯𑀺𑀚𑁆𑀚𑀸𑀧𑀸𑀝𑀯𑀁 𑀲𑀺𑀧𑁆𑀧𑀚𑀸𑀦𑀦𑀁, 𑀅𑀦𑀸𑀫𑀬𑀢𑀸 𑀘 𑀯𑀼𑀟𑁆𑀠𑀲𑀭𑀻𑀭𑁂 𑀳𑁄𑀦𑁆𑀢𑀺, 𑀦 𑀘 𑀢𑀸𑀦𑀺 𑀅𑀜𑁆𑀜𑀲𑁆𑀲 𑀳𑁄𑀦𑁆𑀢𑀺 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀏𑀯 𑀯𑀼𑀟𑁆𑀠𑀲𑀭𑀻𑀭𑁂 𑀉𑀧𑁆𑀧𑀚𑁆𑀚𑀦𑀢𑁄, 𑀦 𑀘 𑀬𑀣𑀸𑀧𑀬𑀼𑀢𑁆𑀢𑁂𑀦 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀦𑀸 𑀯𑀺𑀦𑀸 𑀢𑀸𑀦𑀺 𑀅𑀜𑁆𑀜𑀢𑁄 𑀳𑁄𑀦𑁆𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄, 𑀏𑀯𑀁 𑀇𑀥𑀸𑀧𑀺 𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁, 𑀏𑀢𑀁 𑀦𑀸𑀜𑁆𑀜𑀲𑁆𑀲. 𑀦 𑀘 𑀅𑀜𑁆𑀜𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁂𑀦 𑀘 𑀲𑀗𑁆𑀔𑀸𑀭𑀸𑀪𑀸𑀯𑁂 𑀨𑀮𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀅𑀜𑁆𑀜𑀧𑀘𑁆𑀘𑀬𑀦𑀺𑀯𑀸𑀭𑀡𑀁 𑀓𑀭𑁄𑀢𑀺.

𑀬𑀫𑁆𑀧𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀯𑀤𑀸𑀫𑀸𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀯𑀸 𑀉𑀧𑀪𑀼𑀜𑁆𑀚𑀓𑁂 𑀅𑀲𑀢𑀺 𑀲𑀺𑀤𑁆𑀥𑀸 𑀪𑀼𑀜𑁆𑀚𑀓𑀲𑀫𑁆𑀫𑀼𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀨𑀮𑀢𑀻𑀢𑀺 𑀲𑀫𑁆𑀫𑀼𑀢𑀺 𑀨𑀮𑀢𑀺𑀲𑀫𑁆𑀫𑀼𑀢𑀺.

𑀭𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀭𑀼𑀓𑁆𑀔𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀸𑀦𑀁 𑀪𑀽𑀢𑀼𑀧𑀸𑀤𑀸𑀬𑀥𑀫𑁆𑀫𑀸𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸 𑀔𑀦𑁆𑀥𑀲𑀦𑁆𑀢𑀸𑀦𑁂 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀼𑀧𑁆𑀧𑀢𑁆𑀢𑀺𑀬𑀁 ‘‘𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀧𑀸𑀧𑀁 𑀓𑀭𑁄𑀢𑀻’’𑀢𑀺 𑀓𑀢𑁆𑀢𑀼𑀯𑁄𑀳𑀸𑀭𑁄, 𑀏𑀯𑀁 𑀢𑀲𑁆𑀲 𑀨𑀮𑀼𑀧𑁆𑀧𑀢𑁆𑀢𑀺𑀬𑀁 ‘‘𑀲𑀼𑀔𑀁 𑀅𑀦𑀼𑀪𑀯𑀢𑀺, 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀻’’𑀢𑀺 𑀉𑀧𑀪𑀼𑀜𑁆𑀚𑀓𑀯𑁄𑀳𑀸𑀭𑁄, 𑀢𑀲𑁆𑀫𑀸 𑀦 𑀏𑀢𑁆𑀣 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁂𑀦 𑀅𑀜𑁆𑀜𑁂𑀦 𑀉𑀧𑀪𑀼𑀜𑁆𑀚𑀓𑁂𑀦 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺.

𑁬𑁩𑁫. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀢𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑁂 𑀲𑀢𑀺, 𑀲𑀺𑀤𑁆𑀥𑁂𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀫𑀸𑀦𑀓𑁆𑀔𑀡𑁂 𑀏𑀯. 𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂𑀢𑀺 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑀢𑁄 𑀧𑀼𑀩𑁆𑀩𑁂, 𑀅𑀯𑀺𑀚𑁆𑀚𑀫𑀸𑀦𑀢𑀸𑀬 𑀲𑀫𑀸𑀦𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸 𑀘𑀸𑀢𑀺 𑀯𑀺𑀧𑀘𑁆𑀘𑀦𑀧𑁆𑀧𑀧𑀢𑁆𑀢𑀺𑀢𑁄 𑀧𑀘𑁆𑀙𑀸 𑀘.

𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀓𑀢𑀢𑁆𑀢𑀸 𑀘𑁂 𑀧𑀘𑁆𑀘𑀬𑀸, 𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀫𑁆𑀧𑀺 𑀓𑀢𑀢𑁆𑀢𑀁 𑀲𑀫𑀸𑀦𑀦𑁆𑀢𑀺 𑀢𑁂𑀲𑀫𑁆𑀧𑀺 𑀨𑀮𑀸𑀯𑀳𑀢𑀸 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀦 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸’’𑀢𑀺.

‘‘𑀦 ¶ ¶ 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀜𑁆𑀘 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀤𑁄𑀲𑁂 𑀧𑀭𑀺𑀳𑀭𑀢𑀺. 𑀢𑀲𑁆𑀲𑀸 𑀧𑀸𑀝𑀺𑀪𑁄𑀕𑀓𑀺𑀭𑀺𑀬𑀸𑀬, 𑀪𑀡𑁆𑀟𑀓𑀻𑀡𑀦𑀓𑀺𑀭𑀺𑀬𑀸𑀬, 𑀇𑀡𑀕𑁆𑀕𑀳𑀡𑀓𑀺𑀭𑀺𑀬𑀸𑀬 𑀯𑀸 𑀓𑀭𑀡𑀫𑀢𑁆𑀢𑀁 𑀢𑀁𑀓𑀺𑀭𑀺𑀬𑀸𑀓𑀭𑀡𑀫𑀢𑁆𑀢𑀁, 𑀢𑀤𑁂𑀯 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑁂 𑀧𑀝𑀺𑀪𑀡𑁆𑀟𑀤𑀸𑀦𑁂, 𑀇𑀡𑀤𑀸𑀦𑁂 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀨𑀮𑀺𑀢𑀦𑀺𑀬𑁆𑀬𑀸𑀢𑀦𑀸𑀤𑀺𑀨𑀮𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁬. 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁆𑀣𑀦𑁆𑀢𑀺 𑀩𑀸𑀢𑁆𑀢𑀺𑀁𑀲𑀸𑀬 𑀯𑀺𑀜𑁆𑀜𑀸𑀡𑁂𑀲𑀼 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑀺𑀬𑀜𑁆𑀘 𑀧𑀘𑁆𑀘𑀬𑀪𑀸𑀯𑁂 𑀯𑀺𑀪𑀚𑁆𑀚 𑀅𑀯𑀺𑀪𑀸𑀯𑀺𑀢𑁂 𑀧𑀯𑀢𑁆𑀢𑀦𑀓𑀲𑀫𑁆𑀫𑁄𑀳𑀲𑁆𑀲 𑀅𑀧𑀦𑀬𑀦𑀢𑁆𑀣𑀁.

𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀢𑀺𑀳𑁂𑀢𑀼𑀓𑁄 𑀢𑀺𑀳𑁂𑀢𑀼𑀓𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀪𑁂𑀤𑀁 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁄, 𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀩𑀮𑀯𑀓𑀫𑁆𑀫𑀲𑁆𑀲 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. ‘‘𑀤𑀼𑀩𑁆𑀩𑀮𑀜𑁆𑀳𑀺 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺 𑀧𑀝𑁆𑀞𑀸𑀦𑀲𑀁𑀯𑀡𑁆𑀡𑀦𑀸𑀬 𑀤𑀲𑁆𑀲𑀺𑀢𑀫𑁂𑀢𑀁. 𑀭𑀽𑀧𑀸𑀯𑀘𑀭𑀧𑀜𑁆𑀘𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 ‘‘𑀞𑀧𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀦 𑀯𑀸 𑀯𑀢𑁆𑀢𑀩𑁆𑀩𑀁 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑀓𑀣𑀸𑀬 𑀅𑀯𑀺𑀧𑀸𑀓𑀸𑀭𑀳𑀲𑁆𑀲 𑀧𑀲𑀗𑁆𑀕𑀸𑀪𑀸𑀯𑀢𑁄. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀳𑀺 𑀅𑀯𑀺𑀧𑀸𑀓𑀢𑀸 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀸 𑀏𑀯. 𑀅𑀯𑀺𑀲𑁂𑀲𑁂𑀦 𑀧𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀦𑁆𑀦𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀧𑀜𑁆𑀘𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀬𑀸, 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀻𑀭𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀜𑁆𑀘𑀸𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁. 𑀢𑀣𑁂𑀯𑀸𑀢𑀺 𑀤𑁆𑀯𑁂𑀥𑀸 𑀏𑀯. 𑀓𑀣𑀁 𑀧𑀦 𑀇𑀝𑁆𑀞𑀸𑀭𑀫𑁆𑀫𑀡𑁂𑀬𑁂𑀯 𑀧𑀯𑀢𑁆𑀢𑀦𑀓𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀤𑀼𑀕𑁆𑀕𑀢𑀺𑀬𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀭𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲𑀸’’𑀢𑀺𑀆𑀤𑀺. 𑀣𑁂𑀭𑁄 𑀳𑀺 𑀢𑀢𑁆𑀣 𑀇𑀤𑁆𑀥𑀺𑀬𑀸 𑀯𑀲𑁆𑀲𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀢𑀺𑀧𑀬𑀁 𑀯𑁂𑀮𑀁 𑀦𑀺𑀭𑀬𑀕𑁆𑀕𑀺𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀲𑁆𑀯𑁂𑀯 𑀓𑀸𑀫𑀸𑀯𑀘𑀭𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀓𑀸𑀫𑀸𑀯𑀘𑀭𑀁, 𑀭𑀽𑀧𑀸𑀯𑀘𑀭𑀜𑁆𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀏𑀓𑀚𑁆𑀛𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 𑀏𑀢𑁆𑀣 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸𑀬 𑀕𑀳𑀡𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺, 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀏𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀣𑁂𑀯 ¶ 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂𑀢𑀺 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀦𑀺𑀬𑀫𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂. 𑀧𑀯𑀢𑁆𑀢𑁂 𑀳𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀭𑀽𑀧𑀪𑀯𑁂 ¶ 𑀘𑀢𑀼𑀦𑁆𑀦𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀁. 𑀢𑀸𑀦𑀺 𑀧𑀦 𑀏𑀓𑀦𑁆𑀢𑀢𑁄 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀺, 𑀭𑀽𑀧𑀪𑀯𑁂 𑀘 𑀓𑀣𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄𑀢𑀺 𑀆𑀳 ‘‘𑀲𑁄 𑀘 𑀔𑁄’’𑀢𑀺𑀆𑀤𑀺. ‘‘𑀢𑀣𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀧𑀺 𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀦𑀢𑁆𑀣𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀩𑀳𑀼𑀮𑀜𑁆𑀳𑀺 𑀢𑁂𑀲𑀁 𑀇𑀝𑁆𑀞𑀸 𑀏𑀯 𑀭𑀽𑀧𑀸𑀤𑀬𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀓𑀤𑀸𑀘𑀺 𑀅𑀦𑀺𑀝𑁆𑀞𑀁. 𑀤𑁂𑀯𑀸𑀦𑀜𑁆𑀳𑀺 𑀓𑁂𑀲𑀜𑁆𑀘𑀺𑀤𑁂𑀯 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑀓𑀸𑀮𑀸𑀤𑀻𑀲𑀼 𑀫𑀺𑀮𑀸𑀢𑀫𑀸𑀮𑀸𑀤𑀺𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄 𑀳𑁄𑀢𑀻𑀢𑀺.

𑁬𑁩𑁭. 𑀬𑀢𑁆𑀣 𑀯𑀺𑀢𑁆𑀣𑀸𑀭𑀧𑁆𑀧𑀓𑀸𑀲𑀦𑀁 𑀓𑀢𑀁, 𑀢𑀢𑁄 𑀪𑀯𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀁 𑀓𑀸𑀢𑀼𑀓𑀸𑀫𑁄 𑀆𑀳 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀢𑁂𑀦𑁂𑀯 ‘‘𑀤𑁆𑀯𑀻𑀲𑀼 𑀪𑀯𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀸𑀧𑀺 𑀓𑁂𑀘𑀺 𑀅𑀡𑁆𑀟𑀚𑀸, 𑀲𑀁𑀲𑁂𑀤𑀚𑀸 𑀘 𑀳𑁄𑀦𑁆𑀢𑀻𑀢𑀺 𑀢𑀤𑀧𑁂𑀓𑁆𑀔𑀸𑀬 ‘‘𑀘𑀢𑀽𑀲𑀼 𑀬𑁄𑀦𑀻𑀲𑀽’’𑀢𑀺 𑀯𑀼𑀢𑁆𑀢𑀁. 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀺𑀢𑀸𑀲𑀸𑀫𑀜𑁆𑀜𑁂𑀦 𑀘𑀢𑀼𑀢𑁆𑀣𑀛𑀸𑀦𑀪𑀽𑀫𑀺𑀓𑀸𑀧𑀺 𑀅𑀲𑀜𑁆𑀜𑀸𑀭𑀼𑀧𑁆𑀧𑀯𑀚𑁆𑀚𑀸 𑀘𑀢𑀼𑀢𑁆𑀣𑀺𑀁𑀬𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀪𑀚𑀦𑁆𑀢𑀺. 𑀏𑀲 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀏𑀓𑀯𑀻𑀲𑀢𑀺𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘𑀼𑀤𑁆𑀤𑀲𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘, 𑀲𑀢𑁆𑀢𑀦𑁆𑀦𑀁 𑀧𑀯𑀢𑁆𑀢𑁂 𑀏𑀯𑀸𑀢𑀺 𑀅𑀬𑀁 𑀬𑀣𑀸𑀲𑀫𑁆𑀪𑀯𑁄.

𑀢𑀸𑀤𑀺𑀲𑁂𑀬𑁂𑀯𑀸𑀢𑀺 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑁂𑀬𑁂𑀯.

𑀘𑀢𑀼𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀪𑀯𑀸𑀤𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀅𑀦𑁆𑀢𑁄𑀕𑀥𑀸𑀦𑀁 𑀧𑀦 𑀢𑀺𑀡𑁆𑀡𑀁 𑀯𑀺𑀜𑁆𑀜𑀸𑀡𑀸𑀦𑀁 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀧𑀘𑁆𑀘𑀬𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀯𑀺𑀜𑁆𑀜𑀸𑀡𑀓𑁂 𑀲𑀢𑁆𑀢𑀸𑀯𑀸𑀲𑁂 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑁂 𑀅𑀮𑀩𑁆𑀪𑀫𑀸𑀦𑁂𑀧𑀺 𑀢𑀲𑁆𑀲 𑀲𑀗𑁆𑀔𑀸𑀭𑀳𑁂𑀢𑀼𑀓𑀢𑁆𑀢𑀁 𑀮𑀩𑁆𑀪𑀢𑁂𑀯. 𑀢𑀣𑀸 𑀳𑀺 𑀢𑀢𑁆𑀣 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀤𑀼𑀕𑁆𑀕𑀢𑀺𑀆𑀤𑀻𑀲𑀼 𑀧𑀯𑀢𑁆𑀢𑀺𑀬𑀁 𑀓𑀼𑀲𑀮𑀯𑀺𑀧𑀸𑀓𑀸𑀤𑀺𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀪𑀯𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀸𑀫𑀭𑀽𑀧𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁩𑁮. 𑀯𑀺𑀪𑀸𑀕𑀸 ¶ 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲 𑀘 𑀧𑀪𑁂𑀤𑀢𑁄.

𑀢𑀢𑁆𑀣 𑀦𑀸𑀫𑀲𑁆𑀲 𑀢𑀸𑀯 𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁂𑀦 𑀓𑀸𑀫𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀦𑀸𑀫𑀫𑁂𑀯, 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀧𑀦 𑀅𑀲𑀗𑁆𑀓𑀭𑀢𑁄 ¶ 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦𑁂𑀢𑁆𑀣 𑀧𑀯𑀢𑁆𑀢𑀺𑀓𑀣𑀸𑀬𑀁 𑀅𑀧𑁆𑀧𑀘𑁆𑀘𑀬𑀢𑁆𑀢𑀸, 𑀦𑀫𑀦𑀝𑁆𑀞𑀸𑀪𑀸𑀯𑀢𑁄 𑀘 𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀺. 𑀦𑀸𑀫𑀦𑀝𑁆𑀞𑁂𑀦 𑀳𑀺 𑀢𑀁 𑀦𑀸𑀫𑀁, 𑀦 𑀦𑀫𑀦𑀝𑁆𑀞𑁂𑀦. 𑀢𑁂𑀲𑀁 𑀦𑀸𑀫𑀭𑀽𑀧𑀸𑀦𑀁 𑀲𑀼𑀔𑀸𑀤𑀺𑀯𑀲𑁂𑀦, 𑀧𑀣𑀯𑀻𑀆𑀤𑀺𑀯𑀲𑁂𑀦 𑀘 𑀯𑀺𑀪𑀸𑀕𑁄.

𑀏𑀓𑀁 𑀲𑀢𑁆𑀢𑀸𑀯𑀸𑀲𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑀁. 𑀧𑀼𑀭𑀺𑀫𑁂𑀲𑀼 𑀘𑀢𑀽𑀲𑀼, 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁂 𑀘𑀸𑀢𑀺 𑀧𑀜𑁆𑀘𑀲𑀼.

𑀕𑀩𑁆𑀪𑀲𑁂𑀬𑁆𑀬𑀕𑁆𑀕𑀳𑀡𑁂𑀦 𑀚𑀮𑀸𑀩𑀼𑀚𑀸 𑀕𑀳𑀺𑀢𑀸𑀢𑀺 ‘‘𑀅𑀡𑁆𑀟𑀚𑀸𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀡𑁆𑀟𑀚𑀸𑀦𑀜𑁆𑀘 𑀅𑀪𑀸𑀯𑀓𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀦𑁆𑀢𑀢𑀺𑀲𑀻𑀲𑀸𑀦𑀻𑀢𑀺 𑀓𑀮𑀸𑀧𑀲𑀦𑁆𑀢𑀸𑀦𑀫𑀽𑀮𑀸𑀦𑀺. 𑀬𑀤𑀺𑀧𑀺 𑀯𑀺𑀓𑀸𑀭𑀭𑀽𑀧𑀸𑀦𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦 𑀲𑀦𑁆𑀢𑀺, 𑀮𑀓𑁆𑀔𑀡𑀧𑀭𑀺𑀘𑁆𑀙𑁂𑀤𑀭𑀽𑀧𑀸𑀦𑀺 𑀧𑀦 𑀲𑀦𑁆𑀢𑀻𑀢𑀺 𑀢𑀸𑀦𑀺 𑀧𑀭𑀫𑀢𑁆𑀣𑀢𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀻𑀢𑀺 𑀯𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀭𑀽𑀧𑀢𑁄’’𑀢𑀺. 𑀨𑀲𑁆𑀲𑀸𑀤𑀺𑀓𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀪𑀸𑀯𑁂𑀦 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 ‘‘𑀢𑁂𑀯𑀻𑀲𑀢𑀺 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑀦𑁂𑀢𑁆𑀯𑀸𑀢𑀺 𑀓𑀮𑀸𑀧𑀦𑁆𑀢𑀭𑀕𑀢𑁂 𑀧𑀣𑀯𑀻𑀆𑀤𑀺𑀓𑁂 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀅𑀕𑁆𑀕𑀳𑁂𑀢𑁆𑀯𑀸.

𑀢𑁂𑀲𑀦𑁆𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀦𑀁. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀘𑀢𑀽𑀲𑀼𑀧𑀺 𑀲𑀦𑁆𑀢𑀢𑀺𑀲𑀻𑀲𑁂𑀲𑀼 𑀭𑀽𑀧𑀸𑀦𑀁 𑀅𑀲𑀗𑁆𑀔𑀺𑀧𑀦𑁂𑀦.

𑀓𑀸𑀫𑀪𑀯𑁂 𑀧𑀦 𑀬𑀲𑁆𑀫𑀸 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀸𑀫𑀪𑀯𑁂 𑀑𑀧𑀧𑀸𑀢𑀺𑀓𑀸 𑀯𑀼𑀢𑁆𑀢𑀸 𑀦 𑀲𑀦𑁆𑀢𑀺, 𑀬𑁂𑀦 𑀲𑁂𑀲𑀕𑁆𑀕𑀳𑀡𑀁 𑀲𑀸𑀢𑁆𑀣𑀓𑀁 𑀪𑀯𑁂𑀬𑁆𑀬, 𑀅𑀡𑁆𑀟𑀚𑀕𑀩𑁆𑀪𑀲𑁂𑀬𑁆𑀬𑀓𑁂𑀳𑀺 𑀧𑀦 𑀑𑀧𑀧𑀸𑀢𑀺𑀓𑀲𑀁𑀲𑁂𑀤𑀚𑀸 𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀓𑁂𑀳𑀺 𑀑𑀧𑀧𑀸𑀢𑀺𑀓𑁂𑀳𑀺 𑀯𑀼𑀢𑁆𑀢𑁂𑀳𑀺 𑀲𑁂𑀲𑁂 𑀲𑀦𑁆𑀥𑀸𑀬 ‘‘𑀲𑁂𑀲𑀑𑀧𑀧𑀸𑀢𑀺𑀓𑀸𑀦’’𑀦𑁆𑀢𑀺 𑀆𑀳. 𑀢𑁂 𑀧𑀦 𑀅𑀭𑀽𑀧𑀺𑀦𑁄𑀧𑀺 𑀲𑀦𑁆𑀢𑀻𑀢𑀺 ‘‘𑀓𑀸𑀫𑀪𑀯𑁂’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀦 𑀦𑀸𑀫𑀭𑀽𑀧𑀁 𑀬𑀣𑀸𑀲𑀫𑁆𑀪𑀯𑀁 𑀭𑀽𑀧𑀫𑀺𑀲𑁆𑀲𑀓𑀯𑀺𑀜𑁆𑀜𑀸𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀥𑀫𑁆𑀫𑀕𑀡𑀦𑀢𑁄 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀧𑀯𑀢𑁆𑀢𑀉𑀢𑀼𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀦𑁆𑀦𑀭𑀽𑀧𑁂𑀲𑀼 𑀢𑁂𑀚𑁄𑀥𑀸𑀢𑀼𑀢𑁄. 𑀳𑀤𑀬𑀯𑀢𑁆𑀣𑀼𑀦𑁄 𑀢𑀗𑁆𑀔𑀡𑀼𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸. 𑀢𑁂𑀲𑀁 𑀅𑀚𑁆𑀛𑁄𑀳𑀭𑀺𑀢𑀸𑀳𑀸𑀭𑁂𑀦 𑀅𑀦𑀼𑀕𑀢𑁂 𑀲𑀭𑀻𑀭𑁂 ¶ 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀲𑀼𑀝𑁆𑀞𑀤𑁆𑀥𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀭𑁄𑀢𑀺 𑀢𑁂𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀪𑀸𑀯𑁂𑀦 𑀢𑀺𑀭𑁄𑀓𑁆𑀔𑁄. 𑀅𑀯𑀓𑀁𑀲𑀢𑁄 𑀤𑁆𑀯𑁂 𑀅𑀝𑁆𑀞𑀓𑀸𑀦𑁂𑀯 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀲𑀤𑁆𑀤𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀉𑀓𑁆𑀓𑀁𑀲𑀢𑁄 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀢𑀺 𑀬𑀁 𑀧𑀼𑀩𑁆𑀩𑁂 𑀲𑀦𑁆𑀢𑀢𑀺𑀤𑁆𑀯𑀬𑀸𑀤𑀺𑀓𑀁 𑀲𑀢𑁆𑀢𑀓𑀧𑀭𑀺𑀬𑁄𑀲𑀸𑀦𑀁 𑀭𑀽𑀧𑀁 𑀇𑀥 𑀯𑀼𑀢𑁆𑀢𑀁, 𑀢𑀁 𑀏𑀓𑁂𑀓𑀲𑁆𑀲 ¶ 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀼𑀩𑁆𑀩𑁂…𑀧𑁂… 𑀲𑀢𑁆𑀢𑀢𑀺𑀯𑀺𑀥’’𑀦𑁆𑀢𑀺. 𑀤𑀼𑀯𑀺𑀥𑀫𑁆𑀧𑀺 𑀢𑀦𑁆𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀲𑀤𑁆𑀤𑀁.

𑀲𑀡𑁆𑀞𑀸𑀢𑀼𑀦𑁆𑀢𑀺 𑀅𑀤𑁆𑀥𑀦𑀺𑀬𑀪𑀸𑀯𑁂𑀦 𑀞𑀸𑀢𑀼𑀁, 𑀅𑀢𑁆𑀢𑀦𑁄 𑀧𑀦 𑀔𑀡𑀫𑀢𑁆𑀢𑀁 𑀢𑀺𑀝𑁆𑀞𑀢𑁂𑀯. 𑀘𑀢𑀼𑀤𑁆𑀤𑀺𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀲𑀻𑀲𑀸 𑀫𑀽𑀮𑁂𑀦 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀯𑀯𑀢𑁆𑀣𑀸𑀧𑀺𑀢𑀸. 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀞𑀺𑀢𑀸 𑀪𑀺𑀦𑁆𑀦𑀯𑀸𑀳𑀦𑀺𑀓𑀸 𑀯𑀺𑀬 𑀘.

𑁬𑁩𑁯. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀦𑁆𑀢𑀺 𑀭𑀽𑀧𑀸𑀚𑀦𑀓𑀓𑀫𑁆𑀫𑀚𑀧𑀜𑁆𑀘𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀓𑀸𑀮𑀁, 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀜𑁆𑀘 𑀲𑀦𑁆𑀥𑀸𑀬𑀸𑀳. 𑀢𑀤𑀸 𑀳𑀺 𑀢𑀢𑁄 𑀦𑀸𑀫𑀫𑁂𑀯 𑀳𑁄𑀢𑀻𑀢𑀺. 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀦 𑀢𑀤𑀸𑀧𑀺 𑀉𑀪𑀬𑀁 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀧𑀘𑁆𑀙𑀸𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀘 𑀭𑀽𑀧𑀁 𑀉𑀧𑀢𑁆𑀣𑀤𑁆𑀥𑀁 𑀳𑁄𑀢𑀻𑀢𑀺. 𑀅𑀲𑀜𑁆𑀜𑁂𑀲𑀽𑀢𑀺𑀆𑀤𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀦𑁆𑀢𑀺 𑀪𑀯𑀗𑁆𑀕𑀸𑀤𑀺𑀚𑀦𑀓𑀓𑀫𑁆𑀫𑀢𑁄 𑀅𑀜𑁆𑀜𑁂𑀦 𑀭𑀽𑀧𑀼𑀧𑁆𑀧𑀢𑁆𑀢𑀺𑀓𑀸𑀮𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑀁, 𑀪𑀯𑀗𑁆𑀕𑀸𑀤𑀺𑀉𑀧𑁆𑀧𑀢𑁆𑀢𑀺𑀓𑀸𑀮𑀢𑁄 𑀅𑀜𑁆𑀜𑀓𑀸𑀮𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀪𑀯𑀗𑁆𑀕𑀸𑀤𑀺𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀳𑀺 𑀢𑀁𑀚𑀦𑀓𑁂𑀦 𑀓𑀫𑁆𑀫𑀼𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁, 𑀲𑁄 𑀘 𑀯𑀺𑀧𑀸𑀓𑁄 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀧𑁂𑀓𑁆𑀔𑀫𑁆𑀧𑀺 𑀳𑀺 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑁂𑀦 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀁, 𑀦𑀸𑀫𑀜𑁆𑀘 𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀸𑀦𑀧𑁂𑀓𑁆𑀔𑀁 𑀳𑁄𑀢𑀻𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘𑀸𑀢𑀺 𑀏𑀢𑁆𑀣 𑀦𑀸𑀫𑀭𑀽𑀧𑀲𑀤𑁆𑀤𑁄 𑀅𑀢𑁆𑀢𑀦𑁄 𑀏𑀓𑀤𑁂𑀲𑁂𑀦 𑀦𑀸𑀫𑀲𑀤𑁆𑀤𑁂𑀦 𑀦𑀸𑀫𑀲𑀤𑁆𑀤𑀲𑁆𑀲 𑀲𑀭𑀽𑀧𑁄, 𑀭𑀽𑀧𑀲𑀤𑁆𑀤𑁂𑀦 𑀘 𑀭𑀽𑀧𑀲𑀤𑁆𑀤𑀲𑁆𑀲, 𑀢𑀲𑁆𑀫𑀸 𑀲𑀭𑀽𑀧𑀸𑀦𑀁 𑀏𑀓𑀲𑁂𑀲𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄, 𑀦𑀸𑀫𑀭𑀽𑀧𑀲𑀤𑁆𑀤𑀲𑁆𑀲 𑀞𑀸𑀦𑀁 𑀇𑀢𑀭𑁂𑀲𑀜𑁆𑀘 𑀦𑀸𑀫𑀭𑀽𑀧𑀲𑀤𑁆𑀤𑀸𑀦𑀁 𑀅𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀧𑀸𑀓𑀢𑁄 𑀅𑀜𑁆𑀜𑀁 𑀅𑀯𑀺𑀧𑀸𑀓𑀁. 𑀬𑀢𑁄 𑀤𑁆𑀯𑀺𑀥𑀸 𑀫𑀢𑀁, 𑀢𑀢𑁄 𑀬𑀼𑀢𑁆𑀢𑀫𑁂𑀯 𑀇𑀤𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀓𑁆𑀔𑀡𑁂 𑀯𑀺𑀬 𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑁂𑀧𑀺 𑀯𑀺𑀧𑀸𑀓𑀸𑀚𑀦𑀓𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑁂 𑀧𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀜𑁆𑀘 𑀮𑀩𑁆𑀪𑀢𑀻𑀢𑀺 𑀢𑀸𑀤𑀺𑀲𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑀯𑀚𑁆𑀚𑀦𑀢𑁆𑀣𑀁 ‘‘𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂’’𑀢𑀺 𑀯𑀼𑀢𑁆𑀢𑀁.

𑁬𑁪𑁦. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄𑀢𑀺 ¶ 𑀧𑀝𑁆𑀞𑀸𑀦𑁂 𑀭𑀽𑀧𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑁂 𑀧𑀦 𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀅𑀲𑀢𑀺 𑀘 𑀦 𑀳𑁄𑀢𑀺, 𑀲𑁄 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦𑀺𑀤𑀸𑀦𑀁 𑀳𑁂𑀢𑀼 𑀧𑀪𑀯𑁄𑀢𑀺 𑀓𑀢𑁆𑀯𑀸 ‘‘𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧’’𑀦𑁆𑀢𑀺 𑀭𑀽𑀧𑀲𑁆𑀲 𑀘 𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑁆𑀲𑀬𑀢𑀸 𑀯𑀼𑀢𑁆𑀢𑀸. 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑁂 𑀘 𑀯𑀦𑀧𑀢𑁆𑀣𑀕𑀸𑀫𑀦𑀺𑀕𑀫𑀦𑀕𑀭𑀚𑀦𑀧𑀤𑀧𑀼𑀕𑁆𑀕𑀮𑀽𑀧𑀦𑀺𑀲𑁆𑀲𑀬𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄, 𑀢𑀢𑁄 𑀘 𑀘𑀻𑀯𑀭𑀸𑀤𑀻𑀦𑀁 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀁 𑀓𑀲𑀺𑀭𑁂𑀦, 𑀅𑀧𑁆𑀧𑀓𑀲𑀺𑀭𑁂𑀦 𑀘 𑀲𑀫𑀼𑀤𑀸𑀕𑀫𑀦𑀁 𑀯𑀼𑀢𑁆𑀢𑀁, 𑀦 𑀘 𑀯𑀦𑀧𑀢𑁆𑀣𑀸𑀤𑀬𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀁 𑀇𑀭𑀺𑀬𑀸𑀧𑀣𑀸𑀦𑀁, 𑀘𑀻𑀯𑀭𑀸𑀤𑀺𑀲𑀫𑀼𑀤𑀸𑀕𑀫𑀦𑀲𑁆𑀲 𑀘 𑀪𑀚𑀦𑁆𑀢𑀺. 𑀢𑀲𑁆𑀫𑀸 𑀯𑀺𑀦𑀸 𑀅𑀪𑀸𑀯𑁄 𑀏𑀯 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀫𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀸𑀮𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀭𑀽𑀧𑀲𑁆𑀲𑁂𑀯 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄 𑀏𑀓𑀥𑀸𑀯 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀲𑀲𑀁𑀲𑀬𑀲𑁆𑀲 𑀳𑀺 𑀭𑀽𑀧𑀲𑁆𑀲𑁂𑀢𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁂 𑀦𑀸𑀫𑀲𑁆𑀲 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺.

𑀧𑀯𑀢𑁆𑀢𑀲𑁆𑀲 𑀧𑀸𑀓𑀝𑀢𑁆𑀢𑀸 𑀅𑀧𑀸𑀓𑀝𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀓𑀣𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸. 𑀲𑀼𑀢𑁆𑀢𑀢𑁄 𑀦𑀸𑀫𑀁, 𑀬𑀼𑀢𑁆𑀢𑀺𑀢𑁄 𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀁.

𑀬𑀼𑀢𑁆𑀢𑀺𑀢𑁄 𑀲𑀸𑀥𑁂𑀢𑁆𑀯𑀸 𑀲𑀼𑀢𑁆𑀢𑁂𑀦 𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀬. 𑀏𑀢𑁆𑀣 𑀘 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀉𑀤𑀸. 𑁧) 𑀪𑀸𑀲𑀫𑀸𑀦𑁂𑀦 𑀪𑀕𑀯𑀢𑀸 𑀬𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀧𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀲𑀢𑀺, 𑀦 𑀲𑀢𑁆𑀢𑁄, 𑀦 𑀚𑀻𑀯𑁄, 𑀢𑀲𑁆𑀫𑀸 𑀓𑁂𑀦𑀘𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀳𑁄𑀢𑀺. 𑀲𑀼𑀜𑁆𑀜𑀢𑀧𑁆𑀧𑀓𑀸𑀲𑀦𑀜𑁆𑀳𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺. 𑀅𑀣 𑀯𑀸 𑀦𑀸𑀫𑀭𑀽𑀧𑀫𑀢𑁆𑀢𑀢𑀸𑀯𑀘𑀦𑁂𑀦 𑀧𑀯𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑀘𑁆𑀘𑀫𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀧𑁆𑀧𑀓𑀸𑀲𑀦𑁂𑀦 𑀘 𑀢𑀲𑁆𑀲 𑀲𑀫𑀼𑀤𑀬𑁄, 𑀢𑀲𑁆𑀲 𑀘 𑀦𑀺𑀭𑁄𑀥𑁄, 𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸 𑀘 ¶ 𑀧𑀓𑀸𑀲𑀺𑀢𑀸 𑀏𑀯 𑀳𑁄𑀢𑀺. 𑀅𑀳𑁂𑀢𑀼𑀓𑀲𑁆𑀲 𑀤𑀼𑀓𑁆𑀔𑀲𑁆𑀲, 𑀳𑁂𑀢𑀼𑀦𑀺𑀭𑁄𑀥𑀸 𑀅𑀦𑀺𑀭𑀼𑀚𑁆𑀛𑀦𑀓𑀲𑁆𑀲 𑀘 𑀅𑀪𑀸𑀯𑀸, 𑀦𑀺𑀭𑁄𑀥𑀲𑁆𑀲 𑀘 𑀉𑀧𑀸𑀬𑁂𑀦 𑀯𑀺𑀦𑀸 𑀅𑀦𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀲𑀴𑀸𑀬𑀢𑀦𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁧. 𑀢𑀦𑁆𑀢𑀺 ¶ 𑀦𑀸𑀫𑀭𑀽𑀧𑀁. 𑀢𑀲𑁆𑀲𑀸𑀢𑀺 𑀲𑀴𑀸𑀬𑀢𑀦𑀲𑁆𑀲. 𑀢𑀸𑀤𑀺𑀲𑀲𑁆𑀲𑁂𑀯𑀸𑀢𑀺 𑀓𑀢𑁂𑀓𑀲𑁂𑀲𑀲𑁆𑀲𑁂𑀯.

𑀇𑀥𑀸𑀧𑀺 𑀦𑀸𑀫𑀦𑁆𑀢𑀺 𑀔𑀦𑁆𑀥𑀢𑁆𑀢𑀬𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀦𑀺𑀬𑀫𑀢𑁄𑀢𑀺 𑀇𑀤𑀜𑁆𑀘 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁, 𑀙𑀦𑁆𑀦𑀁 𑀯𑀢𑁆𑀣𑀽𑀦𑀁, 𑀚𑀻𑀯𑀺𑀢𑀲𑁆𑀲 𑀘 𑀬𑀣𑀸𑀲𑀫𑁆𑀪𑀯𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀸𑀤𑀺𑀦𑀸 𑀲𑀴𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀫𑀸𑀦𑀲𑁆𑀲 𑀏𑀓𑀦𑁆𑀢𑁂𑀦 𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀧𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀦𑀼𑀧𑀸𑀮𑀦𑀪𑀸𑀯𑁄 𑀦𑀢𑁆𑀣𑀻𑀢𑀺 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀤𑀺𑀪𑀸𑀯𑁄 𑀘 𑀢𑁂𑀲𑀁 𑀦 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀫𑁂𑀯, 𑀦 𑀘 𑀘𑀓𑁆𑀔𑀸𑀤𑀻𑀦𑀁 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀅𑀦𑀺𑀬𑀫𑀢𑁄 𑀧𑀘𑁆𑀘𑀬𑀪𑀸𑀯𑁄. 𑀦𑀺𑀬𑀫𑀢𑁄…𑀧𑁂… 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀦𑁆𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀯𑀸 𑀭𑀽𑀧𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀙𑀝𑁆𑀞𑀸𑀬𑀢𑀦𑀲𑀴𑀸𑀬𑀢𑀦𑀲𑀤𑁆𑀤𑀸𑀦𑀁 𑀲𑀤𑁆𑀤𑀢𑁄 𑀲𑀭𑀽𑀧𑀢𑀸 𑀦𑀢𑁆𑀣𑀺, 𑀅𑀢𑁆𑀣𑀢𑁄 𑀧𑀦 𑀲𑀴𑀸𑀬𑀢𑀦𑁂𑀓𑀤𑁂𑀲𑁄𑀯 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑀢𑀸 𑀅𑀢𑁆𑀣𑀻𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄𑀧𑀺 𑀳𑀺 𑀲𑀭𑀽𑀧𑀸𑀦𑀁 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀁 𑀇𑀘𑁆𑀙𑀦𑁆𑀢𑀺 ‘‘𑀯𑀗𑁆𑀓𑁄 𑀘 𑀓𑀼𑀝𑀺𑀮𑁄 𑀘 𑀓𑀼𑀝𑀺𑀮𑀸’’𑀢𑀺. 𑀢𑀲𑁆𑀫𑀸 𑀅𑀢𑁆𑀣𑀢𑁄 𑀏𑀓𑀤𑁂𑀲𑀲𑀭𑀽𑀧𑀸𑀦𑀜𑁆𑀘 𑀏𑀓𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀅𑀣 𑀯𑀸 𑀙𑀝𑁆𑀞𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀯𑀸 𑀫𑀦𑀸𑀬𑀢𑀦𑀦𑁆𑀢𑀺 𑀯𑀸 𑀙𑀝𑁆𑀞𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀯𑀸 𑀫𑀦𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀦𑁆𑀢𑀺 𑀯𑀸 𑀏𑀓𑀲𑁂𑀲𑀁 𑀓𑀢𑁆𑀯𑀸 𑀘𑀓𑁆𑀔𑀸𑀤𑀻𑀳𑀺 𑀲𑀤𑁆𑀥𑀺𑀁 ‘‘𑀲𑀴𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑁂𑀯 𑀏𑀓𑀲𑁂𑀲𑀁 𑀦𑀸𑀫𑀫𑀢𑁆𑀢𑀧𑀘𑁆𑀘𑀬𑀲𑁆𑀲, 𑀦𑀸𑀫𑀭𑀽𑀧𑀧𑀘𑁆𑀘𑀬𑀲𑁆𑀲 𑀘 𑀫𑀦𑀸𑀬𑀢𑀦𑀲𑁆𑀲 𑀯𑀲𑁂𑀦 𑀓𑀢𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀲𑁆𑀲𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑁄𑀧𑀺 𑀳𑀺 𑀏𑀓𑀲𑁂𑀲𑁄 𑀅𑀢𑁆𑀣𑀢𑁄 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘𑀸𑀢𑀺 𑀏𑀯𑀁 𑀓𑀢𑁄 𑀦𑀸𑀫 ¶ 𑀳𑁄𑀢𑀻𑀢𑀺. 𑀲𑀩𑁆𑀩𑀢𑁆𑀣 𑀘 𑀏𑀓𑀲𑁂𑀲𑁂 𑀓𑀢𑁂 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁂𑀓𑀲𑁂𑀲𑀸𑀦𑀁 𑀲𑀴𑀸𑀬𑀢𑀦𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀯𑀲𑁂𑀦 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

‘‘𑀦 𑀅𑀜𑁆𑀜𑀣𑀸’’𑀢𑀺 𑀏𑀢𑁂𑀦 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲 𑀘 𑀅𑀪𑀸𑀯𑁂 𑀢𑀁 𑀢𑀁 𑀆𑀬𑀢𑀦𑀁 𑀦 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀁 𑀯𑀺𑀪𑀸𑀯𑁂𑀢𑀺.

𑀬𑀦𑁆𑀢𑀺 ¶ 𑀬𑀁 𑀬𑀁 𑀦𑀸𑀫𑀁, 𑀭𑀽𑀧𑀜𑁆𑀘. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀬𑀲𑁆𑀲 𑀆𑀬𑀢𑀦𑀲𑁆𑀲. 𑀬𑀣𑀸𑀢𑀺 𑀲𑀳𑀚𑀸𑀢𑀸𑀤𑀺𑀦𑀸 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦. 𑀦𑁂𑀬𑁆𑀬𑀦𑁆𑀢𑀺 𑀜𑁂𑀬𑁆𑀬𑀁.

𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀲𑁆𑀲 𑀯𑀲𑁂𑀦. 𑀉𑀓𑁆𑀓𑀁𑀲𑀸𑀯𑀓𑀁𑀲𑁄𑀢𑀺 𑀏𑀢𑁆𑀣 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀉𑀓𑁆𑀓𑀁𑀲𑁄 𑀅𑀝𑁆𑀞𑀥𑀸 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁄 𑀦𑀯𑀥𑀸, 𑀢𑀢𑁄 𑀤𑀲𑀥𑀸𑀢𑀺 𑀅𑀬𑀁 𑀉𑀓𑁆𑀓𑀁𑀲𑁄. 𑀅𑀯𑀓𑀁𑀲𑁄 𑀧𑀦 𑀤𑀲𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀦𑀯𑀥𑀸 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁄 𑀅𑀝𑁆𑀞𑀥𑀸, 𑀢𑀢𑁄 𑀲𑀢𑁆𑀢𑀥𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀏𑀯 𑀤𑁆𑀯𑁂𑀧𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑀸 𑀬𑁄𑀚𑁂𑀢𑀩𑁆𑀩𑀸, 𑀢𑀢𑁄 𑀅𑀯𑀓𑀁𑀲𑀸𑀪𑀸𑀯𑀢𑁄𑀢𑀺.

𑀯𑀺𑀧𑀸𑀓𑀁 𑀦𑀸𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀳𑀚𑀸𑀢𑀸𑀤𑀺𑀯𑀲𑁂𑀦, 𑀲𑀢𑁆𑀢𑀥𑀸, 𑀳𑁂𑀢𑀼𑀆𑀤𑀺𑀯𑀲𑁂𑀦 𑀘. 𑀇𑀢𑀭𑀦𑁆𑀢𑀺 𑀅𑀯𑀺𑀧𑀸𑀓𑀁 𑀦𑀸𑀫𑀁.

‘‘𑀳𑀤𑀬𑀯𑀢𑁆𑀣𑀼𑀦𑁄 𑀲𑀳𑀸𑀬𑀁 𑀳𑀼𑀢𑁆𑀯𑀸’’𑀢𑀺 𑀏𑀢𑁂𑀦 𑀅𑀭𑀽𑀧𑁂 𑀯𑀺𑀬 𑀅𑀲𑀳𑀸𑀬𑀁 𑀦𑀸𑀫𑀁 𑀦 𑀳𑁄𑀢𑀺, 𑀳𑀤𑀬𑀯𑀢𑁆𑀣𑀼 𑀘 𑀦𑀸𑀫𑁂𑀦 𑀲𑀳 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀧𑀦 𑀬𑀣𑀸 𑀳𑀤𑀬𑀯𑀢𑁆𑀣𑀼 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀦𑀸𑀫𑀫𑁆𑀧𑀻𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀢𑁆𑀣𑀼 𑀳𑀺 𑀦𑀸𑀫𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀦𑀸𑀫𑀁. 𑀦𑀸𑀫𑀜𑁆𑀘 𑀯𑀺𑀧𑀸𑀓𑀳𑁂𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀯𑀢𑁆𑀣𑀽𑀢𑀺. 𑀧𑀯𑀢𑁆𑀢𑁂 𑀅𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀚𑀭𑀽𑀧𑀲𑁆𑀲 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲𑁂𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸 𑀘 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀬𑁄 𑀏𑀯 𑀘𑀓𑁆𑀔𑀸𑀤𑀻𑀦𑀁 𑀬𑁄𑀚𑁂𑀢𑀩𑁆𑀩𑀸.

‘‘𑀢𑀢𑁆𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀧𑀯𑀢𑁆𑀢𑁂’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀆𑀳 ‘‘𑀢𑀢𑁆𑀣𑁂𑀯 𑀳𑀺 𑀧𑀯𑀢𑁆𑀢𑁂’’𑀢𑀺. ‘‘𑀧𑀜𑁆𑀘𑀯𑁄𑀓𑀸𑀭𑀪𑀯𑁂’’𑀢𑀺 𑀧𑀦 𑀇𑀤𑀁 ‘‘𑀧𑀜𑁆𑀘𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀤𑀻𑀧𑀺𑀢𑀫𑁂𑀯𑀸𑀢𑀺. 𑀧𑀯𑀢𑁆𑀢𑀺𑀬𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀓𑀲𑁆𑀲 𑀦𑀸𑀫𑀁 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀢𑁆𑀢𑀦𑀸 𑀚𑀦𑀺𑀢𑀭𑀽𑀧𑀲𑁆𑀲𑁂𑀯 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑀺𑀲𑀁, 𑀢𑀲𑁆𑀫𑀸 𑀯𑀢𑁆𑀣𑀼𑀦𑁄𑀧𑀺 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯.

𑀭𑀽𑀧𑀢𑁄𑀢𑀺 ¶ 𑀭𑀽𑀧𑁂𑀲𑀼. 𑀬𑀁 𑀬𑀁 𑀆𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀅𑀡𑁆𑀟𑀚𑀚𑀮𑀸𑀩𑀼𑀚𑀸𑀦𑀁 𑀧𑀜𑁆𑀘𑀲𑀼 𑀆𑀬𑀢𑀦𑁂𑀲𑀼 𑀓𑀸𑀬𑀸𑀬𑀢𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀲𑀁 𑀬𑀣𑀸𑀭𑀳𑀁 𑀇𑀢𑀭𑀸𑀦𑀺𑀧𑀺.

𑀅𑀯𑀲𑁂𑀲𑀫𑀦𑀸𑀬𑀢𑀦𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀓𑁆𑀔𑀦𑁆𑀥𑀪𑀯𑁂 𑀧𑀦𑀸’’𑀢𑀺 𑀏𑀢𑀲𑁆𑀲 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 ¶ 𑀏𑀯 𑀧𑀯𑀢𑁆𑀢𑀫𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀅𑀯𑀲𑁂𑀲𑀁 𑀫𑀦𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀫𑀭𑀽𑀧𑀲𑁆𑀲 𑀲𑀳𑀚𑀸𑀢𑀸𑀤𑀺𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄, 𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀅𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄 𑀘 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. ‘‘𑀭𑀽𑀧𑀧𑀘𑁆𑀘𑀬𑀸 𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀮𑀩𑁆𑀪𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀯𑀲𑁂𑀦, 𑀲𑁄 𑀧𑀦 𑀅𑀧𑀘𑀼𑀭𑀪𑀸𑀯𑀢𑁄 𑀬𑁂𑀪𑀼𑀬𑁆𑀬𑁂𑀦 𑀘 𑀧𑀝𑀺𑀲𑀦𑁆𑀥𑀺𑀬𑀁 𑀧𑀘𑁆𑀘𑀬𑀪𑀽𑀢𑀲𑁆𑀲𑁂𑀯 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀬𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺 𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸𑀨𑀲𑁆𑀲𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁨. 𑀩𑀸𑀯𑀻𑀲𑀢𑀺𑀬𑀸 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀩𑀸𑀯𑀻𑀲𑀢𑀺𑀮𑁄𑀓𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸. 𑀢𑀢𑁄 𑀏𑀯 𑀩𑀸𑀯𑀻𑀲𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀴𑀸𑀬𑀢𑀦𑁂, 𑀢𑁂𑀲𑀼 𑀙𑀲𑀼 𑀆𑀬𑀢𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀕𑀡𑁆𑀳𑀸𑀢𑀺. 𑀢𑀜𑁆𑀳𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀢𑀸𑀤𑀺𑀲𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀤𑀻𑀦𑀺, 𑀧𑀦 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺 𑀘 𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺, 𑀦 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀯𑀺𑀬 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀓𑀫𑁆𑀫𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀧𑀞𑀫𑀸𑀘𑀭𑀺𑀬𑀯𑀸𑀤𑁂 𑀦 𑀕𑀳𑀺𑀢𑀸𑀦𑀺, 𑀤𑀼𑀢𑀺𑀬𑀸𑀘𑀭𑀺𑀬𑀯𑀸𑀤𑁂 𑀧𑀦 𑀬𑀣𑀸 𑀢𑀣𑀸 𑀯𑀸 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀦 𑀲𑀓𑁆𑀓𑀸 𑀯𑀚𑁆𑀚𑁂𑀢𑀼𑀦𑁆𑀢𑀺 𑀕𑀳𑀺𑀢𑀸𑀦𑀺.

𑀢𑀢𑁆𑀣𑀸𑀢𑀺 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑀧𑀤𑁂. 𑀬𑁂 𑀢𑀸𑀯 𑀆𑀘𑀭𑀺𑀬𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀯 𑀬𑀣𑀸 𑀯𑀺𑀜𑁆𑀜𑀸𑀡𑀁, 𑀏𑀯𑀁 𑀦𑀸𑀫𑀭𑀽𑀧𑀁, 𑀲𑀴𑀸𑀬𑀢𑀦𑀁, 𑀨𑀲𑁆𑀲𑀁, 𑀯𑁂𑀤𑀦𑀜𑁆𑀘 𑀧𑀘𑁆𑀘𑀬𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀤𑀻𑀧𑁂𑀦𑁆𑀢𑀸 𑀯𑀺𑀧𑀸𑀓𑀫𑁂𑀯 𑀇𑀘𑁆𑀙𑀦𑁆𑀢𑀺. ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀸𑀴𑀺 (𑀯𑀺𑀪. 𑁨𑁪𑁩) 𑀆𑀭𑀼𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀧𑀸𑀴𑀺𑀅𑀦𑀼𑀲𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑁂 𑀨𑀲𑁆𑀲𑀸 𑀦 𑀲𑀫𑁆𑀪𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑀯𑁂𑀬𑁆𑀬, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀏𑀓𑀲𑁆𑀲 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬 ¶ , 𑀅𑀣𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸 𑀲𑀫𑁆𑀪𑀯𑁂𑀬𑁆𑀬𑀼𑀁, 𑀢𑀣𑀸𑀧𑀺 𑀲𑀩𑁆𑀩𑀸𑀬𑀢𑀦𑁂𑀳𑀺 𑀲𑀩𑁆𑀩𑀨𑀲𑁆𑀲𑀲𑀫𑁆𑀪𑀯𑀢𑁄 𑀆𑀬𑀢𑀦𑀪𑁂𑀤𑁂𑀦 𑀨𑀲𑁆𑀲𑀪𑁂𑀤𑁄 𑀦𑀢𑁆𑀣𑀻𑀢𑀺 𑀢𑀤𑀪𑁂𑀤𑀯𑀲𑁂𑀦 𑀏𑀓𑀲𑁆𑀲 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬, 𑀢𑀣𑀸 𑀧𑀦 𑀅𑀲𑀫𑁆𑀪𑀯𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁄𑀤𑁂𑀢𑀺 ‘‘𑀦 𑀲𑀩𑁆𑀩𑀸𑀬𑀢𑀦𑁂𑀳𑀻’’𑀢𑀺𑀆𑀤𑀺𑀦𑀸 ¶ . 𑀅𑀜𑁆𑀜𑀲𑁆𑀲𑀸𑀧𑀺 𑀯𑀸 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀯𑀺𑀥𑀸𑀦𑀲𑁆𑀲 𑀩𑁄𑀥𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 ‘‘𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸’’𑀢𑀺. ‘‘𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀻’’𑀢𑀺 𑀇𑀤𑀫𑁂𑀯 𑀧𑀦 𑀏𑀓𑀨𑀲𑁆𑀲𑀯𑀘𑀦𑀲𑁆𑀲𑀸𑀬𑀼𑀢𑁆𑀢𑀢𑁆𑀢𑀤𑀻𑀧𑀓𑀁 𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸 𑀲𑀫𑁆𑀪𑁄𑀦𑁆𑀢𑀺, 𑀏𑀯𑀁 𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀺. 𑀢𑀲𑁆𑀫𑀸 𑀏𑀓𑀲𑁆𑀲 𑀯𑀘𑀦𑀁 𑀅𑀬𑀼𑀢𑁆𑀢𑀦𑁆𑀢𑀺. 𑀧𑀭𑀺𑀳𑀸𑀭𑀁 𑀧𑀦 𑀅𑀦𑁂𑀓𑀸𑀬𑀢𑀦𑁂𑀳𑀺 𑀏𑀓𑀨𑀲𑁆𑀲𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀯𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬𑀢𑀦𑀸 𑀨𑀲𑁆𑀲𑀯𑀚𑁆𑀚𑀺𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸.

𑀏𑀓𑁄𑀧𑀺 𑀅𑀦𑁂𑀓𑀸𑀬𑀢𑀦𑀧𑁆𑀧𑀪𑀯𑁄 𑀏𑀓𑁄𑀧𑀦𑁂𑀓𑀸𑀬𑀢𑀦𑀧𑁆𑀧𑀪𑀯𑁄.

𑀙𑀥𑀸 𑀧𑀘𑁆𑀘𑀬𑀢𑁆𑀢𑁂 𑀧𑀜𑁆𑀘 𑀯𑀺𑀪𑀸𑀯𑀬𑁂, 𑀏𑀓𑀁 𑀦𑀯𑀥𑀸 𑀧𑀘𑁆𑀘𑀬𑀢𑁆𑀢𑁂, 𑀩𑀸𑀳𑀺𑀭𑀸𑀦𑀺 𑀙 𑀆𑀬𑀢𑀦𑀸𑀦𑀺 𑀆𑀭𑀫𑁆𑀫𑀡𑀸𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀧𑀘𑁆𑀘𑀬𑀢𑁆𑀢𑁂 𑀯𑀺𑀪𑀸𑀯𑀬𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀦𑁂𑀓𑀪𑁂𑀤𑀲𑁆𑀲𑀸𑀢𑀺 𑀓𑀼𑀲𑀮𑀯𑀺𑀧𑀸𑀓𑀸𑀤𑀺𑀧𑀜𑁆𑀘𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀲𑁆𑀲 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀚𑁆𑀚𑀲𑁆𑀲 𑀯𑀺𑀧𑀸𑀓𑀨𑀲𑁆𑀲𑀲𑁆𑀲. 𑀢𑀸𑀦𑀺 𑀘𑀸𑀢𑀺 𑀭𑀽𑀧𑀸𑀬𑀢𑀦𑀸𑀤𑀻𑀦𑀺. ‘‘𑀫𑀦𑁄 𑀘 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁫) 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀤𑀻𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑀸𑀢𑀺 𑀢𑀁 𑀲𑀩𑁆𑀩𑀁 𑀅𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀜𑁆𑀜𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀨𑀲𑁆𑀲𑀧𑀘𑁆𑀘𑀬𑀸𑀯𑁂𑀤𑀦𑀸𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁩. 𑀤𑁆𑀯𑀸𑀭𑀢𑁄 𑀲𑀴𑁂𑀯𑀸𑀢𑀺 𑀧𑀪𑀯𑀲𑀸𑀫𑀜𑁆𑀜𑀢𑁄 𑀏𑀓𑀯𑀺𑀥𑀸𑀧𑀺 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀢𑁄 𑀙 𑀏𑀯 𑀳𑁄𑀦𑁆𑀢𑀻𑀢𑀺 𑀙𑀴𑁂𑀯 𑀯𑁂𑀤𑀦𑀸 𑀯𑀼𑀢𑁆𑀢𑀸.

𑀘𑀺𑀢𑁆𑀢𑀪𑁂𑀤𑁂𑀦 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀸 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀯𑁂𑀤𑀦𑀸𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑁂𑀲𑀸𑀦’’𑀦𑁆𑀢𑀺 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀬𑀼𑀢𑁆𑀢𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀬𑀤𑀺𑀧𑀺 𑀅𑀦𑀦𑁆𑀢𑀭𑀸𑀤𑀻𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀦𑀦𑁆𑀢𑀭𑀸𑀤𑀻𑀦𑀁 𑀧𑀦 ¶ 𑀉𑀧𑀦𑀺𑀲𑁆𑀲𑀬𑁂 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘 𑀲𑀸𑀥𑀸𑀭𑀡𑀲𑁆𑀲 𑀢𑀲𑁆𑀲 𑀯𑀲𑁂𑀦 ‘‘𑀏𑀓𑀥𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀳𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 ¶ 𑀲𑀳𑀚𑀸𑀢𑀸 𑀨𑀲𑁆𑀲𑀸 𑀲𑀓𑀲𑀓𑀯𑀻𑀣𑀻𑀲𑀼 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀦𑀁, 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀦𑀁 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀫𑁆𑀧𑀺 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀗𑁆𑀔𑀸𑀢𑁄 𑀲𑁄 𑀨𑀲𑁆𑀲𑁄 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑁂𑀤𑀦𑀸 𑀧𑀝𑀺𑀲𑀦𑁆𑀥𑀺𑀆𑀤𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀓𑀸𑀫𑀸𑀯𑀘𑀭𑀸𑀧𑀺 𑀏𑀓𑀘𑁆𑀘𑀸𑀢𑀺 ‘‘𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀲𑀫𑁆𑀧𑀺 𑀳𑀺 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑁄 𑀅𑀝𑁆𑀞𑀥𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀘𑁆𑀘𑀬𑀁 𑀅𑀦𑀼𑀧𑀸𑀤𑀺𑀦𑁆𑀦𑀫𑁆𑀧𑀺 𑀓𑁂𑀘𑀺 𑀇𑀘𑁆𑀙𑀦𑁆𑀢𑀻𑀢𑀺 ‘‘𑀬𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀜𑁆𑀘 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀲𑁆𑀲 𑀅𑀦𑀦𑁆𑀢𑀭𑀲𑁆𑀲, 𑀅𑀦𑀸𑀦𑀦𑁆𑀢𑀭𑀲𑁆𑀲 𑀘 𑀨𑀲𑁆𑀲𑀲𑁆𑀲 𑀢𑀲𑁆𑀲𑀸 𑀢𑀲𑁆𑀲𑀸 𑀯𑀺𑀧𑀸𑀓𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀢𑀸 𑀬𑁄𑀚𑁂𑀢𑀩𑁆𑀩𑀸𑀢𑀺.

𑀯𑁂𑀤𑀦𑀸𑀧𑀘𑁆𑀘𑀬𑀸𑀢𑀡𑁆𑀳𑀸𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁪. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂, 𑀇𑀫𑀲𑁆𑀫𑀺𑀁 𑀯𑀸 𑀲𑀸𑀲𑀦𑁂 𑀙 𑀢𑀡𑁆𑀳𑀸 𑀤𑀻𑀧𑀺𑀢𑀸. 𑀇𑀥𑀸𑀢𑀺 𑀯𑀸 𑀇𑀫𑀲𑁆𑀫𑀺𑀁 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀧𑀤𑁂. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀙𑀲𑀼 𑀢𑀡𑁆𑀳𑀸𑀲𑀼.

𑀏𑀓𑁂𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀸𑀬, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀸𑀬 𑀘 𑀢𑀡𑁆𑀳𑀸𑀬 𑀢𑀤𑀪𑀺𑀦𑀦𑁆𑀤𑀦𑀸𑀦𑀼𑀕𑀼𑀡𑁄 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀓𑁂𑀯𑀮𑀁 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀲𑀺𑀝𑁆𑀞𑀸𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀢𑀡𑁆𑀳𑀸𑀬 𑀢𑀺𑀯𑀺𑀥𑀢𑀸.

𑀫𑀫𑀢𑁆𑀢𑁂𑀦𑀸𑀢𑀺 𑀲𑀫𑁆𑀧𑀺𑀬𑀸𑀬𑀦𑁂𑀦, 𑀅𑀲𑁆𑀲𑀸𑀤𑀦𑀢𑀡𑁆𑀳𑀸𑀬 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀢𑁆𑀢𑁄 𑀯𑀺𑀬 𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸, 𑀔𑀻𑀭𑀸𑀤𑀬𑁄 𑀯𑀺𑀬 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀭𑀽𑀧𑀸𑀤𑀬𑁄, 𑀔𑀻𑀭𑀸𑀤𑀺𑀤𑀸𑀬𑀺𑀓𑀸 𑀥𑀸𑀢𑀺 𑀯𑀺𑀬 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀤𑀸𑀬𑀓𑀸 𑀘𑀺𑀢𑁆𑀢𑀓𑀸𑀭𑀸𑀤𑀬𑁄 𑀙. 𑀢𑀢𑁆𑀣 𑀲𑀼𑀔𑀲𑀫𑁆𑀨𑀲𑁆𑀲𑀯𑀢𑁆𑀣𑀤𑀸𑀬𑀓𑁄 𑀢𑀦𑁆𑀢𑀯𑀸𑀬𑁄, 𑀯𑁂𑀚𑁆𑀚𑁄 𑀭𑀲𑀸𑀬𑀢𑀦𑁄𑀚𑀸𑀯𑀲𑁂𑀦, 𑀢𑀤𑀼𑀧𑀢𑁆𑀣𑀫𑁆𑀪𑀺𑀢𑀚𑀻𑀯𑀺𑀢𑀯𑀲𑁂𑀦 𑀘 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀤𑀸𑀬𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀸𑀧𑁂𑀲𑀸 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸𑀧𑀺.

𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬 𑀉𑀧𑁆𑀧𑀸𑀤𑀓𑁄𑀢𑀺 𑀉𑀧𑁆𑀧𑀸𑀤𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑁆𑀲𑁂𑀯 𑀯𑀲𑁂𑀦 ‘‘𑀏𑀓𑀥𑀸𑀯𑀸’’𑀢𑀺 ¶ 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑁂𑀦 𑀯𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 ¶ 𑀲𑀗𑁆𑀕𑀳𑀺𑀢𑁄. 𑀢𑁂𑀦 𑀘 𑀆𑀭𑀫𑁆𑀫𑀡𑀪𑀸𑀯𑁂𑀦 𑀢𑀁𑀲𑀪𑀸𑀕𑁄 𑀅𑀜𑁆𑀜𑁄𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺𑀦𑀸 𑀦 𑀓𑁂𑀯𑀮𑀁 𑀯𑀺𑀧𑀸𑀓𑀲𑀼𑀔𑀯𑁂𑀤𑀦𑀸 𑀏𑀯, 𑀢𑀺𑀲𑁆𑀲𑁄𑀧𑀺 𑀧𑀦 𑀯𑁂𑀤𑀦𑀸 𑀯𑀺𑀧𑀸𑀓𑀸 𑀯𑀺𑀲𑁂𑀲𑁂𑀦 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀅𑀯𑀺𑀲𑁂𑀲𑁂𑀦 𑀇𑀢𑀭𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸𑀢𑀺 𑀢𑀲𑁆𑀫𑀸 𑀲𑀸𑀧𑀺 𑀪𑀺𑀬𑁆𑀬𑁄 𑀇𑀘𑁆𑀙𑀦𑀯𑀲𑁂𑀦 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑁂𑀓𑁆𑀔𑀸 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀪𑀽𑀢𑀸 𑀅𑀦𑀺𑀝𑁆𑀞𑀢𑁆𑀢𑀸 𑀤𑀼𑀓𑁆𑀔𑁂 𑀅𑀯𑀭𑁄𑀥𑁂𑀢𑀩𑁆𑀩𑀸, 𑀇𑀢𑀭𑀸 𑀇𑀝𑁆𑀞𑀢𑁆𑀢𑀸 𑀲𑀼𑀔𑁂𑀢𑀺 𑀲𑀸 𑀤𑀼𑀓𑁆𑀔𑀁 𑀯𑀺𑀬, 𑀲𑀼𑀔𑀁 𑀯𑀺𑀬 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀯𑀘𑀦𑁂𑀦 𑀲𑀩𑁆𑀩𑀲𑁆𑀲 𑀯𑁂𑀤𑀦𑀸𑀯𑀢𑁄 𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀺𑀢𑀸𑀬 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀘𑀸𑀧𑀻’’𑀢𑀺𑀆𑀤𑀺.

𑀦𑀦𑀼 ‘‘𑀅𑀦𑀼𑀲𑀬𑀲𑀳𑀸𑀬𑀸 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀲𑁆𑀲 𑀅𑀪𑀸𑀯𑀸 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀺𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺? 𑀦, 𑀯𑀝𑁆𑀝𑀓𑀣𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀯𑀝𑁆𑀝𑀲𑁆𑀲 𑀘 𑀅𑀦𑀼𑀲𑀬𑀯𑀺𑀭𑀳𑁂 𑀅𑀪𑀸𑀯𑀢𑁄 𑀅𑀦𑀼𑀲𑀬𑀲𑀳𑀺𑀢𑀸𑀯 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯𑁂𑀢𑀁 𑀳𑁄𑀢𑀻𑀢𑀺. 𑀅𑀣 𑀯𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀅𑀦𑀼𑀲𑀬𑀲𑀳𑀺𑀢𑀸𑀯 𑀧𑀘𑁆𑀘𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀧𑀘𑁆𑀘𑀬𑀸 𑀏𑀯 𑀢𑀡𑁆𑀳𑀸, 𑀦 𑀯𑁂𑀤𑀦𑀸𑀬 𑀯𑀺𑀦𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄, 𑀦 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 𑀳𑁄𑀢𑀺𑀬𑁂𑀯𑀸𑀢𑀺, 𑀢𑀲𑁆𑀫𑀸 𑀅𑀢𑀺𑀧𑁆𑀧𑀲𑀗𑁆𑀕𑁄 𑀏𑀢𑁆𑀣 𑀦𑀢𑁆𑀣𑀺 𑀏𑀯𑀸𑀢𑀺.

𑀯𑀼𑀲𑀻𑀫𑀢𑁄𑀢𑀺 𑀯𑀼𑀲𑀺𑀢𑀯𑀢𑁄, 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀼𑀲𑁆𑀲𑀢𑀻𑀢𑀺 𑀯𑀸 𑀯𑀼𑀲𑀻𑀢𑀺 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑀲𑁆𑀲 𑀯𑀼𑀢𑁆𑀣𑁄 𑀅𑀢𑁆𑀣𑀻𑀢𑀺 𑀯𑀼𑀲𑀻𑀫𑀸, 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀅𑀭𑀳𑀸. 𑀅𑀕𑁆𑀕𑀨𑀮𑀁 𑀯𑀸 𑀧𑀭𑀺𑀦𑀺𑀝𑁆𑀞𑀺𑀢𑀯𑀸𑀲𑀢𑁆𑀢𑀸 ‘‘𑀯𑀼𑀲𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀼𑀲𑀻𑀫𑀸.

𑀢𑀡𑁆𑀳𑀸𑀧𑀘𑁆𑀘𑀬𑀸𑀉𑀧𑀸𑀤𑀸𑀦𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁫. 𑀅𑀢𑁆𑀣𑀯𑀺𑀪𑀸𑀕𑁄 𑀅𑀢𑁆𑀣𑀲𑁆𑀲 𑀯𑀺𑀪𑀚𑀦𑀸. 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀓𑀸𑀫𑀦𑁆𑀢𑀺 𑀓𑀸𑀫𑀕𑀼𑀡𑀲𑀜𑁆𑀜𑀺𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀫𑀸𑀳. 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀤𑀴𑁆𑀳𑀁 𑀅𑀲𑁆𑀲𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀏𑀢𑁆𑀣 𑀓𑀫𑁆𑀫𑀲𑀸𑀥𑀦𑁄 𑀓𑀸𑀫𑀲𑀤𑁆𑀤𑁄 ¶ , 𑀓𑀸𑀫𑁄 𑀘 𑀲𑁄𑀢𑀺 𑀏𑀢𑁆𑀣 𑀓𑀢𑁆𑀢𑀼𑀲𑀸𑀥𑀦𑁄 𑀓𑀺𑀮𑁂𑀲𑀓𑀸𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀉𑀧𑀸𑀤𑀸𑀦𑀲𑀤𑁆𑀤𑁄 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀓𑀢𑁆𑀢𑀼𑀲𑀸𑀥𑀦𑁄𑀯. 𑀤𑀴𑁆𑀳𑀢𑁆𑀣𑁄 𑀪𑀼𑀲𑀢𑁆𑀣𑁄. 𑀬𑀣𑀸 𑀪𑀼𑀲𑁄 𑀆𑀬𑀸𑀲𑁄 ¶ 𑀉𑀧𑀸𑀬𑀸𑀲𑁄, 𑀪𑀼𑀲𑀁 𑀓𑀼𑀝𑁆𑀞𑀁 𑀉𑀧𑀓𑀼𑀝𑁆𑀞𑀁, 𑀏𑀯𑀁 𑀇𑀥𑀸𑀧𑀻𑀢𑀺 𑀆𑀳 ‘‘𑀉𑀧𑀸𑀬𑀸𑀲𑀉𑀧𑀓𑀼𑀝𑁆𑀞𑀸𑀤𑀻𑀲𑀼 𑀯𑀺𑀬𑀸’’𑀢𑀺. 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀻𑀢𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀲𑀲𑁆𑀲𑀢𑀪𑀸𑀯𑁂𑀦 𑀕𑀡𑁆𑀳𑀦𑁆𑀢𑀻 𑀉𑀧𑀸𑀤𑀺𑀬𑀢𑀺, 𑀧𑀼𑀭𑀺𑀫𑀤𑀺𑀝𑁆𑀞𑀺𑀆𑀓𑀸𑀭𑁂𑀦 𑀯𑀸 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑁂𑀦𑁂𑀯 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑀻 𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀯𑀼𑀢𑁆𑀢𑀸. 𑀅𑀣 𑀯𑀸 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀻𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁧.𑁩𑁧) 𑀇𑀤𑀁 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀫𑀸𑀦𑀁 𑀉𑀢𑁆𑀢𑀭𑀤𑀺𑀝𑁆𑀞𑀺𑀁 𑀦𑀺𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀏𑀲𑀸 𑀤𑀴𑁆𑀳𑀻𑀓𑀭𑀡𑀯𑀲𑁂𑀦 𑀧𑀼𑀭𑀺𑀫𑀁 𑀉𑀢𑁆𑀢𑀭𑀸 𑀉𑀧𑀸𑀤𑀺𑀬𑀢𑀺, 𑀏𑀯𑀁 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀧𑀻𑀢𑀺 (𑀫. 𑀦𑀺. 𑁧.𑁪𑁪𑁫; 𑁨.𑁯𑁪; 𑁩.𑁯𑁧, 𑁧𑁧𑁬, 𑁧𑁩𑁬; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮). 𑀅𑀢𑁆𑀢𑀕𑁆𑀕𑀳𑀡𑀁 𑀧𑀦 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀦 𑀇𑀤𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀓𑁄 𑀘𑀸𑀢𑀺 𑀯𑀸 𑀅𑀢𑁆𑀢𑀕𑁆𑀕𑀳𑀡𑀯𑀺𑀦𑀺𑀫𑀼𑀢𑁆𑀢𑀁 𑀕𑀳𑀡𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀪𑀽𑀢𑀁 𑀇𑀥 𑀧𑀼𑀭𑀺𑀫𑀤𑀺𑀝𑁆𑀞𑀺𑀉𑀢𑁆𑀢𑀭𑀤𑀺𑀝𑁆𑀞𑀺𑀯𑀘𑀦𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀏𑀢𑁆𑀣 𑀅𑀲𑀼𑀤𑁆𑀥𑀺𑀫𑀕𑁆𑀕𑀕𑁄𑀲𑀻𑀮𑀸𑀤𑀺𑀲𑀫𑀸𑀤𑀸𑀦𑀯𑀲𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀯𑀢𑀁. 𑀉𑀪𑀬𑀣𑀸𑀧𑀺 𑀯𑀸 𑀲𑀻𑀮𑀁, 𑀢𑀧𑁄𑀓𑀫𑁆𑀫𑀪𑀸𑀯𑁂𑀦 𑀕𑀳𑀺𑀢𑀢𑀸𑀬 𑀯𑀢𑀁, 𑀕𑀯𑀸𑀤𑀺𑀧𑀓𑀢𑀺𑀪𑀸𑀯𑀦𑀸. 𑀅𑀢𑁆𑀢𑀦𑁄 𑀯𑀸 𑀕𑀯𑀸𑀤𑀺𑀪𑀸𑀯𑀸𑀥𑀺𑀝𑁆𑀞𑀸𑀦𑀁 𑀲𑀻𑀮𑀁, ‘‘𑀕𑀘𑁆𑀙𑀦𑁆𑀢𑁄 𑀪𑀓𑁆𑀔𑁂𑀢𑀺, 𑀢𑀺𑀝𑁆𑀞𑀦𑁆𑀢𑁄 𑀫𑀼𑀢𑁆𑀢𑁂𑀢𑀻’’𑀢𑀺𑀆𑀤𑀺𑀦𑀸 𑀕𑀯𑀸𑀤𑀺𑀓𑀺𑀭𑀺𑀬𑀸𑀓𑀭𑀡𑀁 𑀯𑀢𑀁. 𑀢𑀁𑀢𑀁𑀅𑀓𑀺𑀘𑁆𑀘𑀲𑀫𑁆𑀫𑀢𑀢𑁄 𑀯𑀸 𑀦𑀺𑀯𑀢𑁆𑀢𑀺 𑀲𑀻𑀮𑀁, 𑀢𑀁𑀲𑀫𑀸𑀤𑀸𑀦𑀯𑀢𑁄𑀯𑁂𑀲 𑀪𑁄𑀚𑀦𑀓𑀺𑀘𑁆𑀘𑀓𑀭𑀡𑀸𑀤𑀺𑀯𑀺𑀲𑁂𑀲𑀧𑀝𑀺𑀧𑀢𑁆𑀢𑀺 𑀯𑀢𑀁, 𑀢𑀁 𑀲𑀻𑀮𑀩𑁆𑀩𑀢𑀁 𑀅𑀲𑀼𑀤𑁆𑀥𑀺𑀫𑀕𑁆𑀕𑀁 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀧𑀭𑀸𑀫𑀲𑀦𑁆𑀢𑁄 𑀢𑀣𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀉𑀧𑀸𑀤𑀺𑀬𑀢𑀺, 𑀢𑀁 𑀕𑀸𑀳𑀁 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀮𑀩𑁆𑀩𑀢𑀲𑀳𑀘𑀭𑀺𑀢𑀁 𑀧𑀭𑀸𑀫𑀸𑀲𑀁 𑀲𑀻𑀮𑀩𑁆𑀩𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳 ‘‘𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸’’𑀢𑀺. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀻𑀢𑀺 𑀘 𑀢𑀣𑀸𑀪𑀽𑀢𑀁 𑀤𑀺𑀝𑁆𑀞𑀺𑀁 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀻’’𑀢𑀺. 𑀅𑀪𑀺𑀦𑀺𑀯𑁂𑀲𑀢𑁄𑀢𑀺 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄, 𑀅𑀪𑀺𑀦𑀺𑀯𑀺𑀲𑀦𑀢𑁄 𑀯𑀸. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 ‘‘𑀅𑀢𑁆𑀢𑀸’’𑀢𑀺 𑀯𑀸𑀤𑀲𑁆𑀲 𑀧𑀜𑁆𑀜𑀸𑀧𑀦𑀲𑁆𑀲, 𑀕𑀳𑀡𑀲𑁆𑀲 𑀘 𑀓𑀸𑀭𑀡𑀪𑀽𑀢𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀢𑀲𑁆𑀲 𑀅𑀪𑀸𑀯𑀸 ‘‘𑀅𑀢𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀫𑀢𑁆𑀢𑀫𑁂𑀯. 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑀺. 𑀓𑀣𑀁? ‘‘𑀅𑀢𑁆𑀢𑀸’’𑀢𑀺. ‘‘𑀅𑀢𑁆𑀢𑀸’’𑀢𑀺 𑀳𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀯𑀘𑀦𑀫𑀢𑁆𑀢𑀫𑁂𑀯 𑀤𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄𑀢𑀺. 𑀏𑀯𑀁 ‘‘𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀉𑀧𑀸𑀤𑀺𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁 ¶ . 𑀅𑀢𑁆𑀢𑀯𑀸𑀤𑀫𑀢𑁆𑀢𑀦𑁆𑀢𑀺 𑀯𑀸 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯𑀸𑀳. 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯 𑀳𑀺 ‘‘𑀅𑀢𑁆𑀢𑀸’’𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀅𑀢𑁆𑀢𑀲𑁆𑀲 𑀅𑀪𑀸𑀯𑀸𑀢𑀺.

‘‘𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂 𑀧𑀦 𑀓𑀸𑀫𑀼𑀧𑀸𑀤𑀸𑀦𑀁 𑀲𑀗𑁆𑀔𑁂𑀧𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁, 𑀲𑁂𑀲𑀼𑀧𑀸𑀤𑀸𑀦𑀢𑁆𑀢𑀬𑀁 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯, 𑀯𑀺𑀢𑁆𑀣𑀸𑀭𑀢𑁄 𑀧𑀦𑀸’’𑀢𑀺 𑀏𑀯𑀁 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀲𑀫𑀼𑀤𑀸𑀬𑀢𑁄 𑀢𑀤𑀯𑀬𑀯𑀪𑀽𑀢𑀁 𑀲𑀗𑁆𑀔𑁂𑀧𑀁, 𑀯𑀺𑀢𑁆𑀣𑀸𑀭𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑀻𑀢𑀺. 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀓𑀸𑀫𑁂𑀲𑀽𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 ¶ . 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀓𑀸𑀫𑀲𑀗𑁆𑀔𑀸𑀢𑁄 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄, 𑀦 𑀘 𑀥𑀫𑁆𑀫𑀘𑁆𑀙𑀦𑁆𑀤𑁄. 𑀓𑀸𑀫𑀦𑀯𑀲𑁂𑀦, 𑀭𑀜𑁆𑀚𑀦𑀯𑀲𑁂𑀦 𑀘 𑀓𑀸𑀫𑁄𑀬𑁂𑀯 𑀭𑀸𑀕𑁄 𑀓𑀸𑀫𑀭𑀸𑀕𑁄, 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀸𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀓𑀸𑀫𑁄 𑀏𑀯 𑀦𑀦𑁆𑀤𑀦𑀝𑁆𑀞𑁂𑀦 𑀓𑀸𑀫𑀦𑀦𑁆𑀤𑀻, 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀓𑀸𑀫𑁄𑀬𑁂𑀯 𑀓𑀸𑀫𑀢𑀡𑁆𑀳𑀸, 𑀲𑀺𑀦𑁂𑀳𑀦𑀝𑁆𑀞𑁂𑀦 𑀓𑀸𑀫𑁄 𑀏𑀯 𑀓𑀸𑀫𑀲𑁆𑀦𑁂𑀳𑁄, 𑀧𑀭𑀺𑀤𑀬𑁆𑀳𑀦𑀝𑁆𑀞𑁂𑀦 𑀓𑀸𑀫𑀧𑀭𑀺𑀴𑀸𑀳𑁄, 𑀫𑀼𑀘𑁆𑀙𑀦𑀝𑁆𑀞𑁂𑀦 𑀓𑀸𑀫𑀫𑀼𑀘𑁆𑀙𑀸, 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀝𑁆𑀞𑁂𑀦 𑀓𑀸𑀫𑀚𑁆𑀛𑁄𑀲𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 𑀢𑀡𑁆𑀳𑀸 𑀆𑀭𑀫𑁆𑀫𑀡𑁂 𑀧𑀭𑀺𑀢𑀲𑁆𑀲𑀦𑀪𑀸𑀯𑀢𑁄, 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁 𑀆𑀭𑀫𑁆𑀫𑀡𑁂 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑀢𑁄. 𑀅𑀧𑁆𑀧𑀺𑀘𑁆𑀙𑀢𑀸𑀧𑀝𑀺𑀧𑀓𑁆𑀔𑀸 𑀢𑀡𑁆𑀳𑀸 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀢𑁄, 𑀲𑀦𑁆𑀢𑀼𑀝𑁆𑀞𑀺𑀧𑀝𑀺𑀧𑀓𑁆𑀔𑀸 𑀉𑀧𑀸𑀤𑀸𑀦𑀁 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀳𑀼𑀢𑁆𑀯𑀸 𑀅𑀢𑁆𑀭𑀺𑀘𑁆𑀙𑀢𑀸𑀪𑀸𑀯𑀢𑁄. 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀫𑀽𑀮𑀸 𑀢𑀡𑁆𑀳𑀸 𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸𑀪𑀸𑀯𑀢𑁄, 𑀆𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀁 𑀉𑀧𑀸𑀤𑀸𑀦𑀁 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀪𑀸𑀯𑀢𑁄.

𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀤𑀺𑀦𑁆𑀦𑀦𑁆𑀢𑀺 𑀤𑀸𑀦𑀫𑀸𑀳, 𑀢𑀁 𑀅𑀨𑀮𑀢𑁆𑀢𑀸 𑀭𑀽𑀧𑀁 𑀯𑀺𑀬 𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑁄 𑀫𑀳𑀸𑀬𑀸𑀕𑁄. 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀫𑀗𑁆𑀕𑀮𑀓𑀺𑀭𑀺𑀬𑀸. 𑀢𑀢𑁆𑀣 𑀆𑀫𑀦𑁆𑀢𑁂𑀢𑁆𑀯𑀸 𑀳𑀯𑀦𑀁 𑀤𑀸𑀦𑀁 𑀆𑀳𑀼𑀦𑀁, 𑀧𑀸𑀳𑀼𑀦𑀸𑀦𑀁 𑀅𑀢𑀺𑀣𑀻𑀦𑀁 𑀅𑀢𑀺𑀣𑀺𑀓𑀺𑀭𑀺𑀬𑀸 𑀧𑀸𑀳𑀼𑀦𑀁, 𑀆𑀯𑀸𑀳𑀸𑀤𑀻𑀲𑀼 𑀫𑀗𑁆𑀕𑀮𑀢𑁆𑀣𑀁 𑀤𑀸𑀦𑀁 𑀫𑀗𑁆𑀕𑀮𑀓𑀺𑀭𑀺𑀬𑀸, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀲𑀼𑀓𑀢𑀓𑀫𑁆𑀫𑀸𑀦𑀺 𑀦𑀸𑀫, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀼𑀓𑁆𑀓𑀝𑀓𑀫𑁆𑀫𑀸𑀦𑀺 𑀦𑀸𑀫, 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀦𑀺𑀲𑁆𑀲𑀦𑁆𑀤𑀸𑀤𑀺𑀨𑀮𑀜𑁆𑀘𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀯𑀺𑀧𑀸𑀓𑁄 𑀘 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀨𑀮𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑁄𑀯 𑀤𑀝𑁆𑀞𑀩𑁆𑀩𑁄. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 ‘‘𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀺. 𑀇𑀫𑀁 𑀳𑀺 𑀮𑁄𑀓𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀮𑁄𑀓𑁄, 𑀧𑀭𑀜𑁆𑀘 𑀮𑁄𑀓𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 𑀮𑁄𑀓𑁄 𑀳𑁄𑀢𑀺 𑀕𑀦𑁆𑀢𑀩𑁆𑀩𑀢𑁄, 𑀆𑀕𑀦𑁆𑀢𑀩𑁆𑀩𑀢𑁄 𑀘𑀸𑀢𑀺 𑀧𑀭𑀮𑁄𑀓𑀢𑁄 𑀇𑀥𑀸𑀕𑀫𑀦𑀲𑁆𑀲 𑀅𑀪𑀸𑀯𑀸 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄 𑀘𑀺𑀢𑁆𑀢𑁂𑀦 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 ‘‘𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀬𑀁 𑀤𑀺𑀝𑁆𑀞𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲𑁂𑀯 𑀳𑁄𑀢𑀻𑀢𑀺. 𑀦𑀢𑁆𑀣𑀺 𑀧𑀭𑀮𑁄𑀓𑁄𑀢𑀺 𑀇𑀥𑀮𑁄𑀓𑁂 ¶ 𑀞𑀺𑀢𑁄 𑀧𑀭𑀮𑁄𑀓𑀁 ‘‘𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀸𑀢𑀺. 𑀇𑀥𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑁋 𑀲𑀁𑀲𑀭𑀡𑀧𑁆𑀧𑀤𑁂𑀲𑁄 𑀇𑀥𑀮𑁄𑀓𑁄, 𑀧𑀭𑀮𑁄𑀓𑁄 𑀘 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺 𑀲𑀁𑀲𑀭𑀡𑀲𑁆𑀲 𑀅𑀪𑀸𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺.

𑀧𑀼𑀭𑀺𑀫𑀪𑀯𑀢𑁄 𑀧𑀘𑁆𑀙𑀺𑀫𑀪𑀯𑁂 𑀉𑀧𑀧𑀢𑀦𑀁 𑀉𑀧𑀧𑀸𑀢𑁄, 𑀲𑁄 𑀬𑁂𑀲𑀁 𑀲𑀻𑀮𑀁, 𑀢𑁂 𑀑𑀧𑀧𑀸𑀢𑀺𑀓𑀸. 𑀢𑁂 𑀧𑀦 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺. 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡…𑀧𑁂… 𑀧𑀯𑁂𑀤𑁂𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ¶ 𑀮𑁄𑀓𑀲𑁆𑀫𑀺𑀁 𑀦𑀢𑁆𑀣𑀺, 𑀬𑁂 𑀇𑀫𑀜𑁆𑀘 𑀮𑁄𑀓𑀁, 𑀧𑀭𑀜𑁆𑀘 𑀮𑁄𑀓𑀁 𑀅𑀢𑁆𑀢𑀦𑀸 𑀏𑀯 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀧𑀯𑁂𑀤𑀦𑀲𑀫𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀧𑀓𑀢𑀺𑀅𑀡𑀼𑀆𑀤𑀻𑀦𑀁 𑀲𑀲𑁆𑀲𑀢𑀕𑁆𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄, 𑀲𑀭𑀻𑀭𑀲𑁆𑀲 𑀉𑀘𑁆𑀙𑁂𑀤𑀕𑁆𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄 𑀘 𑀢𑁂𑀲𑀁 𑀕𑀸𑀳𑀸𑀦𑀁 𑀲𑀸𑀫𑀺𑀪𑀽𑀢𑁄 𑀓𑁄𑀘𑀺 𑀲𑀲𑁆𑀲𑀢𑁄, 𑀉𑀘𑁆𑀙𑀺𑀚𑁆𑀚𑀫𑀸𑀦𑁄 𑀯𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀢𑁆𑀢𑀕𑁆𑀕𑀸𑀳𑁄 𑀓𑀤𑀸𑀘𑀺 𑀳𑁄𑀢𑀻𑀢𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑁆𑀯𑀸𑀬𑀁 𑀅𑀢𑁆𑀢𑀕𑁆𑀕𑀸𑀳𑁄 𑀅𑀢𑁆𑀣𑀢𑁄 𑀔𑀦𑁆𑀥𑀸𑀭𑀫𑁆𑀫𑀡𑁄 𑀏𑀯 𑀤𑀝𑁆𑀞𑀩𑁆𑀩𑁄. 𑀬𑁂𑀪𑀼𑀬𑁆𑀬𑁂𑀦 𑀧𑀞𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺𑀆𑀤𑀺𑀦𑀸𑀯 𑀲𑀫𑁆𑀩𑀦𑁆𑀥𑁄. 𑀬𑀤𑀺𑀧𑀺 𑀪𑀯𑀭𑀸𑀕𑀚𑀯𑀦𑀯𑀻𑀣𑀺 𑀧𑀞𑀫𑀁 𑀧𑀯𑀢𑁆𑀢𑀢𑀺 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀪𑀯𑀦𑀺𑀓𑀦𑁆𑀢𑀺𑀬𑀸 𑀧𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸, 𑀲𑁄 𑀧𑀦 𑀪𑀯𑀭𑀸𑀕𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀫𑀸𑀳.

𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀧𑀦 𑀯𑀺𑀪𑀸𑀕𑀲𑁆𑀲 𑀅𑀓𑀭𑀡𑁂 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀭𑀡𑁂𑀧𑀺 𑀯𑀸 𑀓𑀸𑀫𑀭𑀸𑀕𑀢𑁄 𑀅𑀜𑁆𑀜𑀸𑀧𑀺 𑀢𑀡𑁆𑀳𑀸 𑀤𑀴𑁆𑀳𑀪𑀸𑀯𑀁 𑀧𑀢𑁆𑀢𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑀸 𑀯𑀼𑀢𑁆𑀢𑀸.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀲𑀬𑁄. 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀆𑀮𑀬𑁄. 𑀢𑀢𑁆𑀣 𑀭𑀫𑀢𑀻𑀢𑀺 𑀆𑀮𑀬𑀭𑀸𑀫𑀸, 𑀧𑀚𑀸. 𑀢𑁂𑀦𑁂𑀯 𑀲𑀸 𑀆𑀮𑀬𑀭𑀸𑀫𑀢𑀸 𑀲𑀲𑀦𑁆𑀢𑀸𑀦𑁂, 𑀧𑀭𑀲𑀦𑁆𑀢𑀸𑀦𑁂 𑀘 𑀧𑀸𑀓𑀝𑀸 𑀳𑁄𑀢𑀺. 𑀓𑀸𑀫𑀸𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸𑀦𑀁. ‘‘𑀲𑀼𑀔𑀤𑀼𑀓𑁆𑀔𑀁 𑀓𑀫𑁆𑀫𑀼𑀦𑀸 𑀳𑁄𑀢𑀻’’𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀩𑀳𑀼𑀮𑁄 𑀳𑁄𑀢𑀺. 𑀲𑀸 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀩𑀳𑀼𑀮𑀢𑀸. 𑀅𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀯𑀢𑁄. 𑀢𑀦𑁆𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀅𑀦𑀢𑁆𑀢𑀦𑀺 𑀥𑀫𑁆𑀫𑀫𑀢𑁆𑀢𑁂 ‘‘𑀅𑀢𑁆𑀢𑀸’’𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀲𑀼𑀔𑀼𑀫𑀢𑀭𑀥𑀫𑁆𑀫𑀼𑀧𑀸𑀤𑀸𑀦𑀢𑀸𑀬 𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸. 𑀉𑀧𑀦𑀺𑀲𑁆𑀲𑀬𑀯𑀘𑀦𑁂𑀦 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀸 ¶ 𑀯𑀼𑀢𑁆𑀢𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀪𑀯𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁪𑁬. 𑀅𑀢𑁆𑀣𑀢𑁄𑀢𑀺 𑀯𑀘𑀦𑀢𑁆𑀣𑀢𑁄. 𑀥𑀫𑁆𑀫𑀢𑁄𑀢𑀺 𑀲𑀪𑀸𑀯𑀥𑀫𑁆𑀫𑀢𑁄. 𑀲𑀸𑀢𑁆𑀣𑀢𑁄𑀢𑀺 𑀲𑀸𑀢𑁆𑀣𑀓𑀢𑁄, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲𑀧𑀺 𑀧𑀼𑀦 𑀯𑀘𑀦𑀲𑁆𑀲 𑀲𑀧𑁆𑀧𑀬𑁄𑀚𑀦𑀢𑁄. 𑀪𑁂𑀤𑀲𑀗𑁆𑀕𑀳𑀸𑀢𑀺 𑀪𑁂𑀤𑀢𑁄 𑀲𑀗𑁆𑀕𑀳𑀢𑁄, 𑀯𑀺𑀪𑀸𑀕𑀢𑁄 𑀘𑁂𑀯 𑀯𑀺𑀪𑀢𑁆𑀢𑀲𑁆𑀲 𑀲𑀗𑁆𑀔𑀺𑀧𑀦𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀬𑀁 𑀬𑀲𑁆𑀲 𑀧𑀘𑁆𑀘𑀬𑁄𑀢𑀺 𑀬𑀁 𑀬𑀁 𑀉𑀧𑀸𑀤𑀸𑀦𑀁 𑀬𑀲𑁆𑀲 𑀬𑀲𑁆𑀲 𑀪𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄 𑀘𑀸𑀢𑀺 𑀅𑀢𑁆𑀣𑁄.

𑀪𑀯𑀢𑀻𑀢𑀺 ¶ 𑀪𑀯𑁄𑀢𑀺 𑀨𑀮𑀯𑁄𑀳𑀸𑀭𑁂𑀦 𑀓𑀫𑁆𑀫𑀪𑀯𑁄 𑀯𑀼𑀢𑁆𑀢𑁄. 𑀉𑀧𑀧𑀢𑁆𑀢𑀺𑀪𑀯𑀦𑀺𑀩𑁆𑀩𑀘𑀦𑀫𑁂𑀯 𑀳𑀺 𑀤𑁆𑀯𑀬𑀲𑁆𑀲𑀧𑀺 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀪𑀯𑀢𑀺 𑀏𑀢𑀲𑁆𑀫𑀸 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀯𑀸. 𑀤𑀼𑀢𑀺𑀬𑁄 𑀧𑀦 𑀓𑀫𑁆𑀫𑀪𑀯𑁄 𑀲𑀢𑁆𑀢𑀲𑁆𑀲 𑀧𑀼𑀦𑀩𑁆𑀪𑀯𑀪𑀸𑀯𑁂𑀦 𑀲𑀯𑀺𑀲𑁂𑀲𑀁 𑀪𑀯𑀢𑀻𑀢𑀺 𑀪𑀯𑁄. 𑀢𑀢𑁄 𑀏𑀯 𑀦 𑀲𑀩𑁆𑀩𑀲𑁆𑀲 𑀪𑀯𑀦𑁆𑀢𑀭𑀲𑁆𑀲, 𑀢𑀁𑀳𑁂𑀢𑀼𑀦𑁄 𑀯𑀸 𑀪𑀯𑀪𑀸𑀯𑀧𑁆𑀧𑀲𑀗𑁆𑀕𑁄. 𑀤𑀼𑀯𑀺𑀥𑁂𑀦𑀸𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀤𑀼𑀯𑀺𑀥𑁂𑀦𑀸𑀢𑀺 𑀯𑀸 𑀧𑀘𑁆𑀘𑀢𑁆𑀢𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀤𑀼𑀯𑀺𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀢𑀺.

𑁬𑁪𑁭. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀦𑁆𑀢𑀺 𑀓𑁂𑀘𑀺, ‘‘𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀸 𑀓𑀫𑁆𑀫𑀲𑀗𑁆𑀔𑀸𑀢𑀸. 𑀧𑀭𑀺𑀢𑁆𑀢𑀪𑀽𑀫𑀓𑁄𑀢𑀺 𑀓𑀸𑀫𑀪𑀽𑀫𑀓𑁄. 𑀫𑀳𑀸𑀪𑀽𑀫𑀓𑁄𑀢𑀺 𑀫𑀳𑀕𑁆𑀕𑀢𑀪𑀽𑀫𑀓𑁄. 𑀲𑀩𑁆𑀩𑀦𑁆𑀢𑀺 𑀅𑀦𑀯𑀲𑁂𑀲𑀁. 𑀪𑀯𑀁 𑀕𑀘𑁆𑀙𑀢𑀺, 𑀕𑀫𑁂𑀢𑀺 𑀘𑀸𑀢𑀺 𑀪𑀯𑀕𑀸𑀫𑀺. 𑀕𑀘𑁆𑀙𑀢𑀻𑀢𑀺 𑀘 𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦, 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑀸𑀮𑁂 𑀪𑀯𑀸𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄, 𑀦𑀺𑀩𑁆𑀩𑀢𑁆𑀢𑀦𑀫𑁂𑀯 𑀯𑀸 𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀪𑀯𑀕𑀸𑀫𑀻’’𑀢𑀺 𑀘 𑀏𑀢𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀁 𑀓𑀫𑁆𑀫𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀬𑀜𑁆𑀳𑀺 𑀯𑀝𑁆𑀝𑀓𑀣𑀸, 𑀢𑀜𑁆𑀘 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀦𑁆𑀢𑀺. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀤𑁆𑀯𑀸𑀤𑀲 𑀘𑁂𑀢𑀦𑀸𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸𑀬𑀧𑀺 𑀕𑀳𑀡𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣 𑀯𑀺𑀬 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀏𑀢𑁆𑀣 𑀧𑀦 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀫𑀳𑀸𑀯. 𑁧; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀏𑀢𑁆𑀣 𑀯𑀺𑀬 𑀲𑀸𑀧𑀺 𑀅𑀧𑀦𑁂𑀢𑀩𑁆𑀩𑀸. 𑀫𑀦𑁆𑀤𑀩𑀳𑀼𑀯𑀺𑀧𑀸𑀓𑀢𑀸𑀢𑀺 𑀅𑀧𑁆𑀧𑀫𑀳𑀸𑀯𑀺𑀧𑀸𑀓𑀢𑀸.

‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀦𑁆𑀢𑀺 𑀇𑀫𑀺𑀦𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀯𑀼𑀢𑁆𑀢𑀸’’𑀢𑀺 𑀏𑀢𑁂𑀦 𑀆𑀘𑀬𑀕𑀸𑀫𑀺𑀢𑀸𑀬 𑀢𑁂𑀲𑀁 𑀓𑀫𑁆𑀫𑀲𑀗𑁆𑀔𑀸𑀢𑀢𑀸 𑀯𑀼𑀢𑁆𑀢𑀸𑀢𑀺 𑀓𑀫𑁆𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀢𑀁 ¶ 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀘𑁂𑀢𑀦𑀸𑀯 𑀓𑀫𑁆𑀫𑀪𑀯𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀫𑁆𑀫𑀪𑀯𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁪𑁪). 𑀉𑀧𑀧𑀢𑁆𑀢𑀺𑀪𑀯𑁄 𑀢𑀻𑀳𑀺𑀧𑀺 𑀢𑀺𑀓𑁂𑀳𑀺 𑀯𑀼𑀢𑁆𑀢𑁄 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑁄𑀯. 𑀬𑀣𑀸𑀳 ‘‘𑀉𑀧𑀧𑀢𑁆𑀢𑀺𑀪𑀯𑁄… 𑀓𑀸𑀫𑀪𑀯𑁄… 𑀲𑀜𑁆𑀜𑀸𑀪𑀯𑁄… 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀺 (𑀥𑀸𑀢𑀼. 𑁬𑁭). 𑀬𑀤𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸, ‘‘𑀤𑁆𑀯𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀓𑀸𑀫𑀢𑀡𑁆𑀳𑀸𑀬 𑀓𑀸𑀫𑁂𑀢𑀩𑁆𑀩𑀢𑁄 𑀓𑀸𑀫𑀦𑀺𑀲𑁆𑀲𑀬𑀢𑀸𑀬 𑀪𑁄𑀕𑀸 𑀯𑀺𑀬, 𑀓𑀸𑀫𑀲𑀳𑀘𑀭𑀺𑀢𑀢𑀸𑀬 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺 𑀯𑀺𑀬, 𑀓𑀸𑀫𑀸𑀭𑀫𑁆𑀫𑀡𑀢𑀸𑀬 ‘‘𑀲𑀼𑀔𑀁 𑀭𑀽𑀧’’𑀦𑁆𑀢𑀺 𑀯𑀺𑀬, 𑀓𑀸𑀫𑀧𑀘𑁆𑀘𑀬𑀝𑁆𑀞𑀸𑀦𑀢𑀸𑀬 ‘‘𑀲𑀼𑀔𑁄 𑀲𑀕𑁆𑀕𑁄’’𑀢𑀺 𑀯𑀺𑀬 𑀓𑀸𑀫𑀸𑀢𑀺 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸 𑀯𑀼𑀘𑁆𑀘𑀦𑁆𑀢𑀺 ¶ . 𑀭𑀽𑀧𑀸𑀯𑀺𑀭𑀸𑀕𑀢𑁄 𑀬𑀁 𑀦𑀺𑀲𑁆𑀲𑀺𑀢𑀸, 𑀢𑀤𑀼𑀧𑀘𑀸𑀭𑁂𑀦 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺 𑀯𑀺𑀬, ‘‘𑀨𑀦𑁆𑀤𑀦𑀤𑁂𑀯𑀢𑀸’’𑀢𑀺 𑀯𑀺𑀬 𑀘 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀓𑀦𑀺𑀝𑁆𑀞𑀧𑀭𑀺𑀘𑁆𑀙𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸.

𑀭𑀽𑀧𑀫𑁂𑀯 𑀪𑀯𑁄 𑀭𑀽𑀧𑀪𑀯𑁄, 𑀢𑀣𑀸 𑀅𑀭𑀽𑀧𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀯𑀕𑁆𑀕𑀧𑀭𑀺𑀘𑁆𑀙𑀺𑀦𑁆𑀦𑀸 𑀘𑀢𑁆𑀢𑀸𑀭𑁄 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸 𑀯𑀼𑀘𑁆𑀘𑀦𑁆𑀢𑀺. 𑀅𑀭𑀽𑀧𑀫𑁂𑀯 𑀪𑀯𑁄 𑀅𑀭𑀽𑀧𑀪𑀯𑁄. 𑀓𑀸𑀫𑁄 𑀏𑀯 𑀪𑀯𑁄𑀢𑀺 𑀓𑀸𑀫𑀪𑀯𑁄, 𑀲𑁄 𑀧𑀦 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 ‘‘𑀓𑀸𑀫𑁄’’𑀢𑀺 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀸𑀫𑀲𑀗𑁆𑀔𑀸𑀢𑁄 𑀪𑀯𑁄’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄 𑀯𑀸 𑀪𑀯𑁄 ‘‘𑀓𑀸𑀫𑀲𑀗𑁆𑀔𑀸𑀢𑁄 𑀪𑀯𑁄’’𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀭𑀽𑀧𑀸𑀭𑀽𑀧𑀪𑀯𑁄𑀢𑀺 𑀆𑀳 ‘‘𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀽’’𑀢𑀺. 𑀲𑀜𑁆𑀜𑀸𑀯𑀢𑀁 𑀪𑀯𑁄𑀢𑀺 𑀏𑀢𑁆𑀣 𑀯𑀦𑁆𑀢𑀼-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲 𑀯𑀸 𑀅𑀢𑁆𑀣𑁂 𑀅𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀜𑁆𑀜𑀪𑀯𑁄’’𑀢𑀺𑀧𑀺 𑀧𑀸𑀞𑁄. 𑀢𑁂𑀦𑀸𑀳 ‘‘𑀲𑀜𑁆𑀜𑀸𑀯𑀸’’𑀢𑀺𑀆𑀤𑀺. 𑀯𑁄𑀓𑀺𑀡𑁆𑀡𑁄𑀢𑀺 𑀏𑀢𑁂𑀦 𑀯𑁄𑀓𑀸𑀭𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀫𑀸𑀳. 𑀯𑁄𑀓𑀺𑀭𑀻𑀬𑀢𑀺 𑀧𑀲𑀸𑀭𑀻𑀬𑀢𑀺 𑀯𑀺𑀢𑁆𑀣𑀸𑀭𑀻𑀬𑀢𑀻𑀢𑀺 𑀯𑁄𑀓𑀸𑀭𑁄, 𑀯𑁄𑀓𑀺𑀭𑀡𑀁 𑀯𑀸 𑀯𑁄𑀓𑀸𑀭𑁄, 𑀲𑁄 𑀏𑀓𑀲𑁆𑀲𑁂𑀯 𑀔𑀦𑁆𑀥𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀏𑀓𑁄 𑀯𑁄𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄, 𑀧𑀲𑀝𑀼𑀧𑁆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑁬𑁪𑁮. 𑀓𑀺𑀜𑁆𑀘𑀸𑀧𑀺 𑀪𑀯𑀦𑀺𑀤𑁆𑀤𑁂𑀲𑁂 ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄’’𑀢𑀺 (𑀯𑀺𑀪. 𑁨𑁩𑁪) 𑀇𑀫𑀺𑀦𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀯𑀸𑀢𑀺 𑀧𑀦 𑀅𑀯𑀥𑀸𑀭𑀡𑀁 ¶ 𑀧𑀘𑁆𑀘𑀬𑀥𑀫𑁆𑀫𑀯𑀺𑀲𑁂𑀲𑁂𑀧𑀺 𑀅𑀢𑁆𑀣𑀧𑁆𑀧𑀪𑁂𑀤𑁂𑀦 𑀲𑀗𑁆𑀔𑀸𑀭𑀪𑀯𑀕𑁆𑀕𑀳𑀡𑁂𑀲𑀼 𑀅𑀢𑁆𑀣𑁂𑀯 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑁂𑀦𑀸𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀲𑀗𑁆𑀔𑀸𑀭𑀪𑀯𑀸𑀦𑀁 𑀥𑀫𑁆𑀫𑀪𑁂𑀤𑀢𑁄 𑀦 𑀲𑀗𑁆𑀔𑀸𑀭𑀸 𑀏𑀯 𑀧𑀼𑀦 𑀯𑀼𑀢𑁆𑀢𑀸𑀢𑀺 ‘‘𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦’’𑀦𑁆𑀢𑀺 𑀏𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀪𑀯𑁂𑀓𑀤𑁂𑀲𑀪𑀸𑀯𑁂𑀦 𑀲𑀗𑁆𑀔𑀸𑀭𑀸𑀦𑀁 𑀪𑀯𑁄𑀢𑀺 𑀧𑀼𑀦 𑀯𑀼𑀢𑁆𑀢𑀢𑁆𑀢𑀸. 𑀧𑀭𑁂𑀦 𑀯𑀸 𑀥𑀫𑁆𑀫𑀯𑀺𑀲𑁂𑀲𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀦𑀯𑀘𑀦𑀁 𑀘𑁄𑀤𑀺𑀢𑀦𑁆𑀢𑀺 𑀘𑁄𑀤𑀓𑀸𑀪𑀺𑀮𑀸𑀲𑀯𑀲𑁂𑀦 ‘‘𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁬𑁪𑁯. 𑀓𑀸𑀫𑀪𑀯𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀫𑀪𑀯𑀸𑀤𑀺𑀪𑀸𑀯𑁄 𑀨𑀮𑀯𑁄𑀳𑀸𑀭𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀧𑀘𑁆𑀘𑀬𑀪𑀽𑀢𑀁 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑀁 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫’’𑀦𑁆𑀢𑀺 (𑀯𑀺𑀪. 𑁨𑁩𑁪) 𑀯𑀘𑀦𑀢𑁄 𑀪𑀯𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀉𑀧𑀸𑀤𑀸𑀦𑀳𑁂𑀢𑀼𑀓𑀁 𑀯𑀺𑀧𑀘𑁆𑀘𑀦𑀸𑀬 𑀓𑀢𑁄𑀓𑀸𑀲𑀫𑁂𑀯 𑀪𑀯𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀁 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀭𑀽𑀧𑀪𑀯𑀦𑀺𑀩𑁆𑀩𑀢𑁆𑀢𑀓𑀁, 𑀅𑀭𑀽𑀧𑀪𑀯𑀦𑀺𑀩𑁆𑀩𑀢𑁆𑀢𑀓𑀜𑁆𑀘 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀲𑁄 𑀓𑀫𑁆𑀫𑀪𑀯𑁄, 𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀽’’𑀢𑀺 𑀅𑀢𑀺𑀤𑀺𑀲𑀢𑀺. 𑀤𑁆𑀯𑁂 𑀓𑀸𑀫𑀪𑀯𑀸𑀢𑀺 ¶ 𑀓𑀸𑀫𑀓𑀫𑁆𑀫𑀪𑀯𑁄, 𑀓𑀸𑀫𑀽𑀧𑀧𑀢𑁆𑀢𑀺𑀪𑀯𑁄𑀢𑀺 𑀤𑁆𑀯𑁂 𑀓𑀸𑀫𑀪𑀯𑀸. 𑀏𑀯𑀁 ‘‘𑀤𑁆𑀯𑁂 𑀭𑀽𑀧𑀪𑀯𑀸, 𑀤𑁆𑀯𑁂 𑀅𑀭𑀽𑀧𑀪𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀅𑀦𑁆𑀢𑁄𑀕𑀥𑁂 𑀳𑀺 𑀯𑀺𑀲𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀕𑀢𑁂 𑀏𑀯 𑀓𑀢𑁆𑀯𑀸 𑀓𑀸𑀫𑀪𑀯𑀸𑀤𑀺𑀓𑁂 𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀤𑀼𑀕𑀼𑀡𑁂 𑀓𑀢𑁆𑀯𑀸 𑀆𑀳 ‘‘𑀙 𑀪𑀯𑀸’’𑀢𑀺.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀉𑀧𑀸𑀤𑀸𑀦𑀯𑀲𑁂𑀦 𑀪𑁂𑀤𑀁 𑀅𑀓𑀢𑁆𑀯𑀸. 𑀉𑀧𑀸𑀤𑀸𑀦𑀪𑁂𑀤𑀸𑀓𑀭𑀡𑁂𑀦𑁂𑀯 𑀘 𑀤𑁆𑀯𑀸𑀤𑀲𑀧𑁆𑀧𑀪𑁂𑀤𑀲𑁆𑀲 𑀲𑀗𑁆𑀕𑀳𑀯𑀲𑁂𑀦 𑀲𑀗𑁆𑀕𑀳𑀢𑁄 ‘‘𑀙 𑀪𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀕𑀫𑁆𑀫𑀸𑀢𑀺 𑀅𑀦𑀺𑀲𑁆𑀲𑀸𑀬, 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁬𑁫𑁦. 𑀕𑁄𑀲𑀻𑀮𑁂𑀦, 𑀓𑀼𑀓𑁆𑀓𑀼𑀭𑀲𑀻𑀮𑁂𑀦 𑀘 𑀲𑀫𑀢𑁆𑀢𑁂𑀦 𑀲𑀫𑀸𑀤𑀺𑀦𑁆𑀦𑁂𑀦 𑀕𑀼𑀦𑁆𑀦𑀁, 𑀓𑀼𑀓𑁆𑀓𑀼𑀭𑀸𑀦𑀜𑁆𑀘 𑀲𑀳𑀩𑁆𑀬𑀢𑀸 𑀯𑀼𑀢𑁆𑀢𑀸𑀢𑀺 ‘‘𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀯𑀢𑁄 𑀛𑀸𑀦𑀪𑀸𑀯𑀦𑀸 𑀦 𑀇𑀚𑁆𑀛𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑁂𑀦 𑀭𑀽𑀧𑀸𑀭𑀽𑀧𑀪𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀯𑀓𑁆𑀔𑀫𑀸𑀦𑁂𑀦 𑀧𑀦 𑀧𑀓𑀸𑀭𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 ‘‘𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀅𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀦𑁆𑀢𑀺 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁 𑀦 𑀦 𑀬𑀼𑀚𑁆𑀚𑀢𑀻𑀢𑀺.

𑀅𑀦𑀼𑀲𑁆𑀲𑀯𑀯𑀲𑁂𑀦𑀸𑀢𑀺 ‘‘𑀲𑁂𑀢𑀯𑀥𑀬𑀚𑁆𑀚𑀁 𑀆𑀮𑀪𑀢𑁂 𑀪𑀽𑀢𑀺𑀓𑀸𑀫𑁄’’𑀢𑀺 𑀆𑀤𑀺𑀦𑁆𑀦𑀅𑀦𑀼𑀲𑁆𑀲𑀯𑀯𑀲𑁂𑀦, 𑀬𑀣𑀸 𑀇𑀫𑁂 𑀫𑀦𑀼𑀲𑁆𑀲𑀮𑁄𑀓𑁂 𑀓𑀸𑀫𑀸 𑀲𑀫𑀺𑀤𑁆𑀥𑀸, 𑀏𑀯𑀁 𑀤𑁂𑀯𑀮𑁄𑀓𑁂 ¶ 𑀇𑀢𑁄 𑀲𑀫𑀺𑀤𑁆𑀥𑀢𑀭𑀸𑀢𑀺 𑀤𑀺𑀝𑁆𑀞𑀸𑀦𑀼𑀲𑀸𑀭𑁂𑀦 𑀯𑀸. 𑀧𑀼𑀭𑀸𑀡𑀪𑀸𑀭𑀢𑀲𑀻𑀢𑀸𑀳𑀭𑀡𑀧𑀲𑀼𑀩𑀦𑁆𑀥𑀯𑀺𑀥𑀺𑀆𑀤𑀺𑀲𑀯𑀦𑀁 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑁂 𑀘 𑀅𑀓𑀢𑀧𑀼𑀜𑁆𑀜𑀢𑀁, 𑀅𑀢𑁆𑀢𑀫𑀺𑀘𑁆𑀙𑀸𑀧𑀡𑀺𑀥𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺𑀧𑀻𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑁂𑀢𑀸𑀦𑀁 𑀓𑀸𑀫𑀸𑀦𑀁 𑀅𑀦𑀼𑀧𑀸𑀬𑀪𑀽𑀢𑀸𑀦𑀺𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀘𑀺𑀭𑀲𑀕𑁆𑀕𑀸𑀤𑀺𑀅𑀢𑁆𑀣𑀁 𑀬𑀼𑀤𑁆𑀥𑀸𑀤𑀺𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀤𑀺𑀝𑁆𑀞𑀺𑀓𑁂 𑀯𑀸 𑀧𑀦 𑀭𑀚𑁆𑀚𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀺𑀲𑀗𑁆𑀕𑀳𑁂 𑀓𑀸𑀫𑁂. 𑀢𑀤𑀦𑁆𑀢𑁄𑀕𑀥𑀸 𑀏𑀯𑀸𑀢𑀺 𑀢𑀲𑁆𑀫𑀺𑀁 𑀤𑀼𑀘𑁆𑀘𑀭𑀺𑀢𑀦𑀺𑀩𑁆𑀩𑀢𑁆𑀢𑁂, 𑀲𑀼𑀘𑀭𑀺𑀢𑀦𑀺𑀩𑁆𑀩𑀢𑁆𑀢𑁂 𑀘 𑀓𑀸𑀫𑀪𑀯𑁂 𑀅𑀦𑁆𑀢𑁄𑀕𑀥𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀕𑀥𑀸𑀢𑀺 𑀘 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸𑀦𑀁 𑀏𑀓𑀤𑁂𑀲𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀦𑀺𑀭𑀯𑀲𑁂𑀲𑀸 𑀓𑀸𑀫𑀪𑀯𑁂 𑀅𑀦𑁆𑀢𑁄𑀕𑀥𑀸𑀢𑀺.

𑀲𑀧𑁆𑀧𑀪𑁂𑀤𑀲𑁆𑀲𑀸𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀫𑀦𑀼𑀲𑁆𑀲𑀸𑀤𑀺𑀧𑁆𑀧𑀪𑁂𑀤𑀯𑀢𑁄.

𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂 𑀧𑀞𑀫𑀤𑀼𑀢𑀺𑀬𑀉𑀘𑁆𑀙𑁂𑀤𑀯𑀸𑀤𑀯𑀲𑁂𑀦, 𑀭𑀽𑀧𑀪𑀯𑁂 𑀢𑀢𑀺𑀬𑀉𑀘𑁆𑀙𑁂𑀤𑀯𑀸𑀤𑀯𑀲𑁂𑀦, 𑀅𑀭𑀽𑀧𑀪𑀯𑁂 𑀲𑁂𑀲𑀉𑀘𑁆𑀙𑁂𑀤𑀯𑀸𑀤𑀯𑀲𑁂𑀦 𑀅𑀬𑀫𑀢𑁆𑀢𑀸 𑀲𑀼𑀉𑀘𑁆𑀙𑀺𑀦𑁆𑀦𑁄 𑀳𑁄𑀢𑀻𑀢𑀺 𑀢𑀤𑀼𑀧𑀕𑀁 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀬𑀁 ¶ 𑀅𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀉𑀘𑁆𑀙𑀺𑀦𑁆𑀦𑁄𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀘𑁆𑀙𑁂𑀤𑁂𑀦 𑀲𑀼𑀝𑁆𑀞𑀼 𑀉𑀘𑁆𑀙𑀺𑀦𑁆𑀦𑁄, 𑀅𑀧𑀼𑀦𑀩𑁆𑀪𑀯𑀼𑀧𑁆𑀧𑀢𑁆𑀢𑀺𑀓𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

‘‘𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀪𑀯𑁂’’𑀢𑀺 𑀇𑀤𑀁 𑀧𑀞𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀁, 𑀲𑁂𑀲𑀁 𑀇𑀢𑀭𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀲𑁂𑀦. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁧.𑁯𑁩 𑀆𑀤𑀬𑁄) 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀯𑀲𑁂𑀦𑁂𑀯 𑀉𑀧𑀭𑀺 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀆𑀕𑀢𑀸, 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀦 𑀬𑀁 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀬𑀣𑀸 𑀢𑀣𑀸 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀭𑀽𑀧𑀪𑀯𑀕𑁆𑀕𑀳𑀡𑀁, 𑀅𑀭𑀽𑀧𑀚𑁆𑀛𑀸𑀦𑀸𑀦𑀫𑁆𑀧𑀺 𑀯𑀸 𑀘𑀢𑀼𑀢𑁆𑀣𑀛𑀸𑀦𑀲𑀗𑁆𑀕𑀳𑀢𑁄 𑀅𑀭𑀽𑀧𑀪𑀯𑀕𑁆𑀕𑀳𑀡𑀁, 𑀲𑀦𑁆𑀢𑀲𑀼𑀔𑀢𑀸𑀬 𑀯𑀸 𑀢𑀁𑀲𑀫𑀗𑁆𑀕𑀺𑀦𑁄 𑀲𑀼𑀔𑀺𑀢𑀪𑀸𑀯𑀲𑀸𑀫𑀜𑁆𑀜𑀢𑁄. 𑀯𑀺𑀕𑀢𑀧𑀭𑀺𑀴𑀸𑀳𑁄𑀢𑀺 𑀬𑀣𑀸𑀪𑀺𑀮𑀸𑀲𑀺𑀢𑀯𑀺𑀲𑀬𑀽𑀧𑀳𑀸𑀭𑁂𑀦, 𑀧𑀳𑀸𑀦𑁂𑀦 𑀘 𑀯𑀽𑀧𑀲𑀦𑁆𑀢𑀓𑀸𑀫𑀭𑀸𑀕𑀧𑀭𑀺𑀴𑀸𑀳𑁄, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀮𑁄𑀓𑀺𑀬𑀁 𑀲𑀻𑀮𑀁, 𑀛𑀸𑀦𑀜𑁆𑀘 𑀲𑀻𑀮𑀩𑁆𑀩𑀢𑀫𑀺𑀘𑁆𑀘𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀲𑀻𑀮𑀩𑁆𑀩𑀢𑀁 𑀦𑀸𑀫𑀸’’𑀢𑀺𑀆𑀤𑀺. 𑀓𑀫𑁂𑀦 𑀅𑀯𑀢𑁆𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀅𑀦𑁆𑀢𑁂 𑀪𑀯𑀧𑀘𑁆𑀘𑀬𑀢𑀸𑀯𑀘𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀯𑀺𑀬 𑀅𑀪𑀺𑀡𑁆𑀳𑀁 𑀅𑀲𑀫𑀼𑀤𑀸𑀘𑀸𑀭𑀢𑁄, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑀺𑀫𑀺𑀢𑁆𑀢𑀢𑁆𑀢𑀸 𑀘.

𑀓𑀫𑁆𑀫𑀪𑀯𑁂𑀢𑀺 ¶ 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑁂𑀳𑀻𑀢𑀺 𑀏𑀢𑁆𑀣 𑀫𑀕𑁆𑀕𑀧𑀘𑁆𑀘𑀬𑁄 𑀘 𑀯𑀢𑁆𑀢𑀩𑁆𑀩𑁄. 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀳𑀺 𑀲𑀳𑀚𑀸𑀢𑀓𑀫𑁆𑀫𑀪𑀯𑀲𑁆𑀲 𑀫𑀕𑁆𑀕𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀳𑀚𑀸𑀢𑀸𑀤𑀻𑀲𑀼 𑀳𑁂𑀢𑀼𑀧𑀘𑁆𑀘𑀬𑀁 𑀅𑀧𑀦𑀻𑀬 𑀫𑀕𑁆𑀕𑀧𑀘𑁆𑀘𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀸𑀦𑀺 𑀧𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀦𑀸𑀦𑀦𑁆𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀤𑀸𑀘𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀦𑀸𑀧𑀺, 𑀢𑀁 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑁂𑀯𑀸’’𑀢𑀺.

𑀪𑀯𑀧𑀘𑁆𑀘𑀬𑀸𑀚𑀸𑀢𑀺𑀆𑀤𑀺𑀧𑀤𑀯𑀺𑀢𑁆𑀣𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁫𑁧. 𑀚𑀸𑀢𑀻𑀢𑀺𑀆𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀫𑀳𑀸𑀯. 𑁧; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀚𑀸𑀢𑀺𑀆𑀤𑀻𑀦’’𑀦𑁆𑀢𑀺𑀆𑀤𑀺. 𑀉𑀧𑀧𑀢𑁆𑀢𑀺𑀪𑀯𑀼𑀧𑁆𑀧𑀢𑁆𑀢𑀺𑀬𑁂𑀯 ¶ 𑀚𑀸𑀢𑀻𑀢𑀺 𑀆𑀳 ‘‘𑀦 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺. 𑀚𑀸𑀬𑀫𑀸𑀦𑀲𑁆𑀲 𑀧𑀦 𑀚𑀸𑀢𑀺 𑀚𑀸𑀢𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀅𑀲𑀢𑀺 𑀅𑀪𑀸𑀯𑀸 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀚𑀸𑀬𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀢𑀸𑀧𑀺 𑀳𑀺 𑀭𑀽𑀧𑀚𑀸𑀢𑀺𑀬𑀸 𑀯𑀼𑀢𑁆𑀢𑀸 ‘‘𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄 𑀉𑀧𑀘𑀬𑁄, 𑀅𑀦𑀼𑀧𑁆𑀧𑀩𑀦𑁆𑀥𑀭𑀽𑀧𑀧𑀤𑀝𑁆𑀞𑀸𑀦𑀸 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁬𑁪𑁧).

𑀚𑀸𑀢𑀸𑀦𑀁 𑀔𑀦𑁆𑀥𑀸𑀦𑀁 𑀉𑀜𑁆𑀜𑀸𑀢𑀢𑀸, 𑀅𑀪𑀺𑀫𑀢𑀢𑀸 𑀘 𑀳𑀻𑀦𑀧𑀡𑀻𑀢𑀢𑀸. 𑀅𑀦𑀺𑀝𑁆𑀞𑀜𑁆𑀳𑀺 𑀳𑀻𑀦𑀁, 𑀇𑀝𑁆𑀞𑀁 𑀧𑀡𑀻𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀳𑀻𑀦𑀼𑀢𑁆𑀢𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀫𑀓𑀸𑀦𑀫𑁆𑀧𑀺 𑀲𑀢𑀦𑁆𑀢𑀺 𑀬𑀫𑀓𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁. 𑀲𑁄 𑀘 𑀲𑀢𑁆𑀢𑀸𑀦𑀁 𑀯𑀺𑀲𑁂𑀲𑁄. 𑀪𑀺𑀦𑁆𑀦𑀲𑀦𑁆𑀢𑀸𑀦𑀺𑀓𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄 ‘‘𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀢𑁆𑀢𑀲𑀦𑁆𑀢𑀸𑀦𑀕𑀢𑀢𑁄 𑀅𑀜𑁆𑀜𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸, 𑀲𑀢𑀺 𑀘 𑀢𑀲𑁆𑀫𑀺𑀁 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀁 𑀅𑀪𑀸𑀯𑀢𑁄𑀢𑀺 𑀧𑀲𑀗𑁆𑀕𑀲𑁆𑀲 𑀤𑀼𑀦𑁆𑀦𑀺𑀯𑀸𑀭𑀡𑀢𑁄 𑀓𑀸𑀭𑀡𑁂 𑀅𑀯𑀺𑀲𑀺𑀝𑁆𑀞𑁂 𑀨𑀮𑀯𑀺𑀲𑁂𑀲𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀓𑀢𑁆𑀢𑀸. 𑀢𑁂𑀦𑀸𑀳 ‘‘𑀓𑀫𑁆𑀫𑀪𑀯𑀳𑁂𑀢𑀼𑀓𑁄𑀯𑀸’’𑀢𑀺.

𑀢𑁂𑀦 𑀢𑁂𑀦𑀸𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀚𑀭𑀸𑀫𑀭𑀡𑀢𑁄 𑀅𑀜𑁆𑀜𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦. 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀜𑁆𑀳𑀺 𑀉𑀧𑁆𑀧𑀦𑁆𑀦𑀸 𑀲𑁄𑀓𑀸𑀤𑀬𑁄 𑀚𑀭𑀸𑀫𑀭𑀡𑀸𑀪𑀺𑀲𑀫𑁆𑀩𑀦𑁆𑀥𑀸, 𑀢𑀤𑀜𑁆𑀜𑁂 𑀅𑀦𑀪𑀺𑀲𑀫𑁆𑀩𑀦𑁆𑀥𑀸. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀁𑀲𑁂𑀦, 𑀉𑀧𑀦𑀺𑀲𑁆𑀲𑀬𑀮𑁂𑀲𑁂𑀦𑀸𑀢𑀺 ¶ 𑀅𑀢𑁆𑀣𑁄. 𑀬𑁄 𑀳𑀺 𑀧𑀝𑁆𑀞𑀸𑀦𑁂 𑀅𑀦𑀸𑀕𑀢𑁄 𑀲𑀢𑀺 𑀪𑀸𑀯𑀸, 𑀅𑀲𑀢𑀺 𑀘 𑀅𑀪𑀸𑀯𑀸 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀲𑁄 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑀫𑀳𑀸𑀧𑀤𑁂𑀲𑁄 𑀓𑀺𑀭𑁂𑀲𑁄, 𑀬𑀤𑀺𑀤𑀁 𑀉𑀧𑀦𑀺𑀲𑁆𑀲𑀬𑁄𑀢𑀺.

𑀪𑀯𑀘𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁬𑁫𑁨. 𑀦 𑀓𑁂𑀯𑀮𑀁 𑀲𑁄𑀓𑀸𑀤𑀻𑀦𑀁𑀬𑁂𑀯 𑀚𑀸𑀢𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄𑀓𑀸𑀤𑀻𑀦𑀁 𑀧𑀦 𑀧𑀘𑁆𑀘𑀬𑀢𑁆𑀢𑀸 𑀅𑀯𑀺𑀚𑁆𑀚𑀸𑀬𑀧𑀺 𑀧𑀘𑁆𑀘𑀬𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑀁. 𑀅𑀯𑀺𑀤𑀺𑀢𑀸𑀤𑀺 𑀫𑀺𑀤𑀦𑁆𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑀢𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀸. 𑀲𑀫𑀺𑀢𑀦𑁆𑀢𑀺 𑀲𑀗𑁆𑀕𑀢𑀁, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑀢𑁂𑀲𑀽𑀢𑀺 𑀲𑁄𑀓𑀸𑀤𑀻𑀲𑀼. 𑀲𑀺𑀤𑁆𑀥𑁂𑀲𑀽𑀢𑀺 𑀮𑀩𑁆𑀪𑀫𑀸𑀦𑁂𑀲𑀼. 𑀲𑀺𑀤𑁆𑀥𑀸 𑀳𑁄𑀢𑀺 𑀅𑀯𑀺𑀚𑁆𑀚𑀸 𑀅𑀯𑀺𑀦𑀸𑀪𑀸𑀯𑀢𑁄.

𑀓𑀸𑀫𑀬𑀸𑀦𑀲𑁆𑀲𑀸𑀢𑀺 ¶ 𑀓𑀸𑀫𑀬𑀫𑀸𑀦𑀲𑁆𑀲, 𑀓𑀸𑀫𑁄 𑀯𑀸 𑀬𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀸𑀫𑀬𑀸𑀦𑁄, 𑀢𑀲𑁆𑀲 𑀓𑀸𑀫𑀯𑀲𑁂𑀦 𑀬𑀸𑀬𑀫𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀢𑀡𑁆𑀳𑀸𑀙𑀦𑁆𑀤𑀲𑁆𑀲. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀯𑀺𑀕𑀘𑁆𑀙𑀦𑁆𑀢𑀺. 𑀭𑀼𑀧𑁆𑀧𑀢𑀻𑀢𑀺 𑀲𑁄𑀓𑀸𑀤𑀺𑀦𑀸 𑀓𑀼𑀧𑁆𑀧𑀢𑀺.

𑀧𑀭𑀺𑀬𑀼𑀝𑁆𑀞𑀸𑀦𑀢𑀸𑀬 𑀢𑀺𑀝𑁆𑀞𑀦𑀲𑀻𑀮𑁄 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀬𑀻. ‘‘𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀁, 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁, 𑀢𑁂𑀦 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 ‘‘𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀸𑀬𑁂 𑀯𑁂𑀯𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦𑀸𑀪𑀺𑀭𑀫𑀢𑀻’’𑀢𑀺 (𑀇𑀢𑀺𑀯𑀼. 𑁮𑁩) 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀫𑀭𑀡𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀳𑀺 𑀤𑀺𑀲𑁆𑀯𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀉𑀧𑀧𑀢𑁆𑀢𑀺𑀪𑀯𑁂 𑀪𑀯𑀘𑁆𑀙𑀦𑁆𑀤𑀩𑀮𑁂𑀦 𑀤𑁂𑀯𑀸𑀦𑀁 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀩𑀸𑀮𑁄𑀢𑀺 𑀅𑀯𑀺𑀤𑁆𑀯𑀸. 𑀢𑁂𑀦 𑀅𑀯𑀺𑀚𑁆𑀚𑀸𑀬 𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀺𑀯𑀺𑀥𑀁 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲𑀸𑀭𑀼𑀧𑁆𑀧𑀓𑀣𑀸𑀲𑀯𑀦, 𑀓𑀫𑁆𑀫𑀓𑀸𑀭𑀡𑀸𑀤𑀲𑁆𑀲𑀦, 𑀫𑀭𑀡𑀓𑀸𑀮𑀓𑀫𑁆𑀫𑁄𑀧𑀝𑁆𑀞𑀸𑀦𑀦𑀺𑀤𑀸𑀦𑀁 𑀲𑁄𑀓𑀸𑀤𑀺𑀤𑀼𑀓𑁆𑀔𑀁.

𑀆𑀲𑀯𑁂 𑀲𑀸𑀥𑁂𑀦𑁆𑀢𑀻𑀢𑀺 𑀆𑀲𑀯𑁂 𑀕𑀫𑁂𑀦𑁆𑀢𑀺 𑀩𑁄𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀲𑀢𑀻𑀢𑀺 𑀏𑀯𑀁 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀤𑀺𑀢𑀸𑀤𑀺𑀢𑀸𑀬 𑀅𑀦𑀸𑀤𑀺𑀪𑀸𑀯𑁂 𑀲𑀢𑀺. 𑀆𑀤𑀺𑀫𑀢𑁆𑀢𑀓𑀣𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀯𑀲𑁂𑀦 𑀆𑀤𑀺𑀲𑀩𑁆𑀪𑀸𑀯𑀓𑀣𑀦𑀁. 𑀆𑀤𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺 𑀆𑀤𑀺𑀫𑀁, 𑀪𑀯𑀘𑀓𑁆𑀓𑀁. 𑀢𑀲𑁆𑀲 𑀪𑀸𑀯𑁄 𑀆𑀤𑀺𑀫𑀢𑁆𑀢𑀁, 𑀢𑀲𑁆𑀲 𑀓𑀣𑀦𑀁 𑀆𑀤𑀺𑀫𑀢𑁆𑀢𑀓𑀣𑀦𑀁. 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀯𑀸 𑀫𑀢𑁆𑀢𑀲𑀤𑁆𑀤𑁄, 𑀲𑀢𑀺 𑀅𑀦𑀸𑀤𑀺𑀪𑀸𑀯𑁂 𑀅𑀯𑀺𑀚𑁆𑀚𑀸 𑀆𑀤𑀺𑀫𑁆𑀳𑀺, 𑀫𑀚𑁆𑀛𑁂, 𑀧𑀭𑀺𑀬𑁄𑀲𑀸𑀦𑁂 𑀘 𑀲𑀩𑁆𑀩𑀢𑁆𑀣 𑀲𑀺𑀬𑀸𑀢𑀺 𑀆𑀤𑀺𑀫𑀢𑁆𑀢𑀸𑀬 𑀅𑀯𑀺𑀚𑁆𑀚𑀸𑀬 𑀓𑀣𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀯𑀺𑀚𑁆𑀚𑀸 𑀧𑀥𑀸𑀦𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀧𑀥𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑀦𑁂𑀦, 𑀅𑀧𑁆𑀧𑀳𑀸𑀦𑁂𑀦 𑀯𑀸, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀦𑁆𑀦𑀺𑀳𑀺𑀢𑀪𑀸𑀯𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀸𑀤𑀻𑀦𑀻𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀺. 𑀧𑀮𑀺𑀩𑁄𑀥𑁂𑀦𑁆𑀢𑀻𑀢𑀺 𑀦𑀸𑀦𑀸𑀤𑀼𑀓𑁆𑀔𑀧𑀭𑀺𑀩𑁆𑀬𑀽𑀴𑁆𑀳𑁂 𑀲𑀁𑀲𑀸𑀭𑀘𑀸𑀭𑀓𑁂 𑀦𑀺𑀭𑁄𑀥𑁂𑀦𑁆𑀢𑀺. 𑀢𑁂𑀳𑀻𑀢𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑁂𑀳𑀺. 𑀯𑀝𑁆𑀝𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀥𑀸𑀦𑀢𑁆𑀢𑀸 ‘‘𑀧𑀥𑀸𑀦𑀥𑀫𑁆𑀫𑁄’’𑀢𑀺 𑀅𑀯𑀺𑀚𑁆𑀚𑀸 𑀓𑀣𑀺𑀢𑀸.

𑀢𑀢𑁄 𑀅𑀯𑀺𑀚𑁆𑀚𑀸𑀤𑀺𑀢𑁄. 𑀩𑁆𑀭𑀳𑁆𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀚𑀸𑀧𑀢𑀺𑀲𑁆𑀲𑀭𑀧𑀼𑀭𑀺𑀲𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀤𑀢𑀻𑀢𑀺 ¶ 𑀯𑀤𑁄, 𑀢𑀁 𑀢𑀁 𑀳𑀺𑀢𑀸𑀳𑀺𑀢𑀁 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀯𑁂𑀤𑁂𑀢𑀺, 𑀯𑁂𑀤𑀺𑀬𑀢𑀻𑀢𑀺 𑀯𑀸 𑀯𑁂𑀤𑁂𑀬𑁆𑀬𑁄, 𑀲𑀼𑀔𑀸𑀤𑀺𑀁 𑀅𑀦𑀼𑀪𑀯𑀢𑀺, 𑀲𑀩𑁆𑀩𑀯𑀺𑀲𑀬𑁂 𑀯𑀸 𑀚𑀸𑀦𑀸𑀢𑀺, ‘‘𑀲𑀼𑀔𑀺𑀢𑁄 𑀤𑀼𑀓𑁆𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀘 𑀚𑀸𑀦𑀸𑀢𑀺, 𑀜𑀸𑀬𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀸𑀤𑀺𑀦𑀸 𑀯𑀸 𑀅𑀢𑁆𑀢𑀦𑀸 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀘-𑀲𑀤𑁆𑀤𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀸𑀭𑀓𑀯𑁂𑀤𑀓𑀭𑀳𑀺𑀢’’𑀦𑁆𑀢𑀺 𑀘-𑀲𑀤𑁆𑀤𑀢𑁆𑀣𑀲𑀫𑀸𑀲𑀁.

𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀲𑀼𑀜𑁆𑀜𑀲𑀪𑀸𑀯𑀸𑀦𑀁 𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀁 𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀁, 𑀥𑀼𑀯𑀪𑀸𑀯𑀸𑀤𑀺𑀲𑀼𑀜𑁆𑀜𑀢𑀸𑀬 𑀯𑀸 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀼𑀜𑁆𑀜𑀢𑀁 𑀏𑀓𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀗𑁆𑀕𑀕𑀢𑀢𑁆𑀢𑀸 𑀤𑁆𑀯𑀸𑀤𑀲𑀯𑀺𑀥𑀸𑀢𑀺 𑀢𑀸𑀬 𑀤𑁆𑀯𑀸𑀤𑀲𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄.

𑁬𑁫𑁩. 𑀧𑀼𑀩𑁆𑀩𑀦𑁆𑀢𑀸𑀳𑀭𑀡𑀢𑁄𑀢𑀺 𑀧𑀼𑀩𑁆𑀩𑀦𑁆𑀢𑀢𑁄 𑀅𑀢𑀻𑀢𑀓𑁄𑀝𑁆𑀞𑀸𑀲𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀲𑁆𑀲 𑀆𑀳𑀭𑀡𑀢𑁄. 𑀯𑁂𑀤𑀦𑀸𑀯𑀲𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀏𑀓𑀁 𑀪𑀯𑀘𑀓𑁆𑀓𑀁 𑀳𑁄𑀢𑀺. 𑀪𑀯𑀘𑀓𑁆𑀓𑁂𑀓𑀤𑁂𑀲𑁄𑀧𑀺 𑀳𑀺 𑀪𑀯𑀘𑀓𑁆𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸 𑀯𑀸 𑀢𑀡𑁆𑀳𑀸𑀲𑀳𑀸𑀬𑀸𑀬 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀦𑀸𑀢𑁄 𑀅𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀸𑀢𑁄 𑀲𑀗𑁆𑀔𑀸𑀭𑀸𑀢𑀺 𑀲𑀫𑁆𑀩𑀚𑁆𑀛𑀦𑀢𑁄 𑀯𑁂𑀤𑀦𑀸𑀯𑀲𑀸𑀦𑀁 𑀪𑀯𑀘𑀓𑁆𑀓𑀁 𑀧𑀭𑀺𑀧𑀼𑀡𑁆𑀡𑀫𑁂𑀯𑀸𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀯𑀸 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀪𑀯𑁄, 𑀯𑀺𑀜𑁆𑀜𑀸𑀡𑀸𑀤𑀺𑀕𑁆𑀕𑀳𑀡𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺, 𑀲𑁄𑀓𑀸𑀤𑀬𑁄 𑀘 𑀕𑀳𑀺𑀢𑀸𑀢𑀺 𑀏𑀯𑀫𑁆𑀧𑀺 𑀯𑁂𑀤𑀦𑀸𑀯𑀲𑀸𑀦𑀁 𑀪𑀯𑀘𑀓𑁆𑀓𑀦𑁆𑀢𑀺 𑀬𑀼𑀢𑁆𑀢𑀫𑁂𑀯𑁂𑀢𑀁. 𑀏𑀯𑀁 𑀢𑀡𑁆𑀳𑀸𑀫𑀽𑀮𑀓𑁂 𑀘 𑀬𑁄𑀚𑁂𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑀺 𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑁆𑀧𑀯𑁂𑀲𑁄 𑀳𑁄𑀢𑀻𑀢𑀺. 𑀅𑀯𑀺𑀚𑁆𑀚𑀸 𑀥𑀫𑁆𑀫𑀲𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑀁 𑀓𑀸𑀭𑁂𑀦𑁆𑀢𑀻 𑀤𑀺𑀝𑁆𑀞𑀺𑀘𑀭𑀺𑀢𑁂 𑀲𑀁𑀲𑀸𑀭𑁂 𑀦𑀬𑀢𑀺, 𑀢𑁂𑀲𑀁 𑀯𑀸 𑀲𑀁𑀲𑀸𑀭𑀁 𑀲𑀗𑁆𑀔𑀸𑀭𑀸𑀤𑀺𑀧𑀯𑀢𑁆𑀢𑀺𑀁 𑀦𑀬𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀲𑀁𑀲𑀸𑀭𑀦𑀸𑀬𑀺𑀓𑀸 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀬 𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀁𑀲𑀸𑀭𑀦𑀸𑀬𑀺𑀓𑀸𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀧𑀞𑀫𑀁 𑀪𑀯𑀘𑀓𑁆𑀓𑀁. 𑀨𑀮𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀓𑀭𑀡𑀢𑁆𑀣𑁂 𑀏𑀯 𑀯𑀸. 𑀯𑀺𑀜𑁆𑀜𑀸𑀡𑀸𑀤𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀨𑀮𑀼𑀧𑁆𑀧𑀢𑁆𑀢𑀺 𑀳𑀺 𑀇𑀥 𑀤𑀺𑀝𑁆𑀞𑀸, 𑀅𑀤𑀺𑀝𑁆𑀞𑀸𑀦𑀁 𑀧𑀼𑀭𑀺𑀫𑀪𑀯𑁂 𑀅𑀢𑁆𑀢𑀦𑁄 𑀳𑁂𑀢𑀽𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀨𑀮𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑀼𑀧𑀘𑁆𑀙𑀺𑀚𑁆𑀚𑀦𑀁 𑀧𑀓𑀸𑀲𑁂𑀢𑀺, 𑀧𑀓𑀸𑀲𑀦𑀲𑁆𑀲 𑀯𑀸 𑀓𑀭𑀡𑀁 𑀳𑁄𑀢𑀻𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀪𑀯𑀘𑀓𑁆𑀓𑀁 𑀤𑀼𑀢𑀺𑀬𑁂𑀦 𑀲𑀫𑁆𑀩𑀦𑁆𑀥𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀢𑀡𑁆𑀳𑀸𑀤𑀻𑀦𑀁 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀁 𑀧𑀓𑀸𑀲𑁂𑀢𑀺, 𑀢𑀲𑁆𑀫𑀸 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬 𑀧𑀞𑀫𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀤𑀻𑀦𑀫𑁂𑀯 𑀯𑀸 𑀨𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀳𑁂𑀢𑀽𑀦𑀁 𑀨𑀮𑀁 𑀅𑀚𑀦𑁂𑀢𑁆𑀯𑀸 𑀅𑀦𑀼𑀧𑀘𑁆𑀙𑁂𑀤𑀫𑁂𑀯, 𑀯𑀺𑀜𑁆𑀜𑀸𑀡𑀸𑀤𑀺𑀳𑁂𑀢𑀽𑀦𑀁 𑀯𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑀫𑁂𑀯 𑀧𑀓𑀸𑀲𑁂𑀢𑀺 𑀧𑀞𑀫𑀁 𑀪𑀯𑀘𑀓𑁆𑀓𑀁, 𑀦 𑀤𑀼𑀢𑀺𑀬𑀁 𑀯𑀺𑀬 𑀧𑀭𑀺𑀬𑁄𑀲𑀸𑀦𑀫𑁆𑀧𑀻𑀢𑀺 ‘‘𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 ¶ 𑀅𑀦𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀼𑀩𑁆𑀩𑀧𑀯𑀢𑁆𑀢𑀺𑀤𑀻𑀧𑀦𑀢𑁄𑀢𑀺 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀥𑀫𑁆𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑀢𑁄 𑀧𑀯𑀢𑁆𑀢𑀺𑀬𑀸 𑀤𑀻𑀧𑀦𑀢𑁄. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀳𑀺 𑀏𑀢𑁆𑀣 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀁 𑀓𑀮𑀮𑀭𑀽𑀧𑀁 𑀯𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀲𑀴𑀸𑀬𑀢𑀦𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. 𑀲𑀳𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄𑀢𑀺 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀯𑀸 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀬𑀸 𑀤𑀻𑀧𑀦𑀢𑁄. 𑀦 𑀳𑀺 𑀏𑀢𑁆𑀣 𑀧𑀞𑀫𑁂 𑀯𑀺𑀬 𑀪𑀯𑀘𑀓𑁆𑀓𑁂 𑀆𑀬𑀢𑀦𑀸𑀦𑀁 𑀓𑀫𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑁬𑁫𑁪. 𑀳𑁂𑀢𑀼𑀆𑀤𑀺𑀧𑀼𑀩𑁆𑀩𑀓𑀸 𑀢𑀬𑁄 𑀲𑀦𑁆𑀥𑀻 𑀏𑀢𑀲𑁆𑀲𑀸𑀢𑀺 𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓𑀢𑀺𑀲𑀦𑁆𑀥𑀺, 𑀪𑀯𑀘𑀓𑁆𑀓𑀁. 𑀳𑁂𑀢𑀼𑀨𑀮𑀳𑁂𑀢𑀼𑀨𑀮𑀯𑀲𑁂𑀦 𑀘𑀢𑀼𑀧𑁆𑀧𑀪𑁂𑀤𑁄 𑀅𑀗𑁆𑀕𑀸𑀦𑀁 𑀲𑀗𑁆𑀕𑀳𑁄 𑀏𑀢𑀲𑁆𑀲𑀸𑀢𑀺 𑀘𑀢𑀼𑀪𑁂𑀤𑀲𑀗𑁆𑀕𑀳𑀁. 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 ¶ 𑀢𑀲𑁆𑀫𑀺𑀁 𑀲𑀗𑁆𑀕𑀳𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸. 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀸 𑀯𑀺𑀧𑀸𑀓𑀓𑀺𑀮𑁂𑀲𑀓𑀫𑁆𑀫𑁂𑀳𑀺 𑀲𑀫𑁆𑀩𑀦𑁆𑀥𑀸 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀼 𑀯𑀝𑁆𑀝𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀢𑀺𑀯𑀝𑁆𑀝’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀝𑁆𑀝𑁂𑀓𑀤𑁂𑀲𑀢𑁆𑀢𑀸 𑀯𑀸 ‘‘𑀯𑀝𑁆𑀝𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀲𑀦𑁆𑀥𑀻𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀯𑀯𑀢𑁆𑀣𑀺𑀢𑀸𑀢𑀺 𑀲𑀦𑁆𑀥𑀻𑀦𑀁 𑀧𑀼𑀩𑁆𑀩𑀸𑀧𑀭𑀯𑀯𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀭𑀺𑀕𑁆𑀕𑀳𑀓𑀭𑀡𑀯𑀲𑁂𑀦 𑀢𑀲𑁆𑀲𑀢𑀺, 𑀢𑀡𑁆𑀳𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀺𑀬𑀢𑀻𑀢𑀺 𑀤𑀴𑁆𑀳𑀕𑀸𑀳𑀁 𑀕𑀡𑁆𑀳𑀸𑀢𑀺. 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑀓𑀫𑁆𑀫𑀪𑀯𑁂 𑀲𑀢𑀺.

𑀢𑀲𑁆𑀲 𑀘 𑀲𑀩𑁆𑀪𑀸𑀯𑁄 𑀓𑀭𑀺𑀬𑀫𑀸𑀦𑀢𑀸 𑀏𑀯𑀸𑀢𑀺 𑀆𑀳 ‘‘𑀓𑀫𑁆𑀫𑀪𑀯𑁂 𑀓𑀭𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄’’𑀢𑀺. 𑀤𑀼𑀓𑁆𑀔𑀸𑀤𑀻𑀲𑀼 𑀫𑁄𑀳𑁄𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑁄 𑀅𑀧𑁆𑀧𑀳𑀻𑀦𑁄 𑀫𑁄𑀳𑁄. 𑀆𑀬𑀽𑀳𑀦𑀸𑀢𑀺 𑀲𑀫𑁆𑀧𑀺𑀡𑁆𑀟𑀦𑀓𑀸 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀦𑀓𑀸. 𑀏𑀓𑀁 𑀆𑀯𑀚𑁆𑀚𑀦𑀁 𑀏𑀢𑁂𑀲𑀦𑁆𑀢𑀺 𑀏𑀓𑀸𑀯𑀚𑁆𑀚𑀦𑀸, 𑀢𑁂𑀲𑀼 𑀏𑀓𑀸𑀯𑀚𑁆𑀚𑀦𑁂𑀲𑀼. 𑀲𑀢𑁆𑀢𑀫𑁂 𑀘𑁂𑀢𑀦𑀸 𑀪𑀯𑁄. ‘‘𑀬𑀸 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄, 𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸’’𑀢𑀺 𑀇𑀤𑀁 𑀬𑀣𑀸𑀤𑀲𑁆𑀲𑀺𑀢𑀸𑀬 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 (𑀧𑀝𑀺. 𑀫. 𑁧.𑁪𑁫) 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀘𑁂𑀢𑀦𑀸 𑀪𑀯𑁄’’𑀢𑀺 𑀆𑀕𑀢𑀸. 𑀪𑀯𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀲𑀸𑀢𑁆𑀣𑀢𑁄’’𑀢𑀺 𑀏𑀢𑁆𑀣 ‘‘𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸, 𑀪𑀯𑁄 𑀧𑀦 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀯𑀲𑁂𑀦 𑀤𑀲𑁆𑀲𑀺𑀢𑀁. ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺𑀦𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 ¶ 𑀘𑁂𑀢𑀦𑀸𑀪𑀸𑀯𑁄 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁨𑁨𑁬) 𑀯𑀼𑀢𑁆𑀢𑁄. 𑀢𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 ‘‘𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸 𑀲𑀯𑀺𑀧𑀸𑀓𑁂𑀦 𑀆𑀬𑀽𑀳𑀦𑀲𑀗𑁆𑀔𑀸𑀢𑁂𑀦 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀦 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄’’𑀢𑀺 (𑀯𑀺𑀪. 𑁨𑁩𑁪) 𑀪𑀯𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀪𑀯𑀕𑀸𑀫𑀺𑀪𑀸𑀯𑀢𑁄, 𑀓𑀫𑁆𑀫𑀲𑀁𑀲𑀝𑁆𑀞𑀲𑀳𑀸𑀬𑀢𑀸𑀬 𑀓𑀫𑁆𑀫𑀪𑀸𑀯𑀢𑁄 𑀘 𑀉𑀧𑀧𑀢𑁆𑀢𑀺𑀪𑀯𑀁 𑀪𑀸𑀯𑁂𑀦𑁆𑀢𑀻𑀢𑀺 ‘‘𑀪𑀯𑁄’’𑀢𑀺 𑀯𑀼𑀢𑁆𑀢𑀸. 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑀦𑀸𑀓𑀺𑀘𑁆𑀘𑀁 𑀧𑀦 𑀘𑁂𑀢𑀦𑀸𑀬 𑀲𑀸𑀢𑀺𑀲𑀬𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 𑀘𑁂𑀢𑀦𑀸 ‘‘𑀪𑀯𑁄’’𑀢𑀺 𑀯𑀼𑀢𑁆𑀢𑀸. 𑀪𑀯𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀁 𑀘𑁂𑀢𑀦𑀸𑀬 𑀲𑀸𑀢𑀺𑀲𑀬𑀦𑁆𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 ‘‘𑀓𑀼𑀲𑀮𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁨𑁬) 𑀘𑁂𑀢𑀦𑀸 ‘‘𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 ¶ 𑀉𑀪𑀬𑀁 𑀉𑀪𑀬𑀢𑁆𑀣 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀯𑀺𑀭𑁄𑀥𑁄. 𑀢𑀲𑁆𑀲 𑀨𑀮𑁂 𑀉𑀧𑀧𑀢𑁆𑀢𑀺𑀪𑀯𑁂 𑀦𑀺𑀓𑀸𑀫𑀦𑀸𑀢𑀺 ‘‘𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 ‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺’’𑀆𑀤𑀺𑀲𑀼𑀢𑀸𑀦𑀼𑀲𑀸𑀭𑁂𑀦 𑀪𑀸𑀯𑀺𑀦𑀺 𑀉𑀧𑀧𑀢𑁆𑀢𑀺𑀪𑀯𑁂 𑀅𑀪𑀺𑀓𑀗𑁆𑀔𑀦𑀸. 𑀕𑀳𑀡𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀓𑀺𑀘𑁆𑀘𑁂𑀦𑀸𑀳. 𑀧𑀭𑀸𑀫𑀲𑀦𑀦𑁆𑀢𑀺 𑀇𑀢𑀭𑀸𑀦𑀺. 𑀆𑀬𑀽𑀳𑀦𑀸𑀯𑀲𑀸𑀦𑁂𑀢𑀺 𑀢𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀯𑀼𑀢𑁆𑀢𑀲𑁆𑀲 𑀆𑀬𑀽𑀳𑀦𑀲𑁆𑀲 𑀅𑀯𑀲𑀸𑀦𑁂.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂. 𑀪𑀯𑀦𑁆𑀢𑀭𑀲𑁆𑀲 𑀅𑀢𑀻𑀢𑀪𑀯𑀲𑁆𑀲 𑀇𑀫𑀺𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂𑀦 𑀧𑀝𑀺𑀲𑀦𑁆𑀥𑀸𑀦𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀁, 𑀪𑀯𑀦𑁆𑀢𑀭𑀪𑀸𑀯𑁂𑀦 𑀯𑀸 𑀧𑀝𑀺𑀲𑀦𑁆𑀥𑀸𑀦𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀁, 𑀢𑀲𑁆𑀲 𑀯𑀲𑁂𑀦. 𑀬𑀁 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀳𑀺 𑀯𑀺𑀜𑁆𑀜𑀸𑀡𑀁 ‘‘𑀧𑀝𑀺𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑀩𑁆𑀪𑁂𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀬𑀁, 𑀕𑀩𑁆𑀪𑀸𑀯𑀢𑁆𑀣𑀸𑀬𑀁 𑀯𑀸.

𑀤𑁆𑀯𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀯𑀼𑀢𑁆𑀢𑁂 𑀆𑀬𑀽𑀳𑀦𑀲𑀗𑁆𑀔𑀸𑀭𑁂 ‘‘𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀸’’𑀢𑀺 𑀆𑀳, 𑀢𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀼𑀢𑁆𑀢𑁂 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀳𑀭𑀲𑁆𑀲 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀪𑀯𑀗𑁆𑀕𑀩𑀳𑀼𑀮𑀸 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑀚𑀦𑀓𑀓𑀫𑁆𑀫𑀸𑀬𑀽𑀳𑀦𑀲𑀫𑀢𑁆𑀣𑀸 𑀦 𑀳𑁄𑀢𑀻𑀢𑀺 ‘‘𑀇𑀥 𑀧𑀝𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀫𑁆𑀫𑁄𑀳𑁄 𑀤𑀲𑁆𑀲𑀺𑀢𑁄’’𑀢𑀺 𑀏𑀢𑁂𑀦 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀲𑀫𑁆𑀫𑁄𑀳𑀁 𑀤𑀲𑁆𑀲𑁂𑀢𑀺, 𑀦 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀫𑁂𑀯.

‘‘𑀢𑀢𑁆𑀣 𑀧𑀼𑀭𑀺𑀫𑀪𑀯𑀲𑁆𑀫𑀺𑀁 𑀧𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀏𑀢𑀭𑀳𑀺 𑀧𑀜𑁆𑀘 𑀯𑀺𑀧𑀸𑀓𑀥𑀫𑁆𑀫𑀸, 𑀏𑀢𑀭𑀳𑀺 𑀧𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀅𑀦𑀸𑀕𑀢𑁂 𑀧𑀜𑁆𑀘 𑀯𑀺𑀧𑀸𑀓𑀥𑀫𑁆𑀫𑀸𑀢𑀺 𑀤𑀲 𑀥𑀫𑁆𑀫𑀸 𑀓𑀫𑁆𑀫𑀁, 𑀤𑀲 𑀥𑀫𑁆𑀫𑀸 𑀯𑀺𑀧𑀸𑀓𑁄, 𑀇𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁, 𑀓𑀫𑁆𑀫𑀯𑀝𑁆𑀝𑀁, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀧𑀸𑀓𑁄, 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀓𑀫𑁆𑀫𑀲𑀗𑁆𑀔𑁂𑀧𑁄 𑀘 𑀯𑀺𑀧𑀸𑀓𑀲𑀗𑁆𑀔𑁂𑀧𑁄 ¶ 𑀘, 𑀓𑀫𑁆𑀫𑀪𑀯𑁄 𑀘 𑀯𑀺𑀧𑀸𑀓𑀪𑀯𑁄 𑀘 𑀓𑀫𑁆𑀫𑀯𑀝𑁆𑀝𑀜𑁆𑀘 𑀯𑀺𑀧𑀸𑀓𑀯𑀝𑁆𑀝𑀜𑁆𑀘, 𑀓𑀫𑁆𑀫𑀧𑀯𑀢𑁆𑀢𑀜𑁆𑀘 𑀯𑀺𑀧𑀸𑀓𑀧𑀯𑀢𑁆𑀢𑀜𑁆𑀘, 𑀓𑀫𑁆𑀫𑀲𑀦𑁆𑀢𑀢𑀺 𑀘 𑀯𑀺𑀧𑀸𑀓𑀲𑀦𑁆𑀢𑀢𑀺 𑀘, 𑀓𑀺𑀭𑀺𑀬𑀸 𑀘𑁂𑀯 𑀓𑀺𑀭𑀺𑀬𑀸𑀨𑀮𑀜𑁆𑀘𑀸𑀢𑀺 𑁋

‘‘𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀫𑀺𑀤𑀁 𑀲𑀳𑁂𑀢𑀼𑀓𑀁,

𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀁 𑀘𑀮𑀫𑀺𑀢𑁆𑀢𑀭𑀤𑁆𑀥𑀼𑀯𑀁;

𑀥𑀫𑁆𑀫𑁂𑀳𑀺 𑀥𑀫𑁆𑀫𑀸 𑀧𑀪𑀯𑀦𑁆𑀢𑀺 𑀳𑁂𑀢𑀼𑀲𑁄,

𑀦 𑀳𑁂𑀢𑁆𑀣 𑀅𑀢𑁆𑀢𑀸𑀯 𑀧𑀭𑁄𑀯 𑀯𑀺𑀚𑁆𑀚𑀢𑀺.

‘‘𑀥𑀫𑁆𑀫𑀸 𑀥𑀫𑁆𑀫𑁂 𑀲𑀜𑁆𑀚𑀦𑁂𑀦𑁆𑀢𑀺, 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸;

𑀳𑁂𑀢𑀽𑀦𑀜𑁆𑀘 𑀦𑀺𑀭𑁄𑀥𑀸𑀬, 𑀥𑀫𑁆𑀫𑁄 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄.

‘‘𑀳𑁂𑀢𑀽𑀲𑀼 ¶ 𑀉𑀧𑀭𑀼𑀤𑁆𑀥𑁂𑀲𑀼, 𑀙𑀺𑀦𑁆𑀦𑀁 𑀯𑀝𑁆𑀝𑀁 𑀦 𑀯𑀝𑁆𑀝𑀢𑀺;

𑀏𑀯𑀁 𑀤𑀼𑀓𑁆𑀔𑀦𑁆𑀢𑀓𑀺𑀭𑀺𑀬𑀸𑀬, 𑀩𑁆𑀭𑀳𑁆𑀫𑀘𑀭𑀺𑀬𑀺𑀥 𑀯𑀺𑀚𑁆𑀚𑀢𑀺;

𑀲𑀢𑁆𑀢𑁂 𑀘 𑀦𑀼𑀧𑀮𑀩𑁆𑀪𑀦𑁆𑀢𑁂, 𑀦𑁂𑀯𑀼𑀘𑁆𑀙𑁂𑀤𑁄 𑀦 𑀲𑀲𑁆𑀲𑀢’’𑀦𑁆𑀢𑀺. (𑀯𑀺𑀪. 𑀅𑀝𑁆𑀞. 𑁨𑁪𑁨);

𑀢𑀢𑁆𑀣 𑀓𑀫𑁆𑀫𑀸𑀦𑁂𑀯 𑀯𑀺𑀧𑀸𑀓𑀁 𑀲𑀫𑁆𑀪𑀭𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀓𑀫𑁆𑀫𑀁 𑀯𑀸 𑀲𑀗𑁆𑀔𑀸𑀭𑀪𑀯𑀸, 𑀢𑀤𑀼𑀧𑀓𑀸𑀭𑀓𑀸𑀦𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀓𑀫𑁆𑀫𑀲𑀫𑁆𑀪𑀸𑀭𑀸. 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑁄 𑀯𑀸 𑀪𑀯𑁄 𑀓𑀫𑁆𑀫𑀁, 𑀢𑀤𑀽𑀧𑀓𑀸𑀭𑀓𑀸 𑀬𑀣𑀸𑀯𑀼𑀢𑁆𑀢𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸, 𑀅𑀯𑀺𑀚𑁆𑀚𑀸𑀤𑀬𑁄 𑀘 𑀓𑀫𑁆𑀫𑀲𑀫𑁆𑀪𑀸𑀭𑀸𑀢𑀺 𑀓𑀫𑁆𑀫𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸 𑀘 𑀓𑀫𑁆𑀫𑀲𑀫𑁆𑀪𑀸𑀭𑀸𑀢𑀺 𑀏𑀓𑀲𑁂𑀲𑀯𑀲𑁂𑀦 𑀓𑀫𑁆𑀫𑀲𑀫𑁆𑀪𑀸𑀭𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀤𑀲 𑀥𑀫𑁆𑀫𑀸 𑀓𑀫𑁆𑀫𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀬𑁄𑀧𑀺 𑀓𑀫𑁆𑀫𑀲𑀳𑀸𑀬𑀢𑀸𑀬 𑀓𑀫𑁆𑀫𑀲𑀭𑀺𑀓𑁆𑀔𑀓𑀸, 𑀢𑀤𑀽𑀧𑀓𑀸𑀭𑀸 𑀘𑀸𑀢𑀺 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀗𑁆𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀓𑀫𑁆𑀫𑀁, 𑀯𑀺𑀧𑀸𑀓𑁄 𑀘. ‘‘𑀓𑀫𑁆𑀫𑀁 𑀯𑀺𑀧𑀸𑀓𑁄’’𑀢𑀺 𑀏𑀯𑀁 𑀲𑀗𑁆𑀔𑀺𑀧𑀻𑀬𑀢𑀻𑀢𑀺 𑀯𑀸 𑀲𑀗𑁆𑀔𑁂𑀧𑁄, 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀲𑀗𑁆𑀔𑁂𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀏𑀓𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀲𑀗𑁆𑀔𑁂𑀧𑀲𑀤𑁆𑀤𑁄 𑀯𑀸 𑀪𑀸𑀕𑀸𑀥𑀺𑀯𑀘𑀦𑀦𑁆𑀢𑀺 𑀓𑀫𑁆𑀫𑀪𑀸𑀕𑁄 𑀓𑀫𑁆𑀫𑀲𑀗𑁆𑀔𑁂𑀧𑁄.

𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀓𑀫𑁆𑀫𑀢𑁄𑀧𑀺 𑀯𑀺𑀧𑀸𑀓𑁄. 𑀢𑀢𑁆𑀣𑀸𑀧𑀺 ‘‘𑀅𑀯𑀺𑀚𑁆𑀚𑀸𑀢𑁄 𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀢𑀺𑀲𑀦𑁆𑀥𑀺𑀆𑀤𑀺𑀯𑀲𑁂𑀦 𑀯𑀸 𑀲𑀫𑀼𑀧𑁆𑀧𑀦𑁆𑀦𑀁 𑀇𑀤𑀁 𑀪𑀯𑀘𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀢𑁆𑀢𑀭𑀦𑁆𑀢𑀺 𑀕𑀫𑀦𑀥𑀫𑁆𑀫𑀁, 𑀯𑀺𑀦𑀲𑁆𑀲𑀥𑀫𑁆𑀫𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑁂𑀦 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑀸𑀤𑀻𑀧𑀓𑁂𑀦 𑀅𑀦𑀺𑀘𑁆𑀘𑀲𑀤𑁆𑀤𑁂𑀦, 𑀯𑀺𑀓𑀸𑀭𑀸𑀧𑀢𑁆𑀢𑀺𑀤𑀻𑀧𑀓𑁂𑀦 𑀘𑀮𑀲𑀤𑁆𑀤𑁂𑀦 𑀘 𑀅𑀤𑀻𑀧𑀺𑀢𑀁 𑀓𑀸𑀮𑀦𑁆𑀢𑀭𑀝𑁆𑀞𑀸𑀬𑀺𑀢𑀸𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀅𑀤𑁆𑀥𑀼𑀯𑀦𑁆𑀢𑀺 𑀏𑀢𑁂𑀦 𑀣𑀺𑀭𑀪𑀸𑀯𑀸𑀪𑀸𑀯𑀦𑀺𑀲𑁆𑀲𑀸𑀭𑀢𑀁. 𑀳𑁂𑀢𑀼 𑀏𑀯 𑀲𑀫𑁆𑀪𑀸𑀭𑀸 𑀳𑁂𑀢𑀼𑀲𑀫𑁆𑀪𑀸𑀭𑀸. ‘‘𑀞𑀸𑀦𑀲𑁄 𑀳𑁂𑀢𑀼𑀲𑁄’’𑀢𑀺 (𑀓𑀣𑀸. 𑁩𑁫𑁫; 𑀧𑀝𑀺. 𑀫. 𑁧.𑁪𑁪) 𑀏𑀢𑁆𑀣 𑀏𑀯𑀁 𑀯𑀼𑀢𑁆𑀢𑀁 𑀯𑀸 𑀞𑀸𑀦𑀁, 𑀅𑀜𑁆𑀜𑀫𑁆𑀧𑀺 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀸𑀭𑀡𑀁 𑀓𑀸𑀭𑀡𑀁 𑀲𑀫𑁆𑀪𑀸𑀭𑁄, 𑀅𑀲𑀸𑀥𑀸𑀭𑀡𑀁 𑀳𑁂𑀢𑀼. 𑀏𑀯𑀦𑁆𑀢𑀺 𑀏𑀯𑀁 𑀳𑁂𑀢𑀼𑀢𑁄 𑀥𑀫𑁆𑀫𑀫𑀢𑁆𑀢𑀲𑀫𑁆𑀪𑀯𑁂, 𑀳𑁂𑀢𑀼𑀦𑀺𑀭𑁄𑀥𑀸 𑀘 𑀯𑀝𑁆𑀝𑀘𑁆𑀙𑁂𑀤𑁂 𑀥𑀫𑁆𑀫𑁂 𑀘 𑀢𑀁𑀦𑀺𑀭𑁄𑀥𑀸𑀬 𑀤𑁂𑀲𑀺𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀺𑀥 𑀲𑀢𑁆𑀢𑁂 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 ‘‘𑀏𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀯𑀺𑀚𑁆𑀚𑀢𑀺, 𑀲𑀲𑁆𑀲𑀢𑀼𑀘𑁆𑀙𑁂𑀤𑀸 𑀘 𑀦 𑀳𑁄𑀦𑁆𑀢𑀻’’𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀏𑀯𑀜𑁆𑀳𑀺 𑀳𑁂𑀢𑀼𑀆𑀬𑀢𑁆𑀢𑁂 𑀥𑀫𑁆𑀫𑀫𑀢𑁆𑀢𑀲𑀫𑁆𑀪𑀯𑁂 𑀲𑀢𑁆𑀢𑁄 𑀦𑀼𑀧𑀮𑀩𑁆𑀪𑀢𑀺, 𑀢𑀲𑁆𑀫𑀺𑀜𑁆𑀘 𑀉𑀧𑀮𑀩𑁆𑀪𑀦𑁆𑀢𑁂 𑀲𑀲𑁆𑀲𑀢𑁄, 𑀉𑀘𑁆𑀙𑁂𑀤𑁄 𑀯𑀸 𑀲𑀺𑀬𑀸𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑁂 𑀢𑀲𑁆𑀫𑀺𑀁 𑀦𑁂𑀯 𑀉𑀘𑁆𑀙𑁂𑀤𑁄 𑀦 𑀲𑀲𑁆𑀲𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁫𑁫. 𑀲𑀘𑁆𑀘𑀧𑁆𑀧𑀪𑀯𑀢𑁄𑀢𑀺 𑀲𑀘𑁆𑀘𑀢𑁄, 𑀲𑀘𑁆𑀘𑀸𑀦𑀁 𑀯𑀸 𑀧𑀪𑀯𑀢𑁄 𑀘.

𑀓𑀼𑀲𑀮𑀸𑀓𑀼𑀲𑀮𑀁 ¶ 𑀓𑀫𑁆𑀫𑀦𑁆𑀢𑀺 𑀯𑀝𑁆𑀝𑀓𑀣𑀸𑀬 𑀯𑀢𑁆𑀢𑀫𑀸𑀦𑀢𑁆𑀢𑀸 𑀲𑀸𑀲𑀯𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀘𑁂𑀢𑀦𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸’’𑀢𑀺 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸, 𑀲𑀩𑁆𑀩𑀫𑁆𑀧𑀺 𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀡𑁆𑀳𑀸 𑀘…𑀧𑁂… 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀯𑀺𑀪. 𑁨𑁦𑁮-𑁨𑁧𑁦) 𑀳𑀺 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺, 𑀅𑀭𑀺𑀬𑀲𑀘𑁆𑀘𑀯𑀺𑀲𑁂𑀲𑀁 𑀯𑀸 𑀅𑀓𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀯𑀺𑀪𑀗𑁆𑀕𑁂 𑀳𑀺 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 ‘‘𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀲𑀘𑁆𑀘𑀁 𑀧𑀪𑀯𑁄 𑀏𑀢𑀲𑁆𑀲𑀸𑀢𑀺 𑀤𑀼𑀢𑀺𑀬𑀲𑀘𑁆𑀘𑀧𑀪𑀯𑀁. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲, 𑀓𑀫𑁆𑀫𑀪𑀯𑀲𑁆𑀲 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀞𑀫𑀤𑀼𑀢𑀺𑀬𑀲𑀘𑁆𑀘𑀤𑁆𑀯𑀬’’𑀦𑁆𑀢𑀺.

𑁬𑁫𑁬. 𑀯𑀢𑁆𑀣𑀽𑀲𑀽𑀢𑀺 𑀆𑀭𑀫𑁆𑀫𑀡𑁂𑀲𑀼, 𑀤𑀼𑀓𑁆𑀔𑀸𑀤𑀻𑀲𑀼 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑁂𑀲𑀼 𑀯𑀢𑁆𑀣𑀽𑀲𑀼. 𑀲𑀫𑁆𑀫𑁄𑀳𑁂𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀁 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀤𑁂𑀦𑁆𑀢𑀻 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀲𑀫𑁆𑀫𑁄𑀳𑁂𑀢𑀺. 𑀯𑀢𑁆𑀣𑀼𑀦𑁆𑀢𑀺 𑀇𑀥 𑀆𑀭𑀫𑁆𑀫𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀜𑁆𑀜𑀫𑀜𑁆𑀜𑀜𑁆𑀘 𑀉𑀧𑀢𑁆𑀣𑀫𑁆𑀪𑁂𑀢𑀺 𑀅𑀜𑁆𑀜𑀫𑀜𑁆𑀜𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁆𑀯𑁂 𑀦𑀴𑀓𑀮𑀸𑀧𑀸 𑀯𑀺𑀬. 𑀲𑀯𑀺𑀲𑀬𑁂𑀢𑀺 𑀬𑀣𑀸𑀲𑀓𑀁 𑀯𑀺𑀲𑀬𑁂 𑀭𑀽𑀧𑀸𑀬𑀢𑀦𑀸𑀤𑀺𑀓𑁂. 𑀚𑀸𑀬𑀫𑀸𑀦𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀓𑀸𑀭𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀸 𑀚𑀸𑀢𑀺 𑀢𑁂 𑀚𑀦𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀔𑀦𑁆𑀥𑁂 𑀘 𑀚𑀦𑁂𑀢𑀻’’𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸’’𑀢𑀺. 𑀧𑀸𑀓𑀪𑁂𑀤𑀪𑀸𑀯𑀜𑁆𑀘 𑀅𑀥𑀺𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀔𑀦𑁆𑀥𑁂 𑀚𑀦𑁂𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀸𑀓𑀪𑁂𑀤𑀯𑀲𑁂𑀦 𑀯𑀢𑁆𑀢𑀢𑀺𑀘𑁆𑀘𑁂𑀯 𑀅𑀢𑁆𑀣𑁄 ¶ . 𑀧𑀘𑁆𑀘𑀢𑀻𑀢𑀺 𑀧𑀸𑀓𑁄, 𑀪𑀺𑀚𑁆𑀚𑀢𑀻𑀢𑀺 𑀪𑁂𑀤𑁄, 𑀧𑀸𑀓𑁄 𑀘 𑀪𑁂𑀤𑁄 𑀘 𑀧𑀸𑀓𑀪𑁂𑀤𑀁, 𑀢𑀲𑁆𑀲 𑀪𑀸𑀯𑀁 𑀧𑀘𑁆𑀘𑀦𑀁, 𑀪𑀺𑀚𑁆𑀚𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸𑀢𑀺 𑀢𑁂𑀲𑀁 𑀓𑀸𑀭𑀡𑀢𑁆𑀢𑀸, 𑀢𑁂𑀳𑀺 𑀲𑀺𑀤𑁆𑀥𑀸𑀬 𑀅𑀯𑀺𑀚𑁆𑀚𑀸𑀬 𑀲𑀳𑀺𑀢𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀼𑀢𑀺𑀘𑀺𑀢𑁆𑀢𑀁 𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀘𑀼𑀢𑀺𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀭𑀳𑀺𑀢𑀁 𑀪𑀯𑀦𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀲𑀲𑀳𑀸𑀬𑀢𑁆𑀢𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸’’𑀢𑀺. 𑀤𑁆𑀯𑁂𑀥𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀭𑀲𑁂𑀦, 𑀥𑀫𑁆𑀫𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀤𑁆𑀯𑁂𑀥𑀸. 𑀩𑁆𑀬𑀸𑀧𑀦𑀺𑀘𑁆𑀙𑀸𑀮𑁄𑀧𑁂𑀦 𑀳𑀺 𑀦𑀺𑀤𑁆𑀤𑁂𑀲𑁄.

𑁬𑁫𑁭. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 ¶ 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁂𑀦 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀲𑁆𑀲𑀦𑁂𑀦 ‘‘𑀓𑁄 𑀦𑀼 𑀔𑁄 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀏𑀲 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀢𑀁 𑀓𑀸𑀭𑀓𑀤𑀲𑁆𑀲𑀦𑀦𑀺𑀯𑀸𑀭𑀡𑀁. 𑀅𑀢𑁆𑀢𑀸 𑀪𑀯𑀢𑁄 𑀪𑀯𑀦𑁆𑀢𑀭𑀁 𑀲𑀗𑁆𑀓𑀫𑀢𑀻𑀢𑀺 𑀤𑀲𑁆𑀲𑀦𑀁 𑀅𑀢𑁆𑀢𑀲𑀗𑁆𑀓𑀦𑁆𑀢𑀺𑀤𑀲𑁆𑀲𑀦𑀁, 𑀢𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀯𑀘𑀦𑁂𑀦 𑀦𑀺𑀯𑀸𑀭𑀺𑀢𑀁 𑀳𑁄𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀪𑁂𑀤𑀢𑁄 𑀏𑀓𑁄 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀖𑀦𑀲𑀜𑁆𑀜𑀸, 𑀢𑀁 𑀬𑀫𑀓𑀢𑀸𑀮𑀓𑀦𑁆𑀤𑀁 𑀪𑀺𑀦𑁆𑀤𑀦𑁆𑀢𑁂𑀦 𑀯𑀺𑀬 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀢’’𑀦𑁆𑀢𑀺 𑀯𑀘𑀦𑁂𑀦 𑀦𑀺𑀯𑀸𑀭𑀺𑀢𑀁 𑀳𑁄𑀢𑀺. ‘‘𑀏𑀯𑀫𑀸𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡’’𑀦𑁆𑀢𑀺 𑀏𑀢𑁂𑀦 ‘‘𑀲𑁄𑀘𑀢𑀺 𑀧𑀭𑀺𑀤𑁂𑀯𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺𑀆𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀫𑀸𑀳. 𑀲𑁄𑀓𑀸𑀤𑀬𑁄𑀧𑀺 𑀳𑀺 𑀧𑀘𑁆𑀘𑀬𑀸𑀬𑀢𑁆𑀢𑀸 𑀅𑀯𑀲𑀯𑀢𑁆𑀢𑀺𑀦𑁄𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓…𑀧𑁂… 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀏𑀢𑁂𑀦 𑀯𑀼𑀢𑁆𑀢𑀫𑁂𑀯𑀸𑀢𑀺. 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑀺𑀯𑀸𑀭𑀡𑀢𑁄𑀧𑀻𑀢𑀺 𑀓𑀸𑀭𑀓𑀤𑀲𑁆𑀲𑀦𑀸𑀤𑀺𑀦𑀸𑀦𑀸𑀯𑀺𑀥𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀺𑀯𑀸𑀭𑀡𑀢𑁄𑀧𑀺.

𑁬𑁫𑁮. ‘‘𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺 𑀏𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀢𑁄 𑀅𑀤𑀲𑁆𑀲𑀦𑀫𑀸𑀳 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀥𑀫𑁆𑀫𑁂𑀲𑀼 𑀧𑀭𑀫𑀢𑁆𑀣𑀢𑁄 𑀧𑀲𑁆𑀲𑀺𑀢𑀩𑁆𑀩𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀉𑀧𑀓𑁆𑀔𑀮𑀦𑀁 𑀯𑀺𑀬 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄. 𑀧𑀢𑀦𑀁 𑀯𑀺𑀬 𑀪𑀯𑀦𑁆𑀢𑀭𑀧𑀧𑀸𑀢𑀢𑁄. 𑀕𑀡𑁆𑀟𑀧𑀸𑀢𑀼𑀪𑀸𑀯𑁄 𑀯𑀺𑀬 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀢𑁄, 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀘. 𑀕𑀡𑁆𑀟𑀪𑁂𑀤𑀧𑀻𑀴𑀓𑀸 𑀯𑀺𑀬𑀸𑀢𑀺 𑀪𑁂𑀤𑀦𑀢𑁆𑀣𑀁 𑀧𑀘𑁆𑀘𑀫𑀸𑀦𑁂 𑀕𑀡𑁆𑀟𑁂 𑀢𑀲𑁆𑀲 𑀉𑀧𑀭𑀺 𑀚𑀸𑀬𑀫𑀸𑀦𑀸 𑀔𑀼𑀤𑁆𑀤𑀓𑀧𑀻𑀴𑀓𑀸 𑀯𑀺𑀬, 𑀕𑀡𑁆𑀟𑀲𑁆𑀲 𑀯𑀸 𑀅𑀦𑁂𑀓𑀥𑀸𑀪𑁂𑀤𑁂 𑀧𑀻𑀴𑀓𑀸 𑀯𑀺𑀬. 𑀖𑀝𑁆𑀝𑀦𑀁 𑀯𑀺𑀬 𑀲𑀗𑁆𑀖𑀝𑁆𑀝𑀦𑀭𑀲𑀢𑀸𑀬 𑀨𑀲𑁆𑀲𑁄. 𑀖𑀝𑁆𑀝𑀦𑀤𑀼𑀓𑁆𑀔𑀁 𑀯𑀺𑀬𑀸𑀢𑀺 𑀖𑀝𑁆𑀝𑀦𑀢𑁄 𑀚𑀸𑀢𑀁 𑀤𑀼𑀓𑁆𑀔𑀁 𑀯𑀺𑀬 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀯𑀲𑁂𑀦 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀪𑀸𑀯𑀢𑁄. 𑀧𑀝𑀺𑀓𑀸𑀭𑀸𑀪𑀺𑀮𑀸𑀲𑁄 𑀯𑀺𑀬𑀸𑀢𑀺 𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀦𑀺𑀤𑀲𑁆𑀲𑀦𑀪𑀸𑀯𑁂𑀦𑀸𑀳. 𑀅𑀲𑀧𑁆𑀧𑀸𑀬𑀕𑁆𑀕𑀳𑀡𑀁 𑀯𑀺𑀬 𑀩𑀳𑀼𑀯𑀺𑀥𑀸𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁄. 𑀅𑀲𑀧𑁆𑀧𑀸𑀬𑀮𑁂𑀧𑀦𑀁 𑀯𑀺𑀬 𑀤𑀼𑀓𑁆𑀔𑀳𑁂𑀢𑀼𑀦𑁄 𑀲𑀲𑀦𑁆𑀢𑀸𑀦𑁂 𑀲𑀦𑁆𑀦𑀺𑀥𑀸𑀧𑀦𑀢𑁄. 𑀕𑀡𑁆𑀟𑀯𑀺𑀓𑀸𑀭𑀧𑀸𑀢𑀼𑀪𑀸𑀯𑁄 𑀯𑀺𑀬 𑀅𑀢𑁆𑀢𑀪𑀸𑀯𑀕𑀡𑁆𑀟𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀸𑀭𑀪𑀸𑀯𑀢𑁄 ¶ , 𑀢𑀦𑁆𑀦𑀺𑀫𑀺𑀢𑁆𑀢𑀜𑁆𑀘𑀲𑁆𑀲 𑀲𑀽𑀦𑀪𑀸𑀯𑀸𑀤𑀺𑀲𑀫𑁆𑀪𑀯𑀢𑁄. 𑀲𑀽𑀦𑀢𑀸𑀲𑀭𑀸𑀕𑀧𑀼𑀩𑁆𑀩𑀕𑁆𑀕𑀳𑀡𑀸𑀤𑀬𑁄 𑀳𑀺 𑀕𑀡𑁆𑀟𑀯𑀺𑀓𑀸𑀭𑀸. 𑀲𑀭𑀲𑀢𑁄 𑀕𑀡𑁆𑀟𑀲𑁆𑀲 𑀪𑀺𑀚𑁆𑀚𑀦𑀁 𑀧𑀸𑀓𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀪𑁂𑀤𑀕𑁆𑀕𑀳𑀡𑁂𑀦𑁂𑀯𑀲𑁆𑀲 𑀧𑀸𑀓𑁄𑀧𑀺 𑀕𑀳𑀺𑀢𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀕𑀡𑁆𑀟𑀪𑁂𑀤𑁄 𑀯𑀺𑀬 𑀚𑀭𑀸𑀫𑀭𑀡’’𑀦𑁆𑀢𑀺. 𑀕𑀡𑁆𑀟𑀲𑁆𑀲 𑀯𑀸 𑀯𑀺𑀲𑀤𑀺𑀲𑀸𑀧𑀢𑁆𑀢𑀺, 𑀪𑀺𑀚𑁆𑀚𑀦𑀜𑁆𑀘 𑀕𑀡𑁆𑀟𑀪𑁂𑀤𑁄, 𑀢𑀢𑁆𑀣 𑀯𑀺𑀲𑀤𑀺𑀲𑀸𑀧𑀢𑁆𑀢𑀺 𑀧𑀸𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀫𑀸𑀳𑀺 ¶ 𑀪𑀯𑀘𑀓𑁆𑀓𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦 𑀏𑀓𑀸𑀥𑀺𑀝𑁆𑀞𑀸𑀦𑁂𑀳𑀺 𑀉𑀧𑀫𑀸𑀯𑀺𑀲𑁂𑀲𑁂𑀳𑀺 𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀦𑀸𑀦𑀸𑀥𑀺𑀝𑁆𑀞𑀸𑀦𑁂𑀳𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀮𑀸𑀪𑀺𑀪𑀽𑀢𑀘𑀓𑁆𑀔𑀼𑀓𑁄 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀧𑀲𑁆𑀲𑀦𑁆𑀢𑁄𑀧𑀺 𑀯𑀺𑀧𑀭𑀻𑀢𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑁄 𑀤𑀼𑀓𑁆𑀔𑀸𑀤𑀻𑀦𑀺 𑀦 𑀧𑀝𑀺𑀧𑀚𑁆𑀚𑀢𑀺 𑀦 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸 𑀯𑀸 𑀧𑀝𑀺𑀧𑀚𑁆𑀚𑀢𑀻𑀢𑀺 𑀧𑀝𑀮𑀁 𑀯𑀺𑀬 𑀅𑀯𑀺𑀚𑁆𑀚𑀸. 𑀓𑁄𑀲𑀓𑀸𑀭𑀓𑀺𑀫𑀺 𑀯𑀺𑀬 𑀅𑀢𑁆𑀢𑀦𑀸𑀯 𑀓𑀢𑀢𑁆𑀢𑀸, 𑀯𑀝𑁆𑀝𑀲𑁆𑀲 𑀅𑀢𑁆𑀢𑀦𑁄 𑀏𑀯 𑀧𑀭𑀺𑀩𑁆𑀪𑀫𑀦𑀓𑀸𑀭𑀡𑀢𑁆𑀢𑀸 𑀘 𑀓𑁄𑀲𑀧𑁆𑀧𑀤𑁂𑀲𑀸 𑀯𑀺𑀬 𑀲𑀗𑁆𑀔𑀸𑀭𑀸. 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀁 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀧𑀭𑀺𑀡𑀸𑀬𑀓𑀧𑀭𑀺𑀕𑁆𑀕𑀳𑀁 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑁄 𑀭𑀸𑀚𑀓𑀼𑀫𑀸𑀭𑁄 𑀯𑀺𑀬𑀸𑀢𑀺 𑀧𑀭𑀺𑀕𑁆𑀕𑀳𑁂𑀦 𑀯𑀺𑀦𑀸 𑀧𑀢𑀺𑀝𑁆𑀞𑀸𑀮𑀸𑀪𑁄 𑀏𑀢𑁆𑀣 𑀉𑀧𑀫𑁄𑀧𑀫𑁂𑀬𑁆𑀬𑀲𑀸𑀫𑀜𑁆𑀜𑀁. 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑀫𑀸𑀳. 𑀧𑀭𑀺𑀓𑀧𑁆𑀧𑀦𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀢𑁄, 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀸 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀦𑀢𑁄. 𑀤𑁂𑀯𑀫𑀦𑀼𑀲𑁆𑀲𑀫𑀺𑀕𑀯𑀺𑀳𑀗𑁆𑀕𑀸𑀤𑀺𑀯𑀺𑀯𑀺𑀥𑀧𑁆𑀧𑀓𑀸𑀭𑀢𑀸𑀬 𑀫𑀸𑀬𑀸 𑀯𑀺𑀬 𑀦𑀸𑀫𑀭𑀽𑀧𑀁. 𑀧𑀢𑀺𑀝𑁆𑀞𑀸𑀯𑀺𑀲𑁂𑀲𑁂𑀦 𑀯𑀼𑀤𑁆𑀥𑀺𑀯𑀺𑀲𑁂𑀲𑀸𑀧𑀢𑁆𑀢𑀺𑀢𑁄 𑀯𑀦𑀧𑁆𑀧𑀕𑀼𑀫𑁆𑀩𑁄 𑀯𑀺𑀬 𑀲𑀴𑀸𑀬𑀢𑀦𑀁. 𑀆𑀬𑀢𑀦𑀸𑀦𑀁 𑀯𑀺𑀲𑀬𑀺𑀯𑀺𑀲𑀬𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀪𑀺𑀫𑀼𑀔𑀪𑀸𑀯𑁄 𑀆𑀬𑀢𑀦𑀖𑀝𑁆𑀝𑀦𑀁. 𑀢𑀢𑁄 𑀆𑀬𑀢𑀦𑀖𑀝𑁆𑀝𑀦𑀢𑁄 𑀤𑁆𑀯𑀬𑀲𑀗𑁆𑀖𑀝𑁆𑀝𑀦𑀼𑀧𑁆𑀧𑀢𑁆𑀢𑀺𑀢𑁄, 𑀯𑁂𑀤𑀦𑀸𑀤𑀼𑀓𑁆𑀔𑀳𑁂𑀢𑀼𑀢𑁄 𑀘 𑀅𑀕𑁆𑀕𑀺 𑀯𑀺𑀬 𑀨𑀲𑁆𑀲𑁄. 𑀲𑀧𑀭𑀺𑀴𑀸𑀳𑀢𑁄 𑀤𑀸𑀳𑁄 𑀯𑀺𑀬 𑀯𑁂𑀤𑀦𑀸. 𑀉𑀧𑀭𑀽𑀧𑀭𑀺 𑀢𑀡𑁆𑀳𑀸𑀧𑀯𑀟𑁆𑀠𑀦𑀢𑁄 𑀮𑁄𑀡𑀽𑀤𑀓𑀧𑀸𑀦𑀁 𑀯𑀺𑀬 𑀯𑀺𑀲𑀬𑀸𑀦𑀼𑀪𑀯𑀦𑀁. 𑀆𑀭𑀫𑁆𑀫𑀡𑁂 𑀧𑀸𑀢𑀼𑀓𑀫𑁆𑀬𑀢𑀸𑀪𑀸𑀯𑀢𑁄 𑀧𑀺𑀧𑀸𑀲𑀸 𑀯𑀺𑀬 𑀢𑀡𑁆𑀳𑀸. 𑀢𑀤𑀲𑁆𑀲𑀼𑀧𑀸𑀤𑀸𑀦𑀦𑁆𑀢𑀺 𑀢𑀁 𑀅𑀪𑀺𑀮𑀸𑀲𑀓𑀭𑀡𑀁 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀁 𑀅𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲, 𑀢𑀤𑀲𑁆𑀲 𑀯𑀸 𑀪𑀯𑁂𑀬𑁆𑀬 𑀉𑀧𑀸𑀤𑀸𑀦𑀁. 𑀩𑁆𑀬𑀲𑀦𑀸𑀯𑀳𑀢𑀸𑀬 𑀅𑀚𑀸𑀦𑀦𑀢𑁄 𑀪𑀯𑀼𑀧𑀸𑀤𑀸𑀦𑀁 𑀫𑀘𑁆𑀙𑀲𑁆𑀲 𑀩𑀴𑀺𑀲𑀼𑀧𑀸𑀤𑀸𑀦𑀁 𑀯𑀺𑀬. 𑀏𑀢𑁆𑀣 𑀘 𑀲𑀗𑁆𑀔𑀸𑀭𑀸𑀤𑀻𑀦𑀁 𑀓𑁄𑀲𑀧𑁆𑀧𑀤𑁂𑀲𑀧𑀭𑀺𑀡𑀸𑀬𑀓𑀸𑀤𑀻𑀳𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀤𑀺𑀲𑀢𑀸𑀬 𑀤𑁆𑀯𑁂 𑀤𑁆𑀯𑁂 𑀉𑀧𑀫𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁫𑁯. 𑀓𑁄𑀘𑀺 𑀅𑀕𑀫𑁆𑀪𑀻𑀭𑁄 𑀏𑀯 𑀕𑀫𑁆𑀪𑀻𑀭𑁄 𑀯𑀺𑀬 𑀔𑀸𑀬𑀢𑀺 𑀧𑀼𑀭𑀸𑀡𑀢𑀺𑀡𑀧𑀡𑁆𑀡𑀸𑀤𑀺𑀪𑀭𑀺𑀢𑁄 𑀧𑀩𑁆𑀩𑀢𑀲𑀗𑁆𑀔𑁂𑀧𑁂 𑀚𑀮𑀸𑀲𑀬𑁄 𑀯𑀺𑀬, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀕𑀫𑁆𑀪𑀻𑀭𑁄𑀯 𑀳𑀼𑀢𑁆𑀯𑀸 𑀑𑀪𑀸𑀲𑀢𑀺 𑀧𑀓𑀸𑀲𑀢𑀺 𑀤𑀺𑀲𑁆𑀲𑀢𑀻𑀢𑀺 𑀕𑀫𑁆𑀪𑀻𑀭𑀸𑀯𑀪𑀸𑀲𑁄. 𑀬𑀣𑀸𑀭𑀳𑀦𑁆𑀢𑀺 𑀅𑀢𑁆𑀣𑀸𑀤𑀺𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁.

𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀦 𑀳𑁄𑀢𑀺, 𑀳𑁄𑀢𑀺 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂 𑀲𑀺𑀤𑁆𑀥𑁂 ‘‘𑀲𑀺𑀬𑀸 𑀦𑀼 𑀔𑁄 𑀚𑀭𑀸𑀫𑀭𑀡𑀁 ¶ 𑀚𑀸𑀢𑀺𑀢𑁄, 𑀅𑀜𑁆𑀜𑀢𑁄𑀧𑀻’’𑀢𑀺 𑀆𑀲𑀗𑁆𑀓𑀸𑀬𑀁 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀕𑁆𑀕𑀳𑀡𑀁 𑀚𑀸𑀢𑀺𑀬𑀸 𑀧𑀝𑀺𑀬𑁄𑀕𑀻𑀯𑀺𑀲𑀬𑀁, 𑀦 𑀅𑀜𑁆𑀜𑀫𑀢𑁆𑀢𑀯𑀺𑀲𑀬𑀁 ¶ ‘‘𑀚𑀸𑀢𑀺𑀁 𑀯𑀺𑀦𑀸’’𑀢𑀺 𑀯𑀘𑀦𑀢𑁄. 𑀢𑁂𑀦𑀲𑁆𑀲 𑀦𑀸𑀜𑁆𑀜𑀁 𑀚𑀸𑀢𑀺𑀬𑀸 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀁 𑀦𑀺𑀯𑀢𑁆𑀢𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀇𑀢𑁆𑀣𑀦𑁆𑀢𑀺 𑀇𑀤𑀁 𑀧𑀓𑀸𑀭𑀁, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑁆𑀧𑀯𑀢𑁆𑀢𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄. ‘‘𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻’’𑀢𑀺 𑀳𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄 𑀯𑀼𑀢𑁆𑀢𑁄. 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄, 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀣 ‘‘𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀢𑀸𑀬 𑀅𑀯𑀺𑀢𑀣𑀢𑀁 𑀤𑀲𑁆𑀲𑁂𑀢𑀺, ‘‘𑀦 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀚𑀭𑀸𑀫𑀭𑀡𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀜𑁆𑀜𑀣𑀢𑁆𑀢𑀁, ‘‘𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀢𑀣𑀢𑀁. 𑀢𑁂𑀦 𑀘 𑀬𑀣𑀸 𑀧𑀘𑁆𑀘𑀬𑀥𑀫𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁂, 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀏𑀯𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀧𑀺 𑀢𑀩𑁆𑀪𑀸𑀯𑁂𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺? ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀨𑀮𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀢𑁆𑀣𑁂 𑀧𑀝𑀺𑀲𑀫𑁆𑀪𑀺𑀤𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀳𑀺 ‘‘𑀅𑀢𑁆𑀣𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀨𑀮𑁂’’𑀢𑀺 𑀯𑀼𑀢𑁆𑀢𑀁, ‘‘𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀜𑀸𑀡’’𑀦𑁆𑀢𑀺, 𑀢𑀲𑁆𑀫𑀸 𑀳𑁂𑀢𑀼𑀨𑀮𑀅𑀢𑁆𑀣𑀲𑀤𑁆𑀤𑀸 𑀏𑀓𑀢𑁆𑀣𑀸, 𑀜𑀸𑀡𑀧𑀝𑀺𑀲𑀫𑁆𑀪𑀺𑀤𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀥𑀺𑀢𑁄 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄.

𑀬𑁂𑀦𑀸𑀓𑀸𑀭𑁂𑀦𑀸𑀢𑀺 𑀬𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑁂𑀦. 𑀲𑀪𑀸𑀯𑀥𑀫𑁆𑀫𑀸 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑀲𑀺𑀤𑁆𑀥𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑁂𑀦 𑀯𑀺𑀲𑀺𑀝𑁆𑀞𑀸𑀓𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫). 𑀬𑀤𑀯𑀢𑁆𑀣𑀸𑀢𑀺 𑀬𑀸𑀬 𑀅𑀯𑀢𑁆𑀣𑀸𑀬 𑀅𑀯𑀢𑁆𑀣𑀺𑀢𑀸. 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀦𑁆𑀢𑁄 𑀳𑀺 𑀥𑀫𑁆𑀫𑀸 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀢𑀁 𑀢𑀁 𑀅𑀢𑁆𑀣𑀓𑀺𑀘𑁆𑀘𑀁 𑀲𑀸𑀥𑁂𑀢𑀼𑀁 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀲𑁆𑀯𑀸𑀬𑀁 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀘 𑀅𑀯𑀺𑀚𑁆𑀚𑀸𑀬𑀧𑀺 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀭𑀯𑀩𑁄𑀥𑀢𑁄 𑀏𑀯 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄 ¶ ¶ 𑀘𑀸𑀢𑀺 𑀆𑀳 ‘‘𑀢𑀲𑁆𑀲…𑀧𑁂… 𑀕𑀫𑁆𑀪𑀻𑀭𑁄’’𑀢𑀺. 𑀢𑀲𑁆𑀲 𑀆𑀓𑀸𑀭𑀲𑁆𑀲, 𑀅𑀯𑀢𑁆𑀣𑀸𑀬 𑀘. 𑀳𑁂𑀢𑀼𑀫𑁆𑀳𑀺 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀦𑁄 𑀥𑀫𑁆𑀫𑀧𑀭𑀺𑀬𑀸𑀬𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀅𑀲𑁆𑀲𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲. 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀯𑁂𑀦𑁂𑀬𑁆𑀬𑀸𑀦𑀁 𑀩𑀼𑀚𑁆𑀛𑀦𑀸𑀦𑀼𑀕𑀼𑀡𑀢𑀸𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑁂𑀲𑀦𑀧𑁆𑀧𑀓𑀸𑀭𑁂. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄𑀢𑀺 𑀦𑀬𑀺𑀥 𑀧𑀘𑁆𑀘𑀬𑀼𑀧𑁆𑀧𑀸𑀤𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀅𑀦𑀼𑀮𑁄𑀫𑀁, 𑀧𑀘𑁆𑀘𑀬𑀦𑀺𑀭𑁄𑀥𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀭𑁄𑀥𑀲𑀗𑁆𑀔𑀸𑀢𑀜𑁆𑀘 𑀧𑀝𑀺𑀮𑁄𑀫𑀫𑀸𑀳. 𑀆𑀤𑀺𑀢𑁄 𑀧𑀦 𑀅𑀦𑁆𑀢𑀕𑀫𑀦𑀫𑀦𑀼𑀮𑁄𑀫𑀁, 𑀅𑀦𑁆𑀢𑀢𑁄 𑀘 𑀆𑀤𑀺𑀕𑀫𑀦𑀁 𑀧𑀝𑀺𑀮𑁄𑀫𑀫𑀸𑀳. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀤𑁂𑀲𑀦𑀸𑀬, 𑀅𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸𑀬 𑀘 𑀢𑀺𑀲𑀦𑁆𑀥𑀺𑀘𑀢𑀼𑀲𑀗𑁆𑀔𑁂𑀧𑀁. ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁𑀦𑀺𑀤𑀸𑀦𑀸’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁨.𑁧𑁧) 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸𑀬, ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀓𑀸𑀬 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑀫. 𑀦𑀺. 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀅𑀦𑀼𑀮𑁄𑀫𑀤𑁂𑀲𑀦𑀸𑀬 𑀘 𑀤𑁆𑀯𑀺𑀲𑀦𑁆𑀥𑀺𑀢𑀺𑀲𑀗𑁆𑀔𑁂𑀧𑀁. ‘‘𑀲𑀁𑀬𑁄𑀚𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁩, 𑁫𑁭) 𑀏𑀓𑀲𑀦𑁆𑀥𑀺𑀤𑁆𑀯𑀺𑀲𑀗𑁆𑀔𑁂𑀧𑀁. 𑀓𑀢𑁆𑀣𑀘𑀺 𑀏𑀓𑀗𑁆𑀕𑁄𑀧𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄, 𑀲𑁄 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁬𑁨) 𑀤𑀲𑁆𑀲𑀺𑀢𑁄 𑀏𑀯.

𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀲𑀁 𑀢𑁂𑀲𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀧𑀝𑀺𑀯𑁂𑀥𑁄’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀚𑀸𑀦𑀦𑀮𑀓𑁆𑀔𑀡𑀲𑁆𑀲 𑀜𑀸𑀡𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀝𑁆𑀞𑁄. 𑀆𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀤𑀲𑁆𑀲𑀦𑀪𑀽𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀤𑀲𑁆𑀲𑀦𑀝𑁆𑀞𑁄. 𑀬𑁂𑀦 𑀧𑀦𑁂𑀲𑀸 𑀤𑀼𑀓𑁆𑀔𑀸𑀤𑀻𑀦𑀁 𑀬𑀸𑀣𑀸𑀯𑀲𑀭𑀲𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀢𑀲𑁆𑀲𑀸 𑀲𑀘𑁆𑀘𑀸𑀲𑀫𑁆𑀧𑀝𑀺𑀯𑁂𑀥𑀝𑁆𑀞𑁄. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀓𑀤𑁂𑀲𑁄 𑀲𑀭𑀸𑀕𑁄, 𑀅𑀜𑁆𑀜𑁄 𑀯𑀺𑀭𑀸𑀕𑁄. 𑀭𑀸𑀕𑀲𑁆𑀲 𑀯𑀸 𑀅𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀭𑀸𑀕𑀧𑀯𑀟𑁆𑀠𑀓𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀩𑁆𑀩𑁄𑀧𑀺 𑀲𑀭𑀸𑀕𑁄, 𑀇𑀢𑀭𑁄 ¶ 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀯𑀺𑀭𑀸𑀕𑁄. ‘‘𑀤𑀻𑀖𑀭𑀢𑁆𑀢𑀁 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁨.𑁬𑁨) 𑀅𑀢𑁆𑀢𑀧𑀭𑀸𑀫𑀸𑀲𑀲𑁆𑀲 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑀢𑁄 𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀝𑁆𑀞𑁄 𑀕𑀫𑁆𑀪𑀻𑀭𑁄. 𑀅𑀢𑁆𑀢𑀸 𑀯𑀺𑀚𑀸𑀦𑀸𑀢𑀺 𑀲𑀁𑀲𑀭𑀢𑀻𑀢𑀺 𑀲𑀩𑁆𑀬𑀸𑀧𑀸𑀭𑀢𑀸𑀲𑀗𑁆𑀓𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀩𑀮𑀯𑀢𑀸𑀬 𑀅𑀩𑁆𑀬𑀸𑀧𑀸𑀭𑀝𑁆𑀞𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑀸 ¶ 𑀘 𑀕𑀫𑁆𑀪𑀻𑀭𑀸. 𑀦𑀸𑀫𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀓𑀼𑀧𑁆𑀧𑀸𑀤𑁄, 𑀧𑀯𑀢𑁆𑀢𑀺𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀬𑀣𑀸𑀭𑀳𑀁 𑀏𑀓𑀼𑀧𑁆𑀧𑀸𑀤𑁄, 𑀦𑀸𑀫𑀲𑁆𑀲 𑀭𑀽𑀧𑁂𑀦, 𑀭𑀽𑀧𑀲𑁆𑀲 𑀘 𑀦𑀸𑀫𑁂𑀦 𑀅𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀩𑁆𑀪𑁄𑀕𑁄, 𑀦𑀸𑀫𑀲𑁆𑀲 𑀦𑀸𑀫𑁂𑀦, 𑀭𑀽𑀧𑀲𑁆𑀲 𑀘 𑀭𑀽𑀧𑁂𑀦, 𑀏𑀓𑀘𑁆𑀘𑀲𑁆𑀲 𑀏𑀓𑀘𑁆𑀘𑁂𑀦 𑀅𑀯𑀺𑀦𑀺𑀩𑁆𑀪𑁄𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑁂 𑀳𑀺 𑀅𑀯𑀺𑀦𑀺𑀩𑁆𑀪𑁄𑀕𑁂 𑀅𑀥𑀺𑀧𑁆𑀧𑁂𑀢𑁂 𑀲𑁄 𑀭𑀽𑀧𑀲𑁆𑀲 𑀘 𑀏𑀓𑀓𑀮𑀸𑀧𑀯𑀼𑀢𑁆𑀢𑀺𑀦𑁄 𑀮𑀩𑁆𑀪𑀢𑀺. 𑀅𑀣 𑀯𑀸 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀦𑀸𑀫𑀭𑀽𑀧𑀸𑀦𑀁 𑀅𑀲𑀳𑀯𑀢𑁆𑀢𑀦𑀢𑁄 𑀅𑀜𑁆𑀜𑀫𑀜𑁆𑀜𑀯𑀺𑀦𑀺𑀩𑁆𑀪𑁄𑀕𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀳𑀯𑀢𑁆𑀢𑀦𑀢𑁄 𑀅𑀯𑀺𑀦𑀺𑀩𑁆𑀪𑁄𑀕𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀅𑀥𑀺𑀧𑀢𑀺𑀬𑀝𑁆𑀞𑁄 𑀦𑀸𑀫 𑀇𑀥 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄. ‘‘𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀔𑁂𑀢𑁆𑀢𑀫𑁆𑀧𑁂𑀢’’𑀦𑁆𑀢𑀺 (𑀥. 𑀲. 𑁫𑁯𑁮-𑁫𑁯𑁯) 𑀯𑀼𑀢𑁆𑀢𑀸 𑀮𑁄𑀓𑀸𑀤𑀺𑀅𑀢𑁆𑀣𑀸 𑀘𑀓𑁆𑀔𑀸𑀤𑀻𑀲𑀼 𑀧𑀜𑁆𑀘𑀲𑀼 𑀬𑁄𑀚𑁂𑀢𑀩𑁆𑀩𑀸. 𑀫𑀦𑀸𑀬𑀢𑀦𑀲𑁆𑀲𑀸𑀧𑀺 𑀮𑀼𑀚𑁆𑀚𑀦𑀢𑁄, 𑀫𑀦𑁄𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀤𑁆𑀯𑀸𑀭𑀔𑁂𑀢𑁆𑀢𑀪𑀸𑀯𑀢𑁄 𑀘 𑀏𑀢𑁂 𑀅𑀢𑁆𑀣𑀸 𑀲𑀫𑁆𑀪𑀯𑀦𑁆𑀢𑀺 𑀏𑀯. 𑀆𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀧𑀓𑀸𑀲𑀦𑀬𑁄𑀕𑁆𑀬𑀢𑀸𑀮𑀓𑁆𑀔𑀡𑀁 𑀑𑀪𑀸𑀲𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑀺𑀪𑀸𑀯𑁄, 𑀫𑀦𑀸𑀬𑀢𑀦𑀲𑁆𑀲 𑀯𑀺𑀚𑀸𑀦𑀦𑀁. 𑀲𑀗𑁆𑀖𑀝𑁆𑀝𑀦𑀝𑁆𑀞𑁄 𑀯𑀺𑀲𑁂𑀲𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁, 𑀇𑀢𑀭𑁂 𑀙𑀦𑁆𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀨𑀼𑀲𑀦𑀜𑁆𑀘 𑀨𑀲𑁆𑀲𑀲𑁆𑀲 𑀲𑀪𑀸𑀯𑁄, 𑀲𑀗𑁆𑀖𑀝𑁆𑀝𑀦𑀁 𑀭𑀲𑁄, 𑀇𑀢𑀭𑁂 𑀉𑀧𑀝𑁆𑀞𑀸𑀦𑀸𑀓𑀸𑀭𑀸. 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑁄 𑀭𑀲𑀯𑀲𑁂𑀦 𑀯𑀼𑀢𑁆𑀢𑁄, 𑀯𑁂𑀤𑀬𑀺𑀢𑀝𑁆𑀞𑁄 𑀮𑀓𑁆𑀔𑀡𑀯𑀲𑁂𑀦. 𑀲𑀼𑀔𑀤𑀼𑀓𑁆𑀔𑀫𑀚𑁆𑀛𑀢𑁆𑀢𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀸. 𑀅𑀢𑁆𑀢𑀸 𑀯𑁂𑀤𑀬𑀢𑀻𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀢𑀸𑀬 𑀦𑀺𑀚𑁆𑀚𑀻𑀯𑀝𑁆𑀞𑁄 𑀯𑁂𑀤𑀦𑀸𑀬 𑀕𑀫𑁆𑀪𑀻𑀭𑁄. 𑀦𑀺𑀚𑁆𑀚𑀻𑀯𑀸𑀬 𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀁 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀁, 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀫𑁂𑀯 𑀅𑀢𑁆𑀣𑁄 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄. 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀺𑀢𑀝𑁆𑀞𑁄, 𑀩𑀮𑀯𑀢𑀭𑀢𑀡𑁆𑀳𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀁 𑀅𑀚𑁆𑀛𑁄𑀲𑀸𑀦𑀝𑁆𑀞𑁄. 𑀇𑀢𑀭𑁄 𑀲𑀸𑀥𑀸𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀸𑀦𑀕𑁆𑀕𑀳𑀡𑀸𑀪𑀺𑀦𑀺𑀯𑁂𑀲𑀝𑁆𑀞𑀸 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀲𑀫𑀸𑀦𑀸, 𑀧𑀭𑀸𑀫𑀸𑀲𑀝𑁆𑀞𑁄 𑀯𑀼𑀢𑁆𑀢𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀫𑁂𑀯, 𑀢𑀣𑀸 𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄. ‘‘𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄’’𑀢𑀺 (𑀥. 𑀲. 𑁩𑁯𑁨) 𑀳𑀺 𑀯𑀘𑀦𑀢𑁄 𑀤𑀺𑀝𑁆𑀞𑀻𑀦𑀁 𑀤𑀼𑀭𑀢𑀺𑀓𑁆𑀓𑀫𑀢𑀸, 𑀤𑀴𑁆𑀳𑀕𑁆𑀕𑀳𑀡𑀢𑁆𑀢𑀸 ¶ 𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀤𑀼𑀭𑀢𑀺𑀓𑁆𑀓𑀫𑀢𑀸𑀬𑀧𑀺 𑀳𑀺 𑀢𑀡𑁆𑀳𑀸𑀬 𑀲𑀫𑀼𑀤𑁆𑀤𑀝𑁆𑀞𑁄 𑀯𑀼𑀢𑁆𑀢𑁄. 𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼𑀔𑀺𑀧𑀦𑀦𑁆𑀢𑀺 𑀲𑀫𑀸𑀲𑁂 𑀪𑀼𑀫𑁆𑀫𑀯𑀘𑀦𑀲𑁆𑀲 𑀅𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀢𑁂𑀦 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀧𑀤𑀸𑀦𑀁 𑀲𑀫𑀸𑀲𑁄 𑀳𑁄𑀢𑀺. 𑀚𑀭𑀸𑀫𑀭𑀡𑀗𑁆𑀕𑀁 𑀫𑀭𑀡𑀧𑁆𑀧𑀥𑀸𑀦𑀦𑁆𑀢𑀺 𑀫𑀭𑀡𑀝𑁆𑀞𑀸 𑀏𑀯 𑀔𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀤𑀲𑁆𑀲𑀺𑀢𑀸. 𑀦𑀯𑀦𑀯𑀸𑀦𑀜𑁆𑀳𑀺 𑀔𑀬𑁂𑀦 𑀔𑀡𑁆𑀟𑀺𑀘𑁆𑀘𑀸𑀤𑀺𑀧𑀭𑀺𑀧𑀓𑁆𑀓𑀧𑁆𑀧𑀯𑀢𑁆𑀢𑀺 𑀚𑀭𑀸𑀢𑀺, 𑀔𑀬𑀝𑁆𑀞𑁄 𑀯𑀸 𑀚𑀭𑀸𑀬 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀯𑀪𑀸𑀯𑀸𑀧𑀕𑀫𑁄 𑀳𑀺 𑀔𑀬𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀤𑁆𑀯𑀺𑀦𑁆𑀦𑀫𑁆𑀧𑀺. 𑀲𑀦𑁆𑀢𑀢𑀺𑀯𑀲𑁂𑀦 𑀯𑀸 𑀚𑀭𑀸𑀬 𑀔𑀬𑀯𑀬𑀪𑀸𑀯𑁄, 𑀲𑀫𑁆𑀫𑀼𑀢𑀺𑀔𑀡𑀺𑀓𑀯𑀲𑁂𑀦 𑀫𑀭𑀡𑀲𑁆𑀲 𑀪𑁂𑀤𑀯𑀺𑀧𑀭𑀺𑀡𑀸𑀫𑀢𑀸 𑀬𑁄𑀚𑁂𑀢𑀩𑁆𑀩𑀸.

𑁬𑁬𑁦. 𑀅𑀢𑁆𑀣𑀦𑀬𑀸𑀢𑀺 𑀅𑀢𑁆𑀣𑀸𑀦𑀁 𑀦𑀬𑀸, 𑀅𑀯𑀺𑀚𑁆𑀚𑀸𑀤𑀺𑀅𑀢𑁆𑀣𑁂𑀳𑀺 𑀏𑀓𑀢𑁆𑀢𑀸𑀤𑀻 𑀲𑀓𑁂𑀦 𑀪𑀸𑀯𑁂𑀦 𑀦𑀬𑀦𑁆𑀢𑀺 𑀕𑀫𑁂𑀦𑁆𑀢𑀻𑀢𑀺 ¶ 𑀏𑀓𑀢𑁆𑀢𑀸𑀤𑀬𑁄, 𑀢𑁂𑀲𑀁 𑀦𑀬𑀸𑀢𑀺 𑀯𑀼𑀢𑁆𑀢𑀸. 𑀦𑀻𑀬𑀦𑁆𑀢𑀻𑀢𑀺 𑀳𑀺 𑀦𑀬𑀸𑀢𑀺. 𑀅𑀢𑁆𑀣𑀸 𑀏𑀯 𑀯𑀸 𑀏𑀓𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀻𑀬𑀫𑀸𑀦𑀸 𑀜𑀸𑀬𑀫𑀸𑀦𑀸 𑀅𑀢𑁆𑀣𑀦𑀬𑀸𑀢𑀺 𑀯𑀼𑀢𑁆𑀢𑀸. 𑀦𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀦𑀬𑀸, 𑀏𑀓𑀢𑁆𑀢𑀸𑀤𑀻𑀳𑀺 𑀘 𑀅𑀢𑁆𑀣𑀸 ‘‘𑀏𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀢𑁆𑀢𑀸𑀤𑀬𑁄 𑀅𑀢𑁆𑀣𑀸𑀦𑀁 𑀦𑀬𑀸𑀢𑀺 𑀅𑀢𑁆𑀣𑀦𑀬𑀸.

𑀅𑀗𑁆𑀓𑀼𑀭𑀸𑀤𑀺𑀪𑀸𑀯𑁂𑀦𑀸𑀢𑀺 𑀅𑀗𑁆𑀓𑀼𑀭𑀧𑀢𑁆𑀢𑀦𑀸𑀴𑀔𑀦𑁆𑀥𑀲𑀸𑀔𑀸𑀧𑀮𑁆𑀮𑀯𑀧𑀮𑀸𑀲𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂 𑀅𑀯𑀬𑀯𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁂𑀦 𑀩𑀻𑀚𑀁 𑀭𑀼𑀓𑁆𑀔𑀪𑀸𑀯𑀁 𑀧𑀢𑁆𑀢𑀁 𑀭𑀼𑀓𑁆𑀔𑀪𑀸𑀯𑁂𑀦 𑀧𑀯𑀢𑁆𑀢𑀁 𑀢𑀜𑁆𑀘 𑀏𑀓𑀢𑁆𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀬𑀣𑀸 𑀏𑀓𑀢𑁆𑀢𑀁, 𑀏𑀯𑀁 𑀇𑀥𑀸𑀧𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀏𑀓𑀲𑀦𑁆𑀢𑀢𑀺𑀧𑀢𑀺𑀢𑀢𑀸 𑀏𑀓𑀢𑁆𑀢𑀦𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂𑀦𑀸’’𑀢𑀺 𑀏𑀢𑁂𑀦 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑀁 𑀯𑀺𑀪𑀸𑀯𑁂𑀢𑀺. 𑀲𑀢𑀺𑀧𑀺 𑀳𑀺 𑀳𑁂𑀢𑀼𑀨𑀮𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑁂𑀤𑁂 𑀳𑁂𑀢𑀼𑀪𑀸𑀯𑁂𑀦, 𑀨𑀮𑀪𑀸𑀯𑁂𑀦 𑀘 𑀢𑁂𑀲𑀁 𑀲𑀫𑁆𑀩𑀦𑁆𑀥𑀪𑀸𑀯𑁄𑀬𑁂𑀯𑁂𑀢𑁆𑀣 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄, 𑀬𑀢𑁄 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀢𑁆𑀣𑁂𑀯 𑀨𑀮𑀼𑀧𑁆𑀧𑀢𑁆𑀢𑀻𑀢𑀺 𑀓𑀢𑀲𑁆𑀲 𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀅𑀩𑁆𑀪𑀸𑀕𑀫𑁄 𑀘 𑀦𑀢𑁆𑀣𑀻𑀢𑀺. 𑀏𑀓𑀢𑁆𑀢𑀕𑁆𑀕𑀳𑀡𑀢𑁄𑀢𑀺 𑀳𑁂𑀢𑀼𑀨𑀮𑀸𑀦𑀁 𑀪𑁂𑀤𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀳𑁂𑀢𑀼𑀁, 𑀨𑀮𑀜𑁆𑀘 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸 𑀉𑀪𑀺𑀦𑁆𑀦𑀁 𑀏𑀓𑀪𑀸𑀯𑀲𑁆𑀲 𑀅𑀪𑁂𑀤𑀲𑁆𑀲 𑀕𑀳𑀡𑁂𑀦. ‘‘𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻’’𑀢𑀺𑀆𑀤𑀺𑀦𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀦𑁆𑀢𑀺 𑀲𑀪𑀸𑀯𑀯𑀯𑀢𑁆𑀣𑀸𑀦𑀁 𑀳𑁂𑀢𑀼𑀦𑁄, 𑀨𑀮𑀲𑁆𑀲 𑀘 𑀪𑀺𑀦𑁆𑀦𑀲𑀪𑀸𑀯𑀢𑀸𑀯𑀩𑁄𑀥𑁄. 𑀪𑀺𑀦𑁆𑀦𑀲𑀦𑁆𑀢𑀸𑀦𑀲𑁆𑀲𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑀭𑀳𑀺𑀢𑀲𑁆𑀲 𑀦𑀸𑀦𑀢𑁆𑀢𑀲𑁆𑀲 𑀕𑀳𑀡𑀢𑁄 ¶ 𑀅𑀜𑁆𑀜𑁄 𑀫𑀢𑁄, 𑀅𑀜𑁆𑀜𑁄 𑀚𑀸𑀢𑁄, 𑀢𑀲𑁆𑀫𑀸 ‘‘𑀲𑀢𑁆𑀢𑀦𑁆𑀢𑀭𑁄 𑀉𑀘𑁆𑀙𑀺𑀦𑁆𑀦𑁄, 𑀲𑀢𑁆𑀢𑀦𑁆𑀢𑀭𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀡𑁆𑀳𑀦𑁆𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

𑀅𑀫𑁆𑀳𑁂𑀳𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀸𑀧𑀸𑀭𑀸𑀪𑀸𑀯𑁄 𑀅𑀦𑀪𑀺𑀲𑀦𑁆𑀥𑀺𑀢𑀸𑀬 𑀅𑀩𑁆𑀬𑀸𑀯𑀝𑀢𑀸. 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄𑀢𑀺 ‘‘𑀦𑀺𑀭𑀻𑀳𑀸 𑀦𑀺𑀚𑁆𑀚𑀻𑀯𑀸 𑀥𑀫𑁆𑀫𑀫𑀢𑁆𑀢𑀸’’𑀢𑀺 𑀧𑀲𑁆𑀲𑀦𑁆𑀢𑁄. 𑀲𑀪𑀸𑀯𑁄 𑀏𑀯 𑀦𑀺𑀬𑀫𑁄 𑀲𑀪𑀸𑀯𑀦𑀺𑀬𑀫𑁄 ‘‘𑀲𑀲𑀫𑁆𑀪𑀸𑀭𑀕𑁆𑀕𑀺𑀦𑁄 𑀉𑀤𑁆𑀥𑀫𑀼𑀔𑀢𑀸, 𑀲𑀲𑀫𑁆𑀪𑀸𑀭𑀯𑀸𑀬𑀼𑀦𑁄 𑀢𑀺𑀭𑀺𑀬𑀕𑀫𑀦’’𑀦𑁆𑀢𑀺 𑀏𑀯𑀫𑀸𑀤𑀺 𑀯𑀺𑀬. 𑀢𑁂𑀦 𑀲𑀺𑀤𑁆𑀥𑁄 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀳𑁂𑀢𑀼𑀪𑀸𑀯𑁄. ‘‘𑀓𑀲𑁆𑀲𑀘𑀺 𑀓𑀢𑁆𑀢𑀼𑀦𑁄 𑀅𑀪𑀸𑀯𑀸 𑀦 𑀓𑀸𑀘𑀺 𑀓𑀺𑀭𑀺𑀬𑀸 𑀨𑀮𑀧𑀩𑀦𑁆𑀥𑀺𑀦𑀻’’𑀢𑀺 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺.

‘‘𑀔𑀻𑀭𑀢𑁄 𑀤𑀥𑀺, 𑀦 𑀉𑀤𑀓𑀢𑁄, 𑀢𑀺𑀮𑀢𑁄 𑀢𑁂𑀮𑀁, 𑀦 𑀯𑀸𑀮𑀺𑀓𑀢𑁄’’𑀢𑀺 𑀲𑀩𑁆𑀩𑀢𑁄 𑀲𑀩𑁆𑀩𑀲𑀫𑁆𑀪𑀯𑀸𑀪𑀸𑀯𑀤𑀲𑁆𑀲𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁 𑀳𑁂𑀢𑀼𑀅𑀦𑀼𑀭𑀽𑀧𑀫𑁂𑀯 𑀨𑀮𑀁 𑀧𑀲𑁆𑀲𑀦𑁆𑀢𑁄 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀧𑀚𑀳𑀢𑀺. 𑀬𑀢𑁄 𑀓𑀼𑀢𑁄𑀘𑀻𑀢𑀺 𑀬𑀤𑀺 𑀅𑀜𑁆𑀜𑀲𑁆𑀫𑀸 𑀅𑀜𑁆𑀜𑀲𑁆𑀲 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀯𑀸𑀮𑀺𑀓𑀢𑁄 𑀢𑁂𑀮𑀲𑁆𑀲, 𑀉𑀘𑁆𑀙𑀼𑀢𑁄 𑀔𑀻𑀭𑀲𑁆𑀲 ¶ 𑀓𑀲𑁆𑀫𑀸 𑀉𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸, 𑀢𑀲𑁆𑀫𑀸 𑀦 𑀓𑁄𑀘𑀺 𑀓𑀲𑁆𑀲𑀘𑀺 𑀳𑁂𑀢𑀼 𑀅𑀢𑁆𑀣𑀻𑀢𑀺 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁, 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀳𑁂𑀢𑀼𑀫𑁆𑀳𑀺 𑀦𑀺𑀬𑀢𑀢𑀸𑀬 𑀢𑀺𑀮𑀕𑀸𑀯𑀻𑀲𑀼𑀓𑁆𑀓𑀲𑁄𑀡𑀺𑀢𑀸𑀤𑀻𑀳𑀺 𑀢𑁂𑀮𑀔𑀻𑀭𑀲𑀭𑀻𑀭𑀸𑀤𑀻𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀬𑀢𑀺𑀯𑀸𑀤𑀜𑁆𑀘 𑀉𑀧𑀸𑀤𑀺𑀬𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑁬𑁬𑁧. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀤𑀜𑁆𑀳𑀺 𑀪𑀯𑀘𑀓𑁆𑀓𑀁 𑀅𑀧𑀤𑀸𑀮𑁂𑀢𑁆𑀯𑀸 𑀲𑀁𑀲𑀸𑀭𑀪𑀬𑀫𑀢𑀻𑀢𑁄 𑀦 𑀓𑁄𑀘𑀺 𑀲𑀼𑀧𑀺𑀦𑀦𑁆𑀢𑀭𑁂𑀧𑀺 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀕𑀸𑀥𑀁 𑀅𑀧𑁆𑀧𑀢𑀺𑀝𑁆𑀞𑀁 𑀤𑀼𑀭𑀢𑀺𑀬𑀸𑀦𑀁 𑀤𑀼𑀭𑀢𑀺𑀓𑁆𑀓𑀫𑀁. 𑀅𑀲𑀦𑀺𑀯𑀺𑀘𑀓𑁆𑀓𑀫𑀺𑀯𑀸𑀢𑀺 𑀅𑀲𑀦𑀺𑀫𑀡𑁆𑀟𑀮𑀫𑀺𑀯. 𑀢𑀜𑁆𑀳𑀺 𑀦𑀺𑀫𑁆𑀫𑀣𑀦𑀫𑁂𑀯, 𑀦𑀸𑀦𑀺𑀫𑁆𑀫𑀣𑀦𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀪𑀯𑀘𑀓𑁆𑀓𑀫𑁆𑀧𑀺 𑀏𑀓𑀦𑁆𑀢𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀢𑁄𑀯 ‘‘𑀦𑀺𑀘𑁆𑀘𑀦𑀺𑀫𑁆𑀫𑀣𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀜𑀸𑀡𑀸𑀲𑀺𑀦𑀸 𑀅𑀧𑀤𑀸𑀮𑁂𑀢𑁆𑀯𑀸 𑀲𑀁𑀲𑀸𑀭𑀪𑀬𑀫𑀢𑀻𑀢𑁄 𑀦𑀢𑁆𑀣𑀻𑀢𑀺 𑀏𑀢𑀲𑁆𑀲 𑀲𑀸𑀥𑀓𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀦𑁆𑀢𑀽𑀦𑀁 𑀆𑀓𑀼𑀮𑀓𑀁 𑀢𑀦𑁆𑀢𑀸𑀓𑀼𑀮𑀓𑀁, 𑀢𑀦𑁆𑀢𑀸𑀓𑀼𑀮𑀓𑀫𑀺𑀯 𑀚𑀸𑀢𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸, 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑁂𑀳𑀺 𑀅𑀢𑀺𑀯𑀺𑀬 𑀚𑀝𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀼𑀮𑀺𑀬𑀸 𑀲𑀓𑀼𑀡𑀺𑀬𑀸 𑀦𑀻𑀟𑀁 𑀓𑀼𑀮𑀺𑀓𑀁, 𑀢𑀁 𑀯𑀺𑀬 𑀚𑀸𑀢𑀸 𑀓𑀼𑀮𑀺𑀓𑀼𑀡𑁆𑀟𑀺𑀓𑀚𑀸𑀢𑀸. 𑀫𑀼𑀜𑁆𑀘𑀸 𑀯𑀺𑀬, 𑀧𑀩𑁆𑀩𑀚𑀸 𑀯𑀺𑀬 𑀘 𑀪𑀽𑀢𑀸 𑀚𑀸𑀢𑀸 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸. 𑀢𑀤𑀼𑀪𑀬𑀁 ¶ 𑀓𑀺𑀭 𑀢𑀺𑀡𑀁 𑀆𑀓𑀼𑀮𑀁 𑀚𑀝𑀺𑀢𑀁 𑀳𑀼𑀢𑁆𑀯𑀸 𑀯𑀟𑁆𑀠𑀢𑀺. 𑀯𑀟𑁆𑀠𑀺𑀬𑀸 𑀅𑀪𑀸𑀯𑀢𑁄 𑀅𑀧𑀸𑀬𑀁, 𑀤𑀼𑀓𑁆𑀔𑀕𑀢𑀺𑀪𑀸𑀯𑀢𑁄 𑀤𑀼𑀕𑁆𑀕𑀢𑀺𑀁, 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀜𑁆𑀘, 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀁 ‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀆𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁬𑁭, 𑁯𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭; 𑀘𑀽𑀴𑀦𑀺. 𑀅𑀝𑁆𑀞. 𑁬; 𑀩𑀼. 𑀯𑀁. 𑀅𑀝𑁆𑀞. 𑁨.𑁫𑁮) 𑀯𑀼𑀢𑁆𑀢𑀁 𑀲𑀁𑀲𑀸𑀭𑀜𑁆𑀘 𑀦𑀸𑀢𑀺𑀯𑀢𑁆𑀢𑀢𑀺. 𑀲𑀁𑀲𑀸𑀭𑁄 𑀏𑀯 𑀯𑀸 𑀲𑀩𑁆𑀩𑁄 𑀇𑀥 𑀯𑀟𑁆𑀠𑀺𑀅𑀧𑀕𑀫𑀸𑀤𑀺𑀅𑀢𑁆𑀣𑁂𑀳𑀺 𑀅𑀧𑀸𑀬𑀸𑀤𑀺𑀦𑀸𑀫𑀓𑁄 𑀯𑀼𑀢𑁆𑀢𑁄 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀪𑀸𑀯𑀢𑁄.

𑀧𑀜𑁆𑀜𑀸𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀢𑁆𑀢𑀭𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁮. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀣𑀸𑀯𑀡𑁆𑀡𑀦𑀸

𑁬𑁬𑁨. 𑀬𑀸 ¶ ¶ 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀲𑀼 𑀬𑀣𑀸𑀯𑀺𑀘𑀸𑀭𑀺𑀢𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼. 𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀁 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄, 𑀧𑀭𑀺𑀢𑁄 𑀲𑀩𑁆𑀩𑀣𑀸𑀧𑀺 𑀅𑀢𑁆𑀣𑀲𑁆𑀲 𑀜𑀸𑀢𑀼𑀫𑀺𑀘𑁆𑀙𑀸 𑀧𑀭𑀺𑀧𑀼𑀘𑁆𑀙𑀸, 𑀲𑀯𑀦𑀼𑀧𑀧𑀭𑀺𑀓𑁆𑀔𑀸𑀤𑀺𑀯𑀲𑁂𑀦 𑀢𑀤𑀢𑁆𑀣𑀲𑁆𑀲 𑀫𑀦𑀲𑀺𑀓𑀸𑀭𑀯𑀺𑀥𑀺, 𑀢𑀤𑀼𑀪𑀬𑀯𑀲𑁂𑀦 𑀬𑀲𑁆𑀫𑀸 𑀢𑀢𑁆𑀣𑀧𑀺 𑀜𑀸𑀡𑀁 𑀲𑁆𑀯𑀸𑀲𑁂𑀯𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸’’𑀢𑀺, 𑀔𑀦𑁆𑀥𑀸𑀤𑀻𑀲𑀼 𑀲𑀼𑀢𑀫𑀬𑀁 𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀢𑁆𑀣𑀸𑀭𑀺𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀘𑀸𑀭𑀲𑀫𑀸𑀥𑀺𑀧𑀺 𑀅𑀧𑁆𑀧𑀦𑀸𑀲𑀫𑀸𑀥𑀺 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑁂𑀯𑀸𑀢𑀺 𑀆𑀳 ‘‘𑀲𑀉𑀧𑀘𑀸𑀭𑀸’’𑀢𑀺. 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀢𑀸 𑀧𑀘𑁆𑀘𑀓𑁆𑀔𑀢𑁄 𑀯𑀺𑀤𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀥𑀺𑀕𑀫𑀯𑀲𑁂𑀦 𑀅𑀦𑀼𑀪𑀯𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀓𑁂𑀯𑀮𑁂𑀦 𑀚𑀸𑀦𑀦𑀫𑀢𑁆𑀢𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺, 𑀦 𑀘 𑀢𑀢𑁆𑀣 𑀅𑀧𑀢𑀺𑀝𑁆𑀞𑀸𑀬 𑀉𑀧𑀭𑀺𑀯𑀺𑀲𑀼𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑀸𑀢𑀺.

𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀦𑁆𑀢𑀺 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲 𑀘 𑀯𑀺𑀪𑀚𑁆𑀚 𑀬𑀣𑀸𑀪𑀽𑀢𑀲𑀪𑀸𑀯𑀤𑀲𑁆𑀲𑀦𑀁. 𑀦𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀯𑁂𑀤𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀢𑁂𑀪𑀽𑀫𑀓𑀸𑀦𑀁 𑀔𑀦𑁆𑀥𑀸𑀦𑀁 𑀕𑀳𑀡𑀁, 𑀦 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀯𑀺𑀜𑁆𑀜𑀸𑀡𑀁 𑀯𑀺𑀦𑀸, 𑀦𑀸𑀧𑀺 ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁪, 𑁩𑁫𑁨; 𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁦𑁯) 𑀏𑀢𑁆𑀣 𑀯𑀺𑀬 𑀲𑀦𑀺𑀩𑁆𑀩𑀸𑀦𑁂𑀳𑀺 𑀮𑁄𑀓𑀼𑀢𑁆𑀢𑀭𑀓𑁆𑀔𑀦𑁆𑀥𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁬𑁩. 𑀬𑀸𑀢𑀺 𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀬𑀸𑀦𑀁, 𑀲𑀫𑀣𑁄𑀯 𑀬𑀸𑀦𑀁 𑀲𑀫𑀣𑀬𑀸𑀦𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑀣𑀬𑀸𑀦𑀺𑀓𑁄. 𑀛𑀸𑀦𑁂, 𑀛𑀸𑀦𑀽𑀧𑀘𑀸𑀭𑁂 𑀯𑀸 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲𑁂𑀢𑀁 𑀦𑀸𑀫𑀁, 𑀢𑁂𑀦 𑀲𑀫𑀣𑀬𑀸𑀦𑀺𑀓𑁂𑀦 ¶ . ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀇𑀤𑀁 𑀪𑀯𑀕𑁆𑀕𑀥𑀫𑁆𑀫𑀸𑀦𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀤𑀼𑀧𑁆𑀧𑀭𑀺𑀕𑁆𑀕𑀳𑀢𑀸𑀬 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀭𑀲𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀩𑁆𑀩𑀸, 𑀧𑀭𑀺𑀕𑁆𑀕𑀳𑀯𑀺𑀥𑀺 𑀧𑀦 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁨𑁧 𑀆𑀤𑀬𑁄) 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀫𑀦𑀁 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀺, 𑀢𑁂𑀦 𑀦𑀫𑀦𑀝𑁆𑀞𑁂𑀦, 𑀦𑀸𑀫𑀓𑀭𑀡𑀝𑁆𑀞𑁂𑀦 ¶ 𑀯𑀸. 𑀯𑁂𑀤𑀦𑀸𑀤𑀬𑁄 𑀳𑀺 𑀅𑀭𑀽𑀧𑀥𑀫𑁆𑀫𑀸 𑀲𑀩𑁆𑀩𑀤𑀸𑀧𑀺 𑀘 𑀨𑀲𑁆𑀲𑀸𑀤𑀺𑀦𑀸𑀫𑀓𑀢𑁆𑀢𑀸 𑀧𑀣𑀯𑀻𑀆𑀤𑀬𑁄 𑀯𑀺𑀬 𑀓𑁂𑀲𑀓𑀼𑀫𑁆𑀪𑀸𑀤𑀺𑀦𑀸𑀫𑀦𑁆𑀢𑀭𑀸𑀦𑀸𑀧𑀚𑁆𑀚𑀦𑀢𑁄 𑀅𑀢𑁆𑀢𑀦𑀸𑀯 𑀓𑀢𑀦𑀸𑀫𑀢𑀸𑀬 𑀦𑀸𑀫𑀓𑀭𑀡𑀝𑁆𑀞𑁂𑀦 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬 𑀅𑀥𑀺𑀯𑀘𑀦𑀁 𑀦𑀸𑀫𑀁 𑀅𑀦𑁆𑀢𑀭𑁂𑀦 𑀅𑀦𑀼𑀧𑀘𑀺𑀢𑀲𑀫𑁆𑀪𑀸𑀭𑀸𑀦𑀁 𑀕𑀳𑀡𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀫𑀸𑀬𑀢𑁆𑀢𑀕𑁆𑀕𑀳𑀡𑀢𑀸𑀬 𑀯𑁂𑀤𑀦𑀸𑀤𑀬𑁄 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀭𑀽𑀧𑀁 𑀧𑀦 𑀯𑀺𑀦𑀸𑀧𑀺 𑀦𑀸𑀫𑀲𑀯𑀦𑀁 𑀅𑀢𑁆𑀢𑀦𑁄 𑀭𑀼𑀧𑁆𑀧𑀦𑀲𑀪𑀸𑀯𑁂𑀦𑁂𑀯 𑀕𑀳𑀡𑀁 𑀕𑀘𑁆𑀙𑀢𑀺. 𑀯𑀯𑀢𑁆𑀣𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀲𑀗𑁆𑀓𑀭𑀢𑁄 𑀞𑀧𑁂𑀢𑀩𑁆𑀩𑀁, 𑀅𑀜𑁆𑀜𑀫𑀜𑁆𑀜𑀁, 𑀭𑀽𑀧𑁂𑀦 𑀘 𑀅𑀫𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄 𑀘 𑀦𑀸𑀫 𑀬𑀸𑀯𑀤𑁂𑀯 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀢𑁆𑀣𑀦𑁆𑀢𑀺 𑀢𑀤𑀦𑀼𑀭𑀽𑀧𑀫𑁂𑀯 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀭𑀼𑀧𑁆𑀧𑀦𑀢𑁄𑀢𑀺 𑀏𑀢𑁆𑀣 𑀭𑀼𑀧𑁆𑀧𑀦𑀝𑁆𑀞𑁄 ‘‘𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁪𑁩𑁨) 𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀏𑀯𑀁 𑀯𑀺𑀲𑀼𑀁 𑀦𑀸𑀫𑀧𑀭𑀺𑀕𑁆𑀕𑀳𑀁, 𑀭𑀽𑀧𑀧𑀭𑀺𑀕𑁆𑀕𑀳𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀓𑀚𑁆𑀛𑀁 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀦𑀫𑀦𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁬𑁪. 𑀇𑀢𑀺 𑀅𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀣𑀬𑀸𑀦𑀺𑀓𑀲𑁆𑀲 𑀲𑀫𑀣𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄, 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 𑀧𑀦 𑀲𑀫𑀣𑀁 𑀅𑀦𑀺𑀲𑁆𑀲𑀸𑀬𑀸𑀢𑀺 𑀆𑀳 ‘‘𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄’’𑀢𑀺, 𑀲𑀫𑀣𑀪𑀸𑀯𑀦𑀸𑀬 𑀅𑀫𑀺𑀲𑁆𑀲𑀺𑀢𑀯𑀺𑀧𑀲𑁆𑀲𑀦𑀸𑀬𑀸𑀦𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀲𑀫𑀣𑀬𑀸𑀦𑀺𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀲𑀫𑀣𑀬𑀸𑀦𑀺𑀓𑁄 𑀏𑀯 𑀯𑀸. 𑀢𑁂𑀦 𑀲𑀫𑀣𑀬𑀸𑀦𑀺𑀓𑀲𑁆𑀲𑀸𑀧𑀺 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀮𑀩𑁆𑀪𑀢𑀺, 𑀦 𑀅𑀭𑀽𑀧𑀫𑀼𑀔𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀦𑁆𑀢𑀺 ‘‘𑀬𑀁 𑀣𑀤𑁆𑀥𑀮𑀓𑁆𑀔𑀡𑀁, 𑀅𑀬𑀁 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁮) 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀢𑁂𑀭𑀲𑀲𑀼 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑁂𑀲𑀼. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀦𑀸𑀫 𑀓𑁂𑀲𑁄 𑀘𑀫𑁆𑀫𑀩𑁆𑀪𑀦𑁆𑀢𑀭𑀕𑀢𑁄. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀓𑁂𑀲𑁂. 𑀓𑀸𑀬𑀧𑁆𑀧𑀲𑀸𑀤𑀲𑁆𑀲 𑀯𑀺𑀬 𑀪𑀸𑀯𑀲𑁆𑀲𑀸𑀧𑀺 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀺𑀢𑀸𑀬 ‘‘𑀪𑀸𑀯𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑁂𑀲𑀲𑀜𑁆𑀜𑀺𑀢𑁂 𑀭𑀽𑀧𑀲𑀫𑀼𑀤𑀸𑀬𑁂. 𑀅𑀧𑀭𑀸𑀦𑀺𑀧𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀻𑀲𑀢𑀺, 𑀇𑀫𑀸𑀦𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑀼𑀯𑀻𑀲𑀢𑀺 ¶ 𑀭𑀽𑀧𑀸𑀦𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀘𑀢𑀼𑀘𑀢𑁆𑀢𑀸𑀮𑀻𑀲, 𑀢𑀜𑁆𑀘 ¶ 𑀔𑁄 𑀢𑀢𑁆𑀣 𑀮𑀩𑁆𑀪𑀫𑀸𑀦𑀲𑀦𑁆𑀢𑀢𑀺𑀲𑀻𑀲𑀲𑀸𑀫𑀜𑁆𑀜𑁂𑀦 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀢𑀼𑀘𑀢𑁆𑀢𑀸𑀮𑀻𑀲𑀸’’𑀢𑀺 𑀘 𑀇𑀤𑀁 𑀲𑀤𑁆𑀤𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀲𑀩𑁆𑀩𑀓𑀸𑀮𑀁 𑀉𑀢𑀼𑀘𑀺𑀢𑁆𑀢𑀢𑁄 𑀭𑀽𑀧𑀁 𑀉𑀧𑁆𑀧𑀚𑁆𑀚𑀦𑁆𑀢𑀁 𑀲𑀲𑀤𑁆𑀤𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀓𑁂𑀲𑁂, 𑀏𑀯𑀁 𑀮𑁄𑀫𑀸𑀤𑀻𑀲𑀼 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑁂𑀲𑀼. 𑀘𑀢𑀼𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼 𑀯𑀓𑁆𑀔𑀫𑀸𑀦𑁂 𑀅𑀝𑁆𑀞 𑀓𑁄𑀝𑁆𑀞𑀸𑀲𑁂 𑀅𑀧𑀦𑁂𑀢𑁆𑀯𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂𑀲𑀼. 𑀲𑁂𑀤𑀸𑀤𑀻𑀦𑀁 𑀆𑀢𑀧𑀽𑀧𑀢𑀸𑀧𑀸𑀤𑀺𑀦𑀸, 𑀘𑀺𑀢𑁆𑀢𑀯𑀺𑀓𑀸𑀭𑁂𑀦 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀢𑁂 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀼𑀢𑁆𑀢𑀸.

𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀕𑀢𑁂𑀲𑀼 𑀭𑀽𑀧𑁂𑀲𑀼 𑀧𑀸𑀓𑀝𑁂𑀲𑀼 𑀚𑀸𑀢𑁂𑀲𑀼 𑀢𑀤𑀜𑁆𑀜𑀸𑀦𑀺𑀧𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀭𑁂 𑀤𑀲 𑀆𑀓𑀸𑀭𑀸𑀢𑀺 𑀢𑁂𑀚𑁄𑀯𑀸𑀬𑁄𑀓𑁄𑀝𑁆𑀞𑀸𑀲𑀯𑀲𑁂𑀦 𑀅𑀧𑀭𑁂 𑀤𑀲 𑀆𑀓𑀸𑀭𑀸. 𑀓𑀫𑁆𑀫𑀚𑁂𑀢𑀺 𑀪𑀽𑀢𑀓𑀣𑀦𑀁, 𑀦 𑀯𑀺𑀲𑁂𑀲𑀦𑀁 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑀲𑁆𑀲 𑀢𑁂𑀚𑀲𑁆𑀲 𑀅𑀓𑀫𑁆𑀫𑀚𑀲𑁆𑀲 𑀅𑀪𑀸𑀯𑀢𑁄. 𑀢𑀣𑀸 𑀘𑀺𑀢𑁆𑀢𑀚𑁂𑀢𑀺 𑀘 𑀏𑀓𑀦𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀦𑁆𑀢𑀺 𑀓𑁂𑀘𑀺, 𑀢𑀁 𑀦, 𑀅𑀘𑀺𑀢𑁆𑀢𑀚𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀁 𑀉𑀢𑀼𑀚𑀪𑀸𑀯𑀢𑁄. 𑀅𑀩𑁆𑀪𑀦𑁆𑀢𑀭𑀝𑁆𑀞𑀸 𑀏𑀯 𑀳𑀺 𑀢𑁂 𑀘𑀺𑀢𑁆𑀢𑀚𑀸, 𑀦 𑀩𑀳𑀺𑀤𑁆𑀥𑀸, 𑀢𑀲𑁆𑀫𑀸 𑀢𑀢𑁆𑀣 ‘‘𑀘𑀺𑀢𑁆𑀢𑀚𑁂’’𑀢𑀺 𑀇𑀤𑀁 𑀯𑀺𑀲𑁂𑀲𑀦𑀫𑁂𑀯, 𑀅𑀬𑀜𑁆𑀘 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀆𑀦𑀸𑀧𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀲𑁂𑀲𑁂𑀲𑀽𑀢𑀺 𑀲𑀦𑁆𑀢𑀧𑁆𑀧𑀦𑀸𑀤𑀺𑀯𑀲𑁂𑀦 𑀘𑁂𑀯 𑀉𑀤𑁆𑀥𑀗𑁆𑀕𑀫𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑁂𑀲𑀼 𑀢𑁂𑀚𑁄𑀯𑀸𑀬𑁄𑀓𑁄𑀝𑁆𑀞𑀸𑀲𑁂𑀲𑀼.

𑀘𑀓𑁆𑀔𑀼𑀤𑀲𑀓𑀸𑀤𑀻𑀲𑀼 𑀧𑀥𑀸𑀦𑀭𑀽𑀧𑀁 𑀘𑀓𑁆𑀔𑀸𑀤𑀬𑁄𑀢𑀺 𑀢𑁂𑀲𑀼 𑀮𑀩𑁆𑀪𑀫𑀸𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀅𑀯𑀬𑀯𑀓𑀺𑀘𑁆𑀘𑀁 𑀲𑀫𑀼𑀤𑀸𑀬𑁂 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀤𑁆𑀯𑀸𑀭𑀯𑀲𑁂𑀦 𑀧𑀜𑁆𑀘 𑀘𑀓𑁆𑀔𑀼𑀤𑀲𑀓𑀸𑀤𑀬𑁄’’𑀢𑀺. 𑀯𑀢𑁆𑀣𑀼𑀯𑀲𑁂𑀦 𑀳𑀤𑀬𑀯𑀢𑁆𑀣𑀼𑀤𑀲𑀓𑀜𑁆𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀸𑀦𑀫𑁆𑀧𑀺 𑀏𑀓𑀤𑁂𑀲𑁄 𑀅𑀦𑀼𑀯𑀢𑁆𑀢𑀢𑀻𑀢𑀺. 𑀲𑀩𑁆𑀩𑀸𑀦𑀺𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀕𑀡𑀦𑀸𑀬𑀁 𑀘𑀢𑀼𑀦𑁆𑀦𑀯𑀼𑀢𑀺𑀘𑀢𑀼𑀲𑀢𑀸𑀥𑀺𑀓𑀸𑀦𑀺 𑀲𑀳𑀲𑁆𑀲𑀭𑀽𑀧𑀭𑀽𑀧𑀸𑀦𑀺. 𑀓𑁄𑀝𑁆𑀞𑀸𑀲𑀸𑀯𑀬𑀯𑀸𑀦𑀁 𑀧𑀦 𑀢𑀤𑀯𑀬𑀯𑀓𑀮𑀸𑀧𑀸𑀦𑀜𑁆𑀘 𑀪𑁂𑀤𑁂 𑀕𑀬𑁆𑀳𑀫𑀸𑀦𑁂 𑀅𑀢𑀺𑀯𑀺𑀬 𑀢𑀢𑁄 𑀩𑀳𑀼𑀢𑀭𑁄 𑀭𑀽𑀧𑀪𑁂𑀤𑁄 𑀳𑁄𑀢𑀺, 𑀲𑁄 𑀧𑀦 𑀪𑁂𑀤𑁄 𑀇𑀥 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀤𑀼𑀧𑁆𑀧𑀭𑀺𑀕𑁆𑀕𑀳𑁄𑀢𑀺 𑀦 𑀕𑀳𑁂𑀢𑀩𑁆𑀩𑁄.

𑀓𑀸𑀫𑀁 𑀯𑀢𑁆𑀣𑀼𑀯𑀲𑁂𑀦𑀸𑀧𑀺 𑀅𑀭𑀽𑀧𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀯𑀲𑁂𑀦 𑀧𑀦 𑀧𑀭𑀺𑀕𑁆𑀕𑀳𑁄 𑀅𑀦𑀸𑀓𑀼𑀮𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀭𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺 ¶ . 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 ‘‘𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀮𑀸𑀪𑀺𑀦𑁄 𑀏𑀯 𑀧𑀦 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀺 𑀲𑀼𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀲𑀸𑀥𑀸𑀭𑀡𑀢𑁄. 𑀨𑀲𑁆𑀲𑀸𑀤𑀬𑁄 𑀳𑀺 𑀲𑀢𑁆𑀢 𑀘𑁂𑀢𑀲𑀺𑀓𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺𑀧𑀺 𑀉𑀧𑁆𑀧𑀚𑁆𑀚𑀦𑀢𑁄 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀧𑀺 𑀢𑁂𑀢𑀺 𑀏𑀓𑀸𑀲𑀻𑀢𑀺 𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀤𑀬𑁄𑀢𑀺 ¶ 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀽𑀧𑀥𑀫𑁆𑀫𑁂. 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑁂𑀦 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑁂𑀤𑁂 𑀕𑀬𑁆𑀳𑀫𑀸𑀦𑁂 𑀢𑀢𑁄 𑀩𑀳𑀼𑀢𑀭𑁄 𑀏𑀯 𑀳𑁄𑀢𑀺, 𑀲𑁄 𑀧𑀦 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄.

𑁬𑁬𑁫. 𑀅𑀲𑁆𑀲 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀧𑀦 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀳𑀚𑀸𑀢𑀭𑀽𑀧𑀸𑀦𑀺 𑀢𑀲𑁆𑀲 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀇𑀘𑁆𑀘𑁂𑀯 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀧𑀤𑁂𑀲𑁂. 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑀸𑀦𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀭𑀽𑀧𑀸𑀦𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀓𑀫𑁆𑀫𑀚𑀭𑀽𑀧𑀸𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀻𑀢𑀺 𑀧𑀞𑀫𑀁 𑀘𑀓𑁆𑀔𑀼𑀦𑁄 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀲𑁂𑀲𑀸𑀦𑀺, 𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀘𑀢𑀼𑀧𑀜𑁆𑀜𑀸𑀲 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀤𑀲𑀓𑀸𑀤𑀻𑀲𑀼 𑀏𑀓𑀲𑁆𑀲𑀧𑀺 𑀅𑀕𑁆𑀕𑀳𑁂𑀢𑀩𑁆𑀩𑀢𑁄 ‘‘𑀅𑀯𑀲𑁂𑀲𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀤𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀢𑁂𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂 𑀤𑁆𑀯𑁂 𑀲𑀤𑁆𑀤𑁂 𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸’’𑀢𑀺 𑀓𑁂𑀘𑀺𑀯𑀸𑀤𑁄 𑀤𑀲𑁆𑀲𑀺𑀢𑁄.

𑀅𑀯𑀲𑁂𑀲𑀭𑀽𑀧𑀸𑀦𑀻𑀢𑀺 ‘‘𑀤𑀲 𑀥𑀸𑀢𑀼𑀬𑁄’’𑀢𑀺 𑀯𑀼𑀢𑁆𑀢𑁂 𑀤𑁆𑀯𑀸𑀤𑀲 𑀭𑀽𑀧𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀙 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺. 𑀭𑀽𑀧𑀭𑀽𑀧𑀸𑀦𑁂𑀯 𑀳𑀺 𑀇𑀥 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺, 𑀦 𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀮𑀓𑁆𑀔𑀡𑀸𑀦𑀺. 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀬𑀭𑀽𑀧𑀸𑀭𑀫𑁆𑀫𑀡𑀪𑀸𑀯𑀲𑀸𑀫𑀜𑁆𑀜𑁂𑀦, 𑀘𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀘 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀢𑀸𑀬 𑀤𑀼𑀯𑀺𑀥𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 ‘‘𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀜𑁆𑀘 ‘‘𑀲𑁄𑀢𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀢𑁆𑀣𑀧𑀺 ‘‘𑀏𑀓𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺. 𑀅𑀟𑁆𑀠𑁂𑀦 𑀏𑀓𑀸𑀤𑀲 𑀅𑀟𑁆𑀠𑁂𑀓𑀸𑀤𑀲, 𑀅𑀟𑁆𑀠𑀁 𑀯𑀸 𑀏𑀓𑀸𑀤𑀲𑀫𑀁 𑀏𑀢𑀸𑀲𑀦𑁆𑀢𑀺 𑀅𑀟𑁆𑀠𑁂𑀓𑀸𑀤𑀲. 𑀅𑀟𑁆𑀠𑀝𑁆𑀞𑀫𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁬𑁬𑁬. 𑀘𑀓𑁆𑀔𑀼𑀥𑀸𑀢𑀼𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀬𑀁 𑀮𑁄𑀓𑁄 𑀲𑁂𑀢𑀓𑀡𑁆𑀳𑀫𑀡𑁆𑀟𑀮𑀯𑀺𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁬𑁫) 𑀯𑀼𑀢𑁆𑀢𑀦𑀬𑁂𑀦.

𑁬𑁬𑁭. 𑀇𑀥 𑀪𑀺𑀓𑁆𑀔𑀼 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂𑀢𑀺 𑀅𑀚𑁆𑀛𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀏𑀓𑀲𑁆𑀲𑁂𑀯 𑀪𑀸𑀯𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀲𑀢𑁆𑀢𑀭𑀲 ¶ 𑀭𑀽𑀧𑀸𑀦𑀺 𑀲𑀫𑁆𑀫𑀲𑀦𑀼𑀧𑀕𑀸𑀦𑀻’’𑀢𑀺 𑀆𑀳. 𑀲𑀫𑁆𑀫𑀲𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺 𑀲𑀫𑁆𑀫𑀲𑀦𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀫𑀲𑀦𑀼𑀧𑀕𑀸𑀦𑀺, 𑀲𑀫𑁆𑀫𑀲𑀦𑀻𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀆𑀓𑀸𑀭-𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀯𑀺𑀓𑀸𑀭-𑀕𑁆𑀕𑀳𑀡𑁂𑀦 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀇𑀢𑀭𑁂𑀦 𑀆𑀓𑀸𑀲𑀥𑀸𑀢𑀽𑀢𑀺 𑀯𑀤𑀦𑁆𑀢𑀺. 𑀆𑀓𑀸𑀭-𑀕𑁆𑀕𑀳𑀡𑁂𑀦 𑀧𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑁂𑀦 𑀲𑀤𑁆𑀥𑀺𑀁 𑀮𑀓𑁆𑀔𑀡𑀭𑀽𑀧𑀫𑀸𑀳. 𑀢𑀫𑁆𑀧𑀺 𑀳𑀺 𑀭𑀽𑀧𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀤𑀺𑀆𑀓𑀸𑀭𑀫𑀢𑁆𑀢𑀦𑁆𑀢𑀺. 𑀅𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄𑀢𑀺 𑀢𑀁𑀢𑀁𑀓𑀮𑀸𑀧𑀸𑀦𑀁 𑀅𑀲𑀗𑁆𑀓𑀭𑀓𑀸𑀭𑀡𑀢𑀸𑀬 𑀅𑀦𑁆𑀢𑀭𑀪𑀽𑀢𑁄 𑀧𑀭𑀺𑀘𑁆𑀙𑁂𑀤𑁄 ¶ . 𑀬𑀤𑀺 𑀦 𑀲𑀫𑁆𑀫𑀲𑀦𑀼𑀧𑀕𑀸𑀦𑀺, 𑀆𑀓𑀸𑀭𑀸𑀤𑀺𑀫𑀢𑁆𑀢𑀸𑀦𑀺 𑀘, 𑀓𑀣𑀁 𑀭𑀽𑀧𑀸𑀦𑀻𑀢𑀺 𑀆𑀳 ‘‘𑀅𑀧𑀺𑀘 𑀔𑁄’’𑀢𑀺𑀆𑀤𑀺.

𑁬𑁬𑁮. 𑀏𑀯𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀭𑀽𑀧𑀧𑀭𑀺𑀕𑁆𑀕𑀳𑀁 𑀢𑀤𑀦𑀼𑀲𑀸𑀭𑁂𑀦 𑀯𑀺𑀢𑁆𑀣𑀸𑀭𑀢𑁄 𑀏𑀯 𑀦𑀸𑀫𑀧𑀭𑀺𑀕𑁆𑀕𑀳𑀁 𑀯𑀺𑀪𑀸𑀯𑁂𑀢𑁆𑀯𑀸 𑀢𑀢𑁄 𑀲𑀁𑀔𑀺𑀢𑁆𑀢𑀲𑀁𑀔𑀺𑀢𑁆𑀢𑀢𑀭𑀲𑀁𑀔𑀺𑀢𑁆𑀢𑀢𑀫𑀯𑀲𑁂𑀦, 𑀅𑀝𑁆𑀞𑀸𑀭𑀲𑀥𑀸𑀢𑀼𑀯𑀲𑁂𑀦, 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦, 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀘 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑀺𑀲𑀁𑀔𑀺𑀢𑁆𑀢𑀦𑀬𑁂𑀦𑀸𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀣𑀸 𑀘 𑀥𑀸𑀢𑀼𑀆𑀤𑀺𑀯𑀲𑁂𑀦, 𑀏𑀯𑀁 𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦𑀧𑀺 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀢𑀸𑀯 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀢𑀺 𑀲𑀢𑁆𑀢 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀁, 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀘 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀘𑀸𑀢𑀺 𑀏𑀓𑀸𑀤𑀲 𑀦𑀸𑀫𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸𑀦𑀺 𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫𑀁, 𑀇𑀢𑀭𑀸𑀦𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺 𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀧𑀘𑁆𑀘𑀬𑀸𑀓𑀸𑀭𑁂 𑀆𑀤𑀺𑀢𑁄 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀦𑀸𑀫𑀁, 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀸𑀦𑀺 𑀦𑀸𑀫𑀁, 𑀤𑀲𑀫𑀁 𑀦𑀸𑀫𑀜𑁆𑀘𑁂𑀯 𑀦𑀸𑀫𑀭𑀽𑀧𑀜𑁆𑀘, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀧𑀘𑁆𑀘𑁂𑀓𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦𑀧𑀺 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀏𑀯𑀁 𑀧𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀯𑀺𑀪𑀸𑀕𑁂𑀦 𑀓𑀣𑀦𑁂 𑀧𑀬𑁄𑀚𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁬𑁬𑁯. 𑀓𑀸𑀫𑀁 𑀯𑁂𑀤𑀦𑀸𑀤𑀻𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀦 𑀉𑀢𑁆𑀢𑀭𑀼𑀢𑁆𑀢𑀭𑀸 𑀯𑀺𑀬 𑀧𑀼𑀭𑀺𑀫𑀧𑀼𑀭𑀺𑀫𑀸 𑀲𑀼𑀔𑀼𑀫𑀸, 𑀢𑀣𑀸𑀧𑀺 𑀲𑀗𑁆𑀖𑀝𑁆𑀝𑀦𑁂𑀦 𑀯𑀺𑀓𑀸𑀭𑀆𑀧𑀚𑁆𑀚𑀦𑀓𑁂 𑀭𑀽𑀧𑀥𑀫𑁆𑀫𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀧𑀺 𑀢𑁂 𑀲𑀼𑀔𑀼𑀫𑀸 𑀏𑀯𑀸𑀢𑀺 𑀆𑀳 ‘‘𑀲𑀼𑀔𑀼𑀫𑀢𑁆𑀢𑀸 𑀅𑀭𑀽𑀧𑀁 𑀦 𑀉𑀧𑀝𑁆𑀞𑀸𑀢𑀻’’𑀢𑀺. 𑀲𑀫𑁆𑀫𑀲𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀫𑀤𑁂𑀯 𑀮𑀓𑁆𑀔𑀡𑀸𑀤𑀺𑀢𑁄 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺 𑀢𑀣𑀸 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑀁. 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀩𑁆𑀩𑀁. 𑀯𑀯𑀢𑁆𑀣𑀧𑁂𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄 ¶ . 𑀲𑀼𑀯𑀺𑀓𑁆𑀔𑀸𑀮𑀺𑀢𑀦𑁆𑀢𑀺 𑀲𑀼𑀯𑀺𑀲𑁄𑀥𑀺𑀢𑀁. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯 𑀥𑀫𑁆𑀫𑀸 𑀲𑀼𑀧𑀭𑀺𑀩𑁆𑀬𑀢𑁆𑀢𑀁 𑀦 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀢𑁂 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀩𑀮𑁂𑀦 𑀅𑀪𑀺𑀪𑀽𑀢𑀸 𑀅𑀯𑀺𑀲𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀲𑀗𑁆𑀓𑀭𑀢𑁄 𑀉𑀧𑀝𑁆𑀞𑀸𑀦𑀸𑀪𑀸𑀯𑀢𑁄 𑀅𑀜𑁆𑀜𑀫𑀜𑁆𑀜𑀜𑁆𑀘 𑀚𑀝𑀺𑀢𑀸. 𑀬𑀤𑀸 𑀧𑀦 𑀲𑀫𑁆𑀫𑀲𑀦𑀸𑀤𑀺𑀯𑀺𑀥𑀺𑀦𑀸 𑀢𑀁 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀤𑀸 𑀢𑁂 𑀲𑀼𑀯𑀺𑀓𑁆𑀔𑀸𑀮𑀺𑀢𑀸, 𑀦𑀺𑀚𑁆𑀚𑀝𑀸 𑀘 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀬𑀣𑀸 𑀳𑀻’’𑀢𑀺𑀆𑀤𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀭𑀽𑀧𑀥𑀫𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀭𑀽𑀧𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀦𑀸𑀓𑀸𑀭𑁂𑀦 ¶ 𑀕𑀳𑀡𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀤𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸’’𑀢𑀺. 𑀢𑁂𑀦𑁂𑀯 𑀳𑀺 𑀳𑁂𑀝𑁆𑀞𑀸 ‘‘𑀢𑀲𑁆𑀲𑁂𑀯𑀁 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀲𑁆𑀲 𑀤𑁆𑀯𑀸𑀭𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀯𑀢𑁆𑀣𑀼𑀯𑀲𑁂𑀦𑀸𑀢𑀺.

𑀇𑀤𑀸𑀦𑀺 𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀉𑀧𑀸𑀬𑁄, 𑀉𑀧𑀢𑁆𑀣𑀫𑁆𑀪𑁄 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀳𑀺 𑀧𑀓𑀸𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀫𑀼𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀁. 𑀢𑀢𑁆𑀭𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑁋 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀢𑀲𑁆𑀲 𑀘𑀓𑁆𑀔𑀼 𑀯𑀺𑀬 𑀬𑁄𑀕𑀺𑀦𑁄 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀸𑀳𑀓𑀜𑀸𑀡𑀁, 𑀆𑀤𑀸𑀲𑀁 𑀯𑀺𑀬 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀅𑀭𑀽𑀧𑀧𑀭𑀺𑀕𑁆𑀕𑀳𑁄, 𑀆𑀤𑀸𑀲𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀓𑀸𑀮𑁄 𑀯𑀺𑀬 𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀅𑀯𑀺𑀓𑁆𑀔𑀸𑀮𑀺𑀢𑀓𑀸𑀮𑁄, 𑀢𑀤𑀸 𑀫𑀼𑀔𑀦𑀺𑀫𑀺𑀢𑁆𑀢𑀲𑁆𑀲 𑀅𑀧𑀜𑁆𑀜𑀸𑀬𑀦𑀁 𑀯𑀺𑀬 𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀅𑀯𑀺𑀲𑀼𑀤𑁆𑀥𑀢𑀸𑀬 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀼𑀧𑀝𑁆𑀞𑀸𑀦𑀁, 𑀆𑀤𑀸𑀲𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀦𑀁 𑀯𑀺𑀬 𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁄𑀥𑀦𑀁, 𑀲𑀼𑀧𑀭𑀺𑀫𑀚𑁆𑀚𑀺𑀢𑁂 𑀆𑀤𑀸𑀲𑁂 𑀲𑀼𑀩𑁆𑀬𑀢𑁆𑀢𑀁 𑀫𑀼𑀔𑀦𑀺𑀫𑀺𑀢𑁆𑀢𑀲𑁆𑀲 𑀧𑀜𑁆𑀜𑀸𑀬𑀦𑀁 𑀯𑀺𑀬 𑀲𑀼𑀯𑀺𑀓𑁆𑀔𑀸𑀮𑀺𑀢𑁂 𑀦𑀺𑀚𑁆𑀚𑀝𑁂 𑀭𑀽𑀧𑀧𑀭𑀺𑀕𑁆𑀕𑀳𑁂 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀼𑀝𑁆𑀞𑀼 𑀉𑀧𑀝𑁆𑀞𑀸𑀦𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀢𑁂𑀮𑀢𑁆𑀣𑀺𑀓𑁄𑀧𑀫𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀮𑀧𑀺𑀝𑁆𑀞𑀦𑁆𑀢𑀺 𑀢𑀺𑀮𑀘𑀼𑀡𑁆𑀡𑀁. 𑀓𑀢𑀓𑀝𑁆𑀞𑀺𑀦𑁆𑀢𑀺 𑀓𑀢𑀓𑀩𑀻𑀚𑀁. 𑀓𑀮𑀮𑀓𑀤𑁆𑀤𑀫𑀦𑁆𑀢𑀺 𑀢𑀦𑀼𑀓𑀤𑁆𑀤𑀫𑀁.

𑀢𑀧𑁆𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸𑀢𑀺 𑀢𑀲𑁆𑀲 𑀅𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀜𑀸𑀡𑀲𑁆𑀲 𑀯𑀺𑀩𑀦𑁆𑀥𑀪𑀸𑀯𑁂𑀦 𑀧𑀝𑀺𑀧𑀓𑁆𑀔𑀪𑀽𑀢𑀸 𑀲𑀫𑁆𑀫𑁄𑀳𑀸𑀤𑀺𑀓𑀺𑀮𑁂𑀲𑀸. 𑀉𑀘𑁆𑀙𑀼𑀆𑀤𑀺𑀉𑀧𑀫𑀸𑀲𑀼 𑀇𑀤𑀁 𑀫𑀼𑀔𑀫𑀢𑁆𑀢𑀲𑁆𑀲 𑀤𑀲𑁆𑀲𑀦𑀁 𑁋 𑀬𑀣𑀸 𑀉𑀘𑁆𑀙𑀼𑀭𑀲𑀁 𑀕𑀳𑁂𑀢𑀼𑀓𑀸𑀫𑁄 𑀉𑀘𑁆𑀙𑀽𑀦𑀺 𑀉𑀘𑁆𑀙𑀼𑀬𑀦𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀯𑀸𑀭𑀁 𑀤𑁆𑀯𑀺𑀯𑀸𑀭𑀁 𑀬𑀦𑁆𑀢𑀓𑁆𑀓𑀫𑀦𑀫𑀢𑁆𑀢𑁂𑀦 𑀉𑀘𑁆𑀙𑀼𑀭𑀲𑁂 𑀅𑀦𑀺𑀓𑁆𑀔𑀫𑀦𑁆𑀢𑁂 𑀦 𑀉𑀘𑁆𑀙𑀽𑀦𑀺 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀬𑀣𑀸 𑀯𑀸 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀢𑁂𑀳𑀺 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑀼𑀓𑀸𑀫𑁄 𑀤𑁆𑀯𑀢𑁆𑀢𑀺𑀧𑁆𑀧𑀳𑀸𑀭𑀫𑀢𑁆𑀢𑁂𑀦 𑀢𑁂𑀲𑀼 𑀢𑀫𑀢𑁆𑀣𑀁 𑀅𑀓𑀣𑁂𑀦𑁆𑀢𑁂𑀲𑀼 𑀦 𑀢𑁂 𑀫𑀼𑀜𑁆𑀘𑀢𑀺, 𑀬𑀣𑀸 𑀯𑀸 𑀧𑀦 𑀕𑁄𑀤𑀫𑁆𑀫𑀓𑁄 𑀕𑁄𑀡𑀁 𑀤𑀫𑁂𑀢𑀼𑀓𑀸𑀫𑁄 𑀥𑀼𑀭𑁂 𑀢𑀁 𑀬𑁄𑀚𑁂𑀢𑁆𑀯𑀸 𑀏𑀓𑀯𑀸𑀭𑀁 𑀤𑁆𑀯𑀺𑀯𑀸𑀭𑀁 𑀢𑀲𑁆𑀫𑀺𑀁 𑀧𑀣𑁂𑀦 𑀅𑀕𑀘𑁆𑀙𑀦𑁆𑀢𑁂 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀬𑀣𑀸 ¶ 𑀘 𑀤𑀥𑀺𑀁 𑀫𑀦𑁆𑀣𑁂𑀢𑁆𑀯𑀸 𑀦𑀯𑀦𑀻𑀢𑀁 𑀕𑀳𑁂𑀢𑀼𑀓𑀸𑀫𑁄 𑀤𑀥𑀺𑀓𑀮𑀲𑀺𑀬𑀁 𑀫𑀦𑁆𑀣𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀓𑀺𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀫𑀦𑁆𑀣𑀲𑁆𑀲 𑀪𑀫𑀦𑀫𑀢𑁆𑀢𑁂𑀦 𑀦𑀯𑀦𑀻𑀢𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀦 𑀤𑀥𑀺𑀁 𑀙𑀟𑁆𑀟𑁂𑀢𑀺, 𑀬𑀣𑀸 𑀯𑀸 𑀧𑀦 𑀫𑀘𑁆𑀙𑁂 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑁄 𑀏𑀓𑀯𑀸𑀭𑀁 𑀤𑁆𑀯𑀺𑀯𑀸𑀭𑀁 𑀅𑀕𑁆𑀕𑀺𑀤𑀸𑀦𑀫𑀢𑁆𑀢𑁂𑀦 𑀫𑀘𑁆𑀙𑁂𑀲𑀼 𑀅𑀧𑀘𑁆𑀘𑀦𑁆𑀢𑁂𑀲𑀼 𑀦 𑀢𑁂 𑀙𑀟𑁆𑀟𑁂𑀢𑀺. ‘‘𑀅𑀣 𑀔𑁄 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 ‘‘𑀅𑀣 𑀔𑁄 𑀦𑀁 𑀉𑀘𑁆𑀙𑀼𑀬𑀦𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀻𑀴𑁂𑀢𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀉𑀧𑀫𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄.

𑀅𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁬𑁭𑁦. 𑀆𑀓𑀺𑀭𑀻𑀬𑀦𑁆𑀢𑀺 ¶ 𑀅𑀪𑀺𑀫𑀼𑀔𑀸 𑀳𑁄𑀦𑁆𑀢𑀺 𑀏𑀢𑁂𑀳𑀻𑀢𑀺 𑀆𑀓𑀸𑀭𑀸, 𑀅𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀝𑁆𑀞𑀸𑀦𑀲𑁆𑀲 𑀫𑀼𑀔𑀪𑀽𑀢𑀸 𑀨𑀼𑀲𑀦𑀸𑀦𑀼𑀪𑀯𑀦𑀯𑀺𑀚𑀸𑀦𑀦𑀧𑁆𑀧𑀓𑀸𑀭𑀸𑀢𑀺 𑀆𑀳 ‘‘𑀅𑀭𑀽𑀧𑀥𑀫𑁆𑀫𑀸 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺𑀆𑀤𑀺. 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀅𑀲𑀢𑀺𑀧𑀺 𑀧𑀼𑀩𑁆𑀩𑀸𑀧𑀭𑀺𑀬𑁂 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀢𑀢𑁆𑀣 𑀲𑀩𑁆𑀩𑀧𑀞𑀫𑀁 𑀅𑀪𑀺𑀦𑀺𑀧𑀢𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄’’𑀢𑀺. 𑀢𑁂𑀦𑀲𑁆𑀲 𑀨𑀼𑀲𑀦𑀸𑀓𑀸𑀭𑁂𑀦 𑀲𑀼𑀧𑀸𑀓𑀝𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀨𑀲𑁆𑀲𑁂 𑀧𑀦 𑀉𑀧𑀝𑁆𑀞𑀺𑀢𑁂 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑁄 𑀨𑀲𑁆𑀲𑁄, 𑀢𑀲𑁆𑀲 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸, 𑀆𑀬𑀽𑀳𑀦𑀮𑀓𑁆𑀔𑀡𑀸 𑀘𑁂𑀢𑀦𑀸, 𑀧𑀝𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸’’𑀢𑀺𑀆𑀤𑀺. 𑀏𑀯𑀁 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀨𑀲𑁆𑀲𑀫𑀼𑀔𑁂𑀦 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀓𑁂𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁂𑀲𑁂 𑀧𑀣𑀯𑀻𑀥𑀸𑀢𑀽𑀢𑀺 𑀓𑁂𑀲𑀲𑀗𑁆𑀔𑀸𑀢𑁂 𑀧𑀣𑀯𑀻𑀓𑁄𑀝𑁆𑀞𑀸𑀲𑁂 𑀧𑀣𑀯𑀻𑀥𑀸𑀢𑀼. 𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄 𑀳𑀺 𑀥𑀸𑀢𑀼𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀫𑁂𑀢𑀁.

𑀧𑀼𑀦𑀧𑀺 𑀤𑁆𑀯𑀺𑀦𑁆𑀦𑀁 𑀥𑀸𑀢𑀼𑀯𑀯𑀢𑁆𑀣𑀸𑀦𑀸𑀦𑀁 𑀯𑀲𑁂𑀦 𑀯𑁂𑀤𑀦𑀸𑀫𑀼𑀔𑁂𑀦 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲 𑀭𑀲𑀸𑀦𑀼𑀪𑀯𑀦𑀓𑀯𑁂𑀤𑀦𑀸𑀢𑀺 𑀣𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑀲𑁆𑀲 𑀅𑀦𑀼𑀪𑀯𑀦𑀯𑀲𑁂𑀦 𑀧𑀯𑀢𑁆𑀢𑀯𑁂𑀤𑀦𑀸.

𑀅𑀧𑀭𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀦𑁆𑀢𑀺 𑀣𑀤𑁆𑀥𑀢𑀸𑀲𑀗𑁆𑀔𑀸𑀢𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁. 𑀓𑀸𑀬𑀤𑁆𑀯𑀸𑀭𑀸𑀪𑀺𑀦𑀺𑀳𑀢𑀁, 𑀓𑁂𑀯𑀮𑀁 𑀯𑀸 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀺𑀜𑁆𑀜𑀸𑀡𑀫𑀸𑀳. 𑀢𑀜𑁆𑀳𑀺 ‘‘𑀧𑀣𑀯𑀻𑀥𑀸𑀢𑀼 ¶ 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀇𑀢𑀭𑀁 𑀧𑀦 𑀓𑀓𑁆𑀔𑀴𑀮𑀓𑁆𑀔𑀡𑀧𑀝𑀺𑀯𑀺𑀚𑀸𑀦𑀦𑀫𑀢𑁆𑀢𑀫𑁂𑀯𑀸𑀢𑀺.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸𑀢𑀺 𑀬𑁆𑀯𑀸𑀬𑀁 𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀢𑁄, 𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀢𑁄 𑀘 𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀞𑀺𑀢𑀲𑁆𑀲 𑀨𑀲𑁆𑀲𑀸𑀤𑀺𑀫𑀼𑀔𑁂𑀦 𑀅𑀭𑀽𑀧𑀧𑀭𑀺𑀕𑁆𑀕𑀡𑁆𑀳𑀦𑀼𑀧𑀸𑀬𑁄 𑀤𑀲𑁆𑀲𑀺𑀢𑁄, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀓𑁂𑀲𑁂𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀓𑁂𑀲𑀢𑁄 𑀦𑀺𑀤𑁆𑀥𑀸𑀭𑀺𑀢𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀓𑁂𑀲𑁂. 𑀓𑀓𑁆𑀔𑀴𑀮𑀓𑁆𑀔𑀡𑀸𑀢𑀺𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 ‘‘𑀧𑀕𑁆𑀖𑀭𑀡𑀮𑀓𑁆𑀔𑀡𑀸 𑀆𑀧𑁄𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀯𑀺𑀲𑁂𑀲𑁂𑀦 𑀲𑀤𑁆𑀥𑀺𑀁 𑀥𑀸𑀢𑁆𑀯𑀦𑁆𑀢𑀭𑀸𑀦𑀺𑀬𑁂𑀯, 𑀅𑀣 𑀔𑁄 𑀏𑀓𑀲𑀫𑀼𑀝𑁆𑀞𑀸𑀦𑀸𑀤𑀺𑀪𑁂𑀤𑀸𑀦𑀺 𑀓𑁄𑀝𑁆𑀞𑀸𑀲𑀦𑁆𑀢𑀭𑀸𑀦𑀺𑀧𑀻𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀥𑀸𑀢𑀼𑀓𑁄𑀝𑁆𑀞𑀸𑀲𑁂𑀲𑀽’’𑀢𑀺. 𑀲𑀩𑁆𑀩𑀁 𑀦𑀬𑀪𑁂𑀤𑀁 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀬𑁆𑀯𑀸𑀬𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀥𑀸𑀢𑀼𑀓𑁄𑀝𑁆𑀞𑀸𑀲𑁂𑀲𑀼 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀮𑀓𑁆𑀔𑀡𑀸𑀤𑀺𑀢𑁄 𑀯𑀯𑀢𑁆𑀣𑀸𑀧𑀦𑀯𑀲𑁂𑀦 𑀦𑀸𑀦𑀸𑀯𑀺𑀥𑁄 𑀭𑀽𑀧𑀧𑀭𑀺𑀕𑁆𑀕𑀳𑀦𑀬𑁄 𑀯𑀼𑀢𑁆𑀢𑁄, 𑀢𑀁 𑀲𑀩𑁆𑀩𑀁 𑀦𑀬𑀪𑁂𑀤𑀁 𑀦𑀬𑀯𑀺𑀲𑁂𑀲𑀁 𑀅𑀦𑀼𑀕𑀦𑁆𑀢𑁆𑀯𑀸, 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀲𑀼 𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑁂𑀲𑀼 𑀅𑀭𑀽𑀧𑀧𑀭𑀺𑀕𑁆𑀕𑀳𑀤𑀲𑁆𑀲𑀦𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀭𑀺𑀤𑀁 𑀬𑁄𑀚𑀦𑀸𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁 𑁋 𑀏𑀓𑀲𑁆𑀲 𑀢𑀸𑀯 ‘‘𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸, 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑁬𑁦𑁦) 𑀦𑀬𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 ‘‘𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸’’𑀢𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 ‘‘𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸𑀬 𑀘𑀓𑁆𑀔𑀼𑀥𑀸𑀢𑀼𑀬𑀸 𑀭𑀲𑀸𑀦𑀼𑀪𑀯𑀦𑀓𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 ‘‘𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸 𑀘𑀓𑁆𑀔𑀼𑀥𑀸𑀢𑀽’’𑀢𑀺, ‘‘𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀆𑀬𑀢𑀦𑀸𑀤𑀺𑀯𑀲𑁂𑀦 𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬𑁭𑁧. 𑀬𑀣𑀸 𑀦𑀸𑀫 𑀳𑁂𑀝𑁆𑀞𑀺𑀫𑀛𑀸𑀦𑀁 𑀲𑀼𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀁 𑀧𑀸𑀧𑀺𑀢𑀫𑁂𑀯 𑀉𑀧𑀭𑀺𑀛𑀸𑀦𑀲𑁆𑀲 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀦 𑀧𑀝𑀺𑀮𑀤𑁆𑀥𑀫𑀢𑁆𑀢𑀁, 𑀏𑀯𑀁 𑀭𑀽𑀧𑀧𑀭𑀺𑀕𑁆𑀕𑀳𑁄 𑀲𑀼𑀯𑀺𑀲𑀼𑀤𑁆𑀥𑁄 𑀦𑀺𑀚𑁆𑀚𑀝𑁄 𑀦𑀺𑀕𑁆𑀕𑀼𑀫𑁆𑀩𑁄 𑀏𑀯 𑀅𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀦 𑀅𑀯𑀺𑀲𑀼𑀤𑁆𑀥𑁄, 𑀢𑀲𑁆𑀫𑀸 𑀭𑀽𑀧𑀸𑀭𑀽𑀧𑀲𑁆𑀲 𑀏𑀓𑀤𑁂𑀲𑁂𑀧𑀺 𑀅𑀦𑀼𑀧𑀝𑁆𑀞𑀺𑀢𑁂 𑀲𑁄 𑀅𑀯𑀺𑀲𑀼𑀤𑁆𑀥𑁄 𑀏𑀯 𑀦𑀸𑀫 𑀳𑁄𑀢𑀺, 𑀧𑀕𑁂𑀯 𑀩𑀳𑀽𑀲𑀼 𑀅𑀦𑀼𑀧𑀝𑁆𑀞𑀺𑀢𑁂𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀧𑀩𑁆𑀩𑀢𑁂𑀬𑁆𑀬𑀸 𑀕𑀸𑀯𑀻 𑀯𑀺𑀬 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀔𑁂𑀢𑁆𑀢𑀜𑁆𑀜𑀽.

𑀔𑀕𑁆𑀕𑁂𑀦𑀸𑀢𑀺 ¶ 𑀔𑀕𑁆𑀕𑀕𑁆𑀕𑁂𑀦. 𑀲𑀫𑀼𑀕𑁆𑀕𑀦𑁆𑀢𑀺 𑀫𑀜𑁆𑀚𑀽𑀲𑀸𑀲𑀤𑀺𑀲𑀁 𑀫𑀳𑀸𑀲𑀫𑀼𑀕𑁆𑀕𑀁. 𑀅𑀧𑀭𑀺𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀯𑀺𑀪𑀢𑁆𑀢𑀁 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀦𑀸𑀫𑀭𑀽𑀧𑀁 𑀯𑀺𑀪𑀢𑁆𑀢𑀲𑀪𑀸𑀯𑀫𑁂𑀯, 𑀢𑀲𑁆𑀲 𑀘 𑀯𑀺𑀪𑀸𑀕𑁄 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁂𑀲𑀼 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀘 𑀤𑀲𑁆𑀲𑀦𑀢𑁆𑀣𑀁 𑀲𑀫𑀼𑀕𑁆𑀕𑀯𑀺𑀯𑀭𑀡𑀁, 𑀬𑀫𑀓𑀢𑀸𑀮𑀓𑀦𑁆𑀤𑀨𑀸𑀮𑀦𑀜𑁆𑀘 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀫𑀓𑀢𑀸𑀮𑀓𑀦𑁆𑀤𑀜𑁆𑀳𑀺 𑀪𑀺𑀦𑁆𑀦𑀲𑀦𑁆𑀢𑀸𑀦𑀫𑁆𑀧𑀺 𑀅𑀪𑀺𑀦𑁆𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀏𑀯𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺. 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑁂 𑀥𑀫𑁆𑀫𑁂 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩-𑀲𑀤𑁆𑀤𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀬𑀓𑁄, 𑀦𑀸𑀫𑀭𑀽𑀧𑀪𑀸𑀯𑁄 𑀧𑀦 𑀅𑀜𑁆𑀜𑀫𑀜𑁆𑀜𑀯𑀺𑀥𑀼𑀭𑁄𑀢𑀺 𑀦 𑀢𑀤𑀼𑀪𑀬𑀁 𑀲𑀫𑀼𑀤𑀸𑀬𑀯𑀲𑁂𑀦 𑀧𑀭𑀺𑀲𑀫𑀸𑀧𑀬𑁂𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀬𑀤𑁂𑀢𑁆𑀣 𑀦𑀫𑀦𑀮𑀓𑁆𑀔𑀡𑀁, 𑀢𑀁 𑀦𑀸𑀫𑀁. 𑀬𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀢𑀁 𑀭𑀽𑀧’’𑀦𑁆𑀢𑀺 𑀏𑀯𑀁 𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀯𑀢𑁆𑀣𑀧𑁂𑀦𑁆𑀢𑁄𑀬𑁂𑀯 𑀘 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄 ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀏𑀢𑁂𑀦𑁂𑀯 ¶ 𑀢𑀲𑁆𑀲 𑀤𑀼𑀯𑀺𑀥𑀪𑀸𑀯𑁂 𑀲𑀺𑀤𑁆𑀥𑁂 ‘‘𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀻’’𑀢𑀺 𑀇𑀤𑀁 𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯𑀸𑀳 ‘‘𑀦𑀸𑀫𑀭𑀽𑀧𑀫𑀢𑁆𑀢𑀢𑁄 𑀉𑀤𑁆𑀥’’𑀦𑁆𑀢𑀺𑀆𑀤𑀺. ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑁂 𑀥𑀫𑁆𑀫𑁂’’𑀢𑀺 𑀧𑀦 𑀲𑀩𑁆𑀩𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀫𑁆𑀫𑀲𑀫𑀦𑀼𑀧𑀕𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀯𑀲𑁂𑀲𑁂𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀅𑀦𑀯𑀲𑁂𑀲𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀁 𑀏𑀓𑀁𑀲𑀢𑁄 𑀯𑀺𑀭𑀚𑁆𑀚𑀺𑀢𑀩𑁆𑀩𑀁, 𑀢𑀢𑁄 𑀘 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀫𑁄𑀘𑁂𑀢𑀩𑁆𑀩𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀲𑀩𑁆𑀩𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺 (𑀲𑀁. 𑀦𑀺. 𑁪.𑁨𑁬-𑁨𑁭).

𑀬𑀤𑀺 𑀢𑁂𑀪𑀽𑀫𑀓𑀁 𑀥𑀫𑁆𑀫𑀚𑀸𑀢𑀁 𑀅𑀦𑀯𑀲𑁂𑀲𑀢𑁄 𑀕𑀳𑀺𑀢𑀁 ‘‘𑀦𑀸𑀫𑀭𑀽𑀧’’𑀦𑁆𑀢𑀺, 𑀬𑀁 𑀇𑀢𑁄 𑀩𑀸𑀳𑀺𑀭𑀓𑁂𑀳𑀺 𑀧𑀤𑀢𑁆𑀣𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀓𑀢𑀺𑀆𑀤𑀺 𑀤𑁆𑀭𑀩𑁆𑀬𑀸𑀤𑀺 𑀚𑀻𑀯𑀸𑀤𑀺 𑀓𑀸𑀬𑀸𑀤𑀺. 𑀢𑀢𑁆𑀣 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀉𑀫𑁆𑀫𑀢𑁆𑀢𑀓𑀯𑀺𑀧𑀮𑁆𑀮𑀸𑀲𑀲𑀤𑀺𑀲𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀯𑁂𑀤𑀺𑀢𑁂 𑀓𑀸 𑀢𑀢𑁆𑀣 𑀅𑀜𑁆𑀜𑀸 𑀧𑀝𑀺𑀧𑀢𑁆𑀢𑀺 𑀅𑀜𑁆𑀜𑀢𑁆𑀭 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄. 𑀅𑀣 𑀯𑀸 𑀢𑁂𑀧𑀺 𑀦𑀸𑀫𑀭𑀽𑀧𑀦𑁆𑀢𑁄𑀕𑀥𑀪𑀸𑀯𑀸𑀪𑀸𑀯𑀯𑀲𑁂𑀦 𑀦𑀺𑀘𑁆𑀙𑀺𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀧𑀓𑀢𑀺, 𑀫𑀳𑀸, 𑀅𑀳𑀁𑀓𑀸𑀭𑁄, 𑀢𑀫𑁆𑀫𑀢𑁆𑀢𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀪𑀽𑀢𑀸𑀦𑀺, 𑀧𑀼𑀭𑀺𑀲𑁄𑀢𑀺 𑀏𑀢𑁂 𑀧𑀓𑀢𑀺𑀆𑀤𑀬𑁄. 𑀢𑀢𑁆𑀣 𑀲𑀫𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀢𑁆𑀢𑀭𑀚𑀢𑀫𑀲𑀗𑁆𑀔𑀸𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀫𑁄𑀳𑀸𑀦𑀁 𑀲𑀫𑀼𑀤𑀸𑀬𑁄 𑀧𑀓𑀢𑀺, 𑀧𑀥𑀸𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀢𑁆𑀢𑀫𑀢𑁆𑀢𑀲𑀫𑁆𑀧𑀯𑁂𑀤𑀦𑀻𑀬𑁄 𑀫𑀳𑀸, 𑀩𑀼𑀤𑁆𑀥𑀻𑀢𑀺 𑀓𑁂𑀘𑀺. 𑀲𑀢𑁆𑀢𑀭𑀚𑀸𑀤𑀻𑀲𑀼 ¶ 𑀅𑀪𑀺𑀫𑀸𑀦𑁄 𑀅𑀳𑀁𑀓𑀸𑀭𑁄, 𑀅𑀲𑁆𑀫𑀺𑀫𑀢𑁆𑀢𑀸𑀢𑀺 𑀓𑁂𑀘𑀺. 𑀲𑀤𑁆𑀤𑀨𑀲𑁆𑀲𑀭𑀽𑀧𑀭𑀲𑀕𑀦𑁆𑀥𑀸 𑀢𑀫𑁆𑀫𑀢𑁆𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀸𑀦𑀁 𑀧𑀣𑀯𑀻𑀆𑀤𑀻𑀦𑀁 𑀏𑀓𑀼𑀢𑁆𑀢𑀭𑀢𑀸𑀤𑀲𑁆𑀲𑀦𑀢𑁄 𑀏𑀓𑀼𑀢𑁆𑀢𑀭𑀸𑀦𑀺 𑀢𑀫𑁆𑀫𑀢𑁆𑀢𑀸𑀦𑀻𑀢𑀺 𑀯𑀺𑀚𑁆𑀛𑀯𑀸𑀲𑀺𑀏𑀓𑀮𑀓𑁆𑀔𑀡𑁂𑀳𑀺 𑀢𑀫𑁆𑀫𑀢𑁆𑀢𑁂𑀳𑀺 𑀏𑀓𑀮𑀓𑁆𑀔𑀡𑀸 𑀯𑀺𑀲𑁂𑀲𑀸 𑀲𑀚𑀺𑀬𑀦𑁆𑀢𑀺, 𑀲𑀼𑀔𑀼𑀫𑀪𑀸𑀯𑁂𑀦 𑀧𑀦 𑀦𑁂𑀲𑀁 𑀲𑀫𑁆𑀧𑀯𑁂𑀲𑀦𑀢𑁄 𑀏𑀓𑀼𑀢𑁆𑀢𑀭𑀢𑀸𑀢𑀺 𑀓𑁂𑀘𑀺. 𑀲𑁄𑀢𑀸𑀤𑀻𑀦𑀺 𑀧𑀜𑁆𑀘 𑀲𑀯𑀦𑀸𑀤𑀺𑀯𑀼𑀢𑁆𑀢𑀺𑀓𑀸𑀦𑀺 𑀩𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀦𑀺, 𑀯𑀘𑀦𑀸𑀤𑀸𑀦𑀯𑀺𑀘𑀭𑀡𑀼𑀲𑁆𑀲𑀕𑁆𑀕𑀸𑀦𑀦𑁆𑀤𑀓𑀺𑀘𑁆𑀘𑀸𑀦𑀺 𑀯𑀸𑀘𑀸𑀤𑀻𑀦𑀺 𑀧𑀜𑁆𑀘 𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀸𑀦𑀺. 𑀫𑀦𑁄 𑀅𑀦𑁆𑀢𑁄𑀓𑀭𑀡𑀁, 𑀇𑀢𑀭𑀁 𑀩𑀸𑀳𑀺𑀭𑀓𑀭𑀡𑀁. 𑀕𑀦𑁆𑀥𑀸𑀤𑀻𑀳𑀺 𑀆𑀭𑀤𑁆𑀥𑀸𑀦𑀺 𑀧𑀣𑀯𑀻𑀉𑀤𑀓𑀅𑀕𑁆𑀕𑀺𑀯𑀸𑀬𑀼𑀆𑀓𑀸𑀲𑀸𑀦𑀺 𑀪𑀽𑀢𑀸𑀦𑀺, 𑀘𑁂𑀢𑀦𑀸𑀲𑀪𑀸𑀯𑁄 𑀧𑀼𑀭𑀺𑀲𑁄𑀢𑀺 𑀏𑀯𑀁 𑀧𑀓𑀢𑀺𑀆𑀤𑀻𑀦𑀺 𑀲𑀭𑀽𑀧𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀳𑀺 𑀧𑀓𑀢𑀺 𑀢𑀸𑀯 𑀲𑀼𑀔𑀤𑀼𑀓𑁆𑀔𑀫𑁄𑀳𑀫𑀢𑁆𑀢𑀢𑀸𑀬 𑀦𑀸𑀫𑀁, 𑀲𑀫𑀯𑀺𑀲𑀫𑀪𑀸𑀯𑀸𑀧𑀢𑁆𑀢𑀺𑀢𑁄 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀲𑀗𑁆𑀔𑀢𑀸 𑀘 𑀆𑀧𑀦𑁆𑀦𑀸. 𑀫𑀳𑀸𑀧𑀺 ‘‘𑀢𑀲𑁆𑀫𑀸 𑀅𑀮𑀺𑀗𑁆𑀕𑀢𑁄 𑀮𑀺𑀗𑁆𑀕𑀯𑀺𑀲𑁂𑀲𑀸𑀫𑀢𑁆𑀢𑁄 𑀫𑀳𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄, 𑀩𑀼𑀤𑁆𑀥𑀺𑀪𑀸𑀯𑀸𑀦𑀼𑀚𑀸𑀦𑀦𑀢𑁄 𑀘 𑀦𑀸𑀫𑀁, 𑀅𑀦𑀺𑀘𑁆𑀘𑀁, 𑀲𑀗𑁆𑀔𑀢𑀫𑁂𑀯 𑀘 𑀆𑀧𑀦𑁆𑀦𑀁. ‘‘𑀢𑀲𑁆𑀫𑀸 ¶ 𑀫𑀳𑀢𑁄 𑀙 𑀯𑀺𑀲𑁂𑀲𑀸 𑀲𑀚𑀺𑀬𑀦𑁆𑀢𑀻’’𑀢𑀺 𑀲𑀓𑁆𑀓𑀢𑁂 𑀯𑀘𑀦𑀢𑁄 ‘‘𑀅𑀲𑁆𑀫𑀻’’𑀢𑀺 𑀕𑀳𑀡𑀦𑀺𑀫𑀺𑀢𑁆𑀢𑀪𑀸𑀯𑀸𑀦𑀼𑀚𑀸𑀦𑀦𑁂𑀦 𑀅𑀳𑀁𑀓𑀸𑀭𑁄 𑀅𑀪𑀺𑀫𑀸𑀦𑁄𑀢𑀺 𑀓𑀢𑁆𑀯𑀸 𑀦𑀸𑀫𑀁, 𑀢𑀢𑁄 𑀏𑀯 𑀅𑀦𑀺𑀘𑁆𑀘𑀲𑀗𑁆𑀔𑀢𑀪𑀸𑀯𑀸𑀧𑀢𑁆𑀢𑀺 𑀘𑀲𑁆𑀲 𑀲𑀺𑀤𑁆𑀥𑀸. 𑀇𑀢𑀭𑀁 𑀢𑀫𑁆𑀫𑀢𑁆𑀢𑀧𑀜𑁆𑀘𑀓𑀁 𑀕𑀦𑁆𑀥𑀭𑀲𑀭𑀽𑀧𑀨𑀲𑁆𑀲𑀲𑀤𑁆𑀤𑀪𑀸𑀯𑀸𑀦𑀼𑀚𑀸𑀦𑀦𑀢𑁄 𑀭𑀽𑀧𑀁, 𑀅𑀭𑀽𑀧𑀦𑁆𑀢𑀺 𑀧𑀦 𑀓𑀸𑀧𑀺𑀮𑀸𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀫𑀢𑁆𑀢𑀁. 𑀢𑁂 𑀳𑀺 𑀲𑁄𑀴𑀲 𑀯𑀺𑀲𑁂𑀲𑀸 𑀧𑀜𑁆𑀘 𑀪𑀽𑀢𑀸𑀦𑀺, 𑀏𑀓𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀽𑀢𑁂𑀳𑀺 𑀪𑀽𑀢𑀯𑀺𑀲𑁂𑀲𑀸𑀦𑀻𑀢𑀺 𑀕𑀦𑁆𑀥𑀸𑀤𑀺𑀢𑀫𑁆𑀫𑀢𑁆𑀢𑁂𑀳𑀺 𑀢𑀦𑁆𑀦𑀺𑀲𑁆𑀲𑀬𑀸𑀦𑀺 𑀧𑀣𑀯𑀻𑀆𑀧𑁄𑀢𑁂𑀚𑁄𑀯𑀸𑀬𑁄𑀆𑀓𑀸𑀲𑀲𑀗𑁆𑀔𑀸𑀢𑀸𑀦𑀺 𑀪𑀽𑀢𑀸𑀦𑀺 𑀇𑀘𑁆𑀙𑀺𑀢𑀸𑀦𑀺. ‘‘𑀢𑀩𑁆𑀩𑀺𑀲𑁂𑀲𑀸 𑀘 𑀦𑀸𑀦𑀸𑀚𑀸𑀢𑀺𑀓𑀸 𑀅𑀳𑀁𑀓𑀸𑀭𑀢𑁄 𑀘 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀯𑀘𑀦𑀢𑁄 𑀲𑁄𑀢𑀓𑀸𑀬𑀘𑀓𑁆𑀔𑀼𑀚𑀺𑀯𑁆𑀳𑀸𑀖𑀸𑀦𑀯𑀸𑀘𑀸𑀧𑀸𑀡𑀺𑀧𑀸𑀤𑀧𑀸𑀬𑀽𑀧𑀢𑁆𑀣𑀸𑀦𑀺 𑀘𑁂𑀯 𑀫𑀦𑁄 𑀘𑀸𑀢𑀺 𑀏𑀓𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺.

𑀢𑀢𑁆𑀣 𑀫𑀦𑁄 𑀦𑀸𑀫𑀁, 𑀇𑀢𑀭𑀸𑀦𑀺 𑀲𑀩𑁆𑀩𑀸𑀦𑀺 𑀭𑀽𑀧𑀁. 𑀯𑀸𑀘𑀸𑀢𑀺 𑀘𑁂𑀢𑁆𑀣 𑀅𑀢𑁆𑀣𑀸𑀯𑀚𑁄𑀢𑀓𑀲𑁆𑀲 𑀅𑀓𑁆𑀔𑀭𑀲𑀫𑀼𑀤𑀸𑀬𑀲𑁆𑀲 𑀕𑀳𑀡𑀁. 𑀇𑀫𑁂𑀲𑀁 𑀧𑀦 𑀥𑀫𑁆𑀫𑀺𑀦𑁄 𑀥𑀫𑁆𑀫𑀲𑁆𑀲 𑀅𑀦𑀜𑁆𑀜𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀲𑀺𑀤𑁆𑀥𑀸𑀯 𑀅𑀦𑀺𑀘𑁆𑀘𑀢𑀸 𑀧𑀭𑀺𑀡𑀸𑀫𑀧𑀓𑁆𑀔𑁂, 𑀅𑀪𑀺𑀩𑁆𑀬𑀢𑁆𑀢𑀺𑀧𑀓𑁆𑀔𑁂𑀧𑀺 𑀬𑀤𑀺 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀸𑀤𑁂𑀦 𑀅𑀪𑀺𑀩𑁆𑀬𑀜𑁆𑀚𑀦𑀁 𑀲𑀺𑀤𑁆𑀥𑀸𑀯 𑀅𑀦𑀺𑀘𑁆𑀘𑀢𑀸, 𑀅𑀣 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀜𑀸𑀡𑀁 𑀅𑀢𑁆𑀣𑁂𑀯. 𑀅𑀓𑁆𑀔𑀩𑁆𑀬𑀢𑁆𑀢𑀺𑀯𑀸𑀤𑁄 𑀧𑀦 𑀲𑀺𑀬𑀸𑀢𑀺 𑀇𑀤𑀫𑁂𑀢𑁆𑀣 𑀤𑀺𑀲𑀸𑀫𑀢𑁆𑀢𑀁. 𑀤𑁆𑀭𑀩𑁆𑀬𑀕𑀼𑀡𑀓𑀫𑁆𑀫𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀫𑀯𑀸𑀬𑀸 𑀤𑁆𑀭𑀩𑁆𑀬𑀸𑀤𑀺𑀓𑀸. 𑀢𑀢𑁆𑀣 𑀧𑀣𑀯𑀻 𑀆𑀧𑁄 ¶ 𑀢𑁂𑀚𑁄 𑀯𑀸𑀬𑀼 𑀆𑀓𑀸𑀲𑁄 𑀓𑀸𑀮𑁄 𑀤𑀺𑀲𑀸 𑀅𑀢𑁆𑀢𑀸 𑀫𑀦𑁄𑀢𑀺 𑀦𑀯 𑀤𑁆𑀭𑀩𑁆𑀬𑀸𑀦𑀺. 𑀲𑀤𑁆𑀤 𑀭𑀽𑀧 𑀭𑀲 𑀕𑀦𑁆𑀥 𑀨𑀲𑁆𑀲 𑀲𑀗𑁆𑀔𑀸 𑀧𑀭𑀺𑀫𑀸𑀡𑀸𑀦𑀺 𑀧𑀼𑀣𑀽𑀢𑁆𑀯 𑀲𑀁𑀬𑁄𑀕 𑀯𑀺𑀬𑁄𑀕 𑀧𑀭𑀢𑁆𑀯𑀸 𑀧𑀭𑀢𑁆𑀯 𑀩𑀼𑀤𑁆𑀥𑀺 𑀲𑀼𑀔 𑀤𑀼𑀓𑁆𑀔 𑀇𑀘𑁆𑀙𑀸 𑀤𑁄𑀲 𑀧𑀬𑀢𑁆𑀢 𑀕𑀼𑀭𑀼𑀢𑁆𑀯 𑀤𑁆𑀭𑀯𑀢𑁆𑀯 𑀲𑁆𑀦𑁂𑀳 𑀯𑁂𑀕𑀸 𑀲𑀗𑁆𑀔𑀸𑀭𑀸 𑀤𑀺𑀝𑁆𑀞𑀸 𑀘𑁂𑀢𑀺 𑀏𑀯𑀫𑁂𑀢𑁂 𑀢𑁂𑀯𑀻𑀲𑀢𑀺 𑀕𑀼𑀡𑀸. 𑀉𑀓𑁆𑀔𑁂𑀧𑀦𑀁 𑀅𑀯𑀓𑁆𑀔𑁂𑀧𑀦𑀫𑀸𑀓𑀼𑀘𑀦𑀁 𑀧𑀲𑀸𑀭𑀡𑀁 𑀕𑀫𑀦𑀫𑀺𑀢𑀺 𑀧𑀜𑁆𑀘 𑀓𑀫𑁆𑀫𑀸𑀦𑀺. 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀅𑀯𑀺𑀲𑀺𑀝𑁆𑀞𑀫𑀪𑀺𑀥𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀁-𑀇𑀢𑀺 𑀬𑀢𑁄 𑀤𑁆𑀭𑀩𑁆𑀬𑀕𑀼𑀡𑀓𑀫𑁆𑀫𑁂𑀲𑀼 𑀲𑀸 𑀅𑀢𑁆𑀣𑀺 𑀏𑀯𑀸𑀢𑀺 𑀏𑀢𑀁 𑀫𑀳𑀸𑀲𑀸𑀫𑀜𑁆𑀜𑀁. 𑀧𑀣𑀯𑀻𑀆𑀤𑀻𑀲𑀼 𑀅𑀦𑀼𑀯𑀢𑁆𑀢𑀺𑀩𑁆𑀬𑀸𑀯𑀼𑀢𑁆𑀢𑀺𑀩𑀼𑀤𑁆𑀥𑀺𑀦𑀺𑀫𑀺𑀢𑁆𑀢𑀁 𑀤𑁆𑀭𑀩𑁆𑀬𑀢𑁆𑀯𑀸𑀤𑀺, 𑀢𑀁 𑀬𑀣𑀸 𑀤𑁆𑀭𑀩𑁆𑀬𑀢𑁆𑀯 𑀕𑀼𑀡𑀢𑁆𑀯 𑀓𑀫𑁆𑀫𑀢𑁆𑀯 𑀖𑀝𑀢𑁆𑀯𑀸𑀤𑀺, 𑀏𑀲𑁄 𑀲𑀸𑀫𑀜𑁆𑀜𑀯𑀺𑀲𑁂𑀲𑁄. 𑀇𑀳 𑀢𑀦𑁆𑀢𑁂𑀲𑀼 𑀧𑀝𑁄, 𑀓𑀧𑀸𑀮𑁂𑀲𑀼 𑀖𑀝𑁄𑀢𑀺 𑀇𑀳𑁂𑀢𑀺 𑀬𑀢𑁄 𑀳𑁂𑀢𑀼𑀳𑁂𑀢𑀼𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀫𑀯𑀸𑀬𑁄𑀢𑀺 𑀯𑀼𑀢𑁆𑀢𑁄, 𑀲𑀫𑀯𑀸𑀬𑁄𑀢𑀺 𑀏𑀯𑀫𑁂𑀢𑁂 𑀤𑁆𑀭𑀩𑁆𑀬𑀸𑀤𑀺𑀓𑀸.

𑀢𑀢𑁆𑀣 𑀧𑀣𑀯𑀻 𑀆𑀧 𑀢𑁂𑀚 𑀯𑀸𑀬𑀽 𑀪𑀽𑀢𑀭𑀽𑀧𑀁, 𑀆𑀓𑀸𑀲𑀁 𑀢𑁂𑀲𑀁 𑀅𑀪𑀸𑀯𑀫𑀢𑁆𑀢𑀁, 𑀧𑀭𑀺𑀘𑁆𑀙𑁂𑀤𑁄 𑀯𑀸, 𑀘𑀦𑁆𑀤𑀲𑀽𑀭𑀺𑀬𑀸𑀤𑀺𑀧𑀭𑀺𑀯𑀢𑁆𑀢𑀦𑀁, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀓𑀸𑀮𑁄. 𑀢𑀣𑀸 𑀤𑀺𑀲𑀸, 𑀅𑀢𑁆𑀢𑀸 𑀘. 𑀫𑀦𑁄 𑀦𑀸𑀫𑀁. 𑀲𑀤𑁆𑀤𑀭𑀽𑀧𑀭𑀲𑀕𑀦𑁆𑀥𑀸 𑀭𑀽𑀧𑀫𑁂𑀯. 𑀢𑀣𑀸 𑀨𑀲𑁆𑀲𑁄 𑀪𑀽𑀢𑀢𑁆𑀢𑀬𑀲𑀪𑀸𑀯𑀢𑁄. 𑀲𑀗𑁆𑀔𑀸 𑀏𑀓𑀸𑀤𑀺𑀓𑀸 𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀢𑀣𑀸 𑀅𑀯𑀬𑀯𑀲𑀫𑀼𑀤𑀸𑀬𑁂 𑀕𑀼𑀡𑀯𑀺𑀲𑁂𑀲𑀯𑀲𑁂𑀦, 𑀲𑀡𑁆𑀞𑀸𑀦𑀯𑀺𑀲𑁂𑀲𑀯𑀲𑁂𑀦 𑀯𑀸 𑀫𑀳𑀦𑁆𑀢𑀁 𑀤𑀻𑀖𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀡𑀼 𑀭𑀲𑁆𑀲𑀦𑁆𑀢𑀺 𑀪𑀺𑀦𑁆𑀦𑀮𑀓𑁆𑀔𑀡𑀤𑁂𑀲𑁂𑀲𑀼 𑀧𑀼𑀣𑀼𑀢𑁆𑀯𑀦𑁆𑀢𑀺. 𑀪𑀺𑀦𑁆𑀦𑀤𑁂𑀲𑀚𑀸𑀦𑀁 𑀲𑀳𑀪𑀸𑀯𑁂 𑀲𑀁𑀬𑁄𑀕𑁄𑀢𑀺. 𑀢𑀤𑀧𑀸𑀬𑁂 𑀯𑀺𑀬𑁄𑀕𑁄𑀢𑀺. 𑀲𑀫𑀸𑀦𑀤𑀺𑀲𑀸𑀤𑁂𑀲𑀕𑀢𑀸𑀦𑀁 𑀭𑀽𑀧𑀸𑀦𑀁 𑀫𑀳𑀤𑀩𑁆𑀩𑀦𑁆𑀢𑀭𑀸𑀦𑀁 𑀯𑀲𑁂𑀦 𑀧𑀭𑀫𑀧𑀭𑀦𑁆𑀢𑀺 ¶ 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀩𑀼𑀤𑁆𑀥𑀺𑀲𑀼𑀔𑀤𑀼𑀓𑁆𑀔𑀇𑀘𑁆𑀙𑀸𑀤𑁄𑀲𑀧𑀬𑀢𑁆𑀢𑀸 𑀦𑀸𑀫𑀫𑁂𑀯. 𑀕𑀼𑀭𑀼𑀢𑁆𑀯 𑀤𑁆𑀭𑀯𑀢𑁆𑀯 𑀲𑁆𑀦𑁂𑀳𑀯𑁂𑀕𑀸 𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑀢𑁄 𑀕𑀳𑁂𑀢𑀩𑁆𑀩𑀸𑀓𑀸𑀭𑀸. 𑀇𑀢𑀭𑁄 𑀲𑀗𑁆𑀔𑀸𑀭𑁄 𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑁄. 𑀅𑀤𑀺𑀝𑁆𑀞𑁄𑀧𑀺 𑀥𑀫𑁆𑀫𑀸𑀥𑀫𑁆𑀫𑀪𑀸𑀯𑀢𑁄 𑀦𑀸𑀫𑀫𑁂𑀯. 𑀉𑀓𑁆𑀔𑁂𑀧𑀦𑀁 𑀅𑀯𑀓𑁆𑀔𑁂𑀧𑀦𑀁 𑀆𑀓𑀼𑀘𑀦𑀁 𑀧𑀲𑀸𑀭𑀡𑀁 𑀕𑀫𑀦𑀦𑁆𑀢𑀺 𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀢𑁆𑀢𑀁. 𑀲𑀤𑀺𑀲𑀸𑀲𑀤𑀺𑀲𑀢𑀸𑀬𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀜𑁆𑀜𑀸, 𑀅𑀬𑀼𑀢𑁆𑀢𑀲𑀫𑁆𑀩𑀦𑁆𑀥𑁂 𑀲𑀫𑀯𑀸𑀬𑀲𑀫𑀜𑁆𑀜𑀸𑀢𑀺 𑀤𑁆𑀭𑀩𑁆𑀬𑀸𑀤𑀻𑀦𑀫𑁆𑀧𑀺 𑀦𑀸𑀫𑀭𑀽𑀧𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸.

𑀚𑀻𑀯𑀸𑀚𑀻𑀯𑀩𑀦𑁆𑀥 𑀧𑀼𑀜𑁆𑀜 𑀧𑀸𑀧𑀸𑀲𑀯 𑀲𑀁𑀯𑀭𑀦𑀺𑀚𑁆𑀚𑀭𑀯𑀺𑀫𑁄𑀓𑁆𑀔𑀸 𑀚𑀻𑀯𑀸𑀤𑀺𑀓𑀸. 𑀢𑀢𑁆𑀣 𑀚𑀻𑀯𑁄𑀢𑀺 𑀅𑀢𑁆𑀢𑀸. 𑀧𑀼𑀕𑁆𑀕𑀮𑀥𑀫𑁆𑀫𑀸𑀥𑀫𑁆𑀫𑀸𑀓𑀸𑀲𑀓𑀸𑀮𑁂𑀲𑀼 𑀅𑀚𑀻𑀯𑀲𑀜𑁆𑀜𑀸. 𑀢𑁂𑀲𑀼 𑀲𑀤𑁆𑀤𑀨𑀲𑁆𑀲𑀭𑀽𑀧𑀭𑀲𑀕𑀦𑁆𑀥𑀲𑀡𑁆𑀞𑀸𑀦𑀩𑀦𑁆𑀥𑀪𑁂𑀤𑀲𑀼𑀔𑀼𑀫𑀧𑀭𑀅𑀧𑀭𑀸𑀖𑀸𑀢𑀧𑁆𑀧𑀪𑀸𑀘𑁆𑀙𑀸𑀬𑁄𑀚𑁆𑀚𑀸𑀓𑀢𑀫𑀸𑀦𑀺 𑀧𑀼𑀕𑁆𑀕𑀮𑀮𑀓𑁆𑀔𑀡𑀦𑁆𑀢𑀺 𑀧𑀼𑀕𑁆𑀕𑀮𑁄 𑀭𑀽𑀧𑀁 𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀫𑀢𑁆𑀢𑀢𑁄. 𑀥𑀫𑁆𑀫𑀸𑀥𑀫𑁆𑀫𑀸 𑀚𑀻𑀯𑀧𑀼𑀕𑁆𑀕𑀮𑀸𑀦𑀁 𑀕𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀢𑀸𑀬 𑀢𑀤𑀯𑀺𑀲𑀺𑀝𑁆𑀞𑀸 ¶ . 𑀆𑀓𑀸𑀲𑀓𑀸𑀮𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀩𑀦𑁆𑀥𑁄 ‘‘𑀓𑀫𑁆𑀫𑀧𑀼𑀕𑁆𑀕𑀮𑀦𑁆𑀢𑀭𑀲𑀁𑀬𑁄𑀕𑁄’’𑀢𑀺 𑀯𑀘𑀦𑀢𑁄 𑀢𑁂𑀳𑀺 𑀅𑀦𑀜𑁆𑀜𑁄. 𑀧𑀼𑀜𑁆𑀜𑀧𑀸𑀧𑀸𑀦𑀺 𑀦𑀸𑀫𑀦𑁆𑀢𑀺 𑀧𑀸𑀓𑀝𑀫𑁂𑀯. ‘‘𑀓𑀫𑁆𑀫𑀧𑀼𑀕𑁆𑀕𑀮𑀸𑀦𑀫𑀸𑀲𑀯𑁄’’𑀢𑀺 𑀯𑀘𑀦𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀲𑀫𑁆𑀪𑀯𑁂 𑀆𑀲𑀯𑀲𑀫𑀜𑁆𑀜𑀸𑀢𑀺 𑀢𑀢𑁄 𑀅𑀯𑀺𑀲𑀺𑀝𑁆𑀞𑁄 𑀆𑀲𑀯𑁄. ‘‘𑀆𑀲𑀯𑀦𑀺𑀭𑁄𑀥𑁄 𑀲𑀁𑀯𑀭𑁄’’𑀢𑀺 𑀯𑀘𑀦𑀢𑁄 𑀧𑀝𑀺𑀧𑀓𑁆𑀔𑁂𑀦 𑀧𑀼𑀜𑁆𑀜𑀸𑀧𑀼𑀜𑁆𑀜𑀦𑀺𑀭𑁄𑀥𑁄 𑀲𑀁𑀯𑀭𑁄. ‘‘𑀓𑀫𑁆𑀫𑀨𑀮𑀧𑁆𑀧𑀯𑀢𑁆𑀢𑀺𑀬𑀸 𑀧𑀓𑀢𑀺𑀬𑀸 𑀅𑀧𑁆𑀧𑀯𑀢𑁆𑀢𑀺 𑀦𑀺𑀚𑁆𑀚𑀭𑁄’’𑀢𑀺 𑀯𑀘𑀦𑀢𑁄 𑀯𑀺𑀧𑀸𑀓𑀦𑀺𑀭𑁄𑀥𑀦𑀺𑀫𑀺𑀢𑁆𑀢𑀁 𑀦𑀺𑀚𑁆𑀚𑀭𑁄. 𑀫𑁄𑀓𑁆𑀔𑁄𑀧𑀺 ‘‘𑀲𑀩𑁆𑀩𑀓𑀫𑁆𑀫𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀘𑀦𑀢𑁄 𑀓𑀫𑁆𑀫𑀧𑀼𑀕𑁆𑀕𑀮𑀚𑀻𑀯𑀯𑀺𑀬𑁄𑀕𑁄. 𑀢𑀢𑁆𑀣 𑀓𑀫𑁆𑀫𑀧𑀼𑀕𑁆𑀕𑀮𑀸𑀦𑀁 𑀲𑀤𑁆𑀤𑀸𑀤𑀺𑀮𑀓𑁆𑀔𑀡𑀢𑀸𑀬 𑀭𑀽𑀧𑀫𑀢𑁆𑀢𑀢𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀫𑀢𑁆𑀢𑀢𑀸𑀬 𑀅𑀭𑀽𑀧𑀢𑀸. 𑀚𑀻𑀯𑁄 𑀘 𑀅𑀭𑀽𑀧𑀫𑀢𑁆𑀢𑀫𑁂𑀯𑀸𑀢𑀺 𑀅𑀬𑀁 𑀤𑁆𑀭𑀩𑁆𑀬𑀫𑁄𑀓𑁆𑀔𑁄. 𑀪𑀸𑀯𑀫𑁄𑀓𑁆𑀔𑁄 𑀧𑀦 𑀚𑀻𑀯𑀲𑁆𑀲 𑀭𑀸𑀕𑀸𑀤𑀺𑀪𑀸𑀯𑀸𑀧𑀭𑀺𑀡𑀸𑀫𑁄 𑀭𑀸𑀕𑀸𑀤𑀬𑁄 𑀦𑀸𑀫𑀫𑁂𑀯𑀸𑀢𑀺 𑀚𑀻𑀯𑀸𑀤𑀬𑁄𑀧𑀺 𑀦𑀸𑀫𑀭𑀽𑀧𑀦𑁆𑀢𑁄𑀕𑀥𑀸 𑀏𑀯.

𑀓𑀸𑀬𑀧𑁆𑀧𑀯𑀢𑁆𑀢𑀺𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀸 𑀓𑀸𑀬𑀸𑀤𑀺𑀓𑀸. 𑀢𑀢𑁆𑀣 𑀧𑀣𑀯𑀻𑀆𑀧𑀢𑁂𑀚𑀯𑀸𑀬𑀼𑀅𑀢𑁆𑀢𑀲𑀼𑀔𑀤𑀼𑀓𑁆𑀔𑁂𑀲𑀼 𑀓𑀸𑀬𑀲𑀫𑀜𑁆𑀜𑀸. 𑀢𑀤𑀯𑀺𑀲𑀺𑀝𑁆𑀞𑀸 𑀧𑀯𑀢𑁆𑀢𑀺𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀸, ‘‘𑀪𑀸𑀯𑁄𑀢𑀺 𑀅𑀢𑁆𑀣𑁄, 𑀓𑀸𑀬𑁄𑀢𑀺 𑀅𑀦𑀢𑁆𑀣𑀦𑁆𑀢𑀭’’𑀦𑁆𑀢𑀺 𑀯𑀘𑀦𑀢𑁄 𑀓𑀸𑀬𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺. ‘‘𑀧𑀯𑀢𑁆𑀢𑀺𑀲𑀜𑁆𑀜𑀸 𑀓𑀺𑀭𑀺𑀬𑀸𑀲𑀁𑀬𑁄𑀕𑀯𑀺𑀪𑀸𑀕𑁂𑀲𑀽’’𑀢𑀺 𑀯𑀘𑀦𑀢𑁄 𑀕𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸 𑀧𑀣𑀯𑀻𑀆𑀤𑀬𑁄 𑀏𑀯 𑀧𑀯𑀢𑁆𑀢𑀺 𑀉𑀧𑀘𑀸𑀭𑁄. ‘‘𑀢𑀲𑁆𑀫𑀺𑀁 𑀅𑀦𑀢𑁆𑀣𑀦𑁆𑀢𑀭’’𑀦𑁆𑀢𑀺 𑀯𑀘𑀦𑀢𑁄 𑀓𑀸𑀬𑀢𑁄 𑀅𑀦𑀜𑁆𑀜𑀸 𑀲𑀼𑀭𑀫𑀦𑀼𑀚𑀧𑁂𑀢𑀢𑀺𑀭𑀘𑁆𑀙𑀸𑀦𑀦𑀭𑀓𑀽𑀧𑀧𑀢𑁆𑀢𑀺𑀬𑁄 𑀕𑀢𑀺𑀬𑁄. 𑀢𑀸𑀲𑀼 𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀯𑀺𑀲𑀺𑀝𑁆𑀞𑁄 𑀕𑀢𑀻𑀲𑀼 𑀚𑀸𑀢𑀲𑁆𑀲 𑀦𑀺𑀘𑁆𑀙𑀬𑁄𑀧𑀺 𑀧𑀯𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀢𑀢𑁄 𑀅𑀦𑀜𑁆𑀜𑀸 𑀓𑀡𑁆𑀳𑀦𑀻𑀮𑀭𑀢𑁆𑀢𑀧𑀻𑀢𑀲𑀼𑀓𑁆𑀓𑀅𑀢𑀺𑀲𑀼𑀓𑁆𑀓𑀲𑀗𑁆𑀔𑀸𑀢𑀸 𑀚𑀸𑀢𑀺𑀬𑁄. 𑀢𑀸 𑀉𑀢𑁆𑀢𑀭𑀼𑀢𑁆𑀢𑀭𑀯𑀺𑀲𑀺𑀝𑁆𑀞𑀸 𑀅𑀜𑁆𑀜𑀸𑀡𑀫𑁄𑀳𑀭𑀸𑀕𑀤𑁄𑀲𑀢𑀢𑁆𑀯𑀸𑀲𑀦𑁆𑀤𑀲𑁆𑀲𑀦𑀧𑁆𑀧𑀸𑀬𑀸 𑀲𑀼𑀓𑁆𑀓𑀚𑀸𑀢𑀺, 𑀅𑀦𑁆𑀢𑀸 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀸 𑀅𑀯𑀕𑀸𑀳𑀺𑀢𑀢𑁆𑀯𑀸 𑀘𑀸𑀢𑀺 𑀲𑀼𑀓𑁆𑀓𑀚𑀸𑀢𑀺 ¶ . ‘‘𑀤𑁄𑀲𑁂𑀲𑀼 𑀩𑀦𑁆𑀥𑀲𑀫𑀜𑁆𑀜𑀸’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑀸𑀡𑀸𑀤𑀺𑀮𑀓𑁆𑀔𑀡𑀲𑁆𑀲 𑀩𑀦𑁆𑀥𑀲𑁆𑀲 𑀚𑀻𑀯𑀢𑁄 𑀅𑀦𑀜𑁆𑀜𑀢𑀸. 𑀅𑀜𑁆𑀜𑀸𑀡𑀸𑀤𑀺𑀤𑁄𑀲𑀸𑀪𑀸𑀯𑀢𑁄 𑀅𑀧𑀯𑀕𑁆𑀕𑀲𑀺𑀤𑁆𑀥𑀻𑀢𑀺 𑀓𑀸𑀬𑀸𑀤𑀬𑁄𑀧𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯.

𑀬𑁄𑀧𑀺 𑀢𑀢𑁆𑀣 𑀢𑀢𑁆𑀣 ‘‘𑀧𑀼𑀭𑀺𑀲𑁄 𑀅𑀢𑁆𑀢𑀸 𑀚𑀻𑀯𑁄’’𑀢𑀺𑀆𑀤𑀺𑀧𑀭𑀺𑀬𑀸𑀬𑁂𑀳𑀺 𑀯𑀼𑀢𑁆𑀢𑁄 𑀅𑀢𑁆𑀢𑀧𑀤𑀢𑁆𑀣𑁄, 𑀲𑁄𑀧𑀺 𑀬𑀣𑀸𑀭𑀳𑀁 𑀦𑀸𑀫𑀭𑀽𑀧𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄, 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀯𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀧𑀺 𑀦𑀸𑀫𑀭𑀽𑀧𑀦𑁆𑀢𑁄𑀕𑀥𑀪𑀸𑀯𑀸𑀪𑀸𑀯𑀯𑀲𑁂𑀦 𑀦𑀺𑀘𑁆𑀙𑀺𑀢𑀸 𑀏𑀯𑀸’’𑀢𑀺.

𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀦𑁆𑀢𑀲𑀁𑀲𑀦𑁆𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁬𑁭𑁨. 𑀲𑁄𑀢𑀺 ¶ 𑀲𑁄 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀬𑀸𑀣𑀸𑀯𑀲𑀭𑀲𑀢𑁄𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀢𑁄. 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀏𑀢𑀫𑀢𑁆𑀣𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀲𑀫𑀜𑁆𑀜𑀸𑀬𑀧𑀺 𑀧𑀳𑀸𑀦𑀢𑁆𑀣𑀸𑀬, 𑀧𑀕𑁂𑀯 ‘‘𑀲𑀢𑁆𑀢𑁄 𑀚𑀻𑀯𑁄’’𑀢𑀺 𑀧𑀯𑀢𑁆𑀢𑀦𑀓𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀫𑀭𑀽𑀧𑀫𑀢𑁆𑀢𑀢𑀸𑀬 𑀅𑀯𑀺𑀦𑀺𑀘𑁆𑀙𑀢𑀢𑁆𑀢𑀸, 𑀲𑀦𑁆𑀢𑀸𑀦𑀸𑀤𑀺𑀖𑀦𑀪𑁂𑀤𑀲𑁆𑀲 𑀘 𑀅𑀓𑀢𑀢𑁆𑀢𑀸 𑀅𑀪𑀺𑀦𑀺𑀯𑁂𑀲𑁂𑀦 𑀯𑀺𑀦𑀸 𑀲𑀫𑀽𑀳𑁂𑀓𑀢𑁆𑀢𑀕𑁆𑀕𑀳𑀡𑀯𑀲𑁂𑀦 ‘‘𑀲𑀢𑁆𑀢𑁄’’𑀢𑀺 𑀧𑀯𑀢𑁆𑀢𑁄 𑀲𑀫𑁆𑀫𑁄𑀳𑁄 𑀲𑀢𑁆𑀢𑀲𑀫𑁆𑀫𑁄𑀳𑁄. 𑀢𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀸 𑀅𑀲𑀫𑁆𑀫𑁄𑀳𑀪𑀽𑀫𑀺. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀦𑁆𑀢𑀯𑀲𑁂𑀦𑀸𑀢𑀺 ‘‘𑀬𑀣𑀸𑀧𑀻’’𑀢𑀺𑀆𑀤𑀺𑀦𑀸 𑀇𑀥 𑀯𑀼𑀢𑁆𑀢𑀸𑀦𑀁, 𑀅𑀯𑀼𑀢𑁆𑀢𑀸𑀦𑀜𑁆𑀘 ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 (𑀲𑀁. 𑀦𑀺. 𑁩.𑁫𑁯; 𑀫𑀳𑀸𑀯. 𑁨𑁦) 𑀏𑀯𑀫𑀸𑀤𑀺𑀦𑀸 𑀲𑀫𑁆𑀩𑀳𑀼𑀮𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀯𑀲𑁂𑀦. ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑀫𑀢𑁆𑀣’’𑀦𑁆𑀢𑀺.

𑀅𑀗𑁆𑀕𑀲𑀫𑁆𑀪𑀸𑀭𑀸𑀢𑀺 𑀅𑀗𑁆𑀕𑀲𑀫𑁆𑀪𑀸𑀭𑀳𑁂𑀢𑀼. 𑀢𑀦𑁆𑀦𑀺𑀫𑀺𑀢𑁆𑀢𑀁 𑀢𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀲𑀢𑀺 𑀏𑀯 𑀢𑀲𑁆𑀫𑀺𑀁 ‘‘𑀲𑀢𑁆𑀢𑁄’’𑀢𑀺 𑀯𑁄𑀳𑀸𑀭𑁄.

𑀅𑀕𑀸𑀭𑀦𑁆𑀢𑁆𑀯𑁂𑀯𑀸𑀢𑀺 𑀬𑀣𑀸 𑀓𑀝𑁆𑀞𑀸𑀤𑀻𑀦𑀺 𑀧𑀝𑀺𑀘𑁆𑀘 𑀉𑀧𑀸𑀤𑀸𑀬 𑀢𑁂𑀲𑀁 𑀦𑀸𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀕𑀸𑀭𑀫𑀺𑀘𑁆𑀘𑁂𑀯 𑀲𑀗𑁆𑀔𑀁 𑀲𑀫𑀜𑁆𑀜𑀁 𑀕𑀘𑁆𑀙𑀢𑀺, 𑀏𑀯𑀁 𑀅𑀝𑁆𑀞𑀺𑀆𑀤𑀻𑀦𑀺 𑀧𑀝𑀺𑀘𑁆𑀘 𑀉𑀧𑀸𑀤𑀸𑀬 𑀢𑁂𑀲𑀁 𑀦𑀸𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀭𑀽𑀧𑀁 𑀲𑀭𑀻𑀭𑀫𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

𑀤𑀼𑀓𑁆𑀔𑀫𑁂𑀯 𑀲𑀫𑁆𑀪𑁄𑀢𑀻𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀪𑁂𑀤𑀁 𑀢𑀺𑀯𑀺𑀥𑀁 𑀤𑀼𑀓𑁆𑀔𑀫𑁂𑀯 𑀲𑀫𑁆𑀪𑀯𑀢𑀺, 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑁂𑀯 𑀤𑀼𑀓𑁆𑀔𑀁 𑀔𑀡𑀝𑁆𑀞𑀺𑀢𑀺𑀧𑀩𑀦𑁆𑀥𑀝𑁆𑀞𑀺𑀢𑀺𑀯𑀲𑁂𑀦 𑀢𑀺𑀝𑁆𑀞𑀢𑀺 𑀘𑁂𑀯 𑀔𑀡𑀦𑀺𑀭𑁄𑀥𑀆𑀬𑀼𑀓𑁆𑀔𑀬𑀦𑀺𑀭𑁄𑀥𑀸𑀤𑀺𑀯𑀲𑁂𑀦 ¶ 𑀦𑀺𑀭𑀼𑀚𑁆𑀛𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀤𑀼𑀓𑁆𑀔𑀫𑁂𑀯𑀸𑀢𑀺 𑀏𑀯𑀓𑀸𑀭𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀜𑁆𑀜𑀢𑁆𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸𑀯𑀼𑀢𑁆𑀢𑀁 𑀤𑀼𑀓𑁆𑀔𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀦 𑀲𑀫𑁆𑀪𑀯𑀢𑀺, 𑀬𑁄 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀚𑀻𑀯𑁄’’𑀢𑀺 𑀯𑀸 𑀯𑀼𑀘𑁆𑀘𑁂𑀬𑁆𑀬, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀸 𑀓𑀼𑀢𑁄 𑀢𑀲𑁆𑀲 𑀦𑀺𑀭𑁄𑀥𑁄𑀢𑀺.

𑀉𑀧𑀫𑀸𑀳𑀺𑀦𑀸𑀫𑀭𑀽𑀧𑀯𑀺𑀪𑀸𑀯𑀦𑀸𑀓𑀣𑀸𑀯𑀡𑁆𑀡𑀦𑀸

𑁬𑁭𑁩. 𑀏𑀓𑁂𑀦𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑁂𑀲𑀽𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀅𑀓𑁆𑀔𑀸𑀤𑀻𑀲𑀼 𑀲𑀦𑁆𑀦𑀺𑀯𑀺𑀝𑁆𑀞𑁂𑀲𑀼 𑀭𑀣𑀲𑀫𑀜𑁆𑀜𑀸, 𑀢𑁂𑀦 𑀏𑀓𑁂𑀦 𑀆𑀓𑀸𑀭𑁂𑀦 𑀲𑀫𑀯𑀝𑁆𑀞𑀺𑀢𑁂𑀲𑀼 𑀏𑀓𑀚𑁆𑀛𑀁 𑀭𑀸𑀲𑀺𑀓𑀢𑁂𑀲𑀼 ¶ . 𑀏𑀯𑀫𑁂𑀯𑀦𑁆𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑁂 𑀅𑀯𑀬𑀯𑀲𑀫𑀼𑀤𑀸𑀬𑁂 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀬𑀣𑀸 ‘‘𑀭𑀣𑁄 𑀕𑁂𑀳𑀁 𑀫𑀼𑀝𑁆𑀞𑀺 𑀯𑀻𑀡𑀸 𑀲𑁂𑀦𑀸 𑀦𑀕𑀭𑀁 𑀭𑀼𑀓𑁆𑀔𑁄’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀧𑀦 𑀭𑀣𑀸𑀤𑀺 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀏𑀯𑀫𑁂𑀯𑀁. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀽𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀲𑀫𑀼𑀤𑀺𑀢𑁂𑀲𑀼 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 ‘‘𑀲𑀢𑁆𑀢𑁄 𑀚𑀻𑀯𑁄’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀧𑀦 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸 𑀦𑀢𑁆𑀣𑀻𑀢𑀺 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁. 𑀇𑀤𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑀁 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑁬𑁭𑁪. 𑀢𑀲𑁆𑀲𑀸𑀢𑀺 𑀲𑀢𑁆𑀢𑁄𑀢𑀺 𑀕𑀳𑀺𑀢𑀲𑁆𑀲 𑀅𑀢𑁆𑀢𑀦𑁄. 𑀯𑀺𑀦𑀸𑀲𑀦𑁆𑀢𑀺 𑀦𑀺𑀭𑀼𑀤𑁆𑀥𑀲𑁆𑀲 𑀯𑀺𑀦𑀸𑀲𑀁. 𑀅𑀯𑀺𑀦𑀸𑀲𑀦𑁆𑀢𑀺 𑀅𑀯𑀺𑀦𑀲𑁆𑀲𑀦𑀁, 𑀦𑀺𑀘𑁆𑀘𑀢𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑀬𑀯𑀲𑁂𑀦𑁂𑀯 𑀳𑀺 𑀅𑀢𑁆𑀢𑀯𑀸𑀤𑀺𑀦𑁄 𑀞𑀺𑀢𑀸, 𑀲𑀲𑁆𑀲𑀢𑁄 𑀅𑀢𑁆𑀢𑀸, 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀯𑀸, 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄𑀧𑀺 𑀏𑀢𑁆𑀣𑁂𑀯 𑀲𑀫𑀯𑀭𑀼𑀤𑁆𑀥𑁄𑀢𑀺. 𑀅𑀯𑀺𑀦𑀸𑀲𑀁 𑀅𑀦𑀼𑀚𑀸𑀦𑀦𑁆𑀢𑁄𑀢𑀺 𑀩𑀼𑀤𑁆𑀥𑀺𑀆𑀤𑀻𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀸𑀲𑀁 𑀇𑀘𑁆𑀙𑀦𑁆𑀢𑁄𑀧𑀺 ‘‘𑀥𑀫𑁆𑀫𑀻 𑀦𑀺𑀘𑁆𑀘𑁄 𑀓𑀽𑀝𑀝𑁆𑀞𑁄’’𑀢𑀺 𑀅𑀢𑁆𑀢𑀦𑁄 𑀯𑀺𑀦𑀸𑀲𑀸𑀪𑀸𑀯𑀁 𑀅𑀦𑀼𑀚𑀸𑀦𑀦𑁆𑀢𑁄. 𑀲𑀲𑁆𑀲𑀢𑁂𑀢𑀺 𑀲𑀲𑁆𑀲𑀢𑀕𑀸𑀳𑁂. 𑀧𑀢𑀢𑀺 𑀓𑀢𑀯𑀺𑀦𑀸𑀲𑀅𑀓𑀢𑀩𑁆𑀪𑀸𑀕𑀫𑀸𑀤𑀺𑀤𑁄𑀲𑀧𑁆𑀧𑀲𑀗𑁆𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀻𑀭𑀦𑁆𑀯𑀬𑀲𑁆𑀲𑀸𑀢𑀺 𑀔𑀻𑀭𑀲𑁆𑀲 𑀅𑀦𑁆𑀯𑀬𑀪𑀽𑀢𑀲𑁆𑀲, 𑀨𑀮𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀤𑀦𑁆𑀯𑀬𑀲𑁆𑀲𑀸𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀦𑁆𑀯𑀬𑀪𑀽𑀢𑀲𑁆𑀲 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀑𑀮𑀻𑀬𑀢𑀺 𑀦𑀸𑀫𑀸𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑁂𑀦 𑀪𑀯𑀸𑀪𑀺𑀭𑀢𑁄 𑀳𑀼𑀢𑁆𑀯𑀸 𑀪𑀯𑀦𑀺𑀭𑁄𑀥𑀢𑁄 𑀲𑀗𑁆𑀓𑁄𑀘𑀦𑀁 𑀆𑀧𑀚𑁆𑀚𑀦𑁆𑀢𑁄 𑀪𑀯𑁂𑀬𑁂𑀯 𑀦𑀺𑀮𑀻𑀬𑀢𑀺 𑀦𑀸𑀫. 𑀅𑀢𑀺𑀥𑀸𑀯𑀢𑀺 𑀦𑀸𑀫𑀸𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀳𑀺 𑀪𑀯𑁂 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀉𑀘𑁆𑀙𑁂𑀤𑀯𑀸𑀤𑀻 ‘‘𑀉𑀘𑁆𑀙𑀺𑀚𑁆𑀚𑀢𑀺 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑁄 𑀧𑀭𑀁 𑀫𑀭𑀡𑀸 𑀲𑀦𑁆𑀢𑀁 𑀪𑀯𑀁 ‘‘𑀦𑀢𑁆𑀣𑀻’’𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑁄 𑀅𑀢𑀺𑀥𑀸𑀯𑀢𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀓𑀺𑀮𑁂𑀲𑀦𑀺𑀭𑁄𑀥𑁂 𑀧𑀦 𑀓𑀫𑁆𑀫𑀲𑁆𑀲 𑀅𑀯𑀺𑀧𑀘𑁆𑀘𑀦𑀢𑁄 𑀪𑀯𑀦𑀺𑀭𑁄𑀥𑁂 𑀇𑀘𑁆𑀙𑀺𑀢𑀩𑁆𑀩𑁂 𑀢𑀣𑀸 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀢𑀁 𑀢𑀁 𑀪𑀯𑀯𑀺𑀲𑁂𑀲𑀁 𑀆𑀕𑀫𑁆𑀫 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀏𑀯𑀁 𑀪𑀯𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀢𑀁 𑀅𑀢𑀺𑀥𑀸𑀯𑀢𑀺 𑀦𑀸𑀫.

𑀧𑀭𑀺𑀬𑀼𑀝𑁆𑀞𑀺𑀢𑀸𑀢𑀺 ¶ 𑀅𑀪𑀺𑀪𑀽𑀢𑀸. 𑀘𑀓𑁆𑀔𑀼𑀫𑀦𑁆𑀢𑁄𑀢𑀺 𑀬𑀣𑀸𑀪𑀽𑀢𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀦𑁆𑀢𑁄.

𑀓𑀸𑀫𑀪𑀯𑀸𑀤𑀺𑀪𑁂𑀤𑁄 𑀪𑀯𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑁂𑀲𑀦𑁆𑀢𑀺 𑀪𑀯𑀸𑀭𑀸𑀫𑀸. 𑀢𑀲𑁆𑀫𑀺𑀁 𑀪𑀯𑁂 𑀭𑀢𑀸 𑀅𑀪𑀺𑀭𑀢𑀸𑀢𑀺 𑀪𑀯𑀭𑀢𑀸. 𑀪𑀯𑁂 𑀲𑀫𑁆𑀫𑁄𑀤𑀁 𑀆𑀧𑀦𑁆𑀦𑀸𑀢𑀺 𑀪𑀯𑀲𑀫𑁆𑀫𑀼𑀤𑀺𑀢𑀸. 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀪𑀯𑀲𑁆𑀲𑀸𑀤𑀕𑀥𑀺𑀢𑀢𑀸𑀯 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀪𑀯𑀲𑁆𑀲𑀸𑀤𑀕𑀥𑀺𑀢𑀢𑁆𑀢𑀸 𑀏𑀯 𑀪𑀯𑀦𑀺𑀭𑁄𑀥𑀸𑀯𑀳𑁂 𑀥𑀫𑁆𑀫𑁂 𑀘𑀺𑀢𑁆𑀢𑀁 𑀦 ¶ 𑀅𑀦𑀼𑀧𑁆𑀧𑀯𑀺𑀲𑀢𑀺. 𑀦𑀧𑁆𑀧𑀲𑀻𑀤𑀢𑀻𑀢𑀺 𑀦 𑀑𑀓𑀧𑁆𑀧𑀢𑀺. 𑀦 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀦 𑀧𑀢𑀺𑀝𑁆𑀞𑀳𑀢𑀺. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀦 𑀅𑀥𑀺𑀫𑀼𑀘𑁆𑀘𑀢𑀺.

𑀅𑀝𑁆𑀝𑀻𑀬𑀫𑀸𑀦𑀸𑀢𑀺 𑀤𑀼𑀓𑁆𑀔𑀸𑀧𑀺𑀬𑀫𑀸𑀦𑀸. 𑀳𑀭𑀸𑀬𑀫𑀸𑀦𑀸𑀢𑀺 𑀮𑀚𑁆𑀚𑀫𑀸𑀦𑀸. 𑀚𑀺𑀕𑀼𑀘𑁆𑀙𑀫𑀸𑀦𑀸𑀢𑀺 𑀳𑀻𑀴𑁂𑀦𑁆𑀢𑀸. 𑀯𑀺𑀪𑀯𑀦𑁆𑀢𑀺 𑀉𑀘𑁆𑀙𑁂𑀤𑀁. 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀅𑀪𑀺𑀦𑀦𑁆𑀤𑀦𑀸𑀓𑀸𑀭𑀤𑀲𑁆𑀲𑀦𑀁 ‘‘𑀬𑀢𑁄 𑀓𑀺𑀭 𑀪𑁄’’𑀢𑀺𑀆𑀤𑀺.

𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀢𑀜𑁆𑀳𑀺 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀚𑀸𑀢𑀢𑁆𑀢𑀸, 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀘 𑀪𑀽𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀽𑀢𑀢𑁄𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀢𑁄, 𑀲𑀮𑀓𑁆𑀔𑀡𑀢𑁄, 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘.

𑁬𑁭𑁫. 𑀏𑀯𑀁 𑀲𑀢𑁆𑀢𑀕𑀸𑀳𑀢𑁄 𑀅𑀯𑀮𑀻𑀬𑀦𑀸𑀢𑀺𑀥𑀸𑀯𑀦𑀤𑁄𑀲𑁂, 𑀬𑀣𑀸𑀪𑀽𑀢𑀤𑀲𑁆𑀲𑀦𑀢𑁄 𑀦𑀺𑀩𑁆𑀩𑀺𑀤𑀸𑀤𑀺𑀕𑀼𑀡𑁂 𑀘 𑀲𑀼𑀢𑁆𑀢𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀸𑀫𑀭𑀽𑀧𑀫𑀢𑁆𑀢𑁂𑀧𑀺 𑀕𑀫𑀦𑀸𑀤𑀺𑀅𑀢𑁆𑀢𑀓𑀺𑀘𑁆𑀘𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀅𑀲𑁆𑀫𑀻’’𑀢𑀺 𑀯𑀸 ‘‘𑀅𑀳’’𑀦𑁆𑀢𑀺 𑀯𑀸 𑀕𑀸𑀳𑀲𑁆𑀲 𑀯𑀢𑁆𑀣𑀼𑀪𑀽𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀧𑀭𑀫𑀢𑁆𑀣𑀢𑁄 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸. 𑀲𑀘𑁂 𑀓𑁄𑀘𑀺 𑀅𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀓𑀣𑀫𑀺𑀥 𑀦𑀸𑀫𑀭𑀽𑀧𑀫𑀢𑁆𑀢𑁂 𑀕𑀫𑀦𑀸𑀤𑀺𑀅𑀢𑁆𑀢𑀓𑀺𑀘𑁆𑀘𑀲𑀺𑀤𑁆𑀥𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀤𑀸𑀭𑀼𑀬𑀦𑁆𑀢’’𑀦𑁆𑀢𑀺𑀆𑀤𑀺. ‘‘𑀔𑀸𑀬𑀢𑀻’’𑀢𑀺 𑀏𑀢𑁂𑀦 𑀬𑀣𑀸 𑀦𑀺𑀚𑁆𑀚𑀻𑀯𑁂 𑀤𑀸𑀭𑀼𑀫𑀬𑀬𑀦𑁆𑀢𑁂 𑀅𑀩𑁆𑀪𑀦𑁆𑀢𑀭𑁂 𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀲𑁆𑀲 𑀯𑀲𑁂𑀦 𑀲𑀈𑀳𑀲𑁆𑀲 𑀲𑀩𑁆𑀬𑀸𑀧𑀸𑀭𑀲𑁆𑀲 𑀯𑀺𑀬 𑀉𑀧𑀝𑁆𑀞𑀸𑀦𑀫𑀢𑁆𑀢𑀁 𑀧𑀘𑁆𑀘𑀬𑀯𑀺𑀲𑁂𑀲𑀢𑁄, 𑀏𑀯𑀁 𑀦𑀺𑀚𑁆𑀚𑀻𑀯𑁂 𑀦𑀸𑀫𑀭𑀽𑀧𑀫𑀢𑁆𑀢𑁂 𑀧𑀘𑁆𑀘𑀬𑀯𑀺𑀲𑁂𑀲𑀢𑁄 𑀕𑀫𑀦𑀸𑀤𑀺𑀅𑀢𑁆𑀢𑀓𑀺𑀘𑁆𑀘𑀲𑀺𑀤𑁆𑀥𑀻𑀢𑀺 𑀲𑀈𑀳𑀲𑁆𑀲 𑀲𑀩𑁆𑀬𑀸𑀧𑀸𑀭𑀲𑁆𑀲 𑀯𑀺𑀬 𑀉𑀧𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀘𑁆𑀘𑀢𑁄𑀢𑀺 𑀪𑀽𑀢𑀢𑁄, 𑀧𑀭𑀫𑀢𑁆𑀣𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑀁 𑀚𑀻𑀯𑁂𑀦 𑀬𑀦𑁆𑀢𑀫𑀺𑀯 𑀅𑀪𑀺𑀲𑀗𑁆𑀔𑀢𑀁 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀧𑀼𑀜𑁆𑀚𑁄 𑀦𑀺𑀘𑁆𑀘𑀸𑀢𑀼𑀭𑀢𑀸𑀬 𑀢𑀺𑀡𑀓𑀝𑁆𑀞𑀲𑀤𑀺𑀲𑁄 𑀅𑀢𑁆𑀢𑀲𑀼𑀜𑁆𑀜𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀦𑀸𑀫𑀭𑀽𑀧𑀁.

𑀬𑀫𑀓𑀦𑁆𑀢𑀺 ¶ 𑀬𑀼𑀕𑀴𑀓𑀁. 𑀲𑁄 𑀘 𑀔𑁄 𑀬𑀫𑀓𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀲𑀦𑁆𑀦𑀺𑀲𑁆𑀲𑀺𑀢𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸’’𑀢𑀺. 𑀢𑀢𑁄 𑀏𑀯 𑀘 𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺. 𑀦 𑀳𑀺 𑀓𑀤𑀸𑀘𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑁂 𑀦𑀺𑀭𑀼𑀚𑁆𑀛𑀦𑁆𑀢𑁂 𑀅𑀭𑀽𑀧𑀁 𑀅𑀦𑀺𑀭𑀼𑀚𑁆𑀛𑀦𑁆𑀢𑀁, 𑀅𑀭𑀽𑀧𑁂 𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑁂 𑀭𑀽𑀧𑀁 𑀅𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀢𑁆𑀣𑀺. 𑀲𑁆𑀯𑀸𑀬𑀁 𑀪𑀗𑁆𑀕𑁄 𑀧𑀘𑁆𑀘𑀬𑀸 𑀧𑀘𑁆𑀘𑀬𑀦𑀺𑀭𑁄𑀥𑁂𑀦𑁂𑀯, 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀸𑀢𑀺 𑀯𑀸 𑀧𑀘𑁆𑀘𑀬𑀪𑀽𑀢𑀸, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀸𑀧𑀺 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁬𑁭𑁬. 𑀤𑀡𑁆𑀟𑀸𑀪𑀺𑀳𑀢𑀦𑁆𑀢𑀺 ¶ 𑀯𑀺𑀲𑁂𑀲𑀦𑁂𑀦 𑀤𑀡𑁆𑀟𑀁, 𑀤𑀡𑁆𑀟𑀸𑀪𑀺𑀖𑀸𑀢𑀲𑁆𑀲 𑀧𑀘𑁆𑀘𑀬𑀁 𑀧𑀼𑀭𑀺𑀲𑀯𑀸𑀬𑀸𑀫𑀜𑁆𑀘 𑀤𑀲𑁆𑀲𑁂𑀢𑀺, 𑀪𑁂𑀭𑀺𑀬𑀸 𑀧𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀲𑀤𑁆𑀤𑀲𑁆𑀲 𑀅𑀲𑀸𑀥𑀸𑀭𑀡𑀓𑀸𑀭𑀡𑀢𑀸𑀬. 𑀢𑁂𑀦𑁂𑀯 𑀳𑀺 ‘‘𑀅𑀜𑁆𑀜𑀸 𑀪𑁂𑀭𑀻’’𑀢𑀺 𑀪𑁂𑀭𑀻𑀬𑁂𑀯 𑀕𑀳𑀺𑀢𑀸, 𑀦 𑀤𑀡𑁆𑀟𑀸𑀤𑀬𑁄. 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀢𑀸𑀬 𑀲𑀤𑁆𑀤𑀁 𑀦𑀸𑀫𑀝𑁆𑀞𑀸𑀦𑀺𑀬𑀁 𑀓𑀢𑁆𑀯𑀸 ‘‘𑀏𑀯𑀫𑁂𑀯’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀓𑀭𑁄𑀢𑀺.

𑀦 𑀘𑀓𑁆𑀔𑀼𑀢𑁄 𑀚𑀸𑀬𑀭𑁂𑀢𑀺 𑀦 𑀘𑀓𑁆𑀔𑀸𑀬𑀢𑀦𑀢𑁄 𑀦𑀺𑀕𑁆𑀕𑀘𑁆𑀙𑀦𑀯𑀲𑁂𑀦 𑀚𑀸𑀬𑀦𑁆𑀢𑀺. 𑀦 𑀳𑀺 𑀘𑀓𑁆𑀔𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀢𑁄 𑀧𑀼𑀩𑁆𑀩𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀮𑀩𑁆𑀪𑀦𑁆𑀢𑀺, 𑀦 𑀘 𑀧𑀤𑁂𑀲𑀯𑀦𑁆𑀢𑁄, 𑀬𑁂𑀦 𑀢𑁂 𑀢𑀢𑁄 𑀦𑀺𑀕𑁆𑀕𑀘𑁆𑀙𑁂𑀬𑁆𑀬𑀼𑀁. 𑀢𑁂𑀦𑁂𑀯𑀸𑀳 ‘‘𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂’’𑀢𑀺 (𑀫𑀳𑀸𑀦𑀺. 𑁧𑁦). 𑀦 𑀭𑀽𑀧𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀦𑁄 𑀘 𑀉𑀪𑀺𑀦𑁆𑀦𑀫𑀦𑁆𑀢𑀭𑀸’’𑀢𑀺 𑀇𑀤𑀁 𑀧𑀦 𑀢𑁂𑀲𑀁 𑀅𑀭𑀽𑀧𑀥𑀫𑁆𑀫𑀢𑁆𑀢𑀸 𑀅𑀧𑁆𑀧𑀤𑁂𑀲𑀢𑀸𑀬 𑀯𑀼𑀢𑁆𑀢𑀁. 𑀓𑁂𑀯𑀮𑀁 𑀧𑀦 𑀬𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑀬𑀲𑀫𑀯𑀸𑀬𑁄, 𑀢𑀤𑀸 𑀉𑀧𑁆𑀧𑀚𑁆𑀚𑀦𑀫𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀳𑁂𑀢𑀼𑀁 𑀧𑀝𑀺𑀘𑁆𑀘 𑀧𑀪𑀯𑀦𑁆𑀢𑀺 𑀲𑀗𑁆𑀔𑀢𑀸’’𑀢𑀺, 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑀸𑀤𑀺𑀪𑁂𑀤𑀁 𑀥𑀫𑁆𑀫𑀚𑀸𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀪𑀽𑀢𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀢𑁂𑀳𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀓𑀢𑀢𑁆𑀢𑀸 𑀲𑀗𑁆𑀔𑀢𑀸 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀧𑀦 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀸𑀓𑀝𑀁 𑀭𑀽𑀧𑀥𑀫𑁆𑀫𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀧𑀺 𑀲𑀤𑁆𑀤𑁄 𑀧𑀳𑀝𑀸𑀬 𑀪𑁂𑀭𑀺𑀬𑀸’’𑀢𑀺 𑀆𑀳. 𑀨𑀲𑁆𑀲𑀧𑀜𑁆𑀘𑀫𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀧𑀸𑀓𑀝𑀅𑀭𑀽𑀧𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀁. 𑀲𑁂𑀲𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀢𑁆𑀣𑀼𑀭𑀽𑀧𑀸𑀢𑀺 𑀳𑀤𑀬𑀯𑀢𑁆𑀣𑀼𑀢𑁄. 𑀢𑀦𑁆𑀦𑀺𑀲𑁆𑀲𑀬𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀩𑀳𑀼𑀪𑁂𑀤𑀢𑁆𑀢𑀸 𑀲𑀸𑀫𑀜𑁆𑀜𑀯𑁄𑀳𑀸𑀭𑁂𑀦 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀢𑀸’’𑀢𑀺 𑀯𑀼𑀢𑁆𑀢𑀁.

𑁬𑁭𑁭. 𑀦𑀺𑀢𑁆𑀢𑁂𑀚𑀦𑁆𑀢𑀺 𑀢𑁂𑀚𑀳𑀻𑀦𑀁 𑀆𑀦𑀼𑀪𑀸𑀯𑀭𑀳𑀺𑀢𑀁. 𑀬𑀣𑀸 𑀧𑀦 𑀢𑀁 𑀦𑀺𑀢𑁆𑀢𑁂𑀚𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀔𑀸𑀤𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑀣𑀸 𑀲𑀤𑁆𑀤𑀳𑀦𑀼𑀲𑁆𑀲𑀳𑀦𑀸𑀤𑀻𑀲𑀼 𑀦𑀸𑀫𑀁 ‘‘𑀦𑀺𑀢𑁆𑀢𑁂𑀚’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦𑀸𑀧𑀺 𑀭𑀽𑀧𑀁 𑀲𑀦𑁆𑀥𑀸𑀭𑀡𑀸𑀩𑀦𑁆𑀥𑀦𑀸𑀤𑀻𑀲𑀼. 𑀢𑁂𑀦𑁂𑀯 𑀳𑀺 ‘‘𑀭𑀽𑀧𑀁 𑀦𑀺𑀢𑁆𑀢𑁂𑀚’’𑀦𑁆𑀢𑀺 𑀯𑀢𑁆𑀯𑀸 ‘‘𑀦 𑀳𑀺 𑀢𑀲𑁆𑀲 𑀔𑀸𑀤𑀺𑀢𑀼𑀓𑀸𑀫𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀣 𑀔𑁄’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀯𑀲𑁂𑀦𑀸𑀧𑀺 𑀦𑀸𑀫𑀭𑀽𑀧𑀸𑀦𑀁 𑀦𑀺𑀢𑁆𑀢𑁂𑀚𑀢𑀁𑀬𑁂𑀯 ¶ 𑀯𑀺𑀪𑀸𑀯𑁂𑀢𑀺. 𑀅𑀜𑁆𑀜𑀫𑀜𑁆𑀜𑀲𑀦𑁆𑀦𑀺𑀲𑁆𑀲𑀬𑁂𑀦 𑀳𑀺 𑀦𑀸𑀫𑀭𑀽𑀧𑀲𑁆𑀲 𑀅𑀢𑁆𑀢𑀓𑀺𑀘𑁆𑀘𑀲𑀺𑀤𑁆𑀥𑀺𑀧𑀺 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀢𑀸𑀯𑀺𑀪𑀸𑀯𑀦𑀫𑁂𑀯. 𑀢𑀣𑀸 𑀳𑀺 𑀦𑀸𑀫𑀭𑀽𑀧𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸, 𑀦𑀺𑀭𑀻𑀳𑀢𑀸, 𑀩𑁆𑀬𑀸𑀧𑀸𑀭𑀯𑀺𑀭𑀳𑀢𑀸 𑀘 𑀲𑀼𑀝𑁆𑀞𑀼𑀢𑀭𑀁 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀓𑀣𑀁 𑀧𑀦 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀸𑀦𑀁 𑀲𑀫𑀼𑀤𑀺𑀢𑀪𑀸𑀯𑁂 𑀲𑀫𑀢𑁆𑀣𑀢𑀸 𑀳𑁄𑀢𑀺? 𑀅𑀲𑀸𑀫𑀕𑁆𑀕𑀺𑀬𑀁 𑀅𑀳𑁂𑀢𑀽𑀦𑀁 𑀲𑀸𑀫𑀕𑁆𑀕𑀺𑀬𑀫𑁆𑀧𑀺 𑀅𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄. 𑀦 𑀳𑀺 𑀧𑀘𑁆𑀘𑁂𑀓𑀁 ¶ 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀅𑀦𑁆𑀥𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀫𑀼𑀤𑀺𑀢𑀁 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺. 𑀇𑀫𑀁 𑀉𑀧𑀫𑀁 𑀉𑀤𑀸𑀳𑀭𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀉𑀧𑀫𑀸𑀬𑀧𑀺 𑀅𑀲𑀺𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄. 𑀢𑁂𑀦𑁂𑀯𑀸𑀳 ‘‘𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁬𑁭). 𑀢𑀼𑀝𑁆𑀞𑀳𑀝𑁆𑀞𑁄𑀢𑀺 𑀬𑀤𑀺𑀧𑀸𑀳𑀁 𑀘𑀓𑁆𑀔𑀼𑀓𑀭𑀡𑀻𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀧𑀸𑀤𑀓𑀭𑀡𑀻𑀬𑀁 𑀧𑀦 𑀓𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀢𑁆𑀯𑀜𑁆𑀘 𑀘𑀓𑁆𑀔𑀼𑀓𑀭𑀡𑀻𑀬𑀁, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀉𑀪𑀺𑀦𑁆𑀦𑀁 𑀲𑀳𑀺𑀢𑀸𑀦𑀜𑁆𑀘 𑀯𑀲𑁂𑀦 𑀇𑀘𑁆𑀙𑀺𑀢𑀤𑁂𑀲𑀲𑀫𑁆𑀧𑀢𑁆𑀢𑀺 𑀲𑀺𑀚𑁆𑀛𑀢𑀻𑀢𑀺 𑀢𑀼𑀝𑁆𑀞𑀳𑀝𑁆𑀞𑁄 𑀚𑀘𑁆𑀘𑀦𑁆𑀥𑁄. 𑀢𑀢𑁆𑀣 𑀚𑀘𑁆𑀘𑀦𑁆𑀥𑁄𑀢𑀺𑀆𑀤𑀺 𑀉𑀧𑀫𑁄𑀧𑀫𑁂𑀬𑁆𑀬𑀲𑀁𑀲𑀦𑁆𑀤𑀦𑀁. 𑀥𑀫𑁆𑀫𑀸𑀦𑀁 𑀅𑀢𑁆𑀢𑀮𑀸𑀪𑁄 𑀧𑀭𑀧𑀝𑀺𑀩𑀤𑁆𑀥𑁄𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀧𑀝𑀺𑀮𑀤𑁆𑀥𑀢𑁆𑀢𑀮𑀸𑀪𑀲𑁆𑀲𑀸𑀧𑀺 𑀧𑀭𑀧𑀝𑀺𑀩𑀤𑁆𑀥𑀫𑁂𑀯 𑀅𑀢𑁆𑀣𑀓𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀲𑀓𑁂𑀦 𑀢𑁂𑀚𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀲𑀼 𑀢𑀸𑀲𑀼 𑀓𑀺𑀭𑀺𑀬𑀸𑀲𑀼 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀦𑀸𑀫𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀢𑁆𑀢𑀺 𑀯𑀸 𑀧𑀯𑀢𑁆𑀢𑀺 𑀯𑀸 𑀦 𑀘 𑀦 𑀳𑁄𑀢𑀻𑀢𑀺 𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀺𑀉𑀧𑀫𑀸𑀬 𑀲𑀸𑀥𑀺𑀢𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 ‘‘𑀅𑀲𑀸𑀫𑀕𑁆𑀕𑀺𑀬𑀁 𑀅𑀳𑁂𑀢𑀽𑀦𑀁 𑀲𑀸𑀫𑀕𑁆𑀕𑀺𑀬𑀫𑁆𑀧𑀺 𑀅𑀳𑁂𑀢𑀼𑀓𑀪𑀸𑀯𑀸𑀧𑀢𑁆𑀢𑀺𑀢𑁄’’𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑁂𑀢𑀼𑀦𑁄 𑀅𑀦𑁂𑀓𑀦𑁆𑀢𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑀧𑀭𑀥𑀫𑁆𑀫𑀯𑀲𑀸𑀦𑀼𑀯𑀢𑁆𑀢𑀺𑀦𑁄𑀢𑀺 𑀧𑀭𑁂𑀲𑀁 𑀅𑀢𑁆𑀢𑀢𑁄 𑀅𑀜𑁆𑀜𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀲𑀗𑁆𑀔𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀅𑀦𑀼𑀯𑀢𑁆𑀢𑀦𑀲𑀻𑀮𑀸. 𑀅𑀢𑁆𑀢𑀤𑀼𑀩𑁆𑀩𑀮𑀸𑀢𑀺 𑀅𑀢𑁆𑀢𑀦𑀸 𑀤𑀼𑀩𑁆𑀩𑀮𑀸 𑀅𑀲𑀫𑀢𑁆𑀣𑀸. 𑀧𑀭𑀧𑀘𑁆𑀘𑀬𑀢𑁄𑀢𑀺 𑀧𑀭𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄. 𑀏𑀢𑁂𑀦 𑀚𑀦𑀓𑀧𑀘𑁆𑀘𑀬𑀁 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀚𑀸𑀬𑀭𑁂’’𑀢𑀺. 𑀧𑀭𑀆𑀭𑀫𑁆𑀫𑀡𑀢𑁄𑀢𑀺 𑀧𑀭𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀏𑀢𑁂𑀦 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀁 𑀯𑀤𑀢𑀺. 𑀧𑀘𑁆𑀘𑀬𑀕𑁆𑀕𑀳𑀡𑀁 𑀯𑀸 𑀭𑀽𑀧𑀸𑀧𑁂𑀓𑁆𑀔𑀁, 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀦𑀸𑀫𑀸𑀧𑁂𑀓𑁆𑀔𑀁. ‘‘𑀧𑀭𑀥𑀫𑁆𑀫𑁂𑀳𑀻’’𑀢𑀺 𑀇𑀤𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑀦𑀁. 𑀧𑀼𑀭𑀺𑀫𑀢𑁆𑀣𑁂𑀦 𑀳𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀘𑁆𑀙𑀺𑀫𑀢𑁆𑀣𑁂𑀦 𑀧𑀸𑀓𑀝𑀁 𑀓𑀭𑁄𑀢𑀺. 𑀧𑀪𑀸𑀯𑀺𑀢𑀸𑀢𑀺 𑀉𑀧𑁆𑀧𑀸𑀤𑀺𑀢𑀸.

𑀦𑀸𑀯𑀸𑀬𑀦𑁆𑀢𑀺𑀓𑀽𑀧𑀫𑀸𑀬𑀧𑀺 𑀦𑀸𑀫𑀭𑀽𑀧𑀸𑀦𑀁 𑀅𑀯𑀲𑀯𑀢𑁆𑀢𑀺𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀧𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀯𑀼𑀢𑁆𑀢𑀸. 𑀦𑀺𑀲𑁆𑀲𑀸𑀬𑀸𑀢𑀺 𑀧𑀢𑀺𑀝𑁆𑀞𑀸𑀬. 𑀬𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬𑀸𑀢𑀺 𑀦𑁂𑀢𑀼𑀪𑀽𑀢𑁂 𑀦𑀺𑀬𑀸𑀫𑀓𑀓𑀫𑁆𑀫𑀓𑀸𑀭𑀓𑀸𑀤𑀺𑀫𑀦𑀼𑀲𑁆𑀲𑁂 𑀅𑀧𑀲𑁆𑀲𑀸𑀬. 𑀦 𑀳𑀺 𑀢𑁂𑀲𑀁 𑀅𑀭𑀡𑀕𑁆𑀕𑀳𑀡𑀮𑀗𑁆𑀓𑀸𑀭𑀲𑀡𑁆𑀞𑀸𑀧𑀦𑀉𑀤𑀓𑀼𑀲𑁆𑀲𑀺𑀜𑁆𑀘𑀦𑀸𑀤𑀺𑀓𑀺𑀭𑀺𑀬𑀸𑀬 ¶ 𑀯𑀺𑀦𑀸 𑀦𑀸𑀯𑀸 𑀇𑀘𑁆𑀙𑀺𑀢𑀤𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀉𑀪𑁄𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀸𑀯𑀁 𑀦𑀺𑀲𑁆𑀲𑀸𑀬 𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬 𑀦𑀸𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀦𑁆𑀢𑀺 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀦𑀸𑀦𑀸𑀦𑀬𑁂𑀳𑀻𑀢𑀺 𑀧𑀞𑀫𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀛𑀸𑀦𑀸𑀦𑀁, 𑀢𑁂𑀲𑀁 𑀉𑀧𑀘𑀸𑀭𑀸𑀦𑀜𑁆𑀘 𑀯𑀲𑁂𑀦 𑀘𑀼𑀤𑁆𑀤𑀲 𑀅𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀺, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀭𑀲𑀦𑁆𑀦𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀁 𑀥𑀸𑀢𑀸𑀬𑀢𑀦𑀔𑀦𑁆𑀥𑀫𑀳𑀸𑀪𑀽𑀢𑀯𑀲𑁂𑀦, 𑀇𑀥 𑀯𑀼𑀢𑁆𑀢𑀸𑀦𑀁 𑀅𑀯𑀼𑀢𑁆𑀢𑀸𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀯𑀲𑁂𑀦 𑀲𑀫𑀯𑀻𑀲𑀢𑀺 𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀺, 𑀢𑀸𑀦𑀺 𑀧𑀘𑁆𑀘𑁂𑀓𑀁 ‘‘𑀨𑀲𑁆𑀲𑁄 𑀯𑁂𑀤𑀦𑀸 𑀘𑀺𑀢𑁆𑀢’’𑀦𑁆𑀢𑀺 𑀇𑀫𑁂𑀲𑀁 𑀲𑀫𑁆𑀫𑀼𑀔𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸𑀦𑀁 𑀢𑀺𑀡𑁆𑀡𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀢𑀺𑀕𑀼𑀡𑀺𑀢𑀸𑀦𑀺 𑀲𑀫𑀲𑀝𑁆𑀞𑀺, 𑀘𑀼𑀤𑁆𑀤𑀲 𑀅𑀭𑀽𑀧𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀺, 𑀢𑀸𑀦𑀺 𑀘𑀸𑀢𑀺 𑀘𑀢𑀼𑀲𑀢𑁆𑀢𑀢𑀺𑀬𑀸 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀦𑀬𑁂𑀳𑀺 𑀘𑁂𑀯 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀦𑁆𑀢𑀭𑀣𑀕𑁂𑀳𑀫𑀼𑀝𑁆𑀞𑀺𑀯𑀻𑀡𑀸𑀲𑁂𑀦𑀸𑀭𑀼𑀓𑁆𑀔𑀤𑀸𑀭𑀼𑀬𑀦𑁆𑀢𑀦𑀴𑀓𑀮𑀸𑀧𑀺𑀪𑁂𑀭𑀺𑀚𑀘𑁆𑀘𑀦𑁆𑀥𑀧𑀗𑁆𑀕𑀼𑀴𑀦𑀸𑀯𑀸𑀫𑀦𑀼𑀲𑁆𑀲𑀽𑀧𑀫𑀸𑀳𑀺 𑀘 𑀦𑀸𑀫𑀭𑀽𑀧𑀧𑀫𑀢𑁆𑀢𑀢𑀸𑀯𑀯𑀢𑁆𑀣𑀸𑀧𑀦𑀦𑀬𑁂𑀳𑀺 𑀘. 𑀲𑀢𑁆𑀢𑀲𑀜𑁆𑀜𑀁 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑁂 𑀅𑀢𑁆𑀢𑀕𑀸𑀳𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀦𑁆𑀢𑀺 ‘‘𑀇𑀤𑀁 𑀦𑀸𑀫𑀁, 𑀏𑀢𑁆𑀢𑀓𑀁 𑀦𑀸𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄. 𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀘 𑀢𑁂𑀲𑀁 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀫𑀼𑀔𑁂𑀦 𑀥𑀫𑁆𑀫𑀫𑀢𑁆𑀢𑀪𑀸𑀯𑀤𑀲𑁆𑀲𑀦𑀁. 𑀅𑀢𑁆𑀢𑀤𑀺𑀝𑁆𑀞𑀺𑀫𑀮𑀯𑀺𑀲𑁄𑀥𑀦𑀢𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀲𑁆𑀲𑁂𑀯𑀸𑀢𑀺 𑀦𑀸𑀫𑀭𑀽𑀧𑀲𑁆𑀲 𑀬𑀸𑀣𑀸𑀯𑀤𑀲𑁆𑀲𑀦𑀲𑁆𑀲𑁂𑀯.

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀝𑁆𑀞𑀸𑀭𑀲𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁧𑁯. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀓𑀣𑀸𑀯𑀡𑁆𑀡𑀦𑀸

𑁬𑁭𑁮. 𑀅𑀦𑀦𑁆𑀢𑀭𑀦𑀺𑀤𑁆𑀤𑀺𑀝𑁆𑀞𑀸𑀬 ¶ ¶ 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀏𑀢𑀲𑁆𑀲𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀢𑀤𑀜𑁆𑀜𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀢𑀤𑀜𑁆𑀜𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀅𑀚𑁆𑀛𑀢𑁆𑀢𑀁 𑀯𑀸 𑀳𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀼 𑀩𑀳𑀺𑀤𑁆𑀥𑀸 𑀯𑀸, 𑀅𑀚𑁆𑀛𑀢𑁆𑀢𑀲𑀺𑀤𑁆𑀥𑀺𑀬𑀁 𑀧𑀦 𑀮𑀓𑁆𑀔𑀡𑀢𑁄 𑀲𑀩𑁆𑀩𑀫𑁆𑀧𑀺 𑀦𑀸𑀫𑀭𑀽𑀧𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀳𑁂𑀢𑀼 𑀳𑀺𑀲𑁆𑀲 𑀅𑀤𑁆𑀥𑀢𑁆𑀢𑀬𑀓𑀗𑁆𑀔𑀸𑀯𑀺𑀢𑀭𑀡𑀁 𑀳𑁄𑀢𑀻𑀢𑀺, 𑀓𑀭𑀡𑁂 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑀢𑁄 𑀓𑀗𑁆𑀔𑀸𑀯𑀺𑀢𑀭𑀡𑀓𑀺𑀭𑀺𑀬𑀸𑀬. 𑀬𑀤𑀸 𑀳𑀺𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑁄 𑀦𑀺𑀚𑁆𑀚𑀝𑁄 𑀦𑀺𑀕𑁆𑀕𑀼𑀫𑁆𑀩𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀺𑀚𑁆𑀛𑀢𑀺, 𑀢𑀤𑀸𑀦𑁂𑀦 𑀓𑀗𑁆𑀔𑀸 𑀯𑀺𑀢𑀭𑀻𑀬𑀢𑀻𑀢𑀺. 𑀯𑀺𑀢𑀭𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀜𑀸𑀡𑀁 𑀢𑀣𑀸𑀥𑀺𑀕𑀢𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁 𑀛𑀸𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀲𑀦𑁆𑀢𑀸𑀦𑁂 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀞𑀺𑀢𑀁 𑀜𑀸𑀡’’𑀦𑁆𑀢𑀺.

𑀢𑀦𑁆𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁. 𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁄 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑀁 𑀦𑀸𑀫𑀭𑀽𑀧𑀁 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀬𑁄𑀕𑀢𑁄 𑀭𑁄𑀕𑁄 𑀯𑀺𑀬. 𑀧𑀘𑁆𑀘𑀬𑀸 𑀘𑀲𑁆𑀲 𑀭𑁄𑀕𑀲𑀫𑀼𑀝𑁆𑀞𑀸𑀦𑀁 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫…𑀧𑁂… 𑀧𑀭𑀺𑀬𑁂𑀲𑀢𑀻’’𑀢𑀺 𑀆𑀳. 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀫𑀼𑀕𑁆𑀕𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀢𑀢𑁄 𑀯𑀺𑀫𑁄𑀘𑁂𑀢𑀼𑀓𑀸𑀫𑀢𑀸𑀯𑀲𑁂𑀦 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀢𑀸 𑀮𑀩𑁆𑀪𑀢𑀻𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀯 𑀞𑀺𑀢𑁂 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀦𑀼𑀓𑀫𑁆𑀧𑁂𑀢𑀩𑁆𑀩𑀓𑀼𑀫𑀸𑀭𑀓𑀤𑀲𑁆𑀲𑀦𑁂𑀦 𑀢𑀲𑁆𑀲 𑀫𑀸𑀢𑀸𑀧𑀺𑀢𑀼𑀆𑀯𑀚𑁆𑀚𑀦𑀁 𑀇𑀥 𑀅𑀦𑀼𑀤𑀸𑀳𑀭𑀡𑀁 𑀦𑀺𑀭𑁄𑀥𑁂𑀢𑀩𑁆𑀩𑀢𑀸𑀬 𑀦𑀸𑀫𑀭𑀽𑀧𑀲𑁆𑀲 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀢𑀸𑀪𑀸𑀯𑀢𑁄’’𑀢𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀅𑀯𑀲𑁆𑀲𑀜𑁆𑀘𑁂𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑁂 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸𑀧𑀯𑀢𑁆𑀢𑀺 𑀏𑀯 𑀯𑀺𑀘𑀸𑀭𑁂𑀢𑀩𑁆𑀩𑀸 𑀲𑀺𑀬𑀸. 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀫𑀦𑁆𑀤𑀁. 𑀯𑀼𑀟𑁆𑀠𑀢𑀭𑁄𑀧𑀺 𑀓𑁄𑀘𑀺 𑀫𑀦𑁆𑀤𑀩𑀼𑀤𑁆𑀥𑀺 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀼𑀫𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁄 𑀓𑁄𑀘𑀺 𑀧𑀞𑀫𑀯𑀬𑁂 𑀯𑀢𑁆𑀢𑀫𑀸𑀦𑁄 ‘‘𑀓𑀼𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀤𑀳𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀬𑁄 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀸𑀭𑀡𑀓𑁄 𑀢𑀭𑀼𑀡𑀤𑀸𑀭𑀓𑁄, 𑀲𑁄𑀧𑀺 ¶ ‘‘𑀤𑀳𑀭𑁄’’𑀢𑀺 ¶ 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀉𑀢𑁆𑀢𑀸𑀦𑀲𑁂𑀬𑁆𑀬𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀓𑀭𑀼𑀡𑀸𑀬𑀺𑀢𑀩𑁆𑀩𑀢𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀆𑀧𑀚𑁆𑀚𑀢𑀻𑀢𑀺 𑀓𑀭𑁄𑀢𑀺.

𑀬𑀣𑀸 𑀧𑀦𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀸𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀅𑀢𑁆𑀣𑁄 𑀲𑀸𑀥𑀺𑀢𑁄 𑀲𑀫𑁆𑀫𑀤𑁂𑀯 𑀲𑀸𑀥𑀺𑀢𑁄 𑀳𑁄𑀢𑀻𑀢𑀺 𑀅𑀳𑁂𑀢𑀼𑀓𑀪𑀸𑀯𑀁 𑀢𑀸𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦 𑀢𑀸𑀯𑀺𑀤𑀁 𑀦𑀸𑀫𑀭𑀽𑀧𑀁 𑀅𑀳𑁂𑀢𑀼𑀓’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀳𑁂𑀢𑀼𑀫𑀦𑁆𑀢𑀭𑁂𑀦 𑀲𑀢𑀺 𑀲𑀫𑁆𑀪𑀯𑁂 𑀲𑀩𑁆𑀩𑀥𑀫𑁆𑀫𑀸𑀦𑀁 𑀳𑁂𑀢𑀼𑀅𑀪𑀸𑀯𑁄 𑀲𑀫𑀸𑀦𑁄𑀢𑀺 𑀲𑀩𑁆𑀩𑀲𑀫𑀸𑀦𑀢𑀸 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀲𑁄𑀢𑀧𑀤𑁂𑀲𑀸𑀤𑀻𑀲𑀼, 𑀩𑀳𑀺𑀤𑁆𑀥𑀸 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀳𑁂𑀢𑀼𑀅𑀪𑀸𑀯𑁄𑀢𑀺 𑀲𑀩𑁆𑀩𑀢𑁆𑀣, 𑀘𑀓𑁆𑀔𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂, 𑀧𑀭𑀺𑀪𑁂𑀤𑀢𑁄 𑀉𑀤𑁆𑀥𑀜𑁆𑀘 𑀳𑁂𑀢𑀼𑀅𑀪𑀸𑀯𑁄𑀢𑀺 𑀲𑀩𑁆𑀩𑀤𑀸 𑀘 𑀅𑀦𑁆𑀥𑀸𑀤𑀻𑀦𑀁 𑀅𑀭𑀽𑀧𑀻𑀦𑀁, 𑀅𑀲𑀜𑁆𑀜𑀻𑀦𑀜𑁆𑀘 𑀳𑁂𑀢𑀼𑀅𑀪𑀸𑀯𑁄𑀢𑀺 𑀲𑀩𑁆𑀩𑁂𑀲𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁, 𑀳𑁂𑀢𑀼𑀅𑀪𑀸𑀯𑀸 𑀯𑀺𑀲𑁂𑀲𑀢𑁄 𑀢𑀜𑁆𑀘 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀜𑁆𑀘 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄’’𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀬𑀤𑀺𑀤𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀳𑀻’’𑀢𑀺. 𑀬𑀢𑁆𑀢𑀓𑀸 𑀮𑁄𑀓𑁂 𑀯𑀺𑀲𑁂𑀲𑀸, 𑀢𑁂𑀳𑀺 𑀲𑀩𑁆𑀩𑁂𑀲𑀁, 𑀲𑀩𑁆𑀩𑀓𑀸𑀮𑀜𑁆𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀓𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀫𑀸 𑀅𑀳𑁂𑀢𑀼𑀓𑀪𑀸𑀯𑁂 𑀯𑀺𑀲𑀺𑀝𑁆𑀞𑀢𑀸𑀬 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀲𑀩𑁆𑀩𑀢𑁆𑀣 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄, 𑀲𑀩𑁆𑀩𑀤𑀸 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄, 𑀲𑀩𑁆𑀩𑁂𑀲𑀁 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀳𑁂𑀢𑀼𑀪𑀸𑀯𑁂 𑀧𑀝𑀺𑀲𑀺𑀤𑁆𑀥𑁂 𑀯𑀺𑀲𑀫𑀳𑁂𑀢𑀼𑀯𑀸𑀤𑀻 𑀯𑀤𑁂𑀬𑁆𑀬 ‘‘𑀦 𑀇𑀤𑀁 𑀅𑀳𑁂𑀢𑀼𑀓𑀁 𑀓𑀺𑀜𑁆𑀘𑀭𑀳𑀺 𑀲𑀳𑁂𑀢𑀼𑀓𑀁, 𑀓𑁂𑀦 𑀧𑀦 𑀳𑁂𑀢𑀼𑀦𑀸 𑀲𑀳𑁂𑀢𑀼𑀓𑀦𑁆𑀢𑀺? 𑀇𑀲𑁆𑀲𑀭𑀸𑀤𑀺𑀦𑀸’’𑀢𑀺.

𑀆𑀤𑀺-𑀲𑀤𑁆𑀤𑁂𑀦 𑀧𑀓𑀢𑀺𑀧𑀼𑀭𑀺𑀲𑀧𑀚𑀸𑀧𑀢𑀺𑀓𑀸𑀮𑀸𑀤𑀻𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓’’𑀦𑁆𑀢𑀺𑀆𑀤𑀺. 𑀦 𑀦𑀸𑀫𑀭𑀽𑀧𑀁 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁 𑀦𑀸𑀫𑀭𑀽𑀧𑀢𑁄 𑀅𑀜𑁆𑀜𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀇𑀲𑁆𑀲𑀭𑀧𑀓𑀢𑀺𑀆𑀤𑀺𑀦𑀫𑁂𑀯 𑀅𑀪𑀸𑀯𑀢𑁄. 𑀬𑀤𑀺 𑀧𑀦 𑀅𑀲𑀢𑁄 𑀇𑀲𑁆𑀲𑀭𑀸𑀤𑀺𑀢𑁄 𑀦𑀸𑀫𑀭𑀽𑀧𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀏𑀯𑀁 𑀲𑀢𑀺 𑀲𑀸 𑀏𑀯 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀁 𑀏𑀓𑀲𑀤𑀺𑀲𑀢𑀸 𑀆𑀧𑀚𑁆𑀚𑀢𑀺. 𑀅𑀣 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁, 𑀦𑀸𑀫𑀭𑀽𑀧𑀜𑁆𑀘 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀁, 𑀳𑀼𑀢𑁆𑀯𑀸 𑀘 𑀯𑀺𑀦𑀲𑁆𑀲𑀦𑁆𑀢𑀁 𑀤𑀺𑀲𑁆𑀲𑀢𑀻𑀢𑀺 𑀇𑀲𑁆𑀲𑀭𑀸𑀤𑀻𑀳𑀺𑀧𑀺 𑀢𑀸𑀤𑀺𑀲𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀘 𑀢𑀤𑀧𑀺 𑀲𑀧𑁆𑀧𑀘𑁆𑀘𑀬𑀁 𑀲𑀗𑁆𑀔𑀢𑀫𑁂𑀯𑀸𑀢𑀺 𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀅𑀣 ¶ 𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀅𑀳𑁂𑀢𑀼𑀓𑀢𑀸 𑀢𑀲𑁆𑀲 𑀆𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀅𑀳𑁂𑀢𑀼𑀓𑀪𑀸𑀯𑀸𑀧𑀢𑁆𑀢𑀺𑀢𑁄’’𑀢𑀺.

𑀅𑀧𑀺𑀘 𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁 𑀦𑀸𑀫𑀭𑀽𑀧𑀁. 𑀓𑀺𑀁 𑀓𑀸𑀭𑀡𑀁? 𑀓𑀫𑁂𑀦 𑀉𑀧𑁆𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀏𑀯𑀁 𑀦𑀺𑀘𑁆𑀘𑀁 ¶ 𑀇𑀲𑁆𑀲𑀭𑀸𑀤𑀺𑀲𑀜𑁆𑀜𑀺𑀢𑀁 𑀓𑀫𑁆𑀫𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸𑀤𑀺𑀦𑀺𑀭𑀧𑁂𑀓𑁆𑀔𑀓𑀸𑀭𑀡𑀫𑁆𑀧𑀺 𑀲𑀺𑀬𑀸, 𑀲𑀩𑁆𑀩𑁂𑀲𑀁𑀬𑁂𑀯 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀬𑀢𑁆𑀢𑀓𑁂𑀳𑀺 𑀢𑀢𑁄 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀬𑀤𑀺 𑀧𑀦 𑀢𑀲𑁆𑀲 𑀇𑀘𑁆𑀙𑀸𑀯𑀲𑁂𑀦 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀧𑀭𑀺𑀓𑀧𑁆𑀧𑁂𑀬𑁆𑀬𑀼𑀁, 𑀢𑀸𑀲𑀜𑁆𑀘 𑀇𑀘𑁆𑀙𑀸𑀦𑀁 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀬𑀁 𑀓𑁄 𑀯𑀺𑀩𑀦𑁆𑀥𑁄. 𑀅𑀣 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀓𑀫𑁆𑀫𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸𑀤𑀺𑀅𑀧𑁂𑀓𑁆𑀔𑀺𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀘𑁂? 𑀢𑀤𑁂𑀯 𑀳𑁂𑀢𑀼 𑀓𑀸𑀭𑀡𑀁, 𑀓𑀺𑀫𑀜𑁆𑀜𑁂𑀦 𑀅𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀁? 𑀤𑀺𑀝𑁆𑀞𑀜𑁆𑀳𑀺 𑀓𑀫𑁆𑀫𑀸𑀤𑀻𑀦𑀁 𑀲𑀸𑀫𑀢𑁆𑀣𑀺𑀬𑀁 𑀢𑀤𑀜𑁆𑀜𑀧𑀘𑁆𑀘𑀬𑀲𑀦𑁆𑀦𑀺𑀥𑀸𑀦𑁂𑀧𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄. 𑀬𑀣𑀸 𑀳𑀺 𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑀲𑀦𑁆𑀦𑀺𑀥𑀸𑀦𑁂𑀧𑀺 𑀘𑀓𑁆𑀔𑀼𑀦𑁄 𑀅𑀪𑀸𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀁, 𑀪𑀸𑀯𑁂 𑀘 𑀪𑀸𑀯𑀁 𑀤𑀺𑀲𑁆𑀯𑀸 𑀘𑀓𑁆𑀔𑀼𑀦𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀘 𑀬𑁆𑀯𑀸𑀬𑀁 𑀬𑀫𑀓𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁 𑀚𑀦𑀓𑀚𑀦𑀦𑀻𑀲𑀼𑀓𑁆𑀓𑀲𑁄𑀡𑀺𑀢𑀸𑀤𑀺𑀩𑀸𑀳𑀺𑀭𑀧𑀘𑁆𑀘𑀬𑀲𑀫𑀪𑀸𑀯𑁂𑀧𑀺 𑀲𑀢𑁆𑀢𑀸𑀦𑀁 𑀳𑀻𑀦𑀧𑀡𑀻𑀢𑀢𑀸𑀤𑀺𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀲𑁄 𑀘 𑀲𑀲𑀦𑁆𑀢𑀸𑀦𑁂 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸 𑀓𑀫𑁆𑀫𑀓𑀺𑀮𑁂𑀲𑀳𑁂𑀢𑀼𑀓𑁄𑀢𑀺 𑀢𑀲𑁆𑀲 𑀢𑀢𑁆𑀣 𑀲𑀫𑀢𑁆𑀣𑀢𑀸 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀏𑀯𑀫𑀺𑀲𑁆𑀲𑀭𑀸𑀤𑀺𑀓𑀲𑁆𑀲. 𑀓𑀸𑀭𑀡𑀲𑁆𑀲 𑀳𑀺 𑀪𑀸𑀯𑀸𑀪𑀸𑀯𑁂 𑀨𑀮𑀲𑁆𑀲 𑀪𑀸𑀯𑀸𑀪𑀸𑀯𑁂𑀳𑀺 𑀓𑀸𑀭𑀡𑀲𑁆𑀲 𑀲𑀫𑀢𑁆𑀣𑀢𑀸 𑀯𑀺𑀜𑁆𑀜𑀸𑀬𑁂𑀬𑁆𑀬. 𑀦 𑀘 𑀲𑀦𑁆𑀦𑀺𑀳𑀺𑀢𑁂 𑀢𑀤𑀓𑀸𑀭𑀡𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀇𑀲𑁆𑀲𑀭𑀸𑀤𑀺𑀯𑁂𑀓𑀮𑁆𑀮𑁂𑀦 𑀓𑀢𑁆𑀣𑀘𑀺 𑀅𑀦𑀼𑀧𑁆𑀧𑀢𑁆𑀢𑀺 𑀤𑀺𑀝𑁆𑀞𑀸, 𑀢𑀲𑁆𑀫𑀸 𑀅𑀓𑀸𑀭𑀡𑀫𑀺𑀲𑁆𑀲𑀭𑁄.

𑀅𑀣𑀸𑀧𑀺 𑀲𑀕𑁆𑀕𑁄 𑀏𑀯𑀁 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑁄 𑀯𑀼𑀘𑁆𑀘𑁂𑀬𑁆𑀬, 𑀲𑁄𑀧𑀺 𑀲𑀕𑁆𑀕𑀧𑁆𑀧𑀓𑀸𑀭𑁄 𑀲𑀩𑁆𑀩𑀓𑀸𑀮𑀁 𑀢𑀢𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀦 𑀳𑀺 𑀲𑀦𑁆𑀦𑀺𑀳𑀺𑀢𑀓𑀸𑀭𑀡𑀲𑁆𑀲 𑀨𑀮𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸. 𑀦𑀺𑀘𑁆𑀘𑁂 𑀘 𑀲𑀢𑀺 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀓𑀸𑀭𑀡𑁂 𑀲𑀕𑁆𑀕𑀲𑁆𑀲 𑀆𑀤𑀺𑀬𑁂𑀯 𑀦 𑀬𑀼𑀢𑁆𑀢𑁄, 𑀬𑀸𑀯 𑀇𑀲𑁆𑀲𑀭𑀸𑀤𑀺𑀓𑀁 𑀓𑀸𑀭𑀡𑀁, 𑀢𑀸𑀯 𑀲𑀩𑁆𑀩𑀲𑁆𑀲 𑀅𑀢𑁆𑀣𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀅𑀣𑀸𑀧𑀺 𑀯𑀤𑁂𑀬𑁆𑀬 ‘‘𑀅𑀜𑁆𑀜𑁂𑀧𑀺 𑀬𑀣𑀸𑀭𑀳𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯, 𑀇𑀲𑁆𑀲𑀭𑀸𑀤𑀺𑀓𑀫𑁆𑀧𑀺 𑀢𑁂𑀲𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀳𑁄𑀢𑀻’’𑀢𑀺. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀬𑀤𑀺 𑀧𑀭𑁄 𑀯𑀤𑁂𑀬𑁆𑀬 ‘‘𑀇𑀥 𑀩𑀼𑀤𑁆𑀥𑀺𑀧𑀼𑀩𑁆𑀩𑁄 𑀪𑀸𑀯𑀸𑀦𑀁 𑀭𑀘𑀦𑀸𑀯𑀺𑀲𑁂𑀲𑁄 𑀤𑀺𑀝𑁆𑀞𑁄, 𑀬𑀣𑀸 𑀢𑀁 𑀖𑀝𑀕𑁂𑀳𑀸𑀤𑀻𑀦𑀁. 𑀅𑀢𑁆𑀣𑀺 𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀲𑀭𑀻𑀭𑀧𑀤𑀼𑀫𑀸𑀤𑀻𑀦𑀁 𑀭𑀘𑀦𑀸𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑁂𑀦𑀸𑀧𑀺 𑀩𑀼𑀤𑁆𑀥𑀺𑀧𑀼𑀩𑁆𑀩𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀲𑁆𑀲 𑀘 𑀲𑁄 𑀩𑀼𑀤𑁆𑀥𑀺𑀧𑀼𑀩𑁆𑀩𑁄, 𑀲𑁄 𑀇𑀲𑁆𑀲𑀭𑀸𑀤𑀺𑀓𑁄, 𑀢𑀲𑁆𑀫𑀸 𑀢𑁂𑀦 𑀦𑀸𑀫𑀭𑀽𑀧𑀲𑀜𑁆𑀜𑀺𑀢𑀲𑁆𑀲 𑀮𑁄𑀓𑀲𑁆𑀲 𑀓𑀸𑀭𑀡𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑀬𑀺𑀤𑀁 𑀅𑀲𑀺𑀤𑁆𑀥𑀁, 𑀭𑀘𑀺𑀢𑀸 𑀲𑀭𑀻𑀭𑀧𑀤𑀼𑀫𑀸𑀤𑀬𑁄𑀢𑀺 ¶ 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀉𑀧𑁆𑀧𑀦𑁆𑀦𑀲𑁆𑀲 𑀳𑀺 𑀲𑀦𑁆𑀦𑀺𑀯𑁂𑀲𑀯𑀲𑁂𑀦 𑀢𑀣𑀸 𑀢𑀣𑀸 𑀧𑀝𑁆𑀞𑀧𑀦𑀁 ‘‘𑀭𑀘𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁂𑀓𑀦𑁆𑀢𑀺𑀓𑁄 𑀘𑀸𑀬𑀁 𑀅𑀩𑀼𑀤𑁆𑀥𑀺𑀧𑀼𑀩𑁆𑀩𑀲𑁆𑀲𑀸𑀧𑀺 𑀤𑀺𑀝𑁆𑀞𑀢𑁆𑀢𑀸. 𑀤𑀺𑀝𑁆𑀞𑁄 𑀳𑀺 𑀦𑁆𑀳𑀸𑀭𑀼𑀆𑀤𑀻𑀦𑀁 𑀅𑀕𑁆𑀕𑀺𑀲𑀁𑀬𑁄𑀕𑁂𑀦 𑀭𑀘𑀦𑀸𑀯𑀺𑀲𑁂𑀲𑁄, 𑀢𑀣𑀸 𑀯𑀺𑀲𑀼𑀲𑁆𑀲𑀦𑁆𑀢𑀸𑀦𑀁 𑀧𑀼𑀩𑁆𑀩𑀘𑀫𑁆𑀫𑀸𑀤𑀻𑀦𑀁. 𑀬𑀤𑀺 𑀧𑀦𑀸𑀬𑀫𑀺𑀲𑁆𑀲𑀭𑀸𑀤𑀺𑀓𑁄 𑀕𑀯𑀲𑁆𑀲𑀚𑀕𑀤𑁆𑀭𑀪𑀸𑀤𑀻𑀦𑀁 𑀓𑀭𑀻𑀲𑀸𑀯𑀢𑁆𑀢𑁂 𑀧𑀝𑀺𑀫𑀳𑀼𑀢𑀁 𑀭𑀘𑁂𑀬𑁆𑀬, 𑀉𑀫𑁆𑀫𑀢𑁆𑀢𑁄 𑀯𑀺𑀬 𑀯𑀺𑀓𑁆𑀔𑀺𑀢𑁆𑀢𑁄 𑀲𑀺𑀬𑀸. 𑀓𑀺𑀜𑁆𑀘𑀸𑀬𑀁 𑀮𑁄𑀓𑀁 𑀲𑀚𑁆𑀚𑁂𑀦𑁆𑀢𑁄 𑀅𑀢𑁆𑀢𑀢𑁆𑀣𑀁 𑀯𑀸 𑀲𑀚𑁆𑀚𑁂𑀬𑁆𑀬 𑀮𑁄𑀓𑀢𑁆𑀣𑀁 𑀯𑀸.

𑀢𑀢𑁆𑀣 ¶ 𑀘 𑀬𑀤𑀺 𑀧𑀼𑀭𑀺𑀫𑁄 𑀫𑀓𑁆𑀔𑁄 𑀓𑀢𑀓𑀺𑀘𑁆𑀘𑁄 𑀦 𑀲𑀺𑀬𑀸 𑀮𑁄𑀓𑁂𑀦 𑀲𑀸𑀥𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀅𑀣 𑀤𑀼𑀢𑀺𑀬𑁄, 𑀓𑀲𑁆𑀫𑀸 𑀮𑁄𑀓𑀲𑁆𑀲 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀁 𑀧𑀸𑀧𑀁 𑀦𑀺𑀭𑀬𑀸𑀤𑀺𑀁, 𑀚𑀭𑀸𑀫𑀭𑀡𑀸𑀤𑀺𑀜𑁆𑀘 𑀲𑀚𑀢𑀺? 𑀅𑀣 𑀢𑀤𑀼𑀪𑀬𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑀻𑀴𑀢𑁆𑀣𑀁 𑀲𑀚𑀢𑀺. 𑀓𑀻𑀴𑀸 𑀘 𑀦𑀸𑀫 𑀭𑀢𑀺𑀅𑀢𑁆𑀣𑀸 𑀳𑁄𑀢𑀺. 𑀯𑀺𑀦𑀸 𑀓𑀻𑀴𑀸𑀬 𑀭𑀢𑀺𑀁 𑀅𑀚𑀸𑀦𑀦𑁆𑀢𑀸𑀦𑀁 𑀭𑀢𑀺𑀅𑀢𑁆𑀣𑀜𑁆𑀘 𑀓𑀻𑀴𑀫𑀸𑀭𑀪𑀦𑁆𑀢𑁄 𑀭𑀢𑀺𑀬𑀁 𑀇𑀲𑁆𑀲𑀭𑁄 𑀅𑀦𑀺𑀲𑁆𑀲𑀭𑁄 𑀲𑀺𑀬𑀸. 𑀅𑀣 𑀧𑀬𑁄𑀚𑀦𑀦𑀺𑀭𑀧𑁂𑀓𑁆𑀔𑁄, 𑀲𑀩𑁆𑀩𑀓𑀸𑀮𑀁 𑀲𑀚𑁂𑀬𑁆𑀬, 𑀢𑀲𑁆𑀲 𑀘𑀸𑀬𑀁 𑀲𑀚𑀦𑀲𑀫𑀢𑁆𑀣𑀢𑀸 𑀅𑀳𑁂𑀢𑀼𑀓𑀸 𑀯𑀸 𑀲𑀺𑀬𑀸 𑀲𑀳𑁂𑀢𑀼𑀓𑀸 𑀯𑀸. 𑀅𑀳𑁂𑀢𑀼𑀓𑀸 𑀘𑁂, 𑀲𑀩𑁆𑀩𑁂𑀲𑀁 𑀲𑀺𑀬𑀸 𑀲𑀳𑁂𑀢𑀼𑀓𑀸 𑀯𑀸. 𑀅𑀳𑁂𑀢𑀼𑀓𑀸 𑀘𑁂, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀺𑀬𑀸. 𑀅𑀣 𑀲𑀳𑁂𑀢𑀼𑀓𑀸, 𑀲𑁄 𑀘𑀲𑁆𑀲 𑀳𑁂𑀢𑀼 𑀧𑀭𑀢𑁄 𑀯𑀸 𑀲𑀫𑁆𑀪𑀽𑀢𑁄 𑀲𑀺𑀬𑀸 𑀅𑀢𑁆𑀢𑀢𑁄 𑀯𑀸. 𑀢𑀢𑁆𑀣 𑀧𑀭𑀢𑁄 𑀘𑁂 𑀲𑀫𑁆𑀪𑀽𑀢𑁄, 𑀬𑀤𑀲𑁆𑀲 𑀲𑁄 𑀮𑀤𑁆𑀥𑁄, 𑀢𑀲𑁆𑀲𑀸𑀬𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑀤𑀺𑀲𑁄 𑀲𑀺𑀬𑀸. 𑀅𑀣 𑀅𑀢𑁆𑀢𑀢𑁄 𑀢𑀤𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀬𑀁 𑀓𑀻𑀤𑀺𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀩𑁆𑀩𑀫𑀺𑀤𑀁 𑀆𑀮𑀼𑀦𑀯𑀺𑀲𑀺𑀡𑀁 𑀆𑀓𑀼𑀮𑀩𑁆𑀬𑀸𑀓𑀼𑀮𑀁 𑀕𑁄𑀬𑀽𑀣𑁂𑀦 𑀕𑀢𑀫𑀕𑁆𑀕𑀲𑀤𑀺𑀲𑀨𑁂𑀡𑀧𑀺𑀡𑁆𑀟𑀲𑀫𑀁 𑀅𑀯𑀺𑀫𑀤𑁆𑀤𑀓𑁆𑀔𑀫𑀁 𑀅𑀲𑀸𑀭𑀁. 𑀢𑀺𑀝𑁆𑀞𑀢𑀼 𑀧𑀲𑀗𑁆𑀕𑁄, 𑀬𑀣𑀸𑀥𑀺𑀓𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀦𑀸𑀫𑀭𑀽𑀧𑀁 𑀦 𑀅𑀳𑁂𑀢𑀼𑀓𑀁, 𑀦𑀸𑀧𑀺 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀁, 𑀢𑀲𑁆𑀫𑀸. 𑀢𑁂𑀢𑀺 𑀳𑁂𑀢𑀼𑀧𑀘𑁆𑀘𑀬𑀸.

𑁬𑁭𑁯. 𑀑𑀴𑀸𑀭𑀺𑀓𑀢𑁆𑀢𑀸, 𑀲𑀼𑀧𑀸𑀓𑀝𑀢𑁆𑀢𑀸 𑀘 𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀼𑀓𑀭𑁄𑀢𑀺 ‘‘𑀇𑀫𑀲𑁆𑀲 𑀢𑀸𑀯 𑀭𑀽𑀧𑀓𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀁 𑀢𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀺𑀥𑀺𑀁 𑀆𑀭𑀪𑀢𑀺. 𑀢𑀢𑁆𑀣 𑀬𑀣𑀸 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀯𑀸𑀤𑀦𑀺𑀯𑀢𑁆𑀢𑀺𑀬𑀸 𑀳𑁄𑀢𑀺, 𑀏𑀯𑀁 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀸𑀯𑀳𑀪𑀸𑀯𑁂𑀦 𑀢𑀢𑁆𑀣 𑀅𑀪𑀺𑀭𑀢𑀺𑀦𑀺𑀯𑀢𑁆𑀢𑀺𑀬𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀁 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀲𑁆𑀲 𑀲𑀼𑀘𑀺𑀪𑀸𑀯𑀧𑀝𑀺𑀲𑁂𑀥𑀦𑀫𑀼𑀔𑁂𑀦 𑀅𑀲𑀼𑀘𑀺𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀁 𑀓𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀮𑀸𑀤𑀻𑀦𑀺 𑀅𑀲𑀼𑀘𑀺𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸𑀦𑀺𑀧𑀺 ¶ 𑀲𑀬𑀁 𑀲𑀼𑀘𑀺𑀲𑀫𑁆𑀫𑀢𑀸𑀦𑁂𑀯𑀸𑀢𑀺 𑀢𑀁𑀤𑀲𑁆𑀲𑀦𑀢𑁆𑀣𑀁 𑀅𑀩𑁆𑀪𑀦𑁆𑀢𑀭𑀕𑁆𑀕𑀳𑀡𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀣𑀸 𑀲𑀗𑁆𑀓𑀸𑀭𑀥𑀸𑀦𑀲𑁆𑀫𑀺𑀁, 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂;

𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫’’𑀦𑁆𑀢𑀺. (𑀥. 𑀧. 𑁫𑁮);

‘‘𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀇𑀤𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀭𑀽𑀧𑀓𑀸𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀲𑀸𑀫𑀜𑁆𑀜𑀢𑁄 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀳𑀸𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀢𑀸𑀯𑀘𑀦𑀁, 𑀉𑀤𑀭𑀧𑀝𑀮𑀲𑁆𑀲 𑀧𑀘𑁆𑀙𑀢𑁄 𑀓𑀭𑀡𑀸𑀤𑀺𑀯𑀘𑀦𑀁, 𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀢𑀸𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀏𑀯𑀫𑀯𑀝𑁆𑀞𑀺𑀢𑁂 𑀬𑀤𑁂𑀓𑀘𑁆𑀘𑁂𑀳𑀺 𑀧𑀺𑀝𑁆𑀞𑀺𑀢𑁄, 𑀧𑀼𑀭𑀢𑁄 𑀘 𑀓𑀭𑀡𑀁 𑀓𑀺𑀁 𑀲𑀺𑀬𑀸 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 ¶ 𑀅𑀧𑀸𑀳𑀢𑀁 𑀳𑁄𑀢𑀺. ‘‘𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀩𑀻𑀚𑀁 𑀯𑀺𑀬 𑀅𑀗𑁆𑀓𑀼𑀭𑀲𑁆𑀲 𑀅𑀯𑀺𑀚𑁆𑀚𑀸𑀤𑀬𑁄 𑀭𑀽𑀧𑀓𑀸𑀬𑀲𑁆𑀲 𑀅𑀲𑀸𑀥𑀸𑀭𑀡𑀓𑀸𑀭𑀡𑀢𑀸𑀬 𑀳𑁂𑀢𑀽𑀢𑀺 𑀤𑀲𑁆𑀲𑁂𑀢𑀺. ‘‘𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀧𑀦 𑀅𑀗𑁆𑀓𑀼𑀭𑀲𑁆𑀲 𑀧𑀣𑀯𑀻𑀲𑀮𑀺𑀮𑀧𑀸𑀭𑀺𑀲𑀺𑀆𑀤𑀬𑁄 𑀯𑀺𑀬 𑀆𑀳𑀸𑀭𑁄 𑀲𑀸𑀥𑀸𑀭𑀡𑀓𑀸𑀭𑀡𑀢𑀸𑀬 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀜𑁆𑀘 𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀅𑀯𑀺𑀚𑁆𑀚𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀬𑀣𑀸𑀭𑀳𑀁 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀢𑁆𑀣𑁄. 𑀪𑀯𑁂𑀲𑀼 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀧𑀢𑁆𑀣𑀦𑀸 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑁂𑀦 𑀲𑀗𑁆𑀔𑀸𑀭𑀪𑀯𑀸𑀦𑀁 𑀳𑁂𑀢𑀼𑀪𑀽𑀢𑀸 𑀚𑀦𑀓𑀲𑀳𑀸𑀬𑀢𑀸𑀬 𑀪𑀯𑀦𑀺𑀓𑀦𑁆𑀢𑀺 𑀢𑀁𑀲𑀳𑀚𑀸𑀢𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀅𑀪𑀺𑀲𑀗𑁆𑀔𑀸𑀭𑀺𑀓𑀸, 𑀅𑀧𑀲𑁆𑀲𑀬𑀪𑀽𑀢𑀸 𑀘𑀸𑀢𑀺 ‘‘𑀫𑀸𑀢𑀸 𑀯𑀺𑀬 𑀤𑀸𑀭𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀸’’𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀧𑀺𑀢𑀼 𑀚𑀦𑀺𑀢𑀲𑀼𑀓𑁆𑀓𑁂 𑀧𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀧𑀺𑀢𑀸 𑀚𑀦𑀓𑁄, 𑀏𑀯𑀁 𑀓𑀫𑁆𑀫𑀁 𑀲𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀢𑁆𑀢𑀸 𑀚𑀦𑀓𑀁 𑀯𑀼𑀢𑁆𑀢𑀁. 𑀬𑀣𑀸 𑀥𑀸𑀢𑀺 𑀚𑀸𑀢𑀲𑁆𑀲 𑀤𑀸𑀭𑀓𑀲𑁆𑀲 𑀧𑁄𑀲𑀦𑀯𑀲𑁂𑀦 𑀲𑀦𑁆𑀥𑀸𑀭𑀺𑀓𑀸, 𑀏𑀯𑀁 𑀆𑀳𑀸𑀭𑁄 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀲𑀦𑁆𑀥𑀸𑀭𑀓𑁄 𑀯𑀼𑀢𑁆𑀢𑁄.

𑀓𑀸𑀫𑀜𑁆𑀘𑁂𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀦𑀸𑀫𑀓𑀸𑀬𑀲𑁆𑀲𑀸𑀧𑀺 𑀧𑀘𑁆𑀘𑀬𑁄, 𑀧𑀓𑀸𑀭𑀦𑁆𑀢𑀭𑁂𑀦 𑀧𑀦 𑀢𑀲𑁆𑀲 𑀧𑀸𑀓𑀝𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀓𑁆𑀔𑀼𑀜𑁆𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀤𑀺𑀅𑀚𑁆𑀛𑀢𑁆𑀢𑀁 𑀲𑀩𑁆𑀩𑀁 𑀧𑀘𑁆𑀘𑀬𑀚𑀸𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀽𑀧𑁂 𑀘𑀸𑀢𑀺 𑀧𑀦 𑀘-𑀲𑀤𑁆𑀤𑁂𑀦 𑀬𑀣𑀸 𑀩𑀳𑀼𑀮𑀁 𑀩𑀸𑀳𑀺𑀭𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀩𑀸𑀳𑀺𑀭𑀁 𑀧𑀘𑁆𑀘𑀬𑀚𑀸𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑀪𑀽𑀢𑀁 ¶ 𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀘𑀓𑁆𑀔𑀼𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦, 𑀭𑀽𑀧𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦, 𑀇𑀢𑀭𑁂𑀲𑀜𑁆𑀘 𑀲𑀗𑁆𑀕𑀳𑀺𑀢𑀸𑀦𑀁 𑀅𑀦𑀦𑁆𑀢𑀭𑀸𑀤𑀺𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀘𑀦𑀪𑁂𑀤𑁂 𑀧𑀦 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀘 𑀨𑀲𑁆𑀲𑀸𑀤𑀻𑀦𑀁 𑀯𑀺𑀬 𑀲𑀳𑀧𑀘𑁆𑀘𑀬𑁂𑀳𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀧𑀸𑀞𑀲𑁆𑀲 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑀓𑀣𑀸. 𑁪𑁬𑁫, 𑁪𑁬𑁭) 𑀯𑀺𑀬 ‘‘𑀲𑁄𑀢𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀧𑀸𑀞𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀯𑀁 𑀲𑀫𑁆𑀫𑀲𑀦𑀼𑀧𑀕𑀁 𑀲𑀩𑁆𑀩𑀁 𑀦𑀸𑀫𑀁 𑀲𑀳𑀧𑀘𑁆𑀘𑀬𑁂𑀦 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑀸𑀫𑀓𑀸𑀬𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀻’’𑀢𑀺.

𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸𑀢𑀺 𑀏𑀢𑀭𑀳𑀺 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀲𑀧𑁆𑀧𑀘𑁆𑀘𑀬𑀢𑀸𑀫𑀢𑁆𑀢𑀫𑁂𑀯 𑀧𑀘𑁆𑀘𑀸𑀫𑀝𑁆𑀞𑀁, 𑀅𑀣 𑀔𑁄 𑀬𑀸𑀤𑀺𑀲𑁂𑀳𑀺 𑀧𑀘𑁆𑀘𑀬𑁂𑀳𑀺 𑀏𑀢𑀭𑀳𑀺 𑀧𑀯𑀢𑁆𑀢𑀢𑀺, 𑀢𑀸𑀤𑀺𑀲𑁂𑀳𑀺 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂𑀳𑁂𑀯 𑀅𑀢𑀻𑀢𑁂𑀧𑀺 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀧𑀘𑁆𑀘𑀬𑀲𑀤𑀺𑀲𑀢𑀸𑀧𑀺 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁮𑁦. 𑀧𑀼𑀩𑁆𑀩𑀦𑁆𑀢𑀦𑁆𑀢𑀺 ¶ 𑀅𑀢𑀻𑀢𑀁 𑀔𑀦𑁆𑀥𑀧𑁆𑀧𑀩𑀦𑁆𑀥𑀓𑁄𑀝𑁆𑀞𑀸𑀲𑀁. 𑀆𑀭𑀩𑁆𑀪𑀸𑀢𑀺 𑀉𑀤𑁆𑀤𑀺𑀲𑁆𑀲. 𑀅𑀳𑁄𑀲𑀺𑀁 𑀦𑀼 𑀔𑁄, 𑀦 𑀦𑀼 𑀔𑁄 𑀅𑀳𑁄𑀲𑀺𑀦𑁆𑀢𑀺 𑀲𑀲𑁆𑀲𑀢𑀸𑀓𑀸𑀭𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀅𑀢𑀻𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀁, 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀺. 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀦𑁆𑀢𑀺 𑀚𑀸𑀢𑀺𑀮𑀺𑀗𑁆𑀕𑀽𑀧𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑁄 𑀦𑀼 𑀔𑁄 𑀅𑀳𑁄𑀲𑀺𑀁, 𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼 𑀕𑀳𑀝𑁆𑀞𑀸𑀤𑀻𑀲𑀼 𑀤𑁂𑀯𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀦𑀼 𑀔𑁄’’𑀢𑀺 𑀓𑀗𑁆𑀔𑀢𑀺. 𑀓𑀣𑀁 𑀦𑀼 𑀔𑁄𑀢𑀺 𑀲𑀡𑁆𑀞𑀸𑀦𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 ‘‘𑀤𑀻𑀖𑁄 𑀦𑀼 𑀔𑁄 𑀅𑀳𑁄𑀲𑀺𑀁, 𑀭𑀲𑁆𑀲𑀑𑀤𑀸𑀢𑀓𑀸𑀴𑀧𑀫𑀸𑀡𑀺𑀓𑀅𑀧𑁆𑀧𑀫𑀸𑀡𑀺𑀓𑀸𑀤𑀻𑀦𑀫𑁆𑀧𑀺 𑀅𑀜𑁆𑀜𑀢𑀭𑁄’’𑀢𑀺 𑀓𑀗𑁆𑀔𑀢𑀺. 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀁 𑀦𑀺𑀲𑁆𑀲𑀸𑀬 ‘‘𑀓𑁂𑀦 𑀦𑀼 𑀔𑁄 𑀧𑀓𑀸𑀭𑁂𑀦 𑀅𑀳𑁄𑀲𑀺’’𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀸𑀓𑀸𑀭𑀢𑁄 𑀓𑀗𑁆𑀔𑀢𑀻𑀢𑀺 𑀘 𑀯𑀤𑀦𑁆𑀢𑀺. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀦𑁆𑀢𑀺 𑀚𑀸𑀢𑀺𑀆𑀤𑀺𑀁 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀦𑀼 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁…𑀧𑁂… 𑀤𑁂𑀯𑁄 𑀳𑀼𑀢𑁆𑀯𑀸 𑀦𑀼 𑀔𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁 𑀓𑀗𑁆𑀔𑀢𑀺. 𑀲𑀩𑁆𑀩𑀢𑁆𑀣𑁂𑀯 𑀘 𑀅𑀤𑁆𑀥𑀸𑀦𑀦𑁆𑀢𑀺 𑀓𑀸𑀮𑀸𑀥𑀺𑀯𑀘𑀦𑀁. 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄𑀢𑀺 𑀲𑀲𑁆𑀲𑀢𑀸𑀓𑀸𑀭𑀁, 𑀉𑀘𑁆𑀙𑁂𑀤𑀸𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀅𑀦𑀸𑀕𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀁, 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑀭𑀳𑀺 𑀯𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀦𑁆𑀢𑀺 𑀇𑀤𑀸𑀦𑀺 𑀯𑀸 𑀧𑀝𑀺𑀲𑀦𑁆𑀥𑀺𑀫𑀸𑀤𑀺𑀁 𑀓𑀢𑁆𑀯𑀸 𑀘𑀼𑀢𑀺𑀧𑀭𑀺𑀬𑀦𑁆𑀢𑀁 𑀲𑀩𑁆𑀩𑀫𑁆𑀧𑀺 𑀯𑀢𑁆𑀢𑀫𑀸𑀦𑀓𑀸𑀮𑀁. 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸 𑀳𑁄𑀢𑀺. 𑀅𑀳𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀁 𑀓𑀗𑁆𑀔𑀢𑀺. 𑀅𑀬𑀼𑀢𑁆𑀢𑀁 ¶ 𑀧𑀦𑁂𑀢𑀦𑁆𑀢𑀺. 𑀬𑀼𑀢𑁆𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀓𑀸 𑀏𑀢𑁆𑀣 𑀘𑀺𑀦𑁆𑀢𑀸. 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁄. 𑀦𑁄 𑀦𑀼 𑀔𑁄𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺𑀪𑀸𑀯𑀁 𑀓𑀗𑁆𑀔𑀢𑀺. 𑀓𑀺𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀔𑀢𑁆𑀢𑀺𑀬𑁄𑀯 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀓𑀗𑁆𑀔𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀓𑀣𑀁 𑀦𑀼 𑀔𑁄𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑁂𑀢𑁆𑀣 ‘‘𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀤𑀻𑀖𑀸𑀤𑀺𑀪𑀸𑀯𑀁 𑀓𑀗𑁆𑀔𑀦𑁆𑀢𑁄 ‘‘𑀓𑀣𑀁 𑀦𑀼 𑀔𑁄𑀲𑁆𑀫𑀺’’𑀦𑁆𑀢𑀺 𑀓𑀗𑁆𑀔𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀅𑀢𑁆𑀢𑀦𑁄 𑀲𑀭𑀻𑀭𑀲𑀡𑁆𑀞𑀸𑀦𑀁 𑀅𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀆𑀕𑀢𑀺𑀕𑀢𑀺𑀝𑁆𑀞𑀸𑀦𑀁 𑀓𑀗𑁆𑀔𑀢𑀺. 𑀲𑀸 𑀲𑀩𑁆𑀩𑀸𑀧𑀺 𑀧𑀳𑀻𑀬𑀢𑀻𑀢𑀺 𑀲𑀸 𑀬𑀣𑀸𑀯𑀼𑀢𑁆𑀢𑀸 𑀲𑁄𑀴𑀲𑀯𑀺𑀥𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀬𑀢𑀺.

𑁬𑁮𑁧. 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲𑀸𑀧𑀺 𑀦𑀸𑀫𑀲𑁆𑀲 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺, 𑀢𑀢𑁄 𑀧𑀯𑀢𑁆𑀢𑀺𑀢𑁄 𑀫𑀦𑀲𑀺𑀓𑀸𑀭𑀸𑀤𑀺𑀓𑁄 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲𑀸𑀧𑀺 𑀦𑀸𑀫𑀲𑁆𑀲 𑀅𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀲𑀮𑀸𑀤𑀺𑀪𑁂𑀤𑀢𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄. 𑀢𑀲𑁆𑀲𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀅𑀜𑁆𑀜𑀢𑀭𑀪𑁂𑀤𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲𑀸𑀧𑀺. 𑀬𑀁 𑀏𑀓𑀦𑁆𑀢𑀢𑁄 𑀙𑀤𑁆𑀯𑀸𑀭𑀺𑀓𑀁, 𑀢𑀫𑁆𑀧𑀺 𑀙𑀤𑁆𑀯𑀸𑀭𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁 𑀬𑀣𑀸 𑀙𑀝𑁆𑀞𑀸𑀭𑀫𑁆𑀫𑀡𑀁 𑀙𑀴𑀸𑀭𑀫𑁆𑀫𑀡𑀕𑁆𑀕𑀳𑀡𑁂𑀦𑀸𑀢𑀺𑀧𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲𑀸𑀧𑀻’’𑀢𑀺. 𑀢𑀢𑁄𑀢𑀺 𑀘𑀓𑁆𑀔𑀼𑀭𑀽𑀧𑀸𑀤𑀺𑀢𑁄. 𑀫𑀦𑀲𑀺𑀓𑀸𑀭𑀸𑀤𑀺𑀓𑁄𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑁄 ¶ , 𑀓𑀫𑁆𑀫𑀪𑀯𑀗𑁆𑀕𑀸𑀤𑀺𑀓𑁄 𑀘. 𑀓𑀸𑀫𑀜𑁆𑀘𑁂𑀢𑁆𑀣 𑀤𑁆𑀯𑀸𑀭𑀘𑁆𑀙𑀓𑁆𑀓𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀦𑀸𑀫𑀲𑁆𑀲𑁂𑀯 𑀲𑀸𑀥𑀸𑀭𑀡𑁄, 𑀅𑀲𑀸𑀥𑀸𑀭𑀡𑁄 𑀘 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀁 𑀧𑀦 𑀅𑀯𑀺𑀲𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀢𑁄 𑀧𑀦 𑀓𑀫𑁆𑀫𑀁 𑀯𑀺𑀧𑀸𑀓𑀦𑀸𑀫𑀲𑁆𑀲, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀦𑀸𑀫𑀲𑁆𑀲, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄, 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯 𑀘 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲 𑀘 𑀢𑀤𑀜𑁆𑀜𑀦𑀸𑀫𑀭𑀽𑀧𑀸𑀧𑁂𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄. 𑀢𑀣𑀸 𑀲𑀪𑀸𑀕𑁄, 𑀉𑀢𑀼𑀲𑀪𑀸𑀕𑁄 𑀘 𑀆𑀳𑀸𑀭𑁄 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄, 𑀢𑀤𑀜𑁆𑀜𑀸𑀧𑁂𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄𑀢𑀺 𑀭𑀽𑀧𑀲𑁆𑀲𑀸𑀧𑀺 𑀲𑀸𑀥𑀸𑀭𑀡𑁄, 𑀅𑀲𑀸𑀥𑀸𑀭𑀡𑁄 𑀘 𑀧𑀘𑁆𑀘𑀬𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀦𑀸𑀫 𑀅𑀦𑀥𑀺𑀕𑀢𑀸𑀭𑀳𑀢𑁆𑀢𑁂𑀦 𑀓𑀸𑀢𑀩𑁆𑀩𑁄𑀢𑀺 𑀢𑀤𑀧𑁂𑀓𑁆𑀔𑀸𑀬 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑁄 𑀓𑀼𑀲𑀮𑀲𑁆𑀲𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲, 𑀘𑀢𑀼𑀦𑁆𑀦𑀫𑁆𑀧𑀺 𑀯𑀸 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀧𑀭𑀻𑀢𑁄 𑀅𑀓𑀼𑀲𑀮𑀲𑁆𑀲𑀸𑀢𑀺 𑀯𑀘𑀦𑀢𑁄 𑀬𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀺𑀧𑀭𑀻𑀢𑁄 𑀅𑀓𑀼𑀲𑀮𑀲𑁆𑀲𑁂𑀯 ¶ 𑀧𑀘𑁆𑀘𑀬𑁄, 𑀢𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺 𑀓𑀼𑀲𑀮𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀯𑀸 𑀓𑀼𑀲𑀮𑀁 𑀲𑀫𑁆𑀪𑀯𑀢𑀺, 𑀅𑀓𑀼𑀲𑀮𑀁 𑀲𑀫𑁆𑀪𑀯𑀢𑀺, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀯𑀸, 𑀢𑀲𑁆𑀲𑀸𑀢𑀺 𑀅𑀢𑁆𑀣𑀲𑀺𑀤𑁆𑀥𑀫𑁂𑀢𑀁. 𑀓𑀫𑁆𑀫𑀸𑀤𑀺𑀓𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀬 𑀕𑀢𑀺𑀓𑀸𑀮𑀸𑀤𑀬𑁄𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀪𑀯𑀗𑁆𑀕𑀸𑀤𑀺𑀓𑁄𑀢𑀺 𑀪𑀯𑀗𑁆𑀕𑀲𑀦𑁆𑀢𑀻𑀭𑀡𑀧𑀭𑀺𑀢𑁆𑀢𑀓𑀺𑀭𑀺𑀬𑀸𑀭𑀳𑀢𑁆𑀢𑀸𑀤𑀺𑀓𑁄. 𑀢𑀢𑁆𑀣 𑀪𑀯𑀗𑁆𑀕𑀁 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀓𑀺𑀭𑀺𑀬𑀸𑀦𑀁, 𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀲𑁆𑀲, 𑀧𑀭𑀺𑀢𑁆𑀢𑀓𑀺𑀭𑀺𑀬𑀸 𑀬𑀣𑀸𑀭𑀳𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀓𑀺𑀭𑀺𑀬𑀸𑀦𑀁, 𑀅𑀭𑀳𑀢𑁆𑀢𑀁 𑀆𑀯𑀚𑁆𑀚𑀦𑀯𑀚𑁆𑀚𑀸𑀦𑀁 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀦𑁆𑀢𑀺 𑀘𑁂𑀢𑀦𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀘 𑀔𑁄 𑀓𑀼𑀲𑀮𑀸𑀓𑀼𑀲𑀮𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁, 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁭). 𑀦 𑀘𑀺𑀢𑁆𑀢𑀁 𑀯𑀺𑀬 𑀲𑀲𑀫𑁆𑀧𑀬𑀼𑀢𑁆𑀢𑀸. 𑀘𑀺𑀢𑁆𑀢𑀜𑁆𑀳𑁂𑀢𑁆𑀣 𑀲𑀲𑀫𑁆𑀧𑀬𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁧). 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀭𑀽𑀧𑀚𑀦𑀓𑀧𑀘𑁆𑀘𑀬𑁂𑀲𑀼. 𑀅𑀢𑀻𑀢𑀢𑁄 𑀏𑀯 𑀓𑀫𑁆𑀫𑀢𑁄 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀢𑁆𑀢𑀫𑀸𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀁 𑀅𑀢𑀻𑀢𑀫𑁂𑀯 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄’’𑀢𑀺. 𑀬𑀤𑀺 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁄 𑀓𑀫𑁆𑀫𑀢𑁄 𑀨𑀮𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀆𑀬𑀽𑀳𑀦𑀓𑁆𑀔𑀡𑁂 𑀏𑀯 𑀨𑀮𑁂𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀦 𑀘 𑀢𑀁 𑀤𑀺𑀝𑁆𑀞𑀫𑀺𑀘𑁆𑀙𑀺𑀢𑀁 𑀯𑀸. 𑀦 𑀳𑀺 𑀮𑁄𑀓𑁂 𑀓𑀼𑀤𑀸𑀘𑀦𑀁 𑀓𑀭𑀺𑀬𑀫𑀸𑀦𑀫𑁂𑀯 𑀓𑀫𑁆𑀫𑀁 𑀨𑀮𑀁 𑀤𑁂𑀦𑁆𑀢𑀁 𑀤𑀺𑀝𑁆𑀞𑀁, 𑀢𑀣𑀸𑀭𑀽𑀧𑁄 𑀯𑀸 𑀆𑀕𑀫𑁄 𑀅𑀢𑁆𑀣𑀻𑀢𑀺. 𑀦𑀦𑀼 𑀘 𑀇𑀤𑀫𑀧𑀺 𑀦 𑀤𑀺𑀝𑁆𑀞𑀁, 𑀬𑀁 𑀯𑀺𑀦𑀝𑁆𑀞𑀢𑁄 𑀳𑁂𑀢𑀼𑀢𑁄 𑀨𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀫𑀢𑁄 𑀯𑀸 𑀓𑀼𑀓𑁆𑀓𑀼𑀝𑁄 𑀯𑀲𑁆𑀲𑀦𑁆𑀢𑁄𑀢𑀺? 𑀲𑀘𑁆𑀘𑀫𑀤𑀺𑀝𑁆𑀞𑀁 𑀭𑀽𑀧𑀥𑀫𑁆𑀫𑀸𑀦𑀁 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑁂, 𑀇𑀤𑀁 𑀧𑀦 𑀅𑀭𑀽𑀧𑀁 𑀧𑀩𑀦𑁆𑀥𑁄𑀧𑀺 𑀅𑀢𑁆𑀣𑀻𑀢𑀺 𑀉𑀧𑀫𑀸 𑀦 𑀲𑀁𑀲𑀦𑁆𑀤𑀢𑀺. 𑀓𑀫𑁆𑀫𑀢𑁄 𑀳𑀺 𑀅𑀢𑀻𑀢𑀢𑁄 ¶ 𑀏𑀯 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸, 𑀉𑀧𑀘𑀺𑀢𑀢𑁆𑀢𑀸 𑀘 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺 (𑀥. 𑀲. 𑁪𑁩𑁧). 𑀬𑀲𑁆𑀫𑀸 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀮𑀸𑀪𑀢𑁄 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀘𑀺𑀢𑁆𑀢𑀲𑁆𑀲 𑀩𑀮𑀯𑀢𑀸, 𑀢𑀲𑁆𑀫𑀸 𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀭𑀽𑀧𑀁 𑀚𑀦𑁂𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺. 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀦 𑀭𑀽𑀧𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀩𑀮𑀯𑀢𑀸 𑀧𑀘𑁆𑀙𑀸𑀚𑀸𑀢𑀸𑀤𑀺𑀧𑀘𑁆𑀘𑀬𑀮𑀸𑀪𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀢𑀼𑀆𑀳𑀸𑀭𑀸…𑀧𑁂… 𑀳𑁄𑀦𑁆𑀢𑀻’’𑀢𑀺, 𑀩𑀸𑀳𑀺𑀭𑀁 𑀉𑀢𑀼𑀁, 𑀆𑀳𑀸𑀭𑀜𑁆𑀘 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂 𑀉𑀢𑀼𑀆𑀳𑀸𑀭𑀸 𑀭𑀽𑀧𑀁 𑀚𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀦𑁆𑀢𑀺 ¶ ‘‘𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

𑁬𑁮𑁨. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀦𑀁. 𑀪𑀗𑁆𑀕𑀦𑁆𑀢𑀺 𑀫𑀭𑀡𑀁. 𑀚𑀭𑀸𑀫𑀭𑀡𑀁 𑀦𑀸𑀫 𑀚𑀸𑀢𑀺𑀬𑀸 𑀲𑀢𑀻𑀢𑀺𑀆𑀤𑀺 𑀨𑀮𑀤𑀲𑁆𑀲𑀦𑀸𑀦𑀼𑀧𑀼𑀩𑁆𑀩𑀺𑀬𑀸 𑀳𑁂𑀢𑀼𑀤𑀲𑁆𑀲𑀦𑀓𑁆𑀓𑀫𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀼𑀓𑀭𑁄𑀢𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀪𑀯𑁂 𑀲𑀢𑀻𑀢𑀺 𑀓𑀫𑁆𑀫𑀪𑀯𑁂 𑀲𑀢𑀺.

𑁬𑁮𑁩. 𑀧𑀼𑀩𑁆𑀩𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦𑀸𑀢𑀺 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀦𑀬𑁂𑀦 𑀆𑀤𑀺𑀧𑀸𑀧𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦. ‘‘𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁪) 𑀳𑀺 𑀧𑀝𑀺𑀮𑁄𑀫𑀯𑀲𑁂𑀦 𑀤𑀲𑁆𑀲𑀺𑀢𑁂 𑀧𑀘𑁆𑀘𑀬𑀸𑀓𑀸𑀭𑁂 ‘‘𑀬𑀲𑁆𑀲 𑀅𑀪𑀸𑀯𑀸 𑀬𑀲𑁆𑀲 𑀅𑀪𑀸𑀯𑁄, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀩𑁆𑀬𑀢𑀺𑀭𑁂𑀓𑀢𑁄, 𑀅𑀦𑁆𑀯𑀬𑀢𑁄 𑀘 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀼𑀓𑀭𑁄𑀢𑀺.

𑁬𑁮𑁪. 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀫𑁆𑀫𑀲𑀳𑀸𑀬𑀢𑁆𑀢𑀸 𑀓𑀺𑀮𑁂𑀲𑀯𑀝𑁆𑀝𑀁 𑀓𑀫𑁆𑀫𑀯𑀝𑁆𑀝𑁂 𑀧𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦𑀸’’𑀢𑀺.

𑁬𑁮𑁫. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀢𑁄 𑀅𑀦𑀦𑁆𑀢𑀭𑀁 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑀸𑀧𑀭𑀺𑀬𑀸𑀬𑁂𑀢𑀺 𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀭𑀸𑀦𑀸𑀕𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑀧𑀭𑀺𑀯𑀢𑁆𑀢𑁂. 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀅𑀳𑁄𑀲𑀺 𑀏𑀯 𑀓𑀫𑁆𑀫𑀁, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺, ‘‘𑀅𑀢𑁆𑀣𑀺, 𑀪𑀯𑀺𑀲𑁆𑀲𑀢𑀺 𑀯𑀸’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀓𑀫𑁆𑀫𑀁. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬, 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀁 𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 ¶ 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀩𑀮𑀯𑀢𑀺 𑀚𑀯𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸, 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀧𑀞𑀫𑀚𑀯𑀦𑀘𑁂𑀢𑀦𑀸 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁, 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀨𑀮𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀦𑁆𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀦𑀸𑀫 𑀉𑀧𑀥𑀺𑀧𑀬𑁄𑀕𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑁂𑀯 𑀳𑁄𑀢𑀻𑀢𑀺 𑀢𑀤𑀪𑀸𑀯𑀢𑁄 ¶ 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀅𑀢𑁆𑀣𑀲𑀸𑀥𑀺𑀓𑀸𑀢𑀺 𑀤𑀸𑀦𑀸𑀤𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀺𑀓𑀸. 𑀓𑀸 𑀧𑀦 𑀲𑀸𑀢𑀺 𑀆𑀳 ‘‘𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸’’𑀢𑀺. 𑀲𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸, 𑀧𑀼𑀭𑀺𑀫𑀚𑀯𑀦𑀘𑁂𑀢𑀦𑀸𑀳𑀺 𑀮𑀤𑁆𑀥𑀸𑀲𑁂𑀯𑀦𑀸 𑀘 𑀲𑀫𑀸𑀦𑀸 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. ‘‘𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀳𑁄𑀲𑀺𑀓𑀫𑁆𑀫𑀧𑀓𑁆𑀔𑁂 𑀢𑀺𑀝𑁆𑀞𑀢𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀻𑀧𑁂𑀢𑀺.

𑁬𑁮𑁬. 𑀬𑀁 𑀕𑀭𑀼𑀓𑀦𑁆𑀢𑀺 𑀬𑀁 𑀅𑀓𑀼𑀲𑀮𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀓𑀼𑀲𑀮𑀁 𑀫𑀳𑀸𑀦𑀼𑀪𑀸𑀯𑀁 𑀓𑀫𑁆𑀫𑀁. 𑀬𑀁 𑀩𑀳𑀼𑀮𑀦𑁆𑀢𑀺 𑀬𑀁 𑀩𑀳𑀼𑀮𑀁 𑀅𑀪𑀺𑀡𑁆𑀳𑀲𑁄 𑀓𑀢𑀁 𑀲𑀫𑀸𑀲𑁂𑀯𑀺𑀢𑀁. 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀦𑁆𑀢𑀺 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑁂𑀦 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁. 𑀆𑀲𑀦𑁆𑀦𑀓𑀸𑀮𑁂 𑀓𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦’’𑀦𑁆𑀢𑀺 𑀇𑀫𑀺𑀦𑀸 ‘‘𑀬𑀁 𑀩𑀳𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀓𑀫𑁆𑀫𑀢𑁄 𑀯𑀺𑀲𑁂𑀲𑁂𑀢𑀺. 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀦𑀺𑀯𑀢𑁆𑀢𑁂𑀢𑀺 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀸𑀦𑀼𑀚𑀸𑀦𑀦𑀢𑁄. 𑀧𑀝𑀺𑀲𑀦𑁆𑀥𑀺𑀚𑀦𑀓𑀯𑀲𑁂𑀦 𑀳𑀺 𑀕𑀭𑀼𑀓𑀸𑀤𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀁.

𑀢𑀢𑁆𑀣 𑀕𑀭𑀼𑀓𑀁 𑀲𑀩𑁆𑀩𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀢𑀣𑀸 𑀳𑀺 𑀢𑀁 𑀕𑀭𑀼𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀭𑀼𑀓𑁂 𑀅𑀲𑀢𑀺 𑀩𑀳𑀼𑀮𑀻𑀓𑀢𑀁, 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀲𑀦𑁆𑀦𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 ‘‘𑀓𑀝𑀢𑁆𑀢𑀸 𑀯𑀸 𑀧𑀦𑀸’’𑀢𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀢𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀩𑀳𑀼𑀮𑀸𑀲𑀦𑁆𑀦𑀧𑀼𑀩𑁆𑀩𑀓𑀢𑁂𑀲𑀼 𑀘 𑀩𑀮𑀸𑀩𑀮𑀁 𑀯𑀸 𑀚𑀸𑀦𑀺𑀢𑀩𑁆𑀩𑀁, 𑀧𑀸𑀧𑀢𑁄 𑀧𑀸𑀧𑀦𑁆𑀢𑀭𑀁, 𑀓𑀮𑁆𑀬𑀸𑀡𑀜𑁆𑀘, 𑀓𑀮𑁆𑀬𑀸𑀡𑀢𑁄 𑀘 𑀓𑀮𑁆𑀬𑀸𑀡𑀦𑁆𑀢𑀭𑀁, 𑀧𑀸𑀧𑀜𑁆𑀘, 𑀩𑀳𑀼𑀮𑀻𑀓𑀢𑀢𑁄 𑀘 𑀫𑀳𑀢𑁄 𑀘 𑀧𑀼𑀩𑁆𑀩𑀓𑀢𑀸𑀤𑀺, 𑀅𑀧𑁆𑀧𑀜𑁆𑀘. 𑀩𑀳𑀼𑀮𑀸𑀦𑀼𑀲𑁆𑀲𑀭𑀡𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀚𑀦𑀦𑀢𑁄 𑀧𑀝𑀺𑀧𑀓𑁆𑀔𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑀸𑀬 𑀆𑀭𑀤𑁆𑀥𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀲𑁂𑀲𑀲𑁆𑀲 𑀯𑀸 𑀅𑀧𑀭𑀸𑀧𑀭𑀺𑀬𑀸𑀬𑁂 𑀯𑁂𑀤𑀦𑀻𑀬𑀲𑁆𑀲 𑀅𑀧𑀭𑀺𑀓𑁆𑀔𑀻𑀡𑀢𑀸𑀬 𑀲𑀦𑁆𑀢𑀢𑀺𑀬𑀸 𑀧𑀭𑀺𑀡𑀸𑀫𑀯𑀺𑀲𑁂𑀲𑀢𑁄𑀢𑀺 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀆𑀳𑀺𑀢𑀩𑀮𑀁 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 𑀯𑀺𑀤𑁂𑀳𑀭𑀜𑁆𑀜𑁄 𑀲𑁂𑀦𑀸𑀧𑀢𑀺 𑀅𑀮𑀸𑀢𑁄, 𑀩𑀻𑀚𑀓𑁄 𑀤𑀸𑀲𑁄, 𑀭𑀸𑀚𑀓𑀜𑁆𑀜𑀸 𑀭𑀼𑀘𑀸 𑀘 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀢𑀢𑁆𑀭𑀸𑀦𑀦𑁆𑀤 ¶ , 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 ¶ , 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑀜𑁆𑀘 𑀔𑁄 𑀲𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀬𑀜𑁆𑀘 𑀔𑁄 𑀲𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀬𑀜𑁆𑀘 𑀔𑁄 𑀲𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 ¶ …𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑀜𑁆𑀘 𑀔𑁄 𑀲𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺 ¶ 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺 (𑀫. 𑀦𑀺. 𑁩.𑁩𑁦𑁩).

𑀓𑀺𑀁 𑀩𑀳𑀼𑀦𑀸 𑀬𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁, 𑀢𑀲𑁆𑀲𑁂𑀯𑀸𑀬𑀁 𑀯𑀺𑀲𑀬𑁄, 𑀬𑀤𑀺𑀤𑀁 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀧𑀼𑀩𑁆𑀩𑀸𑀧𑀭𑀯𑀺𑀧𑀸𑀓𑀢𑀸 𑀲𑀸𑀫𑀢𑁆𑀣𑀺𑀬𑀁.

𑁬𑁮𑁭. 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀤𑀺𑀯𑀲𑁂𑀦 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀚𑀦𑀓𑀁. 𑀢𑁂𑀦𑀸𑀳 ‘‘𑀢𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑁂𑀧𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀚𑀦𑁂𑀢𑀻’’𑀢𑀺. 𑀲𑀼𑀔𑀤𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲, 𑀦𑀸𑀫𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀯𑀸 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀉𑀧𑀧𑀻𑀴𑀓𑀁 𑀲𑀼𑀔𑀤𑀼𑀓𑁆𑀔𑀧𑁆𑀧𑀩𑀦𑁆𑀥𑁂 𑀧𑀯𑀢𑁆𑀢𑀫𑀸𑀦𑁂 𑀲𑀡𑀺𑀓𑀁 𑀲𑀡𑀺𑀓𑀁 𑀢𑀁 𑀳𑀸𑀧𑁂𑀢𑀺. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻’’𑀢𑀺. 𑀖𑀸𑀢𑁂𑀢𑁆𑀯𑀸𑀢𑀺 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀓𑀫𑁆𑀫𑀲𑁆𑀲 𑀉𑀧𑀘𑁆𑀙𑀺𑀦𑁆𑀤𑀦𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺. 𑀢𑀜𑁆𑀘 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺. 𑀯𑀺𑀧𑀘𑁆𑀘𑀦𑀸𑀬 𑀓𑀢𑁄𑀓𑀸𑀲𑀁 𑀓𑀫𑁆𑀫𑀁 𑀯𑀺𑀧𑀓𑁆𑀓𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀓𑀢𑁂 𑀑𑀓𑀸𑀲𑁂 𑀢𑀁 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺. 𑀉𑀧𑀧𑀻𑀴𑀓𑀁 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀲𑀬𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀤𑀼𑀩𑁆𑀩𑀮𑀁 𑀓𑀫𑁆𑀫𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀩𑀯𑁆𑀳𑀸𑀩𑀸𑀥𑀢𑀸𑀤𑀺𑀧𑀘𑁆𑀘𑀬𑀽𑀧𑀦𑀺𑀧𑀸𑀢𑁂𑀦 𑀯𑀺𑀧𑀸𑀓𑀲𑁆𑀲 𑀯𑀺𑀩𑀸𑀥𑀓𑀁 𑀉𑀧𑀧𑀻𑀴𑀓𑀁, 𑀢𑀣𑀸 𑀯𑀺𑀧𑀸𑀓𑀲𑁆𑀲𑁂𑀯 𑀉𑀧𑀘𑁆𑀙𑁂𑀤𑀓𑀁 𑀉𑀧𑀖𑀸𑀢𑀓𑀁. 𑀓𑀫𑁆𑀫𑀁 𑀉𑀧𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀓𑀭𑀡𑁂𑀦 𑀯𑀺𑀧𑀘𑁆𑀘𑀦𑁂 𑀲𑀢𑀺 𑀚𑀦𑀓𑀫𑁂𑀯 𑀲𑀺𑀬𑀸, 𑀚𑀦𑀓𑀸𑀤𑀺𑀪𑀸𑀯𑁄 𑀦𑀸𑀫 𑀯𑀺𑀧𑀸𑀓𑀁 𑀧𑀢𑀺 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀓𑀫𑁆𑀫𑀁 𑀧𑀢𑀻𑀢𑀺 𑀯𑀺𑀧𑀸𑀓𑀲𑁆𑀲𑁂𑀯 𑀉𑀧𑀖𑀸𑀢𑀓𑀢𑀸 𑀬𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀓𑀫𑁆𑀫𑀦𑁆𑀢𑀭𑀦𑁆𑀢𑀺 𑀓𑀫𑁆𑀫𑀯𑀺𑀲𑁂𑀲𑁄 𑀓𑀫𑁆𑀫𑀸𑀦𑀁 𑀩𑀮𑀸𑀩𑀮𑀪𑁂𑀤𑁄. 𑀯𑀺𑀧𑀸𑀓𑀦𑁆𑀢𑀭𑀦𑁆𑀢𑀺 𑀯𑀺𑀧𑀸𑀓𑀯𑀺𑀲𑁂𑀲𑁄, 𑀢𑀲𑁆𑀲 𑀳𑀻𑀦𑀧𑀡𑀻𑀢𑀢𑀸𑀤𑀺𑀪𑁂𑀤𑁄. 𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀚𑀦𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀅𑀜𑁆𑀜𑁂𑀦 𑀚𑀦𑀺𑀢𑀲𑁆𑀲 𑀇𑀝𑁆𑀞𑀲𑁆𑀲 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀺𑀩𑀸𑀥𑀓𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀬𑀸, 𑀉𑀧𑀩𑁆𑀭𑀽𑀳𑀦𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀘 𑀚𑀦𑀓𑀸𑀦𑀼𑀪𑀸𑀯𑀸𑀦𑀼𑀭𑀽𑀧𑀁 𑀧𑀭𑀺𑀧𑁄𑀲𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸 𑀳𑁄𑀦𑁆𑀢𑀺, 𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀚𑀦𑀓𑁂𑀦 ¶ 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀼𑀲𑀮𑀨𑀮𑀁 𑀯𑀸 𑀅𑀓𑀼𑀲𑀮𑀨𑀮𑀁 𑀯𑀸 𑀬𑁂𑀦 𑀧𑀘𑁆𑀘𑀦𑀻𑀓𑀪𑀽𑀢𑁂𑀦 𑀭𑁄𑀕𑀥𑀸𑀢𑀼𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀢𑀸𑀬 𑀩𑀸𑀥𑀻𑀬𑀢𑀺, 𑀢𑀁 𑀉𑀧𑀧𑀻𑀴𑀓𑀁 ¶ . 𑀬𑁂𑀦 𑀧𑀦 𑀓𑀫𑁆𑀫𑀼𑀦𑀸 𑀚𑀦𑀓𑀲𑀸𑀫𑀢𑁆𑀣𑀺𑀬𑀯𑀲𑁂𑀦 𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸𑀭𑀳𑀫𑁆𑀧𑀺 𑀲𑀫𑀸𑀦𑀁 𑀨𑀮𑀁 𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀜𑁆𑀜𑀢𑀺 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀉𑀧𑀖𑀸𑀢𑀓𑀁. 𑀢𑀢𑁆𑀣 𑀓𑁂𑀘𑀺 𑀤𑀼𑀢𑀺𑀬𑀲𑁆𑀲 𑀓𑀼𑀲𑀮𑀪𑀸𑀯𑀁 𑀇𑀢𑁆𑀣𑀦𑁆𑀦𑀸𑀫𑀕𑀢𑀲𑁆𑀲 𑀅𑀧𑁆𑀧𑀸𑀩𑀸𑀥𑀤𑀻𑀖𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦, 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀓𑀼𑀲𑀮𑀪𑀸𑀯𑀁 𑀩𑀯𑁆𑀳𑀸𑀩𑀸𑀥𑀅𑀧𑁆𑀧𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦 𑀯𑀡𑁆𑀡𑁂𑀦𑁆𑀢𑀺. 𑀤𑁂𑀯𑀤𑀢𑁆𑀢𑀸𑀤𑀻𑀦𑀁, 𑀧𑀦 𑀦𑀸𑀕𑀸𑀤𑀻𑀦𑀁, 𑀇𑀢𑁄 𑀅𑀦𑀼𑀧𑀤𑀺𑀦𑁆𑀦𑁂𑀦 𑀬𑀸𑀧𑀦𑀓𑀧𑁂𑀢𑀸𑀦𑀜𑁆𑀘 𑀦𑀭𑀓𑀸𑀤𑀻𑀲𑀼 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑀢𑁆𑀣𑀫𑁆𑀪𑀦𑀼𑀧𑀧𑀻𑀴𑀦𑀼𑀧𑀖𑀸𑀢𑀓𑀸𑀦𑀺 𑀦 𑀦 𑀲𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁄 𑀦 𑀯𑀺𑀭𑀼𑀚𑁆𑀛𑀢𑀺. 𑀩𑀼𑀤𑁆𑀥𑀸𑀯𑁂𑀡𑀺𑀓𑀢𑀸𑀬 𑀅𑀲𑀸𑀥𑀸𑀭𑀡𑀲𑁆𑀲𑁂𑀯 𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀢𑁄 𑀓𑀫𑁆𑀫𑀦𑁆𑀢𑀭𑀸𑀤𑀺 ‘‘𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀤𑁂𑀲𑀢𑁄 𑀚𑀸𑀦𑀺𑀢𑀩𑁆𑀩𑀁 𑀅𑀦𑀯𑀲𑁂𑀲𑀢𑁄 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀅𑀯𑀺𑀲𑀬𑀢𑁆𑀢𑀸. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑀸𑀦𑀦𑁂 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀦 𑀧𑀭𑀺𑀧𑀽𑀭𑀢𑀻𑀢𑀺.

𑁬𑁮𑁮. 𑀬𑀣𑀸𑀯𑀼𑀢𑁆𑀢𑀁 𑀓𑀫𑁆𑀫𑀁 𑀯𑀢𑁆𑀢𑀫𑀸𑀦𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑀦𑀺𑀫𑀺𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀫𑁆𑀫𑁂𑀓𑀤𑁂𑀲𑀢𑀸𑀬 ‘‘𑀤𑁆𑀯𑀸𑀤𑀲𑀯𑀺𑀥𑀁 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀮𑁂𑀲𑀯𑀝𑁆𑀝𑀫𑁆𑀧𑀺 𑀓𑀫𑁆𑀫𑀲𑀳𑀸𑀬𑀢𑀸𑀬 𑀓𑀫𑁆𑀫𑀯𑀝𑁆𑀝𑀧𑀓𑁆𑀔𑀺𑀓𑀫𑁂𑀯 𑀓𑀢𑁆𑀯𑀸 𑀆𑀳 ‘‘𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦𑀸’’𑀢𑀺. 𑀬𑀸𑀤𑀺𑀲𑀢𑁄 𑀧𑀘𑁆𑀘𑀬𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀤𑁆𑀥𑀸𑀦𑁂 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀤𑀺𑀲𑀢𑁄 𑀏𑀯 𑀇𑀢𑀭𑀲𑁆𑀫𑀺𑀫𑁆𑀧𑀺 𑀅𑀤𑁆𑀥𑀤𑁆𑀯𑀬𑁂𑀢𑀺 𑀬𑀣𑀸 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀕𑀢𑁂𑀧𑀺 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦𑁂𑀯𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀏𑀯-𑀲𑀤𑁆𑀤𑀁 ‘‘𑀏𑀢𑀭𑀳𑀺 𑀅𑀢𑀻𑀢𑁂𑀧𑀻’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀅𑀤𑁆𑀥𑀢𑁆𑀢𑀬𑁂𑀧𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀨𑀮𑀫𑀢𑁆𑀢𑀢𑀸𑀤𑀲𑁆𑀲𑀦𑀧𑀭𑀢𑁆𑀢𑀸 𑀘𑁄𑀤𑀦𑀸𑀬. 𑀇𑀢𑀺 𑀓𑀫𑁆𑀫𑀜𑁆𑀘𑁂𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑀭𑀸𑀧𑀭𑀁 𑀯𑀝𑁆𑀝𑀦𑀝𑁆𑀞𑁂𑀦 𑀯𑀝𑁆𑀝𑀁. 𑀢𑀣𑀸 𑀧𑀯𑀢𑁆𑀢𑀦𑀁 𑀧𑀯𑀢𑁆𑀢𑀁. 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑀻𑀢𑀺 𑀲𑀦𑁆𑀢𑀢𑀺, 𑀧𑀩𑀦𑁆𑀥𑁄. 𑀓𑀭𑀡𑀝𑁆𑀞𑁂𑀦, 𑀧𑀘𑁆𑀘𑀬𑁂𑀳𑀺 𑀓𑀭𑀻𑀬𑀢𑀻𑀢𑀺 𑀯𑀸 𑀓𑀺𑀭𑀺𑀬𑀸.

𑀓𑀫𑁆𑀫𑀸𑀢𑀺 𑀓𑀫𑁆𑀫𑀢𑁄. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀓𑀫𑁆𑀫𑀁 𑀲𑀫𑁆𑀪𑀯𑁄 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑀫𑁆𑀪𑀯𑁄, 𑀯𑀺𑀧𑀸𑀓𑁄.

𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀁 𑀤𑀸𑀦𑀸𑀤𑀻𑀳𑀺 𑀲𑀸𑀥𑀺𑀢𑀓𑀺𑀭𑀺𑀬𑀸𑀬 𑀯𑀢𑁆𑀢𑀫𑀸𑀦𑀸𑀬 𑀓𑀸𑀭𑀡𑀫𑀢𑁆𑀢𑁂 𑀓𑀢𑁆𑀢𑀼𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀦𑁂𑀯 𑀓𑀸𑀭𑀡𑀢𑁄 𑀉𑀤𑁆𑀥𑀁 𑀓𑀸𑀭𑀓𑀁 𑀧𑀲𑁆𑀲𑀢𑀻’’𑀢𑀺. 𑀓𑀭𑁄𑀢𑀻𑀢𑀺 𑀳𑀺 𑀓𑀸𑀭𑀓𑀁. 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀓𑀁 𑀦 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀓𑀸𑀫𑀁 𑀩𑀸𑀮𑀸𑀧𑀺 ‘‘𑀓𑀸𑀭𑀓𑁄 𑀧𑀝𑀺𑀲𑀁𑀯𑁂𑀤𑀓𑁄’’𑀢𑀺 𑀯𑀤𑀦𑁆𑀢𑀸 𑀅𑀢𑁆𑀣𑀢𑁄 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀤𑀦𑁆𑀢𑀺, 𑀢𑁂 𑀧𑀦 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦𑀸𑀧𑀺 𑀯𑀤𑀦𑁆𑀢𑀻𑀢𑀺 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀲𑀫𑀜𑁆𑀜𑀸𑀫𑀢𑁆𑀢𑁂𑀦 𑀧𑀡𑁆𑀟𑀺𑀢𑀸 𑀯𑁄𑀳𑀭𑀦𑁆𑀢𑀻’’𑀢𑀺.

𑁬𑁮𑁯. 𑀏𑀯𑁂𑀢𑀦𑁆𑀢𑀺 ¶ 𑀏𑀯𑀁𑀯𑀺𑀥𑀁 𑀏𑀢𑀁 𑀤𑀲𑁆𑀲𑀦𑀁, 𑀲𑀫𑁆𑀫𑀤𑀲𑁆𑀲𑀦𑀁, 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀩𑀻𑀚𑀭𑀼𑀓𑁆𑀔𑀸𑀤𑀺𑀓𑀸𑀦𑀁𑀯𑀸𑀢𑀺 𑀬𑀣𑀸 𑀩𑀻𑀚𑀢𑁄 𑀭𑀼𑀓𑁆𑀔𑁄, 𑀭𑀼𑀓𑁆𑀔𑀢𑁄 𑀧𑀼𑀦 𑀩𑀻𑀚𑀦𑁆𑀢𑀺 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀩𑀻𑀚𑀭𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲 𑀧𑀼𑀩𑁆𑀩𑀓𑁄𑀝𑀺 𑀦𑀢𑁆𑀣𑀺, 𑀏𑀯𑀁 𑀓𑀫𑁆𑀫𑀧𑀘𑁆𑀘𑀬𑀸 𑀯𑀺𑀧𑀸𑀓𑁄, 𑀯𑀺𑀧𑀸𑀓𑀧𑀘𑁆𑀘𑀬𑀸 𑀓𑀫𑁆𑀫𑀦𑁆𑀢𑀺 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀓𑀫𑁆𑀫𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀧𑀼𑀩𑁆𑀩𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀁, 𑀅𑀡𑁆𑀟𑀢𑁄 𑀓𑀼𑀓𑁆𑀓𑀼𑀝𑀻, 𑀧𑀼𑀦𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀕𑀢𑁂𑀧𑀺 𑀲𑀁𑀲𑀸𑀭𑁂𑀢𑀺 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀅𑀦𑀸𑀕𑀢𑁂𑀧𑀺 𑀅𑀤𑁆𑀥𑀸𑀦𑁂 ‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁬𑁭, 𑁯𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭; 𑀘𑀽𑀴𑀦𑀺. 𑀅𑀝𑁆𑀞. 𑁬; 𑀩𑀼. 𑀯𑀁. 𑀅𑀝𑁆𑀞. 𑁨.𑁫𑁮) 𑀯𑀼𑀢𑁆𑀢𑁂 𑀲𑀁𑀲𑀸𑀭𑁂 𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀁 𑀦 𑀤𑀺𑀲𑁆𑀲𑀢𑀺, 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺, 𑀧𑀯𑀢𑁆𑀢𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄.

𑀏𑀢𑀫𑀢𑁆𑀣𑀦𑁆𑀢𑀺 ‘‘𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁬𑁮𑁯) 𑀯𑀼𑀢𑁆𑀢𑀫𑀢𑁆𑀣𑀁. 𑀅𑀲𑀬𑀁𑀯𑀲𑀻𑀢𑀺 𑀦 𑀲𑀬𑀁𑀯𑀲𑀺𑀦𑁄, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀭𑀯𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀢𑀸𑀢𑀺 𑀇𑀢𑀭𑀻𑀢𑀭𑀯𑀺𑀭𑁄𑀥𑀺𑀢𑀸, 𑀤𑀺𑀝𑁆𑀞𑀺𑀬𑁄, 𑀤𑀺𑀝𑁆𑀞𑀺𑀬𑀸 𑀯𑀸 𑀅𑀜𑁆𑀜𑀫𑀜𑁆𑀜𑁂𑀦 𑀯𑀺𑀭𑁄𑀥𑀺𑀢𑀸 𑀯𑀺𑀭𑀼𑀤𑁆𑀥𑀸.

𑀕𑀫𑁆𑀪𑀻𑀭𑀜𑀸𑀡𑀕𑁄𑀘𑀭𑀢𑀸𑀬 𑀕𑀫𑁆𑀪𑀻𑀭𑀁. 𑀢𑀣𑀸 𑀦𑀺𑀧𑀼𑀡𑀁. 𑀲𑀢𑁆𑀢𑀲𑀼𑀜𑁆𑀜𑀢𑀸𑀬, 𑀅𑀜𑁆𑀜𑀫𑀜𑁆𑀜𑀲𑀪𑀸𑀯𑀲𑀼𑀜𑁆𑀜𑀢𑀸𑀬 𑀘 𑀲𑀼𑀜𑁆𑀜𑀁. 𑀧𑀘𑁆𑀘𑀬𑀦𑁆𑀢𑀺 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀁, 𑀢𑀧𑁆𑀧𑀘𑁆𑀘𑀬𑀧𑀝𑀺𑀯𑁂𑀥𑁂𑀦𑁂𑀯 𑀘 𑀲𑀩𑁆𑀩𑀁 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺. 𑀓𑀫𑁆𑀫𑀁 𑀦𑀢𑁆𑀣𑀺 𑀯𑀺𑀧𑀸𑀓𑀫𑁆𑀳𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀧𑀘𑁆𑀘𑀬𑀲𑀼𑀜𑁆𑀜𑀁 𑀨𑀮𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀦 𑀲𑀽𑀭𑀺𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀲𑀽𑀭𑀺𑀬𑀸𑀤𑀻𑀦𑀁. 𑀲𑁄𑀢𑀺 𑀅𑀕𑁆𑀕𑀺. 𑀲𑀫𑁆𑀪𑀸𑀭𑁂𑀳𑀻𑀢𑀺 𑀆𑀢𑀧𑀸𑀤𑀻𑀳𑀺 𑀓𑀸𑀭𑀡𑁂𑀳𑀺.

𑀬𑀤𑀺 ¶ 𑀘 𑀳𑁂𑀢𑀼 𑀘 𑀨𑀮𑀜𑁆𑀘 𑀅𑀜𑁆𑀜𑀫𑀜𑁆𑀜𑀭𑀳𑀺𑀢𑀁, 𑀓𑀣𑀁 𑀳𑁂𑀢𑀼𑀢𑁄 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀜𑁆𑀘 𑀔𑁄 𑀉𑀧𑀸𑀤𑀸𑀬𑀸’’𑀢𑀺. 𑀦 𑀓𑁂𑀯𑀮𑀁 𑀓𑀫𑁆𑀫𑀨𑀮𑀫𑁂𑀯 𑀲𑀼𑀜𑁆𑀜𑀁 𑀓𑀢𑁆𑀢𑀼𑀭𑀳𑀺𑀢𑀁, 𑀲𑀩𑁆𑀩𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀓𑀸𑀭𑀓𑀭𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑁂𑀢𑁆𑀣 𑀤𑁂𑀯𑁄’’𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸. 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸𑀢𑀺 𑀳𑁂𑀢𑀼𑀲𑀫𑀽𑀳𑀦𑀺𑀫𑀺𑀢𑁆𑀢𑀁, 𑀳𑁂𑀢𑀼𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀁 𑀯𑀸.

𑁬𑁯𑁦. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 ¶ 𑀯𑀺𑀤𑀺𑀢𑀸 𑀳𑁄𑀦𑁆𑀢𑀻𑀢𑀺 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀤𑀺𑀢𑀸 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀲𑁆𑀲 𑀤𑀲𑁆𑀲𑀦𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀳𑀻𑀦𑀯𑀺𑀘𑀺𑀓𑀺𑀘𑁆𑀙𑀲𑁆𑀲 𑀅𑀤𑁆𑀥𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀪𑀯𑁂𑀲𑀼 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀅𑀦𑀼𑀧𑀤𑀥𑀫𑁆𑀫𑀯𑀲𑁂𑀦 𑀢𑀣𑀸𑀧𑀭𑀺𑀕𑁆𑀕𑀳𑀲𑁆𑀲 𑀅𑀓𑀢𑀢𑁆𑀢𑀸. 𑀲𑀸𑀲𑁆𑀲 𑀳𑁄𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀢𑀺 𑀬𑀸𑀬 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀁, 𑀢𑀲𑁆𑀲 𑀘 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀲𑀸 𑀅𑀲𑁆𑀲 𑀬𑁄𑀕𑀺𑀦𑁄 ‘‘𑀇𑀤𑀁 𑀦𑀸𑀫𑀁, 𑀏𑀢𑁆𑀢𑀓𑀁 𑀦𑀸𑀫’’𑀦𑁆𑀢𑀺𑀆𑀤𑀺𑀦𑀸, ‘‘𑀢𑀲𑁆𑀲 𑀅𑀬𑀁 𑀧𑀘𑁆𑀘𑀬𑁄, 𑀏𑀢𑁆𑀢𑀓𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀜𑀸𑀢𑀯𑀢𑀻 𑀧𑀜𑁆𑀜𑀸𑀢𑀺 𑀓𑀢𑁆𑀯𑀸 𑀜𑀸𑀢𑀧𑀭𑀺𑀜𑁆𑀜𑀸.

𑀇𑀤𑀸𑀦𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀤𑁆𑀥𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀥𑀫𑁆𑀫𑀸𑀦𑀁 𑀪𑀯𑀦𑁆𑀢𑀭𑀲𑀗𑁆𑀓𑀫𑁄 𑀦𑀸𑀫 𑀦 𑀓𑀤𑀸𑀘𑀺𑀧𑀺 𑀅𑀢𑁆𑀣𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀚𑁆𑀛𑀸𑀬 𑀫𑀦𑁆𑀢𑁄𑀤𑀓𑀧𑀸𑀦 𑀫𑀼𑀔𑀫𑀡𑁆𑀟𑀦 𑀧𑀤𑀻𑀧𑀲𑀻𑀔𑀽𑀧𑀫𑀸𑀳𑀺 𑀢𑀫𑁂𑀯 𑀥𑀫𑁆𑀫𑀸𑀦𑀁 𑀲𑀗𑁆𑀓𑀫𑀸𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀧𑀺𑀘 𑀔𑁄’’𑀢𑀺𑀆𑀤𑀺𑀫𑀸𑀳.

𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀦𑁆𑀢𑀺 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀮𑀩𑁆𑀪𑀫𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀦 𑀘𑁂𑀯 𑀆𑀕𑀢𑀦𑁆𑀢𑀺 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀢𑁄 𑀦 𑀘𑁂𑀯 𑀆𑀕𑀢𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀢𑁄. 𑀦𑀸𑀧𑀺 𑀦 𑀦𑀺𑀩𑁆𑀩𑀢𑁆𑀢𑀁 𑀅𑀦𑀦𑁆𑀢𑀭𑀦𑁆𑀢𑀺 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀢𑁄 𑀅𑀦𑀸𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀮𑀸𑀪𑁂𑀦 𑀢𑀢𑁄 𑀅𑀦𑀦𑁆𑀢𑀭𑀁 𑀦𑀸𑀧𑀺 𑀦 𑀦𑀺𑀩𑁆𑀩𑀢𑁆𑀢𑀁, 𑀦𑀺𑀩𑁆𑀩𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀣𑀸𑀬𑀁 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺, 𑀢𑀣𑁂𑀯 𑀧𑀝𑀺𑀲𑀦𑁆𑀥𑀺𑀫𑁆𑀳𑀺 𑀯𑀢𑁆𑀢𑀢𑁂 𑀘𑀺𑀢𑁆𑀢𑀲𑀦𑁆𑀢𑀢𑀺, 𑀘𑀼𑀢𑀺𑀘𑀺𑀢𑁆𑀢𑀢𑁄 𑀅𑀦𑀸𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀢𑀢𑁄 𑀅𑀦𑀦𑁆𑀢𑀭𑀁 𑀦𑀸𑀧𑀺 𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀢𑀺𑀕𑀳𑀡𑁂𑀦 𑀘𑁂𑀢𑁆𑀣 𑀓𑀼𑀢𑁄𑀘𑀺 𑀆𑀕𑀫𑀸𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀳𑁂𑀢𑀼𑀨𑀮𑀪𑀸𑀯𑁂𑀦 𑀳𑀺 𑀲𑀫𑁆𑀩𑀦𑁆𑀥𑀢𑀸𑀢𑀺 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀲𑀦𑁆𑀢𑀢𑀻𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀁 𑀪𑀺𑀚𑁆𑀚𑀢𑁂 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀧𑀼𑀭𑀺𑀫𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀁. 𑀪𑀺𑀚𑁆𑀚𑀢𑁂𑀢𑀺 ¶ 𑀦𑀺𑀭𑀼𑀚𑁆𑀛𑀢𑀺. 𑀧𑀘𑁆𑀙𑀺𑀫𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁. 𑀢𑀢𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀅𑀦𑀦𑁆𑀢𑀭𑀫𑁂𑀯 𑀚𑀸𑀬𑀢𑀺. 𑀬𑀢𑁆𑀣 𑀳𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀤𑀽𑀭𑁂𑀧𑀺 𑀓𑀸𑀮𑀦𑁆𑀢𑀭𑁂𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀦𑀦𑁆𑀢𑀭𑀫𑁂𑀯 𑀚𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀅𑀦𑁆𑀢𑀭𑀺𑀓𑀸 𑀦𑀢𑁆𑀣𑀺 𑀢𑁂𑀲𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁 𑀩𑁆𑀬𑀯𑀥𑀸𑀬𑀓𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀯𑀻𑀘𑀺 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀢𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀅𑀦𑀦𑁆𑀢𑀭𑀁 𑀦 𑀘 𑀕𑀘𑁆𑀙𑀢𑀺 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀢𑀣𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀲𑀦𑁆𑀥𑀺 𑀘𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑀫𑁂𑀯 𑀬𑀣𑀸𑀧𑀘𑁆𑀘𑀬𑀁 𑀚𑀸𑀬𑀢𑀺 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀧𑀼𑀦𑀧𑀺 𑀲𑀗𑁆𑀓𑀫𑀸𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁 𑀦𑀺𑀕𑀫𑁂𑀢𑀺.

𑁬𑁯𑁧. 𑀦𑀸𑀫𑀭𑀽𑀧𑀕𑁆𑀕𑀳𑀡𑁂𑀦 ¶ , 𑀢𑀲𑁆𑀲 𑀘 𑀧𑀘𑁆𑀘𑀬𑀥𑀫𑁆𑀫𑀕𑁆𑀕𑀳𑀡𑁂𑀦 𑀅𑀕𑁆𑀕𑀳𑀺𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄 ‘‘𑀯𑀺𑀤𑀺𑀢𑀲𑀩𑁆𑀩𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀅𑀥𑀺𑀕𑀢𑀸. 𑀣𑀸𑀫𑀕𑀢𑀁 𑀳𑁄𑀢𑀺 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀺𑀥𑀺𑀦𑁄 𑀅𑀦𑀼𑀝𑁆𑀞𑀺𑀢𑀢𑁆𑀢𑀸. 𑀲𑀼𑀝𑁆𑀞𑀼𑀢𑀭𑀁 𑀧𑀳𑀻𑀬𑀢𑀺 𑀢𑀺𑀬𑀤𑁆𑀥𑀕𑀢𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸. 𑀲𑀸 𑀏𑀯𑀸𑀢𑀺 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸 𑀏𑀯. 𑀬𑀲𑁆𑀫𑀸 𑀏𑀢𑁆𑀣 ‘‘𑀩𑀼𑀤𑁆𑀥𑁄, 𑀥𑀫𑁆𑀫𑁄, 𑀲𑀗𑁆𑀖𑁄, 𑀲𑀺𑀓𑁆𑀔𑀸’’𑀢𑀺 𑀘 𑀓𑀗𑁆𑀔𑀸𑀬 𑀕𑁄𑀘𑀭𑀪𑀽𑀢𑀸 𑀮𑁄𑀓𑀺𑀬𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀓𑀺𑀮𑁂𑀲𑀸 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀧𑀼𑀩𑁆𑀩𑀦𑁆𑀢𑁄𑀢𑀺 𑀅𑀢𑀻𑀢𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄. 𑀅𑀧𑀭𑀦𑁆𑀢𑁄𑀢𑀺 𑀅𑀦𑀸𑀕𑀢𑀸. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄𑀢𑀺 𑀢𑀤𑀼𑀪𑀬𑀁, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀢𑀤𑀼𑀪𑀬𑀪𑀸𑀕𑀬𑀼𑀢𑁆𑀢𑀢𑁆𑀢𑀸. 𑀏𑀯𑀁 𑀩𑀼𑀤𑁆𑀥𑀸𑀤𑀺𑀕𑁆𑀕𑀳𑀡𑁂𑀦, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀕𑁆𑀕𑀳𑀡𑁂𑀦 𑀘 𑀕𑀳𑀺𑀢𑁄 𑀅𑀝𑁆𑀞𑀫𑁄 𑀓𑀗𑁆𑀔𑀸𑀯𑀺𑀲𑀬𑁄 𑀦𑀸𑀫𑀭𑀽𑀧𑀫𑀢𑁆𑀢𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀕𑁆𑀕𑀳𑀡𑁂𑀦 𑀧𑀦 𑀢𑀲𑁆𑀲 𑀧𑀘𑁆𑀘𑀬𑁄 𑀕𑀳𑀺𑀢𑁄, 𑀢𑀲𑁆𑀫𑀸 𑀲𑁄𑀴𑀲𑀯𑀢𑁆𑀣𑀼𑀓𑀸𑀬 𑀓𑀗𑁆𑀔𑀸𑀬 𑀧𑀳𑀻𑀦𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸 𑀓𑀗𑁆𑀔𑀸 𑀅𑀧𑁆𑀧𑀢𑀺𑀝𑁆𑀞𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀦 𑀓𑁂𑀯𑀮𑀜𑁆𑀘…𑀧𑁂… 𑀧𑀳𑀻𑀬𑀢𑀺𑀬𑁂𑀯𑀸’’𑀢𑀺.

𑀤𑀺𑀝𑁆𑀞𑁂𑀓𑀝𑁆𑀞𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀬𑀣𑀸 𑀤𑀺𑀝𑁆𑀞𑀺 𑀲𑀫𑀼𑀘𑁆𑀙𑀺𑀚𑁆𑀚𑀫𑀸𑀦𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀤𑁆𑀥𑀺𑀁𑀬𑁂𑀯 𑀲𑀫𑀼𑀘𑁆𑀙𑀺𑀚𑁆𑀚𑀢𑀺, 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀓𑁆𑀔𑀫𑁆𑀪𑀺𑀬𑀫𑀸𑀦𑀸 𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀓𑁆𑀔𑀫𑁆𑀪𑀻𑀬𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀻’’𑀢𑀺. 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀽𑀧𑀦𑀺𑀲𑁆𑀲𑀬𑀸 𑀳𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀦𑀬𑀧𑁆𑀧𑀯𑀢𑁆𑀢𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀓𑀗𑁆𑀔𑀸, 𑀲𑀸 𑀏𑀯 𑀘 𑀧𑀼𑀩𑁆𑀩𑀦𑁆𑀢𑀸𑀤𑀺𑀯𑀢𑁆𑀣𑀼𑀓𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀓𑀸𑀦𑀺 𑀘 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀩𑀼𑀤𑁆𑀥𑀸𑀤𑀺𑀯𑀢𑁆𑀣𑀼𑀓𑀸 𑀘 𑀓𑀗𑁆𑀔𑀸 𑀢𑀤𑁂𑀓𑀝𑁆𑀞𑀸𑀢𑀺. 𑀥𑀭𑀻𑀬𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀻𑀢𑀺 𑀥𑀫𑁆𑀫𑀸, 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀦𑁆𑀢𑀺 𑀞𑀺𑀢𑀺, 𑀥𑀫𑁆𑀫𑀸𑀦𑀁 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑀥𑀫𑁆𑀫𑁄. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀓𑀸𑀭𑀡𑀁 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮 𑀆𑀤𑀬𑁄) 𑀯𑀺𑀬, 𑀥𑀫𑁆𑀫𑀲𑁆𑀲 𑀞𑀺𑀢𑀺 𑀲𑀪𑀸𑀯𑁄, 𑀥𑀫𑁆𑀫𑀢𑁄 𑀘 𑀅𑀜𑁆𑀜𑁄 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀥𑀫𑁆𑀫𑀝𑁆𑀞𑀺𑀢𑀺, 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀲𑀗𑁆𑀔𑀸𑀭𑀸𑀦𑀁 𑀬𑀁 𑀬𑀁 𑀪𑀽𑀢𑀁 𑀅𑀦𑀺𑀘𑁆𑀘𑀢𑀸𑀤𑀺 𑀬𑀣𑀸𑀪𑀽𑀢𑀁, 𑀢𑀢𑁆𑀣 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀜𑀸𑀡𑀁. 𑀲𑀫𑁆𑀫𑀸 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀁.

𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄𑀢𑀺 𑀅𑀯𑀺𑀚𑁆𑀚𑀸 𑀳𑁂𑀢𑀼𑀆𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑁄. 𑀢𑀢𑁄 𑀏𑀯 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂𑀢𑀺 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀺 𑀆𑀲𑀯𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀲𑀫𑁆𑀪𑀽𑀢𑀸𑀯, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀢𑀺 𑀉𑀪𑀬𑁂𑀧𑀺 𑀏𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀇𑀢𑀻𑀢𑀺 𑀏𑀯𑀁. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸𑀢𑀺 𑀧𑀘𑁆𑀘𑀬𑀸𑀦𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸. 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀦𑀺𑀫𑀺𑀢𑁆𑀢𑀦𑁆𑀢𑀺 ¶ 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀢𑁂 𑀳𑀺 𑀖𑀦𑀲𑀜𑁆𑀜𑀸𑀧𑀯𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀸𑀯𑀢𑁄 𑀦𑀺𑀫𑀺𑀢𑁆𑀢𑀁, 𑀲𑀯𑀺𑀕𑁆𑀕𑀳𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀯𑀸. 𑀬𑀲𑁆𑀫𑀸 𑀅𑀦𑀺𑀘𑁆𑀘𑀢𑀸 𑀦𑀸𑀫 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀧𑀭𑀻𑀢𑀸𑀓𑀸𑀭𑁄. 𑀢𑀢𑁆𑀣 𑀦𑀺𑀘𑁆𑀘𑀢𑀸𑀬 𑀮𑁂𑀲𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺. 𑀢𑀜𑁆𑀘 𑀜𑀸𑀡𑀁 𑀅𑀯𑀺𑀧𑀭𑀻𑀢𑀕𑁆𑀕𑀳𑀡𑀢𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀢𑀁𑀲𑀫𑀗𑁆𑀕𑀺𑀦𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀺 𑀦𑀬𑀁 𑀦𑁂𑀦𑁆𑀢𑁂𑀦 𑀢𑁂 𑀲𑀼𑀧𑀭𑀺𑀯𑀺𑀤𑀺𑀢𑀸 𑀳𑁄𑀦𑁆𑀢𑀺.

𑀅𑀦𑀺𑀘𑁆𑀘𑀢𑀸 𑀘 𑀦𑀸𑀫 𑀉𑀧𑁆𑀧𑀢𑁆𑀢𑀺𑀫𑀢𑁄, 𑀉𑀧𑁆𑀧𑀸𑀤𑁄 𑀘 𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀅𑀦𑀺𑀘𑁆𑀘𑀢𑀸 𑀲𑀺𑀚𑁆𑀛𑀫𑀸𑀦𑀸 𑀲𑀗𑁆𑀔𑀸𑀭𑀸𑀦𑀁 𑀲𑀧𑁆𑀧𑀘𑁆𑀘𑀬𑀢𑀁 𑀲𑀸𑀥𑁂𑀦𑁆𑀢𑀻 𑀬𑀣𑀸𑀯𑀼𑀢𑁆𑀢𑀓𑀗𑁆𑀔𑀧𑁆𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀢𑁄…𑀧𑁂… 𑀧𑀳𑀻𑀬𑀢𑀻’’𑀢𑀺 𑀆𑀳. 𑀢𑀢𑁆𑀣 𑀢𑀤𑀦𑁆𑀯𑀬𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀲𑁆𑀲 𑀅𑀦𑀼𑀕𑀫𑀦𑁂𑀦. 𑀏𑀢𑁆𑀣𑀸𑀢𑀺 𑀬𑀣𑀸𑀤𑀺𑀝𑁆𑀞𑁂𑀲𑀼 𑀥𑀫𑁆𑀫𑁂𑀲𑀼. 𑀤𑀼𑀓𑁆𑀔𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀯𑀢𑁆𑀢𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑁆𑀧𑀯𑀢𑁆𑀢𑀁. 𑀢𑀜𑁆𑀳𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀢𑁆𑀢𑀸 𑀲𑀸𑀢𑀺𑀲𑀬𑀁 𑀤𑀼𑀓𑁆𑀔𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀺. 𑀧𑀯𑀢𑁆𑀢𑀦𑁆𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀘 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀦𑁆𑀢𑀺 𑀅𑀧𑀭𑁂. ‘‘𑀦𑀺𑀫𑀺𑀢𑁆𑀢𑀁, 𑀧𑀯𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑀲𑀜𑁆𑀜𑀺𑀢𑁂 𑀲𑀩𑁆𑀩𑀲𑁆𑀫𑀺𑀁 𑀲𑀧𑁆𑀧𑀘𑁆𑀘𑀬𑁂 𑀦𑀸𑀫𑀭𑀽𑀧𑁂 𑀬𑀸𑀣𑀸𑀯𑀢𑁄 𑀧𑀯𑀢𑁆𑀢𑀸 𑀏𑀓𑀸𑀯 𑀧𑀜𑁆𑀜𑀸 𑀧𑀭𑀺𑀬𑀸𑀬𑀯𑀲𑁂𑀦 ‘‘𑀬𑀣𑀸𑀪𑀽𑀢𑀜𑀸𑀡’’𑀦𑁆𑀢𑀺𑀧𑀺 ‘‘𑀲𑀫𑁆𑀫𑀸𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀢𑀢𑁆𑀣 𑀓𑀗𑁆𑀔𑀸𑀯𑀺𑀓𑁆𑀔𑀫𑁆𑀪𑀦𑁂𑀦 ‘‘𑀓𑀗𑁆𑀔𑀸𑀯𑀺𑀢𑀭𑀡𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀬𑀣𑀸 ‘‘𑀭𑀼𑀓𑁆𑀔𑁄 𑀧𑀸𑀤𑀧𑁄 𑀢𑀭𑀽’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀜𑁆𑀘 𑀬𑀣𑀸𑀪𑀽𑀢𑀜𑀸𑀡’’𑀦𑁆𑀢𑀺𑀆𑀤𑀺.

𑀧𑀭𑀫𑀢𑁆𑀣𑀢𑁄 ¶ 𑀲𑀸𑀲𑀦𑁂 𑀅𑀲𑁆𑀲𑀸𑀲𑁄 𑀦𑀸𑀫 𑀅𑀭𑀺𑀬𑀨𑀮𑀁, 𑀧𑀢𑀺𑀝𑁆𑀞𑀸 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄, 𑀅𑀬𑀁 𑀧𑀦 𑀅𑀦𑀥𑀺𑀕𑀢𑀫𑀕𑁆𑀕𑀨𑀮𑁄𑀧𑀺 𑀢𑀤𑀥𑀺𑀕𑀫𑀼𑀧𑀸𑀬𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀢𑁆𑀢𑀸 𑀮𑀤𑁆𑀥𑀲𑁆𑀲𑀸𑀲𑁄 𑀯𑀺𑀬, 𑀮𑀤𑁆𑀥𑀧𑀢𑀺𑀝𑁆𑀞𑁄 𑀯𑀺𑀬 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀮𑀤𑁆𑀥𑀲𑁆𑀲𑀸𑀲𑁄 𑀮𑀤𑁆𑀥𑀧𑀢𑀺𑀝𑁆𑀞𑁄’’𑀢𑀺. 𑀅𑀧𑀭𑀺𑀳𑀻𑀦𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀓𑁄 𑀯𑀺𑀧𑀲𑁆𑀲𑀓𑁄 𑀮𑁄𑀓𑀺𑀬𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀲𑀼𑀕𑀢𑀺𑀧𑀭𑀸𑀬𑀡𑁄 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀬𑀢𑀕𑀢𑀺𑀓𑁄’’𑀢𑀺. 𑀢𑀢𑁄 𑀏𑀯 𑀘𑀽𑀴𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄𑀢𑀺.

𑀅𑀣 𑀯𑀸 𑀮𑀤𑁆𑀥𑀲𑁆𑀲𑀸𑀲𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀲𑀫𑀥𑀺𑀕𑀫𑁂𑀦. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀳𑀺 𑀔𑀦𑁆𑀥𑀸𑀤𑀺𑀓𑁂 𑀲𑀪𑀸𑀯𑀲𑀭𑀲𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀲𑀦𑁂 𑀥𑀫𑁆𑀫𑀼𑀧𑀲𑀁𑀳𑀺𑀢𑀧𑀸𑀫𑁄𑀚𑁆𑀚𑀧𑁆𑀧𑀝𑀺𑀮𑀸𑀪𑁂𑀦 𑀮𑀤𑁆𑀥𑀲𑁆𑀲𑀸𑀲𑁄 𑀳𑁄𑀢𑀺. 𑀮𑀤𑁆𑀥𑀧𑀢𑀺𑀝𑁆𑀞𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀲𑀫𑀥𑀺𑀕𑀫𑁂𑀦. 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑁂𑀦 𑀳𑀺 𑀧𑀭𑀺𑀫𑀤𑁆𑀤𑀺𑀢𑀤𑀺𑀝𑁆𑀞𑀺𑀓𑀡𑁆𑀝𑀓𑁄 𑀯𑀺𑀦𑀺𑀤𑁆𑀥𑀢𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀯𑀸𑀤𑁄 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑁂𑀯 𑀥𑀫𑁆𑀫𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀲𑀸𑀲𑀦𑁂 ¶ 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁄 𑀮𑀤𑁆𑀥𑀧𑀢𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀸𑀭𑀸𑀤𑀺𑀯𑀺𑀥𑀺𑀦𑀸 𑀫𑀕𑁆𑀕𑀲𑀘𑁆𑀘𑀜𑁆𑀘 𑀅𑀪𑀺𑀜𑁆𑀜𑀸𑀬 𑀧𑀯𑀢𑁆𑀢𑀺𑀬𑀸 𑀤𑀼𑀓𑁆𑀔𑀪𑀸𑀯𑀁 𑀤𑀺𑀲𑁆𑀯𑀸 𑀅𑀧𑁆𑀧𑀯𑀢𑁆𑀢𑁂 𑀦𑀺𑀭𑁄𑀥𑁂 𑀏𑀓𑀁𑀲𑁂𑀦𑁂𑀯 𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸𑀬 𑀮𑁄𑀓𑀺𑀬𑁂𑀦𑁂𑀯 𑀜𑀸𑀡𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀥𑀺𑀕𑀢𑀢𑁆𑀢𑀸 𑀅𑀧𑀸𑀬𑁂𑀲𑀼 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄, 𑀲𑁄𑀢𑀸𑀧𑀦𑁆𑀦𑀪𑀽𑀫𑀺𑀬𑀁 𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀬𑀢𑀕𑀢𑀺𑀓𑁄’’𑀢𑀺. 𑀢𑁂𑀦𑀸𑀳 ‘‘𑀘𑀽𑀴𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻’’𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀫𑀳𑀸𑀦𑀺𑀲𑀁𑀲𑀫𑁂𑀢𑀁 𑀬𑀣𑀸𑀪𑀽𑀢𑀜𑀸𑀡𑀁, 𑀢𑀲𑁆𑀫𑀸. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘. 𑀲𑀩𑁆𑀩𑀲𑁄𑀢𑀺 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀆𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦.

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀏𑀓𑀽𑀦𑀯𑀻𑀲𑀢𑀺𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸.

𑁨𑁦. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀫𑁆𑀫𑀲𑀦𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁬𑁯𑁨. 𑀏𑀯𑀁 ¶ ¶ 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀜𑀢𑁆𑀯𑀸 𑀞𑀺𑀢𑀁 𑀜𑀸𑀡𑀦𑁆𑀢𑀺 𑀅𑀬𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀅𑀬𑀁 𑀑𑀪𑀸𑀲𑀸𑀤𑀺𑀪𑁂𑀤𑁄 𑀤𑀲𑀯𑀺𑀥𑁄 𑀉𑀧𑀓𑁆𑀓𑀺𑀮𑁂𑀲𑁄 𑀦 𑀫𑀕𑁆𑀕𑁄𑀢𑀺 𑀏𑀯𑀁 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀬𑀸𑀣𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁.

𑀅𑀢𑀻𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 𑀓𑀮𑀸𑀧𑀢𑁄 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀲𑀦𑀁 𑀓𑀮𑀸𑀧𑀲𑀫𑁆𑀫𑀲𑀦𑀁, 𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀅𑀪𑀺𑀮𑀸𑀧𑁄. ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑁨.𑁧𑁧𑁩; 𑁩.𑁮𑁬; 𑀅. 𑀦𑀺. 𑁪.𑁧𑁮𑁧) 𑀦𑀬𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀬𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀓𑀺𑀭 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀁 𑀅𑀪𑀺𑀮𑀸𑀧𑁄. 𑀢𑁂𑀦𑁂𑀯𑀸𑀳 ‘‘𑀓𑀮𑀸𑀧𑀲𑀫𑁆𑀫𑀲𑀦𑀲𑀗𑁆𑀔𑀸𑀢𑀸𑀬 𑀦𑀬𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺. 𑀢𑀸𑀯-𑀲𑀤𑁆𑀤𑁄 𑀓𑀫𑀢𑁆𑀣𑁄, 𑀢𑁂𑀦 𑀲𑀫𑁆𑀫𑀲𑀦𑀧𑁆𑀧𑀓𑀸𑀭𑀸𑀦𑀁 𑀩𑀳𑀼𑀪𑁂𑀤𑀢𑀁 𑀤𑀻𑀧𑁂𑀢𑀺. 𑀩𑀳𑀼𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀧𑀞𑀫𑀁 𑀦𑀬𑀯𑀺𑀧𑀲𑁆𑀲𑀦𑀸𑀬 𑀬𑁄𑀕𑀸𑀭𑀫𑁆𑀪𑀁 𑀅𑀦𑀼𑀲𑀸𑀲𑀢𑀺 ‘‘𑀦𑀬𑀯𑀺𑀧𑀲𑁆𑀲𑀦𑀸𑀬 𑀢𑀸𑀯 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀓𑀲𑁆𑀫𑀸𑀢𑀺 𑀘𑁄𑀤𑀓𑀯𑀘𑀦𑀁. 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀅𑀣 𑀓𑀲𑁆𑀫𑀸 ‘‘𑀦𑀬𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀢𑁄 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀢𑀭𑁄 𑀢𑀲𑁆𑀲𑀸𑀬𑀁 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀧𑀲𑁆𑀲𑀦𑀸𑀬 𑀲𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀸𑀤𑁄, 𑀉𑀤𑀬𑀩𑁆𑀩𑀬𑀜𑀸𑀡𑁂 𑀲𑀢𑀺 𑀑𑀪𑀸𑀲𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀲𑀫𑁆𑀪𑀯𑁄, 𑀢𑀢𑁄 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀁, 𑀢𑀲𑁆𑀫𑀸 𑀢𑀲𑁆𑀲 𑀆𑀤𑀺𑀢𑁄𑀯 𑀆𑀭𑀫𑁆𑀪𑀲𑁆𑀲 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀯𑀺𑀧𑀲𑁆𑀲𑀦𑀸 𑀧𑀞𑀫𑀁 𑀆𑀭𑀤𑁆𑀥𑀩𑁆𑀩𑀸’’𑀢𑀺. 𑀏𑀯𑀫𑁆𑀧𑀺 𑀧𑀞𑀫𑀁 𑀦𑀬𑀯𑀺𑀧𑀲𑁆𑀲𑀦𑀸𑀯 𑀓𑀲𑁆𑀫𑀸 𑀆𑀭𑀤𑁆𑀥𑀩𑁆𑀩𑀸𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬 𑀘 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀻’’𑀢𑀺. 𑀢𑀜𑁆𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀲𑀼𑀓𑀭𑀁 𑀲𑀫𑁆𑀫𑀲𑀦𑀦𑁆𑀢𑀺 𑀆𑀤𑀺𑀪𑀽𑀢𑀁.

𑀢𑀲𑁆𑀫𑀸𑀢𑀺 ¶ 𑀆𑀤𑀺𑀪𑀽𑀢𑀢𑁆𑀢𑀸. 𑀅𑀣 𑀯𑀸 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲…𑀧𑁂… 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀺, 𑀢𑀲𑁆𑀫𑀸. 𑀏𑀢𑀦𑁆𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀁. 𑀅𑀧𑀺𑀘𑀸𑀢𑀺𑀆𑀤𑀺 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀪𑀸𑀯𑁂 𑀉𑀧𑀘𑀬𑀳𑁂𑀢𑀼𑀤𑀲𑁆𑀲𑀦𑀁. 𑀉𑀤𑀬𑀩𑁆𑀩𑀬𑀜𑀸𑀡𑀧𑀭𑀺𑀬𑁄𑀲𑀸𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀅𑀲𑀫𑁆𑀧𑀢𑁆𑀢𑁂 ¶ 𑀏𑀯 𑀘 𑀉𑀤𑀬𑀩𑁆𑀩𑀬𑀜𑀸𑀡𑁂 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀸𑀬𑀸’’𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑁂 𑀢𑀸𑀯 𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣𑀸𑀧𑀺 𑀢𑀲𑁆𑀲𑁂𑀯 𑀧𑀞𑀫𑀸𑀭𑀫𑁆𑀪𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀓𑀮𑀸𑀧𑀲𑀫𑁆𑀫𑀲𑀦𑀁 𑀦𑀸𑀫 𑀏𑀓𑀯𑀺𑀲𑀼𑀤𑁆𑀥𑀺𑀬𑀫𑁆𑀧𑀺 𑀦 𑀅𑀦𑁆𑀢𑁄𑀕𑀥𑀁, 𑀏𑀓𑀘𑁆𑀘𑁂 𑀘 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀯𑀡𑁆𑀡𑁂𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀲𑀼𑀢𑁆𑀢𑀦𑁆𑀢𑁂𑀲𑀼 𑀏𑀓𑀤𑁂𑀲𑁂𑀦, 𑀅𑀦𑀯𑀲𑁂𑀲𑀢𑁄 𑀘 𑀤𑀲𑁆𑀲𑀺𑀢𑀁. 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀫𑀦𑀲𑀺𑀓𑀸𑀭𑀲𑀼𑀓𑀭𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀤𑀺𑀪𑀸𑀯𑁂𑀦 𑀞𑀧𑀺𑀢𑀁. 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀘 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑀫𑁆𑀪𑀯𑁄, 𑀢𑀲𑁆𑀫𑀸 ‘‘𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀬𑀁 𑀯𑀺𑀘𑀸𑀭𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁯𑁩. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀜𑀸𑀢𑀧𑀭𑀺𑀜𑁆𑀜𑀸𑀦𑀦𑁆𑀢𑀭𑀪𑀸𑀯𑁂, 𑀢𑀸𑀲𑀼 𑀯𑀸 𑀧𑀭𑀺𑀜𑁆𑀜𑀸𑀲𑀼. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀭𑀽𑀧𑀢𑁄, 𑀓𑀺𑀘𑁆𑀘𑀢𑁄, 𑀪𑀽𑀫𑀺𑀢𑁄 𑀘 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀮𑁄𑀓𑀼𑀢𑁆𑀢𑀭𑀸𑀧𑀺 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑁆𑀘𑀤𑁆𑀯𑀬𑁂 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀧𑀭𑀺𑀜𑁆𑀜𑀸 𑀓𑀺𑀘𑁆𑀘𑀯𑀲𑁂𑀦 𑀮𑀩𑁆𑀪𑀢𑀻𑀢𑀺 ‘‘𑀮𑁄𑀓𑀺𑀬𑀧𑀭𑀺𑀜𑁆𑀜𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁄 𑀜𑁂𑀬𑁆𑀬𑀅𑀪𑀺𑀫𑀼𑀔𑀸 𑀧𑀜𑁆𑀜𑀸 𑀅𑀪𑀺𑀜𑁆𑀜𑀸𑀧𑀜𑁆𑀜𑀸. 𑀜𑀸𑀢𑀝𑁆𑀞𑁂𑀢𑀺 𑀜𑀸𑀢𑀪𑀸𑀯𑀦𑀺𑀫𑀺𑀢𑁆𑀢𑀁. 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀚𑀸𑀦𑀦𑀳𑁂𑀢𑀼 ‘‘𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀧𑀜𑁆𑀜𑀸. 𑀢𑀻𑀭𑀡𑀝𑁆𑀞𑁂𑀢𑀺 𑀲𑀫𑁆𑀫𑀲𑀦𑀪𑀸𑀯𑀳𑁂𑀢𑀼. 𑀧𑀳𑀸𑀦𑀧𑀜𑁆𑀜𑀸𑀢𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀚𑀳𑀦𑀧𑀜𑁆𑀜𑀸. 𑀯𑁂𑀤𑀬𑀺𑀢𑀸𑀤𑀺𑀮𑀓𑁆𑀔𑀡𑀯𑀺𑀥𑀼𑀭𑀢𑀸𑀬 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀢𑁂𑀲𑀁𑀬𑁂𑀯 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀕𑀳𑀺𑀢𑀥𑀫𑁆𑀫𑀸𑀦𑀁𑀬𑁂𑀯. 𑀬𑀣𑀸 𑀧𑀣𑀯𑀻𑀨𑀲𑁆𑀲𑀸𑀤𑀻𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀸𑀦𑀺 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀸𑀦𑀺 𑀧𑀝𑀺𑀦𑀺𑀬𑀢𑀭𑀽𑀧𑀢𑀸𑀬 𑀲𑀪𑀸𑀯𑀲𑀺𑀤𑁆𑀥𑀸𑀦𑁂𑀯 𑀳𑀼𑀢𑁆𑀯𑀸 𑀕𑀬𑁆𑀳𑀦𑁆𑀢𑀺, 𑀦 𑀏𑀯𑀫𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀸𑀦𑀺. 𑀢𑀸𑀦𑀺 𑀧𑀦 𑀪𑀗𑁆𑀕𑀼𑀤𑀬𑀩𑁆𑀩𑀬𑀧𑀻𑀴𑀸𑀯𑀲𑀯𑀢𑁆𑀢𑀦𑀸𑀓𑀸𑀭𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀢𑁄 𑀲𑀫𑀸𑀭𑁄𑀧𑀺𑀢𑀭𑀽𑀧𑀸𑀦𑀺 𑀯𑀺𑀬 𑀕𑀬𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀮𑁄𑀓𑀺𑀬𑀧𑀭𑀺𑀜𑁆𑀜𑀸𑀦𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯 ‘‘𑀧𑀳𑀸𑀦𑀧𑀭𑀺𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸.

𑀲𑀗𑁆𑀔𑀸𑀭𑀧𑀝𑀺𑀘𑁆𑀙𑁂𑀤𑀢𑁄𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀢𑁄, 𑀬𑀸 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀔𑀦𑁆𑀥𑀸𑀤𑀻𑀦𑀁 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀪𑀸𑀯𑀢𑁄 𑀲𑀩𑁆𑀩𑁄𑀧𑀺 𑀔𑀦𑁆𑀥𑀸𑀤𑀺𑀯𑀺𑀘𑀸𑀭𑁄 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀯𑀤𑀦𑁆𑀢𑀺. ‘‘𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀧𑀜𑁆𑀜𑀸𑀦𑀁 𑀢𑀻𑀭𑀡𑀧𑀳𑀸𑀦𑀸𑀲𑀫𑀢𑁆𑀣𑀢𑀁 ¶ 𑀤𑀲𑁆𑀲𑁂𑀢𑀺 ¶ . 𑀢𑀸𑀲𑀫𑁆𑀧𑀺 𑀧𑀦 ‘‘𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧’’𑀦𑁆𑀢𑀺 𑀅𑀭𑀽𑀧𑀭𑀽𑀧𑀸𑀦𑀁 𑀲𑀸𑀥𑀸𑀭𑀡𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑁂𑀦𑀸𑀓𑀸𑀭𑁂𑀦 𑀢𑀻𑀭𑀡𑀧𑀭𑀺𑀬𑀸𑀬𑁄, 𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀳𑀸𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑀺𑀬𑀸 𑀢𑀻𑀭𑀡𑀧𑀳𑀸𑀦𑁂𑀲𑀼𑀧𑀺 𑀆𑀥𑀺𑀧𑀘𑁆𑀘𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀧𑀦 𑀬𑀣𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸𑀯 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀢𑀸, 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀏𑀯 𑀢𑀻𑀭𑀡𑀧𑀳𑀸𑀦𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀳𑀺 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸 𑀯𑀯𑀢𑁆𑀣𑀺𑀢𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀲𑀗𑁆𑀓𑀸𑀭𑁄 𑀲𑀺𑀬𑀸. 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀪𑀽𑀫𑀺 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀲𑀦𑁆𑀢𑀻𑀭𑀡𑀢𑁄. 𑀢𑁂𑀦𑀸𑀳 ‘‘𑀏𑀢𑀲𑁆𑀫𑀺𑀁…𑀧𑁂… 𑀆𑀥𑀺𑀧𑀘𑁆𑀘’’𑀦𑁆𑀢𑀺. 𑀓𑀸𑀫𑀁 𑀉𑀤𑀬𑀩𑁆𑀩𑀬𑀜𑀸𑀡𑀫𑁆𑀧𑀺 𑀓𑀜𑁆𑀘𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺, 𑀢𑀲𑁆𑀲 𑀧𑀦 𑀅𑀣𑀸𑀫𑀕𑀢𑀢𑁆𑀢𑀸 𑀦 𑀲𑀸𑀢𑀺𑀲𑀬𑀁 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑀭𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀪𑀽𑀫𑀻’’𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀲𑀗𑁆𑀔𑀸𑀭𑁂 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀲𑀦𑁆𑀢𑁄. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 ‘‘𑀢𑁂 𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀲𑀜𑁆𑀜𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀫𑁆𑀪𑀽𑀢𑀸𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀦𑀺𑀩𑁆𑀩𑀺𑀚𑁆𑀚𑀦𑀯𑀲𑁂𑀦 𑀧𑀲𑁆𑀲𑀦𑁆𑀢𑁄. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀚𑁆𑀚𑀦𑁆𑀢𑁄𑀢𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀭𑀚𑁆𑀚𑀦𑀯𑀲𑁂𑀦 𑀬𑀣𑀸 𑀲𑀗𑁆𑀔𑀸𑀭𑁂𑀲𑀼 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀢𑀣𑀸𑀪𑀽𑀢𑁄 𑀳𑀺 𑀭𑀸𑀕𑀁 𑀧𑀚𑀳𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑁄𑀥𑁂𑀦𑁆𑀢𑁄𑀢𑀺 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀬𑀣𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀦 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀢𑀣𑀸𑀪𑀽𑀢𑁄 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺 𑀦𑀸𑀫 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀢𑁄. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀬𑀣𑀸 𑀲𑀗𑁆𑀔𑀸𑀭𑀸 𑀦 𑀧𑀼𑀦 𑀆𑀤𑀺𑀬𑀦𑁆𑀢𑀺, 𑀏𑀯𑀁 𑀯𑁄𑀲𑁆𑀲𑀚𑁆𑀚𑀦𑁆𑀢𑁄. 𑀢𑁂𑀦𑀸𑀳 ‘‘𑀆𑀤𑀸𑀦𑀁 𑀧𑀚𑀳𑀢𑀻’’𑀢𑀺, 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀸 𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀥𑀺𑀢𑀢𑁆𑀢𑀸𑀢𑀺 𑀲𑀫𑁆𑀧𑀸𑀤𑀺𑀢𑀢𑁆𑀢𑀸. 𑀇𑀢𑀭𑀸𑀢𑀺 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸. 𑀏𑀯𑀁 𑀧𑀭𑀺𑀜𑁆𑀜𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀓𑁆𑀓𑀫𑀯𑀲𑁂𑀦𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀦𑁆𑀢𑀭𑀁 ‘‘𑀓𑀮𑀸𑀧𑀲𑀫𑁆𑀫𑀲𑀦𑁂 𑀬𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀬𑁆𑀯𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀦𑀺𑀕𑀫𑀯𑀲𑁂𑀦 𑀧𑀘𑁆𑀘𑀸𑀳𑀭𑀦𑁆𑀢𑁄 ‘‘𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁬𑁯𑁪. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀓𑀮𑀸𑀧𑀲𑀫𑁆𑀫𑀲𑀦𑁂 𑀯𑀺𑀪𑀸𑀯𑁂𑀢𑀩𑁆𑀩𑁂, 𑀢𑀲𑁆𑀲 𑀯𑀸 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲 𑀆𑀤𑀺𑀪𑀸𑀯𑁂. 𑀅𑀬𑀁 𑀧𑀸𑀴𑀻𑀢𑀺 𑀤𑀲𑁆𑀲𑀺𑀬𑀫𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 ¶ 𑀏𑀓𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁂 𑀲𑀸𑀥𑁂𑀢𑀩𑁆𑀩𑁂 𑀢𑀁𑀲𑀸𑀥𑀦𑀻𑀬𑀸 𑀧𑀜𑁆𑀜𑀸. 𑀲𑀫𑁆𑀫𑀲𑀦𑁂 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀢𑀻𑀭𑀡𑁂 𑀜𑀸𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺, 𑀲𑀸 𑀓𑀣𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀯𑀢𑁆𑀣𑀸𑀦𑁂 𑀲𑀫𑁆𑀫𑀲𑀦𑁂𑀢𑀺 𑀘 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀯𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀻𑀢𑀺𑀆𑀤𑀻𑀦𑀺 𑀧𑀦 𑀬𑀲𑁆𑀫𑀸 𑀧𑀭𑀢𑁄 𑀯𑀡𑁆𑀡𑀺𑀬𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣𑁂𑀯 𑀦𑁂𑀲𑀁 𑀅𑀢𑁆𑀣𑀁 𑀯𑀺𑀪𑀸𑀯𑀬𑀺𑀲𑁆𑀲𑀸𑀫.

𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀏𑀢𑁆𑀣 𑀳𑀺 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑀲𑀼𑀔𑀢𑁆𑀣𑀁 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀢𑀸𑀯 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀫𑀼𑀔𑁂𑀦 𑀕𑀳𑀺𑀢𑀸, 𑀢𑁂 𑀧𑀦 𑀔𑀦𑁆𑀥𑀸 𑀬𑀲𑁆𑀫𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀯𑀲𑁂𑀦 𑀯𑀺𑀪𑀸𑀕𑀁 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀤𑁆𑀯𑀸𑀭𑀙𑀓𑁆𑀓𑀸𑀤𑀺𑀯𑀲𑁂𑀦 𑀤𑀲 𑀙𑀓𑁆𑀓𑀸 𑀕𑀳𑀺𑀢𑀸. 𑀬𑀲𑁆𑀫𑀸 𑀧𑀦 𑀮𑀓𑁆𑀔𑀡𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀼𑀓𑁆𑀔𑀯𑀺𑀪𑀸𑀕𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀪𑀸𑀯𑀦𑀸𑀬 𑀙 𑀥𑀸𑀢𑀼𑀬𑁄 𑀕𑀳𑀺𑀢𑀸. 𑀢𑀢𑁄 𑀬𑁂𑀲𑀼 𑀓𑀲𑀺𑀡𑁂𑀲𑀼 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄, 𑀢𑀸𑀦𑀺 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑀲 𑀓𑀲𑀺𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀭𑀺𑀯𑀸𑀭𑀪𑀸𑀯𑁂𑀦 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸. 𑀧𑀼𑀩𑁆𑀩𑁂 𑀔𑀦𑁆𑀥𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀕𑀳𑀺𑀢𑀸 𑀥𑀫𑁆𑀫𑀸 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦, 𑀯𑀺𑀢𑁆𑀣𑀸𑀭𑀦𑀬𑁂𑀦 𑀘 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘 𑀕𑀳𑀺𑀢𑀸. 𑀢𑁂𑀲𑀼 𑀇𑀫𑁂 𑀥𑀫𑁆𑀫𑀸 𑀲𑀢𑀺𑀧𑀺 𑀲𑀼𑀜𑁆𑀜𑀦𑀺𑀭𑀻𑀳𑀅𑀩𑁆𑀬𑀸𑀧𑀸𑀭𑀪𑀸𑀯𑁂 𑀥𑀫𑁆𑀫𑀲𑀪𑀸𑀯𑀢𑁄 𑀆𑀥𑀺𑀧𑀘𑁆𑀘𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀕𑀳𑀺𑀢𑀸𑀦𑀺. 𑀏𑀯𑀁 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺𑀫𑁂 𑀥𑀫𑁆𑀫𑀸 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀺𑀯𑀺𑀥𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀕𑀳𑀺𑀢𑀸.

𑀏𑀢𑁆𑀢𑀸𑀯𑀢𑀸 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀓𑀸𑀫𑀪𑀯𑀸𑀤𑀬𑁄 𑀦𑀯 𑀪𑀯𑀸 𑀕𑀳𑀺𑀢𑀸. 𑀏𑀢𑁆𑀢𑀓𑁂 𑀅𑀪𑀺𑀜𑁆𑀜𑁂𑀬𑁆𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑁂𑀦 𑀲𑀡𑁆𑀳𑀲𑀼𑀔𑀼𑀫𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀛𑀸𑀦𑀧𑁆𑀧𑀫𑀜𑁆𑀜𑀸𑀭𑀼𑀧𑁆𑀧𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 𑀛𑀸𑀦𑀸𑀦𑀺 𑀦𑀸𑀫 𑀯𑀼𑀢𑁆𑀢𑀸𑀯𑀲𑁂𑀲𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀢𑁄 𑀇𑀫𑁂 𑀥𑀫𑁆𑀫𑀸 𑀪𑀺𑀦𑁆𑀤𑀺𑀢𑁆𑀯𑀸 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀕𑀳𑀺𑀢𑀸𑀦𑀺. 𑀧𑀘𑁆𑀘𑀬𑀸𑀓𑀸𑀭𑀫𑀦𑀲𑀺𑀓𑀸𑀭𑁄 𑀳𑀺 𑀮𑀓𑁆𑀔𑀡𑀢𑁆𑀢𑀬𑀁 𑀲𑀼𑀔𑁂𑀦, 𑀲𑀼𑀝𑁆𑀞𑀼𑀢𑀭𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀧𑀘𑁆𑀙𑀢𑁄 𑀕𑀳𑀺𑀢𑁄. 𑀏𑀯𑀫𑁂𑀢𑁂 𑀲𑀫𑁆𑀫𑀲𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑀸 ¶ 𑀔𑀦𑁆𑀥𑀸𑀤𑀺𑀯𑀲𑁂𑀦 𑀓𑁄𑀝𑁆𑀞𑀸𑀲𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀸. 𑀧𑀪𑁂𑀤𑀢𑁄 𑀧𑀦 𑀅𑀢𑀻𑀢𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀕𑀬𑁆𑀳𑀫𑀸𑀦𑀸 𑀤𑁆𑀯𑀻𑀳𑀺 𑀊𑀦𑀸𑀦𑀺 𑀤𑁆𑀯𑁂𑀲𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀻𑀢𑀺𑀆𑀤𑀺𑀓𑁄 𑀧𑀞𑀫𑁄 𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀯𑀸𑀭𑁄. 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀓𑁄 𑀤𑀼𑀢𑀺𑀬𑁄 𑀳𑁂𑀢𑀼𑀯𑀸𑀭𑁄 𑀮𑀓𑁆𑀔𑀡𑀸𑀦𑀁 𑀳𑁂𑀢𑀼𑀓𑀺𑀢𑁆𑀢𑀦𑀢𑁄. 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀦𑁆𑀢𑀺𑀆𑀤𑀺𑀓𑁄 𑀧𑀦 𑀳𑁂𑀢𑀼𑀧𑀢𑀺𑀝𑁆𑀞𑀸𑀧𑀦𑀯𑀸𑀭𑁄 ¶ 𑀧𑀸𑀓𑀝𑀪𑀸𑀯𑀲𑀮𑁆𑀮𑀓𑁆𑀔𑀡𑀢𑁄. 𑀔𑀬𑀝𑁆𑀞𑁂𑀦𑀸𑀢𑀺 𑀳𑀺 𑀔𑀬𑀲𑀪𑀸𑀯𑀢𑁄 𑀬𑀲𑁆𑀫𑀸 𑀭𑀽𑀧𑀁 𑀔𑀬𑀲𑀪𑀸𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀬𑀁 𑀯𑀬𑀁 𑀪𑁂𑀤𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀸𑀬𑀺𑀢𑀩𑁆𑀩𑀪𑀸𑀯𑀢𑁄 𑀬𑀲𑁆𑀫𑀸 𑀭𑀽𑀧𑀁 𑀧𑀪𑀗𑁆𑀕𑀼𑀭𑀢𑀸𑀬 𑀪𑀬𑀸𑀦𑀓𑀁, 𑀢𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩𑁦.𑁧𑁫, 𑁪𑁫, 𑁪𑁬, 𑁭𑁬, 𑁮𑁫; 𑁨.𑁪.𑁧𑁪; 𑀧𑀝𑀺. 𑀫. 𑁨.𑁧𑁦). 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀲𑀸𑀭𑀓𑀪𑀸𑀯𑀢𑁄, 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀯𑀸𑀭𑁂 𑀧𑀦 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀳𑁂𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀲𑀗𑁆𑀔𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀁, 𑀅𑀦𑀼𑀭𑀽𑀧𑁂 𑀘 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘, 𑀦 𑀯𑀺𑀦𑀸 𑀢𑁂𑀳𑀺 𑀲𑀫𑀁, 𑀲𑀫𑁆𑀫𑀸 𑀘 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸 𑀔𑀬𑀯𑀬𑀯𑀺𑀭𑀸𑀕𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀦 𑀳𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀅𑀦𑀺𑀭𑀼𑀚𑁆𑀛𑀦𑀓𑀁 𑀦𑀸𑀫 𑀅𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀁 𑀢𑀁 𑀭𑀽𑀧𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁫.𑁩𑁭𑁯). 𑀏𑀢𑁂𑀦 𑀅𑀦𑀺𑀘𑁆𑀘𑀸 𑀧𑀣𑀯𑀻𑀥𑀸𑀢𑀼 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀁 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑀥𑀫𑁆𑀫𑁂𑀲𑀼𑀧𑀺.

𑀇𑀤𑀸𑀦𑀺 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀚𑀸𑀢𑀺𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀮𑀓𑁆𑀔𑀡𑀲𑁆𑀲𑁂𑀯 𑀘𑁂𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀁 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑀺𑀢𑁂 𑀲𑁂𑀲𑀮𑀓𑁆𑀔𑀡𑀤𑁆𑀯𑀬𑀲𑁆𑀲𑀧𑀺 𑀧𑀢𑀺𑀝𑁆𑀞𑀸𑀧𑀦𑀲𑀺𑀤𑁆𑀥𑀺𑀢𑁄.

𑀇𑀫𑀺𑀦𑀸 𑀧𑁂𑀬𑁆𑀬𑀸𑀮𑁂𑀦 𑀇𑀫𑁂 𑀥𑀫𑁆𑀫𑀭𑀸𑀲𑀬𑁄 𑀲𑀁𑀔𑀺𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀥𑀫𑁆𑀫𑀸, 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀇𑀤𑀁 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁩; 𑀲𑀁. 𑀦𑀺. 𑁪.𑁪𑁬) 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀅𑀪𑀺𑀜𑁆𑀜𑁂𑀬𑁆𑀬𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁪𑁮) 𑀧𑀦 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀲𑁆𑀲𑁂𑀢𑁆𑀯𑀸 ‘‘𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀤𑀲𑁆𑀲𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀇𑀫𑁂 𑀥𑀫𑁆𑀫𑀭𑀸𑀲𑀬𑁄 𑀲𑀁𑀔𑀺𑀢𑁆𑀢𑀸𑀢𑀺 𑀧𑀸𑀴𑀺𑀬𑀁 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯𑀸𑀳 ‘‘𑀢𑀁 𑀢𑀢𑁆𑀣…𑀧𑁂… 𑀲𑀁𑀔𑀺𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀢𑀦𑁆𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀏𑀢𑁆𑀣𑀸𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂. ‘‘𑀯𑀺𑀜𑁆𑀜𑀸𑀡𑀁 𑀫𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀬𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀆𑀕𑀢𑀸. 𑀓𑁂𑀘𑀺 𑀧𑀦 ‘‘𑀏𑀢𑁆𑀣𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 ¶ 𑀲𑀼𑀦𑁆𑀤𑀭𑀁. 𑀲𑀫𑁆𑀫𑀲𑀦𑀼𑀧𑀕𑀸 𑀏𑀯 𑀳𑀺 𑀥𑀫𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀕𑀳𑀺𑀢𑀸 𑀲𑀫𑁆𑀫𑀲𑀦𑀯𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑁂 (𑀧𑀝𑀺. 𑀫. 𑁧.𑁩; 𑀲𑀁. 𑀦𑀺. 𑁪.𑁪𑁬) 𑀯𑀺𑀬 𑀲𑀩𑁆𑀩𑁂𑀯 𑀅𑀪𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀬𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸. 𑀬𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀢𑁂𑀲𑀼 𑀢𑁂𑀦 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑀩𑁆𑀩𑀁 𑀬𑀣𑀸𑀧𑀸𑀓𑀝𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑀢𑁆𑀯𑀸. 𑀧𑀘𑁆𑀙𑀸 𑀧𑀦 𑀅𑀦𑀼𑀧𑀝𑁆𑀞𑀳𑀦𑁆𑀢𑁂𑀧𑀺 𑀉𑀧𑀸𑀬𑁂𑀦 𑀉𑀧𑀝𑁆𑀞𑀳𑀸𑀧𑁂𑀢𑁆𑀯𑀸 𑀅𑀦𑀯𑀲𑁂𑀲𑀢𑁄𑀯 𑀲𑀫𑁆𑀫𑀲𑀺𑀢𑀩𑁆𑀩𑀸.

𑁬𑁯𑁫. ‘‘𑀅𑀢𑀻𑀢𑀁 𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀲𑁆𑀲 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸𑀢𑀺 𑀆𑀳 ‘‘𑀏𑀓𑀸𑀤𑀲𑀳𑀺 𑀑𑀓𑀸𑀲𑁂𑀳𑀻’’𑀢𑀺. 𑀯𑀯𑀢𑁆𑀣𑀸𑀧𑀦𑀁 𑀦𑀸𑀫 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀅𑀦𑀺𑀘𑁆𑀘𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘𑁂𑀢𑁆𑀣 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀯𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀲𑀫𑁆𑀫𑀲𑀢𑀻’’𑀢𑀺.

𑀓𑀣𑀦𑁆𑀢𑀺 𑀲𑀫𑁆𑀫𑀲𑀦𑀸𑀓𑀸𑀭𑁄 𑀧𑀼𑀘𑁆𑀙𑀺𑀢𑁄𑀢𑀺 𑀢𑀁 𑀧𑀭𑀢𑁄 𑀇𑀥𑁂𑀯 𑀧𑀸𑀴𑀺𑀬𑀁 𑀤𑀼𑀢𑀺𑀬𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀻-𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 ‘‘𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀅𑀦𑀺𑀘𑁆𑀘𑀦𑁆𑀢𑀺 𑀲𑀫𑁆𑀫𑀲𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀫𑁆𑀧𑀺 𑀲𑀗𑁆𑀔𑁂𑀧𑁄𑀬𑁂𑀯𑀸𑀢𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀻𑀢𑁂𑀢𑀺 𑀅𑀢𑀻𑀢𑁂 𑀪𑀯𑁂. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀇𑀤𑀁 𑀲𑀫𑁆𑀫𑀲𑀦𑀯𑀺𑀥𑀸𑀦𑀁, 𑀢𑀲𑁆𑀫𑀸 𑀪𑀯𑀯𑀲𑁂𑀦 𑀅𑀤𑁆𑀥𑀸𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀦𑀬𑀺𑀫𑀁 𑀪𑀯𑀁 𑀲𑀫𑁆𑀧𑀢𑁆𑀢𑀦𑁆𑀢𑀻’’𑀢𑀺. 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀅𑀢𑀻𑀢𑀪𑀯𑁂 𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀁, 𑀢𑀁 𑀅𑀢𑀻𑀢𑁂𑀬𑁂𑀯 𑀪𑀯𑁂 𑀔𑀻𑀡𑀁, 𑀢𑀢𑁄 𑀦 𑀇𑀫𑀁 𑀪𑀯𑀁 𑀲𑀫𑁆𑀧𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀔𑀬𑀲𑀪𑀸𑀯𑀢𑁆𑀢𑀸𑀢𑀺 𑀲𑀫𑁆𑀫𑀲𑀢𑀻𑀢𑀺. 𑀏𑀲 𑀦𑀬𑁄 𑀬𑀁 𑀅𑀦𑀸𑀕𑀢𑀦𑁆𑀢𑀺𑀆𑀤𑀻𑀲𑀼𑀧𑀺.

𑀬𑀁 ¶ 𑀩𑀳𑀺𑀤𑁆𑀥𑀸, 𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀏𑀯 𑀔𑀻𑀬𑀢𑀺, 𑀦 𑀅𑀚𑁆𑀛𑀢𑁆𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺, 𑀬𑀁 𑀑𑀴𑀸𑀭𑀺𑀓𑀁, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀔𑀻𑀬𑀢𑀻𑀢𑀺 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀁 𑀲𑀩𑁆𑀩𑀫𑁆𑀧𑀻𑀢𑀺 𑀇𑀤𑀁 𑀅𑀢𑀻𑀢𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀲𑁆𑀲 𑀲𑀫𑁆𑀫𑀲𑀦𑀢𑁄 𑀲𑀩𑁆𑀩𑀁 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀲𑀫𑁆𑀫𑀲𑀦𑀁 𑀏𑀓𑀁 𑀲𑀫𑁆𑀫𑀲𑀦𑀁 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀦𑀦𑁆𑀢𑀺 𑀓𑀢𑁆𑀯𑀸.

𑀢𑀦𑁆𑀢𑀺 𑀢𑀁 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀭𑀽𑀧𑀁. 𑀲𑀧𑁆𑀧𑀝𑀺𑀪𑀬𑀢𑀸𑀬𑀸𑀢𑀺 𑀪𑀬𑀸𑀦𑀓𑀢𑀸𑀬. 𑀪𑀬𑀸𑀯𑀳𑀁 𑀳𑁄𑀢𑀻𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀲𑁆𑀲 ¶ ‘‘𑀅𑀳𑀁 𑀯𑀺𑀦𑀲𑁆𑀲𑀸𑀫𑀺, 𑀫𑀫 𑀲𑀦𑁆𑀢𑀓𑀁 𑀯𑀺𑀦𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀪𑀬𑀚𑀦𑀓𑀁 𑀳𑁄𑀢𑀺. 𑀲𑀻𑀳𑁄𑀧𑀫𑀲𑀼𑀢𑁆𑀢𑁂 𑀤𑁂𑀯𑀸𑀦𑀁 𑀯𑀺𑀬𑀸𑀢𑀺 𑀲𑀻𑀳𑁄𑀧𑀫𑀲𑀼𑀢𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀤𑁂𑀯𑀸𑀦𑀁 𑀯𑀺𑀬. 𑀢𑀢𑁆𑀣 𑀳𑀺 𑁋

‘‘𑀬𑀤𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸 𑀉𑀘𑁆𑀘𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀓𑀸, 𑀢𑁂𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺 ‘𑀅𑀦𑀺𑀘𑁆𑀘𑀸𑀯 𑀓𑀺𑀭 𑀪𑁄 𑀫𑀬𑀁 𑀲𑀫𑀸𑀦𑀸 𑀦𑀺𑀘𑁆𑀘𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳, 𑀅𑀤𑁆𑀥𑀼𑀯𑀸𑀯…𑀧𑁂… 𑀅𑀲𑀲𑁆𑀲𑀢𑀸𑀯 𑀓𑀺𑀭 𑀪𑁄 𑀫𑀬𑀁 𑀲𑀫𑀸𑀦𑀸 𑀲𑀲𑁆𑀲𑀢𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳, 𑀫𑀬𑀫𑁆𑀧𑀺 𑀓𑀺𑀭 𑀪𑁄 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸’’’𑀢𑀺 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁪.𑁩𑁩) 𑁋

𑀏𑀯𑀁 𑀤𑁂𑀯𑀸𑀦𑀁 𑀪𑀬𑀼𑀧𑁆𑀧𑀢𑁆𑀢𑀺 𑀆𑀕𑀢𑀸.

𑀔𑀦𑁆𑀥𑀧𑀜𑁆𑀘𑀓𑀁, 𑀢𑀤𑁂𑀓𑀤𑁂𑀲𑁄 𑀯𑀸 𑀅𑀢𑁆𑀢𑀯𑀸𑀤𑀻𑀳𑀺 ‘‘𑀅𑀢𑁆𑀢𑀸’’𑀢𑀺 𑀧𑀭𑀺𑀓𑀧𑁆𑀧𑀻𑀬𑀢𑀺, 𑀢𑀜𑁆𑀘 𑀏𑀓𑀦𑁆𑀢𑀢𑁄 𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀜𑁆𑀘𑀸𑀢𑀺 𑀆𑀳 ‘‘𑀬𑀜𑁆𑀳𑀺 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺. 𑀢𑀻𑀲𑀼 𑀤𑀼𑀓𑁆𑀔𑀢𑀸𑀲𑀼 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯 𑀩𑁆𑀬𑀸𑀧𑀺𑀦𑀻, ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀢𑀁 𑀯𑀸 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀁 𑀯𑀸’’𑀢𑀺. 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸𑀢𑀺 ‘‘𑀓𑀸𑀭𑀓𑁄 𑀯𑁂𑀤𑀓𑁄 𑀲𑀬𑀁𑀯𑀲𑀻’’𑀢𑀺 𑀏𑀯𑀁𑀪𑀽𑀢𑁄 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀢𑀺 𑀭𑀽𑀧𑀲𑁆𑀲 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑀁 𑀅𑀬𑀼𑀚𑁆𑀚𑀫𑀸𑀦𑀓𑀁 𑀲𑀺𑀬𑀸. 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂 𑀅𑀪𑁂𑀤𑀢𑁄 𑀢𑀺𑀯𑀺𑀥𑀁 𑀲𑀫𑁆𑀫𑀲𑀦𑀁, 𑀪𑁂𑀤𑀢𑁄 𑀢𑁂𑀢𑁆𑀢𑀺𑀁𑀲𑀯𑀺𑀥𑀁, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲 𑀦𑀬𑁄’’𑀢𑀺 ¶ 𑀅𑀢𑀺𑀤𑀺𑀲𑀢𑀺. 𑀢𑁂𑀦 𑀔𑀦𑁆𑀥𑀯𑀲𑁂𑀦 𑀢𑀸𑀯 𑀪𑁂𑀤𑀢𑁄 𑀧𑀜𑁆𑀘𑀲𑀝𑁆𑀞𑀺𑀅𑀥𑀺𑀓𑀸 𑀲𑀢𑀁 𑀲𑀫𑁆𑀫𑀲𑀦𑀯𑀸𑀭𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀤𑁆𑀯𑀸𑀭𑀙𑀓𑁆𑀓𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀲𑀫𑁆𑀫𑀲𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁯𑁬. 𑀦𑀺𑀬𑀫𑀢𑁄 𑀲𑀗𑁆𑀔𑀢𑀸𑀤𑀺𑀪𑁂𑀤𑀁 𑀳𑁄𑀢𑀻𑀢𑀺 𑀏𑀓𑀁𑀲𑁂𑀦 𑀲𑀗𑁆𑀔𑀢𑀢𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑀁 𑀳𑁄𑀢𑀺 𑀅𑀲𑀗𑁆𑀔𑀢𑀸𑀤𑀺𑀲𑀪𑀸𑀯𑁂 𑀅𑀦𑀺𑀘𑁆𑀘𑀢𑀸𑀬 𑀅𑀲𑀫𑁆𑀪𑀯𑀢𑁄. 𑀅𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀲𑁆𑀲. 𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀯𑀘𑀦𑀤𑀲𑁆𑀲𑀦𑀢𑁆𑀣𑀁, 𑀢𑀁 𑀧𑀦 ‘‘𑀔𑀬𑀥𑀫𑁆𑀫’’𑀦𑁆𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁. 𑀦 𑀳𑀺 ¶ 𑀢𑀤𑁂𑀯 𑀢𑀲𑁆𑀲 𑀧𑀭𑀺𑀬𑀸𑀬𑁄 𑀳𑁄𑀢𑀺, 𑀦𑀸𑀧𑀺 𑀲𑀗𑁆𑀔𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀧𑀤𑀸𑀦𑀺 𑀳𑀼𑀢𑁆𑀯𑀸 𑀅𑀪𑀸𑀯𑀤𑀻𑀧𑀦𑀢𑁄 𑀧𑀸𑀓𑀪𑀸𑀯𑀤𑀻𑀧𑀦𑀢𑁄. 𑀧𑀸𑀓𑀪𑀸𑀯𑀤𑀻𑀧𑀦𑁂𑀦 𑀧𑀦 𑀅𑀦𑀺𑀘𑁆𑀘𑀢𑀸𑀬 𑀲𑀸𑀥𑀦𑀧𑀓𑁆𑀔𑁂 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀲𑀩𑁆𑀩𑁂𑀲𑀁 𑀧𑀤𑀸𑀦𑀁 𑀧𑀭𑀺𑀬𑀸𑀬𑀢𑀸𑀪𑀸𑀯𑀢𑁄 ‘‘𑀦𑀸𑀦𑀸𑀓𑀸𑀭𑁂𑀳𑀺 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀁 𑀕𑀳𑀺𑀢𑀁. 𑀫𑀦𑀲𑀺𑀓𑀸𑀭𑀧𑁆𑀧𑀯𑀢𑁆𑀢𑀻𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀬 𑀉𑀧𑀩𑁆𑀭𑀽𑀳𑀦𑀫𑀦𑀲𑀺𑀓𑀸𑀭𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁.

𑀘𑀢𑁆𑀢𑀸𑀭𑀻𑀲𑀸𑀓𑀸𑀭𑀅𑀦𑀼𑀧𑀲𑁆𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑁬𑁯𑁭. 𑀲𑁄𑀢𑀺 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀪𑁂𑀤𑀲𑁆𑀲 𑀅𑀦𑀺𑀘𑁆𑀘𑀢𑀸𑀤𑀺𑀲𑀫𑁆𑀫𑀲𑀦𑀲𑁆𑀲. 𑀣𑀺𑀭𑀪𑀸𑀯𑀢𑁆𑀣𑀸𑀬𑀸𑀢𑀺 𑀤𑀴𑁆𑀳𑀪𑀸𑀯𑀢𑁆𑀣𑀸𑀬 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀸𑀭𑁄 𑀯𑀺𑀬 𑀩𑀳𑀼𑀮𑀻𑀓𑀸𑀭𑀪𑀸𑀯𑀢𑁄. 𑀬𑀁 𑀢𑀁 𑀪𑀕𑀯𑀢𑀸 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀮𑁄𑀫𑀺𑀓𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀦𑀼𑀓𑀽𑀮𑀁. 𑀔𑀦𑁆𑀢𑀺𑀦𑁆𑀢𑀺 𑀜𑀸𑀡𑀔𑀦𑁆𑀢𑀺𑀁. 𑀜𑀸𑀡𑀜𑁆𑀳𑀺 𑀯𑀺𑀲𑀬𑀲𑀪𑀸𑀯𑀁 𑀑𑀕𑀸𑀳𑁂𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀔𑀫𑀢𑀺 𑀲𑀳𑀢𑀻𑀢𑀺 𑀔𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀲𑁄 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀲𑀫𑁆𑀫𑀢𑁆𑀢𑀜𑁆𑀘𑁂𑀯 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀦𑀺𑀬𑀸𑀫𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀲𑀼𑀔𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻’’𑀢𑀺 (𑀧𑀝𑀺. 𑀫. 𑁩.𑁩𑁮) 𑀏𑀯𑀫𑀸𑀤𑀺𑀓𑁄 𑀧𑀸𑀞𑀲𑁂𑀲𑁄 𑀭𑁄𑀕𑀸𑀤𑀺𑀧𑀝𑀺𑀧𑀓𑁆𑀔𑀬𑁄𑀚𑀦𑀸𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. ‘‘𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀤𑀼𑀓𑁆𑀔𑀭𑁄𑀕𑀢𑀸𑀤𑀺𑀧𑀝𑀺𑀧𑀓𑁆𑀔𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀼𑀔𑀸𑀭𑁄𑀕𑁆𑀬𑀸𑀤𑀺𑀪𑀸𑀯𑁄 ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀏𑀢𑁆𑀣 𑀦𑀬𑀕𑁆𑀕𑀳𑀡𑁂𑀦 𑀤𑀻𑀧𑀺𑀢𑁄𑀢𑀺. 𑀅𑀯𑀲𑁂𑀲𑁄 𑀲𑀩𑁆𑀩𑁄 𑀧𑀸𑀞𑁄 𑀧𑀓𑀸𑀲𑀺𑀢𑁄 𑀏𑀯 𑀳𑁄𑀢𑀻𑀢𑀺.

𑀓𑀸𑀫𑀜𑁆𑀘𑁂𑀢𑀁 ¶ 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀲𑀦𑀁 𑀅𑀦𑀼𑀮𑁄𑀫𑀜𑀸𑀡𑁂 𑀪𑀸𑀯𑁂𑀢𑀩𑁆𑀩𑀯𑀺𑀥𑀸𑀦𑀁. 𑀢𑁂𑀦𑀸𑀳 ‘‘𑀅𑀦𑀼𑀮𑁄𑀫𑀜𑀸𑀡𑀁 𑀯𑀺𑀪𑀚𑀦𑁆𑀢𑁂𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀓𑀢𑀧𑀭𑀺𑀘𑀬𑀲𑁆𑀲𑁂𑀯 𑀓𑀺𑀘𑁆𑀘𑀸𑀯𑀳𑀁 𑀳𑁄𑀢𑀻𑀢𑀺 𑀇𑀥𑀸𑀧𑀺 𑀯𑀼𑀢𑁆𑀢𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀓𑀮𑀸𑀧𑀲𑀫𑁆𑀫𑀲𑀦𑀲𑁆𑀲𑁂𑀯, 𑀅𑀣 𑀔𑁄 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀧𑁆𑀧𑀪𑁂𑀤𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀲𑁆𑀲𑀧𑀺. 𑀢𑀜𑁆𑀳𑀺 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀧𑀝𑀺𑀮𑀸𑀪𑀸𑀬, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀬 𑀘 𑀲𑀁𑀯𑀢𑁆𑀢𑀦𑀢𑁄 𑀏𑀓𑀁𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 ¶ 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸…𑀧𑁂… 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺 (𑀅. 𑀦𑀺. 𑁬.𑁯𑁮; 𑀧𑀝𑀺. 𑀫. 𑁩.𑁩𑁬) 𑁋

𑀆𑀤𑀺 𑀲𑀼𑀓𑁆𑀓𑀧𑀓𑁆𑀔𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑀣𑀸 ‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄, 𑀤𑀼𑀓𑁆𑀔𑀢𑁄, 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄, 𑀅𑀦𑀢𑁆𑀢𑀢𑁄’’𑀢𑀺 (𑀧𑀝𑀺. 𑀫. 𑁩.𑁩𑁬) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑁬𑁯𑁮. 𑀏𑀓𑁂𑀓𑀁 𑀔𑀦𑁆𑀥𑀁 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀲𑁆𑀲 𑀯𑀲𑁂𑀦 𑀲𑀫𑁆𑀫𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀧𑀦 𑀲𑀫𑁆𑀫𑀲𑀦𑀲𑁆𑀲 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀸𑀥𑀸𑀭𑀡𑀢𑀸𑀬 ‘‘𑀏𑀓𑁂𑀓𑀁 𑀔𑀦𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬𑀸𑀢𑀺 𑀅𑀘𑁆𑀘𑀦𑁆𑀢𑀺𑀓𑀢𑀸𑀪𑀸𑀯𑀢𑁄, 𑀅𑀲𑀲𑁆𑀲𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀲𑁆𑀲𑀢𑀜𑁆𑀳𑀺 𑀅𑀘𑁆𑀘𑀦𑁆𑀢𑀺𑀓𑀁 𑀧𑀭𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄. 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬𑀸𑀢𑀺 𑀧𑀼𑀩𑁆𑀩𑀸𑀧𑀭𑀓𑁄𑀝𑀺𑀯𑀦𑁆𑀢𑀢𑀸𑀬, 𑀉𑀤𑀬𑀩𑁆𑀩𑀬𑀥𑀫𑁆𑀫𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀦𑀺𑀘𑁆𑀘𑀢𑁄𑀢𑀺 𑀘 𑀅𑀤𑁆𑀥𑀼𑀯𑀢𑁄. 𑀏𑀢𑀜𑁆𑀳𑀺 𑀦 𑀦𑀺𑀘𑁆𑀘𑀁, 𑀔𑀡𑀺𑀓𑀢𑀸𑀬 𑀅𑀲𑀤𑀸𑀪𑀸𑀯𑀺𑀢𑀸𑀬 𑀯𑀸 𑀦 𑀇𑀘𑁆𑀘𑀁 𑀦 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀦𑀺𑀘𑁆𑀘𑀁. 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀢𑀸𑀬𑀸𑀢𑀺 𑀉𑀧𑁆𑀧𑀸𑀤𑁂𑀦, 𑀯𑀬𑁂𑀦 𑀘 𑀧𑀢𑀺 𑀧𑀢𑀺 𑀔𑀡𑁂 𑀔𑀡𑁂 𑀢𑀁𑀲𑀫𑀗𑁆𑀕𑀺𑀦𑁄 𑀯𑀺𑀩𑀸𑀥𑀦𑀲𑀪𑀸𑀯𑀢𑁆𑀢𑀸, 𑀢𑁂𑀳𑀺 𑀯𑀸 𑀲𑀬𑀫𑁂𑀯 𑀯𑀺𑀩𑀸𑀥𑁂𑀢𑀩𑁆𑀩𑀢𑁆𑀢𑀸. 𑀉𑀤𑀬𑀩𑁆𑀩𑀬𑀯𑀦𑁆𑀢𑁄 𑀳𑀺 𑀥𑀫𑁆𑀫𑀸 𑀅𑀪𑀺𑀡𑁆𑀳𑀁 𑀢𑁂𑀳𑀺 𑀧𑀝𑀺𑀧𑀻𑀴𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀬𑀸 𑀧𑀻𑀴𑀦𑀸 ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀓𑁆𑀔𑀯𑀢𑁆𑀣𑀼𑀢𑀸𑀬𑀸𑀢𑀺 ¶ 𑀢𑀺𑀯𑀺𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲, 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬𑀸𑀢𑀺 𑀬𑀣𑀸𑀭𑀳𑀁 𑀧𑀘𑁆𑀘𑀬𑁂𑀳𑀺 𑀬𑀸𑀧𑁂𑀢𑀩𑁆𑀩𑀢𑀸𑀬. 𑀭𑁄𑀕𑀫𑀽𑀮𑀢𑀸𑀬𑀸𑀢𑀺 𑀫𑀽𑀮𑀩𑁆𑀬𑀸𑀥𑀺 𑀯𑀺𑀬 𑀅𑀦𑀼𑀩𑀦𑁆𑀥𑀩𑁆𑀬𑀸𑀥𑀻𑀦𑀁 𑀫𑀽𑀮𑀪𑀸𑀯𑀢𑁄, 𑀧𑀤𑀤𑁆𑀯𑀬𑁂𑀦𑀸𑀧𑀺 𑀬𑀸𑀧𑁆𑀬𑀭𑁄𑀕𑀲𑀤𑀺𑀲𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀧𑁆𑀬𑀩𑁆𑀬𑀸𑀥𑀺 𑀳𑀺 𑀭𑁄𑀕𑁄 𑀇𑀢𑀭𑁄 𑀆𑀩𑀸𑀥𑁄𑀢𑀺. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀺𑀢𑀸𑀬𑀸𑀢𑀺 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀲𑀗𑁆𑀔𑀸𑀢𑁂𑀦 𑀭𑀼𑀚𑁆𑀚𑀦𑁂𑀦 𑀬𑀼𑀚𑁆𑀚𑀢𑀸𑀬. 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑀸𑀬𑀸𑀢𑀺 𑀬𑀣𑀸𑀭𑀳𑀫𑀸𑀭𑀫𑁆𑀫𑀡𑀯𑀲𑁂𑀦, 𑀲𑀫𑀦𑁆𑀦𑀸𑀕𑀫𑀯𑀲𑁂𑀦 𑀘 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀲𑀼𑀘𑀺𑀯𑀺𑀲𑁆𑀲𑀦𑁆𑀤𑀦𑀢𑁄. 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀉𑀤𑁆𑀥𑀼𑀫𑀸𑀢𑀢𑀸.

𑀅𑀦𑁆𑀢𑁄𑀢𑀼𑀤𑀦𑀢𑀸𑀬𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀢𑀼𑀤𑀦𑀢𑁄. 𑀤𑀼𑀓𑁆𑀔𑀯𑁂𑀤𑀦𑀸𑀤𑀬𑁄 𑀯𑀺𑀬 𑀳𑀺 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀢𑁆𑀢𑀪𑀸𑀯𑀲𑁆𑀲 𑀅𑀩𑁆𑀪𑀦𑁆𑀢𑀭𑀕𑀢𑀸 𑀏𑀯 𑀉𑀤𑀬𑀩𑁆𑀩𑀬𑀯𑀲𑁂𑀦 𑀢𑀼𑀤𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀲𑀡𑁆𑀟𑀸𑀲𑁂𑀦 𑀯𑀺𑀦𑀸 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀦𑁆𑀦𑀻𑀳𑀭𑀡𑀻𑀬𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀤𑀴𑁆𑀳𑀪𑀸𑀯𑀢𑁄. 𑀅𑀖𑀦𑁆𑀢𑀺 𑀧𑀸𑀧𑀁 𑀯𑀺𑀬 𑀅𑀭𑀺𑀬𑀚𑀦𑁂𑀳𑀺 ¶ 𑀯𑀺𑀕𑀭𑀳𑀺𑀢𑀩𑁆𑀩𑀁. 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀚𑀦𑀦𑀢𑁄 𑀅𑀯𑀟𑁆𑀠𑀺𑀆𑀯𑀳𑀁, 𑀧𑀸𑀧𑀲𑁆𑀲 𑀘 𑀯𑀢𑁆𑀣𑀼𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀆𑀳 ‘‘𑀯𑀺𑀕𑀭𑀳…𑀧𑁂… 𑀅𑀖𑀢𑁄’’𑀢𑀺. 𑀅𑀲𑁂𑀭𑀺𑀪𑀸𑀯𑀚𑀦𑀓𑀢𑀸𑀬𑀸𑀢𑀺 𑀧𑀭𑀯𑀲𑀢𑀸𑀚𑀦𑀦𑀢𑁄. 𑀬𑀣𑀸 𑀕𑀺𑀮𑀸𑀦𑁄 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀦𑀯𑀼𑀝𑁆𑀞𑀸𑀧𑀦𑀸𑀤𑀺𑀦𑀸 𑀧𑀭𑀧𑀝𑀺𑀩𑀤𑁆𑀥𑀲𑀭𑀻𑀭𑀯𑀼𑀢𑁆𑀢𑀺𑀓𑁄 𑀅𑀲𑁂𑀭𑀻, 𑀏𑀯𑀫𑁂𑀢𑁂𑀧𑀺 𑀅𑀲𑁂𑀭𑀺𑀪𑀸𑀯𑀚𑀦𑀓𑀸. 𑀅𑀯𑀲𑀢𑀸𑀬𑀸𑀢𑀺 𑀅𑀯𑀲𑀯𑀢𑁆𑀢𑀦𑀢𑁄. 𑀬𑀣𑀸 𑀧𑀭𑁄𑀲𑀢𑀦𑁆𑀢𑁄 𑀧𑀼𑀭𑀺𑀲𑁄 𑀧𑀭𑀲𑁆𑀲 𑀯𑀲𑀁 𑀦 𑀕𑀘𑁆𑀙𑀢𑀺, 𑀏𑀯𑀁 𑀲𑀼𑀪𑀲𑀼𑀔𑀸𑀤𑀺𑀪𑀸𑀯𑁂𑀦 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀅𑀯𑀺𑀥𑁂𑀬𑁆𑀬𑀢𑀸𑀬𑀸𑀢𑀺 ‘‘𑀫𑀸 𑀚𑀻𑀭𑀣, 𑀫𑀸 𑀫𑀻𑀬𑀣𑀸’’𑀢𑀺𑀆𑀤𑀺𑀦𑀸 𑀯𑀺𑀥𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀧𑀮𑀼𑀚𑁆𑀚𑀦𑀢𑀸𑀬𑀸𑀢𑀺 𑀩𑁆𑀬𑀸𑀥𑀺𑀆𑀤𑀻𑀳𑀺 𑀧𑀓𑀸𑀭𑁂𑀳𑀺 𑀙𑀺𑀚𑁆𑀚𑀦𑀢𑁄 𑀯𑀺𑀦𑀲𑁆𑀲𑀦𑀢𑁄. 𑀢𑁂𑀳𑀺 𑀏𑀯 𑀯𑀸 𑀆𑀩𑁆𑀬𑀲𑀦𑀢𑁄. 𑀩𑁆𑀬𑀲𑀦𑀢𑁆𑀣𑁄 𑀳𑀺 𑀮𑁄𑀓𑀲𑀤𑁆𑀤𑁄, 𑀧𑀲𑀤𑁆𑀤𑁄 𑀪𑀼𑀲𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀩𑁆𑀬𑀸𑀥𑀺𑀆𑀤𑀻𑀳𑀺 𑀘 𑀔𑀦𑁆𑀥𑀸𑀦𑀁 𑀩𑁆𑀬𑀲𑀦𑀦𑁆𑀢𑀺. 𑀩𑁆𑀬𑀲𑀦𑀸𑀯𑀳𑀪𑀸𑀯𑁂𑀦 𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀧𑀓𑁆𑀔𑀺𑀬𑀸𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀔𑀦𑁆𑀥𑀸 𑀘 𑀏𑀤𑀺𑀲𑀸𑀢𑀺 𑀆𑀳 ‘‘𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀢𑀸𑀬 𑀈𑀢𑀺𑀢𑁄’’𑀢𑀺.

𑀉𑀧𑀤𑁆𑀤𑀯𑀢𑀻𑀢𑀺 𑀉𑀧𑀤𑁆𑀤𑀯𑁄, 𑀅𑀦𑀢𑁆𑀣𑀁 𑀚𑀦𑁂𑀦𑁆𑀢𑁄 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄, 𑀭𑀸𑀚𑀤𑀡𑁆𑀟𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀔𑀦𑁆𑀥𑀸 𑀘 𑀏𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀤𑀺𑀢𑀸𑀦𑀁…𑀧𑁂… 𑀉𑀧𑀤𑁆𑀤𑀯𑀢𑁄’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀯𑀳𑀢𑁄, 𑀅𑀪𑀬𑀧𑀝𑀺𑀧𑀓𑁆𑀔𑀢𑁄 𑀘 𑀔𑀦𑁆𑀥𑀸 𑀪𑀬𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀪𑀬𑀸𑀦𑀁…𑀧𑁂… 𑀪𑀬𑀢𑁄’’𑀢𑀺. 𑀩𑀳𑀺𑀤𑁆𑀥𑀸 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺, 𑀅𑀚𑁆𑀛𑀢𑁆𑀢𑀁 𑀭𑀸𑀕𑀸𑀤𑀻𑀳𑀺 𑀅𑀦𑀢𑁆𑀣𑁂𑀳𑀺 𑀉𑀧𑀲𑀚𑁆𑀚𑀦𑀝𑁆𑀞𑁂𑀦, 𑀉𑀧𑀲𑀕𑁆𑀕𑀲𑀤𑀺𑀲𑀢𑀸𑀬 ¶ 𑀘 𑀉𑀧𑀲𑀕𑁆𑀕𑁄. 𑀉𑀧𑀲𑀕𑁆𑀕𑁄𑀢𑀺 𑀘 𑀤𑁂𑀯𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑁄 𑀩𑁆𑀬𑀸𑀥𑀺𑀆𑀤𑀺𑀅𑀦𑀢𑁆𑀣𑁄. 𑀲𑁄 𑀅𑀢𑁆𑀣𑀓𑀸𑀫𑁂𑀦 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁂𑀓𑁂𑀳𑀺…𑀧𑁂… 𑀉𑀧𑀲𑀕𑁆𑀕𑀢𑁄’’𑀢𑀺. 𑀤𑁄𑀲𑀽𑀧𑀲𑀝𑁆𑀞𑀢𑀸𑀬𑀸𑀢𑀺 𑀆𑀭𑀫𑁆𑀫𑀡𑀢𑁄, 𑀲𑀫𑁆𑀧𑀬𑁄𑀕𑀢𑁄 𑀘 𑀭𑀸𑀕𑀸𑀤𑀺𑀤𑁄𑀲𑁂𑀳𑀺 𑀉𑀧𑁂𑀢𑀢𑀸𑀬. 𑀮𑁄𑀓𑀥𑀫𑁆𑀫𑀸 𑀮𑀸𑀪𑀸𑀤𑀺𑀳𑁂𑀢𑀼𑀓𑀸 𑀅𑀦𑀼𑀦𑀬𑀧𑀝𑀺𑀖𑀸, 𑀢𑁂𑀳𑀺, 𑀩𑁆𑀬𑀸𑀥𑀺𑀆𑀤𑀻𑀳𑀺 𑀘 𑀅𑀦𑀯𑀝𑁆𑀞𑀺𑀢𑀢𑀸 𑀧𑀘𑀮𑀺𑀢𑀢𑀸.

𑀉𑀧𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀧𑀬𑁄𑀕𑁂𑀦. 𑀲𑀭𑀲𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀧𑀪𑀗𑁆𑀕𑀼𑀧𑀕𑀫𑀦𑀲𑀻𑀮𑀢𑀸 𑀪𑀺𑀤𑀼𑀭𑀢𑀸. 𑀲𑀩𑁆𑀩𑀸𑀯𑀢𑁆𑀣𑀦𑀺𑀧𑀸𑀢𑀺𑀢𑀸𑀬𑀸𑀢𑀺 𑀭𑀼𑀓𑁆𑀔𑀨𑀮𑀁 𑀯𑀺𑀬 𑀅𑀢𑀺𑀢𑀭𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀦𑀺𑀧𑀢𑀦𑀲𑀻𑀮𑀢𑀸𑀬. 𑀅𑀦𑀺𑀧𑀢𑀲𑁆𑀲𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑀸𑀭𑀢𑀸𑀬 𑀣𑀺𑀭𑀪𑀸𑀯𑀲𑁆𑀲 𑀅𑀪𑀸𑀯𑀢𑀸𑀬. 𑀣𑀺𑀭𑀜𑁆𑀳𑀺 𑀥𑀼𑀯𑀁 𑀦𑀸𑀫 𑀳𑁄𑀢𑀺. 𑀢𑀸𑀬𑀺𑀢𑀼𑀁 𑀭𑀓𑁆𑀔𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀢𑀸𑀬𑀦𑁄𑀢𑀺 𑀅𑀢𑀸𑀬𑀦𑁄, 𑀢𑀩𑁆𑀪𑀸𑀯𑁄 𑀅𑀢𑀸𑀬𑀦𑀢𑀸. 𑀢𑀸𑀡𑀸𑀲𑀻𑀲𑀸𑀬 𑀉𑀧𑀕𑀢𑀲𑁆𑀲 𑀅𑀮𑀩𑁆𑀪𑀦𑁂𑀬𑁆𑀬𑀔𑁂𑀫𑀢𑀸. 𑀤𑀼𑀓𑁆𑀔𑀪𑀻𑀢𑀺𑀬𑀸 𑀉𑀧𑀮𑀻𑀬𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀮𑁆𑀮𑀻𑀬𑀺𑀢𑀼𑀁. 𑀤𑀼𑀓𑁆𑀔𑀦𑀺𑀯𑀢𑁆𑀢𑀦𑀁 𑀮𑁂𑀡𑀓𑀺𑀘𑁆𑀘𑀁. 𑀚𑀸𑀢𑀺𑀆𑀤𑀺𑀪𑀬𑀸𑀦𑀁 𑀳𑀺𑀁𑀲𑀦𑀁 𑀯𑀺𑀥𑀫𑀦𑀁 𑀪𑀬𑀲𑀸𑀭𑀓𑀢𑁆𑀢𑀁. 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑁂𑀳𑀻𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀳𑀺 𑀩𑀸𑀮𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀧𑁆𑀧𑀓𑀸𑀭𑁂𑀳𑀺. 𑀭𑀺𑀢𑁆𑀢𑀢𑀸𑀬𑀸𑀢𑀺 𑀯𑀺𑀯𑀺𑀢𑁆𑀢𑀢𑀸𑀬, 𑀯𑀺𑀭𑀳𑀺𑀢𑀢𑀸𑀬𑀸𑀢𑀺 ¶ 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀸𑀭𑀸𑀪𑀸𑀯𑁄 𑀭𑀺𑀢𑁆𑀢𑀢𑀸. 𑀲𑀸 𑀏𑀯 𑀘 𑀢𑀼𑀘𑁆𑀙𑀢𑀸𑀢𑀺 𑀆𑀳 ‘‘𑀭𑀺𑀢𑁆𑀢𑀢𑀸𑀬𑁂𑀯 𑀢𑀼𑀘𑁆𑀙𑀢𑁄’’𑀢𑀺. 𑀅𑀧𑁆𑀧𑀓𑀢𑁆𑀢𑀸𑀢𑀺 𑀧𑀭𑀺𑀢𑁆𑀢𑀢𑁆𑀢𑀸, 𑀮𑀸𑀫𑀓𑀢𑁆𑀢𑀸 𑀯𑀸. 𑀥𑀼𑀯𑀲𑀸𑀭𑀸𑀪𑀸𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀲𑀸𑀭𑀸𑀪𑀸𑀯𑀁 𑀭𑀺𑀢𑁆𑀢𑀧𑀤𑁂𑀦 𑀯𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀫𑀢𑁆𑀢𑀲𑀸𑀭𑀸𑀪𑀸𑀯𑀫𑁂𑀯 𑀲𑀼𑀜𑁆𑀜𑀧𑀤𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀫𑀺…𑀧𑁂… 𑀲𑀼𑀜𑁆𑀜𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀓𑁂𑀦𑀘𑀺 𑀲𑀸𑀫𑀺𑀆𑀤𑀺𑀮𑀓𑁆𑀔𑀡𑁂𑀦 𑀅𑀢𑁆𑀢𑀦𑀸 𑀲𑀼𑀜𑁆𑀜𑀸 𑀏𑀢𑁂, 𑀏𑀯𑀁 𑀲𑀬𑀫𑁆𑀧𑀺 𑀅𑀢𑀁𑀲𑀪𑀸𑀯𑁄𑀢𑀺 𑀆𑀳 ‘‘𑀲𑀬𑀜𑁆𑀘…𑀧𑁂… 𑀅𑀦𑀢𑁆𑀢𑀢𑁄’’𑀢𑀺. 𑀦 𑀅𑀢𑁆𑀢𑀸𑀢𑀺 𑀳𑀺 𑀅𑀦𑀢𑁆𑀢𑀸𑀢𑀺.