📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀦𑀺𑀤𑀸𑀦𑀓𑀣𑀸

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 ¶ 𑀦𑀸𑀫𑀸𑀬𑀁 𑀕𑀦𑁆𑀣𑁄 𑀧𑀺𑀝𑀓𑀢𑁆𑀢𑀬𑀲𑀸𑀭𑀪𑀽𑀢𑁄 𑀲𑀓𑀮𑀮𑁄𑀓𑁂 𑀧𑀝𑀺𑀧𑀢𑁆𑀢𑀺𑀤𑀻𑀧𑀓𑀕𑀦𑁆𑀣𑀸𑀦𑀁 𑀅𑀕𑁆𑀕𑁄 𑀳𑁄𑀢𑀺 𑀲𑁂𑀝𑁆𑀞𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄 𑀉𑀢𑁆𑀢𑀫𑁄 𑀧𑀯𑀭𑁄 𑀘𑀸𑀢𑀺 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑁄. 𑀢𑀢𑁆𑀣 𑀳𑀺 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀽𑀴𑁆𑀳𑀲𑁆𑀲 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀁 𑀲𑀁𑀔𑀺𑀧𑀺𑀢𑁆𑀯𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀧𑀓𑀸𑀲𑀺𑀢𑀁 𑀲𑀼𑀯𑀺𑀲𑀤𑀜𑁆𑀘. 𑀏𑀯𑀁 𑀧𑀲𑀢𑁆𑀣𑀲𑁆𑀲𑁂𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀦𑀺𑀤𑀸𑀦𑀓𑀣𑀸𑀬𑀧𑀺 𑀪𑀯𑀺𑀢𑀩𑁆𑀩𑀫𑁂𑀯. 𑀢𑀲𑁆𑀫𑀸𑀤𑀸𑀦𑀺 𑀢𑀫𑁆𑀧𑀓𑀸𑀲𑀦𑀢𑁆𑀣𑀫𑀺𑀤𑀁 𑀧𑀜𑁆𑀳𑀓𑀫𑁆𑀫𑀁 𑀯𑀼𑀘𑁆𑀘𑀢𑀺 𑁋

‘‘𑀲𑁄 𑀧𑀦𑁂𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀓𑁂𑀦 𑀓𑀢𑁄, 𑀓𑀤𑀸 𑀓𑀢𑁄, 𑀓𑀢𑁆𑀣 𑀓𑀢𑁄, 𑀓𑀲𑁆𑀫𑀸 𑀓𑀢𑁄, 𑀓𑀺𑀫𑀢𑁆𑀣𑀁 𑀓𑀢𑁄, 𑀓𑀺𑀁 𑀦𑀺𑀲𑁆𑀲𑀸𑀬 𑀓𑀢𑁄, 𑀓𑁂𑀦 𑀧𑀓𑀸𑀭𑁂𑀦 𑀓𑀢𑁄, 𑀓𑀺𑀲𑁆𑀲 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑁄’’𑀢𑀺.

𑀢𑀢𑁆𑀣 𑀓𑁂𑀦 𑀓𑀢𑁄𑀢𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀯𑀭𑁂𑀦 𑀢𑁂𑀧𑀺𑀝𑀓𑀲𑀗𑁆𑀕𑀳𑀝𑁆𑀞𑀓𑀣𑀸𑀓𑀸𑀭𑁂𑀦 𑀓𑀢𑁄.

𑀓𑀤𑀸 𑀓𑀢𑁄𑀢𑀺 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀮𑁄𑀓𑀦𑀸𑀣𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀺𑀓𑀸𑀮𑀢𑁄 𑀧𑀘𑁆𑀙𑀸 𑀤𑀲𑀫𑁂 𑀯𑀲𑁆𑀲𑀲𑀢𑀓𑁂 (𑁯𑁭𑁩 -𑀩𑀼𑀤𑁆𑀥𑀯𑀲𑁆𑀲𑁂) 𑀓𑀢𑁄.

𑀓𑀢𑁆𑀣 𑀓𑀢𑁄𑀢𑀺 𑀲𑀻𑀳𑀴𑀤𑀻𑀧𑁂 𑀅𑀦𑀼𑀭𑀸𑀥𑀧𑀼𑀭𑁂 𑀫𑀳𑀸𑀯𑀺𑀳𑀸𑀭𑁂 𑀓𑀢𑁄.

𑀓𑀲𑁆𑀫𑀸 𑀓𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀸𑀥𑀼𑀚𑀦𑀸𑀦𑀁 𑀢𑀤𑀥𑀺𑀕𑀫𑀼𑀧𑀸𑀬𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀦𑀬𑀁 𑀜𑀸𑀧𑁂𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀲𑀜𑁆𑀘𑁄𑀤𑀺𑀢𑀢𑁆𑀢𑀸, 𑀲𑀗𑁆𑀖𑀧𑀸𑀮𑀢𑁆𑀣𑁂𑀭𑁂𑀦 𑀘 𑀅𑀚𑁆𑀛𑁂𑀲𑀺𑀢𑀢𑁆𑀢𑀸 𑀓𑀢𑁄.

𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀉𑀧𑁆𑀧𑀢𑁆𑀢𑀺 𑀓𑀣𑁂𑀢𑀩𑁆𑀩𑀸, 𑀲𑀸 𑀘 𑀫𑀳𑀸𑀯𑀁𑀲𑁂 (𑀘𑀽𑀴𑀯𑀁𑀲𑁄𑀢𑀺𑀧𑀺 𑀯𑁄𑀳𑀭𑀺𑀢𑁂 𑀤𑀼𑀢𑀺𑀬𑀪𑀸𑀕𑁂) 𑀲𑀢𑁆𑀢𑀢𑀺𑀁𑀲𑀫𑀧𑀭𑀺𑀘𑁆𑀙𑁂𑀤𑁂 𑀧𑀦𑁆𑀦𑀭𑀲𑀸𑀥𑀺𑀓𑀤𑁆𑀯𑀺𑀲𑀢𑀕𑀸𑀣𑀸𑀢𑁄 (𑁩𑁭, 𑁨𑁧𑁫) 𑀧𑀝𑁆𑀞𑀸𑀬 𑀩𑀸𑀢𑁆𑀢𑀺𑀁𑀲𑀸𑀬 𑀕𑀸𑀣𑀸𑀳𑀺 𑀧𑀓𑀸𑀲𑀺𑀢𑀸𑀬𑁂𑀯. 𑀓𑀣𑀁? 𑁋

𑀫𑀳𑀸𑀯𑀁𑀲-𑀩𑀼𑀤𑁆𑀥𑀖𑁄𑀲𑀓𑀣𑀸

𑁨𑁧𑁫.

𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑀫𑁆𑀳𑀺, ¶ 𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄;

𑀯𑀺𑀚𑁆𑀚𑀸-𑀲𑀺𑀧𑁆𑀧-𑀓𑀮𑀸-𑀯𑁂𑀤𑀻, 𑀢𑀻𑀲𑀼 𑀯𑁂𑀤𑁂𑀲𑀼 𑀧𑀸𑀭𑀕𑀽.

𑁨𑁧𑁬.

𑀲𑀫𑁆𑀫𑀸 𑀯𑀺𑀜𑁆𑀜𑀸𑀢𑀲𑀫𑀬𑁄, 𑀲𑀩𑁆𑀩𑀯𑀸𑀤𑀯𑀺𑀲𑀸𑀭𑀤𑁄;

𑀯𑀸𑀤𑀢𑁆𑀣𑀻 𑀚𑀫𑁆𑀩𑀼𑀤𑀻𑀧𑀫𑁆𑀳𑀺, 𑀆𑀳𑀺𑀡𑁆𑀟𑀦𑁆𑀢𑁄 𑀧𑀯𑀸𑀤𑀺𑀓𑁄.

𑁨𑁧𑁭.

𑀯𑀺𑀳𑀸𑀭𑀫𑁂𑀓’𑀫𑀸𑀕𑀫𑁆𑀫, 𑀭𑀢𑁆𑀢𑀺𑀁 𑀧𑀸𑀢𑀜𑁆𑀚𑀮𑀻𑀫𑀢𑀁;

𑀧𑀭𑀺𑀯𑀢𑁆𑀢𑁂𑀢𑀺 𑀲𑀫𑁆𑀧𑀼𑀡𑁆𑀡-𑀧𑀤𑀁 𑀲𑀼𑀧𑀭𑀺𑀫𑀡𑁆𑀟𑀮𑀁.

𑁨𑁧𑁮.

𑀢𑀢𑁆𑀣𑁂𑀓𑁄 𑀭𑁂𑀯𑀢𑁄 𑀦𑀸𑀫, 𑀫𑀳𑀸𑀣𑁂𑀭𑁄 𑀯𑀺𑀚𑀸𑀦𑀺𑀬;

‘‘𑀫𑀳𑀸𑀧𑀜𑁆𑀜𑁄 𑀅𑀬𑀁 𑀲𑀢𑁆𑀢𑁄, 𑀤𑀫𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺, 𑀲𑁄.

𑁨𑁧𑁯.

‘‘𑀓𑁄 𑀦𑀼 𑀕𑀤𑁆𑀭𑀪𑀭𑀸𑀯𑁂𑀦, 𑀯𑀺𑀭𑀯𑀦𑁆𑀢𑁄’’𑀢𑀺 𑀅𑀩𑁆𑀭𑀯𑀺;

‘‘𑀕𑀤𑁆𑀭𑀪𑀸𑀦𑀁 𑀭𑀯𑁂 𑀅𑀢𑁆𑀣𑀁, 𑀓𑀺𑀁 𑀚𑀸𑀦𑀸𑀲𑀻’’𑀢𑀺 𑀆𑀳 𑀢𑀁.

𑁨𑁨𑁦.

‘‘𑀅𑀳𑀁 𑀚𑀸𑀦𑁂’’𑀢𑀺 𑀯𑀼𑀢𑁆𑀢𑁄 𑀲𑁄, 𑀑𑀢𑀸𑀭𑁂𑀲𑀺 𑀲𑀓𑀁 𑀫𑀢𑀁;

𑀧𑀼𑀝𑁆𑀞𑀁 𑀧𑀼𑀝𑁆𑀞𑀁 𑀯𑀺𑀬𑀸𑀓𑀸𑀲𑀺, 𑀯𑀺𑀭𑀤𑁆𑀥𑀫𑁆𑀧𑀺 𑀘 𑀤𑀲𑁆𑀲𑀬𑀺.

𑁨𑁨𑁧.

‘‘𑀢𑁂𑀦 𑀳𑀺 𑀢𑁆𑀯𑀁 𑀲𑀓𑀁 𑀯𑀸𑀤-𑀫𑁄𑀢𑀸𑀭𑁂𑀳𑀻’’𑀢𑀺 𑀘𑁄𑀤𑀺𑀢𑁄;

𑀧𑀸𑀴𑀺’𑀫𑀸𑀳𑀸’𑀪𑀺𑀥𑀫𑁆𑀫𑀲𑁆𑀲, 𑀅𑀢𑁆𑀣’𑀫𑀲𑁆𑀲 𑀦 𑀲𑁄’𑀥𑀺𑀕𑀸.

𑁨𑁨𑁨.

𑀆𑀳‘‘𑀓𑀲𑁆𑀲𑁂’𑀲 𑀫𑀦𑁆𑀢𑁄’’𑀢𑀺,‘‘𑀩𑀼𑀤𑁆𑀥𑀫𑀦𑁆𑀢𑁄’’𑀢𑀺 𑀲𑁄’𑀩𑁆𑀭𑀯𑀺;

‘‘𑀤𑁂𑀳𑀺 𑀫𑁂𑀢𑀁’’𑀢𑀺 𑀯𑀼𑀢𑁆𑀢𑁂 𑀳𑀺, ‘‘𑀕𑀡𑁆𑀳 𑀧𑀩𑁆𑀩𑀚𑁆𑀚 𑀢𑀁’’𑀇𑀢𑀺.

𑁨𑁨𑁩.

𑀫𑀦𑁆𑀢𑀢𑁆𑀣𑀻 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄, 𑀉𑀕𑁆𑀕𑀡𑁆𑀳𑀺 𑀧𑀺𑀝𑀓𑀢𑁆𑀢𑀬𑀁;

𑀏𑀓𑀸𑀬𑀦𑁄 𑀅𑀬𑀁 𑀫𑀕𑁆𑀕𑁄, 𑀇𑀢𑀺 𑀧𑀘𑁆𑀙𑀸 𑀢’𑀫𑀕𑁆𑀕𑀳𑀺.

𑁨𑁨𑁪.

𑀩𑀼𑀤𑁆𑀥𑀲𑁆𑀲 𑀯𑀺𑀬 𑀕𑀫𑁆𑀪𑀻𑀭-𑀖𑁄𑀲𑀢𑁆𑀢𑀸 𑀦𑀁 𑀯𑀺𑀬𑀸𑀓𑀭𑀼𑀁;

𑀩𑀼𑀤𑁆𑀥𑀖𑁄𑀲𑁄𑀢𑀺 𑀖𑁄𑀲𑁄 𑀳𑀺, 𑀩𑀼𑀤𑁆𑀥𑁄 𑀯𑀺𑀬 𑀫𑀳𑀻𑀢𑀮𑁂.

𑁨𑁨𑁫.

𑀢𑀢𑁆𑀣 𑀜𑀸𑀡𑁄𑀤𑀬𑀁 [𑀜𑀸𑀡𑁄𑀤𑀬𑀁 𑀦𑀸𑀫𑀧𑀓𑀭𑀡𑀁 𑀇𑀤𑀸𑀦𑀺 𑀓𑀼𑀳𑀺𑀜𑁆𑀘𑀺𑀧𑀺 𑀦 𑀤𑀺𑀲𑁆𑀲𑀢𑀺;] 𑀦𑀸𑀫, 𑀓𑀢𑁆𑀯𑀸 𑀧𑀓𑀭𑀡𑀁 𑀢𑀤𑀸;

𑀥𑀫𑁆𑀫𑀲𑀗𑁆𑀕𑀡𑀺𑀬𑀸𑀓𑀸𑀲𑀺, 𑀓𑀘𑁆𑀙𑀁 𑀲𑁄 𑀅𑀝𑁆𑀞𑀲𑀸𑀮𑀺𑀦𑀺𑀁 [𑀇𑀤𑀸𑀦𑀺 𑀤𑀺𑀲𑁆𑀲𑀫𑀸𑀦𑀸 𑀧𑀦 𑀅𑀝𑁆𑀞𑀲𑀸𑀮𑀺𑀦𑀻 𑀲𑀻𑀳𑀴𑀤𑀻𑀧𑀺𑀓𑀸𑀬𑁂𑀯; 𑀦 𑀚𑀫𑁆𑀩𑀼𑀤𑀻𑀧𑀺𑀓𑀸; 𑀧𑀭𑀢𑁄 (𑁫𑁪-𑁫𑁫 𑀧𑀺𑀝𑁆𑀞𑁂𑀲𑀼) 𑀏𑀲 𑀆𑀯𑀺𑀪𑀯𑀺𑀲𑁆𑀲𑀢𑀺].

𑁨𑁨𑁬.

𑀧𑀭𑀺𑀢𑁆𑀢𑀝𑁆𑀞𑀓𑀣𑀜𑁆𑀘𑁂𑀯 ¶ [𑀧𑀭𑀺𑀢𑁆𑀢𑀝𑁆𑀞𑀓𑀣𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑀲𑁆𑀲 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸𑀪𑀽𑀢𑀸 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀢𑀺 𑀅𑀥𑀺𑀧𑁆𑀧𑁂𑀢𑀸 𑀪𑀯𑁂𑀲𑀼], 𑀓𑀸𑀢𑀼𑀁 𑀆𑀭𑀪𑀺 𑀩𑀼𑀤𑁆𑀥𑀺𑀫𑀸;

𑀢𑀁 𑀤𑀺𑀲𑁆𑀯𑀸 𑀭𑁂𑀯𑀢𑁄 𑀣𑁂𑀭𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁨𑁨𑁭.

‘‘𑀧𑀸𑀴𑀺𑀫𑀢𑁆𑀢𑀁 𑀇𑀥𑀸𑀦𑀻𑀢𑀁, 𑀦𑀢𑁆𑀣𑀺 𑀅𑀝𑁆𑀞𑀓𑀣𑀸 𑀇𑀥 [𑀏𑀢𑁆𑀣 𑀲𑀕𑀻𑀪𑀺𑀢𑁆𑀢𑀬𑀸𑀭𑀽𑀴𑁆𑀳𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀸 𑀉𑀕𑁆𑀕𑀳𑀺𑀢𑀸 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀧𑀭𑀫𑁆𑀧𑀭𑀸𑀢𑀢𑀸 𑀫𑀽𑀮𑀝𑁆𑀞𑀓𑀣𑀸 𑀓𑀲𑁆𑀫𑀸 𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑀲𑁄 𑀅𑀦𑁆𑀢𑀭𑀳𑀺𑀢𑀸𑀢𑀺 𑀯𑀺𑀫𑀁𑀲𑀺𑀢𑀩𑁆𑀩𑀁];

𑀢𑀣𑀸𑀘𑀭𑀺𑀬𑀯𑀸𑀤𑀸 𑀘, 𑀪𑀺𑀦𑁆𑀦𑀭𑀽𑀧𑀸 𑀦 𑀯𑀺𑀚𑁆𑀚𑀭𑁂.

𑁨𑁨𑁮.

𑀲𑀻𑀳𑀴𑀝𑁆𑀞𑀓𑀣𑀸 𑀲𑀼𑀤𑁆𑀥𑀸, 𑀫𑀳𑀺𑀦𑁆𑀤𑁂𑀦 𑀫𑀢𑀻𑀫𑀢𑀸;

𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀽𑀴𑁆𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁.

𑁨𑁨𑁯.

𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀕𑀻𑀢𑀜𑁆𑀘, 𑀓𑀣𑀸𑀫𑀕𑁆𑀕𑀁 𑀲𑀫𑁂𑀓𑁆𑀔𑀺𑀬;

𑀓𑀢𑀸 𑀲𑀻𑀳𑀴𑀪𑀸𑀲𑀸𑀬, 𑀲𑀻𑀳𑀴𑁂𑀲𑀼 𑀧𑀯𑀢𑁆𑀢𑀢𑀺.

𑁨𑁩𑁦.

𑀢𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀼𑀢𑁆𑀯𑀸 𑀢𑁆𑀯𑀁, 𑀫𑀸𑀕𑀥𑀸𑀦𑀁 𑀦𑀺𑀭𑀼𑀢𑁆𑀢𑀺𑀬𑀸;

𑀧𑀭𑀺𑀯𑀢𑁆𑀢𑁂𑀳𑀺, 𑀲𑀸 𑀳𑁄𑀢𑀺, 𑀲𑀩𑁆𑀩𑀮𑁄𑀓𑀳𑀺𑀢𑀸𑀯𑀳𑀸’’.

𑁨𑁩𑁧.

𑀏𑀯𑀁 𑀯𑀼𑀢𑁆𑀢𑁂 𑀧𑀲𑀦𑁆𑀦𑁄 𑀲𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀇𑀫𑀁;

𑀤𑀻𑀧𑀁 𑀆𑀕𑀸 𑀇𑀫𑀲𑁆𑀲𑁂𑀯 [𑀇𑀤𑀲𑁆𑀲𑁂𑀯𑀸𑀢𑀺 𑀇𑀫𑀲𑁆𑀲𑁂𑀯 𑀫𑀳𑀸𑀦𑀸𑀫𑀭𑀜𑁆𑀜𑁄 𑀓𑀸𑀮𑁂 𑁯𑁫𑁩-𑁯𑁭𑁫 𑀩𑀼𑀤𑁆𑀥𑀯𑀲𑁆𑀲𑁂; 𑀅𑀬𑀜𑁆𑀘 𑀯𑀲𑁆𑀲𑀧𑀭𑀺𑀘𑁆𑀙𑁂𑀤𑁄 𑀲𑀻𑀳𑀴𑀭𑀸𑀚𑀯𑀁𑀲𑀁 𑀦𑀺𑀲𑁆𑀲𑀸𑀬 𑀤𑀲𑁆𑀲𑀺𑀢𑁄; 𑀬𑀼𑀭𑁄𑀧𑀺𑀬𑀯𑀺𑀘𑀓𑁆𑀔𑀡𑀸𑀦𑀁 𑀧𑀦 𑀫𑀢𑁂𑀦 𑁯𑁪𑁧-𑁯𑁬𑁪 𑀩𑀼𑀤𑁆𑀥𑀯𑀲𑁆𑀲𑁂 𑀇𑀢𑀺 𑀯𑁂𑀤𑀺𑀢𑀩𑁆𑀩𑁄; 𑀏𑀯𑀫𑀼𑀧𑀭𑀺𑀧𑀺;], 𑀭𑀜𑁆𑀜𑁄 𑀓𑀸𑀮𑁂 𑀫𑀳𑀸𑀫𑀢𑀺.

𑁨𑁩𑁨.

𑀫𑀳𑀸𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑁄, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀸𑀥𑀼𑀦𑀁;

𑀫𑀳𑀸𑀧𑀥𑀸𑀦𑀖𑀭𑀁 𑀕𑀦𑁆𑀢𑁆𑀯𑀸, 𑀲𑀗𑁆𑀖𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀸.

𑁨𑁩𑁩.

𑀲𑀻𑀳𑀴𑀝𑁆𑀞𑀓𑀣𑀁 𑀲𑀼𑀢𑁆𑀯𑀸, 𑀣𑁂𑀭𑀯𑀸𑀤𑀜𑁆𑀘 𑀲𑀩𑁆𑀩𑀲𑁄;

‘‘𑀥𑀫𑁆𑀫𑀲𑁆𑀲𑀸𑀫𑀺𑀲𑁆𑀲 𑀏𑀲𑁄𑀯, 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀦𑀺𑀘𑁆𑀙𑀺𑀬.

𑁨𑁩𑁪.

𑀢𑀢𑁆𑀣 𑀲𑀗𑁆𑀖𑀁 𑀲𑀫𑀸𑀦𑁂𑀢𑁆𑀯𑀸, ‘‘𑀓𑀸𑀢𑀼𑀁 𑀅𑀝𑁆𑀞𑀓𑀣𑀁 𑀫𑀫;

𑀧𑁄𑀢𑁆𑀣𑀓𑁂 𑀤𑁂𑀣 𑀲𑀩𑁆𑀩𑁂’’𑀢𑀺, 𑀆𑀳, 𑀯𑀻𑀫𑀁𑀲𑀺𑀢𑀼𑀁 𑀲 𑀢𑀁.

𑁨𑁩𑁫.

𑀲𑀗𑁆𑀖𑁄 ¶ 𑀕𑀸𑀣𑀸𑀤𑁆𑀯𑀬𑀁 𑀢𑀲𑁆𑀲𑀸’𑀤𑀸𑀲𑀺 ‘‘𑀲𑀸𑀫𑀢𑁆𑀣𑀺𑀬𑀁 𑀢𑀯;

𑀏𑀢𑁆𑀣 𑀤𑀲𑁆𑀲𑁂𑀳𑀺, 𑀢𑀁 𑀤𑀺𑀲𑁆𑀯𑀸, 𑀲𑀩𑁆𑀩𑁂 𑀤𑁂𑀫𑀸𑀢𑀺 𑀧𑁄𑀢𑁆𑀣𑀓𑁂’’ [𑁨𑁩𑁪-𑁫 𑀕𑀸𑀣𑀸𑀲𑀼 𑀅𑀬𑀫𑀢𑁆𑀣𑀬𑁄𑀚𑀦𑀸𑁋 ‘‘𑀢𑀢𑁆𑀣 𑀫𑀳𑀸𑀯𑀺𑀳𑀸𑀭𑁂 𑀲𑀁𑀖𑀁 𑀫𑀳𑀸𑀦𑁂𑀢𑁆𑀯𑀸 𑀲𑀁𑀖 𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑁂𑀢𑁆𑀯𑀸 𑀆𑀘𑀭𑀺𑀬𑀧𑀼𑀩𑁆𑀩𑀤𑁆𑀥𑀖𑁄𑀲𑁄 𑀏𑀯𑀫𑀸𑀳 ‘𑀅𑀝𑁆𑀞𑀓𑀣𑀁 𑀓𑀸𑀢𑀼𑀁 𑀲𑀩𑁆𑀩𑁂 𑀧𑀸𑀴𑀺-𑀅𑀝𑁆𑀞𑀓𑀣𑀸-𑀧𑁄𑀢𑁆𑀣𑀓𑁂 𑀫𑀫 𑀤𑁂𑀣𑀸’𑀢𑀺; 𑀲𑁄 𑀲𑀁𑀖𑁄 𑀢𑀁 𑀯𑀻𑀫𑀁𑀲𑀺𑀢𑀼𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀢𑁄 ‘𑀅𑀦𑁆𑀢𑁄𑀚𑀝𑀸’𑀢𑀺𑀆𑀤𑀺𑀓𑀁 𑀘 ‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’𑀢𑀺𑀆𑀤𑀺𑀓𑀁 𑀘𑀸𑀢𑀺 𑀕𑀸𑀣𑀸𑀤𑁆𑀯𑀬𑀁 𑀢𑀲𑁆𑀲 𑀅𑀤𑀸𑀲𑀺 ‘𑀏𑀢𑁆𑀣 𑀢𑀯 𑀲𑀸𑀫𑀢𑁆𑀣𑀺𑀬𑀁 𑀜𑀸𑀡𑀧𑁆𑀧𑀪𑀸𑀯𑀁 𑀤𑀲𑁆𑀲𑁂𑀢𑀺; 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀧𑁄𑀢𑁆𑀣𑀓𑁂 𑀤𑁂𑀫𑀸’𑀢𑀺𑀯𑀢𑁆𑀯𑀸’’𑀢𑀺; 𑀇𑀫𑀺𑀦𑀸 𑀧𑀦 𑀅𑀬𑀫𑀢𑁆𑀣𑀸 𑀤𑀲𑁆𑀲𑀺𑀢𑁄 𑀳𑁄𑀢𑀺 ‘‘𑀆𑀘𑀭𑀺𑀬 𑀩𑀼𑀤𑁆𑀥𑀖𑁄𑀲𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀢𑀤𑁂𑀯 𑀕𑀸𑀣𑀸𑀤𑁆𑀯𑀬𑀁 𑀑𑀮𑁄𑀓𑁂𑀢𑁆𑀯𑀸, 𑀓𑀺𑀜𑁆𑀘𑀺𑀧𑀺 𑀅𑀜𑁆𑀜𑀁 𑀧𑁄𑀢𑁆𑀣𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀓𑀸𑀲𑀻’’𑀢𑀺; 𑀢𑀲𑁆𑀲 𑀧𑀦𑀢𑁆𑀣𑀲𑁆𑀲 𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀘𑀸𑀭𑀡𑀸 𑀧𑀭𑀢𑁄 (𑁩𑁯-𑁪𑁯-𑀧𑀺𑀝𑁆𑀞𑁂𑀲𑀼) 𑀆𑀕𑀫𑀺𑀲𑁆𑀲𑀢𑀺].

𑁨𑁩𑁬.

𑀧𑀺𑀝𑀓𑀢𑁆𑀢𑀬’𑀫𑁂𑀢𑁆𑀣𑁂𑀯, 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬 𑀲𑁄;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀦𑀸𑀫𑀸’𑀓𑀸, 𑀲𑀗𑁆𑀕𑀳𑁂𑀢𑁆𑀯𑀸 𑀲𑀫𑀸𑀲𑀢𑁄.

𑁨𑁩𑁭.

𑀢𑀢𑁄 𑀲𑀗𑁆𑀖𑀁 𑀲𑀫𑀽𑀳𑁂𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀫𑀢𑀓𑁄𑀯𑀺𑀤𑀁;

𑀫𑀳𑀸𑀩𑁄𑀥𑀺𑀲𑀫𑀻𑀧𑀫𑁆𑀳𑀺, 𑀲𑁄 𑀢𑀁 𑀯𑀸𑀘𑁂𑀢𑀼 𑀫𑀸𑀭𑀪𑀺.

𑁨𑁩𑁮.

𑀤𑁂𑀯𑀢𑀸 𑀢𑀲𑁆𑀲 𑀦𑁂𑀧𑀼𑀜𑁆𑀜𑀁, 𑀧𑀓𑀸𑀲𑁂𑀢𑀼𑀁 𑀫𑀳𑀸𑀚𑀦𑁂;

𑀙𑀸𑀤𑁂𑀲𑀼𑀁 𑀧𑁄𑀢𑁆𑀣𑀓𑀁 𑀲𑁄𑀧𑀺, 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀁 𑀅𑀓𑀸 [𑁨𑁩𑁮 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄𑁋 ‘‘𑀤𑁂𑀯𑀢𑀸 𑀢𑀲𑁆𑀲 𑀩𑀼𑀤𑁆𑀥𑀖𑁄𑀲𑀲𑁆𑀲 𑀦𑁂𑀧𑀼𑀜𑁆𑀜𑀁 𑀦𑀺𑀧𑀼𑀡𑀜𑁆𑀜𑀸𑀧𑁆𑀧𑀲𑀸𑀯𑀁 𑀫𑀳𑀸𑀚𑀦𑀲𑁆𑀲 𑀧𑀓𑀸𑀲𑁂𑀢𑀼𑀁 𑀢𑁂𑀦 𑀮𑀺𑀔𑀺𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑁄𑀢𑁆𑀣𑀓𑀁 𑀙𑀸𑀤𑁂𑀲𑀼𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑀲𑁆𑀲𑀺𑀬𑀪𑀸𑀯𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀲𑀼𑀁; 𑀲𑁄𑀧𑀺 𑀩𑀼𑀤𑁆𑀥𑀖𑁄𑀲𑁄 𑀤𑀼𑀢𑀺𑀬𑀫𑁆𑀧𑀺 𑀢𑀁 𑀮𑀺𑀔𑀺, 𑀢𑀫𑁆𑀧𑀺 𑀤𑁂𑀯𑀢𑀸 𑀙𑀤𑁂𑀲𑀼𑀁; 𑀢𑀢𑀺𑀬𑀫𑁆𑀧𑀺 𑀮𑀺𑀔𑀻’’𑀢𑀺; 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀁 𑀅𑀓𑀸’’𑀢𑀺; 𑀇𑀤𑀫𑁂𑀯 𑀫𑀳𑀸𑀯𑀁𑀲𑀯𑀘𑀦𑀁 𑀦𑀺𑀲𑁆𑀲𑀸𑀬 𑀯𑀺𑀢𑁆𑀢𑀸𑀭𑁂𑀢𑁆𑀯𑀸 𑀓𑀣𑀺𑀢𑀸𑀬 𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀸 𑀦𑀸𑀫 𑀓𑀣𑀸𑀮 𑀏𑀓𑀭𑀢𑁆𑀢𑁂𑀦𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀮𑀺𑀔𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑀪𑀸𑀯𑁄 𑀧𑀓𑀸𑀲𑀺𑀢𑁄; 𑀈𑀤𑀺𑀲𑀻 𑀧𑀦 𑀓𑀣𑀸 𑀩𑀳𑀽𑀦𑀁 𑀯𑀺𑀫𑁆𑀳𑀬𑀚𑀦𑀦𑀻𑀧𑀺 𑀧𑀭𑀺𑀓𑁆𑀔𑀓𑀸𑀦𑀁 𑀲𑀁𑀲𑀬𑀚𑀦𑀦𑀻 𑀳𑁄𑀢𑀺; 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸𑀧𑀺 𑀯𑀺𑀘𑀸𑀭𑀡𑀸 𑀧𑀭𑀢𑁄 (𑁪𑁭-𑁮-𑀧𑀺𑀝𑁆𑀞𑁂𑀲𑀼) 𑀤𑀲𑁆𑀲𑀺𑀬𑀺𑀲𑁆𑀲𑀢𑀺].

𑁨𑁩𑁯.

𑀯𑀸𑀘𑁂𑀢𑀼𑀁 𑀢𑀢𑀺𑀬𑁂 𑀯𑀸𑀭𑁂, 𑀧𑁄𑀢𑁆𑀣𑀓𑁂 𑀲𑀫𑀼𑀤𑀸𑀳𑀝𑁂;

𑀧𑁄𑀢𑁆𑀣𑀓𑀤𑁆𑀯𑀬’𑀫𑀜𑁆𑀜𑀫𑁆𑀧𑀺, 𑀲𑀡𑁆𑀞𑀧𑁂𑀲𑀼𑀁 𑀢𑀳𑀺𑀁 𑀫𑀭𑀽.

𑁨𑁪𑁦.

𑀯𑀸𑀘𑀬𑀺𑀁𑀲𑀼 𑀢𑀤𑀸 𑀪𑀺𑀓𑁆𑀔𑀽, 𑀧𑁄𑀢𑁆𑀣𑀓𑀢𑁆𑀢𑀬’𑀫𑁂𑀓𑀢𑁄;

𑀕𑀦𑁆𑀣𑀢𑁄 𑀅𑀢𑁆𑀣𑀢𑁄 𑀯𑀸𑀧𑀺, 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀯𑀸.

𑁨𑁪𑁧.

𑀣𑁂𑀭𑀯𑀸𑀤𑁂𑀳𑀺 𑀧𑀸𑀴𑀻𑀳𑀺, 𑀧𑀤𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀯𑀸;

𑀅𑀜𑁆𑀜𑀣𑀢𑁆𑀢𑀫𑀳𑀽 𑀦𑁂𑀯, 𑀧𑁄𑀢𑁆𑀣𑀓𑁂𑀲𑀼𑀧𑀺 𑀢𑀻𑀲𑀼𑀧𑀺.

𑁨𑁪𑁨.

𑀅𑀣 ¶ 𑀉𑀕𑁆𑀖𑁄𑀲𑀬𑀻 𑀲𑀗𑁆𑀖𑁄, 𑀢𑀼𑀝𑁆𑀞𑀳𑀝𑁆𑀞𑁄 𑀯𑀺𑀲𑁂𑀲𑀢𑁄;

𑀦𑀺𑀲𑁆𑀲𑀁𑀲𑀬𑀁’𑀲 𑀫𑁂𑀢𑁆𑀢𑁂𑀬𑁆𑀬𑁄, 𑀇𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁.

𑁨𑁪𑁩.

𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬𑀸’𑀤𑀸, 𑀧𑁄𑀢𑁆𑀣𑀓𑁂 𑀧𑀺𑀝𑀓𑀢𑁆𑀢𑀬𑁂;

𑀕𑀦𑁆𑀣𑀸𑀓𑀭𑁂 𑀯𑀲𑀦𑁆𑀢𑁄 𑀲𑁄, 𑀯𑀺𑀳𑀸𑀭𑁂 𑀤𑀽𑀭𑀲𑀗𑁆𑀓𑀭𑁂.

𑁨𑁪𑁪.

𑀧𑀭𑀺𑀯𑀢𑁆𑀢𑁂𑀲𑀺 𑀲𑀩𑁆𑀩𑀸𑀧𑀺, 𑀲𑀻𑀳𑀴𑀝𑁆𑀞𑀓𑀣𑀸 𑀢𑀤𑀸;

𑀲𑀩𑁆𑀩𑁂𑀲𑀁 𑀫𑀽𑀮𑀪𑀸𑀲𑀸𑀬, 𑀫𑀸𑀕𑀥𑀸𑀬 𑀦𑀺𑀭𑀼𑀢𑁆𑀢𑀺𑀬𑀸.

𑁨𑁪𑁫.

𑀲𑀢𑁆𑀢𑀸𑀦𑀁 𑀲𑀩𑁆𑀩𑀪𑀸𑀲𑀸𑀦𑀁, 𑀲𑀸 𑀅𑀳𑁄𑀲𑀺 𑀳𑀺𑀢𑀸𑀯𑀳𑀸;

𑀣𑁂𑀭𑀺𑀬𑀸𑀘𑀭𑀺𑀬𑀸 𑀲𑀩𑁆𑀩𑁂, 𑀧𑀸𑀴𑀺𑀁 𑀯𑀺𑀬 𑀢’𑀫𑀕𑁆𑀕𑀳𑀼𑀁.

𑁨𑁪𑁬.

𑀅𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼, 𑀕𑀢𑁂𑀲𑀼 𑀧𑀭𑀺𑀦𑀺𑀝𑁆𑀞𑀺𑀢𑀺𑀁;

𑀯𑀦𑁆𑀤𑀺𑀢𑀼𑀁 𑀲𑁄 𑀫𑀳𑀸𑀩𑁄𑀥𑀺𑀁, 𑀚𑀫𑁆𑀩𑀼𑀤𑀻𑀧𑀁 𑀉𑀧𑀸𑀕𑀫𑀻’’𑀢𑀺 [𑀲𑁄 𑀫𑀳𑀸𑀩𑁄𑀥𑀺 𑀯𑀦𑁆𑀤𑀺𑀢𑀼𑀁 𑀚𑀫𑁆𑀩𑀼𑀤𑀻𑀧𑀁 𑀉𑀧𑀸𑀕𑀫𑀻𑀢𑀺 𑀇𑀤𑀁 𑀯𑀘𑀦𑀁 𑀧𑀼𑀭𑀺𑀫𑀯𑀘𑀦𑁂𑀳𑀺 𑀅𑀲𑀁𑀲𑀝𑁆𑀞𑀁 𑀯𑀺𑀬 𑀳𑁄𑀢𑀺; 𑀧𑀼𑀩𑁆𑀩𑁂 𑀳𑀺 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑁂 𑀚𑀸𑀢𑁄’’𑀢𑀺 𑀘, ‘‘𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀫𑀸𑀕𑀥𑀪𑀸𑀲𑀸𑀬 𑀧𑀭𑀺𑀯𑀢𑁆𑀢𑁂𑀳𑀻𑀢𑀺 𑀢𑀲𑁆𑀲𑀸𑀘𑀭𑀺𑀬𑁂𑀦 𑀭𑁂𑀯𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑁄’’𑀢𑀺 𑀘 𑀯𑀼𑀢𑁆𑀢𑀁; 𑀢𑀲𑁆𑀫𑀸 𑀇𑀥𑀸𑀧𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀧𑀯𑀢𑁆𑀢𑀺 𑀢𑀤𑀦𑀼𑀭𑀽𑀧𑀸 ‘‘𑀢𑀸 𑀪𑀸𑀲𑀸𑀧𑀭𑀺𑀯𑀢𑁆𑀢𑀺𑀢𑀝𑁆𑀞𑀓𑀣𑀸𑀬𑁄 𑀆𑀤𑀸𑀬 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀁 𑀚𑀫𑁆𑀩𑀼𑀤𑀻𑀧𑀁 𑀉𑀧𑀸𑀕𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀸𑀲𑀦𑀼𑀚𑁆𑀚𑁄𑀢𑀦𑀫𑀽𑀮𑀺𑀓𑀸 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀦 𑀧𑀦 𑀫𑀳𑀸𑀩𑁄𑀥𑀺𑀯𑀦𑁆𑀤𑀦𑀫𑀽𑀮𑀺𑀓𑀸𑀢𑀺].

𑀅𑀬𑀜𑁆𑀘 𑀧𑀦 𑀫𑀳𑀸𑀯𑀁𑀲𑀓𑀣𑀸 𑁧𑁯𑁫𑁦 - 𑀔𑀭𑀺𑀲𑁆𑀢𑀯𑀲𑁆𑀲𑁂 𑀳𑀸𑀩𑀤𑀫𑀳𑀸𑀯𑀺𑀚𑁆𑀚𑀸𑀮𑀬𑀫𑀼𑀤𑁆𑀤𑀡𑀬𑀦𑁆𑀢𑁂 𑀭𑁄𑀫𑀓𑁆𑀔𑀭𑁂𑀦 𑀫𑀼𑀤𑁆𑀤𑀺𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑁄𑀢𑁆𑀣𑀓𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀓𑀣𑀸𑀬𑀁 ‘‘𑀅𑀦𑁂𑀓𑀸𑀦𑁂𑀢𑁆𑀣 𑀅𑀢𑁆𑀣𑀺 𑀯𑀺𑀘𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀸𑀦𑀦𑁆𑀤𑀓𑁄𑀲𑀫𑁆𑀩𑀻𑀦𑀸𑀫𑀓𑁂𑀦 𑀯𑀺𑀘𑀓𑁆𑀔𑀡𑁂𑀦 𑀯𑀺𑀘𑀸𑀭𑀺𑀢𑀸. 𑀢𑀫𑁂𑀢𑁆𑀣 𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀘𑀺𑀦𑀦𑀸𑀬 𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀯𑀺𑀘𑀸𑀭𑀡𑀫𑁆𑀧𑀺𑀲𑁆𑀲 𑀓𑀭𑀺𑀲𑁆𑀲𑀸𑀫.

𑀚𑀸𑀢𑀺𑀤𑁂𑀲𑀯𑀺𑀘𑀸𑀭𑀡𑀸

𑁧. 𑀢𑀢𑁆𑀣 𑀳𑀺 𑀢𑁂𑀦 𑀥𑀫𑁆𑀫𑀸𑀦𑀦𑁆𑀤𑁂𑀦 ‘‘𑀩𑀼𑀤𑁆𑀥𑀖𑁄𑀲𑁄 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑁂 (𑀩𑀼𑀤𑁆𑀥𑀕𑀬𑀸𑀬𑀁) 𑀚𑀸𑀢𑁄𑀢𑀺 𑀦 𑀬𑀼𑀢𑁆𑀢𑀫𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀁𑀲𑀸𑀥𑀦𑀢𑁆𑀣𑀸𑀬 𑀘𑀢𑁆𑀢𑀸𑀭𑀺 𑀩𑁆𑀬𑀢𑀺𑀭𑁂𑀓𑀓𑀸𑀭𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀓𑀣𑀁?

(𑀓) ‘‘𑀩𑀼𑀤𑁆𑀥𑀖𑁄𑀲𑁂𑀦 𑀧𑀓𑀸𑀲𑀺𑀢𑁂𑀲𑀼 𑀢𑀁𑀓𑀸𑀮𑀺𑀓𑀯𑀢𑁆𑀣𑀽𑀲𑀼 𑀏𑀓𑀫𑁆𑀧𑀺 𑀢𑀁 𑀦𑀢𑁆𑀣𑀺, 𑀬𑀁 𑀫𑀕𑀥𑁂𑀲𑀼 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀞𑀫𑀁 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁. 𑀢𑀤𑀓𑀸𑀭𑀡𑀫𑁂𑀯. 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀳𑀺 𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑁄 𑀓𑀭𑁄𑀦𑁆𑀢𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑁄𑀬𑁂𑀯 ¶ 𑀲𑀁𑀔𑀺𑀧𑀺𑀢𑁆𑀯𑀸, 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀫𑀢𑁆𑀢𑁂𑀦 𑀘 𑀯𑀺𑀲𑁂𑀲𑁂𑀢𑁆𑀯𑀸 𑀅𑀓𑀸𑀲𑀺, 𑀦 𑀧𑀦 𑀬𑀁 𑀯𑀸 𑀢𑀁 𑀯𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀲𑀼𑀢𑀁 𑀤𑀲𑁆𑀲𑁂𑀢𑁆𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀲𑀁𑀯𑀡𑁆𑀡𑀦𑀁 𑀢𑀜𑁆𑀘 𑀲𑀫𑀸𑀭𑀪𑀦𑁆𑀢𑁄,

𑀢𑀲𑁆𑀲𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭𑀁;

𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀣𑁂𑀯,

𑀓𑀼𑀭𑀼𑀦𑁆𑀤𑀺𑀦𑀸𑀫𑀸𑀤𑀺𑀲𑀼 𑀯𑀺𑀲𑁆𑀲𑀼𑀢𑀸𑀲𑀼.

𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄,

𑀬𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄;

𑀅𑀣𑁄𑀧𑀺 𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤𑀁,

𑀲𑀁𑀯𑀡𑁆𑀡𑀦𑀁 𑀲𑀫𑁆𑀫 𑀲𑀫𑀸𑀭𑀪𑀺𑀲𑁆𑀲’’𑀦𑁆𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸,

𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸;

𑀯𑀺𑀦𑀺𑀘𑁆𑀙𑀬𑀁 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸,

𑀢𑀦𑁆𑀢𑀺𑀓𑁆𑀓𑀫𑀁 𑀓𑀺𑀜𑁆𑀘𑀺 𑀅𑀯𑁄𑀓𑁆𑀓𑀫𑀺𑀢𑁆𑀯𑀸.

𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁,

𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀧𑀭𑀺𑀤𑀻𑀧𑀬𑀦𑁆𑀢𑀻;

𑀬𑀲𑁆𑀫𑀸 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀡𑁆𑀡𑀦𑀸𑀧𑀺,

𑀲𑀓𑁆𑀓𑀘𑁆𑀘 𑀢𑀲𑁆𑀫𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

𑀬𑀣𑁂𑀯 𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀅𑀢𑁆𑀢𑀦𑁄 𑀅𑀝𑁆𑀞𑀓𑀣𑀸𑀲𑀼 𑀢𑀁𑀓𑀸𑀮𑀺𑀓𑀸𑀦𑀺 𑀫𑀸𑀕𑀥𑀺𑀓𑀸𑀦𑀺 𑀯𑀢𑁆𑀣𑀽𑀦𑀺 𑀦 𑀧𑀓𑀸𑀲𑀺𑀢𑀸𑀦𑀺, 𑀢𑀣𑁂𑀯 𑀲𑀻𑀳𑀴𑀺𑀓𑀸𑀦𑀺𑀧𑀺 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀸𑀦𑀺𑀧𑀺. 𑀦 𑀳𑀺 𑀢𑀢𑁆𑀣 𑀯𑀲𑀪𑀭𑀸𑀚𑀓𑀸𑀮𑀢𑁄 (𑁬𑁦𑁯-𑁬𑁫𑁩 -𑀩𑀼𑀤𑁆𑀥𑀯𑀲𑁆𑀲) 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀽𑀦𑀺 𑀤𑀺𑀝𑁆𑀞𑀸𑀦𑀺 𑀞𑀧𑁂𑀢𑁆𑀯𑀸 𑀫𑀳𑀸𑀲𑁂𑀦𑀭𑀸𑀚𑀯𑀢𑁆𑀣𑀼𑀁 [𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁬-𑁨𑁩𑁭], 𑀆𑀘𑀭𑀺𑀬𑁄 𑀘 𑀢𑀢𑁄 𑀢𑀺𑀲𑀢𑀫𑀢𑁆𑀢𑀯𑀲𑁆𑀲𑁂𑀳𑀺 𑀧𑀘𑁆𑀙𑀸𑀢𑀭𑁂 𑀫𑀳𑀸𑀦𑀸𑀫𑀭𑀜𑁆𑀜𑁄 𑀓𑀸𑀮𑁂 (𑁯𑁫𑁩-𑁯𑁭𑁫-𑀩𑀼-𑀯) 𑀲𑀻𑀳𑀴𑀤𑀻𑀧𑀫𑀼𑀧𑀸𑀕𑀢𑁄. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀢𑀁𑀓𑀸𑀮𑀺𑀓𑀫𑀸𑀕𑀥𑀺𑀓𑀯𑀢𑁆𑀣𑀽𑀦𑀁 𑀅𑀧𑁆𑀧𑀓𑀸𑀲𑀦𑀫𑀢𑁆𑀢𑁂𑀦 𑀦 𑀲𑀓𑁆𑀓𑀸 𑀢𑀓𑁆𑀓𑀢𑁆𑀢𑀸 𑀦 𑀫𑀸𑀕𑀥𑀺𑀓𑁄𑀢𑀺 𑀜𑀸𑀢𑀼𑀦𑁆𑀢𑀺.

[𑀔) 𑀧𑀼𑀦𑀧𑀺 ¶ 𑀢𑁂𑀦 ‘‘𑀲𑀩𑁆𑀩𑁂𑀲𑀼𑀧𑀺 𑀩𑀼𑀤𑁆𑀥𑀖𑁄𑀲𑀕𑀦𑁆𑀣𑁂𑀲𑀼 𑀉𑀢𑁆𑀢𑀭𑀇𑀦𑁆𑀤𑀺𑀬𑀤𑁂𑀲𑀸𑀬𑀢𑁆𑀢𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀲𑁆𑀲 𑀯𑀺𑀬 𑀧𑀓𑀸𑀲𑀦𑀁 𑀦𑀢𑁆𑀣𑀻’’𑀢𑀺 𑀤𑀼𑀢𑀺𑀬𑀁 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀲𑀧𑀺 𑀅𑀓𑀸𑀭𑀡𑀪𑀸𑀯𑁄 𑀧𑀼𑀭𑀺𑀫𑀯𑀘𑀦𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀦𑀸𑀫 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁, 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑁋

‘‘𑀬𑀣𑁂𑀯 𑀳𑀺 𑀓𑀮𑀫𑁆𑀩𑀦𑀤𑀻𑀢𑀻𑀭𑀢𑁄 𑀭𑀸𑀚𑀫𑀸𑀢𑀼𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀣𑀽𑀧𑀸𑀭𑀸𑀫𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀳𑀺𑀭𑀜𑁆𑀜𑀯𑀢𑀺𑀓𑀸𑀬 𑀦𑀸𑀫 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑀢𑁄 𑀲𑀸𑀮𑀯𑀦𑀁 𑀉𑀬𑁆𑀬𑀸𑀦𑀁. 𑀬𑀣𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄, 𑀏𑀯𑀁 𑀢𑀁 𑀓𑀼𑀲𑀺𑀦𑀸𑀭𑀸𑀬 𑀳𑁄𑀢𑀺. 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸. 𑀢𑀲𑁆𑀫𑀸 𑀢𑀁 𑀉𑀧𑀯𑀢𑁆𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧𑁮𑁬; 𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁯𑁮] 𑁋

𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀲𑁆𑀲 𑀯𑀺𑀬 𑀧𑀓𑀸𑀲𑀦𑀫𑁆𑀧𑀺 𑀤𑀺𑀲𑁆𑀲𑀢𑁂𑀯. 𑀢𑀫𑁆𑀧𑀺 𑀧𑀦 𑀧𑁄𑀭𑀸𑀡𑀝𑁆𑀞𑀓𑀣𑀸𑀳𑀺 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀫𑀢𑁆𑀢𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀸𑀤𑀺𑀲𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀓𑀸𑀮𑀢𑁄𑀬𑁂𑀯 𑀧𑀪𑀼𑀢𑀺 𑀯𑀼𑀢𑁆𑀢𑀸𑀬 𑀏𑀯 𑀪𑀯𑀺𑀢𑀩𑁆𑀩𑀢𑁆𑀢𑀸𑀢𑀺.

[𑀕) 𑀧𑀼𑀦𑀧𑀺 𑀢𑁂𑀦 ‘‘𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲, 𑀢𑀲𑁆𑀲 𑀯𑀦𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁩𑁦-𑀧𑀺𑀝𑁆𑀞𑁂) 𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀢𑀲𑁆𑀲𑀸 𑀧𑀦𑀲𑁆𑀲 𑀅𑀯𑀳𑀲𑀦𑀻𑀬𑀪𑀸𑀯𑁄 𑀧𑀸𑀓𑀝𑁄𑀬𑁂𑀯𑀸’’𑀢𑀺 𑀘 𑀳𑀻𑀴𑁂𑀢𑁆𑀯𑀸 ‘‘𑀇𑀦𑁆𑀤𑀺𑀬𑀭𑀝𑁆𑀞𑁂 𑀧𑀦 𑀉𑀢𑁆𑀢𑀭𑀤𑁂𑀲𑁂𑀲𑀼 𑀕𑀺𑀫𑁆𑀳𑀓𑀸𑀮𑁂 𑀯𑀢𑁆𑀣𑀘𑁆𑀙𑀸𑀤𑀦𑀭𑀳𑀺𑀢𑀸 𑀫𑀸𑀦𑀼𑀲𑀓𑀸𑀬𑀘𑁆𑀙𑀯𑀺 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀏𑀓𑀁𑀲𑀢𑁄 𑀤𑀬𑁆𑀳𑀢𑀺, 𑀢𑀁 𑀦 𑀚𑀸𑀦𑀦𑁆𑀢𑀺 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀤𑁂𑀲𑀺𑀓𑀸’’𑀢𑀺 𑀢𑀢𑀺𑀬𑀁 𑀓𑀸𑀭𑀡𑀁 𑀤𑀴𑁆𑀳𑀢𑀭𑀪𑀸𑀯𑁂𑀦 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀧𑀦 𑀬𑀤𑀺 ‘‘𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀏𑀓𑀁𑀲𑀢𑁄 𑀤𑀬𑁆𑀳𑀢𑀻’’𑀢𑀺 𑀏𑀢𑀁 𑀉𑀚𑀼𑀓𑀢𑁄 𑀲𑀽𑀭𑀺𑀬𑀭𑀲𑁆𑀫𑀺𑀲𑀦𑁆𑀢𑀸𑀧𑁂𑀦𑁂𑀯 𑀤𑀟𑁆𑀠𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀁 𑀲𑀢𑀺 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀦𑁆𑀢𑀺 𑀧𑀤𑁂 𑀆𑀢𑀧𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸 𑀦 𑀬𑀼𑀢𑁆𑀢𑀫𑁂𑀯. 𑀬𑀤𑀺 𑀧𑀦 𑀲𑀽𑀭𑀺𑀬𑀲𑀦𑁆𑀢𑀸𑀧𑀲𑀜𑁆𑀚𑀸𑀢𑁂𑀦 𑀉𑀡𑁆𑀳𑀉𑀢𑀼𑀦𑀸 𑀤𑀟𑁆𑀠𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀁 𑀲𑀢𑀺 𑀉𑀢𑁆𑀢𑀭𑀇𑀦𑁆𑀤𑀺𑀬𑀤𑁂𑀲𑁂𑀲𑀼, 𑀅𑀜𑁆𑀜𑀢𑁆𑀣 𑀘 𑀢𑀸𑀤𑀺𑀲𑁂𑀲𑀼 𑀅𑀢𑀺𑀉𑀡𑁆𑀳𑀝𑁆𑀞𑀸𑀦𑁂𑀲𑀼 𑀲𑀽𑀭𑀺𑀬𑀲𑀦𑁆𑀢𑀸𑀧𑀲𑀜𑁆𑀚𑀸𑀢𑀲𑁆𑀲 𑀉𑀡𑁆𑀳𑀉𑀢𑀼𑀦𑁄 𑀧𑀝𑀺𑀖𑀸𑀢𑀸𑀬 ¶ 𑀘𑀻𑀯𑀭𑀁 𑀲𑁂𑀦𑀸𑀲𑀦𑀜𑁆𑀘 𑀧𑀝𑀺𑀲𑁂𑀯𑀻𑀬𑀢𑀻𑀢𑀺 𑀅𑀬𑀫𑀢𑁆𑀣𑁄 𑀦 𑀦 𑀬𑀼𑀢𑁆𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑁩, 𑁫𑁮)

‘‘𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀉𑀢𑀼𑀯𑀺𑀲𑀪𑀸𑀕𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺.

𑀲𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀤𑀢𑁆𑀣𑀲𑀁𑀯𑀡𑁆𑀡𑀦𑀸 𑀧𑁄𑀭𑀸𑀡𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀳𑀺 𑀆𑀕𑀢𑀸 𑀪𑀯𑁂𑀬𑁆𑀬. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀦𑀸𑀫 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑁧, 𑁫𑁮) ‘‘𑀉𑀡𑁆𑀳𑀦𑁆𑀢𑀺 𑀘𑁂𑀢𑁆𑀣 𑀅𑀕𑁆𑀕𑀺𑀲𑀦𑁆𑀢𑀸𑀧𑁄𑀯 𑀯𑁂𑀤𑀺𑀢𑀩𑁆𑀩𑁄, 𑀲𑀽𑀭𑀺𑀬𑀲𑀦𑁆𑀢𑀸𑀧𑀯𑀲𑁂𑀦 𑀧𑀦𑁂𑀢𑀁 𑀯𑀢𑁆𑀣𑀼 𑀯𑀼𑀢𑁆𑀢’’𑀦𑁆𑀢𑀺. 𑀏𑀢𑁆𑀣 𑀘 𑀲𑀘𑀸𑀬𑀫𑀢𑁆𑀣𑁄 𑀆𑀘𑀭𑀺𑀬𑁂𑀦 𑀅𑀢𑁆𑀢𑀦𑁄 𑀫𑀢𑀺𑀯𑀲𑁂𑀦 𑀯𑀼𑀢𑁆𑀢𑁄 𑀅𑀲𑁆𑀲, 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀪𑀸𑀯𑀜𑁆𑀘 𑀢𑀲𑁆𑀲𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀅𑀢𑁆𑀢𑀦𑁄 𑀫𑀢𑀺𑀪𑀸𑀯𑀜𑁆𑀘 𑀬𑀼𑀢𑁆𑀢𑀪𑀸𑀯𑀜𑁆𑀘 𑀧𑀓𑀸𑀲𑁂𑀬𑁆𑀬. 𑀆𑀘𑀭𑀺𑀬𑁄 𑀳𑀺 𑀬𑀢𑁆𑀣 𑀬𑀢𑁆𑀣 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀅𑀯𑀼𑀢𑁆𑀢𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀸𑀤𑀺𑀲𑀁 𑀜𑀸𑀧𑀓𑀯𑀘𑀦𑀫𑁆𑀧𑀺 𑀧𑀓𑀸𑀲𑁂𑀢𑀺𑀬𑁂𑀯, 𑀬𑀣𑀸 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 (𑁧, 𑁭𑁨) ‘‘𑀏𑀢𑁆𑀣 𑀆𑀡𑀢𑁆𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀧𑀺 𑀧𑀬𑁄𑀕𑀸 𑀬𑀼𑀚𑁆𑀚𑀦𑁆𑀢𑀺, 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀘𑀦𑀁, 𑀬𑀣𑀸 𑀘 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 (𑁧, 𑁩𑁦) ‘‘𑀅𑀯𑀺𑀘𑀸𑀭𑀺𑀢𑀫𑁂𑀢𑀁 𑀧𑁄𑀭𑀸𑀡𑁂𑀳𑀺, 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀫𑀢𑀻’’𑀢𑀺 𑀯𑀘𑀦𑀁. 𑀦 𑀘𑁂𑀢𑁆𑀣 𑀓𑀺𑀜𑁆𑀘𑀺𑀧𑀺 𑀜𑀸𑀧𑀓𑀯𑀘𑀦𑀁 𑀧𑀓𑀸𑀲𑀺𑀢𑀁. 𑀢𑀲𑁆𑀫𑀸 ‘‘𑀬𑀤𑁂𑀢𑀁 ‘𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲𑀸’𑀢𑀺 𑀘, ‘𑀉𑀡𑁆𑀳𑀦𑁆𑀢𑀺 𑀘𑁂𑀢𑁆𑀣 𑀅𑀕𑁆𑀕𑀺𑀲𑀦𑁆𑀢𑀸𑀧𑁄𑀯 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀘 𑀯𑀘𑀦𑀁, 𑀏𑀢𑀁 𑀧𑁄𑀭𑀸𑀡𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀯𑀘𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

(𑀖) 𑀧𑀼𑀦𑀧𑀺 𑀢𑁂𑀦 ‘‘𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀦𑀸𑀫 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀕𑁄𑀧𑀸𑀮𑀓𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 [𑀫. 𑀦𑀺. 𑀅𑀝𑁆𑀞. 𑁧.𑁩𑁫𑁦] 𑀩𑀼𑀤𑁆𑀥𑀖𑁄𑀲𑁄 ‘𑀫𑀕𑀥𑀯𑀺𑀤𑁂𑀳𑀭𑀝𑁆𑀞𑀸𑀦𑀁 𑀅𑀦𑁆𑀢𑀭𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀫𑀚𑁆𑀛𑁂 𑀯𑀸𑀮𑀼𑀓𑀢𑁆𑀣𑀮𑀤𑀻𑀧𑀓𑀸 𑀅𑀢𑁆𑀣𑀻’𑀢𑀺 𑀲𑀤𑁆𑀤𑀳𑀢𑀺 𑀫𑀜𑁆𑀜𑁂. 𑀩𑀼𑀤𑁆𑀥𑀖𑁄𑀲𑁂𑀦 𑀧𑀦 𑀤𑀺𑀝𑁆𑀞𑀕𑀗𑁆𑀕𑀸 𑀲𑀻𑀳𑀴𑀤𑀻𑀧𑁂 𑀫𑀳𑀸𑀯𑁂𑀮𑀺𑀕𑀗𑁆𑀕𑀸𑀬𑁂𑀯, 𑀦 𑀧𑀦 𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀸𑀦𑀁 𑀲𑁂𑀝𑁆𑀞𑀲𑀫𑁆𑀫𑀢𑀸 𑀫𑀳𑀸𑀕𑀗𑁆𑀕𑀸𑀢𑀺 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄’’𑀢𑀺 𑀘𑀢𑀼𑀢𑁆𑀣𑀁 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁. 𑀢𑀁 𑀧𑀦 𑀇𑀤𑀸𑀦𑀺 𑀫𑀳𑀸𑀕𑀗𑁆𑀕𑀸𑀬 𑀫𑀚𑁆𑀛𑁂 𑀢𑀲𑁆𑀫𑀺𑀁 𑀞𑀸𑀦𑁂 𑀢𑀸𑀤𑀺𑀲𑀁 𑀤𑀻𑀧𑀓𑀁 𑀅𑀤𑀺𑀲𑁆𑀯𑀸 ‘‘𑀧𑀼𑀩𑁆𑀩𑁂𑀧𑀺 𑀏𑀯𑀫𑁂𑀯 𑀪𑀯𑁂𑀬𑁆𑀬𑀸’’𑀢𑀺 𑀏𑀓𑀁𑀲𑀢𑁄 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀫𑀢𑁆𑀢𑀫𑁂𑀯. 𑀦𑀤𑀺𑀬𑁄 𑀧𑀦 𑀲𑀩𑁆𑀩𑀤𑀸𑀧𑀺 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀦𑁆𑀢𑀺 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄. 𑀢𑀲𑁆𑀫𑀸 𑀬𑀣𑀸 𑀧𑀼𑀩𑁆𑀩𑁂 𑀢𑀲𑁆𑀲 𑀕𑁄𑀧𑀸𑀮𑀲𑁆𑀲 𑀓𑀸𑀮𑁂 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀢𑀸𑀤𑀺𑀲𑀸 𑀤𑀻𑀧𑀓𑀸 𑀲𑀁𑀯𑀺𑀚𑁆𑀚𑀫𑀸𑀦𑀸 𑀅𑀳𑁂𑀲𑀼𑀁, 𑀢𑀣𑁂𑀯 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀏𑀲 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄, ¶ 𑀢𑀤𑁂𑀯 𑀘 𑀯𑀘𑀦𑀁 𑀆𑀘𑀭𑀺𑀬𑁂𑀦 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀧𑀓𑀸𑀲𑀺𑀢𑀦𑁆𑀢𑀺 𑀏𑀯𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀓𑀸𑀭𑀡𑀫𑁂𑀯𑀸𑀢𑀺.

𑀩𑁆𑀭𑀸𑀳𑁆𑀫𑀡𑀓𑀼𑀮𑀯𑀺𑀘𑀸𑀭𑀡𑀸

𑁨. 𑀅𑀣 ‘‘𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄’’𑀢𑀺 𑀧𑀤𑀫𑁆𑀧𑀺 𑀢𑁂𑀦 𑀏𑀯𑀁 𑀯𑀺𑀘𑀸𑀭𑀺𑀢𑀁 𑁋

(𑀓) ‘‘𑀩𑀼𑀤𑁆𑀥𑀖𑁄𑀲𑁄 ‘𑀩𑁆𑀭𑀸𑀳𑁆𑀫𑀡𑀓𑀼𑀮𑀚𑀸𑀢𑁄’𑀢𑀺 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁. 𑀓𑀲𑁆𑀫𑀸 𑀯𑁂𑀤𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑁆𑀚𑀢𑀦𑀸 𑀲𑀩𑁆𑀩𑁂𑀧𑀺 𑀩𑁆𑀭𑀸𑀳𑁆𑀫𑀡𑀸

𑀩𑁆𑀭𑀸𑀳𑁆𑀫𑀡𑁄𑀲𑁆𑀬 𑀫𑀼𑀔𑀫𑀸𑀲𑀻𑀤𑀺, 𑀩𑀸𑀳𑀽 𑀭𑀸𑀚𑀦𑁆𑀬? 𑀓𑀢?;

𑀊𑀭𑀽 𑀢𑀤𑀲𑁆𑀬 𑀬𑀤 𑀯𑀕𑁆𑀬?, 𑀧𑀤𑁆𑀪𑁆𑀬𑀸𑀁 𑀕𑀽𑀤𑁆𑀭𑁄 𑀅𑀚𑀸𑀬𑀢𑀸’’𑀢𑀺 [𑀇𑀭𑀼𑀯𑁂𑀤, 𑁧𑁦-𑀫𑀡𑁆𑀟𑀮, 𑁯𑁦; 𑀢𑀣𑀸 𑀅𑀣𑀯 𑁬 𑀯𑁂𑀤 𑁧𑁯, 𑁬, 𑁬].

𑀇𑀫𑀁 𑀧𑀼𑀭𑀺𑀲𑀲𑀼𑀢𑁆𑀢𑀁 𑀦𑀸𑀫 𑀫𑀦𑁆𑀢𑀁 𑀚𑀸𑀦𑀦𑁆𑀢𑀻𑀢𑀺 𑀲𑀤𑁆𑀤𑀳𑀺𑀬𑀸.

𑀅𑀬𑀁 𑀧𑀦𑀲𑁆𑀲𑀸 𑀅𑀢𑁆𑀣𑁄 𑁋 ‘𑀩𑁆𑀭𑀸𑀳𑁆𑀫𑀡𑁄 𑀅𑀲𑁆𑀲 (𑀩𑁆𑀭𑀳𑁆𑀫𑀼𑀦𑁄) 𑀫𑀼𑀔𑀁 𑀆𑀲𑀺. 𑀩𑀸𑀳𑀽 𑀭𑀸𑀚𑀜𑁆𑀜𑁄 𑀓𑀢𑁄, 𑀔𑀢𑁆𑀢𑀺𑀬𑀸 𑀅𑀲𑁆𑀲 𑀩𑀸𑀳𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑁂𑀲𑁆𑀲𑁄, 𑀲𑁄 𑀅𑀲𑁆𑀲 𑀊𑀭𑀽. 𑀲𑀼𑀤𑁆𑀤𑁄 𑀅𑀲𑁆𑀲 𑀧𑀸𑀤𑁂𑀳𑀺 𑀅𑀚𑀸𑀬𑀻’𑀢𑀺.

𑀩𑀼𑀤𑁆𑀥𑀖𑁄𑀲𑁄 𑀧𑀦 ‘𑀧𑀡𑁆𑀟𑀺𑀢𑀩𑁆𑀭𑀸𑀳𑁆𑀫𑀡𑁄’𑀢𑀺 𑀜𑀸𑀢𑁄𑀧𑀺 𑀢𑀁 𑀕𑀸𑀣𑀁 𑀦 𑀅𑀜𑁆𑀜𑀸𑀲𑀺. 𑀢𑀣𑀸 𑀳𑀺 𑀢𑁂𑀦 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘𑀢𑁂𑀲𑀁 𑀓𑀺𑀭 𑀅𑀬𑀁 𑀮𑀤𑁆𑀥𑀺 𑁋 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀯𑁂𑀲𑁆𑀲𑀸 𑀦𑀸𑀪𑀺𑀢𑁄, 𑀲𑀼𑀤𑁆𑀤𑀸 𑀚𑀸𑀡𑀼𑀢𑁄, 𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁬𑁩; 𑀫. 𑀦𑀺. 𑀅𑀝𑁆𑀞. 𑁧.𑁫𑁦𑁮] 𑀢𑀺𑀲𑁆𑀲𑀸 𑀯𑁂𑀤𑀕𑀸𑀣𑀸𑀬 𑀅𑀲𑀫𑀸𑀦𑀢𑁆𑀣𑁄 𑀯𑀡𑁆𑀡𑀺𑀢𑁄’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀦𑀼𑀯𑀺𑀘𑀸𑀭𑀡𑀸 𑁋 𑀬𑀤𑀺 𑀘 𑀢𑀁𑀓𑀸𑀮𑀺𑀓𑀸𑀦𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺 𑀢𑀣𑁂𑀯 𑀪𑀯𑁂𑀬𑁆𑀬 𑀬𑀣𑀸 𑀏𑀢𑀺𑀲𑁆𑀲𑀁 𑀕𑀸𑀣𑀸𑀬𑀁 𑀯𑀼𑀢𑁆𑀢𑀸, 𑀲𑀸 𑀘𑀢𑁆𑀣𑀯𑀡𑁆𑀡𑀦𑀸 𑀆𑀘𑀭𑀺𑀬𑀲𑁆𑀲 𑀫𑀢𑀺𑀫𑀢𑁆𑀢𑀸. 𑀏𑀯𑀁 𑀲𑀢𑀺 𑀲𑀸 𑀯𑀺𑀘𑀸𑀭𑀡𑀸 𑀬𑀼𑀢𑁆𑀢𑀸 𑀪𑀯𑁂𑀬𑁆𑀬. 𑀏𑀢𑀺𑀲𑁆𑀲𑀁 𑀧𑀦 𑀕𑀸𑀣𑀸𑀬𑀁 ‘‘𑀩𑁆𑀭𑀸𑀳𑁆𑀫𑀡𑁄𑀲𑁆𑀬 𑀫𑀼𑀔𑀫𑀸𑀲𑀻𑀤𑀺’’𑀢𑀺 𑀧𑀞𑀫𑀧𑀸𑀤𑁂𑀦 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸’’𑀢𑀺 𑀅𑀢𑁆𑀣𑁄 𑀉𑀚𑀼𑀓𑀢𑁄 𑀦 𑀮𑀩𑁆𑀪𑀢𑀺. 𑀩𑀼𑀤𑁆𑀥𑀓𑀸𑀮𑁂 𑀧𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸’’𑀢𑀺 𑀏𑀯𑀫𑁂𑀯 𑀅𑀳𑁄𑀲𑀻𑀢𑀺 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄. 𑀢𑀣𑀸 𑀳𑀺 𑀤𑀻𑀖𑀦𑀺𑀓𑀸𑀬𑁂 𑀧𑀸𑀣𑀺𑀓𑀯𑀕𑁆𑀕𑁂 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 (𑁩, 𑁬𑁭) 𑁋

‘‘𑀤𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦 𑀯𑀸𑀲𑁂𑀝𑁆𑀞 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀺𑀬𑁄 𑀉𑀢𑀼𑀦𑀺𑀬𑁄𑀧𑀺 𑀕𑀩𑁆𑀪𑀺𑀦𑀺𑀬𑁄𑀧𑀺 𑀯𑀺𑀚𑀸𑀬𑀫𑀸𑀦𑀸𑀧𑀺 𑀧𑀸𑀬𑀫𑀸𑀦𑀸𑀧𑀺. 𑀢𑁂 𑀘 𑀩𑁆𑀭𑀸𑀳𑁆𑀫𑀡𑀸 ¶ 𑁦 𑀬𑁄𑀦𑀺𑀚𑀸𑀯 𑀲𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 𑁋 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸. 𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄, 𑀓𑀡𑁆𑀳𑀸 𑀅𑀜𑁆𑀜𑁂 𑀯𑀡𑁆𑀡𑀸. 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸. 𑀩𑁆𑀭𑀸𑀳𑁆𑀫𑀡𑀸𑀯 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸 𑀩𑁆𑀭𑀳𑁆𑀫𑀤𑀸𑀬𑀸𑀤𑀸𑀢𑀺. 𑀢𑁂 𑀩𑁆𑀭𑀳𑁆𑀫𑀸𑀦𑀜𑁆𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀫𑀼𑀲𑀸 𑀘 𑀪𑀸𑀲𑀦𑁆𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺 𑁋

𑀪𑀕𑀯𑀢𑀸 𑀫𑀳𑀸𑀓𑀸𑀭𑀼𑀡𑀺𑀓𑁂𑀦 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑀸𑀦𑀁 𑀪𑀸𑀲𑀺𑀢𑀁, 𑀢𑁂𑀳𑀺 𑀘 𑀢𑀁 𑀅𑀪𑀺𑀦𑀦𑁆𑀤𑀺𑀢𑀁. 𑀢𑁂 𑀧𑀦 𑀤𑁆𑀯𑁂𑀧𑀺 𑀫𑀸𑀡𑀯𑀓𑀸 𑀚𑀸𑀢𑀺𑀯𑀲𑁂𑀦 𑀧𑀭𑀺𑀲𑀼𑀤𑁆𑀥𑀩𑁆𑀭𑀸𑀳𑁆𑀫𑀡𑀸 𑀘𑁂𑀯 𑀳𑁄𑀦𑁆𑀢𑀺 𑀢𑀺𑀡𑁆𑀡𑀫𑁆𑀧𑀺 𑀯𑁂𑀤𑀸𑀦𑀁 𑀧𑀸𑀭𑀕𑀼𑀦𑁄 𑀘. 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸’’𑀢𑀺 𑀯𑀘𑀦𑀲𑁆𑀲 𑀢𑀁𑀓𑀸𑀮𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑁄 𑀧𑀸𑀓𑀝𑁄𑀬𑁂𑀯. 𑀬𑀣𑀸 𑀘𑁂𑀢𑀁, 𑀏𑀯𑀁 ‘‘𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀯𑁂𑀲𑁆𑀲𑀸 𑀦𑀸𑀪𑀺𑀢𑁄, 𑀲𑀼𑀤𑁆𑀤𑀸 𑀚𑀸𑀡𑀼𑀢𑁄, 𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’’𑀢𑀺 𑀯𑀘𑀦𑀫𑁆𑀧𑀺 ‘‘𑀢𑀁𑀓𑀸𑀮𑀺𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺𑀜𑁆𑀜𑀽𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀢𑀁 𑀲𑀩𑁆𑀩𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀢𑁄 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀧𑀓𑀸𑀲𑀺𑀢𑀁 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀢𑀸𑀬𑀧𑀺 𑀯𑁂𑀤𑀕𑀸𑀣𑀸𑀬 𑀆𑀘𑀭𑀺𑀬𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑀸𑀥𑀦𑀁 𑀅𑀦𑀼𑀧𑀧𑀦𑁆𑀦𑀫𑁂𑀯𑀸𑀢𑀺.

(𑀔) 𑀧𑀼𑀦𑀧𑀺 𑀢𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑀸𑀥𑀦𑀢𑁆𑀣𑀁 𑀤𑀼𑀢𑀺𑀬𑀫𑁆𑀧𑀺 𑀓𑀸𑀭𑀡𑀁 𑀏𑀯𑀫𑀸𑀳𑀝𑀁 𑁋

‘‘𑀩𑁆𑀭𑀸𑀳𑁆𑀫𑀡𑀕𑀦𑁆𑀣𑁂𑀲𑀼 𑀕𑀩𑁆𑀪𑀖𑀸𑀢𑀯𑀸𑀘𑀓𑀁 𑀪𑁆𑀭𑀽𑀦𑀳𑀸𑀢𑀺 𑀧𑀤𑀁 𑀧𑀸𑀴𑀺𑀬𑀁 𑀪𑀽𑀦𑀳𑀼 (𑀪𑀽𑀦𑀳𑀦𑁄) 𑀇𑀢𑀺 𑀤𑀺𑀲𑁆𑀲𑀢𑀺. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑁂 𑀪𑀭𑀺𑀬𑀸𑀬 𑀫𑁂𑀣𑀼𑀦𑀲𑀁𑀯𑀸𑀲𑀸𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀕𑀩𑁆𑀪𑀲𑁆𑀲 𑀦𑀸𑀲𑀓𑀢𑁆𑀢𑀁 𑀲𑀦𑁆𑀥𑀸𑀬 𑀫𑀸𑀕𑀡𑁆𑀟𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 ‘𑀪𑀽𑀦𑀳𑀼 (𑀪𑀽𑀦𑀳𑀦𑁄) 𑀲𑀫𑀡𑁄 𑀕𑁄𑀢𑀫𑁄’𑀢𑀺 [𑀫. 𑀦𑀺. 𑁨.𑁨𑁦𑁭 𑀆𑀤𑀬𑁄] 𑀆𑀳. 𑀢𑀁 𑀩𑀼𑀤𑁆𑀥𑀖𑁄𑀲𑁄 𑀦 𑀚𑀸𑀦𑀸𑀢𑀻𑀢𑀺 𑀧𑀸𑀓𑀝𑁄𑀬𑁂𑀯 𑀢𑀤𑀢𑁆𑀣𑀲𑀁𑀯𑀡𑁆𑀡𑀦𑀸𑀬. 𑀢𑀢𑁆𑀣 𑀳𑀺 𑀢𑁂𑀦 𑀪𑀽𑀦𑀳𑀼𑀦𑁄𑀢𑀺 (𑀪𑀽𑀦𑀳𑀦𑀲𑁆𑀲𑀸) 𑀧𑀤𑀁 ‘𑀳𑀢𑀯𑀟𑁆𑀠𑀺𑀦𑁄 𑀫𑀭𑀺𑀬𑀸𑀤𑀓𑀸𑀭𑀓𑀲𑁆𑀲𑀸’𑀢𑀺 [𑀫. 𑀦𑀺. 𑀅𑀝𑁆𑀞. 𑁨.𑁨𑁦𑁭] 𑀯𑀡𑁆𑀡𑀺𑀢’’𑀦𑁆𑀢𑀺.

𑀢𑀫𑁆𑀧𑀺 𑀅𑀬𑀼𑀢𑁆𑀢𑀫𑁂𑀯. 𑀦 𑀳𑀺 𑀫𑀸𑀕𑀡𑁆𑀟𑀺𑀬𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸𑀧𑀭𑀺𑀪𑁄𑀕𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀪𑀽𑀦𑀳𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀅𑀣 𑀔𑁄 𑀙𑀦𑁆𑀦𑀫𑁆𑀧𑀺 𑀮𑁄𑀓𑀸𑀫𑀺𑀲𑀸𑀭𑀫𑁆𑀫𑀡𑀸𑀦𑀁 𑀅𑀧𑀭𑀺𑀪𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑁋

‘‘𑀘𑀓𑁆𑀔𑀼𑀁 ¶ 𑀔𑁄 𑀫𑀸𑀕𑀡𑁆𑀟𑀺𑀬 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢𑀁, 𑀢𑀁 𑀢𑀣𑀸𑀕𑀢𑀲𑁆𑀲 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀲𑀁𑀯𑀼𑀢𑀁, 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀤𑀁 𑀦𑀼 𑀢𑁂 𑀏𑀢𑀁 𑀫𑀸𑀕𑀡𑁆𑀟𑀺𑀬 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀪𑀽𑀦𑀳𑀼 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀏𑀢𑀤𑁂𑀯 𑀔𑁄 𑀧𑀦 𑀫𑁂 𑀪𑁄 𑀕𑁄𑀢𑀫 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀪𑀽𑀦𑀳𑀼 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀏𑀯𑀜𑁆𑀳𑀺 𑀦𑁄 𑀲𑀼𑀢𑁆𑀢𑁂 𑀑𑀘𑀭𑀢𑀻𑀢𑀺…𑀧𑁂… 𑀫𑀦𑁄 𑀔𑁄 𑀫𑀸𑀕𑀡𑁆𑀟𑀺𑀬 𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄 𑀥𑀫𑁆𑀫𑀲𑀫𑁆𑀫𑀼𑀤𑀺𑀢𑁄, 𑀲𑁄 𑀢𑀣𑀸𑀕𑀢𑀲𑁆𑀲 𑀤𑀦𑁆𑀢𑁄 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄, 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀤𑀁 𑀦𑀼 𑀢𑁂 𑀏𑀢𑀁 𑀫𑀸𑀕𑀡𑁆𑀟𑀺𑀬 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀪𑀽𑀦𑀳𑀼 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀏𑀢𑀤𑁂𑀯 𑀔𑁄 𑀧𑀦 𑀫𑁂 𑀪𑁄 𑀕𑁄𑀢𑀫 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀪𑀽𑀦𑀳𑀼 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀏𑀯𑀜𑁆𑀳𑀺 𑀦𑁄 𑀲𑀼𑀢𑁆𑀢𑁂 𑀑𑀘𑀭𑀢𑀻’’𑀢𑀺 [𑀫. 𑀦𑀺. 𑁨.𑁨𑁦𑁭 𑀆𑀤𑀬𑁄].

𑀏𑀯𑀁 𑀪𑀕𑀯𑀢𑁄 𑀘 𑀅𑀦𑀼𑀬𑁄𑀕𑁄 𑀫𑀸𑀕𑀡𑁆𑀟𑀺𑀬𑀲𑁆𑀲 𑀘 𑀧𑀝𑀺𑀜𑁆𑀜𑀸 𑀆𑀕𑀢𑀸.

𑀏𑀢𑁆𑀣 𑀳𑀺 𑀫𑁂𑀣𑀼𑀦𑀧𑁆𑀧𑀝𑀺𑀲𑁂𑀯𑀦𑀯𑀲𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀧𑀭𑀺𑀪𑁄𑀕𑀳𑁂𑀢𑀼 𑀏𑀯 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀁 𑀲𑀫𑁆𑀪𑀯𑀢𑀻𑀢𑀺 𑀢𑀤𑀧𑀭𑀺𑀪𑁄𑀕𑀫𑁂𑀯 𑀲𑀦𑁆𑀥𑀸𑀬 ‘‘𑀪𑀽𑀦𑀳𑀽’’𑀢𑀺 𑀯𑀢𑁆𑀢𑀼𑀁 𑀅𑀭𑀳𑀢𑀺, 𑀢𑀤𑀜𑁆𑀜𑁂𑀲𑀁 𑀧𑀦 𑀧𑀜𑁆𑀘𑀦𑁆𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑀢𑁄 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀲𑀼𑀤𑁆𑀥𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀧𑀭𑀺𑀪𑁄𑀕𑀳𑁂𑀢𑀼 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀅𑀧𑀭𑀺𑀪𑁄𑀕𑀁 𑀲𑀦𑁆𑀥𑀸𑀬 𑀪𑀽𑀦𑀳𑀽𑀢𑀺 𑀯𑀢𑁆𑀢𑀼𑀁 𑀦 𑀅𑀭𑀳𑀢𑀺𑀬𑁂𑀯, 𑀫𑀸𑀕𑀡𑁆𑀟𑀺𑀬𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀪𑀸𑀯𑁄 𑀧𑀝𑀺𑀜𑁆𑀜𑀸𑀢𑁄, 𑀓𑀸𑀭𑀡𑀜𑁆𑀘𑀲𑁆𑀲 𑀤𑀲𑁆𑀲𑀺𑀢𑀁 ‘‘𑀏𑀯𑀜𑁆𑀳𑀺 𑀦𑁄 𑀲𑀼𑀢𑁆𑀢𑁂 𑀑𑀘𑀭𑀢𑀻’’𑀢𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑀕𑀦𑁆𑀣𑁂𑀲𑀼 𑀪𑀽𑀦𑀳𑀼- (𑀪𑁆𑀭𑀽𑀦𑀳𑀸) 𑀲𑀤𑁆𑀤𑁄 𑀕𑀩𑁆𑀪𑀖𑀸𑀢𑀦𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑁂 𑀧𑀦𑁂𑀲𑁄 𑀅𑀢𑁆𑀣𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀆𑀘𑀭𑀺𑀬𑁂𑀦 ‘‘𑀳𑀢𑀯𑀟𑁆𑀠𑀺 𑀫𑀭𑀺𑀬𑀸𑀤𑀓𑀸𑀭𑀓𑁄’’𑀢𑀺 𑀅𑀬𑀫𑁂𑀯𑀢𑁆𑀣𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

(𑀕) 𑀧𑀼𑀦𑀧𑀺 𑀢𑁂𑀦 ‘‘𑀇𑀤𑀫𑁆𑀧𑀦 𑀩𑀼𑀤𑁆𑀥𑀖𑁄𑀲𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑀸𑀥𑀓𑀁 𑀧𑀘𑁆𑀙𑀺𑀫𑀓𑀸𑀭𑀡𑀁, 𑀲𑁄 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀻𑀮𑀦𑀺𑀤𑁆𑀤𑁂𑀲𑁂 (𑁧, 𑁩𑁧) 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 ‘𑀏𑀯𑀁 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑁂𑀯𑀦𑁂𑀦 𑀧𑀼𑀭𑀸𑀡𑀜𑁆𑀘 𑀚𑀺𑀖𑀘𑁆𑀙𑀸𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀅𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀁 𑀆𑀳𑀭𑀳𑀢𑁆𑀣𑀓 𑀅𑀮𑀁𑀲𑀸𑀝𑀓 𑀢𑀢𑁆𑀭𑀯𑀝𑁆𑀝𑀓 𑀓𑀸𑀓𑀫𑀸𑀲𑀓 𑀪𑀼𑀢𑁆𑀢𑀯𑀫𑀺𑀢𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑁄 ¶ 𑀯𑀺𑀬 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀲𑁂𑀯𑀢𑀻’𑀢𑀺 𑀆𑀳. 𑀇𑀤𑀁 𑀧𑀦 𑀏𑀓𑀲𑁆𑀲 𑀪𑀺𑀦𑁆𑀦𑀩𑁆𑀭𑀸𑀳𑁆𑀫𑀡𑀮𑀤𑁆𑀥𑀺𑀓𑀲𑁆𑀲𑀸𑀧𑀺 𑀯𑀘𑀦𑀁 𑀲𑀺𑀬𑀸𑀢𑀺 𑀢𑀤𑁂𑀯 𑀤𑀴𑁆𑀳𑀓𑀸𑀭𑀡𑀁 𑀓𑀢𑁆𑀯𑀸 𑀦 𑀲𑀓𑁆𑀓𑀸 ‘𑀩𑀼𑀤𑁆𑀥𑀖𑁄𑀲𑁄 𑀅𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀢𑁆𑀢𑀼’’𑀦𑁆𑀢𑀺 𑀢𑀢𑀺𑀬𑀁 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀧𑀦 𑀅𑀢𑀺𑀲𑀁𑀯𑁂𑀚𑀦𑀻𑀬𑀯𑀘𑀦𑀫𑁂𑀯. 𑀦 𑀳𑁂𑀢𑀁 𑀆𑀘𑀭𑀺𑀬𑁂𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀳𑀸𑀲𑀁 𑀓𑀸𑀢𑀼𑀓𑀸𑀫𑁂𑀦 𑀯𑀼𑀢𑁆𑀢𑀁, 𑀦 𑀘 𑀢𑀁 𑀧𑀭𑀺𑀳𑀸𑀲𑀯𑀘𑀦𑁂𑀦 𑀲𑀁𑀬𑁄𑀚𑁂𑀢𑀩𑁆𑀩𑀝𑁆𑀞𑀸𑀦𑀁, 𑀅𑀜𑁆𑀜𑀤𑀢𑁆𑀣𑀼 𑀬𑀣𑀸𑀪𑀽𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀤𑀸𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑀁, 𑀢𑀣𑀸𑀬𑁂𑀯 𑀘 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀬𑁂 𑀮𑁄𑀓𑁂 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀜𑁆𑀜𑁂 𑀯𑀸𑀧𑀺 𑀘 𑀧𑀼𑀕𑁆𑀕𑀮𑀸, 𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀭𑀳𑀺𑀢𑀸 𑀅𑀲𑀁𑀯𑀭𑁂 𑀞𑀺𑀢𑀸 𑀓𑀤𑀸𑀘𑀺 𑀅𑀢𑀺𑀧𑀡𑀻𑀢𑀁 𑀭𑀲𑀁 𑀧𑀳𑀽𑀢𑀁 𑀮𑀤𑁆𑀥𑀸 𑀅𑀧𑀭𑀺𑀫𑀺𑀢𑀫𑁆𑀧𑀺 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀯𑀺𑀲𑁂𑀲𑀢𑁄 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀺𑀓𑀯𑀢𑁆𑀣𑀼𑀯𑀲𑁂𑀦 𑀘, 𑀚𑀸𑀢𑀓𑀸𑀤𑀺𑀲𑀸𑀲𑀦𑀺𑀓𑀯𑀢𑁆𑀣𑀼𑀯𑀲𑁂𑀦 𑀘 𑀢𑀸𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀧𑀸𑀓𑀝𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀮𑁄𑀓𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑁂𑀳𑀺 𑀯𑀸 𑀯𑀲𑁆𑀲𑀓𑁄𑀝𑀻𑀳𑀺 𑀯𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀤𑁆𑀥𑀸𑀦𑁂 𑀓𑁄 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀦𑁂𑀤𑀺𑀲𑀸 𑀪𑀽𑀢𑀧𑀼𑀩𑁆𑀩𑀸’’𑀢𑀺. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀳𑀺 𑀯𑀺𑀬 𑀦 𑀅𑀧𑀭𑀺𑀫𑀺𑀢𑀪𑁄𑀚𑀦𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀤𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀤𑁂𑀯𑀁 𑀅𑀢𑁆𑀣𑀲𑀁𑀳𑀺𑀢𑀫𑁆𑀧𑀺 𑀲𑀫𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀅𑀦𑀢𑁆𑀣𑀫𑁂𑀯 𑀚𑀸𑀢𑀁, 𑀬𑀣𑀸 𑀲𑀪𑀭𑀺𑀬𑀲𑁆𑀲 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀨𑀮𑀢𑁆𑀣𑀸𑀬𑀧𑀺 𑀤𑁂𑀲𑀺𑀢𑀸 𑀕𑀸𑀣𑀸 [𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼] 𑀢𑁂𑀲𑀁 𑀥𑀻𑀢𑀼𑀬𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀲𑀁𑀯𑁂𑀕𑁄𑀬𑁂𑀯𑁂𑀢𑁆𑀣 𑀩𑁆𑀭𑀽𑀳𑁂𑀢𑀩𑁆𑀩𑁄𑀢𑀺.

𑀧𑀢𑀜𑁆𑀚𑀮𑀺𑀯𑀸𑀤𑀯𑀺𑀘𑀸𑀭𑀡𑀸

𑁩. 𑀅𑀣 𑀢𑁂𑀦 ‘‘𑀧𑀸𑀢𑀜𑁆𑀚𑀮𑀻𑀫𑀢𑀁 𑀧𑀭𑀺𑀯𑀢𑁆𑀢𑁂𑀢𑀻’’𑀢𑀺 𑀯𑀘𑀦𑀫𑁆𑀧𑀺 𑀏𑀯𑀁 𑀯𑀺𑀘𑀸𑀭𑀺𑀢𑀁.

(𑀓) ‘‘𑀩𑀼𑀤𑁆𑀥𑀖𑁄𑀲𑁄 𑀧𑀢𑀜𑁆𑀚𑀮𑀺𑀲𑁆𑀲 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀉𑀢𑁆𑀢𑀭𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀸𑀦𑀁 𑀯𑀸𑀤𑀁 𑀅𑀧𑁆𑀧𑀓𑀫𑁂𑀯 𑀅𑀜𑁆𑀜𑀸𑀲𑀺. 𑀧𑀢𑀜𑁆𑀚𑀮𑀺𑀯𑀸𑀤𑁂𑀲𑀼 𑀳𑀺 𑀅𑀡𑀺𑀫𑀸 𑀮𑀖𑀺𑀫𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀤𑀲𑁆𑀲𑁂𑀲𑀺 [𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪] 𑀢𑀢𑀼𑀢𑁆𑀢𑀭𑀺 𑀬𑁄𑀕𑀲𑀼𑀢𑁆𑀢𑀁 𑀅𑀚𑀸𑀦𑀦𑁆𑀢𑁄, 𑀧𑀢𑀜𑁆𑀚𑀮𑀺𑀯𑀸𑀤𑀲𑁆𑀲 𑀘 𑀢𑀼𑀮𑁂𑀢𑁆𑀯𑀸 𑀤𑀻𑀧𑀦𑀸 𑀢𑀲𑁆𑀲 𑀕𑀦𑁆𑀣𑁂𑀲𑀼 𑀦 𑀤𑀺𑀲𑁆𑀲𑀢𑀺, 𑀧𑀢𑀜𑁆𑀚𑀮𑀺𑀦𑀸 𑀓𑀢𑀧𑀓𑀭𑀡𑀜𑁆𑀘 𑀧𑀢𑀜𑁆𑀚𑀮𑀻𑀢𑀺 𑀦𑀸𑀫𑀫𑀢𑁆𑀢𑀫𑁆𑀧𑀺 𑀘 𑀢𑀢𑁆𑀣 𑀤𑀻𑀧𑀺𑀢𑀁 𑀦𑀢𑁆𑀣𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 𑀧𑀜𑁆𑀜𑀸𑀪𑀽𑀫𑀺𑀦𑀺𑀤𑁆𑀤𑁂𑀲𑁂 ‘𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬𑀸’𑀢𑀺 [𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁪] 𑀧𑀓𑀢𑀺𑀯𑀸𑀤 (𑀲𑀁𑀔𑁆𑀬𑀸𑀯𑀸𑀤) 𑀦𑀸𑀫𑀫𑀢𑁆𑀢𑀁 𑀧𑀓𑀸𑀲𑀺𑀢𑀁, 𑀢𑀢𑁆𑀣𑁂𑀯 𑀘 ‘𑀧𑀝𑀺𑀜𑁆𑀜𑀸 𑀳𑁂𑀢𑀽𑀢𑀺𑀆𑀤𑀻𑀲𑀼 𑀳𑀺 𑀮𑁄𑀓𑁂 𑀯𑀘𑀦𑀸𑀯𑀬𑀯𑁄 ¶ 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀻’𑀢𑀺 [𑀯𑀺𑀲𑀼𑀤𑁆𑀥𑀺. 𑁨.𑁫𑁯𑁫] 𑀉𑀤𑀸𑀳𑀭𑀺𑀢𑀁, 𑀢𑁂𑀦 𑀜𑀸𑀬𑀢𑀺 ‘𑀩𑀼𑀤𑁆𑀥𑀖𑁄𑀲𑁄 𑀇𑀦𑁆𑀤𑀺𑀬𑀢𑀓𑁆𑀓𑀦𑀬𑀤𑀻𑀧𑀓𑁂 𑀜𑀸𑀬𑀕𑀦𑁆𑀣𑀲𑁆𑀫𑀺𑀁 𑀓𑀺𑀜𑁆𑀘𑀺 𑀫𑀽𑀮𑀪𑀸𑀕𑀫𑀢𑁆𑀢𑀁 𑀅𑀧𑀭𑀺𑀧𑀼𑀡𑁆𑀡𑀁 𑀚𑀸𑀦𑀸𑀢𑀻’𑀢𑀺’’.

𑀢𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀓𑁂𑀯𑀮𑀁 𑀆𑀘𑀭𑀺𑀬𑀲𑁆𑀲 𑀅𑀩𑁆𑀪𑀸𑀘𑀺𑀓𑁆𑀔𑀡𑀫𑀢𑁆𑀢𑀫𑁂𑀯. 𑀅𑀢𑀺𑀕𑀫𑁆𑀪𑀻𑀭𑀲𑁆𑀲 𑀳𑀺 𑀅𑀢𑀺𑀕𑀭𑀼𑀓𑀸𑀢𑀩𑁆𑀩𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀧𑀺𑀝𑀓𑀢𑁆𑀢𑀬𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑁄𑀬𑁂𑀯 𑀧𑀸𑀴𑀺𑀦𑀬𑁄 𑀘 𑀅𑀝𑁆𑀞𑀓𑀣𑀸𑀦𑀬𑁄 𑀘 𑀧𑁄𑀭𑀸𑀡𑀣𑁂𑀭𑀯𑀸𑀤𑀸 𑀘𑀸𑀢𑀺 𑀈𑀤𑀺𑀲𑀸𑀬𑁂𑀯 𑀅𑀢𑁆𑀣𑀸 𑀧𑀓𑀸𑀲𑁂𑀢𑀩𑁆𑀩𑀸, 𑀬𑀁 𑀯𑀸 𑀧𑀦 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀉𑀧𑀓𑀸𑀭𑀓𑀁 𑀲𑀤𑁆𑀤𑀯𑀺𑀦𑀺𑀘𑁆𑀙𑀬𑀧𑀝𑀺𑀲𑀁𑀬𑀼𑀢𑁆𑀢𑀁 𑀮𑁄𑀓𑀺𑀬𑀕𑀦𑁆𑀣𑀯𑀘𑀦𑀁, 𑀢𑀤𑁂𑀯 𑀘 𑀬𑀣𑀸𑀭𑀳𑀁 𑀧𑀓𑀸𑀲𑁂𑀢𑀩𑁆𑀩𑀁, 𑀦 𑀧𑀦 𑀅𑀦𑀼𑀧𑀓𑀸𑀭𑀸𑀦𑀺𑀧𑀺 𑀢𑀁𑀢𑀁𑀕𑀦𑁆𑀣𑀢𑀓𑁆𑀓𑀢𑁆𑀢𑀼𑀦𑀸𑀫𑀸𑀦𑀺 𑀘, 𑀢𑁂𑀳𑀺 𑀯𑀼𑀢𑁆𑀢𑀯𑀘𑀦𑀸𑀦𑀺 𑀘 𑀩𑀳𑀽𑀦𑀺, 𑀦 𑀘 𑀢𑁂𑀲𑀁 𑀅𑀧𑁆𑀧𑀓𑀸𑀲𑀦𑁂𑀦 ‘‘𑀦 𑀢𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀤𑀺 𑀳𑀺 𑀬𑀁 𑀬𑀁 𑀮𑁄𑀓𑀺𑀬𑀕𑀦𑁆𑀣𑀁 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺, 𑀢𑀁 𑀲𑀩𑁆𑀩𑀁 𑀅𑀦𑀼𑀧𑀓𑀸𑀭𑀫𑁆𑀧𑀺 𑀅𑀢𑁆𑀢𑀦𑁄 𑀅𑀝𑁆𑀞𑀓𑀣𑀸𑀬𑀫𑀸𑀦𑁂𑀢𑁆𑀯𑀸 𑀧𑀓𑀸𑀲𑁂𑀬𑁆𑀬, 𑀅𑀢𑀺𑀯𑀺𑀢𑁆𑀣𑀸𑀭𑀸 𑀘 𑀲𑀸 𑀪𑀯𑁂𑀬𑁆𑀬 𑀅𑀧𑀭𑀺𑀲𑀼𑀤𑁆𑀥𑀸 𑀘 𑀅𑀲𑀫𑁆𑀫𑀸𑀦𑀺𑀢𑀸 𑀘 𑀲𑀸𑀲𑀦𑀺𑀓𑀯𑀺𑀜𑁆𑀜𑀽𑀳𑀻𑀢𑀺 𑀆𑀘𑀭𑀺𑀬𑁂𑀦 𑀧𑀢𑀜𑁆𑀚𑀮𑀺𑀯𑀸𑀤𑀸𑀤𑀬𑁄 𑀦 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀺𑀢𑀸𑀢𑀺 𑀜𑀸𑀢𑀩𑁆𑀩𑀁, 𑀅𑀜𑁆𑀜𑀤𑀢𑁆𑀣𑀼 𑀬𑁂𑀳𑀺 𑀬𑁂𑀳𑀺 𑀮𑁄𑀓𑀺𑀬𑀕𑀦𑁆𑀣𑁂𑀳𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀆𑀘𑀭𑀺𑀬𑁂𑀦 𑀆𑀦𑁂𑀢𑁆𑀯𑀸 𑀧𑀓𑀸𑀲𑀺𑀢𑀁, 𑀢𑁂 𑀢𑁂 𑀘 𑀕𑀦𑁆𑀣𑀸, 𑀅𑀜𑁆𑀜𑁂𑀧𑀺 𑀘 𑀢𑀸𑀤𑀺𑀲𑀸 𑀆𑀘𑀭𑀺𑀬𑁂𑀦 𑀜𑀸𑀢𑀸𑀢𑁆𑀯𑁂𑀯 𑀚𑀸𑀦𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺, 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲 𑀏𑀓𑀤𑁂𑀲𑀁 𑀤𑀺𑀲𑁆𑀯𑀸 𑀲𑀩𑁆𑀩𑁄𑀧𑀺 𑀲𑀫𑀼𑀤𑁆𑀤𑁄 𑀏𑀤𑀺𑀲𑁄𑀢𑀺 𑀜𑀸𑀬𑀢𑀺. 𑀆𑀘𑀭𑀺𑀬𑁄 𑀧𑀦 𑀬𑀢𑁆𑀣 𑀬𑀢𑁆𑀣 𑀯𑁂𑀤𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀸𑀦𑀺 𑀆𑀕𑀢𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀯𑁂𑀤𑀕𑀦𑁆𑀣𑁂𑀳𑀺𑀧𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀆𑀦𑁂𑀢𑁆𑀯𑀸 𑀧𑀓𑀸𑀲𑁂𑀲𑀺𑀬𑁂𑀯. 𑀢𑀣𑀸 𑀳𑀺 𑀆𑀘𑀭𑀺𑀬𑁂𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 𑀦𑀸𑀫 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑁋

‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦’’𑀦𑁆𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁬] 𑀘,

‘‘𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀅𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦’’𑀦𑁆𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁬] 𑀘,

‘‘𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑀸𑀕𑁄’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨] 𑀘,

‘‘𑀅𑀕𑁆𑀕𑀺𑀳𑁄𑀫𑀦𑁆𑀢𑀺 ¶ 𑀏𑀯𑀭𑀽𑀧𑁂𑀦 𑀤𑀸𑀭𑀼𑀦𑀸 𑀏𑀯𑀁 𑀳𑀼𑀢𑁂 𑀇𑀤𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀕𑁆𑀕𑀺𑀚𑀼𑀳𑀦𑀁. 𑀤𑀩𑁆𑀩𑀺𑀳𑁄𑀫𑀸𑀤𑀻𑀦𑀺𑀧𑀺 𑀅𑀕𑁆𑀕𑀺𑀳𑁄𑀫𑀸𑀦𑁂𑀯, 𑀏𑀯𑀭𑀽𑀧𑀸𑀬 𑀤𑀩𑁆𑀩𑀺𑀬𑀸 𑀈𑀤𑀺𑀲𑁂𑀳𑀺 𑀓𑀡𑀸𑀤𑀻𑀳𑀺 𑀳𑀼𑀢𑁂 𑀇𑀤𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀦 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀻’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧] 𑀘,

‘‘𑀲𑀸𑀲𑀧𑀸𑀤𑀻𑀦𑀺 𑀧𑀦 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀦𑀁, 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀚𑀼𑀳𑀦𑀁 𑀯𑀸 𑀫𑀼𑀔𑀳𑁄𑀫’’𑀦𑁆𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧] 𑀘 𑁋

𑀏𑀯𑀫𑀸𑀤𑀺𑀦𑀸 𑀯𑁂𑀤𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀸𑀦𑀺 𑀯𑁂𑀤𑀕𑀦𑁆𑀣𑀸𑀦𑀼𑀭𑀽𑀧𑀢𑁄 𑀯𑀡𑁆𑀡𑀺𑀢𑀸𑀦𑀺. 𑀢𑀸𑀦𑀺 𑀘 𑀧𑁄𑀭𑀸𑀡𑀝𑁆𑀞𑀓𑀣𑀸𑀢𑁄 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺𑀧𑀺 𑀪𑀯𑁂𑀬𑁆𑀬𑀼𑀁, 𑀯𑁂𑀤𑀕𑀦𑁆𑀣𑁂𑀲𑀼 𑀧𑀦 𑀅𑀓𑁄𑀯𑀺𑀤𑁂𑀦 𑀬𑀸𑀣𑀸𑀯𑀢𑁄 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀁 𑀓𑀸𑀢𑀼𑀫𑁆𑀧𑀺 𑀦 𑀲𑀼𑀓𑀭𑀫𑁂𑀯, 𑀢𑀲𑁆𑀫𑀸 𑀆𑀘𑀭𑀺𑀬𑀲𑁆𑀲 𑀯𑁂𑀤𑀕𑀦𑁆𑀣𑁂𑀲𑀼 𑀓𑁄𑀯𑀺𑀤𑀪𑀸𑀯𑁄𑀧𑀺 𑀧𑀸𑀓𑀝𑁄𑀬𑁂𑀯. 𑀏𑀯𑀁 𑀯𑁂𑀤𑀕𑀦𑁆𑀣𑁂𑀲𑀼 𑀘 𑀢𑀤𑀜𑁆𑀜𑀮𑁄𑀓𑀺𑀬𑀕𑀦𑁆𑀣𑁂𑀲𑀼 𑀘 𑀲𑀼𑀓𑁄𑀯𑀺𑀤𑀲𑁆𑀲𑁂𑀯 𑀲𑀫𑀸𑀦𑀲𑁆𑀲 𑀢𑁂𑀲𑀁 𑀯𑀺𑀢𑁆𑀣𑀸𑀭𑀢𑁄 𑀅𑀧𑁆𑀧𑀓𑀸𑀲𑀦𑀁 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺 𑀘 𑀆𑀘𑀭𑀺𑀬𑁄 𑀅𑀢𑁆𑀢𑀦𑁄 𑀕𑀦𑁆𑀣𑀸𑀭𑀫𑁆𑀪𑁂𑀬𑁂𑀯 𑁋

‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸,

𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸;

𑀯𑀺𑀦𑀺𑀘𑁆𑀙𑀬𑀁 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸…𑀧𑁂…

𑀬𑀲𑁆𑀫𑀸 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀡𑁆𑀡𑀦𑀸𑀧𑀻’’𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁, 𑀲𑀻𑀳𑀴𑀪𑀸𑀲𑀁 𑀫𑀦𑁄𑀭𑀫𑀁 𑀪𑀸𑀲𑀁;

𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀁, 𑀆𑀭𑁄𑀧𑁂𑀢𑁆𑀯𑀸 𑀯𑀺𑀕𑀢𑀤𑁄𑀲𑀁.

𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄, 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀧𑀤𑀻𑀧𑀸𑀦𑀁;

𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸𑀦𑀁, 𑀫𑀳𑀸𑀯𑀺𑀳𑀸𑀭𑁂 𑀦𑀺𑀯𑀸𑀲𑀺𑀦𑀁;

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢-𑀫𑀢𑁆𑀣𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘𑁋

𑀏𑀯𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀲𑀁𑀔𑀺𑀧𑀦𑀯𑀲𑁂𑀦𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀅𑀪𑀺𑀦𑀯𑀝𑁆𑀞𑀓𑀣𑀸𑀬𑁄 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀫𑁂𑀯 𑀅𑀓𑀸𑀲𑀺, 𑀦 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 ¶ 𑀧𑀢𑀜𑁆𑀚𑀮𑀺𑀯𑀸𑀤𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑀢𑁄 𑀅𑀧𑁆𑀧𑀓𑀸𑀲𑀦𑀫𑀸𑀭𑀩𑁆𑀪 ‘‘𑀩𑀼𑀤𑁆𑀥𑀖𑁄𑀲𑁄 𑀧𑀢𑀜𑁆𑀚𑀮𑀺𑀯𑀸𑀤𑀸𑀤𑀻𑀦𑀺 𑀧𑀭𑀺𑀧𑀼𑀡𑁆𑀡𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀘𑀦𑀁 𑀓𑁂𑀯𑀮𑀁 𑀆𑀘𑀭𑀺𑀬𑀲𑁆𑀲 𑀅𑀩𑁆𑀪𑀸𑀘𑀺𑀓𑁆𑀔𑀡𑀫𑀢𑁆𑀢𑀫𑁂𑀯𑀸𑀢𑀺.

𑀓𑀩𑁆𑀩𑀲𑀢𑁆𑀣𑀯𑀺𑀘𑀸𑀭𑀡𑀸

𑁪. 𑀧𑀼𑀦𑀧𑀺 𑀲𑁄 𑀏𑀯𑀫𑀸𑀳 ‘‘𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀖𑁄𑀲𑁄 𑀭𑀸𑀫𑀸𑀬𑀡𑀫𑀳𑀸𑀪𑀸𑀭𑀢𑀲𑀗𑁆𑀔𑀸𑀢𑀸𑀦𑀁 𑀫𑀳𑀸𑀓𑀩𑁆𑀩𑀲𑀢𑁆𑀣𑀸𑀦𑀁 𑀲𑀼𑀓𑀼𑀲𑀮𑁄 𑀯𑀺𑀬 𑀦 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀸𑀦𑀺 𑀤𑀲𑁆𑀲𑁂𑀲𑀺. 𑀓𑀣𑀁? 𑀅𑀓𑁆𑀔𑀸𑀦𑀦𑁆𑀢𑀺 𑀪𑀸𑀭𑀢𑀬𑀼𑀚𑁆𑀛𑀦𑀸𑀤𑀺𑀓𑀁, 𑀢𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀣𑀻𑀬𑀢𑀺, 𑀢𑀢𑁆𑀣 𑀕𑀦𑁆𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁩] 𑀘, 𑀢𑀲𑁆𑀲 (𑀲𑀫𑁆𑀨𑀧𑀮𑀸𑀧𑀲𑁆𑀲) 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸𑀧𑀼𑀭𑁂𑀓𑁆𑀔𑀸𑀭𑀢𑀸 𑀢𑀣𑀸𑀭𑀽𑀧𑀺𑀓𑀣𑀸𑀓𑀣𑀦𑀜𑁆𑀘𑀸𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁮] 𑀘 𑀤𑀲𑁆𑀲𑁂𑀲𑀻’’𑀢𑀺.

𑀢𑀁 𑀧𑀦 𑀧𑀼𑀭𑀺𑀫𑀯𑀘𑀦𑀢𑁄𑀧𑀺 𑀅𑀳𑁂𑀢𑀼𑀓𑀢𑀭𑀁 𑀓𑁂𑀯𑀮𑀁 𑀅𑀦𑀸𑀤𑀭𑀻𑀓𑀭𑀡𑀫𑀢𑁆𑀢𑀫𑁂𑀯. 𑀅𑀢𑀺𑀕𑀫𑁆𑀪𑀻𑀭𑀢𑁆𑀣𑀲𑁆𑀲 𑀳𑀺 𑀅𑀢𑀺𑀕𑀭𑀼𑀓𑀭𑀡𑀻𑀬𑀲𑁆𑀲 𑀧𑀺𑀝𑀓𑀢𑁆𑀢𑀬𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 𑀦𑀺𑀭𑀢𑁆𑀣𑀓𑀲𑁆𑀲 𑀲𑀫𑁆𑀨𑀧𑀮𑀸𑀧𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀓𑀩𑁆𑀩𑀲𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀧𑀓𑀸𑀲𑀦𑁂𑀦 𑀓𑀺𑀁 𑀲𑀺𑀬𑀸 𑀧𑀬𑁄𑀚𑀦𑀁, 𑀅𑀜𑁆𑀜𑀤𑀢𑁆𑀣𑀼 𑀲𑀸𑀬𑁂𑀯𑀲𑁆𑀲 𑀅𑀲𑀫𑁆𑀫𑀸𑀦𑀺𑀢𑀸, 𑀅𑀦𑀸𑀤𑀭𑀺𑀬𑀸 𑀘 𑀯𑀺𑀜𑁆𑀜𑀽𑀳𑀻𑀢𑀺.

𑀩𑀸𑀳𑀼𑀲𑀘𑁆𑀘𑀕𑀼𑀡𑀫𑀓𑁆𑀔𑀦𑀁

𑁫. 𑀧𑀼𑀦𑀧𑀺 𑀥𑀫𑁆𑀫𑀸𑀦𑀦𑁆𑀤𑁄 𑀆𑀘𑀭𑀺𑀬𑀲𑁆𑀲 𑀩𑀸𑀳𑀼𑀲𑀘𑁆𑀘𑀕𑀼𑀡𑀁 𑀫𑀓𑁆𑀔𑁂𑀢𑀼𑀓𑀸𑀫𑁄 𑀏𑀯𑀫𑀸𑀳 𑁋 ‘‘𑀢𑀲𑁆𑀲 (𑀩𑀼𑀤𑁆𑀥𑀖𑁄𑀲𑀲𑁆𑀲) 𑀲𑀫𑀬𑀦𑁆𑀢𑀭𑀓𑁄𑀯𑀺𑀤𑀲𑀗𑁆𑀔𑀸𑀢𑀁 𑀩𑀸𑀳𑀼𑀲𑀘𑁆𑀘𑀁 𑀦 𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀳𑁄𑀢𑀺, 𑀬𑀁 𑀆𑀥𑀼𑀦𑀺𑀓𑀸𑀦𑀁 𑀕𑀦𑁆𑀣𑀦𑁆𑀢𑀭𑀓𑁄𑀯𑀺𑀤𑀸𑀦𑀁 𑀲𑀻𑀳𑀴𑀺𑀓𑀪𑀺𑀓𑁆𑀔𑀽𑀦𑀁 𑀬𑀁 𑀯𑀸 𑀏𑀓𑀸𑀤𑀲𑀫𑁂 𑀔𑀭𑀺𑀲𑁆𑀢𑀯𑀲𑁆𑀲𑀲𑀢𑀓𑁂 (𑁧𑁦𑁦𑁧-𑁧𑁧𑁦𑁦) 𑀉𑀧𑁆𑀧𑀦𑁆𑀦𑀸𑀦𑀁 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀸𑀦𑀁 𑀅𑀦𑀼𑀭𑀼𑀤𑁆𑀥-𑀥𑀫𑁆𑀫𑀧𑀸𑀮𑀸𑀤𑀻𑀦𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺.

𑀢𑀁 𑀧𑀦 𑀲𑀩𑁆𑀩𑀣𑀸𑀧𑀺 𑀅𑀬𑀼𑀢𑁆𑀢𑀯𑀘𑀦𑀫𑁂𑀯. 𑀬𑀤𑀺 𑀳𑀺 𑀆𑀥𑀼𑀦𑀺𑀓𑀸 𑀯𑀸 𑀲𑀻𑀳𑀴𑀺𑀓𑀪𑀺𑀓𑁆𑀔𑀽, 𑀧𑁄𑀭𑀸𑀡𑀸 𑀯𑀸 𑀆𑀘𑀭𑀺𑀬𑀅𑀦𑀼𑀭𑀼𑀤𑁆𑀥-𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀸𑀤𑀬𑁄 𑀲𑀫𑀬𑀦𑁆𑀢𑀭𑀩𑀸𑀳𑀼𑀲𑀘𑁆𑀘𑀯𑀲𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀲𑀫𑀸𑀦𑀸 𑀯𑀸 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀪𑀯𑁂𑀬𑁆𑀬𑀼𑀁, 𑀢𑁂 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀅𑀝𑁆𑀞𑀓𑀣𑀸𑀳𑀺 𑀅𑀦𑀸𑀭𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑀢𑁄 𑀲𑀼𑀦𑁆𑀤𑀭𑀢𑀭𑀸 𑀧𑀭𑀺𑀧𑀼𑀡𑁆𑀡𑀢𑀭𑀸 𑀘 𑀅𑀪𑀺𑀦𑀯𑀝𑁆𑀞𑀓𑀣𑀸𑀬𑁄 𑀓𑀭𑁂𑀬𑁆𑀬𑀼𑀁, 𑀦 𑀧𑀦 𑀢𑁂 𑀢𑀣𑀸 𑀓𑀭𑁄𑀦𑁆𑀢𑀺, 𑀦 𑀓𑁂𑀯𑀮𑀁 𑀦 𑀓𑀭𑁄𑀦𑁆𑀢𑀺𑀬𑁂𑀯, 𑀅𑀣 ¶ 𑀔𑁄 𑀢𑁂𑀲𑀁 𑀏𑀓𑁄𑀧𑀺 𑀦 𑀏𑀯𑀁 𑀯𑀤𑀢𑀺 ‘‘𑀅𑀳𑀁 𑀩𑀼𑀤𑁆𑀥𑀖𑁄𑀲𑁂𑀦 𑀩𑀸𑀳𑀼𑀲𑀘𑁆𑀘𑀯𑀲𑁂𑀦 𑀲𑀫𑀲𑀫𑁄𑀢𑀺 𑀯𑀸 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀯𑀸, 𑀅𑀜𑁆𑀜𑀤𑀢𑁆𑀣𑀼 𑀢𑁂 𑀆𑀘𑀭𑀺𑀬𑀲𑁆𑀲 𑀅𑀝𑁆𑀞𑀓𑀣𑀸𑀬𑁄𑀬𑁂𑀯 𑀲𑀁𑀯𑀡𑁆𑀡𑁂𑀦𑁆𑀢𑀺 𑀘 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺 𑀘, 𑀆𑀘𑀭𑀺𑀬𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑀺. 𑀢𑁂𑀦𑁂𑀢𑀁 𑀜𑀸𑀬𑀢𑀺 𑀲𑀩𑁆𑀩𑀣𑀸𑀧𑀺 𑀅𑀬𑀼𑀢𑁆𑀢𑀯𑀘𑀦𑀦𑁆𑀢𑀺.

𑀫𑀳𑀸𑀬𑀸𑀦𑀺𑀓𑀦𑀬𑀯𑀺𑀘𑀸𑀭𑀡𑀸

𑁬. 𑀧𑀼𑀦 𑀲𑁄 𑀢𑀸𑀯𑀢𑁆𑀢𑀓𑁂𑀦𑀸𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 𑀆𑀘𑀭𑀺𑀬𑀁 𑀅𑀯𑀫𑀜𑁆𑀜𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀫𑀳𑀸𑀬𑀸𑀦𑀦𑀺𑀓𑀸𑀬𑀲𑁆𑀲 𑀧𑀥𑀸𑀦𑀸𑀘𑀭𑀺𑀬𑀪𑀽𑀢𑀸𑀦𑀁 𑀅𑀲𑁆𑀲 𑀖𑁄𑀲-𑀦𑀸𑀕𑀚𑁆𑀚𑀼𑀦𑀸𑀦𑀁 𑀦𑀬𑀁 𑀯𑀸, 𑀦𑀸𑀫𑀫𑀢𑁆𑀢𑀫𑁆𑀧𑀺 𑀯𑀸 𑀢𑁂𑀲𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂 𑀩𑀼𑀤𑁆𑀥𑀖𑁄𑀲𑁄’’𑀢𑀺. 𑀢𑀁 𑀧𑀦 𑀅𑀢𑀺𑀯𑀺𑀬 𑀅𑀥𑀫𑁆𑀫𑀺𑀓𑀁 𑀦𑀺𑀭𑀢𑁆𑀣𑀓𑀜𑁆𑀘 𑀦𑀺𑀕𑁆𑀕𑀳𑀯𑀘𑀦𑀫𑀢𑁆𑀢𑀫𑁂𑀯. 𑀦 𑀳𑀺 𑀦𑀺𑀓𑀸𑀬𑀦𑁆𑀢𑀭𑀺𑀓𑀸𑀦𑀁 𑀯𑀸𑀤𑀦𑀬𑀸𑀦𑀁 𑀅𑀢𑁆𑀢𑀦𑁄 𑀅𑀝𑁆𑀞𑀓𑀣𑀸𑀬𑀁 𑀅𑀧𑁆𑀧𑀓𑀸𑀲𑀦𑁂𑀦 𑀲𑁄 𑀢𑁂 𑀦 𑀚𑀸𑀦𑀸𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦𑀦𑀼 𑀆𑀘𑀭𑀺𑀬𑁂𑀦 𑀆𑀕𑀫𑀝𑁆𑀞𑀓𑀣𑀸𑀲𑀼 𑀕𑀦𑁆𑀣𑀸𑀭𑀫𑁆𑀪𑁂𑀬𑁂𑀯 𑁋

‘‘𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄, 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀧𑀤𑀻𑀧𑀸𑀦𑀁;

𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸𑀦𑀁, 𑀫𑀳𑀸𑀯𑀺𑀳𑀸𑀭𑁂 𑀦𑀺𑀯𑀸𑀲𑀺𑀦’’𑀦𑁆𑀢𑀺 𑀘,

𑀇𑀥𑀸𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑁋

‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀁;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲’’𑀦𑁆𑀢𑀺 [𑀯𑀺𑀲𑀼𑀤𑁆𑀥𑀺. 𑁧.𑁨] 𑀘,

‘‘𑀢𑀲𑁆𑀲𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁 𑀑𑀢𑀭𑀺𑀢𑁆𑀯𑀸 𑀆𑀘𑀭𑀺𑀬𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦 𑀲𑀓𑀲𑀫𑀬𑀁 𑀅𑀯𑁄𑀓𑁆𑀓𑀫𑀦𑁆𑀢𑁂𑀦 𑀧𑀭𑀲𑀫𑀬𑀁 𑀅𑀦𑀸𑀬𑀽𑀳𑀦𑁆𑀢𑁂𑀦 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦 𑀯𑀺𑀦𑀬𑀁 𑀅𑀦𑀼𑀮𑁄𑀫𑁂𑀦𑁆𑀢𑁂𑀦 𑀫𑀳𑀸𑀧𑀤𑁂𑀲𑁂 𑀑𑀮𑁄𑀓𑁂𑀦𑁆𑀢𑁂𑀦 𑀥𑀫𑁆𑀫𑀁 𑀤𑀻𑀧𑁂𑀦𑁆𑀢𑁂𑀦 𑀅𑀢𑁆𑀣𑀁 𑀲𑀗𑁆𑀕𑀸𑀳𑁂𑀦𑁆𑀢𑁂𑀦 𑀢𑀫𑁂𑀯𑀢𑁆𑀣𑀁 𑀧𑀼𑀦𑀭𑀸𑀯𑀢𑁆𑀢𑁂𑀢𑁆𑀯𑀸 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀘 𑀬𑀲𑁆𑀫𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀻’’𑀢𑀺 [𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁧] 𑀘,

‘‘𑀲𑀸𑀲𑀦𑀁 𑀧𑀦𑀺𑀤𑀁 𑀦𑀸𑀦𑀸-𑀤𑁂𑀲𑀦𑀸𑀦𑀬𑀫𑀡𑁆𑀟𑀺𑀢𑀁;

𑀧𑀼𑀩𑁆𑀩𑀸𑀘𑀭𑀺𑀬𑀫𑀕𑁆𑀕𑁄 𑀘, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀧𑀯𑀢𑁆𑀢𑀢𑀺;

𑀬𑀲𑁆𑀫𑀸 𑀢𑀲𑁆𑀫𑀸 𑀢𑀤𑀼𑀪𑀬𑀁, 𑀲𑀦𑁆𑀦𑀺𑀲𑁆𑀲𑀸𑀬𑀢𑁆𑀣𑀯𑀡𑁆𑀡𑀦𑀁;

𑀆𑀭𑀪𑀺𑀲𑁆𑀲𑀸𑀫𑀺 𑀏𑀢𑀲𑁆𑀲𑀸’’𑀢𑀺 [𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁧] 𑀘,

𑀧𑀝𑀺𑀜𑁆𑀜𑀁 ¶ 𑀓𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑁆𑀧𑀓𑀸𑀭𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑁄 𑀓𑀢𑀸. 𑀏𑀯𑀫𑁂𑀢𑀸𑀲𑀁 𑀓𑀭𑀡𑁂 𑀓𑀸𑀭𑀡𑀫𑁆𑀧𑁂𑀢𑁆𑀣 𑀧𑀓𑀸𑀲𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀤𑀸𑀦𑀺 𑀢𑀫𑁆𑀧𑀓𑀸𑀲𑀦𑀢𑁆𑀣𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀓𑀸𑀮𑁄, 𑀢𑀸𑀯 𑀲𑀸𑀲𑀦𑀧𑁆𑀧𑀯𑀢𑁆𑀢𑀺𑀓𑁆𑀓𑀫𑀫𑁆𑀧𑀺 𑀯𑀓𑁆𑀔𑀸𑀫.

𑀲𑀸𑀲𑀦𑀧𑁆𑀧𑀯𑀢𑁆𑀢𑀺𑀓𑁆𑀓𑀫𑁄

𑀪𑀕𑀯𑀢𑁄 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀺𑀓𑀸𑀮𑀢𑁄 𑀧𑀘𑁆𑀙𑀸 𑀯𑀲𑁆𑀲𑀲𑀢𑀩𑁆𑀪𑀦𑁆𑀢𑀭𑁂 𑀩𑀼𑀤𑁆𑀥𑀲𑀸𑀲𑀦𑁂 𑀓𑁄𑀘𑀺𑀧𑀺 𑀯𑀸𑀤𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀯𑀲𑁆𑀲𑀲𑀢𑀓𑀸𑀮𑁂 𑀧𑀦 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀣𑁂𑀭𑁂𑀳𑀺 𑀦𑀺𑀓𑁆𑀓𑀟𑁆𑀠𑀺𑀢𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀅𑀜𑁆𑀜𑀣𑀸 𑀓𑀢𑁆𑀯𑀸 𑀫𑀳𑀸𑀲𑀗𑁆𑀕𑀻𑀢𑀺𑀦𑀸𑀫𑁂𑀦 𑀯𑀺𑀲𑀼𑀁 𑀲𑀗𑁆𑀕𑀻𑀢𑀺𑀫𑀓𑀁𑀲𑀼. 𑀢𑀤𑀸 𑀲𑀗𑁆𑀕𑀻𑀢𑀺𑀤𑁆𑀯𑀬𑀸𑀭𑀽𑀴𑁆𑀳𑀧𑀼𑀭𑀸𑀡𑀥𑀫𑁆𑀫𑀯𑀺𑀦𑀬𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀸𑀦𑀁 𑀣𑁂𑀭𑀸𑀦𑀁 𑀕𑀡𑁄 𑀣𑁂𑀭𑀯𑀸𑀤𑁄𑀢𑀺 𑀘 𑀢𑀤𑀜𑁆𑀜𑁂𑀲𑀁 𑀫𑀳𑀸𑀲𑀗𑁆𑀖𑀺𑀓𑁄𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺.

𑀧𑀼𑀦 𑀫𑀳𑀸𑀲𑀗𑁆𑀖𑀺𑀓𑀢𑁄 (𑁧) 𑀕𑁄𑀓𑀼𑀮𑀺𑀓𑁄 (𑁨) 𑀏𑀓𑀩𑁆𑀬𑁄𑀳𑀸𑀭𑀺𑀓𑁄𑀢𑀺 𑀤𑁆𑀯𑁂 𑀆𑀘𑀭𑀺𑀬𑀕𑀡𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀕𑁄𑀓𑀼𑀮𑀺𑀓𑀢𑁄 (𑁩) 𑀧𑀜𑁆𑀜𑀢𑁆𑀢𑀺𑀯𑀸𑀤𑁄 (𑁪) 𑀩𑀸𑀳𑀼𑀮𑀺𑀓𑁄 (𑀩𑀳𑀼𑀲𑁆𑀲𑀼𑀢𑀺𑀓𑁄)𑀢𑀺 𑀤𑁆𑀯𑁂 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀩𑀸𑀳𑀼𑀮𑀺𑀓𑀢𑁄𑀧𑀺 (𑁫) 𑀘𑁂𑀢𑀺𑀬𑀯𑀸𑀤𑀺𑀕𑀡𑁄 𑀉𑀧𑁆𑀧𑀦𑁆𑀦𑁄𑀢𑀺 𑀏𑀢𑁂 𑀧𑀜𑁆𑀘 𑀫𑀽𑀮𑀪𑀽𑀢𑁂𑀦 𑀫𑀳𑀸𑀲𑀗𑁆𑀖𑀺𑀓𑁂𑀦 𑀲𑀳 𑀙 𑀧𑀸𑀝𑀺𑀬𑁂𑀓𑁆𑀓𑀸 𑀆𑀘𑀭𑀺𑀬𑀕𑀡𑀸 𑀅𑀳𑁂𑀲𑀼𑀁.

𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀢𑁄𑀧𑀺 (𑁧) 𑀫𑀳𑀺𑀲𑀸𑀲𑀓𑁄 (𑁨) 𑀯𑀚𑁆𑀚𑀺𑀧𑀼𑀢𑁆𑀢𑀓𑁄𑀢𑀺 𑀤𑁆𑀯𑁂 𑀆𑀘𑀭𑀺𑀬𑀕𑀡𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀫𑀳𑀺𑀲𑀸𑀲𑀓𑀢𑁄 (𑁩) 𑀲𑀩𑁆𑀩𑀢𑁆𑀣𑀺𑀯𑀸𑀤𑁄 (𑁪) 𑀥𑀫𑁆𑀫𑀕𑀼𑀢𑁆𑀢𑀺𑀓𑁄𑀢𑀺 𑀤𑁆𑀯𑁂 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀲𑀩𑁆𑀩𑀢𑁆𑀣𑀺𑀯𑀸𑀤𑀢𑁄𑀧𑀺 (𑁫) 𑀓𑀲𑁆𑀲𑀧𑀺𑀬𑁄, 𑀢𑀢𑁄𑀧𑀺 (𑁬) 𑀲𑀗𑁆𑀓𑀦𑁆𑀢𑀺𑀓𑁄, 𑀢𑀢𑁄𑀧𑀺 (𑁭) 𑀲𑀼𑀢𑁆𑀢𑀯𑀸𑀤𑀻𑀢𑀺 𑀢𑀬𑁄 𑀉𑀧𑁆𑀧𑀦𑁆𑀦𑀸. 𑀯𑀚𑁆𑀚𑀺𑀧𑀼𑀢𑁆𑀢𑀓𑀢𑁄𑀧𑀺 (𑁮) 𑀥𑀫𑁆𑀫𑁄𑀢𑁆𑀢𑀭𑀺𑀬𑁄 (𑁯) 𑀪𑀤𑁆𑀤𑀬𑀸𑀦𑀺𑀓𑁄 (𑁧𑁦) 𑀙𑀦𑁆𑀦𑀸𑀕𑀸𑀭𑀺𑀓𑁄 (𑁧𑁧) 𑀲𑀫𑁆𑀫𑀺𑀢𑀺𑀬𑁄𑀢𑀺 𑀘𑀢𑁆𑀢𑀸𑀭𑁄 𑀉𑀧𑁆𑀧𑀦𑁆𑀦𑀸𑀢𑀺 𑀢𑁂 𑀏𑀓𑀸𑀤𑀲 𑀫𑀽𑀮𑀪𑀽𑀢𑁂𑀦 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑁂𑀦 𑀲𑀳 𑀤𑁆𑀯𑀸𑀤𑀲 𑀆𑀘𑀭𑀺𑀬𑀕𑀡𑀸 𑀅𑀳𑁂𑀲𑀼𑀁. 𑀇𑀢𑀺 𑀇𑀫𑁂 𑀘 𑀤𑁆𑀯𑀸𑀤𑀲 𑀧𑀼𑀭𑀺𑀫𑀸 𑀘 𑀙𑀸𑀢𑀺 𑀅𑀝𑁆𑀞𑀸𑀭𑀲 𑀆𑀘𑀭𑀺𑀬𑀕𑀡𑀸 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀦𑀁 𑀅𑀦𑁆𑀢𑀭𑁂 𑀚𑀸𑀢𑀸 𑀅𑀳𑁂𑀲𑀼𑀁.

𑀢𑁂𑀲𑀼 𑀫𑀽𑀮𑀪𑀽𑀢𑁄 𑀣𑁂𑀭𑀯𑀸𑀤𑀕𑀡𑁄𑀬𑁂𑀯 𑀧𑁄𑀭𑀸𑀡𑀥𑀫𑁆𑀫𑀯𑀺𑀦𑀬𑀕𑀭𑀼𑀓𑁄 𑀳𑀼𑀢𑁆𑀯𑀸 𑀅𑀦𑀽𑀦𑀫𑀦𑀥𑀺𑀓𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀧𑁄𑀭𑀸𑀡𑀺𑀓𑀁 𑀥𑀫𑁆𑀫𑀯𑀺𑀦𑀬𑀁 𑀥𑀸𑀭𑁂𑀲𑀺. 𑀇𑀢𑀭𑁂 𑀧𑀦 𑀲𑀢𑁆𑀢𑀭𑀲 𑀪𑀺𑀦𑁆𑀦𑀕𑀡𑀸 𑀧𑁄𑀭𑀸𑀡𑀺𑀓𑀁 𑀥𑀫𑁆𑀫𑀯𑀺𑀦𑀬𑀁 𑀅𑀜𑁆𑀜𑀣𑀸 ¶ 𑀅𑀓𑀁𑀲𑀼. 𑀢𑁂𑀦 𑀢𑁂𑀲𑀁 𑀥𑀫𑁆𑀫𑀯𑀺𑀦𑀬𑁄 𑀓𑀢𑁆𑀣𑀘𑀺 𑀊𑀦𑁄 𑀓𑀢𑁆𑀣𑀘𑀺 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀧𑀭𑀺𑀧𑀼𑀡𑁆𑀡𑁄 𑀘𑁂𑀯 𑀅𑀳𑁄𑀲𑀺 𑀅𑀧𑀭𑀺𑀲𑀼𑀤𑁆𑀥𑁄 𑀘. 𑀢𑁂𑀦 𑀯𑀼𑀢𑁆𑀢𑀁 𑀤𑀻𑀧𑀯𑀁𑀲𑁂 𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤𑁂 𑁋

𑁩𑁦.

‘‘𑀦𑀺𑀓𑁆𑀓𑀟𑁆𑀠𑀺𑀢𑀸 𑀧𑀸𑀧𑀪𑀺𑀓𑁆𑀔𑀽, 𑀣𑁂𑀭𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑀸;

𑀅𑀜𑁆𑀜𑀁 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸𑀦, 𑀅𑀥𑀫𑁆𑀫𑀯𑀸𑀤𑀻 𑀩𑀳𑀽 𑀚𑀦𑀸.

𑁩𑁧.

𑀤𑀲𑀲𑀳𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀥𑀫𑁆𑀫𑀲𑀗𑁆𑀕𑀳𑀁;

𑀢𑀲𑁆𑀫𑀸𑀬𑀁 𑀥𑀫𑁆𑀫𑀲𑀗𑁆𑀕𑀻𑀢𑀺, 𑀫𑀳𑀸𑀲𑀗𑁆𑀕𑀻𑀢𑀻𑀢𑀺 𑀯𑀼𑀘𑁆𑀘𑀢𑀺.

𑁩𑁨.

𑀫𑀳𑀸𑀲𑀗𑁆𑀕𑀻𑀢𑀺𑀓𑀸 𑀪𑀺𑀓𑁆𑀔𑀽, 𑀯𑀺𑀮𑁄𑀫𑀁 𑀅𑀓𑀁𑀲𑀼 𑀲𑀸𑀲𑀦𑁂;

𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀁, 𑀅𑀜𑁆𑀜𑀁 𑀅𑀓𑀁𑀲𑀼 𑀲𑀗𑁆𑀕𑀳𑀁.

𑁩𑁩.

𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢𑀁, 𑀅𑀜𑁆𑀜𑀢𑁆𑀭 𑀅𑀓𑀭𑀺𑀁𑀲𑀼 𑀢𑁂;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀯𑀺𑀦𑀬𑁂 𑀦𑀺𑀓𑀸𑀬𑁂𑀲𑀼 𑀘 𑀧𑀜𑁆𑀘𑀲𑀼…𑀧𑁂…

𑁪𑁯.

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀏𑀓𑀤𑁂𑀲𑀜𑁆𑀘 𑀲𑀗𑁆𑀕𑀳𑀁;

𑀕𑀦𑁆𑀣𑀜𑁆𑀘 𑀏𑀓𑀤𑁂𑀲𑀜𑁆𑀳𑀺, 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

𑁫𑁦.

𑀦𑀸𑀫𑀁 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀻𑀬𑀸𑀦𑀺 𑀘;

𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

𑁫𑁧.

𑀲𑀢𑁆𑀢𑀭𑀲 𑀪𑀺𑀦𑁆𑀦𑀯𑀸𑀤𑀸, 𑀏𑀓𑀯𑀸𑀤𑁄 𑀅𑀪𑀺𑀦𑁆𑀦𑀓𑁄;

𑀲𑀩𑁆𑀩𑁂𑀯𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀪𑀺𑀦𑁆𑀦𑀯𑀸𑀤𑁂𑀦 𑀢𑁂 𑀲𑀳.

𑁫𑁨.

𑀦𑀺𑀕𑁆𑀭𑁄𑀥𑁄𑀯 𑀫𑀳𑀸𑀭𑀼𑀓𑁆𑀔𑁄, 𑀣𑁂𑀭 𑀯𑀸𑀤𑀸𑀦𑀫𑀼𑀢𑁆𑀢𑀫𑁄;

𑀅𑀦𑀽𑀦𑀁 𑀅𑀦𑀥𑀺𑀓𑀜𑁆𑀘, 𑀓𑁂𑀯𑀮𑀁 𑀚𑀺𑀦𑀲𑀸𑀲𑀦𑀁;

𑀓𑀡𑁆𑀝𑀓𑀸 𑀯𑀺𑀬 𑀭𑀼𑀓𑁆𑀔𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀸 𑀯𑀸𑀤𑀲𑁂𑀲𑀓𑀸.

𑁫𑁩.

𑀧𑀞𑀫𑁂 𑀯𑀲𑁆𑀲𑀲𑀢𑁂 𑀦𑀢𑁆𑀣𑀺, 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑀦𑁆𑀢𑀭𑁂;

𑀪𑀺𑀦𑁆𑀦𑀸 𑀲𑀢𑁆𑀢𑀭𑀲 𑀯𑀸𑀤𑀸, 𑀉𑀧𑁆𑀧𑀦𑁆𑀦𑀸 𑀚𑀺𑀦𑀲𑀸𑀲𑀦𑁂’’𑀢𑀺 [𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸].

𑀅𑀲𑁄𑀓𑀭𑀜𑁆𑀜𑁄 𑀘 𑀓𑀸𑀮𑁂 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀻𑀧𑁂𑀦𑁆𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸𑀧𑀺 𑀲𑀬𑀫𑁂𑀯 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑁂𑀲𑀼 𑀯𑀺𑀘𑀭𑀦𑁆𑀢𑀸 𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀓𑀭𑀡𑀓𑀸𑀮𑁂 𑀲𑀗𑁆𑀖𑀫𑀚𑁆𑀛𑀁 ¶ 𑀧𑀯𑀺𑀲𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀺 𑀥𑀫𑁆𑀫𑀯𑀺𑀦𑀬𑀸𑀦𑀼𑀮𑁄𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀡𑁆𑀞𑀳𑀦𑁆𑀢𑀸 𑀅𑀦𑁂𑀓𑀭𑀽𑀧𑀁 𑀲𑀸𑀲𑀦𑀲𑁆𑀲 𑀅𑀩𑁆𑀩𑀼𑀤𑀜𑁆𑀘 𑀫𑀮𑀜𑁆𑀘 𑀓𑀡𑁆𑀝𑀓𑀜𑁆𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀓𑁂𑀘𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀸𑀢𑀧𑁂 𑀢𑀧𑀦𑁆𑀢𑀺, 𑀓𑁂𑀘𑀺 𑀆𑀤𑀺𑀘𑁆𑀘𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀯𑁄𑀪𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀢𑀣𑀸 𑀢𑀣𑀸 𑀧𑀕𑁆𑀕𑀡𑁆𑀳𑀦𑁆𑀢𑀺. 𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀅𑀓𑀸𑀲𑀺, 𑀅𑀲𑁄𑀓𑀸𑀭𑀸𑀫𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀉𑀧𑁄𑀲𑀣𑁄 𑀉𑀧𑀘𑁆𑀙𑀺𑀚𑁆𑀚𑀺 [𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸].

𑀇𑀫𑀜𑁆𑀘 𑀧𑀦 𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 𑀏𑀯𑀫𑁆𑀧𑀺 𑀲𑀓𑁆𑀓𑀸 𑀕𑀳𑁂𑀢𑀼𑀁 ‘‘𑀲𑀢𑁆𑀢𑀭𑀲𑀦𑁆𑀦𑀁 𑀪𑀺𑀦𑁆𑀦𑀯𑀸𑀤𑀕𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀲𑁆𑀲 𑀧𑀘𑁆𑀙𑀺𑀫𑀓𑀸𑀮𑁂𑀲𑀼 𑀅𑀧𑀭𑀺𑀲𑀼𑀤𑁆𑀥𑀢𑀭𑀪𑀸𑀯𑁄 𑀈𑀤𑀺𑀲𑁂𑀦𑀧𑀺 𑀓𑀸𑀭𑀡𑁂𑀦 𑀅𑀳𑁄𑀲𑀻’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀩𑀼𑀤𑁆𑀥𑀲𑀸𑀲𑀦𑀪𑀽𑀢𑁂 𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀯𑀺𑀦𑀬𑁂 ‘‘𑀓𑁄𑀘𑀺𑀧𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀦𑀸𑀫 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸, 𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀸𑀧𑀺 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 𑀅𑀦𑀢𑁆𑀢𑀸𑀬𑁂𑀯𑀸’’𑀢𑀺 𑀅𑀢𑁆𑀣𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄 𑀳𑁄𑀢𑀺, 𑀢𑀣𑀸𑀧𑀺 𑀤𑀸𑀦𑀺 𑀅𑀣𑁂𑀭𑀯𑀸𑀤𑀺𑀓𑀸𑀦𑀁 𑀕𑀦𑁆𑀣𑁂𑀲𑀼 𑀘 𑀧𑀼𑀩𑁆𑀩𑁂 𑀯𑁂𑀢𑀼𑀮𑁆𑀮𑀯𑀸𑀤𑀸𑀤𑀻𑀲𑀼 𑀘 ‘‘𑀩𑀼𑀤𑁆𑀥𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀢𑁆𑀢𑀸’’𑀢𑀺 𑀘, ‘‘𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀢𑁆𑀢𑀸’’𑀢𑀺 𑀘 𑀅𑀢𑁆𑀣𑁄 𑀤𑀺𑀲𑁆𑀲𑀢𑀺.

𑀅𑀣 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀲𑀸𑀲𑀦𑀁 𑀯𑀺𑀲𑁄𑀥𑁂𑀢𑀼𑀓𑀸𑀫𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀞𑀫𑀫𑁂𑀯 𑀲𑀫𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀮𑀤𑁆𑀥𑀺𑀓𑁂 𑀏𑀓𑀮𑀤𑁆𑀥𑀺𑀓𑁂 𑀪𑀺𑀓𑁆𑀔𑀽 𑀏𑀓𑀢𑁄 𑀓𑀸𑀭𑁂𑀢𑁆𑀯𑀸 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀲𑀫𑀽𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀺𑀁 𑀯𑀸𑀤𑀻 𑀪𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀢𑀢𑁄 𑀬𑁂 𑀬𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀲𑁆𑀲𑀢𑀯𑀸𑀤𑀻’’𑀢𑀺 𑀯𑀸, ‘‘𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀻’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀸𑀤𑀸𑀦𑀼𑀭𑀽𑀧𑀁 𑀫𑀺𑀘𑁆𑀙𑀸𑀯𑀸𑀤𑀁 𑀆𑀳𑀁𑀲𑀼, 𑀢𑁂 𑀢𑁂 ‘‘𑀦𑀬𑀺𑀫𑁂 𑀪𑀺𑀓𑁆𑀔𑀽, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀇𑀫𑁂’’𑀢𑀺 𑀢𑀣𑀢𑁄 𑀜𑀢𑁆𑀯𑀸 𑀢𑁂𑀲𑀁 𑀲𑁂𑀢𑀓𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁.

𑀅𑀣𑀜𑁆𑀜𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀯𑀺𑀪𑀚𑁆𑀚𑀯𑀸𑀤𑀻 𑀫𑀳𑀸𑀭𑀸𑀚 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀼𑀤𑁆𑀥𑀁 𑀤𑀸𑀦𑀺 𑀪𑀦𑁆𑀢𑁂 𑀲𑀸𑀲𑀦𑀁, 𑀓𑀭𑁄𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣’’𑀦𑁆𑀢𑀺 𑀯𑀢𑁆𑀯𑀸 𑀆𑀭𑀓𑁆𑀔𑀜𑁆𑀘 𑀤𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀬𑀸𑀦𑀺 𑀘 ¶ 𑀢𑀤𑀸 𑀉𑀧𑁆𑀧𑀦𑁆𑀦𑀸𑀦𑀺 𑀯𑀢𑁆𑀣𑀽𑀦𑀺 𑀬𑀸𑀦𑀺 𑀘 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀝𑀺𑀩𑀸𑀳𑀦𑀢𑁆𑀣𑀁 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑀯𑀲𑁂𑀦𑁂𑀯 𑀢𑀣𑀸𑀕𑀢𑁂𑀦 𑀞𑀧𑀺𑀢𑀫𑀸𑀢𑀺𑀓𑀁 𑀯𑀺𑀪𑀚𑀦𑁆𑀢𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀁 𑀓𑀣𑀸𑀯𑀢𑁆𑀣𑀼𑀁 𑀦𑀸𑀫 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀜𑁆𑀘𑀫𑀁 𑀧𑀓𑀭𑀡𑀁 𑀅𑀪𑀸𑀲𑀺. 𑀢𑀢𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀧𑁆𑀧𑀫𑀼𑀔𑀸 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸 𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀣𑁂𑀭𑀯𑀸𑀤𑀺𑀦𑁄 𑀲𑀗𑁆𑀕𑀻𑀢𑀺𑀤𑁆𑀯𑀬𑀸𑀭𑀽𑀴𑁆𑀳𑀁 𑀧𑀭𑀺𑀲𑀼𑀤𑁆𑀥𑀁 𑀧𑁄𑀭𑀸𑀡𑀥𑀫𑁆𑀫𑀯𑀺𑀦𑀬𑀁 𑀧𑀼𑀦 𑀲𑀗𑁆𑀕𑀸𑀬𑀺𑀢𑁆𑀯𑀸 𑀲𑀼𑀭𑀓𑁆𑀔𑀺𑀢𑀁 𑀭𑀓𑁆𑀔𑀺𑀁𑀲𑀼 [𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸].

𑀅𑀣 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀯𑀲𑀼 𑀧𑀘𑁆𑀘𑀦𑁆𑀢𑀝𑁆𑀞𑀸𑀦𑁂𑀲𑀼 𑀲𑀸𑀲𑀦𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀦𑀯 𑀦𑀸𑀬𑀓𑀢𑁆𑀣𑁂𑀭𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀧𑁂𑀲𑁂𑀲𑀺. 𑀢𑁂𑀲𑀼 𑀅𑀝𑁆𑀞𑀳𑀺 𑀣𑁂𑀭𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀧𑀺𑀢𑁂 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀙𑀢𑁆𑀢𑀺𑀁𑀲𑀸𑀥𑀺𑀓𑀤𑁆𑀯𑀺𑀲𑀢𑁂 (𑁨𑁩𑁬) 𑀩𑀼𑀤𑁆𑀥𑀯𑀲𑁆𑀲𑁂 𑀚𑀫𑁆𑀩𑀼𑀤𑀻𑀧𑀢𑁄 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀁 𑀤𑀻𑀧𑀓𑀚𑀦𑀲𑀫𑀽𑀳𑀁 𑀧𑀲𑀸𑀤𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑀫𑁆𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑁂𑀦 𑀘 𑀭𑀜𑁆𑀜𑀸 𑀤𑀺𑀦𑁆𑀦𑀁 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀫𑀳𑀸𑀯𑀺𑀳𑀸𑀭𑀁 𑀦𑀸𑀫 𑀲𑀗𑁆𑀖𑀸𑀭𑀸𑀫𑀁 𑀧𑀢𑀺𑀝𑁆𑀞𑀸𑀧𑁂𑀲𑀺 [𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸]. 𑀢𑀢𑁄 𑀧𑀪𑀼𑀢𑀺 𑀲𑀻𑀳𑀴𑀤𑀻𑀧𑁂 𑀩𑀼𑀤𑁆𑀥𑀲𑀸𑀲𑀦𑀁 𑀬𑀸𑀯 𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀓𑀸𑀮𑀸 𑀦𑀺𑀓𑀸𑀬𑀦𑁆𑀢𑀭𑀯𑀸𑀤𑀸𑀓𑀼𑀮𑀭𑀳𑀺𑀢𑀁 𑀦𑀺𑀫𑁆𑀫𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀳𑀼𑀢𑁆𑀯𑀸 𑀲𑀫𑀼𑀚𑁆𑀚𑀮𑀺𑀢𑁆𑀣. 𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀦𑀺𑀓𑀸𑀬𑀦𑁆𑀢𑀭𑀯𑀸𑀤𑀸𑀧𑀺 𑀲𑀻𑀳𑀴𑀤𑀻𑀧𑀫𑀼𑀧𑀸𑀕𑀫𑀺𑀁𑀲𑀼. 𑀢𑀤𑀸 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀺𑀦𑁄 𑀬𑀣𑀸 𑀧𑀼𑀭𑀸𑀡𑀥𑀫𑁆𑀫𑀯𑀺𑀦𑀬𑁄 𑀢𑁂𑀳𑀺 𑀦𑀺𑀓𑀸𑀬𑀦𑁆𑀢𑀭𑀯𑀸𑀤𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄 𑀅𑀫𑀮𑀻𑀦𑁄 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬, 𑀢𑀣𑀸 𑀢𑀁 𑀫𑀳𑀼𑀲𑁆𑀲𑀸𑀳𑁂𑀦 𑀲𑀼𑀭𑀓𑁆𑀔𑀺𑀢𑀁 𑀭𑀓𑁆𑀔𑀺𑀁𑀲𑀼. 𑀓𑀣𑀁?

𑀅𑀪𑀬𑀕𑀺𑀭𑀺𑀦𑀺𑀓𑀸𑀬𑀼𑀧𑁆𑀧𑀢𑁆𑀢𑀺

𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀸 𑀳𑀺 (𑁪𑁨𑁫-𑀩𑀼𑀤𑁆𑀥𑀯𑀲𑁆𑀲𑁂) 𑀭𑀚𑁆𑀚𑀁 𑀧𑀢𑁆𑀯𑀸 𑀧𑀜𑁆𑀘𑀫𑀸𑀲𑀫𑀢𑁆𑀢𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀤𑀸𑀫𑀭𑀺𑀓𑁂𑀦 𑀲𑀢𑁆𑀢𑀳𑀺 𑀘 𑀤𑀫𑀺𑀴𑀬𑁄𑀥𑁂𑀳𑀺 𑀉𑀧𑀤𑁆𑀤𑀼𑀢𑁄 𑀲𑀗𑁆𑀕𑀸𑀫𑁂 𑀘 𑀧𑀭𑀸𑀚𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀲𑀸𑀥𑀺𑀓𑀸𑀦𑀺 𑀘𑀼𑀤𑁆𑀤𑀲𑀯𑀲𑁆𑀲𑀸𑀦𑀺 𑀦𑀺𑀮𑀻𑀬𑀺𑀢𑁆𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦 𑀯𑀲𑀢𑀺 [𑀫𑀳𑀸𑀯𑀁𑀲𑁂 𑁩𑁩-𑀧𑀭𑀺𑀘𑁆𑀙𑁂𑀤𑁂 𑁩𑁭-𑀕𑀸𑀣𑀸𑀢𑁄 𑀧𑀝𑁆𑀞𑀸𑀬]. 𑀢𑀤𑀸 𑀮𑀗𑁆𑀓𑀸𑀤𑀻𑀧𑁂 𑀫𑀦𑀼𑀲𑁆𑀲𑀸 𑀘𑁄𑀭𑀪𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦 𑀘 𑀉𑀧𑀤𑁆𑀤𑀼𑀢𑀸 𑀪𑀺𑀓𑁆𑀔𑀽𑀦𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀦 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀢𑀢𑁄 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀁 𑀥𑀸𑀭𑁂𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀮𑀗𑁆𑀓𑀸𑀤𑀻𑀧𑁂𑀬𑁂𑀯 𑀑𑀳𑀻𑀦𑀸𑀧𑀺 𑀣𑁂𑀭𑀸 𑀬𑀣𑀸𑀮𑀤𑁆𑀥𑁂𑀳𑀺 𑀓𑀦𑁆𑀤𑀫𑀽𑀮𑀧𑀡𑁆𑀡𑁂𑀳𑀺 𑀬𑀸𑀧𑁂𑀦𑁆𑀢𑀸 𑀓𑀸𑀬𑁂 𑀯𑀳𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀺, 𑀅𑀯𑀳𑀦𑁆𑀢𑁂 ¶ 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀻𑀲𑀸𑀦𑀺 𑀏𑀓𑀝𑁆𑀞𑀸𑀦𑁂 𑀓𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀁 𑀲𑀫𑁆𑀫𑀲𑀦𑁆𑀢𑀺. 𑀏𑀯𑀁 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀲𑀸𑀝𑁆𑀞𑀓𑀣𑀁 𑀢𑁂𑀧𑀺𑀝𑀓𑀁 𑀅𑀳𑀸𑀧𑁂𑀢𑁆𑀯𑀸 𑀥𑀸𑀭𑀬𑀺𑀁𑀲𑀼. 𑀬𑀤𑀸 𑀧𑀦 𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀸 𑀤𑀫𑀺𑀴𑀭𑀸𑀚𑀸𑀦𑀁 𑀳𑀦𑁆𑀢𑁆𑀯𑀸 (𑁪𑁫𑁫-𑁪𑁬𑁬 𑀩𑀼𑀤𑁆𑀥𑀯𑀲𑁆𑀲𑀩𑁆𑀪𑀦𑁆𑀢𑀭𑁂) 𑀧𑀼𑀦𑀧𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺 [𑀫𑀳𑀸𑀯𑀁𑀲𑁂 𑁩𑁩, 𑁭𑁮-𑀕𑀸𑀣𑀸]. 𑀢𑀤𑀸 𑀢𑁂 𑀣𑁂𑀭𑀸 𑀚𑀫𑁆𑀩𑀼𑀤𑀻𑀧𑀢𑁄 𑀧𑀘𑁆𑀘𑀸𑀕𑀢𑀢𑁆𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀢𑁂𑀧𑀺𑀝𑀓𑀁 𑀲𑁄𑀥𑁂𑀦𑁆𑀢𑀸 𑀏𑀓𑀓𑁆𑀔𑀭𑀫𑁆𑀧𑀺 𑀅𑀲𑀫𑁂𑀦𑁆𑀢𑀁 𑀦𑀸𑀫 𑀦 𑀧𑀲𑁆𑀲𑀺𑀁𑀲𑀼 [𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦; 𑀯𑀺𑀪. 𑀅𑀝𑁆𑀞. 𑁮𑁧𑁦]. 𑀬𑁄𑀧𑀺 𑀘 𑀫𑀳𑀸𑀦𑀺𑀤𑁆𑀤𑁂𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑀲𑁆𑀲𑁂𑀯 𑀤𑀼𑀲𑁆𑀲𑀻𑀮𑀪𑀺𑀓𑁆𑀔𑀼𑀦𑁄 𑀧𑀕𑀼𑀡𑁄 𑀅𑀳𑁄𑀲𑀺, 𑀲𑁄𑀧𑀺 𑀫𑀳𑀸𑀢𑀺𑀧𑀺𑀝𑀓𑀢𑁆𑀣𑁂𑀭𑁂𑀦 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀭𑀓𑁆𑀔𑀺𑀢𑁄 𑀅𑀳𑁄𑀲𑀺 [𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁫]. 𑀏𑀯𑀁 𑀤𑀼𑀩𑁆𑀪𑀺𑀓𑁆𑀔𑀭𑀝𑁆𑀞𑀓𑁆𑀔𑁄𑀪𑀼𑀧𑀤𑁆𑀤𑀯𑁂𑀳𑀺 𑀧𑀻𑀴𑀺𑀢𑀢𑁆𑀢𑀸 𑀤𑀼𑀤𑁆𑀥𑀭𑀲𑀫𑀬𑁂𑀧𑀺 𑀥𑀫𑁆𑀫𑀯𑀺𑀦𑀬𑀁 𑀲𑀓𑁆𑀓𑀘𑁆𑀘𑀁 𑀥𑀸𑀭𑀬𑀺𑀁𑀲𑀼.

𑀭𑀸𑀚𑀸 𑀅𑀪𑀬𑀕𑀺𑀭𑀺𑀁 𑀦𑀸𑀫 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀽𑀧𑀓𑀸𑀭𑀧𑀼𑀩𑁆𑀩𑀲𑁆𑀲 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀲𑁄 𑀧𑀦 𑀣𑁂𑀭𑁄 𑀓𑀼𑀮𑀲𑀁𑀲𑀕𑁆𑀕𑀩𑀳𑀼𑀮𑀢𑁆𑀢𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀪𑀺𑀓𑁆𑀔𑀽𑀳𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑁆𑀯𑀸 𑀦𑀻𑀳𑀝𑁄. 𑀢𑀤𑀸𑀲𑁆𑀲 𑀲𑀺𑀲𑁆𑀲𑁄 𑀩𑀳𑀮𑀫𑀲𑁆𑀲𑀼𑀢𑀺𑀲𑁆𑀲𑀦𑀸𑀫𑀓𑁄 𑀣𑁂𑀭𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺, 𑀢𑁂𑀦𑀲𑁆𑀲 𑀲𑀗𑁆𑀖𑁄 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺. 𑀲𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀢𑁂𑀦 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀯𑀺𑀲𑀼𑀁 𑀕𑀡𑀁 𑀯𑀳𑀦𑁆𑀢𑁄 𑀯𑀲𑀺. 𑀢𑁂 𑀘 𑀤𑁆𑀯𑁂 𑀣𑁂𑀭𑀸 𑀦 𑀫𑀳𑀸𑀯𑀺𑀳𑀸𑀭𑀁 𑀧𑀼𑀦𑀸𑀕𑀫𑀺𑀁𑀲𑀼 [𑀫𑀳𑀸𑀯𑀁𑀲𑁂 𑁩𑁩, 𑁭𑁯-𑀕𑀸𑀣𑀸𑀤𑀻𑀲𑀼. 𑀦𑀺𑀓𑀸𑀬𑀲𑀗𑁆𑀕𑀳𑁂]. 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀳𑀴𑀤𑀻𑀧𑁂 𑀫𑀳𑀸𑀯𑀺𑀳𑀸𑀭𑀯𑀸𑀲𑀻, 𑀅𑀪𑀬𑀕𑀺𑀭𑀺𑀯𑀸𑀲𑀻𑀢𑀺 𑀤𑁆𑀯𑁂 𑀦𑀺𑀓𑀸𑀬𑀸𑀚𑀸𑀢𑀸. 𑀇𑀤𑀁 𑀢𑀸𑀯 𑀲𑀻𑀳𑀴𑀤𑀻𑀧𑁂 𑀲𑀸𑀲𑀦𑀧𑀭𑀺𑀳𑀸𑀦𑀺𑀬𑀸 𑀧𑀞𑀫𑀁 𑀓𑀸𑀭𑀡𑀁.

𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀼𑀧𑁆𑀧𑀢𑁆𑀢𑀺

𑀢𑀤𑀸 𑀘 𑀭𑀸𑀚𑀸 𑀅𑀪𑀬𑀕𑀺𑀭𑀺𑀯𑀸𑀲𑀻𑀲𑀼𑀬𑁂𑀯 𑀪𑀺𑀓𑁆𑀔𑀽𑀲𑀼 𑀯𑀺𑀲𑁂𑀲𑀢𑁄 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀢𑁂𑀬𑁂𑀯 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀧𑀕𑁆𑀕𑀡𑁆𑀳𑀸𑀢𑀺, 𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄𑀧𑀺 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑀳𑀽 𑀚𑀦𑀸 𑀢𑀲𑁆𑀫𑀺𑀜𑁆𑀘 𑀆𑀭𑀸𑀫𑁂 𑀅𑀜𑁆𑀜𑀢𑁆𑀣 𑀘 𑀩𑀳𑀽 𑀆𑀯𑀸𑀲𑁂 𑀓𑀢𑁆𑀯𑀸 𑀢𑁂𑀲𑀁 𑀤𑁂𑀦𑁆𑀢𑀺. 𑀏𑀯𑀁 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀩𑀳𑀽𑀦𑀁 𑀅𑀪𑀺𑀜𑁆𑀜𑀸𑀢𑀚𑀦𑀸𑀦𑀁 𑀲𑀓𑁆𑀓𑀢𑀸 𑀘𑁂𑀯 𑀳𑁄𑀦𑁆𑀢𑀺 𑀧𑀽𑀚𑀺𑀢𑀸 𑀘 𑀫𑀸𑀦𑀺𑀢𑀸 𑀘. 𑀧𑀼𑀦 𑀘 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀩𑀳𑀮𑀫𑀲𑁆𑀲𑀼𑀢𑀺𑀲𑁆𑀲𑀢𑁆𑀣𑁂𑀭𑀸𑀤𑀬𑁄𑀇𑀦𑁆𑀤𑀺𑀬𑀭𑀝𑁆𑀞𑀢𑁄 𑀆𑀕𑀢𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀲𑁆𑀲 𑀥𑀫𑁆𑀫𑀯𑀺𑀦𑀬𑀪𑀽𑀢𑀁 𑀲𑀓𑁆𑀓𑀢𑀪𑀸𑀲𑀸𑀭𑁄𑀧𑀺𑀢𑀁 ¶ 𑀅𑀪𑀺𑀦𑀯𑀫𑁆𑀧𑀺 𑀧𑀺𑀝𑀓𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 [𑀫𑀳𑀸𑀯𑀁𑀲𑁂 𑁩𑁩, 𑁯𑁯 𑀕𑀸𑀣𑀸𑀲𑀼. 𑀦𑀺𑀓𑀸𑀬𑀲𑀗𑁆𑀕𑀳𑁂], 𑀢𑁂𑀦 𑀢𑁂𑀧𑀺 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀺𑀓𑀸 𑀦𑀸𑀫 𑀅𑀳𑁂𑀲𑀼𑀁. 𑀇𑀤𑀁 𑀲𑀻𑀳𑀴𑀤𑀻𑀧𑁂 𑀲𑀸𑀲𑀦𑀧𑀭𑀺𑀳𑀸𑀦𑀺𑀬𑀸 𑀤𑀼𑀢𑀺𑀬𑀁 𑀓𑀸𑀭𑀡𑀁.

𑀧𑀺𑀝𑀓𑀢𑁆𑀢𑀬𑀲𑁆𑀲 𑀧𑁄𑀢𑁆𑀣𑀓𑀸𑀭𑁄𑀧𑀦𑀁

𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀧𑀦 𑀧𑁄𑀭𑀸𑀡𑀺𑀓𑀁 𑀧𑀸𑀴𑀺𑀪𑀸𑀲𑀸𑀬 𑀲𑀡𑁆𑀞𑀺𑀢𑀁 𑀧𑀭𑀺𑀲𑀼𑀤𑁆𑀥𑀧𑀺𑀝𑀓𑀫𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀜𑁆𑀘 𑀫𑀼𑀔𑀧𑀸𑀞𑁂𑀦𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀤𑀸 𑀧𑀦 𑀣𑁂𑀭𑀸 𑀧𑀘𑁆𑀙𑀺𑀫𑀚𑀦𑀸𑀦𑀁 𑀲𑀢𑀺𑀧𑀜𑁆𑀜𑀸𑀳𑀸𑀦𑀺𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀁𑀓𑀸𑀮𑀸 𑀫𑀼𑀔𑀧𑀸𑀞𑁂𑀦𑀸𑀪𑀢𑀁 𑀲𑀸𑀝𑁆𑀞𑀓𑀣𑀁 𑀧𑀺𑀝𑀓𑀢𑁆𑀢𑀬𑀁 𑀧𑁄𑀢𑁆𑀣𑀓𑁂 𑀆𑀭𑁄𑀧𑁂𑀢𑀼𑀁 𑀲𑀫𑀸𑀭𑀪𑀺𑀁𑀲𑀼. 𑀲𑀫𑀸𑀭𑀪𑀫𑀸𑀦𑀸 𑀘 𑀢𑁂 𑀅𑀦𑀼𑀭𑀸𑀥𑀭𑀸𑀚𑀥𑀸𑀦𑀺𑀧𑀼𑀭𑀢𑁄 𑀅𑀝𑁆𑀞𑀲𑀝𑁆𑀞𑀺𑀫𑀺𑀮𑀧𑁆𑀧𑀫𑀸𑀡𑁂 𑀫𑀮𑀬𑀚𑀦𑀧𑀤𑁂 𑀫𑀸𑀢𑀼𑀮 [𑀫𑀸𑀢𑀮𑁂 𑀇𑀢𑀺 𑀏𑀢𑀭𑀳𑀺 𑀯𑁄𑀳𑀸𑀭𑁄] 𑀦𑀕𑀭𑁂 𑀆𑀮𑁄𑀓𑀮𑁂𑀡𑁂 𑀯𑀲𑀦𑁆𑀢𑀸 𑀏𑀓𑀲𑁆𑀲 𑀢𑀦𑁆𑀤𑁂𑀲𑀺𑀓𑀲𑁆𑀲 𑀚𑀦𑀧𑀤𑀸𑀥𑀺𑀧𑀢𑀺𑀦𑁄 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀢𑀁 𑀧𑁄𑀢𑁆𑀣𑀓𑀸𑀭𑁄𑀧𑀦𑀓𑀫𑁆𑀫𑀫𑀓𑀁𑀲𑀼 [𑀫𑀳𑀸𑀯𑀁𑀲𑁂 𑁩𑁩, 𑁧𑁦𑁦-𑁧𑁦𑁧-𑀕𑀸𑀣𑀸𑀲𑀼]. 𑀢𑁂𑀦𑀺𑀤𑀁 𑀜𑀸𑀬𑀢𑀺 ‘‘𑀢𑀤𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀅𑀮𑀤𑁆𑀥𑀽𑀧𑀓𑀸𑀭𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀧𑀺𑀝𑀓𑀢𑁆𑀢𑀬𑀲𑁆𑀲 𑀧𑁄𑀢𑁆𑀣𑀓𑀸𑀭𑁄𑀧𑀦𑀓𑀫𑁆𑀫𑀫𑀓𑀁𑀲𑀽’’𑀢𑀺 𑀘, ‘‘𑀢𑀜𑁆𑀘 𑀬𑀣𑁂𑀯 𑀧𑀘𑁆𑀙𑀺𑀫𑀚𑀦𑀸𑀦𑀁 𑀲𑀢𑀺𑀧𑀜𑁆𑀜𑀸𑀳𑀸𑀦𑀺𑀁 𑀤𑀺𑀲𑁆𑀯𑀸 𑀓𑀢𑀁, 𑀢𑀣𑁂𑀯 𑀤𑀼𑀩𑁆𑀪𑀺𑀓𑁆𑀔𑀭𑀝𑁆𑀞𑀓𑁆𑀔𑁄𑀪𑀸𑀤𑀺𑀪𑀬𑀼𑀧𑀤𑁆𑀤𑀼𑀢𑀓𑀸𑀮𑁂𑀲𑀼 𑀤𑀼𑀤𑁆𑀥𑀭𑀪𑀸𑀯𑀫𑁆𑀧𑀺 𑀤𑀺𑀲𑁆𑀯𑀸’’𑀢𑀺 𑀘, 𑀢𑀣𑀸 ‘‘𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀲𑀫𑀬𑀦𑁆𑀢𑀭𑀯𑀸𑀤𑁂𑀳𑀺 𑀅𑀦𑀸𑀓𑀼𑀮𑀦𑀢𑁆𑀣𑀫𑁆𑀧𑀺 𑀓𑀢’’𑀦𑁆𑀢𑀺 𑀘. 𑀏𑀯𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀸 𑀧𑀭𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀧𑀺𑀝𑀓𑀁 𑀲𑀫𑀬𑀦𑁆𑀢𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀦𑀢𑁆𑀣𑀸𑀬 𑀬𑀣𑀸 𑀧𑀼𑀭𑁂, 𑀢𑀣𑀸 𑀧𑀸𑀴𑀺𑀪𑀸𑀲𑀸𑀬 𑀏𑀯 𑀧𑁄𑀢𑁆𑀣𑀓𑁂 𑀆𑀭𑁄𑀧𑁂𑀢𑁆𑀯𑀸𑀧𑀺 𑀲𑀼𑀭𑀓𑁆𑀔𑀺𑀢𑀁 𑀭𑀓𑁆𑀔𑀺𑀁𑀲𑀼. 𑀬𑀤𑀺 𑀳𑀺 𑀢𑀤𑀸 𑀢𑁂𑀧𑀺𑀝𑀓𑀁 𑀧𑁄𑀢𑁆𑀣𑀓𑁂𑀲𑀼 𑀅𑀦𑀸𑀭𑁄𑀧𑀺𑀢𑀫𑀲𑁆𑀲, 𑀧𑀘𑁆𑀙𑀸𑀓𑀸𑀮𑁂𑀲𑀼 𑀲𑀫𑀬𑀦𑁆𑀢𑀭𑀢𑁄 𑀆𑀕𑀢𑀲𑀼𑀢𑁆𑀢𑀸𑀦𑀺 ‘‘𑀦𑁂𑀢𑀸𑀦𑀺 𑀅𑀫𑁆𑀳𑀸𑀓’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀲𑀼𑀓𑀭𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀬𑀢𑁄 𑀘 𑀔𑁄 𑀢𑀤𑀸 𑀲𑀸𑀝𑁆𑀞𑀓𑀣𑀁 𑀢𑁂𑀧𑀺𑀝𑀓𑀁 𑀧𑁄𑀢𑁆𑀣𑀓𑁂𑀲𑀼 𑀆𑀭𑁄𑀧𑀺𑀢𑀁, 𑀢𑀢𑁄𑀬𑁂𑀯 𑀅𑀦𑀸𑀕𑀢𑀓𑀸𑀮𑁂𑀲𑀼 𑀲𑀫𑀬𑀦𑁆𑀢𑀭𑀸𑀕𑀢𑀲𑀼𑀢𑁆𑀢𑀸𑀦𑀺 𑀢𑁂𑀳𑀺 𑀧𑁄𑀢𑁆𑀣𑀓𑁂𑀳𑀺 𑀲𑀁𑀲𑀦𑁆𑀤𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀼𑀓𑀭𑀸𑀦𑀺 𑀳𑁄𑀦𑁆𑀢𑀺.

𑀢𑀣𑀸 𑀳𑀺 𑀪𑀸𑀢𑀺𑀬𑀭𑀸𑀚𑀓𑀸𑀮𑁂 (𑁫𑁨𑁪-𑁫𑁫𑁨-𑀩𑀼-𑀯) 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀅𑀪𑀬𑀕𑀺𑀭𑀺𑀯𑀸𑀲𑀻𑀳𑀺 𑀯𑀺𑀦𑀬𑁂 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑀺. 𑀢𑀤𑀸 𑀭𑀸𑀚𑀸 𑀤𑀻𑀖𑀓𑀸𑀭𑀸𑀬𑀦𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀁 𑀅𑀫𑀘𑁆𑀘𑀁 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀲𑁄 𑀉𑀪𑀺𑀦𑁆𑀦𑀁 𑀲𑀼𑀢𑁆𑀢𑀁 ¶ 𑀲𑀼𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀅𑀤𑀸𑀲𑀺 [𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁪]. 𑀢𑀣𑀸 𑀯𑁄𑀳𑀸𑀭𑀓𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀘 (𑁭𑁫𑁮-𑁭𑁮𑁦 𑀩𑀼-𑀯) 𑀕𑁄𑀞𑀸𑀪𑀬𑀭𑀸𑀚𑀓𑀸𑀮𑁂 𑀘 (𑁭𑁯𑁭-𑁮𑁧𑁦 𑀩𑀼-𑀯) 𑀣𑁂𑀭𑀯𑀸𑀤𑀺𑀓𑀸 𑀧𑁄𑀢𑁆𑀣𑀓𑀸𑀭𑀽𑀴𑁆𑀳𑁂𑀦 𑀥𑀫𑁆𑀫𑀯𑀺𑀦𑀬𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀁𑀲𑀼 [𑀦𑀺𑀓𑀸𑀬𑀲𑀗𑁆𑀕𑀳𑁂 𑁧𑁨-𑀧𑀺𑀝𑁆𑀞𑁂].

𑀅𑀥𑀫𑁆𑀫𑀯𑀸𑀤𑀼𑀧𑁆𑀧𑀢𑁆𑀢𑀺

𑀅𑀬𑀁 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀫𑀮𑀪𑀽𑀢𑀸𑀦𑀁 𑀅𑀥𑀫𑁆𑀫𑀯𑀸𑀤𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀅𑀲𑁄𑀓𑀭𑀜𑁆𑀜𑁄 𑀳𑀺 𑀓𑀸𑀮𑁂 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀢𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀮𑀤𑁆𑀥𑀧𑀢𑀺𑀝𑁆𑀞𑀸 𑀓𑁄𑀥𑀸𑀪𑀺𑀪𑀽𑀢𑀸 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑀲𑀫𑀻𑀧𑁂 𑀦𑀸𑀮𑀦𑁆𑀤𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀯𑀁 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 ‘‘𑀫𑀳𑀸𑀚𑀦𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑁂 𑀅𑀦𑀯𑀕𑀸𑀳𑀢𑁆𑀣𑀸𑀬 𑀲𑀓𑁆𑀬𑀸𑀦𑀁 𑀥𑀫𑁆𑀫𑀯𑀺𑀦𑀬𑁄 𑀦𑀸𑀲𑁂𑀢𑀩𑁆𑀩𑁄, 𑀢𑀜𑁆𑀘 𑀔𑁄 𑀢𑁂𑀲𑀁 𑀲𑀫𑀬𑀁 𑀅𑀚𑀸𑀦𑀦𑁆𑀢𑁂𑀳𑀺 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀲𑁆𑀫𑀸 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀧𑀼𑀦𑀧𑀺 𑀢𑀢𑁆𑀣 𑀧𑀩𑁆𑀩𑀚𑀺𑀢𑀩𑁆𑀩𑀫𑁂𑀯𑀸’’𑀢𑀺. 𑀢𑁂 𑀏𑀯𑀁 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀻𑀦𑀫𑀦𑁆𑀢𑀭𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀤𑀜𑁆𑀜𑁂𑀲𑀁 𑀲𑀢𑁆𑀢𑀭𑀲𑀦𑁆𑀦𑀁 𑀫𑀳𑀸𑀲𑀗𑁆𑀖𑀺𑀓𑀸𑀤𑀺𑀦𑀺𑀓𑀸𑀬𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀪𑀸𑀯𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀺𑀝𑀓𑀢𑁆𑀢𑀬𑀫𑀼𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀜𑁆𑀘 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀦𑀸𑀲𑀦𑀸𑀬 𑀉𑀧𑀸𑀬𑀁 𑀫𑀦𑁆𑀢𑀬𑀺𑀢𑁆𑀯𑀸 𑁨𑁫𑁩-𑀩𑀼𑀤𑁆𑀥𑀯𑀲𑁆𑀲𑁂 𑀙𑀲𑀼 𑀞𑀸𑀦𑁂𑀲𑀼 𑀯𑀲𑀦𑁆𑀢𑀸 (𑁧) 𑀳𑁂𑀫𑀯𑀢𑀺𑀓𑁄 (𑁨) 𑀭𑀸𑀚𑀕𑀺𑀭𑀺𑀓𑁄 (𑁩) 𑀲𑀺𑀤𑁆𑀥𑀢𑁆𑀣𑀺𑀓𑁄 (𑁪) 𑀧𑀼𑀩𑁆𑀩𑀲𑁂𑀮𑀺𑀬𑁄 (𑁫) 𑀅𑀧𑀭𑀲𑁂𑀮𑀺𑀬𑁄 (𑁬) 𑀯𑀸𑀚𑀺𑀭𑀺𑀬𑁄 (𑁭) 𑀯𑁂𑀢𑀼𑀮𑁆𑀮𑁄 (𑁮) 𑀅𑀦𑁆𑀥𑀓𑁄 (𑁯) 𑀅𑀜𑁆𑀜𑀫𑀳𑀸𑀲𑀗𑁆𑀖𑀺𑀓𑁄𑀢𑀺 𑀦𑀯 𑀅𑀪𑀺𑀦𑀯𑁂 𑀦𑀺𑀓𑀸𑀬𑁂 𑀉𑀧𑁆𑀧𑀸𑀤𑁂𑀲𑀼𑀁 [𑀦𑀺𑀓𑀸𑀬𑀲𑀗𑁆𑀕𑀳𑁂 𑁯-𑀧𑀺𑀝𑁆𑀞𑁂]. 𑀢𑁂𑀲𑀁 𑀦𑀸𑀫𑀸𑀦𑀺 𑀘 𑀮𑀤𑁆𑀥𑀺𑀬𑁄 𑀘 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀸𑀬𑁂𑀯.

𑀢𑁂𑀲𑀼 𑀳𑁂𑀫𑀯𑀢𑀺𑀓𑀸 𑀲𑀤𑁆𑀥𑀫𑁆𑀫𑀧𑀢𑀺𑀭𑀽𑀧𑀓𑀁 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸

(𑁧) 𑀯𑀡𑁆𑀡𑀧𑀺𑀝𑀓𑀁 𑀦𑀸𑀫 𑀕𑀦𑁆𑀣𑀁 𑀅𑀓𑀁𑀲𑀼.

𑀭𑀸𑀚𑀕𑀺𑀭𑀺𑀓𑀸 (𑁨) 𑀅𑀗𑁆𑀕𑀼𑀮𑀺𑀫𑀸𑀮𑀧𑀺𑀝𑀓𑀁,

𑀲𑀺𑀤𑁆𑀥𑀢𑁆𑀣𑀺𑀓𑀸 (𑁩) 𑀕𑀽𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀁,

𑀧𑀼𑀩𑁆𑀩𑀲𑁂𑀮𑀺𑀬𑀸 (𑁪) 𑀭𑀝𑁆𑀞𑀧𑀸𑀮𑀕𑀚𑁆𑀚𑀺𑀢𑀁,

𑀅𑀧𑀭𑀲𑁂𑀮𑀺𑀬𑀸 (𑁫) 𑀆𑀴𑀯𑀓𑀕𑀚𑁆𑀚𑀺𑀢𑀁,

𑀯𑀚𑀺𑀭𑀧𑀩𑁆𑀩𑀢𑀯𑀸𑀲𑀺𑀦𑁄 ¶ 𑀯𑀸𑀚𑀺𑀭𑀺𑀬𑀸 (𑁬) 𑀕𑀽𑀴𑁆𑀳𑀯𑀺𑀦𑀬𑀁 𑀦𑀸𑀫 𑀕𑀦𑁆𑀣𑀁 𑀅𑀓𑀁𑀲𑀼.

𑀢𑁂𑀬𑁂𑀯 𑀲𑀩𑁆𑀩𑁂 𑀫𑀸𑀬𑀸𑀚𑀸𑀮𑀢𑀦𑁆𑀢-𑀲𑀫𑀸𑀚𑀢𑀦𑁆𑀢𑀸𑀤𑀺𑀓𑁂 𑀅𑀦𑁂𑀓𑁂 𑀢𑀦𑁆𑀢𑀕𑀦𑁆𑀣𑁂 𑀘, 𑀫𑀭𑀻𑀘𑀺𑀓𑀧𑁆𑀧-𑀳𑁂𑀭𑀫𑁆𑀪𑀓𑀧𑁆𑀧𑀸𑀤𑀺𑀓𑁂 𑀅𑀦𑁂𑀓𑁂 𑀓𑀧𑁆𑀧𑀕𑀦𑁆𑀣𑁂 𑀘 𑀅𑀓𑀁𑀲𑀼.

𑀯𑁂𑀢𑀼𑀮𑁆𑀮𑀯𑀸𑀤𑀺𑀦𑁄 𑀧𑀦 (𑁭) 𑀯𑁂𑀢𑀼𑀮𑁆𑀮𑀧𑀺𑀝𑀓𑀫𑀓𑀁𑀲𑀼.

𑀅𑀦𑁆𑀥𑀓𑀸 𑀘 (𑁮) 𑀭𑀢𑀦𑀓𑀽𑀝𑀸𑀤𑀺𑀓𑁂 𑀕𑀦𑁆𑀣𑁂,

𑀅𑀜𑁆𑀜𑀫𑀳𑀸𑀲𑀗𑁆𑀖𑀺𑀓𑀸 𑀘 (𑁯) 𑀅𑀓𑁆𑀔𑀭𑀲𑀸𑀭𑀺𑀬𑀸𑀤𑀺𑀲𑀼𑀢𑁆𑀢𑀦𑁆𑀢𑁂 𑀅𑀓𑀁𑀲𑀼 [𑀦𑀺𑀓𑀸𑀬𑀲𑀗𑁆𑀕𑀳𑁂 𑁯-𑀧𑀺𑀝𑁆𑀞𑁂].

𑀢𑁂𑀲𑀼 𑀧𑀦 𑀲𑀤𑁆𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀲𑀼 𑀯𑁂𑀢𑀼𑀮𑁆𑀮𑀯𑀸𑀤𑁄, 𑀯𑀸𑀚𑀺𑀭𑀺𑀬𑀯𑀸𑀤𑁄, 𑀭𑀢𑀦𑀓𑀽𑀝𑀲𑀢𑁆𑀣𑀦𑁆𑀢𑀺 𑀇𑀫𑀸𑀦𑀺𑀬𑁂𑀯 𑀢𑀻𑀡𑀺 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀢𑀸𑀦𑀺, 𑀅𑀜𑁆𑀜𑀸𑀦𑀺 𑀧𑀦 𑀯𑀡𑁆𑀡𑀧𑀺𑀝𑀓𑀸𑀤𑀻𑀦𑀺 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀓𑀸𑀬𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀯𑀡𑁆𑀡𑀧𑀺𑀝𑀓𑀸𑀤𑀻𑀦𑀫𑁆𑀧𑀺 𑀧𑀦 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀢𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑁂𑀯. 𑀢𑀣𑀸 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑁩, 𑁯-𑀧𑀺𑀝𑁆𑀞𑁂)

‘‘𑀯𑀡𑁆𑀡𑀧𑀺𑀝𑀓 𑀅𑀗𑁆𑀕𑀼𑀮𑀺𑀫𑀸𑀮𑀧𑀺𑀝𑀓𑀭𑀝𑁆𑀞𑀧𑀸𑀮𑀕𑀚𑁆𑀚𑀺𑀢𑀆𑀴𑀯𑀓𑀕𑀚𑁆𑀚𑀺𑀢𑀕𑀽𑀴𑁆𑀳𑀫𑀕𑁆𑀕𑀕𑀽𑀴𑁆𑀳𑀯𑁂𑀲𑁆𑀲𑀦𑁆𑀢𑀭 𑀕𑀽𑀴𑁆𑀳𑀯𑀺𑀦𑀬 𑀯𑁂𑀤𑀮𑁆𑀮𑀧𑀺𑀝𑀓𑀸𑀦𑀺 [𑀏𑀢𑁆𑀣 ‘‘𑀯𑁂𑀧𑀼𑀮𑁆𑀮, 𑀯𑁂𑀤𑀮𑁆𑀮𑀁, 𑀯𑁂𑀢𑀼𑀮𑁆𑀮𑀦𑁆𑀢𑀺 𑀅𑀢𑁆𑀣𑀓𑁄 𑀏𑀓𑀁, 𑀩𑁄𑀥𑀺𑀲𑀢𑁆𑀢𑀧𑀺𑀝𑀓𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀲𑀗𑁆𑀕𑁂𑀦 𑀦𑀸𑀫 𑀆𑀘𑀭𑀺𑀬𑁂𑀦 𑀅𑀪𑀺𑀥𑀫𑁆𑀫𑀲𑀫𑀼𑀘𑁆𑀘𑀬𑁂 𑀦𑀸𑀫 𑀫𑀳𑀸𑀬𑀸𑀦𑀺𑀓𑀕𑀦𑁆𑀢𑁂 (𑁭𑁯-𑀧𑀺𑀝𑁆𑀞𑁂) ‘‘𑀯𑁂𑀧𑀼𑀮𑁆𑀮𑀁 𑀓𑀢𑀫𑀁? 𑀩𑁄𑀥𑀺𑀲𑀢𑁆𑀢𑀧𑀺𑀝𑀓𑀲𑀫𑁆𑀧𑀬𑀼𑀢𑁆𑀢𑀁 𑀪𑀸𑀲𑀺𑀢𑀁. 𑀬𑀤𑀼𑀘𑁆𑀘𑀢𑁂 𑀯𑁂𑀧𑀼𑀮𑁆𑀮𑀁, 𑀢𑀁 𑀯𑁂𑀤𑀮𑁆𑀮𑀫𑀧𑁆𑀬𑀼𑀘𑁆𑀘𑀢𑁂, 𑀯𑁂𑀢𑀼𑀮𑁆𑀮𑀫𑀧𑁆𑀬𑀼𑀘𑁆𑀘𑀢𑁂. 𑀓𑀺𑀫𑀢𑁆𑀣𑀁 𑀯𑁂𑀧𑀼𑀮𑁆𑀮𑀫𑀼𑀘𑁆𑀘𑀢𑁂? 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀥𑀺𑀝𑁆𑀞𑀸𑀦𑀢𑁄, 𑀉𑀤𑀸𑀭𑀕𑀫𑁆𑀪𑀻𑀭𑀥𑀫𑁆𑀫𑀤𑁂𑀲𑀦𑀸𑀢𑁄 𑀘. 𑀓𑀺𑀫𑀢𑁆𑀣𑀫𑀼𑀘𑁆𑀘𑀢𑁂 𑀯𑁂𑀤𑀮𑁆𑀮𑀁? 𑀲𑀩𑁆𑀩𑀸𑀯𑀭𑀡𑀯𑀺𑀤𑀮𑀦𑀢𑁄. 𑀓𑀺𑀫𑀢𑁆𑀣𑀫𑀼𑀘𑁆𑀘𑀢𑁂 𑀯𑁂𑀢𑀼𑀮𑁆𑀮𑀁? 𑀉𑀧𑀫𑀸𑀦𑀥𑀫𑁆𑀫𑀸𑀦𑀁 𑀢𑀼𑀮𑀦𑀸𑀪𑀸𑀯𑀢𑁄’’𑀢𑀺] 𑀧𑀦 𑀅𑀩𑀼𑀤𑁆𑀥𑀯𑀘𑀦𑀸𑀦𑀺𑀬𑁂𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀫𑁆𑀧𑀺 (𑁨, 𑁧𑁮𑁬-𑀧𑀺𑀝𑁆𑀞𑁂)

‘‘𑀕𑀽𑀴𑁆𑀳𑀯𑀺𑀦𑀬𑀁 𑀕𑀽𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀁 𑀕𑀽𑀴𑁆𑀳𑀫𑀳𑁄𑀲𑀥𑀁 𑀯𑀡𑁆𑀡𑀧𑀺𑀝𑀓𑀁 𑀅𑀗𑁆𑀕𑀼𑀮𑀺𑀫𑀸𑀮𑀧𑀺𑀝𑀓𑀁 𑀭𑀝𑁆𑀞𑀧𑀸𑀮𑀕𑀚𑁆𑀚𑀺𑀢𑀁 𑀆𑀴𑀯𑀓𑀕𑀚𑁆𑀚𑀺𑀢𑀁 𑀯𑁂𑀤𑀮𑁆𑀮𑀧𑀺𑀝𑀓𑀦𑁆𑀢𑀺 𑀅𑀩𑀼𑀤𑁆𑀥𑀯𑀘𑀦𑀁 𑀲𑀤𑁆𑀥𑀫𑁆𑀫𑀧𑀢𑀺𑀭𑀽𑀧𑀓𑀁 𑀦𑀸𑀫𑀸’’𑀢𑀺 𑀘𑁋

𑀢𑁂𑀲𑀁 𑀧𑀝𑀺𑀓𑁆𑀔𑁂𑀧𑁄 𑀤𑀺𑀲𑁆𑀲𑀢𑀺. 𑀦 𑀳𑀺 𑀢𑀸𑀦𑀺 𑀅𑀲𑀼𑀢𑁆𑀯𑀸, 𑀢𑁂𑀲𑀜𑁆𑀘 𑀅𑀢𑁆𑀣𑀁 𑀅𑀚𑀸𑀦𑀺𑀢𑁆𑀯𑀸 𑀲𑀻𑀳𑀴𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸, 𑀦𑀸𑀧𑀺 𑀢𑀁 𑀧𑀝𑀺𑀓𑁆𑀔𑁂𑀧𑀯𑀘𑀦𑀁 𑀚𑀫𑁆𑀩𑀼𑀤𑀻𑀧𑀺𑀓𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑀁 𑀪𑀯𑀺𑀢𑀼𑀁, 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀻𑀳𑀴𑀤𑀻𑀧𑀁 ¶ 𑀕𑀫𑀦𑀲𑀫𑀬𑁂 𑀢𑁂𑀲𑀁𑀬𑁂𑀯 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀢𑀸𑀦𑀺 𑀘 𑀢𑀤𑀜𑁆𑀜𑀸𑀦𑀺 𑀘 𑀫𑀳𑀸𑀬𑀸𑀦𑀺𑀓𑀧𑀺𑀝𑀓𑀸𑀦𑀺 𑀢𑀁𑀓𑀸𑀮𑀺𑀓𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀲𑀻𑀳𑀴𑀤𑀻𑀧𑀫𑀼𑀧𑀸𑀕𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀘 𑀯𑀚𑁆𑀚𑀺𑀧𑀼𑀢𑁆𑀢𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀲𑁆𑀲 𑀧𑀺𑀝𑀓𑀸𑀦𑀁 𑀢𑀤𑀼𑀧𑀸𑀕𑀫𑀦𑀁 𑀧𑀼𑀩𑁆𑀩𑁂𑀯 𑀯𑀼𑀢𑁆𑀢𑀁. 𑀢𑀤𑀜𑁆𑀜𑁂𑀲𑀁 𑀧𑀦 𑀢𑀤𑀼𑀧𑀸𑀕𑀫𑀦𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀢𑀼𑀮𑁆𑀮𑀯𑀸𑀤𑀲𑁆𑀲 𑀧𑀞𑀫𑀦𑀺𑀕𑁆𑀕𑀳𑁄

𑀯𑁄𑀳𑀸𑀭𑀓𑀢𑀺𑀲𑁆𑀲𑀭𑀜𑁆𑀜𑁄 𑀓𑀸𑀮𑁂 (𑁭𑁫𑁮-𑁭𑁮𑁦-𑀩𑀼-𑀯) 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀺𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀸𑀲𑀦𑀯𑀺𑀦𑀸𑀲𑀦𑀢𑁆𑀣𑀸𑀬 𑀪𑀺𑀓𑁆𑀔𑀼𑀯𑁂𑀲𑀥𑀸𑀭𑀻𑀳𑀺 𑀯𑁂𑀢𑀼𑀮𑁆𑀮𑀯𑀸𑀤𑀺𑀩𑁆𑀭𑀸𑀳𑁆𑀫𑀡𑁂𑀳𑀺 𑀭𑀘𑀺𑀢𑀁 𑀯𑁂𑀢𑀼𑀮𑁆𑀮𑀧𑀺𑀝𑀓𑀁 𑀲𑀫𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ‘‘𑀇𑀤𑀁 𑀩𑀼𑀤𑁆𑀥𑀪𑀸𑀲𑀺𑀢’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀢𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀯𑀸𑀤𑀺𑀓𑀸 𑀥𑀫𑁆𑀫𑀯𑀺𑀦𑀬𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑁄𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀩𑁆𑀩𑀲𑀢𑁆𑀣𑀧𑀸𑀭𑀕𑀼𑀁 𑀓𑀧𑀺𑀮𑀁 𑀦𑀸𑀫 𑀅𑀫𑀘𑁆𑀘𑀁 𑀧𑁂𑀲𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀩𑁆𑀩𑀁 𑀯𑁂𑀢𑀼𑀮𑁆𑀮𑀧𑁄𑀢𑁆𑀣𑀓𑀁 𑀛𑀸𑀧𑁂𑀢𑁆𑀯𑀸 𑀢𑀮𑁆𑀮𑀤𑁆𑀥𑀺𑀓𑁂 𑀘 𑀧𑀸𑀧𑀪𑀺𑀓𑁆𑀔𑀽 𑀦𑀺𑀕𑁆𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀚𑁄𑀢𑁂𑀲𑀺 [𑀦𑀺𑀓𑀸𑀬𑀲𑀗𑁆𑀕𑀳𑁂 𑁧𑁨-𑀧𑀺𑀝𑁆𑀞𑁂]. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

𑁩𑁬-𑁪𑁧.

‘‘𑀯𑁂𑀢𑀼𑀮𑁆𑀮𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸, 𑀓𑀸𑀭𑁂𑀢𑁆𑀯𑀸 𑀧𑀸𑀧𑀦𑀺𑀕𑁆𑀕𑀳𑀁;

𑀓𑀧𑀺𑀮𑁂𑀦 𑀅𑀫𑀘𑁆𑀘𑁂𑀦, 𑀲𑀸𑀲𑀦𑀁 𑀚𑁄𑀢𑀬𑀻 𑀘 𑀲𑁄’’𑀢𑀺.

𑀲𑀸𑀕𑀮𑀺𑀬𑀦𑀺𑀓𑀸𑀬𑀼𑀧𑁆𑀧𑀢𑁆𑀢𑀺

𑀧𑀼𑀦𑀧𑀺 𑀢𑁂 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀕𑁄𑀞𑀸𑀪𑀬𑀭𑀜𑁆𑀜𑁄 𑀓𑀸𑀮𑁂 (𑁭𑁯𑁭-𑁮𑁧𑁦-𑀩𑀼-𑀯) 𑀯𑁂𑀢𑀼𑀮𑁆𑀮𑀯𑀸𑀤𑀁 𑀢𑀣𑁂𑀯 𑀤𑀲𑁆𑀲𑁂𑀦𑁆𑀢𑀺. 𑀢𑀤𑀸 𑀧𑀦 𑀢𑁂𑀲𑀼 𑀉𑀲𑁆𑀲𑀺𑀮𑀺𑀬𑀸𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀣𑁂𑀭𑁄 𑀯𑁄𑀳𑀸𑀭𑀓𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀯𑁂𑀢𑀼𑀮𑁆𑀮𑀯𑀸𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 𑀓𑀢𑀦𑀺𑀕𑁆𑀕𑀳𑀁 𑀲𑀼𑀢𑁆𑀯𑀸 ‘‘𑀯𑀺𑀘𑀸𑀭𑀡𑀲𑀫𑁆𑀧𑀦𑁆𑀦𑀲𑁆𑀲 𑀭𑀜𑁆𑀜𑁄 𑀲𑀫𑀬𑁂 𑀢𑀣𑁂𑀯 𑀪𑀯𑁂𑀬𑁆𑀬, 𑀦 𑀪𑀤𑁆𑀤𑀓𑀫𑁂𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀫𑀬𑀁 𑀢𑁂𑀳𑀺 𑀏𑀓𑀢𑁄 𑀳𑁄𑀫𑀸’’𑀢𑀺 𑀢𑀺𑀲𑀢𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀕𑀺𑀭𑀺𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀢𑁄 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀯𑀲𑀺. 𑀢𑁂𑀲𑀼 𑀲𑀸𑀕𑀮𑁄 𑀦𑀸𑀫 𑀫𑀳𑀸𑀣𑁂𑀭𑁄 𑀢𑀢𑁆𑀣𑁂𑀯 𑀤𑀓𑁆𑀔𑀺𑀡𑀕𑀺𑀭𑀺𑀫𑁆𑀳𑀺 𑀯𑀲𑀦𑁆𑀢𑁄 𑀆𑀕𑀫𑀩𑁆𑀬𑀸𑀔𑁆𑀬𑀸𑀦𑀫𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀣𑁂𑀭𑀫𑀸𑀭𑀩𑁆𑀪 𑀢𑀲𑁆𑀲𑀦𑁆𑀢𑁂𑀯𑀸𑀲𑀺𑀦𑁄 𑀲𑀸𑀕𑀮𑀺𑀬𑀸 𑀦𑀸𑀫 𑀅𑀳𑁂𑀲𑀼𑀁. 𑀢𑁂𑀲𑀫𑁆𑀧𑀺 ¶ 𑀯𑀸𑀤𑁄 𑀧𑀘𑁆𑀙𑀸 𑀫𑀳𑀸𑀲𑁂𑀦𑀭𑀸𑀚𑀓𑀸𑀮𑁂 𑀚𑁂𑀢𑀯𑀦𑀯𑀺𑀳𑀸𑀭𑁂 𑀧𑀢𑁆𑀣𑀭𑀺 [𑀦𑀺𑀓𑀸𑀬 𑁧𑁩-𑀧𑀺𑀝𑁆𑀞𑁂].

𑀯𑁂𑀢𑀼𑀮𑁆𑀮𑀯𑀸𑀤𑀲𑁆𑀲 𑀤𑀼𑀢𑀺𑀬𑀦𑀺𑀕𑁆𑀕𑀳𑁄

𑀕𑁄𑀞𑀸𑀪𑀬𑁄 𑀧𑀦 𑀭𑀸𑀚𑀸 𑀧𑀜𑁆𑀘𑀲𑀼 [𑀫𑀳𑀸𑀯𑀺𑀳𑀸𑀭, 𑀘𑁂𑀢𑀺𑀬, 𑀣𑀽𑀧𑀸𑀭𑀸𑀫, 𑀇𑀲𑁆𑀲𑀭𑀲𑀫𑀡𑀓, 𑀯𑁂𑀲𑁆𑀲𑀕𑀺𑀭𑀺𑀯𑀺𑀳𑀸𑀭𑀲𑀗𑁆𑀔𑀸𑀢𑁂𑀲𑀼] 𑀯𑀺𑀳𑀸𑀭𑁂𑀲𑀼 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑁂𑀢𑀼𑀮𑁆𑀮𑀯𑀸𑀤𑀲𑁆𑀲 𑀅𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁𑀯𑀸𑀤𑀺𑀦𑁄 𑀲𑀝𑁆𑀞𑀺 𑀧𑀸𑀧𑀪𑀺𑀓𑁆𑀔𑀽 𑀮𑀓𑁆𑀔𑀡𑀸𑀳𑀢𑁂 𑀓𑀢𑁆𑀯𑀸 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑁂𑀲𑀺, 𑀯𑁂𑀢𑀼𑀮𑁆𑀮𑀧𑁄𑀢𑁆𑀣𑀓𑀸𑀦𑀺 𑀘 𑀛𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀚𑁄𑀢𑁂𑀲𑀺 [𑀫𑀳𑀸𑀯𑀁𑀲𑁂 𑁩𑁬, 𑁧𑁧𑁧-𑁧𑁧𑁨-𑀕𑀸𑀣𑀸𑀲𑀼, 𑀦𑀺𑀓𑀸𑀬 𑁧𑁩-𑀧𑀺𑀝𑁆𑀞𑁂].

𑀢𑀤𑀸 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀺𑀢𑁂𑀲𑀼 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁂𑀘𑀺 𑀓𑀸𑀯𑀻𑀭𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀫𑀸𑀡𑀯𑀓𑁄 𑀤𑁂𑀲𑀦𑁆𑀢𑀭𑀢𑁄 𑀓𑀸𑀯𑀻𑀭𑀫𑀸𑀕𑀦𑁆𑀢𑁆𑀯𑀸 𑀧𑀝𑁆𑀝𑀦𑀕𑀸𑀫𑀺𑀓𑁂𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀢𑀽𑀧𑀳𑀸𑀭𑀁 𑀤𑀺𑀲𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀲𑁆𑀲𑀸𑀬 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢𑁄𑀢𑀺 𑀦𑀸𑀫𑁂𑀦 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀁 𑀦𑀺𑀲𑁆𑀲𑀸𑀬 𑀕𑁄𑀞𑀸𑀪𑀬𑀭𑀜𑁆𑀜𑀸 𑀯𑁂𑀢𑀼𑀮𑁆𑀮𑀯𑀸𑀤𑀳𑁂𑀢𑀼 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀓𑀼𑀤𑁆𑀥𑁄 𑀳𑀼𑀢𑁆𑀯𑀸 ‘‘𑀯𑁂𑀢𑀼𑀮𑁆𑀮𑀯𑀸𑀤𑀁 𑀯𑀸 𑀦𑁂 𑀕𑀸𑀳𑀸𑀧𑁂𑀲𑁆𑀲𑀸𑀫𑀺, 𑀯𑀺𑀳𑀸𑀭𑁂 𑀯𑀸 𑀦𑁂𑀲𑀁 𑀉𑀫𑁆𑀫𑀽𑀮𑁂𑀢𑁆𑀯𑀸 𑀯𑀺𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑀸𑀤𑁂𑀢𑁆𑀯𑀸 𑀢𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀻𑀢𑀺 𑀆𑀭𑀪𑀺. 𑀢𑀣𑀸𑀧𑀺 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀚𑀸𑀦𑀦𑀲𑀫𑀢𑁆𑀣𑀁 𑀚𑁂𑀝𑁆𑀞𑀢𑀺𑀲𑁆𑀲𑀁 𑀑𑀳𑀸𑀬 𑀅𑀦𑀸𑀕𑀢𑁂 𑀅𑀢𑁆𑀢𑀦𑁄 𑀯𑀘𑀦𑀁 𑀓𑀸𑀭𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀦𑀺𑀝𑁆𑀞𑀁 𑀫𑀳𑀸𑀲𑁂𑀦𑀓𑀼𑀫𑀸𑀭𑀫𑁂𑀯 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀲𑀺. 𑀯𑀺𑀢𑀼𑀦𑁄 𑀅𑀘𑁆𑀘𑀬𑁂𑀦 𑀚𑁂𑀝𑁆𑀞𑀢𑀺𑀲𑁆𑀲𑀓𑀼𑀫𑀸𑀭𑁂 𑀭𑀚𑁆𑀚𑀁 𑀧𑀢𑁆𑀢𑁂 (𑁮𑁧𑁦-𑁮𑁧𑁯-𑀩𑀼-𑀯) 𑀲𑁄 𑀢𑀲𑁆𑀲 𑀭𑀜𑁆𑀜𑁄 𑀪𑀻𑀢𑁄 𑀓𑀸𑀯𑀻𑀭𑀧𑀝𑁆𑀝𑀦𑀫𑁂𑀯 𑀕𑀢𑁄 [𑀫𑀳𑀸𑀯𑀁𑀲𑁂 𑁩𑁬, 𑁧𑁧𑁩-𑀕𑀸𑀣𑀸𑀤𑀻𑀲𑀼, 𑀦𑀺𑀓𑀸𑀬 𑁧𑁪-𑀧𑀺𑀝𑁆𑀞𑁂].

𑀫𑀳𑀸𑀲𑁂𑀦𑀭𑀜𑁆𑀜𑁄 𑀧𑀦 𑀓𑀸𑀮𑁂 (𑁮𑁧𑁯-𑁮𑁪𑁫-𑀩𑀼-𑀯) 𑀲𑁄 𑀧𑀼𑀦 𑀲𑀻𑀳𑀴𑀤𑀻𑀧𑀫𑀸𑀕𑀦𑁆𑀢𑁆𑀯𑀸 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀯𑁂𑀢𑀼𑀮𑁆𑀮𑀯𑀸𑀤𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀦𑀸𑀧𑀓𑀸𑀭𑁂𑀳𑀺 𑀯𑀸𑀬𑀸𑀫𑀫𑀓𑀸𑀲𑀺. 𑀢𑀣𑀸𑀧𑀺 𑀢𑁂𑀳𑀺 𑀢𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀦𑀸𑀓𑀸𑀭𑀡𑁂𑀳𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 ¶ ‘‘𑀬𑁄 𑀓𑁄𑀘𑀺 𑀏𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀲𑁆𑀲 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀆𑀳𑀸𑀭𑀁 𑀤𑀤𑁂𑀬𑁆𑀬, 𑀢𑀲𑁆𑀲 𑀲𑀢𑀁 𑀤𑀡𑁆𑀟𑁄’’𑀢𑀺 𑀭𑀜𑁆𑀜𑁄 𑀆𑀡𑀸𑀬 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀢𑀤𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀢𑀬𑁄 𑀤𑀺𑀯𑀲𑁂 𑀪𑀺𑀓𑁆𑀔𑀫𑀮𑀤𑁆𑀥𑀸 𑀫𑀳𑀸𑀧𑀸𑀲𑀸𑀤𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀲𑀘𑁂 𑀫𑀬𑀁 𑀔𑀼𑀤𑀸𑀳𑁂𑀢𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀕𑀡𑁆𑀳𑁂𑀬𑁆𑀬𑀸𑀫, 𑀩𑀳𑀽 𑀚𑀦𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀧𑀸𑀬𑀕𑀸𑀫𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀜𑁆𑀘 𑀲𑀩𑁆𑀩𑁂 𑀲𑀸𑀯𑀚𑁆𑀚𑀸 𑀪𑀯𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀦 𑀫𑀬𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀯𑁂𑀢𑀼𑀮𑁆𑀮𑀯𑀸𑀤𑀁 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀸𑀤𑀺𑀓𑁂 𑀲𑀩𑁆𑀩𑀯𑀺𑀳𑀸𑀭𑁂 𑀙𑀟𑁆𑀟𑁂𑀢𑁆𑀯𑀸 𑀭𑁄𑀳𑀡𑀚𑀦𑀧𑀤𑀜𑁆𑀘 𑀫𑀮𑀬𑀧𑀤𑁂𑀲𑀜𑁆𑀘 𑀅𑀕𑀫𑀺𑀁𑀲𑀼 [𑀫𑀳𑀸𑀯𑀁𑀲𑁂 𑁩𑁭, 𑁨-𑁬-𑀕𑀸𑀣𑀸𑀲𑀼. 𑀦𑀺𑀓𑀸𑀬𑀲𑀗𑁆𑀕𑀳𑁂 𑁧𑁪-𑀧𑀺𑀝𑁆𑀞𑁂].

𑀯𑁂𑀢𑀼𑀮𑁆𑀮𑀯𑀸𑀤𑁄

𑀓𑀻𑀤𑀺𑀲𑁄 𑀯𑁂𑀢𑀼𑀮𑁆𑀮𑀯𑀸𑀤𑁄 𑀦𑀸𑀫, 𑀬𑀢𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀅𑀢𑀺𑀯𑀺𑀬 𑀚𑀺𑀕𑀼𑀘𑁆𑀙𑀺𑀁𑀲𑀽𑀢𑀺? 𑀇𑀤𑀸𑀦𑀺 𑀯𑁂𑀢𑀼𑀮𑁆𑀮𑀯𑀸𑀤𑀲𑁆𑀲 𑀲𑀭𑀽𑀧𑀁 𑀲𑀩𑁆𑀩𑀸𑀓𑀸𑀭𑁂𑀦 𑀧𑀓𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀯𑁂𑀢𑀼𑀮𑁆𑀮𑀦𑀸𑀫𑁂𑀦 𑀧𑁄𑀢𑁆𑀣𑀓𑀸𑀦𑀁 𑀯𑀸 𑀦𑀺𑀓𑀸𑀬𑀲𑁆𑀲 𑀯𑀸 𑀏𑀢𑀭𑀳𑀺 𑀅𑀧𑀸𑀓𑀝𑀪𑀸𑀯𑀢𑁄. 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀦 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 [𑀓𑀣𑀸. 𑀅𑀝𑁆𑀞. 𑁭𑁯𑁩-𑁭𑁯𑁪 𑀆𑀤𑀬𑁄] 𑀓𑀢𑀺𑀧𑀬𑀸 𑀯𑁂𑀢𑀼𑀮𑁆𑀮𑀯𑀸𑀤𑀸 𑀆𑀕𑀢𑀸. 𑀓𑀣𑀁? 𑁋

‘‘𑀧𑀭𑀫𑀢𑁆𑀣𑀢𑁄 𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄, 𑀫𑀕𑁆𑀕𑀨𑀮𑁂𑀳𑀺 𑀅𑀜𑁆𑀜𑁄 𑀲𑀗𑁆𑀖𑁄 𑀦𑀸𑀫 𑀦𑀢𑁆𑀣𑀺, 𑀫𑀕𑁆𑀕𑀨𑀮𑀸𑀦𑀺 𑀘 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀘 (𑁧).

‘‘𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺 𑀘 (𑁨).

‘‘𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀓𑀺𑀜𑁆𑀘𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀺 𑀧𑀺𑀯𑀢𑀺 𑀔𑀸𑀤𑀢𑀺 𑀲𑀸𑀬𑀢𑀻’’𑀢𑀺 𑀘 (𑁩).

𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀲𑀓𑁆𑀓𑀸 𑀢𑁂𑀲𑀁 𑀓𑀺𑀜𑁆𑀘𑀺 𑀤𑀸𑀢𑀼𑀁, 𑀦 𑀘 𑀢𑁂𑀳𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁, 𑀦𑀸𑀧𑀺 𑀢𑁂𑀲𑀁 𑀤𑀸𑀦𑁂𑀦 𑀓𑁄𑀘𑀺 𑀉𑀧𑀓𑀸𑀭𑁄 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀘 (𑁪).

‘‘𑀩𑀼𑀤𑁆𑀥𑁄 𑀪𑀕𑀯𑀸 𑀦 𑀓𑀺𑀜𑁆𑀘𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀮𑁄𑀓𑀸𑀦𑀼𑀯𑀢𑁆𑀢𑀦𑀢𑁆𑀣𑀁 𑀧𑀦 𑀧𑀭𑀺𑀪𑀼𑀜𑁆𑀚𑀫𑀸𑀦𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀧𑀓𑀸𑀭𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁 𑀢𑀲𑁆𑀫𑀺𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀘 (𑁫).

‘‘𑀪𑀕𑀯𑀸 ¶ 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣𑁂𑀯 𑀯𑀲𑀢𑀺, 𑀦 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀢𑀺, 𑀦𑀺𑀫𑁆𑀫𑀺𑀢𑀭𑀽𑀧𑀫𑀢𑁆𑀢𑀓𑀁 𑀧𑀦𑁂𑀢𑁆𑀣 𑀤𑀲𑁆𑀲𑁂𑀢𑀻’’𑀢𑀺 𑀘 (𑁬).

‘‘𑀢𑀼𑀲𑀺𑀢𑀧𑀼𑀭𑁂 𑀞𑀺𑀢𑁄 𑀪𑀕𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀅𑀪𑀺𑀦𑀺𑀫𑁆𑀫𑀺𑀢𑀁 𑀧𑁂𑀲𑁂𑀲𑀺, 𑀢𑁂𑀦 𑀘𑁂𑀯, 𑀢𑀲𑁆𑀲 𑀘 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸’’𑀢𑀺 𑀘 (𑁭).

‘‘𑀏𑀓𑀸𑀥𑀺𑀧𑁆𑀧𑀸𑀬𑁂𑀦 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀓𑀸𑀭𑀼𑀜𑁆𑀜𑁂𑀦 𑀯𑀸 𑀏𑀓𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀏𑀓𑀸𑀥𑀺𑀧𑁆𑀧𑀸𑀬𑁄, 𑀲𑀁𑀲𑀸𑀭𑁂 𑀯𑀸 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀩𑀼𑀤𑁆𑀥𑀧𑀽𑀚𑀸𑀤𑀻𑀦𑀺 𑀓𑀢𑁆𑀯𑀸 𑀧𑀡𑀺𑀥𑀺𑀯𑀲𑁂𑀦 𑀏𑀓𑁄 𑀅𑀥𑀺𑀧𑁆𑀧𑀸𑀬𑁄 𑀅𑀲𑁆𑀲𑀸𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑁄, 𑀏𑀯𑀭𑀽𑀧𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀏𑀓𑀸𑀥𑀺𑀧𑁆𑀧𑀸𑀬𑁄 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀘 (𑁮) 𑀏𑀯𑀁 𑀯𑁂𑀢𑀼𑀮𑁆𑀮𑀯𑀸𑀤𑀻𑀦𑀁 𑀮𑀤𑁆𑀥𑀺𑀬𑁄 𑀆𑀕𑀢𑀸, 𑀏𑀢𑁆𑀢𑀓𑀸𑀬𑁂𑀯 𑀦𑁂𑀲𑀁 𑀯𑀸𑀤𑀸 𑀣𑁂𑀭𑀯𑀸𑀤𑀕𑀦𑁆𑀣𑀯𑀲𑁂𑀦 𑀤𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺.

𑀏𑀢𑁆𑀣 𑀘 𑀆𑀤𑀺𑀢𑁄 𑀘𑀢𑀽𑀳𑀺 𑀯𑀸𑀤𑁂𑀳𑀺 𑀲𑀼𑀢𑁆𑀢𑀦𑁆𑀢𑀸𑀕𑀢𑀲𑀗𑁆𑀖𑁄 𑀘 𑀫𑀺𑀘𑁆𑀙𑀸 𑀕𑀳𑀺𑀢𑁄, 𑀯𑀺𑀦𑀬𑀸𑀕𑀢𑀲𑀗𑁆𑀖𑁄 𑀘 𑀲𑀩𑁆𑀩𑀣𑀸 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀤𑀦𑀦𑁆𑀢𑀭𑀁 𑀢𑀬𑁄 𑀯𑀸𑀤𑀸 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀸𑀦𑀼𑀯𑀢𑁆𑀢𑀓𑀸. 𑀅𑀦𑁆𑀢𑀺𑀫𑀲𑁆𑀲 𑀧𑀦 𑀅𑀲𑀤𑁆𑀥𑀫𑁆𑀫𑀯𑀸𑀤𑀪𑀸𑀯𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄𑀢𑀺.

𑀅𑀪𑀺𑀥𑀫𑁆𑀫𑀲𑀫𑀼𑀘𑁆𑀘𑀬𑁂 𑀧𑀦 𑀯𑁂𑀢𑀼𑀮𑁆𑀮𑀧𑀺𑀝𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀧𑀺𑀝𑀓𑀪𑀸𑀯𑁄 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 𑀲𑀤𑁆𑀥𑀫𑁆𑀫𑀧𑀼𑀡𑁆𑀟𑀭𑀺𑀓𑀲𑀼𑀢𑁆𑀢𑀸𑀤𑀺𑀓𑁂 𑀩𑁄𑀥𑀺𑀲𑀢𑁆𑀢𑀧𑀺𑀝𑀓𑁂 𑀆𑀕𑀢𑀯𑀸𑀤𑁄𑀧𑀺 ‘‘𑀯𑁂𑀢𑀼𑀮𑁆𑀮𑀯𑀸𑀤𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄 [𑀅𑀪𑀺𑀥𑀫𑁆𑀫𑀲𑀫𑀼𑀘𑁆𑀘𑀬𑁂 𑁭𑁯-𑀧𑀺𑀝𑁆𑀞𑁂].

𑀫𑀳𑀸𑀯𑀺𑀳𑀸𑀭𑀦𑀸𑀲𑀦𑀁

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀲𑀼 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀯𑀺𑀳𑀸𑀭𑁂 𑀙𑀟𑁆𑀟𑁂𑀢𑁆𑀯𑀸 𑀕𑀢𑁂𑀲𑀼 𑀲𑀗𑁆𑀖𑀫𑀺𑀢𑁆𑀢𑁄 𑀧𑀸𑀧𑀪𑀺𑀓𑁆𑀔𑀼 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀸𑀤𑀺𑀓𑁂 𑀘𑀢𑀼𑀲𑀝𑁆𑀞𑁆𑀬𑀸𑀥𑀺𑀓𑁂 𑀢𑀺𑀲𑀢𑀫𑀢𑁆𑀢𑁂 𑀧𑀭𑀺𑀯𑁂𑀡𑀧𑀸𑀲𑀸𑀤𑁂 𑀦𑀸𑀲𑁂𑀢𑁆𑀯𑀸 𑀲𑀫𑀽𑀮𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀁 𑀆𑀦𑀬𑀸𑀧𑁂𑀲𑀺. 𑀯𑀺𑀳𑀸𑀭𑀪𑀽𑀫𑀺𑀬𑀜𑁆𑀘 𑀓𑀲𑀸𑀧𑁂𑀢𑁆𑀯𑀸 𑀅𑀧𑀭𑀡𑁆𑀡𑁂 𑀯𑀧𑀸𑀧𑁂𑀲𑀺. 𑀏𑀯𑀁 𑀢𑀤𑀸 𑀫𑀳𑀸𑀯𑀺𑀳𑀸𑀭𑁄 𑀦𑀯 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀼𑀜𑁆𑀜𑁄 𑀅𑀳𑁄𑀲𑀺 𑀆𑀯𑀸𑀲𑀯𑀺𑀭𑀳𑀺𑀢𑁄 𑀘. 𑀅𑀣 𑀭𑀸𑀚𑀸 𑀫𑁂𑀖𑀯𑀡𑁆𑀡𑀸𑀪𑀬𑀲𑁆𑀲 𑀦𑀸𑀫 𑀓𑀮𑁆𑀬𑀸𑀡𑀫𑀺𑀢𑁆𑀢𑀪𑀽𑀢𑀲𑁆𑀲 𑀅𑀫𑀘𑁆𑀘𑀲𑁆𑀲 𑀲𑀦𑁆𑀢𑀚𑁆𑀚𑀦𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 ¶ 𑀫𑀳𑀸𑀯𑀺𑀳𑀸𑀭𑀁 𑀧𑀼𑀦 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀢𑁂 𑀘𑀸𑀧𑀺 𑀅𑀧𑀓𑁆𑀓𑀦𑁆𑀢𑁂 𑀪𑀺𑀓𑁆𑀔𑀽 𑀆𑀦𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺 [𑀫𑀳𑀸𑀯𑀁𑀲𑁂 𑁩𑁭-𑁩𑁦-𑀕𑀸𑀣𑀸𑀲𑀼. 𑀦𑀺𑀓𑀸𑀬𑀲𑀗𑁆𑀕𑀳𑁂 𑁧𑁪-𑁧𑁫-𑀧𑀺𑀝𑁆𑀞𑁂𑀲𑀼].

𑀚𑁂𑀢𑀯𑀦𑀯𑀸𑀲𑀺𑀦𑀺𑀓𑀸𑀬𑀼𑀧𑁆𑀧𑀢𑁆𑀢𑀺

𑀧𑀼𑀦𑀧𑀺 𑀭𑀸𑀚𑀸 𑀤𑀓𑁆𑀔𑀺𑀡𑀸𑀭𑀸𑀫𑀯𑀸𑀲𑀺𑀫𑁆𑀳𑀺 𑀚𑀺𑀫𑁆𑀳𑀫𑀸𑀦𑀲𑁂 𑀓𑀼𑀳𑀓𑀢𑀺𑀲𑁆𑀲𑀢𑁆𑀣𑁂𑀭𑁂 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀢𑀲𑁆𑀲𑀢𑁆𑀣𑀸𑀬 𑀫𑀳𑀸𑀯𑀺𑀳𑀸𑀭𑀲𑀻𑀫𑀩𑁆𑀪𑀦𑁆𑀢𑀭𑁂 𑀚𑁄𑀢𑀺𑀯𑀦𑀼𑀬𑁆𑀬𑀸𑀦𑁂 𑀚𑁂𑀢𑀯𑀦𑀯𑀺𑀳𑀸𑀭𑀁 𑀓𑀸𑀭𑁂𑀢𑀼𑀫𑀸𑀭𑀪𑀺. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀢𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀼𑀦𑀧𑀺 𑀢𑀢𑁄 𑀅𑀧𑀓𑁆𑀓𑀫𑀺𑀁𑀲𑀼. 𑀢𑀤𑀸𑀧𑀺 𑀫𑀳𑀸𑀯𑀺𑀳𑀸𑀭𑁄 𑀦𑀯 𑀫𑀸𑀲𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀼𑀜𑁆𑀜𑁄 𑀅𑀳𑁄𑀲𑀺. 𑀭𑀸𑀚𑀸 𑀧𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀯𑀲𑁂𑀦𑁂𑀯 𑀢𑀢𑁆𑀣 𑀚𑁂𑀢𑀯𑀦𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀓𑀼𑀳𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺𑀬𑁂𑀯. 𑀢𑀢𑁆𑀣 𑀤𑀓𑁆𑀔𑀺𑀡𑀕𑀺𑀭𑀺𑀯𑀺𑀳𑀸𑀭𑀢𑁄 𑀲𑀸𑀕𑀮𑀺𑀬𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀯𑀲𑀺𑀁𑀲𑀼. 𑀧𑀘𑁆𑀙𑀸 𑀘 𑀢𑁂 𑀅𑀫𑁆𑀩𑀲𑀸𑀫𑀡𑁂𑀭𑀲𑀺𑀮𑀸𑀓𑀸𑀮𑀭𑀜𑁆𑀜𑁄 𑀓𑀸𑀮𑁂 (𑁧𑁦𑁬𑁭-𑁧𑁦𑁮𑁦-𑀩𑀼-𑀯) 𑀯𑁂𑀢𑀼𑀮𑁆𑀮𑀯𑀸𑀤𑀺𑀦𑁄 𑀅𑀳𑁂𑀲𑀼𑀁 [𑀫𑀳𑀸𑀯𑀁𑀲𑁂 𑁩𑁭, 𑁩𑁨-𑀕𑀸𑀣𑀸𑀤𑀻𑀲𑀼, 𑀦𑀺𑀓𑀸𑀬𑀲𑀗𑁆𑀕𑀳𑁂 𑁧𑁫-𑀧𑀺𑀝𑁆𑀞𑁂].

𑀏𑀯𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀲𑀻𑀳𑀴𑀤𑀻𑀧𑀫𑀸𑀕𑀫𑀦𑀓𑀸𑀮𑀢𑁄 (𑁯𑁬𑁫-𑀩𑀼-𑀯) 𑀧𑀼𑀩𑁆𑀩𑁂𑀬𑁂𑀯 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀻𑀳𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀯𑀺𑀭𑀼𑀤𑁆𑀥𑀲𑀫𑀬𑀸 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 (𑁪𑁫𑁫-𑀩𑀼-𑀯) 𑀲𑀸𑀕𑀮𑀺𑀬𑀸 (𑁭𑁯𑁭-𑁮𑁧𑁦-𑀩𑀼-𑀯) 𑀚𑁂𑀢𑀯𑀦𑀯𑀸𑀲𑀺𑀦𑁄 (𑁮𑁨𑁯-𑁮𑁪𑁫-𑀩𑀼-𑀯) 𑀘𑀸𑀢𑀺 𑀢𑀬𑁄 𑀦𑀺𑀓𑀸𑀬𑀸 𑀉𑀧𑁆𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀧𑀦 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀬𑁂𑀯 𑀯𑀺𑀲𑁂𑀲𑀢𑁄 𑀧𑀸𑀓𑀝𑀸 𑀘𑁂𑀯 𑀳𑁄𑀦𑁆𑀢𑀺 𑀩𑀮𑀯𑀦𑁆𑀢𑁄 𑀘. 𑀢𑀣𑀸 𑀳𑀺 𑀢𑁂 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀧𑀺𑀝𑀓𑀜𑁆𑀘 𑀯𑀚𑁆𑀚𑀺𑀧𑀼𑀢𑁆𑀢𑀓𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀧𑀺𑀝𑀓𑀜𑁆𑀘 𑀫𑀳𑀺𑀲𑀸𑀲𑀓𑀸𑀤𑀺𑀦𑀺𑀓𑀸𑀬𑀧𑀺𑀝𑀓𑀜𑁆𑀘 𑀫𑀳𑀸𑀬𑀸𑀦𑀧𑀺𑀝𑀓𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀢𑁂𑀲𑀼 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀧𑀺𑀝𑀓𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑁄 𑀧𑀸𑀓𑀝𑁄𑀬𑁂𑀯. 𑀫𑀳𑀺𑀲𑀸𑀲𑀓𑀸𑀤𑀺𑀦𑀺𑀓𑀸𑀬𑀧𑀺𑀝𑀓𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑁄 𑀧𑀦 𑀨𑀸𑀳𑀺𑀬𑀦𑁆𑀦𑀸𑀫𑀲𑁆𑀲 𑀘𑀺𑀦𑀪𑀺𑀓𑁆𑀔𑀼𑀦𑁄 𑀅𑀤𑁆𑀥𑀸𑀦𑀓𑁆𑀓𑀫𑀲𑀮𑁆𑀮𑀓𑁆𑀔𑀡𑀓𑀣𑀸𑀬 𑀘𑁂𑀯 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀯𑀡𑁆𑀡𑀧𑀺𑀝𑀓𑀸𑀤𑀺𑀦𑀸𑀫𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀫𑀳𑀸𑀬𑀸𑀦𑀧𑀺𑀝𑀓𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑁄𑀧𑀺.

𑀨𑀸𑀳𑀺𑀬𑀫𑀤𑁆𑀥𑀸𑀦𑀓𑁆𑀓𑀫𑀓𑀣𑀸

𑀨𑀸𑀳𑀺𑀬𑀦𑁆𑀦𑀸𑀫𑁂𑀦 𑀳𑀺 𑀘𑀺𑀦𑀪𑀺𑀓𑁆𑀔𑀼𑀦𑀸 𑁯𑁫𑁬-𑀩𑀼𑀤𑁆𑀥𑀯𑀲𑁆𑀲𑁂 𑀲𑀻𑀳𑀴𑀤𑀻𑀧𑀢𑁄 𑀲𑀓𑁆𑀓𑀢𑀪𑀸𑀲𑀸𑀭𑁄𑀧𑀺𑀢𑀁 𑀫𑀳𑀺𑀲𑀸𑀲𑀓𑀯𑀺𑀦𑀬𑀧𑀺𑀝𑀓𑀜𑁆𑀘 𑀤𑀻𑀖𑀸𑀕𑀫𑁄 𑀘 𑀲𑀁𑀬𑀼𑀢𑁆𑀢𑀸𑀕𑀫𑁄 𑀘 𑀲𑀦𑁆𑀦𑀺𑀧𑀸𑀢𑀧𑀺𑀝𑀓𑀜𑁆𑀘 𑀅𑀢𑁆𑀢𑀦𑀸 𑀲𑀳 𑀘𑀺𑀦𑀭𑀝𑁆𑀞𑀫𑀸𑀦𑀻𑀢𑀦𑁆𑀢𑀺 𑀢𑀲𑁆𑀲 𑀅𑀤𑁆𑀥𑀸𑀦𑀓𑁆𑀓𑀫𑀓𑀣𑀸𑀬𑀁 ¶ 𑀤𑀲𑁆𑀲𑀺𑀢𑀁. 𑀢𑀜𑁆𑀘 𑀲𑀩𑁆𑀩𑀁 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀢𑁄𑀬𑁂𑀯 𑀮𑀤𑁆𑀥𑀫𑀲𑁆𑀲, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀲𑀓𑁆𑀓𑀢𑀸𑀭𑁄𑀧𑀺𑀢𑀧𑀺𑀝𑀓𑀸𑀪𑀸𑀯𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀯𑀡𑁆𑀡𑀧𑀺𑀝𑀓𑀸𑀤𑀻𑀦𑀺 𑀘 𑀢𑀢𑁆𑀣𑁂𑀯 𑀪𑀯𑁂𑀬𑁆𑀬𑀼𑀁, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀢𑁂𑀲𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀢𑁄. 𑀢𑀣𑀸 ‘‘𑀨𑀸𑀳𑀺𑀬𑀫𑁆𑀪𑀺𑀓𑁆𑀔𑀼𑀲𑁆𑀲 𑀲𑀻𑀳𑀴𑀤𑀻𑀧𑁂 𑀧𑀝𑀺𑀯𑀲𑀦𑀓𑀸𑀮𑁂 (𑁯𑁫𑁪-𑁯𑁫𑁬-𑀩𑀼-𑀯) 𑀫𑀳𑀸𑀯𑀺𑀳𑀸𑀭𑁂 𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂 𑀣𑁂𑀭𑀯𑀸𑀤𑀧𑀺𑀝𑀓𑀫𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀦 𑀫𑀳𑀸𑀬𑀸𑀦𑀧𑀺𑀝𑀓𑀁. 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑁂 𑀧𑀜𑁆𑀘𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂 𑀧𑀦 𑀤𑁆𑀯𑁂𑀧𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀺 𑀫𑀳𑀸𑀬𑀸𑀦𑀧𑀺𑀝𑀓𑀜𑁆𑀘𑁂𑀯 𑀣𑁂𑀭𑀯𑀸𑀤𑀧𑀺𑀝𑀓𑀜𑁆𑀘𑀸’’𑀢𑀺 𑀘 𑀢𑁂𑀦𑁂𑀯 𑀘𑀺𑀦𑀪𑀺𑀓𑁆𑀔𑀼𑀦𑀸 𑀤𑀲𑁆𑀲𑀺𑀢𑀁.

𑀬𑀲𑁆𑀫𑀸 𑀧𑀦 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀫𑀳𑀸𑀬𑀸𑀦𑀧𑀺𑀝𑀓𑀫𑁆𑀧𑀺 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀳𑀸𑀬𑀸𑀦𑀺𑀓𑀸𑀦𑀁 𑀧𑀥𑀸𑀦𑀸𑀘𑀭𑀺𑀬𑀪𑀽𑀢𑁂𑀳𑀺 𑀅𑀲𑁆𑀲𑀖𑁄𑀲𑀦𑀸𑀕𑀚𑁆𑀚𑀼𑀦𑁂𑀳𑀺 𑀓𑀢𑀕𑀦𑁆𑀣𑀸𑀧𑀺 𑀲𑀁𑀯𑀺𑀚𑁆𑀚𑀫𑀸𑀦𑀸𑀬𑁂𑀯 𑀪𑀯𑁂𑀬𑁆𑀬𑀼𑀁, 𑀢𑀢𑁄𑀬𑁂𑀯 𑀢𑁂𑀲𑀁 𑀦𑀬𑀜𑁆𑀘 𑀦𑀸𑀫𑀜𑁆𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄𑀧𑀺 𑀅𑀜𑁆𑀜𑁂𑀧𑀺 𑀢𑀁𑀓𑀸𑀮𑀺𑀓𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑀸 𑀣𑁂𑀭𑀸 𑀚𑀸𑀦𑁂𑀬𑁆𑀬𑀼𑀁𑀬𑁂𑀯. 𑀅𑀧𑀺𑀘 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀲𑀫𑀼𑀤𑁆𑀤𑀲𑀫𑀻𑀧𑁂 𑀕𑀼𑀦𑁆𑀢𑀸𑀚𑀦𑀧𑀤𑁂 𑀦𑀸𑀕𑀸𑀭𑀚𑀼𑀦𑀓𑁄𑀡𑁆𑀟𑀁 𑀦𑀸𑀫 𑀞𑀸𑀦𑀫𑀢𑁆𑀣𑀺, 𑀬𑀢𑁆𑀣 𑀦𑀸𑀕𑀚𑁆𑀚𑀼𑀦𑁄 𑀫𑀳𑀸𑀬𑀸𑀦𑀺𑀓𑀸𑀦𑀁 𑀧𑀥𑀸𑀦𑀸𑀘𑀭𑀺𑀬𑀪𑀽𑀢𑁄 𑀯𑀲𑀦𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀘 𑀢𑀦𑁆𑀤𑁂𑀲𑀺𑀓𑀪𑀸𑀯𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀲𑀢𑀺, 𑀢𑀁 𑀧𑀘𑁆𑀙𑀢𑁄 (𑁩𑁩-𑀧𑀺𑀝𑁆𑀞𑁂) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸𑀧𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀦𑀸𑀕𑀚𑁆𑀚𑀼𑀦𑀲𑁆𑀲 𑀘 𑀅𑀲𑁆𑀲𑀖𑁄𑀲𑀲𑁆𑀲 𑀘 𑀦𑀬𑀜𑁆𑀘 𑀦𑀸𑀫𑀜𑁆𑀘 𑀚𑀸𑀦𑁂𑀬𑁆𑀬𑀬𑁂𑀯𑀸𑀢𑀺 𑀲𑀓𑁆𑀓𑀸 𑀅𑀦𑀼𑀫𑀺𑀦𑀺𑀢𑀼𑀁.

𑀚𑀸𑀦𑀢𑁄𑀬𑁂𑀯 𑀧𑀦 𑀢𑁂𑀲𑀁 𑀦𑀬𑀲𑁆𑀲 𑀯𑀸 𑀦𑀸𑀫𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀅𑀝𑁆𑀞𑀓𑀣𑀸𑀬𑀫𑀧𑁆𑀧𑀓𑀸𑀲𑀦𑀁 𑀢𑁂𑀲𑀁 𑀦𑀺𑀓𑀸𑀬𑀦𑁆𑀢𑀭𑀪𑀸𑀯𑀢𑁄𑀬𑁂𑀯𑀲𑁆𑀲. 𑀢𑀣𑀸 𑀳𑀺 𑀢𑁂𑀲𑀁 𑀅𑀲𑁆𑀲𑀖𑁄𑀲𑀦𑀸𑀕𑀚𑁆𑀚𑀼𑀦𑀸𑀦𑀁 𑀅𑀲𑁆𑀲𑀖𑁄𑀲𑁄 [(𑁫𑁭𑁦-𑁬𑁭𑁦-𑀩𑀼𑀤𑁆𑀥𑀯𑀲𑁆𑀲𑀩𑁆𑀪𑀦𑁆𑀢𑀭𑁂)] 𑀣𑁂𑀭𑀯𑀸𑀤𑀢𑁄 𑀪𑀺𑀦𑁆𑀦𑁂𑀲𑀼 𑀏𑀓𑀸𑀤𑀲𑀲𑀼 𑀕𑀡𑁂𑀲𑀼 𑀲𑀩𑁆𑀩𑀢𑁆𑀣𑀺𑀯𑀸𑀤𑀕𑀡𑁂 𑀧𑀭𑀺𑀬𑀸𑀧𑀦𑁆𑀦𑁄, 𑀦𑀸𑀕𑀚𑁆𑀚𑀼𑀦𑁄 𑀘 𑀫𑀳𑀸𑀲𑀗𑁆𑀖𑀺𑀓-𑀘𑁂𑀢𑀺𑀬𑀯𑀸𑀤𑀺𑀕𑀡𑀸𑀤𑀻𑀳𑀺 𑀚𑀸𑀢𑁂 𑀫𑀳𑀸𑀬𑀸𑀦𑀦𑀺𑀓𑀸𑀬𑁂 𑀧𑀭𑀺𑀬𑀸𑀧𑀦𑁆𑀦𑁄, ¶ 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀘 𑀆𑀤𑀺𑀢𑁄𑀬𑁂𑀯 𑀧𑀝𑁆𑀞𑀸𑀬 𑀦𑀺𑀓𑀸𑀬𑀦𑁆𑀢𑀭𑀲𑀫𑀬𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀦𑀢𑁆𑀣𑀁 𑀅𑀢𑁆𑀢𑀦𑁄 𑀧𑀺𑀝𑀓𑀁 𑀅𑀢𑀻𑀯 𑀆𑀤𑀭𑀁 𑀓𑀢𑁆𑀯𑀸 𑀭𑀓𑁆𑀔𑀦𑁆𑀢𑀺, 𑀅𑀬𑀜𑁆𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀢𑁂𑀲𑀫𑀜𑁆𑀜𑀢𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀕𑀦𑁆𑀣𑀦𑀺𑀕𑀫𑀦𑁂𑀲𑀼 ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦𑀸’’𑀢𑀺. 𑀢𑀲𑁆𑀫𑀸 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀢𑁂𑀲𑀁 𑀦𑀬𑀁 𑀚𑀸𑀦𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀕𑀦𑁆𑀣𑁂𑀲𑀼 𑀦𑀺𑀓𑀸𑀬𑀦𑁆𑀢𑀭𑀲𑀫𑀬𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀦𑀢𑁆𑀣𑀁 𑀦𑀧𑁆𑀧𑀓𑀸𑀲𑁂𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀘 𑀬𑀸𑀦𑀺 ‘‘𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑀫𑁆𑀳𑀺, 𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀫𑀳𑀸𑀯𑀁𑀲𑀯𑀘𑀦𑀲𑁆𑀲 𑀯𑀺𑀘𑀸𑀭𑀡𑀫𑀼𑀔𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀯𑀫𑁆𑀪𑀦𑀯𑀘𑀦𑀸𑀦𑀺 𑀥𑀫𑁆𑀫𑀸𑀦𑀦𑁆𑀤𑀓𑁄𑀲𑀫𑁆𑀩𑀺𑀦𑀸 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀫𑀽𑀮𑀓𑀪𑀸𑀯𑁂𑀦 𑀅𑀦𑀼𑀯𑀺𑀘𑀸𑀭𑀺𑀢𑀸𑀦𑀺. 𑀢𑀣𑀸𑀧𑀺 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑁂 𑀚𑀸𑀢𑁄’’𑀢𑀺 𑀏𑀢𑀁 𑀧𑀦 𑀅𑀢𑁆𑀣𑀁 𑀲𑀸𑀥𑁂𑀢𑀼𑀁 𑀤𑀴𑁆𑀳𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑁂𑀯 𑀞𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀁𑀲𑀯𑀘𑀦𑀁, 𑀬𑀫𑁆𑀧𑀺 𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀫𑀳𑀸𑀯𑀁𑀲𑀫𑁂𑀯 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀯𑀘𑀦𑀢𑁆𑀢𑀸 𑀦 𑀤𑀴𑁆𑀳𑀓𑀸𑀭𑀡𑀁 𑀳𑁄𑀢𑀻𑀢𑀺.

𑀫𑀭𑀫𑁆𑀫𑀭𑀝𑁆𑀞𑀺𑀓𑀪𑀸𑀯𑀓𑀣𑀸

𑀏𑀓𑀘𑁆𑀘𑁂 𑀧𑀦 𑀫𑀭𑀫𑁆𑀫𑀭𑀝𑁆𑀞𑀺𑀓𑀸 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀫𑀭𑀫𑁆𑀫𑀭𑀝𑁆𑀞𑁂 𑀲𑀣𑀼𑀁 𑀦𑀸𑀫 𑀦𑀕𑀭𑀢𑁄 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑁄 𑀅𑀓𑀸𑀲𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀥𑀫𑁆𑀫𑀸𑀦𑀦𑁆𑀤𑁂𑀦 𑀅𑀦𑀼𑀚𑀸𑀦𑀺𑀢𑁆𑀯𑀸 ‘‘𑀢𑀫𑁆𑀧𑀺 𑀣𑁄𑀓𑀁 𑀬𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀁, 𑀅𑀳𑀁 𑀏𑀯𑀁 𑀲𑀤𑁆𑀤𑀳𑀸𑀫𑀺 ‘𑀩𑀼𑀤𑁆𑀥𑀖𑁄𑀲𑁄 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀢𑁂𑀮𑀗𑁆𑀕𑀚𑀸𑀢𑀺𑀓𑁄’𑀢𑀺, 𑀢𑁂𑀮𑀗𑁆𑀕𑀚𑀸𑀢𑀺𑀓𑀸 𑀘 𑀩𑀳𑀽 𑀚𑀦𑀸 𑀫𑀭𑀫𑁆𑀫𑀭𑀝𑁆𑀞𑁂 𑀘 𑀇𑀦𑁆𑀤𑁄𑀘𑀺𑀦 𑀭𑀝𑁆𑀞𑁂 𑀘 𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀺, 𑀢𑀮𑁆𑀳𑀺𑀗? 𑀇𑀢𑀺 𑀯𑁄𑀳𑀸𑀭𑁄 𑀘 𑀢𑀢𑁄𑀬𑁂𑀯 𑀢𑁂𑀮𑀗𑁆𑀕𑀧𑀤𑀢𑁄 𑀉𑀧𑁆𑀧𑀦𑁆𑀦𑁄. 𑀢𑀣𑀸 ‘𑀩𑀼𑀤𑁆𑀥𑀖𑁄𑀲𑁄 𑀅𑀝𑁆𑀞𑀓𑀣𑀸𑀬𑁄 𑀓𑀢𑁆𑀯𑀸 𑀲𑀻𑀳𑀴𑀤𑀻𑀧𑀢𑁄 𑀫𑀭𑀫𑁆𑀫𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀪𑀸𑀕𑁂 𑀢𑀢𑁆𑀣𑁂𑀯 𑀯𑀲𑀻’𑀢𑀺𑀧𑀺 𑀕𑀳𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀳𑀺 𑀕𑀦𑁆𑀣𑀸 𑀫𑀭𑀫𑁆𑀫𑀭𑀝𑁆𑀞𑁂 𑀲𑀻𑀳𑀴𑀭𑀝𑁆𑀞𑀢𑁄𑀧𑀺 𑀲𑀼𑀭𑀓𑁆𑀔𑀺𑀢𑀢𑀭𑀸 𑀳𑁄𑀦𑁆𑀢𑀻’’𑀢𑀺 𑀘 𑀯𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀺𑀢𑀁.

𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀪𑀸𑀯𑀬𑀼𑀢𑁆𑀢𑀺

𑀩𑀳𑀽 𑀧𑀦 𑀆𑀥𑀼𑀦𑀺𑀓𑀸 𑀯𑀺𑀘𑀓𑁆𑀔𑀡𑀸 𑀥𑀫𑁆𑀫𑀸𑀦𑀦𑁆𑀤𑀸𑀤𑀬𑁄 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑁄’’𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀅𑀝𑁆𑀞𑀓𑀣𑀸𑀝𑀻𑀓𑀸𑀓𑀸𑀭𑀸 𑀣𑁂𑀭𑀸 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀸𑀬𑁂𑀯. 𑀢𑀣𑀸 ¶ 𑀳𑀺 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬 𑀘 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑁆𑀞𑀓𑀣𑀸𑀬 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑁆𑀞𑀓𑀣𑀸𑀬 𑀘 𑀓𑀸𑀭𑀓𑁄 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁄 𑀘𑁄𑀴𑀭𑀝𑁆𑀞𑁂 𑀢𑀫𑁆𑀩𑀧𑀡𑁆𑀡𑀺𑀦𑀤𑀺𑀬𑀁 𑀉𑀭𑀕𑀦𑀕𑀭𑁂 𑀚𑀸𑀢𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀏𑀓𑀓𑀸𑀮𑀺𑀓𑁄 𑀘. 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬-𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤-𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀸𑀦𑀁 𑀓𑀸𑀭𑀓𑁄 𑀆𑀘𑀭𑀺𑀬𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 [𑀏𑀓𑀘𑁆𑀘𑁂 𑀧𑀦 𑀯𑀤𑀦𑁆𑀢𑀺-𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑀓𑀸𑀭𑀓𑁄 𑀏𑀓𑁄, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀸𑀦𑀁 𑀓𑀸𑀭𑀓𑁄 𑀏𑀓𑁄𑀢𑀺 𑀤𑁆𑀯𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀢𑀺] 𑀓𑀜𑁆𑀘𑀺𑀯𑀭𑀭𑀝𑁆𑀞𑁂 𑀓𑀸𑀯𑁂𑀭𑀺𑀦𑀕𑀭𑀚𑀸𑀢𑀺𑀓𑁄. 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀉𑀤𑀸𑀦𑀸𑀤𑀺𑀧𑀸𑀴𑀺𑀬𑀸 𑀲𑀁𑀯𑀡𑁆𑀡𑀦𑀸𑀪𑀽𑀢𑀸𑀬 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀓𑀸𑀭𑀓𑁄 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄𑀧𑀺 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀓𑀜𑁆𑀘𑀺𑀧𑀼𑀭𑀚𑀸𑀢𑀺𑀓𑁄. 𑀢𑀣𑁂𑀯𑀸𑀬𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀦𑀸𑀫 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬 𑀦𑀺𑀕𑀫𑀦𑁂 𑁋

‘‘𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸, 𑀣𑁂𑀭𑁂𑀦 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑁂𑀦;

𑀓𑀜𑁆𑀘𑀺𑀧𑀼𑀭𑀸𑀤𑀻𑀲𑀼 𑀫𑀬𑀸, 𑀧𑀼𑀩𑁆𑀩𑁂 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦𑀸’’𑀢𑀺.

𑀏𑀢𑁆𑀣 𑀘 𑀓𑀜𑁆𑀘𑀺𑀧𑀼𑀭𑀁 𑀦𑀸𑀫 𑀫𑀤𑀭𑀲𑀦𑀕𑀭𑀲𑁆𑀲 𑀈𑀲𑀓𑀁 𑀧𑀘𑁆𑀙𑀺𑀫𑀦𑀺𑀲𑁆𑀲𑀺𑀢𑁂 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀫𑀺𑀮𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀇𑀤𑀸𑀦𑀺 𑀓𑀜𑁆𑀚𑀻𑀯𑀭 𑀇𑀢𑀺 𑀯𑁄𑀳𑀭𑀺𑀢𑀦𑀕𑀭𑀫𑁂𑀯.

𑀢𑀣𑀸 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀦𑀸𑀫 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀦𑀺𑀕𑀫𑀦𑁂𑀧𑀺 𑁋

‘‘𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸, 𑀣𑁂𑀭𑁂𑀦 𑀩𑀼𑀤𑁆𑀥𑀫𑀺𑀢𑁆𑀢𑁂𑀦;

𑀧𑀼𑀩𑁆𑀩𑁂 𑀫𑀬𑀽𑀭𑀤𑀽𑀢 [𑀫𑀬𑀽𑀭𑀭𑀽𑀧 (𑀲𑀻.), 𑀫𑀬𑀽𑀭𑀲𑀼𑀢𑁆𑀢 (𑀲𑁆𑀬𑀸.)] 𑀧𑀝𑁆𑀝𑀦𑀫𑁆𑀳𑀺 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦𑀸’’𑀢𑀺 𑁋 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀫𑀬𑀽𑀭𑀤𑀽𑀢𑀧𑀝𑁆𑀝𑀦𑀁 𑀦𑀸𑀫 𑀇𑀤𑀸𑀦𑀺 𑀫𑀤𑀭𑀲𑀦𑀕𑀭𑀲𑀫𑀻𑀧𑁂 𑀫𑀺𑀮𑀧𑁄𑀭 𑀇𑀢𑀺 𑀯𑁄𑀳𑀭𑀺𑀢𑀝𑁆𑀞𑀸𑀦𑀦𑁆𑀢𑀺 𑀧𑁄𑀭𑀸𑀡𑀧𑁆𑀧𑀯𑀢𑁆𑀢𑀺𑀕𑀯𑁂𑀲𑀻𑀳𑀺 𑀯𑀼𑀢𑁆𑀢𑀁.

𑀇𑀫𑀸𑀳𑀺 𑀧𑀦 𑀦𑀺𑀕𑀫𑀦𑀕𑀸𑀣𑀸𑀳𑀺 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂𑀬𑁂𑀯 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀢𑀁 𑀧𑀓𑀸𑀲𑁂𑀢𑀺, 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑁂 𑀯𑀸, 𑀫𑀭𑀫𑁆𑀫𑀭𑀝𑁆𑀞𑁂 𑀯𑀸 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀢𑀸𑀬 𑀧𑀓𑀸𑀲𑀦𑀜𑁆𑀘 𑀦 𑀤𑀺𑀲𑁆𑀲𑀢𑀺. 𑀢𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀫𑁆𑀧𑀺 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑁩, 𑁧𑁩) 𑀆𑀘𑀭𑀺𑀬𑁂𑀦 𑀏𑀯𑀁 𑀯𑀼𑀢𑁆𑀢𑀁 𑁋

‘‘𑀬𑀁 ¶ 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀫𑀼𑀔𑁂 𑀅𑀦𑀸𑀧𑀢𑁆𑀢𑀻𑀢𑀺 𑀪𑀽𑀫𑀺𑀬𑀁 𑀯𑀺𑀦𑀸 𑀚𑀕𑀢𑀺𑀬𑀸 𑀧𑀫𑀼𑀔𑀁 𑀲𑀦𑁆𑀥𑀸𑀬 𑀓𑀣𑀺𑀢’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑁆𑀥𑀓𑀭𑀝𑁆𑀞𑁂 𑀧𑀸𑀝𑁂𑀓𑁆𑀓𑀲𑀦𑁆𑀦𑀺𑀯𑁂𑀲𑀸 𑀏𑀓𑀘𑁆𑀙𑀤𑀦𑀸 𑀕𑀩𑁆𑀪𑀧𑀸𑀴𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺.

𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 ‘‘𑀅𑀦𑁆𑀥𑀓𑀝𑁆𑀞𑀓𑀣𑀸 𑀅𑀦𑁆𑀥𑀓𑀭𑀝𑁆𑀞𑀺𑀓𑁂𑀳𑀺 𑀣𑁂𑀭𑁂𑀳𑀺 𑀓𑀢𑀸’’𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄𑀧𑀺 𑀘 𑀅𑀦𑁆𑀥𑀓𑀝𑁆𑀞𑀓𑀣𑀸𑀬 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑁆𑀧𑀺 𑀢𑀦𑁆𑀤𑁂𑀲𑀺𑀓𑀕𑀩𑁆𑀪𑀧𑀸𑀴𑀺𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀫𑁆𑀧𑀺 𑀲𑀼𑀝𑁆𑀞𑀼 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀦𑁆𑀤𑁂𑀲𑀺𑀓𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀢𑀣𑀸 𑀇𑀫𑀲𑁆𑀲𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀦𑀺𑀕𑀫𑀦𑁂 𑁋 ‘‘𑀫𑁄𑀭𑀡𑁆𑀟𑀔𑁂𑀝𑀓𑀯𑀢𑁆𑀢𑀩𑁆𑀩𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀔𑁂𑀝𑁄𑀢𑀺 𑀧𑀤𑀲𑁆𑀲 𑀕𑀸𑀫𑁄𑀢𑀺 𑀯𑀸, 𑀚𑀸𑀦𑀧𑀤𑀸𑀦𑀁 𑀓𑀲𑁆𑀲𑀓𑀸𑀦𑀁 𑀦𑀺𑀯𑀸𑀲𑁄𑀢𑀺 𑀯𑀸, 𑀔𑀼𑀤𑁆𑀤𑀓𑀦𑀕𑀭𑀦𑁆𑀢𑀺 𑀯𑀸 𑀢𑀬𑁄 𑀅𑀢𑁆𑀣𑀸 𑀲𑀓𑁆𑀓𑀢𑀸𑀪𑀺𑀥𑀸𑀦𑁂 𑀧𑀓𑀸𑀲𑀺𑀢𑀸, 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂𑀲𑀼 𑀘 𑀬𑀸𑀯𑀚𑁆𑀚𑀢𑀦𑀸𑀧𑀺 𑀕𑀸𑀫𑁄 𑀔𑁂𑀟𑀸𑀢𑀺 𑀯𑁄𑀳𑀭𑀻𑀬𑀢𑀺. 𑀢𑀲𑁆𑀫𑀸 𑀫𑁄𑀭𑀡𑁆𑀟𑀯𑁆𑀳𑀬𑁂 𑀔𑁂𑀝𑁂 𑀚𑀸𑀢𑁄 𑀫𑁄𑀭𑀡𑁆𑀟𑀔𑁂𑀝𑀓𑁄, 𑀫𑁄𑀭𑀡𑁆𑀟𑀔𑁂𑀝𑀓𑁄 𑀇𑀢𑀺 𑀯𑀢𑁆𑀢𑀩𑁆𑀩𑁄 𑀫𑁄𑀭𑀡𑁆𑀟𑀔𑁂𑀝𑀓𑀯𑀢𑁆𑀢𑀩𑁆𑀩𑁄, 𑀢𑁂𑀦 𑀫𑁄𑀭𑀡𑁆𑀟𑀔𑁂𑀝𑀓𑀯𑀢𑁆𑀢𑀩𑁆𑀩𑁂𑀦𑀸𑀢𑀺 𑀯𑀘𑀦𑀢𑁆𑀣𑀁 𑀓𑀢𑁆𑀯𑀸 ‘‘𑀫𑁄𑀭𑀡𑁆𑀟𑀕𑀸𑀫𑁂 𑀚𑀸𑀢𑁄𑀢𑀺 𑀯𑀢𑁆𑀢𑀩𑁆𑀩𑁂𑀦 𑀣𑁂𑀭𑁂𑀦𑀸’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀤𑀸𑀦𑀺 𑀧𑀦 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀕𑀼𑀦𑁆𑀢𑀸𑀚𑀦𑀧𑀤𑁂 𑀦𑀸𑀕𑀸𑀭𑀚𑀼𑀦𑀓𑁄𑀡𑁆𑀟𑀢𑁄 𑀏𑀓𑀧𑀡𑁆𑀡𑀸𑀲𑀫𑀺𑀮𑀫𑀢𑁆𑀢𑁂 (𑁫𑁧) 𑀅𑀫𑀭𑀯𑀢𑀺𑀢𑁄 𑀘 𑀅𑀝𑁆𑀞𑀧𑀡𑁆𑀡𑀸𑀲𑀫𑀺𑀮𑀫𑀢𑁆𑀢𑁂 (𑁫𑁮) 𑀧𑀤𑁂𑀲𑁂 𑀓𑁄𑀢𑀦𑁂𑀫𑀮𑀺𑀧𑀼𑀭𑀻𑀢𑀺 𑀘 𑀕𑀼𑀦𑁆𑀤𑀮𑀧𑀮𑁆𑀮𑀻𑀢𑀺 𑀘 𑀯𑁄𑀳𑀭𑀺𑀢𑀁 𑀞𑀸𑀦𑀤𑁆𑀯𑀬𑀫𑀢𑁆𑀣𑀺, 𑀢𑀢𑁆𑀣 𑀘 𑀩𑀳𑀽𑀦𑀺 𑀩𑀼𑀤𑁆𑀥𑀲𑀸𑀲𑀦𑀺𑀓𑀧𑁄𑀭𑀸𑀡𑀲𑀦𑁆𑀢𑀓𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀦𑁂𑀫𑀮𑀻𑀢𑀺 𑀢𑁂𑀮𑀕𑀼𑀯𑁄𑀳𑀸𑀭𑁄 𑀘 𑀫𑁄𑀭𑀲𑁆𑀲, 𑀕𑀼𑀦𑁆𑀤𑀮𑀼 𑀇𑀢𑀺 𑀘 𑀅𑀡𑁆𑀟𑀲𑁆𑀲, 𑀢𑀲𑁆𑀫𑀸 𑀢𑀁 𑀞𑀸𑀦𑀤𑁆𑀯𑀬𑀫𑁂𑀯 𑀧𑀼𑀩𑁆𑀩𑁂 𑀫𑁄𑀭𑀡𑁆𑀟𑀔𑁂𑀝𑁄𑀢𑀺 𑀯𑁄𑀳𑀭𑀺𑀢𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀚𑀸𑀢𑀺𑀕𑀸𑀫𑁄 𑀪𑀯𑁂𑀬𑁆𑀬𑀸𑀢𑀺 𑀧𑁄𑀭𑀸𑀡𑀝𑁆𑀞𑀸𑀦𑀕𑀯𑁂𑀲𑀻𑀳𑀺 𑀕𑀳𑀺𑀢𑁄. 𑀬𑀲𑁆𑀫𑀸 𑀧𑀦𑁂𑀢𑀁 ‘‘𑀫𑁄𑀭𑀡𑁆𑀟𑀔𑁂𑀝𑀓𑀯𑀢𑁆𑀢𑀩𑁆𑀩𑁂𑀦𑀸’’𑀢𑀺 𑀧𑀤𑀁 ‘‘𑀫𑁄𑀭𑀡𑁆𑀟𑀕𑀸𑀫𑀚𑀸𑀢𑁂𑀦𑀸’’𑀢𑀺 𑀧𑀤𑀁 𑀯𑀺𑀬 𑀧𑀸𑀴𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀁 𑀦 𑀳𑁄𑀢𑀺, 𑀅𑀜𑁆𑀜𑁂𑀳𑀺 𑀘 𑀩𑀳𑀽𑀳𑀺 𑀯𑀺𑀲𑁂𑀲𑀦𑀧𑀤𑁂𑀳𑀺 𑀏𑀓𑀢𑁄 𑀅𑀝𑁆𑀞𑀢𑁆𑀯𑀸 𑀯𑀺𑀲𑁂𑀲𑁆𑀬𑀧𑀤𑀲𑁆𑀲 𑀧𑀘𑁆𑀙𑀢𑁄 𑀯𑀺𑀲𑀼𑀁 𑀞𑀺𑀢𑀁, 𑀆𑀕𑀫𑀝𑁆𑀞𑀓𑀣𑀸𑀤𑀻𑀲𑀼 𑀘 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀢𑀁 𑀓𑁂𑀦𑀘𑀺 𑀢𑀁𑀓𑀸𑀮𑀺𑀓𑁂𑀦 𑀆𑀘𑀭𑀺𑀬𑀲𑁆𑀲 𑀚𑀸𑀢𑀺𑀝𑁆𑀞𑀸𑀦𑀁 𑀲𑀜𑁆𑀚𑀸𑀦𑀦𑁆𑀢𑁂𑀦 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺.

𑀇𑀫𑁂𑀲𑀼 𑀧𑀦 𑀢𑀻𑀲𑀼 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑁂 𑀚𑀸𑀢𑁄𑀢𑀺 𑀘 𑀫𑀭𑀫𑁆𑀫𑀭𑀝𑁆𑀞𑀺𑀓𑁄𑀢𑀺 𑀘 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑁄’’𑀢𑀺 𑀘 𑀯𑀼𑀢𑁆𑀢𑀯𑀘𑀦𑁂𑀲𑀼 𑀧𑀘𑁆𑀙𑀺𑀫𑀫𑁂𑀯 𑀩𑀮𑀯𑀢𑀭𑀁 𑀳𑁄𑀢𑀺 𑀆𑀘𑀭𑀺𑀬𑀲𑁆𑀲𑁂𑀯 𑀯𑀘𑀦𑀦𑀺𑀲𑁆𑀲𑀺𑀢𑀢𑁆𑀢𑀸, 𑀢𑀲𑁆𑀫𑀸 ¶ 𑀢𑀤𑁂𑀯 𑀦𑀺𑀲𑁆𑀲𑀸𑀬 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀉𑀧𑁆𑀧𑀢𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺

𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀤𑀲𑀫𑁂 𑀩𑀼𑀤𑁆𑀥𑀯𑀲𑁆𑀲𑀲𑀢𑀓𑁂 (𑁯𑁦𑁧-𑁧𑁦𑁦𑁦-𑀩𑀼-𑀯) 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀫𑁄𑀭𑀡𑁆𑀟𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑁄, 𑀲𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀘𑁂𑀯 𑀲𑀩𑁆𑀩𑀯𑀺𑀚𑁆𑀚𑀸𑀲𑀺𑀧𑁆𑀧𑀕𑀦𑁆𑀣𑁂𑀲𑀼 𑀘 𑀧𑀸𑀭𑀗𑁆𑀕𑀢𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀫𑁆𑀧𑀺 𑀉𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀢𑀲𑁆𑀫𑀺𑀁𑀬𑁂𑀯 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀣𑁂𑀭𑀯𑀸𑀤𑀺𑀓𑀯𑀺𑀳𑀸𑀭𑁂 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀭𑁂𑀯𑀢𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘𑁂𑀯 𑀉𑀧𑀲𑀫𑁆𑀧𑀤𑀜𑁆𑀘 𑀕𑀡𑁆𑀳𑀺𑀢𑁆𑀯𑀸 𑀧𑀺𑀝𑀓𑀢𑁆𑀢𑀬𑀧𑀸𑀴𑀺𑀫𑀼𑀕𑁆𑀕𑀡𑁆𑀳𑀺. 𑀲𑁄 𑀏𑀯𑀁 𑀧𑀺𑀝𑀓𑀢𑁆𑀢𑀬𑀧𑀸𑀴𑀺𑀫𑀼𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀅𑀜𑁆𑀜𑀸𑀲𑀺 ‘‘𑀅𑀬𑀫𑁂𑀓𑀸𑀬𑀦𑀫𑀕𑁆𑀕𑁄 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀢𑀲𑁆𑀲 𑀯𑀺𑀲𑀺𑀝𑁆𑀞𑀜𑀸𑀡𑀧𑁆𑀧𑀪𑀸𑀯𑀲𑀫𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑁂 𑀓𑀺𑀢𑁆𑀢𑀺𑀖𑁄𑀲𑁄 𑀩𑀼𑀤𑁆𑀥𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀲𑀫𑁆𑀧𑀲𑁆𑀲𑀫𑀸𑀦𑀸 ‘‘𑀩𑀼𑀤𑁆𑀥𑀖𑁄𑀲𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦𑀸’’𑀢𑀺.

𑀲𑁄 𑀏𑀯𑀁 𑀧𑀺𑀝𑀓𑀢𑁆𑀢𑀬𑀧𑀸𑀴𑀺𑀫𑀼𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀤𑀭𑀲 𑀦𑀕𑀭𑀲𑀫𑀻𑀧𑀝𑁆𑀞𑀸𑀦𑀪𑀽𑀢𑁂 𑀫𑀬𑀽𑀭𑀤𑀽𑀢𑀧𑀝𑁆𑀝𑀦𑀫𑁆𑀳𑀺 𑀘 𑀓𑀜𑁆𑀘𑀺𑀧𑀼𑀭𑀸𑀤𑀻𑀲𑀼 𑀘 𑀯𑀲𑀦𑁆𑀢𑁄 𑀅𑀦𑁆𑀥𑀓𑀝𑁆𑀞𑀓𑀣𑀸𑀬 𑀧𑀭𑀺𑀘𑀬𑀁 𑀓𑀢𑁆𑀯𑀸 𑀢𑀸𑀬 𑀅𑀲𑀦𑁆𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀻𑀳𑀴𑀝𑁆𑀞𑀓𑀣𑀸𑀲𑀼𑀧𑀺 𑀧𑀭𑀺𑀘𑀬𑀁 𑀓𑀸𑀢𑀼𑀓𑀸𑀫𑁄 𑀢𑀸 𑀘 𑀧𑀸𑀴𑀺𑀪𑀸𑀲𑀫𑀸𑀭𑁄𑀧𑁂𑀢𑁆𑀯𑀸 𑀅𑀪𑀺𑀦𑀯𑀻𑀓𑀸𑀢𑀼𑀫𑀸𑀲𑀻𑀲𑀦𑁆𑀢𑁄 𑀲𑀻𑀳𑀴𑀤𑀻𑀧𑀫𑀕𑀫𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀲𑀻𑀳𑀴𑀤𑀻𑀧𑁂 𑀫𑀳𑀸𑀦𑀸𑀫𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀲𑁄 𑀘 𑀭𑀸𑀚𑀸 𑀅𑀪𑀬𑀕𑀺𑀭𑀺𑀯𑀸𑀲𑀻𑀲𑀼 𑀧𑀲𑀦𑁆𑀦𑁄 𑀢𑁂𑀬𑁂𑀯 𑀯𑀺𑀲𑁂𑀲𑀢𑁄 𑀧𑀕𑁆𑀕𑀡𑁆𑀳𑀸𑀢𑀺.

𑀏𑀓𑀘𑁆𑀘𑁂 𑀧𑀦 𑀆𑀥𑀼𑀦𑀺𑀓𑀸 𑀯𑀺𑀘𑀓𑁆𑀔𑀡𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀲𑀻𑀳𑀴𑀤𑀻𑀧𑀸𑀕𑀫𑀦𑁂𑀦 𑀲𑀺𑀭𑀺𑀫𑁂𑀖𑀯𑀡𑁆𑀡𑀭𑀸𑀚𑀓𑀸𑀮𑀢𑁄 (𑁮𑁪𑁬-𑀩𑀼-𑀯) 𑀧𑀼𑀭𑁂𑀢𑀭𑀁𑀬𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀜𑁆𑀘 𑀦𑁂𑀲𑀁 𑀓𑀸𑀭𑀡𑀁, 𑀢𑀲𑁆𑀲 𑀭𑀜𑁆𑀜𑁄 𑀦𑀯𑀯𑀲𑁆𑀲𑀓𑀸𑀮𑁂 (𑁮𑁫𑁫-𑀩𑀼-𑀯) 𑀩𑀼𑀤𑁆𑀥𑀲𑁆𑀲 𑀤𑀸𑀞𑀸𑀥𑀸𑀢𑀼𑀓𑀮𑀺𑀗𑁆𑀕𑀭𑀝𑁆𑀞𑀢𑁄 𑀲𑀻𑀳𑀴𑀤𑀻𑀧𑀫𑀸𑀦𑀻𑀢𑀸, 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀳𑀴𑀭𑀸𑀚𑀸𑀦𑁄 𑀅𑀦𑀼𑀲𑀁𑀯𑀘𑁆𑀙𑀭𑀁 𑀫𑀳𑀦𑁆𑀢𑀁 𑀥𑀸𑀢𑀼𑀧𑀽𑀚𑀸𑀉𑀲𑁆𑀲𑀯𑀁 𑀓𑀭𑁄𑀦𑁆𑀢𑀺. 𑀬𑀤𑀺 𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀢𑀢𑁄 𑀧𑀘𑁆𑀙𑀸 𑀲𑀻𑀳𑀴𑀤𑀻𑀧𑀫𑀸𑀕𑀘𑁆𑀙𑁂𑀬𑁆𑀬, 𑀢𑀫𑁆𑀧𑀺 𑀧𑀸𑀲𑀸𑀤𑀺𑀓𑀁 𑀫𑀳𑀼𑀲𑁆𑀲𑀯𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀦𑁆𑀣𑁂𑀲𑀼 𑀧𑀓𑀸𑀲𑁂𑀬𑁆𑀬 𑀬𑀣𑀸 𑀨𑀸𑀳𑀺𑀬𑀁 𑀦𑀸𑀫 𑀘𑀺𑀦𑀪𑀺𑀓𑁆𑀔𑀼 𑀫𑀳𑀸𑀦𑀸𑀫𑀭𑀸𑀚𑀓𑀸𑀮𑁂 (𑁯𑁫𑁩-𑁯𑁭𑁫-𑀩𑀼-𑀯) 𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀅𑀤𑁆𑀥𑀸𑀦𑀓𑁆𑀓𑀫𑀓𑀣𑀸𑀬𑀁 𑀧𑀓𑀸𑀲𑁂𑀲𑀺, 𑀦 𑀧𑀦 𑀆𑀘𑀭𑀺𑀬𑀲𑁆𑀲 𑀕𑀦𑁆𑀣𑁂𑀲𑀼 ¶ 𑀢𑀁𑀧𑀓𑀸𑀲𑀦𑀸 𑀤𑀺𑀲𑁆𑀲𑀢𑀺, 𑀢𑁂𑀦𑁂𑀢𑀁 𑀜𑀸𑀬𑀢𑀺 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀤𑀸𑀞𑀸𑀥𑀸𑀢𑀼𑀲𑀫𑁆𑀧𑀢𑁆𑀢𑀓𑀸𑀮𑀢𑁄 (𑁮𑁫𑁫-𑀩𑀼-𑀯) 𑀧𑀼𑀭𑁂𑀢𑀭𑀁𑀬𑁂𑀯 𑀲𑀻𑀳𑀴𑀤𑀻𑀧𑀫𑀸𑀕𑀦𑁆𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑁄 𑀅𑀓𑀸𑀲𑀻’’𑀢𑀺. 𑀢𑀁 𑀧𑀦 𑀦 𑀤𑀴𑁆𑀳𑀓𑀸𑀭𑀡𑀁 𑀳𑁄𑀢𑀺, 𑀢𑀺𑀧𑀺𑀝𑀓𑀧𑀸𑀴𑀺𑀬𑀸 𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀬𑀁 𑀯𑀸 𑀢𑀁 𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀤𑀺𑀝𑁆𑀞𑀁 𑀧𑀓𑀸𑀲𑁂𑀢𑀩𑁆𑀩𑀁 𑀦 𑀳𑁄𑀢𑀺, 𑀦 𑀘 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀅𑀤𑁆𑀥𑀸𑀦𑀓𑁆𑀓𑀫𑀓𑀣𑀸𑀲𑀤𑀺𑀲𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀤𑀻𑀧𑀯𑀁𑀲𑀢𑁄𑀧𑀺 𑀓𑀺𑀜𑁆𑀘𑀺 𑀆𑀦𑁂𑀢𑁆𑀯𑀸 𑀧𑀓𑀸𑀲𑀺𑀢𑀁, 𑀤𑀻𑀧𑀯𑀁𑀲𑁂 𑀘 𑀬𑀸𑀯 𑀫𑀳𑀸𑀲𑁂𑀦𑀭𑀸𑀚𑀓𑀸𑀮𑀸 (𑁮𑁧𑁯-𑁮𑁪𑁫-𑀩𑀼-𑀯) 𑀧𑀯𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀲𑀺𑀭𑀺𑀫𑁂𑀖𑀯𑀡𑁆𑀡𑀭𑀸𑀚𑀓𑀸𑀮𑀢𑁄 (𑁮𑁪𑁫-𑁮𑁭𑁩-𑀩𑀼-𑀯) 𑀧𑀼𑀩𑁆𑀩𑁂 𑀤𑀻𑀧𑀯𑀁𑀲𑁄𑀬𑁂𑀯 𑀮𑀺𑀔𑀺𑀢𑁄 𑀦 𑀪𑀯𑁂𑀬𑁆𑀬. 𑀬𑀤𑀺 𑀘 𑀅𑀝𑁆𑀞𑀓𑀣𑀸𑀬𑁄 𑀢𑀢𑁄 𑀧𑀼𑀩𑁆𑀩𑁂𑀬𑁂𑀯 𑀓𑀢𑀸 𑀪𑀯𑁂𑀬𑁆𑀬𑀼𑀁, 𑀓𑀣𑀁 𑀢𑀢𑁆𑀣 𑀤𑀻𑀧𑀯𑀁𑀲𑁄 𑀲𑀓𑁆𑀓𑀸 𑀧𑀓𑀸𑀲𑁂𑀢𑀼𑀦𑁆𑀢𑀺.

𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀧𑀦 𑀲𑀻𑀳𑀴𑀤𑀻𑀧𑀁 𑀧𑀢𑁆𑀢𑀓𑀸𑀮𑁂 (𑁯𑁬𑁫-𑀩𑀼-𑀯) 𑀫𑀳𑀸𑀯𑀺𑀳𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀻𑀳𑀴𑀫𑀳𑀸𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀲𑀼𑀡𑀺. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑁋

‘‘𑀫𑀳𑀸𑀅𑀝𑁆𑀞𑀓𑀣𑀜𑁆𑀘𑁂𑀯, 𑀫𑀳𑀸𑀧𑀘𑁆𑀘𑀭𑀺𑀫𑁂𑀯 𑀘;

𑀓𑀼𑀭𑀼𑀦𑁆𑀤𑀺𑀜𑁆𑀘𑀸𑀢𑀺 𑀢𑀺𑀲𑁆𑀲𑁄𑀧𑀺, 𑀲𑀻𑀳𑀴𑀝𑁆𑀞𑀓𑀣𑀸 𑀇𑀫𑀸.

𑀩𑀼𑀤𑁆𑀥𑀫𑀺𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀯𑀺𑀦𑀬𑀜𑁆𑀜𑀼𑀲𑁆𑀲 𑀥𑀻𑀭𑀲𑁆𑀲, 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺 [𑀧𑀭𑀺. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸].

𑀇𑀫𑀺𑀦𑀸 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁𑀬𑁂𑀯 𑀅𑀝𑁆𑀞𑀓𑀣𑀸𑀦𑀁 𑀲𑀼𑀢𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 𑀲𑀗𑁆𑀔𑁂𑀧𑀅𑀦𑁆𑀥𑀓𑀝𑁆𑀞𑀓𑀣𑀸𑀦𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑁄 𑀤𑀲𑁆𑀲𑀺𑀢𑁄𑀬𑁂𑀯, 𑀓𑀲𑁆𑀫𑀸 𑀧𑀦 𑀢𑀸 𑀆𑀘𑀭𑀺𑀬𑁂𑀦 𑀲𑀻𑀳𑀴𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀦 𑀲𑀼𑀢𑀸𑀢𑀺? 𑀢𑀸𑀲𑀼 𑀳𑀺 𑀅𑀦𑁆𑀥𑀓𑀝𑁆𑀞𑀓𑀣𑀸 𑀢𑀸𑀯 𑀅𑀦𑁆𑀥𑀓𑀭𑀝𑁆𑀞𑀺𑀓𑀪𑀸𑀯𑀢𑁄, 𑀓𑀢𑀧𑀭𑀺𑀘𑀬𑀪𑀸𑀯𑀢𑁄 𑀘 𑀦 𑀲𑀼𑀢𑀸𑀢𑀺 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸 𑀧𑀦 𑀫𑀳𑀸𑀧𑀘𑁆𑀘𑀭𑀺𑀝𑁆𑀞𑀓𑀣𑀸𑀬 𑀲𑀁𑀔𑀺𑀢𑁆𑀢𑀫𑀢𑁆𑀢𑀪𑀸𑀯𑀢𑁄 𑀦 𑀲𑀼𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 𑀕𑀦𑁆𑀣𑀸𑀭𑀫𑁆𑀪𑀲𑀁𑀯𑀡𑁆𑀡𑀦𑀸𑀬𑀁 [𑀯𑀺𑀚𑀺𑀭. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸] 𑀘𑀽𑀴𑀧𑀘𑁆𑀘𑀭𑀺𑀝𑁆𑀞𑀓𑀣𑀸𑀅𑀦𑁆𑀥𑀓𑀝𑁆𑀞𑀓𑀣𑀸𑀦𑀫𑁆𑀧𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀸𑀭𑀢𑁆𑀣𑀤𑀻𑀧𑀦𑀻-𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸𑀲𑀼 [𑀲𑀸𑀭𑀢𑁆𑀣. 𑀝𑀻. 𑁧.𑁯𑁨 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟; 𑀯𑀺. 𑀯𑀺. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸] 𑀧𑀦 𑀅𑀦𑁆𑀥𑀓𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀦𑀁 𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀜𑁆𑀘 𑀘𑀽𑀴𑀧𑀘𑁆𑀘𑀭𑀻𑀢𑀺 𑀦𑀸𑀫𑀁 𑀓𑀼𑀳𑀺𑀜𑁆𑀘𑀺𑀧𑀺 𑀦 𑀤𑀺𑀲𑁆𑀲𑀢𑀺, 𑀫𑀳𑀸𑀝𑁆𑀞𑀓𑀣𑀸 𑀫𑀳𑀸𑀧𑀘𑁆𑀘𑀭𑀻 𑀓𑀼𑀭𑀼𑀦𑁆𑀤𑀻 𑀅𑀦𑁆𑀥𑀓𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀢𑀺 ¶ 𑀇𑀫𑀸𑀦𑀺𑀬𑁂𑀯 𑀦𑀸𑀫𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀩𑀳𑀽𑀲𑀼 𑀘 𑀞𑀸𑀦𑁂𑀲𑀼 ‘‘𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 [𑀧𑀸𑀭𑀸. 𑀅𑀝𑁆𑀞. 𑁧.𑁯𑁪] 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑀸𑀦𑀯𑀺𑀦𑀺𑀘𑁆𑀙𑀬𑁄 𑀤𑀲𑁆𑀲𑀺𑀢𑁄. 𑀢𑀲𑁆𑀫𑀸 𑀯𑀚𑀺𑀭𑀩𑀼𑀤𑁆𑀥𑀺𑀬𑀁 𑀘𑀽𑀴𑀧𑀘𑁆𑀘𑀭𑀻𑀢𑀺 𑀯𑀼𑀢𑁆𑀢𑀝𑁆𑀞𑀓𑀣𑀸 𑀫𑀳𑀸𑀧𑀘𑁆𑀘𑀭𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀲𑀗𑁆𑀔𑁂𑀧𑁂𑀦 𑀓𑀢𑀝𑁆𑀞𑀓𑀣𑀸 𑀪𑀯𑁂𑀬𑁆𑀬, 𑀲𑀸 𑀘 𑀲𑀗𑁆𑀔𑁂𑀧𑁂𑀦 𑀓𑀢𑀢𑁆𑀢𑀸 𑀲𑀗𑁆𑀔𑁂𑀧𑀝𑁆𑀞𑀓𑀣𑀸 𑀦𑀸𑀫 𑀚𑀸𑀢𑀸 𑀪𑀯𑁂𑀬𑁆𑀬. 𑀏𑀯𑀜𑁆𑀘 𑀲𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀸 𑀲𑀼𑀢𑀸𑀬 𑀲𑀸𑀧𑀺 𑀲𑀼𑀢𑀸𑀬𑁂𑀯 𑀳𑁄𑀢𑀻𑀢𑀺 𑀦 𑀲𑀸 𑀆𑀘𑀭𑀺𑀬𑁂𑀦 𑀲𑀼𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀲𑀼𑀡𑀦𑁆𑀢𑀲𑁆𑀲𑁂𑀯 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀢𑀺𑀓𑁆𑀔𑀕𑀫𑁆𑀪𑀻𑀭𑀚𑀯𑀦𑀜𑀸𑀡𑀧𑁆𑀧𑀪𑀸𑀯𑀯𑀺𑀲𑁂𑀲𑀲𑀫𑁆𑀧𑀦𑁆𑀦𑀪𑀸𑀯𑀜𑁆𑀘 𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬- 𑀲𑀫𑀼𑀤𑀺𑀢𑀪𑀸𑀯𑀜𑁆𑀘 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺- 𑀬𑀲𑀫𑀦𑁆𑀦𑀸𑀕𑀢𑀪𑀸𑀯𑀜𑁆𑀘 𑀅𑀦𑁂𑀓𑀲𑀢𑁆𑀣𑀦𑁆𑀢𑀭𑁄𑀘𑀺𑀢𑀲𑀁𑀯𑀡𑁆𑀡𑀦𑀸𑀦𑀬𑀲𑀼𑀓𑁄𑀯𑀺𑀤𑀪𑀸𑀯𑀜𑁆𑀘 𑀜𑀢𑁆𑀯𑀸 𑀢𑀁𑀲𑀯𑀦𑀓𑀺𑀘𑁆𑀘𑀧𑀭𑀺𑀦𑀺𑀝𑁆𑀞𑀺𑀢𑀓𑀸𑀮𑁂 𑀲𑀗𑁆𑀖𑀧𑀸𑀮𑀸𑀤𑀬𑁄 𑀣𑁂𑀭𑀸 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀕𑀦𑁆𑀣𑀸𑀦𑀁 𑀓𑀭𑀡𑀢𑁆𑀣𑀸𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀬𑀸𑀘𑀺𑀁𑀲𑀼. 𑀏𑀢𑁆𑀣 𑀘 𑀆𑀘𑀭𑀺𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑀪𑀸𑀯𑁄 𑀅𑀢𑁆𑀢𑀦𑁄 𑀯𑀘𑀦𑁂𑀦𑁂𑀯 𑀧𑀸𑀓𑀝𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀢𑁆𑀢𑀦𑁄 𑀕𑀦𑁆𑀣𑀦𑀺𑀕𑀫𑀦𑁂𑀲𑀼 𑁋

‘‘𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦𑀸𑀢𑀺 𑀧𑀤𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀻𑀦𑀁 𑀤𑁂𑀲𑀦𑀸𑀦𑀬𑀲𑀗𑁆𑀔𑀸𑀢𑁂 𑀲𑀓𑀲𑀫𑀬𑁂 𑀘 𑀫𑀳𑀸𑀲𑀗𑁆𑀖𑀺𑀓𑀸𑀤𑀺𑀫𑀳𑀸𑀬𑀸𑀦𑀺𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀦𑀺𑀓𑀸𑀬𑀦𑁆𑀢𑀭𑀪𑀽𑀢𑀸𑀦𑀁 𑀧𑀭𑁂𑀲𑀁 𑀧𑀺𑀝𑀓𑀕𑀦𑁆𑀣𑀦𑁆𑀢𑀭𑀯𑀸𑀤𑀦𑀬𑀲𑀗𑁆𑀔𑀸𑀢𑁂 𑀧𑀭𑀲𑀫𑀬𑁂 𑀘 𑀢𑀣𑀸 𑀢𑀁𑀓𑀸𑀮𑀺𑀓𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀤𑀢𑁆𑀢𑀬𑀸𑀤𑀺𑀲𑀗𑁆𑀔𑀸𑀢𑁂 𑀧𑀭𑀲𑀫𑀬𑁂 𑀘 𑀓𑁄𑀯𑀺𑀤𑁄, 𑀢𑁂𑀲𑀁 𑀲𑀓𑀲𑀫𑀬𑀧𑀭𑀲𑀫𑀬𑀸𑀦𑀁 𑀤𑀼𑀭𑁄𑀕𑀸𑀳𑀤𑀼𑀩𑁆𑀩𑁄𑀥𑀢𑁆𑀣𑀲𑀗𑁆𑀔𑀸𑀢𑁂 𑀕𑀳𑀦𑀝𑁆𑀞𑀸𑀦𑁂𑀧𑀺 𑀘 𑀑𑀕𑀸𑀳𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀤𑀻𑀧𑁂𑀢𑀺. 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀤𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑁄 𑀲𑀗𑁆𑀔𑀺𑀧𑀺𑀢𑀼𑀜𑁆𑀘 𑀧𑀝𑀺𑀲𑀗𑁆𑀔𑀭𑀺𑀢𑀼𑀜𑁆𑀘 𑀲𑀫𑀢𑁆𑀣𑁄𑀢𑀺 𑀤𑀻𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀆𑀬𑀸𑀘𑀦𑀓𑀸𑀭𑀡𑀁

𑀓𑀲𑁆𑀫𑀸 ¶ 𑀧𑀦 𑀢𑁂 𑀢𑀁 𑀆𑀬𑀸𑀘𑀺𑀁𑀲𑀽𑀢𑀺? 𑀯𑀼𑀘𑁆𑀘𑀢𑁂, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀳𑀺 𑀆𑀤𑀺𑀢𑁄𑀬𑁂𑀯 𑀧𑀝𑁆𑀞𑀸𑀬 𑀧𑀺𑀝𑀓𑀢𑁆𑀢𑀬𑀁 𑀬𑀣𑀸 𑀢𑀻𑀲𑀼 𑀲𑀗𑁆𑀕𑀻𑀢𑀻𑀲𑀼 𑀧𑀸𑀴𑀺𑀪𑀸𑀲𑀸𑀬 𑀲𑀗𑁆𑀕𑀻𑀢𑀁, 𑀬𑀣𑀸 𑀘 𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀓𑀸𑀮𑁂 (𑁪𑁫𑁫-𑁪𑁬𑁭-𑀩𑀼-𑀯) 𑀧𑁄𑀢𑁆𑀣𑀓𑁂𑀲𑀼 𑀆𑀭𑁄𑀧𑀺𑀢𑀁, 𑀢𑀣𑀸 𑀧𑁄𑀭𑀸𑀡𑀁 𑀧𑀸𑀴𑀺𑀧𑀺𑀝𑀓𑀫𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑀺 𑀘𑁂𑀯 𑀯𑀸𑀘𑁂𑀦𑁆𑀢𑀺 𑀘, 𑀦 𑀲𑀓𑁆𑀓𑀢𑀸𑀭𑁄𑀧𑀺𑀢𑀧𑀺𑀝𑀓𑀁. 𑀅𑀝𑁆𑀞𑀓𑀣𑀸𑀬𑁄 𑀘 𑀢𑀺𑀯𑀲𑁆𑀲𑀲𑀢𑀫𑀢𑁆𑀢𑀢𑁄 𑀧𑀼𑀭𑁂 𑀓𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀯𑀲𑀪𑀭𑀸𑀚𑀓𑀸𑀮𑀢𑁄 (𑁬𑁦𑁯-𑁬𑁫𑁩-𑀩𑀼-𑁦) 𑀧𑀘𑁆𑀙𑀸 𑀲𑀻𑀳𑀴𑀺𑀓𑀢𑁆𑀣𑁂𑀭𑀸𑀦𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀯𑀢𑁆𑀣𑀼 𑀦 𑀤𑀺𑀲𑁆𑀲𑀢𑀺 𑀞𑀧𑁂𑀢𑁆𑀯𑀸 𑀫𑀳𑀸𑀲𑁂𑀦𑀭𑀸𑀚𑀯𑀢𑁆𑀣𑀼𑀁 [𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁬-𑁨𑁩𑁭], 𑀬𑀸𑀯 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀓𑀸𑀮𑀸𑀧𑀺 𑀘 𑀢𑀸 𑀏𑀯 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑁄 𑀅𑀢𑁆𑀣𑀺 𑀦 𑀅𑀪𑀺𑀦𑀯𑀻𑀓𑀢𑀸. 𑀢𑁂𑀦 𑀢𑁂𑀲𑀁 𑀧𑀺𑀝𑀓𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀚𑀦𑀸 𑀧𑀭𑀺𑀘𑀬𑀁 𑀓𑀸𑀢𑀼𑀁 𑀅𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑀸 𑀳𑁄𑀦𑁆𑀢𑀺 𑀅𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀸. 𑀤𑀻𑀧𑀦𑁆𑀢𑀭𑁂𑀲𑀼 𑀘 𑀅𑀢𑁆𑀢𑀦𑁄 𑀧𑀺𑀝𑀓𑀁 𑀧𑀢𑁆𑀣𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀝𑁆𑀞𑀓𑀣𑀸𑀦𑀁 𑀤𑀻𑀧𑀪𑀸𑀲𑀸𑀬 𑀅𑀪𑀺𑀲𑀗𑁆𑀔𑀢𑀢𑁆𑀢𑀸. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀧𑀦 𑀯𑀝𑁆𑀝𑀕𑀸𑀫𑀡𑀺𑀭𑀸𑀚𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀢𑀪𑀸𑀲𑀸𑀭𑁄𑀧𑀺𑀢𑀁 𑀥𑀫𑁆𑀫𑀭𑀼𑀘𑀺𑀦𑀺𑀓𑀸𑀬𑀸𑀤𑀺𑀧𑀺𑀝𑀓𑀫𑁆𑀧𑀺 𑀫𑀳𑀸𑀬𑀸𑀦𑀧𑀺𑀝𑀓𑀫𑁆𑀧𑀺 𑀦𑀯𑀁 𑀦𑀯𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀘𑁂𑀯 𑀯𑀸𑀘𑁂𑀦𑁆𑀢𑀺 𑀘, 𑀢𑁂𑀦 𑀢𑁂𑀲𑀁 𑀧𑀺𑀝𑀓𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀚𑀦𑀸 𑀧𑀭𑀺𑀘𑀬𑀁 𑀓𑀸𑀢𑀼𑀁 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑀸 𑀳𑁄𑀦𑁆𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀸, 𑀦𑀯𑀁 𑀦𑀯𑀫𑁂𑀯 𑀳𑀺 𑀲𑀢𑁆𑀢𑀸 𑀧𑀺𑀬𑀸𑀬𑀦𑁆𑀢𑀺. 𑀢𑀢𑁄𑀬𑁂𑀯 𑀢𑁂 𑀤𑀻𑀧𑀦𑁆𑀢𑀭𑁂𑀲𑀼𑀧𑀺 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑁆𑀣𑀭𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀸 𑀅𑀢𑁆𑀢𑀦𑁄 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀧𑀸𑀴𑀺𑀪𑀸𑀲𑀸𑀬 𑀅𑀪𑀺𑀲𑀗𑁆𑀔𑀭𑀺𑀢𑀼𑀓𑀸𑀫𑀸 𑀢𑀣𑀸 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀜𑀸𑀡𑀧𑁆𑀧𑀪𑀸𑀯𑀯𑀺𑀲𑁂𑀲𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀦𑁆𑀦𑀪𑀸𑀯𑀜𑁆𑀘 𑀜𑀢𑁆𑀯𑀸 𑀆𑀬𑀸𑀘𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀓𑀭𑀡𑀁

𑀢𑁂𑀲𑀼 𑀢𑀸𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀲𑀗𑁆𑀖𑀧𑀸𑀮𑀢𑁆𑀣𑁂𑀭𑁂𑀦 𑀅𑀚𑁆𑀛𑁂𑀲𑀺𑀢𑁄 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀓𑁆𑀔𑀺𑀡𑀪𑀸𑀕𑁂 𑀧𑀥𑀸𑀦𑀖𑀭𑁂 𑀫𑀳𑀸𑀦𑀺𑀕𑀫𑀲𑁆𑀲𑀸𑀫𑀺𑀦𑁄 𑀧𑀸𑀲𑀸𑀤𑁂 [𑀧𑀭𑀺. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀯𑀲𑀦𑁆𑀢𑁄 𑀅𑀓𑀸𑀲𑀺. 𑀏𑀢𑁆𑀢𑀸𑀯𑀢𑀸 𑀘 ‘‘𑀲𑁄 𑀧𑀦𑁂𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀓𑁂𑀦 𑀓𑀢𑁄, 𑀓𑀤𑀸 𑀓𑀢𑁄, 𑀓𑀢𑁆𑀣 𑀓𑀢𑁄, 𑀓𑀲𑁆𑀫𑀸 𑀓𑀢𑁄’’𑀢𑀺 𑀇𑀫𑁂𑀲𑀁 𑀧𑀜𑁆𑀳𑀸𑀦𑀫𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 ¶ 𑀓𑀺𑀫𑀢𑁆𑀣𑀁 𑀓𑀢𑁄𑀢𑀺𑀆𑀤𑀻𑀦𑀁 𑀧𑀜𑁆𑀳𑀸𑀦𑀫𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀓𑀺𑀫𑀢𑁆𑀣𑀁 𑀓𑀢𑁄𑀢𑀺 𑀏𑀢𑀲𑁆𑀲 𑀧𑀦 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦𑁂𑀯 𑀧𑀓𑀸𑀲𑀺𑀢𑁄. 𑀓𑀣𑀁?

‘‘𑀲𑀼𑀤𑀼𑀮𑁆𑀮𑀪𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑁆𑀚𑀁 𑀚𑀺𑀦𑀲𑀸𑀲𑀦𑁂;

𑀲𑀻𑀮𑀸𑀤𑀺𑀲𑀗𑁆𑀕𑀳𑀁 𑀔𑁂𑀫𑀁, 𑀉𑀚𑀼𑀁 𑀫𑀕𑁆𑀕𑀁 𑀯𑀺𑀲𑀼𑀤𑁆𑀥𑀺𑀬𑀸.

𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸, 𑀲𑀼𑀤𑁆𑀥𑀺𑀓𑀸𑀫𑀸𑀧𑀺 𑀬𑁂 𑀇𑀥;

𑀯𑀺𑀲𑀼𑀤𑁆𑀥𑀺𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀯𑀸𑀬𑀫𑀦𑁆𑀢𑀸𑀧𑀺 𑀬𑁄𑀕𑀺𑀦𑁄.

𑀢𑁂𑀲𑀁 𑀧𑀸𑀫𑁄𑀚𑁆𑀚𑀓𑀭𑀡𑀁, 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀁.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲𑀁, 𑀢𑀁 𑀫𑁂 𑀲𑀓𑁆𑀓𑀘𑁆𑀘 𑀪𑀸𑀲𑀢𑁄;

𑀯𑀺𑀲𑀼𑀤𑁆𑀥𑀺𑀓𑀸𑀫𑀸 𑀲𑀩𑁆𑀩𑁂𑀧𑀺, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄’’𑀢𑀺 [𑀯𑀺𑀲𑀼𑀤𑁆𑀥𑀺. 𑁧.𑁨].

𑀢𑀲𑁆𑀫𑀸 𑀏𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀦𑀺𑀩𑁆𑀩𑀸𑀦𑀓𑀸𑀫𑀸𑀦𑀁 𑀲𑀸𑀥𑀼𑀚𑀦𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀬𑀸𑀣𑀸𑀯𑀢𑁄 𑀚𑀸𑀦𑀦𑀢𑁆𑀣𑀸𑀬 𑀓𑀢𑁄𑀢𑀺 𑀧𑀥𑀸𑀦𑀧𑁆𑀧𑀬𑁄𑀚𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀥𑀸𑀦𑀧𑁆𑀧𑀬𑁄𑀚𑀦𑀯𑀲𑁂𑀦 𑀧𑀦 𑀘𑀢𑀽𑀲𑀼 𑀆𑀕𑀫𑀝𑁆𑀞𑀓𑀣𑀸𑀲𑀼 𑀕𑀦𑁆𑀣𑀲𑀮𑁆𑀮𑀳𑀼𑀓𑀪𑀸𑀯𑀢𑁆𑀣𑀸𑀬𑀧𑀺 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀕𑀫𑀝𑁆𑀞𑀓𑀣𑀸𑀲𑀼 𑁋

‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀏𑀲 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀜𑁆𑀳𑀺;

𑀞𑀢𑁆𑀯𑀸 𑀧𑀓𑀸𑀲𑀬𑀺𑀲𑁆𑀲𑀢𑀺, 𑀢𑀢𑁆𑀣 𑀬𑀣𑀸𑀪𑀸𑀲𑀺𑀢𑀫𑀢𑁆𑀣𑀁;

𑀇𑀘𑁆𑀘𑁂𑀯 𑀫𑁂 𑀓𑀢𑁄’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸].

𑀢𑀦𑁆𑀦𑀺𑀲𑁆𑀲𑀬𑁄

𑀓𑀺𑀁 𑀦𑀺𑀲𑁆𑀲𑀸𑀬 𑀓𑀢𑁄𑀢𑀺 𑀏𑀢𑀲𑁆𑀲𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦𑁂𑀯 𑀧𑀓𑀸𑀲𑀺𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀏𑀢𑁆𑀣 𑀕𑀦𑁆𑀣𑀸𑀭𑀫𑁆𑀪𑁂 𑁋

‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢’’𑀦𑁆𑀢𑀺 [𑀯𑀺𑀲𑀼𑀤𑁆𑀥𑀺. 𑁧.𑁨].

𑀢𑀣𑀸 𑀦𑀺𑀕𑀫𑀦𑁂𑀧𑀺 𑁋

‘‘𑀢𑁂𑀲𑀁 𑀲𑀻𑀮𑀸𑀤𑀺𑀪𑁂𑀤𑀸𑀦𑀁, 𑀅𑀢𑁆𑀣𑀸𑀦𑀁 𑀬𑁄 𑀯𑀺𑀦𑀺𑀘𑁆𑀙𑀬𑁄;

𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀺𑀓𑀸𑀬𑀸𑀦𑀁, 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀦𑀬𑁂.

𑀲𑀫𑀸𑀳𑀭𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀬𑁂𑀪𑀼𑀬𑁆𑀬𑁂𑀦 𑀲𑀦𑀺𑀘𑁆𑀙𑀬𑁄;

𑀲𑀩𑁆𑀩𑀲𑀗𑁆𑀓𑀭𑀤𑁄𑀲𑁂𑀳𑀺, 𑀫𑀼𑀢𑁆𑀢𑁄 𑀬𑀲𑁆𑀫𑀸 𑀧𑀓𑀸𑀲𑀺𑀢𑁄’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸].

𑀇𑀫𑀺𑀦𑀸 ¶ 𑀧𑀦 𑀯𑀘𑀦𑁂𑀦 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀺 𑁋 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀓𑀼𑀭𑀼𑀫𑀸𑀦𑁄 𑀆𑀘𑀭𑀺𑀬𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀤𑁂𑀲𑀦𑀸𑀦𑀬𑀲𑀗𑁆𑀔𑀸𑀢𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀺𑀓𑀸𑀬𑀸𑀦𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑁄 𑀦𑀺𑀲𑁆𑀲𑀸𑀬 𑀢𑀸𑀲𑀼 𑀯𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁 𑀲𑀩𑁆𑀩𑀁 𑀯𑀺𑀦𑀺𑀘𑁆𑀙𑀬𑀁 𑀲𑀫𑀸𑀳𑀭𑀺𑀢𑁆𑀯𑀸 𑀅𑀓𑀸𑀲𑀻’’𑀢𑀺. 𑀢𑀲𑁆𑀫𑀸 𑀬𑀸 𑀬𑀸 𑀏𑀢𑁆𑀣 𑀧𑀤𑀯𑀡𑁆𑀡𑀦𑀸 𑀯𑀸 𑀯𑀺𑀦𑀺𑀘𑁆𑀙𑀬𑁄 𑀯𑀸 𑀲𑀸𑀥𑀓𑀯𑀢𑁆𑀣𑀼 𑀯𑀸 𑀤𑀲𑁆𑀲𑀻𑀬𑀢𑀺, 𑀢𑀁 𑀲𑀩𑁆𑀩𑀁 𑀢𑀲𑁆𑀲 𑀢𑀲𑁆𑀲 𑀦𑀺𑀤𑁆𑀥𑀸𑀭𑀺𑀢𑀧𑀸𑀴𑀺𑀧𑀤𑀲𑁆𑀲𑀦𑀺𑀓𑀸𑀬𑀲𑀁𑀯𑀡𑁆𑀡𑀦𑀸𑀪𑀽𑀢𑀸𑀬 𑀧𑁄𑀭𑀸𑀡𑀲𑀻𑀳𑀴𑀝𑁆𑀞𑀓𑀣𑀸𑀢𑁄 𑀆𑀦𑁂𑀢𑁆𑀯𑀸 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀪𑀸𑀯𑁂𑀦 𑀓𑀢𑁄, 𑀯𑀺𑀲𑀼𑀁 𑀧𑀓𑀭𑀡𑀪𑀸𑀯𑁂𑀦 𑀘, 𑀅𑀣 𑀔𑁄 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀝𑁆𑀞𑀓𑀣𑀸𑀦𑀁 𑀅𑀯𑀬𑀯𑀪𑀸𑀯𑁂𑀦𑁂𑀯 𑀓𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀸𑀲𑀁 𑀦𑀺𑀕𑀫𑀦𑁂 𑁋

‘‘𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀪𑀸𑀡𑀯𑀸𑀭𑁂𑀳𑀺;

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀸𑀬, 𑀆𑀕𑀫𑀸𑀦𑀁 𑀓𑀢𑁄 𑀬𑀲𑁆𑀫𑀸.

𑀢𑀲𑁆𑀫𑀸 𑀢𑁂𑀦 𑀲𑀳𑀸𑀬𑀁, 𑀅𑀝𑁆𑀞𑀓𑀣𑀸 𑀪𑀸𑀡𑀯𑀸𑀭𑀕𑀡𑀦𑀸𑀬;

𑀲𑀼𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀁, 𑀘𑀢𑁆𑀢𑀸𑀮𑀻𑀲𑀲𑀢𑀁 𑀳𑁄𑀢𑀻’’𑀢𑀺𑀆𑀤𑀺 [𑀤𑀻. 𑀦𑀺. 𑀅𑀝𑁆𑀞. 𑁩.𑀦𑀺𑀕𑀫𑀦𑀓𑀣𑀸].

𑀬𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 ‘‘𑀅𑀬𑀁 𑀢𑀸𑀯 𑀯𑀺𑀲𑀼𑀤𑁆𑀥𑀺𑀓𑀣𑀸𑀬𑀁 𑀦𑀬𑁄. 𑀅𑀭𑀺𑀬𑀯𑀁𑀲𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 [𑀯𑀺𑀲𑀼𑀤𑁆𑀥𑀺. 𑁨.𑁭𑁧𑁭] 𑀤𑁆𑀯𑁂 𑀓𑀣𑀸 𑀯𑀼𑀢𑁆𑀢𑀸, 𑀢𑀸𑀧𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀤𑁂𑀲𑀦𑀸𑀦𑀬𑁂 𑀅𑀦𑁆𑀢𑁄𑀕𑀥𑀸 𑀇𑀫𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀦𑀺𑀲𑁆𑀲𑀬𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀢𑀓𑁆𑀓𑀭𑀡𑀧𑁆𑀧𑀓𑀸𑀭𑁄

𑀓𑁂𑀦 𑀧𑀓𑀸𑀭𑁂𑀦 𑀓𑀢𑁄𑀢𑀺 𑀏𑀢𑁆𑀣 𑀅𑀦𑀦𑁆𑀢𑀭𑀧𑀜𑁆𑀳𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀓𑀢𑁄. 𑀢𑀣𑀸 𑀳𑀺 𑀆𑀘𑀭𑀺𑀬𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀢𑁄

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 [𑀲𑀁. 𑀦𑀺. 𑁧.𑁨𑁩] 𑁋

𑀇𑀫𑀁 𑀕𑀸𑀣𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀧𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀅𑀓𑀸𑀲𑀺. 𑀏𑀯𑀁 𑀓𑀼𑀭𑀼𑀫𑀸𑀦𑁄 𑀘 𑀧𑀜𑁆𑀘𑀳𑀺𑀧𑀺 𑀦𑀺𑀓𑀸𑀬𑁂𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀅𑀢𑁆𑀣𑀜𑁆𑀘 𑀲𑀻𑀳𑀴𑀝𑁆𑀞𑀓𑀣𑀸𑀳𑀺 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀼 𑀯𑀼𑀢𑁆𑀢𑀸𑀦𑀺 𑀲𑀻𑀳𑀴𑀺𑀓𑀯𑀢𑁆𑀣𑀽𑀦𑀺 𑀘 𑀯𑀺𑀦𑀺𑀘𑁆𑀙𑀬𑁂 𑀘 𑀧𑀓𑀸𑀲𑁂𑀲𑀺. 𑀯𑀺𑀲𑁂𑀲𑀢𑁄 𑀧𑀦 𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀧𑀸𑀓𑀝𑀸 𑀲𑀓𑀲𑀫𑀬𑀯𑀺𑀭𑀼𑀤𑁆𑀥𑀸 𑀲𑀫𑀬𑀦𑁆𑀢𑀭𑀸 𑀘 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀤𑀲𑁆𑀲𑁂𑀢𑁆𑀯𑀸 𑀲𑀳𑁂𑀢𑀼𑀓𑀁 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀓𑀣𑀁?

𑀢𑀢𑁆𑀣 𑀳𑀺 𑀘𑀭𑀺𑀬𑀸𑀯𑀡𑁆𑀡𑀦𑀸𑀬𑀁 ‘‘𑀢𑀢𑁆𑀭 𑀧𑀼𑀭𑀺𑀫𑀸 𑀢𑀸𑀯 𑀢𑀺𑀲𑁆𑀲𑁄 𑀘𑀭𑀺𑀬𑀸 𑀧𑀼𑀩𑁆𑀩𑀸𑀘𑀺𑀡𑁆𑀡𑀦𑀺𑀤𑀸𑀦𑀸 𑀥𑀸𑀢𑀼𑀤𑁄𑀲𑀦𑀺𑀤𑀸𑀦𑀸 𑀘𑀸𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀇𑀝𑁆𑀞𑀧𑁆𑀧𑀬𑁄𑀕𑀲𑀼𑀪𑀓𑀫𑁆𑀫𑀩𑀳𑀼𑀮𑁄 𑀭𑀸𑀕𑀘𑀭𑀺𑀢𑁄 𑀳𑁄𑀢𑀺, 𑀲𑀕𑁆𑀕𑀸 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄. 𑀧𑀼𑀩𑁆𑀩𑁂 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑁂𑀭𑀓𑀫𑁆𑀫𑀩𑀳𑀼𑀮𑁄 𑀤𑁄𑀲𑀘𑀭𑀺𑀢𑁄 𑀳𑁄𑀢𑀺, 𑀦𑀺𑀭𑀬𑀦𑀸𑀕𑀬𑁄𑀦𑀻𑀳𑀺 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄. 𑀧𑀼𑀩𑁆𑀩𑁂 𑀫𑀚𑁆𑀚𑀧𑀸𑀦𑀩𑀳𑀼𑀮𑁄 𑀲𑀼𑀢𑀧𑀭𑀺𑀧𑀼𑀘𑁆𑀙𑀸𑀯𑀺𑀳𑀻𑀦𑁄 𑀘 𑀫𑁄𑀳𑀘𑀭𑀺𑀢𑁄 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀏𑀯𑀁 𑀧𑀼𑀩𑁆𑀩𑀸𑀘𑀺𑀡𑁆𑀡𑀦𑀺𑀤𑀸𑀦𑀸𑀢𑀺 𑀯𑀤𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀥𑀸𑀢𑀽𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀧𑀼𑀕𑁆𑀕𑀮𑁄 𑀫𑁄𑀳𑀘𑀭𑀺𑀢𑁄 𑀳𑁄𑀢𑀺 𑀧𑀣𑀯𑀻𑀥𑀸𑀢𑀼𑀬𑀸 𑀘 𑀆𑀧𑁄𑀥𑀸𑀢𑀼𑀬𑀸 𑀘. 𑀇𑀢𑀭𑀸𑀲𑀁 𑀤𑁆𑀯𑀺𑀦𑁆𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀤𑁄𑀲𑀘𑀭𑀺𑀢𑁄. 𑀲𑀩𑁆𑀩𑀸𑀲𑀁 𑀲𑀫𑀢𑁆𑀢𑀸 𑀧𑀦 𑀭𑀸𑀕𑀘𑀭𑀺𑀢𑁄𑀢𑀺. 𑀤𑁄𑀲𑁂𑀲𑀼 𑀘 𑀲𑁂𑀫𑁆𑀳𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄 𑀳𑁄𑀢𑀺. 𑀯𑀸𑀢𑀸𑀥𑀺𑀓𑁄 𑀫𑁄𑀳𑀘𑀭𑀺𑀢𑁄. 𑀲𑁂𑀫𑁆𑀳𑀸𑀥𑀺𑀓𑁄 𑀯𑀸 𑀫𑁄𑀳𑀘𑀭𑀺𑀢𑁄. 𑀯𑀸𑀢𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄𑀢𑀺 𑀏𑀯𑀁 𑀥𑀸𑀢𑀼𑀤𑁄𑀲𑀦𑀺𑀤𑀸𑀦𑀸𑀢𑀺 𑀯𑀤𑀦𑁆𑀢𑀻’’𑀢𑀺 𑀏𑀓𑀘𑁆𑀘𑁂𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀲𑁄 ‘‘𑀢𑀢𑁆𑀣 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀇𑀝𑁆𑀞𑀧𑁆𑀧𑀬𑁄𑀕𑀲𑀼𑀪𑀓𑀫𑁆𑀫𑀩𑀳𑀼𑀮𑀸𑀧𑀺 𑀲𑀕𑁆𑀕𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸𑀧𑀺 𑀘 𑀦 𑀲𑀩𑁆𑀩𑁂 𑀭𑀸𑀕𑀘𑀭𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀇𑀢𑀭𑁂 𑀯𑀸 𑀤𑁄𑀲𑀫𑁄𑀳𑀘𑀭𑀺𑀢𑀸. 𑀏𑀯𑀁 𑀥𑀸𑀢𑀽𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀉𑀲𑁆𑀲𑀤𑀦𑀺𑀬𑀫𑁄 𑀦𑀸𑀫 𑀦𑀢𑁆𑀣𑀺. 𑀤𑁄𑀲𑀦𑀺𑀬𑀫𑁂 𑀘 𑀭𑀸𑀕𑀫𑁄𑀳𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀘 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀫𑁂𑀯. 𑀢𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀯𑀘𑀦’’𑀦𑁆𑀢𑀺 [𑀯𑀺𑀲𑀼𑀤𑁆𑀥𑀺. 𑁧.𑁪𑁪] 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀁 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬 𑀦𑀸𑀫 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸𑀬𑀁 ‘‘𑀏𑀓𑀘𑁆𑀘𑁂𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳, 𑀢𑁂𑀦 𑀳𑀺 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀡𑁆𑀡𑀺𑀢𑀁 [𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁪𑁪].

𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑀧𑀓𑀭𑀡𑀁

𑀓𑁄 𑀲𑁄 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁄 𑀦𑀸𑀫? 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀯𑀺𑀬 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀚𑀺𑀢𑁆𑀯𑀸 𑀤𑀻𑀧𑀓𑁄 𑀏𑀓𑁄 𑀧𑀝𑀺𑀧𑀢𑁆𑀢𑀺𑀕𑀦𑁆𑀣𑁄. 𑀢𑀢𑁆𑀣 𑀳𑀺 𑁋

‘‘𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑀼𑀢𑁆𑀢𑀭𑀸;

𑀅𑀦𑀼𑀩𑀼𑀤𑁆𑀥𑀸 𑀇𑀫𑁂 𑀥𑀫𑁆𑀫𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸’’𑀢𑀺 [𑀤𑀻. 𑀦𑀺. 𑁨.𑁧𑁮𑁬; 𑀅. 𑀦𑀺. 𑁪.𑁧] 𑁋

𑀇𑀫𑀁 ¶ 𑀕𑀸𑀣𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀢𑁆𑀣𑀯𑀡𑁆𑀡𑀦𑀸𑀯𑀲𑁂𑀦 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀚𑀺𑀢𑁆𑀯𑀸 𑀤𑀻𑀧𑀺𑀢𑀸. 𑀲𑁄 𑀧𑀦 𑀕𑀦𑁆𑀣𑁄 𑀇𑀤𑀸𑀦𑀺 𑀘𑀺𑀦𑀭𑀝𑁆𑀞𑁂𑀬𑁂𑀯 𑀤𑀺𑀝𑁆𑀞𑁄, 𑀘𑀺𑀦𑀪𑀸𑀲𑀸𑀬 𑀘 𑀧𑀭𑀺𑀯𑀢𑁆𑀢𑀺𑀢𑁄 (𑁧𑁦𑁪𑁮-𑀩𑀼-𑀯) 𑀲𑀗𑁆𑀖𑀧𑀸𑀮𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸. 𑀓𑁂𑀦 𑀧𑀦 𑀲𑁄 𑀓𑀼𑀢𑁄 𑀘 𑀢𑀢𑁆𑀣 𑀆𑀦𑀻𑀢𑁄𑀢𑀺 𑀦 𑀧𑀸𑀓𑀝𑀫𑁂𑀢𑀁. 𑀢𑀲𑁆𑀲 𑀧𑀦 𑀲𑀗𑁆𑀖𑀧𑀸𑀮𑀲𑁆𑀲 𑀆𑀘𑀭𑀺𑀬𑁄 𑀕𑀼𑀡𑀪𑀤𑁆𑀭𑁄 𑀦𑀸𑀫 𑀫𑀳𑀸𑀬𑀸𑀦𑀺𑀓𑁄 𑀪𑀺𑀓𑁆𑀔𑀼 𑀫𑀚𑁆𑀛𑀺𑀫𑀇𑀦𑁆𑀤𑀺𑀬𑀤𑁂𑀲𑀺𑀓𑁄, 𑀲𑁄 𑀇𑀦𑁆𑀤𑀺𑀬𑀭𑀝𑁆𑀞𑀢𑁄 𑀘𑀺𑀦𑀭𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀧𑀞𑀫𑀁 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀢𑀢𑁄 (𑁯𑁭𑁮-𑀩𑀼-𑀯) 𑀘𑀺𑀦𑀭𑀝𑁆𑀞𑀁 𑀕𑀢𑁄. 𑀢𑀤𑀸 𑀲𑁄 𑀢𑁂𑀦 𑀆𑀦𑀻𑀢𑁄 𑀪𑀯𑁂𑀬𑁆𑀬 [𑀯𑀺𑀫𑀼𑀢𑁆𑀢𑀺𑀫𑀕𑁆𑀕, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕].

𑀢𑀲𑁆𑀫𑀺𑀜𑁆𑀳𑀺 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀧𑀼𑀩𑁆𑀩𑀸𑀘𑀺𑀡𑁆𑀡𑀦𑀺𑀤𑀸𑀦𑀤𑀲𑁆𑀲𑀦𑀁 𑀥𑀸𑀢𑀼𑀦𑀺𑀤𑀸𑀦𑀤𑀲𑁆𑀲𑀦𑀜𑁆𑀘 𑀬𑀣𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀏𑀓𑀘𑁆𑀘𑁂𑀯𑀸𑀤𑁄, 𑀢𑀣𑁂𑀯𑀸𑀕𑀢𑀁. 𑀤𑁄𑀲𑀦𑀺𑀤𑀸𑀦𑀤𑀲𑁆𑀲𑀦𑁂 𑀧𑀦 ‘‘𑀲𑁂𑀫𑁆𑀳𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄, 𑀧𑀺𑀢𑁆𑀢𑀸𑀥𑀺𑀓𑁄 𑀤𑁄𑀲𑀘𑀭𑀺𑀢𑁄, 𑀯𑀸𑀢𑀸𑀥𑀺𑀓𑁄 𑀫𑁄𑀳𑀘𑀭𑀺𑀢𑁄. 𑀲𑁂𑀫𑁆𑀳𑀸𑀥𑀺𑀓𑁄 𑀯𑀸 𑀫𑁄𑀳𑀘𑀭𑀺𑀢𑁄, 𑀯𑀸𑀢𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄’’𑀢𑀺 𑀢𑀺𑀡𑁆𑀡𑀫𑁆𑀧𑀺 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀤𑁄𑀲𑀦𑀺𑀬𑀫𑁄 𑀯𑀼𑀢𑁆𑀢𑁄. 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀤𑀺𑀝𑁆𑀞𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑀧𑁄𑀢𑁆𑀣𑀓𑁂 𑀧𑀦 ‘‘𑀧𑀺𑀢𑁆𑀢𑀸𑀥𑀺𑀓𑁄 𑀤𑁄𑀲𑀘𑀭𑀺𑀢𑁄’’𑀢𑀺 𑀧𑀸𑀞𑁄 𑀊𑀦𑁄 𑀪𑀯𑁂𑀬𑁆𑀬.

𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀪𑀸𑀯𑁂𑀦 𑀤𑀺𑀲𑁆𑀲𑀦𑁆𑀢𑀺. 𑀓𑀣𑀁?

𑀲𑀻𑀮𑀦𑀺𑀤𑁆𑀤𑁂𑀲𑁂 (𑁧, 𑁮-𑀧𑀺𑀝𑁆𑀞𑁂) ‘‘𑀅𑀜𑁆𑀜𑁂 𑀧𑀦 𑀲𑀺𑀭𑀝𑁆𑀞𑁄 𑀲𑀻𑀮𑀢𑁆𑀣𑁄, 𑀲𑀻𑀢𑀮𑀢𑁆𑀣𑁄 𑀲𑀻𑀮𑀢𑁆𑀣𑁄𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀅𑀢𑁆𑀣𑁄𑀧𑀺 𑀢𑀢𑁆𑀣 𑀕𑀳𑁂𑀢𑀩𑁆𑀩𑀪𑀸𑀯𑁂𑀦 𑀤𑀺𑀲𑁆𑀲𑀢𑀺.

𑀢𑀣𑀸 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 (𑁧, 𑁭𑁮-𑀧𑀺𑀝𑁆𑀞𑁂) ‘‘𑀬𑁂𑀲𑀫𑁆𑀧𑀺 𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀁 𑀥𑀼𑀢𑀗𑁆𑀕𑀁, 𑀢𑁂𑀲𑀁 𑀅𑀢𑁆𑀣𑀢𑁄 𑀥𑀼𑀢𑀗𑁆𑀕𑀫𑁂𑀯 𑀦𑀢𑁆𑀣𑀺, 𑀅𑀲𑀦𑁆𑀢𑀁 𑀓𑀲𑁆𑀲 𑀥𑀼𑀦𑀦𑀢𑁄 𑀥𑀼𑀢𑀗𑁆𑀕𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺, 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺 𑀯𑀘𑀦𑀯𑀺𑀭𑁄𑀥𑁄𑀧𑀺 𑀘 𑀦𑁂𑀲𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀥𑀼𑀢𑀗𑁆𑀕𑀫𑁆𑀧𑀺 𑀢𑀢𑁆𑀣 𑀤𑀺𑀲𑁆𑀲𑀢𑀺. 𑀫𑀳𑀸𑀝𑀻𑀓𑀸𑀬𑀁 (𑁧-𑁧𑁦𑁪) 𑀧𑀦 ‘‘𑀬𑁂𑀲𑀦𑁆𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀓𑁂 𑀲𑀦𑁆𑀥𑀸𑀬𑀸𑀳, 𑀢𑁂 𑀳𑀺 𑀥𑀼𑀢𑀗𑁆𑀕𑀁 𑀦𑀸𑀫 𑀧𑀜𑁆𑀜𑀢𑁆𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀡𑁆𑀡𑀺𑀢𑀁.

𑀢𑀣𑀸 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁂 (𑁧, 𑁧𑁪𑁪) ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀲𑀫𑁆𑀪𑀸𑀭𑀺𑀓𑁄 𑀉𑀧𑀘𑀸𑀭𑁄, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫 𑀅𑀧𑁆𑀧𑀦𑀸, 𑀲𑀫𑁆𑀧𑀳𑀁𑀲𑀦𑀸 𑀦𑀸𑀫 ¶ 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀏𑀓𑁂𑀯𑀸𑀤𑁄𑀧𑀺 𑀢𑀢𑁆𑀣 𑀤𑀺𑀲𑁆𑀲𑀢𑀺. 𑀫𑀳𑀸𑀝𑀻𑀓𑀸𑀬𑀁 (𑁧, 𑁧𑁭𑁨) 𑀧𑀦 ‘‘𑀏𑀓𑁂𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄’’𑀢𑀺 𑀯𑀡𑁆𑀡𑀺𑀢𑀁.

𑀢𑀣𑀸 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 (𑁨, 𑁮𑁦-𑀧𑀺𑀝𑁆𑀞𑁂) ‘‘𑀩𑀮𑀭𑀽𑀧𑀁 𑀲𑀫𑁆𑀪𑀯𑀭𑀽𑀧𑀁 𑀚𑀸𑀢𑀺𑀭𑀽𑀧𑀁 𑀭𑁄𑀕𑀭𑀽𑀧𑀁 𑀏𑀓𑀘𑁆𑀘𑀸𑀦𑀁 𑀫𑀢𑁂𑀦 𑀫𑀺𑀤𑁆𑀥𑀭𑀽𑀧’’𑀦𑁆𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀭𑀽𑀧𑀸𑀦𑀺 𑀆𑀳𑀭𑀺𑀢𑁆𑀯𑀸 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀢𑁂𑀲𑀁 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀫𑀳𑀸𑀝𑀻𑀓𑀸𑀬𑀁 ‘‘𑀏𑀓𑀘𑁆𑀘𑀸𑀦𑀦𑁆𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀻𑀦’’𑀦𑁆𑀢𑀺 𑀯𑀡𑁆𑀡𑀺𑀢𑀁. 𑀢𑁂𑀲𑀼 𑀚𑀸𑀢𑀺𑀭𑀽𑀧𑀁 𑀫𑀺𑀤𑁆𑀥𑀭𑀽𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀤𑀲𑁆𑀲𑀺𑀢𑀁. 𑀦 𑀓𑁂𑀯𑀮𑀁 𑀤𑀲𑁆𑀲𑀦𑀫𑀢𑁆𑀢𑀫𑁂𑀯, 𑀅𑀣 𑀔𑁄 𑀫𑀺𑀤𑁆𑀥𑀭𑀽𑀧𑀲𑁆𑀲 𑀅𑀢𑁆𑀣𑀺𑀪𑀸𑀯𑁄𑀧𑀺 ‘‘𑀫𑀺𑀤𑁆𑀥𑀁 𑀦𑀸𑀫 𑀢𑀺𑀯𑀺𑀥𑀁 𑀆𑀳𑀸𑀭𑀚𑀁 𑀉𑀢𑀼𑀚𑀁 𑀘𑀺𑀢𑁆𑀢𑀚𑀜𑁆𑀘𑀸𑀢𑀺. 𑀢𑁂𑀲𑀼 𑀘𑀺𑀢𑁆𑀢𑀚𑀫𑁂𑀯 𑀦𑀻𑀯𑀭𑀡𑀁 𑀳𑁄𑀢𑀺, 𑀲𑁂𑀲𑀸 𑀧𑀦 𑀤𑁆𑀯𑁂 𑀅𑀭𑀳𑀢𑁄𑀧𑀺 𑀪𑀯𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀲𑀸𑀥𑀺𑀢𑁄.

𑀏𑀢𑁆𑀢𑀸𑀯𑀢𑀸 𑀘 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀅𑀲𑀫𑀸𑀦𑀢𑁆𑀣𑀸𑀦𑀁 𑀯𑀼𑀢𑁆𑀢𑀪𑀸𑀯𑁄 𑀘 𑀅𑀪𑀬𑀕𑀺𑀭𑀺𑀯𑀸𑀲𑀻𑀳𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑁄 𑀘 𑀲𑀓𑁆𑀓𑀸 𑀜𑀸𑀢𑀼𑀁. 𑀅𑀜𑁆𑀜𑀸𑀦𑀺𑀧𑀺 𑀧𑀦 𑀈𑀤𑀺𑀲𑀸𑀦𑀺 𑀅𑀲𑀫𑀸𑀦𑀯𑀘𑀦𑀸𑀦𑀺 𑀩𑀳𑀽𑀦𑀺 𑀢𑀢𑁆𑀣 𑀲𑀁𑀯𑀺𑀚𑁆𑀚𑀦𑁆𑀢𑀺𑀬𑁂𑀯, 𑀢𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺 𑀦 𑀲𑀓𑁆𑀓𑀸 𑀇𑀥 𑀤𑀲𑁆𑀲𑁂𑀢𑀼𑀁.

𑀬𑁂𑀪𑀼𑀬𑁆𑀬𑁂𑀦 𑀧𑀦𑀲𑁆𑀲 𑀓𑀭𑀡𑀧𑁆𑀧𑀓𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀯𑀺𑀬 𑀳𑁄𑀢𑀺. 𑀬𑀸 𑀬𑀸 𑀳𑀺 𑀧𑀸𑀴𑀺 𑀅𑀪𑀺𑀥𑀫𑁆𑀫𑀯𑀺𑀪𑀗𑁆𑀕𑀢𑁄 𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀢𑁄 𑀯𑀸 𑀅𑀜𑁆𑀜𑀲𑀼𑀢𑁆𑀢𑀦𑁆𑀢𑁂𑀳𑀺 𑀯𑀸 𑀆𑀦𑁂𑀢𑁆𑀯𑀸 𑀲𑀸𑀥𑀓𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀤𑀲𑁆𑀲𑀺𑀬𑀢𑀺, 𑀢𑀢𑁆𑀣𑀧𑀺 𑀲𑀸 𑀲𑀸 𑀧𑀸𑀴𑀺 𑀬𑁂𑀪𑀼𑀬𑁆𑀬𑁂𑀦 𑀤𑀺𑀲𑁆𑀲𑀢𑁂𑀯. 𑀢𑀸𑀲𑀼 𑀓𑀜𑁆𑀘𑀺𑀫𑀢𑁆𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀦𑀼𑀫𑀺𑀦𑀦𑀢𑁆𑀣𑀸𑀬 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀬𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁪𑁭-𑀧𑀺𑀝𑁆𑀞𑁂) ‘‘𑀧𑀜𑁆𑀘 𑀲𑀻𑀮𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁 𑀲𑀻𑀮’’𑀦𑁆𑀢𑀺𑀆𑀤𑀺𑀓𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺 𑀤𑀲𑁆𑀲𑀺𑀢𑀸, 𑀲𑀸 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂𑀧𑀺 𑀤𑀺𑀲𑁆𑀲𑀢𑁂𑀯.

𑀬𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁧𑁩𑁭-𑀧𑀺𑀝𑁆𑀞𑁂) ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄…𑀧𑁂… 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺 𑀯𑀘𑀦𑀁 𑀧𑁂𑀝𑀓𑁂 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑀺𑀢𑀁, 𑀢𑀜𑁆𑀘 𑀢𑀢𑁆𑀣𑀧𑀺 𑀢𑀣𑁂𑀯 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀺𑀧𑁂𑀝𑀓𑁂 𑀯𑀼𑀢𑁆𑀢’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀺𑀧𑁂𑀝𑀓𑁂𑀢𑀺 𑀦𑀸𑀫𑀜𑁆𑀘 𑀧𑁂𑀝𑀓𑁄𑀧𑀤𑁂𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀢𑀢𑁆𑀣 𑀳𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀧𑀸𑀞𑀲𑀁𑀯𑀡𑁆𑀡𑀦𑀸𑀬𑀁 ‘‘𑀅𑀮𑁄𑀪𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀓𑀸𑀫𑁂𑀳𑀺 𑀯𑀺𑀯𑁂𑀓𑁄 𑀲𑀫𑁆𑀧𑀚𑁆𑀚𑀢𑀺, 𑀅𑀤𑁄𑀲𑀲𑁆𑀲. 𑀅𑀫𑁄𑀳𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀯𑁂𑀓𑁄 ¶ 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀧𑀸𑀞𑀲𑁆𑀲 𑀢𑀺𑀧𑁂𑀝𑀓𑁂 𑀯𑀼𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀲𑁄 𑀘 𑀧𑀸𑀞𑁄 𑀧𑁂𑀝𑀓𑁄𑀧𑀤𑁂𑀲𑁂 (𑁨𑁬𑁨-𑀧𑀺𑀝𑁆𑀞𑁂) ‘‘𑀢𑀢𑁆𑀣 𑀅𑀮𑁄𑀪𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀤𑀺𑀲𑁆𑀲𑀢𑀺.

𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁨𑁫𑁮-𑀧𑀺𑀝𑁆𑀞𑁂) ‘‘𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀪𑀸𑀯𑀺𑀢𑁄’’𑀢𑀺𑀆𑀤𑀺𑀓𑀸 𑀧𑀸𑀴𑀺 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀓𑀢𑁄 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀣𑁂𑀯 𑀢𑀢𑁆𑀣𑀧𑀺.

𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁨𑁭𑁨-𑀧𑀺𑀝𑁆𑀞𑁂) ‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄’’𑀢𑀺𑀆𑀤𑀺 𑀧𑀸𑀴𑀺 𑀘 (𑁧, 𑁨𑁭𑁩-𑀧𑀺𑀝𑁆𑀞𑁂) 𑀓𑀓𑀘𑀽𑀧𑀫𑀧𑀸𑀴𑀺 𑀘 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀢𑁄 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀣𑁂𑀯 𑀢𑀢𑁆𑀣𑀧𑀺.

𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁨, 𑁬𑁯-𑀧𑀺𑀝𑁆𑀞𑁂) ‘‘𑀓𑀢𑀫𑀸 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸’’𑀢𑀺𑀆𑀤𑀺𑀓𑀸 𑀘 𑀧𑀸𑀴𑀺 ‘‘𑀢𑀢𑁆𑀣 𑀓𑀢𑀫𑀁 𑀆𑀬𑀓𑁄𑀲𑀮𑁆𑀮’’𑀦𑁆𑀢𑀺𑀆𑀤𑀺𑀓𑀸 𑀘 𑀧𑀸𑀴𑀺 (𑁨, 𑁭𑁧-𑀧𑀺𑀝𑁆𑀞𑁂) ‘‘𑀤𑀼𑀓𑁆𑀔𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺𑀓𑀸 𑀘 𑀧𑀸𑀴𑀺 𑀅𑀪𑀺𑀥𑀫𑁆𑀫𑀯𑀺𑀪𑀗𑁆𑀕𑀢𑁄 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀣𑁂𑀯 𑀢𑀢𑁆𑀣𑀧𑀺. 𑀲𑀩𑁆𑀩𑀸𑀧𑀺 𑀘 𑀢𑀢𑁆𑀣 𑀯𑀼𑀢𑁆𑀢𑀸 𑀏𑀓𑀯𑀺𑀥𑀤𑀼𑀯𑀺𑀥𑀸𑀤𑀺𑀧𑀜𑁆𑀜𑀸𑀧𑀪𑁂𑀤𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀓𑀣𑀸𑀬 𑀬𑁂𑀪𑀼𑀬𑁆𑀬𑁂𑀦 𑀲𑀫𑀸𑀦𑀸𑀬𑁂𑀯.

‘‘𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀏𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫’’𑀦𑁆𑀢𑀺 [𑀯𑀺𑀲𑀼𑀤𑁆𑀥𑀺. 𑁨.𑁪𑁩𑁬; 𑀥. 𑀲. 𑀅𑀝𑁆𑀞. 𑁫𑁯𑁬] 𑁋

𑀅𑀬𑀫𑁆𑀧𑀺 𑀕𑀸𑀣𑀸 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂𑀧𑀺 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀪𑀸𑀯𑁂𑀦𑁂𑀯 𑀤𑀲𑁆𑀲𑀺𑀢𑀸. 𑀊𑀓𑀸𑀲𑀺𑀭𑀲𑀫𑀽𑀧𑀫𑀦𑁆𑀢𑀺 𑀧𑀤𑀁 𑀧𑀦 𑀊𑀓𑀸𑀲𑀫𑀽𑀧𑀫𑀦𑁆𑀢𑀺 𑀢𑀢𑁆𑀣 𑀤𑀺𑀲𑁆𑀲𑀢𑀺, 𑀢𑀜𑁆𑀘 𑀧𑀭𑀫𑁆𑀧𑀭𑀮𑁂𑀔𑀓𑀸𑀦𑀁 𑀧𑀫𑀸𑀤𑀮𑁂𑀔𑀫𑀢𑁆𑀢𑀫𑁂𑀯 𑀲𑀺𑀬𑀸.

𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀬 𑀯𑀘𑀦𑀢𑁆𑀣𑀢𑁄 𑀮𑀓𑁆𑀔𑀡𑀢𑁄 𑀅𑀦𑀽𑀦𑀸𑀥𑀺𑀓𑀢𑁄 𑀓𑀫𑀢𑁄 𑀅𑀦𑁆𑀢𑁄𑀕𑀥𑀸𑀦𑀁 𑀧𑀪𑁂𑀤𑀢𑁄 𑀉𑀧𑀫𑀸𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀤𑀲𑁆𑀲𑀺𑀢𑁄, 𑀲𑁄 𑀘 𑀬𑁂𑀪𑀼𑀬𑁆𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀦 [𑀯𑀺𑀲𑀼𑀤𑁆𑀥𑀺. 𑁨.𑁫𑁩𑁦] 𑀲𑀫𑀸𑀦𑁄𑀬𑁂𑀯.

𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁨, 𑁨𑁪𑁨-𑁨𑁪𑁫) 𑀲𑀫𑁆𑀫𑀲𑀦𑀜𑀸𑀡𑀓𑀣𑀸𑀬𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀢𑀻𑀢𑀸𑀤𑀺𑀏𑀓𑀸𑀤𑀲𑀯𑀺𑀥𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑁂𑀦 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑁆𑀫𑀲𑀦𑀦𑀬𑁄 𑀤𑀲𑁆𑀲𑀺𑀢𑁄, 𑀢𑀣𑁂𑀯 𑀢𑀢𑁆𑀣𑀧𑀺. 𑀘𑀓𑁆𑀔𑀸𑀤𑀺𑀚𑀭𑀸𑀫𑀭𑀡𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀦 𑀥𑀫𑁆𑀫𑁂𑀲𑀼 𑀥𑀫𑁆𑀫𑀯𑀺𑀘𑀸𑀭𑀧𑀭𑀺𑀬𑁄𑀲𑀸𑀦𑀸𑀦𑀁 𑀲𑀝𑁆𑀞𑀺𑀬𑀸 𑀏𑀯 𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑁂𑀦 𑀲𑀫𑁆𑀫𑀲𑀦𑀦𑀬𑁄 𑀢𑀢𑁆𑀣 𑀤𑀲𑁆𑀲𑀺𑀢𑁄.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ¶ 𑀧𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 (𑁨, 𑁨𑁩𑁦-𑁨𑁩𑁨-𑀧𑀺𑀝𑁆𑀞𑁂𑀲𑀼) 𑀯𑀼𑀢𑁆𑀢𑀸 ‘‘𑀬𑀫𑀓𑀁 𑀦𑀸𑀫𑀭𑀽𑀧𑀜𑁆𑀘…𑀧𑁂… 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺 𑀧𑀘𑁆𑀘𑀬𑀸’’𑀢𑀺 𑀕𑀸𑀣𑀸 𑀘, ‘‘𑀦 𑀘𑀓𑁆𑀔𑀼𑀢𑁄 𑀚𑀸𑀬𑀭𑁂’’𑀢𑀺𑀆𑀤𑀺𑀓𑀸 𑀙 𑀕𑀸𑀣𑀸𑀬𑁄 𑀘, ‘‘𑀦 𑀲𑀓𑁂𑀦 𑀩𑀮𑁂𑀦 𑀚𑀸𑀬𑀭𑁂’’𑀢𑀺𑀆𑀤𑀺𑀓𑀸 𑀙 𑀕𑀸𑀣𑀸𑀬𑁄 𑀘 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀬𑀁 𑀤𑀲𑁆𑀲𑀺𑀢𑀸. 𑀢𑀸𑀲𑀼 𑀅𑀧𑁆𑀧𑀫𑀢𑁆𑀢𑀓𑁄𑀬𑁂𑀯 𑀧𑀸𑀞𑀪𑁂𑀤𑁄 𑀤𑀺𑀲𑁆𑀲𑀢𑀺.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁨, 𑁨𑁬𑁧-𑁨-𑀧𑀺𑀝𑁆𑀞𑁂𑀲𑀼) 𑀅𑀭𑀽𑀧𑀲𑀢𑁆𑀢𑀓𑁂𑀲𑀼 𑀅𑀭𑀺𑀬𑀯𑀁𑀲𑀓𑀣𑀸𑀦𑀬𑁂𑀦 𑀯𑀼𑀢𑁆𑀢𑁄 𑀓𑀮𑀸𑀧𑀢𑁄 𑀘 𑀬𑀫𑀓𑀢𑁄 𑀘 𑀲𑀫𑁆𑀫𑀲𑀦𑀦𑀬𑁄 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀏𑀢𑁆𑀣𑁂𑀯 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀬𑀁 𑀤𑀲𑁆𑀲𑀺𑀢𑁄.

𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀣𑀸𑀬𑀁 𑀮𑁄𑀓𑀯𑀺𑀤𑀽𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀲𑀢𑁆𑀢𑀮𑁄𑀓𑀲𑀗𑁆𑀔𑀸𑀭𑀮𑁄𑀓𑀯𑀲𑁂𑀦 𑀤𑁆𑀯𑁂𑀬𑁂𑀯 𑀮𑁄𑀓𑀸 𑀤𑀲𑁆𑀲𑀺𑀢𑀸, 𑀦 𑀧𑀦 𑀑𑀓𑀸𑀲𑀮𑁄𑀓𑁄 𑀬𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑁧, 𑁧𑁯𑁯-𑁨𑁦𑁦-𑀧𑀺𑀝𑁆𑀞𑁂𑀲𑀼).

𑀏𑀢𑁆𑀢𑀸𑀯𑀢𑀸 𑀘 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁄 𑀦𑀸𑀫 𑀕𑀦𑁆𑀣𑁄 𑀓𑀻𑀤𑀺𑀲𑁄𑀢𑀺 𑀲𑀓𑁆𑀓𑀸 𑀅𑀦𑀼𑀫𑀺𑀦𑀺𑀢𑀼𑀁. 𑀲𑁄 𑀧𑀦 𑀬𑀣𑀸 𑀦 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀕𑀦𑁆𑀣𑁄 𑀳𑁄𑀢𑀺, 𑀏𑀯𑀁 𑀫𑀳𑀸𑀬𑀸𑀦𑀺𑀓𑀸𑀦𑀫𑁆𑀧𑀺 𑀦 𑀳𑁄𑀢𑀺𑀬𑁂𑀯 𑀣𑁂𑀭𑀯𑀸𑀤𑀧𑀺𑀝𑀓𑀫𑁂𑀯 𑀦𑀺𑀲𑁆𑀲𑀸𑀬 𑀓𑀢𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀦 𑀓𑀺𑀜𑁆𑀘𑀺𑀧𑀺 𑀲𑀻𑀳𑀴𑀤𑀻𑀧𑀺𑀓𑀁 𑀦𑀸𑀫𑀁 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑁄 𑀲𑀻𑀳𑀴𑀤𑀻𑀧𑁂 𑀓𑀢𑀕𑀦𑁆𑀣𑁄𑀧𑀺 𑀦 𑀳𑁄𑀢𑀺. 𑀇𑀦𑁆𑀤𑀺𑀬𑀭𑀝𑁆𑀞𑀺𑀓𑀁 𑀧𑀦 𑀦𑀸𑀫𑀜𑁆𑀘 𑀯𑁄𑀳𑀸𑀭𑁄 𑀘 𑀢𑀢𑁆𑀣 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀦𑁆𑀤𑀺𑀬𑀭𑀝𑁆𑀞𑁂 𑀓𑀢𑀕𑀦𑁆𑀣𑁄𑀯 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀘𑀲𑁆𑀲 𑀧𑁂𑀝𑀓𑁄𑀧𑀤𑁂𑀲𑀁 𑀦𑀺𑀲𑁆𑀲𑀺𑀢𑀪𑀸𑀯𑁄 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺, 𑀯𑀺𑀲𑁂𑀲𑀢𑁄 𑀧𑀦 𑀫𑀺𑀤𑁆𑀥𑀭𑀽𑀧𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀘, 𑀅𑀭𑀳𑀢𑁄𑀧𑀺 𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀘 𑀢𑀫𑁂𑀯 𑀦𑀺𑀲𑁆𑀲𑀸𑀬 𑀤𑀲𑁆𑀲𑀻𑀬𑀢𑀺, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀕𑀡𑁆𑀞𑀺𑀧𑀤𑁂 𑀘 𑀧𑁂𑀝𑀓𑁂𑀢𑀺 𑀧𑀤𑀲𑁆𑀲 [𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩𑁬] 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀢𑁆𑀣𑀸𑀬 𑀅𑀝𑁆𑀞𑀓𑀣𑀸 𑀧𑁂𑀝𑀓𑀁 𑀫𑀳𑀺𑀲𑀸𑀲𑀓𑀸𑀦𑀁 𑀕𑀦𑁆𑀣𑁄’’𑀢𑀺 𑀯𑀡𑁆𑀡𑀺𑀢𑁄. 𑀢𑀲𑁆𑀫𑀸 𑀏𑀲𑁄 𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑁄 𑀫𑀳𑀺𑀲𑀸𑀲𑀓𑀦𑀺𑀓𑀸𑀬𑀺𑀓𑁂𑀦 𑀓𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀫𑁆𑀳𑀸𑀓𑀁 𑀫𑀢𑀺.

𑀦𑀺𑀲𑁆𑀲𑀬𑀝𑁆𑀞𑀓𑀣𑀸𑀯𑀺𑀪𑀸𑀯𑀦𑀸

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀧𑀦 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀓𑀢𑁄, 𑀅𑀣 𑀔𑁄 𑀯𑀼𑀘𑁆𑀘𑀫𑀸𑀦𑀧𑁆𑀧𑀓𑀸𑀭𑁂𑀦𑀸𑀧𑀺. 𑀢𑀣𑀸 𑀳𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀳𑀺 𑀲𑀫𑀸𑀳𑀭𑀺𑀢𑁆𑀯𑀸 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄𑀧𑀺 𑀬𑀸 𑀬𑀸 𑀅𑀢𑁆𑀣𑀯𑀡𑁆𑀡𑀦𑀸 ¶ 𑀯𑀸 𑀯𑀺𑀦𑀺𑀘𑁆𑀙𑀬𑁄 𑀯𑀸 𑀲𑀁𑀲𑀬𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑀸 (𑁧, 𑁨𑁬𑁩), 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀲𑀼 𑀧𑀦𑀸𑀢𑀺 𑀯𑀸 (𑁧, 𑁭𑁦), 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀢𑀺 𑀯𑀸 (𑁧, 𑁭𑁨), 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑀸𑀦𑀼𑀲𑀸𑀭𑁂𑀦 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀸 (𑁧, 𑁯𑁯), 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀲𑀽𑀢𑀺 𑀯𑀸 (𑁧, 𑁧𑁧𑁮), 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀸 (𑁧, 𑁧𑁩𑁪), 𑀤𑀻𑀖𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 𑀫𑀢𑀦𑁆𑀢𑀺 𑀯𑀸, 𑀫𑀚𑁆𑀛𑀺𑀫𑀪𑀸𑀡𑀓𑀸 𑀇𑀘𑁆𑀙𑀦𑁆𑀢𑀻𑀢𑀺 𑀯𑀸 (𑁧, 𑁨𑁬𑁭), 𑀅𑀝𑁆𑀞𑀓𑀣𑀸𑀲𑀼 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀸, 𑀏𑀯𑀁 𑀢𑀸𑀯 𑀤𑀻𑀖𑀪𑀸𑀡𑀓𑀸, 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦𑀸𑀳𑀽𑀢𑀺 𑀯𑀸 (𑁧, 𑁨𑁭𑁭), 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦…𑀧𑁂… 𑀅𑀬𑀁 𑀓𑀫𑁄 𑀯𑀼𑀢𑁆𑀢𑁄, 𑀲𑁄 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀯𑀸 (𑁧, 𑁩𑁦𑁯), 𑀏𑀯𑀁 𑀢𑀸𑀯 𑀫𑀚𑁆𑀛𑀺𑀫𑀪𑀸𑀡𑀓𑀸, 𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀧𑀦𑀸𑀢𑀺 𑀯𑀸 (𑁨, 𑁬𑁨), 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑀸 (𑁨, 𑁬𑁩), 𑀅𑀝𑁆𑀞𑀓𑀣𑀸𑀬𑀁 𑀧𑀦𑀸𑀢𑀺 𑀯𑀸 (𑁨, 𑁮𑁦) 𑀏𑀯𑀁 𑀢𑀁𑀢𑀁𑀅𑀢𑁆𑀣𑀯𑀡𑁆𑀡𑀦𑀸𑀯𑀺𑀦𑀺𑀘𑁆𑀙𑀬𑀸𑀦𑀁 𑀦𑀺𑀲𑁆𑀲𑀬𑀫𑁆𑀧𑀺 𑀯𑀺𑀪𑀸𑀯𑁂𑀢𑁆𑀯𑀸 𑀧𑀘𑁆𑀙𑀺𑀫𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑀁𑀲𑀬𑀁 𑀯𑀺𑀦𑁄𑀤𑁂𑀦𑁆𑀢𑁄𑀬𑁂𑀯 𑀢𑁂 𑀤𑀲𑁆𑀲𑁂𑀲𑀺.

𑀢𑁂𑀦𑀺𑀫𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀓𑀭𑀡𑀓𑀸𑀮𑁂 𑀲𑀩𑁆𑀩𑀸𑀧𑀺 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀦𑁆𑀢𑀻𑀢𑀺 𑀘, 𑀧𑀼𑀩𑁆𑀩𑁂𑀬𑁂𑀯 𑀢𑀸 𑀆𑀘𑀭𑀺𑀬𑁂𑀦 𑀲𑀻𑀳𑀴𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀸𑀢𑀺 𑀘, 𑀢𑀸𑀳𑀺 𑀕𑀳𑁂𑀢𑀩𑁆𑀩𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀆𑀘𑀭𑀺𑀬𑁂𑀦 𑀮𑀺𑀔𑀺𑀢𑁄𑀢𑀺 𑀘 𑀅𑀬𑀫𑀢𑁆𑀣𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀁 𑀫𑀳𑀸𑀯𑀁𑀲𑁂 𑁋

‘‘𑀲𑀗𑁆𑀖𑁄 𑀕𑀸𑀣𑀸𑀤𑁆𑀯𑀬𑀁 𑀢𑀲𑁆𑀲𑀸’𑀤𑀸𑀲𑀺 𑀲𑀸𑀫𑀢𑁆𑀣𑀺𑀬𑀁 𑀢𑀯𑀸’’𑀢𑀺𑀆𑀤𑀺𑀦𑀸 ‘‘𑀕𑀸𑀣𑀸𑀤𑁆𑀯𑀬𑀫𑁂𑀯 𑀑𑀮𑁄𑀓𑁂𑀢𑁆𑀯𑀸 𑀓𑀺𑀜𑁆𑀘𑀺𑀧𑀺 𑀅𑀜𑁆𑀜𑀁 𑀧𑁄𑀢𑁆𑀣𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀓𑀸𑀲𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀪𑀺𑀢𑁆𑀣𑀼𑀢𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀅𑀪𑀺𑀢𑁆𑀣𑀼𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑁄𑀭𑀸𑀡𑀯𑀘𑀦𑀤𑀲𑁆𑀲𑀦𑀁

𑀦 𑀓𑁂𑀯𑀮𑀁 𑀆𑀘𑀭𑀺𑀬𑁄 𑀅𑀝𑁆𑀞𑀓𑀣𑀸𑀬𑁄𑀬𑁂𑀯 𑀦𑀺𑀲𑁆𑀲𑀬𑀪𑀸𑀯𑁂𑀦 𑀤𑀲𑁆𑀲𑁂𑀲𑀺, 𑀅𑀣 𑀔𑁄 ‘‘𑀧𑁄𑀭𑀸𑀡𑀸 𑀧𑀦𑀸𑀳𑀽’’𑀢𑀺𑀆𑀤𑀺𑀦𑀸 𑀧𑁄𑀭𑀸𑀡𑀸𑀦𑀁 𑀯𑀘𑀦𑀫𑁆𑀧𑀺 𑀤𑀲𑁆𑀲𑁂𑀲𑀺𑀬𑁂𑀯. 𑀢𑀤𑁂𑀢𑁆𑀣 𑀤𑁆𑀯𑀸𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀤𑀺𑀝𑁆𑀞𑀁 [𑀯𑀺𑀲𑀼𑀤𑁆𑀥𑀺. 𑁧.𑁧𑁫, 𑁧𑁩𑁭, 𑁧𑁪𑁨, 𑁨𑁧𑁭, 𑁨𑁫𑁨, 𑁩𑁦𑁩; 𑁨.𑁫𑁮𑁧, 𑁬𑁭𑁫-𑁬𑁭𑁬, 𑁬𑁮𑁯, 𑁭𑁦𑁬, 𑁭𑁩𑁬, 𑁭𑁪𑁫, 𑁭𑁪𑁬, 𑁭𑁪𑁯,𑁭𑁫𑁫, 𑁭𑁭𑁮, 𑁮𑁩𑁯]. 𑀓𑁂 𑀧𑀦𑁂𑀢𑁂 𑀧𑁄𑀭𑀸𑀡𑀸 𑀦𑀸𑀫? 𑀬𑀸𑀯 𑀘𑀢𑀼𑀢𑁆𑀣𑀲𑀗𑁆𑀕𑀻𑀢𑀺𑀓𑀸𑀮𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 ¶ 𑀢𑀸𑀤𑀺𑀲𑀸 𑀯𑀸 𑀫𑀳𑀸𑀣𑁂𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑁨𑁯𑁨-𑁩-𑀧𑀺𑀝𑁆𑀞𑁂𑀲𑀼).

‘‘𑀑𑀪𑀸𑀲𑁂 𑀘𑁂𑀯 𑀜𑀸𑀡𑁂 𑀘, 𑀧𑀻𑀢𑀺𑀬𑀸 𑀘 𑀯𑀺𑀓𑀫𑁆𑀧𑀢𑀺…𑀧𑁂…

𑀥𑀫𑁆𑀫𑀼𑀤𑁆𑀥𑀘𑁆𑀘𑀓𑀼𑀲𑀮𑁄 𑀳𑁄𑀢𑀺, 𑀦 𑀘 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀻’’𑀢𑀺 𑁋

𑀏𑀯𑀫𑀸𑀕𑀢𑀸 𑀕𑀸𑀣𑀸𑀬𑁄 𑀇𑀥 (𑁨𑁭𑁩-𑁪-𑀧𑀺𑀝𑁆𑀞𑁂𑀲𑀼) 𑀧𑁄𑀭𑀸𑀡𑀸𑀦𑀁 𑀯𑀘𑀦𑀪𑀸𑀯𑁂𑀦 𑀤𑀲𑁆𑀲𑀺𑀢𑀸. 𑀬𑀤𑀺 𑀘𑀺𑀫𑀸 𑀕𑀸𑀣𑀸𑀬𑁄 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀧𑀓𑁆𑀔𑀺𑀢𑁆𑀢𑀸 𑀪𑀯𑁂𑀬𑁆𑀬𑀼𑀁 𑀬𑀣𑀸 𑀧𑀭𑀺𑀯𑀸𑀭𑀧𑀸𑀴𑀺𑀬𑀁 (𑁩-𑀧𑀺𑀝𑁆𑀞𑁂) 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀤𑀻𑀧𑀺𑀓𑀸 𑀕𑀸𑀣𑀸𑀬𑁄, 𑀢𑀸 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑁧, 𑁪𑁬-𑀧𑀺𑀝𑁆𑀞𑁂) 𑀧𑁄𑀭𑀸𑀡𑀯𑀘𑀦𑀪𑀸𑀯𑁂𑀦 𑀤𑀲𑁆𑀲𑀺𑀢𑀸, 𑀏𑀯𑀁 𑀲𑀢𑀺 𑀢𑁂𑀬𑁂𑀯 𑀲𑀗𑁆𑀕𑀻𑀢𑀺𑀓𑀸𑀭𑀸 𑀧𑁄𑀭𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀤𑁂𑀲𑀓𑁂𑀦𑁂𑀯 𑀪𑀸𑀲𑀺𑀢𑀸 𑀪𑀯𑁂𑀬𑁆𑀬𑀼𑀁, 𑀢𑁂 𑀯𑀺𑀬 𑀕𑀭𑀼𑀓𑀭𑀡𑀻𑀬𑀸 𑀧𑀘𑁆𑀘𑀬𑀺𑀓𑀸 𑀲𑀤𑁆𑀥𑀸𑀬𑀺𑀢𑀩𑁆𑀩𑀓𑀸 𑀫𑀳𑀸𑀣𑁂𑀭𑀸 𑀧𑁄𑀭𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀻𑀲𑀼 ‘‘𑀧𑁄𑀭𑀸𑀡𑀸 𑀧𑀦 𑀏𑀯𑀁 𑀯𑀡𑁆𑀡𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀝𑁆𑀞𑀸𑀦𑁂𑀲𑀼𑀧𑀺 𑀢𑀸𑀤𑀺𑀲𑀸𑀯 𑀆𑀘𑀭𑀺𑀬𑀸 𑀧𑁄𑀭𑀸𑀡𑀸𑀢𑀺 𑀯𑀼𑀢𑁆𑀢𑀸.

𑀯𑀺𑀦𑀬𑀝𑁆𑀞𑀓𑀣𑀸𑀓𑀭𑀡𑀁

𑀆𑀘𑀭𑀺𑀬𑁄 𑀧𑀦 𑀇𑀫𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑀓𑀭𑀡𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀢𑁆𑀯𑀸 𑀅𑀜𑁆𑀜𑀸𑀧𑀺 𑀢𑀺𑀧𑀺𑀝𑀓𑀝𑁆𑀞𑀓𑀣𑀸𑀬𑁄 𑀅𑀦𑀼𑀓𑁆𑀓𑀫𑁂𑀦 𑀅𑀓𑀸𑀲𑀺. 𑀓𑀣𑀁? 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀦𑀸𑀫 𑀯𑀺𑀦𑀬𑀝𑁆𑀞𑀓𑀣𑀁 𑀩𑀼𑀤𑁆𑀥𑀲𑀺𑀭𑀺𑀢𑁆𑀣𑁂𑀭𑁂𑀦 𑀅𑀚𑁆𑀛𑁂𑀲𑀺𑀢𑁄 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀓𑁆𑀔𑀺𑀡𑀪𑀸𑀕𑁂 𑀧𑀥𑀸𑀦𑀖𑀭𑀧𑀭𑀺𑀯𑁂𑀡𑁂 𑀫𑀳𑀸𑀦𑀺𑀕𑀫𑀲𑁆𑀲𑀸𑀫𑀺𑀦𑁄 𑀧𑀸𑀲𑀸𑀤𑁂 𑀯𑀲𑀦𑁆𑀢𑁄 𑀅𑀓𑀸𑀲𑀺. 𑀲𑀸 𑀧𑀦𑁂𑀲𑀸 𑀲𑀺𑀭𑀺𑀧𑀸𑀮𑁄𑀢𑀺 𑀦𑀸𑀫𑀦𑁆𑀢𑀭𑀲𑁆𑀲 𑀫𑀳𑀸𑀦𑀸𑀫𑀭𑀜𑁆𑀜𑁄 𑀯𑀻𑀲𑀢𑀺𑀫𑀯𑀲𑁆𑀲𑁂 (𑁯𑁭𑁩-𑀩𑀼-𑀯) 𑀆𑀭𑀤𑁆𑀥𑀸 𑀏𑀓𑀯𑀻𑀲𑀢𑀺𑀫𑀯𑀲𑁆𑀲𑁂 (𑁯𑁭𑁪-𑀩𑀼-𑀯) 𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀢𑀜𑁆𑀘 𑀧𑀦 𑀓𑀭𑁄𑀦𑁆𑀢𑁄 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦𑀸𑀪𑀢𑀁 𑀲𑀻𑀳𑀴𑀪𑀸𑀲𑀸𑀬 𑀲𑀗𑁆𑀔𑀢𑀁 𑀫𑀳𑀸𑀅𑀝𑁆𑀞𑀓𑀣𑀁 𑀢𑀲𑁆𑀲𑀸 𑀲𑀭𑀻𑀭𑀁 𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀻𑀓𑀼𑀭𑀼𑀦𑁆𑀤𑀻𑀲𑀗𑁆𑀔𑁂𑀧𑀅𑀦𑁆𑀥𑀓𑀝𑁆𑀞𑀓𑀣𑀸𑀳𑀺 𑀘 𑀕𑀳𑁂𑀢𑀩𑁆𑀩𑀁 𑀕𑀳𑁂𑀢𑁆𑀯𑀸 𑀲𑀻𑀳𑀴𑀤𑀻𑀧𑁂 𑀬𑀸𑀯 𑀯𑀲𑀪𑀭𑀸𑀚𑀓𑀸𑀮𑀸 𑀧𑀸𑀓𑀝𑀸𑀦𑀁 𑀧𑁄𑀭𑀸𑀡 𑀯𑀺𑀦𑀬𑀥𑀭𑀫𑀳𑀸𑀣𑁂𑀭𑀸𑀦𑀁 𑀯𑀺𑀦𑀺𑀘𑁆𑀙𑀬𑀪𑀽𑀢𑀁 𑀣𑁂𑀭𑀯𑀸𑀤𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑁋

‘‘𑀲𑀁𑀯𑀡𑁆𑀡𑀦𑀁 𑀢𑀜𑁆𑀘 𑀲𑀫𑀸𑀭𑀪𑀦𑁆𑀢𑁄, 𑀢𑀲𑁆𑀲𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭𑀁;

𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀣𑁂𑀯, 𑀓𑀼𑀭𑀼𑀦𑁆𑀤𑀺𑀦𑀸𑀫𑀸𑀤𑀺𑀲𑀼 𑀯𑀺𑀲𑁆𑀲𑀼𑀢𑀸𑀲𑀼.

𑀯𑀺𑀦𑀺𑀘𑁆𑀙𑀬𑁄 ¶ 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄, 𑀬𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄;

𑀢𑀢𑁄𑀧𑀺 𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤𑀁, 𑀲𑀁𑀯𑀡𑁆𑀡𑀦𑀁 𑀲𑀫𑁆𑀫 𑀲𑀫𑀸𑀭𑀪𑀺𑀲𑁆𑀲’’𑀦𑁆𑀢𑀺 𑀘.

‘‘𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂, 𑀪𑀽𑀫𑀺𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑁄;

𑀫𑀳𑀸𑀯𑀺𑀳𑀸𑀭𑁄 𑀬𑁄 𑀲𑀢𑁆𑀣𑀼, 𑀫𑀳𑀸𑀩𑁄𑀥𑀺𑀯𑀺𑀪𑀽𑀲𑀺𑀢𑁄.

𑀬𑀁 𑀢𑀲𑁆𑀲 𑀤𑀓𑁆𑀔𑀺𑀡𑁂 𑀪𑀸𑀕𑁂, 𑀧𑀥𑀸𑀦𑀖𑀭𑀫𑀼𑀢𑁆𑀢𑀫𑀁;

𑀲𑀼𑀘𑀺𑀘𑀸𑀭𑀺𑀢𑁆𑀢𑀲𑀻𑀮𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑁂𑀯𑀺𑀢𑀁.

𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑁄, 𑀲𑀗𑁆𑀖𑀼𑀧𑀝𑁆𑀞𑀸𑀬𑀓𑁄 𑀲𑀤𑀸;

𑀅𑀦𑀸𑀓𑀼𑀮𑀸𑀬 𑀲𑀤𑁆𑀥𑀸𑀬, 𑀧𑀲𑀦𑁆𑀦𑁄 𑀭𑀢𑀦𑀢𑁆𑀢𑀬𑁂.

𑀫𑀳𑀸𑀦𑀺𑀕𑀫𑀲𑀸𑀫𑀻𑀢𑀺, 𑀯𑀺𑀲𑁆𑀲𑀼𑀢𑁄 𑀢𑀢𑁆𑀣 𑀓𑀸𑀭𑀬𑀺;

𑀘𑀸𑀭𑀼𑀧𑀸𑀓𑀸𑀭𑀲𑀜𑁆𑀘𑀺𑀢𑀁, 𑀬𑀁 𑀧𑀸𑀲𑀸𑀤𑀁 𑀫𑀦𑁄𑀭𑀫𑀁.

𑀲𑀦𑁆𑀤𑀘𑁆𑀙𑀸𑀬𑀢𑀭𑀽𑀧𑁂𑀢𑀁, 𑀲𑀫𑁆𑀧𑀦𑁆𑀦𑀲𑀮𑀺𑀮𑀸𑀲𑀬𑀁;

𑀯𑀲𑀢𑀸 𑀢𑀢𑁆𑀭 𑀧𑀸𑀲𑀸𑀤𑁂, 𑀫𑀳𑀸𑀦𑀺𑀕𑀫𑀲𑀸𑀫𑀺𑀦𑁄.

𑀲𑀼𑀘𑀺𑀲𑀻𑀮𑀲𑀫𑀸𑀘𑀸𑀭𑀁, 𑀣𑁂𑀭𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀁;

𑀬𑀸 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀭𑀤𑁆𑀥𑀸, 𑀇𑀤𑁆𑀥𑀸 𑀯𑀺𑀦𑀬𑀯𑀡𑁆𑀡𑀦𑀸.

𑀧𑀸𑀮𑀬𑀦𑁆𑀢𑀲𑁆𑀲 𑀲𑀓𑀮𑀁, 𑀮𑀗𑁆𑀓𑀸𑀤𑀻𑀧𑀁 𑀦𑀺𑀭𑀩𑁆𑀩𑀼𑀤𑀁;

𑀭𑀜𑁆𑀜𑁄 𑀲𑀺𑀭𑀺𑀦𑀺𑀯𑀸𑀲𑀲𑁆𑀲 [𑀲𑀺𑀭𑀺𑀬𑀸 𑀦𑀺𑀯𑀸𑀲𑀝𑁆𑀞𑁄𑀦𑀪𑀽𑀢𑀲𑁆𑀲 𑀲𑀺𑀭𑀺𑀧𑀸𑀮𑀦𑀸𑀫𑀓𑀲𑁆𑀲 𑀭𑀜𑁆𑀜𑁄 (𑀯𑀺𑀫𑀢𑀺, 𑀅𑀦𑁆𑀢𑀺𑀫𑀯𑀺𑀝𑁆𑀞𑁂)], 𑀲𑀺𑀭𑀺𑀧𑀸𑀮𑀬𑀲𑀲𑁆𑀲𑀺𑀦𑁄.

𑀲𑀫𑀯𑀻𑀲𑀢𑀺𑀫𑁂 𑀯𑀲𑁆𑀲𑁂, 𑀚𑀬𑀲𑀁𑀯𑀘𑁆𑀙𑀭𑁂 𑀅𑀬𑀁;

𑀆𑀭𑀤𑁆𑀥𑀸 𑀏𑀓𑀯𑀻𑀲𑀫𑁆𑀳𑀺, 𑀲𑀫𑁆𑀧𑀢𑁆𑀢𑁂 𑀧𑀭𑀺𑀦𑀺𑀝𑁆𑀞𑀺𑀢𑀸.

𑀉𑀧𑀤𑁆𑀤𑀯𑀸𑀓𑀼𑀮𑁂 𑀮𑁄𑀓𑁂, 𑀦𑀺𑀭𑀼𑀧𑀤𑁆𑀤𑀯𑀢𑁄 𑀅𑀬𑀁;

𑀏𑀓𑀲𑀁𑀯𑀘𑁆𑀙𑀭𑁂𑀦𑁂𑀯, 𑀬𑀣𑀸 𑀦𑀺𑀝𑁆𑀞𑀁 𑀉𑀧𑀸𑀕𑀢𑀸’’𑀢𑀺 [𑀧𑀭𑀺. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀘.

𑀅𑀬𑀜𑁆𑀘 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀯𑀺𑀦𑀬𑀝𑁆𑀞𑀓𑀣𑀸 𑀅𑀥𑀼𑀦𑀸 𑀫𑀼𑀤𑁆𑀤𑀺𑀢𑀙𑀝𑁆𑀞𑀲𑀗𑁆𑀕𑀻𑀢𑀺𑀧𑁄𑀢𑁆𑀣𑀓𑀯𑀲𑁂𑀦 𑀲𑀳𑀲𑁆𑀲𑀢𑁄 𑀉𑀧𑀭𑀺 𑀅𑀝𑁆𑀞𑀧𑀡𑁆𑀡𑀸𑀲𑀸𑀥𑀺𑀓𑀢𑀺𑀲𑀢𑀫𑀢𑁆𑀢𑀧𑀺𑀝𑁆𑀞𑀧𑀭𑀺𑀫𑀸𑀡𑀸 (𑁧𑁩𑁫𑁮) 𑀳𑁄𑀢𑀺, 𑀢𑀲𑁆𑀲𑀸 𑀘 𑀏𑀓𑀲𑀁𑀯𑀘𑁆𑀙𑀭𑁂𑀦 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀁 𑀉𑀧𑀦𑀺𑀥𑀸𑀬 𑀘𑀢𑀼𑀯𑀻𑀲𑀸𑀥𑀺𑀓𑀲𑀢𑁆𑀢𑀲𑀢𑀫𑀢𑁆𑀢𑀧𑀺𑀝𑁆𑀞𑀧𑀭𑀺𑀫𑀸𑀡𑁄 (𑁭𑁨𑁪) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀫𑀸𑀲𑁂𑀳𑀺 𑀦𑀺𑀝𑁆𑀞𑀸𑀧𑀺𑀢𑁄 𑀪𑀯𑁂𑀬𑁆𑀬𑀸𑀢𑀺 𑀲𑀓𑁆𑀓𑀸 𑀜𑀸𑀢𑀼𑀁. 𑀢𑀲𑁆𑀫𑀸 𑀬𑀁 𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀁 𑀫𑀳𑀸𑀯𑀁𑀲𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 ¶ 𑀏𑀓𑀭𑀢𑁆𑀢𑁂𑀦𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀮𑀺𑀔𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑁄’’𑀢𑀺 𑀅𑀪𑀺𑀢𑁆𑀣𑀼𑀢𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀢𑀓𑁆𑀓𑀸𑀭𑀓𑀲𑁆𑀲 𑀅𑀪𑀺𑀢𑁆𑀣𑀼𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀘 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀦𑀸𑀫𑀯𑀲𑁂𑀦 𑀆𑀕𑀫𑀝𑁆𑀞𑀓𑀣𑀸𑀦𑀁 𑀅𑀢𑀺𑀤𑁂𑀲𑁄 𑀤𑀺𑀲𑁆𑀲𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑁧𑁫], 𑀓𑀣𑀫𑀺𑀫𑀺𑀲𑁆𑀲𑀸 𑀢𑀸𑀳𑀺 𑀧𑀞𑀫𑀢𑀭𑀁 𑀓𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺? 𑀆𑀘𑀭𑀺𑀬𑀲𑁆𑀲 𑀅𑀝𑁆𑀞𑀓𑀣𑀸𑀲𑀼 𑀅𑀜𑁆𑀜𑀫𑀜𑁆𑀜𑀸𑀢𑀺𑀤𑁂𑀲𑀢𑁄, 𑀯𑀺𑀦𑀬𑀧𑀺𑀝𑀓𑀲𑁆𑀲 𑀕𑀭𑀼𑀓𑀸𑀢𑀩𑁆𑀩𑀢𑀭𑀪𑀸𑀯𑀢𑁄, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀯𑀺𑀲𑁂𑀲𑁂𑀦 𑀕𑀭𑀼𑀓𑀢𑀪𑀸𑀯𑀢𑁄, 𑀲𑀗𑁆𑀕𑀻𑀢𑀺𑀓𑁆𑀓𑀫𑀸𑀦𑀼𑀭𑀽𑀧𑀪𑀸𑀯𑀢𑁄, 𑀇𑀥𑁂𑀯 𑀧𑀭𑀺𑀧𑀼𑀡𑁆𑀡𑀦𑀺𑀤𑀸𑀦𑀓𑀣𑀸𑀧𑀓𑀸𑀲𑀦𑀢𑁄, 𑀦𑀺𑀕𑀫𑀦𑁂 𑀘 𑀧𑀞𑀫𑀁 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀲𑀼𑀢𑁆𑀯𑀸 𑀓𑀭𑀡𑀧𑁆𑀧𑀓𑀸𑀲𑀦𑀢𑁄 𑀞𑀧𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀬𑀫𑁂𑀯 𑀧𑀞𑀫𑀁 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 𑀯𑀺𑀦𑀬𑀝𑁆𑀞𑀓𑀣𑀸𑀬𑀦𑁆𑀢𑀺 𑀯𑀸 𑀯𑀺𑀦𑀬𑀝𑁆𑀞𑀓𑀣𑀸𑀲𑀽𑀢𑀺 𑀯𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀲𑀽𑀢𑀺 𑀯𑀸 𑀏𑀯𑀁 𑀲𑀸𑀫𑀜𑁆𑀜𑀦𑀸𑀫𑀯𑀲𑁂𑀦𑁂𑀯 𑀅𑀢𑀺𑀤𑁂𑀲𑁄 𑀤𑀺𑀲𑁆𑀲𑀢𑀺, 𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀤𑀺𑀯𑀺𑀲𑁂𑀲𑀦𑀸𑀫𑀯𑀲𑁂𑀦. 𑀢𑀲𑁆𑀫𑀸𑀲𑁆𑀲 𑀲𑀩𑁆𑀩𑀧𑀞𑀫𑀁 𑀓𑀢𑀪𑀸𑀯𑁄 𑀧𑀸𑀓𑀝𑁄𑀬𑁂𑀯. 𑀆𑀕𑀫𑀝𑁆𑀞𑀓𑀣𑀸𑀦𑀁 𑀇𑀥𑀸𑀢𑀺𑀤𑁂𑀲𑁄 [𑀧𑀸𑀭𑀸. 𑀅𑀝𑁆𑀞. 𑁧.𑁧𑁫] 𑀇𑀫𑀺𑀲𑁆𑀲𑀸𑀧𑀺 𑀢𑀢𑁆𑀣𑀸𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑁮] 𑀏𑀯𑀁 𑀅𑀜𑁆𑀜𑀫𑀜𑁆𑀜𑀸𑀢𑀺𑀤𑁂𑀲𑁄 𑀧𑀦 𑀆𑀘𑀭𑀺𑀬𑀲𑁆𑀲 𑀫𑀦𑀲𑀸 𑀲𑀼𑀯𑀯𑀢𑁆𑀣𑀺𑀢𑀯𑀲𑁂𑀦 𑀯𑀸 𑀲𑀓𑁆𑀓𑀸 𑀪𑀯𑀺𑀢𑀼𑀁, 𑀅𑀧𑀼𑀩𑁆𑀩𑀸𑀘𑀭𑀺𑀫𑀧𑀭𑀺𑀦𑀺𑀝𑁆𑀞𑀸𑀧𑀦𑁂𑀦 𑀯𑀸. 𑀓𑀣𑀁? 𑀆𑀘𑀭𑀺𑀬𑁂𑀦 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀲𑀩𑁆𑀩𑀲𑁄 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀤𑀺𑀁 𑀏𑀓𑁂𑀓𑀫𑀝𑁆𑀞𑀓𑀣𑀁 𑀓𑀭𑁄𑀦𑁆𑀢𑁂𑀦𑁂𑀯 𑀬𑀢𑁆𑀣 𑀬𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑀯𑀺𑀢𑁆𑀣𑀸𑀭𑀢𑁄 𑀅𑀜𑁆𑀜𑀝𑁆𑀞𑀓𑀣𑀸𑀲𑀼 𑀧𑀓𑀸𑀲𑁂𑀢𑀩𑁆𑀩𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀸 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀜𑁆𑀘 𑀅𑀢𑀺𑀤𑀺𑀲𑀺𑀢𑁆𑀯𑀸 𑀬𑀣𑀸𑀯𑀯𑀢𑁆𑀣𑀺𑀢𑀞𑀸𑀦𑀧𑁆𑀧𑀢𑁆𑀢𑀓𑀸𑀮𑁂 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀦𑁆𑀢𑁂𑀦 𑀢𑀸 𑀓𑀢𑀸 𑀯𑀸 𑀪𑀯𑁂𑀬𑁆𑀬𑀼𑀁. 𑀏𑀓𑁂𑀓𑀺𑀲𑁆𑀲𑀸𑀬 𑀯𑀸 𑀦𑀺𑀝𑁆𑀞𑀸𑀦𑀸𑀲𑀦𑁆𑀦𑀧𑁆𑀧𑀢𑁆𑀢𑀓𑀸𑀮𑁂 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀜𑁆𑀘 𑀅𑀜𑁆𑀜𑀜𑁆𑀘 𑀢𑀣𑀸 𑀓𑀢𑁆𑀯𑀸 𑀲𑀩𑁆𑀩𑀸𑀧𑀺 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀓𑀸𑀭𑀸𑀦𑀫𑀜𑁆𑀜𑀢𑀭𑀯𑀲𑁂𑀦 𑀆𑀘𑀭𑀺𑀬𑀲𑁆𑀲𑀸𑀝𑁆𑀞𑀓𑀣𑀸𑀲𑀼 𑀅𑀜𑁆𑀜𑀫𑀜𑁆𑀜𑀸𑀢𑀺𑀤𑁂𑀲𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀆𑀕𑀫𑀝𑁆𑀞𑀓𑀣𑀸𑀓𑀭𑀡𑀁

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀁 𑀦𑀸𑀫 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀁 𑀧𑀦 𑀆𑀘𑀭𑀺𑀬𑁄 𑀲𑀼𑀫𑀗𑁆𑀕𑀮𑀧𑀭𑀺𑀯𑁂𑀡𑀯𑀸𑀲𑀺𑀦𑀸 𑀤𑀸𑀞𑀸𑀦𑀸𑀕𑀢𑁆𑀣𑁂𑀭𑁂𑀦 𑀆𑀬𑀸𑀘𑀺𑀢𑁄 𑀅𑀓𑀸𑀲𑀺. 𑀯𑀼𑀢𑁆𑀢𑀁 𑀳𑁂𑀢𑀫𑁂𑀢𑀺𑀲𑁆𑀲𑀸 𑀦𑀺𑀕𑀫𑀦𑁂 𑁋

‘‘𑀆𑀬𑀸𑀘𑀺𑀢𑁄 ¶ 𑀲𑀼𑀫𑀗𑁆𑀕𑀮-𑀧𑀭𑀺𑀯𑁂𑀡𑀦𑀺𑀯𑀸𑀲𑀺𑀦𑀸 𑀣𑀺𑀭𑀕𑀼𑀡𑁂𑀦;

𑀤𑀸𑀞𑀸𑀦𑀸𑀕 𑀲𑀗𑁆𑀖, 𑀢𑁆𑀣𑁂𑀭𑁂𑀦 𑀣𑁂𑀭𑀯𑀁𑀲𑀦𑁆𑀯𑀬𑁂𑀦.

𑀤𑀻𑀖𑀸𑀕𑀫𑀲𑁆𑀲 𑀤𑀲𑀩𑀮-𑀕𑀼𑀡𑀕𑀡𑀧𑀭𑀺𑀤𑀻𑀧𑀦𑀲𑁆𑀲 𑀅𑀝𑁆𑀞𑀓𑀣𑀁;

𑀬𑀁 𑀆𑀭𑀪𑀺𑀁 𑀲𑀼𑀫𑀗𑁆𑀕𑀮-𑀯𑀺𑀮𑀸𑀲𑀺𑀦𑀺𑀁 𑀦𑀸𑀫 𑀦𑀸𑀫𑁂𑀦.

𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬, 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁩. 𑀦𑀺𑀕𑀫𑀦𑀓𑀣𑀸].

𑀧𑀧𑀜𑁆𑀘𑀲𑀽𑀤𑀦𑀺𑀁 𑀦𑀸𑀫 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀁 𑀪𑀤𑀦𑁆𑀢𑀩𑀼𑀤𑁆𑀥𑀫𑀺𑀢𑁆𑀢𑀢𑁆𑀣𑁂𑀭𑁂𑀦 𑀧𑀼𑀩𑁆𑀩𑁂 𑀫𑀬𑀽𑀭𑀤𑀽𑀢𑀧𑀝𑁆𑀝𑀦𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦 𑀆𑀬𑀸𑀘𑀺𑀢𑁄 𑀅𑀓𑀸𑀲𑀺. 𑀯𑀼𑀢𑁆𑀢𑀁 𑀳𑁂𑀢𑀫𑁂𑀢𑀺𑀲𑁆𑀲𑀸 𑀦𑀺𑀕𑀫𑀦𑁂 𑁋

‘‘𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸, 𑀣𑁂𑀭𑁂𑀦 𑀪𑀤𑀦𑁆𑀢𑀩𑀼𑀤𑁆𑀥𑀫𑀺𑀢𑁆𑀢𑁂𑀦;

𑀧𑀼𑀩𑁆𑀩𑁂 𑀫𑀬𑀽𑀭𑀤𑀽𑀢𑀧,𑀝𑁆𑀝𑀦𑀫𑁆𑀳𑀺 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦.

𑀧𑀭𑀯𑀸𑀤𑀯𑀺𑀥𑀁𑀲𑀦𑀲𑁆𑀲, 𑀫𑀚𑁆𑀛𑀺𑀫𑀦𑀺𑀓𑀸𑀬𑀲𑁂𑀝𑁆𑀞𑀲𑁆𑀲;

𑀬𑀫𑀳𑀁 𑀧𑀧𑀜𑁆𑀘𑀲𑀽𑀤𑀦𑀺-𑀫𑀝𑁆𑀞𑀓𑀣𑀁 𑀓𑀸𑀢𑀼𑀫𑀸𑀭𑀪𑀺𑀁.

𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬, 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸’’𑀢𑀺 [𑀫. 𑀦𑀺. 𑀅𑀝𑁆𑀞. 𑁩. 𑀦𑀺𑀕𑀫𑀦𑀓𑀣𑀸].

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀁 𑀦𑀸𑀫 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀁 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑁂𑀦 𑀆𑀬𑀸𑀘𑀺𑀢𑁄 𑀅𑀓𑀸𑀲𑀺. 𑀯𑀼𑀢𑁆𑀢𑀁 𑀳𑁂𑀢𑀫𑁂𑀢𑀺𑀲𑁆𑀲𑀸 𑀦𑀺𑀕𑀫𑀦𑁂 𑁋

‘‘𑀏𑀢𑀺𑀲𑁆𑀲𑀸 𑀓𑀭𑀡𑀢𑁆𑀣𑀁, 𑀣𑁂𑀭𑁂𑀦 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑁂𑀦;

𑀲𑀼𑀘𑀺𑀲𑀻𑀮𑁂𑀦 𑀲𑀼𑀪𑀸𑀲𑀺𑀢𑀲𑁆𑀲 𑀧𑀓𑀸𑀲𑀬𑀦𑁆𑀢𑀜𑀸𑀡𑁂𑀦.

𑀲𑀸𑀲𑀦𑀯𑀺𑀪𑀽𑀢𑀺𑀓𑀸𑀫𑁂𑀦, 𑀬𑀸𑀘𑀫𑀸𑀦𑁂𑀦 𑀫𑀁 𑀲𑀼𑀪𑀕𑀼𑀡𑁂𑀦;

𑀬𑀁 𑀲𑀫𑀥𑀺𑀕𑀢𑀁 𑀧𑀼𑀜𑁆𑀜𑀁, 𑀢𑁂𑀦𑀸𑀧𑀺 𑀚𑀦𑁄 𑀲𑀼𑀔𑀻 𑀪𑀯𑀢𑀽’’𑀢𑀺 [𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑀦𑀺𑀕𑀫𑀦𑀓𑀣𑀸].

𑀫𑀦𑁄𑀭𑀣𑀧𑀽𑀭𑀡𑀺𑀁 𑀦𑀸𑀫 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀝𑁆𑀞𑀓𑀣𑀁 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑁂𑀦 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀭𑀝𑁆𑀞𑁂 𑀓𑀜𑁆𑀘𑀺𑀧𑀼𑀭𑀸𑀤𑀻𑀲𑀼 𑀘 𑀲𑀻𑀳𑀴𑀤𑀻𑀧𑁂 𑀫𑀳𑀸𑀯𑀺𑀳𑀸𑀭𑀫𑁆𑀳𑀺 𑀘 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦 𑀆𑀬𑀸𑀘𑀺𑀢𑁄, 𑀢𑀣𑀸 𑀚𑀻𑀯𑀓𑁂𑀦𑀸𑀧𑀺 𑀉𑀧𑀸𑀲𑀓𑁂𑀦 𑀧𑀺𑀝𑀓𑀢𑁆𑀢𑀬𑀧𑀸𑀭𑀕𑀼𑀪𑀽𑀢𑁂𑀦 𑀯𑀸𑀢𑀸𑀳𑀢𑁂𑀧𑀺 𑀅𑀦𑀺𑀜𑁆𑀚𑀫𑀸𑀦𑀲𑀪𑀸𑀯𑁂 𑀤𑀼𑀫𑁂 𑀯𑀺𑀬 𑀅𑀦𑀺𑀜𑁆𑀚𑀫𑀸𑀦𑀲𑀤𑁆𑀥𑀫𑁆𑀫𑁂 𑀞𑀺𑀢𑁂𑀦 𑀲𑀼𑀫𑀢𑀺𑀦𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦𑀸𑀪𑀺𑀬𑀸𑀘𑀺𑀢𑁄 𑀅𑀓𑀸𑀲𑀺. 𑀯𑀼𑀢𑁆𑀢𑀁 𑀳𑁂𑀢𑀫𑁂𑀢𑀺𑀲𑁆𑀲𑀸 𑀦𑀺𑀕𑀫𑀦𑁂 𑁋

‘‘𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸, 𑀣𑁂𑀭𑁂𑀦 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑁂𑀦;

𑀓𑀜𑁆𑀘𑀺𑀧𑀼𑀭𑀸𑀤𑀻𑀲𑀼 𑀫𑀬𑀸, 𑀧𑀼𑀩𑁆𑀩𑁂 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦.

𑀯𑀭𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂, ¶ 𑀫𑀳𑀸𑀯𑀺𑀳𑀸𑀭𑀫𑁆𑀳𑀺 𑀯𑀲𑀦𑀓𑀸𑀮𑁂𑀧𑀺;

𑀯𑀸𑀢𑀸𑀳𑀢𑁂 𑀯𑀺𑀬 𑀤𑀼𑀫𑁂, 𑀅𑀦𑀺𑀜𑁆𑀚𑀫𑀸𑀦𑀫𑁆𑀳𑀺 𑀲𑀤𑁆𑀥𑀫𑁆𑀫𑁂.

𑀧𑀸𑀭𑀁 𑀧𑀺𑀝𑀓𑀢𑁆𑀢𑀬𑀲𑀸,𑀕𑀭𑀲𑁆𑀲 𑀕𑀦𑁆𑀢𑁆𑀯𑀸 𑀞𑀺𑀢𑁂𑀦 𑀲𑀼𑀫𑀢𑀺𑀦𑀸;

𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦𑀸,𑀪𑀺𑀬𑀸𑀘𑀺𑀢𑁄 𑀚𑀻𑀯𑀓𑁂𑀦𑀸𑀧𑀺.

𑀥𑀫𑁆𑀫𑀓𑀣𑀸𑀦𑀬𑀦𑀺𑀧𑀼𑀡𑁂𑀳𑀺, 𑀥𑀫𑁆𑀫𑀓𑀣𑀺𑀓𑁂𑀳𑀺 𑀅𑀧𑀭𑀺𑀫𑀸𑀡𑁂𑀳𑀺;

𑀧𑀭𑀺𑀓𑀻𑀴𑀺𑀢𑀲𑁆𑀲 𑀧𑀝𑀺𑀧,𑀚𑁆𑀚𑀺𑀢𑀲𑁆𑀲 𑀲𑀓𑀲𑀫𑀬𑀘𑀺𑀢𑁆𑀭𑀲𑁆𑀲.

𑀅𑀝𑁆𑀞𑀓𑀣𑀁 𑀅𑀗𑁆𑀕𑀼𑀢𑁆𑀢𑀭,𑀫𑀳𑀸𑀦𑀺𑀓𑀸𑀬𑀲𑁆𑀲 𑀓𑀸𑀢𑀼𑀫𑀸𑀭𑀤𑁆𑀥𑁄;

𑀬𑀫𑀳𑀁 𑀘𑀺𑀭𑀓𑀸𑀮𑀝𑁆𑀞𑀺𑀢𑀺-𑀫𑀺𑀘𑁆𑀙𑀦𑁆𑀢𑁄 𑀲𑀸𑀲𑀦𑀯𑀭𑀲𑁆𑀲.

𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬, 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸;

𑀘𑀢𑀼𑀦𑁆𑀦𑀯𑀼𑀢𑀺𑀧𑀭𑀺𑀫𑀸𑀡𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

𑀲𑀩𑁆𑀩𑀸𑀕𑀫𑀲𑀁𑀯𑀡𑁆𑀡𑀦, 𑀫𑀦𑁄𑀭𑀣𑁄 𑀧𑀽𑀭𑀺𑀢𑁄 𑀘 𑀫𑁂 𑀬𑀲𑁆𑀫𑀸;

𑀏𑀢𑀸𑀬 𑀫𑀦𑁄𑀭𑀣 𑀧𑀽𑀭𑀡𑀻𑀢𑀺 𑀦𑀸𑀫𑀁 𑀢𑀢𑁄 𑀅𑀲𑁆𑀲𑀸’’𑀢𑀺 [𑀅. 𑀦𑀺. 𑀅𑀝𑁆𑀞. 𑁩.𑁧𑁧.𑀦𑀺𑀕𑀫𑀦𑀓𑀣𑀸].

𑀇𑀫𑀸 𑀘 𑀧𑀦 𑀘𑀢𑀲𑁆𑀲𑁄 𑀆𑀕𑀫𑀝𑁆𑀞𑀓𑀣𑀸𑀬𑁄 𑀓𑀼𑀭𑀼𑀫𑀸𑀦𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦𑀸𑀪𑀢𑀁 𑀫𑀽𑀮𑀝𑁆𑀞𑀓𑀣𑀸𑀲𑀗𑁆𑀔𑀸𑀢𑀁 𑀫𑀳𑀸𑀅𑀝𑁆𑀞𑀓𑀣𑀁𑀬𑁂𑀯 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀘𑁂𑀯 𑀧𑀼𑀦𑀧𑁆𑀧𑀼𑀦𑀸𑀕𑀢𑀯𑀺𑀢𑁆𑀣𑀸𑀭𑀓𑀣𑀸𑀫𑀕𑁆𑀕𑀲𑁆𑀲 𑀲𑀁𑀔𑀺𑀧𑀦𑀯𑀲𑁂𑀦 𑀘 𑀅𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀕𑀦𑁆𑀣𑀸𑀭𑀫𑁆𑀪𑁂 𑁋

‘‘𑀲𑀻𑀳𑀴𑀤𑀻𑀧𑀁 𑀧𑀦 𑀆𑀪,𑀢𑀸𑀣 𑀯𑀲𑀺𑀦𑀸 𑀫𑀳𑀸𑀫𑀳𑀺𑀦𑁆𑀤𑁂𑀦;

𑀞𑀧𑀺𑀢𑀸 𑀲𑀻𑀳𑀴𑀪𑀸𑀲𑀸𑀬, 𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬.

𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁, 𑀲𑀻𑀳𑀴𑀪𑀸𑀲𑀁 𑀫𑀦𑁄𑀭𑀫𑀁 𑀪𑀸𑀲𑀁;

𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀁, 𑀆𑀭𑁄𑀧𑁂𑀦𑁆𑀢𑁄 𑀯𑀺𑀕𑀢𑀤𑁄𑀲𑀁…𑀧𑁂…

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢-𑀫𑀢𑁆𑀣𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺.

𑀢𑀣𑀸 𑀦𑀺𑀕𑀫𑀦𑁂𑀧𑀺 𑁋

‘‘𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬, 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁩.𑀦𑀺𑀕𑀫𑀦𑀓𑀣𑀸] 𑀘;

‘‘𑀫𑀽𑀮𑀝𑁆𑀞𑀓𑀣𑀸𑀲𑀸𑀭𑀁, 𑀆𑀤𑀸𑀬 𑀫𑀬𑀸 𑀇𑀫𑀁 𑀓𑀭𑁄𑀦𑁆𑀢𑁂𑀦𑀸’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁩.𑀦𑀺𑀕𑀫𑀦𑀓𑀣𑀸] 𑀘.

𑀇𑀫𑀸𑀲𑀁 𑀲𑀭𑀻𑀭𑀪𑀽𑀢𑀧𑀸𑀞𑁂𑀲𑀼 𑀘 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀺𑀬 ‘‘𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀦𑀺𑀘𑁆𑀙𑀬𑀲𑀁𑀯𑀡𑁆𑀡𑀦𑀸𑀪𑁂𑀤𑀧𑁆𑀧𑀓𑀸𑀲𑀦𑀁 𑀦 𑀤𑀺𑀲𑁆𑀲𑀢𑀺, 𑀢𑀣𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼𑀧𑀺. ¶ 𑀢𑁂𑀦𑁂𑀢𑀁 𑀜𑀸𑀬𑀢𑀺 ‘‘𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀫𑀳𑀸𑀅𑀝𑁆𑀞𑀓𑀣𑀸𑀢𑁄 𑀅𑀜𑁆𑀜𑀸 𑀫𑀳𑀸𑀧𑀘𑁆𑀘𑀭𑀺𑀆𑀤𑀺𑀦𑀸𑀫𑀺𑀓𑀸 𑀧𑁄𑀭𑀸𑀡𑀺𑀓𑀸 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀘𑁂𑀯 𑀅𑀦𑁆𑀥𑀓𑀝𑁆𑀞𑀓𑀣𑀸 𑀘 𑀦𑀢𑁆𑀣𑀻’’𑀢𑀺. 𑀬𑀸𑀯 𑀯𑀲𑀪𑀭𑀸𑀚𑀓𑀸𑀮𑀸 (𑁬𑁦𑁯-𑁬𑁫𑁩) 𑀧𑀦 𑀧𑀸𑀓𑀝𑀸𑀦𑀁 𑀲𑀻𑀳𑀴𑀺𑀓𑀢𑁆𑀣𑁂𑀭𑀸𑀦𑀁 𑀯𑀺𑀦𑀺𑀘𑁆𑀙𑀬𑁄 𑀘 𑀯𑀸𑀤𑀸 𑀘 𑀯𑀢𑁆𑀣𑀽𑀦𑀺 𑀘 𑀏𑀢𑀸𑀲𑀼𑀧𑀺 𑀤𑀺𑀲𑁆𑀲𑀦𑁆𑀢𑀺𑀬𑁂𑀯𑀸𑀢𑀺.

𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀓𑀭𑀡𑀁

𑀅𑀝𑁆𑀞𑀲𑀸𑀮𑀺𑀦𑀺𑀁 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀜𑁆𑀘 𑀥𑀸𑀢𑀼𑀓𑀣𑀸𑀤𑀺𑀧𑀜𑁆𑀘𑀧𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀜𑁆𑀘𑀸𑀢𑀺 𑀢𑀺𑀲𑁆𑀲𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑁄 𑀅𑀢𑁆𑀢𑀦𑀸 𑀲𑀤𑀺𑀲𑀦𑀸𑀫𑁂𑀦 𑀲𑁄𑀢𑀢𑁆𑀣𑀓𑀻𑀕𑀦𑁆𑀣𑀓𑀸𑀭𑀓𑁂𑀦 𑀩𑀼𑀤𑁆𑀥𑀖𑁄𑀲𑀪𑀺𑀓𑁆𑀔𑀼𑀦𑀸 𑀆𑀬𑀸𑀘𑀺𑀢𑁄 𑀅𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀸𑀲𑀼 𑁋

‘‘𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁂𑀦, 𑀦𑀺𑀧𑀼𑀡𑀸𑀫𑀮𑀩𑀼𑀤𑁆𑀥𑀺𑀦𑀸;

𑀪𑀺𑀓𑁆𑀔𑀼𑀦𑀸 𑀩𑀼𑀤𑁆𑀥𑀖𑁄𑀲𑁂𑀦, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄’’𑀢𑀺 [𑀥. 𑀲. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸

𑀅𑀬𑀁 𑀅𑀝𑁆𑀞𑀲𑀸𑀮𑀺𑀦𑀻 𑀦𑀸𑀫 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸’’𑀢𑀺 [𑀥. 𑀲. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀘.

‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁, 𑀢𑀲𑁆𑀲𑀸𑀳𑀁 𑀬𑀸𑀘𑀺𑀢𑁄 𑀞𑀺𑀢𑀕𑀼𑀡𑁂𑀦;

𑀬𑀢𑀺𑀦𑀸 𑀅𑀤𑀦𑁆𑀥𑀕𑀢𑀺𑀦𑀸, 𑀲𑀼𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁂𑀦.

𑀬𑀁 𑀆𑀭𑀪𑀺𑀁 𑀭𑀘𑀬𑀺𑀢𑀼𑀁, 𑀅𑀝𑁆𑀞𑀓𑀣𑀁 𑀲𑀼𑀦𑀺𑀧𑀼𑀡𑁂𑀲𑀼 𑀅𑀢𑁆𑀣𑁂𑀲𑀼;

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀢𑁄, 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀁 𑀦𑀸𑀫𑀸’’𑀢𑀺 [𑀯𑀺𑀪. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀘.

‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸

𑀅𑀬𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻 𑀦𑀸𑀫 𑀯𑀺𑀪𑀗𑁆𑀕𑀝𑁆𑀞𑀓𑀣𑀸’’𑀢𑀺 [𑀯𑀺𑀪. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀘.

𑀇𑀫𑀸𑀲𑀼 𑀧𑀦 𑀢𑀻𑀲𑀼 𑀧𑀜𑁆𑀘𑀧𑀓𑀭𑀡𑀝𑁆𑀞𑀓𑀣𑀸𑀬 𑀦𑀸𑀫𑀯𑀺𑀲𑁂𑀲𑁄 𑀦𑀢𑁆𑀣𑀺 𑀆𑀬𑀸𑀘𑀓𑁄 𑀘 𑀦 𑀧𑀓𑀸𑀲𑀺𑀢𑁄, 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀲𑀤𑁆𑀥𑀸𑀬 𑀏𑀯 𑀲𑀜𑁆𑀘𑁄𑀤𑀺𑀢𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀲𑀸 𑀓𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀲𑁆𑀲𑀸 𑀦𑀺𑀕𑀫𑀦𑁂 𑁋

‘‘𑀓𑀼𑀲𑀮𑀸𑀤𑀺𑀥𑀫𑁆𑀫𑀪𑁂𑀤𑀁, ¶ 𑀦𑀺𑀲𑁆𑀲𑀸𑀬 𑀦𑀬𑁂𑀳𑀺 𑀯𑀺𑀯𑀺𑀥𑀕𑀡𑀦𑁂𑀳𑀺;

𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀲𑀢𑁆𑀢𑀫-𑀫𑀪𑀺𑀥𑀫𑁆𑀫𑀧𑁆𑀧𑀓𑀭𑀡𑀁 𑀲𑀢𑁆𑀣𑀸.

𑀲𑀼𑀯𑀺𑀳𑀺𑀢𑀲𑀦𑁆𑀦𑀺𑀝𑁆𑀞𑀸𑀦𑁄, 𑀧𑀝𑁆𑀞𑀸𑀦𑀁 𑀦𑀸𑀫 𑀬𑀁 𑀧𑀓𑀸𑀲𑁂𑀲𑀺;

𑀲𑀤𑁆𑀥𑀸𑀬 𑀲𑀫𑀸𑀭𑀤𑁆𑀥𑀸, 𑀬𑀸 𑀅𑀝𑁆𑀞𑀓𑀣𑀸 𑀫𑀬𑀸 𑀢𑀲𑁆𑀲𑀸𑀢𑀺 𑀘.

‘‘𑀏𑀢𑁆𑀢𑀸𑀯𑀢𑀸

𑀲𑀢𑁆𑀢𑀧𑁆𑀧𑀓𑀭𑀡𑀁 𑀦𑀸𑀣𑁄, 𑀅𑀪𑀺𑀥𑀫𑁆𑀫𑀫𑀤𑁂𑀲𑀬𑀺;

𑀤𑁂𑀯𑀸𑀢𑀺𑀤𑁂𑀯𑁄 𑀤𑁂𑀯𑀸𑀦𑀁, 𑀤𑁂𑀯𑀮𑁄𑀓𑀫𑁆𑀳𑀺 𑀬𑀁 𑀧𑀼𑀭𑁂;

𑀢𑀲𑁆𑀲 𑀅𑀝𑁆𑀞𑀓𑀣𑀸 𑀏𑀲𑀸, 𑀲𑀓𑀮𑀲𑁆𑀲𑀸𑀧𑀺 𑀦𑀺𑀝𑁆𑀞𑀺𑀢𑀸’’𑀢𑀺 [𑀧𑀝𑁆𑀞𑀸. 𑀅𑀝𑁆𑀞. 𑁧𑁯-𑁨𑁪.𑁧] 𑀘.

‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸

𑀅𑀬𑀁 𑀲𑀓𑀮𑀲𑁆𑀲𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀲𑁆𑀲 𑀅𑀝𑁆𑀞𑀓𑀣𑀸’’𑀢𑀺 [𑀧𑀝𑁆𑀞𑀸. 𑀅𑀝𑁆𑀞. 𑁧𑁯-𑁨𑁪.𑁧] 𑀘.

𑀏𑀓𑀘𑁆𑀘𑁂 𑀧𑀦 𑀆𑀥𑀼𑀦𑀺𑀓𑀸 𑀣𑁂𑀭𑀸 ‘‘𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀬𑀸𑀘𑀺𑀢𑁄 𑀲𑀗𑁆𑀖𑀧𑀸𑀮𑀩𑀼𑀤𑁆𑀥𑀫𑀺𑀢𑁆𑀢𑀚𑁄𑀢𑀺𑀧𑀸𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑁄 𑀣𑁂𑀭𑁄 𑀅𑀓𑀸𑀲𑀻’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀦𑁂𑀲𑀁 𑀯𑀺𑀘𑀸𑀭𑀡𑀸, 𑀅𑀝𑁆𑀞𑀲𑀸𑀮𑀺𑀦𑀻𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀲𑀼 ‘‘𑀢𑀸 𑀩𑀼𑀤𑁆𑀥𑀖𑁄𑀲𑁂𑀦 𑀬𑀸𑀘𑀺𑀢𑁄 𑀅𑀓𑀸𑀲𑀻’’𑀢𑀺 𑀕𑀦𑁆𑀣𑀓𑀸𑀭𑁂𑀦 𑀯𑀼𑀢𑁆𑀢𑀁. 𑀢𑁂𑀦 𑀜𑀸𑀬𑀢𑀺 ‘‘𑀢𑀓𑁆𑀓𑀸𑀭𑀓𑁄 𑀅𑀜𑁆𑀜𑁄, 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀧𑀦 𑀢𑀸𑀲𑀼 𑀬𑀸𑀘𑀓𑀧𑀼𑀕𑁆𑀕𑀮𑁄𑀬𑁂𑀯𑀸’’𑀢𑀺. 𑀆𑀕𑀫𑀝𑁆𑀞𑀓𑀣𑀸𑀲𑀼 𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑁋

‘‘𑀲𑀻𑀮𑀓𑀣𑀸 𑀥𑀼𑀢𑀥𑀫𑁆𑀫𑀸, 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀘𑁂𑀯 𑀲𑀩𑁆𑀩𑀸𑀦𑀺…𑀧𑁂…

𑀇𑀢𑀺 𑀧𑀦 𑀲𑀩𑁆𑀩𑀁 𑀬𑀲𑁆𑀫𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀁;

𑀯𑀼𑀢𑁆𑀢𑀁 𑀢𑀲𑁆𑀫𑀸 𑀪𑀺𑀬𑁆𑀬𑁄, 𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑁋

𑀏𑀯𑀁 𑀲𑀻𑀮𑀓𑀣𑀸𑀤𑀻𑀦𑀁 𑀅𑀢𑁆𑀢𑀦𑀸 𑀏𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀪𑀸𑀯𑁄 𑀫𑀬𑀸𑀢𑀺𑀧𑀤𑁂𑀦 𑀧𑀓𑀸𑀲𑀺𑀢𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑁋

‘‘𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀺, 𑀘𑀭𑀺𑀬𑀸𑀪𑀺𑀜𑁆𑀜𑀸 𑀯𑀺𑀧𑀲𑁆𑀲𑀦𑀸;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦𑀺𑀤𑀁, 𑀬𑀲𑁆𑀫𑀸 𑀲𑀩𑁆𑀩𑀁 𑀧𑀓𑀸𑀲𑀺𑀢’’𑀦𑁆𑀢𑀺 [𑀥. 𑀲. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑁋

𑀏𑀯𑀁 𑀫𑀬𑀸𑀢𑀺 𑀓𑀢𑁆𑀢𑀼𑀧𑀤𑁂𑀦 𑀯𑀺𑀦𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀧𑀺 𑀜𑀸𑀬𑀢𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀸𑀭𑀓𑁄 𑀅𑀜𑁆𑀜𑁄, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀓𑀸𑀭𑀓𑁄 𑀅𑀜𑁆𑀜𑁄’’𑀢𑀺. 𑀓𑀺𑀜𑁆𑀘𑀸𑀧𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼 𑀅𑀪𑀺𑀬𑀸𑀘𑀓𑁄 𑀩𑀼𑀤𑁆𑀥𑀖𑁄𑀲𑁄 𑀪𑀺𑀓𑁆𑀔𑀼𑀦𑀸𑀢𑀺 𑀘 𑀬𑀢𑀺𑀦𑀸𑀢𑀺 𑀘 ¶ 𑀇𑀫𑁂𑀳𑁂𑀯 𑀲𑀸𑀫𑀜𑁆𑀜𑀕𑀼𑀡𑀧𑀤𑁂𑀳𑀺 𑀯𑀼𑀢𑁆𑀢𑁄 𑀦 𑀣𑁂𑀭𑁂𑀦𑀸𑀢𑀺 𑀲𑀕𑀸𑀭𑀯𑀕𑀼𑀡𑀧𑀤𑁂𑀦, 𑀢𑀣𑀸𑀧𑀺 𑀲𑁄 ‘‘𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁂𑀦 𑀦𑀺𑀧𑀼𑀡𑀸𑀫𑀮𑀩𑀼𑀤𑁆𑀥𑀺𑀦𑀸’’𑀢𑀺 𑀘, ‘‘𑀅𑀤𑀦𑁆𑀥𑀕𑀢𑀺𑀦𑀸 𑀲𑀼𑀩𑀼𑀤𑁆𑀥𑀺𑀦𑀸’’𑀢𑀺 𑀘 𑀇𑀫𑁂𑀳𑀺 𑀅𑀥𑀺𑀓𑀕𑀼𑀡𑀧𑀤𑁂𑀳𑀺 𑀣𑁄𑀫𑀺𑀢𑀢𑁆𑀢𑀸 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀓𑀸𑀭𑀓𑁄 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄𑀬𑁂𑀯𑀸’’𑀢𑀺 𑀲𑀓𑁆𑀓𑀸 𑀕𑀳𑁂𑀢𑀼𑀁. 𑀲𑁄 𑀳𑀺 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄𑀬𑁂𑀯 𑀧𑀝𑁆𑀞𑀸𑀬 𑀕𑀦𑁆𑀣𑀓𑁄𑀯𑀺𑀤𑁄 𑀧𑀭𑀺𑀬𑀢𑁆𑀢𑀺𑀯𑀺𑀲𑀸𑀭𑀤𑀕𑀼𑀡𑀲𑀫𑁆𑀧𑀦𑁆𑀦𑁄, 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀊𑀦𑀤𑀲𑀯𑀲𑁆𑀲𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀣𑁂𑀭𑁂𑀦𑀸𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀲𑀓𑁆𑀓𑀸 𑀕𑀳𑁂𑀢𑀼𑀦𑁆𑀢𑀺.

𑀢𑀁 𑀧𑀦 𑀢𑁂𑀲𑀁 𑀅𑀢𑀺𑀯𑀺𑀘𑀸𑀭𑀡𑀫𑀢𑁆𑀢𑀫𑁂𑀯. 𑀦 𑀳𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 ‘‘𑀢𑀲𑁆𑀫𑀺𑀁 𑀓𑀸𑀮𑁂 𑀊𑀦𑀤𑀲𑀯𑀲𑁆𑀲𑁄’’𑀢𑀺 𑀲𑀓𑁆𑀓𑀸 𑀕𑀳𑁂𑀢𑀼𑀁, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀦𑀺𑀕𑀫𑀦𑁂𑀧𑀺 ‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦𑀸’’𑀢𑀺 𑀯𑀘𑀦𑀢𑁄, 𑀦 𑀘 ‘‘𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁂𑀦, 𑀦𑀺𑀧𑀼𑀡𑀸𑀫𑀮𑀩𑀼𑀤𑁆𑀥𑀺𑀦𑀸’’𑀢𑀺 𑀯𑀸, ‘‘𑀅𑀤𑀦𑁆𑀥𑀕𑀢𑀺𑀦𑀸 𑀲𑀼𑀩𑀼𑀤𑁆𑀥𑀺𑀦𑀸’’𑀢𑀺 𑀯𑀸 𑀏𑀢𑁆𑀢𑀓𑁂𑀳𑁂𑀯 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀕𑀼𑀡𑀧𑀤𑁂𑀳𑀺 𑀣𑁄𑀫𑀦𑁂𑀦 𑀲𑀼𑀣𑁄𑀫𑀺𑀢𑁄 𑀳𑁄𑀢𑀺, 𑀅𑀜𑁆𑀜𑀤𑀢𑁆𑀣𑀼 ‘‘𑀦𑀺𑀧𑁆𑀧𑀪𑀻𑀓𑀢𑀔𑀚𑁆𑀚𑁄𑀢𑁄 𑀲𑀫𑀼𑀤𑁂𑀢𑀺 𑀤𑀺𑀯𑀸𑀓𑀭𑁄’’𑀢𑀺 𑀣𑁄𑀫𑀦𑀁 𑀯𑀺𑀬 𑀳𑁄𑀢𑀺. 𑀦𑀦𑀼 𑀆𑀘𑀭𑀺𑀬𑁂𑀦 𑀅𑀢𑁆𑀢𑀦𑁄 𑀕𑀦𑁆𑀣𑀦𑀺𑀕𑀫𑀦𑁂𑀲𑀼 𑁋

‘‘𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦𑀸’’𑀢𑀺𑀆𑀤𑀺𑀦𑀸 𑁋

𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀕𑀼𑀡𑀧𑀤𑀸𑀦𑀺 𑀧𑀓𑀸𑀲𑀺𑀢𑀸𑀦𑀺, 𑀲𑁄𑀬𑁂𑀯 𑀘 𑀧𑁄𑀭𑀸𑀡𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀪𑀺𑀦𑀯𑀲𑀗𑁆𑀕𑀳𑀝𑁆𑀞𑀓𑀣𑀸𑀦𑀁 𑀆𑀤𑀺𑀓𑀢𑁆𑀢𑀸 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀜𑁆𑀜𑁂 𑀧𑀦 𑀅𑀪𑀺𑀦𑀯𑀝𑁆𑀞𑀓𑀣𑀸𑀓𑀸𑀭𑀸 𑀢𑀲𑁆𑀲𑁂𑀯 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀅𑀯𑀲𑁂𑀲𑀫𑁂𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀝𑁆𑀞𑀓𑀣𑀸𑀬𑁄 𑀅𑀓𑀁𑀲𑀼. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼 𑀘 𑀬𑁄 𑀬𑁄 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄, 𑀲𑁄 𑀲𑁄 𑀬𑀣𑀸𑀦𑀼𑀧𑁆𑀧𑀢𑁆𑀢𑀝𑁆𑀞𑀸𑀦𑁂 𑀢𑀢𑁄 𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀼𑀢𑁆𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀲𑀼 𑀛𑀸𑀦𑀓𑀣𑀸𑀯𑀡𑁆𑀡𑀦𑀸𑀲𑀼 𑀘 𑀅𑀬𑀫𑀢𑁆𑀣𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄, 𑀬𑁄𑀧𑀺 𑀘 𑀢𑀢𑁆𑀣 𑀅𑀧𑁆𑀧𑀓𑁄 𑀓𑀢𑀺𑀧𑀬𑀫𑀢𑁆𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀯𑀺𑀲𑀤𑀺𑀲𑁄 𑀲𑀁𑀯𑀡𑁆𑀡𑀦𑀸𑀪𑁂𑀤𑁄 𑀤𑀺𑀲𑁆𑀲𑀢𑀺, 𑀲𑁄𑀧𑀺 𑀆𑀪𑀺𑀥𑀫𑁆𑀫𑀺𑀓𑀸𑀦𑀁 𑀫𑀢𑀸𑀦𑀼𑀲𑀸𑀭𑁂𑀦 𑀬𑀣𑀸 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀢𑀣𑁂𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀅𑀢𑀺𑀤𑁂𑀲𑁄 ¶ 𑀤𑀺𑀲𑁆𑀲𑀢𑀺 [𑀥. 𑀲. 𑀅𑀝𑁆𑀞. 𑁧 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸], 𑀢𑀣𑁂𑀯 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀫𑁆𑀧𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀅𑀢𑀺𑀤𑁂𑀲𑁄 𑀤𑀺𑀲𑁆𑀲𑀢𑁂𑀯 [𑀧𑀸𑀭𑀸. 𑀅𑀝𑁆𑀞. 𑁧.𑁧𑁧;]. 𑀬𑀤𑀺 𑀘 𑀅𑀝𑁆𑀞𑀲𑀸𑀮𑀺𑀦𑀻 𑀅𑀜𑁆𑀜𑁂𑀦 𑀓𑀢𑀸 𑀪𑀯𑁂𑀬𑁆𑀬, 𑀓𑀣𑀁 𑀢𑀸𑀲𑀼 𑀅𑀜𑁆𑀜𑀫𑀜𑁆𑀜𑀸𑀢𑀺𑀤𑁂𑀲𑁄 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼 𑀅𑀪𑀺𑀬𑀸𑀘𑀓𑁄 𑀩𑀼𑀤𑁆𑀥𑀖𑁄𑀲𑁄 𑀆𑀘𑀭𑀺𑀬𑁂𑀦 𑀲𑀫𑀸𑀦𑀦𑀸𑀫𑁄 𑀘𑀽𑀴𑀩𑀼𑀤𑁆𑀥𑀖𑁄𑀲𑁄𑀢𑀺 𑀬𑀸𑀯𑀚𑁆𑀚𑀢𑀦𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀕𑀳𑀺𑀢𑁄 𑀲𑁄𑀢𑀢𑁆𑀣𑀓𑀻𑀕𑀦𑁆𑀣𑀓𑀸𑀭𑀓𑁄 𑀅𑀜𑁆𑀜𑁄𑀬𑁂𑀯, 𑀦 𑀆𑀘𑀭𑀺𑀬𑀫𑀳𑀸𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄. 𑀢𑁂𑀦𑁂𑀯 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀘 ‘‘𑀬𑀢𑀺𑀦𑀸’’𑀢𑀺 𑀘.

𑀬𑀤𑀺 𑀧𑀦 𑀏𑀢𑁆𑀢𑀓𑁂𑀦 𑀦𑀺𑀝𑁆𑀞𑀁 𑀦 𑀕𑀘𑁆𑀙𑁂𑀬𑁆𑀬, 𑀏𑀯𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀓𑀺𑀦𑁆𑀦𑀼 𑀔𑁄 𑀲𑀗𑁆𑀖𑀧𑀸𑀮𑀸𑀤𑀬𑁄 𑀣𑁂𑀭𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀦𑀁 𑀓𑀭𑀡𑀢𑁆𑀣𑀸𑀬 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀁 𑀆𑀬𑀸𑀘𑀫𑀸𑀦𑀸 𑀅𑀢𑁆𑀢𑀦𑀸 𑀲𑀫𑀢𑁆𑀣𑀢𑀭𑁄𑀢𑀺 𑀲𑀤𑁆𑀤𑀳𑀦𑁆𑀢𑀸 𑀆𑀬𑀸𑀘𑀦𑁆𑀢𑀺 𑀉𑀤𑀸𑀳𑀼 𑀅𑀲𑀤𑁆𑀤𑀳𑀦𑁆𑀢𑀸𑀢𑀺? 𑀲𑀤𑁆𑀤𑀳𑀦𑁆𑀢𑀸𑀬𑁂𑀯 𑀆𑀬𑀸𑀘𑀦𑁆𑀢𑀻𑀢𑀺 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄. 𑀢𑀣𑀸 𑀘 𑀲𑀢𑀺 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀲𑀬𑀁 𑀅𑀜𑁆𑀜𑁂𑀳𑀺 𑀲𑀫𑀢𑁆𑀣𑀢𑀭𑁄𑀯 𑀲𑀫𑀸𑀦𑁄 𑀓𑀲𑁆𑀫𑀸 𑀅𑀜𑁆𑀜𑀁 𑀆𑀬𑀸𑀘𑁂𑀬𑁆𑀬. 𑀦 𑀳𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀣𑀸𑀫𑀲𑀫𑁆𑀧𑀦𑁆𑀦𑀲𑁆𑀲 𑀬𑁄𑀩𑁆𑀩𑀦𑀲𑀫𑁆𑀧𑀦𑁆𑀦𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀼𑀦𑁆𑀤𑀭𑀢𑀭𑀁 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀁 𑀓𑀸𑀢𑀼𑀁 𑀪𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀺. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼 𑀘 𑀯𑀼𑀢𑁆𑀢𑀯𑀘𑀦𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀆𑀕𑀫𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀯𑀘𑀦𑁂𑀳𑀺 𑀏𑀓𑀸𑀓𑀸𑀭𑀸𑀦𑁂𑀯 𑀳𑁄𑀦𑁆𑀢𑀺. 𑀬𑀤𑀺 𑀘 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀁 𑀅𑀜𑁆𑀜𑁄 𑀓𑀭𑁂𑀬𑁆𑀬, 𑀓𑀣𑀫𑀧𑀺 𑀢𑀸𑀳𑀺 𑀯𑀘𑀦𑀸𑀓𑀸𑀭𑀲𑁆𑀲 𑀯𑀺𑀲𑀤𑀺𑀲𑀢𑀸 𑀪𑀯𑁂𑀬𑁆𑀬 𑀏𑀯. 𑀏𑀢𑀸𑀲𑀁 𑀦𑀺𑀕𑀫𑀦𑁂 𑀘 𑀤𑀲𑁆𑀲𑀺𑀢𑁂𑀦 ‘‘𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸’’𑀢𑀺 𑀯𑀘𑀦𑁂𑀦 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦 𑀓𑀢𑀸’’𑀢𑁆𑀯𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑁂𑀦𑀸𑀢𑀺. 𑀬𑁂𑀧𑀺 ‘‘𑀅𑀜𑁆𑀜𑁂𑀦 𑀓𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀧𑀺 ‘‘𑀇𑀫𑀺𑀦𑀸 𑀦𑀸𑀫 𑀣𑁂𑀭𑁂𑀦𑀸’’𑀢𑀺 𑀏𑀓𑀁𑀲𑀢𑁄 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀣𑀸 𑀤𑀲𑁆𑀲𑁂𑀢𑀼𑀜𑁆𑀘 𑀮𑁂𑀲𑀫𑀢𑁆𑀢𑀫𑁆𑀧𑀺 𑀲𑀸𑀥𑀓𑀯𑀘𑀦𑀁 𑀦 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑁄𑀧𑀺 𑀇𑀤𑀸𑀦𑀺 𑀆𑀘𑀭𑀺𑀬𑁂𑀳𑀺 𑀘𑀽𑀴𑀩𑀼𑀤𑁆𑀥𑀖𑁄𑀲𑁄𑀢𑀺 𑀯𑁄𑀳𑀭𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸𑀬𑀸𑀘𑀺𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀺𑀦𑀬𑀸𑀕𑀫𑀝𑁆𑀞𑀓𑀣𑀸𑀦𑀁 𑀓𑀸𑀭𑀓𑁄 𑀆𑀘𑀭𑀺𑀬𑀫𑀳𑀸𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄𑀬𑁂𑀯 𑀅𑀓𑀸𑀲𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀬𑀁 𑀧𑀦 𑀫𑀳𑀸𑀯𑀁𑀲𑁂 ‘‘𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀲𑀻𑀳𑀴𑀤𑀻𑀧𑀸𑀕𑀫𑀦𑀢𑁄 𑀧𑀼𑀩𑁆𑀩𑁂 𑀚𑀫𑁆𑀩𑀼𑀤𑀻𑀧𑁂 𑀯𑀲𑀦𑀓𑀸𑀮𑁂𑀬𑁂𑀯 𑀅𑀝𑁆𑀞𑀲𑀸𑀮𑀺𑀦𑀺𑀁 𑀅𑀓𑀸𑀲𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑁋

𑁨𑁨𑁫. ‘‘𑀥𑀫𑁆𑀫𑀲𑀗𑁆𑀕𑀡𑀺𑀬𑀸𑀓𑀸𑀲𑀺, 𑀓𑀘𑁆𑀙𑀁 𑀲𑁄 𑀅𑀝𑁆𑀞𑀲𑀸𑀮𑀺𑀦𑀺’’𑀦𑁆𑀢𑀺 𑁋

𑀯𑀼𑀢𑁆𑀢𑀁, ¶ 𑀢𑀁 𑀇𑀤𑀸𑀦𑀺 𑀤𑀺𑀲𑁆𑀲𑀫𑀸𑀦𑀸𑀬 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀕𑀦𑁆𑀣𑀸𑀭𑀫𑁆𑀪𑁂𑀬𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀧𑀘𑁆𑀙𑀸𑀧𑀺 𑀲𑁄 𑀘, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀘 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀅𑀢𑀺𑀤𑀺𑀲𑀻𑀬𑀦𑁆𑀢𑀺. 𑀢𑀲𑁆𑀫𑀸 𑀢𑀲𑁆𑀲𑀸 𑀆𑀘𑀭𑀺𑀬𑁂𑀦 𑀲𑀻𑀳𑀴𑀤𑀻𑀧𑀁 𑀧𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀜𑁆𑀘𑁂𑀯 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀜𑁆𑀘 𑀓𑀢𑁆𑀯𑀸 𑀧𑀘𑁆𑀙𑀸𑀬𑁂𑀯 𑀓𑀢𑀪𑀸𑀯𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀻𑀅𑀝𑁆𑀞𑀓𑀣𑀸𑀓𑀭𑀡𑀁

𑀓𑀗𑁆𑀔𑀸𑀯𑀺𑀢𑀭𑀡𑀺𑀁 𑀦𑀸𑀫 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀓𑀣𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁄 𑀲𑁄𑀡𑀢𑁆𑀣𑁂𑀭𑁂𑀦 𑀬𑀸𑀘𑀺𑀢𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁 𑀲𑀻𑀳𑀴𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀓𑀣𑀸𑀦𑀬𑀁 𑀦𑀺𑀲𑁆𑀲𑀸𑀬 𑀏𑀓𑀫𑁆𑀧𑀺 𑀧𑀤𑀁 𑀧𑀸𑀴𑀺𑀬𑀸 𑀯𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀳𑀺 𑀯𑀸 𑀅𑀯𑀺𑀭𑁄𑀥𑁂𑀢𑁆𑀯𑀸 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀢𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀲𑀽𑀭𑀢𑁂𑀦 𑀦𑀺𑀯𑀸𑀢𑁂𑀦, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸;

𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦, 𑀲𑁄𑀡𑀢𑁆𑀣𑁂𑀭𑁂𑀦 𑀬𑀸𑀘𑀺𑀢𑁄.

𑀢𑀢𑁆𑀣 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲 𑀯𑀡𑁆𑀡𑀦𑀁;

𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀸𑀬, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁;

𑀯𑀢𑁆𑀢𑀬𑀺𑀲𑁆𑀲𑀸𑀫𑀺 𑀦𑀸𑀫𑁂𑀦, 𑀓𑀗𑁆𑀔𑀸𑀯𑀺𑀢𑀭𑀡𑀺𑀁 𑀲𑀼𑀪’’𑀦𑁆𑀢𑀺 [𑀓𑀗𑁆𑀔𑀸 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀆𑀭𑀪𑀺𑀁 𑀬𑀫𑀳𑀁 𑀲𑀩𑁆𑀩𑀁, 𑀲𑀻𑀳𑀴𑀝𑁆𑀞𑀓𑀣𑀸𑀦𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁.

𑀦𑀺𑀲𑁆𑀲𑀸𑀬 𑀲𑀸 𑀅𑀬𑀁 𑀦𑀺𑀝𑁆𑀞𑀁, 𑀕𑀢𑀸 𑀆𑀤𑀸𑀬 𑀲𑀩𑁆𑀩𑀲𑁄;

𑀲𑀩𑁆𑀩𑀁 𑀅𑀝𑁆𑀞𑀓𑀣𑀸𑀲𑀸𑀭𑀁, 𑀧𑀸𑀴𑀺𑀬𑀢𑁆𑀣𑀜𑁆𑀘 𑀓𑁂𑀯𑀮𑀁.

𑀦 𑀳𑁂𑀢𑁆𑀣 𑀢𑀁 𑀧𑀤𑀁 𑀅𑀢𑁆𑀣𑀺, 𑀬𑀁 𑀯𑀺𑀭𑀼𑀚𑁆𑀛𑁂𑀬𑁆𑀬 𑀧𑀸𑀴𑀺𑀬𑀸;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀧𑁄𑀭𑀸𑀡𑀝𑁆𑀞𑀓𑀣𑀸𑀳𑀺 𑀯𑀸’’𑀢𑀺 [𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀕𑀫𑀦𑀓𑀣𑀸] 𑀘.

𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀓𑀭𑀡𑀁

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀅𑀝𑁆𑀞𑀓𑀣𑀸𑀬𑁄 𑀲𑀦𑁆𑀢𑀺 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸 𑀥𑀫𑁆𑀫𑀧𑀤𑀝𑁆𑀞𑀓𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸 𑀘𑀸𑀢𑀺, 𑀬𑀸 𑀢𑀸𑀲𑀼 𑀤𑀺𑀲𑁆𑀲𑀫𑀸𑀦𑀦𑀺𑀕𑀫𑀦𑀯𑀲𑁂𑀦 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦𑁂𑀯 𑀓𑀢𑀸𑀢𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀢𑀢𑁆𑀣 𑀧𑀦 𑀯𑀼𑀢𑁆𑀢𑀯𑀘𑀦𑀸𑀦𑀺 𑀓𑀸𑀦𑀺𑀘𑀺 ¶ 𑀓𑀸𑀦𑀺𑀘𑀺 𑀆𑀕𑀫𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸𑀓𑀸𑀭𑁂𑀦 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀓𑁂 𑀯𑀤𑀦𑁆𑀢𑀺 ‘‘𑀦𑁂𑀢𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲𑀸’’𑀢𑀺. 𑀏𑀓𑀘𑁆𑀘𑁂 𑀧𑀦 ‘‘𑀆𑀘𑀭𑀺𑀬𑀲𑁆𑀲 𑀉𑀧𑀣𑀫𑁆𑀪𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀓𑀢𑀸, 𑀧𑀘𑁆𑀙𑀸 𑀆𑀘𑀭𑀺𑀬𑁂𑀦 𑀑𑀲𑀸𑀦𑀲𑁄𑀥𑀦𑀯𑀲𑁂𑀦 𑀧𑀭𑀺𑀬𑁄𑀲𑀸𑀧𑀺𑀢𑀸 𑀯𑀸 𑀪𑀯𑁂𑀬𑁆𑀬𑀼𑀁, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀁 𑀆𑀬𑀸𑀘𑀦𑁆𑀢𑁂𑀦 𑀘𑀽𑀴𑀩𑀼𑀤𑁆𑀥𑀖𑁄𑀲𑁂𑀦 𑀯𑀸 𑀓𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀤𑀦𑁆𑀢𑀺.

𑀢𑀁 𑀢𑀣𑀸 𑀯𑀸 𑀳𑁄𑀢𑀼 𑀅𑀜𑁆𑀜𑀣𑀸 𑀯𑀸, 𑀇𑀤𑀸𑀦𑀺 𑀏𑀓𑀦𑁆𑀢𑀢𑁄 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀼𑀓𑀭𑀫𑁂𑀯. 𑀢𑀲𑁆𑀫𑀸 𑀢𑀸𑀲𑀁 𑀦𑀺𑀕𑀫𑀦𑀯𑀘𑀦𑀯𑀲𑁂𑀦𑁂𑀯 𑀏𑀢𑁆𑀣 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀢𑀸𑀲𑀼 𑀳𑀺 𑀥𑀫𑁆𑀫𑀧𑀤𑀝𑁆𑀞𑀓𑀣𑀁 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀆𑀬𑀸𑀘𑀺𑀢𑁄 𑀲𑀺𑀭𑀺𑀓𑀽𑀝𑀲𑁆𑀲 (𑀲𑀺𑀭𑀺𑀓𑀼𑀟𑁆𑀟𑀲𑁆𑀲) 𑀭𑀜𑁆𑀜𑁄 𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁄 𑀧𑀭𑀫𑁆𑀧𑀭𑀸𑀪𑀢𑀁 𑀲𑀻𑀳𑀴𑀪𑀸𑀲𑀸𑀬 𑀲𑀡𑁆𑀞𑀺𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀁 𑀧𑀸𑀴𑀺𑀪𑀸𑀲𑀸𑀬 𑀆𑀭𑁄𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀕𑀢𑀜𑁆𑀘 𑀯𑀘𑀦𑀓𑁆𑀓𑀫𑀁 𑀲𑀫𑀸𑀲𑁂𑀢𑁆𑀯𑀸 𑀕𑀸𑀣𑀸𑀲𑀼 𑀅𑀲𑀁𑀯𑀡𑁆𑀡𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀁𑀯𑀡𑁆𑀡𑁂𑀢𑁆𑀯𑀸 𑀅𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀕𑀦𑁆𑀣𑀸𑀭𑀫𑁆𑀪𑁂 𑁋

‘‘𑀧𑀭𑀫𑁆𑀧𑀭𑀸𑀪𑀢𑀸 𑀢𑀲𑁆𑀲, 𑀦𑀺𑀧𑀼𑀡𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀬𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺, 𑀤𑀻𑀧𑀪𑀸𑀲𑀸𑀬 𑀲𑀡𑁆𑀞𑀺𑀢𑀸…𑀧𑁂…

𑀓𑀼𑀫𑀸𑀭𑀓𑀲𑁆𑀲𑀧𑁂𑀦𑀸𑀳𑀁, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄…𑀧𑁂…

𑀢𑀁 𑀪𑀸𑀲𑀁 𑀅𑀢𑀺𑀯𑀺𑀢𑁆𑀣𑀸𑀭, 𑀕𑀢𑀜𑁆𑀘 𑀯𑀘𑀦𑀓𑁆𑀓𑀫𑀁;

𑀧𑀳𑀸𑀬𑀸𑀭𑁄𑀧𑀬𑀺𑀢𑁆𑀯𑀸𑀦, 𑀢𑀦𑁆𑀢𑀺𑀪𑀸𑀲𑀁 𑀫𑀦𑁄𑀭𑀫𑀁.

𑀕𑀸𑀣𑀸𑀦𑀁 𑀩𑁆𑀬𑀜𑁆𑀚𑀦𑀧𑀤𑀁, 𑀬𑀁 𑀢𑀢𑁆𑀣 𑀦 𑀯𑀺𑀪𑀸𑀯𑀺𑀢𑀁;

𑀓𑁂𑀯𑀮𑀁 𑀢𑀁 𑀯𑀺𑀪𑀸𑀯𑁂𑀢𑁆𑀯𑀸, 𑀲𑁂𑀲𑀁 𑀢𑀫𑁂𑀯 𑀅𑀢𑁆𑀣𑀢𑁄.

𑀪𑀸𑀲𑀦𑁆𑀢𑀭𑁂𑀦 𑀪𑀸𑀲𑀺𑀲𑁆𑀲’’𑀦𑁆𑀢𑀺 [𑀥. 𑀧. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑁋

𑀦𑀺𑀕𑀫𑀦𑁂 𑀘 𑀯𑀼𑀢𑁆𑀢𑀁 𑁋

‘‘𑀯𑀺𑀳𑀸𑀭𑁂 𑀅𑀥𑀺𑀭𑀸𑀚𑁂𑀦, 𑀓𑀸𑀭𑀺𑀢𑀫𑁆𑀳𑀺 𑀓𑀢𑀜𑁆𑀜𑀼𑀦𑀸;

𑀧𑀸𑀲𑀸𑀤𑁂 𑀲𑀺𑀭𑀺𑀓𑀽𑀝𑀲𑁆𑀲, 𑀭𑀜𑁆𑀜𑁄 𑀯𑀺𑀳𑀭𑀢𑀸 𑀫𑀬𑀸’’𑀢𑀺 [𑀥. 𑀧. 𑀅𑀝𑁆𑀞. 𑁨.𑀦𑀺𑀕𑀫𑀦𑀓𑀣𑀸].

𑀏𑀢𑁆𑀣 𑀘 𑀲𑀺𑀭𑀺𑀓𑀽𑀝𑁄 𑀦𑀸𑀫 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀺𑀕𑀫𑀦𑁂 𑀲𑀺𑀭𑀺𑀧𑀸𑀮𑁄𑀢𑀺 𑀯𑀼𑀢𑁆𑀢𑁄 𑀫𑀳𑀸𑀦𑀸𑀫𑁄𑀬𑁂𑀯 𑀭𑀸𑀚𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀫𑀳𑁂𑀲𑀺𑀬𑀸 𑀆𑀦𑀬𑀦𑀁 𑀲𑀫𑀸𑀤𑀸𑀧𑀦𑀫𑀸𑀭𑀩𑁆𑀪 𑀢𑁂𑀦 𑀭𑀜𑁆𑀜𑀸 𑀤𑀺𑀦𑁆𑀦𑁂 𑀥𑀽𑀫𑀭𑀓𑁆𑀔𑀧𑀩𑁆𑀩𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀲𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

𑁩𑁭-𑁨𑁧𑁨.

‘‘𑀮𑁄𑀳𑀤𑁆𑀯𑀸𑀭-𑀭𑀮𑀕𑁆𑀕𑀸𑀫-𑀓𑁄𑀝𑀺𑀧𑀲𑁆𑀲𑀸𑀯𑀦𑀯𑁆𑀳𑀬𑁂;

𑀢𑀬𑁄 ¶ 𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸, 𑀪𑀺𑀓𑁆𑀔𑀽𑀦𑀁 𑀅𑀪𑀬𑀼𑀢𑁆𑀢𑀭𑁂.

𑁨𑁧𑁩.

𑀯𑀺𑀳𑀸𑀭𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀥𑀽𑀫𑀭𑀓𑁆𑀔𑀫𑁆𑀳𑀺 𑀧𑀩𑁆𑀩𑀢𑁂;

𑀫𑀳𑁂𑀲𑀺𑀬𑀸’𑀦𑀬𑁂𑀦𑀸’𑀤𑀸, 𑀪𑀺𑀓𑁆𑀔𑀽𑀦𑀁 𑀣𑁂𑀭𑀯𑀸𑀤𑀺𑀦’’𑀦𑁆𑀢𑀺.

𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀓𑀸𑀮𑁂 𑀲𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁. 𑀢𑀲𑁆𑀲 𑀳𑀺 𑀭𑀜𑁆𑀜𑁄 𑀏𑀓𑀯𑀻𑀲𑀢𑀺𑀫𑀯𑀲𑁆𑀲𑁂 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀘 𑀭𑀸𑀚𑀸 𑀤𑁆𑀯𑀸𑀯𑀻𑀲𑀢𑀺𑀫𑀯𑀲𑁆𑀲𑁂 𑀤𑀺𑀯𑀗𑁆𑀕𑀢𑁄. 𑀏𑀢𑁆𑀣𑀦𑁆𑀢𑀭𑁂 𑀲𑀸𑀥𑀺𑀓𑀏𑀓𑀯𑀲𑁆𑀲𑁂𑀦 ‘‘𑀘𑀢𑀲𑁆𑀲𑁄 𑀘 𑀆𑀕𑀫𑀝𑁆𑀞𑀓𑀣𑀸𑀬𑁄 𑀢𑀺𑀲𑁆𑀲𑁄 𑀘 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑁄 𑀅𑀬𑀜𑁆𑀘 𑀥𑀫𑁆𑀫𑀧𑀤𑀝𑁆𑀞𑀓𑀣𑀸’’𑀢𑀺 𑀲𑀩𑁆𑀩𑀸 𑀏𑀢𑀸 𑀦 𑀲𑀓𑁆𑀓𑀸 𑀦𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀝𑁆𑀞𑀓𑀣𑀸𑀓𑀭𑀡𑀁

𑀧𑀭𑀫𑀢𑁆𑀣𑀚𑁄𑀢𑀺𑀓𑀁 𑀦𑀸𑀫 𑀔𑀼𑀤𑁆𑀤𑀓𑀧𑀸𑀞𑀲𑁆𑀲 𑀘𑁂𑀯 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀘 𑀅𑀝𑁆𑀞𑀓𑀣𑀁 𑀓𑁂𑀦𑀘𑀺𑀧𑀺 𑀅𑀦𑀸𑀬𑀸𑀘𑀺𑀢𑁄 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦𑁂𑀯 𑀅𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬 𑀕𑀦𑁆𑀣𑀸𑀭𑀫𑁆𑀪𑁂 𑁋

‘‘𑀉𑀢𑁆𑀢𑀫𑀁 𑀯𑀦𑁆𑀤𑀦𑁂𑀬𑁆𑀬𑀸𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁;

𑀔𑀼𑀤𑁆𑀤𑀓𑀸𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀓𑁂𑀲𑀜𑁆𑀘𑀺 𑀅𑀢𑁆𑀣𑀯𑀡𑁆𑀡𑀦𑀁.

𑀔𑀼𑀤𑁆𑀤𑀓𑀸𑀦𑀁 𑀕𑀫𑁆𑀪𑀻𑀭𑀢𑁆𑀢𑀸, 𑀓𑀺𑀜𑁆𑀘𑀸𑀧𑀺 𑀅𑀢𑀺𑀤𑀼𑀓𑁆𑀓𑀭𑀸;

𑀯𑀡𑁆𑀡𑀦𑀸 𑀫𑀸𑀤𑀺𑀲𑁂𑀦𑁂𑀲𑀸, 𑀅𑀩𑁄𑀥𑀦𑁆𑀢𑁂𑀦 𑀲𑀸𑀲𑀦𑀁.

𑀅𑀚𑁆𑀚𑀸𑀧𑀺 𑀢𑀼 𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑁄, 𑀧𑀼𑀩𑁆𑀩𑀸𑀘𑀭𑀺𑀬𑀦𑀺𑀘𑁆𑀙𑀬𑁄;

𑀢𑀣𑁂𑀯 𑀘 𑀞𑀺𑀢𑀁 𑀬𑀲𑁆𑀫𑀸, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁.

𑀢𑀲𑁆𑀫𑀸𑀳𑀁 𑀓𑀸𑀢𑀼𑀫𑀺𑀘𑁆𑀙𑀸𑀫𑀺, 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀇𑀫𑀁;

𑀲𑀸𑀲𑀦𑀜𑁆𑀘𑁂𑀯 𑀦𑀺𑀲𑁆𑀲𑀸𑀬, 𑀧𑁄𑀭𑀸𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀁.

𑀲𑀤𑁆𑀥𑀫𑁆𑀫𑀩𑀳𑀼𑀫𑀸𑀦𑁂𑀦, 𑀦𑀸𑀢𑁆𑀢𑀼𑀓𑁆𑀓𑀁𑀲𑀦𑀓𑀫𑁆𑀬𑀢𑀸;

𑀦𑀸𑀜𑁆𑀜𑁂𑀲𑀁 𑀯𑀫𑁆𑀪𑀦𑀢𑁆𑀣𑀸𑀬, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺.

𑀩𑀳𑀽 𑀧𑀦 𑀯𑀺𑀘𑀓𑁆𑀔𑀡𑀸 𑀇𑀫𑀸 𑀆𑀭𑀫𑁆𑀪𑀕𑀸𑀣𑀸𑀬𑁄 𑀯𑀺𑀘𑀺𑀦𑀺𑀢𑁆𑀯𑀸 ‘‘𑀦𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀯𑀺𑀬 𑀯𑀘𑀦𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀦𑁂𑀲𑀁 𑀯𑀺𑀘𑀺𑀦𑀦𑀸𑀓𑀸𑀭𑁄, 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀳𑀺 𑀬𑀁 𑀓𑀜𑁆𑀘𑀺 𑀕𑀦𑁆𑀣𑀁 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂𑀦 𑀅𑀜𑁆𑀜𑁂𑀦 𑀆𑀬𑀸𑀘𑀺𑀢𑁄𑀯 𑀓𑀭𑁄𑀢𑀺, 𑀇𑀥 𑀧𑀦 𑀓𑁄𑀘𑀺𑀧𑀺 𑀆𑀬𑀸𑀘𑀓𑁄 ¶ 𑀦𑀢𑁆𑀣𑀺. 𑀧𑀼𑀦𑀧𑀺 𑀆𑀘𑀭𑀺𑀬𑁄 ‘‘𑀧𑁄𑀭𑀸𑀡𑀲𑀻𑀳𑀴𑀝𑁆𑀞𑀓𑀣𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘 ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀸𑀘𑀦𑀸𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘 𑀏𑀯𑀁 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸𑀯 𑀓𑀭𑁄𑀢𑀺, 𑀇𑀥 𑀧𑀦 𑀢𑀸𑀤𑀺𑀲𑀻𑀧𑀺 𑀧𑀝𑀺𑀜𑁆𑀜𑀸 𑀦𑀢𑁆𑀣𑀺. 𑀧𑀼𑀦𑀧𑀺 𑀆𑀘𑀭𑀺𑀬𑁄 𑀅𑀢𑀺𑀕𑀫𑁆𑀪𑀻𑀭𑀢𑁆𑀣𑀸𑀦𑀁 𑀘𑀢𑀼𑀦𑁆𑀦𑀜𑁆𑀘𑀸𑀕𑀫𑀸𑀦𑀁 𑀅𑀪𑀺𑀥𑀫𑁆𑀫𑀲𑁆𑀲 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂𑀧𑀺 𑀤𑀼𑀓𑁆𑀓𑀭𑀪𑀸𑀯𑀁 𑀦 𑀓𑀣𑁂𑀢𑀺, 𑀇𑀥 𑀧𑀦 ‘‘𑀲𑀸𑀲𑀦𑀁 𑀅𑀩𑁄𑀥𑀦𑁆𑀢𑁂𑀦 𑀫𑀸𑀤𑀺𑀲𑁂𑀦𑀸’’𑀢𑀺 𑀅𑀢𑁆𑀢𑀦𑀸 𑀲𑀸𑀲𑀦𑀲𑁆𑀲 𑀅𑀩𑀼𑀤𑁆𑀥𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀅𑀢𑀺𑀤𑀼𑀓𑁆𑀓𑀭𑀸’’𑀢𑀺 𑀘 𑀓𑀣𑁂𑀢𑀺. 𑀢𑀲𑁆𑀫𑀸 ‘‘𑀦𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀯𑀺𑀬 𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀆𑀘𑀭𑀺𑀬𑁄 𑀳𑀺 𑀅𑀢𑁆𑀢𑀦𑁄 𑀕𑀦𑁆𑀣𑀦𑀺𑀕𑀫𑀦𑁂𑀲𑀼 ‘‘𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀪𑀸𑀯𑀁 𑀧𑀓𑀸𑀲𑁂𑀲𑀺, 𑀲𑁄 ‘‘𑀲𑀸𑀲𑀦𑀁 𑀅𑀩𑁄𑀥𑀦𑁆𑀢𑁂𑀦 𑀫𑀸𑀤𑀺𑀲𑁂𑀦 𑀅𑀢𑀺𑀤𑀼𑀓𑁆𑀓𑀭𑀸’’𑀢𑀺 𑀈𑀤𑀺𑀲𑀁 𑀯𑀘𑀦𑀁 𑀦 𑀓𑀣𑁂𑀬𑁆𑀬𑀬𑁂𑀯𑀸𑀢𑀺.

𑀚𑀸𑀢𑀓𑀝𑁆𑀞𑀓𑀣𑀸𑀓𑀭𑀡𑀁

𑀚𑀸𑀢𑀓𑀝𑁆𑀞𑀓𑀣𑀸𑀧𑀺 𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁂𑀦𑁂𑀯 𑀓𑀢𑀸𑀢𑀺 𑀯𑀤𑀦𑁆𑀢𑀺, 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀦 𑀤𑀺𑀲𑁆𑀲𑀢𑀺. 𑀲𑀸 𑀧𑀦 𑀅𑀢𑁆𑀣𑀤𑀲𑁆𑀲𑀺𑀢𑁆𑀣𑁂𑀭𑁂𑀦 𑀘 𑀩𑀼𑀤𑁆𑀥𑀫𑀺𑀢𑁆𑀢𑀢𑁆𑀣𑁂𑀭𑁂𑀦 𑀘 𑀫𑀳𑀺𑀲𑀸𑀲𑀓𑀦𑀺𑀓𑀸𑀬𑀺𑀓𑁂𑀦 𑀘 𑀩𑀼𑀤𑁆𑀥𑀤𑁂𑀯𑀢𑁆𑀣𑁂𑀭𑁂𑀦𑀸𑀢𑀺 𑀢𑀻𑀳𑀺 𑀣𑁂𑀭𑁂𑀳𑀺 𑀅𑀪𑀺𑀬𑀸𑀘𑀺𑀢𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀸𑀘𑀦𑀸𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀓𑀢𑀸. 𑀇𑀫𑀺𑀲𑁆𑀲𑀸𑀧𑀺 𑀦𑀸𑀫𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀁 𑀳𑀺𑀫𑀺𑀲𑁆𑀲𑀸 𑀆𑀭𑀫𑁆𑀪𑁂 𑁋

‘‘𑀩𑀼𑀤𑁆𑀥𑀯𑀁𑀲𑀲𑁆𑀲 𑀏𑀢𑀲𑁆𑀲, 𑀇𑀘𑁆𑀙𑀦𑁆𑀢𑁂𑀦 𑀘𑀺𑀭𑀝𑁆𑀞𑀺𑀢𑀺𑀁;

𑀬𑀸𑀘𑀺𑀢𑁄 𑀅𑀪𑀺𑀕𑀦𑁆𑀢𑁆𑀯𑀸𑀦, 𑀣𑁂𑀭𑁂𑀦 𑀅𑀢𑁆𑀣𑀤𑀲𑁆𑀲𑀺𑀦𑀸.

𑀅𑀲𑀁𑀲𑀝𑁆𑀞𑀯𑀺𑀳𑀸𑀭𑁂𑀦, 𑀲𑀤𑀸 𑀲𑀼𑀤𑁆𑀥𑀯𑀺𑀳𑀸𑀭𑀺𑀦𑀸;

𑀢𑀣𑁂𑀯 𑀩𑀼𑀤𑁆𑀥𑀫𑀺𑀢𑁆𑀢𑁂𑀦, 𑀲𑀦𑁆𑀢𑀘𑀺𑀢𑁆𑀢𑁂𑀦 𑀯𑀺𑀜𑁆𑀜𑀼𑀦𑀸.

𑀫𑀳𑀺𑀲𑀸𑀲𑀓𑀯𑀁𑀲𑀫𑁆𑀳𑀺, 𑀲𑀫𑁆𑀪𑀽𑀢𑁂𑀦 𑀦𑀬𑀜𑁆𑀜𑀼𑀦𑀸;

𑀩𑀼𑀤𑁆𑀥𑀤𑁂𑀯𑁂𑀦 𑀘 𑀢𑀣𑀸, 𑀪𑀺𑀓𑁆𑀔𑀼𑀦𑀸 𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸.

𑀫𑀳𑀸𑀧𑀼𑀭𑀺𑀲𑀘𑀭𑀺𑀬𑀸𑀦𑀁, 𑀆𑀦𑀼𑀪𑀸𑀯𑀁 𑀅𑀘𑀺𑀦𑁆𑀢𑀺𑀬𑀁;

𑀢𑀲𑁆𑀲 𑀯𑀺𑀚𑁆𑀚𑁄𑀢𑀬𑀦𑁆𑀢𑀲𑁆𑀲, 𑀚𑀸𑀢𑀓𑀲𑁆𑀲𑀢𑁆𑀣𑀯𑀡𑁆𑀡𑀦𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁;

𑀪𑀸𑀲𑀺𑀲𑁆𑀲𑀁 𑀪𑀸𑀲𑀢𑁄 𑀢𑀁 𑀫𑁂, 𑀲𑀸𑀥𑀼 𑀕𑀡𑁆𑀳𑀦𑁆𑀢𑀼 𑀲𑀸𑀥𑀯𑁄’’𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀲𑁆𑀲 𑀕𑀦𑁆𑀣𑀪𑀸𑀯𑁂𑀦 𑀧𑀸𑀓𑀝𑀸𑀳𑀺 𑀲𑀩𑁆𑀩𑀝𑁆𑀞𑀓𑀣𑀸𑀳𑀺 𑀲𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀓𑀭𑀡𑀧𑁆𑀧𑀓𑀸𑀭𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺.

𑀲𑀓𑀮𑀮𑁄𑀓𑀧𑀢𑁆𑀣𑀸𑀭𑀓𑀸𑀭𑀡𑀁

𑀓𑀺𑀲𑁆𑀲𑁂𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑁄𑀢𑀺? 𑀧𑀭𑀺𑀲𑀼𑀤𑁆𑀥𑀧𑀺𑀝𑀓𑀧𑀸𑀴𑀺𑀦𑀺𑀲𑁆𑀲𑀬𑀪𑀸𑀯𑀢𑁄, 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀪𑀸𑀯𑀢𑁄, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀪𑀸𑀯𑀢𑁄, 𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄, 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄, 𑀲𑀻𑀮𑀥𑀼𑀢𑀗𑁆𑀕𑀲𑀫𑀣𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀧𑀪𑁂𑀤𑀸𑀤𑀻𑀦𑀁 𑀧𑀭𑀺𑀧𑀼𑀡𑁆𑀡𑀯𑀺𑀪𑀸𑀕𑀢𑁄, 𑀬𑀸𑀯 𑀅𑀭𑀳𑀢𑁆𑀢𑀸 𑀧𑀝𑀺𑀧𑀢𑁆𑀢𑀺𑀦𑀬𑀧𑀭𑀺𑀤𑀻𑀧𑀦𑀢𑁄, 𑀉𑀢𑁆𑀢𑀸𑀦𑀸𑀦𑀸𑀓𑀼𑀮𑀧𑀤𑀩𑁆𑀬𑀜𑁆𑀚𑀦𑀲𑀗𑁆𑀔𑀢𑀪𑀸𑀯𑀢𑁄, 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀪𑀸𑀯𑀢𑁄, 𑀧𑀲𑀸𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀸𑀧𑀸𑀤𑀦𑀲𑀫𑀢𑁆𑀣𑀸𑀦𑀁 𑀯𑀢𑁆𑀣𑀽𑀦𑀜𑁆𑀘 𑀤𑀻𑀧𑀦𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀲𑀢𑁂𑀳𑀺 𑀕𑀼𑀡𑁂𑀳𑀺 𑀏𑀲 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑁄 𑀚𑀸𑀢𑁄.

𑀅𑀬𑀜𑁆𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀽𑀴𑁆𑀳𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀧𑀺𑀝𑀓𑀫𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄, 𑀦 𑀫𑀳𑀸𑀲𑀗𑁆𑀖𑀺𑀓𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀦𑀺𑀓𑀸𑀬𑀸𑀦𑀁 𑀧𑀺𑀝𑀓𑀁, 𑀦𑀧𑀺 𑀫𑀳𑀸𑀬𑀸𑀦𑀺𑀓𑀸𑀦𑀁 𑀧𑀺𑀝𑀓𑀁. 𑀲𑀧𑀭𑀺𑀯𑀸𑀭𑀁 𑀲𑀺𑀓𑁆𑀔𑀢𑁆𑀢𑀬𑀜𑁆𑀘 𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀫𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑁂𑀦 𑀆𑀕𑀫𑀝𑁆𑀞𑀓𑀣𑀸𑀲𑀼 𑀕𑀦𑁆𑀣𑀸𑀭𑀫𑁆𑀪𑁂 𑁋

‘‘𑀲𑀻𑀮𑀓𑀢𑀸 𑀥𑀼𑀢𑀥𑀫𑁆𑀫𑀸, 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀘𑁂𑀯 𑀲𑀩𑁆𑀩𑀸𑀦𑀺;

𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄, 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀢𑁆𑀣𑀸𑀭𑁄.

𑀲𑀩𑁆𑀩𑀸 𑀘 𑀅𑀪𑀺𑀜𑁆𑀜𑀸𑀬𑁄, 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄 𑀘𑁂𑀯;

𑀔𑀦𑁆𑀥𑀸𑀥𑀸𑀢𑀸𑀬𑀢𑀦𑀺,𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀺𑀬𑀸𑀦𑀺 𑀘𑁂𑀯 𑀘𑀢𑁆𑀢𑀸𑀭𑀺.

𑀲𑀘𑁆𑀘𑀸𑀦𑀺 𑀧𑀘𑁆𑀘𑀬𑀸𑀓𑀸𑀭,𑀤𑁂𑀲𑀦𑀸 𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸;

𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀫𑀕𑁆𑀕𑀸, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀘𑁂𑀯.

𑀇𑀢𑀺 𑀧𑀦 𑀲𑀩𑁆𑀩𑀁 𑀬𑀲𑁆𑀫𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀁;

𑀯𑀼𑀢𑁆𑀢𑀁 𑀢𑀲𑁆𑀫𑀸 𑀪𑀺𑀬𑁆𑀬𑁄, 𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺.

𑀬𑀲𑁆𑀫𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀘𑀢𑀼𑀦𑁆𑀦𑀁 𑀆𑀕𑀫𑀝𑁆𑀞𑀓𑀣𑀸𑀦𑀁 𑀅𑀯𑀬𑀯𑀪𑀸𑀯𑁂𑀦 𑀓𑀢𑁄, 𑀢𑀲𑁆𑀫𑀸 𑀢𑀸 𑀯𑀺𑀬 𑀧𑁄𑀭𑀸𑀡𑀲𑀻𑀳𑀴𑀝𑁆𑀞𑀓𑀣𑀸𑀦𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀘𑁂𑀯 𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣𑀸𑀦𑀁 𑀲𑀁𑀔𑀺𑀧𑀦𑀯𑀲𑁂𑀦 𑀘 𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀯𑀲𑁂𑀦 𑀘 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀧𑀭𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀲𑀗𑁆𑀔𑀸𑀢𑀲𑁆𑀲 𑀲𑀓𑀲𑀫𑀬𑀲𑁆𑀲 𑀤𑀻𑀧𑀦𑀯𑀲𑁂𑀦 𑀘 𑀓𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀅𑀧𑀦𑁂𑀢𑁆𑀯𑀸𑀦 ¶ 𑀢𑀢𑁄𑀳𑀁, 𑀲𑀻𑀳𑀴𑀪𑀸𑀲𑀁 𑀫𑀦𑁄𑀭𑀫𑀁 𑀪𑀸𑀲𑀁;

𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀁, 𑀆𑀭𑁄𑀧𑁂𑀦𑁆𑀢𑁄 𑀯𑀺𑀕𑀢𑀤𑁄𑀲𑀁.

𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄, 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀧𑀤𑀻𑀧𑀸𑀦𑀁;

𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸𑀦𑀁, 𑀫𑀳𑀸𑀯𑀺𑀳𑀸𑀭𑁂 𑀦𑀺𑀯𑀸𑀲𑀻𑀦𑀁;

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢-𑀫𑀢𑁆𑀣𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀏𑀲 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀜𑁆𑀳𑀺;

𑀞𑀢𑁆𑀯𑀸 𑀧𑀓𑀸𑀲𑀬𑀺𑀲𑁆𑀲𑀢𑀺, 𑀢𑀢𑁆𑀣 𑀬𑀣𑀸𑀪𑀸𑀲𑀺𑀢𑀫𑀢𑁆𑀣𑀁.

𑀇𑀘𑁆𑀘𑁂𑀯 𑀓𑀢𑁄 𑀢𑀲𑁆𑀫𑀸, 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸𑀦 𑀲𑀤𑁆𑀥𑀺𑀫𑁂𑀢𑀸𑀬;

𑀅𑀝𑁆𑀞𑀓𑀣𑀸𑀬 𑀯𑀺𑀚𑀸𑀦𑀣, 𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢𑀁 𑀅𑀢𑁆𑀣’’𑀦𑁆𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸] 𑀘.

‘‘𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬, 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸;

𑀏𑀓𑀸𑀲𑀻𑀢𑀺𑀧𑀫𑀸𑀡𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀪𑀸𑀡𑀯𑀸𑀭𑁂𑀳𑀺;

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀸𑀬, 𑀆𑀕𑀫𑀸𑀦𑀁 𑀓𑀢𑁄 𑀬𑀲𑁆𑀫𑀸.

𑀢𑀲𑁆𑀫𑀸 𑀢𑁂𑀦 𑀲𑀳𑀸𑀬𑀁, 𑀅𑀝𑁆𑀞𑀓𑀣𑀸 𑀪𑀸𑀡𑀯𑀸𑀭𑀕𑀡𑀦𑀸𑀬;

𑀲𑀼𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀁, 𑀘𑀢𑁆𑀢𑀸𑀮𑀻𑀲𑀁 𑀲𑀢𑀁 𑀳𑁄𑀢𑀻’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁩.𑀦𑀺𑀕𑀫𑀦𑀓𑀣𑀸] 𑀘.

𑀬𑀤𑀺 𑀘𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀆𑀘𑀭𑀺𑀬𑁂𑀦 𑀆𑀕𑀫𑀝𑁆𑀞𑀓𑀣𑀸𑀬𑁄 𑀯𑀺𑀬 𑀅𑀓𑀢𑁆𑀯𑀸 𑀧𑁄𑀭𑀸𑀡𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀘 𑀅𑀦𑁄𑀮𑁄𑀓𑁂𑀢𑁆𑀯𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀪𑀸𑀯𑁂𑀦𑁂𑀯 𑀓𑀢𑁄 𑀅𑀲𑁆𑀲, 𑀦𑀸𑀬𑀁 𑀆𑀕𑀫𑀝𑁆𑀞𑀓𑀣𑀸𑀦𑀁 𑀅𑀯𑀬𑀯𑁄𑀢𑀺 𑀕𑀳𑁂𑀢𑀩𑁆𑀩𑁄 𑀅𑀲𑁆𑀲, 𑀅𑀜𑁆𑀜𑀤𑀢𑁆𑀣𑀼 ‘‘𑀆𑀕𑀫𑀝𑁆𑀞𑀓𑀣𑀸𑀬𑁄 𑀫𑀳𑀸𑀝𑁆𑀞𑀓𑀣𑀸𑀬 𑀲𑀸𑀭𑀪𑀽𑀢𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀧𑀦 𑀦 𑀢𑀲𑁆𑀲𑀸 𑀲𑀸𑀭𑀪𑀽𑀢𑁄, 𑀓𑁂𑀯𑀮𑀁 𑀆𑀘𑀭𑀺𑀬𑀲𑁆𑀲 𑀫𑀢𑀺𑀬𑀸𑀯 𑀓𑀢𑁄’’𑀢𑀺 𑀏𑀯𑀫𑁂𑀯 𑀯𑀢𑁆𑀢𑀩𑁆𑀩𑁄 𑀅𑀲𑁆𑀲. 𑀬𑀲𑁆𑀫𑀸 𑀧𑀦 𑀢𑀣𑀸 𑀅𑀓𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀓𑀢𑁄, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀢𑀸𑀲𑀁 𑀆𑀕𑀫𑀝𑁆𑀞𑀓𑀣𑀸𑀦𑀁 𑀓𑀭𑀡𑀸𑀓𑀸𑀭𑁂𑀦𑁂𑀯 𑀓𑀢𑁄𑀢𑀺 𑀘, 𑀢𑀢𑁄𑀬𑁂𑀯 𑀫𑀳𑀸𑀝𑁆𑀞𑀓𑀣𑀸𑀬 𑀲𑀸𑀭𑀪𑀽𑀢𑁄𑀢𑀺 𑀘 𑀤𑀝𑁆𑀞𑀩𑁆𑀩𑁄.

𑀏𑀓𑀘𑁆𑀘𑁂 𑀧𑀦 𑀯𑀺𑀘𑀓𑁆𑀔𑀡𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀕𑀦𑁆𑀣𑁂𑀲𑀼 𑀉𑀢𑁆𑀢𑀭𑀧𑀓𑁆𑀔𑀲𑀸𑀲𑀦𑀺𑀓𑀸𑀦𑀁 𑀅𑀲𑁆𑀲𑀖𑁄𑀲𑀦𑀸𑀕𑀚𑁆𑀚𑀼𑀦𑀯𑀲𑀼𑀩𑀦𑁆𑀥𑀼𑀆𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀬 𑀧𑁄𑀭𑀸𑀡𑀕𑀦𑁆𑀣𑁂 𑀅𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀜𑀸𑀡𑁂𑀦𑁂𑀯 𑀢𑀓𑁆𑀓𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀥𑀫𑁆𑀫𑀓𑀣𑀸𑀯𑀺𑀲𑁂𑀲𑀁 𑀅𑀤𑀺𑀲𑁆𑀯𑀸 𑀅𑀲𑀦𑁆𑀢𑀼𑀝𑁆𑀞𑀘𑀺𑀢𑁆𑀢𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀩𑀼𑀤𑁆𑀥𑀖𑁄𑀲𑀲𑁆𑀲 𑀅𑀜𑁆𑀜𑀁 𑀅𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀪𑀸𑀯𑁂𑀦𑁂𑀯 𑀅𑀪𑀺𑀦𑀯𑀕𑀦𑁆𑀣𑀼𑀧𑁆𑀧𑀸𑀤𑀦𑀁 𑀦 𑀧𑀲𑁆𑀲𑀸𑀫𑀸’’𑀢𑀺. ¶ 𑀢𑀁 𑀢𑁂𑀲𑀁 𑀕𑀭𑀳𑀸𑀯𑀘𑀦𑀫𑁆𑀧𑀺 𑀲𑀫𑀸𑀦𑀁 𑀣𑁂𑀭𑀯𑀸𑀤𑀻𑀦𑀁 𑀧𑀲𑀁𑀲𑀸𑀯𑀘𑀦𑀫𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀣𑁂𑀭𑀯𑀸𑀤𑀺𑀦𑁄 𑀳𑀺 𑀏𑀯𑀁 𑀚𑀸𑀦𑀦𑁆𑀢𑀺 ‘‘𑀩𑀼𑀤𑁆𑀥𑁂𑀦𑁂𑀯 𑀪𑀕𑀯𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑁂𑀢𑀩𑁆𑀩𑁄 𑀘𑁂𑀯 𑀥𑀫𑁆𑀫𑁄 𑀧𑀜𑁆𑀜𑀸𑀧𑁂𑀢𑀩𑁆𑀩𑁄 𑀘 𑀯𑀺𑀦𑀬𑁄 𑀅𑀦𑀯𑀲𑁂𑀲𑁂𑀦 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘, 𑀲𑁄𑀬𑁂𑀯 𑀥𑀫𑁆𑀫𑀯𑀺𑀦𑀬𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀪𑀺𑀓𑁆𑀔𑀽𑀳𑀺 𑀘𑁂𑀯 𑀕𑀳𑀝𑁆𑀞𑁂𑀳𑀺 𑀘 𑀬𑀣𑀸𑀭𑀳𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀦 𑀢𑀢𑁄 𑀅𑀜𑁆𑀜𑁄 𑀥𑀫𑁆𑀫𑀯𑀺𑀦𑀬𑁄 𑀢𑀓𑁆𑀓𑁂𑀢𑁆𑀯𑀸 𑀕𑀯𑁂𑀲𑁂𑀢𑀩𑁆𑀩𑁄. 𑀬𑀤𑀺 𑀧𑀦 𑀅𑀜𑁆𑀜𑁄 𑀥𑀫𑁆𑀫𑀯𑀺𑀦𑀬𑁄 𑀓𑁂𑀦𑀘𑀺 𑀢𑀓𑁆𑀓𑁂𑀢𑁆𑀯𑀸 𑀓𑀣𑀺𑀢𑁄 𑀅𑀲𑁆𑀲, 𑀢𑀁 𑀢𑀲𑁆𑀲𑁂𑀯 𑀢𑀓𑁆𑀓𑀺𑀦𑁄 𑀲𑀸𑀲𑀦𑀁 𑀳𑁄𑀢𑀺 𑀦 𑀲𑀢𑁆𑀣𑀼 𑀲𑀸𑀲𑀦𑀁. 𑀬𑀁 𑀬𑀁 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀯𑀺𑀦𑀬𑁂 𑀧𑀤𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑀢𑁄 𑀅𑀧𑀸𑀓𑀝𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑁄𑀭𑀸𑀡𑀓𑁂𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀙𑀴𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂𑀳𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁂𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑀦𑀬𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀅𑀢𑁆𑀢𑀦𑁄𑀫𑀢𑀺𑀯𑀲𑁂𑀦𑀸’’𑀢𑀺. 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁄 𑀘 𑀢𑁂𑀲𑀁 𑀣𑁂𑀭𑀯𑀸𑀤𑀻𑀦𑀁 𑀅𑀜𑁆𑀜𑀢𑀭𑁄, 𑀲𑁄𑀧𑀺 𑀢𑀣𑁂𑀯 𑀚𑀸𑀦𑀸𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄,

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸,

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀸 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁,

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁,

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦𑀁.

𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸,

𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸…𑀧𑁂…

𑀬𑀲𑁆𑀫𑀸 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀡𑁆𑀡𑀦𑀸𑀧𑀺,

𑀲𑀓𑁆𑀓𑀘𑁆𑀘 𑀢𑀲𑁆𑀫𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸].

𑀢𑁂𑀦𑁂𑀯 𑀆𑀘𑀭𑀺𑀬𑁄 𑀪𑀕𑀯𑀢𑁄 𑀥𑀫𑁆𑀫𑀯𑀺𑀦𑀬𑀁 𑀯𑀸 𑀧𑁄𑀭𑀸𑀡𑀝𑁆𑀞𑀓𑀣𑀁 𑀯𑀸 𑀅𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀢𑀓𑁆𑀓𑁂𑀢𑁆𑀯𑀸 𑀯𑀸 𑀅𑀢𑁆𑀢𑀦𑀸 𑀧𑀭𑀺𑀘𑀺𑀢𑀮𑁄𑀓𑀺𑀬𑀕𑀦𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀯𑀸 𑀦 𑀓𑀜𑁆𑀘𑀺 𑀕𑀦𑁆𑀣𑀁 𑀅𑀓𑀸𑀲𑀺. 𑀬𑀤𑀺 𑀧𑀦 𑀢𑀸𑀤𑀺𑀲𑀁 𑀓𑀭𑁂𑀬𑁆𑀬, ¶ 𑀢𑀁 𑀣𑁂𑀭𑀯𑀸𑀤𑀺𑀦𑁄 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑁂 [𑀤𑀻. 𑀦𑀺. 𑁨.𑁧𑁮𑁮; 𑀅. 𑀦𑀺. 𑁪.𑁧𑁮𑁦] 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀤𑁆𑀥𑀸 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁, 𑀩𑀼𑀤𑁆𑀥𑀖𑁄𑀲𑀲𑁆𑀲 𑀘 𑀣𑁂𑀭𑀲𑁆𑀲 𑀤𑀼𑀕𑁆𑀕𑀳𑀺𑀢’’𑀦𑁆𑀢𑀺 𑀙𑀟𑁆𑀟𑁂𑀬𑁆𑀬𑀼𑀁𑀬𑁂𑀯. 𑀬𑀢𑁄 𑀘 𑀔𑁄 𑀅𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀸𑀤𑀺𑀯𑀲𑁂𑀦𑁂𑀯 𑀆𑀘𑀭𑀺𑀬𑁂𑀦 𑀓𑀢𑁄, 𑀢𑀢𑁄𑀬𑁂𑀯 𑀣𑁂𑀭𑀯𑀸𑀤𑀺𑀦𑁄 𑀢𑀁 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀤𑁆𑀥𑀸 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁, 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀼𑀕𑁆𑀕𑀳𑀺𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀢𑁂𑀦𑀸𑀧𑀸𑀬𑀁 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑁄 𑀳𑁄𑀢𑀺.

𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀦𑀁 𑀯𑀺𑀪𑀸𑀕𑁄 𑀘 𑀧𑀝𑀺𑀧𑀢𑁆𑀢𑀺𑀦𑀬𑀧𑀭𑀺𑀤𑀻𑀧𑀦𑀜𑁆𑀘 𑀧𑀸𑀓𑀝𑀫𑁂𑀯. 𑀢𑀣𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀧𑀤𑀯𑀸𑀓𑁆𑀬𑁂𑀳𑀺 𑀘𑁂𑀯 𑀅𑀦𑀸𑀓𑀼𑀮𑀧𑀤𑀯𑀸𑀓𑁆𑀬𑁂𑀳𑀺 𑀘 𑀢𑀦𑁆𑀢𑀺𑀦𑀬𑀸𑀦𑀼𑀭𑀽𑀧𑀸𑀬 𑀧𑀸𑀴𑀺𑀕𑀢𑀺𑀬𑀸 𑀲𑀼𑀝𑁆𑀞𑀼 𑀲𑀗𑁆𑀔𑀢𑁄, 𑀢𑀢𑁄𑀬𑁂𑀯 𑀘𑀲𑁆𑀲 𑀅𑀢𑁆𑀣𑁄𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀑𑀮𑁄𑀓𑁂𑀦𑁆𑀢𑀸 𑀯𑀺𑀜𑁆𑀜𑀼𑀦𑁄 𑀯𑀺𑀲𑀼𑀤𑁆𑀥𑀚𑁆𑀛𑀸𑀲𑀬𑀸 𑀔𑀡𑁂 𑀔𑀡𑁂 𑀅𑀢𑁆𑀣𑀧𑀝𑀺𑀲𑀁𑀯𑁂𑀤𑀺𑀦𑁄 𑀘𑁂𑀯 𑀥𑀫𑁆𑀫𑀧𑀝𑀺𑀲𑀁𑀯𑁂𑀤𑀺𑀦𑁄 𑀘 𑀳𑀼𑀢𑁆𑀯𑀸 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺.

𑀅𑀦𑁂𑀓𑀸𑀦𑀺 𑀘𑁂𑀢𑁆𑀣 𑀧𑀲𑀸𑀤𑀸𑀯𑀳𑀸𑀦𑀺 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼𑀆𑀤𑀻𑀦𑀺 [𑀯𑀺𑀲𑀼𑀤𑁆𑀥𑀺. 𑁧.𑁧𑁫] 𑀲𑀻𑀳𑀴𑀯𑀢𑁆𑀣𑀽𑀦𑀺 𑀘 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼𑀆𑀤𑀻𑀦𑀺 [𑀯𑀺𑀲𑀼𑀤𑁆𑀥𑀺. 𑁧.𑁧𑁯] 𑀚𑀫𑁆𑀩𑀼𑀤𑀻𑀧𑀯𑀢𑁆𑀣𑀽𑀦𑀺 𑀘 𑀤𑀻𑀧𑀺𑀢𑀸𑀦𑀺. 𑀢𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑀮𑀯𑀧𑀲𑀸𑀤𑁄 𑀘 𑀉𑀧𑁆𑀧𑀚𑁆𑀚𑀢𑀺, ‘‘𑀓𑀤𑀸 𑀦𑀼 𑀔𑁄 𑀫𑀬𑀫𑁆𑀧𑀺 𑀈𑀤𑀺𑀲𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀢𑀼𑀓𑀸𑀫𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺.

𑀏𑀯𑀁 𑀧𑀭𑀺𑀲𑀼𑀤𑁆𑀥𑀧𑀺𑀝𑀓𑀧𑀸𑀴𑀺𑀦𑀺𑀲𑁆𑀲𑀬𑀢𑀸𑀤𑀻𑀳𑀺 𑀅𑀦𑁂𑀓𑀲𑀢𑁂𑀳𑀺 𑀕𑀼𑀡𑁂𑀳𑀺 𑀅𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑁄 𑀚𑀸𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀏𑀯𑀁 𑀅𑀜𑁆𑀜𑀸𑀧𑀺 𑀆𑀘𑀭𑀺𑀬𑁂𑀦 𑀓𑀢𑀸 𑀢𑀺𑀧𑀺𑀝𑀓𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑁄 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀪𑀸𑀲𑀸𑀧𑀭𑀺𑀯𑀢𑁆𑀢𑀦𑀪𑀸𑀯𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑀓𑀮𑀮𑁄𑀓𑁂 𑀧𑀢𑁆𑀣𑀝𑀸𑀬𑁂𑀯 𑀳𑁄𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀓𑀺𑀫𑀢𑁆𑀣𑀁 𑀓𑀢𑁄𑀢𑀺𑀆𑀤𑀻𑀦𑀫𑁆𑀧𑀺 𑀧𑀜𑁆𑀳𑀸𑀦𑀫𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀸𑀯𑀺𑀢𑁄𑀯 𑀳𑁄𑀢𑀻𑀢𑀺.

𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑁧.

𑀲𑀫𑁆𑀪𑀸𑀯𑀦𑀻𑀬𑀲𑁆𑀲 ¶ 𑀲𑀼𑀥𑀻𑀯𑀭𑀸𑀦-

𑀫𑀸𑀤𑀢𑁆𑀢𑀥𑀻𑀭𑀺𑀝𑁆𑀞𑀧𑀤𑀲𑁆𑀲 𑀬𑀲𑁆𑀲;

𑀧𑀜𑁆𑀜𑀸𑀤𑀺𑀚𑀸𑀢𑀸 𑀮𑀮𑀺𑀢𑀸 𑀕𑀼𑀡𑀸𑀪𑀸,

𑀪𑀸𑀢𑁂𑀯 𑀮𑁄𑀓𑀫𑁆𑀳𑀺 𑀲𑀢𑀁 𑀫𑀼𑀤𑀸𑀬.

𑁨.

𑀲 𑀩𑀼𑀤𑁆𑀥𑀖𑁄𑀲𑀸𑀯𑁆𑀳𑀣𑀺𑀭𑀕𑁆𑀕𑀥𑀻𑀫𑀸,

𑀯𑀺𑀤𑀽𑀦’𑀫𑀘𑁆𑀘𑀦𑁆𑀢𑀲𑀫𑀸𑀤𑀭𑀸’𑀤𑀸;

𑀲𑀪𑀸𑀯𑀚𑀁 𑀩𑁆𑀬𑀢𑁆𑀢𑀺𑀲𑀲𑀢𑁆𑀢𑀺𑀮𑀤𑁆𑀥𑀁,

𑀲𑀺𑀭𑀺𑀁 𑀤𑀥𑀸𑀢𑁂𑀯 𑀲𑀼𑀩𑀼𑀤𑁆𑀥𑀖𑁄𑀲𑁄.

𑁩.

‘‘𑀲𑀫𑁆𑀩𑀼𑀤𑁆𑀥𑀲𑁂𑀝𑁆𑀞𑁂 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀫𑀺𑀁,

𑀲𑀁𑀯𑀘𑁆𑀙𑀭𑀸𑀦𑀁 𑀤𑀲𑀫𑁂 𑀲𑀢𑀫𑁆𑀳𑀺;

𑀚𑀸𑀢𑁄’’𑀢𑀺 𑀜𑀸𑀢𑁄 𑀯𑀺𑀩𑀼𑀥𑁂𑀳𑀺 𑀩𑀼𑀤𑁆𑀥-

𑀖𑁄𑀲𑀗𑁆𑀓𑀼𑀭𑁄 𑀧𑀢𑁆𑀢𑀲𑀫𑀢𑁆𑀢𑀫𑀸𑀦𑀻.

𑁪.

𑀯𑀺𑀜𑁆𑀜𑀽 𑀯𑀺𑀤𑀽’𑀫𑀲𑁆𑀲 𑀧𑀼𑀫𑀕𑁆𑀕𑀚𑀸𑀢𑁂,

𑀲𑀜𑁆𑀚𑀸𑀢𑀢𑀁 𑀤𑀓𑁆𑀔𑀺𑀡𑀤𑁂𑀲𑀪𑀸𑀕𑁂;

𑀭𑀫𑁆𑀫𑁂’𑀦𑁆𑀤𑀺𑀬𑀲𑁆𑀫𑀺𑀁 𑀲𑀼𑀚𑀦𑀸𑀓𑀭𑀲𑁆𑀫𑀺𑀁,

𑀢𑀢𑁆𑀢𑀢𑁆𑀣𑀫𑁂𑀲𑀻𑀦’𑀫𑀬𑀁 𑀧𑀢𑀻𑀢𑀺.

𑁫.

𑀫𑁄𑀭𑀡𑁆𑀟𑀕𑀸𑀫𑀫𑁆𑀳𑀺 𑀲 𑀢𑀢𑁆𑀣 𑀚𑀸𑀢𑁄,

𑀧𑀼𑀜𑁆𑀜𑀸𑀦𑀺𑀢𑁄 𑀯𑀺𑀧𑁆𑀧𑀓𑀼𑀮𑀫𑁆𑀳𑀺 𑀲𑀫𑁆𑀫𑀸;

𑀲𑀽𑀭𑀲𑁆𑀲 𑀮𑁄𑀓𑀢𑁆𑀣𑀲𑀫𑀸𑀯𑀳𑀢𑁆𑀣𑀁,

𑀉𑀧𑁆𑀧𑀚𑁆𑀚𑀦𑀸𑀬𑀸’𑀤𑁆𑀬𑀭𑀼𑀡𑁄𑀯 𑀭𑀁𑀲𑀺.

𑁬.

𑀲𑀁𑀯𑀤𑁆𑀥𑀩𑀼𑀤𑁆𑀥𑀻 𑀲 𑀧𑀯𑀼𑀤𑁆𑀥𑀺𑀧𑀢𑁆𑀢𑁄,

𑀆𑀭𑀸𑀥𑀬𑀁 𑀜𑀸𑀢𑀺𑀕𑀡𑀁 𑀲𑀤𑁂𑀯;

𑀯𑁂𑀤𑁂𑀲𑀼 𑀯𑀺𑀚𑁆𑀚𑀸𑀲𑀼 𑀢𑀤𑀜𑁆𑀜𑀲𑀺𑀧𑁆𑀧-

𑀕𑀦𑁆𑀣𑁂𑀲𑁆𑀯𑀦𑀸𑀬𑀸𑀲𑀧𑀯𑀻𑀡𑀢𑀸’𑀕𑀸.

𑁭.

𑀲𑀼𑀤𑁆𑀥𑀸𑀥𑀺𑀫𑀼𑀢𑁆𑀢𑀻𑀦 𑀯𑀺𑀯𑁂𑀘𑀦𑁂𑀦,

𑀲𑀸𑀭𑀸𑀦𑀼’𑀲𑀸𑀭𑁄𑀢𑀺 𑀯𑀺𑀯𑀺𑀜𑁆𑀘𑀫𑀸𑀦𑁄;

𑀯𑁂𑀤𑁂𑀲𑁆𑀯’𑀲𑀸𑀭𑀢𑁆𑀢’𑀫𑀩𑀼𑀚𑁆𑀛𑀺 𑀬𑀲𑁆𑀫𑀸,

𑀢𑀼𑀝𑁆𑀞𑀺𑀁 𑀲 𑀦𑀸𑀧𑀚𑁆𑀚𑀺 𑀲𑀼𑀢𑁂𑀦 𑀲𑁂𑀦.

𑁮.

𑀅𑀦𑁆𑀯𑁂𑀲𑀢𑁄 ¶ 𑀢𑀲𑁆𑀲 𑀧𑀲𑀢𑁆𑀣𑀲𑀸𑀭𑀁,

𑀲𑀤𑁆𑀥𑀫𑁆𑀫𑀲𑀸𑀭𑁄 𑀲𑀯𑀦𑁂𑀦 𑀮𑀤𑁆𑀥𑁄;

𑀦𑀺𑀦𑁆𑀦𑁄𑀯 𑀩𑀼𑀤𑁆𑀥𑀲𑁆𑀲 𑀲 𑀲𑀸𑀲𑀦𑀫𑁆𑀳𑀺,

𑀉𑀲𑁆𑀲𑀸𑀳𑀚𑀸𑀢𑁄’𑀧𑀕𑀫𑀸𑀬 𑀢𑀢𑁆𑀣.

𑁯.

𑀥𑀫𑁆𑀫𑀸𑀪𑀺𑀮𑀸𑀲𑀻 𑀲 𑀯𑀺𑀭𑁄𑀘𑀺 𑀢𑀢𑁆𑀣,

𑀲𑀁𑀮𑀤𑁆𑀥𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑁄𑀯;

𑀣𑁂𑀭𑁂’𑀧𑀲𑀗𑁆𑀓𑀫𑁆𑀫 𑀯𑀺𑀲𑀼𑀤𑁆𑀥𑀣𑁂𑀭-

𑀯𑀸𑀤𑀻𑀦𑀺𑀓𑀸𑀬𑀫𑁆𑀳𑀺 𑀧𑀢𑀻𑀢𑀧𑀜𑁆𑀜𑁂.

𑁧𑁦.

𑀢𑀤𑀸 𑀳𑀺’𑀲𑀼𑀁 𑀤𑀓𑁆𑀔𑀺𑀡𑀇𑀦𑁆𑀤𑀺𑀬𑀫𑁆𑀳𑀺,

𑀦𑀺𑀯𑀸𑀲𑀺𑀦𑁄 𑀣𑁂𑀭𑀺𑀬𑀯𑀁𑀲𑀚𑀸𑀢𑀸;

𑀢𑀤𑀜𑁆𑀜𑀯𑀸𑀤𑀻 𑀘 𑀫𑀼𑀦𑀻 𑀫𑀼𑀦𑀺𑀦𑁆𑀤-

𑀫𑀢𑀁 𑀬𑀣𑀸𑀮𑀤𑁆𑀥𑀺 𑀧𑀓𑀸𑀲𑀬𑀦𑁆𑀢𑀸.

𑁧𑁧.

𑀲𑀤𑁆𑀥𑀫𑁆𑀫𑀲𑀸𑀭𑀸𑀥𑀺𑀕𑀫𑀸𑀬 𑀪𑀺𑀬𑁆𑀬𑁄,

𑀧𑀸𑀴𑀺𑀁 𑀲𑀫𑀼𑀕𑁆𑀕𑀡𑁆𑀳𑀺 𑀚𑀺𑀦𑁂𑀭𑀺𑀢𑀁, 𑀲𑀸;

𑀚𑀺𑀯𑁆𑀳𑀕𑁆𑀕𑀮𑀻𑀮𑀸 𑀫𑀦𑀲𑀸’𑀲𑀺𑀢𑀸’𑀲𑁆𑀲,

𑀮𑀓𑁆𑀔𑀻𑀯 𑀧𑀼𑀜𑁆𑀜𑁂 𑀦𑀺𑀯𑀲𑀁 𑀩𑀪𑀸𑀲.

𑁧𑁨.

𑀏𑀯𑀁 𑀢𑀫𑀼𑀕𑁆𑀕𑀡𑁆𑀳’𑀫𑀩𑁄𑀥𑀺 𑀲𑀫𑁆𑀫𑀸,

‘‘𑀏𑀓𑀸𑀬𑀦𑁄𑀬𑀁 𑀲𑀼𑀯𑀺𑀲𑀼𑀤𑁆𑀥𑀺𑀬𑀸𑀢𑀺;

𑀫𑀕𑁆𑀕𑁄 𑀯𑀺𑀯𑀝𑁆𑀝𑀸𑀥𑀺𑀕𑀫𑀸𑀬’’ 𑀢𑀢𑁆𑀣𑁄-

𑀬𑁆𑀬𑁄𑀕𑀁 𑀲𑀫𑀸𑀧𑀚𑁆𑀚𑀺 𑀧𑀭𑀁 𑀧𑀭𑀢𑁆𑀢𑀻.

𑁧𑁩.

𑀲𑀪𑀸𑀯𑀧𑀜𑁆𑀜𑀸 𑀫𑀳𑀢𑀻 𑀘 𑀲𑀢𑁆𑀣-

𑀦𑁆𑀢𑀭𑁄𑀧𑀮𑀤𑁆𑀥𑀸 𑀯𑀺𑀧𑀼𑀮𑀸𑀯 𑀯𑀺𑀚𑁆𑀚𑀸;

𑀢𑁂𑀦𑀲𑁆𑀲 𑀩𑀼𑀤𑁆𑀥𑁄𑀢𑁆𑀢𑀺𑀲𑀫𑀼𑀤𑁆𑀤𑀢𑀺𑀡𑁆𑀡𑁂,

𑀅𑀓𑀺𑀘𑁆𑀙𑀲𑀸𑀥𑀺𑀢𑁆𑀢𑀧𑀪𑀸𑀯’𑀫𑀜𑁆𑀜𑀸.

𑁧𑁪.

𑀩𑀼𑀤𑁆𑀥𑀲𑁆𑀲 𑀓𑀺𑀢𑁆𑀢𑀻𑀯 𑀲𑀼𑀓𑀺𑀢𑁆𑀢𑀺𑀖𑁄𑀲𑁄,

𑀯𑀢𑁆𑀢𑀺𑀲𑁆𑀲𑀢𑁂’𑀘𑁆𑀘𑀲𑁆𑀲 𑀕𑀭𑀽 𑀯𑀺𑀬𑀢𑁆𑀢𑀸;

𑀅𑀢𑁆𑀣𑀸𑀦𑁆𑀯𑀺𑀢𑀁 𑀦𑀸𑀫𑀫𑀓𑀁𑀲𑀼 𑀩𑀼𑀤𑁆𑀥-

𑀖𑁄𑀲𑁄𑀢𑀺 𑀲𑀫𑁆𑀩𑀼𑀤𑁆𑀥𑀫𑀢𑀗𑁆𑀕𑀢𑀲𑁆𑀲.

𑁧𑁫.

𑀫𑀬𑀽𑀭𑀤𑀽𑀢𑀯𑁆𑀳𑀬𑀧𑀝𑁆𑀝𑀦𑀲𑁆𑀫𑀺𑀁,

𑀦𑀺𑀯𑀲𑁆𑀲 ¶ 𑀓𑀜𑁆𑀚𑀻𑀯𑁆𑀳𑀧𑀼𑀭𑀸𑀤𑀺𑀓𑁂 𑀘;

𑀲 𑀅𑀦𑁆𑀥𑀓𑀸𑀔𑁆𑀬𑀸𑀢𑀲𑀤𑁂𑀲𑀺𑀬𑀝𑁆𑀞-

𑀓𑀣𑀁 𑀲𑀫𑀼𑀕𑁆𑀕𑀡𑁆𑀳𑀺 𑀲𑀫𑀸𑀳𑀺𑀢𑀢𑁆𑀢𑁄.

𑁧𑁬.

𑀢𑀸𑀯𑀢𑁆𑀢𑀓𑁂𑀦𑀲𑁆𑀲 𑀲𑀼𑀫𑁂𑀥𑀲𑀲𑁆𑀲𑀸-

𑀲𑀦𑁆𑀢𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀢𑀢𑀼𑀢𑁆𑀢𑀭𑀺𑀫𑁆𑀧𑀺;

𑀲𑀫𑁆𑀩𑀼𑀤𑁆𑀥𑀯𑀸𑀡𑀻𑀲𑀼 𑀲𑀫𑀢𑁆𑀢𑀫𑀢𑁆𑀣𑀁,

𑀅𑀜𑁆𑀜𑀸𑀢𑀼𑀫𑀺𑀘𑁆𑀙𑀸 𑀫𑀳𑀢𑀻 𑀅𑀚𑀸𑀬𑀺.

𑁧𑁭.

𑀫𑀳𑀸𑀫𑀳𑀺𑀦𑁆𑀤𑀸𑀤𑀺𑀯𑀲𑀻𑀯𑀭𑁂𑀪𑀺,

𑀲𑀫𑀸𑀪𑀢𑀸 𑀬𑀸𑀝𑁆𑀞𑀓𑀣𑀸 𑀲𑀲𑀸𑀭𑀸;

𑀲𑀣𑁂𑀭𑀯𑀸𑀤𑀸 𑀲𑀼𑀯𑀺𑀦𑀺𑀘𑁆𑀙𑀬𑀸 𑀘,

𑀢𑀤𑀸 𑀯𑀺𑀪𑀸𑀢𑀸 𑀯𑀢 𑀮𑀗𑁆𑀓𑀬𑀸’𑀲𑀼𑀁.

𑁧𑁮.

𑀧𑀯𑀢𑁆𑀢𑀺𑀫𑁂𑀢𑀁 𑀯𑀺𑀤𑀺𑀬’𑀲𑁆𑀲 𑀫𑁂𑀢-

𑀤𑀳𑁄𑀲𑀺 ‘‘𑀬𑀁 𑀦𑀽𑀦’𑀪𑀺𑀭𑀸𑀫𑀮𑀗𑁆𑀓𑀁;

𑀅𑀮𑀗𑁆𑀓𑀭𑁄𑀦𑁆𑀢𑀺𑀁 𑀭𑀢𑀦𑀸𑀓𑀭𑀁𑀯,

𑀉𑀧𑁂𑀘𑁆𑀘 𑀲𑀺𑀓𑁆𑀔𑁂’𑀝𑁆𑀞𑀓𑀣𑀸 𑀫𑀳𑀦𑁆𑀢𑀻.

𑁧𑁯.

𑀢𑀸 𑀪𑀸𑀲𑀬𑀸 𑀲𑀻𑀳𑀴𑀺𑀓𑀸𑀬 𑀭𑀘𑁆𑀘𑀸,

𑀢𑀦𑁆𑀢𑀺𑀁 𑀲𑀫𑀸𑀭𑁄𑀧𑁆𑀬 𑀦𑀯𑀁 𑀓𑀭𑁂𑀬𑁆𑀬𑀁;

𑀏𑀯𑀜𑁆𑀳𑀺 𑀤𑁂𑀲𑀦𑁆𑀢𑀭𑀺𑀬𑀸𑀦 𑀩𑀼𑀤𑁆𑀥-

𑀫𑀸𑀦𑀻𑀦𑀫𑀢𑁆𑀣𑀁 𑀔𑀮𑀼 𑀲𑀸𑀥𑀬𑁂’’𑀢𑀺.

𑁨𑁦.

𑀧𑀼𑀭𑁂 𑀘 𑀮𑀗𑁆𑀓𑀸𑀕𑀢𑀲𑀸𑀲𑀦𑀁 𑀬𑀁,

𑀲𑀼𑀦𑀺𑀫𑁆𑀫𑀮𑀺𑀦𑁆𑀤𑀽𑀯 𑀳𑀺𑀫𑀸𑀤𑀺𑀫𑀼𑀢𑁆𑀢𑁄;

𑀧𑀪𑀸𑀲𑀺, 𑀓𑀺𑀲𑁆𑀫𑀺𑀜𑁆𑀘𑀺 𑀢𑀤𑀸𑀜𑁆𑀜𑀯𑀸𑀤-

𑀫𑀦𑀸𑀓𑀼𑀮𑀁 𑀢𑀸’𑀓𑀼𑀮𑀢𑀁 𑀚𑀕𑀸𑀫.

𑁨𑁧.

𑀚𑀺𑀦𑀫𑁆𑀳𑀺 𑀦𑀺𑀩𑁆𑀩𑀸𑀦𑀕𑀢𑁂 𑀳𑀺 𑀯𑀲𑁆𑀲-

𑀲𑀢𑀦𑁆𑀢𑀭𑁂 𑀲𑀸𑀲𑀦𑀺𑀓𑀸 𑀲𑀫𑀕𑁆𑀕𑀸;

𑀲𑀫𑀸𑀦𑀯𑀸𑀤𑀸 𑀚𑀺𑀦𑀲𑀸𑀲𑀦𑀫𑁆𑀳𑀺,

𑀦 𑀓𑁄𑀘𑀺 𑀪𑁂𑀤𑁄𑀧𑀺 𑀢𑀤𑀸 𑀅𑀳𑁄𑀲𑀺.

𑁨𑁨.

𑀧𑀘𑁆𑀙𑀸 ¶ 𑀘 𑀲𑀤𑁆𑀥𑀫𑁆𑀫𑀤𑀼𑀫𑀸𑀳𑀢𑁂𑀪𑁆𑀬-

𑀥𑀫𑁆𑀫𑁂𑀳𑀺 𑀯𑀸𑀢𑁂𑀳𑀺 𑀧𑀝𑀺𑀘𑁆𑀘 𑀧𑀸𑀧𑁂;

𑀚𑀸𑀢𑁂𑀳𑀺 𑀲𑀁𑀯𑀺𑀕𑁆𑀕𑀫𑀦𑀸 𑀲𑀫𑀸𑀬,

𑀣𑁂𑀭𑁂’𑀲’𑀫𑀼𑀬𑁆𑀬𑁄𑀕𑀫𑀓𑀁𑀲𑀼 𑀤𑀴𑁆𑀳𑀁.

𑁨𑁩.

𑀲𑀗𑁆𑀕𑀻𑀢𑀺𑀬𑁄 𑀓𑀘𑁆𑀘 𑀲𑀼𑀧𑁂𑀲𑀮𑁂𑀳𑀺,

𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀺 𑀣𑀺𑀭𑁂𑀳𑀺 𑀤𑀴𑁆𑀳𑀁;

𑀙𑀺𑀦𑁆𑀦𑀸𑀧𑀺 𑀭𑀼𑀓𑁆𑀔𑀸’𑀲𑁆𑀲𑀼 𑀧𑀼𑀦𑁄𑀭𑀼𑀳𑀸𑀯𑀸-

𑀓𑀸𑀲𑀼𑀁𑀯 𑀥𑀫𑁆𑀫𑀁 𑀯𑀺𑀦𑀬𑀸’𑀜𑁆𑀜𑀣𑀸 𑀢𑁂.

𑁨𑁪.

𑀦𑀸𑀦𑀸𑀕𑀡𑀸 𑀢𑁂 𑀘 𑀅𑀦𑁂𑀓𑀯𑀸𑀤𑀸,

𑀲𑀁𑀲𑀕𑁆𑀕𑀓𑀸𑀭𑀸 𑀚𑀺𑀦𑀲𑀸𑀲𑀦𑁂’𑀲𑀼𑀁;

𑀯𑀸𑀤𑁂𑀪𑀺 𑀅𑀜𑁆𑀜𑁂𑀳𑀺 𑀚𑀺𑀦𑁂𑀭𑀺𑀢𑁂𑀪𑁆𑀬-

𑀲𑀼𑀤𑁆𑀥𑀸𑀬𑀫𑀸𑀦𑀸 𑀯𑀺𑀦𑀬𑀜𑁆𑀘 𑀥𑀫𑁆𑀫𑀁.

𑁨𑁫.

𑀯𑀸𑀤𑀸 𑀘 𑀯𑀸𑀤𑀻 𑀧𑀺𑀝𑀓𑀸𑀦𑀺 𑀢𑁂𑀲𑀁,

𑀮𑀗𑁆𑀓𑀁 𑀫𑀮𑀗𑁆𑀓𑀁𑀯 𑀓𑀭𑀁’𑀧𑀬𑀸𑀢𑀸;

𑀧𑀝𑀺𑀕𑁆𑀕𑀳𑁂𑀲𑀼𑀁 𑀧𑁆𑀬𑀪𑀬𑀸𑀤𑀺𑀯𑀸𑀲𑀻,

𑀦𑀸𑀜𑁆𑀜𑁂 𑀫𑀳𑀸𑀔𑁆𑀬𑀸𑀢𑀯𑀺𑀳𑀸𑀭𑀯𑀸𑀲𑀻.

𑁨𑁬.

𑀬𑀣𑀸 𑀘 𑀩𑀼𑀤𑁆𑀥𑀸𑀪𑀺𑀳𑀺𑀢𑀸𑀯 𑀧𑀸𑀴𑀺,

𑀢𑀤𑀢𑁆𑀣𑀲𑀸𑀭𑀸 𑀘 𑀯𑀲𑀻𑀪𑀺 𑀜𑀸𑀢𑀸;

𑀦 ‘‘𑀢𑁂𑀥 𑀯𑁄𑀓𑁆𑀓𑀫𑁆𑀫 𑀯𑀺𑀲𑀼𑀤𑁆𑀥𑀣𑁂𑀭-

𑀯𑀸𑀤𑀻 𑀯𑀺𑀯𑀸𑀤𑀻’’𑀢𑀺 𑀧𑀯𑀢𑁆𑀢𑀺 𑀓𑀸𑀘𑀺.

𑁨𑁭.

𑀚𑀻𑀯𑀁𑀯 𑀭𑀓𑁆𑀔𑀺𑀁𑀲𑀼 𑀲𑀣𑁂𑀭𑀯𑀸𑀤𑀁,

𑀢𑀦𑁆𑀢𑀺𑀁 𑀢𑀤𑀢𑁆𑀣𑀜𑁆𑀘 𑀲𑀦𑀺𑀡𑁆𑀡𑀬𑀁 𑀢𑁂;

𑀢𑀲𑁆𑀫𑀸 𑀦 𑀲𑀓𑁆𑀓𑀸𑀯 𑀢𑀤𑀜𑁆𑀜𑀯𑀸𑀤𑀺-

𑀯𑀸𑀤𑁂𑀪𑀺 𑀳𑀦𑁆𑀢𑀼𑀁 𑀘𑀼’𑀧𑀕𑀦𑁆𑀢𑀼𑀫𑀤𑁆𑀥𑀸.

𑁨𑁮.

𑀢𑀁𑀯𑀸𑀤𑀲𑀁𑀪𑁂𑀤𑀪𑀬𑀜𑁆𑀘 𑀫𑀜𑁆𑀜𑀬𑀸,

‘‘𑀤𑀼𑀤𑁆𑀥𑀸𑀭𑀯𑁂𑀮𑀸𑀧𑀺 𑀪𑀬𑁂𑀳𑀺 𑀢𑀦𑁆𑀢𑀺𑀦𑀁;

𑀲𑀫𑁆𑀫𑁄𑀳𑀢𑀸𑀤𑀻𑀳𑀺 𑀪𑀯𑁂’’𑀢𑀺 𑀧𑁄𑀢𑁆𑀣𑀓𑀁,

𑀆𑀭𑁄𑀧𑁆𑀬 𑀲𑀫𑁆𑀫𑀸 𑀧𑀭𑀺𑀧𑀸𑀮𑀬𑀺𑀁𑀲𑀼 𑀢𑁂.

𑁨𑁯.

𑀢𑀤𑀸 ¶ 𑀳𑀺 𑀢𑁂𑀲𑀁 𑀧𑀝𑀺𑀩𑀸𑀳𑀦𑁂 𑀭𑀡-

𑀯𑀺𑀤𑀁𑀯 𑀲𑀺𑀓𑁆𑀔𑀁 𑀚𑀺𑀦𑀲𑀸𑀲𑀦𑀤𑁆𑀥𑀭𑁄;

𑀲 𑀩𑀼𑀤𑁆𑀥𑀖𑁄𑀲𑁄 𑀫𑀼𑀦𑀺 𑀩𑀼𑀤𑁆𑀥𑀺𑀧𑀸𑀝𑀯𑁄,

𑀕𑀢𑁄’𑀲𑀺 𑀤𑀻𑀧𑀁 𑀯𑀭𑀢𑀫𑁆𑀩𑀧𑀡𑁆𑀡𑀺𑀓𑀁.

𑁩𑁦.

𑀮𑀗𑁆𑀓𑀁 𑀉𑀧𑁂𑀘𑁆𑀘 𑀲 𑀫𑀳𑀸𑀝𑁆𑀞𑀓𑀣𑀸𑀡𑁆𑀡𑀯𑀲𑁆𑀲,

𑀧𑀸𑀭𑀁 𑀧𑀭𑀁 𑀯𑀺𑀢𑀭𑀡𑁂 𑀣𑀺𑀭𑀦𑀺𑀡𑁆𑀡𑀬𑁄𑀯;

𑀲𑀁𑀲𑀼𑀤𑁆𑀥𑀯𑀁𑀲𑀚𑀦𑀺𑀯𑀸𑀲𑀫𑀳𑀸𑀯𑀺𑀳𑀸𑀭-

𑀫𑀸𑀕𑀸’𑀫𑁆𑀩𑀭𑀁𑀯 𑀉𑀤𑀬𑀺𑀦𑁆𑀤𑀼’𑀧𑀲𑁄𑀪𑀬𑀦𑁆𑀢𑁄.

𑁩𑁧.

𑀢𑀲𑁆𑀫𑀺𑀜𑁆𑀘 𑀤𑀓𑁆𑀔𑀺𑀡𑀤𑀺𑀲𑀸𑀬 𑀯𑀲𑀻 𑀲 𑀢𑀢𑁆𑀣,

𑀲𑁄𑀪𑀁 𑀧𑀥𑀸𑀦𑀖𑀭𑀲𑀜𑁆𑀜𑀺𑀢𑀧𑀸𑀭𑀺𑀯𑁂𑀡𑀁;

𑀧𑀸𑀲𑀸𑀤’𑀫𑀼𑀢𑁆𑀢𑀫’𑀫𑀓𑀸 𑀲𑀼𑀚𑀦𑁂𑀪𑀺 𑀲𑁂𑀩𑁆𑀬𑀁,

𑀲𑀦𑁆𑀢𑁄 𑀫𑀳𑀸𑀦𑀺𑀕𑀫𑀲𑀸𑀫𑀺 𑀲𑀼𑀘𑀺𑀡𑁆𑀡𑀥𑀫𑁆𑀫𑁄.

𑁩𑁨.

𑀲𑀫𑁆𑀫𑀸 𑀘 𑀬𑁄𑀕𑀫𑀓𑀭𑀻 𑀩𑀼𑀥𑀩𑀼𑀤𑁆𑀥𑀫𑀺𑀢𑁆𑀢-

𑀣𑁂𑀭𑀸𑀤𑀺’𑀫𑀦𑁆𑀢’𑀫𑀼𑀧𑀬𑀸𑀢’𑀫𑀦𑀽𑀦𑀢𑀦𑁆𑀢𑁂;

𑀲𑀁𑀲𑁂𑀯𑀺𑀢𑁄 𑀯𑀺𑀯𑀺𑀥𑀜𑀸𑀬𑀧𑀩𑀼𑀤𑁆𑀥𑀺𑀬𑀸 𑀲𑁄,

𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑁆𑀯’𑀦𑀽𑀦𑀁.

𑁩𑁩.

𑀯𑁂𑀬𑁆𑀬𑀢𑁆𑀢𑀺𑀬𑀁’𑀲 𑀲𑀫𑀬𑁂 𑀲𑀫𑀬𑀦𑁆𑀢𑀭𑁂 𑀘,

𑀧𑀜𑁆𑀜𑀸𑀬 𑀤𑀺𑀲𑁆𑀯 𑀯𑀺𑀯𑀝𑀁𑀯 𑀦𑀺𑀳𑀻𑀢𑀫𑀢𑁆𑀣𑀁;

𑀣𑁂𑀭𑀸 𑀲𑀫𑀕𑁆𑀕𑀚𑀺𑀦𑀫𑀕𑁆𑀕𑀫𑀢𑀸’𑀫𑀢𑀸𑀲𑀻,

𑀫𑀜𑁆𑀜𑀺𑀁𑀲𑀼 𑀦𑀕𑁆𑀖𑀭𑀢𑀦𑀁𑀯 𑀲𑀼𑀤𑀼𑀮𑁆𑀮𑀪𑀦𑁆𑀢𑀺.

𑁩𑁪.

𑀯𑀺𑀜𑁆𑀜𑀸𑀬 𑀥𑀫𑁆𑀫𑀯𑀺𑀦𑀬𑀢𑁆𑀣𑀬𑀣𑀺𑀘𑁆𑀙𑀤𑀸𑀦𑁂,

𑀘𑀺𑀦𑁆𑀢𑀸𑀫𑀡𑀻𑀢𑀺 𑀲𑀼𑀦𑀺𑀭𑀽𑀧𑀺𑀢𑀩𑀼𑀤𑁆𑀥𑀺𑀭𑀽𑀧𑀁;

𑀬𑀲𑁆𑀲𑁂’𑀢𑁆𑀣 𑀦𑀺𑀘𑁆𑀙𑀺𑀢𑀫𑀦𑁄 𑀓𑀯𑀺𑀲𑀗𑁆𑀖𑀧𑀸𑀮-

𑀢𑁆𑀣𑁂𑀭𑀼𑀢𑁆𑀢𑀫𑁄 𑀚𑀦𑀳𑀺𑀢𑀸𑀬 𑀦𑀺𑀬𑁄𑀚𑀬𑀻 𑀢𑀁.

𑁩𑁫.

‘‘𑀓𑀺𑀜𑁆𑀘𑀸𑀧𑀺 𑀲𑀦𑁆𑀢𑀺 𑀯𑀺𑀯𑀺𑀥𑀸 𑀧𑀝𑀺𑀧𑀢𑁆𑀢𑀺𑀕𑀦𑁆𑀣𑀸,

𑀓𑁂𑀲𑀜𑁆𑀘𑀺 𑀓𑀺𑀜𑁆𑀘𑀺 𑀢𑀼 𑀦 𑀩𑀼𑀤𑁆𑀥𑀫𑀢𑀸𑀦𑀼𑀲𑀸𑀭𑀁;

𑀲𑀁𑀲𑀼𑀤𑁆𑀥𑀣𑁂𑀭𑀲𑀫𑀬𑁂𑀳𑀺 𑀘 𑀢𑁂 𑀯𑀺𑀭𑀼𑀤𑁆𑀥𑀸,

𑀢𑀲𑁆𑀫𑀸 𑀓𑀭𑁄𑀢𑀼 𑀯𑀺𑀫𑀮𑀁 𑀧𑀝𑀺𑀧𑀢𑁆𑀢𑀺𑀕𑀦𑁆𑀣𑀁’’.

𑁩𑁬.

𑀫𑁂𑀢𑁆𑀢𑀸𑀤𑀬𑀫𑁆𑀩𑀼𑀤𑀯𑀦𑀁 ¶ 𑀚𑀦𑀪𑀽𑀫𑀺𑀬𑀁’𑀲,

𑀲𑀁𑀯𑀲𑁆𑀲𑀢𑁂 𑀘’𑀭𑀺𑀬𑀫𑀕𑁆𑀕𑀕𑀫𑀕𑁆𑀕’𑀫𑀕𑁆𑀕𑀁;

𑀲𑀁𑀲𑁄𑀥𑀦𑀢𑁆𑀣’𑀫𑀺𑀢𑀺 ‘‘𑀧𑀢𑁆𑀣𑀺𑀢𑀣𑁂𑀭𑀆𑀲𑀁,

𑀧𑀽𑀭𑁂𑀲𑁆𑀲’𑀫𑁂𑀢’’𑀫𑀺𑀢𑀺 𑀓𑀸𑀲𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁.

𑁩𑁭.

𑀯𑀻𑀭𑀸𑀦𑀼𑀓𑀫𑁆𑀧𑀲𑀢𑀺𑀬𑁄𑀚𑀺𑀢𑀩𑀼𑀤𑁆𑀥𑀺𑀫𑀸 𑀲𑀁,

𑀑𑀕𑁆𑀕𑀬𑁆𑀳, 𑀕𑀬𑁆𑀳 𑀘’ 𑀔𑀺𑀮𑀝𑁆𑀞𑀓𑀣𑀸 𑀲𑀢𑀦𑁆𑀢𑀻;

𑀲𑀸𑀭𑀁 𑀲𑀔𑁂𑀤’𑀫𑀦𑀧𑁂𑀓𑁆𑀔𑀺𑀬 𑀲𑀸𑀥𑀼𑀓𑀁 𑀲,

𑀬𑀁’𑀓𑀸𑀲𑀺, 𑀓𑀁 𑀦𑀼’𑀥 𑀦 𑀭𑁄𑀘𑀬𑀢𑁂 𑀩𑀼𑀥𑀁 𑀲𑁄.

𑁩𑁮.

𑀯𑀼𑀢𑁆𑀢𑁂’𑀢𑁆𑀣 𑀪𑀸𑀯𑀧𑀭𑀫𑀸𑀯 𑀲𑀪𑀸𑀯𑀥𑀫𑁆𑀫𑀸,

𑀯𑀢𑁆𑀣𑀽 𑀘 𑀧𑀻𑀢𑀺𑀲𑀼𑀔𑀯𑁂𑀤𑀦𑀺𑀬𑀸’𑀦𑀺𑀢𑀸𑀯;

𑀧𑀼𑀡𑁆𑀡𑁄𑀯 𑀲𑀩𑁆𑀩𑀧𑀝𑀺𑀧𑀢𑁆𑀢𑀺𑀦𑀬𑁂𑀳𑀺 𑀘𑁂𑀲𑁄,

𑀧𑀼𑀧𑁆𑀨𑀸𑀪𑀺𑀨𑀼𑀮𑁆𑀮𑀧𑀯𑀦𑀁𑀯 𑀯𑀺𑀭𑀸𑀚𑀢𑁂’𑀬𑀁.

𑁩𑁯.

𑀬𑀁 𑀧𑀲𑁆𑀲𑀺𑀬𑀸𑀦 𑀧𑀭𑀺𑀓𑀧𑁆𑀧𑀺𑀬 𑀭𑀢𑁆𑀦𑀲𑀸𑀭-

𑀕𑀩𑁆𑀪𑀁 𑀯𑀺𑀲𑀼𑀤𑁆𑀥𑀺’𑀫𑀪𑀺𑀬𑀸𑀢𑀼’𑀫𑀧𑁂𑀓𑁆𑀔𑀫𑀸𑀦𑀸;

𑀢𑀁 𑀲𑀸𑀭’𑀫𑀸𑀤𑀺𑀬𑀺𑀢𑀼’𑀫𑀸𑀲𑀼 𑀧𑀬𑀼𑀢𑁆𑀢𑀬𑀼𑀢𑁆𑀢𑀸,

𑀤𑀺𑀲𑁆𑀯𑀸 𑀳𑀺 𑀦𑀕𑁆𑀖𑀭𑀢𑀦𑀁 𑀦𑀦𑀼 𑀯𑀚𑁆𑀚𑀬𑁂 𑀦.

𑁪𑁦.

𑀓𑀦𑁆𑀢𑀸 𑀧𑀤𑀸𑀯𑀮𑀺’𑀳 𑀢𑀦𑁆𑀢𑀺𑀦𑀬𑀸𑀦𑀼𑀲𑀸𑀭𑀸,

𑀲𑀸𑀭𑀸𑀢𑀺𑀲𑀸𑀭𑀦𑀬𑀧𑀦𑁆𑀢𑀺 𑀧𑀲𑀺𑀤𑁆𑀥𑀲𑀺𑀤𑁆𑀥𑀸;

𑀅𑀢𑁆𑀣𑀸 𑀘 𑀲𑀦𑁆𑀢𑀺𑀦𑀼𑀕𑀫𑀸𑀬 𑀢𑀼𑀮𑀸𑀬𑀫𑀸𑀦𑁄-

𑀬𑁆𑀬𑁄𑀕𑁂𑀦 𑀫𑁂𑀢𑁆𑀣 𑀳𑀺 𑀯𑀺𑀦𑀸 𑀧𑀝𑀺𑀧𑀢𑁆𑀢𑀺 𑀓𑀸’𑀜𑁆𑀜𑀸.

𑁪𑁧.

𑀆𑀪𑀸𑀢𑀺 𑀲𑀢𑁆𑀣𑀼 𑀘𑀢𑀼𑀭𑀸𑀕𑀫𑀫𑀚𑁆𑀛𑀕𑁄’𑀬𑀁-

𑀅𑀢𑁆𑀣𑁂 𑀧𑀓𑀸𑀲𑀬𑀺𑀳 𑀪𑀸𑀡𑀼𑀯 𑀦𑁂𑀓𑀤𑀩𑁆𑀩𑁂;

𑀫𑁂𑀥𑀸𑀯𑀺𑀧𑀻𑀢𑀺𑀚𑀦𑀦𑀁’𑀲 𑀯𑀺𑀥𑀸𑀦’𑀫𑁂𑀢𑀁-

𑀢𑀻𑀢𑀜𑁆𑀳𑀺 𑀬𑀸𑀯 𑀓𑀯𑀺𑀕𑁄𑀘𑀭’𑀫𑀲𑁆𑀲 𑀜𑀸𑀡𑀁.

𑁪𑁨.

𑀤𑀺𑀝𑁆𑀞𑀸𑀯 𑀢𑀺𑀓𑁆𑀔𑀫𑀢𑀺’𑀫𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕-

𑀲𑀫𑁆𑀧𑀸𑀤𑀦𑁂𑀦 𑀲𑀫𑀼𑀧𑀸𑀢𑁆𑀢𑀲𑀼𑀥𑀻𑀧𑀤𑁂𑀪𑀺;

𑀢𑁂𑀦𑀲𑁆𑀲 𑀩𑀼𑀤𑁆𑀥𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑀸𑀬,

𑀧𑀩𑁆𑀬𑀢𑁆𑀢𑀲𑀢𑁆𑀢𑀺 𑀯𑀺𑀤𑀺𑀢𑀸 𑀯𑀺𑀤𑀺𑀢𑀸𑀕𑀫𑁂𑀳𑀺.

𑁪𑁩.

𑀔𑁆𑀬𑀸𑀢𑀁 ¶ 𑀓𑀯𑀻𑀪𑀺’𑀥𑀺𑀕𑀢𑀁 𑀬𑀲’𑀫𑀸𑀯𑀳𑁂𑀦,

𑀣𑁂𑀭𑀲𑁆𑀲 𑀲𑀼𑀤𑁆𑀥𑀫𑀢𑀺𑀩𑀼𑀤𑁆𑀥𑀲𑀺𑀭𑀻𑀯𑁆𑀳𑀬𑀲𑁆𑀲;

𑀮𑁄𑀓𑀢𑁆𑀣’𑀫𑀸𑀯𑀺𑀓𑀢𑀧𑀢𑁆𑀣𑀦’𑀫𑀸𑀤𑀺𑀬𑀸𑀦,

𑀲𑀸𑀫𑀜𑁆𑀘 𑀦𑀺𑀦𑁆𑀦𑀳𑀤𑀬𑁂𑀦 𑀚𑀦𑀸𑀦’𑀫𑀢𑁆𑀣𑁂.

𑁪𑁪.

𑀲𑀫𑁆𑀩𑀼𑀤𑁆𑀥𑀪𑀸𑀯𑀯𑀺𑀤𑀺𑀢𑁂𑀦𑀺’𑀫𑀺𑀦𑀸 𑀲𑀫𑀦𑁆𑀢-

𑀧𑀸𑀲𑀸𑀤𑀺𑀓𑀸𑀯𑁆𑀳𑀯𑀺𑀦𑀬𑀝𑁆𑀞𑀓𑀣𑀸 𑀧𑀡𑀻𑀢𑀸;

𑀲𑀽𑀭𑁄’𑀤𑀺𑀢𑁂 𑀯𑀺𑀬 𑀢𑀬𑀸 𑀯𑀺𑀦𑀬𑀢𑁆𑀣𑀫𑀽𑀴𑁆𑀳𑀸-

𑀫𑀽𑀴𑁆𑀳𑀻 𑀪𑀯𑀦𑁆𑀢𑀺 𑀚𑀺𑀦𑀦𑀻𑀢𑀺𑀧𑀣𑀸’𑀥𑀺𑀕𑀦𑁆𑀢𑁆𑀯𑀸.

𑁪𑁫.

𑀮𑀗𑁆𑀓𑀸 𑀅𑀮𑀗𑁆𑀓𑀢𑀺𑀓𑀢𑀸𑀯 𑀫𑀳𑀸𑀫𑀳𑀺𑀦𑁆𑀤-

𑀢𑁆𑀣𑁂𑀭𑁂𑀦 𑀬𑀸 𑀘 𑀯𑀺𑀦𑀬𑀝𑁆𑀞𑀓𑀣𑀸’𑀪𑀢𑀸, 𑀢𑀁;

𑀓𑀦𑁆𑀢𑀸𑀬 𑀲𑀻𑀳𑀴𑀕𑀺𑀭𑀸𑀬 𑀕𑀺𑀭𑀸𑀬𑀫𑀸𑀦𑀸,

𑀅𑀘𑁆𑀘𑀦𑁆𑀢𑀓𑀦𑁆𑀢𑀩𑀳𑀼𑀮𑀸 𑀫𑀼𑀦𑀬𑁄 𑀧𑀼𑀭𑀸’𑀲𑀼𑀁.

𑁪𑁬.

𑀅𑀜𑁆𑀜𑀸 𑀘 𑀧𑀘𑁆𑀘𑀭𑀺-𑀓𑀼𑀭𑀼𑀦𑁆𑀤𑀺𑀲𑀫𑀜𑁆𑀜𑀺𑀢𑀸𑀤𑀻,

𑀤𑀻𑀧𑀁 𑀧𑀤𑀻𑀧𑀓𑀭𑀡𑀻 𑀯𑀺𑀦𑀬𑀫𑁆𑀳𑀺 𑀬𑀸’𑀲𑀼𑀁;

𑀲𑀗𑁆𑀕𑀬𑁆𑀳 𑀢𑀸𑀲’𑀫𑀔𑀺𑀮𑀢𑁆𑀣𑀦𑀬𑁂 𑀘 𑀣𑁂𑀭-

𑀯𑀸𑀤𑁂 𑀘 𑀫𑀼𑀢𑁆𑀢𑀭𑀢𑀦𑀸𑀦𑀺𑀯 𑀫𑁂𑀓𑀲𑀼𑀢𑁆𑀢𑁂.

𑁪𑁭.

𑀢𑀸𑀳𑁂𑀯 𑀲𑀻𑀳𑀴𑀦𑀺𑀭𑀼𑀢𑁆𑀢𑀺𑀬𑀼𑀢𑀜𑁆𑀘 𑀢𑀦𑁆𑀢𑀺𑀁,

𑀆𑀭𑁄𑀧𑀺𑀬𑀸𑀦 𑀭𑀼𑀘𑀺𑀭𑀁 𑀅𑀣 𑀯𑀺𑀢𑁆𑀣𑀢𑀜𑁆𑀘;

𑀫𑀕𑁆𑀕𑀁 𑀲𑀫𑀸𑀲𑀦𑀯𑀲𑁂𑀦 𑀬𑀣𑀸 𑀲𑀫𑀢𑁆𑀢-

𑀮𑁄𑀓𑁂𑀦 𑀬𑀸 𑀕𑀭𑀼𑀓𑀢𑀸 𑀓𑀢𑀫𑀸𑀦𑀦𑀸’𑀓𑀸.

𑁪𑁮.

𑀲𑀼𑀤𑁆𑀥𑀦𑁆𑀯𑀬𑀸𑀕𑀣𑀯𑀺𑀭𑀸 𑀘 𑀯𑀺𑀲𑀼𑀤𑁆𑀥𑀣𑁂𑀭-

𑀯𑀸𑀤𑀻 𑀯𑀺𑀲𑀼𑀤𑁆𑀥𑀯𑀺𑀦𑀬𑀸𑀕𑀫𑀧𑀼𑀚𑁆𑀚𑀥𑀫𑁆𑀫𑀸;

𑀲𑀼𑀤𑁆𑀥𑀁 𑀓𑀭𑀺𑀁𑀲𑀼 𑀦 𑀬𑀣𑁂’𑀦𑁆𑀢𑀺 𑀢𑀤𑀜𑁆𑀜𑀯𑀸𑀤𑀸,

𑀇𑀘𑁆𑀘𑀸𑀤𑀺’𑀫𑀸𑀯𑀺𑀓𑀭𑀺𑀬𑀸’𑀲𑀺 𑀦𑀺𑀤𑀸𑀦𑀫𑁂𑀢𑁆𑀣.

𑁪𑁯.

𑀬𑀲𑁆𑀫𑀺𑀁 𑀫𑀦𑀼𑀜𑁆𑀜𑀧𑀤𑀧𑀦𑁆𑀢𑀺 𑀲𑀼𑀪𑀸 𑀲𑀼𑀩𑁄𑀥𑀸,

𑀅𑀢𑁆𑀣𑀸 𑀘 𑀧𑀻𑀢𑀺𑀲𑀫’𑀯𑀺𑀫𑁆𑀳𑀬𑀢𑀸𑀤𑀺𑀪𑀸𑀯𑀻;

𑀘𑀺𑀢𑁆𑀭𑀸 𑀯𑀺𑀘𑀺𑀢𑁆𑀭𑀫𑀢𑀺𑀚𑀸 𑀓𑀯𑀺𑀘𑀺𑀢𑁆𑀢𑀳𑀁𑀲𑀸,

𑀢𑀲𑁆𑀫𑀸 𑀭𑀲𑀸𑀬𑀢𑀺 𑀢𑀤𑀢𑁆𑀣𑀦𑀼𑀲𑀸𑀭𑀺𑀦𑀁 𑀬𑀁.

𑁫𑁦.

𑀅𑀘𑁆𑀘𑀦𑁆𑀢𑀲𑀸𑀕𑀭𑀦𑀺𑀪𑀸 ¶ 𑀯𑀺𑀯𑀺𑀥𑀸 𑀦𑀬𑀢𑁆𑀣𑀸,

𑀲𑀦𑁆𑀢𑁂’𑀢𑁆𑀣 𑀬𑀸’𑀲𑀼 𑀯𑀺𑀦𑀬𑀝𑁆𑀞𑀓𑀣𑀸 𑀧𑀼𑀭𑀸𑀡𑀸;

𑀢𑀸𑀲𑀁 𑀬𑀣𑀸𑀪𑀺𑀫𑀢𑀧𑀦𑁆𑀢𑀺 𑀲𑀼𑀢𑀦𑁆𑀢𑀺𑀓𑀢𑁆𑀢𑀁,

𑀓𑀺𑀜𑁆𑀳𑀺’𑀲𑁆𑀲 𑀓𑀺𑀜𑁆𑀘𑀺 𑀩𑀮𑀯𑀻𑀭’𑀧𑀝𑀺𑀘𑁆𑀘 𑀓𑀸𑀢𑀼𑀁.

𑁫𑁧.

𑀉𑀬𑁆𑀬𑁄𑀕’𑀫𑀲𑁆𑀲 𑀓𑀭𑀼𑀡𑀸𑀧𑀳𑀺𑀢𑀁 𑀧𑀝𑀺𑀘𑁆𑀘,

𑀧𑀜𑁆𑀜𑀸𑀲𑀳𑀸𑀬𑀲𑀳𑀺𑀢𑀁 𑀩𑀮𑀯𑀜𑁆𑀘 𑀤𑀴𑁆𑀳𑀁;

𑀮𑀤𑁆𑀥𑀸𑀯 𑀬𑀸 𑀦𑀺𑀔𑀺𑀮𑀮𑁄𑀓𑀫𑀦𑀼𑀜𑁆𑀜𑀪𑀽𑀢𑀸,

𑀫𑁂𑀥𑀸𑀯𑀺𑀦𑀁’𑀦𑀼𑀲𑀪𑀕𑀸𑀯 𑀯𑀺𑀭𑀸𑀚𑀢𑁂 𑀲𑀸.

𑁫𑁨.

𑀯𑀺𑀜𑁆𑀜𑀽𑀪𑀺 𑀬𑀸 ‘‘𑀯𑀺𑀦𑀬𑀲𑀸𑀕𑀭𑀧𑀸𑀭𑀢𑀺𑀡𑁆𑀡𑁂’’,

𑀲𑀫𑁆𑀪𑀸𑀯𑀺𑀢𑀸 ‘‘𑀲𑀼𑀢𑀭𑀡𑀸𑀬𑀢𑀺 𑀲𑀻𑀖𑀯𑀸𑀳𑀸’’;

𑀇𑀘𑁆𑀘𑀸𑀪𑀺𑀫𑀸𑀦𑀺𑀢𑀕𑀼𑀡𑀸’𑀚𑁆𑀚 𑀭𑀭𑀸𑀚 𑀬𑀸𑀯,

𑀓𑀺𑀁 𑀬𑀁 𑀣𑀺𑀭𑀁 𑀮𑀳𑀼 𑀯𑀺𑀦𑀲𑁆𑀲𑀢𑀺 𑀤𑀼𑀧𑁆𑀧𑀲𑀬𑁆𑀳𑀁.

𑁫𑁩.

‘‘𑀬𑀸 𑀩𑁆𑀬𑀸𑀧𑀺𑀦𑀻’𑀔𑀺𑀮𑀦𑀬𑀲𑁆𑀲 𑀲𑀼𑀩𑁄𑀥𑀺𑀦𑀻 𑀘,

𑀲𑁄𑀢𑀽𑀪𑀺 𑀲𑁂𑀯𑀺𑀢𑀲𑀤𑀸𑀢𑀦𑀥𑀫𑁆𑀫𑀭𑀗𑁆𑀕𑀁;

𑀓𑀢𑁆𑀯𑀸𑀦 𑀮𑁄𑀓𑀧𑀳𑀺𑀢𑁂 𑀲𑀕𑀼𑀡𑁂 𑀤𑀥𑀦𑁆𑀢𑀻,

𑀞𑀸𑀢𑀽’’𑀢𑀺 𑀦𑀝𑁆𑀞’𑀫𑀼𑀧𑀕𑀸’𑀝𑁆𑀞𑀓𑀣𑀸 𑀧𑀼𑀭𑀸𑀡𑀸.

𑁫𑁪.

𑀚𑀦𑀸𑀪𑀺𑀲𑀢𑁆𑀢𑀸𑀬 𑀤𑀬𑀸𑀬 𑀘𑁄𑀤𑀺𑀢𑁄,

𑀯𑀺𑀙𑁂𑀚𑁆𑀚 𑀔𑁂𑀤𑀁 𑀯𑀺𑀦𑀬𑀫𑁆𑀳𑀺 𑀲𑀸𑀥𑀼𑀦𑀁;

𑀅𑀣𑀸𑀕𑀫𑀸𑀦’𑀝𑁆𑀞𑀓𑀣𑀸𑀯𑀺𑀥𑀸𑀦𑀦𑁂,

𑀥𑀼𑀭𑀁 𑀤𑀥𑀸𑀢𑀼𑀁’𑀪𑀺𑀫𑀼𑀔𑀸’𑀲𑀺 𑀲𑁄 𑀲𑀼𑀥𑀻.

𑁫𑁫.

𑀧𑀤𑁆𑀫𑀁𑀯 𑀨𑀼𑀮𑁆𑀮𑀸𑀪𑀺𑀦𑀢𑀁 𑀲𑀼𑀪𑀸𑀡𑀼𑀪𑀁,

𑀮𑀤𑁆𑀥𑀸𑀦 𑀨𑀼𑀮𑁆𑀮𑀁’𑀢𑀺𑀲𑀬𑀸’𑀲𑀺 𑀘𑁂𑀢𑀦𑀸;

𑀤𑀸𑀞𑀸𑀤𑀺𑀦𑀸𑀕𑁂𑀦 𑀣𑀺𑀭𑀕𑁆𑀕𑀥𑀻𑀫𑀢𑀸,

𑀬𑀸 𑀧𑀢𑁆𑀣𑀺𑀢𑀸’𑀭𑀩𑁆𑀪 𑀢𑀤𑀢𑁆𑀣𑀲𑀺𑀚𑁆𑀛𑀦𑁂.

𑁫𑁬.

𑀤𑀻𑀖𑀸𑀕𑀫𑀢𑁆𑀣𑁂𑀲𑀼 𑀲𑀩𑀼𑀤𑁆𑀥𑀺𑀯𑀺𑀓𑁆𑀓𑀫-

𑀫𑀸𑀕𑀫𑁆𑀫 𑀲𑀸𑀭𑀸𑀥𑀺𑀕𑀫𑀸 𑀲𑀼𑀫𑀗𑁆𑀕𑀮-

𑀦𑀸𑀫𑀸𑀦𑀼𑀕𑀦𑁆𑀢𑀸𑀯 𑀯𑀺𑀮𑀸𑀲𑀺𑀦𑀻𑀢𑀺 𑀬𑀸,

𑀲𑀁𑀯𑀡𑁆𑀡𑀦𑀸 𑀮𑁄𑀓𑀳𑀺𑀢𑀸𑀬 𑀲𑀫𑁆𑀪𑀯𑀻.

𑁫𑁭.

𑀕𑀫𑁆𑀪𑀻𑀭𑀫𑁂𑀥𑀸𑀯𑀺𑀲𑀬𑀸𑀕𑀫𑀫𑁆𑀳𑀺𑀧𑀺,

¶ 𑀆𑀭𑀩𑁆𑀪 𑀩𑀼𑀤𑁆𑀥𑀺𑀁’𑀲 𑀲𑀼𑀦𑀺𑀫𑁆𑀫𑀮𑀻𑀓𑀢𑀸;

𑀯𑀺𑀜𑁆𑀜𑀸𑀢𑀩𑀼𑀤𑁆𑀥𑀸𑀪𑀺𑀫𑀢𑀸 𑀩𑀳𑀽 𑀚𑀦𑀸,

𑀅𑀜𑁆𑀜𑀢𑁆𑀣𑀲𑀸𑀥𑀸 𑀫𑀳𑀢𑀜𑁆𑀳𑀺 𑀩𑀼𑀤𑁆𑀥𑀺𑀬𑁄.

𑁫𑁮.

𑀲𑀸’𑀦𑀻𑀢𑀯𑀺𑀤𑁆𑀯𑀸𑀓𑁆𑀔𑀺𑀫𑀦𑀸 𑀫𑀦𑀸𑀬𑀺𑀢𑀸,

𑀓𑀦𑁆𑀢𑀸𑀕𑀫𑁂 𑀥𑀫𑁆𑀫𑀲𑀪𑀸𑀬𑀢𑁂 𑀲𑀤𑀸;

𑀢𑁂𑀦𑁂𑀯 𑀫𑀜𑁆𑀜𑁂’𑀳 𑀢𑀺𑀭𑁄𑀓𑀢𑀸 𑀢𑀬𑀸,

𑀓𑀺𑀁 𑀲𑀻𑀖𑀕’𑀜𑁆𑀜𑀢𑁆𑀭 𑀧𑀣𑀜𑁆𑀜𑀕𑀸𑀫𑀺𑀓𑀸.

𑁫𑁯.

𑀧𑀢𑁆𑀯𑀸 𑀫𑀳𑀦𑁆𑀢𑀸’𑀫𑁆𑀩𑀭’𑀫𑀫𑁆𑀩𑀼𑀤𑁄 𑀬𑀣𑀸,

𑀮𑁄𑀓𑀢𑁆𑀣𑀲𑀸𑀥𑀻𑀧𑀺 𑀫𑀳𑀸𑀲𑀬𑀁 𑀫𑀢𑀺;

𑀢𑀲𑁆𑀫𑀸’𑀲𑁆𑀲 𑀲𑀺𑀤𑁆𑀥𑀸’𑀝𑁆𑀞𑀓𑀣𑀸𑀧𑀭𑀫𑁆𑀧𑀭𑀸,

𑀩𑀼𑀤𑁆𑀥𑀺𑀧𑁆𑀧𑀤𑀸𑀦𑀸𑀬’ 𑀳𑀼𑀯𑀼𑀁 𑀦𑀯𑀸 𑀦𑀯𑀸.

𑁬𑁦.

𑀩𑀼𑀤𑁆𑀥𑀸𑀤𑀺𑀫𑀺𑀢𑁆𑀢𑀁 𑀣𑀺𑀭𑀲𑁂𑀝𑁆𑀞’𑀫𑀼𑀤𑁆𑀤𑀺𑀲𑀁,

𑀲𑀁𑀯𑀡𑁆𑀡𑀦𑀸 𑀘𑀸𑀲𑀺 𑀧𑀧𑀜𑁆𑀘𑀲𑀽𑀤𑀦𑀻;

‘‘𑀲𑀩𑁆𑀩𑀢𑁆𑀣𑀲𑀸𑀭𑁂 𑀚𑀺𑀦𑀫𑀚𑁆𑀛𑀺𑀫𑀸𑀕𑀫𑁂,

𑀮𑀤𑁆𑀥𑀸𑀦 𑀧𑀻𑀢𑀺𑀁 𑀲𑀼𑀚𑀦𑀸 𑀲𑀫𑁂𑀦𑁆𑀢𑀼’’𑀢𑀺.

𑁬𑁧.

𑀉𑀧𑁆𑀧𑀚𑁆𑀚𑀺 ‘‘𑀲𑀸𑀭𑀢𑁆𑀣𑀧𑀓𑀸𑀲𑀺𑀦𑀻’’𑀢𑀺 𑀬𑀸,

𑀲𑀸 𑀚𑁄𑀢𑀺𑀧𑀸𑀮𑀲𑁆𑀲 𑀬𑀣𑀸𑀪𑀺𑀮𑀸𑀲𑀺𑀢𑀁;

𑀮𑁄𑀓𑀁 𑀬𑀣𑀸𑀦𑀸𑀫𑀺𑀓𑀲𑀸𑀭𑀤𑀻𑀧𑀦𑀸,

𑀪𑀸𑀢𑀸’𑀲𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀧𑀦𑁆𑀣𑀤𑀸.

𑁬𑁨.

𑀲𑀫𑁆𑀧𑀽𑀭𑀺 𑀓𑀸𑀢𑀼𑀁’𑀲 𑀫𑀦𑁄𑀭𑀣𑁄 𑀬𑀬𑀸,

𑀅𑀗𑁆𑀕𑀼𑀢𑁆𑀢𑀭𑀦𑁆𑀢𑀸𑀕𑀫𑀫𑀢𑁆𑀣𑀯𑀡𑁆𑀡𑀦𑀸;

𑀢𑀦𑁆𑀦𑀸𑀫𑀥𑁂𑀬𑁆𑀬𑀁 𑀲𑀼𑀚𑀦𑀜𑁆𑀘 𑀚𑀻𑀯𑀓𑀁,

𑀲𑁄 𑀚𑁄𑀢𑀺𑀧𑀸𑀮𑀜𑁆𑀘 𑀧𑀲𑀢𑁆𑀣𑀥𑀻𑀢𑀺𑀫𑀁.

𑁬𑁩.

𑀉𑀤𑁆𑀤𑀺𑀲𑁆𑀲 𑀬𑀁’𑀓𑀸𑀲𑀺 𑀧𑀯𑀻𑀡𑀢𑀁 𑀓𑀭𑀁,

𑀩𑀼𑀤𑁆𑀥𑀸𑀤𑀺𑀲𑀁𑀲𑁂𑀩𑁆𑀬𑀲𑀼𑀫𑀕𑁆𑀕𑀤𑀲𑁆𑀲𑀦𑁂;

𑀲𑀤𑁆𑀥𑀫𑁆𑀫𑀧𑀼𑀧𑁆𑀨𑀸𑀦’ 𑀯𑀦𑀸𑀬𑀺𑀢𑀸’𑀲𑀺 𑀲𑀸,

𑀯𑀺𑀤𑁆𑀯𑀸𑀮𑀺𑀲𑀗𑁆𑀖𑀲𑁆𑀲 𑀲𑀤𑀸𑀯𑀕𑀸𑀳𑀡𑀸.

𑁬𑁪.

𑀬𑁂𑀦’𑀢𑁆𑀢𑀮𑀤𑁆𑀥𑀺𑀁 ¶ 𑀧𑀚𑀳𑀦𑁆𑀢𑀼 𑀲𑀸𑀥𑀯𑁄,

𑀤𑀼𑀩𑁆𑀩𑁄𑀥𑀥𑀫𑁆𑀫𑁂 𑀘 𑀲𑀪𑀸𑀯𑀤𑀻𑀧𑀦𑁂;

𑀩𑀼𑀚𑁆𑀛𑀦𑁆𑀢𑀼, 𑀇𑀘𑁆𑀘𑀸𑀲𑀺’𑀪𑀺𑀥𑀫𑁆𑀫𑀲𑀸𑀕𑀭𑁄,

𑀢𑀢𑁆𑀣𑀸’𑀯𑀢𑀸𑀭𑀁 𑀲𑀼𑀓𑀭𑁂𑀦 𑀲𑀸𑀥𑀺𑀦𑀻.

𑁬𑁫.

𑀫𑁂𑀥𑀸𑀯𑀺𑀮𑀸𑀲𑀸’𑀲𑁆𑀲’𑀳𑀼𑀯𑀼’𑀝𑁆𑀞𑀲𑀸𑀮𑀺𑀦𑀻,

𑀓𑀦𑁆𑀢𑀸 𑀘 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀢𑀺 𑀬𑀸;

𑀢𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀲𑀢𑀼𑀮𑁆𑀬𑀦𑀸𑀫𑀺𑀓-

𑀫𑀸𑀕𑀫𑁆𑀫 𑀚𑀸𑀢𑀸 𑀲𑀼𑀚𑀦𑀢𑁆𑀣𑀲𑀸𑀥𑀺𑀦𑀻.

𑁬𑁬.

𑀅𑀜𑁆𑀜𑀸 𑀘 𑀧𑀜𑁆𑀘𑀝𑁆𑀞𑀓𑀣𑀸’𑀪𑀺𑀥𑀫𑁆𑀫𑀚𑁂,

𑀪𑀸𑀯𑁂 𑀦𑀺𑀥𑀸𑀬𑁂’𑀢𑁆𑀣 𑀬𑀣𑀸’𑀲𑁆𑀲𑀼 𑀲𑀼𑀢𑁆𑀢𑀭𑀸;

𑀕𑀫𑁆𑀪𑀻𑀭𑀫𑀢𑁆𑀣𑁂𑀲𑀼 𑀧𑀯𑀺𑀤𑁆𑀥𑀩𑀼𑀤𑁆𑀥𑀺𑀢𑀁,

𑀲𑀫𑁆𑀧𑀸𑀤𑀦𑀻 𑀲𑀢𑁆𑀣𑀼’𑀢𑀼𑀮𑀢𑁆𑀢𑀤𑀻𑀧𑀦𑀻.

𑁬𑁭.

𑀲𑁄𑀡𑀸𑀯𑁆𑀳𑀣𑁂𑀭𑀲𑁆𑀲 𑀧𑀝𑀺𑀘𑁆𑀘 𑀬𑀸𑀘𑀦𑀁,

𑀢𑀸 𑀬𑀸𑀬 𑀓𑀗𑁆𑀔𑀸 𑀯𑀺𑀢𑀭𑀦𑁆𑀢𑀺 𑀪𑀺𑀓𑁆𑀔𑀯𑁄;

𑀬𑀸 𑀧𑀸𑀢𑀺𑀫𑁄𑀓𑁆𑀔𑀫𑁆𑀳𑀺, 𑀢𑀤𑀦𑁆𑀯𑀬𑀸𑀯𑁆𑀳𑀬𑀁,

𑀲𑀁𑀯𑀡𑁆𑀡𑀦𑀁’𑀓𑀸𑀲𑀺 𑀲 𑀥𑀻𑀫𑀢𑀁 𑀯𑀭𑁄.

𑁬𑁮.

𑀲𑀫𑀢𑁆𑀢𑀮𑁄𑀓𑀝𑁆𑀞𑀯𑀺𑀪𑀸𑀯𑀺𑀭𑀜𑁆𑀚𑀦𑀸,

𑀓𑀢𑁂’𑀫𑀺𑀦𑀸 𑀥𑀫𑁆𑀫𑀧𑀤𑀲𑁆𑀲 𑀯𑀡𑁆𑀡𑀦𑀸;

𑀣𑀺𑀭𑀁 𑀲𑀫𑀼𑀤𑁆𑀤𑀺𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀧𑀁,

𑀲𑀢𑀁 𑀫𑀦𑀁 𑀧𑀻𑀢𑀺𑀧𑀨𑀼𑀮𑁆𑀮𑀺𑀢𑀁 𑀬𑀬𑀸.

𑁬𑁯.

𑀅𑀜𑁆𑀜𑀸’𑀲𑁆𑀲 𑀬𑀸 𑀲𑀼𑀢𑁆𑀢𑀦𑀺𑀧𑀸𑀢-𑀔𑀼𑀤𑁆𑀤𑀓-

𑀧𑀸𑀞𑀢𑁆𑀣𑀤𑀸𑀢𑀸 𑀧𑀭𑀫𑀢𑁆𑀣𑀚𑁄𑀢𑀺𑀓𑀸;

𑀲𑀁𑀯𑀡𑁆𑀡𑀦𑀸 𑀚𑀸𑀢𑀓𑀢𑀦𑁆𑀢𑀺 𑀫𑀡𑁆𑀟𑀦𑀸,

𑀢𑀸 𑀳𑁄𑀦𑁆𑀢𑀺 𑀮𑁄𑀓𑀲𑁆𑀲 𑀳𑀺𑀢𑀧𑁆𑀧𑀤𑀻𑀧𑀺𑀦𑀻.

𑁭𑁦.

𑀦𑀺𑀲𑁆𑀲𑁂𑀲𑀮𑁄𑀓𑀫𑁆𑀳𑀺 𑀧𑀘𑀸𑀭𑀡𑀺𑀘𑁆𑀙𑀸,

𑀮𑀗𑁆𑀓𑀸𑀕𑀢𑀸𑀦’𑀝𑁆𑀞𑀓𑀣𑀸𑀦’𑀫𑀤𑁆𑀥𑀸;

𑀬𑀸 𑀣𑁂𑀭𑀯𑀸𑀤𑀻𑀦’𑀫𑀧𑀽𑀭𑀺 𑀩𑀼𑀤𑁆𑀥-

𑀖𑁄𑀲𑀕𑁆𑀕𑀣𑁂𑀭𑀲𑁆𑀲 𑀧𑀪𑀸𑀯𑀮𑀤𑁆𑀥𑀸.

𑁭𑁧.

𑀪𑀤𑁆𑀤𑀁’𑀲 ¶ 𑀦𑀸𑀫𑀜𑁆𑀘, 𑀕𑀼𑀡𑀸 𑀫𑀦𑀼𑀜𑁆𑀜𑀸,

𑀲𑀫𑀕𑁆𑀕𑀕𑀸𑀫𑀻’𑀦𑀼𑀓𑀭𑁄𑀦𑁆𑀢𑀺 𑀢𑁂𑀲𑀁;

𑀲𑀲𑀗𑁆𑀓𑀲𑀽𑀭𑀸 𑀳𑀺 𑀲𑀤𑀸𑀢𑀦𑀸 𑀬𑁂,

𑀮𑁄𑀓𑀁 𑀧𑀫𑁄𑀤𑀜𑁆𑀘 𑀓𑀭𑀁 𑀘𑀭𑀦𑁆𑀢𑀺.

𑁭𑁨.

𑀲𑀼𑀩𑀼𑀤𑁆𑀥𑀖𑁄𑀲𑀲𑁆𑀲 𑀯𑀺𑀪𑀸𑀯𑀺𑀲𑀢𑁆𑀢𑀺-

𑀧𑀩𑁆𑀬𑀢𑁆𑀢𑀺’𑀫𑀸𑀭𑀩𑁆𑀪 𑀣𑀺𑀭𑀸𑀲𑀪𑀲𑁆𑀲;

𑀲𑀫𑀕𑁆𑀕𑀮𑁄𑀓𑁄 𑀳𑀺 𑀲𑀼𑀣𑁂𑀭𑀯𑀸𑀤𑁂,

𑀫𑀸𑀦𑀁 𑀧𑀯𑀟𑁆𑀠𑁂𑀲𑀺 𑀅𑀦𑀜𑁆𑀜𑀚𑀸𑀢𑀁.

𑁭𑁩.

𑀩𑀼𑀤𑁆𑀥𑁄𑀢𑀺 𑀦𑀸𑀫𑀁 𑀪𑀼𑀯𑀦𑀫𑁆𑀳𑀺 𑀬𑀸𑀯,

𑀲𑀼𑀩𑀼𑀤𑁆𑀥𑀖𑁄𑀲𑀲𑁆𑀲 𑀲𑀺𑀬𑀸 𑀦 𑀓𑀺𑀜𑁆𑀳𑀺;

𑀮𑀤𑁆𑀥𑀸 𑀳𑀺 𑀲𑀸𑀥𑀽𑀪𑀺 𑀫𑀳𑁄𑀧𑀓𑀸𑀭𑀸,

𑀫𑀳𑀕𑁆𑀖𑀯𑀺𑀢𑁆𑀢𑀸𑀦𑀺𑀯 𑀢𑀁𑀲𑀓𑀸𑀲𑀸.

𑁭𑁪.

𑀔𑀻𑀬𑁂𑀣 𑀯𑀡𑁆𑀡𑁄 𑀦 𑀲𑀫𑀼𑀤𑁆𑀥𑀝𑁄𑀧𑀺,

𑀦𑀦𑁆𑀯’𑀲𑁆𑀲 𑀦𑁂𑀓𑀸 𑀳𑀺 𑀕𑀼𑀡𑀸 𑀅𑀦𑀦𑁆𑀢𑀸;

𑀓𑁄 𑀦𑀼’𑀤𑁆𑀥𑀭𑁂𑀬𑁆𑀬𑀸’ 𑀔𑀺𑀮𑀲𑀸𑀕𑀭𑁄𑀤𑁂,

𑀢𑀣𑀸𑀧𑀺 𑀫𑀜𑁆𑀜𑀦𑁆𑀢𑀼 𑀲𑀼𑀥𑀻 𑀲𑀤𑀸 𑀢𑁂𑀢𑀺.

𑀙𑀝𑁆𑀞𑀲𑀗𑁆𑀕𑀻𑀢𑀺𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑀗𑁆𑀖𑀲𑀫𑀺𑀢𑀺𑀬𑀸 𑀧𑀓𑀸𑀲𑀺𑀢𑀸𑀬𑀁

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.