𑀅𑀜𑁆𑀜 > 𑀮𑁂𑀟𑀻 𑀲𑀬𑀸𑀟𑁄 𑀕𑀦𑁆𑀣-𑀲𑀗𑁆𑀕𑀳𑁄 > 𑀧𑀝𑁆𑀞𑀸𑀦𑀼𑀤𑁆𑀤𑁂𑀲 𑀤𑀻𑀧𑀦𑀻𑀧𑀸𑀞

𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀮𑁄𑀪 𑀲𑀳𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘 𑀭𑀽𑀧𑀓𑀮𑀸𑀧𑀸𑀥𑀫𑁆𑀫𑀸 𑀘 𑀤𑁄𑀲𑀲𑀳 𑀚𑀸𑀢𑀸 𑀫𑁄𑀳𑀲𑀳𑀚𑀸𑀢𑀸 𑀅𑀮𑁄𑀪𑀲𑀳𑀚𑀸𑀢𑀸 𑀅𑀤𑁄𑀲𑀲𑀳 𑀚𑀸𑀢𑀸 𑀅𑀫𑁄𑀳𑀲𑀳𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘 𑀭𑀽𑀧𑀓𑀮𑀸𑀧𑀸 𑀥𑀫𑁆𑀫𑀸 𑀘 𑀳𑁂𑀢𑀼𑀧𑀘𑁆𑀘𑀬𑀢𑁄 𑀉𑀧𑁆𑀧𑀦𑁆𑀦𑀸 𑀳𑁂𑀢𑀼𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸.

𑀲𑀳𑀚𑀸𑀢𑀭𑀽𑀧𑀓𑀮𑀸𑀧𑀸 𑀦𑀸𑀫 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀚𑀭𑀽𑀧𑀸𑀦𑀺 𑀘 𑀧𑀯𑀢𑁆𑀢𑀺𑀓𑀸𑀮𑁂 𑀲𑀳𑁂𑀢𑀼𑀓𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀘. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁄 𑀦𑀸𑀫 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀧𑀯𑀢𑁆𑀢𑀺𑀓𑀸𑀮𑁄 𑀦𑀸𑀫 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀼𑀢𑀺𑀓𑀸𑀮𑀁 𑀯𑀼𑀘𑁆𑀘𑀢𑀺.

𑀓𑁂𑀦𑀝𑁆𑀞𑁂𑀦 𑀳𑁂𑀢𑀼, 𑀓𑁂𑀦𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺. 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺. 𑀢𑀢𑁆𑀣 𑀫𑀽𑀮𑀬𑀫𑀓𑁂 𑀯𑀼𑀢𑁆𑀢𑀸𑀦𑀁 𑀮𑁄𑀪𑀸𑀤𑀻𑀦𑀁 𑀫𑀽𑀮𑀥𑀫𑁆𑀫𑀸𑀦𑀁 𑀫𑀽𑀮𑀪𑀸𑀯𑁄 𑀫𑀽𑀮𑀝𑁆𑀞𑁄 𑀦𑀸𑀫. 𑀲𑁄 𑀫𑀽𑀮𑀝𑁆𑀞𑁄 𑀫𑀽𑀮𑀬𑀫𑀓𑀤𑀻𑀧𑀦𑀺𑀬𑀁 𑀅𑀫𑁆𑀳𑁂𑀳𑀺 𑀭𑀼𑀓𑁆𑀔𑁄𑀧𑀫𑀸𑀬 𑀤𑀻𑀧𑀺𑀢𑁄𑀬𑁂𑀯.

𑀅𑀧𑀺 𑀘 𑀏𑀓𑁄 𑀧𑀼𑀭𑀺𑀲𑁄 𑀏𑀓𑀺𑀲𑁆𑀲𑀁 𑀇𑀢𑁆𑀣𑀺𑀬𑀁 𑀧𑀝𑀺𑀩𑀤𑁆𑀥 𑀘𑀺𑀢𑁆𑀢𑁄 𑀳𑁄𑀢𑀺. 𑀲𑁄 𑀬𑀸𑀯 𑀢𑀁 𑀘𑀺𑀢𑁆𑀢𑀁 𑀦 𑀚𑀳𑀢𑀺, 𑀢𑀸𑀯 𑀢𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁄𑀪𑀲𑀳𑀚𑀸𑀢𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀘 𑀮𑁄𑀪𑀲𑀫𑀼𑀝𑁆𑀞𑀺𑀢𑀸𑀦𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀘 𑀘𑀺𑀭𑀓𑀸𑀮𑀁𑀧𑀺 𑀧𑀯𑀢𑁆𑀢𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀘 𑀢𑀸𑀦𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀸𑀦𑀺 𑀢𑀲𑁆𑀲𑀁 𑀇𑀢𑁆𑀣𑀺𑀬𑀁 𑀭𑀚𑁆𑀚𑀦𑀮𑁄𑀪𑀫𑀽𑀮𑀓𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀮𑁄𑀪𑁄 𑀢𑁂𑀲𑀁 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼 𑀘, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄 𑀘. 𑀢𑀲𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑁄. 𑀏𑀲 𑀦𑀬𑁄 𑀲𑁂𑀲𑀸𑀦𑀺 𑀭𑀚𑁆𑀚𑀦𑀻𑀬𑀯𑀢𑁆𑀣𑀽𑀦𑀺 𑀆𑀭𑀩𑁆𑀪𑀭𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀲𑀼 𑀮𑁄𑀪𑁂𑀲𑀼, 𑀤𑀼𑀲𑁆𑀲𑀦𑀻𑀬𑀯𑀢𑁆𑀣𑀽𑀦𑀺 𑀆𑀭𑀩𑁆𑀪 𑀤𑀼𑀲𑁆𑀲𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀲𑀼 𑀤𑁄𑀲𑁂𑀲𑀼, 𑀫𑀼𑀬𑁆𑀳𑀦𑀻𑀬𑀯𑀢𑁆𑀣𑀽𑀦𑀺 𑀆𑀭𑀩𑁆𑀪 𑀫𑀼𑀬𑁆𑀳𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀲𑀼 𑀫𑁄𑀳𑁂𑀲𑀼 𑀘.

𑀢𑀢𑁆𑀣 ¶ 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀫𑀽𑀮𑀸𑀦𑀺 𑀲𑀬𑀁 𑀅𑀦𑁆𑀢𑁄𑀧𑀣𑀯𑀺𑀬𑀁 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀕𑀳𑁂𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀬𑀸𑀯 𑀅𑀕𑁆𑀕𑀸 𑀅𑀪𑀺𑀳𑀭𑀦𑁆𑀢𑀺, 𑀢𑁂𑀦 𑀭𑀼𑀓𑁆𑀔𑁄 𑀘𑀺𑀭𑀓𑀸𑀮𑀁 𑀯𑀟𑁆𑀠𑀫𑀸𑀦𑁄 𑀢𑀺𑀝𑁆𑀞𑀢𑀺. 𑀢𑀣𑀸 𑀮𑁄𑀪𑁄 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺 𑀭𑀚𑁆𑀚𑀦𑀯𑀲𑁂𑀦 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀺𑀬𑀭𑀽𑀧𑀭𑀲𑀜𑁆𑀘 𑀲𑀸𑀢𑀭𑀽𑀧𑀭𑀲𑀜𑁆𑀘 𑀕𑀳𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀬𑀸𑀯 𑀓𑀸𑀬𑀯𑀘𑀻𑀯𑀻𑀢𑀺𑀓𑁆𑀓𑀫𑀸 𑀅𑀪𑀺𑀳𑀭𑀢𑀺, 𑀓𑀸𑀬 𑀯𑀻𑀢𑀺𑀓𑁆𑀓𑀫𑀁 𑀯𑀸 𑀯𑀘𑀻𑀯𑀻𑀢𑀺𑀓𑁆𑀓𑀫𑀁 𑀯𑀸 𑀧𑀸𑀧𑁂𑀢𑀺. 𑀢𑀣𑀸 𑀤𑁄𑀲𑁄 𑀘 𑀤𑀼𑀲𑁆𑀲𑀦 𑀯𑀲𑁂𑀦 𑀅𑀧𑁆𑀧𑀺𑀬𑀭𑀽𑀧𑀭𑀲𑀜𑁆𑀘 𑀅𑀲𑀸𑀢𑀭𑀽𑀧𑀭𑀲𑀜𑁆𑀘 𑀕𑀳𑁂𑀢𑁆𑀯𑀸, 𑀫𑁄𑀳𑁄 𑀘 𑀫𑀼𑀬𑁆𑀳𑀦𑀯𑀲𑁂𑀦 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀦𑀺𑀭𑀢𑁆𑀣𑀓𑀘𑀺𑀢𑁆𑀢𑀸𑀘𑀸𑀭𑀭𑀲𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀪𑀺𑀳𑀭𑀦𑁆𑀢𑀸 𑀢𑀬𑁄 𑀥𑀫𑁆𑀫𑀸 𑀭𑀚𑁆𑀚𑀦𑀻𑀬𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀫𑁄𑀤𑀫𑀸𑀦𑁂 𑀧𑀫𑁄𑀤𑀫𑀸𑀦𑁂 𑀓𑀭𑁄𑀦𑁆𑀢𑁄 𑀯𑀺𑀬 𑀘𑀺𑀭 𑀓𑀸𑀮𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂𑀲𑀼 𑀘 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀲𑀳𑀚𑀸𑀢𑀭𑀽𑀧𑀓𑀮𑀸𑀧𑀸𑀧𑀺 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺𑀬𑁂𑀯. 𑀢𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀅𑀪𑀺𑀳𑀭𑀢𑀻𑀢𑀺 𑀤𑁆𑀯𑁂 𑀧𑀺𑀬𑀭𑀽𑀧 𑀲𑀸𑀢𑀭𑀽𑀧𑀭𑀲𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀦𑁆𑀢𑀺𑀓𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀓𑁆𑀓𑀧𑀓𑁆𑀔𑁂 𑀲𑁄 𑀧𑀼𑀭𑀺𑀲𑁄 𑀬𑀤𑀸𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀢𑀺, 𑀢𑀤𑀸 𑀲𑁄 𑀢𑀁 𑀘𑀺𑀢𑁆𑀢𑀁𑀚𑀳𑀢𑀺, 𑀢𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀅𑀮𑁄𑀪𑁄 𑀲𑀜𑁆𑀚𑀸 𑀬𑀢𑀺. 𑀧𑀼𑀩𑁆𑀩𑁂 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀮𑁄𑀪𑀫𑀽𑀮𑀓𑀸𑀦𑀺 𑀅𑀲𑀼𑀤𑁆𑀥𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀯𑀢𑁆𑀢𑀦𑁆𑀢𑀺. 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀓𑀸𑀮𑁂𑀧𑀺 𑀅𑀮𑁄𑀪𑀫𑀽𑀮𑀓𑀸𑀦𑀺 𑀲𑀼𑀤𑁆𑀥𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀯𑀢𑁆𑀢𑀦𑁆𑀢𑀺. 𑀧𑀩𑁆𑀩𑀚𑀺𑀢 𑀲𑀻𑀮𑀲𑀁𑀯𑀭𑀸𑀦𑀺 𑀯𑀸 𑀛𑀸𑀦𑀧𑀭𑀺𑀓𑀫𑁆𑀫𑀸𑀦𑀺 𑀯𑀸 𑀅𑀧𑁆𑀧𑀦𑀸𑀛𑀸𑀦𑀸𑀦𑀺 𑀯𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀅𑀮𑁄𑀪𑁄 𑀢𑁂𑀲𑀁 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼 𑀘 𑀳𑁄𑀢𑀺, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀘. 𑀢𑀲𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀮𑁄𑀪 𑀧𑀝𑀺𑀧𑀓𑁆𑀔𑁂𑀲𑀼 𑀅𑀮𑁄𑀪𑁂𑀲𑀼, 𑀤𑁄𑀲𑀧𑀝𑀺𑀧𑀓𑁆𑀔𑁂𑀲𑀼 𑀅𑀤𑁄𑀲𑁂𑀲𑀼, 𑀫𑁄𑀳 𑀧𑀝𑀺𑀧𑀓𑁆𑀔𑁂𑀲𑀼 𑀅𑀫𑁄𑀳𑁂𑀲𑀼 𑀘.

𑀢𑀢𑁆𑀣 𑀭𑀼𑀓𑁆𑀔𑀫𑀽𑀮𑀸𑀦𑀺 𑀯𑀺𑀬 𑀅𑀮𑁄𑀪𑁄 𑀮𑁄𑀪𑀦𑁂𑀬𑁆𑀬𑀯𑀢𑁆𑀣𑀽𑀲𑀼 𑀮𑁄𑀪𑀁 𑀧𑀳𑀸𑀬 𑀮𑁄𑀪𑀯𑀺𑀯𑁂𑀓𑀲𑀼𑀔𑀭𑀲𑀁 𑀯𑀟𑁆𑀠𑁂𑀢𑁆𑀯𑀸 𑀢𑁂𑀦 𑀲𑀼𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀫𑁄𑀤𑀫𑀸𑀦𑁂 𑀧𑀫𑁄𑀤𑀫𑀸𑀦𑁂 𑀓𑀭𑁄𑀦𑁆𑀢𑁄 𑀯𑀺𑀬 𑀬𑀸𑀯 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀸 𑀯𑀸 𑀬𑀸𑀯 𑀫𑀕𑁆𑀕𑀨𑀮𑀲𑀼𑀔𑀸 𑀯𑀸 𑀯𑀟𑁆𑀠𑀸𑀧𑁂𑀢𑀺. 𑀢𑀣𑀸 𑀅𑀤𑁄𑀲𑁄 𑀘 𑀤𑁄𑀲𑀦𑁂𑀬𑁆𑀬𑀯𑀢𑁆𑀣𑀽𑀲𑀼 𑀤𑁄𑀲𑀯𑀺𑀯𑁂𑀓𑀲𑀼𑀔𑀭𑀲𑀁 𑀯𑀟𑁆𑀠𑁂𑀢𑁆𑀯𑀸, 𑀅𑀫𑁄𑀳𑁄 𑀘 𑀫𑁄𑀳𑀦𑁂𑀬𑁆𑀬𑀯𑀢𑁆𑀣𑀽𑀲𑀼 𑀫𑁄𑀳𑀯𑀺𑀯𑁂𑀓𑀲𑀼𑀔𑀭𑀲𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀯𑀟𑁆𑀠𑀸𑀧𑁂𑀦𑁆𑀢𑀸 𑀢𑀬𑁄 𑀥𑀫𑁆𑀫𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀫𑁄𑀤𑀫𑀸𑀦𑁂 𑀧𑀫𑁄𑀤𑀫𑀸𑀦𑁂 𑀓𑀭𑁄𑀦𑁆𑀢𑁄 𑀯𑀺𑀬 𑀘𑀺𑀭 𑀓𑀸𑀮𑀁𑀧𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂𑀲𑀼 𑀘 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀲𑀳𑀚𑀸𑀢𑀭𑀽𑀧𑀓𑀮𑀸𑀧𑀸𑀧𑀺 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺𑀬𑁂𑀯.

𑀢𑀢𑁆𑀣 ¶ 𑀮𑁄𑀪𑀯𑀺𑀯𑁂𑀓𑀲𑀼𑀔𑀭𑀲𑀦𑁆𑀢𑀺 𑀯𑀺𑀯𑀺𑀘𑁆𑀘𑀦𑀁 𑀯𑀺𑀕𑀫𑀦𑀁 𑀯𑀺𑀯𑁂𑀓𑁄. 𑀮𑁄𑀪𑀲𑁆𑀲 𑀯𑀺𑀯𑁂𑀓𑁄 𑀮𑁄𑀪𑀯𑀺𑀯𑁂𑀓𑁄. 𑀮𑁄𑀪𑀯𑀺𑀯𑁂𑀓𑁂 𑀲𑀼𑀔𑀁 𑀮𑁄𑀪𑀯𑀺𑀯𑁂𑀓𑀲𑀼𑀔𑀁. 𑀮𑁄𑀪𑀯𑀺𑀯𑁂𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑁂𑀯 𑀭𑀲𑁄 𑀮𑁄𑀪𑀯𑀺𑀯𑁂𑀓𑀲𑀼𑀔𑀭𑀲𑁄𑀢𑀺 𑀲𑀫𑀸𑀲𑁄. 𑀅𑀬𑀁 𑀅𑀪𑀺𑀥𑀫𑁆𑀫𑁂 𑀧𑀝𑁆𑀞𑀸𑀦𑀦𑀬𑁄.

𑀳𑀢𑁆𑀢𑀦𑁆𑀢𑀦𑀬𑁄 𑀧𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁄 𑀫𑁄𑀳𑁄 𑀘 𑀢𑀡𑁆𑀳𑀸𑀲𑀗𑁆𑀔𑀸𑀢𑁄 𑀮𑁄𑀪𑁄 𑀘𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀲𑀩𑁆𑀩𑁂𑀲𑀁𑀧𑀺 𑀯𑀝𑁆𑀝𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀤𑁄𑀲𑁄 𑀧𑀦 𑀮𑁄𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑀪𑀽𑀢𑀁 𑀧𑀸𑀧𑀫𑀽𑀮𑀁 𑀳𑁄𑀢𑀺. 𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁄 𑀅𑀫𑁄𑀳𑁄 𑀘 𑀦𑀺𑀓𑁆𑀔𑀫𑀥𑀸𑀢𑀼𑀲𑀗𑁆𑀔𑀸𑀢𑁄 𑀅𑀮𑁄𑀪𑁄 𑀘𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀯𑀺𑀯𑀝𑁆𑀝𑀥𑀫𑁆𑀫𑀸𑀦𑀁 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀅𑀤𑁄𑀲𑁄 𑀧𑀦 𑀅𑀮𑁄𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑀪𑀽𑀢𑀁 𑀓𑀮𑁆𑀬𑀸𑀡𑀫𑀽𑀮𑀁 𑀳𑁄𑀢𑀺. 𑀏𑀯𑀁 𑀙𑀩𑁆𑀩𑀺𑀥𑀸𑀦𑀺 𑀫𑀽𑀮𑀸𑀦𑀺 𑀲𑀳𑀚𑀸𑀢𑀸𑀦𑀁𑀧𑀺 𑀅𑀲𑀳𑀚𑀸𑀢𑀸𑀦𑀁𑀧𑀺 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀲𑀼𑀢𑁆𑀢𑀦𑁆𑀢𑁂𑀲𑀼 𑀦𑀬𑁄. 𑀳𑁂𑀢𑀼𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀢𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀭𑀽𑀧𑀥𑀫𑁆𑀫𑀸 𑀲𑀩𑁆𑀩𑀁𑀧𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀸𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄. 𑀦 𑀳𑀺 𑀲𑁄 𑀦𑀸𑀫 𑀏𑀓𑁄𑀧𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁄 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀲𑀗𑁆𑀔𑁂𑀧𑀢𑁄 𑀧𑀦 𑀆𑀭𑀫𑁆𑀫𑀡𑀁 𑀙𑀩𑁆𑀩𑀺𑀥𑀁 𑀳𑁄𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀭𑀲𑀸𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺.

𑀓𑀢𑀫𑁂 𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀦 𑀳𑀺 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀬𑀁 𑀘𑀺𑀢𑁆𑀢𑀁 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀧𑀯𑀢𑁆𑀢𑀢𑀺.

𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀖𑀸𑀦𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀲𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀺𑀯𑀺𑀥𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀢𑀺𑀯𑀺𑀥𑀲𑁆𑀲 𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀯𑀸 𑀲𑀩𑁆𑀩𑀸𑀦𑀺 𑀢𑁂𑀓𑀸𑀮𑀺𑀓𑀸𑀦𑀺 𑀓𑀸𑀮𑀯𑀺𑀫𑀼𑀢𑁆𑀢𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺 𑀯𑀸 𑀙 𑀲𑀢𑁆𑀢𑀢𑀺𑀯𑀺𑀥𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄.

𑀓𑁂𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀓𑁂𑀦𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺. 𑀘𑀺𑀢𑁆𑀢 𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺.

𑀆𑀮𑀫𑁆𑀩𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 ¶ 𑀘𑁂𑀢𑁆𑀣 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀦𑀸𑀫 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑀓𑀺𑀭𑀺𑀬𑀸, 𑀆𑀭𑀫𑁆𑀫𑀡𑀼𑀧𑀸𑀤𑀸𑀦 𑀓𑀺𑀭𑀺𑀬𑀸.

𑀬𑀣𑀸 𑀳𑀺 𑀮𑁄𑀓𑁂 𑀅𑀬𑁄𑀥𑀸𑀢𑀼𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁂𑀦 𑀅𑀬𑁄𑀓𑀦𑁆𑀢𑀓𑁄 𑀦𑀸𑀫 𑀮𑁄𑀳𑀥𑀸𑀢𑀼𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀲𑁄 𑀅𑀬𑁄𑀔𑀦𑁆𑀥𑀲𑀫𑀻𑀧𑀁 𑀲𑀫𑁆𑀧𑀢𑁆𑀢𑁄 𑀢𑀁 𑀅𑀬𑁄𑀔𑀦𑁆𑀥𑀁 𑀓𑀸𑀫𑁂𑀦𑁆𑀢𑁄 𑀯𑀺𑀬 𑀇𑀘𑁆𑀙𑀦𑁆𑀢𑁄 𑀯𑀺𑀬 𑀅𑀬𑁄𑀔𑀦𑁆𑀥𑀸𑀪𑀺𑀫𑀼𑀔𑁄 𑀘𑀜𑁆𑀘𑀮𑀢𑀺. 𑀲𑀬𑀁 𑀯𑀸 𑀢𑀁 𑀅𑀬𑁄𑀔𑀦𑁆𑀥𑀁 𑀉𑀧𑀕𑀘𑁆𑀙𑀢𑀺. 𑀅𑀬𑁄𑀔𑀦𑁆𑀥𑀁 𑀯𑀸 𑀅𑀢𑁆𑀢𑀸𑀪𑀺𑀫𑀼𑀔𑀁 𑀆𑀓𑀟𑁆𑀠𑀢𑀺, 𑀅𑀬𑁄𑀔𑀦𑁆𑀥𑁄 𑀢𑀤𑀪𑀺𑀫𑀼𑀔𑁄 𑀘𑀜𑁆𑀘𑀮𑀢𑀺, 𑀢𑀁 𑀯𑀸 𑀉𑀧𑀕𑀘𑁆𑀙𑀢𑀺. 𑀅𑀬𑀁 𑀅𑀬𑁄𑀓𑀦𑁆𑀢𑀓𑀲𑁆𑀲 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀦𑀸𑀫. 𑀏𑀯𑀫𑁂𑀯 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀤𑀝𑁆𑀞𑀩𑁆𑀩𑀸. 𑀦 𑀓𑁂𑀯𑀮𑀁 𑀆𑀭𑀫𑁆𑀫𑀡𑁂𑀲𑀼 𑀆𑀮𑀫𑁆𑀩𑀡 𑀫𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀢𑁆𑀢𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸𑀕𑀫𑀦𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀬𑀣𑀸 𑀢𑀁 𑀪𑁂𑀭𑀺𑀢𑀮𑁂 𑀪𑁂𑀭𑀺𑀲𑀤𑁆𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀳𑀢𑁆𑀣𑁂𑀦 𑀧𑀳𑀭𑀡𑀓𑀸𑀮𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀯𑀻𑀡𑀸𑀲𑀤𑁆𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀻𑀡𑀸𑀢𑀦𑁆𑀢𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀻𑀡𑀸𑀤𑀦𑁆𑀢𑀓𑁂𑀦 𑀧𑀳𑀭𑀡𑀓𑀸𑀮𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀓𑀸𑀮𑁂𑀧𑀺 𑀧𑀼𑀩𑁆𑀩𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢 𑀫𑀸𑀕𑀢𑀸𑀦𑀺 𑀓𑀫𑁆𑀫 𑀓𑀫𑁆𑀫𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀏𑀯 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺. 𑀆𑀭𑀫𑁆𑀫𑀡𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀯𑀺𑀥𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀲𑀳 𑀚𑀸𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀘. 𑀢𑀢𑁆𑀣 𑀓𑀢𑀫𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀅𑀢𑀺𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺 𑀅𑀢𑀺𑀓𑀦𑁆𑀢𑀸𑀦𑀺 𑀅𑀢𑀺𑀫𑀦𑀸𑀧𑀸𑀦𑀺 𑀕𑀭𑀼𑀓𑀢𑀸𑀦𑀺. 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄. 𑀢𑀢𑁆𑀣 𑀅𑀢𑀺𑀇𑀝𑁆𑀞𑀸𑀦𑀻𑀢𑀺 𑀲𑀪𑀸𑀯𑀢𑁄 𑀇𑀝𑁆𑀞𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀅𑀦𑀺𑀝𑁆𑀞𑀸𑀦𑀺 𑀯𑀸, 𑀢𑁂𑀦 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀢𑀺𑀇𑀘𑁆𑀙𑀺𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀇𑀥 𑀅𑀢𑀺𑀇𑀝𑁆𑀞𑀸𑀦𑀺 𑀦𑀸𑀫.

𑀢𑀸𑀦𑀺 𑀧𑀦 𑀥𑀫𑁆𑀫𑀢𑁄 𑀤𑁆𑀯𑁂 𑀤𑁄𑀲𑀫𑀽𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀘 𑀤𑁆𑀯𑁂 𑀫𑁄𑀫𑀽𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀘 𑀤𑀼𑀓𑁆𑀔𑀲𑀳𑀕𑀢𑀓𑀸𑀬𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺 𑀘 𑀭𑀽𑀧𑀸𑀭𑀽𑀧 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀅𑀢𑀺𑀇𑀝𑁆𑀞𑀭𑀽𑀧𑀸𑀦𑀺 𑀘 𑀳𑁄𑀦𑁆𑀢𑀺.

𑀢𑁂𑀲𑀼𑀧𑀺 ¶ 𑀓𑀸𑀫𑀸𑀭𑀫𑁆𑀫𑀡𑀸𑀦𑀺 𑀕𑀭𑀼𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀭𑀫𑁆𑀫𑀡𑀸 𑀥𑀺𑀧𑀢𑀺𑀧𑀘𑁆𑀘𑀬𑁄. 𑀕𑀭𑀼𑀁 𑀅𑀓𑀭𑁄𑀦𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀛𑀸𑀦𑀮𑀸𑀪𑀺𑀦𑁄 𑀧𑀦 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸𑀦𑀺 𑀫𑀳𑀕𑁆𑀕𑀢𑀛𑀸𑀦𑀸𑀦𑀺 𑀅𑀭𑀺𑀬𑀲𑀸𑀯𑀓𑀸 𑀘 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀕𑀭𑀼𑀁 𑀅𑀓𑀭𑁄𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺.

𑀓𑀢𑀫𑁂 𑀥𑀫𑁆𑀫𑀸 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀅𑀝𑁆𑀞 𑀮𑁄𑀪 𑀫𑀽𑀮𑀘𑀺𑀢𑁆𑀢𑀸𑀦𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀓𑀸𑀫𑀸𑀯𑀘𑀭 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀢𑀢𑁆𑀣 𑀮𑁄𑀓𑀺𑀬𑀸𑀦𑀺 𑀙𑀴𑀸𑀭𑀫𑁆𑀫𑀡𑀸𑀦𑀺 𑀮𑁄𑀪𑀫𑀽𑀮𑀘𑀺𑀢𑁆𑀢𑀸𑀦𑀁 𑀧𑀘𑁆𑀘𑀬𑁄. 𑀲𑀢𑁆𑀢𑀭𑀲 𑀮𑁄𑀓𑀺𑀬𑀓𑀼𑀲𑀮𑀸𑀦𑀺 𑀘𑀢𑀼𑀦𑁆𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢 𑀓𑀼𑀲𑀮𑀸𑀦𑀁. 𑀢𑀸𑀦𑀺 𑀓𑀼𑀲𑀮𑀸𑀦𑀺𑀘𑁂𑀯 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀸𑀦𑀺 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀘𑀢𑀼𑀦𑁆𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀦𑀁. 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀸𑀦𑀺 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀘𑀢𑀼𑀦𑁆𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀸𑀦𑀁. 𑀦𑀺𑀩𑁆𑀩𑀸𑀦𑀁 𑀅𑀝𑁆𑀞𑀦𑁆𑀦𑀁 𑀮𑁄𑀓𑀼𑀢𑁆𑀢𑀭 𑀘𑀺𑀢𑁆𑀢𑀸𑀦𑀦𑁆𑀢𑀺.

𑀓𑁂𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀓𑁂𑀦𑀝𑁆𑀞𑁂𑀦 𑀅𑀥𑀺𑀧𑀢𑀺. 𑀆𑀮𑀫𑁆𑀩𑀺 𑀢𑀩𑁆𑀩𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀅𑀥𑀺𑀧𑀢𑀺. 𑀓𑁄 𑀆𑀥𑀺𑀧𑀘𑁆𑀘𑀝𑁆𑀞𑁄. 𑀅𑀢𑁆𑀢𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀇𑀲𑁆𑀲𑀭𑀪𑀸𑀯𑁄 𑀆𑀥𑀺𑀧𑀘𑁆𑀘𑀝𑁆𑀞𑁄. 𑀮𑁄𑀓𑁂 𑀲𑀸𑀫𑀺𑀓𑀸 𑀯𑀺𑀬 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬 𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸, 𑀤𑀸𑀲𑀸 𑀯𑀺𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸.

𑀲𑀼𑀢𑀲𑁄𑀫𑀚𑀸𑀢𑀓𑁂 𑀭𑀸𑀚𑀸 𑀧𑁄𑀭𑀺𑀲𑀸𑀤𑁄 𑀫𑀦𑀼𑀲𑁆𑀲𑀫𑀁𑀲𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀫𑀦𑀼𑀲𑁆𑀲𑀫𑀁𑀲𑀳𑁂𑀢𑀼 𑀭𑀚𑁆𑀚𑀁 𑀧𑀳𑀸𑀬 𑀅𑀭𑀜𑁆𑀜𑁂 𑀯𑀺𑀘𑀭𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀫𑀁𑀲𑁂 𑀕𑀦𑁆𑀥𑀭𑀲 𑀥𑀫𑁆𑀫𑀸 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄. 𑀭𑀜𑁆𑀜𑁄 𑀧𑁄𑀭𑀺𑀲𑀸𑀤𑀲𑁆𑀲 𑀮𑁄𑀪𑀫𑀽𑀮𑀘𑀺𑀢𑁆𑀢𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄. 𑀭𑀸𑀚𑀸 𑀲𑀼𑀢 𑀲𑁄𑀫𑁄 𑀲𑀘𑁆𑀘𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀲𑀘𑁆𑀘𑀥𑀫𑁆𑀫𑀳𑁂𑀢𑀼 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀜𑁆𑀘 𑀜𑀸𑀢𑀺 𑀲𑀗𑁆𑀖𑀜𑁆𑀘 𑀅𑀢𑁆𑀢𑀦𑁄 𑀚𑀻𑀯𑀺𑀢𑀜𑁆𑀘 𑀙𑀝𑁆𑀝𑁂𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀁 𑀉𑀧𑀕𑀢𑁄. 𑀢𑀢𑁆𑀣 𑀲𑀘𑁆𑀘𑀥𑀫𑁆𑀫𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄. 𑀭𑀜𑁆𑀜𑁄 𑀲𑀼𑀢𑀲𑁄𑀫𑀲𑁆𑀲 𑀓𑀼𑀲𑀮𑀘𑀺𑀢𑁆𑀢𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄. 𑀏𑀲𑀦𑀬𑁄 𑀲𑀩𑁆𑀩𑁂𑀲𑀼 𑀕𑀭𑀼𑀓𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼.

𑀓𑀢𑀫𑁄 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑁄. 𑀅𑀥𑀺𑀧𑀢𑀺𑀪𑀸𑀯𑀁 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄, 𑀙𑀦𑁆𑀤𑁄 𑀘𑀺𑀢𑁆𑀢𑀁 𑀯𑀻𑀭𑀺𑀬𑀁 𑀯𑀻𑀫𑀁𑀲𑀸.

𑀓𑀢𑀫𑁂 𑀥𑀫𑁆𑀫𑀸 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀅𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘 𑀅𑀥𑀺𑀧𑀢𑀺𑀲𑀫𑀼𑀝𑁆𑀞𑀺𑀢𑀸 𑀘𑀺𑀢𑁆𑀢𑀚𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀲𑀳𑀚𑀸𑀢𑁄, 𑀓𑁂𑀦𑀝𑁆𑀞𑁂𑀦 𑀅𑀥𑀺𑀧𑀢𑀺.

𑀲𑀳𑀼𑀧𑁆𑀧𑀸𑀤𑀦𑀝𑁆𑀞𑁂𑀦 𑀲𑀳𑀚𑀸𑀢𑁄, 𑀲𑀳𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀅𑀥𑀺𑀧𑀢𑀺. 𑀢𑀢𑁆𑀣 𑀲𑀳𑀼𑀧𑁆𑀧𑀸𑀤𑀦𑀝𑁆𑀞𑁂𑀦𑀸𑀢𑀺 ¶ 𑀬𑁄 𑀥𑀫𑁆𑀫𑁄 𑀲𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑀸 𑀲𑀳𑀚𑀸𑀢𑀥𑀫𑁆𑀫𑁂 𑀘 𑀅𑀢𑁆𑀢𑀦𑀸 𑀲𑀳𑁂𑀯 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀲 𑀅𑀢𑁆𑀢𑀦𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀲𑀳𑀼𑀧𑁆𑀧𑀸𑀤𑀦𑀝𑁆𑀞𑁂𑀦.

𑀅𑀪𑀺𑀪𑀯𑀦𑀝𑁆𑀞𑁂𑀦𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀡𑀝𑁆𑀞𑁂𑀦. 𑀬𑀣𑀸 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀓𑀮𑀤𑀻𑀧𑀯𑀸𑀲𑀺𑀦𑁄 𑀅𑀪𑀺𑀪𑀯𑀦𑁆𑀢𑁄 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀢𑀺, 𑀲𑀓𑀮𑀤𑀻𑀧𑀯𑀸𑀲𑀺𑀦𑁄 𑀘 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀅𑀥𑀺𑀧𑀢𑀺𑀝𑁆𑀞𑀸𑀦𑀧𑀢𑁆𑀢𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀺, 𑀲𑀳𑀚𑀸𑀢𑀥𑀫𑁆𑀫𑀸 𑀘 𑀢𑁂𑀲𑀁 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀬𑀣𑀸 𑀯𑀸 𑀲𑀺𑀮𑀸𑀣𑀫𑁆𑀪𑁂 𑀧𑀣𑀯𑀺𑀥𑀸𑀢𑀼 𑀉𑀤𑀓𑀓𑁆𑀔𑀦𑁆𑀥𑁂 𑀆𑀧𑁄𑀥𑀸𑀢𑀼 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀢𑁂𑀚𑁄𑀥𑀸𑀢𑀼 𑀯𑀸𑀢𑀓𑁆𑀔𑀦𑁆𑀥𑁂 𑀯𑀸𑀬𑁄𑀥𑀸𑀢𑀼 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀅𑀪𑀺𑀪𑀯𑀦𑁆𑀢𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀫𑀸𑀧𑁂𑀦𑁆𑀢𑀺, 𑀲𑀳𑀚𑀸𑀢𑀥𑀸𑀢𑀼𑀬𑁄 𑀘 𑀢𑀸𑀲𑀁 𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀅𑀥𑀺𑀧𑀢𑀺𑀝𑁆𑀞𑀸𑀦𑀧𑀢𑁆𑀢𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀳𑀚𑀸𑀢𑀥𑀫𑁆𑀫𑁂 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀫𑀸𑀧𑁂𑀦𑁆𑀢𑀺, 𑀲𑀳𑀚𑀸𑀢𑀥𑀫𑁆𑀫𑀸 𑀘 𑀢𑁂𑀲𑀁 𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀪𑀺𑀪𑀯𑀦𑀝𑁆𑀞𑁂𑀦.

𑀏𑀢𑁆𑀣 𑀯𑀤𑁂𑀬𑁆𑀬𑀼𑀁, 𑀬𑀤𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀅𑀥𑀺𑀧𑀢𑀺𑀦𑀸𑀫 𑀲𑀺𑀬𑀸. 𑀏𑀯𑀁 𑀲𑀢𑀺 𑀢𑀺𑀝𑁆𑀞𑀢𑀼 𑀙𑀦𑁆𑀤𑁄, 𑀮𑁄𑀪𑁄 𑀏𑀯 𑀅𑀥𑀺𑀧𑀢𑀺𑀦𑀸𑀫 𑀲𑀺𑀬𑀸, 𑀲𑁄 𑀳𑀺 𑀙𑀦𑁆𑀤𑀢𑁄𑀧𑀺 𑀩𑀮𑀯𑀢𑀭𑁄 𑀳𑀼𑀢𑁆𑀯𑀸 𑀲𑀳 𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑁄 𑀧𑀯𑀢𑁆𑀢𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀩𑀸𑀮𑀧𑀼𑀣𑀼𑀚𑁆𑀚𑀦𑁂𑀲𑀼 𑀏𑀯 𑀮𑁄𑀪𑁄 𑀙𑀦𑁆𑀤𑀢𑁄 𑀩𑀮𑀯𑀢𑀭𑁄 𑀳𑁄𑀢𑀺, 𑀧𑀡𑁆𑀟𑀺𑀢𑁂𑀲𑀼 𑀧𑀦 𑀙𑀦𑁆𑀤𑁄 𑀏𑀯 𑀮𑁄𑀪𑀢𑁄 𑀩𑀮𑀯𑀢𑀭𑁄 𑀳𑀼𑀢𑁆𑀯𑀸 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺 𑀪𑀯𑀦𑁆𑀢𑁄 𑀧𑀯𑀢𑁆𑀢𑀢𑀺. 𑀲𑀘𑁂 𑀳𑀺 𑀮𑁄𑀪𑁄 𑀏𑀯 𑀙𑀦𑁆𑀤𑀢𑁄 𑀩𑀮𑀯𑀢𑀭𑁄 𑀲𑀺𑀬𑀸, 𑀓𑀣𑀁 𑀇𑀫𑁂 𑀲𑀢𑁆𑀢𑀸 𑀮𑁄𑀪𑀲𑁆𑀲 𑀳𑀢𑁆𑀣𑀕𑀢𑀸 𑀪𑀯𑀲𑀫𑁆𑀧𑀢𑁆𑀢𑀺 𑀪𑁄𑀕𑀲𑀫𑁆𑀫𑀢𑁆𑀢𑀺𑀬𑁄 𑀙𑀝𑁆𑀝𑁂𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀥𑀫𑁆𑀫𑁂 𑀧𑀽𑀭𑁂𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑁄 𑀏𑀯 𑀮𑁄𑀪𑀢𑁄 𑀩𑀮𑀯𑀢𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑁂 𑀲𑀢𑁆𑀢𑀸 𑀮𑁄𑀪𑀲𑁆𑀲 𑀳𑀢𑁆𑀣𑀕𑀢𑀸 𑀪𑀯𑀲𑀫𑁆𑀧𑀢𑁆𑀢𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀙𑀝𑁆𑀝𑁂𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀥𑀫𑁆𑀫𑁂 𑀧𑀽𑀭𑁂𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀦𑁆𑀢𑀺. 𑀢𑀲𑁆𑀫𑀸 𑀙𑀦𑁆𑀤𑁄 𑀏𑀯 𑀮𑁄𑀪𑀢𑁄 𑀩𑀮𑀯𑀢𑀭𑁄 𑀳𑁄𑀢𑀺, 𑀙𑀦𑁆𑀤𑁄 𑀏𑀯 𑀅𑀥𑀺𑀧𑀢𑀺, 𑀦 𑀮𑁄𑀪𑁄𑀢𑀺. 𑀏𑀲 𑀦𑀬𑁄 𑀤𑁄𑀲𑀸𑀤𑀻𑀲𑀼𑀧𑀻𑀢𑀺.

𑀢𑀢𑁆𑀣 𑀮𑁄𑀓𑁂 𑀫𑀳𑀦𑁆𑀢𑁂𑀲𑀼 𑀲𑀼𑀤𑀼𑀓𑁆𑀓𑀭𑁂𑀲𑀼 𑀧𑀼𑀭𑀺𑀲𑀓𑀫𑁆𑀫𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀲𑀼 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀣𑀁.

𑀳𑀻𑀦𑀘𑁆𑀙𑀦𑁆𑀤𑀸 𑀩𑀳𑀼𑀚𑁆𑀚𑀦𑀸 𑀫𑀳𑀦𑁆𑀢𑀸𑀦𑀺 𑀲𑀼𑀤𑀼𑀓𑁆𑀓𑀭𑀸𑀦𑀺 𑀧𑀼𑀭𑀺𑀲𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀘𑁆𑀙𑀦𑁆𑀤𑀸 𑀳𑁄𑀦𑁆𑀢𑀺. 𑀓𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀅𑀯𑀺𑀲𑀬𑁄𑀢𑀺 𑀦𑀺𑀭𑀧𑁂𑀓𑁆𑀔𑀸 𑀞𑀧𑁂𑀦𑁆𑀢𑀺. 𑀙𑀦𑁆𑀤𑀸𑀥𑀺𑀓𑁄 𑀧𑀦 𑀢𑀸𑀤𑀺𑀲𑀸𑀦𑀺 𑀧𑀼𑀭𑀺𑀲𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀉𑀕𑁆𑀕𑀢𑀘𑁆𑀙𑀦𑁆𑀤𑁄 𑀳𑁄𑀢𑀺, 𑀅𑀢𑀺𑀯𑀺𑀬 ¶ 𑀓𑀸𑀢𑀼𑀁 𑀇𑀘𑁆𑀙𑀢𑀺, 𑀫𑀫 𑀯𑀺𑀲𑀬𑁄 𑀏𑀲𑁄𑀢𑀺 𑀅𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀲𑁄 𑀙𑀦𑁆𑀤𑁂𑀦 𑀅𑀪𑀺𑀓𑀟𑁆𑀠𑀺𑀢𑁄 𑀬𑀸𑀯 𑀢𑀁 𑀓𑀫𑁆𑀫𑀁 𑀦 𑀲𑀺𑀚𑁆𑀛𑀢𑀺, 𑀢𑀸𑀯 𑀅𑀦𑁆𑀢𑀭𑀸 𑀢𑀁 𑀓𑀫𑁆𑀫𑀁 𑀙𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀅𑀢𑀺𑀫𑀳𑀦𑁆𑀢𑀁𑀧𑀺 𑀢𑀁 𑀓𑀫𑁆𑀫𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑀺𑀤𑁆𑀥𑀁 𑀪𑀯𑀺𑀲𑁆𑀲𑀢𑀺.

𑀳𑀻𑀦𑀯𑀻𑀭𑀺𑀬𑀸 𑀘 𑀩𑀳𑀼𑀚𑁆𑀚𑀦𑀸 𑀢𑀸𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢 𑀯𑀻𑀭𑀺𑀬𑀸 𑀳𑁄𑀦𑁆𑀢𑀺, 𑀇𑀤𑀁 𑀫𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀩𑀳𑀼𑀁 𑀓𑀸𑀬𑀤𑀼𑀓𑁆𑀔𑀁 𑀯𑀸 𑀘𑁂𑀢𑁄𑀤𑀼𑀓𑁆𑀔𑀁 𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀯𑀢𑁆𑀢𑀦𑁆𑀢𑀺. 𑀯𑀻𑀭𑀺𑀬𑀸𑀥𑀺𑀓𑁄 𑀧𑀦 𑀢𑀸𑀤𑀺𑀲𑀸𑀦𑀺 𑀧𑀼𑀭𑀺𑀲𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀉𑀕𑁆𑀕𑀢𑀯𑀻𑀭𑀺𑀬𑁄 𑀳𑁄𑀢𑀺, 𑀇𑀤𑀸𑀦𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀓𑀸𑀢𑀼𑀁 𑀇𑀘𑁆𑀙𑀢𑀺. 𑀲𑁄 𑀘𑀺𑀭𑀓𑀸𑀮𑀁𑀧𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀩𑀳𑀼𑀁 𑀓𑀸𑀬𑀤𑀼𑀓𑁆𑀔𑀁 𑀯𑀸 𑀘𑁂𑀢𑁄𑀤𑀼𑀓𑁆𑀔𑀁 𑀯𑀸 𑀅𑀦𑀼𑀪𑀯𑀦𑁆𑀢𑁄𑀧𑀺 𑀢𑀲𑁆𑀫𑀺𑀁 𑀯𑀻𑀭𑀺𑀬 𑀓𑀫𑁆𑀫𑁂 𑀦𑀦𑀺𑀩𑁆𑀩𑀺𑀦𑁆𑀤𑀢𑀺, 𑀫𑀳𑀦𑁆𑀢𑁂𑀦 𑀓𑀫𑁆𑀫𑀯𑀻𑀭𑀺𑀬𑁂𑀦 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑁂𑀦 𑀯𑀻𑀭𑀺𑀬𑁂𑀦 𑀭𑀢𑁆𑀢𑀺𑀤𑀺𑀯𑀁 𑀔𑁂𑀧𑁂𑀦𑁆𑀢𑁄 𑀘𑀺𑀢𑁆𑀢𑀲𑀼𑀔𑀁 𑀯𑀺𑀦𑁆𑀤𑀢𑀺. 𑀏𑀯𑀜𑁆𑀘 𑀲𑀢𑀺 𑀅𑀢𑀺𑀫𑀳𑀦𑁆𑀢𑀁𑀧𑀺 𑀢𑀁 𑀓𑀫𑁆𑀫𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑀺𑀤𑁆𑀥𑀁 𑀪𑀯𑀺𑀲𑁆𑀲𑀢𑀺.

𑀳𑀻𑀦𑀘𑀺𑀢𑁆𑀢𑀸 𑀘 𑀩𑀳𑀼𑀚𑁆𑀚𑀦𑀸 𑀢𑀸𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀼𑀦 𑀆𑀭𑀫𑁆𑀫𑀡𑀁𑀧𑀺 𑀦 𑀓𑀭𑁄𑀦𑁆𑀢𑀺. 𑀘𑀺𑀢𑁆𑀢𑀸𑀥𑀺𑀓𑁄 𑀧𑀦 𑀢𑀸𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀉𑀕𑁆𑀕𑀢𑀘𑀺𑀢𑁆𑀢𑁄 𑀳𑁄𑀢𑀺, 𑀘𑀺𑀢𑁆𑀢𑀁 𑀯𑀺𑀦𑁄𑀤𑁂𑀢𑀼𑀁𑀧𑀺 𑀦 𑀲𑀓𑁆𑀓𑁄𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀢𑀢𑁆𑀣 𑀦𑀺𑀩𑀦𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀲𑁄 𑀘𑀺𑀢𑁆𑀢𑀯𑀲𑀺𑀓𑁄 𑀳𑀼𑀢𑁆𑀯𑀸 𑀘𑀺𑀭𑀓𑀸𑀮𑀁𑀧𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀩𑀳𑀼𑀁 𑀓𑀸𑀬𑀤𑀼𑀓𑁆𑀔𑀁𑀯𑀸𑀧𑀻𑀢𑀺𑀆𑀤𑀺𑀦𑀸 𑀙𑀦𑁆𑀤𑀸𑀥𑀺𑀧𑀢𑀺𑀦𑀬𑁂𑀦 𑀯𑀢𑁆𑀢𑀩𑁆𑀩𑀁.

𑀫𑀦𑁆𑀤𑀧𑀜𑁆𑀜𑀸 𑀘 𑀩𑀳𑀼𑀚𑁆𑀚𑀦𑀸 𑀢𑀸𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀧𑀜𑁆𑀜𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀸𑀦𑀁 𑀆𑀤𑀺𑀫𑁆𑀧𑀺 𑀦 𑀧𑀲𑁆𑀲𑀦𑁆𑀢𑀺, 𑀅𑀦𑁆𑀢𑀧𑀺 𑀦 𑀧𑀲𑁆𑀲𑀦𑁆𑀢𑀺, 𑀅𑀦𑁆𑀥𑀓𑀸𑀭𑁂 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀘𑀺𑀢𑁆𑀢𑀁𑀧𑀺 𑀦 𑀦𑀫𑀢𑀺. 𑀧𑀜𑁆𑀜𑀸𑀥𑀺𑀓𑁄 𑀧𑀦 𑀢𑀸𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀉𑀕𑁆𑀕𑀢𑀧𑀜𑁆𑀜𑁄 𑀳𑁄𑀢𑀺, 𑀓𑀫𑁆𑀫𑀸𑀦𑀁 𑀆𑀤𑀺𑀁𑀧𑀺 𑀧𑀲𑁆𑀲𑀢𑀺, 𑀅𑀦𑁆𑀢𑀁𑀧𑀺 𑀧𑀲𑁆𑀲𑀢𑀺, 𑀨𑀮𑀁𑀧𑀺 𑀧𑀲𑁆𑀲𑀢𑀺, 𑀆𑀦𑀺𑀲𑀁𑀲𑀁𑀧𑀺 𑀧𑀲𑁆𑀲𑀢𑀺. 𑀲𑀼𑀔𑁂𑀦 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀦𑀸𑀦𑀸𑀉𑀧𑀸𑀬𑀁𑀧𑀺 𑀧𑀲𑁆𑀲𑀢𑀺. 𑀲𑁄 𑀘𑀺𑀭𑀓𑀸𑀮𑀁𑀧𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀢𑀺𑀆𑀤𑀺𑀦𑀸 𑀯𑀻𑀭𑀺𑀬𑀸𑀥𑀺𑀧𑀢𑀺𑀦𑀬𑁂𑀦 𑀯𑀢𑁆𑀢𑀩𑁆𑀩𑀁. 𑀇𑀥 𑀧𑀦 𑀫𑀳𑀢𑀺𑀬𑀸 𑀓𑀫𑁆𑀫𑀯𑀻𑀫𑀁𑀲𑀸𑀬𑀸𑀢𑀺 𑀘 𑀢𑀸𑀤𑀺𑀲𑀺𑀬𑀸 𑀓𑀫𑁆𑀫 𑀯𑀻𑀫𑀁𑀲𑀸𑀬𑀸𑀢𑀺 𑀘 𑀯𑀢𑁆𑀢𑀩𑁆𑀩𑀁.

𑀏𑀯𑀁 𑀮𑁄𑀓𑁂 𑀫𑀳𑀦𑁆𑀢𑁂𑀲𑀼 𑀲𑀼𑀤𑀼𑀓𑁆𑀓𑀭𑁂𑀲𑀼 𑀧𑀼𑀭𑀺𑀲𑀓𑀫𑁆𑀫𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀲𑀼 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺. 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀮𑁄𑀓𑁂 𑀧𑀼𑀭𑀺𑀲𑀯𑀺𑀲𑁂𑀲𑀸 𑀦𑀸𑀫 𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀦𑀸𑀫 𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸 𑀦𑀸𑀫 𑀤𑀺𑀲𑁆𑀲𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀤𑀺𑀲𑁆𑀲𑀦𑁆𑀢𑀺, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀸𑀫 𑀤𑀺𑀲𑁆𑀲𑀦𑁆𑀢𑀺, 𑀅𑀕𑁆𑀕𑀲𑀸𑀯𑀓𑀸𑀦𑀸𑀫 𑀫𑀳𑀸𑀲𑀸𑀯𑀓𑀸 𑀦𑀸𑀫 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸 𑀦𑀸𑀫 𑀤𑀺𑀲𑁆𑀲𑀦𑁆𑀢𑀺. 𑀮𑁄𑀓𑁂𑀧𑀺 𑀏𑀯𑀭𑀽𑀧𑀸𑀦𑀁 𑀧𑀼𑀭𑀺𑀲𑀯𑀺𑀲𑁂𑀲𑀸𑀦𑀁 𑀯𑀲𑁂𑀦 𑀲𑀢𑁆𑀢 𑀮𑁄𑀓𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀜𑁆𑀜𑀸𑀲𑀺𑀧𑁆𑀧𑀯𑀺𑀲𑁂𑀲𑀸 𑀘 𑀧𑀭𑀺𑀪𑁄𑀕𑀯𑀢𑁆𑀣𑀼𑀯𑀺𑀲𑁂𑀲𑀸 𑀘 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀢𑀫𑁄 ¶ 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀅𑀦𑀦𑁆𑀢𑀭𑁂 𑀔𑀡𑁂 𑀦𑀺𑀭𑀼𑀤𑁆𑀥𑁄 𑀘𑀺𑀢𑁆𑀢 𑀘𑁂𑀢𑀲𑀺𑀓𑀥𑀫𑁆𑀫𑀲𑀫𑀽𑀳𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄.

𑀓𑀢𑀫𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄. 𑀧𑀘𑁆𑀙𑀺𑀫𑁂 𑀅𑀦𑀦𑁆𑀢𑀭𑁂 𑀏𑀯 𑀔𑀡𑁂 𑀉𑀧𑁆𑀧𑀦𑁆𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀲𑀫𑀽𑀳𑁄 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄.

𑀏𑀓𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄, 𑀧𑀞𑀫 𑀪𑀯𑀗𑁆𑀕𑀘𑀺𑀢𑁆𑀢𑀁 𑀤𑀼𑀢𑀺𑀬𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄.

𑀬𑀤𑀸 𑀧𑀦 𑀥𑀫𑁆𑀫𑀬𑀫𑀓𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀅𑀓𑀼𑀲𑀮𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀅𑀪𑀺𑀦𑀯𑀁 𑀅𑀢𑁆𑀢𑀪𑀸𑀯𑀁 𑀆𑀭𑀩𑁆𑀪 𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀧𑀯𑀢𑁆𑀢𑀁 𑀪𑀯𑀦𑀺𑀓𑀦𑁆𑀢𑀺𑀓 𑀢𑀡𑁆𑀳𑀸𑀲𑀳𑀕𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀤𑀸 𑀧𑀞𑀫𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑀁 𑀘𑀮𑀢𑀺. 𑀢𑀢𑁄 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀲𑀢𑁆𑀢 𑀪𑀯𑀦𑀺𑀓𑀦𑁆𑀢𑀺𑀓𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀯𑀸𑀭𑁄.

𑀅𑀧𑀺 𑀘 𑀲𑁄 𑀲𑀢𑁆𑀢𑁄 𑀢𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀪𑀯𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀅𑀘𑁆𑀙𑀢𑀺. 𑀯𑀢𑁆𑀣𑀼𑀲𑁆𑀲 𑀧𑀦 𑀅𑀢𑀺𑀤𑀼𑀩𑁆𑀩𑀮𑀢𑁆𑀢𑀸 𑀢𑀜𑁆𑀘 𑀆𑀭𑀫𑁆𑀫𑀡𑀁 𑀅𑀧𑀭𑀺𑀩𑁆𑀬𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀁 𑀆𑀭𑀩𑁆𑀪 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀫𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺.

𑀬𑀤𑀸 𑀕𑀩𑁆𑀪𑁄 𑀣𑁄𑀓𑀁 𑀯𑀟𑁆𑀠𑀫𑀸𑀦𑁄 𑀳𑁄𑀢𑀺 𑀅𑀢𑀺𑀭𑁂𑀓𑀤𑁆𑀯𑁂𑀫𑀸𑀲𑀁 𑀕𑀢𑁄, 𑀢𑀤𑀸 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀸𑀢𑀼𑀕𑀩𑁆𑀪𑁂 𑀆𑀮𑁄𑀓𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀅𑀪𑀸𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀺𑀜𑁆𑀜𑀸𑀡𑀸𑀦𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀸𑀦𑀺 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄 𑀲𑀢𑁆𑀢𑁄 𑀫𑀸𑀢𑀼𑀬𑀸 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀻𑀲𑀼 𑀩𑀳𑀽𑀦𑀺 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀺 𑀧𑀘𑁆𑀘𑀦𑀼𑀪𑁄𑀢𑀺. 𑀯𑀺𑀚𑀸𑀬𑀦𑀓𑀸𑀮𑁂 𑀧𑀦 𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺𑀬𑁂𑀯. 𑀯𑀺𑀚𑀸𑀬𑀺𑀢𑁆𑀯𑀸𑀧𑀺 𑀬𑀸𑀯 𑀯𑀢𑁆𑀣𑀼𑀭𑀽𑀧𑀸𑀦𑀺 𑀫𑀼𑀤𑀽𑀦𑀺 𑀳𑁄𑀦𑁆𑀢𑀺, 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀲𑁄 𑀅𑀢𑀺𑀫𑀦𑁆𑀤𑀭𑀽𑀧𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀳𑀼𑀢𑁆𑀯𑀸 𑀅𑀘𑁆𑀙𑀢𑀺. 𑀦 𑀓𑀺𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀧𑀼𑀭𑀺𑀫 𑀪𑀯𑀸𑀦𑀼𑀲𑀸𑀭𑀻 𑀏𑀯 𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀲𑀘𑁂 𑀲𑁄 𑀦𑀺𑀭𑀬 𑀪𑀯𑀢𑁄 𑀆𑀕𑀢𑁄 𑀳𑁄𑀢𑀺, 𑀲𑁄 𑀯𑀺𑀭𑀽𑀧𑀫𑀼𑀔𑀩𑀳𑀼𑀮𑁄 𑀳𑁄𑀢𑀺. 𑀧𑀼𑀭𑀺𑀫𑀸𑀦𑀺 𑀦𑀺𑀭𑀬𑀸𑀭𑀫𑁆𑀫𑀡𑀸𑀦𑀺 𑀆𑀭𑀩𑁆𑀪 𑀔𑀡𑁂 𑀔𑀡𑁂 𑀯𑀺𑀭𑀽𑀧𑀫𑀼𑀔𑀫𑀲𑁆𑀲 𑀧𑀜𑁆𑀜𑀸𑀬𑀢𑀺. 𑀅𑀣 𑀤𑁂𑀯𑀮𑁄𑀓𑀢𑁄 𑀆𑀕𑀢𑁄 𑀳𑁄𑀢𑀺, 𑀤𑀺𑀩𑁆𑀩𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀆𑀭𑀩𑁆𑀪 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀩𑀳𑀼𑀮𑁄 𑀳𑁄𑀢𑀺, 𑀔𑀡𑁂 𑀔𑀡𑁂 𑀫𑀺𑀳𑀺𑀢𑀫𑀼𑀔𑀫𑀲𑁆𑀲 𑀧𑀜𑁆𑀜𑀸𑀬𑀢𑀺.

𑀬𑀤𑀸 𑀧𑀦 𑀯𑀢𑁆𑀣𑀼𑀭𑀽𑀧𑀸𑀦𑀺 𑀢𑀺𑀓𑁆𑀔𑀸𑀦𑀺 𑀳𑁄𑀦𑁆𑀢𑀺, 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺. 𑀯𑀺𑀜𑁆𑀜𑀸𑀡𑀸𑀦𑀺 𑀘𑀲𑁆𑀲 𑀲𑀼𑀯𑀺𑀲𑀤𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀅𑀫𑀦𑁆𑀤𑀭𑀽𑀧𑁄 𑀳𑀼𑀢𑁆𑀯𑀸 𑀓𑀻𑀴𑀦𑁆𑀢𑁄 𑀮𑀻𑀴𑀦𑁆𑀢𑁄 𑀫𑁄𑀤𑀦𑁆𑀢𑁄 ¶ 𑀧𑀫𑁄𑀤𑀦𑁆𑀢𑁄 𑀅𑀘𑁆𑀙𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀭𑀫𑁆𑀫𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀺. 𑀫𑀸𑀢𑀼𑀪𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀇𑀥 𑀮𑁄𑀓𑀸𑀦𑀼𑀲𑀸𑀭𑀻 𑀯𑀺𑀜𑁆𑀜𑀸𑀡𑀫𑀲𑁆𑀲 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺. 𑀧𑀼𑀭𑀺𑀫𑀚𑀸𑀢𑀺𑀁 𑀧𑀫𑀼𑀲𑁆𑀲𑀢𑀺.

𑀓𑀺𑀁 𑀧𑀦 𑀲𑀩𑁆𑀩𑁄𑀧𑀺 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀫𑀼𑀲𑁆𑀲𑀢𑀻𑀢𑀺 𑀘𑁂. 𑀦 𑀲𑀩𑁆𑀩𑁄𑀧𑀺 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯 𑀧𑀫𑀼𑀲𑁆𑀲𑀢𑀺. 𑀓𑁄𑀘𑀺 𑀅𑀢𑀺𑀭𑁂𑀓𑀢𑀭𑀁 𑀕𑀫𑁆𑀪𑀯𑀸𑀲𑀤𑀼𑀓𑁆𑀔𑁂𑀦 𑀧𑀭𑀺𑀧𑀻𑀴𑀺𑀢𑁄 𑀕𑀩𑁆𑀪𑁂 𑀏𑀯 𑀧𑀫𑀼𑀲𑁆𑀲𑀢𑀺. 𑀓𑁄𑀘𑀺 𑀯𑀺𑀚𑀸𑀬𑀦𑀓𑀸𑀮𑁂, 𑀓𑁄𑀘𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀫𑀼𑀲𑁆𑀲𑀢𑀺. 𑀓𑁄𑀘𑀺 𑀇𑀢𑁄𑀧𑀭𑀫𑁆𑀧𑀺 𑀤𑀳𑀭𑀓𑀸𑀮𑁂 𑀦 𑀧𑀫𑀼𑀲𑁆𑀲𑀢𑀺. 𑀯𑀼𑀟𑁆𑀠𑀓𑀸𑀮𑁂 𑀏𑀯 𑀧𑀫𑀼𑀲𑁆𑀲𑀢𑀺. 𑀓𑁄𑀘𑀺 𑀬𑀸𑀯𑀚𑀻𑀯𑀁𑀧𑀺 𑀦 𑀧𑀫𑀼𑀲𑁆𑀲𑀢𑀺. 𑀤𑁆𑀯𑁂 𑀢𑀬𑁄 𑀪𑀯𑁂 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀅𑀢𑁆𑀣𑀺𑀬𑁂𑀯. 𑀇𑀫𑁂 𑀚𑀸𑀢𑀺𑀲𑁆𑀲𑀭𑀲𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀢𑁆𑀣 𑀯𑀺𑀚𑀸𑀬𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀙𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀲𑀮𑁆𑀮𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀙𑀤𑁆𑀯𑀸𑀭𑀺𑀓𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀲𑀩𑁆𑀩𑀢𑁆𑀣𑀧𑀺 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀅𑀦𑀦𑁆𑀢𑀭𑁂 𑀦𑀺𑀭𑀼𑀤𑁆𑀥𑀁 𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀅𑀦𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀬𑀜𑁆𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀸𑀫 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀏𑀓𑀧𑁆𑀧𑀩𑀦𑁆𑀥𑁄 𑀏𑀯 𑀳𑁄𑀢𑀺. 𑀬𑀤𑀸 𑀲𑀢𑁆𑀢𑁄 𑀅𑀭𑀳𑀢𑁆𑀢 𑀫𑀕𑁆𑀕𑀁 𑀮𑀪𑀺𑀢𑁆𑀯𑀸 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀤𑀸 𑀏𑀯 𑀲𑁄 𑀧𑀩𑀦𑁆𑀥𑁄 𑀙𑀺𑀚𑁆𑀚𑀢𑀺.

𑀓𑁂𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑁄, 𑀓𑁂𑀦𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺. 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀲𑀤𑀺𑀲𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑁄, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄. 𑀢𑀢𑁆𑀣 𑀅𑀢𑁆𑀢𑀲𑀤𑀺𑀲𑀲𑁆𑀲𑀸𑀢𑀺 𑀲𑀸𑀭𑀫𑁆𑀫𑀡 𑀪𑀸𑀯𑁂𑀦 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲. 𑀲𑀸𑀭𑀫𑁆𑀫𑀡𑀪𑀸𑀯𑁂𑀦𑀸𑀢𑀺 𑀘 𑀬𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀦 𑀧𑀯𑀢𑁆𑀢𑀢𑀺, 𑀲𑁄 𑀲𑀸𑀭𑀫𑁆𑀫𑀡𑁄 𑀦𑀸𑀫, 𑀏𑀯𑀁 𑀲𑀸𑀭𑀫𑁆𑀫𑀡𑀪𑀸𑀯𑁂𑀦. 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀝𑁆𑀞𑁂𑀦𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑁂𑀧𑀺 𑀢𑀲𑁆𑀲 𑀘𑀺𑀦𑁆𑀢𑀦𑀓𑀺𑀭𑀺𑀬𑀸𑀯𑁂𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀏𑀯 𑀯𑀽𑀧𑀲𑀫𑁆𑀫𑀢𑀺, 𑀏𑀯𑀁 𑀧𑀘𑁆𑀙𑀺𑀫𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀝𑁆𑀞𑁂𑀦.

𑀢𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀫𑀸𑀢𑀼𑀧𑀭𑀫𑁆𑀧𑀭𑀸 𑀯𑀺𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑀧𑀭𑀫𑁆𑀧𑀭𑀸 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀥𑀻𑀢𑀼𑀧𑀭𑀫𑁆𑀧𑀭𑀸 𑀯𑀺𑀬 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀭𑀫𑁆𑀧𑀭𑀸 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂 𑀅𑀭𑀳𑀦𑁆𑀢𑀸𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀁 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀫𑁆𑀧𑀺 𑀧𑀼𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀥𑀫𑁆𑀫𑀦𑁆𑀢𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺. 𑀦 𑀉𑀧𑁆𑀧𑀸𑀤𑁂𑀬𑁆𑀬. 𑀓𑀲𑁆𑀫𑀸, 𑀢𑀤𑀸 𑀓𑀫𑁆𑀫𑀓𑀺𑀮𑁂𑀲𑀯𑁂𑀕𑀸𑀦𑀁 𑀲𑀩𑁆𑀩𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑁂𑀦 𑀅𑀘𑁆𑀘𑀦𑁆𑀢𑀲𑀦𑁆𑀢𑀢𑀭𑀢𑁆𑀢𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀥𑀫𑁆𑀫𑀯𑀺𑀪𑀸𑀕𑁄 ¶ 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀯𑀺𑀪𑀸𑀕𑁄 𑀘 𑀅𑀦𑀦𑁆𑀢𑀧𑀘𑁆𑀘𑀬 𑀲𑀤𑀺𑀲𑁄.

𑀓𑁂𑀦𑀝𑁆𑀞𑁂𑀦 𑀲𑀫𑀦𑀦𑁆𑀢𑀭𑁄𑀢𑀺. 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀝𑁆𑀞𑁂𑀦 𑀲𑀫𑀦𑀦𑁆𑀢𑀭𑁄. 𑀬𑀣𑀸 𑀲𑀺𑀮𑀸𑀣𑀫𑁆𑀪𑀸𑀤𑀻𑀲𑀼 𑀭𑀽𑀧𑀓𑀮𑀸𑀧𑀸 𑀏𑀓𑀸𑀩𑀤𑁆𑀥𑀸 𑀲𑀫𑀸𑀦𑀸𑀧𑀺 𑀭𑀽𑀧 𑀥𑀫𑁆𑀫𑀪𑀸𑀯𑁂𑀦 𑀲𑀡𑁆𑀞𑀸𑀦 𑀚𑀸𑀢𑀺𑀓𑀢𑁆𑀢𑀸 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀭𑀽𑀧𑀲𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀭𑀽𑀧𑀓𑀮𑀸𑀧𑀸𑀦𑀁 𑀫𑀚𑁆𑀛𑁂 𑀅𑀦𑁆𑀢𑀭𑀁 𑀦𑀸𑀫 𑀯𑀺𑀯𑀭𑀁 𑀦𑀸𑀫 𑀅𑀢𑁆𑀣𑀺𑀬𑁂𑀯. 𑀦 𑀢𑀣𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓 𑀓𑀮𑀸𑀧𑀸𑀦𑀁 𑀫𑀚𑁆𑀛𑁂. 𑀢𑁂 𑀧𑀦 𑀅𑀭𑀽𑀧𑀥𑀫𑁆𑀫𑀪𑀸𑀯𑁂𑀦 𑀅𑀲𑀡𑁆𑀞𑀸𑀦 𑀚𑀸𑀢𑀺𑀓𑀢𑁆𑀢𑀸 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀥𑀫𑁆𑀫𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀆𑀓𑀸𑀲𑀯𑀺𑀯𑀭𑀲𑁆𑀲 𑀅𑀪𑀸𑀯𑀢𑁄 𑀲𑀩𑁆𑀩𑀲𑁄 𑀅𑀦𑁆𑀢𑀭 𑀭𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀮𑁄𑀓𑀲𑁆𑀲𑀧𑀺 𑀤𑁆𑀯𑀺𑀦𑁆𑀦𑀁 𑀓𑀮𑀸𑀧𑀸𑀦𑀁 𑀅𑀦𑁆𑀢𑀭𑀁 𑀦𑀸𑀫 𑀦 𑀤𑀺𑀲𑁆𑀲𑀢𑀺. 𑀢𑀢𑁄 𑀇𑀫𑁂 𑀲𑀢𑁆𑀢𑀸 𑀘𑀺𑀢𑁆𑀢𑀁 𑀦𑀸𑀫 𑀦𑀺𑀘𑁆𑀘𑀁 𑀥𑀼𑀯𑀁 𑀣𑀸𑀯𑀭𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑁂 𑀦𑀺𑀘𑁆𑀘𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀝𑁆𑀞𑁂𑀦 𑀲𑀫𑀦𑀦𑁆𑀢𑀭𑁄. 𑀅𑀦𑀦𑁆𑀢𑀭𑀝𑁆𑀞𑁂𑀦𑀸𑀢𑀺 𑀘 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀲𑀤𑀺𑀲𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀝𑁆𑀞𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯.

𑀏𑀯𑀁 𑀲𑀦𑁆𑀢𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀼𑀭𑀺𑀫𑀘𑀺𑀢𑁆𑀢𑀁 𑀦𑀸𑀫 𑀦𑁂𑀯 𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀁, 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀦𑀸𑀫 𑀅𑀭𑀺𑀬𑀨𑀮𑀘𑀺𑀢𑁆𑀢𑀁, 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀏𑀓𑀭𑀢𑁆𑀢𑀺𑀤𑀺𑀯𑀫𑁆𑀧𑀺 𑀤𑁆𑀯𑁂𑀭𑀢𑁆𑀢𑀺𑀤𑀺𑀯𑀸𑀦𑀺𑀧𑀺.𑀮. 𑀲𑀢𑁆𑀢𑀭𑀢𑁆𑀢𑀺𑀤𑀺𑀯𑀸𑀦𑀺𑀧𑀺 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺. 𑀅𑀲𑀜𑁆𑀜𑀲𑀢𑁆𑀢𑀪𑀽𑀫𑀺𑀬𑀁𑀧𑀺 𑀧𑀼𑀭𑀺𑀫𑁂 𑀓𑀸𑀫𑀪𑀯𑁂 𑀘𑀼𑀢𑀺𑀘𑀺𑀢𑁆𑀢𑀁 𑀧𑀼𑀭𑀺𑀫𑀘𑀺𑀢𑁆𑀢𑀁 𑀦𑀸𑀫. 𑀧𑀘𑁆𑀙𑀺𑀫𑁂 𑀓𑀸𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀦𑀸𑀫, 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀅𑀲𑀜𑁆𑀜𑀲𑀢𑁆𑀢𑀪𑀯𑁂 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺 𑀧𑀼𑀕𑁆𑀕𑀮𑁄 𑀅𑀘𑀺𑀢𑁆𑀢𑀓𑁄 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀤𑁆𑀯𑁂 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀲𑀤𑀺𑀲𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀧𑀘𑁆𑀘𑀬𑀲𑀢𑁆𑀢𑀺𑀭𑀳𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀦 𑀳𑁄𑀦𑁆𑀢𑀺. 𑀫𑀳𑀦𑁆𑀢𑁂𑀳𑀺 𑀧𑀦 𑀪𑀸𑀯𑀦𑀸𑀧𑀡𑀺𑀥𑀺𑀩𑀮𑁂𑀳𑀺 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀺 𑀘 𑀦𑀺𑀭𑀼𑀚𑁆𑀛𑀫𑀸𑀦𑀸𑀦𑀺 𑀅𑀦𑀦𑁆𑀢𑀭𑁂 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦 𑀲𑀢𑁆𑀢𑀺𑀲𑀳𑀺𑀢𑀸𑀦𑀺 𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀧𑀘𑁆𑀙𑀺𑀫𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀸𑀩𑀤𑁆𑀥𑀪𑀸𑀯𑁂𑀦 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀭𑀓𑀸𑀮𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀘 𑀏𑀢𑁆𑀢𑀓𑀫𑀢𑁆𑀢𑁂𑀦 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀁 𑀅𑀦𑀦𑁆𑀢𑀭𑁂 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦 𑀲𑀢𑁆𑀢𑀺𑀦𑀸𑀫 𑀦𑀢𑁆𑀣𑀻𑀢𑀺 𑀘, 𑀢𑁂 𑀅𑀦𑀦𑁆𑀢𑀭𑀧𑀘𑁆𑀘𑀬𑀥𑀫𑁆𑀫𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑀣𑀸 𑀢𑀁 𑀭𑀜𑁆𑀜𑁄 𑀬𑁄𑀥𑀸 𑀦𑀸𑀫 𑀅𑀢𑁆𑀣𑀺, 𑀓𑀤𑀸𑀘𑀺 𑀭𑀸𑀚𑀸 𑀓𑀸𑀮𑀁 𑀜𑀢𑁆𑀯𑀸 𑀢𑀼𑀫𑁆𑀳𑁂 𑀇𑀤𑀸𑀦𑀺 𑀫𑀸𑀬𑀼𑀚𑁆𑀛𑀣, 𑀬𑀼𑀤𑁆𑀥𑀓𑀸𑀮𑁄 𑀦 𑀳𑁄𑀢𑀺, 𑀅𑀲𑀼𑀓𑀲𑁆𑀫𑀺𑀁 𑀓𑀸𑀮𑁂 𑀏𑀯 𑀬𑀼𑀚𑁆𑀛𑀣𑀸𑀢𑀺 𑀯𑀤𑁂𑀬𑁆𑀬. 𑀢𑁂 𑀘 𑀢𑀤𑀸 𑀅𑀬𑀼𑀚𑁆𑀛𑀫𑀸𑀦𑀸 𑀯𑀺𑀘𑀭𑁂𑀬𑁆𑀬𑀼𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀬𑀼𑀚𑁆𑀛𑀦𑀲𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀘, 𑀢𑁂 𑀬𑁄𑀥𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀏𑀢𑁆𑀣 𑀯𑀤𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑁂 𑀢𑁂 𑀧𑀦 𑀅𑀭𑀽𑀧𑀥𑀫𑁆𑀫𑀪𑀸𑀯𑁂𑀦 𑀅𑀲𑀡𑁆𑀞𑀸𑀦 𑀚𑀸𑀢𑀺𑀓𑀢𑁆𑀢𑀸 𑀫𑀚𑁆𑀛𑁂𑀧𑀭𑀺𑀘𑁆𑀙𑁂𑀤𑀥𑀫𑁆𑀫𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀩𑁆𑀩𑀲𑁄 𑀅𑀦𑁆𑀢𑀭𑀭𑀳𑀺𑀢𑀸 ¶ 𑀏𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀧𑀼𑀩𑁆𑀩𑁂 𑀆𑀭𑀫𑁆𑀫𑀡 𑀧𑀘𑁆𑀘𑀬𑁂 𑀪𑁂𑀭𑀺𑀲𑀤𑁆𑀤𑀯𑀻𑀡𑀸𑀲𑀤𑁆𑀤𑁄𑀧𑀫𑀸𑀳𑀺 𑀬𑁄 𑀘𑀺𑀢𑁆𑀢𑀸𑀦𑀁 𑀔𑀡𑁂 𑀔𑀡𑁂 𑀉𑀧𑁆𑀧𑀸𑀤𑁄 𑀘 𑀦𑀺𑀭𑁄𑀥𑁄 𑀘 𑀯𑀼𑀢𑁆𑀢𑁄, 𑀲𑁄 𑀅𑀫𑁆𑀳𑁂𑀳𑀺 𑀓𑀣𑀁 𑀧𑀘𑁆𑀘𑁂𑀢𑀩𑁆𑀩𑁄𑀢𑀺. 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀁 𑀦𑀸𑀦𑀸𑀘𑀺𑀢𑁆𑀢𑀸𑀦𑀁 𑀔𑀡𑀫𑀢𑁆𑀢𑁂𑀧𑀺 𑀧𑀼𑀩𑁆𑀩𑀸𑀧𑀭 𑀧𑀭𑀺𑀯𑀢𑁆𑀢𑀦𑀲𑁆𑀲 𑀮𑁄𑀓𑁂 𑀧𑀜𑁆𑀜𑀸𑀬𑀦𑀢𑁄. 𑀅𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀘𑀺𑀢𑁆𑀢 𑀬𑀫𑀓𑀤𑀻𑀧𑀦𑀺𑀬𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑁄𑀬𑁂𑀯𑀸𑀢𑀺. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀥𑀫𑁆𑀫𑀯𑀺𑀪𑀸𑀕𑁄 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀯𑀺𑀪𑀸𑀕𑁄𑀘 𑀯𑀼𑀘𑁆𑀘𑀢𑀺. 𑀏𑀓𑀢𑁄 𑀉𑀧𑁆𑀧𑀦𑁆𑀦𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢 𑀧𑀘𑁆𑀘𑀬𑀸 𑀘 𑀳𑁄𑀦𑁆𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘. 𑀧𑀝𑀺𑀲𑀦𑁆𑀥𑀺𑀦𑀸𑀫𑀓𑁆𑀔𑀦𑁆𑀥𑀸 𑀘 𑀧𑀝𑀺𑀲𑀦𑁆𑀥𑀺𑀲𑀳𑀚𑀸𑀢𑀁 𑀳𑀤𑀬𑀯𑀢𑁆𑀣𑀼 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑀸 𑀘 𑀳𑁄𑀦𑁆𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘. 𑀲𑀩𑁆𑀩𑀸𑀦𑀺 𑀫𑀳𑀸𑀪𑀽𑀢𑀸𑀦𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑀸 𑀘 𑀳𑁄𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀩𑁆𑀩𑀸𑀦𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀘 𑀧𑀯𑀢𑁆𑀢𑀺𑀓𑀸𑀮𑁂 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀚𑀸𑀢𑀸𑀦𑀺 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀘 𑀲𑀳𑀚𑀸𑀢𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺 𑀦𑀸𑀫. 𑀲𑀩𑁆𑀩𑀸𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀲𑀳𑀚𑀸𑀢𑀫𑀳𑀸𑀪𑀽𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺 𑀦𑀸𑀫.

𑀓𑁂𑀦𑀝𑁆𑀞𑁂𑀦 𑀲𑀳𑀚𑀸𑀢𑁄, 𑀓𑁂𑀦𑀝𑁆𑀞𑁂𑀦 𑀧𑀘𑁆𑀘𑀬𑁄. 𑀲𑀳 𑀚𑀸𑀦𑀦𑀝𑁆𑀞𑁂𑀦 𑀲𑀳𑀚𑀸𑀢𑁄, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄. 𑀢𑀢𑁆𑀣 𑀲𑀳𑀚𑀸𑀦𑀦𑀝𑁆𑀞𑁂𑀦𑀸𑀢𑀺 𑀬𑁄 𑀥𑀫𑁆𑀫𑁄 𑀚𑀸𑀬𑀫𑀸𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀲𑀳𑁂𑀯 𑀲𑀬𑀜𑁆𑀘 𑀚𑀸𑀬𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀘 𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀳𑁂𑀯 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀲 𑀲𑁄 𑀅𑀢𑁆𑀣𑁄 𑀲𑀳𑀚𑀸𑀦𑀦𑀝𑁆𑀞𑁄 𑀦𑀸𑀫.

𑀬𑀣𑀸 𑀲𑀽𑀭𑀺𑀬𑁄 𑀦𑀸𑀫 𑀉𑀤𑀬𑀦𑁆𑀢𑁄 𑀲𑀽𑀭𑀺𑀬𑀸𑀢𑀧𑁂 𑀘 𑀲𑀽𑀭𑀺𑀬𑀸 𑀮𑁄𑀓𑁂 𑀘 𑀅𑀢𑁆𑀢𑀦𑀸 𑀲𑀳𑁂𑀯 𑀚𑀦𑀬𑀦𑁆𑀢𑁄 𑀉𑀤𑁂𑀢𑀺. 𑀬𑀣𑀸 𑀘 𑀧𑀤𑀻𑀧𑁄 𑀦𑀸𑀫 𑀚𑀮𑀦𑁆𑀢𑁄 𑀧𑀤𑀻𑀧𑀸𑀢𑀧𑁂 𑀘 𑀧𑀤𑀻𑀧𑀸𑀮𑁄𑀓𑁂 𑀘 𑀅𑀢𑁆𑀢𑀦𑀸 𑀲𑀳𑁂𑀯 𑀚𑀦𑀬𑀦𑁆𑀢𑁄 𑀚𑀮𑀢𑀺. 𑀏𑀯𑀫𑁂𑀯𑀁 𑀅𑀬𑀁 𑀧𑀘𑁆𑀘𑀬𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀳𑁂𑀯 𑀉𑀧𑁆𑀧𑀸𑀤𑁂𑀢𑀺. 𑀢𑀢𑁆𑀣 𑀲𑀽𑀭𑀺𑀬𑁄 𑀯𑀺𑀬 𑀏𑀓𑀫𑁂𑀓𑁄 𑀦𑀸𑀫 𑀥𑀫𑁆𑀫𑁄, 𑀲𑀽𑀭𑀺𑀬𑀸𑀢𑀧𑀸 𑀯𑀺𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀽𑀭𑀺𑀬𑀸𑀮𑁄𑀓𑀸 𑀯𑀺𑀬 𑀲𑀳𑀚𑀸𑀢𑀭𑀽𑀧𑀥𑀫𑁆𑀫𑀸. 𑀢𑀣𑀸 𑀲𑀽𑀭𑀺𑀬𑁄 𑀯𑀺𑀬 𑀏𑀓𑀫𑁂𑀓𑁄 𑀫𑀳𑀸𑀪𑀽𑀢𑀭𑀽𑀧𑀥𑀫𑁆𑀫𑁄, 𑀲𑀽𑀭𑀺𑀬𑀸𑀢𑀧𑀸 𑀯𑀺𑀬 𑀲𑀳𑀚𑀸𑀢𑀫𑀳𑀸𑀪𑀽𑀢𑀥𑀫𑁆𑀫𑀸, 𑀲𑀽𑀭𑀺𑀬𑀸𑀮𑁄𑀓𑀸 𑀯𑀺𑀬 𑀲𑀳𑀚𑀸𑀢𑀉𑀧𑀸𑀤𑀸𑀭𑀽𑀧𑀥𑀫𑁆𑀫𑀸, 𑀏𑀲 𑀦𑀬𑁄 𑀧𑀤𑀻𑀧𑀼𑀧𑀫𑀸𑀬𑀧𑀻𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀳𑀚𑀸𑀢𑀧𑀘𑁆𑀘𑀬𑁂 ¶ 𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀬𑁄 𑀧𑀘𑁆𑀘𑀬 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑁄 𑀏𑀯 𑀇𑀥 𑀧𑀘𑁆𑀘𑀬𑀥𑀫𑁆𑀫𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀥𑀫𑁆𑀫𑁄 𑀘 𑀳𑁄𑀢𑀺. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀸 𑀘 𑀳𑁄𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸. 𑀲𑀳𑀚𑀸𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀸 𑀘 𑀳𑁄𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘. 𑀧𑀝𑀺𑀲𑀦𑁆𑀥𑀺𑀦𑀸𑀫𑀓𑁆𑀔𑀦𑁆𑀥𑀸 𑀘 𑀧𑀝𑀺𑀲𑀦𑁆𑀥𑀺 𑀲𑀳𑀚𑀸𑀢𑀁 𑀳𑀤𑀬𑀯𑀢𑁆𑀣𑀼𑀭𑀽𑀧𑀜𑁆𑀘 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀸 𑀘 𑀳𑁄𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘. 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀬𑁂𑀯.

𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀉𑀲𑁆𑀲𑀸𑀧𑀺𑀢𑀸 𑀢𑀬𑁄 𑀤𑀡𑁆𑀟𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀺𑀲𑁆𑀲𑀬𑀸 𑀘 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀺𑀢𑀸 𑀘. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀉𑀲𑁆𑀲𑀺𑀢𑁂 𑀲𑀩𑁆𑀩𑁂 𑀉𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀏𑀓𑀫𑁂𑀓𑀲𑁆𑀫𑀺𑀁 𑀧𑀢𑀦𑁆𑀢𑁂 𑀲𑀩𑁆𑀩𑁂 𑀧𑀢𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀥𑀫𑁆𑀫𑀸 𑀘 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀯𑀤𑁂𑀬𑁆𑀬𑀼𑀁, 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀧𑀘𑁆𑀘𑀬𑀁 𑀅𑀮𑀪 𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑀼𑀢𑁆𑀢𑀁. 𑀓𑀲𑁆𑀫𑀸. 𑀨𑀼𑀲𑀦𑀸𑀤𑀻𑀦𑀁 𑀘𑁂𑀢𑀲𑀺𑀓 𑀓𑀺𑀘𑁆𑀘𑀸𑀦𑀁 𑀯𑀺𑀚𑀸𑀦𑀦𑀓𑀺𑀘𑁆𑀘𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸, 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀁 𑀧𑀦 𑀘𑁂𑀢𑀲𑀺𑀓𑀧𑀘𑁆𑀘𑀬𑀁 𑀅𑀮𑀪𑀫𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀯𑀼𑀘𑁆𑀘𑀢𑁂, 𑀘𑁂𑀢𑀲𑀺𑀓𑀥𑀫𑁆𑀫𑀸 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀲𑀳𑀸𑀬𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀳𑀺 𑀯𑀺𑀦𑀸 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯. 𑀏𑀲𑁂𑀯 𑀦𑀬𑁄 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼𑀧𑀻𑀢𑀺. 𑀉𑀧𑀸𑀤𑀸𑀭𑀽𑀧𑀸𑀦𑀺 𑀧𑀦 𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀦𑁆𑀤𑀫𑀢𑁆𑀢𑀢𑁆𑀢𑀸 𑀲𑀳𑀸𑀬𑀗𑁆𑀕𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺. 𑀦𑀦𑀼 𑀆𑀳𑀸𑀭𑀭𑀽𑀧𑀜𑁆𑀘 𑀚𑀻𑀯𑀺𑀢𑀭𑀽𑀧𑀜𑁆𑀘 𑀧𑀘𑁆𑀘𑀬𑀯𑀺𑀲𑁂𑀲𑀢𑁆𑀢𑀸 𑀲𑀳𑀸𑀬𑀗𑁆𑀕𑀁 𑀳𑁄𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀞𑀺𑀢𑀺𑀬𑀸 𑀏𑀯 𑀲𑀳𑀸𑀬𑀗𑁆𑀕𑀁 𑀳𑁄𑀢𑀺. 𑀦 𑀉𑀧𑁆𑀧𑀸𑀤𑁂. 𑀇𑀥 𑀧𑀦 𑀉𑀧𑁆𑀧𑀸𑀤𑁂 𑀲𑀳𑀸𑀬𑀗𑁆𑀕𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀲𑀳𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄.

𑀢𑀢𑁆𑀣 𑀓𑀢𑀫𑁄 𑀲𑀳𑀚𑀸𑀢𑀦𑀺𑀲𑁆𑀲𑀬𑁄. 𑀲𑀩𑁆𑀩𑁄 𑀲𑀳𑀚𑀸𑀢 𑀧𑀘𑁆𑀘𑀬𑁄 𑀲𑀳𑀚𑀸𑀢𑀦𑀺𑀲𑁆𑀲𑀬𑁄. 𑀢𑀲𑁆𑀫𑀸 𑀢𑀢𑁆𑀣 𑀧𑀘𑁆𑀘𑀬𑀯𑀺𑀪𑀸𑀕𑁄 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑁄 𑀘 𑀲𑀳𑀚𑀸𑀢𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀧𑀦 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄. 𑀙 𑀯𑀢𑁆𑀣𑀽𑀦𑀺 𑀘𑀓𑁆𑀔𑀼 𑀯𑀢𑁆𑀣𑀼 𑀲𑁄𑀢𑀯𑀢𑁆𑀣𑀼 𑀖𑀸𑀦𑀯𑀢𑁆𑀣𑀼 𑀚𑀺𑀯𑁆𑀳𑀸𑀯𑀢𑁆𑀣𑀼 𑀓𑀸𑀬𑀯𑀢𑁆𑀣𑀼 𑀳𑀤𑀬𑀯𑀢𑁆𑀣𑀼. 𑀇𑀫𑀸𑀦𑀺 𑀙𑀯𑀢𑁆𑀣𑀽𑀦𑀺 𑀧𑀯𑀢𑁆𑀢𑀺𑀓𑀸𑀮𑁂 𑀲𑀢𑁆𑀢𑀸𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑀢𑁆𑀣𑀼𑀧𑀼𑀭𑁂 𑀚𑀸𑀢𑀦𑀺𑀲𑁆𑀲𑀬𑁄.

𑀯𑀢𑁆𑀣𑀼𑀭𑀽𑀧𑀫𑁂𑀯 ¶ 𑀧𑀼𑀭𑁂𑀚𑀸𑀢𑀁 𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢 𑀦𑀺𑀲𑁆𑀲𑀬𑁄. 𑀢𑀢𑁆𑀣 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀦𑀸𑀫. 𑀧𑀼𑀭𑁂𑀚𑀸𑀢𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀭𑀺𑀫𑁂 𑀔𑀡𑁂 𑀚𑀸𑀢𑀁.

𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀢𑀤𑀸 𑀧𑀼𑀭𑁂𑀚𑀸𑀢𑀲𑁆𑀲 𑀯𑀢𑁆𑀣𑀼𑀭𑀽𑀧𑀲𑁆𑀲 𑀅𑀪𑀸𑀯𑀢𑁄 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀫𑁂𑀯 𑀳𑀤𑀬𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀧𑀞𑀫 𑀪𑀯𑀗𑁆𑀕𑀘𑀺𑀢𑁆𑀢𑀁 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀳𑀤𑀬 𑀯𑀢𑁆𑀣𑀼𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀢𑀺𑀬𑀪𑀯𑀗𑁆𑀕𑀘𑀺𑀢𑁆𑀢𑀁 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀢𑀢𑀺𑀬𑀪𑀯𑀗𑁆𑀕𑀘𑀺𑀢𑁆𑀢𑀁 𑀤𑀼𑀢𑀺𑀬 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀦𑁆𑀢𑀺𑀆𑀤𑀺𑀦𑀸 𑀬𑀸𑀯𑀫𑀭𑀡𑀸𑀲𑀦𑁆𑀦𑀓𑀸𑀮𑀸 𑀤𑁆𑀯𑀺𑀦𑁆𑀦𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀯𑀻𑀡𑀸𑀲𑀤𑁆𑀤𑀸 𑀦𑀸𑀫 𑀯𑀻𑀡𑀸𑀢𑀦𑁆𑀢𑀻𑀲𑀼 𑀯𑀻𑀡𑀸𑀤𑀡𑁆𑀟𑀓𑁂𑀳𑀺 𑀧𑀳𑀭𑀡𑀯𑁂𑀕𑁂𑀦 𑀏𑀯 𑀚𑀸𑀬𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸. 𑀢𑀣𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀦𑀸𑀫 𑀧𑀜𑁆𑀘𑀯𑀢𑁆𑀣𑀼𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀜𑁆𑀘𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸 𑀕𑀫𑀦𑀯𑁂𑀕𑁂𑀦 𑀏𑀯 𑀚𑀸𑀬𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸.

𑀆𑀧𑀸𑀢𑀸𑀕𑀫𑀦𑀜𑁆𑀘 𑀢𑁂𑀲𑀁 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀁 𑀞𑀺𑀢𑀺𑀧𑀢𑁆𑀢𑀓𑀸𑀮𑁂 𑀏𑀯 𑀳𑁄𑀢𑀺. 𑀆𑀧𑀸𑀢𑀸𑀕𑀫𑀦𑀧𑀘𑁆𑀘𑀬𑀸 𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑀁 𑀘𑀮𑀢𑀺. 𑀪𑀯𑀗𑁆𑀕𑀘𑀮𑀦 𑀧𑀘𑁆𑀘𑀬𑀸 𑀘 𑀆𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀆𑀯𑀚𑁆𑀚𑀦𑀧𑀘𑁆𑀘𑀬𑀸 𑀘 𑀢𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘𑀯𑀢𑁆𑀣𑀽𑀦𑀺 𑀧𑀼𑀭𑁂 𑀅𑀢𑀻𑀢𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀺 𑀏𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀦 𑀲𑀩𑁆𑀩𑀸𑀦𑀺 𑀙 𑀯𑀢𑁆𑀣𑀽𑀦𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀧𑀼𑀭𑁂 𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀧𑀭𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀙𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀘 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀸𑀦𑀺 𑀢𑀸𑀦𑀺𑀬𑁂𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢 𑀦𑀺𑀲𑁆𑀲𑀬𑁄.

𑀓𑀢𑀫𑁄 𑀧𑀦 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄. 𑀬𑀤𑀸 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀁 𑀯𑀢𑁆𑀣𑀼𑀭𑀽𑀧𑀁 𑀆𑀭𑀩𑁆𑀪 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀫 𑀫𑀦𑁄𑀯𑀺𑀜𑁆𑀜𑀸𑀡𑀁 𑀯𑀢𑁆𑀢𑀢𑀺, 𑀏𑀢𑀁 𑀫𑀫 𑀏𑀲𑁄 𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀢𑀡𑁆𑀳𑀸𑀫𑀸𑀦 𑀤𑀺𑀝𑁆𑀞𑀻𑀳𑀺 𑀕𑀳𑀡𑀯𑀲𑁂𑀦 𑀯𑀸 𑀏𑀢𑀁 𑀅𑀦𑀺𑀘𑁆𑀘𑀁 𑀏𑀢𑀁 𑀤𑀼𑀓𑁆𑀔𑀁 𑀏𑀢𑀁 𑀅𑀦𑀢𑁆𑀢𑀸𑀢𑀺 𑀏𑀯𑀁 𑀲𑀫𑁆𑀫𑀲𑀦𑀯𑀲𑁂𑀦 𑀯𑀸 𑀆𑀯𑀚𑁆𑀚𑀦𑀸𑀤𑀻𑀦𑀺 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀢𑀁 𑀢𑀁 𑀯𑀢𑁆𑀣𑀼𑀭𑀽𑀧𑀁 𑀧𑀘𑁆𑀘𑁂𑀓𑀁 𑀢𑁂𑀲𑀁 𑀦𑀺𑀲𑁆𑀲𑀬𑀯𑀢𑁆𑀣𑀼 𑀘 𑀳𑁄𑀢𑀺 𑀢𑁂𑀲𑀁 𑀆𑀭𑀫𑁆𑀫𑀡𑀜𑁆𑀘. 𑀢𑀲𑁆𑀫𑀸 𑀢𑀁 𑀢𑀁 𑀳𑀤𑀬𑀭𑀽𑀧𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀬𑀁 𑀯𑀢𑁆𑀣𑀸𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄. 𑀏𑀯𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀺𑀯𑀺𑀥𑁄 𑀳𑁄𑀢𑀺.

𑀇𑀥 ¶ 𑀲𑀼𑀢𑁆𑀢𑀦𑁆𑀢𑀦𑀺𑀲𑁆𑀲𑀬𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀇𑀫𑁂 𑀫𑀦𑀼𑀲𑁆𑀲𑀸 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀯𑀸 𑀭𑀼𑀓𑁆𑀔𑀸𑀤𑀬𑁄 𑀯𑀸 𑀫𑀳𑀸𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀸, 𑀫𑀳𑀸 𑀧𑀣𑀯𑀻 𑀘 𑀳𑁂𑀝𑁆𑀞𑀸 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁂, 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄 𑀘 𑀳𑁂𑀝𑁆𑀞𑀸 𑀫𑀳𑀸𑀯𑀸𑀢𑀓𑁆𑀔𑀦𑁆𑀥𑁂, 𑀫𑀳𑀸𑀯𑀸𑀢𑀓𑁆𑀔𑀦𑁆𑀥𑁄 𑀘 𑀳𑁂𑀝𑁆𑀞𑀸 𑀅𑀚𑀝𑀸𑀓𑀸𑀲𑁂, 𑀫𑀦𑀼𑀲𑁆𑀲𑀸 𑀕𑁂𑀳𑁂𑀲𑀼, 𑀪𑀺𑀓𑁆𑀔𑀽 𑀯𑀺𑀳𑀸𑀭𑁂𑀲𑀼, 𑀤𑁂𑀯𑀸 𑀤𑀺𑀩𑁆𑀩𑀯𑀺𑀫𑀸𑀦𑁂𑀲𑀽𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀮𑁄𑀓𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀲𑁆𑀲𑀬𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧 𑀦𑀺𑀲𑁆𑀲𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀲𑀤𑀺𑀲𑁄, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑀤𑀺𑀲𑁄.

𑀓𑀢𑀫𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀦𑀸𑀕𑀢 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑀽𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀥𑀫𑁆𑀫𑀸 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀺 𑀘 𑀲𑀩𑁆𑀩𑁂𑀲𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄.

𑀢𑀢𑁆𑀣 𑀅𑀢𑀻𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀘 𑀥𑀫𑁆𑀫𑁄 𑀘 𑀅𑀭𑀺𑀬𑀲𑀸𑀯𑀓𑀲𑀗𑁆𑀖𑁄 𑀘 𑀲𑀫𑁆𑀫𑀼𑀢𑀺𑀲𑀗𑁆𑀖𑀧𑀭𑀫𑁆𑀧𑀭𑀸 𑀘 𑀅𑀫𑁆𑀳𑀸𑀓𑀁 𑀧𑀘𑁆𑀙𑀺𑀫 𑀚𑀦𑀸𑀦𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀢𑀣𑀸 𑀮𑁄𑀓𑁂 𑀅𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀫𑀸𑀢𑀸𑀧𑀺𑀢𑀭𑁄 𑀘 𑀆𑀘𑀭𑀺𑀬𑀸 𑀘 𑀧𑀡𑁆𑀟𑀺𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀧𑀸𑀓𑀝𑀸 𑀦𑀸𑀦𑀸𑀢𑀺𑀢𑁆𑀣𑀸𑀘𑀭𑀺𑀬𑀸 𑀘 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀘 𑀧𑀘𑁆𑀙𑀺𑀫𑀓𑀸𑀦𑀁 𑀚𑀦𑀸𑀦𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀢𑀣𑀸 𑀳𑀺 𑀢𑁂 𑀧𑀘𑁆𑀙𑀺𑀫𑀓𑀸𑀦𑀁 𑀚𑀦𑀸𑀦𑀁 𑀅𑀢𑁆𑀣𑀸𑀬 𑀦𑀸𑀦𑀸𑀲𑀤𑁆𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑁄 𑀯𑀸 𑀦𑀸𑀦𑀸𑀅𑀲𑀤𑁆𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑁄 𑀯𑀸 𑀦𑀸𑀦𑀸𑀮𑁄𑀓𑀽𑀧𑀓𑀭𑀡𑀸𑀦𑀺 𑀯𑀸 𑀧𑀼𑀭𑁂 𑀧𑀝𑁆𑀞𑀧𑁂𑀲𑀼𑀁. 𑀧𑀘𑁆𑀙𑀺𑀫𑀚𑀦𑀸 𑀘 𑀢𑁂𑀳𑀺 𑀧𑀝𑁆𑀞𑀧𑀺𑀢𑁂𑀲𑀼 𑀤𑀸𑀦𑀲𑀻𑀮𑀸𑀤𑀺𑀥𑀫𑁆𑀫𑁂𑀲𑀼 𑀯𑀸 𑀮𑁄𑀓𑀘𑀸𑀭𑀺𑀢𑁆𑀢 𑀓𑀼𑀮𑀕𑁄𑀢𑁆𑀢𑀘𑀸𑀭𑀺𑀢𑁆𑀢 𑀥𑀫𑁆𑀫𑁂𑀲𑀼 𑀯𑀸 𑀦𑀸𑀦𑀸𑀤𑀺𑀝𑁆𑀞𑀺𑀯𑀸𑀤𑁂𑀲𑀼 𑀯𑀸 𑀦𑀸𑀦𑀸𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦 𑀯𑀺𑀚𑁆𑀚𑀸𑀞𑀸𑀦𑁂𑀲𑀼 𑀯𑀸 𑀬𑀣𑀸𑀧𑀝𑁆𑀞𑀧𑀺𑀢𑁂𑀲𑀼 𑀕𑀸𑀫𑀦𑀺𑀕𑀫𑀦𑀕𑀭𑀔𑁂𑀢𑁆𑀢𑀯𑀢𑁆𑀣𑀼 𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀆𑀯𑀸𑀝𑀸𑀤𑀻𑀲𑀼 𑀯𑀸 𑀕𑁂𑀳𑀭𑀣𑀲𑀓𑀝𑀦𑀸𑀯𑀸 𑀲𑀫𑁆𑀧𑁄𑀢𑀲𑀫𑁆𑀩𑀦𑁆𑀥𑀸𑀤𑀻𑀲𑀼 𑀯𑀸 𑀚𑀸𑀢𑀭𑀽𑀧𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀻𑀲𑀼 𑀯𑀸 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀦𑁆𑀢𑀸 𑀮𑁄𑀓𑁂 𑀯𑀟𑁆𑀠𑀦𑁆𑀢𑀺.

𑀅𑀦𑀸𑀕𑀢𑁄𑀧𑀺 𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀩𑀼𑀤𑁆𑀥𑁄 𑀘 𑀢𑀲𑁆𑀲 𑀥𑀫𑁆𑀫𑁄 𑀘 𑀢𑀲𑁆𑀲 𑀲𑀗𑁆𑀖𑁄 𑀘 𑀏𑀢𑀭𑀳𑀺 𑀩𑀳𑀼𑀚𑁆𑀚𑀦𑀸𑀦𑀁 𑀧𑀸𑀭𑀫𑀺𑀧𑀼𑀜𑁆𑀜𑀧𑁆𑀧𑀯𑀢𑁆𑀢𑀺𑀬𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀢𑀣𑀸 𑀇𑀫𑀲𑁆𑀫𑀺𑀁 𑀪𑀯𑁂 𑀘 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀧𑀝𑀺𑀮𑀪𑀺𑀲𑁆𑀲𑀫𑀸𑀦𑀸 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀥𑀦𑀥𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑁄 𑀧𑀼𑀭𑀺𑀫𑁂 𑀓𑀸𑀮𑁂 𑀞𑀺𑀢𑀸𑀦𑀁 𑀫𑀳𑀸𑀚𑀦𑀸𑀦𑀁 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑁄. 𑀅𑀦𑀸𑀕𑀢𑀪𑀯𑁂 𑀘 𑀅𑀦𑀼𑀪𑀯𑀺𑀲𑁆𑀲𑀫𑀸𑀦𑀸 𑀪𑀯𑀲𑀫𑁆𑀧𑀢𑁆𑀢𑀺 𑀪𑁄𑀕 𑀲𑀫𑁆𑀧𑀢𑁆𑀢𑀺𑀬𑁄 ¶ 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑁄 𑀘 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀞𑀺𑀢𑀸𑀦𑀁 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀬𑀣𑀸 𑀳𑀺 𑀮𑁄𑀓𑁂 𑀳𑁂𑀫𑀦𑁆𑀢𑁂 𑀓𑀸𑀮𑁂 𑀥𑀜𑁆𑀜𑀧𑁆𑀨𑀮𑀸𑀦𑀺 𑀮𑀪𑀺𑀲𑁆𑀲𑀸𑀫𑀸𑀢𑀺 𑀯𑀲𑁆𑀲𑀺𑀓𑁂 𑀓𑀸𑀮𑁂 𑀓𑀲𑁆𑀲𑀦𑀯𑀧𑁆𑀧𑀦𑀓𑀫𑁆𑀫𑀸𑀦𑀺 𑀆𑀭𑀪𑀦𑁆𑀢𑀺, 𑀓𑀫𑁆𑀫𑁂 𑀲𑀺𑀤𑁆𑀥𑁂 𑀢𑀁 𑀢𑀁 𑀥𑀦𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀢𑀁 𑀢𑀁 𑀯𑀻𑀭𑀺𑀬𑀓𑀫𑁆𑀫𑀁 𑀯𑀸 𑀢𑀁 𑀢𑀁 𑀧𑀜𑁆𑀜𑀸𑀓𑀫𑁆𑀫𑀁 𑀯𑀸 𑀆𑀭𑀪𑀦𑁆𑀢𑀺. 𑀢𑀢𑁆𑀣 𑀥𑀜𑁆𑀜𑀧𑁆𑀨𑀮𑀧𑁆𑀧𑀝𑀺𑀮𑀸𑀪𑁄 𑀘 𑀢𑀁 𑀢𑀁 𑀥𑀦𑀧𑁆𑀧𑀝𑀺 𑀮𑀸𑀪𑁄𑀘 𑀢𑀁 𑀢𑀁 𑀓𑀫𑁆𑀫𑀸𑀭𑀫𑁆𑀪𑀲𑁆𑀲 𑀅𑀦𑀸𑀕𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀁 𑀢𑀁 𑀓𑀫𑁆𑀫𑀸𑀭𑀫𑁆𑀪𑁄 𑀘 𑀥𑀜𑁆𑀜𑀧𑁆𑀨𑀮𑀧𑁆𑀧𑀝𑀺𑀮𑀸𑀪𑀲𑁆𑀲 𑀘 𑀢𑀁 𑀢𑀁 𑀥𑀦𑀧𑁆𑀧𑀝𑀺 𑀮𑀸𑀪𑀲𑁆𑀲 𑀘 𑀅𑀢𑀻𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀏𑀯𑀫𑁂𑀯 𑀧𑀘𑁆𑀙𑀺𑀫𑁂 𑀅𑀦𑀸𑀕𑀢𑁂 𑀓𑀸𑀮𑁂 𑀦𑀸𑀦𑀸𑀓𑀫𑁆𑀫𑀧𑁆𑀨𑀮𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀧𑀢𑁆𑀣𑀬𑀦𑁆𑀢𑀸 𑀫𑀳𑀸𑀚𑀦𑀸 𑀧𑀼𑀭𑀺𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀮𑁂 𑀦𑀸𑀦𑀸𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀆𑀭𑀪𑀦𑁆𑀢𑀺. 𑀢𑀢𑁆𑀣 𑀧𑀼𑀜𑁆𑀜𑀧𑁆𑀨𑀮𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀁 𑀅𑀦𑀸𑀕𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀧𑀼𑀜𑁆𑀜𑀧𑁆𑀨𑀮𑀸𑀦𑀁 𑀅𑀢𑀻𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀦𑀸𑀕𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀧𑀺 𑀅𑀢𑀻𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀅𑀢𑀺𑀫𑀳𑀦𑁆𑀢𑁄 𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀩𑀼𑀤𑁆𑀥𑀸𑀬𑁄 𑀧𑀘𑁆𑀘𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀓𑀢𑀽𑀧 𑀦𑀺𑀲𑁆𑀲𑀬𑁄 𑀦𑀸𑀫. 𑀲𑁄 𑀲𑀼𑀧𑀸𑀓𑀝𑁄𑀬𑁂𑀯.

𑀅𑀚𑁆𑀛𑀢𑁆𑀢𑀪𑀽𑀢𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀥𑀫𑁆𑀫𑀸 𑀦𑀸𑀫 𑀩𑀼𑀤𑁆𑀥𑀸𑀤𑀻𑀲𑀼 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸 𑀧𑀘𑁆𑀘𑀬𑀥𑀫𑁆𑀫𑀸. 𑀩𑀳𑀺𑀤𑁆𑀥𑀸𑀪𑀽𑀢𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀥𑀫𑁆𑀫𑀸 𑀦𑀸𑀫 𑀲𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀸 𑀧𑀣𑀯𑀺𑀧𑀩𑁆𑀩𑀢𑀦𑀤𑀻 𑀲𑀫𑀼𑀤𑁆𑀤𑀸𑀤𑀬𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀩𑀳𑀽𑀧𑀓𑀸𑀭𑀸 𑀅𑀭𑀜𑁆𑀜𑀯𑀦𑀭𑀼𑀓𑁆𑀔 𑀢𑀺𑀡𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀬𑁄 𑀘𑀦𑁆𑀤𑀲𑀽𑀭𑀺𑀬𑀕𑀳𑀦𑀓𑁆𑀔𑀢𑁆𑀢𑀸𑀤𑀬𑁄 𑀯𑀲𑁆𑀲𑁄𑀤𑀓𑀅𑀕𑁆𑀕𑀺𑀯𑀸𑀢𑀲𑀻𑀢𑀉𑀡𑁆𑀳𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀢𑁂 𑀲𑀢𑁆𑀢𑀸𑀦𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀩𑀮𑀯𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀇𑀫𑁂 𑀚𑀦𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬 𑀥𑀫𑁆𑀫𑁂 𑀯𑀸 𑀪𑀸𑀯𑁂𑀦𑁆𑀢𑀺, 𑀅𑀦𑀸𑀕𑀢𑁂 𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀸𑀢𑀺 𑀧𑀸𑀭𑀫𑀻𑀥𑀫𑁆𑀫𑁂 𑀯𑀸 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀢𑀢𑁆𑀣 𑀦𑀺𑀩𑁆𑀩𑀸𑀦𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺.

𑀮𑁄𑀓𑁂 𑀦𑀸𑀦𑀸𑀯𑁄𑀳𑀸𑀭𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁄 𑀘 𑀩𑀼𑀤𑁆𑀥 𑀲𑀸𑀲𑀦𑁂 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁄 𑀘 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀚𑀸𑀦𑀦𑀢𑁆𑀣𑀸𑀬 𑀩𑀮𑀯𑀧𑀘𑁆𑀘𑀬𑁄.

𑀢𑀢𑁆𑀣 𑀲𑀗𑁆𑀔𑀢𑀥𑀫𑁆𑀫𑀸 𑀦𑀸𑀫 𑀧𑀘𑁆𑀘𑀬𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀲𑀢𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀧𑀘𑁆𑀘𑀬𑁂 𑀲𑀢𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀲𑀢𑀺 𑀦 𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀯𑀸 𑀞𑀺𑀢𑀺𑀬𑀸 𑀯𑀸 𑀧𑀘𑁆𑀘𑀬𑁄 𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀧𑀜𑁆𑀜𑀢𑁆𑀢𑀺 𑀘 𑀅𑀲𑀗𑁆𑀔𑀢𑀥𑀫𑁆𑀫𑀸 𑀳𑁄𑀦𑁆𑀢𑀺 ¶ 𑀅𑀚𑀸𑀢𑀺𑀥𑀫𑁆𑀫𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸 𑀦𑀺𑀘𑁆𑀘 𑀥𑀫𑁆𑀫𑀸 𑀥𑀼𑀯𑀥𑀫𑁆𑀫𑀸. 𑀢𑀲𑁆𑀫𑀸 𑀢𑁂𑀲𑀁 𑀉𑀧𑁆𑀧𑀸𑀤𑀸𑀬 𑀯𑀸 𑀞𑀺𑀢𑀺𑀬𑀸 𑀯𑀸 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀓𑀼𑀲𑀮𑁄 𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄. 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀻𑀢𑀺𑀆𑀤𑀺𑀦𑀸 𑀲𑀼𑀧𑀸𑀓𑀝𑁄. 𑀢𑀣𑀸 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀡𑀁 𑀳𑀦𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀻𑀢𑀺𑀆𑀤𑀺𑀦𑀸 𑀲𑀧𑁆𑀧𑀸𑀬𑀁 𑀉𑀢𑀼𑀁 𑀲𑀧𑁆𑀧𑀸𑀬𑀁 𑀪𑁄𑀚𑀦𑀁 𑀉𑀧𑀦𑀺𑀲𑁆𑀲𑀸𑀬 𑀓𑀸𑀬𑀺𑀓𑀁 𑀲𑀼𑀔𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺𑀆𑀤𑀺𑀦𑀸 𑀘 𑀅𑀓𑀼𑀲𑀮𑁄 𑀅𑀓𑀼𑀲𑀮𑀲𑁆𑀲, 𑀅𑀩𑁆𑀬𑀸𑀓𑀢𑁄 𑀅𑀩𑁆𑀬𑀸𑀓𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄𑀧𑀺 𑀲𑀼𑀧𑀸𑀓𑀝𑁄.

𑀓𑀼𑀲𑀮𑁄 𑀧𑀦 𑀅𑀓𑀼𑀲𑀮𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀤𑀸𑀦𑀁 𑀤𑀢𑁆𑀯𑀸 𑀢𑁂𑀦 𑀤𑀸𑀦𑁂𑀦 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑀺, 𑀧𑀭𑀁 𑀯𑀫𑁆𑀪𑁂𑀢𑀺. 𑀢𑀣𑀸 𑀲𑀻𑀮 𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑀺, 𑀧𑀭𑀁 𑀯𑀫𑁆𑀪𑁂𑀢𑀺.

𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀲𑀩𑁆𑀩𑀸𑀦𑀺 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀓𑀫𑁆𑀫𑀸𑀦𑀺 𑀯𑀸 𑀓𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀓𑀼𑀲𑀮𑀸𑀦𑀺 𑀯𑀸 𑀓𑀸𑀮𑀦𑁆𑀢𑀭𑁂 𑀘𑀢𑀼𑀪𑀽𑀫𑀺𑀓𑀸𑀦𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑀸 𑀧𑀽𑀭𑀡𑀓𑀸𑀮𑁂 𑀩𑀳𑀼𑀁 𑀓𑀸𑀬𑀺𑀓𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀢𑀣𑀸 𑀲𑀻𑀮𑀧𑀸𑀭𑀫𑀺𑀁 𑀦𑀺𑀓𑁆𑀔𑀫𑀧𑀸𑀭𑀫𑀺𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀯𑀻𑀭𑀺𑀬𑀧𑀸𑀭𑀫𑀺𑀁 𑀔𑀦𑁆𑀢𑀺𑀧𑀸𑀭𑀫𑀺𑀁 𑀲𑀘𑁆𑀘𑀧𑀸𑀭𑀫𑀺𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀉𑀧𑁂𑀓𑁆𑀔𑀸 𑀧𑀸𑀭𑀫𑀺𑀁. 𑀏𑀲𑁂𑀯 𑀦𑀬𑁄 𑀛𑀸𑀦𑀪𑀸𑀯𑀦𑀸 𑀫𑀕𑁆𑀕𑀪𑀸𑀯𑀦𑀸𑀲𑀼𑀧𑀺.

𑀅𑀓𑀼𑀲𑀮𑁄 𑀓𑀼𑀲𑀮𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀇𑀥𑁂𑀓𑀘𑁆𑀘𑁄 𑀧𑀸𑀧𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀸𑀧𑀲𑁆𑀲 𑀧𑀳𑀸𑀦𑀸𑀬 𑀤𑀸𑀦𑀲𑀻𑀮𑀛𑀸𑀦𑀫𑀕𑁆𑀕𑀓𑀼𑀲𑀮𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀢𑀁 𑀧𑀸𑀧𑀁 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀩𑀮𑀯𑀽𑀧𑀦𑀺𑀲𑁆𑀲𑀬𑁄.

𑀅𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀇𑀥 𑀩𑀳𑀽 𑀚𑀦𑀸 𑀤𑀼𑀘𑁆𑀘𑀭𑀺𑀢𑀸𑀦𑀺 𑀓𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀢𑀺𑀢𑁆𑀯𑀸 𑀅𑀧𑀸𑀬𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀓𑁂𑀘𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀤𑀼𑀘𑁆𑀘𑀭𑀺𑀢𑀓𑀫𑁆𑀫 𑀧𑀘𑁆𑀘𑀬𑀸 𑀩𑀳𑀼𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀓𑁂𑀘𑀺 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑁂𑀦 𑀥𑀦𑀁 𑀮𑀪𑀺𑀢𑁆𑀯𑀸 𑀲𑀼𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀩𑀳𑀼𑀚𑁆𑀚𑀦𑀸 𑀭𑀸𑀕𑀫𑀽𑀮𑀓𑀁 𑀩𑀳𑀼𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺, 𑀤𑁄𑀲𑀫𑀽𑀮𑀓𑀁 𑀤𑀺𑀝𑁆𑀞𑀺𑀫𑀽𑀮𑀓𑀁 𑀫𑀸𑀦𑀫𑀽𑀮𑀓𑀦𑁆𑀢𑀺.

𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀥𑀦 𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀧𑀽𑀭𑁂𑀢𑀺, 𑀧𑀜𑁆𑀜𑀁 𑀧𑀽𑀭𑁂𑀢𑀺, 𑀪𑀸𑀯𑀦𑀸𑀲𑀧𑁆𑀧𑀸𑀬𑀁 𑀆𑀯𑀸𑀲𑀁 𑀯𑀸 𑀮𑁂𑀡𑀁 𑀯𑀸 𑀕𑀼𑀳𑀁𑀯𑀸 𑀭𑀼𑀓𑁆𑀔𑀁 𑀯𑀸 𑀅𑀭𑀜𑁆𑀜𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀕𑁄𑀘𑀭𑀕𑀸𑀫𑀁 𑀯𑀸 𑀉𑀢𑀼𑀲𑀧𑁆𑀧𑀸𑀬𑀁 𑀯𑀸 𑀆𑀳𑀸𑀭𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀢𑀁 𑀢𑀁 𑀪𑀸𑀯𑀦𑀁 𑀪𑀸𑀯𑁂𑀢𑀺.

𑀅𑀩𑁆𑀬𑀸𑀓𑀢𑁄 𑀅𑀓𑀼𑀲𑀮𑀲𑁆𑀲𑀧𑀺 𑀩𑀮𑀯𑀽𑀧𑀦𑀺𑀲𑁆𑀲𑀬𑁄. 𑀮𑁄𑀓𑁂 𑀘𑀓𑁆𑀔𑀼𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀩𑀳𑀽𑀦𑀺 𑀤𑀲𑁆𑀲𑀦𑀫𑀽𑀮𑀸𑀦𑀺 𑀅𑀓𑀼𑀲𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀲 𑀦𑀬𑁄 𑀲𑁄𑀢𑀲𑀫𑁆𑀧𑀤𑀸𑀤𑀻𑀲𑀼 ¶ . 𑀢𑀣𑀸 𑀳𑀢𑁆𑀣𑀲𑀫𑁆𑀧𑀤𑀁 𑀧𑀸𑀤𑀲𑀫𑁆𑀧𑀤𑀁 𑀲𑀢𑁆𑀣𑀲𑀫𑁆𑀧𑀤𑀁 𑀆𑀯𑀼𑀥𑀲𑀫𑁆𑀧𑀤𑀦𑁆𑀢𑀺𑀆𑀤𑀺𑀦𑀸𑀧𑀺 𑀯𑀢𑁆𑀢𑀩𑁆𑀩𑁄. 𑀏𑀯𑀁 𑀉𑀧𑀦𑀺𑀲𑁆𑀲𑀬𑁄 𑀢𑀺𑀯𑀺𑀥𑁄 𑀳𑁄𑀢𑀺.

𑀇𑀥 𑀲𑀼𑀢𑁆𑀢𑀦𑁆𑀢𑀽𑀧𑀦𑀺𑀲𑁆𑀲𑀬𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧 𑀦𑀺𑀲𑁆𑀲𑀸𑀬 𑀧𑀸𑀧𑀫𑀺𑀢𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀦𑀸 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀆𑀕𑀢𑁄. 𑀅𑀧𑀺 𑀘 𑀧𑀜𑁆𑀘𑀦𑀺𑀬𑀸𑀫𑀥𑀫𑁆𑀫𑀸 𑀲𑀢𑁆𑀢𑀮𑁄𑀓 𑀲𑀗𑁆𑀔𑀸𑀭𑀮𑁄𑀓 𑀑𑀓𑀸𑀲𑀮𑁄𑀓 𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀦𑀺𑀬𑀸𑀫𑀤𑀻𑀧𑀦𑀺𑀬𑀁 𑀅𑀫𑁆𑀳𑁂𑀳𑀺 𑀯𑀺𑀢𑁆𑀣𑀸𑀭𑀢𑁄 𑀤𑀻𑀧𑀺𑀢𑁄𑀢𑀺.

𑀓𑁂𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺. 𑀅𑀥𑀺𑀧𑀢𑀺𑀪𑀽𑀢𑀁 𑀆𑀭𑀫𑁆𑀫𑀡𑀫𑁂𑀯 𑀆𑀭𑀫𑁆𑀫𑀡𑀺𑀓𑀥𑀫𑁆𑀫𑀸𑀦𑀁 𑀩𑀮𑀯𑀦𑀺𑀲𑁆𑀲𑀬𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧 𑀦𑀺𑀲𑁆𑀲𑀬𑁄.

𑀓𑁂𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀢𑀺. 𑀧𑀼𑀭𑀺𑀫𑀁 𑀅𑀦𑀦𑁆𑀢𑀭𑀘𑀺𑀢𑁆𑀢𑀫𑁂𑀯 𑀧𑀘𑁆𑀙𑀺𑀫𑀲𑁆𑀲 𑀅𑀦𑀦𑁆𑀢𑀭𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁆𑀣𑀸𑀬 𑀩𑀮𑀯𑀦𑀺𑀲𑁆𑀲𑀬𑀝𑁆𑀞𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄. 𑀫𑀸𑀢𑀸 𑀯𑀺𑀬 𑀧𑀼𑀭𑀺𑀫𑀘𑀺𑀢𑁆𑀢𑀁, 𑀧𑀼𑀢𑁆𑀢𑁄 𑀯𑀺𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀁. 𑀬𑀣𑀸 𑀫𑀸𑀢𑀸 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀧𑀼𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁆𑀣𑀸𑀬 𑀩𑀮𑀯𑀽𑀧 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀣𑀸 𑀧𑀼𑀭𑀺𑀫𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁆𑀣𑀸𑀬𑀸𑀢𑀺.

𑀓𑁂𑀦𑀝𑁆𑀞𑁂𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺. 𑀧𑀓𑀢𑀺𑀬𑀸𑀯 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁 𑀧𑀸𑀓𑀝𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄.

𑀏𑀢𑁆𑀣 𑀘 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸𑀦𑀼𑀪𑀸𑀯𑁄 𑀅𑀦𑀦𑁆𑀢𑀭𑀘𑀺𑀢𑁆𑀢𑁂 𑀏𑀯 𑀨𑀭𑀢𑀺. 𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀦𑀼𑀪𑀸𑀯𑁄 𑀧𑀦 𑀤𑀽𑀭𑁂𑀧𑀺 𑀨𑀭𑀢𑀺𑀬𑁂𑀯. 𑀢𑀣𑀸 𑀳𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀧𑀼𑀭𑀺𑀫𑁂𑀲𑀼 𑀤𑀺𑀯𑀲𑁂𑀲𑀼 𑀯𑀸 𑀫𑀸𑀲𑁂𑀲𑀼 𑀯𑀸 𑀲𑀁𑀯𑀘𑁆𑀙𑀭𑁂𑀲𑀼 𑀯𑀸 𑀤𑀺𑀝𑁆𑀞𑀲𑀼𑀢𑀖𑀸𑀬𑀺𑀢𑀲𑀸𑀬𑀺𑀢𑀨𑀼𑀲𑀺𑀢𑀯𑀺𑀜𑁆𑀜𑀸𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀘𑁆𑀙𑀸𑀢𑀣𑀸𑀭𑀽𑀧𑁂 𑀧𑀘𑁆𑀘𑀬𑁂 𑀲𑀢𑀺 𑀯𑀲𑁆𑀲𑀲𑀢𑁂𑀧𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀦𑀸𑀫 𑀧𑀼𑀩𑁆𑀩𑁂 𑀫𑀬𑀸 𑀤𑀺𑀝𑁆𑀞𑀁 𑀲𑀼𑀢𑀦𑁆𑀢𑀺𑀆𑀤𑀺𑀦𑀸 𑀲𑀢𑁆𑀢𑀸 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀑𑀧𑀧𑀸𑀢𑀺𑀓𑀲𑀢𑁆𑀢𑀸 𑀧𑀦 𑀧𑀼𑀭𑀺𑀫𑀪𑀯𑀁𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀢𑀣𑀸 𑀫𑀦𑀼𑀲𑁆𑀲𑁂𑀲𑀼𑀧𑀺 𑀅𑀧𑁆𑀧𑁂𑀓𑀘𑁆𑀘𑁂 𑀚𑀸𑀢𑀺𑀲𑁆𑀲𑀭𑀲𑀜𑁆𑀜𑀸𑀮𑀸𑀪𑀺𑀦𑁄. 𑀢𑀣𑀸 𑀧𑀼𑀩𑁆𑀩𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑁂𑀲𑀼 𑀤𑀺𑀝𑁆𑀞𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀧𑀘𑁆𑀙𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀁 𑀯𑀢𑁆𑀣𑀼𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀢𑀲𑁆𑀫𑀺𑀁 𑀏𑀯 𑀔𑀡𑁂 𑀩𑀳𑀽𑀲𑀼𑀧𑀺 𑀢𑁂𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀁 𑀨𑀭𑀫𑀸𑀦𑀁 𑀧𑀯𑀢𑁆𑀢𑀢𑀻𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀘 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀘 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀘.

𑀢𑀢𑁆𑀣 ¶ 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀘 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀘 𑀧𑀼𑀩𑁆𑀩𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀦𑀺𑀲𑁆𑀲𑀬𑀦𑀸𑀫𑁂𑀦 𑀯𑀼𑀢𑁆𑀢𑀸 𑀏𑀯.

𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀦𑀸𑀫 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀅𑀝𑁆𑀞𑀸𑀭𑀲𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀏𑀯. 𑀢𑁂𑀲𑀼𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀲𑀤𑁆𑀤𑀸𑀤𑀻𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀦𑀺𑀬𑀫𑀢𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑀣𑀸 𑀳𑀺 𑀯𑀻𑀡𑀸𑀲𑀤𑁆𑀤𑀸 𑀦𑀸𑀫 𑀯𑀻𑀡𑀸𑀢𑀦𑁆𑀢𑀻𑀲𑀼 𑀯𑀻𑀡𑀸𑀤𑀡𑁆𑀟𑀓𑁂𑀦 𑀧𑀳𑀭𑀡 𑀧𑀘𑁆𑀘𑀬𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀢𑁂 𑀲𑀤𑁆𑀤𑀸 𑀧𑀼𑀭𑁂𑀚𑀸𑀢𑀸𑀳𑀺 𑀯𑀻𑀡𑀸𑀢𑀦𑁆𑀢𑀺 𑀯𑀻𑀡𑀸𑀤𑀡𑁆𑀟𑀓𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀫𑁂𑀯𑀁 𑀧𑀜𑁆𑀘 𑀯𑀺𑀜𑁆𑀜𑀸𑀡 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺 𑀧𑀜𑁆𑀘𑀲𑀼 𑀯𑀢𑁆𑀣𑀼𑀤𑁆𑀯𑀸𑀭𑁂𑀲𑀼 𑀧𑀜𑁆𑀘𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸𑀕𑀫𑀦 𑀧𑀘𑁆𑀘𑀬𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀆𑀧𑀸𑀢𑀸𑀕𑀫𑀦𑀜𑁆𑀘 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀞𑀺𑀢𑀺𑀧𑀢𑁆𑀢𑀓𑀸𑀮𑁂 𑀏𑀯 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀢𑁂𑀲𑀼 𑀧𑀜𑁆𑀘𑀯𑀢𑁆𑀣𑀽𑀲𑀼 𑀏𑀯 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄 𑀪𑀯𑀗𑁆𑀕𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀆𑀧𑀸𑀢𑀕𑀫𑀦𑀢𑁆𑀢𑀸 𑀏𑀯 𑀢𑀁 𑀪𑀯𑀗𑁆𑀕𑀫𑁆𑀧𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀺𑀢𑁆𑀯𑀸 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁂 𑀏𑀯 𑀢𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀢𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀼𑀭𑁂𑀚𑀸𑀢𑁂𑀳𑀺 𑀯𑀢𑁆𑀣𑀼 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀅𑀝𑁆𑀞𑀸𑀭𑀲𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀦𑀺𑀭𑀼𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀅𑀢𑀻𑀢𑀸𑀦𑀺𑀧𑀺 𑀳𑁄𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀳𑀼𑀢𑁆𑀯𑀸 𑀅𑀦𑀸𑀕𑀢𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸𑀦𑀺 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀲𑀩𑁆𑀩𑀸𑀦𑀺𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀏𑀯 𑀢𑁂𑀲𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑀤𑀸 𑀤𑀽𑀭𑁂 𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀞𑀺𑀢𑀁 𑀢𑀁 𑀢𑀁 𑀆𑀭𑀫𑁆𑀫𑀡𑀯𑀢𑁆𑀣𑀼𑀁 𑀫𑀦𑀲𑀸 𑀏𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀤𑀸 𑀢𑀁 𑀢𑀁 𑀯𑀢𑁆𑀣𑀼 𑀲𑀘𑁂 𑀢𑀢𑁆𑀣 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀳𑁄𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀧𑀼𑀭𑁂𑀚𑀸𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑀢𑀼 𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀯𑀼𑀟𑁆𑀠𑀺𑀯𑀺𑀭𑀼𑀴𑁆𑀳𑀺𑀬𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀬𑀣𑀸 𑀢𑀁 𑀧𑀘𑁆𑀙𑀺𑀫𑀯𑀲𑁆𑀲𑁂𑀲𑀼 𑀅𑀦𑀼𑀯𑀲𑁆𑀲𑀁 𑀯𑀲𑁆𑀲𑀫𑀸𑀦𑀸𑀦𑀺 𑀯𑀲𑁆𑀲𑁄𑀤𑀓𑀸𑀦𑀺 𑀧𑀼𑀭𑀺𑀫𑀯𑀲𑁆𑀲𑁂𑀲𑀼 𑀚𑀸𑀢𑀸𑀦𑀁 𑀭𑀼𑀓𑁆𑀔𑀧𑁄𑀢𑀓𑀸𑀦𑀁 𑀯𑀼𑀟𑁆𑀠𑀺𑀯𑀺𑀭𑀼𑀴𑁆𑀳𑀺𑀬𑀸 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀢𑀢𑁆𑀣 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀦𑁆𑀢𑀺 𑀧𑀞𑀫𑀪𑀯𑀗𑁆𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀼𑀢𑀺 𑀘𑀺𑀢𑁆𑀢𑀸 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀧𑀼𑀭𑁂𑀚𑀸𑀢𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀚𑀭𑀽𑀧𑀓𑀸𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁄 𑀲𑀩𑁆𑀩𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀸𑀬𑁄 𑀯𑀼𑀘𑁆𑀘𑀢𑀺.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀲𑁆𑀲 𑀓𑀫𑁆𑀫𑀚𑀭𑀽𑀧𑀓𑀸𑀬𑀲𑁆𑀲 𑀧𑀞𑀫 𑀪𑀯𑀗𑁆𑀕𑀸𑀤𑀻𑀦𑀺 𑀧𑀦𑁆𑀦𑀭𑀲𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀁 𑀧𑀦 𑀢𑁂𑀦 𑀓𑀸𑀬𑁂𑀦 𑀲𑀳𑀼𑀧𑁆𑀧𑀦𑁆𑀦𑀢𑁆𑀢𑀸 ¶ 𑀧𑀘𑁆𑀙𑀚𑀸𑀢𑀁 𑀦 𑀳𑁄𑀢𑀺. 𑀲𑁄𑀴𑀲𑀫𑀪𑀯𑀗𑁆𑀕𑀘𑀺𑀢𑁆𑀢𑀜𑁆𑀘 𑀢𑀲𑁆𑀲 𑀓𑀸𑀬𑀲𑁆𑀲 𑀪𑀺𑀚𑁆𑀚𑀦𑀓𑁆𑀔𑁂𑀢𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀢𑀲𑁆𑀫𑀸 𑀧𑀦𑁆𑀦𑀭𑀲𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀦 𑀤𑁆𑀯𑁂 𑀭𑀽𑀧𑀓𑀸𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀫𑁆𑀫𑀚𑀭𑀽𑀧𑀓𑀸𑀬𑁄 𑀘 𑀉𑀢𑀼𑀚𑀭𑀽𑀧𑀓𑀸𑀬𑁄𑀘. 𑀢𑀣𑀸 𑀪𑀗𑁆𑀕𑀓𑁆𑀔𑀡𑁂𑀧𑀺. 𑀧𑀞𑀫𑀪𑀯𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀧𑀦 𑀢𑀬𑁄 𑀭𑀽𑀧𑀓𑀸𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀫𑁆𑀫𑀚𑀭𑀽𑀧𑀓𑀸𑀬𑁄 𑀘 𑀉𑀢𑀼𑀚𑀭𑀽𑀧𑀓𑀸𑀬𑁄 𑀘 𑀘𑀺𑀢𑁆𑀢𑀚𑀭𑀽𑀧𑀓𑀸𑀬𑁄 𑀘. 𑀬𑀤𑀸 𑀩𑀳𑀺𑀤𑁆𑀥𑀸𑀳𑀸𑀭𑀧𑁆𑀨𑀭𑀡𑀁 𑀮𑀪𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀸𑀳𑀸𑀭𑁄 𑀆𑀳𑀸𑀭𑀚𑀭𑀽𑀧𑀓𑀸𑀬𑀁 𑀚𑀦𑁂𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀸 𑀘𑀢𑁆𑀢𑀸𑀭𑁄 𑀭𑀽𑀧𑀓𑀸𑀬𑀸 𑀤𑀻𑀧 𑀚𑀸𑀮𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺. 𑀢𑁂 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑁆𑀫 𑀬𑀸𑀯 𑀞𑀺𑀢𑀺𑀪𑀸𑀯𑁂𑀦 𑀥𑀭𑀦𑁆𑀢𑀺, 𑀢𑀸𑀯 𑀧𑀦𑁆𑀦𑀭𑀲𑀘𑀺𑀢𑁆𑀢𑀸𑀦𑀺 𑀢𑁂𑀲𑀁 𑀓𑀸𑀬𑀸𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯.

𑀯𑀼𑀟𑁆𑀠𑀺𑀯𑀺𑀭𑀼𑀴𑁆𑀳𑀺𑀬𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀦𑁆𑀢𑀢𑀺𑀬𑀸 𑀉𑀧𑀭𑀽𑀧𑀭𑀺 𑀯𑀼𑀟𑁆𑀠𑀺𑀬𑀸 𑀘 𑀯𑀺𑀭𑀼𑀴𑁆𑀳𑀺𑀬𑀸 𑀘. 𑀢𑀣𑀸𑀳𑀺 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀭𑀽𑀧𑀓𑀸𑀬𑀸 𑀲𑀘𑁂 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑀁 𑀧𑀼𑀦𑀧𑁆𑀧𑀼𑀦𑀁 𑀮𑀪𑀦𑁆𑀢𑀺, 𑀏𑀯𑀁 𑀲𑀢𑀺 𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀸𑀧𑀺 𑀧𑀘𑁆𑀙𑀸𑀭𑀽𑀧𑀲𑀦𑁆𑀢𑀢𑀺𑀧𑀭𑀫𑁆𑀧𑀭𑀸𑀦𑀁 𑀯𑀼𑀟𑁆𑀠𑀺𑀬𑀸 𑀘 𑀯𑀺𑀭𑀼𑀴𑁆𑀳𑀺𑀬𑀸 𑀘 𑀯𑁂𑀧𑀼𑀮𑁆𑀮𑀸𑀬 𑀘 𑀩𑀮𑀯 𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀢𑁆𑀢𑀭𑀲 𑀮𑁄𑀓𑀺𑀬𑀓𑀼𑀲𑀮 𑀘𑀺𑀢𑁆𑀢𑀸𑀦𑀺 𑀆𑀯𑀚𑁆𑀚𑀦𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀅𑀝𑁆𑀞𑀸𑀭𑀲𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀲𑀢𑁆𑀢 𑀘𑀢𑁆𑀢𑀸𑀮𑀻𑀲𑀁 𑀮𑁄𑀓𑀺𑀬𑀚𑀯𑀦𑀘𑀺𑀢𑁆𑀢𑀸𑀦𑀺 𑀆𑀲𑁂𑀯𑀦𑀧𑀘𑁆𑀘𑀬𑁄. 𑀢𑁂𑀲𑀼 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀁 𑀚𑀯𑀦𑀲𑀦𑁆𑀢𑀢𑀺𑀁 𑀧𑀢𑁆𑀯𑀸 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀚𑀯𑀦𑀘𑀺𑀢𑁆𑀢𑀁 𑀆𑀲𑁂𑀯𑀦 𑀧𑀘𑁆𑀘𑀬𑁄. 𑀘𑀢𑀽𑀳𑀺 𑀫𑀕𑁆𑀕𑀘𑀺𑀢𑁆𑀢𑁂𑀳𑀺 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁 𑀆𑀲𑁂𑀯𑀦𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁.

𑀓𑁂𑀦𑀝𑁆𑀞𑁂𑀦 𑀆𑀲𑁂𑀯𑀦𑀦𑁆𑀢𑀺. 𑀉𑀧𑀭𑀽𑀧𑀭𑀺𑀧𑀕𑀼𑀡𑀪𑀸𑀯𑀯𑀟𑁆𑀠𑀦𑀢𑁆𑀣𑀁𑀣𑀸𑀫 𑀩𑀮𑀯𑀟𑁆𑀠𑀦𑀢𑁆𑀣𑀜𑁆𑀘 𑀧𑀭𑀺𑀯𑀸𑀲𑀕𑁆𑀕𑀸𑀳𑀸𑀧𑀦𑀝𑁆𑀞𑁂𑀦.

𑀢𑀢𑁆𑀣 𑀧𑀕𑀼𑀡𑀪𑀸𑀯𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀚𑁆𑀛𑀸𑀬𑀺𑀢𑀲𑁆𑀲 𑀧𑀸𑀴𑀺𑀧𑀸𑀞𑀲𑁆𑀲 𑀲𑀼𑀔𑁂𑀦 𑀧𑀯𑀢𑁆𑀢𑀦𑀁 𑀯𑀺𑀬 𑀚𑀯𑀦𑀝𑁆𑀞𑀸𑀦𑀚𑀯𑀦𑀓𑀺𑀘𑁆𑀘𑀲𑀗𑁆𑀔𑀸𑀢𑁂 𑀞𑀸𑀦𑀓𑀺𑀘𑁆𑀘𑀯𑀺𑀲𑁂𑀲𑁂 𑀧𑀘𑁆𑀙𑀺𑀫 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀲𑀼𑀔𑁂𑀦 𑀧𑀯𑀢𑁆𑀢𑀦𑀁. 𑀧𑀭𑀺𑀯𑀸𑀲𑁄 𑀦𑀸𑀫 𑀓𑁄𑀲𑁂𑀬𑁆𑀬𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀲𑀼𑀕𑀦𑁆𑀥𑁂𑀦 𑀧𑀭𑀺𑀯𑀸𑀲𑀦𑀁 𑀯𑀺𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑁆𑀦𑀁 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺𑀦𑀸 𑀯𑀸 𑀅𑀭𑀚𑁆𑀚𑀦 𑀅𑀤𑀼𑀲𑁆𑀲𑀦𑀸𑀤𑀺𑀦𑀸 𑀯𑀸 𑀧𑀭𑀺𑀯𑀸𑀲𑀦𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀚𑀯𑀦𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑁂𑀧𑀺 𑀢𑀲𑁆𑀲 𑀚𑀯𑀦𑀯𑁂𑀕𑁄 𑀦 𑀦𑀺𑀭𑀼𑀚𑁆𑀛𑀢𑀺, 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀨𑀭𑀫𑀸𑀦𑁄 𑀧𑀯𑀢𑁆𑀢𑀢𑀺𑀬𑁂𑀯. 𑀢𑀲𑁆𑀫𑀸 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀚𑀯𑀦𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑁂𑀦 𑀯𑁂𑀕𑁂𑀦 𑀧𑀕𑁆𑀕𑀳𑀺𑀢𑀁 𑀩𑀮𑀯𑀢𑀭𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 ¶ 𑀧𑀼𑀭𑀺𑀫𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀧𑀭𑀺𑀯𑀸𑀲𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀕𑀡𑁆𑀳𑀸𑀧𑁂𑀢𑀺. 𑀧𑀘𑁆𑀙𑀺𑀫𑀜𑁆𑀘 𑀘𑀺𑀢𑁆𑀢𑀁 𑀧𑀼𑀭𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑁄 𑀆𑀲𑁂𑀯𑀦𑀯𑁂𑀕𑁄 𑀧𑀓𑀢𑀺𑀬𑀸 𑀲𑀢𑁆𑀢𑀳𑀺 𑀘𑀺𑀢𑁆𑀢𑀯𑀸𑀭𑁂𑀳𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀢𑀢𑁄 𑀧𑀭𑀁 𑀢𑀤𑀸𑀭𑀫𑁆𑀫𑀡𑀯𑀺𑀧𑀸𑀓 𑀘𑀺𑀢𑁆𑀢𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀪𑀯𑀗𑁆𑀕 𑀘𑀺𑀢𑁆𑀢𑀯𑀸𑀭𑁄 𑀯𑀸 𑀧𑀯𑀢𑁆𑀢𑀢𑀺.

𑀇𑀥 𑀲𑀼𑀢𑁆𑀢𑀦𑁆𑀢𑀸𑀲𑁂𑀯𑀦𑀧𑀘𑁆𑀘𑀬𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀢𑀺, 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀸𑀯𑁂𑀢𑀺, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺, 𑀥𑀫𑁆𑀫 𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀪𑀸𑀯𑁂𑀢𑀻𑀢𑀺𑀆𑀤𑀺𑀦𑀸 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀯𑀼𑀢𑁆𑀢𑁄. 𑀢𑀢𑁆𑀣 𑀪𑀸𑀯𑁂𑀢𑀻𑀢𑀺 𑀏𑀓𑀁𑀧𑀺 𑀤𑀺𑀯𑀲𑀁 𑀪𑀸𑀯𑁂𑀢𑀺, 𑀲𑀢𑁆𑀢𑀧𑀺 𑀤𑀺𑀯𑀲𑀸𑀦𑀺 𑀪𑀸𑀯𑁂𑀢𑀺, 𑀏𑀓𑀁𑀧𑀺 𑀫𑀸𑀲𑀁 𑀪𑀸𑀯𑁂𑀢𑀺, 𑀲𑀢𑁆𑀢𑀧𑀺 𑀫𑀸𑀲𑀸𑀦𑀺 𑀪𑀸𑀯𑁂𑀢𑀺, 𑀏𑀓𑀁𑀧𑀺 𑀲𑀁𑀯𑀘𑁆𑀙𑀭𑀁 𑀪𑀸𑀯𑁂𑀢𑀺, 𑀲𑀢𑁆𑀢𑀧𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀧𑀼𑀭𑀺𑀫𑁂𑀲𑀼 𑀪𑀯𑁂𑀲𑀼 𑀆𑀲𑁂𑀯𑀺𑀢𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻 𑀓𑀢𑀸𑀦𑀺 𑀓𑀼𑀲𑀮𑀸𑀦𑀺 𑀯𑀸 𑀅𑀓𑀼𑀲𑀮𑀸𑀦𑀺 𑀯𑀸 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑁂𑀲𑀼 𑀪𑀯𑁂𑀲𑀼 𑀩𑀮𑀯𑀢𑀭𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀅𑀓𑀼𑀲𑀮𑀸𑀦𑀁 𑀯𑀸 𑀉𑀧𑁆𑀧𑀢𑁆𑀢𑀺𑀬𑀸 𑀆𑀲𑁂𑀯𑀦 𑀧𑀘𑁆𑀘𑀬𑁄.

𑀓𑀸𑀮𑀦𑁆𑀢𑀭𑁂 𑀯𑀸 𑀪𑀯𑀦𑁆𑀢𑀭𑁂 𑀯𑀸 𑀢𑀸𑀤𑀺𑀲𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀸𑀫. 𑀢𑁂𑀲𑀁𑀬𑁂𑀯 𑀩𑀮𑀯𑀢𑀭𑀢𑁆𑀣𑀸𑀬 𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀸𑀫.

𑀮𑁄𑀓𑁂𑀧𑀺 𑀫𑀳𑀦𑁆𑀢𑁂𑀲𑀼 𑀘𑀺𑀢𑁆𑀢𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀯𑀸𑀘𑀸 𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀓𑀸𑀬𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀞𑀸𑀦𑁂𑀲𑀼 𑀘 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀸𑀦𑀁 𑀦𑀺𑀲𑁆𑀲𑀦𑁆𑀤𑀕𑀼𑀡𑀸 𑀦𑀸𑀫 𑀲𑀦𑁆𑀤𑀺𑀲𑁆𑀲𑀦𑁆𑀢𑀺𑀬𑁂𑀯.

𑀲𑀩𑁆𑀩𑁂𑀲𑀁 𑀔𑀡𑀺𑀓𑀥𑀫𑁆𑀫𑀸𑀦𑀁 𑀫𑀚𑁆𑀛𑁂 𑀏𑀯𑀭𑀽𑀧𑀲𑁆𑀲 𑀆𑀲𑁂𑀯𑀦 𑀧𑀘𑁆𑀘𑀬𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀼𑀭𑀺𑀲𑀩𑀮𑀧𑀼𑀭𑀺𑀲𑀣𑀸𑀫𑀸𑀦𑀁 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦 𑀯𑀲𑁂𑀦 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀺𑀢𑀸𑀦𑀺 𑀧𑀼𑀭𑀺𑀲𑀓𑀫𑁆𑀫𑀸𑀦𑀺 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀸𑀯𑀁𑀧𑀺 𑀕𑀘𑁆𑀙𑀦𑁆𑀢𑀺. 𑀆𑀲𑁂𑀯𑀦𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀯𑀺𑀥𑁄 𑀓𑀫𑁆𑀫𑀧𑀘𑁆𑀘𑀬𑁄 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑁄.

𑀢𑀢𑁆𑀣 𑀔𑀡𑀢𑁆𑀢𑀬𑀲𑀫𑀗𑁆𑀕𑀺 𑀪𑀽𑀢𑀸 𑀲𑀩𑁆𑀩𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀸 𑀩𑁆𑀬𑀸𑀓𑀢𑀘𑁂𑀢𑀦𑀸 𑀲𑀳𑀚𑀸𑀢𑀓𑀫𑁆𑀫 𑀧𑀘𑁆𑀘𑀬𑁄. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀘 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀸 𑀓𑀫𑁆𑀫𑀚𑀭𑀽𑀧𑀥𑀫𑁆𑀫𑀸 𑀘 𑀧𑀯𑀢𑁆𑀢𑀺𑀓𑀸𑀮𑁂 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀚𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀅𑀢𑀻𑀢𑀸 ¶ 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫 𑀧𑀘𑁆𑀘𑀬𑁄. 𑀩𑀸𑀢𑁆𑀢𑀺𑀁𑀲𑀯𑀺𑀥𑀸 𑀮𑁄𑀓𑀺𑀬𑀯𑀺𑀧𑀸𑀓 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘 𑀲𑀩𑁆𑀩𑁂 𑀓𑀫𑁆𑀫𑀚𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀓𑀫𑁆𑀫𑀦𑁆𑀢𑀺. 𑀓𑀺𑀭𑀺𑀬𑀸𑀯𑀺𑀲𑁂𑀲𑀝𑁆𑀞𑁂𑀦 𑀓𑀫𑁆𑀫𑀁. 𑀘𑁂𑀢𑀦𑀸 𑀳𑀺 𑀓𑀺𑀭𑀺𑀬𑀸 𑀯𑀺𑀲𑁂𑀲𑁄 𑀳𑁄𑀢𑀺 𑀲𑀩𑁆𑀩𑀓𑀫𑁆𑀫𑁂𑀲𑀼 𑀚𑁂𑀝𑁆𑀞𑀓𑀢𑁆𑀢𑀸. 𑀢𑀸 𑀳𑀺 𑀲𑀩𑁆𑀩𑁂𑀲𑀼 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀲𑀼 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀢𑁆𑀣𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘𑁂𑀢𑁂𑀢𑀺 𑀓𑀧𑁆𑀧𑁂𑀢𑀺 𑀲𑀁𑀯𑀺𑀤𑀳𑀢𑀺, 𑀏𑀓𑀢𑁄 𑀉𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀓𑀫𑁆𑀫𑁂𑀲𑀼 𑀚𑁂𑀝𑁆𑀞𑀓𑀸 𑀳𑁄𑀢𑀺. 𑀇𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀝𑁆𑀞𑁂𑀦 𑀓𑀫𑁆𑀫𑀁 𑀦𑀸𑀫. 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀓𑀫𑁆𑀫𑀁. 𑀓𑀺𑀁 𑀓𑀭𑁄𑀦𑁆𑀢𑀺. 𑀓𑀸𑀬𑀺𑀓𑀓𑀺𑀭𑀺𑀬𑀁𑀧𑀺 𑀓𑀭𑁄𑀦𑁆𑀢𑀺, 𑀯𑀸𑀘𑀲𑀺𑀓𑀓𑀺𑀭𑀺𑀬𑀁𑀧𑀺 𑀓𑀭𑁄𑀦𑁆𑀢𑀺, 𑀫𑀸𑀦𑀲𑀺𑀓𑀓𑀺𑀭𑀺𑀬𑀁𑀧𑀺 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀓𑀸𑀬𑀺𑀓𑀓𑀺𑀭𑀺𑀬𑀸 𑀦𑀸𑀫 𑀕𑀫𑀦𑀞𑀸𑀦 𑀦𑀺𑀲𑀚𑁆𑀚𑀸𑀤𑀬𑁄 𑀅𑀪𑀺𑀓𑁆𑀓𑀫𑀦𑀧𑀝𑀺𑀓𑁆𑀓𑀫𑀦𑀸𑀤𑀬𑁄 𑀅𑀦𑁆𑀢𑀫𑀲𑁄 𑀅𑀓𑁆𑀔𑀺𑀤𑀮𑀸𑀦𑀁 𑀉𑀓𑁆𑀔𑀺𑀧𑀦𑀦𑀺𑀓𑁆𑀔𑀺𑀧𑀦𑀸𑀦𑀺𑀧𑀺. 𑀯𑀸𑀘𑀲𑀺𑀓𑀓𑀺𑀭𑀺𑀬𑀸 𑀦𑀸𑀫 𑀯𑀸𑀘𑀸𑀧𑀯𑀢𑁆𑀢𑀦𑀓𑀺𑀭𑀺𑀬𑀸. 𑀫𑀸𑀦𑀲𑀺𑀓𑀓𑀺𑀭𑀺𑀬𑀸 𑀦𑀸𑀫 𑀲𑀼𑀘𑀺𑀦𑁆𑀢𑀺𑀢 𑀤𑀼𑀘𑀺𑀦𑁆𑀢𑀺𑀢𑀓𑀺𑀭𑀺𑀬𑀸, 𑀅𑀦𑁆𑀢𑀫𑀲𑁄 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀁 𑀤𑀲𑁆𑀲𑀦𑀓𑀺𑀘𑁆𑀘𑀲𑀯𑀦𑀓𑀺𑀘𑁆𑀘𑀸𑀤𑀻𑀦𑀺𑀧𑀺. 𑀲𑀩𑁆𑀩𑀸𑀧𑀺 𑀇𑀫𑀸 𑀓𑀺𑀭𑀺𑀬𑀸𑀬𑁄 𑀏𑀢𑀸𑀬 𑀘𑁂𑀢𑀦𑀸𑀬 𑀲𑀢𑁆𑀢𑀸 𑀓𑀭𑁄𑀦𑁆𑀢𑀺, 𑀲𑀁𑀯𑀺𑀤𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀸 𑀘𑁂𑀢𑀦𑀸 𑀓𑀫𑁆𑀫𑀁 𑀦𑀸𑀫.

𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀲𑀳 𑀚𑀸𑀬𑀢𑀻𑀢𑀺 𑀲𑀳𑀚𑀸𑀢𑀁. 𑀲𑀳𑀚𑀸𑀢𑀜𑁆𑀘 𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀲𑀳𑀚𑀸𑀢𑀓𑀫𑁆𑀫𑀁. 𑀲𑀳𑀚𑀸𑀢𑀓𑀫𑁆𑀫𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀲𑀳𑀚𑀸𑀢𑀓𑀫𑁆𑀫 𑀧𑀘𑁆𑀘𑀬𑁄. 𑀲𑀳𑀚𑀸𑀢𑀓𑀫𑁆𑀫𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑁄 𑀓𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄 𑀅𑀜𑁆𑀜𑁄 𑀯𑀺𑀧𑀸𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄 𑀏𑀢𑀲𑁆𑀲𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀁. 𑀦𑀸𑀦𑀸𑀓𑁆𑀔𑀡𑀺𑀓𑀜𑁆𑀘 𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀁. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 𑀅𑀢𑁆𑀢𑀦𑁄 𑀦𑀺𑀭𑀼𑀤𑁆𑀥𑀸𑀦𑀦𑁆𑀢𑀭𑁂 𑀏𑀯 𑀅𑀭𑀺𑀬𑀨𑀮𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀲𑀸𑀧𑀺 𑀦𑀸𑀦𑀸𑀓𑁆𑀔𑀡𑀺𑀓𑀸 𑀏𑀯 𑀳𑁄𑀢𑀺.

𑀏𑀢𑁆𑀣 𑀘 𑀏𑀓𑀸 𑀤𑀸𑀦𑀓𑀼𑀲𑀮𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀜𑁆𑀘 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀺𑀭𑀺𑀬𑀸𑀪𑀽𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀜𑁆𑀘 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄. 𑀢𑀸𑀬 𑀘𑁂𑀢𑀦𑀸𑀬 𑀆𑀬𑀢𑀺𑀁 𑀓𑀸𑀮𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀯𑀺𑀧𑀸𑀓𑀓𑁆𑀔𑀦𑁆𑀥𑀲𑁆𑀲 𑀘 𑀓𑀫𑁆𑀫𑀚𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀘 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑁄. 𑀏𑀯𑀁 𑀏𑀓𑀸 𑀓𑀫𑁆𑀫𑀧𑀣𑀧𑀢𑁆𑀢𑀸 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀘𑁂𑀢𑀦𑀸 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀤𑁆𑀯𑀻𑀳𑀺 𑀧𑀘𑁆𑀘𑀬𑀲𑀢𑁆𑀢𑀻𑀳𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀏𑀢𑁆𑀣 𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂 𑀓𑀫𑁆𑀫𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁄. 𑀲𑁄 𑀧𑀦 𑀘𑁂𑀢𑀦𑀸𑀬 𑀦𑀺𑀭𑀼𑀤𑁆𑀥𑀸𑀬𑀧𑀺 𑀅𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀕𑀘𑁆𑀙𑀢𑀺𑀬𑁂𑀯. 𑀬𑀤𑀸 ¶ 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀲𑁄 𑀓𑀺𑀭𑀺𑀬𑀸 𑀯𑀺𑀲𑁂𑀲𑁄 𑀘𑀼𑀢𑀺𑀦𑀦𑁆𑀢𑀭𑁂 𑀏𑀓𑁄 𑀅𑀢𑁆𑀢𑀪𑀸𑀯𑁄 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺 𑀧𑀸𑀢𑀼𑀪𑀯𑀢𑀺. 𑀑𑀓𑀸𑀲𑀁 𑀧𑀦 𑀅𑀮𑀪𑀫𑀸𑀦𑀸 𑀪𑀯𑀲𑀢𑀁𑀧𑀺 𑀪𑀯𑀲𑀳𑀲𑁆𑀲𑀁𑀧𑀺 𑀪𑀯𑀲𑀢𑀲𑀳𑀲𑁆𑀲𑀁𑀧𑀺 𑀢𑀁 𑀲𑀦𑁆𑀢𑀸𑀦𑀁 𑀅𑀦𑀼𑀕𑀘𑁆𑀙𑀢𑀺𑀬𑁂𑀯. 𑀫𑀳𑀕𑁆𑀕𑀢𑀓𑀫𑁆𑀫𑀁 𑀧𑀦 𑀮𑀤𑁆𑀥𑁄𑀓𑀸𑀲𑁂 𑀲𑀢𑀺 𑀤𑀼𑀢𑀺𑀬𑀪𑀯𑁂 𑀩𑁆𑀭𑀳𑁆𑀫𑀮𑁄𑀓𑁂 𑀏𑀓𑁄 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁄 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺 𑀧𑀸𑀢𑀼𑀪𑀯𑀢𑀺. 𑀲𑀼𑀧𑀭𑀺𑀧𑀓𑁆𑀓𑀓𑀫𑁆𑀫𑀢𑁆𑀢𑀸 𑀧𑀦 𑀤𑀼𑀢𑀺𑀬𑀪𑀯𑁂𑀬𑁂𑀯 𑀔𑀻𑀬𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀕𑀘𑁆𑀙𑀢𑀻𑀢𑀺. 𑀓𑀫𑁆𑀫𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑀺𑀧𑀸𑀓𑀪𑀽𑀢𑀸 𑀲𑀳𑀚𑀸𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀯𑀺𑀧𑀸𑀓 𑀧𑀘𑁆𑀘𑀬𑁄. 𑀢𑁂𑀬𑁂𑀯 𑀅𑀜𑁆𑀜𑀫𑀜𑁆𑀜𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀚𑀭𑀽𑀧𑀸𑀦𑀺 𑀘 𑀧𑀯𑀢𑁆𑀢𑀺𑀓𑁆𑀔𑀡𑁂 𑀯𑀺𑀧𑀸𑀓 𑀘𑀺𑀢𑁆𑀢𑀚𑀸𑀢𑀸𑀦𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀘 𑀯𑀺𑀧𑀸𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀯𑀺𑀧𑀸𑀓𑁄𑀢𑀺. 𑀯𑀺𑀧𑀘𑁆𑀘𑀦𑀝𑁆𑀞𑁂𑀦 𑀯𑀺𑀧𑀸𑀓𑁄. 𑀯𑀺𑀧𑀘𑁆𑀘𑀦𑀁 𑀦𑀸𑀫 𑀫𑀼𑀤𑀼𑀢𑀭𑀼𑀡𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀚𑁆𑀚𑀦𑀁. 𑀓𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲 𑀫𑀼𑀤𑀼𑀢𑀭𑀼𑀡𑀪𑀸𑀯𑁄, 𑀓𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑁄𑀢𑀺. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬 𑀲𑀗𑁆𑀔𑀸𑀢𑀲𑁆𑀲 𑀅𑀢𑀻𑀢𑀓𑀫𑁆𑀫𑀲𑁆𑀲 𑀫𑀼𑀤𑀼𑀢𑀭𑀼𑀡𑀪𑀸𑀯𑁄, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑁄.

𑀢𑀢𑁆𑀣 𑀏𑀓𑀲𑁆𑀲 𑀓𑀫𑁆𑀫𑀲𑁆𑀲 𑀘𑀢𑀲𑁆𑀲𑁄 𑀅𑀯𑀢𑁆𑀣𑀸𑀬𑁄 𑀳𑁄𑀦𑁆𑀢𑀺 𑀘𑁂𑀢𑀦𑀸 𑀯𑀢𑁆𑀣𑀸 𑀓𑀫𑁆𑀫𑀸𑀯𑀢𑁆𑀣𑀸 𑀦𑀺𑀫𑀺𑀢𑁆𑀢𑀸𑀯𑀢𑁆𑀣𑀸 𑀯𑀺𑀧𑀸𑀓𑀸𑀯𑀢𑁆𑀣𑀸𑀢𑀺.

𑀢𑀢𑁆𑀣 𑀢𑀸𑀬 𑀘𑁂𑀢𑀦𑀸𑀬 𑀦𑀺𑀭𑀼𑀤𑁆𑀥𑀸𑀬𑀧𑀺 𑀢𑀲𑁆𑀲𑀸 𑀓𑀺𑀭𑀺𑀬𑀸 𑀯𑀺𑀲𑁂𑀲𑁄 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀕𑀘𑁆𑀙𑀢𑀺𑀬𑁂𑀯. 𑀅𑀬𑀁 𑀓𑀫𑁆𑀫𑀸𑀯𑀢𑁆𑀣𑀸 𑀦𑀸𑀫.

𑀦𑀺𑀫𑀺𑀢𑁆𑀢𑀸𑀯𑀢𑁆𑀣𑀸𑀢𑀺 𑀢𑀁 𑀓𑀫𑁆𑀫𑀁 𑀬𑀤𑀸 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀫𑁂𑀯 𑀓𑀫𑁆𑀫𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀢𑀤𑀸 𑀤𑀸𑀦𑀁 𑀤𑁂𑀦𑁆𑀢𑁄 𑀯𑀺𑀬 𑀲𑀻𑀮𑀁 𑀭𑀓𑁆𑀔𑀦𑁆𑀢𑁄 𑀯𑀺𑀬 𑀧𑀸𑀡𑀖𑀸𑀢𑀁 𑀯𑀸 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀤𑀸𑀦 𑀯𑀢𑁆𑀣𑀼𑀆𑀤𑀺𑀓𑀁 𑀯𑀸 𑀲𑀢𑁆𑀣𑀸𑀤𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸𑀧𑀺 𑀧𑀼𑀩𑁆𑀩𑁂 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀓𑀭𑀡𑀪𑀽𑀢𑀁 𑀆𑀭𑀫𑁆𑀫𑀡𑀁 𑀢𑀤𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀕𑀢𑀁 𑀯𑀺𑀬 𑀳𑁄𑀢𑀺. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀤𑀺𑀩𑁆𑀩𑀯𑀺𑀫𑀸𑀦𑀸𑀤𑀺𑀓𑀁 𑀯𑀸 𑀦𑀺𑀭𑀬𑀕𑁆𑀕𑀺𑀚𑀸𑀮𑀸𑀤𑀺𑀓𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀪𑀯𑁂 𑀉𑀧𑀮𑀪𑀺𑀢𑀩𑁆𑀩𑀁 𑀯𑀸 𑀅𑀦𑀼𑀪𑀯𑀺𑀢𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀁 𑀢𑀤𑀸 𑀤𑀺𑀲𑁆𑀲𑀫𑀸𑀦𑀁 𑀳𑁄𑀢𑀺. 𑀅𑀬𑀁 𑀦𑀺𑀫𑀺𑀢𑁆𑀢𑀸 𑀯𑀢𑁆𑀣𑀸 𑀦𑀸𑀫.

𑀯𑀺𑀧𑀸𑀓𑀸𑀯𑀢𑁆𑀣𑀸𑀢𑀺 𑀲𑀘𑁂 𑀲𑁄 𑀧𑀼𑀕𑁆𑀕𑀮𑁄 𑀢𑀣𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀢𑀁 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀏𑀓𑀁 𑀆𑀭𑀫𑁆𑀫𑀡𑀁 𑀅𑀫𑀼𑀜𑁆𑀘𑀫𑀸𑀦𑁄 𑀫𑀭𑀢𑀺, 𑀢𑀤𑀸 𑀢𑀁 𑀓𑀫𑁆𑀫𑀁 𑀢𑀲𑁆𑀫𑀺𑀁𑀪𑀯𑁂 𑀯𑀺𑀧𑀘𑁆𑀘𑀢𑀺, 𑀢𑀁 𑀓𑀫𑁆𑀫𑀁 𑀢𑀲𑁆𑀫𑀺𑀁𑀪𑀯𑁂 𑀏𑀓𑁄 𑀅𑀢𑁆𑀢𑀪𑀸𑀯𑁄 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀢𑀺 ¶ . 𑀢𑀢𑁆𑀣 𑀧𑀼𑀭𑀺𑀫𑀸𑀲𑀼 𑀢𑀻𑀲𑀼 𑀅𑀯𑀢𑁆𑀣𑀸𑀲𑀼 𑀢𑀁 𑀓𑀫𑁆𑀫𑀁 𑀫𑀼𑀤𑀼𑀢𑀭𑀼𑀡𑀪𑀽𑀢𑀁 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀧𑀦 𑀯𑀺𑀧𑀸𑀓𑀸𑀯𑀢𑁆𑀣𑀁 𑀧𑀢𑁆𑀯𑀸 𑀯𑀺𑀧𑀓𑁆𑀓𑀪𑀽𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀧𑀘𑁆𑀘𑀦𑀁 𑀦𑀸𑀫 𑀫𑀼𑀤𑀼𑀢𑀭𑀼𑀡𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀚𑁆𑀚𑀦𑀦𑁆𑀢𑀺. 𑀏𑀯𑀁 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀦𑁆𑀦𑁄 𑀘𑀺𑀢𑁆𑀢 𑀘𑁂𑀢𑀲𑀺𑀓𑀥𑀫𑁆𑀫𑀲𑀫𑀽𑀳𑁄 𑀯𑀺𑀧𑀸𑀓𑁄 𑀦𑀸𑀫.

𑀢𑀢𑁆𑀣 𑀬𑀣𑀸 𑀅𑀫𑁆𑀩𑀧𑁆𑀨𑀮𑀸𑀦𑀺 𑀦𑀸𑀫 𑀬𑀤𑀸 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀲𑀩𑁆𑀩𑀲𑁄 𑀲𑀺𑀦𑀺𑀤𑁆𑀥𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀫𑁂𑀯𑀁 𑀯𑀺𑀧𑀸𑀓𑀥𑀫𑁆𑀫𑀸 𑀦𑀸𑀫 𑀦𑀺𑀭𑀼𑀲𑁆𑀲𑀸𑀳𑀸 𑀦𑀺𑀩𑁆𑀬𑀸𑀧𑀸𑀭𑀸 𑀳𑀼𑀢𑁆𑀯𑀸 𑀲𑀩𑁆𑀩𑀲𑁄 𑀲𑀦𑁆𑀢𑀭𑀽𑀧𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀲𑀦𑁆𑀢𑀭𑀽𑀧𑀢𑁆𑀢𑀸𑀬𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀦𑀓𑀸𑀮𑁂 𑀢𑀁 𑀆𑀭𑀫𑁆𑀫𑀡𑀁 𑀦 𑀚𑀸𑀦𑀸𑀢𑀺. 𑀢𑀣𑀸𑀳𑀺 𑀭𑀢𑁆𑀢𑀺𑀬𑀁 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀧𑀼𑀭𑀺𑀫𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀬𑀣𑀸𑀕𑀳𑀺𑀢𑀁 𑀓𑀫𑁆𑀫𑀸𑀤𑀺𑀓𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀪𑀯𑀗𑁆𑀕𑀲𑁄𑀢𑀁 𑀧𑀯𑀢𑁆𑀢𑀫𑀸𑀦𑀁𑀧𑀺 𑀢𑀲𑁆𑀲 𑀪𑀯𑀗𑁆𑀕𑀲𑁄𑀢𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀇𑀤𑀁 𑀦𑀸𑀫 𑀫𑁂 𑀧𑀼𑀭𑀺𑀫𑀪𑀯𑁂 𑀆𑀭𑀫𑁆𑀫𑀡𑀁 𑀤𑀺𑀝𑁆𑀞𑀦𑁆𑀢𑀺 𑀓𑀲𑁆𑀲𑀘𑀺 𑀚𑀸𑀦𑀦𑀯𑀻𑀣𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀲𑁄 𑀧𑀼𑀕𑁆𑀕𑀮𑁄 𑀦𑀺𑀤𑁆𑀤𑀸𑀬𑀦𑀓𑀸𑀮𑁂𑀧𑀺 𑀉𑀝𑁆𑀞𑀸𑀦𑀓𑀸𑀮𑁂𑀧𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀏𑀯𑀁 𑀦𑀺𑀭𑀼𑀲𑁆𑀲𑀸𑀳𑀦𑀺𑀩𑁆𑀬𑀸𑀧𑀸𑀭𑀲𑀦𑁆𑀢𑀭𑀽𑀧 𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀧𑀸𑀓𑀧𑀘𑁆𑀘𑀬𑀢𑀸 𑀦𑀸𑀫𑀸𑀢𑀺. 𑀯𑀺𑀧𑀸𑀓 𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀯𑀺𑀥𑁄 𑀆𑀳𑀸𑀭𑀧𑀘𑁆𑀘𑀬𑁄 𑀭𑀽𑀧𑀸𑀳𑀸𑀭𑀧𑀘𑁆𑀘𑀬𑁄 𑀅𑀭𑀽𑀧𑀸𑀳𑀸𑀭 𑀧𑀘𑁆𑀘𑀬𑁄.

𑀢𑀢𑁆𑀣 𑀭𑀽𑀧𑀸𑀳𑀸𑀭𑀧𑀘𑁆𑀘𑀬𑁄 𑀦𑀸𑀫 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑀗𑁆𑀔𑀸𑀢𑀁 𑀑𑀚 𑀭𑀽𑀧𑀁 𑀯𑀼𑀘𑁆𑀘𑀢𑀺. 𑀲𑁄 𑀘 𑀅𑀚𑁆𑀛𑀢𑁆𑀢𑀸𑀳𑀸𑀭𑁄 𑀩𑀳𑀺𑀤𑁆𑀥𑀸𑀳𑀸𑀭𑁄𑀢𑀺 𑀤𑀼𑀯𑀺𑀥𑁄. 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀲𑀩𑁆𑀩𑁂𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑀸 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀭𑀽𑀧𑀸𑀳𑀸𑀭𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀅𑀭𑀽𑀧𑀸𑀳𑀸𑀭𑁄 𑀧𑀦 𑀢𑀺𑀯𑀺𑀥𑁄 𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸 𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀘. 𑀢𑀬𑁄𑀧𑁂𑀢𑁂 𑀥𑀫𑁆𑀫𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀺. 𑀲𑀳𑀚𑀸𑀢𑀸 𑀘 𑀦𑀸𑀫𑀭𑀽𑀧 𑀥𑀫𑁆𑀫𑀸 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀆𑀳𑀸𑀭𑁄𑀢𑀺. 𑀪𑀼𑀲𑀁 𑀳𑀭𑀡𑀝𑁆𑀞𑁂𑀦 𑀆𑀳𑀸𑀭𑁄. 𑀪𑀼𑀲𑀁 𑀳𑀭𑀡𑀝𑁆𑀞𑁂𑀦𑀸𑀢𑀺𑀘 𑀤𑀴𑁆𑀳𑀁 𑀧𑀯𑀢𑁆𑀢𑀸𑀧𑀦𑀝𑁆𑀞𑁂𑀦, 𑀘𑀺𑀭𑀓𑀸𑀮𑀁 𑀞𑀺𑀢𑀺𑀬𑀸 𑀯𑀼𑀟𑁆𑀠𑀺𑀬𑀸 𑀯𑀺𑀭𑀼𑀴𑁆𑀳𑀺𑀬𑀸 𑀯𑁂𑀧𑀼𑀮𑁆𑀮𑀸𑀬 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀦𑀦𑀓𑀺𑀘𑁆𑀘𑀬𑀼𑀢𑁆𑀢𑁄𑀧𑀺 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀧𑁆𑀧𑀥𑀸𑀦𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀤𑀼𑀯𑀺𑀥𑁄 𑀭𑀽𑀧𑀸𑀳𑀸𑀭𑁄 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀓𑀸𑀬𑀁 𑀉𑀧𑀩𑁆𑀭𑀽𑀳𑀬𑀦𑁆𑀢𑁄 𑀪𑀼𑀲𑀁 𑀳𑀭𑀢𑀺, 𑀤𑀴𑁆𑀳𑀁 𑀧𑀯𑀢𑁆𑀢𑁂𑀢𑀺, 𑀘𑀺𑀭𑀁 𑀅𑀤𑁆𑀥𑀸𑀦𑀁 𑀕𑀫𑁂𑀢𑀺, 𑀢𑀁 𑀢𑀁 𑀆𑀬𑀼𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑀻𑀢𑀺 𑀆𑀳𑀸𑀭𑁄.

𑀨𑀲𑁆𑀲𑀸𑀳𑀸𑀭𑁄 ¶ 𑀆𑀭𑀫𑁆𑀫𑀡𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀭𑀲𑀁 𑀦𑀻𑀳𑀭𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀓𑀸𑀬𑀯𑀘𑀻 𑀫𑀦𑁄𑀓𑀫𑁆𑀫𑁂𑀲𑀼 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀓𑀺𑀘𑁆𑀘𑀁 𑀯𑀳𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺, 𑀤𑀴𑁆𑀳𑀁 𑀧𑀯𑀢𑁆𑀢𑁂𑀢𑀺, 𑀘𑀺𑀭𑀁 𑀅𑀤𑁆𑀥𑀸𑀦𑀁 𑀕𑀫𑁂𑀢𑀻𑀢𑀺 𑀆𑀳𑀸𑀭𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀦𑁆𑀢𑁄 𑀲𑀳𑀚𑀸𑀢𑀭𑀽𑀧𑀥𑀫𑁆𑀫𑁂𑀧𑀺 𑀪𑀼𑀲𑀁 𑀳𑀭𑀢𑀺𑀬𑁂𑀯.

𑀇𑀥 𑀲𑀼𑀢𑁆𑀢𑀦𑁆𑀢𑀦𑀬𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀬𑀣𑀸 𑀲𑀓𑀼𑀡𑀸 𑀦𑀸𑀫 𑀘𑀓𑁆𑀔𑀽𑀳𑀺 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀢𑁆𑀢𑁂𑀳𑀺 𑀭𑀼𑀓𑁆𑀔𑀢𑁄 𑀭𑀼𑀓𑁆𑀔𑀁 𑀯𑀦𑀢𑁄 𑀯𑀦𑀁 𑀆𑀓𑀸𑀲𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀟𑀓𑁂𑀳𑀺 𑀨𑀮𑀸𑀨𑀮𑀸𑀦𑀺 𑀢𑀼𑀤𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀢𑁆𑀢𑀸𑀦𑀁 𑀬𑀸𑀧𑁂𑀦𑁆𑀢𑀺. 𑀢𑀣𑀸 𑀇𑀫𑁂 𑀲𑀢𑁆𑀢𑀸 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀸𑀯𑁂𑀢𑁆𑀯𑀸 𑀙𑀳𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂𑀳𑀺 𑀆𑀭𑀫𑁆𑀫𑀡𑀯𑀢𑁆𑀣𑀼𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀦𑀁 𑀓𑀢𑁆𑀯𑀸 𑀙𑀳𑀺 𑀨𑀲𑁆𑀲𑀸𑀳𑀸𑀭𑁂𑀳𑀺 𑀆𑀭𑀫𑁆𑀫𑀡𑁂𑀲𑀼 𑀭𑀲𑀁 𑀧𑀸𑀢𑀼𑀪𑀯𑀦𑁆𑀢𑀁 𑀓𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺. 𑀯𑀺𑀜𑁆𑀜𑀸𑀡𑁂𑀳𑀺 𑀯𑀸 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀸𑀯𑁂𑀢𑁆𑀯𑀸 𑀦𑀸𑀫𑀭𑀽𑀧 𑀲𑀫𑁆𑀧𑀢𑁆𑀢𑀺𑀁 𑀲𑀸𑀥𑁂𑀦𑁆𑀢𑀺. 𑀨𑀲𑁆𑀲𑁂𑀳𑀺 𑀆𑀭𑀫𑁆𑀫𑀡𑁂𑀲𑀼 𑀭𑀲𑀁 𑀧𑀸𑀢𑀼𑀪𑀯𑀦𑁆𑀢𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀯𑁂𑀤𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀡𑁆𑀳𑀸𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀘𑁂𑀢𑀦𑀸𑀳𑀺 𑀢𑀡𑁆𑀳𑀸𑀫𑀽𑀮𑀓𑀸𑀦𑀺 𑀦𑀸𑀦𑀸𑀓𑀫𑁆𑀫𑀸𑀦𑀺 𑀧𑀲𑀯𑁂𑀢𑁆𑀯𑀸 𑀪𑀯𑀢𑁄 𑀪𑀯𑀁 𑀲𑀁𑀲𑀭𑀦𑁆𑀢𑀺. 𑀏𑀯𑀁 𑀆𑀳𑀸𑀭𑀥𑀫𑁆𑀫𑀸𑀦𑀁 𑀫𑀳𑀦𑁆𑀢𑀁 𑀆𑀳𑀸𑀭𑀓𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀆𑀳𑀸𑀭𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀲𑀳𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀼𑀭𑁂 𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄.

𑀢𑀢𑁆𑀣 𑀧𑀦𑁆𑀦𑀭𑀲𑀺𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀲𑀳𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦𑀸𑀫, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀢𑁂𑀳𑀺 𑀲𑀳𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸 𑀘 𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀭𑀽𑀧𑀸𑀦𑀺 𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁. 𑀧𑀜𑁆𑀘𑀯𑀺𑀜𑁆𑀜𑀸𑀡𑀘𑀺𑀢𑁆𑀢 𑀘𑁂𑀢𑀲𑀺𑀓 𑀥𑀫𑁆𑀫𑀸 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀏𑀓𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀲𑀩𑁆𑀩𑀸𑀦𑀺 𑀓𑀫𑁆𑀫𑀚 𑀭𑀽𑀧𑀸𑀦𑀺 𑀚𑀻𑀯𑀺𑀢𑀭𑀽𑀧𑀯𑀚𑁆𑀚𑀺𑀢𑀸𑀦𑀺 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺.

𑀓𑁂𑀦𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀦𑁆𑀢𑀺. 𑀇𑀲𑁆𑀲𑀭𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀓𑀢𑁆𑀣 𑀇𑀲𑁆𑀲𑀭𑀺𑀬𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀇𑀲𑁆𑀲𑀭𑀺𑀬𑀁. 𑀓𑀲𑁆𑀫𑀺𑀁 𑀓𑀲𑁆𑀫𑀺𑀁 𑀓𑀺𑀘𑁆𑀘𑁂 𑀇𑀲𑁆𑀲𑀭𑀺𑀬𑀦𑁆𑀢𑀺 ¶ . 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀇𑀲𑁆𑀲𑀭𑀺𑀬𑀁. 𑀦𑀸𑀫𑀚𑀻𑀯𑀺𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀚𑀻𑀯𑀦𑀓𑀺𑀘𑁆𑀘𑁂 𑀇𑀲𑁆𑀲𑀭𑀺𑀬𑀁. 𑀚𑀻𑀯𑀦𑀓𑀺𑀘𑁆𑀘𑁂𑀢𑀺 𑀆𑀬𑀼𑀯𑀟𑁆𑀠𑀦𑀓𑀺𑀘𑁆𑀘𑁂, 𑀲𑀦𑁆𑀢𑀢𑀺𑀞𑀺𑀢𑀺𑀬𑀸 𑀘𑀺𑀭𑀓𑀸𑀮𑀞𑀺𑀢𑀺𑀓𑀺𑀘𑁆𑀘𑁂𑀢𑀺 𑀅𑀢𑁆𑀣𑁄. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑀓𑀺𑀘𑁆𑀘𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀲𑁆𑀲𑀭𑀺𑀬𑀁. 𑀅𑀯𑀲𑁂𑀲𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑁄 𑀧𑀼𑀩𑁆𑀩𑁂 𑀇𑀦𑁆𑀤𑁆𑀭𑀺𑀬𑀬𑀫𑀓𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑁄𑀬𑁂𑀯.

𑀏𑀢𑁆𑀣 𑀯𑀤𑁂𑀬𑁆𑀬, 𑀤𑁆𑀯𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀪𑀽𑀢𑀸 𑀲𑀫𑀸𑀦𑀸𑀧𑀺 𑀓𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀯𑀺𑀲𑀼𑀁 𑀦 𑀕𑀳𑀺𑀢𑀸𑀢𑀺. 𑀧𑀘𑁆𑀘𑀬𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄. 𑀢𑀺𑀯𑀺𑀥𑀜𑁆𑀳𑀺 𑀧𑀘𑁆𑀘𑀬𑀓𑀺𑀘𑁆𑀘𑀁 𑀚𑀦𑀦𑀓𑀺𑀘𑁆𑀘𑀜𑁆𑀘 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀜𑁆𑀘 𑀅𑀦𑀼𑀧𑀸𑀮𑀦𑀓𑀺𑀘𑁆𑀘𑀜𑁆𑀘. 𑀢𑀢𑁆𑀣 𑀬𑁄 𑀧𑀘𑁆𑀘𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀘𑁆𑀘𑀬𑀓𑀺𑀘𑁆𑀘𑀁 𑀚𑀦𑀦𑀓𑀺𑀘𑁆𑀘𑀁 𑀦𑀸𑀫. 𑀬𑀣𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀬𑁄 𑀧𑀘𑁆𑀘𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀘 𑀯𑀼𑀟𑁆𑀠𑀺𑀬𑀸 𑀘 𑀯𑀺𑀭𑀼𑀴𑁆𑀳𑀺𑀬𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀦 𑀢𑀺𑀝𑁆𑀞𑀢𑀺 𑀦 𑀯𑀟𑁆𑀠𑀢𑀺 𑀦 𑀯𑀺𑀭𑀽𑀳𑀢𑀺, 𑀢𑀲𑁆𑀲 𑀧𑀘𑁆𑀘𑀬𑀓𑀺𑀘𑁆𑀘𑀁 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀁 𑀦𑀸𑀫. 𑀬𑀣𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀬𑁄 𑀧𑀘𑁆𑀘𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑁂𑀦 𑀯𑀺𑀦𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀘𑀺𑀭𑀓𑀸𑀮𑀁 𑀦 𑀧𑀯𑀢𑁆𑀢𑀢𑀺, 𑀲𑀦𑁆𑀢𑀢𑀺 𑀕𑀫𑀦𑀁 𑀙𑀺𑀚𑁆𑀚𑀢𑀺, 𑀢𑀲𑁆𑀲 𑀧𑀘𑁆𑀘𑀬 𑀓𑀺𑀘𑁆𑀘𑀁 𑀅𑀦𑀼𑀧𑀸𑀮𑀦𑀓𑀺𑀘𑁆𑀘𑀁 𑀦𑀸𑀫. 𑀬𑀣𑀸 𑀭𑀽𑀧 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀏𑀢𑁂 𑀧𑀦 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀢𑁂𑀲𑀼 𑀢𑀻𑀲𑀼 𑀧𑀘𑁆𑀘𑀬 𑀓𑀺𑀘𑁆𑀘𑁂𑀲𑀼 𑀏𑀓𑀓𑀺𑀘𑁆𑀘𑀁𑀧𑀺 𑀦𑀲𑀸𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂 𑀤𑁆𑀯𑁂 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬 𑀧𑀘𑁆𑀘𑀬𑁂 𑀯𑀺𑀲𑀼𑀁 𑀦 𑀕𑀳𑀺𑀢𑀸𑀢𑀺.

𑀏𑀢𑀁 𑀲𑀦𑁆𑀢𑁂 𑀏𑀢𑁂 𑀤𑁆𑀯𑁂 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺. 𑀦𑁄 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸. 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀲𑀩𑁆𑀪𑀸𑀯𑀢𑁄𑀢𑀺. 𑀓𑀺𑀁 𑀧𑀦 𑀏𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀦𑁆𑀢𑀺. 𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀆𑀓𑀧𑁆𑀧𑁂𑀲𑀼 𑀇𑀲𑁆𑀲𑀭𑀢𑀸 𑀇𑀦𑁆𑀤𑁆𑀭𑀺𑀬 𑀓𑀺𑀘𑁆𑀘𑀁. 𑀢𑀣𑀸 𑀳𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀭𑀽𑀧𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀘𑀢𑀽𑀳𑀺 𑀓𑀫𑁆𑀫𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀦𑁆𑀦𑀸 𑀧𑀜𑁆𑀘𑀓𑁆𑀔𑀦𑁆𑀥 𑀥𑀫𑁆𑀫𑀸 𑀇𑀢𑁆𑀣𑀺𑀪𑀸𑀯𑀸𑀬 𑀧𑀭𑀺𑀡𑀫𑀦𑁆𑀢𑀺, 𑀲𑁄 𑀅𑀢𑁆𑀢𑀪𑀸𑀯𑁄 𑀏𑀓𑀦𑁆𑀢𑁂𑀦 𑀇𑀢𑁆𑀣𑀺𑀮𑀺𑀗𑁆𑀕 𑀇𑀢𑁆𑀣𑀺𑀦𑀺𑀫𑀺𑀢𑁆𑀢 𑀇𑀢𑁆𑀣𑀺𑀓𑀼𑀢𑁆𑀢 𑀇𑀢𑁆𑀣𑀸𑀓𑀧𑁆𑀧𑀬𑀼𑀢𑁆𑀢𑁄 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀦 𑀘 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀭𑀽𑀧𑀁 𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂 𑀚𑀦𑁂𑀢𑀺, 𑀦 𑀘 𑀉𑀧𑀢𑁆𑀣𑀫𑁆𑀪𑀢𑀺, 𑀦𑀸𑀧𑀺 𑀅𑀦𑀼𑀧𑀸𑀮𑁂𑀢𑀺, 𑀅𑀣 𑀔𑁄 𑀢𑁂 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀏𑀯𑀜𑁆𑀘𑁂𑀯𑀜𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀽𑀢𑀺 𑀆𑀡𑀁 𑀞𑀧𑁂𑀦𑁆𑀢𑀁 𑀯𑀺𑀬 𑀢𑁂𑀲𑀼 𑀅𑀢𑁆𑀢𑀦𑁄 𑀅𑀦𑀼𑀪𑀸𑀯𑀁 𑀧𑀯𑀢𑁆𑀢𑁂𑀢𑀺. 𑀢𑁂 𑀘 𑀥𑀫𑁆𑀫𑀸 𑀢𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺. 𑀅𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀭𑀽𑀧𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀇𑀲𑁆𑀲𑀭𑀢𑀸. 𑀏𑀲 𑀦𑀬𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀭𑀽𑀧𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀲𑀼 𑀇𑀲𑁆𑀲𑀭𑀢𑀸𑀬𑀁. 𑀏𑀯𑀁 𑀏𑀢𑁂 𑀤𑁆𑀯𑁂 𑀥𑀫𑁆𑀫𑀸 𑀮𑀺𑀗𑁆𑀕𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘 𑀲𑀩𑁆𑀪𑀸𑀯𑀢𑁄 𑀇𑀦𑁆𑀤𑁆𑀭𑀺𑀬𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀳𑀤𑀬𑀯𑀢𑁆𑀣𑀼𑀭𑀽𑀧𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁𑀧𑀺 𑀢𑀸𑀲𑀼 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀦 𑀳𑀺 𑀪𑀸𑀯𑀺𑀢 𑀘𑀺𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀳𑀤𑀬𑀭𑀽𑀧𑁂 𑀧𑀲𑀦𑁆𑀦𑁂𑀯𑀸 ¶ 𑀅𑀧𑁆𑀧𑀲𑀦𑁆𑀦𑁂 𑀯𑀸 𑀚𑀸𑀢𑁂𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀢𑀤𑀦𑀼𑀯𑀢𑁆𑀢𑀺𑀓𑀸 𑀳𑁄𑀦𑁆𑀢𑀻𑀢𑀺. 𑀇𑀦𑁆𑀤𑁆𑀭𑀺𑀬 𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄, 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁 𑀉𑀧𑁂𑀓𑁆𑀔𑀸 𑀏𑀓𑀕𑁆𑀕𑀢𑀸. 𑀢𑁂𑀳𑀺 𑀲𑀳𑀚𑀸𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸 𑀘 𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀛𑀸𑀦𑀦𑁆𑀢𑀺. 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀛𑀸𑀦𑀁. 𑀉𑀧𑀦𑀺𑀚𑁆𑀛𑀸𑀬 𑀦𑀝𑁆𑀞𑁂𑀦𑀸𑀢𑀺 𑀘 𑀫𑀦𑀲𑀸 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀧𑁂𑀓𑁆𑀔𑀦𑀝𑁆𑀞𑁂𑀦. 𑀬𑀣𑀸 𑀳𑀺 𑀇𑀲𑁆𑀲𑀸𑀲𑁄 𑀤𑀽𑀭𑁂 𑀞𑀢𑁆𑀯𑀸 𑀔𑀼𑀤𑁆𑀤𑀓𑁂 𑀮𑀓𑁆𑀔𑀫𑀡𑁆𑀟𑀮𑁂 𑀲𑀭𑀁 𑀧𑀯𑁂𑀲𑁂𑀦𑁆𑀢𑁄 𑀳𑀢𑁆𑀣𑁂𑀳𑀺 𑀲𑀭𑀁 𑀉𑀚𑀼𑀓𑀜𑁆𑀘 𑀦𑀺𑀘𑁆𑀘𑀮𑀜𑁆𑀘 𑀓𑀢𑁆𑀯𑀸 𑀫𑀡𑁆𑀟𑀮𑀜𑁆𑀘 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀘𑀓𑁆𑀔𑀼𑀦𑀸 𑀦𑀺𑀚𑁆𑀛𑀸𑀬𑀦𑁆𑀢𑁄 𑀧𑀯𑁂𑀲𑁂𑀢𑀺. 𑀏𑀯𑀫𑁂𑀯 𑀇𑀫𑁂𑀳𑀺 𑀅𑀗𑁆𑀕𑁂𑀳𑀺 𑀘𑀺𑀢𑁆𑀢𑀁 𑀉𑀚𑀼𑀓𑀜𑁆𑀘 𑀦𑀺𑀘𑁆𑀘𑀮𑀜𑁆𑀘 𑀓𑀢𑁆𑀯𑀸 𑀆𑀭𑀫𑁆𑀫𑀡𑀜𑁆𑀘 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀦𑀺𑀚𑁆𑀛𑀸𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀉𑀧𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀓𑀸𑀬𑀓𑀫𑁆𑀫𑀁 𑀯𑀸 𑀯𑀘𑀻𑀓𑀫𑁆𑀫𑀁 𑀯𑀸 𑀫𑀦𑁄𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑁄 𑀅𑀯𑀺𑀭𑀚𑁆𑀛𑀫𑀸𑀦𑁄 𑀓𑀭𑁄𑀢𑀺.

𑀢𑀢𑁆𑀣 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀅𑀪𑀺𑀓𑁆𑀓𑀫𑀧𑁆𑀧𑀝𑀺𑀓𑁆𑀓𑀫𑀸𑀤𑀺𑀓𑀁 𑀯𑀼𑀘𑁆𑀘𑀢𑀺. 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀅𑀓𑁆𑀔𑀭𑀯𑀡𑁆𑀡𑀧𑀭𑀺𑀧𑀼𑀡𑁆𑀡𑀁 𑀯𑀘𑀻𑀪𑁂𑀤𑀓𑀭𑀡𑀁 𑀯𑀼𑀘𑁆𑀘𑀢𑀺. 𑀫𑀦𑁄𑀓𑀫𑁆𑀫𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀫𑀦𑀲𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀁 𑀯𑀼𑀘𑁆𑀘𑀢𑀺. 𑀤𑀸𑀦𑀓𑀫𑁆𑀫𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢 𑀓𑀫𑁆𑀫𑀁 𑀯𑀸 𑀅𑀦𑀼𑀭𑀽𑀧𑁂𑀳𑀺 𑀛𑀸𑀦𑀗𑁆𑀕𑁂𑀳𑀺 𑀯𑀺𑀦𑀸 𑀤𑀼𑀩𑁆𑀩𑀮𑁂𑀦 𑀘𑀺𑀢𑁆𑀢𑁂𑀦 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑁂𑀲𑀽𑀢𑀺.

𑀅𑀬𑀜𑁆𑀘 𑀅𑀢𑁆𑀣𑁄 𑀯𑀺𑀢𑀓𑁆𑀓𑀸𑀤𑀻𑀦𑀁 𑀛𑀸𑀦𑀗𑁆𑀕𑀥𑀫𑁆𑀫𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀪𑀸𑀯 𑀮𑀓𑁆𑀔𑀡𑁂𑀳𑀺 𑀤𑀻𑀧𑁂𑀢𑀩𑁆𑀩𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦 𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄, 𑀲𑁄 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀤𑀴𑁆𑀳𑀁 𑀦𑀺𑀬𑁄𑀚𑁂𑀢𑀺. 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀯𑀺𑀘𑀸𑀭𑁄, 𑀲𑁄 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀤𑀴𑁆𑀳𑀁 𑀲𑀁𑀬𑁄𑀚𑁂𑀢𑀺. 𑀆𑀭𑀫𑁆𑀫𑀡𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸𑀧𑀻𑀢𑀺, 𑀲𑀸 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀧𑀭𑀺𑀢𑀼𑀝𑁆𑀞𑀁 𑀓𑀭𑁄𑀢𑀺. 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸 𑀆𑀭𑀫𑁆𑀫𑀡𑀭𑀲𑀸𑀦𑀼 𑀪𑀯𑀦𑀮𑀓𑁆𑀔𑀡𑀸, 𑀢𑀸𑀧𑀺 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀭𑀲𑀸𑀦𑀼𑀪𑀯𑀦 𑀓𑀺𑀘𑁆𑀘𑁂𑀦 𑀤𑀴𑁆𑀳𑀧𑁆𑀧𑀝𑀺𑀩𑀤𑁆𑀥𑀁 𑀓𑀭𑁄𑀦𑁆𑀢𑀺. 𑀲𑀫𑀸𑀥𑀸𑀦𑀮𑀓𑁆𑀔𑀡𑀸 𑀏𑀓𑀕𑁆𑀕𑀢𑀸, 𑀲𑀸𑀧𑀺 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀞𑀧𑁂𑀢𑀻𑀢𑀺. 𑀛𑀸𑀦𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸 𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 ¶ 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀫𑀸𑀥𑀺. 𑀲𑁂𑀲𑀸 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄𑀢𑀺 𑀢𑀬𑁄 𑀥𑀫𑁆𑀫𑀸 𑀯𑀺𑀲𑀼𑀁 𑀘𑁂𑀢𑀲𑀺𑀓𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺. 𑀫𑀼𑀲𑀸𑀯𑀸𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀔𑀦𑁆𑀥𑀸𑀦𑀁 𑀦𑀸𑀫𑀁. 𑀢𑀲𑁆𑀫𑀸 𑀢𑁂 𑀫𑀕𑁆𑀕𑀧𑀘𑁆𑀘𑀬𑁂 𑀯𑀺𑀲𑀼𑀁 𑀦 𑀕𑀳𑀺𑀢𑀸𑀢𑀺. 𑀲𑀩𑁆𑀩𑁂 𑀲𑀳𑁂𑀢𑀼𑀓𑀸 𑀘𑀺𑀢𑁆𑀢 𑀘𑁂𑀢𑀲𑀺𑀓𑀥𑀫𑁆𑀫𑀸 𑀘 𑀲𑀳𑁂𑀢𑀼𑀓𑀘𑀺𑀢𑁆𑀢𑀲𑀳 𑀚𑀸𑀢𑀸 𑀭𑀽𑀧𑀥𑀫𑁆𑀫𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄𑀢𑀺. 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀦𑀺𑀩𑁆𑀩𑀸𑀦 𑀤𑀺𑀲𑀸𑀤𑁂𑀲𑀲𑀫𑁆𑀧𑀸 𑀧𑀦𑀝𑁆𑀞𑁂𑀦 𑀫𑀕𑁆𑀕𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀸𑀦𑀺 𑀳𑀺 𑀅𑀝𑁆𑀞 𑀲𑀫𑁆𑀫𑀸𑀫𑀕𑁆𑀕𑀗𑁆𑀕𑀸𑀦𑀺 𑀲𑀼𑀕𑀢𑀺 𑀤𑀺𑀲𑀸𑀤𑁂𑀲𑀜𑁆𑀘 𑀦𑀺𑀩𑁆𑀩𑀸𑀦𑀤𑀺𑀲𑀸𑀤𑁂𑀲𑀜𑁆𑀘 𑀲𑀫𑁆𑀧𑀸𑀧𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀫𑀺𑀘𑁆𑀙𑀸𑀫𑀕𑁆𑀕𑀗𑁆𑀕𑀸𑀦𑀺 𑀤𑀼𑀕𑁆𑀕𑀢𑀺𑀤𑀺𑀲𑀸𑀤𑁂𑀲𑀁 𑀲𑀫𑁆𑀧𑀸𑀧𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀢𑀢𑁆𑀣 𑀛𑀸𑀦𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀚𑀼𑀁 𑀓𑀭𑁄𑀢𑀺, 𑀣𑀺𑀭𑀁 𑀓𑀭𑁄𑀢𑀺, 𑀅𑀧𑁆𑀧𑀦𑀸𑀧𑀢𑁆𑀢𑀁 𑀓𑀭𑁄𑀢𑀺. 𑀅𑀧𑁆𑀧𑀦𑀸𑀧𑀢𑁆𑀢𑀁 𑀦𑀸𑀫 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀫𑀘𑁆𑀙𑁄𑀯𑀺𑀬 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑁂 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁂 𑀅𑀦𑀼𑀧𑀯𑀺𑀝𑁆𑀞𑀁 𑀘𑀺𑀢𑁆𑀢𑀁 𑀧𑀯𑀼𑀘𑁆𑀘𑀢𑀺. 𑀫𑀕𑁆𑀕𑀧𑀘𑁆𑀘𑀬𑁄 𑀯𑀝𑁆𑀝𑀧𑀣𑁂 𑀘𑁂𑀢𑀦𑀸𑀓𑀫𑁆𑀫𑀁 𑀯𑀺𑀯𑀝𑁆𑀝𑀧𑀣𑁂 𑀪𑀸𑀯𑀦𑀸𑀓𑀫𑁆𑀫𑀁 𑀉𑀚𑀼𑀁 𑀓𑀭𑁄𑀢𑀺, 𑀣𑀺𑀭𑀁 𑀓𑀭𑁄𑀢𑀺, 𑀓𑀫𑁆𑀫𑀧𑀣𑀧𑀢𑁆𑀢𑀁 𑀓𑀭𑁄𑀢𑀺, 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀓𑀭𑁄𑀢𑀺, 𑀪𑀽𑀫𑀦𑁆𑀢𑀭𑀧𑀢𑁆𑀢𑀁 𑀓𑀭𑁄𑀢𑀺. 𑀅𑀬 𑀫𑁂𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄.

𑀢𑀢𑁆𑀣 𑀓𑀫𑁆𑀫𑀧𑀣𑀧𑀢𑁆𑀢𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀸𑀦𑀁 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀬𑀸 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀲𑀫𑀢𑁆𑀣𑀪𑀸𑀯𑀲𑀗𑁆𑀔𑀸𑀢𑀁 𑀓𑀫𑁆𑀫𑀕𑀢𑀺𑀁 𑀧𑀢𑁆𑀢𑀁 𑀘𑁂𑀢𑀦𑀸𑀓𑀫𑁆𑀫𑀁. 𑀪𑀽𑀫𑀦𑁆𑀢𑀭𑀧𑀢𑁆𑀢𑀁 𑀦𑀸𑀫 𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦 𑀓𑀸𑀫 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀮𑁄𑀓𑀼𑀢𑁆𑀢𑀭𑀪𑀽𑀫𑀺𑀬𑀸 𑀏𑀓𑀲𑁆𑀫𑀺𑀁𑀇𑀭𑀺𑀬𑀸𑀧𑀣𑁂𑀧𑀺 𑀉𑀧𑀭𑀽𑀧𑀭𑀺𑀪𑀽𑀫𑀺𑀁 𑀧𑀢𑁆𑀢𑀁 𑀪𑀸𑀯𑀦𑀸𑀓𑀫𑁆𑀫𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀛𑀸𑀦𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀸𑀦𑀁 𑀫𑀕𑁆𑀕𑀗𑁆𑀕𑀥𑀫𑁆𑀫𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀪𑀸𑀯 𑀮𑀓𑁆𑀔𑀡𑁂𑀳𑀺 𑀤𑀻𑀧𑁂𑀢𑀩𑁆𑀩𑁄𑀢𑀺. 𑀫𑀕𑁆𑀕𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀢𑀺 𑀏𑀓𑀁 𑀤𑀼𑀓𑁆𑀓𑀁. 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀧𑀘𑁆𑀘𑀬𑁄𑀢𑀺 𑀏𑀓𑀁 𑀤𑀼𑀓𑁆𑀓𑀁. 𑀯𑀺𑀕𑀢𑀧𑀘𑁆𑀘𑀬𑁄 𑀅𑀯𑀺𑀕𑀢 𑀧𑀘𑁆𑀘𑀬𑁄𑀢𑀺 𑀏𑀓𑀁 𑀤𑀼𑀓𑁆𑀓𑀁. 𑀇𑀫𑀸𑀦𑀺 𑀢𑀻𑀡𑀺 𑀧𑀘𑁆𑀘𑀬𑀤𑀼𑀓𑁆𑀓𑀸𑀦𑀺 𑀯𑀺𑀲𑀼𑀁 𑀧𑀘𑁆𑀘𑀬 𑀯𑀺𑀲𑁂𑀲𑀸𑀦𑀺 𑀦 𑀳𑁄𑀦𑁆𑀢𑀺. 𑀧𑀼𑀩𑁆𑀩𑁂 𑀆𑀕𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀓𑁂𑀘𑀺 𑀧𑀘𑁆𑀘𑀬𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑀢𑁆𑀢𑀁 𑀕𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸, 𑀓𑁂𑀘𑀺 𑀯𑀺𑀚𑁆𑀚𑀫𑀸𑀦𑀸 𑀳𑀼𑀢𑁆𑀯𑀸, 𑀓𑁂𑀘𑀺 𑀅𑀯𑀺𑀚𑁆𑀚𑀫𑀸𑀦𑀸 𑀳𑀼𑀢𑁆𑀯𑀸, 𑀓𑁂𑀘𑀺 𑀯𑀺𑀕𑀢𑀸 𑀳𑀼𑀢𑁆𑀯𑀸, 𑀓𑁂𑀘𑀺 𑀅𑀯𑀺𑀕𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑀬𑀢𑁆𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀫𑀸𑀦𑀺 𑀢𑀻𑀡𑀺 𑀧𑀘𑁆𑀘𑀬𑀤𑀼𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀏𑀢𑁆𑀣 ¶ 𑀘 𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀦𑀢𑁆𑀣𑀻𑀢𑀺 𑀔𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄𑀢𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑀺𑀦𑀢𑁆𑀣𑀺𑀲𑀤𑁆𑀤𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑁂𑀲𑀼𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀸𑀦𑀁 𑀅𑀢𑁆𑀣𑀸𑀦𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀼𑀦 𑀯𑀺𑀕𑀢𑀤𑀼𑀓𑁆𑀓𑀁 𑀯𑀼𑀢𑁆𑀢𑀁.

𑀲𑀩𑁆𑀩𑁂𑀧𑀺 𑀲𑀳𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀸 𑀘𑁂𑀯 𑀳𑁄𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘.

𑀓𑁂𑀦𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑁄. 𑀏𑀓𑀼𑀧𑁆𑀧𑀸𑀤𑀢𑀸 𑀏𑀓𑀦𑀺𑀭𑁄𑀥𑀢𑀸 𑀏𑀓𑀯𑀢𑁆𑀣𑀼𑀓𑀢𑀸 𑀏𑀓𑀸𑀭𑀫𑁆𑀫𑀡𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀲𑀁𑀬𑀼𑀢𑁆𑀢𑁄 𑀏𑀓𑀻𑀪𑀸𑀯𑀁 𑀕𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁄.

𑀢𑀢𑁆𑀣 𑀏𑀓𑀻𑀪𑀸𑀯𑀁 𑀕𑀢𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀨𑀲𑁆𑀲𑀸𑀤𑀻𑀳𑀺 𑀲𑀢𑁆𑀢𑀳𑀺 𑀘𑁂𑀢𑀲𑀺𑀓𑁂𑀳𑀺 𑀲𑀳 𑀏𑀓𑀻𑀪𑀸𑀯𑀁 𑀕𑀢𑀁 𑀳𑁄𑀢𑀺, 𑀤𑀲𑁆𑀲𑀦𑀦𑁆𑀢𑀺 𑀏𑀓𑀁 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺. 𑀅𑀝𑁆𑀞 𑀥𑀫𑁆𑀫𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀦𑁆𑀢𑀺, 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀯𑀺𑀜𑁆𑀜𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺. 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀩𑁆𑀩𑀺𑀥𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀲𑀳𑀚𑀸𑀢𑁄 𑀯𑀢𑁆𑀣𑀼𑀧𑀼𑀭𑁂 𑀚𑀸𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀧𑀘𑁆𑀙𑀸𑀚𑀸𑀢𑁄𑀢𑀺.

𑀢𑀢𑁆𑀣 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀸𑀫 𑀤𑁆𑀯𑀺𑀲𑀼 𑀲𑀳𑀚𑀸𑀢𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀦𑀸𑀫𑀭𑀽𑀧𑁂𑀲𑀼 𑀦𑀸𑀫𑀁 𑀯𑀸 𑀭𑀽𑀧𑀲𑁆𑀲 𑀭𑀽𑀧𑀁 𑀯𑀸 𑀦𑀸𑀫𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄. 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀧𑀯𑀢𑁆𑀢𑀺𑀓𑀸𑀮𑁂 𑀘𑀢𑀼𑀓𑁆𑀔𑀦𑁆𑀥𑀦𑀸𑀫𑀁, 𑀭𑀽𑀧𑀲𑁆𑀲𑀸𑀢𑀺 𑀘𑀺𑀢𑁆𑀢𑀚𑀭𑀽𑀧𑀲𑁆𑀲, 𑀭𑀽𑀧𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑀤𑀬𑀯𑀢𑁆𑀣𑀼𑀭𑀽𑀧𑀁, 𑀦𑀸𑀫𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀔𑀦𑁆𑀥𑀦𑀸𑀫𑀲𑁆𑀲. 𑀲𑁂𑀲𑀸 𑀢𑀬𑁄𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑀸 𑀏𑀯𑀸𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀯𑀺𑀥𑁄 𑀅𑀢𑁆𑀣𑀺𑀧𑀘𑁆𑀘𑀬𑁄, 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀯𑀢𑁆𑀣𑀼𑀧𑀼𑀭𑁂 𑀚𑀸𑀢𑀢𑁆𑀣𑀺 𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂 𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀭𑀽𑀧𑀸𑀳𑀸𑀭𑀢𑁆𑀣𑀺𑀧𑀘𑁆𑀘𑀬𑁄 𑀭𑀽𑀧 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁆𑀣𑀺𑀧𑀘𑁆𑀘𑀬𑁄𑀢𑀺.

𑀢𑀢𑁆𑀣 𑀲𑀳𑀚𑀸𑀢𑀧𑀘𑁆𑀘𑀬𑁄 𑀏𑀯 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀙𑀲𑀼. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑁄𑀧𑀺 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑁄𑀬𑁂𑀯.

𑀓𑁂𑀦𑀝𑁆𑀞𑁂𑀦 ¶ 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀲𑀬𑀁 𑀔𑀡𑀺𑀓𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀅𑀢𑁆𑀣𑀺𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀸𑀫. 𑀢𑀣𑀸 𑀯𑀺𑀕𑀢 𑀧𑀘𑁆𑀘𑀬𑁄. 𑀅𑀯𑀺𑀕𑀢𑀧𑀘𑁆𑀘𑀬𑁄𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀲𑀩𑁆𑀩𑀲𑀤𑀺𑀲𑁄. 𑀅𑀢𑁆𑀣𑀻𑀢𑀺𑀘 𑀅𑀯𑀺𑀕𑀢𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀢𑀣𑀸 𑀦𑀢𑁆𑀣𑀻𑀢𑀺 𑀘 𑀯𑀺𑀕𑀢𑁄𑀢𑀺𑀘. 𑀦𑀢𑁆𑀣𑀺𑀯𑀺𑀕𑀢𑀅𑀯𑀺𑀕𑀢𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀲𑀪𑀸𑀕𑁄 𑀯𑀼𑀘𑁆𑀘𑀢𑁂. 𑀧𑀜𑁆𑀘𑀤𑀲 𑀲𑀳𑀚𑀸𑀢𑀚𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀲𑀳𑀚𑀸𑀢𑀸 𑀘𑀢𑁆𑀢𑀸𑀭𑁄 𑀫𑀚𑁆𑀛𑀺𑀫𑀲𑀳𑀚𑀸𑀢𑀸 𑀲𑀢𑁆𑀢 𑀔𑀼𑀤𑁆𑀤𑀓𑀲𑀳𑀚𑀸𑀢𑀸. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀳𑀸𑀲𑀳𑀚𑀸𑀢𑀸 𑀦𑀸𑀫 𑀲𑀳𑀚𑀸𑀢𑁄 𑀲𑀳𑀚𑀸𑀢𑀦𑀺𑀲𑁆𑀲𑀬𑁄 𑀲𑀳𑀚𑀸𑀢𑀢𑁆𑀣𑀺 𑀲𑀳𑀚𑀸𑀢 𑀅𑀯𑀺𑀕𑀢𑁄. 𑀘𑀢𑁆𑀢𑀸𑀭𑁄 𑀫𑀚𑁆𑀛𑀺𑀫𑀲𑀳𑀚𑀸𑀢𑀸 𑀦𑀸𑀫 𑀅𑀜𑁆𑀜𑀫𑀜𑁆𑀜𑁄 𑀯𑀺𑀧𑀸𑀓𑁄 𑀲𑀫𑁆𑀧𑀬𑀼𑀢𑁆𑀢𑁄 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄. 𑀲𑀢𑁆𑀢 𑀔𑀼𑀤𑁆𑀤𑀓𑀲𑀳 𑀚𑀸𑀢𑀸 𑀦𑀸𑀫 𑀳𑁂𑀢𑀼 𑀲𑀳𑀚𑀸𑀢𑀸𑀥𑀺𑀧𑀢𑀺 𑀲𑀳𑀚𑀸𑀢𑀓𑀫𑁆𑀫𑀁 𑀲𑀳 𑀚𑀸𑀢𑀸𑀳𑀸𑀭𑁄 𑀲𑀳𑀚𑀸𑀢𑀺𑀦𑁆𑀤𑁆𑀭𑀺𑀬𑀁 𑀛𑀸𑀦𑀁 𑀫𑀕𑁆𑀕𑁄.

𑀢𑀬𑁄 𑀭𑀽𑀧𑀸𑀳𑀸𑀭𑀸, 𑀭𑀽𑀧𑀸𑀳𑀸𑀭𑁄 𑀭𑀽𑀧𑀸𑀳𑀸𑀭𑀢𑁆𑀣𑀺 𑀭𑀽𑀧𑀸𑀳𑀸𑀭𑀸 𑀯𑀺𑀕𑀢𑁄.

𑀢𑀻𑀡𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁆𑀣𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀯𑀺𑀕𑀢𑀁.

𑀲𑀢𑁆𑀢𑀭𑀲 𑀧𑀼𑀭𑁂𑀚𑀸𑀢𑀚𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀙 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀸 𑀙 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸 𑀧𑀜𑁆𑀘 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸. 𑀢𑀢𑁆𑀣 𑀙 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀸 𑀦𑀸𑀫 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀢𑁆𑀣𑀺 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀅𑀯𑀺𑀕𑀢𑁄. 𑀙 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸 𑀦𑀸𑀫 𑀆𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑁄 𑀓𑀺𑀜𑁆𑀘𑀺𑀆𑀭𑀫𑁆𑀫𑀡𑀁 𑀓𑁄𑀘𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑁄𑀘𑀺 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀲𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀢𑁆𑀣𑀺 ¶ 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢 𑀅𑀯𑀺𑀕𑀢𑁄. 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀦𑁆𑀢𑀺𑀆𑀤𑀻𑀲𑀼 𑀓𑀺𑀜𑁆𑀘𑀺𑀓𑁄𑀘𑀺𑀯𑀘𑀦𑁂𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀕𑀬𑁆𑀳𑀢𑀺. 𑀧𑀜𑁆𑀘 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸 𑀦𑀸𑀫 𑀯𑀢𑁆𑀣𑀸𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂 𑀚𑀸𑀢 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀢𑁆𑀣𑀺 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢 𑀅𑀯𑀺𑀕𑀢𑁄.

𑀘𑀢𑁆𑀢𑀸𑀭𑁄 𑀧𑀘𑁆𑀙𑀸𑀚𑀸𑀢𑀚𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀧𑀘𑁆𑀙𑀸𑀚𑀸𑀢𑁄 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀘𑁆𑀙𑀸𑀚𑀸𑀢𑀢𑁆𑀣𑀺 𑀧𑀘𑁆𑀙𑀸𑀚𑀸𑀢𑀅𑀯𑀺𑀕𑀢𑁄.

𑀲𑀢𑁆𑀢 𑀅𑀦𑀦𑁆𑀢𑀭𑀸 𑀳𑁄𑀦𑁆𑀢𑀺, 𑀅𑀦𑀦𑁆𑀢𑀭𑁄 𑀲𑀫𑀦𑀦𑁆𑀢𑀭𑁄 𑀅𑀦𑀦𑁆𑀢𑀭𑀽𑀧 𑀦𑀺𑀲𑁆𑀲𑀬𑁄 𑀆𑀲𑁂𑀯𑀦𑀁 𑀅𑀦𑀦𑁆𑀢𑀭𑀓𑀫𑁆𑀫𑀁 𑀦𑀢𑁆𑀣𑀺 𑀯𑀺𑀕𑀢𑁄. 𑀏𑀢𑁆𑀣 𑀘 𑀅𑀦𑀦𑁆𑀢𑀭 𑀓𑀫𑁆𑀫𑀁 𑀦𑀸𑀫 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸, 𑀲𑀸 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀅𑀭𑀺𑀬𑀨𑀮𑀁 𑀚𑀦𑁂𑀢𑀺.

𑀧𑀜𑁆𑀘 𑀯𑀺𑀲𑀼𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀯𑀲𑁂𑀲𑀁 𑀆𑀭𑀫𑁆𑀫𑀡𑀁 𑀅𑀯𑀲𑁂𑀲𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀅𑀯𑀲𑁂𑀲𑁄 𑀆𑀭𑀫𑁆𑀫𑀡𑀽𑀧 𑀦𑀺𑀲𑁆𑀲𑀬𑁄 𑀲𑀩𑁆𑀩𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀅𑀯𑀲𑁂𑀲𑀁 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀁. 𑀇𑀢𑀺 𑀯𑀺𑀢𑁆𑀣𑀸𑀭𑀢𑁄 𑀧𑀝𑁆𑀞𑀸𑀦𑀧𑀘𑁆𑀘𑀬𑀸 𑀘𑀢𑀼𑀧𑀜𑁆𑀜𑀸𑀲𑀧𑁆𑀧𑀪𑁂𑀤𑀸 𑀳𑁄𑀦𑁆𑀢𑀻𑀢𑀺.

𑀢𑀢𑁆𑀣 𑀲𑀩𑁆𑀩𑁂 𑀲𑀳𑀚𑀸𑀢𑀚𑀸𑀢𑀺𑀓𑀸 𑀘 𑀲𑀩𑁆𑀩𑁂 𑀧𑀼𑀭𑁂𑀚𑀸𑀢 𑀚𑀸𑀢𑀺𑀓𑀸 𑀲𑀩𑁆𑀩𑁂 𑀧𑀘𑁆𑀙𑀸𑀚𑀸𑀢𑀚𑀸𑀢𑀺𑀓𑀸 𑀭𑀽𑀧𑀸𑀳𑀸𑀭𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀦𑀸𑀫. 𑀲𑀩𑁆𑀩𑁂 𑀅𑀦𑀦𑁆𑀢𑀭𑀚𑀸𑀢𑀺𑀓𑀸 𑀲𑀩𑁆𑀩𑀁 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀦𑁆𑀢𑀺 𑀇𑀫𑁂 𑀅𑀢𑀻𑀢𑀧𑀘𑁆𑀘𑀬𑀸 𑀦𑀸𑀫. 𑀆𑀭𑀫𑁆𑀫𑀡𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀇𑀫𑁂 𑀢𑁂𑀓𑀸𑀮𑀺𑀓𑀸 𑀘 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀻𑀦𑀁 𑀯𑀲𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑀸 𑀘 𑀳𑁄𑀦𑁆𑀢𑀺.

𑀦𑀺𑀩𑁆𑀩𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸 𑀦𑀸𑀫 𑀅𑀲𑀗𑁆𑀔𑀢𑀸 𑀦𑀸𑀫. 𑀓𑀲𑁆𑀫𑀸. 𑀅𑀚𑀸𑀢𑀺𑀓𑀢𑁆𑀢𑀸. 𑀬𑁂𑀲𑀜𑁆𑀳𑀺 𑀚𑀸𑀢𑀺 𑀦𑀸𑀫 𑀅𑀢𑁆𑀣𑀺, 𑀉𑀧𑁆𑀧𑀸𑀤𑁄 𑀦𑀸𑀫 𑀅𑀢𑁆𑀣𑀺. 𑀢𑁂 𑀲𑀧𑁆𑀧𑀘𑁆𑀘𑀬𑀸𑀦𑀸𑀫 𑀲𑀗𑁆𑀔𑀢𑀸 𑀦𑀸𑀫 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀦𑀸𑀫. 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀅𑀚𑀸𑀢𑀺𑀓𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀢𑁆𑀢𑀸 𑀅𑀚𑀸𑀢𑀺𑀧𑀘𑁆𑀘𑀬𑀢𑁆𑀢𑀸𑀘 𑀅𑀧𑁆𑀧𑀘𑁆𑀘𑀬𑀸 𑀦𑀸𑀫 𑀅𑀲𑀗𑁆𑀔𑀢𑀸 𑀦𑀸𑀫𑀸𑀢𑀺.

𑀲𑀧𑁆𑀧𑀘𑁆𑀘𑀬𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀲𑀗𑁆𑀔𑀢𑁂𑀲𑀼 𑀏𑀓𑁄𑀧𑀺 𑀥𑀫𑁆𑀫𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀻𑀢𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀅𑀣 𑀔𑁄 𑀲𑀩𑁆𑀩𑁂 𑀢𑁂 𑀔𑀬𑀝𑁆𑀞𑁂𑀦 𑀅𑀦𑀺𑀘𑁆𑀘𑀸 𑀏𑀯 𑀳𑁄𑀦𑁆𑀢𑀺. 𑀓𑀲𑁆𑀫𑀸. 𑀲𑀬𑀜𑁆𑀘 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺 𑀓𑀢𑁆𑀢𑀸 𑀧𑀘𑁆𑀘𑀬𑀸𑀦𑀜𑁆𑀘 𑀅𑀦𑀺𑀘𑁆𑀘𑀥𑀫𑁆𑀫𑀢𑁆𑀢𑀸. 𑀦𑀦𑀼 𑀦𑀺𑀩𑁆𑀩𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀺 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂 𑀘 𑀦𑀺𑀘𑁆𑀘𑀸 𑀥𑀼𑀯𑀸𑀢𑀺. 𑀲𑀘𑁆𑀘𑀁. 𑀓𑁂𑀯𑀮𑁂𑀦 𑀧𑀦 𑀦𑀺𑀩𑁆𑀩𑀸𑀦𑀧𑀘𑁆𑀘𑀬𑁂𑀦 𑀯𑀸 𑀧𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑁂𑀦 𑀯𑀸 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺, 𑀩𑀳𑀽𑀳𑀺 𑀧𑀘𑁆𑀘𑀬𑁂𑀳𑀺 𑀏𑀯 𑀉𑀧𑁆𑀧𑀦𑁆𑀦𑁄, 𑀢𑁂 𑀧𑀦 𑀧𑀘𑁆𑀘𑀬𑀸 𑀅𑀦𑀺𑀘𑁆𑀘𑀸 𑀏𑀯 𑀅𑀥𑀼𑀯𑀸𑀢𑀺.

𑀬𑁂 ¶ 𑀘 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀳𑁄𑀦𑁆𑀢𑀺, 𑀢𑁂 𑀦𑀺𑀘𑁆𑀘𑀓𑀸𑀮𑀁 𑀲𑀢𑁆𑀢𑁂 𑀢𑀺𑀯𑀺𑀥𑁂𑀳𑀺 𑀤𑀼𑀓𑁆𑀔𑀤𑀡𑁆𑀟𑁂𑀳𑀺 𑀧𑀝𑀺𑀧𑁆𑀧𑀻𑀴𑁂𑀦𑁆𑀢𑀺 𑀩𑀸𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀥𑀫𑁆𑀫𑀸 𑀪𑀬𑀝𑁆𑀞𑁂𑀦 𑀤𑀼𑀓𑁆𑀔𑀸 𑀏𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀢𑀺𑀯𑀺𑀥𑀸 𑀤𑀼𑀓𑁆𑀔𑀤𑀡𑁆𑀟𑀸 𑀦𑀸𑀫 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀲𑀗𑁆𑀔𑀸𑀭 𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸.

𑀬𑁂 𑀓𑁂𑀘𑀺 𑀅𑀦𑀺𑀘𑁆𑀘𑀸 𑀏𑀯 𑀳𑁄𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀪𑀺𑀚𑁆𑀚𑀦𑁆𑀢𑀺, 𑀢𑁂 𑀓𑀣𑀁 𑀬𑀸𑀯𑀚𑀻𑀯𑀁 𑀦𑀺𑀘𑁆𑀘𑀲𑀜𑁆𑀜𑀺𑀢𑀸𑀦𑀁 𑀲𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀢𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁, 𑀲𑀸𑀭𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁. 𑀬𑁂 𑀘 𑀤𑀼𑀓𑁆𑀔𑀸 𑀏𑀯 𑀳𑁄𑀦𑁆𑀢𑀺, 𑀢𑁂 𑀓𑀣𑀁 𑀤𑀼𑀓𑁆𑀔𑀧𑁆𑀧𑀝𑀺𑀓𑀼𑀮𑀸𑀦𑀁 𑀲𑀼𑀔𑀓𑀸𑀫𑀸𑀦𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁, 𑀲𑀸𑀭𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀢𑁂 𑀥𑀫𑁆𑀫𑀸 𑀅𑀲𑀸𑀭𑀓𑀝𑁆𑀞𑁂𑀦 𑀅𑀦𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺.

𑀅𑀧𑀺 𑀘 𑀬𑀲𑁆𑀫𑀸 𑀇𑀫𑀸𑀬 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀤𑁂𑀲𑀦𑀸𑀬 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀥𑀫𑁆𑀫𑀸 𑀦𑀸𑀫 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸 𑀏𑀯 𑀳𑁄𑀦𑁆𑀢𑀺, 𑀲𑀢𑁆𑀢𑀸𑀦𑀁 𑀯𑀲𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸 𑀦 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀓𑁂𑀲𑀼 𑀘 𑀢𑁂𑀲𑀼 𑀦 𑀏𑀓𑁄𑀧𑀺 𑀥𑀫𑁆𑀫𑁄 𑀅𑀧𑁆𑀧𑀓𑁂𑀦 𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀔𑁄 𑀩𑀳𑀽𑀳𑀺 𑀏𑀯 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀢𑀲𑁆𑀫𑀸 𑀅𑀬𑀁 𑀤𑁂𑀲𑀦𑀸 𑀥𑀫𑁆𑀫𑀸𑀦𑀁 𑀅𑀦𑀢𑁆𑀢𑀮𑀓𑁆𑀔𑀡𑀤𑀻𑀧𑀦𑁂 𑀫𑀢𑁆𑀣𑀓𑀧𑀢𑁆𑀢𑀸 𑀳𑁄𑀢𑀻𑀢𑀺.

𑀧𑀘𑁆𑀘𑀬𑀲𑀪𑀸𑀕𑀲𑀗𑁆𑀕𑀳𑁄 𑀦𑀺𑀝𑁆𑀞𑀺𑀢𑁄.

𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄

𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀯𑀼𑀘𑁆𑀘𑀢𑁂. 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀩𑀳𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀫𑁄𑀥𑀸𑀦𑀁 𑀧𑀘𑁆𑀘𑀬𑀖𑀝𑀦𑀸 𑀦𑀸𑀫. 𑀬𑁂𑀦 𑀧𑀦 𑀥𑀫𑁆𑀫𑀸 𑀲𑀧𑁆𑀧𑀘𑁆𑀘𑀬𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑁂 𑀘 𑀞𑀺𑀢𑀺𑀬𑀜𑁆𑀘 𑀇𑀫𑁂𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀳𑀺 𑀲𑀳𑀺𑀢𑀢𑁆𑀢𑀸 𑀲𑀧𑁆𑀧𑀘𑁆𑀘𑀬𑀸 𑀦𑀸𑀫, 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀲𑀗𑁆𑀔𑀢𑀸 𑀦𑀸𑀫, 𑀲𑀗𑁆𑀔𑀢𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀦𑀸𑀫. 𑀓𑀢𑀫𑁂 𑀧𑀦 𑀢𑁂 𑀥𑀫𑁆𑀫𑀸𑀢𑀺. 𑀏𑀓𑀯𑀻𑀲𑀲𑀢𑀘𑀺𑀢𑁆𑀢𑀸𑀦𑀺 𑀘 𑀤𑁆𑀯𑀺𑀧𑀜𑁆𑀜𑀸𑀲𑀘𑁂𑀢𑀲𑀺𑀓𑀸𑀦𑀺 𑀘 𑀅𑀝𑁆𑀞𑀯𑀻𑀲𑀢𑀺 𑀭𑀽𑀧𑀸𑀦𑀺 𑀘.

𑀢𑀢𑁆𑀣 𑀏𑀓𑀯𑀻𑀲𑀲𑀢𑀘𑀺𑀢𑁆𑀢𑀸𑀦𑀺 𑀥𑀸𑀢𑀼𑀯𑀲𑁂𑀦 𑀲𑀢𑁆𑀢𑀯𑀺𑀥𑀸𑀦𑀺 𑀪𑀯𑀦𑁆𑀢𑀺, 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼 𑀚𑀺𑀯𑁆𑀳𑀸 𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡 𑀥𑀸𑀢𑀽𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀲𑁄𑀢𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀖𑀸𑀦𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀓𑀸𑀬𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 ¶ 𑀦𑀸𑀫. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦 𑀘𑀺𑀢𑁆𑀢𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀤𑁆𑀯𑀬𑀜𑁆𑀘 𑀫𑀦𑁄𑀥𑀸𑀢𑀼 𑀦𑀸𑀫. 𑀲𑁂𑀲𑀸𑀦𑀺 𑀅𑀝𑁆𑀞𑀲𑀢𑀁 𑀘𑀺𑀢𑁆𑀢𑀸𑀦𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫.

𑀤𑁆𑀯𑀺𑀧𑀜𑁆𑀜𑀸𑀲𑀘𑁂𑀢𑀲𑀺𑀓𑀸𑀦𑀺 𑀘 𑀭𑀸𑀲𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀺 𑀪𑀯𑀦𑁆𑀢𑀺, 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀘 𑀙 𑀧𑀓𑀺𑀡𑁆𑀡𑀓𑀸𑀦𑀺 𑀘 𑀘𑀼𑀤𑁆𑀤𑀲 𑀧𑀸𑀧𑀸𑀦𑀺𑀘 𑀧𑀜𑁆𑀘𑀯𑀻𑀲𑀢𑀺 𑀓𑀮𑁆𑀬𑀸𑀡𑀸𑀦𑀺 𑀘.

𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑁂𑀲𑀼 𑀘 𑀧𑀦𑁆𑀦𑀭𑀲𑀧𑀘𑁆𑀘𑀬𑀸 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤 𑀲𑀸𑀥𑀸𑀭𑀡𑀸 𑀳𑁄𑀦𑁆𑀢𑀺, 𑀆𑀭𑀫𑁆𑀫𑀡𑀜𑁆𑀘 𑀅𑀦𑀦𑁆𑀢𑀭𑀜𑁆𑀘 𑀲𑀫𑀦𑀦𑁆𑀢𑀭𑀜𑁆𑀘 𑀲𑀳 𑀚𑀸𑀢𑁄 𑀘 𑀅𑀜𑁆𑀜𑀫𑀜𑁆𑀜𑀜𑁆𑀘 𑀦𑀺𑀲𑁆𑀲𑀬𑁄 𑀘 𑀉𑀧𑀦𑀺𑀲𑁆𑀲𑀬𑁄 𑀘 𑀓𑀫𑁆𑀫𑀜𑁆𑀘 𑀆𑀳𑀸𑀭𑁄 𑀘 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑁄 𑀘 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀯𑀺𑀕𑀢𑁄 𑀘 𑀅𑀯𑀺𑀕𑀢𑁄 𑀘. 𑀦 𑀳𑀺 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀅𑀢𑁆𑀣𑀺. 𑀢𑀣𑀸 𑀅𑀦𑀦𑁆𑀢𑀭𑀸𑀤𑀻𑀳𑀺 𑀘. 𑀅𑀝𑁆𑀞𑀧𑀘𑁆𑀘𑀬𑀸 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀘𑁆𑀘𑀬𑀸 𑀲𑀸𑀥𑀸𑀭𑀡𑀸 𑀳𑁄𑀦𑁆𑀢𑀺, 𑀳𑁂𑀢𑀼 𑀘 𑀅𑀥𑀺𑀧𑀢𑀺 𑀘 𑀧𑀼𑀭𑁂 𑀚𑀸𑀢𑁄 𑀘 𑀆𑀲𑁂𑀯𑀦𑀜𑁆𑀘 𑀯𑀺𑀧𑀸𑀓𑁄 𑀘 𑀛𑀸𑀦𑀜𑁆𑀘 𑀫𑀕𑁆𑀕𑁄 𑀘 𑀯𑀺𑀧𑁆𑀧𑀬𑀼𑀢𑁆𑀢𑁄 𑀘. 𑀢𑀢𑁆𑀣 𑀳𑁂𑀢𑀼 𑀲𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯 𑀲𑀸𑀥𑀸𑀭𑀡𑀸, 𑀅𑀥𑀺𑀧𑀢𑀺 𑀘 𑀲𑀸𑀥𑀺𑀧𑀢𑀺𑀚𑀯𑀦𑀸𑀦𑀁 𑀏𑀯, 𑀧𑀼𑀭𑁂𑀚𑀸𑀢𑁄 𑀘 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯, 𑀆𑀲𑁂𑀯𑀦𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀸𑀦𑀁 𑀏𑀯, 𑀯𑀺𑀧𑀸𑀓𑁄 𑀘 𑀯𑀺𑀧𑀸𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯, 𑀛𑀸𑀦𑀜𑁆𑀘 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯, 𑀫𑀕𑁆𑀕𑁄 𑀘 𑀲𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯, 𑀯𑀺𑀧𑁆𑀧𑀬𑀼𑀢𑁆𑀢𑁄 𑀘 𑀅𑀭𑀽𑀧𑀮𑁄𑀓𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀦𑀢𑁆𑀣𑀺, 𑀏𑀓𑁄 𑀧𑀘𑁆𑀙𑀸𑀚𑀸𑀢𑁄 𑀭𑀽𑀧𑀥𑀫𑁆𑀫𑀸𑀦𑀁 𑀏𑀯 𑀯𑀺𑀲𑀼𑀁𑀪𑀽𑀢𑁄 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀤𑀻𑀧𑀦𑀸. 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀘𑁂𑀢𑀲𑀺𑀓𑀸𑀦𑀺 𑀦𑀸𑀫, 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀁 𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀥𑀺𑀧𑀢𑀺𑀚𑀸𑀢𑀺𑀓𑀜𑁆𑀘 𑀆𑀳𑀸𑀭𑀧𑀘𑁆𑀘𑀬𑁄 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀘. 𑀨𑀲𑁆𑀲𑁄 𑀆𑀳𑀸𑀭𑀧𑀘𑁆𑀘𑀬𑁄. 𑀯𑁂𑀤𑀦𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀘 𑀛𑀸𑀦 𑀧𑀘𑁆𑀘𑀬𑁄 𑀘. 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄 𑀘 𑀆𑀳𑀸𑀭𑀧𑀘𑁆𑀘𑀬𑁄 𑀘. 𑀏𑀓𑀕𑁆𑀕𑀢𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀘 𑀛𑀸𑀦 𑀧𑀘𑁆𑀘𑀬𑁄 𑀘 𑀫𑀕𑁆𑀕𑀧𑀘𑁆𑀘𑀬𑁄 𑀘. 𑀚𑀻𑀯𑀺𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀲𑁂𑀲𑀸 𑀤𑁆𑀯𑁂 𑀥𑀫𑁆𑀫𑀸 𑀯𑀺𑀲𑁂𑀲𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀘𑁂𑀢𑀲𑀺𑀓𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀲𑀢𑁆𑀢𑀳𑀺 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀲𑀳𑀚𑀸𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑀯𑀚𑁆𑀚𑀺𑀢𑁂𑀳𑀺 𑀢𑀻𑀳𑀺 𑀫𑀚𑁆𑀛𑀺𑀫𑀲𑀳𑀚𑀸𑀢𑁂𑀳𑀺 𑀘. 𑀢𑁂𑀲𑁆𑀯𑁂𑀯 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀯𑀺𑀜𑁆𑀜𑀸𑀡𑀁 𑀲𑁂𑀲𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀨𑀲𑁆𑀲𑁄 𑀆𑀳𑀸𑀭𑀧𑀘𑁆𑀘𑀬𑁂𑀦, 𑀯𑁂𑀤𑀦𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀫𑀢𑁆𑀢𑁂𑀦, 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘 𑀆𑀳𑀸𑀭 𑀧𑀘𑁆𑀘𑀬𑁂𑀦 𑀘, 𑀏𑀓𑀕𑁆𑀕𑀢𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀫𑀢𑁆𑀢𑁂𑀦 ¶ , 𑀚𑀻𑀯𑀺𑀢𑀁 𑀲𑁂𑀲𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀼𑀯𑀢𑁆𑀣𑀼𑀭𑀽𑀧𑀁 𑀧𑀦 𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀙𑀳𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁂𑀳𑀺 𑀢𑀲𑁆𑀫𑀺𑀁 𑀘𑀓𑁆𑀔𑀼𑀯𑀢𑁆𑀣𑀼𑀫𑁆𑀳𑀺 𑀆𑀧𑀸𑀢𑀫𑀸𑀕𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀢𑁂𑀲𑀁 𑀘𑀢𑀽𑀳𑀺 𑀆𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑁂𑀳𑀺, 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀜𑁆𑀘 𑀧𑀜𑁆𑀘𑀳𑀺 𑀅𑀦𑀦𑁆𑀢𑀭𑁂𑀳𑀺, 𑀧𑀼𑀩𑁆𑀩𑁂 𑀓𑀢𑀁 𑀓𑀼𑀲𑀮𑀓𑀫𑁆𑀫𑀁 𑀯𑀸 𑀅𑀓𑀼𑀲𑀮𑀓𑀫𑁆𑀫𑀁 𑀯𑀸 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀯𑀸 𑀢𑁂𑀲𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦, 𑀓𑀫𑁆𑀫 𑀲𑀳𑀸𑀬𑀪𑀽𑀢𑀸𑀦𑀺 𑀧𑀼𑀭𑀺𑀫𑀪𑀯𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀽𑀧𑀸𑀤𑀸𑀦𑀸𑀦𑀺 𑀘 𑀇𑀫𑀲𑁆𑀫𑀺𑀁 𑀪𑀯𑁂 𑀆𑀯𑀸𑀲𑀧𑀼𑀕𑁆𑀕𑀮𑀉𑀢𑀼𑀪𑁄𑀚𑀦𑀸𑀤𑀬𑁄 𑀘 𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀳𑁂𑀢𑀼 𑀘 𑀅𑀥𑀺𑀧𑀢𑀺 𑀘 𑀧𑀘𑁆𑀙𑀸𑀚𑀸𑀢𑁄 𑀘 𑀆𑀲𑁂𑀯𑀦𑀜𑁆𑀘 𑀛𑀸𑀦𑀜𑁆𑀘 𑀫𑀕𑁆𑀕𑁄𑀘𑀸𑀢𑀺 𑀙𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀅𑀝𑁆𑀞𑀸𑀭𑀲𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀬𑀣𑀸 𑀘 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀙 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀅𑀝𑁆𑀞𑀸𑀭𑀲𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺.

𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄

𑀙 𑀧𑀓𑀺𑀡𑁆𑀡𑀓𑀸𑀦𑀺 𑀘𑁂𑀢𑀲𑀺𑀓𑀸𑀦𑀺 𑀦𑀸𑀫, 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀅𑀥𑀺𑀫𑁄𑀓𑁆𑀔𑁄 𑀯𑀻𑀭𑀺𑀬𑀁 𑀧𑀻𑀢𑀺 𑀙𑀦𑁆𑀤𑁄. 𑀢𑀢𑁆𑀣 𑀯𑀺𑀢𑀓𑁆𑀓𑁄 𑀛𑀸𑀦𑀧𑀘𑁆𑀘𑀬𑁄 𑀘 𑀫𑀕𑁆𑀕𑀧𑀘𑁆𑀘𑀬𑁄 𑀘. 𑀯𑀺𑀘𑀸𑀭𑁄 𑀛𑀸𑀦𑀧𑀘𑁆𑀘𑀬𑁄. 𑀯𑀻𑀭𑀺𑀬𑀁 𑀅𑀥𑀺𑀧𑀢𑀺𑀚𑀸𑀢𑀺𑀓𑀜𑁆𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀘 𑀫𑀕𑁆𑀕𑀧𑀘𑁆𑀘𑀬𑁄 𑀘. 𑀧𑀻𑀢𑀺 𑀛𑀸𑀦𑀧𑀘𑁆𑀘𑀬𑁄. 𑀙𑀦𑁆𑀤𑁄 𑀅𑀥𑀺𑀧𑀢𑀺𑀚𑀸𑀢𑀺𑀓𑁄. 𑀅𑀥𑀺𑀫𑁄𑀓𑁆𑀔𑁄 𑀧𑀦 𑀯𑀺𑀲𑁂𑀲𑀧𑀘𑁆𑀘𑀬𑁄 𑀦 𑀳𑁄𑀢𑀺.

𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀤𑁆𑀯𑀬𑀜𑁆𑀘 𑀉𑀧𑁂𑀓𑁆𑀔𑀸𑀲𑀦𑁆𑀢𑀻𑀭𑀡 𑀤𑁆𑀯𑀬𑀜𑁆𑀘𑀸𑀢𑀺 𑀧𑀜𑁆𑀘𑀲𑀼 𑀘𑀺𑀢𑁆𑀢𑁂𑀲𑀼 𑀤𑀲 𑀘𑁂𑀢𑀲𑀺𑀓𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀲𑀢𑁆𑀢 𑀲𑀩𑁆𑀩 𑀘𑀺𑀢𑁆𑀢𑀺𑀓𑀸𑀦𑀺 𑀘 𑀧𑀓𑀺𑀡𑁆𑀡𑀓𑁂𑀲𑀼 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀅𑀥𑀺𑀫𑁄𑀓𑁆𑀔𑁄 𑀘. 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀁 𑀏𑀓𑀸𑀤𑀲 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀼 𑀘𑀺𑀢𑁆𑀢𑁂𑀲𑀼 𑀛𑀸𑀦𑀓𑀺𑀘𑁆𑀘𑀁 𑀮𑀩𑁆𑀪𑀢𑀺. 𑀯𑁂𑀤𑀦𑀸 𑀘 𑀏𑀓𑀕𑁆𑀕𑀢𑀸 𑀘 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀛𑀸𑀦𑀧𑀘𑁆𑀘𑀬𑀁 𑀲𑀸𑀥𑁂𑀦𑁆𑀢𑀺. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁 𑀧𑀦 𑀓𑀺𑀭𑀺𑀬𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦𑀢𑁆𑀣𑀺. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀜𑁆𑀘 𑀉𑀧𑀦𑀺𑀲𑁆𑀲𑀬𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀙 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀛𑀸𑀦𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀲𑁂𑀲𑁂𑀲𑀼 𑀘𑀢𑀽𑀲𑀼 𑀯𑀺𑀧𑀸𑀓𑀘𑀺𑀢𑁆𑀢𑁂𑀲𑀼 𑀧𑀜𑁆𑀘 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀘 𑀛𑀸𑀦𑀧𑀘𑁆𑀘𑀬𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀲𑁄𑀫𑀦𑀲𑁆𑀲𑀲𑀦𑁆𑀢𑀻𑀭𑀡𑁂 𑀧𑀻𑀢𑀺𑀬𑀸 𑀲𑀤𑁆𑀥𑀺𑀁 𑀏𑀓𑀸𑀤𑀲𑀘𑁂𑀢𑀲𑀺𑀓𑀸 𑀬𑀼𑀚𑁆𑀚𑀦𑁆𑀢𑀺, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑁂 𑀘 𑀯𑀻𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑀸𑀢𑀺 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 ¶ 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂 𑀧𑀦 𑀧𑀻𑀢𑀺𑀬𑀸 𑀘 𑀯𑀻𑀭𑀺𑀬𑁂𑀦 𑀘 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀘𑁂𑀢𑀲𑀺𑀓𑀸𑀦𑀺 𑀬𑀼𑀚𑁆𑀚𑀦𑁆𑀢𑀺. 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀢𑁂𑀭𑀲 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑁄𑀫𑀦𑀲𑁆𑀲𑀲𑀦𑁆𑀢𑀻𑀭𑀡𑁂 𑀛𑀸𑀦𑀗𑁆𑀕𑁂𑀲𑀼 𑀧𑀻𑀢𑀺𑀫𑀢𑁆𑀢𑀁 𑀅𑀥𑀺𑀓𑀁 𑀳𑁄𑀢𑀺, 𑀧𑀼𑀩𑁆𑀩𑁂 𑀉𑀧𑁂𑀓𑁆𑀔𑀸𑀲𑀦𑁆𑀢𑀻𑀭𑀡𑀤𑁆𑀯𑀬𑁂 𑀯𑀺𑀬 𑀧𑀜𑁆𑀘𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀏𑀓𑀽𑀦𑀯𑀻𑀲𑀢𑀺𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑀸 𑀯𑀚𑁆𑀚𑀦𑀘𑀺𑀢𑁆𑀢𑁂 𑀘 𑀯𑀻𑀭𑀺𑀬𑀫𑀢𑁆𑀢𑀁 𑀅𑀥𑀺𑀓𑀁 𑀳𑁄𑀢𑀺, 𑀢𑀜𑁆𑀘 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘 𑀛𑀸𑀦 𑀓𑀺𑀘𑁆𑀘𑀸𑀦𑀺𑀲𑀸𑀥𑁂𑀢𑀺. 𑀅𑀥𑀺𑀧𑀢𑀺𑀓𑀺𑀘𑁆𑀘𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀜𑁆𑀘 𑀦 𑀲𑀸𑀥𑁂𑀢𑀺. 𑀓𑀺𑀭𑀺𑀬 𑀘𑀺𑀢𑁆𑀢𑀢𑁆𑀢𑀸𑀯𑀺𑀧𑀸𑀓𑀧𑀘𑁆𑀘𑀬𑁄 𑀘 𑀦𑀢𑁆𑀣𑀺. 𑀧𑀼𑀩𑁆𑀩𑁂 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑁂 𑀯𑀺𑀬 𑀯𑀺𑀧𑀸𑀓 𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀙 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀛𑀸𑀦𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀭𑀲 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀧𑀺 𑀓𑀺𑀭𑀺𑀬𑀘𑀺𑀢𑁆𑀢𑀢𑁆𑀢𑀸 𑀯𑀺𑀧𑀸𑀓𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀚𑀯𑀦𑀘𑀺𑀢𑁆𑀢𑀢𑁆𑀢𑀸 𑀧𑀦 𑀆𑀲𑁂𑀯𑀦𑀁 𑀅𑀢𑁆𑀣𑀺, 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄

𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑁆𑀯𑁂 𑀫𑁄𑀳𑀫𑀽𑀮𑀺𑀓𑀸𑀦𑀺 𑀅𑀝𑁆𑀞 𑀮𑁄𑀪 𑀫𑀽𑀮𑀺𑀓𑀸𑀦𑀺 𑀤𑁆𑀯𑁂 𑀤𑁄𑀲𑀫𑀽𑀮𑀺𑀓𑀸𑀦𑀺. 𑀘𑀼𑀤𑁆𑀤𑀲 𑀧𑀸𑀧𑀘𑁂𑀢𑀲𑀺𑀓𑀸𑀦𑀺 𑀦𑀸𑀫 𑀫𑁄𑀳𑁄 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀉𑀤𑁆𑀥𑀘𑁆𑀘𑀦𑁆𑀢𑀺 𑀇𑀤𑀁 𑀫𑁄𑀳𑀘𑀢𑀼𑀓𑁆𑀓𑀁 𑀦𑀸𑀫. 𑀮𑁄𑀪𑁄 𑀤𑀺𑀝𑁆𑀞𑀺 𑀫𑀸𑀦𑁄𑀢𑀺 𑀇𑀤𑀁 𑀮𑁄𑀪𑀢𑀺𑀓𑁆𑀓𑀁 𑀦𑀸𑀫. 𑀤𑁄𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀇𑀤𑀁 𑀤𑁄𑀲𑀘𑀢𑀼𑀓𑁆𑀓𑀁 𑀦𑀸𑀫. 𑀣𑀺𑀦𑀁 𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀤𑀁 𑀯𑀺𑀲𑀼𑀁 𑀢𑀺𑀓𑁆𑀓𑀁 𑀦𑀸𑀫.

𑀢𑀢𑁆𑀣 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀢𑀺 𑀢𑀬𑁄 𑀫𑀽𑀮𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸, 𑀤𑀺𑀝𑁆𑀞𑀺 𑀫𑀕𑁆𑀕𑀧𑀘𑁆𑀘𑀬𑁄, 𑀲𑁂𑀲𑀸 𑀤𑀲𑀥𑀫𑁆𑀫𑀸 𑀯𑀺𑀲𑁂𑀲𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺.

𑀢𑀢𑁆𑀣 𑀤𑁆𑀯𑁂 𑀫𑁄𑀳𑀫𑀽𑀮𑀺𑀓𑀸𑀦𑀺 𑀦𑀸𑀫 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁. 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀧𑀦𑁆𑀦𑀭𑀲 𑀘𑁂𑀢𑀲𑀺𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀘 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀦𑁆𑀢𑀺 𑀢𑀻𑀡𑀺 𑀧𑀓𑀺𑀡𑁆𑀡𑀓𑀸𑀦𑀺 𑀘 𑀧𑀸𑀧𑀘𑁂𑀢𑀲𑀺𑀓𑁂𑀲𑀼 𑀫𑁄𑀳𑀘𑀢𑀼𑀓𑁆𑀓𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘𑀸𑀢𑀺, 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑁄𑀴𑀲 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀳𑁂𑀢𑀼 𑀧𑀘𑁆𑀘𑀬𑁄𑀧𑀺 𑀫𑀕𑁆𑀕𑀧𑀘𑁆𑀘𑀬𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀫𑁄𑀳𑁄 𑀳𑁂𑀢𑀼𑀧𑀘𑁆𑀘𑀬𑁄, 𑀯𑀺𑀢𑀓𑁆𑀓𑁄 𑀘 𑀯𑀻𑀭𑀺𑀬𑀜𑁆𑀘 𑀫𑀕𑁆𑀕𑀧𑀘𑁆𑀘𑀬𑁄, 𑀏𑀓𑀕𑁆𑀕𑀢𑀸 𑀧𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀤𑀼𑀝𑁆𑀞𑀢𑁆𑀢𑀸 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀜𑁆𑀘 𑀦 𑀲𑀸𑀥𑁂𑀢𑀺, 𑀛𑀸𑀦𑀓𑀺𑀘𑁆𑀘𑀫𑀢𑁆𑀢𑀁 𑀲𑀸𑀥𑁂𑀢𑀺. 𑀅𑀥𑀺𑀧𑀢𑀺 𑀘 𑀧𑀘𑁆𑀙𑀸𑀚𑀸𑀢𑁄 𑀯𑀺𑀧𑀸𑀓𑁄 𑀘𑀸𑀢𑀺 𑀢𑀬𑁄 𑀧𑀘𑁆𑀘𑀬𑀸𑀦 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀏𑀓𑀯𑀻𑀲𑀢𑀺𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀧𑀺 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀅𑀥𑀺𑀫𑁄𑀓𑁆𑀔𑁂𑀦 𑀲𑀤𑁆𑀥𑀺𑀁 𑀧𑀦𑁆𑀦𑀭𑀲𑁂𑀯 𑀘𑁂𑀢𑀲𑀺𑀓𑀸𑀦𑀺, 𑀲𑁄𑀴𑀲𑁂𑀯 𑀦𑀸𑀫𑀥𑀫𑁆𑀫𑀸 𑀳𑁄𑀦𑁆𑀢𑀺 ¶ . 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀏𑀓𑀕𑁆𑀕𑀢𑀸 𑀇𑀦𑁆𑀤𑁆𑀭𑀺𑀬 𑀓𑀺𑀘𑁆𑀘𑀜𑁆𑀘 𑀛𑀸𑀦𑀓𑀺𑀘𑁆𑀘𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀜𑁆𑀘 𑀲𑀸𑀥𑁂𑀢𑀺, 𑀢𑀬𑁄 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀏𑀓𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀅𑀝𑁆𑀞𑀲𑀼 𑀮𑁄𑀪𑀫𑀽𑀮𑀺𑀓𑀘𑀺𑀢𑁆𑀢𑁂𑀲𑀼 𑀧𑀦 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀘 𑀙 𑀧𑀓𑀺𑀡𑁆𑀡𑀓𑀸𑀦𑀺 𑀘 𑀧𑀸𑀧𑁂𑀲𑀼 𑀫𑁄𑀳𑀘𑀢𑀼𑀓𑁆𑀓𑀜𑁆𑀘 𑀮𑁄𑀪𑀢𑀺𑀓𑁆𑀓𑀜𑁆𑀘 𑀣𑀺𑀦𑀫𑀺𑀤𑁆𑀥𑀜𑁆𑀘𑀸𑀢𑀺 𑀤𑁆𑀯𑀸𑀯𑀻𑀲𑀢𑀺 𑀘𑁂𑀢𑀲𑀺𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀮𑁄𑀪𑁄 𑀘 𑀫𑁄𑀳𑁄𑀘𑀸𑀢𑀺 𑀤𑁆𑀯𑁂 𑀫𑀽𑀮𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁄. 𑀙𑀦𑁆𑀤𑁄 𑀘 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀜𑁆𑀘𑀸𑀢𑀺 𑀢𑀬𑁄 𑀅𑀥𑀺𑀧𑀢𑀺𑀚𑀸𑀢𑀺𑀓𑀸 𑀓𑀤𑀸𑀘𑀺 𑀅𑀥𑀺𑀧𑀢𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀺 𑀏𑀢𑁆𑀣 𑀮𑀩𑁆𑀪𑀢𑀺. 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄. 𑀢𑀬𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀘𑀺𑀢𑁆𑀢𑀜𑁆𑀘 𑀯𑁂𑀤𑀦𑀸 𑀘 𑀏𑀓𑀕𑁆𑀕𑀢𑀸 𑀘 𑀚𑀻𑀯𑀺𑀢𑀜𑁆𑀘 𑀯𑀻𑀭𑀺𑀬𑀜𑁆𑀘𑀸𑀢𑀺 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀯𑁂𑀤𑀦𑀸 𑀘 𑀏𑀓𑀕𑁆𑀕𑀢𑀸𑀘𑀸𑀢𑀺 𑀧𑀜𑁆𑀘 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄. 𑀯𑀺𑀢𑀓𑁆𑀓𑁄 𑀘 𑀏𑀓𑀕𑁆𑀕𑀢𑀸 𑀘 𑀤𑀺𑀝𑁆𑀞𑀺 𑀘 𑀯𑀻𑀭𑀺𑀬𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑁄 𑀘 𑀯𑀺𑀧𑀸𑀓𑁄 𑀘𑀸𑀢𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺. 𑀲𑁂𑀲𑀸 𑀤𑁆𑀯𑀸𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀤𑁆𑀯𑀻𑀲𑀼 𑀤𑁄𑀲𑀫𑀽𑀮𑀺𑀓𑀘𑀺𑀢𑁆𑀢𑁂𑀲𑀼 𑀧𑀻𑀢𑀺𑀜𑁆𑀘 𑀮𑁄𑀪𑀢𑀺𑀓𑁆𑀓𑀜𑁆𑀘 𑀧𑀳𑀸𑀬 𑀤𑁄𑀲𑀘𑀢𑀼𑀓𑁆𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀯𑀻𑀲𑀢𑀺 𑀏𑀯 𑀘𑁂𑀢𑀲𑀺𑀓𑀸𑀦𑀺, 𑀤𑁄𑀲𑁄 𑀘 𑀫𑁄𑀳𑁄 𑀘 𑀤𑁆𑀯𑁂 𑀫𑀽𑀮𑀸𑀦𑀺, 𑀢𑀬𑁄 𑀅𑀥𑀺𑀧𑀢𑀺 𑀚𑀸𑀢𑀺𑀓𑀸, 𑀢𑀬𑁄 𑀆𑀳𑀸𑀭𑀸, 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀘𑀢𑁆𑀢𑀸𑀭𑀺 𑀛𑀸𑀦𑀗𑁆𑀕𑀸𑀦𑀺, 𑀢𑀻𑀡𑀺 𑀫𑀕𑁆𑀕𑀗𑁆𑀕𑀸𑀦𑀺. 𑀏𑀢𑁆𑀣𑀸𑀧𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀤𑁆𑀯𑀸𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄

𑀏𑀓𑀦𑀯𑀼𑀢𑀺 𑀲𑁄𑀪𑀡𑀘𑀺𑀢𑁆𑀢𑀸𑀦𑀺 𑀦𑀸𑀫, 𑀘𑀢𑀼𑀯𑀻𑀲𑀢𑀺 𑀓𑀸𑀫 𑀲𑁄𑀪𑀡𑀘𑀺𑀢𑁆𑀢𑀸𑀦𑀺 𑀧𑀦𑁆𑀦𑀭𑀲 𑀭𑀽𑀧𑀘𑀺𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀅𑀭𑀽𑀧𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺. 𑀢𑀢𑁆𑀣 𑀘𑀢𑀼𑀯𑀻𑀲𑀢𑀺 𑀓𑀸𑀫𑀲𑁄𑀪𑀡 𑀘𑀺𑀢𑁆𑀢𑀸𑀦𑀺 𑀦𑀸𑀫 𑀅𑀝𑁆𑀞 𑀓𑀸𑀫𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀅𑀝𑁆𑀞 𑀓𑀸𑀫𑀲𑁄𑀪𑀡𑀯𑀺𑀧𑀸𑀓 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞 𑀓𑀸𑀫𑀲𑁄𑀪𑀡𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀧𑀜𑁆𑀘 𑀯𑀻𑀲𑀢𑀺 𑀓𑀮𑁆𑀬𑀸𑀡𑀘𑁂𑀢𑀲𑀺𑀓𑀸𑀦𑀺 𑀦𑀸𑀫, 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀘𑁂𑀢𑀺 𑀢𑀻𑀡𑀺 𑀓𑀮𑁆𑀬𑀸𑀡𑀫𑀽𑀮𑀺𑀓𑀸𑀦𑀺 𑀘 𑀲𑀤𑁆𑀥𑀸 𑀘 𑀲𑀢𑀺 𑀘 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀘 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘 𑀘𑀺𑀢𑁆𑀢 𑀧𑀲𑁆𑀲𑀤𑁆𑀥𑀺 𑀘 𑀓𑀸𑀬𑀮𑀳𑀼𑀢𑀸 𑀘 𑀘𑀺𑀢𑁆𑀢𑀮𑀳𑀼𑀢𑀸 𑀘 𑀓𑀸𑀬𑀫𑀼𑀤𑀼𑀢𑀸 𑀘 𑀘𑀺𑀢𑁆𑀢 𑀫𑀼𑀤𑀼𑀢𑀸 𑀘 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘 𑀘𑀺𑀢𑁆𑀢 𑀓𑀫𑁆𑀫𑀜𑁆𑀜𑀢𑀸 𑀘 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀘 𑀓𑀸𑀬𑀼𑀚𑀼𑀓𑀢𑀸 𑀘 𑀘𑀺𑀢𑁆𑀢𑀼𑀚𑀼𑀓𑀢𑀸 ¶ 𑀘 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄𑀢𑀺 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀘 𑀓𑀭𑀼𑀡𑀸 𑀫𑀼𑀤𑀺𑀢𑀸𑀢𑀺 𑀤𑁆𑀯𑁂 𑀅𑀧𑁆𑀧𑀫𑀜𑁆𑀜𑀸𑀬𑁄 𑀘.

𑀢𑀢𑁆𑀣 𑀢𑀻𑀡𑀺 𑀓𑀮𑁆𑀬𑀸𑀡𑀫𑀽𑀮𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀅𑀫𑁄𑀳𑁄 𑀧𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀻𑀫𑀁𑀲𑀸𑀥𑀺𑀧𑀢𑀺𑀦𑀸𑀫, 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦𑀸𑀫, 𑀫𑀕𑁆𑀕𑀧𑀘𑁆𑀘𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫. 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀦𑀸𑀫. 𑀲𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀲𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀫, 𑀫𑀕𑁆𑀕𑀧𑀘𑁆𑀘𑀬𑁂 𑀲𑀫𑁆𑀫𑀸𑀲𑀢𑀺 𑀦𑀸𑀫. 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀫𑀕𑁆𑀕𑀧𑀘𑁆𑀘𑀬𑁄, 𑀲𑁂𑀲𑀸 𑀲𑀢𑁆𑀢𑀭𑀲 𑀥𑀫𑁆𑀫𑀸 𑀯𑀺𑀲𑁂𑀲𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺.

𑀅𑀝𑁆𑀞𑀲𑀼 𑀓𑀸𑀫𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀅𑀝𑁆𑀞𑀢𑀺𑀁𑀲 𑀘𑁂𑀢𑀲𑀺𑀓𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀲𑀢𑁆𑀢 𑀲𑀩𑁆𑀩𑀘𑀺𑀢𑁆𑀢𑀺𑀓𑀸𑀦𑀺 𑀙 𑀧𑀓𑀺𑀡𑁆𑀡𑀓𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀓𑀮𑁆𑀬𑀸𑀡𑀸𑀦𑀺. 𑀢𑁂𑀲𑀼 𑀘 𑀧𑀻𑀢𑀺 𑀘𑀢𑀽𑀲𑀼 𑀲𑁄𑀫𑀦𑀲𑁆𑀲𑀺𑀓𑁂𑀲𑀼 𑀏𑀯, 𑀅𑀫𑁄𑀳𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀏𑀯, 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀲𑀺𑀓𑁆𑀔𑀸𑀧𑀤𑀲𑀻𑀮𑀧𑀽𑀭𑀡 𑀓𑀸𑀮𑁂 𑀏𑀯, 𑀤𑁆𑀯𑁂 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀫𑁄𑀤𑀦𑀸𑀓𑀸𑀭𑁂𑀲𑀼 𑀏𑀯𑀸𑀢𑀺. 𑀇𑀫𑁂𑀲𑀼𑀧𑀺 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀮𑁆𑀬𑀸𑀡𑀫𑀽𑀮𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀙𑀦𑁆𑀤𑁄 𑀘 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀜𑁆𑀘 𑀯𑀻𑀫𑀁𑀲𑀸𑀘𑀸𑀢𑀺 𑀘𑀢𑀽𑀲𑀼 𑀅𑀥𑀺𑀧𑀢𑀺𑀚𑀸𑀢𑀺𑀓𑁂𑀲𑀼 𑀏𑀓𑀫𑁂𑀓𑁄𑀯 𑀓𑀤𑀸𑀘𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁄. 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄. 𑀢𑀬𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀘𑀺𑀢𑁆𑀢𑀜𑁆𑀘 𑀯𑁂𑀤𑀦𑀸 𑀘 𑀏𑀓𑀕𑁆𑀕𑀢𑀸 𑀘 𑀚𑀻𑀯𑀺𑀢𑀜𑁆𑀘 𑀲𑀤𑁆𑀥𑀸 𑀘 𑀲𑀢𑀺 𑀘 𑀯𑀻𑀭𑀺𑀬𑀜𑁆𑀘 𑀧𑀜𑁆𑀜𑀸𑀘𑀸𑀢𑀺 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀯𑁂𑀤𑀦𑀸 𑀘 𑀏𑀓𑀕𑁆𑀕𑀢𑀸𑀘𑀸𑀢𑀺 𑀧𑀜𑁆𑀘𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄. 𑀧𑀜𑁆𑀜𑀸 𑀘 𑀯𑀺𑀢𑀓𑁆𑀓𑁄 𑀘 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀘 𑀲𑀢𑀺 𑀘 𑀯𑀻𑀭𑀺𑀬𑀜𑁆𑀘 𑀏𑀓𑀕𑁆𑀕𑀢𑀸𑀘𑀸𑀢𑀺 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄. 𑀇𑀫𑁂𑀲𑀼𑀧𑀺 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀧𑀘𑁆𑀙𑀸𑀚𑀸𑀢𑁄 𑀘 𑀯𑀺𑀧𑀸𑀓𑁄𑀘𑀸𑀢𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀤𑁆𑀯𑀸𑀯𑀻𑀲𑀢𑀺𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀅𑀝𑁆𑀞𑀲𑀼 𑀓𑀸𑀫𑀲𑁄𑀪𑀡𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀦 𑀮𑀩𑁆𑀪𑀦𑁆𑀢𑀺, 𑀓𑀼𑀲𑀮𑁂𑀲𑀼 𑀯𑀺𑀬 𑀤𑁆𑀯𑁂 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀤𑁆𑀯𑀸𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀅𑀝𑁆𑀞𑀲𑀼 𑀓𑀸𑀫𑀲𑁄𑀪𑀡𑀯𑀺𑀧𑀸𑀓𑁂𑀲𑀼 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀘 𑀤𑁆𑀯𑁂 𑀅𑀧𑁆𑀧𑀫𑀜𑁆𑀜𑀸𑀬𑁄 𑀘 𑀦 𑀮𑀩𑁆𑀪𑀦𑁆𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀘 𑀧𑀘𑁆𑀙𑀸𑀚𑀸𑀢𑁄 𑀘 𑀆𑀲𑁂𑀯𑀦𑀜𑁆𑀘𑀸𑀢𑀺 𑀢𑀬𑁄 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺, 𑀏𑀓𑀯𑀻𑀲𑀢𑀺 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺.

𑀉𑀧𑀭𑀺 𑀭𑀽𑀧𑀸𑀭𑀽𑀧𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼𑀧𑀺 𑀤𑁆𑀯𑀸𑀯𑀻𑀲𑀢𑀺𑀧𑀘𑁆𑀘𑀬𑀢𑁄 𑀅𑀢𑀺𑀭𑁂𑀓𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀓𑀼𑀲𑀮 𑀘𑀺𑀢𑁆𑀢𑁂𑀲𑀼 𑀯𑀺𑀬 𑀇𑀫𑁂𑀲𑀼 𑀧𑀘𑁆𑀘𑀬𑀖𑀝𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀓𑀸𑀫𑀘𑀺𑀢𑁆𑀢𑀢𑁄 𑀫𑀳𑀦𑁆𑀢 𑀢𑀭𑀸𑀦𑀺 𑀘 𑀧𑀡𑀻𑀢𑀢𑀭𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺. 𑀆𑀲𑁂𑀯𑀦𑀫𑀳𑀦𑁆𑀢𑀢𑁆𑀢𑀸. 𑀢𑀸𑀦𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀪𑀸𑀯𑀦𑀸𑀓𑀫𑁆𑀫𑀯𑀺𑀲𑁂𑀲𑁂𑀳𑀺 ¶ 𑀲𑀺𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀼 𑀆𑀲𑁂𑀯𑀦𑀧𑀘𑁆𑀘𑀬𑁄 𑀫𑀳𑀦𑁆𑀢𑁄 𑀳𑁄𑀢𑀺. 𑀆𑀲𑁂𑀯𑀦 𑀫𑀳𑀦𑁆𑀢𑀢𑁆𑀢𑀸 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄𑀧𑀺 𑀛𑀸𑀦𑀧𑀘𑁆𑀘𑀬𑁄𑀧𑀺 𑀫𑀕𑁆𑀕𑀧𑀘𑁆𑀘𑀬𑁄𑀧𑀺 𑀅𑀜𑁆𑀜𑁂𑀧𑀺 𑀯𑀸 𑀢𑁂𑀲𑀁 𑀧𑀘𑁆𑀘𑀬𑀸 𑀫𑀳𑀦𑁆𑀢𑀸 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀸𑀦𑀁 𑀉𑀧𑀭𑀽𑀧𑀭𑀺 𑀫𑀳𑀦𑁆𑀢𑀢𑁆𑀢𑀸 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑀭𑀽𑀧𑀭𑀺 𑀘 𑀓𑀸𑀫𑀘𑀺𑀢𑁆𑀢𑀢𑁄 𑀫𑀳𑀦𑁆𑀢𑀢𑀭𑀸𑀦𑀺 𑀘 𑀧𑀡𑀻𑀢𑀢𑀭𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺.

𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀭𑀽𑀧𑀓𑀮𑀸𑀧𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄

𑀭𑀽𑀧𑀓𑀮𑀸𑀧𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀯𑀼𑀘𑁆𑀘𑀢𑁂. 𑀅𑀝𑁆𑀞𑀯𑀻𑀲𑀢𑀺 𑀭𑀽𑀧𑀸𑀦𑀺 𑀦𑀸𑀫, 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀣𑀯𑀻 𑀆𑀧𑁄 𑀢𑁂𑀚𑁄 𑀯𑀸𑀬𑁄. 𑀧𑀜𑁆𑀘 𑀧𑀲𑀸𑀤𑀭𑀽𑀧𑀸𑀦𑀺 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄. 𑀧𑀜𑁆𑀘 𑀕𑁄𑀘𑀭𑀭𑀽𑀧𑀸𑀦𑀺 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀨𑁄𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀨𑁄𑀝𑁆𑀞𑀩𑁆𑀩𑀁 𑀢𑀺𑀯𑀺𑀥𑀁 𑀧𑀣𑀯𑀻𑀨𑁄𑀝𑁆𑀞𑀩𑁆𑀩𑀁 𑀢𑁂𑀚𑁄𑀨𑁄𑀝𑁆𑀞𑀩𑁆𑀩𑀁 𑀯𑀸𑀬𑁄𑀨𑁄𑀝𑁆𑀞𑀩𑁆𑀩𑀁. 𑀤𑁆𑀯𑁂 𑀪𑀸𑀯𑀭𑀽𑀧𑀸𑀦𑀺 𑀇𑀢𑁆𑀣𑀺𑀪𑀸𑀯𑀭𑀽𑀧𑀁 𑀧𑀼𑀫𑁆𑀪𑀸𑀯𑀭𑀽𑀧𑀁. 𑀏𑀓𑀁 𑀚𑀻𑀯𑀺𑀢𑀭𑀽𑀧𑀁, 𑀏𑀓𑀁 𑀳𑀤𑀬𑀭𑀽𑀧𑀁. 𑀏𑀓𑀁 𑀆𑀳𑀸𑀭𑀭𑀽𑀧𑀁. 𑀏𑀓𑀁 𑀆𑀓𑀸𑀲𑀥𑀸𑀢𑀼𑀭𑀽𑀧𑀁. 𑀤𑁆𑀯𑁂 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀸𑀦𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀭𑀽𑀧𑀁. 𑀢𑀻𑀡𑀺 𑀯𑀺𑀓𑀸𑀭𑀭𑀽𑀧𑀸𑀦𑀺 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸. 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀭𑀽𑀧𑀸𑀦𑀺 𑀉𑀧𑀘𑀬𑁄 𑀲𑀦𑁆𑀢𑀢𑀺 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸.

𑀢𑀢𑁆𑀣 𑀙 𑀭𑀽𑀧𑀥𑀫𑁆𑀫𑀸 𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘 𑀚𑀻𑀯𑀺𑀢𑀭𑀽𑀧𑀜𑁆𑀘 𑀆𑀳𑀸𑀭𑀭𑀽𑀧𑀜𑁆𑀘. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀫𑀳𑀸 𑀪𑀽𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀜𑁆𑀘𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀳𑀚𑀸𑀢𑁂𑀦 𑀘 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀦𑀺𑀲𑁆𑀲𑀬𑁂𑀦 𑀘 𑀅𑀢𑁆𑀣𑀺𑀬𑀸 𑀘 𑀅𑀯𑀺𑀕𑀢𑁂𑀦𑀘. 𑀲𑀳𑀚𑀸𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀚𑁆𑀚𑀺𑀢𑁂𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀚𑀻𑀯𑀺𑀢𑀭𑀽𑀧𑀁 𑀲𑀳𑀚𑀸𑀢𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀳𑀸𑀭𑀭𑀽𑀧𑀁 𑀲𑀳𑀚𑀸𑀢𑀸𑀦𑀜𑁆𑀘 𑀅𑀲𑀳𑀚𑀸𑀢𑀸𑀦𑀜𑁆𑀘 𑀲𑀩𑁆𑀩𑁂𑀲𑀁 𑀅𑀚𑁆𑀛𑀢𑁆𑀢𑀭𑀽𑀧𑀥𑀫𑁆𑀫𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.

𑀢𑀢𑁆𑀣𑁂𑀯 𑀢𑁂𑀭𑀲 𑀭𑀽𑀧𑀥𑀫𑁆𑀫𑀸 𑀦𑀸𑀫𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀧𑀲𑀸𑀤𑀭𑀽𑀧𑀸𑀦𑀺 𑀘 𑀲𑀢𑁆𑀢 𑀕𑁄𑀘𑀭𑀭𑀽𑀧𑀸𑀦𑀺 𑀘 𑀳𑀤𑀬𑀯𑀢𑁆𑀣𑀼𑀭𑀽𑀧𑀜𑁆𑀘. 𑀢𑀢𑁆𑀣 𑀧𑀜𑁆𑀘 𑀧𑀲𑀸𑀤𑀭𑀽𑀧𑀸𑀦𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀫𑀸𑀢𑀭𑁄 𑀯𑀺𑀬 𑀧𑀼𑀢𑁆𑀢𑀓𑀸𑀦𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁂𑀦 𑀘 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑁂𑀦 𑀘 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀢𑁆𑀢 𑀕𑁄𑀘𑀭𑀭𑀽𑀧𑀸𑀦𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀢𑀺𑀲𑁆𑀲𑀦𑁆𑀦𑀁 𑀫𑀦𑁄𑀥𑀸𑀢𑀽𑀦𑀜𑁆𑀘 𑀧𑀺𑀢𑀭𑁄 𑀯𑀺𑀬 𑀧𑀼𑀢𑁆𑀢𑀓𑀸𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀳𑀤𑀬𑀯𑀢𑁆𑀣𑀼𑀭𑀽𑀧𑀁 𑀤𑁆𑀯𑀺𑀦𑁆𑀦𑀁 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀭𑀼𑀓𑁆𑀔𑁄 𑀯𑀺𑀬 𑀭𑀼𑀓𑁆𑀔𑀤𑁂𑀯𑀢𑀸𑀦𑀁 𑀬𑀣𑀸𑀭𑀳𑀁 ¶ 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀳𑀚𑀸𑀢𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁂𑀦 𑀘 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺.

𑀢𑁂𑀯𑀻𑀲𑀢𑀺 𑀭𑀽𑀧𑀓𑀮𑀸𑀧𑀸. 𑀢𑀢𑁆𑀣 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑀸𑀦𑀁 𑀓𑁂𑀲𑀸𑀦𑀁 𑀓𑁂𑀲𑀓𑀮𑀸𑀧𑁄 𑀯𑀺𑀬 𑀢𑀺𑀡𑀸𑀦𑀁 𑀢𑀺𑀡𑀓𑀮𑀸𑀧𑁄 𑀯𑀺𑀬 𑀏𑀓𑁂𑀦 𑀚𑀸𑀢𑀺𑀭𑀽𑀧𑁂𑀦 𑀩𑀦𑁆𑀥𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀓𑀮𑀸𑀧𑁄 𑀧𑀭𑀺𑀧𑀺𑀡𑁆𑀟𑀺𑀭𑀽𑀧 𑀓𑀮𑀸𑀧𑁄 𑀦𑀸𑀫.

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸 𑀏𑀓𑁄 𑀲𑀩𑁆𑀩𑀫𑀽𑀮𑀓𑀮𑀸𑀧𑁄 𑀦𑀸𑀫, 𑀲𑀩𑁆𑀩𑀫𑀽𑀮𑀝𑁆𑀞𑀓𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀦𑀯 𑀓𑀫𑁆𑀫𑀚𑀭𑀽𑀧𑀓𑀮𑀸𑀧𑀸, 𑁋 𑀚𑀻𑀯𑀺𑀢𑀦𑀯𑀓𑀁 𑀯𑀢𑁆𑀣𑀼𑀤𑀲𑀓𑀁 𑀓𑀸𑀬 𑀤𑀲𑀓𑀁 𑀇𑀢𑁆𑀣𑀺𑀪𑀸𑀯𑀤𑀲𑀓𑀁 𑀧𑀼𑀫𑁆𑀪𑀸𑀯𑀤𑀲𑀓𑀁 𑀘𑀓𑁆𑀔𑀼𑀤𑀲𑀓𑀁 𑀲𑁄𑀢𑀤𑀲𑀓𑀁 𑀖𑀸𑀦𑀤𑀲𑀓𑀁 𑀚𑀺𑀯𑁆𑀳𑀸𑀤𑀲𑀓𑀁. 𑀢𑀢𑁆𑀣 𑀲𑀩𑁆𑀩𑀫𑀽𑀮𑀝𑁆𑀞𑀓𑀫𑁂𑀯𑀚𑀻𑀯𑀺𑀢𑀭𑀽𑀧𑁂𑀦 𑀲𑀳 𑀚𑀻𑀯𑀺𑀢𑀦𑀯𑀓𑀁 𑀦𑀸𑀫. 𑀏𑀢𑀤𑁂𑀯 𑀓𑀫𑁆𑀫𑀚𑀓𑀮𑀸𑀧𑁂𑀲𑀼 𑀫𑀽𑀮𑀦𑀯𑀓𑀁 𑀳𑁄𑀢𑀺. 𑀫𑀽𑀮𑀦𑀯𑀓𑀫𑁂𑀯 𑀬𑀣𑀸𑀓𑁆𑀓𑀫𑀁 𑀳𑀤𑀬𑀯𑀢𑁆𑀣𑀼𑀭𑀽𑀧𑀸𑀤𑀻𑀳𑀺 𑀅𑀝𑁆𑀞𑀭𑀽𑀧𑁂𑀳𑀺 𑀲𑀳 𑀯𑀢𑁆𑀣𑀼𑀤𑀲𑀓𑀸𑀤𑀻𑀦𑀺 𑀅𑀝𑁆𑀞𑀤𑀲𑀓𑀸𑀦𑀺 𑀪𑀯𑀢𑀺. 𑀢𑀢𑁆𑀣 𑀚𑀻𑀯𑀺𑀢𑀦𑀯𑀓𑀜𑁆𑀘 𑀓𑀸𑀬𑀤𑀲𑀓𑀜𑁆𑀘 𑀪𑀸𑀯𑀤𑀲𑀓𑀸𑀦𑀺𑀘𑀸𑀢𑀺 𑀘𑀢𑁆𑀢𑀸𑀭𑁄 𑀓𑀮𑀸𑀧𑀸 𑀲𑀓𑀮 𑀓𑀸𑀬𑁂 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀚𑀻𑀯𑀺𑀢𑀦𑀯𑀓𑀦𑁆𑀢𑀺 𑀧𑀸𑀘𑀓𑀕𑁆𑀕𑀺 𑀘 𑀓𑀸𑀬𑀕𑁆𑀕𑀺 𑀘 𑀯𑀼𑀘𑁆𑀘𑀢𑀺. 𑀧𑀸𑀘𑀓𑀕𑁆𑀕𑀺 𑀦𑀸𑀫 𑀧𑀸𑀘𑀓𑀢𑁂𑀚𑁄 𑀓𑁄𑀝𑁆𑀞𑀸𑀲𑁄, 𑀲𑁄 𑀆𑀫𑀸𑀲𑀬𑁂 𑀧𑀯𑀢𑁆𑀢𑀺𑀢𑁆𑀯𑀸 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀸𑀦𑀺 𑀧𑀭𑀺𑀧𑀸𑀘𑁂𑀢𑀺. 𑀓𑀸𑀬𑀕𑁆𑀕𑀺 𑀦𑀸𑀫 𑀲𑀓𑀮𑀓𑀸𑀬𑀩𑁆𑀬𑀸𑀧𑀓𑁄 𑀉𑀲𑁆𑀫𑀸𑀢𑁂𑀚𑁄 𑀓𑁄𑀝𑁆𑀞𑀸𑀲𑁄, 𑀲𑁄 𑀲𑀓𑀮 𑀓𑀸𑀬𑁂 𑀧𑀯𑀢𑁆𑀢𑀺𑀢𑁆𑀯𑀸 𑀧𑀺𑀢𑁆𑀢𑀲𑁂𑀫𑁆𑀳𑀮𑁄𑀳𑀺𑀢𑀸𑀦𑀺 𑀅𑀧𑀽𑀢𑀻𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀓𑀭𑁄𑀢𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑀫𑀯𑀼𑀢𑁆𑀢𑀺𑀬𑀸 𑀲𑀢𑀺 𑀲𑀢𑁆𑀢𑀸 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺, 𑀲𑀫𑀯𑀼𑀢𑁆𑀢𑀺𑀬𑀸 𑀲𑀢𑀺 𑀅𑀧𑁆𑀧𑀸𑀩𑀸𑀥𑀸. 𑀢𑀤𑀼𑀪𑀬𑀁 𑀚𑀻𑀯𑀺𑀢𑀦𑀯𑀓𑀁 𑀲𑀢𑁆𑀢𑀸𑀦𑀁 𑀆𑀬𑀼𑀁 𑀲𑀫𑁆𑀧𑀸𑀤𑁂𑀢𑀺. 𑀯𑀡𑁆𑀡𑀁 𑀲𑀫𑁆𑀧𑀸𑀤𑁂𑀢𑀺. 𑀓𑀸𑀬𑀤𑀲𑀓𑀁 𑀲𑀓𑀮𑀓𑀸𑀬𑁂 𑀲𑀼𑀔𑀲𑀫𑁆𑀨𑀲𑁆𑀲 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀪𑀸𑀯 𑀤𑀲𑀓𑀸𑀦𑀺 𑀇𑀢𑁆𑀣𑀻𑀦𑀁 𑀲𑀩𑁆𑀩𑁂 𑀇𑀢𑁆𑀣𑀸𑀓𑀸𑀭𑁂 𑀲𑀫𑁆𑀧𑀸𑀤𑁂𑀢𑀺. 𑀧𑀼𑀭𑀺𑀲𑀸𑀦𑀁 𑀲𑀩𑁆𑀩𑁂 𑀧𑀼𑀭𑀺𑀲𑀸𑀓𑀸𑀭𑁂 𑀲𑀫𑁆𑀧𑀸𑀤𑁂𑀳𑀺. 𑀲𑁂𑀲𑀸𑀦𑀺 𑀯𑀢𑁆𑀣𑀼𑀤𑀲𑀓𑀸𑀤𑀻𑀦𑀺 𑀧𑀜𑁆𑀘𑀤𑀲𑀓𑀸𑀦𑀺 𑀧𑀤𑁂𑀲𑀤𑀲𑀓𑀸𑀦𑀺 𑀦𑀸𑀫. 𑀢𑀢𑁆𑀣 𑀯𑀢𑁆𑀣𑀼𑀤𑀲𑀓𑀁 𑀳𑀤𑀬𑀓𑁄𑀲𑀩𑁆𑀪𑀦𑁆𑀢𑀭𑁂 𑀧𑀯𑀢𑁆𑀢𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀦𑀸𑀦𑀸𑀧𑀓𑀸𑀭𑀸𑀦𑀺 𑀲𑀼𑀘𑀺𑀦𑁆𑀢𑀺𑀢𑀤𑀼𑀘𑀺𑀦𑁆𑀢𑀺𑀢𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀘𑀓𑁆𑀔𑀼𑀤𑀲𑀓𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀤𑀲𑀓𑀸𑀦𑀺 𑀘𑀓𑁆𑀔𑀼𑀕𑀼𑀴 𑀓𑀡𑁆𑀡𑀩𑀺𑀮 𑀦𑀸𑀲𑀩𑀺𑀮 𑀚𑀺𑀯𑁆𑀳𑀸𑀢𑀮𑁂𑀲𑀼 𑀧𑀯𑀢𑁆𑀢𑀺𑀢𑁆𑀯𑀸 𑀤𑀲𑁆𑀲𑀦 𑀲𑀯𑀦 𑀖𑀸𑀬𑀦 𑀲𑀸𑀬𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑀺.

𑀅𑀝𑁆𑀞 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸, 𑀲𑀩𑁆𑀩𑀫𑀽𑀮𑀝𑁆𑀞𑀓𑀁 𑀲𑀤𑁆𑀤𑀦𑀯𑀓𑀁 𑀓𑀸𑀬 𑀯𑀺𑀜𑁆𑀜𑀢𑁆𑀢𑀺𑀦𑀯𑀓𑀁 𑀲𑀤𑁆𑀤𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑀲𑀓𑀦𑁆𑀢𑀺 𑀘𑀢𑁆𑀢𑀸𑀭𑁄 𑀫𑀽𑀮𑀓𑀮𑀸𑀧𑀸 𑀘 𑀢𑁂𑀬𑁂𑀯 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀯𑀺𑀓𑀸𑀭 𑀭𑀽𑀧𑁂𑀳𑀺 𑀲𑀳 𑀘𑀢𑁆𑀢𑀸𑀭𑁄 𑀲𑀯𑀺𑀓𑀸𑀭𑀓𑀮𑀸𑀧𑀸 𑀘.

𑀢𑀢𑁆𑀣 ¶ 𑀲𑀭𑀻𑀭𑀥𑀸𑀢𑀽𑀦𑀁 𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀕𑀺𑀮𑀸𑀦𑀲𑁆𑀲 𑀫𑀽𑀮 𑀓𑀮𑀸𑀧𑀸𑀦𑀺 𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀳𑀺 𑀢𑀲𑁆𑀲 𑀲𑀭𑀻𑀭𑀭𑀽𑀧𑀸𑀦𑀺 𑀕𑀭𑀽𑀦𑀺 𑀯𑀸 𑀣𑀤𑁆𑀥𑀸𑀦𑀺 𑀯𑀸 𑀅𑀓𑀫𑁆𑀫𑀜𑁆𑀜𑀸𑀦𑀺 𑀯𑀸 𑀳𑁄𑀦𑁆𑀢𑀺, 𑀬𑀣𑀸𑀭𑀼𑀘𑀺 𑀇𑀭𑀺𑀬𑀧𑀣𑀁𑀧𑀺 𑀧𑀯𑀢𑁆𑀢𑁂𑀢𑀼𑀁 𑀅𑀗𑁆𑀕 𑀧𑀘𑁆𑀘𑀗𑁆𑀕𑀸𑀦𑀺𑀧𑀺 𑀘𑀸𑀮𑁂𑀢𑀼𑀁 𑀯𑀘𑀦𑀁𑀧𑀺 𑀓𑀣𑁂𑀢𑀼𑀁 𑀤𑀼𑀓𑁆𑀔𑁄 𑀳𑁄𑀢𑀺. 𑀲𑀭𑀻𑀭𑀥𑀸𑀢𑀽𑀦𑀁 𑀲𑀫𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀧𑀦 𑀅𑀕𑀺𑀮𑀸𑀦𑀲𑁆𑀲 𑀕𑀭𑀼𑀣𑀤𑁆𑀥𑀸𑀤𑀻𑀦𑀁 𑀲𑀭𑀻𑀭𑀤𑁄𑀲𑀸𑀦𑀁 𑀅𑀪𑀸𑀯𑀢𑁄 𑀲𑀯𑀺𑀓𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀘 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀓𑀸𑀬𑀗𑁆𑀕 𑀘𑀮𑀦𑁂 𑀤𑁆𑀯𑁂 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀓𑀮𑀸𑀧𑀸 𑀧𑀯𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀯𑀲𑁂𑀦𑁂𑀯 𑀫𑀼𑀔𑀢𑁄 𑀯𑀘𑀦𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀤𑁆𑀯𑁂 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀓𑀮𑀸𑀧𑀸, 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀓𑁆𑀔𑀭𑀯𑀡𑁆𑀡𑀭𑀳𑀺𑀢𑀸𑀦𑀁 𑀳𑀲𑀦𑀭𑁄𑀤𑀦𑀸𑀤𑀻𑀦𑀁 𑀅𑀯𑀘𑀦𑀲𑀤𑁆𑀤𑀸𑀦𑀁 𑀫𑀼𑀔𑀢𑁄 𑀧𑀯𑀢𑁆𑀢𑀺𑀓𑀸𑀮𑁂 𑀤𑁆𑀯𑁂 𑀲𑀤𑁆𑀤𑀓𑀮𑀸𑀧𑀸, 𑀲𑁂𑀲𑀓𑀸𑀮𑁂𑀲𑀼 𑀤𑁆𑀯𑁂 𑀆𑀤𑀺 𑀓𑀮𑀸𑀧𑀸 𑀧𑀯𑀢𑁆𑀢𑀦𑁆𑀢𑀺.

𑀘𑀢𑁆𑀢𑀸𑀭𑁄 𑀉𑀢𑀼𑀚𑀭𑀽𑀧𑀓𑀮𑀸𑀧𑀸, 𑀲𑀩𑁆𑀩𑀫𑀽𑀮𑀝𑁆𑀞𑀓𑀁 𑀲𑀤𑁆𑀤𑀦𑀯𑀓𑀦𑁆𑀢𑀺 𑀤𑁆𑀯𑁂 𑀫𑀽𑀮𑀓𑀮𑀸𑀧𑀸 𑀘 𑀤𑁆𑀯𑁂 𑀲𑀯𑀺𑀓𑀸𑀭𑀓𑀮𑀸𑀧𑀸 𑀘. 𑀢𑀢𑁆𑀣 𑀅𑀬𑀁 𑀓𑀸𑀬𑁄 𑀬𑀸𑀯𑀚𑀻𑀯𑀁 𑀇𑀭𑀺𑀬𑀸𑀧𑀣𑀲𑁄𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀬𑀸𑀧𑁂𑀢𑀺, 𑀢𑀲𑁆𑀫𑀸 𑀇𑀭𑀺𑀬𑀸𑀧𑀣𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀔𑀡𑁂 𑀔𑀡𑁂 𑀥𑀸𑀢𑀽𑀦𑀁 𑀲𑀫𑀧𑁆𑀧𑀯𑀢𑁆𑀢𑀺𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀺. 𑀢𑀣𑀸 𑀉𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀆𑀳𑀸𑀭𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀯𑀸𑀢𑀸𑀢𑀧𑀲𑀧𑁆𑀨𑀲𑁆𑀲𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀓𑀸𑀬𑀗𑁆𑀕 𑀧𑀭𑀺𑀳𑀸𑀭𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀅𑀢𑁆𑀢𑀽𑀧𑀓𑁆𑀓𑀫𑀧𑀭𑀽𑀧𑀓𑁆𑀓𑀫𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘. 𑀢𑀢𑁆𑀣 𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀤𑁆𑀯𑁂 𑀫𑀽𑀮𑀓𑀮𑀸𑀧𑀸 𑀏𑀯 𑀧𑀯𑀢𑁆𑀢𑀦𑁆𑀢𑀺, 𑀲𑀫𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀤𑁆𑀯𑁂 𑀲𑀯𑀺𑀓𑀸𑀭𑀸. 𑀢𑁂𑀲𑀼 𑀘 𑀤𑁆𑀯𑁂 𑀲𑀤𑁆𑀤𑀓𑀮𑀸𑀧𑀸 𑀘𑀺𑀢𑁆𑀢𑀚𑀲𑀤𑁆𑀤𑀢𑁄 𑀧𑀭𑀫𑁆𑀧𑀭𑀲𑀤𑁆𑀤𑁂𑀲𑀼 𑀘 𑀅𑀜𑁆𑀜𑁂𑀲𑀼 𑀮𑁄𑀓𑁂 𑀦𑀸𑀦𑀧𑁆𑀧𑀓𑀸𑀭𑀲𑀤𑁆𑀤𑁂𑀲𑀼 𑀘 𑀧𑀯𑀢𑁆𑀢𑀦𑁆𑀢𑀺.

𑀤𑁆𑀯𑁂 𑀆𑀳𑀸𑀭𑀚𑀭𑀽𑀧𑀓𑀮𑀸𑀧𑀸, 𑁋 𑀲𑀩𑁆𑀩𑀫𑀽𑀮𑀝𑁆𑀞𑀓𑀁 𑀲𑀯𑀺𑀓𑀸𑀭𑀦𑁆𑀢𑀺. 𑀇𑀫𑁂 𑀤𑁆𑀯𑁂 𑀓𑀮𑀸𑀧𑀸 𑀲𑀧𑁆𑀧𑀸𑀬𑁂𑀦 𑀯𑀸 𑀅𑀲𑀧𑁆𑀧𑀸𑀬𑁂𑀦 𑀯𑀸 𑀆𑀳𑀸𑀭𑁂𑀦 𑀚𑀸𑀢𑀸𑀦𑀁 𑀲𑀫𑀭𑀽𑀧𑀯𑀺𑀲𑀫𑀭𑀽𑀧𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀆𑀓𑀸𑀲𑀥𑀸𑀢𑀼 𑀘 𑀮𑀓𑁆𑀔𑀡𑀭𑀽𑀧𑀸𑀦𑀺𑀘𑀸𑀢𑀺 𑀧𑀜𑁆𑀘𑀭𑀽𑀧𑀸𑀦𑀺 𑀓𑀮𑀸𑀧 𑀫𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀆𑀓𑀸𑀲𑀥𑀸𑀢𑀼 𑀓𑀮𑀸𑀧𑀸𑀦𑀁 𑀅𑀦𑁆𑀢𑀭𑀸 𑀧𑀭𑀺𑀘𑁆𑀙𑁂𑀤 𑀫𑀢𑁆𑀢𑀢𑁆𑀢𑀸 𑀓𑀮𑀸𑀧𑀫𑀼𑀢𑁆𑀢𑀸 𑀳𑁄𑀢𑀺. 𑀮𑀓𑁆𑀔𑀡𑀭𑀽𑀧𑀸𑀦𑀺 𑀲𑀗𑁆𑀔𑀢𑀪𑀽𑀢𑀸𑀦𑀁 𑀭𑀽𑀧 𑀓𑀮𑀸𑀧𑀸𑀦𑀁 𑀲𑀗𑁆𑀔𑀢𑀪𑀸𑀯𑀚𑀸𑀦𑀦𑀢𑁆𑀣𑀸𑀬 𑀮𑀓𑁆𑀔𑀡𑀫𑀢𑁆𑀢𑀢𑁆𑀢𑀸 𑀓𑀮𑀸𑀧 𑀫𑀼𑀢𑁆𑀢𑀸𑀦𑀺.

𑀇𑀫𑁂 𑀢𑁂𑀯𑀻𑀲𑀢𑀺 𑀓𑀮𑀸𑀧𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀮𑀩𑁆𑀪𑀦𑁆𑀢𑀺. 𑀩𑀳𑀺𑀤𑁆𑀥𑀸 𑀲𑀦𑁆𑀢𑀸𑀦𑁂 𑀧𑀦 𑀤𑁆𑀯𑁂 𑀉𑀢𑀼𑀚𑀫𑀽𑀮𑀓𑀮𑀸𑀧𑀸 𑀏𑀯 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀤𑁆𑀯𑁂 𑀭𑀽𑀧 𑀲𑀦𑁆𑀢𑀸𑀦𑀸𑀦𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀜𑁆𑀘 𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑀜𑁆𑀘. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀁 𑀦𑀸𑀫 𑀲𑀢𑁆𑀢𑀲𑀦𑁆𑀢𑀸𑀦𑀁 𑀯𑀼𑀘𑁆𑀘𑀢𑀺. 𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑀁 𑀦𑀸𑀫 𑀧𑀣𑀯𑀻𑀧𑀩𑁆𑀩𑀢𑀦𑀤𑀻𑀲𑀫𑀼𑀤𑁆𑀤 𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀅𑀝𑁆𑀞𑀯𑀻𑀲𑀢𑀺 𑀭𑀽𑀧𑀸𑀦𑀺 𑀢𑁂𑀯𑀻𑀲𑀢𑀺 𑀭𑀽𑀧𑀓𑀮𑀸𑀧𑀸𑀦𑀺 𑀮𑀩𑁆𑀪𑀦𑁆𑀢𑀺.

𑀢𑀢𑁆𑀣 ¶ 𑀧𑀝𑀺𑀲𑀦𑁆𑀥𑀺𑀦𑀸𑀫𑀥𑀫𑁆𑀫𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀚𑀭𑀽𑀧𑀓𑀮𑀸𑀧𑀸𑀦𑀁 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀲𑀳𑀚𑀸𑀢𑁂𑀳𑀺 𑀘 𑀯𑀺𑀧𑀸𑀓𑁂𑀦 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘. 𑀳𑀤𑀬𑀯𑀢𑁆𑀣𑀼𑀭𑀽𑀧𑀲𑁆𑀲 𑀧𑀦 𑀅𑀜𑁆𑀜𑀫𑀜𑁆𑀜𑁂𑀦 𑀲𑀳 𑀲𑀢𑁆𑀢𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀲𑁆𑀯𑁂𑀯 𑀦𑀸𑀫𑀥𑀫𑁆𑀫𑁂𑀲𑀼 𑀳𑁂𑀢𑀼𑀥𑀫𑁆𑀫𑀸 𑀳𑁂𑀢𑀼𑀪𑀸𑀯𑁂𑀦, 𑀘𑁂𑀢𑀦𑀸 𑀓𑀫𑁆𑀫𑀪𑀸𑀯𑁂𑀦, 𑀆𑀳𑀸𑀭𑀥𑀫𑁆𑀫𑀸 𑀆𑀳𑀸𑀭𑀪𑀸𑀯𑁂𑀦, 𑀇𑀦𑁆𑀤𑁆𑀭𑀺𑀬 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑁂𑀦, 𑀛𑀸𑀦𑀥𑀫𑁆𑀫𑀸 𑀛𑀸𑀦 𑀪𑀸𑀯𑁂𑀦, 𑀫𑀕𑁆𑀕𑀥𑀫𑁆𑀫𑀸 𑀫𑀕𑁆𑀕 𑀪𑀸𑀯𑁂𑀦𑀸𑀢𑀺 𑀬𑀣𑀸𑀭𑀳𑀁 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀢𑀻𑀢𑀸𑀦𑀺 𑀧𑀦 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺 𑀏𑀓𑀥𑀸𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑁂𑀦, 𑀧𑀞𑀫𑀪𑀯𑀗𑁆𑀕𑀸𑀤𑀺𑀓𑀸 𑀧𑀘𑁆𑀙𑀸𑀚𑀸𑀢𑀸 𑀧𑀯𑀢𑁆𑀢𑀦𑀸𑀫𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀸𑀦𑀁 𑀓𑀫𑁆𑀫𑀚𑀭𑀽𑀧 𑀓𑀮𑀸𑀧𑀸𑀦𑀁 𑀏𑀓𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀘𑁆𑀙𑀸𑀚𑀸𑀢𑁂𑀦. 𑀏𑀢𑁆𑀣 𑀘 𑀧𑀘𑁆𑀙𑀸𑀚𑀸𑀢 𑀯𑀘𑀦𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀙𑀸𑀚𑀸𑀢𑀚𑀸𑀢𑀺𑀓𑀸 𑀧𑀘𑁆𑀘𑀬𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀅𑀢𑀻𑀢𑀸𑀦𑀺 𑀘 𑀓𑀫𑁆𑀫𑀸𑀦𑀺 𑀏𑀓𑀥𑀸𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀦𑀸𑀫𑀥𑀫𑁆𑀫𑀸 𑀓𑀫𑁆𑀫𑀚𑀭𑀽𑀧𑀓𑀮𑀸𑀧𑀸𑀦𑀁 𑀬𑀣𑀸𑀭𑀳𑀁 𑀘𑀼𑀤𑁆𑀤𑀲𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀇𑀥 𑀤𑀲𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺 𑀆𑀭𑀫𑁆𑀫𑀡𑀜𑁆𑀘 𑀅𑀥𑀺𑀧𑀢𑀺 𑀘 𑀅𑀦𑀦𑁆𑀢𑀭𑀜𑁆𑀘 𑀲𑀫𑀦𑀦𑁆𑀢𑀭𑀜𑁆𑀘 𑀉𑀧𑀦𑀺𑀲𑁆𑀲𑀬𑁄 𑀘 𑀧𑀼𑀭𑁂𑀚𑀸𑀢𑁄 𑀘 𑀆𑀲𑁂𑀯𑀦𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑁄 𑀘 𑀦𑀢𑁆𑀣𑀺 𑀘 𑀯𑀺𑀕𑀢𑁄 𑀘.

𑀧𑀯𑀢𑁆𑀢𑀺𑀓𑀸𑀮𑁂 𑀭𑀽𑀧𑀚𑀦𑀓𑀸 𑀦𑀸𑀫𑀥𑀫𑁆𑀫𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸𑀦𑀁 𑀧𑀜𑁆𑀘𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀲𑀳 𑀚𑀸𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘. 𑀢𑁂𑀲𑁆𑀯𑁂𑀯 𑀦𑀸𑀫𑀥𑀫𑁆𑀫𑁂𑀲𑀼 𑀳𑁂𑀢𑀼𑀥𑀫𑁆𑀫𑀸 𑀳𑁂𑀢𑀼𑀪𑀸𑀯𑁂𑀦, 𑀅𑀥𑀺𑀧𑀢𑀺𑀥𑀫𑁆𑀫𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀘𑁂𑀢𑀦𑀸 𑀓𑀫𑁆𑀫𑀪𑀸𑀯𑁂𑀦, 𑀯𑀺𑀧𑀸𑀓𑀥𑀫𑁆𑀫𑀸 𑀯𑀺𑀧𑀸𑀓𑀪𑀸𑀯𑁂𑀦, 𑀆𑀳𑀸𑀭𑀥𑀫𑁆𑀫𑀸 𑀆𑀳𑀸𑀭 𑀪𑀸𑀯𑁂𑀦, 𑀇𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑁂𑀦, 𑀛𑀸𑀦𑀥𑀫𑁆𑀫𑀸 𑀛𑀸𑀦𑀪𑀸𑀯𑁂𑀦, 𑀫𑀕𑁆𑀕𑀥𑀫𑁆𑀫𑀸 𑀫𑀕𑁆𑀕𑀪𑀸𑀯𑁂𑀦𑀸𑀢𑀺 𑀬𑀣𑀸𑀭𑀳𑀁 𑀅𑀝𑁆𑀞𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀘𑁆𑀙𑀸𑀚𑀸𑀢𑀸 𑀲𑀩𑁆𑀩𑁂 𑀦𑀸𑀫𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸𑀦𑀁 𑀏𑀓𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀘𑁆𑀙𑀸𑀚𑀸𑀢𑁂𑀦. 𑀏𑀯𑀁 𑀦𑀸𑀫𑀥𑀫𑁆𑀫𑀸 𑀘𑀺𑀢𑁆𑀢𑀚𑀭𑀽𑀧 𑀓𑀮𑀸𑀧𑀸𑀦𑀁 𑀬𑀣𑀸𑀭𑀳𑀁 𑀘𑀼𑀤𑁆𑀤𑀲𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀇𑀥𑀧𑀺 𑀤𑀲 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺 𑀆𑀭𑀫𑁆𑀫𑀡𑀜𑁆𑀘 𑀅𑀦𑀦𑁆𑀢𑀭𑀜𑁆𑀘 𑀲𑀫𑀦𑀦𑁆𑀢𑀭𑀜𑁆𑀘 𑀅𑀜𑁆𑀜𑀫𑀜𑁆𑀜𑀜𑁆𑀘 𑀉𑀧𑀦𑀺𑀲𑁆𑀲𑀬𑁄 𑀘 𑀧𑀼𑀭𑁂𑀚𑀸𑀢𑁄 𑀘 𑀆𑀲𑁂𑀯𑀦𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑁄 𑀘 𑀦𑀢𑁆𑀣𑀺 𑀘 𑀯𑀺𑀕𑀢𑁄 𑀘.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀺𑀓𑀸𑀮𑁂 𑀲𑀩𑁆𑀩𑁂𑀧𑀺 𑀦𑀸𑀫𑀥𑀫𑁆𑀫𑀸 𑀲𑀩𑁆𑀩𑁂𑀲𑀁 𑀉𑀢𑀼𑀚𑀭𑀽𑀧𑀓𑀮𑀸𑀧𑀸𑀦𑀜𑁆𑀘 𑀆𑀳𑀸𑀭𑀚𑀭𑀽𑀧 𑀓𑀮𑀸𑀧𑀸𑀦𑀜𑁆𑀘 𑀏𑀓𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀧𑀘𑁆𑀙𑀸𑀚𑀸𑀢𑀯𑀲𑁂𑀦. 𑀏𑀢𑁆𑀣𑀧𑀺 𑀧𑀘𑁆𑀙𑀸𑀚𑀸𑀢𑀯𑀘𑀦𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀙𑀸𑀚𑀸𑀢𑀚𑀸𑀢𑀺𑀓𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀲𑁂𑀲𑀸 𑀯𑀻𑀲𑀢𑀺 𑀧𑀘𑁆𑀘𑀬𑀸 𑀦 𑀮𑀩𑁆𑀪𑀦𑁆𑀢𑀺.

𑀲𑀩𑁆𑀩𑁂𑀲𑀼 𑀧𑀦 𑀢𑁂𑀯𑀻𑀲𑀢𑀺𑀬𑀸 𑀭𑀽𑀧𑀓𑀮𑀸𑀧𑁂𑀲𑀼𑀘𑀢𑁆𑀢𑀸𑀭𑁄𑀫𑀳𑀸 𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀜𑁆𑀘𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀲𑀳 𑀚𑀸𑀢𑁂𑀳𑀺 𑀘 𑀅𑀜𑁆𑀜𑀫𑀜𑁆𑀜𑁂𑀦 𑀘, 𑀲𑀳𑀚𑀸𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀘𑀢𑀼𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀲𑀳𑀚𑀸𑀢𑁂𑀳𑀺 ¶ . 𑀆𑀳𑀸𑀭𑀭𑀽𑀧𑀁 𑀲𑀳𑀚𑀸𑀢𑀸𑀦𑀜𑁆𑀘 𑀅𑀲𑀳𑀚𑀸𑀢𑀸𑀦𑀜𑁆𑀘 𑀲𑀩𑁆𑀩𑁂𑀲𑀁 𑀅𑀚𑁆𑀛𑀢𑁆𑀢𑀭𑀽𑀧𑀓𑀮𑀸𑀧𑀸𑀦𑀁 𑀆𑀳𑀸𑀭 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀯𑀲𑀼 𑀓𑀫𑁆𑀫𑀚𑀭𑀽𑀧𑀓𑀮𑀸𑀧𑁂𑀲𑀼 𑀚𑀻𑀯𑀺𑀢𑀭𑀽𑀧𑀁 𑀲𑀳𑀚𑀸𑀢𑀸𑀦𑀫𑁂𑀯 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀭𑀽𑀧𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀭𑀽𑀧𑀥𑀫𑁆𑀫𑀸𑀦𑀁 𑀲𑀢𑁆𑀢𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀩𑀳𑀺𑀤𑁆𑀥𑀸 𑀭𑀽𑀧𑀥𑀫𑁆𑀫𑀸 𑀧𑀦 𑀩𑀳𑀺𑀤𑁆𑀥𑀸𑀪𑀽𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀉𑀢𑀼𑀚𑀭𑀽𑀧𑀓𑀮𑀸𑀧𑀸𑀦𑀁 𑀧𑀜𑁆𑀘𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀭𑀽𑀧𑀓𑀮𑀸𑀧𑁂𑀲𑀼 𑀧𑀘𑁆𑀘𑀬𑀖𑀝𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀏𑀢𑁆𑀣 𑀘 𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀧𑀥𑀸𑀦𑀁 𑀞𑀸𑀦𑀦𑁆𑀢𑀺 𑀧𑀝𑁆𑀞𑀸𑀦𑀁. 𑀢𑀢𑁆𑀣 𑀧𑀥𑀸𑀦𑀦𑁆𑀢𑀺 𑀧𑀫𑀼𑀔𑀁, 𑀞𑀸𑀦𑀦𑁆𑀢𑀺 𑀧𑀘𑁆𑀘𑀬𑁄, 𑀧𑀫𑀼𑀔𑀧𑀘𑁆𑀘𑀬𑁄 𑀫𑀼𑀔𑁆𑀬𑀧𑀘𑁆𑀘𑀬𑁄 𑀏𑀓𑀦𑁆𑀢𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀘 𑀏𑀓𑀦𑁆𑀢 𑀧𑀘𑁆𑀘𑀬𑁄 𑀏𑀓𑀦𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀝𑀺𑀘𑁆𑀘 𑀯𑀢𑁆𑀢𑀩𑁆𑀩𑁄.

𑀤𑀼𑀯𑀺𑀥𑀜𑁆𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀫𑀼𑀔𑁆𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀫𑀼𑀔𑁆𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀸𑀫 𑀫𑀽𑀮𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀸𑀫 𑀧𑀭𑀫𑁆𑀧𑀭 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀫𑀽𑀮𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁂𑀯 𑀏𑀓𑀦𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀜𑁆𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀺𑀬𑁂𑀯, 𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀧𑀭𑀫𑁆𑀧𑀭𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀦 𑀅𑀦𑁂𑀓𑀦𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁𑀦𑀸𑀫, 𑀢𑀜𑁆𑀳𑀺 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀲𑀢𑀺𑀧𑀺 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀦 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀏𑀓𑀦𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀝𑀺𑀘𑁆𑀘 𑀲𑁄 𑀧𑀘𑁆𑀘𑀬𑁄 𑀏𑀓𑀦𑁆𑀢𑀧𑀘𑁆𑀘𑀬𑁄 𑀦𑀸𑀫. 𑀲𑁄 𑀏𑀯 𑀇𑀫𑀲𑁆𑀫𑀺𑀁 𑀫𑀳𑀸𑀧𑀓𑀭𑀡𑁂 𑀯𑀼𑀢𑁆𑀢𑁄. 𑀢𑀢𑁄 𑀏𑀯 𑀅𑀬𑀁 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀕𑀡𑁄 𑀘 𑀇𑀫𑀁 𑀫𑀳𑀸 𑀧𑀓𑀭𑀡𑀜𑁆𑀘 𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀥𑀦𑀥𑀜𑁆𑀜𑀢𑁆𑀣𑀸𑀬 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀮𑁄𑀪𑀯𑀲𑁂𑀦 𑀉𑀝𑁆𑀞𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀔𑁂𑀢𑁆𑀢𑀸𑀦𑀺 𑀓𑀭𑁄𑀢𑀺, 𑀯𑀢𑁆𑀣𑀽𑀦𑀺 𑀓𑀭𑁄𑀢𑀺, 𑀉𑀬𑁆𑀬𑀸𑀦𑀸𑀦𑀺 𑀓𑀭𑁄𑀢𑀺. 𑀢𑁂𑀲𑀼 𑀲𑀫𑁆𑀧𑀚𑁆𑀚𑀫𑀸𑀦𑁂𑀲𑀼 𑀲𑁄 𑀧𑀼𑀭𑀺𑀲𑁄 𑀩𑀳𑀽𑀦𑀺 𑀥𑀦𑀥𑀜𑁆𑀜𑀸𑀦𑀺 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸 𑀘 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀢𑁆𑀢𑀤𑀸𑀭𑁂 𑀘 𑀧𑁄𑀲𑁂𑀢𑀺, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀢𑀺, 𑀧𑀼𑀜𑁆𑀜𑀨𑀮𑀸𑀦𑀺 𑀘 𑀆𑀬𑀢𑀺𑀁 𑀧𑀘𑁆𑀘𑀦𑀼𑀪𑀯𑀺𑀲𑁆𑀲𑀢𑀺. 𑀢𑀢𑁆𑀣 𑀮𑁄𑀪𑀲𑀳 𑀚𑀸𑀢𑀸𑀦𑀺 𑀦𑀸𑀫𑀭𑀽𑀧𑀸𑀦𑀺 𑀫𑀼𑀔𑁆𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺 𑀦𑀸𑀫. 𑀢𑀢𑁄 𑀧𑀭𑀁 𑀬𑀸𑀯 𑀆𑀬𑀢𑀺𑀁 𑀪𑀯𑁂𑀲𑀼 𑀧𑀼𑀜𑁆𑀜𑀨𑀮𑀸𑀦𑀺 𑀧𑀘𑁆𑀘𑀦𑀼𑀪𑁄𑀢𑀺, 𑀢𑀸𑀯 𑀉𑀧𑁆𑀧𑀦𑁆𑀦𑀸𑀦𑀺 𑀧𑀭𑀫𑁆𑀧𑀭𑀨𑀮𑀸𑀦𑀺 𑀢𑀲𑁆𑀲 𑀮𑁄𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺 𑀦𑀸𑀫. 𑀢𑁂𑀲𑀼 𑀤𑁆𑀯𑀻𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀫𑀼𑀔𑁆𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁂𑀯 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀦 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀓𑀣𑁂𑀢𑀩𑁆𑀩𑀁. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀦𑀬𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀭𑀽𑀧𑁄 𑀧𑀘𑁆𑀘𑀬𑀦𑀬𑁄. 𑀅𑀧𑀺 𑀘 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀢𑀺 𑀢𑀬𑁄 𑀥𑀫𑁆𑀫𑀸 𑀲𑀓𑀮𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲𑀧𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀧𑀺 𑀑𑀓𑀸𑀲 𑀮𑁄𑀓𑀲𑁆𑀲𑀧𑀺 𑀯𑀺𑀧𑀢𑁆𑀢𑀺𑀬𑀸 𑀫𑀽𑀮𑀝𑁆𑀞𑁂𑀦 𑀳𑁂𑀢𑀽 𑀦𑀸𑀫. 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 ¶ 𑀢𑀬𑁄 𑀥𑀫𑁆𑀫𑀸 𑀲𑀫𑁆𑀧𑀢𑁆𑀢𑀺𑀬𑀸 𑀫𑀽𑀮𑀝𑁆𑀞𑁂𑀦 𑀳𑁂𑀢𑀽𑀦𑀸𑀫𑀸𑀢𑀺 𑀓𑀣𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀧𑀝𑁆𑀞𑀸𑀦𑀧𑀘𑁆𑀘𑀬𑁂𑀲𑀼 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀘 𑀲𑀢𑀺 𑀮𑁄𑀓𑁂 𑀲𑀩𑁆𑀩𑀸 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑁄 𑀇𑀫𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀫𑀼𑀔𑁆𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀤𑀻𑀧𑀦𑀸 𑀧𑀘𑁆𑀘𑀬𑀸𑀦𑀁 𑀲𑀪𑀸𑀕𑀲𑀗𑁆𑀕𑀳𑁄 𑀧𑀘𑁆𑀘𑀬𑀸𑀦𑀁 𑀖𑀝𑀦𑀸𑀦𑀬𑁄𑀢𑀺 𑀢𑀻𑀳𑀺 𑀓𑀡𑁆𑀟𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀝𑁆𑀞𑀸𑀦𑀼𑀤𑁆𑀤𑁂𑀲 𑀤𑀻𑀧𑀦𑀻 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺.

𑀫𑁆𑀭𑀫𑁆𑀫𑀭𑀝𑁆𑀞𑁂 𑀫𑁆ौ𑀁𑀚𑁆𑀯𑀸𑀦𑀕𑀭𑁂 𑀮𑁂𑀟𑀻𑀢𑀻𑀅𑀭𑀜𑁆𑀜𑀯𑀺𑀳𑀸𑀭𑀯𑀸𑀲𑀺𑀦𑀸 𑀫𑀳𑀸 𑀣𑁂𑀭𑁂𑀦 𑀓𑀢𑀸𑀬𑀁 𑀧𑀘𑁆𑀘𑀬𑀼𑀤𑁆𑀤𑁂𑀲𑀤𑀻𑀧𑀦𑀻.