𑀅𑀜𑁆𑀜 > 𑀩𑀼𑀤𑁆𑀥-𑀯𑀦𑁆𑀤𑀦𑀸 𑀕𑀦𑁆𑀣-𑀲𑀗𑁆𑀕𑀳𑁄

MMR Vol 0

Misc. Paragraph

𑀦𑀫𑀓𑁆𑀓𑀸𑀭𑀧𑀸𑀴𑀺

𑀦𑀫𑀓𑁆𑀓𑀸𑀭𑀝𑀻𑀓𑀸

𑀦𑀺𑀕𑀫𑀦

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀼𑀕𑀢𑀁 ¶ 𑀲𑀼𑀕𑀢𑀁 𑀲𑁂𑀝𑁆𑀞𑀁, 𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀁;

𑀅𑀫𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀅𑀲𑀫𑀁 𑀅𑀲𑀫𑀁 𑀤𑀤𑀁.

𑀲𑀭𑀡𑀁 𑀲𑀭𑀡𑀁 𑀮𑁄𑀓𑀁, 𑀅𑀭𑀡𑀁 𑀅𑀭𑀡𑀁 𑀓𑀭𑀁;

𑀅𑀪𑀬𑀁 𑀅𑀪𑀬𑀁 𑀞𑀸𑀦𑀁, 𑀦𑀸𑀬𑀓𑀁 𑀦𑀸𑀬𑀓𑀁 𑀦𑀫𑁂.

𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄,

𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀜𑁆𑀘 𑀮𑁄𑀓𑀢𑁄,

𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀁,

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀁;

𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑀁,

𑀯𑀦𑁆𑀤𑁂 𑀫𑀼𑀦𑀺𑀫𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁.

𑀫𑀚𑁆𑀛𑁂 𑀬𑀢𑀻𑀦𑀁 𑀮𑀮𑀺𑀢𑀁 𑀲𑀺𑀭𑀻𑀳𑀺;

𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀁 𑀅𑀦𑁂𑀚𑀁,

𑀯𑀦𑁆𑀤𑀸𑀫𑀺 𑀲𑀩𑁆𑀩𑀜𑁆𑀜𑀼𑀫𑀳𑀁 𑀫𑀼𑀦𑀺𑀦𑁆𑀤𑀁.

𑀉𑀧𑁂𑀢𑀧𑀼𑀜𑁆𑀜𑁄 ¶ 𑀯𑀭𑀩𑁄𑀥𑀺𑀫𑀽𑀮𑁂,

𑀲𑀲𑁂𑀦𑀫𑀸𑀭𑀁 𑀲𑀼𑀕𑀢𑁄 𑀚𑀺𑀦𑀺𑀢𑁆𑀯𑀸;

𑀅𑀩𑁄𑀚𑁆𑀛𑀺 𑀩𑁄𑀥𑀺𑀁 𑀅𑀭𑀼𑀡𑁄𑀤𑀬𑀫𑁆𑀳𑀺,

𑀦𑀫𑀸𑀫𑀺 𑀢𑀁 𑀫𑀸𑀭𑀚𑀺𑀦𑀁 𑀅𑀪𑀗𑁆𑀕𑀁.

𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡𑀔𑀕𑁆𑀕𑀁,

𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀢𑀁,

𑀦𑀫𑀸𑀫𑀺𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀁.

𑀤𑀬𑀸𑀮𑀬𑀁 𑀲𑀩𑁆𑀩𑀥𑀺 𑀤𑀼𑀓𑁆𑀓𑀭𑀁 𑀓𑀭𑀁,

𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀫𑀕𑁆𑀕𑀢𑀁 𑀕𑀢𑀁;

𑀢𑀺𑀮𑁄𑀓𑀦𑀸𑀣𑀁 𑀲𑀼𑀲𑀫𑀸𑀳𑀺𑀢𑀁 𑀳𑀺𑀢𑀁,

𑀲𑀫𑀦𑁆𑀢𑀘𑀓𑁆𑀔𑀼𑀁 𑀧𑀡𑀫𑀸𑀫𑀺 𑀢𑀁𑀫𑀺𑀢𑀁.

𑀢𑀳𑀺𑀁 𑀢𑀳𑀺𑀁 𑀧𑀸𑀭𑀫𑀺𑀲𑀜𑁆𑀘𑀬𑀁 𑀘𑀬𑀁,

𑀕𑀢𑀁 𑀕𑀢𑀁 𑀲𑀩𑁆𑀪𑀺 𑀲𑀼𑀔𑀧𑁆𑀧𑀤𑀁 𑀧𑀤𑀁;

𑀦𑀭𑀸𑀦𑀭𑀸𑀦𑀁 𑀲𑀼𑀔𑀲𑀫𑁆𑀪𑀯𑀁 𑀪𑀯𑀁,

𑀦𑀫𑀸𑀦𑀫𑀸𑀦𑀁 𑀚𑀺𑀦𑀧𑀼𑀗𑁆𑀕𑀯𑀁 𑀕𑀯𑀁.

𑀫𑀕𑁆𑀕𑀗𑁆𑀕𑀦𑀸𑀯𑀁 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄,

𑀆𑀭𑀼𑀬𑁆𑀳 𑀬𑁄 𑀢𑀸𑀬 𑀩𑀳𑀽 𑀪𑀯𑀡𑁆𑀡𑀯𑀸,

𑀢𑀸𑀭𑁂𑀲𑀺 𑀢𑀁 𑀩𑀼𑀤𑁆𑀥𑀫𑀖𑀧𑁆𑀧𑀳𑀁 𑀦𑀫𑁂.

𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀁,

𑀯𑀭𑀩𑁄𑀥𑀺𑀤𑀼𑀫𑁂 𑀘𑀢𑀼𑀲𑀘𑁆𑀘𑀤𑀲𑀁;

𑀯𑀭𑀫𑀺𑀤𑁆𑀥𑀺𑀕𑀢𑀁 𑀦𑀭𑀤𑁂𑀯𑀳𑀺𑀢𑀁,

𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀁 𑀯𑀺𑀭𑀚𑀁,

𑀕𑀕𑀦𑀽𑀧𑀫𑀥𑀺𑀁 𑀥𑀺𑀢𑀺𑀫𑁂𑀭𑀼𑀲𑀫𑀁;

𑀬𑁄 ¶ 𑀩𑀼𑀤𑁆𑀥𑁄 𑀲𑀼𑀫𑀢𑀺 𑀤𑀺𑀯𑁂 𑀤𑀺𑀯𑀸𑀓𑀭𑁄𑀯,

𑀲𑁄𑀪𑀦𑁆𑀢𑁄 𑀭𑀢𑀺𑀚𑀦𑀦𑁂 𑀲𑀺𑀮𑀸𑀲𑀦𑀫𑁆𑀳𑀺;

𑀆𑀲𑀻𑀦𑁄 𑀲𑀺𑀯𑀲𑀼𑀔𑀤𑀁 𑀅𑀤𑁂𑀲𑀺 𑀥𑀫𑁆𑀫𑀁,

𑀤𑁂𑀯𑀸𑀦𑀁 𑀢𑀫𑀲𑀤𑀺𑀲𑀁 𑀦𑀫𑀸𑀫𑀺 𑀦𑀺𑀘𑁆𑀘𑀁.

𑀬𑁄 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀺,

𑀮𑁄𑀓𑁂𑀳𑀺 𑀢𑀻𑀳𑀺𑀯𑀺𑀓𑀮𑁂𑀳𑀺 𑀦𑀺𑀭𑀸𑀓𑀼𑀮𑁂𑀳𑀺;

𑀲𑀫𑁆𑀧𑀸𑀧𑀼𑀡𑁂 𑀦𑀺𑀭𑀼𑀧𑀫𑁂𑀬𑁆𑀬𑀢𑀫𑁂𑀯 𑀦𑀸𑀣𑁄,

𑀢𑀁 𑀲𑀩𑁆𑀩𑀮𑁄𑀓𑀫𑀳𑀺𑀢𑀁 𑀅𑀲𑀫𑀁 𑀦𑀫𑀸𑀫𑀺.

𑀩𑀼𑀤𑁆𑀥𑀁 𑀦𑀭𑀸𑀦𑀭𑀲𑀫𑁄𑀲𑀭𑀡𑀁 𑀥𑀺𑀢𑀢𑁆𑀢𑀁,

𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀁;

𑀅𑀢𑁆𑀣𑀸𑀪𑀺𑀓𑀸𑀫𑀦𑀭𑀤𑁂𑀯𑀳𑀺𑀢𑀸𑀯𑀳𑀁 𑀢𑀁,

𑀯𑀦𑁆𑀤𑀸𑀫𑀺 𑀓𑀸𑀭𑀼𑀡𑀺𑀓𑀫𑀕𑁆𑀕𑀫𑀦𑀦𑁆𑀢𑀜𑀸𑀡𑀁.

𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄 𑀬𑁄 𑀫𑀼𑀦𑀺𑀦𑁆𑀤𑁄𑀧𑀕𑀦𑁆𑀢𑁆𑀯𑀸,

𑀯𑀦𑀫𑀺𑀲𑀺𑀧𑀢𑀦𑀯𑁆𑀳𑀁 𑀲𑀜𑁆𑀜𑀢𑀸𑀦𑀁 𑀦𑀺𑀓𑁂𑀢𑀁;

𑀢𑀳𑀺𑀫𑀓𑀼𑀲𑀮𑀙𑁂𑀤𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁄,

𑀢𑀫𑀢𑀼𑀮𑀫𑀪𑀺𑀓𑀦𑁆𑀢𑀁 𑀯𑀦𑁆𑀤𑀦𑁂𑀬𑁆𑀬𑀁 𑀦𑀫𑀸𑀫𑀺.

𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀁 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀺 𑀭𑀢𑁆𑀢𑀁,

𑀲𑀺𑀭𑀺𑀯𑀺𑀲𑀭𑀸𑀮𑀬𑀁 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀼𑀧𑁂𑀢𑀁;

𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧𑀘𑀺𑀢𑁆𑀢𑀁,

𑀲𑀼𑀭𑀦𑀭𑀧𑀽𑀚𑀺𑀢𑀁 𑀲𑀼𑀕𑀢𑀫𑀸𑀤𑀭𑀁 𑀦𑀫𑀸𑀫𑀺.

𑀫𑀕𑁆𑀕𑁄𑀴𑀼𑀫𑁆𑀧𑁂𑀦 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺𑀁,

𑀲𑀁𑀲𑀸𑀭𑁄𑀖𑀁 𑀢𑀭𑀺 𑀢𑀫𑀪𑀬𑀁 𑀧𑀸𑀭𑀧𑀢𑁆𑀢𑀁 𑀧𑀚𑀸𑀦𑀁;

𑀢𑀸𑀡𑀁 𑀮𑁂𑀡𑀁 𑀅𑀲𑀫𑀲𑀭𑀡𑀁 𑀏𑀓𑀢𑀺𑀢𑁆𑀣𑀁 𑀧𑀢𑀺𑀝𑁆𑀞𑀁,

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀭𑀫𑀲𑀼𑀔𑀤𑀁 𑀥𑀫𑁆𑀫𑀭𑀸𑀚𑀁 𑀦𑀫𑀸𑀫𑀺.

𑀓𑀡𑁆𑀟𑀫𑁆𑀩𑀁𑀫𑀽𑀮𑁂 𑀧𑀭𑀳𑀺𑀢𑀓𑀭𑁄 𑀬𑁄 𑀫𑀼𑀦𑀺𑀦𑁆𑀤𑁄 𑀦𑀺𑀲𑀺𑀦𑁆𑀦𑁄,

𑀅𑀘𑁆𑀙𑁂𑀭𑀁 𑀲𑀻𑀖𑀁 𑀦𑀬𑀦𑀲𑀼𑀪𑀕𑀁 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁;

𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀁 𑀫𑀼𑀦𑀺𑀪𑀺𑀚𑀳𑀺𑀢𑀁 𑀧𑀸𑀝𑀺𑀳𑁂𑀭𑀁 𑀅𑀓𑀸𑀲𑀺,

𑀯𑀦𑁆𑀤𑁂 𑀢𑀁 𑀲𑁂𑀝𑁆𑀞𑀁 𑀧𑀭𑀫𑀭𑀢𑀺𑀚𑀁 𑀇𑀤𑁆𑀥𑀺𑀥𑀫𑁆𑀫𑁂𑀳𑀼𑀧𑁂𑀢𑀁.

𑀫𑀼𑀦𑀺𑀦𑁆𑀤𑀓𑁆𑀓𑁄 ¶ 𑀬𑁆𑀯𑁂𑀓𑁄 𑀤𑀬𑀼𑀤𑀬𑀭𑀼𑀡𑁄 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄,

𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀓𑀫𑀮𑀓𑀣𑀺𑀢𑀁 𑀥𑀫𑁆𑀫𑀭𑀁𑀲𑀻𑀯𑀭𑁂𑀳𑀺;

𑀲𑀼𑀩𑁄𑀥𑁂𑀲𑀻 𑀲𑀼𑀤𑁆𑀥𑁂 𑀢𑀺𑀪𑀯𑀓𑀼𑀳𑀭𑁂 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀜𑁆𑀘,

𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀁 𑀤𑀼𑀔𑀫𑀲𑀳𑀦𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑀬𑁄 𑀚𑀺𑀦𑁄 𑀅𑀦𑁂𑀓𑀚𑀸𑀢𑀺𑀬𑀁 𑀲𑀧𑀼𑀢𑁆𑀢𑀤𑀸𑀭𑀫𑀗𑁆𑀕𑀚𑀻𑀯𑀺𑀢𑀫𑁆𑀧𑀺,

𑀩𑁄𑀥𑀺𑀧𑁂𑀫𑀢𑁄 𑀅𑀮𑀕𑁆𑀕𑀫𑀸𑀦𑀲𑁄 𑀅𑀤𑀸𑀲𑀺𑀬𑁂𑀯 𑀅𑀢𑁆𑀣𑀺𑀓𑀲𑁆𑀲;

𑀤𑀸𑀦𑀧𑀸𑀭𑀫𑀺𑀁 𑀢𑀢𑁄 𑀧𑀭𑀁 𑀅𑀧𑀽𑀭𑀺 𑀲𑀻𑀮𑀧𑀸𑀭𑀫𑀸𑀤𑀺𑀓𑀫𑁆𑀧𑀺,

𑀢𑀸𑀲𑀫𑀺𑀤𑁆𑀥𑀺𑀬𑁄𑀧𑀬𑀸𑀢𑀫𑀕𑁆𑀕𑀢𑀁 𑀢𑀫𑁂𑀓𑀤𑀻𑀧𑀓𑀁 𑀦𑀫𑀸𑀫𑀺.

𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀁 𑀦𑀺𑀥𑀦𑀯𑀧𑀼𑀥𑀭𑀁 𑀫𑀸𑀭𑀪𑀗𑁆𑀕𑀁 𑀅𑀪𑀗𑁆𑀕𑀁,

𑀤𑀻𑀧𑀁 𑀤𑀻𑀧𑀁 𑀧𑀚𑀸𑀦𑀁 𑀚𑀬𑀯𑀭𑀲𑀬𑀦𑁂 𑀩𑁄𑀥𑀺𑀧𑀢𑁆𑀢𑀁𑀥𑀺𑀧𑀢𑁆𑀢𑀁;

𑀩𑁆𑀭𑀳𑁆𑀫𑀸𑀩𑁆𑀭𑀳𑁆𑀫𑀸𑀕𑀢𑀸𑀦𑀁 𑀯𑀭𑀕𑀺𑀭𑀓𑀣𑀺𑀓𑀁 𑀧𑀸𑀧𑀳𑀻𑀦𑀁 𑀧𑀳𑀻𑀦𑀁,

𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀁 𑀲𑀢𑀢𑀫𑀪𑀺𑀦𑀫𑁂 𑀢𑀁 𑀫𑀼𑀦𑀺𑀦𑁆𑀤𑀁 𑀫𑀼𑀦𑀺𑀦𑁆𑀤𑀁.

𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄 𑀫𑀼𑀤𑀼𑀓𑀭𑀘𑀭𑀡𑁄 𑀩𑁆𑀭𑀳𑁆𑀫𑀖𑁄𑀲𑁂𑀡𑀺𑀚𑀗𑁆𑀖𑁄,

𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄 𑀧𑀼𑀦𑀭𑀧𑀺 𑀲𑀼𑀕𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄;

𑀫𑀽𑀤𑁄𑀤𑀸𑀢𑀼𑀡𑁆𑀡𑀮𑁄𑀫𑁄 𑀅𑀣𑀫𑀧𑀺 𑀲𑀼𑀕𑀢𑁄 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄,

𑀦𑀻𑀮𑀓𑁆𑀔𑀻 𑀤𑀻𑀖𑀧𑀡𑁆𑀳𑀻 𑀲𑀼𑀔𑀼𑀫𑀫𑀮𑀙𑀯𑀻 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻.

𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄 𑀲𑀫𑀓𑀮𑀧𑀦𑀚𑁄 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄,

𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄 𑀅𑀯𑀺𑀭𑀴𑀤𑀲𑀦𑁄 𑀫𑀸𑀭𑀚𑀼𑀲𑁆𑀲𑀗𑁆𑀔𑀧𑀸𑀤𑁄.

𑀢𑀺𑀝𑁆𑀞𑀦𑁆𑀢𑁄 ¶ 𑀦𑁄𑀦𑀫𑀦𑁆𑀢𑁄𑀪𑀬𑀓𑀭𑀫𑀼𑀤𑀼𑀦𑀸 𑀚𑀡𑁆𑀡𑀼𑀓𑀸𑀦𑀸𑀫𑀲𑀦𑁆𑀢𑁄,

𑀯𑀝𑁆𑀝𑀓𑁆𑀔𑀦𑁆𑀥𑁄 𑀚𑀺𑀦𑁄 𑀕𑁄𑀢𑀭𑀼𑀡𑀧𑀔𑀼𑀫𑀓𑁄 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄.

𑀲𑀢𑁆𑀢𑀧𑁆𑀧𑀻𑀦𑁄 𑀘 𑀤𑀻𑀖𑀗𑁆𑀕𑀼𑀮𑀺 𑀫𑀣 𑀲𑀼𑀕𑀢𑁄 𑀮𑁄𑀫𑀓𑀽𑀧𑁂𑀓𑀮𑁄𑀫𑁄,

𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄 𑀓𑀦𑀓𑀲𑀫𑀢𑀘𑁄 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄.

𑀲𑀫𑁆𑀩𑀼𑀤𑁆𑀥𑁄 𑀣𑀽𑀮𑀚𑀺𑀯𑁆𑀳𑁄 𑀅𑀣 𑀲𑀻𑀳𑀳𑀦𑀼𑀓𑁄 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄,

𑀦𑀸𑀣𑁄 𑀉𑀡𑁆𑀳𑀻𑀲𑀲𑀻𑀲𑁄 𑀇𑀢𑀺𑀕𑀼𑀡𑀲𑀳𑀺𑀢𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄 𑀓𑀸 𑀓𑀣𑀸 𑀩𑀼𑀤𑁆𑀥𑀪𑀸𑀯𑁄,

𑀮𑁄𑀓𑁂 𑀢𑀲𑁆𑀫𑀸 𑀯𑀺𑀪𑀸𑀯𑀻 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀲𑀸𑀥𑀯𑁄 𑀧𑀢𑁆𑀣𑀬𑀦𑁆𑀢𑀸.

𑀇𑀝𑁆𑀞𑀁 𑀅𑀢𑁆𑀣𑀁 𑀯𑀳𑀦𑁆𑀢𑀁 𑀲𑀼𑀭𑀦𑀭𑀫𑀳𑀺𑀢𑀁 𑀦𑀺𑀩𑁆𑀪𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀁,

𑀮𑁄𑀓𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀁 𑀤𑀲𑀩𑀮𑀫𑀲𑀫𑀁 𑀢𑀁 𑀦𑀫𑀲𑁆𑀲𑀦𑁆𑀢𑀼 𑀦𑀺𑀘𑁆𑀘𑀁.

𑀧𑀼𑀜𑁆𑀜𑁂𑀦𑁂𑀢𑁂𑀦 𑀲𑁄𑀳𑀁 𑀦𑀺𑀧𑀼𑀡𑀫𑀢𑀺 𑀲𑀢𑁄 𑀲𑀫𑁆𑀧𑀭𑀸𑀬𑁂 𑀘 𑀢𑀺𑀢𑁆𑀢𑁄,

𑀤𑀓𑁆𑀔𑁄 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄 𑀅𑀯𑀺𑀓𑀮𑀯𑀻𑀭𑀺𑀬𑁄 𑀪𑁄𑀕𑀯𑀸 𑀲𑀁𑀯𑀺𑀪𑀸𑀕𑀻.

𑀢𑀺𑀓𑁆𑀔𑁄 𑀲𑀽𑀭𑁄 𑀥𑀺𑀢𑀢𑁆𑀢𑁄 𑀲𑀧𑀭𑀳𑀺𑀢𑀘𑀭𑁄 𑀤𑀻𑀖𑀚𑀻𑀯𑀻 𑀅𑀭𑁄𑀕𑁄,

𑀥𑀜𑁆𑀜𑁄 𑀯𑀡𑁆𑀡𑁄 𑀬𑀲𑀲𑁆𑀲𑀻 𑀅𑀢𑀺𑀩𑀮𑀯𑀥𑀭𑁄 𑀓𑀺𑀢𑁆𑀢𑀺𑀫𑀸 𑀔𑀦𑁆𑀢𑀼𑀧𑁂𑀢𑁄.

𑀲𑀤𑁆𑀥𑁄 ¶ 𑀤𑀸𑀢𑀗𑁆𑀕𑀼𑀧𑁂𑀢𑁄 𑀧𑀭𑀫𑀲𑀺𑀭𑀺𑀥𑀭𑁄 𑀤𑀺𑀝𑁆𑀞𑀥𑀫𑁆𑀫𑁂 𑀯𑀺𑀭𑀢𑁆𑀢𑁄,

𑀮𑀚𑁆𑀚𑀻 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀪𑀺𑀭𑀢𑀓𑀼𑀲𑀮𑁄 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄.

𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀓𑁄𑀥𑁄 𑀅𑀢𑀺𑀯𑀼𑀚𑀼𑀳𑀤𑀬𑁄 𑀇𑀤𑁆𑀥𑀺𑀫𑀸 𑀅𑀧𑁆𑀧𑀫𑁂𑀬𑁆𑀬𑁄,

𑀧𑀸𑀲𑀁𑀲𑁄 𑀧𑁂𑀫𑀯𑀸𑀘𑁄 𑀲𑀼𑀚𑀦𑀕𑀼𑀡𑀯𑀺𑀤𑀽 𑀫𑀸𑀫𑀓𑁄 𑀲𑁄 𑀪𑀯𑁂𑀬𑁆𑀬𑀁.

𑀇𑀢𑁆𑀣𑀁 𑀅𑀲𑀗𑁆𑀔𑀬𑁂 𑀦𑀸𑀣, 𑀕𑀼𑀡𑁂 𑀮𑀓𑁆𑀔𑀡𑀤𑀻𑀧𑀺𑀢𑁂;

𑀕𑀸𑀣𑀸𑀲𑀼 𑀲𑀽𑀘𑀓𑀸𑀲𑁆𑀯𑁂𑀓, 𑀕𑀸𑀣𑀫𑁆𑀧𑀺 𑀲𑀭𑀢𑁂 𑀩𑀼𑀥𑁄.

𑀘𑀢𑀼𑀭𑀸𑀧𑀸𑀬𑀫𑀼𑀢𑁆𑀢𑁄 𑀲𑁄, 𑀲𑀸𑀥𑀓𑀢𑁆𑀣𑀤𑁆𑀯𑀬𑀲𑁆𑀲 𑀘;

𑀳𑀢𑀽𑀧𑀤𑁆𑀤𑀯𑀚𑀸𑀮𑁄 𑀘, 𑀮𑀸𑀪𑀻 𑀳𑀺𑀢𑀲𑀼𑀔𑀲𑁆𑀲 𑀘.

𑀅𑀥𑀺𑀧𑁄 𑀦𑀭𑀤𑁂𑀯𑀸𑀦𑀁, 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀧𑀺 𑀯𑀸;

𑀪𑀯𑁂𑀬𑁆𑀬 𑀅𑀦𑁆𑀢𑀺𑀫𑁂 𑀤𑁂𑀳𑁂, 𑀢𑀫𑀜𑁆𑀜𑀁 𑀲𑁂𑀢𑀙𑀢𑁆𑀢𑀓𑀁.

𑀪𑀸𑀯𑀦𑀸𑀬𑀸𑀦𑀫𑀸𑀭𑀼𑀬𑁆𑀳, 𑀲𑀫𑀫𑁂𑀲𑁆𑀲𑀢𑀺 𑀲𑀼𑀩𑁆𑀩𑀢𑁄;

𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀧𑀺, 𑀅𑀭𑁄𑀕𑁄 𑀤𑀻𑀖𑀚𑀻𑀯𑀺𑀓𑁄.

𑀧𑀽𑀚𑀺𑀢𑁄 𑀲𑀩𑁆𑀩𑀮𑁄𑀓𑁂𑀳𑀺, 𑀪𑀸𑀯𑀦𑀸𑀪𑀺𑀭𑀢𑀻𑀫𑀦𑁄;

𑀚𑀦𑀧𑁆𑀧𑀺𑀬𑁄 𑀫𑀦𑀸𑀧𑁄 𑀘, 𑀓𑀸 𑀓𑀣𑀸𑀔𑀺𑀮𑀥𑀸𑀭𑀡𑁂.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀯𑀡𑁆𑀡𑁂𑀳𑀺 ¶ , 𑀧𑀲𑀢𑁆𑀣𑀜𑁆𑀘 𑀲𑀼𑀔𑀤𑁆𑀤𑀤𑀁;

𑀯𑀦𑁆𑀤𑀦𑁆𑀢𑀸𑀦𑀁 𑀚𑀺𑀦𑀁 𑀦𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀤𑁆𑀥𑀁 𑀕𑀡𑀼𑀢𑁆𑀢𑀫𑀁.

𑀦𑀫𑀓𑁆𑀓𑀸𑀭𑀁 𑀳𑀺𑀢𑀢𑁆𑀣𑀻𑀳𑀺, 𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀺 𑀘;

𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑀁 𑀧𑀼𑀜𑁆𑀜, 𑀩𑀼𑀤𑁆𑀥𑀺𑀬𑀸 𑀢𑁂𑀦 𑀯𑀦𑁆𑀤𑀺𑀦𑀁.

𑀢𑀲𑁆𑀲𑀢𑁆𑀣𑀯𑀡𑁆𑀡𑀦𑀁 𑀓𑀲𑁆𑀲𑀁, 𑀕𑀫𑁆𑀪𑀻𑀭𑀢𑁆𑀣𑀲𑀼𑀩𑁄𑀥𑀦𑀁;

𑀫𑁄𑀯𑀺𑀧𑀼𑀦𑀸𑀫𑁂𑀦 𑀲𑀦𑁆𑀢𑁂𑀦, 𑀲𑀻𑀮𑀼𑀧𑁂𑀢𑁂𑀦 𑀬𑀸𑀘𑀺𑀢𑁄.

𑀯𑀡𑁆𑀡𑀦𑁆𑀢𑁄𑀧𑀺 𑀘 𑀢𑀲𑁆𑀲𑀢𑁆𑀣𑀁, 𑀢𑀁 𑀢𑀁 𑀅𑀝𑁆𑀞𑀓𑀣𑀸𑀤𑀺𑀲𑀼;

𑀯𑀼𑀢𑁆𑀢𑀜𑀸𑀬𑁂𑀦 𑀓𑀲𑁆𑀲𑀸𑀫𑀺, 𑀲𑀤𑁆𑀥𑀸 𑀲𑀼𑀡𑀸𑀣 𑀲𑀸𑀥𑀯𑁄.

𑀦𑀫𑀦𑀁 𑀦𑀫𑀢𑀻𑀢𑀻 𑀯𑀸, 𑀦𑀫𑀢𑀻 𑀢𑁂𑀦 𑀯𑀸 𑀦𑀫𑁄;

𑀢𑀲𑁆𑀲 𑀓𑀸𑀭𑁄𑀦𑁆𑀢𑀺 𑀢𑀸𑀳𑀻𑀢𑀺, 𑀦𑀫𑀓𑁆𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑀢𑀜𑁆𑀘 𑀩𑀼𑀤𑁆𑀥𑀖𑁄𑀲𑀸𑀘𑀭𑀺, 𑀬𑁂𑀦 𑀧𑀼𑀩𑁆𑀩𑀲𑀼𑀢𑀁 𑀓𑀢𑀁;

𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀜𑁆𑀘, 𑀢𑀁 𑀢𑀁 𑀧𑀦 𑀓𑀣𑀸𑀤𑀺𑀲𑀼.

𑀦 𑀤𑀺𑀝𑁆𑀞𑀁 𑀓𑀢𑀓𑀸𑀭𑀡𑀁, 𑀢𑀲𑁆𑀫𑀸 𑀳𑀺𑀢𑀢𑁆𑀣𑀺𑀓𑁂𑀳𑀺 𑀘;

𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀻 𑀘, 𑀞𑀧𑀺𑀢𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀁;

𑀢𑀁 𑀓𑀸𑀭𑀡𑀁 𑀯𑀺𑀜𑁆𑀜𑀽𑀳𑀻 𑀘, 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀚𑀸𑀦𑀺𑀢𑀦𑁆𑀢𑀺.

𑀲𑀼𑀕𑀢𑀁 𑀲𑀼𑀕𑀢𑀁 𑀲𑁂𑀝𑁆𑀞𑀁, 𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀁;

𑀅𑀫𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀅𑀲𑀫𑀁 𑀅𑀲𑀫𑀁 𑀤𑀤𑀁.

𑀲𑀭𑀡𑀁 𑀲𑀭𑀡𑀁 𑀮𑁄𑀓𑀁, 𑀅𑀭𑀡𑀁 𑀅𑀭𑀡𑀁 𑀓𑀭𑀁;

𑀅𑀪𑀬𑀁 𑀅𑀪𑀬𑀁 𑀞𑀸𑀦𑀁, 𑀦𑀸𑀬𑀓𑀁 𑀦𑀸𑀬𑀓𑀁 𑀦𑀫𑁂.

𑁧. [𑀓] 𑀇𑀤𑀸𑀦𑀺 ¶ 𑀧𑀞𑀫𑀁 𑀢𑀸𑀯 𑀲𑀼𑀕𑀢𑀦𑁆𑀢𑁆𑀬𑀸𑀤𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀕𑀼𑀡𑁂𑀳𑀺 𑀣𑁄𑀫𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀦𑁆𑀤𑀺𑀢𑀼𑀓𑀸𑀫𑁂𑀦 𑀲𑀼𑀕𑀢𑀦𑁆𑀢𑀺𑀆𑀤𑀺 𑀕𑀸𑀣𑀸𑀤𑁆𑀯𑀬𑀁 𑀆𑀭𑀤𑁆𑀥𑀁. 𑀅𑀬𑀁 𑀧𑀦 𑀲𑀩𑁆𑀩𑀧𑀸𑀤𑀸𑀤𑀺𑀬𑀫𑀓𑀧𑀣𑁆𑀬𑀸 𑀯𑀢𑁆𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀬𑀫𑀓𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀓𑀺𑀮𑀺𑀝𑁆𑀞𑀤𑁄𑀲𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀬𑀁 𑀓𑀺𑀮𑀺𑀝𑁆𑀞𑀧𑀤𑀁 𑀫𑀦𑁆𑀤𑀸, 𑀪𑀺𑀥𑁂𑀬𑁆𑀬𑀁 𑀬𑀫𑀓𑀸𑀤𑀺𑀓𑀁;

𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀯, 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀭𑀻𑀬𑀢𑀻’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀢𑁆𑀢𑀸𑀬𑁂𑀯 𑀧𑀲𑀸𑀤𑀕𑀼𑀡 𑀲𑀗𑁆𑀔𑀸𑀢𑁂𑀦 𑀲𑀤𑁆𑀤𑀸𑀮𑀗𑁆𑀓𑀸𑀭𑁂𑀦 𑀲𑀁𑀬𑀼𑀢𑁆𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀬𑀫𑀓𑀁 𑀲𑀼𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀭𑀸𑀲𑀼 𑀬𑀫𑀓𑀕𑀸𑀣𑀸𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦𑀸 𑀮𑀗𑁆𑀓𑀸𑀭𑁂 𑁋

‘‘𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁, 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁;

𑀧𑀲𑀸𑀤𑀕𑀼𑀡𑀲𑀁𑀬𑀼𑀢𑁆𑀢𑀁, 𑀬𑀫𑀓𑀁 𑀫𑀢𑀫𑁂𑀤𑀺𑀲’’𑀦𑁆𑀢𑀺.

𑀢𑀢𑁆𑀣 𑀲𑀼𑀕𑀢𑀦𑁆𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀕𑀢𑀢𑁆𑀢𑀸 𑀘 𑀲𑀼𑀕𑀢𑁄, 𑀲𑁄 𑀳𑀺 𑀲𑁄𑀪𑀦𑀁 𑀅𑀭𑀺𑀬𑀫𑀕𑁆𑀕𑁂𑀦 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀧𑀼𑀩𑁆𑀩𑁄 𑀕𑀫𑀼𑀥𑀸𑀢𑀼 𑀢. 𑀲𑀼𑀲𑀤𑁆𑀤𑁄 𑀲𑁄𑀪𑀦𑀢𑁆𑀣𑁄. 𑀅𑀭𑀺𑀬𑀫𑀕𑁆𑀕𑀕𑀫𑀦𑁂𑀦 𑀧𑀭𑀺𑀲𑀼𑀤𑁆𑀥𑀁 𑀅𑀦𑀯𑀚𑁆𑀚𑀁 𑀔𑁂𑀫𑀁 𑀤𑀺𑀲𑀁 𑀅𑀲𑀚𑁆𑀚𑀫𑀸𑀦𑁄 𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀕𑀫𑀦𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀲𑁆𑀲 𑀦𑀺𑀧𑁆𑀨𑀸𑀤 𑀦𑀢𑁄 𑀲𑁄𑀪𑀦𑀁 𑀓𑀸𑀬𑁂𑀦 𑀕𑀫𑀦𑀁 𑀓𑀸𑀬𑀕𑀫𑀦𑀁 𑀦𑀸𑀫. 𑀲𑀬𑀫𑁆𑀪𑀽 𑀜𑀸𑀡𑁂𑀦 𑀧𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑀢𑁄 𑀜𑀸𑀡𑁂𑀦 𑀕𑀫𑀦𑀁 𑀜𑀸𑀡𑀕𑀫𑀦𑀁 𑀦𑀸𑀫. 𑀇𑀥 𑀧𑀦 𑀜𑀸𑀡𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 𑀧𑀦 ‘‘𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 ¶ 𑀅𑀢𑁆𑀣𑁄. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀘𑁂𑀲 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀲𑀤𑁆𑀤𑁄 𑀲𑀫𑁆𑀫𑀸𑀲𑀤𑁆𑀤𑀢𑁆𑀣𑁄. 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀫𑀸 𑀆𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀩𑁄𑀥𑀺𑀫𑀡𑁆𑀟𑀸 𑀢𑀸𑀯 𑀲𑀫𑀢𑀺𑀁𑀲𑀧𑀸𑀭𑀫𑀺𑀧𑀽𑀭𑀺𑀓𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀜𑁆𑀘𑀸𑀢𑀺 𑀇𑀫𑁂 𑀘𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀦 𑀲𑀼𑀕𑀢𑀦𑁆𑀢𑀺 𑀲𑀫𑁆𑀫𑀸 𑀕𑀤𑀢𑁆𑀢𑀸 𑀲𑀼𑀕𑀢𑁄. 𑀲𑁄 𑀳𑀺 𑀲𑀫𑁆𑀫𑀸 𑀕𑀤𑀢𑀺 𑀪𑀸𑀲𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀧𑀼𑀩𑁆𑀩𑀕𑀤𑀥𑀸𑀢𑀼 𑀪𑀸𑀲𑀸𑀬𑀁 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁 𑀯𑀸, 𑀢, 𑀤𑀲𑁆𑀲 𑀢𑁄. 𑀙𑀲𑀼 𑀯𑀸𑀘𑀸𑀲𑀼 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀫𑁂𑀯 𑀤𑁆𑀯𑀺𑀯𑀸𑀘𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀧𑀸𑀴𑀺𑀬𑀁 𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑁂 𑁋

. ‘‘𑀭𑀸𑀚𑀓𑀼𑀫𑀸𑀭 𑀬𑀁 𑀢𑀣𑀸𑀕𑀢𑁄 𑀢𑀁 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑁨. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸. 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑁩. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀢𑁆𑀭𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬. 𑁪. 𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑁫. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑁬. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸 ¶ . 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺.

𑀏𑀢𑁆𑀣 𑀧𑀸𑀴𑀺𑀬𑀁 𑀧𑀦𑁂𑀲𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀳𑁂𑀲𑀸 𑀅𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀢𑁆𑀣 𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀅𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘𑀸𑀢𑀺 𑀙𑀩𑁆𑀩𑀺𑀥𑀸 𑀳𑁄𑀢𑀻𑀢𑀺. 𑀢𑀢𑁆𑀣 𑀅𑀘𑁄𑀭𑀁𑀬𑁂𑀯 𑀘𑁄𑀭𑁄 𑀅𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀧𑀞𑀫𑀯𑀸𑀘𑀸 𑀦𑀸𑀫. 𑀘𑁄𑀭𑀁𑀬𑁂𑀯 𑀘𑁄𑀭𑁄 𑀅𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀤𑀼𑀢𑀺𑀬𑀯𑀸𑀘𑀸 𑀦𑀸𑀫. 𑀅𑀓𑀢𑀧𑀼𑀜𑁆𑀜𑀢𑀸𑀬 𑀤𑀼𑀕𑁆𑀕𑀢𑁄 𑀤𑀼𑀩𑁆𑀩𑀡𑁆𑀡𑁄 𑀅𑀧𑁆𑀧𑁂𑀲𑀓𑁆𑀔𑁄, 𑀇𑀥 𑀧𑀦 𑀞𑀢𑁆𑀯𑀸𑀧𑀺 𑀧𑀼𑀦 𑀧𑀼𑀜𑁆𑀜𑀁 𑀦 𑀓𑀭𑁄𑀢𑀺, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀓𑀣𑀁 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁂𑀦 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁂𑀦 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀸𑀭𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀢𑀢𑀺𑀬𑀯𑀸𑀘𑀸 𑀦𑀸𑀫. 𑀏𑀓𑁄 𑀥𑀼𑀢𑁆𑀢𑁄 𑀆𑀳-𑀫𑀬𑁆𑀳𑀁 𑀪𑁄 𑀫𑀸𑀢𑀼 𑀫𑀬𑀺 𑀓𑀼𑀘𑁆𑀙𑀺𑀕𑀢𑁂 𑀓𑀧𑀺𑀝𑁆𑀞𑀨𑀮𑀤𑁄𑀳𑀴𑁄 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀁 𑀓𑀧𑀺𑀝𑁆𑀞𑀳𑀸𑀭𑀓𑀁 𑀅𑀮𑀪𑀫𑀸𑀦𑀸 𑀫𑀁𑀬𑁂𑀯 𑀧𑁂𑀲𑁂𑀲𑀺. 𑀅𑀳𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀫𑀼𑀕𑁆𑀕𑀭𑀁 𑀯𑀺𑀬 𑀭𑀼𑀓𑁆𑀔𑀲𑁆𑀲 𑀉𑀧𑀭𑀺 𑀔𑀺𑀧𑀺𑀁. 𑀅𑀣 𑀲𑀸𑀔𑀢𑁄 𑀲𑀸𑀔𑀁 𑀯𑀺𑀘𑀭𑀦𑁆𑀢𑁄 𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀑𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀆𑀳𑀭𑀺𑀢𑁆𑀯𑀸 𑀑𑀭𑀼𑀬𑁆𑀳 𑀫𑀸𑀢𑀼 𑀲𑀦𑁆𑀢𑀺𑀓𑁂 𑀕𑀦𑁆𑀢𑁆𑀯𑀸 𑀨𑀮𑀸𑀦𑀺 𑀫𑀸𑀢𑀼𑀬𑀸 𑀅𑀤𑀸𑀲𑀺𑀁. 𑀢𑀸𑀦𑀺 𑀧𑀦 𑀫𑀳𑀦𑁆𑀢𑀸𑀦𑀺 𑀳𑁄𑀦𑁆𑀢𑀺 𑀘𑀸𑀝𑀺𑀧𑁆𑀧 𑀫𑀸𑀡𑀸𑀦𑀺. 𑀢𑀢𑁄 𑀫𑁂 𑀫𑀸𑀢𑀭𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀸𑀬 𑀲𑀫𑀲𑀝𑁆𑀞𑀺𑀨𑀮𑀸𑀦𑀺 𑀔𑀸𑀤𑀺𑀢𑀸𑀦𑀻𑀢𑀺. 𑀏𑀯𑀫𑀸𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀘𑀢𑀼𑀢𑁆𑀣𑀯𑀸𑀘𑀸 𑀦𑀸𑀫. 𑀆𑀫𑀺𑀲𑀳𑁂𑀢𑀼 𑀘𑀸𑀝𑀼𑀓𑀫𑁆𑀬𑀢𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀭𑁂𑀲𑀁 𑀣𑁄𑀫𑀦𑀸 𑀯𑀸𑀘𑀸 𑀘𑁂𑀯 𑀭𑀸𑀚𑀓𑀣𑀁 𑀘𑁄𑀭𑀓𑀣𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀓𑀣𑀸 𑀘 𑀧𑀜𑁆𑀘𑀫𑀯𑀸𑀘𑀸 𑀦𑀸𑀫. 𑀅𑀭𑀺𑀬𑀲𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀸 𑀥𑀫𑁆𑀫𑀓𑀣𑀸 𑀙𑀝𑁆𑀞𑀫𑀯𑀸𑀘𑀸 𑀦𑀸𑀫. 𑀢𑀁 𑀧𑀦 𑀯𑀲𑁆𑀲𑀲𑀢𑀫𑁆𑀧𑀺 𑀲𑀼𑀡𑀦𑁆𑀢𑀸 𑀧𑀡𑁆𑀟𑀺𑀢𑀸 𑀦𑁂𑀯 𑀢𑀺𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺 ¶ . 𑀢𑀸𑀲𑀼 𑀧𑀦 𑀪𑀕𑀯𑀸 𑀢𑀢𑀺𑀬𑀙𑀝𑁆𑀞𑀫𑀸 𑀤𑁆𑀯𑀺𑀯𑀸𑀘𑀸𑀏𑀯 𑀪𑀸𑀲𑀢𑀺. 𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀸𑀬𑁂𑀯 𑀤𑁆𑀯𑀺𑀯𑀸𑀘𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀅𑀬𑀁 𑀢𑀤𑀝𑁆𑀞𑀓𑀣𑀸𑀬𑀁 𑀆𑀕𑀢𑁄 𑀲𑀗𑁆𑀔𑁂𑀧𑀦𑀬𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀻𑀝𑀻𑀓𑀸𑀬𑀜𑁆𑀘 𑀢𑀤𑀜𑁆𑀜𑀸𑀓𑀸𑀭𑁂𑀦 𑀯𑀡𑁆𑀡𑀺𑀢𑁄. 𑀢𑀸𑀲𑀼 𑀧𑀦 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀕𑀳𑀕𑀸𑀣𑀸 𑁋

‘‘𑀬𑁄 𑀪𑀽𑀢𑀫𑀢𑁆𑀣𑀲𑀁𑀳𑀻𑀢𑀁, 𑀧𑀭𑁂𑀲𑀫𑀧𑁆𑀧𑀺𑀬𑀸 𑀯𑀸𑀘𑀁;

𑀪𑀽𑀢𑀫𑀢𑁆𑀣𑀲𑀳𑀻𑀢𑀜𑁆𑀘, 𑀧𑀭𑁂𑀲𑀁 𑀧𑀺𑀬𑀯𑀸𑀘𑀦𑁆𑀢𑀺;

𑀤𑁆𑀯𑀺𑀯𑀸𑀘𑀁 𑀬𑀼𑀢𑁆𑀢𑀝𑁆𑀞𑀸𑀦𑁂𑀯, 𑀯𑀤𑀢𑀻𑀢𑀺 𑀲𑀼𑀕𑀢𑁄𑀢𑀺;

𑀯𑀼𑀘𑁆𑀘𑀢𑀻 𑀘 𑀤𑀓𑀸𑀭𑀲𑁆𑀲, 𑀓𑀢𑁆𑀯𑀸 𑀢𑀓𑀸𑀭𑀯𑀺𑀜𑁆𑀜𑀼𑀦𑀸’’𑀢𑀺.

𑀲𑁂𑀝𑁆𑀞𑀦𑁆𑀢𑀺 𑀕𑀼𑀡𑀫𑀳𑀦𑁆𑀢𑀢𑁆𑀢𑀸 𑀧𑀲𑀢𑁆𑀣𑀢𑀭𑀁. 𑀲𑁄 𑀳𑀺 𑀧𑀲𑀢𑁆𑀣𑀸𑀦𑀁 𑀯𑀺𑀲𑁂𑀲𑁂𑀦 𑀧𑀲𑀢𑁆𑀣𑁄𑀢𑀺 𑀲𑁂𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀲𑀢𑁆𑀣𑀧𑀤𑀁, 𑀯𑀺𑀲𑁂𑀲𑀢𑀤𑁆𑀥𑀺𑀢𑁂 𑀇𑀝𑁆𑀞𑀧𑀘𑁆𑀘𑀬𑁄. 𑀧𑀲𑀢𑁆𑀣𑀲𑀤𑁆𑀤𑀲𑁆𑀲 𑀲𑁄, 𑀧𑀲𑀢𑁆𑀣𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑀸𑀤𑀻𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺 𑀕𑀼𑀡𑁂𑀳𑀺 𑀯𑀺𑀲𑁂𑀲𑁂𑀦 𑀧𑀲𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀏𑀲𑀺𑀁 𑀕𑀯𑁂𑀲𑀺𑀦𑁆𑀢𑀺 𑀯𑀸 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄. 𑀲𑀼𑀧𑀼𑀩𑁆𑀩𑁄𑀏𑀲 𑀕𑀯𑁂𑀲𑀦𑁂 𑀢. 𑀢𑀲𑁆𑀲 𑀭𑀝𑁆𑀞𑁄. 𑀲𑀼𑀲𑀤𑁆𑀤𑁄 𑀲𑀼𑀦𑁆𑀤𑀭𑀢𑁆𑀣𑁄. 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀏𑀲𑀺𑀢𑀩𑁆𑀩𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀯𑀸 𑀲𑁂𑀝𑁆𑀞𑁄. 𑀲𑀦𑁆𑀢𑀲𑀤𑁆𑀤𑀽𑀧𑀧𑀤𑁄 𑀇𑀲 𑀕𑀯𑁂𑀲𑀦𑁂 𑀢, 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄, 𑀇𑀓𑀸𑀭𑀲𑁆𑀲𑁂, 𑀢𑀲𑁆𑀲 𑀝𑁆𑀞𑁄. 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀇𑀘𑁆𑀙𑀺𑀬𑀢𑀺 𑀓𑀦𑁆𑀢𑀺𑀬 𑀢𑀻𑀢𑀺 𑀯𑀸 𑀲𑁂𑀝𑁆𑀞𑁄. 𑀲𑀦𑁆𑀢𑀲𑀤𑁆𑀤𑀽𑀧𑀧𑀤𑁄 𑀇𑀲𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼 𑀢. 𑀅𑀣 𑀯𑀸 𑀲𑀦𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀢𑀻𑀢𑀺 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄. 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀲𑀼𑀦𑁆𑀤𑀭𑁂 𑀲𑀢𑀺𑀧𑀝𑁆𑀞𑀸𑀦𑀸 𑀤𑀺𑀪𑁂𑀤𑁂 𑀥𑀫𑁆𑀫𑁂 𑀏𑀲𑁂𑀢𑀺 𑀩𑀼𑀤𑁆𑀥𑁂𑀢𑀻𑀢𑀺 𑀯𑀸 𑀲𑁂𑀝𑁆𑀞𑁄. 𑀳𑁂𑀢𑀼 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀲𑀼𑀧𑀼𑀩𑁆𑀩𑀏𑀲𑀥𑀸𑀢𑀼 𑀩𑀼𑀤𑁆𑀥𑀺𑀬𑀁 𑀢. 𑀢𑀁 𑀲𑁂𑀝𑁆𑀞𑀁.

𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀚𑀳𑀦𑁆𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀓𑀼𑀘𑁆𑀙𑀺𑀢𑀁 𑀧𑀸𑀧𑀥𑀫𑁆𑀫𑀁 𑀲𑀮𑀬𑀢𑀺 𑀘𑀮𑀬𑀢𑀺 ¶ 𑀓𑀫𑁆𑀧𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀓𑀼𑀲𑀮𑀁, 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀁 𑀮𑀩𑁆𑀪𑀢𑀺. 𑀓𑀼𑀧𑀼𑀩𑁆𑀩𑁄 𑀲𑀮𑀥𑀸𑀢𑀼 𑀅. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀸𑀧𑀥𑀫𑁆𑀫𑀁 𑀲𑀮𑀬𑀢𑀺 𑀘𑀮𑀬𑀢𑀺, 𑀫𑀳𑀕𑁆𑀕𑀢 𑀓𑀼𑀲𑀮𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀲𑀮𑀬𑀢𑀺 𑀓𑀫𑁆𑀧𑁂𑀢𑀺, 𑀮𑁄𑀓𑀼𑀢𑁆𑀢𑀭 𑀓𑀼𑀲𑀮𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀲𑀮𑀬𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀓𑀼𑀘𑁆𑀙𑀺𑀢𑀁 𑀅𑀧𑀸𑀬𑀤𑁆𑀯𑀸𑀭𑀁 𑀲𑀮𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀧𑀺𑀤𑀳𑀦𑁆𑀢𑀺 𑀲𑀸𑀥𑀯𑁄 𑀏𑀢𑁂𑀦𑀸𑀢𑀺 𑀓𑀼𑀲𑀮𑀁, 𑀓𑀭𑀡𑀲𑀸𑀥𑀦𑁄𑀬𑀁. 𑀇𑀥 𑀧𑀦 𑀚𑀳𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀪𑀽𑀫𑀓𑀓𑀼𑀲𑀮𑀫𑁂𑀯𑀸𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀦 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀯𑁄𑀤𑀸𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭 𑀧𑀤𑀝𑁆𑀞𑀸𑀦𑀁. 𑀦 𑀓𑀼𑀲𑀮𑀁 𑀅𑀓𑀼𑀲𑀮𑀁, 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬 𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀓𑀼𑀲𑀮𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓 𑀮𑀓𑁆𑀔𑀡𑀁 𑀯𑀸, 𑀅𑀦𑀢𑁆𑀣𑀚𑀦𑀦𑀭𑀲𑀁, 𑀅𑀦𑀺𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸 𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀓𑀼𑀲𑀮𑀁 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀁𑀓𑀼𑀲𑀮𑀁. 𑀢𑀁 𑀧𑀦 𑀧𑀤𑀁 𑀚𑀳𑀦𑁆𑀢𑀺𑀧𑀤𑁂 𑀓𑀫𑁆𑀫𑀁.

𑀚𑀳𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀚𑀳𑀦𑁆𑀢𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀚𑀳𑀢𑀺 𑀧𑀚𑀳𑀢𑀺, 𑀨𑀮𑀜𑀸𑀡𑁂𑀦 𑀚𑀳𑀺𑀁 𑀧𑀚𑀳𑀺𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀦𑁆𑀢𑀺 𑀯𑀸 𑀚𑀳𑁄, 𑀩𑀼𑀤𑁆𑀥𑁄. 𑀳𑀸𑀥𑀸𑀢𑀼 𑀘𑀸𑀕𑁂 𑀅. 𑀓𑀺𑀜𑁆𑀘𑀸𑀧𑀺 𑀧𑀦𑁂𑀢𑁆𑀣 𑀓𑀼𑀲𑀮𑀁 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀥𑀫𑁆𑀫𑁂 𑀦 𑀯𑀼𑀢𑁆𑀢𑀁, 𑀯𑀝𑁆𑀝𑀫𑀽𑀮𑀪𑀽𑀢𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀓𑀺𑀮𑁂𑀲𑁂 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕 𑀜𑀸𑀡𑁂𑀦 𑀚𑀳𑀺𑀢𑁂 𑀮𑁄𑀓𑀺𑀬𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀫𑀽𑀮𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀬 𑀅𑀪𑀸𑀯𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀁𑀲𑀸𑀭𑁂 𑀧𑀼𑀦 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀫𑀽𑀮𑀪𑀽𑀢𑁂 𑀓𑀺𑀮𑁂𑀲𑁂 𑀚𑀳𑀺𑀢𑁂 𑀨𑀮𑀽𑀧𑀘𑀸𑀭𑁂𑀦 𑀓𑀼𑀲𑀮𑀫𑁆𑀧𑀺 𑀚𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀭𑀽𑀧𑀁 𑀪𑀺𑀓𑁆𑀔𑀯𑁂 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣𑀸𑀢𑀺𑀆𑀤𑀻𑀲𑀼 𑀯𑀺𑀬 ¶ . 𑀅𑀭𑀳𑀦𑁆𑀢𑁂𑀦 𑀳𑀺 𑀅𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀓𑀢𑀫𑁆𑀧𑀺 𑀓𑀼𑀲𑀮𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀓𑁆𑀭𑀺𑀬𑀸𑀢𑀺 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑀺 𑀦𑀺𑀤𑀸𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀔𑀻𑀡𑀸𑀲𑀯𑁂𑀦 𑀳𑀺 𑀓𑀢𑀁 𑀓𑀫𑁆𑀫𑀁 𑀦𑁂𑀯 𑀓𑀼𑀲𑀮𑀁 𑀳𑁄𑀢𑀺 𑀦𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀳𑀼𑀢𑁆𑀯𑀸 𑀓𑁆𑀭𑀺𑀬𑀫𑀢𑁆𑀢𑁂 𑀢𑀺𑀝𑁆𑀞𑀢𑀻’’𑀢𑀺.

𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀘 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀢𑁂𑀦 𑀢𑀁 𑀪𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑁂𑀦 𑀯𑀼𑀢𑁆𑀢𑀁 𑀘𑀽𑀴𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺.

𑀅𑀫𑀢𑀦𑁆𑀢𑀺 𑀫𑀭𑀡𑀯𑀺𑀭𑀳𑀺𑀢𑀁. 𑀲𑁄 𑀚𑀺𑀦𑁄 𑀳𑀺 𑀦 𑀫𑀢𑁄 𑀅𑀫𑀢𑁄, 𑀫𑀭𑀡𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀧𑀼𑀦 𑀫𑀭𑀡𑀢𑁄 𑀯𑀺𑀭𑀳𑀺𑀢𑁄𑀢𑀺 𑀯𑀸 𑀅𑀫𑀢𑁄. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀥𑀺𑀕𑀢𑁂 𑀦𑀢𑁆𑀣𑀺 𑀫𑀢𑀁 𑀫𑀭𑀡𑀁 𑀬𑀲𑁆𑀲 𑀚𑀺𑀦𑀲𑁆𑀲𑀸𑀢𑀺 𑀅𑀫𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀚𑀺𑀦𑁂𑀦 𑀳𑀺 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀁 𑀅𑀚𑀺𑀢𑁄𑀧𑀺 𑀓𑀺𑀮𑁂𑀲𑀫𑀸𑀭𑀁 𑀚𑀬𑀺𑀢𑁆𑀯𑀸 𑀢𑁂𑀲𑀁 𑀅𑀯𑀲𑁆𑀲𑀁 𑀚𑀺𑀬𑀫𑀸𑀦𑀢𑁆𑀢𑀸 𑀨𑀮𑀽𑀧𑀘𑀸𑀭𑁂𑀦 𑀅𑀫𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀦 𑀅𑀫𑀢𑀦𑁆𑀢𑀺 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑀦𑁆𑀦𑀸𑀕𑀢𑀁. 𑀦𑀢𑁆𑀣𑀺 𑀫𑀢𑀁 𑀫𑀭𑀡𑀁 𑀏𑀢𑁆𑀣𑀸𑀢𑀺 𑀅𑀫𑀢𑀁, 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀦 𑀲𑀦𑁆𑀢𑀺𑀮𑀓𑁆𑀔𑀡𑀁, 𑀅𑀘𑁆𑀘𑀼𑀢𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀺𑀲𑁆𑀲𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀧𑀤𑀝𑁆𑀞𑀸𑀦𑀁 𑀦 𑀮𑀩𑁆𑀪𑀢𑀺.

𑀯𑀼𑀢𑁆𑀢𑀜𑁆𑀳𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 ‘‘𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀫𑀢𑁄, 𑀚𑀺𑀦𑁄. 𑀲𑀤𑁆𑀥𑀸𑀤𑀺𑀢𑁄 𑀡𑀸𑀢𑀺 𑀲𑀼𑀢𑁆𑀢𑁂𑀦 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡𑀧𑀘𑁆𑀘𑀬𑁄. 𑀲𑀤𑁆𑀥𑁄 𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀯𑀺𑀬 ¶ . 𑀅𑀲𑁆𑀲 𑀚𑀺𑀦𑀲𑁆𑀲 𑀘𑀢𑀼𑀫𑀕𑁆𑀕𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀢𑀁 𑀅𑀫𑀢𑀁.

𑀲𑀦𑁆𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑁂𑀳𑀺 𑀘 𑀯𑀝𑁆𑀝𑀤𑀼𑀓𑁆𑀔𑁂𑀳𑀺 𑀘 𑀲𑀼𑀯𑀽𑀧𑀲𑀦𑁆𑀢𑀁. 𑀲𑁄 𑀳𑀺 𑀩𑀼𑀤𑁆𑀥𑁄 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀯𑀝𑁆𑀝𑀤𑀼𑀓𑁆𑀔𑁂𑀳𑀺 𑀲𑀫𑀺𑀢𑁆𑀣 𑀯𑀽𑀧𑀲𑀫𑀺𑀢𑁆𑀣𑀸𑀢𑀺 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀥𑀸𑀢𑀼 𑀉𑀧𑀲𑀫𑁂 𑀢. 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑀁 𑀢𑀧𑀘𑁆𑀘𑀬𑀲𑁆𑀲𑀦𑁆𑀢𑁄𑀆𑀤𑁂𑀲𑀁 𑀓𑀢𑁆𑀯𑀸 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀲𑀸𑀭𑀯𑀝𑁆𑀝𑁂 𑀤𑀭𑀣𑀓𑀸𑀭𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀫𑀡𑁆𑀟𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀲𑀻𑀢𑀺𑀪𑀽𑀢𑁄 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀲𑀦𑁆𑀢𑀁.

𑀅𑀲𑀫𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑀁, 𑀲𑁄 𑀳𑀺 𑀩𑀼𑀤𑁆𑀥𑁄 𑀦𑀢𑁆𑀣𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁄 𑀲𑀤𑀺𑀲𑁄 𑀏𑀢𑀲𑁆𑀲𑀸𑀢𑀺 𑀅𑀲𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀲𑀻𑀮 𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑁂𑀳𑀺 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀯𑀸 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀳𑀺 𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢 𑀩𑀸𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄 𑀘 𑀲𑀩𑁆𑀩𑀸𑀓𑀸𑀭𑁂𑀳𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡 𑀭𑀢𑀦𑀲𑀫𑀺𑀤𑁆𑀥𑁄 𑀥𑀫𑁆𑀫𑀓𑀸𑀬𑁄 𑀘 𑀧𑀼𑀜𑁆𑀜𑀫𑀳𑀢𑁆𑀢𑀣𑀸𑀫𑀫𑀳𑀢𑁆𑀢 𑀇𑀤𑁆𑀥𑀺𑀫𑀳𑀢𑁆𑀢𑀬𑀲𑀫𑀳𑀢𑁆𑀢𑀧𑀜𑁆𑀜𑀸𑀫𑀳𑀢𑁆𑀢𑀸𑀤𑀺𑀕𑀼𑀡𑁂𑀳𑀺 𑀘 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀫𑀸 𑀪𑀕𑀯𑀸 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀫𑁄 𑀅𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀫𑀁 𑀤𑀤𑀦𑁆𑀢𑀺 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦 𑀥𑀫𑁆𑀫𑀁 𑀯𑁂𑀦𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 𑀤𑁂𑀲𑀦𑀸𑀜𑀸𑀡𑁂𑀦 𑀤𑀸𑀬𑀓𑀁. 𑀏𑀢𑁆𑀣 𑀘 𑀅𑀲𑀫𑀦𑁆𑀢𑀺 𑀦𑀢𑁆𑀣𑀺 𑀏𑀢𑁆𑀣 𑀏𑀢𑁂𑀲𑀁 𑀯𑀸 𑀲𑀫𑁄 𑀲𑀤𑀺𑀲𑁄 𑀮𑁄𑀓𑀺𑀬𑀥𑀫𑁆𑀫𑁄𑀢𑀺 𑀅𑀲𑀫𑁄, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀁 𑀮𑀩𑁆𑀪𑀢𑀺. 𑀅𑀣 𑀯𑀸 𑀅𑀲𑀫𑀦𑁆𑀢𑀺 𑀅𑀜𑁆𑀜𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀪𑀸𑀯𑀢𑁄 𑀘𑀢𑀼𑀩𑁆𑀩𑀺𑀥𑁂𑀦 𑀅𑀭𑀺𑀬 𑀫𑀕𑁆𑀕𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀤𑀤𑀦𑁆𑀢𑀺𑀧𑀤𑁂𑀦 ¶ 𑀓𑀫𑁆𑀫𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀤𑀤𑀸𑀢𑀻𑀢𑀺 𑀤𑀤𑁄, 𑀩𑀼𑀤𑁆𑀥𑁄. 𑀤𑀸𑀥𑀸𑀢𑀼 𑀅, 𑀲𑁄 𑀓𑁂𑀦𑀘𑀺 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀫𑀁 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀫𑀳𑀸𑀓𑀭𑀼𑀡𑀸𑀧𑁆𑀧𑀥𑀸𑀦𑁂𑀦 𑀅𑀫𑀢𑀸𑀥𑀺𑀕𑀫𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀤𑁂𑀲𑀦𑀸𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 𑀤𑀸𑀢𑀸𑀢𑀺 𑀅𑀢𑁆𑀣𑁄. 𑀢𑀁 𑀅𑀲𑀫𑀁 𑀤𑀤𑀁.

(𑀔) 𑀤𑀼𑀢𑀺𑀬𑀕𑀸𑀣𑀸𑀬𑀁 𑀧𑀦 𑀲𑀭𑀡𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑁄 𑀧𑀭𑀸𑀬𑀡𑁄 𑀮𑁂𑀡𑁄 𑀢𑀸𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀩𑀼𑀤𑁆𑀥𑁄 𑀲𑀭𑀦𑁆𑀢𑀺 𑀧𑀝𑀺𑀲𑀭𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀮𑁄𑀓𑀸𑀢𑀺 𑀲𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀥𑀸𑀢𑀼 𑀬𑀼. 𑀅𑀣 𑀯𑀸 𑀲𑀭𑀦𑁆𑀢𑀺 𑀑𑀲𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀮𑁄𑀓𑀸𑀢𑀺 𑀲𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀭𑀡𑀫𑀺𑀤𑀦𑁆𑀢𑀺 𑀲𑀭𑀡𑁄𑀢𑀺 𑀘. 𑀲𑀭𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀏𑀢𑁆𑀣𑀼𑀧𑀕𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀤𑁆𑀥𑀫𑁆𑀫𑀦𑁆𑀢𑀺 𑀲𑀭𑀡𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀭 𑀘𑀺𑀦𑁆𑀢𑀸𑀬𑀁 𑀬𑀼. 𑀲𑀭𑀡𑀕𑀫𑀦𑀝𑁆𑀞𑀸𑀦𑁂 𑀧𑀦 𑀲𑀭𑀢𑀺 𑀳𑀺𑀁𑀲𑀢𑀺 𑀪𑀬𑀁 𑀲𑀦𑁆𑀢𑀸𑀧𑀁 𑀤𑀼𑀓𑁆𑀔𑀁 𑀓𑀺𑀮𑁂𑀲𑀜𑁆𑀘𑀸𑀢𑀺 𑀲𑀭𑀡𑀁. 𑀭𑀢𑀦𑀢𑁆𑀢 𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀲𑀭𑀡𑀁.

𑀧𑀼𑀦 𑀲𑀭𑀡𑀁 𑀮𑁄𑀓𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑁄𑀓𑀸𑀲𑀲𑀗𑁆𑀔𑀢𑀁 𑀮𑁄𑀓𑀁 𑀲𑀭𑀦𑁆𑀢𑀁 𑀚𑀸𑀦𑀦𑁆𑀢𑀁. 𑀏𑀢𑁆𑀣 𑀳𑀺 𑀮𑁄𑀓𑀬𑀢𑀺 𑀧𑀢𑀺𑀝𑁆𑀞𑀬𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀜𑁆𑀘 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀲𑀢𑁆𑀢 𑀮𑁄𑀓𑁄 𑀮𑀩𑁆𑀪𑀢𑀺. 𑀮𑁄𑀓𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀡. 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀲𑀗𑁆𑀔𑀸𑀭𑀮𑁄𑀓𑁄. 𑀮𑀼𑀚𑀥𑀸𑀢𑀼𑀡. 𑀮𑁄𑀓𑀺𑀬𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀤𑀺𑀲𑁆𑀲𑀢𑀻𑀢𑀺 𑀮𑁄𑀓𑁄, 𑀮𑁄𑀓𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀺𑀬𑀦𑁆𑀢𑀺 𑀏𑀢𑁆𑀣 𑀯𑀸 𑀚𑀗𑁆𑀕𑀫𑀸 𑀘 𑀣𑀸𑀯𑀭𑀸 𑀘𑀸𑀢𑀺 𑀮𑁄𑀓𑁄, 𑀘𑀓𑁆𑀓𑀯𑀸𑀴𑀲𑀗𑁆𑀔𑀢𑁄 𑀑𑀓𑀸𑀲𑀮𑁄𑀓𑁄 𑀮𑀩𑁆𑀪𑀢𑀺. 𑀮𑁄𑀓𑀥𑀸𑀢𑀼𑀡. 𑀏𑀢𑁆𑀣 𑀘 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑁄𑀬𑁂𑀯 𑀮𑁄𑀓𑁄 𑀲𑀢𑁆𑀢𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀢𑁆𑀢𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸 𑀭𑀝𑁆𑀞𑀺𑀢𑀺𑀓𑀸𑀢𑀺 ¶ 𑀆𑀕𑀢𑀝𑁆𑀞𑀸𑀦𑁂 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀯𑀸 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀺𑀬𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀸𑀏𑀯 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀗𑁆𑀔𑀸𑀭𑀮𑁄𑀓𑁄𑀢𑀺.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀆𑀕𑀢𑀝𑁆𑀞𑀸𑀦𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀅𑀯𑀓𑀲𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀓𑀸𑀲𑁄, 𑀲𑁄𑀬𑁂𑀯 𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲 𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀁 𑀮𑁄𑀓𑀁. 𑀲𑀭𑀢𑀺 𑀚𑀸𑀦𑀸𑀢𑀺 𑀅𑀚𑀸𑀦𑀻𑀢𑀺 𑀯𑀸 𑀲𑀭𑀡𑁄, 𑀩𑀼𑀤𑁆𑀥𑁄. 𑀲𑀭 𑀘𑀺𑀦𑁆𑀢𑀸𑀬𑀁 𑀬𑀼. 𑀮𑁄𑀓𑀁 𑀲𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑁄 𑀧𑀦 𑀲𑀢𑁆𑀢𑀮𑁄𑀓𑀁, 𑀲𑀗𑁆𑀔𑀸𑀭𑀮𑁄𑀓𑀁, 𑀑𑀓𑀸𑀲𑀮𑁄𑀓𑀁, 𑀓𑀺𑀮𑁂𑀲𑀮𑁄𑀓𑀁, 𑀪𑀯𑀮𑁄𑀓𑀁, 𑀇𑀦𑁆𑀤𑁆𑀭𑀺𑀬 𑀮𑁄𑀓𑀁, 𑀔𑀦𑁆𑀥𑀮𑁄𑀓𑀁, 𑀆𑀬𑀢𑀦𑀮𑁄𑀓𑀁 𑀥𑀸𑀢𑀼𑀮𑁄𑀓𑀜𑁆𑀘𑀸𑀢𑀺𑀆𑀤𑀺𑀫𑀦𑁂𑀓𑀮𑁄𑀓𑀁 𑀅𑀦𑀸𑀯𑀭𑀡𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀭𑀡𑀦𑁆𑀢𑀺 𑀦𑀺𑀓𑁆𑀓𑀺𑀮𑁂𑀲𑀁, 𑀓𑀺𑀮𑁂𑀲𑀲𑀗𑁆𑀔𑀸𑀢𑀭𑀡𑀯𑀺𑀭𑀳𑀺𑀢𑀁 𑀯𑀸. 𑀭𑀡𑀲𑀤𑁆𑀤𑁄 𑀘 𑀓𑀺𑀮𑁂𑀲𑁂𑀲𑀼 𑀘 𑀬𑀼𑀤𑁆𑀥𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁂 𑀘 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑁂𑀲𑀼 𑀤𑀺𑀲𑁆𑀲𑀢𑀺. 𑀢𑁂 𑀳𑀺 𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀻𑀢𑀺 𑀭𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

‘‘𑀥𑀦𑀼𑀕𑁆𑀕𑀳𑁄 𑀅𑀲𑀤𑀺𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀭𑀡𑀁 𑀓𑀢𑁆𑀯𑀸, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺.

𑀅𑀲𑀤𑀺𑀲𑀚𑀸𑀢𑀓𑁂 𑀬𑀼𑀤𑁆𑀥𑁂 𑀤𑀺𑀲𑁆𑀲𑀢𑀺. 𑀭𑀡𑀁 𑀓𑀢𑁆𑀯𑀸𑀢𑀺 𑀳𑀺 𑀬𑀼𑀤𑁆𑀥𑀁 𑀓𑀢𑁆𑀯𑀸, 𑀲𑀁𑀬𑀫𑀦𑁆𑀢𑀺 𑀲𑀁𑀬𑀢𑀁 𑀇𑀲𑀺𑀧𑀩𑁆𑀩𑀚𑁆𑀚𑀁 𑀅𑀚𑁆𑀛𑀼𑀧𑀸𑀕𑀫𑀻𑀢𑀺 𑀅𑀢𑁆𑀣𑁄. 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀭𑀡𑀁 𑀓𑀭𑁄𑀦𑁆𑀢𑁄, 𑀥𑀸𑀯𑀺𑀁𑀲𑀼 𑀢𑁂 𑀅𑀝𑁆𑀞𑀤𑀺𑀲𑀸 ¶ 𑀲𑀫𑀦𑁆𑀢𑀢𑁄𑀢𑀺 𑀙𑀤𑁆𑀤𑀦𑁆𑀢𑀚𑀸𑀢𑀓𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁂 𑀤𑀺𑀲𑁆𑀲𑀢𑀺. 𑀭𑀡𑀁 𑀓𑀭𑁄𑀦𑁆𑀢𑁄𑀢𑀺 𑀳𑀺 𑀘𑀼𑀡𑁆𑀡𑀁 𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑁄. 𑀢𑁂𑀢𑀺 𑀲𑀩𑁆𑀩𑁂 𑀅𑀝𑁆𑀞𑀲𑀳𑀲𑁆𑀲𑀦𑀸𑀕𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀓𑀺𑀮𑁂𑀲𑁂 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀭𑀡𑀦𑁆𑀢𑀺 𑀲𑀢𑁆𑀢𑁂 𑀭𑀸𑀕𑀸𑀤𑀬𑁄 𑀘𑀼𑀡𑁆𑀡𑁂𑀦𑁆𑀢𑀺 𑀧𑀻𑀴𑁂𑀦𑁆𑀢𑀻𑀢𑀺 𑀭𑀡𑀸, 𑀭𑀡𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀺 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀻𑀢𑀺 𑀯𑀸 𑀭𑀡𑀸, 𑀓𑀺𑀮𑁂𑀲𑀸. 𑀭𑀡𑀥𑀸𑀢𑀼 𑀲𑀤𑁆𑀤𑁂 𑀅. 𑀦𑀢𑁆𑀣𑀺 𑀭𑀡𑀸 𑀓𑀺𑀮𑁂𑀲𑀸 𑀏𑀢𑀲𑁆𑀲𑀸𑀢𑀺 𑀅𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀚𑀺𑀦𑀲𑁆𑀲 𑀓𑀺𑀮𑁂𑀲𑀫𑀸𑀭𑀲𑁆𑀲 𑀩𑁄𑀥𑀺𑀫𑀽𑀮𑁂 𑀚𑀺𑀬𑀫𑀸𑀦𑀢𑁆𑀢𑀸 𑀭𑀡𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀅𑀭𑀡𑀁.

𑀅𑀭𑀡𑀁 𑀓𑀭𑀦𑁆𑀢𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀭𑀡𑀲𑀗𑁆𑀔𑀢𑀓𑀺𑀮𑁂𑀲𑀲𑁆𑀲 𑀅𑀪𑀸𑀯𑀓𑀭𑀡𑀁. 𑀏𑀢𑁆𑀣 𑀘 𑀭𑀡𑀦𑁆𑀢𑀺 𑀏𑀢𑀁 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑀯𑀦𑁆𑀢𑀺 𑀏𑀢𑁂𑀲𑀁 𑀭𑀸𑀕𑀸𑀤𑀻𑀦𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀁 𑀅𑀪𑀸𑀯𑀁 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀤𑁂𑀲𑀦𑀸𑀜𑀸𑀡𑁂𑀦 𑀓𑀭𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀭𑁄𑀢𑀻𑀢𑀺 𑀓𑀭𑁄, 𑀩𑀼𑀤𑁆𑀥𑁄. 𑀢𑀁 𑀓𑀭𑀁.

𑀅𑀪𑀬𑀦𑁆𑀢𑀺 𑀚𑀸𑀢𑀺𑀪𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀩𑁆𑀪𑀬𑀁. 𑀏𑀢𑁆𑀣 𑀳𑀺 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁, 𑀜𑀸𑀡𑀪𑀬𑀁, 𑀆𑀭𑀫𑁆𑀫𑀡𑀪𑀬𑀁, 𑀑𑀢𑁆𑀢𑀧𑁆𑀧 𑀪𑀬𑀜𑁆𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀪𑀸𑀬𑀢𑀺 𑀘𑀺𑀢𑁆𑀢𑁂𑀦𑀸𑀢𑀺 𑀪𑀬𑀁, 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁. 𑀜𑀸𑀡𑁂𑀦 𑀢𑀻𑀭𑁂𑀢𑁆𑀯𑀸 𑀪𑀸𑀬𑀢𑀻𑀢𑀺 𑀪𑀬𑀁, 𑀜𑀸𑀡𑀁. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀆𑀭𑀫𑁆𑀫𑀡𑀪𑀬𑀁. 𑀪𑀸𑀬𑀢𑀺 𑀏𑀢𑁂𑀦 𑀧𑀸𑀧𑀢𑁄𑀢𑀺 𑀪𑀬𑀁, 𑀑𑀢𑁆𑀢𑀧𑁆𑀧𑀪𑀬𑀁. 𑀪𑀻𑀥𑀸𑀢𑀼 𑀪𑀬𑁂 𑀡.

𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 𑀧𑀦 𑀆𑀕𑀢𑀸𑀦𑀺 𑀚𑀸𑀢𑀺𑀪𑀬𑀁, 𑀚𑀭𑀸𑀪𑀬𑀁, 𑀩𑁆𑀬𑀸𑀥𑀺𑀪𑀬𑀁, 𑀫𑀭𑀡𑀪𑀬𑀁, 𑀭𑀸𑀚𑀪𑀬𑀁, 𑀘𑁄𑀭𑀪𑀬𑀁, 𑀅𑀕𑁆𑀕𑀺𑀪𑀬𑀁, 𑀉𑀤𑀓𑀪𑀬𑀁, 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁, 𑀧𑀭𑀸𑀦𑀼𑀯𑀸𑀤𑀪𑀬𑀁, 𑀤𑀡𑁆𑀟𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀁, 𑀊𑀫𑀺𑀪𑀬𑀁, 𑀓𑀼𑀫𑁆𑀪𑀻𑀴𑀪𑀬𑀁, 𑀆𑀯𑀝𑁆𑀝𑀪𑀬𑀁, 𑀲𑀼𑀲𑀼𑀓𑀪𑀬𑀁, 𑀆𑀚𑀻𑀯𑀺𑀓𑀪𑀬𑀁, 𑀅𑀲𑀺𑀮𑁄𑀓𑀪𑀬𑀁, 𑀧𑀭𑀺𑀲𑀬𑀲𑀸𑀭𑀚𑁆𑀚𑀪𑀬𑀁, 𑀫𑀤𑀦 𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺𑀆𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀦𑀢𑁆𑀣𑀺 𑀪𑀬𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀪𑀬𑁄, 𑀩𑀼𑀤𑁆𑀥𑁄. 𑀢𑀲𑁆𑀲 𑀪𑀬𑀸𑀦𑀁 𑀓𑀸𑀭𑀡 𑀪𑀽𑀢𑀸𑀦𑀁 ¶ 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀲𑀩𑁆𑀩𑀪𑀬𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀧𑀼𑀦 𑀅𑀪𑀬𑀁 𑀞𑀸𑀦𑀁 𑀦𑀸𑀬𑀓𑀦𑁆𑀢𑀺 𑀏𑀢𑁆𑀣 𑀅𑀪𑀬𑀦𑁆𑀢𑀺𑀧𑀤𑀁 𑀞𑀸𑀦𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀞𑀸𑀦𑀦𑁆𑀢𑀺𑀧𑀤𑀁 𑀦𑀸𑀬𑀓𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀪𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀦𑀢𑁆𑀣𑀺 𑀲𑀩𑁆𑀩𑀪𑀬𑀁 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂𑀢𑀺 𑀅𑀪𑀬𑀁, 𑀦𑀺𑀩𑁆𑀩𑀸𑀦𑀁. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥 𑀅𑀭𑀳𑀦𑁆𑀢𑀸 𑀞𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀦𑀺𑀩𑁆𑀩𑀸𑀦𑀁. 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑀸𑀬𑀓𑁄, 𑀩𑀼𑀤𑁆𑀥𑁄. 𑀦𑀻𑀥𑀸𑀢𑀼 𑀦𑀬𑀦𑁂 𑀡𑁆𑀯𑀼. 𑀲𑁄 𑀩𑀼𑀤𑁆𑀥𑁄 𑀪𑀩𑁆𑀩𑁂 𑀓𑀼𑀮𑀧𑀼𑀢𑁆𑀢𑁂 𑀫𑀕𑁆𑀕𑀸𑀥𑀺 𑀕𑀫𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀫𑀕𑁆𑀕𑀨𑀮𑀜𑀸𑀡𑀁 𑀅𑀥𑀺𑀕𑀫𑁂𑀦𑁆𑀢𑁄 𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀦𑁂𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀦𑀸𑀬𑀓𑀁.

𑀧𑀼𑀦 𑀦𑀸𑀬𑀓𑀁 𑀦𑀫𑁂𑀢𑀺 𑀦𑀸𑀬𑀓𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀦𑀸𑀬𑀓𑀦𑁆𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀢𑀻𑀢𑀺 𑀦𑀸𑀬𑀓𑁄, 𑀩𑀼𑀤𑁆𑀥𑁄. 𑀲𑁄 𑀳𑀺 𑀬𑀣𑀸 𑀦𑀸𑀯𑀺𑀓𑁄 𑀚𑀦𑁂 𑀦𑀸𑀯𑀸𑀬 𑀑𑀭𑀺𑀫𑀢𑀻𑀭𑀢𑁄 𑀧𑀸𑀭𑀺𑀫𑀢𑀻𑀭𑀁 𑀦𑁂𑀢𑀺, 𑀏𑀯𑀁 𑀲𑀢𑁆𑀢𑁂 𑀫𑀕𑁆𑀕𑀗𑁆𑀕𑀦𑀸𑀯𑀸𑀬 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦 𑀧𑀸𑀭𑀁 𑀦𑁂𑀢𑀺 𑀧𑀸𑀧𑀼𑀡𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀬𑀓𑀦𑁆𑀢𑀺 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀚𑁂𑀝𑁆𑀞𑀪𑀸𑀯𑀕𑀫𑀦𑀢𑁆𑀢𑀸 𑀦𑀸𑀬𑀓𑁄 𑀚𑁂𑀝𑁆𑀞 𑀲𑁂𑀝𑁆𑀞𑀯𑀼𑀟𑁆𑀠𑀢𑀭𑁄. 𑀲𑁄 𑀳𑀺 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀺 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀦𑀸𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀻𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡𑁆𑀯𑀼. 𑀲𑁄 𑀧𑀦 𑀇𑀥 𑀮𑁄𑀓𑁂 𑀅𑀯𑀺𑀚𑁆𑀚𑀡𑁆𑀟𑀕𑀢𑀸𑀦𑀁 𑀲𑀩𑁆𑀩𑀧𑀚𑀸𑀦𑀁 𑀧𑀞𑀫𑀢𑀭𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀤𑀸𑀮𑁂𑀢𑁆𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀚𑁂𑀝𑁆𑀞𑀯𑀼𑀟𑁆𑀠𑀢𑀭𑀪𑀸𑀯𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀦𑀸𑀬𑀓𑀁. 𑀦𑀫𑁂𑀢𑀺 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀦𑀫𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀯𑀢𑁆𑀢𑀫𑀸𑀦𑀫𑀺𑀯𑀺𑀪𑀢𑁆𑀢𑀺𑀬𑀸 𑀓𑁆𑀯𑀘𑀺𑀥𑀸𑀢𑀼𑀢𑁆𑀬𑀸𑀤𑀺𑀲𑀼𑀢𑁆𑀢𑁂𑀦 𑀏𑀆𑀤𑁂𑀲𑁄 𑀳𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀸𑀘𑁆𑀘𑀢𑁆𑀣𑀸𑀤𑀺𑀦𑀬𑁄. 𑀦𑀫𑁂𑀢𑀺𑀧𑀤𑀲𑁆𑀲 𑀆𑀔𑁆𑀬𑀸𑀢𑀧𑀤𑀢𑁆𑀢𑀸 𑀯𑀘𑀦𑀢𑁆𑀣𑁄 𑀦 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀤𑁆𑀤𑀯𑀺𑀤𑀽𑀳𑀺 𑁋

‘‘𑀭𑀼𑀴𑁆𑀳𑀻𑀔𑁆𑀬𑀸𑀢𑀁 𑀦𑀺𑀧𑀸𑀢𑀜𑁆𑀘𑀼, 𑀧𑀲𑀕𑁆𑀕𑀸𑀮𑀧𑀦𑀁 𑀢𑀣𑀸;

𑀲𑀩𑁆𑀩𑀦𑀸𑀫𑀦𑁆𑀢𑀺𑀫𑁂𑀢𑁂𑀲𑀼, 𑀦 𑀓𑀢𑁄 𑀯𑀺𑀕𑁆𑀕𑀳𑁄 𑀙𑀲𑀽’’𑀢𑀺.

𑀢𑀁 ¶ 𑀧𑀦 𑀧𑀤𑀁 𑀦𑀫𑀼𑀥𑀸𑀢𑀼𑀯𑀢𑁆𑀢𑀫𑀸𑀦𑀅𑀫𑁆𑀳𑀬𑁄𑀕𑀧𑀭𑀲𑁆𑀲𑀧𑀤𑀫𑀺𑀯𑀺𑀪𑀢𑁆𑀬𑀦𑁆𑀢𑀁 𑀆𑀔𑁆𑀬𑀸𑀢𑀧𑀤𑀁. 𑀦𑀫𑀼𑀥𑀸𑀢𑀼𑀬𑀸 𑀯𑀸𑀘𑁆𑀘𑀢𑁆𑀣𑁄 𑀦𑀫𑀦𑀓𑁆𑀭𑀺𑀬𑀸 𑀲𑀗𑁆𑀔𑀸𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀫𑀺𑀯𑀺𑀪𑀢𑁆𑀢𑀺𑀬𑀸 𑀯𑀸𑀘𑁆𑀘𑀢𑁆𑀣𑁄 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀉𑀧𑀮𑀓𑁆𑀔𑀺𑀢𑁄 𑀉𑀧𑁆𑀧𑀸𑀤 𑀯𑀦𑁆𑀢𑁄 𑀢𑀤𑀸𑀓𑀸𑀭𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀧𑀤𑀲𑀫𑀼𑀤𑀸𑀬𑀲𑁆𑀲 𑀧𑀦 𑀯𑀸𑀘𑁆𑀘𑀢𑁆𑀣𑁄 𑀓𑀢𑁆𑀢𑀼𑀓𑀫𑁆𑀫𑀪𑀸𑀯𑁂𑀲𑀼 𑀓𑀢𑁆𑀢𑀼𑀪𑀽𑀢𑁄 𑀅𑀢𑀻𑀢𑀸𑀤𑀺𑀓𑀸𑀮𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀪𑀽𑀢𑁄 𑀥𑀸𑀢𑁆𑀯𑀢𑁆𑀣 𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀯 𑀮𑀩𑁆𑀪𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀯𑀺𑀢𑁆𑀣𑀸𑀭𑁄 𑀧𑀦𑁂𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀦𑀫𑀼𑀥𑀸𑀢𑀼𑀬𑀸 𑀯𑀘𑁆𑀘𑀁 𑀲𑀼𑀕𑀢𑀸𑀤𑀺 𑀩𑀼𑀤𑁆𑀥𑀕𑀼𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀦𑁆𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀓𑀸𑀬𑀯𑀘𑀻 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑁄 𑀲𑀤𑁆𑀥𑀸𑀘𑁂𑀢𑀦𑀸𑀧𑀜𑁆𑀜𑀸𑀧𑀥𑀸𑀦𑁄 𑀓𑀼𑀲𑀮 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀤𑁆𑀯𑁂 𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀯𑀦𑁆𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀫𑀼𑀔𑁆𑀬𑁂𑀦 𑀮𑀩𑁆𑀪𑀢𑀺. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸 𑀭𑀸𑀤𑀺𑀧𑀼𑀭𑁂𑀘𑀭𑀸𑀦𑀼𑀘𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀨𑀮𑀽𑀧𑀘𑀸𑀭𑁂𑀦. 𑀤𑀺𑀝𑁆𑀞𑀥𑀫𑁆𑀫𑀺 𑀓𑀲𑀫𑁆𑀧𑀭𑀸𑀬𑀺𑀓𑀲𑀗𑁆𑀔𑀸𑀢𑀁 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀨𑀮𑀁 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀁 𑀅𑀪𑀸𑀯𑀜𑁆𑀘 𑀯𑀸 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀲𑀼𑀔𑀜𑁆𑀘 𑀓𑀸𑀭𑀡𑀽𑀧𑀘𑀸𑀭𑁂𑀦, 𑀧𑀼𑀭𑁂 𑀧𑀼𑀭𑁂 𑀯𑀦𑁆𑀤𑀦𑀸 𑀲𑀤𑀺𑀲𑁆𑀬𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦𑀲𑁆𑀲 𑀦𑀸𑀫𑀧𑀜𑁆𑀜𑀢𑁆𑀢𑀺 𑀞𑀸𑀦𑀽𑀧𑀘𑀸𑀭𑁂𑀦, 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀞𑀸𑀦𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦 𑀕𑀼𑀡𑁂𑀦 𑀮𑀓𑁆𑀔𑀺𑀢𑀁 𑀧𑀼𑀕𑁆𑀕𑀮𑀤𑀩𑁆𑀩𑀁 𑀕𑀼𑀡𑀽𑀧𑀘𑀸𑀭𑁂𑀦. 𑀉𑀓𑁆𑀓𑀝𑁆𑀞𑀫𑀚𑁆𑀛 𑀫𑀼𑀤𑀼𑀢𑁆𑀢𑀫𑀢𑁆𑀢𑀪𑀸𑀯𑁄 𑀕𑀼𑀡𑁆𑀬𑀽𑀧𑀘𑀸𑀭𑁂𑀦, 𑀅𑀯𑀬𑀯𑀪𑀽𑀢𑀸 𑀯𑀦𑁆𑀤𑀦𑀸 𑀏𑀓𑀤𑁂𑀲𑀽𑀧𑀘𑀸𑀭𑁂𑀦. 𑀲𑀫𑀽𑀳𑀪𑀽𑀢𑀸 𑀯𑀦𑁆𑀤𑀦𑀸 𑀏𑀓𑀤𑁂𑀲𑁆𑀬𑀽𑀧𑀘𑀸𑀭𑁂𑀦, 𑀧𑀼𑀩𑁆𑀩𑀧𑀼𑀩𑁆𑀩𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀻𑀧𑀽𑀧𑀘𑀸𑀭𑁂𑀦, 𑀧𑀘𑁆𑀙𑀺𑀫𑀧𑀘𑁆𑀙𑀺𑀫 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀻𑀧𑁆𑀬𑀽𑀧𑀘𑀸𑀭𑁂𑀦, 𑀧𑀡𑀸𑀫𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀽𑀢𑀸𑀦𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀩𑁆𑀬𑀸𑀧𑀸𑀭𑀪𑀸𑀯𑁄 𑀢𑀤𑁆𑀥𑀫𑁆𑀫𑀽𑀧𑀘𑀸𑀭𑁂𑀦. 𑀢𑁂𑀲𑀁 𑀏𑀯𑀁 𑀥𑀫𑁆𑀫𑀢𑀸𑀪𑀸𑀯𑁄 𑀅𑀢𑀤𑁆𑀥𑀫𑁆𑀫𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦𑀸𑀓𑀸𑀭𑁄 𑀅𑀪𑁂𑀤𑀪𑁂𑀤𑀽𑀧𑀘𑀸𑀭𑁂𑀦. 𑀯𑀦𑁆𑀤𑀦𑀲𑀢𑁆𑀢𑀺 𑀪𑁂𑀤𑀅𑀪𑁂𑀤𑀽𑀧𑀘𑀸𑀭𑁂𑀦 𑀮𑀩𑁆𑀪𑀢𑀺. 𑀫𑀺𑀯𑀺𑀪𑀢𑁆𑀢𑀺𑀬𑀸 𑀯𑀸𑀘𑁆𑀘𑀁 𑀢𑀁𑀫𑀼𑀔𑁆𑀬𑀸𑀤𑀻𑀳𑀺 𑀮𑀓𑁆𑀔𑀺𑀢𑁄 𑀓𑀢𑁆𑀢𑀼 𑀓𑁆𑀭𑀺𑀬𑀸𑀯𑀺𑀲𑁂𑀲𑁂𑀦 𑀘 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀯𑀺𑀪𑀢𑁆𑀢𑀺𑀯𑀺𑀲𑁂 𑀲𑁂𑀦 ¶ 𑀘 𑀧𑀭𑀲𑁆𑀲𑀧𑀤𑀲𑀗𑁆𑀔𑀸𑀢𑁂𑀦 𑀧𑀤𑀯𑀺𑀲𑁂𑀲𑁂𑀦 𑀘 𑀉𑀢𑁆𑀢𑀫𑀧𑀼𑀭𑀺𑀲 𑀯𑀺𑀲𑁂𑀲𑁂𑀦 𑀘 𑀅𑀫𑁆𑀳𑀬𑁄𑀕𑀯𑀺𑀲𑁂𑀲𑁂𑀦 𑀘 𑀲𑀩𑁆𑀩𑀥𑀸𑀢𑀼𑀯𑀺𑀲𑁂𑀲𑁂𑀦 𑀘 𑀏𑀓𑀯𑀘𑀦𑀯𑀺𑀲𑁂𑀲𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀺𑀲𑁂𑀲𑁂𑀦 𑀘 𑀥𑀸𑀢𑁆𑀯𑀢𑁆𑀣𑀓𑁆𑀭𑀺𑀬𑀸𑀯𑀺𑀲𑁂𑀲𑁂𑀦 𑀘 𑀅𑀮𑀺𑀗𑁆𑀕 𑀯𑀺𑀲𑁂𑀲𑁂𑀦 𑀘 𑀪𑀽𑀯𑀸𑀤𑀺𑀕𑀡 𑀯𑀺𑀲𑁂𑀲𑁂𑀦 𑀘 𑀦𑁄𑀯𑀺𑀓𑀭𑀡𑀯𑀺𑀲𑁂𑀲𑁂𑀦 𑀘 𑀪𑀸𑀯𑀓𑀫𑁆𑀫𑀓𑀢𑁆𑀢𑀽𑀲𑀼𑀓𑀢𑁆𑀢𑀼𑀯𑀺𑀲𑁂𑀲𑁂𑀦 𑀘 𑀮𑀓𑁆𑀔𑀺𑀢𑁄 𑀅𑀳𑀁𑀲𑀗𑁆𑀔𑀸𑀢𑁄 𑀔𑀦𑁆𑀥𑀲𑀗𑁆𑀔𑀢𑁄 𑀲𑀦𑁆𑀢𑀸𑀦𑁄 𑀅𑀧𑁆𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀓𑁆𑀭𑀺𑀬𑀸𑀧𑀤𑀲𑁆𑀲 𑀓𑁆𑀭𑀺𑀬𑀸𑀬 𑀧𑀥𑀸𑀦𑁂𑀦 𑀯𑀸𑀘𑀓𑀢𑁆𑀢𑀸 𑀥𑀸𑀢𑁆𑀯𑀢𑁆𑀣𑁄𑀯 𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀅𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀁 𑀪𑀽𑀯𑀸𑀤𑀺𑀕𑀡𑀚𑁄𑀢𑀓𑀸 𑀭𑀽𑀧𑀲𑀺𑀤𑁆𑀥𑀺𑀫𑀢𑁆𑀢𑀸 𑀧𑀤 𑀲𑀺𑀮𑀺𑀝𑁆𑀞𑀢𑀸 𑀮𑀩𑁆𑀪𑀢𑀺.

𑀅𑀣 𑀯𑀸 𑀬𑁄 𑀅𑀳𑀁 𑀦𑀫𑀸𑀫𑀻𑀢𑀺 𑀲𑁄 𑀦𑀫𑁂. 𑀲𑀸𑀫𑀜𑁆𑀜𑀢𑁆𑀣 𑀯𑀺𑀕𑁆𑀕𑀳𑁄𑀬𑀁. 𑀯𑀸𑀘𑁆𑀘𑀢𑁆𑀣𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀫𑀦𑀜𑁆𑀘𑁂𑀢𑁆𑀣 𑀩𑀼𑀤𑁆𑀥𑀲𑁆𑀲 𑀲𑀻𑀮𑀸𑀤𑀺𑀅𑀦𑀦𑁆𑀢𑀕𑀼𑀡𑁂𑀲𑀼 𑀦𑀺𑀦𑁆𑀦𑀧𑀩𑁆𑀪𑀸𑀭𑀢𑀸𑀯𑀲𑁂𑀦 𑀧𑀡𑀸𑀫𑀓𑁆𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸. 𑀲𑀸 𑀘 𑀯𑀦𑁆𑀤𑀦𑁂𑀬𑁆𑀬 𑀯𑀦𑁆𑀤𑀦𑀓𑀸𑀦𑀁 𑀔𑁂𑀢𑁆𑀢𑀚𑁆𑀛𑀸𑀲𑀬𑀲𑀫𑁆𑀧𑀤𑀸𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦 𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀉𑀧𑀧𑀻𑀴𑀓𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀸𑀦𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀯𑀢𑁆𑀢𑀺𑀓𑀸𑀮𑁂 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀫𑀧𑁆𑀧𑀯𑀢𑁆𑀢𑀺𑀁 𑀲𑀸𑀥𑁂𑀢𑀺. 𑀲𑀫𑁆𑀧𑀭𑀸𑀬𑁂 𑀘 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀽𑀢𑀸 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀲𑀼𑀔𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀤𑀲𑁆𑀲𑀦𑀢𑁆𑀣𑀦𑀬𑁄. 𑀦𑀫𑁂𑀢𑀺𑀇𑀫𑀺𑀦𑀸 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀸𑀤𑀺𑀕𑀼𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀢𑀺𑀯𑀺𑀥𑀸 𑀧𑀡𑀸𑀫𑀓𑀼𑀲𑀮 𑀘𑁂𑀢𑀦𑀸 𑀫𑀼𑀔𑁆𑀬𑁂𑀦 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑀦𑁂𑀦 𑀢𑀲𑁆𑀲𑀸 𑀓𑀸𑀭𑀡𑀪𑀽𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄 𑀘 𑀘𑀢𑀼𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑀦𑀯𑀫𑀔𑁂𑀢𑁆𑀢𑀜𑁆𑀘 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀁 𑀲𑀤𑁆𑀥𑀸𑀧𑀜𑁆𑀜𑀸𑀧𑀥𑀸𑀦𑀁 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀜𑁆𑀘 𑀨𑀮𑀽𑀧𑀘𑀸𑀭𑁂𑀦 𑀤𑀻𑀧𑁂𑀢𑀺. 𑀢𑀤𑁆𑀤𑀻𑀧𑀦𑁂𑀦 𑀢𑀲𑁆𑀲𑀸 𑀨𑀮𑀪𑀽𑀢𑀁 𑀤𑀺𑀝𑁆𑀞𑀥𑀫𑁆𑀫𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀜𑁆𑀘 𑀲𑀕𑁆𑀕𑀫𑁄𑀓𑁆𑀔 𑀲𑀼𑀔𑀜𑁆𑀘 𑀧𑀞𑀫𑀓𑀸𑀭𑀡𑀽𑀧𑀘𑀸𑀭𑁂𑀦 𑀧𑀓𑀸𑀲𑁂𑀢𑀺. 𑀢𑀧𑁆𑀧𑀓𑀸𑀲𑀦𑁂𑀦 𑀩𑀼𑀤𑁆𑀥𑀲𑁆𑀲 𑀧𑀡𑀸𑀫𑀸𑀭𑀳𑀪𑀸𑀯𑀁 𑀤𑀼𑀢𑀺𑀬𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀺𑀪𑀸𑀯𑁂𑀢𑀺 ¶ . 𑀢𑀁𑀯𑀺𑀪𑀸𑀯𑀦𑁂𑀦 𑀯𑀦𑁆𑀤𑀓𑀲𑁆𑀲 𑀫𑁂 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀜𑁆𑀘 𑀧𑀡𑀸𑀫𑁂 𑀢𑀩𑁆𑀩𑀪𑀸𑀯𑀜𑁆𑀘 𑀢𑀢𑀺𑀬𑀓𑀸𑀭𑀡𑀽𑀧𑀘𑀸𑀭𑁂𑀦 𑀅𑀦𑀼𑀪𑀸𑀯𑁂𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀮𑀗𑁆𑀓𑀸𑀭𑀦𑀬𑁄. 𑀦𑀫𑁂𑀢𑀺𑀯𑀸𑀘𑀓𑀧𑀤𑀲𑁆𑀲 𑀯𑀸𑀘𑁆𑀘𑀪𑀽𑀢𑀸 𑀢𑀺𑀯𑀺𑀥𑀸 𑀩𑀼𑀤𑁆𑀥𑀧𑀡𑀸𑀫𑀓𑀼𑀲𑀮𑀘𑁂𑀢𑀦𑀸 𑀲𑀫𑀝𑁆𑀞𑀸𑀬𑀻 𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀲𑀭𑀻𑀭𑀢𑁆𑀢𑀸. 𑀅𑀣 𑀯𑀸 𑀢𑀺𑀯𑀺𑀥𑀸𑀬 𑀩𑀼𑀤𑁆𑀥𑀧𑀡𑀸 𑀫𑀓𑀼𑀲𑀮𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺𑀧𑁆𑀧𑀥𑀸𑀦𑁄 𑀫𑀳𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀝𑁆𑀞𑀸𑀬𑀻𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑁂 𑀏𑀓𑀕𑁆𑀕𑀢𑁆𑀢𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑁆𑀢𑀸 𑀯𑀸. 𑀲𑁄𑀬𑁂𑀯 𑀧𑀦 𑀲𑀦𑁆𑀢𑀭𑀲𑁄 𑀦𑀸𑀫. 𑀓𑀲𑁆𑀫𑀸, 𑀩𑀼𑀤𑁆𑀥𑀧𑀡𑀸𑀫𑀘𑁂𑀢𑀦𑀸 𑀓𑀼𑀲𑀮𑀗𑁆𑀕𑁂𑀦 𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀻𑀦𑀢𑁆𑀢𑀸. 𑀩𑀼𑀤𑁆𑀥𑀦𑁆𑀢𑀺𑀧𑀸𑀞𑀲𑁂𑀲 𑀧𑀤𑀲𑁆𑀲 𑀯𑀸𑀘𑁆𑀘𑀪𑀽𑀢𑁄 𑀩𑀼𑀤𑁆𑀥𑀤𑀩𑁆𑀩𑁄 𑀆𑀭𑀫𑁆𑀫𑀡𑀯𑀺𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀢𑀲𑁆𑀲 𑀧𑀡𑀸𑀫𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀉𑀧𑀓𑀸𑀭𑀢𑁆𑀢𑀸. 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀕𑀼𑀡𑁄 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀧𑀡𑀸𑀫𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀓𑀸𑀭𑀡𑀪𑀽𑀢𑀁 𑀢𑀁 𑀲𑀫𑀝𑁆𑀞𑀸𑀬𑀻𑀪𑀸𑀯𑀁 𑀉𑀧𑀸𑀤𑀸𑀬 𑀚𑀸𑀦𑀺𑀢𑀩𑁆𑀩𑁄 𑀤𑀺𑀝𑁆𑀞𑀥𑀫𑁆𑀫𑀭𑁄𑀕𑀸 𑀤𑀺𑀅𑀦𑁆𑀢𑀭𑀸𑀬𑀸𑀪𑀸𑀯𑁄 𑀘 𑀲𑀫𑁆𑀧𑀭𑀸𑀬𑁂 𑀲𑀕𑁆𑀕𑀫𑁄𑀓𑁆𑀔𑀲𑀼𑀔𑀲𑀫𑁆𑀧𑀢𑁆𑀢𑀺 𑀘 𑀆𑀦𑀼𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀆𑀦𑀺𑀲𑀁𑀲𑀨𑀮𑀢𑁆𑀢𑀸.

𑀢𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀆𑀦𑀼𑀪𑀸𑀯𑀤𑀻𑀧𑀓𑀁 𑀧𑀤𑀁 𑀦𑀢𑁆𑀣𑀺. 𑀓𑀸𑀭𑀡𑀲𑁆𑀲 𑀧𑀦 𑀨𑀮𑁂𑀦 𑀯𑀺𑀦𑀸𑀪𑀸𑀯𑀢𑁄 𑀓𑀸𑀭𑀡𑀲𑁆𑀲 𑀨𑀮𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺. 𑀅𑀣 𑀯𑀸 𑀦𑀫𑁂𑀢𑀺𑀧𑀤𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁄 𑀆𑀦𑀼𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀯𑀺𑀪𑀽𑀢𑁄 𑀉𑀲𑁆𑀲𑀼𑀓𑁄 𑀘 𑀩𑀼𑀤𑁆𑀥𑀧𑀡𑀸𑀫𑀲𑁆𑀲 𑀆𑀦𑀺𑀲𑀁𑀲𑀧𑀚𑀸𑀦𑀦𑀸 𑀫𑀢𑀺 𑀘 𑀅𑀮𑀲𑀸𑀪𑀸𑀯𑁄 𑀘 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀘 𑀲𑀫𑀸𑀥𑀺𑀢𑁆𑀬𑀸𑀤𑀺 𑀘 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀦𑀸𑀫. 𑀮𑁄𑀫𑀳𑀁𑀲𑀸𑀤𑀺𑀪𑀸𑀯𑁄 𑀲𑀢𑁆𑀯𑀁𑀓𑀸𑀪𑀸𑀯𑁄 𑀦𑀸𑀫𑀸𑀢𑀺 𑀅𑀮𑀗𑁆𑀓𑀸𑀭 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀕𑀸𑀣𑀸𑀲𑀽𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀼𑀕𑀢𑀁 𑀲𑁄𑀪𑀦𑀕𑀢𑀁 𑀲𑀼𑀦𑁆𑀤𑀭𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀕𑀢𑀁 𑀯𑀸 𑀲𑀫𑁆𑀫𑀸 𑀕𑀢𑀁 𑀯𑀸, 𑀲𑀼𑀕𑀢𑀁 𑀲𑀫𑁆𑀫𑀸 𑀯𑀘𑀦𑀁 𑀕𑀤𑀁 𑀪𑀸𑀲𑀦𑀁, 𑀲𑁂𑀝𑁆𑀞𑀁 𑀧𑀲𑀢𑁆𑀣𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 ¶ 𑀕𑀯𑁂𑀲𑀦𑁆𑀢𑀁 𑀯𑀸 𑀲𑀦𑁆𑀢𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁 𑀯𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀺𑀢𑀁 𑀯𑀸, 𑀓𑀼𑀲𑀮𑀁𑀓𑀼𑀲𑀮𑀁 𑀓𑀼𑀲𑀮𑀁𑀅𑀓𑀼𑀲𑀮𑀁, 𑀚𑀳𑀁 𑀚𑀳𑀺𑀢𑀁, 𑀅𑀫𑀢𑀁 𑀫𑀭𑀡𑀯𑀺𑀭𑀳𑀺𑀢𑀁 𑀅𑀫𑀢𑀁 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑀦𑁆𑀦𑀸 𑀕𑀢𑀁, 𑀲𑀦𑁆𑀢𑀁 𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀁, 𑀅𑀲𑀫𑀁 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀥𑀫𑁆𑀫𑀁. 𑀤𑀤𑀁 𑀤𑀸𑀢𑀁 𑀤𑀸𑀬𑀓𑀁 𑀯𑀸, 𑀲𑀭𑀡𑀁 𑀲𑀩𑁆𑀩𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑀁. 𑀮𑁄𑀓𑀁 𑀲𑀢𑁆𑀢𑀲𑀗𑁆𑀔 𑀭𑁄𑀓𑀸𑀲𑀲𑀗𑁆𑀔𑀢𑀁 𑀢𑀺𑀮𑁄𑀓𑀁, 𑀲𑀭𑀡𑀁 𑀚𑀸𑀦𑀦𑁆𑀢𑀁, 𑀅𑀭𑀡𑀁 𑀦𑀺𑀓𑁆𑀓𑀺𑀮𑁂𑀲𑀁, 𑀓𑀺𑀮𑁂𑀲𑀲𑀗𑁆𑀔𑀸𑀢𑀭𑀡𑀯𑀺𑀭𑀳𑀺𑀢𑀁 𑀯𑀸. 𑀅𑀭𑀡𑀁 𑀲𑀢𑁆𑀢𑁂𑀲𑀼 𑀓𑀺𑀮𑁂𑀲𑀭𑀚𑀲𑁆𑀲𑀸𑀪𑀸𑀯𑀁, 𑀓𑀭𑀁 𑀤𑁂𑀲𑀦𑀸𑀜𑀸𑀡𑁂𑀦 𑀓𑀢𑀁, 𑀅𑀪𑀬𑀁 𑀦𑀺𑀩𑁆𑀪𑀬𑀁, 𑀅𑀪𑀬𑀁 𑀦𑀺𑀩𑁆𑀪𑀬𑀝𑁆𑀞𑀸𑀦𑀁 𑀦𑀺𑀩𑁆𑀩𑀸𑀦𑀤𑀺𑀲𑀁, 𑀦𑀸𑀬𑀓𑀁 𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀦𑁆𑀢𑀁, 𑀦𑀸𑀬𑀓𑀁 𑀢𑀺𑀮𑁄𑀓𑀸𑀦𑀁 𑀚𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀩𑀼𑀤𑁆𑀥𑀁 𑀲𑀓𑁆𑀓𑀘𑁆𑀘𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺.

𑀧𑀞𑀫𑀯𑀦𑁆𑀤𑀦𑀕𑀸𑀣𑀸𑀤𑁆𑀯𑀬𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀏𑀯𑀁 𑀧𑀞𑀫𑀁 𑀕𑀸𑀣𑀸𑀤𑁆𑀯𑀬𑁂𑀦 𑀩𑀼𑀤𑁆𑀥𑀲𑁆𑀲 𑀦𑀫𑀲𑁆𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑁆𑀬𑀸𑀤𑀻𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑀼𑀁 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑀺𑀆𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀦 𑀦 𑀫𑀕𑀡𑀬𑀼𑀢𑁆𑀢𑀢𑁆𑀢𑀸 𑀦𑀯𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀪𑀼𑀚𑀕𑀲𑀼 𑀲𑀼𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀪𑀼𑀚𑀕𑀲𑀼𑀲𑀼𑀫𑀢𑀸 𑀦𑀸𑀫𑁄’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀦𑀸 𑀘 𑀤𑁆𑀯𑁂 𑀦𑀕𑀡𑀸𑀫𑁄 𑀘 𑀫𑀕𑀡𑁄 𑀘 𑀬𑀤𑀺 𑀲𑀺𑀬𑀸. 𑀲𑀸 𑀪𑀼𑀚𑀕𑀲𑀼𑀲𑀼 𑀕𑀸𑀣𑀸𑀢𑀺 𑀫𑀢𑀸 𑀜𑀸𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀧𑀦 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀓𑀸𑀬𑀗𑁆𑀕𑁂𑀦𑀲𑀫𑀦𑁆𑀦𑀸𑀕𑀢𑀁. 𑀏𑀢𑁆𑀣 ¶ 𑀳𑀺 𑀦𑀬𑀦𑀦𑁆𑀢𑀺 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑀬𑀦𑀁, 𑀘𑀓𑁆𑀔𑀼 𑀮𑀩𑁆𑀪𑀢𑀺. 𑀦𑀻𑀥𑀸𑀢𑀼 𑀬𑀼. 𑀲𑀼𑀪𑀁 𑀲𑁄𑀪𑀦𑀁 𑀕𑀘𑁆𑀙𑀢𑀻𑀢𑀺 𑀲𑀼𑀪𑀕𑀁, 𑀓𑀸𑀬𑀗𑁆𑀕𑀁 𑀮𑀩𑁆𑀪𑀢𑀺. 𑀲𑀼𑀪𑀲𑀤𑁆𑀤𑀽𑀧𑀧𑀤𑁄 𑀕𑀫𑀼𑀥𑀸𑀢𑀼 𑀓𑁆𑀯𑀺. 𑀓𑀸𑀬𑀲𑁆𑀲 𑀅𑀗𑁆𑀕𑀁 𑀅𑀯𑀬𑀯𑀁 𑀓𑀸𑀬𑀗𑁆𑀕𑀁. 𑀪𑀕𑀯𑀢𑁄 𑀓𑀸𑀬𑀗𑁆𑀕𑀁 𑀮𑀩𑁆𑀪𑀢𑀺. 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄𑀬𑀁. 𑀦𑀬𑀦𑀲𑁆𑀲 𑀲𑀼𑀪𑀕𑀁 𑀦𑀬𑀦𑀲𑀼𑀪𑀕𑀁, 𑀢𑀁 𑀓𑀸𑀬𑀗𑁆𑀕𑀁 𑀬𑀲𑁆𑀲 𑀩𑀼𑀤𑁆𑀥𑀲𑁆𑀲𑀸𑀢𑀺 𑀦𑀬𑀦𑀲𑀼𑀪𑀕 𑀓𑀸𑀬𑀗𑁆𑀕𑁄, 𑀩𑀼𑀤𑁆𑀥𑁄. 𑀲𑁄 𑀳𑀺 𑀭𑀽𑀧𑀓𑀸𑀬𑀲𑁆𑀲 𑀤𑀲𑁆𑀲𑀦𑀸 𑀦𑀼𑀢𑁆𑀢𑀭𑀺𑀬𑀕𑀼𑀡𑀬𑁄𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘 𑀅𑀲𑀻𑀢𑁆𑀬𑀸 𑀦𑀼𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑁂𑀳𑀺 𑀘 𑀮𑀓𑁆𑀔𑀺𑀢𑁂𑀦 𑀓𑀸𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀦𑁆𑀢𑀺 𑀧𑀺𑀬𑀧𑁂𑀫𑀦𑀻𑀬𑀉𑀢𑁆𑀢𑀫𑀲𑀤𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀲𑁄 𑀳𑀺 𑀪𑀕𑀯𑀸 𑀫𑀥𑀺𑀬𑀢𑀺 𑀧𑀺𑀬𑀢𑀺 𑀧𑁂𑀫𑀺𑀬𑀢𑀺 𑀯𑀸𑀢𑀺 𑀫𑀥𑀼𑀭𑁄. 𑀫𑀥𑀥𑀸𑀢𑀼 𑀉𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀝𑀻𑀓𑀸𑀬𑀁 ‘‘𑀫𑀥𑀼𑀭𑁄𑀢𑀺 𑀧𑀺𑀬𑁄 𑀧𑁂𑀫𑀦𑀻𑀬𑁄 𑀅𑀧𑀮𑀺𑀩𑀼𑀤𑁆𑀥𑁄’’𑀢𑀺. 𑀅𑀣 𑀯𑀸 𑀫𑀥𑀺𑀬𑀢𑀺 𑀅𑀲𑁆𑀲𑀸𑀤𑀺𑀬𑀢𑀻𑀢𑀺 𑀫𑀥𑀼𑀭𑁄, 𑀫𑀥𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀻𑀢𑀺𑀁 𑀉𑀦𑁆𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀥𑀼𑀭𑁄, 𑀫𑀥𑀥𑀸𑀢𑀼 𑀉𑀦𑁆𑀤𑁂 𑀉𑀭𑁄. 𑀢𑁂𑀦 𑀯𑀼𑀢𑁆𑀢𑀁 𑀲𑀤𑁆𑀤𑀦𑀻𑀢𑀺𑀬𑀁 ‘‘𑀫𑀥 𑀉𑀦𑁆𑀤𑁂’’𑀢𑀺. 𑀯𑀭𑀺𑀢𑀩𑁆𑀩𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀢𑁆𑀣𑀺𑀢𑀩𑁆𑀩𑁄 𑀯𑀸𑀢𑀺 𑀯𑀭𑁄, 𑀲𑀭𑁄. 𑀯𑀭𑀥𑀸𑀢𑀼 𑀇𑀘𑁆𑀙𑀸𑀬𑀁 𑀅. 𑀲𑀭𑀢𑀺 𑀕𑀘𑁆𑀙𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑀦𑁆𑀢𑀺 𑀲𑀭𑁄, 𑀲𑀤𑁆𑀤𑁄. 𑀲𑀭𑀥𑀸𑀢𑀼 𑀕𑀢𑀺𑀬𑀁 𑀅. 𑀲𑀭𑀢𑀺 𑀕𑀘𑁆𑀙𑀢𑀺 𑀲𑀼𑀬𑁆𑀬𑀫𑀸𑀦𑀢𑀦𑁆𑀢𑀺 𑀯𑀸 𑀲𑀭𑁄, 𑀲𑀭𑀺𑀬𑀢𑀺 𑀲𑀼𑀡𑀺𑀬𑀢𑀻𑀢𑀺 𑀯𑀸 𑀲𑀭𑁄, 𑀪𑀕𑀯𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀤𑁄 𑀮𑀩𑁆𑀪𑀢𑀺. 𑀉𑀧𑀲𑀫𑁆𑀧𑀚𑁆𑀚𑀢𑀻𑀢𑀺 𑀉𑀧𑁂𑀢𑁄, 𑀉𑀧𑀧𑀼𑀩𑁆𑀩𑀇𑀥𑀸𑀢𑀼 𑀢. 𑀫𑀥𑀼𑀭𑁄 𑀘 𑀯𑀭𑁄 𑀘 𑀲𑁄 𑀲𑀭𑁄 𑀘𑀸𑀢𑀺 𑀫𑀥𑀼𑀭𑀯𑀭𑀲𑀭𑁄, 𑀢𑁂𑀦 𑀉𑀧𑁂𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑁄 𑀧𑀦 𑀳𑀤𑀬 𑀯𑀢𑁆𑀣𑀼𑀦𑁄 𑀲𑀼𑀯𑀺𑀲𑀼𑀤𑁆𑀥𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀫𑀥𑀼𑀭𑁂𑀦 𑀧𑀺𑀬𑁂𑀦 𑀫𑀦𑀸𑀧𑀺𑀬𑁂𑀦 𑀯𑀭𑁂𑀦 𑀇𑀘𑁆𑀙𑀺𑀢𑀧𑀢𑁆𑀣𑀺 𑀢𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀲𑀭𑁂𑀦 𑀲𑀤𑁆𑀤𑁂𑀦 𑀉𑀧𑁂𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣 ¶ 𑀘 𑀓𑀺𑀜𑁆𑀘𑀸𑀧𑀺 𑀲𑀭𑁄𑀧𑁂𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁, 𑀪𑀕𑀯𑀢𑁄 𑀲𑀭𑁄 𑀧𑀦 𑀯𑀺𑀲𑀝𑁆𑀞𑁄 𑀘, 𑀯𑀺𑀜𑁆𑀜𑁂𑀬𑁆𑀬𑁄, 𑀫𑀜𑁆𑀚𑀼, 𑀲𑀯𑀦𑀻𑀬𑁄, 𑀩𑀺𑀦𑁆𑀤𑀼, 𑀅𑀯𑀺𑀲𑀸𑀭𑀻, 𑀕𑀫𑁆𑀪𑀻𑀭𑁄, 𑀦𑀺𑀦𑁆𑀦𑀸𑀤𑀺 𑀘𑀸𑀢𑀺 𑀯𑀺𑀲𑁂𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫 𑀧𑀡𑁆𑀡𑀸𑀲𑁂 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀧𑀦𑀲𑁆𑀲 𑀕𑁄𑀢𑀫𑀲𑁆𑀲 𑀫𑀼𑀔𑀢𑁄 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺 𑀯𑀺𑀲𑀝𑁆𑀞𑁄 𑀘, 𑀯𑀺𑀜𑁆𑀜𑁂𑀬𑁆𑀬𑁄 𑀘, 𑀫𑀜𑁆𑀚𑀼 𑀘, 𑀲𑀯𑀦𑀻𑀬𑁄 𑀘, 𑀩𑀺𑀦𑁆𑀤𑀼 𑀘, 𑀅𑀯𑀺𑀲𑀸𑀭𑀻 𑀘, 𑀕𑀫𑁆𑀪𑀻𑀭𑁄 𑀘, 𑀦𑀺𑀦𑁆𑀦𑀸𑀤𑀺 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦 𑀲𑁄 𑀪𑀯𑀁 𑀕𑁄𑀢𑀫𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦 𑀦𑀺𑀘𑁆𑀙𑀭𑀢𑀻’’𑀢𑀺.

𑀢𑀲𑁆𑀲𑀸𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀲𑀝𑁆𑀞𑁄𑀢𑀺 𑀲𑀺𑀦𑀺𑀤𑁆𑀥𑁄 𑀅𑀧𑀮𑀺𑀩𑀼𑀤𑁆𑀥𑁄. 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀯𑀺𑀜𑁆𑀜𑀸𑀧𑀦𑀻𑀬𑁄 𑀧𑀸𑀓𑀝𑁄. 𑀯𑀺𑀲𑀝𑁆𑀞𑀢𑁆𑀢𑀸𑀬𑁂𑀯 𑀘𑁂𑀲 𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. 𑀫𑀜𑁆𑀚𑀽𑀢𑀺 𑀫𑀥𑀼𑀭𑁄. 𑀲𑀯𑀦𑀻𑀬𑁄𑀢𑀺 𑀲𑁄𑀢𑀲𑀼𑀔𑁄, 𑀫𑀥𑀼𑀭𑀢𑁆𑀢𑀸𑀬𑁂𑀯 𑀘𑁂𑀲 𑀲𑀯𑀦𑀻𑀬𑁄 𑀳𑁄𑀢𑀺. 𑀩𑀺𑀦𑁆𑀤𑀽𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁄. 𑀅𑀯𑀺𑀲𑀸𑀭𑀻𑀢𑀺 𑀅𑀯𑀺𑀲𑀝𑁄. 𑀩𑀺𑀦𑁆𑀤𑀼𑀢𑁆𑀢𑀸𑀬𑁂𑀯 𑀘𑁂𑀲 𑀅𑀯𑀺𑀲𑀸𑀭𑀻 𑀳𑁄𑀢𑀺. 𑀕𑀫𑁆𑀪𑀻𑀭𑁄𑀢𑀺 𑀕𑀫𑁆𑀪𑀻𑀭𑀲𑀫𑀼𑀝𑁆𑀞𑀺𑀢𑁄. 𑀦𑀺𑀦𑁆𑀦𑀸𑀤𑀻𑀢𑀺 𑀦𑀺𑀦𑁆𑀦𑀤𑀯𑀸. 𑀕𑀫𑁆𑀪𑀻𑀭𑀢𑁆𑀢𑀸𑀬𑁂𑀯 𑀘𑁂𑀲 𑀦𑀺𑀦𑁆𑀦𑀸𑀤𑀺 𑀳𑁄𑀢𑀺. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀧𑀺 𑀏𑀓𑀩𑀤𑁆𑀥𑀁 𑀧𑀭𑀺𑀲𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀩𑀳𑀺𑀤𑁆𑀥𑀸𑀢𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀧𑀭𑀺𑀲𑀢𑁄 𑀩𑀳𑀺𑀤𑁆𑀥𑀸 𑀦 𑀕𑀘𑁆𑀙𑀢𑀺. 𑀓𑀲𑁆𑀫𑀸. 𑀲𑁄 𑀏𑀯𑀭𑀽𑀧𑁄 𑀫𑀥𑀼𑀭𑀲𑀭𑁄 𑀅𑀓𑀸𑀭𑀡𑀸 𑀫𑀸 𑀦𑀲𑁆𑀲𑀻𑀢𑀺. 𑀇𑀢𑀺 𑀪𑀕𑀯𑀢𑁄 𑀖𑁄𑀲𑁄 𑀧𑀭𑀺𑀲𑀸𑀬 𑀫𑀢𑁆𑀢𑀓𑁂𑀦𑁂𑀯 𑀘𑀭𑀢𑀻𑀢𑀺 𑀯𑀡𑁆𑀡𑀺𑀢𑁄𑀢𑀺. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀜𑁆𑀘 𑀯𑀼𑀢𑁆𑀢𑀸 𑀲𑀗𑁆𑀕𑀳𑀕𑀸𑀣𑀸 𑁋

‘‘𑀯𑀺𑀲𑀝𑁆𑀞𑀫𑀜𑁆𑀚𑀼𑀯𑀺𑀜𑁆𑀜𑁂𑀬𑁆𑀬𑀸, 𑀲𑀯𑀦𑀻𑀬𑀸𑀯𑀺𑀲𑀸𑀭𑀺𑀦𑁄;

𑀩𑀺𑀦𑁆𑀤𑀼𑀕𑀫𑁆𑀪𑀻𑀭𑀦𑀺𑀦𑁆𑀦𑀸𑀤𑀺, 𑀢𑁆𑀬𑁂𑀯𑀫𑀝𑁆𑀞𑀗𑁆𑀕𑀺𑀓𑁄 𑀲𑀭𑁄’’𑀢𑀺.

𑀬𑀣𑀸 𑀳𑀺 𑀩𑁆𑀭𑀳𑁆𑀫𑀼𑀦𑁄 𑀲𑀭𑁄 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀯𑀺𑀲𑀼𑀤𑁆𑀥𑁄 𑀫𑀥𑀼𑀭𑁄 𑀳𑁄𑀢𑀺. 𑀬𑀣𑀸 𑀘 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀩𑀦𑁆𑀥𑀸 𑀥𑀸𑀯𑀦𑁆𑀢𑀸 𑀔𑀼𑀤𑁆𑀤𑀓𑀫𑀺𑀕𑀸 𑀓𑀭𑀯𑀻𑀓𑀲𑀓𑀼𑀡𑀲𑁆𑀲 𑀯𑀺𑀓𑀽𑀚𑀫𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀭𑀲𑁆𑀲 𑀫𑀥𑀼𑀭𑀢𑁆𑀢𑀸 𑀫𑀭𑀡𑀪𑀬𑀁 𑀳𑀺𑀢𑁆𑀯𑀸 𑀅𑀥𑀸𑀯𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀧𑀸𑀤𑀁 ¶ 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀸 𑀲𑀼𑀡𑀦𑁆𑀢𑀺, 𑀏𑀯𑀁 𑀓𑀭𑀯𑀻𑀓𑀲𑁆𑀲 𑀲𑀤𑁆𑀤𑁄 𑀥𑀫𑁆𑀫𑀢𑀸𑀪𑀸𑀯𑁂𑀦 𑀫𑀥𑀼𑀭𑁄 𑀧𑀺𑀬𑁄 𑀫𑀦𑀸𑀧𑁄 𑀳𑁄𑀢𑀺. 𑀏𑀯𑀁 𑀪𑀕𑀯𑀢𑀸 𑀓𑀢𑀁 𑀓𑀫𑁆𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀯𑀢𑁆𑀣𑀼𑀲𑁆𑀲 𑀲𑀼𑀤𑁆𑀥𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀘 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀪𑀕𑀯𑀢𑁄 𑀦𑀸𑀪𑀺𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀼𑀯𑀺𑀲𑀼𑀤𑁆𑀥𑁄 𑀅𑀢𑀺𑀫𑀥𑀼𑀭𑁄 𑀅𑀢𑀺𑀧𑀺𑀬𑁄 𑀅𑀢𑀺𑀫𑀦𑀸𑀧𑁄 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀳𑀻𑀦𑀽𑀧𑀫𑀸 𑀳𑁄𑀢𑀺, 𑀪𑀕𑀯𑀢𑁄 𑀳𑀺 𑀲𑀭𑁄 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀅𑀢𑀺𑀫𑀥𑀼𑀭𑁄 𑀅𑀢𑀺𑀧𑀺𑀬𑁄 𑀅𑀢𑀺𑀫𑀦𑀸𑀧𑁄 𑀳𑁄𑀢𑀺, 𑀢𑀣𑀸 𑀳𑀺 𑀥𑀫𑁆𑀫𑀸𑀲𑁄 𑀓𑀭𑀜𑁆𑀜𑁄 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀤𑁂𑀯𑀻 𑀓𑀭𑀯𑀻𑀓𑀲𑀓𑀼𑀡𑀲𑁆𑀲 𑀫𑀥𑀼𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀲𑁆𑀲 𑀫𑀥𑀼𑀭𑁄 𑀲𑀤𑁆𑀤𑁄, 𑀓𑁄 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀺𑀭𑀺𑀁 𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀅𑀢𑀺𑀫𑀥𑀼𑀭𑁄 𑀲𑀤𑁆𑀤𑁄’’𑀢𑀺, 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀢𑁆𑀢𑀳𑀺 𑀚𑀗𑁆𑀖𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀦𑁆𑀢𑀺 𑀅𑀧𑀭𑀺𑀫𑀺𑀡𑀺𑀢𑀩𑁆𑀩𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁. 𑀏𑀢𑁆𑀣 𑀘 𑀲𑀫𑀺𑀢𑁄𑀢𑀺 𑀧𑀭𑀺𑀫𑀺𑀡𑀺𑀢𑀩𑁆𑀩𑁄𑀢𑀺 𑀫𑀺𑀢𑁄, 𑀫𑀸𑀥𑀸𑀢𑀼 𑀧𑀭𑀺𑀫𑀸𑀡𑁂 𑀢, 𑀦 𑀫𑀺𑀢𑁄 𑀅𑀫𑀺𑀢𑁄. 𑀕𑀼𑀡𑁄𑀢𑀺 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸. 𑀢𑁂 𑀳𑀺 𑀕𑀼𑀡𑁂𑀦𑁆𑀢𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀕𑀼𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀼𑀡𑀥𑀸𑀢𑀼 𑀧𑀓𑀸𑀲𑀦𑁂 𑀅. 𑀫𑀡𑀺𑀲𑀸𑀭𑀫𑀜𑁆𑀚𑀽𑀲𑀸𑀝𑀻𑀓𑀸𑀬𑀁 𑀧𑀦 ‘‘𑀕𑀼𑀡𑀦𑁆𑀢𑀺 𑀅𑀢𑁆𑀢𑀦𑁄 𑀆𑀥𑀸𑀭𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀻𑀢𑀺 𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀁.

𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀜𑁆𑀘 ‘‘𑀕𑀼𑀡 𑀆𑀫𑀦𑁆𑀢𑀦𑁂, 𑀕𑀼𑀡𑁄𑀢𑀺 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸, 𑀓𑁂𑀦𑀝𑁆𑀞𑁂𑀦 𑀢𑁂 𑀕𑀼𑀡𑀸, 𑀕𑁄𑀡𑀸𑀧𑀺𑀬𑀢𑀺 𑀆𑀫𑀦𑁆𑀢𑀸𑀧𑀺𑀬𑀢𑀺 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀺𑀢𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀼𑀁 𑀲𑁄𑀢𑀼𑀁 𑀧𑀽𑀚𑀺𑀢𑀼𑀜𑁆𑀘 𑀇𑀘𑁆𑀙𑀦𑁆𑀢𑁂𑀳𑀺 𑀚𑀦𑁂𑀳𑀻𑀢𑀺 𑀕𑀼𑀡𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀻𑀮𑀸𑀤𑀺 𑀥𑀫𑁆𑀫𑀸𑀦𑀁 𑀆𑀫𑀦𑁆𑀢𑀸𑀧𑀦𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀢𑀁𑀳𑁂𑀢𑀼 𑀆𑀫𑀦𑁆𑀢𑀦𑀁 𑀦𑀺𑀫𑀦𑁆𑀢𑀦𑀜𑁆𑀘 𑀢𑁂𑀬𑁂𑀯 𑀓𑀭𑁄𑀦𑁆𑀢𑀺 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦 𑀕𑀼𑀜𑁆𑀚𑀦𑁆𑀢𑁂 𑀅𑀩𑁆𑀬𑀬𑀦𑁆𑀢𑁂 𑀇𑀢𑀺 𑀕𑀼𑀡𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀤𑀦𑀼𑀭𑀽𑀧𑀁 𑀧𑀦 𑀥𑀸𑀢𑀼𑀲𑀤𑁆𑀤𑀁𑀦 𑀧𑀲𑁆𑀲𑀸𑀫 ¶ . 𑀕𑀼𑀡 𑀆𑀫𑀦𑁆𑀢𑀦𑁂 𑀇𑀘𑁆𑀘𑁂𑀯 𑀧𑀲𑁆𑀲𑀸𑀫. 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀫𑀺𑀢𑁄 𑀕𑀼𑀡𑁄 𑀅𑀫𑀺𑀢𑀕𑀼𑀡𑁄, 𑀢𑁂𑀲𑀁 𑀕𑀡𑁄 𑀲𑀫𑀽𑀳𑁄 𑀅𑀫𑀺𑀢𑀕𑀼𑀡𑀕𑀡𑁄, 𑀢𑁂𑀲𑀁. 𑀆𑀥𑀸𑀭𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑁄, 𑀚𑀺𑀦𑁄 𑀮𑀩𑁆𑀪𑀢𑀺. 𑀲𑁄 𑀧𑀦 𑀲𑀫𑀼𑀤𑁆𑀤𑁄𑀤𑀓𑀁 𑀦𑀸𑀴𑀺𑀧𑀢𑁆𑀢𑁂𑀦 𑀅𑀧𑀭𑀺𑀫𑀺𑀢𑀁 𑀯𑀺𑀬 𑀓𑁂𑀦𑀘𑀺 𑀅𑀧𑀭𑀺𑀫𑀺𑀢𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀆𑀥𑀸𑀭𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑁄𑀢𑀺 𑀅𑀢𑁆𑀣𑁄.

𑀤𑀲𑀩𑀮𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀢𑀣𑀸𑀕𑀢𑀤𑀲𑀩𑀮𑀲𑀫𑁆𑀧𑀦𑁆𑀦𑀁. 𑀏𑀢𑁆𑀣 𑀳𑀺 𑀩𑀮𑀦𑁆𑀢𑀺 𑀓𑁂𑀳𑀺𑀘𑀺 𑀯𑀺𑀭𑀼𑀤𑁆𑀥𑁂𑀳𑀺 𑀓𑀸𑀭𑀡𑁂 𑀳𑀺 𑀩𑀮𑀦𑁆𑀢𑀺 𑀦 𑀓𑀫𑁆𑀧𑁂𑀦𑁆𑀢𑀺 𑀣𑀺𑀭𑀦𑁆𑀢𑀻𑀢𑀺 𑀩𑀮𑀁, 𑀤𑀲 𑀩𑀮𑀸𑀦𑀺 𑀬𑀲𑁆𑀲 𑀲𑁄𑀢𑀺 𑀤𑀲𑀩𑀮𑁄, 𑀩𑀼𑀤𑁆𑀥𑁄. 𑀢𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑀢𑀣𑀸 𑀕𑀢𑀲𑁆𑀲 𑀤𑀲𑀩𑀮𑀁 𑀓𑀸𑀬𑀤𑀲𑀩𑀮𑀜𑁆𑀘, 𑀜𑀸𑀡𑀤𑀲𑀩𑀮𑀜𑁆𑀘𑀸𑀢𑀺. 𑀢𑁂𑀲𑀼 𑀳𑀺 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀴𑀸 𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥 𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀁 𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀴𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁, 𑀢𑀁 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲, 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 𑀕𑀡𑀦𑀸𑀬 𑀳𑀢𑁆𑀣𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 ¶ . 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁 𑀳𑁄𑀢𑀺. 𑀇𑀤𑀁 𑀧𑀦 𑀢𑀸𑀲𑀼 𑀢𑀸𑀲𑀼 𑀧𑀸𑀴𑀻𑀲𑀼 𑀦 𑀆𑀕𑀢𑀁. 𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀆𑀕𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑀤𑀲𑀓 𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 ‘‘𑀤𑀲 𑀩𑀮𑀜𑀸𑀡𑀁 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀦 𑀓𑀸𑀬𑀩𑀮𑀁 𑀯𑀺𑀬 𑀅𑀝𑁆𑀞 𑀓𑀣𑀸𑀭𑀽𑀴𑁆𑀳𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀏𑀢𑁆𑀣 𑀘 𑀦𑀸𑀭𑀸𑀬𑀦 𑀲𑀗𑁆𑀖𑀸𑀢 𑀩𑀮𑀦𑁆𑀢𑀺 𑀏𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄, 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀇𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀸𑀬𑀦𑀁, 𑀯𑀚𑀺𑀭𑀁. 𑀢𑀲𑁆𑀫𑀸 𑀦𑀸𑀭𑀸𑀬𑀦𑀲𑀗𑁆𑀖𑀸𑀢 𑀩𑀮𑀦𑁆𑀢𑀺 𑀯𑀚𑀺𑀭𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀅𑀢𑁆𑀣𑁄𑀢𑀺.

𑀜𑀸𑀡𑀤𑀲𑀩𑀮𑀁 𑀧𑀦 𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀘 𑀫𑀽𑀮𑀧𑀡𑁆𑀡𑀸𑀲𑁂 𑀫𑀳𑀸 𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀤𑀲𑀓𑀦𑀺𑀧𑀸𑀢𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀜𑁆𑀘 𑀯𑀺𑀢𑁆𑀣𑀸𑀭𑁂𑀦 𑀆𑀕𑀢𑀫𑁂𑀯. 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀦 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀬𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁. 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀜𑁆𑀘, 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀯𑀺𑀧𑀸𑀓𑀜𑀸𑀡𑀁, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁, 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀮𑁄𑀓 𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀜𑀸𑀡𑀁, 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀜𑀸𑀡𑀁, 𑀆𑀲𑀯𑀸𑀦𑀁 𑀔𑀬𑀜𑀸𑀡𑀜𑁆𑀘𑀸𑀢𑀺. 𑀅𑀬𑀁 𑀧𑀦 𑀓𑀫𑁄 𑀅𑀪𑀺𑀥𑀫𑁆𑀫𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀆𑀕𑀢𑀓𑁆𑀓𑀫𑁄.

𑀘𑀼𑀢𑀽𑀧𑀧𑀸𑀢𑀜𑀸𑀡𑀝𑁆𑀞𑀸𑀦𑁂 𑀧𑀦 𑀫𑀽𑀮𑀧𑀡𑁆𑀡𑀸𑀲𑀧𑀸𑀴𑀺𑀬𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀘 𑀤𑀲𑀓𑀦𑀺𑀧𑀸𑀢𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀕𑀢𑀁. 𑀅𑀢𑁆𑀣𑀢𑁄 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀘𑀼𑀢𑀽𑀧𑀧𑀸𑀢𑀲𑁆𑀲 𑀧𑀲𑁆𑀲𑀺𑀢𑀢𑁆𑀢𑀸 𑀲𑀤𑀺𑀲𑀫𑁂𑀯𑀸𑀢𑀺. 𑀢𑀢𑁆𑀣 𑀳𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀦𑁆𑀢𑀺 𑀓𑀸𑀭𑀡𑀸𑀓𑀸𑀭𑀡𑀁 𑀬𑀣𑀸𑀪𑀽𑀢𑀁 𑀚𑀸𑀦𑀦𑀜𑀸𑀡𑀁. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀯𑀺𑀧𑀸𑀓𑀜𑀸𑀡𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀅𑀢𑀻𑀢𑀸𑀦𑀸𑀕𑀢 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀯𑀺𑀧𑀸𑀓𑀁 𑀦𑀺𑀩𑁆𑀩𑀸𑀦𑀨𑀮𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀩𑁆𑀩𑀢𑁆𑀣 𑀕𑀸𑀫𑀺𑀦𑀺𑀧𑀝𑀺𑀧𑀤𑀁 ¶ 𑀜𑀸𑀡𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀢𑀢𑁆𑀣 𑀘 𑀧𑀝𑀺𑀧𑀤𑀦𑁆𑀢𑀺 𑀧𑀝𑀺𑀧𑀚𑁆𑀚𑀢𑀺 𑀧𑀸𑀧𑀼𑀡𑀸𑀢𑀺 𑀏𑀢𑁂𑀦𑀸𑀢𑀺 𑀧𑀝𑀺𑀧𑀤𑀁, 𑀫𑀕𑁆𑀕𑀁. 𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀭𑀬𑀸𑀤𑀺𑀧𑀜𑁆𑀘𑀕𑀢𑀺𑀕𑀸𑀫𑀺𑀦𑀺𑀁. 𑀅𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀁 𑀲𑀸𑀭𑀺𑀧𑀼𑀢𑁆𑀢 𑀧𑀚𑀸𑀦𑀸𑀫𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺.

𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀅𑀦𑁂𑀓 𑀥𑀸𑀢𑀽𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀽𑀳𑀺 𑀯𑀸 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀽𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑁆𑀢𑀸 𑀯𑀺𑀲𑀤𑀺𑀲 𑀲𑀪𑀸𑀯𑀢𑁆𑀢𑀸 𑀦𑀸𑀦𑀸𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦 𑀥𑀸𑀢𑀼𑀮𑁄𑀓𑀁. 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀺𑀓𑀢𑀁 𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑁆𑀯𑁂𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀁 𑀯𑀟𑁆𑀠𑀜𑁆𑀘 𑀅𑀧𑀭𑀪𑀸𑀯𑀁 𑀳𑀸𑀦𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦 𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀁 𑀓𑀸𑀭𑀡𑀁. 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀲𑀗𑁆𑀔𑀸𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀜𑁆𑀘 𑀉𑀧𑀧𑀸𑀢𑀜𑁆𑀘 𑀧𑀚𑀸𑀦𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀦𑁆𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀔𑀬𑀲𑀗𑁆𑀔𑀸𑀢𑀁 𑀆𑀲𑀯𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦 𑀜𑀸𑀡𑀦𑁆𑀢𑀺 ¶ . 𑀇𑀫𑀸𑀦𑀺 𑀧𑀦 𑀜𑀸𑀡𑀸𑀦𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲 𑀤𑀲𑀩𑀮𑀜𑀸𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

‘‘𑀞𑀸𑀦𑀸𑀝𑁆𑀞𑀸𑀦𑀁 𑀯𑀺𑀧𑀸𑀓𑀜𑁆𑀘, 𑀜𑀸𑀡𑀁 𑀧𑀝𑀺𑀧𑀤𑀁 𑀜𑀸𑀡𑀁;

𑀅𑀦𑁂𑀓𑀥𑀸𑀢𑀼𑀮𑁄𑀓𑀜𑁆𑀘, 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀺𑀓𑀁. [𑀲𑀸 𑀧𑀦𑁂𑀲𑀸 𑀲𑁂𑀢𑀯𑀯𑀺𑀧𑀼𑀮𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸;]

𑀇𑀦𑁆𑀤𑁆𑀭𑀺𑀬𑀧𑀭𑀸𑀧𑀭𑀜𑁆𑀘, 𑀛𑀸𑀦𑀸𑀤𑀺𑀦𑀁 𑀲𑀁𑀓𑀺𑀮𑁂𑀲𑀁;

𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁;

𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁, 𑀆𑀲𑀯𑀓𑁆𑀔𑀬𑀁 𑀜𑀸𑀡𑀦𑁆𑀢𑀺;

𑀤𑀲𑀺𑀫𑀸𑀦𑀺 𑀩𑀼𑀤𑁆𑀥𑀲𑁆𑀲 𑀘𑀸, 𑀲𑀸𑀥𑀸𑀭𑀡𑀸𑀦𑀺 𑀜𑀸𑀡𑀸𑀦𑀻’’𑀢𑀺. [𑀲𑀸 𑀧𑀦𑁂𑀲𑀸 𑀲𑀸𑀫𑀜𑁆𑀜𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸;]

𑀦𑀦𑀼 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁂𑀯 𑀳𑁄𑀢𑀺, 𑀅𑀣 𑀓𑀲𑁆𑀫𑀸 𑀢𑀁 𑀜𑀸𑀡𑀁 𑀤𑀲𑀪𑁂𑀤𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀯𑀼𑀘𑁆𑀘𑀢𑁂. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀤𑀲𑀩𑀮𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀧𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺. 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭 𑀯𑀺𑀧𑀸𑀓𑀦𑁆𑀢𑀭𑀫𑁂𑀯. 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯. 𑀘𑀢𑀼𑀢𑁆𑀣𑀁 𑀥𑀸𑀢𑀼 𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯. 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯. 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯. 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯. 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯. 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯. 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀢𑁂𑀲𑀁 𑀜𑀸𑀡𑀤𑁆𑀯𑀬𑀸𑀦𑀁 𑀯𑀺𑀲𑁂𑀲𑁄𑀢𑀺. 𑀢𑀁 𑀧𑀦 𑀇𑀥 𑀜𑀸𑀡𑀤𑁆𑀯𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺.

𑀅𑀢𑀼𑀮𑀦𑁆𑀢𑀺 ¶ 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀢𑀼𑀮𑀦𑀁 𑀉𑀫𑁆𑀫𑀸𑀦𑀁 𑀢𑀼𑀮𑀸, 𑀢𑀼𑀮 𑀲𑀤𑀺𑀲𑁆𑀬𑀁. 𑀲𑀤𑁆𑀤𑀦𑀻𑀢𑀺𑀬𑀜𑁆𑀳𑀺 ‘‘𑀢𑀼𑀮 𑀉𑀫𑁆𑀫𑀸𑀦𑁂’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀼𑀮𑀺𑀬𑀢𑀺 𑀧𑀫𑀺𑀬𑀢𑀺 𑀏𑀢𑀸𑀬𑀸𑀢𑀺 𑀢𑀼𑀮𑀸, 𑀧𑀓𑀢𑀺𑀢𑀼𑀮𑀸. 𑀢𑀼𑀮𑀸 𑀯𑀺𑀬𑀸𑀢𑀺 𑀢𑀼𑀮𑀸, 𑀜𑀸𑀡𑀁. 𑀢𑀸𑀬 𑀲𑀫𑁆𑀫𑀺𑀢𑁄 𑀢𑀼𑀮𑁄. 𑀲𑀫𑁆𑀫𑀺𑀢 𑀢𑀤𑁆𑀥𑀺𑀢𑁂 𑀅𑀧𑀘𑁆𑀘𑀬𑁄. 𑀢𑀼𑀮𑀲𑀤𑀺𑀲𑀜𑀸𑀡𑁂𑀦 𑀲𑀫𑁆𑀫𑀺𑀢𑁄 𑀧𑀼𑀕𑁆𑀕𑀮𑁄. 𑀦 𑀢𑀼𑀮𑁄 𑀅𑀢𑀼𑀮𑁄. 𑀓𑀫𑁆𑀫𑀥𑀸𑀭𑀬𑀫𑀺𑀲𑁆𑀲𑀓𑀢𑀧𑁆𑀧𑀼𑀭𑀺𑀲 𑀲𑀫𑀸𑀲𑁄𑀬𑀁. 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑁄 𑀪𑀕𑀯𑀸 𑀮𑀩𑁆𑀪𑀢𑀺. 𑀅𑀣 𑀯𑀸 𑀦𑀢𑁆𑀣𑀺 𑀢𑀼𑀮𑁄 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀏𑀢𑀲𑁆𑀲𑀸𑀢𑀺 𑀅𑀢𑀼𑀮𑁄, 𑀪𑀕𑀯𑀸. 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄𑀬𑀁 𑀩𑀳𑀼𑀩𑁆𑀩𑀻𑀳𑀺. 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑁄 𑀅𑀕𑁆𑀕𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀪𑀸𑀯𑀢𑁄. 𑀬𑀣𑀸𑀳 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺. 𑀢𑀁 𑀅𑀢𑀼𑀮𑀁 𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀦𑁆𑀤𑁂𑀢𑀺 𑀩𑀼𑀤𑁆𑀥𑀲𑁆𑀲 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀸𑀤𑀺𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀅𑀳𑀁 𑀯𑀦𑁆𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀫𑀺𑀯𑀺𑀪𑀢𑁆𑀢𑀺𑀬𑀸 𑀫𑀳𑀸𑀯𑀺𑀲𑀬𑀲𑀼𑀢𑁆𑀢𑁂𑀦 𑀏𑀓𑀸𑀭𑀸 𑀤𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀦𑁆𑀤𑀦𑀸 𑀧𑀦 𑀢𑀺𑀯𑀺𑀥𑀸 𑀳𑁄𑀢𑀺 𑀓𑀸𑀬𑀯𑀘𑀻𑀫𑀦𑁄𑀯𑀦𑁆𑀤𑀦𑀸𑀯𑀲𑁂𑀦𑀸𑀢𑀺. 𑀬𑀣𑀸𑀳 ‘‘𑀢𑀺𑀲𑁆𑀲𑁄 𑀇𑀫𑀸 𑀪𑀺𑀓𑁆𑀔𑀯𑁂 𑀯𑀦𑁆𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄. 𑀓𑀸𑀬𑁂𑀦 𑀯𑀦𑁆𑀤𑀢𑀺, 𑀯𑀸𑀘𑀸𑀬 𑀯𑀦𑁆𑀤𑀢𑀺, 𑀫𑀦𑀲𑀸 𑀯𑀦𑁆𑀤𑀢𑀻’’𑀢𑀺.

𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀚𑀸𑀡𑀼𑀤𑁆𑀯𑀬𑀓𑀧𑁆𑀧𑀭𑀤𑁆𑀯𑀬𑀦𑀮𑀸𑀝𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀦𑁂𑀬𑁆𑀬𑀸𑀦𑀁 𑀅𑀪𑀺𑀫𑀼𑀔𑀁 𑀦𑀺𑀧𑀢𑀦𑁆𑀢𑁄 𑀓𑀸𑀬𑁂𑀦 𑀯𑀦𑁆𑀤𑀢𑀺 𑀦𑀸𑀫. 𑀬𑀁 𑀲𑀦𑁆𑀥𑀸𑀬 ‘‘𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀅𑀝𑁆𑀞 𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀕𑀼𑀡𑀧𑀤𑀸𑀦𑀺 𑀯𑀸𑀘𑀸𑀬 𑀧𑀯𑀢𑁆𑀢𑁂𑀦𑁆𑀢𑁄 𑀯𑀸𑀘𑀸𑀬 𑀯𑀦𑁆𑀤𑀢𑀺 𑀦𑀸𑀫. 𑀯𑀺𑀧𑀲𑁆𑀲𑀺𑀲𑁆𑀲 𑀦𑀫𑀢𑁆𑀣𑀼, 𑀲𑀺𑀔𑀺𑀲𑁆𑀲𑀸𑀧𑀺 𑀦𑀫𑀢𑁆𑀣𑀼, 𑀯𑁂𑀲𑁆𑀲 𑀪𑀼𑀲𑁆𑀲 𑀦𑀫𑀢𑁆𑀣𑀼, 𑀓𑀓𑀼𑀲𑀦𑁆𑀥𑀲𑁆𑀲 𑀦𑀫𑀢𑁆𑀣𑀼, 𑀓𑁄𑀡𑀸𑀕𑀫𑀦𑀲𑁆𑀲 𑀦𑀫𑀢𑁆𑀣𑀼 ¶ , 𑀓𑀲𑁆𑀲𑀧𑀲𑁆𑀲 𑀦𑀫𑀢𑁆𑀣𑀼, 𑀅𑀗𑁆𑀕𑀻𑀭𑀲𑁆𑀲𑀲𑁆𑀲 𑀦𑀫𑀢𑁆𑀣𑀼 𑀢𑁆𑀬𑀸𑀤𑀻𑀲𑀼𑀧𑀺 𑀯𑀸𑀘𑀸𑀯𑀦𑁆𑀤𑀦𑀸𑀬𑁂𑀯. 𑀩𑀼𑀤𑁆𑀥𑀸𑀤𑀺 𑀕𑀼𑀡𑀸𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 𑀫𑀦𑀲𑀸 𑀯𑀦𑁆𑀤𑀢𑀺 𑀦𑀸𑀫𑀸𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀓𑀸𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀁 𑀧𑀺𑀬𑀧𑁂𑀫𑀦𑀻𑀬𑁂𑀦 𑀅𑀲𑁆𑀲𑀸𑀤𑀺 𑀬𑁂𑀦 𑀉𑀢𑁆𑀢𑀫𑀲𑀤𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀁 𑀅𑀧𑀭𑀺𑀫𑀺𑀡𑀺𑀢𑀩𑁆𑀩𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁, 𑀤𑀲𑀩𑀮𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀓𑀸𑀬𑀜𑀸𑀡𑀤𑀲 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀢𑀼𑀮𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁 𑀩𑀼𑀤𑁆𑀥𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀤𑀼𑀢𑀺𑀬𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄,

𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀜𑁆𑀘 𑀮𑁄𑀓𑀢𑁄,

𑁩. 𑀏𑀯𑀁 𑀢𑀢𑀺𑀬𑀕𑀸𑀣𑀸𑀬 𑀩𑀼𑀤𑁆𑀥𑀲𑁆𑀲 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀫𑀸𑀥𑀺 𑀆𑀤𑀻𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄 𑀢𑀺𑀆𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀫𑀲𑀚𑀕𑀡 𑀕𑀭𑀼𑀬𑀼𑀢𑁆𑀢𑀢𑁆𑀢𑀸 𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀲𑀼𑀤𑁆𑀥𑀯𑀺𑀭𑀸 𑀚𑀺𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂-𑀫𑁆𑀲𑀸 𑀚𑁆𑀕𑀸 𑀲𑀼𑀤𑁆𑀥𑀯𑀺𑀭𑀸 𑀚𑀺𑀢𑀁 𑀫𑀢𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀫𑁆𑀲𑀸 𑀫𑀲𑀕𑀡𑀸 𑀘 𑀚𑁆𑀕𑀸 𑀚𑀕𑀡𑀕𑀭𑀼𑀓𑀸 𑀘 𑀘𑁂 𑀲𑀺𑀬𑁆𑀬𑀼𑀁, 𑀢𑀁 𑀯𑀼𑀢𑁆𑀢𑀁 𑀲𑀼𑀤𑁆𑀥𑀯𑀺𑀭𑀸𑀚𑀺𑀢𑀦𑁆𑀢𑀺 𑀫𑀢𑀁 𑀜𑀸𑀢𑀩𑁆𑀩𑀦𑁆𑀢𑀺. 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄 𑀬𑁄 𑀩𑀼𑀤𑁆𑀥𑁄 𑀮𑁄𑀓𑀢𑁄 𑀲𑀁𑀲𑀸𑀭𑁂 𑀓𑀸𑀬𑀺𑀓𑀁 𑀤𑀼𑀓𑁆𑀔𑀜𑁆𑀘 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀜𑁆𑀘 𑀅𑀦𑀼𑀪𑁄𑀲𑀺 𑀦𑀭𑀤𑁂𑀯𑀫𑀗𑁆𑀕𑀮𑀁, 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀦𑁆𑀤𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 ¶ 𑀳𑀺 𑀬𑁄𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄. 𑀬𑁄 𑀬𑀸𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀘 𑀅𑀦𑀺𑀬𑀫𑀯𑀸𑀘𑀓 𑀲𑀩𑁆𑀩𑀦𑀸𑀫𑀧𑀤𑀢𑁆𑀢𑀸 𑀯𑀘𑀦𑀢𑁆𑀣𑁄 𑀦 𑀓𑀸𑀢𑀩𑁆𑀩𑁄. 𑀢𑀲𑁆𑀲 𑀧𑀦 𑀬 𑀑𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀢𑁂𑀲𑀼 𑀘 𑀬𑀲𑀤𑁆𑀤𑀲𑁆𑀲 𑀯𑀸𑀘𑁆𑀘𑀁 𑀅𑀦𑀺𑀬𑀫𑁄 𑀩𑀼𑀤𑁆𑀥𑀤𑀩𑁆𑀩𑁄 𑀅𑀧𑁆𑀧𑀥𑀸𑀦𑁂𑀦 𑀮𑀩𑁆𑀪𑀢𑀺, 𑀢𑀲𑁆𑀲 𑀬𑀸𑀤𑀺𑀲𑀬𑀼𑀢𑁆𑀢𑀚𑀘𑁆𑀘𑀦𑀸𑀫𑀕𑁄𑀢𑁆𑀢𑀲𑀻𑀮𑀯𑀺𑀳𑀸𑀭𑀻 𑀕𑁄𑀘𑀭𑀲𑀗𑁆𑀔𑀸𑀢𑀁 𑀅𑀦𑀺𑀬𑀫𑀲𑀸𑀫𑀜𑁆𑀜𑀸𑀓𑀸𑀭𑀢𑁆𑀢𑀕𑀼𑀡𑀫𑁂𑀯 𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀧𑀞𑀫𑀸𑀲𑀺𑀯𑀺𑀪𑀢𑁆𑀢𑀺𑀬𑀸 𑀓𑀸𑀭𑀺𑀬𑀪𑀽𑀢𑀲𑁆𑀲 𑀑𑀓𑀸𑀭𑀲𑁆𑀲 𑀯𑀸𑀘𑁆𑀘𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑀗𑁆𑀔𑀸𑀢𑀁 𑀓𑀢𑁆𑀢𑀼𑀓𑀸𑀭𑀓𑁂𑀓𑀯𑀘𑀦𑀲𑀗𑁆𑀔𑁆𑀬𑀁 𑀮𑀩𑁆𑀪𑀢𑀺. 𑀅𑀣 𑀯𑀸 𑀲𑀩𑁆𑀩𑀦𑀸𑀫𑀪𑀸𑀯𑀁 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀬𑁄, 𑀅𑀦𑀺𑀬𑀫𑀯𑀸𑀘𑀓𑀪𑀸𑀯𑀁 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀬𑁄, 𑀲𑀩𑁆𑀩𑀦𑀸𑀫 𑀪𑀸𑀯𑁂𑀦 𑀬𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀬𑁄, 𑀲𑀩𑁆𑀩𑀦𑀸𑀫𑀪𑀸𑀯𑁂𑀦 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄𑀢𑀺 𑀯𑀸 𑀬𑁄, 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄 𑀏𑀢𑁂𑀦 𑀯𑀸 𑀅𑀦𑀺𑀬𑀫𑀢𑁆𑀣𑁄𑀢𑀺 𑀬𑁄.

‘‘𑀦𑀸𑀦𑀸𑀓𑀸𑀭𑀡𑀁 𑀧𑀝𑀺𑀘𑁆𑀘, 𑀥𑀸𑀢𑀼𑀧𑀘𑁆𑀘𑀬𑀯𑀺𑀕𑁆𑀕𑀳𑀁;

𑀘𑀺𑀦𑁆𑀢𑀓𑀸𑀦𑀁 𑀧𑀪𑀸𑀯𑁄𑀯, 𑀧𑀥𑀸𑀦𑀁 𑀳𑁄𑀢𑀺 𑀘𑀺𑀦𑁆𑀢𑀦𑁂’’𑀢𑀺.

𑀩𑀼𑀤𑁆𑀥𑁄𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀩𑀼𑀚𑁆𑀛𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀪𑀕𑀯𑀸. 𑀲𑀼𑀤𑁆𑀥𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀩𑀼𑀥𑀥𑀸𑀢𑀼 𑀢. 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀯𑀸 𑀩𑀼𑀤𑁆𑀥𑁄, 𑀳𑁂𑀢𑀼 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀅𑀜𑁆𑀜𑁂𑀲𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑁄𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀦𑀜𑁆𑀜𑀩𑁄𑀥𑀺𑀢𑁄 𑀳𑀼𑀢𑁆𑀯𑀸 𑀲𑀯𑀸𑀲𑀦𑀸𑀬 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀩𑀼𑀚𑁆𑀛𑀢𑀺 𑀚𑀸𑀕𑀭𑁄𑀢𑀻𑀢𑀺 𑀩𑀼𑀤𑁆𑀥𑁄, 𑀤𑀺𑀦𑀓𑀭𑀓𑀺𑀭𑀡 𑀲𑀫𑀸𑀕𑀫𑁂𑀦 𑀧𑀭𑀫𑀭𑀼𑀘𑀺𑀭𑀲𑀺𑀭𑀻𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀫𑀸𑀕𑀫𑁂𑀦 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀩𑀼𑀚𑁆𑀛𑀢𑀺 𑀯𑀺𑀓𑀲𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄, 𑀦𑀺𑀩𑁆𑀩𑀸𑀦 𑀲𑀗𑁆𑀔𑀸𑀢𑀁 𑀏𑀓𑀸𑀬𑀦𑀫𑀕𑁆𑀕𑀁 𑀩𑀼𑀚𑁆𑀛𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄. 𑀩𑀼𑀥𑀲𑀤𑁆𑀤𑁄 𑀳𑀺 𑀜𑀸𑀡𑀸𑀤𑀻𑀲𑀼 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀯𑀢𑁆𑀢𑀢𑀺.

‘‘𑀜𑀸𑀡𑁂 𑀯𑀺𑀓𑀲𑀦𑁂 𑀘𑁂𑀯, 𑀕𑀫𑀦𑁂 𑀘𑀸𑀧𑀺 𑀚𑀸𑀕𑀭𑁂;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀅𑀢𑁆𑀣𑁂𑀲𑀼, 𑀩𑀼𑀥𑀲𑀤𑁆𑀤𑁄 𑀧𑀯𑀢𑁆𑀢𑀢𑀻’’𑀢𑀺.

𑀅𑀣 𑀯𑀸 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀚𑀸𑀦𑀸𑀢𑀻𑀢𑀺 𑀩𑀼𑀤𑁆𑀥𑁄, 𑀧𑀸𑀭𑀫𑀺 𑀪𑀸𑀯𑀺𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑁂 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸𑀢𑀺 𑀅𑀥𑀺𑀕𑀢𑀜𑀸𑀡𑀕𑀼𑀡𑀯𑀺𑀲𑁂𑀲𑁂𑀳𑀺 𑀩𑀼𑀚𑁆𑀛𑀺𑀢𑀩𑁆𑀩𑁄𑀢𑀺 𑀯𑀸 𑀩𑀼𑀤𑁆𑀥𑁄, 𑀪𑀕𑀯𑀢𑀸 𑀩𑀼𑀚𑁆𑀛𑀺𑀢𑀩𑁆𑀩𑀁 𑀜𑀸𑀢𑀩𑁆𑀩𑀦𑁆𑀢𑀺 𑀩𑀼𑀤𑁆𑀥𑀁. 𑀓𑀺𑀁 𑀢𑀁, 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀩𑀼𑀤𑁆𑀥𑁄, 𑀪𑀕𑀯𑀸. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸 𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢 𑀦𑀺𑀭𑀯𑀲𑁂𑀲𑀓𑁆𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀅𑀧𑀭𑀺 𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺.

𑀏𑀢𑁆𑀣 𑀘 𑀩𑀼𑀤𑁆𑀥𑁄 𑀦𑀸𑀫 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥, 𑀧𑀘𑁆𑀘𑁂𑀓𑀩𑀼𑀤𑁆𑀥, 𑀘𑀢𑀼𑀲𑀘𑁆𑀘𑀩𑀼𑀤𑁆𑀥, 𑀲𑀼𑀢 𑀩𑀼𑀤𑁆𑀥𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀬𑀫𑁆𑀪𑀽𑀧𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀅𑀯𑀲𑁂𑀲𑀸 𑀔𑀻𑀡𑀸𑀲𑀯𑀸 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄 𑀦𑀸𑀫. 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀩𑀼𑀤𑁆𑀥𑁄 𑀦𑀸𑀫. 𑀇𑀥 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀅𑀥𑀺𑀧𑁆𑀧𑁂𑀢𑁄.

𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄𑀢𑀺 𑀏𑀢𑁆𑀣 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀥𑀺𑀢𑀺𑀫𑀸𑀢𑀺 𑀲𑀫𑀸𑀥𑀺𑀯𑀦𑁆𑀢𑁄, 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀥𑀸𑀭𑁂𑀢𑀻𑀢𑀺 𑀥𑀺𑀢𑀺, 𑀲𑀫𑀸𑀥𑀺. 𑀥𑀸𑀥𑀸𑀢𑀼𑀢𑀺. 𑀆𑀓𑀸𑀭𑀲𑁆𑀲 𑀇𑀓𑀸𑀭𑀸𑀤𑁂𑀲𑁄. 𑀥𑀺𑀬𑀢𑀺 𑀞𑀧𑁂𑀢𑀺 𑀏𑀓𑀸𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀢𑀺 𑀥𑀺𑀢𑀺, 𑀘𑀺𑀢𑁆𑀢𑁂𑀦 𑀬𑁄𑀕𑁂𑀦𑁂𑀯𑁂𑀲𑁄 𑀏𑀓𑀸 𑀭𑀫𑁆𑀫𑀡𑁂 ¶ 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀥𑀺𑀢𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀥𑀺𑀢𑀺𑀫𑀸, 𑀩𑀼𑀤𑁆𑀥𑁄. 𑀲𑁄 𑀳𑀺 𑀬𑀣𑀸 𑀫𑀳𑀸𑀫𑁂𑀭𑀼 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀪𑀼𑀲𑀁 𑀆𑀕𑀢𑁂𑀳𑀺 𑀯𑀸𑀢𑁂𑀳𑀺 𑀦 𑀲𑀫𑀺𑀜𑁆𑀚𑀢𑀺, 𑀏𑀯𑀁 𑀧𑀝𑀺𑀧𑀓𑁆𑀔𑁂𑀳𑀺 𑀫𑀺𑀘𑁆𑀙𑀸𑀯𑀸𑀤 𑀯𑀸𑀢𑁂𑀳𑀺 𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀳𑀺 𑀘 𑀮𑀸𑀪𑀸𑀮𑀸𑀪 𑀬𑀲𑀸𑀬𑀲 𑀦𑀺𑀦𑁆𑀤𑀸 𑀧𑀲𑀁𑀲 𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀘 𑀦 𑀲𑀫𑀺𑀜𑁆𑀚𑀢𑀺, 𑀲𑀫𑀸𑀥𑀺𑀯𑀦𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑀥𑀸𑀭𑀓𑁄𑀢𑀺 𑀅𑀭𑀳𑀢𑁆𑀢𑀨𑀮𑀳𑀸𑀭𑀓𑁄. 𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀯𑀸. 𑀚𑀸𑀦𑀸𑀢𑀺 𑀧𑀞𑀫 𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑀘𑁆𑀘𑀲𑁆𑀲 𑀆𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸𑀢𑀺 𑀅𑀜𑁆𑀜𑀁, 𑀅𑀭𑀳𑀢𑁆𑀢𑀨𑀮𑀁. 𑀆𑀧𑀼𑀩𑁆𑀩𑀜𑀸𑀥𑀸𑀢𑀼 𑀓𑁆𑀯𑀺. 𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄. 𑀲𑀁𑀬𑁄𑀕𑀧𑀭𑀢𑁆𑀢𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄, 𑀢𑀁 𑀥𑀸𑀭𑁂𑀢𑀻𑀢𑀺 𑀅𑀜𑁆𑀜𑀥𑀸𑀭𑀓𑁄. 𑀅𑀜𑁆𑀜𑀲𑀤𑁆𑀤𑀽𑀧𑀧𑀤𑀥𑀭𑀥𑀸𑀢𑀼 𑀡𑁆𑀯𑀼. 𑀲𑀁𑀲𑀸𑀭𑁂𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑁂 𑀲𑀁𑀲𑀸𑀭𑀯𑀝𑁆𑀝𑁂.

𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀲𑀁𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀁𑀲𑀸𑀭𑁄. 𑀲𑀁𑀧𑀼𑀩𑁆𑀩𑀲𑀭𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡. 𑀅𑀣 𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀲𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀲𑀸𑀭𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀺𑀁. 𑀅𑀦𑀼𑀪𑁄𑀲𑀻𑀢𑀺 𑀅𑀦𑀼𑀧𑀼𑀦𑀧𑁆𑀧𑀼𑀦𑀁 𑀅𑀪𑀼𑀜𑁆𑀚𑀺, 𑀅𑀯𑁂𑀤𑀬𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑁂 𑀲𑀭𑀻𑀭𑁂 𑀧𑀯𑀢𑁆𑀢𑀁 𑀓𑀸𑀬𑀺𑀓𑀁. 𑀘𑁂𑀢𑀲𑀺𑀓𑀦𑁆𑀢𑀺 𑀘𑁂𑀢𑀲𑀺 𑀧𑀯𑀢𑁆𑀢𑀁 𑀘𑁂𑀢𑀲𑀺𑀓𑀁. 𑀢𑀁 𑀧𑀦 𑀧𑀤𑀤𑁆𑀯𑀬𑀁 𑀤𑀼𑀓𑁆𑀔𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀤𑀼𑀓𑁆𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁. 𑀤𑀼𑀓𑁆𑀔𑀦𑀁 𑀤𑀼𑀓𑁆𑀔𑀁, 𑀅𑀣 𑀯𑀸 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀥𑀸𑀢𑀼 𑀅. 𑀇𑀤𑀁 𑀧𑀦 𑀦𑀺𑀩𑁆𑀩𑀘𑀦𑀁 𑀓𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀢𑁄𑀢𑀺 𑀲𑀢𑁆𑀢𑀮𑁄𑀓𑀳𑁂𑀢𑀼. 𑀮𑁄𑀓𑀺𑀬𑀦𑁆𑀢𑀺 ¶ 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄. 𑀮𑁄𑀓𑀥𑀸𑀢𑀼 𑀡. 𑀅𑀣 𑀯𑀸 𑀓𑀼𑀲𑀮𑀸𑀤𑀻𑀦𑀺 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀮𑁄𑀓𑁄. 𑀮𑀸𑀥𑀸𑀢𑀼 𑀑𑀓𑀧𑀘𑁆𑀘𑀬𑁄. 𑀲𑀢𑁆𑀢 𑀮𑁄𑀓𑁄𑀯 𑀮𑀩𑁆𑀪𑀢𑀺. 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄 𑀬𑁄 𑀩𑀼𑀤𑁆𑀥𑁄 𑀲𑀁𑀲𑀸𑀭𑀯𑀝𑁆𑀝𑁂 𑀦𑀺𑀫𑀼𑀕𑁆𑀕𑀸𑀦𑀁 𑀲𑀢𑁆𑀢𑀸𑀦𑀫𑀦𑀼𑀤𑀬𑀸𑀬 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀫𑁄𑀘𑁂𑀢𑀼𑀓𑀸𑀫𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀜𑁆𑀘 𑀫𑀳𑀸 𑀧𑀭𑀺𑀘𑁆𑀘𑀸𑀕𑁂 𑀘 𑀓𑀭𑁄𑀦𑁆𑀢𑁄 𑀲𑀢𑁆𑀢𑀮𑁄𑀓𑀳𑁂𑀢𑀼 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀁 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀁 𑀅𑀦𑀼𑀪𑀯𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁. 𑀯𑀦𑁆𑀤𑁂𑀢𑀺 𑀯𑀦𑁆𑀤𑀸𑀫𑀺.

𑀦𑀭𑀤𑁂𑀯𑀫𑀗𑁆𑀕𑀮𑀦𑁆𑀢𑀺 𑀦𑀭𑀤𑁂𑀯𑀸𑀦𑀁 𑀫𑀗𑁆𑀕𑀮𑀪𑀽𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀢𑁄. 𑀦𑀺𑀭𑀬𑀁 𑀦𑁂𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀦𑀭𑁄, 𑀫𑀦𑀼𑀲𑁆𑀲𑁄. 𑀦𑀺𑀥𑀸𑀢𑀼 𑀧𑀸𑀧𑀼𑀦𑀦𑁂 𑀅𑀭𑁄. 𑀅𑀭𑀺𑀬𑀫𑀦𑀼𑀲𑁆𑀲𑁄 𑀧𑀦 𑀪𑀽𑀢𑀧𑀼𑀩𑁆𑀩𑀕𑀢𑀺𑀓 𑀦𑀬𑁂𑀦 𑀦𑀭𑁄 𑀦𑀸𑀫𑀸𑀢𑀺. 𑀅𑀣 𑀯𑀸 𑀲𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄, 𑀉𑀢𑁆𑀢𑀫𑀁 𑀧𑀩𑁆𑀩𑀚𑁆𑀚𑀁 𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀧𑀦 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀪𑀢𑁆𑀢𑀼𑀪𑀽𑀢𑁄 𑀇𑀢𑀭𑀸𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸𑀬𑀁 𑀧𑀦 𑀦𑀭𑀢𑀻𑀢𑀺 𑀦𑀭𑁄, 𑀧𑀼𑀭𑀺𑀲𑁄. 𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑀺𑀉𑀘𑁆𑀘𑁂 𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀦𑀬𑀦𑀝𑁆𑀞𑁂𑀦 𑀦𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀢𑁆𑀢𑀪𑀸𑀢𑀼 𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀧𑀕𑁂𑀯 𑀇𑀢𑀭𑀸 𑀇𑀢𑀭𑀸𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀥 𑀧𑀦 𑀦𑀭𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀫𑁆𑀧𑀺 𑀯𑀺𑀲𑁂𑀲𑁂𑀦 𑀧𑀼𑀭𑀺𑀲𑀦𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺 𑀧𑀥𑀸𑀦𑀦𑀬𑁂𑀦 𑀕𑀳𑀡𑀲𑁆𑀲 𑀬𑀼𑀢𑁆𑀢𑀢𑁆𑀢𑀸. 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡 𑀛𑀸𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀯𑀼𑀥𑀸𑀢𑀼 𑀡. 𑀅𑀣 𑀯𑀸 𑀲𑀭𑀻𑀭𑀸𑀮𑀗𑁆𑀓𑀸𑀭𑀚𑀼𑀢𑀺𑀬𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀤𑁂𑀯𑀸 𑀘 𑀦𑀸𑀫 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀘𑀸𑀢𑀺. 𑀢𑀢𑁆𑀣 𑀫𑀳𑀸𑀲𑀫𑁆𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂𑀦 ¶ 𑀤𑁂𑀯𑀸𑀢𑀺 𑀲𑀫𑁆𑀫𑀢𑀢𑁆𑀢𑀸 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀭𑀸𑀚𑀓𑀼𑀫𑀸𑀭𑀸 𑀘 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫. 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫. 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀫𑀗𑁆𑀕𑀮𑀦𑁆𑀢𑀺 𑀫𑀗𑁆𑀕𑀮𑀪𑀽𑀢𑀁. 𑀢𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀫𑀗𑁆𑀕𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀲𑀢𑁆𑀢𑀸𑀦𑀁 𑀏𑀢𑁂𑀦𑀸𑀢𑀺 𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀫𑀗𑁆𑀕𑀮 𑀥𑀸𑀢𑀼 𑀯𑀟𑁆𑀠𑀦𑁂 𑀅𑀮𑁄. 𑀅𑀣 𑀯𑀸 𑀫𑀗𑁆𑀕𑀁 𑀯𑀼𑀘𑁆𑀘𑀢𑀺 𑀧𑀸𑀧𑀁, 𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀤𑁂𑀲𑀦𑀸𑀬 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀫𑀗𑁆𑀕𑀲𑀤𑁆𑀤𑀽𑀧𑀧𑀤𑀮𑀼𑀥𑀸𑀢𑀼 𑀓𑁆𑀯𑀺. 𑀦𑀭𑀸 𑀘 𑀤𑁂𑀯𑀸 𑀘 𑀦𑀭𑀤𑁂𑀯𑀸, 𑀢𑁂𑀲𑀁 𑀫𑀗𑁆𑀕𑀮𑁄 𑀦𑀭𑀤𑁂𑀯𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀲𑁄 𑀧𑀦 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀲𑀗𑁆𑀔𑁂, 𑀘𑀓𑁆𑀓𑀁, 𑀧𑀼𑀡𑁆𑀡𑀓𑀼𑀫𑁆𑀪𑁄, 𑀕𑀭𑀸, 𑀲𑀺𑀭𑀻, 𑀲𑁂𑀢𑀘𑁆𑀙𑀢𑁆𑀢𑀁, 𑀅𑀗𑁆𑀓𑀼𑀲𑁄, 𑀥𑀚𑀁, 𑀲𑁄𑀯𑀢𑁆𑀢𑀺𑀓𑀜𑁆𑀘𑀸𑀢𑀺 𑀅𑀝𑁆𑀞𑀳𑀺 𑀮𑁄𑀓𑀺𑀬𑀫𑀗𑁆𑀕𑀮𑁂𑀳𑀺 𑀲𑁂𑀝𑁆𑀞𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀘 𑀫𑀗𑁆𑀕𑀮𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀦𑀭𑀤𑁂𑀯𑀫𑀗𑁆𑀕𑀮𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀥𑀺𑀢𑀺𑀫𑀸 𑀲𑀫𑀸𑀥𑀺𑀯𑀦𑁆𑀢𑁄 𑀅𑀜𑁆𑀜𑀥𑀸𑀭𑀓𑁄 𑀅𑀭𑀳𑀢𑁆𑀢𑀨𑀮𑀥𑀸𑀭𑀓𑁄 𑀅𑀭𑀳𑀢𑁆𑀢𑀨𑀮𑀲𑁂 𑀢𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀯𑀸, 𑀬𑁄 𑀬𑀸𑀤𑀺𑀲𑁄 𑀩𑀼𑀤𑁆𑀥𑁄, 𑀲𑀁𑀲𑀸𑀭𑁂 𑀲𑀁𑀲𑀸𑀭𑀯𑀝𑁆𑀝𑁂, 𑀓𑀸𑀬𑀺𑀓𑀁 𑀓𑀸𑀬𑁂 𑀧𑀯𑀢𑁆𑀢𑀁 𑀤𑀼𑀓𑁆𑀔𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀘𑁂𑀢𑀲𑀺 𑀧𑀯𑀢𑁆𑀢𑀁 𑀤𑀼𑀓𑁆𑀔𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀜𑁆𑀘, 𑀮𑁄𑀓𑀢𑁄 𑀮𑁄𑀓𑀳𑁂𑀢𑀼, 𑀅𑀦𑀼𑀪𑁄𑀲𑀺 𑀧𑀼𑀦𑀧𑁆𑀧𑀼𑀦𑀁 𑀅𑀪𑀯𑀲𑀺 𑀅𑀯𑁂𑀤𑀬𑀺, 𑀦𑀭𑀤𑁂𑀯𑀫𑀗𑁆𑀕𑀮𑀁 𑀦𑀭𑀤𑁂𑀯𑀸𑀦𑀁 𑀫𑀗𑁆𑀕𑀮𑀪𑀽𑀢𑀁, 𑀢𑀁 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀢𑀢𑀺𑀬𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀁,

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀁;

𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑀁,

𑀯𑀦𑁆𑀤𑁂 𑀫𑀼𑀦𑀺𑀫𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁.

𑁪. 𑀏𑀯𑀁 ¶ 𑀢𑀢𑀺𑀬𑀕𑀸𑀣𑀸𑀬 𑀩𑀼𑀤𑁆𑀥𑀲𑁆𑀲 𑀦𑀢𑁆𑀯𑀸 𑀇𑀤𑀸𑀦𑀺 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀦𑁆𑀢𑁆𑀬𑀸𑀤𑀻𑀳𑀺 𑀙𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀫𑀼𑀦𑀺𑀦𑁄 𑀯𑀦𑁆𑀤𑀺𑀢𑀼𑀓𑀸𑀫𑁄 𑀩𑀸𑀢𑁆𑀢𑀺𑀁𑀲𑀢𑀺 𑀮𑀓𑁆𑀔𑀡 𑀘𑀺𑀢𑁆𑀭 𑀤𑁂𑀳 𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢 𑀚 𑀚 𑀕𑀡 𑀕𑀭𑀼𑀤𑁆𑀯𑀬 𑀬𑀼𑀢𑁆𑀢𑀢𑁆𑀢𑀸 𑀏𑀓𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀉𑀧𑀝𑁆𑀞𑀺𑀢𑀸 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 𑀢𑁆𑀚𑀸 𑀚𑁆𑀕𑀸 𑀕𑀭𑀼𑀦𑀸𑀬𑀫𑀼𑀧𑀝𑁆𑀞𑀺𑀢𑀸 𑀲𑀸’’𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀢𑁆𑀚𑀸 𑀢𑀚𑀕𑀡𑀸 𑀘 𑀚𑁆𑀕𑀸𑀚𑀕𑀡𑀕𑀭𑀽 𑀘 𑀕𑀭𑀼𑀦𑀸 𑀧𑀸𑀤𑀦𑁆𑀢𑀕𑀭𑀼𑀦𑀸 𑀘𑁂 𑀬𑀼𑀢𑁆𑀢𑀸, 𑀲𑀸 𑀅𑀬𑀁 𑀕𑀸𑀣𑀸 𑀉𑀧𑀝𑁆𑀞𑀺𑀢𑀸 𑀦𑀸𑀫𑀸𑀢𑀺. 𑀏𑀢𑁆𑀣 𑀘 𑀏𑀓 𑀕𑀭𑀼𑀓𑁂 𑀲𑀢𑀺𑀧𑀺 𑀤𑁆𑀯𑀺𑀕𑀭𑀼𑀓𑁂𑀧𑀺 𑀮𑀓𑁆𑀔𑀡𑀲𑀫𑀸𑀦𑀢𑁆𑀢𑀸 𑀉𑀧𑀝𑁆𑀞𑀺𑀢𑀸 𑀕𑀸𑀣𑀸 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀩𑀸𑀢𑁆𑀢𑀺𑀁𑀲𑀢𑀺 𑀮𑀓𑁆𑀔𑀡 𑀘𑀺𑀢𑁆𑀭 𑀤𑁂𑀳𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀁 𑀲𑀭𑀻𑀭𑀯𑀦𑁆𑀢𑀁. 𑀏𑀢𑁆𑀣 𑀘 𑀤𑁆𑀯𑀻𑀳𑀺 𑀅𑀥𑀺𑀓𑀁 𑀢𑀺𑀁𑀲𑀁 𑀩𑀸𑀢𑁆𑀢𑀺𑀁𑀲𑀢𑀺. 𑀤𑁆𑀯𑀺𑀲𑀤𑁆𑀤𑀲𑁆𑀲 𑀩𑀸𑀤𑁂𑀲𑁄. 𑀮𑀓𑁆𑀔𑀺𑀬𑀢𑀺 𑀮𑀓𑁆𑀔𑀺𑀢𑀩𑁆𑀩𑀁 𑀩𑀼𑀤𑁆𑀥𑀲𑀭𑀻𑀭𑀁 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁. 𑀤𑀺𑀳𑀢𑀺 𑀉𑀧𑀘𑀬𑀢𑀺 𑀯𑀟𑁆𑀠𑀢𑀺 𑀯𑀸 𑀏𑀢𑁆𑀣 𑀓𑀼𑀲𑀮𑀸 𑀓𑀼𑀲𑀮𑀦𑁆𑀢𑀺 𑀤𑁂𑀳𑀁, 𑀲𑀭𑀻𑀭𑀁. 𑀤𑀺𑀳𑀥𑀸𑀢𑀼 𑀉𑀧𑀘𑀬𑁂 𑀯𑀟𑁆𑀠𑀦𑁂 𑀯𑀸 𑀡. 𑀩𑀸𑀢𑁆𑀢𑀺𑀁𑀲𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘𑀺𑀢𑁆𑀭𑀁 𑀯𑀺𑀘𑀺𑀢𑁆𑀭𑀁 𑀤𑁂𑀳𑀁 𑀲𑀭𑀻𑀭𑀁 𑀬𑀲𑁆𑀲 𑀲𑁄𑀢𑀺 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑁄, 𑀫𑀼𑀦𑀺 𑀮𑀩𑁆𑀪𑀢𑀺.

𑀇𑀤𑀁 𑀧𑀦𑁂𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀭𑀽𑀧𑀲𑁆𑀲 𑀲𑀗𑁆𑀔𑁂𑀧 𑀤𑀲𑁆𑀲𑀦𑀁. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀘, 𑀆𑀬𑀢𑀧𑀡𑁆𑀳𑀺, 𑀤𑀻𑀖𑀗𑁆𑀕𑀼𑀮𑀺, 𑀫𑀼𑀤𑀼𑀢 𑀮𑀼𑀡𑀳𑀢𑁆𑀣𑀧𑀸𑀤𑁄, 𑀚𑀸𑀮𑀳𑀢𑁆𑀣𑀧𑀸𑀤𑁄, 𑀉𑀲𑁆𑀲𑀗𑁆𑀔𑀧𑀸𑀤𑁄, 𑀏𑀡𑀺𑀚𑀗𑁆𑀖𑁄, 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀸𑀡𑀼 𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺, 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄, 𑀲𑀼𑀯𑀡𑁆𑀡 𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄, 𑀲𑀼𑀔𑀼𑀫𑀘𑁆𑀙𑀯𑀻, 𑀏𑀓𑁂𑀓𑀮𑁄𑀫𑁄, 𑀉𑀤𑁆𑀥𑀕𑁆𑀕𑀮𑁄𑀫𑁄, 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀲𑀢𑁆𑀢𑀼𑀲𑁆𑀲𑀤𑁄, 𑀲𑀻𑀳𑀧𑀼𑀩𑁆𑀩𑀤𑁆𑀥 𑀓𑀸𑀬𑁄, 𑀘𑀺𑀢𑀦𑁆𑀢𑀭𑀁𑀲𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄, 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄, 𑀭𑀲𑀕𑁆𑀕𑀭𑀲𑀻, 𑀲𑀻𑀳𑀳𑀦𑀼, 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄, 𑀲𑀫𑀤𑀦𑁆𑀢𑁄, 𑀅𑀯𑀺𑀭𑀴𑀤𑀦𑁆𑀢𑁄, 𑀲𑀼𑀲𑀼𑀓𑁆𑀓𑀤𑀸𑀞𑁄, 𑀧𑀳𑀽𑀢𑀚𑀺𑀯𑁆𑀳𑁄, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀭𑀯𑀻𑀓𑀪𑀸𑀡𑀺, 𑀅𑀢𑀺𑀦𑀻𑀮𑀦𑁂𑀢𑁆𑀢𑁄, 𑀕𑁄𑀧𑀔𑀼𑀫𑁄, 𑀉𑀡𑁆𑀡𑀸 𑀪𑀫𑀼 𑀓𑀦𑁆𑀢𑀭𑁂 ¶ 𑀚𑀸𑀢𑁄, 𑀉𑀡𑁆𑀳𑀻𑀲𑀲𑀻𑀲𑁄 𑀘𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑀸𑀦𑀺 𑀳𑁄𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺.

𑀢𑁂𑀦 𑀯𑀼𑀢𑁆𑀢𑀁 𑀧𑀸𑀣𑁂𑀬𑁆𑀬𑀯𑀕𑁆𑀕𑁂 𑀮𑀓𑁆𑀔𑀡𑀲𑀼𑀢𑁆𑀢𑁂 ‘‘𑀓𑀢𑀫𑀸𑀦𑀺 𑀢𑀸𑀦𑀺 𑀪𑀺𑀓𑁆𑀔𑀯𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀕𑀢𑀺𑀬𑁄 𑀪𑀯𑀦𑁆𑀢𑀺, 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀺…𑀧𑁂… 𑀲𑀘𑁂 𑀔𑁄𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸 𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑁧. 𑀇𑀥 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺 𑁨. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸 𑀓𑀸𑀭𑀧𑀭𑀺𑀧𑀽𑀭𑀸𑀦𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲 𑀮𑀓𑁆𑀔𑀡𑀁 𑀪𑀯𑀢𑀺 𑁩. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀆𑀬𑀢𑀧𑀡𑁆𑀳𑀻 𑀳𑁄𑀢𑀺 𑁪. 𑀤𑀻𑀖𑀗𑁆𑀕𑀼𑀮𑀻 𑀳𑁄𑀢𑀺 𑁫. 𑀫𑀼𑀤𑀼𑀢𑀮𑀼𑀡 𑀳𑀢𑁆𑀣𑀧𑀸𑀤𑁄 𑀳𑁄𑀢𑀺 𑁬. 𑀚𑀸𑀮𑀳𑀢𑁆𑀣𑀧𑀸𑀤𑁄 𑀳𑁄𑀢𑀺 𑁭. 𑀉𑀲𑁆𑀲𑀗𑁆𑀔𑀧𑀸𑀤𑁄 𑀳𑁄𑀢𑀺 𑁮. 𑀏𑀡𑀺𑀚𑀗𑁆𑀖𑁄 𑀳𑁄𑀢𑀺 𑁯. 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀸𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺 𑁧𑁦. 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄 𑀳𑁄𑀢𑀺 𑁧𑁧. 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑁧𑁨. 𑀲𑀼𑀔𑀼𑀫𑀘𑁆𑀙𑀯𑀻 𑀳𑁄𑀢𑀺 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺 𑁧𑁩. 𑀏𑀓𑁂𑀓𑀮𑁄𑀫𑁄 𑀳𑁄𑀢𑀺, 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸𑀦𑀺 𑁧𑁪. 𑀉𑀤𑁆𑀥𑀕𑁆𑀕𑀮𑁄𑀫𑁄 𑀳𑁄𑀢𑀺. 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸 𑀯𑀢𑁆𑀢𑀸𑀦𑀺 𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀓𑀚𑀸𑀢𑀸𑀦𑀺 𑁧𑁫. 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑀳𑁄𑀢𑀺 𑁧𑁬. 𑀲𑀢𑁆𑀢𑀼𑀲𑁆𑀲𑀤𑁄 𑀳𑁄𑀢𑀺 𑁧𑁭. 𑀲𑀻𑀳𑀧𑀼𑀩𑁆𑀩𑀤𑁆𑀥 𑀓𑀸𑀬𑁄 𑀳𑁄𑀢𑀺 𑁧𑁮. 𑀘𑀺𑀢𑀦𑁆𑀢𑀭𑀁𑀲𑁄 𑀳𑁄𑀢𑀺 𑁧𑁯. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀳𑁄𑀢𑀺, 𑀬𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀢𑀸𑀯 𑀢𑀓𑁆𑀯𑀲𑁆𑀲 ¶ 𑀓𑀸𑀬𑁄 𑁨𑁦. 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀳𑁄𑀢𑀺 𑁨𑁧. 𑀭𑀲𑀕𑁆𑀕 𑀲𑀕𑁆𑀕𑀻 𑀳𑁄𑀢𑀺 𑁨𑁨. 𑀲𑀻𑀳𑀳𑀦𑀼 𑀳𑁄𑀢𑀺 𑁨𑁩. 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑀳𑁄𑀢𑀺 𑁨𑁪. 𑀲𑀫𑀤𑀦𑁆𑀢𑁄 𑀳𑁄𑀢𑀺 𑁨𑁫. 𑀅𑀯𑀺𑀭𑀴𑀤𑀦𑁆𑀢𑁄 𑀳𑁄𑀢𑀺 𑁨𑁬. 𑀲𑀼𑀲𑀼𑀓𑁆𑀓𑀤𑀸𑀞𑁄 𑀳𑁄𑀢𑀺 𑁨𑁭. 𑀧𑀳𑀽𑀢𑀚𑀺𑀯𑁆𑀳𑁄 𑀳𑁄𑀢𑀺 𑁨𑁮. 𑀩𑁆𑀭𑀳𑁆𑀫𑀲𑁆𑀲𑀭𑁄 𑀳𑁄𑀢𑀺 𑀓𑀭𑀯𑀻𑀓𑀪𑀸𑀡𑀺 𑁨𑁯. 𑀅𑀢𑀺𑀦𑀻𑀮𑀦𑁂𑀢𑁆𑀢𑁄 𑀳𑁄𑀢𑀺 𑁩𑁦. 𑀕𑁄𑀧𑀔𑀼𑀫𑁄 𑀳𑁄𑀢𑀺 𑁩𑁧. 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮 𑀲𑀦𑁆𑀦𑀺𑀪𑀸. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺 𑁩𑁨. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺. 𑀇𑀫𑀸𑀦𑀺 𑀔𑁄 𑀢𑀸𑀦𑀺 𑀪𑀺𑀓𑁆𑀔𑀯𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲 𑀮𑀓𑁆𑀔𑀡𑀸𑀦𑀻’’𑀢𑀺. 𑀏𑀢𑁂𑀲𑀁 𑀧𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀅𑀢𑁆𑀣𑁄 𑀧𑀘𑁆𑀙𑀸 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺.

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀦𑁆𑀢𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑀢𑁄 𑀦𑀺𑀓𑁆𑀔𑀦𑁆𑀢𑁂𑀳𑀺 𑀙𑀩𑁆𑀩𑀡𑁆𑀡𑀭𑀁𑀲𑀻𑀲𑀗𑁆𑀔𑀸𑀢𑁂𑀳𑀺 𑀑𑀪𑀸𑀲𑁂𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀯𑀦𑁆𑀢𑀁. 𑀚𑀯𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀼𑀢𑀺. 𑀚𑀼𑀥𑀸𑀢𑀼𑀢𑀺. 𑀦𑀺𑀕𑀘𑁆𑀙𑀢𑀺 𑀦𑀺𑀘𑁆𑀙𑀭𑀢𑀻𑀢𑀺 𑀦𑀺𑀕𑁆𑀕𑀢𑀸, 𑀭𑀲𑁆𑀫𑀺. 𑀦𑀺𑀧𑀼𑀩𑁆𑀩𑀕𑀫𑀼𑀥𑀸𑀢𑀼 𑀢. 𑀧𑀓𑀸𑀭𑁂𑀦 𑀚𑀮𑀢𑁂 𑀤𑀺𑀩𑁆𑀩𑀢𑁂 𑀧𑀚𑁆𑀚𑀮𑀦𑁆𑀢𑀁. 𑀏𑀢𑁆𑀣 𑀘 𑀤𑁂𑀳𑀦𑀺𑀕𑁆𑀕𑀢𑀚𑀼𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀤𑀯𑀺𑀧𑀭𑀺𑀬𑀸𑀬𑁂𑀦 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀤𑁂𑀳𑀢𑁄 𑀦𑀺𑀕𑁆𑀕𑀢𑀸 𑀚𑀼𑀢𑀻𑀢𑀺 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀤𑁂𑀳𑀢𑁄 𑀭𑀽𑀧𑀓𑀸𑀬𑀢𑁄 𑀦𑀺𑀕𑁆𑀕𑀢𑁂𑀳𑀺 𑀦𑀺𑀘𑁆𑀙𑀭𑁂𑀳𑀺 𑀚𑀼𑀢𑀻𑀳𑀺 𑀭𑀁𑀲𑀻𑀳𑀺 𑀧𑀚𑁆𑀚𑀮𑀦𑁆𑀢𑀁 𑀬𑀲𑁆𑀲 𑀲𑁄𑀢𑀺 𑀤𑁂𑀳𑀚𑁆𑀚𑀼𑀢𑀺 𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑁄, 𑀫𑀼𑀦𑀺 𑀮𑀩𑁆𑀪𑀢𑀺. 𑀫𑀼𑀦𑀺𑀦𑁄 𑀳𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕 𑀳𑁂𑀲𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀯𑀸𑀫𑀳𑀢𑁆𑀣𑀢𑁄 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀯𑀢𑁆𑀢𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 ¶ 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺, 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀓𑀜𑁆𑀘𑀦𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀦𑀺𑀘𑁆𑀙𑀭𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀚𑀸𑀮𑀸 𑀯𑀺𑀬 𑀘𑀢𑀼𑀤𑁆𑀤𑀻𑀧𑀺𑀓 𑀫𑀳𑀸𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀥𑀸𑀯𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀧𑀜𑁆𑀜𑀸𑀥𑀺𑀢𑀺 𑀲𑀻𑀮 𑀕𑀼𑀡𑁄𑀖𑀯𑀺𑀦𑁆𑀤𑀦𑁆𑀢𑀺 𑀏𑀢𑁆𑀣 𑀧𑀜𑁆𑀜𑀸𑀢𑀺 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁. 𑀥𑀺𑀢𑀻𑀢𑀺 𑀛𑀸𑀦𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺. 𑀲𑀻𑀮𑀦𑁆𑀢𑀺 𑀧𑀘𑁆𑀘𑁂𑀓 𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀼𑀯𑀺𑀲𑀼𑀤𑁆𑀥𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀑𑀖𑀦𑁆𑀢𑀺 𑀲𑀫𑀽𑀳𑀁. 𑀯𑀺𑀦𑁆𑀤𑀦𑁆𑀢𑀺 𑀮𑀤𑁆𑀥𑀁. 𑀧𑀓𑀸𑀭𑁂𑀦 𑀬𑀣𑀸𑀲𑀪𑀸𑀯𑀁 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀯𑀸 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀧𑀜𑁆𑀜𑀸. 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁. 𑀧𑀧𑀼𑀩𑁆𑀩𑀜𑀸𑀥𑀸𑀢𑀼 𑀅. 𑀲𑀸 𑀧𑀦𑁂𑀲𑀸 𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀑𑀪𑀸𑀲𑀦𑀮𑀓𑁆𑀔𑀡𑀸 𑀘, 𑀯𑀺𑀲𑀬𑁄𑀪𑀸𑀲 𑀭𑀲𑀸, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸. 𑀥𑀺𑀢𑀺𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀻𑀮𑀢𑀻𑀢𑀺 𑀲𑀻𑀮𑀁. 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀫𑁆𑀫𑀸 𑀤𑀳𑀢𑀺 𑀲𑀫𑁆𑀫𑀸 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀻𑀮𑀢𑀺 𑀲𑀫𑀸𑀥𑀺𑀬𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀺𑀮𑁆𑀬 𑀪𑀸𑀯𑁂𑀦 𑀦 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀲𑀻𑀮𑀁, 𑀲𑀻𑀮𑀦𑁆𑀢𑀺 𑀲𑀫𑀸𑀤𑀳𑀦𑁆𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀯𑀸 𑀲𑀻𑀮𑀁, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀻𑀮𑀥𑀸𑀢𑀼 𑀅. 𑀇𑀤𑀁 𑀧𑀦 𑀧𑀢𑀺𑀝𑁆𑀞𑀸𑀧𑀦𑀮𑀓𑁆𑀔𑀡𑀁, 𑀤𑀼𑀲𑁆𑀲𑀺𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁 𑀅𑀦𑀯𑀚𑁆𑀚𑀭𑀲𑀁 𑀯𑀸, 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀳𑀺𑀭𑀺𑀑𑀢𑁆𑀢𑀧𑁆𑀧𑀧𑀤𑀝𑁆𑀞𑀸𑀦𑀁. 𑀕𑀼𑀡𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀉𑀳𑀦𑀢𑀺 𑀲𑀫𑀽𑀳𑀁 𑀓𑀭𑁄𑀢𑀺 𑀏𑀢𑁆𑀣 𑀅𑀯𑀬𑀯𑀦𑁆𑀢𑀺 𑀑𑀖𑁄, 𑀲𑀫𑀽𑀳𑁄. 𑀉𑀧𑀼𑀩𑁆𑀩𑀳𑀦𑀥𑀸𑀢𑀼 𑀡. 𑀉𑀲𑁆𑀲 𑀑. 𑀳𑀦𑀲𑁆𑀲 𑀖𑁄. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀧𑀦 ‘‘𑀅𑀯𑀬𑀯𑀁 𑀩𑁆𑀬𑀧𑀺𑀬𑀢𑀺 𑀕𑀘𑁆𑀙𑀢𑀻𑀢𑀺 𑀑𑀖𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑁆𑀤𑀦𑀁𑀮𑀪𑀦𑀁 𑀯𑀺𑀦𑁆𑀤𑀁, 𑀯𑀺𑀦𑁆𑀤𑀺𑀬𑀺𑀢𑁆𑀣 𑀮𑀩𑁆𑀪𑀺𑀢𑁆𑀣𑀸𑀢𑀺 𑀯𑀸 𑀯𑀺𑀦𑁆𑀤𑀁, 𑀧𑀜𑁆𑀜𑀸 𑀘 𑀥𑀺𑀢𑀺 𑀘 𑀲𑀻𑀮𑀜𑁆𑀘 𑀢𑀁 𑀕𑀼𑀡𑀜𑁆𑀘𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑀸, 𑀢𑁂𑀲𑀁 𑀑𑀖𑁄 𑀲𑀫𑀽𑀳𑁄𑀢𑀺 𑀢𑀣𑀸, 𑀢𑀁 𑀯𑀺𑀦𑁆𑀤𑀁 𑀮𑀪𑀦𑀁 𑀬𑀲𑁆𑀲𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑁄, 𑀫𑀼𑀦𑀺 ¶ . 𑀅𑀣 𑀯𑀸 𑀯𑀺𑀦𑁆𑀤𑀁 𑀮𑀪𑀺𑀢𑀩𑁆𑀩𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀁 𑀬𑁂𑀦𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑁄. 𑀢𑀢𑀺𑀬𑀸𑀩𑀳𑀼𑀩𑁆𑀩𑀻𑀳𑀺 𑀲𑀫𑀸𑀲𑁄𑀬𑀁. 𑀯𑀺𑀦𑁆𑀤𑀸𑀦𑀁 𑀮𑀪𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮 𑀲𑀗𑁆𑀔𑀸𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁.

𑀯𑀦𑁆𑀤𑁂𑀢𑀺 𑀅𑀳𑀁 𑀯𑀦𑁆𑀤𑀸𑀫𑀺. 𑀫𑀼𑀦𑀺𑀦𑁆𑀢𑀺 𑀩𑀼𑀤𑁆𑀥𑀁. 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀯𑀸 𑀳𑀺𑀢𑀸𑀳𑀺𑀢𑀦𑁆𑀢𑀺 𑀫𑀼𑀦𑀺, 𑀩𑀼𑀤𑁆𑀥𑁄. 𑀫𑀼𑀦𑀥𑀸𑀢𑀼 𑀜𑀸𑀡𑁂 𑀇. 𑀅𑀣 𑀯𑀸 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀉𑀪𑁄 𑀅𑀢𑁆𑀣𑁂𑀢𑀺 𑀫𑀼𑀦𑀺, 𑀔𑀦𑁆𑀥𑀸𑀤𑀺 𑀮𑁄𑀓𑁂 𑀢𑀼𑀮𑀁 𑀆𑀭𑁄𑀧𑁂𑀢𑁆𑀯𑀸 𑀫𑀺𑀦𑀦𑁆𑀢𑁄 𑀯𑀺𑀬 𑀇𑀫𑁂 𑀅𑀚𑁆𑀛𑀢𑁆𑀢𑀺𑀓𑀸 𑀔𑀦𑁆𑀥𑀸 𑀇𑀫𑁂 𑀩𑀸𑀳𑀺𑀭𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀥𑀮𑁄𑀓𑀢𑁆𑀣𑀜𑁆𑀘 𑀧𑀭𑀮𑁄𑀓𑀢𑁆𑀣𑀜𑁆𑀘 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑁂𑀲 𑀅𑀕𑀸𑀭𑀺𑀬𑀫𑀼𑀦𑀺, 𑀅𑀦𑀸𑀕𑀸𑀭𑀺𑀬𑀫𑀼𑀦𑀺, 𑀲𑁂𑀔𑀫𑀼𑀦𑀺, 𑀅𑀲𑁂𑀔𑀫𑀼𑀦𑀺, 𑀧𑀘𑁆𑀘𑁂𑀓𑀫𑀼𑀦𑀺, 𑀫𑀼𑀦𑀺𑀫𑀼𑀦𑀺 𑀘𑀸𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀅𑀕𑀸𑀭𑀺𑀬𑀫𑀼𑀦𑀻𑀢𑀺 𑀕𑀺𑀳𑀺𑀧𑀺 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀅𑀦𑀸𑀕𑀸𑀭𑀺𑀬𑀫𑀼𑀦𑀻𑀢𑀺 𑀢𑀣𑀸𑀭𑀽𑀧𑁄𑀯 𑀧𑀩𑁆𑀩𑀚𑀺𑀢𑁄. 𑀲𑁂𑀔𑀫𑀼𑀦𑀻𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀲𑁂𑀔𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑁄. 𑀧𑀘𑁆𑀘𑁂𑀓𑀫𑀼𑀦𑀻𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀫𑀼𑀦𑀺𑀫𑀼𑀦𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑁂𑀲𑀼 𑀧𑀦 𑀇𑀥 𑀫𑀼𑀦𑀺𑀫𑀼𑀦𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀁 𑀫𑀼𑀦𑀺𑀁. 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀦𑁆𑀢𑀺 𑀅𑀦𑁆𑀢𑀺𑀫𑁂𑀦 𑀘𑀭𑀺𑀫𑀪𑀯𑁂𑀦 𑀬𑀼𑀢𑁆𑀢𑀁. 𑀅𑀯𑀲𑀸𑀦𑀁 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀁. 𑀅𑀫𑀥𑀸𑀢𑀼 𑀢. 𑀫𑀲𑁆𑀲 𑀦𑁄. 𑀅𑀦𑁆𑀢𑁂 𑀪𑀯𑁄 𑀅𑀦𑁆𑀢𑀺𑀫𑁄, 𑀘𑀭𑀺𑀫𑀪𑀯𑁄. 𑀚𑀸𑀦𑀦𑀁 𑀦𑀺𑀩𑁆𑀩𑀢𑁆𑀢𑀦𑀁 𑀚𑀸𑀢𑀺, 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺. 𑀓𑀫𑁆𑀫𑁂𑀦 𑀚𑀦𑀺𑀬𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀢𑀻𑀢𑀺 𑀯𑀸 𑀚𑀸𑀢𑀺. 𑀉𑀧𑀧𑀢𑁆𑀢𑀺𑀪𑀯𑁄 𑀮𑀩𑁆𑀪𑀢𑀺. 𑀚𑀸𑀦𑀺𑀥𑀸𑀢𑀼𑀢𑀺. 𑀥𑀸𑀢𑁆𑀯𑀦𑁆𑀢 𑀮𑁄𑀧𑁄. 𑀅𑀦𑁆𑀢𑀺𑀫𑀚𑀸𑀢𑀺𑀬𑀸 𑀬𑀼𑀢𑁆𑀢𑁄𑀢𑀺 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑁄, 𑀫𑀼𑀦𑀺. 𑀆𑀬𑀢𑀺𑀜𑁆𑀳𑀺 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀁 𑀲𑀩𑁆𑀩 𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀪𑀕𑀯𑀢𑁄 𑀅𑀦𑀸𑀕𑀢𑁂 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀬𑀁 𑀅𑀭𑀺𑀬𑀚𑀸𑀢𑀺 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑁂 𑁋

‘‘𑀜𑀸𑀡𑀜𑁆𑀘 𑀫𑁂𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀅𑀬𑀁 ¶ 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀁 𑀤𑁂𑀳𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀁 𑀭𑀽𑀧𑀓𑀸𑀬𑀯𑀦𑁆𑀢𑀁, 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢 𑀧𑀚𑁆𑀚𑀮𑀦𑁆𑀢𑀁 𑀭𑀽𑀧𑀓𑀸𑀬𑀢𑁄 𑀦𑀺𑀕𑁆𑀕𑀢𑁂𑀳𑀺 𑀙𑀩𑁆𑀩𑀡𑁆𑀡𑀭𑀁 𑀲𑀻𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀯𑀦𑁆𑀢𑀁, 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄 𑀖𑀯𑀺𑀦𑁆𑀤𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀲𑀗𑁆𑀔𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑀁 𑀮𑀪𑀦𑀯𑀦𑁆𑀢𑀁, 𑀯𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀲𑀗𑁆𑀔𑀸𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑀯𑀦𑁆𑀢𑀁 𑀯𑀸, 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁 𑀘𑀭𑀺𑀫𑀪𑀯𑁂𑀦 𑀘𑀭𑀺𑀫𑀢𑁆𑀢𑀪𑀸𑀯𑁂𑀦 𑀯𑀸 𑀬𑀼𑀢𑁆𑀢𑀁 𑀫𑀼𑀦𑀺𑀁 𑀩𑀼𑀤𑁆𑀥𑀁 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀘𑀢𑀼𑀢𑁆𑀣𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀫𑀚𑁆𑀛𑁂 𑀬𑀢𑀻𑀦𑀁 𑀮𑀮𑀺𑀢𑀁 𑀲𑀺𑀭𑀻𑀳𑀺;

𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀁 𑀅𑀦𑁂𑀚𑀁,

𑀯𑀦𑁆𑀤𑀸𑀫𑀺 𑀲𑀩𑁆𑀩𑀜𑁆𑀜𑀼𑀫𑀳𑀁 𑀫𑀼𑀦𑀺𑀦𑁆𑀤𑀁.

𑁫. 𑀏𑀯𑀁 𑀘𑀢𑀼𑀢𑁆𑀣𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀺𑀭𑀻𑀳𑀺 𑀮𑀮𑀺𑀢𑀦𑁆𑀢𑁆𑀬𑀸𑀤𑀻𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀧𑀸𑀢𑁄𑀤𑀬𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢 𑀢 𑀚 𑀕𑀡𑀤𑁆𑀯𑀺𑀕𑀭𑀽𑀳𑀺 𑀬𑀼𑀢𑁆𑀢𑀢𑁆𑀢𑀸 𑀏𑀓𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀇𑀦𑁆𑀤𑀯𑀚𑀺𑀭𑀸 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀇𑀦𑁆𑀤𑀸𑀤𑀺𑀓𑀸 𑀢𑀸 𑀯𑀚𑀺𑀭𑀸 𑀚𑀕𑀸𑀕𑁄’’𑀢𑀺. 𑀢𑀲𑁆𑀲𑀢𑁆𑀣𑁄, 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀢𑀸 𑀤𑁆𑀯𑁂𑀢 𑀕𑀡𑀸 𑀘 𑀚𑀕𑀸 𑀚𑀕𑀡 𑀕𑀭𑀼 𑀘 𑀕𑁄 𑀕𑀭𑀼 𑀘 𑀘𑁂 𑀪𑀯𑀦𑁆𑀢𑀺, 𑀲𑀸 𑀇𑀦𑁆𑀤𑀸 𑀤𑀺𑀓𑀸 𑀇𑀦𑁆𑀤𑀲𑀤𑁆𑀤𑀆𑀤𑀺𑀓𑀸 𑀯𑀚𑀺𑀭𑀸 𑀯𑀚𑀺𑀭𑀸𑀕𑀸𑀣𑀸 𑀦𑀸𑀫𑀸𑀢𑀺.

𑀢𑀢𑁆𑀣 𑀧𑀸𑀢𑁄𑀤𑀬𑀦𑁆𑀢𑀺 𑀏𑀢𑁆𑀣 𑀧𑀸𑀢𑁄 𑀉𑀤𑀬𑀦𑁆𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀧𑀕𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀉𑀕𑁆𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀢𑁄 𑀧𑀕𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀉𑀤𑁂𑀢𑀺 𑀉𑀕𑁆𑀕𑀘𑁆𑀙𑀢𑀻𑀢𑀺 𑀧𑀸𑀢𑁄𑀤𑀬𑁄, 𑀲𑀽𑀭𑀺𑀬𑁄. 𑀧𑀸𑀢𑁄𑀧𑀼𑀩𑁆𑀩 𑀉𑀤𑀥𑀸𑀢𑀼 𑀉𑀕𑁆𑀕𑀫𑀦𑁂 𑀅𑀬𑁄, 𑀢𑀁 𑀧𑀸𑀢𑁄𑀤𑀬𑀁. 𑀩𑀸𑀮𑀤𑀺𑀯𑀸 𑀓𑀭𑀁 ¶ 𑀯𑀸𑀢𑀺 𑀩𑀸𑀮𑀤𑀺𑀯𑀸𑀓𑀭𑀁 𑀇𑀯𑀸𑀢𑀺𑀧𑀤𑀘𑁆𑀙𑁂𑀤𑁄. 𑀩𑀸𑀮𑀤𑀺𑀯𑀸𑀓𑀭𑀁 𑀯𑀸𑀢𑀺 𑀦𑀺𑀕𑁆𑀕𑀢𑀸𑀪𑀺𑀦𑀯𑀲𑀽𑀭𑀺𑀬𑀁 𑀯𑀺𑀬. 𑀏𑀢𑁆𑀣 𑀘 𑀩𑀸𑀮𑁄𑀢𑀺 𑀲𑀫𑁆𑀧𑀢𑀺 𑀚𑀸𑀢𑁄 𑀢𑀭𑀼𑀡𑀤𑀸𑀭𑀓𑁄 𑀧𑁄𑀢𑀓𑁄 𑀯𑀸. 𑀲𑁄 𑀳𑀺 𑀩𑀮𑀢𑀺 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀢𑀺 𑀦 𑀲𑁂𑀝𑁆𑀞𑁂𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀩𑀸𑀮𑁄, 𑀢𑀭𑀼𑀡𑀤𑀸𑀭𑀓𑁄. 𑀩𑀮𑀥𑀸𑀢𑀼 𑀧𑀸𑀡𑀦𑁂 𑀚𑀻𑀯𑀸𑀬𑀁 𑀯𑀸. 𑀲𑀽𑀭𑀺𑀬𑀭𑀁𑀲𑀺𑀦𑀸 𑀤𑀺𑀯𑀢𑀺 𑀤𑀺𑀩𑁆𑀩𑀢𑀻𑀢𑀺 𑀤𑀺𑀯𑀸. 𑀤𑀺𑀯𑀼𑀥𑀸𑀢𑀼 𑀅. 𑀅𑀣 𑀯𑀸 𑀤𑀻𑀬𑀢𑀺 𑀔𑀻𑀬𑀢𑀺 𑀅𑀦𑁆𑀥𑀓𑀸𑀭𑁄 𑀏𑀢𑁂𑀦𑀸𑀢𑀺 𑀤𑀺𑀯𑀸. 𑀤𑀻𑀥𑀸𑀢𑀼 𑀔𑀬𑁂 𑀅, 𑀯𑀸𑀕𑀫𑁄. 𑀢𑀁 𑀓𑀭𑁄𑀢𑀻𑀢𑀺 𑀤𑀺𑀯𑀸𑀓𑀭𑁄, 𑀤𑀺𑀯𑀸 𑀤𑀺𑀯𑀲𑁂 𑀯𑀸 𑀓𑀭𑁄 𑀆𑀪𑀸 𑀬𑀲𑁆𑀲𑀸𑀢𑀺 𑀤𑀺𑀯𑀸𑀓𑀭𑁄, 𑀲𑀽𑀭𑀺𑀬𑁄. 𑀩𑀸𑀮𑀲𑀤𑀺𑀲𑁄 𑀤𑀺𑀯𑀸𑀓𑀭𑁄 𑀩𑀸𑀮𑀤𑀺𑀯𑀸𑀓𑀭𑁄. 𑀅𑀣 𑀯𑀸 𑀩𑀸𑀮𑁄 𑀇𑀯 𑀤𑀺𑀯𑀸𑀓𑀭𑁄𑀢𑀺 𑀩𑀸𑀮𑀤𑀺𑀯𑀸𑀓𑀭𑁄, 𑀦𑀯𑀼𑀕𑁆𑀕𑀢𑀲𑀽𑀭𑀺𑀬𑁄. 𑀲𑁄 𑀧𑀦 𑀆𑀓𑀸𑀲𑁂 𑀦𑀓𑁆𑀔𑀢𑁆𑀢𑀢𑀸𑀭𑀸𑀦𑀁 𑀫𑀚𑁆𑀛𑁂 𑀲𑀳𑀲𑁆𑀲𑀭𑀁𑀲𑀻𑀳𑀺 𑀮𑀮𑀢𑀺 𑀯𑀺𑀮𑀸𑀲𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑀬𑀢𑀻𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀢𑁂 𑀳𑀺 𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀬𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀢 𑀥𑀸𑀢𑀼 𑀧𑀢𑀺𑀬𑀢𑀦𑁂 𑀯𑀸𑀬𑀸𑀫𑁂 𑀯𑀸 𑀇. 𑀅𑀣 𑀯𑀸 𑀬𑀫𑀦𑁆𑀢𑀺 𑀉𑀧𑀭𑀫𑀦𑁆𑀢𑀺 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀬𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀫𑀼𑀥𑀸𑀢𑀼 𑀉𑀧𑀭𑀫𑁂 𑀇. 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀢𑁂𑀲𑀁 𑀬𑀢𑀻𑀦𑀁. 𑀮𑀮𑀺𑀢𑀦𑁆𑀢𑀺 𑀯𑀺𑀮𑀸𑀲𑀺𑀢𑀁. 𑀮𑀮𑀢𑀺 𑀯𑀺𑀮𑀸𑀲𑁂𑀢𑀻𑀢𑀺 𑀮𑀮𑀺𑀢𑁄, 𑀫𑀼𑀦𑀺. 𑀮𑀮𑀥𑀸𑀢𑀼 𑀯𑀺𑀮𑀸𑀲𑁂 𑀢. 𑀢𑀁. 𑀲𑀺𑀭𑀻𑀳𑀻𑀢𑀺 𑀪𑀕𑀯𑀢𑁄 𑀓𑀸𑀬𑀗𑁆𑀕𑀲𑁄𑀪𑀕𑁆𑀕𑀧𑀢𑁆𑀢𑁂𑀳𑀺 𑀲𑀺𑀭𑀻𑀳𑀺, 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸𑀲𑀻𑀢𑁆𑀬𑀸 𑀦𑀼𑀩𑁆𑀬𑀜𑁆𑀚𑀦𑀙𑀩𑁆𑀩𑀡𑁆𑀡𑀭𑀁𑀲𑀻𑀲𑀗𑁆𑀔𑀢𑁂𑀳𑀺 𑀲𑀫𑁆𑀧𑀢𑁆𑀢𑀺𑀲𑀺𑀭𑀻𑀳𑀺 𑀯𑀸. 𑀓𑀢𑀧𑀼𑀜𑁆𑀜𑁂 𑀦𑀺𑀲𑁆𑀲𑀬𑀢𑀻𑀢𑀺 𑀲𑀺𑀭𑀻. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀭𑀧𑀘𑁆𑀘𑀬𑁄 𑀇𑀢𑁆𑀣𑀺 𑀮𑀺𑀗𑁆𑀕𑀚𑁄𑀢𑀓𑀈𑀧𑀘𑁆𑀘𑀬𑁄 𑀘. 𑀓𑀢𑀧𑀼𑀜𑁆𑀜𑁂𑀳𑀺 𑀲𑁂𑀯𑀺𑀬𑀢𑀻𑀢𑀺 𑀯𑀸 𑀲𑀺𑀭𑀻, 𑀲𑀫𑁆𑀧𑀢𑁆𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 ‘‘𑀲𑀺𑀭𑀻𑀢𑀺 𑀧𑀜𑁆𑀜𑀸𑀧𑀼𑀜𑁆𑀜𑀸𑀦 𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀢𑀻𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀲𑀺𑀭𑀻𑀳𑀺 𑀮𑀮𑀺𑀢𑀁 𑀯𑀺𑀮𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀣𑀸 𑀧𑀸𑀢𑁄 𑀉𑀤𑀺𑀢𑁄 𑀉𑀕𑁆𑀕𑀢𑁄 𑀲𑀽𑀭𑀺𑀬𑁄 𑀆𑀓𑀸𑀲𑁂 𑀦𑀓𑁆𑀔𑀢𑁆𑀢𑀢𑀸𑀭𑀸𑀦𑀁 ¶ 𑀫𑀚𑁆𑀛𑁂 𑀲𑀳𑀲𑁆𑀲𑀭𑀁𑀲𑀻𑀳𑀺 𑀮𑀮𑀢𑀺 𑀯𑀺𑀮𑀸𑀲𑀢𑀺, 𑀏𑀯𑀁 𑀫𑀼𑀦𑀺 𑀮𑁄𑀓𑁂 𑀬𑀢𑀻𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸 𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀅𑀮𑀗𑁆𑀓𑀢𑁂𑀳𑀺 𑀲𑀭𑀻𑀭𑀲𑁄𑀪𑀕𑁆𑀕 𑀧𑀢𑁆𑀢𑀻𑀳𑀺 𑀲𑀫𑁆𑀧𑀢𑁆𑀢𑀺𑀲𑀺𑀭𑀻𑀳𑀺 𑀮𑀮𑀢𑀺 𑀯𑀺𑀮𑀸𑀲𑀢𑀻𑀢𑀺.

𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀦𑁆𑀢𑀺 𑀧𑀼𑀡𑁆𑀡𑀘𑀦𑁆𑀤𑁂𑀦 𑀲𑀤𑀺𑀲𑀁 𑀆𑀦𑀦𑀲𑀫𑁆𑀧𑀦𑁆𑀦𑀁. 𑀬𑀣𑀸 𑀳𑀺 𑀘𑀦𑁆𑀤𑁄 𑀓𑀸𑀴𑀧𑀓𑁆𑀔𑁂 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀺𑀦𑁂 𑀤𑀺𑀦𑁂 𑀊𑀦𑁄 𑀳𑁄𑀢𑀺, 𑀏𑀯𑀁 𑀦 𑀫𑀼𑀦𑀺𑀦𑁄 𑀫𑀼𑀔𑀁 𑀆𑀦𑀦𑀁 𑀊𑀦𑀁. 𑀪𑀕𑀯𑀢𑁄 𑀧𑀦 𑀫𑀼𑀔𑀁 𑀦𑀺𑀘𑁆𑀘𑀁 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀅𑀦𑀽𑀦𑀁 𑀳𑀼𑀢𑁆𑀯𑀸 𑀲𑁄𑀪𑀢𑀺, 𑀢𑀲𑁆𑀫𑀸 𑀧𑀼𑀡𑁆𑀡𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀦𑁆𑀢𑀺 𑀣𑁄𑀫𑁂𑀢𑀺. 𑀲𑁄𑀴𑀲𑀓𑀮𑁂𑀳𑀺 𑀧𑀽𑀭𑁂𑀢𑀻𑀢𑀺 𑀧𑀼𑀡𑁆𑀡𑀁. 𑀧𑀽𑀭𑀥𑀸𑀢𑀼 𑀢, 𑀢𑀲𑁆𑀲 𑀡𑁆𑀡𑁄. 𑀇𑀤𑀢𑀺 𑀦𑀓𑁆𑀔𑀢𑁆𑀢𑀢𑀸𑀭𑀸𑀦𑀁 𑀇𑀲𑁆𑀲𑀭𑀺𑀬𑀁 𑀓𑀭𑁄𑀢𑀻𑀢𑀺 𑀇𑀦𑁆𑀤𑀼, 𑀇𑀤𑀺𑀥𑀸𑀢𑀼 𑀇𑀲𑁆𑀲𑀭𑀺𑀬𑀁 𑀉. 𑀧𑀼𑀡𑁆𑀡𑀁 𑀧𑀭𑀺𑀧𑀼𑀡𑁆𑀡𑀁 𑀇𑀦𑁆𑀤𑀼 𑀧𑀼𑀡𑁆𑀡𑀺𑀦𑁆𑀤𑀼, 𑀘𑀦𑁆𑀤𑁄. 𑀲𑀗𑁆𑀓𑀸𑀲𑀦𑁆𑀢𑀺 𑀲𑀤𑀺𑀲𑀁. 𑀲𑀗𑁆𑀓𑀸𑀲𑀲𑀤𑁆𑀤𑁄 𑀳𑀺 𑀉𑀧𑀫𑀸𑀯𑀸𑀘𑀓𑁄 𑀦𑀺𑀧𑀸𑀢𑁄. 𑀯𑀼𑀢𑁆𑀢𑀜𑁆𑀳𑀺

‘‘𑀇𑀯𑀸𑀤𑀺 𑀇𑀯 𑀯𑀸 𑀢𑀼𑀮𑁆𑀬, 𑀲𑀫𑀸𑀦𑀦𑀺𑀪𑀲𑀦𑁆𑀦𑀺𑀪𑀸;

𑀬𑀣𑀸 𑀲𑀗𑁆𑀓𑀸𑀲 𑀢𑀼𑀮𑀺𑀢, 𑀧𑁆𑀧𑀓𑀸𑀲 𑀧𑀢𑀺𑀭𑀽𑀧𑀓𑀸’’𑀢𑁆𑀬𑀸𑀤𑀺.

𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀫𑀼𑀔𑀢𑀺 𑀲𑁄𑀪𑀢𑀻𑀢𑀺 𑀫𑀼𑀔𑀁, 𑀆𑀦𑀦𑀁. 𑀫𑀼𑀔𑀥𑀸𑀢𑀼 𑀅. 𑀧𑀼𑀡𑁆𑀡𑀺𑀦𑁆𑀤𑀼𑀦𑀸 𑀲𑀗𑁆𑀓𑀸𑀲𑀁 𑀲𑀤𑀺𑀲𑀁 𑀫𑀼𑀔𑀁 𑀆𑀦𑀦𑀁 𑀬𑀲𑁆𑀲 𑀲𑁄𑀢𑀺 𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑁄, 𑀫𑀼𑀦𑀺𑀦𑁆𑀤𑁄. 𑀢𑀁. 𑀫𑀼𑀦𑀺𑀦𑁆𑀤𑀲𑁆𑀲 𑀧𑀦 𑀧𑀼𑀡𑁆𑀡 𑀘𑀦𑁆𑀤𑀲𑁆𑀲 𑀲𑀳𑀲𑁆𑀲𑀭𑀁𑀲𑀻𑀳𑀺 𑀲𑀲𑁆𑀲𑀺𑀭𑀺𑀓𑁄 𑀯𑀺𑀬 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀩𑀸𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲 𑀮𑀓𑁆𑀔𑀡𑀸𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦 𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀲𑀺𑀭𑀻𑀳𑀺 𑀘 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑁂𑀳𑀺 𑀆𑀯𑁂𑀴𑀸𑀯𑁂𑀴𑀸 𑀬𑀫𑀓𑀸𑀬𑀫𑀓𑀸 𑀕𑀼𑀫𑁆𑀩𑀸𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀯𑀺𑀦𑀺𑀘𑁆𑀙𑀭𑀦𑁆𑀢𑀻𑀳𑀺 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀲𑀗𑁆𑀔𑀸𑀢𑁂𑀳𑀺 𑀅𑀮𑀗𑁆𑀓𑀺𑀢𑁄 𑀲𑀲𑁆𑀲𑀺𑀭𑀺𑀓𑀫𑀼𑀔𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀦𑁆𑀢𑀺 𑀣𑁄𑀫𑁂𑀢𑀺.

𑀅𑀦𑁂𑀚𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀮𑀸𑀪𑀸𑀮𑀸𑀪𑀸𑀤𑀺𑀁 𑀧𑀝𑀺𑀘𑁆𑀘 𑀏𑀚𑀢𑀺 𑀓𑀫𑁆𑀧𑀢𑀻𑀢𑀺 𑀏𑀚𑀸, 𑀢𑀡𑁆𑀳𑀸. 𑀏𑀚𑀥𑀸𑀢𑀼 𑀓𑀫𑁆𑀧𑀦𑁂 𑀅, 𑀦𑀢𑁆𑀣𑀺 𑀏𑀚𑀸 𑀬𑀲𑁆𑀲𑀸𑀢𑀺 ¶ 𑀅𑀦𑁂𑀚𑁄, 𑀫𑀼𑀦𑀺𑀦𑁆𑀤𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀮𑀸𑀪𑀸𑀮𑀸𑀪 𑀬𑀲𑀸𑀬𑀲 𑀦𑀺𑀦𑁆𑀤𑀸𑀦𑀺𑀦𑁆𑀤 𑀲𑀼𑀔𑀤𑀼𑀓𑁆𑀔𑁂𑀳𑀺 𑀦 𑀇𑀜𑁆𑀚𑀢𑀻𑀢𑀺 𑀅𑀦𑁂𑀚𑁄, 𑀪𑀕𑀯𑀸 𑀮𑀩𑁆𑀪𑀢𑀻’’𑀢𑀺.

𑀲𑀩𑁆𑀩𑀜𑁆𑀜𑀼𑀦𑁆𑀢𑀺 𑀧𑀝𑀺𑀯𑀺𑀤𑁆𑀥 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁. 𑀲𑀗𑁆𑀔𑀭𑀯𑀺𑀓𑀸𑀭𑀮𑀓𑁆𑀔𑀡𑀦𑀺𑀩𑁆𑀩𑀸𑀦 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀲𑀻𑀮𑁂𑀦𑀸𑀢𑀺 𑀲𑀩𑁆𑀩𑀜𑁆𑀜𑀽, 𑀫𑀼𑀦𑀺𑀦𑁆𑀤𑁄. 𑀲𑀩𑁆𑀩𑀲𑀤𑁆𑀤𑀽𑀧𑀧𑀤 𑀜𑀸𑀥𑀸𑀢𑀼 𑀭𑀽. 𑀏𑀢𑁆𑀣 𑀘 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸 𑀲𑀗𑁆𑀔𑀭𑀸 𑀦𑀸𑀫 𑀲𑀓𑀲𑀓𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀺𑀬𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀮𑀳𑀼𑀢𑀸𑀤𑀺𑀢𑁆𑀢𑀬𑀜𑁆𑀘 𑀯𑀺𑀓𑀸𑀭𑁄 𑀦𑀸𑀫 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀯𑀺𑀭𑀽𑀧𑀁 𑀓𑀭𑀺𑀬𑀢𑀻𑀢𑀺 𑀓𑀢𑁆𑀯𑀸. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲 𑀬𑀣𑀸𑀓𑁆𑀓𑀫𑀁 𑀘𑀺𑀢𑁆𑀢𑀚𑀯𑀸𑀬𑁄𑀥𑀸𑀢𑀼 𑀘𑀺𑀢𑁆𑀢𑀚𑀧𑀣𑀯𑀻 𑀥𑀸𑀢𑀽𑀦𑀁 𑀯𑀺𑀲𑁂𑀲𑀕𑀼𑀡𑀢𑁆𑀢𑀸, 𑀮𑀳𑀼𑀢𑀸𑀤𑀺𑀢𑁆𑀢𑀬𑀲𑁆𑀲 𑀘 𑀘𑀺𑀢𑁆𑀢𑁄 𑀢𑁆𑀯𑀸𑀳𑀸𑀭𑀚𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀯𑀺𑀲𑁂𑀲𑀕𑀼𑀡𑀢𑁆𑀢𑀸. 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀨𑀼𑀲𑀦𑀸𑀤𑀺𑀮𑀓𑁆𑀔𑀡𑀜𑁆𑀘 𑀧𑀣𑀯𑀻𑀥𑀸𑀢𑁆𑀯𑀸𑀤𑀻𑀦𑀁 𑀓𑀓𑁆𑀔𑀴𑀸𑀤𑀺𑀮𑀓𑁆𑀔𑀡𑀜𑁆𑀘, 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀜𑁆𑀘, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀺𑀮𑀓𑁆𑀔𑀡𑀜𑁆𑀘, 𑀭𑀽𑀧𑀲𑁆𑀲 𑀭𑀼𑀧𑁆𑀧𑀦𑀮𑀓𑁆𑀔𑀡𑀜𑁆𑀘, 𑀦𑀸𑀫𑀲𑁆𑀲 𑀦𑀫𑀦𑀮𑀓𑁆𑀔𑀡𑀜𑁆𑀘, 𑀅𑀦𑀺𑀘𑁆𑀘𑀢𑀸𑀤𑀺𑀢𑁆𑀢𑀬𑀸𑀦𑀺 𑀘 𑀉𑀧𑀘𑀬𑀸𑀤𑀺𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀭𑀽𑀧𑀸𑀦𑀺 𑀘 𑀮𑀓𑁆𑀔𑀡𑀸𑀦𑀺 𑀦𑀸𑀫 𑀮𑀓𑁆𑀔𑀺𑀬𑀦𑁆𑀢𑀺 𑀏𑀢𑁂𑀦 𑀮𑀓𑁆𑀔𑀺𑀢𑀩𑁆𑀩𑀸 𑀥𑀫𑁆𑀫𑀸𑀢𑀺 𑀓𑀢𑁆𑀯𑀸. 𑀅𑀲𑀗𑁆𑀔𑀢𑀥𑀸𑀢𑀼𑀦𑀺𑀩𑁆𑀩𑀸𑀦𑀁 𑀦𑀸𑀫 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀓𑀢𑁆𑀯𑀸. 𑀧𑀭𑀺𑀘𑁆𑀙𑁂𑀤𑀭𑀽𑀧𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀖𑀝𑀧𑀝𑀸𑀤𑀬𑁄 𑀲𑀩𑁆𑀩 𑀯𑁄𑀳𑀸𑀭𑀢𑁆𑀣𑀸 𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀧𑀜𑁆𑀜𑀸𑀧𑀺𑀬𑀢𑀺 𑀧𑀓𑀸𑀭𑁂𑀦 𑀜𑀸𑀧𑀺𑀬𑀢𑀻𑀢𑀺 𑀓𑀢𑁆𑀯𑀸. 𑀏𑀢𑁆𑀣 𑀘 𑀲𑀗𑁆𑀔𑀸𑀭𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀫𑀢𑁆𑀣𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀯𑀺𑀓𑀸𑀭𑀸𑀤𑀻𑀲𑀼 𑀧𑀦 𑀯𑀺𑀓𑀸𑀭𑀮𑀓𑁆𑀔𑀡𑀸𑀦𑀺 𑀧𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑀢𑁆𑀢𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑀺𑀦𑀺𑀫𑀼𑀢𑁆𑀢𑀸 𑀧𑀦 𑀧𑀭𑀺𑀘𑁆𑀙𑁂𑀤𑀭𑀽𑀧𑀸 𑀲𑀩𑁆𑀩𑀯𑁄𑀳𑀸𑀭𑀢𑁆𑀣𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀤𑀸𑀦 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀩𑁆𑀩𑀁 𑀅𑀢𑀻𑀢𑀸𑀤𑀺𑀪𑁂𑀤𑀁 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽’’𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀜𑁆𑀜𑀽𑀢𑀺 𑀘 𑀓𑀫𑀲𑀩𑁆𑀩𑀜𑁆𑀜𑀽, 𑀲𑀓𑀺𑀁 𑀲𑀩𑁆𑀩𑀜𑁆𑀜𑀽, 𑀲𑀢𑀢𑀲𑀩𑁆𑀩𑀜𑁆𑀜𑀽, 𑀲𑀢𑁆𑀢𑀺 𑀲𑀩𑁆𑀩𑀜𑁆𑀜𑀽, 𑀜𑀸𑀢𑀲𑀩𑁆𑀩𑀜𑁆𑀜𑀽 𑀘𑀸𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺 𑀲𑀩𑁆𑀩𑀜𑁆𑀜𑀽. 𑀢𑀢𑁆𑀣 𑀬𑀣𑀸𑀓𑁆𑀓𑀫𑀁 𑀲𑀩𑁆𑀩𑀁 𑀚𑀸𑀦𑀦𑀥𑀫𑁆𑀫𑁄 𑀓𑀫𑀲𑀩𑁆𑀩𑀜𑁆𑀜𑀽 𑀦𑀸𑀫. 𑀏𑀓𑀸𑀯𑀚𑁆𑀚𑀦𑁂𑀦 𑀚𑀯𑀦𑀯𑀸𑀭𑁂𑀦 ¶ 𑀚𑀸𑀦𑀺𑀢𑀩𑁆𑀩𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀦𑀥𑀫𑁆𑀫𑁄 𑀲𑀓𑀺𑀁𑀲𑀩𑁆𑀩𑀜𑁆𑀜𑀽 𑀦𑀸𑀫. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀬𑀢𑀸𑀭𑀫𑁆𑀫𑀡𑀢𑁆𑀢𑀁 𑀚𑀸𑀦𑀦𑀥𑀫𑁆𑀫𑁄 𑀲𑀢𑀢𑀲𑀩𑁆𑀩𑀜𑁆𑀜𑀽 𑀦𑀸𑀫. 𑀏𑀓𑀧𑁆𑀧𑀳𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀁 𑀚𑀸𑀦𑀦𑀲𑀫𑀢𑁆𑀣𑁄 𑀥𑀫𑁆𑀫𑁄 𑀲𑀢𑁆𑀢𑀺𑀲𑀩𑁆𑀩𑀜𑁆𑀜𑀽 𑀦𑀸𑀫. 𑀆𑀯𑀚𑁆𑀚𑀦𑀸𑀪𑁂𑀤𑁂𑀦 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀥𑀫𑁆𑀫𑀁 𑀚𑀸𑀦𑀦𑀥𑀫𑁆𑀫𑁄 𑀜𑀸𑀢𑀲𑀩𑁆𑀩𑀜𑁆𑀜𑀽 𑀦𑀸𑀫. 𑀢𑁂𑀲𑀼 𑀘 𑀲𑀓𑀺𑀁 𑀲𑀩𑁆𑀩𑀜𑁆𑀜𑀽 𑀲𑀢𑁆𑀢𑀺𑀲𑀩𑁆𑀩𑀜𑁆𑀜𑀽𑀯𑀲𑁂𑀦 𑀤𑁆𑀯𑁂 𑀥𑀫𑁆𑀫𑀸 𑀫𑀕𑁆𑀕𑀜𑀸𑀡𑀸𑀦𑀺𑀬𑁂𑀯. 𑀢𑀤𑀯𑀲𑁂𑀲𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀲𑀩𑁆𑀩𑀜𑁆𑀜𑀼𑀁.

𑀫𑀼𑀦𑀺𑀦𑁆𑀤𑀦𑁆𑀢𑀺 𑀏𑀢𑁆𑀣 𑀫𑀼𑀦𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀫𑀼𑀦𑀻𑀦𑀁 𑀇𑀦𑁆𑀤𑁄 𑀇𑀲𑁆𑀲𑀭𑁄 𑀫𑀼𑀦𑀺𑀦𑁆𑀤𑁄, 𑀢𑀁 𑀫𑀼𑀦𑀺𑀦𑁆𑀤𑀁 𑀅𑀳𑀁 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀧𑀸𑀢𑁄𑀤𑀬𑀁 𑀧𑀕𑁂𑀯 𑀉𑀤𑀬𑀁 𑀉𑀕𑁆𑀕𑀢𑀁, 𑀩𑀸𑀮𑀤𑀺𑀯𑀸𑀓𑀭𑀁𑀯 𑀦𑀯𑀼𑀕𑁆𑀕𑀢𑀲𑀽𑀭𑀺𑀬𑀫𑀸𑀡𑀯𑁄𑀇𑀯, 𑀬𑀢𑀻𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀲𑀺𑀭𑀻𑀳𑀺 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸 𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀲𑀺𑀭𑀻𑀳𑀺 𑀮𑀮𑀺𑀢𑀁 𑀯𑀺𑀮𑀸𑀲𑀺𑀢𑀁, 𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀁 𑀧𑀼𑀡𑁆𑀡𑀘𑀦𑁆𑀤𑁂𑀦 𑀲𑀤𑀺𑀲𑀁 𑀆𑀦𑀦𑀯𑀦𑁆𑀢𑀁, 𑀅𑀦𑁂𑀚𑀁 𑀦𑀺𑀢𑁆𑀢𑀡𑁆𑀳𑀁, 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀺𑀜𑁆𑀚𑀦𑀁 𑀯𑀸, 𑀲𑀩𑁆𑀩𑀜𑁆𑀜𑀼𑀁 𑀲𑀩𑁆𑀩𑀥𑀫𑁆𑀫 𑀯𑀺𑀚𑀸𑀦𑀦𑁆𑀢𑀁, 𑀫𑀼𑀦𑀺𑀦𑁆𑀤𑀁 𑀩𑀼𑀤𑁆𑀥𑀁 𑀲𑀓𑁆𑀓𑀘𑁆𑀘𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀳𑀁 𑀯𑀦𑁆𑀤𑀸𑀫𑀻𑀢𑀺.

𑀧𑀜𑁆𑀘𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀉𑀧𑁂𑀢𑀧𑀼𑀜𑁆𑀜𑁄 𑀯𑀭𑀩𑁄𑀥𑀺𑀫𑀽𑀮𑁂,

𑀲𑀲𑁂𑀦𑀫𑀸𑀭𑀁 𑀲𑀼𑀕𑀢𑁄 𑀚𑀺𑀦𑀺𑀢𑁆𑀯𑀸;

𑀅𑀩𑁄𑀚𑁆𑀛𑀺 𑀩𑁄𑀥𑀺𑀁 𑀅𑀭𑀼𑀡𑁄𑀤𑀬𑀫𑁆𑀳𑀺,

𑀦𑀫𑀸𑀫𑀺 𑀢𑀁 𑀫𑀸𑀭𑀚𑀺𑀦𑀁 𑀅𑀪𑀗𑁆𑀕𑀁.

𑁬. 𑀏𑀯𑀁 𑀧𑀜𑁆𑀘𑀫𑀕𑀸𑀣𑀸𑀬 𑀫𑀼𑀦𑀺𑀦𑁆𑀤𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀸𑀭𑀚𑀺𑀦𑀕𑀼𑀡𑁂𑀦 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀉𑀧𑁂𑀢𑀧𑀼𑀜𑁆𑀜𑁄 𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀚 𑀢 𑀚 𑀕𑀡 𑀤𑁆𑀯𑀺𑀕𑀭𑀼𑀬𑀼𑀢𑁆𑀢𑀢𑁆𑀢𑀸 𑀏𑀓𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀉𑀧𑁂𑀦𑁆𑀤𑀯𑀚𑀺𑀭𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀉𑀧𑀸𑀤𑀺𑀓𑀸 ¶ 𑀲𑀸𑀯 𑀚𑀢𑀸 𑀚𑀕𑀸 𑀕𑁄’’𑀢𑀺. 𑀢𑀲𑁆𑀲𑀢𑁆𑀣𑁄, 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀚𑀢𑀸 𑀚𑀕𑀡 𑀢𑀕𑀡𑀸 𑀘 𑀚𑀕𑀸 𑀚𑀕𑀡𑀕𑀭𑀽 𑀘 𑀕𑁄 𑀕𑀭𑀼 𑀘 𑀘𑁂 𑀲𑀺𑀬𑀸, 𑀲𑀸𑀯 𑀲𑀸𑀕𑀸𑀣𑀸𑀏𑀯 𑀉𑀧𑀸𑀤𑀺𑀓𑀸 𑀉𑀧𑀲𑀤𑁆𑀤𑀸𑀤𑀺𑀓𑀸 𑀇𑀦𑁆𑀤𑀯𑀚𑀺𑀭𑀸𑀕𑀸𑀣𑀸 𑀦𑀸𑀫𑀸𑀢𑀺.

𑀉𑀧𑁂𑀢𑀧𑀼𑀜𑁆𑀜𑁄 𑀬𑁄 𑀲𑀼𑀕𑀢𑁄 𑀯𑀭𑀩𑁄𑀥𑀺𑀫𑀽𑀮𑁂 𑀲𑀲𑁂𑀦 𑀫𑀸𑀭𑀁 𑀚𑀺𑀦𑀺𑀢𑁆𑀯𑀸 𑀅𑀭𑀼𑀡𑁄𑀤𑀬𑀫𑁆𑀳𑀺 𑀩𑁄𑀥𑀺𑀁 𑀅𑀩𑁄𑀚𑁆𑀛𑀺 𑀫𑀸𑀭𑀚𑀺𑀦𑀁 𑀅𑀪𑀗𑁆𑀕𑀁, 𑀢𑀁 𑀲𑀼𑀕𑀢𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀧𑁂𑀢𑀧𑀼𑀜𑁆𑀜𑁄𑀢𑀺 𑀲𑀫𑁆𑀧𑀦𑁆𑀦𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀫𑀻𑀧𑀼𑀜𑁆𑀜𑀯𑀸. 𑀤𑀸𑀦𑀲𑀻𑀮𑀸𑀤𑀺 𑀧𑀸𑀭𑀫𑀻𑀧𑀼𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀸. 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀫𑀻𑀧𑀼𑀜𑁆𑀜𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄, 𑀉𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀏𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀉𑀧𑁂𑀢𑀁, 𑀧𑀼𑀜𑁆𑀜𑀁. 𑀉𑀧𑀧𑀼𑀩𑁆𑀩𑀇𑀥𑀸𑀢𑀼 𑀕𑀢𑀺𑀬𑀁 𑀢. 𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀦𑁆𑀢𑀺 𑀧𑀼𑀜𑁆𑀜𑀁, 𑀧𑀸𑀭𑀫𑀻𑀧𑀼𑀜𑁆𑀜𑀁 𑀮𑀩𑁆𑀪𑀢𑀺. 𑀧𑀼𑀥𑀸𑀢𑀼 𑀧𑀻𑀡𑀦𑁂 𑀲𑁄𑀥𑀦𑁂 𑀯𑀸 𑀡𑁆𑀬𑁄. 𑀢𑀲𑁆𑀲 𑀜𑁄. 𑀢𑀢𑁆𑀣 𑀅𑀢𑁆𑀢𑀦𑁄 𑀓𑀸𑀭𑀓𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀬𑀸 𑀲𑀘𑀺𑀢𑁆𑀢𑀲𑀦𑁆𑀢𑀢𑀺𑀜𑁆𑀘 𑀲𑀁𑀚𑀦𑀺𑀢𑀧𑀡𑀻𑀢𑀭𑀽𑀧𑀯𑀺𑀲𑀝𑁂𑀦 𑀲𑀦𑀺𑀲𑁆𑀲𑀬 𑀭𑀽𑀧𑀲𑀦𑁆𑀢𑀢𑀺𑀜𑁆𑀘 𑀧𑀼𑀦𑀸𑀢𑀺 𑀧𑀻𑀡𑁂𑀢𑀺 𑀲𑁄𑀥𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑁄. 𑀧𑀽𑀭𑁂𑀢𑀺 𑀅𑀚𑁆𑀛𑀸𑀲𑀬𑀦𑁆𑀢𑀺 𑀯𑀸 𑀧𑀼𑀜𑁆𑀜𑀁. 𑀧𑀽𑀭𑀥𑀸𑀢𑀼 𑀡𑁆𑀬. 𑀬𑁄 𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀧𑀼𑀚𑁆𑀚𑀜𑁆𑀘 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀦𑀺𑀩𑁆𑀩𑀢𑁆𑀢𑀺𑀢𑀤𑁆𑀥𑀺𑀢𑀸𑀬𑀁. 𑀧𑀽𑀚 𑀧𑀤𑀁 𑀡𑁆𑀬𑀧𑀘𑁆𑀘𑀬𑁄. 𑀬𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀽𑀚𑀺𑀢𑀩𑁆𑀩𑀁 𑀪𑀯𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀽𑀭𑁂𑀢𑀺 𑀘𑀲𑁆𑀲 𑀅𑀚𑁆𑀛𑀸𑀲𑀬𑀁 𑀧𑀼𑀚𑁆𑀚𑀜𑁆𑀘 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀜𑁆𑀜𑁄’’𑀢𑀺. 𑀫𑀽𑀮𑀝𑀻𑀓𑀸𑀬𑀜𑁆𑀘 ‘‘𑀧𑀼𑀦𑀸𑀢𑀻𑀢𑀺 𑀲𑁄𑀥𑁂𑀢𑀺 𑀅𑀧𑀼𑀜𑁆𑀜𑀨𑀮𑀢𑁄 𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄 𑀘 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀼𑀜𑁆𑀜𑀁 𑀓𑀭𑁄𑀢𑀻𑀢𑀺 𑀢𑀁 𑀦𑀺𑀧𑁆𑀨𑀸𑀤𑀦𑁂𑀦 𑀓𑀸𑀭𑀓𑀲𑁆𑀲𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑀻𑀢𑀺 𑀧𑀼𑀜𑁆𑀜𑁄. 𑀧𑀽𑀭𑀓𑁄 𑀧𑀼𑀚𑁆𑀚𑀦𑀺𑀩𑁆𑀩𑀢𑁆𑀢𑀓𑁄 𑀘 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 𑀧𑀼𑀜𑁆𑀜𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 ¶ . 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸𑀬𑀜𑁆𑀘- ‘‘𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀅𑀧𑀼𑀜𑁆𑀜𑀨𑀮𑀢𑁄 𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄 𑀘 𑀯𑀺𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀳𑀺𑀢𑀲𑀼𑀔𑀚𑁆𑀛𑀸𑀲𑀬𑁂𑀦 𑀧𑀼𑀜𑁆𑀜𑀁 𑀓𑀭𑁄𑀢𑀻𑀢𑀺 𑀢𑀁𑀦𑀺𑀧𑁆𑀨𑀸𑀤𑀦𑁂𑀦 𑀓𑀸𑀭𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑀺, 𑀧𑀼𑀚𑁆𑀚𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀸 𑀧𑀼𑀜𑁆𑀜𑀁. 𑀇𑀢𑀺 𑀧𑀽𑀭𑀓𑁄 𑀧𑀼𑀚𑁆𑀚𑀦𑀺𑀩𑁆𑀩𑀢𑁆𑀢𑀓𑁄 𑀘 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀼𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀉𑀧𑁂𑀢𑀁 𑀲𑀫𑁆𑀧𑀦𑁆𑀦𑀁 𑀧𑀼𑀜𑁆𑀜𑀁 𑀧𑀸𑀭𑀫𑀻𑀧𑀼𑀜𑁆𑀜𑀁 𑀬𑀲𑁆𑀲 𑀲𑁄𑀢𑀺 𑀉𑀧𑁂𑀢𑀧𑀼𑀜𑁆𑀜𑁄, 𑀲𑀼𑀕𑀢𑁄 𑀮𑀩𑁆𑀪𑀢𑀺.

𑀯𑀭𑀩𑁄𑀥𑀺𑀫𑀽𑀮𑁂𑀢𑀺 𑀉𑀢𑁆𑀢𑀫𑀲𑁆𑀲 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂. 𑀢𑀢𑁆𑀣 𑀯𑀭𑁄𑀢𑀺 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑀺𑀢𑀩𑁆𑀩𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀸 𑀯𑀭𑁄. 𑀩𑁄𑀥𑀺𑀫𑀽𑀮𑁂𑀢𑀺 𑀏𑀢𑁆𑀣 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺 𑀭𑀼𑀓𑁆𑀔𑁄𑀧𑀺, 𑀫𑀕𑁆𑀕𑁄𑀧𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁆𑀧𑀺, 𑀦𑀺𑀩𑁆𑀩𑀸𑀦𑀫𑁆𑀧𑀺. 𑀢𑀢𑁆𑀣 𑀳𑀺 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺 𑀲𑀫𑁆𑀩𑀼𑀤𑁆𑀥𑁄𑀢𑀺 𑀘, 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀦𑁆𑀢𑀭𑀸 𑀘 𑀕𑀬𑀦𑁆𑀢𑀺 𑀘 𑀆𑀕𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑁄. 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. 𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺 𑀫𑁂𑀥𑀲𑁄𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀩𑁄𑀥𑀺𑀭𑀼𑀓𑁆𑀔𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀁 𑀧𑀦 𑀢𑁂𑀲𑀁 𑀯𑀘𑀦𑀢𑁆𑀣𑁄. 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀫𑁆𑀧𑀺 𑀏𑀢𑁆𑀣𑀸𑀢𑀺 𑀩𑁄𑀥𑀺, 𑀩𑁄𑀥𑀺𑀭𑀼𑀓𑁆𑀔𑁄. 𑀩𑀼𑀥𑀥𑀸𑀢𑀼 𑀡𑀺. 𑀩𑀼𑀚𑁆𑀛𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀩𑁄𑀥𑀺, 𑀫𑀕𑁆𑀕𑁄. 𑀩𑀼𑀚𑁆𑀛𑀢𑀺 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀦𑁆𑀢𑀺 𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀅𑀭𑀺𑀬𑁂𑀦 𑀩𑀼𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀩𑁄𑀥𑀺, 𑀦𑀺𑀩𑁆𑀩𑀸𑀦𑀁 𑀮𑀩𑁆𑀪𑀢𑀺. 𑀯𑀭𑁄 𑀉𑀢𑁆𑀢𑀫𑁄 𑀩𑁄𑀥𑀺𑀭𑀼𑀓𑁆𑀔𑁄𑀢𑀺 𑀯𑀭𑀩𑁄𑀥𑀺, 𑀢𑀲𑁆𑀲 𑀫𑀽𑀮𑀁 𑀲𑀫𑀻𑀧𑀁 𑀯𑀭𑀩𑁄𑀥𑀺𑀫𑀽𑀮𑀁, 𑀢𑀲𑁆𑀫𑀺𑀁.

𑀲𑀲𑁂𑀦𑀫𑀸𑀭𑀦𑁆𑀢𑀺 𑀲𑀳 𑀲𑁂𑀦𑀸𑀬 𑀧𑀯𑀢𑁆𑀢𑀁 𑀫𑀸𑀭𑀭𑀸𑀚𑀁. 𑀢𑀢𑁆𑀣 𑀲𑀺𑀬𑀢𑀺 𑀩𑀦𑁆𑀥𑀺𑀬𑀢𑀻𑀢𑀺 𑀲𑁂𑀦𑀸. 𑀲𑀺𑀥𑀸𑀢𑀼 𑀩𑀦𑁆𑀥𑀦𑁂𑀬𑀼. 𑀢𑀸𑀬 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀲𑀲𑁂𑀦𑁄, 𑀫𑀸𑀭𑀭𑀸𑀚𑀸. 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀕𑀼𑀡𑀫𑀸𑀭𑀡𑁂𑀦 𑀲𑀢𑁆𑀢𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀫𑀭𑀥𑀸𑀢𑀼 𑀡. 𑀲𑀢𑁆𑀢𑀸𑀦𑀁 𑀓𑀼𑀲𑀮𑀁 𑀫𑀸𑀭𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀸 𑀫𑀸𑀭𑁄. 𑀲𑀲𑁂𑀦𑁄 𑀘 𑀲𑁄 𑀫𑀸𑀭𑁄 𑀘𑀸𑀢𑀺 𑀲𑀲𑁂𑀦𑀫𑀸𑀭𑁄, 𑀫𑀸𑀭𑀭𑀸𑀚𑀸. 𑀢𑀁 ¶ . 𑀚𑀺𑀦𑀺𑀢𑁆𑀯𑀸𑀢𑀺 𑀧𑀤𑁂 𑀓𑀫𑁆𑀫𑀁. 𑀉𑀧𑁂𑀢𑀧𑀼𑀜𑁆𑀜𑁄 𑀬𑁄 𑀲𑀼𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀕𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀚𑀺𑀦𑀺𑀢𑁆𑀯𑀸𑀢𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀺𑀬𑀁 𑀩𑀼𑀤𑁆𑀥𑀤𑀺𑀦𑁂 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀯𑀺𑀚𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀩𑁄𑀚𑁆𑀛𑀻𑀢𑀺 𑀧𑀝𑀺𑀯𑀺𑀚𑁆𑀛𑀺 𑀅𑀥𑀺𑀕𑀫𑀺 𑀯𑀸. 𑀩𑁄𑀥𑀺𑀦𑁆𑀢𑀺 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸 𑀲𑀫𑁆𑀩𑁄𑀥𑀺𑀁, 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀩𑁄𑀥𑀺𑀁.

𑀅𑀭𑀼𑀡𑁄𑀤𑀬𑀫𑁆𑀳𑀻𑀢𑀺 𑀅𑀭𑀼𑀡𑀉𑀤𑀬𑀫𑁆𑀳𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀉𑀦𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄. 𑀆𑀧𑀼𑀩𑁆𑀩𑀉𑀦𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡. 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄. 𑀭𑀓𑀸𑀭𑀸𑀕𑀫𑁄. 𑀦𑀲𑁆𑀲 𑀡𑁄. 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀉𑀕𑁆𑀕𑀢𑀭𑀁𑀲𑀺 𑀅𑀭𑀼𑀡𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀤𑀲𑀓𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 ‘‘𑀲𑀽𑀭𑀺𑀬𑀲𑁆𑀲 𑀪𑀺𑀓𑁆𑀔𑀯𑁂 𑀉𑀤𑀬𑀢𑁄 𑀏𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀬𑀤𑀺𑀤𑀁 𑀅𑀭𑀼𑀡𑀼𑀕𑁆𑀕𑀁, 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀏𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀬𑀤𑀺𑀤𑀁 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀲𑀽𑀭𑀲𑁆𑀲𑁄𑀤𑀬𑀢𑁄 𑀧𑀼𑀩𑁆𑀩𑀼, 𑀝𑁆𑀞𑀺𑀢𑀭𑀁𑀲𑀺 𑀲𑀺𑀬𑀸𑀭𑀼𑀡𑁄’’𑀢𑀺. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀧𑀦 ‘‘𑀅𑀭𑀼𑀡𑀯𑀡𑁆𑀡𑀢𑀸𑀬 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄’’𑀢𑀺 𑀯𑀼𑀢𑁆𑀢𑀁. 𑀉𑀤𑁂𑀢𑀺 𑀉𑀕𑁆𑀕𑀘𑁆𑀙𑀢𑀻𑀢𑀺 𑀉𑀤𑀬𑁄, 𑀲𑀽𑀭𑀺𑀬𑁄. 𑀉𑀤𑀺𑀥𑀸𑀢𑀼 𑀅. 𑀉𑀤𑀬𑀲𑁆𑀲 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑁄 𑀉𑀕𑁆𑀕𑀢𑀭𑀁𑀲𑀻𑀢𑀺 𑀅𑀭𑀼𑀡𑁄𑀤𑀬𑁄. 𑀢𑀲𑁆𑀲𑀁 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁. 𑀩𑁄𑀥𑀺𑀁 𑀅𑀩𑁄𑀚𑁆𑀛𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀪𑀕𑀯𑀸 𑀳𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀺𑀬𑀁 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀘𑀻𑀯𑀭𑀽𑀧𑀭𑀺 𑀧𑀢𑀫𑀸𑀦𑁂𑀳𑀺 𑀩𑁄𑀥𑀺𑀭𑀼𑀓𑁆𑀔𑀗𑁆𑀓𑀭𑁂𑀳𑀺 𑀭𑀢𑁆𑀢𑀧𑀯𑀸𑀴𑀧𑀮𑁆𑀮𑀯𑁂𑀳𑀺 𑀯𑀺𑀬 𑀧𑀽𑀚𑀬𑀫𑀸𑀦𑁄 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀫𑀳𑀸𑀯𑀚𑀺𑀭𑀜𑀸𑀡𑀲𑀗𑁆𑀔𑀸𑀢𑀁 ¶ 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀥𑀺𑀕𑀢𑁂𑀦 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀬𑀤𑀸 𑀅𑀭𑀼𑀡𑁄 𑀉𑀕𑁆𑀕𑀫𑀺𑀲𑁆𑀲𑀢𑀺, 𑀢𑀤𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀲𑀩𑁆𑀩 𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀯𑀺𑀚𑁆𑀛𑀺 𑀅𑀥𑀺𑀕𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀸𑀭𑀚𑀺𑀦𑀦𑁆𑀢𑀺 𑀧𑀜𑁆𑀘𑀫𑀸𑀭𑀸𑀦𑀁 𑀯𑀺𑀚𑀺𑀢𑀸𑀯𑀺𑀁. 𑀤𑁂𑀯𑀧𑀼𑀢𑁆𑀢 𑀓𑀺𑀮𑁂𑀲𑀸𑀪𑀺 𑀲𑀗𑁆𑀔𑀸𑀭𑀔𑀦𑁆𑀥𑀫𑀘𑁆𑀘𑀼𑀲𑀗𑁆𑀔𑀸𑀢𑁂 𑀧𑀜𑁆𑀘𑀫𑀸𑀭𑁂 𑀚𑀺𑀦𑀸𑀢𑀺 𑀅𑀚𑀺𑀦𑀺 𑀚𑀺𑀦𑀺𑀲𑁆𑀲𑀢𑀻𑀢𑀺 𑀫𑀸𑀭𑀚𑀺𑀦𑁄, 𑀲𑀼𑀕𑀢𑁄. 𑀤𑁂𑀯𑀧𑀼𑀢𑁆𑀢𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀭𑀲𑀗𑁆𑀔𑀢𑀁 𑀫𑀸𑀭𑀢𑁆𑀢𑀬𑀁 𑀚𑀺𑀦𑀸𑀢𑀺 𑀅𑀚𑀺𑀦𑀺, 𑀔𑀦𑁆𑀥𑀫𑀘𑁆𑀘𑀼𑀲𑀗𑁆𑀔𑀢𑀁 𑀫𑀸𑀭𑀤𑁆𑀯𑀬𑀁 𑀅𑀯𑀲𑁆𑀲𑀁 𑀚𑀺𑀦𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀚𑀺𑀢𑀸𑀯𑀺𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀯𑀺𑀭𑀤𑁆𑀥𑀁 𑀏𑀓𑀦𑁆𑀢𑁂𑀦 𑀚𑀺𑀬𑀫𑀸𑀦𑀢𑁆𑀢𑀸𑀢𑀺. 𑀅𑀪𑀗𑁆𑀕𑀦𑁆𑀢𑀺 𑀲𑀲𑁂𑀦𑀫𑀸𑀭𑀲𑁆𑀲 𑀪𑀜𑁆𑀚𑀺𑀢𑀼𑀁 𑀯𑀺𑀤𑁆𑀥𑀁𑀲𑀺𑀢𑀼𑀁 𑀅𑀲𑀫𑀢𑁆𑀣𑀁. 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀜𑁆𑀚𑀺𑀢𑀼𑀁 𑀯𑀺𑀤𑁆𑀥𑀁𑀲𑀺𑀢𑀼𑀁 𑀅𑀲𑀫𑀢𑁆𑀣𑀁 𑀯𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀫𑀸𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀪𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀪𑀗𑁆𑀕𑁄, 𑀢𑁂𑀦 𑀯𑀸 𑀦 𑀪𑀜𑁆𑀚𑀺𑀬𑀢𑀺 𑀦 𑀯𑀺𑀤𑁆𑀥𑀁𑀲𑀺𑀬𑀢𑀻𑀢𑀺 𑀅𑀪𑀗𑁆𑀕𑁄, 𑀲𑀼𑀕𑀢𑁄. 𑀦𑀧𑀼𑀩𑁆𑀩 𑀪𑀦𑁆𑀚𑀥𑀸𑀢𑀼 𑀢. 𑀢𑀲𑁆𑀲 𑀥𑀸𑀢𑁆𑀯𑀦𑁆𑀢𑁂𑀦 𑀕𑀓𑀸𑀭𑀸𑀤𑁂𑀲𑁄. 𑀅𑀣 𑀯𑀸 𑀪𑀦𑁆𑀚𑀢𑀺 𑀯𑀺𑀤𑁆𑀥𑀁𑀲𑀢𑀻𑀢𑀺 𑀪𑀗𑁆𑀕𑁄, 𑀫𑀸𑀭𑁄. 𑀬𑁄 𑀓𑁄𑀘𑀺 𑀯𑀸. 𑀦𑀢𑁆𑀣𑀺 𑀪𑀗𑁆𑀕𑁄 𑀫𑀸𑀭𑁄 𑀬𑁄 𑀓𑁄𑀘𑀺 𑀯𑀸 𑀬𑀲𑁆𑀲𑀸𑀢𑀺 𑀅𑀪𑀗𑁆𑀕𑁄, 𑀲𑀼𑀕𑀢𑁄. 𑀢𑀁 𑀅𑀪𑀗𑁆𑀕𑀁. 𑀢𑀦𑁆𑀢𑀺 𑀲𑀼𑀕𑀢𑀁. 𑀫𑀸𑀭𑀚𑀺𑀦𑀁 𑀅𑀪𑀗𑁆𑀕𑀁 𑀢𑀁 𑀲𑀼𑀕𑀢𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀫𑀺𑀲𑁆𑀲𑀁 𑀧𑀦 𑀕𑀸𑀣𑀸𑀬𑀁 𑀏𑀓𑀦𑀺𑀧𑀸𑀢𑀚𑀸𑀢𑀓𑀝𑁆𑀞𑀓𑀣𑀸𑀬𑀁, 𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀜𑁆𑀘 𑀆𑀕𑀢𑀦𑀬𑁂𑀦 𑀩𑀼𑀤𑁆𑀥𑀲𑁆𑀲 𑀫𑀸𑀭𑀯𑀺𑀚𑀬𑀸𑀤𑀺𑀁 𑀲𑁄𑀢𑀼𑀚𑀦𑀸𑀦𑀁 𑀩𑀳𑀼𑀲𑁆𑀲𑀼𑀢𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀥𑀺 𑀲𑀢𑁆𑀢𑁄 𑀳𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀝𑁆𑀝𑁂𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑁂 𑀆𑀲𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀲𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀬𑀼𑀢𑁆𑀢𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁄𑀫𑀦𑀤𑀻𑀢𑀻𑀭𑁂 𑀖𑀝𑀻𑀓𑀸𑀭𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑀁 𑀅𑀭𑀳𑀢𑁆𑀢 𑀥𑀚𑀪𑀽𑀢𑀁 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀲𑀫𑀡𑀧𑀩𑁆𑀩𑀚𑁆𑀚𑀁 𑀓𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀲𑁂𑀦𑀦𑀺𑀕𑀫𑁂 𑀲𑁂𑀦𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀥𑀻𑀢𑀭𑀸𑀬 𑀲𑀼𑀚𑀸𑀢𑀸𑀬 𑀲𑀳 𑀲𑀢𑀲𑀳𑀲𑁆𑀲𑀕𑁆𑀖𑀺𑀬𑀸 ¶ 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀤𑀺𑀦𑁆𑀦𑀁 𑀲𑀩𑁆𑀩𑀁 𑀅𑀧𑁆𑀧𑁄𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀏𑀓𑀝𑁆𑀞𑀺𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑀁 𑀏𑀓𑀽𑀦𑀧𑀜𑁆𑀜𑀸𑀲𑀸𑀮𑁄𑀧𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀤𑁂𑀯𑀢𑀸𑀳𑀺 𑀅𑀮𑀗𑁆𑀓𑀢𑁂𑀦 𑀫𑀕𑁆𑀕𑁂𑀦 𑀩𑁄𑀥𑀺𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁂 𑀅𑀦𑁆𑀢𑀭𑀫𑀕𑁆𑀕𑁂 𑀲𑁄𑀢𑁆𑀣𑀺𑀬𑁂𑀦 𑀦𑀸𑀫 𑀢𑀺𑀡𑀳𑀸𑀭𑀓𑁂𑀦 𑀤𑀺𑀦𑁆𑀦𑀁 𑀅𑀝𑁆𑀞𑀫𑀼𑀝𑁆𑀞𑀺𑀓𑀢𑀺𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀇𑀤𑀁 𑀞𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀁 𑀅𑀘𑀮𑀝𑁆𑀞𑀸𑀦𑀁 𑀓𑀺𑀮𑁂𑀲𑀪𑀜𑁆𑀚𑀦𑀝𑁆𑀞𑀸𑀦𑀦𑁆𑀢𑀺 𑀜𑀢𑁆𑀯𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺. 𑀢𑀸𑀯𑀤𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺. 𑀢𑀸𑀦𑀺𑀧𑀺 𑀢𑀺𑀡𑀸𑀦𑀺 𑀢𑀣𑀸𑀭𑀽𑀧𑁂𑀦 𑀲𑀡𑁆𑀞𑀸𑀦𑁂𑀦 𑀲𑀦𑁆𑀣𑀭𑀺𑀁𑀲𑀼 𑀲𑀡𑁆𑀞𑀳𑀺𑀁𑀲𑀼 𑀯𑀸. 𑀬𑀣𑀸𑀭𑀽𑀧𑀁 𑀲𑀼𑀓𑀼𑀲𑀮𑁄𑀧𑀺 𑀯𑀺𑀘𑀺𑀢𑁆𑀢𑀓𑀸𑀭𑁄 𑀯𑀸 𑀧𑁄𑀢𑁆𑀣𑀢𑀸𑀭𑁄 𑀯𑀸 𑀆𑀮𑀺𑀔𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀩𑁄𑀥𑀺 𑀲𑀢𑁆𑀢𑁄 𑀩𑁄𑀥𑀺𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀤𑀴𑁆𑀳𑀫𑀸𑀦𑀲𑁄 𑀳𑀼𑀢𑁆𑀯𑀸 𑁋

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀼𑀲𑁆𑀲𑀢𑀼;

𑀉𑀧𑀲𑀼𑀲𑁆𑀲𑀢𑀼 𑀦𑀺𑀲𑁂𑀲𑀁, 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺.

𑀦 𑀢𑁆𑀯𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀧𑀢𑁆𑀯𑀸 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀅𑀲𑀦𑀺𑀲𑀢𑀲𑀦𑁆𑀦𑀺𑀧𑀸𑀢𑁂𑀦𑀧𑀺 𑀅𑀪𑁂𑀚𑁆𑀚𑀭𑀽𑀧𑀁 𑀢𑀁 𑀧𑀮𑁆𑀮𑀗𑁆𑀓𑀁 𑀅𑀪𑀜𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 ‘‘𑀫𑀬𑁆𑀳𑀁 𑀯𑀲𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄, 𑀦 𑀤𑀸𑀦𑀺 𑀅𑀲𑁆𑀲 𑀅𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀸𑀭𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀫𑀸𑀭𑀖𑁄𑀲𑀦𑀁 𑀦𑀸𑀫 𑀖𑁄𑀲𑀸𑀧𑁂𑀢𑁆𑀯𑀸 𑀫𑀸𑀭𑀩𑀮𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺. 𑀲𑀸 𑀫𑀸𑀭𑀲𑁂𑀦𑀸 𑀫𑀸𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸 𑀳𑁄𑀦𑁆𑀢𑀺. 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘 𑀤𑁆𑀯𑀸𑀤𑀲 𑀬𑁄𑀚𑀦𑀸. 𑀧𑀘𑁆𑀙𑀢𑁄 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑀸, 𑀉𑀤𑁆𑀥𑀁 𑀦𑀯𑀬𑁄𑀚𑀦𑀼𑀩𑁆𑀩𑁂𑀥𑀸. 𑀬𑀲𑁆𑀲𑀸 𑀉𑀦𑁆𑀦𑀸𑀤𑀦𑁆𑀢𑀺𑀬𑀸 𑀉𑀦𑁆𑀦𑀸𑀤𑀲𑀤𑁆𑀤𑁄 𑀬𑁄𑀚𑀦𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀲𑀤𑁆𑀤𑁄 𑀯𑀺𑀬 𑀲𑀼𑀬𑁆𑀬𑀢𑀺. 𑀅𑀣 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀳𑀢𑁆𑀣𑀺𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀼𑀥𑀸𑀦𑀺 𑀅𑀕𑁆𑀕𑀳𑁂𑀲𑀺. 𑀅𑀯𑀲𑁂𑀲𑀸𑀬𑀧𑀺 𑀫𑀸𑀭𑀧𑀭𑀺𑀲𑀸𑀬 𑀤𑁆𑀯𑁂 𑀚𑀦𑀸 𑀏𑀓𑀲𑀤𑀺𑀲𑀁 ¶ 𑀆𑀯𑀼𑀥𑀁 𑀦 𑀕𑀡𑁆𑀳𑀺𑀁𑀲𑀼. 𑀦𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀸 𑀦𑀸𑀦𑀧𑁆𑀧𑀓𑀸𑀭 𑀫𑀼𑀔𑀸 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀸 𑀆𑀕𑀫𑀁𑀲𑀼.

𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺 𑀬𑁄 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀥𑀫𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀲𑀗𑁆𑀔𑁄 𑀯𑀻𑀲𑀳𑀢𑁆𑀣𑀲𑀢𑀺𑀓𑁄 𑀳𑁄𑀢𑀺. 𑀲𑀓𑀺𑀁 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀥𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀤𑁆𑀤𑀁 𑀓𑀭𑀺𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄 𑀳𑁄𑀢𑀺. 𑀫𑀳𑀸𑀓𑀸𑀴𑀦𑀸𑀕 𑀭𑀸𑀚𑀸 𑀅𑀢𑀺𑀭𑁂𑀓𑀧𑀤𑀲𑀢𑁂𑀦 𑀯𑀡𑁆𑀡𑀁 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀸𑀭 𑀩𑀮𑁂 𑀧𑀦 𑀩𑁄𑀥𑀺𑀫𑀡𑁆𑀟𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀢𑁂𑀲𑀁 𑀏𑀓𑁄𑀧𑀺 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀫𑁆𑀫𑀼𑀔 𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀓𑀸𑀴𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀧𑀣𑀯𑀺𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀫𑀦𑁆𑀢𑀺𑀭𑀓𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑁄. 𑀲𑀓𑁆𑀓𑁄 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀧𑀺𑀝𑁆𑀞𑀺𑀬𑀁 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔 𑀯𑀝𑁆𑀝𑀺𑀬𑀁 𑀅𑀝𑁆𑀞𑀸𑀲𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀏𑀓𑀤𑁂𑀯𑀢𑀸𑀧𑀺 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀏𑀓𑀓𑁄𑀯 𑀦𑀺𑀲𑀻𑀤𑀺. 𑀫𑀸𑀭𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀳 ‘‘𑀢𑀸𑀢 𑀲𑀼𑀤𑁆𑀥𑁄𑀤𑀦𑀧𑀼𑀢𑁆𑀢𑁂𑀦 𑀲𑀺𑀤𑁆𑀥𑀢𑁆𑀣𑁂𑀦 𑀲𑀤𑀺𑀲𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀁 𑀲𑀫𑁆𑀫𑀼𑀔𑀸 𑀬𑀼𑀤𑁆𑀥𑀁 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀧𑀘𑁆𑀙𑀸 𑀪𑀸𑀕𑁂𑀦 𑀤𑀲𑁆𑀲𑀸𑀫𑀸’’𑀢𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 𑀢𑀻𑀡𑀺 𑀧𑀲𑁆𑀲𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀤𑁂𑀯𑀢𑀸𑀦𑀁 𑀧𑀮𑀸𑀬𑀺𑀢𑀢𑁆𑀢𑀸 𑀲𑀼𑀜𑁆𑀜𑀸𑀦𑀺 𑀅𑀤𑁆𑀤𑀲. 𑀧𑀼𑀦 𑀉𑀢𑁆𑀢𑀭𑀧𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀏𑀢𑁆𑀢𑀓𑁄 𑀚𑀦𑁄 𑀫𑀁 𑀏𑀓𑀓𑀁 𑀲𑀦𑁆𑀥𑀸𑀬 𑀫𑀳𑀦𑁆𑀢𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀬𑁆𑀳𑀁 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀜𑀸𑀢𑀓𑁄 𑀯𑀸 𑀦𑀢𑁆𑀣𑀺, 𑀇𑀫𑀸 𑀧𑀦 𑀤𑀲 𑀧𑀸𑀭𑀫𑀺𑀬𑁄𑀯 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀧𑀼𑀢𑁆𑀢𑀧𑀭𑀺𑀚𑀦𑀲𑀤𑀺𑀲𑀸, 𑀢𑀲𑁆𑀫𑀸 𑀫𑀬𑀸 𑀧𑀸𑀭𑀫𑀺𑀬𑁄𑀯 𑀨𑀮𑀓𑀁 𑀓𑀢𑁆𑀯𑀸 𑀧𑀸𑀭𑀫𑀺𑀲𑀢𑁆𑀣𑁂𑀦𑁂𑀯 𑀧𑀳𑀭𑀺𑀢𑁆𑀯𑀸 𑀅𑀬𑀁 𑀩𑀮𑀓𑀸𑀬𑁄 𑀫𑀬𑀸 𑀯𑀺𑀤𑁆𑀥𑀁𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑀫𑀸𑀦𑁄 𑀦𑀺𑀲𑀻𑀤𑀺.

𑀅𑀣 ¶ 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻𑀢𑀺 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀬𑁂𑀯 𑀧𑀼𑀭𑀢𑁆𑀣𑀺𑀫𑀸 𑀤𑀺𑀪𑁂𑀤𑀸 𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀏𑀓𑀬𑁄𑀚𑀦 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀤𑁆𑀥𑀁 𑀫𑀽𑀮𑀸𑀦𑀺 𑀓𑀢𑁆𑀯𑀸 𑀲𑀸𑀫𑀦𑁆𑀢𑀸 𑀕𑀸𑀫𑀦𑀺𑀕𑀫𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀸𑀢𑀼𑀁 𑀲𑀫𑀢𑁆𑀣𑀸𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀫𑀳𑀸𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀸𑀢𑀺 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀴𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀺𑀁𑀲𑀼. 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀪𑀺𑀦𑁆𑀦𑀸 𑀅𑀳𑁄𑀲𑀺. 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺𑀪𑀸𑀕𑁂𑀦 𑀫𑀳𑀸𑀫𑁂𑀖𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸 𑀲𑀢𑁆𑀢𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀕𑁆𑀕𑀳𑀡𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀏𑀓𑀢𑁄𑀥𑀸𑀭𑀸 𑀉𑀪𑀢𑁄𑀥𑀸𑀭𑀸 𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀓𑀺𑀁𑀲𑀼𑀓𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩 𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀴𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀘𑁆𑀘𑀼𑀡𑁆𑀳𑁄 𑀅𑀕𑁆𑀕𑀺𑀯𑀡𑁆𑀡𑁄 𑀓𑀼𑀓𑁆𑀓𑀼𑀴𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀢𑀺. 𑀢𑀢𑁄 𑀯𑀸𑀴𑀼𑀓𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀢𑀺𑀲𑀼𑀔𑀼𑀫𑀯𑀸𑀴𑀺𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀓𑀮𑀮𑀯𑀲𑁆𑀲𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂 𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀯𑀺𑀮𑁂𑀧𑀦𑀁 𑀳𑀼𑀢𑁆𑀯𑀸 𑀧𑀢𑀢𑀺. 𑀢𑀢𑁄 𑀇𑀫𑀺𑀦𑀸 𑀪𑀺𑀁𑀲𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻𑀢𑀺 𑀅𑀦𑁆𑀥𑀓𑀸𑀭𑀁 ¶ 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀫𑀳𑀸𑀢𑀫𑀁 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸 𑀯𑀺𑀳𑀢𑀁 𑀯𑀺𑀬 𑀅𑀦𑁆𑀢𑀭𑀥𑀸𑀬𑀢𑀺.

𑀏𑀯𑀁 𑀫𑀸𑀭𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀅𑀗𑁆𑀕𑀸𑀭 𑀓𑀼𑀓𑁆𑀓𑀼𑀴𑀯𑀸𑀴𑀼𑀓 𑀓𑀮𑀮𑀅𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀩𑁄𑀥𑀺𑀲𑀢𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀪𑀡𑁂 𑀢𑀺𑀝𑁆𑀞𑀣 𑀇𑀫𑀁 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀁 𑀕𑀡𑁆𑀳𑀣 𑀳𑀦𑀣 𑀧𑀮𑀸𑀧𑁂𑀣𑀸’’𑀢𑀺 𑀧𑀭𑀺𑀲𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀕𑀺𑀭𑀺𑀫𑁂𑀔𑀮𑀲𑁆𑀲 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄 𑀘𑀓𑁆𑀓𑀸𑀯𑀼𑀥𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀺𑀤𑁆𑀥𑀢𑁆𑀣 𑀉𑀝𑁆𑀞𑀸𑀳𑀺 𑀏𑀢𑀲𑁆𑀫𑀸 𑀧𑀮𑁆𑀮𑀗𑁆𑀓𑀸, 𑀦𑀸𑀬𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑀁𑀏𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀯𑁄𑀘 ‘‘𑀫𑀸𑀭 𑀦𑁂𑀯 𑀢𑀬𑀸 𑀤𑀲𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀦 𑀉𑀧𑀧𑀸𑀭𑀫𑀺𑀬𑁄 𑀦 𑀧𑀭𑀫𑀢𑁆𑀣 𑀧𑀸𑀭𑀫𑀺𑀬𑁄 𑀦𑀸𑀧𑀺 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸 𑀧𑀭𑀺𑀘𑁆𑀘𑀢𑁆𑀢𑀸 𑀦 𑀜𑀸𑀢𑀢𑁆𑀣𑀘𑀭𑀺𑀬𑀸 𑀦 𑀮𑁄𑀓𑀢𑁆𑀣𑀘𑀭𑀺𑀬𑀸 𑀦 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸 𑀧𑀽𑀭𑀺𑀢𑀸, 𑀲𑀩𑁆𑀩𑀸 𑀢𑀸 𑀫𑀬𑀸𑀬𑁂𑀯 𑀧𑀽𑀭𑀺𑀢𑀸, 𑀢𑀲𑁆𑀫𑀸 𑀦𑀸𑀬𑀁 𑀧𑀮𑁆𑀮𑀗𑁆𑀓𑁄 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑀫𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺. 𑀫𑀸𑀭𑁄 𑀓𑀼𑀤𑁆𑀥𑁄 𑀓𑁄𑀥𑀯𑁂𑀕𑀁 𑀅𑀲𑀳𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀓𑁆𑀓𑀸𑀯𑀼𑀥𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀢𑀲𑁆𑀲 𑀤𑀲𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑀦𑁆𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀓𑀺𑀭 𑀔𑀼𑀭𑀘𑀓𑁆𑀓𑀸𑀯𑀼𑀥𑀁 𑀅𑀜𑁆𑀜𑀤𑀸 𑀢𑁂𑀦 𑀓𑀼𑀤𑁆𑀥𑁂𑀦 𑀯𑀺𑀲𑁆𑀲𑀝𑁆𑀞𑀁 𑀏𑀓𑀖𑀦𑀧𑀸𑀲𑀸𑀡 𑀣𑀫𑁆𑀪𑁂 𑀯𑀁𑀲𑀓𑀴𑀻𑀭𑁂 𑀯𑀺𑀬 𑀙𑀺𑀦𑁆𑀤𑀦𑁆𑀢𑀁 𑀕𑀘𑁆𑀙𑀢𑀺. 𑀇𑀤𑀸𑀦𑀺 𑀧𑀦 𑀢𑀲𑁆𑀫𑀺𑀁 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀞𑀺𑀢𑁂 𑀅𑀯𑀲𑁂𑀲𑀸 𑀫𑀸𑀭𑀧𑀭𑀺𑀲𑀸 𑀇𑀤𑀸𑀦𑀺 𑀧𑀮𑁆𑀮𑀗𑁆𑀓𑀢𑁄 𑀯𑀼𑀝𑁆𑀞𑀸𑀬 𑀧𑀮𑀸𑀬𑀺𑀲𑁆𑀲𑀢𑀻𑀢𑀺 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀲𑁂𑀮𑀓𑀽𑀝𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀸𑀦𑀺𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑀦𑁆𑀢𑀲𑁆𑀲 𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀁𑀲𑀼.

𑀤𑁂𑀯𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀝𑁆𑀞𑁄 𑀯𑀢 𑀪𑁄 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀺. 𑀢𑀢𑁄 ¶ 𑀫𑀳𑀸𑀧𑀼𑀭𑀺𑀲𑁄 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀪𑀺 𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀧𑀢𑁆𑀢𑀧𑀮𑁆𑀮𑀗𑁆𑀓𑁄 𑀫𑀬𑁆𑀳𑀁𑀯 𑀧𑀸𑀧𑀼𑀡𑀸𑀢𑀻𑀢𑀺 𑀯𑀢𑁆𑀯𑀸 𑀞𑀺𑀢𑀁 𑀫𑀸𑀭𑀁 𑀆𑀳 ‘‘𑀫𑀸𑀭 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀸𑀭𑁄 ‘‘𑀏𑀢𑁆𑀢𑀓𑀸 𑀚𑀦𑀸 𑀲𑀓𑁆𑀔𑀺𑀦𑁄’’𑀢𑀺 𑀫𑀸𑀭 𑀩𑀮𑀸𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀭𑀧𑀭𑀺𑀲𑀸𑀬 ‘‘𑀅𑀳𑀁 𑀲𑀓𑁆𑀔𑀻 𑀅𑀳𑀁 𑀲𑀓𑁆𑀔𑀻’’𑀢𑀺 𑀧𑀯𑀢𑁆𑀢𑀲𑀤𑁆𑀤𑁄 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑀤𑀺𑀲𑁄 𑀅𑀳𑁄𑀲𑀺. 𑀅𑀣 𑀔𑁄 𑀫𑀸𑀭𑁄 𑀫𑀳𑀸𑀧𑀼𑀭𑀺𑀲𑀁 𑀆𑀳 ‘‘𑀲𑀺𑀤𑁆𑀥𑀢𑁆𑀣 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀢𑀼𑀬𑁆𑀳𑀁 𑀢𑀸𑀯 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀲𑀘𑁂𑀢𑀦𑀸 𑀲𑀓𑁆𑀔𑀺𑀦𑁄. 𑀫𑀬𑁆𑀳𑀁 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀘𑁂𑀢𑀦𑁄 𑀓𑁄𑀘𑀺 𑀲𑀓𑁆𑀔𑀻 𑀦𑀸𑀫 𑀦𑀢𑁆𑀣𑀺. 𑀢𑀺𑀝𑁆𑀞𑀢𑀼 𑀢𑀸𑀯 𑀫𑁂 𑀅𑀯𑀲𑁂𑀲𑀢𑁆𑀢𑀪𑀸𑀯𑁂𑀲𑀼 𑀤𑀺𑀦𑁆𑀦𑀤𑀸𑀦𑀁, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀞𑀢𑁆𑀯𑀸 𑀫𑀬𑁆𑀳𑀁 𑀲𑀢𑁆𑀢𑀲𑀢𑁆𑀢𑀓 𑀫𑀳𑀸𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀅𑀘𑁂𑀢𑀦𑀸𑀧𑀺 𑀖𑀦𑀫𑀳𑀸𑀧𑀣𑀯𑀻 𑀲𑀓𑁆𑀔𑀻’’𑀢𑀺 𑀘𑀻𑀯𑀭𑀕𑀩𑁆𑀪𑀦𑁆𑀢𑀭𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀫𑀬𑁆𑀳𑀁 𑀲𑀢𑁆𑀢𑀲𑀢𑁆𑀢𑀓𑀫𑀳𑀸𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀢𑁆𑀯𑀁 𑀲𑀓𑁆𑀔𑀺 𑀦 𑀲𑀓𑁆𑀔𑀻𑀢𑀺 𑀫𑀳𑀸𑀧𑀣𑀯𑀺𑀬𑀸𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀫𑀳𑀸 𑀧𑀣𑀯𑀻 ‘‘𑀅𑀳𑀁 𑀢𑁂 𑀤𑀸𑀦𑀲𑁆𑀲 𑀲𑀓𑁆𑀔𑀻’’𑀢𑀺 𑀯𑀺𑀭𑀯𑀲𑀳𑀲𑁆𑀲𑁂𑀦 𑀯𑀺𑀭𑀯𑀲𑀢𑀲𑀳𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀯𑀢𑁆𑀣𑀭𑀫𑀸𑀦𑀸 𑀯𑀺𑀬 𑀉𑀦𑁆𑀦𑀤𑀺.

𑀢𑀢𑁄 𑀫𑀳𑀸𑀧𑀼𑀭𑀺𑀲𑁂 𑀤𑀺𑀦𑁆𑀦𑀁 𑀢𑁂 𑀲𑀺𑀤𑁆𑀥𑀢𑁆𑀣 𑀫𑀳𑀸𑀤𑀸𑀦𑀁 𑀉𑀢𑁆𑀢𑀫 𑀤𑀸𑀦𑀦𑁆𑀢𑀺 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀁 𑀲𑀫𑁆𑀫𑀲𑀦𑁆𑀢𑁂 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀕𑀺𑀭𑀺𑀫𑁂𑀔𑀮𑁄 𑀳𑀢𑁆𑀣𑀻 𑀚𑀸𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀸𑀲𑀺. 𑀫𑀸𑀭𑀧𑀭𑀺𑀲𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀮𑀸𑀬𑀺𑀁𑀲𑀼. 𑀤𑁆𑀯𑁂 𑀏𑀓𑀫𑀕𑁆𑀕𑁂𑀦 𑀕𑀢𑀸 𑀦𑀸𑀫 𑀦𑀢𑁆𑀣𑀺. 𑀲𑀻𑀲𑀸𑀪𑀭𑀡𑀸𑀦𑀺 𑀘𑁂𑀯 𑀯𑀢𑁆𑀣𑀸𑀪𑀭𑀡𑀸𑀦𑀺 𑀘 𑀧𑀳𑀸𑀬 𑀲𑀫𑁆𑀫𑀼𑀔 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀤𑀺𑀲𑀸𑀯𑀺𑀤𑀺𑀲𑀸𑀳𑀺𑀬𑁂𑀯 𑀧𑀮𑀸𑀬𑀺𑀁𑀲𑀼. 𑀢𑀢𑁄 𑀤𑁂𑀯𑀲𑀗𑁆𑀖𑁄 𑀧𑀮𑀸𑀬𑀫𑀸𑀦𑀁 𑀫𑀸𑀭𑀩𑀮𑀁 𑀤𑀺𑀲𑁆𑀯𑀸 𑀫𑀸𑀭𑀲𑁆𑀲 𑀧𑀭𑀸𑀚𑀬𑁄 𑀚𑀸𑀢𑁄. 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀚𑀬𑁄. 𑀚𑀬𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀦𑀸𑀕𑀸 𑀦𑀸𑀕𑀸𑀦𑀁, 𑀲𑀼𑀧𑀡𑁆𑀡𑀸 𑀲𑀼𑀧𑀡𑁆𑀡𑀸𑀦𑀁, 𑀤𑁂𑀯𑀢𑀸 𑀤𑁂𑀯𑀢𑀸𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀩𑁆𑀭𑀳𑁆𑀫𑀸𑀦𑀁 𑀧𑁂𑀲𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺 𑀳𑀢𑁆𑀣𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀆𑀕𑀫𑀁𑀲𑀼. 𑀏𑀯𑀁 𑀕𑀢𑁂𑀲𑀼 𑀘 𑀧𑀦𑁂𑀢𑁂𑀲𑀼 𑁋

‘‘𑀚𑀬𑁄 ¶ 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀺𑀲𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀦𑀸𑀕𑀕𑀡𑀸 𑀫𑀳𑁂𑀲𑀺𑀦𑁄.

𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀺𑀲𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀲𑀼𑀧𑀡𑁆𑀡𑀲𑀗𑁆𑀖𑀸 𑀫𑀳𑁂𑀲𑀺𑀦𑁄.

𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀺𑀲𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀤𑁂𑀯𑀕𑀡𑀸 𑀫𑀳𑁂𑀲𑀺𑀦𑁄.

𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀺𑀲𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀩𑁆𑀭𑀳𑁆𑀫𑀕𑀡𑀸𑀧𑀺 𑀢𑀸𑀤𑀺𑀦𑁄’’𑀢𑀺.

𑀅𑀯𑀲𑁂𑀲𑁂𑀲𑀼 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀘 𑀧𑀽𑀚𑀬𑀫𑀸𑀦𑀸 𑀦𑀸𑀦𑀧𑁆𑀧𑀓𑀸𑀭 𑀣𑀼𑀢𑀺𑀬𑁄 𑀘 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀫𑀳𑀸𑀧𑀼𑀭𑀺𑀲𑁄 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀘𑀻𑀯𑀭𑀽𑀧𑀭𑀺 𑀧𑀢 𑀫𑀸𑀦𑁂𑀳𑀺 𑀩𑁄𑀥𑀺𑀭𑀼𑀓𑁆𑀔𑀗𑁆𑀓𑀼𑀭𑁂𑀳𑀺 𑀭𑀢𑁆𑀢𑀧𑀯𑀸𑀴𑀧𑀮𑁆𑀮𑀯𑁂𑀳𑀺 𑀯𑀺𑀬 𑀧𑀽𑀚𑀬𑀫𑀸𑀦𑁄 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀲𑀺. 𑀅𑀣𑀲𑁆𑀲 𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀸 𑀓𑀸𑀭𑀁 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀅𑀦𑀼𑀮𑁄𑀫𑀢𑁄 𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀲𑀫𑁆𑀧𑀓𑀫𑁆𑀧𑀺. 𑀫𑀳𑀸𑀧𑀼𑀭𑀺𑀲𑁂𑀦 𑀧𑀦 𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁 ¶ 𑀧𑀝𑀺𑀯𑀺𑀚𑁆𑀛𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀧𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀢𑀸𑀲𑀼 𑀘 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀉𑀧𑁂𑀢𑀧𑀼𑀜𑁆𑀜𑁄 𑀲𑀫𑁆𑀧𑀦𑁆𑀦 𑀤𑀸𑀦𑀸𑀤𑀺𑀧𑀸𑀭𑀫𑀻𑀧𑀼𑀜𑁆𑀜𑀯𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀧𑀼𑀜𑁆𑀜𑁂𑀦 𑀲𑀫𑁆𑀧𑀦𑁆𑀦𑁄 𑀯𑀸, 𑀬𑁄 𑀲𑀼𑀕𑀢𑁄 𑀯𑀭𑀩𑁄𑀥𑀺𑀫𑀽𑀮𑁂 𑀉𑀢𑁆𑀢𑀫𑀲𑁆𑀲 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂, 𑀲𑀲𑁂𑀦𑀫𑀸𑀭𑀁 𑀲𑁂𑀦𑀸𑀬 𑀲𑀳 𑀧𑀯𑀢𑁆𑀢𑀁 𑀫𑀸𑀭𑀭𑀸𑀚𑀁, 𑀚𑀺𑀦𑀺𑀢𑁆𑀯𑀸 𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀯𑀺𑀚𑀬𑀺𑀢𑁆𑀯𑀸, 𑀅𑀭𑀼𑀡𑁄𑀤𑀬𑀫𑁆𑀳𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀺𑀬𑀁 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁, 𑀩𑁄𑀥𑀺𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑀁 𑀩𑁄𑀥𑀺𑀁, 𑀅𑀩𑁄𑀚𑁆𑀛𑀺 𑀧𑀝𑀺𑀯𑀺𑀚𑁆𑀛𑀺 𑀅𑀥𑀺𑀕𑀫𑀺 𑀯𑀸, 𑀫𑀸𑀭𑀚𑀺𑀦𑀁 𑀧𑀜𑁆𑀘𑀫𑀸𑀭𑀸𑀦𑀁 𑀯𑀺𑀚𑀺𑀢𑀸𑀯𑀺𑀁, 𑀅𑀪𑀗𑁆𑀕𑀁 𑀲𑀲𑁂𑀦𑀫𑀸𑀭𑁄 𑀬𑁄 𑀓𑁄𑀘𑀺 𑀯𑀸 𑀪𑀺𑀦𑁆𑀤𑀺𑀢𑀼𑀁 𑀅𑀲𑀫𑀢𑁆𑀣𑀁 𑀢𑀁 𑀲𑀼𑀕𑀢𑀁 𑀅𑀳𑀁 𑀦𑀫𑀸𑀫𑀻𑀢𑀺.

𑀙𑀝𑁆𑀞𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀭𑀸𑀕𑀸𑀤𑀺 𑀙𑁂𑀤𑀸𑀫𑀮𑀜𑀸𑀡𑀔𑀕𑁆𑀕𑀁,

𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀢𑀁,

𑀦𑀫𑀸𑀫𑀺𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀁.

𑁭. 𑀏𑀯𑀁 𑀙𑀝𑁆𑀞𑀫𑀕𑀸𑀣𑀸𑀬 𑀲𑀼𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀢𑁆𑀢 𑀫𑀕𑁆𑀕𑀜𑀸𑀡𑀸𑀤𑀻𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀭𑀸𑀕𑀸𑀤𑀺𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀇𑀦𑁆𑀤𑀯𑀚𑀺𑀭 𑀉𑀧𑁂𑀦𑁆𑀤𑀯𑀚𑀺𑀭 𑀕𑀸𑀣𑀸𑀤𑁆𑀯𑀬𑀲𑁆𑀲 𑀮𑀓𑁆𑀔𑀡𑀲𑁆𑀲 𑀫𑀺𑀲𑁆𑀲𑀓𑀢𑁆𑀢𑀸 𑀏𑀓𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀉𑀧𑀚𑀸𑀢𑀺𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀅𑀦𑀦𑁆𑀢𑀭𑁄𑀤𑀻𑀭𑀺𑀢𑀮𑀓𑁆𑀔𑀡𑀸 𑀘𑁂, 𑀧𑀸𑀤𑀸𑀯𑀺𑀫𑀺𑀲𑁆𑀲𑀸 𑀉𑀧𑀚𑀸𑀢𑀺𑀬𑁄 𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀸 𑀯𑀼𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑁄 𑀤𑀻𑀭𑀺𑀢𑀮𑀓𑁆𑀔𑀡𑀸 𑀅𑀦𑀦𑁆𑀢𑀭𑁂 𑀉𑀤𑀻𑀭𑀺𑀢𑀁 𑀯𑀼𑀢𑁆𑀢𑀁 𑀇𑀦𑁆𑀤𑀯𑀚𑀺𑀭𑁄𑀧𑁂𑀦𑁆𑀤 𑀯𑀚𑀺𑀭𑀕𑀸𑀣𑀸𑀦𑀁 𑀮𑀓𑁆𑀔𑀡𑀯𑀦𑁆𑀢𑀸 𑀧𑀸𑀤𑀸 𑀯𑀺𑀫𑀺𑀲𑁆𑀲𑀸 𑀲𑀁𑀲𑀝𑁆𑀞𑀸 𑀘𑁂 𑀪𑀯𑀦𑁆𑀢𑀺, 𑀢𑀸 𑀯𑀼𑀢𑁆𑀢𑀺𑀬𑁄 𑀉𑀧𑀚𑀸𑀢𑀺𑀬𑁄 𑀦𑀸𑀫𑀸𑀢𑀺.

𑀢𑀢𑁆𑀣 ¶ 𑀭𑀸𑀕𑀸𑀤𑀺𑀙𑁂𑀤𑀸𑀫𑀮 𑀜𑀸𑀡𑀔𑀕𑁆𑀕𑀦𑁆𑀢𑀺 𑀏𑀢𑁆𑀣 𑀭𑀸𑀕𑀆𑀤𑀺𑀙𑁂𑀤 𑀅𑀫𑀮𑀜𑀸𑀡𑀔𑀕𑁆𑀕𑀦𑁆𑀢𑀺𑀧𑀤𑀘𑁆𑀙𑁂𑀤𑁄. 𑀭𑀸𑀕𑀸𑀤𑀺𑀓𑀺𑀮𑁂𑀲𑀁 𑀙𑀺𑀦𑁆𑀤𑀦𑁆𑀢𑀁 𑀫𑀮𑀯𑀺𑀭 𑀳𑀺𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀅𑀲𑀺𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀭𑀽𑀧𑀸𑀤𑀻𑀲𑀼 𑀭𑀜𑁆𑀚𑀢𑀻𑀢𑀺 𑀭𑀸𑀕𑁄. 𑀭𑀦𑁆𑀚𑀥𑀸𑀢𑀼 𑀭𑀸𑀕𑁂 𑀡. 𑀭𑀸𑀕𑁄 𑀆𑀤𑀺 𑀬𑁂𑀲𑀦𑁆𑀢𑁂𑀢𑀺 𑀭𑀸𑀕𑀸𑀤𑀬𑁄, 𑀓𑀺𑀮𑁂𑀲𑀸. 𑀢𑁂 𑀙𑀺𑀦𑁆𑀤𑀢𑀻𑀢𑀺 𑀭𑀸𑀕𑀸𑀤𑀺𑀙𑁂𑀤𑀁, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀅𑀧𑀸𑀬𑀁 𑀫𑀮𑀢𑀺 𑀥𑀸𑀭𑁂𑀢𑀻𑀢𑀺 𑀫𑀮𑀁, 𑀭𑀸𑀕𑀸𑀤𑀺. 𑀅𑀣 𑀯𑀸 𑀫𑀮𑀢𑀺 𑀲𑀁𑀓𑀺𑀮𑀺𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀫𑀮𑀁. 𑀫𑀮𑀥𑀸𑀢𑀼 𑀲𑀁𑀓𑀺𑀮𑁂𑀲𑀦𑁂 𑀅. 𑀫𑀮𑀢𑁄 𑀯𑀺𑀭𑀳𑀺𑀢𑀁 𑀅𑀫𑀮𑀁, 𑀜𑀸𑀡𑀁. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀜𑀸𑀡𑀁, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀭𑀸𑀕𑀸𑀤𑀺𑀙𑁂𑀤𑀜𑁆𑀘 𑀅𑀫𑀮𑀜𑁆𑀘 𑀢𑀁 𑀜𑀸𑀡𑀜𑁆𑀘𑀸𑀢𑀺 𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡𑀁. 𑀭𑀼𑀓𑁆𑀔𑀸𑀤𑀺𑀁 𑀔𑀕𑁆𑀕𑀢𑀺 𑀙𑀺𑀦𑁆𑀤𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀔𑀕𑁆𑀕𑀁, 𑀧𑀓𑀢𑀺𑀅𑀲𑀺. 𑀔𑀕𑁆𑀕𑀁 𑀯𑀺𑀬𑀸𑀢𑀺 𑀔𑀕𑁆𑀕𑀁, 𑀜𑀸𑀡𑀁. 𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡𑀲𑀗𑁆𑀔𑀢𑀁 𑀔𑀕𑁆𑀕𑀁 𑀬𑀲𑁆𑀲 𑀲𑁄𑀢𑀺 𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡𑀔𑀕𑁆𑀕𑁄, 𑀩𑀼𑀤𑁆𑀥𑁄. 𑀭𑀸𑀕𑀸𑀤𑀺𑀓𑀺𑀮𑁂𑀲𑀁 𑀙𑀺𑀦𑁆𑀤𑀦𑁆𑀢𑁂𑀦 𑀫𑀮𑀯𑀺𑀭 𑀳𑀺𑀢𑁂𑀦 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀗𑁆𑀔𑀢𑁂𑀦 𑀅𑀲𑀺𑀦𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁.

𑀲𑀢𑀻𑀲𑀫𑀜𑁆𑀜𑀸 𑀨𑀮𑀓𑀸𑀪𑀺𑀕𑀸𑀳𑀦𑁆𑀢𑀺 𑀏𑀢𑁆𑀣 𑀲𑀢𑀺𑀲𑀫𑀜𑁆𑀜𑀸𑀨𑀮𑀓 𑀅𑀪𑀺𑀕𑀸𑀳𑀦𑁆𑀢𑀺𑀧𑀤𑀘𑁆𑀙𑁂𑀤𑁄. 𑀲𑀫𑁆𑀫𑀸𑀲𑀢𑀺𑀦𑀸𑀫𑀺𑀓𑀁 𑀨𑀮𑀓𑀁 𑀤𑀴𑁆𑀳𑀕𑀸𑀳 𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀲𑀭𑀡𑀁 𑀲𑀢𑀺, 𑀲𑀭𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀢𑀸𑀬𑀸𑀢𑀺, 𑀲𑀭𑀢𑀻𑀢𑀺 𑀯𑀸 𑀲𑀢𑀺. 𑀲𑀭𑀥𑀸𑀢𑀼𑀢𑀺. 𑀅𑀣 𑀯𑀸 𑀧𑀫𑀸𑀤𑀁 𑀲𑀭𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑀺, 𑀲𑀫𑁆𑀫𑀸𑀲𑀢𑀺. 𑀲𑀭𑀥𑀸𑀢𑀼 𑀳𑀺𑀁𑀲𑀸𑀬𑀁𑀢𑀺. 𑀲𑀫𑁆𑀫𑀸 𑀆𑀚𑀸𑀦𑀸𑀢𑀺 𑀏𑀢𑀸𑀬𑀸𑀢𑀺 𑀲𑀫𑀜𑁆𑀜𑀸, 𑀲𑀢𑀺𑀇𑀢𑀺 𑀲𑀫𑀜𑁆𑀜𑀸 𑀲𑀢𑀺𑀲𑀫𑀜𑁆𑀜𑀸, 𑀅𑀲𑀺𑀆𑀤𑀺𑀲𑀢𑁆𑀣𑀁 𑀨𑀮𑀢𑀺 𑀦𑀺𑀯𑀸𑀭𑁂𑀢𑀻𑀢𑀺 𑀨𑀮𑀓𑀁, 𑀔𑁂𑀝𑀓𑀁. 𑀨𑀮𑀥𑀸𑀢𑀼 𑀦𑀺𑀯𑀸𑀭𑀡𑁂 𑀡𑁆𑀯𑀼. 𑀲𑀢𑀺𑀲𑀫𑀜𑁆𑀜𑀁 𑀨𑀮𑀓𑀁 𑀅𑀪𑀺𑀤𑀴𑁆𑀳𑀁 𑀕𑀡𑁆𑀳𑀢𑀻𑀢𑀺 𑀲𑀢𑀺𑀲𑀫𑀜𑁆𑀜𑀸𑀨𑀮 𑀓𑀸𑀪𑀺𑀕𑀸𑀳𑁄, 𑀩𑀼𑀤𑁆𑀥𑁄 𑀮𑀩𑁆𑀪𑀢𑀺. 𑀬𑀣𑀸 𑀳𑀺 𑀲𑁂𑀦𑀸𑀬 𑀨𑀮𑀓𑀁 𑀅𑀲𑀺𑀆𑀤𑀺𑀲𑀢𑁆𑀣𑀁 𑀭𑀓𑁆𑀔𑀢𑀺, 𑀏𑀯𑀁 𑀲𑀢𑀺𑀲𑀁𑀯𑀭𑁄 𑀘𑀓𑁆𑀔𑀸𑀤𑀺 𑀤𑁆𑀯𑀸𑀭𑁂𑀲𑀼 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀧𑀯𑀺𑀲𑀺𑀢𑀼𑀁 𑀅𑀤𑀢𑁆𑀯𑀸 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀲𑀢𑀺𑀥𑀫𑁆𑀫𑁄 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀭𑀓𑁆𑀔𑀓𑀢𑁆𑀢𑀸 𑀲𑀩𑁆𑀩𑀓𑀼𑀲𑀮 𑀥𑀫𑁆𑀫𑀸𑀦𑀁 𑀉𑀧𑀓𑀸𑀭𑀢𑁆𑀢𑀸 𑀲𑀩𑁆𑀩𑀢𑁆𑀣𑀸𑀦𑀁 𑀲𑀸𑀥𑀓𑀢𑁆𑀢𑀸 𑀘 𑀲𑀢𑀺𑀨𑀮𑀓𑀁 𑀤𑀴𑁆𑀳𑀁 ¶ 𑀕𑀡𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸, 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀘. ‘‘𑀲𑀢𑀺𑀁 𑀔𑁆𑀯𑀸𑀳𑀁 𑀪𑀺𑀓𑁆𑀔𑀯𑁂 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 𑀘.

𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀦𑁆𑀢𑀺 𑀲𑀻𑀮𑀑𑀖𑀅𑀮𑀗𑁆𑀓𑀸𑀭 𑀯𑀺𑀪𑀽 𑀲𑀺𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀲𑀼𑀤𑁆𑀥𑀲𑀻𑀮𑀸𑀦𑀁 𑀲𑀫𑀽𑀳𑀲𑀗𑁆𑀔𑀸𑀢𑁂𑀦 𑀅𑀮𑀗𑁆𑀓𑀸𑀭𑁂𑀦 𑀯𑀺𑀪𑀽𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀻𑀮𑀦𑁆𑀢𑀺 𑀮𑁄𑀓𑀼𑀢𑁆𑀢𑀭 𑀲𑀻𑀮𑀁. 𑀢𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀁 𑀧𑀦 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀜𑁆𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸 𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸. 𑀘𑁂𑀢𑀲𑀺𑀓𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀭𑀢𑀺. 𑀲𑀁𑀯𑀭𑁄 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺 𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺, 𑀲𑀩𑁆𑀩𑀫𑁂𑀢𑀁 𑀲𑀁𑀯𑀭𑁄 𑀲𑀻𑀮𑀁 𑀦𑀸𑀫. 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁 𑀦𑀸𑀫 𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀦𑀢𑀺𑀓𑁆𑀓𑀫𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀺𑀁𑀲𑀻𑀮𑀦𑁆𑀢𑀺𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺. 𑀇𑀥 𑀧𑀦 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁 𑀦𑀸𑀥𑀺𑀧𑁆𑀧𑁂𑀢𑀁. 𑀓𑀲𑁆𑀫𑀸. 𑀪𑀕𑀯𑀢𑁄 𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀪𑀸𑀯𑀢𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀑𑀖𑁄𑀢𑀺 𑀲𑀫𑀽𑀳𑁄. 𑀑𑀖𑀲𑀤𑁆𑀤𑁄 𑀳𑀺 𑀲𑀫𑀽𑀳𑀯𑀸𑀘𑀓𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁋

‘‘𑀲𑀫𑀽𑀳𑁄 𑀕𑀡𑀲𑀗𑁆𑀖𑀸𑀢𑀸, 𑀲𑀫𑀼𑀤𑀸𑀬𑁄 𑀘 𑀲𑀜𑁆𑀘𑀬𑁄;

𑀲𑀦𑁆𑀤𑁄𑀳𑁄 𑀦𑀺𑀯𑀳𑁄 𑀑𑀖𑁄, 𑀯𑀺𑀲𑀭𑁄 𑀦𑀺𑀓𑀭𑁄 𑀘𑀬𑁄’’𑀢𑁆𑀬𑀸𑀤𑀺.

𑀅𑀯𑀳𑀦𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀅𑀯𑀬𑀯𑀁 𑀏𑀢𑁆𑀣𑀸𑀢𑀺 𑀑𑀖𑁄, 𑀲𑀫𑀽𑀳𑁄. 𑀅𑀯𑀧𑀼𑀩𑁆𑀩𑀳𑀦𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡𑁄. 𑀅𑀯𑀲𑁆𑀲 𑀑, 𑀳𑀦𑀲𑁆𑀲 𑀖𑁄. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀧𑀦 ‘‘𑀅𑀯𑀬𑀯𑀁 𑀓𑀢𑁆𑀯𑀸 ¶ 𑀩𑁆𑀬𑀸𑀧𑀺𑀬𑀢𑀺 𑀕𑀘𑁆𑀙𑀢𑀻𑀢𑀺 𑀑𑀖𑁄’’𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀸𑀦𑀁 𑀑𑀖𑁄 𑀲𑀫𑀽𑀳𑁄 𑀲𑀻𑀮𑁄𑀖𑁄. 𑀅𑀮𑀗𑁆𑀓𑀸𑀭𑁄𑀢𑀺 𑀧𑀺𑀴𑀦𑁆𑀥𑀦𑁄. 𑀅𑀮𑀁 𑀯𑀺𑀪𑀼𑀲𑀁 𑀢𑀁 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀅𑀮𑀗𑁆𑀓𑀸𑀭𑁄, 𑀲𑀻𑀮𑀁. 𑀅𑀮𑀁𑀲𑀤𑁆𑀤𑀽𑀧𑀧𑀤𑀓𑀭𑀥𑀸𑀢𑀼 𑀡𑁄. 𑀲𑀻𑀮𑁄𑀖𑁄 𑀏𑀯 𑀅𑀮𑀗𑁆𑀓𑀸𑀭𑁄 𑀲𑀻𑀮𑁄𑀖𑀸𑀮𑀗𑁆𑀓𑀸𑀭𑁄, 𑀢𑁂𑀦 𑀯𑀺𑀪𑀽 𑀲𑀺𑀬𑀢𑀻𑀢𑀺 𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑁄, 𑀩𑀼𑀤𑁆𑀥𑁄. 𑀢𑁂𑀦 𑀧𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁂𑀦 𑀮𑁄𑀓𑀼𑀢𑁆𑀢𑀭𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀯𑀺𑀪𑀽𑀲𑀺𑀢𑁄. 𑀦 𑀘𑀻𑀯𑀭𑀸𑀤𑀺𑀦𑀸𑀮𑀗𑁆𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀺 𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺. 𑀢𑀁 𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁.

𑀦𑀫𑀸𑀫𑀺𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀦𑁆𑀢𑀺 𑀏𑀢𑁆𑀣 𑀦𑀫𑀸𑀫𑀺 𑀅𑀪𑀺𑀜𑁆𑀜𑀸𑀯𑀭𑀁 𑀇𑀤𑁆𑀥𑀺 𑀉𑀧𑁂𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣 𑀦𑀫𑀸𑀫𑀻𑀢𑀺 𑀯𑀦𑁆𑀤𑀸𑀫𑀺. 𑀅𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀉𑀢𑁆𑀢𑀫𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀯𑀺𑀲𑁂𑀲𑁂𑀦 𑀚𑀸𑀦𑀸𑀢𑀻𑀢𑀺 𑀅𑀪𑀺𑀜𑁆𑀜𑀸, 𑀙𑀩𑁆𑀩𑀺𑀥𑀁 𑀜𑀸𑀡𑀁. 𑀢𑀜𑁆𑀳𑀺 𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢 𑀧𑀭𑀘𑀺𑀢𑁆𑀢 𑀯𑀺𑀚𑀸𑀦𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀘𑀼𑀢𑀽𑀧𑀧𑀸𑀢 𑀆𑀲𑀯𑀓𑁆𑀔𑀬 𑀜𑀸𑀡𑀯𑀲𑁂𑀦 𑀙𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑀦𑁆𑀢𑀺 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑁂 𑀚𑀸𑀦𑀦 𑀜𑀸𑀡𑀁. 𑀤𑀺𑀩𑁆𑀩𑀲𑁄𑀢𑀜𑀸𑀡𑀦𑁆𑀢𑀺 𑀤𑀽𑀭𑀲𑀦𑁆𑀢𑀺𑀓𑀸𑀤𑀺𑀪𑁂𑀤𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀚𑀸𑀦𑀦𑀜𑀸𑀡𑀁. 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀜𑀸𑀡𑀦𑁆𑀢𑀺 𑀧𑀭𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀚𑀸𑀦𑀦𑀜𑀸𑀡𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸 𑀦𑀼𑀲𑁆𑀲𑀢𑀺𑀜𑀸𑀡𑀦𑁆𑀢𑀺 𑀅𑀢𑁆𑀢𑀲𑀦𑁆𑀢𑀸𑀦𑁂 𑀯𑀼𑀢𑁆𑀣𑀯𑀲𑁂𑀦 𑀘𑁂𑀯 𑀕𑁄𑀘𑀭 𑀦𑀺𑀯𑀸𑀲𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂𑀲𑀼 𑀔𑀦𑁆𑀥𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁. 𑀘𑀼𑀢𑀽𑀧𑀧𑀸𑀢𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀬𑀜𑁆𑀘 𑀉𑀧𑀧𑀸𑀢𑁂 𑀘 𑀚𑀸𑀦𑀦𑀜𑀸𑀡𑀁. 𑀏𑀢𑁆𑀣 𑀘 𑀅𑀝𑁆𑀞𑀓𑀣𑀸𑀲𑀼 𑀘𑀼𑀢𑀽𑀧𑀧𑀸𑀢𑀜𑀸𑀡𑀝𑁆𑀞𑀸𑀦𑁂 𑀢𑀲𑁆𑀲 𑀲𑀸𑀥𑀓𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀲𑁆𑀲 𑀚𑀸𑀦𑀦𑀁 𑀅𑀭𑀳𑀢𑁆𑀢 𑀫𑀕𑁆𑀕𑀜𑀸𑀡𑀦𑁆𑀢𑀺. 𑀯𑀭𑀦𑁆𑀢𑀺 𑀉𑀢𑁆𑀢𑀫𑀁. 𑀇𑀤𑁆𑀥𑀻𑀢𑀺 𑀇𑀚𑁆𑀛𑀦𑀁 𑀲𑀫𑀺𑀚𑁆𑀛𑀦𑀁. 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀻𑀢𑀺 𑀯𑀸 𑀇𑀤𑁆𑀥𑀺. 𑀇𑀥𑀥𑀸𑀢𑀼𑀢𑀺. 𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀭𑀸𑀬 ¶ 𑀇𑀤𑁆𑀥𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑁄, 𑀩𑀼𑀤𑁆𑀥𑁄. 𑀢𑀁 𑀅𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀁. 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡 𑀔𑀕𑁆𑀕𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀁 𑀙𑀺𑀦𑁆𑀤𑀦𑁆𑀢𑀁 𑀫𑀮𑀯𑀺𑀭𑀳𑀺𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡 𑀲𑀗𑁆𑀔𑀸𑀢𑀁 𑀅𑀲𑀺𑀯𑀦𑁆𑀢𑀁, 𑀲𑀢𑀻𑀲𑀫𑀜𑁆𑀜𑀸𑀨𑀮𑀓𑀸𑀪𑀺𑀕𑀸𑀳𑀁 𑀲𑀫𑁆𑀫𑀸 𑀲𑀢𑀺𑀦𑀸𑀫𑀺𑀓𑀁 𑀨𑀮𑀓𑀁 𑀤𑀴𑁆𑀳𑀕𑀳𑀡𑀁, 𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀲𑀻𑀮𑀸𑀦𑀁 𑀲𑀫𑀽𑀳𑀲𑀗𑁆𑀔𑀸𑀢𑁂𑀦 𑀅𑀮𑀗𑁆𑀓𑀸𑀭𑁂𑀦 𑀯𑀺𑀪𑀽𑀲𑀺𑀢𑀁, 𑀅𑀪𑀺𑀜𑁆𑀜𑀸 𑀯𑀭𑀫𑀺𑀤𑁆𑀥𑀼𑀧𑁂𑀢𑀁 𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀭𑀸𑀬 𑀉𑀢𑁆𑀢𑀫𑀸𑀬 𑀇𑀤𑁆𑀥𑀺𑀬𑀸 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀁 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀫𑀸𑀫𑀻𑀢𑀺.

𑀲𑀢𑁆𑀢𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀬𑀸𑀮𑀬𑀁 𑀲𑀩𑁆𑀩𑀥𑀺 𑀤𑀼𑀓𑁆𑀓𑀭𑀁 𑀓𑀭𑀁,

𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀫𑀕𑁆𑀕𑀢𑀁 𑀕𑀢𑀁;

𑀢𑀺𑀮𑁄𑀓𑀦𑀸𑀣𑀁 𑀲𑀼𑀲𑀫𑀸𑀳𑀺𑀢𑀁 𑀳𑀺𑀢𑀁,

𑀲𑀫𑀦𑁆𑀢𑀘𑀓𑁆𑀔𑀼𑀁 𑀧𑀡𑀫𑀸𑀫𑀺 𑀢𑀁𑀫𑀺𑀢𑀁.

𑁮. 𑀏𑀯𑀁 𑀲𑀢𑁆𑀢𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀓𑀭𑀼𑀡𑀸 𑀤𑀻𑀳𑀺 𑀦𑀯𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀤𑀬𑀸𑀮𑀬𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀚 𑀢 𑀚 𑀭𑀕𑀡𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀤𑁆𑀯𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀘𑀢𑀼𑀧𑀸𑀤𑀦𑁆𑀢𑀬𑀫𑀓𑀸 𑀯𑀁𑀲𑀝𑁆𑀞𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀯𑀤𑀦𑁆𑀢𑀺 𑀯𑀁𑀲𑀝𑁆𑀞𑀫𑀺𑀤𑀁 𑀚𑀢𑀸 𑀚𑀭𑀸’’𑀢𑀺. 𑀢𑀲𑁆𑀲𑀢𑁆𑀣𑁄, 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀚𑀢𑀸 𑀚𑀢𑀕𑀡𑀸 𑀘 𑀚𑀭𑀸 𑀚𑀭𑀕𑀡𑀸 𑀘 𑀘𑁂 𑀪𑀯𑀦𑁆𑀢𑀺, 𑀇𑀤𑀁 𑀯𑀼𑀢𑁆𑀢𑀁 𑀯𑀁𑀲𑀝𑁆𑀞𑀁 𑀯𑀁𑀲𑀝𑁆𑀞𑀕𑀸𑀣𑀸 𑀦𑀸𑀫𑀸𑀢𑀺 𑀫𑀼𑀦𑀬𑁄 𑀇𑀲𑀬𑁄 𑀯𑀤𑀦𑁆𑀢𑀻𑀢𑀺.

𑀢𑀢𑁆𑀣 𑀤𑀬𑀸𑀮𑀬𑀦𑁆𑀢𑀺 𑀫𑀳𑀸𑀓𑀭𑀼𑀡𑀸𑀬 𑀘, 𑀫𑁂𑀢𑁆𑀢𑀸𑀬 𑀘 𑀆𑀥𑀸𑀭𑀁. 𑀤𑀬𑀸𑀲𑀤𑁆𑀤𑁄 𑀳𑀺 𑀓𑀭𑀼𑀡𑀸𑀬 𑀘, 𑀫𑁂𑀢𑁆𑀢𑀸𑀬 𑀘 𑀯𑀢𑁆𑀢𑀢𑀺. 𑀅𑀤𑀬𑀸𑀧𑀦𑁆𑀦𑁄𑀢𑀺 𑀏𑀢𑁆𑀣 𑀳𑀺 𑀓𑀭𑀼𑀡𑀸𑀬 𑀯𑀢𑁆𑀢𑀢𑀺. 𑀦𑀺𑀓𑁆𑀓𑀭𑀼𑀡𑀺𑀓𑀢𑀁 ¶ 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀤𑀬𑀸𑀧𑀦𑁆𑀦𑁄𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸𑀬 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀤𑀬𑀸 𑀘 𑀤𑀬𑀸 𑀘 𑀤𑀬𑀸𑀢𑀺 𑀲𑀤𑁆𑀤𑀲𑀭𑀽𑀧𑁂𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀤𑀬𑀢𑀺 𑀳𑀺𑀁𑀲𑀢𑀺 𑀓𑀸𑀭𑀼𑀡𑀺𑀓𑀦𑁆𑀢𑀺 𑀤𑀬𑀸, 𑀫𑀳𑀸𑀓𑀭𑀼𑀡𑀸. 𑀤𑀬𑀥𑀸𑀢𑀼 𑀳𑀺𑀁𑀲𑀸𑀬𑀁 𑀅. 𑀬𑀸 𑀓𑀭𑀼𑀡𑀸 𑀬𑀸𑀯 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀭𑀲𑁆𑀲 𑀳𑀺𑀢𑀦𑀺𑀧𑁆𑀨𑀢𑁆𑀢𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀤𑀬𑀢𑀺 𑀳𑀺𑀁𑀲𑀢𑀺 𑀅𑀧𑀦𑁂𑀢𑀺 𑀧𑀭𑀤𑀼𑀓𑁆𑀔𑀦𑁆𑀢𑀺 𑀯𑀸 𑀤𑀬𑀸. 𑀅𑀣 𑀯𑀸 𑀤𑀬𑀢𑀺 𑀅𑀢𑁆𑀢𑀦𑁄 𑀲𑀼𑀔𑀫𑁆𑀧𑀺 𑀧𑀳𑀸𑀬 𑀔𑁂𑀤𑀁 𑀕𑀡𑁆𑀳𑀸𑀢𑀺 𑀲𑀚𑁆𑀚𑀦𑁄 𑀏𑀢𑀸𑀬𑀸𑀢𑀺 𑀤𑀬𑀸, 𑀤𑀬𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀧𑀸𑀧𑀚𑀦𑀫𑁆𑀧𑀺 𑀏𑀢𑀸𑀬𑀸𑀢𑀺 𑀯𑀸 𑀤𑀬𑀸, 𑀤𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀏𑀢𑀸𑀬𑀸𑀢𑀺 𑀯𑀸 𑀤𑀬𑀸, 𑀩𑁄𑀥𑀺𑀲𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀓𑀭𑀡 𑀓𑀸𑀮𑁂 𑀳𑀢𑁆𑀣𑀕𑀢𑀫𑁆𑀧𑀺 𑀅𑀕𑁆𑀕𑀨𑀮𑀁 𑀙𑀝𑁆𑀝𑁂𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀁𑀲𑀸𑀭𑀲𑀸𑀕𑀭𑀢𑁄 𑀲𑀢𑁆𑀢𑁂 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑀸 𑀅𑀦𑀲𑁆𑀲𑀸𑀲 𑀓𑀭𑀁 𑀫𑀳𑀦𑁆𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀜𑁆𑀘 𑀧𑀘𑁆𑀙𑀺𑀫𑀪𑀯𑁂 𑀲𑀳 𑀅𑀫𑀢 𑀥𑀸𑀢𑀼𑀧𑀝𑀺𑀮𑀸𑀪𑁂𑀦 𑀅𑀦𑁂𑀓𑀕𑀼𑀡𑀲𑀫𑀮𑀗𑁆𑀓𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀜𑁆𑀘 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀬𑀢𑀺 𑀤𑀤𑀸𑀢𑀺 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀏𑀢𑀸𑀬𑀸𑀢𑀺 𑀤𑀬𑀸, 𑀫𑁂𑀢𑁆𑀢𑀸. 𑀤𑀬𑀥𑀸𑀢𑀼 𑀤𑀸𑀦𑁂 𑀅. 𑀤𑀬𑀢𑀺 𑀕𑀘𑁆𑀙𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀢𑁆𑀢𑁂𑀲𑀼 𑀲𑀫𑀁 𑀧𑀯𑀢𑁆𑀢𑀢𑀻𑀢𑀺 𑀤𑀬𑀸. 𑀬𑀣𑀸 𑀉𑀤𑀓𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀻𑀢𑁂𑀦 𑀲𑀫𑀁 𑀨𑀭𑀢𑀺 𑀭𑀚𑁄𑀫𑀮𑀜𑁆𑀘 𑀧𑀯𑀸𑀳𑁂𑀢𑀺, 𑀏𑀯𑀁 𑀫𑁂𑀢𑁆𑀢𑀸 𑀧𑀸𑀧𑀓𑀮𑁆𑀬𑀸𑀡𑀚𑀦𑁂𑀲𑀼 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀅𑀧𑀭𑁄 𑀦𑀬𑁄. 𑀤𑀬𑀦𑁆𑀢𑀺 𑀅𑀦𑀼𑀭𑀓𑁆𑀔𑀦𑁆𑀢𑀺 𑀲𑀢𑁆𑀢𑁂 𑀏𑀢𑀸𑀬, 𑀲𑀬𑀁 𑀯𑀸 𑀅𑀦𑀼𑀤𑁆𑀤𑀬𑀢𑀺 𑀅𑀦𑀼𑀤𑁆𑀤𑀬𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀤𑀬𑀸, 𑀓𑀭𑀼𑀡𑀸𑀫𑁂𑀢𑁆𑀢𑀸 𑀮𑀩𑁆𑀪𑀦𑁆𑀢𑀺. 𑀢𑀸𑀬 𑀆𑀮𑀬𑀢𑀺 𑀧𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀤𑀬𑀸𑀮𑀬𑁄, 𑀩𑀼𑀤𑁆𑀥𑁄. 𑀪𑀕𑀯𑀸 𑀳𑀺 𑀤𑁂𑀯𑀤𑀢𑁆𑀢𑀸𑀤𑀻𑀲𑀼 𑀯𑀺𑀭𑁄𑀥𑀺 𑀲𑀢𑁆𑀢𑁂𑀲𑀼 𑀘 𑀅𑀯𑀺𑀭𑁄𑀥𑀺𑀲𑀢𑁆𑀢𑁂𑀲𑀼 𑀑𑀭𑀲𑁂 𑀭𑀸𑀳𑀼𑀮𑁂 𑀘 𑀲𑀫𑀁 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑀸𑀬 𑀫𑀳𑀸𑀓𑀭𑀼𑀡𑀸𑀬 𑀫𑁂𑀢𑁆𑀢𑀸𑀬 𑀘 𑀞𑀺𑀢𑁄 ¶ , 𑀢𑀲𑁆𑀫𑀸 𑀤𑀬𑀸𑀮𑀬𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑀧𑀸𑀴𑀺𑀬𑀁 𑁋

‘‘𑀯𑀥𑀓𑁂 𑀤𑁂𑀯𑀤𑀢𑁆𑀢𑁂 𑀘, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀫𑀘𑀺𑀢𑁆𑀢𑁄 𑀫𑀳𑀸𑀫𑀼𑀦𑀻’’𑀢𑀺.

𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂. 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀢𑁆𑀢𑀪𑀸𑀯𑁂𑀲𑀽𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀭𑀦𑁆𑀢𑀺 𑀤𑀼𑀓𑁆𑀔𑁂𑀦 𑀓𑀭𑀺𑀢𑀩𑁆𑀩𑀁 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀫𑁆𑀫𑀁 𑀤𑀼𑀓𑁆𑀔𑁂𑀦 𑀓𑀭𑀺𑀢𑀩𑁆𑀩𑀦𑁆𑀢𑀺 𑀤𑀼𑀓𑁆𑀓𑀭𑀁, 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀫𑁆𑀫𑀁 𑀮𑀩𑁆𑀪𑀢𑀺. 𑀏𑀢𑁆𑀣 𑀘 𑀧𑀜𑁆𑀘𑀫𑀳𑀸 𑀧𑀭𑀺𑀘𑁆𑀘𑀸𑀕𑁄𑀢𑀺 𑀥𑀦𑀧𑀭𑀺𑀘𑁆𑀘𑀸𑀕𑁄, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄, 𑀧𑀼𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀪𑀭𑀺𑀬𑀧𑀭𑀺𑀘𑁆𑀘𑀸𑀕𑁄, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀳𑀢𑁆𑀣𑀺𑀅𑀲𑁆𑀲 𑀤𑀸𑀲𑀺𑀤𑀸𑀲𑀸𑀤𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀥𑀦𑀲𑁆𑀲 𑀯𑀸 𑀫𑀼𑀢𑁆𑀢𑀸𑀫𑀡𑀺𑀭𑀚𑀢𑀸𑀤𑀺 𑀅𑀯𑀺𑀜𑁆𑀜𑀸𑀡𑀓𑀲𑁆𑀲 𑀥𑀦𑀲𑁆𑀲 𑀯𑀸 𑀧𑀭𑀺𑀘𑁆𑀘𑀸𑀕𑁄 𑀥𑀦𑀧𑀭𑀺𑀘𑁆𑀘𑀸𑀕𑁄 𑀦𑀸𑀫. 𑀳𑀢𑁆𑀣𑀧𑀸𑀤𑀘𑀓𑁆𑀔𑀼𑀓𑀡𑁆𑀡𑀦𑀸𑀲𑀸𑀤𑀺𑀲𑀭𑀻𑀭𑀸𑀯 𑀬𑀯𑀲𑁆𑀲 𑀧𑀭𑀺𑀘𑁆𑀘𑀸𑀕𑁄 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀦𑀸𑀫. 𑀧𑀼𑀢𑁆𑀢𑀲𑁆𑀲 𑀘 𑀥𑀻𑀢𑀼𑀬𑀸 𑀘 𑀧𑀭𑀺𑀘𑁆𑀘𑀸𑀕𑁄 𑀧𑀼𑀢𑁆𑀢𑀧𑀭𑀺𑀘𑁆𑀘𑀸𑀕𑁄 𑀦𑀸𑀫. 𑀪𑀭𑀺𑀬𑀸𑀬 𑀧𑀭𑀺𑀘𑁆𑀘𑀸𑀕𑁄 𑀪𑀭𑀺𑀬𑀧𑀭𑀺𑀘𑁆𑀘𑀸𑀕𑁄 𑀦𑀸𑀫. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀲𑁆𑀲 𑀲𑀭𑀻𑀭𑀲𑁆𑀲 𑀧𑀭𑀺𑀘𑁆𑀘𑀸𑀕𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀦𑀸𑀫. 𑀓𑀺𑀜𑁆𑀘𑀸𑀧𑀺 𑀧𑀦 𑀥𑀦𑀧𑀭𑀺𑀘𑁆𑀘𑀸𑀕𑀸 𑀤𑀬𑁄 𑀤𑀸𑀦𑀧𑀸𑀭𑀫𑀺𑀬𑀁𑀬𑁂𑀯 𑀅𑀦𑁆𑀢𑁄𑀕𑀥𑀸, 𑀢𑀣𑀸𑀧𑀺 𑀧𑀭𑀺𑀘𑁆𑀘𑀸𑀕 𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀯𑀺𑀲𑀼𑀁 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀝𑀻𑀓𑀸𑀬𑀁 𑀧𑀦 ‘‘𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄, 𑀦𑀬𑀦𑀧𑀭𑀺𑀘𑁆𑀘𑀸𑀕𑁄, 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑁄, 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸. 𑀢𑀢𑁆𑀣𑀧𑀺 𑀓𑀸𑀫𑀁 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀬𑁄𑀧𑀺 𑀤𑀸𑀦𑀧𑀸𑀭𑀫𑀻𑀬𑁂𑀯. 𑀢𑀣𑀸𑀧𑀺 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄𑀧𑀺 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁. 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀭𑀚𑁆𑀚𑀧𑀭𑀺𑀘𑁆𑀘𑀸𑀕 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀤𑀼𑀓𑁆𑀓𑀭𑀁. 𑀇𑀤𑀁 𑀧𑀦 𑀓𑀭𑀦𑁆𑀢𑀺 𑀏𑀢𑀲𑁆𑀲 𑀓𑀫𑁆𑀫𑀧𑀤𑀁. 𑀓𑀭𑀦𑁆𑀢𑀺 𑀓𑀭𑁄𑀦𑁆𑀢𑀁, 𑀓𑀭𑁄𑀢𑀻𑀢𑀺 𑀓𑀭𑁄, 𑀩𑀼𑀤𑁆𑀥𑁄. 𑀢𑀁.

𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀫𑀕𑁆𑀕𑀢𑀦𑁆𑀢𑀺 ¶ 𑀏𑀢𑁆𑀣 𑀪𑀯𑀅𑀡𑁆𑀡𑀯𑀅𑀢𑀺𑀓𑁆𑀓𑀫𑀁 𑀅𑀕𑁆𑀕𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀦𑁆𑀢𑀺 𑀓𑀸𑀫𑀭𑀽𑀧𑀅𑀭𑀽𑀧𑀪𑀯𑀲𑀗𑁆𑀔𑀢𑀸 𑀅𑀡𑁆𑀡𑀯𑀸 𑀲𑀫𑀼𑀤𑁆𑀤𑀢𑁄 𑀅𑀢𑀺𑀓𑁆𑀓𑀦𑁆𑀢𑀁. 𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺 𑀪𑀯𑁄. 𑀅𑀡𑁆𑀡𑁄 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀢𑀁 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀅𑀡𑁆𑀡𑀯𑀸, 𑀲𑀫𑀼𑀤𑁆𑀤𑁄. 𑀪𑀯𑀲𑀗𑁆𑀔𑀸𑀢𑁄 𑀅𑀡𑁆𑀡𑀯𑁄𑀢𑀺 𑀪𑀯𑀡𑁆𑀡𑀯𑀸, 𑀫𑀳𑀸𑀲𑀫𑀼𑀤𑁆𑀤𑁄. 𑀩𑀳𑀽𑀳𑀺 𑀊𑀫𑀺𑀯𑁂𑀕𑀸𑀤𑀻𑀳𑀺 𑀪𑀬𑁂𑀳𑀺 𑀑𑀓𑀺𑀡𑁆𑀡𑁄 𑀯𑀺𑀬 𑀢𑀺𑀯𑀺𑀥𑁄𑀧𑀺 𑀪𑀯𑁄 𑀩𑀳𑀽𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀻𑀳𑀺 𑀤𑀼𑀓𑁆𑀔𑀪𑀬𑁂𑀳𑀺 𑀑𑀓𑀺𑀡𑁆𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀪𑀯𑀡𑁆𑀡𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀣 𑀉𑀢𑁆𑀢𑀭𑀺𑀢𑁆𑀣𑀸𑀢𑀺 𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑁄, 𑀩𑀼𑀤𑁆𑀥𑁄. 𑀢𑀲𑁆𑀲 𑀳𑀺 𑀕𑀫𑁆𑀪𑀻𑀭𑁂 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁂 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀺 𑀲𑀦𑁆𑀤𑀢𑀺𑀇𑀯 𑀢𑀺𑀪𑀯𑀲𑀗𑁆𑀔𑀢𑁂 𑀲𑀁𑀲𑀸𑀭𑁂 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀬𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀓𑀸𑀦𑀁 𑀤𑀺𑀬𑀟𑁆𑀠𑀲𑀳𑀲𑁆𑀲𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀫𑀡𑁆𑀟𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀲𑁂𑀲𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀢𑀻𑀲𑀼 𑀪𑀯𑁂𑀲𑀼 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀁 𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀦𑁆𑀢𑀺 𑀅𑀪𑀺𑀢𑁆𑀣𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀁.

𑀅𑀕𑁆𑀕𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀪𑀸𑀯𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀦𑁆𑀢𑀺𑀆𑀤𑀻𑀲𑀼 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. 𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑁆𑀞𑀸𑀲𑁂. 𑀅𑀕𑁆𑀕𑁄 𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸𑀢𑀺𑀆𑀤𑀻𑀲𑀼 𑀲𑁂𑀝𑁆𑀞𑁂. 𑀲𑁆𑀯𑀸𑀬𑀫𑀺𑀥𑀧𑀺 𑀲𑁄𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀪𑀸𑀯𑀁 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑁄, 𑀩𑀼𑀤𑁆𑀥𑁄. 𑀅𑀲𑀤𑀺𑀲𑀝𑁆𑀞𑁂𑀦 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦 𑀅𑀲𑀫𑀲𑀫𑀝𑁆𑀞𑁂𑀦 𑀘 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀼𑀮𑁆𑀮𑀪𑀧𑀸𑀢𑀼 𑀪𑀸𑀯𑀢𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀪𑀸𑀯𑀢𑁄 𑀩𑀳𑀼𑀚𑀦𑀳𑀺𑀢𑀲𑀼𑀔𑀸𑀯𑀳𑀢𑁄 𑀅𑀤𑀼𑀢𑀺𑀬𑀅𑀲𑀳𑀸𑀬𑀸𑀤𑀺𑀪𑀸𑀯𑀢𑁄 𑀘 𑀪𑀕𑀯𑀸 𑀮𑁄𑀓𑁂 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 ¶ 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. 𑀅𑀕𑁆𑀕𑀲𑁆𑀲 𑀪𑀸𑀯𑁄 𑀅𑀕𑁆𑀕𑀢𑀁. 𑀢𑀁 𑀧𑀦 𑀕𑀢𑀦𑁆𑀢𑀺𑀏𑀢𑀲𑁆𑀲 𑀓𑀫𑁆𑀫𑀧𑀤𑀁. 𑀕𑀢𑀦𑁆𑀢𑀺 𑀧𑀢𑁆𑀢𑀁, 𑀧𑀸𑀧𑀼𑀡𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀺𑀮𑁄𑀓𑀦𑀸𑀣𑀦𑁆𑀢𑀺 𑀓𑀸𑀫𑀭𑀽𑀧𑀅𑀭𑀽𑀧𑀲𑀗𑁆𑀔𑀢𑀸𑀦𑀁 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀧𑀝𑀺𑀲𑀭𑀡𑀁. 𑀏𑀢𑁆𑀣 𑀘 𑀮𑁄𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀬𑁄 𑀮𑁄𑀓𑀸 𑀢𑀺𑀮𑁄𑀓𑀸. 𑀦𑀸𑀣𑀲𑀤𑁆𑀤𑁄 𑀧𑀦 𑀦𑀺𑀧𑁆𑀨𑀦𑁆𑀦𑀸𑀦𑀺𑀧𑁆𑀨𑀦𑁆𑀦𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀺𑀧𑁆𑀨𑀦𑁆𑀦𑀦𑀸𑀣𑀲𑀤𑁆𑀤𑁄 𑀧𑀝𑀺𑀲𑀭𑀡𑀢𑁆𑀣𑁄 𑀳𑁄𑀢𑀺 𑀲𑀗𑁆𑀓𑁂𑀢𑀯𑀲𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡’’𑀦𑁆𑀢𑀺. 𑀢𑀺𑀮𑁄𑀓𑀸𑀦𑀁 𑀦𑀸𑀣𑁄 𑀧𑀝𑀺𑀲𑀭𑀡𑁄𑀢𑀺 𑀢𑀺𑀮𑁄𑀓𑀦𑀸𑀣𑁄, 𑀩𑀼𑀤𑁆𑀥𑁄. 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭 𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀏𑀓𑀧𑀝𑀺𑀲𑀭𑀡𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀦𑀺𑀧𑁆𑀨𑀦𑁆𑀦𑀦𑀸𑀣𑀲𑀤𑁆𑀤𑁄 𑀧𑀦 𑀬𑀸𑀘𑀦𑁂, 𑀉𑀧𑀢𑀸𑀧𑁂, 𑀇𑀲𑁆𑀲𑀭𑀺𑀬𑁂, 𑀆𑀲𑀻𑀲𑁂 𑀘𑀸𑀢𑀺 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀢𑀢𑁆𑀣 𑀬𑀸𑀘𑀦𑁂 𑀦𑀸𑀣𑀢𑀺 𑀬𑀸𑀘𑀢𑀻𑀢𑀺 𑀦𑀸𑀣𑁄, 𑀩𑀼𑀤𑁆𑀥𑁄. 𑀦𑀸𑀣𑀥𑀸𑀢𑀼 𑀅. 𑀲𑁄 𑀧𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀅𑀢𑁆𑀢𑀦𑁄 𑀳𑀺𑀢𑀓𑀭𑀡𑁂 𑀬𑀸𑀘𑀺𑀢𑁆𑀯𑀸𑀧𑀺 𑀦𑀺𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀕𑀯𑀸 𑀲𑀸𑀥𑀼 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀸𑀢𑀺𑀆𑀤𑀺𑀦𑀸 𑀲𑀢𑁆𑀢𑀸𑀦𑀁 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀺𑀢𑁆𑀯𑀸𑀧𑀺 𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀢𑁂 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺. 𑀢𑀲𑁆𑀫𑀸 𑀦𑀸𑀣𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀉𑀧𑀢𑀸𑀧𑁂 𑀦𑀸𑀣𑀢𑀺 𑀯𑁂𑀦𑁂𑀬𑁆𑀬𑀕𑀢𑁂 𑀓𑀺𑀮𑁂𑀲𑁂 𑀉𑀧𑀢𑀸𑀧𑁂𑀢𑀻𑀢𑀺 𑀦𑀸𑀣𑁄, 𑀩𑀼𑀤𑁆𑀥𑁄. 𑀥𑀫𑁆𑀫𑀤𑁂𑀲𑀦𑀸𑀬 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀲𑁆𑀲𑀭𑀺𑀬𑁂 𑀦𑀸𑀣𑀢𑀺 𑀇𑀲𑁆𑀲𑀭𑀺𑀬𑀢𑀺 𑀲𑀢𑁆𑀢𑁂𑀢𑀺 𑀦𑀸𑀣𑁄. 𑀧𑀭𑀫𑁂𑀦 𑀧𑀦 ¶ 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑁂 𑀥𑀫𑁆𑀫𑁂𑀦 𑀇𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀻𑀲𑁂 𑀧𑀦 𑀦𑀸𑀣𑀢𑀺 𑀆𑀲𑀻𑀲𑀢𑀻𑀢𑀺 𑀦𑀸𑀣𑁄. 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀫𑁂𑀢𑁆𑀢𑀸𑀬 𑀦𑀯𑀲𑁂𑀦 𑀧𑀢𑁆𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀺𑀮𑁄𑀓𑀸𑀦𑀁 𑀦𑀸𑀣𑁄 𑀢𑀺𑀮𑁄𑀓𑀦𑀸𑀣𑁄, 𑀩𑀼𑀤𑁆𑀥𑁄. 𑀢𑀁 𑀢𑀺𑀮𑁄𑀓𑀦𑀸𑀣𑀁.

𑀲𑀼𑀲𑀫𑀸𑀳𑀺𑀢𑀦𑁆𑀢𑀺 𑀮𑀸𑀪𑀸𑀮𑀸𑀪𑀸𑀤𑀺𑀮𑁄𑀓𑀥𑀫𑁆𑀫𑁂𑀳𑀺 𑀅𑀘𑀮 𑀫𑀸𑀦𑀢𑁆𑀢𑀸 𑀲𑀼𑀦𑁆𑀤𑀭𑀲𑀫𑀸𑀥𑀺𑀯𑀦𑁆𑀢𑀁. 𑀲𑀁𑀲𑀫𑀁 𑀆𑀥𑀺𑀬𑀢𑀺 𑀏𑀓𑀸𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀞𑀧𑁂𑀢𑀺 𑀏𑀢𑁂𑀦𑀸𑀢𑀺 𑀲𑀫𑀸𑀥𑀺. 𑀲𑀁𑀧𑀼𑀩𑁆𑀩 𑀥𑀸 𑀥𑀸𑀢𑀼 𑀇. 𑀲𑀼𑀦𑁆𑀤𑀭𑁄 𑀧𑀲𑀢𑁆𑀣𑁄 𑀯𑀸 𑀲𑀫𑀸𑀥𑀺 𑀲𑀼𑀲𑀫𑀸𑀥𑀺. 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀲𑀫𑀸𑀳𑀺𑀢𑁄, 𑀩𑀼𑀤𑁆𑀥𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀢𑁄. 𑀧𑀩𑁆𑀩𑀢𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀥𑀲𑁆𑀲 𑀳𑁄. 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑁂𑀳𑀺 𑀯𑀸𑀢𑁂𑀳𑀺 𑀅𑀘𑀮𑀫𑀸𑀦𑁄 𑀫𑀳𑀸𑀫𑁂𑀭𑀼𑀧𑀩𑁆𑀩𑀢𑁄 𑀯𑀺𑀬 𑀪𑀕𑀯𑀸 𑀮𑀸𑀪𑀸𑀮𑀸𑀪𑀸𑀤𑀺𑀮𑁄𑀓𑀥𑀫𑁆𑀫𑁂𑀳𑀺 𑀘 𑀫𑀺𑀘𑁆𑀙𑀸𑀯𑀸𑀤 𑀯𑀸𑀢𑁂𑀳𑀺 𑀘 𑀅𑀘𑀮𑀫𑀸𑀦𑁂𑀦 𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀲𑀫𑀸𑀳𑀺𑀢𑀁.

𑀳𑀺𑀢𑀦𑁆𑀢𑀺 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀲𑀗𑁆𑀔𑀸𑀢𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀬𑁄𑀚𑀦 𑀥𑀸𑀭𑁂𑀦𑁆𑀢𑀁. 𑀓𑀸𑀭𑀡𑀸𑀦𑀼𑀭𑀽𑀧𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑀺𑀢𑀁, 𑀧𑀬𑁄𑀚𑀦𑀁. 𑀳𑀺𑀥𑀸𑀢𑀼 𑀕𑀢𑀺𑀬𑀁 𑀢. 𑀢𑀁 𑀥𑀸𑀭𑁂𑀢𑀻𑀢𑀺 𑀳𑀺𑀢𑁄, 𑀩𑀼𑀤𑁆𑀥𑁄. 𑀓𑀺𑀢𑀦𑁆𑀢 𑀲𑀫𑀸𑀲𑁄𑀬𑀁. 𑀳𑀺𑀢𑀥𑀭𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀉𑀢𑁆𑀢𑀭 𑀧𑀤𑀮𑁄𑀧𑁂𑀦 𑀳𑀺𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀲𑀫𑀚𑁆𑀚𑀦𑀻 𑀧𑀤𑀻𑀧𑁄𑀢𑀺. 𑀅𑀣 𑀯𑀸 𑀤𑀼𑀓𑁆𑀔𑀁 𑀳𑀺𑀁𑀲𑀢𑀻𑀢𑀺 𑀳𑀺𑀢𑀁. 𑀳𑀺𑀁𑀲𑀥𑀸𑀢𑀼 𑀳𑀺𑀁𑀲𑀸𑀬𑀁 𑀢𑀧𑀘𑁆𑀘𑀬𑁄. 𑀬𑀣𑀸 𑀘 𑀩𑁆𑀬𑀸𑀥𑀺𑀬𑀸 𑀑𑀲𑀫𑀁 𑀭𑁄𑀕𑀻𑀦𑀁 𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀤𑀼𑀓𑁆𑀔𑀳𑀦𑀦𑀢𑁄 𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑀼𑀔𑀁 𑀯𑀺𑀤𑀥𑀸𑀢𑀻𑀢𑀺 𑀯𑀸 𑀳𑀺𑀢𑀁. 𑀥𑀸𑀥𑀸𑀢𑀼 𑀥𑀸𑀭𑀡𑁂 𑀢. 𑀬𑀣𑀸 𑀘 𑀭𑀼𑀥𑀺𑀭𑀫𑀁𑀲𑀸𑀤𑀺 𑀥𑀸𑀢𑀼 𑀯𑀟𑁆𑀠𑀦𑀁 𑀭𑀲𑀸𑀬𑀢𑀦𑀁 𑀓𑀺𑀲𑁆𑀲𑀸𑀦𑀁 𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀼𑀔𑀯𑀳𑀦𑀢𑁄 𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀬𑁄𑀚𑀦𑀁 𑀢𑀁 𑀥𑀸𑀭𑁂𑀢𑀻𑀢𑀺 𑀳𑀺𑀢𑁄, 𑀩𑀼𑀤𑁆𑀥𑁄. 𑀲𑁄 𑀧𑀦 𑀥𑀫𑁆𑀫𑀤𑁂𑀲𑀦𑀸𑀬 𑀯𑁂𑀦𑁂𑀬𑁆𑀬𑀚𑀦𑀸𑀦𑀁 𑀤𑀼𑀓𑁆𑀔𑀸𑀧𑀦𑀬𑀦𑀫𑁆𑀧𑀺 𑀜𑀸𑀡𑀧𑀭𑀺𑀧𑀸𑀘𑀦𑀫𑁆𑀧𑀺 𑀓𑀢𑁆𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀁 𑀥𑀸𑀭𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀳𑀺𑀢𑀁.

𑀲𑀫𑀦𑁆𑀢𑀘𑀓𑁆𑀔𑀼𑀦𑁆𑀢𑀺 ¶ 𑀏𑀢𑁆𑀣 𑀘𑀓𑁆𑀔𑀼 𑀦𑀸𑀫 𑀩𑀼𑀤𑁆𑀥𑀘𑀓𑁆𑀔𑀼, 𑀥𑀫𑁆𑀫𑀘𑀓𑁆𑀔𑀼, 𑀜𑀸𑀡 𑀘𑀓𑁆𑀔𑀼, 𑀲𑀫𑀦𑁆𑀢𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑁆𑀤𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀯𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄𑀢𑀺 𑀇𑀤𑀁 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫. 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀢𑁆𑀢 𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫. 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑀇𑀤𑀁 𑀜𑀸𑀡𑀘𑀓𑁆𑀔𑀼 𑀦𑀸𑀫. 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑁆𑀢𑀺 𑀇𑀤𑀁 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫. 𑀅𑀤𑁆𑀤𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀯𑁂 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸𑀢𑀺 𑀇𑀤𑀁 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫. 𑀇𑀥 𑀧𑀦 𑀲𑀫𑀦𑁆𑀢𑀘𑀓𑁆𑀔𑀼 𑀅𑀥𑀺𑀧𑁆𑀧𑁂𑀢𑀁. 𑀧𑀭𑀺𑀲𑀫𑀦𑁆𑀢𑀢𑁄 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀘𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀘𑀓𑁆𑀔𑀥𑀸𑀢𑀼 𑀉. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡’’𑀦𑁆𑀢𑀺. 𑀲𑀫𑀦𑁆𑀢𑀘𑀓𑁆𑀔𑀼 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑁋

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺,

𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑀢𑀲𑁆𑀲𑀢𑁆𑀣𑁄. 𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀁 𑀅𑀧𑀲𑁆𑀲𑀦𑁆𑀢𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀇𑀥𑀮𑁄𑀓𑁂 𑀦 𑀅𑀢𑁆𑀣𑀺. 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀅𑀯𑀺𑀤𑀺𑀢𑀁 𑀅𑀧𑀸𑀓𑀝𑀁 𑀯𑀸 𑀅𑀚𑀸𑀦𑀺𑀢𑀩𑁆𑀩𑀁 𑀥𑀫𑁆𑀫𑀚𑀸𑀢𑀁 𑀦 𑀅𑀢𑁆𑀣𑀺. 𑀦𑁂𑀬𑁆𑀬𑀁 𑀜𑀸𑀢𑀩𑁆𑀩𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀅𑀢𑁆𑀣𑀺. 𑀲𑀩𑁆𑀩𑀁 𑀢𑀁 𑀥𑀫𑁆𑀫𑀚𑀸𑀢𑀁 𑀢𑀣𑀸𑀕𑀢𑁄 𑀅𑀪𑀺𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀢𑁂𑀦 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫𑀸𑀢𑀺. 𑀢𑀁 𑀲𑀫𑀦𑁆𑀢𑀘𑀓𑁆𑀔𑀼𑀁.

𑀧𑀡𑀫𑀸𑀫𑀺 𑀢𑀁𑀫𑀺𑀢𑀦𑁆𑀢𑀺 𑀏𑀢𑁆𑀣 𑀧𑀡𑀫𑀸𑀫𑀺 𑀢𑀁 𑀅𑀫𑀺𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀫𑀺𑀢𑀁 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀧𑀡𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀫𑀺𑀢𑀦𑁆𑀢𑀺 𑀅𑀧𑀭𑀺𑀫𑁂𑀬𑁆𑀬𑀁 𑀜𑀸𑀡𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀁 𑀯𑀸, 𑀲𑀻𑀮𑀲𑀫𑀸𑀥𑀺 𑀧𑀜𑁆𑀜𑀸𑀤𑀺𑀕𑀼𑀡𑀯𑀦𑁆𑀢𑀁. 𑀅𑀫𑀺𑀢𑀩𑁆𑀩𑀁 𑀜𑀸𑀡𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀯𑀸 𑀅𑀫𑀺𑀢𑀁, 𑀲𑀻𑀮𑀸𑀤𑀺𑀕𑀼𑀡𑀁. 𑀦𑀧𑀼𑀩𑁆𑀩 𑀫𑀸𑀥𑀸𑀢𑀼 𑀧𑀭𑀺𑀫𑀸𑀡𑁂 𑀢. 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 ¶ 𑀅𑀫𑀺𑀢𑁄, 𑀩𑀼𑀤𑁆𑀥𑁄. 𑀬𑀣𑀸 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀼𑀓𑀭𑀁 𑀉𑀤𑀓𑀲𑁆𑀲 𑀧𑀫𑀸𑀡𑀁 𑀕𑀡𑁂𑀢𑀼𑀁 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀦 𑀲𑀼𑀓𑀭𑀁 𑀲𑀻𑀮𑀸𑀤𑀺𑀕𑀼𑀡𑀲𑁆𑀲 𑀧𑀫𑀸𑀡𑀁 𑀕𑀡𑁂𑀢𑀼𑀁 𑀏𑀢𑁆𑀢𑀓𑀁 𑀲𑀻𑀮𑀕𑀼𑀡𑀁, 𑀏𑀢𑁆𑀢𑀓𑁄 𑀲𑀫𑀸𑀥𑀺𑀕𑀼𑀡𑁄, 𑀏𑀢𑁆𑀢𑀓𑀸 𑀧𑀜𑁆𑀜𑀸𑀕𑀼𑀡𑀸𑀢𑀺𑀆𑀤𑀺𑀦𑀸𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀕𑀼𑀡𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑁂𑀦𑀯𑀼𑀢𑁆𑀢𑀁 𑀅𑀧𑀤𑀸𑀦𑀧𑀸𑀴𑀺𑀬𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀸𑀦’’𑀦𑁆𑀢𑀺 𑀘.

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺 𑀘.

𑀢𑁂𑀦 𑀩𑀼𑀤𑁆𑀥𑀁 𑀅𑀫𑀺𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀤𑀬𑀸𑀮𑀬𑀁 𑀫𑀳𑀸𑀓𑀭𑀼𑀡𑀸𑀬 𑀫𑁂𑀢𑁆𑀢𑀸𑀬 𑀆𑀥𑀸𑀭𑀁. 𑀲𑀩𑁆𑀩𑀥𑀺 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀤𑀼𑀓𑁆𑀓𑀭𑀁 𑀤𑀼𑀓𑁆𑀔𑁂𑀦 𑀓𑀭𑀺𑀢𑀩𑁆𑀩𑀁 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀫𑁆𑀫𑀁 𑀓𑀭𑀁 𑀓𑀭𑁄𑀦𑁆𑀢𑀁, 𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀁 𑀢𑀺𑀪𑀯𑀲𑀗𑁆𑀔𑀸𑀢𑀲𑀫𑀼𑀤𑁆𑀤𑀢𑁄 𑀅𑀢𑀺𑀓𑁆𑀓𑀦𑁆𑀢𑀁, 𑀅𑀕𑁆𑀕𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀪𑀸𑀯𑀁, 𑀕𑀢𑀁 𑀧𑀢𑁆𑀢𑀁, 𑀢𑀺𑀮𑁄𑀓𑀦𑀸𑀣𑀁 𑀓𑀸𑀫𑀭𑀽𑀧 𑀅𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀢𑀺𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀁, 𑀲𑀼𑀲𑀫𑀸𑀳𑀺𑀢𑀁 𑀲𑀼𑀦𑁆𑀤𑀭 𑀲𑀫𑀸𑀥𑀺𑀯𑀦𑁆𑀢𑀁, 𑀳𑀺𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀅𑀢𑁆𑀣𑀥𑀸𑀭𑀡𑀁, 𑀲𑀫𑀦𑁆𑀢𑀘𑀓𑁆𑀔𑀼𑀁 𑀧𑀭𑀺𑀲𑀫𑀦𑁆𑀢𑀢𑁄 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀦𑁆𑀢𑀁, 𑀅𑀫𑀺𑀢𑀁 𑀅𑀧𑀭𑀺𑀫𑁂𑀬𑁆𑀬𑀁 𑀲𑀻𑀮𑀸𑀤𑀺𑀕𑀼𑀡𑀯𑀦𑁆𑀢𑀁, 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀧𑀡𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀅𑀝𑁆𑀞𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀢𑀳𑀺𑀁 ¶ 𑀢𑀳𑀺𑀁 𑀧𑀸𑀭𑀫𑀺𑀲𑀜𑁆𑀘𑀬𑀁 𑀘𑀬𑀁,

𑀕𑀢𑀁 𑀕𑀢𑀁 𑀲𑀩𑁆𑀪𑀺 𑀲𑀼𑀔𑀧𑁆𑀧𑀤𑀁 𑀧𑀤𑀁;

𑀦𑀭𑀸𑀦𑀭𑀸𑀦𑀁 𑀲𑀼𑀔𑀲𑀫𑁆𑀪𑀯𑀁 𑀪𑀯𑀁,

𑀦𑀫𑀸𑀦𑀫𑀸𑀦𑀁 𑀚𑀺𑀦𑀧𑀼𑀗𑁆𑀕𑀯𑀁 𑀕𑀯𑀁.

𑁯. 𑀏𑀯𑀁 𑀅𑀝𑁆𑀞𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀧𑀸𑀭𑀫𑀺𑀲𑀜𑁆𑀘𑀬𑀁 𑀘𑀬𑀦𑁆𑀢𑁆𑀬𑀸𑀤𑀻𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀢𑀳𑀺𑀁 𑀢𑀳𑀺𑀁 𑀧𑀸𑀭𑀫𑀺𑀲𑀜𑁆𑀘𑀬𑀁𑀘𑀬𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀚𑀢𑀚𑀭 𑀕𑀡𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀤𑁆𑀯𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀲𑀩𑁆𑀩𑀧𑀸𑀤𑀸𑀤𑁆𑀬𑀦𑁆𑀢𑀬𑀫𑀓𑀸 𑀯𑀁𑀲𑀝𑁆𑀞𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀯𑀤𑀦𑁆𑀢𑀺 𑀯𑀁𑀲𑀝𑁆𑀞𑀫𑀺𑀤𑀁 𑀚𑀢𑀸 𑀚𑀭𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀢𑀢𑁆𑀣 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀪𑀸𑀯𑁂 𑀯𑀸, 𑀩𑀼𑀤𑁆𑀥𑀯𑀭𑀁 𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀭𑀫𑀺𑀲𑀜𑁆𑀘𑀬𑀦𑁆𑀢𑀺 𑀤𑀸𑀦𑀸𑀤𑀺𑀧𑀸 𑀭𑀫𑀻𑀦𑀁 𑀲𑀫𑀽𑀳𑀁. 𑀏𑀢𑁆𑀣 𑀘 𑀧𑀸𑀭𑀫𑀻 𑀦𑀸𑀫 𑀤𑀸𑀦𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸 𑀯𑀻𑀭𑀺𑀬 𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀯𑀲𑁂𑀦 𑀤𑀲𑀯𑀺𑀥𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 𑀩𑀼𑀤𑁆𑀥𑀯𑀁𑀲𑁂 𑁋

‘‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸 𑀯𑀻𑀭𑀺𑀬𑁂𑀦 𑀧𑀜𑁆𑀘𑀫𑀁;

𑀔𑀦𑁆𑀢𑀺𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀢𑁂 𑀤𑀲𑀸’’𑀢𑀺.

𑀅𑀬𑀁 𑀧𑀦 𑀧𑀸𑀭𑀫𑀻𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄. 𑀤𑀸𑀦𑀲𑀻𑀮𑀸𑀤𑀺𑀕𑀼𑀡 𑀯𑀺𑀲𑁂𑀲𑀬𑁄𑀕𑁂𑀦 𑀲𑀢𑁆𑀢𑀼𑀢𑁆𑀢𑀫𑀢𑀸𑀬 𑀫𑀳𑀸𑀩𑁄𑀥𑀺𑀲𑀢𑁆𑀢𑁄 𑀧𑀭𑀫𑁄. 𑀢𑀲𑁆𑀲 𑀅𑀬𑀁 𑀪𑀸𑀯𑁄 𑀓𑀫𑁆𑀫𑀦𑁆𑀢𑀺 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺 𑀓𑁆𑀭𑀺𑀬𑀸𑀯 𑀮𑀩𑁆𑀪𑀢𑀺. 𑀲𑀦𑁆𑀢𑀓𑀪𑀸𑀯𑀓𑀫𑁆𑀫𑀢𑀤𑁆𑀥𑀺𑀢𑁂 𑀡𑀧𑀘𑁆𑀘𑀬𑁄. 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓 𑀈𑀧𑀘𑁆𑀘𑀬𑁄 𑀘. 𑀅𑀣 𑀯𑀸 𑀤𑀸𑀦𑀸𑀤𑀻𑀦𑀺 𑀧𑀽𑀭𑁂𑀢𑀻𑀢𑀺 𑀧𑀭𑀫𑁄. 𑀤𑀸𑀦𑀸𑀤𑀺𑀕𑀼𑀡𑀸𑀦𑀁 𑀧𑀽𑀭𑀓𑁄 𑀧𑀸𑀮𑀓𑁄 𑀘 𑀩𑁄𑀥𑀺𑀲𑀢𑁆𑀢𑁄. 𑀧𑀽𑀭𑀥𑀸𑀢𑀼 𑀅𑀫𑀧𑀘𑁆𑀘𑀬𑁄. 𑀧𑀭𑁂 𑀲𑀢𑁆𑀢𑁂 𑀫𑀯𑀢𑀺 𑀅𑀢𑁆𑀢𑀦𑀺 𑀩𑀦𑁆𑀥𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦𑀸𑀢𑀺 𑀯𑀸 𑀧𑀭𑀫𑁄, 𑀩𑁄𑀥𑀺𑀲𑀢𑁆𑀢𑁄. 𑀧𑀭𑀲𑀤𑁆𑀤𑀽𑀧𑀧𑀤 𑀫𑀼𑀥𑀸𑀢𑀼 𑀩𑀦𑁆𑀥𑀦𑁂 𑀓𑁆𑀯𑀺. 𑀧𑀭𑀁 𑀅𑀢𑀺𑀭𑁂𑀓𑀁 𑀫𑀚𑁆𑀚𑀢𑀺 𑀓𑀺𑀮𑁂𑀲𑀫𑀮𑀢𑁄𑀢𑀺 𑀯𑀸 𑀧𑀭𑀫𑁄. 𑀧𑀭𑀲𑀤𑁆𑀤𑀽𑀧 𑀧𑀤 ¶ 𑀫𑀚𑁆𑀚𑀥𑀸𑀢𑀼 𑀲𑀁𑀲𑀼𑀤𑁆𑀥𑀺𑀬𑀁 𑀓𑁆𑀯𑀺. 𑀧𑀭𑀲𑀤𑁆𑀤𑁄 𑀅𑀢𑀺𑀭𑁂𑀓𑀢𑁆𑀣𑁄. 𑀧𑀭𑀁 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑁂𑀦 𑀫𑀬𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀧𑀭𑀫𑁄. 𑀧𑀭𑀲𑀤𑁆𑀤𑀽𑀧𑀧𑀤 𑀫𑀬𑀥𑀸𑀢𑀼 𑀕𑀢𑀺𑀬𑀁 𑀓𑁆𑀯𑀺. 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀧𑀭 𑀲𑀤𑁆𑀤𑁄 𑀲𑁂𑀝𑁆𑀞𑀢𑁆𑀣𑁄. 𑀧𑀭𑀁 𑀮𑁄𑀓𑀁 𑀧𑀫𑀸𑀡𑀪𑀽𑀢𑁂𑀦 𑀜𑀸𑀡 𑀯𑀺𑀲𑁂𑀲𑁂𑀦 𑀇𑀥𑀮𑁄𑀓𑀫𑀺𑀯 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀸 𑀧𑀭𑀫𑁄. 𑀧𑀭𑀲𑀤𑁆𑀤𑀽𑀧 𑀧𑀤 𑀫𑀼𑀦𑀥𑀸𑀢𑀼 𑀧𑀭𑀺𑀘𑁆𑀙𑀺𑀦𑁆𑀤𑀦𑁂 𑀓𑁆𑀯𑀺. 𑀧𑀭𑀁 𑀅𑀢𑀺 𑀯𑀺𑀬 𑀲𑀻𑀮𑀸𑀤𑀺𑀕𑀼𑀡𑀕𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀻𑀢𑀺 𑀯𑀸 𑀧𑀭𑀫𑁄. 𑀧𑀭𑀲𑀤𑁆𑀤𑀽𑀧𑀧𑀤 𑀫𑀺𑀥𑀸𑀢𑀼 𑀧𑀓𑁆𑀔𑀺𑀧𑀦𑁂 𑀓𑁆𑀯𑀺. 𑀧𑀭𑀲𑀤𑁆𑀤𑁄 𑀅𑀢𑀺𑀭𑁂𑀓𑀯𑀸𑀘𑀓𑁄. 𑀧𑀭𑀁 𑀅𑀢𑁆𑀢𑀪𑀽𑀢𑀥𑀫𑁆𑀫𑀓𑀸𑀬𑀢𑁄 𑀅𑀜𑁆𑀜𑀁 𑀧𑀝𑀺𑀧𑀓𑁆𑀔𑀁 𑀯𑀸 𑀢𑀤𑀦𑀢𑁆𑀣𑀓𑀭𑀁 𑀓𑀺𑀮𑁂𑀲𑀘𑁄𑀭𑀕𑀡𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀯𑀸 𑀧𑀭𑀫𑁄, 𑀫𑀳𑀸𑀩𑁄𑀥𑀺𑀲𑀢𑁆𑀢𑁄. 𑀧𑀭𑀲𑀤𑁆𑀤𑀽𑀧𑀧𑀤 𑀫𑀺𑀥𑀸𑀢𑀼 𑀳𑀺𑀁𑀲𑀸𑀬𑀁 𑀓𑁆𑀯𑀺. 𑀧𑀭𑀲𑀤𑁆𑀤𑁄 𑀅𑀜𑁆𑀜𑀯𑀸𑀘𑀓𑁄, 𑀧𑀝𑀺𑀧𑀓𑁆𑀔𑀯𑀸𑀘𑀓𑁄 𑀯𑀸. 𑀧𑀭𑀫𑀲𑁆𑀲 𑀅𑀬𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀫𑀻𑀢𑀺. 𑀅𑀧𑀺 𑀘 𑀧𑀸𑀭𑁂 𑀦𑀺𑀩𑁆𑀩𑀸𑀦𑁂 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀻𑀢𑀺 𑀧𑀸𑀭𑀫𑀻, 𑀫𑀳𑀸𑀩𑁄𑀥𑀺 𑀲𑀢𑁆𑀢𑁄. 𑀲𑀼𑀤𑁆𑀥𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀧𑀸𑀭𑀲𑀤𑁆𑀤𑀽𑀧𑀧𑀤 𑀫𑀚𑀥𑀸𑀢𑀼 𑀲𑀁𑀲𑀼𑀤𑁆𑀥𑀺𑀬𑀁 𑀓𑁆𑀯𑀺. 𑀈 𑀘. 𑀧𑀸𑀭𑁂 𑀦𑀺𑀩𑁆𑀩𑀸𑀦𑁂 𑀲𑀢𑁆𑀢𑁂 𑀫𑀚𑁆𑀚𑀢𑀺 𑀲𑁄𑀥𑁂𑀢𑀻𑀢𑀺 𑀯𑀸 𑀧𑀸𑀭𑀫𑀻, 𑀳𑁂𑀢𑀼𑀓𑀢𑁆𑀢𑀼𑀲𑀸𑀥𑀦𑁄𑀬𑀁.

𑀧𑀸𑀭𑁂𑀦𑀺𑀩𑁆𑀩𑀸𑀦𑁂 𑀲𑀢𑁆𑀢𑁂 𑀫𑀯𑀢𑀺 𑀩𑀦𑁆𑀥𑀢𑀺 𑀬𑁄𑀚𑁂𑀢𑀻𑀢𑀺 𑀯𑀸 𑀧𑀸𑀭𑀫𑀻. 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀫𑀬𑀢𑀺 𑀕𑀘𑁆𑀙𑀢𑀺 𑀲𑀢𑁆𑀢𑁂 𑀘 𑀫𑀸𑀬𑁂𑀢𑀺 𑀕𑀫𑁂𑀢𑀺 𑀯𑀸 𑀧𑀸𑀭𑀫𑀻. 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀬𑀸𑀣𑀸𑀯𑀢𑁄 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀸 𑀧𑀸𑀭𑀫𑀻. 𑀧𑀸𑀭𑁂 𑀦𑀺𑀩𑁆𑀩𑀸𑀦𑁂 𑀲𑀢𑁆𑀢𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀻𑀢𑀺 𑀯𑀸 𑀧𑀸𑀭𑀫𑀻. 𑀫𑀺𑀥𑀸𑀢𑀼 𑀧𑀓𑁆𑀔𑀺𑀧𑀦𑁂 𑀈. 𑀧𑀸𑀭𑁂 𑀦𑀺𑀩𑁆𑀩𑀸𑀦𑁂 𑀲𑀢𑁆𑀢𑀸𑀦𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀯𑀸 𑀧𑀸𑀭𑀫𑀻, 𑀫𑀳𑀸𑀩𑁄𑀥𑀺𑀲𑀢𑁆𑀢𑁄. 𑀢𑀲𑁆𑀲 𑀅𑀬𑀁 𑀪𑀸𑀯𑁄 𑀓𑀫𑁆𑀫𑀦𑁆𑀢𑀺 𑀤𑀸𑀦𑀸𑀤𑀺𑀓𑁆𑀭𑀺𑀬𑀸 𑀧𑀸𑀭𑀫𑀻𑀢𑀺. 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀫𑀻𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀜𑁆𑀘𑀸𑀧𑀺 𑀧𑀦 𑀧𑀸𑀭𑀫𑀻𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁. 𑀲𑁄𑀢𑀽𑀦𑀁 𑀧𑀦 𑀦𑀺𑀭𑀼𑀢𑁆𑀢𑀺𑀦𑀬𑀓𑁄𑀲𑀮𑁆𑀮𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀸 𑀧𑀦 𑀤𑀲𑀧𑀸𑀭𑀫𑀻, 𑀤𑀲𑀉𑀧𑀧𑀸𑀭𑀫𑀻, 𑀤𑀲𑀧𑀭𑀫𑀢𑁆𑀣𑀧𑀸𑀭𑀫𑀻 𑀘𑀸𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀲𑀯𑀺𑀜𑁆𑀜𑀸𑀡𑀸𑀯𑀺𑀜𑁆𑀜𑀸𑀡𑀓𑀁 𑀥𑀦𑀁 𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 ¶ 𑀧𑀽𑀭𑀺𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀸 𑀤𑀲𑀧𑀸𑀭𑀫𑀺𑀬𑁄 𑀦𑀸𑀫. 𑀳𑀢𑁆𑀣 𑀧𑀸𑀤 𑀓𑀡𑁆𑀡 𑀦𑀸𑀲𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀽𑀭𑀺𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀸 𑀤𑀲𑀉𑀧𑀧𑀸𑀭𑀫𑀺𑀬𑁄 𑀦𑀸𑀫. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀽𑀭𑀺𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀸 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀦𑀸𑀫𑀸𑀢𑀺. 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀦 𑀅𑀢𑁆𑀣𑁄 𑀘𑀭𑀺𑀬𑀧𑀺𑀝𑀓𑀅𑀝𑁆𑀞𑀓𑀣𑀸𑀤𑀻𑀲𑀼 𑀕𑀳𑁂𑀢𑀩𑁆𑀩𑁄. 𑀅𑀯𑀬𑀯𑀁 𑀲𑀗𑁆𑀕𑀳𑀯𑀲𑁂𑀦 𑀘𑀬𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀜𑁆𑀘𑀬𑁄, 𑀲𑀁𑀧𑀼𑀩𑁆𑀩 𑀘𑀺𑀥𑀸𑀢𑀼 𑀕𑀢𑀺𑀬𑀁 𑀡. 𑀲𑀜𑁆𑀘𑀺𑀦𑁄𑀢𑀺 𑀅𑀯𑀬𑀯𑀦𑁆𑀢𑀺 𑀯𑀸 𑀲𑀜𑁆𑀘𑀬𑁄, 𑀲𑀫𑀽𑀳𑁄. 𑀧𑀸𑀭𑀫𑀻𑀦𑀁 𑀲𑀜𑁆𑀘𑀬𑁄 𑀲𑀫𑀽𑀳𑁄𑀢𑀺 𑀧𑀸𑀭𑀫𑀺𑀲𑀜𑁆𑀘𑀬𑁄, 𑀢𑀁 𑀧𑀸𑀭𑀫𑀺𑀲𑀜𑁆𑀘𑀬𑀁. 𑀢𑀁 𑀧𑀦 𑀘𑀬𑀦𑁆𑀢𑀺 𑀏𑀢𑀲𑁆𑀲 𑀓𑀫𑁆𑀫𑀁. 𑀘𑀬𑀦𑁆𑀢𑀺 𑀉𑀧𑀘𑀺𑀢𑀁, 𑀧𑀭𑀺𑀲𑀫𑁆𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀘𑀬𑀢𑀺 𑀉𑀧𑀘𑀺𑀦𑀸𑀢𑀻𑀢𑀺 𑀘𑀬𑁄, 𑀘𑀺𑀬𑀺𑀢𑁆𑀣 𑀉𑀧𑀘𑀺𑀬𑀺𑀢𑁆𑀣𑀸𑀢𑀺 𑀯𑀸 𑀘𑀬𑁄, 𑀩𑀼𑀤𑁆𑀥𑁄. 𑀘𑀺𑀥𑀸𑀢𑀼 𑀉𑀧𑀘𑀬𑁂 𑀡. 𑀢𑀁 𑀘𑀬𑀁. 𑀲𑀩𑁆𑀪𑀺𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀲𑀩𑁆𑀪𑀻𑀢𑀺 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺. 𑀭𑀸𑀕𑀸𑀤𑀺𑀓𑀺𑀮𑁂𑀲𑁂 𑀲𑀫𑁂𑀦𑁆𑀢𑀺 𑀉𑀧𑀲𑀫𑁂𑀦𑁆𑀢𑀻𑀢𑀺 𑀲𑀦𑁆𑀢𑀸, 𑀲𑀧𑁆𑀧𑀼𑀭𑀺𑀲𑀸. 𑀲𑀫𑀼𑀥𑀸𑀢𑀼 𑀉𑀧𑀲𑀫𑁂𑀢, 𑀅𑀦𑁆𑀢𑀧𑀘𑁆𑀘𑀬𑁄 𑀯𑀸. 𑀲𑀦𑁆𑀢𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁂 𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸 𑀪𑀺𑀫𑁆𑀳𑀺𑀯𑀸𑀢𑀺 𑀲𑀼𑀢𑁆𑀢𑁂𑀦 𑀳𑀺𑀯𑀺𑀪𑀢𑁆𑀢𑀺𑀬𑀸 𑀪𑀺𑀓𑀸𑀭𑀁 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄 𑀪𑁂 𑀩𑁄 𑀘𑀦𑁆𑀢𑁂𑀢𑀺 𑀲𑀼𑀢𑁆𑀢𑁂𑀦 𑀪𑀓𑀸𑀭𑁂 𑀧𑀭𑁂 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀓𑀸𑀭𑀁 𑀓𑀢𑁆𑀯𑀸 𑀅𑀦𑁆𑀢𑁂 𑀘 𑀩𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀲𑀩𑁆𑀪𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀳𑀺 𑀲𑀩𑁆𑀪𑀺. 𑀢𑀁 𑀧𑀦 𑀕𑀢𑀦𑁆𑀢𑀺 𑀏𑀢𑀲𑁆𑀲 𑀅𑀯𑀼𑀢𑁆𑀢𑀓𑀢𑁆𑀢𑀸. 𑀕𑀢𑀦𑁆𑀢𑀺 𑀉𑀧𑀕𑀫𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀕𑀫𑀺𑀬𑀢𑀺 𑀉𑀧𑀕𑀫𑀺𑀬𑀢𑀺 𑀉𑀧𑀲𑀗𑁆𑀓𑀫𑀺𑀬𑀢𑀻𑀢𑀺 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀩𑀼𑀤𑁆𑀥𑀁 𑀅𑀢𑁆𑀣𑀓𑀸𑀫𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀻𑀮𑀸𑀤𑀺𑀅𑀦𑀦𑁆𑀢𑀕𑀼𑀡𑀺𑀓𑀢𑁆𑀢𑀸 𑀲𑀭𑀡𑀦𑁆𑀢𑀺 𑀅𑀪𑀺𑀫𑀸𑀦𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀕𑀢𑀁. 𑀲𑀼𑀔𑀧𑁆𑀧𑀤𑀁 𑀧𑀤𑀁 𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀼𑀔𑀧𑁆𑀧𑀤𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁. 𑀲𑀼𑀔𑀦𑀁 𑀲𑀼𑀔𑀁, 𑀢𑀲𑁆𑀲 𑀧𑀚𑁆𑀚𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀲𑀼𑀔𑀧𑁆𑀧𑀤𑀁, 𑀦𑀺𑀩𑁆𑀩𑀸𑀦𑀁. 𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀚𑁆𑀚𑀺𑀬𑀢𑀺 𑀕𑀫𑀺𑀬𑀢𑀻𑀢𑀺 𑀧𑀤𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑀢𑀦𑁆𑀢𑀺 𑀅𑀕𑀫𑀺𑀦𑁆𑀢𑀺 𑀕𑀢𑁄, 𑀩𑀼𑀤𑁆𑀥𑁄. 𑀤𑀼𑀓𑁆𑀔𑀸𑀤𑀺𑀅𑀲𑀫𑁆𑀫𑀺𑀲𑁆𑀲𑀲𑁆𑀲 𑀏𑀓𑀦𑁆𑀢𑀲𑀼𑀔𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀧𑀸𑀧𑀼𑀡𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀕𑀢𑀁.

𑀦𑀭𑀸𑀦𑀭𑀸𑀦𑀦𑁆𑀢𑀺 ¶ 𑀦𑀭𑀅𑀦𑀭𑀸𑀦𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀫𑀦𑀼𑀲𑁆𑀲𑀤𑁂𑀯𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑁆𑀚𑀸𑀤𑀺𑀲𑁂𑀝𑁆𑀞𑀪𑀸𑀯𑀁 𑀦𑀭𑀢𑀺 𑀦𑁂𑀢𑀻𑀢𑀺 𑀦𑀭𑁄, 𑀦𑀭𑀻𑀬𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦 𑀦𑀺𑀬𑀢𑀻𑀢𑀺 𑀯𑀸 𑀦𑀭𑁄, 𑀫𑀦𑀼𑀲𑁆𑀲𑁄, 𑀲𑀢𑁆𑀢𑁄 𑀯𑀸. 𑀦𑀭𑀥𑀸𑀢𑀼 𑀦𑀬𑀦𑁂 𑀅. 𑀦 𑀦𑀭𑁄 𑀅𑀦𑀭𑁄, 𑀤𑁂𑀯𑁄. 𑀦𑀭𑁄 𑀘 𑀅𑀦𑀭𑁄 𑀘 𑀦𑀭𑀸𑀦𑀭𑁄, 𑀢𑁂𑀲𑀁 𑀦𑀭𑀸𑀦𑀭𑀸𑀦𑀁. 𑀢𑀁 𑀧𑀦 𑀲𑀼𑀔𑀲𑀫𑁆𑀪𑀯𑀦𑁆𑀢𑀺 𑀧𑀤𑁂 𑀲𑀫𑁆𑀩𑀦𑁆𑀥𑁄.

𑀲𑀼𑀔𑀲𑀫𑁆𑀪𑀯𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀲𑁆𑀲 𑀓𑀸𑀭𑀡𑀁. 𑀢𑀺𑀯𑀺𑀥𑀲𑀼𑀔𑀲𑁆𑀲 𑀮𑀪𑀦𑀓𑀸𑀭𑀡𑀪𑀽𑀢𑀁 𑀧𑀼𑀜𑁆𑀜𑀁 𑀯𑀸. 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁. 𑀢𑀺𑀯𑀺𑀥𑀲𑀼𑀔𑀁. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀝𑁆𑀞𑀼 𑀤𑀼𑀓𑁆𑀔𑀁 𑀔𑀦𑀢𑀻𑀢𑀺 𑀲𑀼𑀔𑀁. 𑀲𑀼𑀧𑀼𑀩𑁆𑀩𑀔𑀦𑀼𑀥𑀸𑀢𑀼 𑀅𑀯𑀥𑀸𑀭𑀡𑁂 𑀅. 𑀲𑀫𑁆𑀪𑀯𑀢𑀺 𑀲𑀼𑀔𑀲𑀗𑁆𑀔𑀸𑀢𑀁 𑀨𑀮𑀁 𑀅𑀦𑁂𑀦 𑀧𑀼𑀜𑁆𑀜𑁂𑀦𑀸𑀢𑀺 𑀲𑀫𑁆𑀪𑀯𑀁, 𑀧𑀼𑀜𑁆𑀜𑀓𑀭𑀡𑀁. 𑀲𑀁𑀧𑀼𑀩𑁆𑀩𑀪𑀽𑀥𑀸𑀢𑀼 𑀲𑀢𑁆𑀢𑀸𑀬𑀁𑀡. 𑀲𑀼𑀔𑀲𑁆𑀲 𑀲𑀫𑁆𑀪𑀯𑀁 𑀲𑀼𑀔𑀲𑀫𑁆𑀪𑀯𑀁, 𑀢𑀁 𑀧𑀦 𑀪𑀯𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀪𑀯𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁. 𑀢𑀁 𑀲𑀼𑀔𑀲𑀫𑁆𑀪𑀯𑀁 𑀪𑀸𑀯𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀪𑀯𑁄, 𑀩𑀼𑀤𑁆𑀥𑁄. 𑀢𑀁 𑀪𑀯𑀁. 𑀲𑁄 𑀳𑀺 𑀫𑀳𑀸𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀲𑁆𑀲 𑀮𑀪𑀦𑀓𑀸𑀭𑀡𑀪𑀽𑀢𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀦𑀭𑀸𑀦𑀭𑀸𑀦𑀁 𑀲𑀼𑀔𑀲𑀫𑁆𑀪𑀯𑀁 𑀪𑀯𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀫𑀸𑀦𑀫𑀸𑀦𑀦𑁆𑀢𑀺 𑀧𑀤𑀲𑁆𑀲 𑀦𑀫𑁂 𑀅𑀦𑀫𑀸𑀦𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀦𑀫𑁂𑀢𑀺 𑀅𑀳𑀁 𑀦𑀫𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀫𑀺𑀯𑀺𑀪𑀢𑁆𑀢𑀺𑀬𑀸 𑀏𑀓𑀸𑀭𑀸𑀤𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀫𑀸𑀦𑀦𑁆𑀢𑀺 𑀅𑀦𑀫𑁂𑀦𑁆𑀢𑀸𑀦𑀁 𑀅𑀯𑀦𑁆𑀤𑀦𑁆𑀢𑀸𑀦𑀁 𑀅𑀦𑀸𑀤𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀕𑀯𑀦𑁆𑀢𑀺𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀕𑀯𑀦𑁆𑀢𑀺 𑀕𑁄𑀡𑀲𑀤𑀺𑀲𑀸𑀦𑀁 𑀩𑀸𑀮𑀸𑀦𑀁. 𑀕𑀯𑀦𑁆𑀢𑀺 𑀳𑀺 𑀙𑀝𑁆𑀞𑀻𑀩𑀳𑀼𑀯𑀘𑀦𑀦𑁆𑀢𑀦𑀸𑀫𑀧𑀤𑀁. 𑀢𑀢𑁄 𑀦𑀫𑀁 𑀧𑀢𑀺𑀫𑁆𑀳𑀸𑀮𑀼𑀢𑁆𑀢𑁂 𑀘 𑀲𑀫𑀸𑀲𑁂𑀢𑀺 𑀲𑀼𑀢𑁆𑀢𑁂 𑀲𑀫𑀪𑀺𑀦𑀺𑀯𑀺𑀝𑁆𑀞𑁂𑀦 𑀘𑀕𑁆𑀕𑀳𑀡𑁂𑀦 𑀦𑀁𑀯𑀘𑀦𑀲𑁆𑀲 𑀅𑀁 𑀆𑀤𑁂𑀲𑀜𑁆𑀘 𑀕𑁄𑀇𑀘𑁆𑀘𑁂𑀢𑀲𑁆𑀲 𑀑𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑀁 𑀓𑀢𑁆𑀯𑀸 𑀭𑀽𑀧𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀕𑀘𑁆𑀙𑀦𑁆𑀢𑀻𑀢𑀺 𑀕𑀸𑀯𑁄, 𑀕𑁄𑀡𑀸. 𑀕𑀸𑀯𑁄 𑀯𑀺𑀬𑀸𑀢𑀺 𑀕𑀸𑀯𑁄, 𑀢𑁂𑀲𑀁 𑀕𑀯𑀁 𑀩𑀸𑀮𑀸𑀦𑀁. 𑀢𑀁 𑀧𑀦 𑀚𑀺𑀦𑀧𑀼𑀗𑁆𑀕𑀯𑀦𑁆𑀢𑀺𑀧𑀤𑁂 𑀙𑀝𑁆𑀞𑀻𑀓𑀫𑁆𑀫𑀁. 𑀚𑀺𑀦𑀧𑀼𑀗𑁆𑀕𑀯𑀦𑁆𑀢𑀺 𑀚𑀬𑀦𑁆𑀢𑀧𑀼𑀭𑀺𑀲𑀼𑀢𑁆𑀢𑀫𑀁 𑀩𑀼𑀤𑁆𑀥𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀧𑀼𑀗𑁆𑀕𑀯 𑀲𑀤𑁆𑀤𑁄 ¶ 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀲𑁂𑀝𑁆𑀞𑀢𑁆𑀣𑀯𑀸𑀘𑀓𑁄. 𑀫𑀼𑀦𑀺𑀧𑀼𑀗𑁆𑀕𑀯𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 𑁋

‘‘𑀉𑀢𑁆𑀢𑀭𑀲𑁆𑀫𑀺𑀁 𑀧𑀤𑁂 𑀩𑁆𑀬𑀕𑁆𑀖, 𑀧𑀼𑀗𑁆𑀕𑀯𑁄𑀲𑀪𑀓𑀼𑀜𑁆𑀚𑀭𑀸;

𑀲𑀻𑀳𑀲𑀤𑁆𑀤𑀽𑀮𑀦𑀸𑀕𑀸𑀤𑁆𑀬𑀸, 𑀧𑀼𑀫𑁂 𑀲𑁂𑀝𑁆𑀞𑀢𑁆𑀣𑀕𑁄𑀘𑀭𑀸’’𑀢𑀺.

𑀢𑀲𑁆𑀲𑀢𑁆𑀣𑁄. 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀉𑀢𑁆𑀢𑀭𑀧𑀤𑁂 𑀯𑀢𑁆𑀢𑀫𑀸𑀦𑀸 𑀩𑁆𑀬𑀕𑁆𑀖𑀧𑀼𑀗𑁆𑀕𑀯𑁄𑀲𑀪𑀓𑀼𑀜𑁆𑀚𑀭𑀸 𑀩𑁆𑀬𑀕𑁆𑀖𑀧𑀼𑀗𑁆𑀕𑀯𑀉𑀲𑀪𑀓𑀼𑀜𑁆𑀚𑀭𑀲𑀤𑁆𑀤𑀸 𑀘 𑀲𑀻𑀳 𑀲𑀤𑁆𑀤𑀽𑀮𑀦𑀸𑀕𑀸𑀤𑁆𑀬𑀸 𑀲𑀻𑀳 𑀲𑀤𑁆𑀤𑀽𑀮 𑀦𑀸𑀕𑀸𑀲𑀤𑁆𑀤𑀸 𑀘 𑀧𑀼𑀫𑁂 𑀲𑁂𑀝𑁆𑀞𑀢𑁆𑀣 𑀯𑀸𑀘𑀓𑀸𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀕𑁄 𑀯𑀺𑀬 𑀩𑀼𑀤𑁆𑀥𑀕𑀼𑀡𑁂 𑀅𑀚𑀸𑀦𑀦𑁆𑀢𑁂 𑀅𑀦𑀫𑀦𑁆𑀢𑁂 𑀅𑀜𑁆𑀜𑀤𑀺𑀝𑁆𑀞𑀺𑀓𑁂 𑀩𑀸𑀮𑁂 𑀚𑀺𑀦𑀸𑀢𑀺 𑀅𑀚𑀺𑀦𑀻𑀢𑀺 𑀯𑀸 𑀚𑀺𑀦𑁄. 𑀧𑀓𑀝𑁆𑀞𑀪𑀸𑀯𑀁 𑀧𑀥𑀸𑀦𑀪𑀸𑀯𑀁 𑀯𑀸 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀧𑀼𑀗𑁆𑀕𑀯𑁄. 𑀧𑀉𑀧𑀼𑀩𑁆𑀩 𑀕𑀫𑀼𑀥𑀸𑀢𑀼 𑀕𑀢𑀺𑀬𑀁 𑀅𑀯𑀧𑀘𑁆𑀘𑀬𑁄. 𑀦𑀺𑀕𑁆𑀕𑀳𑀺𑀢𑀸 𑀕𑀫𑁄. 𑀢𑀲𑁆𑀲 𑀓𑀯𑀕𑁆𑀕𑀦𑁆𑀢𑀁 𑀥𑀸𑀢𑁆𑀯𑀦𑁆𑀢𑀮𑁄𑀧𑀜𑁆𑀘 𑀬𑀤𑀸𑀤𑀺𑀦𑀸 𑀓𑀢𑁆𑀯𑀸 𑀭𑀽𑀧𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀚𑀺𑀦𑁄 𑀘 𑀲𑁄 𑀧𑀼𑀗𑁆𑀕𑀯𑁄 𑀘𑀸𑀢𑀺 𑀚𑀺𑀦𑀧𑀼𑀗𑁆𑀕𑀯𑁄, 𑀩𑀼𑀤𑁆𑀥𑁄. 𑀲𑁄 𑀧𑀦 𑀕𑀼𑀦𑁆𑀦𑀁 𑀯𑀺𑀬 𑀩𑀼𑀤𑁆𑀥𑀸𑀦𑀁 𑀲𑀻𑀮𑀸𑀤𑀺𑀓𑁂 𑀅𑀧𑁆𑀧𑀫𑁂𑀬𑁆𑀬𑀕𑀼𑀡𑁂 𑀅𑀚𑀸𑀦𑀦𑁆𑀢𑀸𑀦𑀁 𑀅𑀦𑀫𑀦𑁆𑀢𑀸𑀦𑀁 𑀅𑀕𑀸𑀭𑀯𑀦𑁆𑀢𑀸𑀦𑀁 𑀅𑀯𑀦𑁆𑀤𑀦𑁆𑀢𑀸𑀦𑀁 𑀅𑀜𑁆𑀜 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀩𑀸𑀮𑀸𑀦𑀁 𑀅𑀲𑀢𑁆𑀣𑁂𑀦 𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀅𑀚𑀺𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀚𑀺𑀦𑀧𑀼𑀗𑁆𑀕𑀯𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀢𑀳𑀺𑀁 𑀢𑀳𑀺𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂, 𑀅𑀢𑁆𑀢𑀪𑀸𑀯𑁂 𑀯𑀸, 𑀧𑀸𑀭𑀫𑀺𑀲𑀜𑁆𑀘𑀬𑀁 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀲𑀫𑀽𑀳𑀁, 𑀘𑀬𑀁 𑀉𑀧𑀘𑀺𑀢𑀁 𑀧𑀭𑀺𑀲𑀫𑁆𑀪𑀽𑀢𑀁, 𑀲𑀩𑁆𑀪𑀺 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺, 𑀕𑀢𑀁 𑀉𑀧𑀕𑀫𑀺𑀢𑀩𑁆𑀩𑀁 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀁, 𑀲𑀼𑀔𑀧𑁆𑀧𑀤𑀁 𑀅𑀘𑁆𑀘𑀦𑁆𑀢𑀲𑀼𑀔𑀲𑁆𑀲 𑀧𑀢𑀺𑀝𑁆𑀞𑀸𑀦 𑀪𑀽𑀢𑀁, 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀕𑀢𑀁 𑀧𑀢𑁆𑀢𑀁 𑀅𑀕𑀫𑀺𑀁, 𑀦𑀭𑀸𑀦𑀭𑀸𑀦𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁, 𑀲𑀼𑀔𑀲𑀫𑁆𑀪𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀲𑁆𑀲 𑀓𑀸𑀭𑀡𑀁 𑀢𑀺𑀯𑀺𑀥 𑀲𑀼𑀔𑀲𑁆𑀲 𑀮𑀪𑀦𑀓𑀸𑀭𑀡𑀪𑀽𑀢𑀁 𑀧𑀼𑀜𑁆𑀜𑀁 𑀯𑀸 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁, 𑀅𑀦𑀫𑀸𑀦𑀁 𑀅𑀦𑀫𑀦𑁆𑀢𑀸𑀦𑀁 𑀅𑀦𑀸𑀤𑀭𑀸𑀦𑀁 𑀅𑀯𑀦𑁆𑀤𑀦𑁆𑀢𑀸𑀦𑀁 𑀯𑀸, 𑀕𑀯𑀁 𑀕𑁄𑀡𑀲𑀤𑀺𑀲𑀸𑀦𑀁 𑀩𑀸𑀮𑀸𑀦𑀁 𑀚𑀺𑀦𑀧𑀼𑀗𑁆𑀕𑀯𑀁 𑀚𑀬𑀦𑁆𑀢𑀧𑀼𑀭𑀺𑀲𑀼𑀢𑁆𑀢𑀫𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺.

𑀦𑀯𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀫𑀕𑁆𑀕𑀗𑁆𑀕𑀦𑀸𑀯𑀁 ¶ 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄,

𑀆𑀭𑀼𑀬𑁆𑀳 𑀬𑁄 𑀢𑀸𑀬 𑀩𑀳𑀽 𑀪𑀯𑀡𑁆𑀡𑀯𑀸,

𑀢𑀸𑀭𑁂𑀲𑀺 𑀢𑀁 𑀩𑀼𑀤𑁆𑀥𑀫𑀖𑀧𑁆𑀧𑀳𑀁 𑀦𑀫𑁂.

𑁧𑁦. 𑀏𑀯𑀁 𑀦𑀯𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀦𑀢𑁆𑀯𑀸 𑀇𑀤𑀸𑀦𑀺 𑀩𑀳𑀽 𑀲𑀢𑁆𑀢𑁂 𑀢𑀺𑀪𑀯𑀲𑀗𑁆𑀔𑀸𑀢𑀸 𑀲𑀁𑀲𑀸𑀭𑀲𑀫𑀼𑀤𑁆𑀤𑀢𑁄 𑀢𑀸𑀭𑁂𑀦𑁆𑀢𑁂𑀦 𑀕𑀼𑀡𑁂𑀦 𑀘 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀧𑁆𑀧𑀳𑀸𑀦𑁂𑀦 𑀕𑀼𑀡𑁂𑀦 𑀘 𑀣𑁄𑀫𑀺𑀢𑁆𑀯𑀸 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑀼 𑀓𑀸𑀫𑁄 𑀫𑀕𑁆𑀕𑀗𑁆𑀕𑀦𑀸𑀯𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢𑀢 𑀚𑀭 𑀕𑀡𑁂𑀳𑀺 𑀭𑀘𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀇𑀦𑁆𑀤𑀯𑀁𑀲 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀲𑀸𑀬𑀺𑀦𑁆𑀤𑀯𑀁𑀲𑀸 𑀔𑀮𑀼 𑀬𑀢𑁆𑀣 𑀢𑀸 𑀚𑀭𑀸’’𑀢𑀺.

𑀢𑀲𑁆𑀲𑀢𑁆𑀣𑁄. 𑀬𑀢𑁆𑀣 𑀬𑀲𑁆𑀲𑀁 𑀕𑀸𑀣𑀸𑀬𑀁 𑀢𑀸 𑀢𑀕𑀡𑀤𑁆𑀯𑀬𑀜𑁆𑀘 𑀚𑀭𑀸 𑀚𑀕𑀡 𑀭𑀕𑀡𑀸 𑀘 𑀘𑁂 𑀲𑀺𑀬𑀼𑀁, 𑀲𑀸 𑀕𑀸𑀣𑀸 𑀔𑀮𑀼 𑀏𑀓𑀦𑁆𑀢𑀁 𑀇𑀦𑁆𑀤𑀯𑀁𑀲𑀕𑀸𑀣𑀸 𑀦𑀸𑀫𑀸𑀢𑀺.

𑀢𑀢𑁆𑀣 𑀬𑁄 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀩𑀼𑀤𑁆𑀥 𑀲𑀗𑁆𑀔𑀸𑀢𑁄 𑀙𑁂𑀓𑁄 𑀦𑀸𑀯𑀸𑀚𑁂𑀝𑁆𑀞𑀓𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀼𑀦𑀻𑀢𑀺 𑀉𑀪𑁄 𑀮𑁄𑀓𑁂 𑀫𑀼𑀦𑀸𑀢𑀺 𑀚𑀸𑀦𑀸𑀢𑀻𑀢𑀺 𑀫𑀼𑀦𑀺, 𑀪𑀕𑀯𑀸. 𑀫𑀼𑀦𑀥𑀸𑀢𑀼 𑀜𑀸𑀡𑁂 𑀇. 𑀅𑀣 𑀯𑀸 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀦𑀺, 𑀪𑀕𑀯𑀸. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀇𑀧𑀘𑁆𑀘𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀏𑀓𑀦𑀺𑀧𑀸𑀢𑁂 𑀯𑀡𑁆𑀡𑀧𑀣𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀓𑀸𑀬 𑀫𑁄𑀦𑁂𑀬𑁆𑀬𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀼𑀕𑁆𑀕𑀮𑁄 𑀫𑀼𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦𑁂𑀲 𑀅𑀕𑀸𑀭𑀺𑀬𑀫𑀼𑀦𑀺, 𑀅𑀦𑀕𑀸𑀭𑀺𑀬𑀫𑀼𑀦𑀺, 𑀲𑁂𑀓𑁆𑀔𑀫𑀼𑀦𑀺, 𑀅𑀲𑁂𑀓𑁆𑀔𑀫𑀼𑀦𑀺, 𑀧𑀘𑁆𑀘𑁂𑀓𑀫𑀼𑀦𑀺, 𑀫𑀼𑀦𑀺𑀫𑀼𑀦𑀻𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀅𑀕𑀸𑀭𑀺𑀬𑀫𑀼𑀦𑀻𑀢𑀺 𑀕𑀺𑀳𑀺 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀅𑀦𑀕𑀸𑀭𑀺𑀬𑀫𑀼𑀦𑀻𑀢𑀺 𑀢𑀣𑀸𑀭𑀽𑀧𑁄𑀯 𑀧𑀩𑁆𑀩𑀚𑀺𑀢𑁄. 𑀲𑁂𑀓𑁆𑀔𑀫𑀼𑀦𑀻𑀢𑀺 𑀲𑀢𑁆𑀢𑀲𑁂𑀓𑁆𑀔𑀸. 𑀅𑀲𑁂𑀓𑁆𑀔𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑁄. 𑀧𑀘𑁆𑀘𑁂𑀓𑀫𑀼𑀦𑀻𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄. 𑀫𑀼𑀦𑀺𑀫𑀼𑀦𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀇𑀥 𑀧𑀦 𑀫𑀼𑀦𑀺𑀫𑀼𑀦𑀺 𑀅𑀥𑀺𑀧𑁆𑀧𑁂𑀢𑁄.

𑀤𑀓𑁆𑀔𑁄𑀢𑀺 ¶ 𑀙𑁂𑀓𑁄. 𑀲𑀫𑀼𑀤𑁆𑀤𑀢𑀭𑀡𑁂 𑀤𑀓𑁆𑀔𑀢𑀺 𑀓𑀼𑀲𑀮𑀢𑁆𑀢𑀁 𑀕𑀘𑁆𑀙𑀢𑀻𑀢𑀺 𑀤𑀓𑁆𑀔𑁄, 𑀦𑀸𑀯𑀺𑀓𑁄. 𑀤𑀓𑁆𑀔𑀥𑀸𑀢𑀼 𑀕𑀢𑀺𑀬𑀁 𑀅. 𑀅𑀣 𑀯𑀸 𑀤𑀓𑁆𑀔𑀢𑀺 𑀓𑀼𑀲𑀮𑀓𑀫𑁆𑀫𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀓𑀺𑀘𑁆𑀘𑀸𑀓𑀺𑀘𑁆𑀘𑁂 𑀅𑀤𑀦𑁆𑀥𑀢𑀸𑀬 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀤𑀓𑁆𑀔𑁄, 𑀬𑁄𑀓𑁄𑀘𑀺 𑀓𑀼𑀲𑀮𑁄 𑀧𑀼𑀕𑁆𑀕𑀮𑁄. 𑀤𑀓𑁆𑀔𑀥𑀸𑀢𑀼 𑀲𑀻𑀖𑀢𑁆𑀣𑁂 𑀅. 𑀤𑀓𑁆𑀔𑁄 𑀯𑀺𑀬𑀸𑀢𑀺 𑀤𑀓𑁆𑀔𑁄, 𑀩𑀼𑀤𑁆𑀥𑁄. 𑀦𑀻𑀢𑀢𑁆𑀣𑁂𑀦 𑀧𑀦 𑀩𑀼𑀤𑁆𑀥𑁄 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀲𑀫𑀼𑀤𑁆𑀤𑀢𑁄 𑀉𑀤𑁆𑀥𑀸𑀭𑀡𑀲𑁆𑀲 𑀓𑀸𑀭𑀡𑀁 𑀤𑀓𑁆𑀔𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀜𑀸𑀡𑁂𑀦𑀸𑀢𑀺 𑀤𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀯𑀺𑀓𑁄𑀢𑀺 𑀲𑀫𑀼𑀤𑁆𑀤𑀢𑀻𑀭𑀁 𑀦𑀸𑀯𑀸𑀬 𑀢𑀭𑀢𑀻𑀢𑀺 𑀦𑀸𑀯𑀺𑀓𑁄, 𑀦𑀸𑀯𑀸𑀚𑁂𑀝𑁆𑀞𑀓𑁄. 𑀢𑀭𑀢𑀺𑀢𑀤𑁆𑀥𑀺𑀢𑁂 𑀡𑀺𑀓𑁄. 𑀦𑀸𑀯𑀺𑀓𑁄 𑀯𑀺𑀬𑀸𑀢𑀺 𑀦𑀸𑀯𑀺𑀓𑁄, 𑀩𑀼𑀤𑁆𑀥𑁄. 𑀦𑀻𑀢𑀢𑁆𑀣𑁂𑀦 𑀧𑀦 𑀩𑀼𑀤𑁆𑀥𑁄 𑀦𑀺𑀩𑁆𑀩𑀸𑀦𑀁 𑀧𑀸𑀭𑀁 𑀅𑀝𑁆𑀞𑀫𑀕𑁆𑀕𑀗𑁆𑀕𑀦𑀸𑀯𑀸𑀬 𑀢𑀭𑀢𑀻𑀢𑀺 𑀦𑀸𑀯𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀤𑀓𑁆𑀔𑁄 𑀦𑀸𑀯𑀺𑀓𑁄 𑀤𑀓𑁆𑀔𑀦𑀸𑀯𑀺𑀓𑁄, 𑀫𑀼𑀦𑀺 𑀘 𑀲𑁄 𑀤𑀓𑁆𑀔𑀦𑀸𑀯𑀺𑀓𑁄𑀘𑀸𑀢𑀺 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄, 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄𑀬𑀁. 𑀅𑀣 𑀯𑀸 𑀤𑀓𑁆𑀔𑀦𑀸𑀯𑀺𑀓𑁄 𑀯𑀺𑀬 𑀤𑀓𑁆𑀔𑁄 𑀫𑀼𑀦𑀻𑀢𑀺 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄, 𑀩𑀼𑀤𑁆𑀥𑁄. 𑀉𑀧𑀫𑀸𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄𑀬𑀁. 𑀬𑀣𑀸 𑀳𑀺 𑀲𑀫𑀼𑀤𑁆𑀤𑀢𑀭𑀡𑁂 𑀙𑁂𑀓𑁄 𑀦𑀸𑀯𑀺𑀓𑁄 𑀫𑀦𑀼𑀲𑁆𑀲𑁂 𑀲𑀫𑀼𑀤𑁆𑀤𑀧𑀸𑀭𑀁 𑀦𑁂𑀢𑀺, 𑀏𑀯𑀁 𑀩𑀼𑀤𑁆𑀥𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀕𑁆𑀕𑀗𑁆𑀕𑀦𑀸𑀯𑀁 𑀆𑀭𑀼𑀬𑁆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑀗𑁆𑀕𑀦𑀸𑀯𑀦𑁆𑀢𑀺 𑀅𑀝𑁆𑀞𑀫𑀕𑁆𑀕𑀗𑁆𑀕 𑀲𑀗𑁆𑀔𑀸𑀢𑀁 𑀦𑀸𑀯𑀁. 𑀆𑀭𑀼𑀬𑁆𑀳𑀸𑀢𑀺 𑀆𑀭𑁄𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄. 𑀫𑀸𑀭𑀲𑀤𑁆𑀤𑀽𑀧𑀧𑀤 𑀕𑀫𑀼𑀥𑀸𑀢𑀼 𑀓𑁆𑀯𑀺. 𑀫𑀸𑀭𑁂𑀦𑁆𑀢 𑀕𑁄𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀻𑀢𑀺 𑀫𑀕𑁆𑀕𑁄. 𑀫𑀕𑁆𑀕𑀥𑀸𑀢𑀼 𑀕𑀯𑁂𑀲𑀦𑁂 𑀅. 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀬𑀢𑀺 𑀕𑀯𑁂𑀲𑀺𑀬𑀢𑀻𑀢𑀺 𑀯𑀸 𑀫𑀕𑁆𑀕𑁄. 𑀏𑀓𑀦𑁆𑀢𑀢𑁄 𑀚𑀸𑀢𑀺 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀤𑀼𑀓𑁆𑀔𑀸𑀤𑀻𑀳𑀺 𑀧𑀻𑀴𑀺𑀢𑁂𑀳𑀺 𑀲𑀢𑁆𑀢𑁂𑀳𑀺 𑀤𑀼𑀓𑁆𑀔𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀢𑁆𑀣𑀸𑀬 𑀫𑀕𑁆𑀕𑀺𑀢𑀩𑁆𑀩𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄, 𑀘𑀢𑀼𑀫𑀕𑁆𑀕𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘𑀸’’𑀢𑀺. 𑀅𑀗𑁆𑀕𑀢𑀺 𑀕𑀘𑁆𑀙𑀢𑀺 𑀨𑀮𑀦𑀺𑀩𑁆𑀩𑀸𑀦𑀁 𑀏𑀢𑁂𑀦𑀸𑀢𑀺 𑀅𑀗𑁆𑀕𑀁. 𑀅𑀕𑀺𑀥𑀸𑀢𑀼 𑀕𑀫𑀦𑁂 𑀅. 𑀫𑀕𑁆𑀕𑀲𑁆𑀲 𑀅𑀗𑁆𑀕𑀁 𑀓𑀸𑀭𑀡𑀦𑁆𑀢𑀺 𑀫𑀕𑁆𑀕𑀗𑁆𑀕𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢 𑀲𑀫𑁆𑀫𑀸𑀆𑀚𑀻𑀯 𑀲𑀫𑁆𑀫𑀸𑀯𑀸𑀬𑀸𑀫 ¶ 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀲𑁂𑀦 𑀅𑀝𑁆𑀞𑀫𑀕𑁆𑀕𑀗𑁆𑀕𑀁 𑀮𑀩𑁆𑀪𑀢𑀺. 𑀦𑀼𑀬𑀢𑀺 𑀣𑀯𑀻𑀬𑀢𑀻𑀢𑀺 𑀦𑀸𑀯𑀸. 𑀦𑀼𑀥𑀸𑀢𑀼 𑀣𑀯𑀺𑀬𑀁 𑀅𑀯𑁄. 𑀅𑀣 𑀯𑀸 𑀑𑀭𑀢𑁄 𑀧𑀸𑀭𑀁 𑀦𑁂𑀢𑀻𑀢𑀺 𑀦𑀸𑀯𑀸, 𑀪𑀸𑀭𑀁 𑀦𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀦𑀸𑀯𑀸. 𑀦𑀺𑀥𑀸𑀢𑀼 𑀦𑀬𑀦𑁂 𑀅𑀯𑁄. 𑀫𑀕𑁆𑀕𑀗𑁆𑀕𑀲𑀗𑁆𑀔𑀸𑀢𑀸 𑀦𑀸𑀯𑀸 𑀫𑀕𑁆𑀕𑀗𑁆𑀕𑀦𑀸𑀯𑀸. 𑀅𑀣 𑀯𑀸 𑀦𑀸𑀯𑀸 𑀯𑀺𑀬 𑀫𑀕𑁆𑀕𑀗𑁆𑀕𑀦𑁆𑀢𑀺 𑀫𑀕𑁆𑀕𑀗𑁆𑀕 𑀦𑀸𑀯𑀸. 𑀬𑀣𑀸 𑀳𑀺 𑀦𑀸𑀯𑀸 𑀅𑀢𑁆𑀢𑀦𑀺 𑀆𑀭𑀼𑀴𑁆𑀳𑁂 𑀫𑀦𑀼𑀲𑁆𑀲𑁂 𑀲𑀫𑀼𑀤𑁆𑀤 𑀦𑀤𑀻𑀧𑀸𑀭𑀁 𑀦𑁂𑀢𑀺, 𑀏𑀯𑀁 𑀅𑀝𑁆𑀞𑀫𑀕𑁆𑀕𑀗𑁆𑀕𑀥𑀫𑁆𑀫𑀸 𑀅𑀢𑁆𑀢𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑁂 𑀦𑀺𑀩𑁆𑀩𑀸𑀦 𑀧𑀸𑀭𑀁 𑀦𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀫𑀕𑁆𑀕𑀗𑁆𑀕𑀦𑀸𑀯𑀁.

𑀈𑀳𑀸𑀨𑀺𑀬𑀦𑁆𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑀁 𑀤𑀩𑁆𑀩𑀺𑀲𑀸𑀭𑀓𑀁. 𑀯𑀼𑀢𑁆𑀢𑀜𑁆𑀳𑀺 𑀲𑀼𑀢𑁆𑀢𑀦𑀺 𑀧𑀸𑀢𑀅𑀝𑁆𑀞𑀓𑀣𑀸𑀬𑀁 ‘‘𑀨𑀺𑀬𑁂𑀦𑀸𑀢𑀺 𑀤𑀩𑁆𑀩𑀺𑀲𑀸𑀭𑀓𑁂𑀦𑀸’’𑀢𑀺. 𑀈𑀳𑀢𑀺 𑀆𑀭𑀩𑁆𑀪𑀢𑀻𑀢𑀺 𑀈𑀳𑀸. 𑀈𑀳𑀢𑀺 𑀯𑀸𑀬𑀫𑀢𑀺 𑀘𑁂𑀢𑀬𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀈𑀳𑀸, 𑀯𑀻𑀭𑀺𑀬𑀁. 𑀲𑀤𑁆𑀤𑀦𑀻𑀢𑀺𑀬𑀁 𑀧𑀦 ‘‘𑀈𑀳 𑀘𑁂𑀢𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀨𑀸𑀢𑀺 𑀯𑀟𑁆𑀠𑁂𑀢𑀺 𑀉𑀤𑀓𑀁 𑀏𑀢𑁂𑀦𑀸𑀢𑀺 𑀨𑀺𑀬𑀁. 𑀨𑀸𑀥𑀸𑀢𑀼 𑀯𑀟𑁆𑀠𑀺𑀬𑀁 𑀇𑀬𑁄. 𑀨𑀸𑀢𑀺 𑀖𑀝𑁆𑀝𑁂𑀢𑀺 𑀉𑀤𑀓𑀦𑁆𑀢𑀺 𑀯𑀸 𑀨𑀺𑀬𑀁. 𑀅𑀣 𑀯𑀸 𑀨𑀸𑀬𑀢𑀺 𑀕𑀘𑁆𑀙𑀢𑀺 𑀦𑀸𑀯𑀁 𑀏𑀢𑁂𑀦𑀸𑀢𑀺 𑀨𑀺𑀬𑀁. 𑀤𑀩𑁆𑀩𑀺𑀲𑀸𑀭𑀓𑀁. 𑀨𑀸𑀬𑀺 𑀥𑀸𑀢𑀼 𑀕𑀢𑀺𑀬𑀁 𑀅. 𑀆𑀓𑀸𑀭𑀲𑁆𑀲 𑀇. 𑀈𑀳𑀸𑀲𑀗𑁆𑀔𑀸𑀢𑀁 𑀨𑀺𑀬𑀦𑁆𑀢𑀺 𑀈𑀳𑀸𑀨𑀺𑀬𑀁. 𑀨𑀺𑀬𑀁 𑀯𑀺𑀬 𑀈𑀳𑀸𑀢𑀺 𑀈𑀳𑀸𑀨𑀺𑀬𑀁. 𑀬𑀣𑀸 𑀳𑀺 𑀨𑀺𑀬𑁂𑀦 𑀦𑀸𑀯𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀏𑀯𑀁 𑀈𑀳𑀸𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑁂𑀦 𑀢𑀁 𑀢𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀇𑀘𑁆𑀙𑀺𑀢𑀁 𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦 𑀕𑀸𑀳𑀓𑁄𑀢𑀺 𑀧𑀤𑁂 𑀓𑀫𑁆𑀫𑀁. 𑀜𑀸𑀡𑀓𑀭𑁂𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑁂𑀦. 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀢𑀁 𑀢𑀁 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀓𑀭𑁄, 𑀳𑀢𑁆𑀣𑁄. 𑀜𑀸𑀡𑀲𑀗𑁆𑀔𑀸𑀢𑁄 𑀓𑀭𑁄 𑀜𑀸𑀡 𑀓𑀭𑁄, 𑀓𑀭𑀁 𑀯𑀺𑀬 𑀜𑀸𑀡𑀦𑁆𑀢𑀺 𑀯𑀸 𑀜𑀸𑀡𑀓𑀭𑁄, 𑀢𑁂𑀦 𑀜𑀸𑀡𑀓𑀭𑁂𑀦. 𑀕𑀸𑀳𑀓𑁄𑀢𑀺 𑀤𑀴𑁆𑀳𑀕𑀡𑁆𑀳𑀫𑀸𑀦𑁄 𑀳𑀼𑀢𑁆𑀯𑀸. 𑀢𑀸𑀬𑀸𑀢𑀺 𑀅𑀝𑁆𑀞𑀫𑀕𑁆𑀕𑀗𑁆𑀕 𑀲𑀗𑁆𑀔𑀸𑀢𑀸𑀬 𑀢𑀸𑀬 𑀦𑀸𑀯𑀸𑀬, 𑀩𑀳𑀽𑀢𑀺 𑀅𑀦𑁂𑀓𑁂 𑀯𑁂𑀦𑁂𑀬𑁆𑀬𑀲𑀢𑁆𑀢𑁂. 𑀪𑀯𑀡𑁆𑀡𑀯𑀸𑀢𑀺 𑀢𑀺𑀪𑀯𑀲𑀗𑁆𑀔𑀸𑀢𑀸 𑀲𑀁𑀲𑀸𑀭𑀯𑀝𑁆𑀝𑀲𑀗𑁆𑀔𑀸𑀢𑀸 𑀯𑀸 𑀫𑀳𑀸𑀲𑀫𑀼𑀤𑁆𑀤𑀢𑁄. 𑀢𑀲𑁆𑀲 𑀧𑀦 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀢𑀸𑀭𑁂𑀲𑀻𑀢𑀺 𑀑𑀢𑀺𑀡𑁆𑀡𑁂𑀲𑀺, 𑀅𑀢𑀺𑀓𑁆𑀓𑀫𑁂𑀲𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀦𑁆𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀅𑀖𑀧𑁆𑀧𑀳𑀦𑁆𑀢𑀺 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀧𑁆𑀧𑀚 𑀳𑀦𑁆𑀢𑀁 ¶ . 𑀤𑀼𑀓𑁆𑀔𑀯𑀺𑀤𑁆𑀥𑀁𑀲𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀖𑀧𑁆𑀧𑀳𑀦𑁆𑀢𑀺 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀧𑁆𑀧𑀚𑀳𑀦𑁆𑀢𑀁. 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀅𑀖𑀲𑀤𑁆𑀤𑁄 𑀤𑀼𑀓𑁆𑀔𑁂 𑀓𑀺𑀮𑁂𑀲𑁂 𑀘 𑀯𑀢𑁆𑀢𑀢𑀺. 𑀢𑀢𑁆𑀣 𑀳𑀺 𑀤𑀼𑀓𑁆𑀔𑀁 𑀅𑀖𑀬𑀢𑀺 𑀤𑀼𑀓𑁆𑀔𑀬𑀢𑀻𑀢𑀺 𑀅𑀖𑀦𑁆𑀢𑀺 𑀘, 𑀅𑀖𑀬𑀢𑀺 𑀤𑀼𑀓𑁆𑀔𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀅𑀖𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀮𑁂𑀲𑁄 𑀧𑀦 𑀅𑀖𑀬𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀖𑀥𑀸𑀢𑀼 𑀧𑀸𑀧𑀓𑀭𑀡𑁂 𑀅. 𑀅𑀖𑀁 𑀧𑀚𑀳𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀖𑀧𑁆𑀧𑀳𑁄, 𑀩𑀼𑀤𑁆𑀥𑁄. 𑀅𑀖𑀲𑀤𑁆𑀤𑀽𑀧𑀧𑀤𑀧𑀧𑀼𑀩𑁆𑀩𑀳𑀸𑀥𑀸𑀢𑀼 𑀘𑀸𑀕𑁂. 𑀩𑀼𑀤𑁆𑀥𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀜𑁆𑀘 𑀓𑀺𑀮𑁂𑀲𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀞𑀫𑀯𑀺𑀓𑀧𑁆𑀧𑁂 𑀤𑀼𑀓𑁆𑀔𑀲𑁆𑀲 𑀅𑀧𑁆𑀧𑀳𑀸𑀢𑀩𑁆𑀩𑀥𑀫𑁆𑀫𑀢𑁆𑀢𑀸 𑀫𑀕𑁆𑀕𑁂𑀦 𑀅𑀧𑁆𑀧𑀳𑀸𑀢𑀩𑁆𑀩𑀫𑁆𑀧𑀺 𑀨𑀮𑀽𑀧𑀘𑀸𑀭𑁂𑀦 𑀤𑀼𑀓𑁆𑀔𑀧𑁆𑀧𑀚𑀳𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑀁 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀬𑁄 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄 𑀬𑁄 𑀩𑀼𑀤𑁆𑀥𑀲𑀗𑁆𑀔𑀸𑀢𑁄 𑀙𑁂𑀓𑁄 𑀦𑀸𑀯𑀸𑀚𑁂𑀝𑁆𑀞𑀓𑁄, 𑀫𑀕𑁆𑀕𑀗𑁆𑀕𑀦𑀸𑀯𑀁 𑀅𑀝𑁆𑀞𑀫𑀕𑁆𑀕𑀗𑁆𑀕𑀲𑀗𑁆𑀔𑀸𑀢𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀆𑀭𑁄𑀳𑀺𑀢𑁆𑀯𑀸 𑀈𑀳𑀸𑀨𑀺𑀬𑀁 𑀯𑀻𑀭𑀺𑀬𑀲𑀗𑁆𑀔𑀸𑀢𑀁 𑀤𑀩𑁆𑀩𑀺𑀲𑀸𑀭𑀓𑀁, 𑀜𑀸𑀡𑀓𑀭𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑁂𑀦, 𑀕𑀸𑀳𑀓𑁄 𑀤𑀴𑁆𑀳𑀁 𑀕𑀡𑁆𑀳𑀫𑀸𑀦𑁄 𑀳𑀼𑀢𑁆𑀯𑀸 𑀢𑀸𑀬 𑀅𑀝𑁆𑀞𑀫𑀕𑁆𑀕𑀗𑁆𑀕𑀦𑀸𑀯𑀸𑀬, 𑀩𑀳𑀽 𑀅𑀦𑁂𑀓𑁂 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀪𑀯𑀡𑁆𑀡𑀯𑀸 𑀢𑀺𑀪𑀯𑀲𑀗𑁆𑀔𑀸𑀢𑀫𑀳𑀸𑀲𑀫𑀼𑀤𑁆𑀤𑀢𑁄, 𑀢𑀸𑀭𑁂𑀲𑀺 𑀑𑀢𑀸𑀭𑁂𑀲𑀺, 𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀖𑀧𑁆𑀧𑀳𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀯𑀺𑀤𑁆𑀥𑀁𑀲𑁂𑀦𑁆𑀢𑀁 𑀓𑀺𑀮𑁂𑀲 𑀯𑀺𑀤𑁆𑀥𑀁𑀲𑁂𑀦𑁆𑀢𑀁 𑀯𑀸 𑀢𑀁 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑀁 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺.

𑀤𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀁,

𑀯𑀭𑀩𑁄𑀥𑀺𑀤𑀼𑀫𑁂 𑀘𑀢𑀼𑀲𑀘𑁆𑀘𑀤𑀲𑀁;

𑀯𑀭𑀫𑀺𑀤𑁆𑀥𑀺𑀕𑀢𑀁 𑀦𑀭𑀤𑁂𑀯𑀳𑀺𑀢𑀁,

𑁧𑁧. 𑀏𑀯𑀁 ¶ 𑀤𑀲𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀫𑀢𑀺𑀁 𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀸𑀤𑀻𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀚𑀺𑀦𑀁 𑀯𑀦𑁆𑀤𑀺𑀢𑀼𑀓𑀸𑀫𑁄 𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀘𑀢𑀽𑀳𑀺 𑀲𑀕𑀡𑁂𑀳𑀺 𑀭𑀘𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀢𑁄𑀝𑀓𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀇𑀳 𑀢𑁄𑀝𑀓 𑀫𑀫𑁆𑀩𑀼𑀥𑀺𑀲𑁂𑀳𑀺 𑀫𑀺𑀢’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀅𑀫𑁆𑀩𑀼𑀥𑀺𑀲𑁂𑀳𑀺 𑀘𑀢𑀽𑀳𑀺 𑀲𑀕𑀡𑁂𑀳𑀺 𑀫𑀺𑀢𑀁 𑀧𑀫𑀺𑀢𑀁 𑀭𑀘𑀺𑀢𑀁 𑀮𑀓𑁆𑀔𑀺𑀢𑀁 𑀯𑀸 𑀯𑀼𑀢𑁆𑀢𑀁 𑀇𑀥 𑀚𑀕𑀢𑀺𑀙𑀦𑁆𑀤𑁂 𑀢𑁄𑀝𑀓𑀁 𑀦𑀸𑀫𑀸𑀢𑀺.

𑀢𑀢𑁆𑀣 𑀧𑀦 𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀦𑁆𑀢𑀺 𑀤𑀲𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀘𑀸𑀢𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀲𑀫𑁆𑀪𑀽𑀢𑀁, 𑀧𑀭𑀺𑀧𑀽𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀲𑀁 𑀧𑀦 𑀯𑀺𑀲𑁂𑀲𑁄 𑀧𑀸𑀭𑀫𑀺𑀲𑀤𑁆𑀤𑀲𑁆𑀲 𑀘 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀫𑁆𑀪𑀭𑀺𑀢𑁆𑀣 𑀧𑀭𑀺𑀧𑀽𑀭𑀬𑀺𑀢𑁆𑀣𑀸𑀢𑀺 𑀲𑀫𑁆𑀪𑀭𑀡𑁄, 𑀚𑀺𑀦𑁄. 𑀲𑀁𑀧𑀼𑀩𑁆𑀩𑀪𑀭𑀥𑀸𑀢𑀼 𑀧𑀽𑀭𑀡𑁂 𑀬𑀼. 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀲𑀫𑁆𑀪𑀭𑀡𑁄𑀢𑀺 𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑁄, 𑀚𑀺𑀦𑁄. 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀢𑀁 𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀁. 𑀯𑀭𑀩𑁄𑀥𑀺𑀤𑀼𑀫𑁂𑀢𑀺 𑀉𑀢𑁆𑀢𑀫𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂. 𑀏𑀢𑁆𑀣 𑀘 𑀯𑀭𑀩𑁄𑀥𑀺𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀤𑀯𑀢𑀺 𑀕𑀘𑁆𑀙𑀢𑀺 𑀫𑀽𑀮𑀔𑀦𑁆𑀥𑀢𑀘𑀲𑀸𑀔 𑀯𑀺𑀝𑀧 𑀧𑀮𑁆𑀮𑀯 𑀨𑀮𑁂𑀳𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑀺𑀁 𑀯𑁂𑀧𑀼𑀮𑁆𑀮𑀁 𑀭𑀚𑀢 𑀲𑀼𑀯𑀡𑁆𑀡𑀫𑀡𑀺 𑀲𑀦𑁆𑀢𑀸 𑀭𑀼𑀘𑀻𑀳𑀺 𑀅𑀢𑀺𑀲𑁄𑀪𑀦𑀁 𑀯𑀸 𑀧𑀸𑀧𑀼𑀡𑀸𑀢𑀻𑀢𑀺 𑀤𑀼𑀫𑁄, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀚𑀸𑀢𑀤𑀺𑀯𑀲𑁂𑀬𑁂𑀯 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀳 𑀚𑀸𑀢𑁄 𑀲𑀢𑀳𑀢𑁆𑀣𑀼𑀩𑁆𑀩𑁂𑀥𑁄 𑀅𑀲𑀢𑁆𑀣𑀤𑀼𑀫𑀭𑀸𑀚𑀸 𑀮𑀩𑁆𑀪𑀢𑀺. 𑀤𑀼𑀥𑀸𑀢𑀼 𑀕𑀢𑀺𑀫𑁆𑀳𑀺 𑀅𑀫𑁄. 𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀤𑀼𑀦𑀸𑀢𑀺 𑀓𑀫𑁆𑀧𑀢𑀻𑀢𑀺 𑀤𑀼𑀫𑁄. 𑀤𑀼𑀫𑀢𑀺 𑀧𑀽𑀭𑁂𑀢𑀺 𑀆𑀓𑀸𑀲𑀢𑀮𑀦𑁆𑀢𑀺 𑀯𑀸 𑀤𑀼𑀫𑁄’’𑀢𑀺 𑀯𑀼𑀢𑁆𑀢𑀁. 𑀯𑀭𑁄 𑀩𑁄𑀥𑀺 𑀯𑀭𑀩𑁄𑀥𑀺, 𑀯𑀭𑀩𑁄𑀥𑀺 𑀘 𑀲𑁄 𑀤𑀼𑀫𑁄 𑀘𑀸𑀢𑀺 𑀯𑀭𑀩𑁄𑀥𑀺𑀤𑀼𑀫𑁄, 𑀢𑀲𑁆𑀫𑀺𑀁.

𑀘𑀢𑀼𑀲𑀘𑁆𑀘𑀤𑀲𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀁. 𑀏𑀢𑁆𑀣 𑀘 𑀲𑀘𑁆𑀘𑀲𑀤𑁆𑀤𑁄 𑀅𑀦𑁂𑀓𑁂𑀲𑁆𑀯𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁. 𑀲𑀘𑁆𑀘𑀁 ¶ 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀯𑀸𑀘𑀸𑀲𑀘𑁆𑀘𑁂. 𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀯𑀺𑀭𑀢𑀺𑀲𑀘𑁆𑀘𑁂. 𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀺𑀲𑀘𑁆𑀘𑁂. 𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀻𑀢𑀺𑀆𑀤𑀻𑀲𑀼 𑀧𑀭𑀫𑀢𑁆𑀣𑀲𑀘𑁆𑀘𑁂 𑀦𑀺𑀩𑁆𑀩𑀸𑀦𑁂 𑀘𑁂𑀯 𑀫𑀕𑁆𑀕𑁂 𑀘, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸𑀢𑀺𑀆𑀤𑀻𑀲𑀼 𑀅𑀭𑀺𑀬𑀲𑀘𑁆𑀘𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀅𑀭𑀺𑀬𑀲𑀘𑁆𑀘𑁂 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀣𑀦𑀁 𑀲𑀘𑁆𑀘𑀁, 𑀅𑀯𑀺𑀢𑀣𑀁. 𑀲𑀣𑀥𑀸𑀢𑀼 𑀅𑀯𑀺𑀢𑀣𑁂 𑀡𑁆𑀬𑁄. 𑀬𑀣𑀸 𑀳𑀺 𑀅𑀕𑁆𑀕𑀻𑀦𑀁 𑀲𑀪𑀸𑀯𑁄 𑀏𑀓𑀦𑁆𑀢𑀁 𑀉𑀡𑁆𑀳𑁄𑀬𑁂𑀯 𑀳𑁄𑀢𑀺, 𑀦 𑀲𑀻𑀢𑀮𑁄, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺 𑀲𑀪𑀸𑀯𑀁 𑀏𑀓𑀦𑁆𑀢𑀁 𑀲𑀘𑁆𑀘𑀁 𑀢𑀣𑀁 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁 𑀳𑁄𑀢𑀺. 𑀢𑀁 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀫𑀼𑀤𑀬𑀲𑀘𑁆𑀘𑀁, 𑀦𑀺𑀭𑁄𑀥𑀲𑀘𑁆𑀘𑀁, 𑀫𑀕𑁆𑀕𑀲𑀘𑁆𑀘𑀜𑁆𑀘𑀸𑀢𑀺. 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀘𑁆𑀙𑀺𑀢𑀁 𑀔𑀁 𑀢𑀼𑀘𑁆𑀙𑀦𑁆𑀢𑀺 𑀤𑀼𑀓𑁆𑀔𑀁. 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄𑀬𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀘𑁆𑀘𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 ‘‘𑀤𑀼𑀇𑀢𑀺 𑀅𑀬𑀁𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑁂 𑀤𑀺𑀲𑁆𑀲𑀢𑀺. 𑀓𑀼𑀘𑁆𑀙𑀺𑀢𑀜𑁆𑀳𑀺 𑀧𑀼𑀢𑁆𑀢𑀁 𑀤𑀼𑀧𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀔𑀁𑀲𑀤𑁆𑀤𑁄 𑀧𑀦 𑀢𑀼𑀘𑁆𑀙𑁂. 𑀢𑀼𑀘𑁆𑀙𑀜𑁆𑀳𑀺 𑀆𑀓𑀸𑀲𑀁 𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀧𑀞𑀫𑀲𑀘𑁆𑀘𑀁 𑀓𑀼𑀘𑁆𑀙𑀺𑀢𑀁. 𑀅𑀦𑁂𑀓𑀉𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑁄, 𑀢𑀼𑀘𑁆𑀙𑀁𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁄. 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀢𑁆𑀢𑀸 𑀢𑀼𑀘𑁆𑀙𑀢𑁆𑀢𑀸 𑀘 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀼𑀓𑁆𑀔𑀜𑁆𑀘 𑀢𑀁 𑀲𑀘𑁆𑀘𑀜𑁆𑀘𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀢𑁂𑀪𑀽𑀫𑀺𑀓𑀯𑀝𑁆𑀝𑀁 𑀮𑀩𑁆𑀪𑀢𑀺.

𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀤𑀼𑀓𑁆𑀔𑀨𑀮𑀁 𑀏𑀢𑁂𑀦𑀸𑀢𑀺 𑀅𑀬𑁄, 𑀮𑁄𑀪𑁄. 𑀅𑀬𑀥𑀸𑀢𑀼 𑀕𑀢𑀺𑀫𑁆𑀳𑀺 𑀅. 𑀲𑀁 𑀅𑀯𑀲𑁂𑀲 𑀧𑀘𑁆𑀘𑀬𑀲𑀁𑀬𑁄𑀕𑁂 𑀲𑀢𑀺 𑀉 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀅𑀬𑁄 𑀓𑀸𑀭𑀡𑁄𑀢𑀺 𑀲𑀫𑀼𑀤𑀬𑁄. 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄𑀬𑀁. 𑀯𑀼𑀢𑁆𑀢𑁂𑀜𑁆𑀳𑁂𑀢𑀁 𑀲𑀘𑁆𑀘 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 ‘‘𑀲𑀁𑀇𑀢𑀺 𑀘 𑀅𑀬𑀁𑀲𑀤𑁆𑀤𑁄 𑀲𑀫𑀸𑀕𑀫𑁄 𑀲𑀫𑁂𑀢𑀦𑁆𑀢𑀺𑀆𑀤𑀻𑀲𑀼 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺. 𑀉𑀇𑀢𑀺 𑀅𑀬𑀁𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑀁 𑀉𑀤𑀺𑀢𑀦𑁆𑀢𑀺𑀆𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀁. 𑀅𑀬𑀲𑀤𑁆𑀤𑁄 𑀧𑀦 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀇𑀤𑀜𑁆𑀘𑀸𑀧𑀺 𑀤𑀼𑀢𑀺𑀬𑀲𑀘𑁆𑀘𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀇𑀢𑀺 𑀤𑀼𑀓𑁆𑀔𑀲𑁆𑀲 𑀲𑀁𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀲𑀫𑀼𑀤𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑀫𑀼𑀤𑀬𑁄 𑀘 𑀲𑁄 𑀲𑀘𑁆𑀘𑀜𑁆𑀘𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀮𑁄𑀪𑀲𑀗𑁆𑀔𑀸𑀢𑀸 𑀢𑀡𑁆𑀳𑀸 𑀮𑀩𑁆𑀪𑀢𑀺 ¶ . 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀭𑁄𑀥𑀢𑀺 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀭𑁄𑀥𑁄, 𑀢𑁂𑀪𑀽𑀫𑀺𑀓𑀯𑀝𑁆𑀝𑀥𑀫𑁆𑀫𑁄. 𑀭𑁄𑀥𑀥𑀸𑀢𑀼 𑀘𑀭𑀡𑁂 𑀡. 𑀦𑀢𑁆𑀣𑀺 𑀢𑁂𑀪𑀽𑀫𑀺𑀓𑀯𑀝𑁆𑀝𑀥𑀫𑁆𑀫𑀲𑁆𑀲 𑀭𑁄𑀥𑁄 𑀘𑀭𑀡𑀁 𑀏𑀢𑁆𑀣𑀸𑀢𑀺 𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀁. 𑀅𑀣 𑀯𑀸 𑀦𑀺𑀭𑀼𑀚𑁆𑀛𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀏𑀢𑁆𑀣𑀸𑀢𑀺 𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀁. 𑀭𑀼𑀥𑀺𑀥𑀸𑀢𑀼 𑀆𑀯𑀭𑀡𑁂 𑀡. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀘𑁆𑀘𑀯𑀺𑀪𑀗𑁆𑀕𑀝𑁆𑀞 𑀓𑀣𑀸𑀬𑀁 ‘‘𑀢𑀢𑀺𑀬𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀦𑀺𑀲𑀤𑁆𑀤𑁄 𑀅𑀪𑀸𑀯𑀁. 𑀭𑁄𑀥 𑀲𑀤𑁆𑀤𑁄 𑀘𑀸𑀭𑀓𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀅𑀪𑀸𑀯𑁄 𑀏𑀢𑁆𑀣 𑀲𑀁𑀲𑀸𑀭 𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸. 𑀲𑀫𑀥𑀺 𑀕𑀢𑁂 𑀯𑀸 𑀢𑀲𑁆𑀫𑀺𑀁 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸𑀢𑀺𑀧𑀺 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺. 𑀦𑀺𑀭𑁄𑀥𑁄 𑀘 𑀲𑁄 𑀲𑀘𑁆𑀘𑀜𑁆𑀘𑀸𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀦𑀺𑀩𑁆𑀩𑀸𑀦𑀁. 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀕𑁆𑀕𑁄. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀫𑀕𑁆𑀕𑀥𑀸𑀢𑀼 𑀕𑀢𑀺𑀬𑀁 𑀅. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀘𑁆𑀘 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 ‘‘𑀘𑀢𑀼𑀢𑁆𑀣𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀏𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀪𑀽𑀢𑀢𑁆𑀢𑀸 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀫𑀕𑁆𑀕𑁄 𑀘 𑀲𑁄 𑀲𑀘𑁆𑀘𑀜𑁆𑀘𑀸𑀢𑀺 𑀫𑀕𑁆𑀕𑀲𑀘𑁆𑀘𑀁. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀮𑀩𑁆𑀪𑀢𑀺. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑀢𑁂𑀲𑀁 𑀧𑀦 𑀮𑀓𑁆𑀔𑀡𑀸𑀤𑀻𑀦𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀳𑀺 𑀩𑀸𑀥𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀦𑁆𑀢𑀸𑀧𑀦𑀭𑀲𑀁, 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀧𑀪𑀯𑀮𑀓𑁆𑀔𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀁, 𑀧𑀮𑀺𑀩𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀦𑁆𑀢𑀺𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀺𑀮𑁂𑀲𑀧𑁆𑀧𑀳𑀸𑀦 𑀓𑀭𑀡𑀭𑀲𑀁, 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺. 𑀏𑀢𑁂𑀲𑀼 𑀧𑀦 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀞𑀫𑀢𑀢𑀺𑀬𑀲𑀘𑁆𑀘𑀸𑀦𑀺 𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀤𑀼𑀢𑀺𑀬 𑀘𑀢𑀼𑀢𑁆𑀣𑀲𑀘𑁆𑀘𑀸𑀦𑀺 𑀳𑁂𑀢𑀽𑀦𑀺 𑀳𑁄𑀦𑁆𑀢𑀺. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂𑀲𑀘𑁆𑀘𑀸𑀦𑀺 𑀤𑀼𑀤𑁆𑀤 𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺. 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂𑀲𑀘𑁆𑀘𑀸𑀦𑀺 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺.

𑀅𑀧𑀺 ¶ 𑀘 𑀔𑁄 𑀧𑀦 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀕𑀫𑁆𑀪𑀻𑀭𑀜𑁆𑀘𑁂𑀯 𑀤𑀼𑀤𑁆𑀤𑀲𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑁂𑀓𑀲𑁆𑀲 𑀧𑀦 𑀲𑀘𑁆𑀘𑀲𑁆𑀲 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀲𑁄𑀴𑀲 𑀲𑀘𑁆𑀘𑀝𑁆𑀞𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀧𑀸𑀴𑀺𑀬𑀁 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀤𑀼𑀓𑁆𑀔𑀁 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀲𑀫𑀼𑀤𑀬𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀏𑀯𑀁 𑀦𑀺𑀭𑁄𑀥𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑁆𑀯𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀏𑀯𑀁 𑀫𑀕𑁆𑀕𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘’’𑀦𑁆𑀢𑀺.

𑀤𑀲𑁆𑀲𑀦𑀁 𑀤𑀲𑀁, 𑀤𑀺𑀲𑀢𑀺 𑀧𑀲𑁆𑀲𑀢𑀻𑀢𑀺 𑀯𑀸 𑀤𑀲𑀁, 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀤𑀺𑀲𑀥𑀸𑀢𑀼 𑀅𑀧𑁂𑀓𑁆𑀔𑀦𑁂 𑀅. 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁 𑀅𑀲𑁆𑀲𑀸𑀢𑀺 𑀘𑀢𑀼𑀲𑀘𑁆𑀘𑀤𑀲𑁄, 𑀚𑀺𑀦𑁄. 𑀅𑀣 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀤𑀲𑁆𑀲𑀺 𑀅𑀧𑀲𑁆𑀲𑀻𑀢𑀺 𑀘𑀢𑀼𑀲𑀘𑁆𑀘𑀤𑀲𑁄, 𑀚𑀺𑀦𑁄. 𑀲𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀘𑀢𑀼𑀫𑀕𑁆𑀕𑀜𑀸𑀡𑁂𑀦 𑀅𑀧𑁆𑀧𑀝𑀺𑀯𑀺𑀚𑁆𑀛𑀻𑀢𑀺 𑀅𑀢𑁆𑀣𑁄. 𑀢𑀁 𑀘𑀢𑀼𑀲𑀘𑁆𑀘𑀤𑀲𑀁. 𑀘𑀢𑀼𑀲𑀘𑁆𑀘𑀜𑀸𑀡𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑀅𑀦𑀼𑀩𑁄𑀥𑀜𑀸𑀡𑀜𑁆𑀘, 𑀧𑀝𑀺𑀯𑁂𑀥 𑀜𑀸𑀡𑀜𑁆𑀘𑀸𑀢𑀺. 𑀢𑀢𑁆𑀣 𑀅𑀦𑀼𑀩𑁄𑀥𑀜𑀸𑀡𑀁 𑀮𑁄𑀓𑀺𑀬𑀁 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀦𑀺𑀭𑁄𑀥𑁂 𑀫𑀕𑁆𑀕𑁂 𑀘 𑀧𑀯𑀢𑁆𑀢𑀢𑀺, 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁 𑀦𑀺𑀭𑁄𑀥𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀢𑁄 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀬𑀣𑀸𑀳 𑀬𑁄 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺 𑀧𑀤𑀫𑁆𑀧𑀺 𑀧𑀲𑁆𑀲𑀢𑀻𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀜𑀸𑀡𑀁 𑀧𑀦 𑀅𑀦𑀼𑀩𑁄𑀥𑀜𑀸𑀡𑁂𑀦 𑀯𑀺𑀦𑀸 𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀦𑀼𑀩𑁄𑀥 𑀜𑀸𑀡𑀢𑁆𑀣𑀸𑀬 𑀧𑀼𑀩𑁆𑀩𑁂 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀧𑀡𑁆𑀟𑀺𑀢𑁂𑀦 𑀲𑀫𑀸𑀭𑀫𑁆𑀪𑀺 𑀢𑀩𑁆𑀩𑀦𑁆𑀢𑀺 ¶ . 𑀦𑀦𑀼 𑀘 𑀅𑀭𑀺𑀬𑀲𑀸𑀯𑀓𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀅𑀣 𑀓𑀲𑁆𑀫𑀸 𑀚𑀺𑀦𑁄𑀬𑁂𑀯 𑀘𑀢𑀼𑀲𑀘𑁆𑀘𑀤𑀲𑀦𑁆𑀢𑀺 𑀣𑁄𑀫𑀺𑀢𑁄𑀢𑀺. 𑀪𑀕𑀯𑀸 𑀧𑀦 𑀅𑀭𑀺𑀬𑀲𑀸𑀯𑀓𑁂𑀳𑀺 𑀯𑀺𑀲𑀺𑀝𑁆𑀞𑁂𑀦 𑀅𑀦𑀜𑁆𑀜𑁄𑀧𑀤𑁂𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀸𑀬𑁂𑀯 𑀘𑀢𑀼𑀲𑀘𑁆𑀘𑀤𑀲𑀦𑁆𑀢𑀺 𑀅𑀪𑀺𑀢𑁆𑀣𑀯𑀺𑀢𑁄𑀢𑀺. 𑀢𑀢𑁆𑀣 𑀧𑀦 𑀞𑀧𑁂𑀢𑁆𑀯𑀸 𑀢𑀡𑁆𑀳𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀅𑀯𑀲𑁂𑀲𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫. 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥 𑀲𑀘𑁆𑀘𑀁 𑀦𑀸𑀫. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁 𑀦𑀸𑀫. 𑀯𑀼𑀢𑁆𑀢𑀁 𑀧𑀦 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑁋

‘‘𑀤𑀼𑀓𑁆𑀔𑀁 𑀢𑁂𑀪𑀽𑀫𑀓𑀁 𑀯𑀝𑁆𑀝𑀁, 𑀢𑀡𑁆𑀳𑀸 𑀲𑀫𑀼𑀤𑀬𑁄 𑀪𑀯𑁂;

𑀦𑀺𑀭𑁄𑀥𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑁄 𑀫𑀢𑁄’’𑀢𑀺.

𑀯𑀭𑀫𑀺𑀤𑁆𑀥𑀺𑀕𑀢𑀦𑁆𑀢𑀺 𑀯𑀭𑀁 𑀇𑀤𑁆𑀥𑀺𑀕𑀢𑀁. 𑀉𑀢𑁆𑀢𑀫𑀁 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀇𑀤𑁆𑀥𑀺𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀢𑁆𑀢𑀫𑀸𑀦𑀁 𑀇𑀤𑁆𑀥𑀻𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑀁 𑀲𑀫𑀺𑀚𑁆𑀛𑀦𑀁 𑀇𑀤𑁆𑀥𑀺, 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀧𑀚𑁆𑀚𑀢𑀻𑀢𑀺 𑀯𑀸 𑀇𑀤𑁆𑀥𑀺. 𑀇𑀤𑁆𑀥𑀺𑀯𑀺𑀥𑀜𑀸𑀡𑀜𑁆𑀘 𑀅𑀭𑀳𑀢𑁆𑀢𑀫𑀕𑁆𑀕𑁄 𑀘 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀢𑀣𑀸 𑀦𑁂𑀓𑁆𑀔𑀫𑁆𑀫𑀁 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀻𑀢𑀺 𑀘 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀻’’𑀢𑀺 𑀘. 𑀅𑀣 𑀯𑀸 𑀇𑀚𑁆𑀛𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀘 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘 𑀮𑀩𑁆𑀪𑀦𑁆𑀢𑀺. 𑀇𑀥𑀥𑀸𑀢𑀼 𑀯𑀼𑀟𑁆𑀠𑀺𑀬𑀦𑁆𑀢𑀺 𑀧𑀘𑁆𑀘𑀬𑁄. 𑀅𑀣 𑀯𑀸 𑀢𑀧𑀘𑁆𑀘𑀬𑁄 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑁄 𑀈𑀧𑀘𑁆𑀘𑀬𑁄 𑀘. 𑀇𑀤𑁆𑀥𑀺𑀁 𑀅𑀕𑀫𑀺𑀦𑁆𑀢𑀺 𑀇𑀤𑁆𑀥𑀺𑀕𑀢𑁄, 𑀚𑀺𑀦𑁄. 𑀅𑀣 𑀯𑀸 𑀕𑀘𑁆𑀙𑀢𑀺 𑀧𑀢𑀺𑀝𑁆𑀞𑀳𑀢𑀺 𑀏𑀢𑁆𑀣𑀸𑀢𑀺 𑀕𑀢𑁄, 𑀯𑀭𑀸𑀦𑀁 𑀉𑀢𑁆𑀢𑀫𑀸𑀦𑀁 𑀇𑀤𑁆𑀥𑀻𑀦𑀁 𑀕𑀢𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑁄𑀢𑀺 𑀯𑀭𑀫𑀺𑀤𑁆𑀥𑀺𑀕𑀢𑁄, 𑀚𑀺𑀦𑁄. 𑀢𑀁 𑀯𑀭𑀫𑀺𑀤𑁆𑀥𑀺𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀧𑀦 𑀅𑀭𑀺𑀬𑀲𑀸𑀯𑀓𑀸 𑀇𑀤𑁆𑀥𑀺𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺, 𑀩𑀼𑀤𑁆𑀥𑀸 𑀧𑀦 𑀯𑀺𑀲𑁂𑀲𑀢𑁄 𑀏𑀢𑀸𑀬 𑀅𑀪𑀺𑀜𑁆𑀜𑀸𑀬 𑀇𑀤𑁆𑀥𑀸 𑀲𑀫𑀺𑀤𑁆𑀥𑀸 𑀯𑀼𑀤𑁆𑀥𑀸 𑀅𑀢𑀺𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀬𑁂𑀯 𑀯𑀭𑀫𑀺𑀤𑁆𑀥𑀺𑀕𑀢𑀦𑁆𑀢𑀺 𑀅𑀪𑀺𑀢𑁆𑀣𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑀭𑀤𑁂𑀯𑀳𑀺𑀢𑀦𑁆𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀲𑀗𑁆𑀔𑀸𑀢𑀁 𑀳𑀺𑀢𑀁 𑀧𑀬𑁄𑀚𑀦𑀁 𑀥𑀸𑀭𑀡𑀁. 𑀢𑁂𑀲𑀁 𑀧𑀦 𑀅𑀢𑁆𑀣𑁄 𑀳𑁂𑀝𑁆𑀞𑀸 ¶ 𑀯𑀼𑀢𑁆𑀢𑁄𑀬𑁂𑀯. 𑀢𑀺𑀪𑀯𑀽𑀧𑀲𑀫𑀦𑁆𑀢𑀺 𑀢𑀺𑀪𑀯𑀉𑀧𑀲𑀫𑀁. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀓𑀸𑀫𑀭𑀽𑀧𑀅𑀭𑀽𑀧𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀪𑀯𑁂𑀳𑀺 𑀢𑀻𑀲𑀼 𑀪𑀯𑁂𑀲𑀼 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑁄 𑀯𑀸 𑀉𑀧𑀲𑀫𑀺𑀢𑀁 𑀦𑀺𑀩𑁆𑀩𑀼𑀢𑀁 𑀦𑀺𑀭𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺 𑀪𑀯𑁄, 𑀢𑀬𑁄 𑀪𑀯𑀸 𑀢𑀺𑀪𑀯𑀸, 𑀢𑁂𑀳𑀺 𑀉𑀧𑀲𑀫𑀺𑀢𑁆𑀣𑀸𑀢𑀺 𑀢𑀺𑀪𑀯𑀽𑀧𑀲𑀫𑁄, 𑀚𑀺𑀦𑁄. 𑀢𑀁 𑀢𑀺𑀪𑀯𑀽𑀧𑀲𑀫𑀁. 𑀪𑀕𑀯𑀢𑁄 𑀧𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀯 𑀓𑀸𑀫𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑀸𑀦𑀁 𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀦𑀺𑀭𑀯𑀲𑁂𑀲𑀁 𑀧𑀳𑀻𑀦𑀢𑁆𑀢𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁𑀬𑁂𑀯 𑀯𑀺𑀲𑁂𑀲𑁂𑀦 𑀢𑀺𑀪𑀯𑀽𑀧𑀲𑀫𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀺𑀦𑀦𑁆𑀢𑀺 𑀧𑀜𑁆𑀘𑀫𑀸𑀭𑀚𑀬𑀦𑁆𑀢𑀁 𑀩𑀼𑀤𑁆𑀥𑀁. 𑀧𑀡𑀫𑀸𑀫𑀻𑀢𑀺 𑀅𑀳𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀆𑀤𑀭𑀁 𑀯𑀦𑁆𑀤𑀸𑀫𑀻𑀢𑀺 𑀬𑁄𑀚𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀫𑀢𑀺𑀁𑀲𑀢𑀺 𑀲𑀫𑁆𑀪𑀭𑀡𑀁 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀲𑀫𑁆𑀪𑀽𑀢𑀁 𑀧𑀭𑀺𑀧𑀽𑀭𑀺𑀢𑀁, 𑀯𑀭𑀩𑁄𑀥𑀺𑀤𑀼𑀫𑁂 𑀉𑀢𑁆𑀢𑀫𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂, 𑀘𑀢𑀼𑀲𑀘𑁆𑀘𑀤𑀲𑀁 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀫𑀕𑁆𑀕𑀜𑀸𑀡𑁂𑀦 𑀧𑀲𑁆𑀲𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁, 𑀯𑀭𑀫𑀺𑀤𑁆𑀥𑀺𑀕𑀢𑀁 𑀉𑀢𑁆𑀢𑀫𑀁 𑀅𑀢𑀻𑀢 𑀩𑀼𑀤𑁆𑀥𑀸𑀦𑀁 𑀇𑀤𑁆𑀥𑀺𑀧𑀢𑁆𑀢𑀁 𑀉𑀢𑁆𑀢𑀫𑀸𑀦𑀁 𑀇𑀤𑁆𑀥𑀻𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀯𑀸, 𑀦𑀭𑀤𑁂𑀯𑀳𑀺𑀢𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀥𑀸𑀭𑀡𑀁, 𑀢𑀺𑀪𑀯𑀽𑀧𑀲𑀫𑀁 𑀓𑀸𑀫𑀭𑀽𑀧𑀅𑀭𑀽𑀧𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀪𑀯𑁂𑀳𑀺 𑀉𑀧𑀲𑀫𑀺𑀢𑀁, 𑀓𑀸𑀫𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀪𑀯𑁂𑀲𑀼 𑀧𑀼𑀦𑀩𑁆𑀪𑀯𑀸 𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑁄 𑀉𑀧𑀲𑀫𑀺𑀢𑀁 𑀦𑀺𑀩𑁆𑀩𑀼𑀢𑀁 𑀯𑀸, 𑀚𑀺𑀦𑀁 𑀧𑀜𑁆𑀘𑀫𑀸𑀭𑀚𑀬𑀦𑁆𑀢𑀁 𑀩𑀼𑀤𑁆𑀥𑀁 𑀧𑀡𑀫𑀸𑀫𑀺 𑀅𑀳𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀆𑀤𑀭𑀁 𑀯𑀦𑁆𑀤𑀸𑀫𑀻𑀢𑀺.

𑀏𑀓𑀸𑀤𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀁 𑀯𑀺𑀭𑀚𑀁,

𑀕𑀕𑀦𑀽𑀧𑀫𑀥𑀺𑀁 𑀥𑀺𑀢𑀺𑀫𑁂𑀭𑀼𑀲𑀫𑀁;

𑁧𑁨. 𑀏𑀯𑀁 ¶ 𑀏𑀓𑀸𑀤𑀲𑀫𑀕𑀸𑀣𑀸𑀬 𑀚𑀺𑀦𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀦𑁆𑀢𑁆𑀬𑀸𑀤𑀻𑀳𑀺 𑀙𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀚𑀺𑀦𑀁 𑀯𑀦𑁆𑀤𑀺𑀢𑀼 𑀓𑀸𑀫𑁄 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀘𑀢𑀽𑀳𑀺 𑀲 𑀕𑀡𑁂𑀳𑀺 𑀭𑀘𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀢𑁄𑀝𑀓𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀸𑀥𑀓𑀁 𑀧𑀦 𑀅𑀦𑀦𑁆𑀢𑀭𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀢𑀢𑁆𑀣 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀦𑁆𑀢𑀺 𑀅𑀦𑁂𑀓𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀚𑀸𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀦 𑀲𑀫𑁆𑀧𑀦𑁆𑀦𑀁. 𑀏𑀢𑁆𑀣 𑀘 𑀲𑀢𑀲𑀤𑁆𑀤𑁄 𑀅𑀦𑁂𑀓𑀲𑀗𑁆𑀔𑁆𑀬𑀸𑀯𑀸𑀘𑀓𑁄. 𑀲𑀢𑀢𑁂𑀚𑁄 𑀲𑀳𑀲𑁆𑀲𑀭𑀁 𑀲𑀻𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀢𑁂𑀦 𑀅𑀦𑁂𑀓𑁂𑀦 𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀚𑀸𑀢𑀦𑁆𑀢𑀺 𑀲𑀢𑀧𑀼𑀜𑁆𑀜𑀚𑀁, 𑀮𑀓𑁆𑀔𑀺𑀬𑀢𑀺 𑀮𑀓𑁆𑀔𑀺𑀢𑀩𑁆𑀩𑀁 𑀩𑀼𑀤𑁆𑀥𑀤𑀩𑁆𑀩𑀁 𑀏𑀢𑁂𑀳𑀻𑀢𑀺 𑀮𑀓𑁆𑀔𑀡𑀁, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀤𑀺. 𑀮𑀓𑁆𑀔𑀥𑀸𑀢𑀼 𑀤𑀲𑁆𑀲𑀦𑀗𑁆𑀓𑁂𑀲𑀼𑀬𑀼. 𑀲𑀢𑀧𑀼𑀜𑁆𑀜𑀚𑀜𑁆𑀘 𑀢𑀁 𑀮𑀓𑁆𑀔𑀡𑀜𑁆𑀘𑀸𑀢𑀺 𑀲𑀢𑀧𑀼𑀜𑁆𑀜𑀚 𑀮𑀓𑁆𑀔𑀡𑀁. 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑁄, 𑀚𑀺𑀦𑁄. 𑀢𑀁. 𑀪𑀕𑀯𑀸 𑀳𑀺 𑀅𑀦𑀦𑁆𑀢𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑁂𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀭𑁂𑀬𑁆𑀬𑀼𑀁. 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀓𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄𑀯 𑀏𑀓𑁂𑀓𑀁 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀦 𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀚𑀸𑀢𑁂𑀳𑀺 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦 𑀮𑀓𑁆𑀔𑀡𑁂 𑀳𑀺 𑀘 𑀲𑀫𑁆𑀧𑀦𑁆𑀦𑁄𑀢𑀺 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬𑀁 𑁋

‘‘𑀲𑀢𑀧𑀼𑀜𑁆𑀜 𑀮𑀓𑁆𑀔𑀡𑁄𑀢𑀺 𑀅𑀦𑀦𑁆𑀢𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑁂𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀭𑁂𑀬𑁆𑀬𑀼𑀁, 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀓𑀢𑀓𑀫𑁆𑀫𑀁 𑀩𑁄𑀥𑀺𑀲𑀢𑁆𑀢𑁄 𑀲𑀬𑀫𑁂𑀯 𑀏𑀓𑁄 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 𑀧𑀦 𑀲𑀢𑁂𑀦 𑀲𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁 𑀏𑀓𑁂𑀓𑀮𑀓𑁆𑀔𑀡𑁄𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺. 𑀧𑀸𑀣𑁂𑀬𑁆𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀢 𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀲𑀢𑁂𑀦 𑀲𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁 𑀏𑀓𑁂𑀓𑀁 𑀮𑀓𑁆𑀔𑀡𑀁 ¶ . 𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸𑀢𑀺 𑀦 𑀭𑁄𑀘𑀬𑀺𑀁𑀲𑀼. 𑀅𑀦𑀦𑁆𑀢𑁂𑀲𑀼 𑀧𑀦 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑁂𑀓𑀁 𑀓𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀭𑁂𑀬𑁆𑀬𑀼𑀁. 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀓𑀢𑀁 𑀓𑀫𑁆𑀫𑀁 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄𑀯 𑀏𑀓𑁂𑀓𑀁 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀇𑀫𑀫𑀢𑁆𑀣𑀁 𑀭𑁄𑀘𑀬𑀺𑀁𑀲𑀽’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀦 𑀉𑀧𑀭𑀺 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺.

𑀯𑀺𑀭𑀚𑀦𑁆𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑀸 𑀯𑀺𑀕𑀢𑀭𑀚𑀁. 𑀭𑀜𑁆𑀚𑀢𑀺 𑀲𑀜𑁆𑀚𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀲𑀽𑀢𑀺 𑀭𑀚𑁄, 𑀭𑀸𑀕𑀸𑀤𑀺𑀭𑀚𑁄. 𑀭𑀦𑁆𑀚𑀥𑀸𑀢𑀼 𑀭𑀸𑀕𑁂 𑀅. 𑀯𑀺𑀕𑀢𑁄 𑀭𑀚𑁄 𑀅𑀲𑁆𑀲𑀸𑀢𑀺 𑀯𑀺𑀭𑀚𑁄, 𑀚𑀺𑀦𑁄. 𑀢𑀁 𑀯𑀺𑀭𑀚𑀁. 𑀚𑀺𑀦𑁄 𑀳𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀲𑀩𑁆𑀩𑀓𑀺𑀮𑁂𑀲𑀫𑀸𑀭 𑀭𑀚𑀲𑁆𑀲 𑀚𑀬𑀺𑀢𑀢𑁆𑀢𑀸 𑀯𑀺𑀕𑀢𑀭𑀚𑁄𑀢𑀺 𑀅𑀢𑁆𑀣𑁄. 𑀕𑀕𑀦𑀽𑀧𑀫𑀥𑀺𑀦𑁆𑀢𑀺 𑀏𑀢𑁆𑀣 𑀥𑀻 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀢𑀲𑁆𑀫𑀸 𑀆𑀓𑀸𑀲𑀽𑀧𑀫𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣 𑀯𑀺𑀳𑀗𑁆𑀕𑀫𑀸𑀤𑀬𑁄𑀢𑀺 𑀕𑀕𑀦𑀁, 𑀆𑀓𑀸𑀲𑁄. 𑀕𑀫𑀼𑀥𑀸𑀢𑀼 𑀕𑀢𑀺𑀬𑀁 𑀬𑀼. 𑀫𑀓𑀸𑀭𑀲𑁆𑀲 𑀕𑁄. 𑀉𑀧𑀫𑀺𑀬𑀢𑁂 𑀉𑀧𑀫𑀸. 𑀪𑀸𑀯𑀲𑀸𑀥𑀦𑁄𑀬𑀁. 𑀉𑀧𑀧𑀼𑀩𑁆𑀩𑀫𑀸𑀥𑀸𑀢𑀼 𑀧𑀭𑀺𑀫𑀸𑀦𑁂 𑀅. 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀥𑀭𑀢𑀺 𑀚𑀸𑀦𑀸𑀢𑀻𑀢𑀺 𑀥𑀻, 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁. 𑀥𑀭𑀥𑀸𑀢𑀼 𑀜𑀸𑀡𑁂 𑀓𑁆𑀯𑀺, 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑀈𑀧𑀘𑁆𑀘𑀬𑁄 𑀘. 𑀕𑀕𑀦𑁂𑀦 𑀆𑀓𑀸𑀲𑁂𑀦 𑀬𑀼𑀢𑁆𑀢𑀸 𑀉𑀧𑀫𑀸 𑀕𑀕𑀦𑀽𑀧𑀫𑀸, 𑀢𑀁 𑀲𑀤𑀺𑀲𑀁 𑀥𑀻 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀬𑀲𑁆𑀲𑀸𑀢𑀺 𑀕𑀕𑀦𑀽𑀧𑀫𑀥𑀺, 𑀚𑀺𑀦𑁄. 𑀢𑀁 𑀕𑀕𑀦𑀽𑀧𑀫𑀥𑀺𑀁. 𑀅𑀬𑀁 𑀧𑀦 𑀅𑀦𑀦𑁆𑀢𑀸𑀤𑀺𑀕𑀼𑀡𑀳𑀻𑀦𑀢𑁆𑀢𑀸 𑀥𑀫𑁆𑀫𑀳𑀻𑀦𑁄𑀧𑀫𑀸 𑀦𑀸𑀫. 𑀯𑀼𑀢𑁆𑀢𑀜𑁆𑀳𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 ‘‘𑀥𑀫𑁆𑀫𑀳𑀻𑀦𑀸𑀫𑀼𑀔𑀫𑁆𑀪𑁄𑀚, 𑀲𑀤𑀺𑀲𑀁 𑀫𑀼𑀦𑀺𑀦𑁄 𑀇𑀢𑀻’’𑀢𑀺. 𑀬𑀣𑀸 𑀳𑀺 𑀆𑀓𑀸𑀲𑁄 𑀅𑀦𑀦𑁆𑀢𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀲𑁄 𑀅𑀦𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀢𑁆𑀣𑀭𑀢𑀺, 𑀏𑀯𑀁 𑀪𑀕𑀯𑀢𑁄 𑀅𑀦𑀦𑁆𑀢𑀁 𑀩𑀼𑀤𑁆𑀥𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀅𑀦𑀦𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘 𑀜𑀸𑀡𑀁 𑀅𑀦𑀦𑁆𑀢𑀁 𑀳𑀼𑀢𑁆𑀯𑀸 𑀯𑀺𑀢𑁆𑀣𑀭𑀢𑀺. 𑀢𑀲𑁆𑀫𑀸 𑀕𑀕𑀦𑀽𑀧𑀫𑀥𑀺𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀥𑀺𑀢𑀺𑀫𑁂𑀭𑀼𑀲𑀫𑀦𑁆𑀢𑀺 𑀏𑀢𑁆𑀣 𑀥𑀺𑀢𑀺 𑀯𑀼𑀘𑁆𑀘𑀢𑀺 𑀲𑀫𑀸𑀥𑀺. 𑀲𑀺𑀦𑁂𑀭𑀼𑀧𑀩𑁆𑀩𑀢 𑀲𑀤𑀺𑀲𑀁 𑀅𑀘𑀮𑀲𑀫𑀸𑀥𑀺𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀥𑀺𑀬𑀢𑀺 𑀞𑀧𑀺𑀬𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 ¶ 𑀏𑀓𑀸𑀭𑀫𑁆𑀫𑀡𑁂 𑀏𑀢𑁂𑀦𑀸𑀢𑀺 𑀥𑀺𑀢𑀺, 𑀪𑀕𑀯𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀛𑀸𑀦𑀲𑀫𑀸𑀥𑀺. 𑀥𑀺𑀥𑀸𑀢𑀼 𑀥𑀸𑀭𑀡𑁂𑀢𑀺. 𑀭𑀁𑀲𑀺𑀬𑀸 𑀅𑀦𑁆𑀥𑀓𑀸𑀭𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀭𑀼, 𑀧𑀩𑁆𑀩𑀢𑀭𑀸𑀚𑀸. 𑀫𑀻𑀥𑀸𑀢𑀼 𑀳𑀺𑀁𑀲𑀸𑀬𑀁 𑀭𑀼𑀧𑀘𑁆𑀘𑀬𑁄. 𑀇𑀫𑀁 𑀯𑀘𑀦𑀢𑁆𑀣𑀜𑁆𑀳𑀺 𑀲𑀺𑀦𑁂𑀭𑀼𑀲𑁆𑀲 𑀧𑀸𑀘𑀻𑀦𑀧𑀲𑁆𑀲𑀁 𑀭𑀚𑀢𑀫𑀬𑀁, 𑀤𑀓𑁆𑀔𑀺𑀡𑀧𑀲𑁆𑀲𑀁 𑀫𑀡𑀺𑀫𑀬𑀁, 𑀧𑀘𑁆𑀙𑀺𑀫𑀧𑀲𑁆𑀲𑀁 𑀨𑀮𑁆𑀮𑀺𑀓𑀫𑀬𑀁, 𑀉𑀢𑁆𑀢𑀭𑀧𑀲𑁆𑀲𑀁 𑀲𑀼𑀯𑀡𑁆𑀡𑀫𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑀺𑀦𑀸𑀢𑀺 𑀳𑀺𑀁𑀲𑀢𑀺 𑀲𑀩𑁆𑀩𑁂 𑀧𑀩𑁆𑀩𑀢𑁂 𑀅𑀢𑁆𑀢𑀦𑁄 𑀉𑀘𑁆𑀘𑀢𑀭𑀝𑁆𑀞𑁂𑀦𑀸𑀢𑀺 𑀫𑁂𑀭𑀼, 𑀫𑁂𑀭𑀼𑀦𑀸 𑀲𑀫𑁄 𑀥𑀺𑀢𑀺 𑀲𑀫𑀸𑀥𑀺 𑀬𑀲𑁆𑀲𑀸𑀢𑀺 𑀥𑀺𑀢𑀺𑀫𑁂𑀭𑀼𑀲𑀫𑁄, 𑀚𑀺𑀦𑁄. 𑀢𑀁 𑀥𑀺𑀢𑀺𑀫𑁂𑀭𑀼 𑀲𑀫𑀁. 𑀬𑀣𑀸 𑀳𑀺 𑀫𑁂𑀭𑀼𑀭𑀸𑀚𑀸 𑀅𑀝𑁆𑀞𑀳𑀺 𑀤𑀺𑀲𑀸𑀳𑀺 𑀆𑀕𑀢𑁂𑀳𑀺 𑀯𑀸𑀢𑁂𑀳𑀺 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺, 𑀏𑀯𑀁 𑀚𑀺𑀦𑁄 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑁂 𑀧𑀚𑀳𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀸𑀢𑁂𑀳𑀺 𑀘 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀻𑀢𑀺 𑀥𑀺𑀢𑀺𑀫𑁂𑀭𑀼𑀲𑀫𑀦𑁆𑀢𑀺 𑀣𑁄𑀫𑁂𑀢𑀺.

𑀚𑀮𑀚𑀽𑀧𑀫𑀲𑀻𑀢𑀮𑀲𑀻𑀮𑀬𑀼𑀢𑀦𑁆𑀢𑀺 𑀉𑀤𑀓𑀚𑀸𑀢𑀧𑁆𑀧𑀤𑀼𑀫𑀲𑀤𑀺𑀲𑁂𑀦 𑀅𑀢𑀺𑀲𑀻𑀢𑀮𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀻𑀮𑁂𑀦 𑀲𑀁𑀬𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀧𑀤𑀸𑀦 𑀧𑀸𑀴𑀺𑀬𑀁 ‘‘𑀲𑀻𑀮𑀁 𑀢𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬’’𑀦𑁆𑀢𑀺. 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 ‘‘𑀪𑀕𑀯𑀢𑁄 𑀧𑀦 𑀲𑀻𑀮𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁂𑀯𑀸’’𑀢𑀺. 𑀚𑀮𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀮𑀁, 𑀉𑀤𑀓𑀁. 𑀚𑀮𑀥𑀸𑀢𑀼 𑀤𑀺𑀢𑁆𑀢𑀺𑀬𑀁 𑀅. 𑀚𑀮𑁂 𑀉𑀤𑀓𑁂 𑀚𑀸𑀢𑀁 𑀚𑀮𑀚𑀁, 𑀧𑀤𑀼𑀫𑀁. 𑀚𑀮𑀚𑁂𑀦 𑀧𑀤𑀼𑀫𑁂𑀦 𑀉𑀧𑀫𑀁 𑀲𑀤𑀺𑀲𑀦𑁆𑀢𑀺 𑀚𑀮𑀚𑀽𑀧𑀫𑀁, 𑀲𑀻𑀮𑀁. 𑀲𑀼𑀔𑀢𑁆𑀣𑀺𑀓𑁂𑀳𑀺 𑀲𑁂𑀯𑀺𑀬𑀢𑀻𑀢𑀺 𑀲𑀻𑀢𑀮𑀁, 𑀲𑀻𑀮𑀁. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀢𑀮𑀧𑀘𑁆𑀘𑀬𑁄. 𑀅𑀣 𑀯𑀸 𑀲𑀻𑀢𑀕𑀼𑀡𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀢𑀮𑀁, 𑀲𑀻𑀮𑀁. 𑀲𑀻𑀢𑀲𑀤𑁆𑀤𑀽𑀧𑀧𑀤 𑀮𑀸𑀥𑀸𑀢𑀼 𑀕𑀳𑀡𑁂 𑀓𑁆𑀯𑀺. 𑀉𑀤𑀓𑁂 𑀧𑀦 𑀚𑀸𑀢𑀁 𑀧𑀤𑀼𑀫𑀁 𑀉𑀤𑀓𑁂𑀦 𑀉𑀡𑁆𑀳𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀻𑀢𑀮𑀁 𑀯𑀺𑀬. 𑀲𑀻𑀮𑀁 𑀧𑀦 𑀩𑀼𑀤𑁆𑀥𑀲𑁆𑀲 𑀓𑀺𑀮𑁂𑀲𑀢𑀸 𑀧𑀦𑀲𑁆𑀲 𑀲𑀫𑁂𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀲𑀻𑀢𑀮𑀁 𑀳𑁄𑀢𑀺. 𑀲𑀼𑀭𑀓𑁆𑀔𑀺𑀢𑀜𑁆𑀳𑀺 𑀯𑀺𑀲𑀼𑀤𑁆𑀥𑀁 𑀲𑀻𑀮𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑀁 𑀉𑀧𑀲𑀫𑁂𑀢𑀺 𑀦 𑀳𑀭𑀺𑀢𑀘𑀦𑁆𑀤𑀦𑀁 𑀫𑀼𑀢𑁆𑀢𑀸𑀳𑀸𑀭𑁄 𑀫𑀡𑀺 𑀉𑀤𑀓𑀁 𑀯𑀸𑀢𑁄 𑀘𑀦𑁆𑀤𑀓𑀺𑀭𑀡𑁄 𑀘. 𑀢𑀲𑁆𑀫𑀸 𑀲𑀻𑀮𑀫𑁂𑀯 𑀲𑀻𑀢𑀮𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀻𑀢𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑁋

‘‘𑀦 ¶ 𑀢𑀁 𑀲𑀚𑀮𑀤𑀸 𑀯𑀸𑀢𑀸, 𑀦 𑀘𑀸𑀧𑀺 𑀳𑀭𑀺𑀘𑀦𑁆𑀤𑀦𑀁;

𑀦𑁂𑀯 𑀳𑀸𑀭𑀸 𑀦 𑀫𑀡𑀬𑁄, 𑀦 𑀘𑀦𑁆𑀤𑀓𑀺𑀭𑀡𑀗𑁆𑀓𑀼𑀭𑀸;

𑀲𑀫𑀬𑀦𑁆𑀢𑀻𑀥 𑀲𑀢𑁆𑀢𑀸𑀦𑀁, 𑀧𑀭𑀺𑀴𑀸𑀳𑀁 𑀲𑀼𑀭𑀓𑁆𑀔𑀺𑀢𑀁;

𑀬𑀁 𑀲𑀫𑁂𑀢𑀺𑀤𑀁 𑀅𑀭𑀺𑀬𑀁, 𑀲𑀻𑀮𑀁 𑀅𑀘𑁆𑀘𑀦𑁆𑀢𑀲𑀻𑀢𑀮’’𑀦𑁆𑀢𑀺.

𑀅𑀬𑀁 𑀧𑀦 𑀢𑀲𑁆𑀲 𑀕𑀸𑀣𑀸𑀤𑁆𑀯𑀬𑀲𑁆𑀲𑀢𑁆𑀣𑁄. 𑀲𑀼𑀭𑀓𑁆𑀔𑀺𑀢𑀁 𑀲𑀼𑀝𑁆𑀞𑀼𑀭𑀓𑁆𑀔𑀺𑀢𑀁 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀅𑀘𑁆𑀘𑀦𑁆𑀢𑀲𑀻𑀢𑀮𑀁 𑀇𑀤𑀁 𑀲𑀻𑀮𑀁 𑀇𑀥𑀮𑁄𑀓𑁂 𑀲𑀢𑁆𑀢𑀸𑀦𑀁 𑀬𑀁 𑀧𑀭𑀺𑀴𑀸𑀳𑀁 𑀲𑀫𑁂𑀢𑀺, 𑀢𑀁 𑀧𑀭𑀺𑀴𑀸𑀳𑀁 𑀲𑀚𑀮𑀤𑀸 𑀉𑀤𑀓𑀤𑀤𑁂𑀦 𑀫𑁂𑀖𑁂𑀦 𑀲𑀳 𑀧𑀯𑀢𑁆𑀢𑀸 𑀯𑀸𑀢𑀸 𑀲𑀻𑀢𑀯𑀸𑀢𑀸 𑀦 𑀲𑀫𑀬𑀦𑁆𑀢𑀺 𑀳𑀭𑀺𑀢𑀘𑀦𑁆𑀤𑀦𑀜𑁆𑀘𑀸𑀧𑀺 𑀦 𑀲𑀫𑀬𑀢𑀺. 𑀳𑀸𑀭𑀸 𑀫𑀼𑀢𑁆𑀢𑀸𑀳𑀸𑀭𑀸 𑀦𑁂𑀯 𑀲𑀫𑀬𑀦𑁆𑀢𑀺. 𑀫𑀡𑀬𑁄 𑀯𑁂𑀴𑀼𑀭𑀺𑀬𑀸𑀤𑀺𑀫𑀡𑀺𑀬𑁄 𑀦 𑀲𑀫𑀬𑀦𑁆𑀢𑀺. 𑀘𑀦𑁆𑀤𑀓𑀺𑀭𑀡𑀗𑁆𑀓𑀼𑀭𑀸 𑀘𑀦𑁆𑀤𑀲𑁆𑀲 𑀭𑀁𑀲𑀺𑀅𑀗𑁆𑀓𑀼𑀭𑀸 𑀦 𑀲𑀫𑀬𑀦𑁆𑀢𑀻𑀢𑀺. 𑀲𑀻𑀮𑀢𑀺 𑀲𑀫𑀸𑀥𑀺𑀬𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀦 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀲𑀻𑀮𑀁. 𑀲𑀻𑀮𑀥𑀸𑀢𑀼 𑀲𑀫𑀸𑀥𑀺𑀫𑁆𑀳𑀺 𑀅. 𑀅𑀣 𑀯𑀸 𑀲𑀻𑀮𑀦𑁆𑀢𑀺 𑀲𑀫𑀸𑀤𑀳𑀦𑁆𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀻𑀮𑀁, 𑀲𑀻𑀮𑁂𑀦𑁆𑀢𑀺 𑀯𑀸 𑀏𑀢𑁂𑀦 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀦𑁆𑀢𑀺 𑀆𑀪𑀼𑀲𑁄 𑀥𑀸𑀭𑁂𑀦𑁆𑀢𑀺 𑀲𑀸𑀥𑀯𑁄𑀢𑀺 𑀲𑀻𑀮𑀁, 𑀘𑁂𑀢𑀦𑀸𑀥𑀫𑁆𑀫𑁄, 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸 𑀮𑀩𑁆𑀪𑀢𑀺. 𑀲𑀻𑀮𑀥𑀸𑀢𑀼 𑀉𑀧𑀥𑀸𑀭𑀡𑁂 𑀅. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑁆𑀞𑀓𑀣𑀸𑀬𑀁 ‘‘𑀓𑁂𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀓𑀺𑀫𑀺𑀤𑀁 𑀲𑀻𑀮𑀁 𑀦𑀸𑀫, 𑀲𑀫𑀸𑀥𑀸𑀦𑀁 𑀯𑀸, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀸𑀭𑀡𑀁 𑀯𑀸, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄’’𑀢𑀺. 𑀚𑀮𑀚𑀽𑀧𑀫𑁂𑀦 𑀧𑀤𑀼𑀫𑀲𑀤𑀺𑀲𑁂𑀦 𑀲𑀻𑀢𑀮𑁂𑀦 𑀅𑀘𑁆𑀘𑀦𑁆𑀢𑀲𑀻𑀢𑀮𑁂𑀦 𑀲𑀻𑀮𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀻𑀮𑁂𑀦 𑀬𑀼𑀢𑁆𑀢𑁄𑀢𑀺 𑀚𑀮𑀚𑀽𑀧𑀫𑀲𑀻𑀢𑀮𑀲𑀻𑀮𑀬𑀼𑀢𑁄, 𑀚𑀺𑀦𑁄. 𑀢𑀁 𑀚𑀮𑀚𑀽𑀧𑀫𑀲𑀻𑀢𑀮𑀲𑀻𑀮𑀬𑀼𑀢𑀁. 𑀬𑀣𑀸 𑀳𑀺 𑀉𑀤𑀓𑁂 𑀚𑀸𑀢𑀁 𑀧𑀤𑀼𑀫𑀁 𑀚𑀮𑁂𑀦 𑀲𑀻𑀢𑀮𑀁 𑀳𑁄𑀢𑀺, 𑀏𑀯𑀁 𑀪𑀕𑀯𑀢𑁄 𑀫𑀕𑁆𑀕𑀲𑀻𑀮𑁂𑀦 𑀓𑀺𑀮𑁂𑀲𑀼𑀧𑀢𑀸𑀧𑀦𑀲𑁆𑀲 𑀧𑀳𑀻𑀦𑀢𑁆𑀢𑀸 𑀢𑀁 𑀲𑀻𑀢𑀮𑀁 𑀅𑀘𑁆𑀘𑀦𑁆𑀢𑀲𑀻𑀢𑀮𑀁. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀚𑀮𑀚𑀽𑀧𑀫𑀲𑀻𑀢𑀮𑀲𑀻𑀮 𑀬𑀼𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀣𑀯𑀻𑀲𑀳𑀦𑀦𑁆𑀢𑀺 𑀧𑀣𑀯𑀻 𑀯𑀺𑀬 𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑀁 𑀔𑀦𑁆𑀢𑀺𑀯𑀦𑁆𑀢𑀁 𑀯𑀸. 𑀧𑀣𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀢𑀭𑀼𑀧𑀩𑁆𑀩𑀢𑀸𑀤𑀬𑁄𑀢𑀺 𑀧𑀣𑀯𑀻, 𑀪𑀽𑀫𑀺. 𑀧𑀣𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 ¶ 𑀯𑀻𑀧𑀘𑁆𑀘𑀬𑁄. 𑀅𑀣 𑀯𑀸 𑀧𑀼𑀣𑀼 𑀳𑀼𑀢𑁆𑀯𑀸 𑀚𑀸𑀢𑀦𑁆𑀢𑀺 𑀧𑀣𑀯𑀻. 𑀚𑀸𑀢𑀢𑀤𑁆𑀥𑀺𑀢𑀢𑁆𑀣𑁂 𑀯𑀻𑀧𑀘𑁆𑀘𑀬𑁄. 𑀲𑀳𑀬𑀢𑁂 𑀔𑀫𑀺𑀬𑀢𑁂 𑀲𑀳𑀦𑀁, 𑀲𑀳𑀢𑀺 𑀔𑀫𑀢𑀻𑀢𑀺 𑀯𑀸 𑀲𑀳𑀦𑀁, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑀳𑀥𑀸𑀢𑀼 𑀔𑀦𑁆𑀢𑀺𑀬𑀁 𑀬𑀼. 𑀧𑀣𑀯𑀻 𑀯𑀺𑀬 𑀲𑀳𑀦𑀁 𑀔𑀫𑀦𑀁 𑀬𑀲𑁆𑀲 𑀲𑁄𑀢𑀺 𑀧𑀣𑀯𑀻𑀲𑀳𑀦𑁄, 𑀚𑀺𑀦𑁄. 𑀢𑀁 𑀧𑀣𑀯𑀻𑀲𑀳𑀦𑀁. 𑀬𑀣𑀸 𑀳𑀺 𑀧𑀣𑀯𑀻 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀓𑁆𑀔𑀺𑀢𑁆𑀢𑀁 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀲𑀩𑁆𑀩𑀁 𑀲𑀳𑀢𑀺, 𑀦 𑀧𑀝𑀺𑀖𑀸𑀦𑀼𑀦𑀬𑀁 𑀓𑀭𑁄𑀢𑀺, 𑀏𑀯𑀁 𑀚𑀺𑀦𑁄 𑀇𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀺 𑀲𑀩𑁆𑀩𑀁 𑀲𑀳𑀢𑀺, 𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀦𑀬𑀁 𑀓𑀭𑁄𑀢𑀻𑀢𑀺 𑀧𑀣𑀯𑀻𑀲𑀳𑀦𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑀧𑀸𑀴𑀺𑀬𑀁 𑁋

‘‘𑀮𑀸𑀪𑀸𑀮𑀸𑀪𑁂 𑀦 𑀲𑀚𑁆𑀚𑀦𑁆𑀢𑀺, 𑀲𑀫𑁆𑀫𑀸𑀦𑀦𑀯𑀺𑀫𑀸𑀦𑀦𑁂;

𑀧𑀣𑀯𑀻𑀲𑀤𑀺𑀲𑀸 𑀩𑀼𑀤𑁆𑀥𑀸, 𑀢𑀲𑁆𑀫𑀸 𑀢𑁂 𑀦 𑀯𑀺𑀭𑀸𑀥𑀺𑀬𑀸’’𑀢𑀺.

𑀅𑀳𑀁 𑀚𑀺𑀦𑀁 𑀧𑀡𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀁 𑀅𑀦𑁂𑀓𑀧𑀸𑀭𑀫𑀻𑀧𑀼𑀜𑁆𑀜𑀢𑁂𑀚𑁂𑀦 𑀚𑀸𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀦 𑀲𑀫𑁆𑀧𑀦𑁆𑀦𑀁, 𑀯𑀺𑀭𑀚𑀁 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑀸 𑀯𑀺𑀕𑀢𑀭𑀚𑀁, 𑀕𑀕𑀦𑀽𑀧𑀫𑀥𑀺𑀁 𑀆𑀓𑀸𑀲𑀽𑀧𑀫𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀦𑁆𑀢𑀁, 𑀥𑀺𑀢𑀺𑀫𑁂𑀭𑀼𑀲𑀫𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑀤𑀺𑀲𑀁 𑀅𑀘𑀮𑀲𑀫𑀸𑀥𑀺𑀯𑀦𑁆𑀢𑀁, 𑀚𑀮𑀚𑀽𑀧𑀫𑀲𑀻𑀢𑀮 𑀲𑀻𑀮𑀬𑀼𑀢𑀁. 𑀉𑀤𑀓𑀚𑀸𑀢𑀧𑁆𑀧𑀤𑀼𑀫𑀲𑀤𑀺𑀲𑁂𑀦 𑀅𑀘𑁆𑀘𑀦𑁆𑀢𑀅𑀢𑀺𑀲𑀻𑀢𑀮𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀻𑀮𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀧𑀣𑀯𑀻𑀲𑀳𑀦𑀁 𑀧𑀣𑀯𑀻 𑀯𑀺𑀬 𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑀁, 𑀔𑀦𑁆𑀢𑀺𑀯𑀦𑁆𑀢𑀁 𑀯𑀸, 𑀚𑀺𑀦𑀁 𑀧𑀜𑁆𑀘𑀫𑀸𑀭𑀯𑀺𑀚𑀬𑀁 𑀩𑀼𑀤𑁆𑀥𑀁 𑀅𑀳𑀁 𑀲𑀓𑁆𑀓𑀘𑁆𑀘𑀁 𑀧𑀡𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀤𑁆𑀯𑀸𑀤𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀬𑁄 𑀩𑀼𑀤𑁆𑀥𑁄 𑀲𑀼𑀫𑀢𑀺 𑀤𑀺𑀯𑁂 𑀤𑀺𑀯𑀸𑀓𑀭𑁄𑀯,

𑀲𑁄𑀪𑀦𑁆𑀢𑁄 𑀭𑀢𑀺𑀚𑀦𑀦𑁂 𑀲𑀺𑀮𑀸𑀲𑀦𑀫𑁆𑀳𑀺;

𑀆𑀲𑀻𑀦𑁄 𑀲𑀺𑀯𑀲𑀼𑀔𑀤𑀁 𑀅𑀤𑁂𑀲𑀺 𑀥𑀫𑁆𑀫𑀁,

𑀤𑁂𑀯𑀸𑀦𑀁 𑀢𑀫𑀲𑀤𑀺𑀲𑀁 𑀦𑀫𑀸𑀫𑀺 𑀦𑀺𑀘𑁆𑀘𑀁.

𑁧𑁩. 𑀏𑀯𑀁 ¶ 𑀤𑁆𑀯𑀸𑀤𑀲𑀫𑀕𑀸𑀣𑀸𑀬 𑀚𑀺𑀦𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀢𑀸𑀯𑀢𑀺𑀁𑀲𑀧𑀼𑀭𑁂 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑀓 𑀕𑀼𑀡𑁂𑀦 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀬𑁄 𑀩𑀼𑀤𑁆𑀥𑁄 𑀲𑀼𑀫𑀢𑀺𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀫 𑀦 𑀚 𑀭 𑀕𑀡𑁂𑀳𑀺 𑀘 𑀏𑀓𑀕𑀭𑀼𑀦𑀸 𑀘 𑀢𑀻𑀳𑀺 𑀬𑀢𑀻𑀳𑀺 𑀘 𑀤𑀲𑀳𑀺 𑀬𑀢𑀻𑀳𑀺 𑀘 𑀭𑀘𑀺𑀢𑀢𑁆𑀢𑀸 𑀢𑁂𑀭𑀲𑀓𑁆𑀔𑀭 𑀲𑀁𑀬𑀼𑀢𑁆𑀢𑀸 𑀧𑀳𑀲𑁆𑀲𑀺𑀡𑀻𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀼𑀢𑁆𑀢𑁄𑀤𑀬𑁂 ‘‘𑀫𑁆𑀦𑀸 𑀚𑀭𑀸 𑀕𑁄 𑀢𑀺𑀤𑀲𑀬𑀢𑀺𑀧𑁆𑀧𑀳𑀲𑁆𑀲𑀺𑀡𑀻 𑀲𑀸’’𑀢𑀺.

𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀫𑁆𑀦𑀸 𑀫𑀕𑀡 𑀦𑀕𑀡𑀸 𑀘 𑀚𑀭𑀸 𑀚 𑀕𑀡 𑀭𑀕𑀡𑀸 𑀘 𑀕𑁄 𑀕𑀭𑀼 𑀘 𑀢𑀺𑀤𑀲𑀬𑀢𑀺 𑀢𑀺𑀬𑀢𑀺 𑀘 𑀤𑀲𑀬𑀢𑀺 𑀘 𑀘𑁂 𑀲𑀺𑀬𑀸, 𑀲𑀸 𑀕𑀸𑀣𑀸 𑀧𑀳𑀲𑁆𑀲𑀺𑀡𑀻𑀕𑀸𑀣𑀸 𑀦𑀸𑀫𑀸𑀢𑀺. 𑀢𑀢𑁆𑀣 𑀲𑀼𑀫𑀢𑀺 𑀬𑁄 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀤𑁂𑀯𑀸𑀦𑀁 𑀅𑀤𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀢𑀺 𑀅𑀦𑀺𑀬𑀫𑀯𑀸𑀘𑀓𑀲𑀩𑁆𑀩𑀦𑀸𑀫𑀧𑀤𑀁. 𑀢𑀲𑁆𑀲 𑀯𑀘𑀦𑀢𑁆𑀣𑁄 𑀦 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀤𑁆𑀤𑀯𑀺𑀤𑀽𑀳𑀺 𑁋

‘‘𑀭𑀼𑀴𑁆𑀳𑀻𑀔𑁆𑀬𑀸𑀢𑀁 𑀦𑀺𑀧𑀸𑀢𑀜𑁆𑀘𑀼, 𑀧𑀲𑀕𑁆𑀕𑀸𑀮𑀧𑀦𑀁 𑀢𑀣𑀸;

𑀲𑀩𑁆𑀩𑀦𑀸𑀫𑀦𑁆𑀢𑀺 𑀏𑀢𑁂𑀲𑀼, 𑀦 𑀓𑀢𑁄 𑀯𑀺𑀕𑁆𑀕𑀳𑁄 𑀙𑀲𑀽’’𑀢𑀺.

𑀅𑀣 𑀯𑀸 𑀲𑀩𑁆𑀩𑀦𑀸𑀫𑀪𑀸𑀯𑀁 𑀬𑀸𑀢𑀻𑀢𑀺 𑀬𑁄, 𑀅𑀦𑀺𑀬𑀫𑀯𑀸𑀘𑀓 𑀪𑀸𑀯𑀁 𑀬𑀸𑀢𑀻𑀢𑀺 𑀯𑀸 𑀬𑁄. 𑀲𑀩𑁆𑀩𑀦𑀸𑀫𑀪𑀸𑀯𑁂𑀦 𑀬𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀬𑁄. 𑀅𑀦𑀺𑀬𑀫𑀯𑀸𑀘𑀓𑀪𑀸𑀯𑁂𑀦 𑀬𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀬𑁄. 𑀲𑀩𑁆𑀩𑀦𑀸𑀫𑀪𑀸𑀯𑁂𑀦 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄𑀢𑀺 𑀯𑀸 𑀬𑁄, 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄 𑀏𑀢𑁂𑀦 𑀅𑀦𑀺𑀬𑀫𑀢𑁆𑀣𑁄𑀢𑀺 𑀯𑀸 𑀬𑁄. 𑀲𑀩𑁆𑀩𑀦𑀸𑀫𑀲𑀗𑁆𑀔𑀸𑀢𑀁 𑀬𑀇𑀢𑀺𑀧𑀤𑀁 𑀮𑀩𑁆𑀪𑀢𑀺. 𑀬𑁄 𑀬𑀸𑀤𑀺 𑀲𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑁄𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑁄, 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁄 𑀯𑀸. 𑀢𑀲𑁆𑀲 𑀧𑀦 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀼𑀫𑀢𑀻𑀢𑀺 𑀲𑀼𑀦𑁆𑀤𑀭𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀸𑀢𑁄, 𑀤𑁂𑀲𑀦𑀸𑀜𑀸𑀡𑀯𑀸𑀢𑁄 𑀯𑀸. 𑀅𑀤𑁂𑀲𑀺 𑀥𑀫𑁆𑀫𑀁 𑀤𑁂𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀳𑀺 𑀇𑀥 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁 𑀲𑀼𑀫𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀫𑀦𑀢𑀺 𑀚𑀸𑀦𑀸𑀢𑀺 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀁 𑀯𑀸𑀢𑀺 𑀫𑀢𑀺. 𑀫𑀦𑀥𑀸𑀢𑀼 𑀜𑀸𑀡𑁂𑀢𑀺. 𑀲𑀼𑀦𑁆𑀤𑀭𑀸 𑀫𑀢𑀺 𑀲𑀼𑀫𑀢𑀺, 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀚𑀸𑀦𑀦𑀲𑀫𑀢𑁆𑀣𑀁 𑀢𑁂𑀲𑀁 𑀤𑁂𑀲𑁂 𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦𑀲𑀫𑀢𑁆𑀣𑀁 ¶ 𑀩𑁄𑀥𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀆𑀲𑀬𑀸𑀥𑀺 𑀫𑀼𑀢𑁆𑀢𑀺𑀬𑀸𑀤𑀺𑀯𑀺𑀪𑀸𑀯𑀦𑀲𑀫𑀢𑁆𑀣𑀜𑁆𑀘𑀸𑀢𑀺 𑀢𑀺𑀲𑀫𑀢𑁆𑀣𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀮𑀩𑁆𑀪𑀢𑀺. 𑀲𑀼𑀫𑀢𑀻𑀢𑀺 𑀇𑀫𑀺𑀦𑀸 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁂𑀯 𑀅𑀪𑀺𑀥𑀫𑁆𑀫𑀓𑀣𑀸𑀬 𑀲𑀫𑀼𑀝𑁆𑀞𑀸𑀦𑀪𑀸𑀯𑁂 𑀲𑀫𑀢𑁆𑀣𑀁. 𑀦𑀸𑀜𑁆𑀜𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀼𑀦𑁆𑀤𑀭𑀸 𑀫𑀢𑀺 𑀅𑀲𑁆𑀲 𑀅𑀲𑁆𑀫𑀺𑀁 𑀯𑀸 𑀅𑀢𑁆𑀣𑀻𑀢𑀺 𑀲𑀼𑀫𑀢𑀺, 𑀩𑀼𑀤𑁆𑀥𑁄. 𑀲𑀫𑀸𑀲𑀦𑁆𑀢 𑀢𑀤𑁆𑀥𑀺𑀢𑀸𑀬𑀁. 𑀢𑀤𑀲𑁆𑀲𑀢𑁆𑀣𑀻𑀢𑀺𑀯𑀻 𑀘𑀸𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀅𑀧𑀘𑁆𑀘𑀬𑁄. 𑀬𑀣𑀸 𑀧𑀻𑀢𑀺𑀲𑀼𑀔𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀧𑀸𑀭𑀸𑀚𑀺𑀓𑀡𑁆𑀟𑀝𑁆𑀞𑀓𑀣𑀸𑀬𑀁 ‘‘𑀅𑀬𑀜𑁆𑀘 𑀧𑀻𑀢𑀺 𑀇𑀤𑀜𑁆𑀘 𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀤𑀺𑀯𑁂𑀢𑀺 𑀤𑀺𑀯𑀲𑁂. 𑀲𑀽𑀭𑀺𑀬𑁄𑀪𑀸𑀲𑁂𑀦 𑀤𑀺𑀩𑁆𑀩𑀢𑀺 𑀏𑀢𑁆𑀣𑀸𑀢𑀺 𑀤𑀺𑀯𑁄. 𑀤𑀺𑀯𑀼𑀥𑀸𑀢𑀼 𑀚𑀼𑀢𑀺𑀬𑀁 𑀅. 𑀢𑀲𑁆𑀫𑀺𑀁 𑀤𑀺𑀯𑁂. 𑀤𑀺𑀯𑀸 𑀓𑀭𑁄𑀯𑀸𑀢𑀺 𑀲𑀽𑀭𑀺𑀬𑁄 𑀇𑀯. 𑀤𑀺𑀯𑀸𑀤𑀺𑀦𑀁 𑀓𑀭𑁄𑀢𑀻𑀢𑀺 𑀤𑀺𑀯𑀸𑀓𑀭𑁄, 𑀲𑀽𑀭𑀺𑀬𑁄. 𑀤𑀺𑀯𑀸𑀲𑀤𑁆𑀤𑀽𑀧 𑀧𑀤 𑀓𑀭𑀥𑀸𑀢𑀼 𑀓𑀭𑀡𑁂 𑀅. 𑀅𑀣 𑀯𑀸 𑀤𑀺𑀯𑀸 𑀤𑀺𑀯𑀲𑁂 𑀓𑀭𑁄 𑀭𑀁𑀲𑀺 𑀅𑀲𑁆𑀲𑀸𑀢𑀺 𑀤𑀺𑀯𑀸𑀓𑀭𑁄. 𑀓𑀭𑀲𑀤𑁆𑀤𑁄 𑀳𑀺 𑀭𑀁𑀲𑀺𑀯𑀸𑀘𑀓𑁄. 𑀲𑁄𑀪𑀦𑁆𑀢𑁄𑀢𑀺 𑀯𑀺𑀭𑁄𑀘𑀫𑀸𑀦𑁄 𑀳𑀼𑀢𑁆𑀯𑀸. 𑀲𑀼𑀪𑀢𑀺 𑀯𑀺𑀭𑁄𑀘𑀢𑀺 𑀙𑀩𑁆𑀩𑀡𑁆𑀡𑀭𑀁𑀲𑀺𑀆𑀤𑀻𑀳𑀻𑀢𑀺 𑀲𑁄𑀪𑀦𑁆𑀢𑁄, 𑀩𑀼𑀤𑁆𑀥𑁄. 𑀲𑀼𑀪𑀥𑀸𑀢𑀼 𑀲𑁄𑀪𑁂, 𑀤𑀺𑀢𑁆𑀢𑀺𑀬𑀁 𑀯𑀸 𑀅𑀦𑁆𑀢𑀧𑀘𑁆𑀘𑀬𑁄. 𑀪𑀕𑀯𑀸 𑀳𑀺 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀅𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑁂𑀳𑀺 𑀘 𑀤𑁂𑀯𑀸𑀦𑀁 𑀫𑀚𑁆𑀛𑁂 𑀲𑁄𑀪𑀢𑀺 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀭𑀢𑀺𑀚𑀦𑀦𑁂𑀢𑀺 𑀤𑁂𑀯𑀸𑀦𑀁 𑀅𑀢𑀧𑁆𑀧𑀓𑀧𑀻𑀢𑀺𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑁂, 𑀧𑁂𑀫𑀼𑀧𑁆𑀧𑀸𑀤𑀦𑁂 𑀯𑀸. 𑀭𑀫𑀦𑀁 𑀭𑀢𑀺. 𑀭𑀫𑀼𑀥𑀸𑀢𑀼 𑀓𑀻𑀴𑀸𑀬𑀦𑁆𑀢𑀺. 𑀢𑀁 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀭𑀢𑀺𑀚𑀦𑀦𑀁. 𑀲𑀺𑀮𑀸𑀲𑀦𑀁. 𑀭𑀢𑀺𑀲𑀤𑁆𑀤𑀽𑀧𑀧𑀤 𑀚𑀦𑀥𑀸𑀢𑀼 𑀚𑀦𑀦𑁂 𑀬𑀼. 𑀢𑀲𑁆𑀫𑀺𑀁 𑀭𑀢𑀺𑀚𑀦𑀦𑁂.

𑀲𑀺𑀮𑀸𑀲𑀦𑀫𑁆𑀳𑀻𑀢𑀺 𑀢𑀺𑀤𑀲𑀸𑀮𑀬𑁂, 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀚𑀸𑀢𑁂 𑀦𑀺𑀓𑁆𑀔𑀺𑀢𑁆𑀢𑁂 𑀯𑀸 𑀤𑀻𑀖𑀢𑁄 𑀲𑀝𑁆𑀞𑀺𑀬𑁄𑀚𑀦𑁂 𑀯𑀺𑀢𑁆𑀣𑀸𑀭𑀢𑁄 𑀧𑀡𑁆𑀡𑀸𑀲 𑀬𑁄𑀚𑀦𑁂 𑀧𑀼𑀣𑀼𑀮𑀢𑁄 𑀧𑀦𑁆𑀦𑀭𑀲𑀬𑁄𑀚𑀦𑁂 𑀯𑀡𑁆𑀡𑀢𑁄 𑀚𑀬𑀲𑀼𑀫𑀦𑀧𑀼𑀧𑁆𑀨𑀲𑀤𑀺𑀲𑁂 𑀭𑀢𑁆𑀢𑀓𑀫𑁆𑀧𑀮𑀯𑀡𑁆𑀡𑁂 𑀯𑀸 𑀲𑀡𑁆𑀳𑀲𑀼𑀔𑀼𑀫𑁂 𑀧𑀡𑁆𑀟𑀼𑀓𑀫𑁆𑀧 𑀮𑀦𑀸𑀫𑀓𑁂 𑀲𑀺𑀮𑀸𑀲𑀦𑁂. 𑀲𑀓𑁆𑀓𑁂𑀦 𑀲𑁂𑀯𑀺𑀬𑀢𑀻𑀢𑀺 𑀲𑀺𑀮𑀁. 𑀧𑀸𑀲𑀸𑀡𑁄 ¶ . 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀅𑀮𑀧𑀘𑁆𑀘𑀬𑁄. 𑀆𑀲𑀺𑀬𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁. 𑀅𑀣 𑀯𑀸 𑀆𑀕𑀦𑁆𑀢𑁆𑀯𑀸 𑀲𑁂𑀯𑀺𑀬𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁. 𑀆𑀧𑀼𑀩𑁆𑀩𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀬𑀼. 𑀲𑀺𑀮𑀁𑀏𑀯 𑀆𑀲𑀦𑀁 𑀲𑀺𑀮𑀸𑀲𑀦𑀁. 𑀧𑀡𑁆𑀟𑀼𑀓𑀫𑁆𑀧𑀮𑀲𑀺𑀮𑀸𑀲𑀦𑀁 𑀮𑀩𑁆𑀪𑀢𑀺. 𑀢𑀲𑁆𑀫𑀺𑀁 𑀲𑀺𑀮𑀸𑀲𑀦𑀫𑁆𑀳𑀺. 𑀆𑀲𑀻𑀦𑁄𑀢𑀺 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀆𑀕𑀫𑁆𑀫 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀤𑁂𑀯𑀸𑀦𑀁 𑀕𑀡𑁂𑀦 𑀧𑀭𑀺𑀯𑀸𑀭𑀺𑀢𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑁄. 𑀆𑀲𑀻𑀤𑀦𑀁 𑀦𑀺𑀲𑀚𑁆𑀚𑀦𑀁 𑀆𑀲𑀻𑀦𑁄. 𑀆𑀲𑀫𑀦𑁆𑀢𑀢𑁄 𑀲𑀻𑀤𑀢𑀺 𑀯𑀲𑀢𑀻𑀢𑀺 𑀯𑀸 𑀆𑀲𑀻𑀦𑁄. 𑀅𑀪𑀺𑀥𑀫𑁆𑀫𑀓𑀣𑀸𑀪𑀺𑀫𑀼𑀔𑀁 𑀲𑀻𑀤𑀢𑀺 𑀦𑀺𑀲𑀚𑁆𑀚𑀢𑀻𑀢𑀺 𑀯𑀸 𑀆𑀲𑀻𑀦𑁄, 𑀩𑀼𑀤𑁆𑀥𑁄. 𑀆𑀧𑀼𑀩𑁆𑀩𑀲𑀻𑀤𑀥𑀸𑀢𑀼 𑀦𑀺𑀲𑀚𑁆𑀚𑀸𑀬𑀁. 𑀯𑀺𑀲𑀭𑀡 𑀕𑀢𑁆𑀬𑀸𑀯𑀲𑀸𑀦𑁂𑀲𑀼 𑀯𑀸 𑀢𑀧𑀘𑁆𑀘𑀬𑁄. 𑀢𑀲𑁆𑀲 𑀈𑀡𑀸𑀤𑁂𑀲𑁄, 𑀡𑀲𑁆𑀲𑀦𑀢𑁆𑀢𑀁, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀲𑀺𑀯𑀲𑀼𑀔𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀤𑀸𑀬𑀓𑀁. 𑀅𑀭𑀺𑀬𑁂𑀳𑀺 𑀲𑁂𑀯𑀺𑀬𑀢𑀻𑀢𑀺 𑀲𑀺𑀯𑀁, 𑀦𑀺𑀩𑁆𑀩𑀸𑀦𑀁. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀅𑀯𑁄. 𑀅𑀣 𑀯𑀸 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀲𑀫𑀢𑀺 𑀉𑀧𑀲𑀫𑀢𑀺 𑀏𑀢𑁆𑀣𑀸𑀢𑀺 𑀲𑀺𑀯𑀁, 𑀦𑀺𑀩𑁆𑀩𑀸𑀦𑀁. 𑀲𑀫𑀼𑀥𑀸𑀢𑀼 𑀉𑀧𑀲𑀫𑁂 𑀭𑀺𑀯𑁄. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀝𑀻𑀓𑀸𑀬𑀁 𑀧𑀦 ‘‘𑀲𑀺𑀯𑀁 𑀔𑁂𑀫𑀪𑀸𑀯𑀁 𑀓𑀭𑁄𑀢𑀻𑀢𑀺 𑀲𑀺𑀯𑀁, 𑀲𑀁𑀲𑀸𑀭𑀪𑀻𑀭𑀼𑀓𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀯𑀸 𑀲𑀺𑀯𑀁. 𑀬𑀤𑀸𑀤𑀺𑀦𑀸 𑀯𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀝𑁆𑀞𑀼 𑀤𑀼𑀓𑁆𑀔𑀁 𑀔𑀦𑀢𑀻𑀢𑀺 𑀲𑀼𑀔𑀁. 𑀲𑀼𑀧𑀼𑀩𑁆𑀩 𑀔𑀦𑀼𑀥𑀸𑀢𑀼 𑀅𑀯𑀤𑀸𑀭𑀡𑁂 𑀓𑁆𑀯𑀺. 𑀲𑀺𑀯𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀼𑀔𑀁 𑀲𑀺𑀯𑀲𑀼𑀔𑀁, 𑀢𑀁 𑀤𑀤𑀸𑀢𑀻𑀢𑀺 𑀲𑀺𑀯𑀲𑀼𑀔𑀤𑀁, 𑀅𑀪𑀺𑀥𑀫𑁆𑀫𑀥𑀫𑁆𑀫𑁄. 𑀲𑀺𑀯𑀲𑀼𑀔𑀲𑀤𑁆𑀤𑀽𑀧𑀧𑀤𑀤𑀸𑀥𑀸𑀢𑀼 𑀅. 𑀬𑁄 𑀳𑀺 𑀅𑀪𑀺𑀥𑀫𑁆𑀫𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑁄 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑀼𑀔𑀁 𑀤𑀤𑀸𑀢𑀻𑀢𑀺 𑀅𑀢𑁆𑀣𑁄.

𑀅𑀤𑁂𑀲𑀺 𑀥𑀫𑁆𑀫𑀁 𑀤𑁂𑀯𑀸𑀦𑀦𑁆𑀢𑀺 𑀤𑁂𑀯𑀸𑀦𑀁 𑀥𑀫𑁆𑀫𑀁 𑀅𑀤𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀥𑀫𑁆𑀫𑀦𑁆𑀢𑀺 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀁 𑀤𑀼𑀤𑁆𑀤𑀲𑀁 𑀅𑀪𑀺𑀥𑀫𑁆𑀫 𑀥𑀫𑁆𑀫𑀁. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀧𑀡𑁆𑀟𑀺𑀢𑁂𑀳𑀺 𑀥𑀸𑀭𑀺𑀬𑀢𑀺 𑀦 𑀩𑀸𑀮𑁂𑀳𑀻𑀢𑀺 𑀯𑀸 𑀥𑀫𑁆𑀫𑁄, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀥𑀭𑀥𑀸𑀢𑀼 𑀥𑀸𑀭𑀡𑁂 𑀭𑀫𑁆𑀫𑀧𑀘𑁆𑀘𑀬𑁄. 𑀢𑀁 𑀥𑀫𑁆𑀫𑀁. 𑀤𑁂𑀯𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀼𑀪𑀽𑀢𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀲𑀸𑀮𑀺𑀦𑀻𑀅𑀝𑁆𑀞𑀓𑀣𑀸𑀬𑀁 𑁋

‘‘𑀫𑀸𑀢𑀭𑀁 ¶ 𑀧𑀫𑀼𑀔𑀁 𑀓𑀢𑁆𑀯𑀸, 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀢𑁂𑀚𑀲𑀸;

𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁, 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀻’’𑀢𑀺.

𑀏𑀢𑁆𑀣 𑀘 𑀫𑀸𑀢𑀭𑀦𑁆𑀢𑀺𑀧𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀼𑀪𑀽𑀢𑀁 𑀤𑁂𑀯𑀧𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀚𑀺𑀦𑀸𑀮𑀗𑁆𑀓𑀸𑀭𑀧𑀸𑀴𑀺𑀬𑀁 𑁋

‘‘𑀢𑀢𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀕𑀢𑀸 𑀫𑀸𑀢𑀸 𑀲𑀓𑀁 𑀖𑀭𑀁;

𑀲𑀢𑁆𑀢𑀫𑀺𑀬𑀁 𑀘𑀼𑀢𑀸 𑀕𑀦𑁆𑀢𑁆𑀯𑀸, 𑀤𑁂𑀯𑀧𑀼𑀢𑁆𑀢𑀢𑁆𑀢𑀫𑀸𑀕𑀫𑀻’’𑀢𑀺.

𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀗𑁆𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀤𑁂𑀯𑀧𑀼𑀢𑁆𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀫𑁂𑀯. 𑀓𑀸𑀴𑀼𑀤𑀸𑀬𑀻 𑀣𑁂𑀭𑀕𑀸𑀣𑀸𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀧𑀭𑀺𑀯𑀸𑀭𑀺𑀢𑀸𑀢𑀺 𑀘 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑀲𑀺𑀤𑁆𑀥𑀁 𑀇𑀢𑁆𑀣𑀺𑀪𑀸𑀯𑀁 𑀤𑁂𑀯𑀢𑀸𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀓𑀢𑁄. 𑀤𑁂𑀯𑀽𑀧𑀧𑀢𑁆𑀢𑀺 𑀧𑀦 𑀧𑀼𑀭𑀺𑀲𑀪𑀸𑀯𑁂𑀦 𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀓𑀝𑀻𑀓𑀸𑀬𑀜𑁆𑀘 ‘‘𑀤𑁂𑀯𑁄𑀭𑁄𑀳𑀦𑁂𑀢𑀺 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀲𑁆𑀲 𑀢𑁂𑀫𑀸𑀲𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀢𑁆𑀯𑀸 𑀤𑁂𑀯𑁄𑀭𑁄𑀳𑀦𑀓𑀸𑀮𑁂’’𑀢𑀺 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬𑀜𑁆𑀘 ‘‘𑀤𑁂𑀯𑀸𑀦𑀦𑁆𑀢𑀺 𑀢𑀤𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀥𑀺𑀯𑀸𑀲𑀻𑀦𑀁 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸𑀦’’𑀦𑁆𑀢𑀺 𑀫𑀸𑀢𑀼𑀤𑁂𑀯𑀧𑀼𑀢𑁆𑀢 𑀲𑀤𑁆𑀤𑁂𑀦 𑀯𑀼𑀢𑁆𑀢𑀁. 𑀲𑀺𑀭𑀻𑀫𑀳𑀸𑀫𑀸𑀬𑀸𑀲𑀢𑁆𑀣𑁂 𑀘 ‘‘𑀲𑀺𑀭𑀻𑀫𑀳𑀸𑀫𑀸𑀬𑀸 𑀤𑁂𑀯𑀻𑀧𑀺 𑀲𑀢𑁆𑀢𑀤𑀺𑀯𑀲𑁂𑀬𑁂𑀯 𑀯𑀲𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀼𑀲𑀺𑀢𑀪𑀯𑀦𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀁. 𑀫𑀡𑀺𑀤𑀻𑀧𑀝𑀻𑀓𑀸𑀬𑀜𑁆𑀘 ‘‘𑀫𑀸𑀢𑀭𑀦𑁆𑀢𑀺 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀮𑁄𑀓𑁂 𑀫𑀸𑀢𑀼𑀪𑀽𑀢𑀁 𑀤𑁂𑀯𑀧𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀭𑀻𑀫𑀳𑀸𑀫𑀸𑀬𑀸 𑀳𑀺 𑀩𑁄𑀥𑀺𑀲𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀢𑁆𑀢𑀸𑀳𑀫𑀢𑁆𑀢𑀁 𑀞𑀢𑁆𑀯𑀸 𑀇𑀢𑁄 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀧𑀼𑀭𑀺𑀲𑀪𑀸𑀯𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑁄, 𑀦 𑀇𑀢𑁆𑀣𑀺𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀫𑀸𑀢𑀭𑀦𑁆𑀢𑀺𑀧𑀤𑀲𑁆𑀲 𑀫𑀸𑀢𑀼𑀪𑀽𑀢𑀁 𑀤𑁂𑀯𑀧𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀫𑀼𑀔𑁆𑀬𑁂𑀦 𑀤𑀝𑁆𑀞𑀩𑁆𑀩𑁄.

𑀫𑀥𑀼𑀲𑀸𑀭𑀢𑁆𑀣 𑀤𑀻𑀧𑀦𑀻𑀝𑀻𑀓𑀸𑀬𑀁 𑀧𑀦 𑁋

‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀧𑀺𑀢𑀸 𑀫𑀳𑁂𑀲𑀺𑀦𑁄,

𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀧𑀦 𑀫𑀸𑀬𑀸 𑀦𑀸𑀫.

𑀩𑁄𑀥𑀺𑀲𑀢𑁆𑀢𑀁 ¶ 𑀧𑀭𑀺𑀳𑀭𑀺𑀬 𑀓𑀼𑀘𑁆𑀙𑀺𑀦𑀸,

𑀓𑀸𑀬𑀲𑁆𑀲 𑀪𑁂𑀤𑀸 𑀢𑀺𑀤𑀺𑀯𑀲𑁆𑀫𑀺𑀁 𑀫𑁄𑀤𑀢𑀺;

𑀲𑀸 𑀕𑁄𑀢𑀫𑀻 𑀓𑀸𑀮𑀁𑀓𑀢𑀸 𑀇𑀢𑁄 𑀘𑀼𑀢𑀸,

𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀆𑀫𑁄𑀤𑀢𑀺 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺,

𑀧𑀭𑀺𑀯𑀸𑀭𑀺𑀢𑀸 𑀤𑁂𑀯𑀕𑀡𑁂𑀳𑀺 𑀢𑁂𑀳𑀻’’𑀢𑀺; 𑀣𑁂𑀭𑀸𑀧𑀸𑀴𑀺;

𑀢𑀤𑀝𑁆𑀞𑀓𑀣𑀸𑀬𑀁 ‘‘𑀧𑀭𑀺𑀯𑀸𑀭𑀺𑀢𑀸𑀢𑀺 𑀘 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀧𑀼𑀭𑀺𑀫𑀢𑁆𑀢 𑀪𑀸𑀯𑀲𑀺𑀤𑁆𑀥𑀁 𑀇𑀢𑁆𑀣𑀺𑀪𑀸𑀯𑀁 𑀤𑁂𑀯𑀢𑀸𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀓𑀢𑁄. 𑀤𑁂𑀯𑀽𑀧𑀧𑀢𑁆𑀢𑀺 𑀧𑀦 𑀧𑀼𑀭𑀺𑀲𑀪𑀸𑀯𑁂𑀦 𑀚𑀸𑀢𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀸𑀢𑀭𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀣𑁂𑀭𑀝𑁆𑀞𑀓𑀣𑀸 𑀧𑀦 𑀦𑀲𑀗𑁆𑀕𑀳𑀸𑀭𑀼𑀴𑁆𑀳𑀸. 𑀅𑀜𑁆𑀜𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀢𑀸𑀤𑀺𑀲𑀁 𑀯𑀘𑀦𑀁 𑀦𑀢𑁆𑀣𑀺. 𑀧𑀢𑁆𑀣𑀦𑀸𑀓𑀸𑀮𑁂 𑀘 𑀩𑀼𑀤𑁆𑀥𑀫𑀸𑀢𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀧𑀼𑀭𑀺𑀲𑁄 𑀳𑁄𑀫𑀻𑀢𑀺 𑀧𑀢𑁆𑀣𑀦𑀸 𑀦𑀢𑁆𑀣𑀺. 𑀢𑀺𑀁𑀲𑀥𑀫𑁆𑀫𑀢𑀸𑀬𑀜𑁆𑀘 𑀩𑀼𑀤𑁆𑀥𑀫𑀸𑀢𑀼𑀬𑀸 𑀧𑀼𑀭𑀺𑀲𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺𑀧𑀺 𑀯𑀺𑀤𑀽 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀦 𑀕𑀳𑁂𑀢𑀩𑁆𑀩𑀁. 𑀓𑀲𑁆𑀫𑀸, 𑀲𑀁𑀲𑀬𑀯𑀘𑀦𑁂𑀦 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀺𑀤𑀽𑀯𑀤𑀦𑁆𑀢𑀻𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑀝𑁆𑀞𑀓𑀣𑀸𑀝𑀻𑀓𑀸𑀯𑀘𑀦𑁂𑀳𑀺 𑀉𑀚𑀼𑀓𑀁 𑀯𑀺𑀭𑀼𑀤𑁆𑀥𑀢𑁆𑀢𑀸 𑀘. 𑀤𑁂𑀯𑀢𑀸𑀲𑀤𑁆𑀤𑁄 𑀳𑀺 𑀤𑁂𑀯𑀧𑀼𑀢𑁆𑀢𑁂 𑀩𑁆𑀭𑀳𑁆𑀫𑁂 𑀤𑁂𑀯𑀥𑀻𑀢𑀸𑀬 𑀘 𑀯𑀢𑁆𑀢𑀢𑀺. 𑀢𑀣𑀸𑀳𑁂𑀲 ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀤𑁂𑀯𑀧𑀼𑀢𑁆𑀢𑁂. 𑀯𑀼𑀢𑁆𑀢𑀜𑁆𑀳𑀺 𑀔𑀼𑀤𑁆𑀤𑀓𑀧𑀸𑀞𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀢𑀭𑀸𑀢𑀺 𑀅𑀦𑀺𑀬𑀫𑀺𑀢 𑀦𑀺𑀤𑁆𑀤𑁂𑀲𑁄. 𑀲𑀸 𑀳𑀺 𑀦𑀸𑀫𑀕𑁄𑀢𑁆𑀢𑀢𑁄 𑀅𑀧𑀸𑀓𑀝𑀸. 𑀢𑀲𑁆𑀫𑀸 𑀅𑀜𑁆𑀜𑀢𑀭𑀸𑀢𑀺 𑀯𑀼𑀢𑁆𑀢𑀸. 𑀤𑁂𑀯𑁄𑀬𑁂𑀯 𑀤𑁂𑀯𑀢𑀸. 𑀇𑀢𑁆𑀣𑀺𑀧𑀼𑀭𑀺𑀲𑀲𑀸𑀥𑀸𑀭𑀡𑀫𑁂𑀯𑁂𑀢𑀁. 𑀇𑀥 𑀧𑀦 𑀧𑀼𑀭𑀺𑀲𑁄𑀏𑀯. 𑀲𑁄 𑀤𑁂𑀯𑀧𑀼𑀢𑁆𑀢𑁄. 𑀓𑀺𑀦𑁆𑀢𑀼𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦 𑀤𑁂𑀯𑀢𑀸𑀢𑀺 𑀯𑀼𑀢𑁆𑀢𑁄’’𑀢𑀺. 𑀲𑀼𑀦𑀻𑀢𑀢𑁆𑀣𑁂𑀭𑀅𑀧𑀤𑀸𑀦 𑀧𑀸𑀴𑀺𑀬𑀁 𑀆𑀕𑀢𑀸𑀲𑀼 ‘‘𑀢𑀣𑀸 𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸 𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀩𑁆𑀭𑀳𑁆𑀫𑁂. 𑀧𑀤𑀻𑀧𑀯𑀺𑀫𑀸𑀦𑀯𑀢𑁆𑀣𑀼𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀲𑀼 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀢𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺.

𑀆𑀤𑀻𑀲𑀼 ¶ 𑀤𑁂𑀯𑀥𑀻𑀢𑀸𑀬. 𑀏𑀯𑀁 𑀧𑀦 𑀧𑀭𑀺𑀯𑀸𑀭𑀺𑀢𑀸𑀲𑀤𑁆𑀤𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀓𑀢𑀸𑀬 𑀣𑁂𑀭𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀘𑀦𑀁 𑀚𑀸𑀢𑀓𑀝𑀻𑀓𑀸𑀬 𑀯𑀼𑀢𑁆𑀢𑀯𑀘𑀦𑀜𑁆𑀘 𑀆𑀘𑀭𑀺𑀬𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑁂𑀦 𑀓𑀢𑀸𑀬 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬 𑀯𑀼𑀢𑁆𑀢𑀯𑀘𑀦𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀏𑀢𑀭𑀳𑀺 𑀧𑀦 𑀓𑁂𑀘𑀺 𑀆𑀘𑀭𑀺𑀬𑀸 𑀣𑁂𑀭𑀸𑀧𑀸𑀴𑀺𑀬𑀁 𑀆𑀕𑀢𑀁 𑀧𑀭𑀺𑀯𑀸𑀭𑀺𑀢𑀸𑀲𑀤𑁆𑀤𑀜𑁆𑀘 𑀫𑀥𑀼𑀲𑀸𑀭𑀢𑁆𑀣𑀤𑀻𑀧𑀦𑀻𑀝𑀻𑀓𑀸𑀯𑀘𑀦𑀜𑁆𑀘 𑀧𑀝𑀺𑀘𑁆𑀘 𑀫𑀸𑀢𑀼𑀤𑁂𑀯𑀥𑀻𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀢𑁂𑀲𑀁 𑀫𑀢𑀺𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀤𑁂𑀲𑀻𑀢𑀺 𑀫𑀳𑀸𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀓𑀣𑁂𑀲𑀺. 𑀅𑀲𑀤𑀺𑀲𑀁 𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀢𑀦𑁆𑀢𑀺 𑀩𑀼𑀤𑁆𑀥𑀁. 𑀅𑀲𑀤𑀺𑀲𑀦𑁆𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀤𑀺𑀲𑁄 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀅𑀲𑀤𑀺𑀲𑁄, 𑀩𑀼𑀤𑁆𑀥𑁄. 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀻𑀮𑀸𑀤𑀺𑀕𑀼𑀡𑁂𑀦 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀯𑀺𑀦𑀬𑀫𑀳𑀸𑀯𑀕𑁆𑀕𑀧𑀸𑀴𑀺𑀬𑀁 𑁋

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺.

𑀦𑀺𑀘𑁆𑀘𑀦𑁆𑀢𑀺𑀲𑀢𑀢𑀁 𑀲𑀫𑀺𑀢𑀁, 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀤𑀺𑀲𑀁 𑀢𑀁 𑀩𑀼𑀤𑁆𑀥𑀁 𑀦𑀺𑀘𑁆𑀘𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀼𑀫𑀢𑀺 𑀲𑀼𑀦𑁆𑀤𑀭𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀯𑀸𑀢𑁄, 𑀤𑁂𑀲𑀦𑀸𑀜𑀸𑀡𑀯𑀸𑀢𑁄 𑀯𑀸. 𑀬𑁄 𑀬𑀸𑀤𑀺𑀲𑁄 𑀩𑀼𑀤𑁆𑀥𑁄. 𑀤𑀺𑀯𑁂 𑀤𑀺𑀯𑀲𑁂 𑀤𑀺𑀯𑀸𑀓𑀭𑁄𑀯 𑀲𑀽𑀭𑀺𑀬𑁄𑀇𑀯, 𑀲𑁄𑀪𑀦𑁆𑀢𑁄 𑀯𑀺𑀭𑁄𑀘𑀫𑀸𑀦𑁄 𑀳𑀼𑀢𑁆𑀯𑀸, 𑀭𑀢𑀺𑀚𑀦𑀦𑁂 𑀤𑁂𑀯𑀸𑀦𑀁 𑀅𑀢𑀧𑁆𑀧𑀓𑀧𑀻𑀢𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑁂, 𑀧𑁂𑀫𑀼𑀧𑁆𑀧𑀸𑀤𑀦𑁂 𑀯𑀸, 𑀲𑀺𑀮𑀸𑀲𑀦𑀫𑁆𑀳𑀺 𑀧𑀡𑁆𑀟𑀼 𑀓𑀫𑁆𑀧𑀮𑀦𑀸𑀫𑀓𑁂 𑀲𑀺𑀮𑀸𑀲𑀦𑁂, 𑀆𑀲𑀻𑀦𑁄 𑀦𑀺𑀲𑀻𑀤𑀦𑁆𑀢𑁄 𑀳𑀼𑀢𑁆𑀯𑀸 𑀲𑀺𑀯𑀲𑀼𑀔𑀤𑀁 𑀦𑀺𑀩𑁆𑀩𑀸𑀦𑀲𑀼𑀔𑀤𑀸𑀬𑀓𑀁, 𑀥𑀫𑁆𑀫𑀁 𑀅𑀪𑀺𑀥𑀫𑁆𑀫𑀥𑀫𑁆𑀫𑀁, 𑀤𑁂𑀯𑀸𑀦𑀁 𑀫𑀸𑀢𑀼 𑀧𑀼𑀩𑁆𑀩𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀅𑀤𑁂𑀲𑀺 𑀓𑀣𑁂𑀲𑀺. 𑀅𑀲𑀤𑀺𑀲𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀺𑀘𑁆𑀘𑀁 𑀲𑀢𑀢𑀁 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀢𑁂𑀭𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀬𑁄 ¶ 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀺,

𑀮𑁄𑀓𑁂𑀳𑀺 𑀢𑀻𑀳𑀺𑀯𑀺𑀓𑀮𑁂𑀳𑀺 𑀦𑀺𑀭𑀸𑀓𑀼𑀮𑁂𑀳𑀺;

𑀲𑀫𑁆𑀧𑀸𑀧𑀼𑀡𑁂 𑀦𑀺𑀭𑀼𑀧𑀫𑁂𑀬𑁆𑀬𑀢𑀫𑁂𑀯 𑀦𑀸𑀣𑁄,

𑀢𑀁 𑀲𑀩𑁆𑀩𑀮𑁄𑀓𑀫𑀳𑀺𑀢𑀁 𑀅𑀲𑀫𑀁 𑀦𑀫𑀸𑀫𑀺.

𑁧𑁪. 𑀏𑀯𑀁 𑀢𑁂𑀭𑀲𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀩𑀼𑀤𑁆𑀥𑀲𑁆𑀲 𑀧𑀸𑀤𑀢𑀮𑁂 𑀯𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑁂𑀳𑀺 𑀅𑀝𑁆𑀞𑀲𑀢𑀘𑀓𑁆𑀓𑀮𑀓𑁆𑀔𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀬𑁄 𑀧𑀸𑀤𑀧𑀗𑁆𑀓𑀚𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢 𑀪 𑀚 𑀚 𑀕𑀡𑁂𑀳𑀺 𑀘 𑀕𑀭𑀼𑀤𑁆𑀯𑀬𑁂𑀦 𑀭𑀘𑀺𑀢𑀢𑁆𑀢𑀸 𑀘𑀼𑀤𑁆𑀤𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀯𑀲𑀦𑁆𑀢𑀢𑀺𑀮𑀓𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀼𑀢𑁆𑀢𑁄𑀤𑀬𑁂 ‘‘𑀯𑀼𑀢𑁆𑀢𑀸 𑀯𑀲𑀦𑁆𑀢𑀢𑀺𑀮𑀓𑀸 𑀢 𑀪 𑀚𑀸 𑀚𑀕𑀸 𑀕𑁄’’𑀢𑀺. 𑀢𑀲𑁆𑀲𑀸𑀬𑀫𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀢 𑀪 𑀚𑀸 𑀢 𑀪 𑀚 𑀕𑀡𑀸 𑀘 𑀚𑀕𑀸 𑀚𑀕𑀡𑀕𑀭𑀼𑀓𑀸 𑀘 𑀕𑁄 𑀕𑀭𑀼 𑀘 𑀘𑁂 𑀪𑀯𑀦𑁆𑀢𑀺, 𑀲𑀸 𑀕𑀸𑀣𑀸 𑀯𑀲𑀦𑁆𑀢𑀢𑀺𑀮𑀓𑀸𑀕𑀸𑀣𑀸𑀢𑀺 𑀙𑀦𑁆𑀤𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀢𑀺.

𑀢𑀢𑁆𑀣 𑀧𑀦 𑀬𑁄 𑀦𑀸𑀣𑁄 𑀅𑀯𑀺𑀓𑀮𑁂𑀳𑀺 𑀦𑀺𑀭𑀸𑀓𑀼𑀮𑁂𑀳𑀺 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑁂𑀳𑀺𑀢𑀻𑀳𑀺 𑀮𑁄𑀓𑁂𑀳𑀺 𑀦𑀺𑀭𑀼𑀧𑀫𑁂𑀬𑁆𑀬𑀢𑀁 𑀲𑀫𑁆𑀧𑀸𑀧𑀼𑀡𑁂𑀏𑀯 𑀲𑀩𑁆𑀩𑀮𑁄𑀓𑀫𑀳𑀺𑀢𑀁 𑀅𑀲𑀫𑀁 𑀢𑀁 𑀦𑀸𑀣𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀦 𑀲𑀤𑁆𑀤𑀓𑁆𑀓𑀫𑁂𑀦 𑀅𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀓𑁆𑀓𑀫𑁂𑀦 𑀯𑀡𑁆𑀡𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀬𑁄 𑀦𑀸𑀣𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑁄 𑀩𑀼𑀤𑁆𑀥𑁄. 𑀢𑀁 𑀧𑀦 𑀧𑀤𑀁 𑀲𑀫𑁆𑀧𑀸𑀧𑀼𑀡𑁂𑀏𑀯𑀸𑀢𑀺𑀧𑀤𑁂 𑀓𑀢𑁆𑀢𑀼𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦𑀸𑀣𑀲𑁆𑀲 𑀧𑀦 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀯𑀺𑀓𑀮𑁂𑀳𑀻𑀢𑀺 𑀓𑁂𑀦𑀘𑀺 𑀅𑀯𑁂𑀓𑀮𑁆𑀮𑁂𑀳𑀺 𑀲𑀩𑁆𑀩𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀼𑀡𑁆𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀽𑀧𑀁 𑀓𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀺𑀓𑀮𑁄. 𑀯𑀺𑀧𑀼𑀩𑁆𑀩𑀓𑀮𑀥𑀸𑀢𑀼 𑀕𑀢𑀺𑀬𑀁 𑀅. 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀺𑀓𑀮𑀁 𑀏𑀢𑀺𑀲𑁆𑀲𑀸 𑀭𑀸𑀚𑀺𑀬𑀸𑀢𑀺 𑀅𑀯𑀺𑀓𑀮𑀸, 𑀧𑀸𑀤𑀭𑀸𑀚𑀺. 𑀧𑀸𑀤𑀤𑁆𑀯𑀬𑁂 𑀧𑀭𑀺𑀩𑁆𑀬𑀢𑁆𑀢𑀁 𑀲𑀡𑁆𑀞𑀸𑀦𑀭𑀽𑀧𑀁 𑀓𑀺𑀜𑁆𑀘𑀺 𑀯𑀺𑀓𑀮𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀅𑀯𑀺𑀓𑀮𑁂𑀳𑀺.

𑀦𑀺𑀭𑀸𑀓𑀼𑀮𑁂𑀳𑀻𑀢𑀺 ¶ 𑀆𑀓𑀼𑀮𑀯𑀺𑀭𑀳𑀺𑀢𑁂𑀳𑀺. 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀫𑀺𑀲𑁆𑀲𑁂𑀳𑀺 𑀅𑀲𑀁𑀲𑀝𑁆𑀞𑁂𑀳𑀻𑀢𑀺 𑀅𑀢𑁆𑀣𑁄. 𑀆𑀪𑀼𑀲𑁄 𑀓𑀼𑀮𑀢𑀺 𑀩𑀦𑁆𑀥𑀢𑀻𑀢𑀺 𑀆𑀓𑀼𑀮𑀁, 𑀆𑀧𑀼𑀩𑁆𑀩 𑀓𑀼𑀮𑀥𑀸𑀢𑀼 𑀩𑀦𑁆𑀥𑀦𑁂 𑀅. 𑀅𑀣 𑀯𑀸 𑀆𑀪𑀼𑀲𑁄 𑀓𑀼𑀮𑀢𑀺 𑀆𑀯𑀭𑀢𑀺 𑀲𑁄𑀪𑀦𑀦𑁆𑀢𑀺 𑀆𑀓𑀼𑀮𑀁, 𑀦𑀢𑁆𑀣𑀺 𑀆𑀓𑀼𑀮𑀁 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀁 𑀏𑀢𑀺𑀲𑁆𑀲𑀸 𑀧𑀸𑀤𑀭𑀸𑀚𑀺 𑀬𑀸𑀢𑀺 𑀦𑀺𑀭𑀸𑀓𑀼𑀮𑀸, 𑀧𑀸𑀤𑀭𑀸𑀚𑀺. 𑀢𑁂𑀳𑀺 𑀦𑀺𑀭𑀸𑀓𑀼𑀮𑁂𑀳𑀺. 𑀢𑀁 𑀧𑀦 𑀧𑀤𑀤𑁆𑀯𑀬𑀁 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀻𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀻𑀢𑀺 𑀧𑀸𑀤𑀲𑀗𑁆𑀔𑀸𑀢𑀧𑀤𑀼𑀫𑀲𑁆𑀲 𑀲𑀡𑁆𑀳 𑀢𑀮𑁂 𑀚𑀸𑀢𑁂𑀳𑀺 𑀅𑀝𑁆𑀞𑀲𑀢𑀘𑀓𑁆𑀓𑀮𑀓𑁆𑀔𑀡𑀭𑀸𑀚𑀺𑀓𑁂𑀳𑀺 𑀧𑀤𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄. 𑀧𑀤𑀥𑀸𑀢𑀼 𑀕𑀢𑀺𑀫𑁆𑀳𑀺𑀡. 𑀧𑀗𑁆𑀓𑁂 𑀓𑀤𑁆𑀤𑀫𑁂 𑀚𑀸𑀢𑀦𑁆𑀢𑀺 𑀧𑀗𑁆𑀓𑀚𑀁, 𑀧𑀤𑀼𑀫𑀁. 𑀧𑀸𑀤𑀲𑀗𑁆𑀔𑀸𑀢𑀁 𑀧𑀗𑁆𑀓𑀚𑀁 𑀧𑀸𑀤𑀧𑀗𑁆𑀓𑀚𑀁. 𑀧𑀗𑁆𑀓𑀚𑀁𑀇𑀯 𑀧𑀸𑀤𑁄 𑀯𑀸 𑀧𑀸𑀤𑀧𑀗𑁆𑀓𑀚𑀁, 𑀧𑀸𑀤𑁄. 𑀲𑀡𑁆𑀳𑀪𑀸𑀯𑁂𑀦 𑀫𑀼𑀤𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀼𑀤𑀼, 𑀫𑀼𑀤𑀥𑀸𑀢𑀼 𑀕𑀢𑀺𑀬𑀁 𑀉. 𑀢𑀮𑀢𑀺 𑀧𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀢𑀮𑀁. 𑀢𑀮𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀅. 𑀫𑀼𑀤𑀼 𑀘 𑀢𑀁 𑀢𑀮𑀜𑁆𑀘𑀸𑀢𑀺 𑀫𑀼𑀤𑀼𑀢𑁆𑀢𑀮𑀁, 𑀧𑀸𑀤𑀧𑀗𑁆𑀓𑀚𑀲𑁆𑀲 𑀫𑀼𑀤𑀼𑀢𑁆𑀢𑀮𑀁 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀁, 𑀭𑀸𑀚𑀢𑀺 𑀤𑀺𑀲𑁆𑀲𑀢𑀻𑀢𑀺 𑀭𑀸𑀚𑀺𑀓𑀸, 𑀭𑀸𑀚𑀢𑀺 𑀲𑁄𑀪𑀢𑀺 𑀏𑀢𑁂𑀦𑀸𑀢𑀺 𑀭𑀸𑀚𑀺𑀓𑀸. 𑀭𑀸𑀚𑀥𑀸𑀢𑀼 𑀲𑁄𑀪𑀦𑁂 𑀡𑀺𑀓𑁄. 𑀧𑀸𑀤𑀧𑀗𑁆𑀓𑀚 𑀫𑀼𑀤𑀼𑀢𑁆𑀢𑀮𑁂 𑀚𑀸𑀢𑀁 𑀅𑀝𑁆𑀞𑀲𑀢𑀘𑀓𑁆𑀓𑀮𑀓𑁆𑀔𑀡𑀲𑀗𑁆𑀔𑀸𑀢𑀁 𑀭𑀸𑀚𑀺𑀓𑀦𑁆𑀢𑀺 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑀁, 𑀢𑁂𑀳𑀺.

𑀢𑀁 𑀧𑀦 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀁 𑀦𑀸𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀢𑁄 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑀮𑀲𑁆𑀲 𑀫𑀚𑁆𑀛𑁂 𑀦𑀸𑀪𑀺 𑀤𑀺𑀲𑁆𑀲𑀢𑀺. 𑀦𑀸𑀪𑀺𑀧𑀝𑀺𑀘𑁆𑀙𑀺𑀦𑁆𑀦𑀸 𑀯𑀝𑁆𑀝𑀮𑁂𑀔𑀸 𑀤𑀺𑀲𑁆𑀲𑀢𑀺. 𑀦𑀸𑀪𑀺𑀫𑀼𑀔𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄 𑀤𑀺𑀲𑁆𑀲𑀢𑀺. 𑀧𑀦𑀸𑀴𑀺𑀫𑀼𑀔𑀁 𑀤𑀺𑀲𑁆𑀲𑀢𑀺. 𑀅𑀭𑀸 𑀤𑀺𑀲𑁆𑀲𑀦𑁆𑀢𑀺. 𑀅𑀭𑁂𑀲𑀼 𑀯𑀝𑁆𑀝𑀮𑁂𑀔𑀸 𑀤𑀺𑀲𑁆𑀲𑀦𑁆𑀢𑀺. 𑀦𑁂𑀫𑀺 𑀤𑀺𑀲𑁆𑀲𑀢𑀺. 𑀦𑁂𑀫𑀺𑀫𑀡𑀺𑀓𑀸 𑀤𑀺𑀲𑁆𑀲𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀸𑀴𑀺𑀆𑀕𑀢𑀫𑁂𑀯. 𑀲𑀫𑁆𑀧𑀳𑀼𑀮𑀯𑀸𑀭𑁄 𑀧𑀦 𑀅𑀦𑀸𑀕𑀢𑁄, 𑀲𑁄 𑀏𑀯𑀁 𑀤𑀝𑁆𑀞𑀩𑁆𑀩𑁄. 𑀲𑀢𑁆𑀢𑀺, 𑀲𑀺𑀭𑀻𑀯𑀘𑁆𑀙𑁄, 𑀦𑀦𑁆𑀤𑀺𑀬𑀸𑀯𑀝𑁆𑀝𑀁, 𑀲𑁄𑀯𑀢𑁆𑀢𑀺𑀓𑁄, 𑀯𑀝𑀁𑀲𑀓𑁄, 𑀯𑀟𑁆𑀠𑀫𑀸𑀦𑀓𑀁, 𑀫𑀘𑁆𑀙𑀬𑀼𑀕𑀮𑀁, 𑀪𑀤𑁆𑀤𑀧𑀻𑀞𑀁, 𑀅𑀗𑁆𑀓𑀼𑀲𑀁, 𑀢𑁄𑀫𑀭𑁄, 𑀧𑀸𑀲𑀸𑀤𑁄, 𑀢𑁄𑀭𑀡𑀁, 𑀲𑁂𑀢𑀘𑁆𑀙𑀢𑁆𑀢𑀁, 𑀔𑀕𑁆𑀕𑁄, 𑀢𑀸𑀮𑀯𑀡𑁆𑀟𑀁, 𑀫𑁄𑀭𑀳𑀢𑁆𑀣𑀓𑁄, 𑀯𑀸𑀴𑀩𑀻𑀚𑀦𑀺, 𑀉𑀡𑁆𑀳𑀻𑀲𑀁, 𑀧𑀢𑁆𑀢𑁄 ¶ , 𑀫𑀡𑀺𑀓𑀼𑀲𑀼𑀫𑀤𑀸𑀫𑀁, 𑀦𑀻𑀮𑀼𑀧𑁆𑀧𑀮𑀁, 𑀭𑀢𑁆𑀢𑀼𑀧𑁆𑀧𑀮𑀁, 𑀲𑁂𑀢𑀼𑀧𑁆𑀧𑀮𑀁, 𑀧𑀤𑀼𑀫𑀁, 𑀧𑀼𑀡𑁆𑀟𑀭𑀺𑀓𑀁, 𑀧𑀼𑀡𑁆𑀡𑀖𑀝𑁄, 𑀧𑀼𑀡𑁆𑀡𑀧𑀸𑀢𑀺, 𑀲𑀫𑀼𑀤𑁆𑀤𑁄, 𑀘𑀓𑁆𑀓𑀯𑀸𑀴𑀁, 𑀳𑀺𑀫𑀯𑀸, 𑀲𑀺𑀦𑁂𑀭𑀼, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀦𑀓𑁆𑀔𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑀸, 𑀤𑁆𑀯𑁂𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑀸𑀦𑀺 𑀅𑀦𑁆𑀢𑀫𑀲𑁄 𑀘𑀓𑁆𑀓𑀯𑀢𑁆𑀢𑀺 𑀭𑀜𑁆𑀜𑁄 𑀧𑀭𑀺𑀲𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄 𑀘𑀓𑁆𑀓𑀮𑀓𑁆𑀔𑀡𑀲𑁆𑀲𑁂𑀯 𑀧𑀭𑀺𑀯𑀸𑀭𑁄𑀢𑀺 𑀏𑀢𑁆𑀢𑀓𑀫𑁂𑀯 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀚𑀺𑀦𑀸𑀮𑀗𑁆𑀓𑀸𑀭𑀝𑀻𑀓𑀸𑀬𑀁 𑀧𑀦 ‘‘𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻𑀢𑀺 𑀘𑀓𑁆𑀓𑀮𑀓𑁆𑀔𑀡𑀁 𑀦𑀸𑀫 𑀤𑁆𑀯𑀻𑀲𑀼 𑀧𑀸𑀤𑀢𑀮𑁂𑀲𑀼 𑀤𑁆𑀯𑁂 𑀘𑀓𑁆𑀓𑀸𑀦𑀺 𑀏𑀓𑁂𑀓𑀲𑁆𑀫𑀺𑀁 𑀲𑀳𑀲𑁆𑀲𑀫𑀢𑁆𑀢𑀸 𑀅𑀭𑀸 𑀬𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀦𑁂𑀫𑀺𑀯𑀮𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑀁. 𑀦𑀸𑀪𑀺 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑀸. 𑀢𑀲𑁆𑀫𑀺𑀁 𑀫𑀚𑁆𑀛𑁂 𑀘 𑀦𑀸𑀪𑀺𑀧𑀭𑀺𑀬𑀦𑁆𑀢𑁂 𑀘 𑀦𑀸𑀪𑀺𑀫𑀼𑀔𑁂 𑀘 𑀯𑀝𑁆𑀝𑀮𑁂𑀔𑀸 𑀫𑀚𑁆𑀛𑁂 𑀙𑀺𑀤𑁆𑀤𑀁 𑀘𑀓𑁆𑀓𑀧𑀭𑀺𑀬𑀦𑁆𑀢𑁂 𑀦𑁂𑀫𑀺𑀢𑁄 𑀩𑀳𑀺𑀤𑁆𑀥𑀸 𑀯𑀝𑁆𑀝𑁂. 𑀲𑀢𑁆𑀢𑀺, 𑀲𑀺𑀭𑀻𑀯𑀘𑁆𑀙𑁄, 𑀦𑀦𑁆𑀤𑀺𑀬𑀸𑀯𑀝𑁆𑀝𑀁, 𑀲𑁄𑀯𑀢𑁆𑀢𑀺𑀓𑁄, 𑀯𑀝𑀁𑀲𑀓𑀁, 𑀯𑀟𑁆𑀠𑀫𑀸𑀦𑀓𑀁, 𑀪𑀤𑁆𑀤𑀧𑀻𑀞𑀁, 𑀅𑀗𑁆𑀓𑀼𑀲𑁄, 𑀧𑀸𑀲𑀸𑀤𑀁, 𑀢𑁄𑀭𑀡𑀁, 𑀲𑁂𑀢𑀘𑁆𑀙𑀢𑁆𑀢𑀁, 𑀔𑀕𑁆𑀕𑀁, 𑀢𑀸𑀮𑀯𑀡𑁆𑀟𑀁, 𑀫𑀬𑀽𑀭𑀳𑀢𑁆𑀣𑀁, 𑀘𑀸𑀫𑀭𑀁, 𑀉𑀡𑁆𑀳𑀻𑀲𑀁, 𑀧𑀢𑁆𑀢𑀁, 𑀫𑀡𑀺, 𑀲𑀼𑀫𑀦𑀤𑀸𑀫𑀁, 𑀦𑀻𑀮𑀼𑀧𑁆𑀧𑀮𑀁, 𑀭𑀢𑁆𑀢𑀼𑀧𑁆𑀧𑀮𑀁, 𑀭𑀢𑁆𑀢𑀧𑀤𑀼𑀫𑀁, 𑀲𑁂𑀢𑀧𑀤𑀼𑀫𑀁, 𑀧𑀼𑀡𑁆𑀟𑀭𑀺𑀓𑀁, 𑀧𑀼𑀡𑁆𑀡𑀓𑀮𑀲𑀁, 𑀧𑀼𑀡𑁆𑀡𑀧𑀢𑁆𑀢𑀁, 𑀲𑀫𑀼𑀤𑁆𑀤𑁄, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄, 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄, 𑀫𑁂𑀭𑀼𑀧𑀩𑁆𑀩𑀢𑁄, 𑀲𑀽𑀭𑀺𑀬𑀫𑀡𑁆𑀟𑀮𑀁, 𑀘𑀦𑁆𑀤𑀫𑀡𑁆𑀟𑀮𑀁, 𑀦𑀓𑁆𑀔𑀢𑁆𑀢𑀁, 𑀲𑀧𑀭𑀺𑀯𑀸𑀭𑀸 𑀘𑀢𑀼𑀫𑀳𑀸𑀤𑀻𑀧𑀸, 𑀲𑀧𑀭𑀺𑀯𑀸𑀭𑁄 𑀲𑀢𑁆𑀢𑀭𑀢𑀦𑀲𑀫𑀗𑁆𑀕𑀻 𑀘𑀓𑁆𑀓𑀯𑀢𑁆𑀢𑀺, 𑀤𑀓𑁆𑀔𑀺𑀡𑀸𑀯𑀝𑁆𑀝 𑀲𑁂𑀢𑀲𑀗𑁆𑀔𑀁, 𑀲𑀼𑀯𑀡𑁆𑀡𑀫𑀘𑁆𑀙𑀬𑀼𑀕𑀴𑀁, 𑀘𑀓𑁆𑀓𑀸𑀯𑀼𑀥𑀁, 𑀲𑀢𑁆𑀢𑀫𑀳𑀸𑀕𑀗𑁆𑀕𑀸, 𑀲𑀢𑁆𑀢𑀓𑀼𑀮𑀧𑀩𑁆𑀩𑀢𑀸, 𑀲𑀢𑁆𑀢𑀲𑀻𑀤𑀦𑁆𑀢𑀲𑀸𑀕𑀭𑀸, 𑀲𑀼𑀯𑀡𑁆𑀡 𑀳𑀁𑀲𑀭𑀸𑀚𑀸, 𑀲𑀁𑀲𑀼𑀫𑀸𑀭𑁄, 𑀥𑀚𑀧𑀝𑀸𑀓𑁄, 𑀲𑀼𑀯𑀡𑁆𑀡𑀲𑀺𑀯𑀺𑀓𑀸, 𑀲𑀼𑀯𑀡𑁆𑀡𑀯𑀸𑀴𑀩𑀻𑀚𑀦𑀺, 𑀓𑁂𑀮𑀸𑀲𑀧𑀩𑁆𑀩𑀢𑁄, 𑀲𑀻𑀳𑀭𑀸𑀚𑀸, 𑀩𑁆𑀬𑀕𑁆𑀖𑀭𑀸𑀚𑀸, 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀸, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀳𑀢𑁆𑀣𑀺𑀭𑀸𑀚𑀸, 𑀯𑀸𑀲𑀼𑀓𑀻𑀦𑀸𑀕𑀭𑀸𑀚𑀸, 𑀳𑀁𑀲𑀭𑀸𑀚𑀸, 𑀉𑀲𑀪𑀭𑀸𑀚𑀸, 𑀏𑀭𑀸𑀯𑀡 𑀳𑀢𑁆𑀣𑀺𑀭𑀸𑀚𑀸, 𑀲𑀼𑀯𑀡𑁆𑀡𑀫𑀓𑀭𑀁, 𑀘𑀢𑀼𑀫𑀼𑀔𑀲𑀼𑀯𑀡𑁆𑀡𑀦𑀸𑀯𑀸, 𑀲𑀯𑀘𑁆𑀙𑀓𑀸 𑀥𑁂𑀦𑀼, 𑀓𑀺𑀁𑀧𑀼𑀭𑀺𑀲𑁄, 𑀓𑀺𑀦𑁆𑀦𑀭𑀻, 𑀓𑀭𑀯𑀻𑀓𑁄, 𑀫𑀬𑀽𑀭𑀭𑀸𑀚𑀸, 𑀓𑁄𑀜𑁆𑀘𑀭𑀸𑀚𑀸, 𑀘𑀓𑁆𑀓𑀯𑀸𑀓𑀭𑀸𑀚𑀸, 𑀚𑀻𑀯𑀜𑁆𑀚𑀻𑀯𑀓𑀭𑀸𑀚𑀸 𑀙 𑀤𑁂𑀯𑀮𑁄𑀓𑀸, 𑀲𑁄𑀴𑀲 ¶ 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀇𑀫𑁂 𑀏𑀢𑁆𑀢𑀓𑀸 𑀅𑀕𑁆𑀕𑀫𑀗𑁆𑀕𑀮𑀮𑀓𑁆𑀔𑀡𑀸 𑀧𑀸𑀤𑀢𑀮𑁂 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀯𑀘𑀦𑁂𑀦 𑀅𑀝𑁆𑀞𑀲𑀢 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀢𑀻𑀳𑀺 𑀮𑁄𑀓𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀳𑀺 𑀓𑀸𑀫𑀭𑀽𑀧𑀸𑀭𑀽𑀧 𑀮𑁄𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀦 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀁 𑀧𑀦𑁂𑀢𑀁 𑀓𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀦𑀺𑀭𑀼𑀧𑀫𑁂𑀬𑁆𑀬𑀸𑀢𑀺 𑀧𑀤𑁂𑀦 𑀓𑀢𑁆𑀢𑀼𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀼𑀧𑀫𑁂𑀬𑁆𑀬𑀢𑀦𑁆𑀢𑀺 𑀅𑀧𑁆𑀧𑀫𑁂𑀬𑁆𑀬𑀪𑀸𑀯𑀁. 𑀉𑀧𑀫𑀺𑀢𑀩𑁆𑀩𑀦𑁆𑀢𑀺 𑀉𑀧𑀫𑁂𑀬𑁆𑀬𑀁. 𑀉𑀧𑀧𑀼𑀩𑁆𑀩 𑀫𑀸𑀥𑀸𑀢𑀼 𑀧𑀫𑀸𑀦𑁂 𑀡𑁆𑀬𑁄. 𑀉𑀧𑀫𑁂𑀬𑁆𑀬𑀲𑁆𑀲 𑀪𑀸𑀯𑁄 𑀉𑀧𑀫𑁂𑀬𑁆𑀬𑀢𑀁. 𑀦𑀢𑁆𑀣𑀺 𑀉𑀧𑀫𑁂𑀬𑁆𑀬𑀢𑀁 𑀅𑀲𑁆𑀲 𑀭𑀸𑀚𑀺𑀓𑀲𑁆𑀲𑀸𑀢𑀺 𑀦𑀺𑀭𑀼𑀧𑀫𑁂𑀬𑁆𑀬𑀢𑀁. 𑀅𑀣 𑀯𑀸 𑀦𑀢𑁆𑀣𑀺 𑀉𑀧𑀫𑁂𑀬𑁆𑀬𑀁 𑀏𑀢𑀲𑁆𑀲 𑀭𑀸𑀚𑀺𑀓𑀲𑁆𑀲𑀸𑀢𑀺 𑀦𑀺𑀭𑀼𑀧𑀫𑁂𑀬𑁆𑀬𑁄, 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀭𑀸𑀚𑀺𑀓𑁄 𑀮𑀩𑁆𑀪𑀢𑀺. 𑀢𑀲𑁆𑀲 𑀪𑀸𑀯𑁄 𑀦𑀺𑀭𑀼𑀧𑀫𑁂𑀬𑁆𑀬𑀢𑀁. 𑀢𑀁 𑀧𑀦 𑀧𑀤𑀁 𑀲𑀫𑁆𑀧𑀸𑀧𑀼𑀡𑁂 𑀏𑀯𑀸𑀢𑀺𑀧𑀤𑁂 𑀓𑀫𑁆𑀫𑀁. 𑀲𑀫𑁆𑀧𑀸𑀧𑀼𑀡𑁂𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀫𑀸 𑀕𑀘𑁆𑀙𑀢𑀺𑀏𑀯𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀢𑀻𑀳𑀺 𑀮𑁄𑀓𑁂𑀳𑀺 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑀮𑁂𑀳𑀺 𑀦𑀺𑀭𑀼𑀧𑀫𑁂𑀬𑁆𑀬𑀢𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀩𑀼𑀤𑁆𑀥𑀢𑁄 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀤𑁂𑀯𑀫𑀦𑀼𑀲𑁆𑀲𑀲𑁆𑀲 𑀧𑀸𑀤𑀢𑀮𑀫𑀚𑁆𑀛𑁂 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀢𑁄. 𑀪𑀕𑀯𑀢𑁄 𑀳𑀺 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑀮𑁂 𑀧𑀸𑀭𑀫𑀺𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀸𑀦𑀺 𑀲𑀫𑁆𑀧𑀸𑀧𑀼𑀡𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀁. 𑀢𑀲𑁆𑀫𑀸 𑀦𑀺𑀭𑀼𑀧𑀫𑁂𑀬𑁆𑀬𑀢𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀲𑀩𑁆𑀩𑀮𑁄𑀓𑀫𑀳𑀺𑀢𑀦𑁆𑀢𑀺 𑀲𑀩𑁆𑀩𑀮𑁄𑀓𑁂𑀦 𑀧𑀽𑀚𑀺𑀢𑀁. 𑀲𑀩𑁆𑀩𑁂𑀦 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀦 𑀫𑀳𑀺𑀢𑀩𑁆𑀩𑁄 𑀧𑀽𑀚𑀺𑀢𑀩𑁆𑀩𑁄𑀢𑀺 𑀲𑀩𑁆𑀩𑀮𑁄𑀓 𑀫𑀳𑀺𑀢𑁄, 𑀦𑀸𑀣𑁄 𑀮𑀩𑁆𑀪𑀢𑀺. 𑀢𑀁. 𑀉𑀧𑁆𑀧𑀦𑁆𑀦𑁂 𑀳𑀺 𑀢𑀣𑀸𑀕𑀢𑁂 𑀬𑁂 𑀓𑁂𑀘𑀺 𑀫𑀳𑁂𑀲𑀓𑁆𑀔𑀸 𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀲𑁆𑀲 𑀧𑀽𑀚𑁂𑀦𑁆𑀢𑀺, 𑀧𑀕𑁂𑀯 𑀅𑀜𑁆𑀜𑀸. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀭𑀢𑀦 𑀤𑀸𑀫𑁂𑀦 𑀢𑀣𑀸𑀕𑀢𑀁 𑀧𑀽𑀚𑁂𑀢𑀺. 𑀬𑀣𑀸𑀩𑀮𑀜𑁆𑀘 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀸𑀤𑀬𑁄 𑀦𑀺𑀩𑁆𑀩𑀼𑀢𑀫𑁆𑀧𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑁄𑀓 𑀫𑀳𑀸𑀭𑀸𑀚𑀸 ¶ 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀓𑀸 𑀓𑀣𑀸 𑀧𑀦 𑀅𑀜𑁆𑀜𑁂𑀲𑀁 𑀧𑀽𑀚𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀫𑀦𑁆𑀢𑀺 𑀲𑀩𑁆𑀩𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑁂𑀳𑀺 𑀅𑀲𑀤𑀺𑀲𑀁. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀦𑁆𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀲𑀫𑁄 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀅𑀲𑁆𑀲𑀸𑀢𑀺 𑀅𑀲𑀫𑁄, 𑀦𑀸𑀣𑁄. 𑀲𑁄 𑀧𑀦 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡 𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄. 𑀲𑀩𑁆𑀩𑀸𑀓𑀸𑀭 𑀧𑀭𑀺𑀲𑀼𑀤𑁆𑀥 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀭𑀢𑀦𑀲𑀫𑀺𑀤𑁆𑀥𑀥𑀫𑁆𑀫𑀓𑀸𑀬𑁄. 𑀧𑀼𑀜𑁆𑀜𑀫𑀳𑀢𑁆𑀢 𑀣𑀸𑀫𑀫𑀳𑀢𑁆𑀢𑀇𑀤𑁆𑀥𑀺𑀫𑀳𑀢𑁆𑀢 𑀬𑀲𑀫𑀳𑀢𑁆𑀢 𑀧𑀜𑁆𑀜𑀸𑀫𑀳𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲 𑀕𑀢𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀣𑀸𑀕𑀢𑁂𑀦 𑀲𑀫𑁄 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁 𑀅𑀲𑀫𑀁. 𑀢𑀦𑁆𑀢𑀺 𑀦𑀸𑀣𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀬𑁄 𑀦𑀸𑀣𑁄 𑀬𑁄 𑀬𑀸𑀤𑀺𑀲𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑁄 𑀩𑀼𑀤𑁆𑀥𑁄, 𑀅𑀯𑀺𑀓𑀮𑁂𑀳𑀺 𑀓𑁂𑀳𑀺𑀘𑀺 𑀅𑀯𑁂𑀓𑀮𑁆𑀮𑁂𑀳𑀺, 𑀦𑀺𑀭𑀸𑀓𑀼𑀮𑁂𑀳𑀺 𑀆𑀓𑀼𑀮𑀯𑀺𑀭𑀳𑀺𑀢𑁂𑀳𑀺, 𑀧𑀸𑀤𑀧𑀗𑁆𑀓𑀚 𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀺 𑀧𑀸𑀤𑀲𑀗𑁆𑀔𑀸𑀢𑀧𑀤𑀼𑀫𑀲𑁆𑀲 𑀲𑀡𑁆𑀳𑀢𑀮𑁂 𑀚𑀸𑀢𑁂𑀳𑀺 𑀅𑀝𑁆𑀞𑀲𑀢𑀘𑀓𑁆𑀓𑀮𑀓𑁆𑀔𑀡𑀭𑀸𑀚𑀺𑀓𑁂𑀳𑀺, 𑀢𑀻𑀳𑀺 𑀮𑁄𑀓𑁂𑀳𑀺 𑀓𑀢𑁆𑀢𑀼𑀪𑀽𑀢𑁂𑀳𑀺, 𑀦𑀺𑀭𑀼𑀧𑀫𑁂𑀬𑁆𑀬𑀢𑀁 𑀅𑀧𑁆𑀧𑀫𑁂𑀬𑁆𑀬𑀪𑀸𑀯𑀁 𑀅𑀧𑁆𑀧𑀫𑀺𑀢𑀩𑁆𑀩 𑀪𑀸𑀯𑀁 𑀯𑀸, 𑀲𑀫𑁆𑀧𑀸𑀧𑀼𑀡𑁂𑀏𑀯 𑀲𑀫𑁆𑀫𑀸 𑀕𑀘𑁆𑀙𑀢𑀺𑀏𑀯, 𑀲𑀩𑁆𑀩𑀮𑁄𑀓𑀫𑀳𑀺𑀢𑀁 𑀲𑀩𑁆𑀩𑀮𑁄𑀓𑁂𑀦 𑀧𑀽𑀚𑀺𑀢𑀁, 𑀅𑀲𑀫𑀁 𑀲𑀩𑁆𑀩𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑁂𑀳𑀺 𑀅𑀲𑀤𑀺𑀲𑀁 𑀢𑀁 𑀦𑀸𑀣𑀁 𑀅𑀳𑀁 𑀦𑀫𑀸𑀫𑀻𑀢𑀺.

𑀘𑀼𑀤𑁆𑀤𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀩𑀼𑀤𑁆𑀥𑀁 𑀦𑀭𑀸𑀦𑀭𑀲𑀫𑁄𑀲𑀭𑀡𑀁 𑀥𑀺𑀢𑀢𑁆𑀢𑀁,

𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀁;

𑀅𑀢𑁆𑀣𑀸𑀪𑀺𑀓𑀸𑀫𑀦𑀭𑀤𑁂𑀯𑀳𑀺𑀢𑀸𑀯𑀳𑀁 𑀢𑀁,

𑀯𑀦𑁆𑀤𑀸𑀫𑀺 𑀓𑀸𑀭𑀼𑀡𑀺𑀓𑀫𑀕𑁆𑀕𑀫𑀦𑀦𑁆𑀢𑀜𑀸𑀡𑀁.

𑁧𑁫. 𑀏𑀯𑀁 ¶ 𑀘𑀼𑀤𑁆𑀤𑀲𑀫𑀕𑀸𑀣𑀸𑀬 𑀦𑀸𑀣𑀁 𑀦𑀢𑁆𑀯𑀸 𑀇𑀤𑀸𑀦𑀺 𑀦𑀭𑀸𑀦𑀭𑀲 𑀫𑁄𑀲𑀭𑀡𑀦𑁆𑀢𑁆𑀬𑀸𑀤𑀻𑀳𑀺 𑀲𑀢𑁆𑀢𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑀼 𑀓𑀸𑀫𑁄 𑀩𑀼𑀤𑁆𑀥𑀁 𑀦𑀭𑀸𑀦𑀭𑀲𑀫𑁄𑀲𑀭𑀡𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢𑀪𑀚𑀚𑀕𑀡𑁂𑀳𑀺 𑀕𑀭𑀼𑀤𑁆𑀯𑀬𑁂𑀦 𑀘 𑀭𑀘𑀺𑀢𑀢𑁆𑀢𑀸 𑀘𑀼𑀤𑁆𑀤𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀯𑀲𑀦𑁆𑀢𑀢𑀺𑀮𑀓𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀸𑀥𑀓𑀁 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀢𑀢𑁆𑀣 𑀧𑀦 𑀦𑀭𑀸𑀦𑀭𑀲𑀫𑁄𑀲𑀭𑀡𑀦𑁆𑀢𑀺 𑀏𑀢𑁆𑀣 𑀦𑀭𑀅𑀦𑀭𑀲𑀫𑀁 𑀑𑀲𑀭𑀡𑀦𑁆𑀢𑀺 𑀧𑀤𑀯𑀺𑀪𑀸𑀕𑁄. 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀲𑀫𑀁 𑀑𑀲𑀭𑀡𑀁 𑀲𑀦𑁆𑀦𑀺𑀧𑀢𑀺𑀢𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀭𑀸𑀦𑀭𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀫𑀁 𑀅𑀯𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑁄, 𑀩𑀼𑀤𑁆𑀥𑁄. 𑀲𑀫𑀅𑀯𑀧𑀼𑀩𑁆𑀩 𑀲𑀭𑀥𑀸𑀢𑀼 𑀕𑀢𑀺𑀬𑀁 𑀬𑀼. 𑀦𑀭𑀸𑀦𑀭𑀸𑀦𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀲𑀫𑁄𑀲𑀭𑀡𑁄 𑀦𑀭𑀸𑀦𑀭𑀲𑀫𑁄𑀲𑀭𑀡𑁄, 𑀩𑀼𑀤𑁆𑀥𑁄. 𑀬𑀣𑀸 𑀳𑀺 𑀫𑀳𑀸𑀦𑀺𑀕𑁆𑀭𑁄𑀥𑁄 𑀨𑀮𑀓𑀸𑀫𑀸𑀦𑀁 𑀲𑀓𑀼𑀡 𑀲𑀫𑀽𑀳𑀸𑀦𑀁 𑀲𑀫𑁄𑀲𑀭𑀡𑀁 𑀳𑁄𑀢𑀺, 𑀏𑀯𑀁 𑀩𑀼𑀤𑁆𑀥𑁄 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀓𑀸𑀫𑀸𑀦𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀲𑀫𑁄𑀲𑀭𑀡𑁄 𑀲𑀦𑁆𑀦𑀺𑀧𑀢𑀺𑀢𑁄 𑀧𑀝𑀺𑀲𑀭𑀡𑁄 𑀯𑀸 𑀳𑁄𑀢𑀺. 𑀢𑀲𑁆𑀫𑀸 𑀦𑀭𑀸𑀦𑀭𑀲𑀫𑁄𑀲𑀭𑀡𑀦𑁆𑀢𑀺 𑀣𑁄𑀫𑁂𑀢𑀺.

𑀥𑀺𑀢𑀢𑁆𑀢𑀦𑁆𑀢𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑀁. 𑀏𑀢𑁆𑀣 𑀅𑀢𑁆𑀢𑀲𑀤𑁆𑀤𑁄 𑀅𑀢𑁆𑀢𑀲𑀫𑁆𑀫𑀸 𑀧𑀡𑀺𑀥𑀺 𑀘𑀸𑀢𑀺𑀆𑀤𑀻𑀲𑀼 𑀅𑀢𑁆𑀢𑀲𑀤𑁆𑀤𑁄 𑀯𑀺𑀬 𑀘𑀺𑀢𑁆𑀢𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀥𑀺𑀬𑀢𑀺 𑀞𑀧𑀺𑀬𑀢𑀺 𑀏𑀢𑁆𑀣 𑀏𑀢𑁂𑀦 𑀯𑀸 𑀏𑀓𑀸𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀢𑀺 𑀥𑀺𑀢𑁄, 𑀲𑀫𑀸𑀥𑀺. 𑀥𑀸𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀢. 𑀆𑀭𑀫𑁆𑀫𑀡𑀁 𑀅𑀤𑀢𑀺 𑀆𑀤𑀤𑀸𑀢𑀻𑀢𑀺 𑀅𑀢𑁆𑀢𑀁, 𑀘𑀺𑀢𑁆𑀢𑀁. 𑀅𑀤𑀥𑀸𑀢𑀼 𑀆𑀤𑀸𑀦𑁂 𑀢. 𑀥𑀺𑀢𑀁 𑀲𑀫𑀸𑀳𑀺𑀢𑀁 𑀅𑀢𑁆𑀢𑀁 𑀘𑀺𑀢𑁆𑀢𑀁 𑀬𑀲𑁆𑀲𑀸𑀢𑀺 𑀥𑀺𑀢𑀢𑁆𑀢𑁄, 𑀩𑀼𑀤𑁆𑀥𑁄. 𑀢𑀁 𑀥𑀺𑀢𑀢𑁆𑀢𑀁.

𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀧𑀤𑀻𑀧𑁄𑀪𑀸𑀲𑁂𑀦 𑀓𑀭𑀡𑀪𑀽𑀢𑁂𑀦. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀅𑀭𑀳𑀢𑁆𑀢𑀫𑀕𑁆𑀕 𑀜𑀸𑀡𑀁. 𑀬𑀣𑀸𑀲𑀪𑀸𑀯𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀲𑀩𑁆𑀩𑀧𑀓𑀸𑀭𑁂𑀳𑀺 ¶ 𑀥𑀫𑁆𑀫𑀲𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀧𑀜𑁆𑀜𑀸𑀧𑀤𑀻𑀧𑁄. 𑀚𑁄𑀢𑁂𑀢𑀻𑀢𑀺 𑀚𑀼𑀢𑀺, 𑀧𑀜𑁆𑀜𑀸𑀧𑀤𑀻𑀧𑁄𑀪𑀸𑀲𑁄. 𑀚𑀼𑀥𑀸𑀢𑀼 𑀤𑀺𑀢𑁆𑀢𑀺𑀬𑀦𑁆𑀢𑀺. 𑀧𑀜𑁆𑀜𑀸 𑀧𑀤𑀻𑀧𑁄𑀏𑀯 𑀚𑀼𑀢𑀺 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺. 𑀅𑀣 𑀯𑀸 𑀧𑀜𑁆𑀜𑀸𑀧𑀤𑀻𑀧𑀲𑁆𑀲 𑀚𑀼𑀢𑀺 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺, 𑀅𑀬𑀁 𑀧𑀦 𑀲𑀫𑀸𑀲𑁄 𑀅𑀪𑁂𑀤𑀪𑁂𑀤𑀽 𑀧𑀘𑀸𑀭𑁂𑀦 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸.

𑀯𑀺𑀳𑀢𑀦𑁆𑀥𑀓𑀸𑀭𑀦𑁆𑀢𑀺 𑀳𑀦𑀺𑀢𑀩𑁆𑀩𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀫𑁄𑀳𑀢𑀫𑀁. 𑀲𑀯𑀸𑀲𑀦𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑁂𑀦 𑀳𑀦𑀺𑀢𑀩𑁆𑀩𑁄𑀢𑀺 𑀯𑀺𑀳𑀢𑁄. 𑀯𑀺𑀧𑀼𑀩𑁆𑀩𑀳𑀦𑀥𑀸𑀢𑀼 𑀳𑀺𑀁𑀲𑀸𑀬𑀁 𑀢. 𑀅𑀦𑁆𑀥𑀁 𑀢𑀫𑀁 𑀓𑀭𑁄𑀢𑀻𑀢𑀺 𑀅𑀦𑁆𑀥𑀓𑀸𑀭𑁄, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀫𑁄𑀳𑁄. 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀓𑀢𑀸𑀬 𑀫𑁄𑀳𑁄 𑀅𑀦𑁆𑀥𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀅𑀦𑁆𑀥𑀁 𑀧𑀜𑁆𑀜𑀸𑀘𑀓𑁆𑀔𑀼𑀅𑀦𑁆𑀥𑀁 𑀓𑀭𑁄𑀢𑀻𑀢𑀺 𑀅𑀦𑁆𑀥𑀓𑀸𑀭𑁄, 𑀫𑁄𑀳𑁄. 𑀅𑀦𑁆𑀥𑀲𑀤𑁆𑀤𑀽𑀧𑀧𑀤 𑀓𑀭𑀥𑀸𑀢𑀼 𑀡. 𑀯𑀺𑀳𑀢𑁄 𑀅𑀦𑁆𑀥𑀓𑀸𑀭𑁄 𑀬𑁂𑀦 𑀲𑁄𑀢𑀺 𑀯𑀺𑀳𑀢𑀦𑁆𑀥𑀓𑀸𑀭𑁄, 𑀩𑀼𑀤𑁆𑀥𑁄. 𑀢𑀁 𑀯𑀺𑀳𑀢𑀦𑁆𑀥𑀓𑀸𑀭𑀁. 𑀬𑀣𑀸 𑀳𑀺 𑀮𑁄𑀓𑁂 𑀧𑀤𑀻𑀧𑁄 𑀅𑀢𑁆𑀢𑀦𑁄 𑀚𑀼𑀢𑀺𑀬𑀸 𑀅𑀦𑁆𑀥𑀓𑀸𑀭𑀁 𑀳𑀦𑀢𑀺, 𑀏𑀯𑀁 𑀩𑀼𑀤𑁆𑀥𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀧𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀳𑀦𑀢𑀻𑀢𑀺 𑀯𑀼𑀢𑁆𑀢𑀸. 𑀅𑀬𑀁 𑀧𑀦 𑀳𑀻𑀦𑀽𑀧𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀜𑀸𑀯𑀢𑁄 𑀳𑀺 𑀏𑀓𑀧𑀮𑁆𑀮𑀗𑁆𑀓𑁂𑀦𑀧𑀺 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼 𑀏𑀓𑀧𑀚𑁆𑀚𑁄𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀧𑀚𑁆𑀚𑁄𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄. 𑀘𑀦𑁆𑀤𑀧𑀚𑁆𑀚𑁄𑀢𑁄, 𑀲𑀽𑀭𑀺𑀬𑀧𑀚𑁆𑀚𑁄𑀢𑁄, 𑀅𑀕𑁆𑀕𑀺𑀧𑀚𑁆𑀚𑁄𑀢𑁄, 𑀧𑀜𑁆𑀜𑀸 𑀧𑀚𑁆𑀚𑁄𑀢𑁄. 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂 𑀘𑀢𑁆𑀢𑀸𑀭𑁄 𑀧𑀚𑁆𑀚𑁄𑀢𑀸. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀚𑁆𑀚𑁄𑀢𑀸𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸 𑀧𑀚𑁆𑀚𑁄𑀢𑁄’’𑀢𑀺.

𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀜𑁆𑀜𑀸𑀧𑀤𑀻𑀧 𑀚𑀼𑀢𑀺𑀬𑀸𑀢𑀺𑀇𑀫𑀺𑀦𑀸 𑀩𑀼𑀤𑁆𑀥𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀫𑀼𑀔𑁆𑀬𑁂𑀦 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑀦𑁂𑀦 𑀧𑀸𑀭𑀫𑀻𑀜𑀸𑀡𑀜𑁆𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮 𑀜𑀸𑀡𑀜𑁆𑀘 𑀨𑀮𑀽𑀧𑀘𑀸𑀭𑁂𑀦 𑀤𑀻𑀧𑁂𑀢𑀺. 𑀢𑀤𑁆𑀤𑀻𑀧𑀓𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀧𑁆𑀧𑀳𑀸𑀦𑀁 𑀧𑀞𑀫𑀓𑀸𑀭𑀡𑀽𑀧𑀘𑀸𑀭𑁂𑀦 𑀧𑀓𑀸𑀲𑁂𑀢𑀺. 𑀢𑀧𑁆𑀧𑀓𑀸𑀲𑀦𑁂𑀦 𑀅𑀭𑀳𑀢𑁆𑀢 𑀨𑀮𑀜𑀸𑀡𑀮𑀪𑀦𑀁 𑀤𑀼𑀢𑀺𑀬𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀁 𑀯𑀺𑀪𑀸𑀯𑀦𑁂𑀦 ¶ 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀮𑀪𑀦𑀁 𑀢𑀢𑀺𑀬 𑀓𑀸𑀭𑀡𑀽𑀧𑀘𑀸𑀭𑁂𑀦 𑀆𑀦𑀼𑀪𑀸𑀯𑁂𑀢𑀺.

𑀦𑀦𑀼 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀢𑀸 𑀲𑀫𑁆𑀪𑀯𑀢𑀺, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑀲𑀸𑀥𑀸𑀭𑀡𑀸𑀯𑀺𑀲𑁂𑀲 𑀕𑀼𑀡𑁂𑀦 𑀩𑀼𑀤𑁆𑀥𑀲𑁆𑀲 𑀣𑁄𑀫𑀦𑀸 𑀓𑀢𑀸𑀢𑀺. 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀢𑀸𑀬 𑀲𑀫𑁆𑀪𑀯𑀢𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀲𑀢𑀺𑀧𑀺 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀢𑁆𑀢𑁂 𑀅𑀭𑀺𑀬𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀯𑀸𑀲𑀦𑀸𑀬 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀦 𑀯𑀺𑀚𑁆𑀚𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁𑀬𑁂𑀯 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑀻𑀢𑀺 𑀲𑀸𑀢𑀺𑀲𑀬𑀯𑀲𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀧𑁆𑀧𑀳𑀸𑀦𑁂𑀦 𑀪𑀕𑀯𑀦𑁆𑀢𑀁𑀬𑁂𑀯 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀅𑀢𑁆𑀣𑀸𑀪𑀺𑀓𑀸𑀫𑀦𑁆𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀅𑀢𑀺𑀯𑀺𑀬 𑀇𑀘𑁆𑀙𑀦𑁆𑀢𑀁. 𑀓𑀸𑀭𑀡𑀸𑀦𑀼𑀭𑀽𑀧𑀁 𑀅𑀲𑀢𑀺 𑀪𑀯𑀢𑀻𑀢𑀺 𑀅𑀢𑁆𑀣𑀁, 𑀨𑀮𑀁. 𑀅𑀲𑀥𑀸𑀢𑀼 𑀪𑀼𑀯𑀺𑀫𑁆𑀳𑀺 𑀣. 𑀢𑀁 𑀅𑀪𑀺𑀅𑀢𑀺𑀭𑁂𑀓𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑀸𑀪𑀺𑀓𑀸𑀫𑁄, 𑀩𑀼𑀤𑁆𑀥𑁄. 𑀅𑀢𑁆𑀣𑀲𑀤𑁆𑀤𑀽𑀧𑀧𑀤 𑀅𑀪𑀺𑀧𑀼𑀩𑁆𑀩𑀓𑀫𑀼𑀥𑀸𑀢𑀼 𑀇𑀘𑁆𑀙𑀸𑀬𑀁 𑀡. 𑀢𑀁 𑀅𑀢𑁆𑀣𑀸𑀪𑀺𑀓𑀸𑀫𑀁. 𑀦𑀭𑀤𑁂𑀯𑀳𑀺𑀢𑀸𑀯𑀳𑀦𑁆𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀳𑀺𑀢𑀁 𑀥𑀸𑀭𑀓𑀁. 𑀳𑀺𑀢𑀁 𑀦𑀭𑀢𑀺 𑀦𑁂𑀢𑀻𑀢𑀺 𑀦𑀭𑁄, 𑀫𑀦𑀼𑀲𑁆𑀲𑁄. 𑀅𑀣 𑀯𑀸 𑀦𑀭𑀺𑀬𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦 𑀦𑀺𑀬𑁆𑀬𑀢𑀻𑀢𑀺 𑀦𑀭𑁄, 𑀫𑀦𑀼𑀲𑁆𑀲𑁄. 𑀦𑀭𑀥𑀸𑀢𑀼 𑀦𑀬𑀦𑁂 𑀅. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀫𑁆𑀫𑁂𑀦 𑀦𑀺𑀬𑁆𑀬𑀢𑀺 𑀮𑁄𑀓𑁄’’𑀢𑀺. 𑀓𑀸𑀫𑀕𑀼𑀡 𑀛𑀸𑀦𑀸𑀪𑀺𑀜𑁆𑀜𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀤𑁂𑀯𑀸, 𑀤𑀺𑀯𑀼𑀥𑀸𑀢𑀼 𑀓𑀻𑀴𑀸𑀤𑀻𑀲𑀼 𑀡. 𑀦𑀭𑀸 𑀘 𑀤𑁂𑀯𑀸 𑀘 𑀦𑀭𑀤𑁂𑀯𑀸. 𑀳𑀺𑀦𑁄𑀢𑀺 𑀯𑀟𑁆𑀠𑀢𑀻𑀢𑀺 𑀳𑀺𑀢𑀁, 𑀨𑀮𑀁. 𑀳𑀺𑀥𑀸𑀢𑀼 𑀯𑀟𑁆𑀠𑀦𑁂 𑀢. 𑀦𑀭𑀤𑁂𑀯𑀸𑀦𑀁 𑀳𑀺𑀢𑀁 𑀦𑀭𑀤𑁂𑀯𑀳𑀺𑀢𑀁, 𑀢𑀁 𑀆𑀯𑀳𑀢𑀻𑀢𑀺 𑀦𑀭𑀤𑁂𑀯𑀳𑀺𑀢𑀸𑀯𑀳𑁄, 𑀩𑀼𑀤𑁆𑀥𑁄. 𑀦𑀭𑀤𑁂𑀯𑀳𑀺𑀢𑀲𑀤𑁆𑀤𑀽𑀧𑀧𑀤𑀆𑀧𑀼𑀩𑁆𑀩 𑀯𑀳𑀥𑀸𑀢𑀼 𑀳𑀭𑀡𑁂 𑀡. 𑀩𑀼𑀤𑁆𑀥𑁄 𑀳𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀁 𑀥𑀫𑁆𑀫𑀤𑁂𑀲𑀦𑀸𑀬 𑀥𑀸𑀭𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀦𑀭𑀤𑁂𑀯𑀳𑀺𑀢𑀸𑀯𑀳𑀁. 𑀓𑀸𑀭𑀼𑀡𑀺𑀓𑀫𑀕𑁆𑀕𑀫𑀦𑀦𑁆𑀢 𑀜𑀸𑀡𑀦𑁆𑀢𑀺 ¶ 𑀏𑀢𑁆𑀣 𑀓𑀸𑀭𑀼𑀡𑀺𑀓𑀁 𑀅𑀕𑁆𑀕𑀁 𑀅𑀦𑀦𑁆𑀢𑀜𑀸𑀡𑀦𑁆𑀢𑀺𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣 𑀓𑀸𑀭𑀼𑀡𑀺𑀓𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀬𑀼𑀢𑁆𑀢𑀁, 𑀫𑀳𑀸𑀓𑀭𑀼𑀡𑀯𑀦𑁆𑀢𑀁 𑀯𑀸. 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀭𑀥𑀸𑀢𑀼 𑀅𑀧𑀦𑀬𑀦𑁂 𑀉𑀡𑀧𑀘𑁆𑀘𑀬𑁄. 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀓𑀺𑀦𑀸𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀥𑀸𑀢𑀼 𑀳𑀺𑀁𑀲𑀸𑀬𑀁 𑀭𑀼𑀡𑀧𑀘𑁆𑀘𑀬𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀓𑀭𑀥𑀸𑀢𑀼 𑀉𑀡𑀧𑀘𑁆𑀘𑀬𑁄. 𑀅𑀣 𑀯𑀸 𑀓𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀓𑀁𑀲𑀤𑁆𑀤𑀽𑀧𑀧𑀤 𑀭𑀼𑀥𑀺𑀥𑀸𑀢𑀼 𑀆𑀯𑀭𑀡𑁂 𑀬𑀼𑀧𑀘𑁆𑀘𑀬𑁄. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀮𑀓𑁆𑀔𑀡𑀸. 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀬 𑀫𑀳𑀸𑀓𑀭𑀼𑀡𑀸𑀬 𑀬𑀼𑀢𑁆𑀢𑁄 𑀓𑀸𑀭𑀼𑀡𑀺𑀓𑁄. 𑀓𑀭𑀼𑀡𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸 𑀓𑀸𑀭𑀼𑀡𑀺𑀓𑁄, 𑀩𑀼𑀤𑁆𑀥𑁄. 𑀢𑀁 𑀓𑀸𑀭𑀼𑀡𑀺𑀢𑀁. 𑀅𑀕𑁆𑀕𑀦𑁆𑀢𑀺 𑀚𑀸𑀢𑀺𑀧𑀼𑀜𑁆𑀜 𑀕𑀼𑀡𑀫𑀳𑀢𑁆𑀢𑀪𑀸𑀯𑁂𑀦 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀁 𑀲𑁂𑀝𑁆𑀞𑀪𑀸𑀯𑀁 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑁄, 𑀩𑀼𑀤𑁆𑀥𑁄. 𑀅𑀚𑀥𑀸𑀢𑀼 𑀕𑀢𑀺𑀬𑀁 𑀅. 𑀚𑀲𑁆𑀲 𑀕𑁄. 𑀩𑀼𑀤𑁆𑀥𑁄 𑀳𑀺 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀯𑀁𑀲𑁂 𑀚𑀸𑀢𑀢𑁆𑀢𑀸 𑀚𑀸𑀢𑀺𑀯𑀲𑁂𑀦 𑀘 𑀧𑀽𑀭𑀺𑀢𑀧𑀸𑀭𑀫𑀻𑀧𑀼𑀜𑁆𑀜𑀢𑁆𑀢𑀸 𑀧𑀼𑀜𑁆𑀜𑀯𑀲𑁂𑀦 𑀘 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀲𑀻𑀮𑀸𑀤𑀺 𑀕𑀼𑀡𑀯𑀺𑀲𑁂𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀕𑀼𑀡𑀯𑀲𑁂𑀦 𑀘 𑀅𑀦𑀦𑁆𑀢𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑁄. 𑀦𑀺𑀩𑁆𑀩𑀸𑀦𑀁 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀅𑀕𑁆𑀕𑁄. 𑀅𑀣 𑀯𑀸 𑀅𑀚𑁂𑀢𑀺 𑀔𑁂𑀧𑁂𑀢𑀺 𑀓𑀺𑀮𑁂𑀲𑁂𑀢𑀺 𑀅𑀕𑁆𑀕𑁄, 𑀩𑀼𑀤𑁆𑀥𑁄. 𑀅𑀚𑀥𑀸𑀢𑀼 𑀔𑁂𑀧𑀦𑁂 𑀅. 𑀢𑀁 𑀅𑀕𑁆𑀕𑀁. 𑀅𑀦𑀦𑁆𑀢𑀜𑀸𑀡𑀦𑁆𑀢𑀺 𑀕𑀡𑀦𑀯𑀲𑁂𑀦 𑀘 𑀲𑀪𑀸𑀯𑀯𑀲𑁂𑀦 𑀘 𑀯𑀺𑀲𑀬𑀯𑀲𑁂𑀦 𑀘 𑀅𑀦𑁆𑀢𑀯𑀺𑀭𑀳𑀺𑀢𑀜𑀸𑀡𑀁. 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀜𑀸𑀡𑁂𑀦 𑀅𑀦𑀦𑁆𑀢𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀦𑁆𑀢𑀁 𑀯𑀸. 𑀦𑀢𑁆𑀣𑀺 𑀅𑀦𑁆𑀢𑀁 𑀬𑀲𑁆𑀲𑀸𑀢𑀺 𑀅𑀦𑀦𑁆𑀢𑀁, 𑀜𑀸𑀡𑀁. 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀅𑀦𑀦𑁆𑀢𑀁 𑀜𑀸𑀡𑀁 𑀬𑀲𑁆𑀲 𑀲𑁄𑀢𑀺 𑀅𑀦𑀦𑁆𑀢𑀜𑀸𑀡𑁄, 𑀩𑀼𑀤𑁆𑀥𑁄. 𑀩𑀼𑀤𑁆𑀥𑀲𑁆𑀲 𑀳𑀺 𑀜𑀸𑀡𑀁 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀯𑀸 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀏𑀢𑁆𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑁂 𑁋

‘‘𑀲𑀓𑁆𑀓𑀸 𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀧𑀫𑁂𑀢𑀼𑀁 𑀅𑀴𑁆𑀳𑀓𑁂𑀦 𑀯𑀸;

𑀦𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂’’𑀢𑀺.

𑀓𑀸𑀭𑀼𑀡𑀺𑀓𑀫𑀕𑁆𑀕𑀫𑀦𑀦𑁆𑀢𑀜𑀸𑀡𑀦𑁆𑀢𑀺 𑀏𑀢𑁆𑀣 𑀘 𑀓𑀭𑀼𑀡𑀕𑁆𑀕𑀳𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺, 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀦𑁆𑀢𑀺. 𑀅𑀕𑁆𑀕𑀦𑁆𑀢𑀺 𑀏𑀢𑁂𑀦 𑀪𑀕𑀯𑀢𑁄 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀲𑀻𑀮𑀸𑀤𑀺𑀕𑀼𑀡𑀲𑀫𑀗𑁆𑀕𑀻𑀢𑀸𑀬 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀦𑀦𑁆𑀢𑀜𑀸𑀡𑀦𑁆𑀢𑀺𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀘 𑀲𑀸𑀫𑀢𑁆𑀣𑀺𑀬𑁂𑀦 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀙𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀘 𑀙𑀅𑀪𑀺𑀜𑁆𑀜𑀸 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦 𑀜𑀸𑀡𑀸𑀦𑀺 𑀤𑀲𑀩𑀮𑀜𑀸𑀡𑀸𑀦𑀺 𑀲𑁄𑀴𑀲𑀜𑀸𑀡𑀘𑀭𑀺𑀬𑀸 𑀘 𑀘𑀢𑀼𑀘𑀢𑁆𑀢𑀸𑀭𑀻𑀲𑀜𑀸𑀡𑀯𑀢𑁆𑀣𑀽𑀦𑀺 𑀲𑀢𑁆𑀢𑀲𑀢𑁆𑀢𑀢𑀺𑀜𑀸𑀡𑀯𑀢𑁆𑀣𑀽𑀦𑀺 𑀘𑀸𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀸𑀘𑀸𑀭𑀁 𑀤𑀲𑁆𑀲𑁂𑀢𑀻𑀢𑀺. 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀦𑀭𑀸𑀦𑀭𑀲𑀫𑁄𑀲𑀭𑀡𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀲𑀫𑀁 𑀑𑀲𑀭𑀡𑀁 𑀲𑀦𑁆𑀦𑀺𑀧𑀢𑀺𑀢𑀝𑁆𑀞𑀸𑀦𑀁, 𑀥𑀺𑀢𑀢𑁆𑀢𑀁 𑀲𑀫𑀸𑀳𑀺𑀢𑀘𑀺𑀢𑁆𑀢𑀁, 𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢 𑀧𑀤𑀻𑀧𑁄𑀪𑀸𑀲𑁂𑀦 𑀓𑀭𑀡𑀪𑀽𑀢𑁂𑀦 𑀯𑀺𑀳𑀢𑀦𑁆𑀥𑀓𑀸𑀭𑀁 𑀳𑀦𑀺𑀢𑀩𑁆𑀩 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀫𑁄𑀳𑀢𑀫𑀁, 𑀅𑀢𑁆𑀣𑀸𑀪𑀺𑀓𑀸𑀫𑀁 𑀲𑀢𑁆𑀢𑀮𑁄𑀓𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀧𑀬𑁄𑀚𑀦𑀁 𑀅𑀢𑀺𑀯𑀺𑀬 𑀇𑀘𑁆𑀙𑀦𑁆𑀢𑀁, 𑀦𑀭𑀤𑁂𑀯𑀳𑀺𑀢𑀸𑀯𑀳𑀁 𑀫𑀦𑀼𑀲𑁆𑀲𑀤𑁂𑀯𑀸𑀦𑀁 𑀳𑀺𑀢𑀁 𑀥𑀸𑀭𑀓𑀁, 𑀓𑀸𑀭𑀼𑀡𑀺𑀓𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 ¶ 𑀫𑀳𑀸𑀓𑀭𑀼𑀡𑀸𑀬 𑀬𑀼𑀢𑁆𑀢𑀁 𑀫𑀳𑀸𑀓𑀭𑀼𑀡𑀯𑀦𑁆𑀢𑀁 𑀯𑀸, 𑀅𑀕𑁆𑀕𑀁 𑀚𑀸𑀢𑀺𑀧𑀼𑀜𑁆𑀜𑀕𑀼𑀡𑀫𑀳𑀢𑁆𑀢𑀪𑀸𑀯𑁂𑀦 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀁, 𑀅𑀦𑀦𑁆𑀢 𑀜𑀸𑀡𑀁 𑀕𑀡𑀯𑀲𑁂𑀦 𑀘 𑀲𑀪𑀸𑀯𑀯𑀲𑁂𑀦 𑀘 𑀯𑀺𑀲𑀬𑀯𑀲𑁂𑀦 𑀘 𑀅𑀦𑁆𑀢𑀯𑀺𑀭𑀳𑀺𑀢𑀜𑀸𑀡𑀁, 𑀅𑀦𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀦𑁆𑀢𑀁 𑀯𑀸 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀯𑀦𑁆𑀤𑀸𑀫𑀻𑀢𑀺.

𑀧𑀦𑁆𑀦𑀭𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄 𑀬𑁄 𑀫𑀼𑀦𑀺𑀦𑁆𑀤𑁄𑀧𑀕𑀦𑁆𑀢𑁆𑀯𑀸,

𑀯𑀦𑀫𑀺𑀲𑀺𑀧𑀢𑀦𑀯𑁆𑀳𑀁 𑀲𑀜𑁆𑀜𑀢𑀸𑀦𑀁 𑀦𑀺𑀓𑁂𑀢𑀁;

𑀢𑀳𑀺𑀫𑀓𑀼𑀲𑀮𑀙𑁂𑀤𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁄,

𑀢𑀫𑀢𑀼𑀮𑀫𑀪𑀺𑀓𑀦𑁆𑀢𑀁 𑀯𑀦𑁆𑀤𑀦𑁂𑀬𑁆𑀬𑀁 𑀦𑀫𑀸𑀫𑀺.

𑁧𑁬. 𑀏𑀯𑀁 𑀧𑀦𑁆𑀦𑀭𑀲𑀫𑀕𑀸𑀣𑀸𑀬 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀇𑀲𑀺𑀧𑀢𑀦 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀸𑀤𑀺𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀫𑀼𑀦𑀺𑀦𑁆𑀤𑀁 𑀯𑀦𑁆𑀤𑀺𑀢𑀼 𑀓𑀸𑀫𑁄 𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄 𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀦𑀦𑀫𑀬𑀬𑀕𑀡𑁂𑀳𑀺 𑀭𑀘𑀺𑀢𑀢𑁆𑀢𑀸 𑀧𑀦𑁆𑀦𑀭𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀫𑀸𑀮𑀺𑀦𑀻 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀦𑀦𑀫𑀬𑀬𑀬𑀼𑀢𑀸𑀬𑀁 𑀫𑀸𑀮𑀺𑀦𑀻𑀪𑁄𑀕𑀺𑀲𑀻𑀳𑀻’’𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀪𑁄𑀕𑀺𑀲𑀻𑀳𑀺 𑀅𑀝𑁆𑀞𑀲𑀢𑁆𑀢𑀬𑀢𑀻𑀳𑀺 𑀬𑀼𑀢𑁆𑀢𑀸 𑀘 𑀦𑀦𑀫𑀬𑀬𑀬𑀼𑀢𑀸 𑀦𑀦𑀕𑀡𑀫𑀕𑀡 𑀬𑀬𑀕𑀡𑁂𑀳𑀺 𑀬𑀼𑀢𑁆𑀢𑀸 𑀘 𑀘𑁂 𑀲𑀺𑀬𑀼𑀁, 𑀅𑀬𑀁 𑀕𑀸𑀣𑀸 𑀫𑀸𑀮𑀺𑀦𑀻𑀕𑀸𑀣𑀸 𑀦𑀸𑀫𑀸𑀢𑀺. 𑀏𑀢𑁆𑀣 𑀘 𑀪𑁄𑀕𑀺𑀲𑀻𑀳𑀻𑀢𑀺 𑀪𑁄𑀕𑀇𑀲𑀻𑀳𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀪𑁄𑀕𑀲𑀤𑁆𑀤𑁄 𑀅𑀝𑁆𑀞𑀲𑀗𑁆𑀔𑁆𑀬𑀸 𑀯𑀸𑀘𑀓𑁄. 𑀇𑀲𑀺𑀲𑀤𑁆𑀤𑁄 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄𑀢𑀺 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀲𑀗𑁆𑀔𑀸𑀢𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑁄. 𑀏𑀢𑁆𑀣 𑀘 𑀅𑀔𑀺𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀯𑀸𑀘𑀓𑁄. 𑀲𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀥𑀼𑀝𑀻𑀓𑀸𑀬𑀁 ‘‘𑀔𑀺𑀮𑀲𑀤𑁆𑀤𑁄 𑀳𑁂𑀢𑁆𑀣 𑀅𑀯𑀲𑁂𑀲𑀯𑀸𑀘𑀓𑁄’’𑀢𑀺. 𑀦 𑀔𑀺𑀮𑀁 𑀅𑀔𑀺𑀮𑀁. 𑀅𑀣 𑀯𑀸 𑀦 𑀔𑀻𑀬𑀢𑀻𑀢𑀺 𑀅𑀔𑀺𑀮𑀁 ¶ , 𑀲𑀩𑁆𑀩𑀁. 𑀦𑀧𑀼𑀩𑁆𑀩𑀔𑀺𑀥𑀸𑀢𑀼 𑀔𑀬𑁂 𑀮𑁄. 𑀕𑀼𑀡𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀔𑀺𑀮𑀸𑀦𑀺 𑀲𑀩𑁆𑀩𑀸𑀦𑀺 𑀕𑀼𑀡𑀸𑀦𑀺 𑀅𑀔𑀺𑀮𑀕𑀼𑀡𑀸𑀦𑀺, 𑀢𑁂𑀲𑀁 𑀦𑀺𑀥𑀸𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄, 𑀫𑀼𑀦𑀺𑀦𑁆𑀤𑁄 𑀮𑀩𑁆𑀪𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄. 𑀫𑀼𑀦𑀺𑀦𑁆𑀤𑁄𑀧𑀕𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀫𑀼𑀦𑀺𑀦𑁆𑀤𑁄 𑀉𑀧𑀕𑀦𑁆𑀢𑁆𑀯𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀫𑀼𑀦𑀺𑀦𑁆𑀤𑁄𑀢𑀺 𑀅𑀕𑀸𑀭𑀺𑀬𑀫𑀼𑀦𑀺, 𑀅𑀦𑀕𑀸𑀭𑀺𑀬𑀫𑀼𑀦𑀺, 𑀲𑁂𑀓𑁆𑀔𑀫𑀼𑀦𑀺, 𑀅𑀲𑁂𑀓𑁆𑀔𑀫𑀼𑀦𑀺, 𑀧𑀘𑁆𑀘𑁂𑀓 𑀫𑀼𑀦𑀺𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀫𑀼𑀦𑀻𑀦𑀁 𑀇𑀦𑁆𑀤𑁄 𑀇𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀦 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄 𑀬𑁄 𑀫𑀼𑀦𑀺𑀦𑁆𑀤𑁄 𑀲𑀜𑁆𑀜𑀢𑀸𑀦𑀁 𑀦𑀺𑀓𑁂𑀢𑀁 𑀇𑀲𑀺𑀧𑀢𑀦𑀅𑀯𑁆𑀳𑀁 𑀯𑀦𑀁 𑀉𑀧𑀕𑀦𑁆𑀢𑁆𑀯𑀸 𑀢𑀳𑀺𑀁 𑀅𑀓𑀼𑀲𑀮𑀙𑁂𑀤𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀦𑀫𑀺𑀲𑀺𑀧𑀢𑀦𑀯𑁆𑀳𑀦𑁆𑀢𑀺 𑀯𑀦𑀁 𑀇𑀲𑀺𑀧𑀢𑀦𑀅𑀯𑁆𑀳𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀢𑁆𑀣 𑀯𑀦𑀦𑁆𑀢𑀺 𑀫𑀺𑀕𑀤𑀸𑀬𑀯𑀦𑀁. 𑀢𑀜𑁆𑀳𑀺 𑀯𑀺𑀯𑁂𑀓𑀓𑀸𑀫𑁂𑀳𑀺 𑀯𑀦𑀺𑀢𑀩𑁆𑀩𑀁 𑀲𑀫𑁆𑀪𑀚𑀺𑀢𑀩𑁆𑀩𑀁 𑀏𑀢𑁆𑀣𑀸𑀢𑀺 𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀦𑀥𑀸𑀢𑀼 𑀲𑀫𑁆𑀪𑀢𑁆𑀢𑀺𑀬𑀁 𑀓𑁆𑀯𑀺. 𑀇𑀲𑀺𑀧𑀢𑀦𑀯𑁆𑀳𑀦𑁆𑀢𑀺 𑀇𑀲𑀺𑀧𑀢𑀦𑀦𑀸𑀫𑀺𑀓𑀁 𑀇𑀲𑀻𑀦𑀁 𑀧𑀢𑀦𑀝𑁆𑀞𑀸𑀦𑀢𑁆𑀢𑀸 𑀇𑀲𑀺𑀧𑀢𑀦𑀦𑁆𑀢𑀺 𑀯𑁄𑀳𑀭𑀺𑀢𑀩𑁆𑀩𑀁 𑀯𑀸, 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀇𑀲𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄. 𑀇𑀲𑀥𑀸𑀢𑀼 𑀕𑀯𑁂𑀲𑀦𑁂 𑀇𑀧𑀘𑁆𑀘𑀬𑁄. 𑀢𑁂 𑀧𑀢𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀇𑀲𑀺𑀧𑀢𑀦𑀁, 𑀯𑀦𑀁. 𑀇𑀲𑀺𑀲𑀤𑁆𑀤𑀽𑀧𑀧𑀤𑀧𑀢𑀥𑀸𑀢𑀼 𑀕𑀢𑀺𑀬𑀁 𑀬𑀼. 𑀅𑀣 𑀯𑀸 𑀇𑀲𑀻𑀦𑀁 𑀧𑀢𑀦𑀁 𑀇𑀲𑀺𑀧𑀢𑀦𑀁, 𑀯𑀦𑀁. 𑀅𑀯𑁆𑀳𑁂𑀢𑀩𑁆𑀩𑀁 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀯𑁆𑀳𑀁. 𑀆𑀧𑀼𑀩𑁆𑀩𑀯𑁆𑀳𑁂𑀥𑀸𑀢𑀼 𑀅𑀯𑁆𑀳𑀬𑀦𑁂 𑀓𑁆𑀯𑀺. 𑀲𑀁𑀬𑁄𑀕𑀧𑀭𑀢𑁆𑀢𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑀸𑀤𑁂𑀲𑁄. 𑀇𑀲𑀺𑀧𑀢𑀦𑀦𑁆𑀢𑀺 𑀅𑀯𑁆𑀳𑁂𑀢𑀩𑁆𑀩𑀦𑁆𑀢𑀺 𑀇𑀲𑀺𑀧𑀢𑀦𑀯𑁆𑀳𑀁, 𑀯𑀦𑀁. 𑀲𑀜𑁆𑀜𑀢𑀸𑀦𑀦𑁆𑀢𑀺 𑀓𑀸𑀬𑀯𑀘𑀻𑀫𑀦𑁄𑀲𑀁𑀬𑀫𑀦𑁆𑀢𑀸𑀦𑀁 𑀲𑀸𑀥𑀽𑀦𑀁. 𑀲𑀁𑀬𑀫𑀦𑁆𑀢𑀻𑀢𑀺 𑀲𑀜𑁆𑀜𑀢𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀲𑀸𑀥𑀽. 𑀲𑀁𑀧𑀼𑀩𑁆𑀩𑀬𑀫𑀼𑀥𑀸𑀢𑀼 𑀉𑀧𑀭𑀫𑁂 𑀢. 𑀢𑁂𑀲𑀁 𑀲𑀜𑁆𑀜𑀢𑀸𑀦𑀁. 𑀦𑀺𑀓𑁂𑀢𑀦𑁆𑀢𑀺 𑀯𑀲𑀦𑀝𑁆𑀞𑀸𑀦𑀁, 𑀭𑀫𑁆𑀫𑀡𑀝𑁆𑀞𑀸𑀦𑀁 𑀯𑀸. 𑀦𑀺𑀓𑀺𑀢𑀢𑀺 𑀦𑀺𑀯𑀲𑀢𑀺 𑀭𑀫𑁆𑀫𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀦𑀺𑀓𑁂𑀢𑀁, 𑀯𑀦𑀁. 𑀦𑀺𑀧𑀼𑀩𑁆𑀩 𑀓𑀺𑀢𑀥𑀸𑀢𑀼 𑀦𑀺𑀯𑀸𑀲𑁂 𑀡. 𑀉𑀧𑀕𑀦𑁆𑀢𑁆𑀯𑀸𑀢𑀺 𑀕𑀫𑀺𑀢𑁆𑀯𑀸. 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀇𑀲𑀺𑀧𑀢𑀦𑀦𑀸𑀫𑀓𑁂 𑀫𑀺𑀕𑀤𑀸𑀬𑀯𑀦𑁂. 𑀅𑀓𑀼𑀲𑀮𑀙𑁂𑀤𑀦𑁆𑀢𑀺 𑀅𑀓𑀼𑀲𑀮𑀲𑁆𑀲 𑀲𑀫𑀼𑀘𑁆𑀙𑁂𑀤𑀁. 𑀅𑀓𑀼𑀲𑀮𑀁 𑀙𑀺𑀦𑁆𑀤𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 ¶ 𑀏𑀢𑁂𑀦 𑀲𑀼𑀢𑁆𑀢𑁂𑀦𑀸𑀢𑀺 𑀅𑀓𑀼𑀲𑀮𑀙𑁂𑀤𑀁, 𑀥𑀫𑁆𑀫𑀘𑀓𑁆𑀓 𑀧𑀯𑀢𑁆𑀢𑀦𑀲𑀼𑀢𑁆𑀢𑀁. 𑀅𑀓𑀼𑀲𑀮𑀲𑀤𑁆𑀤𑀽𑀧𑀧𑀤𑀙𑀺𑀤𑀺𑀥𑀸𑀢𑀼 𑀤𑁆𑀯𑀺𑀥𑀸𑀓𑀭𑀡𑁂 𑀡.

𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀘𑀓𑁆𑀓𑀲𑀤𑁆𑀤𑁄 𑀲𑀫𑁆𑀧𑀢𑁆𑀢𑀺𑀬𑀁, 𑀮𑀓𑁆𑀔𑀡𑁂, 𑀭𑀣𑀗𑁆𑀕𑁂, 𑀇𑀭𑀺𑀬𑀸𑀧𑀣𑁂, 𑀤𑀸𑀦𑁂, 𑀭𑀢𑀦 𑀥𑀫𑁆𑀫𑀔𑀼𑀭𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺. 𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺𑀆𑀤𑀻𑀲𑀼 𑀳𑀺 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻𑀢𑀺 𑀏𑀢𑁆𑀣 𑀮𑀓𑁆𑀔𑀡𑁂. 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀦𑁆𑀢𑀺 𑀏𑀢𑁆𑀣 𑀭𑀣𑀗𑁆𑀕𑁂. 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀦𑁆𑀢𑀺 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. 𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄 𑀘𑀓𑁆𑀓𑀁 𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀻𑀦𑀦𑁆𑀢𑀺 𑀏𑀢𑁆𑀣 𑀤𑀸𑀦𑁂. 𑀤𑀺𑀩𑁆𑀩𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻𑀢𑀺 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. 𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. 𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂𑀢𑀺 𑀏𑀢𑁆𑀣 𑀔𑀼𑀭𑀘𑀓𑁆𑀓𑁂. 𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑀓𑁆𑀓𑁂𑀦𑀸𑀢𑀺 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. 𑀅𑀲𑀦𑀺𑀯𑀺𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀥𑀫𑁆𑀫𑀘𑀓𑁆𑀓𑁂 𑀤𑀝𑁆𑀞𑀩𑁆𑀩𑁄. 𑀢𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑀁 𑀘𑀓𑁆𑀓𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀭𑀺𑀬𑀲𑀘𑁆𑀘𑀸𑀤𑀺𑀥𑀫𑁆𑀫𑀁 𑀯𑀸 𑀘𑀓𑁆𑀓𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀦𑁆𑀢𑀺. 𑀅𑀣 𑀯𑀸 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀆𑀡𑀸𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀢𑁂𑀦 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂 𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺. 𑀅𑀧𑀺 𑀘 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀺. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀦𑀬𑀲𑀳𑀲𑁆𑀲𑁂𑀳𑀺 𑀧𑀝𑀺𑀯𑀺𑀚𑁆𑀛𑀺. 𑀤𑁂𑀲𑀦𑀸𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀉𑀪𑀬𑀫𑁆𑀧𑁂𑀢𑀁 𑀤𑀲𑀩𑀮𑀲𑁆𑀲 𑀉𑀭𑁂 𑀚𑀸𑀢𑀜𑀸𑀡𑀫𑁂𑀯. 𑀢𑁂𑀲𑀼 𑀧𑀦 𑀥𑀫𑁆𑀫𑀤𑁂𑀲𑀦𑀸𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀼𑀢𑁆𑀢𑀁 𑀧𑀦 𑀞𑀸𑀦𑀽𑀧𑀘𑀸𑀭𑁂𑀦 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀯𑀢𑁆𑀢𑁄𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 ¶ 𑀪𑀺𑀓𑁆𑀔𑀽𑀦𑀁 𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺𑀆𑀤𑀺𑀦𑀸 𑀅𑀤𑁂𑀲𑀬𑀺.

𑀢𑀫𑀢𑀼𑀮𑀫𑀪𑀺𑀓𑀦𑁆𑀢𑀦𑁆𑀢𑀺 𑀢𑀁 𑀅𑀢𑀼𑀮𑀁 𑀅𑀪𑀺𑀓𑀦𑁆𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀢𑁆𑀣 𑀢𑀦𑁆𑀢𑀺 𑀫𑀼𑀦𑀺𑀦𑁆𑀤𑀁. 𑀅𑀢𑀼𑀮𑀦𑁆𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁. 𑀦𑀢𑁆𑀣𑀺 𑀢𑀼𑀮𑁄 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀏𑀢𑀲𑁆𑀲𑀸𑀢𑀺 𑀅𑀢𑀼𑀮𑁄, 𑀫𑀼𑀦𑀺𑀦𑁆𑀤𑁄. 𑀢𑀲𑁆𑀲 𑀳𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓 𑀥𑀸𑀢𑀽𑀲𑀼 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺. 𑀅𑀲𑀤𑀺𑀲𑁂𑀳𑀺 𑀩𑀼𑀤𑁆𑀥𑁂𑀳𑀺 𑀲𑀫𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀓𑀦𑁆𑀢𑀦𑁆𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀯𑀺𑀬 𑀓𑀦𑁆𑀢𑀁 𑀓𑀫𑀦𑀻𑀬𑀁 𑀲𑀭𑀻𑀭𑀯𑀡𑁆𑀡𑀯𑀦𑁆𑀢𑀁. 𑀅𑀢𑀺𑀭𑁂𑀓𑀁 𑀢𑀼𑀲𑀺𑀢𑀩𑁆𑀩𑀲𑀭𑀻𑀭𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀯𑀸. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀓𑀸𑀭𑀮𑁄𑀧𑀜𑁆𑀘 𑀯𑀡𑁆𑀡𑀧𑀤𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀲𑀦𑁆𑀥𑀺𑀯𑀲𑁂𑀦 𑀅𑀪𑀺𑀓𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀢𑁆𑀢𑀭𑀧𑀤𑀮𑁄𑀧 𑀯𑀲𑁂𑀦 𑀯𑀸. 𑀫𑀼𑀦𑀺𑀦𑁆𑀤𑀲𑁆𑀲 𑀧𑀦 𑀲𑀭𑀻𑀭𑀯𑀡𑁆𑀡𑀁 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀯𑀺𑀬 𑀅𑀢𑀺𑀭𑁂𑀓𑀁 𑀯𑀸 𑀓𑀫𑀺𑀬𑀢𑀺 𑀢𑁄𑀲𑀺𑀬𑀢𑀻𑀢𑀺 𑀅𑀪𑀺𑀓𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀧𑀼𑀩𑁆𑀩𑀓𑀫𑀼𑀥𑀸𑀢𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼 𑀢. 𑀅𑀪𑀺𑀓𑀦𑁆𑀢𑀁 𑀯𑀡𑁆𑀡𑀁 𑀲𑀭𑀻𑀭𑀯𑀡𑁆𑀡𑀁 𑀬𑀲𑁆𑀲 𑀲𑁄𑀢𑀺 𑀅𑀪𑀺𑀓𑀦𑁆𑀢𑁄, 𑀫𑀼𑀦𑀺𑀦𑁆𑀤𑁄. 𑀢𑀲𑁆𑀲 𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘 𑀅𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦 𑀮𑀓𑁆𑀔𑀡𑁂𑀳𑀺 𑀘 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀘 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀘 𑀲𑀫𑀦𑁆𑀦𑀸 𑀕𑀢𑀢𑁆𑀢𑀸 𑀲𑀭𑀻𑀭𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀢𑁄 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀯𑀺𑀬 𑀓𑀫𑀦𑀻𑀬𑁄 𑀢𑀼𑀝𑁆𑀞𑁄 𑀲𑀭𑀻𑀭𑀯𑀡𑁆𑀡𑁄 𑀅𑀢𑁆𑀣𑀻𑀢𑀺 𑀅𑀪𑀺𑀓𑀦𑁆𑀢𑀦𑁆𑀢𑀺 𑀣𑁄𑀫𑁂𑀢𑀺. 𑀢𑀁 𑀅𑀪𑀺𑀓𑀦𑁆𑀢𑀁. 𑀯𑀦𑁆𑀤𑀦𑁂𑀬𑁆𑀬𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀦𑁆𑀤𑀦𑀸𑀭𑀳𑀁. 𑀢𑁂𑀳𑀺 𑀯𑀦𑁆𑀤𑀺𑀢𑀩𑁆𑀩𑀁 𑀯𑀸, 𑀯𑀦𑁆𑀤𑀺𑀬𑀢𑁂 𑀣𑁄𑀫𑀺𑀬𑀢𑁂 𑀯𑀸 𑀯𑀦𑁆𑀤𑀦𑀁. 𑀪𑀸𑀯𑀲𑀸𑀥𑀦𑁄𑀬𑀁. 𑀯𑀦𑁆𑀤𑀥𑀸𑀢𑀼 𑀯𑀤𑀺𑀥𑀸𑀢𑀼 𑀯𑀸 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀼 𑀬𑀼. 𑀢𑀁 𑀅𑀭𑀳𑀢𑀻𑀢𑀺 𑀯𑀦𑁆𑀤𑀦𑁂𑀬𑁆𑀬𑁄, 𑀫𑀼𑀦𑀺𑀦𑁆𑀤𑁄. 𑀯𑀦𑁆𑀤𑀧𑀤𑀁 𑀅𑀭𑀳𑀢𑀺𑀢𑀤𑁆𑀥𑀺𑀢𑁂 𑀡𑁂𑀬𑁆𑀬𑁄.

𑀅𑀣 𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀯𑀦𑁆𑀤𑀺𑀢𑀩𑁆𑀩𑀁 𑀣𑁄𑀫𑀺𑀢𑀩𑁆𑀩𑀦𑁆𑀢𑀺 𑀯𑀸 𑀯𑀦𑁆𑀤𑀦𑁂𑀬𑁆𑀬𑁄, 𑀫𑀼𑀦𑀺𑀦𑁆𑀤𑁄. 𑀲𑁄 𑀳𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀦𑁆𑀤𑀦𑀸𑀭𑀳𑁄 𑀢𑁂𑀳𑀺 𑀯𑀸 𑀯𑀦𑁆𑀤𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀢𑁆𑀣 𑀘 𑀆𑀤𑀺𑀕𑀼𑀡𑀁 𑀦𑀸𑀫 𑀓𑀭𑀼𑀡𑀸𑀦𑀺𑀤𑀸𑀦𑀁 ¶ 𑀲𑀻𑀮𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄. 𑀫𑀚𑁆𑀛 𑀕𑀼𑀡𑀁 𑀦𑀸𑀫 𑀲𑀫𑀸𑀥𑀺 𑀛𑀸𑀦𑀢𑁆𑀢𑀬𑀬𑁄𑀕𑀢𑁄. 𑀧𑀭𑀺𑀬𑁄𑀲𑀸𑀦𑀕𑀼𑀡𑀁 𑀦𑀸𑀫 𑀧𑀜𑁆𑀜𑀸 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄𑀢𑀺 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀯𑀦𑁆𑀤𑀦𑁂𑀬𑁆𑀬𑀦𑁆𑀢𑀺 𑀣𑁄𑀫𑁂𑀢𑀺. 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀅𑀔𑀺𑀮𑀦𑀺𑀥𑀸𑀦𑁄 𑀲𑀩𑁆𑀩 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡 𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑁄 𑀬𑁄 𑀬𑀸𑀤𑀺𑀲𑁄 𑀫𑀼𑀦𑀺𑀦𑁆𑀤𑁄 𑀧𑀜𑁆𑀘𑀦𑁆𑀦𑀁 𑀫𑀼𑀦𑀻𑀦𑀁 𑀇𑀦𑁆𑀤𑁄 𑀇𑀲𑁆𑀲𑀭𑁄 𑀪𑀕𑀯𑀸, 𑀲𑀜𑁆𑀜𑀢𑀸𑀦𑀁 𑀓𑀸𑀬𑀯𑀘𑀻𑀫𑀦𑁄𑀲𑀁𑀬 𑀫𑀦𑁆𑀢𑀸𑀦𑀁 𑀲𑀸𑀥𑀽𑀦𑀁, 𑀦𑀺𑀓𑁂𑀢𑀁 𑀯𑀲𑀦𑀝𑁆𑀞𑀸𑀦𑀁 𑀭𑀫𑁆𑀫𑀡𑀝𑁆𑀞𑀸𑀦𑀁 𑀯𑀸, 𑀇𑀲𑀺𑀧𑀢𑀦𑀯𑁆𑀳𑀁 𑀇𑀲𑀺𑀧𑀢𑀦𑀦𑀸𑀫𑀺𑀓𑀁 𑀇𑀲𑀺𑀧𑀢𑀦𑀦𑁆𑀢𑀺 𑀯𑁄𑀳𑀭𑀺𑀢𑀩𑁆𑀩𑀁 𑀯𑀸, 𑀯𑀦𑀁 𑀫𑀺𑀕𑀤𑀸𑀬𑀯𑀦𑀁, 𑀉𑀧𑀕𑀦𑁆𑀢𑁆𑀯𑀸 𑀕𑀫𑀺𑀢𑁆𑀯𑀸 𑀢𑀳𑀺𑀁 𑀢𑀲𑁆𑀫𑀺𑀁 𑀇𑀲𑀺𑀧𑀢𑀦𑀦𑀸𑀫𑀓𑁂 𑀫𑀺𑀕𑀤𑀸𑀬 𑀯𑀦𑁂, 𑀅𑀓𑀼𑀲𑀮𑀲𑁆𑀲 𑀲𑀫𑀼𑀘𑁆𑀙𑁂𑀤𑀁, 𑀥𑀫𑁆𑀫𑀘𑀓𑁆𑀓𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀁, 𑀧𑀯𑀢𑁆𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀤𑁂𑀲𑀬𑀺, 𑀅𑀢𑀼𑀮𑀁 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁, 𑀅𑀪𑀺𑀓𑀦𑁆𑀢𑀁 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀯𑀺𑀬 𑀓𑀦𑁆𑀢𑀁 𑀓𑀫𑀦𑀻𑀬𑀁 𑀢𑀼𑀝𑁆𑀞𑀺 𑀲𑀭𑀻𑀭𑀯𑀡𑁆𑀡𑀯𑀦𑁆𑀢𑀁, 𑀯𑀦𑁆𑀤𑀦𑁂𑀬𑁆𑀬𑀁 𑀤𑁂𑀯 𑀫𑀦𑀼𑀲𑁆𑀲𑀸𑀦𑀁 𑀯𑀦𑁆𑀤𑀦𑀸𑀭𑀳𑀁 𑀢𑁂𑀳𑀺 𑀯𑀸 𑀯𑀦𑁆𑀤𑀺𑀢𑀩𑁆𑀩𑀁, 𑀢𑀁 𑀫𑀼𑀦𑀺𑀦𑁆𑀤𑀁 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀲𑁄𑀴𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀁 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀺 𑀭𑀢𑁆𑀢𑀁,

𑀲𑀺𑀭𑀺𑀯𑀺𑀲𑀭𑀸𑀮𑀬𑀁 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀼𑀧𑁂𑀢𑀁;

𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧𑀘𑀺𑀢𑁆𑀢𑀁,

𑀲𑀼𑀭𑀦𑀭𑀧𑀽𑀚𑀺𑀢𑀁 𑀲𑀼𑀕𑀢𑀫𑀸𑀤𑀭𑀁 𑀦𑀫𑀸𑀫𑀺.

𑁧𑁭. 𑀏𑀯𑀁 𑀲𑁄𑀴𑀲𑀫𑀕𑀸𑀣𑀸𑀬 𑀫𑀼𑀦𑀺𑀦𑁆𑀤𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀦𑁆𑀢𑁆𑀬𑀸𑀤𑀻𑀳𑀺 𑀲𑀢𑁆𑀢𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀦 𑀚𑀪𑀚𑀭𑀕𑀡𑁂𑀳𑀺 𑀘 𑀏𑀓𑀕𑀭𑀼𑀦𑀸 𑀘 𑀭𑀘𑀺𑀢𑀢𑁆𑀢𑀸 𑀲𑁄𑀴𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸𑀯𑀸𑀡𑀺𑀦𑀻𑀕𑀸𑀣𑀸𑀢𑀺 ¶ 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀦𑀚𑀪𑀚𑀭𑀸 𑀬𑀤𑀸 𑀪𑀯𑀢𑀺 𑀯𑀸𑀡𑀺𑀦𑀻 𑀕𑀬𑀼𑀢𑁆𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀦𑀚𑀪𑀚𑀭𑀸 𑀦𑀕𑀡 𑀚𑀕𑀡 𑀪𑀕𑀡 𑀚𑀕𑀡 𑀭𑀕𑀡𑀸 𑀬𑀤𑀸 𑀕𑀬𑀼𑀢𑁆𑀢𑀸 𑀧𑀸𑀤𑀦𑁆𑀢𑀕𑀭𑀼𑀦𑀸 𑀲𑀁𑀬𑁄𑀕𑀸 𑀘𑁂 𑀲𑀺𑀬𑀼𑀁, 𑀢𑀤𑀸 𑀲𑀸 𑀯𑀼𑀢𑁆𑀢𑀸 𑀯𑀸𑀡𑀺𑀦𑀻 𑀯𑀸𑀡𑀺𑀦𑀻𑀕𑀸𑀣𑀸 𑀦𑀸𑀫 𑀪𑀯𑀢𑀻𑀢𑀺.

𑀢𑀢𑁆𑀣 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀦𑁆𑀢𑀺 𑀭𑀸𑀕𑀸𑀤𑀺𑀫𑀮𑀯𑀺𑀲𑀼𑀤𑁆𑀥𑀸𑀳𑀺 𑀅𑀭𑀺𑀬𑀲𑀸𑀯𑀓𑀸𑀤𑀺𑀧𑀭𑀺𑀲𑀸𑀳𑀺 𑀧𑀭𑀺𑀓𑁆𑀔𑀸𑀭𑀺𑀢𑀁 𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀁 𑀧𑀭𑀺𑀓𑁆𑀔𑀸𑀭𑀯𑀦𑁆𑀢𑀁 𑀯𑀸. 𑀭𑀸𑀕𑀸𑀤𑀺𑀫𑀮𑁂𑀳𑀺 𑀲𑀼𑀘𑀢𑀺 𑀲𑀼𑀚𑁆𑀛𑀢𑀻𑀢𑀺 𑀲𑀼𑀘𑀺, 𑀧𑀭𑀺𑀲𑀸. 𑀲𑀼𑀘𑀥𑀸𑀢𑀼 𑀲𑁄𑀘𑁂𑀬𑁆𑀬𑁂 𑀇. 𑀧𑀭𑀺𑀲𑀫𑀦𑁆𑀢𑀢𑁄 𑀅𑀭𑀺𑀬𑀪𑀺𑀓𑁆𑀔𑀼𑀆𑀤𑀻𑀳𑀺 𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀯𑀸𑀭𑀺𑀬𑀢𑀺 𑀧𑀭𑀺𑀓𑁆𑀔𑀭𑀺𑀬𑀢𑀻𑀢𑀺 𑀧𑀭𑀺𑀯𑀸𑀭𑁄, 𑀲𑀼𑀕𑀢𑁄. 𑀧𑀭𑀺𑀧𑀼𑀩𑁆𑀩𑀯𑀭𑀥𑀸𑀢𑀼 𑀆𑀯𑀭𑀡𑁂 𑀧𑀭𑀺𑀓𑁆𑀔𑀸𑀭𑁂 𑀯𑀸 𑀡. 𑀲𑀼𑀘𑀻𑀳𑀺 𑀧𑀭𑀺𑀲𑀸𑀳𑀺 𑀧𑀭𑀺𑀯𑀸𑀭𑀺𑀢𑁄 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑁄, 𑀲𑀼𑀕𑀢𑁄. 𑀢𑀢𑀺𑀬 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄𑀬𑀁. 𑀪𑀕𑀯𑀢𑁄 𑀳𑀺 𑀲𑀤𑀸 𑀭𑀸𑀕𑀸𑀤𑀺𑀫𑀮 𑀯𑀺𑀲𑀼𑀤𑁆𑀥𑁂𑀳𑀺 𑀅𑀭𑀺𑀬𑀪𑀺𑀓𑁆𑀔𑀼𑀆𑀤𑀻𑀳𑀺 𑀘𑀢𑀽𑀳𑀺 𑀧𑀭𑀺𑀲𑀸𑀳𑀺 𑀅𑀝𑁆𑀞𑀳𑀺 𑀧𑀭𑀺𑀲𑀸𑀳𑀺 𑀯𑀸 𑀧𑀭𑀺𑀯𑀸𑀭𑀺𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀲𑀼𑀘𑀺𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀯𑀸𑀭𑀺𑀢𑀁 𑀬𑀲𑁆𑀲 𑀲𑁄𑀢𑀺 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑁄, 𑀲𑀼𑀕𑀢𑁄. 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀻𑀢𑀺 𑀲𑀼𑀝𑁆𑀞𑀼 𑀓𑀦𑁆𑀢𑀺𑀢𑀲𑀭𑀻𑀭𑀦𑀺𑀓𑁆𑀔𑀦𑁆𑀢 𑀩𑁆𑀬𑀸𑀫𑀫𑀢𑁆𑀢𑀭𑀁𑀲𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀲𑀼𑀝𑁆𑀞𑀼 𑀭𑀼𑀘𑀺𑀬𑀢𑀺 𑀓𑀫𑀺𑀬𑀢𑀺 𑀢𑀼𑀲𑀺𑀬𑀢𑀻𑀢𑀺 𑀲𑀼𑀭𑀼𑀘𑀺𑀭𑀸, 𑀭𑀁𑀲𑀺. 𑀲𑀼𑀧𑀼𑀩𑁆𑀩 𑀭𑀼𑀘𑀥𑀸𑀢𑀼 𑀭𑁄𑀘𑀦𑁂 𑀇𑀭𑁄. 𑀧𑀓𑀸𑀭𑁂𑀦 𑀪𑀸𑀢𑀺 𑀤𑀺𑀩𑁆𑀩𑀢𑀻𑀢𑀺 𑀧𑀪𑀸, 𑀭𑀁𑀲𑀺. 𑀧𑀧𑀼𑀩𑁆𑀩 𑀪𑀸𑀥𑀸𑀢𑀼 𑀤𑀺𑀩𑁆𑀩𑀦𑁂 𑀓𑁆𑀯𑀺. 𑀲𑀼𑀭𑀼𑀘𑀺𑀭𑀸 𑀘 𑀲𑀸 𑀧𑀪𑀸 𑀘𑀸𑀢𑀺 𑀲𑀼𑀭𑀼𑀘𑀺𑀭𑀧𑁆𑀧𑀪𑀸, 𑀢𑀸𑀳𑀺 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀺. 𑀭𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀁 𑀭𑀜𑁆𑀚𑀺𑀢𑀩𑁆𑀩𑀓𑀸𑀬𑀁. 𑀭𑀜𑁆𑀚𑀺𑀬𑀢𑀻𑀢𑀺 𑀭𑀢𑁆𑀢𑁄, 𑀓𑀸𑀬𑁄. 𑀭𑀦𑁆𑀚𑀥𑀸𑀢𑀼 𑀭𑀸𑀕𑁂 𑀢. 𑀭𑀢𑁆𑀢𑁄 𑀓𑀸𑀬𑁄 𑀬𑀲𑁆𑀲 𑀲𑁄𑀢𑀺 𑀭𑀢𑁆𑀢𑁄, 𑀲𑀼𑀕𑀢𑁄. 𑀉𑀢𑁆𑀢𑀭𑀧𑀤𑀮𑁄𑀧𑀲𑀫𑀸 𑀲𑁄𑀬𑀁. 𑀭𑀽𑀧𑀲𑁆𑀲 𑀪𑀯𑁄 𑀭𑀽𑀧𑀁 𑀯𑀺𑀬, 𑀢𑀁 𑀭𑀢𑁆𑀢𑀁. 𑀪𑀕𑀯𑀢𑁄 𑀳𑀺 𑀲𑀭𑀻𑀭𑀢𑁄 𑀦𑀺𑀘𑁆𑀘𑀁 𑀦𑀺𑀓𑁆𑀔𑀦𑁆𑀢𑁂𑀳𑀺 𑀩𑁆𑀬𑀸𑀫𑀫𑀢𑁆𑀢𑀭𑀁𑀲𑀻𑀳𑀺 𑀭𑀜𑁆𑀚𑀺𑀢𑀩𑁆𑀩𑁄 𑀭𑀽𑀧𑀓𑀸𑀬𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀺𑀭𑀺𑀯𑀺𑀲𑀭𑀸𑀮𑀬𑀦𑁆𑀢𑀺 𑀧𑀜𑁆𑀜𑀸𑀧𑀼𑀜𑁆𑀜𑀲𑀗𑁆𑀔𑀸𑀢𑀮𑀓𑁆𑀔𑀺𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑀁. 𑀏𑀢𑁆𑀣 𑀘 𑀲𑀺𑀭𑀻𑀢𑀺 𑀧𑀜𑁆𑀜𑀸𑀧𑀼𑀜𑁆𑀜𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀣 𑀯𑀸 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀸 ¶ 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀫𑁆𑀧𑀢𑁆𑀢𑀺. 𑀲𑀸 𑀳𑀺 𑀓𑀢𑀧𑀼𑀜𑁆𑀜𑁂 𑀲𑀺𑀬𑀢𑀺 𑀦𑀺𑀲𑁆𑀲𑀬𑀢𑀺, 𑀓𑀢𑀧𑀼𑀜𑁆𑀜𑁂𑀳𑀺 𑀯𑀸 𑀲𑀺𑀬𑀢𑀺 𑀦𑀺𑀲𑁆𑀲𑀺𑀬𑀢𑀻𑀢𑀺 𑀲𑀺𑀭𑀻𑀢𑀺 𑀯𑀼𑀘𑁆𑀘𑀢𑀺, 𑀧𑀜𑁆𑀜𑀸𑀧𑀼𑀜𑁆𑀜𑀁, 𑀇𑀲𑁆𑀲𑀭𑀺𑀬𑀁 𑀯𑀸. 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺 𑀲𑀫𑁆𑀧𑀢𑁆𑀢𑀺 𑀯𑀸 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀤𑀻𑀲𑀼 ‘‘𑀲𑀺𑀭𑀻𑀢𑀺 𑀩𑀼𑀤𑁆𑀥𑀺𑀧𑀼𑀜𑁆𑀜𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀘. 𑀲𑀺𑀭𑀻𑀢𑀺 𑀇𑀲𑁆𑀲𑀭𑀺𑀬𑀦𑁆𑀢𑀺 𑀘 𑀲𑀺𑀭𑀻𑀢𑀺 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀻’’𑀢𑀺 𑀘. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁, 𑀭𑀧𑀘𑁆𑀘𑀬𑁄 𑀘, 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑀈𑀧𑀘𑁆𑀘𑀬𑁄 𑀘. 𑀲𑀺𑀭𑀻𑀢𑀺 𑀳𑀺 𑀤𑀻𑀖𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀢𑁆𑀢𑀸 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀺𑀲𑀭𑀸𑀮𑀬𑀦𑁆𑀢𑀺 𑀯𑀺𑀲𑀭𑀆𑀮𑀬𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀲𑀭𑁄𑀢𑀺 𑀲𑀫𑀽𑀳𑁄. 𑀯𑀺𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀅𑀯𑀬𑀯𑀸 𑀬𑀲𑁆𑀫𑀺𑀁 𑀲𑀫𑀽𑀳𑁂𑀢𑀺 𑀯𑀺𑀲𑀭𑁄, 𑀲𑀫𑀽𑀳𑁄. 𑀯𑀺𑀲𑀥𑀸𑀢𑀼 𑀧𑀯𑁂𑀲𑀦𑁂 𑀅𑀭𑀧𑀘𑁆𑀘𑀬𑁄. 𑀅𑀣 𑀯𑀸 𑀯𑀺𑀲𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺 𑀅𑀯𑀬𑀯𑀸 𑀬𑀲𑁆𑀫𑀺𑀦𑁆𑀢𑀺 𑀯𑀺𑀲𑀭𑁄. 𑀯𑀺𑀧𑀼𑀩𑁆𑀩 𑀲𑀭𑀥𑀸𑀢𑀼 𑀲𑀫𑁄𑀲𑀭𑀡𑁂 𑀅. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀯𑀺𑀲𑀬𑀸𑀮 𑀬𑀦𑁆𑀢𑀺 𑀬𑀓𑀸𑀭𑁂𑀦 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀦 𑀲𑁄 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸, 𑀯𑀺𑀲𑀭𑀲𑀤𑁆𑀤𑀲𑁆𑀲𑁂𑀯 𑀲𑀫𑀽𑀳𑀯𑀸𑀘𑀓𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧 𑀤𑀻𑀧𑀺𑀓𑀸𑀬𑀁 𑁋

𑀯𑀺𑀲𑀭𑁄 𑀦𑀺𑀓𑀭𑁄 𑀘𑀬𑁄’’𑀢𑁆𑀬𑀸𑀤𑀺.

𑀆𑀮𑀬𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀁. 𑀆𑀮𑀬𑀦𑁆𑀢𑀺 𑀧𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀮𑀬𑁄, 𑀲𑀼𑀕𑀢𑁄. 𑀆𑀧𑀼𑀩𑁆𑀩 𑀮𑀺𑀥𑀸𑀢𑀼 𑀅𑀮𑁆𑀮𑀺𑀬𑀦𑁂 𑀡. 𑀲𑀺𑀭𑀻𑀦𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑀮𑀓𑁆𑀔𑀻𑀦𑀁 𑀯𑀺𑀲𑀭𑁄 𑀲𑀫𑀽𑀳𑁄 𑀲𑀺𑀭𑀻𑀯𑀺𑀲𑀭𑁄, 𑀢𑁂𑀲𑀁 𑀆𑀮𑀬𑁄 𑀲𑀺𑀭𑀻𑀯𑀺𑀲𑀭𑀸𑀮𑀬𑁄, 𑀲𑀼𑀕𑀢𑁄. 𑀢𑀁 𑀲𑀺𑀭𑀺𑀯𑀺𑀲𑀭𑀸𑀮𑀬𑀁. 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀼𑀧𑁂𑀢𑀦𑁆𑀢𑀺 𑀕𑁄𑀧𑀺𑀢𑀩𑁆𑀩𑁂𑀳𑀺 𑀲𑀁𑀯𑀭𑀺𑀢𑀩𑁆𑀩𑁂𑀳𑀺 𑀘𑀓𑁆𑀔𑀸𑀤𑀻𑀳𑀺 𑀙𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀁. 𑀕𑀼𑀧𑀺𑀬𑀦𑁆𑀢𑀺 𑀭𑀓𑁆𑀔𑀺𑀬𑀦𑁆𑀢𑀻𑀢𑀺 𑀕𑀼𑀧𑀺𑀢𑀸𑀦𑀺. 𑀕𑀼𑀧𑀥𑀸𑀢𑀼 𑀭𑀓𑁆𑀔𑀦𑁂 𑀢. 𑀇𑀤𑀦𑁆𑀢𑀺 𑀲𑀳𑀚𑀸𑀢𑀥𑀫𑁆𑀫𑁂 𑀇𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀇𑀤𑀺𑀥𑀸𑀢𑀼 𑀧𑀭𑀫𑀺𑀲𑁆𑀲𑀭𑀺𑀬𑁂 𑀇𑀬𑁄. 𑀕𑀼𑀧𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑀸𑀦𑀺 ¶ , 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀢𑁂𑀳𑀺. 𑀉𑀧𑁂𑀢𑀺 𑀲𑀫𑁆𑀧𑀚𑁆𑀚𑀢𑀻𑀢𑀺 𑀉𑀧𑁂𑀢𑁄, 𑀲𑀼𑀕𑀢𑁄. 𑀉𑀧𑀧𑀼𑀩𑁆𑀩 𑀇𑀥𑀸𑀢𑀼 𑀕𑀢𑀺𑀬𑀁 𑀢, 𑀢𑀁 𑀉𑀧𑁂𑀢𑀁. 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀢𑁄 𑀅𑀜𑁆𑀜𑁂𑀳𑀺 𑀅𑀭𑀺𑀬𑀲𑀸𑀯𑀓𑀸𑀤𑀻𑀳𑀺 𑀧𑀼𑀕𑁆𑀕𑀮𑁂𑀳𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀺𑀢𑀸𑀦𑀺. 𑀩𑀼𑀤𑁆𑀥𑁄𑀬𑁂𑀯 𑀧𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀲𑀳 𑀯𑀸𑀲𑀦𑀸𑀬 𑀲𑀩𑁆𑀩 𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀯𑀺𑀲𑀺𑀝𑁆𑀞𑁂𑀦 𑀘𑀓𑁆𑀔𑀸𑀤𑀺 𑀇𑀦𑁆𑀤𑁆𑀭𑀺𑀬𑀁 𑀭𑀓𑁆𑀔𑀺𑀢𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀼𑀧𑁂𑀢𑀦𑁆𑀢𑀺 𑀣𑁄𑀫𑁂𑀢𑀺.

𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧𑀘𑀺𑀢𑁆𑀢𑀦𑁆𑀢𑀺 𑀲𑀽𑀭𑀺𑀬𑀫𑀡𑁆𑀟𑀮 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀳𑀺 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑁂𑀳𑀺 𑀅𑀪𑀺𑀯𑀺𑀘𑀺𑀢𑁆𑀭𑀧𑀸𑀤𑀁. 𑀉𑀧𑀲𑀤𑁆𑀤𑁄 𑀘𑁂𑀢𑁆𑀣 𑀪𑀼𑀲𑀝𑁆𑀞𑀯𑀸𑀘𑀓𑁄. 𑀅𑀪𑀺𑀯𑀺𑀘𑀺𑀢𑁆𑀭𑀁 𑀲𑀽𑀭𑀺𑀬𑀫𑀡𑁆𑀟𑀮 𑀘𑀦𑁆𑀤𑀫𑀡𑁆𑀟𑀮𑀸𑀤𑀺𑀁 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀯𑀦𑁆𑀢𑀁 𑀯𑀸. 𑀏𑀢𑁆𑀣 𑀘 𑀭𑀯𑀻𑀢𑀺 𑀲𑀽𑀭𑀺𑀬𑁄, 𑀲𑁄 𑀳𑀺 𑀭𑀯𑀢𑀺 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀭𑀯𑀻𑀢𑀺 𑀯𑀼𑀘𑁆𑀘𑀢𑀺. 𑀭𑀼𑀥𑀸𑀢𑀼 𑀕𑀢𑀺𑀬𑀁 𑀡𑀺. 𑀯𑀼𑀢𑁆𑀢𑀜𑁆𑀳𑀺 𑀧𑀸𑀣𑁂𑀬𑁆𑀬𑀝𑁆𑀞𑀓𑀣𑀸𑀬𑀁 ‘‘𑀘𑀦𑁆𑀤𑁄 𑀉𑀚𑀼𑀓𑀁 𑀲𑀡𑀺𑀓𑀁 𑀕𑀘𑁆𑀙𑀢𑀺, 𑀲𑀽𑀭𑀺𑀬𑀲𑁆𑀲 𑀧𑀦 𑀉𑀚𑀼𑀓𑀁 𑀕𑀫𑀦𑀁 𑀲𑀻𑀖’’𑀦𑁆𑀢𑀺. 𑀡𑁆𑀯𑀸𑀤𑀺 𑀫𑁄𑀕𑁆𑀕𑀮𑁆𑀮𑀸𑀦𑁂 𑀧𑀦 ‘‘𑀭𑀼𑀲𑀤𑁆𑀤𑁂 𑀇. 𑀑 𑀅𑀯𑀸𑀤𑁂𑀲𑁄. 𑀭𑀯𑀢𑀺 𑀕𑀚𑁆𑀚𑀢𑀻𑀢𑀺 𑀭𑀯𑀺. 𑀆𑀤𑀺𑀘𑁆𑀘𑁄’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀥𑀸𑀦 𑀝𑀻𑀓𑀸𑀬𑀜𑁆𑀘 ‘‘𑀭𑀯𑀦𑁆𑀢𑀺 𑀏𑀢𑁂𑀦 𑀲𑀢𑁆𑀢𑀸 𑀧𑀪𑀸𑀯𑀺𑀢𑀢𑁆𑀢𑀸𑀢𑀺 𑀭𑀯𑀻’’𑀢𑀺 𑀯𑀼𑀢𑁆𑀢𑀁. 𑀲𑀲𑀻𑀢𑀺 𑀘𑀦𑁆𑀤𑁄. 𑀲𑁄 𑀳𑀺 𑀲𑀲𑀢𑀺 𑀢𑀺𑀡𑁂𑀦 𑀧𑀸𑀡𑀢𑀺 𑀚𑀻𑀯𑀢𑀻𑀢𑀺 𑀲𑀲𑁄, 𑀲𑀲𑀧𑀡𑁆𑀟𑀺𑀢𑁄. 𑀲𑀲𑀥𑀸𑀢𑀼 𑀧𑀸𑀡𑁂 𑀅. 𑀲𑀲𑀭𑀽𑀧𑀮𑀓𑁆𑀔𑀡𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀲𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀢𑀻𑀢𑁂 𑀳𑀺 𑀲𑀲𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀬𑀸𑀘𑀓𑀲𑁆𑀲 𑀲𑀓𑁆𑀓𑀭𑀜𑁆𑀜𑁄 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀮𑀗𑁆𑀖𑀺𑀢𑁆𑀯𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀸𑀬𑀁 𑀅𑀤𑀸𑀲𑀺. 𑀅𑀣 𑀧𑀦 𑀲𑀓𑁆𑀓𑁄 𑀭𑀸𑀚𑀸 𑀢𑀲𑁆𑀲 𑀲𑀲𑀧𑀡𑁆𑀟𑀺𑀢𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀚𑀺𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀕𑀼𑀡𑁄 𑀲𑀓𑀮𑀓𑀧𑁆𑀧𑀁 𑀧𑀸𑀓𑀝𑁄 𑀳𑁄𑀢𑀽𑀢𑀺 𑀧𑀩𑁆𑀩𑀢𑀁 𑀧𑀻𑀴𑁂𑀢𑁆𑀯𑀸 𑀧𑀩𑁆𑀩𑀢𑀭𑀲𑀁 𑀆𑀤𑀸𑀬 𑀘𑀦𑁆𑀤𑀫𑀡𑁆𑀟𑀮𑁂 𑀲𑀲𑀭𑀽𑀧𑀮𑀓𑁆𑀔𑀡𑀁 𑀮𑀺𑀔𑀺𑀢𑁆𑀯𑀸 𑀞𑀧𑁂𑀲𑀺. 𑀢𑀲𑁆𑀫𑀸 𑀘𑀦𑁆𑀤𑁄 𑀲𑀲𑀻𑀢𑀺 𑀮𑁄𑀓𑁂𑀳𑀺 𑀯𑁄𑀳𑀭𑀺𑀬𑀢𑀺. 𑀢𑀲𑁆𑀲 𑀧𑀦 𑀯𑀺𑀢𑁆𑀣𑀸𑀭𑁄 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑁂 𑀧𑀲𑁆𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀅𑀣 ¶ 𑀯𑀸 𑀲𑀲𑀢𑀺 𑀳𑀺𑀁𑀲𑀢𑀺 𑀉𑀡𑁆𑀳𑀕𑀼𑀡𑀦𑁆𑀢𑀺 𑀲𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀲𑀼𑀥𑀸𑀢𑀼 𑀳𑀺𑀁𑀲𑀸𑀬𑀁 𑀈𑀧𑀘𑁆𑀘𑀬𑁄. 𑀫𑀡𑁆𑀟𑀺𑀬𑀢𑀺 𑀯𑀺𑀪𑀽𑀲𑀺𑀬𑀢𑀺 𑀧𑀭𑀺𑀘𑁆𑀙𑁂𑀤𑀓𑀭𑀡𑀯𑀲𑁂𑀦𑀸𑀢𑀺 𑀫𑀡𑁆𑀟𑀮𑀁. 𑀫𑀡𑁆𑀟𑀥𑀸𑀢𑀼 𑀫𑀟𑀺𑀥𑀸𑀢𑀼 𑀯𑀸 𑀯𑀺𑀪𑀽𑀲𑀦𑁂 𑀅𑀮𑁄. 𑀅𑀣 𑀯𑀸 𑀫𑀡𑁆𑀟𑀁 𑀯𑀺𑀪𑀽𑀲𑀦𑀁 𑀧𑀭𑀺𑀲𑀫𑀦𑁆𑀢𑀢𑁄 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀡𑁆𑀟𑀮𑀁. 𑀫𑀡𑁆𑀟𑀲𑀤𑁆𑀤𑀽𑀧𑀧𑀤 𑀮𑀸𑀥𑀸𑀢𑀼 𑀕𑀳𑀡𑁂 𑀓𑁆𑀯𑀺. 𑀭𑀯𑀺𑀦𑁄 𑀫𑀡𑁆𑀟𑀮𑀁 𑀭𑀯𑀺𑀫𑀡𑁆𑀟𑀮𑀁, 𑀲𑀲𑀺𑀦𑁄 𑀫𑀡𑁆𑀟𑀮𑀁 𑀲𑀲𑀺𑀫𑀡𑁆𑀟𑀮𑀁, 𑀭𑀯𑀺𑀫𑀡𑁆𑀟𑀮𑀜𑁆𑀘 𑀲𑀲𑀺𑀫𑀡𑁆𑀟𑀮𑀜𑁆𑀘 𑀭𑀯𑀺𑀲𑀲𑀺𑀫𑀡𑁆𑀟𑀮𑀁, 𑀫𑀡𑁆𑀟𑀮𑀲𑀤𑁆𑀤𑁄 𑀭𑀯𑀺𑀲𑀤𑁆𑀤𑁂𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀫𑀡𑁆𑀟𑀮𑀲𑀤𑁆𑀤𑀲𑁆𑀲 𑀤𑁆𑀯𑀦𑁆𑀤𑀧𑀤𑀢𑁄 𑀲𑀼𑀬𑁆𑀬𑀫𑀸𑀦𑀢𑁆𑀢𑀸. 𑀧𑀪𑀼𑀢𑀻𑀢𑀺𑀆𑀤𑀺. 𑀲𑁄 𑀳𑀺 𑀆𑀤𑁆𑀬𑀢𑁆𑀣𑀯𑀸𑀘𑀓𑁄 𑀅𑀩𑁆𑀬𑀬𑀦𑀺𑀧𑀸𑀢𑁄. 𑀭𑀯𑀺𑀲𑀲𑀺𑀫𑀡𑁆𑀟𑀮𑀁 𑀧𑀪𑀼𑀢𑀺𑀆𑀤𑀺 𑀬𑀲𑁆𑀲𑀸𑀢𑀺 𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺, 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀁 𑀮𑀩𑁆𑀪𑀢𑀺. 𑀮𑀓𑁆𑀔𑀺𑀬𑀢𑀺 𑀮𑀓𑁆𑀔𑀺𑀢𑀩𑁆𑀩𑀁 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀧𑀸𑀤𑀧𑁆𑀧 𑀯𑀢𑁆𑀢𑀘𑀓𑁆𑀓𑀮𑀓𑁆𑀔𑀡𑀁, 𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺 𑀘 𑀢𑀁 𑀮𑀓𑁆𑀔𑀡𑀜𑁆𑀘𑀸𑀢𑀺 𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑀁, 𑀢𑁂𑀦 𑀉𑀧𑀘𑀺𑀢𑁆𑀢𑀁 𑀅𑀢𑀺𑀯𑀺𑀘𑀺𑀢𑁆𑀭𑀁 𑀧𑀸𑀤𑀁 𑀬𑀲𑁆𑀲 𑀲𑁄𑀢𑀺 𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧 𑀘𑀺𑀢𑁆𑀢𑁄, 𑀲𑀼𑀕𑀢𑁄. 𑀅𑀣 𑀯𑀸 𑀉𑀧𑀘𑀺𑀢𑁆𑀢𑀁 𑀅𑀢𑀺𑀯𑀺𑀘𑀺𑀢𑁆𑀭𑀁 𑀭𑀯𑀺𑀲𑀲𑀺 𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑀁 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀁 𑀅𑀲𑁆𑀲𑀸𑀢𑀺 𑀢𑀣𑀸, 𑀲𑀼𑀕𑀢𑁄. 𑀢𑀁.

𑀲𑀼𑀭𑀦𑀭𑀧𑀽𑀚𑀺𑀢𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀺𑀢𑀩𑁆𑀩𑀁. 𑀲𑀼𑀭𑀦𑁆𑀢𑀺 𑀇𑀲𑁆𑀲𑀭𑀺𑀬 𑀓𑀻𑀴𑀸𑀤𑀻𑀳𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀲𑀼𑀭𑀸, 𑀤𑁂𑀯𑀸. 𑀲𑀼𑀭𑀥𑀸𑀢𑀼 𑀤𑀺𑀩𑁆𑀩𑀦𑁂 𑀅. 𑀅𑀣 𑀯𑀸 𑀲𑀼𑀭𑀢𑀺 𑀇𑀲𑀢𑀺 𑀤𑁂𑀯𑀺𑀲𑁆𑀲𑀭𑀺𑀬𑀁 𑀧𑀸𑀧𑀼𑀡𑀸𑀢𑀺 𑀯𑀺𑀭𑁄𑀘𑀢𑀺 𑀘𑀸𑀢𑀺 𑀲𑀼𑀭𑀸, 𑀤𑁂𑀯𑀸. 𑀲𑀼𑀭𑀥𑀸𑀢𑀼 𑀇𑀲𑁆𑀲𑀭𑀺𑀬𑀤𑀺𑀢𑁆𑀢𑀻𑀲𑀼 𑀅. 𑀲𑀼𑀦𑁆𑀤𑀭𑀸 𑀭𑀸𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀯𑀸 𑀲𑀼𑀭𑀸, 𑀤𑁂𑀯𑀸. 𑀔𑀦𑁆𑀥𑀲𑀦𑁆𑀢𑀸𑀦𑀁 𑀲𑀓𑀓𑀫𑁆𑀫𑀁 𑀯𑀸 𑀦𑀭𑀦𑁆𑀢𑀺 𑀦𑀺𑀬𑀦𑁆𑀢𑀻𑀢𑀺 𑀦𑀭𑀸, 𑀫𑀦𑀼𑀲𑁆𑀲𑀸. 𑀦𑀭𑀥𑀸𑀢𑀼 𑀦𑀬𑀦𑁂 𑀅. 𑀲𑀼𑀭𑀸 𑀘 𑀦𑀭𑀸 𑀘 𑀲𑀼𑀭𑀦𑀭𑀸, 𑀢𑁂𑀳𑀺 𑀧𑀽𑀚𑀺𑀢𑀩𑁆𑀩𑁄𑀢𑀺 𑀲𑀼𑀭𑀦𑀭 𑀧𑀽𑀚𑀺𑀢𑁄, 𑀲𑀼𑀕𑀢𑁄. 𑀢𑀁. 𑀲𑀼𑀕𑀢𑀦𑁆𑀢𑀺 𑀩𑀼𑀤𑁆𑀥𑀁. 𑀲𑁄 𑀳𑀺 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀽𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁. 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺 𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 ¶ 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀺𑀴𑀺𑀦𑀼𑀓𑁆𑀓𑀼𑀝𑀺𑀓 𑀓𑀼𑀝𑀺𑀮𑀸𑀓𑀼𑀝𑀺𑀮𑀢𑀸𑀤𑀺 𑀤𑁄𑀲𑀭𑀳𑀺𑀢 𑀫𑀯𑀳𑀲𑀺𑀢 𑀭𑀸𑀚𑀳𑀁𑀲𑀉𑀲𑀪 𑀯𑀸𑀭𑀡 𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁. 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮 𑀦𑀺𑀫𑁆𑀫𑀮 𑀓𑀭𑀼𑀡𑀸 𑀲𑀢𑀺 𑀯𑀻𑀭𑀺𑀬𑀸𑀤𑀺 𑀕𑀼𑀡𑀯𑀺𑀲𑁂𑀲 𑀲𑀳𑀺𑀢 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺.

𑀅𑀣 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺 𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀢𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺 𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀬𑀲𑁆𑀫𑀸 𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀬𑀼𑀢𑁆𑀢𑀫𑁂𑀯 𑀘 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀲𑀼𑀕𑀢𑁄 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸. 𑀇𑀢𑀺 𑀲𑁄𑀪𑀦 𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑁄, 𑀢𑀁 𑀲𑀼𑀕𑀢𑀁. 𑀆𑀤𑀭𑀦𑁆𑀢𑀺 𑀲𑀓𑁆𑀓𑀘𑁆𑀘𑀁, 𑀆𑀤𑀭𑀦𑀁 𑀆𑀤𑀭𑁄. 𑀆𑀧𑀼𑀩𑁆𑀩 𑀤𑀭𑀥𑀸𑀢𑀼 𑀆𑀤𑀭𑁂 𑀡. 𑀢𑀁 𑀆𑀤𑀭𑀁. 𑀦𑀫𑀸𑀫𑀻𑀢𑀺 𑀅𑀳𑀁 𑀯𑀦𑁆𑀤𑀸𑀫𑀻𑀢𑀺 𑀅𑀢𑁆𑀣𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀁 𑀭𑀸𑀕𑀸𑀤𑀺𑀫𑀮 𑀯𑀺𑀲𑀼𑀤𑁆𑀥𑀸𑀳𑀺 𑀅𑀭𑀺𑀬𑀲𑀸𑀯𑀓𑀸𑀤𑀺𑀧𑀭𑀺𑀲𑀸𑀳𑀺 𑀧𑀭𑀺𑀓𑁆𑀔𑀸𑀭𑀺𑀢𑀁 𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀁 𑀧𑀭𑀺𑀓𑁆𑀔𑀸𑀭𑀯𑀦𑁆𑀢𑀁 𑀯𑀸, 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀺 𑀲𑀼𑀝𑁆𑀞𑀼 𑀓𑀦𑁆𑀢𑀺𑀢 𑀲𑀭𑀻𑀭𑀦𑀺𑀓𑁆𑀔𑀦𑁆𑀢𑀩𑁆𑀬𑀸𑀫𑀫𑀢𑁆𑀢𑀭𑀁𑀲𑀻𑀳𑀺 𑀓𑀭𑀡𑀪𑀽𑀢𑁂𑀳𑀺, 𑀭𑀢𑁆𑀢𑀁 𑀦𑀺𑀘𑁆𑀘𑀁 𑀭𑀜𑁆𑀚𑀺𑀢𑀩𑁆𑀩𑀓𑀸𑀬𑀁, 𑀲𑀺𑀭𑀺𑀯𑀺𑀲𑀭𑀸𑀮𑀬𑀁 𑀧𑀜𑁆𑀜𑀸𑀧𑀼𑀜𑁆𑀜𑀲𑀗𑁆𑀔𑀸𑀢𑀮𑀓𑁆𑀔𑀺𑀲 𑀫𑀽𑀳𑀸𑀦𑀁 ¶ 𑀧𑀢𑀺𑀝𑁆𑀞𑀸𑀦𑀁, 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀺 𑀕𑀼𑀧𑀺𑀢𑀩𑁆𑀩𑁂𑀳𑀺 𑀲𑀁𑀯𑀭𑀺𑀢𑀩𑁆𑀩𑁂𑀳𑀺 𑀙𑀳𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀳𑀺, 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀁, 𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧𑀘𑀺𑀢𑁆𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀳𑀺 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑁂𑀳𑀺 𑀅𑀪𑀺𑀯𑀺𑀘𑀺𑀢𑁆𑀭𑀧𑀸𑀤𑀁, 𑀅𑀪𑀺𑀯𑀺𑀘𑀺𑀢𑁆𑀭𑀁 𑀲𑀽𑀭𑀺𑀬 𑀫𑀡𑁆𑀟𑀮𑀘𑀦𑁆𑀤𑀫𑀡𑁆𑀟𑀮𑀸𑀤𑀺𑀁 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀯𑀦𑁆𑀢𑀁 𑀯𑀸, 𑀲𑀼𑀭𑀦𑀭𑀧𑀽𑀚𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀺𑀢𑀩𑁆𑀩𑀁, 𑀲𑀼𑀕𑀢𑀁 𑀩𑀼𑀤𑁆𑀥𑀁 𑀆𑀤𑀭𑀁 𑀲𑀓𑁆𑀓𑀘𑁆𑀘𑀁 𑀅𑀳𑀁 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀲𑀢𑁆𑀢𑀭𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀫𑀕𑁆𑀕𑁄𑀴𑀼𑀫𑁆𑀧𑁂𑀦 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺𑀁,

𑀲𑀁𑀲𑀸𑀭𑁄𑀖𑀁 𑀢𑀭𑀺 𑀢𑀫𑀪𑀬𑀁 𑀧𑀸𑀭𑀧𑀢𑁆𑀢𑀁 𑀧𑀚𑀸𑀦𑀁;

𑀢𑀸𑀡𑀁 𑀮𑁂𑀡𑀁 𑀅𑀲𑀫𑀲𑀭𑀡𑀁 𑀏𑀓𑀢𑀺𑀢𑁆𑀣𑀁 𑀧𑀢𑀺𑀝𑁆𑀞𑀁,

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀭𑀫𑀲𑀼𑀔𑀤𑀁 𑀥𑀫𑁆𑀫𑀭𑀸𑀚𑀁 𑀦𑀫𑀸𑀫𑀺.

𑁧𑁮. 𑀏𑀯𑀁 𑀲𑀢𑁆𑀢𑀭𑀲𑀫𑀕𑀸𑀣𑀸𑀬 𑀲𑀼𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀁𑀲𑀸𑀭𑁄𑀖𑀁 𑀢𑀭𑀺𑀢𑀸𑀤𑀻𑀳𑀺 𑀦𑀯𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀫𑀕𑁆𑀕𑁄𑀴𑀼𑀫𑁆𑀧𑁂𑀦𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀫 𑀪 𑀦 𑀢 𑀢 𑀕𑀡𑁂𑀳𑀺 𑀘 𑀕𑀭𑀼𑀤𑁆𑀯𑀬𑁂𑀦 𑀘 𑀭𑀘𑀺𑀢𑀢𑁆𑀢𑀸 𑀲𑀢𑁆𑀢𑀭𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀫𑀦𑁆𑀤𑀓𑁆𑀓𑀦𑁆𑀢𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀫𑀦𑁆𑀤𑀓𑁆𑀓𑀦𑁆𑀢𑀸 𑀫 𑀪 𑀦 𑀢𑀢 𑀕𑀸 𑀕𑁄 𑀬𑀼𑀕𑀼𑀢𑁆𑀯𑀲𑁆𑀲 𑀓𑁂𑀳𑀻’’𑀢𑀺. 𑀢𑀲𑁆𑀲𑀸 𑀧𑀦𑀸𑀬𑀫𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀬𑀼𑀕𑀼𑀢𑁆𑀯𑀲𑁆𑀲𑀓𑁂𑀳𑀺 𑀘𑀢𑀼 𑀙 𑀲𑀢𑁆𑀢𑀬𑀢𑀻𑀳𑀺 𑀫 𑀪 𑀦 𑀢 𑀢 𑀕𑀸 𑀫𑀕𑀡 𑀪𑀕𑀡 𑀦𑀕𑀡 𑀢𑀕𑀡 𑀢𑀕𑀡 𑀕𑀭𑀽 𑀘 𑀕𑁄 𑀕𑀭𑀼 𑀘 𑀘𑁂 𑀬𑀼𑀢𑁆𑀢𑀸, 𑀫𑀦𑁆𑀤𑀓𑁆𑀓𑀦𑁆𑀢𑀸𑀕𑀸𑀣𑀸𑀦𑀸𑀫𑀸𑀢𑀺. 𑀬𑀼𑀕𑀼𑀢𑁆𑀯𑀲𑁆𑀲𑀓𑁂𑀳𑀻𑀢𑀺 𑀏𑀢𑁆𑀣 𑀘 𑀬𑀼𑀕𑀲𑀤𑁆𑀤𑀲𑁆𑀲 𑀫𑀕𑁆𑀕𑀨𑀮𑀘𑀢𑀼𑀩𑁆𑀩𑀺𑀥𑀧𑀼𑀭𑀺𑀲𑀬𑀼𑀕𑀴𑀯𑀸𑀘𑀓𑀢𑁆𑀢𑀸 𑀬𑀼𑀕𑀲𑀤𑁆𑀤𑁄 𑀘𑀢𑀼𑀲𑀗𑁆𑀔𑁆𑀬𑀸𑀯𑀸𑀘𑀓𑁄, 𑀉𑀢𑀽𑀦𑀁 𑀳𑁂𑀫𑀦𑁆𑀢𑀲𑀺𑀲𑀺𑀭 𑀯𑀲𑁆𑀲𑀦𑁆𑀢 𑀕𑀺𑀫𑁆𑀳 𑀯𑀲𑁆𑀲𑀸𑀦 𑀲𑀭𑀤 𑀉𑀢𑀼𑀯𑀲𑁂𑀦 𑀙𑀩𑁆𑀩𑀺𑀥𑀢𑁆𑀢𑀸 𑀉𑀢𑀼𑀲𑀤𑁆𑀤𑁄 𑀙𑀲𑀗𑁆𑀔𑁆𑀬𑀸𑀯𑀸𑀘𑀓𑁄. 𑀅𑀲𑁆𑀲𑀲𑀤𑁆𑀤𑁄 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 ¶ . 𑀙𑀧𑁆𑀧𑀘𑁆𑀘𑀬𑀝𑀻𑀓𑀸𑀤𑀻𑀲𑀼 𑀳𑀺 ‘‘𑀅𑀲𑁆𑀲𑀲𑀤𑁆𑀤𑀲𑁆𑀲 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑀪𑀸𑀯𑁄 𑀯𑀼𑀢𑁆𑀢𑁄’’𑀢𑀺.

𑀢𑀢𑁆𑀣 𑀧𑀦 𑀬𑁄 𑀥𑀫𑁆𑀫𑀭𑀸𑀚𑀸 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺𑀁 𑀲𑀁𑀲𑀸𑀭𑁄𑀖𑀁 𑀫𑀕𑁆𑀕𑁄𑀴𑀼𑀫𑁆𑀧𑁂𑀦 𑀢𑀭𑀺, 𑀅𑀪𑀬𑀁 𑀧𑀸𑀭𑀧𑀢𑁆𑀢𑀁 𑀧𑀚𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀅𑀲𑀫𑀲𑀭𑀡𑀁 𑀏𑀓𑀢𑀺𑀢𑁆𑀣𑀁 𑀧𑀢𑀺𑀝𑁆𑀞𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀭𑀫𑀲𑀼𑀔𑀤𑀁 𑀢𑀁 𑀥𑀫𑁆𑀫𑀭𑀸𑀚𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀺𑀲𑁆𑀲𑀁 𑀧𑀦 𑀅𑀢𑁆𑀣𑀓𑁆𑀓𑀫𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫𑀺. 𑀫𑀼𑀳𑀧𑀝𑀺𑀖𑀸𑀲𑀸𑀤𑀺 𑀉𑀮𑁆𑀮𑁄𑀮𑀯𑀻𑀘𑀺𑀦𑁆𑀢𑀺 𑀫𑁄𑀳𑀤𑁄𑀲𑀢𑀡𑁆𑀳𑀸𑀤𑀺𑀲𑀗𑁆𑀔𑀸𑀢𑀁 𑀫𑀳𑀸𑀢𑀭𑀗𑁆𑀕 𑀔𑀼𑀤𑁆𑀤𑀊𑀫𑀺𑀓𑀁. 𑀫𑀼𑀬𑁆𑀳𑀦𑁆𑀢𑀺 𑀏𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀫𑀼𑀳𑁄, 𑀫𑁄𑀳𑁄. 𑀫𑀼𑀳𑀥𑀸𑀢𑀼 𑀯𑁂𑀔𑀺𑀢𑁆𑀢𑁂 𑀡. 𑀧𑀝𑀺𑀳𑀜𑁆𑀜𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀬𑀁 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀧𑀝𑀺𑀳𑀜𑁆𑀜𑀦𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀧𑀝𑀺𑀖𑁄, 𑀤𑁄𑀲𑁄. 𑀧𑀝𑀺𑀧𑀼𑀩𑁆𑀩 𑀳𑀦𑀥𑀸𑀢𑀼 𑀳𑀺𑀁𑀲𑀸𑀕𑀢𑀻𑀲𑀼 𑀅. 𑀳𑀦𑀲𑁆𑀲 𑀖𑁄. 𑀅𑀲𑀦𑀁 𑀇𑀘𑁆𑀙𑀦𑀁 𑀆𑀲𑀸, 𑀇𑀲𑀢𑀺 𑀇𑀘𑁆𑀙𑀢𑀻𑀢𑀺 𑀯𑀸 𑀆𑀲𑀸, 𑀢𑀡𑁆𑀳𑀸. 𑀇𑀲𑀼𑀥𑀸𑀢𑀼 𑀇𑀘𑁆𑀙𑀸𑀬𑀁 𑀅. 𑀇𑀲𑁆𑀲 𑀆. 𑀫𑀼𑀳𑁄 𑀘 𑀧𑀝𑀺𑀖𑁄 𑀘 𑀆𑀲𑀸 𑀘 𑀫𑀼𑀳𑀧𑀝𑀺𑀖𑀸𑀲𑀸, 𑀢𑁂 𑀆𑀤𑀺 𑀬𑁂𑀲𑀦𑁆𑀢𑁂𑀢𑀺 𑀫𑀼𑀳𑀧𑀝𑀺𑀖𑀸𑀲𑀸𑀤𑀺, 𑀮𑁄𑀪𑀸𑀤𑀺𑀓𑀺𑀮𑁂𑀲𑀸 𑀮𑀩𑁆𑀪𑀦𑁆𑀢𑀺. 𑀏𑀢𑁆𑀣 𑀘 𑀆𑀤𑀺𑀲𑀤𑁆𑀤𑁂𑀦 𑀫𑀸𑀦 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦 𑀉𑀤𑁆𑀥𑀘𑁆𑀘 𑀅𑀳𑀺𑀭𑀺𑀓 𑀅𑀦𑁄𑀢𑁆𑀢𑀧𑁆𑀧𑀓𑀺𑀮𑁂𑀲𑁂 𑀘 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑁆𑀥𑀁 𑀉𑀤𑀓𑀁 𑀮𑁄𑀮𑀢𑀺 𑀆𑀓𑀼𑀮𑁂𑀢𑀻𑀢𑀺 𑀉𑀮𑁆𑀮𑁄𑀮𑁄, 𑀫𑀳𑀸𑀢𑀭𑀗𑁆𑀕𑁄. 𑀉𑀧𑀼𑀩𑁆𑀩𑀮𑁄𑀮 𑀥𑀸𑀢𑀼 𑀉𑀫𑁆𑀫𑀸𑀤𑀦𑁂 𑀡. 𑀢𑀻𑀭𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀉𑀮𑁆𑀮𑁄𑀮𑁄. 𑀉𑀮𑀥𑀸𑀢𑀼 𑀕𑀢𑀺𑀬𑀁 𑀑𑀮𑀧𑀘𑁆𑀘𑀬𑁄. 𑀯𑀺𑀫𑁆𑀳𑀬𑀁 𑀯𑀺𑀘𑀺𑀢𑁆𑀢𑀁 𑀘𑀺𑀦𑁄𑀢𑀻𑀢𑀺 𑀯𑀻𑀘𑀺, 𑀔𑀼𑀤𑁆𑀤𑀓𑀊𑀫𑀺. 𑀯𑀺𑀧𑀼𑀩𑁆𑀩 𑀘𑀺𑀥𑀸𑀢𑀼 𑀘𑀬𑁂 𑀓𑁆𑀯𑀺. 𑀉𑀮𑁆𑀮𑁄𑀮𑁄 𑀘 𑀯𑀻𑀘𑀺 𑀘 𑀉𑀮𑁆𑀮𑁄𑀮𑀯𑀻𑀘𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀘 𑀓𑀼𑀮𑁆𑀮𑁄𑀮𑀯𑀻𑀘𑀺𑀦𑁆𑀢𑀺𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀦 𑀲𑁄 𑀬𑀼𑀚𑁆𑀚𑀢𑀺, 𑀓𑀲𑁆𑀫𑀸, 𑀓𑀼𑀮𑁆𑀮𑀲𑀤𑁆𑀤𑀲𑁆𑀲 𑀉𑀴𑀼𑀫𑁆𑀧𑀢𑁆𑀣𑀯𑀸𑀘𑀓𑀢𑁆𑀢𑀸. 𑀉𑀮𑁆𑀮𑁄𑀮𑀲𑀤𑁆𑀤𑁄𑀬𑁂𑀯 𑀳𑀺 𑀫𑀳𑀸𑀢𑀭𑀗𑁆𑀕𑀢𑁆𑀣 𑀯𑀸𑀘𑀓𑁄 𑀳𑁄𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀉𑀮𑁆𑀮𑁄𑀮𑁄 𑀢𑀼 𑀘 𑀓𑀮𑁆𑀮𑁄𑀮𑁄, 𑀫𑀳𑀸𑀯𑀻𑀘𑀺𑀲𑀼 𑀓𑀣𑁆𑀬𑀢𑁂’’𑀢𑀺.

𑀫𑀽𑀮𑀧𑀡𑁆𑀡𑀸𑀲𑀝𑁆𑀞𑀓𑀣𑀸𑀬𑀜𑁆𑀘 ‘‘𑀓𑀼𑀮𑁆𑀮𑁄 𑀦𑀸𑀫 𑀢𑀭𑀡𑀢𑁆𑀣𑀸𑀬 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀦𑁆𑀥𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀩𑀤𑁆𑀥𑀸 𑀧𑀦 𑀧𑀤𑀭𑀘𑀸𑀝𑀺 𑀆𑀤𑀬𑁄 ¶ 𑀉𑀴𑀼𑀫𑁆𑀧𑁄’’𑀢𑀺 𑀯𑀼𑀢𑁆𑀢𑁄. 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀏𑀯 𑀉𑀮𑁆𑀮𑁄𑀮𑀯𑀻𑀘𑀺. 𑀲𑀸 𑀅𑀲𑁆𑀫𑀺𑀁 𑀲𑀁𑀲𑀸𑀭𑁄𑀖𑁂 𑀅𑀢𑁆𑀣𑀻𑀢𑀺 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺. 𑀲𑀫𑀸𑀲𑀦𑁆𑀢𑀢𑀤𑁆𑀥𑀺𑀢𑀸𑀬𑀁. 𑀧𑀻𑀢𑀺𑀲𑀼𑀔𑀁, 𑀫𑀳𑀸𑀲𑀦𑁆𑀦𑀁, 𑀭𑀢𑁆𑀢𑀺𑀤𑀺𑀯𑀦𑁆𑀢𑁆𑀬𑀸𑀤𑀻𑀲𑀼 𑀯𑀺𑀬. 𑀏𑀯𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀢𑀁 𑀅𑀲𑁆𑀲 𑀛𑀸𑀦𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀧𑀻𑀢𑀺𑀲𑀼𑀔𑀁, 𑀛𑀸𑀦𑀁. 𑀫𑀳𑀦𑁆𑀢𑀁 𑀆𑀲𑀦𑀁 𑀫𑀳𑀸𑀲𑀦𑀁, 𑀢𑀲𑁆𑀲 𑀪𑀸𑀯𑁄 𑀫𑀳𑀸𑀲𑀦𑁆𑀦𑀁. 𑀭𑀢𑁆𑀢𑀺 𑀘 𑀤𑀺𑀯𑀸 𑀘 𑀭𑀢𑁆𑀢𑀺𑀤𑀺𑀯𑀁. 𑀭𑀢𑁆𑀢𑀺𑀤𑀺𑀯𑀁 𑀓𑀢𑀁 𑀭𑀢𑁆𑀢𑀺𑀤𑀺𑀯𑀦𑁆𑀢𑀺. 𑀅𑀣 𑀯𑀸 𑀉𑀮𑁆𑀮𑁄𑀮𑀯𑀻𑀘𑀺 𑀯𑀺𑀬 𑀫𑀼𑀳𑀧𑀝𑀺𑀖𑀸𑀲𑀸𑀤𑀺 𑀉𑀮𑁆𑀮𑁄𑀮𑀯𑀻𑀘𑀺, 𑀲𑀁𑀲𑀸𑀭𑁄𑀖𑀁 𑀮𑀩𑁆𑀪𑀢𑀺. 𑀉𑀧𑀫𑀸 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄𑀬𑀁. 𑀬𑀣𑀸 𑀧𑀦 𑀫𑀳𑀸𑀲𑀫𑀼𑀤𑁆𑀤𑁂 𑀪𑀸𑀬𑀺𑀢𑀩𑁆𑀩𑀸 𑀫𑀳𑀸𑀢𑀭𑀗𑁆𑀕𑀊𑀫𑀺𑀯𑁂𑀕𑀸𑀤𑀬𑁄 𑀘 𑀲𑀁𑀲𑀼𑀫𑀸𑀭 𑀢𑀺𑀫𑀺 𑀢𑀺𑀧𑀺𑀗𑁆𑀕𑀮𑀸𑀤𑀺 𑀫𑀘𑁆𑀙𑀫𑀓𑀸𑀭𑀸𑀤𑀬𑁄 𑀘 𑀑𑀓𑀺𑀡𑁆𑀡𑀸 𑀳𑁄𑀦𑁆𑀢𑀺, 𑀏𑀯𑀁 𑀫𑁄𑀳𑀸𑀤𑀺𑀓𑀺𑀮𑁂𑀲𑀸 𑀘 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘 𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑀸 𑀪𑀬𑀸𑀦𑀓𑀸 𑀩𑀳𑀽 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀤𑀼𑀓𑁆𑀔𑀸𑀤𑀬𑁄 𑀘 𑀔𑀦𑁆𑀥𑀸𑀤𑀬𑁄 𑀘 𑀑𑀓𑀺𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀲𑀸𑀭𑁄𑀖𑀦𑁆𑀢𑀺 𑀲𑀁𑀲𑀸𑀭𑀲𑀗𑁆𑀔𑀸𑀢𑀁 𑀑𑀖𑀁 𑀲𑀫𑀼𑀤𑁆𑀤𑀚𑀮𑀧𑁆𑀧𑀯𑀸𑀳𑀁. 𑀲𑀁𑀧𑀼𑀦𑀧𑁆𑀧𑀼𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀸 𑀲𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀁𑀲𑀸𑀭𑁄. 𑀲𑀁𑀧𑀼𑀩𑁆𑀩𑀲𑀭𑀥𑀸𑀢𑀼 𑀕𑀢𑀺𑀬𑀁 𑀡. 𑀔𑀦𑁆𑀥𑀥𑀸𑀢𑀼𑀆𑀬𑀢 𑀦𑀸𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀲𑀢𑁆𑀢𑁂 𑀑𑀢𑁆𑀣𑀭𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀳𑁂𑀝𑁆𑀞𑀸 𑀳𑀦𑀢𑀺 𑀳𑀭𑀢𑀻𑀢𑀺 𑀑𑀖𑁄, 𑀚𑀮𑀧𑁆𑀧𑀯𑀸𑀳𑁄. 𑀅𑀯𑀧𑀼𑀩𑁆𑀩 𑀳𑀦𑀥𑀸𑀢𑀼 𑀳𑀭𑀡𑁂 𑀡. 𑀳𑀦𑀲𑁆𑀲 𑀖𑁄. 𑀅𑀯𑀲𑀤𑁆𑀤𑁄 𑀑𑀢𑁆𑀣𑀭𑀡𑀢𑁆𑀣𑁄. 𑀅𑀢𑁆𑀢𑀦𑀺 𑀧𑀢𑀺𑀢𑁂 𑀲𑀢𑁆𑀢𑁂 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀳𑀦𑁂𑀢𑀺 𑀑𑀲𑀻𑀤𑀸𑀧𑁂𑀢𑀻𑀢𑀺 𑀯𑀸 𑀑𑀖𑁄, 𑀚𑀮𑀧𑁆𑀧𑀯𑀸𑀳𑁄. 𑀅𑀯𑀧𑀼𑀩𑁆𑀩 𑀳𑀦𑀥𑀸𑀢𑀼 𑀑𑀲𑀻𑀤𑀸𑀧𑀦𑁂 𑀡. 𑀅𑀯𑀲𑀤𑁆𑀤𑁄 𑀳𑁂𑀝𑁆𑀞𑀸𑀪𑀸𑀕𑀢𑁆𑀣𑁄. 𑀑𑀖𑁄 𑀯𑀺𑀬𑀸𑀢𑀺 𑀑𑀖𑁄, 𑀲𑀁𑀲𑀸𑀭𑁄. 𑀅𑀣 ¶ 𑀯𑀸 𑀲𑀢𑁆𑀢𑀲𑀗𑁆𑀔𑀸𑀭𑁂 𑀑𑀢𑁆𑀣𑀭𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀝𑁆𑀝𑀲𑁆𑀫𑀺𑀁 𑀳𑀦𑀢𑀺 𑀳𑀭𑀢𑀻𑀢𑀺 𑀑𑀖𑁄, 𑀑𑀳𑀦𑁂𑀢𑀺 𑀑𑀲𑀻𑀤𑀸𑀧𑁂𑀢𑀺 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑀲𑀗𑁆𑀔𑀸𑀭𑁂𑀢𑀺 𑀯𑀸 𑀑𑀖𑁄, 𑀭𑀸𑀕𑀸𑀤𑀺 𑀓𑀺𑀮𑁂𑀲𑀸 𑀮𑀩𑁆𑀪𑀦𑁆𑀢𑀺. 𑀲𑀁𑀲𑀸𑀭𑁄𑀏𑀯 𑀑𑀖𑁄 𑀲𑀁𑀲𑀸𑀭𑁄𑀖𑁄, 𑀢𑀁 𑀲𑀁𑀲𑀸𑀭𑁄𑀖𑀁.

𑀫𑀕𑁆𑀕𑁄𑀴𑀼𑀫𑁆𑀧𑁂𑀦𑀸𑀢𑀺 𑀏𑀢𑁆𑀣 𑀫𑀕𑁆𑀕𑀑𑀴𑀼𑀫𑁆𑀧𑁂𑀦𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀝𑁆𑀞𑀫𑀕𑁆𑀕𑀗𑁆𑀕𑀲𑀗𑁆𑀔𑀸𑀢𑁂𑀦 𑀓𑀼𑀮𑁆𑀮𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁄. 𑀫𑀕𑁆𑀕𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀫𑀕𑁆𑀕𑁄. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀫𑀕𑁆𑀕𑀥𑀸𑀢𑀼 𑀕𑀢𑀺𑀬𑀁 𑀅. 𑀯𑀼𑀢𑁆𑀢𑀜𑁆𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀏𑀢𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀻𑀢𑀺 𑀫𑀕𑁆𑀕𑁄, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀬𑀢𑀺 𑀕𑀯𑁂𑀲𑀺𑀬𑀢𑀻𑀢𑀺 𑀯𑀸 𑀫𑀕𑁆𑀕𑁄, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀜𑀸𑀡𑁂𑀦 𑀤𑀲𑁆𑀲𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀥𑀸𑀢𑀼 𑀕𑀯𑁂𑀲𑀦𑁂 𑀅. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄, 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀺𑀬𑀝𑁆𑀞𑁂𑀦 𑀘𑀸’’𑀢𑀺. 𑀅𑀣 𑀯𑀸 𑀫𑀕𑁆𑀕𑀺𑀬𑀢𑀺 𑀧𑀝𑀺𑀧𑀚𑁆𑀚𑀺𑀬𑀢𑀻𑀢𑀺 𑀫𑀕𑁆𑀕𑁄, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀉𑀴𑀼 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀢𑁄 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀉𑀴𑀼𑀧𑁄, 𑀲𑁄𑀬𑁂𑀯 𑀦𑀺𑀕𑁆𑀕𑀳𑀺𑀢𑀸𑀕𑀫𑀯𑀲𑁂𑀦 𑀉𑀴𑀼𑀫𑁆𑀧𑁄, 𑀓𑀼𑀮𑁆𑀮𑁄. 𑀉𑀴𑀼𑀲𑀤𑁆𑀤𑀽𑀧𑀧𑀤𑀧𑀸𑀥𑀸𑀢𑀼 𑀭𑀓𑁆𑀔𑀦𑁂 𑀓𑁆𑀯𑀺. 𑀫𑀕𑁆𑀕𑁄𑀏𑀯 𑀉𑀴𑀼𑀫𑁆𑀧𑁄 𑀫𑀕𑁆𑀕𑁄𑀴𑀼𑀫𑁆𑀧𑁄, 𑀫𑀕𑁆𑀕𑀲𑀗𑁆𑀔𑀸𑀢𑁄 𑀯𑀸 𑀉𑀴𑀼𑀫𑁆𑀧𑁄 𑀢𑀣𑀸, 𑀫𑀕𑁆𑀕𑀲𑀤𑀺𑀲𑁄 𑀯𑀸 𑀉𑀴𑀼𑀫𑁆𑀧𑁄 𑀢𑀣𑀸, 𑀫𑀕𑁆𑀕𑁄 𑀯𑀺𑀬 𑀯𑀸 𑀉𑀴𑀼𑀫𑁆𑀧𑁄 𑀢𑀣𑀸, 𑀫𑀕𑁆𑀕𑁄 𑀘 𑀉𑀴𑀼𑀫𑁆𑀧𑁄 𑀘 𑀫𑀕𑁆𑀕𑁄𑀴𑀼𑀫𑁆𑀧𑁄. 𑀅𑀣 𑀯𑀸 𑀉𑀴𑀼𑀫𑁆𑀧𑁄𑀏𑀯 𑀫𑀕𑁆𑀕𑁄 𑀫𑀕𑁆𑀕𑁄𑀴𑀼𑀫𑁆𑀧𑁄, 𑀉𑀴𑀼𑀫𑁆𑀧𑀲𑀗𑁆𑀔𑀸𑀢𑁄 𑀯𑀸 𑀫𑀕𑁆𑀕𑁄 𑀢𑀣𑀸, 𑀉𑀴𑀼𑀫𑁆𑀧 𑀲𑀤𑀺𑀲𑁄 𑀯𑀸 𑀫𑀕𑁆𑀕𑁄 𑀢𑀣𑀸, 𑀉𑀴𑀼𑀫𑁆𑀧𑁄 𑀯𑀺𑀬 𑀯𑀸 𑀫𑀕𑁆𑀕𑁄 𑀢𑀣𑀸, 𑀉𑀴𑀼𑀫𑁆𑀧𑁄 𑀘 𑀫𑀕𑁆𑀕𑁄 𑀘 𑀫𑀕𑁆𑀕𑁄𑀴𑀼𑀫𑁆𑀧𑁄𑀢𑀺 𑀏𑀯𑀁 𑀭𑀽𑀧𑀓𑀲𑀤𑀺𑀲𑀉𑀧𑀫𑀸 𑀲𑀫𑀼𑀧𑁂𑀓𑁆𑀔𑀢𑁆𑀣𑀯𑀲𑁂𑀦 𑀘 𑀧𑀭𑀧𑀓𑁆𑀔 𑀲𑀓𑀧𑀓𑁆𑀔𑀢𑁆𑀣𑀯𑀲𑁂𑀦 𑀘 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀫𑀕𑁆𑀕𑁄𑀴𑀼𑀫𑁆𑀧𑁂𑀦. 𑀢𑀭𑀻𑀢𑀺 𑀅𑀢𑀭𑀺. 𑀥𑀫𑁆𑀫𑀭𑀸𑀚𑀸 𑀳𑀺 ¶ 𑀅𑀝𑁆𑀞𑀫𑀕𑁆𑀕𑀗𑁆𑀕𑀦𑀸𑀯𑀸𑀬 𑀲𑀁𑀲𑀸𑀭𑁄𑀖𑀁 𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑀻𑀭𑀁 𑀧𑀸𑀧𑀼𑀡𑀸𑀢𑀺. 𑀅𑀢𑀻𑀢𑀸 𑀩𑀼𑀤𑁆𑀥𑀸 𑀧𑀸𑀧𑀼𑀡𑀺𑀁𑀲𑀼. 𑀅𑀦𑀸𑀕𑀢𑀸 𑀩𑀼𑀤𑁆𑀥𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑁂

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺𑀬𑁂𑀯 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺; 𑀩𑀼𑀤𑁆𑀥𑀯𑀁𑀲𑁂 𑀘

‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀼𑀬𑁆𑀳, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼’’𑀦𑁆𑀢𑀺.

𑀅𑀪𑀬𑀦𑁆𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀪𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀩𑁆𑀪𑀬𑀁. 𑀲𑁄 𑀳𑀺 𑀪𑀕𑀯𑀸 𑀦𑀢𑁆𑀣𑀺 𑀪𑀬𑀁 𑀏𑀢𑀲𑁆𑀲𑀸𑀢𑀺 𑀅𑀪𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀅𑀪𑀬𑀦𑁆𑀢𑀺 𑀔𑁂𑀫𑀁. 𑀢𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀺 𑀚𑀸𑀢𑀺𑀆𑀤𑀺𑀪𑀬𑀁 𑀏𑀢𑁆𑀣𑀸𑀢𑀺 𑀅𑀪𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀢𑀁 𑀧𑀤𑀁 𑀧𑀸𑀭𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀧𑀸𑀭𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀸𑀭𑀦𑁆𑀢𑀺 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀧𑀭𑀢𑀻𑀭𑀝𑁆𑀞𑁂𑀦 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀉𑀤𑀓𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀧𑀸𑀭𑀁, 𑀲𑀫𑀼𑀤𑁆𑀤𑀧𑀸𑀭𑀁. 𑀧𑀸𑀥𑀸𑀢𑀼 𑀭𑀓𑁆𑀔𑀦𑁂 𑀅𑀭𑁄. 𑀅𑀣 𑀯𑀸 𑀧𑀸𑀭𑁂𑀢𑀺 𑀲𑀫𑀢𑁆𑀣𑁂𑀢𑀺 𑀢𑀭𑀗𑁆𑀕𑀸𑀤𑀬𑁄 𑀯𑀸𑀭𑁂𑀢𑀼𑀦𑁆𑀢𑀺 𑀧𑀸𑀭𑀁. 𑀧𑀸𑀭𑀥𑀸𑀢𑀼 𑀲𑀫𑀢𑁆𑀣𑀺𑀬𑀁 𑀅. 𑀧𑀸𑀭𑀁 𑀯𑀺𑀬𑀸𑀢𑀺 𑀧𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀻𑀢𑀢𑁆𑀣𑁂𑀦 𑀧𑀦 𑀏𑀯𑀁 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀚𑀸𑀢𑀺 𑀪𑀬𑀸𑀤𑀺𑀁 𑀧𑀸𑀢𑀺 𑀭𑀓𑁆𑀔𑀢𑀺 𑀏𑀢𑁆𑀣𑀸𑀢𑀺 𑀧𑀸𑀭𑀁, 𑀧𑀸𑀭𑁂𑀢𑀺 𑀲𑀫𑀢𑁆𑀣𑁂𑀢𑀺 𑀏𑀢𑁆𑀣 𑀯𑀸 𑀚𑀸𑀢𑀺𑀪𑀬𑀸𑀤𑀬𑁄 𑀯𑀸𑀭𑁂𑀢𑀼𑀦𑁆𑀢𑀺 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀚𑁆𑀚𑀺𑀢𑁆𑀣 𑀅𑀥𑀺𑀕𑀫𑀺𑀢𑁆𑀣𑀸𑀢𑀺 𑀧𑀸𑀭𑀧𑀢𑁆𑀢𑁄, 𑀥𑀫𑁆𑀫𑀭𑀸𑀚𑀸. 𑀧𑀸𑀭𑀲𑀤𑁆𑀤𑀽𑀧𑀧𑀤 𑀧𑀤𑀥𑀸𑀢𑀼 𑀕𑀢𑀺𑀬𑀁 𑀢. 𑀅𑀣 𑀯𑀸 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀲𑁆𑀲 𑀫𑀳𑀸𑀪𑀺𑀦𑀻𑀳𑀸𑀭𑀲𑁆𑀲 𑀲𑀓𑀮𑀲𑁆𑀲 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀕𑀼𑀡𑀸𑀦𑀁 𑀯𑀸 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑁄 𑀕𑀢𑁄𑀢𑀺 𑀧𑀸𑀭𑀧𑀢𑁆𑀢𑁄, 𑀥𑀫𑁆𑀫𑀭𑀸𑀚𑀸. 𑀧𑀸𑀭𑀲𑀤𑁆𑀤𑁄 𑀳𑀺 𑀧𑀭𑀺𑀬𑀦𑁆𑀢 𑀯𑀸𑀘𑀓𑁄. 𑀢𑀁 𑀧𑀸𑀭𑀧𑀢𑁆𑀢𑀁. 𑀧𑀚𑀸𑀦𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁. 𑀢𑁂𑀳𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀓𑀸𑀭𑁂𑀦 𑀚𑀦𑀺𑀬𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀢𑀻𑀢𑀺 𑀧𑀚𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀧𑀚𑀸𑀦𑀁.

𑀢𑀸𑀡𑀦𑁆𑀢𑀺 ¶ 𑀢𑀸𑀬𑀦𑀝𑁆𑀞𑁂𑀦 𑀢𑀸𑀡𑀁. 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭 𑀪𑀬𑀢𑁄 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀡𑁄, 𑀥𑀫𑁆𑀫𑀭𑀸𑀚𑀸. 𑀢𑀸𑀥𑀸𑀢𑀼 𑀭𑀓𑁆𑀔𑀦𑁂 𑀬𑀼. 𑀅𑀣 𑀯𑀸 𑀢𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀭𑀺𑀧𑀸𑀮𑀦𑀝𑁆𑀞𑁂𑀦 𑀢𑀸𑀡𑀁. 𑀲𑁄 𑀳𑀺 𑀥𑀫𑁆𑀫𑀭𑀸𑀚𑀸 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀫𑀕𑁆𑀕 𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀁 𑀤𑀤𑀦𑁆𑀢𑁄 𑀢𑀸𑀬𑀢𑀺 𑀧𑀸𑀮𑁂𑀢𑀻𑀢𑀺 𑀢𑀸𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀢𑀸𑀡𑀁. 𑀮𑁂𑀡𑀦𑁆𑀢𑀺 𑀦𑀺𑀮𑀻𑀬𑀦𑀝𑁆𑀞𑁂𑀦 𑀮𑁂𑀡𑀁, 𑀚𑀸𑀢𑀺𑀪𑀬𑀸𑀤𑀻𑀳𑀺 𑀧𑀻𑀴𑀺𑀢𑁂𑀳𑀺 𑀲𑀢𑁆𑀢𑁂𑀳𑀺 𑀮𑀻𑀬𑀦𑁆𑀢𑀺 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑁄, 𑀥𑀫𑁆𑀫𑀭𑀸𑀚𑀸. 𑀮𑀻𑀥𑀸𑀢𑀼 𑀦𑀺𑀮𑀻𑀬𑀦𑁂 𑀬𑀼. 𑀅𑀣 𑀯𑀸 𑀮𑁂𑀡𑀦𑁆𑀢𑀺 𑀲𑀁𑀲𑀸𑀭𑀪𑀬𑀁 𑀧𑀲𑁆𑀲𑀦𑁆𑀢𑁂𑀳𑀺 𑀦𑀺𑀮𑀻𑀬𑀦𑀝𑁆𑀞𑁂𑀦 𑀮𑁂𑀡𑀁. 𑀲𑁄 𑀳𑀺 𑀥𑀫𑁆𑀫𑀭𑀸𑀚𑀸 𑀲𑀁𑀲𑀸𑀭𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀮𑀻𑀬𑀦𑁆𑀢𑀺 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀮𑁂𑀡𑀁. 𑀥𑀫𑁆𑀫𑀭𑀸𑀚𑀸 𑀳𑀺 𑀲𑀁𑀲𑀸𑀭𑀪𑀬𑁂𑀳𑀺 𑀧𑀻𑀴𑀺𑀢𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀧𑀭𑀸𑀬𑀦𑀁 𑀞𑀸𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀫𑀲𑀭𑀡𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀲𑀤𑀺𑀲𑀅𑀯𑀲𑁆𑀲𑀬𑀦𑀁, 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀫𑁄 𑀲𑀤𑀺𑀲𑁄 𑀲𑀻𑀮𑀸𑀤𑀺𑀕𑀼𑀡𑁂𑀦𑀸𑀢𑀺 𑀅𑀲𑀫𑁄, 𑀥𑀫𑁆𑀫𑀭𑀸𑀚𑀸. 𑀲𑀭𑀢𑀺 𑀕𑀘𑁆𑀙𑀢𑀺 𑀅𑀯𑀲𑁆𑀲𑀬𑀢𑀺 𑀏𑀢𑁆𑀣𑀸𑀢𑀺 𑀲𑀭𑀡𑁄, 𑀥𑀫𑁆𑀫𑀭𑀸𑀚𑀸. 𑀲𑀭𑀥𑀸𑀢𑀼 𑀕𑀢𑀺𑀫𑁆𑀳𑀺 𑀬𑀼. 𑀅𑀲𑀫𑁄 𑀅𑀲𑀤𑀺𑀲𑁄 𑀳𑀼𑀢𑁆𑀯𑀸 𑀲𑀭𑀡𑁄𑀢𑀺 𑀅𑀲𑀫𑀲𑀭𑀡𑁄, 𑀥𑀫𑁆𑀫𑀭𑀸𑀚𑀸. 𑀲𑀫𑁆𑀪𑀸𑀯 𑀦𑀸𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄𑀬𑀁. 𑀥𑀫𑁆𑀫𑀭𑀸𑀚𑀸 𑀳𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀼𑀔𑀸𑀦𑀁 𑀤𑀸𑀬𑀓𑀢𑁆𑀢𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀅𑀲𑀫𑀁 𑀲𑀭𑀡𑀁 𑀅𑀯𑀲𑁆𑀲𑀬𑀦𑀁 𑀧𑀭𑀸𑀬𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀅𑀲𑀫𑀲𑀭𑀡𑀁. 𑀏𑀓𑀢𑀺𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀕𑀫𑀦𑀸𑀦𑀁 𑀏𑀓𑀢𑀺𑀢𑁆𑀣𑀪𑀽𑀢𑀁. 𑀢𑀭𑀦𑁆𑀢𑀺 𑀉𑀢𑁆𑀢𑀭𑀦𑁆𑀢𑀺 𑀏𑀢𑁆𑀣 𑀏𑀢𑁂𑀦 𑀯𑀸 𑀦𑀚𑁆𑀚𑀲𑀫𑀼𑀤𑁆𑀤𑀸𑀤𑀺𑀦𑁆𑀢𑀺 𑀢𑀺𑀢𑁆𑀣𑀁. 𑀦𑀚𑁆𑀚𑀲𑀫𑀼𑀤𑁆𑀤𑀸𑀤𑀻𑀦𑀁 𑀧𑀸𑀭𑀺𑀫𑀢𑀻𑀭𑀕𑀫𑀦𑀢𑁆𑀣𑀁 𑀑𑀢𑀭𑀡𑀝𑁆𑀞𑀸𑀦𑀁 𑀮𑀩𑁆𑀪𑀢𑀺. 𑀢𑀭𑀥𑀸𑀢𑀼 𑀑𑀢𑀭𑀡𑁂 𑀣. 𑀭𑀲𑁆𑀲 𑀢𑁄, 𑀇𑀓𑀸𑀭𑀸𑀕𑀫𑁄. 𑀫𑀦𑀼𑀲𑁆𑀲𑀸𑀦𑀁 𑀏𑀓𑀁 𑀢𑀺𑀢𑁆𑀣𑀁 𑀏𑀓𑀢𑀺𑀢𑁆𑀣𑀁, 𑀢𑀁 𑀯𑀺𑀬𑀸𑀢𑀺 𑀏𑀓𑀢𑀺𑀢𑁆𑀣𑁄, 𑀥𑀫𑁆𑀫𑀭𑀸𑀚𑀸. 𑀬𑀣𑀸 𑀳𑀺 𑀢𑀺𑀢𑁆𑀣𑁂𑀦 𑀦𑀚𑁆𑀚𑀸𑀤𑀺𑀁 𑀢𑀭𑀦𑁆𑀢𑀸 𑀫𑀦𑀼𑀲𑁆𑀲𑀸 𑀧𑀸𑀭𑀺𑀫𑀢𑀻𑀭𑀁 𑀲𑀼𑀔𑀁 𑀧𑀸𑀧𑀼𑀡𑀦𑁆𑀢𑀺, 𑀦 𑀅𑀢𑀺𑀢𑁆𑀣𑁂𑀦, 𑀏𑀯𑀁 𑀲𑁂𑀝𑁆𑀞𑀪𑀽𑀢𑁂𑀦 𑀩𑀼𑀤𑁆𑀥𑀢𑀺𑀢𑁆𑀣𑁂𑀦 𑀲𑀁𑀲𑀸𑀭𑁄𑀖𑀁 ¶ 𑀢𑀭𑀦𑁆𑀢𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀲𑀼𑀔𑀁 𑀧𑀸𑀧𑀼𑀡𑀦𑁆𑀢𑀺, 𑀦 𑀅𑀢𑀺𑀢𑁆𑀣𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀦, 𑀢𑀲𑁆𑀫𑀸 𑀥𑀫𑁆𑀫𑀭𑀸𑀚𑀁 𑀏𑀓𑀢𑀺𑀢𑁆𑀣𑁄𑀢𑀺 𑀣𑁄𑀫𑁂𑀢𑀺. 𑀦𑀻𑀢𑀢𑁆𑀣𑁂𑀦 𑀧𑀦 𑀏𑀓𑁄 𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀢𑀭𑀦𑁆𑀢𑀺 𑀉𑀢𑁆𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀏𑀓 𑀢𑀺𑀢𑁆𑀣𑁄, 𑀥𑀫𑁆𑀫𑀭𑀸𑀚𑀸. 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀏𑀢𑁆𑀣 𑀩𑀼𑀤𑁆𑀥𑀢𑀺𑀢𑁆𑀣𑁂 𑀤𑁂𑀲𑀺𑀢𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑁂𑀲𑀺𑀢𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀲𑀁𑀲𑀸𑀭𑁄𑀖𑀁 𑀅𑀝𑁆𑀞𑀫𑀕𑁆𑀕𑀗𑁆𑀕𑀦𑀸𑀯𑀸𑀬 𑀙𑀺𑀦𑁆𑀤𑀺𑀢𑁆𑀯𑀸 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀸𑀭𑀁 𑀲𑀼𑀔𑀁 𑀢𑀭𑀦𑁆𑀢𑀺, 𑀇𑀢𑀺𑀢𑀲𑁆𑀫𑀸 𑀏𑀢𑁆𑀣𑀸𑀢𑀺𑀧𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀲𑁄 𑀩𑀼𑀤𑁆𑀥𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀏𑀓𑁄 𑀲𑁂𑀝𑁆𑀞𑁄 𑀢𑀺𑀢𑁆𑀣𑁄 𑀦𑀸𑀫. 𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀏𑀓𑀢𑀺𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀏𑀓𑀢𑀺𑀢𑁆𑀣𑀁.

𑀧𑀢𑀺𑀝𑁆𑀞𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀳𑀸𑀤𑀻𑀧𑀁 𑀯𑀺𑀬 𑀧𑀢𑀺𑀝𑁆𑀞𑀁 𑀆𑀥𑀸𑀭𑀪𑀽𑀢𑀁. 𑀧𑀝𑀺𑀲𑀭𑀡𑀁 𑀮𑁂𑀡𑀁 𑀧𑀭𑀸𑀬𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀢𑀺𑀝𑁆𑀞𑁄, 𑀥𑀫𑁆𑀫𑀭𑀸𑀚𑀸. 𑀧𑀢𑀺𑀧𑀼𑀩𑁆𑀩𑀝𑁆𑀞𑀸𑀥𑀸𑀢𑀼 𑀕𑀢𑀺𑀦𑀺𑀯𑀢𑁆𑀢𑀺𑀫𑁆𑀳𑀺 𑀅. 𑀥𑀫𑁆𑀫𑀭𑀸𑀚𑀸 𑀳𑀺 𑀲𑀩𑁆𑀩𑀲𑀼𑀔𑀢𑁆𑀣𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀫𑀳𑀸𑀤𑀻𑀧𑁄 𑀯𑀺𑀬 𑀧𑀢𑀺𑀝𑁆𑀞𑁄 𑀧𑀝𑀺𑀲𑀭𑀡𑁄 𑀮𑁂𑀡𑁄 𑀧𑀭𑀸𑀬𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀧𑀢𑀺𑀝𑁆𑀞𑀁. 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀲𑁆𑀲 𑀔𑁂𑀢𑁆𑀢𑀪𑀽𑀢𑀁. 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀲𑁆𑀲 𑀯𑀧𑀦𑀞𑀸𑀦𑀁 𑀔𑁂𑀢𑁆𑀢𑀪𑀽𑀢𑀁 𑀯𑀸, 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀯𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀓𑀼𑀲𑀮𑀁. 𑀧𑀼𑀥𑀸𑀢𑀼 𑀲𑁄𑀥𑀦𑁂 𑀡𑁆𑀬𑁄. 𑀅𑀣 𑀯𑀸 𑀧𑀭𑀁 𑀧𑀼𑀚𑁆𑀚𑀪𑀸𑀯𑀁 𑀚𑀦𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀲𑀤𑀸 𑀧𑀽𑀚𑀺𑀢𑀁 𑀯𑀸 𑀚𑀦𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀓𑀼𑀲𑀮𑀁. 𑀧𑀽𑀚𑀲𑀤𑁆𑀤𑀽𑀧𑀧𑀤 𑀚𑀦𑀥𑀸𑀢𑀼 𑀡𑁆𑀬𑁄. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁂𑀲𑀁 𑀅𑀧𑀼𑀜𑁆𑀜𑀁 𑀧𑀼𑀦𑀸𑀢𑀺 𑀲𑁄𑀥𑁂𑀢𑀻𑀢𑀺 𑀯𑀸 𑀧𑀼𑀜𑁆𑀜𑀁, 𑀓𑀼𑀲𑀮𑀁. 𑀧𑀼𑀥𑀸𑀢𑀼 𑀲𑁄𑀥𑀦𑁂 𑀡𑁆𑀬𑁄. 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀩𑀻𑀚𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀔𑁂𑀢𑁆𑀢𑀁, 𑀓𑁂𑀤𑀸𑀭𑀸𑀤𑀺. 𑀔𑀺𑀧𑀲𑀤𑁆𑀤𑀽𑀧𑀧𑀤 𑀢𑀸𑀥𑀸𑀢𑀼 𑀭𑀓𑁆𑀔𑀦𑁂 𑀓𑁆𑀯𑀺. 𑀩𑀻𑀚𑀸𑀦𑀺 𑀯𑀧𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀩𑀻𑀚𑀁 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀔𑀺𑀧𑀦𑁆𑀢𑀺 𑀯𑀧𑀦𑁆𑀢𑀺 𑀏𑀢𑁆𑀣 𑀩𑀻𑀚𑀸𑀦𑀻𑀢𑀺 𑀔𑁂𑀢𑁆𑀢𑀁. 𑀔𑀺𑀧𑀥𑀸𑀢𑀼 𑀧𑁂𑀭𑀡𑁂 𑀔𑁂𑀧𑁂 𑀯𑀸 𑀢. 𑀔𑁂𑀢𑁆𑀢𑀁 𑀯𑀺𑀬𑀸𑀢𑀺 𑀔𑁂𑀢𑁆𑀢𑁄. 𑀥𑀫𑁆𑀫𑀭𑀸𑀚𑀸. 𑀦𑀻𑀢𑀢𑁆𑀣𑁂𑀦 𑀧𑀦 𑀧𑀼𑀜𑁆𑀜𑀩𑀻𑀚𑀸𑀦𑀺 𑀯𑀧𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀫𑀳𑀧𑁆𑀨𑀮 𑀪𑀸𑀯𑀓𑀭𑀡𑁂𑀦 ¶ 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀧𑀼𑀜𑁆𑀜𑀩𑀻𑀚𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀔𑁂𑀢𑁆𑀢𑁄. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀧𑀼𑀜𑁆𑀜𑀩𑀻𑀚𑀸𑀦𑀺 𑀔𑀺𑀧𑀺𑀬𑀦𑁆𑀢𑀺 𑀯𑀧𑀺𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀔𑁂𑀢𑁆𑀢𑁄. 𑀥𑀫𑁆𑀫𑀭𑀸𑀚𑀸𑀢𑀺 𑀓𑀸𑀢𑀩𑁆𑀩𑁄. 𑀧𑀼𑀜𑁆𑀜𑀸𑀦𑀁 𑀔𑁂𑀢𑁆𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄, 𑀥𑀫𑁆𑀫𑀭𑀸𑀚𑀸. 𑀬𑀣𑀸 𑀳𑀺 𑀭𑀜𑁆𑀜𑁄 𑀯𑀸 𑀅𑀫𑀘𑁆𑀘𑀸𑀤𑀻𑀦𑀁 𑀯𑀸 𑀲𑀸𑀮𑀻𑀦𑀁 𑀯𑀸 𑀬𑀯𑀸𑀦𑀁 𑀯𑀸 𑀯𑀺𑀭𑀽𑀳𑀦𑀝𑁆𑀞𑀸𑀦𑀁 𑀭𑀜𑁆𑀜𑁄 𑀯𑀸 𑀅𑀫𑀘𑁆𑀘𑀸𑀤𑀻𑀦𑀁 𑀯𑀸 𑀲𑀸𑀮𑀺𑀔𑁂𑀢𑁆𑀢𑀁 𑀬𑀯𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀥𑀫𑁆𑀫𑀭𑀸𑀚𑀸 𑀲𑀩𑁆𑀩𑀮𑁄𑀓𑀲𑁆𑀲 𑀧𑀼𑀜𑁆𑀜𑀫𑀳𑀩𑁆𑀩𑀮𑀪𑀸𑀯𑀓𑀭𑀡𑁂𑀦 𑀧𑀼𑀜𑁆𑀜𑀸𑀦𑀁 𑀯𑀺𑀭𑀽𑀳 𑀦𑀝𑁆𑀞𑀸𑀦𑀁 𑀥𑀫𑁆𑀫𑀭𑀸𑀚𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀮𑁄𑀓𑀲𑁆𑀲 𑀦𑀸𑀦𑀸𑀧𑁆𑀧𑀓𑀸𑀭𑀳𑀺𑀢 𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀯𑀺𑀭𑀽𑀳𑀦𑁆𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀭𑀸𑀚𑀸 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀦𑁆𑀢𑀺 𑀅𑀪𑀺𑀢𑁆𑀣𑀯𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁.

𑀧𑀭𑀫𑀲𑀼𑀔𑀤𑀦𑁆𑀢𑀺 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀤𑀤𑀫𑀸𑀦𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺. 𑀏𑀢𑁆𑀣 𑀘 𑀧𑀭𑀫𑀲𑀤𑁆𑀤𑁄 𑀉𑀢𑁆𑀢𑀫𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺 𑀧𑀤𑀺𑀓𑁄. 𑀅𑀣 𑀯𑀸 𑀧𑀭𑀁 𑀅𑀢𑀺𑀭𑁂𑀓𑀁 𑀅𑀭𑀺𑀬𑁂𑀳𑀺 𑀫𑀸𑀦𑀺𑀢𑀩𑁆𑀩𑀦𑁆𑀢𑀺 𑀧𑀭𑀫𑀁, 𑀦𑀺𑀩𑁆𑀩𑀸𑀦𑀁. 𑀧𑀭𑀧𑀼𑀩𑁆𑀩𑀫𑀸𑀥𑀸𑀢𑀼 𑀫𑀸𑀦𑁂 𑀅. 𑀧𑀓𑀸𑀭𑁂𑀦 𑀅𑀭𑀺𑀬𑁂𑀳𑀺 𑀭𑀫𑀺𑀬𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀧𑀭𑀫𑀁, 𑀦𑀺𑀩𑁆𑀩𑀸𑀦𑀁. 𑀧𑀧𑀼𑀩𑁆𑀩𑀭𑀫𑀼𑀥𑀸𑀢𑀼 𑀭𑀫𑀦𑁂 𑀡. 𑀅𑀪𑀺𑀥𑀸𑀦𑀝𑀻𑀓𑀸𑀬𑀁 𑀧𑀦 ‘‘𑀧𑀭𑀁 𑀧𑀘𑁆𑀘𑀦𑀻𑀓𑀁 𑀫𑀸𑀭𑁂𑀢𑀻𑀢𑀺 𑀧𑀭𑀫𑀁. 𑀧𑀓𑀝𑁆𑀞𑀪𑀸𑀯𑁂 𑀭𑀫𑀢𑀻𑀢𑀺 𑀧𑀭𑀫𑀁. 𑀡𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀲𑀼𑀔𑀁 𑀧𑀭𑀫𑀲𑀼𑀔𑀁. 𑀧𑀭𑀫𑀁 𑀉𑀢𑁆𑀢𑀫𑀁 𑀯𑀸 𑀲𑀼𑀔𑀁 𑀧𑀭𑀫𑀲𑀼𑀔𑀁. 𑀢𑀁 𑀤𑀤𑀸𑀢𑀻𑀢𑀺 𑀧𑀭𑀫𑀲𑀼𑀔𑀤𑁄, 𑀥𑀫𑁆𑀫𑀭𑀸𑀚𑀸. 𑀧𑀭𑀫𑀲𑀼𑀔𑀲𑀤𑁆𑀤𑀽𑀧𑀧𑀤 𑀤𑀸𑀥𑀸𑀢𑀼 𑀤𑀸𑀦𑁂 𑀓𑁆𑀯𑀺. 𑀥𑀫𑁆𑀫𑀭𑀸𑀚𑀸 𑀧𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀘𑀢𑀼𑀧𑀘𑁆𑀘𑀬𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀘 𑀦𑀺𑀩𑁆𑀩𑀸𑀦𑀲𑀼𑀔𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀭𑀫𑀲𑀼𑀔𑀤𑀁. 𑀥𑀫𑁆𑀫𑀭𑀸𑀚𑀦𑁆𑀢𑀺 𑀩𑀼𑀤𑁆𑀥𑀁. 𑀲𑁄 𑀳𑀺 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀭𑀜𑁆𑀚𑁂𑀢𑀺 𑀢𑁄𑀲𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸𑀢𑀺. 𑀅𑀣 𑀯𑀸 𑀧𑀸𑀭𑀫𑀻𑀥𑀫𑁆𑀫𑁂𑀦𑁂𑀯 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸𑀢𑀺. 𑀧𑀸𑀭𑀫𑀻𑀥𑀫𑁆𑀫𑁂𑀦𑁂𑀯 𑀚𑀸𑀢𑁄 𑀯𑀸 𑀭𑀸𑀚𑀸𑀢𑀺 𑀥𑀫𑁆𑀫𑀭𑀸𑀚𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀁 𑀥𑀫𑁆𑀫𑀭𑀸𑀚𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀬𑁄 𑀥𑀫𑁆𑀫𑀭𑀸𑀚𑀸 𑀫𑀼𑀳 𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺𑀁 𑀫𑁄𑀳𑀤𑁄𑀲𑀢𑀡𑁆𑀳𑀸𑀤𑀺𑀲𑀗𑁆𑀔𑀸𑀢𑀁 𑀫𑀳𑀸𑀢𑀭𑀗𑁆𑀕 𑀔𑀼𑀤𑁆𑀤𑀓𑀊𑀫𑀺𑀓𑀁, 𑀲𑀁𑀲𑀸𑀭𑁄𑀖𑀁 𑀲𑀁𑀲𑀸𑀭𑀲𑀗𑁆𑀔𑀸𑀢𑀁 𑀑𑀖𑀁 𑀲𑀫𑀼𑀤𑁆𑀤𑀚𑀮𑀧𑁆𑀧𑀯𑀸𑀳𑀁 ¶ . 𑀫𑀕𑁆𑀕𑁄𑀴𑀼𑀫𑁆𑀧𑁂𑀦 𑀅𑀝𑁆𑀞𑀫𑀕𑁆𑀕𑀗𑁆𑀕𑀲𑀗𑁆𑀔𑀸𑀢𑁂𑀦 𑀓𑀼𑀮𑁆𑀮𑁂𑀦 𑀢𑀭𑀺 𑀅𑀢𑀭𑀺𑀁, 𑀅𑀪𑀬𑀁 𑀔𑁂𑀫𑀁, 𑀚𑀸𑀢𑀺𑀆𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀩𑁆𑀪𑀬𑀁 𑀯𑀸, 𑀧𑀸𑀭𑀧𑀢𑁆𑀢𑀁 𑀦𑀺𑀩𑁆𑀩𑀸𑀦𑀧𑀸𑀭𑀁 𑀧𑀢𑁆𑀢𑀁 𑀅𑀥𑀺𑀕𑀢𑀁, 𑀧𑀚𑀸𑀦𑀁 𑀲𑀩𑁆𑀩 𑀲𑀢𑁆𑀢𑀸𑀦𑀁, 𑀢𑀸𑀡𑀁 𑀢𑀸𑀬𑀦𑀝𑁆𑀞𑁂𑀦 𑀢𑀸𑀡𑀁 𑀭𑀓𑁆𑀔𑀡𑀁. 𑀮𑁂𑀡𑀁 𑀦𑀺𑀮𑀻𑀬𑀦𑀝𑁆𑀞𑁂𑀦 𑀮𑁂𑀡𑀁 𑀦𑀺𑀮𑀻𑀬𑀦𑀁, 𑀅𑀲𑀫𑀲𑀭𑀡𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀲𑀤𑀺𑀲𑀅𑀯𑀲𑁆𑀲𑀬𑀦𑀁, 𑀏𑀓𑀢𑀺𑀢𑁆𑀣𑀁 𑀦𑀺𑀩𑁆𑀩𑀸𑀦𑀧𑀸𑀭𑀕𑀫𑀦𑀸𑀦𑀁 𑀏𑀓𑀢𑀺𑀢𑁆𑀣 𑀪𑀽𑀢𑀁, 𑀧𑀢𑀺𑀝𑁆𑀞𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀳𑀸𑀤𑀻𑀧𑀁 𑀯𑀺𑀬 𑀧𑀢𑀺𑀝𑁆𑀞𑀁 𑀆𑀥𑀸𑀭𑀪𑀽𑀢𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀦𑀺𑀩𑁆𑀩𑀸𑀦𑀲𑀼𑀔𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀲𑁆𑀲 𑀔𑁂𑀢𑁆𑀢𑀪𑀽𑀢𑀁, 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀲𑁆𑀲 𑀯𑀧𑀦𑀝𑁆𑀞𑀸𑀦𑀁 𑀔𑁂𑀢𑁆𑀢𑀪𑀽𑀢𑀁 𑀯𑀸, 𑀧𑀭𑀫𑀲𑀼𑀔𑀁 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀤𑀤𑀫𑀸𑀦𑀁, 𑀥𑀫𑁆𑀫𑀭𑀸𑀚𑀁 𑀩𑀼𑀤𑁆𑀥𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑁂𑀳𑀺 𑀧𑀚𑀸𑀦𑀁 𑀭𑀜𑁆𑀚𑀸𑀧𑀦𑀁 𑀯𑀸, 𑀧𑀸𑀭𑀫𑀻𑀥𑀫𑁆𑀫𑁂𑀦𑁂𑀯 𑀩𑀼𑀤𑁆𑀥𑀪𑀸𑀯𑀁 𑀚𑀸𑀢𑀁 𑀩𑀼𑀤𑁆𑀥𑀁 𑀯𑀸, 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀸𑀫𑀻𑀢𑀺.

𑀅𑀝𑁆𑀞𑀸𑀭𑀲𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀓𑀡𑁆𑀟𑀫𑁆𑀩𑀁𑀫𑀽𑀮𑁂 𑀧𑀭𑀳𑀺𑀢𑀓𑀭𑁄 𑀬𑁄 𑀫𑀼𑀦𑀺𑀦𑁆𑀤𑁄 𑀦𑀺𑀲𑀺𑀦𑁆𑀦𑁄;

𑀅𑀘𑁆𑀙𑁂𑀭𑀁 𑀲𑀻𑀖𑀁 𑀦𑀬𑀦𑀲𑀼𑀪𑀕𑀁 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁;

𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀁 𑀫𑀼𑀦𑀺𑀪𑀺𑀚𑀳𑀺𑀢𑀁 𑀧𑀸𑀝𑀺𑀳𑁂𑀭𑀁 𑀅𑀓𑀸𑀲𑀺;

𑀯𑀦𑁆𑀤𑁂 𑀢𑀁 𑀲𑁂𑀝𑁆𑀞𑀁 𑀧𑀭𑀫𑀭𑀢𑀺𑀚𑀁 𑀇𑀤𑁆𑀥𑀺𑀥𑀫𑁆𑀫𑁂𑀳𑀼𑀧𑁂𑀢𑀁.

𑁧𑁯. 𑀏𑀯𑀁 𑀅𑀝𑁆𑀞𑀸𑀭𑀲𑀫𑀕𑀸𑀣𑀸𑀬 𑀥𑀫𑁆𑀫𑀭𑀸𑀚𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀸𑀯𑀢𑁆𑀣𑀺𑀬𑀁 𑀓𑀡𑁆𑀟𑀫𑁆𑀩𑀫𑀽𑀮𑁂 𑀇𑀤𑁆𑀥𑀺𑀧𑀸𑀝𑀺𑀳𑁂𑀭𑀸𑀤𑀻𑀳𑀺 𑀕𑀼𑀡𑁂𑀳𑀺 𑀫𑀼𑀦𑀺𑀦𑁆𑀤𑀲𑁆𑀲 𑀣𑁄𑀫𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀓𑀡𑁆𑀟𑀫𑁆𑀩𑀁𑀫𑀽𑀮𑁂𑀢𑁆𑀬𑀸𑀤𑀺 𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀫𑀢𑀦𑀬𑀬𑀬𑀕𑀡𑁂𑀳𑀺 𑀘 𑀧𑀜𑁆𑀘 𑀬𑀢𑀺 𑀙𑀬𑀢𑀺 𑀲𑀢𑁆𑀢𑀬 𑀢𑀻𑀳𑀺 𑀘 𑀭𑀘𑀺𑀢𑀢𑁆𑀢𑀸 𑀅𑀝𑁆𑀞𑀸𑀭𑀲𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀓𑀼𑀲𑀼𑀫𑀺𑀢𑀮𑀢𑀸 𑀯𑁂𑀮𑁆𑀮𑀺𑀢𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀫𑁄 𑀢𑁄 𑀦𑁄 𑀬𑁄 𑀬𑀸 𑀓𑀼𑀲𑀼𑀫𑀺𑀢𑀮𑀢𑀸 𑀯𑁂𑀮𑁆𑀮𑀺𑀢𑀸𑀓𑁆𑀔𑀼𑀢𑁆𑀯𑀺𑀲𑀻𑀳𑀻’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀅𑀓𑁆𑀔𑀼𑀢𑁆𑀯𑀺𑀲𑀻𑀳𑀺 𑀧𑀜𑁆𑀘𑀬𑀢𑀺 𑀙𑀬𑀢𑀺 𑀲𑀢𑁆𑀢𑀬𑀢𑀻𑀳𑀺 𑀫𑁄𑀕𑀡𑁄 𑀘 𑀢𑁄𑀕𑀡𑁄 𑀘 𑀦𑁄𑀕𑀡𑁄 𑀘 𑀬𑁄𑀕𑀡𑁄 𑀘 𑀬𑀸 𑀬𑀕𑀡𑀤𑁆𑀯𑀬𑀜𑁆𑀘 𑀘𑁂 𑀬𑀼𑀢𑁆𑀢𑀸 ¶ , 𑀲𑀸 𑀕𑀸𑀣𑀸 𑀓𑀼𑀲𑀼𑀫𑀺𑀢𑀮𑀢𑀸 𑀯𑁂𑀮𑁆𑀮𑀺𑀢𑀸 𑀓𑀼𑀲𑀼𑀫𑀺𑀢𑀮𑀢𑀸 𑀯𑁂𑀮𑁆𑀮𑀺𑀢𑀸 𑀕𑀸𑀣𑀸 𑀦𑀸𑀫𑀸𑀢𑀺. 𑀏𑀢𑁆𑀣 𑀘 𑀅𑀓𑁆𑀔𑀲𑀤𑁆𑀤𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀸𑀘𑀓𑀢𑁆𑀢𑀸 𑀅𑀓𑁆𑀔𑀲𑀤𑁆𑀤𑁄 𑀧𑀜𑁆𑀘𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀢𑀽𑀦𑀁 𑀳𑁂𑀫𑀦𑁆𑀢𑀲𑀺𑀲𑀻𑀭𑀯𑀲𑁆𑀲𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑀲𑀭𑀤𑀯𑀲𑁂𑀦 𑀙𑀩𑁆𑀩𑀺𑀥𑀢𑁆𑀢𑀸 𑀉𑀢𑀼𑀲𑀤𑁆𑀤𑁄 𑀙𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺. 𑀇𑀲𑀺𑀲𑀤𑁆𑀤𑁄 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀩𑀼𑀤𑁆𑀥𑀸𑀦𑀁 𑀲𑀢𑁆𑀢𑀯𑀺𑀥𑀢𑁆𑀢𑀸 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀢𑀢𑁆𑀣 𑀧𑀦 𑀧𑀭𑀳𑀺𑀢𑀓𑀭𑁄 𑀬𑁄 𑀫𑀼𑀦𑀺𑀦𑁆𑀤𑁄 𑀓𑀡𑁆𑀟𑀫𑁆𑀩𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀧𑀸𑀝𑀺𑀳𑁂𑀭𑀁 𑀲𑀻𑀖𑀁 𑀅𑀓𑀸𑀲𑀺, 𑀢𑀁 𑀫𑀼𑀦𑀺𑀦𑁆𑀤𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀓𑁆𑀓𑀫𑁂𑀦 𑀧𑀦𑁂𑀢𑁆𑀣 𑀯𑀡𑁆𑀡𑀬𑀺𑀲𑁆𑀲𑀸𑀫𑀺. 𑀧𑀭𑀳𑀺𑀢𑀓𑀭𑁄𑀢𑀺 𑀅𑀢𑁆𑀢𑀦𑀸 𑀧𑀭𑁂𑀲𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀁 𑀅𑀢𑁆𑀣𑀁 𑀓𑀭𑁄𑀦𑁆𑀢𑁄. 𑀳𑀺𑀦𑁄𑀢𑀺 𑀯𑀟𑁆𑀠𑀢𑀺 𑀲𑀼𑀔𑀁 𑀏𑀢𑁂𑀦𑀸𑀢𑀺 𑀳𑀺𑀢𑀁, 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀯𑀸. 𑀳𑀺𑀥𑀸𑀢𑀼 𑀯𑀟𑁆𑀠𑀦𑁂 𑀢. 𑀢𑀁𑀲𑀫𑀗𑁆𑀕𑀺𑀦𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄. 𑀧𑀭𑁂𑀲𑀁 𑀳𑀺𑀢𑀁 𑀧𑀭𑀳𑀺𑀢𑀁, 𑀢𑀁 𑀓𑀭𑁄𑀢𑀻𑀢𑀺 𑀧𑀭𑀳𑀺𑀢𑀓𑀭𑁄, 𑀫𑀼𑀦𑀺𑀦𑁆𑀤𑁄. 𑀲𑁄 𑀳𑀺 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀲𑀼𑀔𑀁 𑀧𑀚𑀳𑀦𑁆𑀢𑁄 𑀲𑀢𑁆𑀢𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀢𑁆𑀣𑀸𑀬 𑀓𑀧𑁆𑀧𑀲𑀢 𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀘 𑀓𑀭𑁄𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀢𑀓𑀸𑀮𑁂 𑀘 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀥𑀫𑁆𑀫 𑀤𑁂𑀲𑀦𑀸𑀬 𑀲𑀢𑁆𑀢𑀮𑁄𑀓𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢 𑀲𑀼𑀔𑀁 𑀓𑀭𑁄𑀢𑀻𑀢𑀺 𑀧𑀭𑀳𑀺𑀢𑀓𑀭𑁄𑀢𑀺 𑀣𑁄𑀫𑁂𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄. 𑀫𑀼𑀦𑀺𑀦𑁆𑀤𑁄𑀢𑀺 𑀩𑀼𑀤𑁆𑀥𑁄. 𑀲𑁄 𑀳𑀺 𑀅𑀕𑀸𑀭𑀺𑀬 𑀫𑀼𑀦𑀺, 𑀅𑀦𑀕𑀸𑀭𑀺𑀬𑀫𑀼𑀦𑀺, 𑀲𑁂𑀓𑁆𑀔𑀫𑀼𑀦𑀺, 𑀅𑀲𑁂𑀓𑁆𑀔𑀫𑀼𑀦𑀺, 𑀧𑀘𑁆𑀘𑁂𑀓𑀫𑀼𑀦𑀺𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀫𑀼𑀦𑀻𑀦𑀁 𑀇𑀦𑁆𑀤𑁄𑀢𑀺 𑀫𑀼𑀦𑀺𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀟𑀫𑁆𑀩𑀫𑀽𑀮𑁂𑀢𑀺 𑀏𑀢𑁆𑀣 𑀓𑀡𑁆𑀟𑀅𑀫𑁆𑀩𑀫𑀽𑀮𑁂𑀢𑀺 𑀧𑀤𑀘𑁆𑀙𑁂𑀤𑁄. 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀩𑀺𑀦𑁆𑀤𑀸𑀕𑀫𑁄. 𑀓𑀡𑁆𑀟𑀦𑀸𑀫𑀺𑀓𑁂𑀦 𑀧𑀲𑁂𑀦𑀤𑀻𑀓𑁄𑀲𑀮𑀭𑀜𑁆𑀜𑁄 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑁄𑀧𑀺𑀢𑀲𑁆𑀲 𑀲𑁂𑀢𑀫𑁆𑀩𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀡𑁆𑀟𑀦𑁆𑀢𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀅𑀣 𑀯𑀸 𑀓𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀟𑁂𑀢𑀺 𑀕𑀘𑁆𑀙𑀢𑀺 ¶ 𑀧𑀸𑀧𑀼𑀡𑀸𑀢𑀻𑀢𑀺 𑀓𑀡𑁆𑀟𑁄, 𑀉𑀬𑁆𑀬𑀸𑀦𑀧𑀸𑀮𑁄. 𑀓𑀁𑀲𑀤𑁆𑀤𑀽𑀧𑀧𑀤𑀟𑀺 𑀥𑀸𑀢𑀼 𑀕𑀢𑀺𑀬𑀁 𑀡. 𑀓𑀁 𑀯𑀼𑀘𑁆𑀘𑀢𑀺 𑀯𑀸 𑀉𑀤𑀓𑀁, 𑀢𑀁 𑀭𑀼𑀓𑁆𑀔𑁂𑀲𑀼 𑀲𑀺𑀜𑁆𑀘𑀦𑀁 𑀝𑀺𑀦𑀸𑀢𑀺 𑀚𑀸𑀦𑀸𑀢𑀻𑀢𑀺 𑀓𑀡𑁆𑀟𑁄, 𑀉𑀬𑁆𑀬𑀸𑀦𑀧𑀸𑀮𑁄 𑀉𑀬𑁆𑀬𑀸𑀦 𑀦𑀸𑀬𑀓𑁄 𑀯𑀸. 𑀨𑀮𑀓𑀸𑀫𑁂𑀳𑀺 𑀚𑀦𑁂𑀳𑀺 𑀅𑀫𑀺𑀬𑀢𑀺 𑀕𑀫𑀺𑀬𑀢𑀻𑀢𑀺 𑀅𑀫𑁆𑀩𑁄, 𑀲𑁂𑀢𑀫𑁆𑀩𑀭𑀼𑀓𑁆𑀔𑁄. 𑀅𑀫𑀥𑀸𑀢𑀼 𑀕𑀢𑀺𑀬𑀁 𑀩𑁄. 𑀓𑀡𑁆𑀟𑀦𑀸𑀫𑀺𑀓𑁂𑀦 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑁄𑀧𑀺𑀢𑁄 𑀅𑀫𑁆𑀩𑁄 𑀓𑀡𑁆𑀟𑀫𑁆𑀩𑁄, 𑀢𑀲𑁆𑀲 𑀫𑀽𑀮𑀁 𑀲𑀫𑀻𑀧𑀦𑁆𑀢𑀺 𑀓𑀡𑁆𑀟𑀫𑁆𑀩𑀫𑀽𑀮𑀁, 𑀢𑀲𑁆𑀫𑀺𑀁 𑀓𑀡𑁆𑀟𑀫𑁆𑀩𑀫𑀽𑀮𑁂.

𑀦𑀺𑀲𑀺𑀦𑁆𑀦𑁄𑀢𑀺 𑀯𑀲𑀫𑀸𑀦𑁄. 𑀯𑀺𑀫𑁆𑀳𑀸𑀧𑀦𑀺𑀬𑀝𑁆𑀞𑁂𑀦 𑀅𑀘𑁆𑀙𑁂𑀭𑀁. 𑀅𑀬𑀜𑁆𑀳𑀺 𑀅𑀘𑁆𑀙𑁂𑀭𑀲𑀤𑁆𑀤𑁄 𑀯𑀺𑀫𑁆𑀳𑀬𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺 𑀧𑀤𑀺𑀓𑁄. 𑀅𑀣 𑀯𑀸 𑀆𑀪𑀼𑀲𑁄 𑀯𑀺𑀫𑁆𑀳𑀬𑁄 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀘𑁆𑀙𑁂𑀭𑀁, 𑀧𑀸𑀝𑀺𑀳𑁂𑀭𑀁. 𑀆𑀧𑀼𑀩𑁆𑀩 𑀘𑀭𑀥𑀸𑀢𑀼 𑀕𑀢𑀺𑀬𑀁 𑀅. 𑀘𑀭𑀥𑀸𑀢𑀼𑀲𑁆𑀲𑀘𑁆𑀙𑁂𑀭𑀸𑀤𑁂𑀲𑁄. 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄. 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀘𑀭𑀢𑀺 𑀦 𑀧𑀯𑀢𑁆𑀢𑀢𑀻𑀢𑀺 𑀅𑀘𑁆𑀙𑁂𑀭𑀁, 𑀧𑀸𑀝𑀺𑀳𑁂𑀭𑀁. 𑀦𑀧𑀼𑀩𑁆𑀩 𑀘𑀭𑀥𑀸𑀢𑀼 𑀕𑀢𑀺𑀬𑀁 𑀅. 𑀬𑀣𑀸 𑀳𑀺 𑀅𑀦𑁆𑀥𑀲𑁆𑀲 𑀧𑀩𑁆𑀩𑀸𑀢𑀸𑀭𑁄𑀳𑀦𑀁 𑀦𑀺𑀘𑁆𑀘𑀁 𑀦 𑀳𑁄𑀢𑀺, 𑀓𑀤𑀸𑀘𑀺𑀬𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀪𑀕𑀯𑀢𑁄 𑀧𑀸𑀝𑀺𑀳𑀸𑀭𑀺𑀬𑀁 𑀦𑀺𑀘𑁆𑀘𑀁 𑀦 𑀳𑁄𑀢𑀺, 𑀓𑀤𑀸𑀘𑀺𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀅𑀘𑁆𑀙𑁂𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀅𑀪𑀺𑀡𑁆𑀳𑀁 𑀦 𑀧𑀯𑀢𑁆𑀢𑀢𑀺, 𑀢𑀁 𑀅𑀘𑁆𑀙𑀭𑀺𑀬’’𑀦𑁆𑀢𑀺. 𑀅𑀣 𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑁄𑀕𑁆𑀕𑀦𑁆𑀢𑀺 𑀅𑀘𑁆𑀙𑀭𑀺𑀬𑀁. 𑀬𑁄𑀕𑁆𑀕𑀢𑀤𑁆𑀥𑀺𑀢𑁂 𑀡𑀺𑀬𑀧𑀘𑁆𑀘𑀬𑁄. 𑀅𑀘𑁆𑀙𑀭𑀺𑀬𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀇𑀬𑀲𑀤𑁆𑀤𑀮𑁄𑀧𑁂𑀦 𑀅𑀘𑁆𑀙𑁂𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀬𑀁 𑀢𑀸𑀯 𑀲𑀤𑁆𑀤𑀦𑀬𑁄. 𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀦𑀬𑁄, 𑀅𑀘𑁆𑀙𑀭𑀸𑀬𑁄𑀕𑁆𑀕𑀦𑁆𑀢𑀺 𑀅𑀘𑁆𑀙𑀭𑀺𑀬𑀁, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀦𑀬𑀦𑀲𑀼𑀪𑀕𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀧𑀢𑁆𑀢𑀁. 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑀬𑀦𑀁, 𑀧𑀲𑀸𑀤𑀘𑀓𑁆𑀔𑀼. 𑀦𑀻𑀥𑀸𑀢𑀼 𑀦𑀬𑁂 𑀬𑀼. 𑀢𑀲𑁆𑀲 𑀲𑀼𑀪𑀁 𑀲𑁄𑀪𑀦𑀁 𑀕𑀘𑁆𑀙𑀢𑀻𑀢𑀺 𑀦𑀬𑀦𑀲𑀼𑀪𑀕𑀁, 𑀧𑀸𑀝𑀺𑀳𑁂𑀭𑀁. 𑀦𑀬𑀦𑀲𑀼𑀪 𑀲𑀤𑁆𑀤𑀽𑀧𑀧𑀤𑀕𑀫𑀼𑀥𑀸𑀢𑀼 𑀕𑀢𑀺𑀬𑀁 𑀓𑁆𑀯𑀺. 𑀢𑀁 𑀦𑀬𑀦𑀲𑀼𑀪𑀕𑀁.

𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀦𑁆𑀢𑀺 ¶ 𑀏𑀢𑁆𑀣 𑀆𑀓𑀼𑀮𑀅𑀡𑁆𑀡𑀅𑀕𑁆𑀕𑀺𑀚𑀸𑀮𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀭𑀺𑀓𑀺𑀡𑁆𑀡 𑀉𑀤𑀓𑀥𑀸𑀭 𑀅𑀕𑁆𑀕𑀺𑀲𑀺𑀔𑀸𑀯𑀦𑁆𑀢𑀁. 𑀅𑀣 𑀯𑀸 𑀧𑀭𑀺𑀲𑀫𑀦𑁆𑀢𑀢𑁄 𑀓𑀼𑀮𑀁 𑀧𑀓𑀺𑀡𑁆𑀡𑀁 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀓𑀁 𑀬𑀫𑀓𑀁 𑀬𑀫𑀓𑀁 𑀉𑀤𑀓𑀚𑀸𑀮𑀅𑀕𑁆𑀕𑀺𑀚𑀸𑀮𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀪𑀼𑀲𑁄 𑀓𑀼𑀮𑀢𑀺 𑀉𑀤𑀓𑀕𑁆𑀕𑀺𑀚𑀸𑀮𑀁 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀓𑀁 𑀓𑀭𑁄𑀢𑀻𑀢𑀺 𑀆𑀓𑀼𑀮𑀁, 𑀉𑀤𑀓𑀕𑁆𑀕𑀺𑀚𑀸𑀮𑀁. 𑀆𑀧𑀼𑀩𑁆𑀩𑀓𑀼𑀮𑀥𑀸𑀢𑀼 𑀓𑀭𑀡𑁂 𑀅. 𑀆𑀪𑀼𑀲𑀁 𑀓𑀼𑀮𑀢𑀺 𑀩𑀦𑁆𑀥𑀢𑀺 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀯𑀸 𑀆𑀓𑀼𑀮𑀁. 𑀅𑀣 𑀯𑀸 𑀆𑀲𑀫𑀦𑁆𑀢𑀢𑁄 𑀓𑀼𑀮𑀢𑀺 𑀬𑀫𑀓𑀁 𑀬𑀫𑀓𑀁 𑀉𑀤𑀓𑀕𑁆𑀕𑀺𑀚𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀆𑀓𑀼𑀮𑀁, 𑀉𑀤𑀓𑀕𑁆𑀕𑀺𑀚𑀸𑀮𑀁. 𑀉𑀤𑀓𑀚𑀸𑀮𑀁 𑀅𑀕𑁆𑀕𑀺𑀚𑀸𑀮𑁂𑀦 𑀅𑀕𑁆𑀕𑀺𑀚𑀸𑀮𑀜𑁆𑀘 𑀉𑀤𑀓𑀚𑀸𑀮𑁂𑀦 𑀲𑀫𑁆𑀫𑀺𑀲𑁆𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀺 𑀚𑀻𑀯𑀦𑁆𑀢𑀺 𑀏𑀢𑁂𑀦 𑀲𑀢𑁆𑀢𑀸𑀢𑀺 𑀅𑀡𑁆𑀡𑀁, 𑀉𑀤𑀓𑀁. 𑀅𑀦𑀥𑀸𑀢𑀼 𑀚𑀻𑀯𑀸𑀬𑀁 𑀅. 𑀦𑀲𑁆𑀲 𑀡𑁄. 𑀢𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀤𑁆𑀯𑀺𑀪𑀸𑀯𑁄 𑀯𑀸. 𑀅𑀣 𑀯𑀸 𑀅𑀭𑀢𑀺 𑀕𑀘𑁆𑀙𑀢𑀺 𑀢𑀁 𑀢𑀁 𑀞𑀸𑀦𑀦𑁆𑀢𑀺 𑀅𑀡𑁆𑀡𑀁. 𑀅𑀭𑀥𑀸𑀢𑀼 𑀕𑀢𑀺𑀫𑁆𑀳𑀺𑀢𑁄. 𑀢𑀲𑁆𑀲 𑀅𑀦𑁆𑀦𑀸𑀤𑁂𑀲𑁄, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄, 𑀦𑁆𑀦𑀲𑁆𑀲 𑀡𑁆𑀡𑀢𑁆𑀢𑀁. 𑀅𑀡𑁆𑀡𑀲𑁆𑀲 𑀥𑀸𑀭𑀁 𑀅𑀡𑁆𑀡𑀁. 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀓𑀼𑀝𑀺𑀮𑀪𑀸𑀯𑁂𑀦 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑀺, 𑀅𑀚𑀥𑀸𑀢𑀼 𑀕𑀢𑀺𑀬𑀁 𑀇. 𑀚𑀲𑁆𑀲 𑀕𑁆𑀕𑁄. 𑀚𑀮𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀸𑀮𑀁, 𑀲𑀺𑀔𑀁. 𑀚𑀮𑀥𑀸𑀢𑀼 𑀤𑀺𑀢𑁆𑀢𑀺𑀬𑀁 𑀡. 𑀅𑀕𑁆𑀕𑀺𑀦𑁄 𑀚𑀸𑀮𑀁 𑀅𑀕𑁆𑀕𑀺𑀚𑀸𑀮𑀁. 𑀅𑀡𑁆𑀡𑀜𑁆𑀘 𑀅𑀕𑁆𑀕𑀺𑀚𑀸𑀮𑀜𑁆𑀘 𑀅𑀡𑁆𑀡𑀕𑁆𑀕𑀺𑀚𑀸𑀮𑀁, 𑀆𑀓𑀼𑀮𑀁 𑀧𑀭𑀺𑀓𑀺𑀡𑁆𑀡𑀁 𑀅𑀡𑁆𑀡𑀕𑁆𑀕𑀺𑀚𑀸𑀮𑀁 𑀅𑀲𑁆𑀲𑀸𑀢𑀺 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁, 𑀬𑀫𑀓 𑀧𑀸𑀝𑀺𑀳𑁂𑀭𑀁 𑀮𑀩𑁆𑀪𑀢𑀺. 𑀢𑀁 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁.

𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀦𑁆𑀢𑀺 𑀤𑀼𑀝𑁆𑀞𑀼 𑀤𑀺𑀝𑁆𑀞𑀺𑀯𑀸𑀤𑀲𑀗𑁆𑀔𑀸𑀢𑀚𑀸𑀮𑀁 𑀯𑀺𑀤𑁆𑀥𑀁𑀲𑀺𑀢𑀁. 𑀤𑀼𑀝𑁆𑀞𑀼 𑀚𑀮𑀢𑀺 𑀩𑀦𑁆𑀥𑀢𑀺 𑀲𑀁𑀲𑀸𑀭𑀯𑀝𑁆𑀝𑁂𑀢𑀺 𑀤𑀼𑀚𑁆𑀚𑀸𑀮𑀁, 𑀤𑀺𑀝𑁆𑀞𑀺𑀯𑀸𑀤𑀚𑀸𑀮𑀁. 𑀢𑀺𑀢𑁆𑀣𑀺𑀬 𑀯𑀸𑀤𑁄 𑀳𑀺 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑁄 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀺𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦 𑀚𑀸𑀮𑀲𑀤𑀺𑀲𑀢𑁆𑀢𑀸 𑀤𑀼𑀚𑁆𑀚𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀧𑀼𑀩𑁆𑀩 𑀚𑀮𑀥𑀸𑀢𑀼 𑀩𑀦𑁆𑀥𑀦𑁂 𑀡𑁄. 𑀢𑀁 𑀥𑀁𑀲𑀢𑀺 𑀯𑀺𑀤𑁆𑀥𑀁𑀲𑀢𑀻𑀢𑀺 𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀁, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁. 𑀫𑀼𑀦𑀺𑀪𑀺𑀚𑀳𑀺𑀢𑀦𑁆𑀢𑀺 𑀫𑀼𑀦𑀺𑀪𑀺 𑀅𑀚𑀳𑀺𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣 𑀫𑀼𑀦𑀺𑀪𑀻𑀢𑀺 𑀲𑀩𑁆𑀩𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺. 𑀢𑁂 𑀳𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀼𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀫𑁄𑀦𑁂𑀬𑁆𑀬 𑀯𑀘𑀻𑀫𑁄𑀦𑁂𑀬𑁆𑀬 𑀫𑀦𑁄𑀫𑁄𑀦𑁂𑀬𑁆𑀬𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀸 ¶ 𑀫𑀼𑀦𑀺. 𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢𑁂 𑀡𑀻𑀧𑀘𑁆𑀘𑀬𑁄. 𑀅𑀣 𑀯𑀸 𑀇𑀥𑀮𑁄𑀓 𑀧𑀭𑀮𑁄𑀓𑀁 𑀅𑀢𑁆𑀢𑀳𑀺𑀢 𑀧𑀭𑀳𑀺𑀢𑀁 𑀳𑀺𑀢𑀸𑀳𑀺𑀢𑀜𑁆𑀘 𑀫𑀼𑀦𑀦𑁆𑀢𑀺 𑀚𑀸𑀦𑀦𑁆𑀢𑀻𑀢𑀺 𑀫𑀼𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀺 𑀫𑀼𑀦𑀻𑀪𑀺.

𑀅𑀚𑀳𑀺𑀢𑀦𑁆𑀢𑀺 𑀅𑀯𑀺𑀚𑀳𑀺𑀢𑀁 𑀅𑀧𑀭𑀺𑀘𑁆𑀘𑀢𑁆𑀢𑀁 𑀯𑀸, 𑀳𑀸𑀢𑀩𑁆𑀩𑀁 𑀘𑀚𑀺𑀢𑀩𑁆𑀩𑀦𑁆𑀢𑀺 𑀚𑀳𑀺𑀢𑀁. 𑀳𑀸𑀥𑀸𑀢𑀼 𑀘𑀸𑀕𑁂 𑀢. 𑀦 𑀚𑀳𑀺𑀢𑀁 𑀅𑀚𑀳𑀺𑀢𑀁, 𑀧𑀸𑀝𑀺𑀳𑁂𑀭𑀁. 𑀢𑀁 𑀅𑀚𑀳𑀺𑀢𑀁. 𑀪𑀕𑀯𑀢𑁄 𑀳𑀺 𑀲𑀸𑀯𑀢𑁆𑀣𑀺𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀢𑀁 𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀪𑀕𑀯𑀸 𑀧𑀦 𑀢𑀲𑁆𑀫𑀺𑀁 𑀧𑀸𑀝𑀺𑀳𑀸𑀭𑀺𑀬𑀸𑀯𑀲𑀸𑀦𑁂 𑀢𑀸𑀯𑀢𑀺𑀁𑀲𑀧𑀼𑀭𑀁 𑀕𑀢𑁄, 𑀢𑀲𑁆𑀫𑀺𑀁 𑀧𑀸𑀭𑀺𑀙𑀢𑁆𑀢𑀓𑀫𑀽𑀮𑀫𑁆𑀳𑀺 𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀓𑁂 𑀲𑀺𑀮𑀸𑀲𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑁄 𑀤𑁂𑀯𑀸𑀦𑀁 𑀅𑀪𑀺𑀥𑀫𑁆𑀫𑀓𑀣𑀸𑀬 𑀤𑁂𑀲𑀦𑀸 𑀘 𑀲𑀩𑁆𑀩𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀸 𑀥𑀫𑁆𑀫𑀢𑀸𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬𑀜𑁆𑀳𑀺 𑀲𑀫𑀢𑀺𑀁𑀲𑀥𑀫𑁆𑀫𑀢𑀸𑀧𑀓𑀸𑀲𑀦𑁂 𑀲𑀸𑀯𑀢𑁆𑀣𑀺 𑀦𑀕𑀭𑀤𑁆𑀯𑀸𑀭𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁. 𑀢𑀸𑀯𑀢𑀺𑀁𑀲𑁂 𑀪𑀯𑀦𑁂 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀢𑀺 𑀥𑀫𑁆𑀫𑀢𑀸𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀸𑀝𑀺𑀳𑁂𑀭𑀁 𑀫𑀼𑀦𑀻𑀪𑀺𑀚𑀳𑀺𑀢𑀦𑁆𑀢𑀺 𑀣𑁄𑀫𑁂𑀢𑀺.

𑀧𑀸𑀝𑀺𑀳𑁂𑀭𑀦𑁆𑀢𑀺 𑀧𑀘𑁆𑀘𑀦𑀻𑀓𑀧𑀝𑀺𑀳𑀭𑀡𑀯𑀲𑁂𑀦 𑀧𑀸𑀝𑀺𑀳𑀸𑀭𑀺𑀬𑀁, 𑀧𑀝𑀺𑀧𑀓𑁆𑀔𑁂 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀝𑀺𑀳𑁂𑀭𑀁. 𑀧𑀝𑀺𑀧𑀼𑀩𑁆𑀩𑀳𑀺𑀥𑀸𑀢𑀼 𑀕𑀢𑀺𑀬𑀁 𑀡𑁄. 𑀳𑀺𑀲𑁆𑀲 𑀳𑁂𑀭𑀡𑀺𑀤𑁂𑀲𑁄. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑁂 𑀢𑀺𑀢𑁆𑀣𑀺𑀬𑁂 𑀳𑀭𑀢𑀺 𑀅𑀧𑀦𑁂𑀢𑀻𑀢𑀺 𑀧𑀸𑀝𑀺𑀳𑁂𑀭𑀁, 𑀇𑀤𑁆𑀥𑀺𑀯𑀺𑀥𑀜𑀸𑀡𑀁. 𑀧𑀝𑀺𑀧𑀼𑀩𑁆𑀩𑀳𑀭𑀥𑀸𑀢𑀼 𑀅𑀧𑀦𑀬𑀦𑁂 𑀡𑁄. 𑀧𑀝𑀺𑀳𑀭𑀢𑀺 𑀅𑀧𑀦𑁂𑀢𑀺 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀺𑀫𑀸𑀦𑁄𑀧𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀻𑀢𑀺 𑀯𑀸 𑀧𑀸𑀝𑀺𑀳𑁂𑀭𑀁. 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀁 𑀆𑀳𑀭𑀢𑀻𑀢𑀺 𑀯𑀸 𑀧𑀸𑀝𑀺𑀳𑁂𑀭𑀁. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀝𑀺𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀧𑀸𑀝𑀺𑀳𑁂𑀭𑀁. 𑀧𑀝𑀻𑀢𑀺 𑀳𑀺 𑀅𑀬𑀁𑀲𑀤𑁆𑀤𑁄 𑀧𑀘𑁆𑀙𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺. 𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺 𑀅𑀜𑁆𑀜𑁄 𑀆𑀕𑀘𑁆𑀙𑀺 𑀩𑁆𑀭𑀸𑀳𑁆𑀫𑀡𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀧𑀝𑀺𑀧𑀼𑀦𑀧𑁆𑀧𑀼𑀦𑀁 𑀉𑀤𑀓𑀕𑁆𑀕𑀺𑀚𑀸𑀮𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀬𑀫𑀓𑀁 𑀬𑀫𑀓𑀁 𑀳𑀼𑀢𑁆𑀯𑀸 𑀳𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀝𑀺𑀳𑁂𑀭𑀁, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁. 𑀢𑀜𑁆𑀘 𑀧𑀦 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬, 𑀅𑀦𑀼𑀲𑀸 𑀲𑀦𑀻 ¶ 𑀧𑀸𑀝𑀺𑀳𑀸𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑁂𑀲𑀼 𑀧𑀦 𑀇𑀥 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀲𑀻𑀖𑀦𑁆𑀢𑀺 𑀔𑀺𑀧𑁆𑀧𑀁 𑀆𑀲𑀼𑀁 𑀮𑀳𑀼𑀁 𑀯𑀸. 𑀢𑀁 𑀧𑀦 𑀅𑀓𑀸𑀲𑀻𑀢𑀺𑀧𑀤𑁂 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁. 𑀲𑁂𑀢𑀺 𑀮𑀳𑀼 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀲𑀻𑀖𑀁. 𑀲𑀺𑀥𑀸𑀢𑀼 𑀕𑀢𑀺𑀫𑁆𑀳𑀺 𑀖𑀧𑀘𑁆𑀘𑀬𑁄. 𑀤𑀻𑀖𑁄. 𑀅𑀓𑀸𑀲𑀻𑀢𑀺 𑀅𑀓𑀭𑀺.

𑀏𑀢𑁆𑀣 𑀘 𑀧𑀸𑀝𑀺𑀳𑀸𑀭𑀺𑀬𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀸 𑀳𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀲𑀸𑀯𑀢𑁆𑀣𑀺𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀲𑀓𑁆𑀓𑁂𑀦 𑀆𑀡𑀸𑀧𑀺𑀢𑁂𑀦 𑀯𑀺𑀲𑀼𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁂𑀦 𑀦𑀺𑀫𑁆𑀫𑀺𑀢𑁂 𑀤𑁆𑀯𑀸𑀤𑀲𑀬𑁄𑀚𑀦𑁂 𑀭𑀢𑀦 𑀫𑀡𑁆𑀟𑀧𑁂 𑀪𑀕𑀯𑀢𑀸 𑀦𑀺𑀫𑁆𑀫𑀺𑀢𑁂 𑀬𑁄𑀚𑀦𑀧𑁆𑀧𑀫𑀸𑀡𑁂 𑀭𑀢𑀦𑀧𑀮𑁆𑀮𑀗𑁆𑀓𑁂 𑀭𑀢𑀦𑀘𑀗𑁆𑀓𑀫𑁂 𑀘 𑀦𑀺𑀲𑀻𑀤𑀺𑀢𑁆𑀯𑀸 𑀢𑀺𑀬𑁄𑀚𑀦𑀺𑀓𑁂 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂 𑀥𑀸𑀭𑀬𑀫𑀸𑀦𑁂 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀅𑀢𑁆𑀣𑀸𑀤𑀸𑀦𑀧𑀭𑀺𑀤𑀻𑀧𑀦𑀁 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸. 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀘𑁆𑀙𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀅𑀓𑁆𑀔𑀺𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀅𑀓𑁆𑀔𑀺𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡 𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀦𑀸𑀲𑀺𑀓𑀸𑀲𑁄 𑀢𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀅𑀁𑀲𑀓𑀽𑀝𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀳𑀢𑁆𑀣𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀳𑀢𑁆𑀣𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 ¶ 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀧𑀲𑁆𑀲𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀧𑀲𑁆𑀲𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀉𑀤𑀓𑀥𑀸𑀭𑀸. 𑀤𑀓𑁆𑀔𑀺𑀡𑀧𑀸𑀤𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀯𑀸𑀫𑀧𑀸𑀤𑀢𑁄 𑀉𑀤𑀓𑀥𑀸𑀭𑀸. 𑀯𑀸𑀫𑀧𑀸𑀤𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀤𑀓𑁆𑀔𑀺𑀡𑀧𑀸𑀤𑀢𑁄 𑀉𑀤𑀓𑀥𑀸𑀭𑀸. 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀉𑀤𑀓𑀥𑀸𑀭𑀸. 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀉𑀤𑀓𑀥𑀸𑀭𑀸. 𑀏𑀓𑁂𑀓𑀮𑁄𑀫𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀏𑀓𑁂𑀓𑀮𑁄𑀫𑀢𑁄 𑀉𑀤𑀓𑀥𑀸𑀭𑀸. 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀦𑀻𑀮𑀸𑀦𑀁 𑀧𑀻𑀢𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀑𑀤𑀸𑀢𑀸𑀦𑀁 𑀫𑀜𑁆𑀚𑀝𑁆𑀞𑀸𑀦𑀁 𑀧𑀪𑀲𑁆𑀲𑀭𑀸𑀦𑀁 𑀉𑀩𑁆𑀩𑀳𑀦𑀪𑀽𑀢𑀸𑀦𑀁 𑀬𑀫𑀓𑀸 𑀬𑀫𑀓𑀸 𑀯𑀡𑁆𑀡𑀸 𑀧𑀯𑀢𑁆𑀢𑀦𑁆𑀢𑀺. 𑀪𑀕𑀯𑀸 𑀘𑀗𑁆𑀓𑀫𑀢𑀺, 𑀦𑀺𑀫𑁆𑀫𑀺𑀢𑁄 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀢𑀺𑀝𑁆𑀞𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀦𑀺𑀲𑀻𑀤𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸. 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺, 𑀪𑀕𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀢𑀺𑀝𑁆𑀞𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀦𑀺𑀲𑀻𑀤𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸𑀢𑀺 𑀯𑀺𑀯𑀺𑀥𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀢𑀺𑀢𑁆𑀣𑀺𑀬𑀸𑀦𑀁 𑀫𑀤𑁆𑀤𑀦𑀢𑁆𑀣𑀸𑀬 𑀅𑀓𑀸𑀲𑀻𑀢𑀺. 𑀏𑀢𑁆𑀣 𑀘 𑀧𑀦 𑀬𑁄 𑀓𑁄𑀘𑀺 𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀘𑁂. 𑀲𑁄 𑀆𑀕𑀘𑁆𑀙𑀢𑀽𑀢𑀺 𑀘𑁄𑀤𑀦𑀸𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁 𑀅𑀢𑁆𑀣𑀸𑀤𑀸𑀦𑀧𑀭𑀺𑀤𑀻𑀧𑀦𑀦𑁆𑀢𑀺. 𑀅𑀢𑁆𑀣𑀸𑀤𑀸𑀦𑀜𑁆𑀳𑀺 𑀅𑀦𑀼𑀬𑁄𑀕𑁄, 𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀣𑀲𑁆𑀲 𑀆𑀤𑀸𑀦𑀁 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸, 𑀢𑀲𑁆𑀲 𑀧𑀭𑀺𑀤𑀻𑀧𑀦𑀁 𑀅𑀢𑁆𑀣𑀸𑀤𑀸𑀦𑀧𑀭𑀺𑀤𑀻𑀧𑀦𑀁. 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀓𑀼𑀳𑀸𑀬𑀦𑀯𑀲𑁂𑀦 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀫𑀤𑁆𑀤𑀦𑀁. 𑀢𑀜𑁆𑀘 𑀢𑀣𑀸 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸 𑀲𑀫𑁆𑀧𑀸𑀤𑀦𑀫𑁂𑀯. 𑀢𑀤𑁂𑀢𑀁 𑀧𑀤𑀤𑁆𑀯𑀬𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺.

𑀲𑁂𑀝𑁆𑀞𑀦𑁆𑀢𑀺 ¶ 𑀧𑀲𑀢𑁆𑀣𑀢𑀭𑀁. 𑀢𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀧𑀭𑀫𑀭𑀢𑀺𑀚𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀢𑁆𑀢𑀫𑀭𑀢𑀺𑀁 𑀚𑀦𑀓𑀁. 𑀧𑀭𑀫𑀸𑀦𑀁 𑀉𑀢𑁆𑀢𑀫𑀲𑀸𑀥𑀽𑀦𑀁 𑀘𑀺𑀢𑁆𑀢𑀭𑀫𑀦𑀁 𑀚𑀦𑀸𑀧𑁂𑀢𑀁 𑀯𑀸, 𑀏𑀢𑁆𑀣 𑀘 𑀧𑀞𑀫𑀯𑀺𑀓𑀧𑁆𑀧𑁂 𑀧𑀭𑀫𑀲𑀤𑁆𑀤𑁄 𑀉𑀢𑁆𑀢𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄 𑀦𑀺𑀧𑀸𑀢𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀲𑀸𑀥𑀼𑀯𑀸𑀘𑀓𑁄 𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀭𑀢𑀺𑀁 𑀚𑀦𑁂𑀢𑀻𑀢𑀺 𑀧𑀭𑀫𑀭𑀢𑀺𑀚𑁄, 𑀫𑀼𑀦𑀺𑀦𑁆𑀤𑁄. 𑀧𑀭𑀫𑀭𑀢𑀺𑀲𑀤𑁆𑀤𑀽𑀧𑀧𑀤 𑀚𑀦𑀥𑀸𑀢𑀼 𑀚𑀦𑀦𑁂 𑀓𑁆𑀯𑀺. 𑀅𑀣 𑀯𑀸 𑀧𑀓𑀸𑀭𑁂𑀦 𑀲𑀤𑁆𑀥𑀫𑁆𑀫𑁂 𑀭𑀫𑀦𑁆𑀢𑀻𑀢𑀺 𑀧𑀭𑀫𑀸, 𑀲𑀸𑀥𑀽 𑀮𑀩𑁆𑀪𑀦𑁆𑀢𑀺. 𑀧𑀧𑀼𑀩𑁆𑀩 𑀭𑀫𑀼𑀥𑀸𑀢𑀼 𑀓𑀻𑀴𑀸𑀬𑀁 𑀅. 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀭𑀢𑀺𑀁 𑀭𑀫𑀦𑀁 𑀚𑀦𑁂𑀢𑀻𑀢𑀺 𑀧𑀭𑀫𑀭𑀢𑀺𑀚𑁄, 𑀫𑀼𑀦𑀺𑀦𑁆𑀤𑁄. 𑀢𑀁 𑀧𑀭𑀫𑀭𑀢𑀺𑀚𑀁. 𑀲𑁄 𑀳𑀺 𑀥𑀫𑁆𑀫 𑀤𑁂𑀲𑀦𑀸𑀬 𑀘 𑀧𑀸𑀝𑀺𑀳𑀸𑀭𑀺𑀬𑁂𑀦 𑀇𑀤𑁆𑀥𑀺𑀬𑀸 𑀲𑀭𑀻𑀭𑀲𑁄𑀪𑀕𑁆𑀕 𑀲𑀫𑁆𑀧𑀢𑁆𑀢𑀺𑀆𑀤𑀻𑀳𑀺 𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀢𑀺𑀁 𑀅𑀪𑀺𑀓𑁆𑀓𑀦𑁆𑀢𑀁 𑀚𑀦𑁂𑀢𑀻𑀢𑀺 𑀧𑀭𑀫𑀭𑀢𑀺𑀚𑀦𑁆𑀢𑀺 𑀣𑁄𑀫𑁂𑀢𑀺.

𑀇𑀤𑁆𑀥𑀺𑀥𑀫𑁆𑀫𑁂𑀳𑀼𑀧𑁂𑀢𑀦𑁆𑀢𑀺 𑀇𑀤𑁆𑀥𑀺𑀥𑀫𑁆𑀫𑁂𑀳𑀺 𑀉𑀧𑁂𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀇𑀤𑁆𑀥𑀺 𑀥𑀫𑁆𑀫𑁂𑀳𑀻𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀅𑀧𑁆𑀧𑀫𑁂𑀬𑁆𑀬𑁂𑀳𑀺 𑀩𑀼𑀤𑁆𑀥𑀇𑀤𑁆𑀥𑀺𑀲𑀗𑁆𑀔𑀸𑀢𑀕𑀼𑀡𑁂𑀳𑀺. 𑀥𑀫𑁆𑀫𑀲𑀤𑁆𑀤𑁄 𑀳𑀺 𑀕𑀼𑀡𑁂 𑀯𑀢𑁆𑀢𑀢𑀺 𑀩𑀼𑀤𑁆𑀥𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀚𑁆𑀛𑀦𑀁 𑀲𑀫𑀺𑀚𑁆𑀛𑀦𑀁 𑀇𑀤𑁆𑀥𑀺. 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀻𑀢𑀺 𑀯𑀸 𑀇𑀤𑁆𑀥𑀺. 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀬𑀣𑀺𑀘𑁆𑀙𑀺𑀢𑀢𑁆𑀣𑁄 𑀏𑀢𑀸𑀬𑀸𑀢𑀺 𑀇𑀤𑁆𑀥𑀺. 𑀇𑀥𑀥𑀸𑀢𑀼 𑀯𑀼𑀤𑁆𑀥𑀺𑀬𑀁 𑀇, 𑀢𑀺𑀧𑀘𑁆𑀘𑀬𑁄 𑀯𑀸. 𑀪𑀕𑀯𑀸 𑀏𑀢𑀸𑀬 𑀇𑀤𑁆𑀥𑀺𑀬𑀸 𑀬𑀣𑀺𑀘𑁆𑀙𑀺𑀢𑀢𑁆𑀣𑁄 𑀇𑀤𑁆𑀥𑁄 𑀯𑀼𑀤𑁆𑀥𑁄 𑀉𑀓𑁆𑀓𑀁𑀲𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀥𑀸𑀭𑁂𑀢𑀺 𑀧𑀓𑀸𑀲𑁂𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀤𑀩𑁆𑀩𑀦𑁆𑀢𑀺 𑀥𑀫𑁆𑀫𑁄, 𑀕𑀼𑀡𑁄. 𑀇𑀤𑁆𑀥𑀺𑀏𑀯 𑀥𑀫𑁆𑀫𑁄 𑀇𑀤𑁆𑀥𑀺𑀥𑀫𑁆𑀫𑁄, 𑀢𑁂𑀳𑀺 𑀥𑀫𑁆𑀫𑁂𑀳𑀺. 𑀉𑀧𑁂𑀢𑀦𑁆𑀢𑀺 𑀲𑀫𑀦𑁆𑀦𑀸𑀕𑀢𑀁. 𑀉𑀧𑀕𑀘𑁆𑀙𑀢𑀺 𑀲𑀫𑁆𑀧𑀚𑁆𑀚𑀢𑀻𑀢𑀺 𑀉𑀧𑁂𑀢𑁄, 𑀫𑀼𑀦𑀺𑀦𑁆𑀤𑁄. 𑀉𑀧𑀧𑀼𑀩𑁆𑀩𑀇𑀥𑀸𑀢𑀼 𑀕𑀢𑀺𑀬𑀁 𑀢. 𑀢𑀁 𑀉𑀧𑁂𑀢𑀁.

𑀇𑀤𑁆𑀥𑀺 𑀧𑀦 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺, 𑀯𑀺𑀓𑀼𑀧𑁆𑀧𑀦𑀸 𑀇𑀤𑁆𑀥𑀺, 𑀫𑀦𑁄𑀫𑀬𑀸 𑀇𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀅𑀭𑀺𑀬𑀸 𑀇𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺 𑀘𑀸𑀢𑀺 𑀤𑀲𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀧𑀚𑁆𑀚𑀢𑀺. 𑀲𑀢𑀁 ¶ 𑀯𑀸 𑀲𑀳𑀲𑁆𑀲𑀁 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑀩𑀳𑀼𑀓𑁄 𑀳𑁄𑀫𑀻𑀢𑀺 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀇𑀤𑁆𑀥𑀺 𑀅𑀥𑀺𑀝𑁆𑀞𑀸𑀦 𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺 𑀦𑀸𑀫. 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀸 𑀬𑀓𑁆𑀔𑀯𑀡𑁆𑀡𑀁 𑀯𑀸…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀧𑁆𑀧𑀦𑀸 𑀇𑀤𑁆𑀥𑀺 𑀦𑀸𑀫. 𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀁 𑀫𑀦𑁄𑀫𑀬𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸 𑀇𑀤𑁆𑀥𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀲𑁆𑀲𑁂𑀯 𑀫𑀦𑁄𑀫𑀬𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸 𑀇𑀤𑁆𑀥𑀺 𑀦𑀸𑀫. 𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀗𑁆𑀔𑀡𑁂 𑀯𑀸 𑀜𑀸𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀸 𑀯𑀺𑀲𑁂𑀲𑀸 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀏𑀢𑁆𑀣 𑀘 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀢𑁆𑀣𑁂𑀭𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀪𑀽𑀢𑀧𑀸𑀮𑀢𑁆𑀣𑁂𑀭𑀲𑁆𑀲 𑀘 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀥𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀗𑁆𑀔𑀡𑁂 𑀯𑀸 𑀲𑀫𑀣𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸 𑀯𑀺𑀲𑁂𑀲𑀸 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀏𑀢𑁆𑀣 𑀘 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀘 𑀉𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬 𑀘 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀘 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀓𑀽𑀮𑀸𑀤𑀻𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀸𑀭𑀸𑀤𑀺𑀓𑀸 𑀧𑀦 𑀅𑀭𑀺𑀬𑀸 𑀇𑀤𑁆𑀥𑀺 𑀦𑀸𑀫. 𑀧𑀓𑁆𑀔𑀺𑀤𑁂𑀯𑀸𑀤𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀓𑀫𑁆𑀫 𑀯𑀺𑀧𑀸𑀓𑀚𑀸 𑀇𑀤𑁆𑀥𑀺 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑀸 𑀯𑀺𑀧𑀸𑀓𑀚𑀸 𑀇𑀤𑁆𑀥𑀺. 𑀲𑀩𑁆𑀩𑁂𑀲𑀁 𑀧𑀓𑁆𑀔𑀻𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀓𑀘𑁆𑀘𑀸 𑀦𑀜𑁆𑀘 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀅𑀬𑀁 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀻’’𑀢𑀺𑀆𑀤𑀺. 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀧𑀦 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑀸 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀯𑁂𑀳𑀸𑀲𑀁 𑀕𑀘𑁆𑀙𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀅𑀦𑁆𑀢𑀫𑀲𑁄 𑀅𑀲𑁆𑀲𑀩𑀦𑁆𑀥𑀕𑁄𑀩𑀦𑁆𑀥𑀧𑀼𑀭𑀺𑀲𑁂 ¶ 𑀉𑀧𑀸𑀤𑀸𑀬. 𑀚𑁄𑀢𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀚𑀝𑀺𑀮𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀖𑁄𑀲𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀻’’𑀢𑀺. 𑀯𑀺𑀚𑁆𑀚𑀸𑀥𑀭𑀸𑀤𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀧𑀦 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺 𑀦𑀸𑀫. 𑀏𑀢𑁆𑀣 𑀘 𑀆𑀤𑀺𑀲𑀤𑁆𑀤𑁂𑀦 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀫𑁆𑀧𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀺 𑀢𑁆𑀬𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀢𑁂𑀦 𑀲𑀫𑁆𑀫𑀸𑀧𑀬𑁄𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀇𑀚𑁆𑀛𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺 𑀦𑀸𑀫.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀇𑀤𑁆𑀥𑀺𑀓𑀣𑀸𑀬 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑁆𑀞𑀓𑀣𑀸𑀬 𑀘 𑀕𑀳𑁂𑀢𑀩𑁆𑀩𑁄. 𑀢𑀸𑀲𑀼 𑀧𑀦 𑀇𑀤𑁆𑀥𑀻𑀲𑀼 𑀪𑀕𑀯𑀢𑁄 𑀞𑀧𑁂𑀢𑁆𑀯𑀸 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀁 𑀅𑀯𑀲𑁂𑀲𑀸 𑀅𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀪𑀕𑀯𑀢𑁄 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀘 𑀅𑀝𑁆𑀞𑀳𑀺 𑀯𑀺𑀚𑁆𑀚𑀸𑀳𑀺 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀩𑁆𑀩𑀸 𑀩𑀼𑀤𑁆𑀥𑀇𑀤𑁆𑀥𑀺𑀬𑁄 𑀲𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀧𑀺 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀁 𑀫𑀼𑀦𑀺𑀦𑁆𑀤𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑀬𑁄𑀚𑀦𑀸. 𑀧𑀭𑀳𑀺𑀢𑀓𑀭𑁄 𑀅𑀢𑁆𑀢𑀦𑀸 𑀧𑀭𑁂𑀲𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀓𑀭𑁄𑀦𑁆𑀢𑁄, 𑀬𑁄 𑀫𑀼𑀦𑀺𑀦𑁆𑀤𑁄 𑀬𑁄 𑀬𑀸𑀤𑀺𑀲𑁄 𑀩𑀼𑀤𑁆𑀥𑁄, 𑀓𑀡𑁆𑀟𑀫𑁆𑀩𑀁𑀫𑀽𑀮𑁂 𑀓𑀡𑁆𑀟𑀦𑀸𑀫𑀺𑀓𑁂𑀦 𑀧𑀲𑁂𑀦𑀤𑀺𑀓𑁄𑀲𑀮𑀭𑀜𑁆𑀜𑁄 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑁄𑀧𑀺𑀢𑀲𑁆𑀲 𑀲𑁂𑀢𑀫𑁆𑀩𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀲𑀦𑁆𑀦𑀺𑀲𑀺𑀦𑁆𑀦𑁄 𑀯𑀲𑀫𑀸𑀦𑁄 𑀅𑀘𑁆𑀙𑁂𑀭𑀁 𑀯𑀺𑀫𑁆𑀳𑀸𑀧𑀦𑀻𑀬𑀁 𑀦𑀬𑀦𑀲𑀼𑀪𑀕𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤 𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀧𑀢𑁆𑀢𑀁 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁 𑀧𑀭𑀺𑀓𑀺𑀡𑁆𑀡𑀉𑀤𑀓 𑀥𑀸𑀭𑀅𑀕𑁆𑀕𑀺𑀲𑀺𑀔𑀯𑀦𑁆𑀢𑀁 𑀧𑀭𑀺𑀲𑀫𑀦𑁆𑀢𑀢𑁄 𑀓𑀼𑀮𑀁 𑀧𑀭𑀺𑀓𑀺𑀡𑁆𑀡𑀁 𑀅𑀜𑁆𑀜𑀫𑀜𑁆𑀜 𑀫𑀺𑀲𑁆𑀲𑀓𑀁 𑀬𑀫𑀓𑀁 𑀬𑀫𑀓𑀁 𑀉𑀤𑀓𑀚𑀸𑀮𑀅𑀕𑁆𑀕𑀺𑀚𑀸𑀮𑀯𑀦𑁆𑀢𑀁 𑀯𑀸, 𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀁 𑀤𑀼𑀝𑁆𑀞𑀼𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀸𑀤𑀲𑀗𑁆𑀔𑀸𑀢𑀁 𑀚𑀸𑀮𑀁 𑀯𑀺𑀤𑁆𑀥𑀁𑀲𑀺𑀢𑀁, 𑀫𑀼𑀦𑀺𑀪𑀺𑀚𑀳𑀺𑀢𑀁 𑀲𑀩𑁆𑀩𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀁, 𑀧𑀸𑀝𑀺𑀳𑁂𑀭𑀁 𑀧𑀘𑁆𑀘𑀦𑀻𑀓 𑀧𑀝𑀺𑀳𑀸𑀭𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀉𑀤𑀓𑀕𑁆𑀕𑀺𑀬𑀫𑀓𑀁𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀯𑀸 ¶ , 𑀲𑀻𑀖𑀁 𑀔𑀺𑀧𑁆𑀧𑀁 𑀅𑀓𑀸𑀲𑀺 𑀅𑀓𑀭𑀺, 𑀲𑁂𑀝𑁆𑀞𑀁 𑀧𑀲𑀢𑁆𑀣𑀢𑀭𑀁, 𑀧𑀭𑀫𑀭𑀢𑀺𑀚𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀢𑁆𑀢𑀫𑀭𑀢𑀺𑀁 𑀚𑀦𑀓𑀁 𑀉𑀢𑁆𑀢𑀫𑀸𑀦𑀁 𑀲𑀸𑀥𑀽𑀦𑀁 𑀘𑀺𑀢𑁆𑀢𑀭𑀫𑀦𑀁 𑀚𑀦𑀸𑀧𑁂𑀢𑀁 𑀯𑀸, 𑀇𑀤𑁆𑀥𑀺𑀥𑀫𑁆𑀫𑁂𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀅𑀧𑁆𑀧𑀫𑁂𑀬𑁆𑀬𑁂𑀳𑀺 𑀩𑀼𑀤𑁆𑀥𑀇𑀤𑁆𑀥𑀺 𑀕𑀼𑀡𑁂𑀳𑀺 𑀉𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀁, 𑀢𑀁 𑀫𑀼𑀦𑀺𑀦𑁆𑀤𑀁 𑀅𑀳𑀁 𑀲𑀺𑀭𑀲𑀸 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀏𑀓𑀽𑀦𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁦. 𑀫𑀼𑀦𑀺𑀦𑁆𑀤𑀓𑁆𑀓𑁄 𑀬𑁆𑀯𑁂𑀓𑁄 𑀤𑀬𑀼𑀤𑀬𑀭𑀼𑀡𑁄 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄, 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀓𑀫𑀮𑀓𑀣𑀺𑀢𑀁 𑀥𑀫𑁆𑀫𑀭𑀁𑀲𑀻𑀯𑀭𑁂𑀳𑀺. 𑀲𑀼𑀩𑁄𑀥𑁂𑀲𑀻 𑀲𑀼𑀤𑁆𑀥𑁂 𑀢𑀺𑀪𑀯𑀓𑀼𑀳𑀭𑁂 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀜𑁆𑀘, 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀁 𑀤𑀼𑀔𑀫𑀲𑀳𑀦𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑁨𑁦. 𑀏𑀯𑀁 𑀏𑀓𑀽𑀦𑀯𑀻𑀲𑀢𑀺𑀫𑀸𑀬 𑀕𑀸𑀣𑀸𑀬 𑀫𑀼𑀦𑀺𑀦𑁆𑀤𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀩𑁄𑀥𑀦𑁂𑀬𑁆𑀬𑀸𑀤𑀻𑀳𑀺 𑀦𑀯𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀫𑀼𑀦𑀺𑀦𑁆𑀤𑀓𑁆𑀓𑀁 𑀯𑀦𑁆𑀤𑀺𑀢𑀼𑀓𑀸𑀫𑁄 𑀫𑀼𑀦𑀺𑀦𑁆𑀤𑀓𑁆𑀓𑁄𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀬 𑀫 𑀦 𑀲 𑀭 𑀭𑀕𑀡𑁂𑀳𑀺 𑀘 𑀏𑀓𑀕𑀭𑀼𑀦𑀸 𑀘 𑀙𑀬𑀢𑀻𑀳𑀺 𑀘 𑀲𑀢𑁆𑀢𑀬𑀢𑀻𑀳𑀺 𑀘 𑀭𑀘𑀺𑀢𑀢𑁆𑀢𑀸 𑀏𑀓𑀽𑀦𑀯𑀻𑀲𑀢𑀓𑁆𑀔𑀭𑀸 𑀫𑁂𑀖𑀯𑀺𑀧𑁆𑀨𑀼𑀚𑁆𑀚𑀺𑀢𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀭𑀲𑀼𑀢𑁆𑀯𑀲𑁆𑀲𑁂𑀳𑀺 𑀬𑁆𑀫𑀸 𑀦 𑀲 𑀭 𑀭 𑀕𑀭𑀽 𑀫𑁂𑀖𑀯𑀺𑀧𑁆𑀨𑀼𑀚𑁆𑀚𑀺𑀢𑀸 𑀲𑀸’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀭𑀲𑀼𑀢𑁆𑀯𑀲𑁆𑀲𑁂𑀳𑀺 𑀙 𑀙 𑀲𑀢𑁆𑀢 𑀬𑀢𑀻𑀳𑀺 𑀬𑁆𑀫𑀸 𑀬𑀕𑀡𑀫𑀕𑀡𑀸 𑀘 𑀦 𑀲 𑀭𑀭 𑀕𑀭𑀽 𑀦𑀕𑀡 𑀲𑀕𑀡 𑀭𑀕𑀡 𑀭𑀕𑀡 𑀏𑀓𑀕𑀭𑀼 𑀘 𑀘𑁂 𑀬𑀼𑀢𑁆𑀢𑀸, 𑀲𑀸 𑀕𑀸𑀣𑀸 𑀫𑁂𑀖𑀯𑀺𑀧𑁆𑀨𑀼𑀚𑁆𑀚𑀺𑀢𑀸 𑀫𑁂𑀖 𑀯𑀺𑀧𑁆𑀨𑀼𑀚𑁆𑀚𑀺𑀢𑀸 𑀕𑀸𑀣𑀸 𑀦𑀸𑀫𑀸𑀢𑀺. 𑀏𑀢𑁆𑀣 𑀘 𑀭𑀲𑀸𑀦𑀁 𑀓𑀲𑀸𑀯 𑀢𑀺𑀢𑁆𑀢 𑀫𑀥𑀼𑀭𑀮𑀯𑀡 𑀅𑀫𑁆𑀩𑀺𑀮 𑀓𑀝𑀼𑀓𑀯𑀲𑁂𑀦 𑀙𑀩𑁆𑀩𑀺𑀥𑀢𑁆𑀢𑀸 𑀭𑀲𑀲𑀤𑁆𑀤𑁄 𑀙𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀉𑀢𑀽𑀦𑀁 𑀳𑁂𑀫𑀦𑁆𑀢 𑀲𑀺𑀲𑀻𑀭 𑀯𑀲𑀦𑁆𑀢 𑀕𑀺𑀫𑁆𑀳𑀯𑀲𑁆𑀲𑀸𑀦𑀲𑀭𑀤𑀯𑀲𑁂𑀦 𑀙𑀩𑁆𑀩𑀺𑀥𑀢𑁆𑀢𑀸 𑀉𑀢𑀼𑀲𑀤𑁆𑀤𑁄 𑀙𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺. 𑀅𑀲𑁆𑀲𑀲𑀤𑁆𑀤𑁄 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀲𑁆𑀲𑀲𑀤𑁆𑀤𑀲𑁆𑀲 𑀳𑀺 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑀪𑀸𑀯𑁄 𑀙𑀦𑁆𑀤𑀝𑀻𑀓𑀸𑀲𑀼 𑀯𑀼𑀢𑁆𑀢𑁄𑀢𑀺.

𑀢𑀢𑁆𑀣 ¶ 𑀧𑀦 𑀤𑀬𑀼𑀤𑀬𑀭𑀼𑀡𑁄 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄 𑀏𑀓𑁄 𑀬𑁄 𑀫𑀼𑀦𑀺𑀦𑁆𑀤𑀓𑁆𑀓𑁄 𑀲𑀼𑀤𑁆𑀥𑁂 𑀢𑀺𑀪𑀯𑀓𑀼𑀳𑀭𑁂 𑀓𑀫𑀮𑀓𑀣𑀺𑀢𑀁 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀥𑀫𑁆𑀫𑀭𑀁𑀲𑀻𑀯𑀭𑁂𑀳𑀺 𑀲𑀼𑀩𑁄𑀥𑁂𑀲𑀺 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺 𑀦𑀜𑁆𑀘 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀁 𑀤𑀼𑀔𑀫𑀲𑀳𑀦𑀁 𑀫𑀳𑁂𑀲𑀺𑀁 𑀢𑀁 𑀫𑀼𑀦𑀺𑀦𑁆𑀤𑀓𑁆𑀓𑀁 𑀦𑀫𑀸𑀫𑀻𑀢𑀺 𑀬𑁄𑀚𑀦𑀸.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀘 𑀅𑀢𑁆𑀣𑀓𑁆𑀓𑀫𑁂𑀦𑁂𑀯 𑀲𑀼𑀔𑀚𑀸𑀦𑀦𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀦 𑀲𑀤𑁆𑀤𑀓𑁆𑀓𑀫𑁂𑀦. 𑀤𑀬𑀼𑀤𑀬𑀭𑀼𑀡𑁄𑀢𑀺𑀧𑀤𑀲𑁆𑀲 𑀤𑀬𑀸𑀉𑀤𑀬𑀅𑀭𑀼𑀡𑁄𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀫𑀳𑀸𑀓𑀭𑀼𑀡𑀸𑀲𑀗𑁆𑀔𑀸𑀢𑀉𑀤𑀬𑀧𑀩𑁆𑀩𑀢𑀼𑀕𑁆𑀕𑀢𑀲𑀽𑀭𑀺𑀬𑀸𑀭𑀼𑀡𑁄. 𑀅𑀣 𑀯𑀸 𑀉𑀤𑀬𑀧𑀩𑁆𑀩𑀢𑀢𑁄 𑀉𑀕𑁆𑀕𑀢𑀲𑀽𑀭𑀺𑀬𑀸𑀭𑀼𑀡𑁄 𑀯𑀺𑀬 𑀫𑀳𑀸𑀓𑀭𑀼𑀡𑀸 𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀤𑀬𑀸𑀲𑀤𑁆𑀤𑁄 𑀓𑀭𑀼𑀡𑀸𑀫𑁂𑀢𑁆𑀢𑀸𑀲𑀼 𑀯𑀢𑁆𑀢𑀢𑀺. 𑀅𑀤𑀬𑀸𑀢𑀺 𑀯𑀼𑀘𑁆𑀘𑀢𑀺 𑀦𑀺𑀓𑁆𑀓𑀭𑀼𑀡𑀢𑀦𑁆𑀢𑀺 𑀏𑀢𑁆𑀣 𑀳𑀺 𑀓𑀭𑀼𑀡𑀸𑀬𑀁. 𑀤𑀬𑀸𑀧𑀦𑁆𑀦𑁄𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸𑀬𑀁 𑀯𑀢𑁆𑀢𑀢𑀺. 𑀫𑁂𑀢𑁆𑀢𑀸𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀓𑀭𑀼𑀡𑀸 𑀅𑀥𑀺𑀧𑁆𑀧𑁂𑀢𑀸.

𑀅𑀬𑀁 𑀧𑀦 𑀯𑀘𑀦𑀢𑁆𑀣𑁄. 𑀤𑀬𑀢𑀺 𑀳𑀺𑀁𑀲𑀢𑀺 𑀓𑀸𑀭𑀼𑀡𑀺𑀓𑀁 𑀬𑀸𑀯 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀭𑀲𑁆𑀲 𑀳𑀺𑀢𑀦𑀺𑀩𑁆𑀩𑀢𑁆𑀢𑀺𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀸𑀯𑀸𑀢𑀺 𑀤𑀬𑀸, 𑀫𑀳𑀸𑀓𑀭𑀼𑀡𑀸. 𑀤𑀬𑀥𑀸𑀢𑀼 𑀳𑀺𑀁𑀲𑀸𑀬𑀁 𑀅. 𑀤𑀬𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀧𑀸𑀧𑀚𑀦𑀫𑁆𑀧𑀺 𑀏𑀢𑀸𑀬𑀸𑀢𑀺 𑀯𑀸 𑀤𑀬𑀸. 𑀤𑀬𑀥𑀸𑀢𑀼 𑀅𑀦𑀼𑀕𑁆𑀕𑀳𑀡𑁂. 𑀤𑀬𑀢𑀺 𑀅𑀢𑁆𑀢𑀦𑁄 𑀲𑀼𑀔𑀫𑁆𑀧𑀺 𑀧𑀳𑀸𑀬 𑀔𑁂𑀤𑀁 𑀕𑀡𑁆𑀳𑀸𑀢𑀻𑀢𑀺 𑀯𑀸 𑀤𑀬𑀸. 𑀤𑀬𑀥𑀸𑀢𑀼 𑀕𑀳𑀡𑁂. 𑀅𑀣 𑀯𑀸 𑀤𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀏𑀢𑀸𑀬 𑀩𑁄𑀥𑀺𑀲𑀢𑁆𑀢𑀸 𑀲𑀁𑀲𑀸𑀭𑀤𑀼𑀓𑁆𑀔𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀜𑁆𑀘𑀸𑀢𑀺 𑀤𑀬𑀸, 𑀫𑀳𑀸𑀓𑀭𑀼𑀡𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀳𑀺 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀓𑀭𑀡𑀓𑀸𑀮𑁂 𑀳𑀢𑁆𑀣𑀕𑀢𑀫𑁆𑀧𑀺 𑀅𑀭𑀳𑀢𑁆𑀢 𑀨𑀮𑀁 𑀙𑀝𑁆𑀝𑁂𑀢𑁆𑀯𑀸 𑀲𑀁𑀲𑀸𑀭𑀲𑀸𑀕𑀭𑀢𑁄 𑀲𑀢𑁆𑀢𑁂 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑀸 𑀅𑀦𑀲𑁆𑀲𑀸𑀲𑀓𑀭𑀁 𑀅𑀢𑀺𑀪𑀬𑀸𑀦𑀓𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀧𑀘𑁆𑀙𑀺𑀫𑀪𑀯𑁂 𑀘 𑀲𑀳 𑀅𑀫𑀢𑀥𑀸𑀢𑀼𑀧𑀝𑀺𑀮𑀸𑀪𑁂𑀦 𑀅𑀦𑁂𑀓𑀕𑀼𑀡𑀲𑀫𑀮𑀗𑁆𑀓𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀜𑁆𑀘 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀫𑀽𑀮𑀓𑀸 𑀳𑀺 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸. 𑀢𑁂𑀦 𑀯𑀼𑀢𑁆𑀢𑀁 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 ‘‘𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺, 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄’’𑀢𑀺.

𑀅𑀧𑀺 ¶ 𑀘 𑀤𑀬𑀦𑁆𑀢𑀺 𑀅𑀦𑀼𑀭𑀓𑁆𑀔𑀦𑁆𑀢𑀺 𑀲𑀢𑁆𑀢𑁂 𑀏𑀢𑀸𑀬, 𑀲𑀬𑀁 𑀯𑀸 𑀅𑀦𑀼𑀤𑁆𑀤𑀬𑀢𑀺 𑀅𑀦𑀼𑀤𑀬𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀤𑀬𑀸. 𑀤𑀬𑀥𑀸𑀢𑀼 𑀅𑀦𑀼𑀭𑀓𑁆𑀔𑀡𑁂 𑀅𑀧𑀘𑁆𑀘𑀬𑁄. 𑀉𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀉𑀤𑀬𑁄, 𑀧𑀩𑁆𑀩𑀢𑁄. 𑀉𑀤𑀺𑀥𑀸𑀢𑀼 𑀧𑀲𑀯𑀦𑁂 𑀡. 𑀆𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀉𑀡𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄, 𑀲𑀽𑀭𑀺𑀬𑀭𑀁𑀲𑀻 𑀯𑀺𑀲𑁂𑀲𑁄. 𑀆𑀧𑀼𑀩𑁆𑀩𑀉𑀡𑀥𑀸𑀢𑀼 𑀕𑀢𑀺𑀬𑀁 𑀡. 𑀤𑀬𑀸𑀲𑀗𑁆𑀔𑀸𑀢𑀢𑁄 𑀉𑀤𑀬𑀧𑀩𑁆𑀩𑀢𑀢𑁄 𑀉𑀕𑁆𑀕𑀢𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑁄 𑀬𑀲𑁆𑀲𑀸𑀢𑀺 𑀤𑀬𑀼𑀤𑀬𑀭𑀼𑀡𑁄. 𑀅𑀣 𑀯𑀸 𑀉𑀤𑀬𑀧𑀩𑁆𑀩𑀢𑀢𑁄 𑀉𑀕𑁆𑀕𑀢𑀲𑀽𑀭𑀺𑀬𑀸𑀭𑀼𑀡𑁄 𑀯𑀺𑀬 𑀤𑀬𑀸 𑀫𑀳𑀸𑀓𑀭𑀼𑀡𑀸 𑀬𑀲𑁆𑀲𑀸𑀢𑀺 𑀤𑀬𑀼𑀤𑀬𑀭𑀼𑀡𑁄, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀬𑀣𑀸 𑀳𑀺 𑀉𑀕𑁆𑀕𑀢𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑁄 𑀆𑀮𑁄𑀓𑀲𑁆𑀲 𑀆𑀤𑀺 𑀳𑁄𑀢𑀺, 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀓𑀭𑁄𑀧𑀬𑀸𑀢𑀁 𑀦𑀺𑀩𑁆𑀩𑀸𑀦𑀲𑀼𑀔𑀫𑁄𑀲𑀚𑁆𑀚 𑀫𑀳𑀸𑀓𑀭𑀼𑀡𑀸𑀬 𑀲𑀁𑀲𑀸𑀭𑀲𑀫𑀼𑀤𑁆𑀤𑀢𑁄 𑀲𑀢𑁆𑀢𑁂 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀩𑀼𑀤𑁆𑀥𑀪𑀸𑀯𑀸𑀬 𑀲𑀼𑀤𑀼𑀓𑁆𑀓𑀭𑀸 𑀤𑀸𑀦𑀸𑀤𑀬𑁄 𑀤𑀲 𑀧𑀸𑀭𑀫𑀺𑀬𑁄 𑀘 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀘 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀓𑀸𑀲𑀻𑀢𑀺 𑀓𑀭𑀼𑀡𑀸 𑀩𑀼𑀤𑁆𑀥𑀪𑀸𑀯𑀸𑀬 𑀆𑀤𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀲𑁆𑀲𑁂𑀯 𑀤𑀬𑀼𑀤𑀬𑀭𑀼𑀡𑁄𑀢𑀺 𑀅𑀪𑀺𑀢𑁆𑀣𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑁄 𑀯𑀺𑀢𑁆𑀣𑀸𑀭 𑀧𑀭𑀺𑀫𑀡𑁆𑀟𑀮𑁄. 𑀯𑀺𑀢𑁆𑀣𑀸𑀭𑀘𑀓𑁆𑀓𑀯𑀸𑀴𑀫𑀡𑁆𑀟𑀮𑀁 𑀯𑀺𑀬 𑀯𑀺𑀧𑀼𑀮𑀸𑀭𑀫𑁆𑀫𑀡 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀸. 𑀲𑀗𑁆𑀔𑀢𑀸𑀲𑀗𑁆𑀔𑀢𑀪𑁂𑀤𑀁 𑀲𑀩𑁆𑀩𑁂𑀜𑁂𑀬𑁆𑀬𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀜𑀸𑀥𑀸𑀢𑀼 𑀅𑀯𑀩𑁄𑀥𑀦𑁂𑀬𑀼. 𑀯𑀺𑀲𑁂𑀲𑁂𑀦 𑀢𑀦𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀯𑀺𑀢𑁆𑀣𑀺𑀡𑁆𑀡𑀁, 𑀜𑀸𑀡𑀁. 𑀯𑀺𑀧𑀼𑀩𑁆𑀩𑀢𑀦𑀼𑀥𑀸𑀢𑀼 𑀯𑀺𑀢𑁆𑀣𑀸𑀭𑁂 𑀢𑀧𑀘𑁆𑀘𑀬𑁄. 𑀢𑀲𑁆𑀲 𑀇𑀡𑁆𑀡𑀸𑀤𑁂𑀲𑁄. 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁. 𑀅𑀣 𑀯𑀸 𑀯𑀺𑀢𑁆𑀣𑀭𑀢𑀺 𑀧𑀢𑁆𑀣𑀭𑀢𑀻𑀢𑀺 𑀯𑀺𑀢𑁆𑀣𑀺𑀡𑁆𑀡𑀁. 𑀣𑀭𑀥𑀸𑀢𑀼𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀯𑀫𑀢𑀺 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀩𑀺𑀫𑁆𑀩𑀁, 𑀜𑀸𑀡𑀫𑀡𑁆𑀟𑀮𑀁. 𑀯𑀫𑀥𑀸𑀢𑀼 𑀕𑀢𑀺𑀬𑀁 𑀩𑁄. 𑀅𑀲𑁆𑀲𑀺. 𑀯𑀲𑁆𑀲 𑀩𑁄.

𑀡𑁆𑀯𑀸𑀤𑀺𑀫𑁄𑀕𑁆𑀕𑀮𑁆𑀮𑀸𑀦𑁂 𑀧𑀦 ‘‘𑀯𑀫 𑀉𑀕𑁆𑀕𑀺𑀭𑀡𑁂 𑀩. 𑀯𑀫𑀺𑀲𑁆𑀲 𑀯𑀲𑁆𑀲 𑀩𑀺𑀢𑁆𑀢𑀁. 𑀯𑀫𑀢𑀺 𑀉𑀕𑁆𑀕𑀺𑀭𑀢𑀻𑀢𑀺 𑀩𑀺𑀫𑁆𑀩𑀁, 𑀲𑀭𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀩𑀺𑀫𑁆𑀩𑀲𑀤𑁆𑀤𑀲𑁆𑀲 𑀲𑀭𑀻𑀭𑀯𑀸𑀘𑀓𑁂 ¶ 𑀬𑀼𑀢𑁆𑀢𑀫𑁂𑀯. 𑀦 𑀧𑀭𑀺𑀫𑀡𑁆𑀟𑀮𑀯𑀸𑀘𑀓𑁂. 𑀇𑀥 𑀧𑀦 𑀩𑀺𑀫𑁆𑀩𑀲𑀤𑁆𑀤𑀲𑁆𑀲 𑀧𑀭𑀺𑀫𑀡𑁆𑀟𑀮𑀯𑀸𑀘𑀓𑀢𑁆𑀢𑀸. 𑀆𑀘𑀭𑀺𑀬𑀸 𑀧𑀦 𑀇𑀥 𑀩𑀺𑀫𑁆𑀩𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀘𑀓𑁆𑀓𑀫𑀡𑁆𑀟𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀓𑀲𑁆𑀫𑀸, 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀩𑀺𑀫𑁆𑀩𑀁 𑀢𑀼 𑀧𑀝𑀺𑀩𑀺𑀫𑁆𑀩𑁂 𑀘, 𑀫𑀡𑁆𑀟𑀮𑁂 𑀩𑀺𑀫𑁆𑀩𑀺𑀓𑀸𑀨𑀮𑁂’’𑀢𑀺 𑀘. 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀫𑀡𑁆𑀟𑀮𑁂 𑀧𑀝𑀺𑀫𑀡𑁆𑀟𑀮𑁂’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑀁 𑀯𑀺𑀢𑁆𑀣𑀺𑀡𑁆𑀡𑀁 𑀯𑀺𑀢𑁆𑀣𑀸𑀭𑀁 𑀩𑀺𑀫𑁆𑀩𑀁 𑀧𑀭𑀺𑀫𑀡𑁆𑀟𑀮𑀁 𑀅𑀲𑁆𑀲𑀸𑀢𑀺 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄. 𑀅𑀣 𑀯𑀸 𑀯𑀺𑀢𑁆𑀣𑀺𑀡𑁆𑀡𑀁 𑀯𑀺𑀢𑁆𑀣𑀸𑀭𑀁 𑀩𑀺𑀫𑁆𑀩𑀁 𑀘𑀓𑁆𑀓𑀯𑀸𑀴𑀧𑀭𑀺𑀫𑀡𑁆𑀟𑀮𑀁 𑀯𑀺𑀬 𑀯𑀺𑀧𑀼𑀮𑀸𑀭𑀫𑁆𑀫𑀡𑀁 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀲𑁆𑀲𑀸𑀢𑀺 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀬𑀣𑀸 𑀳𑀺 𑀘𑀓𑁆𑀓𑀯𑀸𑀴𑀲𑁆𑀲 𑀅𑀦𑀦𑁆𑀢𑀢𑁆𑀢𑀸 𑀘𑀓𑁆𑀓𑀯𑀸𑀴𑀫𑀡𑁆𑀟𑀮𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀏𑀯 𑀫𑁂𑀯 𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀦𑀦𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁. 𑀢𑀲𑁆𑀫𑀸 𑀢𑀲𑁆𑀲 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄𑀢𑀺 𑀣𑁄𑀫𑁂𑀢𑀻𑀢𑀺. 𑀬𑁆𑀯𑁂𑀓𑁄𑀢𑀺 𑀬𑁄 𑀏𑀓𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀬𑁂𑀓𑁄𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄. 𑀢𑀲𑁆𑀲 𑀧𑀦 𑀬𑁄 𑀏𑀓𑁄𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀢𑀁 𑀧𑀦 𑀧𑀸𑀞𑀤𑁆𑀯𑀬𑀁 𑀬𑀼𑀢𑁆𑀢𑀫𑁂𑀯. 𑀬𑁆𑀯𑁂𑀓𑁄𑀢𑀺 𑀳𑀺 𑀧𑀸𑀞𑁂 𑀆𑀤𑁂𑀲𑀲𑀦𑁆𑀥𑀺 𑀳𑁄𑀢𑀺. 𑀬𑁂𑀓𑁄𑀢𑀺 𑀧𑀸𑀞𑁂 𑀧𑀦 𑀮𑁄𑀧𑀲𑀦𑁆𑀥𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀬𑁄 𑀫𑀼𑀦𑀺𑀦𑁆𑀤𑀓𑁆𑀓𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀓𑁄𑀢𑀺 𑀅𑀲𑀳𑀸𑀬𑁄, 𑀅𑀤𑀼𑀢𑀺𑀬𑀓𑁄 𑀏𑀓 𑀩𑀼𑀤𑁆𑀥𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀏𑀓𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬 𑀲𑀗𑁆𑀔𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑁂𑀲 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺. 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺𑀆𑀤𑀻𑀲𑀼 𑀲𑁂𑀝𑁆𑀞𑁂. 𑀏𑀓𑁄 𑀯𑀽𑀧𑀓𑀝𑁆𑀞𑁄𑀢𑀺𑀆𑀤𑀻𑀲𑀼 𑀅𑀲𑀳𑀸𑀬𑁂. 𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀸𑀬𑀸𑀢𑀺𑀆𑀤𑀻𑀲𑀼 𑀲𑀗𑁆𑀔𑁆𑀬𑀸𑀬𑀁. 𑀇𑀥 𑀧𑀦 𑀅𑀲𑀳𑀸𑀬𑁂 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀁 𑀧𑀦𑀲𑁆𑀲 𑀯𑀘𑀦𑀢𑁆𑀣𑁄. 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸 𑀏𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀓𑁄, 𑀅𑀤𑀼𑀢𑀺𑀬𑀓𑁄 𑀳𑀼𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀏𑀢𑀺 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀯𑀸 𑀏𑀓𑁄, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀏𑀥𑀸𑀢𑀼 𑀇𑀥𑀸𑀢𑀼 𑀯𑀸 𑀜𑀸𑀡𑀕𑀢𑀻𑀲𑀼 𑀡𑁆𑀯𑀼. 𑀅𑀣 𑀯𑀸 𑀏𑀓𑁄 𑀪𑀕𑀯𑀸 𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀏𑀓𑁄. 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄 ¶ , 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬 𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄𑀢𑀺𑀆𑀤𑀺𑀦𑀸 𑀆𑀕𑀢𑁂𑀦 𑀫𑀳𑀸𑀦𑀺𑀤𑁆𑀤𑁂𑀲𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺 𑀘 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼𑀬𑁂𑀯 𑀏𑀓𑁄𑀯 𑀩𑀼𑀤𑁆𑀥𑁄 𑀏𑀢𑀺 𑀉𑀧𑁆𑀧𑀚𑁆𑀚𑀢𑀺 𑀯𑀺𑀓𑀲𑀢𑀺 𑀯𑀸𑀢𑀺 𑀏𑀓𑁄. 𑀯𑀼𑀢𑁆𑀢𑀜𑁆𑀳𑀺 𑀏𑀓𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭 𑀧𑀸𑀴𑀺𑀬𑀁 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀪𑀺𑀓𑁆𑀔𑀯𑁂 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀪𑀺𑀓𑁆𑀔𑀯𑁂 𑀯𑀺𑀚𑁆𑀚𑀢𑀺, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀏𑀓𑁄𑀯 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀢𑀻𑀡𑀺 𑀳𑀺 𑀔𑁂𑀢𑁆𑀢𑀸𑀦𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀆𑀡𑀓𑁆𑀔𑁂𑀢𑁆𑀢𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑀓𑀸𑀮𑁂 𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀫𑁆𑀩𑁄𑀥𑀺𑀓𑀸𑀮𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀆𑀬𑀼 𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀓𑀫𑁆𑀧𑀢𑀺, 𑀓𑁄𑀝𑀺𑀲𑀢𑀲𑀳𑀲𑁆𑀲 𑀘𑀓𑁆𑀓𑀯𑀸𑀴𑀁 𑀧𑀦 𑀆𑀡𑀓𑁆𑀔𑁂𑀢𑁆𑀢𑀁 𑀦𑀸𑀫. 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢 𑀫𑁄𑀭𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢 𑀭𑀢𑀦𑀧𑀭𑀺𑀢𑁆𑀢𑀸𑀤𑀻𑀦𑀜𑁆𑀳𑀺 𑀏𑀢𑁆𑀣 𑀆𑀡𑀸 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀓𑁆𑀔𑁂𑀢𑁆𑀢𑀲𑁆𑀲 𑀧𑀦 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀁, 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀦𑁆𑀢𑀺 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺. 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀢𑀻𑀡𑀺 𑀳𑀺 𑀧𑀺𑀝𑀓𑀸𑀦𑀺 𑀯𑀺𑀦𑀬𑀧𑀺𑀝𑀓𑀁, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀢𑀺𑀲𑁆𑀲𑁄 𑀲𑀁𑀕𑀻𑀢𑀺𑀬𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀁𑀕𑀻𑀢𑀺, 𑀬𑀲𑀢𑁆𑀣𑁂𑀭𑀲𑁆𑀲 𑀲𑀁𑀕𑀻𑀢𑀺, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀁𑀕𑀻𑀢𑀺, 𑀇𑀫𑀸 𑀢𑀺𑀲𑁆𑀲𑁄 𑀲𑀁𑀕𑀻𑀢𑀺𑀬𑁄 ¶ 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻’’𑀢𑀺.

𑀏𑀢𑁆𑀣 𑀘 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼𑀬𑀸𑀢𑀺 𑀇𑀤𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀳𑀺 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺. 𑀢𑀢𑁆𑀢𑀓𑀸𑀦𑀁𑀬𑁂𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀸𑀯𑁄 𑀥𑀫𑁆𑀫𑀢𑀸 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀽𑀢𑀺 𑀇𑀫𑀺𑀦𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀲𑀗𑁆𑀔𑀸𑀢𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁂 𑀆𑀡𑀓𑁆𑀔𑁂𑀢𑁆𑀢𑁂 𑀅𑀦𑀦𑁆𑀢𑀘𑀓𑁆𑀓𑀯𑀸𑀴 𑀲𑀗𑁆𑀔𑀸𑀢𑁂 𑀯𑀺𑀲𑀬𑀓𑁆𑀔𑁂𑀢𑁆𑀢𑁂 𑀘𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀼 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀺𑀯𑀺𑀥𑀜𑁆𑀳𑀺 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀽𑀢𑀺 𑀆𑀥𑀸𑀭𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀦 𑀦𑀺𑀤𑁆𑀥𑀸𑀭𑀡𑀪𑀸𑀯𑁂𑀦. 𑀓𑀲𑁆𑀫𑀸, 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑁆𑀥𑀸𑀭𑀡𑀻𑀬𑀧𑀤𑀲𑁆𑀲 𑀅𑀪𑀸𑀯𑀢𑁄. 𑀲𑀢𑀺 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀢𑀲𑁆𑀲 𑀧𑀤𑀲𑁆𑀲 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁂 𑀇𑀫𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀆𑀡𑀓𑁆𑀔𑁂𑀢𑁆𑀢𑁂 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀦𑁆𑀢𑀺𑀆𑀤𑀺 𑀯𑀼𑀘𑁆𑀘𑁂𑀬𑁆𑀬. 𑀦. 𑀢𑀲𑁆𑀫𑀸 𑀢𑀲𑁆𑀲 𑀧𑀤𑀲𑁆𑀲 𑀆𑀥𑀸𑀭𑀢𑁆𑀣𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀧𑀼𑀩𑁆𑀩𑀦𑀺𑀲𑁆𑀲𑀬𑀸 𑀘𑀭𑀺𑀬𑁂𑀳𑀺 𑀘 𑀢𑀲𑁆𑀲 𑀧𑀤𑀲𑁆𑀲 𑀆𑀥𑀸𑀭𑀪𑀸𑀯𑁂𑀦 𑀅𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺. 𑀢𑀣𑁂𑀯 𑀧𑀦 𑀅𑀪𑀺𑀥𑀫𑁆𑀫𑀜𑀸𑀡𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀘, 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀉𑀧𑀭𑀺𑀧𑀡𑁆𑀡𑀸𑀲𑁂 𑀩𑀳𑀼𑀥𑀸𑀢𑀼𑀲𑀼𑀢𑁆𑀢𑀧𑀸𑀴𑀺𑀬𑀜𑁆𑀘, 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀦𑁂𑀢𑁆𑀢𑀺𑀧𑀸𑀴𑀺𑀬𑀜𑁆𑀘 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀢𑀁 𑀓𑀸𑀭𑀡𑀁 𑀆𑀕𑀢𑀫𑁂𑀯𑀸𑀢𑀺. 𑀢𑀁 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 𑀧𑀦 ‘‘𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦𑀯𑀺𑀚𑁆𑀚𑀢𑀻𑀢𑀺𑀆𑀤𑀺. 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀓𑀺𑀁𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀲𑀫𑀲𑀫𑁄 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑁄𑀳𑀁 𑀪𑀦𑁆𑀢𑁂 𑀦𑁄𑀢𑀺 𑀯𑀤𑁂𑀬𑁆𑀬𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 ¶ 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀆𑀳𑀭𑀦𑁆𑀢𑁂𑀦 𑀥𑀫𑁆𑀫 𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑁂𑀯 𑀧𑀦 𑀜𑀸𑀡𑀯𑀺𑀪𑀗𑁆𑀕𑀫𑀽𑀮𑀝𑀻𑀓𑀸𑀬𑀁, 𑀉𑀧𑀭𑀺𑀧𑀡𑁆𑀡𑀸𑀲𑀩𑀳𑀼𑀥𑀸𑀢𑀼 𑀲𑀼𑀢𑁆𑀢𑀝𑀻𑀓𑀸𑀬𑀜𑁆𑀘 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑀢𑁄 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀳𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂𑀦 𑀇𑀫𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀽𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑀪𑀽𑀢𑁄 𑀯𑀺𑀲𑁂𑀲𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀸𑀫𑀜𑁆𑀜𑀯𑀘𑀦𑁄𑀧𑀺 𑀳𑀺 𑀲𑀤𑁆𑀤𑁄 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀯𑀺𑀲𑁂𑀲𑀯𑀺𑀲𑀬𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀧𑀭𑁄 𑀦𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀩𑀼𑀤𑁆𑀥𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀦 𑀯𑀸𑀭𑀺𑀢𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀸𑀭𑀺𑀢𑀫𑁂𑀯 𑀳𑁄𑀢𑀻𑀢𑀺𑀏𑀢𑁆𑀣 𑀯𑀸𑀓𑁆𑀬𑁂 𑀇𑀫𑀲𑁆𑀫𑀺𑀁 𑀬𑁂𑀯𑀸𑀢𑀺𑀧𑀤𑁂 𑀲𑀫𑀪𑀺𑀦𑀺𑀯𑀺𑀝𑁆𑀞𑁄 𑀏𑀯𑀲𑀤𑁆𑀤𑁄 𑀦𑀺𑀯𑀢𑁆𑀢𑀸𑀧𑀦𑀸𑀯𑀥𑀸𑀭𑀡𑀢𑁆𑀣𑁄. 𑀏𑀢𑁂𑀦 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀬𑀤𑀺𑀧𑀺 𑀳𑀺 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀏𑀯𑀁 𑀲𑀦𑁆𑀢𑁂𑀲𑀼 𑀲𑀗𑁆𑀔𑀢𑀸𑀲𑀗𑁆𑀔𑀢𑀪𑁂𑀤𑀁 𑀲𑀩𑁆𑀩𑀥𑀫𑁆𑀫𑀁 𑀚𑀸𑀦𑀦𑁆𑀢𑁄 𑀧𑀲𑁆𑀲𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀜𑁆𑀜𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀯𑀼𑀘𑁆𑀘𑁂𑀬𑁆𑀬. 𑀦. 𑀢𑀡𑁆𑀳𑀗𑁆𑀓𑀭𑀸𑀤𑀬𑁄 𑀳𑀺 𑀅𑀝𑁆𑀞𑀯𑀻𑀲𑀢𑀺 𑀲𑀫𑁆𑀩𑀼𑀤𑁆𑀥𑀸 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺𑀯𑀘𑀦𑀁 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀦𑀢𑁆𑀣𑀺, 𑀢𑀣𑀸 𑀅𑀝𑁆𑀞𑀓𑀣𑀸 𑀝𑀻𑀓𑀸𑀲𑀼 𑀘. 𑀢𑀲𑁆𑀫𑀸 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢 𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂 𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀼𑀢𑁆𑀢𑀦𑁆𑀢𑀫𑀳𑀸𑀯𑀕𑁆𑀕𑀝𑁆𑀞𑀓𑀣𑀸𑀬𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑁋

‘‘𑀅𑀣𑀲𑁆𑀲 ¶ 𑀏𑀢𑀤𑀳𑁄𑀲𑀺 𑀫𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀅𑀜𑁆𑀜𑁄 𑀩𑀼𑀤𑁆𑀥𑁄𑀢𑀺 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀜𑁆𑀜𑀁 𑀩𑀼𑀤𑁆𑀥𑀁 𑀦 𑀅𑀤𑁆𑀤𑀲. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑀁 𑀦 𑀧𑀲𑁆𑀲𑁂𑀬𑁆𑀬. 𑀬𑁄 𑀚𑀸𑀢𑀤𑀺𑀯𑀲𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀦𑁆𑀢𑁄 𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀯𑀁 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀻’’𑀢𑀺. 𑀢𑀣𑁂𑀯𑁂𑀢𑀁. 𑀧𑀼𑀭𑀸𑀪𑁂𑀤𑀲𑀼𑀢𑁆𑀢 𑀫𑀳𑀸𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬𑀜𑁆𑀘, 𑀢𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀝𑀻𑀓𑀸𑀬𑀜𑁆𑀘 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀲𑀩𑁆𑀩𑀢𑁆𑀣𑁂𑀯 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀸𑀫 𑀦 𑀳𑁄𑀦𑁆𑀢𑁂𑀯. 𑀢𑁂𑀦𑁂𑀯𑀸𑀳 ‘‘𑀅𑀦𑀦𑁆𑀢𑀸𑀲𑀼 𑀮𑁄𑀓 𑀥𑀸𑀢𑀽𑀲𑀼…𑀧𑁂… 𑀦 𑀅𑀤𑁆𑀤𑀲𑀸’’𑀢𑀺 𑀲𑀁𑀯𑀡𑁆𑀡𑁂𑀢𑀺.

𑀅𑀧𑀡𑁆𑀡𑀓𑀚𑀸𑀢𑀓𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑀢𑁆𑀣𑀸 𑀉𑀧𑀸𑀲𑀓𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀉𑀧𑀭𑀺 𑀪𑀯𑀕𑁆𑀕𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀺. 𑀓𑀼𑀢𑁄 𑀅𑀥𑀺𑀓𑀢𑀭𑁄…𑀧𑁂… 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀅𑀝𑁆𑀞𑀓𑀣𑀸𑀲𑀼 𑀘 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀽𑀢𑀺 𑀘 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀽𑀢𑀺 𑀘 𑀅𑀦𑀦𑁆𑀢𑀅𑀧𑀭𑀺𑀫𑀸𑀡 𑀲𑀤𑁆𑀤𑁂𑀦 𑀯𑀼𑀢𑁆𑀢𑀁. 𑀢𑁂𑀳𑀺 𑀤𑁆𑀯𑀻𑀳𑀺 𑀲𑀤𑁆𑀤𑁂𑀳𑀺 𑀝𑀻𑀓𑀸𑀯𑀘𑀦𑁂𑀦 𑀘 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀅𑀝𑁆𑀞𑀓𑀣𑀸𑀬 𑀬𑁄𑀚𑀦𑀸𑀬𑀁 𑀧𑀦 𑀇𑀫𑁂𑀲𑀼 𑀧𑀦𑀸𑀢𑀺𑀆𑀤𑀺𑀦𑀸 𑀓𑁄𑀝𑀺𑀲𑀢𑀲𑀳𑀲𑁆𑀲 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀜𑀸𑀧𑁂𑀢𑀺. 𑀫𑀬𑀁 𑀧𑀦 𑀏𑀯𑀁 𑀯𑀺𑀢𑀓𑁆𑀓𑀬𑀸𑀫. 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂𑀢𑀺 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀲𑀢𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂𑀢𑀺 𑀇𑀢𑁄 𑀅𑀜𑁆𑀜𑀲𑁆𑀫𑀺𑀁 𑀚𑀸𑀢𑀺𑀆𑀡𑀸𑀔𑁂𑀢𑁆𑀢𑀪𑀽𑀢𑁂 𑀘𑀓𑁆𑀓𑀯𑀸𑀴𑁂𑀢𑀺 𑀅𑀢𑁆𑀣𑁂 ¶ 𑀕𑀳𑀺𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺 𑀪𑀯𑁂𑀬𑁆𑀬𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀘. ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀻’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀓𑀣𑀦𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀯𑀺𑀬 𑀅𑀜𑁆𑀜𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀅𑀦𑀼𑀧𑁆𑀧𑀢𑁆𑀢𑀺 𑀪𑀯𑁂𑀬𑁆𑀬. 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂 𑀘 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀧𑀝𑀺𑀲𑁂𑀥𑀺𑀢𑀸. 𑀢𑀲𑁆𑀫𑀸 𑀆𑀡𑀓𑁆𑀔𑁂𑀢𑁆𑀢𑀪𑀽𑀢𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀯𑀻𑀫𑀁𑀲𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀬𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂 𑀘…𑀧𑁂… 𑀦 𑀧𑀝𑀺𑀲𑁂𑀥𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀁 𑀦𑀢𑁆𑀣𑁂𑀯. 𑀇𑀫𑀺𑀲𑁆𑀲𑀸 𑀧𑀦 𑀲𑀩𑁆𑀩𑀤𑀺𑀲𑀸𑀓𑀣𑀸𑀬𑀁 𑀧𑀭𑀯𑀸𑀤𑀻𑀦𑀁 𑀧𑀭𑀺𑀓𑀧𑁆𑀧𑀯𑀘𑀦𑀫𑀢𑁆𑀢𑀫𑁂𑀯 𑀅𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 𑀢𑀲𑁆𑀲𑀁 𑀧𑀸𑀴𑀺𑀬𑀁 ‘‘𑀲𑀩𑁆𑀩𑀤𑀺𑀲𑀸 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀆𑀫𑀦𑁆𑀢𑀸. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺. 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺. 𑀆𑀫𑀦𑁆𑀢𑀸. 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸 𑀓𑀺𑀁𑀚𑀘𑁆𑀘𑁄 𑀓𑀺𑀁𑀕𑁄𑀢𑁆𑀢𑁄, 𑀓𑀺𑀦𑁆𑀦𑀸𑀫𑀸 𑀢𑀲𑁆𑀲 𑀪𑀕𑀯𑀢𑁄 𑀫𑀸𑀢𑀸𑀧𑀺𑀢𑀭𑁄, 𑀓𑀺𑀦𑁆𑀦𑀸𑀫𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀬𑀼𑀕𑀁, 𑀓𑁄 𑀦𑀸𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀓𑁄, 𑀓𑀺𑀁𑀤𑀺𑀲𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀓𑀺𑀁𑀤𑀺𑀲𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺. 𑀓𑀢𑀭𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸 𑀭𑀝𑁆𑀞𑁂 𑀯𑀸 𑀚𑀦𑀧𑀤𑁂 𑀯𑀸𑀢𑀺. 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑁆𑀬𑀸𑀤𑀺.

𑀢𑀤𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀲𑀩𑁆𑀩𑀤𑀺𑀲𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀳𑁂𑀝𑁆𑀞𑀸 𑀉𑀧𑀭𑀻𑀢𑀺 𑀲𑀫𑀦𑁆𑀢𑀢𑁄 𑀮𑁄𑀓𑀥𑀸𑀢𑀼𑀲𑀦𑁆𑀦𑀺𑀯𑁂𑀲𑀁 𑀲𑀩𑁆𑀩𑀮𑁄𑀓𑀥𑀸𑀢𑀽𑀲𑀼 𑀘 𑀩𑀼𑀤𑁆𑀥𑁄 𑀅𑀢𑁆𑀣𑀻𑀢𑀺 𑀅𑀢𑁆𑀢𑀦𑁄 𑀯𑀺𑀓𑀧𑁆𑀧𑀲𑀺𑀧𑁆𑀧𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀲𑀼 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀬𑁂𑀲𑀁…𑀧𑁂… ¶ 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀭𑀢𑁆𑀣𑀺𑀫𑀸𑀬𑀸𑀢𑀺 𑀧𑀼𑀝𑁆𑀞𑁄 𑀲𑀓𑁆𑀬𑀫𑀼𑀦𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀮𑀤𑁆𑀥𑀺𑀯𑀲𑁂𑀦 𑀅𑀜𑁆𑀜𑀮𑁄𑀓𑀥𑀸𑀢𑀼𑀬𑀁 𑀞𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸𑀢𑀺𑀆𑀤𑀺 𑀲𑀘𑁂 𑀢𑁆𑀯𑀁 𑀚𑀸𑀦𑀸𑀲𑀺. 𑀦𑀸𑀫𑀸𑀤𑀺𑀯𑀲𑁂𑀦 𑀦𑀁 𑀓𑀣𑁂𑀳𑀻𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀘𑀢𑀽𑀲𑀼 𑀤𑀺𑀲𑀸𑀲𑀼…𑀧𑁂… 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀭𑀯𑀸𑀤𑀻𑀦𑀁 𑀮𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀦 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀇𑀢𑀺 𑀏𑀯𑀁 𑀲𑀫𑀦𑁆𑀢𑀢𑁄 𑀮𑁄𑀓𑀥𑀸𑀢𑀼𑀲𑀦𑁆𑀦𑀺𑀯𑁂𑀲𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀬𑁂𑀲𑀁…𑀧𑁂… 𑀫𑀳𑀸𑀲𑀗𑁆𑀖𑀺𑀓𑀸𑀦𑀦𑁆𑀢𑀺 𑀬𑁂𑀲𑀁 𑀧𑀭𑀯𑀸𑀤𑀻𑀦𑀁 𑀮𑀤𑁆𑀥𑀺 𑀳𑁄𑀢𑀺. 𑀓𑁂𑀲𑀁 𑀮𑀤𑁆𑀥𑀺 𑀯𑀺𑀬. 𑀫𑀳𑀸𑀲𑀗𑁆𑀖𑀺𑀓𑀸𑀦𑀁 𑀮𑀤𑁆𑀥𑀺 𑀲𑁂𑀬𑁆𑀬𑀣𑀸𑀧𑀻𑀢𑀺 𑀅𑀢𑁆𑀣𑁄. 𑀢𑁂 𑀲𑀦𑁆𑀥𑀸𑀬𑀸𑀢𑀺 𑀢𑁂 𑀧𑀭𑀯𑀸𑀤𑀻𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀜𑀸𑀡𑁂𑀦 𑀥𑀸𑀭𑁂𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀲𑀓𑀯𑀸𑀤𑀺𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀼𑀘𑁆𑀙𑀸 𑀳𑁄𑀢𑀺. 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀲𑁆𑀲 𑀧𑀝𑀺𑀚𑀸𑀦𑀦𑀸 𑀳𑁄𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬𑀸𑀢𑀺 𑀧𑀼𑀝𑁆𑀞𑁄𑀢𑀺 𑀲𑀓𑀯𑀸𑀤𑀺𑀦𑀸 𑀧𑀼𑀭𑀢𑁆𑀣𑀺 𑀫𑀸𑀬𑀸𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑁂 𑀲𑀢𑀺. 𑀲𑀓𑁆𑀬𑀫𑀼𑀦𑀺𑀦𑁆𑀢𑀺 𑀲𑀓𑁆𑀬𑀯𑀁𑀲 𑀔𑀢𑁆𑀢𑀺𑀬𑀚𑀸𑀢𑀺𑀪𑀽𑀢𑀁 𑀅𑀫𑁆𑀳𑀸𑀓𑀁 𑀕𑁄𑀢𑀫𑀩𑀼𑀤𑁆𑀥𑀁 𑀲𑀦𑁆𑀥𑀸𑀬. 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀧𑀭𑀯𑀸𑀤𑀻𑀧𑀼𑀕𑁆𑀕𑀮𑁄 𑀅𑀧𑀦𑁂𑀢𑀺. 𑀧𑀼𑀦 𑀧𑀼𑀝𑁆𑀞𑁄𑀢𑀺 𑀲𑀓𑀯𑀸𑀤𑀺𑀦𑀸 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺 𑀧𑀼𑀘𑁆𑀙𑀺𑀢𑁂 𑀲𑀢𑀺. 𑀮𑀤𑁆𑀥𑀺𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀜𑁆𑀜𑀮𑁄𑀓𑀥𑀸𑀢𑀼𑀬𑀁 𑀩𑀼𑀤𑁆𑀥𑁄 𑀅𑀢𑁆𑀣𑀺 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀸𑀢𑀺 𑀫𑀺𑀘𑁆𑀙𑀸𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀻𑀢𑀺 𑀧𑀭𑀯𑀸𑀤𑀻 𑀧𑀼𑀕𑁆𑀕𑀮𑁄 𑀧𑀝𑀺𑀚𑀸𑀦𑀸𑀢𑀺. 𑀬𑀤𑀺 𑀧𑀦 𑀅𑀜𑁆𑀜𑀮𑁄𑀓𑀥𑀸𑀢𑀼𑀬𑀁 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀺. 𑀏𑀯𑀁 𑀲𑀢𑀺 𑀢𑀲𑁆𑀲 𑀦𑀸𑀫𑀕𑁄𑀢𑁆𑀢𑀸𑀤𑀺𑀁 𑀢𑁆𑀯𑀁 𑀓𑀣𑁂𑀳𑀻𑀢𑀺 𑀲𑀓𑀯𑀸𑀤𑀺𑀲𑁆𑀲 𑀘𑁄𑀤𑀦𑀸𑀯𑀘𑀦𑀁 𑀤𑀲𑁆𑀲𑁂𑀢𑀼𑀁 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀘 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀁 ‘‘𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸 𑀓𑀺𑀁𑀚𑀘𑁆𑀘𑁄…𑀧𑁂… 𑀚𑀦𑀧𑀤𑁂𑀯𑀸𑀢𑀺. 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺.

𑀏𑀢𑁆𑀣 ¶ 𑀘 𑀧𑀦 𑀲𑀓𑀯𑀸𑀤𑀺𑀦𑀸 𑀓𑀺𑀦𑁆𑀦𑀸𑀫𑁄𑀢𑁆𑀬𑀸𑀤𑀺𑀦𑀸 𑀧𑀼𑀘𑁆𑀙𑀺𑀢𑁂 𑀧𑀭𑀯𑀸𑀤𑀻𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀲𑀩𑁆𑀩𑀮𑁄𑀓𑀥𑀸𑀢𑀽𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀤𑀺𑀁 𑀅𑀚𑀸𑀦𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑁄 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀲𑁆𑀫𑀸 𑀧𑀦𑁂𑀢𑁆𑀣 𑀲𑀓𑀯𑀸𑀤𑀻 𑀧𑀼𑀕𑁆𑀕𑀮𑀲𑁆𑀲 𑀮𑀤𑁆𑀥𑀺𑀬𑀸 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺𑀧𑀺 𑀳𑀺 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀏𑀯𑀁 𑀲𑀦𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀫𑀢𑀺𑀁 𑀬𑀣𑀸𑀪𑀽𑀢𑀢𑁄 𑀚𑀸𑀦𑀦𑁆𑀢𑁄 𑀧𑀲𑁆𑀲𑀦𑁆𑀢𑁄 𑀫𑀳𑀸𑀧𑀜𑁆𑀜𑁄 𑀇𑀤𑁆𑀥𑀺𑀫𑀸 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀻𑀳𑀺 𑀙𑀴𑀪𑀺𑀜𑁆𑀜𑁂𑀳𑀺 𑀲𑀫𑁆𑀧𑀦𑁆𑀦𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀢𑁆𑀢𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀫𑀸𑀢𑀺𑀓𑀸𑀦𑀬𑁂𑀦 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀁 𑀤𑁂𑀲𑁂𑀦𑁆𑀢𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀓𑀣𑁂𑀬𑁆𑀬 𑀘. 𑀦𑀸𑀢𑀺. 𑀢𑀲𑁆𑀫𑀸 𑀅𑀬𑀁 𑀓𑀣𑀸𑀯𑀢𑁆𑀣𑀼𑀧𑀸𑀴𑀺 𑀘 𑀢𑀤𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑀤𑀻𑀧𑀦𑁂 𑀲𑀩𑁆𑀩𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀯𑀼𑀢𑁆𑀢𑀯𑀘𑀦𑁂𑀳𑀺 𑀤𑀴𑁆𑀳𑀢𑀭𑀁 𑀧𑀥𑀸𑀦𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀦 𑀧𑀦 𑀩𑀼𑀤𑁆𑀥𑀸𑀏𑀯 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀣 𑀔𑁄 𑀮𑀤𑁆𑀥𑀩𑁆𑀬𑀸𑀓𑀭𑀡𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀧𑀘𑁆𑀘𑁂𑀓𑀩𑁄𑀥𑀺 𑀲𑀢𑁆𑀢𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸 𑀧𑀭𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀸 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸 𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑁂 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑀢𑁆𑀣. 𑀓𑀲𑁆𑀫𑀸, 𑀢𑁂𑀲𑀼 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸, 𑀢𑁂𑀲𑀁 𑀧𑀦 𑀅𑀪𑀺𑀦𑀻𑀳𑀸𑀭𑁄 𑀧𑀸𑀭𑀫𑀻𑀲𑀫𑁆𑀪𑀭𑀡𑀁 𑀜𑀸𑀡𑀧𑀭𑀺𑀧𑀸𑀘𑀦𑀜𑁆𑀘 𑀢𑀲𑁆𑀫𑀺𑀁𑀏𑀯 𑀲𑀫𑀺𑀚𑁆𑀛𑀢𑀺, 𑀦 𑀅𑀜𑁆𑀜𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀧𑀤𑀸𑀦 𑀲𑀼𑀢𑁆𑀢𑀝𑀻𑀓𑀸𑀬𑀁 𑁋

‘‘𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀯𑀓𑀩𑁄𑀥𑀺𑀬𑀸 𑀅𑀪𑀺𑀦𑀻𑀳𑀸𑀭𑁄 𑀲𑀸𑀯𑀓𑀧𑀸𑀭𑀫𑀺𑀬𑀸 𑀲𑀫𑁆𑀪𑀭𑀡𑀁 𑀧𑀭𑀺𑀧𑀸𑀘𑀦𑀜𑁆𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑁂 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂𑀏𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀢𑁆𑀣𑀸’’𑀢𑀺. 𑀢𑀣𑁂𑀯𑁂𑀢𑀁 𑀏𑀓𑀦𑀺𑀧𑀸𑀢𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀜𑁆𑀘𑀸𑀢𑀺.

𑀏𑀢𑀭𑀳𑀺 ¶ 𑀧𑀦 𑀅𑀧𑀭𑁂 𑀆𑀘𑀭𑀺𑀬𑀸 ‘‘𑀆𑀡𑀓𑁆𑀔𑁂𑀢𑁆𑀢𑀪𑀽𑀢𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀧𑀦 𑀯𑀘𑀦𑀁 𑀅𑀬𑀼𑀢𑁆𑀢𑀫𑁂𑀯. 𑀓𑀲𑁆𑀫𑀸, 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂𑀢𑀺 𑀏𑀢𑁆𑀣 𑀅𑀜𑁆𑀜𑀲𑀤𑁆𑀤𑀲𑁆𑀲 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀦𑁆𑀢𑀺𑀧𑀤𑀢𑁄 𑀅𑀜𑁆𑀜𑀲𑁆𑀲 𑀅𑀧𑀸𑀤𑀸𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 𑀘 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀩𑀳𑀽𑀲𑀼 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀼𑀤𑁆𑀥𑀲𑁆𑀲 𑀅𑀦𑀘𑁆𑀙𑀭𑀺𑀬𑀢𑁆𑀢𑀸 𑀘. 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑀺 𑀏𑀓𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁

‘‘𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀏𑀓𑀧𑀼𑀕𑁆𑀕𑀮𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄’’𑀢𑀺. 𑀅𑀜𑁆𑀜𑀁 𑀧𑀦 𑀓𑀸𑀭𑀡𑀁 𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀧𑀺 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺. 𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸 𑀩𑀼𑀤𑁆𑀥𑀅𑀧𑀤𑀸𑀦𑀧𑀸𑀴𑀺𑀬𑀁 𑁋

‘‘𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂, 𑀬𑀸𑀬𑀢𑁄 𑀦𑀢𑁆𑀣𑀺 𑀅𑀦𑁆𑀢𑀓𑀁;

𑀢𑀲𑁆𑀫𑀺𑀜𑁆𑀘 𑀤𑀺𑀲𑀸𑀪𑀸𑀕𑀫𑁆𑀳𑀺, 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂 𑀅𑀲𑀗𑁆𑀔𑀬𑀸;

𑀧𑀪𑀸 𑀧𑀓𑀺𑀢𑁆𑀢𑀺𑀢𑀸 𑀫𑀬𑁆𑀳𑀁, 𑀬𑀫𑀓𑀸 𑀭𑀁𑀲𑀺𑀯𑀸𑀳𑀦𑀸;

𑀏𑀢𑁆𑀣𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀪𑀯𑁂’’𑀢𑀺.

𑀯𑀼𑀢𑁆𑀢𑀸𑀲𑀼 𑀤𑁆𑀯𑀻𑀲𑀼 𑀕𑀸𑀣𑀸𑀲𑀼 𑀧𑀞𑀫𑀕𑀸𑀣𑀸𑀬 𑀅𑀢𑁆𑀣𑀁 𑀩𑀼𑀤𑁆𑀥𑀲𑁆𑀲 𑀅𑀦𑀸𑀥𑀺𑀧𑁆𑀧𑀸𑀬𑁂𑀦 𑀕𑀳𑁂𑀢𑁆𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸 𑀩𑀼𑀤𑁆𑀥𑀸 𑀅𑀲𑀗𑁆𑀔𑀬𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀧𑀦𑁂𑀢𑀁 𑀅𑀬𑀼𑀢𑁆𑀢𑀫𑁂𑀯 𑀅𑀲𑀼𑀦𑁆𑀤𑀭𑀫𑁂𑀯. 𑀓𑀲𑁆𑀫𑀸, 𑀧𑀸𑀴𑀺𑀬𑀸 𑀘 𑀅𑀝𑁆𑀞𑀓𑀣𑀸𑀝𑀻𑀓𑀸𑀯𑀘𑀦𑁂𑀳𑀺 𑀘 𑀯𑀺𑀭𑀼𑀤𑁆𑀥𑀢𑁆𑀢𑀸 𑀘 𑀢𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀕𑁆𑀕𑀳𑀡𑀲𑁆𑀲 𑀫𑀺𑀘𑁆𑀙𑀢𑁆𑀢𑀸 𑀘. 𑀇𑀫𑀸𑀬 𑀳𑀺 𑀧𑀸𑀴𑀺𑀬𑀸 𑀕𑀸𑀣𑀸𑀬 𑀯𑀸 𑀅𑀜𑁆𑀜𑀸𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀅𑀝𑁆𑀞𑀓𑀣𑀸𑀲𑀼 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀯𑀘𑀦𑁂𑀦 𑀘, 𑀢𑀻𑀡𑀺 𑀳𑀺 ¶ 𑀧𑀺𑀝𑀓𑀸𑀦𑀺…𑀧𑁂… 𑀇𑀫𑀸 𑀢𑀺𑀲𑁆𑀲𑁄 𑀲𑀁𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂…𑀧𑁂… 𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀯𑀘𑀦𑁂𑀦 𑀘 𑀉𑀚𑀼𑀓𑀁 𑀯𑀺𑀭𑀼𑀚𑁆𑀛𑀢𑀺 𑀘. 𑀪𑀤𑁆𑀤𑀦𑁆𑀢𑀫𑀳𑀸 𑀩𑀼𑀤𑁆𑀥𑀖𑁄𑀲𑀸𑀤𑀬𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀢𑀁 𑀧𑀸𑀴𑀺𑀁 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀺𑀢𑁂𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀅𑀩𑁆𑀪𑀓𑁆𑀔𑀸𑀦𑀁 𑀆𑀧𑀚𑁆𑀚𑀢𑀺 𑀘. 𑀓𑀺𑀁 𑀧𑀦𑁂𑀢𑁂 𑀢𑀺𑀧𑀺𑀝𑀓𑀥𑀭𑀸 𑀢𑀺𑀓𑁆𑀔𑀯𑀺𑀲𑀤𑀚𑀯𑀦 𑀕𑀫𑁆𑀪𑀻𑀭𑀸𑀤𑀺𑀜𑀸𑀡𑀺𑀓𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦 𑀧𑀲𑁆𑀲𑁂𑀬𑁆𑀬𑀼𑀁. 𑀧𑀲𑁆𑀲𑁂𑀬𑁆𑀬𑀼𑀁 𑀏𑀯. 𑀢𑀲𑁆𑀫𑀸 𑀅𑀬𑀼𑀢𑁆𑀢𑀫𑁂𑀯. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀆𑀕𑀢𑀁 𑀲𑀼𑀢𑁆𑀢𑀁 𑀦𑀢𑁆𑀣𑀻𑀢𑀺𑀆𑀤𑀺𑀯𑀘𑀦𑀫𑁂𑀯 𑀬𑀼𑀢𑁆𑀢𑀢𑀭𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀢𑀺𑀧𑀤𑀁 𑀢𑀲𑁆𑀫𑀺𑀜𑁆𑀘 𑀤𑀺𑀲𑀸𑀪𑀸𑀕𑀫𑁆𑀳𑀻𑀢𑀺𑀧𑀤𑁂 𑀯𑀺𑀲𑁂𑀲𑀦𑀁, 𑀅𑀲𑀗𑁆𑀔𑀬𑀸𑀢𑀺𑀧𑀤𑀁 𑀤𑀼𑀢𑀺𑀬𑀕𑀸𑀣𑀸𑀬 𑀧𑀪𑀸𑀢𑀺𑀧𑀤𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀮𑁄𑀓𑁂 𑀘𑀓𑁆𑀓𑀯𑀸𑀴𑀮𑁄𑀓𑁂 𑀤𑀲𑀯𑀺𑀥𑀸 𑀤𑀲 𑀓𑁄𑀝𑁆𑀞𑀸𑀲𑀸 𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀬𑀸𑀬𑀢𑁄 𑀬𑀸𑀬𑀦𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀫𑁂 𑀅𑀦𑁆𑀢𑀓𑀁 𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂 𑀩𑀼𑀤𑁆𑀥𑀲𑁆𑀲 𑀤𑀲𑀲𑀳𑀲𑁆𑀲𑀺𑀲𑀗𑁆𑀔𑀸𑀢𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀽𑀢𑁂 𑀢𑀲𑁆𑀫𑀺𑀜𑁆𑀘 𑀤𑀺𑀲𑀸𑀪𑀸𑀕𑀫𑁆𑀳𑀺 𑀫𑀬𑁆𑀳𑀁 𑀅𑀲𑀗𑁆𑀔𑀬𑀸 𑀲𑀗𑁆𑀔𑀸𑀭𑀳𑀺𑀢𑀸 𑀬𑀫𑀓𑀸 𑀬𑀼𑀕𑀴𑀸 𑀬𑀼𑀕𑀴𑀸 𑀳𑀼𑀢𑁆𑀯𑀸 𑀭𑀁𑀲𑀺𑀯𑀸𑀳𑀦𑀸 𑀭𑀁𑀲𑀺𑀯𑀳𑀦𑁆𑀢𑀸 𑀭𑀁𑀲𑀺𑀫𑀼𑀜𑁆𑀘𑀫𑀸𑀦𑀸 𑀯𑀸 𑀧𑀪𑀸 𑀘𑀓𑁆𑀓𑀭𑀢𑀦𑀫𑀡𑀺𑀭𑀢𑀦𑀸𑀤𑀻𑀦𑀁 𑀆𑀮𑁄𑀓𑀸 𑀧𑀓𑀺𑀢𑁆𑀢𑀺𑀢𑀸 𑀧𑀸𑀓𑀝𑀸 𑀧𑀢𑁆𑀣𑀭𑀺𑀢𑀸 𑀯𑀸. 𑀏𑀢𑁆𑀣𑀦𑁆𑀢𑀭𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁 𑀭𑀁𑀲𑀺𑀲𑀫𑀽𑀳𑁂𑀦 𑀯𑀺𑀧𑀼𑀮𑁄 𑀩𑀳𑀼𑀢𑀭𑁄 𑀆𑀮𑁄𑀓𑁄 𑀪𑀯𑁂 𑀅𑀳𑁄𑀲𑀺𑀦𑁆𑀢𑀺. 𑀅𑀬𑀫𑀢𑁆𑀣𑁄 𑀘𑀓𑁆𑀓𑀺𑀦𑁆𑀤𑀸𑀪𑀺𑀲𑀺𑀭𑀻𑀲𑀤𑁆𑀥𑀫𑁆𑀫 𑀥𑀚𑀫𑀳𑀸𑀥𑀫𑁆𑀫𑀭𑀸𑀚𑀸𑀥𑀺𑀭𑀸𑀚𑀕𑀼𑀭𑀽𑀢𑀺𑀮𑀤𑁆𑀥𑀮𑀜𑁆𑀙𑀺𑀢𑁂𑀦 𑀆𑀘𑀭𑀺𑀬𑀩𑀼𑀥𑁂𑀦 𑀮𑀺𑀔𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀪𑀕𑀯𑀸 𑀳𑀺 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀸𑀮𑁂 𑀫𑀬𑁆𑀳𑀁𑀘𑀓𑁆𑀓𑀭𑀢𑀦𑀫𑀡𑀻𑀭𑀢𑀦𑀸𑀤𑀻𑀦𑀁 𑀅𑀲𑀗𑁆𑀔𑀬𑀸 𑀧𑀪𑀸 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑁂 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂 𑀧𑀸𑀓𑀝𑀸 𑀧𑀢𑁆𑀣𑀭𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀉𑀧𑁆𑀧𑀚𑁆𑀚𑀦𑀩𑀼𑀤𑁆𑀥𑀸𑀦𑀁 𑀅𑀲𑀗𑁆𑀔𑀬𑀪𑀸𑀯𑀦𑁆𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀩𑀼𑀤𑁆𑀥𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀁 ‘‘𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑁂 𑀤𑀲𑀯𑀺𑀥𑀸 𑀤𑀲𑀓𑁄𑀝𑁆𑀞𑀸𑀲𑀸 𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀬𑀸𑀬𑀢𑁄 𑀬𑀸𑀬𑀦𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀓𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀢𑀲𑁆𑀫𑀺𑀁 𑀫𑀬𑀸 𑀕𑀢𑀝𑁆𑀞𑀸𑀦𑁂 𑀤𑀺𑀲𑀸𑀪𑀸𑀕𑁂 𑀯𑀸 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂 𑀩𑀼𑀤𑁆𑀥𑀯𑀺𑀲𑀬𑀸 𑀅𑀲𑀗𑁆𑀔𑀬𑀸 𑀲𑀗𑁆𑀔𑀸𑀭𑀳𑀺𑀢𑀸. 𑀧𑀪𑀸 𑀧𑀓𑀺𑀢𑁆𑀢𑀺𑀢𑀸𑀢𑀺 𑀢𑀤𑀸 𑀘𑀓𑁆𑀓𑀯𑀢𑁆𑀢𑀺 𑀭𑀸𑀚𑀓𑀸𑀮𑁂 𑀫𑀬𑁆𑀳𑀁 𑀧𑀪𑀸 𑀘𑀓𑁆𑀓𑀭𑀢𑀦𑀫𑀡𑀺𑀭𑀢𑀦𑀸𑀤𑀻𑀦𑀁 𑀧𑀪𑀸 𑀆𑀮𑁄𑀓𑀸 𑀬𑀫𑀓𑀸 𑀬𑀼𑀕𑀴𑀸 𑀬𑀼𑀕𑀴𑀸 𑀳𑀼𑀢𑁆𑀯𑀸 𑀭𑀁𑀲𑀺𑀯𑀸𑀳𑀦𑀸 𑀭𑀁𑀲𑀺𑀫𑀼𑀜𑁆𑀘𑀫𑀸𑀦𑀸 𑀧𑀓𑀺𑀢𑁆𑀢𑀺𑀢𑀸 𑀧𑀸𑀓𑀝𑀸. 𑀏𑀢𑁆𑀣𑀦𑁆𑀢𑀭𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁 𑀭𑀁𑀲𑀺𑀲𑀫𑀽𑀳𑀁 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀩𑀳𑀼𑀢𑀭𑁄 𑀪𑀯𑁂 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑁆𑀣 𑀘 𑀧𑀞𑀫𑀕𑀸𑀣𑀸𑀬 𑀧𑀼𑀩𑁆𑀩𑀟𑁆𑀠𑀲𑁆𑀲 𑀏𑀓𑀯𑀸𑀓𑁆𑀬𑀪𑀸𑀯𑀢𑁄 𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑁂…𑀧𑁂… 𑀅𑀦𑁆𑀢𑀓𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀟𑁆𑀠𑀲𑁆𑀲 𑀤𑀼𑀢𑀺𑀬𑀕𑀸𑀣𑀸𑀬𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂…𑀧𑁂… 𑀅𑀲𑀗𑁆𑀔𑀬𑀸 𑀲𑀗𑁆𑀔𑀸𑀭𑀳𑀺𑀢𑀸 𑀧𑀪𑀸 𑀧𑀓𑀺𑀢𑁆𑀢𑀺𑀢𑀸𑀢𑀺 𑀢𑀤𑀸 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂…𑀧𑁂… 𑀪𑀯𑁂 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀲𑀗𑁆𑀔𑀬𑀸𑀢𑀺𑀧𑀤𑀁 𑀤𑀼𑀢𑀺𑀬𑀕𑀸𑀣𑀸𑀬 𑀧𑀪𑀸𑀢𑀺𑀧𑀤𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀚𑀺𑀦𑀸𑀮𑀗𑁆𑀓𑀸𑀭𑀝𑀻𑀓𑀸𑀬𑀁 𑀧𑀦 𑀏𑀯𑀫𑀲𑁆𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢 𑀜𑀸𑀡𑀸𑀘𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑁂 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳.

‘‘𑀅𑀦𑀦𑁆𑀢𑀲𑀢𑁆𑀢𑁂𑀲𑀼 𑀘 𑀮𑁄𑀓𑀥𑀸𑀢𑀼𑀲𑀼,

𑀏𑀓𑁄𑀯 𑀲𑀩𑁆𑀩𑁂𑀧𑀺 𑀲𑀫𑀸 𑀦 𑀢𑁂𑀦𑀸’’𑀢𑀺.

𑀢𑀢𑁆𑀣 𑀅𑀦𑀦𑁆𑀢𑀮𑁄𑀓𑀥𑀸𑀢𑀽𑀲𑀼 𑀏𑀓𑁂𑀓𑀺𑀲𑁆𑀲𑀁 𑀮𑁄𑀓𑀥𑀸𑀢𑀼𑀬𑀸 𑀅𑀦𑀦𑁆𑀢𑀲𑀢𑁆𑀢𑁂𑀲𑀼 𑀢𑁂𑀦 𑀢𑀣𑀸𑀕𑀢𑁂𑀦 𑀲𑀫𑁄 𑀏𑀓𑁄𑀧𑀺 𑀦𑀢𑁆𑀣𑀺. 𑀲𑀘𑁂 𑀏𑀓𑁄 𑀧𑀦 𑀲𑀫𑁄 𑀦 𑀪𑀯𑁂𑀬𑁆𑀬. 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑀚𑁆𑀛𑀁 𑀳𑀼𑀢𑁆𑀯𑀸 𑀲𑀫𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀘𑁂. 𑀢𑀣𑀸𑀧𑀺 𑀦𑀢𑁆𑀣𑀺, 𑀲𑀩𑁆𑀩𑁂 𑀏𑀓𑀚𑁆𑀛𑀁 𑀳𑀼𑀢𑁆𑀯𑀸𑀧𑀺 𑀇𑀫𑀺𑀦𑀸 𑀏𑀓𑀓𑁂𑀦 𑀲𑀫𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 ¶ 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀦𑀦𑁆𑀢𑀮𑁄𑀓𑀥𑀸𑀢𑀼𑀲𑀽𑀢𑀺𑀆𑀤𑀺𑀦𑀸 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑁂𑀲𑀼 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀦 𑀫𑀬𑀸 𑀧𑀣𑀯𑁄𑀚𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑁄 𑀯𑀺𑀬 𑀤𑀲𑁆𑀲𑀺𑀢𑁂𑀳𑀺 𑀅𑀢𑀺𑀤𑀴𑁆𑀳𑀢𑀭𑁂𑀳𑀺 𑀲𑀸𑀥𑀓𑀯𑀘𑀦𑁂𑀳𑀺 𑀇𑀢𑁄 𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀫𑀺𑀘𑁆𑀙𑀸𑀯𑀸𑀤𑁄 𑀲𑀽𑀭𑀺𑀬𑁄 𑀅𑀦𑁆𑀥𑀓𑀸𑀭𑀁 𑀧𑀝𑀺𑀳𑀦𑀢𑀺 𑀯𑀺𑀬 𑀧𑀝𑀺𑀳𑀦𑀺𑀬𑀢𑀺 𑀅𑀧𑀦𑀺𑀬𑀢𑀻𑀢𑀺 𑀲𑀤𑁆𑀥𑀳𑀓𑀁 𑀤𑀝𑁆𑀞𑀩𑁆𑀩𑁄𑀢𑀺.

𑀫𑀼𑀦𑀺𑀦𑁆𑀤𑀓𑁆𑀓𑁄𑀢𑀺 𑀫𑀼𑀦𑀺𑀦𑁆𑀤 𑀅𑀓𑁆𑀓𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀩𑀼𑀤𑁆𑀥𑀸𑀤𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀥𑀫𑁆𑀫𑁂 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀼𑀦𑀺. 𑀫𑀦𑀥𑀸𑀢𑀼 𑀜𑀸𑀡𑁂 𑀇. 𑀫𑀓𑀸𑀭𑁂 𑀅𑀲𑁆𑀲𑀼𑀢𑁆𑀢𑀁. 𑀅𑀣 𑀯𑀸 𑀫𑀼𑀦𑀸𑀢𑀺 𑀲𑀩𑁆𑀩𑀥𑀫𑁆𑀫𑁂 𑀲𑀓 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀤𑀺𑀦𑀸 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀫𑀼𑀦𑀺. 𑀫𑀼𑀦𑀢𑀺 𑀳𑀺𑀢𑀸𑀳𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀸 𑀫𑀼𑀦𑀺, 𑀪𑀕𑀯𑀸. 𑀫𑀼𑀦𑀥𑀸𑀢𑀼 𑀧𑀝𑀺𑀯𑀺𑀚𑁆𑀛𑀦𑁂, 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀫𑀼𑀦𑀸𑀢𑀺 𑀚𑀸𑀦𑀸𑀢𑀻𑀢𑀺 𑀯𑀸 𑀫𑁄𑀦𑀁. 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀯𑀼𑀢𑁆𑀢𑀜𑁆𑀳𑀺 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀫𑁄𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀢𑀜𑁆𑀳𑀺 𑀫𑀼𑀦𑀸𑀢𑀻𑀢𑀺 𑀫𑁄𑀦𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀫𑁄𑀦𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀦𑀺, 𑀪𑀕𑀯𑀸. 𑀫𑀼𑀦𑀺 𑀘 𑀲𑁄 𑀇𑀦𑁆𑀤𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀥𑀫𑁆𑀫𑁂𑀦 𑀅𑀪𑀺𑀪𑀯𑀢𑀺 𑀇𑀦𑁆𑀤𑁄 𑀘𑀸𑀢𑀺 𑀫𑀼𑀦𑀺𑀦𑁆𑀤𑁄, 𑀪𑀕𑀯𑀸. 𑀅𑀣 𑀯𑀸 𑀫𑀼𑀦𑀻𑀦𑀁 𑀧𑀜𑁆𑀘𑀫𑀼𑀦𑀻𑀦𑀁 𑀇𑀦𑁆𑀤𑁄𑀢𑀺 𑀫𑀼𑀦𑀺𑀦𑁆𑀤𑁄, 𑀪𑀕𑀯𑀸. 𑀦 𑀓𑀫𑀢𑀺 𑀦 𑀕𑀘𑁆𑀙𑀢𑀺 𑀧𑀸𑀤𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀚𑀯𑀺𑀫𑀸𑀦𑁂𑀦 𑀕𑀘𑁆𑀙𑀢𑀻𑀢𑀺 𑀅𑀓𑁆𑀓𑁄, 𑀆𑀤𑀺𑀘𑁆𑀘𑁄. 𑀦𑀧𑀼𑀩𑁆𑀩 𑀓𑀫𑀼𑀥𑀸𑀢𑀼 𑀕𑀢𑀺𑀬𑀁 𑀓𑁆𑀯𑀺. 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀓𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀅𑀣 𑀯𑀸 𑀬𑀼𑀕𑀦𑁆𑀥𑀭𑀼𑀩𑁆𑀩𑁂𑀥𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀓𑁆𑀓𑁄. 𑀅𑀭𑀥𑀸𑀢𑀼 𑀕𑀫𑀦𑁂 𑀓𑀧𑀘𑁆𑀘𑀬𑁄. 𑀓𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀢𑀁 𑀢𑀁 𑀭𑀸𑀲𑀺𑀢𑁄 𑀢𑀁 𑀢𑀁 𑀭𑀸𑀲𑀺𑀁 𑀅𑀭𑀢𑀺 𑀬𑀸𑀢𑀻𑀢𑀺 𑀯𑀸 𑀅𑀓𑁆𑀓𑁄. 𑀅𑀣 𑀯𑀸 𑀫𑀳𑀦𑁆𑀢𑀚𑀼𑀢𑀢𑀸𑀬 𑀅𑀓𑁆𑀓𑀺𑀬𑀢𑀺 𑀅𑀪𑀺𑀢𑁆𑀣𑀯𑀺𑀬𑀢𑀺 𑀢𑀧𑁆𑀧𑀲𑀦𑁆𑀦𑁂𑀳𑀺 𑀚𑀦𑁂𑀳𑀻𑀢𑀺 𑀅𑀓𑁆𑀓𑁄, 𑀆𑀤𑀺𑀘𑁆𑀘𑁄. 𑀅𑀓𑁆𑀓𑀥𑀸𑀢𑀼 𑀣𑀯𑀦𑁂 𑀅. 𑀫𑀼𑀦𑀺𑀦𑁆𑀤𑁄 𑀘 𑀲𑁄 𑀅𑀓𑁆𑀓𑁄 𑀘𑀸𑀢𑀺 𑀫𑀼𑀦𑀺𑀦𑁆𑀤𑀓𑁆𑀓𑁄, 𑀅𑀓𑁆𑀓𑁄 𑀆𑀤𑀺𑀘𑁆𑀘𑁄 𑀯𑀺𑀬 𑀯𑀸 𑀫𑀼𑀦𑀺𑀦𑁆𑀤𑁄𑀢𑀺 𑀫𑀼𑀦𑀺𑀦𑁆𑀤𑀓𑁆𑀓𑁄, 𑀩𑀼𑀤𑁆𑀥𑁄. 𑀬𑀣𑀸 𑀳𑀺 𑀲𑀽𑀭𑀺𑀬𑁄 𑀅𑀢𑁆𑀢𑀦𑁄 ¶ 𑀲𑀳𑀲𑁆𑀲𑀭𑀁𑀲𑀺𑀬𑀸 𑀏𑀓𑀘𑀓𑁆𑀓𑀯𑀸𑀴𑁂 𑀢𑀺𑀫𑀺𑀭𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀤𑀺𑀦𑁂 𑀤𑀺𑀦𑁂 𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀧𑁆𑀧𑀤𑁂𑀲𑀁 𑀓𑁄𑀝𑀺𑀲𑀳𑀲𑁆𑀲𑀧𑁆𑀧𑀤𑁂𑀲𑀁 𑀯𑀸 𑀤𑀲𑀤𑀺𑀲𑀁 𑀯𑀸 𑀑𑀪𑀸𑀲𑁂𑀢𑁆𑀯𑀸 𑀯𑀺𑀭𑁄𑀘𑀫𑀸𑀦𑁄 𑀘𑀭𑀢𑀺, 𑀏𑀯𑀫𑁂𑀯 𑀪𑀕𑀯𑀸𑀧𑀺 𑀅𑀢𑁆𑀢𑀦𑁄 𑀲𑀤𑁆𑀥𑀫𑁆𑀫𑀭𑀁 𑀲𑀺𑀬𑀸 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀯𑀺𑀦𑁂𑀬𑁆𑀬𑀸𑀦𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀤𑀺𑀦𑁂 𑀤𑀺𑀦𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀯𑁂𑀦𑁂𑀬𑁆𑀬𑀲𑀢𑁆𑀢𑀲𑀫𑀽𑀳𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑁄𑀪𑀸𑀲𑁂𑀦 𑀚𑁄𑀢𑀬𑀫𑀸𑀦𑁄 𑀯𑀺𑀭𑁄𑀘𑀦𑀁 𑀘𑀭𑀢𑀻𑀢𑀺 𑀞𑀸𑀦𑀸𑀦𑀼𑀭𑀽𑀧𑀁 𑀫𑀼𑀦𑀺𑀦𑁆𑀤𑀓𑁆𑀓𑁄𑀢𑀺 𑀣𑁄𑀫𑁂𑀢𑀺. 𑀅𑀬𑀁 𑀲𑀫𑀸𑀲𑁄𑀧𑀫𑀸 𑀳𑀻𑀦𑀽𑀧𑀫𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀼𑀤𑁆𑀥𑁂𑀢𑀺 𑀭𑀸𑀕𑀸𑀤𑀺𑀫𑀮𑁂𑀳𑀺 𑀯𑀺𑀲𑀼𑀤𑁆𑀥𑁂. 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀻𑀢𑀺 𑀲𑀼𑀤𑁆𑀥𑁄, 𑀢𑀺𑀪𑀯𑁄. 𑀲𑀼𑀥𑀥𑀸𑀢𑀼 𑀲𑁄𑀘𑁂𑀬𑁆𑀬𑁂𑀢𑀺. 𑀢𑀺𑀪𑀯 𑀓𑀼𑀳𑀭𑁂𑀢𑀺 𑀢𑀺𑀪𑀯𑀲𑀗𑁆𑀔𑀸𑀢𑀓𑀫𑀮𑀲𑀭𑁂. 𑀓𑀫𑀮𑀲𑀭𑀁 𑀯𑀺𑀬 𑀢𑀺𑀪𑀯𑀲𑁆𑀫𑀺𑀁 𑀯𑀸 𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺 𑀪𑀯𑁄. 𑀪𑀽𑀥𑀸𑀢𑀼 𑀲𑀢𑁆𑀢𑀸𑀬𑀁 𑀡. 𑀢𑀬𑁄 𑀪𑀯𑀸 𑀢𑀺𑀪𑀯𑀸, 𑀓𑀸𑀫𑀭𑀽𑀧𑀸𑀭𑀽𑀧𑀪𑀽𑀫𑀺 𑀮𑀩𑁆𑀪𑀢𑀺. 𑀓𑀼𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀁 𑀳𑀭𑀢𑀻𑀢𑀺 𑀓𑀼𑀳𑀭𑁄. 𑀓𑀼𑀧𑀼𑀩𑁆𑀩𑀳𑀭𑀥𑀸𑀢𑀼 𑀳𑀭𑀡𑁂 𑀅. 𑀢𑀬𑁄 𑀪𑀯𑀸 𑀘 𑀢𑁂 𑀓𑀼𑀳𑀭𑁄 𑀘𑀸𑀢𑀺 𑀢𑀺𑀪𑀯𑀓𑀼𑀳𑀭𑁄, 𑀓𑀼𑀳𑀭𑁄 𑀯𑀺𑀬 𑀢𑀬𑁄 𑀪𑀯𑀸𑀢𑀺 𑀯𑀸 𑀢𑀣𑀸. 𑀢𑀲𑁆𑀫𑀺𑀁 𑀢𑀺𑀪𑀯𑀓𑀼𑀳𑀭𑁂. 𑀓𑀫𑀮 𑀓𑀣𑀺𑀢𑀦𑁆𑀢𑀺 𑀉𑀧𑁆𑀧𑀮𑀦𑁆𑀢𑀺 𑀓𑀣𑁂𑀢𑀩𑁆𑀩𑀁 𑀓𑀁 𑀚𑀮𑀁 𑀅𑀮𑀬𑀢𑀺 𑀯𑀺𑀪𑀽𑀲𑀬𑀢𑀻𑀢𑀺 𑀓𑀫𑀮𑀁, 𑀉𑀧𑁆𑀧𑀮𑀁. 𑀓𑀁𑀲𑀤𑁆𑀤𑀽𑀧𑀧𑀤 𑀅𑀮𑀥𑀸𑀢𑀼 𑀯𑀺𑀪𑀽𑀲𑀦𑁂 𑀅. 𑀅𑀣 𑀯𑀸 𑀓𑀫𑀺𑀬𑀢𑀺 𑀇𑀘𑁆𑀙𑀺𑀬𑀢𑀻𑀢𑀺 𑀓𑀫𑀮𑀁. 𑀓𑀫𑀼𑀥𑀸𑀢𑀼 𑀇𑀘𑁆𑀙𑀸𑀬𑀁 𑀅𑀮𑀧𑀘𑁆𑀘𑀬𑁄. 𑀓𑀫𑀮𑀦𑁆𑀢𑀺 𑀉𑀧𑁆𑀧𑀮𑀦𑁆𑀢𑀺 𑀓𑀣𑀺𑀬𑀢𑀻𑀢𑀺 𑀓𑀫𑀮𑀓𑀣𑀺𑀢𑀁. 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀦𑁆𑀢𑀺 𑀯𑀺𑀦𑁂𑀬𑁆𑀬𑀧𑀸𑀡𑀑𑀖𑀦𑁆𑀢𑀺 𑀧𑀤𑀯𑀺𑀪𑀸𑀕𑁄. 𑀯𑀺𑀦𑁂𑀢𑀩𑁆𑀩𑀲𑀢𑁆𑀢𑀲𑀫𑀽𑀳𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑁂𑀢𑀩𑁆𑀩𑁄 𑀤𑀫𑁂𑀢𑀩𑁆𑀩𑁄 𑀲𑀢𑁆𑀣𑀸𑀭𑀸𑀢𑀺 𑀯𑀺𑀦𑁂𑀬𑁆𑀬𑁄, 𑀲𑀢𑁆𑀢𑁄. 𑀯𑀺𑀧𑀼𑀩𑁆𑀩𑀦𑀺𑀥𑀸𑀢𑀼 𑀤𑀫𑀦𑁂 𑀡𑁆𑀬𑁄. 𑀧𑀡𑀦𑁆𑀢𑀺 𑀚𑀻𑀯𑀦𑁆𑀢𑀺 𑀲𑀢𑁆𑀢𑀸 𑀅𑀦𑁂𑀦𑀸𑀢𑀺 𑀧𑀸𑀡𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀡𑀥𑀸𑀢𑀼 𑀚𑀻𑀯𑀸𑀬𑀁 𑀡. 𑀢𑀁 𑀅𑀲𑁆𑀲 𑀅𑀢𑁆𑀣𑀺 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀧𑀸𑀡𑁄, 𑀲𑀢𑁆𑀢𑁄. 𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢𑁂 𑀡𑀧𑀘𑁆𑀘𑀬𑁄. 𑀯𑀺𑀦𑁂𑀬𑁆𑀬𑁄 𑀘 𑀲𑁄 𑀧𑀸𑀡𑁄 𑀘𑀸𑀢𑀺 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄. 𑀅𑀯𑀬𑀯𑁂𑀦 ¶ 𑀲𑀳 𑀳𑀦𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀑𑀖𑁄, 𑀲𑀫𑀽𑀳𑁄. 𑀅𑀯𑀧𑀼𑀩𑁆𑀩 𑀳𑀦𑀥𑀸𑀢𑀼 𑀕𑀢𑀺𑀬𑀁 𑀡𑁄. 𑀅𑀯𑀲𑁆𑀲 𑀑. 𑀳𑀦𑀲𑁆𑀲 𑀖𑁄. 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑀸𑀦𑀁 𑀑𑀖𑁄 𑀲𑀫𑀽𑀳𑁄𑀢𑀺 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑁄, 𑀢𑀁.

𑀥𑀫𑁆𑀫𑀭𑀁𑀲𑀺𑀯𑀭𑁂𑀳𑀻𑀢𑀺 𑀉𑀢𑁆𑀢𑀫𑀥𑀫𑁆𑀫𑀲𑀗𑁆𑀔𑀸𑀢𑀭𑀁𑀲𑀻𑀳𑀺. 𑀏𑀢𑁆𑀣 𑀘 𑀥𑀫𑁆𑀫𑁄𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀲𑀢𑁆𑀢𑁂 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀯𑀝𑁆𑀝𑀤𑀼𑀓𑁆𑀔𑁂𑀲𑀼 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀥𑀭𑀥𑀸𑀢𑀼 𑀥𑀸𑀭𑀡𑁂 𑀭𑀫𑁆𑀫𑀧𑀘𑁆𑀘𑀬𑁄. 𑀥𑀸𑀭𑁂𑀢𑀺 𑀘 𑀅𑀧𑀸𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀁 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀺𑀬𑀫𑀕𑁆𑀕𑁄 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺. 𑀓𑀲𑁆𑀫𑀸, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀓𑀢𑁆𑀢𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀯𑀲𑁂𑀦 𑀢𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀁 𑀧𑀢𑁆𑀯𑀸 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑁆𑀢𑀸. 𑀘𑀢𑀼𑀭𑀺𑀬𑀨𑀮𑀜𑁆𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀘 𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺. 𑀓𑀲𑁆𑀫𑀸, 𑀨𑀮𑀲𑁆𑀲 𑀫𑀕𑁆𑀕𑁂𑀦 𑀯𑀺𑀤𑁆𑀥𑀁𑀲𑀺 𑀢𑀩𑁆𑀩𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦 𑀫𑀕𑁆𑀕𑀸𑀦𑀼𑀓𑀽𑀮𑀧𑁆𑀧 𑀯𑀢𑁆𑀢𑀢𑁆𑀢𑀸. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀘 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀢𑀤𑀥𑀺𑀕𑀫 𑀳𑁂𑀢𑀼𑀢𑁆𑀢𑀸. 𑀅𑀣 𑀯𑀸 𑀓𑀺𑀮𑁂𑀲𑁂 𑀥𑀼𑀦𑀸𑀢𑀺 𑀓𑀫𑁆𑀧𑀢𑀺 𑀘𑀮𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀥𑀫𑁆𑀫𑁄, 𑀘𑀢𑀼𑀭𑀺𑀬𑀫𑀕𑁆𑀕𑁄. 𑀥𑀼𑀦𑀥𑀸𑀢𑀼 𑀓𑀫𑁆𑀧𑀦𑁂 𑀭𑀫𑁆𑀫𑁄. 𑀅𑀭𑀺𑀬𑁂𑀳𑀺 𑀥𑀸𑀭𑀺𑀬𑀢𑀺 𑀧𑀝𑀺𑀯𑀺𑀚𑁆𑀛𑀺𑀬𑀢𑀺 𑀲𑀘𑁆𑀙𑀺𑀓𑀭𑀺𑀬𑀢𑀺 𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦𑀸𑀢𑀺 𑀥𑀫𑁆𑀫𑁄, 𑀦𑀺𑀩𑁆𑀩𑀸𑀦𑀁. 𑀥𑀭𑀥𑀸𑀢𑀼 𑀜𑀸𑀡𑁂. 𑀥𑀁𑀲𑁂𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺 𑀫𑀕𑁆𑀕𑀧𑁆𑀧𑀳𑀻𑀦𑀓𑀺𑀮𑁂𑀲𑀯𑀸𑀲𑀦𑀦𑁆𑀢𑀺 𑀥𑀫𑁆𑀫𑁄, 𑀅𑀭𑀺𑀬𑀨𑀮𑀁. 𑀥𑀁𑀲𑀥𑀸𑀢𑀼 𑀯𑀺𑀤𑁆𑀥𑀁𑀲𑀦𑁂. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀢𑀺 𑀘 𑀥𑀸𑀭𑀺𑀬𑀢𑀺 𑀘 𑀧𑀡𑁆𑀟𑀺𑀢𑁂𑀳𑀺 𑀦 𑀩𑀸𑀮𑁂𑀳𑀻𑀢𑀺 𑀥𑀫𑁆𑀫𑁄, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀥𑀫𑁆𑀫𑁄 𑀘 𑀥𑀫𑁆𑀫𑁄 𑀘 𑀥𑀫𑁆𑀫𑁄 𑀘 𑀥𑀫𑁆𑀫𑁄 𑀘𑀸𑀢𑀺 𑀥𑀫𑁆𑀫𑁄 𑀏𑀓 𑀲𑁂𑀲𑀦𑀬𑁂𑀦, 𑀤𑀲𑀯𑀺𑀥𑁄 𑀥𑀫𑁆𑀫𑁄 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀙𑀢𑁆𑀢𑀯𑀺𑀫𑀸𑀦𑁂 𑁋

𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁,

𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀢𑀫𑀼𑀧𑁂𑀳𑀻’’𑀢𑀺.

𑀅𑀬𑀁 ¶ 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀫𑀸𑀡𑀯 𑀭𑀸𑀕𑀯𑀺𑀭𑀸𑀕𑀁 𑀭𑀸𑀕𑀯𑀺𑀕𑀢𑀁 𑀇𑀫𑀁 𑀥𑀫𑁆𑀫𑀁 𑀫𑀕𑁆𑀕𑀥𑀫𑁆𑀫𑀜𑁆𑀘 𑀅𑀦𑁂𑀚𑀁 𑀏𑀚𑀸𑀲𑀗𑁆𑀔𑀸𑀢𑀢𑀡𑁆𑀳𑀸𑀯𑀺𑀭𑀳𑀺𑀢𑀁 𑀅𑀲𑁄𑀓𑀁 𑀲𑁄𑀓𑀯𑀺𑀭𑀳𑀺𑀢𑀁 𑀇𑀫𑀁 𑀥𑀫𑁆𑀫𑀁 𑀨𑀮𑀥𑀫𑁆𑀫𑀜𑁆𑀘, 𑀅𑀲𑀗𑁆𑀔𑀢𑀁 𑀲𑀗𑁆𑀔𑀢𑀯𑀺𑀭𑀳𑀺𑀢𑀁 𑀇𑀫𑀁 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀜𑁆𑀘. 𑀅𑀧𑁆𑀧𑀝𑀺𑀓𑀽𑀮𑀁 𑀅𑀯𑀺𑀭𑁄𑀥𑀦𑀁 𑀫𑀥𑀼𑀭𑀁 𑀅𑀢𑁆𑀣𑀩𑁆𑀬𑀜𑁆𑀚𑀦 𑀲𑀫𑁆𑀧𑀦𑁆𑀦𑀢𑁆𑀢𑀸 𑀫𑀥𑀼𑀭𑀁, 𑀧𑀕𑀼𑀡𑀁 𑀧𑀓𑀝𑁆𑀞𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁 𑀲𑀼𑀝𑁆𑀞𑀼 𑀯𑀺𑀪𑀚𑀺𑀢𑀩𑁆𑀩𑀁, 𑀇𑀫𑀁 𑀥𑀫𑁆𑀫𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀘 𑀲𑀭𑀡𑀢𑁆𑀢𑀁 𑀲𑀭𑀡𑀪𑀸𑀯𑀁 𑀉𑀧𑁂𑀳𑀺 𑀉𑀧𑀕𑀘𑁆𑀙𑀸𑀳𑀻𑀢𑀺.

𑀏𑀢𑁆𑀣 𑀳𑀺 𑀓𑀸𑀫𑀭𑀸𑀕𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀧𑀳𑀺𑀬𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀘 𑀲𑁄𑀓𑀲𑁆𑀲 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀦𑁂𑀚𑀫 𑀲𑁄𑀓𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀅𑀲𑀗𑁆𑀔𑀢𑀢𑁆𑀢𑀸 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁. 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀧𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀲𑀫𑁆𑀧𑀦𑁆𑀦𑀢𑀸𑀬 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀲𑀼𑀝𑁆𑀞𑀼 𑀯𑀺𑀪𑀚𑀺𑀢𑀢𑁆𑀢𑀸 𑀘 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑁄𑀧𑀺 𑀧𑀭𑀺𑀬𑀢𑁆𑀢𑀺 𑀥𑀫𑁆𑀫𑁄 𑀓𑀣𑀺𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 ‘‘𑀏𑀢𑁆𑀣 𑀳𑀺 𑀭𑀸𑀕𑀯𑀺𑀭𑀸𑀕𑀦𑁆𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁. 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀧𑁆𑀧𑀝𑀺𑀓𑀽𑀮𑀁 𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸’’𑀢𑀺. 𑀇𑀥 𑀧𑀦 𑀲𑀸𑀫𑀜𑁆𑀜𑀢𑁄 𑀤𑀲𑀯𑀺𑀥𑁄 𑀥𑀫𑁆𑀫𑁄. 𑀯𑀺𑀲𑁂𑀲𑀢𑁄 𑀧𑀦 𑀧𑀭𑀺𑀬𑀢𑁆𑀢𑀺 𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀲𑁆𑀫𑀸, 𑀲𑀼𑀩𑁄𑀥𑁂𑀲𑀻𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀭𑀁𑀲𑀻𑀢𑀺 𑀭𑀲𑀺𑀬𑀦𑁆𑀢𑀺 𑀅𑀲𑁆𑀲𑀸𑀤𑀺𑀬𑀦𑁆𑀢𑀻𑀢𑀺 𑀭𑀁𑀲𑀻, 𑀭𑀲𑀦𑁆𑀢𑀺 𑀅𑀲𑁆𑀲𑀸𑀤𑁂𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺 𑀯𑀸 𑀭𑀁𑀲𑀻, 𑀭𑀲𑀥𑀸𑀢𑀼 𑀅𑀲𑁆𑀲𑀸𑀤𑀦𑁂 𑀅 𑀘 𑀈 𑀘. 𑀅𑀣 𑀯𑀸 𑀭𑀲𑀺𑀬𑀢𑀺 𑀲𑀺𑀦𑁂𑀳𑀺𑀬𑀢𑀺 𑀢𑀁 𑀚𑀦𑁂𑀳𑀻𑀢𑀺 𑀭𑀁𑀲𑀻. 𑀭𑀲𑀥𑀸𑀢𑀼 𑀲𑀺𑀦𑁂𑀳𑁂. 𑀦𑀺𑀕𑁆𑀕𑀳𑀻𑀢𑀸𑀕𑀫𑁄.

𑀯𑀭𑁄𑀢𑀺 𑀉𑀢𑁆𑀢𑀫𑁄, 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑀺𑀢𑀩𑁆𑀩𑁄𑀢𑀺 𑀯𑀭𑁄, 𑀯𑀭𑀢𑀺 𑀦𑀺𑀯𑀸𑀭𑁂𑀢𑀺 𑀳𑀻𑀦𑀦𑁆𑀢𑀺 𑀯𑀸 𑀯𑀭𑁄. 𑀯𑀭𑀥𑀸𑀢𑀼 𑀧𑀢𑁆𑀣𑀦𑁂 𑀦𑀺𑀯𑀸𑀭𑀡𑁂 𑀯𑀸 𑀅. 𑀥𑀫𑁆𑀫𑁄 𑀘 𑀲𑁄 𑀭𑀁𑀲𑀺 𑀘𑀸𑀢𑀺 𑀥𑀫𑁆𑀫𑀭𑀁𑀲𑀺, 𑀥𑀫𑁆𑀫𑀲𑁆𑀲 𑀯𑀸 𑀭𑀁𑀲𑀺 𑀥𑀫𑁆𑀫𑀭𑀁𑀲𑀺. 𑀅𑀬𑀁 𑀧𑀦 𑀲𑀫𑀸𑀲𑁄 𑀅𑀪𑁂𑀤𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑁄 ¶ . 𑀯𑀭𑁄 𑀘 𑀲𑁄 𑀥𑀫𑁆𑀫𑀭𑀁𑀲𑀺 𑀘𑀸𑀢𑀺 𑀥𑀫𑁆𑀫𑀭𑀁𑀲𑀺𑀯𑀭𑁄, 𑀢𑁂𑀳𑀺 𑀥𑀫𑁆𑀫𑀭𑀁𑀲𑀺𑀯𑀭𑁂𑀳𑀺. 𑀲𑀼𑀩𑁄𑀥𑁂𑀲𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀬𑀫𑀸𑀦𑁂𑀦 𑀲𑀼𑀝𑁆𑀞𑀼 𑀧𑀩𑁄𑀥𑁂𑀲𑀺 𑀯𑀺𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀲𑀽𑀭𑀺𑀬𑁄 𑀅𑀢𑁆𑀢𑀦𑁄 𑀭𑀁𑀲𑀺𑀬𑀸 𑀨𑀼𑀲𑀬𑀺𑀢𑁆𑀯𑀸 𑀓𑀼𑀳𑀭 𑀲𑀗𑁆𑀔𑀸𑀢𑁂 𑀲𑀭𑁂 𑀚𑀸𑀢𑀁 𑀉𑀧𑁆𑀧𑀮𑀁 𑀯𑀺𑀓𑀸𑀲𑁂𑀢𑀺, 𑀏𑀯𑀫𑁂𑀯 𑀪𑀕𑀯𑀸𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀤𑁂𑀲𑀦𑀸𑀲𑀗𑁆𑀔𑀸𑀢𑀭𑀁𑀲𑀺𑀬𑀸 𑀓𑀫𑀮𑀲𑀭𑀲𑀗𑁆𑀔𑀸𑀢𑁂 𑀪𑀯𑀢𑁆𑀢𑀬𑁂 𑀯𑀲𑀦𑁆𑀢𑀁 𑀧𑀼𑀜𑁆𑀜𑀽𑀧𑀦𑀺𑀲𑁆𑀲𑀬𑀁 𑀧𑀝𑀺𑀯𑀺𑀚𑁆𑀛𑀸𑀭𑀳𑀁 𑀓𑀫𑀮 𑀲𑀗𑁆𑀔𑀸𑀢𑀁 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀬𑀫𑀸𑀦𑁄 𑀨𑀮𑀥𑀫𑁆𑀫𑁂𑀦 𑀧𑀩𑁄𑀥𑁂𑀲𑀺 𑀯𑀺𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀜𑁆𑀘𑀸𑀢𑀺 𑀢𑀺𑀮𑁄𑀓𑁂 𑀧𑀢𑁆𑀣𑀝𑀧𑀭𑀺𑀓𑀺𑀢𑁆𑀢𑀦𑀁. 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀧𑀢𑁆𑀣𑀝𑀣𑀼𑀢𑀺𑀖𑁄𑀲𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀘𑀲𑀤𑁆𑀤𑁄 𑀘𑁂𑀢𑁆𑀣 𑀧𑀤𑀧𑀽𑀭𑀡𑀫𑀢𑁆𑀢𑁄𑀬𑁂𑀯. 𑀯𑀺𑀲𑁂𑀲𑁂𑀦 𑀯𑀺𑀯𑀺𑀥𑀁 𑀯𑀸 𑀆𑀧𑀢𑀺 𑀯𑀟𑁆𑀠𑀢𑀻𑀢𑀺 𑀩𑁆𑀬𑀸𑀧𑀺𑀢𑁄. 𑀯𑀺𑀧𑀼𑀩𑁆𑀩𑀆𑀧𑀥𑀸𑀢𑀼 𑀩𑁆𑀬𑀸𑀧𑀦𑁂 𑀯𑀟𑁆𑀠𑀦𑁂 𑀯𑀸 𑀢. 𑀩𑁆𑀬𑀸𑀧𑀦𑀁 𑀯𑀸 𑀩𑁆𑀬𑀸𑀧𑀺𑀢𑀁. 𑀓𑀺𑀢𑁆𑀢𑀺𑀬𑀢𑁂 𑀅𑀪𑀺𑀢𑁆𑀣𑀯𑀺𑀬𑀢𑁂 𑀓𑀺𑀢𑁆𑀢𑀺𑀦𑀁. 𑀪𑀸𑀯𑀲𑀸𑀥𑀦𑁄𑀬𑀁. 𑀣𑀼𑀢𑀺𑀓𑁆𑀭𑀺𑀬𑀸 𑀮𑀩𑁆𑀪𑀢𑀺. 𑀓𑀺𑀢𑁆𑀢𑀺𑀬𑀢𑀺 𑀅𑀪𑀺𑀢𑁆𑀣𑀯𑀺𑀬𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀻𑀢𑀺 𑀓𑀺𑀢𑁆𑀢𑀺𑀦𑀁, 𑀣𑀼𑀢𑀺𑀖𑁄𑀲𑁄. 𑀓𑀺𑀢𑁆𑀢𑀥𑀸𑀢𑀼 𑀅𑀪𑀺𑀢𑁆𑀣𑀯𑀦𑁂 𑀬𑀼. 𑀩𑁆𑀬𑀸𑀧𑀺𑀢𑁄 𑀧𑀢𑁆𑀣𑀝𑁄 𑀓𑀺𑀢𑁆𑀢𑀦𑁄 𑀣𑀼𑀢𑀺𑀖𑁄𑀲𑁄 𑀬𑀲𑁆𑀲 𑀲𑁄𑀢𑀺 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑁄, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀢𑀁. 𑀪𑀕𑀯𑀢𑁄 𑀳𑀺 𑀢𑀺𑀮𑁄𑀓𑁂 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑁆𑀬𑀸𑀤𑀻𑀳𑀺 𑀕𑀼𑀡𑁂𑀳𑀺 𑀘 𑀣𑁄𑀫𑀺𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀬𑀸𑀯 𑀪𑀯𑀕𑁆𑀕𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀦𑁆𑀢𑀺 𑀢𑀺𑀮𑁄𑀓𑁂 𑀏𑀓𑀘𑀓𑁆𑀔𑀽𑀢𑀺 𑀧𑀤𑀘𑁆𑀙𑁂𑀤𑁄. 𑀓𑀸𑀫𑀭𑀽𑀧 𑀅𑀭𑀽𑀧𑀲𑀗𑁆𑀔𑀸𑀢𑀸𑀦𑀁 𑀢𑀺𑀮𑁄𑀓𑀸𑀦𑀁 𑀏𑀓𑀁 𑀧𑀜𑁆𑀜𑀸𑀘𑀓𑁆𑀔𑀼𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀬𑁄 𑀮𑁄𑀓𑀸 𑀢𑀺𑀮𑁄𑀓𑀁. 𑀢𑀲𑁆𑀲 𑀘𑀓𑁆𑀔𑀼 𑀯𑀺𑀬 𑀏𑀓 𑀪𑀽𑀢𑀁𑀧𑀜𑁆𑀜𑀸𑀘𑀓𑁆𑀔𑀼 𑀬𑀲𑁆𑀲 𑀲𑁄𑀢𑀺 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀏𑀢𑁆𑀣 𑀘 𑀏𑀓𑀘𑀓𑁆𑀔𑀼𑀲𑀤𑁆𑀤𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀢𑀺𑀮𑁄𑀓𑀲𑁆𑀲 𑀏𑀓𑀁 𑀧𑀜𑁆𑀜𑀸𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀪𑀽𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀪𑀽𑀢𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 ¶ 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀺𑀮𑁄𑀓𑀲𑁆𑀲 𑀏𑀓𑀪𑀽𑀢𑁄 𑀧𑀜𑁆𑀜𑀸𑀘𑀓𑁆𑀔𑀼 𑀳𑀼𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑁂 𑀘𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀢𑀁. 𑀪𑀕𑀯𑀸 𑀳𑀺 𑀧𑀜𑁆𑀜𑀸𑀘𑀓𑁆𑀔𑀼 𑀫𑀬𑀢𑁆𑀢𑀸 𑀲𑀢𑁆𑀢𑁂𑀲𑀼 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀢𑀺𑀮𑁄𑀓𑀲𑁆𑀲 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑁂 ‘‘𑀲𑁄 𑀳𑀸𑀯𑀼𑀲𑁄 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄’’𑀢𑀺. 𑀢𑀲𑁆𑀫𑀸 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀦𑁆𑀢𑀺 𑀣𑁄𑀫𑁂𑀢𑀺.

𑀤𑀼𑀔𑀫𑀲𑀳𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀢𑀺𑀤𑀼𑀓𑁆𑀔𑀫𑀺𑀢𑀝𑁆𑀞𑀸𑀦𑀁 𑀔𑀫𑀦𑀁. 𑀧𑀼𑀣𑀼𑀚𑁆𑀚𑀦𑁂𑀳𑀺 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀔𑀫𑀺𑀢𑀩𑁆𑀩𑀦𑁆𑀢𑀺 𑀤𑀼𑀔𑀫𑀁, 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺 𑀆𑀭𑀫𑁆𑀫𑀡𑀁. 𑀤𑀼𑀓𑁆𑀔𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀚𑁆𑀚𑀩𑀦𑁆𑀥𑀢𑁆𑀢𑀸 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀤𑀼𑀔𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀳𑀢𑀺 𑀔𑀫𑀢𑀻𑀢𑀺 𑀤𑀼𑀔𑀫𑀲𑀳𑀦𑁄, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀲𑀳𑀥𑀸𑀢𑀼 𑀧𑀭𑀺𑀲𑀳𑀦𑁂 𑀬𑀼. 𑀢𑀁 𑀤𑀼𑀔𑀫𑀲𑀳𑀦𑀁. 𑀪𑀕𑀯𑀸 𑀳𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀲𑀼𑀤𑀼𑀓𑁆𑀔𑀫𑀺𑀢𑀁 𑀇𑀝𑁆𑀞𑀸 𑀦𑀺𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑀁 𑀲𑀻𑀢𑀼𑀡𑁆𑀳𑀸𑀤𑀺𑀁 𑀮𑀸𑀪𑀸𑀮𑀸𑀪𑀬𑀲𑀸𑀬𑀲 𑀦𑀺𑀦𑁆𑀤𑀧𑀲𑀁𑀲𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀮𑁄𑀓𑀥𑀫𑁆𑀫𑀜𑁆𑀘 𑀅𑀢𑀺𑀯𑀺𑀬 𑀔𑀫𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀢𑀲𑁆𑀫𑀸 𑀤𑀼𑀔𑀫𑀲𑀳𑀦𑀦𑁆𑀢𑀺 𑀣𑁄𑀫𑁂𑀢𑀺.

𑀫𑀳𑁂𑀲𑀺𑀦𑁆𑀢𑀺 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀁 𑀧𑀭𑀺𑀬𑁂𑀲𑀫𑀸𑀦𑀁 𑀫𑀳𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀫𑀸𑀦𑀁 𑀯𑀸 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀻𑀢𑀺 𑀫𑀳𑁂𑀲𑀻, 𑀫𑀼𑀦𑀺𑀦𑁆𑀤𑀓𑁆𑀓𑁄. 𑀫𑀳𑀦𑁆𑀢𑀲𑀤𑁆𑀤𑀽𑀧 𑀧𑀤 𑀏𑀲𑀥𑀸𑀢𑀼 𑀕𑀯𑁂𑀲𑀦𑁂 𑀈. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 ‘‘𑀫𑀳𑁂𑀲𑀻𑀢𑀺 𑀫𑀳𑁂𑀲𑀻. 𑀪𑀕𑀯𑀸 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀺 𑀕𑀯𑁂𑀲𑀺 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀻. 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀻’’𑀢𑀺. 𑀫𑀳𑀦𑁆𑀢𑁂 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬 𑀥𑀫𑁆𑀫𑁂 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀯𑀸 𑀫𑀳𑁂𑀲𑀻, 𑀫𑀳𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀯𑀸 𑀫𑀳𑁂𑀲𑀻. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 ‘‘𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂 𑀫𑀳𑀦𑁆𑀢𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀫𑀳𑀦𑁆𑀢𑁂 𑀇𑀤𑁆𑀥𑀺𑀧𑀸𑀤𑁂 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 ¶ 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂 𑀫𑀳𑀦𑁆𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀻’’𑀢𑀺. 𑀅𑀣 𑀯𑀸 𑀫𑀳𑁂𑀲𑀓𑁆𑀔𑁂𑀳𑀺 𑀲𑀢𑁆𑀢𑁂𑀳𑀺 𑀏𑀲𑀺𑀬𑀢𑀺 𑀕𑀯𑁂𑀲𑀺𑀬𑀢𑀺 𑀧𑀭𑀺𑀬𑁂𑀲𑀺𑀬𑀢𑀺 𑀅𑀫𑁆𑀳𑀸𑀓𑀁 𑀓𑀳𑀁 𑀩𑀼𑀤𑁆𑀥𑁄𑀢𑀺 𑀫𑀳𑁂𑀲𑀻. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 ‘‘𑀫𑀳𑁂𑀲𑀓𑁆𑀔𑁂𑀳𑀺 𑀯𑀸 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀓𑀳𑀁 𑀩𑀼𑀤𑁆𑀥𑁄’’𑀢𑁆𑀬𑀸𑀤𑀺. 𑀢𑀁 𑀫𑀳𑁂𑀲𑀺𑀁. 𑀢𑀦𑁆𑀢𑀺 𑀫𑀼𑀦𑀺𑀦𑁆𑀤𑀓𑁆𑀓𑀁. 𑀅𑀳𑀁 𑀲𑀺𑀭𑀲𑀸 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀤𑀬𑀼𑀤𑀬𑀭𑀼𑀡𑁄 𑀫𑀳𑀸𑀓𑀭𑀼𑀡𑀸𑀲𑀗𑁆𑀔𑀸𑀢𑀉𑀤𑀬𑀧𑀩𑁆𑀩𑀢𑀼𑀕𑁆𑀕𑀢𑀲𑀽𑀭𑀺𑀬𑀸𑀭𑀼𑀡𑁄, 𑀉𑀤𑀬𑀧𑀩𑁆𑀩 𑀢𑀢𑁄 𑀉𑀕𑁆𑀕𑀢𑀲𑀽𑀭𑀺𑀬𑀸𑀭𑀼𑀡𑁄 𑀯𑀺𑀬 𑀫𑀳𑀸𑀓𑀭𑀼𑀡𑀸 𑀯𑀸, 𑀜𑀸𑀡 𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑁄 𑀯𑀺𑀢𑁆𑀣𑀸𑀭𑀧𑀭𑀺𑀫𑀡𑁆𑀟𑀮𑁄, 𑀯𑀺𑀢𑁆𑀣𑀸𑀭𑀘𑀓𑁆𑀓𑀯𑀸𑀴𑀫𑀡𑁆𑀟𑀮𑀁 𑀯𑀺𑀬 𑀯𑀺𑀧𑀼𑀮𑀸𑀭𑀫𑁆𑀫𑀡𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀸, 𑀏𑀓𑁄 𑀅𑀲𑀳𑀸𑀬𑁄 𑀏𑀓𑀩𑀼𑀤𑁆𑀥𑀪𑀽𑀢𑁄, 𑀬𑁄 𑀬𑀸𑀤𑀺𑀲𑁄 𑀫𑀼𑀦𑀺𑀦𑁆𑀤𑀓𑁆𑀓𑁄 𑀩𑀼𑀤𑁆𑀥𑀸𑀤𑀺𑀘𑁆𑀘𑁄 𑀲𑀼𑀤𑁆𑀥𑁂 𑀭𑀸𑀕𑀸𑀤𑀺𑀫𑀮𑁂𑀳𑀺 𑀯𑀺𑀲𑀼𑀤𑁆𑀥𑁂 𑀢𑀺𑀪𑀯 𑀓𑀼𑀳𑀭𑁂 𑀢𑀺𑀪𑀯𑀲𑀗𑁆𑀔𑀸𑀢𑀓𑀫𑀮𑀲𑀭𑁂, 𑀓𑀫𑀮𑀓𑀣𑀺𑀢𑀁 𑀉𑀧𑁆𑀧𑀮𑀦𑁆𑀢𑀺 𑀓𑀣𑁂𑀢𑀩𑁆𑀩𑀁, 𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀯𑀺𑀦𑁂𑀢𑀩𑁆𑀩𑀲𑀢𑁆𑀢𑀲𑀫𑀽𑀳𑀁, 𑀥𑀫𑁆𑀫𑀭𑀁 𑀲𑀻𑀯𑀭𑁂𑀳𑀺 𑀉𑀢𑁆𑀢𑀫𑀥𑀫𑁆𑀫𑀲𑀗𑁆𑀔𑀸𑀢𑀭𑀁𑀲𑀻𑀳𑀺, 𑀲𑀼𑀩𑁄𑀥𑁂𑀲𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑁂𑀥𑀬𑀫𑀸𑀦𑁂𑀦 𑀲𑀼𑀝𑁆𑀞𑀼 𑀧𑀩𑁄𑀥𑁂𑀲𑀺 𑀯𑀺𑀓𑀸𑀲𑁂𑀲𑀺, 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀁 𑀢𑀺𑀮𑁄𑀓𑁂 𑀧𑀢𑁆𑀣𑀝𑀧𑀭𑀺𑀓𑀺𑀢𑁆𑀢𑀦𑀁, 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀧𑀢𑁆𑀣𑀝𑀣𑀼𑀢𑀺𑀖𑁄𑀲𑀺𑀓𑀁 𑀯𑀸, 𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀁 𑀓𑀸𑀫𑀭𑀽𑀧𑀅𑀭𑀽𑀧 𑀲𑀗𑁆𑀔𑀸𑀢𑀸𑀦𑀁 𑀢𑀺𑀮𑁄𑀓𑀸𑀦𑀁 𑀏𑀓𑀁 𑀧𑀜𑁆𑀜𑀸𑀘𑀓𑁆𑀔𑀼𑀪𑀽𑀢𑀁, 𑀤𑀼𑀔𑀫𑀲𑀳𑀦𑀁 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀢𑀺𑀤𑀼𑀓𑁆𑀔𑀫𑀺𑀢𑀝𑁆𑀞𑀸𑀦𑀁 𑀔𑀫𑀦𑀁, 𑀫𑀳𑁂𑀲𑀺𑀁 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀁 𑀧𑀭𑀺𑀬𑁂𑀲𑀫𑀸𑀦𑀁 𑀫𑀳𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀫𑀸𑀦𑀁 𑀯𑀸, 𑀢𑀁 𑀫𑀼𑀦𑀺𑀦𑁆𑀤𑀓𑁆𑀓𑀁 𑀅𑀳𑀁 𑀲𑀺𑀭𑀲𑀸 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀬𑁄 ¶ 𑀚𑀺𑀦𑁄 𑀅𑀦𑁂𑀓𑀚𑀸𑀢𑀺𑀬𑀁 𑀲𑀧𑀼𑀢𑁆𑀢𑀤𑀸𑀭𑀫𑀗𑁆𑀕𑀚𑀻𑀯𑀺𑀢𑀫𑁆𑀧𑀺;

𑀩𑁄𑀥𑀺𑀧𑁂𑀫𑀢𑁄 𑀅𑀮𑀕𑁆𑀕𑀫𑀸𑀦𑀲𑁄 𑀅𑀤𑀸𑀲𑀺𑀬𑁂𑀯 𑀅𑀢𑁆𑀣𑀺 𑀓𑀲𑁆𑀲;

𑀤𑀸𑀦𑀧𑀸𑀭𑀫𑀺𑀁 𑀢𑀢𑁄 𑀧𑀭𑀁 𑀅𑀧𑀽𑀭𑀺 𑀲𑀻𑀮𑀧𑀸𑀭𑀫𑀸𑀤𑀺𑀓𑀫𑁆𑀧𑀺;

𑀢𑀸𑀲𑀫𑀺𑀤𑁆𑀥𑀺𑀬𑁄𑀧𑀬𑀸𑀢𑀫𑀕𑁆𑀕𑀢𑀁 𑀢𑀫𑁂𑀓𑀤𑀻𑀧𑀓𑀁 𑀦𑀫𑀸𑀫𑀺.

𑁨𑁧. 𑀏𑀯𑀁 𑀯𑀻𑀲𑀢𑀺𑀫𑀸𑀬 𑀕𑀸𑀣𑀸𑀬 𑀫𑀼𑀦𑀺𑀦𑁆𑀤𑀓𑁆𑀓𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀧𑀼𑀩𑁆𑀩𑁂 𑀅𑀦𑁂𑀓𑀚𑀸𑀢𑀺𑀬𑀁 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀸𑀤𑀻𑀳𑀺 𑀘 𑀤𑀸𑀦𑀸𑀤𑀺𑀤𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀕𑀼𑀡𑁂𑀳𑀺 𑀘 𑀣𑁄𑀫𑁂𑀢𑁆𑀯𑀸 𑀚𑀺𑀦𑀁 𑀯𑀦𑁆𑀤𑀺𑀢𑀼𑀓𑀸𑀫𑁄 𑀬𑁄 𑀚𑀺𑀦𑁄 𑀢𑁆𑀬𑀸𑀤𑀺𑀫𑀸𑀳. 𑀅𑀬𑀁 𑀧𑀦 𑀭𑀚 𑀭𑀚 𑀭𑀚 𑀕𑀡𑁂𑀳𑀺 𑀘 𑀕𑀭𑀼𑀮𑀳𑀽𑀳𑀺 𑀘 𑀭𑀘𑀺𑀢𑀢𑁆𑀢𑀸 𑀯𑀻𑀲𑀢𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀯𑀼𑀢𑁆𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀯𑀼𑀢𑁆𑀢 𑀫𑀻𑀤𑀺𑀲𑀦𑁆𑀢𑀼 𑀦𑀸𑀫𑀢𑁄 𑀭𑀚𑀸 𑀭𑀚𑀸 𑀭𑀚𑀸 𑀕𑀭𑀼𑀮𑁆𑀮𑀳𑀽 𑀘𑀸’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀭𑀚𑀸 𑀭𑀚𑀕𑀡𑀸 𑀘 𑀭𑀚𑀸 𑀭𑀚𑀕𑀡𑀸 𑀘 𑀭𑀚𑀸 𑀭𑀚𑀕𑀡𑀸 𑀘 𑀕𑀭𑀼𑀮𑁆𑀮𑀳𑀽 𑀘 𑀘𑁂 𑀲𑀺𑀬𑁆𑀬𑀼𑀁, 𑀈𑀤𑀺𑀲𑀦𑁆𑀢𑀼 𑀈𑀤𑀺𑀲𑀁 𑀧𑀦 𑀕𑀸𑀣𑀸 𑀦𑀸𑀫𑀢𑁄 𑀦𑀸𑀫𑁂𑀦 𑀯𑀼𑀢𑁆𑀢𑀁 𑀯𑀼𑀢𑁆𑀢 𑀕𑀸𑀣𑀸 𑀦𑀸𑀫𑀸𑀢𑀺.

𑀢𑀢𑁆𑀣 𑀧𑀦 𑀬𑁄 𑀚𑀺𑀦𑁄𑀢𑀺 𑀬𑁄 𑀩𑀼𑀤𑁆𑀥𑁄. 𑀲𑁄 𑀳𑀺 𑀤𑁂𑀯𑀧𑀼𑀢𑁆𑀢𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀔𑀦𑁆𑀥𑀫𑀘𑁆𑀘𑀼𑀯𑀲𑁂𑀦 𑀧𑀜𑁆𑀘𑀫𑀸𑀭𑁂 𑀅𑀚𑀺𑀦𑀺 𑀚𑀺𑀦𑀸𑀢𑀺 𑀚𑀺𑀦𑀺𑀲𑁆𑀲𑀢𑀻𑀢𑀺 𑀚𑀺𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀦𑀼 𑀘 𑀩𑀼𑀤𑁆𑀥𑀲𑀸𑀯𑀓𑀸𑀧𑀺 𑀧𑀜𑁆𑀘𑀫𑀸𑀭𑁂 𑀚𑀺𑀦𑀢𑁆𑀢𑀸 𑀚𑀺𑀦𑀸 𑀦𑀸𑀫𑀸𑀢𑀺 𑀘𑁂. 𑀦 𑀪𑀕𑀯𑀢𑁄 𑀧𑀭𑀽𑀧 𑀦𑀺𑀲𑁆𑀲𑀬𑀯𑀺𑀭𑀳𑀦𑀺𑀭𑀢𑀺𑀲𑀬𑀯𑀲𑁂𑀦 𑀧𑀜𑁆𑀘𑀫𑀸𑀭𑀚𑀺𑀦𑀢𑁆𑀢𑀸 𑀪𑀕𑀯𑀸𑀬𑁂𑀯 𑀚𑀺𑀦𑁄 𑀦𑀸𑀫𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀥𑀸𑀢𑀼𑀓𑀣𑀸𑀫𑀽𑀮𑀝𑀻𑀓𑀸𑀬𑀁 𑁋

‘‘𑀢𑀢𑁆𑀣 𑀩𑀮𑀯𑀺𑀥𑀫𑀦 𑀯𑀺𑀲𑀬𑀸𑀢𑀺𑀓𑁆𑀓𑀫𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲, 𑀅𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀲𑁆𑀲, 𑀫𑀘𑁆𑀘𑀼𑀫𑀸𑀭𑀲𑁆𑀲, 𑀘 𑀩𑁄𑀥𑀺𑀫𑀽𑀮𑁂 𑀏𑀯 𑀪𑀜𑁆𑀚𑀺𑀢𑀢𑁆𑀢𑀸 𑀧𑀭𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀁 𑀦𑀺𑀭𑀢𑀺𑀲𑀬𑀁 𑀢𑀁 𑀪𑀜𑁆𑀚𑀦𑀁 𑀉𑀧𑀸𑀤𑀸𑀬 𑀪𑀕𑀯𑀸𑀏𑀯 𑀫𑀸𑀭𑀪𑀜𑁆𑀚𑀦𑁄𑀢𑀺 𑀣𑁄𑀫𑀺𑀢𑁄’’𑀢𑀺.

𑀅𑀦𑁂𑀓𑀚𑀸𑀢𑀺𑀬𑀦𑁆𑀢𑀺 ¶ 𑀅𑀦𑁂𑀓𑀲𑀁𑀲𑀸𑀭𑀪𑀯𑁂. 𑀏𑀢𑁆𑀣 𑀳𑀺 𑀅𑀬𑀁 𑀚𑀸𑀢𑀺𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑁂𑀲 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺 𑀏𑀢𑁆𑀣 𑀪𑀯𑁂 𑀆𑀕𑀢𑁄. 𑀅𑀢𑁆𑀣𑀺 𑀯𑀺𑀲𑀸𑀔𑁂 𑀦𑀺𑀕𑀡𑁆𑀞𑀸 𑀦𑀸𑀫 𑀲𑀫𑀡𑀚𑀸𑀢𑀻𑀢𑀺 𑀏𑀢𑁆𑀣 𑀦𑀺𑀓𑀸𑀬𑁂. 𑀢𑀺𑀭𑀺 𑀦𑀸𑀫 𑀢𑀺𑀡𑀚𑀸𑀢𑀺 𑀦𑀸𑀪𑀺𑀬𑀸 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀁. 𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 𑀏𑀢𑁆𑀣 𑀲𑀗𑁆𑀔𑀢𑀮𑀓𑁆𑀔𑀡𑁂. 𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁. 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀻𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁. 𑀲𑀫𑁆𑀧𑀢𑀺𑀚𑀸𑀢𑁄 𑀆𑀦𑀦𑁆𑀤 𑀩𑁄𑀥𑀺𑀲𑀢𑁆𑀢𑁄𑀢𑀺 𑀏𑀢𑁆𑀣 𑀧𑀲𑀽𑀢𑀺𑀬𑀁. 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀏𑀢𑁆𑀣 𑀓𑀼𑀮𑁂. 𑀬𑀢𑁄𑀳𑀁 𑀪𑀕𑀺𑀦𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄𑀢𑀺 𑀏𑀢𑁆𑀣 𑀅𑀭𑀺𑀬𑀲𑀻𑀮𑁂. 𑀇𑀥 𑀧𑀦𑀸𑀬𑀁 𑀪𑀯𑁂 𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀅𑀦𑁂𑀓𑀲𑀁𑀲𑀸𑀭𑀪𑀯𑁂𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀲𑁄 𑀳𑀺 𑀚𑀸𑀬𑀢𑀺 𑀬𑁄𑀦𑀺 𑀕𑀢𑀺𑀆𑀤𑀺 𑀯𑀺𑀪𑀸𑀕𑁄𑀢𑀺 𑀚𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀏𑀢𑁆𑀣 𑀔𑀦𑁆𑀥𑀸𑀤𑀬𑁄𑀢𑀺 𑀚𑀸𑀢𑀺, 𑀪𑀯𑁄. 𑀚𑀦𑀺𑀥𑀸𑀢𑀼 𑀦𑀺𑀩𑁆𑀩𑀢𑁆𑀢𑀦𑁂𑀢𑀺. 𑀦 𑀏𑀓𑀸 𑀅𑀦𑁂𑀓𑀸, 𑀅𑀦𑁂𑀓𑀸 𑀘 𑀲𑀸 𑀚𑀸𑀢𑀺 𑀘𑀸𑀢𑀺 𑀅𑀦𑁂𑀓 𑀚𑀸𑀢𑀺. 𑀢𑀲𑁆𑀲𑀁 𑀅𑀦𑁂𑀓𑀚𑀸𑀢𑀺𑀬𑀁.

𑀲𑀧𑀼𑀢𑁆𑀢𑀤𑀸𑀭𑀦𑁆𑀢𑀺 𑀧𑀼𑀢𑁆𑀢𑁂𑀦 𑀘 𑀪𑀭𑀺𑀬𑀸𑀬 𑀘 𑀲𑀳𑀺𑀢𑀁. 𑀅𑀢𑁆𑀢𑀦𑁄 𑀓𑀼𑀮𑀁 𑀧𑀼𑀦𑀸𑀢𑀺 𑀧𑀯𑀢𑀺 𑀲𑁄𑀥𑁂𑀢𑀻𑀢𑀺 𑀯𑀸 𑀧𑀼𑀢𑁆𑀢𑁄. 𑀧𑀼𑀥𑀸𑀢𑀼 𑀧𑀯𑀦𑁂 𑀢. 𑀫𑀸𑀢𑀸𑀧𑀺𑀢𑀽𑀦𑀁 𑀫𑀦𑀁 𑀧𑀽𑀭𑁂𑀢𑀻𑀢𑀺 𑀯𑀸 𑀧𑀼𑀢𑁆𑀢𑁄. 𑀧𑀽𑀭𑀥𑀸𑀢𑀼 𑀧𑀽𑀭𑀡𑁂 𑀢. 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘 𑀧𑀼𑀢𑁆𑀢𑁄. 𑀯𑀺𑀭𑀽𑀧𑁂𑀓 𑀲𑁂𑀲𑁄𑀬𑀁. 𑀲𑀸𑀫𑀺𑀓𑁂𑀦 𑀥𑀭𑀺𑀬𑀢𑁂𑀢𑀺 𑀤𑀸𑀭𑁄. 𑀥𑀭𑀥𑀸𑀢𑀼 𑀥𑀸𑀭𑀡𑁂 𑀡𑁄. 𑀥𑀲𑁆𑀲 𑀤𑁄. 𑀅𑀣 𑀯𑀸 𑀧𑀼𑀭𑀺𑀲𑁂𑀦 𑀪𑁄𑀕𑀁 𑀤𑀻𑀬𑀢𑀻𑀢𑀺 𑀤𑀸𑀭𑁄. 𑀤𑀸𑀥𑀸𑀢𑀼 𑀤𑀸𑀦𑁂 𑀭𑀧𑀘𑁆𑀘𑀬𑁄. 𑀤𑀸𑀓𑀼𑀘𑁆𑀙𑀺𑀢𑀸 𑀓𑀸𑀭𑁂𑀦 𑀧𑀼𑀭𑀺𑀲𑁂𑀦 𑀭𑀫𑀺𑀬𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀤𑀸𑀭𑁄, 𑀪𑀭𑀺𑀬𑀸. 𑀤𑀸𑀧𑀼𑀩𑁆𑀩𑀭𑀫𑀼𑀥𑀸𑀢𑀼 𑀭𑀫𑀦𑁂 𑀓𑁆𑀯𑀺. 𑀤𑀸𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑀢𑁆𑀣𑁄. 𑀅𑀪𑀺𑀥𑀸𑀦𑀝𑀻𑀓𑀸𑀬𑀁 𑀧𑀦 ‘‘𑀤𑀸𑀭𑀬𑀦𑁆𑀢𑁂 𑀬𑁂𑀦𑀸𑀢𑀺 𑀤𑀸𑀭𑁄, 𑀤𑀭 𑀯𑀺𑀤𑀸𑀭𑀡𑁂. 𑀅𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀲𑀜𑁆𑀜𑀸𑀬𑀁 𑀡𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀢𑁆𑀢𑁄 𑀘 𑀤𑀸𑀭𑁄 𑀘 𑀧𑀼𑀢𑁆𑀢𑀤𑀸𑀭𑁄. 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀳𑀺 ¶ 𑀧𑀼𑀮𑁆𑀮𑀺𑀗𑁆𑀕𑀁 𑀇𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸. 𑀢𑁂𑀦 𑀲𑀳 𑀯𑀢𑁆𑀢𑀢𑀺 𑀬𑀲𑁆𑀲𑀸𑀢𑀺 𑀲𑀧𑀼𑀢𑁆𑀢𑀤𑀸𑀭𑁄, 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄. 𑀢𑀁 𑀲𑀧𑀼𑀢𑁆𑀢𑀤𑀸𑀭𑀁. 𑀅𑀗𑁆𑀕𑀚𑀻𑀯𑀺𑀢𑀫𑁆𑀧𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀘𑀓𑁆𑀔𑀸𑀤𑀺𑀲𑀭𑀻𑀭𑀸𑀯𑀬𑀯𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬 𑀧𑀝𑀺𑀩𑀤𑁆𑀥𑀲𑀓𑀮𑀲𑀭𑀻𑀭𑀜𑁆𑀘 𑀅𑀗𑁆𑀕𑀢𑀺 𑀕𑀘𑁆𑀙𑀢𑀺 𑀓𑀸𑀬𑁂𑀢𑀺 𑀅𑀗𑁆𑀕𑁄, 𑀘𑀓𑁆𑀔𑀸𑀤𑀺𑀲𑀭𑀻𑀭𑀸𑀯𑀬𑀯𑁄. 𑀅𑀕𑀺𑀥𑀸𑀢𑀼 𑀕𑀢𑀺𑀬𑀁 𑀅. 𑀚𑀻𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀚𑀻𑀯𑀥𑀸𑀢𑀼 𑀧𑀸𑀡𑀥𑀸𑀭𑀡𑁂 𑀢. 𑀅𑀗𑁆𑀕𑁄 𑀘 𑀚𑀻𑀯𑀺𑀢𑀜𑁆𑀘 𑀅𑀗𑁆𑀕𑀚𑀻𑀯𑀺𑀢𑀁. 𑀏𑀢𑁆𑀣 𑀘 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀥𑀦𑀭𑀝𑁆𑀞𑀧𑀭𑀺𑀘𑁆𑀘𑀸𑀕𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀲𑀻𑀮𑀓𑁆𑀔𑀦𑁆𑀥𑀝𑁆𑀞 𑀓𑀣𑀸𑀬𑀁 𑁋

‘‘𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀁 𑀚𑀻𑀯𑀺𑀢𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸’’𑀢𑀺. 𑀅𑀣 𑀯𑀸 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀢𑁂𑀦 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀳𑁂𑀢𑀼𑀧𑀺 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑀫𑁆𑀧𑀺 𑀅𑀮𑀕𑁆𑀕𑀫𑀸𑀦𑀲𑁄 𑀧𑀭𑀺𑀘𑁆𑀘𑀚𑁂𑀢𑀺, 𑀧𑀕𑁂𑀯 𑀥𑀦𑀸𑀤𑀺𑀩𑀸𑀳𑀺𑀭𑀯𑀢𑁆𑀣𑀼 𑀧𑀭𑀺𑀘𑁆𑀘𑀸𑀕𑁂𑀧𑀻𑀢𑀺 𑀲𑀫𑁆𑀪𑀸𑀯𑁂𑀢𑀺.

𑀩𑁄𑀥𑀺𑀧𑁂𑀫𑀢𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀧𑀺𑀬𑀫𑀸𑀦𑀢𑁆𑀢𑀸, 𑀳𑁂𑀢𑁆𑀯𑀢𑁆𑀣𑁂 𑀳𑀺 𑀢𑁄𑀧𑀘𑁆𑀘𑀬𑁄. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀲𑀩𑁆𑀩 𑀜𑁂𑀬𑁆𑀬𑀥𑀫𑁆𑀫𑁂 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀩𑀼𑀥𑀥𑀸𑀢𑀼 𑀜𑀸𑀡𑁂 𑀡. 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑁄 𑀈𑀧𑀘𑁆𑀘𑀬𑁄 𑀘. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁋 ‘‘𑀩𑁄𑀥𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂, 𑀅𑀭𑀺𑀬𑀫𑀕𑁆𑀕𑁂 𑀘 𑀦𑀸𑀭𑀺𑀬’’𑀦𑁆𑀢𑀺. 𑀩𑁄𑀥𑀺 𑀘 𑀩𑁄𑀥𑀺 𑀘 𑀩𑁄𑀥𑀺 𑀲𑀭𑀽𑀧𑁂𑀓𑀲𑁂 𑀲𑀯𑀲𑁂𑀦. 𑀧𑀺𑀬𑀦𑀁 𑀧𑁂𑀫𑁄, 𑀧𑀺𑀬𑀸𑀬𑀺𑀢𑀩𑁆𑀩𑁄𑀢𑀺 𑀯𑀸 𑀧𑁂𑀫𑁄. 𑀧𑀻𑀥𑀸𑀢𑀼 𑀢𑀧𑁆𑀧𑀦𑀓𑀦𑁆𑀢𑀻𑀲𑀼 𑀫𑀦𑀺𑀧𑀘𑁆𑀘𑀬𑁄. 𑀩𑁄𑀥𑀺𑀬𑀸 𑀧𑁂𑀫𑁄 𑀩𑁄𑀥𑀺𑀧𑁂𑀫𑁄, 𑀢𑀢𑁄 𑀩𑁄𑀥𑀺𑀧𑁂𑀫𑀢𑁄. 𑀪𑀕𑀯𑀢𑀸 𑀳𑀺 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑁂𑀳𑀺𑀧𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢 𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀩𑁄𑀥𑀺𑀜𑀸𑀡𑀫𑁂𑀯 𑀧𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑁋

‘‘𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀫𑀤𑁆𑀤𑀻 𑀤𑁂𑀯𑀻 𑀦 𑀤𑁂𑀲𑁆𑀲𑀺𑀬𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀧𑀺𑀬𑁂 𑀅𑀤𑀸𑀲𑀳’’𑀦𑁆𑀢𑀺.

𑀅𑀮𑀕𑁆𑀕𑀫𑀸𑀦𑀲𑁄𑀢𑀺 ¶ 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑀸𑀤𑀻𑀲𑀼 𑀅𑀦𑀮𑁆𑀮𑀻𑀬𑀦 𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀮𑀕𑀦𑀁 𑀲𑀗𑁆𑀕𑀦𑀁 𑀮𑀕𑁆𑀕𑁄, 𑀮𑀕𑀢𑀺 𑀲𑀗𑁆𑀕𑀢𑀺 𑀅𑀮𑁆𑀮𑀬𑀢𑀺 𑀯𑀸𑀢𑀺 𑀮𑀕𑁆𑀕𑁄. 𑀮𑀕𑀥𑀸𑀢𑀼 𑀲𑀗𑁆𑀕𑁂 𑀅𑀮𑁆𑀮𑀻𑀬𑀦𑁂 𑀯𑀸 𑀕𑀧𑀘𑁆𑀘𑀬𑁄. 𑀦 𑀮𑀕𑁆𑀕𑁄 𑀅𑀮𑀕𑁆𑀕𑁄, 𑀦𑀢𑁆𑀣𑀺 𑀮𑀕𑁆𑀕𑁄 𑀏𑀢𑁆𑀣 𑀧𑀼𑀢𑁆𑀢𑀤𑀸𑀭 𑀅𑀗𑁆𑀕𑀚𑀻𑀯𑀺𑀢𑀸𑀤𑀻𑀲𑀽𑀢𑀺 𑀯𑀸 𑀅𑀮𑀕𑁆𑀕𑁄. 𑀫𑀦𑀢𑀺 𑀚𑀸𑀦𑀸𑀢𑀺 𑀆𑀭𑀫𑁆𑀫𑀡𑀦𑁆𑀢𑀺 𑀫𑀦𑁄. 𑀲𑁄𑀬𑁂𑀯 𑀫𑀸𑀦𑀲𑁄. 𑀅𑀮𑀕𑁆𑀕𑁄 𑀫𑀸𑀦𑀲𑁄 𑀬𑀲𑁆𑀲 𑀲𑁄𑀢𑀺 𑀅𑀮𑀕𑁆𑀕𑀫𑀸𑀦𑀲𑁄, 𑀚𑀺𑀦𑁄. 𑀅𑀢𑁆𑀣𑀺𑀓𑀲𑁆𑀲𑀸𑀢𑀺 𑀧𑀼𑀢𑁆𑀢 𑀤𑀸𑀭𑀸𑀤𑀺𑀁 𑀓𑀸𑀫𑀺𑀓𑀲𑁆𑀲, 𑀬𑀸𑀘𑀓𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄 𑀓𑀸𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑁄, 𑀡𑀺𑀓𑁄. 𑀢𑀲𑁆𑀲 𑀅𑀢𑁆𑀣𑀺𑀓𑀲𑁆𑀲. 𑀅𑀤𑀸𑀲𑀺𑀬𑁂𑀯𑀸𑀢𑀺 𑀧𑀽𑀚𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀅𑀤𑀸𑀲𑀺𑀏𑀯𑀸𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀧𑀸𑀭𑀫𑀻𑀧𑀽𑀭𑀡 𑀓𑀸𑀮𑁂 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑁆𑀲𑁂𑀯 𑀲𑀢𑁄 𑀆𑀕𑀢𑀸 𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀻𑀲𑀁 𑀓𑀦𑁆𑀢𑀺𑀢𑁆𑀯𑀸 𑀕𑀮𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀼𑀮𑀯𑀁𑀲𑀧𑁆𑀧𑀤𑀻𑀧𑀁 𑀧𑀼𑀢𑁆𑀢𑀁 𑀫𑀦𑀸𑀧𑀘𑀸𑀭𑀺𑀦𑀺𑀁 𑀪𑀭𑀺𑀬𑀜𑁆𑀘 𑀔𑁂𑀴𑀧𑀺𑀡𑁆𑀟𑀫𑀺𑀯 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀻𑀬𑀫𑀸𑀦𑁄𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀜𑀸𑀡𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸, 𑀦 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑀫𑁆𑀧𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀧𑀜𑁆𑀘 𑀳𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀩𑀼𑀤𑁆𑀥𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑀸 𑀧𑀦 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑀸𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑀩𑁄𑀥𑀺𑀜𑀸𑀡𑀁 𑀮𑀤𑁆𑀥𑀼𑀁 𑀲𑀫𑀢𑁆𑀣𑀸𑀯. 𑀢𑀲𑁆𑀫𑀸𑀬𑁂𑀯 𑀪𑀕𑀯𑀦𑁆𑀢𑀁𑀬𑁂𑀯 𑀲𑀧𑀼𑀢𑁆𑀢𑀤𑀸𑀭𑀫𑀗𑁆𑀕𑀚𑀻𑀯𑀺𑀢𑀫𑁆𑀧𑀺 𑀩𑁄𑀥𑀺𑀧𑁂𑀫𑀢𑁄 𑀅𑀮𑀕𑁆𑀕𑀫𑀸𑀦𑀲𑁄 𑀅𑀤𑀸𑀲𑀺𑀬𑁂𑀯 𑀅𑀢𑁆𑀣𑀺 𑀓𑀲𑁆𑀲𑀸𑀢𑀺 𑀣𑁄𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀝𑁆𑀞 𑀓𑀣𑀸𑀬𑀁 ‘‘𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀥𑀦𑀧𑀭𑀺𑀘𑁆𑀘𑀸𑀕𑀁, 𑀧𑀼𑀢𑁆𑀢𑀧𑀭𑀺𑀘𑁆𑀘𑀸𑀕𑀁, 𑀪𑀭𑀺𑀬𑀧𑀭𑀺𑀘𑁆𑀘𑀸𑀕𑀁, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀁, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀩𑀼𑀤𑁆𑀥𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀻’’𑀢𑀺.

𑀏𑀯𑀁 𑀧𑀜𑁆𑀘𑀳𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑀕𑀼𑀡𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀤𑀸𑀦𑀸𑀤𑀺𑀧𑀸𑀭𑀫𑀻𑀧𑀽𑀭𑀡𑀕𑀼𑀡𑁂𑀦 𑀣𑁄𑀫𑀦𑀁 𑀓𑀢𑁆𑀢𑀼 𑀓𑀸𑀫𑁄 𑀤𑀸𑀦𑀧𑀸𑀭𑀫𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀸𑀦𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺 ¶ 𑀘𑀸𑀕𑀘𑁂𑀢𑀦𑀸 𑀘, 𑀯𑀺𑀭𑀢𑀺 𑀘, 𑀤𑁂𑀬𑁆𑀬𑀥𑀫𑁆𑀫𑁄 𑀘𑀸𑀢𑀺. 𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀳𑀺 𑀘𑀸𑀕𑀘𑁂𑀢𑀦𑀸 𑀤𑀸𑀦𑀁 𑀦𑀸𑀫. 𑀅𑀪𑀬𑀁 𑀤𑁂𑀢𑀻𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀭𑀢𑀻 𑀤𑀸𑀦𑀁 𑀦𑀸𑀫. 𑀤𑀸𑀦𑀁 𑀤𑁂𑀢𑀺 𑀅𑀦𑁆𑀦𑀁 𑀧𑀸𑀦𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀦𑀁 𑀦𑀸𑀫. 𑀢𑀢𑁆𑀣 𑀘𑀸𑀕𑀘𑁂𑀢𑀦𑀸 𑀤𑁂𑀢𑀺 𑀯𑀸 𑀤𑁂𑀬𑁆𑀬𑀥𑀫𑁆𑀫𑀁 𑀤𑁂𑀦𑁆𑀢𑀺 𑀯𑀸 𑀏𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀦𑁆𑀢𑀺 𑀤𑀸𑀦𑀁. 𑀯𑀺𑀭𑀢𑀺 𑀅𑀯𑀔𑀡𑁆𑀟𑀦𑀝𑁆𑀞𑁂𑀦 𑀮𑀯𑀦𑀝𑁆𑀞𑁂𑀦 𑀯𑀸 𑀤𑀸𑀦𑀁. 𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀪𑀬𑀪𑁂𑀭𑀯𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀺𑀮𑁆𑀬𑀁 𑀘𑁂𑀢𑀦𑀁 𑀤𑀸𑀢𑀺 𑀮𑀼𑀦𑀸𑀢𑀺 𑀘𑀸𑀢𑀺 𑀤𑀸𑀦𑀁, 𑀤𑁂𑀬𑁆𑀬𑀥𑀫𑁆𑀫𑁄 𑀤𑀺𑀬𑁆𑀬𑀢𑀻𑀢𑀺 𑀤𑀸𑀦𑀁. 𑀇𑀥 𑀧𑀦 𑀢𑀺𑀯𑀺𑀥𑀁 𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀸𑀭𑀫𑀻𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀣 𑀯𑀸 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀏𑀢𑀺 𑀕𑀘𑁆𑀙𑀢𑀺 𑀏𑀢𑀸𑀬𑀸𑀢𑀺 𑀧𑀸𑀭𑀫𑀺. 𑀧𑀸𑀭𑀲𑀤𑁆𑀤𑀽𑀧𑀧𑀤 𑀇𑀥𑀸𑀢𑀼 𑀕𑀢𑀺𑀬𑀁 𑀓𑁆𑀯𑀺. 𑀧𑀸𑀭𑀁 𑀇𑀢𑀻𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀤𑀸𑀦𑀫𑁂𑀯 𑀧𑀸𑀭𑀫𑀻 𑀤𑀸𑀦𑀧𑀸𑀭𑀫𑀻, 𑀢𑀁 𑀤𑀸𑀦𑀧𑀸𑀭𑀫𑀺𑀁. 𑀢𑀢𑁄𑀢𑀺 𑀤𑀸𑀦𑀧𑀸𑀭𑀫𑀺𑀢𑁄. 𑀧𑀭𑀦𑁆𑀢𑀺 𑀅𑀜𑁆𑀜𑀁. 𑀲𑀻𑀮𑀧𑀸𑀭𑀫𑀸𑀤𑀺𑀓𑀫𑁆𑀧𑀻𑀢𑀺 𑀲𑀻𑀮𑀢𑀻𑀢𑀺 𑀲𑀻𑀮𑀁. 𑀲𑀻𑀮 𑀥𑀸𑀢𑀼 𑀲𑀫𑀸𑀥𑀺𑀫𑁆𑀳𑀺 𑀅. 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀫𑀸𑀤𑀳𑀢𑀺 𑀲𑀫𑀸𑀥𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀮𑀢𑀺 𑀲𑀫𑀸𑀥𑀺𑀬𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀺𑀮𑁆𑀬𑀯𑀲𑁂𑀦 𑀦 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀯𑀸 𑀲𑀻𑀮𑀁, 𑀲𑀻𑀮𑀦𑁆𑀢𑀺 𑀲𑀫𑀸𑀤𑀳𑀦𑁆𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀯𑀸 𑀲𑀻𑀮𑀁. 𑀅𑀣 𑀯𑀸 𑀲𑀻𑀮𑀬𑀢𑀺 𑀉𑀧𑀥𑀸𑀭𑁂𑀢𑀻𑀢𑀺 𑀲𑀻𑀮𑀁, 𑀲𑀻𑀮𑀥𑀸𑀢𑀼 𑀉𑀧𑀥𑀸𑀭𑀡𑁂 𑀅. 𑀓𑀼𑀲𑀮 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀆𑀪𑀼𑀲𑁄 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀮𑁂𑀦𑁆𑀢𑀺 𑀯𑀸 𑀏𑀢𑁂𑀦 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀦𑁆𑀢𑀺 𑀲𑀸𑀥𑀯𑁄𑀢𑀺 𑀲𑀻𑀮𑀁, 𑀲𑀻𑀮𑀺𑀬𑀢𑀺 𑀉𑀧𑀥𑀸𑀭𑀺𑀬𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀳𑀤𑀬𑀫𑀁𑀲𑀦𑁆𑀢𑀭𑀁 𑀉𑀧𑀦𑁂𑀢𑁆𑀯𑀸𑀢𑀺 𑀯𑀸 𑀲𑀻𑀮𑀁, 𑀲𑀻𑀮𑁂𑀢𑀺 𑀉𑀧𑀥𑀸𑀭𑁂𑀢𑀺 𑀢𑀁 𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑀁 𑀅𑀧𑀸𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀦𑀻𑀯𑀸𑀭𑀡𑀯𑀲𑁂𑀦 𑀲𑀼𑀕𑁆𑀕𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀸 𑀲𑀻𑀮𑀁, 𑀲𑀻𑀮𑀫𑁂𑀯 𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀻, 𑀲𑀸 𑀆𑀤𑀺 𑀬𑀸𑀲𑀦𑁆𑀢𑁂𑀢𑀺 𑀲𑀻𑀮𑀧𑀸𑀭𑀫𑀸𑀤𑀺𑀓𑀸. 𑀏𑀢𑁆𑀣 𑀘 𑀆𑀤𑀺𑀲𑀤𑁆𑀤𑁂𑀦 𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸 𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑀼𑀤𑁆𑀥𑀯𑀁𑀲𑀧𑀸𑀴𑀺𑀬𑀁 𑁋

‘‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸 𑀯𑀻𑀭𑀺𑀬𑁂𑀦 𑀧𑀜𑁆𑀘𑀫𑀁;

𑀔𑀦𑁆𑀢𑀺𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸 𑀇𑀫𑀸 𑀤𑀲𑀸’’𑀢𑀺.

𑀧𑀺𑀲𑀤𑁆𑀤𑁄 ¶ 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀅𑀧𑀽𑀭𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀢𑁆𑀣𑀸𑀬 𑀧𑀽𑀭𑀡𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀩𑀼𑀤𑁆𑀥𑀢𑁆𑀣𑀸𑀬 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀅𑀦𑁂𑀓𑀚𑀸𑀢𑀻𑀲𑀼 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑁄 𑀅𑀤𑀺𑀦𑁆𑀦𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀭𑀓𑁆𑀔𑀺𑀢𑀲𑀻𑀮𑀁 𑀦𑀸𑀫 𑀦𑀢𑁆𑀣𑀺. 𑀅𑀧𑀽𑀭𑀺𑀢𑀸 𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺. 𑀅𑀢𑀺𑀩𑀳𑀼𑀫𑁆𑀧𑀺 𑀧𑀽𑀭𑀡𑀁 𑀅𑀓𑀸𑀲𑀺𑀬𑁂𑀯. 𑀪𑀕𑀯𑀸 𑀳𑀺 𑀩𑁄𑀥𑀺𑀲𑀢𑁆𑀢 𑀪𑀽𑀢𑁄 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁 𑀧𑀭𑀸𑀚𑁂𑀢𑁆𑀯𑀸 𑀅𑀥𑀺𑀓𑀁 𑀮𑁄𑀳𑀺𑀢𑀤𑀸𑀦𑀫𑀓𑀸𑀲𑀺. 𑀲𑀓𑀮𑀧𑀣𑀯𑀺𑀬𑀸 𑀧𑀁𑀲𑀼𑀁 𑀧𑀭𑀸𑀚𑁂𑀢𑁆𑀯𑀸 𑀅𑀥𑀺𑀓𑀁 𑀫𑀁𑀲𑀫𑀤𑀸𑀲𑀺. 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀧𑀭𑀸𑀚𑁂𑀢𑁆𑀯𑀸 𑀅𑀥𑀺𑀓𑀁 𑀲𑀻𑀲𑀤𑀸𑀦𑀫𑀤𑀸𑀲𑀺. 𑀆𑀓𑀸𑀲𑁂 𑀢𑀸𑀭𑀓𑀲𑀫𑀽𑀳𑀁 𑀧𑀭𑀸𑀚𑁂𑀢𑁆𑀯𑀸 𑀅𑀥𑀺𑀓𑀁 𑀦𑀬𑀦𑀫𑀤𑀸𑀲𑀺.

𑀢𑁂𑀦 𑀯𑀼𑀢𑁆𑀢𑀁 𑀚𑀺𑀦𑀸𑀮𑀗𑁆𑀓𑀸𑀭𑁂 𑁋

‘‘𑀲𑁄 𑀲𑀸𑀕𑀭𑁂 𑀚𑀮𑀥𑀺𑀓𑀁 𑀭𑀼𑀥𑀺𑀭𑀁 𑀅𑀤𑀸𑀲𑀺,

𑀪𑀽𑀫𑀺𑀁 𑀧𑀭𑀸𑀚𑀺𑀬 𑀲𑀫𑀁𑀲𑀫𑀤𑀸𑀲𑀺 𑀤𑀸𑀦𑀁;

𑀫𑁂𑀭𑀼𑀧𑁆𑀧𑀫𑀸𑀡𑀫𑀥𑀺𑀓𑀜𑁆𑀘 𑀲𑀫𑁄𑀴𑀺𑀲𑀻𑀲𑀁,

𑀔𑁂 𑀢𑀸𑀭𑀓𑀸𑀥𑀺𑀓𑀢𑀭𑀁 𑀦𑀬𑀦𑀁 𑀅𑀤𑀸𑀲𑀻’’𑀢𑀺.

𑀢𑀢𑁆𑀣 𑀘 𑀲𑁄𑀢𑀺 𑀲𑁄 𑀏𑀯𑀁𑀯𑀺𑀥𑁄 𑀩𑁄𑀥𑀺𑀲𑀢𑁆𑀢𑁄. 𑀲𑀸𑀕𑀭𑁂𑀢𑀺 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼. 𑀚𑀮𑀥𑀺𑀓𑀦𑁆𑀢𑀺 𑀉𑀤𑀓𑀢𑁄 𑀅𑀥𑀺𑀓𑀁 𑀓𑀢𑁆𑀯𑀸. 𑀭𑀼𑀥𑀺𑀭𑀁 𑀅𑀤𑀸𑀲𑀻𑀢𑀺 𑀮𑁄𑀳𑀺𑀢𑀤𑀸𑀦𑀫𑀤𑀸𑀲𑀺. 𑀪𑀽𑀫𑀺𑀁 𑀧𑀭𑀸𑀚𑀺𑀬𑀸𑀢𑀺 𑀧𑀁𑀲𑀼𑀧𑀣𑀯𑀺𑀬𑀸 𑀧𑀁𑀲𑀼𑀁 𑀧𑀭𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀫𑀁𑀲𑀁 𑀅𑀥𑀺𑀓𑀁 𑀅𑀤𑀸𑀲𑀺. 𑀫𑁂𑀭𑀼𑀧𑁆𑀧𑀫𑀸𑀡𑀫𑀥𑀺𑀓𑀦𑁆𑀢𑀺 𑀬𑁄𑀚𑀦 𑀅𑀝𑁆𑀞𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑁆𑀲 𑀕𑀺𑀭𑀺𑀭𑀸𑀚𑀲𑁆𑀲 𑀧𑀫𑀸𑀡𑀢𑁄𑀧𑀺 𑀅𑀥𑀺𑀓𑀁 𑀓𑀢𑁆𑀯𑀸. 𑀲𑀫𑁄𑀴𑀺𑀲𑀻𑀲𑀦𑁆𑀢𑀺 𑀫𑁄𑀴𑀺𑀬𑀸 𑀲𑀳 𑀅𑀪𑀺𑀲𑀺𑀢𑁆𑀢𑀲𑀻𑀲𑀁 𑀅𑀤𑀸𑀲𑀺. 𑀔𑁂𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂 𑀆𑀓𑀸𑀲𑁂. 𑀢𑀸𑀭𑀓𑀸𑀥𑀺𑀓𑀢𑀭𑀦𑁆𑀢𑀺 𑀦𑀓𑁆𑀔𑀢𑁆𑀢𑀸𑀤𑀺𑀢𑀸𑀭𑀓𑀭𑀽𑀧𑀢𑁄𑀧𑀺 𑀅𑀥𑀺𑀓𑀁 𑀓𑀢𑁆𑀯𑀸 ¶ . 𑀦𑀬𑀦𑀁 𑀅𑀤𑀸𑀲𑀻𑀢𑀺 𑀦𑁂𑀢𑁆𑀢𑀤𑀸𑀦𑀁 𑀅𑀤𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀸𑀲𑀫𑀺𑀤𑁆𑀥𑀺𑀬𑁄𑀧𑀬𑀸𑀢𑀫𑀕𑁆𑀕𑀢𑀦𑁆𑀢𑀺 𑀢𑀸𑀲𑀁 𑀇𑀤𑁆𑀥𑀺𑀬𑀸 𑀉𑀧𑀬𑀸𑀢𑀁 𑀅𑀕𑁆𑀕𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀸𑀲𑀦𑁆𑀢𑀺 𑀢𑀸𑀲𑀁 𑀧𑀸𑀭𑀫𑀻𑀦𑀁. 𑀇𑀤𑁆𑀥𑀺𑀬𑀸𑀢𑀺 𑀲𑀫𑀺𑀤𑁆𑀥𑀺𑀬𑀸, 𑀳𑁂𑀢𑁆𑀯𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀉𑀧𑀬𑀸𑀢𑀦𑁆𑀢𑀺 𑀉𑀧𑀕𑀢𑀁. 𑀅𑀕𑁆𑀕𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀪𑀸𑀯𑀁, 𑀲𑁂𑀝𑁆𑀞𑀪𑀽𑀢𑀁 𑀩𑀼𑀤𑁆𑀥𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀧𑀤𑀁 𑀉𑀧𑀬𑀸𑀢𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀅𑀕𑁆𑀕𑀲𑀤𑁆𑀤𑁄 𑀘𑁂𑀢𑁆𑀣 𑀉𑀢𑁆𑀢𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀅𑀕𑁆𑀕𑀢𑀺 𑀉𑀢𑁆𑀢𑀫𑀪𑀸𑀯𑀁 𑀲𑁂𑀝𑁆𑀞𑀪𑀽𑀢𑀁 𑀯𑀸 𑀩𑀼𑀤𑁆𑀥𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀕𑁆𑀕𑁄, 𑀚𑀺𑀦𑁄. 𑀅𑀕𑁆𑀕𑀥𑀸𑀢𑀼 𑀕𑀢𑀺𑀬𑀁 𑀅. 𑀅𑀕𑁆𑀕𑀲𑁆𑀲 𑀪𑀸𑀯𑁄 𑀅𑀕𑁆𑀕𑀢𑀁. 𑀪𑀕𑀯𑀸 𑀳𑀺 𑀅𑀦𑀦𑁆𑀢𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩 𑀲𑀢𑁆𑀢𑀸𑀦𑀁 𑀅𑀕𑁆𑀕𑁄 𑀉𑀢𑁆𑀢𑀫𑀢𑀭𑁄 𑀲𑁂𑀝𑁆𑀞𑀢𑀭𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀤𑀲𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 𑁋

‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺.

𑀢𑀫𑁂𑀓𑀤𑀻𑀧𑀓𑀦𑁆𑀢𑀺 𑀢𑀁 𑀏𑀓𑀤𑀻𑀧𑀓𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀦𑁆𑀢𑀺 𑀚𑀺𑀦𑀁. 𑀏𑀓𑀤𑀻𑀧𑀓𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀏𑀓𑀧𑀝𑀺𑀲𑀭𑀡𑀪𑀽𑀢𑀁 𑀧𑀢𑀺𑀝𑁆𑀞𑀪𑀽𑀢𑀁 𑀯𑀸. 𑀤𑀻𑀧𑀓𑀲𑀤𑁆𑀤𑁄 𑀳𑀺 𑀧𑀝𑀺𑀲𑀭𑀡𑀧𑀢𑀺𑀝𑁆𑀞𑀯𑀸𑀘𑀓𑁄 𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀧𑀢𑀺𑀝𑁆𑀞𑀸𑀧𑀦𑀝𑁆𑀞𑁂𑀦 𑀤𑀻𑀧’’𑀦𑁆𑀢𑀺. 𑀤𑀻𑀧𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀧𑀝𑀺𑀲𑀭𑀡𑀪𑀸𑀯𑁂𑀦 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺 𑀯𑀸 𑀤𑀻𑀧𑀓𑁄, 𑀚𑀺𑀦𑁄. 𑀤𑀻𑀧𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀅𑀓𑁄. 𑀏𑀓𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀯𑀸𑀘𑀓𑁄. 𑀏𑀓𑁄 𑀏𑀓𑀪𑀽𑀢𑁄 𑀤𑀻𑀧𑀓𑁄𑀢𑀺 𑀏𑀓𑀤𑀻𑀧𑀓𑁄, 𑀚𑀺𑀦𑁄. 𑀅𑀣 𑀯𑀸 𑀏𑀓𑀤𑀻𑀧𑀓𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀭𑀡𑀪𑀽𑀢𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀲𑀫𑀼𑀤𑁆𑀤𑀤𑀻𑀧𑀓𑀫𑀺𑀯 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑀪𑀽𑀢𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀏𑀓𑀩𑀼𑀤𑁆𑀥𑀪𑀽𑀢𑀁.

𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀢𑀻𑀢𑀺 𑀤𑀻𑀧𑁄. 𑀤𑁆𑀯𑀺𑀥𑀸 𑀆𑀧𑁄𑀲𑀦𑁆𑀤𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀤𑀻𑀧𑁄. 𑀲𑁄𑀬𑁂𑀯 𑀤𑀻𑀧𑀓𑁄. 𑀲𑁄𑀯𑀺𑀬 ¶ 𑀏𑀓𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀏𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀓𑀤𑀻𑀧𑀓𑁄, 𑀚𑀺𑀦𑁄. 𑀬𑀣𑀸 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀦𑀸𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀫𑀼𑀤𑁆𑀤𑀤𑀻𑀧𑁄 𑀧𑀝𑀺𑀲𑀭𑀡𑁄 𑀧𑀢𑀺𑀝𑁆𑀞𑁄 𑀳𑁄𑀢𑀺, 𑀏𑀯𑀁 𑀚𑀺𑀦𑁄 𑀲𑀁𑀲𑀸𑀭𑀲𑀸𑀕𑀭𑁂 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁂 𑀑𑀲𑀻𑀤𑀦𑁆𑀢𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀏𑀓𑀩𑀼𑀤𑁆𑀥𑀪𑀽𑀢𑁄 𑀧𑀝𑀺𑀲𑀭𑀡𑁄 𑀧𑀢𑀺𑀝𑁆𑀞𑁄 𑀳𑁄𑀢𑀻𑀢𑀺 𑀏𑀓𑀤𑀻𑀧𑀓𑀦𑁆𑀢𑀺 𑀣𑁄𑀫𑁂𑀢𑀺. 𑀢𑀁 𑀚𑀺𑀦𑀁 𑀅𑀳𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀬𑁄 𑀚𑀺𑀦𑁄 𑀅𑀦𑁂𑀓 𑀚𑀸𑀢𑀺𑀬𑀁 𑀅𑀦𑁂𑀓𑀲𑀁𑀲𑀸𑀭𑀪𑀯𑁂, 𑀲𑀧𑀼𑀢𑁆𑀢𑀤𑀸𑀭𑀁 𑀧𑀼𑀢𑁆𑀢𑁂𑀦 𑀘 𑀪𑀭𑀺𑀬𑀸𑀬 𑀘 𑀲𑀳𑀺𑀢𑀁, 𑀅𑀗𑁆𑀕𑀚𑀻𑀯𑀺𑀢𑀫𑁆𑀧𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺. 𑀅𑀣 𑀯𑀸 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀘𑀓𑁆𑀔𑀸𑀤𑀺𑀲𑀭𑀻𑀭𑀸𑀯𑀬𑀯𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬 𑀧𑀝𑀺𑀩𑀤𑁆𑀥𑀲𑀓𑀮𑀲𑀭𑀻𑀭𑀜𑁆𑀘, 𑀩𑁄𑀥𑀺𑀧𑁂𑀫𑀢𑁄 𑀅𑀭𑀳𑀢𑁆𑀢𑀫𑀕𑁆𑀕 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀧𑀺𑀬𑀫𑀸𑀦𑀢𑁆𑀢𑀸, 𑀅𑀮𑀕𑁆𑀕 𑀫𑀸𑀦𑀲𑁄𑀢𑀺 𑀧𑀼𑀢𑁆𑀢𑀤𑀸𑀭𑀅𑀗𑁆𑀕𑀚𑀻𑀯𑀺𑀢𑀸𑀤𑀻𑀲𑀼 𑀅𑀦𑀮𑁆𑀮𑀻𑀬𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸, 𑀅𑀢𑁆𑀣𑀺𑀓𑀲𑁆𑀲 𑀧𑀼𑀢𑁆𑀢𑀤𑀸𑀭𑀸𑀤𑀺𑀁 𑀓𑀸𑀫𑀺𑀓𑀲𑁆𑀲 𑀬𑀸𑀘𑀓𑀲𑁆𑀲 𑀅𑀤𑀸𑀲𑀺𑀬𑁂𑀯 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀅𑀤𑀸𑀲𑀺𑀏𑀯. 𑀤𑀸𑀦𑀧𑀸𑀭𑀫𑀺𑀫𑁆𑀧𑀺 𑀢𑀢𑁄 𑀤𑀸𑀦𑀧𑀸𑀭𑀫𑀺𑀢𑁄 𑀧𑀭𑀁 𑀅𑀜𑁆𑀜𑀁 𑀲𑀻𑀮𑀧𑀸𑀭𑀫𑀸𑀤𑀺𑀓𑀫𑁆𑀧𑀺 𑀲𑀻𑀮𑀧𑀸𑀭𑀫𑀻𑀆𑀤𑀺𑀓𑀫𑁆𑀧𑀺, 𑀅𑀧𑀽𑀭𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀢𑁆𑀣𑀸𑀬 𑀧𑀽𑀭𑀡𑀁 𑀅𑀓𑀸𑀲𑀺, 𑀢𑀸𑀲𑀁 𑀧𑀸𑀭𑀫𑀻𑀦𑀁 𑀇𑀤𑁆𑀥𑀺𑀬𑀸 𑀲𑀫𑀺𑀤𑁆𑀥𑀺𑀬𑀸 𑀅𑀕𑁆𑀕𑀢𑀁 𑀉𑀢𑁆𑀢𑀫 𑀪𑀸𑀯𑀁 𑀲𑁂𑀝𑁆𑀞𑀩𑀼𑀤𑁆𑀥𑀢𑁆𑀢𑀁 𑀯𑀸, 𑀉𑀧𑀬𑀸𑀢𑀁 𑀉𑀧𑀕𑀢𑀁, 𑀏𑀓𑀤𑀻𑀧𑀓𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀏𑀓𑀧𑀝𑀺𑀲𑀭𑀡𑀪𑀽𑀢𑀁 𑀏𑀓𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀯𑀸, 𑀤𑀻𑀧𑀓𑀫𑀺𑀯 𑀏𑀓𑀧𑀝𑀺𑀲𑀭𑀡𑀪𑀽𑀢𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀯𑀸 𑀢𑀁 𑀚𑀺𑀦𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀸𑀫𑀻𑀢𑀺.

𑀏𑀓𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀁 𑀦𑀺𑀥𑀦𑀯𑀧𑀼𑀥𑀭𑀁 𑀫𑀸𑀭𑀪𑀗𑁆𑀕𑀁 𑀅𑀪𑀗𑁆𑀕𑀁,

𑀤𑀻𑀧𑀁 𑀤𑀻𑀧𑀁 𑀧𑀚𑀸𑀦𑀁 𑀚𑀬𑀯𑀭𑀲𑀬𑀦𑁂 𑀩𑁄𑀥𑀺𑀧𑀢𑁆𑀢𑀁𑀥𑀺𑀧𑀢𑁆𑀢𑀁;

𑀩𑁆𑀭𑀳𑁆𑀫𑀸𑀩𑁆𑀭𑀳𑁆𑀫𑀸𑀕𑀢𑀸𑀦𑀁 𑀯𑀭𑀕𑀺𑀭𑀓𑀣𑀺𑀓𑀁 𑀧𑀸𑀧𑀳𑀻𑀦𑀁 𑀧𑀳𑀻𑀦𑀁,

𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀁 𑀲𑀢𑀢𑀫𑀪𑀺𑀦𑀫𑁂 𑀢𑀁 𑀫𑀼𑀦𑀺𑀦𑁆𑀤𑀁 𑀫𑀼𑀦𑀺𑀦𑁆𑀤𑀁.

𑁨𑁨. 𑀏𑀯𑀁 ¶ 𑀏𑀓𑀯𑀻𑀲𑀢𑀺𑀫𑀸𑀬 𑀕𑀸𑀣𑀸𑀬 𑀚𑀺𑀦𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀦𑁆𑀢𑁆𑀬𑀸𑀤𑀻𑀳𑀺 𑀤𑀲𑀳𑀺 𑀕𑀼𑀡𑁂𑀳𑀺 𑀣𑁄𑀫𑁂𑀢𑁆𑀯𑀸 𑀫𑀼𑀦𑀺𑀦𑁆𑀤𑀁 𑀯𑀦𑁆𑀤𑀺𑀢𑀼𑀓𑀸𑀫𑁄 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀦𑁆𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀧𑀦 𑀫 𑀭 𑀪 𑀦 𑀬 𑀬 𑀕𑀡𑁂𑀳𑀺 𑀘 𑀢𑀺𑀫𑀼𑀦𑀺𑀬𑀢𑀻𑀳𑀺 𑀘 𑀭𑀘𑀺𑀢𑀢𑁆𑀢𑀸 𑀏𑀓𑀯𑀻𑀲𑀢𑀓𑁆𑀔𑀭𑁂𑀳𑀺 𑀬𑀼𑀢𑁆𑀢𑀸 𑀆𑀤𑁆𑀬𑀦𑁆𑀢𑀬𑀫𑀓𑀸 𑀲𑀤𑁆𑀥𑀭𑀸 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀫𑁆𑀭𑀸 𑀪𑁆𑀦𑀸 𑀬𑁄 𑀬𑁄𑀢𑁆𑀭 𑀬𑁂𑀦 𑀢𑀺𑀫𑀼𑀦𑀺𑀬𑀢𑀺𑀬𑀼𑀢𑀸 𑀲𑀤𑁆𑀥𑀭𑀸 𑀓𑀺𑀢𑁆𑀢𑀺𑀢𑀸𑀬’’𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀫𑁆𑀭𑀸 𑀫𑀭𑀕𑀡𑀸 𑀘 𑀪𑁆𑀦𑀸 𑀪𑀦𑀕𑀡𑀸 𑀘 𑀬𑁄𑀕𑀡𑁄 𑀘 𑀬𑁂𑀦 𑀬𑀕𑀡𑁂𑀦 𑀲𑀳 𑀬𑁄𑀕𑀡𑁄 𑀘 𑀢𑀺𑀫𑀼𑀦𑀺𑀬𑀢𑀺𑀬𑀼𑀢𑀸 𑀲𑀢𑁆𑀢𑀫𑀓𑁆𑀔𑀭𑀦𑁆𑀢𑁂𑀢𑀻𑀳𑀺 𑀬𑀢𑀻𑀳𑀺 𑀬𑀼𑀢𑁆𑀢𑀸 𑀘 𑀘𑁂 𑀲𑀺𑀬𑀼𑀁. 𑀅𑀢𑁆𑀭 𑀇𑀫𑀲𑁆𑀫𑀺𑀁 𑀧𑀓𑀢𑀺 𑀙𑀦𑁆𑀤𑁂 𑀅𑀬𑀁 𑀕𑀸𑀣𑀸 𑀲𑀤𑁆𑀥𑀭𑀸𑀕𑀸𑀣𑀸𑀢𑀺 𑀓𑀺𑀢𑁆𑀢𑀺𑀢𑀸𑀢𑀺. 𑀏𑀢𑁆𑀣 𑀘 𑀫𑀼𑀦𑀺𑀲𑀤𑁆𑀤𑁄 𑀲𑀢𑁆𑀢𑀲𑀗𑁆𑀔𑁆𑀬𑀸𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀓𑀲𑁆𑀫𑀺𑀁 𑀧𑀸𑀤𑁂 𑀲𑀢𑁆𑀢𑀫𑀓𑁆𑀔𑀭𑀦𑁆𑀢𑁂 𑀲𑀢𑁆𑀢𑀫𑀓𑁆𑀔𑀭𑀦𑁆𑀢𑁂 𑀬𑀢𑀻𑀦𑀁 𑀢𑀺𑀧𑀭𑀺𑀯𑀢𑁆𑀢𑀢𑁆𑀢𑀸 𑀢𑀺𑀫𑀼𑀦𑀺𑀬𑀢𑀺𑀬𑀼𑀢𑀸𑀢𑀺 𑀯𑀼𑀢𑁆𑀢𑀁. 𑀏𑀓𑀯𑀻𑀲𑀢𑀓𑁆𑀔𑀭𑀯𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀘 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀦𑁆𑀢𑀺 𑀭𑀸𑀚𑀲𑀗𑁆𑀔𑀸𑀢𑀲𑀫𑁆𑀫𑀼𑀢𑀺𑀤𑁂𑀯 𑀘𑀢𑀼𑀫𑀳𑀸𑀭𑀸𑀚𑀸𑀤𑀺𑀓𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀅𑀢𑀺𑀉𑀢𑁆𑀢𑀫𑀁 𑀅𑀢𑀺𑀲𑁂𑀝𑁆𑀞𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀽𑀢𑀁. 𑀏𑀢𑁆𑀣 𑀳𑀺 𑀤𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸. 𑀢𑁂 𑀳𑀺 𑀫𑀸𑀦𑀼𑀲𑁆𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀳𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀫𑀦𑀼𑀲𑁆𑀲𑀭𑀸𑀚𑀤𑁂𑀯𑀻 𑀓𑀼𑀫𑀸𑀭𑀸 𑀤𑁂𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀦 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀢𑁂 𑀳𑀺 𑀤𑀺𑀩𑁆𑀩𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀳𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀘𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺, 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀇𑀲𑁆𑀲𑀭𑀺𑀬𑀥𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀁 𑀢𑀁 𑀢𑀁 𑀅𑀢𑁆𑀣𑀸𑀦𑀼𑀲𑀸𑀲𑀦𑀜𑁆𑀘 𑀓𑀭𑁄𑀦𑁆𑀢𑀸 𑀯𑁄𑀳𑀭𑀦𑁆𑀢𑀺. 𑀧𑀼𑀜𑁆𑀜𑀸𑀢𑀺𑀲𑀬𑀬𑁄𑀕𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑀦𑁆𑀢𑀺. 𑀬𑀣𑀸𑀥𑀺𑀧𑁆𑀧𑁂𑀢𑀜𑁆𑀘 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀺. 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀘 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑁂𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸𑀬𑀁 𑀆𑀕𑀢𑀦𑀬𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀺𑀤𑁂𑀯𑀦𑁆𑀢𑀺 ¶ 𑀢𑁂𑀲𑀁 𑀤𑁂𑀯𑀸𑀦𑀁 𑀅𑀢𑀺𑀉𑀢𑁆𑀢𑀫𑀁 𑀅𑀢𑀺𑀲𑁂𑀝𑁆𑀞𑀁 𑀯𑀸 𑀯𑀺𑀲𑀼𑀤𑁆𑀥𑀺 𑀤𑁂𑀯𑀪𑀽𑀢𑀁 𑀪𑀕𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀢𑁂𑀲𑀁 𑀲𑀫𑁆𑀫𑀼𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑀢𑁆𑀢𑀸 𑀅𑀢𑀺𑀭𑁂𑀓𑁄 𑀤𑁂𑀯𑁄𑀢𑀺 𑀪𑀕𑀯𑀸 𑀅𑀢𑀺𑀤𑁂𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀯𑁄 𑀤𑁂𑀯𑀸𑀦𑀁 𑀅𑀢𑀺𑀭𑁂𑀓𑁄 𑀅𑀢𑀺𑀉𑀢𑁆𑀢𑀫𑁄 𑀅𑀢𑀺𑀲𑁂𑀝𑁆𑀞𑁄 𑀅𑀢𑀺𑀯𑀺𑀲𑀺𑀝𑁆𑀞𑁄 𑀤𑁂𑀯𑁄 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑁄, 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀽𑀢𑁄 𑀫𑀼𑀦𑀺𑀦𑁆𑀤𑁄 𑀮𑀩𑁆𑀪𑀢𑀺. 𑀢𑀁 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀁.

𑀯𑀼𑀢𑁆𑀢𑀜𑁆𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 ‘‘𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑀲𑀫𑁆𑀫𑀼𑀢𑀺 𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀭𑀸𑀚𑀓𑀼𑀫𑀸𑀭𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀧𑀭𑀺 𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀅𑀭𑀳𑀦𑁆𑀢𑁄 𑀯𑀼𑀘𑁆𑀘𑀦𑁆𑀢𑀻’’𑀢𑀺.

𑀪𑀕𑀯𑀸 𑀧𑀦 𑀦𑀺𑀭𑀸𑀢𑀺𑀲𑀬𑀸𑀬 𑀅𑀪𑀺𑀜𑁆𑀜𑀸𑀓𑀻𑀴𑀸𑀬 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀧𑀭𑀲𑀦𑁆𑀢𑀸𑀦𑀕𑀢𑀧𑀜𑁆𑀘𑀯𑀺𑀥𑀫𑀸𑀭𑀯𑀺𑀚 𑀬𑀺𑀘𑁆𑀙𑀸𑀦𑀺𑀧𑁆𑀨𑀢𑁆𑀢𑀺𑀬𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬 𑀲𑀢𑁆𑀢𑀥𑀦𑀸𑀤𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀲𑀪𑀸𑀯𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁂𑀦 𑀘 𑀯𑁄𑀳𑀸𑀭𑀸𑀢𑀺𑀲𑀬𑁂𑀦 𑀧𑀭𑀫𑀸𑀬 𑀧𑀜𑁆𑀜𑀸𑀲𑀭𑀻𑀭𑀧𑁆𑀧𑀪𑀸𑀲𑀗𑁆𑀔𑀸𑀢𑀸𑀬 𑀚𑀼𑀢𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀜𑀸𑀡𑀲𑀭𑀻𑀭𑀕𑀢𑀺𑀬𑀸 𑀫𑀸𑀭𑀯𑀺𑀚𑀬 𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀭𑀳𑀺𑀢 𑀦𑀺𑀧𑁆𑀨𑀸𑀤𑀦𑁂𑀲𑀼 𑀅𑀧𑁆𑀧𑀝𑀺𑀳𑀢𑀸𑀬 𑀲𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀕𑀫𑀦𑀻𑀬𑀢𑁄 𑀅𑀪𑀺𑀢𑁆𑀣𑀯𑀦𑀻𑀬𑀢𑁄 𑀪𑀢𑁆𑀢𑀺𑀯𑀲𑁂𑀦 𑀓𑀫𑀦𑀻𑀬𑀢𑁄 𑀘 𑀲𑀩𑁆𑀩𑁂 𑀢𑁂 𑀤𑁂𑀯𑁂 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀪𑀺𑀪𑀼𑀬𑁆𑀬 𑀞𑀺𑀢𑀢𑁆𑀢𑀸 𑀢𑁂𑀲𑀁 𑀤𑁂𑀯𑀸𑀦𑀁 𑀅𑀢𑀺𑀲𑁂𑀝𑁆𑀞𑁄 𑀅𑀢𑀺𑀉𑀢𑁆𑀢𑀫𑁄 𑀤𑁂𑀯𑁄𑀢𑀺 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀫𑀳𑀸𑀝𑀻𑀓𑀸𑀬𑀁 𑀆𑀕𑀢𑀦𑀬𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀥𑀦𑀯𑀧𑀼𑀥𑀭𑀦𑁆𑀢𑀺 𑀅𑀦𑁆𑀢𑀺𑀫𑀓𑀸𑀬𑀥𑀸𑀭𑀡𑀁. 𑀏𑀢𑁆𑀣 𑀘 𑀦𑀺𑀥𑀦𑀲𑀤𑁆𑀤𑁄 𑀧𑀭𑀺𑀬𑁄𑀲𑀸𑀦𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀦𑀺𑀥𑁂𑀢𑀺 𑀧𑀭𑀺𑀬𑁄𑀲𑀸𑀦𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀦𑀺𑀥𑀦𑀁. 𑀦𑀺𑀥𑁂𑀢𑀺 𑀯𑀺𑀦𑀸𑀲𑁂𑀢𑀺 𑀪𑀯𑀦𑁆𑀢𑀺 𑀯𑀸 𑀦𑀺𑀥𑀦𑀁, 𑀅𑀦𑁆𑀢𑀺𑀫𑀓𑀸𑀬𑁄 𑀮𑀩𑁆𑀪𑀢𑀺. 𑀦𑀺𑀧𑀼𑀩𑁆𑀩 𑀥𑀸 𑀥𑀸𑀢𑀼 ¶ 𑀦𑀸𑀲𑁂 𑀬𑀼. 𑀯𑀧𑀢𑀺 𑀓𑀼𑀲𑀮𑀸𑀓𑀼𑀲𑀮𑀩𑀻𑀚𑀫𑁂𑀢𑁆𑀣𑀸𑀢𑀺 𑀯𑀧𑀼, 𑀓𑀸𑀬𑁄. 𑀯𑀧𑀥𑀸𑀢𑀼 𑀩𑀻𑀚𑀲𑀦𑁆𑀢𑀸𑀦𑁂 𑀉. 𑀦𑀺𑀥𑀦𑀜𑁆𑀘 𑀢𑀁 𑀯𑀧𑀼 𑀘𑀸𑀢𑀺 𑀦𑀺𑀥𑀦𑀯𑀧𑀼, 𑀢𑀁 𑀥𑀸𑀭𑁂𑀢𑀻𑀢𑀺 𑀦𑀺𑀥𑀦𑀯𑀧𑀼𑀥𑀭𑁄, 𑀫𑀼𑀦𑀺𑀦𑁆𑀤𑁄. 𑀢𑀁 𑀦𑀺𑀥𑀦𑀯𑀧𑀼𑀥𑀭𑀁. 𑀲𑁄 𑀳𑀺 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀫𑀡𑁆𑀟𑁂 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀢𑁆𑀣𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺 𑀢𑀢𑁆𑀢𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀩𑀼𑀤𑁆𑀥𑀪𑀸𑀯𑀚𑀸𑀢𑀺 𑀅𑀦𑁆𑀢𑀺𑀫 𑀪𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀲𑁂𑀲𑁂𑀦 𑀫𑀼𑀦𑀺𑀦𑁆𑀤𑀫𑁂𑀯 𑀦𑀺𑀥𑀦𑀯𑀧𑀼𑀥𑀭𑀦𑁆𑀢𑀺 𑀣𑁄𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 ‘‘𑀩𑀼𑀤𑁆𑀥𑁄 𑀅𑀦𑁆𑀢𑀺𑀫 𑀥𑀭𑁄’’𑀢𑀺.

𑀫𑀸𑀭𑀪𑀗𑁆𑀕𑀦𑁆𑀢𑀺 𑀤𑁂𑀯𑀧𑀼𑀢𑁆𑀢𑀸𑀤𑀺𑀧𑀜𑁆𑀘𑀫𑀸𑀭𑁂 𑀯𑀺𑀤𑁆𑀥𑀁𑀲𑀦𑀁. 𑀫𑀸𑀭𑀲𑀤𑁆𑀤𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀧𑀜𑁆𑀘𑀫𑀸𑀭𑁂 𑀪𑀜𑁆𑀚𑀢𑀺 𑀅𑀪𑀜𑁆𑀚𑀺 𑀪𑀜𑁆𑀚𑀺𑀲𑁆𑀲𑀢𑀻𑀢𑀺 𑀫𑀸𑀭𑀪𑀗𑁆𑀕𑁄, 𑀫𑀼𑀦𑀺𑀦𑁆𑀤𑁄. 𑀫𑀸𑀭𑀲𑀤𑁆𑀤𑀽𑀧𑀧𑀤 𑀪𑀦𑁆𑀚𑀥𑀸𑀢𑀼 𑀅𑀯𑀫𑀤𑁆𑀤𑀦𑁂 𑀢𑀧𑀘𑁆𑀘𑀬𑁄. 𑀢𑀲𑁆𑀲 𑀲𑀳 𑀥𑀸𑀢𑁆𑀯𑀦𑁆𑀢𑁂𑀦 𑀕𑁄𑀆𑀤𑁂𑀲𑁄. 𑀦𑀓𑀸𑀭𑀲𑁆𑀲 𑀦𑀺𑀕𑁆𑀕𑀳𑀺𑀢𑀸𑀤𑁂𑀲𑁄. 𑀢𑀲𑁆𑀲 𑀓𑀯𑀕𑁆𑀕𑀦𑁆𑀢𑀸𑀤𑁂𑀲𑁄. 𑀢𑀁 𑀫𑀸𑀭𑀪𑀗𑁆𑀕𑀁. 𑀅𑀪𑀗𑁆𑀕𑀦𑁆𑀢𑀺 𑀫𑀸𑀭𑀲𑁂𑀦𑀸𑀬 𑀪𑀜𑁆𑀚𑀺𑀢𑀼𑀁 𑀯𑀺𑀤𑁆𑀥𑀁𑀲𑀺𑀢𑀼𑀁 𑀅𑀲𑀫𑀢𑁆𑀣𑀁, 𑀪𑀜𑁆𑀚𑀺𑀬𑀢𑁂 𑀪𑀗𑁆𑀕𑁄. 𑀦𑀪𑀗𑁆𑀕𑁄 𑀅𑀪𑀗𑁆𑀕𑁄. 𑀅𑀣 𑀯𑀸 𑀫𑀸𑀭𑀲𑁂𑀦𑀸𑀬 𑀦 𑀪𑀜𑁆𑀚𑀺𑀬𑀢𑀻𑀢𑀺 𑀅𑀪𑀗𑁆𑀕𑁄. 𑀫𑀸𑀭𑀲𑁂𑀦𑀸𑀬 𑀪𑀜𑁆𑀚𑀺𑀢𑀼𑀁 𑀦 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀭𑀲𑁂𑀦𑀸 𑀪𑀜𑁆𑀚𑀺𑀢𑀼𑀁 𑀦 𑀲𑀫𑀢𑁆𑀣𑁄𑀢𑀺 𑀯𑀸 𑀅𑀪𑀗𑁆𑀕𑁄, 𑀫𑀼𑀦𑀺𑀦𑁆𑀤𑁄. 𑀢𑀁 𑀅𑀪𑀗𑁆𑀕𑀁.

𑀤𑀻𑀧𑀁𑀤𑀻𑀧𑀁 𑀧𑀚𑀸𑀦𑀦𑁆𑀢𑀺 𑀏𑀢𑁆𑀣 𑀧𑀚𑀸𑀦𑀁 𑀤𑀻𑀧𑀁 𑀤𑀻𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀚𑀸𑀦𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀢𑁂𑀳𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀦𑁆𑀢𑀺, 𑀧𑀓𑀸𑀭𑁂𑀦 𑀯𑀸 𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀯𑀲𑁂𑀦𑀸𑀢𑀺 𑀧𑀚𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑀻𑀧𑀦𑁆𑀢𑀺 𑀧𑀜𑁆𑀜𑀸𑀧𑀤𑀻𑀧𑀁. 𑀢𑀜𑁆𑀳𑀺 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀤𑀻𑀧𑁂𑀢𑀺 𑀧𑀓𑀸𑀲𑁂𑀢𑀺 𑀚𑁄𑀢𑁂𑀢𑀻𑀢𑀺 𑀤𑀻𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀤𑀺𑀧𑁆𑀧𑀢𑀺 𑀚𑁄𑀢𑁂𑀢𑀻𑀢𑀺 𑀤𑀻𑀧𑁄. 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀆𑀮𑁄𑀓𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀻𑀧𑀥𑀸𑀢𑀼 𑀤𑀺𑀢𑁆𑀢𑀺𑀬𑀁 𑀅. 𑀤𑀻𑀧𑀫𑀺𑀯𑀸𑀢𑀺 𑀤𑀻𑀧𑀸, 𑀧𑀜𑁆𑀜𑀸. 𑀬𑀣𑀸 𑀳𑀺 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀧𑀓𑀸𑀲𑁂𑀢𑀺, 𑀏𑀯𑀁 𑀧𑀜𑁆𑀜𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀳𑀦𑁆𑀢𑁆𑀯𑀸 𑀥𑀫𑁆𑀫𑀸𑀮𑁄𑀓𑀁 𑀧𑀓𑀸𑀲𑁂𑀢𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀤𑀻𑀧𑀁. 𑀧𑀼𑀦 𑀤𑀻𑀧𑀦𑁆𑀢𑀺 𑀤𑀻𑀧𑀓𑀁 𑀧𑀓𑀸𑀲𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀤𑀻𑀧𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀤𑀻𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀦𑀺𑀦𑁆𑀤𑁄 𑀳𑀺 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀕𑀢𑀸𑀕𑀢𑀸𑀦𑀁 𑀯𑀺𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀢𑀼𑀫𑀕𑁆𑀕𑀜𑀸𑀡𑀸𑀤𑀺𑀧𑀜𑁆𑀜𑀸𑀧𑀤𑀻𑀧𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀤𑀻𑀧𑀁.

𑀚𑀬𑀯𑀭𑀲𑀬𑀦𑁂𑀢𑀺 𑀧𑀜𑁆𑀘𑀫𑀸𑀭𑀯𑀺𑀚𑀬𑀦𑁆𑀢𑀝𑁆𑀞𑀸𑀦𑀪𑀽𑀢𑁂 𑀉𑀢𑁆𑀢𑀫 𑀩𑁄𑀥𑀺𑀧𑀮𑁆𑀮𑀗𑁆𑀓𑀸𑀲𑀦𑁂. 𑀧𑀜𑁆𑀘𑀫𑀸𑀭𑁂 𑀚𑀺𑀦𑀸𑀢𑀺 𑀏𑀢𑁆𑀣𑀸𑀢𑀺 𑀚𑀬𑁄, 𑀩𑁄𑀥𑀺𑀭𑀼𑀓𑁆𑀔𑀧𑀮𑁆𑀮𑀗𑁆𑀓𑁄. 𑀚𑀺𑀥𑀸𑀢𑀼 𑀚𑀬𑁂 𑀡. 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑀺 𑀢𑀩𑁆𑀩𑁄𑀢𑀺 𑀯𑀭𑁄, 𑀯𑀭𑀥𑀸𑀢𑀼 𑀧𑀢𑁆𑀣𑀦𑁂 𑀅. 𑀯𑀭𑀢𑀺 𑀦𑀺𑀯𑀸𑀭𑁂𑀢𑀺 𑀳𑀻𑀦𑀦𑁆𑀢𑀺 𑀯𑀸 𑀯𑀭𑁄. 𑀯𑀭𑀥𑀸𑀢𑀼 𑀦𑀺𑀯𑀸𑀭𑀡𑁂 𑀅. 𑀩𑀼𑀤𑁆𑀥𑁂𑀦 𑀲𑁂𑀯𑀺𑀬𑀢𑀺 𑀪𑀚𑀺𑀬𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑁄. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁𑀬𑀼. 𑀯𑀭𑁄 𑀉𑀢𑁆𑀢𑀫𑁄 𑀲𑀬𑀦𑁄 𑀯𑀭𑀲𑀬𑀦𑁄, 𑀚𑀬𑁄𑀏𑀯 𑀯𑀭𑀲𑀬𑀦𑁄 𑀚𑀬𑀯𑀭𑀲𑀬𑀦𑁄, 𑀩𑁄𑀥𑀺𑀭𑀼𑀓𑁆𑀔𑀧𑀮𑁆𑀮𑀗𑁆𑀓𑁄. 𑀢𑀲𑁆𑀫𑀺𑀁.

𑀩𑁄𑀥𑀺𑀧𑀢𑁆𑀢𑀁𑀥𑀺𑀧𑀢𑁆𑀢𑀦𑁆𑀢𑀺 𑀩𑁄𑀥𑀺𑀧𑀢𑁆𑀢𑀁 𑀅𑀥𑀺𑀧𑀢𑁆𑀢𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀩𑁄𑀥𑀺𑀧𑀢𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀕𑀢𑀁. 𑀏𑀢𑁆𑀣 𑀘 𑀩𑁄𑀥𑀺𑀲𑀤𑁆𑀤𑁄 𑀭𑀼𑀓𑁆𑀔𑀫𑀕𑁆𑀕𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀦𑀺𑀩𑁆𑀩𑀸𑀦𑁂𑀲𑀼𑀧𑀺 𑀯𑀢𑁆𑀢𑀢𑀺. 𑀢𑀣𑀸 𑀳𑁂𑀲 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀲𑀼 𑀭𑀼𑀓𑁆𑀔𑁂 𑀯𑀢𑁆𑀢𑀢𑀺. 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀫𑀕𑁆𑀕𑁂. 𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀻 𑀫𑁂𑀥𑀲𑁄𑀢𑀺𑀆𑀤𑀻𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂. 𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢𑀦𑁆𑀢𑀺𑀆𑀤𑀻𑀲𑀼 𑀦𑀺𑀩𑁆𑀩𑀸𑀦𑁂. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀅𑀭𑀳𑀢𑁆𑀢 𑀫𑀕𑁆𑀕𑀜𑀸𑀡𑀁. 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀩𑀼𑀥𑀥𑀸𑀢𑀼 𑀜𑀸𑀡𑁂 𑀡 𑀈 𑀘. 𑀩𑁄𑀥𑀺 𑀘 𑀩𑁄𑀥𑀺 𑀘 𑀩𑁄𑀥𑀺 𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦. 𑀢𑀁 𑀅𑀧𑀚𑁆𑀚𑀺𑀁 𑀅𑀕𑀫𑀺𑀦𑁆𑀢𑀺 𑀩𑁄𑀥𑀺 𑀧𑀢𑁆𑀢𑁄, 𑀫𑀼𑀦𑀺𑀦𑁆𑀤𑁄. 𑀢𑀁 𑀩𑁄𑀥𑀺𑀧𑀢𑁆𑀢𑀁. 𑀅𑀥𑀺𑀧𑀢𑁆𑀢𑀦𑁆𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀚𑁂𑀝𑁆𑀞𑀪𑀸𑀯𑀁 𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀥𑀺𑀓𑀁 𑀚𑁂𑀝𑁆𑀞𑀪𑀸𑀯𑀁 𑀯𑀼𑀟𑁆𑀠𑀢𑀭𑀪𑀸𑀯𑀁 𑀧𑀢𑁆𑀢𑁄 𑀕𑀢𑁄𑀢𑀺 𑀅𑀥𑀺𑀧𑀢𑁆𑀢𑁄, 𑀫𑀼𑀦𑀺𑀦𑁆𑀤𑁄. 𑀢𑀁 𑀅𑀥𑀺𑀧𑀢𑁆𑀢𑀁. 𑀬𑀣𑀸 𑀳𑀺 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 ¶ 𑀬𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀪𑀺𑀤𑁄, 𑀲𑁄 𑀢𑁂𑀲𑀁 𑀚𑁂𑀝𑁆𑀞𑀪𑀸𑀯𑀁 𑀯𑀼𑀟𑁆𑀠𑀢𑀭𑀪𑀸𑀯𑀁 𑀕𑀢𑁄, 𑀏𑀯𑀫𑁂𑀯 𑀪𑀕𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀯𑀺𑀚𑁆𑀚𑀸 𑀕𑀢𑀸𑀬 𑀧𑀚𑀸𑀬 𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀢𑀭𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺 𑀲𑀩𑁆𑀩𑀕𑀼𑀡𑁂𑀳𑀺 𑀅𑀥𑀺𑀓𑀢𑁆𑀢𑀸 𑀘 𑀅𑀧𑁆𑀧𑀝𑀺𑀲𑀫𑀢𑁆𑀢𑀸 𑀘 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀚𑁂𑀝𑁆𑀞𑀪𑀸𑀯𑀁 𑀯𑀼𑀟𑁆𑀠𑀢𑀭𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀅𑀧𑁆𑀧𑀝𑀺𑀲𑀫𑀪𑀸𑀯𑀜𑁆𑀘 𑀧𑀢𑁆𑀢𑁄 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀥𑀺𑀧𑀢𑁆𑀢𑀦𑁆𑀢𑀺 𑀣𑁄𑀫𑁂𑀢𑀺.

𑀩𑁆𑀭𑀳𑁆𑀫𑀸𑀩𑁆𑀭𑀳𑁆𑀫𑀸𑀕𑀢𑀸𑀦𑀦𑁆𑀢𑀺 𑀩𑁆𑀭𑀳𑁆𑀫 𑀅𑀩𑁆𑀭𑀳𑁆𑀫 𑀆𑀕𑀢𑀸𑀦𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀕𑀢𑀸𑀦𑀁 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀆𑀕𑀢𑀸𑀦𑀁 𑀩𑁆𑀭𑀳𑁆𑀫 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺 𑀩𑁆𑀭𑀳𑁆𑀫𑀸. 𑀢𑁂 𑀳𑀺 𑀛𑀸𑀦𑀸𑀤𑀺𑀕𑀼𑀡𑁂𑀳𑀺 𑀩𑁆𑀭𑀽𑀳𑀦𑁆𑀢𑀺 𑀯𑀟𑁆𑀠𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀩𑁆𑀭𑀳𑁆𑀫𑀸𑀢𑀺 𑀤𑁂𑀯𑀫𑀦𑀼𑀲𑁆𑀲𑀸. 𑀢𑁂 𑀳𑀺 𑀦 𑀩𑁆𑀭𑀳𑁆𑀫𑀸 𑀅𑀩𑁆𑀭𑀳𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀆𑀕𑀘𑁆𑀙𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦𑀸𑀢𑀺 𑀆𑀕𑀢𑀸, 𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀸𑀦𑁄 𑀮𑀩𑁆𑀪𑀦𑁆𑀢𑀺. 𑀆𑀧𑀼𑀩𑁆𑀩𑀕𑀫𑀼𑀥𑀸𑀢𑀼 𑀕𑀢𑀺𑀬𑀁 𑀢. 𑀆𑀕𑀢𑀸 𑀩𑁆𑀭𑀳𑁆𑀫𑀸 𑀘 𑀅𑀩𑁆𑀭𑀳𑁆𑀫𑀸 𑀘𑀸𑀢𑀺 𑀩𑁆𑀭𑀳𑁆𑀫𑀸𑀩𑁆𑀭𑀳𑁆𑀫𑀸𑀕𑀢𑀸, 𑀢𑁂𑀲𑀁. 𑀯𑀺𑀲𑁂𑀲𑀦 𑀧𑀭𑀦𑀺𑀧𑀸𑀢𑀧𑀤𑀫𑁂𑀢𑀁 𑀅𑀕𑁆𑀬𑀸𑀳𑀺𑀢𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀁 𑀧𑀦 𑀧𑀤𑀁 𑀯𑀭𑀕𑀺𑀭𑀓𑀣𑀺𑀓𑀦𑁆𑀢𑀺𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀧𑀬𑀺𑀭𑀼𑀧𑀸𑀲𑀦𑀸𑀦𑀁 𑀩𑁆𑀭𑀳𑁆𑀫 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀲𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀯𑀭𑀕𑀺𑀭𑀓𑀣𑀺𑀓𑀦𑁆𑀢𑀺 𑀉𑀢𑁆𑀢𑀫𑀁 𑀥𑀫𑁆𑀫𑀯𑀸𑀘𑀁 𑀤𑁂𑀲𑁂𑀦𑁆𑀢𑀁. 𑀲𑁂𑀝𑁆𑀞𑀯𑀸𑀘𑀸𑀬 𑀥𑀫𑁆𑀫𑀁 𑀤𑁂𑀲𑀫𑀸𑀦𑀁 𑀯𑀸, 𑀕𑀸𑀬𑀢𑀺 𑀓𑀣𑀺𑀬𑀢𑀻𑀢𑀺 𑀕𑀺𑀭𑀸, 𑀯𑀸𑀘𑀸. 𑀕𑀸𑀥𑀸𑀢𑀼 𑀲𑀤𑁆𑀤𑁂 𑀈𑀭𑁄. 𑀯𑀭𑀸 𑀲𑁂𑀝𑁆𑀞𑀸 𑀕𑀺𑀭𑀸 𑀯𑀸𑀘𑀸 𑀯𑀭𑀕𑀺𑀭𑀸. 𑀢𑀸𑀬 𑀥𑀫𑁆𑀫𑀁 𑀓𑀣𑁂𑀢𑀻𑀢𑀺 𑀯𑀭𑀕𑀺𑀭𑀓𑀣𑀺𑀓𑁄, 𑀫𑀼𑀦𑀺𑀦𑁆𑀤𑁄. 𑀉𑀢𑁆𑀢𑀫𑀸𑀬 𑀫𑀦𑀸𑀧𑀪𑀽𑀢𑀯𑀸𑀘𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀁.

𑀧𑀸𑀧𑀳𑀻𑀦𑀦𑁆𑀢𑀺 𑀮𑀸𑀫𑀓𑀅𑀓𑀼𑀲𑀮𑀓𑀺𑀮𑁂𑀲𑀁. 𑀢𑀜𑁆𑀳𑀺 𑀅𑀧𑀸𑀬𑀸𑀤𑀺 𑀤𑀼𑀓𑁆𑀔𑀁 𑀧𑀸𑀧𑁂𑀢𑀻𑀢𑀺 𑀧𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀓𑀼𑀲𑀮𑀓𑀺𑀮𑁂𑀲𑁄. 𑀧𑀧𑀼𑀩𑁆𑀩𑀅𑀧𑀥𑀸𑀢𑀼 𑀧𑀸𑀧𑀼𑀡𑀦𑁂. 𑀓𑀼𑀲𑀮𑀥𑀫𑁆𑀫𑁂𑀦 𑀳𑀸𑀢𑀩𑁆𑀩𑀁 𑀘𑀚𑀺 𑀢𑀩𑁆𑀩𑀦𑁆𑀢𑀺 𑀳𑀻𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑀸𑀫𑀓𑀥𑀫𑁆𑀫𑁄. 𑀳𑀸𑀥𑀸𑀢𑀼 𑀘𑀸𑀕𑁂 𑀢𑀧𑀘𑁆𑀘𑀬𑁄, 𑀢𑀲𑁆𑀲𑀺𑀦𑁄. 𑀧𑀸𑀧𑁄𑀏𑀯 𑀳𑀻𑀦𑀁 𑀧𑀸𑀧𑀳𑀻𑀦𑀁. 𑀧𑀳𑀻𑀦𑀦𑁆𑀢𑀺 ¶ 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀁. 𑀧𑀚𑀳𑀢𑀻𑀢𑀺 𑀧𑀳𑀻𑀦𑁄, 𑀫𑀼𑀦𑀺𑀦𑁆𑀤𑁄. 𑀧𑀧𑀼𑀩𑁆𑀩𑀳𑀸𑀥𑀸𑀢𑀼 𑀘𑀸𑀕𑁂 𑀇𑀦𑁄. 𑀲𑀩𑁆𑀩𑁂 𑀅𑀓𑀼𑀲𑀮𑀥𑀫𑁆𑀫𑁂 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀦𑁆𑀢𑀺 𑀮𑁄𑀓𑀅𑀮𑁄𑀓𑀅𑀪𑀺𑀭𑀸𑀫𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀫𑀦𑀼𑀲𑁆𑀲𑀮𑁄𑀓𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀅𑀪𑀺𑀭𑀸𑀫𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑁄𑀢𑀺 𑀫𑀦𑀼𑀲𑁆𑀲 𑀮𑁄𑀓𑁄, 𑀲𑁄 𑀳𑀺 𑀮𑁄𑀓𑀬𑀢𑀺 𑀧𑀢𑀺𑀝𑁆𑀞𑀳𑀢𑀺 𑀧𑀯𑀢𑁆𑀢𑀢𑀺 𑀯𑀸 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀫𑀦𑀼𑀲𑁆𑀲 𑀮𑁄𑀓𑁄. 𑀮𑁄𑀓𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀅. 𑀦 𑀮𑁄𑀓𑁄 𑀅𑀮𑁄𑀓𑁄. 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁄. 𑀮𑁄𑀓𑁄 𑀘 𑀅𑀮𑁄𑀓𑁄 𑀘 𑀮𑁄𑀓𑀸𑀮𑁄𑀓𑀸, 𑀢𑁂𑀲𑀁 𑀲𑀢𑁆𑀢𑀮𑁄𑀓𑀸𑀦𑀁 𑀅𑀪𑀺𑀅𑀥𑀺𑀓𑀁 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑁄. 𑀫𑀼𑀦𑀺𑀦𑁆𑀤𑁄, 𑀢𑀁. 𑀲𑁄 𑀳𑀺 𑀢𑀺𑀮𑁄𑀓𑀸𑀦𑀁 𑀧𑀽𑀚𑀸𑀦𑀼𑀕𑁆𑀕𑀳𑀸𑀤𑀺𑀓𑀭𑀡𑀯𑀲𑁂𑀦 𑀅𑀪𑀺𑀭𑀸𑀫𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀦𑁆𑀢𑀺 𑀣𑁄𑀫𑁂𑀢𑀺. 𑀲𑀢𑀢𑀦𑁆𑀢𑀺 𑀦𑀺𑀘𑁆𑀘𑀁. 𑀭𑀢𑁆𑀢𑀺𑀤𑀺𑀯𑀁 𑀅𑀪𑀺𑀡𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀦𑀺𑀦𑁆𑀤𑀦𑁆𑀢𑀺 𑀧𑀜𑁆𑀘𑀫𑀼𑀦𑀺𑀲𑁆𑀲𑀭𑀁, 𑀢𑀁 𑀫𑀼𑀦𑀺𑀦𑁆𑀤𑀁. 𑀅𑀪𑀺𑀦𑀫𑁂𑀢𑀺 𑀅𑀳𑀁 𑀅𑀪𑀺𑀲𑀓𑁆𑀓𑀘𑁆𑀘𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀁 𑀲𑀫𑁆𑀫𑀼𑀢𑀺𑀤𑁂𑀯𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀅𑀢𑀺𑀉𑀢𑁆𑀢𑀫𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀽𑀢𑀁 𑀦𑀺𑀥𑀦𑀯𑀧𑀼𑀥𑀭𑀁 𑀅𑀦𑁆𑀢𑀺𑀫𑀓𑀸𑀬𑀥𑀸𑀭𑀡𑀁, 𑀫𑀸𑀭𑀪𑀗𑁆𑀕𑀁 𑀤𑁂𑀯𑀧𑀼𑀢𑁆𑀢𑀸𑀤𑀺𑀧𑀜𑁆𑀘𑀫𑀸𑀭𑁂 𑀯𑀺𑀤𑁆𑀥𑀁𑀲𑀦𑀁 𑀅𑀪𑀗𑁆𑀕𑀁 𑀫𑀸𑀭𑀲𑁂𑀦𑀸𑀬 𑀪𑀜𑁆𑀚𑀺𑀢𑀼𑀁 𑀅𑀲𑀫𑀢𑁆𑀣𑀁, 𑀫𑀸𑀭𑀲𑁂𑀦𑀸 𑀪𑀜𑁆𑀚𑀦𑀸𑀭𑀳𑀁 𑀯𑀸, 𑀧𑀚𑀸𑀦𑀁 𑀲𑀢𑁆𑀢𑀸𑀦𑀁 𑀤𑀻𑀧𑀁 𑀧𑀜𑁆𑀜𑀸𑀧𑀤𑀻𑀧𑀁, 𑀓𑀫𑁆𑀫𑀪𑀽𑀢𑀁 𑀤𑀻𑀧𑀁 𑀤𑀻𑀧𑀓𑀁 𑀧𑀓𑀸𑀲𑁂𑀦𑁆𑀢𑀁, 𑀚𑀬𑀯𑀭𑀲𑀬𑀦𑁂 𑀧𑀜𑁆𑀘𑀫𑀸𑀭𑀯𑀺𑀚𑀬𑀦𑁆𑀢𑀝𑁆𑀞𑀸𑀦𑀪𑀽𑀢𑁂 𑀉𑀢𑁆𑀢𑀫𑀩𑁄𑀥𑀺𑀧𑀮𑁆𑀮𑀗𑁆𑀓𑀸𑀲𑀦𑁂 𑀆𑀥𑀸𑀭𑀪𑀽𑀢𑁂, 𑀩𑁄𑀥𑀺𑀧𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀕𑀢𑀁 𑀅𑀥𑀺𑀧𑀢𑁆𑀢𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀚𑁂𑀝𑁆𑀞𑀪𑀸𑀯𑀁 𑀕𑀢𑀁, 𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀸𑀕𑀢𑀸𑀦𑀁 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀆𑀕𑀢𑀸𑀦𑀁 𑀩𑁆𑀭𑀳𑁆𑀫𑀤𑁂𑀯 𑀫𑀦𑀼𑀲𑁆𑀲𑀧𑀭𑀺𑀲𑀸𑀦𑀁 𑀯𑀭𑀕𑀺𑀭𑀓𑀣𑀺𑀓𑀁 𑀲𑁂𑀝𑁆𑀞𑀯𑀸𑀘𑀸𑀬 𑀥𑀫𑁆𑀫𑀁 𑀤𑁂𑀲𑀫𑀸𑀦𑀁 𑀧𑀸𑀧𑀳𑀻𑀦𑀁 𑀮𑀸𑀫𑀓𑀅𑀓𑀼𑀲𑀮𑀓𑀺𑀮𑁂𑀲𑀁 𑀧𑀳𑀻𑀦𑀁 𑀅𑀭𑀳𑀢𑁆𑀢𑀫𑀕𑁆𑀕 𑀜𑀸𑀡𑁂𑀦 ¶ 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀁 𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀁 𑀫𑀦𑀼𑀲𑁆𑀲 𑀮𑁄𑀓𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀅𑀪𑀺𑀭𑀸𑀫𑀪𑀽𑀢𑀁, 𑀫𑀼𑀦𑀺𑀦𑁆𑀤𑀁 𑀧𑀜𑁆𑀘𑀫𑀼𑀦𑀺𑀲𑁆𑀲𑀭𑀁 𑀢𑀁 𑀫𑀼𑀦𑀺𑀦𑁆𑀤𑀁 𑀲𑀢𑀢𑀁 𑀦𑀺𑀘𑁆𑀘𑀁 𑀅𑀪𑀺𑀡𑁆𑀳𑀁 𑀅𑀳𑀁 𑀅𑀪𑀺𑀦𑀫𑁂 𑀅𑀪𑀺𑀲𑀓𑁆𑀓𑀘𑁆𑀘𑀁 𑀦𑀫𑀸𑀫𑀻𑀢𑀺.

𑀤𑁆𑀯𑀸𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄 𑀫𑀼𑀤𑀼𑀓𑀭𑀘𑀭𑀡𑁄 𑀩𑁆𑀭𑀳𑁆𑀫𑀖𑁄𑀲𑁂𑀡𑀺𑀚𑀗𑁆𑀖𑁄,

𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄 𑀧𑀼𑀦𑀭𑀧𑀺 𑀲𑀼𑀕𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄;

𑀫𑀽𑀤𑁄𑀤𑀸𑀢𑀼𑀡𑁆𑀡𑀮𑁄𑀫𑁄 𑀅𑀣𑀫𑀧𑀺 𑀲𑀼𑀕𑀢𑁄 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄,

𑀦𑀻𑀮𑀓𑁆𑀔𑀻 𑀤𑀻𑀖𑀧𑀡𑁆𑀳𑀻 𑀲𑀼𑀔𑀼𑀫𑀫𑀮𑀙𑀯𑀻 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻.

𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄 𑀲𑀫𑀓𑀮𑀧𑀦𑀚𑁄 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄,

𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄 𑀅𑀯𑀺𑀭𑀴𑀤𑀲𑀦𑁄 𑀫𑀸𑀭𑀚𑀼𑀲𑁆𑀲𑀗𑁆𑀔𑀧𑀸𑀤𑁄;

𑀢𑀺𑀝𑁆𑀞𑀦𑁆𑀢𑁄 𑀦𑁄𑀦𑀫𑀦𑁆𑀢𑁄𑀪𑀬𑀓𑀭𑀫𑀼𑀤𑀼𑀦𑀸 𑀚𑀡𑁆𑀡𑀼𑀓𑀸𑀦𑀸𑀫𑀲𑀦𑁆𑀢𑁄,

𑀯𑀝𑁆𑀝𑀓𑁆𑀔𑀦𑁆𑀥𑁄 𑀚𑀺𑀦𑁄 𑀕𑁄𑀢𑀭𑀼𑀡𑀧𑀔𑀼𑀫𑀓𑁄 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄.

𑀲𑀢𑁆𑀢𑀧𑁆𑀧𑀻𑀦𑁄 𑀘 𑀤𑀻𑀖𑀗𑁆𑀕𑀼𑀮𑀺 𑀫𑀣 𑀲𑀼𑀕𑀢𑁄 𑀮𑁄𑀫𑀓𑀽𑀧𑁂𑀓𑀮𑁄𑀫𑁄,

𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄 𑀓𑀦𑀓𑀲𑀫𑀢𑀘𑁄 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄;

𑀲𑀫𑁆𑀩𑀼𑀤𑁆𑀥𑁄 𑀣𑀽𑀮𑀚𑀺𑀯𑁆𑀳𑁄 𑀅𑀣 𑀲𑀻𑀳𑀳𑀦𑀼𑀓𑁄 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄,

𑀦𑀸𑀣𑁄 𑀉𑀡𑁆𑀳𑀻𑀲𑀲𑀻𑀲𑁄 𑀇𑀢𑀺𑀕𑀼𑀡𑀲𑀳𑀺𑀢𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑁨𑁩. 𑀏𑀯𑀁 ¶ 𑀤𑁆𑀯𑀸𑀯𑀻𑀲𑀢𑀺𑀫𑀸𑀬 𑀕𑀸𑀣𑀸𑀬 𑀫𑀼𑀦𑀺𑀦𑁆𑀤𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄𑀢𑁆𑀬𑀸𑀤𑀻𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀩𑀼𑀤𑁆𑀥𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀫𑀳𑁂𑀲𑀺𑀁 𑀯𑀦𑁆𑀤𑀺𑀢𑀼𑀓𑀸𑀫𑁄 𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄𑀢𑁆𑀬𑀸𑀤𑀺𑀕𑀸𑀣𑀸𑀢𑁆𑀢𑀬𑀫𑀸𑀳. 𑀢𑀁 𑀧𑀦 𑀕𑀸𑀣𑀸𑀢𑁆𑀢𑀬𑀁 𑀲𑀤𑁆𑀥𑀭𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀥𑀓𑀁 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀩𑀼𑀤𑁆𑀥𑁄𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑀦𑀺𑀭𑀯𑀲𑁂𑀲𑀲𑀩𑁆𑀩𑀥𑀫𑁆𑀫𑁄 𑀯𑀸. 𑀢𑀁 𑀧𑀦 𑀧𑀤𑀁 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄 𑀢𑁆𑀬𑀸𑀤𑀻𑀲𑀼 𑀧𑀤𑁂𑀲𑀼 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑁄 𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀘, 𑀦𑀺𑀭𑀯𑀲𑁂𑀲𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀘 𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑀯𑀺𑀓𑀧𑁆𑀧𑁂 𑀩𑀼𑀥𑀥𑀸𑀢𑀼𑀲𑁆𑀲 𑀯𑀸𑀘𑁆𑀘𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀝𑀺𑀯𑀺𑀚𑁆𑀛𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀫𑀼𑀔𑁆𑀬𑁂𑀦 𑀮𑀩𑁆𑀪𑀢𑀺. 𑀳𑁂𑀝𑁆𑀞𑀸 𑀫𑀕𑁆𑀕𑀨𑀮𑀜𑀸𑀡𑀜𑁆𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀧𑀸𑀭𑀫𑀻𑀜𑀸𑀡𑀜𑁆𑀘 𑀨𑀮𑀽𑀧𑀘𑀸𑀭𑁂𑀦. 𑀅𑀭𑀳𑀢𑁆𑀢𑀨𑀮𑀜𑀸𑀡𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀜𑀸𑀡𑀸𑀦𑀺 𑀘 𑀓𑀸𑀭𑀡𑀽𑀧𑀘𑀸𑀭𑁂𑀦. 𑀢𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀁 𑀢𑁂𑀦 𑀫𑀼𑀔𑁆𑀬𑁄𑀧𑀘𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑁄 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀸𑀭𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺 𑀧𑀜𑁆𑀜𑀢𑁆𑀢𑁄 𑀲𑀢𑁆𑀢𑀯𑀺𑀲𑁂𑀲𑁄 𑀮𑀩𑁆𑀪𑀢𑀺. 𑀤𑀼𑀢𑀺𑀬 𑀯𑀺𑀓𑀧𑁆𑀧𑁂 𑀩𑀼𑀥𑀥𑀸𑀢𑀼𑀲𑁆𑀲 𑀯𑀸𑀘𑁆𑀘𑀁 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀫𑀼𑀔𑁆𑀬𑁂𑀦 𑀮𑀩𑁆𑀪𑀢𑀺. 𑀘𑀢𑀼𑀫𑀕𑁆𑀕𑀨𑀮𑀜𑀸𑀡𑀜𑁆𑀘 𑀯𑀺𑀧𑀲𑁆𑀲𑀦𑀸 𑀧𑀸𑀭𑀫𑀻𑀜𑀸𑀡𑀜𑁆𑀘 𑀨𑀮𑀽𑀧𑀘𑀸𑀭𑁂𑀦. 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀺𑀧𑀘𑁆𑀙𑀺𑀫 𑀧𑀘𑁆𑀙𑀺𑀫𑀜𑀸𑀡𑀸𑀦𑀺 𑀓𑀸𑀭𑀡𑀽𑀧𑀘𑀸𑀭𑁂𑀦. 𑀢𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀁 𑀢𑁂𑀦 𑀫𑀼𑀔𑁆𑀬𑁄𑀧𑀘𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑁄 𑀅𑀧𑀭𑀺𑀫𑀸𑀡𑀕𑀼𑀡𑁄𑀖𑀸𑀮𑀗𑁆𑀓𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺 𑀧𑀜𑁆𑀜𑀢𑁆𑀢𑁄 𑀲𑀢𑁆𑀢𑀯𑀺𑀲𑁂𑀲𑁄 𑀮𑀩𑁆𑀪𑀢𑀺. 𑀓𑀺𑀁𑀧𑀦𑁂𑀢𑁆𑀣 𑀩𑀼𑀥𑀥𑀸𑀢𑀼𑀲𑁆𑀲 𑀯𑀸𑀘𑁆𑀘𑀪𑀽𑀢𑀁 𑀜𑀸𑀡𑀫𑁂𑀯 𑀩𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺. 𑀉𑀤𑀸𑀳𑀼 𑀢𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀪𑀽𑀢𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄 𑀦𑀸𑀫𑀸𑀢𑀺. 𑀜𑀸𑀡𑁂𑀦 𑀧𑀦 𑀫𑀮𑀓𑀭 𑀓𑀺𑀮𑁂𑀲𑀸𑀦𑀁 𑀲𑀯𑀸𑀲𑀦𑀸𑀦𑀁 𑀦𑀺𑀭𑀯𑀲𑁂𑀲𑀁 𑀧𑀳𑀻𑀦𑀢𑁆𑀢𑀸 𑀘𑀺𑀢𑁆𑀢 𑀲𑀦𑁆𑀢𑀸𑀦𑁄 𑀲𑀼𑀤𑁆𑀥𑁄 𑀳𑁄𑀢𑀺. 𑀢𑀲𑁆𑀲 𑀧𑀦 𑀲𑀼𑀤𑁆𑀥𑀢𑁆𑀢𑀸 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁄 ¶ 𑀭𑀽𑀧𑀓𑀸𑀬𑁄𑀧𑀺 𑀲𑀼𑀤𑁆𑀥𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀪𑀽𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀤𑀻𑀦𑀁 𑀆𑀥𑀸𑀭𑀪𑀽𑀢𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑁄 𑀦𑀸𑀫𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑁋

‘‘𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡 𑀦𑀺𑀫𑀺𑀢𑁆𑀢𑀸𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀧𑀭𑀺𑀪𑀸𑀯𑀺𑀢𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀉𑀧𑀸𑀤𑀸𑀬 𑀧𑀡𑁆𑀡𑀢𑁆𑀢𑀺𑀓𑁄 𑀲𑀩𑁆𑀩𑀜𑁆𑀜𑀼𑀢𑀧𑀤𑀝𑁆𑀞𑀸𑀦𑀁 𑀯𑀸 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀺𑀫𑀼𑀧𑀸𑀤𑀸𑀬 𑀧𑀡𑁆𑀡𑀢𑁆𑀢𑀺𑀓𑁄 𑀲𑀢𑁆𑀢𑀯𑀺𑀲𑁂𑀲𑁄 𑀩𑀼𑀤𑁆𑀥𑁄’’𑀢𑀺.

𑀧𑀭𑀫𑀢𑁆𑀣𑀪𑀽𑀢𑁂 𑀳𑀺 𑀔𑀦𑁆𑀥𑀲𑀦𑁆𑀢𑀸𑀦𑁂 𑀯𑁄𑀳𑀸𑀭𑀲𑀼𑀔𑀢𑁆𑀣𑀁 𑀲𑀢𑁆𑀢 𑀧𑀼𑀕𑁆𑀕𑀮𑀸𑀤𑀺𑀯𑁄𑀳𑀸𑀭𑁄 𑀆𑀭𑁄𑀧𑀺𑀢𑁄. 𑀏𑀯𑀁 𑀯𑁄𑀳𑀸𑀭𑀧𑁆𑀧𑀢𑁆𑀢𑁄 𑀲𑀢𑁆𑀢𑁄 𑀬𑀸𑀯 𑀩𑁄𑀥𑀺𑀜𑀸𑀡𑀢𑁆𑀣𑀸𑀬 𑀦 𑀯𑀸𑀬𑀫𑀢𑀺, 𑀧𑀡𑀺𑀥𑀸𑀦𑀁 𑀦 𑀓𑀭𑁄𑀢𑀺. 𑀢𑀸𑀯 𑀲𑀢𑁆𑀢𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀢𑁄 𑀧𑀦 𑀧𑀝𑁆𑀞𑀸𑀬 𑀩𑁄𑀥𑀺𑀜𑀸𑀡𑀢𑁆𑀣𑀸𑀬 𑀯𑀸𑀬𑀫𑀢𑀺, 𑀧𑀡𑀺𑀥𑀸𑀦𑀁 𑀓𑀭𑁄𑀢𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀸𑀫 𑀯𑁄𑀳𑀸𑀭𑁄 𑀳𑁄𑀢𑀺. 𑀲𑁄 𑀧𑀦 𑀬𑀤𑀸 𑀩𑁄𑀥𑀺𑀜𑀸𑀡𑀁 𑀮𑀪𑀢𑀺, 𑀢𑀤𑀸 𑀩𑀼𑀤𑁆𑀥𑁄 𑀦𑀸𑀫 𑀯𑁄𑀳𑀸𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 ‘‘𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸 𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑀢𑀁 𑀩𑀼𑀤𑁆𑀥’’𑀦𑁆𑀢𑀺. 𑀅𑀣 𑀯𑀸 𑀧𑀝𑁆𑀞𑀸𑀦𑀦𑀬𑁂𑀦 𑀯𑀸 𑀦𑀸𑀦𑀦𑁆𑀢𑀭𑀺𑀓𑀦𑀬𑁂𑀦 𑀯𑀸 𑀜𑀸𑀡𑀧𑁆𑀧𑀥𑀸𑀦𑁄 𑀲𑀼𑀯𑀺𑀲𑀼𑀤𑁆𑀥𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯𑀸𑀢𑀺.

𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀧𑀭𑀺𑀫𑀡𑁆𑀟𑀮𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑀲𑀭𑀻𑀭𑁄. 𑀅𑀥𑁄𑀪𑀸𑀕𑀁 𑀭𑀼𑀦𑁆𑀥𑀢𑀻𑀢𑀺 𑀦𑀺𑀕𑁆𑀭𑁄𑀥𑁄, 𑀯𑀝𑀭𑀼𑀓𑁆𑀔𑁄. 𑀦𑀺𑀧𑀼𑀩𑁆𑀩𑀭𑀼𑀥𑀥𑀸𑀢𑀼 𑀆𑀯𑀭𑀡𑁂 𑀡, 𑀉𑀲𑁆𑀲𑁄 𑀕𑀸𑀕𑀫𑁄. 𑀯𑀫𑀢𑀺 ¶ 𑀉𑀕𑁆𑀕𑀺𑀭𑀢𑀻𑀢𑀺 𑀩𑀺𑀫𑁆𑀩𑁄, 𑀲𑀭𑀻𑀭𑁄. 𑀯𑀫𑀼𑀥𑀸𑀢𑀼 𑀉𑀕𑁆𑀕𑀺𑀭𑀡𑁂 𑀩𑁄. 𑀯𑀫𑀺𑀲𑁆𑀲 𑀯𑀲𑁆𑀲 𑀩𑀺𑀢𑁆𑀢𑀁. 𑀦𑀺𑀕𑁆𑀭𑁄𑀥𑀲𑁆𑀲 𑀧𑀭𑀺𑀫𑀡𑁆𑀟𑀮𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄 𑀩𑀺𑀫𑁆𑀩𑁄 𑀲𑀭𑀻𑀭𑁄 𑀬𑀲𑁆𑀲𑀸𑀢𑀺 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄, 𑀩𑀼𑀤𑁆𑀥𑁄. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑀩𑀺𑀫𑁆𑀩𑁄𑀢𑀺 𑀯𑀢𑁆𑀢𑀩𑁆𑀩𑁂 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀮𑁄𑀧𑁂 𑀦𑁂𑀯𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀧𑀡𑁆𑀡𑀸𑀲𑀳𑀢𑁆𑀣𑀢𑀸𑀬 𑀯𑀸 𑀲𑀢𑀳𑀢𑁆𑀣𑀢𑀸𑀬 𑀯𑀸 𑀲𑀫𑀓𑁆𑀔𑀦𑁆𑀥𑀲𑀸𑀔𑁄 𑀦𑀺𑀕𑁆𑀭𑁄𑀥𑁄 𑀤𑀻𑀖𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄𑀯 𑀳𑁄𑀢𑀺, 𑀏𑀯𑀁 𑀓𑀸𑀬𑀢𑁄𑀧𑀺 𑀩𑁆𑀬𑀸𑀫𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄. 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀸𑀬𑁄 𑀯𑀸 𑀤𑀻𑀖𑁄 𑀳𑁄𑀢𑀺, 𑀩𑁆𑀬𑀸𑀫𑁄 𑀯𑀸 𑀦 𑀏𑀯𑀁 𑀯𑀺𑀲𑀫𑀧𑁆𑀧𑀫𑀸𑀡𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀔𑁄 𑀧𑀦 𑀪𑀯𑀁 𑀕𑁄𑀢𑀫𑁄. 𑀬𑀸𑀯𑀢𑀓𑁆𑀯𑀸𑀲𑁆𑀲 𑀓𑀸𑀬𑁄, 𑀢𑀸𑀯 𑀢𑀓𑁆𑀯𑀸𑀲𑁆𑀲 𑀩𑁆𑀬𑀸𑀫𑁄. 𑀬𑀸𑀯𑀢𑀓𑁆𑀯𑀸𑀲𑁆𑀲 𑀩𑁆𑀬𑀸𑀫𑁄, 𑀢𑀸𑀯 𑀢𑀓𑁆𑀯𑀸𑀲𑁆𑀲 𑀓𑀸𑀬𑁄’’𑀢𑀺.

𑀫𑀼𑀤𑀼𑀓𑀭𑀘𑀭𑀡𑁄𑀢𑀺 𑀲𑀡𑁆𑀳𑀳𑀢𑁆𑀣𑀧𑀸𑀤𑁄. 𑀏𑀢𑁆𑀣 𑀘 𑀫𑀼𑀤𑀼𑀲𑀤𑁆𑀤𑁄 𑀲𑀡𑁆𑀳𑀲𑀼𑀔𑀼𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀫𑀼𑀤𑁂𑀢𑀺 𑀫𑁄𑀤𑀬𑀢𑀺 𑀲𑀢𑁆𑀢𑁂𑀢𑀺 𑀫𑀼𑀤𑀼, 𑀲𑀡𑁆𑀳𑀳𑀢𑁆𑀣𑀧𑀸𑀤𑁄. 𑀫𑀼𑀤𑀥𑀸𑀢𑀼 𑀫𑁄𑀤𑀦𑁂 𑀳𑀸𑀲𑁂 𑀯𑀸 𑀉. 𑀢𑀁 𑀢𑀁 𑀓𑀫𑁆𑀫𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀓𑀭𑁄, 𑀳𑀢𑁆𑀣𑁄 𑀘𑀭𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦 𑀢𑀁 𑀢𑀁 𑀞𑀸𑀦𑀦𑁆𑀢𑀺 𑀘𑀭𑀡𑁄, 𑀧𑀸𑀤𑁄. 𑀘𑀭𑀥𑀸𑀢𑀼 𑀕𑀢𑀺𑀬𑀁 𑀬𑀼. 𑀫𑀼𑀤𑀼𑀓𑀭𑁄 𑀘 𑀘𑀭𑀡𑁄 𑀘 𑀬𑀲𑁆𑀲𑀸𑀢𑀺 𑀫𑀼𑀤𑀼𑀓𑀭𑀘𑀭𑀡𑁄, 𑀩𑀼𑀤𑁆𑀥𑁄. 𑀲𑀧𑁆𑀧𑀺 𑀫𑀡𑁆𑀟𑁂 𑀑𑀲𑀸𑀭𑀺𑀢𑁆𑀯𑀸 𑀞𑀧𑀺𑀢𑀁 𑀲𑀢𑀯𑀸𑀭𑀁 𑀯𑀺𑀳𑀢𑀓𑀧𑁆𑀧𑀸𑀲𑀧𑀝𑀮𑀁 𑀯𑀺𑀬 𑀫𑀼𑀤𑀼𑀚𑀸𑀢𑀫𑀢𑁆𑀢𑀓𑀼𑀫𑀸𑀭𑀲𑁆𑀲 𑀯𑀺𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀫𑀼𑀤𑀼𑀳𑀢𑁆𑀣 𑀧𑀸𑀤𑁄𑀢𑀺 𑀅𑀢𑁆𑀣𑁄.

𑀩𑁆𑀭𑀳𑁆𑀫𑀖𑁄𑀲𑁂𑀡𑀺𑀚𑀗𑁆𑀖𑁄𑀢𑀺 𑀩𑁆𑀭𑀳𑁆𑀫𑀖𑁄𑀲𑁄 𑀏𑀡𑀺𑀚𑀗𑁆𑀖𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀩𑁆𑀭𑀳𑁆𑀫𑀖𑁄𑀲𑁄𑀢𑀺 𑀩𑁆𑀭𑀳𑁆𑀫𑀼𑀦𑁄 𑀲𑀭𑁄 𑀯𑀺𑀬 𑀅𑀝𑁆𑀞𑀗𑁆𑀕 𑀲𑀫𑁆𑀧𑀦𑁆𑀦𑀲𑀭𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀛𑀸𑀦𑀸𑀤𑀺𑀕𑀼𑀡𑁂𑀳𑀺 𑀩𑁆𑀭𑀽𑀳𑀢𑀺 𑀯𑀟𑁆𑀠𑀢𑀻𑀢𑀺𑀩𑁆𑀭𑀳𑁆𑀫𑀸. 𑀩𑁆𑀭𑀽𑀳𑀥𑀸𑀢𑀼 𑀫𑀦𑀺𑀧𑀘𑁆𑀘𑀬𑁄. 𑀖𑀼𑀲𑀺𑀬𑀢𑀺 𑀲𑀤𑁆𑀤𑀺𑀬𑀢𑀺 𑀓𑀣𑀺𑀬𑀢𑀻𑀢𑀺 𑀖𑁄𑀲𑁄, 𑀲𑀭𑁄. 𑀖𑀼𑀲𑀥𑀸𑀢𑀼 𑀲𑀤𑁆𑀤𑁂 𑀡. 𑀩𑁆𑀭𑀳𑁆𑀫𑀼𑀦𑁄 𑀖𑁄𑀲𑁄 𑀲𑀭𑁄 𑀩𑁆𑀭𑀳𑁆𑀫𑀖𑁄𑀲𑁄, 𑀲𑁄 𑀯𑀺𑀬 𑀖𑁄𑀲𑁄 ¶ 𑀲𑀭𑁄 𑀬𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀖𑁄𑀲𑁄, 𑀩𑀼𑀤𑁆𑀥𑁄. 𑀬𑀣𑀸 𑀳𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀏𑀯𑀫𑁂𑀯 𑀢𑀣𑀸𑀕𑀢𑁂𑀦𑀧𑀺 𑀓𑀢𑀁 𑀓𑀫𑁆𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀯𑀢𑁆𑀣𑀼𑀲𑁆𑀲 𑀲𑀼𑀤𑁆𑀥𑀢𑁆𑀢𑀸 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀖𑁄𑀲𑁄 𑀯𑀺𑀬 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑀭𑀯𑀦𑁆𑀢𑁄𑀢𑀺 𑀣𑁄𑀫𑁂𑀢𑀺.

𑀏𑀡𑀺𑀚𑀗𑁆𑀖𑁄𑀢𑀺 𑀏𑀡𑀺𑀫𑀺𑀕𑀲𑁆𑀲 𑀚𑀗𑁆𑀖𑀸 𑀯𑀺𑀬 𑀲𑀼𑀯𑀝𑁆𑀝𑀚𑀸𑀡𑀼𑀓𑁄. 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀏𑀡𑀺, 𑀫𑀺𑀕𑁄. 𑀇𑀥𑀸𑀢𑀼 𑀕𑀢𑀺𑀬𑀁 𑀡𑀺. 𑀚𑀸𑀬𑀢𑀺 𑀓𑀫𑀦𑀫𑁂𑀢𑀸𑀬𑀸𑀢𑀺 𑀚𑀗𑁆𑀖𑁄, 𑀚𑀸𑀡𑀼. 𑀚𑀦𑀥𑀸𑀢𑀼 𑀚𑀦𑀦𑁂 𑀖𑁄. 𑀦𑀲𑁆𑀲 𑀦𑀺𑀕𑁆𑀕𑀳𑀺𑀢𑀸𑀤𑁂𑀲𑁄. 𑀏𑀡𑀺𑀫𑀺𑀕𑀲𑁆𑀲 𑀚𑀗𑁆𑀖𑁄 𑀯𑀺𑀬 𑀚𑀗𑁆𑀖𑁄 𑀬𑀲𑁆𑀲 𑀲𑁄𑀢𑀺 𑀏𑀡𑀺𑀚𑀗𑁆𑀖𑁄, 𑀩𑀼𑀤𑁆𑀥𑁄. 𑀬𑀣𑀸 𑀳𑀺 𑀏𑀡𑀺𑀫𑀺𑀕𑀲𑁆𑀲 𑀚𑀗𑁆𑀖𑁄 𑀲𑀼𑀯𑀝𑁆𑀝𑁄 𑀳𑁄𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀫𑀁𑀲𑀼𑀲𑁆𑀲𑀤𑁂𑀦 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄. 𑀦 𑀏𑀓𑀢𑁄 𑀩𑀦𑁆𑀥𑀧𑀺𑀡𑁆𑀟𑀺𑀓𑀫𑀁𑀲𑁄. 𑀲𑀫𑀦𑁆𑀢𑀢𑁄 𑀲𑀫𑀲𑀡𑁆𑀞𑀺𑀢𑁂𑀦 𑀫𑀁𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀸𑀳𑀺 𑀲𑀼𑀯𑀝𑁆𑀝𑀺𑀢𑀸𑀳𑀺 𑀲𑀸𑀮𑀺 𑀕𑀩𑁆𑀪𑀬𑀯𑀕𑀩𑁆𑀪𑀲𑀤𑀺𑀲𑀸𑀳𑀺 𑀚𑀗𑁆𑀖𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀏𑀡𑀺𑀫𑀺𑀕𑀚𑀗𑁆𑀖𑀲𑀤𑀺𑀲𑁄 𑀲𑀼𑀯𑀝𑁆𑀝𑀚𑀸𑀡𑀼𑀓𑁄𑀢𑀺 𑀣𑁄𑀫𑁂𑀢𑀺.

𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄𑀢𑀺 𑀓𑁄𑀲𑀘𑁆𑀙𑀸𑀤𑀅𑀗𑁆𑀕𑀚𑀸𑀢𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀉𑀲𑀪𑀯𑀸𑀭𑀡𑀸𑀤𑀻𑀦𑀁 𑀅𑀗𑁆𑀕𑀚𑀸𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀤𑀼𑀫 𑀓𑀡𑁆𑀡𑀺𑀓𑀲𑀤𑀺𑀲𑁂𑀦 𑀯𑀢𑁆𑀣𑀓𑁄𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑁂𑀦 𑀕𑀼𑀬𑁆𑀳𑀗𑁆𑀕𑀚𑀸𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀓𑀼𑀲𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀓𑁄𑀲𑁄. 𑀓𑀼𑀲𑀥𑀸𑀢𑀼 𑀕𑀢𑀺𑀬𑀁 𑀡. 𑀙𑀸𑀤𑀺𑀬𑀢𑀻𑀢𑀺 𑀙𑀸𑀤𑁄. 𑀙𑀤𑀥𑀸𑀢𑀼 𑀧𑀝𑀺𑀘𑁆𑀙𑀦𑁆𑀦𑁂 𑀡. 𑀓𑁄𑀲𑁂𑀦 𑀙𑀸𑀤𑁄 𑀓𑁄𑀲𑀘𑁆𑀙𑀸𑀤𑁄. 𑀅𑀗𑁆𑀕𑁂 𑀲𑀭𑀻𑀭𑀸𑀯𑀬𑀯𑁂 𑀚𑀸𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁. 𑀓𑁄𑀲𑀘𑁆𑀙𑀸𑀤𑀁 𑀅𑀗𑁆𑀕𑀚𑀸𑀢𑀁 𑀩𑁆𑀬𑀜𑁆𑀚𑀦𑀁 𑀬𑀲𑁆𑀲𑀸𑀢𑀺 𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄, 𑀩𑀼𑀤𑁆𑀥𑁄. 𑀪𑀕𑀯𑀢𑁄 𑀳𑀺 𑀉𑀲𑀪𑀯𑀸𑀭𑀡𑀸𑀤𑀻𑀦𑀁 𑀅𑀗𑁆𑀕𑀚𑀸𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀤𑀼𑀫𑀓𑀡𑁆𑀡𑀺 𑀓𑀲𑀤𑀺𑀲𑁂𑀦 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁂𑀦 𑀩𑁆𑀬𑀜𑁆𑀚𑀦𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑀲𑀫𑁆𑀧𑀦𑁆𑀦𑁄𑀢𑀺 𑀣𑁄𑀫𑁂𑀢𑀺. 𑀧𑀼𑀦𑀭𑀧𑀻𑀢𑀺 𑀧𑀼𑀦 𑀅𑀧𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀭𑀓𑀸𑀭𑀸 𑀕𑀫𑁄 ¶ . 𑀧𑀼𑀦𑀸𑀢𑀺 𑀏𑀲𑁄 𑀅𑀢𑁆𑀣𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑀼𑀕𑀢𑁄𑀢𑀺 𑀩𑀼𑀤𑁆𑀥𑁄. 𑀲𑁄 𑀳𑀺 𑀲𑀼𑀦𑁆𑀤𑀭𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄𑀢𑀺 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀫𑀺𑀯 𑀪𑀽𑀫𑀺𑀬𑀁 𑀲𑀫𑀁 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀲𑀫𑀁 𑀲𑀼𑀝𑁆𑀞𑀼 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀢𑀻𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀧𑀸𑀤𑁄. 𑀲𑀼 𑀧𑀢𑀺 𑀧𑀼𑀩𑁆𑀩𑁄 𑀞𑀸 𑀥𑀸𑀢𑀼 𑀕𑀢𑀺𑀦𑀺𑀯𑀢𑁆𑀢𑀺𑀬𑀁 𑀢. 𑀧𑀚𑁆𑀚𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄. 𑀧𑀤𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀧𑀸𑀤𑁄 𑀬𑀲𑁆𑀲𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀲𑀼𑀕𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀧𑀸𑀤𑀁 𑀞𑀧𑁂𑀦𑁆𑀢𑀸𑀦𑀁 𑀅𑀕𑁆𑀕𑀢𑀮𑀁 𑀯𑀸 𑀧𑀡𑁆𑀳𑀺𑀁 𑀯𑀸 𑀧𑀲𑁆𑀲𑀁 𑀯𑀸 𑀧𑀞𑀫𑀁 𑀨𑀼𑀲𑀢𑀺 𑀯𑁂𑀫𑀚𑁆𑀛𑀁 𑀯𑀸 𑀧𑀦 𑀙𑀺𑀤𑁆𑀤𑀁 𑀳𑁄𑀢𑀺, 𑀉𑀓𑁆𑀔𑀺𑀧𑀦𑁆𑀢𑀸𑀦𑀫𑁆𑀧𑀺 𑀅𑀕𑁆𑀕𑀢𑀮𑀸𑀤𑀻𑀲𑀼 𑀏𑀓𑀓𑁄𑀝𑁆𑀞𑀸𑀲𑁄𑀯 𑀧𑀞𑀫𑀁 𑀉𑀝𑁆𑀞𑀳𑀢𑀺, 𑀦 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀁 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀧𑀸𑀤𑀢𑀮𑀁 𑀪𑀽𑀫𑀺𑀁 𑀨𑀼𑀲𑀢𑀺, 𑀪𑀽𑀫𑀺𑀢𑁄 𑀉𑀝𑁆𑀞𑀳𑀢𑀺. 𑀲𑀘𑁂𑀧𑀺 𑀳𑀺 𑀪𑀕𑀯𑀸 𑀅𑀦𑁂𑀓𑀲𑀢𑀧𑁄𑀭𑀺𑀲𑀁 𑀦𑀭𑀓𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀧𑀸𑀤𑀁 𑀦𑀻𑀳𑀭𑀢𑀺, 𑀢𑀸𑀯𑀤𑁂𑀯 𑀦𑀺𑀦𑁆𑀦𑀝𑁆𑀞𑀸𑀦𑀁 𑀯𑀸𑀢𑀧𑀽𑀭𑀺𑀢𑀁 𑀯𑀺𑀬 𑀓𑀫𑁆𑀫𑀸𑀭𑀪𑀲𑁆𑀢𑀁 𑀉𑀦𑁆𑀦𑀫𑀺𑀢𑁆𑀯𑀸 𑀧𑀣𑀯𑀻𑀲𑀫𑀁 𑀳𑁄𑀢𑀺, 𑀉𑀦𑁆𑀦𑀢𑀝𑁆𑀞𑀸𑀦𑀫𑁆𑀧𑀺 𑀅𑀦𑁆𑀢𑁄 𑀧𑀯𑀺𑀲𑀢𑀺, 𑀤𑀽𑀭𑁂 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀅𑀪𑀺𑀦𑀻𑀳𑀭𑀦𑁆𑀢𑀲𑁆𑀲 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁄𑀧𑀺 𑀧𑀩𑁆𑀩𑀢𑁄 𑀲𑁂𑀤𑀺𑀢𑀯𑁂𑀢𑁆𑀣𑀗𑁆𑀓𑀼𑀭𑁄 𑀯𑀺𑀬 𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀘𑁆𑀙𑀢𑀺. 𑀢𑀣𑀸 𑀳𑀺𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀧𑀸𑀤𑁂 𑀅𑀪𑀺𑀦𑀻𑀳𑀭𑀢𑁄 𑀧𑀩𑁆𑀩𑀢𑁄 𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀢𑁄. 𑀲𑁄 𑀢𑀁 𑀅𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀧𑀸𑀤𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀓𑁆𑀓𑀫𑀺. 𑀦 𑀳𑀺 𑀘𑀓𑁆𑀓𑀮𑀓𑁆𑀔𑀡𑁂𑀦 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁 𑀯𑀺𑀲𑀫𑀁 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀸𑀡𑀼 𑀯𑀸 𑀓𑀡𑁆𑀟𑀓𑁄 𑀯𑀸 𑀲𑀓𑁆𑀔𑀭𑀓𑀣𑀮𑀸 𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀯𑀸 𑀔𑁂𑀴𑀲𑀺𑀗𑁆𑀖𑀡𑀺𑀓𑀸𑀤𑀻𑀦𑀺 𑀯𑀸 𑀧𑀼𑀭𑀺𑀫𑀢𑀭𑀸𑀯 𑀅𑀧𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀣𑀯𑀺𑀁 𑀧𑀯𑀺𑀲𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀻𑀮𑀢𑁂𑀚𑁂𑀦 𑀧𑀜𑁆𑀜𑀸𑀢𑁂𑀚𑁂𑀦 𑀥𑀫𑁆𑀫𑀢𑁂𑀚𑁂𑀦 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀆𑀦𑀼𑀪𑀸𑀯𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀫𑀸 𑀫𑀼𑀤𑀼 𑀧𑀼𑀧𑁆𑀨𑀸𑀓𑀺𑀡𑁆𑀡𑀸 𑀳𑁄𑀦𑁆𑀢𑀺. 𑀢𑀢𑁆𑀭 𑀢𑀣𑀸𑀕𑀢𑁄 𑀲𑀫𑀁 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺. 𑀲𑀫𑀁 𑀉𑀤𑁆𑀥𑀭𑀢𑀺, 𑀲𑀩𑁆𑀩𑀸𑀯𑀦𑁆𑀢𑁂𑀳𑀺 𑀧𑀸𑀤𑀢𑀮𑁂𑀳𑀺 ¶ 𑀪𑀽𑀫𑀺𑀁 𑀨𑀼𑀲𑀢𑀺, 𑀢𑀲𑁆𑀫𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄𑀢𑀺 𑀣𑁄𑀫𑁂𑀢𑀺.

𑀫𑀽𑀤𑁄 𑀤𑀸𑀢𑀼𑀡𑁆𑀡𑀮𑁄𑀫𑁄𑀢𑀺 𑀫𑀼𑀤 𑀑𑀤𑀸𑀢 𑀉𑀡𑁆𑀡𑀮𑁄𑀫𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀲𑁂𑀢𑁄 𑀲𑀼𑀤𑁆𑀥𑁄 𑀉𑀡𑁆𑀡𑀮𑁄𑀫𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀫𑀼𑀤𑀲𑀤𑁆𑀤𑁄 𑀲𑀡𑁆𑀳𑀲𑀼𑀔𑀼𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀫𑀼𑀤𑁂𑀢𑀺 𑀫𑀼𑀤𑀬𑀢𑀺 𑀲𑀢𑁆𑀢𑁂𑀢𑀺 𑀫𑀼𑀤𑁄, 𑀲𑀼𑀔𑀼𑀫𑁄. 𑀫𑀼𑀤𑀥𑀸𑀢𑀼 𑀫𑁄𑀤𑀦𑁂 𑀅. 𑀅𑀯𑀤𑀸𑀬𑀢𑀺 𑀔𑀡𑁆𑀟𑀺𑀬𑀢𑀻𑀢𑀺 𑀑𑀤𑀸𑀢𑁄. 𑀅𑀯𑀧𑀼𑀩𑁆𑀩 𑀤𑀸𑀥𑀸𑀢𑀼 𑀅𑀯𑀔𑀡𑁆𑀟𑀦𑁂 𑀢. 𑀅𑀣 𑀯𑀸 𑀅𑀯𑀤𑀸𑀬𑀢𑀺 𑀲𑀼𑀚𑁆𑀛𑀢𑀻𑀢𑀺 𑀑𑀤𑀸𑀢𑁄, 𑀬𑀣𑀸 𑀯𑁄𑀤𑀸𑀦𑀦𑁆𑀢𑀺. 𑀫𑀼𑀤𑁄 𑀘 𑀑𑀤𑀸𑀢𑁄 𑀘 𑀫𑀼𑀤𑁄𑀤𑀸𑀢𑁄, 𑀉𑀡𑀢𑀺 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀉𑀡𑁆𑀡𑀸, 𑀮𑁄𑀫𑁄. 𑀉𑀡𑁆𑀡𑀲𑀤𑁆𑀤𑁄 𑀳𑀺 𑀮𑁄𑀓𑁂 𑀮𑁄𑀫𑀲𑀤𑁆𑀤𑀧𑀭𑀺𑀬𑀸𑀬𑁄𑀢𑀺 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸. 𑀫𑀁𑀲𑀲𑁆𑀲 𑀉𑀧𑀭𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀉𑀡𑀥𑀸𑀢𑀼 𑀕𑀢𑀺𑀬𑀁 𑀡. 𑀫𑀁𑀲𑀘𑀫𑁆𑀫𑀸𑀦𑀺 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀮𑁄𑀫𑁄. 𑀮𑀼𑀥𑀸𑀢𑀼 𑀙𑀺𑀦𑁆𑀤𑀦𑁂 𑀫𑀦𑀺𑀧𑀘𑁆𑀘𑀬𑁄. 𑀮𑀼𑀦𑀺𑀢𑀩𑁆𑀩𑁄𑀢𑀺 𑀯𑀸 𑀮𑁄𑀫𑁄, 𑀉𑀡𑁆𑀡𑀸 𑀘 𑀲𑀸 𑀮𑁄𑀫𑁄 𑀘𑀸𑀢𑀺 𑀉𑀡𑁆𑀡𑀮𑁄𑀫𑁄, 𑀮𑁄𑀫𑀯𑀺𑀲𑁂𑀲𑁄. 𑀫𑀼𑀤𑁄 𑀤𑀸𑀢𑁄 𑀉𑀡𑁆𑀡𑀮𑁄𑀫𑁄 𑀬𑀲𑁆𑀲 𑀲𑁄𑀢𑀺 𑀫𑀼𑀤𑁄𑀤𑀸𑀢𑀼𑀡𑁆𑀡 𑀮𑁄𑀫𑁄, 𑀲𑀼𑀕𑀢𑁄. 𑀉𑀡𑁆𑀡𑀸𑀮𑁄𑀫𑀁 𑀧𑀦 𑀪𑀕𑀯𑀢𑁄 𑀤𑁆𑀯𑀺𑀦𑁆𑀦𑀁 𑀪𑀫𑀼𑀓𑀸𑀦𑀁 𑀯𑁂𑀫𑀚𑁆𑀛𑁂 𑀦𑀸𑀲𑀺𑀫𑀢𑁆𑀣𑀓𑁂𑀬𑁂𑀯 𑀚𑀸𑀢𑀁. 𑀉𑀕𑁆𑀕𑀦𑁆𑀢𑁆𑀯𑀸 𑀧𑀦 𑀦𑀮𑀸𑀝𑀫𑀚𑁆𑀛𑁂 𑀚𑀸𑀢𑀁. 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀭𑁂𑀢𑁆𑀯𑀸 𑀞𑀧𑀺𑀢𑀲𑀢 𑀯𑀺𑀢𑀢𑀓𑀧𑁆𑀧𑀸𑀲𑀧𑀝𑀮𑀁 𑀯𑀺𑀬 𑀫𑀼𑀤𑀁. 𑀧𑀭𑀺𑀲𑀼𑀤𑁆𑀥𑀑𑀲𑀥𑀺𑀢𑀸𑀭𑀓𑀯𑀡𑁆𑀡𑀁 𑀯𑀺𑀬 𑀘 𑀲𑀺𑀧𑁆𑀧𑀮𑀺𑀢𑀽𑀮𑀮𑀢𑀸𑀢𑀽𑀮𑀁 𑀯𑀺𑀬 𑀘 𑀯𑀺𑀕𑀢𑀫𑀮𑁂𑀦 𑀑𑀤𑀸𑀢𑀁 𑀉𑀡𑁆𑀡𑀸𑀮𑁄𑀫𑀁 𑀅𑀢𑁆𑀣𑀺, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑁋

‘‘𑀉𑀡𑁆𑀡𑀸 𑀔𑁄 𑀧𑀦𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼 𑀢𑀽𑀮𑀲𑀦𑁆𑀦𑀺𑀪𑀸’’𑀢𑀺.

𑀢𑀁 𑀧𑀦𑁂𑀢𑀁 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀬𑀫𑀸𑀦𑀁 𑀉𑀧𑀟𑁆𑀠 𑀩𑀸𑀳𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀯𑀺𑀲𑁆𑀲𑀝𑁆𑀞𑀁 𑀤𑀓𑁆𑀔𑀺𑀡𑀸𑀯𑀝𑁆𑀝𑀯𑀲𑁂𑀦 𑀆𑀯𑀝𑁆𑀝𑀺𑀢𑁆𑀯𑀸 𑀉𑀤𑁆𑀥𑀕𑁆𑀕𑀸 𑀳𑀼𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀲𑀼𑀯𑀡𑁆𑀡𑀨𑀮𑀓𑀫𑀚𑁆𑀛𑁂 𑀞𑀧𑀺𑀢𑀭𑀚𑀢 𑀧𑀼𑀧𑁆𑀨𑀼𑀴𑀓𑀁 ¶ 𑀯𑀺𑀬, 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀫𑁆𑀫𑀫𑀸𑀦𑀁 𑀔𑀻𑀭𑀥𑀸𑀭𑀁 𑀯𑀺𑀬 𑀅𑀭𑀼𑀡𑀧𑁆𑀧𑀪𑀸𑀭𑀜𑁆𑀚𑀺𑀢𑁂 𑀕𑀕𑀦𑀢𑀮𑁂 𑀑𑀲𑀥𑀺𑀢𑀸𑀭𑀓𑀁 𑀯𑀺𑀬 𑀘 𑀅𑀢𑀺𑀫𑀦𑁄𑀳𑀭𑀸𑀬 𑀲𑀺𑀭𑀺𑀬𑀸 𑀯𑀺𑀭𑁄𑀘𑀢𑀺, 𑀢𑀲𑁆𑀫𑀸 𑀫𑀽𑀤𑁄𑀤𑀸𑀢𑀼𑀡𑁆𑀡𑀮𑁄𑀫𑁄𑀢𑀺 𑀣𑁄𑀫𑁂𑀢𑀺.

𑀅𑀣𑀫𑀧𑀻𑀢𑀺 𑀢𑀤𑀜𑁆𑀜𑀁 𑀅𑀧𑀺. 𑀲𑀼𑀕𑀢𑁄𑀢𑀺 𑀩𑀼𑀤𑁆𑀥𑁄. 𑀲𑁄 𑀳𑀺 𑀲𑀼𑀦𑁆𑀤𑀭𑀯𑀸𑀘𑀁 𑀕𑀤𑀢𑀺 𑀯𑀤𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄𑀢𑀺 𑀩𑁆𑀭𑀳𑁆𑀫𑀉𑀚𑀼𑀉𑀕𑁆𑀕𑀢𑀅𑀢𑁆𑀢𑀪𑀸𑀯𑁄𑀢𑀺 𑀧𑀤𑀯𑀺𑀪𑀸𑀕𑁄. 𑀩𑁆𑀭𑀳𑁆𑀫𑀼𑀦𑁄 𑀉𑀚𑀼 𑀉𑀕𑁆𑀕𑀢𑀅𑀢𑁆𑀢𑀪𑀸𑀯𑁄 𑀯𑀺𑀬 𑀉𑀚𑀼𑀫𑁂𑀯 𑀉𑀕𑁆𑀕𑀢𑀅𑀢𑁆𑀢𑀪𑀸𑀯𑁄 𑀤𑀻𑀖𑀲𑀭𑀻𑀭𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀧𑀦 ‘‘𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄’’𑀢𑀺𑀧𑀸𑀞𑁄. 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀸 𑀯𑀺𑀬 𑀉𑀚𑀼𑀕𑀢𑁆𑀢𑁄 𑀉𑀚𑀼𑀫𑁂𑀯 𑀉𑀕𑁆𑀕𑀢𑀤𑀻𑀖𑀲𑀭𑀻𑀭𑁄𑀢𑀺 𑀯𑀺𑀯𑀭𑀢𑀺. 𑀢𑀁 𑀧𑀦 𑀲𑀦𑁆𑀥𑀸𑀬 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁.

𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀛𑀸𑀦𑀸𑀤𑀺𑀕𑀼𑀡𑁂𑀳𑀺 𑀉𑀧𑀭𑀽𑀧𑀭𑀺𑀩𑁆𑀭𑀽𑀳𑀢𑀺 𑀯𑀟𑁆𑀠𑀢𑀻𑀢𑀺 𑀩𑁆𑀭𑀳𑁆𑀫𑀸. 𑀩𑁆𑀭𑀽𑀳𑀥𑀸𑀢𑀼 𑀯𑀟𑁆𑀠𑀦𑁂 𑀫, 𑀅𑀭𑀢𑀺 𑀅𑀯𑀗𑁆𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀉𑀚𑀼, 𑀅𑀯𑀗𑁆𑀓𑁄. 𑀅𑀭𑀥𑀸𑀢𑀼 𑀕𑀢𑀺𑀬𑀁 𑀚𑀼𑀧𑀘𑁆𑀘𑀬𑁄. 𑀅𑀭𑀺𑀲𑁆𑀲 𑀉𑀆𑀤𑁂𑀲𑁄. 𑀉𑀤𑁆𑀥𑀁 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀉𑀕𑁆𑀕𑀢𑁄. 𑀉𑀧𑀼𑀩𑁆𑀩 𑀕𑀫𑀼𑀥𑀸𑀢𑀼 𑀕𑀢𑀺𑀬𑀁 𑀢𑁄. 𑀆𑀳𑀺𑀢𑁄 𑀆𑀭𑁄𑀧𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀲𑀭𑀻𑀭𑁄. 𑀆𑀧𑀼𑀩𑁆𑀩 𑀥𑀸 𑀥𑀸𑀢𑀼 𑀭𑁄𑀧𑀦𑁂 𑀫𑀦𑀺𑀧𑀘𑁆𑀘𑀬𑁄 𑀢𑀼𑀧𑀘𑁆𑀘𑀬𑁄 𑀯𑀸. 𑀥𑀲𑁆𑀲 𑀢𑁄. 𑀫𑀲𑁆𑀲 𑀢𑁄. 𑀅𑀣 𑀯𑀸 𑀲𑀼𑀔𑀤𑀼𑀓𑁆𑀔𑀁 𑀅𑀤𑀢𑀺 𑀅𑀦𑀼𑀪𑀯𑀢𑀻𑀢𑀺 𑀅𑀢𑁆𑀢𑀸. 𑀅𑀤𑀥𑀸𑀢𑀼 𑀅𑀦𑀼𑀪𑀯𑀦𑁂 𑀫𑀦𑀺𑀧𑀘𑁆𑀘𑀬𑁄. 𑀓𑀘𑁆𑀘𑀸𑀬𑀦𑀲𑀤𑁆𑀤𑀲𑀢𑁆𑀣𑁂 𑀧𑀦 ‘‘𑀲𑀼𑀔𑀤𑀼𑀓𑁆𑀔𑀁 𑀅𑀤𑀢𑀺 𑀪𑀓𑁆𑀔𑀢𑀻𑀢𑀺 𑀅𑀢𑁆𑀢𑀸, 𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀻𑀳𑀺 𑀅𑀤𑀺𑀬𑀢𑁂 𑀪𑀓𑁆𑀔𑀺𑀬𑀢𑁂𑀢𑀺 𑀯𑀸 𑀅𑀢𑁆𑀢𑀸. 𑀆𑀢𑀼𑀫𑀸’’𑀢𑀺 𑀯𑀼𑀢𑁆𑀢𑀁. 𑀔𑁆𑀬𑀸𑀤𑀻𑀳𑀺 𑀫𑀦𑀺𑀫𑀘 𑀢𑁄𑀯𑀸𑀢𑀺 𑀲𑀼𑀢𑁆𑀢𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀸𑀢𑀺 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺 𑀘 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸𑀢𑀺 𑀅𑀢𑁆𑀢𑀪𑀸𑀯𑁄, 𑀭𑀽𑀧𑀓𑀸𑀬𑁄. 𑀅𑀦𑀼𑀝𑀻𑀓𑀸𑀬𑀁 𑀧𑀦 ‘‘𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀲𑁄𑀏𑀯 𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀭𑀧𑀭𑀺𑀓𑀧𑁆𑀧𑀺𑀢𑁄 𑀯𑀺𑀬 𑀦𑀺𑀘𑁆𑀘𑁄𑀢𑀺 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀸𑀢𑀺 𑀯𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀕𑀳𑁂𑀢𑀩𑁆𑀩𑀸𑀓𑀸𑀭𑁂𑀦 𑀪𑀯𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀢𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁 ¶ . 𑀩𑁆𑀭𑀳𑁆𑀫𑀼𑀦𑁄 𑀉𑀚𑀼𑀫𑁂𑀯 𑀉𑀕𑁆𑀕𑀢𑁄 𑀅𑀢𑁆𑀢𑀪𑀸𑀯𑁄 𑀯𑀺𑀬 𑀉𑀚𑀼𑀫𑁂𑀯 𑀉𑀕𑁆𑀕𑀢𑁄 𑀅𑀢𑁆𑀢𑀪𑀸𑀯𑁄 𑀬𑀲𑁆𑀲 𑀲𑁄𑀢𑀺 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄, 𑀲𑀼𑀕𑀢𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀔𑀦𑁆𑀥𑁂 𑀓𑀝𑀺𑀬𑀁 𑀚𑀸𑀡𑀼𑀲𑀽𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀺. 𑀣𑁄𑀓𑀁 𑀓𑀝𑀺𑀬𑀁 𑀦𑀫𑀦𑁆𑀢𑀸 𑀧𑀘𑁆𑀙𑀢𑁄 𑀦𑀫𑀦𑁆𑀢𑀺. 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀼𑀭𑀢𑁄. 𑀤𑀻𑀖𑀲𑀭𑀻𑀭𑀸 𑀧𑀦𑁂𑀓𑁂 𑀧𑀲𑁆𑀲𑀸 𑀯𑀗𑁆𑀓𑀸 𑀳𑁄𑀦𑁆𑀢𑀺, 𑀏𑀓𑁂 𑀫𑀼𑀔𑀁 𑀉𑀦𑁆𑀦𑀫𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀕𑀡𑀬𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺, 𑀏𑀓𑁂 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀲𑀽𑀮𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀧𑀯𑁂𑀥𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀢𑀣𑀸𑀕𑀢𑁄 𑀧𑀦 𑀉𑀚𑀼𑀫𑁂𑀯 𑀉𑀕𑁆𑀕𑀦𑁆𑀢𑁆𑀯𑀸 𑀤𑀻𑀖𑀧𑁆𑀧𑀫𑀸𑀡𑁄 𑀤𑁂𑀯𑀦𑀕𑀭𑁂 𑀉𑀲𑁆𑀲𑀺𑀢𑀲𑀼𑀯𑀡𑁆𑀡 𑀢𑁄𑀭𑀡𑀁 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄𑀢𑀺 𑀣𑁄𑀫𑁂𑀢𑀺.

𑀦𑀻𑀮𑀓𑁆𑀔𑀻𑀢𑀺 𑀦𑀻𑀮𑀅𑀓𑁆𑀔𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀢𑀺𑀦𑀻𑀮𑀦𑁂𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀓𑁆𑀔𑀢𑀺 𑀧𑀲𑁆𑀲𑀢𑀺 𑀅𑀦𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑀯𑀺𑀲𑀫𑀁 𑀯𑀸𑀢𑀺 𑀅𑀓𑁆𑀔𑀺, 𑀦𑁂𑀢𑁆𑀢𑀁. 𑀇𑀓𑁆𑀔𑀥𑀸𑀢𑀼 𑀤𑀲𑁆𑀲𑀦𑁂 𑀇. 𑀇𑀲𑁆𑀲 𑀅𑀢𑁆𑀢𑀁. 𑀦𑀻𑀮𑀸 𑀅𑀢𑀺𑀦𑀻𑀮𑀸 𑀅𑀓𑁆𑀔𑀺 𑀦𑁂𑀢𑁆𑀢𑀸 𑀬𑀲𑁆𑀲𑀸𑀢𑀺 𑀦𑀻𑀮𑀓𑁆𑀔𑀺, 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀦 𑀲𑀓𑀮𑀦𑀻𑀮𑀓𑁆𑀔𑀺𑀯 𑀳𑁄𑀢𑀺. 𑀦𑀻𑀮𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀦𑀲𑁆𑀲 𑀉𑀫𑁆𑀫𑀸𑀭𑀧𑀼𑀧𑁆𑀨𑀲𑀤𑀺𑀲𑁂𑀦 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀦𑀻𑀮𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺 𑀅𑀓𑁆𑀔𑀻𑀦𑀺 𑀳𑁄𑀦𑁆𑀢𑀺. 𑀧𑀻𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀤𑀺𑀲𑁂𑀦 𑀮𑁄𑀳𑀺𑀢𑀯𑀡𑁆𑀡𑁂𑀦. 𑀮𑁄𑀳𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑁂𑀦 𑀮𑁄𑀳𑀺𑀢𑀯𑀡𑁆𑀡𑁂𑀦. 𑀲𑁂𑀢 𑀬𑀼𑀢𑁆𑀢𑀝𑁆𑀞𑀸𑀦𑁂 𑀑𑀲𑀥𑀺𑀢𑀸𑀭𑀓𑀲𑀤𑀺𑀲𑁂𑀦 𑀲𑁂𑀢𑀯𑀡𑁆𑀡𑁂𑀦. 𑀓𑀸𑀴 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀤𑀺𑀲𑁂𑀦 𑀓𑀸𑀴𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀲𑀤𑀺𑀲𑀸𑀦𑀺 𑀔𑀸𑀬𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 ‘‘𑀫𑀁𑀲𑀘𑀓𑁆𑀔𑀼𑀫𑁆𑀳𑀺 𑀪𑀕𑀯𑀢𑁄 𑀧𑀜𑁆𑀘𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀦𑀻𑀮𑁄 𑀘 𑀯𑀡𑁆𑀡𑁄, 𑀧𑀻𑀢𑀓𑁄 𑀘 𑀯𑀡𑁆𑀡𑁄, 𑀮𑁄𑀳𑀺𑀢𑀓𑁄 𑀘 𑀯𑀡𑁆𑀡𑁄, 𑀓𑀡𑁆𑀳𑁄 𑀘 𑀯𑀡𑁆𑀡𑁄, 𑀑𑀤𑀸𑀢𑁄 𑀘 𑀯𑀡𑁆𑀡𑁄 𑀅𑀓𑁆𑀔𑀺𑀮𑁄𑀫𑀸𑀦𑀺 𑀘 𑀪𑀕𑀯𑀢𑁄, 𑀬𑀢𑁆𑀣 𑀘 𑀅𑀓𑁆𑀔𑀺 𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺. 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀉𑀫𑁆𑀫𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀧𑀻𑀢𑀓𑀁 𑀳𑁄𑀢𑀺 ¶ 𑀲𑀼𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀉𑀪𑀢𑁄 𑀅𑀓𑁆𑀔𑀺𑀓𑀼𑀝𑀸𑀦𑀺 𑀪𑀕𑀯𑀢𑁄 𑀮𑁄𑀳𑀺𑀢𑀓𑀸𑀦𑀺 𑀳𑁄𑀦𑁆𑀢𑀺 𑀲𑀼𑀮𑁄𑀳𑀺𑀓𑀸𑀦𑀺 𑀧𑀸𑀲𑀸𑀤𑀺𑀓𑀸𑀦𑀺 𑀤𑀲𑁆𑀲𑀦𑁂𑀬𑁆𑀬𑀸𑀦𑀺 𑀇𑀦𑁆𑀤𑀕𑁄𑀧𑀓𑀲𑀫𑀸𑀦𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀁 𑀳𑁄𑀢𑀺 𑀲𑀼𑀓𑀡𑁆𑀳𑀁 𑀅𑀮𑀽𑀔𑀁 𑀲𑀼𑀤𑁆𑀥𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀅𑀤𑁆𑀤𑀸𑀭𑀺𑀝𑁆𑀞𑀓 𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀑𑀤𑀸𑀢𑀁 𑀳𑁄𑀢𑀺 𑀲𑀼𑀑𑀤𑀸𑀢𑀁 𑀲𑁂𑀢𑀁 𑀧𑀡𑁆𑀟𑀭𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀑𑀲𑀥𑀺𑀢𑀸𑀭𑀓𑀲𑀫𑀸𑀦’’𑀦𑁆𑀢𑀺. 𑀪𑀕𑀯𑀸 𑀧𑀦 𑀢𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂𑀧𑀺 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘.

𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 𑁋

‘‘𑀢𑁂𑀦 𑀪𑀕𑀯𑀸 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀅𑀢𑁆𑀢𑀪𑀸𑀯 𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘. 𑀬𑀤𑀸𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺, 𑀲𑀽𑀭𑀺𑀬𑁄 𑀘 𑀅𑀢𑁆𑀣𑀗𑁆𑀕𑀫𑀺𑀢𑁄 𑀳𑁄𑀢𑀺, 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄 𑀳𑁄𑀢𑀺, 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄 𑀳𑁄𑀢𑀺, 𑀫𑀳𑀸 𑀘 𑀓𑀸𑀴𑀫𑁂𑀖𑁄 𑀅𑀩𑁆𑀪𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀏𑀯𑀭𑀽𑀧𑁂𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀲𑁄 𑀓𑀼𑀝𑁆𑀝𑁄 𑀯𑀸 𑀓𑀯𑀸𑀝𑀁 𑀯𑀸 𑀧𑀸𑀓𑀸𑀭𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬𑀸’’𑀢𑀺. 𑀢𑀲𑁆𑀫𑀸 𑀉𑀧𑀮𑀓𑁆𑀔𑀡𑀦𑀬𑁂𑀦 𑀦𑀻𑀮𑀓𑁆𑀔𑀻𑀢𑀺 𑀣𑁄𑀫𑁂𑀢𑀺.

𑀤𑀻𑀖𑀧𑀡𑁆𑀳𑀻𑀢𑀺 𑀆𑀬𑀢𑀧𑀡𑁆𑀳𑀺. 𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀻𑀢𑀺 𑀅𑀢𑁆𑀣𑁄. 𑀧𑀲𑀢𑀺 𑀩𑀸𑀥𑀢𑀺 𑀅𑀦𑁂𑀦 𑀧𑀭𑁂𑀲𑀦𑁆𑀢𑀺 𑀧𑀡𑁆𑀳𑀺, 𑀧𑀸𑀤𑀲𑁆𑀲 𑀧𑀘𑁆𑀙𑀸𑀪𑀸𑀕𑁄. 𑀧𑀲𑀥𑀸𑀢𑀼 𑀩𑀸𑀥𑀦𑁂 𑀡𑀺. 𑀲𑀲𑁆𑀲 𑀳𑁄. 𑀡𑁆𑀯𑀸𑀤𑀺𑀫𑁄𑀕𑁆𑀕𑀮𑁆𑀮𑀸𑀦𑁂 𑀧𑀦 ‘‘𑀧𑀡 𑀩𑁆𑀬𑀯𑀳𑀸𑀭𑀣𑀼𑀢𑀻𑀲𑀼 𑀳𑀺 𑀧𑀡𑀺𑀬𑀢𑀺 𑀯𑁄𑀳𑀸𑀭𑀺𑀬𑀢𑀻𑀢𑀺 𑀧𑀡𑁆𑀳𑀺, 𑀧𑀸𑀤𑀲𑁆𑀲 𑀧𑀘𑁆𑀙𑀸𑀪𑀸𑀕𑁄’’𑀢𑀺 𑀯𑀼𑀢𑁆𑀢𑀁. 𑀤𑀻𑀖𑀸 𑀧𑀡𑁆𑀳𑀺 𑀬𑀲𑁆𑀲 𑀲𑁄𑀢𑀺 𑀤𑀻𑀖𑀧𑀡𑁆𑀳𑀺, 𑀲𑀼𑀕𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕 𑀧𑀸𑀤𑁄 𑀤𑀻𑀖𑁄 𑀳𑁄𑀢𑀺. 𑀧𑀡𑁆𑀳𑀺𑀫𑀢𑁆𑀣𑀓𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺 𑀧𑀡𑁆𑀳𑀺𑀁 ¶ 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀳𑁄𑀢𑀺. 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀕𑁆𑀕𑀧𑀸𑀤𑀸 𑀳𑁄𑀦𑁆𑀢𑀺. 𑀢𑀢𑀺𑀬𑁂 𑀓𑁄𑀝𑁆𑀞𑀸𑀲𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺. 𑀘𑀢𑀼𑀢𑁆𑀣𑁂 𑀓𑁄𑀝𑁆𑀞𑀸𑀲𑁂 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀭𑀢𑁆𑀢𑀓𑀫𑁆𑀩𑀮𑁂 𑀕𑁂𑀡𑁆𑀟𑀼𑀓𑀲𑀤𑀺𑀲𑀸 𑀧𑀡𑁆𑀳𑀺 𑀳𑁄𑀢𑀺. 𑀢𑀲𑁆𑀫𑀸 𑀤𑀻𑀖𑀧𑀡𑁆𑀳𑀻𑀢𑀺 𑀣𑁄𑀫𑁂𑀢𑀺.

𑀲𑀼𑀔𑀼𑀫𑀫𑀮𑀙𑀯𑀻𑀢𑀺 𑀲𑀼𑀔𑀼𑀫 𑀅𑀫𑀮 𑀙𑀯𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀡𑁆𑀳𑀫𑀮𑀯𑀺𑀲𑀼𑀤𑁆𑀥𑀢𑀘𑁄 𑀲𑀡𑁆𑀳𑀫𑀮𑀯𑀺𑀭𑀳𑀺𑀢𑀢𑀘𑁄 𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀼𑀔𑀼𑀫𑀲𑀤𑁆𑀤𑁄 𑀲𑀡𑁆𑀳𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀲𑀼𑀔𑀬𑀢𑀺 𑀲𑀡𑁆𑀳𑀪𑀸𑀯𑁂𑀦𑀸𑀢𑀺 𑀲𑀼𑀔𑀼𑀫𑀁, 𑀲𑀡𑁆𑀳𑀁. 𑀲𑀼𑀔𑀥𑀸𑀢𑀼 𑀢𑀓𑁆𑀓𑀭𑀺𑀬𑀁 𑀉𑀫𑀧𑀘𑁆𑀘𑀬𑁄. 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀓𑀺𑀮𑀺𑀝𑁆𑀞𑀁 𑀫𑀮𑀢𑀺 𑀥𑀸𑀭𑁂𑀢𑀻𑀢𑀺 𑀫𑀮𑀁, 𑀭𑀚𑀸𑀤𑀺𑀫𑀮𑀁. 𑀫𑀮𑀥𑀸𑀢𑀼 𑀥𑀸𑀭𑀡𑁂 𑀅, 𑀦𑀢𑁆𑀣𑀺 𑀫𑀮𑀫𑁂𑀢𑀺𑀲𑁆𑀲𑀸𑀢𑀺 𑀅𑀫𑀮𑀸, 𑀙𑀯𑀻. 𑀫𑀁𑀲𑀁 𑀙𑀸𑀤𑁂𑀢𑀻𑀢𑀺 𑀙𑀯𑀻. 𑀙𑀤 𑀥𑀸𑀢𑀼 𑀲𑀁𑀯𑀭𑀡𑁂 𑀭𑀯𑀧𑀘𑁆𑀘𑀬𑁄 𑀈𑀧𑀘𑁆𑀘𑀬𑁄 𑀘. 𑀲𑀼𑀔𑀼𑀫𑀸 𑀲𑀡𑁆𑀳𑀸 𑀅𑀫𑀮𑀸 𑀫𑀮𑀯𑀺𑀭𑀳𑀺𑀢𑀸 𑀙𑀯𑀻 𑀬𑀲𑁆𑀲𑀸𑀢𑀺 𑀲𑀼𑀔𑀼𑀫𑀫𑀮𑀙𑀯𑀻, 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀲𑀼𑀯𑀡𑁆𑀡𑀲𑀺𑀦𑀺𑀤𑁆𑀥𑀲𑀡𑁆𑀳𑀲𑀭𑀻𑀭𑀢𑁆𑀢𑀸 𑀓𑀜𑁆𑀘𑀦𑀲𑀦𑁆𑀦𑀺𑀪 𑀢𑀘𑀢𑁆𑀢𑀸 𑀘 𑀭𑀽𑀧𑀓𑀸𑀬𑁂 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀥𑀼 𑀯𑀺𑀬 𑀭𑀚𑁄𑀚𑀮𑁆𑀮𑀁 𑀯𑀸 𑀫𑀮𑀁 𑀯𑀸 𑀦 𑀮𑀺𑀫𑁆𑀧𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑁂 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑁋

‘‘𑀲𑀼𑀔𑀼𑀫𑀘𑁆𑀙𑀯𑀻 𑀔𑁄 𑀧𑀦 𑀪𑀯𑀁 𑀕𑁄𑀢𑀫𑁄 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀻’’𑀢𑀺. 𑀢𑀲𑁆𑀫𑀸 𑀲𑀼𑀔𑀼𑀫 𑀫𑀮𑀙𑀯𑀻𑀢𑀺 𑀣𑁄𑀫𑁂𑀢𑀺.

𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀣𑁄𑀫𑁆𑀬𑀭𑀲 𑀕𑀲 𑀅𑀕𑁆𑀕𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀣𑁄𑀫𑀺𑀢𑀩𑁆𑀩 𑀭𑀲𑀳𑀭𑀡𑀲𑀢𑁆𑀢𑀲𑀳𑀲𑁆𑀲𑀦𑁆𑀳𑀸𑀭𑀽 𑀉𑀤𑁆𑀥𑀕𑁆𑀕𑀺𑀓𑀸𑀢𑀺 𑀅𑀢𑁆𑀣𑁄. 𑀣𑁄𑀫𑀺𑀬𑀢𑀻𑀢𑀺 𑀣𑁄𑀫𑁆𑀬𑁄, 𑀦𑁆𑀳𑀸𑀭𑀼. 𑀣𑁄𑀫𑀥𑀸𑀢𑀼 𑀲𑀻𑀮𑀸𑀖𑀸𑀬𑀁 𑀡𑁆𑀬𑁄. 𑀫𑀥𑀼𑀭𑀸𑀤𑀺𑀪𑁂𑀤𑀁 𑀭𑀲𑀁 𑀕𑀲𑁂𑀦𑁆𑀢𑀺 𑀅𑀦𑁆𑀢𑁄 𑀧𑀯𑁂𑀲𑁂𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸, 𑀦𑁆𑀳𑀸𑀭𑀼. 𑀭𑀲𑀲𑀤𑁆𑀤𑀽𑀧𑀧𑀤𑀕𑀲𑀥𑀸𑀢𑀼 𑀅𑀤𑀦𑁂 𑀅. 𑀅𑀣 𑀯𑀸 𑀭𑀲𑀁 𑀕𑀲𑀢𑀺 𑀳𑀭𑀢𑀺 𑀏𑀢𑁂𑀳𑀻𑀢𑀺 𑀭𑀲𑀕𑁆𑀕𑀲𑀸 ¶ , 𑀦𑁆𑀳𑀸𑀭𑀼. 𑀕𑀲𑀥𑀸𑀢𑀼 𑀳𑀭𑀡𑁂 𑀅. 𑀥𑀸𑀢𑀼𑀲𑀤𑁆𑀤𑁄 𑀳𑀺 𑀅𑀦𑁂𑀓𑀢𑁆𑀣𑁄. 𑀭𑀲𑀕𑁆𑀕𑀲𑀸𑀦𑀁 𑀅𑀕𑁆𑀕𑀸𑀢𑀺 𑀭𑀲𑀕𑁆𑀕𑀲𑀕𑁆𑀕𑀸, 𑀢𑁂 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀕𑁆𑀕𑀻, 𑀦𑁆𑀳𑀸𑀭𑀼. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀈𑀧𑀘𑁆𑀘𑀬𑁄. 𑀣𑁄𑀫𑁆𑀬𑁄 𑀭𑀲𑀕𑁆𑀕𑀲𑀕𑁆𑀕𑀻 𑀬𑀲𑁆𑀲 𑀲𑁄𑀢𑀺 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻, 𑀲𑀼𑀕𑀢𑁄. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀢𑁆𑀢𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀕𑀻𑀯𑀸𑀬𑀫𑁂𑀯 𑀧𑀝𑀺𑀫𑀼𑀓𑁆𑀓𑀸𑀦𑀺. 𑀢𑀺𑀮𑀨𑀮𑀫𑀢𑁆𑀢𑁄𑀧𑀺 𑀆𑀳𑀸𑀭𑁄 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑁄 𑀲𑀩𑁆𑀩𑀁 𑀓𑀸𑀬𑀁 𑀅𑀦𑀼𑀨𑀭𑀢𑀺. 𑀢𑁂𑀦𑁂𑀯 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 𑀏𑀓𑀢𑀡𑁆𑀟𑀼𑀮𑀸𑀤𑀻𑀳𑀺𑀧𑀺 𑀓𑀴𑀸𑀬𑀬𑀽𑀲𑀧𑀲𑀢𑁂𑀦𑀧𑀺 𑀓𑀸𑀬𑀲𑁆𑀲 𑀬𑀸𑀧𑀦𑀁 𑀳𑁄𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀢𑀣𑀸 𑀅𑀪𑀸𑀯𑀸 𑀦 𑀲𑀓𑀮𑀓𑀸𑀬𑀁 𑀑𑀚𑀸 𑀨𑀭𑀢𑀺. 𑀢𑁂𑀦 𑀢𑁂 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺. 𑀇𑀤𑀁 𑀮𑀓𑁆𑀔𑀡𑀁 𑀅𑀧𑁆𑀧𑀸𑀩𑀸𑀥𑀢𑀸𑀲𑀗𑁆𑀔𑀸𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀲𑁆𑀲𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀣𑁄𑀫𑁂𑀢𑀺.

𑀢𑁂𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁪. 𑀤𑀼𑀢𑀺𑀬𑀕𑀸𑀣𑀸𑀬𑀁 𑀚𑀺𑀦𑁄𑀢𑀺 𑀧𑀜𑁆𑀘𑀫𑀸𑀭𑀚𑀺𑀢𑀯𑀸 𑀩𑀼𑀤𑁆𑀥𑁄. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀲𑀫𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄𑀢𑁆𑀬𑀸𑀤𑀻𑀳𑀺 𑀧𑀤𑁂𑀳𑀺 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄𑀢𑀺 𑀘𑀢𑁆𑀢𑀸𑀮𑀻𑀲𑀅𑀕𑁆𑀕𑀤𑀦𑁆𑀢𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀫𑀘𑀢𑁆𑀢𑀸𑀮𑀻𑀲 𑀉𑀢𑁆𑀢𑀫𑀤𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀕𑁆𑀕𑀲𑀤𑁆𑀤𑁄 𑀉𑀢𑁆𑀢𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀉𑀢𑁆𑀢𑀫𑀪𑀸𑀯𑀁 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑁄, 𑀤𑀦𑁆𑀢𑁄. 𑀤𑀁𑀲𑀢𑀺 𑀯𑀺𑀤𑀁𑀲𑀢𑀺 𑀪𑁄𑀚𑁆𑀚𑀫𑀦𑁂𑀦𑀸𑀢𑀺 𑀤𑀦𑁆𑀢𑁄. 𑀤𑀁𑀲𑀥𑀸𑀢𑀼 𑀤𑀁𑀲𑀦𑁂 𑀢. 𑀢𑀲𑁆𑀲 𑀦𑁆𑀢𑁄 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀲𑀫𑀘𑀢𑁆𑀢𑀸𑀮𑀻𑀲𑀁 𑀅𑀕𑁆𑀕𑁄 𑀉𑀢𑁆𑀢𑀫𑁄 𑀤𑀦𑁆𑀢𑁄 𑀬𑀲𑁆𑀲𑀸𑀢𑀺 𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄, 𑀚𑀺𑀦𑁄. 𑀉𑀧𑀭𑀺𑀫𑀳𑀦𑀼𑀓𑁂 𑀧𑀢𑀺𑀝𑁆𑀞𑀺𑀢𑀸 𑀤𑀦𑁆𑀢𑀸 𑀯𑀻𑀲𑀢𑀺 𑀳𑁂𑀝𑁆𑀞𑀺𑀫𑁂 𑀯𑀻𑀲𑀢𑀻𑀢𑀺 𑀲𑀫𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀭𑀺𑀧𑀼𑀡𑁆𑀡𑀤𑀦𑁆𑀢𑀸𑀦𑀫𑁆𑀧𑀺 𑀤𑁆𑀯𑀢𑁆𑀢𑀺𑀁𑀲𑀤𑀦𑁆𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀕𑀢𑀲𑁆𑀲 𑀧𑀦 𑀘𑀢𑁆𑀢𑀸𑀮𑀻𑀲𑀁. 𑀢𑀲𑁆𑀫𑀸 𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄𑀢𑀺 𑀣𑁄𑀫𑁂𑀢𑀺.

𑀲𑀫𑀓𑀮𑀧𑀦𑀚𑁄𑀢𑀺 ¶ 𑀓𑀓𑀘𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄 𑀯𑀺𑀬 𑀲𑀫𑀤𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀮𑀧𑀢𑀺 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀮𑀧𑀦𑀁, 𑀫𑀼𑀔𑀁. 𑀮𑀧𑀥𑀸𑀢𑀼 𑀯𑀤𑀦𑁂 𑀬𑀼. 𑀢𑀲𑁆𑀫𑀺𑀁 𑀮𑀧𑀦𑁂 𑀫𑀼𑀔𑁂 𑀚𑀸𑀢𑁄𑀢𑀺 𑀮𑀧𑀦𑀚𑁄, 𑀤𑀦𑁆𑀢𑁄. 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄𑀬𑀁, 𑀲𑀫𑀓𑁄 𑀮𑀧𑀦𑀚𑁄 𑀤𑀦𑁆𑀢𑁄 𑀬𑀲𑁆𑀲𑀸𑀢𑀺 𑀲𑀫𑀓𑀮𑀧𑀦𑀚𑁄, 𑀚𑀺𑀦𑁄. 𑀧𑀸𑀴𑀺𑀬𑀁 𑀧𑀦 ‘‘𑀲𑀫𑀤𑀦𑁆𑀢𑁄’’𑀢𑀺 𑀧𑀸𑀞𑁄 𑀅𑀢𑁆𑀣𑀺. 𑀅𑀬𑀫𑁂𑀯𑀢𑁆𑀣𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀓𑁂𑀘𑀺 𑀤𑀦𑁆𑀢𑀸 𑀉𑀘𑁆𑀘𑀸, 𑀓𑁂𑀘𑀺 𑀦𑀻𑀘𑀸𑀢𑀺 𑀯𑀺𑀲𑀫𑀸 𑀳𑁄𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀅𑀬𑀧𑀝𑁆𑀝𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀁 𑀯𑀺𑀬 𑀲𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀫𑀓𑀮𑀧𑀦𑀚𑁄𑀢𑀺 𑀣𑁄𑀫𑁂𑀢𑀺.

𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄𑀢𑀺 𑀅𑀦𑁆𑀢𑀭𑀅𑀁𑀲𑀧𑀻𑀦𑁄𑀢𑀺 𑀧𑀤𑀯𑀺𑀪𑀸𑀕𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀅𑀁𑀲𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀁 𑀯𑁂𑀫𑀚𑁆𑀛𑁂 𑀧𑀭𑀺𑀧𑀼𑀡𑁆𑀡𑀧𑀺𑀝𑁆𑀞𑀺𑀢𑀮𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀁𑀲𑀲𑀤𑁆𑀤𑁄 𑀔𑀦𑁆𑀥𑀢𑁆𑀣𑁂 𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀅𑀁𑀲𑁄 𑀦𑀺𑀢𑁆𑀣𑀺 𑀪𑀼𑀚𑀲𑀺𑀭𑁄, 𑀔𑀦𑁆𑀥𑁄 𑀢𑀲𑁆𑀲𑀦𑁆𑀥𑀺 𑀚𑀢𑁆𑀢𑀼 𑀢’’𑀦𑁆𑀢𑀺.

𑀅𑀦𑀢𑀺 𑀚𑀻𑀯𑀢𑀺 𑀏𑀢𑁂𑀦𑀸𑀢𑀺 𑀅𑀁𑀲𑁄, 𑀔𑀦𑁆𑀥𑁄. 𑀅𑀦𑀥𑀸𑀢𑀼 𑀧𑀸𑀡𑁂 𑀲𑁄𑀧𑀘𑁆𑀘𑀬𑁄. 𑀦𑀲𑁆𑀲 𑀦𑀺𑀕𑁆𑀕𑀳𑀺𑀢𑀸𑀤𑁂𑀲𑁄. 𑀲𑀭𑀻𑀭𑀲𑁆𑀲 𑀅𑀯𑀬𑀯𑀪𑀸𑀯𑁂𑀦 𑀅𑀦𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀅𑀁𑀲𑁄, 𑀤𑁆𑀯𑀺𑀦𑁆𑀦𑀁 𑀅𑀁𑀲𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀁 𑀯𑁂𑀫𑀚𑁆𑀛𑀦𑁆𑀢𑀺 𑀅𑀦𑁆𑀢𑀭𑀁𑀲𑁄, 𑀧𑀺𑀡𑀢𑀺 𑀧𑀽𑀭𑀢𑀻𑀢𑀺 𑀧𑀻𑀦𑁄, 𑀧𑀺𑀝𑁆𑀞𑀺𑀢𑀮𑀁. 𑀧𑀺𑀡𑀥𑀸𑀢𑀼 𑀧𑀺𑀦𑀦𑁂 𑀧𑀽𑀭𑀡𑁂 𑀯𑀸 𑀡. 𑀡𑀲𑁆𑀲 𑀦𑁄. 𑀤𑁆𑀯𑀺𑀦𑁆𑀦𑀁 𑀅𑀁𑀲𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀁 𑀯𑁂𑀫𑀚𑁆𑀛𑁂 𑀧𑀻𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀺𑀝𑁆𑀞𑀺𑀢𑀮𑀁 𑀬𑀲𑁆𑀲𑀸𑀢𑀺 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄, 𑀚𑀺𑀦𑁄. 𑀉𑀢𑁆𑀢𑀭𑀧𑀤𑀮𑁄𑀧𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄𑀬𑀁. 𑀅𑀜𑁆𑀜𑁂𑀲𑀜𑁆𑀳𑀺 𑀢𑀁 𑀞𑀸𑀦𑀁 𑀦𑀺𑀦𑁆𑀦𑀁 𑀳𑁄𑀢𑀺, 𑀤𑁆𑀯𑁂 𑀧𑀺𑀝𑁆𑀞𑀺𑀓𑁄𑀝𑁆𑀝𑀸 𑀧𑀸𑀝𑀺𑀏𑀓𑁆𑀓𑀁 𑀧𑀜𑁆𑀜𑀸𑀬𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀮𑀁 𑀬𑀸𑀯 𑀔𑀦𑁆𑀥𑀸 𑀉𑀕𑁆𑀕𑀫𑁆𑀫 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀨𑀮𑀓𑀁 𑀯𑀺𑀬 𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀁. 𑀢𑀲𑁆𑀫𑀸 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄𑀢𑀺 𑀣𑁄𑀫𑁂𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀘𑀺𑀢𑀦𑁆𑀢𑀭𑀁𑀲𑁄’’𑀢𑀺 𑀧𑀸𑀞𑁄. 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 ‘‘𑀘𑀺𑀢𑀦𑁆𑀢𑀭𑀁 𑀲𑁄𑀢𑀺 ¶ 𑀅𑀦𑁆𑀢𑀭𑀁𑀲𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀝𑀸𑀦𑀫𑀦𑁆𑀢𑀭𑀁. 𑀢𑀁 𑀧𑀭𑀺𑀧𑀼𑀡𑁆𑀡 𑀫𑀲𑁆𑀲𑀸𑀢𑀺 𑀅𑀦𑁆𑀢𑀭𑀁𑀲𑁄’’𑀢𑀺 𑀯𑀼𑀢𑁆𑀢𑀁.

𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄𑀢𑀺 𑀘𑀓𑁆𑀓𑁂𑀦 𑀅𑀗𑁆𑀓𑀺𑀢𑀧𑀸𑀤𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑁂𑀦 𑀮𑀓𑁆𑀔𑀺𑀢𑀧𑀸𑀤𑀢𑀮𑁄𑀢𑀺 𑀅𑀢𑁆𑀣𑁄. 𑀘𑀓𑁆𑀓𑁂𑀦 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑁂𑀦 𑀅𑀗𑁆𑀓𑀺𑀢𑁄 𑀮𑀓𑁆𑀔𑀺𑀢𑁄 𑀧𑀸𑀤𑁄 𑀬𑁂𑀦 𑀲𑁄𑀢𑀺 𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄, 𑀚𑀺𑀦𑁄. 𑀢𑀢𑀺𑀬𑀸𑀩𑀳𑀼𑀩𑁆𑀩𑀻𑀳𑀺 𑀲𑀫𑀸𑀲𑁄𑀬𑀁. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀸𑀤𑀢𑀮𑁂 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓 𑀮𑀓𑁆𑀔𑀡𑀁 𑀦𑀢𑁆𑀣𑀺. 𑀢𑀣𑀸𑀕𑀢𑀲𑁆𑀲 𑀧𑀸𑀤𑀢𑀮𑁂𑀏𑀯 𑀯𑀺𑀘𑀺𑀢𑁆𑀭𑀁 𑀅𑀝𑁆𑀞𑀲𑀢 𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄𑀢𑀺 𑀣𑁄𑀫𑁂𑀢𑀺.

𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀳𑁂𑀝𑁆𑀞𑀸 𑀔𑁄 𑀧𑀦 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀻’’𑀢𑀺. 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑀲𑀭𑀽𑀧𑀁 𑀧𑀦 𑀬𑁄 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸 𑀚𑀺𑀓𑁂𑀳𑀻𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀅𑀯𑀺𑀭𑀴𑀤𑀲𑀦𑁄𑀢𑀺 𑀅𑀯𑀺𑀯𑀭𑀤𑀦𑁆𑀢𑁄. 𑀅𑀯𑀺𑀯𑀭𑀤𑀦𑁆𑀢𑁂𑀦 𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀭𑀢𑀺 𑀨𑀼𑀮𑁆𑀮𑀢𑀻𑀢𑀺 𑀯𑀺𑀭𑀴𑁄. 𑀯𑀭𑀥𑀸𑀢𑀼 𑀨𑀼𑀮𑁆𑀮𑀦𑁂𑀴𑁄. 𑀅𑀲𑁆𑀲𑀺. 𑀦 𑀯𑀺𑀭𑀴𑁄 𑀅𑀯𑀺𑀭𑀴𑁄, 𑀦𑀢𑁆𑀣𑀺 𑀯𑀺𑀭𑀴𑁄 𑀏𑀢𑀲𑁆𑀲𑀸𑀢𑀺 𑀅𑀯𑀺𑀭𑀴𑁄, 𑀤𑀦𑁆𑀢𑁄. 𑀤𑀁𑀲𑀢𑀺 𑀯𑀺𑀤𑀁𑀲𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀏𑀢𑁂𑀦𑀸𑀢𑀺 𑀤𑀲𑀦𑁄, 𑀤𑀦𑁆𑀢𑁄. 𑀤𑀁𑀲𑀥𑀸𑀢𑀼 𑀤𑀁𑀲𑀦𑁂 𑀬𑀼. 𑀦𑀺𑀕𑁆𑀕𑀳𑀺𑀢𑀮𑁄𑀧𑁄. 𑀅𑀯𑀺𑀭𑀴𑁄 𑀤𑀲𑀦𑁄 𑀤𑀦𑁆𑀢𑁄 𑀬𑀲𑁆𑀲𑀸𑀢𑀺 𑀅𑀯𑀺𑀭𑀴𑀤𑀲𑀦𑁄, 𑀚𑀺𑀦𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀓𑀼𑀫𑁆𑀪𑀺𑀮𑀸𑀦𑀁 𑀯𑀺𑀬 𑀤𑀦𑁆𑀢𑀸 𑀯𑀺𑀭𑀴𑀸 𑀳𑁄𑀦𑁆𑀢𑀺. 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀔𑀸𑀤𑀦𑁆𑀢𑀸𑀦𑀁 𑀤𑀦𑁆𑀢𑀦𑁆𑀢𑀭𑀁 𑀧𑀽𑀭𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀓𑀦𑀓𑀮𑀢𑀸𑀬 𑀲𑀫𑀼𑀲𑁆𑀲𑀸𑀧𑀺𑀢𑀯𑀚𑀺𑀭 𑀧𑀦𑁆𑀢𑀺 𑀯𑀺𑀬 𑀅𑀯𑀺𑀭𑀴𑀸 𑀢𑀼𑀮𑀺𑀓𑀸𑀬 𑀤𑀲𑁆𑀲𑀺𑀢𑀧𑀭𑀺𑀘𑁆𑀙𑁂𑀤𑀸 𑀯𑀺𑀬 𑀤𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀯𑀺𑀭𑀴𑀤𑀲𑀦𑁄𑀢𑀺 𑀣𑁄𑀫𑁂𑀢𑀺.

𑀫𑀸𑀭𑀚𑀼𑀲𑁆𑀲𑀗𑁆𑀔𑀧𑀸𑀤𑁄𑀢𑀺 𑀫𑀸𑀭𑀚𑀺 𑀉𑀲𑁆𑀲𑀗𑁆𑀔𑀧𑀸𑀤𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀢𑁆𑀣 𑀘 𑀫𑀸𑀭𑀚𑀻𑀢𑀺 𑀧𑀜𑁆𑀘𑀫𑀸𑀭𑀚𑀺𑀢𑀯𑀸 𑀩𑀼𑀤𑁆𑀥𑁄 𑀓𑀢𑁆𑀢𑀼𑀪𑀽𑀢𑁄. 𑀲𑁄 ¶ 𑀳𑀺 𑀧𑀜𑁆𑀘𑀫𑀸𑀭𑁂 𑀚𑀺𑀢𑀯𑀸𑀢𑀺 𑀫𑀸𑀭𑀚𑀻𑀢𑀺 𑀯𑀼𑀘𑁆𑀘𑀢𑀺. 𑀉𑀲𑁆𑀲𑀗𑁆𑀔𑀧𑀸𑀤𑁄𑀢𑀺 𑀧𑀸𑀤𑀲𑁆𑀲 𑀉𑀧𑀭𑀺 𑀞𑀺𑀢𑁂𑀦 𑀲𑀗𑁆𑀔𑀲𑀤𑀺𑀲𑀢𑁆𑀢𑀸 𑀲𑀗𑁆𑀔𑀦𑀸𑀫𑀺𑀓𑁂𑀦 𑀕𑁄𑀧𑁆𑀨𑀓𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀁𑀲𑀼𑀝𑁆𑀞𑀼𑀁 𑀧𑀣𑀯𑀺𑀁 𑀔𑀦𑀢𑀻𑀢𑀺 𑀲𑀗𑁆𑀔𑁂. 𑀲𑀁𑀧𑀼𑀩𑁆𑀩𑀔𑀦𑀼𑀥𑀸𑀢𑀼 𑀅𑀯𑀤𑀸𑀭𑀡𑁂 𑀓𑁆𑀯𑀺. 𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀁𑀲𑀼𑀝𑁆𑀞𑀼𑀁 𑀔𑀸𑀤𑀦𑁆𑀢𑁄 𑀔𑀡𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀗𑁆𑀔𑁂. 𑀲𑀫𑀼𑀤𑁆𑀤𑀚𑀮𑀧𑀭𑀺𑀬𑀦𑁆𑀢𑁂 𑀘𑀭𑀫𑀸𑀦𑁄 𑀕𑀘𑁆𑀙𑀢𑀺 𑀘𑀭𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑁂 𑀯𑀺𑀬𑀸𑀢𑀺 𑀲𑀗𑁆𑀔𑁂, 𑀕𑁄𑀧𑁆𑀨𑀓𑁄. 𑀧𑀸𑀤𑀲𑁆𑀲 𑀉𑀤𑁆𑀥𑀁 𑀉𑀧𑀭𑀺 𑀞𑀺𑀢𑀁 𑀲𑀗𑁆𑀔𑀲𑀤𑀺𑀲𑀁 𑀕𑁄𑀧𑁆𑀨𑀓 𑀫𑀲𑁆𑀲𑀸𑀢𑀺 𑀉𑀲𑁆𑀲𑀗𑁆𑀔𑀧𑀸𑀤𑁄, 𑀚𑀺𑀦𑁄. 𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀉𑀤𑁆𑀥𑀁 𑀧𑀢𑀺𑀝𑁆𑀞𑀺𑀢𑀕𑁄𑀧𑁆𑀨𑀓𑀢𑁆𑀢𑀸 𑀉𑀲𑁆𑀲𑀗𑁆𑀔𑀸 𑀧𑀸𑀤𑀸 𑀅𑀲𑁆𑀲𑀸𑀢𑀺 𑀉𑀲𑁆𑀲𑀗𑁆𑀔𑀧𑀸𑀤𑁄’’𑀢𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀺𑀝𑁆𑀞𑀺𑀧𑀸𑀤𑁂 𑀕𑁄𑀧𑁆𑀨𑀓𑀸 𑀳𑁄𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀧𑀸𑀤𑀸 𑀆𑀡𑀺𑀩𑀤𑁆𑀥𑀸 𑀯𑀺𑀬 𑀩𑀤𑁆𑀥𑀸 𑀳𑁄𑀦𑁆𑀢𑀺. 𑀦 𑀬𑀣𑀸𑀲𑀼𑀔𑀁 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀕𑀘𑁆𑀙𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀅𑀪𑀺𑀭𑀽𑀳𑀺𑀢𑁆𑀯𑀸 𑀉𑀧𑀭𑀺 𑀕𑁄𑀧𑁆𑀨𑀓𑀸 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀢𑁂𑀦𑀲𑁆𑀲 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀦𑀸𑀯𑀸𑀬 𑀞𑀧𑀺𑀢 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺. 𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀺. 𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄 𑀉𑀪𑀬𑀧𑀲𑁆𑀲𑁂𑀲𑀼𑀧𑀺 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀦 𑀳𑀢𑁆𑀣𑀻𑀦𑀁 𑀯𑀺𑀬 𑀧𑀘𑁆𑀙𑀢𑁄𑀬𑁂𑀯𑀸𑀢𑀺. 𑀢𑀲𑁆𑀫𑀸 𑀉𑀲𑁆𑀲𑀗𑁆𑀔𑀧𑀸𑀤𑁄𑀢𑀺 𑀣𑁄𑀫𑁂𑀢𑀺.

𑀢𑀺𑀝𑁆𑀞𑀦𑁆𑀢𑁄 𑀦𑁄𑀦𑀫𑀦𑁆𑀢𑁄𑀪𑀬𑀓𑀭𑀫𑀼𑀤𑀼𑀦𑀸 𑀚𑀡𑁆𑀡𑀼𑀓𑀸𑀦𑀸𑀫 𑀲𑀦𑁆𑀢𑁄𑀢𑀺 𑀏𑀢𑁆𑀣 𑀢𑀺𑀝𑁆𑀞𑀦𑁆𑀢𑁄 𑀦𑁄 𑀦𑀫𑀦𑁆𑀢𑁄 𑀉𑀪𑀬 𑀓𑀭𑀫𑀼𑀤𑀼𑀦𑀸 𑀚𑀡𑁆𑀡𑀼𑀓𑀸𑀦𑀺 𑀆𑀫𑀲𑀦𑁆𑀢𑁄𑀢𑀺 𑀧𑀤𑀯𑀺𑀪𑀸𑀕𑁄. 𑀢𑀺𑀝𑁆𑀞𑀦𑁆𑀢𑁄𑀢𑀺 𑀞𑀺𑀢𑀓𑁄𑀯. 𑀦𑁄𑀦𑀫𑀦𑁆𑀢𑁄𑀢𑀺 𑀅𑀦𑀫𑀫𑀸𑀦𑁄 𑀳𑀼𑀢𑁆𑀯𑀸. 𑀉𑀪𑀬 𑀓𑀭𑀫𑀼𑀤𑀼𑀦𑀸𑀢𑀺 𑀲𑀼𑀔𑀼𑀫𑁂𑀦 𑀳𑀢𑁆𑀣𑀤𑁆𑀯𑀬𑁂𑀦. 𑀚𑀡𑁆𑀡𑀼𑀓𑀸𑀦𑀻𑀢𑀺 𑀚𑀗𑁆𑀖𑀸𑀦𑀺. 𑀚𑀸𑀬𑀢𑀺 𑀕𑀫𑀦𑀸𑀕𑀫𑀦𑀁 𑀅𑀦𑁂𑀦𑀸𑀢𑀺 𑀚𑀡𑁆𑀡𑀼, 𑀚𑀦𑀥𑀸𑀢𑀼 𑀚𑀦𑀦𑁂 𑀡𑀼. 𑀲𑁄𑀏𑀯 𑀚𑀡𑁆𑀡𑀼𑀓𑀸, 𑀚𑀗𑁆𑀖𑁄𑀭𑀽𑀦𑀁 𑀲𑀦𑁆𑀥𑀺 𑀮𑀩𑁆𑀪𑀢𑀺. 𑀢𑀸𑀦𑀺. 𑀆𑀫𑀲𑀦𑁆𑀢𑁄𑀢𑀺 𑀧𑀭𑀺𑀫𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄. 𑀏𑀢𑁆𑀣 𑀘 𑀢𑀺𑀝𑁆𑀞𑀦𑁆𑀢𑁄 𑀦𑁄𑀦𑀫𑀦𑁆𑀢𑁄𑀢𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀅𑀔𑀼𑀚𑁆𑀚𑀅𑀯𑀸𑀫𑀦𑀪𑀸𑀯𑁄 𑀤𑀻𑀧𑀺𑀢𑁄 ¶ . 𑀅𑀯𑀲𑁂𑀲𑀚𑀦𑀸 𑀳𑀺 𑀔𑀼𑀚𑁆𑀚𑀸 𑀯𑀸 𑀳𑁄𑀦𑁆𑀢𑀺 𑀯𑀸𑀫𑀦𑀸 𑀯𑀸. 𑀔𑀼𑀚𑁆𑀚𑀸𑀦𑀁 𑀉𑀧𑀭𑀺𑀫𑀓𑀸𑀬𑁄 𑀅𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺 𑀯𑀸𑀫𑀦𑀸𑀦𑀁 𑀳𑁂𑀝𑁆𑀞𑀺𑀫𑀓𑀸𑀬𑁄. 𑀢𑁂 𑀅𑀧𑀭𑀺𑀧𑀼𑀡𑁆𑀡𑀓𑀸𑀬𑀢𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀦𑁄𑀦𑀫𑀦𑁆𑀢𑁄 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑀼𑀁. 𑀢𑀣𑀸𑀕𑀢𑁄 𑀧𑀦 𑀧𑀭𑀺𑀧𑀼𑀡𑁆𑀡𑀉𑀪𑀬𑀓𑀸𑀬𑀢𑁆𑀢𑀸 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀺𑀝𑁆𑀞𑀦𑁆𑀢𑁄…𑀧𑁂… 𑀚𑀡𑁆𑀡𑀼𑀓𑀸 𑀦𑀸𑀫𑀲𑀦𑁆𑀢𑁄𑀢𑀺 𑀣𑁄𑀫𑁂𑀢𑀺.

𑀯𑀝𑁆𑀝𑀓𑁆𑀔𑀦𑁆𑀥𑁄𑀢𑀺 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑁄 𑀯𑀺𑀬 𑀲𑀫𑀯𑀝𑁆𑀝𑀺𑀢𑀕𑀮𑀺𑀓𑁄. 𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄’’𑀢𑀺. 𑀧𑀭𑀺𑀫𑀡𑁆𑀟𑀮𑀸 𑀓𑀸𑀭𑁂𑀦 𑀯𑀝𑁆𑀝𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀝𑁆𑀝𑁄, 𑀧𑀭𑀺𑀫𑀡𑁆𑀟𑀮𑁄. 𑀯𑀝𑁆𑀝𑀥𑀸𑀢𑀼 𑀯𑀝𑁆𑀝𑀦𑁂 𑀅. 𑀪𑁄𑀚𑀦𑀁 𑀔𑀸𑀤𑀢𑀺 𑀏𑀢𑁂𑀦 𑀕𑀮𑁂𑀦𑀸𑀢𑀺 𑀔𑀦𑁆𑀥𑁄, 𑀕𑀮𑁄. 𑀔𑀸𑀤𑀥𑀸𑀢𑀼 𑀔𑀸𑀤𑀦𑁂 𑀪𑀓𑁆𑀔𑀦𑁂 𑀯𑀸 𑀓𑁆𑀯𑀺𑀧𑀘𑁆𑀘𑀬𑁄. 𑀔𑀸𑀤𑀸𑀫𑀕𑀫𑀸𑀦𑀁 𑀔𑀦𑁆𑀥𑀦𑁆𑀥𑀕𑀦𑁆𑀥𑀸𑀢𑀺 𑀲𑀼𑀢𑁆𑀢𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀥𑀸𑀦𑀝𑀻𑀓𑀸𑀬𑀁 𑀧𑀦 ‘‘𑀓𑀁 𑀫𑀢𑁆𑀣𑀓𑀁 𑀤𑀥𑀸𑀢𑀻𑀢𑀺 𑀓𑀦𑁆𑀥𑁄. 𑀲𑁄𑀏𑀯 𑀓𑀓𑀸𑀭𑀲𑁆𑀲 𑀔𑀓𑀸𑀭𑀓𑀭𑀡𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀝𑁆𑀝𑁄 𑀲𑀫𑀧𑀭𑀺𑀫𑀡𑁆𑀟𑀮𑁄 𑀔𑀦𑁆𑀥𑁄 𑀕𑀮𑁄 𑀬𑀲𑁆𑀲𑀸𑀢𑀺 𑀯𑀝𑁆𑀝𑀓𑁆𑀔𑀦𑁆𑀥𑁄, 𑀚𑀺𑀦𑁄. 𑀬𑀣𑀸 𑀳𑀺 𑀏𑀓𑁂 𑀓𑁄𑀜𑁆𑀘𑀸 𑀯𑀺𑀬 𑀩𑀓𑀸 𑀯𑀺𑀬 𑀯𑀭𑀸𑀳𑀸 𑀯𑀺𑀬 𑀘 𑀤𑀻𑀖𑀕𑀮𑀸 𑀯𑀗𑁆𑀓𑀕𑀮𑀸 𑀧𑀼𑀣𑀼𑀕𑀮𑀸 𑀘 𑀳𑁄𑀦𑁆𑀢𑀺. 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀮𑀁 𑀧𑀜𑁆𑀜𑀸𑀬𑀢𑀺. 𑀫𑀦𑁆𑀤𑁄 𑀲𑀭𑁄 𑀦𑀺𑀓𑁆𑀔𑀫𑀢𑀺, 𑀦 𑀏𑀯𑀁 𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀼𑀯𑀝𑁆𑀝𑀺𑀢𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑁄 𑀔𑀦𑁆𑀥𑁄 𑀕𑀮𑁄 𑀳𑁄𑀢𑀺. 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀮𑀁 𑀦 𑀧𑀜𑁆𑀜𑀸𑀬𑀢𑀺. 𑀫𑁂𑀖𑀲𑁆𑀲 𑀯𑀺𑀬 𑀕𑀚𑁆𑀚𑀢𑁄 𑀲𑀭𑁄 𑀫𑀳𑀸 𑀳𑁄𑀢𑀺. 𑀢𑀲𑁆𑀫𑀸 𑀯𑀝𑁆𑀝𑀓𑁆𑀔𑀦𑁆𑀥𑁄𑀢𑀺 𑀣𑁄𑀫𑁂𑀢𑀺.

𑀧𑀼𑀦 𑀚𑀺𑀦𑁄𑀢𑀺 𑀩𑀼𑀤𑁆𑀥𑁄 𑀓𑀢𑁆𑀢𑀼𑀪𑀽𑀢𑁄. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀕𑁄𑀢𑀭𑀼𑀡𑀧𑀔𑀼𑀫𑀓𑁄𑀢𑁆𑀬𑀸𑀤𑀻𑀳𑀺 𑀧𑀤𑁂𑀳𑀺 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀕𑁄𑀢𑀭𑀼𑀡𑀧𑀔𑀼𑀫𑀓𑁄𑀢𑀺 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀭𑀢𑁆𑀢 𑀯𑀘𑁆𑀙𑀲𑁆𑀲 𑀘𑀓𑁆𑀔𑀼𑀪𑀡𑁆𑀟𑁄 𑀯𑀺𑀬 𑀯𑀺𑀧𑁆𑀧𑀲𑀦𑁆𑀦𑀘𑀓𑁆𑀔𑀼𑀪𑀡𑁆𑀟𑁄, 𑀯𑀺𑀧𑁆𑀧𑀲𑀦𑁆𑀦𑀘𑀓𑁆𑀔𑀼𑀪𑀡𑁆𑀟𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀸. 𑀏𑀢𑁆𑀣 𑀘 𑀧𑀔𑀼𑀫𑀓𑁄𑀢𑀺 𑀲𑀓𑀮𑀁 𑀘𑀓𑁆𑀔𑀼𑀪𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀘𑀓𑁆𑀔𑀼𑀪𑀡𑁆𑀟𑀦𑁆𑀢𑀺 𑀘𑀓𑁆𑀔𑀼𑀧𑀭𑀺𑀯𑀸𑀭𑀁. 𑀘𑀓𑁆𑀔𑀼𑀪𑀡𑁆𑀟𑀦𑁆𑀢𑀺 𑀅𑀓𑁆𑀔𑀺𑀤𑀮𑀦𑁆𑀢𑀺 𑀓𑁂𑀘𑀺. 𑀅𑀓𑁆𑀔𑀺𑀤𑀮𑀧𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺 𑀅𑀜𑁆𑀜𑁂. 𑀅𑀓𑁆𑀔𑀺𑀤𑀮𑁂 𑀳𑀺 ¶ 𑀧𑀦 𑀲𑀤𑁆𑀥𑀺𑀁 𑀅𑀓𑁆𑀔𑀺𑀩𑀺𑀫𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀧𑀢𑀢𑀺 𑀘𑀓𑁆𑀔𑀼𑀁 𑀧𑀭𑀺𑀯𑀸𑀭𑁂𑀢𑀺 𑀏𑀢𑁂𑀦𑀸𑀢𑀺 𑀧𑀔𑀼𑀫𑀁, 𑀧𑀫𑁆𑀳𑀸𑀤𑀺𑀧𑀭𑀺𑀯𑀸𑀭𑀁. 𑀧𑀢𑀥𑀸𑀢𑀼 𑀧𑀭𑀺𑀯𑀸𑀭𑁂 𑀉𑀫𑁄. 𑀢𑀓𑀸𑀭𑀲𑁆𑀲 𑀔𑁄. 𑀅𑀣 𑀯𑀸 𑀅𑀓𑁆𑀔𑀺𑀦𑁄 𑀧𑀓𑁆𑀔𑀤𑁆𑀯𑀬𑁂 𑀚𑀸𑀢𑀦𑁆𑀢𑀺 𑀧𑀔𑀼𑀫𑀁, 𑀧𑀫𑁆𑀳𑀁. 𑀚𑀸𑀢𑀢𑀤𑁆𑀥𑀺𑀢𑁂 𑀉𑀫𑁄. 𑀧𑀓𑁆𑀔𑀼𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀓𑀓𑀸𑀭𑀮𑁄𑀧𑀯𑀲𑁂𑀦 𑀧𑀔𑀼𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀔𑀼𑀫𑀁𑀬𑁂𑀯 𑀧𑀔𑀼𑀫𑀓𑁄. 𑀕𑁄𑀢𑀭𑀼𑀡𑀲𑁆𑀲 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀭𑀢𑁆𑀢𑀯𑀘𑁆𑀙𑀲𑁆𑀲 𑀧𑀔𑀼𑀫𑀁 𑀯𑀺𑀬 𑀧𑀔𑀼𑀫𑀁 𑀬𑀲𑁆𑀲 𑀲𑁄𑀢𑀺 𑀕𑁄𑀢𑀭𑀼𑀡𑀧𑀔𑀼𑀫𑀓𑁄, 𑀚𑀺𑀦𑁄. 𑀕𑁄𑀢𑀭𑀼𑀡𑀲𑁆𑀲 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀭𑀢𑁆𑀢𑀯𑀘𑁆𑀙𑀲𑁆𑀲 𑀧𑀔𑀼𑀫𑀲𑀤𑀺𑀲𑀁 𑀯𑀺𑀧𑁆𑀧𑀲𑀦𑁆𑀦𑀘𑀓𑁆𑀔𑀼𑀪𑀡𑁆𑀟𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀅𑀓𑁆𑀔𑀺𑀪𑀡𑁆𑀟𑁄 𑀅𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀳𑀢𑁆𑀣𑀺𑀫𑀽𑀲𑀺𑀓𑀓𑀸𑀓𑀸𑀤𑀻𑀦𑀁 𑀅𑀓𑁆𑀔𑀺𑀲𑀤𑀺𑀲𑁂𑀳𑀺 𑀯𑀺𑀦𑀺𑀕𑁆𑀕𑀢𑁂𑀳𑀺 𑀕𑀫𑁆𑀪𑀻𑀭𑁂𑀳𑀺𑀧𑀺 𑀅𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀢𑀣𑀸𑀕𑀢𑀲𑁆𑀲 𑀧𑀦 𑀥𑁄𑀯𑀺𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀫𑀡𑀺𑀕𑀼𑀴𑀺𑀓𑀸 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀦𑀻𑀮 𑀲𑀼𑀔𑀼𑀫𑀧𑀔𑀼𑀫𑀸𑀘𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀕𑁄𑀢𑀭𑀼𑀡𑀧𑀔𑀼𑀫𑀓𑁄𑀢𑀺 𑀣𑁄𑀫𑁂𑀢𑀺.

𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄𑀢𑀺 𑀲𑀻𑀳𑀲𑁆𑀲 𑀧𑀼𑀩𑁆𑀩𑀟𑁆𑀠𑀓𑀸𑀬𑁄 𑀯𑀺𑀬 𑀧𑀭𑀺𑀧𑀼𑀡𑁆𑀡𑀓𑀸𑀬𑁄. 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀁 𑀲𑀳𑀢𑀺 𑀔𑀫𑀢𑀻𑀢𑀺 𑀲𑀻𑀳𑁄, 𑀲𑀳𑀥𑀸𑀢𑀼 𑀔𑀫𑀦𑁂 𑀅. 𑀈𑀓𑀸𑀭𑀸𑀕𑀫𑁄. 𑀅𑀣 𑀯𑀸 𑀲𑀽𑀓𑀭𑀫𑀳𑀺𑀁𑀲𑀸𑀤𑀬𑁄 𑀲𑀢𑁆𑀢𑁂 𑀳𑀺𑀁𑀲𑀢𑀻𑀢𑀺 𑀲𑀻𑀳𑁄. 𑀳𑀺𑀁𑀲𑀥𑀸𑀢𑀼 𑀳𑀦𑀦𑁂 𑀡. 𑀳𑀺𑀁𑀲𑁄𑀢𑀺 𑀯𑀢𑁆𑀢𑀩𑁆𑀩𑁂 𑀅𑀓𑁆𑀔𑀭𑀯𑀺𑀧𑀭𑀺𑀬𑀸𑀬𑁂𑀦 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑀢𑁆𑀢𑀸 𑀲𑀼𑀝𑁆𑀞𑀼 𑀈𑀳𑀢𑀺 𑀯𑀸𑀬𑀫𑀢𑀻𑀢𑀺 𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄. 𑀲𑀼𑀧𑀼𑀩𑁆𑀩 𑀈𑀳𑀥𑀸𑀢𑀼 𑀘𑁂𑀢𑀸𑀬𑀁 𑀅. 𑀢𑁂𑀦 𑀯𑀼𑀢𑁆𑀢𑀁 𑀲𑀤𑁆𑀤𑀦𑀻𑀢𑀺𑀬𑀁 ‘‘𑀲𑀳𑀳𑀺𑀁𑀲 𑀈𑀳𑀸𑀯𑀲𑀸, 𑀲𑀻𑀳𑀲𑀤𑁆𑀤𑀕𑀢𑀺𑀁 𑀯𑀤𑁂’’𑀢𑀺. 𑀲𑀻𑀳𑀲𑁆𑀲 𑀧𑀼𑀩𑁆𑀩𑀟𑁆𑀠𑁂 𑀚𑀸𑀢𑁄 𑀓𑀸𑀬𑁄 𑀯𑀺𑀬 𑀧𑀭𑀺𑀧𑀼𑀡𑁆𑀡𑀓𑀸𑀬𑁄 𑀬𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄, 𑀚𑀺𑀦𑁄. 𑀬𑀣𑀸 𑀳𑀺 𑀲𑀻𑀳𑀲𑁆𑀲 𑀧𑀼𑀩𑁆𑀩𑀟𑁆𑀠𑀓𑀸𑀬𑁄𑀯 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀦 𑀏𑀯𑀁 𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀓𑀸𑀬𑁄 𑀲𑀩𑁆𑀩𑀧𑀭𑀺𑀧𑀼𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀲𑀻𑀳𑀲𑁆𑀲 𑀧𑀦 𑀧𑀼𑀭𑀺𑀫𑀓𑀸𑀬𑁄𑀯 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀧𑀘𑁆𑀙𑀺𑀫 𑀓𑀸𑀬𑁄 ¶ 𑀅𑀧𑀭𑀺𑀧𑀼𑀡𑁆𑀡𑁄. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀧𑀼𑀩𑁆𑀩𑀟𑁆𑀠𑀓𑀸𑀬𑁄𑀇𑀯 𑀲𑀩𑁆𑀩𑁄 𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀲𑁄𑀧𑀺 𑀲𑀻𑀳𑀲𑁆𑀲𑁂𑀯 𑀦 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀢𑀼𑀦𑁆𑀦𑀢𑀸𑀤𑀺𑀯𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢 𑀯𑀺𑀲𑀡𑁆𑀞𑀺𑀢𑁄. 𑀤𑀻𑀖𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀦 𑀤𑀻𑀖𑁄. 𑀭𑀲𑁆𑀲𑀓𑀺𑀲𑀣𑀽𑀮 𑀅𑀦𑀼𑀯𑀝𑁆𑀝𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀯𑀺𑀥𑁄𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀫𑀦𑀸𑀧𑀺𑀬𑁂 𑀘 𑀔𑁄 𑀪𑀺𑀓𑁆𑀔𑀯𑁂 𑀓𑀫𑁆𑀫𑀯𑀺𑀧𑀸𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀤𑀻𑀖𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀣𑀽𑀮𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀓𑀺𑀲𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀓𑀺𑀲𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀯𑀝𑁆𑀝𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀯𑀝𑁆𑀝𑀸𑀦𑀺 𑀲𑀡𑁆𑀞𑀳𑀦𑁆𑀢𑀻’’𑀢𑀺. 𑀇𑀢𑀺 𑀦𑀸𑀦𑀸𑀘𑀺𑀢𑁆𑀢𑁂𑀦 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀺𑀢𑁄 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀲𑀚𑁆𑀚𑀺𑀢𑁄 𑀢𑀣𑀸𑀕𑀢𑀲𑁆𑀲 𑀅𑀢𑁆𑀢𑀪𑀸𑀯𑁄 𑀢𑀲𑁆𑀲 𑀮𑁄𑀓𑁂 𑀲𑀩𑁆𑀩𑀲𑀺𑀧𑁆𑀧𑀺𑀦𑁄 𑀯𑀸 𑀇𑀤𑁆𑀥𑀺𑀫𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀓𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄𑀢𑀺 𑀣𑁄𑀫𑁂𑀢𑀺.

𑀘𑀢𑀼𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁫. 𑀢𑀢𑀺𑀬 𑀕𑀸𑀣𑀸𑀬𑀁 𑀲𑀼𑀕𑀢𑁄𑀢𑀺 𑀩𑀼𑀤𑁆𑀥𑁄 𑀓𑀢𑁆𑀢𑀼𑀪𑀽𑀢𑁄. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀲𑀢𑁆𑀢𑀧𑁆𑀧𑀻𑀦𑁄𑀢𑁆𑀬𑀸𑀤𑀻𑀳𑀺 𑀧𑀤𑁂𑀳𑀺 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀲𑀢𑁆𑀢𑀧𑁆𑀧𑀻𑀦𑁄𑀢𑀺 𑀤𑁆𑀯𑀺𑀳𑀢𑁆𑀣𑀧𑀸𑀤 𑀅𑀁𑀲𑀓𑀽𑀝 𑀏𑀓𑀕𑀮𑀯𑀲𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀺𑀓𑁄𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀸 𑀧𑀦 𑀧𑀭𑀺𑀧𑀼𑀡𑁆𑀡𑀤𑁆𑀯𑀺𑀳𑀢𑁆𑀣𑀧𑀸𑀤 𑀅𑀁𑀲𑀓𑀽𑀝 𑀔𑀦𑁆𑀥𑀲𑀗𑁆𑀔𑀸𑀢𑀲𑀢𑁆𑀢𑀝𑁆𑀞𑀸𑀦𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀫𑀁𑀲𑁂𑀦 𑀧𑀻𑀡𑀢𑀺 𑀧𑀭𑀺𑀧𑀽𑀭𑀢𑀻𑀢𑀺 𑀧𑀻𑀦𑁄. 𑀧𑀻𑀡𑀢𑁂 𑀧𑀭𑀺𑀧𑀽𑀭𑀢𑁂 𑀯𑀸 𑀧𑀻𑀦𑁄. 𑀧𑀻𑀡𑀥𑀸𑀢𑀼 𑀧𑀻𑀡𑀦𑁂, 𑀧𑀽𑀭𑀡𑁂 𑀯𑀸 𑀡. 𑀡𑀲𑁆𑀲 𑀦𑁄. 𑀤𑁆𑀯𑁂 𑀳𑀢𑁆𑀣𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀧𑀸𑀤𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀅𑀁𑀲𑀓𑀽𑀝𑀸𑀦𑀺 𑀏𑀓𑀕𑀮𑁄 𑀘𑀸𑀢𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀻𑀦𑁄 𑀧𑀭𑀺𑀧𑀼𑀡𑁆𑀡𑁄 𑀫𑀁𑀲𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀧𑀻𑀦𑁄, 𑀲𑀼𑀕𑀢𑁄 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀻𑀲𑀼 𑀦𑁆𑀳𑀸𑀭𑀼𑀚𑀸𑀮𑀸 𑀧𑀜𑁆𑀜𑀸𑀬𑀦𑁆𑀢𑀺 𑀅𑀁𑀲𑀓𑀽𑀝𑀕𑀮𑁂𑀲𑀼 𑀅𑀝𑁆𑀞𑀺𑀓𑁄𑀝𑀺𑀬𑁄. 𑀢𑁂 𑀫𑀦𑀼𑀲𑁆𑀲𑀸 𑀧𑁂𑀢𑀸 𑀯𑀺𑀬 𑀔𑀸𑀬𑀦𑁆𑀢𑀺. 𑀦 𑀢𑀣𑀸𑀕𑀢𑁄. 𑀢𑀣𑀸𑀕𑀢𑁄 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 ¶ 𑀧𑀭𑀺𑀧𑀼𑀡𑁆𑀡𑀫𑀁𑀲𑀼𑀲𑁆𑀲𑀤𑀢𑁆𑀢𑀸 𑀦𑀺𑀕𑀼𑀴𑀦𑁆𑀳𑀸𑀭𑀼𑀚𑀸𑀮𑁂𑀳𑀺 𑀳𑀢𑁆𑀣𑀧𑀺𑀝𑁆𑀞𑀸𑀤𑀻𑀳𑀺 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀲𑀼𑀯𑀡𑁆𑀡𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑁂𑀦 𑀕𑀮𑁂𑀦 𑀲𑀻𑀮𑀸𑀭𑀽𑀧𑀓𑀁 𑀯𑀺𑀬 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀁 𑀯𑀺𑀬 𑀘 𑀔𑀸𑀬𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀧𑁆𑀧𑀻𑀦𑁄𑀢𑀺 𑀣𑁄𑀫𑁂𑀢𑀺.

𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀧𑀦 ‘‘𑀲𑀢𑁆𑀢𑀼𑀲𑁆𑀲𑀤𑁄’’𑀢𑀺 𑀧𑀸𑀞𑁄. 𑀢𑀲𑁆𑀲 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀼𑀲𑁆𑀲𑀤𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀤𑀻𑀖𑀗𑁆𑀕𑀼𑀮𑀻𑀢𑀺 𑀤𑀻𑀖𑀅𑀗𑁆𑀕𑀼𑀮𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀫𑀆𑀬𑀢𑀳𑀢𑁆𑀣 𑀧𑀸𑀤𑀗𑁆𑀕𑀼𑀮𑀻𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀢𑀺 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀅𑀗𑁆𑀕𑀼𑀮𑀺. 𑀅𑀗𑁆𑀕𑀢𑀺 𑀢𑀁 𑀢𑀁 𑀓𑀸𑀬𑀗𑁆𑀕𑀁 𑀧𑀭𑀸𑀫𑀲𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀅𑀗𑁆𑀕𑀼𑀮𑀺, 𑀓𑀭𑀲𑀸𑀔𑀸. 𑀅𑀕𑀺𑀥𑀸𑀢𑀼 𑀕𑀢𑀺𑀬𑀁 𑀉𑀮𑀺𑀧𑀘𑁆𑀘𑀬𑁄. 𑀅𑀣 𑀯𑀸 𑀅𑀗𑁆𑀕𑀁 𑀓𑀸𑀬𑀗𑁆𑀕𑀁 𑀉𑀮𑀢𑀺 𑀕𑀘𑁆𑀙𑀢𑀺 𑀧𑀭𑀸𑀫𑀲𑀢𑀺 𑀏𑀢𑀸𑀬𑀸𑀢𑀺 𑀅𑀗𑁆𑀕𑀼𑀮𑀺, 𑀓𑀭𑀲𑀸𑀔𑀸. 𑀅𑀗𑁆𑀕 𑀲𑀤𑁆𑀤𑀽𑀧𑀧𑀤𑀉𑀮𑀥𑀸𑀢𑀼 𑀕𑀢𑀺𑀬𑀁 𑀇. 𑀲𑀫𑀤𑀻𑀖𑀸 𑀅𑀗𑁆𑀕𑀼𑀮𑀺 𑀳𑀢𑁆𑀣 𑀧𑀸𑀤𑀗𑁆𑀕𑀼𑀮𑀺 𑀬𑀲𑁆𑀲 𑀲𑁄𑀢𑀺 𑀤𑀻𑀖𑀗𑁆𑀕𑀼𑀮𑀺, 𑀲𑀼𑀕𑀢𑁄. 𑀲𑀫𑀤𑀻𑀖𑀸 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀓𑀸𑀘𑀺 𑀅𑀗𑁆𑀕𑀼𑀮𑀺 𑀤𑀻𑀖𑀸 𑀳𑁄𑀢𑀺 𑀓𑀸𑀘𑀺 𑀭𑀲𑁆𑀲𑀸, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀫𑀓𑁆𑀓𑀝𑀲𑁆𑀲𑁂𑀯 𑀤𑀻𑀖𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺𑀬𑁄 𑀫𑀽𑀮𑁂 𑀣𑀽𑀮𑀸 𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸 𑀅𑀕𑁆𑀕𑁂 𑀢𑀦𑀼𑀓𑀸 𑀦𑀺𑀬𑁆𑀬𑀸𑀲𑀢𑁂𑀮𑁂𑀦 𑀫𑀤𑁆𑀤𑀺𑀢𑁆𑀯𑀸 𑀯𑀝𑁆𑀝𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀤𑀻𑀖𑀗𑁆𑀕𑀼𑀮𑀻𑀢𑀺 𑀣𑁄𑀫𑁂𑀢𑀺. 𑀫𑀣𑀸𑀢𑀺 𑀫𑀅𑀣𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀫𑀓𑀸𑀭𑁄 𑀳𑀺 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀣𑀸𑀢𑀺 𑀅𑀢𑁆𑀣𑀦𑁆𑀢𑀭𑁂 𑀦𑀺𑀧𑀸𑀢𑁄. 𑀢𑀤𑀜𑁆𑀜𑀦𑁆𑀢𑀺 𑀅𑀢𑁆𑀣𑁄.

𑀮𑁄𑀫𑀓𑀽𑀧𑁂𑀓𑀮𑁄𑀫𑁄𑀢𑀺 𑀮𑁄𑀫𑀓𑀽𑀧𑀏𑀓𑀮𑁄𑀫𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀓𑁂𑀓𑀮𑁄𑀫𑀓𑀽𑀧𑁂 𑀏𑀓𑁂𑀓𑀚𑀸𑀢𑀮𑁄𑀫𑁄𑀢𑀺 𑀅𑀢𑁆𑀣𑁄. 𑀘𑀫𑁆𑀫𑀫𑀁𑀲𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀮𑁄𑀫𑁄, 𑀯𑀟𑁆𑀠𑀫𑀸𑀦𑀁 𑀮𑀼𑀦𑀺𑀢𑀩𑁆𑀩𑀦𑁆𑀢𑀺 𑀯𑀸 𑀮𑁄𑀫𑁄, 𑀮𑀽𑀥𑀸𑀢𑀼 𑀙𑁂𑀤𑀦𑁂 𑀫𑀦𑀺𑀧𑀘𑁆𑀘𑀬𑁄. 𑀓𑀼𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀓𑀽𑀧𑁄. 𑀓𑀼𑀧𑀼𑀩𑁆𑀩𑀧𑀸𑀥𑀸𑀢𑀼 𑀭𑀓𑁆𑀔𑀦𑁂 𑀓𑁆𑀯𑀺. 𑀉𑀲𑁆𑀲 𑀤𑀻𑀖𑁄. 𑀓𑀽𑀧𑁄 𑀯𑀺𑀬𑀸𑀢𑀺 𑀓𑀽𑀧𑁄, 𑀅𑀣 𑀯𑀸 ¶ 𑀓𑀼𑀯𑀼𑀘𑁆𑀘𑀢𑀺 𑀮𑁄𑀫𑀁, 𑀢𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀓𑀽𑀧𑁄. 𑀅𑀪𑀺𑀥𑀸𑀦𑀝𑀻𑀓𑀸𑀬𑀁 𑀧𑀦 ‘‘𑀓𑀼𑀲𑀤𑁆𑀤𑁂 𑀧𑁄. 𑀤𑀻𑀖𑀸𑀤𑀺. 𑀓𑀽𑀧𑁄. 𑀓𑁂𑀦 𑀉𑀪𑀢𑀻𑀢𑀺 𑀯𑀸 𑀓𑀽𑀧𑁄. 𑀪𑀲𑁆𑀲 𑀧𑁄’’𑀢𑀺 𑀯𑀼𑀢𑁆𑀢𑀁. 𑀮𑁄𑀫𑀲𑁆𑀲 𑀓𑀽𑀧𑁄 𑀮𑁄𑀫𑀓𑀽𑀧𑁄. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀚𑀸𑀢𑁄 𑀏𑀓𑁂𑀓 𑀮𑁄𑀫𑁄 𑀬𑀲𑁆𑀲𑀸𑀢𑀺 𑀮𑁄𑀫𑀓𑀽𑀧𑁂𑀓𑀮𑁄𑀫𑁄, 𑀲𑀼𑀕𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀏𑀓𑁂𑀓𑀲𑁆𑀫𑀺𑀫𑁆𑀧𑀺 𑀮𑁄𑀫𑀓𑀽𑀧𑁂 𑀅𑀦𑁂𑀓𑀸𑀦𑀺 𑀮𑁄𑀫𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀮𑁄𑀫𑀓𑀽𑀧𑁂 𑀏𑀓𑁂𑀓𑀮𑁄𑀫𑁄 𑀚𑀸𑀬𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀏𑀓𑁂𑀓𑀮𑁄𑀫𑁄 𑀔𑁄 𑀧𑀦 𑀪𑀯𑀁 𑀕𑁄𑀢𑀫𑁄. 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸 𑀦𑀻’’𑀢𑀺. 𑀢𑀲𑁆𑀫𑀸 𑀮𑁄𑀫𑀓𑀽𑀧𑁂𑀓𑀮𑁄𑀫𑁄𑀢𑀺 𑀣𑁄𑀫𑁂𑀢𑀺.

𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄𑀢𑀺 𑀲𑀫𑁆𑀧𑀦𑁆𑀦𑁄𑀑𑀤𑀸𑀢𑀤𑀸𑀞𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀫𑁆𑀧𑀦𑁆𑀦𑀲𑀼𑀓𑁆𑀓𑀤𑀸𑀞𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀧𑀦𑁆𑀦𑁄. 𑀲𑀁𑀧𑀼𑀩𑁆𑀩𑀧𑀤𑀥𑀸𑀢𑀼 𑀕𑀢𑀺𑀬𑀁 𑀢. 𑀢𑀲𑁆𑀲 𑀅𑀦𑁆𑀦𑁄. 𑀅𑀯𑀤𑀸𑀬𑀢𑀺 𑀅𑀯𑀔𑀡𑁆𑀟𑀺𑀬𑀢𑀺 𑀅𑀜𑁆𑀜𑀯𑀡𑁆𑀡𑁄𑀪𑀸𑀲𑀦𑁆𑀢𑀺 𑀑𑀤𑀸𑀢𑁄. 𑀅𑀯𑀧𑀼𑀩𑁆𑀩 𑀤𑀸𑀥𑀸𑀢𑀼 𑀅𑀯𑀔𑀡𑁆𑀟𑀦𑁂 𑀢. 𑀤𑀁𑀲𑀢𑀺 𑀑𑀤𑀦𑀸𑀤𑀺𑀁 𑀏𑀢𑀸𑀬𑀸𑀢𑀺 𑀤𑀸𑀞𑁄, 𑀤𑀦𑁆𑀢𑀯𑀺𑀲𑁂𑀲𑁄. 𑀤𑀁𑀲𑀥𑀸𑀢𑀼 𑀤𑀁𑀲𑀦𑁂 𑀞𑁄. 𑀤𑀁𑀲𑀺𑀲𑁆𑀲 𑀤𑀸. 𑀲𑀫𑁆𑀧𑀦𑁆𑀦𑁄 𑀘 𑀑𑀤𑀸𑀢𑁄 𑀘 𑀤𑀸𑀞𑁄 𑀬𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑁄 𑀤𑀸𑀢𑀤𑀸𑀞𑁄, 𑀲𑀼𑀕𑀢𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀽𑀢𑀺𑀤𑀦𑁆𑀢𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀓𑀸𑀘𑀺 𑀤𑀸𑀞𑀸 𑀓𑀸𑀴𑀸𑀧𑀺 𑀯𑀺𑀯𑀡𑁆𑀡𑀸𑀧𑀺 𑀳𑁄𑀦𑁆𑀢𑀺. 𑀢𑀣𑀸𑀕𑀢𑁄 𑀧𑀦 𑀲𑀼𑀓𑁆𑀓𑀤𑀸𑀞𑁄 𑀑𑀲𑀥𑀺𑀢𑀸𑀭𑀓𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀯𑀺𑀭𑁄𑀘𑀫𑀸𑀦𑀸𑀬 𑀧𑀪𑀸𑀬 𑀲𑀫𑀦𑁆𑀦𑀸𑀕𑀢𑀤𑀸𑀞𑁄 𑀳𑁄𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀲𑀼𑀲𑀼𑀓𑁆𑀓𑀤𑀸𑀞𑁄’’𑀢𑀺 𑀧𑀸𑀞𑁄. 𑀅𑀬𑀫𑁂𑀯𑀢𑁆𑀣𑁄. 𑀢𑀲𑁆𑀫𑀸 𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄𑀢𑀺 𑀣𑁄𑀫𑁂𑀢𑀺.

𑀓𑀦𑀓𑀲𑀫𑀢𑀘𑁄𑀢𑀺 𑀲𑀼𑀯𑀡𑁆𑀡𑁂𑀦 𑀲𑀤𑀺𑀲𑀘𑀫𑁆𑀫𑁄. 𑀓𑀦𑀢𑀺 𑀤𑀺𑀩𑁆𑀩𑀢𑀺 𑀑𑀪𑀸𑀲𑁂𑀦𑀸𑀢𑀺 𑀓𑀦𑀓𑀁. 𑀓𑀦𑀺𑀬𑀢𑀺 𑀇𑀘𑁆𑀙𑀺𑀬𑀢𑀺 𑀫𑀦𑀼𑀲𑁆𑀲𑁂 𑀳𑀻𑀢𑀺 𑀯𑀸 𑀓𑀦𑀓𑀁, 𑀲𑀼𑀯𑀡𑁆𑀡𑀁. 𑀓𑀦𑀥𑀸𑀢𑀼 𑀤𑀺𑀢𑁆𑀢𑀺𑀕𑀢𑀺𑀓𑀦𑁆𑀢𑀻𑀲𑀼 𑀅𑀓𑀧𑀘𑁆𑀘𑀬𑁄, 𑀲𑀁𑀲𑀤𑀺𑀲𑁂𑀦 𑀅𑀫𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑀁. 𑀲𑀁𑀧𑀼𑀩𑁆𑀩𑀅𑀫𑀥𑀸𑀢𑀼 𑀕𑀢𑀺𑀬𑀁 𑀅. 𑀢𑀘𑀢𑀺 𑀫𑀁𑀲𑀁 𑀙𑀸𑀤𑁂𑀢𑀺 𑀲𑀁𑀯𑀭𑀢𑀺 𑀯𑀸𑀢𑀺 ¶ 𑀢𑀘𑁄, 𑀢𑀘𑀢𑀺 𑀤𑀺𑀩𑁆𑀩𑀢𑀺 𑀲𑀼𑀯𑀡𑁆𑀡𑁄𑀪𑀸𑀲𑁂𑀦𑀸𑀢𑀺 𑀯𑀸 𑀢𑀘𑁄, 𑀘𑀫𑁆𑀫𑀁. 𑀢𑀘𑀥𑀸𑀢𑀼 𑀲𑀁𑀯𑀭𑀡𑀤𑀺𑀢𑁆𑀢𑀻𑀲𑀼 𑀅. 𑀓𑀦𑀓𑁂𑀦 𑀲𑀼𑀯𑀡𑁆𑀡𑁂𑀦 𑀲𑀫𑁄 𑀲𑀤𑀺𑀲𑁄 𑀢𑀘𑁄 𑀬𑀲𑁆𑀲𑀸𑀢𑀺 𑀓𑀦𑀓 𑀲𑀫𑀢𑀘𑁄, 𑀲𑀼𑀕𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀢𑀘𑁄 𑀓𑁄𑀘𑀺 𑀦𑀻𑀮𑀢𑀘𑁄 𑀲𑁂𑀢𑀢𑀘𑁄 𑀧𑀻𑀢𑀢𑀘𑁄 𑀳𑁄𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀦𑀺𑀲𑀤𑀸𑀬 𑀖𑀁𑀲𑀺𑀢𑁆𑀯𑀸 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢 𑀖𑀦𑀲𑀼𑀯𑀡𑁆𑀡𑀭𑀽𑀧𑀓𑀁 𑀯𑀺𑀬 𑀓𑀜𑁆𑀘𑀦𑀲𑀤𑀺𑀲𑀢𑀘𑁄 𑀳𑁄𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄’’𑀢𑀺 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑀲𑀼𑀯𑀡𑁆𑀡𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀓𑀜𑁆𑀘𑀦𑁂𑀦 𑀲𑀦𑁆𑀦𑀺𑀪𑀁 𑀲𑀤𑀺𑀲𑀁 𑀢𑀘𑀫𑀲𑁆𑀲𑀸𑀢𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀏𑀢𑁆𑀣 𑀘 𑀲𑀼𑀯𑀡𑁆𑀡𑀯𑀡𑁆𑀡𑀦𑁆𑀢𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀖𑀦𑀲𑀺𑀦𑀺𑀤𑁆𑀥𑀲𑀡𑁆𑀳𑀲𑀭𑀻𑀭𑀢𑀁 𑀤𑀲𑁆𑀲𑁂𑀢𑀺. 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄𑀢𑀺 𑀇𑀫𑀺𑀦𑀸 𑀙𑀯𑀺𑀯𑀡𑁆𑀡𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀯𑁂𑀯𑀘𑀦𑀫𑁂𑀢𑀁 𑀧𑀤𑀤𑁆𑀯𑀬𑀁. 𑀢𑀲𑁆𑀫𑀸 𑀓𑀦𑀓𑀲𑀫𑀢𑀘𑁄𑀢𑀺 𑀣𑁄𑀫𑁂𑀢𑀺.

𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄𑀢𑀺 𑀦𑀻𑀮𑀁 𑀉𑀤𑁆𑀥𑀁 𑀅𑀕𑁆𑀕𑀮𑁄𑀫𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀦𑀻𑀮𑀁 𑀉𑀤𑁆𑀥𑀁 𑀅𑀕𑁆𑀕𑀸 𑀓𑁄𑀝𑀺 𑀳𑀼𑀢𑁆𑀯𑀸 𑀫𑀼𑀔𑀲𑁄𑀪𑀁 𑀉𑀮𑁆𑀮𑁄𑀓𑀬𑀫𑀸𑀦𑁄 𑀯𑀺𑀬 𑀞𑀺𑀢𑀮𑁄𑀫𑁄, 𑀦𑀻𑀮𑀸𑀦𑀺 𑀉𑀤𑁆𑀥𑀁 𑀅𑀕𑁆𑀕𑀸𑀦𑀺 𑀓𑁄𑀝𑀻𑀦𑀺 𑀳𑀼𑀢𑁆𑀯𑀸 𑀞𑀺𑀢𑀸𑀦𑀺 𑀮𑁄𑀫𑀸𑀦𑀺 𑀬𑀲𑁆𑀲𑀸𑀢𑀺 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄, 𑀲𑀼𑀕𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀮𑁄𑀫𑀸𑀦𑀺 𑀳𑁂𑀝𑁆𑀞𑀸 𑀅𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀮𑁄𑀫𑀸𑀦𑀺 𑀆𑀯𑀝𑁆𑀝𑀧𑀭𑀺𑀬𑁄𑀲𑀸𑀦𑁂 𑀉𑀤𑁆𑀥𑀁 𑀅𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀫𑀼𑀔𑀲𑁄𑀪𑀁 𑀉𑀮𑁆𑀮𑁄𑀓𑀬𑀫𑀸𑀦𑀸𑀦𑀺 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀉𑀤𑁆𑀥𑀕𑁆𑀕𑀮𑁄𑀫𑁄 𑀪𑀯𑀁 𑀕𑁄𑀢𑀫𑁄. 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸𑀯𑀝𑁆𑀝𑀸𑀦𑀺 𑀧𑀤𑀓𑁆𑀔𑀺𑀡𑀸𑀯𑀝𑁆𑀝𑀓𑀚𑀸𑀢𑀸𑀦𑀻’’𑀢𑀺. 𑀢𑀲𑁆𑀫𑀸 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄𑀢𑀺 𑀣𑁄𑀫𑁂𑀢𑀺.

𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄. 𑀲𑁄 𑀳𑀺 𑀅𑀦𑀜𑁆𑀜𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀸𑀫𑀁𑀬𑁂𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 ¶ 𑀧𑀦 𑀧𑀤𑀲𑁆𑀲 𑀣𑀽𑀮𑀚𑀺𑀯𑁆𑀳𑁄𑀢𑁆𑀬𑀸𑀤𑀻𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄.

𑀣𑀽𑀮𑀚𑀺𑀯𑁆𑀳𑁄𑀢𑀺 𑀫𑀼𑀤𑀼𑀤𑀻𑀖𑀧𑀼𑀣𑀼𑀮 𑀚𑀺𑀯𑁆𑀳𑀸𑀬 𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀳𑀺 𑀫𑀼𑀤𑀼𑀤𑀻𑀖𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀼𑀤𑀼𑀚𑀺𑀯𑁆𑀳𑀸 𑀤𑀻𑀖𑀸 𑀣𑀽𑀮𑀸 𑀯𑀡𑁆𑀡 𑀲𑀫𑁆𑀧𑀦𑁆𑀦𑀸’’𑀢𑀺. 𑀣𑀽𑀮𑀢𑀺 𑀩𑁆𑀭𑀽𑀳𑀢𑀻𑀢𑀺 𑀣𑀽𑀮𑀸, 𑀚𑀺𑀯𑁆𑀳𑀸. 𑀣𑀽𑀮𑀥𑀸𑀢𑀼 𑀩𑀼𑀤𑁆𑀥𑀺𑀬𑀁 𑀅. 𑀚𑀻𑀯𑀢𑀺 𑀧𑀸𑀡𑀁 𑀥𑀸𑀭𑁂𑀢𑀻𑀢𑀺 𑀚𑀺𑀯𑁆𑀳𑀸, 𑀭𑀲𑀦𑀸. 𑀚𑀻𑀯𑀥𑀸𑀢𑀼 𑀧𑀸𑀡𑀥𑀸𑀭𑀡𑁂 𑀳𑀧𑀘𑁆𑀘𑀬𑁄. 𑀚𑀻𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦 𑀭𑀲𑁂𑀦𑀸𑀢𑀺 𑀚𑀻𑀯𑀺𑀢𑀁, 𑀙𑀩𑁆𑀩𑀺𑀥𑀭𑀲𑁄. 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸, 𑀚𑀺𑀯𑁆𑀳𑀸𑀧𑀲𑀸𑀤𑀭𑀽𑀧𑀁. 𑀲𑀫𑁆𑀪𑀸𑀭𑀚𑀺𑀯𑁆𑀳𑀸 𑀞𑀸𑀦𑀽𑀧𑀘𑀸𑀭𑁂𑀦 𑀮𑀩𑁆𑀪𑀢𑀺. 𑀚𑀻𑀯𑀺𑀢𑀲𑀤𑁆𑀤𑀽𑀧𑀧𑀤 𑀅𑀯𑁆𑀳𑀥𑀸𑀢𑀼 𑀅𑀯𑁆𑀳𑀸𑀬𑀦𑁂 𑀅. 𑀚𑀻𑀯𑀺𑀢𑀅𑀯𑁆𑀳𑀸𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀺𑀢𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀚𑀺𑀯𑁆𑀳𑀸𑀢𑀺 𑀯𑀼𑀢𑁆𑀢𑀁. 𑀣𑀽𑀮𑀸 𑀫𑀳𑀦𑁆𑀢𑀸 𑀤𑀻𑀖𑀸 𑀫𑀼𑀤𑀼𑀓𑀸 𑀚𑀺𑀯𑁆𑀳𑀸 𑀬𑀲𑁆𑀲𑀸𑀢𑀺 𑀣𑀽𑀮𑀚𑀺𑀯𑁆𑀳𑁄, 𑀲𑀫𑁆𑀩𑀼𑀤𑁆𑀥𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀚𑀺𑀯𑁆𑀳𑀸 𑀣𑀽𑀮𑀸𑀧𑀺 𑀳𑁄𑀢𑀺 𑀓𑀺𑀲𑀸𑀧𑀺 𑀭𑀲𑁆𑀲𑀸𑀧𑀺 𑀣𑀤𑁆𑀥𑀸𑀧𑀺 𑀯𑀺𑀲𑀫𑀸𑀧𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀫𑀼𑀤𑀼𑀚𑀺𑀯𑁆𑀳𑀸 𑀤𑀻𑀖𑀸 𑀧𑀼𑀣𑀼𑀮𑀸 𑀯𑀡𑁆𑀡 𑀲𑀫𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 𑀢𑀁 𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀆𑀕𑀢𑀸𑀦𑀁 𑀩𑁆𑀭𑀳𑁆𑀫𑀸𑀬𑀼𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀚𑀺𑀯𑁆𑀳𑀸𑀬 𑀫𑀼𑀤𑀼𑀓𑀢𑁆𑀢𑀸 𑀢𑀁 𑀚𑀺𑀯𑁆𑀳𑀁 𑀓𑀣𑀺𑀦𑀲𑀽𑀘𑀺 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀉𑀪𑁄𑀧𑀺 𑀦𑀸𑀲𑀺𑀓𑀸𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺, 𑀤𑀻𑀖𑀢𑁆𑀢𑀸 𑀉𑀪𑁄 𑀓𑀡𑁆𑀡𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺, 𑀧𑀼𑀣𑀼𑀮𑀢𑁆𑀢𑀸 𑀓𑁂𑀲𑀦𑁆𑀢𑀧𑀭𑀺𑀬𑁄𑀲𑀸𑀦𑀁 𑀓𑁂𑀯𑀮𑀫𑁆𑀧𑀺 𑀦𑀮𑀸𑀝𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀢𑀲𑁆𑀲𑀸 𑀫𑀼𑀤𑀼𑀤𑀻𑀖𑀧𑀼𑀣𑀼𑀮𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀓𑀗𑁆𑀔𑀸𑀯𑀺𑀦𑁄𑀤𑁂𑀢𑀺, 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀚𑀺𑀯𑁆𑀳𑀁 𑀲𑀦𑁆𑀥𑀸𑀬 𑀣𑀽𑀮 𑀚𑀺𑀯𑁆𑀳𑁄𑀢𑀺 𑀣𑁄𑀫𑁂𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀧𑀳𑀽𑀢𑀚𑀺𑀯𑁆𑀳𑁄’’𑀢𑀺 𑀧𑀸𑀞𑁄. 𑀅𑀬𑀫𑁂𑀯𑀢𑁆𑀣𑁄.

𑀅𑀣𑀸𑀢𑀺 𑀅𑀢𑁆𑀣𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀤𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀳𑀳𑀦𑀼𑀓𑁄𑀢𑀺 𑀲𑀻𑀳𑀲𑁆𑀲 𑀳𑁂𑀝𑁆𑀞𑀸 𑀳𑀦𑀼 𑀯𑀺𑀬 𑀧𑀭𑀺𑀧𑀼𑀡𑁆𑀡 𑀳𑀦𑀼𑀓𑁄. 𑀲𑀻𑀳𑀲𑀤𑁆𑀤𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀳𑀦𑀢𑀺 𑀑𑀤𑀦𑀸𑀤𑀻𑀦𑀁 𑀯𑀡𑁆𑀡𑀯𑀺𑀲𑁂𑀲𑀁 𑀦𑀸𑀲𑁂𑀢𑀻𑀢𑀺 𑀳𑀦𑀼. 𑀳𑀦𑀥𑀸𑀢𑀼 𑀳𑀺𑀁𑀲𑀸𑀬𑀁 𑀉. 𑀲𑀻𑀳𑀲𑁆𑀲 𑀳𑁂𑀝𑁆𑀞𑀸 𑀳𑀦𑀼 𑀯𑀺𑀬 𑀳𑀦𑀼 𑀬𑀲𑁆𑀲𑀸𑀢𑀺 𑀲𑀻𑀳𑀳𑀦𑀼𑀓𑁄 ¶ , 𑀲𑀫𑁆𑀩𑀼𑀤𑁆𑀥𑁄. 𑀲𑀫𑀸𑀲𑀦𑁆𑀢𑁂 𑀓𑁄. 𑀲𑀻𑀳𑀲𑁆𑀲 𑀳𑀺 𑀳𑁂𑀝𑁆𑀞𑀺𑀫𑀳𑀦𑀼𑀫𑁂𑀯 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀉𑀧𑀭𑀺𑀫𑀁. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀁 𑀯𑀺𑀬 𑀤𑁆𑀯𑁂𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑁆𑀯𑀸𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀻𑀳𑀳𑀦𑀼𑀓𑁄𑀢𑀺 𑀣𑁄𑀫𑁂𑀢𑀺.

𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄𑀢𑀺 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀯𑀸𑀢𑀧𑀸𑀦𑁂 𑀲𑀫𑁆𑀫𑀸𑀬𑁄𑀚𑀺𑀢𑀚𑀸𑀮𑀁 𑀯𑀺𑀬 𑀘𑀫𑁆𑀫𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑁄. 𑀚𑀮𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀸𑀮𑀁, 𑀚𑀮𑀥𑀸𑀢𑀼 𑀤𑀺𑀢𑁆𑀢𑀺𑀬𑀁 𑀡. 𑀚𑀸𑀮𑀁 𑀅𑀲𑁆𑀲 𑀅𑀢𑁆𑀣𑀺 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀚𑀸𑀮𑀺𑀓𑀁, 𑀯𑀸𑀢𑀧𑀸𑀦𑀁. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡𑀺𑀓𑁄. 𑀅𑀣 𑀯𑀸 𑀚𑀸𑀮𑀁 𑀏𑀯 𑀚𑀸𑀮𑀺𑀓𑀁. 𑀧𑀚𑁆𑀚𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄, 𑀘𑀭𑀡𑁄. 𑀧𑀤𑀥𑀸𑀢𑀼 𑀕𑀫𑀦𑁂 𑀡. 𑀢𑀁 𑀢𑀁 𑀪𑀸𑀭𑀁 𑀳𑀭𑀢𑀻𑀢𑀺 𑀳𑀢𑁆𑀣𑁄, 𑀓𑀭𑁄. 𑀳𑀭𑀥𑀸𑀢𑀼 𑀳𑀭𑀡𑁂 𑀣𑁄. 𑀚𑀸𑀮𑀺𑀓𑀁 𑀯𑀺𑀬 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑀁 𑀬𑀲𑁆𑀲𑀸𑀢𑀺 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄, 𑀲𑀫𑁆𑀩𑀼𑀤𑁆𑀥𑁄. 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀯𑀸𑀢𑀧𑀸𑀦𑁂 𑀲𑀫𑁆𑀫𑀸𑀬𑁄𑀚𑀺𑀢𑀸𑀦𑀺 𑀚𑀸𑀮𑀲𑀤𑀺𑀲𑀸𑀦𑀺 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑀸𑀦𑀺 𑀳𑁄𑀦𑁆𑀢𑀺. 𑀦 𑀘 𑀘𑀫𑁆𑀫𑁂𑀦 𑀧𑀝𑀺𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑀗𑁆𑀕𑀼𑀮𑀦𑁆𑀢𑀭𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀘𑀫𑁆𑀫𑁂𑀦 𑀧𑀝𑀺𑀩𑀤𑁆𑀥𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑁄 𑀳𑀺 𑀨𑀡𑀳𑀢𑁆𑀣𑀓𑁄 𑀧𑀼𑀭𑀺𑀲𑀤𑁄𑀲𑁂𑀦 𑀉𑀧𑀳𑀢𑁄 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀘𑀢𑀲𑁆𑀲𑁄 𑀳𑀢𑁆𑀣𑀗𑁆𑀕𑀼𑀮𑀺𑀬𑁄 𑀧𑀜𑁆𑀘𑀧𑀺 𑀧𑀸𑀤𑀗𑁆𑀕𑀼𑀮𑀺𑀬𑁄 𑀏𑀓𑀧𑁆𑀧𑀫𑀸𑀡𑀸 𑀳𑁄𑀦𑁆𑀢𑀺. 𑀢𑀸𑀲𑀁 𑀏𑀓𑀧𑁆𑀧𑀫𑀸𑀡 𑀢𑀸𑀬 𑀬𑀯𑀮𑀓𑁆𑀔𑀡𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀳𑀢𑁆𑀣𑀧𑀸𑀤𑀸 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀲𑀫𑁆𑀫𑀸𑀬𑁄𑀚𑀺𑀢𑀚𑀸𑀮𑀯𑀸𑀢 𑀧𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄𑀢𑀺 𑀣𑁄𑀫𑁂𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀚𑀸𑀮𑀳𑀢𑁆𑀣𑀧𑀸𑀤𑁄’’𑀢𑀺 𑀧𑀸𑀞𑁄. 𑀅𑀬𑀫𑁂𑀯𑀢𑁆𑀣𑁄.

𑀦𑀸𑀣𑁄𑀢𑀺 𑀩𑀼𑀤𑁆𑀥𑁄 𑀓𑀢𑁆𑀢𑀼𑀯𑀲𑁂𑀦. 𑀲𑁄 𑀳𑀺 𑀦𑀸𑀣𑀢𑀺 𑀯𑀺𑀦𑁂𑀬𑁆𑀬𑀸𑀦𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀢𑀺, 𑀧𑀭𑀲𑀦𑁆𑀢𑀸𑀦𑀕𑀢𑀁 𑀯𑀸 𑀓𑀺𑀮𑁂𑀲𑀩𑁆𑀬𑀲𑀁 𑀉𑀧𑀢𑀸𑀧𑁂𑀢𑀺, 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸 𑀕𑀢𑁄 ¶ . 𑀲𑀩𑁆𑀩𑀲𑀢𑁆𑀢𑁂 𑀯𑀸 𑀕𑀼𑀡𑁂𑀳𑀺 𑀈𑀲𑀢𑀺 𑀅𑀪𑀺𑀪𑀯𑀢𑀺, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀯𑀸 𑀆𑀲𑀻𑀲𑀢𑀻𑀢𑀺 𑀦𑀸𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀲𑀤𑁆𑀤𑀦𑀻𑀢𑀺𑀬𑀁 ‘‘𑀦𑀸𑀣𑀥𑀸𑀢𑀼 𑀬𑀸𑀘𑀦𑁂 𑀉𑀧𑀢𑀸𑀧𑁂 𑀇𑀲𑁆𑀲𑀭𑀺𑀬𑁂 𑀆𑀲𑀺𑀲𑀦𑁂 𑀘𑀸𑀢𑀺 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀧𑀯𑀢𑁆𑀢𑀢𑀻’’𑀢𑀺.

𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀉𑀡𑁆𑀳𑀻𑀲𑀲𑀻𑀲𑁄𑀢𑀺𑀧𑀤𑁂𑀦 𑀢𑀼𑀮𑁆𑀬𑀮𑀺𑀗𑁆𑀕𑀢𑁆𑀢𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀭𑀜𑁆𑀜𑁄 𑀩𑀤𑁆𑀥𑀉𑀡𑁆𑀳𑀻𑀲 𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀧𑀓𑀢𑀺𑀫𑀁𑀲𑀧𑀺𑀡𑁆𑀟𑀲𑀗𑁆𑀔𑀸𑀢𑁄 𑀉𑀡𑁆𑀳𑀻𑀲𑀧𑀝𑁆𑀝𑀲𑀻𑀲𑁄. 𑀦𑀮𑀸𑀝𑁂 𑀦𑀳𑀺𑀬𑀢𑀺 𑀩𑀦𑁆𑀥𑀺𑀬𑀢𑀻𑀢𑀺 𑀉𑀡𑁆𑀳𑀻𑀲𑁄. 𑀉𑀧𑀼𑀩𑁆𑀩𑀦𑀳𑀥𑀸𑀢𑀼 𑀩𑀦𑁆𑀥𑀦𑁂, 𑀈𑀲𑁄. 𑀯𑀡𑁆𑀡𑀯𑀺𑀓𑀸𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀚𑀸𑀮𑀺𑀦𑀺𑀬𑀁 𑁋

‘‘𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄,

𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸;

𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄,

𑀢𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀁 𑀦𑀺𑀭𑀼𑀢𑁆𑀢𑀺’’𑀦𑁆𑀢𑀺.

𑀢𑀢𑁆𑀣 𑀘 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀆𑀕𑀫𑀸 𑀯𑀡𑁆𑀡𑀸𑀕𑀫𑁄 𑀦𑀸𑀫. 𑀯𑀺𑀚𑁆𑀚𑀫𑀸𑀦𑀅𑀓𑁆𑀔𑀭𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑀯𑀲𑁂𑀦 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄 𑀦𑀸𑀫. 𑀅𑀜𑁆𑀜𑀓𑁆𑀔𑀭𑀲𑁆𑀲 𑀅𑀜𑁆𑀜𑀓𑁆𑀔𑀭𑀸𑀧𑀚𑁆𑀚𑀦𑀢𑀸 𑀯𑀡𑁆𑀡𑀯𑀺𑀓𑀸𑀭𑁄 𑀦𑀸𑀫. 𑀯𑀺𑀚𑁆𑀚𑀫𑀸𑀦𑀓𑁆𑀔𑀭𑀯𑀺𑀦𑀸𑀲𑁄 𑀯𑀡𑁆𑀡𑀯𑀺𑀦𑀸𑀲𑁄 𑀦𑀸𑀫. 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀬𑁄𑀕𑀁 𑀯𑀺𑀲𑁂𑀲𑀢𑁆𑀣𑀬𑁄𑀕𑁄 𑀥𑀸𑀢𑀽𑀦𑀁 𑀅𑀢𑁆𑀣𑀸𑀢𑀺𑀲𑀬 𑀬𑁄𑀕𑁄 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀧𑀦 𑀦𑀓𑀸𑀭𑀲𑁆𑀲 𑀡𑀓𑀸𑀭𑀁 𑀓𑀢𑀢𑁆𑀢𑀸 𑀯𑀡𑁆𑀡𑀯𑀺𑀓𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀫𑀸𑀮𑀸𑀤𑀺𑀁 𑀲𑀺𑀬𑀢𑀺 𑀩𑀦𑁆𑀥𑀺𑀬𑀢𑀻𑀢𑀺 𑀲𑀻𑀲𑁄, 𑀉𑀢𑁆𑀢𑀫𑀗𑁆𑀕𑁄. 𑀲𑀺𑀥𑀸𑀢𑀼 𑀩𑀦𑁆𑀥𑀦𑁂 𑀈𑀲𑁄. 𑀭𑀸𑀚𑀽𑀦𑀁 𑀉𑀡𑁆𑀳𑀻𑀲𑀧𑀝𑁆𑀝𑁂𑀦 𑀯𑁂𑀞𑀺𑀢𑀲𑀻𑀲𑁄 𑀯𑀺𑀬 𑀲𑀻𑀲𑁄 𑀬𑀲𑁆𑀲𑀸𑀢𑀺 𑀉𑀡𑁆𑀳𑀻𑀲𑀲𑀻𑀲𑁄. 𑀅𑀣 𑀯𑀸 𑀭𑀸𑀚𑀽𑀦𑀁 𑀉𑀡𑁆𑀳𑀻𑀲𑀁 𑀯𑀺𑀬 𑀲𑀩𑁆𑀩𑀢𑁆𑀣 𑀧𑀭𑀺𑀫𑀡𑁆𑀟𑀮𑀲𑀻𑀲𑁄 𑀬𑀲𑁆𑀲𑀸𑀢𑀺 𑀉𑀡𑁆𑀳𑀻𑀲𑀲𑀻𑀲𑁄, 𑀦𑀸𑀣𑁄.

𑀯𑀼𑀢𑁆𑀢𑀜𑁆𑀳𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀇𑀤𑀁 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀜𑁆𑀘𑁂𑀯 𑀧𑀭𑀺𑀧𑀼𑀡𑁆𑀡𑀲𑀻𑀲𑀜𑁆𑀘𑀸𑀢𑀺 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀺𑀓𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀁 ¶ 𑀉𑀝𑁆𑀞𑀳𑀺𑀢𑁆𑀯𑀸 𑀲𑀓𑀮𑀁 𑀦𑀮𑀸𑀝𑀁 𑀙𑀸𑀤𑀬𑀫𑀸𑀦𑀁 𑀧𑀽𑀭𑀬𑀫𑀸𑀦𑀁 𑀕𑀦𑁆𑀢𑁆𑀯𑀸 𑀯𑀸𑀫𑀓𑀡𑁆𑀡𑀘𑀽𑀴𑀺𑀓𑀸𑀬 𑀧𑀢𑀺𑀝𑁆𑀞𑀺𑀢𑀁. 𑀭𑀜𑁆𑀜𑁄 𑀩𑀤𑁆𑀥𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀢𑀺. 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀓𑀺𑀭 𑀇𑀫𑀁 𑀮𑀓𑁆𑀔𑀡𑀁 𑀯𑀺𑀤𑀺𑀢𑁆𑀯𑀸 𑀭𑀸𑀚𑀽𑀦𑀁 𑀉𑀡𑁆𑀳𑀻𑀲𑀧𑀝𑁆𑀝𑀁 𑀅𑀓𑀁𑀲𑀼. 𑀅𑀬𑀁 𑀢𑀸𑀯 𑀏𑀓𑁄 𑀅𑀢𑁆𑀣𑁄. 𑀅𑀜𑁆𑀜𑁂 𑀧𑀦 𑀚𑀦𑀸 𑀅𑀧𑀭𑀺𑀧𑀼𑀡𑁆𑀡𑀲𑀻𑀲𑀸 𑀳𑁄𑀦𑁆𑀢𑀺. 𑀓𑁂𑀘𑀺 𑀓𑀧𑀺𑀲𑀻𑀲𑀸, 𑀓𑁂𑀘𑀺 𑀨𑀮𑀲𑀻𑀲𑀸, 𑀓𑁂𑀘𑀺 𑀅𑀝𑁆𑀞𑀺𑀲𑀻𑀲𑀸, 𑀓𑁂𑀘𑀺 𑀢𑀼𑀫𑁆𑀩 𑀲𑀻𑀲𑀸, 𑀓𑁂𑀘𑀺 𑀧𑀩𑁆𑀪𑀸𑀭𑀲𑀻𑀲𑀸. 𑀢𑀣𑀸𑀕𑀢𑀲𑁆𑀲 𑀧𑀦 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀲𑀼𑀧𑀭𑀺𑀧𑀼𑀡𑁆𑀡𑀁 𑀉𑀤𑀓𑀧𑀼𑀧𑁆𑀨𑀼𑀮𑀲𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀉𑀡𑁆𑀳𑀻𑀲𑀯𑁂𑀞𑀺𑀢𑀲𑀻𑀲𑁄 𑀯𑀺𑀬𑀸𑀢𑀺 𑀉𑀡𑁆𑀳𑀻𑀲𑀲𑀻𑀲𑁄. 𑀤𑀼𑀢𑀺𑀬𑀦𑀬𑁂𑀦 𑀉𑀡𑁆𑀳𑀻𑀲𑀁 𑀯𑀺𑀬 𑀲𑀩𑁆𑀩𑀢𑁆𑀣 𑀧𑀭𑀺𑀫𑀡𑁆𑀟𑀮 𑀲𑀻𑀲𑁄𑀢𑀺 𑀉𑀡𑁆𑀳𑀻𑀲𑀲𑀻𑀲𑁄’’𑀢𑀺. 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀤𑁆𑀯𑁂 𑀅𑀢𑁆𑀣 𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑁆𑀢𑀺, 𑀬𑀲𑁆𑀫𑀸 𑀩𑀼𑀤𑁆𑀥𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀧𑀭𑀺𑀧𑀼𑀡𑁆𑀡 𑀦𑀮𑀸𑀝𑀢𑀸𑀬 𑀧𑀭𑀺𑀧𑀼𑀡𑁆𑀡𑀲𑀻𑀲𑀩𑀺𑀫𑁆𑀩𑀢𑀸𑀬 𑀉𑀡𑁆𑀳𑀻𑀲𑀲𑀻𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀡𑁆𑀡𑁂𑀢𑀺. 𑀢𑀲𑁆𑀫𑀸 𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀣𑁄𑀫𑁂𑀢𑀺.

𑀇𑀢𑀺𑀕𑀼𑀡𑀲𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄𑀢𑁆𑀬𑀸𑀤𑀺𑀦𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀕𑀼𑀡𑁂𑀦 𑀲𑀫𑁆𑀧𑀦𑁆𑀦𑀁. 𑀇𑀢𑀺𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀕𑀼𑀡𑀁 𑀇𑀢𑀺𑀕𑀼𑀡𑀁. 𑀢𑁂𑀦 𑀲𑀳 𑀇𑀢𑁄 𑀧𑀢𑁆𑀢𑁄𑀢𑀺 𑀇𑀢𑀺𑀕𑀼𑀡𑀲𑀳𑀺𑀢𑁄, 𑀫𑀳𑁂𑀲𑀻. 𑀅𑀜𑁆𑀜𑁂 𑀳𑀺 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀦𑁆𑀦𑀸 𑀦 𑀳𑁄𑀦𑁆𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀦𑁆𑀦𑀸𑀧𑀺 𑀞𑀧𑁂𑀢𑁆𑀯𑀸 𑀓𑁄𑀲𑁄𑀳𑀺𑀢𑀯𑀢𑁆𑀣 𑀕𑀼𑀬𑁆𑀳𑀮𑀓𑁆𑀔𑀡𑀁 𑀅𑀯𑀲𑁂𑀲𑁂𑀳𑀺 𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑀣𑀸𑀕𑀢𑁄𑀬𑁂𑀯 𑀲𑀩𑁆𑀩𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁𑀬𑁂𑀯 𑀇𑀢𑀺𑀕𑀼𑀡𑀲𑀳𑀺𑀢𑀦𑁆𑀢𑀺 𑀣𑁄𑀫𑀦𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀫𑀳𑁂𑀲𑀺𑀦𑁆𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀫𑀳𑁂𑀲𑀻. 𑀢𑀁 𑀫𑀳𑁂𑀲𑀺𑀁 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀘𑀯𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁩. 𑀅𑀬𑀁 ¶ 𑀧𑀦 𑀇𑀫𑀸𑀲𑀼 𑀢𑀻𑀲𑀼 𑀕𑀸𑀣𑀸𑀲𑀼 𑀲𑀗𑁆𑀔𑁂𑀧𑀢𑁆𑀣𑀬𑁄𑀚𑀦𑀸. 𑀩𑀼𑀤𑁆𑀥𑁄 𑀓𑀢𑁆𑀢𑀼𑀪𑀽𑀢𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄 𑀦𑀺𑀕𑁆𑀭𑁄𑀥𑀲𑁆𑀲 𑀧𑀭𑀺𑀫𑀡𑁆𑀟𑀮𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑀲𑀭𑀻𑀭𑁄 𑀫𑀼𑀤𑀼𑀓𑀭𑀘𑀭𑀡𑁄 𑀲𑀡𑁆𑀳𑀳𑀢𑁆𑀣𑀧𑀸𑀤𑁄, 𑀩𑁆𑀭𑀳𑁆𑀫𑀖𑁄𑀲𑁄 𑀩𑁆𑀭𑀳𑁆𑀫𑀼𑀦𑁄 𑀲𑀭𑁄 𑀯𑀺𑀬 𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑀲𑀭𑀯𑀦𑁆𑀢𑁄, 𑀏𑀡𑀺𑀚𑀗𑁆𑀖𑀸 𑀏𑀡𑀺𑀫𑀺𑀕𑀲𑁆𑀲 𑀚𑀗𑁆𑀖𑀸 𑀯𑀺𑀬 𑀲𑀼𑀯𑀝𑁆𑀝𑀚𑀸𑀡𑀼𑀓𑁄, 𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄 𑀉𑀲𑀪𑀯𑀸𑀭𑀡𑀸 𑀤𑀻𑀦𑀁 𑀅𑀗𑁆𑀕𑀚𑀸𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀤𑀼𑀫𑀓𑀡𑁆𑀡𑀺𑀓𑀲𑀤𑀺𑀲𑁂𑀦 𑀯𑀢𑁆𑀣𑀓𑁄𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑁂𑀦 𑀕𑀼𑀬𑁆𑀳𑀗𑁆𑀕𑀚𑀸𑀢𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀼𑀦𑀭𑀧𑀺 𑀧𑀼𑀦𑀅𑀧𑀺, 𑀲𑀼𑀕𑀢𑁄 𑀩𑀼𑀤𑁆𑀥𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀲𑀼𑀯𑀡𑁆𑀡 𑀧𑀸𑀤𑀼𑀓𑀢𑀮𑀫𑀺𑀯 𑀪𑀽𑀫𑀺𑀬𑀁 𑀲𑀫𑀁 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀫𑀽𑀤𑁄 𑀤𑀸𑀢𑀼𑀡𑁆𑀡𑀮𑁄𑀫𑁄 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀲𑁂𑀢𑁄 𑀲𑀼𑀤𑁆𑀥𑁄 𑀉𑀡𑁆𑀡𑀮𑁄𑀫𑀯𑀦𑁆𑀢𑁄, 𑀅𑀣𑀫𑀧𑀺 𑀢𑀤𑀜𑁆𑀜𑀁𑀅𑀧𑀺, 𑀲𑀼𑀕𑀢𑁄 𑀩𑀼𑀤𑁆𑀥𑁄, 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄 𑀩𑁆𑀭𑀳𑁆𑀫𑀼𑀦𑁄 𑀉𑀚𑀼𑀉𑀕𑁆𑀕𑀢 𑀅𑀢𑁆𑀢𑀪𑀸𑀯𑁄 𑀯𑀺𑀬 𑀉𑀚𑀼𑀫𑁂𑀯 𑀅𑀢𑁆𑀢𑀪𑀸𑀯𑁄, 𑀦𑀻𑀮𑀓𑁆𑀔𑀻 𑀅𑀢𑀺𑀦𑀻𑀮𑀦𑁂𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀤𑀻𑀖𑀧𑀡𑁆𑀳𑀺 𑀆𑀬𑀢𑀧𑀡𑁆𑀳𑀺 𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀺 𑀯𑀸, 𑀲𑀼𑀔𑀼𑀫𑀫𑀮𑀙𑀯𑀻 𑀲𑀡𑁆𑀳𑀫𑀮𑀯𑀺𑀲𑀼𑀤𑁆𑀥𑀢𑀘𑁄 𑀲𑀡𑁆𑀳𑀫𑀮 𑀯𑀺𑀭𑀳𑀺𑀢𑀢𑀘𑁄 𑀯𑀸, 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻 𑀣𑁄𑀫𑀺𑀢𑀩𑁆𑀩𑀲𑀢𑁆𑀢𑀭 𑀲𑀳𑀭𑀡𑀲𑀳𑀲𑁆𑀲𑀦𑁆𑀳𑀸𑀭𑀼𑀉𑀤𑁆𑀥𑀕𑁆𑀕𑀺𑀓𑀸.

𑁨𑁪. 𑀚𑀺𑀦𑁄 𑀧𑀜𑁆𑀘𑀫𑀸𑀭𑀚𑀺𑀢𑀯𑀸 𑀩𑀼𑀤𑁆𑀥𑁄, 𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄 𑀲𑀫𑀘𑀢𑁆𑀢𑀸𑀮𑀻𑀲𑀉𑀢𑁆𑀢𑀫𑀤𑀦𑁆𑀢𑁄, 𑀲𑀫𑀓𑀮𑀧𑀦𑀚𑁄 𑀓𑀓𑀘𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄 𑀯𑀺𑀬 𑀲𑀫𑀤𑀦𑁆𑀢𑁄, 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄 𑀤𑁆𑀯𑀺𑀦𑁆𑀦𑀁 𑀅𑀁𑀲𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀁 𑀯𑁂𑀫𑀚𑁆𑀛𑁂 𑀧𑀭𑀺𑀧𑀼𑀡𑁆𑀡𑀧𑀺𑀝𑁆𑀞𑀺𑀢𑀮𑁄, 𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄 𑀅𑀝𑁆𑀞𑀲𑀢𑀧𑀸𑀤𑀘𑀓𑁆𑀓𑀮𑀓𑁆𑀔𑀡𑁂𑀦 𑀮𑀓𑁆𑀔𑀺𑀢 𑀧𑀸𑀤𑀢𑀮𑁄, 𑀅𑀯𑀺𑀭𑀴𑀤𑀲𑀦𑁄 𑀅𑀯𑀺𑀯𑀭𑀤𑀦𑁆𑀢𑁂𑀦 𑀲𑀫𑁆𑀧𑀦𑁆𑀦𑁄, 𑀫𑀸𑀭𑀚𑀺 𑀧𑀜𑁆𑀘𑀫𑀸𑀭𑀚𑀺𑀢𑀯𑀸 𑀩𑀼𑀤𑁆𑀥𑁄, 𑀉𑀲𑁆𑀲𑀗𑁆𑀔𑀧𑀸𑀤𑁄 𑀧𑀸𑀤𑀲𑁆𑀲 𑀉𑀧𑀭𑀺 𑀞𑀺𑀢𑁂𑀦 𑀲𑀗𑁆𑀔𑀲𑀤𑀺𑀲𑀢𑁆𑀢𑀸 𑀲𑀗𑁆𑀔𑀦𑀸𑀫𑀺𑀓𑁂𑀦 𑀕𑁄𑀧𑁆𑀨𑀓𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀺𑀝𑁆𑀞𑀦𑁆𑀢𑁄 𑀞𑀺𑀢𑀓𑁄𑀯 𑀦𑁄𑀦𑀫𑀦𑁆𑀢𑁄 𑀅𑀦𑀫𑀫𑀸𑀦𑁄 𑀳𑀼𑀢𑁆𑀯𑀸 𑀉𑀪𑀬𑀓𑀭𑀫𑀼𑀤𑀼𑀦𑀸 𑀲𑀼𑀔𑀼𑀫𑁂𑀦 𑀳𑀢𑁆𑀣𑀤𑁆𑀯𑀬𑁂𑀦 𑀚𑀡𑁆𑀡𑀼𑀓𑀸𑀦𑀺 𑀚𑀗𑁆𑀖𑀸𑀦𑀺 𑀆𑀫𑀲𑀦𑁆𑀢𑁄 𑀧𑀭𑀺𑀫𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄, 𑀯𑀝𑁆𑀝𑀓𑁆𑀔𑀦𑁆𑀥𑁄 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑁄 ¶ 𑀯𑀺𑀬 𑀲𑀫𑀯𑀝𑁆𑀝𑀺𑀢𑀕𑀮𑀺𑀓𑁄, 𑀕𑁄𑀢𑀭𑀼𑀡 𑀧𑀔𑀼𑀫𑀓𑁄 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀭𑀢𑁆𑀢𑀯𑀘𑁆𑀙𑀲𑁆𑀲 𑀘𑀓𑁆𑀔𑀼𑀪𑀡𑁆𑀟𑁄 𑀯𑀺𑀬 𑀯𑀺𑀧𑁆𑀧𑀲𑀦𑁆𑀦𑀘𑀓𑁆𑀔𑀼𑀪𑀡𑁆𑀟𑁄, 𑀯𑀺𑀧𑁆𑀧𑀲𑀦𑁆𑀦𑀘𑀓𑁆𑀔𑀼𑀪𑀡𑁆𑀟𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀸, 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄 𑀲𑀻𑀳𑀲𑁆𑀲 𑀧𑀼𑀩𑁆𑀩𑀟𑁆𑀠𑀓𑀸𑀬𑁄 𑀯𑀺𑀬 𑀧𑀭𑀺𑀧𑀼𑀡𑁆𑀡𑀓𑀸𑀬𑁄.

𑁨𑁫. 𑀲𑀼𑀕𑀢𑁄 𑀩𑀼𑀤𑁆𑀥𑁄, 𑀲𑀢𑁆𑀢𑀧𑀻𑀦𑁄 𑀤𑁆𑀯𑀺𑀳𑀢𑁆𑀣𑀧𑀸𑀤𑀅𑀁𑀲𑀓𑀽𑀝𑀏𑀓𑀕𑀮𑀯𑀲𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀺𑀓𑁄, 𑀤𑀻𑀖𑀗𑁆𑀕𑀼𑀮𑀺 𑀲𑀫𑀆𑀬𑀢𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺, 𑀅𑀣 𑀢𑀤𑀜𑁆𑀜𑀁 𑀮𑁄𑀫 𑀓𑀽𑀧𑁂𑀓𑀮𑁄𑀫𑁄 𑀏𑀓𑁂𑀓𑀮𑁄𑀫𑀓𑀽𑀧𑁂 𑀏𑀓𑁂𑀓𑀚𑀸𑀢𑀮𑁄𑀫𑁄, 𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄 𑀲𑀫𑁆𑀧𑀦𑁆𑀦𑀲𑀼𑀓𑁆𑀓𑀤𑀸𑀞𑁄, 𑀓𑀦𑀓 𑀲𑀫𑀢𑀘𑁄 𑀲𑀼𑀯𑀡𑁆𑀡𑁂𑀦 𑀲𑀤𑀺𑀲𑀘𑀫𑁆𑀫𑁄 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄 𑀦𑀻𑀮𑀁 𑀉𑀤𑁆𑀥𑀁 𑀅𑀕𑁆𑀕𑀸 𑀓𑁄𑀝𑀺 𑀳𑀼𑀢𑁆𑀯𑀸 𑀫𑀼𑀔𑀲𑁄𑀪𑀁 𑀉𑀮𑁆𑀮𑁄𑀓𑀬𑀫𑀸𑀦𑁄 𑀯𑀺𑀬 𑀞𑀺𑀢𑀮𑁄𑀫𑁄, 𑀲𑀫𑁆𑀩𑀼𑀤𑁆𑀥𑁄 𑀢𑀣𑀸𑀕𑀢𑁄, 𑀣𑀽𑀮𑀚𑀺𑀯𑁆𑀳𑁄 𑀫𑀼𑀤𑀼𑀤𑀻𑀖𑀧𑀼𑀣𑀼𑀮𑀚𑀺𑀯𑁆𑀳𑀸𑀬 𑀲𑀫𑁆𑀧𑀦𑁆𑀦𑁄, 𑀅𑀣 𑀢𑀤𑀜𑁆𑀜𑀁, 𑀲𑀻𑀳𑀳𑀦𑀼𑀓𑁄 𑀲𑀻𑀳𑀲𑁆𑀲 𑀳𑁂𑀝𑁆𑀞𑀸𑀳𑀦𑀼 𑀯𑀺𑀬 𑀧𑀭𑀺𑀧𑀼𑀡𑁆𑀡𑀳𑀦𑀼𑀓𑁄, 𑀚𑀸𑀮𑀺𑀓𑀧𑁆𑀧𑀸𑀤 𑀳𑀢𑁆𑀣𑁄 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀯𑀸𑀢𑀧𑀸𑀦𑁂 𑀲𑀫𑁆𑀫𑀸𑀬𑁄𑀚𑀺𑀢 𑀚𑀸𑀮𑀁 𑀯𑀺𑀬 𑀘𑀫𑁆𑀫𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑁄, 𑀦𑀸𑀣𑁄 𑀩𑀼𑀤𑁆𑀥𑁄, 𑀉𑀡𑁆𑀳𑀻𑀲𑀲𑀻𑀲𑁄 𑀭𑀜𑁆𑀜𑁄 𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀧𑀓𑀢𑀺𑀫𑀁𑀲𑀧𑀺𑀡𑁆𑀟𑀲𑀗𑁆𑀔𑀸𑀢𑁄 𑀉𑀡𑁆𑀳𑀻𑀲𑀧𑀝𑁆𑀝𑀲𑀻𑀲𑁄, 𑀇𑀢𑀺 𑀕𑀼𑀡𑀲𑀳𑀺𑀢𑀁 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀕𑀼𑀡𑁂𑀦 𑀲𑀫𑀦𑁆𑀦𑀸𑀕𑀢𑀁 𑀢𑀁 𑀫𑀳𑁂𑀲𑀺𑀁 𑀩𑀼𑀤𑁆𑀥𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀳𑀁 𑀦𑀫𑀸𑀫𑀺 𑀯𑀦𑁆𑀤𑀸𑀫𑀻𑀢𑀺.

𑀢𑀻𑀲𑀼 𑀕𑀸𑀣𑀸𑀲𑀼 𑀲𑀗𑁆𑀔𑁂𑀧𑀢𑁆𑀣𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀇𑀫𑀺𑀲𑁆𑀲𑀁 𑀧𑀦 𑀦𑀫𑀓𑁆𑀓𑀸𑀭𑀧𑀸𑀴𑀺𑀬𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀩𑀼𑀤𑁆𑀥𑀯𑀘𑀦𑀧𑀸𑀴𑀺𑀬𑀁 𑀆𑀕𑀢𑀦𑀬𑀸𑀦𑀼𑀓𑁆𑀓𑀫𑁂𑀦 𑀦 𑀯𑀼𑀢𑁆𑀢𑀁. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀫𑁂𑀯 𑀧𑀦 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄𑀢𑁆𑀬𑀸𑀤𑀺𑀦𑀸 𑀅𑀓𑁆𑀓𑀫𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀸𑀣𑁂𑀬𑁆𑀬𑀯𑀕𑁆𑀕𑁂 𑀮𑀓𑁆𑀔𑀡𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀓𑁆𑀓𑀫𑀁 ¶ 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀬𑀺𑀲𑁆𑀲𑀸𑀫 𑀩𑀳𑀼𑀲𑁆𑀲𑀼𑀢𑀧𑀜𑁆𑀜𑀸𑀯𑀟𑁆𑀠𑀦𑀢𑁆𑀣𑀁.

. 𑀩𑀼𑀤𑁆𑀥𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑁨. 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀚𑀸𑀢𑁄 𑁩. 𑀆𑀬𑀢𑀧𑀡𑁆𑀳𑀺 𑁪. 𑀤𑀻𑀖𑀗𑁆𑀕𑀼𑀮𑀺 𑁫. 𑀫𑀼𑀤𑀼𑀢𑀮𑀼𑀦 𑀳𑀢𑁆𑀣𑀧𑀸𑀤𑁄 𑁬. 𑀚𑀸𑀮𑀳𑀢𑁆𑀣𑀧𑀸𑀤𑁄 𑁭. 𑀉𑀲𑁆𑀲𑀗𑁆𑀔𑀧𑀸𑀤𑁄 𑁮. 𑀏𑀡𑀺𑀚𑀗𑁆𑀖𑁄 𑁯. 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀸𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 𑁧𑁦. 𑀓𑁄𑀲𑁄𑀳𑀺𑀢 𑀯𑀢𑁆𑀣𑀕𑀼𑀬𑁆𑀳𑁄 𑁧𑁧. 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑁧𑁨. 𑀲𑀼𑀔𑀼𑀫𑀘𑁆𑀙𑀯𑀻 𑁧𑁩. 𑀏𑀓𑁂𑀓𑀮𑁄𑀫𑀓𑀽𑀧𑁂𑀲𑀼 𑀏𑀓𑁂𑀓𑀮𑁄𑀫𑁄 𑁧𑁪. 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄 𑁧𑁫. 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑁧𑁬. 𑀲𑀢𑁆𑀢𑀼𑀲𑁆𑀲𑀤𑁄 𑁧𑁭. 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄 𑁧𑁮. 𑀘𑀺𑀢𑀦𑁆𑀢𑀭𑀁𑀲𑁄 𑁧𑁯. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑁨𑁦. 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑁨𑁧. 𑀭𑀲𑀕𑁆𑀕𑀲𑀕𑁆𑀕𑀻 𑁨𑁨. 𑀲𑀻𑀳𑀳𑀦𑀼𑀓𑁄 𑁨𑁩. 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑁨𑁪. 𑀲𑀫𑀤𑀦𑁆𑀢𑁄 𑁨𑁫. 𑀅𑀯𑀺𑀭𑀴𑀤𑀦𑁆𑀢𑁄 𑁨𑁬. 𑀲𑀼𑀲𑀼𑀓𑁆𑀓𑀤𑀸𑀞𑁄 𑁨𑁭. 𑀧𑀳𑀼𑀢 𑀚𑀺𑀯𑁆𑀳𑁄 𑁨𑁮. 𑀩𑁆𑀭𑀳𑁆𑀫𑀲𑀭𑁄 𑁨𑁯. 𑀅𑀪𑀺𑀦𑀻𑀮𑀦𑁂𑀢𑁆𑀢𑁄 𑁩𑁦. 𑀕𑁄𑀧 𑀔𑀼𑀫𑁄 𑁩𑁧. 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮 𑀲𑀦𑁆𑀦𑀺𑀪𑀸 𑁩𑁨. 𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑁆𑀲 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀸𑀦𑀺 𑀧𑀦 𑀪𑀕𑀯𑀢𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀸𑀭𑀫𑀻𑀧𑀼𑀜𑁆𑀜𑀓𑀫𑁆𑀫𑁂𑀦 𑀬𑀣𑀸𑀭𑀳𑀁 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀧𑀦 𑀓𑀫𑁆𑀫𑀸𑀦𑀺 𑀧𑀸𑀣𑁂𑀬𑁆𑀬𑀯𑀕𑁆𑀕𑁂 𑀮𑀓𑁆𑀔𑀡𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀦𑁂𑀢𑁆𑀣 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀻𑀢𑀺.

𑀢𑀺𑀲𑁆𑀲𑁄 𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄 𑀓𑀸 𑀓𑀣𑀸 𑀩𑀼𑀤𑁆𑀥𑀪𑀸𑀯𑁄,

𑀮𑁄𑀓𑁂 𑀢𑀲𑁆𑀫𑀸 𑀯𑀺𑀪𑀸𑀯𑀻 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀲𑀸𑀥𑀯𑁄 𑀧𑀢𑁆𑀣𑀬𑀦𑁆𑀢𑀸;

𑀇𑀝𑁆𑀞𑀁 𑀅𑀢𑁆𑀣𑀁 𑀯𑀳𑀦𑁆𑀢𑀁 𑀲𑀼𑀭𑀦𑀭𑀫𑀳𑀺𑀢𑀁 𑀦𑀺𑀩𑁆𑀪𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀁,

𑀮𑁄𑀓𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀁 𑀤𑀲𑀩𑀮𑀫𑀲𑀫𑀁 𑀢𑀁 𑀦𑀫𑀲𑁆𑀲𑀦𑁆𑀢𑀼 𑀦𑀺𑀘𑁆𑀘𑀁.

𑁨𑁬. 𑀏𑀯𑀁 ¶ 𑀲𑀼𑀕𑀢𑀦𑁆𑀢𑀺𑀆𑀤𑀻𑀳𑀺 𑀧𑀜𑁆𑀘𑀯𑀻𑀲𑀢𑀺𑀯𑀦𑁆𑀤𑀦𑀕𑀸𑀣𑀸𑀳𑀺 𑀩𑀼𑀤𑁆𑀥𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀯𑀦𑁆𑀤𑀦𑁂 𑀉𑀬𑁆𑀬𑁄𑀚𑀦𑀁 𑀓𑀭𑁄𑀦𑁆𑀢𑁄 𑀆𑀳 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀢𑁆𑀬𑀸𑀤𑀺𑀕𑀸𑀣𑀁. 𑀅𑀬𑀁 𑀧𑀦 𑀲𑀤𑁆𑀥𑀭𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀧𑀦 𑀮𑁄𑀓𑁂 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄 𑀩𑀼𑀤𑁆𑀥𑀪𑀸𑀯𑁄 𑀓𑀸 𑀓𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀢𑀺𑀮𑁄𑀓𑁂 𑀯𑀸 𑀅𑀦𑀦𑁆𑀢𑀘𑀓𑁆𑀓𑀯𑀸𑀴 𑀮𑁄𑀓𑁂 𑀯𑀸. 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺𑀖𑁄𑀲𑁄𑀢𑀺 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄 𑀇𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀣𑀼𑀢𑀺𑀲𑀤𑁆𑀤𑁄 𑀯𑀸. 𑀖𑀼𑀲𑀦𑀁 𑀖𑁄𑀲𑁄. 𑀖𑀼𑀲𑀺𑀬𑀢𑀺 𑀓𑀣𑀺𑀬𑀢𑀻𑀢𑀺 𑀯𑀸 𑀖𑁄𑀲𑁄, 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀖𑀼𑀲𑀥𑀸𑀢𑀼 𑀲𑀤𑁆𑀤𑁂 𑀡. 𑀅𑀣 𑀯𑀸 𑀖𑀼𑀲𑀺𑀬𑀢𑀺 𑀣𑀯𑀺𑀬𑀢𑀻𑀢𑀺 𑀖𑁄𑀲𑁄, 𑀣𑀼𑀢𑀺𑀲𑀤𑁆𑀤𑁄. 𑀢𑁂𑀦 𑀯𑀼𑀢𑁆𑀢𑀁 𑀧𑀸𑀭𑀸𑀚𑀺𑀓𑀡𑁆𑀟𑀝𑁆𑀞𑀓𑀣𑀸𑀬𑀁 ‘‘𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀏𑀯. 𑀣𑀼𑀢𑀺𑀖𑁄𑀲𑁄 𑀯𑀸’’𑀢𑀺. 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄 𑀇𑀢𑀺 𑀧𑀯𑀢𑁆𑀢𑁄 𑀖𑁄𑀲𑁄 𑀣𑀼𑀢𑀺𑀖𑁄𑀲𑁄𑀢𑀺 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄. 𑀅𑀢𑀺𑀤𑀼𑀮𑀪𑀢𑀭𑁄𑀢𑀺 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑀢𑀫𑁄. 𑀤𑀼𑀮𑁆𑀮𑀪𑀢𑀭𑁄𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀮𑀓𑀸𑀭𑀮𑁄𑀧𑁂𑀦 𑀤𑀼𑀮𑀪𑀢𑀭𑁄𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑁂𑀦 𑀮𑀪𑀺𑀬𑀢𑀻𑀢𑀺 𑀤𑀼𑀮𑁆𑀮𑀪𑁄. 𑀤𑀼𑀧𑀼𑀩𑁆𑀩𑀮𑀪𑀥𑀸𑀢𑀼 𑀮𑀪𑀦𑁂 𑀅. 𑀅𑀣 𑀯𑀸 𑀮𑀪𑀲𑁆𑀲 𑀅𑀲𑀫𑀺𑀤𑁆𑀥𑀦𑁆𑀢𑀺 𑀤𑀼𑀮𑁆𑀮𑀪𑁄, 𑀤𑀼𑀩𑁆𑀪𑀺𑀚𑀸𑀦𑁂𑀬𑁆𑀬 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄𑀬𑀁. 𑀤𑀼𑀲𑀤𑁆𑀤𑁄 𑀅𑀲𑀫𑀺𑀤𑁆𑀥𑀢𑁆𑀣𑁄, 𑀬𑀣𑀸 𑀤𑀼𑀩𑁆𑀪𑀺𑀓𑁆𑀔𑁄𑀢𑀺. 𑀅𑀢𑀺 𑀯𑀺𑀬 𑀤𑀼𑀮𑁆𑀮𑀪𑁄𑀢𑀺 𑀅𑀢𑀺𑀤𑀼𑀮𑀪𑁄. 𑀢𑁂𑀲𑀁 𑀯𑀺𑀲𑁂𑀲𑁂𑀦 𑀅𑀢𑀺𑀤𑀼𑀮𑁆𑀮𑀪𑁄𑀢𑀺 𑀅𑀢𑀺𑀤𑀼𑀮𑀪𑀢𑀭𑁄. 𑀩𑀼𑀤𑁆𑀥𑀸 𑀳𑀺 𑀮𑁄𑀓𑁂 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀘𑀽𑀴𑀯𑀕𑁆𑀕𑀔𑀦𑁆𑀥𑀓𑁂 ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄 𑀕𑀳𑀧𑀢𑀺 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀬𑀤𑀺𑀤𑀁 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄’’𑀢𑀺. 𑀬𑀣𑀸 𑀘 𑀳𑀺 𑀮𑁄𑀓𑁂 𑀉𑀤𑀼𑀫𑁆𑀩𑀭𑀺𑀓𑀧𑀼𑀧𑁆𑀨𑀁 𑀤𑀼𑀮𑁆𑀮𑀪𑀁. 𑀘𑀦𑁆𑀤𑀫𑁆𑀳𑀺 𑀲𑀲𑀓𑀁 𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀁. 𑀯𑀸𑀬𑀲𑀸𑀦𑀁 𑀔𑀻𑀭𑀁, 𑀏𑀯𑀁 𑀩𑀼𑀤𑁆𑀥𑀪𑀸𑀯𑁄 𑀅𑀢𑀺𑀤𑀼𑀮𑁆𑀮𑀪𑀢𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦 𑀳𑀻𑀦𑀽𑀧𑀫𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑀧𑀸𑀴𑀺𑀬𑀁 𑁋

‘‘𑀉𑀤𑀼𑀫𑁆𑀩𑀭𑀺𑀓𑀧𑀼𑀧𑁆𑀨𑀁𑀯 ¶ , 𑀘𑀦𑁆𑀤𑀫𑁆𑀳𑀺 𑀲𑀲𑀓𑀁 𑀬𑀣𑀸;

𑀯𑀸𑀬𑀲𑀸𑀦𑀁 𑀬𑀣𑀸 𑀔𑀻𑀭𑀁, 𑀤𑀼𑀮𑁆𑀮𑀪𑀁 𑀮𑁄𑀓𑀦𑀸𑀬𑀓’’𑀦𑁆𑀢𑀺 𑀘;

𑀤𑀼𑀮𑁆𑀮𑀪𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀮𑁄𑀓𑀲𑁆𑀫𑀺’’𑀦𑁆𑀢𑀺 𑀘;

𑀓𑀺𑀜𑁆𑀘𑀸𑀧𑀺 𑀳𑀺 𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀽𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀼𑀮𑁆𑀮𑀪𑁄. 𑀏𑀓𑀲𑁆𑀫𑀺𑀫𑁆𑀧𑀺 𑀧𑀦 𑀓𑀧𑁆𑀧𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀅𑀦𑁂𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀣𑀸𑀕𑀢𑀸 𑀧𑀦 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓 𑀤𑁆𑀯𑀺𑀢𑀺 𑀘𑀢𑀼 𑀧𑀜𑁆𑀘 𑀩𑀼𑀤𑁆𑀥𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀤𑀼𑀢𑁆𑀢𑀭𑀺. 𑀬𑀲𑁆𑀫𑀸 𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀢𑀣𑀸𑀕𑀢𑀲𑀼𑀜𑁆𑀜𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲𑁂𑀯 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑀢𑁄 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄 𑀓𑀸 𑀓𑀣𑀸 𑀩𑀼𑀤𑁆𑀥𑀪𑀸𑀯𑁄𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 ‘‘𑀤𑁂𑀯𑀢𑀸 𑀆𑀦𑀦𑁆𑀤 𑀉𑀚𑁆𑀛𑀸𑀬𑀦𑁆𑀢𑀺. 𑀤𑀼𑀭𑀸𑀯𑀢𑀫𑁆𑀳𑀸 𑀆𑀕𑀢𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸. 𑀅𑀚𑁆𑀚 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀬𑀜𑁆𑀘 𑀫𑀳𑁂𑀲𑀓𑁆𑀔𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀺𑀢𑁄 𑀑𑀯𑀸𑀭𑁂𑀦𑁆𑀢𑁄 𑀑𑀢𑀭𑁂𑀦𑁆𑀢𑁄 𑀯𑀸 𑀦 𑀫𑀬𑀁 𑀮𑀪𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺.

𑀩𑀼𑀤𑁆𑀥𑀪𑀸𑀯𑁄𑀢𑀺 𑀩𑀼𑀤𑁆𑀥𑀲𑁆𑀲 𑀪𑀸𑀯𑁄. 𑀓𑀸 𑀓𑀣𑀸𑀢𑀺 𑀓𑀺𑀁 𑀯𑀢𑁆𑀢𑀩𑁆𑀩𑁄𑀏𑀯𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀩𑀼𑀤𑁆𑀥𑁄 𑀅𑀢𑀺𑀤𑀼𑀮𑁆𑀮𑀪𑀢𑀭𑁄𑀢𑀺 𑀘, 𑀩𑀼𑀤𑁆𑀥𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘 𑀯𑀼𑀢𑁆𑀢𑀁. 𑀦𑀦𑀼 𑀩𑀼𑀤𑁆𑀥𑀸 𑀮𑁄𑀓𑁂 𑀅𑀦𑁂𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀲𑀘𑁆𑀘𑀫𑁂𑀢𑀁. 𑀩𑀼𑀤𑁆𑀥𑁄 𑀦𑀸𑀫 𑀧𑀦 𑀅𑀦𑁂𑀓𑀸𑀲𑀗𑁆𑀔𑁆𑀬𑁂𑀬𑁆𑀬𑀯𑀸𑀭𑁂𑀦 𑀯𑀸 𑀅𑀦𑁂𑀓𑀸𑀲𑀗𑁆𑀔𑁆𑀬𑁂𑀬𑁆𑀬𑀤𑀺𑀯𑀲𑀫𑀸𑀲𑀲𑀁𑀯𑀘𑁆𑀙𑀭𑀁 𑀯𑀸 𑀅𑀦𑁂𑀓𑀸𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁 𑀯𑀸 𑀤𑀲𑀧𑀸𑀭𑀫𑀺𑀬𑁄 𑀘 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀘 𑀧𑀽𑀭𑁂𑀢𑁆𑀯𑀸𑀯 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀏𑀓𑁂𑀓𑀯𑀸𑀭𑀸𑀤𑀺𑀦𑀸. 𑀅𑀣 𑀔𑁄 𑀧𑀦 𑀅𑀦𑁆𑀢𑀫𑀲𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀲𑀧𑀸𑀭𑀫𑀺𑀬𑁄 𑀘 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀘 𑀧𑀽𑀭𑁂𑀢𑁆𑀯𑀸𑀯 𑀩𑀼𑀤𑁆𑀥𑁄 ¶ 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀢𑀺𑀤𑀼𑀮𑁆𑀮𑀪𑀢𑀭𑁄𑀢𑀺 𑀘, 𑀩𑀼𑀤𑁆𑀥𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺.

𑀏𑀯𑀁 𑀩𑀼𑀤𑁆𑀥𑀲𑁆𑀲 𑀅𑀢𑀺𑀤𑀼𑀮𑁆𑀮𑀪𑀢𑀭𑀢𑁆𑀢𑀸 𑀘 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘𑀏𑀯 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂 𑁋

‘‘𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸 𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲𑀸’’𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀖𑁄𑀲𑁄 𑀅𑀢𑀺𑀤𑀼𑀮𑁆𑀮𑀪𑀢𑀭𑁄, 𑀩𑀼𑀤𑁆𑀥𑀪𑀸𑀯𑁄 𑀓𑀸 𑀓𑀣𑀸. 𑀢𑀲𑁆𑀫𑀸. 𑀯𑀺𑀪𑀸𑀯𑀻𑀢𑀺 𑀫𑁂𑀥𑀸𑀯𑀻. 𑀢𑁂 𑀳𑀺 𑀳𑀺𑀢𑀸𑀳𑀺𑀢𑀁 𑀓𑀸𑀭𑀡𑀸𑀓𑀸𑀭𑀡𑀁 𑀯𑀸 𑀯𑀺𑀲𑁂𑀲𑁂𑀦 𑀪𑀸𑀯𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀯𑀺𑀪𑀸𑀯𑀸, 𑀧𑀜𑁆𑀜𑀸. 𑀯𑀺𑀧𑀼𑀩𑁆𑀩 𑀪𑀽𑀥𑀸𑀢𑀼 𑀲𑀢𑁆𑀢𑀸𑀬𑀁 𑀡. 𑀲𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀪𑀸𑀯𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀸𑀥𑀯𑁄 𑀮𑀩𑁆𑀪𑀢𑀺. 𑀢𑀁 𑀧𑀦 𑀲𑀸𑀥𑀯𑁄𑀢𑀺 𑀧𑀤𑁂 𑀯𑀺𑀲𑁂𑀲𑀦𑀁.

𑀯𑀺𑀯𑀺𑀥𑀳𑀺𑀢𑀲𑀼𑀔𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭 𑀲𑀗𑁆𑀔𑀸𑀢𑀁 𑀳𑀺𑀢𑀲𑀼𑀔𑀁. 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀁 𑀧𑀦 𑀧𑀢𑁆𑀣𑀬𑀦𑁆𑀢𑀸𑀢𑀺𑀧𑀤𑁂 𑀓𑀫𑁆𑀫𑀁. 𑀲𑀸𑀥𑀯𑁄𑀢𑀺 𑀲𑀧𑁆𑀧𑀼𑀭𑀺𑀲𑀸. 𑀢𑁂 𑀳𑀺 𑀲𑀧𑀭𑀳𑀺𑀢𑀁 𑀲𑀸𑀥𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀲𑀸𑀥𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀥𑀥𑀸𑀢𑀼 𑀲𑀁𑀲𑀺𑀤𑁆𑀥𑀺𑀬𑀁 𑀅𑀯𑁄. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀦𑀫𑀲𑁆𑀲𑀦𑁆𑀢𑀽𑀢𑀺 𑀧𑀤𑁂𑀦 𑀓𑀢𑁆𑀢𑀼𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀣𑀬𑀦𑁆𑀢𑀸𑀢𑀺 𑀬𑀸𑀘𑀦𑁆𑀢𑀸. 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀧𑀢𑁆𑀣𑀬𑀦𑁆𑀢𑀺 𑀬𑀸𑀘𑀦𑁆𑀢𑀻𑀢𑀺 𑀧𑀢𑁆𑀣𑀬𑀦𑁆𑀢𑀸, 𑀲𑀸𑀥𑀯𑁄. 𑀧𑀢𑁆𑀣𑀥𑀸𑀢𑀼 𑀬𑀸𑀘𑀦𑁂 𑀅𑀦𑁆𑀢𑁄. 𑀬𑀓𑀸𑀭𑀸𑀕𑀫𑁄. 𑀢𑀁 𑀧𑀦 𑀲𑀸𑀥𑀯𑁄𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀇𑀝𑁆𑀞𑀦𑁆𑀢𑀺 𑀓𑀸𑀫𑀬𑀫𑀸𑀦𑀁. 𑀇𑀘𑁆𑀙𑀺𑀢𑀩𑁆𑀩𑀁 𑀓𑀫𑀺𑀢𑀩𑁆𑀩𑀦𑁆𑀢𑀺 𑀇𑀝𑁆𑀞𑀁. 𑀇𑀲𑀼𑀥𑀸𑀢𑀼 𑀇𑀘𑁆𑀙𑀸 𑀓𑀦𑁆𑀢𑀻𑀲𑀼 𑀢𑀧𑀘𑁆𑀘𑀬𑁄. 𑀢𑀲𑁆𑀲 𑀭𑀝𑁆𑀞𑁄, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀅𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀅𑀢𑁆𑀣𑀁. 𑀅𑀢𑁆𑀣𑀺𑀬𑀢𑀺 𑀧𑀢𑁆𑀣𑀺𑀬𑀢𑀻𑀢𑀺 𑀅𑀢𑁆𑀣𑁄, 𑀯𑀺𑀧𑀸𑀓𑀸𑀦𑀺𑀲𑀁𑀲𑀨𑀮𑀁. 𑀅𑀢𑁆𑀣𑀥𑀸𑀢𑀼 𑀬𑀸𑀘𑀦𑀸𑀬𑀁 𑀅 ¶ . 𑀅𑀣 𑀯𑀸 𑀅𑀲𑀢𑀺 𑀪𑀯𑀢𑀺 𑀨𑀮𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀲𑀥𑀸𑀢𑀼 𑀪𑀼𑀯𑀺𑀫𑁆𑀳𑀺 𑀣. 𑀢𑀁 𑀧𑀦 𑀧𑀤𑀤𑁆𑀯𑀬𑀁 𑀯𑀳𑀦𑁆𑀢𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀯𑀳𑀦𑁆𑀢𑀦𑁆𑀢𑀺 𑀥𑀸𑀭𑀓𑀁. 𑀯𑀳𑀢𑀺 𑀳𑀭𑀢𑀻𑀢𑀺 𑀯𑀳𑀦𑁆𑀢𑁄, 𑀩𑀼𑀤𑁆𑀥𑁄. 𑀯𑀳𑀥𑀸𑀢𑀼 𑀯𑀳𑀦𑁂 𑀧𑀸𑀧𑀼𑀡𑀦𑁂 𑀯𑀸 𑀅𑀦𑁆𑀢𑁄. 𑀩𑀼𑀤𑁆𑀥𑁄 𑀳𑀺 𑀲𑀢𑁆𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀁 𑀥𑀫𑁆𑀫𑀤𑁂𑀲𑀦𑀸𑀬 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀭𑀦𑀭𑀫𑀳𑀺𑀢𑀦𑁆𑀢𑀺 𑀤𑁂𑀯𑁂𑀳𑀺 𑀘 𑀫𑀦𑀼𑀲𑁆𑀲𑁂𑀳𑀺 𑀘 𑀘𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀧𑀽𑀚𑀺𑀢𑀁. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁. 𑀇𑀲𑁆𑀲𑀭𑀺𑀬𑀓𑀻𑀴𑀸𑀤𑀻𑀳𑀺 𑀲𑀼𑀭𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀲𑀼𑀭𑀸, 𑀤𑁂𑀯𑀸. 𑀲𑀼𑀭𑀥𑀸𑀢𑀼 𑀤𑀺𑀢𑁆𑀢𑀺𑀬𑀁. 𑀅𑀣 𑀯𑀸 𑀲𑀼𑀭𑀦𑁆𑀢𑀺 𑀈𑀲𑀦𑁆𑀢𑀺 𑀤𑁂𑀯𑀺𑀲𑁆𑀲𑀭𑀺𑀬𑀁 𑀧𑀸𑀧𑀼𑀡𑀦𑁆𑀢𑀺 𑀯𑀺𑀭𑁄𑀘𑀦𑁆𑀢𑀺 𑀘𑀸𑀢𑀺 𑀲𑀼𑀭𑀸, 𑀤𑁂𑀯𑀸. 𑀲𑀼𑀦𑁆𑀤𑀭𑀸 𑀭𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀯𑀸 𑀲𑀼𑀭𑀸, 𑀤𑁂𑀯𑀸. 𑀔𑀦𑁆𑀥𑀲𑀦𑁆𑀢𑀸𑀦𑀁 𑀦𑀭𑀦𑁆𑀢𑀺 𑀦𑁂𑀦𑁆𑀢𑀻𑀢𑀺 𑀦𑀭𑀸, 𑀫𑀦𑀼𑀲𑁆𑀲𑀸. 𑀦𑀭𑀥𑀸𑀢𑀼 𑀦𑀬𑀦𑁂 𑀅. 𑀲𑀼𑀭𑀸 𑀘 𑀦𑀭𑀸 𑀘 𑀲𑀼𑀭𑀦𑀭𑀸. 𑀢𑁂𑀳𑀺 𑀫𑀳𑀺𑀢𑀩𑁆𑀩𑀸 𑀧𑀽𑀚𑀺𑀢𑀩𑁆𑀩𑀸𑀢𑀺 𑀲𑀼𑀭𑀦𑀭𑀫𑀳𑀺𑀢𑁄, 𑀩𑀼𑀤𑁆𑀥𑁄. 𑀫𑀳𑀥𑀸𑀢𑀼 𑀧𑀽𑀚𑀸𑀬𑀁 𑀢. 𑀢𑀁 𑀲𑀼𑀭𑀦𑀭𑀫𑀳𑀺𑀢𑀁. 𑀦𑀺𑀩𑁆𑀪𑀬𑀦𑁆𑀢𑀺 𑀅𑀪𑀬𑀁. 𑀪𑀺𑀬𑀢𑁂 𑀪𑀬𑀁. 𑀦𑀢𑁆𑀣𑀺 𑀪𑀬𑀁 𑀏𑀢𑀲𑁆𑀲𑀸𑀢𑀺 𑀦𑀺𑀩𑁆𑀪𑀬𑁄, 𑀩𑀼𑀤𑁆𑀥𑁄. 𑀢𑀁 𑀦𑀺𑀩𑁆𑀪𑀬𑀁. 𑀢𑀣𑀸𑀕𑀢𑀲𑁆𑀲 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀪𑀬𑀁 𑀳𑀤𑀬𑀘𑀮𑀦𑀁 𑀓𑀫𑁆𑀧𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀤𑀓𑁆𑀔𑀺𑀡𑁂𑀬𑁆𑀬𑀦𑁆𑀢𑀺 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀉𑀢𑁆𑀢𑀫𑀤𑀸𑀦𑀸𑀭𑀳𑀁. 𑀤𑀸𑀢𑀩𑁆𑀩𑀸𑀢𑀺 𑀤𑀓𑁆𑀔𑀺𑀡𑀸, 𑀤𑁂𑀬𑁆𑀬𑀥𑀫𑁆𑀫𑀯𑀢𑁆𑀣𑀼. 𑀤𑀸𑀥𑀸𑀢𑀼 𑀤𑀸𑀦𑁂𑀓𑁆𑀔𑀺𑀡𑀧𑀘𑁆𑀘𑀬𑁄. 𑀅𑀣 𑀯𑀸 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀻𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀁. 𑀤𑀓𑁆𑀔𑀥𑀸𑀢𑀼 𑀯𑀟𑁆𑀠𑀦𑁂𑀬𑀼, 𑀢𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀩𑀼𑀤𑁆𑀥𑁄. 𑀅𑀭𑀳𑀢𑀺𑀢𑀤𑁆𑀥𑀺𑀢𑁂 𑀡𑁂𑀬𑁆𑀬𑁄. 𑀅𑀣 𑀯𑀸 𑀤𑀓𑁆𑀔𑀺𑀡𑀸𑀬 𑀳𑀺𑀢𑀁 𑀅𑀦𑀼𑀭𑀽𑀧𑀁 𑀫𑀳𑀧𑁆𑀨𑀮𑀓𑀭𑀡𑀢𑀸𑀬 𑀯𑀺𑀲𑁄𑀥𑁂𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀩𑀼𑀤𑁆𑀥𑁄. 𑀯𑀺𑀲𑁄𑀥𑁂𑀢𑀺𑀢𑀤𑁆𑀥𑀺𑀢𑀸𑀬𑀁. 𑀩𑀼𑀤𑁆𑀥𑁄𑀬𑁂𑀯 𑀳𑀺 𑀤𑀓𑁆𑀔𑀺𑀡𑀸𑀬 𑀫𑀳𑀧𑁆𑀨𑀮𑀓𑀭𑀡𑀯𑀲𑁂𑀦 𑀘, 𑀯𑀺𑀲𑁄𑀥𑀦𑀯𑀲𑁂𑀦 𑀘, 𑀤𑁂𑀯𑀲𑀓𑁆𑀓𑀩𑁆𑀭𑀳𑁆𑀫𑁂𑀳𑀺 𑀘, 𑀓𑁄𑀲𑀮𑀭𑀸𑀚𑀸𑀤𑀻𑀳𑀺 𑀘, 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀸𑀤𑀻𑀳𑀺 𑀘 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀁 𑀉𑀢𑁆𑀢𑀫𑀤𑀸𑀦𑀁 𑀯𑀺𑀲𑁂𑀲𑁂𑀦 𑀅𑀭𑀳𑀢𑀺, 𑀢𑀲𑁆𑀫𑀸 𑀤𑀓𑁆𑀔𑀺𑀡𑁂𑀬𑁆𑀬𑀦𑁆𑀢𑀺 𑀣𑁄𑀫𑁂𑀢𑀺.

𑀮𑁄𑀓𑀸𑀦𑀦𑁆𑀢𑀺 ¶ 𑀲𑀢𑁆𑀢𑀮𑁄𑀓𑀸𑀦𑀁. 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀦𑀦𑁆𑀤𑀺𑀯𑀟𑁆𑀠𑀦𑁆𑀢𑀺 𑀧𑀻𑀢𑀺𑀬𑀸 𑀯𑀟𑁆𑀠𑀸𑀧𑁂𑀦𑁆𑀢𑀁. 𑀦𑀦𑁆𑀤𑀺𑀬𑀢𑁂 𑀦𑀦𑁆𑀤𑀺. 𑀪𑀸𑀯𑀲𑀸𑀥𑀦𑁄𑀬𑀁. 𑀦𑀦𑁆𑀤𑀥𑀸𑀢𑀼 𑀲𑀫𑀺𑀤𑁆𑀥𑀺𑀬𑀁 𑀦𑀦𑁆𑀤𑀦𑁂 𑀯𑀸 𑀇. 𑀧𑀻𑀢𑀺𑀬𑀸 𑀅𑀥𑀺𑀯𑀘𑀦𑀫𑁂𑀢𑀁. 𑀲𑀸 𑀯𑀟𑁆𑀠𑁂𑀢𑀺 𑀩𑀼𑀤𑁆𑀥𑁂𑀢𑀻𑀢𑀺 𑀦𑀦𑁆𑀤𑀺𑀯𑀟𑁆𑀠𑁄, 𑀩𑀼𑀤𑁆𑀥𑁄. 𑀦𑀦𑁆𑀤𑀺𑀲𑀤𑁆𑀤𑀽𑀧𑀧𑀤𑀯𑀟𑁆𑀠𑀥𑀸𑀢𑀼 𑀯𑀟𑁆𑀠𑀦𑁂 𑀅. 𑀩𑀼𑀤𑁆𑀥𑁄 𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦 𑀘 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀮𑁄𑀓𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀻𑀢𑀺𑀁 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑀢𑁆𑀢𑀸𑀦𑀜𑁆𑀳𑀺 𑀩𑀼𑀤𑁆𑀥𑀤𑀲𑁆𑀲𑀦𑁂 𑀥𑀫𑁆𑀫𑀲𑀯𑀦𑁂 𑀘 𑀢𑀺𑀢𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀮𑁄𑀓𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀦𑁆𑀢𑀺 𑀣𑁄𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀁 ‘‘𑀧𑀓𑀢𑀺𑀬𑀸𑀏𑀯 𑀳𑀺 𑀩𑀼𑀤𑁆𑀥𑀤𑀲𑁆𑀲𑀦𑁂 𑀧𑀼𑀡𑁆𑀡𑀘𑀦𑁆𑀤𑀲𑀫𑀼𑀤𑁆𑀤𑀭𑀸𑀚𑀤𑀲𑁆𑀲𑀦𑁂 𑀅𑀢𑀺𑀢𑁆𑀢𑁄 𑀮𑁄𑀓𑁄𑀢𑀺. 𑀓𑀣𑀁 𑀧𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑀤𑀲𑁆𑀲𑀦𑁂 𑀅𑀢𑀺𑀢𑁆𑀢𑁄 𑀳𑁄𑀢𑀻’’𑀢𑀺. 𑀩𑀼𑀤𑁆𑀥𑀲𑁆𑀲 𑀧𑀦 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀤𑀻𑀳𑀺 𑀲𑀻𑀮𑀸𑀤𑀺𑀅𑀲𑀸𑀥𑀸𑀭𑀡𑀕𑀼𑀡𑁂𑀳𑀺 𑀘 𑀅𑀥𑀺𑀓 𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀯𑀺𑀭𑁄𑀘𑀫𑀸𑀦𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀢𑀸𑀯𑀢𑀺𑀁𑀲𑁂 𑁋

‘‘𑀦 𑀓𑁄𑀘𑀺 𑀤𑁂𑀯𑁄 𑀯𑀡𑁆𑀡𑁂𑀦, 𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀭𑁄𑀘𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀥𑀺𑀕𑁆𑀕𑀬𑁆𑀳, 𑀲𑀫𑁆𑀩𑀼𑀤𑁆𑀥𑁄𑀯 𑀯𑀺𑀭𑁄𑀘𑀢𑀻’’𑀢𑀺.

𑀤𑀲𑀩𑀮𑀦𑁆𑀢𑀺 𑀅𑀜𑁆𑀜𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑁂𑀦 𑀤𑀲𑀓𑀸𑀬𑀩𑀮𑁂𑀦 𑀘 𑀤𑀲𑀜𑀸𑀡𑀩𑀮𑁂𑀦 𑀲𑀫𑁆𑀧𑀦𑁆𑀦𑀁. 𑀢𑀜𑁆𑀳𑀺 𑀓𑁂𑀳𑀺𑀘𑀺 𑀯𑀺𑀭𑀼𑀤𑁆𑀥𑁂𑀳𑀺 𑀓𑀸𑀭𑀡𑁂𑀳𑀺 𑀩𑀮𑀦𑁆𑀢𑀺 𑀦 𑀓𑀫𑁆𑀧𑁂𑀦𑁆𑀢𑀻𑀢𑀺 𑀩𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀩𑀮𑀦𑁆𑀢𑀺 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀩𑀮𑀁, 𑀓𑀸𑀬𑀩𑀮𑀁. 𑀩𑀮𑀥𑀸𑀢𑀼 𑀧𑀸𑀡𑁂 𑀅. 𑀩𑀮𑀦𑁆𑀢𑀺 𑀪𑀸𑀭𑀁 𑀯𑀳𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀯𑀸 𑀩𑀮𑀁, 𑀩𑀮𑀦𑁆𑀢𑀺 𑀚𑀸𑀦𑀦𑁆𑀢𑀺 𑀲𑀩𑁆𑀩𑀥𑀫𑁆𑀫𑀦𑁆𑀢𑀺 𑀩𑀮𑀁, 𑀜𑀸𑀡 𑀩𑀮𑀁. 𑀤𑀲𑀩𑀮𑀜𑁆𑀘 𑀤𑀲𑀩𑀮𑀜𑁆𑀘 𑀤𑀲𑀩𑀮𑀸𑀦𑀺 𑀏𑀓𑀲𑁂𑀲𑀦𑀬𑁂𑀦. 𑀢𑀸𑀦𑀺 𑀬𑀲𑁆𑀲 𑀲𑁄𑀢𑀺 𑀤𑀲𑀩𑀮𑁄, 𑀩𑀼𑀤𑁆𑀥𑁄. 𑀇𑀥 𑀧𑀦 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑁄𑀧𑀺 𑀯𑀺𑀲𑁂𑀲𑀝𑁆𑀞𑀸𑀦𑀺𑀬𑀢𑁆𑀢𑀸 𑀪𑀕𑀯𑀢𑁄 𑀤𑀲𑀓𑀸𑀬𑀩𑀮𑀸𑀦𑀺 𑀘, 𑀤𑀲𑀜𑀸𑀡𑀩𑀮𑀸𑀦𑀺 𑀘 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑁂𑀲𑀁 𑀧𑀦 𑀲𑀭𑀽 𑀧𑀢𑁆𑀣𑀁 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑁆𑀬𑀸𑀤𑀺 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀅𑀲𑀫𑀦𑁆𑀢𑀺 ¶ 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁. 𑀦𑀢𑁆𑀣𑀺 𑀲𑀫𑁄 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀏𑀢𑀲𑁆𑀲𑀸𑀢𑀺 𑀅𑀲𑀫𑁄, 𑀩𑀼𑀤𑁆𑀥𑁄. 𑀢𑀁 𑀅𑀲𑀫𑀁. 𑀢𑀦𑁆𑀢𑀺 𑀢𑀸𑀤𑀺𑀲𑀁 𑀕𑀼𑀡𑀲𑀫𑁆𑀧𑀦𑁆𑀦𑀁 𑀩𑀼𑀤𑁆𑀥𑀁. 𑀦𑀺𑀘𑁆𑀘𑀦𑁆𑀢𑀺 𑀲𑀢𑀢𑀁 𑀲𑀫𑀺𑀢𑀁 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀦𑀫𑀲𑁆𑀲𑀦𑁆𑀢𑀽𑀢𑀺 𑀅𑀪𑀺𑀯𑀦𑁆𑀤𑀦𑁆𑀢𑀽𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀮𑁄𑀓𑁂 𑀢𑀺𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸, 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀇𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀣𑀼𑀢𑀺𑀲𑀤𑁆𑀤𑁄 𑀯𑀸, 𑀅𑀢𑀺𑀤𑀼𑀮𑀪𑀢𑀭𑁄 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑀢𑀫𑁄, 𑀩𑀼𑀤𑁆𑀥𑀪𑀸𑀯𑁄 𑀩𑀼𑀤𑁆𑀥𑀲𑁆𑀲 𑀪𑀸𑀯𑁄, 𑀓𑀸 𑀓𑀣𑀸 𑀓𑀺𑀁𑀯𑀢𑁆𑀢𑀩𑁆𑀩𑁄 𑀏𑀯, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺 𑀖𑁄𑀲𑀲𑁆𑀲 𑀅𑀢𑀺𑀤𑀼𑀮𑁆𑀮𑀪𑀢𑀭𑀢𑁆𑀢𑀸, 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀦𑀸𑀦𑀧𑁆𑀧𑀓𑀸𑀭𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀳𑀺𑀢𑀲𑀼𑀔𑀁 𑀧𑀢𑁆𑀣𑀬𑀦𑁆𑀢𑀸 𑀬𑀸𑀘𑀦𑁆𑀢𑀸, 𑀲𑀸𑀥𑀯𑁄 𑀲𑀧𑁆𑀧𑀼𑀭𑀺𑀲𑀸 𑀇𑀝𑁆𑀞𑀁 𑀓𑀸𑀫𑀬𑀫𑀸𑀦𑀁, 𑀅𑀢𑁆𑀣𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀅𑀢𑁆𑀣𑀁, 𑀯𑀳𑀦𑁆𑀢𑀁 𑀥𑀸𑀭𑀓𑀁, 𑀲𑀼𑀭𑀦𑀭𑀫𑀳𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀺𑀢𑀁, 𑀦𑀺𑀩𑁆𑀪𑀬𑀁 𑀅𑀪𑀬𑀁 𑀅𑀲𑀦𑁆𑀢𑀸𑀲𑀁 𑀯𑀸, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀉𑀢𑁆𑀢𑀫𑀤𑀸𑀦𑀸𑀭𑀳𑀁, 𑀮𑁄𑀓𑀸𑀦𑀁 𑀲𑀢𑁆𑀢𑀮𑁄𑀓𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀁 𑀧𑀻𑀢𑀺𑀬𑀸 𑀯𑀟𑁆𑀠𑀸𑀧𑀦𑁂𑀦𑁆𑀢𑀁. 𑀤𑀲𑀩𑀮𑀁 𑀅𑀲𑀸𑀥𑀸𑀭𑀡𑁂𑀦 𑀤𑀲𑀓𑀸𑀬𑀜𑀸𑀡𑀩𑀮𑁂𑀦 𑀲𑀫𑁆𑀧𑀦𑁆𑀦𑀁, 𑀅𑀲𑀫𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁 𑀢𑀁 𑀢𑀸𑀤𑀺𑀲𑀁 𑀕𑀼𑀡𑀲𑀫𑁆𑀧𑀦𑁆𑀦𑀁 𑀩𑀼𑀤𑁆𑀥𑀁 𑀦𑀺𑀘𑁆𑀘𑀁 𑀲𑀢𑀢𑀁 𑀲𑀫𑀺𑀢𑀁 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀁, 𑀦𑀫𑀲𑁆𑀲𑀦𑁆𑀢𑀼 𑀅𑀪𑀺𑀯𑀦𑁆𑀤𑀦𑁆𑀢𑀽𑀢𑀺.

𑀙𑀩𑁆𑀩𑀻𑀲𑀢𑀺𑀫𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀼𑀜𑁆𑀜𑁂𑀦𑁂𑀢𑁂𑀦 𑀲𑁄𑀳𑀁 𑀦𑀺𑀧𑀼𑀡𑀫𑀢𑀺 𑀲𑀢𑁄 𑀲𑀫𑁆𑀧𑀭𑀸𑀬𑁂 𑀘 𑀢𑀺𑀢𑁆𑀢𑁄,

𑀤𑀓𑁆𑀔𑁄 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄 𑀅𑀯𑀺𑀓𑀮𑀯𑀻𑀭𑀺𑀬𑁄 𑀪𑁄𑀕𑀯𑀸 𑀲𑀁𑀯𑀺𑀪𑀸𑀕𑀻;

𑀢𑀺𑀓𑁆𑀔𑁄 ¶ 𑀲𑀽𑀭𑁄 𑀥𑀺𑀢𑀢𑁆𑀢𑁄 𑀲𑀧𑀭𑀳𑀺𑀢𑀥𑀭𑁄 𑀤𑀻𑀖𑀚𑀻𑀯𑀻 𑀅𑀭𑁄𑀕𑁄,

𑀥𑀜𑁆𑀜𑁄 𑀯𑀡𑁆𑀡𑁄 𑀬𑀲𑀲𑁆𑀲𑀻 𑀅𑀢𑀺𑀩𑀮𑀯𑀥𑀭𑁄 𑀓𑀺𑀢𑁆𑀢𑀺𑀫𑀸 𑀔𑀦𑁆𑀢𑀼𑀧𑁂𑀢𑁄.

𑀲𑀤𑁆𑀥𑁄 𑀤𑀸𑀢𑀗𑁆𑀕𑀼𑀧𑁂𑀢𑁄 𑀧𑀭𑀫𑀲𑀺𑀭𑀺𑀥𑀭𑁄 𑀤𑀺𑀝𑁆𑀞𑀥𑀫𑁆𑀫𑁂 𑀯𑀺𑀭𑀢𑁆𑀢𑁄,

𑀮𑀚𑁆𑀚𑀻 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀪𑀺𑀭𑀢𑀓𑀼𑀲𑀮𑁄 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄;

𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀓𑁄𑀥𑁄 𑀅𑀢𑀺𑀯𑀼𑀚𑀼𑀳𑀤𑀬𑁄 𑀇𑀤𑁆𑀥𑀺𑀫𑀸 𑀅𑀧𑁆𑀧𑀫𑁂𑀬𑁆𑀬𑁄,

𑀧𑀸𑀲𑀁𑀲𑁄 𑀧𑁂𑀫𑀯𑀸𑀘𑁄 𑀲𑀼𑀚𑀦𑀕𑀼𑀡𑀯𑀺𑀤𑀽 𑀫𑀸𑀫𑀓𑁄 𑀲𑁄 𑀪𑀯𑁂𑀬𑁆𑀬𑀁.

𑁨𑁭. 𑀏𑀯𑀁 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀖𑁄𑀲𑁄𑀢𑁆𑀬𑀸𑀤𑀺𑀕𑀸𑀣𑀸𑀬 𑀩𑀼𑀤𑁆𑀥𑀯𑀦𑁆𑀤𑀦𑁂 𑀉𑀬𑁆𑀬𑁄𑀚𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀼𑀕𑀢𑀦𑁆𑀢𑁆𑀬𑀸𑀤𑀻𑀳𑀺 𑀕𑀸𑀣𑀸𑀳𑀺 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑀺𑀥𑀺𑀁 𑀓𑀭𑁄𑀦𑁆𑀢𑁄 𑀆𑀳 𑀧𑀼𑀜𑁆𑀜𑁂𑀦𑁂𑀢𑁂𑀦 𑀲𑁄𑀳𑀦𑁆𑀢𑁆𑀬𑀸𑀤𑀺 𑀕𑀸𑀣𑀸𑀤𑁆𑀯𑀬𑀁. 𑀅𑀬𑀁 𑀧𑀦 𑀕𑀸𑀣𑀸𑀤𑁆𑀯𑀬𑀫𑁆𑀧𑀺 𑀲𑀤𑁆𑀥𑀭𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀲𑁄𑀅𑀳𑀁 𑀏𑀢𑁂𑀦 𑀧𑀼𑀜𑁆𑀜𑁂𑀦 𑀲𑀫𑁆𑀧𑀭𑀸𑀬𑁂 𑀦𑀺𑀧𑀼𑀡𑀫𑀢𑀺 𑀘 𑀲𑀢𑁄 𑀘…𑀧𑁂… 𑀔𑀦𑁆𑀢𑀼𑀧𑁂𑀢𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀳𑀦𑁆𑀢𑀺 𑀲𑁄 𑀅𑀳𑀁. 𑀩𑀼𑀤𑁆𑀥𑀲𑁆𑀲 𑀦𑀫𑀓𑁆𑀓𑀸𑀭𑁄 𑀲𑁄𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀼𑀜𑁆𑀜𑁂𑀦𑀸𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀯𑀦𑁆𑀤𑀦𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀯𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀧𑀼𑀥𑀸𑀢𑀼 𑀲𑁄𑀥𑀦𑁂 𑀡𑁆𑀬. 𑀧𑀼𑀜𑁆𑀜𑀦𑁆𑀢𑀺 𑀘 𑀇𑀥 𑀧𑀦 𑀩𑀼𑀤𑁆𑀥𑀧𑀡𑀸𑀫𑀓𑁆𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀯𑀦𑁆𑀤𑀦𑁂𑀬𑁆𑀬𑀯𑀦𑁆𑀤𑀓𑀸𑀦𑀁 𑀔𑁂𑀢𑁆𑀢𑀚𑁆𑀛𑀸𑀲𑀬𑀲𑀫𑁆𑀧𑀤𑀸𑀳𑀺 𑀤𑀺𑀝𑁆𑀞𑀥𑀫𑁆𑀫 𑀯𑁂𑀤𑀦𑀻𑀬𑀪𑀽𑀢𑀸 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀉𑀧𑀧𑀻𑀴𑀓𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀸𑀦𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀢𑀦𑁆𑀦𑀺𑀤𑀸𑀦𑀸𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀲𑀺𑀤𑁆𑀥𑀺𑀯𑀺𑀩𑀦𑁆𑀥𑀓𑀸𑀦𑀁 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀫𑀧𑁆𑀧𑀯𑀢𑁆𑀢𑀺𑀁𑀲𑀸𑀥𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀧𑀭𑀸𑀬𑁂 𑀘𑀸𑀢𑀺 𑀏𑀢𑁆𑀣 ¶ 𑀘𑀲𑀤𑁆𑀤𑁄 𑀅𑀝𑁆𑀞𑀸𑀦𑀬𑁄𑀕𑁄. 𑀲𑁄 𑀘 𑀦𑀺𑀧𑀼𑀡𑀫𑀢𑀺𑀢𑁆𑀬𑀸𑀤𑀻𑀲𑀼 𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀲𑀫𑁆𑀧𑀭𑀸𑀬𑁂𑀢𑀺 𑀧𑀭𑀮𑁄𑀓𑁂. 𑀲𑁄 𑀳𑀺 𑀲𑀫𑁆𑀧𑀭𑀸𑀬𑀺𑀢𑀩𑁆𑀩𑀸 𑀉𑀧𑀕𑀫𑀺𑀢𑀩𑁆𑀩𑀸 𑀏𑀢𑁆𑀣 𑀲𑀢𑁆𑀢𑁂𑀳𑀻𑀢𑀺 𑀘, 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀢𑁆𑀢𑁂𑀳𑀺 𑀲𑀫𑁆𑀧𑀭𑀸𑀬𑀺𑀢𑀩𑁆𑀩𑀸 𑀧𑀸𑀧𑀼𑀡𑀺𑀢𑀩𑁆𑀩𑀸𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀘 𑀲𑀫𑁆𑀧𑀭𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀧𑀭𑀺𑀧𑀼𑀩𑁆𑀩 𑀅𑀬𑀥𑀸𑀢𑀼 𑀳𑀺 𑀕𑀢𑀺𑀬𑀁 𑀡. 𑀅𑀣 𑀯𑀸 𑀓𑀫𑁆𑀫𑀯𑀲𑁂𑀦 𑀅𑀪𑀺𑀫𑀼𑀔𑁄 𑀲𑀫𑁆𑀧𑀭𑁂𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀧𑀭𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀧𑀼𑀩𑁆𑀩𑀧𑀭𑀥𑀸𑀢𑀼 𑀕𑀢𑀺𑀬𑀁 𑀡𑁆𑀬. 𑀇𑀢𑀺 𑀔𑁄 𑀆𑀦𑀦𑁆𑀤 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀘𑀼𑀭𑀸𑀤𑀺 𑀕𑀡𑀯𑀲𑁂𑀦 𑀧𑀭𑀲𑀤𑁆𑀤𑀁 𑀕𑀢𑀺𑀬𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀢𑀲𑁆𑀫𑀺𑀁 𑀲𑀫𑁆𑀧𑀭𑀸𑀬𑁂.

𑀦𑀺𑀧𑀼𑀡𑀫𑀢𑀻𑀢𑀺 𑀲𑀡𑁆𑀳𑀲𑀼𑀔𑀼𑀫𑀧𑀜𑁆𑀜𑀯𑀸 𑀘. 𑀲𑀡𑁆𑀳𑀲𑀼𑀔𑀼𑀫𑀁 𑀅𑀢𑁆𑀣𑀦𑁆𑀢𑀭𑀁 𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑁄 𑀘 𑀯𑀸. 𑀏𑀢𑁆𑀣 𑀘 𑀦𑀺𑀧𑀼𑀡𑀲𑀤𑁆𑀤𑁄 𑀲𑀡𑁆𑀳𑀲𑀼𑀔𑀼𑀫𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀳𑀺𑀢𑀸𑀳𑀺𑀢𑀁 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀢𑀺, 𑀧𑀜𑁆𑀜𑀸. 𑀫𑀦𑀥𑀸𑀢𑀼 𑀜𑀸𑀡𑁂𑀢𑀺. 𑀦𑀺𑀧𑀼𑀡𑀸 𑀲𑀡𑁆𑀳𑀸 𑀫𑀢𑀺 𑀧𑀜𑁆𑀜𑀸 𑀬𑀲𑁆𑀲 𑀫𑁂𑀢𑀺 𑀦𑀺𑀧𑀼𑀡𑀫𑀢𑀺. 𑀲𑀢𑁄𑀢𑀺 𑀲𑀢𑀺𑀫𑀸 𑀘. 𑀲𑀭𑀢𑀻𑀢𑀺 𑀲𑀢𑀺, 𑀲𑀭𑀥𑀸𑀢𑀼 𑀘𑀺𑀦𑁆𑀢𑀸𑀬𑀦𑁆𑀢𑀺. 𑀲𑀸 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀲𑀢𑁄. 𑀢𑀺𑀢𑁆𑀢𑁄𑀢𑀺 𑀢𑀧𑁆𑀧𑀦𑁄 𑀘. 𑀬𑀣𑀸𑀮𑀤𑁆𑀥𑀯𑀢𑁆𑀣𑀼𑀦𑀸 𑀲𑀦𑁆𑀢𑀼𑀝𑁆𑀞𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀺𑀲𑀦𑀁 𑀢𑀧𑁆𑀧𑀦𑀁 𑀢𑀺𑀢𑁆𑀢𑁄. 𑀢𑀺𑀲𑀥𑀸𑀢𑀼 𑀢𑀧𑁆𑀧𑀦𑁂 𑀢𑀧𑀘𑁆𑀘𑀬𑁄. 𑀲𑀓𑀸𑀭𑀲𑁆𑀲 𑀢𑁄𑀆𑀤𑁂𑀲𑁄. 𑀬𑀣𑀸𑀮𑀸𑀪 𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄 𑀲𑁄 𑀘𑀸𑀢𑀺 𑀢𑀺𑀯𑀺𑀥𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀓𑁆𑀔𑁄𑀢𑀺 𑀢𑀁 𑀢𑀁 𑀓𑀺𑀘𑁆𑀘𑁂 𑀙𑁂𑀓𑁄 𑀘 𑀓𑀼𑀲𑀮𑁄 𑀘 𑀯𑀸. 𑀲𑁄 𑀳𑀺 𑀓𑀼𑀲𑀮𑀓𑀫𑁆𑀫𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀓𑀺𑀘𑁆𑀘𑀸𑀓𑀺𑀘𑁆𑀘𑁂 𑀅𑀤𑀦𑁆𑀥𑀢𑀸𑀬 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀤𑀓𑁆𑀔𑁄. 𑀤𑀓𑁆𑀔𑀥𑀸𑀢𑀼 𑀲𑀻𑀖𑀢𑁆𑀣𑁂 𑀅. 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄𑀢𑀺 𑀤𑀺𑀝𑁆𑀞𑀺𑀉𑀚𑀼𑀧𑀜𑁆𑀜𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀉𑀚𑀼 𑀤𑀺𑀝𑁆𑀞𑀺𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀤𑀺𑀝𑁆𑀞𑀺𑀚𑁆𑀚𑀼 𑀧𑀜𑁆𑀜𑁄𑀢𑀺 𑀧𑀸𑀞𑁄. 𑀤𑀺𑀝𑁆𑀞𑀺𑀉𑀚𑀼𑀧𑀜𑁆𑀜𑁄𑀢𑀺 𑀧𑀤𑀘𑁆𑀙𑁂𑀤𑁄, 𑀲𑁄𑀬𑁂 𑀯𑀢𑁆𑀣𑁄 ¶ . 𑀉𑀚𑀽𑀢𑀺 𑀅𑀓𑀼𑀝𑀺𑀮𑀪𑀸𑀯𑁂𑀦 𑀪𑀯𑀢𑀻𑀢𑀺 𑀉𑀚𑀼, 𑀅𑀚𑁆𑀚𑀯𑁄. 𑀉𑀚𑀼𑀥𑀸𑀢𑀼 𑀅𑀚𑁆𑀚𑀯𑁂 𑀓𑁆𑀯𑀺. 𑀅𑀣 𑀯𑀸 𑀅𑀭𑀢𑀺 𑀅𑀓𑀼𑀝𑀺𑀮𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀉𑀚𑀼, 𑀅𑀯𑀗𑁆𑀓𑁄. 𑀅𑀭𑀥𑀸𑀢𑀼 𑀕𑀢𑀺𑀬𑀁 𑀚𑀼𑀧𑀘𑁆𑀘𑀬𑁄. 𑀅𑀭𑀺𑀲𑁆𑀲 𑀉𑀆𑀤𑁂𑀲𑁄. 𑀲𑀫𑁆𑀫𑀸 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺, 𑀫𑀢𑀺. 𑀤𑀺𑀲𑀥𑀸𑀢𑀼 𑀧𑀲𑁆𑀲𑀦𑁂 𑀢𑀧𑀘𑁆𑀘𑀬𑁄. 𑀢𑀲𑁆𑀲 𑀭𑀝𑁆𑀞𑀸𑀤𑁂𑀲𑁄. 𑀥𑀸𑀢𑁆𑀯𑀦𑁆𑀢𑀮𑁄𑀧𑁄 𑀘 𑀈 𑀘. 𑀉𑀚𑀼 𑀅𑀚𑁆𑀚𑀯𑀸 𑀤𑀺𑀝𑁆𑀞𑀺 𑀫𑀢𑀺 𑀤𑀺𑀝𑁆𑀞𑀼𑀚𑀼 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀯𑀲𑁂𑀦. 𑀧𑀓𑀸𑀭𑁂𑀦 𑀚𑀸𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀯𑀩𑀼𑀚𑁆𑀛𑀢𑀻𑀢𑀺 𑀧𑀜𑁆𑀜𑀸. 𑀧𑀧𑀼𑀩𑁆𑀩𑀜𑀸𑀥𑀸𑀢𑀼 𑀅𑀯𑀩𑁄𑀥𑀦𑁂 𑀅. 𑀉𑀚𑀼𑀤𑀺𑀝𑁆𑀞𑀺 𑀘 𑀉𑀚𑀼𑀧𑀜𑁆𑀜𑀸 𑀘 𑀬𑀲𑁆𑀲 𑀫𑁂𑀢𑀺 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄, 𑀧𑀼𑀕𑁆𑀕𑀮𑁄. 𑀅𑀯𑀺𑀓𑀮𑀯𑀻𑀭𑀺𑀬𑁄𑀢𑀺 𑀅𑀦𑀽𑀦𑀯𑀻𑀭𑀺𑀬𑁄 𑀘 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑁄 𑀘𑀸𑀢𑀺 𑀅𑀢𑁆𑀣𑁄. 𑀯𑀺𑀳𑀻𑀦𑀁 𑀓𑀭𑁄𑀢𑀻𑀢𑀺 𑀯𑀺𑀓𑀮𑁄. 𑀯𑀺𑀧𑀼𑀩𑁆𑀩𑀓𑀭𑀥𑀸𑀢𑀼 𑀓𑀭𑀡𑁂 𑀅. 𑀭𑀲𑁆𑀲𑀮𑁄. 𑀯𑀻𑀭𑀸𑀦𑀁 𑀓𑀫𑁆𑀫𑀁 𑀯𑀻𑀭𑀺𑀬𑀁. 𑀅𑀯𑀺𑀓𑀮𑀁 𑀅𑀦𑀽𑀦𑀁 𑀯𑀻𑀭𑀺𑀬𑀁 𑀅𑀲𑁆𑀲𑀫𑁂𑀢𑀺 𑀅𑀯𑀺𑀓𑀮𑀯𑀻𑀭𑀺𑀬𑁄. 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦𑁂𑀯 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀮𑀤𑁆𑀥𑀼𑀁, 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑁂𑀯 𑀲𑀓𑁆𑀓𑀸. 𑀢𑀲𑁆𑀫𑀸 𑀅𑀯𑀺𑀓𑀮𑀯𑀻𑀭𑀺𑀬𑁄𑀢𑀺 𑀧𑀢𑁆𑀣𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑁄𑀕𑀯𑀸𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀼𑀔𑁂𑀦 𑀲𑀫𑁆𑀧𑀦𑁆𑀦𑁄 𑀘. 𑀪𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀪𑁄𑀕𑁄, 𑀲𑀫𑁆𑀧𑀢𑁆𑀢𑀺. 𑀪𑀼𑀚𑀥𑀸𑀢𑀼 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼 𑀡. 𑀪𑁄𑀕𑁄 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀪𑁄𑀕𑀯𑀸. 𑀲𑀁𑀯𑀺𑀪𑀸𑀕𑀻𑀢𑀺 𑀲𑀁𑀯𑀺𑀪𑀚𑀦𑀲𑀻𑀮𑁄 𑀘 𑀲𑀁𑀯𑀺𑀪𑀚𑀦𑀲𑀫𑁆𑀧𑀦𑁆𑀦𑁄 𑀘 𑀯𑀸, 𑀲𑀁𑀯𑀺𑀪𑀚𑀢𑀺 𑀲𑀻𑀮𑁂𑀦𑀸𑀢𑀺 𑀲𑀁𑀯𑀺𑀪𑀸𑀕𑀻. 𑀲𑀁𑀯𑀺𑀪𑀚𑀦𑀲𑀻𑀮𑁄𑀢𑀺 𑀯𑀸 𑀲𑀁𑀯𑀺𑀪𑀸𑀕𑀻, 𑀲𑀁𑀯𑀺𑀪𑀚𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀸 𑀲𑀁𑀯𑀺𑀪𑀸𑀕𑀻. 𑀲𑀁𑀯𑀺𑀪𑀸𑀕𑁂 𑀲𑀻𑀮𑀫𑀲𑁆𑀲𑀸𑀢𑀺 𑀲𑀁𑀯𑀺𑀪𑀸𑀕𑀻. 𑀅𑀬𑀁 𑀢𑀲𑁆𑀲𑀻𑀮𑀢𑁆𑀣𑁄. 𑀲𑀁𑀯𑀺𑀪𑀚𑀢𑀺 𑀥𑀫𑁆𑀫𑁂𑀦𑀸𑀢𑀺 𑀲𑀁𑀯𑀺𑀪𑀚𑀦𑀥𑀫𑁆𑀫𑁄𑀢𑀺 𑀯𑀸. 𑀲𑀁𑀯𑀺𑀪𑀚𑀺𑀢𑀼𑀁 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀯𑀸, 𑀲𑀁𑀯𑀺𑀪𑀚𑀦𑁂 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀯𑀸 𑀲𑀁𑀯𑀺𑀪𑀸𑀕𑀻. 𑀅𑀬𑀁 𑀢𑀤𑁆𑀥𑀫𑁆𑀫𑀢𑁆𑀣𑁄. 𑀲𑀁𑀯𑀺𑀪𑀚𑀦𑀁 𑀲𑀸𑀥𑀼𑀓𑀸𑀭𑁄 𑀅𑀲𑁆𑀲 𑀅𑀢𑁆𑀣𑀺. 𑀲𑀸𑀥𑀼𑀓𑀸𑀭𑀺𑀦𑀸 𑀲𑀁𑀯𑀺𑀪𑀚𑀢𑀻𑀢𑀺 𑀯𑀸, 𑀲𑀁𑀯𑀺𑀪𑀚𑀺𑀢𑀼𑀁 𑀲𑀸𑀥𑀼𑀓𑀸𑀭𑀻𑀢𑀺 𑀯𑀸, 𑀲𑀁𑀯𑀺𑀪𑀚𑀦𑁂 𑀲𑀸𑀥𑀼𑀓𑀸𑀭𑀻𑀢𑀺 𑀯𑀸 𑀲𑀁𑀯𑀺𑀪𑀸𑀕𑀻. 𑀅𑀬𑀁 𑀢𑀲𑁆𑀲𑀸 𑀥𑀼𑀓𑀸𑀭𑀢𑁆𑀣𑁄. 𑀲𑀁𑀯𑀺𑀧𑀼𑀩𑁆𑀩 𑀪𑀚𑀥𑀸𑀢𑀼 𑀯𑀺𑀪𑀸𑀕𑁂 𑀡. 𑀚𑀲𑁆𑀲 𑀕𑁄. 𑀅𑀣 𑀯𑀸 𑀲𑀁𑀯𑀺𑀪𑀚𑀦𑀁 𑀲𑀁𑀯𑀺𑀪𑀸𑀕𑁄. 𑀲𑁄 𑀫𑁂 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀁𑀯𑀺𑀪𑀸𑀕𑀻 ¶ . 𑀅𑀲𑁆𑀲𑀣𑁆𑀬𑀢𑁆𑀣𑁂 𑀈. 𑀧𑀭𑁂𑀲𑀁 𑀬𑀸𑀘𑀓𑀸𑀦𑀁 𑀅𑀦𑁆𑀦𑀸𑀤𑀺𑀤𑀸𑀦𑀯𑀢𑁆𑀣𑀼𑀁 𑀦𑀺𑀘𑁆𑀘𑀁 𑀧𑀭𑀺𑀘𑁆𑀘𑀚𑀦𑀓𑀸𑀭𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀓𑁆𑀔𑁄𑀢𑀺 𑀢𑀺𑀓𑁆𑀔𑀧𑁆𑀧𑀜𑁆𑀜𑀯𑀸 𑀘 𑀦𑀺𑀲𑀸𑀦𑀧𑀜𑁆𑀜𑀯𑀸 𑀯𑀸. 𑀢𑀺𑀚𑀦𑀁 𑀦𑀺𑀲𑀦𑀁 𑀢𑀺𑀓𑁆𑀔𑀸, 𑀧𑀜𑁆𑀜𑀸. 𑀢𑀺𑀚𑀥𑀸𑀢𑀼 𑀦𑀺𑀲𑀸𑀦𑁂 𑀔. 𑀚𑀲𑁆𑀲 𑀓𑁄. 𑀢𑀺𑀓𑁆𑀔𑀸 𑀧𑀜𑁆𑀜𑀸 𑀫𑁂 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀺𑀓𑁆𑀔𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡𑁄. 𑀢𑀺𑀓𑁆𑀔 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀬 𑀘 𑀲𑀩𑁆𑀩 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑁂𑀝𑁆𑀞𑀢𑁆𑀢𑀸 𑀫𑀽𑀮𑀓𑀸𑀭𑀡𑀢𑁆𑀢𑀸 𑀘 𑀢𑀺𑀓𑁆𑀔𑁄𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑁋

‘‘𑀧𑀜𑁆𑀜𑀸 𑀧𑀲𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀓𑀢𑀸 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸;

𑀧𑀜𑁆𑀜𑀸𑀬 𑀯𑀺𑀫𑀢𑀺𑀁 𑀳𑀦𑁆𑀢𑁆𑀯𑀸, 𑀲𑀦𑁆𑀢𑀺𑀁 𑀧𑀧𑁆𑀧𑁄𑀢𑀺 𑀧𑀡𑁆𑀟𑀺𑀢𑁄’’𑀢𑀺.

𑀲𑀽𑀭𑁄𑀢𑀺 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀘 𑀯𑀻𑀭𑁄 𑀘. 𑀲𑀢𑁆𑀢𑀺𑀯𑀦𑁆𑀢𑁄 𑀦𑀺𑀩𑁆𑀪𑀬𑁄𑀢𑀺 𑀅𑀢𑁆𑀣𑁄. 𑀲𑀽𑀭𑀬𑀢𑁂 𑀯𑀺𑀭𑀬𑀢𑁂 𑀲𑀽𑀭𑁄. 𑀪𑀸𑀯𑀲𑀸𑀥𑀦𑁄𑀬𑀁. 𑀲𑀽𑀭𑀥𑀸𑀢𑀼 𑀯𑀺𑀓𑁆𑀓𑀦𑁆𑀢𑀺𑀬𑀁 𑀯𑀻𑀭𑁂 𑀯𑀸 𑀅. 𑀅𑀣 𑀯𑀸 𑀅𑀪𑀺𑀭𑀼𑀅𑀙𑀫𑁆𑀪𑀺𑀅𑀦𑀼𑀢𑁆𑀭𑀸𑀲𑀪𑀸𑀯𑁂𑀦 𑀲𑀽𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀽𑀭𑁄. 𑀲𑀽𑀭𑀥𑀸𑀢𑀼 𑀕𑀢𑀺𑀬𑀁 𑀅. 𑀲𑀻𑀳𑁄 𑀯𑀺𑀬 𑀧𑀭𑀺𑀲𑀫𑀚𑁆𑀛𑁂 𑀲𑀽𑀭𑀯𑀻𑀭𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀺 𑀓𑁂𑀳𑀺 𑀧𑀦 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀲𑀽𑀭𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁 𑀦 𑀤𑀲𑁆𑀲𑀺𑀢𑀁. 𑀓𑁂𑀯𑀮𑀁 𑀧𑀦 𑀲𑀽𑀭𑁄𑀢𑀺 𑀯𑀺𑀲𑀺𑀝𑁆𑀞𑀲𑀽𑀭𑁄𑀢𑀺 𑀅𑀢𑁆𑀣𑀯𑀺𑀯𑀭𑀡𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁. 𑀥𑀺𑀢𑀢𑁆𑀢𑁄𑀢𑀺 𑀏𑀢𑁆𑀣 𑀥𑀺𑀢 𑀅𑀢𑁆𑀢𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀥𑀺𑀢𑁄𑀢𑀺 𑀲𑀫𑀸𑀥𑀺. 𑀅𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁. 𑀏𑀓𑀕𑁆𑀕𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀺 𑀢𑀺𑀝𑁆𑀞𑀢𑀺 𑀏𑀓𑀸𑀭𑀫𑁆𑀫𑀡𑁂𑀳𑀺 𑀥𑀺𑀢𑁄, 𑀏𑀓𑀸𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀥𑀸𑀭𑁂𑀢𑀻𑀢𑀺 𑀯𑀸 𑀥𑀺𑀢𑁄, 𑀲𑀫𑀸𑀥𑀺. 𑀥𑀸𑀥𑀸𑀢𑀼 𑀥𑀸𑀭𑀡𑁂 𑀢. 𑀆𑀭𑀫𑁆𑀫𑀡𑀁 𑀅𑀭𑀢𑀺 𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀁, 𑀘𑀺𑀢𑁆𑀢𑀁. 𑀅𑀭𑀥𑀸𑀢𑀼 𑀕𑀢𑀺𑀬𑀁 𑀢. 𑀭𑀲𑁆𑀲 𑀢𑁄. 𑀥𑀺𑀢𑁄 𑀲𑀫𑀸𑀥𑀺 𑀅𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑁆𑀲 𑀫𑁂𑀢𑀺 𑀥𑀺𑀢𑀢𑁆𑀢𑁄.

𑀲𑀧𑀭𑀳𑀺𑀢𑀘𑀭𑁄𑀢𑀺 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀘𑀭𑁄, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀅𑀢𑁆𑀣𑀁 𑀧𑀝𑀺𑀧𑀦𑁆𑀦𑀓𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀳𑀺𑀢𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀘𑀭𑀢𑀺 𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑀧𑀭𑀳𑀺𑀢𑀘𑀭𑁄 ¶ . 𑀲𑀧𑀭𑀳𑀺𑀢𑀲𑀤𑁆𑀤𑀽𑀧𑀧𑀤 𑀘𑀭𑀥𑀸𑀢𑀼 𑀘𑀭𑀡𑁂 𑀅. 𑀤𑀻𑀖𑀚𑀻𑀯𑀻𑀢𑀺 𑀤𑀻𑀖𑀸𑀬𑀼𑀓𑁄 𑀘. 𑀤𑀻𑀖𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀫𑁆𑀧𑀦𑁆𑀦𑁄 𑀯𑀸. 𑀤𑀻𑀖𑁄 𑀚𑀻𑀯𑁄 𑀚𑀻𑀯𑀺𑀢𑀁 𑀅𑀲𑁆𑀲 𑀫𑁂𑀢𑀺 𑀤𑀻𑀖𑀚𑀻𑀯𑀺. 𑀆𑀬𑀼𑀓𑀧𑁆𑀧𑀫𑁆𑀧𑀺 𑀤𑀻𑀖𑀚𑀻𑀯𑀺𑀢𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀭𑁄𑀕𑁄𑀢𑀺 𑀭𑁄𑀕𑀯𑀺𑀭𑀳𑁄 𑀘 𑀆𑀭𑁄𑀕𑁆𑀬𑀁 𑀯𑀸. 𑀭𑀼𑀚𑁆𑀚𑀢𑀺 𑀪𑀜𑁆𑀚𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀻𑀢𑀺 𑀭𑁄𑀕𑁄, 𑀩𑁆𑀬𑀸𑀥𑀺. 𑀭𑀼𑀚𑀥𑀸𑀢𑀼 𑀪𑀗𑁆𑀕𑁂 𑀡. 𑀅𑀣 𑀯𑀸 𑀭𑀼𑀚𑁆𑀚𑀢𑀺 𑀳𑀺𑀁𑀲𑀢𑀻𑀢𑀺 𑀭𑁄𑀕𑁄. 𑀭𑀼𑀚𑀥𑀸𑀢𑀼 𑀳𑀺𑀁𑀲𑀸𑀬𑀁 𑀡. 𑀦𑀢𑁆𑀣𑀺 𑀭𑁄𑀕𑁄 𑀢𑀲𑁆𑀲 𑀫𑁂𑀢𑀺 𑀅𑀭𑁄𑀕𑁄, 𑀙𑀦𑁆𑀦𑀯𑀼𑀢𑀺𑀭𑁄𑀕𑀸𑀦𑀁 𑀅𑀪𑀸𑀯𑁄 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀥𑀜𑁆𑀜𑁄𑀢𑀺 𑀲𑀺𑀭𑀻𑀧𑀼𑀜𑁆𑀜𑀧𑀜𑁆𑀜𑀸𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀘. 𑀥𑀜𑁆𑀜𑀲𑀤𑁆𑀤𑁄 𑀳𑀺 𑀲𑀺𑀭𑀻𑀧𑀼𑀜𑁆𑀜𑀧𑀜𑁆𑀜𑀸𑀮𑀓𑁆𑀔𑀡𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 ‘‘𑀥𑀜𑁆𑀜𑀁 𑀫𑀗𑁆𑀕𑀮 𑀲𑀫𑁆𑀫𑀢’’𑀦𑁆𑀢𑀺 𑀘. 𑀢𑁂𑀫𑀺𑀬𑀚𑀸𑀢𑀓𑁂 ‘‘𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀻’’𑀢𑀺 𑀘. 𑀇𑀤𑀁 𑀧𑀦 𑀦𑀺𑀩𑁆𑀩𑀘𑀦𑀁. 𑀥𑀦𑀦𑀁 𑀲𑀫𑁆𑀧𑀚𑁆𑀚𑀦𑀁 𑀥𑀜𑁆𑀜𑀁, 𑀲𑀺𑀭𑀻𑀧𑀜𑁆𑀜𑀸𑀧𑀼𑀜𑁆𑀜𑀮𑀓𑁆𑀔𑀡𑀸𑀦𑀁 𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀥𑀦𑀥𑀸𑀢𑀼 𑀲𑀫𑁆𑀧𑀦𑁆𑀦𑁂. 𑀥𑀸𑀢𑀽𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀡𑁆𑀬𑀧𑀘𑁆𑀘𑀬𑁄. 𑀡𑀓𑀸𑀭𑀸𑀦𑀼𑀩𑀦𑁆𑀥𑁂 𑀮𑁄𑀧𑁂 𑀓𑀢𑁂 𑀬𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀓𑀸𑀭𑀲𑁆𑀲 𑀜𑀓𑀸𑀭𑀁 𑀓𑀢𑁆𑀯𑀸 𑀥𑀜𑁆𑀜𑀦𑁆𑀢𑀺 𑀭𑀽𑀧𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀥𑀦𑀁 𑀲𑀺𑀭𑀻𑀧𑀜𑁆𑀜𑀸 𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀤𑀁 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀥𑀜𑁆𑀜𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡𑁆𑀬𑁄.

𑀯𑀡𑁆𑀡𑁄𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘. 𑀏𑀢𑁆𑀣 𑀘 𑀯𑀡𑁆𑀡𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀲𑀭𑀻𑀭𑀯𑀡𑁆𑀡𑀕𑀼𑀡𑀯𑀡𑁆𑀡𑀯𑀲𑁂𑀦. 𑀢𑀢𑁆𑀣 𑀲𑀭𑀻𑀭 𑀯𑀡𑁆𑀡𑁄 𑀦𑀸𑀫 𑀭𑀽𑀧𑀓𑀸𑀬𑀲𑁆𑀲 𑀧𑀸𑀲𑀸𑀤𑀺𑀓𑀭𑀽𑀧𑀲𑀫𑁆𑀧𑀦𑁆𑀦𑀢𑀸. 𑀕𑀼𑀡 𑀯𑀡𑁆𑀡𑁄 𑀦𑀸𑀫 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑁂𑀦 𑀘 𑀥𑀼𑀢𑀗𑁆𑀕𑀸𑀤𑀺𑀧𑀝𑀺𑀧𑀤𑀸𑀕𑀼𑀡𑁂𑀦 𑀘 𑀲𑀫𑁆𑀧𑀦𑁆𑀦𑀢𑀸. 𑀇𑀤𑀁 𑀧𑀦 𑀦𑀺𑀩𑁆𑀩𑀘𑀦𑀁. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀫𑀸𑀧𑀦𑁆𑀦𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀲𑀭𑀻𑀭𑀭𑀽𑀧𑀁. 𑀯𑀡𑁆𑀡𑁂𑀢𑀺 𑀅𑀢𑁆𑀢𑀦𑁄 𑀤𑀩𑁆𑀩𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀕𑀼𑀡𑁄. 𑀯𑀡𑁆𑀡𑀥𑀸𑀢𑀼 𑀧𑀓𑀸𑀲𑀦𑁂 𑀅. 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀯𑀡𑁆𑀡𑀁 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀯𑀡𑁆𑀡𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀅. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀓𑀺𑀢𑁆𑀢𑀺𑀯𑀦𑁆𑀢𑁄 𑀯𑀸. 𑀏𑀢𑁆𑀣 𑀘 ¶ 𑀤𑀼𑀯𑀺𑀥𑁄 𑀳𑁄𑀢𑀺 𑀬𑀲𑁄 𑀧𑀭𑀺𑀯𑀸𑀭𑀓𑀺𑀢𑁆𑀢𑀺𑀬𑀲𑀯𑀲𑁂𑀦. 𑀢𑀢𑁆𑀣 𑀬𑀚𑀺𑀬𑀢𑀺 𑀧𑀽𑀚𑀺𑀬𑀢𑀺 𑀏𑀢𑁂𑀦 𑀧𑀭𑀺𑀯𑀸𑀭𑁂𑀦𑀸𑀢𑀺 𑀬𑀲𑁄, 𑀧𑀭𑀺𑀯𑀸𑀭𑁄. 𑀬𑀚𑀥𑀸𑀢𑀼 𑀧𑀽𑀚𑀸𑀬𑀁 𑀅. 𑀚𑀲𑁆𑀲 𑀲𑁄. 𑀅𑀣 𑀯𑀸 𑀬𑀸𑀢𑀺 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀓𑀲𑁆𑀲 𑀧𑀭𑀺𑀯𑀸𑀭𑀦𑁆𑀢𑀺 𑀬𑀲𑁄, 𑀧𑀭𑀺𑀯𑀸𑀭𑁄. 𑀬𑀸𑀥𑀸𑀢𑀼 𑀕𑀢𑀺𑀬𑀁 𑀲𑁄𑀧𑀘𑁆𑀘𑀬𑁄. 𑀬𑀚𑀺𑀬𑀢𑀺 𑀧𑀽𑀚𑀺𑀬𑀢𑀺 𑀏𑀢𑁂𑀦𑀸𑀢𑀺 𑀬𑀲𑁄, 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀬𑀚𑀥𑀸𑀢𑀼 𑀤𑁂𑀯𑀧𑀽𑀚𑀸𑀲𑀗𑁆𑀕𑀳𑀓𑀭𑀡𑀤𑀸𑀦𑀥𑀫𑁆𑀫𑁂𑀲𑀼 𑀅. 𑀚𑀲𑁆𑀲 𑀲𑁄. 𑀅𑀣 𑀯𑀸 𑀬𑀸𑀢𑀺 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺 𑀲𑀩𑁆𑀩𑀢𑁆𑀣 𑀩𑁆𑀬𑀸𑀧𑀦𑀦𑁆𑀢𑀺 𑀬𑀲𑁄, 𑀓𑀺𑀢𑁆𑀢𑀺𑀖𑁄𑀲𑁄 𑀣𑀼𑀢𑀺𑀲𑀤𑁆𑀤𑁄 𑀯𑀸. 𑀬𑀸𑀥𑀸𑀢𑀼 𑀕𑀢𑀺𑀬𑀁 𑀲𑁄𑀧𑀘𑁆𑀘𑀬𑁄. 𑀬𑀲𑁄 𑀘 𑀬𑀲𑁄 𑀘 𑀬𑀲𑁄 𑀏𑀓𑀲𑁂𑀲𑀦𑀬𑁂𑀦. 𑀲𑁄 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀻, 𑀅𑀲𑁆𑀲𑀣𑁆𑀬𑀢𑁆𑀣𑁂 𑀲𑀻𑀧𑀘𑁆𑀘𑀬𑁄.

𑀅𑀢𑀺𑀩𑀮𑀯𑀥𑀭𑁄𑀢𑀺 𑀅𑀢𑀺𑀩𑀮𑀯𑀦𑁆𑀢𑀥𑀸𑀭𑀓𑁄 𑀘 𑀅𑀢𑀺𑀯𑀺𑀬 𑀓𑀸𑀬𑀩𑀮𑀜𑀸𑀡𑀩𑀮𑀯𑀦𑁆𑀢𑀁 𑀥𑀸𑀭𑁂𑀢𑀻𑀢𑀺 𑀅𑀢𑀺𑀩𑀮𑀯𑀥𑀭𑁄. 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀤𑀬𑁄 𑀯𑀺𑀬 𑀧𑀜𑁆𑀘𑀳𑀢𑁆𑀣𑀺 𑀤𑀲𑀳𑀢𑁆𑀣𑀺𑀩𑀮𑀲𑁆𑀲 𑀥𑀸𑀭𑀡𑀲𑀫𑀢𑁆𑀣𑁄 𑀘, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 𑀯𑀺𑀬 𑀜𑀸𑀡𑀩𑀮𑀲𑁆𑀲 𑀥𑀸𑀭𑀡𑀲𑀫𑀢𑁆𑀣𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀢𑁆𑀢𑀺𑀫𑀸𑀢𑀺 𑀓𑀺𑀢𑁆𑀢𑀺𑀖𑁄𑀲𑀯𑀦𑁆𑀢𑁄 𑀘. 𑀓𑀺𑀢𑁆𑀢𑀺𑀬𑀢𑁂 𑀓𑀣𑀺𑀬𑀢𑁂 𑀕𑀼𑀡𑀦𑁆𑀢𑀺 𑀓𑀺𑀢𑁆𑀢𑀺, 𑀣𑀼𑀢𑀺𑀖𑁄𑀲𑁄. 𑀓𑀺𑀢𑁆𑀢𑀥𑀸𑀢𑀼 𑀲𑀤𑁆𑀤𑁂 𑀇. 𑀓𑀺𑀢𑁆𑀢𑀺𑀖𑁄𑀲𑁄 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀓𑀺𑀢𑁆𑀢𑀺𑀫𑀸. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀫𑀦𑁆𑀢𑀼𑀧𑀘𑁆𑀘𑀬𑁄. 𑀔𑀦𑁆𑀢𑀼𑀧𑁂𑀢𑁄𑀢𑀺 𑀔𑀦𑁆𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘. 𑀔𑀫𑀦𑀁 𑀲𑀳𑀦𑀁 𑀔𑀦𑁆𑀢𑀺. 𑀔𑀫𑀼𑀥𑀸𑀢𑀼 𑀲𑀳𑀦𑁂 𑀢𑀧𑀘𑁆𑀘𑀬𑁄. 𑀢𑀲𑁆𑀲𑀦𑁆𑀢𑀺 𑀢𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀔𑀦𑁆𑀢𑀼𑀧𑁂𑀢𑁄. 𑀔𑀦𑁆𑀢𑀺𑀯𑀸𑀤𑀢𑀸𑀧𑀲𑁄 𑀯𑀺𑀬 𑀔𑀦𑁆𑀢𑀼𑀧𑁂𑀢𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀔𑀦𑁆𑀢𑀺𑀬𑀸 𑀳𑀺 𑀤𑀼𑀓𑁆𑀓𑀭𑀢𑁆𑀢𑀸 𑀲𑀩𑁆𑀩𑀓𑀼𑀲𑀮 𑀥𑀫𑁆𑀫𑀸𑀦𑀁 𑀧𑀥𑀸𑀦𑀢𑁆𑀢𑀸 𑀲𑁂𑀝𑁆𑀞𑀢𑀧𑀢𑁆𑀢𑀸 𑀘 𑀔𑀦𑁆𑀢𑀼𑀧𑁂𑀢𑁄𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸’’𑀢𑀺 𑀘. ‘‘𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻’’𑀢𑀺 𑀘. ‘‘𑀔𑀦𑁆𑀢𑀻𑀩𑀮𑀁 𑀩𑀮𑀸𑀦𑀻𑀓’’𑀦𑁆𑀢𑀺 𑀘.

‘‘𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀦𑀁 ¶ , 𑀔𑀦𑁆𑀢𑀺𑀧𑁆𑀧𑀥𑀸𑀦𑀓𑀸𑀭𑀡𑀁;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀔𑀦𑁆𑀢𑁆𑀬𑀸𑀬𑀢𑁆𑀢𑀸𑀯 𑀯𑀟𑁆𑀠𑀭𑁂’’𑀢𑀺 𑀘.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑁄𑀳𑀁 𑀲𑁄 𑀅𑀳𑀁, 𑀏𑀢𑁂𑀦 𑀧𑀼𑀜𑁆𑀜𑁂𑀦 𑀇𑀫𑀺𑀦𑀸 𑀩𑀼𑀤𑁆𑀥𑀯𑀦𑁆𑀤𑀦𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀫𑁆𑀧𑀭𑀸𑀬𑁂 𑀧𑀭𑀮𑁄𑀓𑁂, 𑀦𑀺𑀧𑀼𑀡𑀫𑀢𑀺 𑀘 𑀲𑀡𑁆𑀳𑀲𑀼𑀔𑀼𑀫𑀧𑀜𑁆𑀜𑀯𑀸 𑀘, 𑀲𑀢𑁄 𑀲𑀢𑀺𑀫𑀸 𑀘 𑀢𑀺𑀢𑁆𑀢𑁄 𑀢𑀧𑁆𑀧𑀦𑁄 𑀬𑀣𑀸𑀮𑀤𑁆𑀥𑀯𑀢𑁆𑀣𑀼𑀦𑀸 𑀲𑀦𑁆𑀢𑀼𑀝𑁆𑀞𑁄 𑀘, 𑀤𑀓𑁆𑀔𑁄 𑀢𑀁𑀢𑀁𑀓𑀺𑀘𑁆𑀘𑁂 𑀙𑁂𑀓𑁄 𑀘, 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄 𑀉𑀚𑀼𑀤𑀺𑀝𑁆𑀞𑀺 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑁄 𑀘 𑀅𑀯𑀻𑀓𑀮𑀯𑀻𑀭𑀺𑀬𑁄 𑀅𑀦𑀽𑀦𑀯𑀻𑀭𑀺𑀬𑁄 𑀘 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑁄 𑀯𑀸, 𑀪𑁄𑀕𑀯𑀸𑀪𑀼𑀜𑁆𑀚𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀼𑀔𑁂𑀦 𑀲𑀫𑁆𑀧𑀦𑁆𑀦𑁄 𑀘 𑀲𑀁𑀯𑀺𑀪𑀸𑀕𑀻 𑀲𑀁𑀯𑀺𑀪𑀚𑀦𑀲𑀻𑀮𑁄 𑀘 𑀢𑀺𑀓𑁆𑀔𑁄 𑀢𑀺𑀓𑁆𑀔𑀧𑀜𑁆𑀜𑀯𑀸 𑀘, 𑀲𑀽𑀭𑁄𑀢𑀺 𑀲𑀢𑁆𑀢𑀺𑀯𑀦𑁆𑀢𑁄 𑀦𑀺𑀩𑁆𑀪𑀬𑁄 𑀘, 𑀥𑀺𑀢𑀢𑁆𑀢𑁄 𑀲𑀫𑀸𑀳𑀺𑀢 𑀘𑀺𑀢𑁆𑀢𑁄 𑀘 𑀏𑀓𑀕𑁆𑀕𑀘𑀺𑀢𑁆𑀢𑁄 𑀯𑀸, 𑀲𑀧𑀭𑀳𑀺𑀢𑀘𑀭𑁄 𑀅𑀢𑁆𑀢𑀳𑀺𑀢 𑀧𑀭𑀳𑀺𑀢𑀧𑀝𑀺𑀧𑀦𑁆𑀦𑀓𑁄 𑀘 𑀤𑀻𑀖𑀚𑀻𑀯𑀻 𑀤𑀻𑀖𑀸𑀬𑀼𑀓𑁄 𑀘 𑀅𑀭𑁄𑀕𑁄 𑀭𑁄𑀕𑀯𑀺𑀭𑀳𑁄 𑀘 𑀥𑀜𑁆𑀜𑁄 𑀲𑀺𑀭𑀻𑀧𑀼𑀜𑁆𑀜𑀧𑀜𑁆𑀜𑀸𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀘 𑀯𑀡𑁆𑀡𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀬𑀲𑀲𑁆𑀲𑀻 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀘 𑀅𑀢𑀺𑀩𑀮𑀯𑀥𑀭𑁄 𑀅𑀢𑀺𑀩𑀮𑀯𑀦𑁆𑀢𑀥𑀸𑀭𑀓𑁄 𑀘 𑀓𑀺𑀢𑁆𑀢𑀺𑀫𑀸 𑀓𑀺𑀢𑁆𑀢𑀺 𑀖𑁄𑀲𑀯𑀦𑁆𑀢𑁄 𑀘 𑀔𑀦𑁆𑀢𑀼𑀧𑁂𑀢𑁄 𑀔𑀦𑁆𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺.

𑀲𑀢𑁆𑀢𑀯𑀻𑀲𑀢𑀺𑀫𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁮. 𑀏𑀯𑀁 𑀧𑀼𑀜𑁆𑀜𑁂𑀦𑁂𑀢𑁂𑀦𑀢𑁆𑀬𑀸𑀤𑀺𑀕𑀸𑀣𑀸𑀬 𑀲𑀫𑁆𑀧𑀭𑀸𑀬𑁂 𑀧𑀡𑀺𑀥𑀺𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑁂 𑀧𑀢𑁆𑀣𑀦𑀁 𑀓𑀢𑁆𑀢𑀼𑀓𑀸𑀫𑁄 𑀲𑀤𑁆𑀥𑁄 𑀤𑀸𑀢𑀗𑁆𑀕𑀼𑀧𑁂𑀢𑁄 𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀤𑁆𑀥𑁄𑀢𑀺 𑀓𑀫𑁆𑀫𑀸𑀤𑀺 𑀲𑀤𑁆𑀤𑀳𑀦𑀮𑀓𑁆𑀔𑀡𑀸𑀬 𑀲𑀤𑁆𑀥𑀸𑀬 𑀲𑀫𑁆𑀧𑀦𑁆𑀦𑁄 𑀘. 𑀲𑀤𑁆𑀤𑀳𑀦𑀁 𑀲𑀤𑁆𑀥𑀸, 𑀲𑀤𑁆𑀤𑀳𑀢𑀻𑀢𑀺 𑀯𑀸 𑀲𑀤𑁆𑀥𑀸. 𑀲𑀤𑁆𑀤𑀳𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀢𑀸𑀬𑀸𑀢𑀺 𑀲𑀤𑁆𑀥𑀸. 𑀲𑀁𑀧𑀼𑀩𑁆𑀩𑀥𑀸𑀥𑀸𑀢𑀼 𑀥𑀸𑀭𑀡𑁂 𑀢. 𑀲𑀸 𑀧𑀦 𑀓𑀫𑁆𑀫𑀸𑀤𑀻𑀲𑀼 𑀲𑀤𑁆𑀤𑀳𑀦𑀮𑀓𑁆𑀔𑀡𑀸. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸. 𑀧𑀲𑀸𑀤𑀭𑀲𑀸. 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬. 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸. 𑀑𑀖𑀼𑀢𑁆𑀢𑀭𑀡𑁄 𑀯𑀺𑀬 ¶ . 𑀅𑀓𑀸𑀮𑀼𑀲𑁆𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸 𑀯𑀸. 𑀲𑀸 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀪𑀕𑀯𑀢𑀸 𑀳𑀺 𑀲𑀸 𑀲𑀤𑁆𑀥𑀸 ‘‘𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄’’𑀢𑀺 𑀘. ‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 𑀘. ‘‘𑀲𑀤𑁆𑀥𑀸𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺 𑀘 ‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖’’𑀦𑁆𑀢𑀺 𑀘 ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀁, 𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻’’𑀢𑀺 𑀘, ‘‘𑀲𑀤𑁆𑀥𑁂𑀲𑀺𑀓𑁄 𑀪𑀺𑀓𑁆𑀔𑀯𑁂 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀘, ‘‘𑀲𑀤𑁆𑀥𑀸𑀥𑀦’’𑀦𑁆𑀢𑀺 𑀘.

‘‘𑀬𑁂𑀲𑀁 𑀅𑀢𑁆𑀣𑀺 𑀲𑀤𑁆𑀥𑀸 𑀩𑀼𑀤𑁆𑀥𑁂, 𑀥𑀫𑁆𑀫𑁂 𑀘 𑀲𑀗𑁆𑀖𑀭𑀢𑀦𑁂;

𑀢𑁂 𑀫𑀁 𑀅𑀢𑀺𑀯𑀺𑀭𑁄𑀘𑀦𑁆𑀢𑀺, 𑀆𑀬𑀼𑀦𑀸 𑀬𑀲𑀲𑀸 𑀲𑀺𑀭𑀺𑀬𑀸’’𑀢𑀺.

𑀘. ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺 𑀘. ‘‘𑀤𑀼𑀮𑁆𑀮𑀪𑀸 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀻’’𑀢𑀺 𑀘 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀲𑀤𑁆𑀥𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀺.

𑀲𑀸 𑀘 𑀧𑀦 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑀆𑀕𑀫𑀲𑀤𑁆𑀥𑀸, 𑀅𑀥𑀺𑀕𑀫𑀲𑀤𑁆𑀥𑀸, 𑀑𑀓𑀧𑁆𑀧𑀦𑀲𑀤𑁆𑀥𑀸, 𑀧𑀲𑀸𑀤𑀲𑀤𑁆𑀥𑀸 𑀘𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀪𑀺𑀦𑀻𑀳𑀸𑀭𑀢𑁄 𑀆𑀕𑀢𑀢𑁆𑀢𑀸 𑀆𑀕𑀫𑀲𑀤𑁆𑀥𑀸 𑀦𑀸𑀫. 𑀅𑀭𑀺𑀬𑀲𑀸𑀯𑀓𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀥𑀺𑀕𑀫𑀲𑀤𑁆𑀥𑀸 𑀦𑀸𑀫. 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑁂 𑀅𑀘𑀮𑀪𑀸𑀯𑁂𑀦 𑀑𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀲𑀤𑁆𑀥𑀸 𑀦𑀸𑀫. 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀸 𑀧𑀲𑀸𑀤𑀲𑀤𑁆𑀥𑀸 𑀦𑀸𑀫. 𑀇𑀥 𑀧𑀦 𑀧𑀡𑀺𑀥𑀸𑀦𑀝𑁆𑀞𑀸𑀦𑀢𑁆𑀢𑀸 𑀲𑀩𑁆𑀩𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀤𑁆𑀥𑀸 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀲𑀤𑁆𑀥𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡.

𑀤𑀸𑀢𑀗𑁆𑀕𑀼𑀧𑁂𑀢𑁄𑀢𑀺 𑀤𑀸𑀢𑀲𑁆𑀲 𑀅𑀗𑁆𑀕𑀸𑀬 𑀓𑀸𑀭𑀡𑀪𑀽𑀢𑀸𑀬 𑀥𑀦𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘. 𑀤𑀸𑀢𑀩𑁆𑀩𑀯𑀢𑁆𑀣𑀼 𑀘, 𑀢𑀧𑁆𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁄 𑀘, 𑀲𑀤𑁆𑀥𑀸 𑀘𑀸𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘 𑀯𑀸. 𑀤𑀺𑀬𑀢𑁂 𑀤𑀸𑀢𑀁. 𑀪𑀸𑀯𑀲𑀸𑀥𑀦𑁄𑀬𑀁. 𑀤𑀸𑀥𑀸𑀢𑀼 𑀤𑀸𑀦𑁂 𑀅. 𑀅𑀗𑁆𑀕𑀻𑀬𑀢𑀺 ¶ 𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀅𑀗𑁆𑀕𑁄, 𑀥𑀦𑀲𑀫𑁆𑀧𑀢𑁆𑀢𑀺. 𑀤𑀸𑀢𑀲𑁆𑀲 𑀅𑀗𑁆𑀕𑁄 𑀤𑀸𑀢𑀗𑁆𑀕𑁄, 𑀢𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀤𑀸𑀢𑀗𑁆𑀕𑀼𑀧𑁂𑀢𑁄, 𑀅𑀣 𑀯𑀸 𑀤𑀺𑀬𑀢𑀻𑀢𑀺 𑀤𑀸𑀢𑀁, 𑀤𑀸𑀦𑀯𑀢𑁆𑀣𑀼. 𑀤𑀸𑀢𑀲𑁆𑀲 𑀅𑀗𑁆𑀕𑁄 𑀤𑀸𑀢𑀗𑁆𑀕𑁄, 𑀢𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀤𑀸𑀢𑀗𑁆𑀕𑀼𑀧𑁂𑀢𑁄, 𑀤𑀸𑀢𑀩𑁆𑀩𑀯𑀢𑁆𑀣𑀼 𑀘, 𑀢𑀧𑁆𑀧𑀝𑀺𑀕𑁆𑀕𑀸𑀳𑀓 𑀧𑀼𑀕𑁆𑀕𑀮𑁄 𑀘, 𑀲𑀤𑁆𑀥𑀸 𑀘𑀸𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀚𑁆𑀚𑀸𑀫𑀻𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀇𑀢𑀺𑀯𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀲𑀤𑁆𑀥𑀸 𑀤𑁂𑀬𑁆𑀬𑀥𑀫𑁆𑀫𑁄 𑀧𑀝𑀺𑀕𑁆𑀕𑀸𑀳𑀓𑁄 𑀘𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀫𑀼𑀔𑀻𑀪𑀽𑀢𑀓𑀸𑀮𑁂𑀬𑁂𑀯 𑀳𑀺 𑀤𑀸𑀦𑀁 𑀲𑀫𑁆𑀪𑀯𑀢𑀻’’𑀢𑀺.

𑀧𑀭𑀫𑀲𑀺𑀭𑀺𑀥𑀭𑁄𑀢𑀺 𑀉𑀢𑁆𑀢𑀫𑀲𑀺𑀭𑀻𑀥𑀸𑀭𑀓𑁄 𑀘. 𑀉𑀢𑁆𑀢𑀫𑀲𑀺𑀭𑀺𑀁 𑀥𑀸𑀭𑀡𑀲𑀫𑀢𑁆𑀣𑁄 𑀘 𑀯𑀸. 𑀏𑀢𑁆𑀣 𑀘 𑀲𑀺𑀭𑀻𑀢𑀺 𑀧𑀜𑁆𑀜𑀸𑀧𑀼𑀜𑁆𑀜𑀲𑀭𑀻𑀭𑀲𑁄𑀪𑀕𑁆𑀕𑀲𑀫𑁆𑀧𑀢𑁆𑀢𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀢𑀧𑀼𑀜𑁆𑀜𑁂𑀳𑀺 𑀲𑁂𑀯𑀺𑀬𑀢𑀻𑀢𑀺 𑀲𑀺𑀭𑀻, 𑀓𑀢𑀧𑀼𑀜𑁆𑀜𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑀺 𑀦𑀺𑀲𑁆𑀲𑀬𑀢𑀻𑀢𑀺 𑀯𑀸 𑀲𑀺𑀭𑀻, 𑀧𑀜𑁆𑀜𑀸𑀧𑀼𑀜𑁆𑀜𑀲𑀭𑀻𑀭𑀲𑁄𑀪𑀕𑁆𑀕𑀲𑀫𑁆𑀧𑀢𑁆𑀢𑀺 𑀮𑀩𑁆𑀪𑀢𑀺. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀇𑀭𑁄 𑀈 𑀘. 𑀧𑀭𑀫𑀸 𑀉𑀢𑁆𑀢𑀫𑀸 𑀲𑀺𑀭𑀻 𑀧𑀭𑀫𑀲𑀺𑀭𑀻, 𑀢𑀁 𑀥𑀸𑀭𑁂𑀢𑀻𑀢𑀺 𑀧𑀭𑀫𑀲𑀺𑀭𑀻𑀥𑀭𑁄, 𑀧𑀭𑀫𑀲𑀺𑀭𑀺𑀬𑀸 𑀥𑀸𑀭𑀡𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄.

𑀤𑀺𑀝𑁆𑀞𑀥𑀫𑁆𑀫𑁂𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁂 𑀅𑀢𑁆𑀢𑀪𑀸𑀯𑁂. 𑀏𑀢𑁆𑀣 𑀘 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀤𑀺𑀝𑁆𑀞𑁄, 𑀅𑀢𑁆𑀢𑀪𑀸𑀯𑁄. 𑀤𑀺𑀝𑁆𑀞𑁄 𑀧𑀲𑁆𑀲𑀺𑀢𑀩𑁆𑀩𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀤𑀺𑀝𑁆𑀞𑀥𑀫𑁆𑀫𑁂. 𑀯𑀺𑀭𑀢𑁆𑀢𑁄𑀢𑀺 𑀓𑀸𑀫𑀕𑀼𑀡𑁂𑀲𑀼 𑀯𑀺𑀕𑀢𑀭𑀢𑁆𑀢𑁄 𑀘, 𑀭𑀚𑁆𑀚𑀦𑀁 𑀭𑀢𑁆𑀢𑁄. 𑀭𑀦𑁆𑀚𑀥𑀸𑀢𑀼 𑀭𑀸𑀕𑁂. 𑀯𑀺𑀕𑀢𑁄 𑀭𑀢𑁆𑀢𑁄 𑀅𑀲𑁆𑀲 𑀫𑁂𑀢𑀺 𑀯𑀺𑀭𑀢𑁆𑀢𑁄. 𑀮𑀚𑁆𑀚𑀻𑀢𑀺 𑀧𑀸𑀧𑀳𑀺𑀭𑀺𑀯𑀦𑁆𑀢𑁄 𑀘, 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑁆𑀧𑀦𑁆𑀦𑁄 𑀘 𑀯𑀸. 𑀅𑀣 𑀯𑀸 𑀮𑀚𑁆𑀚𑀻𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀘. 𑀮𑀚𑁆𑀚𑀻𑀲𑀤𑁆𑀤𑁂𑀦 𑀳𑀺 𑀮𑀓𑁆𑀔𑀡𑀸𑀳𑀸𑀭𑀦𑀬𑁂𑀦 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀓𑀲𑁆𑀫𑀸, 𑀓𑀼𑀲𑀮 𑀮𑀓𑁆𑀔𑀡𑀲𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀧𑀸𑀴𑀺𑀬𑀁 𑁋

‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁄, 𑀲𑁄𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸’’𑀢𑀺.

𑀮𑀚𑁆𑀚𑀢𑀻𑀢𑀺 ¶ 𑀮𑀚𑁆𑀚𑀸, 𑀳𑀺𑀭𑀺. 𑀮𑀚𑁆𑀚𑀥𑀸𑀢𑀼 𑀳𑀺𑀭𑀺𑀬𑀁. 𑀮𑀚𑁆𑀚𑀸 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀮𑀚𑁆𑀚𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑀦𑁆𑀦𑀸𑀕𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀲𑀼𑀦𑁆𑀤𑀭𑀫𑀺𑀢𑁆𑀢 𑀲𑀫𑁆𑀧𑀦𑁆𑀦𑁄 𑀘. 𑀓𑀮𑁆𑀬𑀸𑀡𑀲𑀤𑁆𑀤𑁄 𑀳𑀺 𑀲𑀼𑀦𑁆𑀤𑀭𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦 𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀓𑀮𑁆𑀬𑀁 𑀳𑀺𑀢𑀁 𑀅𑀡𑀬𑀢𑀺 𑀧𑀸𑀧𑀬𑀢𑀻𑀢𑀺 𑀓𑀮𑁆𑀬𑀸𑀡𑁄, 𑀲𑀼𑀫𑀺𑀢𑁆𑀢𑁄. 𑀓𑀮𑁆𑀬𑀲𑀤𑁆𑀤𑀽𑀧𑀧𑀤𑀅𑀡𑀥𑀸𑀢𑀼 𑀕𑀢𑀺𑀬𑀁 𑀡. 𑀫𑀺𑀚𑁆𑀚𑀢𑀺 𑀲𑀺𑀦𑁂𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀫𑀺𑀚𑁆𑀚𑀺𑀬𑀢𑀺 𑀲𑀺𑀦𑁂𑀳𑀺𑀬𑀢𑀻𑀢𑀺 𑀯𑀸 𑀫𑀺𑀢𑁆𑀢𑁄, 𑀫𑀺𑀤𑀥𑀸𑀢𑀼 𑀲𑀺𑀦𑁂𑀳𑁂 𑀢. 𑀓𑀮𑁆𑀬𑀸𑀡𑁄 𑀫𑀺𑀢𑁆𑀢𑁄 𑀅𑀲𑁆𑀲 𑀫𑁂𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀳𑀺𑀢𑀥𑀭𑀲𑀼𑀫𑀺𑀢𑁆𑀢𑀲𑀫𑁆𑀧𑀦𑁆𑀦𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀯𑀻𑀭𑀺𑀬𑀲𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀧𑀦 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑁂 𑁋

‘‘𑀉𑀧𑀓𑀸𑀭𑁄 𑀘 𑀬𑁄 𑀫𑀺𑀢𑁆𑀢𑁄, 𑀲𑀼𑀔𑀤𑀼𑀓𑁆𑀔𑁂 𑀘 𑀬𑁄 𑀲𑀔𑀸;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑁄 𑀫𑀺𑀢𑁆𑀢𑁄, 𑀬𑁄 𑀘 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀓𑁄;

𑀏𑀢𑁂𑀧𑀺 𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑁄, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄; 𑀲𑀓𑁆𑀓𑀘𑁆𑀘𑀁

𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲’’𑀦𑁆𑀢𑀺 𑀯𑀼𑀢𑁆𑀢𑁄.

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄. 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀸𑀝𑁆𑀞𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀏𑀯𑀭𑀽𑀧𑀲𑁆𑀲 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀸𑀫𑀻𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀭𑀢𑀓𑀼𑀲𑀮𑁄𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀪𑀺𑀭𑀫𑀡𑁄 𑀘. 𑀓𑀼𑀘𑁆𑀙𑀺𑀢𑀁 𑀅𑀧𑀸𑀬𑀤𑁆𑀯𑀸𑀭𑀁 𑀲𑀮𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀧𑀺𑀤𑀳𑀦𑁆𑀢𑀺 𑀲𑀸𑀥𑀯𑁄 𑀏𑀢𑁂𑀦𑀸𑀢𑀺 𑀓𑀼𑀲𑀮𑀁, 𑀤𑀸𑀦𑀸𑀤𑀺𑀧𑀼𑀜𑁆𑀜𑀥𑀫𑁆𑀫𑀸. 𑀓𑀼𑀧𑀼𑀩𑁆𑀩 𑀲𑀮𑀥𑀸𑀢𑀼 𑀲𑀁𑀯𑀭𑀡𑁂 𑀅. 𑀢𑁂𑀲𑀼 𑀅𑀪𑀺𑀅𑀢𑀺𑀭𑁂𑀓𑀁 𑀭𑀫𑀢𑀻𑀢𑀺 𑀅𑀪𑀺𑀭𑀢𑀓𑀼𑀲𑀮𑁄 ¶ , 𑀓𑀺𑀢𑀦𑁆𑀢𑀲𑀫𑀸𑀲𑁄𑀬𑀁. 𑀓𑀼𑀲𑀮𑀸𑀪𑀺𑀭𑀢𑁄𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀤𑀯𑀺𑀧𑀭𑀺𑀬𑀸𑀬𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀣 𑀯𑀸 𑀅𑀪𑀺𑀅𑀢𑀺𑀭𑁂𑀓𑀁 𑀭𑀫𑀦𑀁 𑀅𑀪𑀺𑀭𑀢𑁄, 𑀓𑀼𑀲𑀮𑁂𑀲𑀼 𑀅𑀪𑀺𑀭𑀢𑁄 𑀬𑀲𑁆𑀲 𑀫𑁂𑀢𑀺 𑀅𑀪𑀺𑀭𑀢𑀓𑀼𑀲𑀮𑁄, 𑀦𑀺𑀘𑁆𑀘𑀁 𑀓𑀼𑀲𑀮𑀧𑀼𑀜𑁆𑀜𑀲𑁆𑀲 𑀓𑀭𑀡𑁂 𑀅𑀪𑀺𑀭𑀢𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄𑀢𑀺 𑀧𑀜𑁆𑀘𑀲𑀻𑀮𑀸𑀤𑀻𑀦𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀘. 𑀏𑀢𑁆𑀣 𑀘 𑀆𑀤𑀺𑀲𑀤𑁆𑀤𑁂𑀦 𑀕𑀺𑀳𑀻𑀦𑀁 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀲𑀻𑀮𑀁, 𑀲𑀸𑀫𑀡𑁂𑀭𑀸𑀦𑀁 𑀤𑀲𑀗𑁆𑀕𑀲𑀻𑀮𑀜𑁆𑀘, 𑀪𑀺𑀓𑁆𑀔𑀽𑀦𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀜𑁆𑀘𑀲𑀻𑀮𑀁 𑀆𑀤𑀺 𑀬𑁂𑀲𑀁 𑀢𑁂𑀢𑀺 𑀧𑀜𑁆𑀘𑀲𑀻𑀮𑀸𑀤𑀺, 𑀢𑀁 𑀭𑀓𑁆𑀔𑀢𑀺 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁂𑀢𑀻𑀢𑀺 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄. 𑀕𑀳𑀝𑁆𑀞𑀸𑀦𑀁 𑀦𑀺𑀘𑁆𑀘𑀲𑀻𑀮𑀯𑀲𑁂𑀦 𑀧𑀜𑁆𑀘𑀲𑀻𑀮𑀁 𑀲𑀢𑀺 𑀉𑀲𑁆𑀲𑀸𑀳𑀲𑀫𑀢𑁆𑀣𑁂 𑀉𑀧𑁄𑀲𑀣𑀗𑁆𑀕𑀯𑀲𑁂𑀦 𑀅𑀝𑁆𑀞𑀗𑁆𑀕𑀲𑀻𑀮𑀁 𑀤𑀲𑀗𑁆𑀕𑀲𑀻𑀮𑀜𑁆𑀘 𑀅𑀔𑀡𑁆𑀟𑀁 𑀅𑀘𑁆𑀙𑀺𑀤𑁆𑀤𑀁 𑀅𑀲𑀩𑀮𑀁 𑀅𑀓𑀫𑁆𑀫𑀸𑀲𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀁 𑀲𑀸𑀫𑀡𑁂𑀭𑀲𑀻𑀮𑀯𑀲𑁂𑀦 𑀤𑀲𑀲𑀻𑀮𑀜𑁆𑀘, 𑀪𑀺𑀓𑁆𑀔𑀼𑀲𑀻𑀮𑀯𑀲𑁂𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀘 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀘𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑀸 𑀳𑀺 ‘‘𑀲𑀻𑀮𑀯𑀺𑀧𑀢𑁆𑀢𑀺𑀳𑁂𑀢𑀼 𑀯𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀘. ‘‘𑀲𑀻𑀮𑀲𑀫𑁆𑀧𑀤𑀸𑀳𑁂𑀢𑀼 𑀯𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀘. ‘‘𑀲𑀻𑀮𑀲𑀫𑁆𑀧𑀦𑁆𑀦𑁄 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀘𑀢𑀼𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀘. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺, 𑀲𑀻𑀮𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀺, 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀻’’𑀢𑀺 𑀘. ‘‘𑀲𑀻𑀮 𑀲𑀫𑁆𑀧𑀢𑁆𑀢𑀺𑀜𑁆𑀳𑀺 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀻’’𑀢𑀺 𑀘. ‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀯𑀺𑀲𑁄𑀥𑁂𑀬𑁆𑀬𑀸’’𑀢𑀺 𑀘. ‘‘𑀲𑀢𑁆𑀢𑀸 𑀲𑀻𑀮𑁂𑀦 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 𑀘. ‘‘𑀲𑀻𑀮𑀁 𑀲𑀸𑀲𑀦𑀲𑁆𑀲 𑀆𑀤𑀻’’𑀢𑀺 𑀘. ‘‘𑀲𑀢𑁆𑀢𑀲𑀼 𑀯𑀺𑀲𑀼𑀤𑁆𑀥𑀻𑀲𑀼 ¶ 𑀲𑀻𑀮𑀯𑀺𑀲𑀼𑀤𑁆𑀥𑀺 𑀲𑀭𑀻𑀭𑀁 𑀦𑀸𑀫𑀸’’𑀢𑀺 𑀘. ‘‘𑀲𑀻𑀮𑀁 𑀦𑀸𑀫𑁂𑀢𑀁 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀺𑀘𑁆𑀙𑁄𑀢𑀺 𑀅𑀦𑀺𑀘𑁆𑀙𑁄 𑀘, 𑀭𑀽𑀧𑀸𑀤𑀺𑀓𑀸𑀫𑀕𑀼𑀡𑁂𑀲𑀼 𑀅𑀦𑀺𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀪𑀸𑀯𑀢𑁆𑀣𑁄𑀳𑁂𑀢𑁆𑀣 𑀅𑀧𑁆𑀧𑀲𑀤𑁆𑀤𑁄. 𑀅𑀧𑁆𑀧𑀟𑀁𑀲𑀫𑀓𑀲𑀯𑀸 𑀢𑀸𑀢𑀧𑀸𑀢𑀺𑀆𑀤𑀻𑀲𑀼 𑀯𑀺𑀬 𑀇𑀘𑁆𑀙𑀦𑀁 𑀇𑀘𑁆𑀙𑀸, 𑀭𑀽𑀧𑀸𑀤𑀺𑀓𑀸𑀫𑀕𑀼𑀡𑀁 𑀇𑀘𑁆𑀙𑀢𑀻𑀢𑀺 𑀯𑀸 𑀇𑀘𑁆𑀙𑀸, 𑀓𑀸𑀫𑀢𑀡𑁆𑀳𑀸. 𑀇𑀲𑀼𑀥𑀸𑀢𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼 𑀅. 𑀥𑀸𑀢𑁆𑀯𑀦𑁆𑀢𑀲𑁆𑀲𑀘𑁆𑀙𑁄. 𑀦𑀢𑁆𑀣𑀺 𑀇𑀘𑁆𑀙𑀸 𑀬𑀲𑁆𑀲 𑀫𑁂𑀢𑀺 𑀅𑀧𑁆𑀧𑀺𑀘𑁆𑀙𑁄, 𑀭𑀽𑀧𑀸𑀤𑀻𑀲𑀼 𑀓𑀸𑀫𑁂𑀲𑀼 𑀅𑀦𑀺𑀘𑁆𑀙𑀦𑁆𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀺𑀘𑁆𑀙𑁄 𑀧𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄, 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄, 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄, 𑀧𑀝𑀺𑀯𑁂𑀥𑀅𑀧𑁆𑀧𑀺𑀘𑁆𑀙𑁄 𑀘𑀸𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄. 𑀬𑁄 𑀧𑀦 𑀧𑀘𑁆𑀘𑀬𑁂 𑀩𑀳𑀼𑀁 𑀤𑁂𑀦𑁆𑀢𑁂 𑀅𑀧𑁆𑀧𑀁 𑀕𑀡𑁆𑀳𑀢𑀺, 𑀅𑀧𑁆𑀧𑀁 𑀤𑁂𑀦𑁆𑀢𑁂 𑀅𑀧𑁆𑀧𑀢𑀭𑀁 𑀯𑀸 𑀕𑀡𑁆𑀳𑀢𑀺 𑀦 𑀯𑀸 𑀕𑀡𑁆𑀳𑀢𑀺. 𑀦 𑀅𑀦𑀯𑀲𑁂𑀲𑀕𑀸𑀳𑀻 𑀳𑁄𑀢𑀺. 𑀅𑀬𑀁 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀬𑁄 𑀧𑀦 𑀢𑁂𑀧𑀺𑀝𑀓𑁄𑀧𑀺 𑀲𑀫𑀸𑀦𑁄 𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀧𑀦 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀪𑀸𑀯𑀁 𑀅𑀜𑁆𑀜𑁂𑀲𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺, 𑀅𑀬𑀁 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀇𑀫𑁂𑀳𑀺 𑀅𑀧𑁆𑀧𑀺𑀘𑁆𑀙𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀘 𑀅𑀳𑀁 𑀪𑀯𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀓𑁄𑀥𑁄𑀢𑀺 𑀤𑀼𑀲𑁆𑀲𑀦𑀮𑀓𑁆𑀔𑀡𑀤𑁄𑀲𑀢𑁄 𑀯𑀺𑀭𑀳𑀺𑀢𑁄 𑀘. 𑀲𑁄 𑀳𑀺 𑀓𑀼𑀚𑁆𑀛𑀢𑀻𑀢𑀺 𑀓𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀓𑁄𑀥𑁄 𑀅𑀲𑁆𑀲 𑀫𑁂𑀢𑀺 𑀅𑀧𑁆𑀧𑀓𑁄𑀥𑁄.

𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀓𑁄𑀥𑁄 𑀲𑀳𑀢𑁂 𑀦𑀭𑀦𑁆𑀢𑀺.

𑀯𑀼𑀢𑁆𑀢𑀤𑁂𑀲𑀦𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀧𑁆𑀧𑀓𑁄𑀥𑁄𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀢𑀺𑀯𑀼𑀚𑀼𑀳𑀤𑀬𑁄𑀢𑀺 ¶ 𑀅𑀢𑀺𑀏𑀯 𑀉𑀚𑀼𑀘𑀺𑀢𑁆𑀢𑀲𑀫𑀦𑁆𑀦𑀸𑀕𑀢𑁄 𑀘. 𑀅𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀅𑀓𑀼𑀝𑀺𑀮𑀪𑀸𑀯𑁂𑀦𑀸𑀢𑀺 𑀉𑀚𑀼, 𑀅𑀚𑁆𑀚𑀯𑀁. 𑀅𑀭𑀥𑀸𑀢𑀼 𑀕𑀢𑀺𑀬𑀁 𑀚𑀼. 𑀅𑀭𑀺𑀲𑁆𑀲 𑀉. 𑀆𑀭𑀫𑁆𑀫𑀡𑀁 𑀳𑀭𑀢𑀻𑀢𑀺 𑀳𑀤𑀬𑀁, 𑀘𑀺𑀢𑁆𑀢𑀁. 𑀳𑀭𑀥𑀸𑀢𑀼 𑀳𑀭𑀡𑁂 𑀅𑀬. 𑀭𑀲𑁆𑀲 𑀤𑁄. 𑀅𑀣 𑀯𑀸 𑀆𑀭𑀫𑁆𑀫𑀡𑀁 𑀳𑀭𑀦𑁆𑀢𑀁 𑀅𑀬𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑀤𑀬𑀁, 𑀘𑀺𑀢𑁆𑀢𑀁. 𑀳𑀭𑀲𑀤𑁆𑀤𑀽𑀧𑀧𑀤 𑀅𑀬𑀥𑀸𑀢𑀼 𑀕𑀢𑀺𑀬𑀁 𑀅. 𑀉𑀚𑀼 𑀘 𑀢𑀁 𑀳𑀤𑀬𑀜𑁆𑀘𑀸𑀢𑀺 𑀉𑀚𑀼𑀳𑀤𑀬𑀁. 𑀅𑀢𑀺𑀏𑀯 𑀉𑀚𑀼 𑀳𑀤𑀬𑀁 𑀅𑀲𑁆𑀲 𑀫𑁂𑀢𑀺 𑀅𑀢𑀺𑀯𑀼𑀚𑀼𑀳𑀤𑀬𑁄. 𑀕𑁄𑀫𑀼𑀢𑁆𑀢𑀯𑀗𑁆𑀓𑁄 𑀘 𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑁄 𑀘 𑀦𑀗𑁆𑀕𑀮𑀓𑁄𑀝𑀺 𑀯𑀗𑁆𑀓𑁄 𑀘𑀸𑀢𑀺 𑀢𑀻𑀳𑀺 𑀯𑀗𑁆𑀓𑁂𑀳𑀺 𑀯𑀺𑀕𑀢𑁄 𑀳𑀼𑀢𑁆𑀯𑀸 𑀅𑀢𑀺𑀯𑀺𑀬 𑀉𑀚𑀼𑀘𑀺𑀢𑁆𑀢𑀲𑀫𑀦𑁆𑀦𑀸𑀕𑀢𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘 𑀬𑁄 𑀧𑀸𑀧𑀁 𑀓𑀢𑁆𑀯𑀸𑀯 𑀦 𑀓𑀭𑁄𑀫𑀻𑀢𑀺 𑀪𑀸𑀲𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀧𑀘𑁆𑀘𑁄𑀲𑀓𑁆𑀓𑀦𑀢𑀸𑀬 𑀕𑁄𑀫𑀼𑀢𑁆𑀢𑀯𑀗𑁆𑀓𑁄 𑀦𑀸𑀫. 𑀬𑁄 𑀧𑀸𑀧𑀁 𑀓𑀭𑁄𑀦𑁆𑀢𑁄𑀯 𑀪𑀸𑀬𑀸𑀫𑀳𑀁 𑀧𑀸𑀧𑀲𑁆𑀲𑀸𑀢𑀺 𑀪𑀸𑀲𑀢𑀺. 𑀲𑁄 𑀬𑁂𑀪𑀼𑀬𑁆𑀬𑁂𑀦 𑀓𑀼𑀝𑀺𑀮𑀢𑀸𑀬 𑀘𑀦𑁆𑀤𑀮𑁂𑀔𑀸 𑀯𑀗𑁆𑀓𑁄 𑀦𑀸𑀫. 𑀬𑁄 𑀧𑀸𑀧𑀁 𑀓𑀭𑁄𑀦𑁆𑀢𑁄𑀯 𑀓𑁄 𑀧𑀸𑀧𑀲𑁆𑀲 𑀦 𑀪𑀸𑀬𑁂𑀬𑁆𑀬𑀸𑀢𑀺 𑀪𑀸𑀲𑀢𑀺, 𑀲𑁄 𑀦𑀸𑀢𑀺𑀓𑀼𑀝𑀺𑀮𑀢𑀸𑀬 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀯𑀸 𑀢𑀻𑀡𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀅𑀲𑀼𑀤𑁆𑀥𑀸𑀦𑀺. 𑀲𑁄 𑀕𑁄𑀫𑀼𑀢𑁆𑀢𑀯𑀗𑁆𑀓𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀬𑀸𑀦𑀺 𑀓𑀸𑀦𑀺𑀘𑀺 𑀤𑁆𑀯𑁂. 𑀲𑁄 𑀘𑀦𑁆𑀤𑀮𑁂𑀔𑀸 𑀯𑀗𑁆𑀓𑁄 𑀦𑀸𑀫. 𑀬𑀲𑁆𑀲 𑀬𑀁𑀓𑀺𑀜𑁆𑀘𑀺 𑀏𑀓𑀁. 𑀲𑁄 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑁆𑀥𑀺𑀫𑀸𑀢𑀺 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀘, 𑀇𑀤𑁆𑀥𑀺𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀇𑀤𑁆𑀥𑀺 𑀅𑀲𑁆𑀲 𑀫𑁂 𑀅𑀢𑁆𑀣𑀻𑀢𑀺 𑀇𑀤𑁆𑀥𑀺𑀫𑀸. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀫𑀦𑁆𑀢𑀼𑀧𑀘𑁆𑀘𑀬𑁄. 𑀫𑀸𑀦𑀼𑀲𑁆𑀲𑀺𑀓𑀸𑀮𑁂 𑀫𑀦𑀼𑀲𑁆𑀲𑀺𑀤𑁆𑀥𑀺𑀬𑀸 𑀤𑁂𑀯𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀤𑁂𑀯𑀺𑀤𑁆𑀥𑀺𑀬𑀸 𑀲𑀫𑀡𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀲𑀫𑀡𑀺𑀤𑁆𑀥𑀺𑀬𑀸 𑀘 𑀲𑀫𑁆𑀧𑀼𑀡𑁆𑀡𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀅𑀧𑁆𑀧𑀫𑁂𑀢𑀩𑁆𑀩𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀘. 𑀧𑀫𑁂𑀢𑀩𑁆𑀩𑁄𑀢𑀺 𑀧𑀫𑁂𑀬𑁆𑀬𑁄. 𑀧𑀧𑀼𑀩𑁆𑀩𑀫𑀸𑀥𑀸𑀢𑀼 𑀧𑀫𑀸𑀡𑁂 𑀡𑁆𑀬. 𑀦 𑀧𑀫𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀲𑀻𑀮𑀸𑀤𑀺𑀕𑀼𑀡𑁄 𑀫𑁂 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀧𑁆𑀧𑀫𑁂𑀬𑁆𑀬𑁄. 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡. 𑀅𑀧𑁆𑀧𑀫𑁂𑀬𑁆𑀬𑁂𑀳𑀺 ¶ 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘 𑀪𑁄𑀕𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀫𑁆𑀧𑀚𑁆𑀚𑀸𑀫𑀻𑀢𑀺 𑀧𑀢𑁆𑀣𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀸𑀲𑀁𑀲𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀲𑀁𑀲𑀸𑀭𑀳𑁄 𑀘, 𑀧𑀲𑀁𑀲𑀺𑀬𑀢𑁂 𑀣𑀯𑀺𑀬𑀢𑁂 𑀧𑀲𑀁𑀲𑁄. 𑀪𑀸𑀯 𑀲𑀸𑀥𑀦𑁄𑀬𑀁. 𑀧𑀧𑀼𑀩𑁆𑀩𑀲𑀁𑀲𑀥𑀸𑀢𑀼 𑀣𑀼𑀢𑀺𑀬𑀁, 𑀢𑀁 𑀅𑀭𑀳𑀢𑀻𑀢𑀺 𑀧𑀸𑀲𑀁𑀲𑁄. 𑀅𑀭𑀳𑀢𑀺𑀢𑀤𑁆𑀥𑀺𑀢𑁂 𑀡. 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀲𑀁𑀲𑀺 𑀢𑀩𑁆𑀩𑁂𑀳𑀺 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑁂𑀫𑀯𑀸𑀘𑁄𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑁂𑀫𑀺𑀢𑀩𑁆𑀩𑀯𑀸𑀘𑀸𑀬 𑀲𑀫𑁆𑀧𑀦𑁆𑀦𑁄 𑀘. 𑀧𑀺𑀬𑀢𑁂𑀢𑀺 𑀧𑁂𑀫𑀸, 𑀯𑀸𑀘𑀸. 𑀧𑀻𑀥𑀸𑀢𑀼 𑀢𑀧𑁆𑀧𑀦𑀓𑀦𑁆𑀢𑀻𑀲𑀼 𑀇𑀫𑁄. 𑀯𑀘𑀺𑀢𑀩𑁆𑀩𑀸𑀢𑀺 𑀯𑀸𑀘𑀸. 𑀯𑀘𑀥𑀸𑀢𑀼 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁 𑀡. 𑀧𑁂𑀫𑀸 𑀯𑀸𑀘𑀸 𑀅𑀲𑁆𑀲 𑀫𑁂𑀢𑀺 𑀧𑁂𑀫 𑀯𑀸𑀘𑁄. 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑁂𑀫𑀺𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢 𑀯𑀸𑀘𑀸𑀬 𑀲𑀫𑁆𑀧𑀦𑁆𑀦𑁄 𑀘𑀸𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀦 𑀯𑀸𑀘𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀳𑁄𑀢𑀺. 𑀲𑀼𑀪𑀸𑀲𑀺𑀢𑀯𑀸𑀘𑀸 𑀘 𑀥𑀫𑁆𑀫𑀯𑀸𑀘𑀸 𑀧𑀺𑀬𑀯𑀸𑀘𑀸 𑀲𑀘𑁆𑀘𑀯𑀸𑀘𑀸𑀢𑀺. 𑀢𑀣𑀸𑀳𑁂𑀢𑀁 𑀯𑀼𑀢𑁆𑀢𑀁 𑀲𑀕𑀸𑀣𑀸𑀯𑀕𑁆𑀕 𑀲𑀁𑀬𑀼𑀢𑁆𑀢𑁂 𑁋

𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄,

𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁,

𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀉𑀢𑁆𑀢𑀫𑀁 𑀲𑀼𑀪𑀸𑀲𑀺𑀢𑀁 𑀲𑀼𑀝𑁆𑀞𑀼 𑀪𑀸𑀲𑀺𑀢𑀁 𑀯𑀸𑀘𑀁 𑀆𑀳𑀼, 𑀥𑀫𑁆𑀫𑀁 𑀪𑀡𑁂 𑀪𑀡𑁂𑀬𑁆𑀬 𑀅𑀥𑀫𑁆𑀫𑀁 𑀦 𑀪𑀡𑁂 𑀦 𑀪𑀡𑁂𑀬𑁆𑀬, 𑀤𑀼𑀢𑀺𑀬𑀁 𑀢𑀁 𑀯𑀸𑀘𑀁 𑀆𑀳𑀼, 𑀧𑀺𑀬𑀁 𑀪𑀡𑁂 𑀪𑀡𑁂𑀬𑁆𑀬, 𑀅𑀧𑁆𑀧𑀺𑀬𑀁 𑀦 𑀪𑀡𑁂 𑀦 𑀪𑀡𑁂𑀬𑁆𑀬, 𑀢𑀢𑀺𑀬𑀁 𑀢𑀁 𑀯𑀸𑀘𑀁 𑀆𑀳𑀼, 𑀲𑀘𑁆𑀘𑀁 𑀪𑀡𑁂 𑀪𑀡𑁂𑀬𑁆𑀬 𑀅𑀮𑀺𑀓𑀁 𑀦 𑀪𑀡𑁂 𑀦 𑀪𑀡𑁂𑀬𑁆𑀬, 𑀘𑀢𑀼𑀢𑁆𑀣𑀁 𑀢𑀁 𑀯𑀸𑀘𑀁 𑀆𑀳𑀽𑀢𑀺.

𑀲𑀼𑀚𑀦𑀕𑀼𑀡𑀯𑀺𑀤𑀽𑀢𑀺 ¶ 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀁 𑀯𑀺𑀚𑀸𑀦𑀓𑁄 𑀘. 𑀲𑀼𑀦𑁆𑀤𑀭𑁄 𑀚𑀦𑁄 𑀲𑀼𑀚𑀦𑁄. 𑀕𑀼𑀡𑀢𑀺 𑀧𑀓𑀸𑀲𑁂𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 𑀕𑀼𑀡𑀁, 𑀲𑀻𑀮𑀸𑀤𑀺𑀕𑀼𑀡𑀁. 𑀕𑀼𑀡𑀥𑀸𑀢𑀼 𑀧𑀓𑀸𑀲𑀦𑁂 𑀅. 𑀲𑀼𑀚𑀦𑀸𑀦𑀁 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀕𑀼𑀡𑁄 𑀲𑀼𑀚𑀦𑀕𑀼𑀡𑁄, 𑀢𑀁 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀲𑀼𑀚𑀦𑀕𑀼𑀡𑀯𑀺𑀤𑀽. 𑀲𑀼𑀚𑀦 𑀕𑀼𑀡𑀲𑀤𑁆𑀤𑀽𑀧𑀧𑀤𑀯𑀺𑀤𑀥𑀸𑀢𑀼 𑀜𑀸𑀡𑁂 𑀊. 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀫𑀸𑀫𑀓𑁄𑀢𑀺 𑀩𑀼𑀤𑁆𑀥𑀸𑀤𑀺𑀲𑀚𑁆𑀚𑀦𑀸𑀦𑀁 𑀫𑀸𑀫𑀓𑁄 𑀘. 𑀫𑀫𑀸𑀬𑀢𑀻𑀢𑀺 𑀫𑀸𑀫𑀓𑁄. 𑀫𑀫𑀥𑀸𑀢𑀼 𑀫𑀸𑀦𑀦𑁂 𑀧𑁂𑀫𑁂 𑀯𑀸 𑀡𑁆𑀯𑀼. 𑀢𑀲𑁆𑀲 𑀅𑀓𑁄. 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀜𑁆𑀘 𑀲𑀤𑁆𑀥𑀫𑁆𑀫𑀜𑁆𑀘 𑀫𑀸𑀦𑀦𑁆𑀢𑁄 𑀘 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀲𑁄 𑀅𑀳𑀁. 𑀪𑀯𑁂𑀬𑁆𑀬𑀦𑁆𑀢𑀺 𑀪𑀯𑀸𑀫𑀻𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑁄 𑀅𑀳𑀁 𑀤𑀺𑀝𑁆𑀞𑀥𑀫𑁆𑀫𑁂 𑀧𑀘𑁆𑀘𑀓𑁆𑀔𑀪𑀽𑀢𑁂 𑀅𑀢𑁆𑀢𑀪𑀸𑀯𑁂, 𑀲𑀤𑁆𑀥𑁄 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀘, 𑀤𑀸𑀢𑀗𑁆𑀕𑀼𑀧𑁂𑀢𑁄 𑀤𑀸𑀢𑀲𑁆𑀲 𑀅𑀗𑁆𑀕𑀸𑀬 𑀓𑀸𑀭𑀡𑀪𑀽𑀢𑀸𑀬 𑀥𑀦 𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘, 𑀤𑀸𑀢𑀩𑁆𑀩 𑀯𑀢𑁆𑀣𑀼 𑀘, 𑀢𑀧𑁆𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁄 𑀘, 𑀲𑀤𑁆𑀥𑀸 𑀘𑀸𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀘 𑀯𑀸, 𑀧𑀭𑀫𑀲𑀺𑀭𑀺𑀥𑀭𑁄 𑀉𑀢𑁆𑀢𑀫𑀲𑀺𑀭𑀻𑀥𑀸𑀭𑀓𑁄 𑀘, 𑀉𑀢𑁆𑀢𑀫𑀲𑀺𑀭𑀺𑀁 𑀥𑀸𑀭𑀡𑀲𑀫𑀢𑁆𑀣𑁄 𑀘 𑀯𑀸, 𑀯𑀺𑀭𑀢𑁆𑀢𑁄 𑀓𑀸𑀫𑀕𑀼𑀡𑁂𑀲𑀼 𑀯𑀺𑀕𑀢𑀭𑀢𑁆𑀢𑁄 𑀘, 𑀮𑀚𑁆𑀚𑀻 𑀧𑀸𑀧𑀳𑀺𑀭𑀺𑀯𑀦𑁆𑀢𑁄 𑀘, 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑁆𑀧𑀦𑁆𑀦𑁄 𑀘 𑀯𑀸, 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑀦𑁆𑀦𑀸𑀕𑀢𑁄 𑀘 𑀯𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀼𑀦𑁆𑀤𑀭𑀫𑀺𑀢𑁆𑀢 𑀲𑀫𑁆𑀧𑀦𑁆𑀦𑁄 𑀘, 𑀅𑀪𑀺𑀭𑀢𑀓𑀼𑀲𑀮𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀪𑀺𑀭𑀫𑀡𑁄 𑀘, 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄 𑀧𑀜𑁆𑀘𑀲𑀻𑀮𑀸𑀤𑀻𑀦𑀺 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀘, 𑀅𑀧𑁆𑀧𑀺𑀘𑁆𑀙𑁄 𑀅𑀦𑀺𑀘𑁆𑀙𑁄 𑀘, 𑀭𑀽𑀧𑀸𑀤𑀺𑀓𑀸𑀫𑀕𑀼𑀡𑁂𑀲𑀼 𑀅𑀦𑀺𑀘𑁆𑀙𑀦𑁆𑀢𑁄 𑀘 𑀯𑀸, 𑀅𑀧𑁆𑀧𑀓𑁄𑀥𑁄 𑀤𑀼𑀲𑁆𑀲𑀦𑀮𑀓𑁆𑀔𑀡𑀤𑁄𑀲𑀢𑁄 𑀯𑀺𑀭𑀳𑀺𑀢𑁄 𑀘, 𑀅𑀢𑀺𑀯𑀼𑀚𑀼𑀳𑀤𑀬𑁄 𑀅𑀢𑀺𑀏𑀯 𑀉𑀚𑀼𑀘𑀺𑀢𑁆𑀢𑀲𑀫𑀦𑁆𑀦𑀸𑀕𑀢𑁄 𑀘, 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀘, 𑀅𑀧𑁆𑀧𑀫𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀘, 𑀧𑀸𑀲𑀁𑀲𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀲𑀁𑀲𑀸𑀭𑀳𑁄 𑀘, 𑀧𑁂𑀫𑀯𑀸𑀘𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 ¶ 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑁂𑀫𑀺𑀢𑀩𑁆𑀩𑀯𑀸𑀘𑀸𑀬 𑀲𑀫𑁆𑀧𑀦𑁆𑀦𑁄 𑀘, 𑀲𑀼𑀚𑀦𑀕𑀼𑀡𑀯𑀺𑀤𑀽 𑀩𑀼𑀤𑁆𑀥𑀸𑀤𑀺𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀁 𑀯𑀺𑀚𑀸𑀦𑀓𑁄 𑀘, 𑀫𑀸𑀫𑀓𑁄 𑀩𑀼𑀤𑁆𑀥𑀸𑀤𑀺𑀲𑀚𑁆𑀚𑀦𑀸𑀦𑀁 𑀫𑀸𑀫𑀓𑁄 𑀘, 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀜𑁆𑀘 𑀲𑀤𑁆𑀥𑀫𑁆𑀫𑀜𑁆𑀘 𑀫𑀸𑀦𑀦𑁆𑀢𑁄 𑀘 𑀯𑀸, 𑀪𑀯𑁂𑀬𑁆𑀬𑀁 𑀪𑀯𑀸𑀫𑀻𑀢𑀺.

𑀅𑀝𑁆𑀞𑀯𑀻𑀲𑀢𑀺𑀫𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀇𑀢𑁆𑀣𑀁 𑀅𑀲𑀗𑁆𑀔𑀬𑁂 𑀦𑀸𑀣, 𑀕𑀼𑀡𑁂 𑀮𑀓𑁆𑀔𑀡𑀤𑀻𑀧𑀺𑀢𑁂;

𑀕𑀸𑀣𑀸𑀲𑀼 𑀲𑀽𑀘𑀓𑀸𑀲𑁆𑀯𑁂𑀓, 𑀕𑀸𑀣𑀫𑁆𑀧𑀺 𑀲𑀭𑀢𑁂 𑀩𑀼𑀥𑁄.

𑀘𑀢𑀼𑀭𑀸𑀧𑀸𑀬𑀫𑀼𑀢𑁆𑀢𑁄 𑀲𑁄, 𑀲𑀸𑀥𑀓𑀢𑁆𑀣𑀤𑁆𑀯𑀬𑀲𑁆𑀲 𑀘;

𑀳𑀢𑀽𑀧𑀤𑁆𑀤𑀯𑀚𑀸𑀮𑁄 𑀘, 𑀮𑀸𑀪𑀻 𑀳𑀺𑀢𑀲𑀼𑀔𑀲𑁆𑀲 𑀘.

𑀅𑀥𑀺𑀧𑁄 𑀦𑀭𑀤𑁂𑀯𑀸𑀦𑀁, 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀧𑀺 𑀯𑀸;

𑀪𑀯𑁂𑀬𑁆𑀬 𑀅𑀦𑁆𑀢𑀺𑀫𑁂 𑀤𑁂𑀳𑁂, 𑀢𑀫𑀜𑁆𑀜𑀁 𑀲𑁂𑀢𑀙𑀢𑁆𑀢𑀓𑀁.

𑀪𑀸𑀯𑀦𑀸𑀬𑀸𑀦𑀫𑀸𑀭𑀼𑀬𑁆𑀳, 𑀲𑀫𑀫𑁂𑀲𑁆𑀲𑀢𑀺 𑀲𑀼𑀩𑁆𑀩𑀢𑁄;

𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀧𑀺, 𑀅𑀭𑁄𑀕𑁄 𑀤𑀻𑀖𑀚𑀻𑀯𑀺𑀓𑁄.

𑀧𑀽𑀚𑀺𑀢𑁄 𑀲𑀩𑁆𑀩𑀮𑁄𑀓𑁂𑀳𑀺, 𑀪𑀸𑀯𑀦𑀸𑀪𑀺𑀭𑀢𑀻𑀫𑀦𑁄;

𑀚𑀦𑀧𑁆𑀧𑀺𑀬𑁄 𑀫𑀦𑀸𑀧𑁄 𑀘, 𑀓𑀸 𑀓𑀣𑀸𑀔𑀺𑀮𑀥𑀸𑀭𑀡𑁂.

𑁨𑁯. 𑀏𑀯𑀁 𑀧𑀼𑀜𑁆𑀜𑁂𑀦𑁂𑀢𑁂𑀦𑀢𑁆𑀬𑀸𑀤𑀺 𑀕𑀸𑀣𑀸𑀤𑁆𑀯𑀬𑁂𑀦 𑀧𑀡𑀺𑀥𑀺𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀩𑀼𑀤𑁆𑀥𑀯𑀦𑁆𑀤𑀦𑀲𑁆𑀲 𑀨𑀮𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀇𑀢𑁆𑀣𑀦𑁆𑀢𑁆𑀬𑀸𑀤𑀺 𑀕𑀸𑀣𑀸𑀧𑀜𑁆𑀘𑀓𑀁 𑀆𑀳. 𑀢𑀁 𑀧𑀦 𑀫𑀽𑀮𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑀁, 𑀧𑀘𑁆𑀙𑀸 𑀧𑀦 𑀳𑀺𑀢𑀓𑀸𑀫𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀓𑁆𑀔𑀺𑀢𑁆𑀢𑀁 𑀕𑀸𑀣𑀸𑀧𑀜𑁆𑀘𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸 𑀧𑀦 𑀕𑀸𑀣𑀸𑀬𑁄 𑀧𑀣𑁆𑀬𑀸𑀯𑀢𑁆𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀢𑀸𑀲𑀼 𑀧𑀦 𑀧𑀞𑀫𑀕𑀸𑀣𑀸𑀬𑀁 𑀇𑀢𑁆𑀣𑀁 𑀅𑀲𑀗𑁆𑀔𑀬𑁂 𑀮𑀓𑁆𑀔𑀡𑀤𑀻𑀧𑀺𑀢𑁂 𑀦𑀸𑀣𑀕𑀼𑀡𑁂 𑀲𑀽𑀘𑀓𑀸𑀲𑀼 𑀕𑀸𑀣𑀸𑀲𑀼 𑀏𑀓𑀕𑀸𑀣𑀫𑁆𑀧𑀺 𑀬𑁄 𑀩𑀼𑀥𑁄 𑀲𑀭𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀲𑀼𑀕𑀢𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀲𑀗𑁆𑀔𑀬𑁂𑀢𑀺 𑀏𑀢𑁆𑀢𑀓𑀸 𑀩𑀼𑀤𑁆𑀥𑀕𑀼𑀡𑀸𑀢𑀺 𑀕𑀡𑁂𑀢𑀼𑀁 𑀅𑀲𑀫𑀢𑁆𑀣𑁂. 𑀲𑀗𑁆𑀔𑀺𑀬𑀢𑁂 𑀲𑀗𑁆𑀔𑀬𑀸. 𑀲𑀗𑁆𑀔𑀺𑀬𑀢𑀺 𑀕𑀡𑀺𑀬𑀢𑀻𑀢𑀺 𑀯𑀸 𑀲𑀗𑁆𑀔𑀬𑀸 ¶ . 𑀲𑀔𑀺𑀥𑀸𑀢𑀼 𑀲𑀗𑁆𑀔𑁆𑀬𑀸𑀬𑀁 𑀬𑀧𑀘𑁆𑀘𑀬𑁄. 𑀅𑀣 𑀯𑀸 𑀲𑀗𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀲𑀗𑁆𑀔𑀬𑀸. 𑀏𑀢𑁆𑀢𑀓𑀸 𑀩𑀼𑀤𑁆𑀥𑀕𑀼𑀡𑀸 𑀏𑀢𑁆𑀢𑀓𑀸 𑀩𑀼𑀤𑁆𑀥𑀕𑀼𑀡𑀸𑀢𑀺 𑀦𑀺𑀭𑀯𑀲𑁂𑀲𑀢𑁄 𑀏𑀓𑀩𑀼𑀤𑁆𑀥𑁄𑀧𑀺 𑀅𑀦𑁂𑀓𑀯𑀲𑁆𑀲 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑀸𑀧𑀺 𑀕𑀡𑁂𑀢𑀼𑀁 𑀅𑀲𑀫𑀢𑁆𑀣𑁄𑀯. 𑀧𑀕𑁂𑀯 𑀧𑀦 𑀅𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀧𑀤𑀸𑀦𑁂 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺 𑀘.

‘‘𑀲𑀓𑁆𑀓𑀸 𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀧𑀫𑁂𑀢𑀼𑀁 𑀆𑀴𑁆𑀳𑀓𑁂𑀦 𑀯𑀸;

𑀦𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂’’𑀢𑀺 𑀘.

𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀧𑁆𑀧𑀫𑀸𑀡𑀸 𑀳𑀺 𑀩𑀼𑀤𑁆𑀥𑀸 𑀢𑁂𑀲𑀁 𑀩𑀼𑀤𑁆𑀥𑀸𑀧𑀺 𑀅𑀦𑀯𑀲𑁂𑀲𑀢𑁄 𑀯𑀡𑁆𑀡𑀁 𑀯𑀢𑁆𑀢𑀼𑀁 𑀅𑀲𑀫𑀢𑁆𑀣𑀸, 𑀧𑀕𑁂𑀯 𑀇𑀢𑀭𑀸 𑀧𑀚𑀸’’𑀢𑀺 𑀘. 𑀮𑀓𑁆𑀔𑀡𑀤𑀻𑀧𑀺𑀢𑁂𑀢𑀺 𑀉𑀧𑀮𑀓𑁆𑀔𑀡 𑀦𑀬𑁂𑀦 𑀧𑀓𑀸𑀲𑀺𑀢𑀩𑁆𑀩𑁂. 𑀏𑀢𑁆𑀣 𑀘 𑀧𑀥𑀸𑀦𑀦𑀬𑁄 𑀦𑀺𑀤𑀲𑁆𑀲𑀦 𑀦𑀬𑁄 𑀘 𑀮𑀩𑁆𑀪𑀢𑀺. 𑀦𑀸𑀣𑀕𑀼𑀡𑁂𑀢𑀺 𑀩𑀼𑀤𑁆𑀥𑀲𑁆𑀲 𑀲𑀻𑀮𑀲𑀫𑀸𑀥𑀺 𑀧𑀜𑁆𑀜𑀸𑀤𑀺𑀕𑀼𑀡𑁂. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀽𑀘𑀓𑀸𑀲𑁆𑀯𑁂𑀓𑀕𑀸𑀣𑀫𑁆𑀧𑀻𑀢𑀺 𑀲𑀽𑀘𑀓𑀸𑀲𑀼 𑀏𑀓𑀕𑀸𑀣𑀫𑁆𑀧𑀻𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀽𑀘𑀓𑀸𑀲𑀽𑀢𑀺 𑀧𑀓𑀸𑀲𑀓𑀸𑀲𑀼. 𑀕𑀸𑀣𑀸𑀲𑀽𑀢𑀺 𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀸𑀲𑀼 𑀙𑀩𑁆𑀩𑀻𑀲𑀢𑀺𑀯𑀦𑁆𑀤𑀦𑀕𑀸𑀣𑀸𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀓𑀯𑀻𑀳𑀺 𑀕𑀸𑀬𑀢𑀺 𑀓𑀣𑀺𑀬𑀢𑀻𑀢𑀺 𑀕𑀸𑀣𑀸. 𑀧𑀚𑁆𑀚𑀯𑀺𑀲𑁂𑀲𑁄. 𑀕𑁂𑀥𑀸𑀢𑀼 𑀲𑀤𑁆𑀤𑁂 𑀣. 𑀕𑁂𑀥𑀸𑀢𑀼𑀲𑁆𑀲 𑀕𑀸𑀤𑁂𑀲𑁄. 𑀅𑀣 𑀯𑀸 𑀕𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀢𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀕𑀸𑀣𑀸. 𑀕𑀁𑀲𑀤𑁆𑀤𑀽𑀧𑀧𑀤𑀣𑀸𑀥𑀸𑀢𑀼 𑀕𑀢𑀺𑀦𑀺𑀯𑀢𑁆𑀢𑀺𑀬𑀁. 𑀕𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀓𑀯𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀣𑀺𑀬𑀢𑀺 𑀣𑀧𑀺𑀬𑀢𑀻𑀢𑀺 𑀯𑀸 𑀕𑀸𑀣𑀸, 𑀢𑀸𑀲𑀼 𑀕𑀸𑀣𑀸𑀲𑀼. 𑀏𑀓𑀕𑀸𑀣𑀫𑁆𑀧𑀻𑀢𑀺 𑀏𑀓𑀧𑀚𑁆𑀚𑀫𑁆𑀧𑀺. 𑀏𑀢𑁆𑀣 𑀘 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀢𑁂𑀦 𑀅𑀦𑁂𑀓𑀕𑀸𑀣𑀸𑀬 𑀩𑀼𑀤𑁆𑀥𑀕𑀼𑀡𑀲𑀭𑀡𑁂 𑀓𑀸 𑀓𑀣𑀸𑀯𑀸𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀩𑀼𑀥𑁄𑀢𑀺 𑀬𑁄 𑀧𑀡𑁆𑀟𑀺𑀢𑁄. 𑀲𑁄 ¶ 𑀳𑀺 𑀅𑀢𑁆𑀣𑀸𑀦𑀢𑁆𑀣𑀁 𑀩𑀼𑀥𑀢𑀺 𑀚𑀸𑀦𑀸𑀢𑀻𑀢𑀺𑀩𑀼𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀢𑁂𑀢𑀺 𑀲𑀭𑀢𑀺. 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀳𑀺 𑀧𑀭𑀲𑁆𑀲𑀧𑀤𑀢𑀺𑀯𑀺𑀪𑀢𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑀢𑁂𑀯𑀺𑀪𑀢𑁆𑀢𑀸𑀤𑁂𑀲𑁄.

𑁩𑁦. 𑀲𑁄𑀢𑀺 𑀲𑁄 𑀩𑀼𑀥𑁄 𑀪𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀭𑀸𑀧𑀸𑀬𑀫𑀼𑀢𑁆𑀢𑁄𑀢𑀺 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀧𑁂𑀢𑀅𑀲𑀼𑀭𑀓𑀸𑀬𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀯𑀺𑀫𑀼𑀢𑁆𑀢𑁄 𑀘. 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸𑀬𑁂𑀪𑀼𑀬𑁆𑀬𑁂𑀦 𑀅𑀧𑀕𑀢𑁄𑀢𑀺 𑀅𑀧𑀸𑀬𑁄. 𑀅𑀬𑀢𑁄 𑀲𑀼𑀔𑀢𑁄 𑀅𑀧𑀕𑀢𑁄𑀢𑀺 𑀯𑀸 𑀅𑀧𑀸𑀬𑁄. 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄𑀬𑀁. 𑀅𑀣 𑀯𑀸 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀬𑁄, 𑀧𑀼𑀜𑁆𑀜𑀁. 𑀅𑀬𑀥𑀸𑀢𑀼 𑀕𑀢𑀺𑀬𑀁 𑀅. 𑀧𑀼𑀜𑁆𑀜𑀢𑁄 𑀅𑀬𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸, 𑀧𑀼𑀜𑁆𑀜𑀓𑀸𑀭𑀻𑀳𑀺 𑀅𑀬𑀺𑀢𑀩𑁆𑀩𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀯𑀸 𑀅𑀬𑁄, 𑀲𑀼𑀔𑀁. 𑀢𑀢𑁄 𑀅𑀧𑀕𑀢𑁄𑀢𑀺 𑀅𑀧𑀸𑀬𑁄. 𑀘𑀢𑀼𑀭𑁄 𑀅𑀧𑀸𑀬𑁄 𑀘𑀢𑀼𑀭𑀸𑀧𑀸𑀬𑁄, 𑀢𑁂𑀳𑀺 𑀫𑀼𑀢𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀘𑀢𑀼𑀭𑀸𑀧𑀸𑀬𑀫𑀼𑀢𑁆𑀢𑁄. 𑀲𑀸𑀥𑀓𑀢𑁆𑀣𑀤𑁆𑀯𑀬𑀲𑁆𑀲 𑀘𑀸𑀢𑀺 𑀲𑀸𑀥𑀓𑁄 𑀅𑀢𑁆𑀣𑀤𑁆𑀯𑀬𑀲𑁆𑀲 𑀘𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀢𑁆𑀣𑀤𑁆𑀯𑀬𑀲𑁆𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀤𑁆𑀯𑀬𑀲𑁆𑀲. 𑀏𑀢𑁆𑀣 𑀘𑀲𑀤𑁆𑀤𑁄 𑀅𑀝𑁆𑀞𑀸𑀦𑀬𑁄𑀕𑁄. 𑀲𑁄 𑀧𑀦 𑀲𑀸𑀥𑀓𑁄 𑀢𑁆𑀬𑀸𑀤𑀻𑀲𑀼 𑀧𑀤𑁂𑀲𑀼 𑀬𑀼𑀢𑁆𑀢𑁄. 𑀲𑀸𑀥𑀓𑁄𑀢𑀺 𑀦𑀺𑀧𑁆𑀨𑀸𑀤𑀓𑁄 𑀘. 𑀲𑁄 𑀳𑀺 𑀲𑀸𑀥𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀲𑀸𑀥𑀓𑁄𑀢𑀺 𑀯𑀼𑀘𑁆𑀘𑀢𑀺.

𑀳𑀢𑀽𑀧𑀤𑁆𑀤𑀯𑀚𑀸𑀮𑁄 𑀘𑀸𑀢𑀺 𑀳𑀢𑁄 𑀉𑀧𑀤𑁆𑀤𑀯𑀲𑀗𑁆𑀔𑀸𑀢𑀚𑀸𑀮𑁄 𑀘. 𑀳𑀦𑀬𑀺𑀢𑁆𑀣 𑀅𑀧𑀦𑀬𑀺𑀢𑁆𑀣𑀸𑀢𑀺 𑀳𑀢𑁄. 𑀳𑀦𑀥𑀸𑀢𑀼 𑀳𑀺𑀁𑀲𑀸𑀬𑀁 𑀢. 𑀉𑀧𑀕𑀦𑁆𑀢𑁆𑀯𑀸 𑀤𑀯𑀢𑀺 𑀳𑀺𑀁𑀲𑀢𑀻𑀢𑀺 𑀉𑀧𑀤𑁆𑀤𑀯𑁄, 𑀚𑀸𑀢𑀺𑀪𑀬𑀸𑀤𑀺 𑀲𑁄𑀴𑀲𑀉𑀧𑀤𑁆𑀤𑀯𑁄. 𑀉𑀧𑀧𑀼𑀩𑁆𑀩𑀤𑀼𑀥𑀸𑀢𑀼 𑀳𑀺𑀁𑀲𑀸𑀬𑀁, 𑀉𑀧𑀤𑁆𑀤𑀯𑀸 𑀦𑀸𑀫 𑀧𑀦 𑀲𑁄𑀴𑀲𑀯𑀺𑀥𑀸 𑀳𑁄𑀦𑁆𑀢𑀺 𑀚𑀸𑀢𑀺𑀪𑀬𑀁, 𑀚𑀭𑀸𑀪𑀬𑀁, 𑀩𑁆𑀬𑀸𑀥𑀺𑀪𑀬𑀁, 𑀫𑀭𑀡𑀪𑀬𑀁, 𑀭𑀸𑀚𑀪𑀬𑀁, 𑀘𑁄𑀭𑀪𑀬𑀁, 𑀅𑀕𑁆𑀕𑀺𑀪𑀬𑀁, 𑀉𑀤𑀓𑀪𑀬𑀁, 𑀊𑀫𑀺𑀪𑀬𑀁, 𑀓𑀼𑀫𑁆𑀪𑀺𑀮𑀪𑀬𑀁, 𑀆𑀯𑀝𑁆𑀝𑀪𑀬𑀁, 𑀲𑀼𑀲𑀼𑀓𑀸𑀪𑀬𑀁, 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁, 𑀧𑀭𑀸𑀦𑀼𑀯𑀸𑀤𑀪𑀬𑀁, 𑀤𑀡𑁆𑀟𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀜𑁆𑀘𑀸𑀢𑀺. 𑀚𑀮𑀢𑀺 𑀳𑀺𑀁𑀲𑀢𑀺 𑀫𑀘𑁆𑀙𑁂 𑀏𑀢𑁂𑀦𑀸𑀢𑀺 𑀚𑀸𑀮𑀁, 𑀫𑀘𑁆𑀙𑀚𑀸𑀮𑀁. 𑀚𑀸𑀮𑀁 ¶ 𑀯𑀺𑀬𑀸𑀢𑀺 𑀚𑀸𑀮𑁄, 𑀉𑀧𑀤𑁆𑀤𑀯𑁄. 𑀦𑀺𑀢𑀢𑁆𑀣𑁂𑀦 𑀧𑀦 𑀚𑀮𑀢𑀺 𑀳𑀺𑀁𑀲𑀢𑀺 𑀲𑀢𑁆𑀢𑁂 𑀏𑀢𑁂𑀦𑀸𑀢𑀺 𑀚𑀸𑀮𑁄. 𑀉𑀧𑀤𑁆𑀤𑀯𑁄. 𑀚𑀮𑀥𑀸𑀢𑀼 𑀳𑀺𑀁𑀲𑀸𑀬𑀁 𑀡. 𑀳𑀢𑁄 𑀉𑀧𑀤𑁆𑀤𑀯𑀲𑀗𑁆𑀔𑀸𑀢𑀚𑀸𑀮𑁄 𑀬𑁂𑀦 𑀲𑁄𑀢𑀺 𑀳𑀢𑀽𑀧𑀤𑁆𑀤𑀯𑀚𑀸𑀮𑁄. 𑀩𑀼𑀤𑁆𑀥𑀧𑀡𑀸𑀫𑀘𑁂𑀢𑀦𑀸𑀬 𑀧𑀳𑀺𑀢𑁄 𑀉𑀧𑀤𑁆𑀤𑀯𑀲𑀗𑁆𑀔𑀸𑀢𑀚𑀸𑀮𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀮𑀸𑀪𑀻 𑀳𑀺𑀢𑀲𑀼𑀔𑀲𑁆𑀲 𑀘𑀸𑀢𑀺 𑀳𑀺𑀢𑀲𑁆𑀲 𑀘 𑀲𑀼𑀔𑀲𑁆𑀲 𑀘 𑀮𑀸𑀪𑀻 𑀘. 𑀮𑀪𑀦𑀁 𑀮𑀸𑀪𑁄, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀮𑀸𑀪𑀻, 𑀳𑀺𑀦𑁄𑀢𑀺 𑀯𑀟𑁆𑀠𑀢𑀻𑀢𑀺 𑀳𑀺𑀢𑀁, 𑀅𑀢𑁆𑀣𑀁. 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀝𑁆𑀞𑀼 𑀤𑀼𑀓𑁆𑀔𑀁 𑀔𑀦𑀢𑀻𑀢𑀺 𑀲𑀼𑀔𑀁. 𑀲𑀼𑀧𑀼𑀩𑁆𑀩 𑀔𑀦𑀼𑀥𑀸𑀢𑀼 𑀅𑀯𑀥𑀸𑀭𑀡𑁂 𑀓𑁆𑀯𑀺. 𑀳𑀺𑀢𑀜𑁆𑀘 𑀲𑀼𑀔𑀜𑁆𑀘 𑀳𑀺𑀢𑀲𑀼𑀔𑀁, 𑀢𑀲𑁆𑀲 𑀮𑀸𑀪𑀻 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁧-𑁩𑁨. 𑀦𑀭𑀤𑁂𑀯𑀸𑀦𑀁 𑀅𑀥𑀺𑀧𑁄 𑀘 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀧𑀺 𑀯𑀸 𑀪𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀭𑀤𑁂𑀯𑀸𑀦𑀦𑁆𑀢𑀺 𑀦𑀭𑀸 𑀘 𑀤𑁂𑀯𑀸 𑀘 𑀦𑀭𑀤𑁂𑀯𑀸, 𑀢𑁂𑀲𑀁. 𑀓𑀫𑁆𑀫𑀢𑁆𑀣𑁂 𑀘𑁂𑀢𑀁 𑀙𑀝𑁆𑀞𑀻𑀯𑀘𑀦𑀁. 𑀅𑀥𑀺𑀧𑁄𑀢𑀺 𑀇𑀲𑁆𑀲𑀭𑁄 𑀘. 𑀲𑁄 𑀳𑀺 𑀅𑀢𑁆𑀢𑀸𑀥𑀻𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺 𑀥𑀫𑁆𑀫𑁂𑀦 𑀯𑀸 𑀅𑀥𑀺𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀧𑀼𑀩𑁆𑀩𑀧𑀸𑀥𑀸𑀢𑀼 𑀭𑀓𑁆𑀔𑀦𑁂 𑀅, 𑀦𑀭𑀸𑀦𑀁 𑀅𑀥𑀺𑀧𑁄 𑀇𑀲𑁆𑀲𑀭𑁄 𑀫𑀦𑀼𑀲𑁆𑀲𑀭𑀸𑀚𑀸 𑀘 𑀤𑁂𑀯𑀸𑀦𑀁 𑀅𑀥𑀺𑀧𑁄 𑀇𑀲𑁆𑀲𑀭𑁄 𑀤𑁂𑀯𑀭𑀸𑀚𑀸 𑀘 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀧𑀺 𑀯𑀸𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀧𑀕𑁂𑀯 𑀏𑀓𑀤𑀻𑀧𑀺𑀲𑁆𑀲𑀭𑀭𑀸𑀚𑀪𑀸𑀯𑁄 𑀘, 𑀧𑀤𑁂 𑀲𑀺𑀲𑁆𑀲𑀭𑀭𑀸𑀚𑀪𑀸𑀯𑁄 𑀘𑀸𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀯𑀸 𑀲𑀤𑁆𑀤𑁄 𑀧𑀤𑀧𑀽𑀭𑀡 𑀫𑀢𑁆𑀢𑁄𑀬𑁂𑀯. 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑁄, 𑀅𑀧𑀭𑀕𑁄 𑀬𑀸𑀦𑁄, 𑀚𑀫𑁆𑀩𑀼𑀤𑀻𑀧𑁄, 𑀉𑀢𑁆𑀢𑀭𑀓𑀼𑀭𑀼 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀇𑀲𑁆𑀲𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀧𑀺 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀼𑀩𑁆𑀩𑀯𑀺𑀤𑁂𑀳𑁄𑀢𑀺 𑀲𑀺𑀦𑁂𑀭𑀼𑀦𑁄 𑀧𑀼𑀭𑁂 𑀪𑀯𑀁 𑀧𑀼𑀩𑁆𑀩𑀁, 𑀯𑁂𑀤𑁂𑀦 𑀧𑀜𑁆𑀜𑀸𑀬 𑀈𑀳𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀤𑁂𑀳𑁄, 𑀯𑀺𑀤𑀲𑀤𑁆𑀤𑀽𑀧𑀧𑀤 𑀈𑀳𑀥𑀸𑀢𑀼 𑀯𑀸𑀬𑀸𑀫𑁂 𑀡. 𑀲𑁄𑀬𑁂𑀯 𑀯𑀺𑀤𑁂𑀳𑁄. 𑀇𑀫𑀁 𑀤𑀻𑀧𑀫𑀼𑀧𑀸𑀤𑀸𑀬 𑀲𑀺𑀦𑁂𑀭𑀼𑀦𑁄 𑀧𑀼𑀩𑁆𑀩𑀤𑀺𑀲𑀪𑀸𑀕𑀢𑁆𑀢𑀸 𑀧𑀼𑀩𑁆𑀩𑁄 𑀘 𑀲𑁄 𑀯𑀺𑀤𑁂𑀳𑁄 𑀘𑀸𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑁄, 𑀧𑀼𑀩𑁆𑀩𑀤𑀻𑀧𑁄.

𑀅𑀧𑀭𑀕𑁄𑀬𑀸𑀦𑁄𑀢𑀺 ¶ 𑀲𑀺𑀦𑁂𑀭𑀼𑀦𑁄 𑀅𑀧𑀭𑁂 𑀧𑀘𑁆𑀙𑀺𑀫𑁂 𑀪𑀯𑁄 𑀅𑀧𑀭𑁄. 𑀕𑀯𑁂𑀦 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀬𑀸𑀦𑁄. 𑀕𑁄𑀲𑀤𑁆𑀤𑀽𑀧𑀧𑀤 𑀬𑀸𑀥𑀸𑀢𑀼 𑀕𑀫𑀦𑁂 𑀬𑀼. 𑀲𑀺𑀦𑁂𑀭𑀼𑀦𑁄 𑀧𑀘𑁆𑀙𑀺𑀫 𑀤𑀺𑀲𑀪𑀸𑀕𑀢𑁆𑀢𑀸 𑀅𑀧𑀭𑁄 𑀘 𑀲𑁄 𑀕𑁄𑀬𑀸𑀦𑁄 𑀘𑀸𑀢𑀺 𑀅𑀧𑀭𑀕𑁄𑀬𑀸𑀦𑁄, 𑀧𑀘𑁆𑀙𑀺𑀫𑀤𑀻𑀧𑁄. 𑀚𑀫𑁆𑀩𑀼𑀤𑀻𑀧𑁄𑀢𑀺 𑀚𑀸𑀬𑀢𑀻𑀢𑀺 𑀚𑀫𑁆𑀩𑀽. 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀭𑀼𑀓𑁆𑀔𑁄. 𑀚𑀦𑀥𑀸𑀢𑀼 𑀚𑀦𑀦𑁂 𑀊. 𑀦𑀲𑁆𑀲 𑀫𑁄. 𑀩𑀓𑀸𑀭𑀸𑀕𑀫𑁄. 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀢𑀻𑀢𑀺 𑀤𑀻𑀧𑁄, 𑀤𑀺𑀧𑁆𑀧𑀦𑁆𑀢𑀺 𑀚𑁄𑀢𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀫𑁆𑀫𑀸𑀢𑀺 𑀯𑀸 𑀤𑀻𑀧𑁄. 𑀤𑀻𑀧𑀥𑀸𑀢𑀼 𑀤𑀺𑀢𑁆𑀢𑀺𑀬𑀁 𑀅. 𑀢𑀲𑁆𑀲 𑀧𑀦 𑀤𑁆𑀯𑀺𑀆𑀧𑁄𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀤𑁆𑀯𑀺𑀥𑀸 𑀆𑀧𑁄 𑀲𑀦𑁆𑀤𑀢𑀺 𑀏𑀢𑁆𑀣𑀸𑀢𑀺 𑀤𑀻𑀧𑁄𑀢𑀺 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄𑀧𑀺 𑀬𑀼𑀚𑁆𑀚𑀢𑀺. 𑀚𑀫𑁆𑀩𑀼𑀬𑀸 𑀮𑀓𑁆𑀔𑀺𑀢𑁄 𑀧𑀜𑁆𑀜𑀸𑀢𑁄 𑀯𑀸 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄, 𑀤𑀓𑁆𑀔𑀺𑀡𑀤𑀻𑀧𑁄. 𑀉𑀢𑁆𑀢𑀭𑀓𑀼𑀭𑀽𑀢𑀺 𑀲𑀺𑀦𑁂𑀭𑀼𑀦𑁄 𑀉𑀢𑁆𑀢𑀭𑁂 𑀪𑀯𑀸 𑀉𑀢𑁆𑀢𑀭𑀸. 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀓𑀁 𑀲𑀼𑀔𑀁 𑀉𑀭𑀼𑀫𑀳𑀦𑁆𑀢𑀁 𑀏𑀢𑁆𑀣𑀸𑀢𑀺 𑀓𑀼𑀭𑀼. 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄𑀬𑀁. 𑀓𑀼𑀁 𑀯𑀼𑀘𑁆𑀘𑀢𑀺 𑀧𑀸𑀧𑀁. 𑀢𑀁 𑀭𑀼𑀦𑁆𑀥𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀓𑀼𑀭𑀼. 𑀓𑀼𑀧𑀼𑀩𑁆𑀩𑀭𑀼𑀥𑀺𑀥𑀸𑀢𑀼 𑀆𑀯𑀭𑀡𑁂 𑀓𑁆𑀯𑀺. 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄. 𑀲𑀺𑀦𑁂𑀭𑀼𑀦𑁄 𑀉𑀢𑁆𑀢𑀭𑀤𑀺𑀲𑀪𑀸𑀕𑀢𑁆𑀢𑀸 𑀉𑀢𑁆𑀢𑀭𑁄 𑀘 𑀲𑁄 𑀓𑀼𑀭𑀼 𑀘𑀸𑀢𑀺 𑀉𑀢𑁆𑀢𑀭𑀓𑀼𑀭𑀼. 𑀉𑀢𑁆𑀢𑀭𑀤𑀻𑀧𑁄𑀢𑀺 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀇𑀲𑁆𑀲𑀭𑁄 𑀘𑀢𑀼𑀤𑀻𑀧𑀺𑀲𑁆𑀲𑀭𑁄, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀮𑀩𑁆𑀪𑀢𑀺.

𑀏𑀯𑀁 𑀮𑁄𑀓𑀺𑀬𑀳𑀺𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀳𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀅𑀦𑁆𑀢𑀺𑀫𑁂 𑀤𑁂𑀳𑁂…𑀧𑁂… 𑀲𑀼𑀩𑁆𑀩𑀢𑁄𑀢𑀺 𑀅𑀦𑁆𑀢𑀺𑀫𑁂 𑀤𑁂𑀳𑁂 𑀲𑀼𑀩𑁆𑀩𑀢𑁄 𑀪𑀸𑀯𑀦𑀸𑀬𑀸𑀦𑀁 𑀆𑀭𑀼𑀬𑁆𑀳 𑀅𑀜𑁆𑀜𑀁 𑀢𑀁 𑀲𑁂𑀢𑀙𑀢𑁆𑀢𑀓𑀁 𑀥𑀸𑀭𑁂𑀦𑁆𑀢𑁄 𑀲𑀫𑀁 𑀏𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀦 𑀅𑀢𑁆𑀣𑀓𑁆𑀓𑀫𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀦𑁆𑀢𑀺𑀫𑁂𑀢𑀺 𑀘𑀭𑀺𑀫𑁂 𑀧𑀘𑁆𑀙𑀺𑀫𑁂 𑀯𑀸. 𑀅𑀦𑁆𑀢𑁂 𑀧𑀭𑀺𑀬𑁄𑀲𑀸𑀦𑁂 𑀪𑀯𑁄 𑀅𑀦𑁆𑀢𑀺𑀫𑁄, 𑀧𑀘𑁆𑀙𑀺𑀫𑀲𑀭𑀻𑀭𑁄. 𑀢𑀲𑁆𑀫𑀺𑀁. 𑀤𑁂𑀳𑁂𑀢𑀺 𑀲𑀭𑀻𑀭𑁂. 𑀤𑀺𑀳𑀢𑀺 𑀉𑀧𑀘𑀺𑀬𑀢𑀺 𑀯𑀟𑁆𑀠𑀢𑀻𑀢𑀺 𑀤𑁂𑀳𑁄, 𑀲𑀭𑀻𑀭𑁄. 𑀤𑀺𑀳𑀥𑀸𑀢𑀼 𑀉𑀧𑀘𑀬𑁂 𑀡. 𑀅𑀣 𑀯𑀸 𑀤𑀺𑀳𑀢𑀺 𑀉𑀧𑀘𑀬𑀢𑀺 𑀏𑀢𑁂𑀦 𑀧𑀼𑀜𑁆𑀜𑀸𑀧𑀼𑀜𑁆𑀜𑀦𑁆𑀢𑀺 𑀤𑁂𑀳𑁄, 𑀧𑀘𑁆𑀙𑀺𑀫𑀪𑀯𑀪𑀽𑀢𑁂 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀪𑀽𑀢𑁂 𑀯𑀸 𑀲𑀭𑀻𑀭𑁂𑀢𑀺 𑀅𑀢𑁆𑀣𑁄. 𑀲𑀼𑀩𑁆𑀩𑀢𑁄𑀢𑀺 𑀲𑀼𑀝𑁆𑀞𑀼 𑀧𑀝𑀺𑀧𑀦𑁆𑀦𑀓𑁄 𑀳𑀼𑀢𑁆𑀯𑀸 ¶ . 𑀲𑀼𑀝𑁆𑀞𑀼 𑀯𑀢𑀁 𑀧𑀝𑀺𑀧𑀦𑁆𑀦𑀁 𑀅𑀲𑁆𑀲𑀸𑀢𑀺 𑀲𑀼𑀩𑁆𑀩𑀢𑁄. 𑀯𑀓𑀸𑀭𑀲𑁆𑀲𑀩𑁆𑀩𑁄. 𑀪𑀸𑀯𑀦𑀸𑀬𑀸𑀦𑀫𑀸𑀭𑀼𑀬𑁆𑀳𑀸𑀢𑀺 𑀪𑀸𑀯𑀦𑀸𑀬𑀸𑀦𑀁 𑀆𑀭𑀼𑀬𑁆𑀳𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀬𑀸𑀦𑀁 𑀆𑀭𑀼𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀸𑀯𑁂𑀢𑀩𑁆𑀩𑀸 𑀯𑀟𑁆𑀠𑁂𑀢𑀩𑁆𑀩𑀸𑀢𑀺 𑀪𑀸𑀯𑀦𑀸. 𑀢𑁂𑀪𑀽𑀫𑀓 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁. 𑀅𑀣 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀪𑀸𑀯𑀦𑀸, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀪𑀽𑀥𑀸𑀢𑀼 𑀲𑀢𑁆𑀢𑀸𑀬𑀁 𑀯𑀟𑁆𑀠𑀦𑁂 𑀯𑀸 𑀬𑀼. 𑀲𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸 𑀪𑀸𑀯𑀦𑀸𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀇𑀥 𑀧𑀦 𑀅𑀜𑁆𑀜𑀁 𑀲𑁂𑀢𑀙𑀢𑁆𑀢𑀓𑀦𑁆𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀦𑁆𑀢𑀺 𑀬𑀸𑀦𑀁, 𑀅𑀦𑀺𑀘𑁆𑀘𑀸𑀤𑀺𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀬𑀸𑀥𑀸𑀢𑀼 𑀕𑀢𑀺𑀬𑀁 𑀬𑀼. 𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀬𑀸𑀦𑀁 𑀪𑀸𑀯𑀦𑀸𑀬𑀸𑀦𑀁, 𑀪𑀸𑀯𑀦𑀸 𑀘 𑀲𑀸 𑀬𑀸𑀦𑀜𑁆𑀘𑀸𑀢𑀺 𑀯𑀸 𑀪𑀸𑀯𑀦𑀸𑀬𑀸𑀦𑀁.

𑀆𑀭𑀼𑀬𑁆𑀳𑀸𑀢𑀺 𑀆𑀭𑁄𑀳𑀺𑀢𑁆𑀯𑀸. 𑀧𑀓𑀢𑀺𑀬𑀸𑀦𑀲𑀤𑀺𑀲𑀁 𑀅𑀦𑀺𑀘𑁆𑀘 𑀤𑀼𑀓𑁆𑀔𑀅𑀦𑀢𑁆𑀢𑀬𑀸𑀦𑀁 𑀆𑀭𑀼𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑁂𑀦 𑀳𑀺 𑀯𑀺𑀦𑀸 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀸𑀯𑀦𑀸𑀬𑀸𑀦𑀫𑀸𑀭𑀼𑀬𑁆𑀳𑀸𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀢𑀜𑁆𑀳𑀺 𑀧𑀞𑀫𑀫𑀕𑁆𑀕𑁂𑀦 𑀆𑀤𑀺𑀝𑁆𑀞𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀯𑀩𑀼𑀚𑁆𑀛𑀢𑀻𑀢𑀺 𑀅𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀼𑀩𑁆𑀩𑀜𑀸𑀥𑀸𑀢𑀼 𑀅𑀯𑀩𑁄𑀥𑀦𑁂 𑀓𑁆𑀯𑀺. 𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄. 𑀲𑁂𑀢𑀙𑀢𑁆𑀢𑀓𑀦𑁆𑀢𑀺 𑀑𑀤𑀸𑀢𑀸𑀢𑀧𑀢𑁆𑀢𑀁. 𑀲𑁂𑀯𑀺𑀬𑀢𑀻𑀢𑀺 𑀲𑁂𑀢𑀁, 𑀥𑀯𑀮𑀁. 𑀲𑀺𑀥𑀸𑀢𑀼 𑀲𑁂𑀯𑀸𑀬𑀁 𑀢. 𑀓𑀺𑀮𑁂𑀲𑀢𑀧𑀁 𑀙𑀸𑀤𑁂𑀢𑀻𑀢𑀺 𑀙𑀢𑁆𑀢𑀁. 𑀙𑀤𑀥𑀸𑀢𑀼 𑀲𑀁𑀯𑀭𑀡𑁂 𑀢. 𑀢𑀁𑀬𑁂𑀯 𑀙𑀢𑁆𑀢𑀓𑀁. 𑀲𑁂𑀢𑀜𑁆𑀘 𑀢𑀁 𑀙𑀢𑁆𑀢𑀓𑀜𑁆𑀘𑀸𑀢𑀺 𑀲𑁂𑀢𑀙𑀢𑁆𑀢𑀓𑀁. 𑀅𑀭𑀳𑀢𑁆𑀢𑀨𑀮𑀆𑀢𑀧𑀢𑁆𑀢𑀁 𑀮𑀩𑁆𑀪𑀢𑀺. 𑀅𑀜𑁆𑀜𑀁 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀲𑁂𑀢𑀙𑀢𑁆𑀢𑀓𑀁 𑀥𑀸𑀭𑁂𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺 𑀯𑀽𑀧𑀲𑀫𑀢𑀺 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀲𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀲𑁆𑀲𑀢𑀻𑀢𑀺 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺.

𑀇𑀤𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀧𑀺 𑀅𑀭𑁄𑀕𑁄 𑀘 𑀤𑀻𑀖𑀸𑀬𑀼𑀓𑁄 𑀘 𑀲𑀩𑁆𑀩𑀮𑁄𑀓𑁂𑀳𑀺 𑀧𑀽𑀚𑀺𑀢𑁄 𑀘 𑀪𑀸𑀯𑀦𑀸𑀪𑀺 𑀭𑀢𑀺𑀫𑀦𑁄 ¶ 𑀘 𑀚𑀦𑀧𑁆𑀧𑀺𑀬𑁄 𑀘 𑀫𑀦𑀸𑀧𑁄 𑀘 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀪𑀸𑀯𑁂𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀢𑁆𑀢𑀸𑀢𑀺 𑀪𑀯𑀢𑀺 𑀏𑀢𑁂𑀦 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺 𑀘𑀸𑀢𑀺 𑀅𑀢𑁆𑀢𑀪𑀸𑀯𑁄. 𑀔𑀦𑁆𑀥𑀧𑀜𑁆𑀘𑀓𑀲𑁆𑀲𑁂𑀢𑀫𑀥𑀺𑀯𑀘𑀦𑀁. 𑀅𑀭𑁄𑀕𑁄𑀢𑀺 𑀲𑀩𑁆𑀩𑀩𑁆𑀬𑀸𑀥𑀺𑀯𑀺𑀭𑀳𑁄 𑀘. 𑀲𑁄 𑀳𑀺 𑀦𑀢𑁆𑀣𑀺 𑀭𑁄𑀕𑁄 𑀅𑀲𑁆𑀲𑀸𑀢𑀺 𑀅𑀭𑁄𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀤𑀻𑀖𑀚𑀻𑀯𑀺𑀓𑁄𑀢𑀺 𑀤𑀻𑀖𑀸𑀬𑀼𑀓𑁄 𑀘. 𑀲𑁄 𑀳𑀺 𑀤𑀻𑀖𑀸 𑀚𑀻𑀯𑀺 𑀆𑀬𑀼 𑀅𑀲𑁆𑀲𑀸𑀢𑀺 𑀤𑀻𑀖𑀚𑀻𑀯𑀺𑀓𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁩. 𑀲𑀩𑁆𑀩𑀮𑁄𑀓𑁂𑀳𑀻𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺. 𑀧𑀽𑀚𑀺𑀢𑁄𑀢𑀺 𑀧𑀽𑀚𑀺𑀢𑀩𑁆𑀩𑁄 𑀘. 𑀪𑀸𑀯𑀦𑀸𑀪𑀺𑀭𑀢𑀺𑀫𑀦𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬 𑀅𑀪𑀺𑀭𑀫𑀡𑀘𑀺𑀢𑁆𑀢𑁄 𑀘. 𑀚𑀦𑀧𑁆𑀧𑀺𑀬𑁄𑀢𑀺 𑀲𑀩𑁆𑀩𑀚𑀦𑁂𑀳𑀺 𑀧𑀺𑀬𑀸𑀬𑀺𑀢𑀩𑁆𑀩𑁄 𑀘. 𑀫𑀦𑀸𑀧𑁄𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀯𑀟𑁆𑀠𑀦𑀓𑁄 𑀘 𑀪𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀙𑀩𑁆𑀩𑀻𑀲𑀢𑀺𑀬𑀸 𑀯𑀦𑁆𑀤𑀦𑀕𑀸𑀣𑀸𑀲𑀼 𑀏𑀓𑀕𑀸𑀣𑀸𑀫𑀢𑁆𑀢𑀫𑁆𑀧𑀺 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑁂 𑀨𑀮𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀕𑀸𑀣𑀸𑀬𑁄 𑀯𑀘𑀲𑀸 𑀥𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀯𑀦𑁆𑀤𑀦𑁂 𑀅𑀦𑁂𑀓𑀸𑀦𑀺 𑀨𑀮𑀸𑀦𑀺𑀲𑀁𑀲𑀸𑀦𑀺 𑀤𑀲𑁆𑀲𑁂𑀢𑀼𑀁 𑀓𑀸 𑀓𑀣𑀸𑀔𑀺𑀮𑀥𑀸𑀭𑀡𑁂𑀢𑀺 𑀆𑀳. 𑀢𑀢𑁆𑀣 𑀓𑀸 𑀓𑀣𑀸𑀔𑀺𑀮𑀥𑀸𑀭𑀡𑁂𑀢𑀺 𑀓𑀸 𑀓𑀣𑀸 𑀅𑀔𑀺𑀮𑀥𑀸𑀭𑀡𑁂𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀩𑁆𑀩𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸𑀬 𑀯𑀘𑀲𑀸 𑀥𑀸𑀭𑀡𑁂 𑀓𑀺𑀁 𑀯𑀢𑁆𑀢𑀩𑁆𑀩𑀸 𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀅𑀔𑀺𑀮𑀲𑀤𑁆𑀤𑁄 𑀲𑀩𑁆𑀩𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀣 𑀯𑀸 𑀔𑀺𑀬𑀦𑀁 𑀔𑀺𑀮𑀁. 𑀔𑀺𑀥𑀸𑀢𑀼 𑀔𑀬𑁂 𑀮𑀧𑀘𑁆𑀘𑀬𑁄. 𑀔𑀬𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀯𑀸 𑀔𑀺𑀮𑀁, 𑀅𑀧𑁆𑀧𑀓𑀁. 𑀔𑀬𑀲𑀤𑁆𑀤𑀽𑀧𑀧𑀤𑀮𑀸𑀥𑀸𑀢𑀼 𑀕𑀳𑀡𑁂 𑀅. 𑀦 𑀔𑀺𑀮𑀁 𑀅𑀔𑀺𑀮𑀁, 𑀲𑀩𑁆𑀩𑀕𑀸𑀣𑀸𑀬𑁄. 𑀥𑀸𑀭𑀺𑀬𑀢𑁂 𑀥𑀸𑀭𑀡𑀁, 𑀅𑀔𑀺𑀮𑀸𑀬 𑀲𑀩𑁆𑀩𑀸𑀬 𑀕𑀸𑀣𑀸𑀬 𑀥𑀸𑀭𑀡𑀁 𑀅𑀔𑀺𑀮𑀥𑀸𑀭𑀡𑀁, 𑀢𑀲𑁆𑀫𑀺𑀁. 𑀙𑀩𑁆𑀩𑀻𑀲𑀢𑀺𑀬𑀸 𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸𑀲𑀼 𑀏𑀓𑀁 𑀕𑀸𑀣𑀁 𑀯𑀘𑀲𑀸 𑀥𑀸𑀭𑀬𑀺𑀢𑁆𑀯𑀸 𑀩𑀼𑀤𑁆𑀥𑀯𑀦𑁆𑀤𑀦𑁂 𑀬𑀣𑀸𑀯𑀼𑀢𑁆𑀢𑀨𑀮𑀸𑀦𑀺𑀲𑀁𑀲𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀧𑀕𑁂𑀯 𑀧𑀦 𑀲𑀩𑁆𑀩𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸𑀬𑁄 𑀯𑀘𑀲𑀸 𑀥𑀸𑀭𑀬𑀺𑀢𑁆𑀯𑀸 𑀤𑀺𑀦𑁂 𑀤𑀺𑀦𑁂 𑀩𑀼𑀤𑁆𑀥𑀯𑀦𑁆𑀤𑀦𑁂𑀢𑀺 ¶ 𑀅𑀢𑁆𑀣𑁄𑀢𑀺. 𑀇𑀫𑀺𑀦𑀸 𑀧𑀦 𑀕𑀸𑀣𑀸𑀧𑀜𑁆𑀘𑀓𑁂𑀦 𑀬𑀣𑀸𑀯𑀼𑀢𑁆𑀢 𑀨𑀮𑀸𑀦𑀺𑀲𑀁𑀲𑀁 𑀜𑀢𑁆𑀯𑀸 𑀲𑀤𑁆𑀤𑀳𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀩𑁆𑀩𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸𑀬𑁄 𑀯𑀘𑀲𑀸 𑀥𑀸𑀭𑀬𑀺𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀧𑀼𑀩𑁆𑀩𑀡𑁆𑀳𑀓𑀸𑀮𑁂 𑀘 𑀲𑀸𑀬𑀦𑁆𑀳𑀓𑀸𑀮𑁂 𑀘 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀘 𑀧𑀘𑁆𑀙𑀺𑀫𑀬𑀸𑀫𑁂 𑀘 𑀲𑀢𑀢𑀁 𑀲𑀫𑀺𑀢𑀁 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀁 𑀯𑀦𑁆𑀤𑁂𑀬𑁆𑀬𑀸𑀢𑀺 𑀉𑀬𑁆𑀬𑁄𑀚𑀦𑀁 𑀤𑀲𑁆𑀲𑁂𑀢𑀻𑀢𑀺.

𑀧𑀜𑁆𑀘𑀓𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀇𑀢𑀺 𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀺 𑀯𑀦𑁆𑀤𑀺𑀢𑀲𑁆𑀲 𑀦𑀫𑀓𑁆𑀓𑀸𑀭𑀲𑁆𑀲 𑀲𑀤𑁆𑀤𑀢𑁆𑀣𑀦𑀬𑁂𑀳𑀺 𑀙𑀦𑁆𑀤𑀸𑀮𑀗𑁆𑀓𑀸𑀭𑀦𑀬𑁂𑀳𑀺 𑀘 𑀲𑀡𑁆𑀳𑀲𑀼𑀔𑀼𑀫𑀲𑀼𑀤𑀼𑀤𑁆𑀤𑀲 𑀕𑀫𑁆𑀪𑀻𑀭𑀲𑁆𑀲 𑀩𑀼𑀤𑁆𑀥𑀲𑁆𑀲 𑀤𑀼𑀧𑁆𑀧𑀝𑀺𑀯𑀺𑀥𑀕𑀼𑀡𑀧𑀭𑀺𑀤𑀻𑀧𑀓𑀲𑁆𑀲 𑀲𑀧𑁆𑀧𑀼𑀭𑀺𑀲𑀸𑀦𑀁 𑀘𑀺𑀢𑁆𑀢𑀧𑀲𑀦𑁆𑀦𑀚𑀦𑀓𑀲𑁆𑀲 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀅𑀲𑀁𑀳𑀺𑀭 𑀯𑀺𑀲𑀸𑀭𑀤𑀜𑀸𑀡𑀘𑀸𑀭𑀺𑀦𑀸 𑀲𑀸𑀲𑀦𑀲𑁄𑀥𑀓𑁂𑀦 𑀪𑀤𑁆𑀤𑀦𑁆𑀢𑀭𑁂𑀯 𑀢𑀢𑁆𑀣𑁂𑀭𑀯𑀭𑁂𑀦 𑀭𑀘𑀺𑀢𑀸 𑀩𑀼𑀤𑁆𑀥𑀕𑀼𑀡𑀧𑁆𑀧𑀤𑀻𑀧𑀺𑀓𑀦𑀸𑀫𑀺𑀓𑀸 𑀯𑀡𑁆𑀡𑀦𑀸.

𑀇𑀤𑀁 𑀧𑀦 𑀧𑀼𑀭𑀁 𑀦𑀺𑀫𑁆𑀫𑀺𑀢𑁂𑀦 𑀲𑀺𑀭𑀻𑀧𑀯𑀭𑀯𑀺𑀚𑀬𑀸𑀦𑀦𑁆𑀢𑀬𑀲𑀧𑀡𑁆𑀟𑀺𑀢 𑀢𑁆𑀭𑀺𑀪𑀯𑀦𑀸𑀤𑀺𑀢𑁆𑀬𑀸𑀥𑀺𑀧𑀢𑀺𑀫𑀳𑀸𑀥𑀫𑁆𑀫𑀭𑀸𑀚𑀸𑀥𑀺𑀭𑀸𑀚𑀸𑀢𑀺 𑀮𑀜𑁆𑀙𑀺𑀢𑀦𑀸𑀫𑀺𑀓𑁂𑀦 𑀧𑀺𑀝𑀓𑀢𑁆𑀢𑀬𑀧𑀸𑀴𑀺𑀁 𑀲𑀺𑀮𑀸𑀭𑀽𑀴𑁆𑀳𑀁 𑀓𑀸𑀭𑀬𑀺𑀢𑁆𑀯𑀸 𑀧𑀜𑁆𑀘𑀫 𑀲𑀗𑁆𑀕𑀻𑀢𑀺𑀓𑀭𑀡𑁂𑀦 𑀢𑀺𑀫𑀳𑀸𑀥𑀫𑁆𑀫𑀭𑀸𑀚𑁂𑀦 𑀭𑀢𑀦𑀸𑀧𑀼𑀜𑁆𑀚𑀦𑁆𑀢𑀺 𑀲𑀫𑁆𑀫𑀢𑁂 𑀭𑀸𑀚𑀥𑀸𑀦𑀻𑀪𑀽𑀢𑁂 𑀦𑀸𑀦𑀸𑀓𑀼𑀮𑀲𑀁𑀓𑀺𑀡𑁆𑀡𑁂 𑀧𑀼𑀜𑁆𑀜𑀥𑀜𑁆𑀜𑀯𑀦𑁆𑀢𑀸𑀦𑀁 𑀲𑀸𑀥𑀽𑀦𑀜𑁆𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀯𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀜𑁆𑀘 𑀦𑀺𑀯𑀸𑀲𑀪𑀽𑀢𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀓𑀭𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑀼𑀚𑁆𑀚𑁄𑀢𑀦𑁂 𑀫𑀦𑁆𑀢𑀮𑁂 𑀦𑀕𑀭𑁂 𑀇𑀢𑀺 𑀧𑀭𑀺𑀓𑀺𑀢𑁆𑀢𑀺𑀢𑁂 𑀫𑀳𑀸𑀭𑀸𑀫𑁂 𑀤𑁂𑀲𑁂 𑀯𑀲𑀦𑁆𑀢𑁂𑀦 𑀉𑀧𑀸𑀲𑀓 𑀕𑀼𑀡𑀲𑀫𑁆𑀧𑀦𑁆𑀦𑁂𑀦 𑀦𑀸𑀫𑀺𑀓𑁂𑀦 𑀉𑀧𑀸𑀲𑀓𑁂𑀦 𑀘 𑀢𑀲𑁆𑀲𑀼𑀧𑀝𑁆𑀞𑀸𑀓𑀸𑀬 𑀦𑀸𑀫𑀺𑀓𑀸𑀬 𑀉𑀧𑀸𑀲𑀺𑀓𑀸𑀬 𑀘 𑀲𑀫𑀓𑀼𑀲𑀮𑀘𑁆𑀙𑀦𑁆𑀤𑀁 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬 𑀓𑀸𑀭𑀺𑀢𑁂 𑀫𑀦𑁄𑀭𑀫𑁂 𑀲𑀼𑀯𑀡𑁆𑀡𑁂𑀦 𑀮𑀺𑀫𑁆𑀧𑀺𑀢𑀢𑁆𑀢𑀸 𑀲𑀼𑀯𑀡𑁆𑀡𑀯𑀢𑀻 𑀦𑀸𑀫𑀺𑀓𑁂 ¶ 𑀤𑁆𑀯𑀺𑀪𑀼𑀫𑁆𑀫𑀺𑀓𑁂 𑀫𑀳𑀺𑀝𑁆𑀞𑀓𑀯𑀺𑀳𑀸𑀭𑁂 𑀅𑀝𑁆𑀞𑀳𑀺 𑀤𑀺𑀲𑀸𑀳𑀺 𑀆𑀕𑀢𑀸𑀦𑀁 𑀲𑀼𑀢𑁂𑀲𑀦𑀪𑀺𑀓𑁆𑀔𑀽𑀦𑀁 𑀲𑀸𑀝𑁆𑀞𑀓𑀣𑀁 𑀧𑀺𑀝𑀓𑀢𑁆𑀢𑀬𑀁 𑀤𑀺𑀦𑁂 𑀤𑀺𑀦𑁂 𑀲𑀢𑀢𑀁 𑀦𑀺𑀭𑀦𑁆𑀢𑀭𑀁 𑀯𑀸𑀘𑁂𑀦𑁆𑀢𑁂𑀦 𑀅𑀥𑀺𑀯𑀲𑀦𑁆𑀢𑁂𑀦 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀅𑀲𑀁𑀳𑀺𑀭𑀯𑀺𑀲𑀸𑀭𑀤𑀜𑀸𑀡𑀘𑀸𑀭𑀺𑀦𑀸 𑀫𑀦𑁆𑀢𑀮𑁂 𑀧𑀼𑀭𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀳𑀺𑀢𑀥𑀫𑁆𑀫𑀸𑀘𑀭𑀺𑀬𑀕𑀡𑀲𑁆𑀲 𑀚𑁂𑀝𑁆𑀞𑀼𑀓𑁆𑀓𑀝𑁆𑀞𑀪𑀽𑀢𑁂𑀦 𑀭𑁂𑀯𑀢𑀸𑀪𑀺𑀧𑀡𑁆𑀟𑀺𑀢𑀥𑀚𑀲𑀸𑀲𑀦𑀯𑀁𑀲𑀫𑀳𑀸𑀥𑀫𑁆𑀫𑀭𑀸𑀚𑀕𑀼𑀭𑀽𑀢𑀺 𑀘 𑀅𑀕𑁆𑀕 𑀫𑀳𑀸𑀧𑀡𑁆𑀟𑀺𑀢𑀸𑀢𑀺 𑀘 𑀮𑀤𑁆𑀥𑀮𑀜𑁆𑀙𑀺𑀢𑁂𑀦 𑀫𑀽𑀮𑀤𑁆𑀯𑀸𑀤𑀲𑀲𑀸𑀲𑀦 𑀓𑀭𑀫𑀳𑀸𑀕𑀡𑀲𑁆𑀲 𑀚𑁂𑀝𑁆𑀞𑀫𑀳𑀸𑀦𑀸𑀬𑀓𑀪𑀽𑀢𑁂𑀦 𑀲𑀸𑀲𑀦𑀸𑀧𑁆𑀭𑀼𑀜𑁆𑀜𑁄 𑀆𑀘𑀭𑀺𑀬𑁄𑀢𑀺 𑀯𑀺𑀲𑁆𑀲𑀼𑀢𑁂𑀦 𑀲𑀸𑀲𑀦𑀲𑁄𑀥𑀓 𑀫𑀳𑀸𑀦𑀸𑀬𑀓𑀢𑁆𑀣𑁂𑀭𑀯𑀭𑁂𑀦 𑀧𑁄𑀭𑀸𑀡𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑁂𑀳𑀺 𑀩𑀼𑀤𑁆𑀥𑀕𑀼𑀡𑀧𑁆𑀧𑀓𑀸𑀲𑀓𑁂𑀳𑀺 𑀩𑀼𑀤𑁆𑀥𑀕𑀼𑀡𑀧𑀤𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀦 𑀙𑀦𑁆𑀤𑀸𑀮𑀗𑁆𑀓𑀸𑀭𑀦𑀬𑁂𑀦 𑀘 𑀧𑀣𑀯𑀻𑀲𑀦𑁆𑀥𑀸𑀭𑀓𑀲𑁆𑀲 𑀉𑀤𑀓𑀓𑁆𑀔𑀦𑁆𑀥𑀲𑁆𑀲 𑀯𑀺𑀬 𑀕𑀫𑁆𑀪𑀻𑀭𑀲𑁆𑀲 𑀧𑀩𑁆𑀩𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀧𑀺𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀺𑀬 𑀅𑀢𑀺𑀤𑀼𑀤𑁆𑀤𑀲𑀲𑁆𑀲 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀅𑀕𑁆𑀕𑀓𑁄𑀝𑀺𑀬𑀸 𑀯𑀺𑀬 𑀅𑀢𑀺𑀲𑀡𑁆𑀳 𑀲𑀼𑀔𑀼𑀫𑀲𑁆𑀲 𑀧𑀼𑀣𑀼𑀚𑁆𑀚𑀦𑀜𑀸𑀡𑁂𑀦 𑀩𑀼𑀤𑁆𑀥𑀲𑁆𑀲 𑀤𑀼𑀧𑁆𑀧𑀝𑀺𑀯𑀺𑀥𑀕𑀼𑀡𑀧𑀭𑀺𑀤𑀻𑀧𑀓𑀲𑁆𑀲 𑀦𑀫𑀓𑁆𑀓𑀸𑀭𑀲𑁆𑀲 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀩𑀼𑀤𑁆𑀥𑀕𑀼𑀡𑀧𑁆𑀧𑀤𑀻𑀧𑀺𑀓𑀦𑀸𑀫𑀺𑀓𑀸 𑀲𑀁𑀯𑀡𑁆𑀡𑀦𑀸 𑀢𑀸𑀲𑀼 𑀢𑀸𑀲𑀼 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀆𑀕𑀢𑀁 𑀲𑀁𑀯𑀡𑁆𑀡𑀦𑀸𑀦𑀬𑀁 𑀦𑀺𑀲𑁆𑀲𑀸𑀬 𑀧𑀜𑁆𑀜𑀸𑀧𑀸𑀝𑀯𑀢𑁆𑀣𑀸𑀬 𑀲𑀸𑀲𑀦𑀯𑀼𑀤𑁆𑀥𑀺𑀬𑀸 𑀘 𑀓𑀢𑀸.

𑀲𑀫𑁆𑀧𑀢𑁆𑀢𑁂 𑀘𑀓𑁆𑀓𑀯𑀲𑁆𑀲𑁂 𑀲𑀸, 𑀤𑁆𑀯𑀺𑀲𑀳𑀲𑁆𑀲𑁂 𑀘𑀢𑀽𑀲𑀢𑁂;

𑀦𑀯𑀸𑀥𑀺𑀓𑀸𑀲𑀺𑀢𑀻𑀬𑀸 𑀘, 𑀲𑀓𑁆𑀓𑀭𑀸𑀚𑁂 𑀘 𑀲𑀫𑁆𑀧𑀢𑁆𑀢𑁂.

𑀲𑀢𑁆𑀢𑀢𑀺𑀲𑀢𑀲𑀳𑀲𑁆𑀲, 𑀯𑀲𑁆𑀲𑁂 𑀨𑀼𑀲𑁆𑀲𑀫𑀸𑀲𑀲𑁆𑀲𑁂𑀯;

𑀓𑀸𑀮𑀧𑀓𑁆𑀔𑀲𑀢𑁆𑀢𑀫𑁂 𑀘, 𑀩𑀼𑀤𑁆𑀥𑀤𑀺𑀦𑁂 𑀲𑀼𑀦𑀺𑀝𑁆𑀞𑀺𑀢𑀸; 𑀲𑀸𑀫𑀜𑁆𑀜.

𑀏𑀲𑀸 𑀘 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀫𑀬𑀸;

𑀅𑀜𑁆𑀜𑀫𑁆𑀧𑀺 𑀢𑁂𑀦 𑀧𑀼𑀜𑁆𑀜𑁂𑀦, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑀲𑀁𑀲𑀸𑀭𑀢𑁄 ¶ 𑀩𑀳𑀽 𑀲𑀢𑁆𑀢𑁂, 𑀢𑀸𑀭𑀬𑀺𑀢𑁆𑀯𑀸 𑀢𑀡𑁆𑀳𑀓𑁆𑀔𑀬𑀁;

𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀭𑁂𑀬𑁆𑀬𑀁, 𑀫𑀕𑁆𑀕𑀜𑀸𑀡𑀼𑀢𑁆𑀢𑀭𑁂𑀦 𑀘.

𑀲𑀤𑀸 𑀭𑀓𑁆𑀔𑀦𑁆𑀢𑀼 𑀭𑀸𑀚𑀸𑀦𑁄, 𑀥𑀫𑁆𑀫𑁂𑀦𑁂𑀯 𑀧𑀚𑀁 𑀇𑀫𑀁;

𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀻 𑀳𑁄𑀦𑁆𑀢𑀼, 𑀚𑁄𑀢𑁂𑀦𑁆𑀢𑀼 𑀚𑀺𑀦𑀲𑀸𑀲𑀦𑀁.

𑀫𑁆𑀭𑀫𑁆𑀫𑀭𑀝𑁆𑀞𑁂 𑀫𑀦𑀼𑀲𑁆𑀲𑀸 𑀘, 𑀲𑀩𑁆𑀩𑀤𑀸 𑀦𑀺𑀭𑀼𑀧𑀤𑁆𑀤𑀯𑀸;

𑀦𑀺𑀘𑁆𑀘𑀁 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀧𑀧𑁆𑀧𑁄𑀦𑁆𑀢𑀼 𑀅𑀫𑀢𑀁 𑀧𑀤𑀦𑁆𑀢𑀺.

𑀩𑀼𑀤𑁆𑀥𑀕𑀼𑀡𑀧𑁆𑀧𑀤𑀻𑀧𑀺𑀓𑀦𑀸𑀫𑀺𑀓𑀸