𑀅𑀜𑁆𑀜 > 𑀩𑀼𑀤𑁆𑀥-𑀯𑀦𑁆𑀤𑀦𑀸 𑀕𑀦𑁆𑀣-𑀲𑀗𑁆𑀕𑀳𑁄

Misc. Paragraph

𑀚𑀺𑀦𑀸𑀮𑀗𑁆𑀓𑀸𑀭

𑀧𑀡𑀸𑀫𑀤𑀻𑀧𑀦𑀻𑀕𑀸𑀣𑀸

𑀬𑁄𑀕𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀯𑀺𑀚𑀸𑀬𑀦𑀫𑀗𑁆𑀕𑀮𑀤𑀻𑀧𑀦𑀻𑀕𑀸𑀣𑀸

𑀅𑀕𑀸𑀭𑀺𑀬𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀤𑀻𑀧𑀦𑀻𑀬𑀫𑀓𑀕𑀸𑀣𑀸

𑀧𑀸𑀤𑀼𑀤𑁆𑀥𑀸𑀭𑀯𑀺𑀫𑁆𑀳𑀬𑀤𑀻𑀧𑀦𑀻𑀕𑀸𑀣𑀸

𑀅𑀧𑀼𑀦𑀭𑀸𑀯𑀢𑁆𑀢𑀺𑀕𑀫𑀦𑀤𑀻𑀧𑀦𑀻𑀬𑀫𑀓𑀕𑀸𑀣𑀸

𑀤𑁆𑀯𑀺𑀧𑀸𑀤𑀩𑁆𑀬𑀸𑀲𑀬𑀫𑀓𑀕𑀸𑀣𑀸

𑀢𑀺𑀧𑀸𑀤𑀩𑁆𑀬𑀸𑀲𑀬𑀫𑀓𑀕𑀸𑀣𑀸

𑀧𑀸𑀤𑀩𑁆𑀬𑀸𑀲𑀫𑀳𑀸𑀬𑀫𑀓𑀕𑀸𑀣𑀸

𑀅𑀩𑁆𑀬𑀸𑀧𑁂𑀢𑀸𑀤𑁆𑀬𑀦𑁆𑀢𑀬𑀫𑀓𑀕𑀸𑀣𑀸

𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀤𑀻𑀧𑀦𑀻𑀕𑀸𑀣𑀸

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀬𑁄 𑀮𑁄𑀓𑀢𑁆𑀣𑀸𑀬 𑀩𑀼𑀤𑁆𑀥𑁄 𑀥𑀦𑀲𑀼𑀢𑀪𑀭𑀺𑀬𑀸𑀅𑀗𑁆𑀕𑀚𑀻𑀯𑁂 𑀘𑀚𑀺𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀭𑀫𑀺𑀬𑁄 𑀢𑀺𑀤𑀲𑀫𑀦𑀼𑀧𑀫𑁂 𑀩𑁄𑀥𑀺𑀧𑀓𑁆𑀔𑀻𑀬𑀥𑀫𑁆𑀫𑁂,

𑀧𑀢𑁆𑀯𑀸 𑀩𑁄𑀥𑀺𑀁 𑀯𑀺𑀲𑀼𑀤𑁆𑀥𑀁 𑀲𑀓𑀮𑀕𑀼𑀡𑀤𑀤𑀁 𑀲𑁂𑀝𑁆𑀞𑀪𑀽𑀢𑁄 𑀢𑀺𑀮𑁄𑀓𑁂,

𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀢𑀲𑀼𑀪𑀚𑀦𑀢𑀁 𑀤𑀼𑀓𑁆𑀔𑀢𑁄 𑀫𑁄𑀘𑀬𑀺𑀢𑁆𑀣.

𑀦𑀢𑁆𑀯𑀸𑀦𑀸𑀳𑀁 𑀚𑀺𑀦𑀦𑁆𑀢𑀁 𑀲𑀫𑀼𑀧𑀘𑀺𑀢𑀲𑀼𑀪𑀁 𑀲𑀩𑁆𑀩𑀮𑁄𑀓𑁂𑀓𑀩𑀦𑁆𑀥𑀼𑀁,

𑀦𑀸𑀳𑀼 𑀬𑁂𑀦𑀧𑀺 𑀢𑀼𑀮𑁆𑀬𑁄 𑀓𑀼𑀲𑀮𑀫𑀳𑀺𑀫𑀢𑁄 𑀉𑀢𑁆𑀢𑀫𑁄 𑀪𑀽𑀢𑀮𑁄𑀓𑁂 𑀢𑀲𑁆𑀲𑁂𑀯𑀸𑀬𑀁 𑀉𑀯𑀺𑀫𑁆𑀳𑀁 𑀲𑀼𑀯𑀺𑀧𑀼𑀮𑀫𑀫𑀮𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁,

𑀳𑁂𑀢𑀼𑀁 𑀳𑁂𑀢𑁆𑀯𑀸𑀦𑀼𑀭𑀽𑀧𑀁 𑀲𑀼𑀕𑀢𑀕𑀢𑀨𑀮𑀁 𑀪𑀸𑀲𑀢𑁄 𑀫𑁂 𑀲𑀼𑀡𑀸𑀣.

𑀬𑁄𑀕𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀚𑀸𑀢𑁄 𑀬𑁄 𑀦𑀯𑀫𑁂 𑀔𑀡𑁂 𑀲𑀼𑀢𑀥𑀭𑁄 𑀲𑀻𑀮𑁂𑀦 𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑁄 𑀲𑀁𑀲𑀸𑀭𑀁 𑀅𑀬𑀢𑁄 𑀪𑀯𑀓𑁆𑀓𑀬𑀓𑀭𑀁 𑀤𑀺𑀲𑁆𑀯𑀸 𑀲𑀺𑀯𑀁 𑀔𑁂𑀫𑀢𑁄,

𑀢𑀁 𑀲𑀫𑁆𑀧𑀸𑀧𑀓𑀫𑀕𑁆𑀕𑀤𑁂𑀲𑀓𑀫𑀼𑀦𑀺𑀁 𑀲𑀫𑁆𑀧𑀽𑀚𑀬𑀦𑁆𑀢𑁄 𑀢𑀢𑁄 𑀉𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀤𑀺𑀓𑀫𑀢𑁄 𑀲𑀫𑁆𑀧𑀸𑀤𑀬𑁂 𑀢𑀁 𑀲𑀺𑀯𑀁.

𑀩𑀼𑀤𑁆𑀥𑁄𑀢𑀺 𑀓𑁄 𑀩𑀼𑀤𑁆𑀥𑀕𑀼𑀡𑁄 𑀢𑀺 𑀓𑁄 𑀲𑁄,

𑀅𑀘𑀺𑀦𑁆𑀢𑀬𑀸𑀤𑀺𑀢𑁆𑀢𑀫𑀼𑀧𑀸𑀕𑀢𑁄 𑀬𑁄;

𑀅𑀓𑀸𑀲𑀺 𑀓𑀺𑀁 𑀲𑁄 𑀓𑀺𑀫𑀯𑁄𑀘 𑀩𑀼𑀤𑁆𑀥𑁄.

𑀯𑀺𑀲𑀼𑀤𑁆𑀥𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄𑀢𑀺 𑀦𑀺𑀬𑀫𑁄 𑀓𑀢𑁄,

𑀔𑀦𑁆𑀥𑀲𑀦𑁆𑀢𑀸𑀦𑀲𑀼𑀤𑁆𑀥𑀻 𑀢𑀼 𑀕𑀼𑀡𑁄𑀢𑀺 𑀦𑀺𑀬𑀫𑁄 𑀓𑀢𑁄.

𑀅𑀓𑀸𑀲𑀺 𑀓𑀺𑀘𑁆𑀘𑀸𑀦𑀺 𑀤𑀺𑀦𑁂𑀲𑀼 𑀧𑀜𑁆𑀘,

𑀧𑀲𑀸𑀤𑀬𑀜𑁆𑀘𑀺𑀤𑁆𑀥𑀺𑀩𑀮𑁂𑀦 𑀲𑁂𑀦;

𑀜𑀢𑁆𑀯𑀸𑀦𑀯𑁄𑀘𑀸𑀦𑀼𑀲𑀬𑀧𑁆𑀧𑀳𑀸𑀦𑀁.

𑀅𑀦𑀜𑁆𑀜𑀲𑀸𑀥𑀸𑀭𑀡𑀤𑀻𑀧𑀦𑀻𑀕𑀸𑀣𑀸

𑀅𑀩𑁆𑀪𑀼𑀕𑁆𑀕𑀢𑀸 𑀬𑀲𑁆𑀲 𑀕𑀼𑀡𑀸 𑀅𑀦𑀦𑁆𑀢𑀸,

𑀢𑀺𑀩𑀼𑀤𑁆𑀥𑀔𑁂𑀢𑁆𑀢𑁂𑀓𑀤𑀺𑀯𑀸𑀓𑀭𑁄𑀢𑀺;

𑀚𑀸𑀦𑀸𑀢𑀺 𑀲𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘,

𑀩𑁆𑀬𑀢𑀻𑀢𑀫𑀧𑁆𑀧𑀢𑁆𑀢𑀓𑀫𑀢𑁆𑀭𑀪𑀽𑀢𑀁.

𑀅𑀦𑀦𑁆𑀢𑀲𑀢𑁆𑀢𑁂𑀲𑀼 𑀘 𑀮𑁄𑀓𑀥𑀸𑀢𑀼𑀲𑀼,

𑀤𑀺𑀲𑀸𑀲𑀼 𑀧𑀼𑀩𑁆𑀩𑀸𑀤𑀺𑀲𑀼 𑀘𑀓𑁆𑀓𑀯𑀸𑀴𑀸,

𑀲𑀳𑀲𑁆𑀲𑀲𑀗𑁆𑀔𑀸𑀬𑀧𑀺 𑀅𑀧𑁆𑀧𑀫𑁂𑀬𑁆𑀬𑀸;

𑀬𑁂 𑀢𑁂𑀲𑀼 𑀤𑁂𑀯𑀸 𑀫𑀦𑀼𑀚𑀸 𑀘 𑀩𑁆𑀭𑀳𑁆𑀫𑀸,

𑀏𑀓𑀢𑁆𑀣 𑀲𑀗𑁆𑀕𑀫𑁆𑀫 𑀳𑀺 𑀫𑀦𑁆𑀢𑀬𑀦𑁆𑀢𑀸.

𑀅𑀦𑀸𑀤𑀺𑀓𑀸𑀮𑀸𑀕𑀢𑀦𑀸𑀫𑀭𑀽𑀧𑀺𑀦𑀁,

𑀬𑀣𑀸𑀲𑀓𑀁 𑀳𑁂𑀢𑀼𑀨𑀮𑀢𑁆𑀢𑀯𑀼𑀢𑁆𑀢𑀺𑀦𑀁;

𑀢𑀩𑁆𑀪𑀸𑀯𑀪𑀸𑀯𑀺𑀢𑁆𑀢𑀫𑀲𑀫𑁆𑀪𑀼𑀡𑀦𑁆𑀢𑀸,

𑀦𑀸𑀦𑀸𑀯𑀺𑀧𑀮𑁆𑀮𑀸𑀲𑀫𑀦𑀼𑀧𑀯𑀺𑀝𑁆𑀞𑀸.

𑀓𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘 𑀨𑀮𑀧𑁆𑀧𑀯𑀢𑁆𑀢𑀺𑀁,

𑀏𑀓𑀢𑁆𑀢𑀦𑀸𑀦𑀢𑁆𑀢𑀦𑀺𑀭𑀻𑀳𑀥𑀫𑁆𑀫𑀢𑀁;

𑀯𑀺𑀜𑁆𑀜𑀢𑁆𑀢𑀺𑀲𑀦𑁆𑀢𑀸𑀦𑀖𑀦𑁂𑀦 𑀙𑀦𑁆𑀦𑀢𑁄,

𑀲𑀺𑀯𑀜𑁆𑀚𑀲𑀁 𑀦𑁄 𑀪𑀡𑀺𑀢𑀼𑀁 𑀲𑀫𑀢𑁆𑀣𑀸.

𑀏𑀓𑁄 𑀯 𑀲𑁄 𑀲𑀦𑁆𑀢𑀺𑀓𑀭𑁄 𑀧𑀪𑀗𑁆𑀓𑀭𑁄,

𑀲𑀗𑁆𑀔𑀸𑀬 𑀜𑁂𑀬𑁆𑀬𑀸𑀦𑀺 𑀅𑀲𑁂𑀲𑀺𑀢𑀸𑀦𑀺;

𑀢𑁂𑀲𑀜𑁆𑀳𑀺 𑀫𑀚𑁆𑀛𑁂 𑀧𑀭𑀫𑀸𑀲𑀫𑁆𑀪𑀻𑀯𑀤𑀁,

𑀲𑀺𑀯𑀜𑁆𑀚𑀲𑀁 𑀤𑀻𑀧𑀬𑀺𑀢𑀼𑀁 𑀲𑀫𑀢𑁆𑀣𑁄.

𑀲𑁄 𑀕𑁄𑀢𑀫𑁄 𑀲𑀓𑁆𑀬𑀲𑀼𑀢𑁄 𑀫𑀼𑀦𑀺𑀦𑁆𑀤𑁄,

𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀧𑀤𑀻𑀧𑀪𑀽𑀢𑁄;

𑀅𑀦𑀦𑁆𑀢𑀲𑀢𑁆𑀢𑁂 𑀪𑀯𑀩𑀦𑁆𑀥𑀦𑀫𑁆𑀳𑀸,

𑀫𑁄𑀘𑁂𑀲𑀺 𑀓𑀸𑀭𑀼𑀜𑁆𑀜𑀨𑀮𑀸𑀦𑀼𑀧𑁂𑀓𑁆𑀔𑀻.

𑀯𑀤𑁂𑀣 𑀢𑀲𑁆𑀲𑀻𑀥 𑀅𑀦𑀧𑁆𑀧𑀓𑀁 𑀕𑀼𑀡𑀁,

𑀦 𑀢𑁂𑀦 𑀢𑀼𑀮𑁆𑀬𑁄 𑀧𑀭𑀫𑁄 𑀘 𑀯𑀺𑀚𑁆𑀚𑀢𑀺;

𑀓𑀺𑀁 𑀢𑀁 𑀕𑀼𑀡𑀁 𑀢𑀁 𑀲𑀤𑀺𑀲𑁂𑀦 𑀤𑀺𑀦𑁆𑀦𑀁,

𑀲𑀬𑀁𑀓𑀢𑀁 𑀓𑀺𑀦𑁆𑀦𑀼 𑀅𑀥𑀺𑀘𑁆𑀘𑀮𑀤𑁆𑀥𑀁.

𑀦𑀸𑀥𑀺𑀘𑁆𑀘𑀮𑀤𑁆𑀥𑀁 𑀦 𑀘 𑀧𑀼𑀩𑁆𑀩𑀩𑀼𑀤𑁆𑀥𑀸,

𑀩𑁆𑀭𑀳𑁆𑀫𑀸𑀤𑀺𑀦𑀁 𑀲𑀫𑁆𑀫𑀼𑀢𑀺𑀬𑀸 𑀩𑀳𑀽𑀦𑀁;

𑀤𑀸𑀦𑀸𑀤𑀺𑀦𑀸 𑀮𑀤𑁆𑀥𑀫𑀺𑀤𑀁 𑀯𑀺𑀧𑀸𑀓𑀁.

𑀇𑀢𑁄 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁,

𑀲𑀢𑀁𑀲𑀳𑀲𑁆𑀲𑀸𑀦𑀥𑀺𑀓𑀸𑀦𑀫𑀢𑁆𑀣𑀓𑁂;

𑀓𑀧𑁆𑀧𑁂 𑀅𑀢𑀻𑀢𑀫𑁆𑀳𑀺 𑀲𑀼𑀫𑁂𑀥𑀢𑀸𑀧𑀲𑁄,

𑀯𑁂𑀳𑀸𑀬𑀲𑀁 𑀕𑀘𑁆𑀙𑀢𑀺 𑀇𑀤𑁆𑀥𑀺𑀬𑀸 𑀢𑀤𑀸.

𑀤𑀺𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄 𑀲𑀲𑀗𑁆𑀖𑁄,

𑀭𑀫𑁆𑀫𑀁 𑀧𑀼𑀭𑀁 𑀬𑀸𑀢𑀺 𑀯𑀺𑀭𑁄𑀘𑀫𑀸𑀦𑁄;

𑀫𑀦𑀼𑀲𑁆𑀲𑀤𑁂𑀯𑁂𑀳𑀺𑀪𑀺𑀧𑀽𑀚𑀺𑀬𑀦𑁆𑀢𑁄,

𑀲𑀳𑀲𑁆𑀲𑀭𑀁𑀲𑀺 𑀯𑀺𑀬 𑀪𑀸𑀡𑀼𑀫𑀸 𑀦𑀪𑁂.

𑀢𑀲𑁆𑀲𑀜𑁆𑀚𑀲𑀁 𑀓𑀸𑀢𑀼𑀩𑀳𑀼𑀲𑁆𑀲𑀳𑀸𑀦𑀁,

𑀩𑀼𑀤𑁆𑀥𑁄𑀢𑀺 𑀲𑀼𑀢𑁆𑀯𑀸 𑀲𑀼𑀫𑀦𑁄 𑀧𑀢𑀻𑀢𑁄;

𑀫𑀫𑀚𑁆𑀚 𑀤𑁂𑀳𑀁 𑀧𑀦𑀺𑀫𑀲𑁆𑀲 𑀤𑀢𑁆𑀯𑀸,

𑀩𑀼𑀤𑁆𑀥𑁄 𑀅𑀳𑀁 𑀳𑁂𑀲𑁆𑀲𑀫𑀦𑀸𑀕𑀢𑁂𑀤𑀺𑀲𑁄.

𑀢𑀲𑁆𑀫𑀺𑀜𑁆𑀚𑀲𑁂 𑀓𑀦𑁆𑀤𑀭𑀢𑀫𑁆𑀳𑀺 𑀧𑀗𑁆𑀓𑁂,

𑀓𑀢𑁆𑀯𑀸𑀦 𑀲𑁂𑀢𑀼𑀁 𑀲𑀬𑀺 𑀲𑁄 𑀲𑀤𑁂𑀳𑀁;

𑀩𑀼𑀤𑁆𑀥𑁄 𑀅𑀬𑀁 𑀕𑀘𑁆𑀙𑀢𑀼 𑀧𑀺𑀝𑁆𑀞𑀺𑀬𑀸 𑀫𑀫𑀁,

𑀩𑁄𑀥𑀺𑀲𑁆𑀲𑀘𑁂 𑀳𑁂𑀲𑁆𑀲𑀢𑀺 𑀫𑁂 𑀅𑀦𑀸𑀕𑀢𑁂.

𑀉𑀲𑁆𑀲𑀻𑀲𑀓𑀁 𑀬𑀸𑀢𑀺 𑀚𑀺𑀦𑁄 𑀳𑀺 𑀢𑀲𑁆𑀲,

𑀅𑀚𑁆𑀛𑀸𑀲𑀬𑁄 𑀲𑀺𑀚𑁆𑀛𑀢𑀺𑀫𑀲𑁆𑀲𑀦𑀸𑀕𑀢𑁂;

𑀜𑀢𑁆𑀯𑀸𑀦 𑀩𑁆𑀬𑀸𑀓𑀸𑀲𑀺 𑀅𑀲𑁂𑀲𑀢𑁄 𑀳𑀺,

𑀩𑀼𑀤𑁆𑀥𑁄 𑀅𑀬𑀁 𑀳𑁂𑀲𑁆𑀲𑀢𑀺𑀦𑀸𑀕𑀢𑁂𑀲𑀼.

𑀲𑀼𑀢𑁆𑀯𑀸𑀦 𑀧𑀢𑁆𑀢𑁄 𑀯 𑀫𑀳𑀸𑀪𑀺𑀲𑁂𑀓𑀁,

𑀮𑀤𑁆𑀥𑀁 𑀯 𑀩𑁄𑀥𑀺𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄;

𑀧𑀽𑀚𑁂𑀢𑁆𑀯𑀸 𑀬𑀸𑀢𑁂 𑀫𑀼𑀦𑀺𑀤𑁂𑀯𑀫𑀸𑀦𑀼𑀲𑁂,

𑀉𑀝𑁆𑀞𑀸𑀬 𑀲𑁄 𑀲𑀫𑁆𑀫𑀲𑀺 𑀧𑀸𑀭𑀫𑀻 𑀤𑀲.

𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀲𑀫𑀢𑀺𑀁𑀲𑀧𑀸𑀭𑀫𑀻,

𑀲𑀺𑀓𑁆𑀔𑀢𑁆𑀢𑀬𑀜𑁆𑀘𑀲𑁆𑀲 𑀚𑀺𑀦𑀲𑁆𑀲 𑀲𑀦𑁆𑀢𑀺𑀓𑁂;

𑀓𑀸𑀢𑀼𑀁 𑀲𑀫𑀢𑁆𑀣𑁄 𑀧𑀺 𑀪𑀯𑀲𑁆𑀲 𑀧𑀸𑀭𑀁,

𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀩𑀮𑀸 𑀪𑀯𑀁 𑀕𑀢𑁄.

𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀓𑁂 𑀲𑁄 𑀚𑀺𑀦𑀯𑀭𑀫𑀢𑀼𑀮𑁂 𑀧𑀽𑀚𑀬𑀺𑀢𑁆𑀯𑀸 𑀅𑀲𑁂𑀲𑀁 𑀩𑀼𑀤𑁆𑀥𑁄 𑀏𑀲𑁄 𑀳𑀺 𑀑𑀲𑁄 𑀪𑀯𑀢𑀺 𑀦𑀺𑀬𑀫𑀢𑁄 𑀩𑁆𑀬𑀸𑀓𑀢𑁄 𑀢𑁂𑀳𑀺 𑀢𑁂𑀳𑀺 𑀢𑁂𑀲𑀁 𑀢𑁂𑀲𑀁 𑀚𑀺𑀦𑀸𑀦𑀁 𑀅𑀘𑀦𑀫𑀦𑀼𑀧𑀫𑀁 𑀧𑀽𑀚𑀬𑀺𑀢𑁆𑀯𑀸 𑀲𑀺𑀭𑁂𑀦,

𑀢𑀁 𑀢𑀁 𑀤𑀼𑀓𑁆𑀔𑀁 𑀲𑀳𑀺𑀢𑁆𑀯𑀸 𑀲𑀓𑀮𑀕𑀼𑀡𑀤𑀤𑀁 𑀧𑀸𑀭𑀫𑀻 𑀧𑀽𑀭𑀬𑀺𑀢𑁆𑀣.

𑀲𑁄 𑀤𑀼𑀓𑁆𑀔𑀔𑀺𑀦𑁆𑀦𑀚𑀦𑀤𑀲𑁆𑀲𑀦𑀤𑀼𑀓𑁆𑀔𑀔𑀺𑀦𑁆𑀦𑁄,

𑀓𑀸𑀭𑀼𑀜𑁆𑀜𑀫𑁂𑀯 𑀚𑀦𑀢𑀸𑀬 𑀅𑀓𑀸𑀲𑀺 𑀦𑀺𑀘𑁆𑀘𑀁;

𑀢𑁂𑀲𑀁 𑀳𑀺 𑀫𑁄𑀘𑀦𑀫𑀼𑀧𑀸𑀬𑀫𑀺𑀤𑀦𑁆𑀢𑀺 𑀜𑀢𑁆𑀯𑀸,

𑀢𑀸𑀤𑀻𑀧𑀭𑀸𑀥𑀫𑀧𑀺 𑀅𑀢𑁆𑀢𑀦𑀺 𑀭𑁄𑀧𑀬𑀻 𑀲𑁄.

𑀤𑀸𑀦𑀸𑀤𑀺𑀦𑁂𑀓𑀯𑀭𑀧𑀸𑀭𑀫𑀺𑀲𑀸𑀕𑀭𑁂𑀲𑀼,

𑀑𑀕𑀸𑀴𑁆𑀳𑀢𑀸𑀬𑀧𑀺 𑀧𑀤𑀼𑀝𑁆𑀞𑀚𑀦𑁂𑀦 𑀤𑀺𑀦𑁆𑀦𑀁;

𑀤𑀼𑀓𑁆𑀔𑀁 𑀢𑀣𑀸 𑀅𑀢𑀺𑀫𑀳𑀦𑁆𑀢𑀢𑀭𑀫𑁆𑀧𑀺 𑀓𑀺𑀜𑁆𑀘𑀺,

𑀦𑀸𑀜𑁆𑀜𑀸𑀲𑀺 𑀲𑀢𑁆𑀢𑀳𑀺𑀢𑀫𑁂𑀯𑁂𑀅 𑀕𑀯𑁂𑀲𑀬𑀦𑁆𑀢𑁄.

𑀙𑁂𑀢𑁆𑀯𑀸𑀦 𑀲𑀻𑀲𑀁 𑀳𑀺 𑀲𑀓𑀁 𑀤𑀤𑀦𑁆𑀢𑁄,

𑀫𑀁𑀲𑀁 𑀧𑀘𑀺𑀢𑁆𑀯𑀸𑀦 𑀲𑀓𑀁 𑀤𑀤𑀦𑁆𑀢𑁄;

𑀲𑁄 𑀘𑀢𑁆𑀢𑀕𑀢𑁆𑀢𑁄 𑀧𑀡𑀺𑀥𑀸𑀦𑀓𑀸𑀮𑁂,

𑀤𑀼𑀝𑁆𑀞𑀲𑁆𑀲 𑀓𑀺𑀁 𑀤𑀼𑀲𑁆𑀲𑀢𑀺 𑀙𑁂𑀤𑀦𑁂𑀦.

𑀏𑀯𑀁 𑀅𑀦𑀦𑁆𑀢𑀫𑀧𑀺 𑀚𑀸𑀢𑀺𑀲𑀢𑁂𑀲𑀼 𑀤𑀼𑀓𑁆𑀔𑀁,

𑀧𑀢𑁆𑀯𑀸𑀦 𑀲𑀢𑁆𑀢𑀳𑀺𑀢𑀫𑁂𑀯 𑀕𑀯𑁂𑀲𑀬𑀦𑁆𑀢𑁄;

𑀤𑀻𑀧𑀗𑁆𑀓𑀭𑁂 𑀕𑀳𑀺𑀢𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀁,

𑀧𑀸𑀮𑁂𑀲𑀺 𑀬𑀸𑀯 𑀲𑀓𑀩𑁄𑀥𑀺𑀢𑀮𑁂 𑀲𑀼𑀦𑀺𑀝𑁆𑀞𑁄.

𑀬𑀤𑀸 𑀘 𑀫𑀤𑁆𑀤𑀺𑀁 𑀅𑀤𑀤𑀸 𑀲𑀺𑀯𑀺𑀦𑁆𑀤𑁄;

𑀏𑀢𑁆𑀣𑀦𑁆𑀢𑀭𑁂 𑀚𑀸𑀢𑀺𑀲𑀼 𑀓𑀺𑀜𑁆𑀘𑀺𑀧𑁂𑀓𑀁,

𑀦𑀺𑀭𑀢𑁆𑀣𑀓𑀁 𑀦𑁄 𑀅𑀕𑀫𑀸𑀲𑀺 𑀢𑀲𑁆𑀲.

𑀫𑀳𑀸𑀲𑀫𑀼𑀤𑁆𑀤𑁂 𑀚𑀮𑀩𑀺𑀦𑁆𑀤𑀼𑀢𑁄𑀧𑀺,

𑀢𑀤𑀦𑁆𑀢𑁆𑀭𑁂 𑀚𑀸𑀢𑀺 𑀅𑀦𑀧𑁆𑀧𑀓𑀸 𑀯;

𑀦𑀺𑀭𑀦𑁆𑀢𑀭𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀁,

𑀓𑀣𑀁 𑀧𑀫𑀸𑀡𑀁 𑀉𑀧𑀫𑀸 𑀓𑀼𑀳𑀺𑀁 𑀯𑀸.

𑀬𑁄 𑀫𑀕𑁆𑀕𑀧𑀲𑁆𑀲𑁂 𑀫𑀥𑀼𑀭𑀫𑁆𑀩𑀩𑀻𑀚𑀁,

𑀭𑁄𑀧𑁂𑀲𑀺 𑀢𑀲𑁆𑀫𑀺𑀁 𑀳𑀺 𑀔𑀡𑁂𑀯 𑀢𑁂𑀦,

𑀙𑀸𑀬𑀸𑀨𑀮𑁂 𑀧𑀼𑀜𑁆𑀜𑀫𑀮𑀤𑁆𑀥𑀫𑀼𑀤𑁆𑀥𑀁.

𑀳𑀺𑀢𑀸𑀬 𑀅𑀢𑁆𑀢𑀦𑀫𑀪𑀺𑀭𑁄𑀧𑀺𑀢𑀓𑁆𑀔𑀡𑁂;

𑀲𑀺𑀤𑁆𑀥𑀁 𑀯 𑀧𑀼𑀜𑁆𑀜𑀽𑀧𑀭𑀺 𑀢𑀲𑁆𑀲 𑀢𑀲𑁆𑀫𑀺𑀁,

𑀥𑀦𑀗𑁆𑀕𑀚𑀻𑀯𑀁 𑀧𑀺 𑀳𑀭𑀦𑁆𑀢𑀺 𑀬𑁂 𑀬𑁂.

𑀲𑁄 𑀲𑀸𑀕𑀭𑁂 𑀚𑀮𑀥𑀺𑀓𑀁 𑀭𑀼𑀳𑀺𑀭𑀁 𑀅𑀤𑀸𑀲𑀺,

𑀪𑀽𑀫𑀸𑀧𑀭𑀸𑀚𑀺𑀬 𑀲𑀫𑀁𑀲𑀫𑀤𑀸𑀲𑀺 𑀤𑀸𑀦𑀁;

𑀫𑁂𑀭𑀼𑀧𑁆𑀧𑀫𑀸𑀡𑀫𑀥𑀺𑀓𑀜𑁆𑀘 𑀲𑀫𑁄𑀴𑀺𑀲𑀻𑀲𑀁,

𑀔𑁂 𑀢𑀸𑀭𑀓𑀸𑀥𑀺𑀓𑀢𑀭𑀁 𑀦𑀬𑀦𑀁 𑀅𑀤𑀸𑀲𑀺.

𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀕𑀫𑁆𑀪𑀻𑀭𑀧𑀸𑀦𑀤𑀸𑀦𑀸𑀤𑀺𑀲𑀸𑀕𑀭𑁂𑀲𑀼 𑀳𑀺 𑀣𑀸𑀫𑀲𑀸;

𑀢𑀭𑀦𑁆𑀢𑁄 𑀫𑀤𑁆𑀤𑀺𑀤𑀸𑀦𑁂𑀦 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀧𑀸𑀭𑀫𑀻.

𑀯𑀲𑀦𑁆𑀢𑁄 𑀢𑀼𑀲𑀻𑀢𑁂 𑀓𑀸𑀬𑁂 𑀩𑁄𑀥𑀺𑀧𑀭𑀺𑀧𑀸𑀓𑀫𑀸𑀕𑀫𑁆𑀫;

𑀆𑀬𑀸𑀘𑀦𑀸𑀬 𑀘 𑀤𑁂𑀯𑀸𑀦𑀁 𑀫𑀸𑀢𑀼𑀕𑀩𑁆𑀪𑀫𑀼𑀧𑀸𑀕𑀫𑀺.

𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀘 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀑𑀓𑁆𑀓𑀫𑀺;

𑀢𑀲𑁆𑀲 𑀑𑀓𑁆𑀓𑀦𑁆𑀢𑀺𑀬𑀁 𑀲𑀩𑁆𑀩𑀸 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀺𑀢𑁆𑀣.

𑀢𑀢𑁄 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀸𑀦𑀺 𑀢𑀤𑀸 𑀲𑀺𑀬𑀼𑀁;

𑀢𑀼𑀝𑁆𑀞𑀳𑀝𑁆𑀞𑀸 𑀯 𑀲𑀸 𑀫𑀸𑀢𑀸 𑀧𑀼𑀢𑁆𑀢𑀁 𑀧𑀲𑁆𑀲𑀢𑀺 𑀓𑀼𑀘𑁆𑀙𑀺𑀬𑀁.

𑀯𑀺𑀚𑀸𑀬𑀦𑀫𑀗𑁆𑀕𑀮𑀤𑀻𑀧𑀦𑀻𑀕𑀸𑀣𑀸

𑀲𑀸 𑀧𑀼𑀡𑁆𑀡𑀕𑀩𑁆𑀪𑀸 𑀤𑀲𑀫𑀸𑀲𑀢𑁄 𑀧𑀭𑀁,

𑀕𑀦𑁆𑀢𑁆𑀯𑀸𑀦 𑀨𑀼𑀮𑁆𑀮𑀁 𑀯𑀭𑀮𑀼𑀫𑁆𑀩𑀺𑀦𑀻𑀯𑀦𑀁;

𑀞𑀺𑀢𑀸 𑀕𑀳𑁂𑀢𑁆𑀯𑀸 𑀯𑀭𑀲𑀸𑀮𑀲𑀸𑀔𑀁,

𑀯𑀺𑀚𑀸𑀬𑀺 𑀢𑀁 𑀧𑀼𑀢𑁆𑀢𑀯𑀭𑀁 𑀲𑀼𑀔𑁂𑀦.

𑀢𑀤𑀸 𑀲𑀳𑀲𑁆𑀲𑀻𑀤𑀲𑀮𑁄𑀓𑀥𑀸𑀢𑀼𑀲𑀼,

𑀤𑁂𑀯𑀸 𑀘 𑀦𑀸𑀕𑀸 𑀅𑀲𑀼𑀭𑀸 𑀘 𑀬𑀓𑁆𑀔𑀸;

𑀦𑀸𑀦𑀸𑀤𑀺𑀲𑀸 𑀫𑀗𑁆𑀕𑀮𑀘𑀓𑁆𑀓𑀯𑀸𑀴𑀁,

𑀲𑀼𑀫𑀗𑁆𑀕𑀮𑀁 𑀫𑀗𑁆𑀕𑀮𑀫𑀸𑀕𑀫𑀺𑀁𑀲𑀼.

𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀔𑀚𑁆𑀚𑀺𑀁𑀲𑀼 𑀪𑁂𑀭𑀻 𑀘 𑀦𑀤𑀺𑀁𑀲𑀼 𑀲𑀗𑁆𑀔𑀸.

𑀫𑀮𑁂𑀦𑀓𑁂𑀦𑀸𑀧𑀺 𑀅𑀦𑀽𑀧𑀮𑀺𑀢𑁆𑀢𑁄,

𑀞𑀺𑀢𑁄 𑀯 𑀧𑀸𑀤𑀸𑀦𑀺 𑀧𑀲𑀸𑀭𑀬𑀦𑁆𑀢𑁄;

𑀚𑀸𑀢𑁄 𑀬𑀣𑀸𑀤𑀺𑀘𑁆𑀘𑀯𑀭𑁄 𑀦𑀪𑀫𑁆𑀳𑀸.

𑀔𑀻𑀡𑀸𑀲𑀯𑀸 𑀩𑁆𑀭𑀳𑁆𑀫𑀕𑀡𑁄𑀧𑀕𑀦𑁆𑀢𑁆𑀯𑀸,

𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀳𑁂𑀲𑀼𑀁;

𑀢𑀢𑁄 𑀤𑀼𑀓𑀽𑀮𑁂𑀦 𑀘 𑀢𑀁 𑀫𑀦𑀼𑀲𑁆𑀲𑀸.

𑀢𑁂𑀲𑀁 𑀧𑀺 𑀳𑀢𑁆𑀣𑀸 𑀯𑀭𑀪𑀽𑀫𑀺𑀬𑀁 𑀞𑀺𑀢𑁄,

𑀤𑀺𑀲𑀸 𑀯𑀺𑀮𑁄𑀓𑁂𑀲𑀺 𑀲𑀩𑁆𑀩𑀸 𑀲𑀫𑀦𑁆𑀢𑀢𑁄;

𑀯𑀤𑀺𑀁𑀲𑀼 𑀤𑁂𑀯𑀸 𑀧𑀺 𑀘 𑀩𑁆𑀭𑀳𑁆𑀫𑀓𑀸𑀬𑀺𑀓𑀸,

𑀢𑀬𑀸 𑀲𑀫𑁄 𑀓𑀢𑁆𑀣𑀘𑀺 𑀦𑀢𑁆𑀣𑀺 𑀉𑀢𑁆𑀢𑀭𑁄.

𑀕𑀦𑁆𑀢𑁆𑀯𑀸𑀦 𑀉𑀢𑁆𑀢𑀭𑀁 𑀲𑀢𑁆𑀢 𑀧𑀤𑀯𑀸𑀭𑁂𑀳𑀺 𑀯𑀺𑀓𑁆𑀓𑀫𑁄,

𑀲𑀻𑀳𑀦𑀸𑀤𑀁 𑀦𑀤𑀻 𑀢𑁂𑀲𑀁 𑀤𑁂𑀯𑀢𑀸𑀦𑀁 𑀳𑀺 𑀲𑀸𑀯𑀬𑀁.

𑀢𑀢𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸𑀦 𑀕𑀢𑀸 𑀫𑀸𑀢𑀸 𑀲𑀓𑀗𑁆𑀖𑀭𑀁,

𑀫𑀸𑀢𑀸 𑀲𑀢𑁆𑀢𑀫𑀺𑀬𑀁 𑀕𑀦𑁆𑀢𑁆𑀯𑀸 𑀤𑁂𑀅𑀧𑀼𑀢𑁆𑀢𑀢𑁆𑀢𑀫𑀸𑀕𑀫𑀺.

𑀢𑁂 𑀩𑁆𑀭𑀳𑁆𑀫𑀡𑀸 𑀧𑀜𑁆𑀘𑀫𑀺𑀬𑀁 𑀲𑀼𑀪𑀼𑀢𑁆𑀢𑀸,

𑀦𑀸𑀫𑀁 𑀕𑀳𑁂𑀢𑀼𑀁 𑀯𑀭𑀮𑀓𑁆𑀔𑀡𑀸𑀦𑀺;

𑀤𑀺𑀲𑁆𑀯𑀸𑀦 𑀏𑀓𑀗𑁆𑀕𑀼𑀮𑀺𑀫𑀼𑀓𑁆𑀔𑀺𑀧𑀺𑀁𑀲𑀼,

𑀩𑀼𑀤𑁆𑀥𑁄 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀻𑀢𑀭𑀸𑀕𑁄.

𑀚𑀺𑀡𑁆𑀡𑀜𑁆𑀘 𑀤𑀺𑀲𑁆𑀯𑀸 𑀩𑁆𑀬𑀸𑀥𑀺𑀓𑀁 𑀫𑀢𑀜𑁆𑀘,

𑀅𑀯𑁆𑀳𑀸𑀬𑀺𑀢𑀁 𑀧𑀩𑁆𑀩𑀚𑀺𑀢𑀜𑁆𑀘 𑀤𑀺𑀲𑁆𑀯𑀸;

𑀑𑀳𑀸𑀬 𑀧𑀩𑁆𑀩𑀚𑁆𑀚𑀫𑀼𑀧𑁂𑀢𑀺 𑀓𑀸𑀫𑁂,

𑀩𑀼𑀤𑁆𑀥𑁄 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀻𑀢𑀭𑀸𑀕𑁄.

𑀅𑀕𑀸𑀭𑀺𑀬𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑀓𑀸𑀮𑀓𑁆𑀓𑀫𑁂𑀦 𑀘𑀦𑁆𑀤𑁄 𑀯 𑀯𑀟𑁆𑀠𑀦𑁆𑀢𑁄 𑀯𑀟𑁆𑀠𑀺𑀢𑁂 𑀓𑀼𑀮𑁂,

𑀧𑀼𑀜𑁆𑀜𑁄𑀤𑀬𑁂𑀦𑀼𑀤𑁂𑀦𑁆𑀢𑁄 𑀲𑁄 𑀪𑀸𑀡𑀼𑀫𑀸 𑀯𑀺𑀬 𑀅𑀫𑁆𑀩𑀭𑁂.

𑀲𑀺𑀤𑁆𑀥𑀣𑀓𑁄 𑀳𑀺 𑀲𑀺𑀤𑁆𑀥𑀢𑁆𑀣𑁄 𑀮𑀤𑁆𑀥𑀸 𑀤𑁂𑀯𑀺𑀁 𑀬𑀲𑁄𑀥𑀭𑀁,

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑁂𑀳𑀺 𑀧𑀽𑀭𑀺𑀢𑁆𑀣𑀻𑀳𑀺 𑀧𑀼𑀭𑀓𑁆𑀔𑀺𑀢𑁄.

𑀭𑀫𑁆𑀫𑀲𑀼𑀭𑀫𑁆𑀫𑀲𑀼𑀪𑁂𑀲𑀼 𑀖𑀭𑁂𑀲𑀼,

𑀢𑀺𑀡𑁆𑀡𑀫𑀼𑀢𑀽𑀦𑀫𑀦𑀼𑀘𑁆𑀙𑀯𑀺𑀓𑁂𑀲𑀼;

𑀤𑀺𑀩𑁆𑀩𑀲𑀼𑀔𑀁 𑀯𑀺𑀬 𑀪𑀼𑀜𑁆𑀚𑀺 𑀲𑀼𑀔𑀁 𑀲𑁄,

𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀭𑀸𑀚𑀯𑀺𑀪𑀽𑀢𑀺𑀁.

𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀤𑀻𑀧𑀦𑀻𑀬𑀫𑀓𑀕𑀸𑀣𑀸

𑀦𑀫𑁄 𑀢𑀲𑁆𑀲 𑀬𑀢𑁄 𑀫𑀳𑀺𑀫𑀢𑁄 𑀬𑀲𑁆𑀲 𑀢𑀫𑁄 𑀦

𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀺 𑀫𑀤𑀘𑁆𑀙𑀺𑀤𑀸𑀦𑀺,

𑀣𑀻𑀦𑀁 𑀯𑀺𑀭𑀽𑀧𑀸𑀦𑀺 𑀭𑀢𑀘𑁆𑀙𑀺𑀤𑀸𑀦𑀺;

𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀲𑀼𑀔𑀘𑁆𑀙𑀺𑀤𑀸𑀦𑀺,

𑀮𑀤𑁆𑀥𑀸𑀦𑀺 𑀜𑀸𑀡𑀸𑀦𑀺 𑀪𑀯𑀘𑁆𑀙𑀺𑀤𑀸𑀦𑀺.

𑀧𑀤𑀺𑀢𑁆𑀢𑀕𑁂𑀳𑀸 𑀯𑀺𑀬 𑀪𑁂𑀭𑀯𑀁 𑀭𑀯𑀁,

𑀭𑀯𑀁 𑀲𑀫𑁆𑀫𑀼𑀝𑁆𑀞𑀸𑀬 𑀕𑀢𑁄 𑀫𑀳𑁂𑀲𑀺;

𑀫𑀳𑁂𑀲𑀺𑀫𑁄𑀮𑁄𑀓𑀺𑀬𑀧𑀼𑀢𑁆𑀢𑀫𑀢𑁆𑀢𑀦𑁄,

𑀢𑀦𑁄𑀲𑀺 𑀦𑁄 𑀧𑁂𑀫𑀫𑀳𑁄𑀖𑀫𑀢𑁆𑀢𑀦𑁄.

𑀉𑀫𑁆𑀫𑀸𑀭𑀉𑀫𑁆𑀫𑀸𑀭𑀕𑀢𑀼𑀤𑁆𑀥𑀭𑀺𑀢𑁆𑀯𑀸,

𑀫𑀢𑀻 𑀫𑀢𑀻𑀯𑁂𑀢𑀺𑀫𑀦𑀗𑁆𑀕𑀪𑀗𑁆𑀕𑁂.

𑀉𑀫𑁆𑀫𑀸𑀭𑀉𑀫𑁆𑀫𑀸𑀭𑀕𑀢𑁄 𑀫𑀳𑁂𑀲𑀺,

𑀅𑀦𑀗𑁆𑀕𑀪𑀗𑁆𑀕𑀁 𑀲𑀫𑀘𑀺𑀦𑁆𑀢𑀬𑀺𑀢𑁆𑀣;

𑀓𑀺𑀁 𑀫𑁂 𑀚𑀭𑀸𑀫𑀘𑁆𑀘𑀼𑀫𑀼𑀔𑁂 𑀞𑀺𑀢𑀲𑁆𑀲,

𑀓𑀸𑀫𑁂𑀦 𑀓𑀸𑀫𑁂𑀦 𑀦 𑀲𑀸𑀥𑁆𑀬𑀫𑁄𑀓𑁆𑀔𑀁,

𑀫𑀸𑀦𑁂𑀦 𑀫𑀸𑀦𑁂𑀦 𑀫𑀫𑀢𑁆𑀣𑀺 𑀓𑀺𑀜𑁆𑀘𑀺;

𑀫𑀸𑀭𑁄 𑀲𑀲𑁂𑀦𑁄 𑀳𑀺 𑀅𑀯𑀸𑀭𑀡𑀻𑀬𑁄,

𑀬𑀦𑁆𑀢𑁂𑀦 𑀉𑀘𑁆𑀙𑀼𑀁 𑀯𑀺𑀬 𑀫𑀤𑁆𑀤𑀢𑀻 𑀫𑀁.

𑀤𑀺𑀲𑁆𑀯𑀸𑀦 𑀤𑀺𑀲𑁆𑀯𑀸𑀦 𑀲𑀺𑀯𑀁 𑀫𑀬𑀸 𑀢𑁂,

𑀓𑀸𑀫𑁂𑀦 𑀓𑀸𑀫𑁂𑀦 𑀓𑀣𑀁 𑀯𑀺𑀦𑁂𑀬𑁆𑀬.

𑀯𑀺𑀚𑁆𑀚𑀸𑀯𑀺𑀚𑁆𑀚𑀸𑀬 𑀘𑀼𑀢𑀜𑁆𑀘𑀼𑀧𑁂𑀢𑀁,

𑀯𑀺𑀚𑁆𑀚𑀸𑀬𑀯𑀺𑀚𑁆𑀚𑀸𑀬 𑀬𑀼𑀢𑁄 𑀘𑀼𑀢𑁄𑀳𑀁,

𑀧𑀳𑁄𑀫𑀺 𑀢𑀸𑀭𑁂𑀢𑀼𑀫𑀲𑀗𑁆𑀕𑀳𑁄 𑀕𑀢𑁄.

𑀫𑀕𑁆𑀕𑀦𑁆𑀢𑀺 𑀦𑁄 𑀤𑀺𑀝𑁆𑀞𑀺𑀕𑀢𑀸𑀧𑀯𑀕𑁆𑀕𑀁,

𑀅𑀕𑁆𑀕𑀸 𑀢𑀺 𑀢𑁂𑀯𑀸𑀳𑀼 𑀚𑀦𑀸 𑀲𑀫𑀕𑁆𑀕𑀸;

𑀦𑀕𑁆𑀕𑀁 𑀅𑀳𑁄 𑀫𑁄𑀳𑀢𑀫𑀲𑁆𑀲 𑀯𑀕𑁆𑀕𑀁,

𑀯𑀕𑁆𑀕𑀁 𑀳𑀦𑀺𑀲𑁆𑀲𑀸𑀫𑀺 𑀢𑀫𑀕𑁆𑀕𑀫𑀕𑁆𑀕𑀸.

𑀧𑀲𑁂𑀬𑁆𑀳𑀓𑀸𑀭𑁂𑀦 𑀅𑀲𑁂𑀬𑁆𑀳𑀤𑀼𑀓𑁆𑀔𑀁,

𑀧𑀲𑁂𑀬𑁆𑀳𑀓𑀸𑀭𑁂𑀦𑀸 𑀅𑀲𑁂𑀬𑁆𑀳𑀤𑀼𑀓𑁆𑀔𑀁,

𑀧𑀸𑀧𑀁 𑀦 𑀚𑀸𑀦𑀦𑁆𑀢𑀺 𑀢𑀢𑁄 𑀦𑀺𑀤𑀸𑀦𑀁.

𑀢𑀫𑁂𑀯 𑀦𑀸𑀲𑁂𑀦𑁆𑀢𑀺 𑀢𑀢𑁄 𑀲𑀫𑀼𑀝𑁆𑀞𑀺𑀢𑀸;

𑀏𑀓𑀦𑁆𑀢𑀺𑀓𑀁 𑀚𑀸𑀢𑀺 𑀚𑀭𑀸 𑀘 𑀫𑀘𑁆𑀘𑀼,

𑀦𑀺𑀭𑀦𑁆𑀢𑀭𑀁 𑀢𑀁 𑀩𑁆𑀬𑀲𑀦𑀜𑁆𑀘𑀦𑁂𑀓𑀁.

𑀘𑀻𑀭𑀁 𑀓𑀺𑀮𑁂𑀲𑀸𑀦𑀲𑀫𑀼𑀚𑁆𑀚𑀮𑀦𑁆𑀢𑀁,

𑀤𑀺𑀲𑁆𑀯𑀸𑀦 𑀲𑀢𑁆𑀢𑀸𑀦𑀼𑀲𑀬𑀁 𑀲𑀬𑀫𑁆𑀪𑀽;

𑀲𑀸𑀥𑁂𑀫𑀺 𑀩𑁄𑀥𑀺𑀁 𑀯𑀺𑀦𑀬𑀸𑀫𑀺 𑀲𑀢𑁆𑀢𑁂,

𑀧𑀘𑁆𑀙𑀸𑀧𑀺 𑀧𑀲𑁆𑀲𑀸𑀫𑀺 𑀲𑀼𑀢𑀁 𑀲𑀼𑀢𑀦𑁆𑀢𑀁.

𑀢𑀁 𑀤𑀺𑀩𑁆𑀩𑀘𑀓𑁆𑀓𑀁 𑀔𑀼𑀭𑀘𑀓𑁆𑀓𑀫𑀸𑀮𑀁,

𑀭𑀚𑁆𑀚𑀁 𑀲𑀲𑀸𑀭𑀚𑁆𑀚𑀲𑀫𑀚𑁆𑀚𑀫𑀚𑁆𑀚𑀁;

𑀢𑁂 𑀩𑀦𑁆𑀥𑀯𑀸 𑀩𑀦𑁆𑀥𑀦𑀫𑀸𑀕𑀢𑀸 𑀧𑀭𑁂,

𑀲𑀫𑀼𑀚𑁆𑀚𑀮𑀦𑁆𑀢𑀁 𑀯𑀲𑀢𑀻 𑀲𑀢𑀻𑀲𑀺𑀭𑀻,

𑀲𑀺𑀭𑀻𑀲𑀧𑀸𑀕𑀸𑀭𑀫𑀺𑀤𑀁 𑀫𑀳𑀸𑀯𑀺𑀲𑀁;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀼𑀯𑀢𑀻 𑀯𑀢𑀻𑀫𑀸,

𑀲𑀓𑀡𑁆𑀝𑀓𑀸𑀬𑁂𑀯 𑀲𑀫𑀜𑁆𑀚𑀲𑀜𑁆𑀚𑀲𑁂.

𑀬𑀲𑁆𑀲𑀸 𑀯𑀺𑀭𑀸𑀚𑀺𑀢𑀲𑀺𑀭𑀻 𑀲𑀺𑀭𑀺𑀬𑀸𑀧𑀺 𑀦𑀢𑁆𑀣𑀺,

𑀢𑀲𑁆𑀲𑀸𑀯𑀮𑁄𑀓𑀺𑀬 𑀦 𑀢𑀺𑀢𑁆𑀢𑀺𑀯𑀲𑀸𑀦𑀫𑀢𑁆𑀣𑀺;

𑀕𑀘𑁆𑀙𑀸𑀫𑀺 𑀳𑀦𑁆𑀤 𑀢𑀯𑀦𑀗𑁆𑀕 𑀲𑀺𑀭𑀧𑁆𑀧𑀪𑁂𑀤𑀁,

𑀫𑀢𑁆𑀢𑁂𑀪𑀓𑀼𑀫𑁆𑀪𑀼𑀧𑀭𑀺 𑀲𑀻𑀳𑀯𑀺𑀮𑀸𑀲𑀕𑀸𑀫𑀺𑀁.

𑀪𑁄 𑀪𑁄 𑀅𑀦𑀗𑁆𑀕𑀲𑀼𑀘𑀺𑀭 𑀧𑀺 𑀧𑀦𑀼𑀡𑁆𑀡𑀩𑀸𑀡,

𑀩𑀸𑀡𑀸𑀦𑀺 𑀲𑀁𑀳𑀭 𑀧𑀦𑀼𑀡𑁆𑀡𑀫𑀺𑀢𑁄 𑀦𑀺𑀭𑁄𑀥;

𑀭𑁄𑀥𑁂𑀦 𑀘𑀸𑀧𑀤𑀕𑀢𑁄 𑀫𑀦𑀲𑁄 𑀦 𑀲𑁄𑀘,

𑀲𑁄𑀘𑀁 𑀢𑀯𑀧𑁆𑀧𑀦𑀯𑀮𑁄𑀓𑀺𑀬 𑀬𑀸𑀫𑀺 𑀲𑀦𑁆𑀢𑀺𑀁.

𑀭𑀢𑀻 𑀭𑀢𑀻 𑀓𑀸𑀫𑀕𑀼𑀡𑁂 𑀯𑀺𑀯𑁂𑀓𑁂,

𑀅𑀮𑀁 𑀅𑀮𑀦𑁆𑀢𑁂𑀯 𑀯𑀺𑀘𑀺𑀦𑁆𑀢𑀬𑀦𑁆𑀢𑁄;

𑀫𑀦𑀁 𑀫𑀦𑀗𑁆𑀕𑀸𑀮𑀬𑀲𑀫𑁆𑀧𑀤𑀸𑀮𑀬𑀁,

𑀢𑀳𑀺𑀁 𑀢𑀳𑀺𑀁 𑀤𑀺𑀝𑁆𑀞𑀩𑀸𑀮𑀸 𑀯 𑀧𑀓𑁆𑀓𑀫𑀺.

𑀧𑀸𑀤𑀼𑀤𑁆𑀥𑀸𑀭𑀯𑀺𑀫𑁆𑀳𑀬𑀤𑀻𑀧𑀦𑀻𑀕𑀸𑀣𑀸

𑀬𑀸𑀯𑀜𑁆𑀘𑀬𑀁 𑀭𑀯𑀺 𑀘𑀭𑀢𑁆𑀬𑀘𑀮𑁂𑀦 𑀭𑀼𑀤𑁆𑀥𑁂,

𑀬𑀸𑀯𑀜𑁆𑀘 𑀘𑀓𑁆𑀓𑀭𑀢𑀦𑀜𑁆𑀘 𑀧𑀬𑀸𑀢𑀺 𑀮𑁄𑀓𑁂;

𑀢𑀸𑀯𑀺𑀲𑁆𑀲𑀭𑁄 𑀦𑀪𑀘𑀭𑁄 𑀚𑀺𑀢𑀘𑀸𑀢𑀼𑀭𑀦𑁆𑀢𑁄,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀤𑀻𑀧𑁂 𑀫𑀳𑀸 𑀘 𑀘𑀢𑀼𑀭𑀸𑀥𑀺𑀓𑀤𑁆𑀯𑁂𑀲𑀳𑀲𑁆𑀲𑁂,

𑀢𑀢𑁆𑀭𑀸𑀧𑀺 𑀲𑁂𑀝𑁆𑀞𑀪𑀚𑀺𑀢𑀁 𑀯𑀭𑀚𑀫𑁆𑀩𑀼𑀤𑀻𑀧𑀁;

𑀪𑀽𑀦𑀸𑀪𑀺𑀓𑀁 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀲𑀼𑀭𑀫𑁆𑀫𑀁,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀜𑀸𑀢𑀻𑀦𑀲𑀻𑀢𑀺 𑀓𑀼𑀮𑀢𑁄 𑀳𑀺 𑀲𑀳𑀲𑁆𑀲 𑀲𑀸𑀓𑁆𑀬𑁂,

𑀳𑀢𑁆𑀣𑀺𑀲𑁆𑀲𑀥𑀜𑁆𑀜𑀥𑀦𑀺𑀦𑁄 𑀯𑀺𑀚𑀺𑀢𑀸𑀭𑀺𑀲𑀗𑁆𑀖𑁂;

𑀕𑁄𑀢𑁆𑀢𑁂𑀦 𑀕𑁄𑀢𑀫𑀪𑀯𑀁 𑀧𑀺𑀢𑀭𑀜𑁆𑀚𑀦𑀕𑁆𑀕𑀁,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀭𑀫𑁆𑀫𑀁 𑀲𑀼𑀭𑀫𑁆𑀫𑀯𑀲𑀢𑀺𑀁 𑀭𑀢𑀦𑀼𑀚𑁆𑀚𑀮𑀦𑁆𑀢𑀁,

𑀕𑀺𑀫𑁆𑀳𑁂𑀧𑀺 𑀯𑀺𑀫𑁆𑀳𑀬𑀓𑀭𑀁 𑀲𑀼𑀭𑀫𑀦𑁆𑀤𑀺𑀭𑀸𑀪𑀁;

𑀉𑀲𑁆𑀲𑀸𑀧𑀺𑀢𑀤𑁆𑀥𑀚𑀧𑀝𑀸𑀓𑀲𑀺𑀢𑀸𑀢𑀧𑀢𑁆𑀢𑀁,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀲𑀧𑁄𑀓𑁆𑀔𑀭𑀸 𑀧𑁄𑀓𑁆𑀔𑀭𑀡𑀻 𑀘𑀢𑀲𑁆𑀲𑁄,

𑀲𑀼𑀧𑀼𑀧𑁆𑀨𑀺𑀢𑀸 𑀫𑀦𑁆𑀤𑀺𑀭𑀢𑁄 𑀲𑀫𑀦𑁆𑀢𑀸;

𑀓𑁄𑀓𑀸 𑀦𑀤𑀦𑁆𑀢𑀽𑀧𑀭𑀺 𑀓𑁄𑀓𑀦𑀸𑀤𑁂,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀲𑀭𑁂 𑀲𑀭𑁄𑀚𑁂 𑀭𑀼𑀤𑀺𑀢𑀸𑀴𑀺𑀧𑀸𑀴𑀺,

𑀲𑀫𑀦𑁆𑀢𑀢𑁄 𑀧𑀲𑁆𑀲𑀢𑀺 𑀧𑀜𑁆𑀚𑀭𑀜𑁆𑀚𑀲𑀸;

𑀤𑀺𑀲𑁆𑀯𑀸𑀭𑀯𑀺𑀦𑁆𑀤𑀸𑀦𑀺 𑀫𑀼𑀔𑀸𑀭𑀯𑀺𑀦𑁆𑀤𑀁

𑀦𑀸𑀣𑀲𑁆𑀲 𑀮𑀚𑁆𑀚𑀸 𑀯𑀺𑀬 𑀲𑀁𑀓𑀼𑀚𑀦𑁆𑀢𑀺.

𑀘𑀭𑀺𑀢𑀸 𑀧𑀤𑀼𑀫𑁂 𑀧𑀤𑀼𑀫𑁂𑀴𑀺𑀕𑀡𑀸;

𑀅𑀓𑀭𑀼𑀁 𑀚𑀳𑀺𑀢𑀁 𑀓𑀺𑀫𑀺𑀤𑀁 𑀧𑀢𑀺𑀦𑀸.

𑀢𑀫𑁆𑀳𑀸 𑀭𑀲𑀁 𑀫𑀥𑀼𑀓𑀭𑀸 𑀪𑀯𑀦𑀁 𑀳𑀭𑀺𑀢𑁆𑀯𑀸,

𑀦𑀺𑀦𑁆𑀦𑀸𑀤𑀺𑀦𑁄 𑀲𑀫𑀥𑀼𑀭𑀁 𑀫𑀥𑀼𑀭𑀁 𑀓𑀭𑁄𑀦𑁆𑀢𑀺;

𑀦𑀸𑀤𑁂𑀦 𑀦𑀸𑀤𑀫𑀢𑀺𑀭𑀺𑀘𑁆𑀘𑀼𑀧𑀯𑀻𑀡𑀬𑀦𑁆𑀢𑀺,

𑀦𑀘𑁆𑀘𑀦𑁆𑀢𑀺 𑀢𑀸 𑀲𑀼𑀭𑀧𑀼𑀭𑁂 𑀯𑀡𑀺𑀢𑀸 𑀯 𑀢𑀸𑀯.

𑀲𑀜𑁆𑀘𑁄𑀤𑀺𑀢𑀸 𑀧𑀻𑀡𑀧𑀬𑁄𑀥𑀭𑀸𑀥𑀭𑀸,

𑀯𑀺𑀭𑀸𑀚𑀺𑀢𑀸𑀦𑀗𑁆𑀕𑀚𑀫𑁂𑀔𑀮𑀸𑀔𑀮𑀸;

𑀲𑀼𑀭𑀗𑁆𑀕𑀡𑀸 𑀯𑀗𑁆𑀕𑀚𑀨𑀲𑁆𑀲𑀤𑀸 𑀲𑀤𑀸,

𑀭𑀫𑀸 𑀭𑀫𑀸𑀧𑁂𑀦𑁆𑀢𑀺 𑀯𑀭𑀗𑁆𑀕𑀤𑀸𑀕𑀤𑀸.

𑀓𑀭𑀸𑀢𑀺𑀭𑀢𑁆𑀢𑀸 𑀭𑀢𑀺𑀭𑀢𑁆𑀢𑀭𑀸𑀫𑀸,

𑀢𑀸𑀴𑁂𑀦𑁆𑀢𑀺 𑀢𑀸𑀴𑀸𑀯𑀘𑀭𑁂 𑀲𑀫𑀦𑁆𑀢𑀸;

𑀦𑀘𑁆𑀘𑀼𑀕𑁆𑀕𑀢𑀸𑀦𑁂𑀓𑀲𑀳𑀲𑁆𑀲𑀳𑀢𑁆𑀣𑀸,

𑀲𑀓𑁆𑀓𑁄𑀧𑀺 𑀓𑀺𑀁 𑀲𑀓𑁆𑀬𑀲𑀫𑁄𑀢𑀺 𑀘𑁄𑀤𑀬𑀼𑀁.

𑀯𑀺𑀲𑀸𑀮𑀦𑁂𑀢𑁆𑀢𑀸 𑀳𑀲𑀼𑀮𑀸 𑀲𑀼𑀫𑀚𑁆𑀛𑀸,

𑀦𑀺𑀫𑁆𑀩𑀢𑁆𑀣𑀦𑀻 𑀯𑀺𑀫𑁆𑀳𑀬𑀕𑀻𑀢𑀲𑀤𑁆𑀤𑀸;

𑀅𑀮𑀗𑁆𑀓𑀢𑀸 𑀫𑀮𑁆𑀮𑀥𑀭𑀸 𑀲𑀼𑀯𑀢𑁆𑀣𑀸,

𑀦𑀘𑁆𑀘𑀦𑁆𑀢𑀺 𑀢𑀸𑀴𑀸𑀯𑀘𑀭𑁂𑀳𑀺 𑀖𑀼𑀝𑁆𑀞𑀸.

𑀬𑀸𑀲𑀁 𑀳𑀺 𑀮𑁄𑀓𑁂 𑀉𑀧𑀫𑀸 𑀦𑀢𑁆𑀣𑀺,

𑀢𑀸𑀲𑀁 𑀳𑀺 𑀨𑀲𑁆𑀲𑁂𑀲𑀼 𑀓𑀣𑀸𑀯𑀓𑀸𑀲𑀸;

𑀢𑀁 𑀢𑀸𑀤𑀺𑀲𑀁 𑀓𑀸𑀫𑀭𑀢𑀺𑀁𑀦𑀼𑀪𑁄𑀦𑁆𑀢𑁄,

𑀳𑀺𑀢𑁆𑀯𑀸 𑀓𑀣𑀁 𑀦𑀼 𑀧𑀤𑀫𑀼𑀤𑁆𑀥𑀭𑀺 𑀲𑁄 𑀦𑀺𑀭𑀸𑀲𑁄.

𑀧𑀸𑀤𑁂𑀧𑀸𑀤𑁂 𑀯𑀮𑀬𑀯𑀺𑀭𑀯𑀸𑀫𑁂𑀔𑀮𑀸𑀯𑀻𑀡𑀸𑀦𑀸𑀤𑀸,

𑀕𑀻𑀢𑀁𑀕𑀻𑀢𑀁 𑀧𑀢𑀺𑀭𑀢𑀺𑀓𑀭𑀁 𑀕𑀸𑀬𑀢𑀻 𑀕𑀸𑀬𑀢𑀻 𑀲𑀸;

𑀳𑀢𑁆𑀣𑁂𑀳𑀢𑁆𑀣𑁂 𑀯𑀮𑀬𑀘𑀮𑀺𑀢𑀸 𑀲𑀫𑁆𑀪𑀫𑀁 𑀲𑀫𑁆𑀪𑀫𑀦𑁆𑀢𑀺,

𑀤𑀺𑀲𑁆𑀯𑀸𑀤𑀺𑀲𑁆𑀯𑀸 𑀇𑀢𑀺 𑀭𑀢𑀺𑀓𑀭𑀁 𑀬𑀸𑀢𑀺 𑀳𑀸𑀳𑀸 𑀓𑀺𑀫𑀻𑀳𑀸.

𑀅𑀧𑀼𑀦𑀭𑀸𑀯𑀢𑁆𑀢𑀺𑀕𑀫𑀦𑀤𑀻𑀧𑀦𑀻𑀬𑀫𑀓𑀕𑀸𑀣𑀸

𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀯𑀺𑀫𑀸𑀦𑀬𑀸𑀦𑁂;

𑀢𑀲𑁆𑀫𑀺𑀁 𑀤𑀺𑀦𑁂 𑀚𑀸𑀢𑀲𑀼𑀢𑀁 𑀧𑀚𑀸𑀧𑀢𑀺𑀁,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀢𑀁 𑀚𑀻𑀯𑀫𑀸𑀦𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁,

𑀢𑁂 𑀜𑀸𑀢𑀓𑁂 𑀢𑀸𑀤𑀺𑀲𑀺𑀬𑁄 𑀘 𑀇𑀢𑁆𑀣𑀺𑀬𑁄;

𑀢𑁂 𑀢𑀸𑀤𑀺𑀲𑁂 𑀭𑀫𑁆𑀫𑀓𑀭𑁂 𑀦𑀺𑀓𑁂𑀢𑁂,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀔𑁄𑀫𑀜𑁆𑀘 𑀧𑀢𑁆𑀢𑀼𑀡𑁆𑀡𑀤𑀼𑀓𑀽𑀮𑀘𑀻𑀦𑀁,

𑀲𑀓𑀸𑀲𑀺𑀓𑀁 𑀲𑀸𑀥𑀼𑀲𑀼𑀕𑀦𑁆𑀥𑀯𑀸𑀲𑀺𑀢𑀁;

𑀦𑀺𑀯𑀸𑀲𑀺𑀢𑁄 𑀲𑁄𑀪𑀢𑀺 𑀯𑀸𑀲𑀯𑁄 𑀯,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀯𑀺𑀥𑀺𑀧𑁆𑀧𑀓𑀸𑀲𑀸 𑀦𑀺𑀥𑀺𑀬𑁄 𑀘𑀢𑀲𑁆𑀲𑁄,

𑀲𑀫𑀼𑀕𑁆𑀕𑀢𑀸 𑀪𑀽𑀢𑀥𑀭𑀸 𑀯𑀲𑀼𑀦𑁆𑀥𑀭𑀸;

𑀲𑀢𑁆𑀢𑀸𑀯𑀲𑀢𑁆𑀢𑀸𑀯𑀲𑀼𑀥𑀸 𑀲𑀼𑀥𑀸𑀲𑀸,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀲𑀼𑀯𑀡𑁆𑀡𑀣𑀸𑀮𑁂 𑀲𑀢𑀭𑀸𑀚𑀺𑀓𑁂 𑀲𑀼𑀪𑁂,

𑀲𑀸𑀥𑀼𑀁 𑀲𑀼𑀕𑀦𑁆𑀥𑀁 𑀲𑀼𑀘𑀺𑀲𑀸𑀮𑀺𑀪𑁄𑀚𑀦𑀁;

𑀪𑀼𑀢𑁆𑀯𑀸 𑀲𑀯𑀸𑀲𑀻𑀳𑀺 𑀯𑀺𑀮𑀸𑀲𑀺𑀦𑀻𑀳𑀺,

𑀳𑀺𑀢𑁆𑀯𑀸 𑀕𑀢 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀫𑀦𑀼𑀜𑁆𑀜𑀕𑀦𑁆𑀥𑁂𑀦 𑀅𑀲𑀼𑀜𑁆𑀜𑀕𑀦𑁆𑀥𑁄,

𑀲𑀼𑀕𑀦𑁆𑀥𑀕𑀦𑁆𑀥𑁂𑀦 𑀯𑀺𑀮𑀺𑀢𑁆𑀢𑀕𑀢𑁆𑀢𑁄;

𑀲𑀼𑀕𑀦𑁆𑀥𑀯𑀸𑀢𑁂𑀦 𑀲𑀼𑀯𑀺𑀚𑁆𑀚𑀺𑀢𑀗𑁆𑀕𑁄,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀲𑀼𑀮𑀓𑁆𑀔𑀡𑁂 𑀳𑁂𑀯𑀪𑀺𑀮𑀓𑁆𑀔𑀺𑀢𑀗𑁆𑀕𑁄,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀦𑀸𑀦𑀸𑀲𑀦𑀸𑀦𑀺 𑀲𑀬𑀦𑀸𑀦𑀺 𑀦𑀺𑀯𑁂𑀲𑀦𑀸𑀦𑀺,

𑀪𑀸𑀪𑀸𑀦𑀺𑀪𑀸𑀦𑀺 𑀭𑀢𑀦𑀸𑀓𑀭𑀲𑀦𑁆𑀦𑀺𑀪𑀸𑀦𑀺;

𑀢𑀢𑁆𑀭𑀼𑀲𑁆𑀲𑀺𑀢𑀸𑀦𑀺 𑀭𑀢𑀦𑀤𑁆𑀥𑀚𑀪𑀽𑀲𑀺𑀢𑀸𑀦𑀺,

𑀳𑀺𑀢𑁆𑀯𑀸 𑀯 𑀢𑀸𑀦𑀺 𑀳𑀺𑀫𑀩𑀺𑀦𑁆𑀤𑀼𑀲𑀫𑀸𑀦𑀺 𑀢𑀸𑀦𑀺.

𑀦𑀸𑀦𑀸𑀯𑀺𑀥𑁂𑀳𑀺 𑀭𑀢𑀦𑁂𑀳𑀺 𑀲𑀫𑀼𑀚𑁆𑀚𑀮𑁂𑀳𑀺,

𑀦𑀸𑀭𑀻𑀳𑀺 𑀦𑀺𑀘𑁆𑀘𑀫𑀼𑀧𑀕𑀸𑀬𑀺𑀢𑀳𑀫𑁆𑀫𑀺𑀬𑁂𑀳𑀺;

𑀭𑀚𑁆𑀚𑁂𑀳𑀺 𑀘𑀓𑁆𑀓𑀭𑀢𑀦𑀸𑀤𑀺𑀯𑀺𑀪𑀽𑀲𑀺𑀢𑁂𑀳𑀺,

𑀬𑀸𑀢𑁄 𑀢𑀢𑁄 𑀳𑀺 𑀫𑀳𑀺𑀢𑁄 𑀧𑀼𑀭𑀺𑀲𑀲𑁆𑀲𑀭𑁂𑀳𑀺.

𑀅𑀦𑀗𑁆𑀕𑀭𑀗𑁆𑀕𑀤𑁆𑀥𑀚𑀪𑀽𑀢𑀫𑀗𑁆𑀕𑀁;

𑀤𑁂𑀯𑀘𑁆𑀙𑀭𑀸𑀯𑀼𑀚𑁆𑀚𑀮𑀺𑀢𑀁 𑀧𑀢𑀺𑀩𑁆𑀩𑀢𑀁,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀯 𑀦𑀽𑀦.

𑀲𑀪𑀸𑀯𑀦𑀺𑀘𑁆𑀙𑀦𑁆𑀤𑀫𑀢𑀺𑀁 𑀧𑀪𑀸𑀯𑀢𑀺𑀁,

𑀪𑀢𑁆𑀢𑁄 𑀓𑀼𑀲𑁄 𑀲𑀁𑀳𑀭𑀺 𑀪𑀢𑁆𑀢𑀓𑀸𑀚𑀁;

𑀢𑀸𑀬𑀸𑀪𑀺𑀭𑀽𑀧𑀁 𑀧𑀺 𑀬𑀲𑁄𑀥𑀭𑀁 𑀯𑀭𑀁,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀯 𑀦𑀽𑀦.

𑀧𑀼𑀭𑁂 𑀧𑀼𑀭𑁂 𑀲𑀜𑁆𑀘𑀭𑀺 𑀔𑀕𑁆𑀕𑀳𑀢𑁆𑀣𑁄,

𑀯𑀭𑀁 𑀧𑀭𑀺𑀢𑁆𑀣𑀻𑀦𑀁 𑀅𑀦𑀺𑀢𑁆𑀣𑀺𑀕𑀦𑁆𑀥𑁄;

𑀲𑀺𑀭𑀺𑀜𑁆𑀘 𑀭𑀺𑀜𑁆𑀘𑀸𑀧𑀺 𑀦 𑀭𑀺𑀜𑁆𑀘𑀺 𑀦𑀸𑀭𑀺𑀁,

𑀳𑀺𑀢𑁆𑀯𑀸𑀦𑀺𑀫𑀦𑁆𑀤𑀸𑀦𑀺 𑀕𑀢𑁄 𑀢𑀣𑀸𑀕𑀢𑁄.

𑀳𑀭𑀺𑀢𑁆𑀢𑀘𑁄 𑀭𑀸𑀕𑀩𑀮𑁂𑀦 𑀤𑁂𑀯𑀺𑀬𑀸,

𑀅𑀯𑀢𑁆𑀣𑀮𑀺𑀗𑁆𑀕𑁂𑀦 𑀦 𑀮𑀺𑀗𑁆𑀕𑀦𑀼𑀲𑁆𑀲𑀭𑀺;

𑀅𑀲𑁂𑀯𑀺 𑀓𑀸𑀫𑀁 𑀢𑀫𑀺𑀤𑀸𑀦𑀺 𑀓𑀸𑀫𑀁,

𑀳𑀺𑀢𑁆𑀯𑀸 𑀕𑀢𑁄 𑀲𑁄 𑀲𑀼𑀕𑀢𑁄 𑀯 𑀦𑀽𑀦.

𑀅𑀧𑀫𑁂𑀬𑁆𑀬𑀓𑀧𑁆𑀧𑁂𑀲𑀼 𑀯𑀺𑀯𑁂𑀓𑀲𑁂𑀯𑀻,

𑀳𑀺𑀢𑁆𑀯𑀸 𑀕𑀢𑁄 𑀭𑀚𑁆𑀚𑀲𑀺𑀭𑀺𑀁 𑀯𑀭𑀺𑀢𑁆𑀣𑀺𑀁;

𑀅𑀡𑀼𑀁 𑀓𑀮𑀺𑀁 𑀯𑀡𑁆𑀡𑀬𑀺 𑀢𑀁 𑀧𑀼𑀭𑀸𑀡𑀁,

𑀯𑀢𑁆𑀣𑀫𑁆𑀳𑀺 𑀙𑀺𑀤𑁆𑀤𑀁 𑀯𑀺𑀬 𑀢𑀼𑀦𑁆𑀦𑀓𑀸𑀭𑁄.

𑀢𑀣𑀸𑀢𑀺 𑀫𑀦𑁆𑀢𑁆𑀯𑀸𑀦 𑀇𑀤𑀸𑀦𑀺𑀦𑀗𑁆𑀕𑁄,

𑀫𑀢𑁆𑀢𑁄 𑀚𑀺𑀢𑁄𑀫𑁆𑀳𑀻 𑀢𑀺 𑀧𑀫𑀢𑁆𑀢𑀩𑀦𑁆𑀥𑀼,

𑀦 𑀧𑀲𑁆𑀲𑀺 𑀜𑀸𑀡𑀸𑀲𑀦𑀺𑀧𑀸𑀢𑀫𑀦𑁆𑀢𑀭𑀁.

𑀤𑀺𑀲𑁆𑀯𑀸𑀦 𑀤𑀼𑀓𑁆𑀔𑀸𑀦𑀮𑀲𑀫𑁆𑀪𑀯𑀁𑀪𑀯𑀁,

𑀓𑀢𑁆𑀯𑀸 𑀢𑀤𑀼𑀧𑁆𑀧𑀸𑀤𑀓𑀦𑀗𑁆𑀕𑀪𑀗𑁆𑀕𑀁;

𑀳𑀺𑀢𑁆𑀯𑀸 𑀕𑀢𑁄 𑀩𑀼𑀤𑁆𑀥𑀩𑀮𑀧𑁆𑀧𑀤𑀁 𑀧𑀤𑀁.

𑀅𑀦𑀦𑁆𑀢𑀲𑀢𑁆𑀢𑀸𑀦𑀫𑀦𑀦𑁆𑀢𑀓𑀸𑀮𑁂,

𑀫𑀦𑀗𑁆𑀕𑀳𑁂𑀢𑁆𑀯𑀸𑀦 𑀚𑀺𑀢𑁄 𑀅𑀦𑀗𑁆𑀕𑁄;

𑀤𑀺𑀲𑁆𑀯𑀸𑀦 𑀜𑀸𑀡𑀸𑀲𑀦𑀺𑀧𑀸𑀢𑀫𑀦𑁆𑀢𑀭𑀁,

𑀤𑀺𑀲𑁆𑀯𑀸𑀦𑀜𑀸𑀡𑀸𑀲𑀦𑀺𑀧𑀸𑀢𑀫𑀦𑁆𑀢𑀭𑀁.

𑀢𑀣𑀸 𑀳𑀺𑀫𑀸𑀭𑁄𑀧𑀺𑀢𑀤𑀸𑀳𑀲𑀦𑁆𑀢𑀺𑀁;

𑀢𑀣𑀸 𑀳𑀺 𑀫𑀸𑀭𑁄 𑀧𑀺 𑀢𑀤𑀸𑀳 𑀲𑀦𑁆𑀢𑀺𑀁,

𑀢𑀣𑀸 𑀳𑀺 𑀫𑀸𑀭𑁄𑀧𑀺 𑀢𑀤𑀸 𑀳𑀲𑀦𑁆𑀢𑀺𑀁.

𑀲𑀓𑀸𑀫𑀤𑀸𑀢𑀸 𑀯𑀺𑀦𑀬𑀸𑀫𑀦𑀦𑁆𑀢𑀕𑀽;

𑀲𑀓𑀸𑀫𑀤𑀸𑀢𑀸 𑀯𑀺𑀦𑀬𑀸𑀫𑀦𑀦𑁆𑀢𑀕𑀽,

𑀲𑀓𑀸𑀫𑀤𑀸𑀢𑀸 𑀯𑀺𑀦𑀬𑀸𑀫𑀦𑀦𑁆𑀢𑀕𑀽.

𑀅𑀩𑁆𑀬𑀸𑀧𑁂𑀢𑀸𑀤𑁆𑀬𑀦𑁆𑀢𑀬𑀫𑀓𑀕𑀸𑀣𑀸

𑀭𑀯𑁂 𑀭𑀯𑁂 𑀲𑀽𑀤𑀺𑀢𑀕𑀸𑀭𑀯𑁂 𑀭𑀯𑁂,

𑀭𑀯𑁂𑀭𑀯𑁂𑀤𑁂𑀲𑀺 𑀚𑀺𑀦𑁄𑀭𑀯𑁂 𑀭𑀯𑁂.

𑀮𑁄𑀓𑀸𑀬𑀸𑀢𑀢𑀬𑀸 𑀓𑀸𑀮𑁄 𑀯𑀺𑀲𑁂𑀲𑀁 𑀦 𑀦 𑀲𑀁𑀲𑁂𑀯𑀺,

𑀯𑀺𑀲𑁂𑀲𑀁 𑀦 𑀦 𑀲𑀁𑀲𑁂𑀯𑀺 𑀮𑁄𑀓𑀸 𑀬𑀸𑀢𑀢𑀬𑀸 𑀓𑀸𑀮𑁄.

𑀭𑀸𑀚𑀭𑀸𑀚𑀬𑀲𑁄𑀧𑁂𑀢𑀯𑀺𑀲𑁂𑀲𑀁 𑀭𑀘𑀺𑀢𑀁 𑀫𑀬𑀸,

𑀬𑀸𑀫𑀢𑀁 𑀘𑀺𑀭𑀲𑀁𑀲𑁂𑀯𑀺𑀢𑀧𑁂𑀲𑁄 𑀬𑀚𑀭𑀸𑀚𑀭𑀸.

𑀆𑀓𑀗𑁆𑀔𑀓𑁆𑀔𑀸𑀓𑀗𑁆𑀔𑀗𑁆𑀕 𑀓𑀗𑁆𑀔𑀸𑀕𑀗𑁆𑀕𑀸𑀔𑀸𑀕𑀳𑀓,

𑀓𑀗𑁆𑀔𑀸𑀕𑀸𑀳𑀓𑀓𑀗𑁆𑀔𑀸𑀖 𑀳𑀸 𑀳𑀸 𑀓𑀗𑁆𑀔𑀸 𑀓𑀳𑀁 𑀓𑀳𑀁.

𑀅𑀧𑁆𑀧𑀕𑀩𑁆𑀪𑁄 𑀅𑀧𑀕𑀩𑁆𑀪𑁄 𑀅𑀫𑁄𑀳𑁄 𑀫𑀸 𑀧𑀫𑁄𑀳𑀓𑁄,

𑀫𑀕𑁆𑀕𑀫𑀼𑀔𑀁 𑀫𑁄𑀔𑀫𑀸𑀳 𑀫𑀸𑀳𑀸 𑀫𑁄𑀳𑀫𑀽𑀳𑀓𑁆𑀔𑀫𑀁.

𑀧𑀸𑀧𑀸𑀧𑀸𑀧𑀪𑀯𑀁 𑀧𑀲𑁆𑀲𑀁 𑀧𑀸𑀧𑀸𑀧𑀪𑀯𑀼𑀕𑁆𑀕𑀢𑁄,

𑀧𑀸𑀧𑀸𑀧𑀸𑀧𑀪𑀯𑀸𑀲𑀗𑁆𑀕𑀸 𑀧𑀸𑀧𑀸𑀧𑀸𑀧𑀪𑀯𑀸𑀕𑀢𑁄.

𑀓𑀼𑀲𑀮𑀸𑀓𑀼𑀲𑀮𑀁 𑀧𑀲𑁆𑀲𑀁 𑀓𑀼𑀲𑀮𑀸𑀓𑀼𑀲𑀮𑀁 𑀘𑀚𑀺,

𑀓𑀼𑀲𑀮𑀸𑀓𑀼𑀲𑀮𑀸𑀲𑀗𑁆𑀕 𑀓𑀼𑀲𑀮𑀸𑀓𑀼𑀲𑀮𑀸 𑀘𑀼𑀢𑁄.

𑀦𑁄𑀦𑀸𑀦𑀺𑀦𑁄 𑀦𑀦𑀽𑀦𑀸𑀦𑀺 𑀦𑀦𑁂𑀦𑀸𑀦𑀺 𑀦𑀦𑀸𑀦𑀺𑀦𑁄,

𑀦𑀼𑀦𑁆𑀦𑀸𑀦𑁂𑀦𑀸𑀦𑀺 𑀦𑀽𑀦 𑀦 𑀦𑀸𑀦𑀦𑀁 𑀦𑀸𑀦𑀦𑁂𑀦 𑀦𑁄.

𑀲𑀸𑀭𑁂 𑀲𑀼𑀭𑀸𑀲𑀼𑀭𑁂 𑀲𑀸𑀭𑀻 𑀭𑀲𑀲𑀸𑀭𑀲𑀭𑀺𑀲𑁆𑀲𑀭𑁄,

𑀭𑀲𑀲𑀸𑀭𑀭𑀲𑁂 𑀲𑀸𑀭𑀺 𑀲𑀼𑀭𑀸𑀲𑀼𑀭𑀲𑀭𑀲𑁆𑀲𑀺𑀭𑁂.

𑀤𑁂𑀯𑀸𑀦𑀁 𑀦𑀦𑁆𑀤𑀦𑁄 𑀤𑁂𑀯𑁄 𑀤𑁂𑀯𑀤𑁂𑀯 𑀦 𑀦𑀦𑁆𑀤𑀺 𑀦𑁄,

𑀯𑁂𑀤𑀤𑀻𑀦𑁂𑀦 𑀯𑁂𑀤𑀦 𑀯𑁂𑀤𑀺 𑀯𑁂𑀤𑀦 𑀯𑁂𑀤𑀺𑀦𑁄.

𑀤𑁂𑀯𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑁄 𑀤𑁂𑀯𑀤𑁂𑀯𑁄 𑀲𑀲𑀸𑀲𑀦𑁂,

𑀦𑀺𑀲𑀺𑀦𑁆𑀦𑀸𑀦𑀁 𑀲𑀤𑁂𑀯𑀸𑀦𑀁 𑀤𑁂𑀲𑁂𑀲𑀺 𑀤𑀲𑁆𑀲𑀦𑀸𑀲𑀦𑀁.

𑀤𑀲𑀦𑀸𑀯𑀕𑀢𑁄 𑀲𑀜𑁆𑀜𑁄 𑀅𑀦𑁆𑀥𑀲𑁆𑀲 𑀢𑀫𑀤𑁄 𑀭𑀯𑀺,

𑀅𑀝𑁆𑀞𑀫𑀸𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀧𑀸𑀢𑁆𑀯𑀦𑀜𑁆𑀜𑀫𑀦𑀜𑁆𑀜𑀺𑀯.

𑀏𑀓𑀦𑁆𑀢𑀫𑁂𑀯 𑀲𑀧𑀭𑀢𑁆𑀣𑀧𑀭𑁄 𑀫𑀳𑁂𑀲𑀺,

𑀏𑀓𑀦𑁆𑀢𑀫𑁂𑀯 𑀤𑀲𑀧𑀸𑀭𑀫𑀺𑀢𑀸𑀩𑀮𑁂𑀦;

𑀏𑀓𑀦𑁆𑀢𑀫𑁂𑀯 𑀳𑀢𑀫𑀸𑀭𑀩𑀮𑁂𑀦 𑀢𑁂𑀦,

𑀏𑀓𑀦𑁆𑀢𑀫𑁂𑀯 𑀲𑀼𑀯𑀺𑀲𑀼𑀤𑁆𑀥𑀫𑀮𑀢𑁆𑀣 𑀩𑁄𑀥𑀺𑀁.

𑀑𑀭𑁄𑀳𑀺𑀢𑁄𑀢𑁄𑀳𑀺𑀢𑀧𑀸𑀧𑀥𑀫𑁆𑀫𑁄,

𑀙𑀦𑁆𑀦𑁂𑀦 𑀲 𑀙𑀦𑁆𑀦𑀳𑀬𑁂𑀦 𑀕𑀦𑁆𑀢𑁆𑀯𑀸;

𑀅𑀦𑁄𑀫𑀢𑀻𑀭𑀫𑁆𑀳𑀺 𑀅𑀦𑁄𑀫𑀲𑀢𑁆𑀢𑁄,

𑀅𑀦𑁄𑀫𑀧𑀩𑁆𑀩𑀚𑁆𑀚𑀫𑀼𑀧𑀸𑀕𑀢𑁄 𑀲𑁄.

𑀦𑀺𑀭𑀸𑀫𑀺𑀲𑀁 𑀧𑀻𑀢𑀺𑀲𑀼𑀔𑀁 𑀅𑀦𑀽𑀧𑀫𑀁,

𑀛𑀸𑀦𑁂𑀦𑀲𑀦𑁆𑀢𑀼𑀝𑁆𑀞𑀫𑀦𑁄 𑀯𑀺𑀳𑀸𑀬;

𑀫𑀳𑀸𑀧𑀥𑀸𑀦𑀸𑀬 𑀉𑀭𑀼𑀯𑁂𑀮𑀪𑀽𑀫𑀺𑀁,

𑀕𑀢𑁄 𑀲𑀺𑀔𑀧𑁆𑀧𑀢𑁆𑀢𑀫𑀓𑀸𑀲𑀺 𑀤𑀼𑀓𑁆𑀓𑀭𑀁.

𑀦 𑀓𑀸𑀫𑀢𑁄 𑀦𑁂𑀯𑀢𑀺𑀤𑀼𑀓𑁆𑀓𑀭𑀫𑁆𑀳𑀺,

𑀲𑀩𑁆𑀩𑀜𑁆𑀜𑀼𑀢𑀸 𑀲𑀺𑀚𑁆𑀛𑀢𑀺 𑀫𑀚𑁆𑀛𑀺𑀫𑀸𑀬;

𑀜𑀢𑁆𑀯𑀸𑀦 𑀢𑀁 𑀧𑀼𑀩𑁆𑀩𑀕𑀼𑀡𑁄𑀧𑀮𑀤𑁆𑀥𑀁,

𑀥𑀫𑁆𑀫𑀁 𑀲𑀫𑀸𑀦𑁂𑀢𑀼𑀫𑀕𑀸 𑀲𑀼𑀩𑁄𑀥𑀺𑀁.

𑀢𑀺𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺 𑀢𑀺𑀲𑁂𑀢𑀙𑀢𑁆𑀢𑀁,

𑀮𑀤𑁆𑀥𑀸𑀦 𑀮𑁄𑀓𑀸𑀥𑀺𑀧𑀢𑀻 𑀪𑀯𑁂𑀬𑁆𑀬;

𑀕𑀦𑁆𑀢𑁆𑀯𑀸𑀦 𑀩𑁄𑀥𑀺𑀫𑁆𑀳𑀺𑀧𑀭𑀸𑀚𑀺𑀢𑀸𑀲𑀦𑁂,

𑀬𑀼𑀤𑁆𑀥𑀸𑀬 𑀫𑀸𑀭𑁂𑀦𑀘𑀮𑁄 𑀦𑀺𑀲𑀻𑀤𑀺.

𑀤𑀢𑁆𑀯𑀸𑀦 𑀫𑀁𑀲𑀁 𑀭𑀚𑁆𑀚𑀁 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀢𑀤𑀸,

𑀦𑀫𑀲𑁆𑀲𑀫𑀸𑀦𑁄 𑀲𑀺𑀭𑀲𑀸 𑀲𑁂𑀢𑀙𑀢𑁆𑀢𑁂𑀦 𑀧𑀽𑀚𑀬𑀺.

𑀲𑀬𑀁 𑀦𑀸𑀭𑀸𑀬𑀦𑀩𑀮𑁄 𑀅𑀪𑀺𑀜𑁆𑀜𑀸𑀩𑀮𑀧𑀸𑀭𑀕𑀽,

𑀚𑁂𑀢𑀼𑀁 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀩𑁄𑀥𑀺𑀫𑀡𑁆𑀟𑀁𑀉𑀧𑀸𑀕𑀫𑀺.

𑀢𑀤𑀸 𑀯𑀲𑀯𑀢𑁆𑀢𑀻𑀭𑀸𑀚𑀸 𑀙𑀓𑀸𑀫𑀯𑀘𑀭𑀺𑀲𑁆𑀲𑀭𑁄,

𑀲𑀲𑁂𑀦𑀸𑀯𑀸𑀳𑀦𑁄 𑀩𑁄𑀥𑀺𑀫𑀡𑁆𑀟𑀁 𑀬𑀼𑀤𑁆𑀥𑀸𑀬𑀼𑀧𑀸𑀕𑀫𑀺.

𑀏𑀣 𑀕𑀡𑁆𑀳𑀣 𑀩𑀦𑁆𑀥𑀣 𑀙𑀝𑁆𑀝𑁂𑀣 𑀘𑁂𑀝𑀓𑀁 𑀇𑀫𑀁,

𑀫𑀦𑀼𑀲𑁆𑀲𑀓𑀮𑀮𑁂 𑀚𑀸𑀢𑁄 𑀓𑀺𑀫𑀺𑀳𑀦𑁆𑀢𑀺 𑀦 𑀫𑀜𑁆𑀜𑀢𑀺.

𑀚𑀮𑀦𑁆𑀢𑀁 𑀦𑀯𑀯𑀺𑀥𑀁 𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀺 𑀅𑀦𑀧𑁆𑀧𑀓𑀁,

𑀥𑀽𑀫𑀦𑁆𑀥𑀓𑀸𑀭𑀁 𑀓𑀢𑁆𑀯𑀸𑀦 𑀧𑀸𑀢𑁂𑀲𑀺 𑀅𑀲𑀺𑀦𑀁 𑀩𑀳𑀼𑀁.

𑀘𑀓𑁆𑀓𑀸𑀯𑀼𑀥𑀁 𑀔𑀺𑀧𑁂𑀦𑁆𑀢𑁄 𑀧𑀺 𑀦𑀸𑀲𑀓𑁆𑀔𑀺 𑀓𑀺𑀜𑁆𑀘𑀺 𑀓𑀸𑀢𑀯𑁂,

𑀕𑀳𑁂𑀢𑀩𑁆𑀩𑀁 𑀳𑀺 𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑁄 𑀇𑀢𑀺𑀩𑁆𑀭𑀯𑀺.

𑀲𑀺𑀤𑁆𑀥𑀢𑁆𑀣 𑀓𑀲𑁆𑀫𑀸 𑀆𑀲𑀺 𑀦𑀼 𑀆𑀲𑀦𑁂 𑀫𑀫 𑀲𑀦𑁆𑀢𑀓𑁂,

𑀉𑀝𑁆𑀞𑁂𑀳𑀺 𑀆𑀲𑀦𑀸 𑀦𑁄 𑀘𑁂 𑀨𑀸𑀮𑁂𑀫𑀺 𑀳𑀤𑀬𑀁 𑀢𑀯.

𑀲𑀧𑀸𑀤𑀫𑀽𑀮𑁂 𑀓𑀻𑀴𑀦𑁆𑀢𑀁 𑀧𑀲𑁆𑀲𑀦𑁆𑀢𑁄 𑀢𑀭𑀼𑀡𑀁 𑀲𑀼𑀢𑀁,

𑀧𑀺𑀢𑀸 𑀯𑀼𑀤𑀺𑀓𑁆𑀔𑀺 𑀢𑀁 𑀫𑀸𑀭𑀁 𑀫𑁂𑀢𑁆𑀢𑀸𑀬𑀦𑁆𑀢𑁄 𑀤𑀬𑀧𑀭𑁄.

𑀢𑀤𑀸 𑀲𑁄 𑀅𑀲𑀫𑁆𑀪𑀺𑀯𑀸𑀘𑀁 𑀲𑀻𑀳𑀦𑀸𑀤𑀁 𑀦𑀤𑀻 𑀫𑀼𑀦𑀺,

𑀦 𑀚𑀸𑀦𑀸𑀢𑀺 𑀲𑀬𑀁 𑀫𑀬𑁆𑀳𑀁 𑀤𑀸𑀲𑀪𑀸𑀯𑀧𑀺𑀬𑀁 𑀔𑀴𑁄.

𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀚𑀸𑀢𑁄 𑀤𑁂𑀯𑀧𑀼𑀭𑁂 𑀯𑀭𑁂,

𑀲𑀓𑀁 𑀕𑀢𑀺𑀁 𑀅𑀚𑀸𑀦𑀦𑁆𑀢𑁄 𑀮𑁄𑀓𑀚𑁂𑀝𑁆𑀞𑁄𑀢𑀺 𑀫𑀜𑁆𑀜𑀢𑀺.

𑀅𑀦𑀦𑁆𑀢𑀮𑁄𑀓𑀔𑀸𑀢𑀼𑀫𑁆𑀳𑀺 𑀲𑀢𑁆𑀢𑀸𑀦𑀁 𑀳𑀺 𑀓𑀢𑀁 𑀲𑀼𑀪𑀁,

𑀫𑀬𑁆𑀳𑁂𑀓𑀧𑀸𑀭𑀫𑀺𑀬𑀸 𑀧𑀺 𑀓𑀮𑀁 𑀦𑀕𑁆𑀖𑀢𑀺 𑀲𑁄𑀴𑀲𑀺𑀁.

𑀢𑀺𑀭𑀘𑁆𑀙𑀸𑀦𑁄 𑀲𑀲𑁄 𑀳𑀼𑀢𑁆𑀯𑀸 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑀁,

𑀧𑀘𑀺𑀢𑁆𑀯𑀸𑀦 𑀲𑀓𑀁 𑀫𑀁𑀲𑀁 𑀧𑀢𑀺𑀇𑀑𑀕𑁆𑀕𑀺𑀫𑁆𑀳𑀺 𑀤𑀸𑀢𑀯𑁂.

𑀏𑀯𑀁 𑀅𑀦𑀦𑁆𑀢𑀓𑀸𑀮𑁂𑀲𑀼 𑀓𑀢𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁,

𑀓𑁄 𑀳𑀺 𑀦𑀸𑀫 𑀓𑀭𑁂𑀬𑁆𑀬𑀜𑁆𑀜𑁄 𑀅𑀦𑀼𑀫𑁆𑀫𑀢𑁆𑀢𑁄 𑀲𑀘𑁂𑀢𑀦𑁄.

𑀏𑀯𑀁 𑀅𑀦𑀦𑁆𑀢𑀧𑀼𑀜𑁆𑀜𑁂𑀳𑀺 𑀲𑀺𑀤𑁆𑀥𑀁 𑀤𑁂𑀳𑀫𑀺𑀫𑀁 𑀧𑀦,

𑀬𑀣𑀸𑀪𑀼𑀢𑀁 𑀅𑀚𑀸𑀦𑀦𑁆𑀢𑁄 𑀫𑀦𑀼𑀲𑁆𑀲𑁄𑀲𑀻 𑀢𑀺 𑀫𑀜𑁆𑀜𑀢𑀺.

𑀦𑀸𑀳𑀁 𑀫𑀦𑀼𑀲𑁆𑀲𑁄𑀫𑀦𑀼𑀲𑁆𑀲𑁄 𑀦 𑀩𑁆𑀭𑀳𑁆𑀫𑀸 𑀦 𑀘 𑀤𑁂𑀯𑀢𑀸,

𑀚𑀭𑀸𑀫𑀭𑀡𑀁 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀼𑀁 𑀧𑀦𑀺𑀥𑀸𑀕𑀢𑁄.

𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦 𑀚𑀸𑀢𑁄𑀦𑀦𑁆𑀢𑀚𑀺𑀦𑁄 𑀅𑀳𑀁,

𑀩𑀼𑀤𑁆𑀥𑁄 𑀩𑁄𑀥𑀺𑀢𑀮𑁂 𑀳𑀼𑀢𑁆𑀯𑀸 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

𑀲𑀫𑀦𑁆𑀢𑀸 𑀥𑀚𑀺𑀦𑀁 𑀤𑀺𑀲𑁆𑀯𑀸 𑀬𑀼𑀤𑁆𑀥𑀁 𑀫𑀸𑀭𑀁 𑀲𑀯𑀸𑀳𑀦𑀁,

𑀬𑀼𑀤𑁆𑀥𑀸𑀬 𑀧𑀘𑁆𑀘𑀼𑀕𑀘𑁆𑀙𑀸𑀫𑀺 𑀫𑀸 𑀫𑀁 𑀞𑀸𑀦𑀸 𑀅𑀘𑀸𑀯𑀬𑀺.

𑀬𑀦𑁆𑀢𑁂 𑀢𑀁 𑀦𑀧𑁆𑀧𑀲𑀳𑀢𑀺 𑀲𑁂𑀦𑀁 𑀮𑁄𑀓𑁄 𑀲𑀤𑁂𑀯𑀓𑁄,

𑀢𑀦𑁆𑀢𑁂 𑀧𑀜𑁆𑀜𑀸𑀬 𑀕𑀘𑁆𑀙𑀸𑀫𑀺 𑀆𑀫𑀁 𑀧𑀢𑁆𑀢𑀁 𑀯 𑀅𑀲𑁆𑀫𑀦𑀸.

𑀇𑀘𑁆𑀙𑀦𑁆𑀢𑁄 𑀲𑀸𑀲𑀧𑁂 𑀕𑀩𑁆𑀪𑁂 𑀘𑀗𑁆𑀓𑀫𑀸𑀫𑀺 𑀇𑀢𑁄 𑀘𑀺𑀢𑁄,

𑀇𑀘𑁆𑀙𑀦𑁆𑀢𑁄 𑀮𑁄𑀓𑀥𑀸𑀢𑀼𑀫𑁆𑀳𑀺 𑀅𑀢𑁆𑀢𑀪𑀸𑀯𑁂𑀦 𑀙𑀸𑀤𑀬𑀺.

𑀏𑀢𑁂 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸𑀦 𑀘𑀼𑀡𑁆𑀡𑁂𑀢𑀼𑀁 𑀅𑀘𑁆𑀙𑀭𑀸𑀬𑀧𑀺,

𑀅𑀢𑁆𑀣𑀺 𑀣𑀸𑀫𑀁 𑀩𑀮𑀁 𑀫𑀬𑁆𑀳𑀁 𑀧𑀸𑀡𑀖𑀸𑀢𑁄 𑀦 𑀯𑀝𑁆𑀝𑀢𑀺.

𑀇𑀫𑀲𑁆𑀲 𑀕𑀡𑁆𑀟𑀼𑀧𑁆𑀧𑀸𑀤𑀲𑁆𑀲 𑀆𑀬𑀼𑀥𑁂𑀦 𑀩𑀮𑁂𑀦 𑀓𑀺𑀁,

𑀫𑀬𑁆𑀳𑀁 𑀳𑀺 𑀢𑁂𑀦 𑀧𑀸𑀧𑁂𑀦 𑀲𑀮𑁆𑀮𑀸𑀧𑁄 𑀧𑀺 𑀦 𑀬𑀼𑀚𑁆𑀚𑀢𑀺.

𑀧𑀮𑁆𑀮𑀗𑁆𑀓𑀁 𑀫𑀫 𑀪𑀸𑀯𑀸𑀬 𑀓𑀺𑀫𑀢𑁆𑀣𑀜𑁆𑀜𑁂𑀦 𑀲𑀓𑁆𑀔𑀺𑀦𑀸,

𑀓𑀫𑁆𑀧𑀺𑀢𑀸 𑀫𑀤𑁆𑀤𑀺𑀬𑀸 𑀤𑀸𑀦𑀸 𑀲𑀓𑁆𑀔𑀺 𑀳𑁄𑀢𑀺 𑀅𑀬𑀁 𑀫𑀳𑀻.

𑀇𑀢𑀺 𑀯𑀢𑁆𑀯𑀸 𑀤𑀓𑁆𑀔𑀺𑀡𑀁 𑀩𑀸𑀳𑀼𑀁 𑀧𑀣𑀯𑀺𑀬𑀸 𑀧𑀡𑀫𑀬𑀺,

𑀢𑀤𑀸 𑀓𑀫𑁆𑀧𑀺𑀢𑁆𑀣 𑀧𑀣𑀯𑀻 𑀫𑀳𑀸𑀖𑁄𑀲𑁄 𑀅𑀚𑀸𑀬𑀣.

𑀧𑀣𑀯𑀻𑀖𑁄𑀲𑁂𑀦 𑀆𑀓𑀸𑀲𑁂 𑀕𑀚𑁆𑀚𑀦𑁆𑀢𑁄 𑀅𑀲𑀦𑀺 𑀨𑀮𑀺,

𑀢𑀲𑁆𑀫𑀺𑀁 𑀫𑀚𑁆𑀛𑁂 𑀕𑀢𑁄 𑀫𑀸𑀭𑁄 𑀲𑀧𑀭𑀺𑀲𑁄 𑀪𑀬𑀢𑀚𑁆𑀚𑀺𑀢𑁄.

𑀫𑀳𑀸𑀯𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀁 𑀯 𑀯𑀺𑀓𑀺𑀭𑀺𑀬𑁆𑀬𑀣,

𑀫𑀳𑀸𑀖𑁄𑀲𑁄 𑀅𑀚𑀸𑀬𑀺𑀢𑁆𑀣 𑀲𑀺𑀤𑁆𑀥𑀢𑀲𑁆𑀲 𑀚𑀬𑁄 𑀇𑀢𑀺.

𑀧𑀼𑀭𑀢𑁄 𑀕𑀘𑁆𑀙𑀢𑀺 𑀘𑀦𑁆𑀤𑁄 𑀭𑀚𑀢𑀘𑀓𑁆𑀓𑀁 𑀯 𑀅𑀫𑁆𑀩𑀭𑁂,

𑀲𑀳𑀲𑁆𑀲𑀭𑀁𑀲𑀺 𑀲𑀼𑀭𑀺𑀬𑁄 𑀧𑀘𑁆𑀙𑀺𑀫𑁂𑀦𑀼𑀧𑀕𑀘𑁆𑀙𑀢𑀺.

𑀫𑀚𑁆𑀛𑁂 𑀩𑁄𑀥𑀺𑀤𑀼𑀫𑀘𑁆𑀙𑀢𑁆𑀢𑁂 𑀧𑀮𑁆𑀮𑀗𑁆𑀓𑁂 𑀅𑀧𑁆𑀧𑀭𑀸𑀚𑀺𑀢𑁂,

𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀫𑁆𑀫𑀲𑀢𑁂 𑀫𑀼𑀦𑀺.

𑀲𑀓𑁆𑀓𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀗𑁆𑀔𑀁 𑀥𑀫𑀦𑁆𑀢𑁄 𑀅𑀪𑀺𑀥𑀸𑀯𑀢𑀺,

𑀩𑁆𑀭𑀳𑁆𑀫𑀸 𑀢𑀺𑀬𑁄𑀚𑀦𑀁 𑀙𑀢𑁆𑀢𑀁 𑀥𑀸𑀭𑁂𑀢𑀺 𑀫𑀼𑀦𑀺𑀫𑀼𑀤𑁆𑀥𑀦𑀺.

𑀫𑀡𑀺𑀢𑀸𑀮𑀯𑀡𑁆𑀝𑀁 𑀢𑀼𑀲𑀻𑀢𑁄 𑀲𑀼𑀬𑀸𑀫𑁄 𑀯𑀸𑀴𑀩𑀻𑀚𑀦𑀺𑀁,

𑀦𑀸𑀦𑀸𑀫𑀗𑁆𑀕𑀮𑀪𑀡𑁆𑀟𑀸𑀦𑀺 𑀕𑀳𑀺𑀢𑁄 𑀲𑁂𑀲𑀤𑁂𑀯𑀢𑀸.

𑀏𑀯𑀁 𑀤𑀲𑀲𑀳𑀲𑁆𑀲𑀫𑁆𑀳𑀺 𑀲𑀓𑁆𑀓𑁄 𑀩𑁆𑀭𑀳𑁆𑀫𑀸 𑀘 𑀤𑁂𑀯𑀢𑀸,

𑀲𑀗𑁆𑀔𑀸𑀤𑀻𑀦𑀻 𑀥𑀫𑀦𑁆𑀢𑀸 𑀘 𑀘𑀓𑁆𑀓𑀯𑀸𑀴𑀫𑁆𑀳𑀺 𑀧𑀽𑀭𑀬𑀼𑀁.

𑀫𑀗𑁆𑀕𑀮𑀸𑀦𑀺 𑀕𑀳𑁂𑀢𑁆𑀯𑀸𑀦 𑀢𑀺𑀝𑁆𑀞𑀦𑁆𑀢𑀺 𑀓𑀸𑀘𑀺 𑀤𑁂𑀯𑀢𑀸,

𑀥𑀚𑀫𑀸𑀮 𑀕𑀳𑁂𑀢𑁆𑀯𑀸𑀦 𑀢𑀣𑀸 𑀧𑀼𑀡𑁆𑀡𑀖𑀝𑀸𑀤𑀬𑁄.

𑀢𑀢𑁆𑀣 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀲𑁂𑀴𑁂𑀦𑁆𑀢𑀺 𑀯𑀸𑀤𑀬𑀦𑁆𑀢𑀺 𑀘,

𑀤𑁂𑀯𑀸 𑀤𑀲𑀲𑀳𑀲𑁆𑀲𑀫𑁆𑀳𑀺 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸.

𑀥𑀫𑁆𑀫𑀸𑀫𑀢𑀭𑀲𑀲𑁆𑀲𑀸𑀤𑀁 𑀮𑀪𑀺𑀲𑁆𑀲𑀸𑀫𑀲𑁆𑀲 𑀲𑀦𑁆𑀢𑀺𑀓𑁂,

𑀦𑀬𑀦𑀸𑀫𑀢𑀭𑀲𑀲𑁆𑀲𑀸𑀤𑀁 𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀧𑀲𑁆𑀲𑀺𑀢𑀼𑀁.

𑀚𑀸𑀭𑀫𑀭𑀡𑀓𑀦𑁆𑀢𑀸𑀭𑀸 𑀲𑁄𑀓𑁄𑀧𑀸𑀬𑀸𑀲𑀲𑀮𑁆𑀮𑀢𑁄,

𑀫𑁄𑀘𑁂𑀲𑀺 𑀓𑀸𑀫𑀧𑀸𑀲𑀫𑁆𑀳𑀸 𑀤𑁂𑀲𑁂𑀦𑁆𑀢𑁄 𑀅𑀫𑀢𑀁 𑀧𑀤𑀁.

𑀇𑀢𑀺 𑀢𑀼𑀝𑁆𑀞𑁂𑀳𑀺 𑀤𑁂𑀯𑁂𑀳𑀺 𑀧𑀽𑀚𑀺𑀬𑀦𑁆𑀢𑁄 𑀦𑀭𑀸𑀲𑀪𑁄,

𑀓𑀺𑀜𑁆𑀘𑀺 𑀧𑀽𑀚𑀁 𑀅𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀦𑁆𑀢𑁂𑀦𑁆𑀢𑁄 𑀥𑀫𑁆𑀫𑀫𑀼𑀢𑁆𑀢𑀫𑀁.

𑀲𑀩𑁆𑀩𑀢𑁆𑀣𑀲𑀸𑀥𑀺𑀢𑁄 𑀲𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑁄 𑀅𑀧𑁆𑀧𑀭𑀸𑀚𑀺𑀢𑁄,

𑀘𑀓𑁆𑀓𑀯𑀸𑀴𑀲𑀺𑀮𑀸𑀲𑀸𑀡𑀺𑀧𑀸𑀓𑀸𑀭𑁂𑀳𑀺 𑀫𑀦𑁄𑀭𑀫𑁂.

𑀢𑀸𑀭𑀸𑀫𑀡𑀺𑀔𑀘𑀺𑀢𑀸𑀓𑀸𑀲𑀯𑀺𑀢𑀸𑀦𑁂 𑀘𑀦𑁆𑀤𑀤𑀻𑀧𑀓𑁂,

𑀫𑀸𑀦𑀸𑀭𑀢𑀫𑀧𑀚𑁆𑀚𑁄𑀢𑁂 𑀫𑀸𑀮𑀸𑀕𑀦𑁆𑀥𑀸𑀤𑀺𑀧𑀽𑀚𑀺𑀢𑁂.

𑀤𑀺𑀩𑁆𑀩𑁂𑀳𑀺 𑀙𑀡𑀪𑁂𑀭𑀻𑀳𑀺 𑀖𑀼𑀝𑁆𑀞𑁂 𑀫𑀗𑁆𑀕𑀮𑀕𑀻𑀢𑀺𑀬𑀸,

𑀘𑀓𑁆𑀓𑀯𑀸𑀴𑁂 𑀲𑀼𑀧𑁆𑀧𑀸𑀲𑀸𑀤𑁂 𑀩𑁄𑀥𑀺𑀫𑀡𑁆𑀟𑀫𑀳𑀸𑀢𑀮𑁂.

𑀩𑁄𑀥𑀺𑀭𑀼𑀓𑁆𑀔𑀫𑀡𑀺𑀘𑁆𑀙𑀢𑁆𑀢𑁂 𑀧𑀮𑁆𑀮𑀗𑁆𑀓𑁂 𑀅𑀧𑁆𑀧𑀭𑀸𑀚𑀺𑀢𑁂,

𑀦𑀺𑀲𑁆𑀲𑀺𑀦𑁆𑀦𑁄 𑀧𑀞𑀫𑁂 𑀬𑀸𑀫𑁂 𑀧𑀼𑀭𑀺𑀫𑀁 𑀚𑀸𑀢𑀺𑀫𑀦𑀼𑀲𑁆𑀲𑀭𑀺.

𑀦𑀫𑀭𑀽𑀧𑀸𑀫𑀦𑀼𑀧𑁆𑀧𑀢𑁆𑀢𑀺 𑀲𑀼𑀤𑀺𑀝𑁆𑀞𑀸 𑀳𑁄𑀢𑀺 𑀢𑁂𑀦𑀺𑀥𑀸,

𑀲𑀓𑁆𑀓𑀸𑀢𑀤𑀺𑀝𑁆𑀞𑀺 𑀢𑁂𑀦𑀲𑁆𑀲 𑀧𑀳𑀻𑀦𑀸 𑀳𑁄𑀢𑀺 𑀲𑀩𑁆𑀩𑀲𑁄.

𑀢𑀢𑁄 𑀳𑀺 𑀤𑀼𑀢𑀺𑀬𑁂 𑀬𑀸𑀫𑁂 𑀬𑀣𑀸𑀬𑀫𑁆𑀫𑀼𑀧𑀕𑁂 𑀲𑀭𑀺,

𑀲𑀼𑀤𑀺𑀝𑁆𑀞𑀁 𑀳𑁄𑀢𑀺 𑀢𑁂𑀦𑀲𑁆𑀲 𑀓𑀫𑁆𑀫𑀓𑁆𑀮𑁂𑀲𑁂𑀳𑀺 𑀲𑀫𑁆𑀪𑀯𑀁.

𑀓𑀗𑁆𑀔𑀸𑀯𑀺𑀢𑀭𑀡𑀻 𑀦𑀸𑀫 𑀜𑀸𑀡𑀦𑁆𑀢𑀁 𑀲𑀫𑀼𑀧𑀸𑀕𑀢𑀁,

𑀢𑁂𑀦𑀲𑁂𑀲 𑀧𑀳𑀻𑀬𑀺𑀢𑁆𑀣 𑀓𑀗𑁆𑀔𑀸 𑀲𑁄𑀴𑀲𑀥𑀸 𑀞𑀺𑀢𑀸.

𑀢𑀢𑁄 𑀲𑁄 𑀢𑀢𑀺𑀬𑁂 𑀬𑀸𑀫𑁂 𑀤𑁆𑀯𑀸𑀤𑀲𑀗𑁆𑀕𑁂 𑀅𑀲𑁂𑀲𑀢𑁄,

𑀲𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀫𑁄𑀢𑀸𑀭𑀬𑀻 𑀫𑀼𑀦𑀺.

𑀅𑀯𑀺𑀚𑁆𑀚𑀯𑀸𑀤𑁆𑀬𑀸𑀦𑀼𑀮𑁄𑀫𑁂𑀦 𑀚𑀭𑀸𑀤𑀺𑀧𑀝𑀺𑀮𑁄𑀫𑀢𑁄,

𑀲𑀫𑁆𑀫𑀲𑀦𑁆𑀢𑁄 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀫𑀸𑀕𑀫𑀺.

𑀓𑀧𑁆𑀧𑀓𑁄𑀝𑀺𑀲𑀢𑁂𑀦𑀸𑀧𑀺 𑀅𑀧𑁆𑀧𑀫𑁂𑀬𑁆𑀬𑁂𑀲𑀼 𑀚𑀸𑀢𑀺𑀲𑀼,

𑀮𑁄𑀪𑀁 𑀅𑀲𑁂𑀲𑀤𑀸𑀦𑁂𑀦 𑀯𑀺𑀦𑀸𑀲𑁂𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁.

𑀲𑀻𑀮𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑀸𑀬 𑀓𑁄𑀔𑀤𑁄𑀲𑀁 𑀦𑀺𑀯𑀸𑀭𑁂𑀲𑀺,

𑀧𑀜𑁆𑀜𑀸𑀬 𑀫𑁄𑀳𑀁 𑀙𑁂𑀢𑁆𑀯𑀸𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀣𑁂𑀯 𑀘.

𑀕𑀭𑀽𑀧𑀲𑁂𑀯𑀦𑀸𑀤𑀻𑀳𑀺 𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀦𑁄𑀤𑀬𑀁,

𑀫𑀸𑀦𑀼𑀤𑁆𑀥𑀘𑁆𑀘𑀁 𑀯𑀺𑀦𑁄𑀤𑁂𑀦𑁆𑀢𑁄 𑀓𑀼𑀮𑁂 𑀚𑁂𑀝𑁆𑀞𑁄𑀧𑀘𑀸𑀬𑀺𑀦𑀸.

𑀦𑁂𑀓𑁆𑀔𑀫𑁆𑀫𑁂𑀦 𑀯𑀺𑀦𑀸𑀲𑁂𑀦𑁆𑀢𑁄 𑀓𑀸𑀫𑀭𑀸𑀕𑀁 𑀧𑀼𑀦𑀧𑁆𑀧𑀼𑀦𑀁,

𑀲𑀘𑁆𑀘𑁂𑀦 𑀯𑀺𑀲𑀁𑀯𑀸𑀤𑀁 𑀓𑁄𑀲𑀚𑁆𑀚𑀁 𑀯𑀻𑀭𑀺𑀬𑁂𑀦 𑀘.

𑀏𑀯𑀁 𑀤𑀸𑀦𑀸𑀤𑀺𑀦𑀸 𑀢𑀁 𑀢𑀁 𑀓𑀺𑀮𑁂𑀲𑀗𑁆𑀕𑀁 𑀯𑀺𑀦𑁄𑀤𑀬𑀁,

𑀲𑀼𑀯𑀟𑁆𑀠𑀺𑀢𑀸 𑀫𑀳𑀸𑀧𑀜𑁆𑀜𑀸 𑀓𑀣𑀁 𑀲𑀦𑁆𑀢𑀺𑀁 𑀦 𑀭𑀽𑀳𑀢𑀺.

𑀲𑀼𑀤𑀼𑀓𑁆𑀓𑀭𑀁 𑀓𑀭𑀺𑀢𑁆𑀯𑀸𑀦 𑀤𑀸𑀦𑀸𑀤𑀺𑀧𑀘𑁆𑀘𑀬𑀁 𑀧𑀼𑀭𑁂,

𑀦 𑀓𑀺𑀜𑁆𑀘𑀺 𑀪𑀯𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀲𑀺 𑀩𑁄𑀥𑀺𑀫𑀼𑀢𑁆𑀢𑀫𑀁.

𑀧𑀡𑀺𑀥𑀸𑀦𑀫𑁆𑀳𑀸 𑀧𑀝𑁆𑀞𑀸𑀬 𑀓𑀢𑀁 𑀧𑀼𑀜𑁆𑀜𑀜𑁆𑀘 𑀧𑀢𑁆𑀣𑀦𑀁,

𑀏𑀓𑁆𑀓𑀢𑁆𑀣 𑀤𑀸𑀦𑀺 𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀩𑁄𑀥𑀺𑀁 𑀅𑀲𑀁𑀲𑀬𑀁.

𑀢𑀢𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀤𑀼𑀓𑁆𑀔𑀦𑀢𑁆𑀢𑀢𑁄,

𑀲𑀫𑁆𑀫𑀲𑀦𑁆𑀢𑁄𑀦𑀼𑀮𑁄𑀫𑁂𑀦 𑀦𑀺𑀩𑁆𑀩𑀸𑀦𑀁 𑀲𑀫𑀼𑀧𑀸𑀕𑀫𑀺.

𑀲𑀯𑀸𑀲𑀦𑁂 𑀓𑀺𑀮𑁂𑀲𑁂 𑀲𑁄 𑀛𑀸𑀧𑁂𑀦𑁆𑀢𑁄𑀦𑀼𑀫𑀢𑁆𑀢𑀁 𑀧𑀺 𑀘,

𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀲𑀼𑀤𑁆𑀥𑁄 𑀩𑀼𑀤𑁆𑀥𑁄 𑀩𑁄𑀥𑀺𑀢𑀮𑁂 𑀅𑀳𑀼.

𑀧𑀢𑁆𑀢𑁄 𑀯𑀺𑀫𑁂𑀢𑁆𑀢𑀺𑀁 𑀯𑀭𑀲𑁂𑀢𑀙𑀢𑁆𑀢𑀁,

𑀲𑁄 𑀧𑀻𑀢𑀺𑀯𑁂𑀕𑁂𑀦 𑀉𑀤𑀸𑀦𑀼𑀤𑀻𑀭𑀬𑀺;

𑀙𑁂𑀢𑁆𑀯𑀸𑀦 𑀫𑀸𑀭𑁂 𑀯𑀺𑀚𑀺𑀢𑀸𑀭𑀺𑀲𑀗𑁆𑀖𑁄,

𑀢𑀺𑀩𑀼𑀤𑁆𑀥𑀔𑁂𑀢𑁆𑀢𑁂𑀓𑀤𑀺𑀯𑀸𑀓𑀭𑁄 𑀅𑀳𑀼.

𑀢𑀺𑀙𑀢𑁆𑀢𑀥𑀸𑀭𑀺 𑀯𑀭𑀥𑀫𑁆𑀫𑀭𑀸𑀚𑀸;

𑀫𑀳𑀸𑀲𑀳𑀲𑁆𑀲𑀁 𑀧𑀺 𑀘 𑀮𑁄𑀓𑀥𑀸𑀢𑀼𑀁,

𑀲𑀭𑁂𑀦 𑀯𑀺𑀜𑁆𑀜𑀸𑀧𑀬𑀺𑀢𑀼𑀁 𑀲𑀫𑀢𑁆𑀣𑁄.

𑀚𑀸𑀢𑁄 𑀲𑀢𑁆𑀢𑁄 𑀓𑁄𑀦𑀼𑀫𑁆𑀫𑀢𑁆𑀢𑁄;

𑀲𑀼𑀤𑁆𑀥𑀁 𑀩𑀼𑀤𑁆𑀥𑀁 𑀑𑀖𑀸 𑀢𑀺𑀡𑁆𑀡𑀁,

𑀲𑀤𑁆𑀥𑁄 𑀧𑀜𑁆𑀜𑁄 𑀓𑁄 𑀦𑁄 𑀯𑀦𑁆𑀤𑁂.

𑀲𑀼𑀕𑀢𑀁 𑀅𑀕𑀢𑀁 𑀲𑀼𑀕𑀢𑀺𑀁 𑀅𑀕𑀢𑀺𑀁,

𑀦𑀫𑀺𑀢𑀁 𑀅𑀫𑀺𑀢𑀁 𑀦𑀫𑀢𑀺𑀁 𑀲𑀼𑀫𑀢𑀺𑀁.

𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀤𑀻𑀧𑀦𑀻𑀕𑀸𑀣𑀸

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀜𑀸𑀦𑀁 𑀳𑀢𑀲𑀓𑀮𑀫𑀮𑀁 𑀲𑀼𑀤𑁆𑀥𑀢𑁄 𑀘𑀸𑀢𑀺𑀲𑀼𑀤𑁆𑀥𑀁,

𑀅𑀤𑁆𑀥𑀸 𑀮𑀤𑁆𑀥𑀸 𑀲𑀼𑀮𑀤𑁆𑀥𑀁 𑀯𑀢𑀫𑀺𑀢𑀺 𑀲𑀢𑀢𑀁 𑀘𑀺𑀦𑁆𑀢𑀬𑀦𑁆𑀢𑁄 𑀲𑀼𑀩𑁄𑀥𑀺𑀁;

𑀲𑀢𑁆𑀢𑀸𑀳𑀁 𑀲𑀢𑁆𑀢𑀫𑁂𑀯𑀁 𑀯𑀺𑀯𑀺𑀥𑀨𑀮𑀲𑀼𑀔𑀁 𑀯𑀺𑀢𑀺𑀦𑀸𑀫𑁂𑀲𑀺 𑀓𑀸𑀮𑀁,

𑀩𑁆𑀭𑀳𑁆𑀫𑁂𑀦𑀸𑀬𑀸𑀘𑀺𑀢𑁄 𑀲𑁄 𑀇𑀲𑀺𑀧𑀢𑀦𑀯𑀦𑁂 𑀯𑀢𑁆𑀢𑀬𑀻 𑀥𑀫𑁆𑀫𑀘𑀓𑁆𑀓𑀁.

𑀩𑁆𑀭𑀳𑁆𑀫𑀲𑁆𑀲 𑀲𑀤𑁆𑀤𑀁 𑀓𑀭𑀯𑀻𑀓𑀪𑀸𑀡𑀺𑀁,

𑀬𑀣𑀺𑀘𑁆𑀙𑀺𑀢𑀁 𑀲𑀸𑀯𑀬𑀺𑀢𑀼𑀁 𑀲𑀫𑀢𑁆𑀣𑀁;

𑀲𑀘𑁆𑀘𑀁 𑀧𑀺𑀬𑀁 𑀪𑀽𑀢𑀳𑀺𑀢𑀁 𑀯𑀤𑀦𑁆𑀢𑀁,

𑀦 𑀧𑀽𑀚𑀬𑁂 𑀓𑁄 𑀳𑀺 𑀦𑀭𑁄 𑀲𑀘𑁂𑀢𑀦𑁄.

𑀓𑀢𑁆𑀯𑀸𑀦 𑀅𑀘𑁆𑀙𑁂𑀭𑀲𑀼𑀧𑀸𑀝𑀺𑀳𑀻𑀭𑀁,

𑀤𑁂𑀲𑁂𑀲𑀺 𑀥𑀫𑁆𑀫𑀁 𑀅𑀦𑀼𑀓𑀫𑁆𑀧𑀺𑀫𑀁 𑀧𑀚𑀁.

𑀏𑀯𑀁 𑀳𑀺 𑀩𑀼𑀤𑁆𑀥𑀢𑁆𑀢𑀫𑀼𑀧𑀸𑀕𑀢𑁄 𑀲𑁄,

𑀤𑁂𑀲𑁂𑀲𑀺 𑀥𑀫𑁆𑀫𑀁 𑀲𑀦𑀭𑀸𑀫𑀭𑀸𑀦𑀁;

𑀦𑀸𑀦𑀸𑀦𑀬𑁂𑀳𑀻𑀪𑀺𑀲𑀫𑁂𑀲𑀺 𑀲𑀢𑁆𑀢𑁂,

𑀢𑀲𑁆𑀫𑀸 𑀳𑀺 𑀛𑀸𑀢𑁄 𑀢𑀺𑀪𑀯𑁂𑀲𑀼 𑀦𑀸𑀣𑁄.

𑀤𑀺𑀝𑁆𑀞𑀸 𑀧𑀢𑁆𑀢𑀸 𑀜𑀸𑀢𑀸 𑀲𑀘𑁆𑀘𑀁;

𑀣𑁄𑀫𑁂𑀲𑀼𑀁 𑀢𑁂 𑀤𑁂𑀯𑀸 𑀩𑁆𑀭𑀳𑁆𑀫𑀸.

𑀤𑀺𑀯𑀺𑀤𑁂𑀯𑀯𑀭𑁄 𑀲𑀼𑀘𑀺𑀩𑁆𑀭𑀳𑁆𑀫𑀯𑀭𑁄;

𑀲𑀓𑀯𑀼𑀟𑁆𑀠𑀺𑀓𑀭𑁄 𑀧𑀭𑀯𑀼𑀟𑁆𑀠𑀺𑀓𑀭𑁄.

𑀲𑀦𑀭𑀸𑀫𑀭𑀼𑀩𑁆𑀭𑀳𑁆𑀫𑀕𑀡𑁂𑀪𑀺 𑀭𑀼𑀢𑀸,

𑀅𑀭𑀳𑀸𑀤𑀺𑀕𑀼𑀡𑀸 𑀯𑀺𑀧𑀼𑀮𑀸 𑀯𑀺𑀫𑀮𑀸;

𑀲𑀓𑀮𑁂 𑀢𑀺𑀤𑀺𑀯𑁂 𑀢𑀺𑀪𑀯𑁂 𑀯𑀺𑀲𑀝𑀸.

𑀬𑁂 𑀧𑀺𑀲𑁆𑀲 𑀢𑁂 𑀪𑀕𑀯𑀢𑁄 𑀘 𑀅𑀘𑀺𑀦𑁆𑀢𑀺𑀬𑀸𑀤𑀻,

𑀲𑀼𑀤𑁆𑀥𑀸𑀢𑀺𑀲𑀼𑀤𑁆𑀥𑀢𑀭𑀩𑀼𑀤𑁆𑀥𑀕𑀼𑀡𑀸 𑀳𑀺 𑀲𑀩𑁆𑀩𑁂;

𑀲𑀗𑁆𑀔𑁂𑀧𑀢𑁄 𑀦𑀯𑀯𑀺𑀥𑁂𑀲𑀼 𑀧𑀤𑁂𑀲𑀼 𑀔𑀺𑀢𑁆𑀢𑀸,

𑀯𑀓𑁆𑀔𑀸𑀫𑀺 𑀤𑀸𑀦𑀺 𑀅𑀭𑀳𑀸𑀤𑀺𑀕𑀼𑀡𑁂 𑀅𑀳𑀁 𑀧𑀺.

𑀬𑁄 𑀘𑀻𑀥 𑀚𑀸𑀢𑁄 𑀅𑀭𑀳𑀁 𑀦𑀺𑀭𑀸𑀲𑁄,

𑀲𑀫𑁆𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀼;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁄𑀖𑀢𑀺𑀡𑁆𑀡𑁄,

𑀲𑀫𑁆𑀫𑀸𑀕𑀢𑁄 𑀲𑁄 𑀲𑀼𑀕𑀢𑁄 𑀕𑀢𑁄 𑀯.

𑀅𑀯𑁂𑀤𑀺 𑀲𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘,

𑀅𑀫𑀼𑀢𑁆𑀢𑀭𑁄 𑀲𑀸𑀭𑀣𑀺𑀤𑀫𑁆𑀫𑀲𑀢𑁆𑀢𑁂;

𑀲𑀤𑁂𑀯𑀓𑀸𑀦𑀁 𑀯𑀭𑀲𑀢𑁆𑀣𑀼𑀓𑀺𑀘𑁆𑀘𑀁,

𑀅𑀓𑀸𑀲𑀺 𑀩𑀼𑀤𑁆𑀥𑁄 𑀪𑀕𑀯𑀸 𑀯𑀺𑀲𑀼𑀤𑁆𑀥𑁄.

𑀦 𑀢𑀲𑁆𑀲 𑀅𑀤𑀺𑀝𑁆𑀞𑀦𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺,

𑀅𑀢𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀜𑁂𑀬𑁆𑀬𑀁,

𑀇𑀢𑀺 𑀫𑀳𑀺𑀢𑀫𑀦𑀦𑁆𑀢𑀸𑀓𑀺𑀢𑁆𑀢𑀺𑀲𑀫𑁆𑀪𑀸𑀭𑀲𑀸𑀭𑀁,

𑀲𑀓𑀮𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀫𑁆𑀳𑀺 𑀦𑀺𑀘𑁆𑀘𑀁;

𑀉𑀧𑀘𑀺𑀢𑀲𑀼𑀪𑀳𑁂𑀢𑀼𑀧𑀬𑀼𑀢𑀸𑀦𑀦𑁆𑀢𑀓𑀸𑀮𑀁,

𑀢𑀤𑀺𑀳 𑀲𑀼𑀕𑀢𑀩𑁄𑀥𑀺𑀲𑀸𑀥𑀼𑀓𑀁 𑀘𑀺𑀦𑁆𑀢𑀦𑀻𑀬𑀁;

𑀢𑀓𑁆𑀓𑀩𑁆𑀬𑀸𑀓𑀭𑀡𑀜𑁆𑀘 𑀥𑀫𑁆𑀫𑀯𑀺𑀦𑀬𑀁 𑀲𑀼𑀢𑁆𑀯𑀸 𑀧𑀺 𑀬𑁄 𑀧𑀜𑁆𑀜𑀯𑀸,

𑀢𑁂𑀦𑀸𑀬𑀁 𑀲𑀼𑀘𑀺𑀲𑀸𑀭𑀪𑀽𑀢𑀯𑀘𑀦𑀁 𑀯𑀺𑀜𑁆𑀜𑀸𑀬𑀢𑁂 𑀓𑁂𑀯𑀮𑀁;

𑀳𑁂𑀢𑀼𑀜𑁆𑀘𑀸𑀧𑀺 𑀨𑀮𑁂𑀦 𑀢𑁂𑀦 𑀲𑀨𑀮𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀢𑀢𑁄 𑀩𑁄𑀥𑀺𑀁 𑀲𑀤𑁆𑀤𑀳𑀢𑁂𑀯 𑀢𑀲𑁆𑀲 𑀫𑀳𑀢𑀸𑀯𑀸𑀬𑀫𑀢𑁄 𑀲𑀫𑁆𑀪𑀯𑀁.

𑀬𑁄 𑀲𑀤𑁆𑀤𑀳𑀦𑁆𑀢𑁄 𑀧𑀦 𑀢𑀲𑁆𑀲 𑀩𑁄𑀥𑀺𑀁,

𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀕𑀼𑀡𑁂𑀭𑀳𑀸𑀤𑀻;

𑀓𑀣𑁂𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀘 𑀲𑁄 𑀫𑀼𑀳𑀼𑀢𑁆𑀢𑀁,

𑀑𑀳𑀸𑀬 𑀧𑀸𑀧𑀸𑀦𑀺 𑀉𑀧𑁂𑀢𑀺 𑀲𑀦𑁆𑀢𑀺𑀁.

𑀲𑀤𑁆𑀥𑁂𑀬𑁆𑀬𑀸 𑀢𑁂 𑀘𑀺𑀦𑁆𑀢𑁂𑀬𑁆𑀬𑀸 𑀢𑁂,

𑀯𑀦𑁆𑀤𑁂𑀬𑁆𑀬𑀸 𑀢𑁂 𑀧𑀽𑀚𑁂𑀬𑁆𑀬𑀸𑀢𑁂;

𑀢𑀲𑀫𑀸 𑀳𑀺 𑀚𑀸𑀢𑁄𑀯𑀭𑀓𑀫𑁆𑀳𑀺 𑀢𑀲𑁆𑀲,

𑀆𑀬𑀢𑁆𑀢𑀓𑁂 𑀫𑀗𑁆𑀕𑀮𑀘𑀓𑁆𑀓𑀯𑀸𑀴𑁂;

𑀪𑀽𑀢𑁂𑀳𑀺 𑀯𑀢𑁆𑀣𑀽𑀳𑀺 𑀫𑀦𑁄𑀭𑀫𑁂𑀳𑀺,

𑀧𑀽𑀚𑁂𑀫𑀺 𑀢𑀁 𑀧𑀽𑀚𑀺𑀢𑁆𑀧𑀽𑀚𑀺𑀢𑀁 𑀧𑀼𑀭𑁂.

𑀲𑁄𑀳𑀁 𑀅𑀚𑁆𑀚 𑀧𑀦𑁂𑀢𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀫𑁆𑀳𑀺 𑀧𑀼𑀧𑁆𑀨𑀺𑀢𑁂,

𑀣𑀮𑀚𑁂 𑀚𑀮𑀚𑁂 𑀯𑀸𑀧𑀺 𑀲𑀼𑀕𑀦𑁆𑀥𑁂 𑀘 𑀅𑀕𑀦𑁆𑀥𑀓𑁂.

𑀫𑀦𑀼𑀲𑁆𑀲𑁂𑀲𑀼 𑀅𑀦𑁂𑀓𑀢𑁆𑀣 𑀢𑀴𑀸𑀓𑀼𑀬𑁆𑀬𑀸𑀦𑀯𑀸𑀧𑀺𑀲𑀼,

𑀧𑀯𑀦𑁂 𑀳𑀺𑀫𑀯𑀦𑁆𑀢𑀲𑁆𑀫𑀺𑀁 𑀢𑀢𑁆𑀣 𑀲𑀢𑁆𑀢 𑀫𑀳𑀸𑀲𑀭𑁂.

𑀧𑀭𑀺𑀢𑁆𑀢𑀤𑀻𑀧𑁂 𑀤𑁆𑀯𑀺𑀲𑀳𑀲𑁆𑀲𑁂 𑀫𑀳𑀸𑀤𑀻𑀧𑁂 𑀲𑀼𑀧𑀼𑀧𑁆𑀨𑀺𑀢𑁂,

𑀲𑀢𑁆𑀢𑀧𑀭𑀺𑀪𑀡𑁆𑀟𑀲𑁂𑀮𑁂𑀲𑀼 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁂.

𑀓𑀼𑀫𑀼𑀤𑀼𑀧𑁆𑀧𑀮𑀓𑀸𑀤𑀻𑀦𑀺 𑀦𑀸𑀕𑀸𑀦𑀁 𑀪𑀯𑀦𑁂𑀲𑀼𑀧𑀺,

𑀧𑀸𑀝𑀮𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀅𑀲𑀼𑀭𑀸𑀦𑀁 𑀳𑀺 𑀆𑀮𑀬𑁂.

𑀓𑁄𑀯𑀺𑀴𑀸𑀭𑀸𑀤𑀺𑀓𑀸𑀦𑀺 𑀢𑀼 𑀤𑁂𑀯𑀢𑀸𑀦𑀁 𑀳𑀺 𑀆𑀮𑀬𑁂,

𑀏𑀯𑀫𑀸𑀤𑀻 𑀅𑀦𑁂𑀓𑀢𑁆𑀣 𑀧𑀼𑀧𑁆𑀨𑀺𑀢𑁂 𑀥𑀭𑀡𑀻𑀭𑀼𑀳𑁂.

𑀘𑀫𑁆𑀧𑀓𑀸 𑀲𑀮𑀮𑀸 𑀦𑀺𑀫𑁆𑀩𑀸 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸,

𑀯𑀲𑁆𑀲𑀺𑀓𑀸 𑀫𑀮𑁆𑀮𑀺𑀓𑀸 𑀲𑀸𑀮𑀸 𑀓𑁄𑀯𑀺𑀴𑀸𑀭𑀸 𑀘 𑀧𑀸𑀝𑀮𑀺.

𑀇𑀦𑁆𑀤𑀻𑀯𑀭𑀸 𑀅𑀲𑁄𑀓𑀸 𑀘 𑀓𑀡𑀺𑀓𑀸𑀭𑀸 𑀘 𑀫𑀓𑀼𑀮𑀸,

𑀧𑀤𑀼𑀫𑀸 𑀧𑀼𑀡𑁆𑀟𑀭𑀺𑀓𑀸 𑀘 𑀲𑁄𑀕𑀦𑁆𑀥𑀺𑀓𑀼𑀫𑀼𑀤𑀼𑀧𑁆𑀧𑀮𑀸.

𑀏𑀢𑁂 𑀘𑀜𑁆𑀜𑁂 𑀘 𑀭𑀼𑀓𑁆𑀔𑀸 𑀘 𑀯𑀮𑁆𑀮𑀺𑀬𑁄 𑀘𑀸𑀧𑀺 𑀧𑀼𑀧𑁆𑀨𑀺𑀢𑀸,

𑀲𑀼𑀕𑀦𑁆𑀥𑀸 𑀲𑀼𑀔𑀲𑀫𑁆𑀨𑀲𑁆𑀲𑀸 𑀦𑀸𑀦𑀸𑀯𑀡𑁆𑀡𑀦𑀺𑀪𑀸 𑀲𑀼𑀪𑀸.

𑀯𑀺𑀘𑀺𑀢𑁆𑀭𑀸 𑀦𑀻𑀮𑀸𑀦𑁂𑀓𑀸𑀦𑀺 𑀧𑀻𑀢𑀸 𑀮𑁄𑀳𑀺𑀢𑀓𑀸𑀦𑀺 𑀘,

𑀓𑀸𑀴𑀸 𑀲𑁂𑀢𑀸 𑀘 𑀫𑀜𑁆𑀚𑀝𑁆𑀞 𑀦𑁂𑀓𑀯𑀡𑁆𑀡𑀸 𑀲𑀼𑀧𑀼𑀧𑁆𑀨𑀺𑀢𑀸.

𑀲𑁄𑀪𑀢𑁂 𑀧𑀩𑁆𑀩𑀢𑁂 𑀳𑁂𑀝𑁆𑀞𑀸 𑀲𑀭𑁂𑀳𑀺 𑀯𑀦𑀭𑀸𑀚𑀺𑀳𑀺,

𑀲𑀦𑁆𑀤𑀫𑀸𑀦𑀸𑀳𑀺 𑀕𑀗𑁆𑀕𑀸𑀳𑀺 𑀳𑀺𑀫𑀯𑀸 𑀭𑀢𑀦𑀸𑀓𑀭𑁄.

𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀭𑁂𑀡𑀽𑀳𑀺 𑀑𑀓𑀺𑀡𑁆𑀡𑀁 𑀳𑁄𑀢𑀺 𑀢𑀁 𑀯𑀦𑀁,

𑀪𑀫𑀭𑀸 𑀧𑀼𑀧𑁆𑀨𑀕𑀦𑁆𑀥𑁂𑀳𑀺 𑀲𑀫𑀦𑁆𑀢𑀸 𑀅𑀪𑀺𑀦𑀸𑀤𑀺𑀢𑀸.

𑀅𑀣𑁂𑀢𑁆𑀢 𑀲𑀓𑀼𑀡𑀸 𑀲𑀦𑁆𑀢𑀺 𑀤𑀺𑀚𑀸 𑀫𑀜𑁆𑀚𑀼𑀲𑁆𑀲𑀭𑀸 𑀲𑀼𑀪𑀸,

𑀓𑀽𑀚𑀦𑁆𑀢𑀫𑀼𑀧𑀓𑀽𑀚𑀦𑁆𑀢𑀺 𑀉𑀢𑀼𑀲𑀫𑁆𑀧𑀼𑀧𑁆𑀨𑀺𑀢𑁂 𑀤𑀼𑀫𑁂.

𑀦𑀺𑀘𑁆𑀙𑀭𑀸𑀦𑀁 𑀦𑀺𑀧𑀸𑀢𑁂𑀦 𑀧𑀩𑁆𑀩𑀢𑀸 𑀅𑀪𑀺𑀦𑀸𑀤𑀺𑀢𑀸,

𑀧𑀜𑁆𑀘𑀗𑁆𑀕𑀺𑀓𑀸𑀦𑀺 𑀢𑀽𑀭𑀺𑀬𑀸𑀦𑀺 𑀤𑀺𑀩𑁆𑀩𑀸𑀦𑀺 𑀯𑀺𑀬 𑀲𑀼𑀬𑁆𑀬𑀭𑁂.

𑀢𑀢𑁆𑀣 𑀦𑀘𑁆𑀘𑀦𑁆𑀢𑀺 𑀢𑀲𑁆𑀫𑀺𑀁 𑀚𑀮𑀦𑁆𑀢𑀕𑁆𑀕𑀺𑀲𑀺𑀔𑀽𑀧𑀫𑀸,

𑀢𑀲𑁆𑀫𑀺𑀁 𑀳𑀺 𑀓𑀺𑀦𑁆𑀦𑀭𑀸 𑀓𑀺𑀘𑁆𑀘𑀁 𑀧𑀤𑀻𑀧𑁂𑀦 𑀓𑀭𑀻𑀬𑀢𑀺.

𑀫𑀼𑀢𑁆𑀢𑀸𑀚𑀸𑀮𑀸𑀯 𑀤𑀺𑀲𑁆𑀲𑀦𑁆𑀢𑀺 𑀦𑀺𑀘𑁆𑀙𑀭𑀸𑀦𑀁 𑀳𑀺 𑀧𑀸𑀢𑀓𑀸,

𑀧𑀚𑁆𑀚𑀮𑀦𑁆𑀢𑀸 𑀯 𑀢𑀺𑀝𑁆𑀞𑀦𑁆𑀢𑀺 𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀬𑁄.

𑀓𑀸𑀴𑀸𑀦𑀼𑀲𑀸𑀭𑀺 𑀢𑀕𑁆𑀕𑀭𑀁 𑀓𑀧𑁆𑀧𑀽𑀭𑀁 𑀳𑀭𑀺𑀘𑀦𑁆𑀤𑀦𑀁,

𑀲𑀓𑀼𑀡𑀸𑀦𑀁 𑀳𑀺 𑀲𑀤𑁆𑀤𑁂𑀦 𑀫𑀬𑀽𑀭𑀸𑀦𑀁 𑀳𑀺 𑀓𑁂𑀓𑀬𑀸.

𑀪𑀫𑀭𑀸𑀦𑀁 𑀳𑀺 𑀦𑀺𑀦𑁆𑀦𑀸𑀤𑀸 𑀓𑁄𑀜𑁆𑀘𑀦𑀸𑀤𑁂𑀦 𑀳𑀢𑁆𑀣𑀺𑀦𑀁,

𑀯𑀺𑀚𑀫𑁆𑀪𑀺𑀢𑁂𑀦 𑀯𑀸𑀴𑀸𑀦𑀁 𑀓𑀺𑀦𑁆𑀦𑀭𑀸𑀦𑀁 𑀳𑀺 𑀕𑀻𑀢𑀺𑀬𑀸;

𑀧𑀩𑁆𑀩𑀢𑀸𑀦𑀁 𑀳𑀺 𑀑𑀪𑀸𑀲𑀸 𑀫𑀡𑀻𑀦𑀁 𑀚𑁄𑀢𑀺𑀬𑀸𑀧𑀺 𑀘,

𑀯𑀺𑀘𑀺𑀢𑁆𑀭𑀩𑁆𑀪𑀯𑀺𑀢𑀸𑀦𑁂𑀳𑀺 𑀤𑀼𑀫𑀸𑀦𑀁 𑀧𑀼𑀧𑁆𑀨𑀥𑀽𑀧𑀺𑀬𑀸;

𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁 𑀓𑀺𑀁 𑀲𑀺𑀬𑀸 𑀦𑀦𑁆𑀤𑀦𑀁 𑀯𑀦𑀁.

𑀏𑀯𑀁 𑀲𑀼𑀲𑀫𑁆𑀨𑀼𑀮𑁆𑀮𑀯𑀦𑀁 𑀳𑀺 𑀬𑀁 𑀬𑀁,

𑀢𑀳𑀺𑀁 𑀢𑀳𑀺𑀁 𑀧𑀼𑀧𑁆𑀨𑀺𑀢𑀧𑀼𑀧𑁆𑀨𑀺𑀢𑀁 𑀲𑀼𑀪𑀁;

𑀫𑀸𑀮𑀁 𑀲𑀼𑀲𑀤𑁆𑀤𑀜𑁆𑀘 𑀫𑀦𑀼𑀜𑁆𑀜𑀕𑀦𑁆𑀥𑀁,

𑀧𑀽𑀚𑁂𑀫𑀺 𑀢𑀁 𑀧𑀽𑀚𑀺𑀢𑀧𑀽𑀚𑀺𑀢𑀁 𑀧𑀼𑀭𑀸.

𑀦𑀸𑀕𑀮𑁄𑀓𑁂 𑀫𑀦𑀼𑀲𑁆𑀲𑁂 𑀘 𑀤𑁂𑀯𑁂 𑀩𑁆𑀭𑀳𑁆𑀫𑁂 𑀘 𑀬𑀁 𑀲𑀺𑀬𑀸,

𑀲𑀸𑀫𑀼𑀤𑁆𑀤𑀺𑀓𑀁 𑀪𑀽𑀫𑀺𑀕𑀢𑀁 𑀆𑀓𑀸𑀲𑀝𑁆𑀞𑀜𑁆𑀘 𑀬𑀁 𑀥𑀫𑀁.

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀫𑀡𑀺,

𑀫𑀲𑀸𑀭𑀕𑀮𑁆𑀮𑀁 𑀨𑀮𑀺𑀓𑀁 𑀮𑁄𑀳𑀺𑀢𑀗𑁆𑀕𑀁 𑀧𑀯𑀸𑀴𑀓𑀁.

𑀬𑁄 𑀲𑁄 𑀅𑀦𑀦𑁆𑀢𑀓𑀧𑁆𑀧𑁂𑀲𑀼 𑀧𑀽𑀭𑁂𑀢𑁆𑀯𑀸 𑀤𑀲𑀧𑀸𑀭𑀫𑀻,

𑀩𑀼𑀤𑁆𑀥𑁄 𑀩𑁄𑀥𑁂𑀲𑀺 𑀲𑀢𑁆𑀢𑀸𑀦𑀁 𑀢𑀲𑁆𑀲 𑀧𑀽𑀚𑁂𑀫𑀺 𑀢𑀁 𑀥𑀦𑀁.

𑀔𑁄𑀫𑀁 𑀓𑁄𑀲𑁂𑀬𑁆𑀬𑀁 𑀓𑀧𑁆𑀧𑀸𑀲𑀁 𑀲𑀸𑀡𑀁 𑀪𑀗𑁆𑀕𑀜𑁆𑀘 𑀓𑀫𑁆𑀩𑀮𑀁,

𑀤𑀼𑀓𑀽𑀮𑀸𑀦𑀺 𑀘 𑀤𑀺𑀩𑁆𑀩𑀸𑀦𑀺 𑀤𑀼𑀲𑁆𑀲𑀸𑀦𑀺 𑀯𑀺𑀯𑀺𑀥𑀸𑀦𑀺 𑀢𑁂.

𑀅𑀦𑀦𑁆𑀢𑀯𑀢𑁆𑀣𑀤𑀸𑀦𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀺𑀲𑀁𑀯𑀭𑀁,

𑀬𑀲𑁆𑀲 𑀲𑀺𑀤𑁆𑀥𑀁 𑀲𑀺𑀬𑀸 𑀢𑀲𑁆𑀲 𑀤𑀼𑀲𑁆𑀲𑀸𑀦𑀺 𑀧𑀼𑀚𑀬𑀸𑀫𑀳𑀁.

𑀧𑀯𑀦𑁂 𑀚𑀸𑀢𑀭𑀼𑀓𑁆𑀔𑀸𑀦𑀁 𑀦𑀸𑀦𑀸𑀨𑀮𑀭𑀲𑀼𑀢𑁆𑀢𑀫𑀁,

𑀅𑀫𑁆𑀩𑀸 𑀓𑀧𑀺𑀝𑁆𑀞𑀸 𑀧𑀦𑁆𑀲𑀸 𑀘𑁄𑀘𑀫𑁄𑀘𑀸𑀤𑀺𑀦𑀧𑁆𑀧𑀓𑀸.

𑀢𑀲𑁆𑀫𑀺𑀁 𑀕𑀦𑁆𑀥𑀭𑀲𑀁 𑀑𑀚𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀧𑀽𑀚𑀺𑀢𑀁,

𑀯𑀦𑁆𑀤𑀸𑀫𑀺 𑀲𑀺𑀭𑀲𑀸 𑀦𑀺𑀘𑁆𑀘𑀁 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀧𑀽𑀚𑁂𑀫𑀺 𑀧𑀞𑀫𑀁 𑀢𑀲𑁆𑀲 𑀧𑀡𑀺𑀥𑀸𑀦𑀁 𑀅𑀘𑀺𑀦𑁆𑀢𑀺𑀬𑀁,

𑀘𑀓𑁆𑀓𑀯𑀸𑀴𑀫𑁆𑀳𑀺 𑀲𑀩𑁆𑀩𑁂𑀳𑀺 𑀯𑀺𑀚𑁆𑀚𑀫𑀸𑀦𑁂𑀳𑀺 𑀯𑀢𑁆𑀣𑀼𑀳𑀺.

𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀦𑁆𑀢𑀼 𑀧𑀽𑀭𑀺𑀢𑀝𑁆𑀞𑀸𑀦𑀫𑀼𑀢𑁆𑀢𑀫𑀁,

𑀢𑀢𑁄 𑀲𑀸𑀮𑀯𑀦𑁂 𑀭𑀫𑁆𑀫𑁂 𑀚𑀸𑀢𑀝𑁆𑀞𑀸𑀦𑀁 𑀘𑀭𑀺𑀫𑀓𑀁.

𑀙𑀩𑁆𑀩𑀲𑀸𑀦𑀺 𑀧𑀥𑀸𑀦𑀲𑁆𑀫𑀺𑀁 𑀓𑀭𑀡𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁,

𑀅𑀧𑁆𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀩𑀼𑀤𑁆𑀥𑀁 𑀩𑀼𑀤𑁆𑀥𑀕𑀼𑀡𑀁 𑀦𑀫𑁂.

𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺 𑀅𑀝𑁆𑀞𑀭𑁆𑀲 𑀆𑀯𑁂𑀡𑀺𑀓𑀁,

𑀧𑀽𑀚𑁂𑀫𑀺 𑀤𑀲𑀩𑀮𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀫𑀼𑀢𑁆𑀢𑀫𑀁.

𑀆𑀲𑀬𑀸𑀦𑀼𑀲𑀬𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀁,

𑀬𑀫𑀓𑀧𑀸𑀝𑀺𑀳𑀻𑀭𑀜𑁆𑀘 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀺 𑀘.

𑀫𑀳𑀸𑀓𑀭𑀼𑀡𑀸𑀧𑀢𑁆𑀢𑀺𑀜𑀸𑀡𑀁 𑀅𑀦𑀸𑀯𑀭𑀡𑁆𑀫𑀺𑀢𑀺 𑀘,

𑀙 𑀅𑀲𑀸𑀥𑀸𑀭𑀡𑀸𑀦𑁂𑀢𑁂 𑀜𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀢𑀢𑁄 𑀘 𑀲𑀢𑁆𑀢𑀲𑀢𑁆𑀢𑀸𑀳𑁂 𑀥𑀫𑁆𑀫𑀲𑀫𑁆𑀫𑀲𑀺𑀢𑀁 𑀦𑀫𑁂,

𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑀝𑁆𑀞𑀸𑀦𑀁 𑀥𑀫𑁆𑀫𑀁 𑀤𑁂𑀲𑀬𑀺𑀢𑀼𑀁 𑀯𑀭𑀁.

𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀁,

𑀢𑀢𑁄 𑀯𑁂𑀴𑀼𑀯𑀦𑀸𑀭𑀸𑀫𑁂 𑀯𑀲𑀺𑀢𑀞𑀸𑀦𑀜𑁆𑀘 𑀧𑀽𑀚𑀬𑁂.

𑀢𑀢𑁄 𑀚𑁂𑀢𑀯𑀦𑀁 𑀭𑀫𑁆𑀫𑀁 𑀘𑀺𑀭𑀯𑀼𑀢𑁆𑀣𑀁 𑀫𑀳𑁂𑀲𑀺𑀦𑀸,

𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀁 𑀬𑀫𑀓𑀧𑀸𑀝𑀺𑀳𑀭𑀺𑀬𑀁.

𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑀫𑁆𑀳𑀺 𑀅𑀪𑀺𑀥𑀫𑁆𑀫𑀜𑁆𑀘 𑀤𑁂𑀲𑀦𑀁,

𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀤𑁂𑀯𑁄𑀭𑁄𑀳𑀡𑀓𑀁 𑀧𑀺 𑀘.

𑀢𑀢𑁄 𑀘 𑀳𑀺𑀫𑀯𑀦𑁆𑀢𑀲𑁆𑀫𑀺𑀁 𑀫𑀳𑀸𑀲𑀫𑀬𑀤𑁂𑀲𑀦𑀁,

𑀯𑀼𑀢𑁆𑀢𑀸𑀦𑁂𑀢𑀸𑀦𑀺 𑀞𑀸𑀦𑀸𑀦𑀺 𑀦𑀢𑁆𑀯𑀸𑀦 𑀧𑀼𑀚𑀬𑀸𑀫𑀳𑀁.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀁,

𑀧𑀺𑀝𑀓𑀢𑁆𑀢𑀬𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀽𑀚𑀬𑀸𑀫𑀳𑀁.

𑀫𑀸𑀭𑀲𑁆𑀲 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑁄𑀲𑀚𑁆𑀚𑀦𑀁 𑀦𑀫𑁂,

𑀓𑀼𑀲𑀺𑀦𑀸𑀭𑀸𑀬 𑀫𑀮𑁆𑀮𑀸𑀦𑀁 𑀬𑀫𑀓𑀲𑀸𑀮𑀫𑀦𑁆𑀢𑀭𑁂.

𑀧𑀡𑀺𑀥𑀸𑀦𑀫𑁆𑀳𑀺 𑀧𑀝𑁆𑀞𑀸𑀬 𑀓𑀢𑀁 𑀓𑀺𑀘𑁆𑀘𑀁 𑀅𑀲𑁂𑀲𑀢𑁄,

𑀦𑀺𑀝𑁆𑀞𑀧𑁂𑀢𑁆𑀯𑀸𑀦 𑀲𑁄 𑀲𑀩𑁆𑀩𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀸𑀲𑀯𑁄.

𑀏𑀯𑀁 𑀦𑀺𑀩𑁆𑀩𑀸𑀬𑀫𑀸𑀦𑀲𑁆𑀲 𑀓𑀢𑀓𑀺𑀘𑁆𑀘𑀲𑁆𑀲 𑀢𑀸𑀤𑀺𑀦𑁄,

𑀘𑀺𑀭𑀕𑀢𑀸 𑀫𑀳𑀸𑀓𑀭𑀼𑀡𑀸 𑀦 𑀦𑀺𑀩𑁆𑀩𑀸𑀬𑀺𑀢𑁆𑀣 𑀓𑀺𑀜𑁆𑀘𑀺𑀧𑀺.

𑀲𑁆𑀯𑀸𑀬𑀁 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀲𑀸𑀥𑀼𑀓𑀁 𑀫𑀬𑀸,

𑀫𑀫𑀘𑁆𑀘𑀬𑁂𑀦 𑀲𑁄 𑀲𑀢𑁆𑀣𑀸 𑀥𑀸𑀢𑀼 𑀘𑀸𑀧𑀺 𑀲𑀭𑀻𑀭𑀚𑀸.

𑀅𑀧𑁆𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀉𑀢𑁆𑀢𑀫𑀁,

𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸 𑀢𑀺 𑀅𑀦𑀼𑀚𑀸𑀦𑀺 𑀫𑀳𑀸𑀫𑀼𑀦𑀺.

𑀫𑀫 𑀞𑀦𑁂 𑀞𑀧𑁂𑀢𑁆𑀯𑀸𑀦 𑀥𑀸𑀢𑀼𑀩𑁄𑀥𑀺𑀜𑁆𑀘 𑀧𑀽𑀚𑀺𑀢𑀁,

𑀅𑀦𑀼𑀚𑀸𑀦𑀸𑀫𑀺 𑀢𑀼𑀫𑁆𑀳𑀸𑀓𑀁 𑀲𑀸𑀥𑀦𑀢𑁆𑀣𑀁 𑀲𑀺𑀯𑀜𑁆𑀚𑀲𑀁.

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀲𑀤𑁆𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀬𑀣𑀸𑀢𑀣𑀁,

𑀬𑁄 𑀤𑁂𑀲𑁂𑀢𑀺 𑀲𑀫𑁆𑀩𑀼𑀤𑁆𑀥𑁄 𑀢𑀺 𑀦𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀢𑀲𑁆𑀫𑀸 𑀲𑀸𑀲𑀧𑀫𑀢𑁆𑀢𑀁 𑀧𑀺 𑀚𑀺𑀦𑀥𑀸𑀢𑀼𑀁 𑀅𑀲𑁂𑀲𑀺𑀬,

𑀯𑀺𑀢𑁆𑀣𑀺𑀦𑁆𑀦𑀘𑀓𑁆𑀓𑀯𑀸𑀴𑀫𑁆𑀳𑀺 𑀦𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀧𑀭𑀫𑁆𑀧𑀭𑀸𑀪𑀢𑀸𑀦𑀁 𑀳𑀺 𑀇𑀫𑀫𑁆𑀳𑀸 𑀩𑁄𑀤𑁆𑀥𑀺𑀭𑀼𑀓𑁆𑀔𑀢𑁄,

𑀲𑀩𑁆𑀩𑁂𑀲𑀁 𑀩𑁄𑀥𑀺𑀭𑀼𑀓𑁆𑀔𑀸𑀦𑀁 𑀦𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀬𑀁 𑀬𑀁 𑀧𑀭𑀺𑀪𑀼𑀜𑁆𑀚𑀺 𑀪𑀕𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀺𑀓𑀁,

𑀲𑀩𑁆𑀩𑀁 𑀧𑀭𑀺𑀪𑁄𑀕𑀥𑀸𑀢𑀼𑀁 𑀦𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀬𑀢𑁆𑀣 𑀓𑀢𑁆𑀣𑀘𑀺 𑀲𑀬𑀺𑀢𑁄 𑀆𑀲𑀺𑀦𑁆𑀦𑁄 𑀘𑀗𑁆𑀓𑀫𑁂𑀧𑀺 𑀯𑀸,

𑀧𑀸𑀤𑀮𑀜𑁆𑀙𑀦𑁆𑀓𑀁 𑀓𑀢𑁆𑀯𑀸 𑀞𑀺𑀢𑁄 𑀦𑀢𑁆𑀯𑀸𑀦 𑀧𑀽𑀚𑀬𑁂.

𑀦 𑀲𑀜𑁆𑀚𑀸𑀦𑀦𑁆𑀢𑀺 𑀬𑁂 𑀩𑀼𑀤𑁆𑀥𑀁 𑀏𑀯𑀭𑀽𑀧𑁄 𑀢𑀺 𑀜𑀸𑀢𑁆𑀯𑁂,

𑀓𑀢𑀁 𑀢𑀁 𑀧𑀝𑀺𑀫𑀁 𑀲𑀩𑁆𑀩𑀁 𑀦𑀢𑁆𑀯𑀸𑀦 𑀧𑀽𑀚𑀬𑀸𑀫𑀳𑀁.

𑀏𑀯𑀁 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀅𑀦𑀼𑀢𑁆𑀢𑀭𑀁,

𑀘𑀓𑁆𑀓𑀯𑀸𑀴𑀫𑁆𑀳𑀺 𑀲𑀩𑁆𑀩𑁂𑀳𑀺 𑀯𑀢𑁆𑀣𑀽𑀳𑀺 𑀧𑀽𑀚𑀬𑀸𑀫𑀳𑀁.

𑀅𑀲𑁆𑀫𑀺𑀁 𑀘 𑀧𑀼𑀩𑁆𑀩𑁂𑀧𑀺 𑀘 𑀅𑀢𑁆𑀢𑀪𑀸𑀯𑁂,

𑀲𑀩𑁆𑀩𑁂𑀳𑀺 𑀧𑀼𑀜𑁆𑀜𑁂𑀳𑀺 𑀫𑀬𑀸 𑀓𑀢𑁂𑀳𑀺;

𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀘 𑀲𑀜𑁆𑀜𑀫𑁂𑀳𑀺,

𑀪𑀯𑁂 𑀪𑀯𑁂 𑀧𑁂𑀫𑀦𑀺𑀬𑁄 𑀪𑀯𑁂𑀬𑁆𑀬𑀁.

𑀲𑀤𑁆𑀥𑀸 𑀳𑀺𑀭𑁄𑀢𑁆𑀢𑀧𑁆𑀧𑀩𑀳𑀼𑀲𑁆𑀲𑀼𑀢𑀢𑁆𑀢𑀁,

𑀧𑀭𑀓𑁆𑀓𑀫𑁄 𑀘𑁂𑀯 𑀲𑀢𑀺𑀲𑁆𑀲𑀫𑀸𑀥𑀺;

𑀦𑀺𑀩𑁆𑀩𑁂𑀥𑀪𑀸𑀕𑀻 𑀯𑀚𑀺𑀭𑀽𑀧𑀫𑀸𑀢𑀺,

𑀧𑀜𑁆𑀜𑀸 𑀘 𑀫𑁂 𑀲𑀺𑀚𑁆𑀛𑀢𑀼 𑀬𑀸𑀯 𑀩𑁄𑀥𑀺𑀁.

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁,

𑀤𑀺𑀝𑁆𑀞𑀺𑀜𑁆𑀘 𑀫𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘;

𑀫𑀘𑁆𑀙𑁂𑀭𑁂𑀇𑀲𑁆𑀲𑀸𑀫𑀮𑀯𑀺𑀧𑁆𑀧𑀳𑀻𑀦𑁄,

𑀅𑀦𑀼𑀤𑁆𑀥𑀢𑁄 𑀅𑀘𑁆𑀘𑀧𑀮𑁄 𑀪𑀯𑁂𑀬𑁆𑀬𑀁.

𑀪𑀯𑁂𑀬𑁆𑀬𑀳𑀁 𑀓𑁂𑀦𑀘𑀺 𑀦𑀧𑁆𑀧𑀲𑁂𑀬𑁆𑀳𑁄,

𑀪𑁄𑀕𑁄 𑀘 𑀓𑀸𑀬𑁄 𑀘 𑀫𑀫𑁂𑀲 𑀮𑀤𑁆𑀥𑁄,

𑀥𑀫𑁆𑀫𑁂𑀦𑀸 𑀫𑀸𑀮𑀸𑀧𑀺𑀢𑀭𑁄 𑀪𑀭𑁂𑀬𑁆𑀬𑀁,

𑀜𑀸𑀢𑀻𑀲𑀼 𑀫𑀺𑀢𑁆𑀢𑁂𑀲𑀼 𑀲𑀧𑀢𑁆𑀢𑀓𑁂𑀲𑀼,

𑀯𑀼𑀟𑁆𑀠𑀺𑀁 𑀓𑀭𑁂𑀬𑁆𑀬𑀁 𑀳𑀺𑀢𑀫𑀢𑁆𑀢𑀦𑁄 𑀘.

𑀫𑁂𑀢𑁆𑀢𑁂𑀬𑁆𑀬𑀦𑀸𑀣𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸,

𑀢𑀲𑁆𑀲𑀢𑁆𑀢𑀪𑀸𑀯𑀁 𑀅𑀪𑀺𑀧𑀽𑀚𑀬𑀺𑀢𑁆𑀯𑀸;

𑀮𑀤𑁆𑀥𑀸𑀦 𑀯𑁂𑀬𑁆𑀬𑀸𑀓𑀭𑀡𑀁 𑀅𑀦𑀽𑀦𑀁,

𑀩𑀼𑀤𑁆𑀥𑁄 𑀅𑀬𑀁 𑀳𑁂𑀲𑁆𑀲𑀢𑀺𑀦𑀸𑀕𑀢𑁂𑀲𑀼.

𑀮𑁄𑀓𑁂𑀦 𑀓𑁂𑀦𑀸𑀧𑀺 𑀅𑀦𑀼𑀧𑀮𑀺𑀢𑁆𑀢𑁄,

𑀤𑀸𑀦𑁂 𑀭𑀢𑁄 𑀲𑀻𑀮𑀕𑀼𑀡𑁂 𑀲𑀼𑀲𑀸𑀡𑁆𑀞𑀺𑀢𑁄;

𑀦𑁂𑀓𑁆𑀔𑀫𑁆𑀫𑀪𑀸𑀕𑀺 𑀯𑀭𑀜𑀸𑀡𑀮𑀸𑀪𑀻,

𑀪𑀯𑁂𑀬𑁆𑀬𑀳𑀁 𑀣𑀸𑀫𑀩𑀮𑀼𑀧𑀧𑀦𑁆𑀦𑁄.

𑀲𑀻𑀲𑀁 𑀲𑀫𑀁𑀲𑀫𑀁 𑀫𑀫 𑀳𑀢𑁆𑀣𑀧𑀸𑀤𑁂,

𑀲𑀁𑀙𑀺𑀦𑀤𑀫𑀸𑀦𑁂𑀧𑀺 𑀓𑀭𑁂𑀬𑁆𑀬𑀔𑀦𑁆𑀢𑀺𑀁;

𑀲𑀘𑁆𑀘𑁂 𑀞𑀺𑀢𑁄 𑀓𑀸𑀮𑀼𑀫𑀥𑀺𑀝𑁆𑀞𑀺𑀢𑁂 𑀯,

𑀫𑁂𑀢𑁆𑀢𑀸𑀬𑀼𑀧𑁂𑀓𑁆𑀔𑀸𑀬 𑀬𑀼𑀢𑁄 𑀪𑀯𑁂𑀬𑁆𑀬𑀁.

𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀜𑁆𑀘,

𑀲𑀫𑁆𑀩𑁄𑀥𑀺𑀫𑀕𑁆𑀕𑀁 𑀅𑀯𑀺𑀭𑀸𑀥𑀬𑀦𑁆𑀢𑁄;

𑀙𑁂𑀢𑁆𑀯𑀸 𑀓𑀺𑀮𑁂𑀲𑁂 𑀘𑀺𑀢𑀧𑀜𑁆𑀘𑀫𑀸𑀭𑁄,

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑁂𑀲𑀼.