📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀚𑁆𑀚𑀫𑀥𑀼

𑀆𑀦𑀦𑁆𑀤 𑀭𑀜𑁆𑀜 𑀭𑀢𑀦𑀸𑀤𑀺 𑀫𑀳𑀸 𑀬𑀢𑀺𑀦𑁆𑀤,

𑀦𑀺𑀘𑁆𑀘𑀧𑁆𑀧𑀩𑀼𑀤𑁆𑀥 𑀧𑀤𑀼𑀫𑀧𑁆𑀧𑀺𑀬 𑀲𑁂𑀯𑀺𑀦𑀗𑁆𑀕𑀻;

𑀩𑀼𑀤𑁆𑀥𑀧𑁆𑀧𑀺𑀬𑁂𑀦 𑀖𑀦 𑀩𑀼𑀤𑁆𑀥 𑀕𑀼𑀡𑀧𑁆𑀧𑀺𑀬𑁂𑀦,

𑀣𑁂𑀭𑀸𑀮𑀺𑀦𑀸 𑀭𑀘𑀺𑀢 𑀧𑀚𑁆𑀚𑀫𑀥𑀼𑀁 𑀧𑀺𑀩𑀦𑁆𑀢𑀼.

𑁧.

𑀉𑀡𑁆𑀡𑀸𑀧𑀧𑀼𑀡𑁆𑀡𑀲𑀲𑀺𑀫𑀡𑁆𑀤𑀮𑀢𑁄 𑀕𑀮𑀺𑀢𑁆𑀯𑀸,

𑀧𑀸𑀤𑀫𑁆𑀩𑀼𑀚𑀗𑁆𑀕𑀼𑀮𑀺 𑀤𑀮𑀝𑁆𑀞 𑀲𑀼𑀥𑀸 𑀮𑀯𑀸𑀦𑀁;

𑀧𑀦𑁆𑀢𑀻𑀯 𑀲𑀢𑁆𑀣𑀼 𑀦𑀔𑀧𑀦𑁆𑀢𑀺 𑀧𑀚𑀸𑀯𑀺𑀲𑁂𑀲𑀁,

𑀧𑀻𑀡𑁂𑀢𑀼 𑀲𑀼𑀤𑁆𑀥 𑀲𑀼𑀔𑀺𑀢𑀫𑁆𑀫𑀡 𑀢𑀼𑀡𑁆𑀟𑀧𑀻𑀢𑀸.

𑁨.

𑀔𑀺𑀢𑁆𑀢𑀸𑀬 𑀫𑀸𑀭𑀭𑀺𑀧𑀼𑀦𑀸 𑀧𑀭𑀺𑀯𑀢𑁆𑀬 𑀲𑀢𑁆𑀣𑀼,

𑀧𑀸𑀤𑀲𑁆𑀲𑀬𑀸 𑀚𑀺𑀢 𑀤𑀺𑀲𑀸𑀬 𑀲𑀺𑀢𑀢𑁆𑀢𑀮𑀸𑀬;

𑀬𑀸 𑀚𑁂𑀢𑀺 𑀓𑀜𑁆𑀘𑀦 𑀲𑀭𑀸𑀯𑀮𑀺𑀬𑀸 𑀲𑀺𑀭𑀺𑀁 𑀲𑀸,

𑀤𑁂𑀢𑀦𑁆𑀕𑀺𑀦𑀁 𑀭𑀡𑀚𑀬𑀗𑁆𑀕𑀼𑀮𑀺𑀧𑀦𑁆𑀢𑀺𑀓𑀦𑁆𑀢𑀸.

𑁩.

𑀲𑁄𑀯𑀡𑁆𑀡 𑀯𑀡𑁆𑀡 𑀲𑀼𑀔𑀼𑀫𑀘𑁆𑀙𑀯𑀺 𑀲𑁄𑀫𑁆𑀫 𑀓𑀼𑀫𑁆𑀫,

𑀧𑀺𑀝𑁆𑀞𑀻𑀯 𑀧𑀺𑀝𑁆𑀞𑀺 𑀓𑀫𑀢𑀼𑀦𑁆𑀦𑀢𑀺 𑀪𑀸𑀢𑀺 𑀬𑁂𑀲𑀁;

𑀢𑁂𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀼𑀓𑁄𑀫𑀮𑀤𑀻𑀖𑀧𑀡𑁆𑀳𑀺,

𑀧𑀸𑀤𑀸 𑀚𑀺𑀦𑀲𑁆𑀲 𑀧𑀤𑀤𑀦𑁆𑀢𑀼 𑀧𑀤𑀁 𑀚𑀦𑀲𑁆𑀲.

𑁪.

𑀅𑀘𑁆𑀙𑁂𑀭 𑀧𑀗𑁆𑀓𑀚𑀲𑀺𑀭𑀁 𑀲𑀺𑀭𑀺𑀬𑀸 𑀲𑀓𑀸𑀬,

𑀬𑁂 𑀫𑀤𑁆𑀤𑀺𑀦𑁄 𑀯𑀺𑀬 𑀘𑀭𑀦𑁆𑀢𑀺 𑀲𑀭𑁄𑀚 𑀲𑀻𑀲𑁂;

𑀲𑀜𑁆𑀘𑀼𑀫𑁆𑀩𑀺𑀢𑀸 𑀯𑀺𑀬 𑀘 𑀢𑀸𑀦𑀺 𑀧𑀭𑀸𑀕 𑀭𑀸𑀕𑀸,

𑀢𑁂 𑀦𑀻𑀭𑀚𑀸 𑀫𑀼𑀦𑀺𑀧𑀤𑀸 𑀧𑀤𑀤𑀦𑁆𑀢𑀼 𑀮𑀓𑁆𑀔𑀺𑀁.

𑁫.

𑀅𑀕𑀸𑀫𑀺 𑀓𑀸𑀮 𑀚𑀦 𑀫𑀗𑁆𑀕𑀮 𑀪𑀢𑁆𑀢𑀼 𑀪𑀸𑀯𑀁,

𑀯𑁆𑀬𑀸𑀓𑀢𑁆𑀢𑀼𑀫𑀢𑁆𑀭 𑀓𑀼𑀲𑀮𑁂𑀦𑀺𑀯 𑀦𑀺𑀫𑁆𑀫𑀺𑀢𑀸𑀦𑀺;

𑀬𑀸𑀢𑁆𑀭𑀸𑀲𑀼𑀫𑀝𑁆𑀞𑀲𑀢𑀫𑀗𑁆𑀕𑀮𑀓𑁆𑀔𑀡𑀸𑀦𑀺,

𑀲𑀸𑀥𑁂𑀢𑀼 𑀦𑀁 𑀧𑀤𑀬𑀼𑀕𑀁 𑀚𑀬𑀫𑀗𑁆𑀕𑀮𑀸𑀦𑀺.

𑁬.

𑀲𑀲𑁆𑀲𑁂𑀯𑀺𑀚𑀦𑁆𑀢𑀼𑀯𑀭𑀲𑀦𑁆𑀢𑀺𑀧𑀼𑀭𑀧𑁆𑀧𑀯𑁂𑀲𑁂,

𑀦𑀺𑀘𑁆𑀘𑀁 𑀲𑀼𑀲𑀚𑁆𑀚 𑀞𑀧𑀺𑀢𑀸𑀦𑀺𑀯 𑀫𑀗𑁆𑀕𑀮𑀸𑀬;

𑀬𑁂 𑀢𑁂 𑀤𑀥𑀦𑁆𑀢𑀺 𑀓𑀮𑀫𑀗𑁆𑀕𑀮𑀮𑀓𑁆𑀔𑀡𑀸𑀦𑀺,

𑀯𑀢𑁆𑀢𑀦𑁆𑀢𑀼 𑀢𑁂 𑀚𑀺𑀦𑀧𑀤𑀸 𑀚𑀬𑀫𑀗𑁆𑀕𑀮𑀸𑀬.

𑁭.

𑀲𑀩𑁆𑀩𑁂𑀪𑀺𑀪𑀽𑀬 𑀲𑀧𑀤𑁂𑀲𑀼 𑀦𑀺𑀧𑀸𑀢𑀦𑀲𑁆𑀲,

𑀲𑀜𑁆𑀜𑀸𑀡𑀓𑀁 𑀯𑀺𑀬 𑀬𑀤𑀲𑁆𑀲𑀺𑀢𑀲𑀩𑁆𑀩𑀮𑁄𑀓𑁄;

𑀧𑀸𑀤𑀸𑀢𑁆𑀬𑀥𑁄𑀓𑀢𑀢𑀺𑀮𑁄𑀓𑀲𑀺𑀭𑁄𑀯𑀭𑀸 𑀧𑀺,

𑀮𑁄𑀓𑀁 𑀧𑀼𑀡𑀦𑁆𑀢𑀼 𑀚𑀬𑀫𑀗𑁆𑀕𑀮𑀓𑀸𑀭𑀡𑀸𑀦𑀺.

𑁮.

𑀮𑁄𑀓𑀢𑁆𑀢𑀬𑁂𑀓𑀲𑀭𑀡𑀢𑁆𑀢𑀯𑀺𑀪𑀸𑀯𑀦𑀸𑀬,

𑀲𑀚𑁆𑀚𑁄 𑀯 𑀢𑀺𑀝𑁆𑀞𑀢𑀺 𑀬𑀳𑀺𑀁 𑀲𑀼𑀯𑀺𑀪𑀢𑁆𑀢𑀮𑁄𑀓𑁄;

𑀢𑀁 𑀲𑀩𑁆𑀩𑀮𑁄𑀓𑀧𑀝𑀺𑀩𑀺𑀫𑁆𑀩𑀺𑀢𑀤𑀧𑁆𑀧𑀡𑀸𑀪𑀁,

𑀧𑀸𑀤𑀤𑁆𑀯𑀬𑀁 𑀚𑀦𑀲𑀼𑀲𑀚𑁆𑀚𑀦𑀳𑁂𑀢𑀼 𑀳𑁄𑀢𑀼.

𑁯.

𑀮𑁄𑀓𑀼𑀢𑁆𑀢𑀭𑀸𑀬 𑀲𑀺𑀭𑀺𑀬𑀸𑀥𑀺𑀕𑀫𑀸𑀬 𑀲𑀼𑀝𑁆𑀞𑀼,

𑀭𑀚𑀦𑁆𑀢𑀺 𑀬𑀢𑁆𑀣 𑀤𑀺𑀕𑀼𑀡𑀸𑀦𑀺𑀯 𑀧𑀸𑀢𑀼 𑀪𑀽𑀢𑀸;

𑀘𑀓𑁆𑀓𑀸𑀲𑀦𑀸𑀪𑀺𑀲𑀳𑀦𑁂𑀫𑀺𑀲𑀳𑀲𑁆𑀲𑀭𑀸𑀦𑀺,

𑀢𑁆𑀬𑀗𑁆𑀖𑀻 𑀤𑀺𑀲𑀦𑁆𑀢𑀼 𑀲𑀓𑀮𑀺𑀲𑁆𑀲𑀭𑀺𑀬𑀁 𑀚𑀦𑀲𑁆𑀲.

𑁧𑁦.

𑀬𑀢𑁆𑀭𑀼𑀮𑁆𑀮𑀲𑀦𑁆𑀢𑀺 𑀤𑀼𑀯𑀺𑀥𑀸𑀦𑀺𑀯 𑀧𑀸𑀢𑀽 𑀪𑀽𑀢𑀸,

𑀥𑀫𑁆𑀫𑀲𑁆𑀲𑀲𑀩𑁆𑀩𑀪𑀼𑀯𑀦𑀲𑁆𑀲 𑀘 𑀇𑀲𑁆𑀲𑀭𑀢𑁆𑀢𑁂;

𑀘𑀓𑁆𑀓𑀸𑀦𑀺 𑀘𑀓𑁆𑀓𑀲𑀤𑀺𑀲𑀸𑀦𑀺 𑀲𑀼𑀤𑀲𑁆𑀲𑀦𑀲𑁆𑀲,

𑀢𑀸𑀦𑀚𑁆𑀚 𑀚𑀦𑁆𑀢𑀼 𑀲𑀭𑀡𑀸 𑀘𑀭𑀡𑀸𑀦𑀺 𑀳𑁄𑀦𑁆𑀢𑀼.

𑁧𑁧.

𑀲𑀢𑁆𑀢𑁂𑀲𑀼 𑀯𑀘𑁆𑀙𑀢𑀼 𑀲𑀺𑀭𑀻 𑀲𑀺𑀭𑀺𑀯𑀘𑁆𑀙𑀓𑁂𑀦,

𑀲𑁄𑀯𑀢𑁆𑀣𑀺 𑀲𑁄𑀢𑁆𑀣𑀺𑀫𑀦𑀼𑀢𑀺𑀝𑁆𑀞𑀢𑀼 𑀧𑀼𑀕𑁆𑀕𑀮𑁂𑀲𑀼;

𑀦𑀦𑁆𑀤𑀺𑀁 𑀚𑀦𑀸𑀦𑀫𑀦𑀼𑀯𑀢𑁆𑀢𑀢𑀼 𑀦𑀦𑁆𑀤𑀺𑀯𑀢𑁆𑀢𑀻,

𑀲𑀻𑀲𑀸𑀦𑀮𑀁𑀓𑀼𑀭𑀼𑀢𑀼 𑀧𑀸𑀤𑀯𑀢𑀁𑀲𑀓𑁄 𑀧𑀺.

𑁧𑁨.

𑀪𑀤𑁆𑀤𑀸𑀬 𑀧𑀻𑀞𑀫𑀼𑀧𑀕𑀘𑁆𑀙𑀢𑀼 𑀪𑀤𑁆𑀤𑀧𑀻𑀞𑀁,

𑀯𑀼𑀤𑁆𑀥𑀺𑀁 𑀚𑀦𑀸𑀦𑀫𑀦𑀼𑀯𑀢𑁆𑀢𑀢𑀼 𑀯𑀤𑁆𑀥𑀫𑀸𑀦𑀁;

𑀧𑀼𑀡𑁆𑀡𑀢𑁆𑀢𑀫𑀗𑁆𑀕𑀺𑀫𑀦𑀼𑀓𑀼𑀩𑁆𑀩𑀢𑀼 𑀧𑀼𑀡𑁆𑀡𑀓𑀼𑀫𑁆𑀪𑁄,

𑀧𑀸𑀢𑀺 𑀘 𑀧𑀸𑀢𑀼 𑀲𑀢𑀢𑀁 𑀚𑀦𑀢𑀁 𑀅𑀧𑀸𑀬𑀸.

𑁧𑁩.

𑀲𑁂𑀢𑀸𑀢𑀧𑀢𑁆𑀢𑀫𑀧𑀦𑁂𑀢𑀫𑀖𑀸𑀢𑀧𑁂 𑀢𑀁,

𑀔𑀕𑁆𑀕𑁄 𑀯𑀺𑀙𑀺𑀦𑁆𑀤𑀢𑀼 𑀲𑀤𑀸 𑀤𑀼𑀭𑀺𑀢𑀸𑀭𑀺𑀯𑀕𑁆𑀕𑁂;

𑀲𑀁𑀓𑁆𑀮𑁂𑀲𑀤𑀸𑀳𑀫𑀧𑀦𑁂𑀢𑀼 𑀲𑀢𑀸𑀮𑀯𑀡𑁆𑀝,

𑀲𑀁𑀯𑀻𑀚𑀦𑀻 𑀓𑀼𑀫𑀢𑀺𑀫𑀓𑁆𑀔𑀺𑀓𑀫𑁄𑀭𑀳𑀢𑁆𑀣𑁄.

𑁧𑁪.

𑀆𑀓𑀟𑁆𑀠𑀦𑁄 𑀚𑀦𑀯𑀺𑀮𑁄𑀘𑀦𑀫𑀢𑁆𑀢𑀦𑀺𑀦𑁆𑀦𑀁,

𑀯𑀸𑀭𑁂𑀢𑀼 𑀲𑀩𑁆𑀩𑀕𑀢𑀺𑀯𑀸𑀭𑀦𑀫𑀗𑁆𑀓𑀼𑀲𑁄 𑀲𑁄;

𑀧𑀸𑀤𑀫𑁆𑀩𑀼𑀚𑀲𑁆𑀲𑀺𑀭𑀺𑀯𑀺𑀮𑀸𑀲𑀦𑀺𑀓𑁂𑀢𑀦𑀁 𑀯,

𑀧𑀸𑀲𑀸𑀤𑀮𑀔𑀡𑀫𑀼𑀧𑁂𑀢𑀼 𑀫𑀦𑁄𑀧𑀲𑀸𑀤𑀁.

𑁧𑁫.

𑀧𑀸𑀡𑀻𑀦𑀫𑀢𑁆𑀢𑀪𑀚𑀢𑀁 𑀯𑀭𑀧𑀼𑀡𑁆𑀡𑀧𑀢𑁆𑀢𑀁,

𑀲𑀫𑁆𑀫𑀸 𑀤𑀤𑀸𑀢𑀼 𑀧𑀤𑀦𑀺𑀲𑁆𑀲𑀺𑀢𑀧𑀼𑀡𑁆𑀡𑀧𑀢𑁆𑀢𑁄;

𑀧𑀸𑀤𑁂𑀲𑀼 𑀚𑀦𑁆𑀢𑀼 𑀫𑀦𑀩𑀦𑁆𑀥𑀦𑀤𑀸𑀫𑀪𑀽𑀢𑀁,

𑀤𑀸𑀫𑀁 𑀤𑀫𑁂𑀢𑀼 𑀯𑀺𑀫𑀮𑀁 𑀚𑀦𑀢𑀫𑁆𑀫𑀦𑀸𑀦𑀺.

𑁧𑁬.

𑀉𑀡𑁆𑀳𑀻𑀲𑀓𑀼𑀧𑁆𑀧𑀮𑀫𑀡𑀻𑀧𑀤𑀼𑀫𑁂𑀳𑀺 𑀧𑀸𑀤𑀸,

𑀲𑀲𑁆𑀲𑁂𑀯𑀺𑀚𑀦𑁆𑀢𑀼𑀓𑀭𑀡𑀸𑀦𑀺 𑀯𑀺𑀪𑀽𑀲𑀬𑀦𑁆𑀢𑀼;

𑀲𑀦𑁆𑀦𑁂𑀢𑁆𑀢𑀦𑀸𑀯𑀼𑀧𑀕𑀢𑀸𑀦𑀫𑀦𑀕𑁆𑀖𑀓𑀸𑀦𑀺,

𑀩𑁄𑀚𑁆𑀛𑀗𑁆𑀕𑀲𑀢𑁆𑀢𑀭𑀢𑀦𑀸𑀦𑀺 𑀤𑀤𑁂 𑀲𑀫𑀼𑀤𑁆𑀤𑁄.

𑁧𑁭.

𑀉𑀢𑁆𑀢𑀼𑀗𑁆𑀕 𑀦𑀺𑀘𑁆𑀘𑀮𑀕𑀼𑀗𑀸 𑀚𑀺𑀢𑀢𑀸𑀬 𑀦𑀺𑀘𑁆𑀘𑀁,

𑀲𑁂𑀯𑀻𑀯 𑀧𑀸𑀤𑀲𑀺𑀭𑀺 𑀦𑀺𑀘𑁆𑀘 𑀲𑀫𑀼𑀩𑁆𑀩𑀳𑀁 𑀯;

𑀅𑀢𑁆𑀭𑀸𑀧𑀺 𑀲𑀓𑁆𑀓𑀪𑀯𑀦𑀼𑀩𑁆𑀩𑀳𑀡𑁂 𑀦𑀺𑀬𑀼𑀢𑁆𑀢𑁄,

𑀧𑀸𑀤𑀝𑁆𑀞𑀫𑁂𑀭𑀼 𑀪𑀯𑀢𑀁 𑀪𑀯𑀢𑀁 𑀯𑀺𑀪𑀽𑀢𑁆𑀬𑀸.

𑁧𑁮.

𑀲𑁄 𑀘𑀓𑁆𑀓𑀯𑀸𑀴𑀲𑀺𑀔𑀭𑀻 𑀧𑁆𑀬𑀯𑀢𑀁 𑀲𑀫𑀦𑁆𑀢𑀸,

𑀲𑀩𑁆𑀩𑀽𑀧𑀲𑀕𑁆𑀕𑀯𑀺𑀲𑀭𑀸𑀚𑀦𑀢𑀁 𑀲𑀫𑀕𑁆𑀕𑀁;

𑀤𑀻𑀧𑀸 𑀧𑀼𑀣𑀽𑀧𑀺 𑀘𑀢𑀼𑀭𑁄 𑀤𑁆𑀯𑀺𑀲𑀳𑀲𑁆𑀲 𑀔𑀼𑀤𑁆𑀤𑀸,

𑀥𑀸𑀭𑁂𑀦𑁆𑀢𑁆𑀯𑀧𑀸𑀬𑀧𑀢𑀫𑀸𑀦𑀫𑀤𑀢𑁆𑀯 𑀚𑀦𑁆𑀢𑀼𑀁.

𑁧𑁯.

𑀲𑀽𑀭𑁄 𑀧𑀩𑁄𑀥𑀬𑀢𑀼 𑀚𑀦𑁆𑀢𑀼 𑀲𑀭𑁄𑀭𑀼𑀳𑀸𑀦𑀺,

𑀘𑀦𑁆𑀤𑁄 𑀧𑀲𑀸𑀤 𑀓𑀼𑀫𑀼𑀤𑀸𑀦𑀺 𑀫𑀦𑁄𑀤𑀳𑁂𑀲𑀼;

𑀦𑀓𑁆𑀔𑀢𑁆𑀢𑀚𑀸𑀢𑀫𑀔𑀺𑀮𑀁 𑀲𑀼𑀪𑀢𑀸𑀬 𑀳𑁄𑀢𑀼,

𑀘𑀓𑁆𑀓𑀁 𑀥𑀚𑀁 𑀭𑀺𑀧𑀼𑀚𑀬𑀸𑀬 𑀚𑀬𑀤𑁆𑀥𑀚𑀸𑀬.

𑁨𑁦.

𑀚𑁂𑀢𑀼𑀁 𑀲𑀲𑀁𑀲𑀤-𑀲𑀼𑀤𑀲𑁆𑀲𑀦-𑀘𑀓𑁆𑀓𑀯𑀢𑁆𑀢𑀺,

𑀘𑀓𑁆𑀓𑀸𑀦𑀼𑀕𑀦𑁆𑀢𑀮𑀮𑀺𑀢𑀁 𑀬𑀳𑀺𑀫𑀸𑀯𑀳𑁂𑀬𑁆𑀬;

𑀘𑀓𑁆𑀓𑀸𑀡𑀼𑀯𑀢𑁆𑀢𑀺 𑀧𑀭𑀺𑀲𑀸𑀯𑀢-𑀘𑀓𑁆𑀓𑀯𑀢𑁆𑀢𑀺,

𑀦𑀁𑀯𑀢𑁆𑀢𑀢𑀁 𑀧𑀤𑀬𑀼𑀕𑀁 𑀚𑀦𑀢𑀸 𑀳𑀺𑀢𑀸𑀬.

𑁨𑁧.

𑀧𑀼𑀚𑁂𑀢𑀼𑀫𑀸𑀕𑀢 𑀯𑀢𑀸 𑀯𑀚𑀺𑀭𑀸𑀲𑀦𑀝𑁆𑀞,

𑀫𑀺𑀦𑁆𑀤𑁂𑀦 𑀙𑀟𑁆𑀟𑀺𑀢 𑀫𑀳𑀸𑀯𑀺𑀚𑀬𑀼𑀢𑁆𑀢𑀭𑀸𑀔𑁆𑀬𑀁;

𑀲𑀁𑀔𑀁 𑀧𑀯𑀺𑀝𑁆𑀞𑀫𑀺𑀯 𑀫𑀸𑀭𑀪𑀬𑀸 𑀧𑀤𑀸𑀥𑁄,

𑀧𑀸𑀤𑀝𑁆𑀞𑀲𑀁𑀔𑀫𑀺𑀳 𑀯𑀢𑁆𑀢𑀢𑀼 𑀲𑀦𑁆𑀢𑀺𑀬𑀸 𑀯𑁄.

𑁨𑁨.

𑀲𑁄𑀯𑀡𑁆𑀡𑀫𑀘𑁆𑀙𑀬𑀼𑀕𑀮𑀁 𑀲𑀺𑀯𑀪𑀢𑁆𑀢 𑀪𑁄𑀕𑁂,

𑀇𑀘𑁆𑀙𑀸 𑀩𑀳𑀽𑀧𑀓𑀭𑀡𑀁 𑀪𑀯𑀢𑀁 𑀚𑀦𑀸𑀦𑀁;

𑀓𑀼𑀫𑁆𑀪𑀻𑀮𑀥𑀺𑀕𑁆𑀕𑀳𑀺𑀢𑀢𑁄 𑀯 𑀧𑀤𑀼𑀢𑁆𑀣𑀘𑀺𑀢𑁆𑀢𑀸,

𑀧𑀸𑀤𑀫𑁆𑀩𑀼𑀚𑀸𑀓𑀭 𑀯𑀺𑀕𑀸𑀳𑀺 𑀢𑀼 𑀦𑁄𑀧𑀳𑁄𑀦𑁆𑀢𑀼.

𑁨𑁩.

𑀲𑀢𑁆𑀢𑀸𑀧𑀕𑀸 𑀚𑀦𑀫𑀦𑁄𑀚 𑀫𑀮𑁂 𑀚𑀳𑀦𑁆𑀢𑀼,

𑀲𑀁𑀓𑁆𑀮𑁂𑀲𑀤𑀸𑀳𑀫𑀧𑀦𑁂𑀦𑁆𑀢𑀼 𑀤𑀳𑀸 𑀘 𑀲𑀢𑁆𑀢;

𑀲𑁂𑀮𑀸 𑀘 𑀲𑀢𑁆𑀢 𑀯𑀺𑀤𑀥𑀦𑁆𑀢𑀼 𑀚𑀦𑀲𑁆𑀲 𑀢𑀸𑀦𑀁,

𑀮𑁄𑀓𑀧𑁆𑀧𑀲𑀺𑀤𑁆𑀥𑀺𑀚𑀦𑀦𑁂 𑀪𑀯𑀢𑀁 𑀧𑀢𑀸𑀓𑀸.

𑁨𑁪.

𑀧𑀸𑀝𑀗𑁆𑀓𑀺 𑀲𑀦𑁆𑀢𑀺 𑀕𑀫𑀦𑁂 𑀪𑀯𑀢𑀽𑀧𑀓𑀸𑀭𑀸,

𑀤𑀸𑀳𑁂𑀢𑁆𑀢𑀦𑁂𑀲𑀼 𑀚𑀳𑀢𑀁 𑀧𑀤𑀘𑀸𑀫𑀭𑀁 𑀢𑀁;

𑀲𑀮𑁆𑀮𑁄𑀓𑀮𑁄𑀘𑀦𑀫𑀳𑀼𑀲𑁆𑀲𑀯-𑀉𑀲𑁆𑀲𑀺𑀢𑀁 𑀯,

𑀯𑀢𑁆𑀢𑁂𑀬𑁆𑀬 𑀢𑁄𑀭𑀡𑀫𑀦𑀼𑀢𑁆𑀢𑀭𑀫𑀗𑁆𑀕𑀮𑀸𑀬.

𑁨𑁫.

𑀬𑀲𑁆𑀫𑀺𑀁 𑀫𑀺𑀕𑀺𑀦𑁆𑀤 𑀕𑀢 𑀪𑀻𑀢𑀺 𑀩𑀮𑀸𑀯 𑀤𑀟𑁆𑀠,

𑀤𑀸𑀦𑀸 𑀦𑀢𑀸 𑀲𑀺𑀭𑀯𑀺𑀤𑀸𑀭𑀡 𑀧𑀻𑀴𑀺𑀢𑀸𑀯;

𑀦𑀸𑀮𑀸𑀕𑀺𑀭𑀻 𑀓𑀭𑀺𑀯𑀭𑁄 𑀕𑀺𑀭𑀺𑀫𑁂𑀔𑀮𑁄 𑀘,

𑀢𑀁 𑀲𑀻𑀳𑀯𑀺𑀓𑁆𑀓𑀫𑀧𑀤𑀁 𑀳𑀦𑀢𑀸 𑀖𑀤𑀦𑁆𑀢𑀺𑀁.

𑁨𑁬.

𑀧𑀸𑀧𑀸𑀳𑀺𑀦𑁄 𑀳𑀦𑀢𑀼 𑀧𑀸𑀤𑀲𑀼𑀯𑀡𑁆𑀡𑀭𑀸𑀚𑀸,

𑀯𑁆𑀬𑀕𑁆𑀖𑀸𑀥𑀺𑀧𑁄 𑀓𑀮𑀺𑀚𑀦𑁂 𑀅𑀤𑀢𑀁 𑀅𑀲𑁂𑀲𑀁;

𑀯𑀸𑀮𑀸𑀳-𑀅𑀲𑁆𑀲𑀧𑀢𑀺 𑀲𑀫𑁆𑀧𑀢𑀺𑀢𑀼𑀁 𑀅𑀤𑀢𑁆𑀯𑀸,

𑀧𑀸𑀬𑁂𑀲𑀼 𑀧𑀸𑀧𑀬𑀢𑀼 𑀲𑀦𑁆𑀢𑀺𑀧𑀼𑀭𑀫𑁆𑀧𑀚𑀸𑀬𑁄.

𑁨𑁭.

𑀙𑀤𑁆𑀤𑀦𑁆𑀢 𑀤𑀦𑁆𑀢𑀺 𑀮𑀮𑀺𑀢𑀁 𑀕𑀮𑀺𑀢𑀁 𑀭𑀼𑀲𑀫𑁆𑀳𑀸,

𑀮𑀼𑀤𑁆𑀤𑁂𑀢𑁆𑀢 𑀤𑀼𑀩𑁆𑀪𑀺𑀦𑀺 𑀤𑀺𑀲𑁂 𑀅𑀘𑀮𑀁 𑀤𑀥𑀸𑀦𑁄;

𑀧𑀸𑀤𑀝𑁆𑀞𑀳𑀢𑁆𑀣𑀺𑀧𑀢𑀺 𑀲𑀫𑁆𑀧𑀢𑀺 𑀚𑀦𑁆𑀢𑀼𑀢𑀸𑀲𑁂,

𑀢𑀸𑀲𑁂𑀢𑀼 𑀳𑀸𑀲𑀫𑀧𑀭𑀦𑁆𑀤𑀺𑀲𑀢𑀁 𑀲𑀢𑀸𑀦𑀁.

𑁨𑁮.

𑀲𑀩𑁆𑀩𑀗𑁆𑀕𑀺𑀦𑁄 𑀘𑀭𑀡𑀼𑀧𑁄𑀲𑀣 𑀳𑀢𑁆𑀣𑀺𑀭𑀸𑀚𑀸,

𑀧𑀸𑀧𑁂𑀢𑀼 𑀲𑀩𑁆𑀩𑀘𑀢𑀼𑀤𑀻𑀧𑀺𑀓𑀭𑀚𑁆𑀚𑀮𑀓𑁆𑀔𑀺𑀁;

𑀓𑀺𑀢𑁆𑀢𑀻𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀢𑀸 𑀦𑀺𑀬𑀼𑀢𑁆𑀢𑀸,

𑀓𑁂𑀮𑀲𑀲𑁂𑀮𑀧𑀝𑀺𑀫𑀸 𑀳𑀺𑀢𑀫𑀸𑀘𑀭𑁂𑀬𑁆𑀬.

𑁨𑁯.

𑀲𑀸𑀫𑀺𑀲𑁆𑀲 𑀳𑀁𑀲𑀲𑀫𑀬𑁂 𑀤𑀳𑀧𑀸𑀲𑀩𑀤𑁆𑀥,

𑀫𑀸𑀲𑀻𑀦 𑀯𑁂𑀲𑀕𑀫𑀓𑁄 𑀯𑀺𑀬 𑀧𑀸𑀤𑀳𑀁𑀲𑁄;

𑀦𑀺𑀕𑁆𑀖𑁄𑀲 𑀕𑀦𑁆𑀢𑀺𑀚𑀺𑀢𑀢𑁄 𑀯𑀺𑀬 𑀫𑀽𑀕𑀧𑀓𑁆𑀔𑁄,

𑀬𑀸𑀭𑁂𑀢𑀼 𑀲𑀩𑁆𑀩 𑀚𑀦𑀢𑀸 𑀪𑀯𑀕𑀦𑁆𑀢𑀼𑀓𑀢𑁆𑀢𑀁.

𑁩𑁦.

𑀑𑀳𑀸𑀬 𑀤𑀺𑀩𑁆𑀩𑀲𑀭𑀲𑀺𑀁 𑀔𑀺𑀮𑀮𑁄𑀓 𑀲𑀩𑁆𑀩,

𑀭𑀫𑁆𑀫𑀗𑁆𑀖𑀺𑀯𑀸𑀧𑀺𑀫𑀯𑀕𑀸𑀳𑀺𑀢𑀯𑀸𑀯 𑀧𑀸𑀤𑁂;

𑀏𑀭𑀸𑀯𑀡𑁄 𑀓𑀭𑀺𑀯𑀭𑁄 𑀫𑀦𑀲𑀸𑀪𑀺𑀭𑀼𑀴𑁆𑀳𑁂,

𑀚𑀦𑁆𑀢𑀼𑀁 𑀧𑀼𑀭𑀺𑀦𑁆𑀤𑀤𑀧𑀼𑀭𑀁 𑀦𑀬𑀢𑀁 𑀯 𑀲𑀻𑀖𑀁.

𑁩𑁧.

𑀳𑀺𑀢𑁆𑀯𑀸 𑀲𑀓𑀫𑁆𑀪𑀯𑀦𑀫𑀗𑁆𑀖𑀺𑀦𑀺𑀲𑁂𑀯𑀦𑀢𑁆𑀣,

𑀫𑀸𑀕𑀫𑁆𑀫 𑀭𑀫𑁆𑀫 𑀢𑀭𑀢𑀸𑀬𑀺𑀳 𑀦𑀺𑀲𑁆𑀲𑀺𑀢𑁄 𑀯;

𑀧𑀸𑀮𑁂𑀢𑁆𑀯 𑀫𑀽𑀦𑀺 𑀧𑀤𑀯𑀸𑀧𑀺𑀢𑀭𑀗𑁆𑀕𑀪𑀗𑁆𑀕𑀺,

𑀫𑀦𑁆𑀕𑀻 𑀓𑀭𑁄𑀦𑁆𑀢𑀢𑀦𑀼𑀯𑀸𑀲𑀼𑀓𑀺 𑀦𑀸𑀕𑀭𑀸𑀚𑀸.

𑁩𑁨.

𑀦𑀸𑀣𑀲𑁆𑀲 𑀓𑀜𑁆𑀘𑀦𑀲𑀺𑀔𑀸𑀯𑀮𑀚𑀸𑀢𑀺𑀮𑀻𑀮,

𑀫𑀸𑀯𑀺𑀓𑀭𑀁 𑀯 𑀧𑀤𑀦𑀺𑀲𑁆𑀲𑀺𑀢𑀫𑁄𑀭𑀭𑀸𑀚𑀸;

𑀢𑀁 𑀥𑀫𑁆𑀫𑀤𑁂𑀲𑀦𑀭𑀯𑁂𑀦𑀺𑀯 𑀮𑀼𑀤𑁆𑀤𑀓𑀲𑁆𑀲,

𑀮𑁄𑀓𑀲𑁆𑀲 𑀧𑀸𑀧𑀨𑀡𑀺𑀦𑁄 𑀳𑀦𑀢𑀁 𑀅𑀲𑁂𑀲𑀁.

𑁩𑁩.

𑀲𑀁𑀲𑀸𑀭𑀲𑀸𑀕𑀭𑀕𑀢𑁂 𑀲𑀥𑀦𑁂 𑀚𑀦𑁂 𑀢𑁂,

𑀦𑁂𑀢𑀫𑁆𑀧𑀤𑁂 𑀓𑀮𑀘𑀢𑀼𑀫𑁆𑀫𑀼𑀔𑀳𑁂𑀫𑀦𑀸𑀯𑀸;

𑀦𑀺𑀩𑁆𑀩𑀸𑀡𑀧𑀝𑁆𑀝𑀦𑀯𑀭𑀁 𑀪𑀭𑀼𑀓𑀘𑁆𑀙𑀓𑀦𑁆𑀢𑀁,

𑀲𑀼𑀧𑁆𑀧𑀸𑀭𑀧𑀡𑁆𑀟𑀺𑀢 𑀕𑀢𑀸 𑀯𑀺𑀬 𑀆𑀲𑀼𑀦𑀸𑀯𑀸.

𑁩𑁪.

𑀲𑀫𑁆𑀩𑁄𑀥𑀺 𑀜𑀸𑀡 𑀧𑀭𑀺𑀧𑀸𑀘𑀬𑀢𑁄 𑀫𑀼𑀦𑀺𑀲𑁆𑀲,

𑀪𑀢𑁆𑀢𑁄 𑀬𑀣𑀸 𑀳𑀺𑀫𑀯𑀢𑀤𑁆𑀤𑀺 𑀲𑀫𑀸𑀥𑀺𑀳𑁂𑀢𑀼;

𑀏𑀯𑀫𑁆𑀫𑀦𑁂𑀦 𑀪𑀚𑀢𑀁 𑀳𑀺𑀫𑀯𑀤𑁆𑀤𑀺𑀧𑀸𑀤𑁂,

𑀲𑀫𑁆𑀩𑁄𑀥𑀺𑀜𑀸𑀡 𑀧𑀭𑀺𑀧𑀸𑀘𑀦𑀳𑁂𑀢𑀼 𑀳𑁄𑀢𑀼.

𑁩𑁫.

𑀤𑀴𑁆𑀳𑀁 𑀧𑀭𑀸𑀚𑀺𑀢𑀢𑀬𑀸 𑀫𑀼𑀦𑀺𑀦𑀸 𑀲𑀭𑁂𑀦,

𑀲𑀼𑀜𑁆𑀜𑀲𑁆𑀲𑀭𑁄𑀧𑀕𑀢 𑀧𑀜𑁆𑀚𑀭 𑀩𑀦𑁆𑀥𑀦𑁄𑀯;

𑀲𑁄 𑀧𑀸𑀤𑀧𑀜𑁆𑀚𑀭𑀕𑀢𑁄 𑀓𑀭𑀯𑀻𑀓𑀧𑀓𑁆𑀔𑀻,

𑀲𑀩𑁆𑀩𑁂𑀲𑀫𑀧𑁆𑀧𑀻𑀬𑀸𑀯𑀘𑀜𑁆𑀚𑀳𑀢𑀸 𑀪𑀯𑀦𑁆𑀢𑀁.

𑁩𑁬.

𑀢𑁂 𑀘𑀓𑁆𑀓𑀯𑀸𑀓 𑀫𑀓𑀭𑀸 𑀅𑀧𑀺 𑀓𑁄𑀜𑁆𑀘 𑀚𑀻𑀯𑀁,

𑀚𑀻𑀯𑀸𑀤𑀺 𑀧𑀓𑁆𑀔𑀺𑀯𑀺𑀲𑀭𑀸 𑀲𑀭𑀲𑀻𑀯 𑀪𑀼𑀢𑁆𑀢𑀁;

𑀯𑁂𑀲𑁆𑀲𑀦𑁆𑀢𑀭𑁂𑀦 𑀘𑀭𑀡𑀫𑁆𑀩𑀼𑀚𑀺 𑀦𑀺𑀩𑁆𑀪𑀚𑀦𑁆𑀢𑀸,

𑀚𑀦𑁆𑀢𑀼 𑀢𑀳𑀺𑀁 𑀯𑀺𑀬 𑀧𑀤𑁂 𑀲𑀼𑀭𑀫𑁂𑀦𑁆𑀢𑀼 𑀦𑀺𑀘𑁆𑀘𑀁.

𑁩𑁭.

𑀢𑀁 𑀘𑀦𑁆𑀤𑀓𑀺𑀦𑁆𑀦𑀭𑀕𑀢𑀺𑀁𑀯 𑀕𑀢𑀲𑁆𑀲 𑀩𑁄𑀥𑀺,

𑀲𑀢𑁆𑀢𑀲𑁆𑀲 𑀢𑀲𑁆𑀲 𑀲𑀧𑀚𑀸𑀧𑀢𑀺𑀓𑀲𑁆𑀲 𑀪𑀸𑀯𑀁;

𑀲𑀁𑀲𑀽𑀘𑀬𑀦𑁆𑀢 𑀧𑀤 𑀓𑀺𑀦𑁆𑀦𑀭 𑀓𑀺𑀦𑁆𑀦𑀭𑀻 𑀯𑁂,

𑀲𑀸𑀫𑀕𑁆𑀕𑀺𑀫𑀕𑁆𑀕 𑀧𑀝𑀺 𑀧𑀢𑁆𑀢𑀺𑀲𑀼 𑀧𑀸𑀧𑀬𑀦𑁆𑀢𑀼.

𑁩𑁮.

𑀲𑀁𑀭𑀸𑀚𑀥𑀸𑀦𑀺𑀫𑀼𑀲𑀪𑁄 𑀯𑀳𑀢𑀕𑁆𑀕 𑀪𑀸𑀭𑀁,

𑀧𑀻𑀢𑀺𑀧𑁆𑀧𑀬𑁄 𑀧𑀚𑀦𑀬𑁂𑀬𑁆𑀬 𑀲𑀯𑀘𑁆𑀙𑀥𑁂𑀦𑀼;

𑀲𑀲𑁆𑀲𑁂𑀯𑀺𑀦𑁄 𑀅𑀪𑀺𑀭𑀫𑁂𑀦𑁆𑀢𑀼 𑀙𑀓𑀸𑀫𑀲𑀕𑁆𑀕𑀸,

𑀥𑀸𑀭𑁂𑀦𑁆𑀢𑀼 𑀛𑀸𑀬𑀺𑀫𑀺𑀳 𑀲𑁄𑀴𑀲 𑀥𑀸𑀢𑀼𑀥𑀸𑀫𑀸.

𑁩𑁯.

𑀲𑀼𑀢𑁆𑀯𑀸 𑀚𑀺𑀦𑀲𑁆𑀲 𑀓𑀭𑀯𑀻𑀓 𑀲𑀭𑀫𑁆𑀫𑀦𑀼𑀜𑁆𑀜𑀁,

𑀅𑀜𑁆𑀜𑁄𑀜𑁆𑀜 𑀪𑀻𑀢𑀺𑀭𑀳𑀺𑀢𑀸 𑀅𑀧𑀺 𑀧𑀘𑁆𑀘𑀦𑀻𑀓𑀸;

𑀳𑀺𑀢𑁆𑀯𑀸 𑀕𑀢𑀺𑀁 𑀯𑀺𑀬 𑀞𑀺𑀢𑀸 𑀧𑀤𑀲𑀢𑁆𑀢𑀭𑀽𑀧𑀸,

𑀲𑀩𑁆𑀩𑀁 𑀪𑀯𑀲𑁆𑀲𑀺𑀢 𑀚𑀦𑀸𑀦𑀕𑀢𑀺𑀁 𑀳𑀦𑀦𑁆𑀢𑀼.

𑁪𑁦.

𑀲𑁄𑀯𑀡𑁆𑀡 𑀓𑀸𑀳𑀴 𑀬𑀼𑀕𑁄 𑀧𑀫𑀫𑀺𑀦𑁆𑀤𑀺𑀭𑀸𑀬,

𑀲𑀦𑁆𑀦𑀻𑀭𑀧𑀼𑀧𑁆𑀨 𑀫𑀼𑀓𑀼𑀮𑁄𑀧𑀫𑀫𑀼𑀲𑁆𑀲𑀯𑀸𑀬;

𑀦𑀺𑀘𑁆𑀘𑀁 𑀲𑀼𑀲𑀚𑁆𑀚 𑀞𑀧𑀺𑀢𑀁 𑀫𑀼𑀦𑀺 𑀢𑀺𑀝𑁆𑀞𑀢𑀦𑁆𑀢𑁂,

𑀚𑀗𑁆𑀖𑀸𑀤𑁆𑀯𑀬𑀁 𑀚𑀦𑀯𑀺𑀮𑁄𑀘𑀦 𑀫𑀗𑁆𑀕𑀮𑀸𑀬.

𑁪𑁧.

𑀮𑀔𑁆𑀬𑀸 𑀯𑀺𑀮𑀸𑀲 𑀫𑀼𑀓𑀼𑀭𑀤𑁆𑀯𑀬 𑀲𑀦𑁆𑀦𑀺𑀓𑀸𑀲𑀁,

𑀢𑀸𑀟𑀗𑁆𑀓 𑀫𑀡𑁆𑀟𑀦 𑀯𑀺𑀟𑀫𑁆𑀩𑀓𑀫𑀁𑀲𑀼 𑀲𑀡𑁆𑀟𑀁;

𑀚𑀸𑀦𑀼𑀤𑁆𑀯𑀬𑀁 𑀮𑀴𑀺𑀢 𑀲𑀸𑀕𑀭 𑀩𑀼𑀩𑁆𑀩𑀮𑀸𑀪𑀁,

𑀳𑁄𑀢𑀁 𑀚𑀕𑀢𑁆𑀢𑀬 𑀦𑀺𑀚𑀢𑁆𑀢 𑀯𑀺𑀪𑀽𑀲𑀺𑀢𑀼𑀦𑁆𑀢𑁂.

𑁪𑁨.

𑀙𑀤𑁆𑀤𑀦𑁆𑀢𑀺 𑀤𑀺𑀦𑁆𑀦 𑀯𑀭𑀤𑀦𑁆𑀢 𑀬𑀼𑀕𑁄𑀧𑀫𑀸𑀦𑀸,

𑀢𑀁 𑀳𑀢𑁆𑀣𑀺 𑀲𑁄𑀡𑁆𑀟 𑀓𑀫 𑀧𑀼𑀡𑁆𑀡 𑀕𑀼𑀡𑀸 𑀢𑀯𑁄𑀭𑀽;

𑀮𑀻𑀮 𑀧𑀬𑁄𑀥𑀺 𑀲𑀺𑀭𑀺 𑀓𑁂𑀴𑀺 𑀲𑀼𑀯𑀡𑁆𑀡𑀭𑀫𑁆𑀪𑀸,

𑀔𑀦𑁆𑀥𑀸𑀯 𑀤𑁂𑀦𑁆𑀢𑀼 𑀧𑀭𑀺𑀧𑀼𑀡𑁆𑀡 𑀕𑀼𑀦𑁂 𑀚𑀦𑀸𑀦𑀸𑀁.

𑁪𑁩.

𑀚𑀗𑁆𑀖𑀓𑁆𑀔 𑀓𑀤𑁆𑀯𑁆𑀬 𑀲𑀫𑀧𑁆𑀧𑀺𑀢 𑀘𑀺𑀢𑁆𑀢𑀧𑀸𑀤,

𑀘𑀓𑁆𑀓𑀤𑁆𑀯𑀬𑀻 𑀫𑀦𑀫𑀦𑁄𑀚𑀳𑀬𑁄 𑀫𑀼𑀦𑁂 𑀢𑁂;

𑀲𑁄𑀦𑀻 𑀭𑀣𑁄 𑀲𑀺𑀭𑀺𑀯𑀳𑁄 𑀫𑀦𑀲𑀸 𑀪𑀺𑀭𑀼𑀴𑁆𑀳𑀁,

𑀮𑁄𑀓𑀢𑁆𑀢𑀬𑀁 𑀲𑀺𑀯𑀧𑀼𑀭𑀁 𑀮𑀳𑀼 𑀧𑀸𑀧𑀬𑀸𑀢𑀼.

𑁪𑁪.

𑀭𑀫𑁆𑀫𑁄𑀭 𑀧𑀸𑀓𑀝 𑀢𑀝𑀸𑀓 𑀢𑀝𑀸 𑀲𑀯𑀦𑁆𑀢,

𑀭𑁄𑀫𑀸𑀯𑀮𑀻 𑀚𑀮 𑀧𑀦𑀸𑀮𑀺𑀓 𑀓𑁄𑀝𑀺𑀓𑀝𑁆𑀞𑀸;

𑀦𑀸𑀪𑀻 𑀕𑀪𑀻𑀭 𑀲𑀭𑀲𑀻 𑀲𑀺𑀭𑀺 𑀓𑁂𑀴𑀺𑀢𑀸 𑀢𑁂,

𑀲𑀲𑁆𑀲𑁂𑀯𑀺𑀦𑀁 𑀯𑁆𑀬𑀲𑀦 𑀖𑀫𑁆𑀫𑀫𑀮𑀁 𑀲𑀫𑁂𑀢𑀼.

𑁪𑁫.

𑀓𑀦𑁆𑀢𑀺𑀘𑁆𑀙𑀝𑀸 𑀮𑀼𑀴𑀺𑀢 𑀭𑀽𑀧 𑀧𑀬𑁄𑀥𑀺 𑀦𑀸𑀪𑀺,

𑀆𑀯𑀝𑁆𑀝 𑀯𑀝𑁆𑀝𑀺𑀢 𑀦𑀺𑀫𑀼𑀚𑁆𑀚𑀺𑀢 𑀲𑀩𑁆𑀩𑀮𑁄𑀓𑁄;

𑀲𑁄𑀪𑀕𑁆𑀕 𑀢𑁄𑀬 𑀦𑀺𑀯𑀳𑀁 𑀯𑀺𑀲𑀲𑁄 𑀧𑀺𑀯𑀺𑀢𑁆𑀯𑀸,

𑀮𑁄𑀓𑀼𑀢𑁆𑀢𑀭𑀸𑀤𑀺 𑀲𑀼𑀔 𑀫𑀼𑀘𑁆𑀙𑀺𑀢𑀢𑀁 𑀧𑀬𑀸𑀢𑀼.

𑁪𑁬.

𑀕𑀫𑁆𑀪𑀻𑀭 𑀘𑀺𑀢𑁆𑀢𑀭𑀳𑀤𑀁 𑀧𑀭𑀺𑀧𑀽𑀭𑀬𑀺𑀢𑁆𑀯𑀸,

𑀢𑀁 𑀲𑀦𑁆𑀤𑀫𑀸𑀦 𑀓𑀭𑀼𑀡𑀫𑁆𑀩𑀼 𑀧𑀯𑀸𑀳 𑀢𑀼𑀮𑁆𑀬𑀸;

𑀭𑁄𑀫𑀸𑀮𑀺𑀯𑀮𑁆𑀮𑀺𑀳𑀭𑀺 𑀦𑀸𑀪𑀺 𑀲𑀼𑀪𑀸𑀮𑀯𑀸𑀮𑀸,

𑀤𑁂𑀢𑀁 𑀮𑀳𑀼𑀁 𑀲𑀺𑀯𑀨𑀮𑀁 𑀪𑀚𑀢𑀁 𑀫𑀼𑀦𑁂 𑀢𑁂.

𑁪𑁭.

𑀘𑀸𑀭𑀽𑀭 𑀲𑀸𑀭𑀺𑀨𑀮𑀓𑁄 𑀓𑀼𑀝𑀺𑀮𑀕𑁆𑀕 𑀮𑁄𑀫,

𑀧𑀦𑁆𑀢𑀻 𑀯𑀺𑀪𑀢𑁆𑀢𑀺 𑀲𑀳𑀺𑀢𑁄 𑀲𑀺𑀭𑀺 𑀓𑁂𑀴𑀺 𑀲𑀚𑁆𑀚𑁄;

𑀲𑀕𑁆𑀕𑀸𑀧𑀯𑀕𑁆𑀕 𑀲𑀼𑀔 𑀚𑀽𑀢𑀓 𑀓𑁂𑀴𑀺 𑀳𑁂𑀢𑀼,

𑀳𑁄𑀢𑀁 𑀢𑀺𑀮𑁄𑀓 𑀲𑀼𑀔 𑀚𑀽𑀢𑀓 𑀲𑁄𑀡𑁆𑀟𑀓𑀸𑀦𑀁.

𑁪𑁮.

𑀕𑀫𑁆𑀪𑀻𑀭 𑀘𑀺𑀢𑁆𑀢 𑀭𑀳𑀤𑁄 𑀤𑀭 𑀕𑀸𑀳𑀫𑀸𑀦,

𑀫𑁂𑀢𑁆𑀢𑀸𑀤𑀬𑀸 𑀓𑀭𑀺 𑀯𑀥𑀽 𑀓𑀭 𑀲𑀦𑁆𑀦𑀺 𑀓𑀸𑀲𑀸;

𑀲𑀩𑁆𑀩𑀗𑁆𑀕𑀺𑀦𑀁 𑀲𑀺𑀯𑀨𑀮𑀁 𑀢𑀦𑀼 𑀤𑁂𑀯 𑀭𑀼𑀓𑁆𑀔𑁂,

𑀲𑀸𑀔𑀸 𑀲𑀔𑀸 𑀢𑀯 𑀪𑀼𑀚𑀸 𑀪𑀚𑀢𑀁 𑀤𑀤𑀦𑁆𑀢𑀼.

𑁪𑁯.

𑀦𑀺𑀳𑀸𑀭 𑀩𑀺𑀦𑁆𑀤𑀼 𑀲𑀳𑀺𑀢𑀕𑁆𑀕𑀤𑀮𑁄𑀧 𑀲𑁄𑀪𑀺,

𑀩𑁆𑀬𑀸𑀮𑀫𑁆𑀩 𑀭𑀢𑁆𑀢 𑀧𑀤𑀼𑀫𑀤𑁆𑀯𑀬 𑀪𑀗𑁆𑀕𑀺 𑀪𑀸𑀚𑀸;

𑀧𑀸𑀧𑀸𑀭𑀺𑀲𑀻𑀲𑀮𑀼𑀦𑀢𑁂𑀦𑀺𑀯 𑀭𑀢𑁆𑀢 𑀭𑀢𑁆𑀢𑀸,

𑀭𑀢𑁆𑀢𑀸 𑀓𑀭𑀸 𑀢𑀯 𑀪𑀯𑀼𑀫𑁆𑀪𑀼𑀯𑀺 𑀫𑀗𑁆𑀕𑀮𑀸𑀬.

𑁫𑁦.

𑀭𑀼𑀧𑀲𑁆𑀲𑀺𑀭𑀻 𑀘𑀭𑀺𑀢 𑀘𑀗𑁆𑀓𑀫 𑀯𑀺𑀩𑁆𑀪𑀫𑀸 𑀢𑁂,

𑀧𑀺𑀝𑁆𑀞𑀻 𑀬𑀣𑀸 𑀓𑀮𑀮 𑀫𑀼𑀤𑁆𑀥𑀦𑀺 𑀲𑁂𑀢𑀼 𑀪𑀽𑀢𑀸;

𑀏𑀯𑀁 𑀪𑀯𑀡𑁆𑀡𑀯 𑀲𑀫𑀼𑀢𑁆𑀢𑀭𑀡𑀸𑀬 𑀲𑁂𑀢𑀼,

𑀳𑁄𑀢𑀫𑁆𑀫𑀳𑀸𑀓𑀦𑀓 𑀲𑀁𑀓𑀫 𑀲𑀦𑁆𑀦𑀺𑀓𑀸𑀲𑀸.

𑁫𑁧.

𑀲𑀤𑁆𑀥𑀫𑁆𑀫 𑀤𑁂𑀲𑀦 𑀫𑀦𑁄𑀳𑀭 𑀪𑁂𑀭𑀺𑀦𑀸𑀤,

𑀲𑀁𑀘𑀸𑀭𑀡𑁂 𑀲𑀺𑀯𑀧𑀼𑀭𑀁 𑀯𑀺𑀲𑀺𑀢𑀼𑀁 𑀚𑀦𑀸𑀦𑀁;

𑀕𑀻𑀯𑀸 𑀲𑀼𑀯𑀡𑁆𑀡𑀫𑀬 𑀘𑀸𑀭𑀼 𑀫𑀼𑀢𑀺𑀗𑁆𑀕 𑀪𑁂𑀭𑀺,

𑀪𑀸𑀯𑀫𑁆𑀪𑀚𑀸 𑀪𑀯𑀢𑀼 𑀪𑀽𑀢 𑀯𑀺𑀪𑀽𑀢𑀺𑀬𑀸 𑀢𑁂.

𑁫𑁨.

𑀮𑀔𑀻 𑀦𑀺𑀯𑀸𑀲 𑀯𑀤𑀦𑀫𑁆𑀩𑀼𑀚 𑀫𑀢𑁆𑀢 𑀦𑀺𑀦𑁆𑀦,

𑀫𑀸𑀓𑀟𑁆𑀠𑀬𑀁 𑀚𑀦 𑀯𑀺𑀮𑁄𑀘𑀦 𑀘𑀜𑁆𑀘𑀭𑀻𑀓𑁂;

𑀲𑁄𑀭𑀩𑁆𑀪 𑀥𑀫𑁆𑀫 𑀫𑀓𑀭𑀦𑁆𑀤 𑀦𑀺𑀲𑀦𑁆𑀤𑀫𑀸𑀦𑀁,

𑀧𑀺𑀡𑁂𑀢𑀼 𑀢𑁂𑀦 𑀲𑀭𑀲𑁂𑀦 𑀲𑀪𑀸 𑀚𑀦𑁂 𑀢𑁂.

𑁫𑁩.

𑀮𑀔𑀻 𑀲𑀫𑀸𑀭𑀼𑀳𑀺𑀢 𑀯𑀢𑁆𑀢𑀭𑀣𑁂 𑀭𑀣𑀗𑁆𑀕,

𑀤𑁆𑀯𑀦𑁆𑀤𑀸𑀦𑀼 𑀓𑀸𑀭𑀺 𑀫𑀺𑀕 𑀭𑀸𑀚 𑀓𑀧𑁄𑀮 𑀮𑀻𑀮𑀁;

𑀢𑀸𑀤𑀗𑁆𑀓 𑀫𑀡𑁆𑀟𑀮𑀬𑀼𑀕𑀁 𑀯𑀺𑀬 𑀓𑀡𑁆𑀡𑀪𑀸𑀚𑀁,

𑀕𑀡𑁆𑀟𑀢𑁆𑀣𑀮𑀤𑁆𑀯𑁆𑀬𑀫𑀮𑀁𑀓𑀼𑀭𑀼𑀢𑀁 𑀚𑀦𑀢𑁆𑀢𑁂.

𑁫𑁪.

𑀮𑀸𑀯𑀡𑁆𑀡 𑀫𑀡𑁆𑀡𑀯 𑀧𑀯𑀸𑀴 𑀮𑀢𑀸 𑀤𑁆𑀯𑀬𑀸𑀪𑀁,

𑀢𑀦𑁆𑀤𑁂𑀳 𑀤𑁂𑀯 𑀢𑀭𑀼 𑀧𑀮𑁆𑀮𑀯 𑀓𑀦𑁆𑀢𑁂 𑀫𑀦𑁆𑀢𑀁;

𑀯𑀢𑁆𑀢𑀸𑀭𑀯𑀺𑀦𑁆𑀤 𑀫𑀓𑀭𑀦𑁆𑀤 𑀧𑀭𑀸𑀚𑀺𑀲𑁄𑀪𑀁,

𑀭𑀢𑁆𑀢𑀸𑀥𑀭𑀤𑁆𑀯𑀬𑀫𑀥𑁄 𑀓𑀼𑀭𑀼𑀢𑀁 𑀚𑀦𑀸𑀖𑀁.

𑁫𑁫.

𑀉𑀡𑁆𑀡𑀸 𑀲𑀓𑀼𑀦𑁆𑀢𑀺𑀕𑀢 𑀫𑀢𑁆𑀣𑀓 𑀦𑀢𑁆𑀣𑀼 𑀓𑀽𑀧,

𑀲𑀼𑀩𑁆𑀪𑀽 𑀮𑀓𑀸𑀭 𑀲𑀳𑀺𑀢𑁄𑀝𑁆𑀞 𑀧𑀯𑀸𑀴 𑀦𑀸𑀯𑀸;

𑀕𑀢𑁆𑀢𑀼𑀢𑁆𑀢𑀭𑀭𑀡𑁆𑀡𑀯 𑀕𑀢𑀸 𑀢𑀯 𑀚𑀦𑁆𑀢𑀼𑀓𑀸𑀦𑀁,

𑀳𑁄𑀢𑀁 𑀪𑀯𑀡𑁆𑀡𑀯 𑀲𑀫𑀼𑀢𑁆𑀢𑀭𑀦𑀬 𑀦𑀸𑀣.

𑁫𑁬.

𑀇𑀲𑀁 𑀯𑀺𑀓𑀸𑀲 𑀧𑀤𑀼𑀫𑁄𑀤𑀭 𑀓𑁂𑀲𑀭𑀸𑀮𑀺,

𑀮𑀻𑀮𑀸 𑀯𑀺𑀦𑀤𑁆𑀥 𑀭𑀼𑀘𑀺𑀭𑀸 𑀢𑀯 𑀤𑀦𑁆𑀢 𑀧𑀦𑁆𑀢𑀺;

𑀯𑀸𑀦𑀻 𑀯𑀥𑀽 𑀥𑀭𑀺𑀢 𑀫𑀸𑀮𑀢𑀺 𑀫𑀸𑀮𑁆𑀬 𑀢𑀼𑀮𑁆𑀬𑀸,

𑀢𑀲𑁆𑀲𑀁 𑀚𑀸𑀦𑀲𑁆𑀲 𑀫𑀦𑀭𑀜𑁆𑀚𑀦 𑀫𑀸𑀘𑀭𑁂𑀬𑁆𑀬.

𑁫𑁭.

𑀲𑀤𑁆𑀥𑀫𑁆𑀫 𑀦𑀺𑀚𑁆𑀛𑀭 𑀲𑀼𑀭𑀢𑁆𑀢 𑀲𑀺𑀮𑀸𑀢𑀮𑀸𑀪𑀸,

𑀚𑀺𑀯𑁆𑀳𑀸 𑀯𑀘𑀻 𑀦𑀝 𑀯𑀥𑀽 𑀓𑀮 𑀭𑀗𑁆𑀕 𑀪𑀽𑀢𑀸;

𑀲𑀤𑁆𑀥𑀫𑁆𑀫 𑀲𑁂𑀝𑁆𑀞 𑀢𑀭𑀡𑀻 𑀦𑀺𑀳𑀺𑀢𑀧𑁆𑀧𑀺𑀬𑀸 𑀢𑁂,

𑀲𑀁𑀲𑀸𑀭 𑀲𑀸𑀕𑀭 𑀲𑀫𑀼𑀢𑁆𑀢𑀭𑀡𑀸𑀬 𑀳𑁄𑀢𑀼.

𑁫𑁮.

𑀤𑀦𑁆𑀢𑀁𑀲𑀼 𑀓𑀜𑁆𑀘𑀼𑀓𑀻𑀢 𑀭𑀢𑁆𑀢𑀥𑀭𑁄 𑀧𑀥𑀸𑀦𑁂,

𑀚𑀺𑀯𑁆𑀳𑀸 𑀲𑀼𑀭𑀢𑁆𑀢 𑀲𑀬𑀦𑁂 𑀫𑀼𑀔 𑀫𑀦𑁆𑀤𑀺𑀭𑀝𑁆𑀞𑁂;

𑀆𑀫𑁄𑀓𑁆𑀔 𑀫𑀼𑀢𑁆𑀢𑀺 𑀯𑀥𑀼𑀬𑀸 𑀲𑀬𑀺𑀢𑀸𑀬 𑀢𑀼𑀬𑁆𑀳𑀁,

𑀓𑀼𑀩𑁆𑀩𑀦𑁆𑀢𑀼 𑀲𑀁𑀕𑀫 𑀫𑀮𑀁 𑀚𑀦 𑀲𑁄𑀢𑀼 𑀓𑀸𑀫𑀺.

𑁫𑁯.

𑀉𑀡𑁆𑀡𑀸 𑀢𑀣𑀸𑀪𑀺𑀦𑀯 𑀧𑀢𑁆𑀢 𑀯𑀭𑀸𑀪𑀺 𑀭𑀸𑀫𑀸,

𑀮𑀻𑀮𑁄𑀮𑁆𑀮𑀲𑀦𑁆𑀢 𑀪𑀫𑀼𑀓𑀤𑁆𑀯𑀬 𑀦𑀻𑀮 𑀧𑀢𑁆𑀢𑀸;

𑀖𑀸𑀦𑁄𑀭𑀼 𑀘𑀸𑀭𑀼 𑀓𑀤𑀮𑀻 𑀯𑀤𑀦𑀸 𑀮𑀯𑀸𑀮𑀸,

𑀢𑀼𑀬𑁆𑀳𑀁 𑀧𑀯𑀢𑁆𑀢𑀢𑀼 𑀘𑀺𑀭𑀁 𑀚𑀦 𑀫𑀗𑁆𑀕𑀮𑀸𑀬.

𑁬𑁦.

𑀩𑀸𑀮𑀢𑁆𑀣𑀮𑀻 𑀳𑀭𑀺 𑀲𑀺𑀮𑀸𑀢𑀮 𑀧𑀺𑀝𑁆𑀞𑀺𑀓𑀝𑁆𑀞,

𑀪𑀽𑀯𑀮𑁆𑀮𑀭𑀺𑀤𑁆𑀯𑀬 𑀫𑀬𑀽𑀭 𑀬𑀼𑀕𑀲𑁆𑀲 𑀢𑀼𑀬𑁆𑀳𑀁;

𑀧𑀜𑁆𑀘𑀧𑁆𑀧𑀪𑀸 𑀭𑀼𑀘𑀺𑀭 𑀧𑀺𑀘𑁆𑀙 𑀬𑀼𑀕𑀲𑁆𑀲𑀺𑀭𑀻𑀓𑀁,

𑀦𑁂𑀢𑁆𑀢𑀤𑁆𑀯𑀬𑀁 𑀫𑀦𑀲𑀺 𑀧𑀼𑀜𑁆𑀙𑀢𑀼 𑀧𑀸𑀧𑀥𑀽𑀮𑀺𑀁.

𑁬𑁧.

𑀇𑀦𑁆𑀤𑀻𑀯𑀭𑀸𑀦𑁆𑀢𑀕𑀢 𑀪𑀺𑀗𑁆𑀕𑀺𑀓 𑀧𑀦𑁆𑀢𑀺 𑀪𑀗𑁆𑀕𑀺,

𑀧𑀜𑀫𑁆𑀩𑀼𑀚𑀲𑁆𑀲𑀭𑀢𑀢𑁂 𑀯𑀺𑀬 𑀕𑀘𑁆𑀙𑀧𑀦𑁆𑀢𑀻;

𑀦𑁂𑀢𑁆𑀢𑀫𑁆𑀩𑀼𑀚𑀲𑁆𑀲𑀺𑀭𑀺 𑀢𑀺𑀭𑁄𑀓𑀭𑀡𑀻𑀯 𑀢𑀼𑀬𑁆𑀳𑀁,

𑀧𑀫𑁆𑀳𑀸𑀯𑀮𑀻 𑀲𑀺𑀭𑀺𑀕𑀢𑁂𑀳 𑀢𑀺𑀭𑁄 𑀓𑀭𑁄𑀦𑁆𑀢𑀼.

𑁬𑁨.

𑀯𑀢𑁆𑀢𑀼𑀮𑁆𑀮𑀲𑀫𑁆𑀩𑀼𑀚 𑀯𑀺𑀮𑁄𑀘𑀦 𑀳𑀁𑀲 𑀢𑀼𑀡𑁆𑀟,

𑀓𑀜𑁆𑀚𑀁𑀲𑀼 𑀧𑀺𑀜𑁆𑀚𑀭 𑀫𑀼𑀮𑀸𑀮 𑀮𑀢𑀸 𑀤𑁆𑀯𑁆𑀬𑀸𑀪𑀁;

𑀤𑁄𑀮𑀸𑀤𑁆𑀯𑀬𑀁𑀯 𑀲𑀯𑀡𑀤𑁆𑀯𑁆𑀬𑀫𑀢𑁆𑀢 𑀮𑀓𑁆𑀔𑁆𑀬𑀸,

𑀳𑁄𑀢𑀁 𑀢𑀯𑀚𑁆𑀚 𑀚𑀦𑀢𑀸 𑀫𑀢𑀺𑀘𑀸𑀭𑀳𑁂𑀢𑀼.

𑁬𑁩.

𑀯𑀫𑁆𑀫𑀻𑀓 𑀫𑀢𑁆𑀣𑀓 𑀲𑀬𑀸𑀦𑀓 𑀪𑀽𑀭𑀺𑀤𑀢𑁆𑀢,

𑀪𑁄𑀕𑀺𑀦𑁆𑀤 𑀪𑁄𑀕𑀯𑀮𑀺 𑀯𑀺𑀩𑁆𑀪𑀫𑀫𑀸 𑀯𑀳𑀦𑁆𑀢𑀺;

𑀖𑀸𑀦𑁄𑀧𑀭𑀺𑀝𑁆𑀞𑀺𑀢𑀫𑀼𑀦𑁂 𑀢𑀯 𑀢𑀼𑀡𑁆𑀡𑀫𑀼𑀡𑁆𑀡𑀸,

𑀢𑀕𑁆𑀕𑀸𑀳𑀺𑀦𑁄 𑀯𑀺𑀬 𑀚𑀦𑀲𑁆𑀲 𑀤𑀤𑀸𑀢𑀼 𑀯𑀺𑀢𑁆𑀢𑀁.

𑁬𑁪.

𑀭𑀽𑀧𑀺𑀦𑁆𑀤𑀺𑀭𑀸𑀬 𑀯𑀺𑀚𑀬𑁂 𑀔𑀺𑀮 𑀮𑁄𑀓 𑀭𑀽𑀧𑀁,

𑀖𑀸𑀡𑁄𑀭𑀼 𑀘𑀸𑀭𑀼 𑀧𑀭𑀺𑀖𑁄𑀧𑀭𑀺 𑀩𑀤𑁆𑀥 𑀲𑀺𑀤𑁆𑀥𑀸;

𑀦𑀻𑀮𑀸𑀪 𑀯𑀸𑀢 𑀯𑀺𑀮𑀼𑀣𑀦𑁆𑀢 𑀯𑀬𑀤𑁆𑀥𑀚𑀸𑀪𑀸,

𑀢𑀺𑀝𑁆𑀞𑀦𑁆𑀢𑀼 𑀲𑀚𑁆𑀚 𑀤𑀼𑀭𑀺𑀢𑀸𑀭𑀺 𑀚𑀬𑀸𑀬 𑀢𑁂 𑀪𑀽.

𑁬𑁫.

𑀉𑀡𑁆𑀡𑀲𑁆𑀲𑀺𑀢𑁄𑀧𑀮 𑀦𑀺𑀯𑁂𑀲𑀺𑀢 𑀩𑀼𑀦𑁆𑀤 𑀲𑀦𑁆𑀥𑀺,

𑀖𑀸𑀡𑁄𑀭𑀼 𑀧𑀺𑀡𑁆𑀟𑀓𑀫𑀖𑀸 𑀢𑀧 𑀭𑀼𑀦𑁆𑀥𑀺𑀢𑀼𑀦𑁆𑀢𑁂;

𑀳𑁄𑀢𑀫𑁆𑀫𑀼𑀔𑀫𑁆𑀩𑀼𑀚 𑀲𑀺𑀭𑀻 𑀲𑀺𑀭𑀲𑀼𑀲𑁆𑀲𑀺𑀢𑀸𑀪𑀁,

𑀪𑀽 𑀦𑀻𑀮 𑀧𑀝𑁆𑀝𑀺𑀓 𑀮𑀮𑀸𑀢 𑀲𑀼𑀯𑀡𑁆𑀡 𑀙𑀢𑁆𑀢𑀁.

𑁬𑁬.

𑀭𑀼𑀧𑀗𑁆𑀓 𑀯𑁂𑀤𑀦 𑀯𑀺𑀮𑁄𑀘𑀦 𑀩𑀸𑀦 𑀤𑀺𑀝𑁆𑀞𑀻,

𑀥𑀸𑀭𑀸 𑀦𑀺𑀲𑀸𑀦 𑀫𑀡𑀺𑀯𑀝𑁆𑀝 𑀲𑀺𑀭𑀻 𑀲𑀺𑀭𑁄 𑀢𑁂;

𑀲𑀺𑀤𑁆𑀥𑀸 𑀫𑀢𑁄𑀲𑀥 𑀓𑀢𑀜𑁆𑀚𑀦 𑀧𑀼𑀜𑁆𑀚 𑀮𑀓𑁆𑀔𑀻,

𑀳𑁄𑀢𑀁 𑀚𑀦𑀲𑁆𑀲 𑀦𑀬𑀦𑀸𑀫𑀬 𑀦𑀸𑀲𑀦𑀸𑀬.

𑁬𑁭.

𑀲𑀓𑁆𑀔𑀦𑁆𑀥 𑀩𑀸𑀳𑀼𑀬𑀼𑀕 𑀢𑁄𑀭𑀦 𑀫𑀚𑁆𑀛 𑀕𑀻𑀯𑀸,

𑀥𑀭𑀧𑁆𑀧𑀺𑀢𑀲𑁆𑀲𑀺𑀭𑀺𑀖𑀢𑁄 𑀧𑀭𑀺 𑀫𑀼𑀲𑁆𑀲𑀯𑀸𑀬;

𑀦𑀻𑀮𑀼𑀧𑁆𑀧𑀮𑀸𑀯 𑀞𑀧𑀺𑀢𑀸 𑀲𑀯𑀺𑀪𑀢𑁆𑀢𑀺 𑀓𑀦𑁆𑀢𑁂,

𑀓𑁂𑀲𑀸 𑀪𑀯𑀦𑁆𑀢𑀼 𑀪𑀼𑀯𑀦𑀢𑁆𑀢𑀬 𑀫𑀗𑁆𑀕𑀮𑀸𑀬.

𑁬𑁮.

𑀳𑁂𑀫𑀕𑁆𑀖𑀺𑀬𑁂 𑀞𑀧𑀺𑀢 𑀦𑀻𑀮 𑀲𑀺𑀮𑀸 𑀓𑀧𑀸𑀮𑁂,

𑀧𑀚𑁆𑀚𑁄𑀢 𑀚𑀸𑀮 𑀮𑀮𑀺𑀢𑀁 𑀫𑀼𑀦𑀺 𑀲𑀸𑀭𑀬𑀦𑁆𑀢𑀻;

𑀭𑀽𑀧𑀲𑁆𑀲𑀺𑀭𑀻 𑀲𑀺𑀭𑀲𑀺 𑀪𑀽𑀲𑀺𑀢 𑀳𑁂𑀫 𑀫𑀸𑀮𑀸,

𑀓𑀸𑀭𑀸 𑀓𑀭𑁄𑀢𑀼 𑀲𑀼𑀪𑀕𑀁 𑀢𑀯 𑀓𑁂𑀢𑀼 𑀫𑀸𑀮𑀸.

𑁬𑁯.

𑀪𑁆𑀬𑀸𑀫𑀧𑁆𑀧𑀪𑀸𑀮𑀺 𑀢𑀯 𑀓𑀜𑁆𑀘𑀦 𑀫𑁄𑀭 𑀓𑀸𑀮𑁂,

𑀲𑀼𑀭𑁄𑀤𑀬𑁂 𑀯𑀺𑀢𑀢 𑀘𑀦𑁆𑀤𑀓 𑀘𑀓𑁆𑀓𑀮𑀓𑁆𑀔𑀻;

𑀫𑁂𑀖𑀸𑀯𑀦𑀤𑁆𑀥 𑀲𑀺𑀔𑀭𑀼𑀦𑁆𑀦𑀢 𑀳𑁂𑀫 𑀲𑁂𑀮𑀸,

𑀬𑀦𑁆𑀢𑀺𑀦𑁆𑀤𑀘𑀸𑀧 𑀯𑀺𑀓𑀢𑀻𑀯 𑀤𑀤𑀸𑀢𑀼 𑀲𑁄𑀪𑀁.

𑁭𑁦.

𑀧𑀝𑁆𑀞𑀸𑀬 𑀢𑁂 𑀧𑀡𑀺𑀥𑀺𑀢𑁄 𑀲𑀼𑀘𑀺 𑀤𑀸𑀦 𑀲𑀻𑀮,

𑀦𑁂𑀓𑁆𑀔𑀫𑁆𑀫 𑀧𑀜𑁆𑀜 𑀯𑀺𑀭𑀺𑀬𑀓𑁆𑀔𑀫 𑀲𑀘𑁆𑀘𑀥𑀺𑀝𑁆𑀞𑀸;

𑀫𑁂𑀢𑁆𑀢𑀸 𑀉𑀧𑁂𑀓𑁆𑀔𑀺𑀢𑀺 𑀇𑀫𑁂 𑀤𑀲 𑀧𑀽𑀭𑀢𑁄𑀯,

𑀧𑀽𑀭𑁂𑀦𑁆𑀢𑀼 𑀧𑀸𑀭𑀫𑀺 𑀕𑀼𑀡𑀸 𑀚𑀦𑀢𑀸𑀦𑀫𑀢𑁆𑀢𑁂.

𑁭𑁧.

𑀧𑀢𑁆𑀢𑀼𑀢𑁆𑀢𑀭𑀼𑀢𑁆𑀢𑀭𑀤𑀲𑀸 𑀧𑀡𑀺𑀥𑀸𑀦 𑀩𑀻𑀚𑀸,

𑀘𑁂𑀢𑁄𑀭𑀥𑀭𑀸𑀬 𑀓𑀭𑀼𑀡𑀸 𑀚𑀮 𑀲𑁂𑀔 𑀯𑀼𑀤𑁆𑀥𑀸;

𑀲𑀩𑁆𑀩𑀜𑁆𑀜𑀼 𑀜𑀸𑀡 𑀨𑀮𑀤𑀸 𑀲𑀢𑀺 𑀯𑀸𑀝 𑀕𑀼𑀢𑁆𑀢𑀸,

𑀢𑀁 𑀲𑀫𑁆𑀨𑀮𑀦𑁆𑀤𑀺𑀲𑀢𑀼 𑀧𑀸𑀭𑀫𑀺𑀢𑀸 𑀮𑀢𑀸 𑀢𑁂.

𑁭𑁨.

𑀆𑀩𑁄𑀥𑀺 𑀧𑀼𑀡𑁆𑀡𑀫𑀺 𑀧𑀤𑀺𑀝𑁆𑀞 𑀤𑀺𑀦𑀸𑀤𑀺𑀢𑁄 𑀢𑁂,

𑀲𑀫𑁆𑀪𑀸𑀭 𑀓𑀸𑀮 𑀲𑀺𑀢 𑀧𑀓𑁆𑀔 𑀓𑀫𑀸𑀪𑀺 𑀯𑀼𑀤𑁆𑀥𑁄;

𑀲𑀫𑁆𑀧𑀼𑀡𑁆𑀡 𑀧𑀸𑀭𑀫𑀺 𑀕𑀼𑀡𑀸𑀫𑀢𑀭𑀁𑀲𑀺 𑀢𑀁𑀯,

𑀲𑀩𑁆𑀩𑀗𑁆𑀕𑀺 𑀓𑀼𑀦𑁆𑀤 𑀓𑀼𑀫𑀼𑀤𑀸𑀦𑀺 𑀧𑀩𑁄𑀥𑀬𑁂𑀬𑁆𑀬.

𑁭𑁩.

𑀆𑀧𑀘𑁆𑀙𑀺𑀫𑀩𑁆𑀪𑀯 𑀲𑀺𑀯𑀧𑁆𑀨𑀮 𑀮𑀸𑀪 𑀤𑀸𑀦𑀸,

𑀤𑀸𑀦𑀧𑁆𑀧𑀩𑀦𑁆𑀥𑀫𑀧𑀺𑀤𑀸𑀦 𑀨𑀮𑀧𑁆𑀧𑀪𑀦𑁆𑀤𑀁;

𑀲𑀁𑀯𑀟𑁆𑀠𑀬𑀺 𑀢𑁆𑀯𑀁 𑀅𑀪𑀺𑀧𑀢𑁆𑀣𑀦𑀢𑁄 𑀬𑀣𑁂𑀯𑀁,

𑀚𑀦𑁆𑀢𑀼𑀢𑁆𑀢𑀭𑀼𑀢𑁆𑀢𑀭 𑀨𑀮𑀁 𑀔𑀮𑀼 𑀲𑀫𑁆𑀪𑀼𑀦𑀦𑁆𑀢𑀼.

𑁭𑁪.

𑀆𑀭𑀫𑁆𑀪𑀢𑁄𑀧𑁆𑀧𑀪𑀼𑀢𑀺 𑀬𑀸𑀯 𑀢𑀯𑀕𑁆𑀕𑀫𑀕𑁆𑀕𑀸,

𑀯𑀺𑀓𑁆𑀔𑀸𑀮𑀺𑀢 𑀖𑀓𑀮𑀼𑀲𑀁 𑀲𑀼𑀘𑀺 𑀲𑀻𑀮 𑀢𑁄𑀬𑀁;

𑀫𑁂𑀢𑁆𑀢𑀸 𑀤𑀬𑀸 𑀫𑀥𑀼𑀭 𑀲𑀻𑀢𑀮𑀢𑀸𑀬𑀼𑀧𑁂𑀢𑀁,

𑀲𑁄𑀥𑁂𑀢𑀼 𑀢𑁆𑀯𑀁𑀯 𑀪𑀯 𑀦𑀺𑀲𑁆𑀲𑀺𑀢 𑀚𑀦𑁆𑀢𑀼 𑀫𑁂𑀢𑀁.

𑁭𑁫.

𑀆𑀧𑀘𑁆𑀘𑀺𑀫𑀢𑁆𑀢𑀫𑀪𑀺𑀦𑀺𑀓𑁆𑀔𑀫𑀦𑀸𑀪𑀺𑀬𑁄𑀕𑀸,

𑀧𑀝𑁆𑀞𑀸𑀬 𑀢𑀫𑁆𑀧𑀪𑀯𑀢𑁄 𑀧𑀭𑀺𑀧𑀼𑀡𑁆𑀡 𑀕𑁂𑀳𑀸;

𑀢𑁆𑀯𑀁 𑀲𑀩𑁆𑀩 𑀚𑀸𑀢𑀺 𑀕𑀳𑀢𑁄 𑀅𑀧𑀺 𑀦𑀺𑀓𑁆𑀔𑀫𑀺𑀢𑁆𑀣𑁄,

𑀏𑀯𑀁 𑀚𑀦𑀸 𑀪𑀯 𑀤𑀼𑀔𑀸 𑀔𑀮𑀼 𑀦𑀺𑀓𑁆𑀔𑀫𑀦𑁆𑀢𑀼.

𑁭𑁬.

𑀏𑀓𑀕𑁆𑀕𑀢𑁄 𑀧𑀮 𑀢𑀮𑁂 𑀦𑀺𑀲𑀺𑀢𑀸 𑀘𑀺𑀭𑀦𑁆𑀥𑀺,

𑀥𑀸𑀭𑀸 𑀲𑀼𑀘𑀺𑀢𑁆𑀢𑀼 𑀲𑀼𑀢𑀮𑁂 𑀲𑀢𑀺 𑀤𑀡𑁆𑀟 𑀩𑀤𑁆𑀥𑁂;

𑀦𑀺𑀩𑁆𑀩𑀺𑀚𑁆𑀛𑀺 𑀮𑀓𑁆𑀔𑀡 𑀥𑀦𑀼𑀝𑁆𑀞𑀺𑀢𑀺 𑀲𑀦𑁆𑀢𑀺 𑀮𑀓𑁆𑀔𑀁,

𑀔𑀺𑀢𑁆𑀢𑀸 𑀢𑀬𑁄𑀦𑀫𑀦𑀼 𑀯𑀺𑀚𑁆𑀛𑀢𑀼 𑀚𑀦𑁆𑀢𑀼 𑀔𑀺𑀢𑁆𑀢𑀸.

𑁭𑁭.

𑀢𑁆𑀯𑀁 𑀧𑀸𑀭𑀫𑀻 𑀚𑀮 𑀦𑀺𑀥𑀺𑀁 𑀘𑀢𑀼𑀭𑀺𑀳 𑀩𑀸𑀳𑀼,

𑀲𑀢𑁆𑀢𑀻𑀳𑀺 𑀲𑀼𑀢𑁆𑀢𑀭𑀺 𑀘𑀺𑀭𑀁 𑀚𑀦𑀓𑁄𑀯 𑀲𑀺𑀦𑁆𑀥𑀼𑀁;

𑀲𑀫𑁆𑀧𑀦𑁆𑀦 𑀯𑀺𑀓𑁆𑀓𑀫 𑀨𑀮𑁄𑀲𑀺 𑀬𑀣𑀸 𑀘𑀲𑁄𑀯,

𑀏𑀯𑀁 𑀚𑀦𑀸 𑀯𑀺𑀭𑀺𑀬𑀢𑀧𑁆𑀨𑀮𑀫𑁂 𑀥𑀬𑀦𑁆𑀢𑀼.

𑁭𑁮.

𑀲𑀢𑁆𑀢 𑀧𑀭𑀥 𑀤𑀳𑀦𑁂𑀲𑀼 𑀘𑀺𑀭𑀁 𑀲𑀼𑀥𑀦𑁆𑀢𑀁,

𑀔𑀦𑁆𑀢𑀻 𑀲𑀼𑀯𑀡𑁆𑀡 𑀓𑀢 𑀭𑀽𑀧 𑀲𑀫𑀦𑁆𑀢𑀺𑀫𑀢𑁆𑀢𑀸;

𑀲𑀩𑁆𑀩𑀸 𑀧𑀭𑀸𑀥𑀫𑀲𑀳𑀺 𑀢𑁆𑀯𑀁𑀅𑀲𑀬𑁆𑀳𑀫𑁂𑀯𑀁,

𑀲𑀩𑁆𑀩𑁂 𑀚𑀦𑀸𑀧𑀺 𑀔𑀫𑀦𑁂𑀦 𑀪𑀚𑀦𑁆𑀢𑀼 𑀲𑀦𑁆𑀢𑀺𑀁.

𑁭𑁯.

𑀮𑀓𑁆𑀔𑀸𑀥𑀺𑀓𑀁 𑀘𑀢𑀼𑀭 𑀲𑀁𑀔𑀺𑀬 𑀓𑀧𑁆𑀧 𑀓𑀸𑀮𑀁,

𑀲𑀘𑁆𑀘𑁂𑀦 𑀲𑀼𑀝𑁆𑀞𑀼 𑀧𑀭𑀺𑀪𑀸𑀯𑀺𑀢 𑀯𑀸𑀘𑀺𑀦𑁄 𑀢𑁂;

𑀯𑀸𑀘𑀸𑀬 𑀲𑀘𑁆𑀘 𑀨𑀼𑀲𑀺𑀢𑀸𑀬 𑀲𑀫𑁂𑀦𑁆𑀢𑀺 𑀚𑀦𑁆𑀢𑀼,

𑀏𑀯𑀁 𑀯𑀺𑀲𑀼𑀤𑁆𑀥 𑀯𑀘𑀦𑀸 𑀚𑀦𑀢𑀸 𑀪𑀯𑀦𑁆𑀢𑀼.

𑁮𑁦.

𑀆𑀤𑀺𑀦𑁆𑀦 𑀥𑀫𑁆𑀫 𑀫𑀳𑀺𑀬𑀢𑁆𑀣𑀺𑀭 𑀲𑀼𑀧𑁆𑀧𑀢𑀺𑀝𑁆𑀞𑀸,

𑀥𑀺𑀝𑁆𑀞𑀸𑀦 𑀧𑀸𑀭𑀫𑀺 𑀫𑀳𑀸 𑀯𑀚𑀺𑀭𑀤𑁆𑀤𑀺 𑀢𑀼𑀬𑁆𑀳𑀁;

𑀲𑀢𑁆𑀢𑁂𑀦 𑀓𑁂𑀦 𑀧𑀺 𑀬𑀣𑀸𑀳𑀺 𑀅𑀪𑁂𑀚𑁆𑀚 𑀦𑁂𑀚𑁆𑀚𑁄,

𑀏𑀯𑀁 𑀚𑀦𑀸𑀧𑀺 𑀓𑀼𑀲𑀮𑁂𑀲𑀼 𑀅𑀥𑀺𑀝𑁆𑀞 𑀳𑀦𑁆𑀢𑀼.

𑁮𑁧.

𑀢𑁆𑀯𑀁 𑀲𑀩𑁆𑀩 𑀲𑀢𑁆𑀢 𑀘𑀺𑀭𑀪𑀸𑀯𑀺𑀢 𑀫𑁂𑀢𑁆𑀢 𑀘𑀺𑀢𑁆𑀢,

𑀢𑁄𑀬𑁂𑀳𑀺 𑀲𑀁𑀲𑀫𑀺𑀢 𑀓𑁄𑀥 𑀫𑀳𑀸 𑀳𑀼𑀢𑀸𑀲𑁄;

𑀮𑁄𑀓𑀼𑀢𑁆𑀢𑀭𑀁 𑀢𑀤𑀺𑀢𑀭𑀁 𑀳𑀺𑀢𑀫𑀸𑀯𑀳𑀺𑀢𑁆𑀣𑁄,

𑀏𑀯𑀁 𑀚𑀦𑁂𑀲𑀼 𑀚𑀦𑀢𑀸 𑀳𑀺𑀢𑀫𑀸𑀯𑀳𑀦𑁆𑀢𑀽.

𑁮𑁨.

𑀫𑀺𑀢𑁆𑀢𑁄𑀧𑀓𑀸𑀭 𑀧𑀝𑀺𑀧𑀓𑁆𑀔 𑀚𑀦𑀸𑀧𑀓𑀸𑀭𑁂,

𑀢𑁆𑀯𑀁 𑀦𑀺𑀩𑁆𑀩𑀺𑀓𑀸𑀭 𑀫𑀦𑀲𑁄 𑀘𑀺𑀭𑀪𑀸𑀯𑀦𑀸𑀬;

𑀧𑀢𑁆𑀢𑁄𑀲𑀺𑀮𑀸𑀪 𑀧𑀪𑀼𑀢𑀝𑁆𑀝𑀼𑀲𑀼 𑀦𑀺𑀩𑁆𑀩𑀺𑀓𑀸𑀭𑀁,

𑀏𑀯𑀁 𑀚𑀦𑀸𑀦𑀼𑀦𑀬 𑀓𑁄𑀧 𑀦𑀼𑀤𑀸 𑀪𑀯𑀦𑁆𑀢𑀼.

𑁮𑁩.

𑀲𑀫𑁆𑀧𑀦𑁆𑀦 𑀳𑁂𑀢𑀼 𑀯𑀺𑀪𑀯𑁄 𑀢𑀼𑀲𑀺𑀢𑁂 𑀯𑀺𑀫𑀸𑀦𑀁,

𑀬𑀼𑀢𑁆𑀢𑀁 𑀕𑀼𑀡𑁂𑀳𑀺 𑀦𑀯𑀪𑀺𑀧𑁆𑀧𑀤𑀯𑀻 𑀯𑀺𑀫𑀸𑀦𑀁;

𑀢𑁆𑀯𑀁 𑀯𑀸𑀥𑀺𑀧𑀭𑀫𑀺𑀥𑀺𑀭𑁄𑀳𑀺𑀦𑀺𑀬𑀸 𑀢𑀺𑀮𑁄𑀓𑁄,

𑀆𑀭𑁄𑀳𑀢𑀼 𑀪𑀬 𑀲𑀼𑀔𑀁 𑀧𑀤𑀯𑀻 𑀯𑀺𑀫𑀸𑀦𑀁.

𑁮𑁪.

𑀢𑁆𑀯𑀁𑀯𑁂𑀭𑀳𑀁𑀲𑀺 𑀲𑀫𑀩𑀼𑀚𑁆𑀛𑀺 𑀬𑀣𑀸𑀘 𑀲𑀫𑁆𑀫𑀸,

𑀲𑀫𑁆𑀧𑀦𑁆𑀦 𑀯𑀺𑀚𑁆𑀚 𑀘𑀭𑀡𑁄 𑀲𑀼𑀕𑀢𑁄𑀲𑀺 𑀳𑁄𑀦𑁆𑀢𑀼;

𑀮𑁄𑀓𑀁 𑀯𑀺𑀤𑁄 𑀧𑀼𑀭𑀺𑀲𑀤𑀫𑁆𑀫𑀲𑀼𑀲𑀸𑀭𑀣𑀻 𑀲𑀺,

𑀲𑀢𑁆𑀣𑀸𑀲𑀺 𑀩𑀼𑀚𑁆𑀛𑀺 𑀪𑀕𑀯𑀸 𑀲𑀺 𑀢𑀣𑁂𑀯 𑀚𑀦𑁆𑀢𑀼.

𑁮𑁫.

𑀲𑀘𑁆𑀘𑀺𑀢𑁆𑀢 𑀪𑀽 𑀦𑀺𑀤𑀳𑀺𑀢𑀁 𑀚𑀦𑀢𑀸𑀬 𑀢𑀼𑀬𑁆𑀳𑀁,

𑀓𑀮𑁆𑀬𑀸𑀡𑀯𑀡𑁆𑀡𑀭𑀢𑀦𑀡𑁆𑀡𑀯𑀚𑀸𑀢𑀺𑀪𑀺𑀦𑁆𑀦𑀁;

𑀤𑀼𑀓𑁆𑀔𑀕𑁆𑀕𑀺 𑀘𑁄𑀭 𑀚𑀮𑀼𑀧𑀤𑁆𑀤𑀼𑀢𑀚𑀸𑀢𑀺 𑀕𑁂𑀳𑁂,

𑀢𑀲𑁆𑀲𑀸 𑀲𑀼𑀔𑀁 𑀪𑀯𑀢𑀼 𑀚𑀻𑀯𑀺𑀢𑀼𑀫𑀸𑀧𑀤𑀸𑀬.

𑁮𑁬.

𑀯𑀸𑀘𑀸 𑀯𑀺𑀘𑀺𑀢𑁆𑀢 𑀯𑀭 𑀢𑀦𑁆𑀢𑀼 𑀕𑀢𑀗𑁆𑀕𑀺 𑀓𑀡𑁆𑀞𑁂,

𑀲𑁆𑀯𑀸 𑀫𑀼𑀢𑁆𑀢 𑀲𑀕𑁆𑀕𑀼𑀡 𑀫𑀳𑀸 𑀭𑀢𑀦𑀸 𑀯𑀮𑀻 𑀢𑁂;

𑀯𑁂𑀯𑀡𑁆𑀡𑀺 𑀬𑀢𑁆𑀢𑀦𑀺 𑀪𑀯𑀁 𑀲𑀓𑀮𑀫𑁆𑀧𑀳𑀸𑀬,

𑀳𑁄𑀢𑀜𑁆𑀚𑀦𑀲𑁆𑀲 𑀲𑀺𑀭𑀺 𑀲𑀗𑁆𑀕𑀫 𑀫𑀗𑁆𑀕𑀮𑀸𑀬.

𑁮𑁭.

𑀢𑀁 𑀲𑀕𑁆𑀕𑀼𑀡𑀢𑁆𑀣𑀯 𑀤𑀳𑀝𑁆𑀞 𑀲𑀼𑀢𑀺𑀧𑁆𑀧𑀦𑀸𑀮𑀺,

𑀦𑀺𑀲𑁆𑀲𑀦𑁆𑀤𑀫𑀸𑀦 𑀕𑀼𑀡𑀦𑀻𑀭 𑀦𑀺𑀧𑀸𑀦 𑀢𑀺𑀦𑁆𑀢𑁂;

𑀔𑁂𑀢𑁆𑀢𑁂𑀢𑁆𑀢 𑀲𑀜𑁆𑀜𑀺𑀦𑀺 𑀚𑀦𑀸 𑀓𑀢 𑀮𑁄𑀫 𑀳𑀁𑀲,

𑀩𑀻𑀚𑀗𑁆𑀓𑀼𑀭𑀻 𑀓𑀼𑀲𑀮 𑀲𑀲𑁆𑀲 𑀨𑀮𑀁 𑀮𑀪𑀦𑁆𑀢𑀼.

𑁮𑁮.

𑀆𑀧𑀸𑀬𑀺𑀓𑀧𑁆𑀧𑀪𑀼𑀢𑀺 𑀤𑀼𑀓𑁆𑀔 𑀦𑀺𑀤𑀸𑀖 𑀓𑀸𑀮,

𑀲𑀦𑁆𑀢𑀸𑀧𑀺𑀢𑀸 𑀦𑀺𑀔𑀺𑀮 𑀮𑁄𑀓 𑀫𑀦𑁄 𑀓𑀤𑀫𑁆𑀩𑀸;

𑀢𑀁 𑀯𑀗𑁆𑀡 𑀫𑁂𑀖 𑀨𑀼𑀲𑀦𑀸 𑀳𑀲𑀦𑀗𑁆𑀓𑀼𑀭𑁂𑀳𑀺,

𑀇𑀤𑁆𑀥𑀸 𑀪𑀯𑀦𑁆𑀢𑀼 𑀫𑀢𑀺 𑀯𑀮𑁆𑀮𑀭𑀺 𑀯𑁂𑀮𑁆𑀮𑀻𑀢𑀸 𑀢𑁂.

𑁮𑁯.

𑀳𑁂𑀢𑀼𑀤𑁆𑀤𑀲𑀸 𑀨𑀮𑀤𑀲𑀸 𑀲𑀫𑀯𑀝𑁆𑀞𑀺𑀢𑀁 𑀢𑀁,

𑀲𑀩𑁆𑀩𑀢𑁆𑀣 𑀲𑀢𑁆𑀢 𑀳𑀺𑀢𑀫𑀸𑀯𑀳𑀡𑁂𑀦 𑀲𑀺𑀤𑁆𑀥𑀁;

𑀘𑀺𑀦𑁆𑀢𑀸𑀧𑀣𑀸𑀢𑀺𑀕𑀦𑀼𑀪𑀸𑀯 𑀯𑀺𑀪𑀸𑀯𑀦𑀦𑁆𑀢𑁂,

𑀪𑀽𑀢𑀸𑀦𑀫𑀢𑁆𑀣𑀼 𑀘𑀭𑀺𑀢𑀩𑁆𑀪𑀼𑀢𑀫𑀢𑁆𑀣 𑀲𑀺𑀥𑁆𑀬𑀸.

𑁯𑁦.

𑀅𑀗𑁆𑀕𑀸𑀭𑀓𑀸𑀲𑀼𑀫𑀪𑀺𑀮𑀗𑁆𑀖𑀺𑀬 𑀤𑀸𑀦 𑀓𑀸𑀮𑁂,

𑀪𑀢𑁆𑀢𑀢𑁆𑀢𑀦𑁄 𑀧𑀤 𑀧𑀝𑀺𑀘𑁆𑀙𑀓 𑀧𑀗𑁆𑀓𑀚𑀸 𑀘;

𑀬𑀸𑀢𑀓𑁆𑀔𑀡𑁂 𑀢𑀯 𑀧𑀤𑁂 𑀥𑀝𑀫𑀼𑀝𑁆𑀞𑀳𑀺𑀢𑁆𑀯𑀸,

𑀧𑀗𑁆𑀓𑁂𑀭𑀼𑀳𑀸𑀁 𑀲𑀺𑀯 𑀫𑀥𑀼𑀁 𑀲𑀭𑀢𑀁 𑀤𑀤𑀦𑁆𑀢𑀼.

𑁯𑁧.

𑀲𑀘𑁆𑀘𑁂𑀦 𑀫𑀘𑁆𑀙 𑀧𑀢𑀺 𑀯𑀲𑁆𑀲𑀺𑀢 𑀯𑀲𑁆𑀲𑀥𑀸𑀭𑀸,

𑀲𑀢𑁆𑀢𑁂 𑀤𑀬𑀸𑀬 𑀢𑀯 𑀯𑀲𑁆𑀲𑀺𑀢 𑀯𑀲𑁆𑀲𑀥𑀸𑀭𑀸;

𑀕𑀺𑀫𑁆𑀳𑁂 𑀚𑀦𑀲𑁆𑀲 𑀲𑀫𑀬𑀺𑀁𑀲𑀼 𑀬𑀣𑀸 𑀢𑀣𑀸𑀢𑀸,

𑀥𑀫𑀫𑁆𑀩𑀼𑀯𑀼𑀝𑁆𑀞𑀺𑀯 𑀲𑀫𑁂𑀦𑁆𑀢𑀼 𑀓𑀺𑀮𑁂𑀲 𑀤𑀸𑀳𑁂.

𑁯𑁨.

𑀙𑀤𑁆𑀤𑀦𑁆𑀢 𑀦𑀸𑀕 𑀧𑀢𑀺𑀦𑀸 𑀔𑀫𑀢𑀸 𑀧𑀭𑀸𑀥𑀁,

𑀙𑁂𑀢𑁆𑀯𑀸 𑀓𑀭𑁂 𑀞𑀧𑀺𑀢 𑀤𑀦𑁆𑀢𑀯𑀭𑀸𑀯 𑀮𑀼𑀤𑁆𑀤𑀁;

𑀮𑁄𑀓𑁂 𑀳𑀺𑀢𑀸𑀬 𑀞𑀧𑀺𑀢𑀸 𑀢𑀯 𑀤𑀦𑁆𑀢 𑀥𑀸𑀢𑀼,

𑀲𑁂𑀝𑁆𑀞𑀸 𑀚𑀦𑀁 𑀲𑀺𑀯 𑀧𑀼𑀭𑀁 𑀮𑀳𑀼 𑀧𑀸𑀧𑀬𑀦𑁆𑀢𑀼.

𑁯𑁩.

𑀢𑀁 𑀢𑁂𑀫𑀺𑀬𑀸𑀔𑁆𑀬 𑀬𑀢𑀺𑀦𑁄𑀲𑁆𑀲𑀫 𑀫𑀸𑀮𑀓𑀫𑁆𑀳𑀺,

𑀑𑀓𑀺𑀡𑁆𑀡 𑀫𑀼𑀢𑁆𑀢 𑀓𑀦𑀓𑀸 𑀯𑀼𑀚 𑀯𑀺𑀧𑁆𑀧𑀓𑀺𑀡𑁆𑀡𑀸;

𑀓𑀸𑀭𑀼𑀜𑁆𑀜 𑀯𑀸𑀭𑀺𑀤 𑀘𑀼𑀢𑁄 𑀤𑀓 𑀩𑀺𑀦𑁆𑀤𑀼 𑀩𑀦𑁆𑀥𑀽,

𑀥𑀸𑀢𑀼 𑀲𑀫𑁂𑀦𑁆𑀢𑀼 𑀢𑀯 𑀚𑀦𑁆𑀢𑀼𑀲𑀼 𑀤𑀼𑀓𑁆𑀔𑀤𑀸𑀳𑁂.

𑁯𑁪.

𑀭𑀝𑁆𑀞𑀲𑁆𑀲 𑀅𑀢𑁆𑀣 𑀘𑀭𑀡𑀸𑀬 𑀅𑀲𑀫𑁆𑀫𑀼𑀔𑀲𑁆𑀲,

𑀭𑀸𑀫𑁂𑀦 𑀤𑀺𑀦𑁆𑀦 𑀢𑀺𑀡 𑀲𑀁𑀔𑀢 𑀧𑀸𑀤𑀼𑀓𑀸𑀯;

𑀪𑀼𑀢𑁆𑀢𑀸 𑀢𑀬𑀸 𑀘𑀺𑀭𑀫𑀲𑀫𑁆𑀫𑀼𑀔 𑀦𑀸𑀕𑀢𑀲𑁆𑀲,

𑀮𑁄𑀓𑀲𑁆𑀲 𑀅𑀢𑁆𑀣𑀫𑀦𑀼 𑀢𑀺𑀝𑁆𑀞𑀢𑀼 𑀧𑀢𑁆𑀢 𑀥𑀸𑀢𑀼.

𑁯𑁫.

𑀯𑀼𑀢𑁆𑀢𑁄 𑀚𑀦𑀸𑀦𑀫𑀼𑀧𑀤𑀺𑀲𑁆𑀲 𑀯𑀭𑀸𑀳 𑀭𑀜𑁆𑀜𑀸,

𑀲𑀢𑁆𑀣𑀺𑀁 𑀲𑀳𑀲𑁆𑀲 𑀲𑀭𑀤𑀁 𑀯𑀺𑀬 𑀜𑀸𑀬 𑀥𑀫𑁆𑀫𑁄;

𑀆𑀤𑁂𑀬𑁆𑀬 𑀳𑁂𑀬𑁆𑀬𑀫𑀼𑀧𑀤𑀺𑀲𑁆𑀲 𑀢𑀬𑀸 𑀧𑀯𑀼𑀢𑁆𑀢𑁄,

𑀥𑀫𑁆𑀫𑁄 𑀧𑀯𑀢𑁆𑀢𑀢𑀼 𑀘𑀺𑀭𑀁 𑀚𑀦𑀢𑀸 𑀳𑀺𑀢𑀸𑀬.

𑁯𑁬.

𑀫𑀸𑀭𑀸𑀭𑀺 𑀫𑀤𑁆𑀤𑀦 𑀳𑀺𑀢𑀸𑀥𑀺𑀕𑀫𑀁 𑀓𑀭𑁄𑀢𑀸,

𑀪𑀢𑁆𑀢𑁄 𑀢𑀬𑀸 𑀯𑀭 𑀫𑀳𑀸 𑀚𑀬 𑀩𑁄𑀥𑀺 𑀭𑀸𑀚𑀸;

𑀲𑀕𑁆𑀕𑀸 𑀧𑀯𑀯𑀕𑁆𑀕 𑀳𑀺𑀢𑀳𑁂𑀢𑀼 𑀚𑀦𑀲𑁆𑀲 𑀳𑀦𑁆𑀢𑁆𑀯𑀸,

𑀲𑀩𑁆𑀩𑀦𑁆𑀢𑀭𑀸𑀬𑀫𑀺𑀳 𑀢𑀺𑀝𑁆𑀞𑀢𑀼 𑀲𑀼𑀝𑁆𑀞𑀼 𑀲𑀚𑁆𑀚𑁄.

𑁯𑁭.

𑀲𑀸𑀫𑁄𑀤 𑀯𑀡𑁆𑀡 𑀪𑀚𑀦𑀻 𑀕𑀼𑀡 𑀫𑀜𑁆𑀚𑀭𑀻𑀬𑀁,

𑀘𑀭𑀺𑀬𑀸 𑀮𑀢𑀸 𑀯𑀺𑀓𑀲𑀺𑀢𑀸 𑀢𑀯 𑀲𑀧𑁆𑀨𑀮𑀗𑁆𑀕𑀁;

𑀑𑀓𑀺𑀡𑁆𑀡 𑀘𑀺𑀢𑁆𑀢 𑀫𑀥𑀼𑀧𑁂 𑀭𑀲 𑀧𑀻𑀡𑀬𑀦𑁆𑀢𑀺,

𑀲𑀫𑁆𑀪𑀸𑀯𑀺𑀢𑀸 𑀪𑀼𑀯𑀺 𑀧𑀯𑀢𑁆𑀢𑀢𑀼 𑀫𑀢𑁆𑀣𑀓𑁂𑀳𑀺.

𑁯𑁮.

𑀲𑀫𑁆𑀩𑀼𑀤𑁆𑀥 𑀲𑁂𑀮𑀯𑀮𑀬𑀦𑁆𑀢𑀭 𑀚𑀸𑀦𑀦𑀯𑁆𑀳𑀸,

𑀦𑁄𑀢𑁆𑀢𑀢𑁆𑀢𑀢𑁄 𑀢𑀺𑀧𑀣𑀕𑀸 𑀬𑀢𑀺 𑀲𑀸𑀕𑀭𑀝𑁆𑀞𑀸;

𑀥𑀫𑁆𑀫𑀸 𑀧𑀕𑀸 𑀲𑀼𑀢𑀺 𑀯𑀲𑁂 𑀢𑀭𑀺𑀢𑁂 𑀧𑀼𑀡𑀦𑁆𑀢𑀺,

𑀲𑀫𑁆𑀪𑀸𑀭 𑀲𑀲𑁆𑀲𑀫𑀺𑀳 𑀯𑀢𑁆𑀢𑀢𑀼 𑀧𑀘𑀬𑀦𑁆𑀢𑀺.

𑁯𑁯.

𑀧𑀜𑁆𑀜𑀸𑀡 𑀓𑀽𑀧 𑀲𑀺𑀢 𑀧𑀕𑁆𑀕𑀳 𑀯𑀸𑀬𑀼 𑀕𑀸𑀳𑀻,

𑀲𑀤𑁆𑀥𑀸 𑀮𑀓𑀸𑀭 𑀲𑀳𑀺𑀢𑀸 𑀲𑀢𑀺 𑀧𑁄𑀢 𑀯𑀸𑀳𑀸;

𑀲𑀫𑁆𑀧𑀸𑀧𑀬𑀸𑀢𑀼 𑀪𑀯 𑀲𑀸𑀕𑀭 𑀧𑀸𑀭 𑀢𑀻𑀭,

𑀲𑀧𑁆𑀧𑀢𑁆𑀢𑀦𑀁 𑀯𑀭𑀥𑀦𑁂 𑀧𑀢𑀺 𑀧𑀢𑁆𑀢𑀺 𑀦𑀸𑀯𑀸.

𑁧𑁦𑁦.

𑀩𑁄𑀚𑁆𑀛𑀗𑁆𑀕 𑀲𑀢𑁆𑀢 𑀭𑀢𑀦𑀸𑀓𑀭 𑀥𑀫𑁆𑀫 𑀔𑀦𑁆𑀥,

𑀕𑀫𑁆𑀪𑀻𑀭 𑀦𑀻𑀭 𑀘𑀬 𑀲𑀸𑀲𑀦 𑀲𑀸𑀕𑀭𑁄 𑀲𑀁;

𑀲𑁄 𑀲𑀻𑀮𑁆𑀬𑀦𑀦𑁆𑀢 𑀢𑀦𑀼 𑀯𑁂𑀝𑀺𑀣 𑀜𑀸𑀡 𑀫𑀦𑁆𑀣,

𑀲𑁂𑀮𑁂𑀦 𑀫𑀦𑁆𑀣𑀺𑀢𑀯𑀢𑀁 𑀤𑀺𑀲𑀢𑀸 𑀫𑀢𑀁 𑀯𑁂.

𑁧𑁦𑁧.

𑀯𑀼𑀢𑁆𑀢𑁂𑀦 𑀢𑁂𑀦 𑀯𑀺𑀥𑀺𑀦𑀸 𑀯𑀺𑀥𑀺𑀦𑀸 𑀢𑀢𑁄 𑀢𑀁,

𑀮𑀤𑁆𑀥𑀸 𑀦𑀼𑀪𑀽𑀢𑀫𑀫𑀢𑀁 𑀔𑀺𑀮 𑀤𑁄𑀲 𑀦𑀸𑀲𑀁;

𑀅𑀘𑁆𑀘𑀦𑁆𑀢 𑀭𑁄𑀕 𑀚𑀭𑀢𑀸 𑀫𑀭𑀡𑀸 𑀪𑀺 𑀪𑀽𑀢𑀁,

𑀪𑀽𑀢𑀁 𑀓𑀭𑁄𑀢𑀼 𑀅𑀫𑀭𑀁 𑀅𑀚𑀭𑀁 𑀅𑀭𑁄𑀕𑀁.

𑁧𑁦𑁨.

𑀲𑀤𑁆𑀥𑀫𑁆𑀫 𑀭𑀸𑀚 𑀭𑀯𑀺𑀦𑀺𑀕𑁆𑀕𑀢 𑀥𑀫𑁆𑀫𑀭𑀁𑀲𑀺,

𑀨𑀼𑀮𑁆𑀮𑁄 𑀥𑀼𑀢𑀗𑁆𑀕𑀤𑀮 𑀲𑀁𑀯𑀭 𑀓𑁂𑀲𑀭𑀸𑀮𑀺;

𑀲𑀗𑁆𑀖𑀸𑀭𑀯𑀺𑀦𑁆𑀤 𑀦𑀺𑀓𑀭𑁄 𑀲𑀫𑀥𑀼𑀁 𑀲𑀫𑀸𑀥𑀺,

𑀲𑀓𑁆𑀓𑀺𑀡𑁆𑀡𑀺𑀓𑁄 𑀤𑀺𑀲𑀢𑀼 𑀲𑀸𑀲𑀦 𑀯𑀸𑀧𑀺 𑀚𑀢𑁄.

𑁧𑁦𑁩.

𑀆𑀦𑀦𑁆𑀤 𑀭𑀜𑁆𑀜 𑀭𑀢𑀦𑀸𑀤𑀺 𑀫𑀳𑀸 𑀬𑀢𑀺𑀦𑁆𑀤,

𑀦𑀺𑀘𑁆𑀘𑀧𑁆𑀧𑀩𑀼𑀤𑁆𑀥 𑀧𑀤𑀼𑀫𑀧𑁆𑀧𑀺𑀬 𑀲𑁂𑀯𑀺𑀦𑀗𑁆𑀕𑀻;

𑀩𑀼𑀤𑁆𑀥𑀧𑁆𑀧𑀺𑀬𑁂𑀦 𑀖𑀦 𑀩𑀼𑀤𑁆𑀥 𑀕𑀼𑀡𑀧𑁆𑀧𑀺𑀬𑁂𑀦,

𑀣𑁂𑀭𑀸𑀮𑀺𑀦𑀸 𑀭𑀘𑀺𑀢 𑀧𑀚𑁆𑀚𑀫𑀥𑀼𑀁 𑀧𑀺𑀩𑀦𑁆𑀢𑀼.

𑁧𑁦𑁪.

𑀇𑀢𑁆𑀣𑀁 𑀭𑀽𑀧 𑀕𑀼𑀡𑀸𑀦𑀼𑀓𑀺𑀢𑁆𑀢𑀦𑀯𑀲𑀸 𑀢𑀁 𑀢𑀁 𑀳𑀺𑀢𑀸 𑀲𑀺𑀁 𑀲𑀢𑁄,

𑀯𑀢𑁆𑀣𑀸𑀦𑀼𑀲𑁆𑀲𑀢𑀺 𑀯𑀢𑁆𑀢𑀺𑀢 𑀇𑀳 𑀬𑀣𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀘 𑀫𑁂;

𑀏𑀯𑀁 𑀢𑀸𑀪𑀺 𑀪𑀯𑀦𑁆𑀢 𑀭𑀼𑀢𑁆𑀢𑀭 𑀢𑀭𑀸 𑀯𑀢𑁆𑀢𑀦𑁆𑀢𑀼 𑀢𑀸 𑀩𑁄𑀥𑀺 𑀫𑁂,

𑀲𑀁𑀬𑁄𑀕𑁄𑀘 𑀥𑀦𑁂𑀳𑀺 𑀲𑀦𑁆𑀢𑀺𑀳𑀺 𑀪𑀯𑁂 𑀓𑀮𑁆𑀬𑀸𑀦 𑀫𑀺𑀢𑁆𑀢𑁂𑀳𑀺 𑀘.