𑀅𑀜𑁆𑀜 > 𑀯𑀁𑀲-𑀕𑀦𑁆𑀣-𑀲𑀗𑁆𑀕𑀳𑁄

𑀯𑀺𑀦𑀬𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀦𑁆𑀢𑀺. 𑀢𑀢𑁆𑀣 𑀓𑀢𑀫𑀁 𑀯𑀺𑀦𑀬 𑀧𑀺𑀝𑀓𑀁? 𑀧𑀸𑀭𑀸𑀚𑀺𑀓𑀓𑀡𑁆𑀟𑀁, 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁, 𑀫𑀳𑀸𑀯𑀕𑁆𑀕𑀓𑀡𑁆𑀟𑀁, 𑀘𑀼𑀮𑁆𑀮𑀯𑀕𑁆𑀕𑀓𑀡𑁆𑀟𑀁, 𑀧𑀭𑀺𑀯𑀸𑀭𑀓𑀡𑁆𑀟𑀦𑁆𑀢𑀺. 𑀇𑀫𑀸𑀦𑀺 𑀓𑀡𑁆𑀟𑀸𑀦𑀺 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫.

𑀓𑀢𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁? 𑀥𑀫𑁆𑀫𑀲𑀗𑁆𑀕𑀡𑀻-𑀧𑀓𑀭𑀡𑀁, 𑀯𑀺𑀪𑀗𑁆𑀕-𑀧𑀓𑀭𑀡𑀁, 𑀥𑀸𑀢𑀼𑀓𑀣𑀸-𑀧𑀓𑀭𑀡𑀁, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺-𑀧𑀓𑀭𑀡𑀁, 𑀓𑀣𑀸𑀯𑀢𑁆𑀣𑀼-𑀧𑀓𑀭𑀡𑀁, 𑀬𑀫𑀓-𑀧𑀓𑀭𑀡𑀁, 𑀧𑀝𑁆𑀞𑀸𑀦-𑀧𑀓𑀭𑀡𑀦𑁆𑀢𑀺. 𑀇𑀫𑀸𑀦𑀺 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫. 𑀓𑀢𑀫𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁? 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀸𑀤𑀺𑀓𑀁, 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀦𑀸𑀫.

𑀓𑀣𑀁 𑀦𑀺𑀓𑀸𑀬𑀢𑁄? 𑀦𑀺𑀓𑀸𑀬𑀸 𑀧𑀜𑁆𑀘 𑀯𑀺𑀥𑀸 𑀳𑁄𑀦𑁆𑀢𑀺. 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺.

𑀢𑀢𑁆𑀣 𑀓𑀢𑀫𑁄 𑀤𑀻𑀖-𑀦𑀺𑀓𑀸𑀬𑁄? 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄, 𑀫𑀳𑀸𑀯𑀕𑁆𑀕𑁄, 𑀧𑀸𑀣𑀺𑀓𑀯𑀕𑁆𑀕𑁄𑀢𑀺, 𑀇𑀫𑁂 𑀢𑀬𑁄 𑀯𑀕𑁆𑀕𑀸 𑀤𑀻𑀖𑀦𑀺𑀓𑀸𑀬𑁄 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀯𑀕𑁆𑀕𑁂𑀲𑀼, 𑀘𑀢𑀼𑀢𑀺𑀁𑀲 𑀯𑀕𑁆𑀕𑀸𑀦𑀺 𑀘 𑀳𑁄𑀦𑁆𑀢𑀺. [𑀘𑀢𑀼𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀸𑀤𑀺𑀓𑀸, 𑀬𑀲𑁆𑀲 𑀪𑀯𑀦𑁆𑀢𑀺 𑀲𑁄 𑀬𑁂𑀯 𑀤𑀻𑀖𑀦𑀺𑀓𑀸𑀬 𑀦𑀸𑀫 𑀳𑁄𑀢𑀺.]

𑀓𑀢𑀫𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄? 𑀫𑀽𑀮𑀧𑀡𑁆𑀡𑀸𑀲𑁄, 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑁄, 𑀉𑀧𑀭𑀺𑀧𑀡𑁆𑀡𑀸𑀲𑁄𑀢𑀺, 𑀇𑀫𑁂 𑀢𑀬𑁄 𑀧𑀡𑁆𑀡𑀸𑀲𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀧𑀡𑁆𑀡𑀸𑀲𑁂𑀲𑀼 𑀤𑁆𑀯𑁂𑀧𑀜𑁆𑀜𑀸𑀲𑀸𑀥𑀺𑀓-𑀲𑀼𑀢𑁆𑀢-𑀲𑀢𑀸𑀦𑀺 𑀳𑁄𑀦𑁆𑀢𑀺 [𑀤𑀺𑀬𑀟𑁆𑀠𑀲𑀢𑀲𑀼𑀢𑁆𑀢𑀦𑁆𑀢𑀸, 𑀤𑁆𑀯𑀺 𑀲𑀼𑀢𑁆𑀢𑀁 𑀬𑀲𑁆𑀲 𑀲𑀦𑁆𑀢𑀺𑀲𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀦𑀸𑀫𑁄 𑀫𑀽𑀮𑀧𑀡𑁆𑀡𑀸𑀲𑀫𑀸𑀤𑀺 𑀳𑁄𑀢𑀺.]

𑀓𑀢𑀫𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄? 𑀲𑀕𑀸𑀣𑀸𑀯𑀕𑁆𑀕𑁄, 𑀦𑀺𑀤𑀸𑀦𑀯𑀕𑁆𑀕𑁄, 𑀔𑀦𑁆𑀥𑀓𑀯𑀕𑁆𑀕𑁄, 𑀲𑀴𑀸𑀬𑀢𑀦𑀯𑀕𑁆𑀕𑁄, 𑀫𑀳𑀸𑀯𑀕𑁆𑀕𑁄𑀢𑀺, 𑀇𑀫𑁂 𑀧𑀜𑁆𑀘 𑀯𑀕𑁆𑀕𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀦𑀸𑀫. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀤𑁆𑀯𑀸𑀲𑀝𑁆𑀞𑀺𑀲𑀼𑀢𑁆𑀢𑀲𑀢𑁆𑀢𑀲𑀢𑀸𑀥𑀺𑀓𑀲𑀢𑁆𑀢-𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. [𑀤𑁆𑀯𑀸𑀲𑀝𑁆𑀞𑀺-𑀲𑀢𑁆𑀢-𑀲𑀢𑀸𑀦𑀺, 𑀲𑀢𑁆𑀢𑀲𑀳𑀲𑁆𑀲𑀓𑀸𑀦𑀺 𑀘.] 𑀲𑀼𑀢𑁆𑀢𑀸𑀦𑀺 𑀬𑀲𑁆𑀲 𑀳𑁄𑀦𑁆𑀢𑀺 𑀲𑁄, 𑀲𑀕𑀸𑀣𑀸𑀤𑀺𑀓𑀯𑀕𑁆𑀕𑀓𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀦𑀸𑀫𑁄 𑀯𑁂𑀤𑀺𑀢𑀩𑁆𑀩𑁄 𑀘 𑀯𑀺𑀜𑁆𑀜𑀽𑀦𑀸𑀢𑀺.

𑀓𑀢𑀫𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄? 𑀏𑀓𑁆𑀓𑀦𑀺𑀧𑀸𑀢𑁄, 𑀤𑀼𑀓𑁆𑀓𑀦𑀺𑀧𑀸𑀢𑁄, 𑀢𑀺𑀓𑁆𑀓𑀦𑀺𑀧𑀸𑀢𑁄, 𑀘𑀢𑀼𑀓𑁆𑀓𑀦𑀺𑀧𑀸𑀢𑁄, 𑀧𑀜𑁆𑀘𑀓𑀦𑀺𑀧𑀸𑀢𑁄, 𑀙𑀓𑁆𑀓𑀦𑀺𑀧𑀸𑀢𑁄, 𑀲𑀢𑁆𑀢𑀓𑀦𑀺𑀧𑀸𑀢𑁄, 𑀅𑀝𑁆𑀞𑀓𑀦𑀺𑀧𑀸𑀢𑁄, 𑀦𑀯𑀓𑀦𑀺𑀧𑀸𑀢𑁄, 𑀤𑀲𑀓𑀦𑀺𑀧𑀸𑀢𑁄, 𑀏𑀓𑀸𑀤𑀲𑀦𑀺𑀧𑀸𑀢𑁄𑀢𑀺, 𑀇𑀫𑁂 𑀏𑀓𑀸𑀤𑀲 𑀦𑀺𑀧𑀸𑀢𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀦𑀸𑀫. 𑀇𑀫𑁂𑀲𑀼 𑀏𑀓𑀸𑀤𑀲 𑀦𑀺𑀧𑀸𑀢𑁂𑀲𑀼 𑀲𑀢𑁆𑀢-𑀧𑀜𑁆𑀜𑀸𑀲-𑀧𑀜𑁆𑀘-𑀲𑀢𑀸𑀥𑀺𑀓𑀦𑀯-𑀲𑀼𑀢𑁆𑀢-𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. [𑀦𑀯𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘𑀲𑀢𑀫𑀢𑁆𑀢𑀸𑀦𑀺 𑀘, 𑀲𑀢𑁆𑀢𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺, 𑀲𑀼𑀢𑁆𑀢𑀸𑀦𑀺 𑀬𑀲𑁆𑀲 𑀳𑁄𑀦𑁆𑀢𑀺 𑀲𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄𑀢𑀺, 𑀏𑀓𑁆𑀓𑀦𑀺𑀧𑀸𑀢𑀓𑀸𑀤𑀺𑀓𑁄𑀢𑀺.]

𑀓𑀢𑀫𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄? 𑀔𑀼𑀤𑁆𑀤𑀓𑀧𑀸𑀞𑁄, 𑀥𑀫𑁆𑀫𑀧𑀤𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀲𑀼𑀢𑁆𑀢𑀦𑀺𑀧𑀸𑀢𑁄, 𑀯𑀺𑀫𑀸𑀦𑀯𑀢𑁆𑀣𑀼, 𑀧𑁂𑀢𑀯𑀢𑁆𑀣𑀼, 𑀣𑁂𑀭𑀓𑀣𑀸, 𑀣𑁂𑀭𑀻𑀓𑀣𑀸, 𑀚𑀸𑀢𑀓𑀁, 𑀫𑀳𑀸𑀦𑀺𑀤𑁆𑀤𑁂𑀲𑁄, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁄, 𑀅𑀧𑀤𑀸𑀦𑀁, 𑀩𑀼𑀤𑁆𑀥𑀯𑀁𑀲𑁄, 𑀘𑀭𑀺𑀬𑀸𑀧𑀺𑀝𑀓𑀁, 𑀯𑀺𑀦𑀬𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺. 𑀇𑀫𑁂𑀲𑀼 𑀲𑀢𑁆𑀢𑀭𑀲𑀲𑀼 𑀕𑀦𑁆𑀣𑁂𑀲𑀼 𑀅𑀦𑁂𑀓𑀸𑀦𑀺 𑀲𑀼𑀢𑁆𑀢-𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. [𑀅𑀦𑁂𑀓𑀸𑀦𑀺 𑀲𑀼𑀢𑁆𑀢-𑀲𑀳𑀲𑁆𑀲𑀸𑀦𑀺, 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀫𑀳𑁂𑀲𑀺𑀦𑀸, 𑀦𑀺𑀓𑀸𑀬𑁂 𑀧𑀜𑁆𑀘𑀫𑁂 𑀇𑀫𑁂, 𑀔𑀼𑀤𑁆𑀤𑀓𑁂 𑀇𑀢𑀺 𑀯𑀺𑀲𑀼𑀢𑁂𑀢𑀺.]

𑀓𑀣𑀁 𑀅𑀗𑁆𑀕𑀢𑁄 𑀅𑀗𑁆𑀕𑀳𑀺 𑀦𑀯 𑀯𑀺𑀥𑀁 𑀳𑁄𑀢𑀺? 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀦𑁆𑀢𑀺, 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀉𑀪𑀢𑁄 𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂, 𑀫𑀗𑁆𑀕𑀮𑀲𑀼𑀢𑁆𑀢, 𑀭𑀢𑀦𑀲𑀼𑀢𑁆𑀢, 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀺. 𑀅𑀜𑁆𑀜𑀫𑁆𑀧𑀺 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁, 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀁 𑀲𑀕𑀸𑀣𑀓𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑀦𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀓𑀯𑀕𑁆𑀕𑁄, 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀺𑀕𑀸𑀣𑀓𑀜𑁆𑀘 𑀲𑀼𑀢𑁆𑀢𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀁, 𑀣𑁂𑀭𑀓𑀣𑀸, 𑀣𑁂𑀭𑀻𑀓𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂, 𑀦𑁄 𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸, 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲 𑀜𑀸𑀡𑀫𑀬𑀺𑀓𑀕𑀸𑀣𑀸 𑀧𑀝𑀺𑀓-𑀲𑀁𑀬𑀼𑀢𑁆𑀢𑀸 𑀤𑁆𑀯𑁂 𑀅𑀲𑀻𑀢𑀺𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸, 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀜𑁆𑀜𑀸𑀲𑀸𑀤𑀺𑀓𑀸𑀦𑀺. 𑀧𑀜𑁆𑀘𑀚𑀸𑀢𑀓𑀲𑀢𑀸𑀦𑀺, 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑁄 𑀫𑁂 𑀪𑀺𑀓𑁆𑀔𑀯𑁂 𑀅𑀘𑁆𑀙𑀭𑀺𑀬𑀸 𑀅𑀪𑀽𑀢𑀥𑀫𑁆𑀫𑀸, 𑀆𑀦𑀦𑁆𑀤𑁂𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬 𑀅𑀪𑀽𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀪𑀽𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀼𑀮𑁆𑀮𑀯𑁂𑀤𑀮𑁆𑀮, 𑀫𑀳𑀸𑀯𑁂𑀤𑀮𑁆𑀮, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀓𑁆𑀓𑀧𑀜𑁆𑀳, 𑀲𑀗𑁆𑀔𑀸𑀭𑀪𑀸𑀚𑀦𑀺𑀬, 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀦𑁆𑀢𑀸𑀤𑀬𑁄 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 [𑀧𑀼𑀘𑁆𑀙] 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸, 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀢𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀤𑀼𑀚𑀸𑀦𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀲𑀘𑁂 𑀯𑀺𑀢𑁆𑀣𑀸𑀭𑁂𑀦 𑀓𑀣𑀺𑀲𑁆𑀲𑀁 𑀅𑀢𑀺𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀦𑀬 𑀯𑀲𑁂𑀦 𑀓𑀣𑀺𑀲𑁆𑀲𑀸𑀫𑀺. 𑀏𑀓𑀁 𑀯𑀢𑁆𑀣𑀼, 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀏𑀓𑀁 𑀦𑀺𑀤𑀸𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀏𑀓𑀁 𑀧𑀜𑁆𑀳𑀸 𑀧𑀼𑀘𑁆𑀙𑀦𑁆𑀢𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀏𑀓𑀁 𑀧𑀜𑁆𑀳𑀸 𑀯𑀺𑀲𑀚𑁆𑀚𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀓𑁂𑀦 𑀪𑀸𑀲𑀺𑀢𑀸𑀦𑀺, 𑀓𑀢𑁆𑀣 𑀪𑀸𑀲𑀺𑀢𑀸𑀦𑀺, 𑀓𑀤𑀸 𑀪𑀸𑀲𑀺𑀢𑀸𑀦𑀺, 𑀓𑀫𑀸𑀭𑀩𑁆𑀪 𑀪𑀸𑀲𑀺𑀢𑀸𑀦𑀺, 𑀓𑀺𑀫𑀢𑁆𑀣𑀁 𑀪𑀸𑀲𑀺𑀢𑀸𑀦𑀺, 𑀓𑁂𑀦 𑀥𑀸𑀭𑀺𑀢𑀸𑀦𑀺, 𑀓𑁂𑀦𑀸𑀪𑀢𑀸𑀦𑀺, 𑀓𑀺𑀫𑀢𑁆𑀣𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸𑀦𑀺. 𑀢𑀢𑁆𑀭𑀸𑀬𑀁 𑀯𑀺𑀲𑀚𑁆𑀚𑀦𑀸, 𑀓𑁂𑀦 𑀪𑀸𑀲𑀺𑀢𑀸𑀦𑀻𑀢𑀺? 𑀩𑀼𑀤𑁆𑀥𑀸𑀦𑀼 𑀩𑀼𑀤𑁆𑀥𑁂𑀳𑀺 𑀪𑀸𑀲𑀺𑀢𑀸𑀦𑀺. 𑀓𑀢𑁆𑀣 𑀪𑀸𑀲𑀺𑀢𑀸𑀦𑀻𑀢𑀺? 𑀤𑁂𑀯𑁂𑀲𑀼 𑀘 𑀫𑀸𑀦𑀼𑀲𑁆𑀲𑁂𑀲𑀼 𑀘, 𑀪𑀸𑀲𑀺𑀢𑀸𑀦𑀺. 𑀓𑀤𑀸 𑀪𑀸𑀲𑀺𑀢𑀸𑀦𑀻𑀢𑀺? 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀘𑁂𑀯 𑀧𑀘𑁆𑀙𑀺𑀫𑀓𑀸𑀮𑁂 𑀘 𑀪𑀸𑀲𑀺𑀢𑀸𑀦𑀺. 𑀓𑀢𑀫𑀸𑀭𑀩𑁆𑀪 𑀪𑀸𑀲𑀺𑀢𑀸𑀦𑀻𑀢𑀺? 𑀧𑀜𑁆𑀘𑀯𑀕𑁆𑀕𑀺𑀬𑀸𑀤𑀺𑀓𑁂 𑀯𑁂𑀦𑁂𑀬𑁆𑀬 𑀩𑀦𑁆𑀥𑀯𑁂 𑀆𑀭𑀩𑁆𑀪 𑀪𑀸𑀲𑀺𑀢𑀸𑀦𑀻𑀢𑀺. 𑀓𑀺𑀫𑀢𑁆𑀣𑀁 𑀪𑀸𑀲𑀺𑀢𑀸𑀦𑀻𑀢𑀺? 𑀢𑀺𑀯𑀚𑁆𑀚𑀜𑁆𑀘 𑀅𑀯𑀚𑁆𑀚𑀜𑁆𑀘 𑀜𑀢𑁆𑀯𑀸 𑀯𑀚𑁆𑀚𑀁 𑀧𑀳𑀸𑀬 𑀅𑀯𑀚𑁆𑀚𑁂 𑀧𑀝𑀺𑀧𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀭𑀺𑀬𑀦𑁆𑀢𑁂. 𑀤𑀺𑀝𑁆𑀞-𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂 𑀲𑀫𑁆𑀧𑀸𑀧𑀼𑀡𑀺𑀢𑀼𑀁.

𑀓𑁂𑀦 𑀥𑀸𑀭𑀺𑀢𑀸𑀦𑀻𑀢𑀺? 𑀅𑀦𑀼𑀩𑀼𑀤𑁆𑀥𑁂𑀳𑀺 𑀘𑁂𑀯 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑁂𑀳𑀺 𑀘 𑀥𑀸𑀭𑀺𑀢𑀸𑀦𑀺. 𑀓𑁂𑀦𑀸 𑀪𑀢𑀸𑀦𑀻𑀢𑀺? 𑀆𑀘𑀭𑀺𑀬 𑀧𑀭𑀁𑀧𑀭𑁂𑀳𑀺 𑀆𑀪𑀢𑀸𑀦𑀺. 𑀓𑀺𑀫𑀢𑁆𑀣𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸𑀦𑀻𑀢𑀺? 𑀯𑀚𑁆𑀚𑀜𑁆𑀘 𑀅𑀯𑀚𑁆𑀚𑀜𑁆𑀘 𑀜𑀢𑁆𑀯𑀸 𑀯𑀚𑁆𑀚𑀁 𑀧𑀳𑀸𑀬 𑀅𑀯𑀚𑁆𑀚𑁂 𑀧𑀝𑀺𑀧𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀭𑀺𑀬𑀦𑁆𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂, 𑀲𑀁𑀧𑀸𑀧𑀼𑀡𑀺𑀢𑀼𑀁, 𑀬𑀤𑁂𑀯𑀁 𑀢𑀸𑀬 𑀦𑀺𑀩𑁆𑀩𑀸𑀦𑀧𑀭𑀺𑀬𑀦𑁆𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂 𑀲𑀸𑀥𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀯 𑀢𑀢𑁆𑀣 𑀓𑁂𑀳𑀺 𑀅𑀧𑁆𑀧𑀫𑀢𑁆𑀢𑁂𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀯𑀸𑀘𑁂𑀢𑀩𑁆𑀩𑀸𑀦𑀺 𑀲𑀚𑁆𑀛𑀸𑀬𑀁 𑀓𑀸𑀢𑀩𑁆𑀩𑀸𑀦𑀻𑀢𑀺 [𑀇𑀢𑀺 𑀘𑀼𑀮𑁆𑀮𑀕𑀦𑁆𑀣𑀯𑀁𑀲𑁂 𑀧𑀺𑀝𑀓𑀢𑁆𑀢𑀬 𑀤𑀻𑀧𑀓𑁄 𑀦𑀸𑀫 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.]

𑁨. 𑀕𑀦𑁆𑀣𑀓𑀸𑀭𑀓𑀸𑀘𑀭𑀺𑀬-𑀧𑀭𑀺𑀘𑁆𑀙𑁂𑀤𑁄

𑀆𑀘𑀭𑀺𑀬𑁄 𑀧𑀦 𑀅𑀢𑁆𑀣𑀺. 𑀧𑁄𑀭𑀸𑀡𑀸𑀘𑀭𑀺𑀬𑀸 𑀅𑀢𑁆𑀣𑀺, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀅𑀢𑁆𑀣𑀺, 𑀕𑀦𑁆𑀣𑀓𑀸𑀭𑀓𑀸𑀘𑀭𑀺𑀬𑀸 𑀅𑀢𑁆𑀣𑀺, 𑀢𑀺𑀯𑀺𑀥𑀦𑀸𑀫𑀺𑀓𑀸𑀘𑀭𑀺𑀬𑀸. 𑀓𑀢𑀫𑁂 𑀧𑁄𑀭𑀸𑀡𑀸𑀘𑀭𑀺𑀬𑀸? 𑀧𑀞𑀫𑀲𑀗𑁆𑀕𑀸𑀬𑀦𑀸𑀬𑀁 𑀧𑀜𑁆𑀘𑀲𑀢𑀸 𑀔𑀻𑀡𑀸𑀲𑀯𑀸 𑀧𑀜𑁆𑀘𑀦𑁆𑀦𑀁 𑀦𑀺𑀓𑀸𑀬𑀸𑀦𑀁 𑀦𑀸𑀫𑀜𑁆𑀘 𑀅𑀢𑁆𑀣𑀜𑁆𑀘 𑀅𑀥𑀺𑀧𑁆𑀧𑀸𑀬𑀜𑁆𑀘 𑀬𑀤𑀜𑁆𑀘 𑀩𑁆𑀬𑀜𑁆𑀚𑀦 𑀲𑁄𑀥𑀦𑀜𑁆𑀘 𑀅𑀯𑀲𑁂𑀲𑀁 𑀓𑀺𑀘𑁆𑀘𑀁 𑀓𑀭𑀺𑀁𑀲𑀼. 𑀤𑀼𑀢𑀺𑀬𑀲𑀗𑁆𑀕𑀸𑀬𑀦𑀸𑀬𑀁 𑀲𑀢𑁆𑀢𑀲𑀢𑀸 𑀔𑀻𑀡𑀸𑀲𑀯𑀸 𑀢𑁂𑀲𑀁𑀬𑁂𑀯 𑀲𑀤𑁆𑀤𑀢𑁆𑀣𑀸𑀤𑀺𑀓𑀁 𑀓𑀺𑀘𑁆𑀘𑀁 𑀧𑀼𑀦 𑀓𑀭𑀺𑀁𑀲𑀼. 𑀢𑀢𑀺𑀬𑀲𑀗𑁆𑀕𑀸𑀬𑀦𑀸𑀬𑀁 𑀲𑀳𑀲𑁆𑀲𑀫𑀢𑁆𑀢𑀸 𑀔𑀻𑀡𑀸𑀲𑀯𑀸 𑀢𑁂𑀲𑀁𑀬𑁂𑀯 𑀲𑀤𑁆𑀤𑀢𑁆𑀣𑀸𑀤𑀺𑀓𑀁 𑀓𑀺𑀘𑁆𑀘𑀁 𑀧𑀼𑀦 𑀓𑀭𑀺𑀁𑀲𑀼. 𑀇𑀘𑁆𑀘𑁂𑀯𑀁 𑀤𑁆𑀯𑁂𑀲𑀢𑀸𑀥𑀺𑀓𑀸 𑀤𑁆𑀯𑁂𑀲𑀳𑀲𑁆𑀲 𑀔𑀻𑀡𑀸𑀲𑀯𑀸 𑀫𑀳𑀸𑀓𑀘𑁆𑀘𑀸𑀬𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑁄𑀭𑀸𑀡𑀸𑀘𑀭𑀺𑀬𑀸 𑀦𑀸𑀫. 𑀬𑁂 𑀧𑁄𑀭𑀸𑀡𑀸𑀘𑀭𑀺𑀬𑀸 𑀢𑁂𑀬𑁂𑀯 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦𑀸𑀫. 𑀓𑀢𑀫𑁂 𑀕𑀦𑁆𑀣𑀓𑀸𑀭𑀓𑀸𑀘𑀭𑀺𑀬𑀸? 𑀫𑀳𑀸𑀅𑀝𑁆𑀞𑀓𑀣𑀺𑀓𑀸𑀧𑁂𑀪𑀤𑀅𑀦𑁂𑀓𑀸𑀘𑀭𑀺𑀬𑀸 𑀕𑀦𑁆𑀣𑀓𑀸𑀭𑀓𑀸𑀘𑀭𑀺𑀬𑀸 𑀦𑀸𑀫. 𑀓𑀢𑀫𑁂 𑀢𑀺𑀯𑀺𑀥 𑀦𑀸𑀫𑀸𑀘𑀭𑀺𑀬𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀢𑀺𑀯𑀺𑀥𑀦𑀸𑀫𑀁. 𑀓𑀢𑀫𑁂 𑀕𑀦𑁆𑀣𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀓𑀢𑀸? 𑀓𑀘𑁆𑀘𑀸𑀬𑀦𑀕𑀦𑁆𑀣𑁄, 𑀫𑀳𑀸𑀦𑀺𑀭𑀼𑀢𑁆𑀢𑀺𑀕𑀦𑁆𑀣𑁄, 𑀘𑀼𑀮𑁆𑀮𑀦𑀺𑀭𑀼𑀢𑁆𑀢𑀺𑀕𑀦𑁆𑀣𑁄, 𑀬𑀫𑀓𑀕𑀦𑁆𑀣𑁄, 𑀦𑁂𑀢𑁆𑀢𑀺𑀕𑀦𑁆𑀣𑁄, 𑀧𑁂𑀝𑀓𑁄𑀧𑀤𑁂𑀲𑀕𑀦𑁆𑀣𑁄𑀢𑀺, 𑀇𑀫𑁂 𑀙 𑀕𑀦𑁆𑀣𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀓𑀢𑀸. 𑀓𑀢𑀫𑁂 𑀅𑀦𑁂𑀓𑀸𑀘𑀭𑀺𑀬𑁂𑀦 𑀓𑀢𑀸 𑀕𑀦𑁆𑀣𑀸? 𑀫𑀳𑀸𑀧𑀘𑁆𑀘𑀭𑀺𑀓𑀸𑀘𑀭𑀺𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀦𑀸𑀫 𑀕𑀦𑁆𑀣𑀁 𑀅𑀓𑀸𑀲𑀺. 𑀫𑀳𑀸𑀓𑀼𑀭𑀼𑀦𑁆𑀤𑀺𑀓𑀸𑀘𑀭𑀺𑀬𑁄 𑀓𑀼𑀭𑀼𑀦𑁆𑀤𑀺 𑀦𑀸𑀫 𑀕𑀦𑁆𑀣𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀫𑀳𑀸𑀧𑀘𑁆𑀘𑀭𑀺𑀬 𑀕𑀦𑁆𑀣𑀲𑁆𑀲 𑀅𑀝𑁆𑀞𑀓𑀣𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀓𑀼𑀭𑀼𑀦𑁆𑀤𑀺 𑀕𑀦𑁆𑀣𑀲𑁆𑀲 𑀅𑀝𑁆𑀞𑀓𑀣𑀁 𑀅𑀓𑀸𑀲𑀺, 𑀫𑀳𑀸𑀩𑀼𑀤𑁆𑀥𑀖𑁄𑀲𑀸 𑀦𑀸𑀫𑀘𑀭𑀺𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀤𑀻𑀖𑀦𑀺𑀓𑀸𑀬𑀲𑁆𑀲 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀦𑀺 𑀦𑀸𑀫 𑀅𑀝𑁆𑀞𑀓𑀣𑀸, 𑀫𑀚𑁆𑀛𑀺𑀫𑀦𑀺𑀓𑀸𑀬𑀲𑁆𑀲 𑀧𑀧𑀜𑁆𑀘𑀲𑀽𑀤𑀦𑀻 𑀦𑀸𑀫 𑀅𑀝𑁆𑀞𑀓𑀣𑀸, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀻 𑀦𑀸𑀫 𑀅𑀝𑁆𑀞𑀓𑀣𑀸, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀲𑁆𑀲 𑀫𑀦𑁄𑀭𑀣𑀧𑀽𑀭𑀡𑀻 𑀦𑀸𑀫 𑀅𑀝𑁆𑀞𑀓𑀣𑀸, 𑀧𑀜𑁆𑀘𑀯𑀺𑀦𑀬 𑀕𑀦𑁆𑀣𑀸𑀦𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀅𑀝𑁆𑀞𑀓𑀣𑀸, 𑀲𑀢𑁆𑀢𑀦𑁆𑀦𑀁 𑀅𑀪𑀺𑀥𑀫𑁆𑀫𑀕𑀦𑁆𑀣𑀸𑀦𑀁 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫 𑀅𑀝𑁆𑀞𑀓𑀣𑀸, 𑀧𑀸𑀢𑀺𑀫𑁄𑀓𑁆𑀔 𑀲𑀁𑀔𑀸𑀢𑀸𑀬 𑀫𑀸𑀢𑀺𑀓𑀸𑀬 𑀓𑀗𑁆𑀔𑀸𑀯𑀺𑀢𑀭𑀡𑀻𑀢𑀺 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀅𑀝𑁆𑀞𑀓𑀣𑀸, 𑀥𑀫𑁆𑀫𑀧𑀤𑀲𑁆𑀲 𑀅𑀝𑁆𑀞𑀓𑀣𑀸, 𑀚𑀸𑀢𑀓𑀲𑁆𑀲 𑀅𑀝𑁆𑀞𑀓𑀣𑀸, 𑀔𑀼𑀤𑁆𑀤𑀓𑀧𑀸𑀞𑀲𑁆𑀲 𑀅𑀝𑁆𑀞𑀓𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀅𑀝𑁆𑀞𑀓𑀣𑀸, 𑀅𑀧𑀤𑀸𑀦𑀲𑁆𑀲 𑀅𑀝𑁆𑀞𑀓𑀣𑀸𑀢𑀺, 𑀇𑀫𑁂 𑀢𑁂𑀭𑀲 𑀕𑀦𑁆𑀣𑁂 𑀅𑀓𑀸𑀲𑀺. 𑀩𑀼𑀤𑁆𑀥𑀤𑀢𑁆𑀢𑁄𑀦𑀸𑀫𑀸𑀘𑀭𑀺𑀬𑁄 𑀯𑀺𑀦𑀬 𑀯𑀺𑀦𑀺𑀘𑁆𑀙𑀬𑁄, 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑁄, 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄, 𑀩𑀼𑀤𑁆𑀥𑀯𑀁𑀲𑀲𑁆𑀲 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀻 𑀦𑀸𑀫 𑀅𑀝𑁆𑀞𑀓𑀣𑀸𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄 𑀕𑀦𑁆𑀣𑁂 𑀅𑀓𑀸𑀲𑀺. 𑀆𑀦𑀦𑁆𑀤𑁄𑀦𑀸𑀫𑀸𑀘𑀭𑀺𑀬𑀸 𑀲𑀢𑁆𑀢𑀸𑀪𑀺𑀥𑀫𑁆𑀫𑀕𑀦𑁆𑀣𑀝𑁆𑀞𑀓𑀣𑀸𑀬 𑀫𑀽𑀝𑀻𑀓𑀁 𑀦𑀸𑀫 𑀝𑀻𑀓𑀁 𑀅𑀓𑀸𑀲𑀺. 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀝𑁆𑀞𑀓𑀣𑀸, 𑀇𑀢𑀺𑀯𑀼𑀢𑁆𑀢𑀓𑀝𑁆𑀞𑀓𑀣𑀸, 𑀉𑀤𑀸𑀦𑀝𑁆𑀞𑀓𑀣𑀸, 𑀘𑀭𑀺𑀬𑀸𑀧𑀺𑀝𑀓𑀝𑁆𑀞𑀓𑀣𑀸, 𑀣𑁂𑀭𑀓𑀣𑀝𑁆𑀞𑀓𑀣𑀸, 𑀣𑁂𑀭𑀻𑀓𑀣𑀝𑁆𑀞𑀓𑀣𑀸, 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀲 𑀯𑀺𑀫𑀮𑀯𑀺𑀮𑀸𑀲𑀺𑀦𑀺 𑀦𑀸𑀫 𑀅𑀝𑁆𑀞𑀓𑀣𑀸, 𑀧𑁂𑀢𑀯𑀢𑁆𑀣𑀼𑀲𑁆𑀲 𑀯𑀺𑀫𑀮𑀯𑀺𑀮𑀸𑀲𑀺𑀦𑀺 𑀦𑀸𑀫 𑀅𑀝𑁆𑀞𑀓𑀣𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸 𑀦𑀸𑀫 𑀝𑀻𑀓𑀸, 𑀤𑀻𑀖𑀦𑀺𑀓𑀸𑀬𑀲𑁆𑀲 𑀅𑀝𑁆𑀞𑀓𑀣𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀝𑁆𑀞𑀓𑀣𑀸𑀦𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺 𑀦𑀸𑀫 𑀝𑀻𑀓𑀸, 𑀚𑀸𑀢𑀓𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺 𑀦𑀸𑀫 𑀝𑀻𑀓𑀸, 𑀦𑁂𑀢𑁆𑀢𑀺𑀧𑀓𑀭𑀡𑀝𑁆𑀞𑀓𑀣𑀸𑀬 𑀝𑀻𑀓𑀸, 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬 𑀧𑀭𑀫𑀢𑁆𑀣𑀤𑀻𑀧𑀦𑀻 𑀦𑀸𑀫 𑀝𑀻𑀓𑀸, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀝𑀻𑀓𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀸 𑀦𑀸𑀫 𑀅𑀦𑀼𑀝𑀻𑀓𑀸𑀢𑀺 𑀇𑀫𑁂 𑀘𑀼𑀤𑁆𑀤𑀲 𑀫𑀢𑁆𑀢𑁂 𑀕𑀦𑁆𑀣𑁂 𑀅𑀓𑀸𑀲𑀺.

𑀤𑁆𑀯𑁂 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀸𑀫𑀸 𑀘𑀭𑀺𑀬𑀸𑀦𑀺𑀭𑀼𑀢𑁆𑀢𑀺 𑀫𑀜𑁆𑀚𑀽𑀲𑀁 𑀦𑀸𑀫 𑀘𑀼𑀮𑁆𑀮𑀦𑀺𑀭𑀼𑀢𑁆𑀢𑀺 𑀝𑀻𑀓𑀜𑁆𑀘 𑀫𑀳𑀸𑀦𑀺𑀭𑀼𑀢𑁆𑀢𑀺 𑀲𑀗𑁆𑀔𑁂𑀧𑀜𑁆𑀘 𑀅𑀓𑀁𑀲𑀼. 𑀫𑀳𑀸𑀯𑀚𑀺𑀭𑀩𑀼𑀤𑁆𑀥𑀺𑀦𑀸𑀫𑀸𑀘𑀭𑀺𑀬𑁄 𑀯𑀺𑀦𑀬𑀕𑀡𑁆𑀞𑀺𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀤𑀻𑀧𑀗𑁆𑀓𑀭𑀲𑀗𑁆𑀔𑀸𑀢𑁄 𑀯𑀺𑀫𑀮𑀩𑀼𑀤𑁆𑀥𑀺 𑀦𑀸𑀫𑀸𑀘𑀭𑀺𑀬𑁄 𑀫𑀼𑀔𑀫𑀢𑁆𑀢𑀤𑀻𑀧𑀦𑀻 𑀦𑀸𑀫𑀓𑀁 𑀦𑁆𑀬𑀸𑀲𑀧𑁆𑀧𑀓𑀭𑀡𑀁 𑀅𑀓𑀸𑀲𑀺. 𑀘𑀼𑀮𑁆𑀮𑀯𑀚𑀺𑀭𑀩𑀼𑀤𑁆𑀥𑀺 𑀦𑀸𑀫𑀸𑀘𑀭𑀺𑀬𑁄 𑀅𑀢𑁆𑀣𑀩𑁆𑀬𑀸𑀔𑁆𑀬𑀸𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺.

𑀤𑀻𑀧𑀗𑁆𑀓𑀭𑁄 𑀦𑀸𑀫𑀸𑀘𑀭𑀺𑀬𑁄 𑀭𑀽𑀧𑀲𑀺𑀤𑁆𑀥𑀺 𑀧𑀓𑀭𑀡𑀁, 𑀭𑀽𑀧𑀲𑀺𑀤𑁆𑀥𑀺 𑀝𑀻𑀓𑀁, 𑀲𑀫𑁆𑀧𑀧𑀜𑁆𑀘 𑀲𑀼𑀢𑁆𑀢𑀜𑁆𑀘𑁂𑀢𑀺 𑀢𑀺𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀆𑀦𑀦𑁆𑀤𑀸𑀘𑀭𑀺𑀬𑀲𑁆𑀲 𑀚𑁂𑀝𑁆𑀞𑀲𑀺𑀲𑁆𑀲𑁄 𑀥𑀫𑁆𑀫𑀧𑀸𑀮𑁄 𑀦𑀸𑀫𑀸𑀘𑀭𑀺𑀬𑁄 𑀲𑀘𑁆𑀘𑀲𑀗𑁆𑀔𑁂𑀧𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀓𑀲𑁆𑀲𑀧𑁄 𑀦𑀸𑀫𑀸𑀘𑀭𑀺𑀬𑁄 𑀫𑁄𑀳𑀯𑀺𑀘𑁆𑀙𑁂𑀤𑀦𑀻, 𑀯𑀺𑀫𑀢𑀺𑀘𑁆𑀙𑁂𑀤𑀦𑀻, 𑀤𑀲𑀩𑀼𑀤𑁆𑀥𑀯𑀁𑀲𑁄, 𑀅𑀦𑀸𑀕𑀢𑀯𑀁𑀲𑁄𑀢𑀺, 𑀘𑀢𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺.

𑀫𑀳𑀸𑀦𑀸𑀫𑁄 𑀦𑀸𑀫𑀸𑀘𑀭𑀺𑀬𑁄, 𑀲𑀤𑁆𑀥𑀫𑁆𑀫𑀧𑀓𑀸𑀲𑀦𑀻 𑀦𑀸𑀫 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀲𑁆𑀲 𑀅𑀝𑁆𑀞𑀓𑀣𑀁 𑀅𑀓𑀸𑀲𑀺. 𑀤𑀻𑀧𑀯𑀁𑀲𑁄, 𑀣𑀽𑀧𑀯𑀁𑀲𑁄, 𑀩𑁄𑀥𑀺𑀯𑀁𑀲𑁄, 𑀘𑀽𑀮𑀯𑀁𑀲𑁄, 𑀫𑀳𑀸𑀯𑀁𑀲𑁄, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸 𑀕𑀡𑁆𑀞𑀺 𑀘𑁂𑀢𑀺 𑀇𑀫𑁂 𑀙 𑀕𑀦𑁆𑀣𑀸 𑀫𑀳𑀸𑀦𑀸𑀫𑀸𑀘𑀭𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑀸.

𑀦𑀯𑁄 𑀫𑀳𑀸𑀦𑀸𑀫𑁄 𑀦𑀸𑀫𑀸𑀘𑀭𑀺𑀬𑁄 𑀦𑀯𑀁 𑀫𑀳𑀸𑀯𑀁𑀲 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀉𑀧𑀲𑁂𑀦𑁄 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀥𑀫𑁆𑀫𑀧𑀚𑁆𑀚𑁄𑀢𑀺𑀓𑀁 𑀦𑀸𑀫 𑀫𑀳𑀸𑀦𑀺𑀤𑁆𑀤𑁂𑀲𑀲𑁆𑀲 𑀅𑀝𑁆𑀞𑀓𑀣𑀁 𑀅𑀓𑀸𑀲𑀺. 𑀫𑁄𑀕𑁆𑀕𑀮𑀸𑀦𑁄 𑀦𑀸𑀫𑀸𑀘𑀭𑀺𑀬𑁄 𑀫𑁄𑀕𑁆𑀕𑀮𑀸𑀦𑀩𑁆𑀬𑀸𑀓𑀭𑀡𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀲𑀗𑁆𑀖𑀭𑀓𑁆𑀔𑀺𑀢𑁄 𑀦𑀸𑀫𑀸𑀘𑀭𑀺𑀬𑁄, 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀯𑀼𑀢𑁆𑀢𑁄𑀤𑀬𑀓𑀸𑀭𑁄 𑀦𑀸𑀫𑀸𑀘𑀭𑀺𑀬𑁄 𑀯𑀼𑀢𑁆𑀢𑁄𑀤𑀬𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀥𑀫𑁆𑀫𑀲𑀺𑀭𑀺 𑀦𑀸𑀫𑀸𑀘𑀭𑀺𑀬𑁄 𑀔𑀼𑀤𑁆𑀤𑀓𑀲𑀺𑀓𑁆𑀔𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀧𑀼𑀭𑀸𑀡𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀝𑀻𑀓𑀸, 𑀫𑀽𑀮𑀲𑀺𑀓𑁆𑀔𑀸 𑀘𑁂𑀢𑀺, 𑀇𑀫𑁂 𑀤𑁆𑀯𑁂 𑀕𑀦𑁆𑀣𑀸 𑀤𑁆𑀯𑁂𑀳𑀸𑀘𑀭𑀺𑀬𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑀸.

𑀅𑀦𑀼𑀭𑀼𑀤𑁆𑀥𑁄 𑀦𑀸𑀫𑀸𑀘𑀭𑀺𑀬𑁄 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑀁, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀁, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀁 𑀘𑁂𑀢𑀺 𑀢𑀺𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀔𑁂𑀫𑁄 𑀦𑀸𑀫𑀸𑀘𑀭𑀺𑀬𑁄 𑀔𑁂𑀫𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫𑀸𑀘𑀭𑀺𑀬𑁄 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀻 𑀦𑀸𑀫 𑀝𑀻𑀓𑀁; 𑀯𑀺𑀦𑀬𑀲𑀗𑁆𑀕𑀳𑀧𑀓𑀭𑀡𑀁, 𑀯𑀺𑀦𑀬𑀲𑀗𑁆𑀕𑀳𑀲𑁆𑀲𑀝𑀻𑀓𑀁; 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀫𑀜𑁆𑀚𑀽𑀲𑀁 𑀦𑀸𑀫 𑀦𑀯𑀁 𑀝𑀻𑀓𑀁; 𑀧𑀜𑁆𑀘𑀺𑀓𑀸 𑀝𑀻𑀓𑀜𑁆𑀘𑁂𑀢𑀺, 𑀇𑀫𑁂 𑀧𑀜𑁆𑀘 𑀕𑀦𑁆𑀣𑁂 𑀅𑀓𑀸𑀲𑀺. 𑀩𑀼𑀤𑁆𑀥𑀦𑀸𑀕𑁄 𑀦𑀸𑀫𑀸𑀘𑀭𑀺𑀬𑁄 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀁 𑀦𑀸𑀫 𑀓𑀗𑁆𑀔𑀸𑀯𑀺𑀢𑀭𑀡𑀻𑀬𑀸 𑀝𑀻𑀓𑀁 𑀅𑀓𑀸𑀲𑀺. 𑀦𑀯𑁄 𑀫𑁄𑀕𑁆𑀕𑀮𑀸𑀦𑁄 𑀦𑀸𑀫𑀸𑀘𑀭𑀺𑀬𑁄 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀯𑀸𑀘𑀺𑀲𑁆𑀲𑀭𑁄 𑀦𑀸𑀫𑀸𑀘𑀭𑀺𑀬𑁄 𑀫𑀳𑀸𑀲𑀸𑀫𑀺 𑀦𑀸𑀫 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑁆𑀲 𑀝𑀻𑀓𑀸, 𑀯𑀼𑀢𑁆𑀢𑁄𑀤𑀬 𑀯𑀺𑀯𑀭𑀡𑀁, 𑀲𑀼𑀫𑀗𑁆𑀕𑀮𑀧𑁆𑀧𑀲𑀸𑀤𑀦𑀺 𑀦𑀸𑀫 𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀝𑀻𑀓𑀸; 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀸, 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀸𑀬 𑀝𑀻𑀓𑀸; 𑀩𑀸𑀮𑀸𑀯𑀢𑀸𑀭𑁄, 𑀫𑁄𑀕𑁆𑀕𑀮𑀸𑀦𑀩𑁆𑀬𑀸𑀓𑀭𑀡𑀲𑁆𑀲 𑀧𑀜𑁆𑀘𑀺𑀓𑀸𑀬 𑀝𑀻𑀓𑀸; 𑀬𑁄𑀕𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲 𑀝𑀻𑀓𑀸, 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑀲𑁆𑀲 𑀝𑀻𑀓𑀸, 𑀦𑀸𑀫𑀭𑀽𑀧-𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀪𑀸𑀕𑁄, 𑀲𑀤𑁆𑀤𑀢𑁆𑀣𑀲𑁆𑀲 𑀧𑀤𑀭𑀽𑀧𑀯𑀺𑀪𑀸𑀯𑀦𑀁; 𑀔𑁂𑀫𑀲𑁆𑀲 𑀧𑀓𑀭𑀡𑀲𑁆𑀲 𑀝𑀻𑀓𑀸, 𑀲𑀻𑀫𑀸𑀮𑀗𑁆𑀓𑀸𑀭𑁄, 𑀫𑀽𑀮𑀲𑀺𑀓𑁆𑀔𑀸𑀬 𑀝𑀻𑀓𑀸, 𑀭𑀽𑀧𑀯𑀺𑀪𑀸𑀕𑁄, 𑀧𑀘𑁆𑀘𑀬𑀲𑀗𑁆𑀕𑀳𑁄, 𑀲𑀘𑁆𑀘𑀲𑀗𑁆𑀔𑁂𑀧𑀲𑁆𑀲 𑀝𑀻𑀓𑀸 𑀘𑁂𑀢𑀺, 𑀇𑀫𑁂 𑀅𑀝𑁆𑀞𑀸𑀭𑀲 𑀕𑀦𑁆𑀣𑁂 𑀅𑀓𑀸𑀲𑀺.

𑀲𑀼𑀫𑀗𑁆𑀕𑀮𑁄 𑀦𑀸𑀫𑀸𑀘𑀭𑀺𑀬𑁄 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑁆𑀲𑀝𑀻𑀓𑀁, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲𑀝𑀻𑀓𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀩𑀼𑀤𑁆𑀥𑀧𑀺𑀬𑁄 𑀦𑀸𑀫𑀸𑀘𑀭𑀺𑀬𑁄 𑀲𑀸𑀭𑀢𑁆𑀣𑀲𑀗𑁆𑀕𑀳𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀥𑀫𑁆𑀫𑀓𑀺𑀢𑁆𑀢𑀺 𑀦𑀸𑀫𑀸𑀘𑀭𑀺𑀬𑁄 𑀤𑀦𑁆𑀢𑀥𑀸𑀢𑀼 𑀧𑀓𑀭𑀡𑀁 𑀅𑀓𑀸𑀲𑀺. 𑀫𑁂𑀥𑀗𑁆𑀓𑀭𑁄 𑀦𑀸𑀫𑀸𑀘𑀭𑀺𑀬𑁄 𑀚𑀺𑀦𑀘𑀭𑀺𑀢𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀦𑀸𑀫𑀸𑀘𑀭𑀺𑀬𑁄 𑀚𑀺𑀦𑀮𑀗𑁆𑀓𑀸𑀭𑀁, 𑀚𑀺𑀦𑀮𑀗𑁆𑀓𑀸𑀭𑀲𑁆𑀲 𑀝𑀻𑀓𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀉𑀧𑀢𑀺𑀲𑁆𑀲𑁄 𑀦𑀸𑀫𑀸𑀘𑀭𑀺𑀬𑁄 𑀅𑀦𑀸𑀕𑀢𑀯𑀁𑀲𑀲𑁆𑀲 𑀅𑀝𑁆𑀞𑀓𑀣𑀁 𑀅𑀓𑀸𑀲𑀺.

𑀓𑀗𑁆𑀔𑀸𑀯𑀺𑀢𑀭𑀡𑀻𑀬𑀸 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀺𑀦𑀺, 𑀦𑀺𑀲𑀦𑁆𑀤𑁂𑀳𑁄, 𑀥𑀫𑁆𑀫𑀸𑀦𑀼𑀲𑀸𑀭𑀡𑀻, 𑀜𑁂𑀬𑁆𑀬𑀸𑀲𑀦𑁆𑀢𑀢𑀺, 𑀜𑁂𑀬𑁆𑀬𑀸𑀲𑀦𑁆𑀢𑀢𑀺𑀬𑀸 𑀝𑀻𑀓𑀸, 𑀲𑀼𑀫𑀢𑀸𑀤𑀸𑀯𑀢𑀸𑀭𑁄, 𑀮𑁄𑀓𑀧𑀜𑁆𑀜𑀢𑁆𑀢𑀺 𑀧𑀓𑀭𑀡𑀁, 𑀢𑀣𑀸𑀕𑀢𑀼𑀧𑁆𑀧𑀢𑁆𑀢𑀺 𑀧𑀓𑀭𑀡𑀁, 𑀦𑀮𑀸𑀝𑀥𑀸𑀢𑀼 𑀯𑀡𑁆𑀡𑀦𑀸, 𑀲𑀻𑀳𑀴𑀯𑀢𑁆𑀣𑀼, 𑀥𑀫𑁆𑀫𑀤𑀻𑀧𑀓𑁄, 𑀧𑀝𑀺𑀧𑀢𑁆𑀢𑀺𑀲𑀗𑁆𑀕𑀳𑁄, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀡𑁆𑀞𑀺, 𑀅𑀪𑀺𑀥𑀫𑁆𑀫𑀕𑀡𑁆𑀞𑀺, 𑀦𑁂𑀢𑁆𑀢𑀺𑀧𑀓𑀭𑀡𑀕𑀡𑁆𑀞𑀺, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀘𑀼𑀮𑁆𑀮𑀦𑀯𑀝𑀻𑀓𑀸, 𑀲𑁄𑀢𑀩𑁆𑀩𑀫𑀸𑀮𑀺𑀦𑀻, 𑀧𑀲𑀸𑀤𑀚𑀦𑀦𑀻, 𑀑𑀓𑀸𑀲𑀮𑁄𑀓𑁄, 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑁆𑀲 𑀦𑀯 𑀝𑀻𑀓𑀸 𑀘𑁂𑀢𑀺, 𑀇𑀫𑁂 𑀯𑀻𑀲𑀢𑀺 𑀕𑀦𑁆𑀣𑀸 𑀯𑀻𑀲𑀢𑀸𑀘𑀭𑀺𑀬𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑀸.

𑀲𑀤𑁆𑀥𑀫𑁆𑀫𑀲𑀺𑀭𑀺 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀤𑁂𑀯𑁄 𑀦𑀸𑀫𑀸𑀘𑀭𑀺𑀬𑁄 𑀲𑀼𑀫𑀦 𑀓𑀽𑀝𑀯𑀡𑁆𑀡𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀘𑀼𑀮𑁆𑀮𑀩𑀼𑀤𑁆𑀥𑀖𑁄𑀲𑁄 𑀦𑀸𑀫𑀸𑀘𑀭𑀺𑀬𑁄 𑀲𑁄𑀢𑀢𑁆𑀣𑀓𑀺𑀦𑀺𑀤𑀸𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀭𑀝𑁆𑀞𑀧𑀸𑀮𑁄 𑀦𑀸𑀫𑀸𑀘𑀭𑀺𑀬𑁄 𑀫𑀥𑀼𑀭𑀲𑀗𑁆𑀕𑀸𑀳𑀡𑀻𑀓𑀺𑀢𑁆𑀢𑀺 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀲𑀼𑀪𑀽𑀢𑀘𑀦𑁆𑀤𑁄 𑀦𑀸𑀫𑀸𑀘𑀭𑀺𑀬𑁄 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡-𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀕𑁆𑀕𑀯𑀁𑀲𑁄 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀦𑀻𑀢𑀺 𑀧𑀓𑀭𑀡𑀁 𑀦𑀸𑀫 𑀅𑀓𑀸𑀲𑀺. 𑀯𑀚𑀺𑀭𑀩𑀼𑀤𑁆𑀥𑀺 𑀦𑀸𑀫𑀸𑀘𑀭𑀺𑀬𑁄 𑀫𑀳𑀸𑀝𑀻𑀓𑀁 𑀦𑀸𑀫 𑀦𑁆𑀬𑀸𑀲𑀧𑀓𑀭𑀡𑀝𑀻𑀓𑀁 𑀅𑀓𑀸𑀲𑀺. 𑀕𑀼𑀡𑀲𑀸𑀕𑀭𑁄 𑀦𑀸𑀫𑀸𑀘𑀭𑀺𑀬𑁄 𑀫𑀼𑀔𑀫𑀢𑁆𑀢𑀲𑀸𑀭𑀁, 𑀫𑀼𑀔𑀫𑀢𑁆𑀢𑀲𑀸𑀭𑀲𑁆𑀲 𑀝𑀻𑀓𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀪𑀬𑁄 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀬 𑀫𑀳𑀸𑀝𑀻𑀓𑀁 𑀅𑀓𑀸𑀲𑀺. 𑀜𑀸𑀡𑀲𑀸𑀕𑀭𑁄 𑀦𑀸𑀫𑀸𑀘𑀭𑀺𑀬𑁄 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀧𑁆𑀧𑀓𑀸𑀲𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀕𑀽𑀴𑀢𑁆𑀣𑀝𑀻𑀓𑀁, 𑀩𑀸𑀮𑀧𑁆𑀧𑀩𑁄𑀥𑀦𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀲𑀤𑁆𑀤𑀢𑁆𑀣-𑀪𑁂𑀤𑀘𑀺𑀦𑁆𑀢𑀸𑀬 𑀫𑀚𑁆𑀛𑀺𑀫𑀝𑀻𑀓𑀁 𑀅𑀓𑀸𑀲𑀺. 𑀉𑀢𑁆𑀢𑀫𑁄 𑀦𑀸𑀫𑀸𑀘𑀭𑀺𑀬𑁄 𑀩𑀸𑀮𑀸𑀯𑀢𑀸𑀭𑀝𑀻𑀓𑀁, 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀝𑀻𑀓𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀬 𑀦𑀯-𑀝𑀻𑀓𑀁 𑀅𑀓𑀸𑀲𑀺. 𑀏𑀓𑁄 𑀅𑀫𑀘𑁆𑀘𑁄 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀝𑀻𑀓𑀁, 𑀕𑀡𑁆𑀞𑀺𑀧𑀓𑀭𑀡𑀲𑁆𑀲 𑀤𑀡𑁆𑀟𑀻𑀧𑁆𑀧𑀓𑀭𑀡𑀲𑁆𑀲 𑀫𑀸𑀕𑀥𑀪𑀽𑀢𑀁 𑀝𑀻𑀓𑀁, 𑀓𑁄𑀮𑀤𑁆𑀥𑀚𑀦𑀲𑁆𑀲 𑀲𑀓𑀝𑀪𑀸𑀲𑀸𑀬 𑀓𑀢𑀝𑀻𑀓𑀜𑁆𑀘 𑀢𑀺𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀸𑀫𑀸𑀘𑀭𑀺𑀬𑁄 𑀓𑀸𑀭𑀺𑀓𑀁, 𑀏𑀢𑀺𑀫𑀸𑀲𑀧𑀺𑀤𑀻𑀧𑀦𑀻, 𑀫𑀦𑁄𑀳𑀸𑀭𑀜𑁆𑀘 𑀢𑀺𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀓𑀸𑀭𑀺𑀓𑀸𑀬 𑀝𑀻𑀓𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀏𑀢𑀺𑀫𑀸𑀲𑀧𑀺𑀤𑀻𑀧𑀺𑀓𑀸𑀬 𑀝𑀻𑀓𑀁 𑀅𑀓𑀸𑀲𑀺.

𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀲𑀤𑁆𑀤𑀩𑀺𑀦𑁆𑀤𑀼 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀲𑀤𑁆𑀥𑀫𑁆𑀫𑀕𑀼𑀭𑀼 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀯𑀼𑀢𑁆𑀢𑀺𑀧𑁆𑀧𑀓𑀸𑀲𑀓𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀯𑀼𑀢𑁆𑀢𑀺𑀧𑁆𑀧𑀓𑀸𑀲𑀓𑀲𑁆𑀲 𑀝𑀻𑀓𑀁 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀓𑀘𑁆𑀘𑀸𑀬𑀦𑀲𑀸𑀭𑀁 𑀦𑀸𑀫 𑀧𑀓𑀭𑀡𑀁 𑀓𑀘𑁆𑀘𑀸𑀬𑀦𑀲𑀸𑀭𑀲𑁆𑀲 𑀝𑀻𑀓𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀓𑀸𑀲𑀺. 𑀦𑀯𑁄 𑀫𑁂𑀥𑀗𑁆𑀓𑀭𑁄 𑀦𑀸𑀫𑀸𑀘𑀭𑀺𑀬𑁄 𑀮𑁄𑀓𑀤𑀻𑀧𑀓𑀲𑀸𑀭𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀅𑀕𑁆𑀕𑀧𑀡𑁆𑀟𑀺𑀢𑁄 𑀦𑀸𑀫𑀸𑀘𑀭𑀺𑀬𑁄 𑀮𑁄𑀓𑀼𑀧𑁆𑀧𑀢𑁆𑀢𑀺 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀘𑀻𑀯𑀭𑁄 𑀦𑀸𑀫𑀸𑀘𑀭𑀺𑀬𑁄 𑀚𑀗𑁆𑀖𑀤𑀸𑀲𑀓𑀲𑁆𑀲 𑀝𑀻𑀓𑀁 𑀅𑀓𑀸𑀲𑀺. 𑀫𑀸𑀢𑀺𑀓𑀢𑁆𑀣𑀤𑀻𑀧𑀦𑀻, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸, 𑀲𑀻𑀫𑀸𑀮𑀗𑁆𑀓𑀸𑀭𑀲𑁆𑀲𑀝𑀻𑀓𑀸, 𑀯𑀺𑀦𑀬𑀲𑀫𑀼𑀝𑁆𑀞𑀸𑀦𑀤𑀻𑀧𑀦𑀻 𑀝𑀻𑀓𑀸, 𑀕𑀡𑁆𑀞𑀺 𑀲𑀸𑀭𑁄, 𑀧𑀝𑁆𑀞𑀸𑀦𑀕𑀡𑀦𑀸 𑀦𑀬𑁄, 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄, 𑀧𑀸𑀢𑀺𑀫𑁄𑀓𑁆𑀔𑁄, 𑀘𑁂𑀢𑀺, 𑀇𑀫𑁂 𑀅𑀝𑁆𑀞 𑀕𑀦𑁆𑀣𑁂 𑀲𑀤𑁆𑀥𑀫𑁆𑀫𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁄 𑀅𑀓𑀸𑀲𑀺. 𑀯𑀺𑀫𑀮𑀩𑀼𑀤𑁆𑀥𑀺 𑀦𑀸𑀫𑀸𑀘𑀭𑀺𑀬𑁄 𑀅𑀪𑀺𑀥𑀫𑁆𑀫-𑀧𑀦𑁆𑀦𑀭𑀲𑀝𑁆𑀞𑀸𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀓𑀸𑀲𑀺. 𑀦𑀯𑁄 𑀯𑀺𑀫𑀮𑀩𑀼𑀤𑁆𑀥𑀺 𑀦𑀸𑀫𑀸𑀘𑀭𑀺𑀬𑁄 𑀲𑀤𑁆𑀤𑀲𑀸𑀭𑀢𑁆𑀣𑀚𑀸𑀮𑀺𑀦𑀻, 𑀲𑀤𑁆𑀤𑀲𑀸𑀭𑀢𑁆𑀣𑀚𑀸𑀮𑀺𑀦𑀺𑀬𑀸 𑀝𑀻𑀓𑀸, 𑀯𑀼𑀢𑁆𑀢𑁄𑀤𑀬 𑀝𑀻𑀓𑀸, 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸 𑀦𑀸𑀫 𑀅𑀪𑀺𑀥𑀫𑁆𑀫𑀲𑀗𑁆𑀕𑀳𑀝𑀻𑀓𑀸𑀬 𑀅𑀦𑀼𑀝𑀻𑀓𑀸 𑀤𑀲𑀕𑀡𑁆𑀞𑀺𑀯𑀡𑁆𑀡𑀦𑀸, 𑀫𑀸𑀕𑀥𑀪𑀽𑀢𑀸𑀯𑀺𑀤𑀕𑁆𑀕𑀫𑀼𑀔𑀫𑀡𑁆𑀟𑀦𑀝𑀻𑀓𑀸 𑀘𑁂𑀢𑀺 𑀇𑀫𑁂 𑀙 𑀕𑀦𑁆𑀣𑁂 𑀅𑀓𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄 𑀧𑀜𑁆𑀘𑀧𑀓𑀭𑀡𑀝𑀻𑀓𑀸𑀬 𑀦𑀯𑀸𑀦𑀼𑀝𑀻𑀓𑀁 𑀅𑀓𑀸𑀲𑀺. 𑀅𑀭𑀺𑀬𑀯𑀁𑀲𑁄 𑀦𑀸𑀫𑀸𑀘𑀭𑀺𑀬𑁄 𑀅𑀪𑀺𑀥𑀫𑁆𑀫𑀲𑀗𑁆𑀕𑀳-𑀝𑀻𑀓𑀸𑀬 [𑀧𑀭𑀫𑀢𑁆𑀣] 𑀫𑀡𑀺𑀲𑀸𑀭𑀫𑀜𑁆𑀚𑀽𑀲𑀁 𑀦𑀸𑀫 𑀦𑀯𑀸𑀦𑀼𑀝𑀻𑀓𑀁 𑀅𑀓𑀸𑀲𑀺. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲 𑀝𑀻𑀓𑀸, 𑀧𑁂𑀝𑀓𑁄𑀧𑀤𑁂𑀲𑀲𑁆𑀲 𑀝𑀻𑀓𑀸, 𑀘𑀢𑀼𑀪𑀸𑀡𑀯𑀸𑀭𑀲𑁆𑀲 𑀅𑀝𑁆𑀞𑀓𑀣𑀸, 𑀫𑀳𑀸𑀲𑀸𑀭𑀧𑀓𑀸𑀲𑀦𑀻, 𑀫𑀳𑀸𑀤𑀻𑀧𑀦𑀻, 𑀲𑀸𑀭𑀢𑁆𑀣𑀤𑀻𑀧𑀦𑀻 𑀕𑀢𑀺 𑀧𑀓𑀭𑀡𑀁, 𑀳𑀢𑁆𑀣𑀲𑀸𑀭𑁄, 𑀪𑀼𑀫𑁆𑀫𑀲𑀗𑁆𑀕𑀳𑁄, 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄, 𑀤𑀲𑀯𑀢𑁆𑀣𑀼𑀓𑀸𑀬𑀯𑀺𑀭𑀢𑀺𑀝𑀻𑀓𑀸, 𑀚𑁄𑀢𑀦𑀸 𑀦𑀺𑀭𑀼𑀢𑁆𑀢𑀺, 𑀯𑀺𑀪𑀢𑁆𑀢𑀺𑀓𑀣𑀸, 𑀓𑀘𑁆𑀘𑀸𑀬𑀦𑀯𑀺𑀯𑀭𑀡𑀸, 𑀲𑀤𑁆𑀥𑀫𑁆𑀫𑀫𑀸𑀮𑀺𑀦𑀻, 𑀧𑀜𑁆𑀘𑀕𑀢𑀺 𑀯𑀡𑁆𑀡𑀦𑀸, 𑀩𑀸𑀮𑀘𑀺𑀢𑁆𑀢𑀧𑀩𑁄𑀥𑀦𑀁, 𑀥𑀫𑁆𑀫𑀘𑀓𑁆𑀓𑀲𑀼𑀢𑁆𑀢𑀲𑁆𑀲 𑀦𑀯𑀝𑁆𑀞𑀓𑀣𑀸, 𑀤𑀦𑁆𑀢𑀥𑀸𑀢𑀼 𑀧𑀓𑀭𑀡𑀲𑁆𑀲 𑀝𑀻𑀓𑀸 𑀘𑁂𑀢𑀺, 𑀇𑀫𑁂 𑀯𑀻𑀲𑀢𑀺 𑀕𑀦𑁆𑀣𑀸 𑀦𑀸𑀦𑀸𑀘𑀭𑀺𑀬𑁂𑀳𑀺 𑀓𑀢𑀸, 𑀅𑀜𑁆𑀜𑀸𑀦𑀺 𑀧𑀦 𑀧𑀓𑀭𑀡𑀸𑀦𑀺 𑀅𑀢𑁆𑀣𑀺.

𑀓𑀢𑀫𑀸𑀦𑀺 𑀲𑀤𑁆𑀥𑀫𑁆𑀫𑁄 𑀧𑀸𑀬𑀦𑁄, 𑀩𑀸𑀮𑀧𑁆𑀧𑀩𑁄𑀥𑀦𑀧𑀓𑀭𑀡𑀲𑁆𑀲 𑀝𑀻𑀓𑀸 𑀘, 𑀚𑀺𑀦𑀸𑀮𑀗𑁆𑀓𑀸𑀭𑀧𑀓𑀭𑀡𑀲𑁆𑀲 𑀦𑀯𑀝𑀻𑀓𑀸 𑀘, 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀁, 𑀮𑀺𑀗𑁆𑀕𑀯𑀺𑀦𑀺𑀘𑁆𑀙𑀬𑁄; 𑀧𑀸𑀢𑀺𑀫𑁄𑀓𑁆𑀔𑀯𑀺𑀯𑀭𑀡𑀁, 𑀧𑀭𑀫𑀢𑁆𑀣𑀓𑀣𑀸𑀯𑀺𑀯𑀭𑀡𑀁, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀯𑀺𑀯𑀭𑀡𑀁, 𑀘𑀢𑀼𑀪𑀸𑀡𑀯𑀸𑀭𑀝𑁆𑀞𑀓𑀣𑀸 𑀯𑀺𑀯𑀭𑀡𑀁, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀺𑀯𑀭𑀡𑀁, 𑀲𑀘𑁆𑀘𑀲𑀗𑁆𑀔𑁂𑀧𑀯𑀺𑀯𑀭𑀡𑀁, 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀯𑀺𑀯𑀭𑀡𑀁, 𑀲𑀤𑁆𑀤𑀯𑀼𑀢𑁆𑀢𑀺𑀯𑀺𑀯𑀭𑀡𑀁, 𑀓𑀘𑁆𑀘𑀸𑀬𑀦𑀲𑀸𑀭𑀯𑀺𑀯𑀭𑀡𑀁, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲 𑀝𑀻𑀓𑀸 𑀯𑀺𑀯𑀭𑀡𑀁, 𑀫𑀳𑀸𑀯𑁂𑀲𑁆𑀲𑀦𑁆𑀢𑀭𑀸𑀚𑀸𑀢𑀓𑀲𑁆𑀲 𑀯𑀺𑀯𑀭𑀡𑀁, 𑀲𑀓𑁆𑀓𑀸𑀪𑀺𑀫𑀢𑀁, 𑀫𑀳𑀸𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀲𑁆𑀲 𑀦𑀯𑀝𑁆𑀞𑀓𑀣𑀸, 𑀧𑀞𑀫 𑀲𑀁𑀩𑁄𑀥𑀺, 𑀮𑁄𑀓𑀦𑁂𑀢𑁆𑀢𑀺 𑀘, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀦𑀺𑀤𑀸𑀦𑀁 𑀫𑀺𑀮𑀺𑀦𑁆𑀤𑀧𑀜𑁆𑀳𑀸 𑀯𑀡𑁆𑀡𑀦𑀸, 𑀘𑀢𑀼𑀭𑀸 𑀭𑀓𑁆𑀔𑀸, 𑀘𑀢𑀼𑀭𑀓𑁆𑀔𑀸𑀬 𑀅𑀝𑁆𑀞𑀓𑀣𑀸, 𑀲𑀤𑁆𑀤𑀯𑀼𑀢𑁆𑀢𑀺𑀧𑀓𑀭𑀡𑀲𑁆𑀲 𑀦𑀯𑀝𑀻𑀓𑀸, 𑀇𑀘𑁆𑀘𑁂𑀯𑀁 𑀧𑀜𑁆𑀘𑀯𑀻𑀲𑀢𑀺 𑀧𑀫𑀸𑀡𑀸𑀦𑀺 𑀧𑀓𑀭𑀡𑀸𑀦𑀺 𑀮𑀗𑁆𑀓𑁄 𑀤𑀻𑀧𑀸𑀤𑀻𑀲𑀼𑀝𑁆𑀞𑀸𑀦𑁂𑀲𑀼 𑀧𑀡𑁆𑀟𑀺𑀢𑁂𑀳𑀺 𑀓𑀢𑀸𑀦𑀺 𑀅𑀳𑁂𑀲𑀼𑀁, 𑀲𑀫𑁆𑀩𑀼𑀤𑁆𑀥𑁂𑀕𑀸𑀣𑀸 𑀘, 𑀦𑀭𑀤𑁂𑀯 𑀦𑀸𑀫 𑀕𑀸𑀣𑀸 𑀘, 𑀤𑀸𑀢𑀯𑁂 𑀘𑀻𑀭𑀢𑁆𑀢𑀺 𑀕𑀸𑀣𑀸 𑀘, 𑀯𑀻𑀲𑀢𑀺 𑀑𑀯𑀸𑀤𑀕𑀸𑀣𑀸 𑀘, 𑀤𑀸𑀦𑀲𑀢𑁆𑀢𑀭𑀺, 𑀲𑀻𑀮𑀲𑀢𑁆𑀢𑀭𑀺, 𑀲𑀧𑁆𑀧𑀸𑀤𑀸𑀦𑀯𑀡𑁆𑀡𑀦𑀸, 𑀅𑀦𑀦𑁆𑀢𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸 𑀘, 𑀅𑀝𑁆𑀞𑀯𑀻𑀲𑀢𑀺 𑀩𑀼𑀤𑁆𑀥𑀯𑀦𑁆𑀤𑀦𑀕𑀸𑀣𑀸 𑀘, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀦𑁆𑀤𑀦𑀕𑀸𑀣𑀸 𑀘, 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀯𑀦𑁆𑀤𑀦𑀕𑀸𑀣𑀸 𑀘, 𑀦𑀯𑀳𑀸𑀭𑀕𑀼𑀡𑀯𑀡𑁆𑀡𑀦𑀸 𑀘𑀸𑀢𑀺, 𑀇𑀫𑁂 𑀩𑀼𑀤𑁆𑀥𑀧𑀡𑀸𑀫-𑀕𑀸𑀣𑀸𑀤𑀺𑀓𑀸 𑀕𑀸𑀣𑀸 𑀬𑁄 𑀧𑀡𑁆𑀟𑀺𑀢𑁂𑀳𑀺 𑀮𑀗𑁆𑀓𑀸𑀤𑀻𑀧𑀸𑀤𑀺𑀲𑀼𑀝𑁆𑀞𑀸𑀦𑁂𑀲𑀼 𑀓𑀢𑀸 𑀅𑀳𑁂𑀲𑀼𑀁 [𑀇𑀢𑀺 𑀘𑀼𑀮𑁆𑀮𑀕𑀦𑁆𑀣𑀯𑀁𑀲𑁂 𑀕𑀦𑁆𑀣𑀓𑀸𑀭𑀓𑀸𑀘𑀭𑀺𑀬 𑀤𑀻𑀧𑀓𑁄 𑀦𑀸𑀫 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄]

𑁩. 𑀆𑀘𑀭𑀺𑀬𑀸𑀦𑀁 𑀲𑀜𑁆𑀚𑀸𑀢𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑁄

𑀆𑀘𑀭𑀺𑀬𑁂𑀲𑀼 𑀘 𑀅𑀢𑁆𑀣𑀺 𑀚𑀫𑁆𑀩𑀼𑀤𑀻𑀧𑀺𑀓𑀸𑀘𑀭𑀺𑀬𑀸 𑀅𑀢𑁆𑀣𑀺, 𑀮𑀗𑁆𑀓𑀸𑀤𑀻𑀧𑀺𑀓𑀸𑀘𑀭𑀺𑀬𑀸. 𑀓𑀢𑀫𑁂 𑀚𑀫𑁆𑀩𑀼𑀤𑀻𑀧𑀺𑀓𑀸𑀘𑀭𑀺𑀬𑀸? 𑀓𑀢𑀫𑁂 𑀮𑀗𑁆𑀓𑀸𑀤𑀻𑀧𑀺𑀓𑀸𑀘𑀭𑀺𑀬𑀸? 𑀫𑀳𑀸𑀓𑀘𑁆𑀘𑀸𑀬𑀦𑁄 𑀚𑀫𑁆𑀩𑀼𑀤𑀻𑀧𑀺𑀓𑀸𑀘𑀭𑀺𑀬𑁄 𑀲𑁄 𑀳𑀺 𑀅𑀯𑀦𑁆𑀢𑀺𑀭𑀝𑁆𑀞𑁂 𑀉𑀚𑁆𑀚𑁂𑀦𑀻 𑀦𑀕𑀭𑁂 𑀘𑀦𑁆𑀤𑀧𑀚𑁆𑀚𑁄𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀳𑀼𑀢𑁆𑀯𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀲𑀢𑁆𑀣𑀼𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀅𑀓𑀸𑀲𑀺. 𑀫𑀳𑀸𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀚𑀫𑁆𑀩𑀼𑀤𑀻𑀧𑀺𑀓𑁄, 𑀫𑀳𑀸𑀧𑀘𑁆𑀘𑀭𑀺𑀓𑀸𑀘𑀭𑀺𑀬𑁄, 𑀫𑀳𑀸𑀓𑀼𑀭𑀼𑀦𑁆𑀤𑀺𑀓𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑀸 𑀤𑁆𑀯𑁂𑀢𑀺 𑀇𑀫𑁂 𑀘 𑀪𑀽𑀯𑀸𑀘𑀭𑀺𑀬𑀸. 𑀮𑀗𑁆𑀓𑀸𑀤𑀻𑀧𑀺𑀓𑀸𑀘𑀭𑀺𑀬𑀸 𑀦𑀸𑀫 𑀢𑁂 𑀓𑀺𑀭 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀲𑁆𑀲 𑀧𑀽𑀭𑁂 𑀪𑀽𑀢𑀸𑀘𑀭𑀺𑀬𑁂 𑀓𑀸𑀮𑁂 𑀅𑀳𑁂𑀲𑀼𑀁. 𑀫𑀳𑀸𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄 𑀚𑀫𑁆𑀩𑀼𑀤𑀻𑀧𑀺𑀓𑁄. 𑀲𑁄 𑀓𑀺𑀭 𑀫𑀕𑀥𑀭𑀝𑁆𑀞𑁂 𑀖𑁄𑀲𑀓𑀕𑀸𑀫𑁂 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀓𑁂𑀲𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄, 𑀲𑀢𑁆𑀣𑀼𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀺𑀢𑁆𑀯𑀸 𑀮𑀗𑁆𑀓𑀸𑀤𑀻𑀧𑀁 𑀕𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀅𑀓𑀸𑀲𑀺.

𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁄, 𑀆𑀦𑀦𑁆𑀤𑀸𑀘𑀭𑀺𑀬𑁄, 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄, 𑀤𑁆𑀯𑁂 𑀩𑀼𑀩𑁆𑀩𑀸𑀘𑀭𑀺𑀬𑁄, 𑀫𑀳𑀸𑀯𑀚𑀺𑀭-𑀩𑀼𑀤𑁆𑀥𑀸𑀘𑀭𑀺𑀬𑁄, 𑀘𑀼𑀮𑁆𑀮𑀯𑀚𑀺𑀭-𑀩𑀼𑀤𑁆𑀥𑀸𑀘𑀭𑀺𑀬𑁄, 𑀯𑀺𑀫𑀮𑀩𑀼𑀤𑁆𑀥𑀲𑀗𑁆𑀔𑀸𑀢𑁄 𑀤𑀻𑀧𑀗𑁆𑀓𑀭𑀸𑀘𑀭𑀺𑀬𑁄, 𑀘𑀼𑀮𑁆𑀮𑀤𑀻𑀧𑀗𑁆𑀓𑀭𑀸𑀘𑀭𑀺𑀬𑁄, 𑀘𑀼𑀮𑁆𑀮𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄, 𑀓𑀲𑁆𑀲𑀧𑀸𑀘𑀭𑀺𑀬𑁄𑀢𑀺 𑀇𑀫𑁂 𑀏𑀓𑀸𑀤𑀲𑀘𑀭𑀺𑀬𑀸 𑀚𑀫𑁆𑀩𑀼𑀤𑀻𑀧𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀓𑀸𑀭𑁂 𑀕𑀦𑁆𑀣𑁂 𑀅𑀓𑀁𑀲𑀼. 𑀫𑀳𑀸𑀦𑀸𑀫𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑀸𑀘𑀭𑀺𑀬𑀸, 𑀘𑀼𑀮𑁆𑀮𑀫𑀳𑀸𑀦𑀸𑀫𑀸𑀘𑀭𑀺𑀬𑁄, 𑀉𑀧𑀲𑁂𑀦𑀸𑀘𑀭𑀺𑀬𑁄, 𑀫𑁄𑀕𑁆𑀕𑀮𑀸𑀦𑀸𑀘𑀭𑀺𑀬𑁄, 𑀲𑀗𑁆𑀖𑀭𑀓𑁆𑀔𑀺𑀢𑀸𑀘𑀭𑀺𑀬𑁄, 𑀯𑀼𑀢𑁆𑀢𑁄𑀤𑀬𑀓𑀸𑀭𑀸𑀘𑀭𑀺𑀬𑁄, 𑀥𑀫𑁆𑀫𑀲𑀺𑀭𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑀸 𑀤𑁆𑀯𑀸𑀘𑀭𑀺𑀬𑀸, 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁄, 𑀔𑁂𑀫𑀸𑀘𑀭𑀺𑀬𑁄, 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁄, 𑀩𑀼𑀤𑁆𑀥𑀦𑀸𑀕𑀸𑀘𑀭𑀺𑀬𑁄, 𑀘𑀼𑀮𑁆𑀮𑀫𑁄𑀕𑁆𑀕𑀮𑀸𑀦𑀸𑀘𑀭𑀺𑀬𑁄, 𑀯𑀸𑀘𑀺𑀲𑁆𑀲𑀯𑀸𑀘𑀭𑀺𑀬𑁄, 𑀲𑀼𑀫𑀗𑁆𑀕𑀮𑀸𑀘𑀭𑀺𑀬𑁄, 𑀩𑀼𑀤𑁆𑀥𑀧𑀺𑀬𑀸𑀘𑀭𑀺𑀬𑁄, 𑀥𑀫𑁆𑀫𑀓𑀺𑀢𑁆𑀢𑀺 𑀆𑀘𑀭𑀺𑀬𑁄 𑀫𑁂𑀥𑀗𑁆𑀓𑀭𑀸𑀘𑀭𑀺𑀬𑁄, 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀘𑀭𑀺𑀬𑁄, 𑀉𑀧𑀢𑀺𑀲𑁆𑀲𑀸 𑀘𑀭𑀺𑀬𑁄, 𑀅𑀜𑁆𑀜𑀢𑀭𑀸 𑀯𑀻𑀲𑀢𑀸𑀘𑀭𑀺𑀬𑀸, 𑀲𑀤𑁆𑀥𑀫𑁆𑀫𑀲𑀺𑀭𑀸𑀘𑀭𑀺𑀬𑁄, 𑀤𑁂𑀯𑀸𑀘𑀭𑀺𑀬𑁄, 𑀘𑀼𑀮𑁆𑀮𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄, 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁄, 𑀭𑀝𑁆𑀞𑀧𑀸𑀮𑀸𑀘𑀭𑀺𑀬𑁄𑀢𑀺 𑀇𑀫𑁂 𑀤𑁆𑀯𑁂 𑀧𑀜𑁆𑀜𑀸𑀲𑀸𑀘𑀭𑀺𑀬𑀸 𑀮𑀗𑁆𑀓𑀸𑀤𑀻𑀧𑀺𑀓𑀸𑀘𑀭𑀺𑀬𑀸 𑀦𑀸𑀫. 𑀲𑀼𑀪𑀽𑀢𑀘𑀦𑁆𑀤𑀸𑀘𑀭𑀺𑀬𑁄, 𑀅𑀕𑁆𑀕𑀯𑀁𑀲𑀸𑀘𑀭𑀺𑀬𑁄, 𑀦𑀯𑁄 𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁄, 𑀕𑀼𑀡𑀲𑀸𑀕𑀭𑀸𑀘𑀭𑀺𑀬𑁄, 𑀅𑀪𑀬𑀸𑀘𑀭𑀺𑀬𑁄, 𑀜𑀸𑀡𑀲𑀸𑀕𑀭𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑀸 𑀤𑁆𑀯𑀸𑀘𑀭𑀺𑀬𑀸, 𑀉𑀢𑁆𑀢𑀫𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑁄 𑀆𑀘𑀭𑀺𑀬𑁄, 𑀅𑀜𑁆𑀜𑀢𑀭𑁄 𑀫𑀳𑀸𑀫𑀘𑁆𑀘𑁄, 𑀥𑀫𑁆𑀫𑀲𑁂𑀦𑀸𑀧𑀢𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑀸 𑀢𑀬𑁄 𑀆𑀘𑀭𑀺𑀬𑀸, 𑀲𑀤𑁆𑀥𑀫𑁆𑀫𑀕𑀼𑀭𑀼 𑀆𑀘𑀭𑀺𑀬𑁄, 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁄, 𑀅𑀜𑁆𑀜𑀢𑀭𑁄 𑀏𑀓𑀸 𑀆𑀘𑀭𑀺𑀬𑁄, 𑀫𑁂𑀥𑀗𑁆𑀓𑀭𑀸𑀘𑀭𑀺𑀬𑁄, 𑀅𑀕𑁆𑀕𑀧𑀡𑁆𑀟𑀺𑀢𑀸𑀘𑀭𑀺𑀬𑁄, 𑀘𑀻𑀯𑀭𑀸𑀘𑀭𑀺𑀬𑁄, 𑀲𑀤𑁆𑀥𑀫𑁆𑀫𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁄, 𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁄𑀢𑀺 𑀇𑀫𑁂 𑀢𑁂𑀯𑀻𑀲𑀢𑀺 𑀆𑀘𑀭𑀺𑀬𑀸 𑀚𑀫𑁆𑀩𑀼𑀤𑀻𑀧𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀧𑀼𑀓𑁆𑀓𑀸𑀫 𑀲𑀗𑁆𑀔𑀸𑀢𑁂 𑀅𑀭𑀺𑀫𑀤𑁆𑀤𑀦 𑀦𑀕𑀭𑁂 𑀅𑀓𑀁𑀲𑀼.

𑀦𑀯𑁄𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁄 𑀚𑀫𑁆𑀩𑀼𑀤𑀻𑀧𑀺𑀓𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀧𑀁𑀬𑀦𑀕𑀭𑁂 𑀅𑀓𑀸𑀲𑀺. 𑀅𑀜𑁆𑀜𑀢𑀭𑀸𑀘𑀭𑀺𑀬𑁄 𑀅𑀭𑀺𑀬𑀯𑀁𑀲𑀸𑀘𑀭𑀺𑀬𑁄𑀢𑀺 𑀇𑀫𑁂 𑀤𑁆𑀯𑀸𑀘𑀭𑀺𑀬𑀸 𑀚𑀫𑁆𑀩𑀼𑀤𑀻𑀧𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀅𑀢𑀺 [𑀦𑀯𑀺] 𑀧𑀼𑀭𑁂 𑀅𑀓𑀁𑀲𑀼, 𑀅𑀜𑁆𑀜𑀢𑀭𑀸 𑀯𑀻𑀲𑀢𑀸𑀘𑀭𑀺𑀬𑀸 𑀚𑀫𑁆𑀩𑀼𑀤𑀻𑀧𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀓𑀺𑀜𑁆𑀘𑀺 𑀧𑀼𑀭𑀸𑀤𑀺𑀖𑀭𑁂 𑀅𑀓𑀁𑀲𑀼.

[𑀇𑀢𑀺 𑀘𑀼𑀮𑁆𑀮𑀕𑀦𑁆𑀣𑀯𑀁𑀲𑁂 𑀆𑀘𑀭𑀺𑀬𑀸𑀦𑀁 𑀲𑀜𑁆𑀚𑀸𑀢𑀝𑁆𑀞𑀸𑀦 𑀤𑀻𑀧𑀓𑁄 𑀦𑀸𑀫 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.]

𑁪. 𑀆𑀬𑀸𑀬𑀓𑀸𑀘𑀭𑀺𑀬-𑀧𑀭𑀺𑀘𑁆𑀙𑁂𑀤𑁄

𑀕𑀦𑁆𑀣𑀸 𑀧𑀦 𑀲𑀺𑀬𑀸 𑀆𑀬𑀸𑀘𑀦𑁂𑀦 𑀆𑀘𑀭𑀺𑀬𑁂𑀳𑀺 𑀓𑀢𑀸, 𑀲𑀺𑀬𑀸 𑀅𑀦𑀸𑀬𑀸𑀘𑀦𑁂𑀦 𑀆𑀘𑀭𑀺𑀬𑁂𑀳𑀺 𑀓𑀢𑀸. 𑀓𑀢𑀫𑁂 𑀕𑀦𑁆𑀣𑀸 𑀆𑀬𑀸𑀘𑀦𑁂𑀦, 𑀓𑀢𑀫𑁂 𑀅𑀦𑀸𑀬𑀸𑀘𑀦𑁂𑀦 𑀓𑀢𑀸? 𑀫𑀳𑀸𑀓𑀘𑁆𑀘𑀸𑀬𑀦 𑀕𑀦𑁆𑀣𑁄, 𑀫𑀳𑀸𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀫𑀳𑀸𑀧𑀘𑁆𑀘𑀭𑀺𑀬 𑀕𑀦𑁆𑀣𑁄, 𑀫𑀳𑀸𑀓𑀼𑀭𑀼𑀦𑁆𑀤𑀺 𑀕𑀦𑁆𑀣𑁄, 𑀫𑀳𑀸𑀧𑀘𑁆𑀘𑀭𑀺𑀬𑀕𑀦𑁆𑀣𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀫𑀳𑀸𑀓𑀼𑀭𑀼𑀦𑁆𑀤𑀺 𑀕𑀦𑁆𑀣𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄𑀢𑀺. 𑀇𑀫𑁂𑀳𑀺 𑀙 𑀕𑀦𑁆𑀣𑁂𑀳𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀸𑀲𑀦𑀼𑀕𑁆𑀕𑀳𑀦𑀢𑁆𑀣𑀸𑀬 𑀲𑀤𑁆𑀥𑀫𑁆𑀫𑀞𑀺𑀢𑀺𑀬𑀸 𑀓𑀢𑀸.

𑀓. 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬-𑀕𑀦𑁆𑀣𑀤𑀻𑀧𑀦𑀸

𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬 𑀕𑀦𑁆𑀣𑁂𑀲𑀼 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀲𑀗𑁆𑀖𑀧𑀸𑀮𑁂𑀦 𑀦𑀸𑀫 𑀲𑀗𑁆𑀖𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀤𑀻𑀖𑀦𑀺𑀓𑀸𑀬𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀤𑀸𑀞𑀸 𑀦𑀸𑀫𑁂𑀦 𑀲𑀗𑁆𑀖𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀫𑀚𑁆𑀛𑀺𑀫𑀦𑀺𑀓𑀸𑀬𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀩𑀼𑀤𑁆𑀥𑀫𑀺𑀢𑁆𑀢𑀦𑀸𑀫𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀚𑁄𑀢𑀺𑀧𑀸𑀮𑁂𑀦 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀪𑀤𑁆𑀤𑀦𑁆𑀢𑀸 𑀦𑀸𑀫 𑀣𑁂𑀭𑁂𑀦 𑀲𑀳𑀆𑀚𑀻𑀯𑀓𑁂𑀦 𑀉𑀧𑀸𑀲𑀓𑁂𑀦 𑀘 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀩𑀼𑀤𑁆𑀥𑀲𑀺𑀭𑀺 𑀦𑀸𑀫𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀢𑁆𑀢𑀦𑁆𑀦𑀁 𑀅𑀪𑀺𑀥𑀫𑁆𑀫-𑀕𑀦𑁆𑀣𑀸𑀦𑀁 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀘𑀼𑀮𑁆𑀮𑀩𑀼𑀤𑁆𑀥𑀖𑁄𑀲𑁂𑀦 𑀪𑀺𑀓𑁆𑀔𑀼𑀦𑀸 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀥𑀫𑁆𑀫𑀧𑀤𑀲𑁆𑀲𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀓𑀼𑀫𑀸𑀭𑀓𑀲𑁆𑀲𑀧𑀦𑀸𑀫𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀚𑀸𑀢𑀓𑀲𑁆𑀲𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀅𑀢𑁆𑀣𑀤𑀲𑁆𑀲𑀻, 𑀩𑀼𑀤𑁆𑀥𑀫𑀺𑀢𑁆𑀢, 𑀩𑀼𑀤𑁆𑀥𑀧𑀺𑀬𑀤𑁂𑀯 𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀣𑁂𑀭𑁂𑀳𑀺 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀔𑀼𑀤𑁆𑀤𑀓𑀧𑀸𑀞𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀧𑀤𑀸𑀦𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀧𑀜𑁆𑀘𑀦𑀺𑀓𑀸𑀬 𑀯𑀺𑀜𑁆𑀜𑀽𑀳𑀺 𑀧𑀜𑁆𑀘𑀳𑀺 𑀣𑁂𑀭𑁂𑀳𑀺 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑁄.

𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬-𑀕𑀦𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀔. 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬-𑀕𑀦𑁆𑀣𑀤𑀻𑀧𑀦𑀸

𑀩𑀼𑀤𑁆𑀥𑀢𑁆𑀢𑀸𑀘𑀭𑀺𑀬 𑀕𑀦𑁆𑀣𑁂𑀲𑀼 𑀧𑀦 𑀯𑀺𑀦𑀬-𑀯𑀺𑀦𑀺𑀘𑁆𑀙𑀬𑀕𑀦𑁆𑀣𑁄 𑀅𑀢𑁆𑀢𑀦𑁄 𑀲𑀺𑀲𑁆𑀲𑁂𑀦 𑀩𑀼𑀤𑁆𑀥𑀲𑀻𑀳𑁂𑀦 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀢𑁆𑀢𑀸𑀘𑀭𑀺𑀬𑀸 𑀓𑀢𑁄. 𑀉𑀢𑁆𑀢𑀭-𑀯𑀺𑀦𑀺𑀘𑁆𑀙𑀬𑀕𑀦𑁆𑀣𑁄 𑀲𑀗𑁆𑀖𑀧𑀸𑀮𑁂𑀦 𑀦𑀸𑀫𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀲𑀺𑀲𑁆𑀲𑁂𑀦 𑀲𑀼𑀫𑀢𑀺 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀩𑀼𑀤𑁆𑀥𑀯𑀁𑀲𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀢𑁂𑀦𑁂𑀯 𑀩𑀼𑀤𑁆𑀥𑀲𑀻𑀳𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑁄.

𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬-𑀕𑀦𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀓𑀣𑀸𑀬 𑀫𑀽𑀮𑀝𑀻𑀓𑀸 𑀦𑀸𑀫 𑀝𑀻𑀓𑀸 𑀕𑀦𑁆𑀣𑁄 𑀩𑀼𑀤𑁆𑀥𑀫𑀺𑀢𑁆𑀢𑀸 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀆𑀦𑀦𑁆𑀤𑀸𑀘𑀭𑀺𑀬𑁂𑀦 𑀓𑀢𑁄.

𑀕. 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦-𑀕𑀦𑁆𑀣𑀤𑀻𑀧𑀦𑀸

𑀦𑁂𑀢𑁆𑀢𑀺𑀧𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀥𑀫𑁆𑀫𑀭𑀓𑁆𑀔𑀺𑀢 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄. 𑀇𑀢𑀺𑀯𑀼𑀢𑁆𑀢𑀓𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀉𑀤𑀸𑀦𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀘𑀭𑀺𑀬𑀸𑀧𑀺𑀝𑀓𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀣𑁂𑀭𑀓𑀣𑀸𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀣𑁂𑀭𑀺𑀓𑀣𑀸𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀧𑁂𑀢𑀯𑀢𑁆𑀣𑀼𑀅𑀝𑁆𑀞𑀓𑀣𑀸 𑀕𑀦𑁆𑀣𑁄, 𑀇𑀫𑁂 𑀲𑀢𑁆𑀢 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸 𑀕𑀦𑁆𑀣𑁄 𑀤𑀸𑀞𑀸 𑀦𑀸𑀫𑁂𑀦 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄, 𑀤𑀻𑀖𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀝𑁆𑀞𑀓𑀣𑀸𑀦𑀁 𑀝𑀻𑀓𑀸 𑀕𑀦𑁆𑀣𑁄, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀅𑀦𑀼𑀝𑀻𑀓𑀸 𑀕𑀦𑁆𑀣𑁄, 𑀦𑁂𑀢𑁆𑀢𑀺𑀧𑀓𑀭𑀡𑀝𑁆𑀞𑀓𑀣𑀸𑀬 𑀝𑀻𑀓𑀸 𑀕𑀦𑁆𑀣𑁄, 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬 𑀝𑀻𑀓𑀸 𑀕𑀦𑁆𑀣𑁄, 𑀚𑀸𑀢𑀓𑀝𑁆𑀞𑀓𑀣𑀸𑀬 𑀝𑀻𑀓𑀸 𑀕𑀦𑁆𑀣𑁄 𑀘𑁂𑀢𑀺 𑀇𑀫𑁂 𑀧𑀜𑁆𑀘 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄.

𑀥𑀫𑁆𑀫𑀧𑀸𑀮𑀸𑀘𑀭𑀺𑀬-𑀕𑀦𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀭𑀼𑀢𑁆𑀢𑀺𑀫𑀜𑁆𑀚𑀽𑀲𑀸 𑀦𑀸𑀫 𑀘𑀼𑀮𑁆𑀮𑀦𑀺𑀭𑀼𑀢𑁆𑀢𑀺𑀝𑀻𑀓𑀸 𑀕𑀦𑁆𑀣𑁄, 𑀫𑀳𑀸𑀦𑀺𑀭𑀼𑀢𑁆𑀢𑀺𑀲𑀗𑁆𑀔𑁂𑀧𑁄 𑀦𑀸𑀫 𑀕𑀦𑁆𑀣𑁄 𑀘 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀺𑀁𑀲𑀼 𑀓𑀢𑁄.

𑀧𑀜𑁆𑀘 𑀯𑀺𑀦𑀬𑀧𑀓𑀭𑀡𑀸𑀦𑀁 𑀯𑀺𑀦𑀬𑀕𑀡𑁆𑀞𑀺 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀫𑀳𑀸𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑁄. 𑀦𑁆𑀬𑀸𑀲𑀲𑀗𑁆𑀔𑀸𑀢𑁄 𑀫𑀼𑀔𑀫𑀢𑁆𑀢𑀤𑀻𑀧𑀦𑀻 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀺𑀫𑀮𑀩𑀼𑀤𑁆𑀥𑀺 𑀆𑀘𑀭𑀺𑀬𑁂𑀦 𑀓𑀢𑁄. 𑀅𑀢𑁆𑀣𑀩𑁆𑀬𑀓𑁆𑀔𑁆𑀬𑀸𑀦𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀼𑀮𑁆𑀮𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑁄. 𑀭𑀽𑀧𑀲𑀺𑀤𑁆𑀥𑀺 𑀢𑀲𑁆𑀲 𑀘 𑀕𑀦𑁆𑀣𑀲𑁆𑀲 𑀝𑀻𑀓𑀸 𑀕𑀦𑁆𑀣𑁄 𑀲𑀩𑁆𑀩 𑀧𑀜𑁆𑀘𑀲𑀼𑀢𑁆𑀢𑀜𑁆𑀘 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀤𑀻𑀧𑀗𑁆𑀓𑀭𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀘𑁆𑀘𑀲𑀗𑁆𑀔𑁂𑀧𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀼𑀮𑁆𑀮𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄. 𑀫𑁄𑀳𑀘𑁆𑀙𑁂𑀤𑀦𑀻 𑀕𑀦𑁆𑀣𑁄, 𑀯𑀺𑀫𑀢𑀺𑀘𑁆𑀙𑁂𑀤𑀦𑀻 𑀕𑀦𑁆𑀣𑁄, 𑀤𑀲 𑀩𑀼𑀤𑁆𑀥𑀯𑀁𑀲𑁄, 𑀅𑀦𑀸𑀕𑀢𑀯𑀁𑀲𑁄 𑀘. 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀓𑀲𑁆𑀲𑀧𑀸𑀘𑀭𑀺𑀬𑁂𑀦 𑀓𑀢𑁄. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀫𑀳𑀸𑀦𑀸𑀫𑁂𑀦 𑀉𑀧𑀸𑀲𑀓𑁂𑀦 𑀆𑀬𑀸𑀘𑀺𑀢𑁂𑀦 𑀫𑀳𑀸𑀦𑀸𑀫𑀸𑀘𑀭𑀺𑀬𑁂𑀦 𑀓𑀢𑁄. 𑀤𑀻𑀧𑀯𑀁𑀲𑁄, 𑀣𑀽𑀧𑀯𑀁𑀲𑁄, 𑀩𑁄𑀥𑀺𑀯𑀁𑀲𑁄, 𑀘𑀼𑀮𑁆𑀮𑀯𑀁𑀲𑁄, 𑀧𑁄𑀭𑀸𑀡𑀯𑀁𑀲𑁄, 𑀫𑀳𑀸𑀯𑀁𑀲𑁄 𑀘𑀸𑀢𑀺 𑀇𑀫𑁂 𑀙 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀫𑀳𑀸𑀦𑀸𑀫𑀸𑀘𑀭𑀺𑀬𑁂𑀳𑀺 𑀯𑀺𑀲𑀼𑀁 𑀓𑀢𑀸. 𑀦𑀯𑁄 𑀫𑀳𑀸𑀯𑀁𑀲𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀼𑀮𑁆𑀮𑀫𑀳𑀸𑀦𑀸𑀫𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀤𑁆𑀥𑀫𑁆𑀫𑀧𑀚𑁆𑀚𑁄𑀢𑀺𑀓𑀸 𑀦𑀸𑀫 𑀫𑀳𑀸𑀦𑀺𑀤𑁆𑀤𑁂𑀲𑀲𑁆𑀲 𑀅𑀝𑁆𑀞𑀓𑀣𑀸 𑀕𑀦𑁆𑀣𑁄 𑀤𑁂𑀯𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀉𑀧𑀲𑁂𑀦𑀸𑀘𑀭𑀺𑀬𑁂𑀦 𑀓𑀢𑁄. 𑀫𑁄𑀕𑁆𑀕𑀮𑀸𑀦𑀩𑁆𑀬𑀸𑀓𑀭𑀡𑀕𑀦𑁆𑀣𑁂 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀫𑁄𑀕𑁆𑀕𑀮𑀸𑀦𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀗𑁆𑀖𑀭𑀓𑁆𑀔𑀺𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀯𑀼𑀢𑁆𑀢𑁄𑀤𑀬 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀼𑀢𑁆𑀢𑁄𑀤𑀬𑀓𑀸𑀭𑀸𑀘𑀭𑀺𑀬𑁂𑀦 𑀓𑀢𑁄. 𑀔𑀼𑀤𑁆𑀤𑀲𑀺𑀓𑁆𑀔𑀸 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀥𑀫𑁆𑀫𑀲𑀺𑀭𑀸𑀘𑀭𑀺𑀬𑁂𑀦 𑀓𑀢𑁄. 𑀧𑁄𑀭𑀸𑀡𑀔𑀼𑀤𑁆𑀤𑀲𑀺𑀓𑁆𑀔𑀸 𑀝𑀻𑀓𑀸 𑀘 𑀫𑀽𑀮𑀲𑀺𑀓𑁆𑀔𑀸 𑀘𑀸𑀢𑀺, 𑀇𑀫𑁂 𑀤𑁆𑀯𑁂 𑀕𑀦𑁆𑀣𑁂 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑁂𑀳𑀺 𑀤𑁆𑀯𑀺𑀳𑀸𑀘𑀭𑀺𑀬𑁂𑀳𑀺 𑀯𑀺𑀁𑀲𑀼 𑀓𑀢𑀸.

𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀕𑀦𑁆𑀣𑁄 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑁄. 𑀦𑀸𑀫𑀭𑀽𑀧-𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀁 𑀦𑀸𑀫 𑀕𑀦𑁆𑀣𑁄 𑀦𑀫𑁆𑀫 𑀦𑀸𑀫𑁂𑀦 𑀉𑀧𑀸𑀲𑀓𑁂𑀦 𑀆𑀬𑀸𑀘𑀺𑀢𑁂𑀦 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑁄. 𑀔𑁂𑀫𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀔𑁂𑀫𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀸𑀭𑀢𑁆𑀣𑀤𑀻𑀧𑀦𑀻 𑀦𑀸𑀫 𑀯𑀺𑀦𑀬𑀝𑁆𑀞𑀓𑀣𑀸𑀬 𑀝𑀻𑀓𑀸 𑀕𑀦𑁆𑀣𑁄, 𑀯𑀺𑀦𑀬𑀲𑀗𑁆𑀕𑀳𑀁, 𑀯𑀺𑀦𑀬𑀲𑀗𑁆𑀕𑀳𑀲𑁆𑀲 𑀝𑀻𑀓𑀸 𑀕𑀦𑁆𑀣𑁄, 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬 𑀦𑀯𑁄 𑀝𑀻𑀓𑀸 𑀕𑀦𑁆𑀣𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀧𑀭𑀓𑁆𑀓𑀫𑀩𑀸𑀳𑀼 𑀦𑀸𑀫𑁂𑀦 𑀮𑀗𑁆𑀓𑀸𑀤𑀻𑀧𑀺𑀲𑁆𑀲𑀭𑁂𑀦 𑀭𑀜𑁆𑀜𑀸 𑀆𑀬𑀸𑀘𑀺𑀢𑁂𑀦 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀓𑀝𑀲𑀤𑁆𑀤𑀲𑀢𑁆𑀣𑀲𑁆𑀲 𑀧𑀜𑁆𑀘𑀺𑀓𑀸𑀬 𑀝𑀻𑀓𑀸 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸 𑀦𑀸𑀫 𑀝𑀻𑀓𑀸 𑀕𑀦𑁆𑀣𑁄 𑀲𑀼𑀫𑁂𑀥𑀸 𑀦𑀸𑀫𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀩𑀼𑀤𑁆𑀥𑀦𑀸𑀕𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑁄 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀽𑀮𑀫𑁄𑀕𑁆𑀕𑀮𑀸𑀦𑀸𑀘𑀭𑀺𑀬𑁂𑀦 𑀓𑀢𑁄. 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑁆𑀲 𑀫𑀳𑀸𑀲𑀸𑀫𑀺 𑀦𑀸𑀫 𑀝𑀻𑀓𑀸, 𑀯𑀼𑀢𑁆𑀢𑁄𑀤𑀬 𑀯𑀺𑀯𑀭𑀡𑀜𑁆𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀸𑀘𑀺𑀲𑁆𑀲𑀭𑁂𑀦 𑀓𑀢𑀸. 𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀲𑀼𑀫𑀗𑁆𑀕𑀮𑀧𑁆𑀧𑀲𑀸𑀤𑀦𑀺 𑀦𑀸𑀫 𑀦𑀯𑁄 𑀝𑀻𑀓𑀸 𑀕𑀦𑁆𑀣𑁄 𑀲𑀼𑀫𑀗𑁆𑀕𑀮𑁂𑀦 𑀆𑀬𑀸𑀘𑀺𑀢𑁂𑀦 𑀦𑀯𑀸𑀘𑀺𑀲𑁆𑀲𑀭𑁂𑀦 𑀓𑀢𑁄. 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀸𑀝𑀻𑀓𑀸 𑀩𑀸𑀮𑀸𑀯𑀢𑀸𑀭𑁄, 𑀫𑁄𑀕𑁆𑀕𑀮𑀸𑀦𑀩𑁆𑀬𑀸𑀓𑀭𑀡𑀲𑁆𑀲 𑀝𑀻𑀓𑀸 𑀘𑀸𑀢𑀺 𑀇𑀫𑁂 𑀢𑀬𑁄 𑀕𑀦𑁆𑀣𑀸, 𑀲𑀼𑀫𑀗𑁆𑀕𑀮, 𑀩𑀼𑀤𑁆𑀥𑀫𑀺𑀢𑁆𑀢, 𑀫𑀳𑀸𑀓𑀲𑁆𑀲𑀧 𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀣𑁂𑀭𑁂𑀳𑀺 𑀘, 𑀥𑀫𑁆𑀫𑀓𑀺𑀢𑁆𑀢𑀺 𑀦𑀸𑀫 𑀉𑀧𑀸𑀲𑀓𑁂𑀦, 𑀯𑀸𑀦𑀺𑀚𑁆𑀚𑀸 𑀪𑀸𑀢𑀼 𑀉𑀧𑀸𑀲𑀓𑁂𑀦 𑀘 𑀆𑀬𑀸𑀘𑀺𑀢𑁂𑀦 𑀯𑀸𑀘𑀺𑀲𑁆𑀲𑀭𑁂𑀦 𑀓𑀢𑁄. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀪𑀸𑀕𑁄, 𑀲𑀤𑁆𑀤𑀢𑁆𑀣𑀲𑁆𑀲 𑀧𑀤𑀭𑀽𑀧-𑀯𑀺𑀪𑀸𑀯𑀦𑀁, 𑀔𑁂𑀫𑀧𑀓𑀭𑀡𑀲𑁆𑀲 𑀝𑀻𑀓𑀸, 𑀲𑀻𑀫𑀸𑀮𑀗𑁆𑀓𑀸𑀭𑁄, 𑀫𑀽𑀮𑀲𑀺𑀓𑁆𑀔𑀸𑀬 𑀝𑀻𑀓𑀸, 𑀭𑀽𑀧𑀯𑀺𑀪𑀸𑀕𑁄, 𑀧𑀘𑁆𑀘𑀬𑀲𑀗𑁆𑀕𑀳𑁄 𑀘𑀸𑀢𑀺 𑀇𑀫𑁂 𑀲𑀢𑁆𑀢 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀸𑀘𑀺𑀲𑁆𑀲𑀭𑁂𑀦 𑀓𑀢𑀸. 𑀲𑀘𑁆𑀘𑀲𑀗𑁆𑀔𑁂𑀧𑀲𑁆𑀲 𑀝𑀻𑀓𑀸 𑀕𑀦𑁆𑀣𑁄 𑀲𑀸𑀭𑀺𑀧𑀼𑀢𑁆𑀢-𑀦𑀸𑀫𑁂𑀦 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀯𑀸𑀘𑀺𑀲𑁆𑀲𑀭𑁂𑀦 𑀓𑀢𑁄. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑁆𑀲 𑀝𑀻𑀓𑀸, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲 𑀝𑀻𑀓𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀼𑀫𑀗𑁆𑀕𑀮𑀸𑀘𑀭𑀺𑀬𑁂𑀦 𑀓𑀢𑀸. 𑀲𑀸𑀭𑀢𑁆𑀣𑀲𑀗𑁆𑀕𑀳𑀁 𑀦𑀸𑀫 𑀕𑀦𑁆𑀣𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀩𑀼𑀤𑁆𑀥𑀧𑁆𑀧𑀺𑀬𑁂𑀦 𑀓𑀢𑁄 𑀤𑀦𑁆𑀢𑀥𑀸𑀢𑀼𑀯𑀡𑁆𑀡𑀦𑀸 𑀦𑀸𑀫 𑀧𑀓𑀭𑀡𑀁

𑀮𑀗𑁆𑀓𑀸𑀤𑀻𑀧𑀺𑀲𑁆𑀲𑀭𑀲𑁆𑀲 𑀭𑀜𑁆𑀜𑁄 𑀲𑁂𑀦𑀸𑀧𑀢𑀺𑀦𑀸 𑀆𑀬𑀸𑀘𑀺𑀢𑁂𑀦 𑀥𑀫𑁆𑀫𑀓𑀺𑀢𑁆𑀢𑀺𑀦𑀸𑀫𑀸𑀘𑀭𑀺𑀬𑁂𑀦 𑀓𑀢𑀁. 𑀚𑀺𑀦𑀘𑀭𑀺𑀢𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀫𑁂𑀥𑀗𑁆𑀓𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀚𑀺𑀦𑀸𑀮𑀗𑁆𑀓𑀸𑀭𑁄, 𑀚𑀺𑀦𑀸𑀮𑀗𑁆𑀓𑀸𑀭𑀲𑁆𑀲 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀘𑀭𑀺𑀬𑁂𑀦 𑀓𑀢𑁄. 𑀅𑀫𑀢𑀥𑀭𑀲𑁆𑀲 𑀦𑀸𑀫 𑀅𑀦𑀸𑀕𑀢𑀯𑀁𑀲𑀲𑁆𑀲 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀝𑁆𑀞𑀓𑀣𑀸 𑀉𑀧𑀢𑀺𑀲𑁆𑀲𑀸𑀘𑀭𑀺𑀬𑁂𑀦 𑀓𑀢𑀸. 𑀓𑀗𑁆𑀔𑀸𑀯𑀺𑀢𑀭𑀡𑀻𑀬𑀸 𑀮𑀻𑀦𑀢𑁆𑀣𑀧𑀓𑀸𑀲𑀺𑀦𑀻, 𑀦𑀺𑀲𑀦𑁆𑀤𑁂𑀳𑁄, 𑀥𑀫𑁆𑀫𑀸𑀦𑀼𑀲𑀸𑀭𑀡𑀻, 𑀜𑁂𑀬𑁆𑀬𑀸-𑀲𑀦𑁆𑀢𑀢𑀺, 𑀜𑁂𑀬𑁆𑀬𑀸-𑀲𑀦𑁆𑀢𑀢𑀺𑀬𑀸 𑀝𑀻𑀓𑀸, 𑀲𑀼𑀫𑀢𑀸𑀯𑀢𑀸𑀭𑁄, 𑀮𑁄𑀓𑀧𑀜𑁆𑀜𑀢𑁆𑀢𑀺 𑀧𑀓𑀭𑀡𑀁, 𑀢𑀣𑀸𑀕𑀢𑀼𑀧𑁆𑀧𑀢𑁆𑀢𑀺 𑀧𑀓𑀭𑀡𑀁, 𑀦𑀮𑀸𑀝𑀥𑀸𑀢𑀼𑀯𑀡𑁆𑀡𑀦𑀸, 𑀲𑀻𑀳𑀴𑀯𑀢𑁆𑀣𑀼, 𑀥𑀫𑁆𑀫𑀤𑀻𑀧𑀓𑁄 𑀧𑀝𑀺𑀧𑀢𑁆𑀢𑀺 𑀲𑀗𑁆𑀕𑀳𑁄, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀕𑀡𑁆𑀞𑀺, 𑀅𑀪𑀺𑀥𑀫𑁆𑀫𑀕𑀡𑁆𑀞𑀺, 𑀦𑁂𑀢𑁆𑀢𑀺𑀧𑀓𑀭𑀡𑀕𑀡𑁆𑀞𑀺, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀘𑀽𑀮-𑀦𑀯𑀝𑀻𑀓𑀸, 𑀲𑁄𑀢𑀩𑁆𑀩𑀫𑀸𑀮𑀺𑀦𑀻, 𑀧𑀲𑀸𑀤𑀚𑀦𑀦𑀻, 𑀑𑀓𑀲𑁆𑀲𑀮𑁄𑀓𑁄, 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑁆𑀲 𑀦𑀯 𑀝𑀻𑀓𑀸 𑀘𑁂𑀢𑀺, 𑀇𑀫𑁂 𑀯𑀻𑀲𑀢𑀺 𑀕𑀦𑁆𑀣𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀻𑀲𑀢𑀸𑀘𑀭𑀺𑀬𑁂𑀳𑀺 𑀯𑀺𑀁𑀲𑀼 𑀯𑀺𑀁𑀲𑀼 𑀓𑀢𑀸.

𑀲𑀤𑁆𑀤𑀢𑁆𑀣 𑀪𑁂𑀤𑀘𑀺𑀦𑁆𑀢𑀸 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀤𑁆𑀥𑀫𑁆𑀫𑀲𑀺𑀭𑀺𑀦𑀸𑀫𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀼𑀫𑀦-𑀓𑀽𑀝𑀯𑀡𑁆𑀡𑀦𑀁 𑀦𑀸𑀫 𑀧𑀓𑀭𑀡𑀁, 𑀭𑀸𑀳𑀼𑀮𑀸 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀯𑀸𑀘𑀺𑀲𑁆𑀲𑀭𑁂𑀦𑀤𑁂𑀯𑀣𑁂𑀭𑁂𑀦 𑀓𑀢𑀁. 𑀲𑁄𑀢𑀢𑁆𑀣 𑀓𑀺𑀁 𑀫𑀳𑀸𑀦𑀺𑀤𑀸𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀼𑀮𑁆𑀮𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀓𑀢𑀁. 𑀫𑀥𑀼𑀭𑀲𑀗𑁆𑀕𑀸𑀳𑀦𑀺 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀭𑀝𑁆𑀞𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑀁. 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀼𑀪𑀽𑀢𑀘𑀦𑁆𑀤𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀤𑁆𑀤𑀦𑀻𑀢𑀺𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀕𑁆𑀕𑀯𑀁𑀲𑀸𑀘𑀭𑀺𑀬𑁂𑀦 𑀓𑀢𑀁. 𑀦𑁆𑀬𑀸𑀲𑀧𑀓𑀭𑀡𑀲𑁆𑀲 𑀫𑀳𑀸𑀝𑀻𑀓𑀸 𑀦𑀸𑀫 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑀸. 𑀫𑀼𑀔𑀫𑀢𑁆𑀢𑀲𑀸𑀭𑁄 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀕𑀼𑀡𑀲𑀸𑀕𑀭𑀸𑀘𑀭𑀺𑀬𑁂𑀦 𑀓𑀢𑁄. 𑀫𑀼𑀔𑀫𑀢𑁆𑀢𑀲𑀸𑀭𑀲𑁆𑀲 𑀝𑀻𑀓𑀸 𑀲𑀼𑀢𑀲𑀫𑁆𑀧𑀦𑁆𑀦 𑀦𑀸𑀫𑁂𑀦 𑀥𑀫𑁆𑀫𑀭𑀸𑀚𑀺𑀦𑁄 𑀕𑀼𑀭𑀼𑀦𑀸 𑀲𑀗𑁆𑀖𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀕𑀼𑀡𑀲𑀸𑀕𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀬 𑀫𑀳𑀸𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀪𑀬𑀸𑀘𑀭𑀺𑀬𑁂𑀦 𑀓𑀢𑀸. 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀧𑁆𑀧𑀓𑀸𑀲𑀓𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀜𑀸𑀡𑀲𑀸𑀕𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀕𑀼𑀴𑁆𑀳𑀢𑁆𑀣𑀲𑁆𑀲 𑀝𑀻𑀓𑀸 𑀩𑀸𑀮𑀧𑁆𑀧𑀩𑁄𑀥𑀦𑀜𑁆𑀘 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀬 𑀫𑀚𑁆𑀛𑀺𑀫𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀩𑀸𑀮𑀸𑀯𑀢𑀸𑀭𑀲𑁆𑀲 𑀝𑀻𑀓𑀸, 𑀮𑀺𑀗𑁆𑀕𑀢𑁆𑀣𑀯𑀺𑀯𑀭𑀡𑀸 𑀝𑀻𑀓𑀸 𑀘 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀉𑀢𑁆𑀢𑀫𑀸𑀘𑀭𑀺𑀬𑁂𑀦 𑀓𑀢𑀸. 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀬 𑀦𑀯 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬 𑀝𑀻𑀓𑀸 𑀤𑀡𑁆𑀟𑀻𑀧𑀓𑀭𑀡𑀲𑁆𑀲 𑀫𑀕𑀖-𑀪𑀽𑀢𑀸 𑀝𑀻𑀓𑀸 𑀘𑀸𑀢𑀺 𑀤𑀼𑀯𑀺𑀥𑀸 𑀝𑀻𑀓𑀸𑀬𑁄 𑀅𑀢𑁆𑀢𑀦𑁄 𑀫𑀢𑀺, 𑀲𑀻𑀳𑀲𑀽𑀭 𑀦𑀸𑀫 𑀭𑀜𑁆𑀜𑁄 𑀏𑀓𑁂𑀦 𑀅𑀫𑀘𑁆𑀘𑁂𑀦 𑀓𑀢𑀸. 𑀓𑁄𑀮𑀤𑁆𑀥𑀚𑀦𑀲𑁆𑀲𑀝𑀻𑀓𑀸 𑀧𑀸𑀲𑀸𑀤𑀺𑀓𑁂𑀦 𑀦𑀸𑀫 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀢𑁂𑀦𑁂𑀯 𑀫𑀳𑀸𑀫𑀘𑁆𑀘𑁂𑀦 𑀓𑀢𑀸. 𑀓𑀸𑀭𑀺𑀓𑀁 𑀦𑀸𑀫 𑀧𑀓𑀭𑀡𑀁 𑀜𑀸𑀡𑀕𑀫𑁆𑀪𑀻𑀭𑀦𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀆𑀬𑀸𑀘𑀺𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀸𑀘𑀭𑀺𑀬𑁂𑀦 𑀓𑀢𑀁. 𑀏𑀢𑀺𑀫𑀸𑀲𑀫𑀺𑀤𑀻𑀧𑀦𑀻 [𑀯𑀸 𑀏𑀢𑀺𑀫𑀸𑀲𑀫𑀺𑀤𑀻𑀧𑀺𑀓𑀸] 𑀦𑀸𑀫 𑀧𑀓𑀭𑀡𑀁 𑀫𑀦𑁄𑀳𑀸𑀭𑀜𑁆𑀘 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀢𑁂𑀦𑁂𑀯 𑀥𑀫𑁆𑀫𑀲𑁂𑀦𑀸𑀧𑀢𑀸𑀘𑀭𑀺𑀬𑁂𑀦 𑀓𑀢𑀁. 𑀓𑀸𑀭𑀺𑀓𑀸𑀬 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀏𑀢𑀺𑀫𑀸𑀲𑀫𑀺𑀤𑀻𑀧𑀺𑀓𑀸𑀬 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀸.

𑀲𑀤𑁆𑀤𑀩𑀺𑀦𑁆𑀤𑀼𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀥𑀫𑁆𑀫𑀭𑀸𑀚𑀲𑁆𑀲 𑀕𑀼𑀭𑀼𑀦𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀤𑁆𑀤𑀯𑀼𑀢𑁆𑀢𑀺𑀧𑁆𑀧𑀓𑀸𑀲𑀓𑀁 𑀦𑀸𑀫 𑀧𑀓𑀭𑀡𑀁 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀆𑀬𑀸𑀘𑀺𑀢𑁂𑀦 𑀲𑀤𑁆𑀥𑀫𑁆𑀫𑀕𑀼𑀭𑀼 𑀦𑀸𑀫𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀤𑁆𑀤𑀯𑀼𑀢𑁆𑀢𑀺𑀧𑁆𑀧𑀓𑀸𑀲𑀓𑀲𑁆𑀲 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀸𑀭𑀺𑀧𑀼𑀢𑁆𑀢𑀸𑀘𑀭𑀺𑀬𑁂𑀦 𑀓𑀢𑀸.

𑀓𑀘𑁆𑀘𑀸𑀬𑀦 𑀲𑀸𑀭𑁄 𑀘 𑀓𑀘𑁆𑀘𑀸𑀬𑀦𑀲𑀸𑀭𑀲𑁆𑀲 𑀝𑀻𑀓𑀸 𑀘𑀸𑀢𑀺 𑀤𑀼𑀯𑀺𑀥𑀁 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀮𑁄𑀓𑀤𑀻𑀧𑀓𑀲𑀸𑀭𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀦𑀯𑁂𑀦𑀫𑁂𑀥𑀗𑁆𑀓𑀭𑀸𑀘𑀭𑀺𑀬𑁂𑀦 𑀓𑀢𑀁. 𑀮𑁄𑀓𑀼𑀧𑁆𑀧𑀢𑁆𑀢𑀺𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀕𑁆𑀕𑀧𑀡𑁆𑀟𑀺𑀢𑀸𑀘𑀭𑀺𑀬𑁂𑀦 𑀓𑀢𑀁. 𑀚𑀗𑁆𑀖𑀤𑀸𑀲𑀓𑀲𑁆𑀲 𑀝𑀻𑀓𑀸 𑀪𑀽𑀢𑀸 𑀫𑀕𑀥𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀻𑀯𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀫𑀸𑀢𑀺𑀓𑀢𑁆𑀣𑀤𑀻𑀧𑀦𑀻, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸, 𑀲𑀻𑀫𑀸𑀮𑀗𑁆𑀓𑀸𑀭𑀲𑁆𑀲𑀝𑀻𑀓𑀸, 𑀕𑀡𑁆𑀞𑀺𑀲𑀸𑀭𑁄, 𑀧𑀝𑁆𑀞𑀸𑀦𑀕𑀡𑀦𑀸𑀦𑀬𑁄 𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀧𑀓𑀭𑀡𑀸𑀦𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀤𑁆𑀥𑀫𑁆𑀫𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑀸𑀦𑀺. 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑀧𑀭𑀓𑁆𑀓𑀫𑀩𑀸𑀳𑀼-𑀦𑀸𑀫𑁂𑀦 𑀚𑀫𑁆𑀩𑀼𑀤𑀻𑀧𑀺𑀲𑁆𑀲𑀭𑁂𑀦 𑀭𑀜𑁆𑀜𑁄 𑀆𑀬𑀸𑀘𑀺𑀢𑁂 𑀢𑁂𑀦𑁂𑀯 𑀲𑀤𑁆𑀥𑀫𑁆𑀫𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑀸. 𑀓𑀘𑁆𑀘𑀸𑀬𑀦𑀲𑁆𑀲 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀅𑀢𑁆𑀢𑀦𑁄 𑀲𑀺𑀲𑁆𑀲𑁂𑀦 𑀥𑀫𑁆𑀫𑀘𑀸𑀭𑀺𑀦𑀸 𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀲𑀤𑁆𑀥𑀫𑁆𑀫𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑁄. 𑀯𑀺𑀦𑀬𑀲𑀫𑀼𑀝𑁆𑀞𑀸𑀦𑀤𑀻𑀧𑀦𑀻 𑀦𑀸𑀫 𑀧𑀓𑀭𑀡𑀁, 𑀅𑀢𑁆𑀢𑀦𑁄 𑀕𑀼𑀭𑀼𑀦𑀸 𑀲𑀗𑁆𑀖𑀣𑁂𑀭𑁂𑀦 𑀆𑀬𑀸𑀘𑀺𑀢𑁂𑀦 𑀲𑀤𑁆𑀥𑀫𑁆𑀫-𑀚𑁄𑀢𑀺𑀧𑀸𑀮𑀸𑀘𑀭𑀺𑀬𑁂𑀦 𑀓𑀢𑀁.

𑀲𑀢𑁆𑀢𑀧𑀓𑀭𑀡𑀸𑀦𑀺 𑀧𑀦 𑀢𑁂𑀦 𑀧𑀼𑀓𑁆𑀓𑀸𑀫𑀦𑀕𑀭𑁂 𑀓𑀢𑀸𑀦𑀺. 𑀲𑀗𑁆𑀔𑁂𑀧𑀯𑀡𑁆𑀡𑀦𑀸𑀯 𑀮𑀗𑁆𑀓𑀸𑀤𑀻𑀧𑁂 𑀓𑀢𑀸. 𑀅𑀪𑀺𑀥𑀫𑁆𑀫-𑀧𑀦𑁆𑀦𑀭𑀲𑀝𑁆𑀞𑀸𑀦𑀯𑀡𑁆𑀡𑀸𑀦𑀁 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀦𑀯𑁂𑀦-𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑀸. 𑀲𑀤𑁆𑀤𑀲𑀸𑀭𑀢𑁆𑀣𑀚𑀸𑀮𑀺𑀦𑀻 𑀦𑀸𑀫 𑀧𑀓𑀭𑀡𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀦𑀯𑁂𑀦-𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑀁. 𑀲𑀤𑁆𑀤𑀲𑀸𑀭𑀢𑁆𑀣-𑀚𑀸𑀮𑀺𑀦𑀺𑀬𑀸 𑀝𑀻𑀓𑀸, 𑀧𑀁𑀬𑀦𑀕𑀭𑁂 𑀭𑀜𑁆𑀜𑁄 𑀕𑀼𑀭𑀼𑀦𑀸 𑀲𑀗𑁆𑀖𑀭𑀸𑀚𑁂𑀦 𑀆𑀬𑀸𑀘𑀺𑀢𑁂𑀦 𑀢𑁂𑀦𑁂𑀯 𑀦𑀯𑁂𑀦 𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑀸. 𑀯𑀼𑀢𑁆𑀢𑁄𑀤𑀬𑀲𑁆𑀲 𑀝𑀻𑀓𑀸, 𑀅𑀪𑀺𑀥𑀫𑁆𑀫𑀲𑀗𑁆𑀕𑀳𑀲𑁆𑀲 𑀝𑀻𑀓𑀸𑀬 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸 𑀦𑀸𑀫 𑀅𑀦𑀼𑀝𑀻𑀓𑀸, 𑀤𑀲𑀕𑀡𑁆𑀞𑀺𑀯𑀡𑁆𑀡𑀦𑀁 𑀦𑀸𑀫 𑀧𑀓𑀭𑀡𑀁, 𑀫𑀕𑀥𑀪𑀽𑀢𑀯𑀺𑀤𑀕𑁆𑀕𑀫𑀼𑀔𑀫𑀡𑁆𑀟𑀦𑀺𑀬𑀸𑀝𑀻𑀓𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀓𑀭𑀡𑀸𑀦𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀢𑁂𑀦𑁂𑀯 𑀦𑀯𑁂𑀦 𑀯𑀺𑀫𑀮𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀓𑀢𑀸𑀦𑀺.

𑀧𑀜𑁆𑀘𑀧𑀓𑀭𑀡𑀝𑀻𑀓𑀸𑀬 𑀦𑀯𑀸𑀦𑀼𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑁄 𑀘𑀭𑀺𑀬𑁂𑀦 𑀓𑀢𑀸. 𑀅𑀪𑀺𑀥𑀫𑁆𑀫𑀲𑀗𑁆𑀕𑀳𑀲𑁆𑀲 𑀦𑀯𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀜𑁆𑀜𑀢𑀭𑀸𑀘𑀭𑀺𑀬𑁂𑀦 𑀓𑀢𑀸. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀝𑀻𑀓𑀸𑀬 [𑀫𑀡𑀺] 𑀫𑀜𑁆𑀚𑀽𑀲𑀸 [𑀫𑀡𑀺𑀲𑀸𑀭𑀫𑀜𑁆𑀚𑀽𑀲𑀸] 𑀦𑀸𑀫 𑀦𑀯𑀸𑀦𑀼𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀅𑀭𑀺𑀬𑀯𑀁𑀲𑀸𑀘𑀭𑀺𑀬𑁂𑀦 𑀓𑀢𑀸.

𑀧𑁂𑀝𑀓𑁄𑀧𑀤𑁂𑀲𑀲𑁆𑀲 𑀝𑀻𑀓𑀸 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀉𑀤𑀼𑀫𑁆𑀩𑀭𑀺𑀦𑀸𑀫𑀸𑀘𑀭𑀺𑀬𑁂𑀦 𑀧𑀼𑀓𑁆𑀓𑀸𑀫𑀦𑀕𑀭𑁂 𑀓𑀢𑀸. 𑀘𑀢𑀼𑀪𑀸𑀡𑀯𑀸𑀭𑀲𑁆𑀲 𑀅𑀝𑁆𑀞𑀓𑀣𑀸, 𑀫𑀳𑀸𑀲𑀸𑀭𑀧𑀓𑀸𑀲𑀺𑀦𑀺, 𑀫𑀳𑀸𑀤𑀻𑀧𑀦𑀻, 𑀲𑀸𑀭𑀢𑁆𑀣𑀤𑀻𑀧𑀦𑀻, 𑀕𑀢𑀺𑀧𑀓𑀭𑀡𑀁, 𑀳𑀢𑁆𑀣𑀸𑀲𑀸𑀭𑁄, 𑀪𑀼𑀫𑁆𑀫𑀲𑀗𑁆𑀕𑀳𑁄, 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄, 𑀤𑀲𑀯𑀢𑁆𑀣𑀼𑀓𑀸𑀬𑀯𑀺𑀭𑀢𑀺𑀝𑀻𑀓𑀸, 𑀘𑁄𑀤𑀦𑀸𑀦𑀺𑀭𑀼𑀢𑁆𑀢𑀺, 𑀯𑀺𑀪𑀢𑁆𑀢𑀺𑀓𑀣𑀸, 𑀲𑀤𑁆𑀥𑀫𑁆𑀫𑀫𑀸𑀮𑀺𑀦𑀺, 𑀧𑀜𑁆𑀘𑀕𑀢𑀺𑀯𑀡𑁆𑀡𑀦𑀸, 𑀩𑀸𑀮𑀘𑀺𑀢𑁆𑀢-𑀧𑀩𑁄𑀥𑀦𑀁, 𑀥𑀫𑁆𑀫𑀘𑀓𑁆𑀓𑀲𑀼𑀢𑁆𑀢𑀲𑁆𑀲 𑀦𑀯𑀝𑁆𑀞𑀓𑀣𑀸, 𑀤𑀦𑁆𑀢𑀥𑀸𑀢𑀼-𑀧𑀓𑀭𑀡𑀲𑁆𑀲 𑀝𑀻𑀓𑀸 𑀘 𑀲𑀤𑁆𑀥𑀫𑁆𑀫𑁄𑀧𑀸𑀬𑀦𑁄 𑀩𑀸𑀮𑀧𑁆𑀧𑀩𑁄𑀥𑀦𑀝𑀻𑀓𑀸 𑀘, 𑀚𑀺𑀦𑀸𑀮𑀗𑁆𑀓𑀸𑀭𑀲𑁆𑀲 𑀦𑀯𑀝𑀻𑀓𑀸 𑀘, 𑀮𑀺𑀗𑁆𑀕𑀢𑁆𑀣-𑀯𑀺𑀯𑀭𑀡𑀁, 𑀮𑀺𑀗𑁆𑀕𑀢𑁆𑀣-𑀯𑀺𑀦𑀺𑀘𑁆𑀙𑀬𑁄, 𑀧𑀸𑀢𑀺𑀫𑁄𑀓𑁆𑀔𑀯𑀺𑀯𑀭𑀡𑀁, 𑀧𑀭𑀫𑀢𑁆𑀣𑀓𑀣𑀸𑀯𑀺𑀯𑀭𑀡𑀁, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀯𑀺𑀯𑀭𑀡𑀁, 𑀘𑀢𑀼𑀪𑀸𑀡𑀯𑀸𑀭𑀝𑁆𑀞𑀓𑀣𑀸 𑀯𑀺𑀯𑀭𑀡𑀁, 𑀅𑀪𑀺𑀥𑀫𑁆𑀫𑀲𑀗𑁆𑀕𑀳𑀯𑀺𑀯𑀭𑀡𑀁, 𑀲𑀘𑁆𑀘𑀲𑀗𑁆𑀔𑁂𑀧𑀯𑀺𑀯𑀭𑀡𑀁, 𑀲𑀤𑁆𑀤𑀢𑁆𑀣𑀪𑁂𑀤𑀘𑀺𑀦𑁆𑀢𑀸𑀯𑀺𑀯𑀭𑀡𑀁, 𑀲𑀤𑁆𑀤𑀯𑀼𑀢𑁆𑀢𑀺𑀯𑀺𑀯𑀭𑀡𑀁, 𑀓𑀘𑁆𑀘𑀸𑀬𑀦𑀲𑀸𑀭𑀯𑀺𑀯𑀭𑀡𑀁, 𑀓𑀘𑁆𑀘𑀸𑀬𑀦𑀯𑀺𑀯𑀭𑀡𑀁, 𑀅𑀪𑀺𑀥𑀫𑁆𑀫𑀲𑀗𑁆𑀕𑀳𑀲𑁆𑀲𑀝𑀻𑀓𑀸𑀯𑀺𑀯𑀭𑀡𑀁, 𑀫𑀳𑀸𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀲𑁆𑀲 𑀯𑀺𑀯𑀭𑀡𑀁, 𑀲𑀓𑁆𑀓𑀸𑀪𑀺𑀫𑀢𑀁, 𑀫𑀳𑀸𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀲𑁆𑀲 𑀦𑀯𑀝𑁆𑀞𑀓𑀣𑀸, 𑀧𑀞𑀫-𑀲𑀫𑁆𑀩𑁄𑀥𑀺 𑀘 𑀮𑁄𑀓𑀦𑁂𑀢𑁆𑀢𑀺, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀦𑀺𑀤𑀸𑀦𑀁, 𑀫𑀺𑀮𑀺𑀦𑁆𑀤-𑀧𑀜𑁆𑀳𑁄 𑀯𑀡𑁆𑀡𑀦𑀸, 𑀘𑀢𑀼𑀭𑀸𑀭𑀓𑁆𑀔𑀸, 𑀘𑀢𑀼𑀭𑀸𑀭𑀓𑁆𑀔𑀸𑀬𑀅𑀝𑁆𑀞𑀓𑀣𑀸, 𑀲𑀤𑁆𑀤𑀯𑀼𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀦𑀯𑀝𑀻𑀓𑀸 𑀘𑀸𑀢𑀺 𑀇𑀫𑀸𑀦𑀺, 𑀢𑀺𑀘𑀢𑁆𑀢𑀸𑀮𑀻𑀲 𑀧𑀓𑀭𑀡𑀸𑀦𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀲𑀸𑀲𑀦𑀲𑁆𑀲 𑀚𑀸𑀢𑀺𑀬𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀘 𑀮𑀗𑁆𑀓𑀸𑀤𑀻𑀧𑀸𑀤𑀻𑀲𑀼 𑀯𑀺𑀁𑀲𑀼 𑀯𑀺𑀁𑀲𑀼 𑀓𑀢𑀸𑀦𑀺.

𑀲𑀫𑁆𑀩𑀼𑀤𑁆𑀥𑁂 𑀕𑀸𑀣𑀸 𑀘…𑀧𑁂… 𑀦𑀯𑀳𑀸𑀭𑀕𑀼𑀡𑀯𑀡𑁆𑀡𑀦𑀸 𑀘𑀸𑀢𑀺 𑀇𑀫𑁂 𑀩𑀼𑀤𑁆𑀥𑀧𑀡𑀸𑀫𑀸𑀤𑀺𑀓𑀸 𑀕𑀸𑀣𑀸𑀬𑁄. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀼𑀤𑁆𑀥𑀕𑀼𑀡𑀧𑀓𑀸𑀲𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀘 𑀧𑀭𑁂 𑀘 𑀅𑀦𑀦𑁆𑀢𑀧𑀜𑁆𑀜𑀸𑀧𑀯𑀢𑁆𑀢𑀦𑀢𑁆𑀣𑀸𑀬 𑀘 𑀧𑀡𑁆𑀟𑀺𑀢𑁂𑀳𑀺 𑀮𑀗𑁆𑀓𑀸𑀤𑀻𑀧𑀸𑀤𑀻𑀲𑀼 𑀯𑀺𑀁𑀲𑀼 𑀯𑀺𑀁𑀲𑀼 𑀓𑀢𑀸.

[𑀇𑀢𑀺 𑀘𑀼𑀮𑁆𑀮-𑀕𑀦𑁆𑀣𑀯𑀁𑀲𑁂 𑀆𑀬𑀸𑀘𑀓𑀸𑀘𑀭𑀺𑀬𑀤𑀻𑀧𑀓𑁄 𑀦𑀸𑀫 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.]

𑀦𑀸𑀫𑀁 𑀆𑀭𑁄𑀧𑀦𑀁 𑀧𑁄𑀢𑁆𑀣𑀓𑀁 𑀕𑀦𑁆𑀣𑀓𑀸𑀭𑀲𑁆𑀲 𑀘. 𑀮𑁂𑀔𑀁𑀮𑁂𑀔𑀸𑀧𑀦𑀜𑁆𑀘𑁂𑀯, 𑀯𑀤𑀸𑀫𑀺 𑀢𑀤𑀦𑀦𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀧𑀺𑀝𑀓, 𑀦𑀺𑀓𑀸𑀬𑀗𑁆𑀕, 𑀯𑀕𑁆𑀕, 𑀦𑀺𑀧𑀸𑀢𑀸𑀤𑀺𑀓𑀁 𑀦𑀸𑀫𑀁, 𑀓𑁂𑀦𑀸𑀭𑁄𑀧𑀺𑀢𑀁, 𑀓𑀢𑁆𑀣 𑀆𑀭𑁄𑀧𑀺𑀢𑀁, 𑀓𑀤𑀸 𑀆𑀭𑁄𑀧𑀺𑀢𑀁, 𑀓𑀺𑀫𑀢𑁆𑀣𑀁 𑀆𑀭𑁄𑀧𑀺𑀢𑀦𑁆𑀢𑀺? 𑀢𑀢𑁆𑀭𑀸𑀬𑀁 𑀧𑀺𑀯𑀺𑀲𑀚𑁆𑀚𑀦𑀸𑀓𑁂𑀦 𑀆𑀭𑁄𑀧𑀺𑀢𑀦𑁆𑀢𑀺 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑁂𑀳𑀺 𑀆𑀭𑁄𑀧𑀺𑀢𑀁. 𑀢𑁂𑀳𑀺 𑀲𑀩𑁆𑀩𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀕𑀸𑀬𑀦𑁆𑀢𑀺, 𑀇𑀤𑀁 𑀧𑀺𑀝𑀓𑀁, 𑀅𑀬𑀁 𑀦𑀺𑀓𑀸𑀬𑁄, 𑀇𑀤𑀁 𑀅𑀗𑁆𑀕𑀁, 𑀅𑀬𑀁 𑀯𑀕𑁆𑀕𑁄, 𑀅𑀬𑀁 𑀦𑀺𑀧𑀸𑀢𑁄𑀢𑀺. 𑀏𑀯𑀫𑀸𑀤𑀺𑀓𑀁 𑀦𑀸𑀫𑀁 𑀆𑀭𑁄𑀧𑁂𑀦𑁆𑀢𑀺. 𑀓𑀢𑁆𑀣 𑀆𑀭𑁄𑀧𑀺𑀢𑀦𑁆𑀢𑀺? 𑀭𑀸𑀚𑀕𑀳𑁂 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀧𑀸𑀤𑁂 𑀥𑀫𑁆𑀫𑀫𑀡𑁆𑀟𑀧𑁆𑀧𑁂 𑀆𑀭𑁄𑀧𑀺𑀢𑀁. 𑀓𑀤𑀸 𑀆𑀭𑁄𑀧𑀺𑀢𑀦𑁆𑀢𑀺? 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀞𑀫𑀲𑀗𑁆𑀕𑀸𑀬𑀦𑀓𑀸𑀮𑁂 𑀆𑀭𑁄𑀧𑀺𑀢𑀁. 𑀓𑀺𑀫𑀢𑁆𑀣𑀁 𑀆𑀭𑁄𑀧𑀺𑀢𑀦𑁆𑀢𑀺? 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀯𑁄𑀳𑀸𑀭𑀲𑀼𑀔𑀢𑁆𑀣𑀸𑀬 𑀲𑀼𑀔𑀥𑀸𑀭𑀡𑀢𑁆𑀣𑀸𑀬 𑀘 𑀆𑀭𑁄𑀧𑀺𑀢𑀁. 𑀲𑀗𑁆𑀕𑀻𑀢𑀺𑀓𑀸𑀮𑁂 𑀧𑀜𑁆𑀘𑀲𑀢𑀸 𑀔𑀻𑀡𑀸𑀲𑀯𑀸 𑀢𑁂𑀲𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀦𑀸𑀫 𑀯𑀕𑁆𑀕𑀦𑀺𑀧𑀸𑀢𑀢𑁄. 𑀇𑀫𑀲𑁆𑀲 𑀥𑀫𑁆𑀫𑀓𑁆𑀔𑀦𑁆𑀥𑀲𑁆𑀲 𑀅𑀬𑀁 𑀦𑀸𑀫𑁄 𑀳𑁄𑀢𑀼, 𑀇𑀫𑀲𑁆𑀲 𑀘 𑀧𑀓𑀭𑀡𑀲𑁆𑀲 𑀅𑀬𑀁 𑀦𑀸𑀫𑁄𑀢𑀺, 𑀅𑀩𑁆𑀭𑀯𑀼𑀁 𑀲𑀩𑁆𑀩𑀁 𑀦𑀸𑀫𑀸𑀤𑀺𑀓𑀁 𑀓𑀺𑀘𑁆𑀘𑀁 𑀅𑀓𑀁𑀲𑀼. 𑀢𑁂 𑀔𑀻𑀡𑀸𑀲𑀯𑀸, 𑀬𑀤𑀺 𑀦𑀸𑀫𑀸𑀤𑀺𑀓𑀁 𑀓𑀺𑀘𑁆𑀘𑀁 𑀅𑀓𑀢𑀁 𑀦 𑀲𑀼𑀧𑀸𑀓𑀢𑀁 𑀢𑀲𑁆𑀫𑀸 𑀯𑁄𑀳𑀸𑀭𑀲𑀼𑀔𑀢𑁆𑀣𑀸𑀬𑀦𑀸𑀫𑀸𑀤𑀺𑀓𑀁 𑀓𑀺𑀘𑁆𑀘𑀁 𑀓𑀢𑀁 𑀅𑀦𑀸𑀕𑀢𑁂 𑀧𑀦𑀢𑁆𑀣𑀸𑀬 𑀦𑀸𑀫𑀸𑀤𑀺𑀓𑀁 𑀧𑀯𑀢𑁆𑀢𑀺𑀢𑀁 𑀅𑀲𑀜𑁆𑀚𑀸𑀢𑀦𑀸𑀫𑁄 𑀦 𑀲𑀼𑀝𑁆𑀞𑀼 𑀧𑀸𑀓𑀢𑁄 𑀲𑀩𑁆𑀩𑀲𑁄 𑀪𑀯𑁂𑀢𑀺. 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀦𑀸𑀫 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀓𑁂𑀦 𑀧𑁄𑀢𑁆𑀣𑀓𑁂 𑀆𑀭𑁄𑀧𑀺𑀢𑀸𑀦𑀺, 𑀓𑀤𑀸 𑀆𑀭𑁄𑀧𑀺𑀢𑀸𑀦𑀺, 𑀓𑀺𑀫𑀢𑁆𑀣𑀁 𑀆𑀭𑁄𑀧𑀺𑀢𑀸𑀦𑀻𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀲𑀚𑁆𑀚𑀦𑀸 𑀓𑁂𑀦𑀸𑀭𑁄𑀧𑀺𑀢𑀸𑀦𑀺𑀢𑀺? 𑀔𑀻𑀡𑀸𑀲𑀯𑀫𑀳𑀸𑀦𑀸𑀕𑁂𑀳𑀺 𑀆𑀭𑁄𑀧𑀺𑀢𑀸𑀦𑀺. 𑀓𑀢𑁆𑀣 𑀆𑀭𑁄𑀧𑀺𑀢𑀸𑀦𑀻𑀢𑀺? 𑀮𑀗𑁆𑀓𑀸𑀤𑀻𑀧𑁂 𑀆𑀭𑁄𑀧𑀺𑀢𑀸𑀦𑀺. 𑀓𑀤𑀸 𑀆𑀭𑁄𑀧𑀺𑀢𑀸𑀦𑀻𑀢𑀺? 𑀲𑀤𑁆𑀥𑀸𑀢𑀺𑀲𑁆𑀲𑀲𑁆𑀲𑀭𑀸𑀚𑀺𑀦𑁄 𑀧𑀼𑀢𑁆𑀢𑀲𑁆𑀲 𑀯𑀝𑁆𑀝𑀕𑀸𑀫𑀦𑀺 𑀭𑀸𑀚𑀲𑁆𑀲 𑀓𑀸𑀮𑁂 𑀆𑀭𑁄𑀧𑀺𑀢𑀸𑀦𑀺. 𑀓𑀺𑀫𑀢𑁆𑀣𑀁 𑀆𑀭𑁄𑀧𑀺𑀢𑀸𑀦𑀻𑀢𑀺? 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀅𑀯𑀺𑀥𑀁𑀲𑀦𑀢𑁆𑀣𑀸𑀬 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀘 𑀆𑀭𑁄𑀧𑀺𑀢𑀸𑀦𑀺.

𑀥𑀭𑀫𑀸𑀦𑁄 𑀳𑀺 𑀪𑀕𑀯𑀸, 𑀅𑀫𑁆𑀳𑀸𑀓𑀁 𑀲𑀼𑀕𑀢𑁄𑀥𑀻𑀭𑁄;

𑀦𑀺𑀓𑀸𑀬𑁂 𑀧𑀜𑁆𑀘𑀤𑁂𑀲𑁂𑀢𑀺, 𑀬𑀸𑀯 𑀦𑀺𑀩𑁆𑀩𑀸𑀦𑀕𑀫𑀦𑀸.

𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀼 𑀆𑀤𑀺, 𑀫𑀦𑀲𑀸 𑀯𑀘𑀲𑀸𑀳𑀸𑀭𑁄;

𑀲𑀩𑁆𑀩𑁂 𑀘 𑀯𑀸𑀘𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀫𑀳𑀸𑀧𑀜𑁆𑀜𑀸𑀲𑀢𑀺𑀯𑀭𑀸.

𑀦𑀺𑀩𑁆𑀩𑀽𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀢𑀢𑁄 𑀯𑀲𑁆𑀲𑀲𑀢𑀁 𑀪𑀯𑁂;

𑀅𑀭𑀺𑀬𑀸𑀦𑀭𑀺𑀬𑀸 𑀘𑀸𑀧𑀺 𑀘, 𑀲𑀩𑁆𑀩𑁂 𑀯𑀸𑀘𑀼𑀕𑁆𑀕𑀢𑀸 𑀥𑀼𑀯𑀁.

𑀢𑀢𑁄 𑀧𑀭𑀁 𑀅𑀝𑁆𑀞𑀭𑀲𑀁, 𑀤𑁆𑀯𑀺𑀲𑀢𑀁𑀯𑀲𑁆𑀲 𑀕𑀡𑀦𑀁;

𑀲𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀸 𑀘𑁂𑀯, 𑀅𑀭𑀺𑀬𑀸 𑀘 𑀲𑀩𑁆𑀩𑁂𑀧𑀺𑀢𑁂.

𑀫𑀦𑀲𑀸𑀯𑀘𑀲𑀸𑀬𑁂𑀯, 𑀯𑀸𑀘𑀼𑀕𑁆𑀕𑀢𑀸𑀯 𑀲𑀩𑁆𑀩𑀤𑀸;

𑀤𑀼𑀝𑁆𑀞𑀕𑀸𑀫𑀡𑀺𑀭𑀜𑁆𑀜𑁄 𑀘, 𑀓𑀸𑀮𑁂 𑀯𑀸𑀘𑀼𑀕𑁆𑀕𑀢𑀸 𑀥𑀼𑀯𑀁.

𑀅𑀭𑀺𑀬𑀸𑀦𑀭𑀺𑀬𑀸𑀧𑀺 𑀘, 𑀦𑀺𑀓𑀸𑀬𑁂 𑀥𑀸𑀭𑀡𑀸𑀲𑀤𑀸;

𑀢𑀢𑁄 𑀧𑀭𑀫𑁆𑀳𑀺 𑀭𑀸𑀚𑀸 𑀘, 𑀢𑀢𑁄 𑀘𑀼𑀢𑁄 𑀘 𑀢𑀼𑀲𑀺𑀢𑁂.

𑀉𑀧𑁆𑀧𑀚𑁆𑀚𑀺 𑀤𑁂𑀯 𑀮𑁄𑀓𑁂 𑀲𑁄, 𑀤𑁂𑀯𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀲𑀤𑁆𑀥𑀸 𑀢𑀺𑀲𑁆𑀲𑁄𑀢𑀺 𑀦𑀸𑀫𑁂𑀦, 𑀢𑀲𑁆𑀲 𑀓𑀦𑀺𑀝𑁆𑀞𑀓𑁄 𑀳𑀺𑀢𑁄.

𑀢𑀢𑁄 𑀮𑀤𑁆𑀥𑀭𑀝𑁆𑀞𑁄 𑀳𑁄𑀢𑀺, 𑀩𑀼𑀤𑁆𑀥𑀲𑀸𑀲𑀦𑀧𑀸𑀮𑀓𑁄.

𑀢𑀤𑀸 𑀓𑀸𑀮𑁂 𑀪𑀺𑀓𑁆𑀔𑀽 𑀆𑀲𑀼𑀁, 𑀲𑀩𑁆𑀩𑁂 𑀯𑀸𑀘𑀼𑀕𑁆𑀕𑀢𑀸 𑀲𑀤𑀸;

𑀦𑀺𑀓𑀸𑀬𑁂 𑀧𑀜𑁆𑀘𑀯𑁂𑀥𑁂𑀯, 𑀬𑀸𑀯 𑀭𑀜𑁆𑀜𑁄 𑀘 𑀥𑀸𑀭𑀡𑀸;

𑀢𑀢𑁄 𑀘𑀼𑀢𑁄 𑀲𑁄 𑀭𑀸𑀚𑀸 𑀘, 𑀢𑀼𑀲𑁆𑀲𑀻𑀢𑁂 𑀉𑀧𑀧𑀚𑁆𑀚𑀢𑀺;

𑀤𑁂𑀯𑀮𑁄𑀓𑁂𑀝𑁆𑀞𑀺𑀢𑁄 𑀲𑀦𑁆𑀢𑁄, 𑀢𑀤𑀸 𑀯𑀸𑀘𑀼𑀕𑁆𑀕𑀢𑀸 𑀢𑀢𑁄.

𑀢𑀲𑁆𑀲 𑀧𑀼𑀢𑁆𑀢𑀸𑀧𑀺 𑀅𑀳𑁂𑀲𑀼𑀁, 𑀅𑀦𑁂𑀓𑀸 𑀯𑀭𑀚𑁆𑀚𑀁 𑀕𑀢𑀸;

𑀅𑀦𑀼𑀓𑁆𑀓𑀫𑁂𑀦 𑀘𑀼𑀢𑀢𑁂, 𑀤𑁂𑀯𑀮𑁄𑀓𑀁 𑀕𑀢𑀸 𑀥𑀼𑀯𑀁;

𑀢𑀤𑀸𑀧𑀺𑀢𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽, 𑀯𑀸𑀘𑀼𑀕𑁆𑀕𑀢𑀸𑀯 𑀲𑀩𑁆𑀩𑀤𑀸;

𑀦𑀺𑀓𑀸𑀬𑁂 𑀧𑀜𑁆𑀘𑀯𑀺𑀥𑁂𑀯, 𑀥𑀸𑀭𑀡𑀸𑀯𑀲𑀢𑀺𑀫𑀢𑀸.

𑀢𑀢𑁄 𑀧𑀭𑀁 𑀧𑁄𑀢𑁆𑀣𑀓𑁂𑀲𑀼, 𑀦𑀺𑀓𑀸𑀬𑀸 𑀧𑀜𑁆𑀘 𑀧𑀺𑀝𑁆𑀞𑀺𑀢𑀸;

𑀢𑀤𑀸 𑀅𑀝𑁆𑀞𑀓𑀣𑀸 𑀝𑀻𑀓𑀸, 𑀲𑀩𑁆𑀩𑁂 𑀕𑀦𑁆𑀣𑀸 𑀧𑁄𑀢𑁆𑀣𑀓𑁂 𑀕𑀢𑀸;

𑀲𑀩𑁆𑀩𑁂 𑀧𑁄𑀢𑁆𑀣𑁂𑀲𑀼 𑀬𑁂 𑀕𑀦𑁆𑀣𑀸, 𑀧𑀸𑀴𑀺 𑀅𑀝𑁆𑀞𑀓𑀣𑀸 𑀝𑀻𑀓𑀸;

𑀲𑀁𑀝𑁆𑀞𑀺𑀢𑀸𑀲𑀁 𑀞𑀺𑀢𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀦𑁄 𑀦 𑀲𑀦𑁆𑀢𑀺𑀢𑁂.

𑀢𑀤𑀸 𑀢𑁂 𑀧𑁄𑀢𑁆𑀣𑀓𑁂𑀬𑁂𑀯, 𑀦𑀺𑀓𑀸𑀬𑀸 𑀧𑀺𑀞𑀺𑀢𑀸 𑀔𑀺𑀮𑀸;

𑀢𑀤𑀸 𑀅𑀝𑁆𑀞𑀓𑀣𑀸𑀤𑀻𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀤𑀦𑁆𑀢𑀺 𑀘.

𑀧𑀭𑀺𑀳𑀸𑀭𑁄 𑀧𑀡𑁆𑀟𑀺𑀢𑁂𑀳𑀺 𑀯𑀢𑁆𑀢𑀩𑁆𑀩𑁄𑀯;

𑀮𑀗𑁆𑀓𑀸𑀤𑀻𑀧𑀲𑁆𑀲 𑀭𑀜𑁆𑀜𑁄𑀯, 𑀲𑀤𑁆𑀥𑀸 𑀢𑀺𑀲𑁆𑀲𑀲𑁆𑀲 𑀭𑀸𑀚𑀺𑀦𑁄.

𑀧𑀼𑀢𑁆𑀢𑀓𑁄 𑀮𑀗𑁆𑀓𑀸𑀤𑀻𑀧𑀲𑁆𑀲, 𑀇𑀲𑁆𑀲𑀭𑁄 𑀥𑀫𑁆𑀫𑀺𑀓𑁄 𑀯𑀭𑁄;

𑀢𑀤𑀸 𑀔𑀻𑀡𑀸𑀲𑀯𑀸 𑀲𑀩𑁆𑀩𑁂, 𑀑𑀮𑁄𑀓𑁂𑀦𑁆𑀢𑀺 𑀅𑀦𑀕𑀢𑁂.

𑀔𑀻𑀡𑀸𑀲𑀯𑀸 𑀧𑀲𑁆𑀲𑀦𑁆𑀢𑀺 𑀢𑁂, 𑀤𑀼𑀧𑀜𑁆𑀜𑁂𑀯 𑀧𑀼𑀣𑀼𑀚𑁆𑀚𑀦𑁂;

𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀆𑀲𑀼𑀁, 𑀩𑀳𑀼𑀁𑀢𑀭𑀸 𑀧𑀼𑀣𑀼𑀚𑁆𑀚𑀦𑀸;

𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀢𑁂 𑀧𑀜𑁆𑀘, 𑀦𑀺𑀓𑀸𑀬𑁂 𑀯𑀸𑀘𑀼𑀕𑁆𑀕𑀢𑀁 𑀇𑀢𑀺;

𑀧𑁄𑀢𑁆𑀣𑀓𑁂𑀲𑀼 𑀲𑀩𑁆𑀩𑁂 𑀧𑀜𑁆𑀘, 𑀆𑀭𑁄𑀧𑁂𑀦𑁆𑀢𑀺 𑀔𑀻𑀡𑀸𑀲𑀯𑀸.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺 𑀘𑀺𑀭𑀢𑁆𑀢𑀸𑀬, 𑀚𑀦𑀸𑀦𑀁 𑀧𑀼𑀜𑁆𑀜𑀢𑁆𑀣𑀸𑀬 𑀘;

𑀢𑀢𑁄 𑀧𑀝𑁆𑀞𑀸𑀬𑀢𑁂 𑀲𑀩𑁆𑀩𑁂, 𑀦𑀺𑀓𑀸𑀬𑀸 𑀳𑁄𑀦𑁆𑀢𑀺 𑀧𑁄𑀢𑁆𑀣𑀓𑁂;

𑀅𑀝𑁆𑀞𑀓𑀣𑀸 𑀝𑀻𑀓𑀸 𑀲𑀩𑁆𑀩𑁂, 𑀢𑁂 𑀳𑁄𑀦𑁆𑀢𑀺 𑀧𑁄𑀢𑁆𑀣𑀓𑁂𑀝𑁆𑀞𑀺𑀢𑀸.

𑀢𑀢𑁄 𑀧𑀝𑁆𑀞𑀸𑀬𑀢𑁂 𑀲𑀩𑁆𑀩𑁂, 𑀪𑀺𑀓𑁆𑀔𑀼 𑀆𑀤𑀺 𑀫𑀳𑀸𑀕𑀡𑀸;

𑀧𑁄𑀢𑁆𑀣𑀓𑁂𑀲𑀼 𑀞𑀺𑀢𑁂𑀬𑁂𑀯, 𑀲𑀩𑁆𑀩𑁂 𑀧𑀲𑁆𑀲𑀦𑁆𑀢𑀺 𑀲𑀩𑁆𑀩𑀤𑀸.

[𑀧𑁄𑀢𑁆𑀣𑀓𑁂 𑀆𑀭𑁄𑀧𑀦 𑀤𑀻𑀧𑀓𑀸 𑀦𑀺𑀝𑁆𑀞𑀺𑀢𑀸.]

𑀬𑁄 𑀓𑁄𑀘𑀺 𑀧𑀡𑁆𑀟𑀺𑀢𑁄 𑀥𑀻𑀭𑁄, 𑀅𑀝𑁆𑀞𑀓𑀣𑀸𑀤𑀺𑀓𑀁 𑀕𑀦𑁆𑀣𑀁 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀅𑀦𑀦𑁆𑀢𑀓𑁄 𑀳𑁄𑀢𑀺 𑀧𑀼𑀜𑁆𑀜𑀲𑀁𑀘𑀬𑁄, 𑀅𑀦𑀦𑁆𑀢𑀓𑁄 𑀳𑁄𑀢𑀺 𑀧𑀼𑀜𑁆𑀜𑀸𑀦𑀺𑀲𑀁𑀲𑁄. 𑀘𑀢𑀼𑀭𑀸𑀲𑀻𑀢𑀺 𑀘𑁂𑀢𑀺𑀬𑀲𑀳𑀲𑁆𑀲 𑀓𑀭𑀡𑀲𑀤𑀺𑀲𑁄, 𑀘𑀢𑀼𑀭𑀸𑀲𑀻𑀢𑀺 𑀩𑀼𑀤𑁆𑀥𑀭𑀽𑀧𑀲𑀳𑀲𑁆𑀲 𑀓𑀭𑀡𑀲𑀤𑀺𑀲𑁄, 𑀘𑀢𑀼𑀭𑀸𑀲𑀻𑀢𑀺 𑀩𑁄𑀥𑀺𑀭𑀼𑀓𑁆𑀔𑀲𑀳𑀲𑁆𑀲𑀭𑁄𑀧𑀦𑀲𑀤𑀺𑀲𑁄, 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲 𑀓𑀭𑀡𑀲𑀤𑀺𑀲𑁄, 𑀬𑁄 𑀘 𑀩𑀼𑀤𑁆𑀥𑀯𑀘𑀦𑀫𑀜𑁆𑀚𑀽𑀲𑀁 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀬𑁄 𑀘 𑀩𑀼𑀤𑁆𑀥𑀯𑀘𑀦𑀁 𑀫𑀡𑁆𑀟𑀦𑀁 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀬𑁄 𑀘 𑀩𑀼𑀤𑁆𑀥𑀯𑀘𑀦𑀁 𑀮𑁂𑀔𑀁 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀬𑁄 𑀘 𑀧𑁄𑀢𑁆𑀣𑀓𑀁 𑀯𑀸, 𑀬𑁄 𑀘 𑀧𑁄𑀢𑁆𑀣𑀓𑀫𑀽𑀮𑀁 𑀯𑀸, 𑀤𑁂𑀢𑀺 𑀯𑀸 𑀤𑀸𑀧𑁂𑀢𑀺 𑀯𑀸, 𑀬𑁄 𑀘 𑀢𑁂𑀮𑀁 𑀯𑀸 𑀘𑀼𑀡𑁆𑀡𑀁 𑀯𑀸, 𑀥𑀜𑁆𑀜𑀁 𑀯𑀸 𑀧𑁄𑀢𑁆𑀣𑀓𑀪𑀜𑁆𑀚𑀦𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀦𑀺𑀢𑁆𑀣𑀁 𑀯𑀸 𑀧𑁄𑀢𑁆𑀣𑀓𑀙𑀺𑀤𑁆𑀤𑁂 𑀆𑀯𑀼𑀦𑀢𑁆𑀣𑀸𑀬, 𑀬𑀁 𑀓𑀺𑀜𑁆𑀘𑀺 𑀲𑀼𑀢𑁆𑀢𑀁 𑀯𑀸 𑀓𑀝𑁆𑀞𑀨𑀮𑀓𑀤𑁆𑀯𑀬𑀁 𑀯𑀸 𑀧𑁄𑀢𑁆𑀣𑀓𑀁 𑀧𑀼𑀝𑀦𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀁 𑀯𑀸, 𑀧𑁄𑀢𑁆𑀣𑀓-𑀩𑀦𑁆𑀥𑀦𑀢𑁆𑀣𑀸𑀬, 𑀬𑀁 𑀓𑀺𑀜𑁆𑀘𑀺 𑀬𑁄𑀢𑁆𑀢𑀁 𑀯𑀸 𑀧𑁄𑀢𑁆𑀣𑀓𑀮𑀸𑀧 𑀧𑀽𑀝𑀦𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀣𑀯𑀺𑀓𑀁 𑀤𑁂𑀢𑀺 𑀯𑀸 𑀤𑀸𑀧𑁂𑀢𑀺 𑀯𑀸.

𑀬𑁄 𑀘 𑀳𑀭𑀺𑀢𑀸𑀮𑁂𑀦 𑀯𑀸 𑀫𑀦𑁄𑀲𑀺𑀮𑀸𑀬 𑀯𑀸, 𑀲𑀼𑀯𑀡𑁆𑀡𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀧𑁄𑀢𑁆𑀣𑀓𑀫𑀡𑁆𑀟𑀦𑀁 𑀯𑀸 𑀓𑀝𑁆𑀞𑀨𑀮𑀓𑀫𑀡𑁆𑀟𑀦𑀁 𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀅𑀦𑀦𑁆𑀢𑀓𑁄 𑀳𑁄𑀢𑀺 𑀧𑀼𑀜𑁆𑀜𑀲𑀁𑀘𑀬𑁄, 𑀅𑀦𑀦𑁆𑀢𑀓𑁄 𑀳𑁄𑀢𑀺 𑀧𑀼𑀜𑁆𑀜𑀸𑀦𑀺𑀲𑀁𑀲𑁄. 𑀘𑀢𑀼𑀭𑀸𑀲𑀻𑀢𑀺 𑀘𑁂𑀢𑀺𑀬𑀲𑀳𑀲𑁆𑀲 𑀓𑀭𑀡𑀲𑀤𑀺𑀲𑁄, 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲 𑀓𑀭𑀡𑀲𑀤𑀺𑀲𑁄.

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀲𑁄, 𑀲𑀻𑀮𑀕𑀼𑀡𑀫𑀼𑀧𑀸𑀕𑀢𑀸;

𑀫𑀳𑀸 𑀢𑁂𑀚𑁄 𑀲𑀤𑀸 𑀳𑁄𑀢𑀺, 𑀲𑀻𑀳𑀦𑀸𑀤𑁄 𑀯𑀺𑀲𑀸𑀭𑀤𑁄.

𑀆𑀬𑀼𑀯𑀡𑁆𑀡𑀩𑀮𑀼𑀧𑁆𑀧𑁂𑀢𑁄, 𑀥𑀫𑁆𑀫𑀓𑀸𑀫𑁄 𑀪𑀯𑁂 𑀲𑀤𑁆𑀤𑀸;

𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀲𑀼, 𑀫𑀳𑁂𑀲𑀓𑁆𑀔𑁄 𑀅𑀦𑀸𑀫𑀬𑁄.

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀲𑁄, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀅𑀥𑀺𑀧𑀘𑁆𑀘 𑀧𑀭𑀺𑀯𑀸𑀭𑁄, 𑀲𑀩𑁆𑀩𑀲𑀼𑀔𑀸𑀥𑀺 𑀕𑀘𑁆𑀙𑀢𑀺.

𑀲𑀤𑁆𑀤𑁄𑀳𑀻𑀭𑀺𑀫𑀸 𑀯𑀤𑀜𑁆𑀜𑀽, 𑀲𑀁𑀯𑀺𑀕𑁆𑀕 𑀫𑀸𑀦𑀲𑁄 𑀪𑀯𑁂;

𑀅𑀗𑁆𑀕𑀧𑀘𑁆𑀘𑀗𑁆𑀕 𑀲𑀫𑁆𑀧𑀦𑁆𑀦𑁄, 𑀆𑀭𑁄𑀳 𑀧𑀭𑀺𑀡𑀸𑀳𑀯𑀸.

𑀲𑀩𑁆𑀩𑁂 𑀲𑀢𑁆𑀢𑀸𑀧𑀺 𑀬𑁄 𑀮𑁄𑀓𑁂, 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑀸𑀪𑀯𑁂;

𑀤𑁂𑀯𑀫𑀦𑀼𑀲𑁆𑀲 𑀲𑀜𑁆𑀘𑀭𑁄, 𑀫𑀺𑀢𑁆𑀢𑀲𑀳𑀸𑀬 𑀧𑀸𑀮𑀺𑀢𑁄.

𑀤𑁂𑀯𑀫𑀦𑀼𑀲𑁆𑀲 𑀲𑀫𑁆𑀧𑀢𑁆𑀢𑀺𑀁, 𑀅𑀦𑀼𑀪𑁄𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀅𑀭𑀳𑀢𑁆𑀢 𑀨𑀮𑀁 𑀧𑀢𑁆𑀢𑁄, 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺.

𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀅𑀪𑀺𑀜𑁆𑀜𑀸 𑀙𑀩𑁆𑀩𑀺𑀥𑁂 𑀯𑀭𑁂;

𑀯𑀺𑀫𑁄𑀓𑁆𑀔𑁂 𑀅𑀝𑁆𑀞𑀓𑁂 𑀲𑁂𑀝𑁆𑀞𑁂, 𑀕𑀫𑀺𑀲𑁆𑀲𑀢𑀺 𑀅𑀦𑀸𑀕𑀢𑁂.

𑀢𑀲𑁆𑀫𑀸𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀁𑀧𑀲𑁆𑀲𑀁 𑀳𑀺𑀢 𑀫𑀢𑁆𑀢𑀦𑁄;

𑀓𑀸𑀭𑁂𑀬𑁆𑀬 𑀲𑀸𑀫 𑀕𑀦𑁆𑀣𑁂 𑀘, 𑀅𑀜𑁆𑀜𑁂 𑀘𑀸𑀧𑀺 𑀓𑀸𑀭𑀸𑀧𑀬𑁂.

𑀧𑁄𑀢𑁆𑀣𑀓𑁂 𑀘 𑀞𑀺𑀢𑁂 𑀕𑀦𑁆𑀣𑁂, 𑀧𑀸𑀴𑀺 𑀅𑀝𑁆𑀞𑀓𑀣𑀸𑀤𑀺𑀓𑁂;

𑀥𑀫𑁆𑀫𑀫𑀜𑁆𑀚𑀽𑀲𑀸 𑀕𑀦𑁆𑀣𑁂 𑀘, 𑀮𑁂𑀔𑀁 𑀓𑀭𑁂 𑀓𑀸𑀭𑀸𑀧𑀬𑁂.

𑀧𑁄𑀢𑁆𑀣𑀓𑀁 𑀧𑁄𑀢𑁆𑀣𑀓𑀫𑀽𑀮𑀜𑁆𑀘, 𑀢𑁂𑀲𑀁 𑀘𑀼𑀮𑁆𑀮𑀣𑀽𑀲𑀫𑁆𑀧𑀺 𑀘;

𑀧𑀺𑀮𑁄𑀢𑀺𑀓𑀸𑀤𑀺𑀓𑀁 𑀲𑀼𑀢𑁆𑀢𑀁, 𑀓𑀝𑁆𑀞𑀨𑀮𑀤𑁆𑀯𑀬𑀫𑁆𑀳𑀺 𑀘.

𑀥𑀫𑁆𑀫𑀩𑀦𑁆𑀥𑀦𑀢𑁆𑀣𑀸𑀬 𑀘, 𑀬𑀁 𑀓𑀺𑀜𑁆𑀘𑀺 𑀫𑀳𑀕𑁆𑀖𑀁 𑀯𑀢𑁆𑀣𑀁;

𑀥𑀫𑁆𑀫𑀩𑀦𑁆𑀥𑀦𑀬𑁄𑀢𑁆𑀢𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀣𑀯𑀺𑀓𑀫𑁆𑀧𑀺 𑀘.

𑀤𑀤𑁂𑀬𑁆𑀬 𑀥𑀫𑁆𑀫𑀔𑁂𑀢𑁆𑀢𑀫𑁆𑀳𑀺, 𑀯𑀺𑀧𑁆𑀧𑀲𑁆𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀜𑁆𑀜𑁄 𑀘𑀸𑀧𑀺 𑀤𑀚𑁆𑀚𑀸𑀧𑁂𑀬𑁆𑀬, 𑀫𑀺𑀢𑁆𑀢𑀲𑀳𑀸𑀬𑀩𑀦𑁆𑀥𑀯𑁂𑀢𑀺.

𑀕𑀦𑁆𑀣𑀸𑀓𑀭𑀮𑁂𑀔𑀮𑁂𑀔𑀸𑀧𑀦𑀸𑀦𑀺𑀲𑀁𑀲 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

[𑀇𑀢𑀺 𑀘𑀽𑀮𑀕𑀦𑁆𑀣𑀯𑀁𑀲𑁂 𑀧𑀓𑀺𑀡𑁆𑀡𑀓𑀤𑀻𑀧𑀓𑁄 𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.]

𑀲𑁄𑀳𑀁 𑀳𑀁𑀲𑀸𑀭𑀝𑁆𑀞 𑀚𑀸𑀢𑁄, 𑀦𑀦𑁆𑀢𑀧𑀜𑁆𑀜𑁄𑀢𑀺 𑀯𑀺𑀲𑁆𑀲𑀼𑀢𑁄

𑀲𑀤𑁆𑀥𑀸 𑀲𑀻𑀮 𑀯𑀻𑀭𑀧𑁆𑀧𑁂𑀢𑁄, 𑀥𑀫𑁆𑀫𑀭𑀲𑀁 𑀕𑀯𑁂𑀲𑀦𑁄.

𑀲𑁄𑀳𑀁 𑀢𑀢𑁄 𑀕𑀦𑁆𑀢𑁆𑀯𑀸 𑀘𑀺𑀫𑀁, 𑀚𑀺𑀦 𑀦𑀯𑀁 𑀬𑀁 𑀧𑀽𑀭𑀁;

𑀲𑀩𑁆𑀩 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄, 𑀯𑀻𑀲𑀢𑀺 𑀯𑀲𑁆𑀲𑀫𑀸𑀕𑀢𑁄.

𑀲𑀩𑁆𑀩 𑀥𑀫𑁆𑀫𑀁 𑀯𑀺𑀲𑁆𑀲𑁂𑀚𑁆𑀚𑁂𑀦𑁆𑀢𑁄, 𑀓𑀺𑀓𑀸𑀭𑁂 𑀦𑁂𑀯 𑀪𑀺𑀓𑁆𑀔𑀼𑀦𑁄;

𑀙 𑀯𑀲𑁆𑀲𑀸𑀦𑀁 𑀕𑀡𑀁 𑀪𑀺𑀢𑁆𑀯𑀸, 𑀓𑀸𑀫𑀸𑀦𑀁 𑀅𑀪𑀺𑀫𑀤𑁆𑀤𑀦𑀁.

𑀲𑀦𑁆𑀢𑀺 𑀲𑀪𑀸 𑀘 𑀦𑀺𑀩𑁆𑀩𑀸𑀦𑀁, 𑀕𑀯𑁂𑀲𑀺𑀜𑁆𑀘 𑀧𑀼𑀦𑀧𑁆𑀧𑀼𑀦𑀁;

𑀯𑀲𑀦𑁆𑀢𑁄𑀳𑀁, 𑀯𑀦𑀸𑀭𑀫𑁆𑀫𑀁, 𑀧𑀺𑀝𑀓𑀢𑁆𑀢𑀬 𑀲𑀗𑁆𑀕𑀳𑀁;

𑀕𑀦𑁆𑀣𑀯𑀁𑀲𑀁 𑀇𑀫𑀁 𑀔𑀼𑀤𑁆𑀤𑀁, 𑀅𑀭𑀺𑀬𑀲𑀗𑁆𑀖𑀤𑀸𑀲𑀓𑀦𑁆𑀢𑀺.

𑀇𑀢𑀺 𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀅𑀭𑀜𑁆𑀜𑀯𑀸𑀲𑀺𑀦𑀸, 𑀦𑀦𑁆𑀤𑀧𑀜𑁆𑀜𑀸𑀘𑀭𑀺𑀬𑁂𑀦 𑀓𑀢𑁄 𑀘𑀽𑀴𑀕𑀦𑁆𑀣𑀯𑀁𑀲𑁄 𑀦𑀺𑀝𑁆𑀞𑀺𑀢𑁄.

𑀥𑀫𑁆𑀫𑀯𑀝𑀁𑀲𑀓𑀦𑀸𑀫𑁂𑀦 𑀯𑀺𑀲𑀼𑀢𑁄 𑀣𑁂𑀭𑁄, 𑀬𑀁 𑀧𑀓𑀭𑀡𑀁 𑀮𑀺𑀓𑁆𑀔𑀺𑀢𑀁 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀁 𑀧𑀺𑀝𑀓𑀁 𑀧𑀭𑀺𑀲𑀺𑀧𑁆𑀧𑀁 𑀧𑀭𑀺𑀦𑀺𑀝𑁆𑀞𑀺𑀢𑀁.

𑀫𑀫𑁂𑀯 𑀲𑀺𑀲𑁆𑀲𑀲𑀫𑀽𑀳𑀸𑀦𑀜𑁆𑀘 𑀧𑀭𑀺𑀲𑀺𑀧𑁆𑀧𑀁 𑀧𑀭𑀺𑀦𑀺𑀝𑁆𑀞𑀺𑀢𑀁. 𑀢𑀯𑁂 𑀲𑀺𑀲𑁆𑀲𑀸𑀦𑀽 𑀲𑀺𑀲𑁆𑀲𑀸𑀦𑀺 𑀘, 𑀧𑀭𑀺𑀲𑀺𑀧𑁆𑀧𑀁 𑀧𑀭𑀺𑀦𑀺𑀝𑁆𑀞𑀺𑀢𑀁.