𑀅𑀜𑁆𑀜 > 𑀯𑀁𑀲-𑀕𑀦𑁆𑀣-𑀲𑀗𑁆𑀕𑀳𑁄

MMR Vol 0

Misc. Paragraph

𑀫𑀳𑀸𑀯𑀁𑀲𑀧𑀸𑀴𑀺

𑀧𑀣𑀫𑀧𑀭𑀺𑀘𑁆𑀙𑁂𑀤

𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀣𑁂𑀭𑀸𑀤𑀬𑁄

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀸𑀪𑀺𑀲𑁂𑀓𑁄

𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭 𑀧𑀝𑀺𑀕𑁆𑀕𑀳𑀓𑁄

𑀤𑁆𑀯𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀼𑀲𑀺𑀢𑀧𑀼𑀭𑀕𑀫𑀦𑀁

𑀢𑁂𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑀲𑀭𑀸𑀚𑀓𑁄

𑀘𑀢𑀼𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀭𑀸𑀚𑀤𑁆𑀯𑀬𑀤𑀻𑀧𑀦𑁄

𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀅𑀝𑁆𑀞𑀭𑀸𑀚𑀓𑁄

𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑁆𑀯𑀺𑀭𑀸𑀚𑀓𑁄

𑀤𑁆𑀯𑀺𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀙 𑀭𑀸𑀚𑀓𑁄

𑀢𑁂𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀘𑀢𑀼𑀭𑀸𑀚𑀓𑁄

𑀘𑀢𑀼𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀺𑀭𑀸𑀚𑀓𑁄

𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀙𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀧𑀜𑁆𑀘𑀭𑀸𑀚𑀓𑁄

𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀏𑀓𑀭𑀸𑀚𑀓𑁄

𑀏𑀓𑀽𑀦𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑁆𑀯𑀺𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀺𑀭𑀸𑀚𑀓𑁄𑀦𑀸𑀫

𑀢𑀺𑀯𑀜𑁆𑀜𑀸𑀲𑀢𑀺𑀫 𑀧𑀘𑁆𑀙𑁂𑀤

𑀮𑀁𑀓𑀸𑀯𑀺𑀮𑁄𑀧𑁄𑀦𑀸𑀫

𑀘𑀢𑀼𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀙 𑀭𑀸𑀚𑀓𑁄𑀦𑀸𑀫

𑀧𑀜𑁆𑀘𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀭𑁄𑀳𑀡𑀸𑀭𑀸𑀢𑀺 𑀯𑀺𑀚𑀬𑁄𑀦𑀸𑀫

𑀙𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀅𑀦𑀼𑀭𑀸𑀥𑀧𑀼𑀭𑀸𑀪𑀺𑀕𑀫𑀦𑁄

𑀲𑀢𑁆𑀢𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀲𑀁𑀕𑀳𑀓𑀭𑀡𑁄𑀦𑀸𑀫

𑀅𑀝𑁆𑀞𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀦𑀫𑀲𑁆𑀲𑀺𑀢𑁆𑀯𑀸𑀦 ¶ 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀲𑀼𑀤𑁆𑀥𑀁 𑀲𑀼𑀤𑁆𑀥𑀯𑀁𑀲𑀚𑀁;

𑀫𑀳𑀸𑀯𑀁𑀲𑀁 𑀧𑀯𑀓𑁆𑀔𑀸𑀫𑀺, 𑀦𑀸𑀦𑀸𑀦𑀽𑀦𑀸𑀥𑀺𑀓𑀸𑀭𑀺𑀓𑀁.

𑀧𑁄𑀭𑀸𑀡𑁂𑀳𑀺 𑀓𑀢𑁄’𑀧𑁂𑀲𑁄, 𑀅𑀢𑀺𑀯𑀺𑀢𑁆𑀣𑀸𑀭𑀺𑀢𑁄 𑀓𑁆𑀯𑀘𑀺;

𑀅𑀢𑀻𑀯 𑀓𑁆𑀯𑀘𑀺 𑀲𑀁𑀔𑀺𑀢𑁆𑀢𑁄, 𑀅𑀦𑁂𑀓𑀧𑀼𑀦𑀭𑀼𑀢𑁆𑀢𑀓𑁄.

𑀯𑀚𑁆𑀚𑀺𑀢𑀁 𑀢𑁂𑀳𑀺 𑀤𑁄𑀲𑁂𑀳𑀺, 𑀲𑀼𑀔𑀕𑁆𑀕𑀳𑀡𑀥𑀸𑀭𑀡𑀁;

𑀧𑀲𑀸𑀤𑀲𑀁𑀯𑁂𑀕𑀓𑀭𑀁, 𑀲𑀼𑀢𑀺𑀢𑁄 𑀘 𑀉𑀧𑀸𑀕𑀢𑀁.

𑀧𑀲𑀸𑀤𑀚𑀦𑀓𑁂 𑀞𑀸𑀦𑁂, 𑀢𑀣𑀸 𑀲𑀁𑀯𑁂𑀕𑀓𑀸𑀭𑀓𑁂;

𑀚𑀦𑀬𑀦𑁆𑀢𑁄 𑀧𑀲𑀸𑀤𑀜𑁆𑀘, 𑀲𑀁𑀯𑁂𑀕𑀜𑁆𑀘 𑀲𑀼𑀡𑀸𑀣 𑀢𑀁.

𑀤𑀻𑀧𑀗𑁆𑀓𑀭𑀜𑁆𑀳𑀺 𑀲𑀫𑁆𑀩𑀼𑀤𑁆𑀥𑀁, 𑀧𑀲𑁆𑀲𑀺𑀢𑁆𑀯𑀸 𑀦𑁄 𑀚𑀺𑀦𑁄 𑀧𑀼𑀭𑀸;

𑀮𑁄𑀓𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀼𑀁, 𑀩𑁄𑀥𑀸𑀬 𑀧𑀡𑀺𑀥𑀺𑀁 𑀅𑀓𑀸.

𑀢𑀢𑁄 𑀢𑀜𑁆𑀘𑁂𑀯 𑀲𑀫𑁆𑀩𑀼𑀤𑁆𑀥𑀁, 𑀓𑁄𑀡𑁆𑀟𑀜𑁆𑀜𑀁 𑀫𑀗𑁆𑀕𑀮𑀁 𑀫𑀼𑀦𑀺𑀁;

𑀲𑀼𑀫𑀦𑀁 𑀭𑁂𑀯𑀢𑀁 𑀩𑀼𑀤𑁆𑀥𑀁, 𑀲𑁄𑀪𑀺𑀢𑀜𑁆𑀘 𑀫𑀳𑀸𑀫𑀼𑀦𑀺𑀁.

𑀅𑀦𑁄𑀫𑀤𑀲𑁆𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀤𑀼𑀫𑀁 𑀦𑀸𑀭𑀤𑀁 𑀚𑀺𑀦𑀁;

𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁, 𑀲𑀼𑀫𑁂𑀥𑀜𑁆𑀘 𑀢𑀣𑀸𑀕𑀢𑀁.

𑀲𑀼𑀚𑀸𑀢𑀁 𑀧𑀺𑀬𑀤𑀲𑁆𑀲𑀺𑀜𑁆𑀘, 𑀅𑀢𑁆𑀣𑀤𑀲𑁆𑀲𑀺𑀜𑁆𑀘 𑀦𑀸𑀬𑀓𑀁;

𑀥𑀫𑁆𑀫𑀤𑀲𑁆𑀲𑀺𑀜𑁆𑀘 𑀲𑀺𑀤𑁆𑀥𑀢𑁆𑀣𑀁, 𑀢𑀺𑀲𑁆𑀲𑀁 𑀨𑀼𑀲𑁆𑀲𑀚𑀺𑀦𑀁 𑀢𑀣𑀸.

𑀯𑀺𑀧𑀲𑁆𑀲𑀺𑀁 𑀲𑀺𑀔𑀻𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑀼𑀤𑁆𑀥𑀁 𑀯𑁂𑀲𑁆𑀲𑀪𑀼𑀁 𑀯𑀺𑀪𑀼𑀁;

𑀓𑀓𑀼𑀲𑀦𑁆𑀥𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀓𑁄𑀡𑀸𑀕𑀫𑀦𑀫𑁂𑀯 𑀘.

𑀓𑀲𑁆𑀲𑀧𑀁 𑀲𑀼𑀕𑀢𑀜𑁆𑀘’𑀫𑁂, 𑀲𑀫𑁆𑀩𑀼𑀤𑁆𑀥𑁂 𑀘𑀢𑀼𑀯𑀻𑀲𑀢𑀺;

𑀆𑀭𑀸𑀥𑁂𑀢𑁆𑀯𑀸 𑀫𑀳𑀸𑀯𑀻𑀭𑁄, 𑀢𑁂𑀳𑀺 𑀩𑁄𑀥𑀸𑀬 𑀩𑁆𑀬𑀸𑀓𑀢𑁄.

𑀧𑀼𑀭𑁂𑀢𑁆𑀯𑀸 ¶ 𑀧𑀸𑀭𑀫𑀻 𑀲𑀩𑁆𑀩𑀸, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀉𑀢𑁆𑀢𑀫𑁄 𑀕𑁄𑀢𑀫𑁄 𑀩𑀼𑀤𑁆𑀥𑁄, 𑀲𑀢𑁆𑀢𑁂 𑀤𑀼𑀓𑁆𑀔𑀸 𑀧𑀫𑁄𑀘𑀬𑀺.

𑀫𑀕𑀥𑁂𑀲𑀼 𑀭𑀼𑀯𑁂𑀮𑀸𑀬𑀁, 𑀩𑁄𑀥𑀺𑀫𑀽𑀮𑁂 𑀫𑀳𑀸𑀫𑀼𑀦𑀺;

𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀲𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑀲𑀢𑁆𑀢𑀸𑀳𑀸𑀦𑀺 𑀢𑀳𑀺𑀁 𑀲𑀢𑁆𑀢, 𑀲𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀭𑀁;

𑀯𑀺𑀦𑁆𑀤𑀦𑁆𑀢𑀁 𑀫𑀥𑀼𑀭𑀢𑁆𑀢𑀜𑁆𑀘, 𑀤𑀲𑁆𑀲𑀬𑀦𑁆𑀢𑁄 𑀯𑀲𑀻 𑀯𑀲𑀺.

𑀢𑀢𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀕𑀢𑁆𑀢𑀬𑀺;

𑀢𑀢𑁆𑀣 𑀯𑀲𑁆𑀲 𑀯𑀲𑀦𑁆𑀢𑁄’𑀯, 𑀲𑀝𑁆𑀞𑀺𑀁 𑀅𑀭𑀳𑀢𑀁 𑀅𑀓𑀸.

𑀢𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀦 𑀪𑀺𑀓𑁆𑀔𑀯𑁄;

𑀯𑀺𑀦𑁂𑀢𑁆𑀯𑀸 𑀘 𑀢𑀢𑁄 𑀢𑀺𑀁𑀲-𑀲𑀳𑀸 𑀬𑁂 𑀪𑀤𑁆𑀤𑀯𑀕𑁆𑀕𑀺𑀬𑁂.

𑀲𑀳𑀲𑁆𑀲𑀚𑀝𑀺𑀮𑁂 𑀦𑀸𑀣𑁄, 𑀯𑀺𑀦𑁂𑀢𑀼𑀁 𑀓𑀲𑁆𑀲𑀧𑀸𑀤𑀺𑀓𑁂;

𑀳𑁂𑀫𑀦𑁆𑀢𑁂 𑀉𑀭𑀼𑀯𑁂𑀮𑀸𑀬𑀁, 𑀯𑀲𑀺𑀢𑁂 𑀧𑀭𑀺𑀧𑀸𑀘𑀬𑀁.

𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲, 𑀫𑀳𑀸𑀬𑀜𑁆𑀜𑁂 𑀉𑀧𑀝𑁆𑀞𑀺𑀢𑁂;

𑀢𑀲𑁆𑀲’𑀢𑁆𑀢𑀦𑁄 𑀦𑀸𑀕𑀫𑀦𑁂, 𑀇𑀘𑁆𑀙𑀸𑀘𑀸𑀭𑀁 𑀯𑀺𑀚𑀸𑀦𑀺𑀬.

𑀉𑀢𑁆𑀢𑀭𑀓𑀼𑀭𑀼𑀢𑁄 𑀪𑀺𑀓𑁆𑀔𑀁, 𑀆𑀳𑀭𑀺𑀢𑁆𑀯𑀸 𑀭𑀺𑀫𑀤𑁆𑀤𑀦𑁄;

𑀅𑀦𑁄𑀢𑀢𑁆𑀢𑀤𑀳𑁂 𑀪𑀼𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 𑀲𑀬𑀁.

𑀩𑁄𑀥𑀺𑀢𑁄 𑀦𑀯𑀫𑁂 𑀫𑀸𑀲𑁂, 𑀨𑀼𑀲𑁆𑀲𑀧𑀼𑀡𑁆𑀡𑀫𑀺𑀬𑀁 𑀚𑀺𑀦𑁄;

𑀮𑀗𑁆𑀓𑀸𑀤𑀻𑀧𑀁 𑀯𑀺𑀲𑁄𑀥𑁂𑀢𑀼𑀁, 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀫𑀺.

𑀲𑀸𑀲𑀦𑀼𑀚𑁆𑀚𑁄𑀢𑀦𑀁 𑀞𑀸𑀦𑀁, 𑀮𑀁𑀓𑀸 𑀜𑀸𑀢𑀸 𑀚𑀺𑀦𑁂𑀦 𑀳𑀺;

𑀬𑀓𑁆𑀔𑀧𑀼𑀡𑁆𑀡𑀸𑀬 𑀮𑀗𑁆𑀓𑀸𑀬, 𑀬𑀓𑁆𑀔𑀸 𑀦𑀺𑀩𑁆𑀩𑀸 𑀲𑀺𑀬𑀸𑀢𑀺 𑀘.

𑀜𑀸𑀢𑁄𑀯 𑀮𑀗𑁆𑀓𑀸𑀫𑀚𑁆𑀛𑀫𑁆𑀳𑀺, 𑀕𑀗𑁆𑀕𑀸𑀪𑀻𑀭𑁂 𑀫𑀦𑁄𑀭𑀫𑁂;

𑀢𑀺𑀬𑁄𑀚𑀦𑀸𑀬 𑀢𑁂 𑀭𑀫𑁆𑀫𑁂, 𑀏𑀓𑀬𑁄𑀚𑀦𑀯𑀺𑀢𑁆𑀣𑀢𑁂.

𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂, 𑀬𑀓𑁆𑀔𑀲𑀗𑁆𑀕𑀸𑀫𑀪𑀽𑀫𑀺𑀬𑀸;

𑀮𑀗𑁆𑀓𑀸𑀤𑀻𑀧𑀝𑁆𑀞𑀬𑀓𑁆𑀔𑀸𑀦𑀁, 𑀫𑀳𑀸𑀬𑀓𑁆𑀔𑀲𑀫𑀸𑀕𑀫𑁄.

𑀉𑀧𑀸𑀕𑀢𑁄 𑀢𑀁 𑀲𑀼𑀕𑀢𑁄, 𑀫𑀳𑀸𑀬𑀓𑁆𑀔𑀲𑀫𑀸𑀕𑀫𑀁;

𑀲𑀫𑀸𑀕𑀫𑀲𑁆𑀲 𑀫𑀚𑁆𑀛𑀫𑁆𑀳𑀺, 𑀢𑀢𑁆𑀣 𑀢𑁂𑀲𑀁 𑀲𑀺𑀭𑁄𑀧𑀭𑀺.

𑀫𑀳𑀺𑀬𑀗𑁆𑀕𑀡𑀣𑀽𑀧𑀲𑁆𑀲, 𑀞𑀸𑀦𑁂 𑀯𑁂𑀳𑀸𑀬𑀲𑀁 𑀚𑀺𑀦𑁄;

𑀯𑀼𑀝𑁆𑀞𑀺𑀯𑀸𑀢𑀦𑁆𑀥𑀓𑀸𑀭𑁂𑀲𑀺, 𑀢𑁂𑀲𑀁 𑀲𑀁𑀯𑁂𑀚𑀦𑀁 𑀅𑀓𑀸.

𑀢𑁂 𑀪𑀬𑀝𑁆𑀞𑀸’𑀪𑀬𑀁 𑀬𑀓𑁆𑀔𑀸, 𑀅𑀬𑀸𑀘𑀼𑀁 𑀅𑀪𑀬𑀁 𑀚𑀺𑀦𑀁;

𑀚𑀺𑀦𑁄 𑀅𑀪𑀬𑀤𑁄 𑀆𑀳, 𑀬𑀓𑁆𑀔𑁂 𑀢𑁂’𑀢𑀺 𑀪𑀬𑀤𑁆𑀤𑀻𑀢𑁂.

𑀬𑀓𑁆𑀔𑀸 ¶ 𑀪𑀬𑀁 𑀯𑁄 𑀤𑀼𑀓𑁆𑀔𑀜𑁆𑀘, 𑀳𑀭𑀺𑀲𑁆𑀲𑀸𑀫𑀺 𑀇𑀤𑀁 𑀅𑀳𑀁;

𑀢𑀼𑀫𑁆𑀳𑁂 𑀦𑀺𑀲𑀚𑁆𑀚𑀞𑀸𑀦𑀁 𑀫𑁂, 𑀲𑀫𑀕𑁆𑀕𑀸 𑀤𑁂𑀣 𑀦𑁄 𑀇𑀥.

𑀆𑀳𑀼 𑀢𑁂 𑀲𑀼𑀕𑀢𑀁 𑀬𑀓𑁆𑀔𑀸, 𑀤𑁂𑀫 𑀫𑀸𑀭𑀺𑀲 𑀢𑁂 𑀇𑀥;

𑀲𑀩𑁆𑀩𑁂𑀧𑀺 𑀲𑀓𑀮𑀁 𑀤𑀻𑀧𑀁, 𑀤𑁂𑀳𑀺 𑀦𑁄 𑀅𑀪𑀬𑀁 𑀢𑀼𑀯𑀁.

𑀪𑀬𑀁 𑀲𑀻𑀢𑀁 𑀢𑀫𑀁 𑀢𑁂𑀲𑀁, 𑀳𑀦𑁆𑀢𑁆𑀯𑀸 𑀢𑀁 𑀤𑀺𑀦𑁆𑀦𑀪𑀽𑀫𑀺𑀬𑀁;

𑀘𑀫𑁆𑀫𑀓𑁆𑀔𑀦𑁆𑀥𑀁 𑀅𑀢𑁆𑀣𑀭𑀺𑀢𑁆𑀯𑀸, 𑀢𑀢𑁆𑀣𑀸’ 𑀲𑀻𑀦𑁄 𑀚𑀺𑀦𑁄 𑀢𑀢𑁄.

𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀲𑀸𑀭𑁂𑀲𑀺, 𑀆𑀤𑀺𑀢𑁆𑀢𑀁 𑀢𑀁 𑀲𑀫𑀦𑁆𑀢𑀢𑁄;

𑀖𑀫𑁆𑀫𑀸𑀪𑀺𑀪𑀽𑀢𑀸 𑀢𑁂 𑀪𑀻𑀢𑀸, 𑀞𑀺𑀢𑀸 𑀅𑀦𑁆𑀢𑁂 𑀲𑀫𑀦𑁆𑀢𑀢𑁄.

𑀕𑀺𑀭𑀺𑀤𑀻𑀧𑀁 𑀢𑀢𑁄 𑀦𑀸𑀣𑁄, 𑀭𑀫𑁆𑀫𑀁 𑀢𑁂𑀲𑀁 𑀇𑀥𑀸’𑀦𑀬𑀺;

𑀢𑁂𑀲𑀼 𑀢𑀢𑁆𑀣 𑀧𑀯𑀺𑀝𑁆𑀞𑁂𑀲𑀼, 𑀬𑀣𑀸𑀞𑀸𑀦𑁂 𑀞𑀧𑁂𑀲𑀺 𑀘.

𑀦𑀸𑀣𑁄 𑀢𑀁 𑀲𑀁𑀔𑀺𑀧𑀺 𑀥𑀫𑁆𑀫𑀁, 𑀢𑀤𑀸 𑀤𑁂𑀯𑀸 𑀲𑀫𑀸𑀕𑀫𑀼𑀁;

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀢𑁂𑀲𑀁, 𑀲𑀢𑁆𑀣𑀸 𑀥𑀫𑁆𑀫 𑀫𑀤𑁂𑀲𑀬𑀺.

𑀦𑁂𑀓𑁂𑀲𑀁 𑀧𑀸𑀡𑀓𑁄𑀝𑀻𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼, 𑀞𑀺𑀢𑀸 𑀆𑀲𑀼𑀁 𑀅𑀲𑀁𑀔𑀺𑀬𑀸.

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸, 𑀲𑁂𑀮𑁂 𑀲𑀼𑀫𑀦𑀓𑀽𑀝𑀓𑁂;

𑀫𑀳𑀸𑀲𑀼𑀫𑀦𑀤𑁂𑀯𑀺𑀦𑁆𑀤𑁄, 𑀧𑀽𑀚𑀺𑀬𑀁 𑀬𑀸𑀘𑀺 𑀧𑀽𑀚𑀺𑀬𑀁.

𑀲𑀺𑀭𑀁 𑀧𑀭𑀸𑀫𑀲𑀺𑀢𑁆𑀯𑀸𑀦, 𑀦𑀻𑀮𑀸𑀫𑀮𑀲𑀺𑀭𑁄𑀭𑀼𑀳𑁄;

𑀧𑀸𑀡𑀺𑀫𑀢𑁆𑀢𑁂𑀅𑀤𑀸 𑀓𑁂𑀲𑁂, 𑀢𑀲𑁆𑀲 𑀧𑀸𑀡 𑀳𑀺𑀢𑁄 𑀚𑀺𑀦𑁄.

𑀲𑁄 𑀢𑀁 𑀲𑀼𑀯𑀡𑁆𑀡𑀘𑀗𑁆𑀓𑁄𑀝-𑀯𑀭𑁂𑀦𑀸𑀤𑀸𑀬 𑀲𑀢𑁆𑀣𑀼𑀦𑁄;

𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀭𑀘𑀺𑀢𑁂, 𑀦𑀸𑀦𑀸𑀭𑀢𑀦𑀲𑀜𑁆𑀘𑀬𑁂.

𑀲𑀩𑁆𑀩𑀢𑁄 𑀲𑀢𑁆𑀢𑀭𑀢𑀦𑁂, 𑀢𑁂 𑀞𑀧𑁂𑀢𑁆𑀯𑀸 𑀲𑀺𑀭𑁄𑀭𑀼𑀳𑁂;

𑀲𑁄 𑀇𑀦𑁆𑀤𑀦𑀻𑀮𑀣𑀽𑀧𑁂𑀦, 𑀧𑀺𑀤𑀳𑁂𑀲𑀺 𑀦𑀫𑀲𑁆𑀲𑀺 𑀘.

𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀳𑀺 𑀲𑀫𑁆𑀩𑀼𑀤𑁆𑀥𑁂, 𑀘𑀺𑀢𑀓𑀢𑁄 𑀘 𑀇𑀤𑁆𑀥𑀺𑀬𑀸;

𑀆𑀤𑀸𑀬 𑀚𑀺𑀦𑀕𑀻𑀯𑀝𑁆𑀞𑀺𑀁, 𑀣𑁂𑀭𑁄 𑀲𑀭𑀪𑀽𑀦𑀸𑀫𑀓𑁄.

𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀲𑀺𑀲𑁆𑀲𑁄 𑀆𑀦𑀻𑀬 𑀘𑁂𑀢𑀺𑀬𑁂;

𑀢𑀲𑁆𑀫𑀺𑀁𑀬𑁂𑀯 𑀞𑀧𑁂𑀢𑁆𑀯𑀸𑀦, 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀸𑀭𑀺𑀢𑁄.

𑀙𑀸𑀤𑀸𑀧𑁂𑀢𑁆𑀯𑀸 𑀫𑁂𑀤𑀯𑀡𑁆𑀡-𑀧𑀸𑀲𑀸𑀡𑁂𑀳𑀺 𑀫𑀳𑀺𑀤𑁆𑀥𑀺𑀓𑁄;

𑀣𑀽𑀧𑀁 𑀤𑁆𑀯𑀸𑀤𑀲𑀳𑀢𑁆𑀣𑀼𑀘𑁆𑀘𑀁, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀧𑀓𑁆𑀓𑀫𑀺.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲, 𑀭𑀜𑁆𑀜𑁄 𑀪𑀸𑀢𑀼𑀓𑀼𑀥𑀸𑀭𑀓𑁄;

𑀉𑀤𑁆𑀥𑀘𑀽𑀴𑀸𑀪𑀬𑁄 𑀦𑀸𑀫, 𑀤𑀺𑀲𑁆𑀯𑀸 𑀘𑁂𑀢𑀺𑀬 𑀫𑀩𑁆𑀪𑀼𑀢𑀁.

𑀢𑀁 ¶ 𑀙𑀸𑀤𑀬𑀺𑀢𑁆𑀯𑀸 𑀓𑀸𑀭𑁂𑀲𑀺, 𑀢𑀺𑀁𑀲𑀳𑀢𑁆𑀣𑀼𑀘𑁆𑀘 𑀘𑁂𑀢𑀺𑀬𑀁;

𑀫𑀤𑁆𑀤𑀦𑁆𑀢𑁄 𑀤𑀫𑀺𑀴𑁂 𑀭𑀸𑀚𑀸, 𑀢𑀢𑁆𑀭𑀝𑁆𑀞𑁄 𑀤𑀼𑀓𑁆𑀔𑀕𑀸𑀫𑀡𑀺.

𑀅𑀲𑀻𑀢𑀺𑀳𑀢𑁆𑀣𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀓𑀜𑁆𑀚𑀼𑀓𑀘𑁂𑀢𑀺𑀬𑀁;

𑀫𑀳𑀺𑀬𑀗𑁆𑀕𑀡𑀣𑀽𑀧𑁄𑀬-𑀫𑁂𑀲𑁄 𑀏𑀯𑀁 𑀧𑀢𑀺𑀝𑁆𑀞𑀺𑀢𑁄.

𑀏𑀯𑀁 𑀤𑀻𑀧𑀫𑀺𑀫𑀁𑀓𑀢𑁆𑀯𑀸, 𑀫𑀦𑀼𑀲𑁆𑀲𑀸𑀭𑀳𑀫𑀺𑀲𑁆𑀲𑀭𑁄;

𑀉𑀭𑀼𑀯𑁂𑀮𑀫𑀕𑀸 𑀥𑀻𑀭𑁄, 𑀉𑀭𑀼𑀯𑀻𑀭 𑀧𑀭𑀓𑁆𑀓𑀫𑁄𑀢𑀺.

𑀫𑀳𑀺𑀬𑀗𑁆𑀕𑀡𑀸𑀕𑀫𑀦𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀸𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀳𑀺𑀢𑁂 𑀭𑀢𑁄;

𑀩𑁄𑀥𑀺𑀢𑁄 𑀧𑀜𑁆𑀘𑀫𑁂 𑀯𑀲𑁆𑀲𑁂, 𑀯𑀲𑀁 𑀚𑁂𑀢𑀯𑀦𑁂 𑀚𑀺𑀦𑁄.

𑀫𑀳𑁄𑀤𑀭𑀲𑁆𑀲 𑀦𑀸𑀕𑀲𑁆𑀲, 𑀢𑀣𑀸 𑀘𑀽𑀴𑁄𑀤𑀭𑀲𑁆𑀲 𑀘;

𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀁, 𑀫𑀡𑀺𑀧𑀮𑁆𑀮𑀗𑁆𑀓𑀳𑁂𑀢𑀼𑀓𑀁.

𑀤𑀺𑀲𑁆𑀯𑀸 𑀲𑀧𑀸𑀭𑀺𑀲𑀚𑁆𑀚𑀸𑀦𑀁, 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁;

𑀲𑀫𑁆𑀩𑀼𑀤𑁆𑀥𑁄 𑀘𑀺𑀢𑁆𑀢𑀫𑀸𑀲𑀲𑁆𑀲, 𑀓𑀸𑀴𑀧𑀓𑁆𑀔𑁂 𑀉𑀧𑁄𑀲𑀣𑁂.

𑀧𑀸𑀢𑁄𑀬𑁂𑀯 𑀲𑀫𑀸𑀤𑀸𑀬, 𑀧𑀯𑀭𑀁 𑀧𑀢𑁆𑀢𑀘𑀻𑀯𑀭𑀁;

𑀅𑀦𑀼𑀓𑀫𑁆𑀧𑀸𑀬 𑀦𑀸𑀕𑀸𑀦𑀁, 𑀦𑀸𑀕𑀤𑀻𑀧𑀫𑀼𑀧𑀸𑀕𑀫𑀺.

𑀫𑀳𑀸𑀤𑀭𑁄’𑀧𑀺𑀲𑁄 𑀦𑀸𑀕𑁄, 𑀢𑀤𑀸 𑀭𑀸𑀚𑀸 𑀅𑀳𑀺𑀤𑁆𑀥𑀺𑀓𑁄;

𑀲𑀫𑀼𑀤𑁆𑀤𑁂 𑀦𑀸𑀕𑀪𑀯𑀦𑁂, 𑀤𑀲𑀤𑁆𑀥𑀲𑀢𑀬𑁄𑀚𑀦𑁂.

𑀓𑀡𑀺𑀝𑁆𑀞𑀺𑀓𑀸 𑀢𑀲𑁆𑀲 𑀓𑀡𑁆𑀳𑀸, 𑀯𑀟𑁆𑀠𑀫𑀸𑀦𑀫𑁆𑀳𑀺 𑀧𑀩𑁆𑀩𑀢𑁂;

𑀦𑀸𑀕𑀭𑀸𑀚𑀲𑁆𑀲 𑀤𑀺𑀦𑁆𑀦𑀸’𑀲𑀺, 𑀢𑀲𑁆𑀲 𑀘𑀽𑀴𑁄𑀤𑀭𑁄 𑀲𑀼𑀢𑁄.

𑀢𑀲𑁆𑀲 𑀫𑀸𑀢𑀸 𑀫𑀳𑀸𑀫𑀸𑀢𑀼, 𑀫𑀡𑀺𑀧𑀮𑁆𑀮𑀗𑁆𑀓𑀫𑀼𑀢𑁆𑀢𑀫𑀁;

𑀤𑀢𑁆𑀯𑀸 𑀓𑀸𑀮𑀓𑀢𑀸 𑀦𑀸𑀕𑀻, 𑀫𑀸𑀢𑀼𑀮𑁂𑀦 𑀢𑀣𑀸 𑀳𑀺 𑀲𑁄.

𑀅𑀳𑁄𑀲𑀺 𑀪𑀸𑀕𑀺𑀦𑁂𑀬𑁆𑀬𑀲𑁆𑀲, 𑀲𑀗𑁆𑀕𑀸𑀫𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄;

𑀧𑀩𑁆𑀩𑀢𑁂𑀬𑁆𑀬𑀸’𑀧𑀺 𑀦𑀸𑀕𑀸 𑀢𑁂, 𑀅𑀳𑁂𑀲𑀼𑀜𑁆𑀳𑀺 𑀫𑀳𑀺𑀤𑁆𑀥𑀺𑀓𑀸.

𑀲𑀫𑀺𑀤𑁆𑀥𑀺𑀲𑀼𑀫𑀦𑁄 𑀦𑀸𑀫, 𑀤𑁂𑀯𑁄 𑀚𑁂𑀢𑀯𑀦𑁂 𑀞𑀺𑀢𑀁;

𑀭𑀸𑀚𑀸𑀬𑀢𑀦𑀫𑀸𑀤𑀸𑀬, 𑀅𑀢𑁆𑀢𑀦𑁄 𑀪𑀯𑀦𑀁 𑀲𑀼𑀪𑀁.

𑀩𑀼𑀤𑁆𑀥𑀸𑀦𑀼𑀫𑀢𑀺𑀬𑀸𑀬𑁂𑀯, 𑀙𑀢𑁆𑀢𑀸𑀓𑀸𑀭𑀁 𑀚𑀺𑀦𑁄𑀧𑀭𑀺;

𑀥𑀸𑀭𑀬𑀦𑁆𑀢𑁄 𑀉𑀧𑀸𑀕𑀜𑁆𑀙𑀺, 𑀞𑀸𑀦𑀁 𑀢𑀁 𑀧𑀼𑀩𑁆𑀩𑀯𑀼𑀝𑁆𑀞𑀓𑀁.

𑀤𑁂𑀯𑁄 ¶ 𑀳𑀺 𑀲𑁄 𑀦𑀸𑀕𑀤𑀻𑀧𑁂, 𑀫𑀦𑀼𑀲𑁆𑀲𑁄’𑀦𑀦𑁆𑀢𑀭𑁂 𑀪𑀯𑁂;

𑀅𑀳𑁄𑀲𑀺 𑀭𑀸𑀚𑀸𑀬𑀢𑀦-𑀞𑀺𑀢𑀞𑀸𑀦𑁂 𑀲 𑀅𑀤𑁆𑀤𑀲.

𑀧𑀘𑁆𑀘𑁂𑀓𑀩𑀼𑀤𑁆𑀥 𑀪𑀼𑀜𑁆𑀚𑀦𑁆𑀢𑁂, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀺𑀬;

𑀧𑀢𑁆𑀢𑀲𑁄𑀥𑀦𑀲𑀸𑀔𑀸𑀬𑁄, 𑀢𑁂𑀲𑀁 𑀧𑀸𑀤𑀸𑀲𑀺 𑀢𑁂𑀦 𑀲𑁄.

𑀦𑀺𑀩𑁆𑀩𑀢𑁆𑀢𑀺𑀢𑀲𑁆𑀫𑀺𑀁 𑀭𑀼𑀓𑁆𑀔𑀲𑁆𑀫𑀺𑀁, 𑀚𑁂𑀢𑀼𑀬𑁆𑀬𑀸𑀦𑁂 𑀫𑀦𑁄𑀭𑀫𑁂;

𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀲𑁆𑀲𑀫𑁆𑀳𑀺, 𑀧𑀘𑁆𑀙𑀸 𑀩𑀳𑀺 𑀅𑀳𑁄𑀲𑀺 𑀲𑁄.

𑀤𑁂𑀯𑀸𑀢𑀺𑀤𑁂𑀯𑁄 𑀤𑁂𑀯𑀲𑁆𑀲, 𑀢𑀲𑁆𑀲 𑀯𑀼𑀤𑁆𑀥𑀺𑀜𑁆𑀘 𑀧𑀲𑁆𑀲𑀺𑀬;

𑀇𑀤𑀁 𑀞𑀸𑀦 𑀳𑀺𑀢𑀢𑁆𑀣𑀜𑁆𑀘, 𑀢𑀁 𑀲𑀭𑀼𑀓𑁆𑀔𑀁 𑀇𑀥𑀸𑀦𑀬𑀺.

𑀲𑀗𑁆𑀕𑀸𑀫𑀫𑀚𑁆𑀛𑁂 𑀆𑀓𑀸𑀲𑁂, 𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀦𑀸𑀬𑀓𑁄;

𑀢𑀫𑀁 𑀢𑀫𑁄𑀦𑀼𑀤𑁄 𑀢𑁂𑀲𑀁, 𑀦𑀸𑀕𑀸𑀦𑀁 𑀳𑀺𑀁𑀲𑀦𑀁 𑀅𑀓𑀸.

𑀅𑀲𑁆𑀲𑀸𑀲𑁂𑀦𑁆𑀢𑁄 𑀪𑀬𑀝𑁆𑀝𑁂 𑀢𑁂, 𑀆𑀮𑁄𑀓𑀁 𑀧𑀯𑀺𑀤𑁆𑀥𑀁𑀲𑀬𑀺;

𑀢𑁂 𑀤𑀺𑀲𑁆𑀯𑀸 𑀲𑀼𑀕𑀢𑀁 𑀢𑀼𑀝𑁆𑀞𑀸, 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼 𑀲𑀢𑁆𑀣𑀼𑀦𑁄.

𑀢𑁂𑀲𑀁 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀸𑀫𑀕𑁆𑀕𑀺𑀓𑀭𑀡𑀁 𑀚𑀺𑀦𑁄;

𑀉𑀪𑁄’𑀧𑀺 𑀢𑁂 𑀧𑀢𑀻𑀢𑀸 𑀢𑀁, 𑀧𑀮𑁆𑀮𑀗𑁆𑀓𑀁 𑀫𑀼𑀦𑀺𑀦𑁄 𑀅𑀤𑀼𑀁.

𑀲𑀢𑁆𑀣𑀸 𑀪𑀽𑀫𑀺𑀕𑀢𑁄 𑀢𑀢𑁆𑀣, 𑀧𑀲𑀻𑀤𑀺𑀲𑁆𑀯𑀸𑀦 𑀆𑀲𑀦𑁂;

𑀢𑁂𑀳𑀺 𑀤𑀺𑀩𑁆𑀩𑀦𑁆𑀦𑀧𑀸𑀦𑁂𑀳𑀺, 𑀦𑀸𑀕𑀭𑀸𑀚𑁂𑀳𑀺 𑀢𑀧𑁆𑀧𑀺𑀢𑁄.

𑀢𑁂 𑀚𑀮𑀝𑁆𑀞𑁂 𑀢𑀮𑀝𑁆𑀞𑁂 𑀘, 𑀪𑀼𑀚𑀕𑁂’𑀲𑀻𑀢𑀺𑀓𑁄𑀝𑀺𑀬𑁄;

𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀦𑀸𑀬𑀓𑁄.

𑀫𑀳𑁄𑀤𑀭𑀲𑁆𑀲 𑀦𑀸𑀕𑀲𑁆𑀲, 𑀫𑀸𑀢𑀼𑀮𑁄 𑀫𑀡𑀺𑀅𑀓𑁆𑀔𑀺𑀓𑁄;

𑀓𑀮𑁆𑀬𑀸𑀡𑀺𑀬𑀁 𑀦𑀸𑀕𑀭𑀸𑀚𑀸, 𑀬𑀼𑀤𑁆𑀥𑀁 𑀓𑀸𑀢𑀼𑀁 𑀢𑀳𑀺𑀁 𑀕𑀢𑁄.

𑀩𑀼𑀤𑁆𑀥𑀕𑀸𑀫𑀫𑁆𑀳𑀺 𑀧𑀞𑀫𑁂, 𑀲𑀼𑀢𑁆𑀯𑀸 𑀲𑀤𑁆𑀥𑀫𑁆𑀫𑀤𑁂𑀲𑀦𑀁;

𑀞𑀺𑀢𑁄 𑀲𑀭𑀡𑀲𑀻𑀮𑁂𑀲𑀼, 𑀢𑀢𑁆𑀣𑀸’𑀬𑀸𑀘𑀺 𑀢𑀣𑀸𑀕𑀢𑀁.

𑀫𑀳𑀢𑀻 𑀅𑀦𑀼𑀓𑀫𑁆𑀧𑀸𑀦𑁄, 𑀓𑀢𑀸 𑀦𑀸𑀣 𑀢𑀬𑀸 𑀅𑀬𑀁;

𑀢𑀯𑀸𑀦𑀸𑀕𑀫𑀦𑁂 𑀲𑀩𑁆𑀩𑁂, 𑀫𑀬𑀁 𑀪𑀲𑁆𑀫𑀻 𑀪𑀯𑀸𑀫𑀳𑁂.

𑀅𑀦𑀼𑀓𑀫𑁆𑀧𑀸 𑀫𑀳𑀻 𑀧𑀺𑀢𑁂, 𑀯𑀺𑀲𑀼𑀁 𑀳𑁄𑀢𑀼 𑀫𑀳𑁄𑀤𑀬;

𑀧𑀼𑀦𑀭𑀸𑀕𑀫𑀦𑁂𑀦𑁂𑀢𑁆𑀣, 𑀯𑀸𑀲𑀪𑀽𑀫𑀺𑀁 𑀫𑀫𑀸 𑀫𑀫.

𑀅𑀥𑀺𑀯𑀸𑀲𑀬𑀺𑀢𑁆𑀯𑀸 𑀪𑀕𑀯𑀸, 𑀢𑀼𑀡𑁆𑀳𑀺𑀪𑀸𑀯𑁂 𑀦𑀺𑀥𑀸𑀕𑀫𑀁;

𑀧𑀢𑀺𑀝𑁆𑀞𑀸𑀧𑁂𑀲𑀺 𑀢𑀢𑁆𑀣𑁂𑀯, 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁.

𑀢𑀜𑁆𑀘𑀧𑀺 ¶ 𑀭𑀸𑀚𑀸𑀬𑀢𑀦𑀁, 𑀧𑀮𑁆𑀮𑀜𑁆𑀘𑀗𑁆𑀓 𑀫𑀳𑀸𑀭𑀳𑀁;

𑀅𑀧𑁆𑀧𑁂𑀲𑀺 𑀦𑀸𑀕𑀭𑀸𑀚𑀽𑀦𑀁, 𑀮𑁄𑀓𑀦𑀸𑀣𑁄 𑀦𑀫𑀲𑁆𑀲𑀺𑀢𑀼𑀁.

𑀧𑀭𑀺𑀪𑁄𑀕𑀘𑁂𑀢𑀺𑀬𑀁 𑀫𑀬𑁆𑀳𑀁, 𑀦𑀸𑀕𑀭𑀸𑀚𑀸 𑀦𑀫𑀲𑁆𑀲𑀣;

𑀢𑀁 𑀪𑀯𑀺𑀲𑁆𑀲𑀢𑀺 𑀯𑁄𑀢𑀸𑀢𑀸, 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘.

𑀇𑀘𑁆𑀘𑁂𑀯𑀫𑀸𑀤𑀺𑀁 𑀲𑀼𑀕𑀢𑁄, 𑀦𑀸𑀕𑀸𑀦𑀁 𑀅𑀦𑀼𑀲𑀸𑀲𑀦𑀁;

𑀓𑀢𑁆𑀯𑀸 𑀚𑁂𑀢𑀯𑀦𑀁 𑀏𑀯, 𑀕𑀢𑁄 𑀮𑁄𑀓𑀸𑀦𑀼𑀓𑀫𑁆𑀧𑀓𑁄𑀢𑀺.

𑀩𑁄𑀥𑀺𑀢𑁄 𑀅𑀝𑁆𑀞𑀫𑁂 𑀯𑀲𑁆𑀲𑁂, 𑀯𑀲𑀁 𑀚𑁂𑀢𑀯𑀦𑁂 𑀚𑀺𑀦𑁄;

𑀦𑀸𑀣𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀦𑀁, 𑀲𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄.

𑀤𑀼𑀢𑀺𑀬𑁂 𑀤𑀺𑀯𑀲𑁂 𑀪𑀢𑁆𑀢-𑀓𑀸𑀮𑁂 𑀆𑀭𑁄𑀘𑀺𑀢𑁂 𑀚𑀺𑀦𑁄;

𑀭𑀫𑁆𑀫𑁂 𑀯𑁂𑀲𑀸𑀔𑀫𑀸𑀲𑀫𑁆𑀳𑀺, 𑀧𑀼𑀡𑁆𑀡𑀫𑀸𑀬𑀁 𑀫𑀼𑀦𑀺𑀲𑁆𑀲𑀭𑁄.

𑀢𑀢𑁆𑀣𑁂𑀯 𑀧𑀸𑀭𑀼𑀧𑀺𑀢𑁆𑀯𑀸𑀦, 𑀲𑀗𑁆𑀖𑀸𑀝𑀺𑀁 𑀧𑀢𑁆𑀢𑀫𑀸𑀤𑀺𑀬;

𑀆𑀕𑀸 𑀓𑀮𑁆𑀬𑀸𑀡𑀺𑀤𑁂𑀲𑀁 𑀢𑀁, 𑀫𑀡𑀺𑀅𑀓𑁆𑀔𑀺𑀦𑀺𑀯𑁂𑀲𑀦𑀁.

𑀓𑀮𑁆𑀬𑀸𑀡𑀺 𑀘𑁂𑀢𑀺𑀬𑀞𑀸𑀦𑁂, 𑀓𑀢𑁂 𑀭𑀢𑀦𑀫𑀡𑁆𑀟𑀧𑁂;

𑀫𑀳𑀸𑀭𑀳𑀫𑁆𑀳𑀺 𑀧𑀮𑁆𑀮𑀗𑁆𑀓𑁂, 𑀲𑀳𑀲𑀗𑁆𑀖𑁂𑀦𑀼’𑀧𑀸𑀯𑀺𑀲𑀺.

𑀤𑀺𑀩𑁆𑀩𑁂𑀳𑀺 𑀔𑀚𑁆𑀚𑀪𑁄𑀚𑁆𑀚𑁂𑀳𑀺, 𑀲𑀕𑀡𑁄 𑀲𑀕𑀡𑀁 𑀚𑀺𑀦𑀁;

𑀦𑀸𑀕𑀭𑀸𑀚𑀸 𑀥𑀫𑁆𑀫𑀭𑀸𑀚𑀁, 𑀲𑀦𑁆𑀢𑀧𑁆𑀧𑁂𑀲𑀺 𑀲𑀼𑀫𑀸𑀦𑀲𑁄.

𑀢𑀢𑁆𑀣 𑀥𑀫𑁆𑀫𑀁 𑀤𑁂𑀲𑀬𑀺𑀢𑁆𑀯𑀸, 𑀲𑀢𑁆𑀣𑀸 𑀮𑁄𑀦𑀼𑀓𑀫𑁆𑀧𑀓𑁄;

𑀉𑀕𑁆𑀕𑀦𑁆𑀢𑁆𑀯𑀸 𑀲𑀼𑀫𑀦𑁂 𑀓𑀽𑀝𑁂, 𑀧𑀤𑀁 𑀤𑀲𑁆𑀲𑁂𑀲𑀺 𑀦𑀸𑀬𑀓𑁄.

𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀲𑀳𑀲𑀗𑁆𑀖𑁄 𑀬𑀣𑀸𑀲𑀼𑀔𑀁;

𑀤𑀺𑀯𑀸 𑀯𑀺𑀳𑀸𑀭𑀁 𑀓𑀢𑁆𑀯𑀸𑀦, 𑀤𑀻𑀖𑀯𑀸𑀧𑀺 𑀫𑀼𑀧𑀸𑀕𑀫𑀺.

𑀢𑀢𑁆𑀣 ¶ 𑀘𑁂𑀢𑀺𑀬𑀞𑀸𑀦𑀫𑁆𑀳𑀺, 𑀲𑀲𑀗𑁆𑀖𑁄𑀯 𑀦𑀺𑀲𑀻𑀤𑀺𑀬;

𑀲𑀫𑀸𑀥𑀺𑀁 𑀅𑀧𑁆𑀧𑀬𑀻 𑀦𑀸𑀣𑁄, 𑀞𑀸𑀦𑀸𑀕𑀸𑀭𑀯𑀧𑀢𑁆𑀢𑀺𑀬𑀸.

𑀢𑀢𑁄 𑀯𑀼𑀝𑁆𑀞𑀸𑀬 𑀞𑀸𑀦𑀫𑁆𑀳𑀸, 𑀞𑀸𑀦𑀸𑀞𑀸𑀦𑁂𑀲𑀼 𑀓𑁄𑀯𑀺𑀤𑁄;

𑀫𑀳𑀸𑀫𑁂𑀖𑀯𑀦𑀸𑀭𑀸𑀫-𑀞𑀸𑀦𑀫𑀸𑀕 𑀫𑀳𑀸𑀫𑀼𑀦𑀺.

𑀫𑀳𑀸𑀩𑁄𑀥𑀺𑀞𑀺𑀢𑀞𑀸𑀦𑁂, 𑀦𑀺𑀲𑀻𑀤𑀺𑀢𑁆𑀯𑀸 𑀲𑀲𑀸𑀯𑀓𑁄;

𑀲𑀫𑀸𑀥𑀺𑀁 𑀅𑀧𑁆𑀧𑀬𑀻 𑀦𑀸𑀣𑁄, 𑀫𑀳𑀸𑀣𑀽𑀧𑀞𑀺𑀢𑁂 𑀢𑀣𑀸.

𑀣𑀽𑀧𑀸𑀭𑀸𑀫𑀫𑁆𑀳𑀺 𑀣𑀽𑀧𑀲𑁆𑀲, 𑀞𑀺𑀢𑀞𑀸𑀦𑁂 𑀢𑀣𑁂𑀯 𑀘;

𑀲𑀫𑀸𑀥𑀺𑀢𑁄’𑀣 𑀯𑀼𑀝𑁆𑀞𑀸𑀬, 𑀲𑀺𑀮𑀸𑀘𑁂𑀢𑀺𑀬𑀞𑀸𑀦𑀕𑁄.

𑀲𑀳𑀸𑀕𑀢𑁂 𑀤𑁂𑀯𑀕𑀡𑁄, 𑀕𑀡𑀻 𑀲𑀫𑀦𑀼𑀲𑀸𑀲𑀺𑀬;

𑀢𑀢𑁄 𑀚𑁂𑀢𑀯𑀦𑀁 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀲𑀩𑁆𑀩𑀢𑁆𑀣𑀓𑁄 𑀅𑀕𑀸.

𑀏𑀯𑀁 𑀮𑀗𑁆𑀓𑀸𑀬 𑀦𑀸𑀣𑁄, 𑀳𑀺𑀢𑀫𑀫𑀺𑀢𑀫𑀢𑀻 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄;

𑀢𑀲𑁆𑀫𑀺𑀁 𑀓𑀸𑀮𑀫𑁆𑀳𑀺 𑀮𑀁𑀓𑀸𑀲𑀼𑀭𑀪𑀼𑀚𑀕𑀕𑀡𑀸𑀤𑀻𑀦𑀫𑀢𑁆𑀣𑀜𑁆𑀘 𑀧𑀲𑁆𑀲𑀁;

𑀆𑀕𑀸 𑀢𑀺𑀓𑁆𑀔𑀢𑁆𑀢𑀼𑀫𑁂𑀢𑀁 𑀅𑀢𑀺𑀯𑀺𑀧𑀼𑀮𑀤𑀬𑁄 𑀮𑁄𑀓𑀤𑀻𑀧𑁄 𑀲𑀼𑀤𑀻𑀧𑀁;

𑀤𑀻𑀧𑁄 𑀢𑁂𑀦𑀸𑀬𑀫𑀸𑀲𑀺 𑀲𑀼𑀚𑀦𑀩𑀳𑀼𑀫𑀦𑁄 𑀥𑀫𑁆𑀫𑀤𑀻𑀧𑀸𑀯 𑀪𑀸𑀲𑀻𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀳𑀸𑀲𑀫𑁆𑀫𑀢 ¶ 𑀭𑀸𑀚𑀲𑁆𑀲, 𑀯𑀁𑀲𑀚𑁄 𑀳𑀺 𑀫𑀳𑀸𑀫𑀼𑀦𑀺;

𑀓𑀧𑁆𑀧𑀲𑁆𑀲𑀸𑀤𑀺𑀫𑁆𑀳𑀺 𑀭𑀸𑀚𑀸’𑀲𑀺, 𑀫𑀳𑀸𑀲𑀫𑁆𑀫𑀢𑀦𑀸𑀫𑀓𑁄.

𑀭𑁄𑀚𑁄 𑀘 𑀯𑀭𑀭𑁄𑀚𑁄 𑀘, 𑀢𑀣𑀸 𑀓𑀮𑁆𑀬𑀸𑀡𑀓𑀸 𑀤𑀼𑀯𑁂;

𑀉𑀧𑁄𑀲𑀣𑁄 𑀘 𑀫𑀦𑁆𑀥𑀸𑀢𑀸, 𑀘𑀭𑀓𑁄’𑀧𑀘𑀭𑀸 𑀤𑀼𑀯𑁂.

𑀘𑁂𑀢𑀻𑀬𑁄 𑀫𑀼𑀘𑀮𑁄 𑀘𑁂𑀯, 𑀫𑀳𑀸𑀫𑀽𑀘𑀮𑀦𑀸𑀫𑀓𑁄;

𑀫𑀼𑀘𑀮𑀺𑀦𑁆𑀤𑁄 𑀲𑀸𑀕𑀭𑁄 𑀘𑁂𑀯, 𑀲𑀸𑀕𑀭𑁄 𑀤𑁂𑀯 𑀯𑀦𑀸𑀫𑀓𑁄.

𑀪𑀭𑀢𑁄 𑀪𑀕𑀻𑀭𑀣𑁄 𑀘𑁂𑀯, 𑀭𑀼𑀘𑀺 𑀘 𑀲𑀼𑀭𑀼𑀘𑀺 𑀧𑀺𑀘;

𑀧𑀢𑀸𑀧𑁄 𑀫𑀳𑀸𑀧𑀢𑀸𑀧𑁄, 𑀧𑀦𑀸𑀤𑀸 𑀘 𑀢𑀣𑀸 𑀤𑀼𑀯𑁂.

𑀲𑀼𑀤𑀲𑁆𑀲𑀦𑁄 𑀘 𑀦𑁂𑀭𑀼 𑀘, 𑀢𑀣𑀸 𑀏𑀯 𑀤𑀼𑀯𑁂 𑀤𑀼𑀯𑁂;

𑀧𑀘𑁆𑀙𑀺𑀫𑀸 𑀘𑀸’𑀢𑀺 𑀭𑀸𑀚𑀸𑀦𑁄, 𑀢𑀲𑁆𑀲 𑀧𑀼𑀢𑁆𑀢𑀧𑀧𑀼𑀢𑁆𑀢𑀓𑀸.

𑀅𑀲𑀁𑀔𑀺𑀬𑀸𑀬𑀼𑀓𑀸 𑀏𑀢𑁂, 𑀅𑀝𑁆𑀞𑀯𑀻𑀲𑀢𑀺 𑀪𑀽𑀫𑀺𑀧𑀸;

𑀓𑀼𑀲𑀸𑀯𑀢𑀺𑀁 𑀭𑀸𑀚𑀕𑀳𑀁, 𑀫𑀺𑀣𑀺𑀮𑀜𑁆𑀘𑀸𑀧𑀺 𑀆𑀯𑀲𑀼𑀁.

𑀢𑀢𑁄 𑀲𑀢𑀜𑁆𑀘 𑀭𑀸𑀚𑀦𑁄, 𑀙𑀧𑁆𑀧𑀜𑁆𑀜𑀸𑀲 𑀘 𑀲𑀝𑁆𑀞𑀺 𑀘;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲𑀸 𑀘 𑀢𑀢𑁄 𑀧𑀭𑁂.

𑀤𑁆𑀯𑀢𑁆𑀢𑀺𑀁𑀲 𑀅𑀝𑁆𑀞𑀯𑀻𑀲𑀸 𑀘, 𑀤𑁆𑀯𑀸𑀯𑀻𑀲𑀢𑀺 𑀢𑀢𑁄 𑀧𑀭𑁂;

𑀅𑀝𑁆𑀞𑀸𑀭𑀲 𑀲𑀢𑁆𑀢𑀭𑀲, 𑀧𑀜𑁆𑀘𑀤𑀲 𑀘𑀢𑀼𑀤𑁆𑀤𑀲.

𑀦𑀯 𑀲𑀢𑁆𑀢 𑀤𑁆𑀯𑀸𑀤𑀲 𑀘, 𑀧𑀜𑁆𑀘𑀯𑀻𑀲 𑀢𑀢𑁄𑀧𑀭𑁂;

𑀧𑀜𑁆𑀘𑀯𑀻𑀲𑀁 𑀤𑁆𑀯𑀸𑀤𑀲 𑀘, 𑀤𑁆𑀯𑀸𑀤𑀲𑀜𑁆𑀘 𑀦𑀯𑀸 𑀧𑀺𑀘.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀫𑀔𑀸𑀤𑁂𑀯𑀸𑀤𑀺𑀓𑀸𑀧𑀺 𑀘;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀴𑀸𑀭𑀸𑀚𑀦𑀓𑀸𑀤𑀬𑁄.

𑀲𑁄𑀴𑀲 𑀬𑀸𑀯 𑀑𑀓𑁆𑀓𑀸𑀢𑀁, 𑀧𑀧𑀼𑀢𑁆𑀢𑀸 𑀭𑀸𑀲𑀺𑀢𑁄 𑀇𑀫𑁂;

𑀯𑀺𑀲𑀼𑀁 𑀯𑀺𑀲𑀼𑀁 𑀧𑀼𑀭𑁂 𑀭𑀚𑁆𑀚𑀁, 𑀓𑀫𑀢𑁄 𑀅𑀦𑀼𑀲𑀸𑀲𑀺𑀲𑀼𑀁.

𑀑𑀓𑁆𑀓𑀸𑀫𑀼𑀔𑁄 𑀚𑁂𑀝𑁆𑀞𑀧𑀼𑀢𑁆𑀢𑁄, 𑀑𑀓𑁆𑀓𑀸𑀓𑀲𑀸’𑀲𑀺 𑀪𑀽𑀧𑀢𑀺;

𑀦𑀺𑀧𑀼𑀭𑁄 𑀘𑀦𑁆𑀤𑀻𑀫𑀸 𑀘𑀦𑁆𑀤𑀁-𑀫𑀼𑀔𑁄 𑀘 𑀲𑀺𑀯𑀺 𑀲𑀜𑁆𑀚𑀬𑁄.

𑀯𑁂𑀲𑁆𑀲𑀦𑁆𑀢𑀭 ¶ 𑀫𑀳𑀸𑀭𑀸𑀚𑀸, 𑀚𑀸𑀮𑀻 𑀘 𑀲𑀻𑀳𑀯𑀸𑀳𑀦𑁄;

𑀲𑀻𑀳𑀲𑁆𑀲𑀭𑁄 𑀘 𑀇𑀘𑁆𑀘𑁂𑀢𑁂, 𑀢𑀲𑁆𑀲 𑀧𑀼𑀢𑁆𑀢 𑀧 𑀧𑀼𑀢𑁆𑀢𑀓𑀸.

𑀤𑁆𑀯𑁂𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀲𑀻𑀳𑀲𑁆𑀲𑀭𑀲𑁆𑀲 𑀭𑀸𑀚𑀺𑀦𑁄;

𑀧𑀼𑀢𑁆𑀢 𑀧 𑀧𑀼𑀢𑁆𑀢 𑀭𑀸𑀚𑀸𑀦𑁄, 𑀚𑀬𑀲𑁂𑀦𑁄 𑀢𑀤𑀦𑁆𑀢𑀺𑀫𑁄.

𑀏𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑀓𑁆𑀬𑀭𑀸𑀚𑀸𑀢𑀺 𑀯𑀺𑀲𑁆𑀲𑀼𑀢𑀸;

𑀲𑀻𑀳𑀳𑀦𑀼 𑀫𑀳𑀸𑀭𑀸𑀚𑀸, 𑀚𑀬𑀲𑁂𑀦𑀲𑁆𑀲 𑀅𑀢𑁆𑀭𑀚𑁄.

𑀚𑀬𑀲𑁂𑀦𑀲𑁆𑀲 𑀥𑀻𑀢𑀸 𑀘, 𑀦𑀸𑀫𑁂𑀦𑀸’𑀲𑀺 𑀬𑀲𑁄𑀥𑀭𑀸;

𑀤𑁂𑀯𑀤𑀬𑁂 𑀤𑁂𑀯𑀤𑀳-𑀲𑀓𑁆𑀓𑁄 𑀦𑀸𑀫𑀸’𑀲𑀺 𑀪𑀽𑀧𑀢𑀺.

𑀅𑀜𑁆𑀚𑀦𑁄 𑀘𑀸’𑀣 𑀓𑀘𑁆𑀘𑀸𑀦𑀸, 𑀆𑀲𑀼𑀁 𑀢𑀲𑁆𑀲 𑀲𑀼𑀢𑀸 𑀤𑀼𑀯𑁂;

𑀫𑀳𑁂𑀲𑀻𑀘𑀸’𑀲𑀺 𑀓𑀘𑁆𑀘𑀸𑀦𑀸, 𑀭𑀜𑁆𑀜𑁄 𑀲𑀻𑀳𑀳𑀦𑀼𑀲𑁆𑀲 𑀲𑀸.

𑀆𑀲𑀻 𑀅𑀜𑁆𑀚𑀦𑀲𑀓𑁆𑀓𑀲𑁆𑀲, 𑀫𑀳𑁂𑀲𑀻 𑀲𑀸 𑀬𑀲𑁄𑀥𑀭𑀸;

𑀅𑀜𑁆𑀚𑀦𑀲𑁆𑀲 𑀤𑀼𑀯𑁂 𑀥𑀻𑀢𑀸, 𑀫𑀸𑀬𑀸 𑀘𑀸𑀣 𑀧𑀚𑀸𑀧𑀢𑀺.

𑀧𑀼𑀢𑁆𑀢𑀸 𑀤𑀼𑀯𑁂 𑀤𑀡𑁆𑀟𑀧𑀸𑀡𑀻, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀘 𑀲𑀸𑀓𑀺𑀬𑁄;

𑀧𑀜𑁆𑀘 𑀧𑀼𑀢𑁆𑀢𑀸 𑀤𑀼𑀯𑁂 𑀥𑀻𑀢𑀸, 𑀆𑀲𑀼𑀁 𑀲𑀻𑀳𑀳𑀦𑀼𑀲𑁆𑀲𑀭𑁂.

𑀲𑀼𑀤𑁆𑀥𑁄𑀤𑀦𑁄 𑀥𑁄𑀢𑁄𑀤𑀦𑁄, 𑀲𑀓𑁆𑀓𑀲𑀼𑀓𑁆𑀓𑀫𑀺𑀢𑁄𑀤𑀦𑁄;

𑀅𑀫𑀺𑀢𑀸 𑀧𑀫𑀺𑀢𑀸𑀘𑀸’𑀢𑀺, 𑀇𑀫𑁂 𑀧𑀜𑁆𑀘 𑀇𑀫𑀸 𑀤𑀼𑀯𑁂.

𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲, 𑀫𑀳𑁂𑀲𑀻 𑀅𑀫𑀺𑀢𑀸 𑀅𑀳𑀼;

𑀢𑀲𑁆𑀲𑀸’𑀲𑀼𑀁 𑀪𑀤𑁆𑀤𑀓𑀘𑁆𑀘𑀸𑀦𑀸, 𑀤𑁂𑀯𑀤𑀢𑁆𑀢𑁄 𑀤𑀼𑀯𑁂 𑀲𑀼𑀢𑀸.

𑀫𑀸𑀬𑀸 𑀫𑀳𑀸𑀧𑀚𑀸𑀧𑀢𑀺 𑀘𑁂𑀯, 𑀲𑀼𑀤𑁆𑀥𑁄𑀤𑀦 𑀫𑀳𑁂𑀲𑀻𑀬𑁄;

𑀲𑀼𑀤𑁆𑀥𑁄𑀤𑀦 𑀫𑀳𑀸𑀭𑀜𑁆𑀜𑁄, 𑀧𑀼𑀢𑁆𑀢𑁄 𑀫𑀸𑀬𑀸𑀬 𑀲𑁄 𑀚𑀺𑀦𑁄.

𑀫𑀳𑀸 𑀲𑀫𑁆𑀫𑀢𑀯𑀁𑀲𑀫𑁆𑀳𑀺, 𑀅𑀲𑀫𑁆𑀪𑀺𑀦𑁆𑀦𑁂 𑀫𑀳𑀸𑀫𑀼𑀦𑀺;

𑀏𑀯𑀁 𑀧𑀯𑀢𑁆𑀢𑁂 𑀲𑀜𑁆𑀚𑀸𑀢𑁄, 𑀲𑀩𑁆𑀩 𑀔𑀢𑁆𑀣𑀺𑀬 𑀫𑀼𑀤𑁆𑀥𑀦𑀺.

𑀲𑀺𑀤𑁆𑀥𑀢𑁆𑀣𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀸 𑀅𑀳𑀼;

𑀫𑀳𑁂𑀲𑀻 𑀪𑀤𑁆𑀤𑀓𑀘𑁆𑀘𑀸𑀦𑀸, 𑀧𑀼𑀢𑁆𑀢𑁄 𑀢𑀲𑁆𑀲𑀸’𑀲𑀺 𑀭𑀸𑀳𑀼𑀮𑁄.

𑀩𑀺𑀫𑁆𑀩𑀺𑀲𑀸𑀭𑁄 𑀘 𑀲𑀺𑀤𑁆𑀥𑀢𑁆𑀣-𑀓𑀼𑀫𑀸𑀭𑁄 𑀘 𑀲𑀳𑀸𑀬𑀓𑀸;

𑀉𑀪𑀺𑀦𑁆𑀦𑀁 𑀧𑀺𑀢𑀭𑁄 𑀘𑀸𑀧𑀺, 𑀲𑀳𑀸𑀬𑀸𑀏𑀯 𑀢𑁂 𑀅𑀳𑀼𑀁.

𑀩𑁄𑀥𑀺𑀲𑀢𑁆𑀢𑁄 𑀩𑀺𑀫𑁆𑀩𑀺𑀲𑀸𑀭𑀸, 𑀧𑀜𑁆𑀘𑀯𑀲𑁆𑀲𑀸𑀥𑀺𑀓𑁄 𑀅𑀳𑀼;

𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸, 𑀩𑁄𑀥𑀺𑀲𑀢𑁆𑀢𑁄’𑀪𑀺𑀦𑀺𑀓𑁆𑀔𑀫𑀺.

𑀧𑀤𑀳𑀺𑀢𑁆𑀯𑀸𑀦 ¶ 𑀙𑀩𑁆𑀩𑀲𑁆𑀲𑀁, 𑀩𑁄𑀥𑀺𑀁 𑀧𑀢𑁆𑀯𑀸 𑀓𑀫𑁂𑀦 𑀘;

𑀧𑀜𑁆𑀘𑀢𑀺𑀁𑀲𑁄 𑀣 𑀯𑀬𑀲𑀸, 𑀩𑀺𑀫𑁆𑀩𑀺𑀲𑀸𑀭𑀫𑀼𑀧𑀸𑀕𑀫𑀺.

𑀩𑀺𑀫𑁆𑀩𑀺𑀲𑀸𑀭𑁄 𑀧𑀦𑁆𑀦𑀭𑀲-𑀯𑀲𑁆𑀲𑁄’𑀣 𑀧𑀻𑀢𑀭𑀁 𑀲𑀬𑀁;

𑀅𑀪𑀺𑀲𑀺𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀧𑀢𑁆𑀢𑁄 𑀭𑀚𑁆𑀚𑀲𑁆𑀲 𑀢𑀲𑁆𑀲 𑀢𑀼.

𑀧𑀢𑁆𑀢𑁂 𑀲𑁄𑀴𑀲𑀫𑁂 𑀯𑀲𑁆𑀲𑁂, 𑀲𑀢𑁆𑀣𑀸 𑀥𑀫𑁆𑀫𑀫𑀤𑁂𑀲𑀬𑀺;

𑀤𑁆𑀯𑀸𑀧𑀜𑁆𑀜𑀸𑀲𑁂𑀯 𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀲𑁄 𑀧𑀦.

𑀭𑀚𑁆𑀚𑁂 𑀲𑀫𑀸 𑀧𑀦𑁆𑀦𑀭𑀲, 𑀧𑀼𑀩𑁆𑀩𑁂 𑀚𑀺𑀦𑀲𑀫𑀸𑀕𑀫𑀸;

𑀲𑀢𑁆𑀢𑀢𑀺𑀁𑀲 𑀲𑀫𑀸 𑀢𑀲𑁆𑀲, 𑀥𑀭𑀫𑀸𑀦𑁂 𑀢𑀣𑀸𑀕𑀢𑁂.

𑀩𑀺𑀫𑁆𑀩𑀺𑀲𑀸𑀭𑀲𑀼𑀢𑁄’𑀚𑀸𑀢-𑀲𑀢𑁆𑀢𑀼𑀢𑀁 𑀖𑀸𑀢𑀻𑀬𑀸’𑀫𑀢𑀺;

𑀭𑀚𑁆𑀚𑀁 𑀤𑁆𑀯𑀢𑁆𑀢𑀺𑀁𑀲𑀯𑀲𑁆𑀲𑀸𑀦𑀺, 𑀫𑀳𑀸𑀫𑀺𑀢𑁆𑀢𑀤𑁆𑀤𑀼𑀓𑀸𑀭𑀬𑀻.

𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑀲𑁆𑀲𑁂, 𑀅𑀝𑁆𑀞𑀫𑁂 𑀫𑀼𑀦𑀺 𑀦𑀺𑀩𑁆𑀩𑀼𑀢𑁄;

𑀧𑀘𑁆𑀙𑀸 𑀲𑁄 𑀓𑀸𑀭𑀬𑀻 𑀭𑀚𑁆𑀚𑀁, 𑀯𑀲𑁆𑀲𑀸𑀦𑀺 𑀘𑀢𑀼𑀯𑀻𑀲𑀢𑀺.

𑀢𑀣𑀸𑀕𑀢𑁄 𑀲𑀓𑀮𑀮𑁄𑀓𑀕𑁆𑀕𑀢𑀁 𑀕𑀢𑁄;

𑀅𑀦𑀺𑀘𑁆𑀘𑀢𑀸𑀯 𑀲𑀫𑀯𑀲𑁄 𑀉𑀧𑀸𑀕𑀢𑁄;

𑀇𑀢𑀺’𑀥 𑀬𑁄 𑀪𑀬𑀚𑀦𑀦𑀺𑀁 𑀅𑀦𑀺𑀘𑁆𑀘𑀢𑀁,

𑀅𑀯𑁂𑀓𑁆𑀔𑀢𑁂 𑀲 𑀪𑀯𑀢𑀺 𑀤𑀼𑀓𑁆𑀔𑀧𑀸𑀭𑀕𑀽𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀜𑁆𑀘𑀦𑁂𑀢𑁆𑀢𑁄 ¶ 𑀚𑀺𑀦𑁄 𑀧𑀜𑁆𑀘-𑀘𑀢𑁆𑀢𑀸𑀮𑀻𑀲𑀲𑀫𑀸’𑀲𑀫𑁄;

𑀞𑀢𑁆𑀯𑀸 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺, 𑀓𑀢𑁆𑀯𑀸 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸.

𑀓𑀼𑀲𑀺𑀦𑀸𑀭𑀸𑀬𑀬𑀫𑀓-𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀭𑁂;

𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀲𑁄, 𑀤𑀻𑀧𑁄 𑀮𑁄𑀓𑀲𑁆𑀲 𑀦𑀺𑀩𑁆𑀩𑀼𑀢𑁄.

𑀲𑀗𑁆𑀔𑁆𑀬𑀸𑀧𑀣𑀫𑀢𑀺𑀓𑁆𑀓𑀦𑁆𑀢𑀸, 𑀪𑀺𑀓𑁆𑀔𑀽 𑀢𑀢𑁆𑀣 𑀲𑀫𑀸𑀕𑀢𑀸;

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑀲𑁆𑀲𑀸, 𑀲𑀼𑀤𑁆𑀥𑀸 𑀤𑁂𑀯𑀸 𑀢𑀣𑁂𑀯 𑀘.

𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀢𑁂𑀲𑀼 𑀧𑀸𑀫𑁄𑀓𑁆𑀔𑀪𑀺𑀓𑁆𑀔𑀯𑁄;

𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄𑀯, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀼.

𑀲𑀢𑁆𑀣𑀼𑀲𑀭𑀻𑀭𑀲𑀸𑀭𑀻𑀭-𑀥𑀸𑀢𑀼𑀓𑀺𑀘𑁆𑀘𑀸𑀦𑀺 𑀓𑀸𑀭𑀺𑀬;

𑀇𑀘𑁆𑀙𑀦𑁆𑀢𑁄 𑀲𑁄 𑀫𑀳𑀸𑀣𑁂𑀭𑁄, 𑀲𑀢𑁆𑀣𑀼 𑀥𑀫𑁆𑀫𑀘𑀺𑀭𑀝𑁆𑀞𑀺𑀢𑀺𑀁.

𑀮𑁄𑀓𑀦𑀸𑀣𑁂 𑀤𑀲𑀩𑀮𑁂, 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂;

𑀤𑀼𑀩𑁆𑀪𑀸𑀲𑀺𑀢𑀁 𑀲𑀼𑀪𑀤𑁆𑀤𑀲𑁆𑀲, 𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀭𑀁.

𑀲𑀭𑀁 𑀘𑀻𑀯𑀭𑀤𑀸𑀦𑀜𑁆𑀘, 𑀲𑀫𑀢𑁆𑀢𑁂 𑀞𑀧𑀦𑀁 𑀢𑀣𑀸;

𑀲𑀤𑁆𑀥𑀫𑁆𑀫𑀞𑀧𑀦𑀢𑁆𑀣𑀸𑀬, 𑀫𑀼𑀦𑀺𑀦𑀸’𑀦𑀼𑀕𑁆𑀕𑀳𑀁 𑀓𑀢𑀁.

𑀓𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑀁𑀕𑀻𑀢𑀺𑀁, 𑀲𑀫𑁆𑀩𑀼𑀤𑁆𑀥𑀸𑀦𑀫𑀢𑁂 𑀬𑀢𑀺;

𑀦𑀯𑀗𑁆𑀕𑀲𑀸𑀲𑀦𑀥𑀭𑁂, 𑀲𑀩𑁆𑀩𑀗𑁆𑀕𑀲𑀫𑀼𑀧𑀸𑀕𑀢𑁂.

𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑁂𑀬𑁂𑀯, 𑀫𑀳𑀸𑀔𑀻𑀡𑀸𑀲𑀯𑁂 𑀯𑀭𑁂;

𑀲𑀫𑁆𑀫𑀦𑁆𑀦𑀺 𑀏𑀓𑁂𑀦𑀽𑀦𑁂 𑀢𑀼, 𑀆𑀦𑀦𑁆𑀤𑀢𑁆𑀣𑁂𑀭𑀓𑀸𑀭𑀡𑀸.

𑀧𑀼𑀦 𑀆𑀦𑀦𑁆𑀤𑀢𑁆𑀣𑁂𑀭𑀸’𑀧𑀺, 𑀪𑀺𑀓𑁆𑀔𑀽𑀳𑀺 𑀅𑀪𑀺𑀬𑀸𑀘𑀺𑀢𑁄;

𑀲𑀫𑁆𑀫𑀦𑁆𑀦𑀺 𑀓𑀸𑀢𑀼𑀁 𑀲𑀁𑀕𑀻𑀢𑀺𑀁, 𑀲𑀸 𑀦 𑀲𑀓𑁆𑀓𑀸 𑀳𑀺 𑀢𑀁 𑀯𑀺𑀦𑀸.

𑀲𑀸𑀥𑀼𑀓𑀻𑀴𑀦𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀁 𑀥𑀸𑀢𑀼𑀪𑀸𑀚𑀦𑀁;

𑀇𑀘𑁆𑀘𑀤𑁆𑀥𑀫𑀸𑀲𑀁 𑀔𑁂𑀧𑁂𑀢𑁆𑀯𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑀸.

𑀯𑀲𑁆𑀲𑀁 𑀯𑀲𑀁 𑀭𑀸𑀚𑀕𑀳𑁂, 𑀓𑀲𑁆𑀲𑀸𑀫 𑀥𑀫𑁆𑀫𑀲𑀗𑁆𑀕𑀳𑀁;

𑀦𑀸𑀜𑁆𑀜𑁂𑀳𑀺 𑀢𑀢𑁆𑀢 𑀯𑀢𑁆𑀣𑀩𑁆𑀩-𑀫𑀺𑀢𑀺 𑀓𑀢𑁆𑀯𑀸𑀦 𑀦𑀺𑀘𑁆𑀙𑀬𑀁.

𑀲𑁄𑀓𑀸𑀢𑀼𑀭𑀁 ¶ 𑀢𑀢𑁆𑀣 𑀢𑀢𑁆𑀣, 𑀅𑀲𑁆𑀲𑀸𑀲𑁂𑀦𑁆𑀢𑁄 𑀫𑀳𑀸𑀚𑀦𑀁;

𑀚𑀫𑁆𑀩𑀼𑀤𑀻𑀧𑀫𑁆𑀳𑀺 𑀢𑁂 𑀣𑁂𑀭𑀸, 𑀯𑀺𑀘𑀭𑀺𑀢𑁆𑀯𑀸𑀦 𑀘𑀸𑀭𑀺𑀓𑀁.

𑀆𑀲𑀴𑁆𑀳𑀺𑀲𑀼𑀓𑁆𑀓𑀧𑀓𑁆𑀔𑀫𑁆𑀳𑀺, 𑀲𑀼𑀓𑁆𑀓𑀧𑀓𑁆𑀔𑀞𑀺𑀢𑀢𑁆𑀣𑀺𑀓𑀸;

𑀉𑀧𑀸𑀕𑀫𑀼𑀁 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑀢𑀢𑁆𑀣𑁂𑀯 𑀯𑀲𑁆𑀲𑀽𑀧𑀕𑀢𑀸, 𑀢𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄;

𑀣𑁂𑀭𑀸 𑀣𑀺𑀭𑀕𑀼𑀡𑀽𑀧𑁂𑀢𑀸, 𑀲𑀫𑁆𑀩𑀼𑀤𑁆𑀥𑀫𑀢𑀓𑁄𑀯𑀺𑀤𑀸.

𑀯𑀲𑁆𑀲𑀸𑀦𑀁 𑀧𑀞𑀫𑀁 𑀫𑀸𑀲𑀁, 𑀲𑀩𑁆𑀩𑀲𑁂𑀦𑀸𑀲𑀦𑁂𑀲𑀼’𑀧𑀺;

𑀓𑀸𑀭𑁂𑀲𑀼𑀁 𑀧𑀝𑀺𑀲𑀗𑁆𑀔𑀸𑀭𑀁, 𑀯𑀢𑁆𑀯𑀸𑀦𑀸’𑀚𑀸𑀢𑀲𑀢𑁆𑀢𑀼𑀦𑁄.

𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀸𑀭𑁂, 𑀦𑀺𑀝𑁆𑀞𑀺𑀢𑁂 𑀅𑀳𑀼 𑀪𑀽𑀧𑀢𑀺;

𑀇𑀤𑀸𑀦𑀺 𑀥𑀫𑁆𑀫𑀲𑀁𑀕𑀻𑀢𑀺𑀁, 𑀓𑀭𑀺𑀲𑁆𑀲𑀸𑀫𑀺 𑀫𑀬𑀁 𑀇𑀢𑀺.

𑀓𑀢𑁆𑀢𑀩𑁆𑀩𑀁 𑀓𑀺𑀦𑁆𑀢𑀺𑀧𑀼𑀝𑁆𑀞𑀲𑁆𑀲, 𑀦𑀺𑀲𑀚𑁆𑀚𑀞𑀸𑀦𑀫𑀸𑀤𑀺𑀲𑀼𑀁;

𑀭𑀸𑀚𑀸 𑀓𑀢𑁆𑀣𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀯𑀼𑀢𑁆𑀢𑀞𑀸𑀦𑀫𑁆𑀳𑀺 𑀢𑁂𑀳𑀺 𑀲𑁄.

𑀲𑀻𑀖𑀁 𑀯𑁂𑀪𑀸𑀭𑀲𑁂𑀮𑀲𑁆𑀲, 𑀧𑀲𑁆𑀲𑁂 𑀓𑀸𑀭𑁂𑀲𑀺 𑀫𑀡𑁆𑀟𑀧𑀁;

𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂, 𑀭𑀫𑁆𑀫𑀁 𑀤𑁂𑀯𑀲𑀪𑁄𑀧𑀫𑀁.

𑀲𑀩𑁆𑀩𑀣𑀸 𑀫𑀡𑁆𑀟𑀬𑀺𑀢𑁆𑀯𑀸 𑀢𑀁, 𑀅𑀢𑁆𑀣𑀭𑀸𑀧𑁂𑀲𑀺 𑀢𑀢𑁆𑀣 𑀲𑁄;

𑀪𑀺𑀓𑁆𑀔𑀽𑀦𑀁 𑀕𑀡𑀦𑀸𑀬𑁂𑀯, 𑀅𑀦𑀕𑁆𑀖𑀢𑁆𑀣𑀭𑀡𑀸𑀦𑀺 𑀘.

𑀦𑀺𑀲𑁆𑀲𑀸𑀬 𑀤𑀓𑁆𑀔𑀺𑀡𑀁 𑀪𑀸𑀕𑀁, 𑀉𑀢𑁆𑀢𑀭𑀸𑀫𑀼𑀔𑀫𑀼𑀢𑁆𑀢𑀫𑀁;

𑀣𑁂𑀭𑀸𑀲𑀦𑀁 𑀲𑀼𑀧𑀜𑁆𑀜𑀢𑁆𑀢𑀁, 𑀆𑀲𑀺 𑀢𑀢𑁆𑀣 𑀫𑀳𑀸𑀭𑀳𑀁.

𑀢𑀲𑁆𑀫𑀺𑀁 𑀫𑀡𑁆𑀟𑀧𑀫𑀚𑁆𑀛𑀲𑁆𑀫𑀺𑀁, 𑀧𑀼𑀭𑀢𑁆𑀣𑀫𑀼𑀔𑀫𑀼𑀢𑁆𑀢𑀫𑀁;

𑀥𑀫𑁆𑀫𑀸𑀲𑀦𑀁 𑀲𑀼𑀧𑀜𑁆𑀜𑀢𑁆𑀢𑀁, 𑀅𑀳𑁄𑀲𑀺 𑀲𑀼𑀕𑀢𑀸𑀭𑀳𑀁.

𑀭𑀸𑀚𑀸’𑀭𑁄𑀘𑀬𑀺 𑀣𑁂𑀭𑀸𑀦𑀁, 𑀓𑀫𑁆𑀫𑀁 𑀦𑁄 𑀦𑀺𑀝𑁆𑀞𑀺𑀢𑀁 𑀇𑀢𑀺;

𑀢𑁂 𑀣𑁂𑀭𑀸 𑀣𑁂𑀭𑀫𑀸𑀦𑀦𑁆𑀤-𑀫𑀸𑀦𑀦𑁆𑀤𑀓𑀭𑀫𑀩𑁆𑀭𑀯𑀼𑀁.

𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄 𑀆𑀦𑀦𑁆𑀤, 𑀲𑁂𑀔𑁂𑀦 𑀕𑀫𑀦𑀁 𑀢𑀳𑀺𑀁;

𑀦 𑀬𑀼𑀢𑁆𑀢𑀦𑁆𑀢𑁂 𑀲𑀤𑀢𑁆𑀣𑁂 𑀢𑁆𑀯𑀁, 𑀅𑀧𑁆𑀧𑀫𑀢𑁆𑀢𑁄 𑀢𑀢𑁄 𑀪𑀯.

𑀇𑀘𑁆𑀘𑁂𑀯𑀁 𑀘𑁄𑀤𑀺𑀢𑁄 𑀣𑁂𑀭𑁄, 𑀓𑀢𑁆𑀯𑀸𑀦 𑀯𑀻𑀭𑀺𑀬𑀁 𑀲𑀫𑀁;

𑀇𑀭𑀺𑀬𑀸𑀧𑀣𑀢𑁄 𑀫𑀼𑀢𑁆𑀢𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺.

𑀯𑀲𑁆𑀲𑀸𑀦𑀁 𑀤𑀼𑀢𑀺𑀬𑁂 𑀫𑀸𑀲𑁂, 𑀤𑀼𑀢𑀺𑀬𑁂 𑀤𑀺𑀯𑀲𑁂 𑀧𑀦;

𑀭𑀼𑀘𑀺𑀭𑁂 𑀫𑀡𑁆𑀟𑀧𑁂 𑀢𑀲𑁆𑀫𑀺𑀁, 𑀣𑁂𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑁂.

𑀞𑀧𑁂𑀢𑁆𑀯𑀸’𑀦𑀦𑁆𑀤𑀢𑁆𑀣𑁂𑀭𑀲𑁆𑀲, 𑀅𑀦𑀼𑀘𑁆𑀙𑀯𑀺𑀓𑀫𑀸𑀲𑀦𑀁;

𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼, 𑀅𑀭𑀳𑀦𑁆𑀢𑁄 𑀬𑀣𑀸𑀭𑀳𑀁.

𑀣𑁂𑀭𑁄’𑀭𑀳𑀢𑁆𑀢𑀧𑀢𑁆𑀢𑀺𑀁 ¶ 𑀲𑁄, 𑀜𑀸𑀧𑁂𑀢𑀼𑀁 𑀢𑁂𑀳𑀺 𑀦𑀸𑀕𑀫𑀸;

𑀓𑀼𑀳𑀺𑀁 𑀆𑀦𑀦𑁆𑀤𑀢𑁆𑀣𑁂𑀭𑁄’𑀢𑀺, 𑀯𑀼𑀘𑁆𑀘𑀫𑀸𑀦𑁂 𑀢𑀼 𑀓𑁂𑀳𑀺𑀘𑀺.

𑀦𑀺𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀣𑀯𑀺𑀬𑀸, 𑀕𑀦𑁆𑀢𑁆𑀯𑀸 𑀚𑁄𑀢𑀺𑀧𑀣𑁂𑀦 𑀯𑀸;

𑀦𑀺𑀲𑀻𑀤𑀺 𑀣𑁂𑀭𑁄 𑀆𑀦𑀦𑁆𑀤𑁄, 𑀅𑀢𑁆𑀢𑀦𑁄 𑀞𑀧𑀺𑀢𑀸𑀲𑀦𑁂.

𑀉𑀧𑀸𑀮𑀺𑀣𑁂𑀭𑁄 𑀯𑀺𑀦𑀬𑁂, 𑀲𑁂𑀲𑀥𑀫𑁆𑀫𑁂 𑀅𑀲𑁂𑀲𑀓𑁂;

𑀆𑀦𑀦𑁆𑀤𑀢𑁆𑀣𑁂𑀭𑀫𑀓𑀭𑀼𑀁, 𑀲𑀩𑁆𑀩𑁂 𑀣𑁂𑀭𑀸 𑀥𑀼𑀭𑀦𑁆𑀥𑀭𑁂.

𑀫𑀳𑀸𑀣𑁂𑀭𑁄 𑀲𑀓𑀢𑁆𑀢𑀸𑀦𑀁, 𑀯𑀺𑀦𑀬𑀁 𑀧𑀼𑀘𑁆𑀙𑀺𑀢𑀼𑀁 𑀲𑀬𑀁;

𑀲𑀫𑁆𑀫𑀦𑁆𑀦𑀼’𑀧𑀸𑀮𑀺𑀣𑁂𑀭𑁄 𑀘, 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀢𑀫𑁂𑀯 𑀢𑀼.

𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀺𑀦𑀬𑀁 𑀢𑀫𑀧𑀼𑀘𑁆𑀙𑀺 𑀲𑁄;

𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀺𑀲𑁆𑀲𑀚𑁆𑀚𑁂𑀲𑀺 𑀢𑀫𑁂𑀯 𑀲𑁄.

𑀯𑀺𑀦𑀬𑀜𑁆𑀜𑀽𑀦𑀫𑀕𑁆𑀕𑁂𑀦, 𑀯𑀺𑀲𑁆𑀲𑀚𑁆𑀚𑀺𑀢𑀓𑀫𑁂𑀦 𑀢𑁂;

𑀲𑀩𑁆𑀩𑁂 𑀲𑀚𑁆𑀛𑀸𑀬𑀫𑀓𑀭𑀼𑀁, 𑀯𑀺𑀦𑀬𑀁 𑀦𑀬𑀓𑁄𑀯𑀺𑀤𑀸.

𑀅𑀕𑁆𑀕𑀁 𑀩𑀳𑀼𑀲𑁆𑀲𑀼𑀢𑀸𑀤𑀻𑀦𑀁, 𑀓𑁄𑀲𑀸𑀭𑀓𑁆𑀔𑀁 𑀫𑀳𑁂𑀲𑀺𑀦𑁄;

𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀅𑀢𑁆𑀢𑀸𑀦𑀁, 𑀣𑁂𑀭𑁄 𑀥𑀫𑁆𑀫𑀫𑀧𑀼𑀘𑁆𑀙𑀺 𑀲𑁄.

𑀢𑀣𑀸 𑀲𑀫𑁆𑀫𑀦𑁆𑀦𑀺𑀬’𑀢𑁆𑀢𑀸𑀦𑀁, 𑀥𑀫𑁆𑀫𑀸𑀲𑀦𑀸𑀕𑀢𑁄 𑀲𑀬𑀁;

𑀯𑀺𑀲𑁆𑀲𑀚𑁆𑀚𑁂𑀲𑀺 𑀢𑀫𑀸𑀦𑀦𑁆𑀤-𑀢𑁆𑀣𑁂𑀭𑁄 𑀥𑀫𑁆𑀫𑀫𑀲𑁂𑀲𑀢𑁄.

𑀯𑁂𑀤𑁂𑀳𑀫𑀼𑀦𑀺𑀦𑀸 𑀢𑁂𑀦, 𑀯𑀺𑀲𑁆𑀲𑀚𑁆𑀚𑀺𑀢𑀓𑀫𑁂𑀦 𑀢𑁂;

𑀲𑀩𑁆𑀩𑁂 𑀲𑀚𑁆𑀛𑀸𑀬𑀫𑀓𑀭𑀼𑀁, 𑀥𑀫𑁆𑀫𑀁 𑀥𑀫𑁆𑀫𑀢𑁆𑀣𑀓𑁄𑀯𑀺𑀤𑀸.

𑀏𑀯𑀁 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺, 𑀥𑀫𑁆𑀫𑀲𑀁𑀕𑀻𑀢𑀺 𑀦𑀺𑀝𑁆𑀞𑀺𑀢𑀸;

𑀲𑀩𑁆𑀩𑀮𑁄𑀓𑀳𑀺𑀢𑀢𑁆𑀣𑀸𑀬, 𑀲𑀩𑁆𑀩𑀮𑁄𑀓𑀳𑀺 𑀢𑁂𑀳𑀺 𑀲𑀸.

𑀫𑀳𑀸𑀓𑀲𑁆𑀲𑀧𑀣𑁂𑀭𑁂𑀦, 𑀇𑀤𑀁 𑀲𑀼𑀕𑀢𑀲𑀸𑀲𑀦𑀁;

𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀫𑀢𑁆𑀣𑀁 𑀯𑀢𑁆𑀢𑀦𑁂 𑀓𑀢𑀁.

𑀅𑀢𑀻𑀯 𑀚𑀸𑀢𑀧𑀸𑀫𑁄𑀚𑁆𑀚𑀸, 𑀲𑀦𑁆𑀥𑀸𑀭𑀓𑀚𑀮𑀦𑁆𑀢𑀺𑀓𑀸;

𑀲𑀁𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂, 𑀙𑀤𑁆𑀥𑀸𑀓𑀫𑁆𑀧𑀺 𑀫𑀳𑀸𑀫𑀳𑀻.

𑀅𑀘𑁆𑀙𑀭𑀺𑀬𑀸𑀦𑀺 𑀘𑀸’𑀳𑁂𑀲𑀼𑀁, 𑀮𑁄𑀓𑁂𑀦𑁂𑀓𑀸𑀦𑀺𑀦𑁂𑀓𑀥𑀸;

𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀘, 𑀣𑁂𑀭𑀺𑀬𑀸𑀬𑀁 𑀧𑀭𑀫𑁆𑀧𑀭𑀸.

𑀧𑀞𑀫𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸, 𑀲𑀩𑁆𑀩𑀮𑁄𑀓𑀳𑀺𑀢𑀁 𑀩𑀳𑀼𑀁;

𑀢𑁂 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸, 𑀣𑁂𑀭𑀸 𑀲𑀩𑁆𑀩𑁂𑀧𑀺 𑀦𑀺𑀩𑁆𑀩𑀼𑀢𑀸.

𑀣𑁂𑀭𑀸’𑀧𑀺 ¶ 𑀢𑁂 𑀫𑀢𑀺𑀧𑀤𑀻𑀧𑀳𑀢𑀦𑁆𑀥𑀓𑀸𑀭𑀸,

𑀮𑁄𑀓𑀦𑁆𑀥𑀓𑀸𑀭𑀳𑀦𑀦𑀫𑁆𑀳𑀺 𑀫𑀳𑀸𑀧𑀤𑀻𑀧𑀸;

𑀦𑀺𑀩𑁆𑀩𑀸𑀧𑀺𑀢𑀸 𑀫𑀭𑀡𑀖𑁄𑀭𑀫𑀳𑀸𑀦𑀺𑀮𑁂𑀦,

𑀢𑁂𑀦𑀸𑀧𑀺 𑀚𑀻𑀯𑀺𑀢𑀫𑀤𑀁 𑀫𑀢𑀺𑀫𑀸 𑀚𑀳𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀁𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀚𑀸𑀢𑀲𑀢𑁆𑀢𑀼 𑀧𑀼𑀢𑁆𑀢𑁄 𑀢𑀁, 𑀖𑀸𑀢𑁂𑀢𑁆𑀯𑀸’𑀤𑀸𑀬𑀺 𑀪𑀤𑁆𑀤𑀓𑁄;

𑀭𑀚𑁆𑀚𑀁 𑀲𑁄𑀴𑀲𑀯𑀲𑁆𑀲𑀸𑀦𑀺, 𑀓𑀸𑀭𑁂𑀲𑀺 𑀫𑀺𑀢𑁆𑀢𑀤𑀽𑀪𑀺𑀓𑁄.

𑀉𑀤𑀬𑀪𑀤𑁆𑀤 𑀧𑀼𑀢𑁆𑀢𑁄 𑀢𑀁, 𑀖𑀸𑀢𑁂𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑀓𑁄;

𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄 𑀢𑀁, 𑀖𑀸𑀢𑁂𑀢𑁆𑀯𑀸 𑀫𑀼𑀡𑁆𑀟𑀦𑀸𑀫𑀓𑁄.

𑀫𑀺𑀢𑁆𑀢𑀤𑁆𑀤𑀼𑀦𑁄 𑀤𑀼𑀫𑁆𑀫𑀢𑀺𑀦𑁄, 𑀢𑁂’𑀧𑀺 𑀭𑀚𑁆𑀚𑀫𑀓𑀸𑀭𑀬𑀼𑀁;

𑀢𑁂𑀲𑀁 𑀉𑀪𑀺𑀦𑁆𑀦𑀁 𑀭𑀚𑁆𑀚𑁂𑀲𑀼, 𑀅𑀝𑁆𑀞𑀯𑀲𑁆𑀲𑀸𑀦’𑀢𑀺𑀓𑁆𑀓𑀫𑀼𑀁.

𑀫𑀼𑀡𑁆𑀟𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀁, 𑀖𑀸𑀢𑁂𑀢𑁆𑀯𑀸 𑀦𑀸𑀕𑀤𑀸𑀲𑀓𑁄;

𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀧𑀸𑀧𑀓𑁄.

𑀧𑀺𑀢𑀼𑀖𑀸𑀢𑀓𑀯𑀁𑀲𑁄’𑀬, 𑀫𑀻𑀢𑀺𑀓𑀼𑀤𑁆𑀥𑀸’𑀣 𑀦𑀸𑀕𑀭𑀸;

𑀦𑀸𑀕𑀤𑀸𑀲𑀓 𑀭𑀸𑀚𑀸𑀦𑀁, 𑀅𑀧𑀦𑁂𑀢𑁆𑀯𑀸 𑀲𑀫𑀸𑀕𑀢𑀸.

𑀲𑀼𑀲𑀼𑀦𑀸𑀕𑁄𑀢𑀺 𑀧𑀜𑁆𑀜𑀸𑀢𑀁, 𑀅𑀫𑀘𑁆𑀘𑀁 𑀲𑀸𑀥𑀼𑀲𑀫𑁆𑀫𑀢𑀁;

𑀭𑀚𑁆𑀚𑁂 𑀲𑀫𑀪𑀺𑀲𑀺𑀜𑁆𑀚𑀺𑀁𑀲𑀼, 𑀲𑀩𑁆𑀩𑁂𑀲𑀁 𑀳𑀺𑀢𑀫𑀸𑀦𑀲𑀸.

𑀲𑁄 ¶ 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀦𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺;

𑀓𑀸𑀴𑀸𑀲𑁄 𑀓𑁄 𑀢𑀲𑁆𑀲 𑀧𑀼𑀢𑁆𑀢𑁄, 𑀅𑀝𑁆𑀞𑀯𑀻𑀲𑀢𑀺 𑀓𑀸𑀭𑀬𑀺.

𑀅𑀢𑀻𑀢𑁂 𑀤𑀲𑀫𑁂 𑀯𑀲𑁆𑀲𑁂, 𑀓𑀸𑀴𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀲𑀫𑁆𑀩𑀼𑀤𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸, 𑀏𑀯𑀁 𑀯𑀲𑁆𑀲𑀲𑀢𑀁 𑀅𑀳𑀼.

𑀢𑀤𑀸 𑀯𑁂𑀲𑀸𑀮𑀺𑀬𑀸 𑀪𑀺𑀓𑁆𑀔𑀽, 𑀅𑀦𑁂𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸;

𑀲𑀺𑀗𑁆𑀕𑀻𑀮𑁄𑀡𑀁 𑀤𑁆𑀯𑀗𑁆𑀕𑀼𑀮𑀜𑁆𑀘, 𑀢𑀣𑀸 𑀕𑀸𑀫𑀦𑁆𑀢𑀭𑀫𑁆𑀫𑀺 𑀘.

𑀆𑀯𑀸𑀲𑀸’𑀦𑀼𑀫𑀢𑀸’𑀘𑀺𑀡𑁆𑀡𑀁, 𑀅𑀫𑀣𑀺𑀢𑀁 𑀚𑀮𑁄𑀕𑀺 𑀘;

𑀦𑀺𑀲𑀻𑀤𑀦𑀁 𑀅𑀤𑀲𑀓𑀁, 𑀚𑀸𑀢𑀭𑀽𑀧𑀸𑀤𑀺𑀓𑀁 𑀇𑀢𑀺.

𑀤𑀲𑀯𑀢𑁆𑀣𑀽𑀦𑀺 𑀤𑀻𑀧𑁂𑀲𑀼𑀁, 𑀓𑀧𑁆𑀧𑀦𑁆𑀢𑀻𑀢𑀺 𑀅𑀮𑀚𑁆𑀚𑀻𑀦𑁄;

𑀢𑀁 𑀲𑀼𑀢𑁆𑀯𑀸𑀦 𑀬𑀲𑀢𑁆𑀣𑁂𑀭𑁄, 𑀏𑀯𑀁 𑀯𑀚𑁆𑀚𑀻𑀲𑀼 𑀘𑀸𑀭𑀺𑀓𑀁.

𑀙𑀴𑀪𑀺𑀜𑁆𑀜𑁄 𑀩𑀮𑀧𑁆𑀧𑀢𑁆𑀢𑁄, 𑀬𑀲𑁄 𑀓𑀸𑀓𑀡𑁆𑀟𑀓𑀢𑁆𑀭𑀚𑁄;

𑀢𑀁 𑀲𑀫𑁂𑀢𑀼𑀁 𑀲𑀉𑀲𑁆𑀲𑀸𑀳𑁄, 𑀢𑀢𑁆𑀣𑀸𑀕𑀫𑀺’𑀫𑀳𑀸𑀯𑀦𑀁.

𑀞𑀧𑁂𑀢𑁆𑀯𑀸’𑀧𑁄𑀲𑀣𑀕𑁆𑀕𑁂 𑀢𑁂, 𑀓𑀁𑀲𑀧𑀸𑀢𑀺𑀁 𑀲𑀳𑁄𑀥𑀓𑀁;

𑀓𑀳𑀸𑀧𑀡𑀸𑀤𑀺𑀁 𑀲𑀗𑁆𑀖𑀲𑁆𑀲, 𑀤𑁂𑀣’𑀦𑀸’𑀳𑀼 𑀉𑀧𑀸𑀲𑀓𑁂.

𑀦 𑀓𑀧𑁆𑀧𑀢𑁂 𑀢𑀁 𑀫𑀸 𑀤𑁂𑀣, 𑀇𑀢𑀺 𑀣𑁂𑀭𑁄 𑀲𑀯𑀸𑀭𑀬𑀺;

𑀧𑀝𑀺𑀲𑀸𑀭𑀡𑀻𑀬𑀁 𑀓𑀫𑁆𑀫𑀁, 𑀬𑀲𑀢𑁆𑀣𑁂𑀭𑀲𑁆𑀲 𑀢𑁂 𑀓𑀭𑀼𑀁.

𑀬𑀸𑀘𑀺𑀢𑁆𑀯𑀸 𑀅𑀦𑀼𑀤𑀽𑀢𑀁 𑀲𑁄, 𑀲𑀳 𑀢𑁂𑀦 𑀧𑀼𑀭𑀁 𑀕𑀢𑁄;

𑀅𑀢𑁆𑀢𑀦𑁄 𑀥𑀫𑁆𑀫𑀯𑀸𑀤𑀺𑀢𑁆𑀢𑀁, 𑀲𑀜𑁆𑀜𑀸𑀧𑁂𑀢𑁆𑀯𑀸’𑀕 𑀲𑀸𑀕𑀭𑁂.

𑀅𑀦𑀼𑀤𑀽𑀢𑀯𑀘𑁄 𑀲𑀼𑀢𑁆𑀯𑀸, 𑀢𑀫𑀼𑀓𑁆𑀔𑀺𑀧𑀺𑀢𑀼𑀫𑀸𑀕𑀢𑀸;

𑀧𑀭𑀺𑀓𑁆𑀔𑀺𑀧𑀺𑀬 𑀅𑀝𑁆𑀞𑀁𑀲𑀼, 𑀲𑀭𑀁 𑀣𑁂𑀭𑀲𑁆𑀲 𑀪𑀺𑀓𑁆𑀔𑀯𑁄.

𑀣𑁂𑀭𑁄 𑀉𑀕𑁆𑀕𑀫𑁆𑀫 𑀦𑀪𑀲𑀸, 𑀕𑀦𑁆𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀢𑀢𑁄;

𑀧𑀸𑀯𑁂𑀬𑁆𑀬𑀓𑀸 𑀯𑀦𑁆𑀢𑀺𑀓𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀮𑀳𑀼𑀁.

𑀯𑁂𑀲𑁂𑀲𑀺 𑀤𑀽𑀢𑁂𑀢𑀼 𑀲𑀬𑀁, 𑀕𑀦𑁆𑀢𑁆𑀯𑀸’𑀳𑁄 𑀕𑀗𑁆𑀕𑀧𑀩𑁆𑀩𑀢𑀁;

𑀆𑀳 𑀲𑀫𑁆𑀪𑀽𑀢𑀢𑁆𑀣𑁂𑀭𑀲𑁆𑀲, 𑀢𑀁 𑀲𑀩𑁆𑀩𑀁 𑀲𑀸𑀡𑀯𑀸𑀲𑀺𑀦𑁄.

𑀧𑀸𑀯𑁂𑀬𑁆𑀬𑀓𑀸 𑀲𑀝𑁆𑀞𑀺𑀣𑁂𑀭𑀸, 𑀅𑀲𑀺𑀢𑀸’𑀯𑀦𑁆𑀢𑀺𑀓𑀸𑀧𑀺 𑀘;

𑀫𑀳𑀸𑀔𑀻𑀡𑀸𑀲𑀯𑀸 𑀲𑀩𑁆𑀩𑁂, 𑀅𑀳𑁄𑀕𑀗𑁆𑀕𑀫𑁆𑀳𑀺 𑀑𑀢𑀭𑀼𑀁.

𑀪𑀺𑀓𑁆𑀔𑀯𑁄 𑀲𑀦𑁆𑀦𑀺𑀧𑀢𑀺𑀢𑀸, 𑀲𑀩𑁆𑀩𑁂 𑀢𑀢𑁆𑀣 𑀢𑀢𑁄 𑀢𑀢𑁄;

𑀆𑀲𑀼𑀁 𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀺, 𑀫𑀦𑁆𑀢𑁂𑀢𑁆𑀯𑀸 𑀅𑀔𑀺𑀮𑀸’𑀧𑀺 𑀢𑁂.

𑀲𑁄𑀭𑁂𑀬𑁆𑀬 ¶ 𑀭𑁂𑀯𑀢𑀢𑁆𑀣𑁂𑀭𑀁, 𑀩𑀳𑀼𑀲𑁆𑀲𑀼𑀢 𑀫𑀦𑀸𑀲𑀯𑀁;

𑀢𑀁 𑀓𑀸𑀮𑀧𑀫𑀼𑀔𑀁 𑀜𑀢𑁆𑀯𑀸, 𑀧𑀲𑁆𑀲𑀺𑀢𑀼𑀁 𑀦𑀺𑀓𑁆𑀔𑀫𑀺𑀁𑀲𑀼 𑀢𑀁.

𑀣𑁂𑀭𑁄 𑀢𑀫𑁆𑀫𑀦𑁆𑀢𑀦𑀁 𑀲𑀼𑀢𑁆𑀯𑀸, 𑀯𑁂𑀲𑀸𑀮𑀺𑀁 𑀕𑀦𑁆𑀢𑀼𑀫𑁂𑀯 𑀲𑁄;

𑀇𑀘𑁆𑀙𑀦𑁆𑀢𑁄 𑀨𑀸𑀲𑀼𑀕𑀫𑀦𑀁, 𑀢𑀢𑁄 𑀦𑀺𑀓𑁆𑀔𑀫𑀺 𑀢𑀗𑁆𑀔𑀡𑀁.

𑀧𑀸𑀢𑁄 𑀧𑀸𑀢𑁄𑀯 𑀦𑀺𑀓𑁆𑀔𑀦𑁆𑀢-𑀝𑁆𑀞𑀸𑀦𑀁 𑀢𑁂𑀦 𑀫𑀳𑀢𑁆𑀢𑀦𑀸;

𑀲𑀸𑀬𑀁 𑀲𑀸𑀬𑀫𑀼𑀧𑁂𑀦𑁆𑀢𑀸𑀦𑀁, 𑀲𑀳𑀚𑁄𑀢𑀺𑀬𑀫𑀤𑁆𑀤𑀲𑀼𑀁.

𑀢𑀢𑁆𑀣 𑀲𑀫𑁆𑀪𑀽𑀢𑀢𑁆𑀣𑁂𑀭𑁂𑀦, 𑀬𑀲𑀢𑁆𑀣𑁂𑀭𑁄 𑀦𑀺𑀬𑁄𑀚𑀺𑀢𑁄;

𑀲𑀤𑁆𑀥𑀫𑁆𑀫𑀲𑀯𑀦𑀦𑁆𑀢𑁂 𑀢𑀁, 𑀭𑁂𑀯𑀢𑀣𑁂𑀭 𑀫𑀼𑀢𑁆𑀢𑀫𑀁.

𑀉𑀧𑁂𑀘𑁆𑀘 𑀤𑀲𑀯𑀢𑁆𑀣𑀽𑀦𑀺, 𑀧𑀼𑀘𑁆𑀙𑀺 𑀣𑁂𑀭𑁄 𑀧𑀝𑀺𑀓𑁆𑀔𑀺𑀧𑀺;

𑀲𑀼𑀢𑁆𑀯𑀸’𑀥𑀺𑀓𑀭𑀡𑀁 𑀢𑀜𑁆𑀘, 𑀦𑀺𑀲𑁂𑀥𑁂𑀫𑀸𑀢𑀺 𑀅𑀩𑁆𑀭𑀯𑀺.

𑀧𑀸𑀧𑀸𑀧𑀺 𑀧𑀓𑁆𑀔𑀁 𑀧𑁂𑀓𑁆𑀔𑀦𑁆𑀢𑀸, 𑀭𑁂𑀯𑀢𑀢𑁆𑀣𑁂𑀭 𑀫𑀼𑀢𑁆𑀢𑀫𑀁;

𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁, 𑀧𑀝𑀺𑀬𑀸𑀤𑀺𑀬 𑀢𑁂 𑀩𑀳𑀼𑀁.

𑀲𑀻𑀖𑀁 𑀦𑀸𑀯𑀸𑀬 𑀕𑀦𑁆𑀢𑁆𑀯𑀸𑀦, 𑀲𑀳𑀚𑀸𑀢𑀺𑀲𑀫𑀻𑀧𑀕𑀸;

𑀓𑀭𑁄𑀦𑁆𑀢𑀺 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁, 𑀪𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀺𑀢𑁂.

𑀲𑀳𑀚𑀸𑀢𑀺𑀁 𑀆𑀯𑀲𑀦𑁆𑀢𑁄, 𑀲𑀸𑀴𑀣𑁂𑀭𑁄 𑀯𑀺𑀘𑀺𑀦𑁆𑀢𑀺𑀬𑀸;

𑀧𑀸𑀯𑁂𑀬𑁆𑀬𑀓𑀸 𑀥𑀫𑁆𑀫𑀯𑀸𑀤𑀻, 𑀇𑀢𑀺 𑀧𑀲𑁆𑀲𑀺 𑀅𑀦𑀸𑀲𑀯𑁄.

𑀉𑀧𑁂𑀘𑁆𑀘 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸, 𑀥𑀫𑁆𑀫𑁂 𑀦𑀺𑀝𑁆𑀞𑀸𑀢𑀺 𑀅𑀩𑁆𑀭𑀯𑀺;

𑀦𑀺𑀘𑁆𑀘𑀁 𑀥𑀫𑁆𑀫𑁂 𑀞𑀺𑀢𑀢𑁆𑀢𑀁 𑀲𑁄, 𑀅𑀢𑁆𑀢𑀦𑁄 𑀢𑀲𑁆𑀲 𑀅𑀩𑁆𑀭𑀯𑀺.

𑀢𑁂 𑀧𑀭𑀺𑀓𑁆𑀔𑀸𑀭𑀫𑀸𑀤𑀸𑀬, 𑀭𑁂𑀯𑀢𑀢𑁆𑀣𑁂𑀭𑀫𑀤𑁆𑀤𑀲𑀼𑀁;

𑀣𑁂𑀭𑁄 𑀦 𑀕𑀡𑁆𑀳𑀺 𑀢𑀧𑁆𑀧𑀓𑁆𑀔-𑀕𑀸𑀳𑀻 𑀲𑀺𑀲𑁆𑀲𑀁 𑀧𑀡𑀸𑀫𑀬𑀻.

𑀯𑁂𑀲𑀸𑀮𑀺𑀁 𑀢𑁂 𑀢𑀢𑁄 𑀕𑀦𑁆𑀢𑁆𑀯𑀸, 𑀢𑀢𑁄 𑀧𑀼𑀧𑁆𑀨𑀧𑀼𑀭𑀁 𑀕𑀢𑀸;

𑀯𑀤𑀺𑀁𑀲𑀼 𑀓𑀸𑀴𑀸𑀲𑁄𑀓𑀲𑁆𑀲, 𑀦𑀭𑀺𑀦𑁆𑀤𑀲𑁆𑀲 𑀅𑀮𑀚𑁆𑀚𑀻𑀦𑁄.

𑀲𑀢𑁆𑀣𑀼𑀲𑁆𑀲 𑀦𑁄 𑀕𑀦𑁆𑀥𑀓𑀼𑀝𑀺𑀁, 𑀕𑁄𑀧𑀬𑀦𑁆𑀢𑁄 𑀫𑀬𑀁 𑀢𑀳𑀺𑀁;

𑀫𑀳𑀸𑀯𑀦𑀯𑀺𑀳𑀸𑀭𑀲𑁆𑀫𑀺𑀁, 𑀯𑀲𑀸𑀫 𑀯𑀚𑁆𑀚𑀻𑀪𑀽𑀫𑀺𑀬𑀁.

𑀕𑀡𑁆𑀳𑀺𑀲𑁆𑀲𑀸𑀫 𑀯𑀺𑀳𑀸𑀭’𑀦𑁆𑀢𑀺, 𑀕𑀸𑀫𑀯𑀸𑀲𑀺𑀓𑀲𑀺𑀓𑁆𑀔𑀯𑁄;

𑀆𑀕𑀘𑁆𑀙𑀦𑁆𑀢𑀺 𑀫𑀳𑀸𑀭𑀸𑀚, 𑀫𑀝𑀺𑀲𑁂𑀥𑀬 𑀢𑁂 𑀇𑀢𑀺.

𑀭𑀸𑀚𑀸𑀦𑀁 𑀤𑀼𑀕𑁆𑀕𑀳𑀺𑀢𑀁 𑀢𑁂, 𑀓𑀢𑁆𑀯𑀸 𑀯𑁂𑀲𑀸𑀮𑀺𑀫𑀸𑀕𑀫𑀼𑀁;

𑀭𑁂𑀯𑀢𑀢𑁆𑀣𑁂𑀭 𑀫𑀽𑀮𑀫𑁆𑀳𑀺, 𑀲𑀳𑀚𑀸𑀢𑀺𑀬𑀫𑁂𑀢𑁆𑀣 𑀢𑀼.

𑀪𑀺𑀓𑁆𑀔𑀽 ¶ 𑀲𑀢𑀲𑀳𑀲𑁆𑀲𑀸𑀦𑀺, 𑀏𑀓𑀸𑀤𑀲 𑀲𑀫𑀸𑀕𑀢𑀸;

𑀦𑀯𑀼𑀢𑀺𑀜𑁆𑀘 𑀲𑀳𑀲𑁆𑀲𑀸𑀦𑀺, 𑀅𑀳𑀼 𑀢𑀁 𑀯𑀢𑁆𑀣𑀼 𑀲𑀦𑁆𑀢𑀺𑀬𑀸.

𑀫𑀽𑀮𑀝𑁆𑀞𑁂𑀳𑀺 𑀯𑀺𑀦𑀸 𑀯𑀢𑁆𑀣𑀼-𑀲𑀫𑀦𑀁 𑀦𑁂𑀯 𑀭𑁄𑀘𑀬𑀺;

𑀣𑁂𑀭𑁄 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀢𑁂, 𑀯𑁂𑀲𑀸𑀮𑀺𑀫𑀸𑀕𑀫𑀼𑀁 𑀢𑀢𑁄.

𑀤𑀼𑀕𑁆𑀕𑀳𑀺𑀢𑁄𑀯 𑀲𑁄 𑀭𑀸𑀚𑀸, 𑀢𑀢𑁆𑀣𑀸𑀫𑀘𑁆𑀘𑁂 𑀅𑀧𑁂𑀲𑀬𑀺;

𑀫𑀽𑀴𑀸 𑀤𑁂𑀯𑀸𑀦𑀼𑀪𑀸𑀯𑁂𑀦, 𑀅𑀜𑁆𑀜𑀢𑁆𑀣 𑀅𑀕𑀫𑀺𑀁𑀲𑀼 𑀢𑁂.

𑀧𑁂𑀲𑁂𑀢𑁆𑀯𑀸 𑀢𑁂 𑀫𑀳𑀻𑀧𑀸𑀮𑁄, 𑀢𑀁 𑀭𑀢𑁆𑀢𑀺𑀁 𑀲𑀼𑀧𑀺𑀦𑁂𑀦𑀲𑁄;

𑀅𑀧𑀲𑁆𑀲𑀺 𑀲𑀓𑀫𑀢𑁆𑀢𑀸𑀦𑀁, 𑀧𑀓𑁆𑀔𑀺𑀢𑁆𑀢𑀁 𑀮𑁄𑀳𑀓𑀼𑀫𑁆𑀪𑀺𑀬𑀁.

𑀅𑀢𑀺𑀪𑀻𑀢𑁄 𑀅𑀳𑀼 𑀭𑀸𑀚𑀸, 𑀢𑀫𑀲𑁆𑀲𑀸 𑀲𑁂𑀢𑀼 𑀫𑀸𑀕𑀫𑀸;

𑀪𑀕𑀺𑀦𑀻 𑀦𑀦𑁆𑀤𑀣𑁂𑀭𑀻 𑀢𑀼, 𑀆𑀓𑀸𑀲𑁂𑀦 𑀅𑀦𑀸𑀲𑀯𑀸.

𑀪𑀸𑀭𑀺𑀬𑀁 𑀢𑁂 𑀓𑀢𑀁 𑀓𑀫𑁆𑀫𑀁, 𑀥𑀫𑁆𑀫𑀺𑀓𑁂’𑀬𑁆𑀬𑁂 𑀔𑀫𑀸𑀧𑀬;

𑀧𑀓𑁆𑀔𑁄 𑀢𑁂𑀲𑀁 𑀪𑀯𑀺𑀢𑁆𑀯𑀸 𑀢𑁆𑀯𑀁, 𑀓𑀼𑀭𑀼 𑀲𑀸𑀲𑀦𑀧𑀕𑁆𑀕𑀳𑀁.

𑀏𑀯𑀁 𑀓𑀢𑁂 𑀲𑁄𑀢𑁆𑀣𑀺 𑀢𑀼𑀬𑁆𑀳𑀁, 𑀳𑁂𑀲𑁆𑀲𑀢𑀻𑀢𑀺 𑀅𑀧𑀓𑁆𑀓𑀫𑀺;

𑀧𑀲𑀸𑀢𑁂𑀬𑁂𑀯 𑀯𑁂𑀲𑀸𑀮𑀺𑀁, 𑀕𑀦𑁆𑀢𑀼𑀁 𑀦𑀺𑀓𑁆𑀔𑀫𑀺 𑀪𑀽𑀧𑀢𑀺.

𑀕𑀦𑁆𑀢𑁆𑀯𑀸 𑀫𑀳𑀸𑀯𑀦𑀁 𑀪𑀺𑀓𑁆𑀔𑀽-𑀲𑀗𑁆𑀖𑀁 𑀲𑁄 𑀲𑀦𑁆𑀦𑀺𑀧𑀸𑀢𑀺𑀬;

𑀲𑀼𑀢𑁆𑀯𑀸 𑀉𑀪𑀺𑀦𑁆𑀦𑀁 𑀯𑀸𑀤𑀜𑁆𑀘, 𑀥𑀫𑁆𑀫𑀧𑀓𑁆𑀔𑀜𑁆𑀘 𑀭𑁄𑀘𑀺𑀬.

𑀔𑀫𑀸𑀧𑁂𑀢𑁆𑀯𑀸 𑀥𑀫𑁆𑀫𑀺𑀓𑁂 𑀢𑁂, 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀫𑀳𑀻𑀧𑀢𑀺;

𑀅𑀢𑁆𑀢𑀦𑁄 𑀥𑀫𑁆𑀫𑀧𑀓𑁆𑀔𑀢𑁆𑀢𑀁, 𑀯𑀢𑁆𑀯𑀸 𑀢𑀼𑀫𑁆𑀳𑁂 𑀬𑀣𑀸𑀭𑀼𑀘𑀺.

𑀲𑀫𑁆𑀧𑀕𑁆𑀕𑀳𑀁 𑀲𑀸𑀲𑀦𑀲𑁆𑀲, 𑀓𑀭𑁄𑀣𑀸𑀢𑀺 𑀘 𑀪𑀸𑀲𑀺𑀬;

𑀤𑀢𑁆𑀯𑀸 𑀘 𑀢𑁂𑀲𑀁 𑀆𑀭𑀓𑁆𑀔𑀁, 𑀅𑀕𑀫𑀸𑀲𑀺 𑀲𑀓𑀁 𑀧𑀼𑀭𑀁.

𑀦𑀺𑀘𑁆𑀙𑁂𑀢𑀼𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀻 𑀢𑀤𑀸;

𑀅𑀦𑀕𑁆𑀕𑀸𑀦𑀺 𑀢𑀢𑁆𑀣 𑀪𑀲𑁆𑀲𑀸𑀦𑀺, 𑀲𑀗𑁆𑀖𑀫𑀚𑁆𑀛𑁂 𑀅𑀚𑀸𑀬𑀺𑀲𑀼𑀁.

𑀢𑀢𑁄 𑀲𑁄 𑀭𑁂𑀯𑀢𑀢𑁆𑀣𑁂𑀭𑁄, 𑀲𑀸𑀯𑁂𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑀕𑁄;

𑀉𑀩𑁆𑀪𑀸𑀳𑀺𑀓𑀸𑀬 𑀢𑀁 𑀯𑀢𑁆𑀣𑀼𑀁, 𑀲𑀫𑁂𑀢𑀼𑀁 𑀦𑀺𑀘𑁆𑀙𑀬𑀁 𑀅𑀓𑀸.

𑀧𑀸𑀘𑀺𑀦𑀓𑁂𑀘 𑀘𑀢𑀼𑀭𑁄, 𑀘𑀢𑀼𑀭𑁄 𑀧𑀸𑀯𑁂𑀬𑁆𑀬𑀓𑁂𑀧𑀺 𑀘;

𑀉𑀩𑁆𑀪𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺, 𑀪𑀺𑀓𑁆𑀔𑀽 𑀢𑀁 𑀯𑀢𑁆𑀣𑀼 𑀲𑀦𑁆𑀢𑀺𑀬𑀸.

𑀲𑀩𑁆𑀩𑀓𑀸𑀫𑀻 𑀘 𑀲𑀸𑀴𑁆𑀳𑁄 𑀘, 𑀔𑀼𑀚𑁆𑀚𑀲𑁄𑀪𑀺𑀢𑀦𑀸𑀫𑀓𑁄;

𑀯𑀸𑀲𑀪𑀕𑀸𑀫𑀺𑀓𑁄 𑀘𑀸𑀢𑀺, 𑀣𑁂𑀭𑁄 𑀧𑀸𑀘𑀺𑀦𑀓𑀸 𑀇𑀫𑁂.

𑀲𑀫𑁂𑀢𑀼𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀅𑀧𑁆𑀧𑀲𑀤𑁆𑀤𑀁 𑀅𑀦𑀸𑀓𑀼𑀮𑀁;

𑀅𑀕𑀫𑀼𑀁 𑀯𑀸𑀮𑀼𑀓𑀸𑀭𑀸𑀫𑀁, 𑀅𑀝𑁆𑀞𑀢𑁆𑀣𑁂𑀭𑀸 𑀅𑀦𑀸𑀲𑀯𑀸.

𑀤𑀳𑀭𑁂𑀦𑀸’𑀚𑀺 𑀢𑁂 𑀦𑁂𑀢𑁆𑀣, 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀲𑀼𑀪𑁂;

𑀦𑀺𑀲𑀻𑀤𑀺𑀁𑀲𑀼 𑀫𑀳𑀸𑀣𑁂𑀭𑀸, 𑀫𑀳𑀸𑀫𑀼𑀦𑀺 𑀫𑀢𑀜𑁆𑀜𑀼𑀦𑁄.

𑀢𑁂𑀲𑀼 𑀯𑀢𑁆𑀣𑀽𑀲𑀼 𑀏𑀓𑁂𑀓𑀁, 𑀓𑀫𑀢𑁄 𑀭𑁂𑀯𑀢𑁄 𑀫𑀳𑀸;

𑀣𑁂𑀭𑁄 𑀣𑁂𑀭𑀁 𑀲𑀩𑁆𑀩𑀓𑀸𑀫𑀺𑀁, 𑀧𑀼𑀘𑁆𑀙𑀺 𑀧𑀼𑀘𑁆𑀙𑀸𑀲𑀼 𑀓𑁄𑀯𑀺𑀤𑁄.

𑀲𑀩𑁆𑀩𑀓𑀸𑀫𑀻 𑀫𑀳𑀸𑀣𑁂𑀭𑁄, 𑀢𑁂𑀦 𑀧𑀼𑀝𑁆𑀞𑁄’𑀣 𑀩𑁆𑀬𑀸𑀓𑀭𑀺;

𑀲𑀩𑁆𑀩𑀸𑀦𑀺 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀲𑀼𑀢𑁆𑀢𑀢𑁄.

𑀦𑀺𑀳𑀦𑀺𑀢𑁆𑀯𑀸’𑀥𑀺𑀓𑀭𑀡𑀁, 𑀢𑀁 𑀢𑁂 𑀢𑀢𑁆𑀣 𑀬𑀣𑀸𑀓𑁆𑀓𑀫𑀁;

𑀢𑀣𑁂𑀯 𑀲𑀗𑁆𑀖𑀫𑀚𑁆𑀛𑁂𑀧𑀺, 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑀼𑀁.

𑀦𑀺𑀕𑁆𑀕𑀳𑀁 𑀧𑀸𑀧𑀪𑀺𑀓𑁆𑀔𑀽𑀦𑀁, 𑀤𑀲𑀯𑀢𑁆𑀣𑀼𑀓𑀤𑀻𑀧𑀦𑀁;

𑀢𑁂𑀲𑀁 𑀤𑀲𑀲𑀳𑀲𑁆𑀲𑀸𑀦𑀁, 𑀫𑀳𑀸𑀣𑁂𑀭𑁄 𑀅𑀓𑀁𑀲𑀼 𑀢𑁂.

𑀲𑀩𑁆𑀩𑀓𑀸𑀫𑀻 𑀧𑀼𑀣𑀯𑀺𑀬𑀸, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀼;

𑀲𑁄 𑀯𑀻𑀲𑀁 𑀯𑀲𑁆𑀲𑀲𑀢𑀺𑀓𑁄, 𑀢𑀤𑀸’𑀲𑀺 𑀉𑀧𑀲𑀫𑁆𑀧𑀤𑀸.

𑀣𑁂𑀭𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲, 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄;

𑀯𑀸𑀲𑀪𑀕𑀸𑀫𑀺𑀓𑁄 𑀘𑁂𑀯, 𑀲𑀼𑀫𑀦𑁄 𑀘 𑀤𑀼𑀯𑁂 𑀧𑀦.

𑀣𑁂𑀭𑀸’𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲, 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄;

𑀅𑀝𑁆𑀞 𑀣𑁂𑀭𑀸’𑀧𑀺 𑀥𑀜𑁆𑀜𑀸 𑀢𑁂, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑀣𑀸𑀕𑀢𑀁.

𑀪𑀺𑀓𑁆𑀔𑀽 𑀲𑀢𑀲𑀳𑀲𑁆𑀲𑀸𑀦𑀺, 𑀤𑁆𑀯𑀸𑀤𑀲𑀸𑀲𑀼𑀁 𑀲𑀫𑀸𑀕𑀢𑀸;

𑀲𑀩𑁆𑀩𑁂𑀲𑀁 𑀭𑁂𑀯𑀢𑀢𑁆𑀣𑁂𑀭𑁄, 𑀪𑀺𑀓𑁆𑀔𑀽𑀦𑀁𑀧𑀫𑀼𑀔𑁄𑀢𑀤𑀸.

𑀢𑀢𑁄 ¶ 𑀲𑁄 𑀭𑁂𑀯𑀢𑀢𑁆𑀣𑁂𑀭𑁄, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀘𑀺𑀭𑀁;

𑀓𑀸𑀭𑁂𑀢𑀼𑀁 𑀥𑀫𑁆𑀫𑀲𑀁𑀕𑀻𑀢𑀺𑀁, 𑀲𑀩𑁆𑀩𑀪𑀺𑀓𑁆𑀔𑀼𑀲𑀫𑀽𑀳𑀢𑁄.

𑀧𑀪𑀺𑀦𑁆𑀦𑀢𑁆𑀣𑀸𑀤𑀺𑀜𑀸𑀡𑀸𑀦𑀁, 𑀧𑀺𑀝𑀓𑀢𑁆𑀢𑀬𑀥𑀸𑀭𑀺𑀦𑀁;

𑀲𑀢𑀸𑀦𑀺 𑀲𑀢𑁆𑀢𑀪𑀺𑀓𑁆𑀔𑀽𑀦𑀁, 𑀅𑀭𑀳𑀦𑁆𑀢𑀸𑀦𑀫𑀼𑀘𑁆𑀘𑀺𑀦𑀺.

𑀢𑁂 𑀲𑀩𑁆𑀩𑁂 𑀯𑀸𑀮𑀼𑀓𑀸𑀭𑀸𑀫𑁂, 𑀓𑀸𑀴𑀸𑀲𑁄𑀓𑁂𑀦 𑀭𑀓𑁆𑀔𑀺𑀢𑀸;

𑀭𑁂𑀯𑀢𑀢𑁆𑀣𑁂𑀭𑀧𑀸𑀫𑁄𑀓𑁆𑀔𑀸, 𑀅𑀓𑀭𑀼𑀁 𑀥𑀫𑁆𑀫𑀲𑀗𑁆𑀕𑀳𑀁.

𑀧𑀼𑀩𑁆𑀩𑁂 𑀓𑀢𑀁 𑀢𑀣𑀸 𑀏𑀯, 𑀥𑀫𑁆𑀫𑀁 𑀧𑀘𑁆𑀙𑀸 𑀘 𑀪𑀸𑀲𑀺𑀢𑀁;

𑀆𑀤𑀸𑀬 𑀦𑀺𑀝𑁆𑀞𑀧𑁂𑀲𑀼𑀁 𑀢𑀁, 𑀏𑀢𑀁 𑀫𑀸𑀲𑁂𑀳𑀺 𑀅𑀝𑁆𑀞𑀳𑀺.

𑀏𑀯𑀁 𑀤𑀼𑀢𑀺𑀬𑀲𑀁𑀕𑀻𑀢𑀺𑀁, 𑀓𑀢𑁆𑀯𑀸 𑀢𑁂𑀧𑀺 𑀫𑀳𑀸𑀬𑀲𑀸;

𑀣𑁂𑀭𑀸 𑀤𑁄𑀲𑀓𑁆𑀔𑀬𑀁 𑀧𑀢𑁆𑀢𑀸, 𑀧𑀢𑁆𑀢𑀸𑀓𑀸𑀮𑁂𑀦 𑀦𑀺𑀩𑁆𑀩𑀼𑀢𑀺𑀁.

𑀇𑀢𑀺 𑀧𑀭𑀫𑀫𑀢𑀻𑀦𑀁 𑀧𑀢𑁆𑀢𑀺𑀧𑀢𑁆𑀢𑀩𑁆𑀩𑀓𑀸𑀦𑀁,

𑀢𑀺𑀪𑀯𑀳𑀺𑀢𑀓𑀭𑀸𑀦𑀁 𑀮𑁄𑀓𑀦𑀸𑀣𑁂𑀭𑀲𑀸𑀦𑀁;

𑀲𑀼𑀫𑀭𑀺𑀬𑀫𑀭𑀡𑀁 𑀢𑀁 𑀲𑀗𑁆𑀔𑀢𑀸 𑀲𑀸𑀭𑀓𑀢𑁆𑀢𑀁,

𑀧𑀭𑀺𑀕𑀡𑀺𑀬𑀫𑀲𑁂𑀲𑀁 𑀅𑀧𑁆𑀧𑀫𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂

𑀫𑀳𑀸𑀯𑀁𑀲𑁂 𑀤𑀼𑀢𑀺𑀬𑀲𑀁𑀕𑀻𑀢𑀺 𑀦𑀸𑀫

𑀬𑀸 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 ¶ , 𑀫𑀳𑀸𑀣𑁂𑀭𑁂𑀳𑀺 𑀆𑀤𑀺𑀢𑁄;

𑀓𑀢𑀸 𑀲𑀤𑁆𑀥𑀫𑁆𑀫 𑀲𑀁𑀕𑀻𑀢𑀺, 𑀣𑁂𑀭𑀺𑀬𑀸’𑀢𑀺 𑀧𑀯𑀼𑀘𑁆𑀘𑀢𑀺.

𑀏𑀓𑁄’𑀯 𑀣𑁂𑀭𑀯𑀸𑀤𑁄 𑀲𑁄, 𑀆𑀤𑀺𑀯𑀲𑁆𑀲𑀲𑀢𑁂 𑀅𑀳𑀼;

𑀅𑀜𑁆𑀜𑀸𑀘𑀭𑀺𑀬𑀯𑀸𑀤𑀸𑀢𑀼, 𑀢𑀢𑁄 𑀑𑀭𑀁 𑀅𑀚𑀸𑀬𑀺𑀲𑀼𑀁.

𑀢𑁂𑀳𑀺 𑀲𑀁𑀕𑀻𑀢𑀺𑀓𑀸𑀭𑁂𑀳𑀺, 𑀣𑁂𑀭𑁂𑀳𑀺 𑀤𑀼𑀢𑀺𑀬𑁂𑀳𑀺 𑀢𑁂;

𑀦𑀺𑀕𑁆𑀕𑀳𑀺𑀢𑀸 𑀧𑀸𑀧𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀤𑀲𑀲𑀳𑀲𑁆𑀲𑀓𑀸.

𑀅𑀓𑀁𑀲𑀸’𑀘𑀭𑀺𑀬𑀯𑀸𑀤𑀁 𑀢𑁂, 𑀫𑀳𑀸𑀲𑀁𑀕𑀻𑀢𑀺𑀦𑀸𑀫𑀓𑀸;

𑀢𑀢𑁄 𑀕𑁄𑀓𑀼𑀮𑀺𑀓𑀸 𑀚𑀸𑀢𑀸, 𑀏𑀓𑀩𑁆𑀩𑁄𑀳𑀸𑀭𑀺𑀓𑀸𑀧𑀺 𑀘.

𑀕𑁄𑀓𑀼𑀮𑀺𑀓𑁂𑀳𑀺 𑀧𑀡𑁆𑀡𑀢𑁆𑀢𑀺-𑀯𑀸𑀤𑀸 𑀩𑀸𑀳𑀼𑀮𑀺𑀓𑀸𑀧𑀺 𑀘;

𑀘𑁂𑀢𑀺𑀬𑀯𑀸𑀤𑀸 𑀢𑁂𑀲𑁆𑀯𑁂𑀯, 𑀲𑀫𑀢𑀸𑀲𑀗𑁆𑀖𑀺𑀓𑀸 𑀙 𑀢𑁂.

𑀧𑀼𑀦𑀸𑀧𑀺 𑀣𑁂𑀭𑀯𑀸𑀤𑁂𑀳𑀺, 𑀫𑀳𑀺𑀁𑀲𑀸𑀲𑀓𑀪𑀺𑀓𑁆𑀔𑀯𑁄;

𑀯𑀚𑁆𑀚𑀻𑀧𑀼𑀢𑁆𑀢𑀓𑀪𑀺𑀓𑁆𑀔𑀽 𑀘, 𑀤𑀼𑀯𑁂 𑀚𑀸𑀢𑀸 𑀇𑀫𑁂 𑀔𑀮𑀼.

𑀚𑀸𑀢𑀸’𑀣 𑀥𑀫𑁆𑀫𑀼𑀢𑁆𑀢𑀭𑀺𑀬𑀸, 𑀪𑀤𑁆𑀭𑀬𑀸𑀦𑀺𑀓𑀪𑀺𑀓𑁆𑀔𑀯𑁄;

𑀙𑀦𑁆𑀦𑀸𑀕𑀸𑀭𑀸 𑀲𑀫𑁆𑀫𑀺𑀢𑀺𑀬𑀸, 𑀯𑀚𑁆𑀚𑀻𑀧𑀼𑀢𑁆𑀢𑀺𑀬𑀪𑀺𑀓𑁆𑀔𑀽𑀢𑀺.

𑀫𑀳𑀺𑀁𑀲𑀸𑀲𑀓𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽 𑀲𑀩𑁆𑀩𑀢𑁆𑀣 𑀯𑀸𑀤𑀺𑀦𑁄;

𑀥𑀫𑁆𑀫𑀕𑀼𑀢𑁆𑀢𑀺𑀬𑀪𑀺𑀓𑁆𑀔𑀽 𑀘, 𑀚𑀸𑀢𑀸 𑀔𑀮𑀼 𑀇𑀫𑁂 𑀤𑀼𑀯𑁂.

𑀚𑀸𑀢𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀻𑀳𑀺, 𑀓𑀲𑁆𑀲𑀧𑀺𑀬𑀸 𑀢𑀢𑁄 𑀧𑀦;

𑀚𑀸𑀢𑀸 𑀲𑀗𑁆𑀓𑀦𑁆𑀢𑀺𑀓𑀸 𑀪𑀺𑀓𑁆𑀔𑀽, 𑀲𑀼𑀢𑁆𑀢𑀯𑀸𑀤𑀸 𑀢𑀢𑁄 𑀧𑀦.

𑀣𑁂𑀭𑀯𑀸𑀤𑁂𑀦 𑀲𑀳 𑀢𑁂, 𑀳𑁄𑀦𑁆𑀢𑀺 𑀤𑁆𑀯𑀸𑀤𑀲𑀺’𑀫𑁂𑀧𑀺 𑀘;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀙𑀯𑀸𑀤𑀸 𑀘, 𑀇𑀢𑀺 𑀅𑀝𑁆𑀞𑀸𑀭𑀲𑀸 𑀔𑀺𑀮𑀸.

𑀲𑀢𑁆𑀢𑀭𑀲𑀸𑀧𑀺 𑀤𑀼𑀢𑀺𑀬𑁂, 𑀚𑀸𑀢𑀸 𑀯𑀲𑀲𑁆𑀲𑀢𑁂 𑀇𑀢𑀺;

𑀅𑀜𑁆𑀜𑀸𑀘𑀭𑀺𑀬𑀯𑀸𑀤𑀸 𑀢𑀼, 𑀢𑀢𑁄 𑀑𑀭𑀫𑀚𑀸𑀬𑀺𑀲𑀼𑀁.

𑀳𑁂𑀫𑀢𑀸 ¶ 𑀭𑀸𑀚𑀕𑀺𑀭𑀺𑀬𑀸, 𑀢𑀣𑀸 𑀲𑀺𑀤𑁆𑀥𑀢𑁆𑀣𑀺𑀓𑀸𑀧𑀺 𑀘;

𑀧𑀼𑀩𑁆𑀩𑀲𑁂𑀮𑀺𑀬𑀪𑀺𑀓𑁆𑀔𑀽 𑀘, 𑀢𑀣𑀸 𑀅𑀧𑀭𑀲𑁂𑀮𑀺𑀬𑀸.

𑀯𑀸𑀚𑀺𑀭𑀺𑀬𑀸 𑀙 𑀏𑀢𑁂𑀳𑀺, 𑀚𑀫𑁆𑀩𑀼𑀤𑀻𑀧𑀫𑁆𑀳𑀺 𑀪𑀺𑀦𑁆𑀦𑀓𑀸;

𑀥𑀫𑁆𑀫𑀭𑀼𑀘𑀺 𑀘 𑀲𑀸𑀕𑀮𑀺𑀬𑀸, 𑀮𑀁𑀓𑀸𑀤𑀻𑀧𑀫𑁆𑀳𑀺 𑀪𑀺𑀦𑁆𑀦𑀓𑀸.

𑀆𑀘𑀭𑀺𑀬𑀓𑀼𑀮𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀴𑀸𑀲𑁄𑀓𑀲𑁆𑀲 𑀧𑀼𑀢𑁆𑀢𑀸 𑀢𑀼, 𑀅𑀳𑁂𑀲𑀼𑀁 𑀤𑀲𑀪𑀸𑀢𑀺𑀓𑀸;

𑀩𑀸𑀯𑀻𑀲𑀢𑀺𑀁 𑀢𑁂 𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀲𑀫𑀦𑀼𑀲𑀸𑀲𑀺𑀲𑀼𑀁.

𑀦𑀯 𑀦𑀦𑁆𑀤𑀸 𑀢𑀢𑁄 𑀆𑀲𑀼𑀁, 𑀓𑀫𑁂𑀦𑁂𑀯 𑀦𑀭𑀸𑀥𑀺𑀧𑀸;

𑀢𑁂’𑀧𑀺 𑀩𑀸𑀯𑀻𑀲𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀲𑀫𑀦𑀼𑀲𑀸𑀲𑀺𑀲𑀼𑀁.

𑀫𑁄𑀭𑀺𑀬𑀸𑀦𑀁 𑀔𑀢𑁆𑀢𑀺𑀬𑀸𑀦𑀁, 𑀯𑀁𑀲𑁂 𑀚𑀸𑀢𑀁 𑀲𑀺𑀭𑀺𑀥𑀭𑀁;

𑀘𑀦𑁆𑀤𑀕𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀢𑀁, 𑀘𑀸𑀡𑀓𑁆𑀓𑁄 𑀩𑁆𑀭𑀸𑀳𑁆𑀫𑀡𑁄 𑀢𑀢𑁄.

𑀦𑀯𑀫𑀁 𑀥𑀦𑀦𑀦𑁆𑀤𑀁 𑀢𑀁, 𑀖𑀸𑀢𑁂𑀢𑁆𑀯𑀸 𑀘𑀡𑁆𑀟𑀓𑁄𑀥𑀲𑀸;

𑀲𑀓𑀮𑁂 𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀁, 𑀭𑀚𑁆𑀚𑁂 𑀲𑀫𑀪𑀺𑀲𑀺𑀜𑁆𑀘𑀻 𑀲𑁄.

𑀲𑁄 𑀘𑀢𑀼𑀯𑀻𑀲𑀯𑀲𑁆𑀲𑀸𑀦𑀺𑀁, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺;

𑀢𑀲𑁆𑀲 𑀧𑀼𑀢𑁆𑀢𑁄 𑀩𑀺𑀦𑁆𑀤𑀼𑀲𑀸𑀭𑁄, 𑀅𑀝𑁆𑀞𑀯𑀻𑀲𑀢𑀺 𑀓𑀸𑀭𑀬𑀺.

𑀩𑀺𑀦𑁆𑀤𑀼𑀲𑀸𑀭𑀲𑀼𑀢𑀸 𑀆𑀲𑀼𑀁, 𑀲𑀢𑀁 𑀏𑀓𑁄 𑀘 𑀯𑀺𑀲𑁆𑀲𑀼𑀢𑀸;

𑀅𑀲𑁄𑀓𑁄 𑀆𑀲𑀺 𑀢𑁂𑀲𑀁 𑀢𑀼, 𑀧𑀼𑀜𑁆𑀜𑀢𑁂𑀚𑁄𑀩𑀮𑀺𑀤𑁆𑀥𑀺𑀓𑁄.

𑀯𑁂𑀫𑀸𑀢𑀺𑀓𑁂 𑀪𑀸𑀢𑀭𑁄 𑀲𑁄, 𑀳𑀦𑁆𑀢𑁆𑀯𑀸 𑀏𑀓𑀽𑀦𑀓𑀁 𑀲𑀢𑀁;

𑀲𑀓𑀮𑁂 𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀁, 𑀏𑀓𑀭𑀚𑁆𑀚𑀫𑀧𑀸𑀧𑀼𑀡𑀺.

𑀚𑀺𑀦𑀦𑀺𑀩𑁆𑀩𑀸𑀦𑀢𑁄 𑀧𑀘𑁆𑀙𑀸, 𑀧𑀼𑀭𑁂 𑀢𑀲𑁆𑀲𑀸𑀪𑀺𑀲𑁂𑀓𑀢𑁄;

𑀲𑀸𑀝𑁆𑀞𑀸𑀭𑀲𑀁 𑀯𑀲𑁆𑀲𑀲𑀢-𑀤𑁆𑀯𑀬𑀫𑁂𑀯𑀁 𑀯𑀺𑀚𑀸𑀦𑀺𑀬.

𑀧𑀢𑁆𑀯𑀸 𑀘𑀢𑀽𑀳𑀺 𑀯𑀲𑁆𑀲𑁂𑀳𑀺, 𑀏𑀓𑀭𑀚𑁆𑀚𑀁 𑀫𑀳𑀸𑀬𑀲𑁄;

𑀧𑀼𑀭𑁂 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀺𑀁, 𑀅𑀢𑁆𑀢𑀸𑀦𑀫𑀪𑀺𑀲𑁂𑀘𑀬𑀺.

𑀢𑀲𑁆𑀲𑀸’𑀪𑀺𑀲𑁂𑀓𑁂𑀦 ¶ 𑀲𑀫𑀁, 𑀆𑀓𑀸𑀲𑁂 𑀪𑀽𑀫𑀺𑀬𑀁 𑀢𑀣𑀸;

𑀬𑁄𑀚𑀦𑁂 𑀬𑁄𑀚𑀦𑁂 𑀆𑀡𑀸, 𑀦𑀺𑀘𑁆𑀘𑀁 𑀧𑀯𑀢𑁆𑀢𑀺𑀢𑀸 𑀅𑀳𑀼.

𑀅𑀦𑁄𑀢𑀢𑁆𑀢𑁄 𑀤𑀓𑀸𑀓𑀸𑀚𑁂, 𑀅𑀝𑁆𑀞𑀦𑁂𑀲𑀼𑀁 𑀤𑀺𑀦𑁂 𑀤𑀺𑀦𑁂;

𑀤𑁂𑀯𑀸 𑀤𑁂𑀯𑁄 𑀅𑀓𑀸 𑀢𑁂𑀳𑀺, 𑀲𑀁𑀯𑀺𑀪𑀸𑀕𑀁 𑀚𑀦𑀲𑁆𑀲𑀘.

𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁, 𑀆𑀦𑁂𑀲𑀼𑀁 𑀳𑀺𑀫𑀯𑀦𑁆𑀢𑀢𑁄;

𑀅𑀦𑁂𑀓𑁂𑀲𑀁 𑀲𑀳𑀲𑁆𑀲𑀸𑀦𑀁, 𑀤𑁂𑀯𑀸 𑀏𑀯 𑀧𑀳𑁄𑀦𑀓𑀁.

𑀅𑀕𑀤𑀸’𑀫𑀮𑀓𑀜𑁆𑀘𑁂𑀯, 𑀢𑀣𑀸𑀕𑀤 𑀳𑀭𑀺𑀢𑀓𑀁;

𑀢𑀢𑁄’𑀯 𑀅𑀫𑀧𑀓𑁆𑀓𑀜𑁆𑀘, 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀁.

𑀧𑀜𑁆𑀘𑀯𑀡𑁆𑀡𑀸𑀦𑀺 𑀯𑀢𑁆𑀣𑀸𑀦𑀺, 𑀢𑀢𑁆𑀣𑀧𑀼𑀜𑁆𑀚𑀦𑀧𑀝𑁆𑀝𑀓𑀁;

𑀧𑀻𑀢𑀜𑁆𑀘 𑀤𑀺𑀩𑁆𑀩𑀧𑀸𑀦𑀜𑁆𑀘, 𑀙𑀤𑁆𑀤𑀦𑁆𑀢𑀤𑀳𑀢𑁄 𑀫𑀭𑀼.

𑀫𑀭𑀦𑁆𑀢𑀸 𑀦𑀕𑀭𑁂 𑀢𑀲𑁆𑀫𑀺𑀁, 𑀫𑀺𑀕𑀲𑀽𑀓𑀭𑀧𑀓𑁆𑀔𑀺𑀦𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀳𑀸𑀦𑀲𑀁, 𑀲𑀬𑀫𑁂𑀯 𑀫𑀭𑀦𑁆𑀢𑀺 𑀘.

𑀕𑀸𑀯𑁄 𑀢𑀢𑁆𑀣 𑀘𑀭𑀸𑀧𑁂𑀢𑁆𑀯𑀸, 𑀯𑀚𑀫𑀸𑀦𑁂𑀦𑁆𑀢𑀺 𑀤𑀻𑀧𑀺𑀦𑁄;

𑀔𑁂𑀢𑁆𑀢 𑀯𑀢𑁆𑀣𑀼𑀢𑀴𑀸𑀓𑀸𑀤𑀺𑀁, 𑀧𑀸𑀮𑁂𑀦𑁆𑀢𑀺 𑀫𑀺𑀕𑀲𑀽𑀓𑀭𑀸.

𑀲𑀼𑀫𑀦𑀁 𑀧𑀼𑀧𑁆𑀨𑀧𑀝𑀓𑀁, 𑀅𑀪𑀼𑀢𑁆𑀢𑀁 𑀤𑀺𑀩𑁆𑀩𑀫𑀼𑀧𑁆𑀧𑀮𑀁;

𑀯𑀺𑀮𑁂𑀧𑀦𑀁 𑀅𑀜𑁆𑀚𑀦𑀜𑁆𑀘, 𑀦𑀸𑀕𑀸𑀦𑀸𑀕𑀸𑀯𑀺𑀫𑀸𑀦𑀢𑁄.

𑀲𑀸𑀮𑀺𑀯𑀸𑀳𑀲𑀳𑀲𑁆𑀲𑀸𑀦𑀺, 𑀦𑀯𑀼𑀢𑀺𑀁 𑀢𑀼 𑀲𑀼𑀯𑀸 𑀧𑀦;

𑀙𑀤𑁆𑀤𑀦𑁆𑀢𑀤𑀳𑀢𑁄𑀬𑁂𑀯, 𑀆𑀳𑀭𑀺𑀁𑀲𑀼 𑀤𑀺𑀦𑁂 𑀤𑀺𑀦𑁂.

𑀢𑁂 𑀲𑀸𑀮𑀺𑀦𑀺𑀢𑁆𑀣𑀼𑀲𑀓𑀡𑁂, 𑀅𑀔𑀡𑁆𑀟𑁂𑀢𑁆𑀯𑀸𑀦 𑀢𑀡𑁆𑀟𑀼𑀮𑁂;

𑀅𑀓𑀁𑀲𑀼 𑀫𑀽𑀲𑀺𑀓𑀸 𑀢𑁂𑀳𑀺, 𑀪𑀢𑁆𑀢𑀁 𑀭𑀸𑀚𑀓𑀼𑀮𑁂 𑀅𑀳𑀼.

𑀅𑀓𑀁𑀲𑀼 𑀲𑀲𑁆𑀲𑀢𑀁 𑀢𑀲𑁆𑀲, 𑀫𑀥𑀽𑀦𑀺 𑀫𑀥𑀼𑀫𑀓𑁆𑀔𑀺𑀓𑀸;

𑀢𑀣𑀸 𑀓𑀫𑁆𑀫𑀸𑀭𑀲𑀸𑀮𑀸𑀲𑀼, 𑀅𑀘𑁆𑀙𑀸𑀓𑀽𑀝𑀸𑀦𑀺 𑀧𑀸𑀢𑀬𑀼𑀁.

𑀓𑀭𑀯𑀺𑀓𑀸 𑀲𑀓𑀼𑀡𑀺𑀓𑀸, 𑀫𑀦𑀼𑀜𑁆𑀜𑀫𑀥𑀼𑀭𑀲𑁆𑀲𑀭𑀸;

𑀅𑀓𑀁𑀲𑀼 𑀢𑀲𑁆𑀲𑀸’𑀕𑀦𑁆𑀢𑁆𑀯𑀸𑀦, 𑀭𑀜𑁆𑀜𑁄 𑀫𑀥𑀼𑀭𑀯𑀲𑁆𑀲𑀺𑀢𑀁.

𑀭𑀸𑀚𑀸’𑀪𑀺𑀲𑀺𑀢𑁆𑀢𑁄 𑀲𑁄’𑀲𑁄𑀓𑁄,

𑀓𑀡𑀺𑀝𑁆𑀞𑀁 𑀲𑀁𑀲𑁄𑀤𑀭𑀺𑀬𑀁, 𑀉𑀧𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀥𑀫𑁆𑀫𑀸𑀲𑁄𑀓𑀸𑀪𑀺𑀲𑁂𑀓𑁄 𑀦𑀺𑀝𑁆𑀞𑀺𑀢𑁄

𑀧𑀺𑀢𑀸 ¶ 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀩𑁆𑀭𑀸𑀳𑁆𑀫𑀡𑁂 𑀩𑁆𑀭𑀳𑁆𑀫𑀧𑀓𑁆𑀔𑀺𑀓𑁂;

𑀪𑁄𑀚𑁂𑀲𑀺 𑀲𑁄𑀧𑀺 𑀢𑁂𑀬𑁂𑀯, 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀪𑁄𑀚𑀬𑀺.

𑀤𑀺𑀲𑁆𑀯𑀸’𑀦𑀼𑀧𑀲𑀫𑀁 𑀢𑁂𑀲𑀁, 𑀅𑀲𑁄𑀓𑁄 𑀧𑀭𑀺𑀯𑁂𑀲𑀦𑁂;

𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀅𑀫𑀘𑁆𑀘𑁂 𑀲𑀦𑁆𑀦𑀺𑀬𑁄𑀚𑀺𑀬.

𑀆𑀡𑀸𑀧𑀬𑀺𑀢𑁆𑀯𑀸 𑀫𑀢𑀺𑀫𑀸, 𑀦𑀸𑀦𑀸𑀧𑀸𑀲𑀡𑁆𑀟𑀺𑀓𑁂 𑀯𑀺𑀲𑀼𑀁;

𑀯𑀻𑀫𑀁𑀲𑀺𑀢𑁆𑀯𑀸 𑀦𑀺𑀲𑀚𑁆𑀚𑀸𑀬, 𑀪𑁄𑀚𑀸𑀧𑁂𑀢𑁆𑀯𑀸 𑀯𑀺𑀲𑀚𑁆𑀚𑀬𑀺.

𑀓𑀸𑀮𑁂 𑀯𑀸𑀢𑀸𑀬𑀦𑀕𑀢𑁄, 𑀲𑀦𑁆𑀢𑀁 𑀭𑀘𑁆𑀙𑀸𑀕𑀢𑀁 𑀬𑀢𑀺𑀁;

𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀲𑁄, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺.

𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀧𑀼𑀢𑁆𑀢𑀸𑀦𑀁, 𑀲𑀩𑁆𑀩𑁂𑀲𑀁 𑀚𑁂𑀝𑁆𑀞𑀪𑀸𑀢𑀼𑀦𑁄;

𑀲𑀼𑀫𑀦𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀧𑀼𑀢𑁆𑀢𑁄 𑀲𑁄 𑀳𑀺 𑀓𑀼𑀫𑀸𑀭𑀓𑁄.

𑀅𑀲𑁄𑀓𑁄 𑀧𑀺𑀢𑀭𑀸 𑀤𑀺𑀦𑁆𑀦𑀁, 𑀭𑀚𑁆𑀚𑀫𑀼𑀚𑁆𑀚𑁂𑀦𑀺𑀬𑀜𑁆𑀳𑀺 𑀲𑁄;

𑀳𑀺𑀢𑁆𑀯𑀸’𑀕𑀢𑁄 𑀧𑀼𑀧𑁆𑀨𑀧𑀼𑀭𑀁, 𑀩𑀺𑀦𑁆𑀤𑀼𑀲𑀸𑀭𑁂 𑀕𑀺𑀮𑀸𑀦𑀓𑁂.

𑀓𑀢𑁆𑀯𑀸 𑀧𑀼𑀭𑀁 𑀲𑀓𑀸𑀬𑀢𑁆𑀢𑀁, 𑀫𑀢𑁂 𑀧𑀺𑀢𑀭𑀺 𑀪𑀸𑀢𑀭𑀁;

𑀖𑀸𑀢𑁂𑀢𑁆𑀯𑀸 𑀚𑁂𑀝𑁆𑀞𑀓𑀁 𑀭𑀚𑁆𑀚𑀁, 𑀅𑀕𑁆𑀕𑀳𑁂𑀲𑀺 𑀧𑀼𑀭𑁂 𑀯𑀭𑁂.

𑀲𑀼𑀫𑀦𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀤𑁂𑀯𑀻 𑀢𑀦𑁆𑀦𑀸𑀫𑀺𑀓𑀸 𑀢𑀢𑁄;

𑀕𑀩𑁆𑀪𑀺𑀦𑀻 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀸𑀘𑀺𑀦𑀤𑁆𑀯𑀸𑀭𑀢𑁄 𑀩𑀳𑀺.

𑀘𑀡𑁆𑀟𑀸𑀮𑀕𑀸𑀫 𑀫𑀕𑀫𑀸, 𑀢𑀢𑁆𑀣 𑀦𑀺𑀕𑁆𑀭𑁄𑀥𑀤𑁂𑀯𑀢𑀸;

𑀢𑀫𑀸𑀮𑀧𑀺𑀬𑀦𑀸𑀫𑁂𑀦, 𑀫𑀸 𑀧𑀢𑁆𑀯𑀸 𑀖𑀭𑀓𑀁 𑀅𑀤𑀸.

𑀢𑀤𑀳𑁂’𑀯 𑀯𑀭𑀁 𑀧𑀼𑀢𑁆𑀢𑀁, 𑀯𑀺𑀚𑀸𑀬𑀺𑀢𑁆𑀯𑀸 𑀲𑀼𑀢𑀲𑁆𑀲 𑀲𑀸;

𑀦𑀺𑀕𑁆𑀭𑁄𑀥𑁄𑀢𑀺 𑀅𑀓𑀸 𑀦𑀸𑀫𑀁, 𑀤𑁂𑀯𑀢𑀸 𑀦𑀼𑀕𑁆𑀕𑀳𑀸𑀦𑀼𑀕𑀸.

𑀤𑀺𑀲𑁆𑀯𑀸 𑀢𑀁 𑀚𑁂𑀝𑁆𑀞𑀘𑀡𑁆𑀟𑀸𑀮𑁄, 𑀅𑀢𑁆𑀢𑀦𑁄 𑀲𑀸𑀫𑀺𑀦𑀺𑀁 𑀯𑀺𑀬;

𑀫𑀜𑁆𑀜𑀦𑁆𑀢𑁄 𑀢𑀁 𑀉𑀧𑀝𑁆𑀞𑀸𑀲𑀺, 𑀲𑀢𑁆𑀢𑀯𑀲𑁆𑀲𑀸𑀦𑀺 𑀲𑀸𑀥𑀼𑀓𑀁.

𑀢𑀁 𑀫𑀳𑀸𑀯𑀭𑀼𑀡𑁄 𑀣𑁂𑀭𑁄, 𑀢𑀤𑀸 𑀤𑀺𑀲𑁆𑀯𑀸 𑀓𑀼𑀫𑀸𑀭𑀓𑀁;

𑀉𑀧𑀦𑀺𑀲𑁆𑀲𑀬 𑀲𑀫𑁆𑀧𑀦𑁆𑀦𑀁, 𑀅𑀭𑀳𑀸 𑀧𑀼𑀘𑁆𑀙𑀺 𑀫𑀸𑀢𑀭𑀁.

𑀧𑀩𑁆𑀩𑀸𑀚𑁂𑀲𑀺 𑀔𑀼𑀭𑀕𑁆𑀕𑁂 𑀲𑁄, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺;

𑀤𑀲𑁆𑀲𑀦𑀸𑀬𑁄’𑀧 𑀕𑀘𑁆𑀙𑀦𑁆𑀢𑁄, 𑀲𑁄 𑀢𑀢𑁄 𑀫𑀸𑀢𑀼𑀤𑁂𑀯𑀺𑀬𑀸.

𑀤𑀓𑁆𑀔𑀺𑀡𑁂𑀦 𑀘 𑀤𑁆𑀯𑀸𑀭𑁂𑀦, 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀼𑀢𑁆𑀢𑀫𑀁;

𑀢𑀁 𑀕𑀸𑀫𑀕𑀸𑀫𑀺𑀫𑀕𑁆𑀕𑁂𑀦, 𑀬𑀸𑀢𑀺 𑀭𑀸𑀚𑀗𑁆𑀕𑀡𑁂 𑀢𑀤𑀸.

𑀲𑀦𑁆𑀢𑀸𑀬 ¶ 𑀇𑀭𑀺𑀬𑀸 𑀬𑀲𑁆𑀫𑀺𑀁, 𑀧𑀲𑀻𑀤𑀺 𑀲𑀫𑀳𑀻𑀧𑀢𑀺;

𑀧𑀼𑀩𑁆𑀩𑁂’𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑁂𑀫𑀁 𑀢𑀲𑁆𑀫𑀺𑀁 𑀅𑀚𑀸𑀬𑀣.

𑀧𑀼𑀩𑁆𑀩𑁂 𑀓𑀺𑀭 𑀢𑀬𑁄 𑀆𑀲𑀼𑀁, 𑀪𑀸𑀢𑀭𑁄 𑀫𑀥𑀼 𑀯𑀸𑀡𑀺𑀚𑀸;

𑀏𑀓𑁄 𑀫𑀥𑀼𑀁 𑀯𑀺𑀓𑁆𑀓𑀺𑀡𑀸𑀢𑀺, 𑀆𑀳𑀭𑀦𑁆𑀢𑀺 𑀫𑀥𑀼𑀁 𑀤𑀼𑀯𑁂.

𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀯𑀡𑀭𑁄𑀕𑀸𑀢𑀼𑀭𑁄 𑀅𑀳𑀼;

𑀅𑀜𑁆𑀜𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀢𑀤𑀢𑁆𑀣𑀁 𑀫𑀥𑀼𑀯𑀢𑁆𑀣𑀺𑀓𑁄.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂𑀦, 𑀦𑀕𑀭𑀁 𑀧𑀸𑀯𑀺𑀲𑀻 𑀢𑀤𑀸;

𑀢𑀺𑀢𑁆𑀣𑀁 𑀚𑀮𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀏𑀓𑀸 𑀘𑁂𑀝𑀻 𑀢𑀫𑀤𑁆𑀤𑀲.

𑀧𑀼𑀘𑁆𑀙𑀺𑀢𑁆𑀯𑀸 𑀫𑀥𑀼𑀓𑀸𑀫𑀢𑁆𑀢𑀁, 𑀜𑀢𑁆𑀯𑀸 𑀳𑀢𑁆𑀣𑁂𑀦 𑀆𑀤𑀺𑀲𑀺;

𑀏𑀲𑁄 𑀫𑀥𑁆𑀯𑀸𑀧𑀡𑁄 𑀪𑀦𑁆𑀢𑁂, 𑀢𑀢𑁆𑀣 𑀕𑀘𑁆𑀙𑀸’𑀢𑀺 𑀅𑀩𑁆𑀭𑀯𑀺.

𑀢𑀢𑁆𑀣 𑀧𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀯𑀸𑀡𑀺𑀚𑁄 𑀲𑁄 𑀧𑀲𑀸𑀤𑀯𑀸;

𑀯𑀺𑀲𑁆𑀲𑀦𑁆𑀤𑀬𑀦𑁆𑀢𑁄 𑀫𑀼𑀔𑀢𑁄, 𑀧𑀢𑁆𑀢𑀧𑀼𑀭𑀁 𑀫𑀥𑀼𑀁 𑀅𑀤𑀸.

𑀧𑀼𑀡𑁆𑀡𑀜𑁆𑀘 𑀉𑀧𑁆𑀧𑀢𑀦𑁆𑀢𑀜𑁆𑀘, 𑀧𑀢𑀺𑀢𑀜𑁆𑀘 𑀫𑀳𑀻𑀢𑀮𑁂;

𑀤𑀺𑀲𑁆𑀯𑀸 𑀫𑀥𑀼𑀁 𑀧𑀲𑀦𑁆𑀦𑁄 𑀲𑁄, 𑀏𑀯𑀁 𑀧𑀡𑀺𑀤𑀳𑀻 𑀢𑀤𑀸.

𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀁, 𑀤𑀸𑀦𑁂𑀦𑀸’𑀦𑁂𑀦 𑀳𑁄𑀢𑀼 𑀫𑁂;

𑀆𑀓𑀸𑀲𑁂 𑀬𑁄𑀚𑀦𑁂 𑀆𑀡𑀸, 𑀪𑀽𑀫𑀺𑀬𑀁 𑀬𑁄𑀚𑀦𑁂𑀢𑀺 𑀘.

𑀪𑀸𑀢𑀭𑁂 𑀆𑀕𑀢𑁂 𑀆𑀳, 𑀏𑀤𑀺𑀲𑀲𑁆𑀲 𑀫𑀥𑀼𑀁 𑀅𑀤𑀁;

𑀅𑀦𑀼𑀫𑁄𑀤𑀣 𑀢𑀼𑀫𑁆𑀳𑁂 𑀢𑀁, 𑀢𑀼𑀫𑁆𑀳𑀸𑀓𑀜𑁆𑀘 𑀬𑀢𑁄 𑀫𑀥𑀼.

𑀫𑀚𑁆𑀛𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀢𑀁, 𑀔𑀺𑀧𑀧𑀸𑀭𑀡𑁆𑀡𑀯𑁂 𑀇𑀢𑀺;

𑀧𑀢𑁆𑀢𑀺𑀤𑀸𑀦𑀯𑀘𑁄 𑀢𑀲𑁆𑀲, 𑀲𑀼𑀢𑁆𑀯𑀸 𑀢𑁂 𑀘𑀸𑀦𑀼𑀫𑁄𑀤𑀺𑀲𑀼𑀁.

𑀆𑀧𑀡𑀸 𑀤𑁂𑀲𑀺𑀓𑀁 𑀬𑀸𑀢𑀼, 𑀤𑁂𑀯𑀺𑀢𑁆𑀢𑀁 𑀢𑀲𑁆𑀲 𑀧𑀢𑁆𑀣𑀬𑀺;

𑀆𑀤𑀺𑀲𑁆𑀲𑀫𑀸𑀦𑀲𑀦𑁆𑀥𑀺 𑀘, 𑀭𑀽𑀧𑀁 𑀅𑀢𑀺𑀫𑀦𑁄𑀭𑀫𑀁.

𑀅𑀲𑁄𑀓𑁄 𑀫𑀥𑀼𑀤𑁄’𑀲𑀦𑁆𑀥𑀺-𑀫𑀺𑀢𑁆𑀢𑀸𑀤𑁂𑀯𑀻 𑀢𑀼 𑀘𑁂𑀝𑀺𑀓𑀸;

𑀘𑀡𑁆𑀟𑀸𑀮𑀯𑀸𑀤𑀻 𑀦𑀺𑀕𑁆𑀭𑁄𑀥𑁄, 𑀢𑀺𑀲𑁆𑀲𑁄 𑀲𑁄 𑀧𑀸𑀭𑀯𑀸𑀤𑀺𑀓𑁄.

𑀘𑀡𑁆𑀟𑀸𑀮𑀯𑀸𑀤𑀻 𑀘𑀡𑁆𑀟𑀸𑀮-𑀕𑀸𑀫𑁂 𑀆𑀲𑀺 𑀬𑀢𑁄 𑀢𑀼 𑀲𑁄;

𑀧𑀢𑁆𑀣𑁂𑀲𑀺 𑀫𑁄𑀓𑁆𑀔𑀁 𑀫𑁄𑀓𑁆𑀔𑀜𑁆𑀘, 𑀲𑀢𑁆𑀢 𑀯𑀲𑁆𑀲𑁄𑀯 𑀧𑀸𑀧𑀼𑀡𑀺.

𑀦𑀺𑀯𑀺𑀝𑁆𑀞𑀧𑁂𑀫𑁄 ¶ 𑀢𑀲𑁆𑀫𑀺𑀁 𑀲𑁄, 𑀭𑀸𑀚𑀸’𑀢𑀺 𑀢𑀼𑀭𑀺𑀢𑁄 𑀢𑀢𑁄;

𑀧𑀓𑁆𑀓𑁄𑀲𑀸𑀧𑁂𑀲𑀺 𑀢𑀁 𑀲𑁄 𑀢𑀼, 𑀲𑀦𑁆𑀢𑀯𑀼𑀢𑁆𑀢𑀻 𑀉𑀧𑀸𑀕𑀫𑀺.

𑀦𑀺𑀲𑀺𑀤 𑀢𑀸𑀢𑀸’𑀦𑀼𑀭𑀽𑀧𑁂, 𑀆𑀲𑀦𑁂 𑀢𑀸’𑀳 𑀪𑀽𑀧𑀢𑀺;

𑀅𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀫𑀜𑁆𑀜𑀁 𑀲𑁄, 𑀲𑀻𑀳𑀸𑀲𑀦𑀫𑀼𑀧𑀸𑀕𑀫𑀺.

𑀢𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑀫𑀸𑀬𑀸𑀢𑁂, 𑀭𑀸𑀚𑀸𑀇𑀢𑀺 𑀯𑀺𑀘𑀺𑀦𑁆𑀢𑀬𑀺;

𑀅𑀚𑁆𑀚𑀸’𑀬𑀁 𑀲𑀸𑀫𑀡𑁂𑀭𑁄 𑀫𑁂, 𑀖𑀭𑁂 𑀳𑁂𑀲𑁆𑀲𑀢𑀺 𑀲𑀸𑀫𑀺𑀓𑁄.

𑀆𑀮𑀫𑁆𑀩𑀺𑀢𑁆𑀯𑀸 𑀓𑀭𑀁 𑀭𑀜𑁆𑀜𑁄, 𑀲𑁄 𑀧𑀮𑁆𑀮𑀗𑁆𑀓𑁂 𑀲𑀫𑀸𑀭𑀼𑀳𑀺;

𑀦𑀺𑀲𑀻𑀤𑀺 𑀭𑀸𑀚𑀧𑀮𑁆𑀮𑀗𑁆𑀓𑁂, 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀢𑁄.

𑀤𑀺𑀲𑁆𑀯𑀸 𑀢𑀣𑀸 𑀦𑀺𑀲𑀺𑀦𑁆𑀦𑀁 𑀢𑀁, 𑀅𑀲𑁄𑀓𑁄 𑀲𑁄 𑀫𑀳𑀻𑀧𑀢𑀺;

𑀲𑀫𑁆𑀪𑀸𑀯𑁂𑀢𑁆𑀯𑀸𑀦 𑀕𑀼𑀡𑀢𑁄, 𑀢𑀼𑀝𑁆𑀞𑁄’𑀢𑀻𑀯 𑀢𑀤𑀸 𑀅𑀳𑀼.

𑀅𑀢𑁆𑀢𑀦𑁄 𑀧𑀝𑀺𑀬𑀢𑁆𑀢𑁂𑀦, 𑀔𑀚𑁆𑀚𑀪𑁄𑀚𑁆𑀚𑁂𑀦 𑀢𑀧𑁆𑀧𑀺𑀬;

𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁 𑀥𑀫𑁆𑀫𑀁, 𑀲𑀸𑀫𑀡𑁂𑀭𑀫𑀧𑀼𑀘𑁆𑀙𑀺𑀢𑀁.

𑀢𑀲𑁆𑀲’𑀧𑁆𑀧𑀫𑀸𑀤𑀯𑀕𑁆𑀕𑀁 𑀲𑁄, 𑀲𑀸𑀫𑀡𑁂𑀭𑁄 𑀅𑀪𑀸𑀲𑀣;

𑀢𑀁 𑀲𑀼𑀢𑁆𑀯𑀸 𑀪𑀽𑀫𑀺𑀧𑀸𑀮𑁄 𑀲𑁄, 𑀧𑀲𑀦𑁆𑀦𑁄 𑀚𑀺𑀦𑀲𑀸𑀲𑀦𑁂.

𑀅𑀝𑁆𑀞 𑀢𑁂 𑀦𑀺𑀘𑁆𑀘𑀪𑀢𑁆𑀢𑀸𑀦𑀺, 𑀤𑀫𑁆𑀫𑀺 𑀢𑀸𑀢𑀸’𑀢𑀺 𑀆𑀳 𑀢𑀁;

𑀉𑀧𑀚𑁆𑀛𑀸𑀬𑀲𑁆𑀲 𑀫𑁂 𑀭𑀸𑀚, 𑀢𑀸𑀦𑀺 𑀤𑀫𑁆𑀫𑀻𑀢𑀺 𑀆𑀳 𑀲𑁄.

𑀧𑀼𑀦 𑀅𑀝𑁆𑀞𑀲𑀼 𑀤𑀺𑀦𑁆𑀦𑁂𑀲𑀼, 𑀢𑀸𑀦’𑀤𑀸 𑀘𑀭𑀺𑀬𑀲𑁆𑀲 𑀲𑁄;

𑀧𑀼𑀦 𑀅𑀝𑁆𑀞𑀲𑀼 𑀤𑀺𑀦𑁆𑀦𑁂𑀲𑀼, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀸𑀦’𑀤𑀸.

𑀧𑀼𑀦 𑀅𑀝𑁆𑀞𑀲𑀼 𑀤𑀺𑀦𑁆𑀦𑁂𑀲𑀼, 𑀅𑀥𑀺𑀯𑀸𑀲𑁂𑀲𑀺 𑀩𑀼𑀤𑁆𑀥𑀺𑀫𑀸;

𑀤𑁆𑀯𑀢𑁆𑀢𑀺𑀁𑀲𑀪𑀺𑀓𑁆𑀔𑀽 𑀆𑀤𑀸𑀬, 𑀤𑀼𑀢𑀺𑀬𑀤𑀺𑀯𑀲𑁂 𑀕𑀢𑁄.

𑀲𑀳𑀢𑁆𑀣𑀸 𑀢𑀧𑁆𑀧𑀺𑀢𑁄 𑀭𑀜𑁆𑀜𑀸, 𑀥𑀫𑁆𑀫𑀁 𑀤𑁂𑀲𑀺𑀬 𑀪𑀽𑀧𑀢𑀺𑀁;

𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼, 𑀞𑀧𑁂𑀲𑀺 𑀲𑀫𑀳𑀸𑀚𑀦𑀁.

𑀢𑀢𑁄 𑀭𑀸𑀚𑀸 𑀧𑀲𑀦𑁆𑀦𑁄 𑀲𑁄, 𑀤𑀺𑀕𑀼𑀡𑁂𑀦 𑀤𑀺𑀦𑁂 𑀤𑀺𑀦𑁂;

𑀪𑀺𑀓𑁆𑀔𑀽 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀅𑀦𑀼𑀧𑀼𑀩𑁆𑀩𑁂𑀦𑀼’𑀧𑀞𑀳𑀺.

𑀢𑀢𑁆𑀣𑀺𑀬𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀦𑀺𑀓𑀟𑁆𑀠𑀺𑀢𑁆𑀯𑀸𑀦 𑀲𑀝𑁆𑀞𑀺𑀲𑁄;

𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀖𑀭𑁂 𑀦𑀺𑀘𑁆𑀘𑀫𑀪𑁄𑀚𑀬𑀺.

𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 ¶ , 𑀪𑁄𑀚𑁂𑀢𑀼𑀁 𑀢𑀼𑀭𑀺𑀢𑁄 𑀳𑀺 𑀲𑁄;

𑀧𑀝𑀺𑀬𑀸𑀤𑀸𑀧𑀬𑀺𑀢𑁆𑀯𑀸𑀦, 𑀔𑀚𑁆𑀚𑀪𑁄𑀚𑁆𑀚𑀁 𑀫𑀳𑀸𑀭𑀳𑀁.

𑀪𑀽𑀲𑀸𑀧𑁂𑀢𑁆𑀯𑀸𑀦 𑀦𑀕𑀭𑀁, 𑀕𑀦𑁆𑀢𑁆𑀯𑀸 𑀲𑀗𑁆𑀖𑀁 𑀦𑀺𑀫𑀦𑁆𑀢𑀺𑀬;

𑀖𑀭𑀁 𑀦𑁂𑀢𑁆𑀯𑀸𑀦 𑀪𑁄𑀚𑁂𑀢𑁆𑀯𑀸, 𑀤𑀢𑁆𑀯𑀸 𑀲𑀸𑀫𑀡𑀓𑀁 𑀩𑀳𑀼𑀁.

𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀓𑀺𑀢𑁆𑀢𑀓𑁄𑀢𑀺 𑀅𑀧𑀼𑀘𑁆𑀙𑀣;

𑀩𑁆𑀬𑀸𑀓𑀸𑀲𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀤𑀲𑁆𑀲𑀢𑀁.

𑀲𑀼𑀢𑁆𑀯𑀸𑀦 𑀘𑀢𑀼𑀭𑀸𑀲𑀻𑀢𑀺, 𑀥𑀫𑁆𑀫𑀓𑁆𑀔𑀦𑁆𑀥𑀸’𑀢𑀺 𑀲𑁄’𑀩𑁆𑀭𑀯𑀺;

𑀧𑀽𑀚𑁂𑀫𑀺 𑀢𑁂’𑀳𑀁 𑀧𑀘𑁆𑀘𑁂𑀓𑀁, 𑀯𑀺𑀳𑀸𑀭𑁂𑀦𑀸’𑀢𑀺 𑀪𑀽𑀧𑀢𑀺.

𑀤𑀢𑁆𑀯𑀸 𑀢𑀤𑀸 𑀙𑀦𑁆𑀦𑀯𑀼𑀢𑀺-𑀥𑀦𑀓𑁄𑀝𑀺𑀁 𑀫𑀳𑀻𑀧𑀢𑀺;

𑀧𑀼𑀭𑁂𑀲𑀼 𑀘𑀢𑀼𑀭𑀸𑀲𑀻𑀢𑀺-𑀲𑀳𑀲𑁆𑀲𑁂𑀲𑀼 𑀫𑀳𑀻𑀢𑀮𑁂.

𑀢𑀢𑁆𑀣 𑀢𑀢𑁆𑀣𑁂’𑀯 𑀭𑀸𑀚𑀽𑀳𑀺, 𑀯𑀺𑀳𑀸𑀭𑁂 𑀆𑀭𑀪𑀸𑀧𑀬𑀺;

𑀲𑀬𑀁 𑀅𑀲𑁄𑀓𑀸𑀭𑀸𑀫𑀁 𑀢𑀼, 𑀓𑀸𑀭𑀸𑀧𑁂𑀢𑀼𑀁 𑀲𑀫𑀸𑀭𑀪𑀺.

𑀭𑀢𑀦𑀢𑁆𑀢𑀬𑀦𑀺𑀕𑁆𑀭𑁄𑀥-𑀕𑀺𑀮𑀸𑀦𑀸𑀦𑀦𑁆𑀢𑀺 𑀲𑀸𑀲𑀦𑁂;

𑀧𑀘𑁆𑀘𑁂𑀓𑀁 𑀲𑀢𑀲𑀳𑀲𑁆𑀲𑀁, 𑀲𑁄 𑀤𑀸𑀧𑁂𑀲𑀺 𑀤𑀺𑀦𑁂 𑀤𑀺𑀦𑁂.

𑀥𑀦𑁂𑀦 𑀩𑀼𑀤𑁆𑀥𑀤𑀺𑀦𑁆𑀦𑁂𑀦, 𑀣𑀽𑀧𑀧𑀽𑀚𑀸 𑀅𑀦𑁂𑀓𑀥𑀸;

𑀅𑀦𑁂𑀓𑁂𑀲𑀼 𑀯𑀺𑀳𑀸𑀭𑁂𑀲𑀼, 𑀅𑀦𑁂𑀓𑁂 𑀅𑀓𑀭𑀼𑀁 𑀲𑀤𑀸.

𑀥𑀦𑁂𑀦 𑀥𑀫𑁆𑀫𑀤𑀺𑀦𑁆𑀦𑁂𑀦, 𑀧𑀘𑁆𑀘𑀬𑁂 𑀘𑀢𑀼𑀭𑁄 𑀯𑀭𑁂;

𑀥𑀫𑁆𑀫𑀥𑀭𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀉𑀧𑀦𑁂𑀢𑀼𑀁 𑀲𑀤𑀸 𑀦𑀭𑀸.

𑀅𑀦𑁄𑀢𑀢𑁆𑀢𑁄𑀤𑀓𑀸𑀚𑁂𑀲𑀼, 𑀲𑀗𑁆𑀖𑀲𑁆𑀲 𑀘𑀢𑀼𑀭𑁄 𑀅𑀤𑀸;

𑀢𑁂 𑀧𑀺𑀝𑀓𑀸𑀦𑀁 𑀣𑁂𑀭𑀸𑀦𑀁, 𑀲𑀝𑁆𑀞𑀺𑀬𑁂’𑀓𑀁 𑀤𑀺𑀦𑁂 𑀤𑀺𑀦𑁂.

𑀏𑀓𑀁 𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀬, 𑀤𑁂𑀯𑀺𑀬𑀸 𑀢𑀼 𑀅𑀤𑀸𑀧𑀬𑀺;

𑀲𑀬𑀁 𑀧𑀦 𑀤𑀼𑀯𑁂𑀬𑁂𑀯, 𑀧𑀭𑀺𑀪𑀼𑀜𑁆𑀚𑀺 𑀫𑀳𑀻𑀧𑀢𑀺.

𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀤𑀦𑁆𑀢𑀓𑀝𑁆𑀞𑀁 𑀤𑀺𑀦𑁂 𑀤𑀺𑀦𑁂;

𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀅𑀤𑀸 𑀦𑀸𑀕𑀮𑀢𑀸𑀯𑁆𑀳𑀬𑀁.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸, 𑀘𑀢𑀼𑀲𑀫𑁆𑀩𑀼𑀤𑁆𑀥𑀤𑀲𑁆𑀲𑀺𑀦𑀁;

𑀓𑀧𑁆𑀧𑀸𑀬𑀼𑀓𑀁 𑀫𑀳𑀸𑀓𑀸𑀴𑀁, 𑀦𑀸𑀕𑀭𑀸𑀚𑀁 𑀫𑀳𑀺𑀤𑁆𑀥𑀺𑀓𑀁.

𑀲𑀼𑀡𑀺𑀢𑁆𑀯𑀸 𑀢𑀫𑀸𑀦𑁂𑀢𑀼𑀁, 𑀲𑁄𑀡𑁆𑀟𑀲𑀗𑁆𑀔𑀮𑀺𑀩𑀦𑁆𑀥𑀦𑀁;

𑀧𑁂𑀲𑀬𑀺𑀢𑁆𑀯𑀸 𑀢𑀫𑀸𑀦𑁂𑀢𑁆𑀯𑀸, 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀢𑁄.

𑀧𑀮𑁆𑀮𑀗𑁆𑀓𑀫𑁆𑀳𑀺 𑀦𑀺𑀲𑀻𑀤𑁂𑀢𑁆𑀯𑀸, 𑀦𑀸𑀦𑀸𑀧𑀼𑀧𑁆𑀨𑁂𑀳𑀺 𑀧𑀽𑀚𑀺𑀬;

𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀸𑀭𑀺𑀬 𑀅𑀩𑁆𑀭𑀯𑀺.

𑀲𑀤𑁆𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺𑀲𑁆𑀲 ¶ , 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑁂𑀲𑀺𑀦𑁄;

𑀭𑀽𑀧𑀁 𑀅𑀦𑀦𑁆𑀢𑀜𑀸𑀡𑀲𑁆𑀲, 𑀤𑀲𑁆𑀲𑁂𑀳𑀺 𑀫𑀫 𑀪𑁄 𑀇𑀢𑀺.

𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀽𑀧𑁂𑀢𑀁, 𑀅𑀲𑀻𑀢𑀺𑀩𑁆𑀬𑀜𑁆𑀚𑀦𑀼𑀚𑁆𑀚𑀮𑀁;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁, 𑀓𑁂𑀢𑀼𑀫𑀸𑀮𑀸𑀳𑀺 𑀲𑁄𑀪𑀺𑀢𑀁.

𑀦𑀺𑀫𑁆𑀫𑀸𑀲𑀺 𑀦𑀸𑀕𑀭𑀸𑀚𑀸 𑀲𑁄, 𑀩𑀼𑀤𑁆𑀥𑀭𑀽𑀧𑀁 𑀫𑀦𑁄𑀳𑀭𑀁;

𑀢𑀁 𑀤𑀺𑀲𑁆𑀯𑀸’𑀢𑀺 𑀧𑀲𑀸𑀤𑀲𑁆𑀲, 𑀯𑀺𑀫𑁆𑀳𑀬𑀲𑁆𑀲 𑀘 𑀧𑀽𑀭𑀺𑀢𑁄.

𑀏𑀢𑁂𑀦 𑀦𑀺𑀫𑁆𑀫𑀺𑀢𑀁 𑀭𑀽𑀧𑀁, 𑀈𑀤𑀺𑀲𑀁 𑀓𑀻𑀤𑀺𑀲𑀁 𑀦𑀼𑀔𑁄;

𑀢𑀣𑀸𑀕𑀢𑀲𑁆𑀲 𑀭𑀽𑀧𑀦𑁆𑀢𑀺, 𑀆𑀲𑀺 𑀧𑀺𑀢𑀼𑀦𑁆𑀦𑀢𑀼𑀦𑁆𑀦𑀢𑁄.

𑀅𑀓𑁆𑀔𑀺𑀧𑀽𑀚𑀦𑁆𑀢𑀺 𑀲𑀜𑁆𑀜𑀸𑀢𑀁, 𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀁;

𑀫𑀳𑀸𑀫𑀳𑀁 𑀫𑀳𑀸𑀭𑀸𑀚, 𑀓𑀸𑀭𑀸𑀧𑁂𑀲𑀺 𑀫𑀳𑀺𑀤𑁆𑀥𑀺𑀓𑁄.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀘, 𑀲𑀤𑁆𑀥𑁄 𑀘𑀸𑀧𑀺 𑀫𑀳𑀻𑀧𑀢𑀺;

𑀣𑁂𑀭𑁄 𑀘 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄, 𑀤𑀺𑀝𑁆𑀞𑀸 𑀧𑀼𑀩𑁆𑀩𑁂 𑀯𑀲𑀻𑀳𑀺 𑀢𑁂.

𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀣𑁂𑀭𑀸𑀤𑀬𑁄

𑀤𑀼𑀢𑀺𑀬𑁂 𑀲𑀗𑁆𑀕𑀳𑁂 𑀣𑁂𑀭𑀸, 𑀧𑁂𑀓𑁆𑀔𑀦𑁆𑀢𑀸’𑀦𑀸𑀕𑀢𑁂𑀳𑀺 𑀢𑁂;

𑀲𑀸𑀲𑀦𑁄𑀧𑀤𑁆𑀤𑀯𑀁 𑀢𑀲𑁆𑀲, 𑀭𑀜𑁆𑀜𑁄 𑀓𑀸𑀮𑀫𑁆𑀳𑀺 𑀅𑀤𑁆𑀤𑀲𑀼𑀁.

𑀧𑁂𑀓𑁆𑀔𑀸𑀦𑁆𑀢𑀸 𑀲𑀓𑀮𑁂 𑀮𑁄𑀓𑁂, 𑀢𑀤𑀼𑀧𑀤𑁆𑀤𑀯𑀖𑀸𑀢𑀓𑀁;

𑀢𑀺𑀲𑁆𑀲𑀩𑁆𑀭𑀳𑁆𑀫𑀸𑀦𑀫𑀤𑁆𑀤𑀓𑁆𑀔𑀼𑀁, 𑀅𑀘𑀺𑀭𑀝𑁆𑀞𑀸𑀬𑀺 𑀚𑀻𑀯𑀺𑀢𑀁.

𑀢𑁂𑀲𑀁 𑀲𑀫𑀼𑀧𑀲𑀗𑁆𑀓𑀫𑁆𑀫, 𑀆𑀬𑀸𑀘𑀺𑀁𑀲𑀼 𑀫𑀳𑀸𑀧𑀢𑀺𑀁;

𑀫𑀦𑀼𑀲𑁆𑀲𑁂𑀲𑀼’𑀧𑀧𑀚𑁆𑀚𑀺𑀢𑁆𑀯𑀸, 𑀢𑀤𑀼𑀧𑀤𑁆𑀤𑀯𑀖𑀸𑀢𑀦𑀁.

𑀅𑀤𑀸 𑀧𑀝𑀺𑀜𑁆𑀜𑀁 𑀢𑁂𑀲𑀁 𑀲𑁄, 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀺𑀓𑁄;

𑀲𑀺𑀕𑁆𑀕𑀯𑀁 𑀘𑀡𑁆𑀟𑀯𑀚𑁆𑀚𑀺𑀜𑁆𑀘 𑀅𑀯𑁄𑀘𑀼𑀁 𑀤𑀳𑀭𑁂 𑀬𑀢𑀺.

𑀅𑀝𑁆𑀞𑀸𑀭𑀲𑀸𑀤𑀺𑀓𑀸 𑀯𑀲𑁆𑀲-𑀲𑀢𑀸 𑀉𑀧𑀭𑀺 𑀳𑁂𑀲𑁆𑀲𑀢𑀺;

𑀉𑀧𑀤𑁆𑀤𑀯𑁄 𑀲𑀸𑀲𑀦𑀲𑁆𑀲, 𑀦 𑀲𑀫𑁆𑀪𑁄𑀲𑁆𑀲𑀸𑀫 𑀢𑀁 𑀫𑀬𑀁.

𑀇𑀫𑀁 𑀢𑀼𑀫𑁆𑀳𑀸’𑀥𑀺𑀓𑀭𑀡𑀁, 𑀦𑁄𑀧𑀕𑀜𑁆𑀙𑀺𑀢𑁆𑀣 𑀪𑀺𑀓𑁆𑀔𑀯𑁄;

𑀤𑀡𑁆𑀟𑀓𑀫𑁆𑀫𑀸𑀭𑀳𑀸 𑀢𑀲𑁆𑀫𑀸, 𑀤𑀡𑁆𑀟𑀓𑀫𑁆𑀫𑀧𑀤𑀜𑁆𑀳𑀺 𑀯𑁄.

𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀸𑀬, 𑀢𑀺𑀲𑁆𑀲𑀩𑁆𑀭𑀳𑁆𑀫𑀸 𑀫𑀳𑀸𑀧𑀢𑀺;

𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀖𑀭𑁂, 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀲𑁆𑀲𑀢𑀺.

𑀓𑀸𑀮𑁂 ¶ 𑀢𑀼𑀫𑁆𑀳𑁂𑀲𑀼 𑀏𑀓𑁄 𑀢𑀁, 𑀧𑀩𑁆𑀩𑀸𑀚𑁂𑀢𑀼 𑀓𑀼𑀫𑀸𑀭𑀓𑀁;

𑀏𑀓𑁄 𑀢𑀁 𑀩𑀼𑀤𑁆𑀥𑀯𑀘𑀦𑀁, 𑀉𑀕𑁆𑀕𑀡𑁆𑀳𑀸𑀧𑁂𑀢𑀼 𑀲𑀸𑀥𑀼𑀓𑀁.

𑀅𑀳𑀼 𑀯𑁂𑀲𑀸𑀮𑀺𑀬𑀁 𑀧𑀼𑀩𑁆𑀩𑁂-𑀤𑀸𑀲𑀓𑁄 𑀦𑀸𑀫 𑀲𑁄𑀢𑁆𑀣𑀺𑀬𑁄;

𑀢𑀺𑀲𑀺𑀲𑁆𑀲𑀲𑀢𑀚𑁂𑀝𑁆𑀞𑁄 𑀲𑁄, 𑀯𑀲𑀁 𑀆𑀘𑀭𑀺𑀬𑀦𑁆𑀢𑀺𑀓𑁂.

𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄𑀬𑁂𑀯, 𑀯𑁂𑀤𑀧𑀸𑀭𑀕𑀢𑁄 𑀘𑀭𑀁;

𑀲𑀲𑀺𑀲𑁆𑀲𑁄 𑀯𑀸𑀮𑀺𑀓𑀸𑀭𑀸𑀫𑁂, 𑀯𑀲𑀦𑁆𑀢𑀁 𑀓𑀢𑀲𑀗𑁆𑀕𑀳𑀁.

𑀉𑀧𑀸𑀮𑀺𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀤𑀦𑁆𑀢𑀺𑀓𑁂;

𑀯𑁂𑀤𑁂𑀲𑀼 𑀕𑀡𑁆𑀞𑀺𑀞𑀸𑀦𑀸𑀦𑀺, 𑀧𑀼𑀘𑁆𑀙𑀺 𑀲𑁄 𑀢𑀸𑀦𑀺 𑀩𑁆𑀬𑀸𑀓𑀭𑀺.

𑀲𑀩𑁆𑀩𑀥𑀫𑁆𑀫𑀸𑀦𑀼𑀧𑀢𑀺𑀢𑁄, 𑀏𑀓𑀥𑀫𑁆𑀫𑁄 𑀳𑀺 𑀫𑀸𑀡𑀯;

𑀲𑀩𑁆𑀩𑁂 𑀥𑀫𑁆𑀫𑀸 𑀑𑀲𑀭𑀦𑁆𑀢𑀺, 𑀏𑀓𑀥𑀫𑁆𑀫𑁄 𑀳𑀺 𑀓𑁄 𑀦𑀼 𑀲𑁄.

𑀇𑀘𑁆𑀘𑀸𑀳 𑀦𑀸𑀫𑀁 𑀲𑀦𑁆𑀥𑀸𑀬, 𑀣𑁂𑀭𑁄 𑀫𑀸𑀡𑀯𑀓𑁄 𑀢𑀼 𑀲𑁄;

𑀦𑀸’𑀜𑁆𑀜𑀸𑀲𑀺 𑀧𑀼𑀘𑁆𑀙𑀺𑀢𑁄 𑀫𑀦𑁆𑀢𑁄, 𑀩𑀼𑀤𑁆𑀥𑀫𑀦𑁆𑀢𑁄𑀢𑀺 𑀪𑀸𑀲𑀺𑀢𑁄.

𑀤𑁂𑀳𑀻𑀢𑀺 𑀆𑀳 𑀲𑁄 𑀆𑀳, 𑀤𑁂𑀫 𑀦𑁄 𑀯𑁂𑀲𑀥𑀸𑀭𑀺𑀦𑁄;

𑀕𑀼𑀭𑀼𑀁 𑀆𑀧𑀼𑀘𑁆𑀙𑀺 𑀫𑀦𑁆𑀢𑀢𑁆𑀣𑀁, 𑀫𑀸𑀢𑀭𑀁 𑀧𑀺𑀢𑀭𑀁 𑀢𑀣𑀸.

𑀫𑀸𑀡𑀯𑀸𑀦𑀁 𑀲𑀢𑁂𑀳𑁂’𑀲, 𑀢𑀻𑀳𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀮𑁂𑀦, 𑀉𑀧𑀲𑀫𑁆𑀧𑀚𑁆𑀚𑀺 𑀫𑀸𑀡𑀯𑁄.

𑀔𑀻𑀡𑀸𑀲𑀯𑀲𑀳𑀲𑁆𑀲𑀁 𑀲𑁄, 𑀤𑀸𑀲𑀓𑀢𑁆𑀣𑁂𑀭𑀚𑁂𑀝𑁆𑀞𑀓𑀁;

𑀉𑀧𑀸𑀮𑀺𑀣𑁂𑀭𑁄 𑀯𑀸𑀘𑁂𑀲𑀺, 𑀲𑀓𑀮𑀁 𑀧𑀺𑀝𑀓𑀢𑁆𑀢𑀬𑀁.

𑀕𑀡𑀦𑀸 𑀯𑀻𑀢𑀺𑀯𑀢𑁆𑀢𑀸 𑀢𑁂, 𑀲𑁂𑀲𑀸’𑀭𑀺𑀬 𑀧𑀼𑀣𑀼𑀚𑁆𑀚𑀦𑀸;

𑀧𑀺𑀝𑀓𑀸𑀦𑀼𑀕𑁆𑀕𑀳𑀺𑀢𑀸𑀦𑀺, 𑀬𑁂𑀳𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀓𑀸𑀲𑀻𑀲𑀼 𑀓𑁄𑀲𑀮𑁄 𑀦𑀸𑀫, 𑀲𑀢𑁆𑀣𑀯𑀸𑀳𑀲𑀼𑀢𑁄 𑀅𑀳𑀼;

𑀕𑀺𑀭𑀺𑀩𑁆𑀩𑀚𑀁 𑀯𑀡𑀺𑀚𑁆𑀚𑀸𑀬, 𑀕𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑁄.

𑀅𑀕𑀸 𑀯𑁂𑀴𑀼𑀯𑀦𑀁 𑀧𑀜𑁆𑀘-𑀤𑀲𑀯𑀲𑁄 𑀓𑀼𑀫𑀸𑀭𑀓𑁄;

𑀫𑀸𑀡𑀯𑀁 𑀧𑀜𑁆𑀘𑀧𑀜𑁆𑀜𑀸𑀲, 𑀧𑀭𑀺𑀯𑀸𑀭𑀺𑀬 𑀢𑀁 𑀕𑀢𑀸.

𑀲𑀕𑀡𑀁 𑀤𑀸𑀲𑀓𑀁 𑀣𑁂𑀭𑀁, 𑀢𑀢𑁆𑀣 𑀤𑀺𑀲𑁆𑀯𑀸 𑀧𑀲𑀻𑀤𑀺𑀬;

𑀧𑀩𑁆𑀩𑀚𑁆𑀚𑀁 𑀬𑀸𑀘𑀺 𑀲𑁄 𑀆𑀳, 𑀢𑀯𑀸’𑀧𑀼𑀘𑁆𑀙 𑀕𑀼𑀭𑀼𑀁 𑀇𑀢𑀺.

𑀪𑀢𑁆𑀢𑀢𑁆𑀢𑀬𑀫𑀪𑀼𑀜𑁆𑀚𑀺𑀢𑁆𑀯𑀸 ¶ , 𑀲𑁄𑀡𑀓𑁄 𑀲𑁄 𑀓𑀼𑀫𑀸𑀭𑀓𑁄;

𑀫𑀸𑀢𑀸𑀧𑀺𑀢𑀽𑀳𑀺 𑀓𑀸𑀭𑁂𑀢𑁆𑀯𑀸, 𑀧𑀩𑁆𑀩𑀚𑁆𑀚𑀸𑀦𑀼𑀜𑁆𑀜𑀫𑀸𑀕𑀢𑁄.

𑀲𑀤𑁆𑀥𑀺𑀁 𑀢𑁂𑀳𑀺 𑀓𑀼𑀫𑀸𑀭𑁂𑀳𑀺, 𑀤𑀸𑀲𑀓𑀢𑁆𑀣𑁂𑀭𑀲𑀦𑁆𑀢𑀺𑀓𑁂;

𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀚𑁆𑀚, 𑀉𑀕𑁆𑀕𑀡𑁆𑀳𑀺 𑀧𑀺𑀝𑀓𑀢𑁆𑀢𑀬𑀁.

𑀔𑀻𑀡𑀸𑀲𑀯𑀲𑀳𑀲𑁆𑀲𑀲𑁆𑀲, 𑀣𑁂𑀭𑀲𑀺𑀲𑁆𑀲 𑀕𑀡𑀲𑁆𑀲 𑀲𑁄;

𑀅𑀳𑁄𑀲𑀺 𑀧𑀺𑀝𑀓𑀜𑁆𑀜𑀼𑀲𑁆𑀲, 𑀚𑁂𑀝𑁆𑀞𑀓𑁄 𑀲𑁄𑀡𑀓𑁄 𑀬𑀢𑀺.

𑀅𑀳𑁄𑀲𑀺 𑀲𑀺𑀕𑁆𑀕𑀯𑁄 𑀦𑀸𑀫, 𑀧𑀼𑀭𑁂 𑀧𑀸𑀝𑀮𑀺𑀦𑀸𑀫𑀓𑁄;

𑀧𑀜𑁆𑀜𑀯𑀸’𑀫𑀘𑁆𑀘𑀢𑀦𑀬𑁄, 𑀅𑀝𑁆𑀞𑀸𑀭𑀲𑀲𑀫𑁄 𑀢𑀼 𑀲𑁄.

𑀧𑀸𑀲𑀸𑀤𑁂𑀲𑀼 𑀯𑀲𑀁 𑀢𑀻𑀲𑀼, 𑀙𑀴𑀟𑁆𑀠𑀉𑀢𑀼𑀲𑀸𑀥𑀼𑀲𑀼;

𑀅𑀫𑀘𑁆𑀘𑀧𑀼𑀢𑁆𑀢𑀁 𑀆𑀤𑀸𑀬, 𑀘𑀡𑁆𑀟𑀯𑀚𑁆𑀚𑀺𑀁 𑀲𑀳𑀸𑀬𑀓𑀁.

𑀧𑀼𑀭𑀺𑀲𑀸𑀦𑀁 𑀤𑀲𑀤𑁆𑀥𑁂𑀳𑀺, 𑀲𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀕𑀦𑁆𑀢𑁆𑀯𑀸𑀦 𑀓𑀼𑀓𑁆𑀓𑀼𑀝𑀸𑀭𑀸𑀫𑀁, 𑀲𑁄𑀡𑀓𑀢𑁆𑀣𑁂𑀭𑀫𑀤𑁆𑀤𑀲.

𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑀁, 𑀦𑀺𑀲𑀺𑀦𑁆𑀦𑀁 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀁;

𑀯𑀦𑁆𑀤𑀺 𑀢𑁂𑀦𑀸𑀮𑀧𑀦𑁆𑀢𑀁 𑀢𑀁, 𑀜𑀢𑁆𑀯𑀸 𑀲𑀗𑁆𑀖𑀫𑀧𑀼𑀘𑁆𑀙𑀺𑀢𑀁.

𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑀸, 𑀦𑀸𑀮𑀧𑀦𑁆𑀢𑀻’𑀢𑀺 𑀆𑀳𑀼 𑀢𑁂;

𑀓𑀣𑀦𑁆𑀦𑀼 𑀯𑀼𑀝𑁆𑀞𑀳𑀦𑁆𑀢𑀻𑀢𑀺, 𑀯𑀼𑀢𑁆𑀢𑀸 𑀆𑀳𑀁𑀲𑀼 𑀪𑀺𑀓𑁆𑀔𑀯𑁄.

𑀧𑀓𑁆𑀓𑁄𑀲𑀦𑀸𑀬 𑀲𑀢𑁆𑀣𑀼𑀲𑁆𑀲, 𑀲𑀗𑁆𑀖𑀧𑀓𑁆𑀓𑁄𑀲𑀦𑀸𑀬 𑀘;

𑀬𑀣𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀸, 𑀆𑀬𑀼𑀓𑁆𑀔𑀬𑀯𑀲𑁂𑀦 𑀘.

𑀯𑀼𑀝𑁆𑀞𑀳𑀦𑁆𑀢𑀻𑀢𑀺 𑀯𑀢𑁆𑀯𑀸𑀦, 𑀢𑁂𑀲𑀁 𑀤𑀺𑀲𑁆𑀯𑁄’𑀧𑀦𑀺𑀲𑁆𑀲𑀬𑀁;

𑀧𑀸𑀳𑁂𑀲𑀼𑀁 𑀲𑀗𑁆𑀖𑀯𑀘𑀦𑀁, 𑀯𑀼𑀝𑁆𑀞𑀸𑀬 𑀲 𑀢𑀳𑀺𑀁 𑀅𑀕𑀸.

𑀓𑀼𑀫𑀸𑀭𑁄 𑀧𑀼𑀘𑁆𑀙𑀺 𑀓𑀺𑀁 𑀪𑀦𑁆𑀢𑁂, 𑀦𑀸𑀮𑀧𑀺𑀢𑁆𑀣𑀸𑀢𑀺 𑀆𑀳 𑀲𑁄;

𑀪𑀼𑀜𑁆𑀚𑀺𑀫𑁆𑀳 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺, 𑀆𑀳 𑀪𑁄𑀚𑁂𑀣 𑀦𑁄 𑀅𑀧𑀺.

𑀆𑀳 𑀅𑀫𑁆𑀳𑀸𑀤𑀺𑀲𑁂 𑀚𑀸𑀳𑁂, 𑀲𑀓𑁆𑀓𑀸 𑀪𑁄𑀚𑀬𑀺𑀢𑀼𑀁 𑀇𑀢𑀺;

𑀫𑀸𑀢𑀸𑀧𑀺𑀢𑀼 𑀅𑀦𑀼𑀜𑁆𑀜𑀸𑀬, 𑀲𑁄 𑀓𑀼𑀫𑀸𑀭𑁄𑀣 𑀲𑀺𑀕𑁆𑀕𑀯𑁄.

𑀘𑀡𑁆𑀟𑀯𑀚𑁆𑀚𑀻 𑀘 𑀢𑁂𑀧𑀜𑁆𑀘-𑀲𑀢𑀸𑀦𑀺 𑀧𑀼𑀭𑀺𑀲𑀸𑀧𑀺 𑀘;

𑀧𑀩𑁆𑀩𑀚𑁆𑀚𑀺𑀢𑁆𑀯𑁄’𑀧𑀲𑀫𑁆𑀧𑀚𑁆𑀚𑀼𑀁, 𑀲𑁄𑀡𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀉𑀧𑀚𑁆𑀛𑀸𑀬𑀦𑁆𑀢𑀺𑀓𑁂𑀬𑁂𑀯, 𑀢𑁂 𑀤𑀼𑀯𑁂 𑀧𑀺𑀝𑀓𑀢𑁆𑀢𑀬𑀁;

𑀉𑀕𑁆𑀕𑀳𑁂𑀲𑀼𑀜𑁆𑀘 𑀓𑀸𑀮𑁂𑀦, 𑀙𑀴𑀪𑀺𑀜𑁆𑀜𑀁 𑀮𑀪𑀺𑀁𑀲𑀼 𑀘.

𑀜𑀢𑁆𑀯𑀸 ¶ 𑀢𑀺𑀲𑁆𑀲 𑀧𑀝𑀺𑀲𑀦𑁆𑀥𑀺𑀁, 𑀢𑀢𑁄 𑀧𑀪𑀼𑀢𑀺 𑀲𑀺𑀕𑁆𑀕𑀯𑁄;

𑀣𑁂𑀭𑁄 𑀲𑁄 𑀲𑀢𑁆𑀢𑀯𑀲𑁆𑀲𑀸𑀦𑀺, 𑀢𑀁 𑀖𑀭𑀁 𑀉𑀧𑀲𑀗𑁆𑀓𑀫𑀺.

𑀕𑀘𑁆𑀙𑀸𑀢𑀺 𑀯𑀸𑀘𑀸𑀫𑀢𑁆𑀢𑀫𑁆𑀧𑀺, 𑀲𑀢𑁆𑀢𑀯𑀲𑁆𑀲𑀸𑀦𑀺 𑀦𑀸𑀮𑀪𑀺;

𑀅𑀮𑀢𑁆𑀣 𑀅𑀝𑁆𑀞𑀫𑁂 𑀯𑀲𑁆𑀲𑁂, 𑀕𑀘𑁆𑀙𑀸𑀢𑀺 𑀯𑀘𑀦𑀁 𑀢𑀳𑀺𑀁.

𑀢𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀯𑀺𑀲𑀦𑁆𑀢𑁄, 𑀤𑀺𑀲𑁆𑀯𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑁄;

𑀓𑀺𑀜𑁆𑀘𑀺 𑀮𑀤𑁆𑀥𑀁 𑀖𑀭𑁂 𑀦𑁄𑀢𑀺, 𑀧𑀼𑀘𑁆𑀙𑀺 𑀆𑀫𑀸𑀢𑀺 𑀲𑁄’𑀩𑁆𑀭𑀯𑀺.

𑀖𑀭𑀁 𑀕𑀦𑁆𑀢𑁆𑀯𑀸𑀦 𑀧𑀼𑀘𑁆𑀙𑀺𑀢𑁆𑀯𑀸, 𑀤𑀼𑀢𑀺𑀬𑁂 𑀤𑀺𑀯𑀲𑁂 𑀢𑀢𑁄;

𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺, 𑀣𑁂𑀭𑀁 𑀖𑀭𑀫𑀼𑀧𑀸𑀕𑀢𑀁.

𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑁄 𑀧𑀲𑀦𑁆𑀦𑀫𑀦𑁄 𑀤𑁆𑀯𑀺𑀚𑁄;

𑀅𑀢𑁆𑀢𑀦𑁄 𑀧𑀓𑀢𑁂𑀦’𑀲𑁆𑀲, 𑀦𑀺𑀘𑁆𑀘𑀁 𑀪𑀺𑀓𑁆𑀔𑀁 𑀧𑀯𑀢𑁆𑀢𑀬𑀺.

𑀓𑀫𑁂𑀦’𑀲𑁆𑀲 𑀧𑀲𑀻𑀤𑀺𑀁𑀲𑀼, 𑀲𑀩𑁆𑀩𑁂’𑀧𑀺 𑀖𑀭𑀫𑀸𑀦𑀼𑀲𑀸;

𑀪𑁄𑀚𑀸𑀧𑁂𑀲𑀺 𑀤𑀺𑀚𑁄 𑀦𑀺𑀘𑁆𑀘𑀁, 𑀦𑀺𑀲𑀻𑀤𑀸𑀧𑀺𑀬 𑀢𑀁 𑀖𑀭𑁂.

𑀏𑀯𑀁 𑀓𑀫𑁂𑀦 𑀕𑀘𑁆𑀙𑀦𑁆𑀢𑁄, 𑀓𑀸𑀮𑁂 𑀲𑁄𑀴𑀲𑀯𑀲𑁆𑀲𑀺𑀓𑁄;

𑀅𑀳𑀼 𑀢𑀺𑀲𑁆𑀲𑀓𑀼𑀫𑀸𑀭𑁄 𑀲𑁄, 𑀢𑀺𑀯𑁂𑀤𑁄𑀤𑀥𑀺𑀧𑀸𑀭𑀕𑁄.

𑀣𑁂𑀭𑁄 𑀓𑀣𑀸𑀲𑀫𑀼𑀝𑁆𑀞𑀸𑀦𑀁, 𑀳𑁂𑀲𑁆𑀲𑀢𑁂’𑀯 𑀖𑀭𑁂 𑀇𑀢𑀺;

𑀆𑀲𑀦𑀸𑀦𑀺 𑀦 𑀤𑀲𑁆𑀲𑁂𑀲𑀺, 𑀞𑀧𑁂𑀢𑁆𑀯𑀸 𑀫𑀸𑀡𑀯𑀸𑀲𑀦𑀁.

𑀩𑁆𑀭𑀳𑁆𑀫𑀮𑁄𑀓𑀕𑀢𑀢𑁆𑀢𑀸𑀯, 𑀲𑀼𑀘𑀺𑀓𑀸𑀫𑁄 𑀅𑀳𑁄𑀲𑀺 𑀲𑁄;

𑀢𑀲𑁆𑀫𑀸 𑀲𑁄 𑀢𑀲𑁆𑀲 𑀧𑀮𑁆𑀮𑀗𑁆𑀓𑁄, 𑀯𑀸𑀲𑀬𑀺𑀢𑁆𑀯𑀸 𑀮𑀕𑀻𑀬𑀢𑀺.

𑀅𑀜𑁆𑀜𑀸𑀲𑀦𑀁 𑀅𑀧𑀲𑁆𑀲𑀦𑁆𑀢𑁄, 𑀞𑀺𑀢𑁂 𑀣𑁂𑀭𑁂 𑀲𑀲𑀫𑁆𑀪𑀫𑁄;

𑀢𑀲𑁆𑀲 𑀢𑀁 𑀆𑀲𑀦𑀁 𑀢𑀲𑁆𑀲, 𑀧𑀜𑁆𑀜𑀧𑁂𑀲𑀺 𑀖𑀭𑁂 𑀚𑀦𑁄.

𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀢𑀁, 𑀆𑀕𑀫𑁆𑀫𑀸’𑀘𑀭𑀺𑀬𑀦𑁆𑀢𑀺𑀓𑀸;

𑀓𑀼𑀚𑁆𑀛𑀺𑀢𑁆𑀯𑀸 𑀫𑀸𑀡𑀯𑁄 𑀯𑀸𑀘𑀁, 𑀅𑀫𑀦𑀸𑀧𑀁 𑀉𑀤𑀻𑀭𑀬𑀺.

𑀣𑁂𑀭𑁄 𑀫𑀸𑀡𑀯 𑀓𑀺𑀁 𑀫𑀦𑁆𑀢𑀁, 𑀚𑀸𑀦𑀸𑀲𑀻𑀢𑀺 𑀢𑀫𑀩𑁆𑀭𑀯𑀺;

𑀢𑀫𑁂𑀯 𑀧𑀼𑀘𑁆𑀙𑀁 𑀣𑁂𑀭𑀲𑁆𑀲, 𑀧𑀘𑁆𑀙𑀸 𑀭𑁄𑀘𑁂𑀲𑀺 𑀫𑀸𑀡𑀯𑁄.

𑀚𑀸𑀦𑀸𑀫𑀻𑀢𑀺 𑀧𑀝𑀺𑀜𑁆𑀜𑀸𑀬, 𑀣𑁂𑀭𑁂 𑀣𑁂𑀭𑀁 𑀅𑀧𑀼𑀘𑁆𑀙𑀺𑀲𑁄;

𑀕𑀡𑁆𑀞𑀺𑀞𑀸𑀦𑀸𑀦𑀺 𑀯𑁂𑀤𑁂𑀲𑀼, 𑀢𑀲𑁆𑀲 𑀣𑁂𑀭𑁄’𑀣 𑀩𑁆𑀬𑀸𑀓𑀭𑀺.

𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺,

𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺; 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺,

𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺;

𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀢𑀁 𑀘𑀺𑀢𑁆𑀢𑀬𑀫𑀓𑁂 𑀧𑀜𑁆𑀳𑀁, 𑀧𑀼𑀘𑁆𑀙𑀺 𑀣𑁂𑀭𑁄 𑀯𑀺𑀲𑀸𑀭𑀤𑁄;

𑀅𑀦𑁆𑀥𑀓𑀸𑀭𑁄 𑀯𑀺𑀬 𑀅𑀳𑀼, 𑀢𑀲𑁆𑀲 𑀲𑁄 𑀢𑀫𑀯𑁄𑀘 𑀲𑁄.

𑀪𑀺𑀓𑁆𑀔𑀼𑀓𑁄 𑀦𑀸𑀫 𑀫𑀦𑁆𑀢𑁄𑀢𑀺, 𑀩𑀼𑀤𑁆𑀥 𑀫𑀦𑁆𑀢𑁄𑀢𑀺 𑀲𑁄 𑀩𑁆𑀭𑀯𑀺;

𑀤𑁂𑀳𑀻𑀢𑀺 𑀯𑀼𑀢𑁆𑀢𑁂 𑀦𑁄𑀯𑁂𑀲-𑀥𑀸𑀭𑀺𑀦𑁄 𑀤𑀫𑁆𑀫𑀺 𑀢𑀁 𑀇𑀢𑀺.

𑀫𑀸𑀢𑀸𑀧𑀺𑀢𑀽𑀳𑀺’𑀦𑀼𑀜𑁆𑀜𑀸𑀢𑁄, 𑀫𑀦𑁆𑀢𑀢𑁆𑀣𑀸𑀬 𑀲 𑀧𑀩𑁆𑀩𑀚𑁆𑀚𑀺;

𑀓𑀫𑁆𑀫𑀝𑁆𑀞𑀸𑀦𑀫𑀤𑀸 𑀣𑁂𑀭𑁄, 𑀧𑀩𑁆𑀩𑀸𑀚𑁂𑀢𑁆𑀯𑀸 𑀬𑀣𑀸𑀭𑀳𑀁.

𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄, 𑀅𑀘𑀺𑀭𑁂𑀦 𑀫𑀳𑀸𑀫𑀢𑀻;

𑀲𑁄𑀢𑀸𑀨𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀣𑁂𑀭𑁄 𑀜𑀢𑁆𑀯𑀸𑀦 𑀢𑀁 𑀢𑀣𑀸.

𑀧𑁂𑀲𑁂𑀲𑀺 𑀘𑀡𑁆𑀟𑀯𑀚𑁆𑀚𑀺𑀲𑁆𑀲, 𑀣𑁂𑀭𑀲𑁆𑀲𑀦𑁆𑀢𑀺𑀓𑀫𑀼𑀕𑁆𑀕𑀳𑀁;

𑀓𑀸𑀢𑀼𑀁 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀸𑀦𑀁, 𑀲𑁄𑀢𑀢𑁆𑀣𑀸’𑀓𑀸𑀢𑀤𑀼𑀕𑁆𑀕𑀳𑀁.

𑀢𑀢𑁄 𑀲𑁄 𑀢𑀺𑀲𑁆𑀲𑀤𑀳𑀭𑁄, 𑀆𑀭𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁;

𑀙𑀴𑀪𑀺𑀜𑁆𑀜𑁄 𑀅𑀳𑀼 𑀓𑀸𑀮𑁂, 𑀣𑁂𑀭𑀪𑀸𑀯𑀜𑁆𑀘 𑀧𑀸𑀧𑀼𑀡𑀺.

𑀅𑀢𑀻𑀯 𑀧𑀸𑀓𑀝𑁄 𑀆𑀲𑀺, 𑀘𑀦𑁆𑀤𑁄’𑀯 𑀲𑀽𑀭𑀺𑀬𑁄’𑀯𑀲𑁄;

𑀮𑁄𑀓𑁄 𑀢𑀲𑁆𑀲 𑀯𑀘𑁄’𑀫𑀜𑁆𑀜𑀻, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑁄𑀧𑀺𑀬.

𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀣𑁂𑀭𑁄𑀤𑀬𑁄 𑀦𑀺𑀝𑁆𑀞𑀻𑀢𑁄.

𑀏𑀓𑀸𑀳𑀁 ¶ 𑀉𑀧𑀭𑀸𑀚𑀸 𑀲𑁄, 𑀅𑀤𑀓𑁆𑀔𑀺 𑀫𑀺𑀕𑀯𑀁 𑀕𑀢𑁄;

𑀓𑀻𑀴𑀫𑀸𑀦𑁂 𑀫𑀺𑀕𑁂’𑀭𑀜𑁆𑀜𑁂, 𑀤𑀺𑀲𑁆𑀯𑀸 𑀏𑀢𑀁 𑀯𑀺𑀘𑀺𑀦𑁆𑀢𑀬𑀺.

𑀫𑀺𑀕𑀸𑀧𑀺 𑀏𑀯𑀁 𑀓𑀺𑀴𑀦𑁆𑀢𑀺, 𑀅𑀭𑀜𑁆𑀜𑁂 𑀢𑀺𑀡𑀕𑁄𑀘𑀭𑀸;

𑀦 𑀓𑀺𑀴𑀺𑀲𑁆𑀲𑀦𑁆𑀢𑀺 𑀓𑀺𑀁 𑀪𑀺𑀓𑁆𑀔𑀽, 𑀲𑀼𑀔𑀸𑀳𑀸𑀭𑀯𑀺𑀳𑀸𑀭𑀺𑀦𑁄.

𑀅𑀢𑁆𑀢𑀦𑁄 𑀘𑀺𑀦𑁆𑀢𑀺𑀢𑀁 𑀭𑀜𑁆𑀜𑁄, 𑀆𑀭𑁄𑀘𑁂𑀲𑀺 𑀖𑀭𑀁 𑀕𑀢𑁄;

𑀲𑀜𑁆𑀜𑀸𑀧𑁂𑀢𑀼𑀁 𑀢𑀼 𑀲𑀢𑁆𑀢𑀸𑀳𑀁, 𑀭𑀚𑁆𑀚𑀁 𑀢𑀲𑁆𑀲 𑀅𑀤𑀸𑀲𑀺 𑀲𑁄.

𑀅𑀦𑀼𑀪𑁄𑀳𑀺 𑀇𑀫𑁂 𑀭𑀚𑁆𑀚𑀁, 𑀲𑀢𑁆𑀢𑀸𑀳𑀁 𑀢𑁆𑀯𑀁 𑀓𑀼𑀫𑀸𑀭𑀓;

𑀢𑀢𑁄 𑀢𑀁 𑀖𑀸𑀢𑀬𑀺𑀲𑁆𑀲𑀸𑀫𑀺, 𑀇𑀘𑁆𑀘’𑀯𑁄𑀘 𑀫𑀳𑀻𑀧𑀢𑀺.

𑀲𑀢𑁆𑀢𑀸𑀳𑀸’𑀳𑀁 𑀫𑀭𑀺𑀲𑁆𑀲𑀁𑀢𑀺, 𑀢𑁆𑀯𑀁 𑀦 𑀓𑀻𑀴𑀺 𑀇𑀫𑁂 𑀓𑀣𑀁;

𑀓𑀻𑀴𑀺𑀲𑁆𑀲𑀦𑁆𑀢𑀺 𑀬𑀢𑀺 𑀢𑀸𑀢, 𑀲𑀤𑀸 𑀫𑀭𑀡𑀲𑀜𑁆𑀜𑀺𑀦𑁄.

𑀇𑀘𑁆𑀘𑁂𑀯𑀁 𑀪𑀸𑀓𑀭𑀸 𑀯𑀼𑀢𑁆𑀢𑁄, 𑀲𑀸𑀲𑀦𑀲𑁆𑀫𑀺𑀁 𑀧𑀲𑀻𑀤𑀺 𑀲𑁄;

𑀓𑀸𑀮𑁂𑀦 𑀫𑀺𑀕𑀯𑀁 𑀕𑀦𑁆𑀢𑁆𑀯𑀸, 𑀣𑁂𑀭𑀫𑀤𑀓𑁆𑀔𑀺 𑀲𑀜𑁆𑀜𑀢𑀁.

𑀦𑀺𑀲𑀺𑀦𑁆𑀦𑀁 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀲𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀁;

𑀲𑀸𑀮𑀲𑀸𑀔𑀸𑀬 𑀦𑀸𑀕𑁂𑀦, 𑀩𑀻𑀚𑀬𑀦𑁆𑀢 𑀫𑀦𑀸𑀲𑀯𑀁.

𑀅𑀬𑀁 𑀣𑁂𑀭𑁄 𑀯𑀺𑀬𑀸’𑀳𑀫𑁆𑀧𑀺, 𑀧𑀩𑁆𑀩𑀚𑁆𑀚 𑀚𑀺𑀦 𑀲𑀸𑀲𑀦𑁂;

𑀯𑀺𑀳𑀭𑀺𑀲𑁆𑀲𑀁 𑀓𑀤𑀸 𑀭𑀜𑁆𑀜𑁂, 𑀇𑀢𑀺 𑀘𑀺𑀦𑁆𑀢𑀬𑀺 𑀧𑀜𑁆𑀜𑀯𑀸.

𑀆𑀓𑀸𑀲𑁂 𑀞𑀧𑀬𑀺𑀢𑁆𑀯𑀸𑀦, 𑀘𑀻𑀯𑀭𑀸𑀦𑀺 𑀯𑀭𑀸𑀦𑀺 𑀲𑁄;

𑀑𑀕𑀸𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀻, 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀣.

𑀢𑀁 ¶ 𑀇𑀤𑁆𑀥𑀺𑀁 𑀉𑀧𑀭𑀸𑀚𑀸 𑀲𑁄, 𑀤𑀺𑀲𑁆𑀯𑀸’𑀢𑀻𑀯 𑀧𑀲𑀻𑀤𑀺𑀬;

𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀁𑀢𑀺, 𑀩𑀼𑀤𑁆𑀥𑀺𑀁𑀘𑀸’𑀓𑀸𑀲𑀺 𑀩𑀼𑀤𑁆𑀥𑀺𑀫𑀸.

𑀉𑀧𑀲𑀗𑁆𑀓𑀫𑁆𑀫 𑀭𑀸𑀚𑀸𑀦𑀁, 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺 𑀲𑀸𑀤𑀭𑁄;

𑀦𑀺𑀯𑀸𑀭𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄, 𑀢𑀫𑀸𑀤𑀸𑀬 𑀫𑀳𑀻𑀧𑀢𑀺.

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀯𑀺𑀳𑀸𑀭𑀫𑀕𑀫𑀸 𑀲𑀬𑀁;

𑀧𑀩𑁆𑀩𑀚𑀺 𑀲𑁄 𑀫𑀳𑀸𑀥𑀫𑁆𑀫-𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑀦𑁆𑀢𑀺𑀓𑁂.

𑀲𑀤𑁆𑀥𑀺𑀁 𑀢𑁂𑀦 𑀘𑀢𑀼𑀲𑀢-𑀲𑀳𑀲𑁆𑀲𑀸𑀦𑀺 𑀦𑀭𑀸𑀧𑀺 𑀘;

𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀼, 𑀕𑀡𑀦𑀸 𑀘 𑀦 𑀯𑀚𑁆𑀚𑀢𑀺.

𑀪𑀸𑀕𑀺𑀦𑁂𑀬𑁆𑀬𑁄 𑀦𑀭𑀺𑀦𑁆𑀤𑀲𑁆𑀲, 𑀅𑀕𑁆𑀕𑀺 𑀩𑁆𑀭𑀳𑁆𑀫𑀸𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀳𑁄𑀲𑀺 𑀭𑀜𑁆𑀜𑁄 𑀥𑀻𑀢𑀸𑀬, 𑀲𑀗𑁆𑀖𑀫𑀺𑀢𑁆𑀢𑀸𑀬 𑀲𑀸𑀫𑀺𑀓𑁄.

𑀉𑀧𑀭𑀸𑀚𑀲𑁆𑀲 𑀧𑀩𑁆𑀩𑀚𑁆𑀚𑀸, 𑀢𑀲𑁆𑀲𑀸’𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀘𑀢𑀼𑀢𑁆𑀣𑁂 𑀆𑀲𑀺𑀯𑀲𑁆𑀲𑁂𑀲𑀸, 𑀫𑀳𑀸𑀚𑀦𑀳𑀺𑀢𑁄𑀤𑀬𑀸.

𑀢𑀢𑁆𑀣𑁂𑀯 𑀉𑀧𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀉𑀧𑀦𑀺𑀲𑁆𑀲𑀬𑁄;

𑀖𑀝𑁂𑀦𑁆𑀢𑁄 𑀉𑀧𑀭𑀸𑀚𑀸 𑀲𑁄, 𑀙𑀴’𑀪𑀺𑀜𑁆𑀜𑁄’𑀭𑀳𑀸 𑀅𑀳𑀼.

𑀯𑀺𑀳𑀸𑀭𑁂 𑀢𑁂𑀲𑀫𑀸𑀭𑀤𑁆𑀥𑁂, 𑀲𑀩𑁆𑀩𑁂 𑀲𑀩𑁆𑀩𑀧𑀼𑀭𑁂𑀲𑀼𑀧𑀺;

𑀲𑀸𑀥𑀼𑀓𑀁 𑀢𑀻𑀳𑀺 𑀯𑀲𑁆𑀲𑁂𑀳𑀺, 𑀦𑀺𑀝𑁆𑀞𑀸𑀧𑁂𑀲𑀼𑀁 𑀫𑀦𑁄𑀭𑀫𑁂.

𑀣𑁂𑀭𑀲𑁆𑀲 𑀇𑀦𑁆𑀤𑀕𑀼𑀢𑁆𑀢𑀲𑁆𑀲, 𑀓𑀫𑁆𑀫𑀸𑀤𑀺𑀝𑁆𑀞𑀸𑀬𑀓𑀲𑁆𑀲 𑀢𑀼;

𑀇𑀤𑁆𑀥𑀺𑀬𑀸 𑀘𑀸’𑀲𑀼 𑀦𑀺𑀝𑁆𑀞𑀸𑀲𑀺, 𑀅𑀲𑁄𑀓𑀸𑀭𑀸𑀫𑀲𑀯𑁆𑀳𑀬𑁄.

𑀚𑀦𑁂𑀦 𑀧𑀭𑀺𑀪𑀼𑀢𑁆𑀢𑁂𑀲𑀼, 𑀞𑀸𑀦𑁂𑀲𑀼 𑀘 𑀢𑀳𑀺𑀁 𑀢𑀳𑀺𑀁;

𑀘𑁂𑀢𑀺𑀬𑀸𑀦𑀺 𑀅𑀓𑀸𑀭𑁂𑀲𑀺, 𑀭𑀫𑀡𑀻𑀬𑀸𑀦𑀺 𑀪𑀽𑀧𑀢𑀺.

𑀧𑀼𑀭𑁂𑀳𑀺 𑀘𑀢𑀼𑀭𑀸𑀲𑀻𑀢𑀺-𑀲𑀳𑀲𑁆𑀲𑁂𑀳𑀺 𑀲𑀫𑀦𑁆𑀢𑀢𑁄;

𑀮𑁂𑀔𑁂 𑀏𑀓𑀸𑀳𑀫𑀸𑀦𑁂𑀲𑀼𑀁, 𑀯𑀺𑀳𑀸𑀭𑀸 𑀦𑀺𑀝𑁆𑀞𑀺𑀢𑀸 𑀇𑀢𑀺.

𑀮𑁂𑀔𑁂 𑀲𑀼𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀫𑀳𑀸𑀢𑁂𑀚𑀺𑀤𑁆𑀥𑀺 𑀯𑀺𑀓𑁆𑀓𑀫𑁄;

𑀓𑀸𑀢𑀼𑀓𑀸𑀫𑁄 𑀲𑀓𑀺𑀁𑀬𑁂𑀯, 𑀲𑀩𑁆𑀩𑀸𑀭𑀸𑀫 𑀫𑀳𑀸𑀫𑀳𑀁.

𑀧𑀼𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀢𑁄;

𑀲𑀩𑁆𑀩𑀸𑀭𑀸𑀫𑀫𑀳𑁄 𑀳𑁄𑀢𑀼, 𑀲𑀩𑁆𑀩𑀤𑁂𑀲𑁂𑀲𑀼 𑀏𑀓𑀤𑀸.

𑀬𑁄𑀚𑀦𑁂 ¶ 𑀬𑁄𑀚𑀦𑁂 𑀤𑁂𑀦𑁆𑀢𑀼, 𑀫𑀳𑀸𑀤𑀸𑀦𑀁 𑀫𑀳𑀻𑀢𑀮𑁂;

𑀓𑀭𑁄𑀦𑁆𑀢𑀼 𑀕𑀸𑀫𑀸𑀭𑀸𑀫𑀸𑀦𑀁, 𑀫𑀕𑁆𑀕𑀸𑀦𑀜𑁆𑀘 𑀯𑀺𑀪𑀽𑀲𑀦𑀁.

𑀯𑀺𑀳𑀸𑀭𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀣𑀸;

𑀫𑀳𑀸𑀤𑀸𑀦𑀸𑀦𑀺 𑀯𑀢𑁆𑀢𑁂𑀦𑁆𑀢𑀼, 𑀬𑀣𑀸𑀓𑀸𑀮𑀁 𑀬𑀣𑀸𑀩𑀮𑀁.

𑀤𑀻𑀧𑀫𑀸𑀮𑀸 𑀧𑀼𑀫𑁆𑀨𑀫𑀸𑀮𑀸-𑀮𑀗𑁆𑀓𑀸𑀭𑁂𑀳𑀺 𑀢𑀳𑀺𑀁 𑀢𑀳𑀺𑀁;

𑀢𑀽𑀭𑀺𑀬𑁂𑀳𑀺 𑀘 𑀲𑀩𑁆𑀩𑁂𑀳𑀺, 𑀉𑀧𑀳𑀸𑀭𑀁 𑀅𑀦𑁂𑀓𑀥𑀸.

𑀉𑀧𑁄𑀲𑀣𑀗𑁆𑀕𑀸𑀦𑀸’𑀤𑀸𑀬, 𑀲𑀩𑁆𑀩𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀼 𑀘;

𑀧𑀽𑀚𑀸𑀯𑀺𑀲𑁂𑀲𑁂𑀦’𑀦𑁂𑀓𑁂 𑀘, 𑀓𑀭𑁄𑀦𑁆𑀢𑀼 𑀢𑀤𑀳𑁂𑀧𑀺 𑀘.

𑀲𑀩𑁆𑀩𑁂 𑀲𑀩𑁆𑀩𑀢𑁆𑀣 𑀲𑀩𑁆𑀩𑀣𑀸, 𑀬𑀣𑀸𑀡𑀢𑁆𑀢𑀸𑀥𑀺𑀓𑀸𑀧𑀺 𑀘;

𑀧𑀽𑀚𑀸 𑀲𑀫𑁆𑀧𑀝𑀺𑀬𑀸𑀤𑁂𑀲𑀼𑀁, 𑀤𑁂𑀯𑀮𑁄𑀓𑀫𑀦𑁄𑀭𑀫𑀸.

𑀢𑀲𑁆𑀫𑀺𑀁 𑀤𑀺𑀦𑁂 𑀫𑀳𑀸𑀭𑀸𑀚𑀸, 𑀲𑀩𑁆𑀩𑀸𑀮𑀗𑁆𑀓𑀸𑀭 𑀪𑀽𑀲𑀺𑀢𑁄;

𑀲𑀳𑁄𑀭𑁄𑀥𑁄 𑀲𑀳𑀸𑀫𑀘𑁆𑀘𑁄, 𑀩𑀮𑁄𑀖 𑀧𑀭𑀺𑀯𑀸𑀭𑀺𑀢𑁄.

𑀅𑀕𑀫𑀸𑀲𑀺 𑀲𑀓𑀸𑀭𑀸𑀫𑀁, 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀫𑁂𑀤𑀺𑀦𑀺𑀁;

𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀅𑀝𑁆𑀞𑀸𑀲𑀺, 𑀯𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀫𑀼𑀢𑁆𑀢𑀫𑀁.

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀆𑀲𑀼𑀁, 𑀅𑀲𑀻𑀢𑀺 𑀪𑀺𑀓𑁆𑀔𑀼𑀓𑁄𑀝𑀺 𑀬𑁄;

𑀅𑀳𑁂𑀲𑀼𑀁 𑀲𑀢𑀲𑀳𑀲𑁆𑀲𑀁, 𑀢𑁂𑀲𑀼 𑀔𑀻𑀡𑀸𑀲𑀯𑀸 𑀬𑀢𑀺.

𑀦𑀯𑀼𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀅𑀳𑀽 𑀪𑀺𑀓𑁆𑀔𑀼𑀦𑀺𑀬𑁄 𑀢𑀳𑀺𑀁;

𑀔𑀺𑀡𑀸𑀲𑀯𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀲𑀳𑀲𑁆𑀲𑀁 𑀆𑀲𑀼 𑀢𑀸𑀲𑀼 𑀢𑀼.

𑀮𑁄𑀓𑀯𑀺𑀯𑀭𑀡𑀁 𑀦𑀸𑀫, 𑀧𑀸𑀝𑀺𑀳𑀻𑀭𑀁 𑀅𑀓𑀁𑀲𑀼 𑀢𑁂;

𑀔𑀻𑀡𑀸𑀲𑀯𑀸 𑀧𑀲𑀸𑀤𑀢𑁆𑀣𑀁, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄.

𑀘𑀡𑁆𑀟𑀸𑀲𑁄𑀓𑁄𑀢𑀺 𑀜𑀸𑀬𑀺𑀢𑁆𑀣, 𑀧𑀼𑀩𑁆𑀩𑁂 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀥𑀫𑁆𑀫𑀸𑀲𑁄𑀓𑁄𑀢𑀺 𑀜𑀸𑀬𑀺𑀢𑁆𑀣, 𑀧𑀘𑁆𑀙𑀸 𑀧𑀼𑀜𑁆𑀜𑁂𑀦 𑀓𑀫𑁆𑀫𑀼𑀦𑀸.

𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀲𑁄, 𑀚𑀫𑁆𑀩𑀼𑀤𑀻𑀧𑀁 𑀲𑀫𑀦𑁆𑀢𑀢𑁄;

𑀧𑀲𑁆𑀲𑀺 𑀲𑀩𑁆𑀩𑁂 𑀯𑀺𑀳𑀸𑀭𑁂 𑀘, 𑀦𑀸𑀦𑀸𑀧𑀽𑀚𑀸 𑀯𑀺𑀪𑀽𑀲𑀺𑀢𑁂.

𑀅𑀢𑀻𑀯 𑀢𑀼𑀝𑁆𑀞𑁄 𑀢𑁂 𑀤𑀺𑀲𑁆𑀯𑀸, 𑀲𑀗𑁆𑀖𑀁 𑀧𑀼𑀘𑁆𑀙𑀺 𑀦𑀺𑀲𑀻𑀤𑀺𑀬;

𑀓𑀲𑁆𑀲 𑀪𑀦𑁆𑀢𑁂 𑀧𑀭𑀺𑀘𑁆𑀘𑀸𑀕𑁄, 𑀫𑀳𑀸𑀲𑀼𑀕𑀢 𑀲𑀸𑀲𑀦𑁂.

𑀣𑁂𑀭𑁄 𑀲𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄, 𑀭𑀜𑁆𑀜𑁄 𑀧𑀜𑁆𑀳𑀁 𑀯𑀺𑀬𑀸𑀓𑀭𑀺;

𑀥𑀭𑀫𑀸𑀦𑁂’𑀧𑀺 𑀲𑀼𑀕𑀢𑁂, 𑀦𑀢𑁆𑀣𑀺 𑀘𑀸𑀕𑀻 𑀢𑀬𑀸𑀲𑀫𑁄.

𑀢𑀁 𑀲𑀼𑀢𑁆𑀯𑀸 𑀯𑀘𑀦𑀁 𑀪𑀺𑀬𑁆𑀬𑁄, 𑀢𑀼𑀝𑁆𑀞𑁄 𑀭𑀸𑀚𑀸 𑀅𑀧𑀼𑀘𑁆𑀙𑀺 𑀢𑀁;

𑀩𑀼𑀤𑁆𑀥𑀲𑀸𑀲𑀦 𑀤𑀸𑀬𑀸𑀤𑁄, 𑀳𑁄𑀢𑀺 𑀔𑁄 𑀫𑀸𑀤𑀺𑀲𑁄 𑀇𑀢𑀺.

𑀣𑁂𑀭𑁄 ¶ 𑀢𑀼 𑀭𑀸𑀚𑀧𑀼𑀢𑁆𑀢𑀲𑁆𑀲, 𑀫𑀳𑀺𑀦𑁆𑀤𑀲𑁆𑀲𑀽’𑀧𑀦𑀺𑀲𑁆𑀲𑀬𑀁;

𑀢𑀣𑁂𑀯 𑀭𑀸𑀚𑀥𑀻𑀢𑀸𑀬, 𑀲𑀗𑁆𑀖𑀫𑀺𑀢𑁆𑀢𑀸𑀬 𑀧𑁂𑀓𑁆𑀔𑀺𑀬.

𑀲𑀸𑀲𑀦𑀲𑁆𑀲𑀸’𑀪𑀺 𑀯𑀼𑀤𑁆𑀥𑀺𑀜𑁆𑀘, 𑀢𑀁 𑀳𑁂𑀢𑀼𑀓𑀫 𑀯𑁂𑀓𑁆𑀔𑀺𑀬;

𑀧𑀘𑁆𑀘𑀸𑀪𑀸𑀲𑀣 𑀭𑀸𑀚𑀸𑀦𑀁, 𑀲𑁄 𑀲𑀸𑀲𑀦𑀥𑀼𑀭𑀦𑁆𑀥𑀭𑁄.

𑀢𑀸𑀤𑀺𑀲𑁄’𑀧𑀺 𑀫𑀳𑀸𑀘𑀸𑀕𑀻, 𑀤𑀸𑀬𑀸𑀤𑁄 𑀲𑀸𑀲𑀦𑀲𑁆𑀲 𑀦;

𑀧𑀘𑁆𑀘𑀬𑀤𑀸𑀬𑀓𑁄’𑀘𑁆𑀘𑁂𑀯, 𑀯𑀼𑀘𑁆𑀘𑀢𑁂 𑀫𑀦𑀼𑀚𑀸𑀥𑀻𑀧.

𑀅𑀣 𑀲𑀸𑀲𑀦 𑀤𑀸𑀬𑀸𑀤-𑀪𑀸𑀯𑀫𑀺𑀘𑁆𑀙𑀁 𑀫𑀳𑀻𑀧𑀢𑀺;

𑀫𑀳𑀺𑀦𑁆𑀤𑀁 𑀲𑀗𑁆𑀖𑀫𑀺𑀢𑁆𑀢𑀜𑁆𑀘, 𑀞𑀺𑀢𑁂 𑀢𑀢𑁆𑀭 𑀅𑀧𑀼𑀘𑁆𑀙𑀣.

𑀧𑀩𑁆𑀩𑀚𑀺𑀲𑁆𑀲𑀣 𑀓𑀺𑀁 𑀢𑀸𑀢𑀸, 𑀧𑀩𑁆𑀩𑀚𑁆𑀚𑀸 𑀫𑀳𑀢𑀻 𑀫𑀢𑀸;

𑀧𑀺𑀢𑀼𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀺𑀢𑀭𑀁 𑀢𑁂 𑀅𑀪𑀸𑀲𑀺𑀲𑀼𑀁.

𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀲𑀘𑁂 𑀢𑁆𑀯𑀁 𑀤𑁂𑀯 𑀇𑀘𑁆𑀙𑀲𑀺;

𑀅𑀫𑁆𑀳𑀜𑁆𑀘 𑀮𑀸𑀪𑁄 𑀢𑀼𑀫𑁆𑀳𑀜𑁆𑀘, 𑀧𑀩𑁆𑀩𑀚𑁆𑀚𑀸𑀬 𑀪𑀯𑀺𑀲𑁆𑀲𑀢𑀺.

𑀉𑀧𑀭𑀸𑀚𑀲𑁆𑀲 𑀧𑀩𑁆𑀩𑀚𑁆𑀚-𑀓𑀸𑀮𑀪𑁄 𑀧𑀪𑀼𑀢𑀻𑀳𑀺 𑀲𑁄;

𑀲𑀸 𑀘𑀸𑀧𑀺 𑀅𑀕𑁆𑀕𑀺𑀩𑁆𑀭𑀳𑁆𑀫𑀲𑁆𑀲, 𑀧𑀩𑁆𑀩𑀚𑁆𑀚𑀸 𑀓𑀢𑀦𑀺𑀘𑁆𑀙𑀬𑀸.

𑀉𑀧𑀭𑀚𑁆𑀚𑀁 𑀫𑀳𑀻𑀦𑁆𑀤𑀲𑁆𑀲, 𑀤𑀸𑀢𑀼𑀓𑀸𑀫𑁄’𑀧𑀺 𑀪𑀽𑀧𑀢𑀺;

𑀢𑀢𑁄’𑀧𑀺 𑀅𑀥𑀺𑀓𑀸𑀲𑀸’𑀢𑀺, 𑀧𑀩𑁆𑀩𑀚𑁆𑀚𑀁𑀬𑁂𑀯 𑀭𑁄𑀘𑀬𑀺.

𑀧𑀺𑀬𑀁 𑀧𑀼𑀢𑁆𑀢𑀁 𑀫𑀳𑀺𑀦𑁆𑀤𑀜𑁆𑀘, 𑀩𑀼𑀤𑁆𑀥𑀺𑀭𑀽𑀧𑀩𑀮𑁄𑀤𑀺𑀢𑀁;

𑀧𑀩𑁆𑀩𑀚𑁆𑀚𑀸 𑀧𑁂𑀲𑀺 𑀲𑀫𑀳𑀁, 𑀲𑀗𑁆𑀖 𑀫𑀺𑀢𑁆𑀢𑀜𑁆𑀘 𑀥𑀻𑀢𑀭𑀁.

𑀢𑀤𑀸 𑀯𑀻𑀲𑀢𑀺𑀯𑀲𑁆𑀲𑁄 𑀲𑁄, 𑀫𑀳𑀺𑀦𑁆𑀤𑁄 𑀭𑀸𑀚𑀦𑀦𑁆𑀤𑀦𑁄;

𑀲𑀗𑁆𑀖𑀫𑀺𑀢𑁆𑀢𑀸 𑀭𑀸𑀚𑀥𑀻𑀢𑀸, 𑀅𑀝𑁆𑀞𑀸𑀭𑀲𑀲𑀫𑀸 𑀢𑀤𑀸.

𑀢𑀤𑀳𑁂𑀯 𑀅𑀳𑀼 𑀢𑀲𑁆𑀲, 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸;

𑀧𑀩𑁆𑀩𑀚𑁆𑀚𑀸 𑀲𑀺𑀓𑁆𑀔𑀸𑀤𑀸𑀦𑀜𑁆𑀘, 𑀢𑀲𑁆𑀲𑀸 𑀘 𑀢𑀤𑀳𑀼 𑀅𑀳𑀼.

𑀉𑀧𑀚𑁆𑀛𑀸𑀬𑁄 𑀓𑀼𑀫𑀸𑀭𑀲𑁆𑀲, 𑀅𑀳𑀼 𑀫𑁄𑀕𑁆𑀕𑀮𑀺𑀲𑀯𑁆𑀳𑀬𑁄;

𑀧𑀩𑁆𑀩𑀸𑀚𑁂𑀲𑀺 𑀫𑀳𑀸𑀤𑁂𑀯-𑀢𑁆𑀣𑁂𑀭𑁄 𑀫𑀚𑁆𑀛𑀦𑁆𑀢𑀺𑀓𑁄 𑀧𑀦.

𑀓𑀫𑁆𑀫𑀯𑀸𑀘𑀁 𑀅𑀓𑀸 𑀢𑀲𑁆𑀫𑀺𑀁, 𑀲𑁄’𑀧𑀲𑀫𑁆𑀧𑀤𑀫𑀡𑁆𑀟𑀮𑁂;

𑀅𑀭𑀳𑀢𑁆𑀢𑀁 𑀫𑀳𑀺𑀦𑁆𑀤𑁄 𑀲𑁄, 𑀧𑀢𑁆𑀢𑁄 𑀲𑀧𑀝𑀺𑀲𑀫𑁆𑀪𑀺𑀤𑀁.

𑀲𑀗𑁆𑀖𑀫𑀺𑀢𑁆𑀢𑀸’𑀳𑀼’𑀧𑀚𑁆𑀛𑀸𑀬𑀸 ¶ , 𑀥𑀫𑁆𑀫𑀧𑀸𑀮𑀸𑀢𑀺 𑀯𑀺𑀲𑁆𑀲𑀼𑀢𑀸;

𑀆𑀘𑀭𑀺𑀬𑀸 𑀆𑀬𑀼𑀧𑀸𑀮𑀺, 𑀓𑀸𑀮𑁂 𑀲𑀸’𑀲𑀺 𑀅𑀦𑀸𑀲𑀯𑀸.

𑀉𑀪𑁄 𑀲𑀸𑀲𑀦𑀧𑀚𑁆𑀚𑁄𑀢𑀸, 𑀮𑀁𑀓𑀸𑀤𑀻𑀧𑁄𑀧𑀓𑀸𑀭𑀺𑀦𑁄;

𑀙𑀝𑁆𑀞𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀁𑀲𑀼, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄.

𑀫𑀳𑀸𑀫𑀳𑀺𑀦𑁆𑀤𑁄 𑀯𑀲𑁆𑀲𑁂𑀳𑀺, 𑀢𑀻𑀳𑀺 𑀤𑀻𑀧𑀧𑁆𑀧𑀲𑀸𑀤𑀓𑁄;

𑀧𑀺𑀝𑀓𑀢𑁆𑀢𑀬𑀁 𑀫𑀼𑀕𑁆𑀕𑀡𑁆𑀳𑀺, 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑁂.

𑀲𑀸 𑀪𑀺𑀓𑁆𑀔𑀼𑀦𑀻 𑀘𑀦𑁆𑀤𑀮𑁂𑀔𑀸, 𑀫𑀳𑀺𑀦𑁆𑀤𑁄 𑀪𑀺𑀓𑁆𑀔𑀽 𑀲𑀽𑀭𑀺𑀬𑁄;

𑀲𑀫𑁆𑀩𑀼𑀤𑁆𑀥 𑀲𑀸𑀲𑀦𑀸𑀓𑀸𑀲𑀁, 𑀢𑁂 𑀲𑀤𑀸 𑀲𑁄𑀪𑀬𑀼𑀁 𑀢𑀤𑀸.

𑀯𑀦𑁂 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀸, 𑀯𑀦𑁂 𑀯𑀦𑀘𑀭𑁄 𑀘𑀭𑀁;

𑀓𑀼𑀦𑁆𑀢𑀓𑀺𑀦𑁆𑀦𑀭𑀺𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀁 𑀓𑀧𑁆𑀧𑀬𑀻 𑀓𑀺𑀭.

𑀢𑀺𑀲𑁆𑀲𑁄 𑀚𑁂𑀝𑁆𑀞𑁄 𑀓𑀡𑀺𑀝𑁆𑀞𑁄 𑀢𑀼,

𑀫𑀳𑀸𑀯𑀭𑀼𑀡𑀢𑁆𑀣𑁂𑀭𑀲𑁆𑀲, 𑀓𑀸𑀮𑁂 𑀧𑀩𑁆𑀩𑀚𑁆𑀚 𑀲𑀦𑁆𑀢𑀺𑀓𑁂;

𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀙𑀴𑀪𑀺𑀜𑁆𑀜𑀁 𑀕𑀼𑀡𑀁 𑀉𑀪𑁄.

𑀧𑀸𑀤𑁂 𑀓𑀻𑀝𑀯𑀺𑀲𑁂𑀦𑀸’𑀲𑀺, 𑀨𑀼𑀝𑁆𑀞𑁄 𑀚𑁂𑀝𑁆𑀞𑁄 𑀲𑀯𑁂𑀤𑀦𑁄;

𑀆𑀳 𑀧𑀼𑀝𑁆𑀞𑁄 𑀓𑀡𑀺𑀝𑁆𑀞𑁂𑀦, 𑀪𑁂𑀲𑀚𑁆𑀚𑀁 𑀧𑀲𑀢𑀁 𑀖𑀝𑀁.

𑀭𑀜𑁆𑀜𑁄 𑀦𑀺𑀯𑁂𑀤𑀦𑀁 𑀣𑁂𑀭𑁄, 𑀕𑀺𑀮𑀸𑀦𑀯𑀢𑁆𑀢𑀢𑁄’𑀧𑀺 𑀲𑁄;

𑀲𑀧𑁆𑀧𑀺𑀲𑀢𑁆𑀣𑀜𑁆𑀘 𑀘𑀭𑀡𑀁, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺.

𑀧𑀺𑀡𑁆𑀟𑀸𑀬 𑀘𑁂 𑀘𑀭𑀁 𑀲𑀧𑁆𑀧𑀺𑀁, 𑀮𑀪𑀲𑁂 𑀢𑁆𑀯𑀁 𑀢𑀫𑀸𑀳𑀭;

𑀇𑀘𑁆𑀙𑀸𑀳 𑀢𑀺𑀲𑁆𑀲𑀣𑁂𑀭𑁄 𑀲𑁄, 𑀲𑀼𑀫𑀺𑀢𑁆𑀢𑀁 𑀣𑁂𑀭𑀫𑀼𑀢𑁆𑀢𑀫𑀁.

𑀧𑀺𑀡𑁆𑀟𑀸𑀬 𑀘𑀭𑀢𑀸 𑀢𑁂𑀦, 𑀦 𑀮𑀤𑁆𑀥𑀁 𑀧𑀲𑀢𑀁 𑀖𑀢𑀁;

𑀲𑀧𑁆𑀧𑀺𑀓𑀼𑀫𑁆𑀪𑀲𑀢𑁂𑀦𑀸𑀧𑀺, 𑀩𑁆𑀬𑀸𑀥𑀺𑀚𑀸𑀢𑁄 𑀅𑀲𑀸𑀥𑀺𑀬𑁄.

𑀢𑁂𑀦𑁂𑀯 𑀩𑁆𑀬𑀸𑀥𑀺𑀦𑀸 𑀣𑁂𑀭𑁄, 𑀧𑀢𑁆𑀢𑁄 𑀆𑀬𑀼𑀓𑁆𑀔𑀬𑀦𑁆𑀢𑀺𑀓𑀁;

𑀑𑀯𑀤𑀺𑀢𑁆𑀯𑀸𑀧𑁆𑀧𑀫𑀸𑀤𑁂𑀦, 𑀦𑀺𑀩𑁆𑀩𑀸𑀢𑀼𑀁 𑀫𑀸𑀦𑀲𑀁 𑀅𑀓𑀸.

𑀆𑀓𑀸𑀲𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸, 𑀢𑁂𑀚𑁄𑀥𑀸𑀢𑀼𑀯𑀲𑁂𑀦 𑀲𑁄;

𑀬𑀣𑀸𑀭𑀼𑀘𑀺 𑀅𑀥𑀺𑀝𑁆𑀞𑀸𑀬, 𑀲𑀭𑀻𑀭𑀁 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀚𑀸𑀮𑀸𑀲𑀭𑀻𑀭𑀸 𑀦𑀺𑀓𑁆𑀔𑀫𑁆𑀫, 𑀦𑀺𑀫𑁆𑀫𑀁𑀲𑀙𑀸𑀭𑀺𑀓𑀁 𑀟𑀳𑀺;

𑀣𑁂𑀭𑀲𑁆𑀲 𑀲𑀓𑀮𑀁 𑀓𑀸𑀬𑀁, 𑀅𑀝𑁆𑀞𑀺𑀓𑀸𑀦𑀺𑀢𑀼𑀦𑁄 𑀟𑀳𑀺.

𑀲𑀼𑀢𑁆𑀯𑀸 ¶ 𑀦𑀺𑀩𑁆𑀩𑀽𑀢𑀺𑀫𑁂𑀢𑀲𑁆𑀲, 𑀢𑀺𑀲𑁆𑀲𑀣𑁂𑀭𑀲𑁆𑀲 𑀪𑀽𑀧𑀢𑀺;

𑀅𑀕𑀫𑀸𑀲𑀺 𑀲𑀓𑀸𑀭𑀸𑀫𑀁, 𑀚𑀦𑁄𑀖 𑀧𑀭𑀺𑀯𑀸𑀭𑀺𑀢𑁄.

𑀳𑀢𑁆𑀢𑀺𑀓𑁆𑀔𑀦𑁆𑀥𑀕𑀢𑁄 𑀭𑀸𑀚𑀸, 𑀢𑀸𑀦𑀝𑁆𑀞𑀺𑀦’𑀯𑀭𑁄𑀧𑀺𑀬;

𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀲𑀓𑁆𑀓𑀸𑀭𑀁, 𑀲𑀗𑁆𑀖𑀁 𑀩𑁆𑀬𑀸𑀥𑀺𑀫𑀧𑀼𑀘𑁆𑀙𑀺𑀢𑀁.

𑀢𑀁 𑀲𑀼𑀢𑁆𑀯𑀸 𑀚𑀸𑀢𑀲𑀁𑀯𑁂𑀕𑁄, 𑀧𑀼𑀭𑀤𑁆𑀯𑀸𑀭𑁂𑀲𑀼 𑀓𑀸𑀭𑀺𑀬;

𑀲𑀼𑀥𑀸𑀘𑀺𑀢𑀸 𑀧𑁄𑀓𑁆𑀔𑀭𑀡𑀻, 𑀪𑁂𑀲𑀚𑁆𑀚𑀸𑀦𑀜𑁆𑀘 𑀧𑀽𑀭𑀺𑀬.

𑀧𑀸𑀧𑁂𑀲𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀪𑁂𑀲𑀚𑁆𑀚𑀸𑀦𑀺 𑀤𑀺𑀦𑁂 𑀤𑀺𑀦𑁂;

𑀫𑀸 𑀳𑁄𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀪𑁂𑀲𑀚𑁆𑀚𑀁 𑀤𑀼𑀮𑁆𑀮𑀪𑀁 𑀇𑀢𑀺.

𑀲𑀼𑀫𑀺𑀢𑁆𑀢𑀣𑁂𑀭𑁄 𑀦𑀺𑀩𑁆𑀩𑀸𑀬𑀺, 𑀘𑀗𑁆𑀓𑀫𑀦𑁆𑀢𑁄’𑀯 𑀘𑀗𑁆𑀓𑀫𑁂;

𑀧𑀲𑀻𑀤𑀺 𑀲𑀸𑀲𑀦𑁂’𑀢𑀻𑀯, 𑀢𑁂𑀦𑀸𑀧𑀺 𑀘 𑀫𑀳𑀸𑀚𑀦𑁄.

𑀓𑀼𑀦𑁆𑀢𑀺𑀧𑀼𑀢𑁆𑀢𑀸 𑀤𑀼𑀯𑁂 𑀣𑁂𑀭𑀸,

𑀢𑀢𑁄 𑀧𑀪𑀼𑀢𑀺 𑀲𑀗𑁆𑀖𑀲𑁆𑀲, 𑀮𑀸𑀪𑁄’𑀢𑀻𑀯 𑀫𑀳𑀸 𑀅𑀳𑀼;

𑀧𑀘𑁆𑀙𑀸 𑀧𑀲𑀦𑁆𑀦𑀸 𑀘 𑀚𑀦𑀸, 𑀬𑀲𑁆𑀫𑀸 𑀮𑀸𑀪𑀁 𑀧𑀯𑀢𑁆𑀢𑀬𑀼𑀁.

𑀧𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸, 𑀢𑀺𑀢𑁆𑀣𑀺𑀬𑀸 𑀮𑀸𑀪𑀓𑀸𑀭𑀡𑀸;

𑀲𑀬𑀁 𑀓𑀸𑀲𑀸𑀬𑀫𑀸𑀤𑀸𑀬, 𑀯𑀲𑀺𑀁𑀲𑀼 𑀲𑀳 𑀪𑀺𑀓𑁆𑀔𑀽𑀳𑀺.

𑀬𑀣𑀸𑀲𑀓𑀜𑁆𑀘 𑀢𑁂 𑀯𑀸𑀤𑀁, 𑀩𑀼𑀤𑁆𑀥𑀯𑀸𑀤𑁄’𑀢𑀺 𑀤𑀻𑀧𑀬𑀼𑀁;

𑀬𑀣𑀸𑀲𑀓𑀜𑁆𑀘 𑀓𑀺𑀭𑀺𑀬𑀸, 𑀅𑀓𑀭𑀺𑀁𑀲𑀼 𑀬𑀣𑀸𑀭𑀼𑀘𑀺.

𑀢𑀲𑁆𑀲𑁄’𑀧𑀲𑀫𑀦𑁂 𑀓𑀸𑀮𑀁, 𑀤𑀻𑀖𑀤𑀲𑁆𑀲𑀻 𑀅𑀯𑁂𑀓𑁆𑀔𑀺𑀬;

𑀤𑀢𑁆𑀯𑀸 𑀫𑀳𑀺𑀦𑁆𑀤𑀣𑁂𑀭𑀲𑁆𑀲, 𑀫𑀳𑀸𑀪𑀺𑀓𑁆𑀔𑀼𑀕𑀡𑀁 𑀲𑀓𑀁.

𑀉𑀤𑁆𑀥𑀁 𑀕𑀗𑁆𑀕𑀸𑀬 𑀏𑀓𑁄’𑀯, 𑀅𑀳𑁄𑀕𑀗𑁆𑀕𑀫𑁆𑀳𑀺 𑀧𑀩𑁆𑀩𑀢𑁂;

𑀯𑀺𑀳𑀸𑀲𑀺 𑀲𑀢𑁆𑀢𑀯𑀲𑁆𑀲𑀸𑀦𑀺, 𑀯𑀺𑀯𑁂𑀓 𑀫𑀦𑀼𑀩𑁆𑀭𑀽𑀳𑀬𑀁.

𑀢𑀺𑀢𑁆𑀣𑀺𑀬𑀸𑀦𑀁 𑀩𑀳𑀼𑀘𑀢𑁆𑀢𑀸 𑀘, 𑀤𑀼𑀩𑁆𑀩𑀘𑁆𑀘𑀢𑁆𑀢𑀸 𑀘 𑀪𑀺𑀓𑁆𑀔𑀯𑁄;

𑀢𑁂𑀲𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀥𑀫𑁆𑀫𑁂𑀦 𑀧𑀝𑀺𑀲𑁂𑀥𑀦𑀁.

𑀢𑁂𑀦𑁂𑀯 ¶ 𑀚𑀫𑁆𑀩𑀼𑀤𑀻𑀧𑀫𑁆𑀳𑀺, 𑀲𑀩𑁆𑀩𑀸𑀭𑀸𑀫𑁂𑀲𑀼 𑀪𑀺𑀓𑁆𑀔𑀯𑁄;

𑀲𑀢𑁆𑀢𑀯𑀲𑁆𑀲𑀸𑀦𑀺 𑀦𑀸𑀓𑀁𑀲𑀼, 𑀉𑀧𑁄𑀲𑀣 𑀧𑀯𑀸𑀭𑀡𑀁.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀥𑀫𑁆𑀫𑀸𑀲𑁄𑀓𑁄 𑀫𑀳𑀸𑀬𑀲𑁄;

𑀏𑀓𑀁 𑀅𑀫𑀘𑁆𑀘𑀁 𑀧𑁂𑀲𑁂𑀲𑀺, 𑀅𑀲𑁄𑀓𑀸𑀭𑀸𑀫 𑀫𑀼𑀢𑁆𑀢𑀫𑀁.

𑀕𑀦𑁆𑀢𑁆𑀯𑀸’𑀥𑀺𑀓𑀭𑀡𑀁 𑀏𑀢𑀁, 𑀯𑀼𑀧𑀲𑀫𑁆𑀫 𑀉𑀧𑁄𑀲𑀣𑀁;

𑀓𑀸𑀭𑁂𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀫𑀸’𑀭𑀸𑀫𑁂 𑀢𑀼𑀯𑀁 𑀇𑀢𑀺.

𑀕𑀦𑁆𑀢𑁆𑀯𑀸𑀦 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀤𑀼𑀫𑁆𑀫𑀢𑀺;

𑀉𑀧𑁄𑀲𑀣𑀁 𑀓𑀭𑁄𑀣𑀸𑀢𑀺, 𑀲𑀸𑀯𑁂𑀲𑀺 𑀭𑀸𑀚𑀲𑀸𑀲𑀦𑀁.

𑀉𑀧𑁄𑀲𑀣𑀁 𑀢𑀺𑀢𑁆𑀢𑀺𑀬𑁂𑀳𑀺, 𑀦 𑀓𑀭𑁄𑀫 𑀫𑀬𑀁 𑀇𑀢𑀺;

𑀅𑀯𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀁, 𑀅𑀫𑀘𑁆𑀘𑀁 𑀫𑀽𑀴𑁆𑀳𑀫𑀸𑀦𑀲𑀁.

𑀲𑁄’𑀫𑀘𑁆𑀘𑁄 𑀓𑀢𑀺𑀧𑀬𑀸𑀦𑀁, 𑀣𑁂𑀭𑀸𑀦𑀁 𑀧𑀝𑀺𑀧𑀸𑀝𑀺𑀬𑀸;

𑀅𑀘𑁆𑀙𑀺𑀦𑁆𑀤𑀺 𑀅𑀲𑀺𑀦𑀸 𑀲𑀻𑀲𑀁, 𑀓𑀸𑀭𑁂𑀫𑀻𑀢𑀺 𑀉𑀧𑁄𑀲𑀣𑀁.

𑀭𑀸𑀚𑀪𑀸𑀢𑀸 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀢𑀁 𑀤𑀺𑀲𑁆𑀯𑀸 𑀓𑀺𑀭𑀺𑀬𑀁 𑀮𑀳𑀼𑀁;

𑀕𑀦𑁆𑀢𑁆𑀯𑀸𑀦 𑀢𑀲𑁆𑀲 𑀆𑀲𑀦𑁆𑀦𑁂, 𑀲𑀸𑀲𑀦𑀫𑁆𑀳𑀺 𑀦𑀺𑀲𑀺𑀤𑀺 𑀲𑁄.

𑀣𑁂𑀭𑀁 𑀤𑀺𑀲𑁆𑀯𑀸 𑀅𑀫𑀘𑁆𑀘𑁄 𑀲𑁄, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑀬𑀺;

𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀢𑀁 𑀲𑀼𑀢𑁆𑀯𑀸, 𑀚𑀸𑀢𑀤𑀸𑀳𑁄 𑀫𑀳𑀻𑀧𑀢𑀺.

𑀲𑀻𑀖𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀧𑀼𑀘𑁆𑀙𑀺 𑀉𑀩𑁆𑀩𑀺𑀕𑁆𑀕𑀫𑀸𑀦𑀲𑁄;

𑀏𑀯𑀁 𑀓𑀢𑁂𑀦 𑀓𑀫𑁆𑀫𑁂𑀦, 𑀓𑀲𑁆𑀲 𑀧𑀸𑀧𑀁 𑀲𑀺𑀬𑀸 𑀇𑀢𑀺.

𑀢𑁂𑀲𑀁 𑀅𑀧𑀡𑁆𑀟𑀺𑀢𑀸 𑀓𑁂𑀘𑀺, 𑀧𑀸𑀧𑀁 𑀢𑀼𑀬𑁆𑀳𑀦𑁆𑀢𑀺 𑀓𑁂𑀘𑀺 𑀢𑀼;

𑀉𑀪𑀺𑀦𑁆𑀦𑀁𑀘𑀸’𑀢𑀺 𑀆𑀳𑀁𑀲𑀼, 𑀦𑀢𑁆𑀣𑀺 𑀢𑀼𑀬𑁆𑀳𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀢𑀁 𑀲𑀼𑀢𑁆𑀯𑀸’𑀳 𑀫𑀳𑀸𑀭𑀸𑀚𑀸, 𑀲𑀫𑀢𑁆𑀣𑁄 𑀅𑀢𑁆𑀣𑀺 𑀪𑀺𑀓𑁆𑀔𑀼𑀦;

𑀯𑀺𑀫𑀢𑀺𑀁 𑀫𑁂 𑀯𑀺𑀦𑁄𑀤𑁂𑀢𑁆𑀯𑀸, 𑀓𑀸𑀢𑀼𑀁 𑀲𑀸𑀲𑀦𑀧𑀕𑁆𑀕𑀳𑀁.

𑀅𑀢𑁆𑀣𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑁄,

𑀯𑀺𑀲𑀼𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀘𑀢𑀼𑀭𑁄 𑀧𑀭𑀺𑀯𑀸𑀭𑀺𑀢𑁂;

𑀣𑁂𑀭𑁄 𑀦𑀭𑀲𑀳𑀲𑁆𑀲𑁂𑀦, 𑀅𑀫𑀘𑁆𑀘𑁂 𑀘𑀢𑀼𑀭𑁄 𑀢𑀣𑀸.

𑀢𑀤𑀳𑁂𑀬𑁂𑀯 𑀧𑁂𑀲𑁂𑀲𑀺, 𑀅𑀢𑁆𑀢𑀦𑁄 𑀯𑀘𑀦𑁂𑀦 𑀲𑁄;

𑀣𑁂𑀭𑀁 𑀆𑀦𑁂𑀢𑀼 𑀫𑁂 𑀢𑁂𑀳𑀺, 𑀢𑀣𑀸 𑀯𑀼𑀢𑁆𑀢𑁂 𑀲𑀦𑀸𑀕𑀫𑀺.

𑀢𑀁 ¶ 𑀲𑀼𑀢𑁆𑀯𑀸 𑀧𑀼𑀦 𑀅𑀝𑁆𑀞’𑀢𑁆𑀣, 𑀣𑁂𑀭𑁂’𑀫𑀘𑁆𑀘𑁂 𑀘 𑀧𑁂𑀲𑀬𑀺;

𑀯𑀺𑀲𑀼𑀁 𑀲𑀳𑀲𑁆𑀲𑀧𑀼𑀭𑀺𑀲𑁂, 𑀧𑀼𑀩𑁆𑀩𑁂 𑀯𑀺𑀬 𑀲𑀦𑀸𑀕𑀫𑀺.

𑀭𑀸𑀚𑀸 𑀧𑀼𑀘𑁆𑀙𑀺 𑀓𑀣𑀁 𑀣𑁂𑀭𑁄, 𑀆𑀕𑀘𑁆𑀙𑁂𑀬𑁆𑀬 𑀦𑀼 𑀔𑁄 𑀇𑀢𑀺;

𑀪𑀺𑀓𑁆𑀔𑀽 𑀆𑀳𑀁𑀲𑀼 𑀣𑁂𑀭𑀲𑁆𑀲, 𑀢𑀲𑁆𑀲’𑀕𑀫𑀦𑀓𑀸𑀭𑀡𑀁.

𑀳𑁄𑀢𑀺 𑀪𑀦𑁆𑀢𑁂 𑀉𑀧𑀢𑁆𑀣𑀫𑁆𑀪𑁄, 𑀓𑀸𑀢𑀼𑀁 𑀲𑀸𑀲𑀦𑀧𑀕𑁆𑀕𑀳𑀁;

𑀇𑀢𑀺 𑀯𑀼𑀢𑁆𑀢𑁂 𑀫𑀳𑀸𑀭𑀸𑀚, 𑀣𑁂𑀭𑁄 𑀏𑀲𑁆𑀲𑀢𑀺 𑀲𑁄 𑀇𑀢𑀺.

𑀧𑀼𑀦𑀸𑀧𑀺 𑀣𑁂𑀭𑁄’𑀫𑀘𑁆𑀘𑁂 𑀘, 𑀭𑀸𑀚𑀸 𑀲𑁄𑀴𑀲 𑀲𑁄𑀴𑀲;

𑀯𑀺𑀲𑀼𑀁 𑀲𑀳𑀲𑁆𑀲 𑀧𑀼𑀭𑀺𑀲𑁂, 𑀢𑀣𑀸 𑀯𑀢𑁆𑀯𑀸𑀦 𑀧𑁂𑀲𑀬𑀺.

𑀣𑁂𑀭𑁄 𑀫𑀳𑀮𑁆𑀮𑀢𑁆𑀢𑁂’𑀧𑀺, 𑀦𑀸𑀭𑁄𑀳𑀺𑀲𑁆𑀲𑀢𑀺 𑀬𑀸𑀦𑀓𑀁;

𑀣𑁂𑀭𑀁 𑀕𑀗𑁆𑀕𑀸𑀬 𑀦𑀸𑀯𑀸𑀬, 𑀆𑀦𑁂𑀣𑀸’𑀢𑀺 𑀘 𑀅𑀩𑁆𑀭𑀯𑀺.

𑀕𑀦𑁆𑀢𑁆𑀯𑀸 𑀢𑁂 𑀢𑀁 𑀢𑀣𑀸’𑀯𑁄𑀘𑀼𑀁,

𑀚𑀸𑀡𑀼𑀫𑀢𑁆𑀢𑀁 𑀚𑀮𑀁 𑀭𑀸𑀚𑁄’𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀁 𑀓𑀭𑀁;

𑀦𑀸𑀯𑀸𑀬 𑀑𑀢𑀭𑀦𑁆𑀢𑀲𑁆𑀲, 𑀣𑁂𑀭𑀲𑁆𑀲𑀸’𑀤𑀸𑀲𑀺 𑀕𑀸𑀭𑀯𑁄.

𑀤𑀓𑁆𑀔𑀺𑀡𑀁 𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑁄, 𑀓𑀭𑀁 𑀭𑀜𑁆𑀜𑁄’𑀦𑀼𑀓𑀫𑁆𑀧𑀓𑁄;

𑀆𑀮𑀫𑁆𑀩𑀺𑀢𑁆𑀯𑀸’𑀦𑀼𑀓𑀫𑁆𑀧𑀸𑀬, 𑀣𑁂𑀭𑁄 𑀦𑀸𑀯𑀸𑀬 𑀑𑀢𑀭𑀺.

𑀭𑀸𑀚𑀸 𑀣𑁂𑀭𑀁 𑀦𑀬𑀺𑀢𑁆𑀯𑀸𑀦, 𑀉𑀬𑁆𑀬𑀸𑀦𑀁 𑀭𑀢𑀺𑀯𑀟𑁆𑀠𑀦𑀁;

𑀣𑁂𑀭𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸, 𑀫𑀓𑁆𑀔𑁂𑀢𑁆𑀯𑀸 𑀘 𑀦𑀺𑀲𑀻𑀤𑀺𑀬.

𑀲𑀫𑀢𑁆𑀣𑀪𑀸𑀯𑀁 𑀣𑁂𑀭𑀲𑁆𑀲, 𑀯𑀻𑀫𑀁𑀲𑀦𑁆𑀢𑁄 𑀫𑀳𑀻𑀧𑀢𑀺;

𑀤𑀝𑁆𑀞𑀼𑀓𑀸𑀫𑁄 𑀅𑀳𑀁 𑀪𑀦𑁆𑀢𑁂, 𑀧𑀸𑀝𑀺𑀳𑀻𑀭𑀦𑁆𑀢𑀺 𑀅𑀩𑁆𑀭𑀯𑀺.

𑀓𑀦𑁆𑀢𑀺 𑀯𑀼𑀢𑁆𑀢𑁂 𑀫𑀳𑀻𑀓𑀫𑁆𑀧𑀁, 𑀆𑀳 𑀢𑀁 𑀧𑀼𑀦 𑀭𑀸𑀳𑀲𑁄;

𑀲𑀓𑀮𑀸𑀬𑁂’𑀓 𑀤𑁂𑀲𑀸𑀬, 𑀓𑀢𑀭𑀁 𑀤𑀝𑁆𑀞𑀼𑀫𑀺𑀘𑁆𑀙𑀲𑀺.

𑀓𑁄 𑀤𑀼𑀓𑁆𑀓𑀭𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀏𑀓 𑀤𑁂𑀲𑀸𑀬 𑀓𑀫𑁆𑀧𑀦𑀁;

𑀤𑀼𑀓𑁆𑀓𑀭𑀦𑁆𑀢𑀺 𑀲𑀼𑀡𑀺𑀢𑁆𑀯𑀸𑀦, 𑀢𑀁 𑀤𑀼𑀝𑁆𑀞𑀼𑀓𑀸𑀫𑀢𑀁 𑀩𑁆𑀭𑀯𑀻.

𑀭𑀣𑀁 𑀅𑀲𑁆𑀲𑀁 𑀫𑀦𑀼𑀲𑁆𑀲𑀜𑁆𑀘, 𑀧𑀸𑀢𑀺𑀜𑁆𑀘𑁄𑀤𑀓 𑀧𑀽𑀭𑀺𑀢𑀁;

𑀣𑁂𑀭𑁄 𑀬𑁄𑀚𑀦 𑀲𑀻𑀫𑀸𑀬, 𑀅𑀦𑁆𑀢𑀭𑀫𑁆𑀳𑀺 𑀘𑀢𑀼𑀤𑁆𑀤𑀺𑀲𑁂.

𑀞𑀧𑀸𑀧𑁂𑀢𑁆𑀯𑀸 ¶ 𑀢𑀤𑀟𑁆𑀠𑁂𑀳𑀺, 𑀲𑀳 𑀢𑀁 𑀬𑁄𑀚𑀦𑀁 𑀫𑀳𑀺𑀁;

𑀘𑀸𑀮𑁂𑀲𑀺 𑀇𑀤𑁆𑀥𑀺𑀬𑀸 𑀢𑀢𑁆𑀭, 𑀦𑀺𑀲𑀺𑀦𑁆𑀦𑀲𑁆𑀲 𑀘 𑀤𑀲𑁆𑀲𑀬𑀺.

𑀢𑁂𑀦𑀸’𑀫𑀘𑁆𑀘𑁂𑀦 𑀪𑀺𑀓𑁆𑀔𑀽𑀦𑀁, 𑀫𑀭𑀡𑁂𑀦’𑀢𑁆𑀢𑀦𑁄𑀧𑀺 𑀘;

𑀧𑀸𑀧𑀲𑁆𑀲’𑀢𑁆𑀣𑀺𑀢𑁆𑀢 𑀦𑀢𑁆𑀣𑀺𑀢𑁆𑀢𑀁, 𑀣𑁂𑀭𑀁 𑀧𑀼𑀘𑁆𑀙𑀺 𑀫𑀳𑀻𑀧𑀢𑀺.

𑀧𑀝𑀺𑀘𑁆𑀘 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺, 𑀓𑀺𑀮𑀺𑀝𑁆𑀞𑀁 𑀘𑁂𑀢𑀦𑀁 𑀯𑀺𑀦𑀸;

𑀣𑁂𑀭𑁄 𑀩𑁄𑀥𑁂𑀲𑀺 𑀭𑀸𑀚𑀸𑀦𑀁, 𑀯𑀢𑁆𑀯𑀸 𑀢𑀺𑀢𑁆𑀢𑀺𑀭𑀚𑀸𑀢𑀓𑀁.

𑀯𑀲𑀦𑁆𑀢𑁄 𑀢𑀢𑁆𑀣 𑀲𑀢𑁆𑀢𑀸𑀳𑀁, 𑀭𑀸𑀚𑀼𑀬𑁆𑀬𑀸𑀦𑁂 𑀫𑀦𑁄𑀭𑀫𑁂;

𑀲𑀺𑀓𑁆𑀔𑀸𑀧𑁂𑀲𑀺 𑀫𑀳𑀻𑀧𑀸𑀮𑀁, 𑀲𑀫𑁆𑀩𑀼𑀤𑁆𑀥𑀲𑀫𑀬𑀁 𑀲𑀼𑀪𑀁.

𑀢𑀲𑁆𑀫𑀺𑀁𑀬𑁂𑀯 𑀘 𑀲𑀢𑁆𑀢𑀸 𑀳𑁂, 𑀤𑀼𑀯𑁂 𑀬𑀓𑁆𑀔𑁂 𑀫𑀳𑀻𑀧𑀢𑀺;

𑀧𑁂𑀲𑁂𑀢𑁆𑀯𑀸 𑀫𑀳𑀺𑀬𑀁 𑀪𑀺𑀓𑁆𑀔𑀽, 𑀅𑀲𑁂𑀲𑁂 𑀲𑀦𑁆𑀦𑀺𑀧𑀸𑀢𑀬𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀕𑀦𑁆𑀢𑁆𑀯𑀸, 𑀲𑀓𑀸𑀭𑀸𑀫𑀁 𑀫𑀦𑁄𑀭𑀫𑀁;

𑀓𑀸𑀭𑁂𑀲𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀲𑀦𑁆𑀦𑀺𑀧𑀸𑀢𑀫𑀲𑁂𑀲𑀢𑁄.

𑀣𑁂𑀭𑁂𑀦 𑀲𑀳 𑀏𑀓𑀦𑁆𑀢𑁂, 𑀦𑀺𑀲𑀺𑀦𑁆𑀦𑁄 𑀲𑀸𑀡𑀺𑀅𑀦𑁆𑀢𑀭𑁂;

𑀏𑀓𑁂𑀓𑀮𑀤𑁆𑀥𑀺𑀓𑁂 𑀪𑀺𑀓𑁆𑀔𑀼, 𑀧𑀓𑁆𑀓𑁄𑀲𑀺𑀢𑁆𑀯𑀸𑀦 𑀲𑀦𑁆𑀢𑀺𑀓𑀁.

𑀓𑀺𑀁𑀯𑀸𑀤𑀻 𑀲𑀼𑀕𑀢𑁄 𑀪𑀦𑁆𑀢𑁂, 𑀇𑀢𑀺 𑀧𑀼𑀘𑁆𑀙𑀺 𑀫𑀳𑀻𑀧𑀢𑀺;

𑀢𑁂 𑀲𑀲𑁆𑀲𑀢𑀸𑀤𑀺𑀓𑀁 𑀤𑀺𑀝𑁆𑀞𑀺𑀁, 𑀩𑁆𑀬𑀸𑀓𑀭𑀺𑀁𑀲𑀼 𑀬𑀣𑀸𑀲𑀓𑀁.

𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂 𑀲𑀩𑁆𑀩𑁂, 𑀭𑀸𑀚𑀸 𑀉𑀧𑁆𑀧𑀩𑁆𑀩𑀸𑀚𑀸𑀧𑀬𑀻;

𑀲𑀩𑁆𑀩𑁂 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀆𑀲𑀼𑀁 𑀉𑀧𑁆𑀧𑀩𑁆𑀩𑀚𑀸𑀧𑀺𑀢𑀸.

𑀅𑀧𑀼𑀘𑁆𑀙𑀺 𑀥𑀫𑁆𑀫𑀺𑀓𑁂 𑀪𑀺𑀓𑁆𑀔𑀽, 𑀓𑀺𑀁𑀯𑀸𑀤𑀻 𑀲𑀼𑀕𑀢𑁄 𑀇𑀢𑀺;

𑀯𑀺𑀪𑀚𑁆𑀚𑀯𑀸𑀤𑀻 𑀢𑀸𑀳𑀁𑀲𑀼, 𑀢𑀁 𑀣𑁂𑀭𑀁 𑀧𑀼𑀘𑁆𑀙𑀺 𑀪𑀽𑀧𑀢𑀺.

𑀲𑀗𑁆𑀖𑀲𑁆𑀲 𑀭𑀓𑁆𑀔𑀁 𑀤𑀢𑁆𑀯𑀸𑀦, 𑀦𑀕𑀭𑀁 𑀧𑀸𑀯𑀺𑀲𑀻 𑀲𑀼𑀪𑀁;

𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑀼𑀢𑁆𑀯𑀸𑀦, 𑀢𑀤𑀸’𑀓𑀸𑀲𑀺 𑀉𑀧𑁄𑀲𑀣𑀁.

𑀣𑁂𑀭𑁄 ¶ 𑀅𑀦𑁂𑀓 𑀲𑀗𑁆𑀔𑀫𑁆𑀳𑀸, 𑀪𑀺𑀓𑁆𑀔𑀼𑀲𑀗𑁆𑀖𑀸 𑀯𑀺𑀲𑀸𑀭𑀤𑁂;

𑀙𑀴𑀪𑀺𑀜𑁆𑀜𑁂 𑀢𑁂𑀧𑀺𑀝𑀓𑁂, 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂.

𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀉𑀘𑁆𑀘𑀺𑀦𑀺, 𑀓𑀸𑀢𑀼𑀁 𑀲𑀤𑁆𑀥𑀫𑁆𑀫𑀁 𑀲𑀗𑁆𑀕𑀳𑀁;

𑀢𑁂𑀳𑀺 𑀅𑀲𑁄𑀓𑀸𑀭𑀸𑀫𑀫𑁆𑀳𑀺, 𑀅𑀓𑀸 𑀲𑀤𑁆𑀥𑀫𑁆𑀫 𑀲𑀗𑁆𑀕𑀳𑀁.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘, 𑀬𑀲𑀢𑁆𑀣𑁂𑀭𑁄 𑀘 𑀓𑀸𑀭𑀬𑀼𑀁;

𑀬𑀣𑀸 𑀢𑁂 𑀥𑀫𑁆𑀫 𑀲𑀁𑀕𑀻𑀢𑀺𑀁, 𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀢𑀁 𑀢𑀣𑀸.

𑀢𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑀁;

𑀅𑀪𑀸𑀲𑀺 𑀢𑀺𑀲𑁆𑀲𑀢𑁆𑀣𑁂𑀭𑁄 𑀘, 𑀢𑀲𑁆𑀫𑀺𑀁 𑀲𑀁𑀕𑀻𑀢𑀺 𑀫𑀡𑁆𑀟𑀮𑁂.

𑀏𑀯𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀭𑀓𑁆𑀔𑀸𑀬’𑀲𑁄𑀓 𑀭𑀸𑀚𑀺𑀦𑁄;

𑀅𑀬𑀁 𑀦𑀯𑀳𑀺 𑀫𑀸𑀲𑁂𑀳𑀺, 𑀥𑀫𑁆𑀫 𑀲𑀁𑀕𑀻𑀢𑀺 𑀦𑀺𑀝𑁆𑀞𑀺𑀢𑀸.

𑀭𑀜𑁆𑀜𑁄 𑀲𑀢𑁆𑀢𑀭𑀲𑁂 𑀯𑀲𑁆𑀲𑁂, 𑀤𑁆𑀯𑀸𑀲𑀢𑁆𑀢𑀢𑀺𑀲𑀫𑁄 𑀇𑀲𑀺;

𑀫𑀳𑀸𑀧𑀯𑀸𑀭𑀡𑀸𑀬’𑀲𑁄, 𑀲𑀁𑀕𑀻𑀢𑀺 𑀢𑀁 𑀲𑀫𑀸𑀧𑀬𑀺.

𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀻𑀯, 𑀲𑀸𑀲𑀦𑀝𑁆𑀞𑀺𑀢𑀺 𑀓𑀸𑀭𑀡𑀁;

𑀲𑀁𑀕𑀻𑀢𑀺 𑀧𑀭𑀺𑀬𑁄𑀲𑀸𑀦𑁂, 𑀅𑀓𑀫𑁆𑀫𑀺𑀢𑁆𑀣 𑀫𑀳𑀸𑀫𑀳𑀻.

𑀳𑀺𑀢𑁆𑀯𑀸 𑀲𑁂𑀝𑁆𑀞𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀫𑁆𑀧𑀺 𑀫𑀦𑀼𑀜𑁆𑀜𑀁;

𑀚𑁂𑀕𑀼𑀘𑁆𑀙𑀁 𑀲𑁄 𑀲𑀸𑀲𑀦𑀳𑁂𑀢𑀼𑀦𑀭𑀮𑁄𑀓𑀁;

𑀆𑀕𑀫𑁆𑀫𑀸’𑀓𑀸 𑀲𑀸𑀲𑀦𑀓𑀺𑀘𑁆𑀘𑀁 𑀓𑀢𑀓𑀺𑀘𑁆𑀘𑁄;

𑀓𑁄𑀦𑀸𑀫’𑀜𑁆𑀜𑁄 𑀲𑀸𑀲𑀦𑀓𑀺𑀘𑁆𑀘𑀫𑁆𑀳𑀺 𑀧𑀫𑀚𑁆𑀚𑁂𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀯𑀗𑁆𑀕𑁂𑀲𑀼 ¶ 𑀯𑀗𑁆𑀕𑀦𑀕𑀭𑁂, 𑀯𑀗𑁆𑀕𑀭𑀸𑀚𑀸 𑀅𑀳𑀼 𑀧𑀼𑀭𑁂;

𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀥𑀻𑀢𑀸’𑀲𑀺, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄.

𑀲𑁄 𑀭𑀸𑀚𑀸 𑀤𑁂𑀯𑀺𑀬𑀸 𑀢𑀲𑁆𑀲𑀸, 𑀏𑀓𑀁 𑀅𑀮𑀪𑀺 𑀥𑀻𑀢𑀭𑀁;

𑀦𑁂𑀫𑀺𑀢𑁆𑀢𑀸𑀩𑁆𑀬𑀸𑀓𑀭𑀼𑀁 𑀢𑀲𑁆𑀲𑀸, 𑀲𑀁𑀯𑀸𑀲𑀁 𑀫𑀕𑀭𑀸𑀚𑀺𑀦𑀸.

𑀅𑀢𑀻𑀯 𑀭𑀽𑀧𑀺𑀦𑀺𑀁 𑀆𑀲𑀺, 𑀅𑀢𑀻𑀯 𑀓𑀸𑀫𑀕𑀺𑀤𑁆𑀥𑀺𑀦𑀻;

𑀤𑁂𑀯𑁂𑀦 𑀤𑁂𑀯𑀺𑀬𑀸’𑀘𑀸𑀧𑀺, 𑀮𑀚𑁆𑀚𑀸𑀬𑀸’𑀲𑀺 𑀚𑀕𑀼𑀘𑁆𑀙𑀺𑀢𑀸.

𑀏𑀓𑀸𑀓𑀺𑀦𑀻 𑀲𑀸 𑀦𑀺𑀓𑁆𑀔𑀫𑁆𑀫, 𑀲𑁂𑀭𑀻𑀘𑀸𑀭𑀲𑀼𑀔𑀢𑁆𑀣𑀺𑀦𑀻;

𑀲𑀢𑁆𑀣𑁂𑀦 𑀲𑀳 𑀅𑀜𑁆𑀜𑀸𑀢𑀸, 𑀅𑀕𑀸 𑀫𑀕𑀥𑀕𑀸𑀫𑀺𑀦𑀸.

𑀮𑀸𑀴𑀭𑀝𑁆𑀞𑁂 𑀅𑀝𑀯𑀺𑀬𑀸, 𑀲𑀻𑀳𑁄 𑀲𑀢𑁆𑀣𑀫𑀪𑀺𑀤𑁆𑀥𑀯𑀺;

𑀅𑀜𑁆𑀜𑀢𑁆𑀣 𑀲𑁂𑀲𑀸 𑀥𑀸𑀯𑀺𑀁𑀲𑀼, 𑀲𑀻𑀳𑀕𑀢𑀤𑀺𑀲𑀦𑁆𑀢𑀼𑀲𑀸.

𑀕𑀡𑁆𑀳𑀺𑀢𑁆𑀯𑀸 𑀕𑁄𑀘𑀭𑀁 𑀲𑀻𑀳𑁄, 𑀕𑀘𑁆𑀙𑀁 𑀤𑀺𑀲𑁆𑀯𑀸 𑀢𑀫𑀸’𑀭𑀢𑁄;

𑀭𑀢𑁆𑀢𑁄 𑀉𑀧𑀸𑀕𑀮𑀸𑀮𑁂𑀦𑁆𑀢𑁄, 𑀮𑀗𑁆𑀕𑀼𑀮𑀁 𑀧𑀢𑁆𑀢𑀓𑀡𑁆𑀡𑀓𑁄.

𑀲𑀸 𑀢𑀁 𑀤𑀺𑀲𑁆𑀯𑀸 𑀲𑀭𑀺𑀢𑁆𑀯𑀸𑀦, 𑀦𑁂𑀫𑀺𑀢𑁆𑀢𑀯𑀘𑀦𑀁 𑀲𑀼𑀢𑀁;

𑀅𑀪𑀻𑀢𑀸 𑀢𑀲𑁆𑀲 𑀅𑀗𑁆𑀕𑀸𑀦𑀺, 𑀭𑀜𑁆𑀚𑀬𑀦𑁆𑀢𑀺 𑀧𑀭𑀸𑀫𑀲𑀺.

𑀢𑀲𑁆𑀲𑀸 𑀨𑀲𑁆𑀲𑁂𑀦𑀸’𑀢𑀺 𑀭𑀢𑁆𑀢𑁄, 𑀧𑀺𑀝𑁆𑀞𑀺𑀁 𑀆𑀭𑁄𑀧𑀺𑀬𑀸’𑀲𑀼𑀢𑀁;

𑀲𑀻𑀳𑁄 𑀲𑀓𑀁 𑀕𑀼𑀳𑀁 𑀦𑁂𑀢𑁆𑀯𑀸, 𑀢𑀸𑀬 𑀲𑀁𑀯𑀸𑀲𑀫𑀸𑀘𑀭𑀺.

𑀢𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀓𑀸𑀮𑁂𑀦 𑀬𑀫𑀓𑁂 𑀤𑀼𑀯𑁂;

𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘𑀸𑀢𑀺, 𑀭𑀸𑀚𑀥𑀻𑀢𑀸 𑀚𑀦𑁂𑀲𑀺 𑀲𑀸.

𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑀸’𑀲𑀼𑀁, 𑀲𑀻𑀳𑀸𑀓𑀸𑀭𑀸 𑀢𑀢𑁄 𑀅𑀓𑀸;

𑀦𑀸𑀫𑁂𑀦 𑀲𑀻𑀳𑀩𑀸𑀳𑀼𑀁 𑀢𑀁, 𑀥𑀻𑀢𑀭𑀁 𑀲𑀻𑀳𑀲𑀻𑀯𑀮𑀺𑀁.

𑀧𑀼𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑁄 𑀲𑁄, 𑀫𑀸𑀢𑀭𑀁 𑀧𑀼𑀘𑁆𑀙𑀺 𑀲𑀁𑀲𑀬𑀁;

𑀢𑀼𑀯𑀁 𑀧𑀺𑀢𑀸 𑀘 𑀦𑁄 𑀅𑀫𑁆𑀫, 𑀓𑀲𑁆𑀫𑀸 𑀯𑀺𑀲𑀤𑀺𑀲𑀸 𑀇𑀢𑀺.

𑀲𑀸 𑀲𑀩𑁆𑀩𑀫𑀩𑁆𑀭𑀯𑀻 𑀢𑀲𑁆𑀲, 𑀓𑀺𑀁𑀦𑀬𑀸𑀫𑀸’𑀢𑀺 𑀲𑁄’𑀩𑁆𑀭𑀯𑀺;

𑀕𑀼𑀳𑀁 𑀣𑀓𑁂𑀢𑀺𑀢𑀸𑀢𑁄 𑀢𑁂, 𑀧𑀸𑀲𑀸𑀡𑁂𑀦𑀸𑀢𑀺 𑀲𑀸’𑀩𑁆𑀭𑀯𑀺.

𑀫𑀳𑀸𑀕𑀼𑀳𑀸𑀬 ¶ 𑀣𑀓𑀦𑀁, 𑀔𑀦𑁆𑀥𑁂𑀦𑀸’𑀤𑀸𑀬 𑀲𑁄 𑀅𑀓𑀸;

𑀏𑀓𑀸𑀳𑁂𑀦𑁂’𑀯 𑀧𑀜𑁆𑀜𑀸𑀲-𑀬𑁄𑀚𑀦𑀸𑀦𑀺 𑀕𑀢𑀸𑀕𑀢𑀁.

𑀕𑁄𑀘𑀭𑀸𑀬 𑀕𑀳𑁂 𑀲𑀻𑀳𑁂, 𑀤𑀓𑁆𑀔𑀺𑀡𑀲𑁆𑀫𑀺𑀜𑁆𑀳𑀺 𑀫𑀸𑀢𑀭𑀁;

𑀯𑀸𑀫𑁂 𑀓𑀡𑀺𑀝𑁆𑀞𑀺𑀁 𑀓𑀢𑁆𑀯𑀸𑀦, 𑀢𑀬𑁄 𑀲𑀻𑀖𑀁 𑀅𑀧𑀓𑁆𑀓𑀫𑀻.

𑀦𑀺𑀯𑀸𑀲𑁂𑀢𑁆𑀯𑀸𑀦 𑀲𑀸𑀔𑀁 𑀢𑁂, 𑀧𑀘𑁆𑀘𑀦𑁆𑀢𑀁 𑀕𑀸𑀫𑀫𑀸𑀕𑀫𑀼𑀁;

𑀢𑀢𑁆𑀣𑀸𑀲𑀺 𑀭𑀸𑀚𑀺𑀥𑀻𑀢𑀸𑀬, 𑀫𑀸𑀢𑀼𑀮𑀲𑁆𑀲 𑀲𑀼𑀢𑁄 𑀢𑀤𑀸.

𑀲𑁂𑀦𑀸𑀧𑀢𑀺 𑀯𑀗𑁆𑀕𑀭𑀜𑁆𑀜𑁄, 𑀞𑀺𑀢𑁄 𑀧𑀘𑁆𑀘𑀦𑁆𑀢 𑀕𑀸𑀫𑀓𑁄;

𑀦𑀺𑀲𑀺𑀦𑁆𑀦𑁄𑀯𑀝𑀫𑀽𑀮𑀮𑁂𑀲𑁄, 𑀓𑀫𑁆𑀫𑀦𑁆𑀢𑀁 𑀲𑀁𑀯𑀺𑀥𑀸𑀬𑀓𑀁.

𑀤𑀺𑀲𑁆𑀯𑀸 𑀢𑁂 𑀧𑀼𑀘𑁆𑀙𑀺𑀢𑁂’𑀯𑁄𑀘𑀼𑀁, 𑀅𑀝𑀯𑀻 𑀯𑀸𑀲𑀺𑀦𑁄 𑀫𑀬𑀁;

𑀇𑀢𑀺 𑀲𑁄 𑀤𑀸𑀧𑀬𑀻 𑀢𑁂𑀲𑀁, 𑀯𑀢𑁆𑀣𑀸𑀦𑀺 𑀥𑀚𑀺𑀦𑀻 𑀧𑀢𑀺.

𑀢𑀸𑀦𑀸’𑀳𑁂𑀲𑀼𑀁 𑀉𑀴𑀸𑀭𑀸𑀦𑀺, 𑀪𑀢𑁆𑀢𑀁 𑀧𑀡𑁆𑀡𑁂𑀲𑀼 𑀤𑀸𑀧𑀬𑀺;

𑀲𑁄𑀯𑀡𑁆𑀡𑀪𑀸𑀚𑀦𑀦𑀸’𑀲𑀼𑀁, 𑀢𑁂𑀲𑀁 𑀧𑀼𑀜𑁆𑀜𑁂𑀦 𑀢𑀸𑀦𑀺 𑀘.

𑀢𑁂𑀦 𑀲𑁄 𑀯𑀺𑀫𑁆𑀳𑀺𑀢𑁄 𑀧𑀼𑀘𑁆𑀙𑀺, 𑀓𑁂 𑀢𑀼𑀫𑁆𑀳𑁂𑀢𑀺 𑀘𑀫𑀽𑀧𑀢𑀺;

𑀢𑀲𑁆𑀲 𑀲𑀸 𑀚𑀸𑀢𑀺𑀕𑁄𑀢𑁆𑀢𑀸𑀦𑀺, 𑀭𑀸𑀚𑀥𑀻𑀢𑀸 𑀦𑀺𑀯𑁂𑀤𑀬𑀺.

𑀧𑀺𑀢𑀼𑀘𑁆𑀙𑀸 𑀥𑀻𑀢𑀭𑀁 𑀢𑀁 𑀲𑁄, 𑀆𑀤𑀸𑀬 𑀥𑀚𑀺𑀦𑀻 𑀧𑀢𑀺;

𑀕𑀦𑁆𑀢𑁆𑀯𑀸𑀦 𑀯𑀗𑁆𑀕𑀦𑀕𑀭𑀁, 𑀲𑀁𑀯𑀸𑀲𑀁 𑀢𑀸𑀬 𑀓𑀧𑁆𑀧𑀬𑀺.

𑀲𑀻𑀳𑁄 𑀲𑀻𑀖𑀁 𑀕𑀼𑀳𑀁 𑀕𑀦𑁆𑀢𑁆𑀯𑀸, 𑀢𑁂 𑀅𑀤𑀺𑀲𑁆𑀯𑀸 𑀢𑀬𑁄 𑀚𑀦𑁂;

𑀅𑀝𑁆𑀝𑀺𑀢𑁄 𑀧𑀼𑀢𑁆𑀢𑀲𑁄𑀓𑁂𑀦, 𑀦 𑀘 𑀔𑀸𑀤𑀺 𑀦 𑀘𑀸’𑀧𑀺𑀯𑀺.

𑀤𑀸𑀭𑀓𑁂 𑀢𑁂 𑀕𑀯𑁂𑀲𑀦𑁆𑀢𑁄, 𑀅𑀕𑀸 𑀧𑀘𑁆𑀘𑀦𑁆𑀢𑀕𑀸𑀫𑀓𑁂;

𑀉𑀩𑁆𑀩𑀸𑀲𑀻𑀬𑀢𑀺 𑀲𑁄 𑀲𑁄’𑀯, 𑀬𑀁𑀬𑀁 𑀕𑀸𑀫𑀫𑀼𑀧𑁂𑀢𑀺 𑀲𑁄.

𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀢𑀁 𑀧𑀝𑀺𑀯𑁂𑀤𑀬𑀼𑀁;

𑀲𑀻𑀳𑁄 𑀧𑀺𑀴𑁂𑀢𑀺 𑀢𑁂 𑀭𑀝𑁆𑀞𑀁, 𑀢𑀁 𑀤𑁂𑀯 𑀧𑀝𑀺𑀲𑁂𑀥𑀬.

𑀅𑀮𑀓𑀁 𑀦𑀺𑀲𑁂𑀥𑀓𑀁 𑀢𑀲𑁆𑀲, 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀧𑀼𑀭𑁂;

𑀆𑀤𑁂𑀢𑀼 𑀲𑀻𑀳𑀤𑀸𑀬𑀻𑀢𑀺, 𑀲𑀳𑀲𑁆𑀲𑀁 𑀲𑁄 𑀧𑀘𑀸𑀭𑀬𑀺.

𑀢𑀣𑁂𑀯 𑀤𑁆𑀯𑁂𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺𑀘𑀸’𑀧𑀺 𑀦𑀭𑀺𑀲𑁆𑀲𑀭𑁄;

𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀯𑀸𑀭𑁂𑀲𑀺, 𑀫𑀸𑀢𑀸 𑀲𑀻𑀳𑀪𑀼𑀚𑀁 𑀳𑀺𑀢𑀁.

𑀅𑀕𑁆𑀕𑀳𑀺 𑀢𑀢𑀺𑀬𑁂 𑀯𑀸𑀭𑁂, 𑀲𑀻𑀳𑀩𑀸𑀳𑀼 𑀅𑀧𑀼𑀘𑁆𑀙𑀺𑀬;

𑀫𑀸𑀢𑀭𑀁 𑀢𑀺𑀲𑀳𑀲𑁆𑀲𑀁 𑀢𑀁, 𑀖𑀸𑀢𑁂𑀢𑀼𑀁 𑀧𑀺𑀢𑀭𑀁 𑀲𑀓𑀁.

𑀭𑀜𑁆𑀜𑁄 𑀓𑀼𑀫𑀸𑀭𑀁 𑀤𑀲𑁆𑀲𑁂𑀲𑀼𑀁, 𑀢𑀁 𑀭𑀸𑀚𑀸 𑀇𑀥 𑀫𑀩𑁆𑀭𑀯𑀺;

𑀕𑀳𑀺𑀢𑁄 𑀬𑀤𑀺 𑀲𑀻𑀳𑁄 𑀢𑁂, 𑀤𑀫𑁆𑀫𑀺 𑀭𑀝𑁆𑀞𑀁 𑀢𑀤𑁂𑀯 𑀢𑁂.

𑀲𑁄 ¶ 𑀢𑀁 𑀕𑀦𑁆𑀢𑁆𑀯𑀸 𑀕𑀼𑀳𑀸𑀤𑁆𑀯𑀸𑀭𑀁, 𑀲𑀻𑀳𑀁 𑀤𑀺𑀲𑁆𑀯𑀸𑀯 𑀆𑀭𑀓𑀸;

𑀏𑀦𑁆𑀢𑀁 𑀧𑀼𑀢𑁆𑀢𑀲𑀺𑀦𑁂𑀳𑁂𑀦, 𑀯𑀺𑀚𑁆𑀛𑀺𑀢𑀼𑀁 𑀢𑀁 𑀲𑀭𑀁 𑀔𑀺𑀧𑀺.

𑀲𑀭𑁄 𑀦𑀴𑀸𑀢𑀫𑀸𑀳𑀘𑁆𑀘, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀣𑀲𑁆𑀲 𑀢𑀼;

𑀓𑀼𑀫𑀸𑀭𑀧𑀸𑀤𑀫𑀽𑀮𑁂’𑀯, 𑀦𑀺𑀯𑀢𑁆𑀢𑁄 𑀧𑀢𑀺 𑀪𑀽𑀫𑀺𑀬𑀁.

𑀢𑀣𑀸’𑀲𑀺 𑀬𑀸𑀯 𑀢𑀢𑀺𑀬𑀁, 𑀢𑀢𑁄 𑀓𑀼𑀚𑁆𑀛𑀺𑀫𑀺𑀕𑀸𑀫𑀺𑀧𑁄;

𑀢𑀢𑁄 𑀔𑀺𑀢𑁆𑀢𑁄 𑀲𑀭𑁄𑀢𑀲𑁆𑀲, 𑀓𑀸𑀬𑀁 𑀦𑀺𑀩𑁆𑀩𑀺𑀚𑁆𑀚 𑀦𑀺𑀓𑁆𑀔𑀫𑀺.

𑀲𑀓𑁂𑀲𑀭𑀁 𑀲𑀻𑀳𑀲𑀻𑀲𑀁, 𑀆𑀤𑀸𑀬 𑀲𑀧𑀼𑀭𑀁 𑀅𑀕𑀸;

𑀫𑀢𑀲𑁆𑀲 𑀯𑀗𑁆𑀕𑀭𑀸𑀚𑀲𑁆𑀲, 𑀲𑀢𑁆𑀢𑀸𑀳𑀸𑀦𑀺 𑀢𑀤𑀸 𑀅𑀳𑀼.

𑀭𑀜𑁆𑀜𑁄 𑀅𑀧𑀼𑀢𑁆𑀢𑀓𑀢𑁆𑀢𑀸 𑀘, 𑀧𑀢𑀻𑀢𑀸 𑀘𑀲𑁆𑀲 𑀓𑀫𑁆𑀫𑀼𑀦𑀸;

𑀲𑀼𑀢𑁆𑀯𑀸 𑀘 𑀭𑀜𑁆𑀜𑁄 𑀦𑀢𑁆𑀢𑀼𑀢𑁆𑀢𑀁, 𑀲𑀜𑁆𑀚𑀸𑀦𑀺𑀢𑁆𑀯𑀸 𑀘 𑀫𑀸𑀢𑀭𑀁.

𑀅𑀫𑀘𑁆𑀘𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀅𑀔𑀺𑀮𑀸 𑀏𑀓𑀫𑀸𑀦𑀲𑀸;

𑀲𑀻𑀳𑀩𑀸𑀳𑀼 𑀓𑀼𑀫𑀸𑀭𑀲𑁆𑀲, 𑀭𑀸𑀚𑀸 𑀳𑁄𑀳𑀻𑀢𑀺 𑀅𑀩𑁆𑀭𑀯𑀼𑀁.

𑀲𑁄 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸, 𑀤𑀢𑁆𑀯𑀸 𑀫𑀸𑀢𑀼 𑀧𑀢𑀺𑀲𑁆𑀲 𑀢𑀁;

𑀲𑀻𑀳𑀲𑀻𑀯𑀮𑀺𑀫𑀸𑀤𑀸𑀬, 𑀚𑀸𑀢𑀪𑀽𑀫𑀺𑀁 𑀕𑀢𑁄 𑀲𑀬𑀁.

𑀦𑀕𑀭𑀁 𑀢𑀢𑁆𑀣 𑀫𑀸𑀧𑁂𑀲𑀺, 𑀅𑀳𑀼 𑀲𑀻𑀳𑀧𑀼𑀭𑀦𑁆𑀢𑀺 𑀢𑀁;

𑀅𑀭𑀜𑁆𑀜𑁂 𑀬𑁄𑀚𑀦𑀲𑀢𑁂, 𑀕𑀸𑀫𑁂 𑀘𑀸𑀧𑀺 𑀦𑀺𑀯𑁂𑀲𑀬𑀺.

𑀮𑀸𑀴𑀭𑀝𑁆𑀞𑁂 𑀧𑀼𑀭𑁂 𑀢𑀲𑁆𑀫𑀺𑀁, 𑀲𑀻𑀳𑀩𑀸𑀳𑀼𑀦𑀭𑀸𑀥𑀺𑀧𑁄;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀓𑀢𑁆𑀯𑀸𑀦, 𑀫𑀳𑁂𑀲𑀺𑀁 𑀲𑀻𑀳𑀲𑀻𑀯𑀮𑀺𑀁.

𑀫𑀳𑁂𑀲𑀻 𑀲𑁄𑀴𑀲𑀓𑁆𑀔𑀢𑁆𑀢𑀼𑀁, 𑀬𑀫𑀓𑁂 𑀘 𑀤𑀼𑀯𑁂 𑀤𑀼𑀯𑁂;

𑀧𑀼𑀢𑁆𑀢𑁂 𑀚𑀦𑀬𑀺 𑀓𑀸𑀮𑁂𑀲𑀸, 𑀯𑀺𑀚𑀬𑁄 𑀦𑀸𑀫 𑀚𑁂𑀝𑁆𑀞𑀓𑁄.

𑀲𑀼𑀫𑀺𑀢𑁆𑀢𑁄 𑀦𑀸𑀫 𑀤𑀼𑀢𑀺𑀬𑁄, 𑀲𑀩𑁆𑀩𑁂 𑀤𑁆𑀯𑀢𑁆𑀢𑀺𑀁𑀲 𑀧𑀼𑀢𑁆𑀢𑀓𑀸;

𑀓𑀸𑀮𑁂𑀦 𑀯𑀺𑀚𑀬𑀁 𑀭𑀸𑀚𑀸, 𑀉𑀧𑀭𑀚𑁆𑀚𑁂’𑀪𑀺 𑀲𑁂𑀘𑀬𑀺.

𑀯𑀺𑀚𑀬𑁄 𑀯𑀺𑀲𑀫𑀸𑀘𑀸𑀭𑁄, 𑀆𑀲𑀺 𑀢𑀫𑁆𑀧𑀭𑀺𑀲𑀸𑀧𑀺 𑀘;

𑀲𑀸𑀳𑀲𑀸𑀦𑀺 𑀅𑀦𑁂𑀓𑀸𑀦𑀺, 𑀤𑀼𑀲𑁆𑀲𑀳𑀸𑀦𑀺 𑀓𑀭𑀺𑀁𑀲𑀼𑀢𑁂.

𑀓𑀼𑀤𑁆𑀥𑁄 𑀫𑀳𑀸𑀚𑀦𑁄 𑀭𑀜𑁆𑀜𑁄, 𑀢𑀫𑀢𑁆𑀣𑀁 𑀧𑀝𑀺𑀯𑁂𑀤𑀬𑀺;

𑀭𑀸𑀚𑀸 𑀢𑁂 𑀲𑀜𑁆𑀜𑀧𑁂𑀢𑁆𑀯𑀸𑀦, 𑀧𑀼𑀢𑁆𑀢𑀁 𑀑𑀯𑀤𑀺 𑀲𑀸𑀥𑀼𑀓𑀁.

𑀲𑀩𑁆𑀩𑀁 𑀢𑀣𑁂𑀯 𑀤𑀼𑀢𑀺𑀬𑀁, 𑀅𑀳𑁄𑀲𑀺 𑀢𑀢𑀺𑀬𑀁 𑀧𑀦;

𑀓𑀼𑀤𑁆𑀥𑁄 𑀫𑀳𑀸𑀚𑀦𑁄 𑀆𑀳, 𑀧𑀼𑀢𑁆𑀢𑀁 𑀖𑀸𑀢𑁂𑀳𑀺 𑀢𑁂 𑀇𑀢𑀺.

𑀭𑀸𑀚𑀸’𑀣𑀯𑀺𑀚𑀬𑀁 𑀢𑀜𑁆𑀘, 𑀧𑀭𑀺𑀯𑀸𑀭𑀜𑁆𑀘 𑀢𑀲𑁆𑀲 𑀢𑀁;

𑀲𑀢𑁆𑀢𑀲𑀢𑀸𑀦𑀺 𑀧𑀼𑀭𑀺𑀲𑁂, 𑀓𑀸𑀭𑁂𑀢𑁆𑀯𑀸 𑀅𑀤𑁆𑀥𑀫𑀼𑀡𑁆𑀡𑀓𑁂.

𑀦𑀸𑀯𑀸𑀬 ¶ 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸, 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺 𑀲𑀸𑀕𑀭𑁂;

𑀢𑀣𑀸 𑀢𑁂𑀲𑀁 𑀪𑀭𑀺𑀬𑀸𑀬𑁄, 𑀢𑀣𑁂𑀯 𑀘 𑀓𑀼𑀫𑀸𑀭𑀓𑁂.

𑀯𑀺𑀲𑀼𑀁 𑀯𑀺𑀲𑀼𑀁 𑀢𑁂 𑀯𑀺𑀲𑁆𑀲𑀝𑁆𑀞𑀸, 𑀧𑀼𑀭𑀺𑀲𑀺𑀢𑁆𑀣𑀺𑀓𑀼𑀫𑀸𑀭𑀓𑀸;

𑀯𑀺𑀲𑀼𑀁 𑀯𑀺𑀲𑀼𑀁 𑀤𑀻𑀧𑀓𑀲𑁆𑀫𑀺𑀁, 𑀑𑀓𑁆𑀓𑀫𑀺𑀁𑀲𑀼 𑀯𑀲𑀺𑀁𑀲𑀼 𑀘.

𑀦𑀕𑁆𑀕𑀤𑀻𑀧𑁄𑀢𑀺 𑀜𑀸𑀬𑀺𑀢𑁆𑀣, 𑀓𑀼𑀫𑀸𑀭𑁄𑀓𑁆𑀓𑀦𑁆𑀢𑀤𑀻𑀧𑀓𑁄;

𑀪𑀭𑀺𑀬𑁄𑀓𑁆𑀓𑀦𑁆𑀢𑀤𑀻𑀧𑁄 𑀢𑀼, 𑀫𑀳𑀺𑀦𑁆𑀤𑀤𑀻𑀧𑀓𑁄 𑀇𑀢𑀺.

𑀲𑀼𑀧𑁆𑀧𑀸𑀭𑀓𑁂 𑀧𑀝𑁆𑀝𑀦𑀫𑁆𑀳𑀺, 𑀯𑀺𑀚𑀬𑁄 𑀧𑀦 𑀑𑀓𑁆𑀓𑀫𑀺;

𑀧𑀭𑀺𑀲𑀸 𑀲𑀸𑀳𑀲𑁂𑀦𑁂’𑀢𑁆𑀣, 𑀪𑀻𑀢𑁄 𑀦𑀸𑀯𑀁 𑀧𑀼𑀦𑀸’𑀭𑀼𑀳𑀺.

𑀮𑀁𑀓𑀸𑀬𑀁 𑀯𑀺𑀚𑀬𑀲𑀦𑀸𑀫𑀓𑁄 𑀓𑀼𑀫𑀸𑀭𑁄;

𑀑𑀢𑀺𑀡𑁆𑀡𑁄 𑀣𑀺𑀭𑀫𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂;

𑀲𑀸𑀮𑀸𑀦𑀁 𑀬𑀫𑀓𑀕𑀼𑀡𑀸𑀦𑀫𑀦𑁆𑀢𑀭𑀲𑁆𑀫𑀺𑀁;

𑀦𑀺𑀩𑁆𑀩𑀸𑀢𑀼𑀁 𑀲𑀬𑀺𑀢𑀤𑀺𑀦𑁂 𑀢𑀣𑀸𑀕𑀢𑀲𑁆𑀲.

𑀲𑀼𑀚𑀦𑀧𑀲𑀸𑀤𑀲𑀁𑀯𑁂 𑀕𑀢𑁆𑀣𑀸𑀬𑀓𑀢𑁂 𑀫𑀳𑀸𑀯𑀁𑀲𑁂

𑀲𑀩𑁆𑀩𑀮𑁄𑀓𑀳𑀻𑀢𑀁 ¶ 𑀓𑀢𑁆𑀯𑀸, 𑀧𑀢𑁆𑀯𑀸 𑀲𑀦𑁆𑀢𑀺𑀓𑀭𑀁 𑀧𑀤𑀁;

𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁄 𑀮𑁄𑀓𑀦𑀸𑀬𑀓𑁄.

𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀫𑁆𑀳𑀺, 𑀫𑀳𑀦𑁆𑀢𑀫𑁆𑀳𑀺 𑀫𑀳𑀸𑀫𑀼𑀦𑀺;

𑀲𑀓𑁆𑀓 𑀢𑀢𑁆𑀭𑀲𑀫𑀻𑀧𑀝𑁆𑀞𑀁, 𑀅𑀯𑁄𑀘 𑀯𑀤𑀢𑀁 𑀯𑀭𑁄.

𑀯𑀺𑀚𑀬𑁄 𑀮𑀸𑀴𑀸𑀯𑀺𑀲𑀬𑀸, 𑀲𑀻𑀳𑀩𑀸𑀳𑀼𑀦𑀭𑀺𑀦𑁆𑀤𑀚𑁄;

𑀏𑀲𑀮𑀗𑁆𑀓𑀸𑀥𑀦𑀼𑀧𑀢𑁆𑀢𑁄, 𑀲𑀢𑁆𑀢𑀪𑀘𑁆𑀘𑀲𑀢𑀸𑀦𑀼𑀕𑁄.

𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺 𑀤𑁂𑀯𑀺𑀦𑁆𑀤𑀁, 𑀮𑀁𑀓𑀸𑀬𑀁 𑀫𑀫 𑀲𑀸𑀲𑀦𑀁;

𑀢𑀲𑁆𑀫𑀸 𑀲𑀧𑀭𑀺𑀯𑀸𑀭𑀁 𑀢𑀁, 𑀭𑀓𑁆𑀔𑀮𑀁𑀓𑀜𑁆𑀘 𑀲𑀸𑀥𑀼𑀓𑀁.

𑀢𑀣𑀸𑀕𑀢𑀲𑁆𑀲 𑀤𑁂𑀯𑀺𑀦𑁆𑀤𑁄, 𑀯𑀘𑁄 𑀲𑀼𑀢𑁆𑀯𑀸𑀯 𑀲𑀸𑀤𑀭𑁄;

𑀤𑁂𑀯𑀲𑁆𑀲𑀼𑀧𑁆𑀧𑀮𑀯𑀡𑁆𑀡𑀲𑁆𑀲, 𑀮𑀁𑀓𑀸𑀭𑀓𑁆𑀔𑀁 𑀲𑀫𑀧𑁆𑀧𑀬𑀺.

𑀲𑀓𑁆𑀓𑁂𑀦 𑀯𑀼𑀢𑁆𑀢𑀫𑀢𑁆𑀢𑁄𑀲𑁄, 𑀮𑀗𑁆𑀓𑀸𑀫𑀸𑀕𑀫𑁆𑀫𑀲𑀚𑁆𑀚𑀼𑀓𑀁;

𑀧𑀭𑀺𑀩𑁆𑀩𑀸𑀚𑀓 𑀯𑁂𑀲𑁂𑀦, 𑀭𑀼𑀓𑁆𑀔𑀫𑀽𑀮 𑀫𑀽𑀧𑀯𑀺𑀲𑀺𑀁.

𑀦 𑀲𑀦𑁆𑀢𑀺 𑀫𑀦𑀼𑀚𑀸 𑀳𑁂𑀢𑁆𑀣, 𑀦 𑀘 𑀳𑁂𑀲𑁆𑀲𑀢𑀺 𑀯𑁄 𑀪𑀬𑀁;

𑀇𑀢𑀺 𑀯𑀢𑁆𑀯𑀸 𑀓𑀼𑀡𑁆𑀟𑀻𑀓𑀸𑀬, 𑀢𑁂 𑀚𑀮𑁂𑀦 𑀦𑀺𑀲𑀺𑀜𑁆𑀘𑀺𑀬.

𑀲𑀼𑀢𑁆𑀢𑀜𑁆𑀘 𑀢𑁂𑀲𑀁 𑀳𑀢𑁆𑀣𑁂𑀲𑀼, 𑀮𑀕𑁂𑀢𑁆𑀯𑀸𑀦𑀪𑀲𑀸’𑀕𑀫𑀸;

𑀤𑀲𑁆𑀲𑁂𑀲𑀺 𑀲𑁄𑀡𑀺𑀭𑀽𑀧𑁂𑀦, 𑀧𑀭𑀺𑀯𑀸𑀭𑀺𑀓𑀬𑀓𑁆𑀔𑀺𑀦𑀻.

𑀏𑀓𑁄 𑀢𑀁 𑀯𑀸𑀭𑀺𑀬𑀦𑁆𑀢𑁄𑀧𑀺, 𑀭𑀸𑀚𑀧𑀼𑀢𑁆𑀢𑁂𑀦 𑀅𑀦𑁆𑀯𑀕𑀸;

𑀕𑀸𑀫𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑀫𑁆𑀳𑀺, 𑀪𑀯𑀦𑁆𑀢𑀺 𑀲𑀼𑀦𑀔𑀸 𑀇𑀢𑀺.

𑀢𑀲𑁆𑀲𑀸 𑀘 𑀲𑀸𑀫𑀻𑀦𑀻 𑀢𑀢𑁆𑀣, 𑀓𑀼𑀯𑁂𑀡𑀻𑀦𑀸𑀫 𑀬𑀓𑁆𑀔𑀺𑀦𑀻;

𑀦𑀺𑀲𑀻𑀤𑀺 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀓𑀦𑁆𑀢𑀦𑁆𑀢𑀺 𑀢𑀸𑀧𑀲𑀻 𑀯𑀺𑀬.

𑀤𑀺𑀲𑁆𑀯𑀸𑀦 ¶ 𑀲𑁄 𑀧𑁄𑀓𑁆𑀔𑀭𑀡𑀻, 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀢𑀸𑀧𑀲𑀺𑀁;

𑀢𑀢𑁆𑀣 𑀦𑁆𑀳𑀸𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀆𑀤𑀸𑀬 𑀘 𑀫𑀼𑀮𑀸𑀮𑀺𑀬𑁄.

𑀯𑀸𑀭𑀺𑀜𑁆𑀘 𑀧𑁄𑀓𑁆𑀔𑀭𑁂𑀳𑁂𑀯, 𑀯𑀼𑀝𑁆𑀞𑀸𑀲𑀺 𑀲𑀸𑀢𑀫𑀩𑁆𑀭𑀯𑀺;

𑀪𑀓𑁆𑀔𑁄’𑀲𑀺 𑀫𑀫 𑀢𑀺𑀝𑁆𑀞𑀸𑀢𑀺, 𑀅𑀝𑁆𑀞𑀸 𑀩𑀤𑁆𑀥𑁄 𑀯𑀲𑁄 𑀦𑀭𑁄.

𑀧𑀭𑀺𑀢𑁆𑀢𑀲𑀼𑀢𑁆𑀢 𑀢𑁂𑀚𑁂𑀦, 𑀪𑀓𑁆𑀔𑀺𑀢𑀼𑀁 𑀲𑀸 𑀦 𑀲𑀓𑁆𑀓𑀼𑀡𑀻;

𑀬𑀸𑀘𑀺𑀬𑀦𑁆𑀢𑁄𑀧𑀺 𑀢𑀁 𑀲𑀼𑀢𑁆𑀢𑀁, 𑀦𑀸’𑀤𑀸𑀬𑀓𑁆𑀔𑀺𑀦𑀺𑀬𑀸 𑀦𑀭𑁄.

𑀢𑀁 𑀕𑀳𑁂𑀢𑁆𑀯𑀸 𑀲𑀼𑀭𑀼𑀗𑁆𑀕𑀸𑀬𑀁, 𑀭𑀼𑀤𑀦𑁆𑀢𑀁 𑀬𑀓𑁆𑀔𑀺𑀦𑀻 𑀔𑀺𑀧𑀺;

𑀏𑀯𑀁 𑀏𑀓𑁂𑀓𑀲𑁄 𑀢𑀢𑁆𑀣, 𑀔𑀺𑀧𑀻 𑀲𑀢𑁆𑀢𑀲𑀢𑀸𑀦𑀺𑀧𑀺.

𑀅𑀦𑀸𑀬𑀦𑁆𑀢𑁂𑀲𑀼 𑀲𑀩𑁆𑀩𑁂𑀲𑀼, 𑀯𑀺𑀚𑀬𑁄 𑀪𑀬𑀲𑀁𑀓𑀺𑀢𑁄;

𑀦𑀦𑁆𑀢𑀧𑀜𑁆𑀘𑀸𑀬𑀼𑀥𑁄 𑀕𑀦𑁆𑀢𑁆𑀯𑀸, 𑀤𑀺𑀲𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀲𑀼𑀪𑀁.

𑀅𑀧𑀲𑁆𑀲 𑀫𑀼𑀢𑁆𑀢𑀺𑀡𑁆𑀡𑀧𑀤𑀁, 𑀧𑀲𑁆𑀲𑀁 𑀢𑀜𑁆𑀘𑁂𑀯 𑀢𑀸𑀧𑀲𑀺𑀁;

‘‘𑀇𑀫𑀸𑀬 𑀔𑀮𑀼 𑀪𑀘𑁆𑀘𑀸 𑀫𑁂, 𑀕𑀳𑀺𑀢𑀸𑀦𑀼’’𑀢𑀺 𑀘𑀺𑀦𑁆𑀢𑀺𑀬.

‘‘𑀓𑀺𑀁 𑀭𑀸𑀚𑀧𑀼𑀢𑁆𑀢 𑀪𑀘𑁆𑀘𑁂𑀳𑀺,

𑀬𑀓𑁆𑀔𑀺𑀦𑀻 𑀢𑀸𑀯 𑀚𑀸𑀦𑀸𑀢𑀺, 𑀫𑀫 𑀚𑀸𑀢𑀺𑀦𑁆𑀢𑀺 𑀦𑀺𑀘𑁆𑀙𑀺𑀢𑁄;

𑀲𑀗𑁆𑀖𑀁 𑀲𑀦𑀸𑀫𑀁 𑀲𑀸𑀯𑁂𑀢𑁆𑀯𑀸, 𑀥𑀦𑀼𑀁 𑀲𑀦𑁆𑀥𑀸𑀬𑀼’ 𑀧𑀸𑀕𑀢𑁄.

𑀬𑀓𑁆𑀔𑀺𑀁 𑀆𑀤𑀸𑀬 𑀕𑀻𑀯𑀸𑀬, 𑀦𑀸𑀭𑀸 𑀘 𑀯𑀮𑀬𑁂𑀦 𑀲𑁄;

𑀯𑀸𑀫𑀳𑀢𑁆𑀣𑁂𑀦 𑀓𑁂𑀲𑁂𑀲𑀼, 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂 𑀦 𑀢𑀼.

𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑀺𑀁𑀆𑀳, ‘‘𑀪𑀘𑁆𑀘𑁂 𑀫𑁂 𑀤𑁂𑀳𑀺 𑀤𑀸𑀲𑀺𑀢𑀁;

𑀫𑀸𑀭𑁂𑀫𑀻’’𑀢𑀺 𑀪𑀬𑀝𑁆𑀝𑀸𑀲𑀸, 𑀚𑀻𑀯𑀺𑀢𑀁 𑀬𑀸𑀘𑀺 𑀬𑀓𑁆𑀔𑀺𑀦𑀻.

𑀚𑀻𑀯𑀺𑀢𑀁 𑀤𑁂𑀳𑀺 𑀫𑁂 𑀲𑀸𑀫𑀺, 𑀭𑀚𑁆𑀚𑀁 𑀤𑀚𑁆𑀚𑀸𑀫𑀺 𑀢𑁂 𑀅𑀳𑀁;

𑀓𑀭𑀺𑀲𑁆𑀲𑀫𑀺’𑀢𑁆𑀢𑀺 𑀓𑀺𑀘𑁆𑀘𑀜𑁆𑀘, 𑀓𑀺𑀘𑁆𑀘𑀁 𑀅𑀜𑁆𑀜𑀁 𑀬𑀣𑀺𑀘𑁆𑀙𑀺𑀢𑀁.

𑀅𑀤𑀼𑀩𑁆𑀪𑀸𑀢𑁆𑀣𑀸𑀬 𑀲𑀧𑀣𑀁, 𑀲𑁄 𑀢𑀁 𑀬𑀓𑁆𑀔𑀺𑀁 𑀅𑀓𑀸𑀭𑀬𑀺;

‘‘𑀆𑀦𑁂𑀳𑀺 𑀪𑀘𑁆𑀘𑁂 𑀲𑀻𑀖’’𑀦𑁆𑀢𑀺, 𑀯𑀼𑀢𑁆𑀢𑀫𑀢𑁆𑀢𑀸𑀯 𑀲𑀸’𑀦𑀬𑀺.

‘‘𑀇𑀫𑁂 𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀸𑀲𑀸,

𑀢𑀡𑁆𑀟𑀼𑀮𑀸𑀤𑀺𑀁 𑀯𑀺𑀦𑀺𑀤𑁆𑀤𑀺𑀲𑀺;

𑀪𑀘𑁆𑀘𑀸 ¶ 𑀢𑁂 𑀲𑀸𑀥𑀬𑀺𑀢𑁆𑀯𑀸𑀦, 𑀪𑀢𑁆𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺𑀘;

𑀭𑀸𑀚𑀸 𑀧𑀼𑀢𑁆𑀢𑀁 𑀪𑁄𑀚𑀬𑀺𑀢𑁆𑀯𑀸, 𑀲𑀩𑁆𑀩𑁂𑀘𑀸𑀧𑀺 𑀅𑀪𑀼𑀜𑁆𑀚𑀺𑀲𑀼𑀁.

𑀤𑀸𑀧𑀺𑀢𑀁 𑀯𑀺𑀚𑀬𑁂𑀦’𑀕𑁆𑀕𑀁, 𑀬𑀓𑁆𑀔𑀻 𑀪𑀼𑀜𑁆𑀚𑀺𑀬 𑀧𑀻𑀡𑀺𑀢𑀸;

𑀲𑁄𑀴𑀲𑀯𑀲𑁆𑀲𑀺𑀓𑀁 𑀭𑀽𑀧𑀁, 𑀫𑀸𑀧𑀬𑀺𑀢𑁆𑀯𑀸 𑀫𑀦𑁄𑀳𑀭𑀁.

𑀭𑀸𑀚𑀧𑀼𑀢𑁆𑀢 𑀫𑀼𑀧𑀕𑀜𑁆𑀙𑀺, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸;

𑀫𑀸𑀧𑁂𑀲𑀺 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀲𑀬𑀦𑀜𑁆𑀘 𑀫𑀳𑀸𑀭𑀳𑀁.

𑀲𑀸𑀡𑀺𑀬𑀸 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁, 𑀯𑀺𑀢𑀸𑀦𑀲𑀫𑀮𑀗𑁆𑀓𑀢𑀁;

𑀢𑀁 𑀤𑀺𑀲𑁆𑀯𑀸 𑀭𑀸𑀚𑀢𑀦𑀬𑁄, 𑀧𑁂𑀓𑁆𑀔𑀁 𑀅𑀢𑁆𑀣𑀫𑀦𑀸𑀕𑀢𑀁.

𑀓𑀢𑁆𑀯𑀸𑀦 𑀢𑀸𑀬𑀦𑀸𑀯𑀸𑀬𑀁, 𑀦𑀺𑀧𑀚𑁆𑀚 𑀲𑀬𑀦𑁂 𑀲𑀼𑀔𑀁;

𑀲𑀸𑀡𑀻 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀲𑀩𑁆𑀩𑁂 𑀪𑀘𑁆𑀘𑀸 𑀦𑀺𑀧𑀚𑁆𑀚𑀺𑀲𑀼𑀁.

𑀭𑀢𑁆𑀢𑀺𑀁 𑀢𑀽𑀭𑀺𑀬𑀲𑀤𑁆𑀤𑀜𑁆𑀘, 𑀲𑀼𑀢𑁆𑀯𑀸 𑀕𑀻𑀢𑀭𑀯𑀜𑁆𑀘 𑀲𑁄;

𑀅𑀧𑀼𑀘𑁆𑀙𑀺 𑀲𑀳𑀲𑁂𑀫𑀸𑀦𑀁, 𑀓𑀺𑀁 𑀲𑀤𑁆𑀤𑁄 𑀇𑀢𑀺 𑀬𑀓𑁆𑀔𑀺𑀦𑀺𑀁.

𑀭𑀚𑁆𑀚𑀜𑁆𑀘 𑀲𑀸𑀫𑀺𑀦𑁄 𑀤𑁂𑀬𑁆𑀬𑀁, 𑀲𑀩𑁆𑀩𑁂 𑀬𑀓𑁆𑀔𑁂 𑀘 𑀖𑀸𑀢𑀺𑀬;

𑀫𑀦𑀼𑀲𑁆𑀲𑀸 𑀯𑀸𑀲𑀓𑀭𑀡𑀸, 𑀬𑀓𑁆𑀔𑀸 𑀫𑀁 𑀖𑀸𑀢𑀬𑀦𑁆𑀢𑀺𑀳𑀺.

𑀇𑀢𑀺 𑀘𑀺𑀦𑁆𑀢𑀺𑀬 𑀬𑀓𑁆𑀔𑀻 𑀲𑀸, 𑀅𑀩𑁆𑀭𑀯𑀺 𑀭𑀸𑀚𑀦𑀦𑁆𑀤𑀦𑀁;

𑀲𑀻𑀭𑀻𑀲𑀯𑀢𑁆𑀣𑀼𑀦𑀸 𑀫𑁂𑀢𑀁, 𑀲𑀸𑀫𑀺 𑀬𑀓𑁆𑀔𑀧𑀼𑀭𑀁 𑀇𑀥.

𑀢𑀢𑁆𑀣 𑀚𑁂𑀝𑁆𑀞𑀲𑁆𑀲 𑀬𑀓𑁆𑀔𑀲𑁆𑀲, 𑀮𑀁𑀓𑀸𑀦𑀕𑀭𑀯𑀸𑀲𑀺𑀦𑀻;

𑀓𑀼𑀫𑀸𑀭𑀺𑀓𑀸 𑀇𑀥𑀸’𑀦𑀻𑀢𑀸, 𑀢𑀲𑁆𑀲𑀸 𑀫𑀸𑀢𑀸 𑀘 𑀆𑀕𑀢𑀸.

𑀆𑀯𑀸𑀳 𑀫𑀗𑁆𑀕𑀮𑁂 𑀢𑀢𑁆𑀣, 𑀇𑀥𑀸𑀧𑀺 𑀉𑀲𑁆𑀲𑀯𑁂 𑀫𑀳𑀸;

𑀯𑀢𑁆𑀢𑀢𑁂 𑀢𑀢𑁆𑀣 𑀲𑀤𑁆𑀤𑁄𑀬𑀁, 𑀫𑀳𑀸𑀳𑁂𑀲 𑀲𑀫𑀸𑀕𑀫𑁄.

𑀬𑀢𑁆𑀣 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫, 𑀢𑁂𑀦 𑀲𑀤𑁆𑀤𑁂𑀦 𑀖𑀸𑀢𑀬;

𑀆𑀬𑀼𑀥𑀁 𑀫𑁂’𑀦𑀼𑀪𑀸𑀯𑁂𑀦, 𑀢𑁂𑀲𑀁 𑀓𑀸𑀬𑁂 𑀧𑀢𑀺𑀲𑁆𑀲𑀢𑀺.

𑀢𑀲𑁆𑀲𑀸 𑀲𑀼𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸, 𑀲𑀩𑁆𑀩𑁂 𑀬𑀓𑁆𑀔𑁂 𑀅𑀖𑀸𑀢𑀬𑀺;

𑀲𑀬𑀫𑁆𑀧𑀺 𑀮𑀤𑁆𑀥𑀯𑀺𑀚𑀬𑁄, 𑀬𑀓𑁆𑀔𑀭𑀸𑀚 𑀧𑀲𑀸𑀥𑀦𑀁.

𑀧𑀲𑀸𑀥𑀦𑁂𑀳𑀺 𑀲𑁂𑀲𑁂𑀳𑀺, 𑀢𑀁𑀢𑀁 𑀪𑀘𑁆𑀘𑀁 𑀧𑀲𑀸𑀥𑀬𑀺;

𑀓𑀢𑀺𑀧𑀳𑀁 𑀯𑀲𑀺𑀢𑁆𑀯𑁂’𑀢𑁆𑀣, 𑀢𑀫𑁆𑀩𑀧𑀡𑁆𑀡𑀺𑀫𑀼𑀧𑀸𑀕𑀫𑀺.

𑀫𑀸𑀧𑀬𑀺𑀢𑁆𑀯𑀸 ¶ 𑀢𑀫𑁆𑀧𑀧𑀡𑁆𑀡𑀺-𑀦𑀕𑀭𑀁 𑀯𑀺𑀚𑀬𑁄 𑀢𑀳𑀺𑀁;

𑀯𑀲𑀻 𑀬𑀓𑁆𑀔𑀺𑀦𑀺𑀬𑀸 𑀲𑀤𑁆𑀥𑀺𑀁, 𑀅𑀫𑀘𑁆𑀘 𑀧𑀭𑀺𑀯𑀸𑀭𑀺𑀢𑁄.

𑀦𑀸𑀯𑀸𑀬 𑀪𑀽𑀫𑀺𑀫𑁄𑀢𑀺𑀡𑁆𑀡𑀸, 𑀯𑀺𑀚𑀬𑀧𑀫𑀼𑀔𑀸 𑀢𑀤𑀸;

𑀓𑀺𑀮𑀦𑁆𑀢𑀸 𑀧𑀸𑀡𑀺𑀦𑀸𑀪𑀽𑀫𑀺𑀁, 𑀆𑀮𑀫𑁆𑀩𑀺𑀬 𑀦𑀺𑀲𑀻𑀤𑀺𑀲𑀼𑀁.

𑀢𑀫𑁆𑀩𑀪𑀽𑀫𑀺𑀭𑀚𑁄𑀨𑀼𑀝𑁆𑀞𑁄, 𑀢𑀫𑁆𑀩𑁄𑀧𑀸𑀡𑀺 𑀬𑀢𑁄 𑀅𑀳𑀼𑀁;

𑀲𑁄 𑀤𑁂𑀲𑁄𑀘𑁂𑀯 𑀤𑀻𑀧𑁄 𑀘, 𑀢𑁂𑀦 𑀢𑀦𑁆𑀦𑀸𑀫𑀓𑁄 𑀅𑀳𑀼.

𑀲𑀻𑀳𑀩𑀸𑀳𑀼 𑀦𑀭𑀺𑀦𑁆𑀤𑁄 𑀲𑁄, 𑀲𑀻𑀳𑀫𑀸𑀤𑀺𑀦𑁆𑀦𑀯𑀸 𑀇𑀢𑀺;

𑀲𑀻𑀳𑀴𑁄 𑀢𑁂𑀦 𑀲𑀫𑁆𑀩𑀦𑁆𑀥𑀸, 𑀏𑀢𑁂 𑀲𑀩𑁆𑀩𑁂𑀧𑀺 𑀲𑀻𑀳𑀴𑀸.

𑀢𑀢𑁆𑀣 𑀢𑀢𑁆𑀣 𑀘 𑀕𑀸𑀫𑁂 𑀢𑁂, 𑀢𑀲𑁆𑀲𑀸’𑀫𑀘𑁆𑀘𑀸 𑀦𑀺𑀯𑁂𑀲𑀬𑀼𑀁;

𑀅𑀦𑀼𑀭𑀸𑀥𑀕𑀸𑀫𑀁 𑀢𑀦𑁆𑀦𑀸𑀫𑁄, 𑀓𑀤𑀫𑁆𑀩 𑀦𑀤𑀻𑀬𑀦𑁆𑀢𑀺𑀓𑁂.

𑀕𑀫𑁆𑀪𑀻𑀭𑀦𑀤𑀻𑀬𑀸 𑀢𑀻𑀭𑁂, 𑀉𑀧𑀢𑀺𑀲𑁆𑀲𑁄 𑀧𑀼𑀭𑁄𑀳𑀺𑀢𑁄;

𑀉𑀧𑀢𑀺𑀲𑁆𑀲𑀕𑀸𑀫𑀁 𑀫𑀸𑀧𑁂𑀲𑀺, 𑀅𑀦𑀼𑀭𑀸𑀥𑀲𑁆𑀲 𑀉𑀢𑁆𑀢𑀭𑁂.

𑀅𑀜𑁆𑀜𑁂 𑀢𑀬𑁄 𑀅𑀫𑀘𑁆𑀘𑀸 𑀢𑁂, 𑀫𑀸𑀧𑀬𑀺𑀁𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁;

𑀉𑀚𑁆𑀚𑁂𑀦𑀺𑀁 𑀉𑀭𑀼𑀯𑁂𑀮𑀜𑁆𑀘, 𑀯𑀺𑀚𑀺𑀢𑀁 𑀦𑀕𑀭𑀁 𑀢𑀣𑀸.

𑀦𑀺𑀯𑀸𑀲𑁂𑀢𑁆𑀯𑀸 𑀚𑀦𑀧𑀤𑀁, 𑀲𑀩𑁆𑀩𑁂’𑀫𑀘𑁆𑀘𑀸 𑀲𑀫𑀘𑁆𑀘𑀢𑀁;

𑀅𑀯𑁄𑀘𑀼𑀁 𑀭𑀸𑀚𑀢𑀦𑀬𑀸, 𑀲𑀸𑀫𑀺 𑀭𑀚𑁆𑀚𑁂𑀪𑀺𑀲𑁂𑀘𑀬.

𑀇𑀢𑀺 𑀯𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄, 𑀦 𑀇𑀘𑁆𑀙𑀺 𑀅𑀪𑀺𑀲𑁂𑀘𑀦𑀁;

𑀯𑀺𑀦𑀸 𑀔𑀢𑁆𑀢𑀺𑀬𑀓𑀜𑁆𑀜𑀸𑀬, 𑀅𑀪𑀺𑀲𑁂𑀓𑀁 𑀫𑀳𑁂𑀲𑀺𑀬𑀸.

𑀅𑀣𑀸𑀫𑀘𑁆𑀘𑀸 𑀲𑀸𑀫𑀺𑀦𑁄 𑀳𑁂, 𑀅𑀪𑀺𑀲𑁂𑀓 𑀓𑀢𑀸 𑀤𑀭𑀸;

𑀤𑀼𑀓𑁆𑀓𑀭𑁂𑀲𑀼𑀧𑀺 𑀓𑀺𑀘𑁆𑀘𑁂𑀲𑀼, 𑀢𑀤𑀢𑁆𑀣𑀪𑀺𑀭𑀼𑀢𑀸 𑀢𑀺𑀕𑀸.

𑀧𑀡𑁆𑀡𑀸𑀓𑀸𑀭𑁂 𑀫𑀳𑀸𑀲𑀸𑀭𑁂, 𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑁂 𑀩𑀳𑀽;

𑀕𑀸𑀳𑀸𑀧𑀬𑀺𑀢𑁆𑀯𑀸 𑀧𑀸𑀳𑁂𑀲𑀼𑀁, 𑀤𑀓𑁆𑀔𑀺𑀡𑀁 𑀫𑀥𑀼𑀭𑀁 𑀧𑀼𑀭𑀁.

𑀧𑀡𑁆𑀟𑀼𑀭𑀸𑀚𑀲𑁆𑀲 𑀥𑀻𑀢𑀢𑁆𑀣𑀁, 𑀲𑀸𑀫𑀺𑀦𑁄 𑀲𑀸𑀫𑀺𑀪𑀢𑁆𑀢𑀺𑀦𑁄;

𑀅𑀜𑁆𑀜𑁂𑀲𑀁 𑀘𑀸𑀧𑀺 𑀥𑀻𑀢𑀢𑁆𑀣𑀁, 𑀅𑀫𑀘𑁆𑀘𑀸𑀦𑀁 𑀚𑀦𑀲𑁆𑀲 𑀘.

𑀲𑀻𑀖𑀁 𑀦𑀸𑀯𑀸𑀬 𑀕𑀦𑁆𑀢𑁆𑀯𑀸𑀦, 𑀤𑀽𑀢𑀸 𑀢𑁂 𑀫𑀥𑀼𑀭𑀁 𑀧𑀼𑀭𑀁;

𑀧𑀡𑁆𑀡𑀸𑀓𑀸𑀭𑁂 𑀘 𑀮𑁂𑀔𑀜𑁆𑀘, 𑀢𑀲𑁆𑀲 𑀭𑀜𑁆𑀜𑁄 𑀅𑀤𑀲𑁆𑀲𑀬𑀼𑀁.

𑀢𑀢𑁄 𑀭𑀸𑀚𑀸𑀅𑀫𑀘𑁆𑀘𑁂𑀳𑀺, 𑀫𑀦𑁆𑀢𑀬𑀺𑀢𑁆𑀯𑀸 𑀲𑀥𑀻𑀢𑀭𑀁;

𑀧𑀸𑀳𑁂𑀢𑀼𑀓𑀸𑀫𑁄’𑀫𑀘𑁆𑀘𑀸𑀦𑀁, 𑀅𑀜𑁆𑀜𑁂𑀲𑀁 𑀘𑀸𑀧𑀺 𑀥𑀻𑀢𑀭𑁄.

𑀮𑀤𑁆𑀥𑀸 𑀊𑀦𑀲𑀢𑀁 𑀓𑀜𑁆𑀜𑀸, 𑀅𑀣𑀪𑁂𑀭𑀺𑀁 𑀘𑀭𑀸𑀧𑀬𑀺;

𑀮𑀁𑀓𑀸𑀬 𑀥𑀻𑀢𑀼𑀕𑀫𑀦𑀁, 𑀇𑀘𑁆𑀙𑀫𑀸𑀦𑀸 𑀦𑀭𑀸 𑀇𑀥.

𑀦𑀺𑀯𑀸𑀲𑀬𑀺𑀢𑁆𑀯𑀸 ¶ 𑀤𑀺𑀕𑀼𑀡𑀁, 𑀖𑀭𑀤𑁆𑀯𑀸𑀭𑁂𑀲𑀼 𑀥𑀻𑀢𑀭𑁄;

𑀞𑀧𑁂𑀦𑁆𑀢𑀼 𑀢𑁂𑀦 𑀮𑀺𑀗𑁆𑀕𑁂𑀦, 𑀆𑀤𑀻𑀬𑀺𑀲𑁆𑀲𑀸𑀫𑀺𑀢𑀸 𑀇𑀢𑀺.

𑀏𑀯𑀁 𑀮𑀤𑁆𑀥𑀸 𑀩𑀳𑀽𑀓𑀜𑁆𑀜𑀸, 𑀢𑀧𑁆𑀧𑀬𑀺𑀢𑁆𑀯𑀸𑀦 𑀢𑀁 𑀓𑀼𑀮𑀁;

𑀲𑀫𑁆𑀧𑀦𑁆𑀦𑀲𑀩𑁆𑀩𑀸𑀮𑀗𑁆𑀓𑀸𑀭𑀁, 𑀥𑀻𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀤𑀁.

𑀲𑀩𑁆𑀩𑀸 𑀢𑀸 𑀮𑀤𑁆𑀥𑀲𑀓𑁆𑀓𑀸𑀭𑀸, 𑀓𑀜𑁆𑀜𑀸𑀬𑁄 𑀘 𑀬𑀣𑀸𑀭𑀳𑀁;

𑀭𑀸𑀚𑀸𑀭𑀳𑁂 𑀘 𑀳𑀢𑁆𑀣𑀲𑁆𑀲-𑀭𑀣𑀧𑁂𑀲𑁆𑀲𑀺𑀬 𑀓𑀸𑀭𑀓𑁂.

𑀅𑀝𑁆𑀞𑀸𑀭𑀲𑀦𑁆𑀦𑀁 𑀲𑁂𑀡𑀻𑀦𑀁, 𑀲𑀳𑀲𑁆𑀲𑀜𑁆𑀘 𑀓𑀼𑀮𑀸𑀦𑀺 𑀲𑁄;

𑀮𑁂𑀔𑀁 𑀤𑀢𑁆𑀯𑀸𑀦 𑀧𑁂𑀲𑁂𑀲𑀺, 𑀯𑀺𑀚𑀬𑀲𑁆𑀲 𑀚𑀺𑀢𑀸’𑀭𑀺𑀦𑁄.

𑀲𑀩𑁆𑀩𑁄𑀲𑁄’𑀢𑀭𑀻 𑀦𑀸𑀯𑀸𑀳𑀺, 𑀫𑀳𑀸𑀢𑀺𑀢𑁆𑀣𑁂 𑀫𑀳𑀸𑀚𑀦𑁄;

𑀢𑁂𑀦𑁂𑀯 𑀧𑀝𑁆𑀝𑀦𑀁 𑀢𑀜𑁆𑀳𑀺, 𑀫𑀳𑀸𑀢𑀺𑀢𑁆𑀣𑀁𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀚𑀬𑀲𑁆𑀲 𑀲𑀼𑀢𑁄𑀥𑀻𑀢𑀸, 𑀢𑀲𑁆𑀲𑀸 𑀬𑀓𑁆𑀔𑀺𑀦𑀺𑀬𑀸 𑀅𑀳𑀼;

𑀭𑀸𑀚𑀓𑀜𑁆𑀜𑀸𑀕𑀫𑀁 𑀲𑀼𑀢𑁆𑀯𑀸, 𑀯𑀺𑀚𑀬𑁄 𑀆𑀳 𑀬𑀓𑁆𑀔𑀺𑀦𑀺𑀁.

‘‘𑀕𑀘𑁆𑀙 𑀤𑀸𑀦𑀺 𑀢𑀼𑀯𑀁 𑀪𑁄𑀢𑀺, 𑀞𑀧𑁂𑀢𑁆𑀯𑀸 𑀧𑀼𑀢𑁆𑀢𑀓𑁂 𑀤𑀼𑀯𑁂;

𑀫𑀦𑀼𑀲𑁆𑀲𑀸 𑀅𑀫𑀦𑀼𑀲𑁆𑀲𑁂𑀳𑀺, 𑀪𑀸𑀬𑀺𑀦𑁆𑀢𑀻𑀳𑀺 𑀲𑀤𑀸’’ 𑀇𑀢𑀺.

𑀲𑀼𑀢𑁆𑀯𑀸 𑀢𑀁 𑀬𑀓𑁆𑀔𑀪𑀬𑀢𑁄, 𑀪𑀻𑀢𑀁 𑀢𑀁 𑀆𑀳 𑀬𑀓𑁆𑀔𑀺𑀦𑀺𑀁;

𑀫𑀸 𑀘𑀺𑀦𑁆𑀢𑀬𑀺 𑀲𑀸𑀳𑀲𑁆𑀲𑁂𑀦, 𑀤𑀸𑀧𑀬𑀺𑀲𑁆𑀲𑀸𑀫𑀺 𑀢𑁂 𑀩𑀮𑀺𑀁.

𑀧𑀼𑀦𑀧𑁆𑀧𑀼𑀦𑀁 𑀢𑀁 𑀬𑀸𑀘𑀺𑀢𑁆𑀯𑀸, 𑀉𑀪𑁄 𑀆𑀤𑀸𑀬 𑀧𑀼𑀢𑁆𑀢𑀓𑁂;

𑀪𑀻𑀢𑀸𑀧𑀺 𑀲𑀸 𑀅𑀕𑀢𑀺𑀬𑀸, 𑀮𑀁𑀓𑀸𑀧𑀼𑀭𑀫𑀼𑀧𑀸𑀕𑀫𑀺.

𑀧𑀼𑀢𑁆𑀢𑁂 𑀩𑀺𑀳𑀺 𑀦𑀺𑀲𑀻𑀤𑁂𑀢𑁆𑀯𑀸, 𑀲𑀬𑀁 𑀧𑀸𑀯𑀺𑀲𑀺 𑀢𑀁 𑀧𑀼𑀭𑀁;

𑀲𑀜𑁆𑀚𑀸𑀦𑀺𑀢𑁆𑀯𑀸𑀦 𑀢𑀁 𑀬𑀓𑁆𑀔𑀺𑀁, 𑀪𑀻𑀢𑀸 𑀘𑁄𑀭𑀻𑀢𑀺 𑀲𑀜𑁆𑀜𑀺𑀢𑁄.

𑀲𑀁𑀔𑀼𑀪𑀺𑀁𑀲𑀼 𑀧𑀼𑀭𑁂 𑀬𑀓𑁆𑀔𑀸, 𑀏𑀓𑁄 𑀲𑀸𑀳𑀲𑀺𑀓𑁄 𑀧𑀦;

𑀏𑀓𑀧𑀸𑀡𑀺𑀧𑁆𑀧𑀳𑀸𑀭𑁂𑀦, 𑀯𑀺𑀮𑀬𑀁 𑀦𑀬𑀺 𑀬𑀓𑁆𑀔𑀺𑀦𑀺𑀁.

𑀢𑀲𑁆𑀲𑀸𑀢𑀼 𑀫𑀸𑀢𑀼𑀮𑁄 𑀬𑀓𑁆𑀔𑁄, 𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀩𑀳𑀺;

𑀤𑀺𑀲𑁆𑀯𑀸 𑀢𑁂 𑀤𑀸𑀭𑀓𑁂 𑀧𑀼𑀘𑁆𑀙𑀺, 𑀢𑀼𑀫𑁆𑀳𑁂 𑀓𑀲𑁆𑀲 𑀲𑀼𑀢𑀸 𑀇𑀢𑀺.

𑀓𑀼𑀯𑁂𑀡𑀺𑀬𑀸’𑀢𑀺 𑀲𑀼𑀢𑁆𑀯𑀸’𑀳, 𑀫𑀸𑀢𑀸 𑀯𑁄 𑀫𑀸𑀭𑀺𑀢𑀸 𑀇𑀥;

𑀢𑀼𑀫𑁆𑀳𑁂𑀧𑀺 𑀤𑀺𑀲𑁆𑀯𑀸 𑀫𑀸𑀭𑁂𑀬𑁆𑀬𑀼𑀁, 𑀧𑀮𑀸𑀬𑀣 𑀮𑀳𑀼𑀁 𑀇𑀢𑀺.

𑀆𑀕𑀼𑀁 𑀲𑀼𑀫𑀦𑀓𑀽𑀝𑀁 𑀢𑁂, 𑀧𑀮𑀸𑀬𑀺𑀢𑁆𑀯𑀸 𑀢𑀢𑁄 𑀮𑀳𑀼𑀁;

𑀯𑀸𑀲𑀁 𑀓𑀧𑁆𑀧𑁂𑀲𑀺 𑀚𑁂𑀝𑁆𑀞𑁄 𑀲𑁄, 𑀯𑀼𑀤𑁆𑀥𑁄 𑀢𑀸𑀬 𑀓𑀡𑀺𑀝𑁆𑀞𑀺𑀬𑀸.

𑀧𑀼𑀢𑁆𑀢𑀥𑀻𑀢𑀸𑀳𑀺 ¶ 𑀯𑀟𑁆𑀠𑀺𑀢𑁆𑀯𑀸, 𑀭𑀸𑀚𑀸𑀦𑀼𑀜𑁆𑀜𑀸𑀬 𑀢𑁂 𑀯𑀲𑀼𑀁;

𑀢𑀢𑁆𑀣𑁂𑀯 𑀫𑀮𑀬𑁂 𑀏𑀲𑁄, 𑀧𑀼𑀮𑀺𑀦𑁆𑀤𑀸𑀦𑀜𑁆𑀳𑀺 𑀲𑀫𑁆𑀪𑀯𑁄.

𑀧𑀡𑁆𑀟𑀼𑀭𑀸𑀚𑀲𑁆𑀲 𑀤𑀽𑀢𑀸 𑀢𑁂, 𑀧𑀡𑁆𑀡𑀸𑀓𑀸𑀭𑀁 𑀲𑀫𑀧𑁆𑀧𑀬𑀼𑀁;

𑀯𑀺𑀚𑀬𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀭𑀸𑀚𑀸𑀥𑀺𑀓𑀸𑀭𑀺𑀓𑀸 𑀘 𑀢𑀸.

𑀓𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁, 𑀤𑀽𑀢𑀸𑀦𑀁 𑀯𑀺𑀚𑀬𑁄 𑀧𑀦;

𑀅𑀤𑀸 𑀬𑀸𑀣𑀸𑀭𑀳𑀁 𑀓𑀜𑁆𑀜𑀸, 𑀅𑀫𑀘𑁆𑀘𑀸𑀦𑀁 𑀚𑀦𑀲𑁆𑀲 𑀘.

𑀬𑀣𑀸 𑀯𑀺𑀥𑀺 𑀘 𑀯𑀺𑀚𑀬𑀁, 𑀲𑀩𑁆𑀩𑁂 𑀫𑀘𑁆𑀘𑀸𑀲𑀫𑀸𑀕𑀢𑀸;

𑀭𑀚𑁆𑀚𑁂𑀲𑀫𑀪𑀺𑀲𑀺𑀜𑁆𑀘𑀺𑀁𑀲𑀼, 𑀓𑀭𑀺𑀁𑀲𑀼𑀘 𑀫𑀳𑀸𑀙𑀡𑀁.

𑀢𑀢𑁄 𑀲𑁄 𑀯𑀺𑀚𑀬𑁄 𑀭𑀸𑀚𑀸, 𑀧𑀡𑁆𑀟𑀼𑀭𑀸𑀚𑀲𑁆𑀲 𑀥𑀻𑀢𑀭𑀁;

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀫𑀳𑁂𑀲𑀺𑀢𑁆𑀢𑁂’𑀪𑀺𑀲𑁂𑀘𑀬𑀺.

𑀥𑀦𑀸𑀦’𑀤𑀸 𑀅𑀫𑀘𑁆𑀘𑀸𑀦𑀁, 𑀅𑀤𑀸𑀲𑀺 𑀲𑀲𑀼𑀭𑀲𑁆𑀲𑀢𑀼;

𑀅𑀦𑀼𑀯𑀲𑁆𑀲𑀁 𑀲𑀗𑁆𑀔𑀫𑀼𑀢𑁆𑀢𑀁, 𑀲𑀢𑀲𑀳𑀲𑁆𑀲 𑀤𑁆𑀯𑀬𑀸𑀭𑀳𑀁.

𑀳𑀺𑀢𑁆𑀯𑀸 𑀧𑀼𑀩𑁆𑀩𑀸𑀘𑀭𑀺𑀢𑀁 𑀯𑀺𑀲𑀫𑀁 𑀲𑀫𑁂𑀦;

𑀥𑀫𑁆𑀫𑁂𑀦 𑀮𑀁𑀓𑀫𑀔𑀺𑀮𑀁 𑀅𑀦𑀼𑀲𑀸𑀲𑀫𑀸𑀦𑁄;

𑀲𑁄 𑀢𑀫𑀧𑀡𑁆𑀡𑀺𑀦𑀕𑀭𑁂 𑀯𑀺𑀚𑀬𑁄 𑀦𑀭𑀺𑀦𑁆𑀤𑁄;

𑀭𑀚𑁆𑀚𑀁 𑀅𑀓𑀸𑀭𑀬𑀺 𑀲𑀫𑀸 𑀔𑀮𑀼 𑀅𑀝𑁆𑀞𑀢𑀺𑀁𑀲𑀸’𑀢𑀺.

𑀲𑀼𑀚𑀦𑀧𑀲𑀸𑀤𑀲𑀁𑀯𑁂 𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀯𑀺𑀚𑀬𑁄 ¶ 𑀲𑁄 𑀫𑀳𑀸𑀭𑀸𑀚𑀸, 𑀯𑀲𑁆𑀲𑁂 𑀅𑀦𑁆𑀢𑀺𑀫𑀓𑁂 𑀞𑀺𑀢𑁄;

𑀇𑀢𑀺 𑀘𑀺𑀦𑁆𑀢𑀬𑀺 ‘‘𑀯𑀼𑀤𑁆𑀥𑁄’𑀳𑀁, 𑀦 𑀘 𑀯𑀺𑀚𑁆𑀚𑀢𑀺 𑀫𑁂 𑀲𑀼𑀢𑁄.

𑀓𑀺𑀘𑁆𑀙𑁂𑀦 𑀯𑀸𑀲𑀺𑀢𑀁 𑀭𑀝𑁆𑀞𑀁, 𑀦𑀲𑁆𑀲𑁂𑀬𑁆𑀬 𑀫𑀫 𑀅𑀘𑁆𑀘𑀬𑁂;

𑀆𑀡𑀸𑀧𑁂𑀬𑁆𑀬𑀁 𑀭𑀚𑁆𑀚𑀳𑁂𑀢𑀼-𑀲𑀼𑀫𑀺𑀢𑁆𑀢𑀁 𑀪𑀸𑀢𑀭𑀁 𑀫𑀫.

𑀅𑀣𑀸’𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀢𑁆𑀯𑀸, 𑀮𑁂𑀔𑀁 𑀢𑀢𑁆𑀣 𑀯𑀺𑀲𑀚𑁆𑀚𑀬𑀺;

𑀮𑁂𑀔𑀁 𑀤𑀢𑁆𑀯𑀸𑀦 𑀯𑀺𑀚𑀬𑁄, 𑀦 𑀘𑀺𑀭𑁂𑀦 𑀤𑀺𑀯𑀗𑁆𑀕𑀢𑁄.

𑀢𑀲𑁆𑀫𑀺𑀁 𑀫𑀢𑁂 𑀅𑀫𑀘𑁆𑀘𑀸 𑀢𑁂, 𑀧𑁂𑀓𑁆𑀔𑀦𑁆𑀢𑀸 𑀔𑀢𑁆𑀢𑀺𑀬𑀸𑀕𑀫𑀁;

𑀉𑀧𑀢𑀺𑀲𑁆𑀲𑀕𑀸𑀫𑁂 𑀞𑀢𑁆𑀯𑀸𑀦, 𑀭𑀝𑁆𑀞𑀁 𑀲𑀫𑀼𑀦𑀼𑀲𑀸𑀲𑀺𑀲𑀼𑀁.

𑀫𑀢𑁂 𑀯𑀺𑀚𑀬𑀭𑀸𑀚𑀫𑁆𑀳𑀺, 𑀔𑀢𑁆𑀢𑀺𑀬𑀸𑀕𑀫𑀦𑀸 𑀧𑀼𑀭𑀸;

𑀏𑀓𑀁 𑀯𑀲𑁆𑀲𑀁 𑀅𑀬𑀁 𑀮𑀁𑀓𑀸-𑀤𑀻𑀧𑁄 𑀆𑀲𑀺 𑀅𑀭𑀸𑀚𑀓𑁄.

𑀢𑀲𑁆𑀫𑀺𑀁 𑀲𑀻𑀳𑀧𑀼𑀭𑁂 𑀢𑀲𑁆𑀲, 𑀲𑀻𑀳𑀩𑀸𑀳𑀼𑀲𑁆𑀲 𑀭𑀸𑀚𑀺𑀦𑁄;

𑀅𑀘𑁆𑀘𑀬𑁂𑀦 𑀲𑀼𑀫𑀺𑀢𑁆𑀢𑁄 𑀲𑁄, 𑀭𑀸𑀚𑀸 𑀢𑀲𑁆𑀲 𑀲𑀼𑀢𑁄 𑀅𑀳𑀼.

𑀢𑀲𑁆𑀲 𑀧𑀼𑀢𑁆𑀢𑀸 𑀢𑀬𑁄 𑀆𑀲𑀼𑀁, 𑀫𑀤𑁆𑀤𑀭𑀸𑀚𑀲𑁆𑀲 𑀥𑀻𑀢𑀼𑀬𑀸;

𑀤𑀽𑀢𑀸 𑀲𑀻𑀳𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀮𑁂𑀔𑀁 𑀅𑀤𑀁𑀲𑀼 𑀢𑁂.

𑀮𑁂𑀔𑀁 𑀲𑀼𑀢𑁆𑀯𑀸𑀦 𑀲𑁄 𑀭𑀸𑀚𑀸, 𑀧𑀼𑀢𑁆𑀢𑁂 𑀆𑀫𑀦𑁆𑀢𑀬𑀻 𑀢𑀬𑁄;

𑀅𑀳𑀁 𑀫𑀳𑀮𑁆𑀮𑀓𑁄 𑀢𑀸𑀢𑀸, 𑀏𑀓𑁄 𑀢𑀼𑀫𑁆𑀳𑁂𑀲𑀼 𑀕𑀘𑁆𑀙𑀢𑀼.

𑀮𑀁𑀓𑀁 𑀦𑁂𑀓𑀕𑀼𑀡𑀁 𑀓𑀦𑁆𑀢𑀁, 𑀫𑀫 𑀪𑀸𑀢𑀼𑀲𑁆𑀲 𑀲𑀦𑁆𑀢𑀓𑀁;

𑀢𑀲𑁆𑀲’𑀘𑁆𑀘 𑀬𑁂𑀦 𑀢𑀢𑁆𑀣𑁂𑀯, 𑀭𑀚𑁆𑀚𑀁 𑀓𑀸𑀭𑁂𑀢𑀼 𑀲𑁄𑀪𑀦𑀁.

𑀓𑀡𑀺𑀝𑁆𑀞𑀓𑁄 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀭𑀸𑀚𑀓𑀼𑀫𑀸𑀭𑀓𑁄;

‘‘𑀕𑀫𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀜𑀢𑁆𑀯𑀸 𑀲𑁄𑀢𑁆𑀣𑀺 𑀕𑀢𑀫𑁆𑀧𑀺 𑀘.

𑀧𑀺𑀢𑀭𑀸 𑀲𑀫𑀦𑀼𑀜𑁆𑀜𑀸𑀢𑁄, 𑀤𑁆𑀯𑀢𑁆𑀢𑀺𑀁𑀲𑀸𑀫𑀘𑁆𑀘 𑀤𑀸𑀭𑀓𑁂;

𑀆𑀤𑀸𑀬 𑀆𑀭𑀼𑀳𑀻 𑀦𑀸𑀯𑀁, 𑀧𑀭𑀺𑀩𑁆𑀩𑀸𑀚𑀓𑀮𑀺𑀗𑁆𑀕𑀯𑀸.

𑀫𑀳𑀸𑀓𑀦𑁆𑀤𑀭𑀦𑀚𑁆𑀚𑀸 𑀢𑁂, 𑀫𑀼𑀔𑀤𑁆𑀯𑀸𑀭𑀫𑁆𑀳𑀺 𑀑𑀢𑀭𑀁;

𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀤𑀺𑀲𑁆𑀯𑀸, 𑀚𑀦𑁄 𑀲𑀓𑁆𑀓𑀭𑀺 𑀲𑀸𑀥𑀼𑀓𑀁.

𑀧𑀼𑀘𑁆𑀙𑀺𑀢𑁆𑀯𑀸 ¶ 𑀦𑀕𑀭𑀁 𑀏𑀢𑁆𑀣, 𑀉𑀧𑀬𑀦𑁆𑀢𑀁 𑀓𑀫𑁂𑀦 𑀢𑁂;

𑀉𑀧𑀢𑀺𑀲𑁆𑀲 𑀕𑀸𑀫𑀁 𑀲𑀫𑁆𑀧𑀢𑁆𑀢𑀸, 𑀤𑁂𑀯𑀢𑀸 𑀧𑀭𑀺𑀧𑀸𑀮𑀺𑀢𑀸.

𑀅𑀫𑀘𑁆𑀘𑀸’𑀦𑀼𑀫𑀢𑁄’𑀫𑀘𑁆𑀘𑁄, 𑀧𑀼𑀘𑁆𑀙𑀺 𑀦𑁂𑀫𑀺𑀢𑁆𑀢𑀓𑀸 𑀢𑀳𑀺𑀁;

𑀔𑀢𑁆𑀢𑀺𑀬𑀸’𑀕𑀫𑀦𑀁 𑀢𑀲𑁆𑀲, 𑀲𑁄 𑀩𑁆𑀬𑀸𑀓𑀸𑀲𑀺 𑀧𑀭𑀁𑀧𑀺 𑀘.

𑀲𑀢𑁆𑀢𑀫𑁂 𑀤𑀻𑀯𑀲𑁂𑀬𑁂𑀯, 𑀆𑀕𑀫𑀺𑀲𑁆𑀲𑀢𑀺 𑀔𑀢𑁆𑀢𑀺𑀬𑁄;

𑀩𑀼𑀤𑁆𑀥𑀲𑀸𑀲𑀦 𑀫𑁂𑀢𑀲𑁆𑀲, 𑀯𑀁𑀲𑀚𑁄’𑀯 𑀞𑀧𑁂𑀲𑁆𑀲𑀢𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂𑀬𑁂𑀯, 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀢𑀳𑀺𑀁;

𑀧𑀢𑁆𑀢𑁂 𑀤𑀺𑀲𑁆𑀯𑀸𑀦 𑀧𑀼𑀘𑁆𑀙𑀺𑀢𑁆𑀯𑀸, 𑀅𑀫𑀘𑁆𑀘𑀸 𑀢𑁂 𑀯𑀺𑀚𑀸𑀦𑀺𑀬.

𑀢𑀁 𑀧𑀡𑁆𑀡𑀼𑀯𑀸𑀲𑀼𑀤𑁂𑀯𑀁 𑀢𑁂, 𑀮𑀁𑀓𑀸𑀭𑀚𑁆𑀚𑁂𑀦 𑀅𑀧𑁆𑀧𑀬𑀼𑀁;

𑀫𑀳𑁂𑀲𑀺𑀬𑀸 𑀅𑀪𑀸𑀯𑀸𑀲𑁄, 𑀦 𑀢𑀸𑀯 𑀅𑀪𑀺𑀲𑁂𑀘𑀬𑀺.

𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲, 𑀧𑀡𑁆𑀟𑀼𑀲𑀓𑁆𑀓𑁄 𑀲𑀼𑀢𑁄 𑀅𑀳𑀼;

𑀜𑀢𑁆𑀯𑀸 𑀯𑀺𑀦𑀸𑀲𑀁 𑀲𑀓𑁆𑀬𑀸𑀦𑀁, 𑀲𑁄 𑀆𑀤𑀸𑀬 𑀲𑀓𑀁 𑀚𑀦𑀁.

𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀧𑀤𑁂𑀲𑁂𑀦, 𑀕𑀗𑁆𑀕𑀸𑀧𑀸𑀭𑀁 𑀢𑀳𑀺𑀁 𑀧𑀼𑀭𑀁;

𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀓𑀸𑀭𑁂𑀲𑀺, 𑀭𑀚𑁆𑀚𑀁 𑀢𑀲𑁆𑀲 𑀲𑀼𑀢𑁂 𑀮𑀪𑀺.

𑀥𑀻𑀢𑀸 𑀓𑀡𑀺𑀝𑁆𑀞𑀺𑀢𑀸 𑀆𑀲𑀺, 𑀪𑀤𑁆𑀤𑀓𑀘𑁆𑀘𑀸𑀦 𑀦𑀸𑀫𑀺𑀓𑀸;

𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸, 𑀲𑀼𑀭𑀽𑀧𑀸 𑀅𑀪𑀺𑀧𑀢𑁆𑀣𑀺𑀢𑀸.

𑀢𑀤𑀢𑁆𑀣𑀁 𑀲𑀢𑁆𑀢𑀭𑀸𑀚𑀸𑀦𑁄, 𑀧𑀡𑁆𑀡𑀸𑀓𑀸𑀭𑁂 𑀫𑀳𑀸𑀭𑀳𑁂;

𑀧𑁂𑀲𑁂𑀲𑀼𑀁 𑀭𑀸𑀚𑀺𑀦𑁄 𑀢𑀲𑁆𑀲, 𑀪𑀻𑀢𑁄 𑀭𑀸𑀚𑀽𑀳𑀺 𑀲𑁄 𑀧𑀦.

𑀜𑀢𑁆𑀯𑀸𑀦 𑀲𑁄𑀢𑁆𑀣𑀺𑀕𑀫𑀦𑀁, 𑀅𑀪𑀺𑀲𑁂𑀓𑀨𑀮𑀫𑁆𑀧𑀺 𑀘;

𑀲𑀳𑀤𑁆𑀯𑀢𑁆𑀢𑀺𑀁𑀲 𑀇𑀢𑁆𑀣𑀻𑀳𑀺, 𑀦𑀸𑀯𑀁 𑀆𑀭𑁄𑀧𑀺𑀬𑀸’𑀲𑀼𑀢𑀁.

𑀕𑀗𑁆𑀕𑀸𑀬 𑀔𑀺𑀧𑀺 𑀕𑀡𑁆𑀳𑀸𑀢𑀼, 𑀧𑀳𑀼 𑀫𑁂 𑀥𑀻𑀢𑀭𑀁 𑀇𑀢𑀺;

𑀕𑀳𑁂𑀢𑀼𑀁 𑀢𑁂 𑀦 𑀲𑀓𑁆𑀔𑀺𑀁𑀲𑀼, 𑀦𑀸𑀯𑀸𑀲𑀸𑀧𑀦 𑀲𑀻𑀖𑀕𑀸.

𑀤𑀼𑀢𑀺𑀬𑁂 𑀤𑀺𑀯𑀲𑁂𑀬𑁂𑀯, 𑀕𑁄𑀡𑀸𑀕𑀸𑀫𑀓 𑀧𑀝𑁆𑀝𑀦𑀁;

𑀧𑀢𑁆𑀢𑀸𑀧𑀩𑁆𑀩𑀚𑀺𑀢𑀸 𑀓𑀸𑀭𑀸, 𑀲𑀩𑁆𑀩𑀸 𑀢𑀸 𑀢𑀢𑁆𑀣 𑀑𑀢𑀭𑀼𑀁.

𑀧𑀼𑀘𑁆𑀙𑀺𑀢𑁆𑀯𑀸 𑀦𑀕𑀭𑀁 𑀏𑀢𑁆𑀣, 𑀢𑀸 𑀓𑀫𑁂𑀦𑁄𑀧𑀬𑀦𑁆𑀢𑀺𑀬𑁄;

𑀉𑀧𑀢𑀺𑀲𑁆𑀲𑀕𑀸𑀫𑀁 𑀲𑀫𑁆𑀧𑀢𑁆𑀢𑀸, 𑀤𑁂𑀯𑀢𑀸 𑀧𑀭𑀺𑀧𑀸𑀮𑀺𑀢𑀸.

𑀦𑁂𑀫𑀺𑀢𑁆𑀢𑀓𑀲𑁆𑀲 𑀯𑀘𑀦𑀁, 𑀲𑀼𑀢𑁆𑀯𑀸 𑀢𑀢𑁆𑀣𑀸’𑀕𑀢𑀸 𑀢𑀼 𑀢𑀸;

𑀤𑀺𑀲𑁆𑀯𑀸 𑀅𑀫𑀘𑁆𑀘𑁄 𑀧𑀼𑀘𑁆𑀙𑀺𑀢𑁆𑀯𑀸, 𑀜𑀢𑁆𑀯𑀸 𑀭𑀜𑁆𑀜𑁄 𑀲𑀫𑀧𑁆𑀧𑀬𑀺.

𑀢𑀁 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀁 𑀢𑁂, 𑀅𑀫𑀘𑁆𑀘𑀸 𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑁄;

𑀭𑀚𑁆𑀚𑁂 𑀲𑀫𑀪𑀺𑀲𑀺𑀜𑁆𑀘𑀺𑀁𑀲𑀼, 𑀧𑀼𑀡𑁆𑀡𑀲𑀩𑁆𑀩𑀫𑀦𑁄𑀭𑀣𑀁.

𑀲𑀼𑀪𑀤𑁆𑀤𑀓𑀘𑁆𑀘𑀸𑀦 ¶ 𑀫𑀦𑁄𑀫𑀭𑀽𑀧𑀺𑀦𑀺𑀁;

𑀫𑀳𑁂𑀲𑀻𑀪𑀸𑀯𑁂 𑀅𑀪𑀺𑀲𑀺𑀜𑁆𑀘𑀺𑀬’𑀢𑁆𑀢𑀦𑁄;

𑀲𑀳𑀕𑀢𑀸 𑀢𑀸𑀬 𑀧𑀤𑀸𑀲𑀺 𑀅𑀢𑁆𑀢𑀦𑀸;

𑀲𑀳𑀸𑀕𑀢𑀸𑀦𑀁 𑀯𑀲𑀺 𑀪𑀽𑀫𑀺𑀧𑁄 𑀲𑀼𑀔𑀦𑁆𑀢𑀻.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀸𑀪𑀺𑀲𑁂𑀓𑁄 𑀦𑀸𑀫

𑀫𑀳𑁂𑀲𑀻 𑀚𑀦𑀬𑀻 𑀧𑀼𑀢𑁆𑀢𑁂, 𑀤𑀲 𑀏𑀓𑀜𑁆𑀘 𑀥𑀻𑀢𑀭𑀁;

𑀲𑀩𑁆𑀩𑀚𑁂𑀝𑁆𑀞𑁄’𑀪𑀬𑁄 𑀦𑀸𑀫, 𑀘𑀺𑀢𑁆𑀢𑀸𑀦𑀸𑀫 𑀓𑀦𑀺𑀝𑁆𑀞𑀺𑀓𑀸.

𑀧𑀲𑁆𑀲𑀺𑀢𑁆𑀯𑀸 𑀢𑀁 𑀯𑀺𑀬𑀸𑀓𑀁𑀲𑀼, 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑀧𑀸𑀭𑀕𑀸;

‘‘𑀭𑀚𑁆𑀚𑀳𑁂𑀢𑀼 𑀲𑀼𑀢𑁄 𑀅𑀲𑁆𑀲𑀸, 𑀖𑀸𑀢𑀬𑀺𑀲𑁆𑀲𑀢𑀺 𑀫𑀸𑀢𑀼𑀮𑁂’’.

𑀖𑀸𑀢𑁂𑀲𑁆𑀲𑀸𑀫𑀺 𑀓𑀦𑀺𑀝𑁆𑀞𑀺𑀦𑁆𑀢𑀺, 𑀦𑀺𑀘𑁆𑀙𑀺𑀢𑁂 𑀪𑀸𑀢𑀭𑀸’𑀪𑀬𑁄;

𑀯𑀸𑀭𑁂𑀲𑀺 𑀓𑀸𑀮𑁂 𑀯𑀸𑀲𑁂𑀲𑀼𑀁, 𑀕𑁂𑀳𑀁 𑀢𑀁 𑀏𑀓𑀣𑀼𑀡𑀺𑀓𑁂.

𑀭𑀜𑁆𑀜𑁄 𑀘 𑀲𑀺𑀭𑀺𑀕𑀩𑁆𑀪𑁂𑀦, 𑀢𑀲𑁆𑀲 𑀤𑁆𑀯𑀸𑀭𑀫𑀓𑀸𑀭𑀬𑀼𑀁;

𑀅𑀦𑁆𑀢𑁄 𑀞𑀧𑁂𑀲𑀼𑀁 𑀏𑀓𑀜𑁆𑀘, 𑀤𑀸𑀲𑀺𑀁 𑀦𑀭𑀲𑀢𑀁 𑀩𑀳𑀺.

𑀭𑀽𑀧𑁂𑀦𑀼’𑀫𑁆𑀫𑀸𑀤𑀬𑀻 𑀦𑀭𑁂, 𑀤𑀺𑀝𑁆𑀞𑀫𑀢𑁆𑀢𑀸𑀯 𑀲𑀸𑀬𑀢𑁄;

𑀢𑀢𑁄 𑀉𑀫𑁆𑀫𑀸𑀤𑀘𑀺𑀢𑁆𑀢𑀸’𑀢𑀺, 𑀦𑀸𑀫𑀁 𑀲𑁄𑀧𑀧𑀤𑀁 𑀮𑀪𑀺.

𑀲𑀼𑀢𑁆𑀯𑀸𑀦 𑀮𑀁𑀓𑀸𑀕𑀫𑀦𑀁, 𑀪𑀤𑁆𑀤𑀓𑀘𑁆𑀘𑀸𑀦𑀤𑁂𑀯𑀺𑀬𑀸;

𑀫𑀸𑀢𑀭𑀸 𑀘𑁄𑀤𑀺𑀢𑀸 𑀧𑀼𑀢𑁆𑀢𑀸, 𑀞𑀧𑁂𑀢𑁆𑀯𑁂’𑀓𑀜𑁆𑀘 𑀆𑀕𑀫𑀼𑀁.

𑀤𑀺𑀲𑁆𑀯𑀸𑀦 𑀢𑁂 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑀁 𑀮𑀗𑁆𑀓𑀺𑀦𑁆𑀤𑀫𑀸𑀕𑀢𑀸;

𑀤𑀺𑀲𑁆𑀯𑀸𑀦 𑀢𑀁 𑀓𑀦𑀺𑀝𑁆𑀞𑀺𑀜𑁆𑀘, 𑀭𑁄𑀤𑀺𑀢𑁆𑀯𑀸 𑀲𑀳 𑀢𑀸𑀬 𑀘.

𑀭𑀜𑁆𑀜𑀸 𑀲𑀼𑀓𑀢𑀲𑀓𑁆𑀓𑀸𑀭𑀸, 𑀭𑀜𑁆𑀜𑁄’𑀦𑀼𑀜𑁆𑀜𑀸𑀬 𑀘𑀸𑀭𑀺𑀓𑀁;

𑀘𑀭𑀺𑀁𑀲𑀼 𑀮𑀁𑀓𑀸𑀤𑀻𑀧𑀫𑁆𑀳𑀺, 𑀦𑀺𑀯𑀲𑀼𑀜𑁆𑀘 𑀬𑀣𑀸𑀭𑀼𑀘𑀺𑀁.

𑀭𑀸𑀫𑁂𑀦 ¶ 𑀯𑀼𑀲𑀺𑀢𑀞𑀸𑀦𑀁, 𑀭𑀸𑀫𑀕𑁄𑀡𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀉𑀭𑀼𑀯𑁂𑀮𑀸’𑀦𑀼𑀭𑀸𑀥𑀸𑀦𑀁, 𑀦𑀺𑀯𑀸𑀲𑀸 𑀘 𑀢𑀣𑀸 𑀢𑀣𑀸.

𑀢𑀣𑀸 𑀯𑀺𑀚𑀺𑀢𑀤𑀻𑀖𑀸𑀬𑀼-𑀭𑁄𑀳𑀡𑀸𑀦𑀁 𑀦𑀺𑀯𑀸𑀲𑀓𑀸;

𑀯𑀺𑀚𑀺𑀢𑀕𑀸𑀫𑁄 𑀤𑀻𑀖𑀸𑀬𑀼-𑀭𑁄𑀳𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀓𑀸𑀭𑁂𑀲𑀺 𑀅𑀦𑀼𑀭𑀸𑀥𑁄 𑀲𑁄, 𑀯𑀸𑀧𑀺𑀁 𑀤𑀓𑁆𑀔𑀺𑀡𑀢𑁄 𑀢𑀢𑁄;

𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑀁, 𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑀬𑀻.

𑀫𑀳𑀸𑀭𑀸𑀚𑀸 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀚𑀝𑁆𑀞𑀲𑀼𑀢𑀁 𑀲𑀓𑀁;

𑀅𑀪𑀬𑀁 𑀉𑀧𑀭𑀚𑁆𑀚𑀫𑁆𑀳𑀺, 𑀓𑀸𑀮𑁂 𑀲𑀫𑀪𑀺𑀲𑁂𑀘𑀬𑀺.

𑀤𑀻𑀖𑀸𑀬𑀼𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀢𑀦𑀬𑁄 𑀤𑀻𑀖𑀕𑀸𑀫𑀡𑀺;

𑀲𑀼𑀢𑁆𑀯𑀸 𑀉𑀫𑁆𑀫𑀸𑀤𑀘𑀺𑀢𑁆𑀢𑀁 𑀢𑀁, 𑀢𑀲𑁆𑀲𑀁 𑀚𑀸𑀢𑀓𑀼𑀢𑀽𑀳𑀮𑁄.

𑀕𑀳𑁂𑀢𑁆𑀯𑀸’𑀧𑀢𑀺𑀲𑁆𑀲 𑀕𑀸𑀫𑀁, 𑀢𑀁 𑀅𑀧𑀲𑁆𑀲𑀺 𑀫𑀦𑀼𑀚𑀸𑀥𑀺𑀧𑀁;

𑀅𑀤𑀸 𑀲𑀳𑁄𑀧𑀭𑀸𑀚𑁂𑀦, 𑀭𑀸𑀚𑀼𑀧𑀝𑁆𑀞𑀸𑀦𑀫𑀲𑁆𑀲𑀲𑁄.

𑀕𑀯𑀓𑁆𑀔𑀸𑀪𑀺𑀫𑀼𑀔𑀝𑁆𑀞𑀸𑀦𑁂, 𑀢𑀁 𑀉𑀧𑁂𑀘𑁆𑀘 𑀞𑀺𑀢𑀁 𑀢𑀼𑀲𑀸;

𑀤𑀺𑀲𑁆𑀯𑀸𑀦 𑀕𑀸𑀫𑀺𑀡𑀺𑀁 𑀘𑀺𑀢𑁆𑀢𑀸, 𑀭𑀢𑁆𑀢𑀘𑀺𑀢𑁆𑀢𑀸’𑀳 𑀤𑀸𑀲𑀺𑀓𑀁.

‘‘𑀓𑁄 𑀏𑀲𑁄’’𑀢𑀺 𑀢𑀢𑁄 𑀲𑀼𑀢𑁆𑀯𑀸,

𑀕𑀯𑀓𑁆𑀔𑀫𑁆𑀳𑀺 𑀟𑀲𑀸𑀧𑁂𑀢𑁆𑀯𑀸, 𑀭𑀢𑁆𑀢𑀺𑀁 𑀓𑀓𑁆𑀓𑀝𑀬𑀦𑁆𑀢𑀓𑀁;

𑀆𑀭𑀼𑀬𑁆𑀳 𑀙𑀺𑀦𑁆𑀤𑀬𑀺𑀢𑁆𑀯𑀸𑀦, 𑀓𑀯𑀸𑀝𑀁 𑀢𑁂𑀦 𑀧𑀸𑀯𑀺𑀲𑀺.

𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸𑀦, 𑀧𑀘𑁆𑀘𑀽𑀲𑁂𑀬𑁂𑀯 𑀦𑀺𑀓𑁆𑀔𑀫𑀺;

𑀏𑀯𑀁 𑀦𑀺𑀘𑁆𑀘𑀁 𑀯𑀲𑀻 𑀢𑀢𑁆𑀣, 𑀙𑀺𑀤𑁆𑀤𑀸𑀪𑀸𑀯𑀸 𑀅𑀧𑀸𑀓𑀝𑁄.

𑀲𑀸 𑀢𑁂𑀦 𑀅𑀕𑁆𑀕𑀳𑀻 𑀕𑀩𑁆𑀪𑀁, 𑀕𑀩𑁆𑀪𑁂 𑀧𑀭𑀺𑀡𑀢𑁂 𑀢𑀢𑁄;

𑀫𑀸𑀢𑀼 𑀆𑀭𑁄𑀘𑀬𑀻 𑀤𑀸𑀲𑀻, 𑀫𑀸𑀢𑀸 𑀧𑀼𑀘𑁆𑀙𑀺𑀬 𑀥𑀻𑀢𑀭𑀁.

𑀭𑀜𑁆𑀜𑁄 𑀆𑀭𑁄𑀘𑀬𑀻 𑀭𑀸𑀚𑀸, 𑀅𑀫𑀦𑁆𑀢𑁂𑀢𑁆𑀯𑀸 𑀲𑀼𑀢𑁂’𑀩𑁆𑀭𑀳𑁆𑀫𑀸;

𑀧𑁄𑀲𑀺𑀬𑁄𑀲𑁄’𑀧𑀺 𑀅𑀫𑁆𑀳𑁂𑀳𑀺, 𑀤𑁂𑀯 𑀢𑀲𑁆𑀲𑁂𑀯 𑀢𑀁 𑀇𑀢𑀺.

𑀧𑀼𑀢𑁆𑀢𑁄 𑀘𑁂 𑀫𑀸𑀭𑀬𑀺𑀲𑁆𑀲𑀸𑀫, 𑀢’𑀦𑁆𑀢𑀺 𑀢𑀲𑁆𑀲 𑀅𑀤𑀁𑀲𑀼 𑀢𑀁;

𑀲𑀸 𑀲𑀽𑀢𑀺𑀓𑀸𑀮𑀲𑀫𑁆𑀧𑀢𑁆𑀢𑁂, 𑀲𑀽𑀢𑀺 𑀕𑁂𑀳𑀜𑁆𑀘 𑀧𑀸𑀯𑀺𑀲𑀺𑀁.

𑀲𑀗𑁆𑀓𑀺𑀢𑁆𑀯𑀸 ¶ 𑀕𑁄𑀧𑀓𑀁 𑀘𑀺𑀢𑁆𑀢𑀁, 𑀓𑀸𑀮𑀯𑁂𑀮𑀜𑁆𑀘 𑀤𑀸𑀲𑀓𑀁;

𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀲𑁆𑀲𑀸𑀬𑀸’𑀢𑀺, 𑀕𑀸𑀫𑀡𑀺 𑀧𑀭𑀺𑀘𑀸𑀭𑀓𑁂.

𑀢𑁂 𑀧𑀝𑀺𑀜𑁆𑀜𑀁 𑀅𑀤𑁂𑀦𑁆𑀢𑁂 𑀢𑁂, 𑀭𑀸𑀚𑀧𑀼𑀢𑁆𑀢𑀸 𑀅𑀖𑀸𑀢𑀬𑀼𑀁;

𑀬𑀓𑁆𑀔𑀸 𑀳𑀼𑀢𑁆𑀯𑀸𑀦 𑀭𑀓𑁆𑀔𑀺𑀁𑀲𑀼, 𑀉𑀪𑁄 𑀕𑀩𑁆𑀪𑁂 𑀓𑀼𑀫𑀸𑀭𑀓𑀁.

𑀅𑀜𑁆𑀜𑀁 𑀉𑀧𑀯𑀺𑀚𑀜𑁆𑀜𑀁 𑀲𑀸, 𑀲𑀮𑁆𑀮𑀓𑁆𑀔𑀸 𑀧𑁂𑀲𑀺 𑀤𑀸𑀲𑀺𑀬𑀸;

𑀘𑀺𑀢𑁆𑀢𑀸 𑀲𑀸 𑀚𑀦𑀬𑀻 𑀧𑀼𑀢𑁆𑀢𑀁, 𑀲𑀸 𑀇𑀢𑁆𑀣𑀺 𑀧𑀦 𑀥𑀻𑀢𑀭𑀁.

𑀘𑀺𑀢𑁆𑀢𑀁 𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸, 𑀢𑀲𑁆𑀲𑀸 𑀧𑀼𑀢𑁆𑀢𑀁 𑀲𑀓𑀫𑁆𑀧𑀺 𑀘;

𑀆𑀡𑀸𑀧𑁂𑀢𑁆𑀯𑀸 𑀥𑀻𑀢𑀭𑀁 𑀢𑀁, 𑀦𑀺𑀧𑀚𑁆𑀚𑀸𑀧𑁂𑀲𑀺 𑀲𑀦𑁆𑀢𑀺𑀓𑁂.

𑀥𑀻𑀢𑀸 𑀮𑀤𑁆𑀥𑀸’𑀢𑀺 𑀲𑀼𑀢𑁆𑀯𑀸𑀦, 𑀢𑀼𑀝𑁆𑀞𑀸 𑀭𑀸𑀚𑀲𑀼𑀢𑀸 𑀅𑀳𑀼𑀁;

𑀫𑀸𑀢𑀸 𑀘 𑀫𑀸𑀢𑀼𑀫𑀸𑀢𑀸 𑀘, 𑀉𑀪𑁄 𑀧𑀦 𑀓𑀼𑀫𑀸𑀭𑀓𑀁.

𑀫𑀸𑀢𑀸𑀫𑀳𑀲𑁆𑀲 𑀦𑀸𑀫𑀜𑁆𑀘, 𑀚𑁂𑀝𑁆𑀞𑀲𑁆𑀲 𑀫𑀸𑀢𑀼𑀮𑀲𑁆𑀲 𑀘;

𑀏𑀓𑀁 𑀓𑀢𑁆𑀯𑀸 𑀢𑀫𑀓𑀭𑀼𑀁, 𑀧𑀡𑁆𑀟𑀼𑀓𑀸𑀪𑀬𑀦𑀸𑀫𑀓𑀁.

𑀮𑀁𑀓𑀸 𑀧𑀸𑀮𑁄 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀭𑀚𑁆𑀚𑀫𑀓𑀸𑀭𑀬𑀺;

𑀢𑀺𑀁𑀲 𑀯𑀲𑁆𑀲𑀫𑁆𑀳𑀺 𑀚𑀸𑀢𑀫𑁆𑀳𑀺, 𑀫𑀢𑁄 𑀲𑁄 𑀧𑀡𑁆𑀟𑀼𑀓𑀸𑀪𑀬𑁂.

𑀢𑀲𑁆𑀫𑀺𑀁 𑀫𑀢𑀲𑁆𑀫𑀺𑀁 𑀫𑀦𑀼𑀚𑀸𑀥𑀺𑀧𑀲𑁆𑀫𑀺𑀁,

𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀦𑀭𑀺𑀦𑁆𑀤𑀧𑀼𑀢𑁆𑀢𑀸;

𑀢𑀲𑁆𑀲𑀸𑀪𑀬𑀲𑁆𑀲𑀸𑀪𑀬𑀤𑀲𑁆𑀲 𑀪𑀸𑀢𑀼,

𑀭𑀸𑀚𑀸𑀪𑀺𑀲𑁂𑀓𑀁 𑀅𑀓𑀭𑀼𑀁 𑀉𑀴𑀸𑀭𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀉𑀫𑁆𑀫𑀸𑀤𑀘𑀺𑀢𑁆𑀢𑀸𑀬𑀸𑀡𑀢𑁆𑀢𑀸 ¶ , 𑀤𑀸𑀲𑀻 𑀆𑀤𑀸𑀬 𑀤𑀸𑀭𑀓𑀁;

𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀦, 𑀤𑁆𑀯𑀸𑀭𑀫𑀡𑁆𑀟𑀮 𑀓𑁂 𑀅𑀕𑀸.

𑀭𑀸𑀚𑀧𑀼𑀢𑁆𑀢𑀸 𑀘 𑀫𑀺𑀕𑀯𑀁, 𑀕𑀢𑀸 𑀢𑀼𑀫𑁆𑀩𑀭𑀓𑀦𑁆𑀤𑀭𑁂;

𑀤𑀺𑀲𑁆𑀯𑀸 𑀤𑀸𑀲𑀺𑀁 𑀓𑀼𑀳𑀺𑀁 𑀬𑀸𑀲𑀺, 𑀓𑀺𑀁 𑀫𑁂 𑀓𑀦𑁆𑀢𑀺 𑀘 𑀧𑀼𑀘𑁆𑀙𑀺𑀲𑀼𑀁.

𑀤𑁆𑀯𑀸𑀭𑀫𑀡𑁆𑀟𑀮𑀓𑀁 𑀬𑀸𑀫𑀺, 𑀥𑀻𑀢𑀼𑀫𑁂𑀕𑀼𑀴𑀧𑀽𑀯𑀓𑀁;

𑀇𑀘𑁆𑀘𑀸𑀳 𑀑𑀭𑁄𑀧𑁂𑀳𑀻𑀢𑀺, 𑀭𑀸𑀚𑀧𑀼𑀢𑁆𑀢𑀁 𑀓𑀫𑀩𑁆𑀭𑀯𑀼𑀁.

𑀘𑀺𑀢𑁆𑀢𑁄 𑀘 𑀓𑀸𑀮𑀯𑁂𑀮𑁄 𑀘, 𑀢𑀲𑁆𑀲𑀸’𑀭𑀓𑁆𑀔𑀸𑀬 𑀦𑀺𑀕𑁆𑀕𑀢𑀸;

𑀫𑀳𑀦𑁆𑀢𑀁 𑀲𑀽𑀓𑀭𑀯𑁂𑀲𑀁, 𑀢𑀁 𑀔𑀡𑀁𑀬𑁂𑀯 𑀤𑀲𑁆𑀲𑀬𑀼𑀁.

𑀢𑁂 𑀢𑀁 𑀲𑀫𑀦𑀼𑀩𑀦𑁆𑀥𑀺𑀁𑀲𑀼, 𑀲𑀸𑀲𑀫𑀸𑀤𑀸𑀬 𑀢𑀢𑁆𑀭’𑀕𑀸;

𑀤𑀸𑀭𑀓𑀜𑁆𑀘 𑀲𑀳𑀲𑁆𑀲𑀜𑁆𑀘, 𑀆𑀬𑀼𑀢𑁆𑀢𑀲𑁆𑀲 𑀅𑀤𑀸𑀭𑀳𑁄.

𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂 𑀢𑀲𑁆𑀲, 𑀪𑀭𑀺𑀬𑀸 𑀚𑀦𑀬𑀻 𑀲𑀼𑀢𑀁;

𑀬𑀫𑀓𑁂 𑀚𑀦𑀬𑀻 𑀧𑀼𑀢𑁆𑀢𑁂, 𑀪𑀭𑀺𑀬𑀁 𑀫𑁂’𑀢𑀺 𑀧𑁄𑀲𑀺𑀢𑀁.

𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀘𑀸’𑀲𑀺, 𑀢𑀁 𑀯𑀺𑀚𑀸𑀦𑀺𑀬 𑀫𑀸𑀢𑀼𑀮𑀸;

𑀕𑀦𑁆𑀢𑀼𑀁 𑀲𑀭𑀲𑀺 𑀓𑀻𑀴𑀦𑁆𑀢𑁂, 𑀤𑀸𑀭𑀓𑁂 𑀘 𑀧𑀬𑁄𑀚𑀬𑀼𑀁.

𑀚𑀮𑀝𑁆𑀞𑀁 𑀭𑀼𑀓𑁆𑀔𑀲𑀼𑀲𑀺𑀭𑀁, 𑀚𑀮𑀘𑁆𑀙𑀸𑀤𑀺𑀢𑀙𑀺𑀤𑁆𑀤𑀓𑀁;

𑀦𑀺𑀫𑀼𑀚𑁆𑀚𑀫𑀸𑀦𑁄 𑀙𑀺𑀤𑁆𑀤𑁂𑀦, 𑀧𑀯𑀺𑀲𑀺𑀢𑁆𑀯𑀸 𑀘𑀺𑀭𑀝𑁆𑀞𑀺𑀢𑁄.

𑀢𑀢𑁄 𑀢𑀣𑁂𑀯 𑀦𑀺𑀓𑁆𑀔𑀫𑁆𑀫, 𑀓𑀼𑀫𑀸𑀭𑁂 𑀲𑁂𑀲𑀤𑀸𑀭𑀓𑁂;

𑀉𑀧𑀘𑁆𑀘 𑀧𑀼𑀘𑁆𑀙𑀺𑀬𑀦𑁆𑀢𑁄𑀧𑀺, 𑀯𑀜𑁆𑀘𑁂𑀢’𑀜𑁆𑀜𑀯𑀘𑁄𑀳𑀺 𑀲𑁄.

𑀫𑀦𑀼𑀲𑁆𑀲𑁂𑀳𑀸’𑀕𑀢𑁂𑀳𑁂𑀲𑁄, 𑀦𑀺𑀯𑀸𑀲𑁂𑀢𑁆𑀯𑀸𑀦 𑀯𑀢𑁆𑀣𑀓𑀁;

𑀓𑀼𑀫𑀸𑀭𑁄 𑀯𑀸𑀭𑀺𑀫𑁄 𑀕𑀬𑁆𑀳, 𑀲𑀼𑀲𑀺𑀭𑀫𑁆𑀳𑀺 𑀞𑀺𑀢𑁄 𑀅𑀳𑀼.

𑀯𑀢𑁆𑀣𑀓𑀸𑀦𑀺 𑀕𑀡𑁂𑀢𑁆𑀯𑀸𑀦, 𑀫𑀸𑀭𑁂𑀢𑁆𑀯𑀸 𑀲𑁂𑀲𑀤𑀸𑀭𑀓𑁂;

𑀕𑀦𑁆𑀢𑁆𑀯𑀸 𑀆𑀭𑁄𑀘𑀬𑀼𑀁 𑀲𑀩𑁆𑀩𑁂, 𑀤𑀸𑀭𑀓𑀸 𑀫𑀸𑀭𑀺𑀢𑀸 𑀇𑀢𑀺.

𑀕𑀢𑁂𑀲𑀼 ¶ 𑀢𑁂𑀲𑀼 𑀲𑁄 𑀕𑀦𑁆𑀢𑁆𑀯𑀸, 𑀆𑀬𑀼𑀢𑁆𑀢𑀓𑀖𑀭𑀁 𑀲𑀓𑀁;

𑀯𑀲𑀁 𑀅𑀲𑁆𑀲𑀸𑀲𑀺𑀢𑁄 𑀢𑁂𑀦, 𑀅𑀳𑀽 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄.

𑀧𑀼𑀦 𑀲𑀼𑀢𑁆𑀯𑀸𑀦 𑀚𑀻𑀯𑀦𑁆𑀢𑀁, 𑀓𑀼𑀫𑀸𑀭𑀁 𑀢𑀲𑁆𑀲 𑀫𑀸𑀢𑀼𑀮𑀁;

𑀢𑀢𑁆𑀣 𑀕𑁄𑀧𑀸𑀮𑀓𑁂 𑀲𑀩𑁆𑀩𑁂, 𑀫𑀸𑀭𑁂𑀢𑀼𑀁 𑀲𑀦𑁆𑀦𑀺𑀬𑁄𑀚𑀬𑀼𑀁.

𑀢𑀲𑁆𑀫𑀺𑀁 𑀅𑀳𑀦𑀺 𑀕𑁄𑀧𑀸𑀮𑀸, 𑀮𑀤𑁆𑀥𑀸 𑀏𑀓𑀁 𑀘𑀢𑀼𑀧𑁆𑀧𑀤𑀁;

𑀅𑀕𑁆𑀕𑀺𑀁 𑀆𑀳𑀭𑀺𑀢𑀼𑀁 𑀕𑀸𑀫𑀁, 𑀧𑁂𑀲𑁂𑀢𑀼𑀁 𑀢𑀁 𑀓𑀼𑀫𑀸𑀭𑀓𑀁.

𑀲𑁄 𑀕𑀦𑁆𑀢𑁆𑀯𑀸 𑀖𑀭𑀫𑀸𑀬𑀼𑀢𑁆𑀢-𑀧𑀼𑀢𑁆𑀢𑀓𑀁𑀬𑁂𑀯 𑀧𑁂𑀲𑀬𑀺;

𑀧𑀸𑀤𑀸 𑀭𑀼𑀚𑀦𑁆𑀢𑀺 𑀫𑁂 𑀢𑁂𑀳𑀺, 𑀅𑀕𑁆𑀕𑀺𑀁 𑀕𑁄𑀧𑀸𑀮𑀲𑀦𑁆𑀢𑀺𑀓𑀁.

𑀢𑀲𑁆𑀫𑀺𑀁 𑀔𑀡𑁂 𑀧𑁂𑀲𑀺𑀢𑀸 𑀢𑁂, 𑀧𑀭𑀺𑀓𑁆𑀔𑀺𑀧𑀺𑀬 𑀫𑀸𑀭𑀬𑀼𑀁;

𑀲𑀩𑁆𑀩𑁂 𑀕𑁄𑀧𑁂 𑀫𑀸𑀭𑀬𑀺𑀢𑁆𑀯𑀸, 𑀫𑀸𑀢𑀼𑀮𑀸𑀦𑀁 𑀦𑀺𑀯𑁂𑀤𑀬𑀼𑀁.

𑀢𑀣𑁄 𑀲𑁄𑀴𑀲𑀯𑀲𑁆𑀲𑀁 𑀢𑀁, 𑀯𑀺𑀚𑀸𑀦𑀺𑀁𑀲𑀼 𑀘 𑀫𑀸𑀢𑀼𑀮𑀸;

𑀫𑀸𑀢𑀸 𑀲𑀳𑀲𑁆𑀲𑀜𑁆𑀘𑀸’𑀤𑀸𑀲𑀺, 𑀢𑀲𑁆𑀲𑀸 𑀭𑀓𑁆𑀔𑀜𑁆𑀘 𑀆𑀤𑀺𑀲𑀺.

𑀆𑀬𑀼𑀢𑁆𑀢𑁄 𑀫𑀸𑀢𑀼𑀲𑀦𑁆𑀤𑁂𑀲𑀁, 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀯𑁂𑀤𑀺𑀬;

𑀤𑀢𑁆𑀯𑀸 𑀤𑀸𑀲𑀁 𑀲𑀳𑀲𑁆𑀲𑀜𑁆𑀘, 𑀧𑁂𑀲𑁂𑀲𑀺 𑀧𑀡𑁆𑀟𑀼𑀮𑀦𑁆𑀢𑀺𑀓𑀁.

𑀧𑀡𑁆𑀟𑀼𑀮𑀩𑁆𑀭𑀸𑀳𑁆𑀫𑀡𑁄 𑀦𑀸𑀫, 𑀪𑁄𑀕𑀯𑀸 𑀯𑁂𑀤𑀧𑀸𑀭𑀕𑁄;

𑀤𑀓𑁆𑀔𑀺𑀡𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂, 𑀯𑀲𑀻 𑀧𑀡𑁆𑀟𑀼𑀮𑀕𑀸𑀫𑀓𑁂.

𑀓𑀼𑀫𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦, 𑀧𑀲𑁆𑀲𑀺 𑀧𑀡𑁆𑀟𑀼𑀮𑀩𑁆𑀭𑀸𑀳𑁆𑀫𑀡𑀁;

‘‘𑀢𑁆𑀯𑀁 𑀧𑀡𑁆𑀟𑀼𑀓𑀸𑀪𑀬𑁄 𑀢𑀸𑀢’’, 𑀇𑀢𑀺 𑀧𑀼𑀘𑁆𑀙𑀺𑀬 𑀩𑁆𑀬𑀸𑀓𑀢𑁂.

𑀢𑀲𑁆𑀲 𑀓𑀢𑁆𑀯𑀸𑀦 𑀲𑀓𑁆𑀓𑀸𑀭𑀁, 𑀆𑀳 𑀭𑀸𑀚𑀸 𑀪𑀯𑀺𑀲𑁆𑀲𑀲𑀺;

𑀲𑀫𑀲𑀢𑁆𑀢𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀢𑁆𑀯𑀁 𑀓𑀸𑀭𑀬𑀺𑀲𑁆𑀲𑀲𑀺.

𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳 𑀢𑀸𑀢𑀸𑀢𑀺, 𑀲𑀺𑀧𑁆𑀧𑀼𑀕𑁆𑀕𑀳𑀫𑀓𑀸𑀭𑀬𑀻;

𑀘𑀦𑁆𑀤𑁂𑀦 𑀢𑀲𑁆𑀲 𑀧𑀼𑀢𑁆𑀢𑁂𑀦, 𑀔𑀺𑀧𑁆𑀧𑀁 𑀲𑀺𑀧𑁆𑀧𑀁 𑀲𑀫𑀸𑀧𑀺𑀢𑀁.

𑀅𑀤𑀸 𑀲𑀢𑀲𑀳𑀲𑁆𑀲𑀁 𑀲𑁄, 𑀬𑁄𑀥𑀲𑀗𑁆𑀕𑀳𑀓𑀸𑀭𑀡𑀸;

𑀬𑁄𑀥𑁂𑀲𑀼 𑀲𑀗𑁆𑀕𑀳𑀺𑀢𑁂𑀲𑀼, 𑀢𑁂𑀦 𑀧𑀜𑁆𑀘𑀲𑀢𑁂𑀲𑀼 𑀲𑁄.

𑀲𑀺𑀬𑀼𑀁 𑀬𑀸𑀬 𑀕𑀬𑀺𑀢𑀸𑀦𑀺, 𑀧𑀡𑁆𑀡𑀸𑀦𑀺 𑀓𑀦𑀓𑀸𑀦𑀺 𑀢𑀁;

𑀫𑀳𑁂𑀲𑀺𑀁 𑀓𑀼𑀭𑀼𑀘𑀦𑁆𑀤𑀜𑁆𑀘, 𑀫𑀫 𑀧𑀼𑀢𑁆𑀢𑀁 𑀧𑀼𑀭𑁄𑀳𑀺𑀢𑀁.

𑀇𑀪𑀺 ¶ 𑀯𑀢𑁆𑀯𑀸 𑀥𑀦𑀁 𑀤𑀢𑁆𑀯𑀸, 𑀲𑀬𑁄𑀥𑀁 𑀦𑀺𑀳𑀭𑀺 𑀢𑀢𑁄;

𑀲𑁄 𑀦𑀸𑀫𑀁 𑀲𑀸𑀯𑀬𑀺𑀢𑁆𑀯𑀸𑀦, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀧𑀼𑀜𑁆𑀜𑀯𑀸.

𑀮𑀤𑁆𑀥𑀩𑀮𑁄 𑀦𑀕𑀭𑀓𑁂, 𑀓𑀸𑀲𑀧𑀩𑁆𑀩𑀢 𑀲𑀦𑁆𑀢𑀺𑀓𑁂;

𑀲𑀢𑁆𑀢𑀲𑀢𑀸𑀦𑀺 𑀧𑀼𑀭𑀺𑀲𑁂, 𑀲𑀩𑁆𑀩𑁂𑀲𑀁 𑀪𑁄𑀚𑀦𑀸𑀦𑀺 𑀘.

𑀢𑀢𑁄 𑀦𑀭𑀲𑀳𑀲𑁆𑀲𑁂𑀦, 𑀤𑁆𑀯𑀺𑀲𑀢𑁂𑀦 𑀓𑀼𑀫𑀸𑀭𑀓𑁄;

𑀕𑀺𑀭𑀺𑀓𑀡𑁆𑀟 𑀧𑀩𑁆𑀩𑀢𑀁 𑀦𑀸𑀫, 𑀅𑀕𑀫𑀸 𑀧𑀭𑀺𑀯𑀸𑀭𑀺𑀢𑁄.

𑀕𑀺𑀭𑀺𑀓𑀡𑁆𑀟𑀲𑀺𑀯𑁄 𑀦𑀸𑀫, 𑀧𑀡𑁆𑀟𑀼𑀓𑀸𑀪𑀬 𑀫𑀸𑀢𑀼𑀮𑁄;

𑀢𑀁 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁂𑀦, 𑀤𑀺𑀦𑁆𑀦𑀁 𑀪𑀼𑀜𑁆𑀚𑀢𑀺 𑀤𑁂𑀲𑀓𑀁.

𑀲𑁄 𑀓𑀭𑀺𑀲𑀲𑀢𑀁 𑀧𑀓𑁆𑀓𑀁, 𑀢𑀤𑀸 𑀮𑀸𑀯𑁂𑀢𑀺 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀥𑀻𑀢𑀸 𑀭𑀽𑀧𑀯𑀢𑀻, 𑀧𑀸𑀮𑀻 𑀦𑀸𑀫𑀸’𑀲𑀺 𑀔𑀢𑁆𑀢𑀺𑀬𑀸.

𑀲𑀸 𑀫𑀳𑀸𑀧𑀭𑀺𑀯𑀸𑀭𑁂𑀦, 𑀬𑀸𑀦𑀫𑀸𑀭𑀼𑀬𑁆𑀳 𑀲𑁄𑀪𑀦𑀁;

𑀧𑀺𑀢𑀼𑀪𑀢𑁆𑀢𑀁 𑀕𑀸𑀳𑀬𑀺𑀢𑁆𑀯𑀸, 𑀮𑀸𑀯𑀓𑀸𑀦𑀜𑁆𑀘 𑀕𑀘𑁆𑀙𑀢𑀺.

𑀓𑀼𑀫𑀸𑀭𑀲𑁆𑀲 𑀫𑀦𑀼𑀲𑁆𑀲𑀸𑀦𑀁, 𑀤𑀺𑀲𑁆𑀯𑀸 𑀢𑀢𑁆𑀣 𑀓𑀼𑀫𑀸𑀭𑀺𑀓𑀁;

𑀆𑀭𑁄𑀘𑁂𑀲𑀼𑀁 𑀓𑀼𑀫𑀸𑀭𑀲𑁆𑀲, 𑀓𑀼𑀫𑀸𑀭𑁄 𑀲𑀳𑀲𑀸’𑀕𑀢𑁄.

𑀤𑁆𑀯𑁂𑀥𑀸 𑀢𑀁 𑀧𑀭𑀺𑀲𑀁 𑀓𑀢𑁆𑀯𑀸, 𑀲𑀢𑀁 𑀬𑀸𑀦𑀫𑀧𑁂𑀲𑀬𑀺;

𑀢𑀤𑀦𑁆𑀢𑀺𑀓𑀁 𑀲𑀧𑀭𑀺𑀲𑀸, 𑀓𑀢𑁆𑀣 𑀬𑀸𑀲𑀻𑀢𑀺 𑀧𑀼𑀘𑁆𑀙𑀺𑀢𑀁.

𑀢𑀸𑀬 𑀯𑀼𑀢𑁆𑀢𑁂𑀢𑀼 𑀲𑀩𑁆𑀩𑀲𑁆𑀫𑀺𑀁, 𑀢𑀲𑁆𑀲𑀁𑀲𑀸𑀭𑀢𑁆𑀢 𑀫𑀸𑀦𑀲𑁄;

𑀅𑀢𑁆𑀢𑀦𑁄 𑀲𑀁𑀯𑀺𑀪𑀸𑀕𑀢𑁆𑀣𑀁, 𑀪𑀦𑁆𑀢𑁂𑀦𑀸’𑀬𑀸𑀘𑀺 𑀔𑀢𑁆𑀢𑀺𑀬𑁄.

𑀲𑀸𑀲𑀫𑁄𑀭𑀼𑀬𑁆𑀳 𑀬𑀸𑀦𑀫𑁆𑀳𑀸, 𑀅𑀤𑀸 𑀲𑁄𑀯𑀡𑁆𑀡𑀧𑀸𑀢𑀺𑀬𑀸;

𑀪𑀢𑁆𑀢𑀁 𑀦𑀺𑀕𑁆𑀭𑁄𑀥 𑀫𑀽𑀮𑀲𑁆𑀫𑀺𑀁, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀔𑀢𑁆𑀢𑀺𑀬𑀸.

𑀕𑀡𑁆𑀳𑀺 𑀦𑀺𑀕𑁆𑀭𑁄𑀥𑀧𑀡𑁆𑀡𑀸𑀦𑀺, 𑀪𑁄𑀚𑁂𑀢𑀼𑀁 𑀲𑁂𑀲𑀓𑁂 𑀚𑀦𑁂;

𑀲𑁄𑀯𑀡𑁆𑀡𑀪𑀸𑀚𑀦𑀸𑀦𑀸’𑀲𑀼𑀁, 𑀢𑀸𑀦𑀺 𑀧𑀡𑁆𑀡𑀸𑀦𑀺 𑀢𑀁 𑀔𑀡𑁂.

𑀢𑀸𑀦𑀺 𑀤𑀺𑀲𑁆𑀯𑀸 𑀭𑀸𑀚𑀧𑀼𑀢𑁆𑀢𑁄, 𑀲𑀭𑀺𑀢𑁆𑀯𑀸 𑀤𑀺𑀚𑀪𑀸𑀲𑀺𑀢𑀁;

𑀫𑀳𑁂𑀲𑀺𑀪𑀸𑀯 𑀬𑁄𑀕𑁆𑀕𑀸𑀫𑁂, 𑀓𑀜𑁆𑀜𑀸𑀮𑀤𑁆𑀥𑀸𑀢𑀺 𑀢𑀼𑀲𑁆𑀲𑀺𑀲𑁄.

𑀲𑀩𑁆𑀩𑁂 𑀪𑁄𑀚𑀸𑀧𑀬𑀻 𑀢𑁂𑀲𑀸, 𑀢𑀁 𑀦 𑀔𑀻𑀬𑀺𑀢𑁆𑀣 𑀪𑁄𑀚𑀦𑀁;

𑀏𑀓𑀲𑁆𑀲 𑀧𑀝𑀺𑀯𑀺𑀲𑁄’𑀯, 𑀕𑀳𑀺𑀢𑁄 𑀢𑀢𑁆𑀣 𑀤𑀺𑀲𑁆𑀲𑀣.

𑀏𑀯𑀁 𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑀸, 𑀲𑀼𑀓𑀼𑀫𑀸𑀭𑀻 𑀓𑀼𑀫𑀸𑀭𑀺𑀓𑀸;

𑀲𑀼𑀯𑀡𑁆𑀡𑀧𑀸𑀮𑀺 𑀦𑀸𑀫𑁂𑀦, 𑀢𑀢𑁄𑀧𑁆𑀧𑀪𑀼𑀢 𑀆𑀲𑀺 𑀲𑀸.

𑀢𑀁 ¶ 𑀓𑀼𑀫𑀸𑀭 𑀕𑀳𑁂𑀢𑁆𑀯𑀸𑀦, 𑀬𑀸𑀦𑀫𑀸𑀭𑀼𑀬𑁆𑀳 𑀔𑀢𑁆𑀢𑀺𑀬𑁄;

𑀫𑀳𑀩𑁆𑀩𑀮 𑀧𑀭𑀺𑀩𑁆𑀬𑀽𑀴𑁆𑀳𑁄, 𑀅𑀦𑀼𑀲𑀁𑀡𑀻 𑀅𑀧𑀓𑁆𑀓𑀫𑀺.

𑀢𑀁 𑀲𑀼𑀢𑁆𑀯𑀸𑀦 𑀧𑀺𑀢𑀸 𑀢𑀲𑁆𑀲𑀸, 𑀦𑀭𑁂 𑀲𑀩𑁆𑀩𑁂 𑀅𑀧𑁂𑀲𑀬𑀺;

𑀢𑁂 𑀕𑀦𑁆𑀢𑁆𑀯𑀸 𑀓𑀮𑀳𑀁 𑀓𑀢𑁆𑀯𑀸, 𑀢𑀚𑁆𑀚𑀺𑀢𑀸 𑀢𑁂𑀳𑀺 𑀆𑀕𑀫𑀼𑀁.

𑀓𑀮𑀳𑀦𑀕𑀭𑀁 𑀦𑀸𑀫, 𑀕𑀸𑀫𑁄 𑀢𑀢𑁆𑀣 𑀓𑀢𑁂 𑀅𑀳𑀼;

𑀢𑀁 𑀲𑀼𑀢𑁆𑀯𑀸 𑀪𑀸𑀢𑀭𑁄 𑀢𑀲𑁆𑀲𑀸, 𑀧𑀜𑁆𑀘𑀬𑀼𑀤𑁆𑀥𑀸𑀬𑀼’𑀧𑀸𑀕𑀫𑀼𑀁.

𑀲𑀩𑁆𑀩𑁂 𑀢𑁂 𑀧𑀡𑁆𑀟𑀼𑀮𑀲𑀼𑀢𑁄, 𑀘𑀦𑁆𑀤𑁄𑀬𑁂𑀯 𑀅𑀖𑀸𑀢𑀬𑀺;

𑀮𑁄𑀳𑀺𑀢 𑀯𑀸𑀳𑀔𑀡𑁆𑀟𑁄𑀢𑀺, 𑀢𑁂𑀲𑀁 𑀬𑀼𑀤𑁆𑀥𑀫𑀳𑀻 𑀅𑀳𑀼.

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀯𑀲𑀺 𑀢𑀁 𑀢𑀢𑁆𑀣 𑀫𑀸𑀢𑀼𑀮𑀸;

𑀲𑀼𑀢𑁆𑀯𑀸 𑀞𑀧𑁂𑀢𑁆𑀯𑀸 𑀭𑀸𑀚𑀸𑀦𑀁, 𑀢𑀁 𑀬𑀼𑀤𑁆𑀥𑀢𑁆𑀣𑀫𑀼𑀧𑀸𑀕𑀫𑀼𑀁.

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸, 𑀥𑀽𑀫𑀭𑀓𑁆𑀔𑀸𑀕 𑀲𑀦𑁆𑀢𑀺𑀓𑁂;

𑀪𑀸𑀕𑀺𑀦𑁂𑀬𑁆𑀬𑁂𑀦 𑀬𑀼𑀚𑁆𑀛𑀺𑀁𑀲𑀼, 𑀪𑀸𑀕𑀺𑀦𑁂𑀬𑁆𑀬𑁄 𑀢𑀼 𑀫𑀸𑀢𑀼𑀮𑁂.

𑀅𑀦𑀼𑀩𑀦𑁆𑀥𑀻 𑀑𑀭𑀕𑀗𑁆𑀕𑀁, 𑀫𑀮𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀬;

𑀢𑁂𑀲𑀜𑁆𑀘 𑀔𑀦𑁆𑀥𑀸𑀯𑀸𑀭𑀫𑁆𑀳𑀺, 𑀤𑀼𑀯𑁂 𑀯𑀲𑁆𑀲𑀸𑀦𑀺 𑀲𑁄 𑀯𑀲𑀻.

𑀕𑀦𑁆𑀢𑁆𑀯𑁄’𑀧𑀢𑀺𑀲𑁆𑀲𑀕𑀸𑀫𑀁 𑀢𑁂, 𑀢𑀫𑀢𑁆𑀣𑀁 𑀭𑀸𑀚𑀺𑀦𑁄’𑀩𑁆𑀭𑀯𑀼𑀁;

𑀭𑀸𑀚𑀸𑀮𑁂𑀔𑀁 𑀓𑀼𑀫𑀸𑀭𑀲𑁆𑀲, 𑀲𑀭𑀳𑀲𑁆𑀲𑀁 𑀲𑀧𑀸𑀳𑀺𑀡𑀺.

‘‘𑀧𑀼𑀜𑁆𑀚𑀲𑁆𑀲𑀼 𑀧𑀸𑀭𑀕𑀗𑁆𑀕𑀁 𑀢𑁆𑀯𑀁, 𑀫𑀸’𑀕𑀸 𑀑𑀭𑀁𑀢𑀢𑁄’’𑀇𑀢𑀺;

𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀓𑀼𑀚𑁆𑀚𑀺𑀁𑀲𑀼, 𑀪𑀸𑀢𑀭𑁄 𑀦𑀯 𑀭𑀸𑀚𑀺𑀦𑁄.

𑀉𑀧𑀢𑁆𑀣𑀫𑁆𑀪𑁄 𑀢𑁆𑀯𑀫𑁂𑀯𑀸’𑀲𑀺, 𑀘𑀺𑀭𑀁 𑀢𑀲𑁆𑀲 𑀇𑀤𑀸𑀦𑀺 𑀢𑀼;

𑀭𑀝𑁆𑀞𑀁 𑀤𑀤𑀸𑀲𑀺 𑀢𑀲𑁆𑀫𑀸 𑀢𑁆𑀯𑀁, 𑀫𑀸𑀭𑁂𑀲𑁆𑀲𑀸𑀫𑀸’𑀢𑀺 𑀅𑀩𑁆𑀭𑀯𑀼𑀁.

𑀲𑁄 𑀢𑁂𑀲𑀁 𑀭𑀚𑁆𑀚𑀫𑀧𑁆𑀧𑁂𑀲𑀺, 𑀢𑁂 𑀢𑀺𑀲𑁆𑀲𑀁 𑀦𑀸𑀫 𑀪𑀸𑀢𑀭𑀁;

𑀲𑀩𑁆𑀩𑁂𑀯 𑀲𑀳𑀺𑀢𑀸’𑀓𑀁𑀲𑀼, 𑀭𑀚𑁆𑀚𑀲𑁆𑀲 𑀧𑀭𑀺𑀦𑀸𑀬𑀓𑀁.

𑀏𑀲𑁄 𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀅𑀪𑀬𑁄’𑀪𑀬 𑀤𑀸𑀬𑀓𑁄;

𑀢𑀢𑁆𑀣𑁄’𑀧𑀢𑀺𑀲𑁆𑀲𑀕𑀸𑀫𑀫𑁆𑀳𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀯𑀲𑀦𑁆𑀢𑀺 ¶ 𑀥𑀽𑀫𑀭𑀓𑁆𑀔𑀸𑀕𑁂, 𑀲𑀭𑁂 𑀢𑀼𑀫𑁆𑀩𑀭𑀺𑀬𑀗𑁆𑀕𑀡𑁂;

𑀘𑀭𑀢𑁂 𑀯𑀴𑀯𑀸 𑀭𑀼𑀧𑀸, 𑀬𑀓𑁆𑀔𑀻 𑀘𑁂𑀢𑀺𑀬𑀦𑀸𑀫𑀺𑀓𑀸.

𑀏𑀓𑁄 𑀤𑀺𑀲𑁆𑀯𑀸𑀦 𑀲𑁂𑀦𑀗𑁆𑀕𑀁, 𑀉𑀢𑁆𑀢𑀧𑀸𑀤𑀁 𑀫𑀦𑁄𑀭𑀫𑀁;

𑀆𑀭𑁄𑀘𑁂𑀲𑀺 𑀓𑀼𑀫𑀸𑀭𑀲𑁆𑀲, 𑀯𑀴𑀯𑁂’𑀢𑁆𑀢𑀻’𑀤𑀺𑀲𑀻 𑀇𑀢𑀺.

𑀓𑀼𑀫𑀸𑀭𑁄 𑀭𑀲𑁆𑀫𑀺𑀫𑀸𑀤𑀸𑀬, 𑀕𑀳𑁂𑀢𑀼𑀁 𑀢𑀁 𑀉𑀧𑀸𑀕𑀫𑀺;

𑀧𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑁆𑀯𑀸, 𑀪𑀻𑀢𑀸 𑀢𑁂𑀚𑁂𑀦 𑀢𑀲𑁆𑀲𑀲𑀸.

𑀥𑀸𑀯𑀺’𑀦𑀦𑁆𑀢𑀭𑀥𑀸𑀬𑀺𑀢𑁆𑀯𑀸, 𑀥𑀸𑀯𑀦𑁆𑀢𑀺 𑀫𑀦𑀼𑀩𑀦𑁆𑀥𑀺𑀲𑁄;

𑀥𑀸𑀯𑀫𑀸𑀦𑀸 𑀲𑀭𑀁 𑀳𑀁 𑀲𑀸, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀺.

𑀑𑀢𑀭𑀺𑀢𑁆𑀯𑀸 𑀫𑀳𑀸𑀕𑀗𑁆𑀕𑀁, 𑀉𑀢𑁆𑀢𑀭𑀺𑀢𑁆𑀯𑀸 𑀢𑀢𑁄 𑀧𑀦;

𑀥𑀼𑀫𑀭𑀓𑁆𑀔𑀁 𑀧𑀩𑁆𑀩𑀢𑀁 𑀢𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀺.

𑀢𑀁 𑀲𑀭𑀁 𑀧𑀼𑀦 𑀢𑀺𑀓𑁆𑀔𑀢𑁆𑀢𑀼𑀁, 𑀧𑀭𑀺𑀓𑁆𑀔𑀺𑀧𑀺 𑀢𑀢𑁄 𑀧𑀼𑀦;

𑀕𑀗𑁆𑀕𑀁 𑀓𑀘𑁆𑀙𑀓𑀢𑀺𑀢𑁆𑀣𑁂𑀦, 𑀲𑀫𑁄𑀢𑀭𑀺 𑀢𑀳𑀺𑀁 𑀢𑀼 𑀲𑁄.

𑀕𑀳𑁂𑀲𑀺𑀢𑀁 𑀯𑀸𑀮𑀥𑀺𑀲𑁆𑀫𑀺𑀁, 𑀢𑀸𑀮𑀧𑀢𑁆𑀢𑀜𑁆𑀘 𑀢𑁄𑀬𑀕𑀁;

𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀲𑁄 𑀅𑀳𑁄𑀲𑀺 𑀫𑀳𑀸 𑀅𑀲𑀺.

𑀉𑀘𑁆𑀘𑀸𑀭𑁂𑀲𑀺 𑀅𑀲𑀺𑀁 𑀤𑀚𑁆𑀚𑀁, ‘‘𑀫𑀸𑀭𑁄𑀫𑀻’’𑀢𑀺 𑀢𑀫𑀸𑀳 𑀲𑀸;

𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑁂 𑀤𑀚𑁆𑀚𑀁, 𑀲𑀸𑀫𑀺 𑀫𑀸𑀫𑀁 𑀅𑀫𑀸𑀭𑀬𑀺.

𑀕𑀻𑀯𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀲𑁄, 𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑀺𑀓𑁄𑀝𑀺𑀬𑀸;

𑀦𑀸𑀲𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺, 𑀲𑀸 𑀅𑀳𑁄𑀲𑀺 𑀯𑀲𑀸𑀦𑀼𑀕𑀸.

𑀕𑀦𑁆𑀢𑁆𑀯𑀸 𑀢𑀁 𑀥𑀼𑀫𑀭𑀓𑁆𑀔𑀁 𑀲𑁄, 𑀢𑀫𑀸𑀭𑀼𑀬𑁆𑀳 𑀫𑀳𑀩𑁆𑀩𑀮𑁄;

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀥𑀽𑀫𑀭𑀓𑁆𑀔𑀦 𑀕𑁂 𑀯𑀲𑀺.

𑀢𑀢𑁄 𑀦𑀺𑀓𑁆𑀔𑀫𑁆𑀫 𑀲𑀩𑀮𑁄, 𑀆𑀕𑀫𑁆𑀫𑀸’𑀭𑀺𑀝𑁆𑀞𑀧𑀩𑁆𑀩𑀢𑀁;

𑀲𑀼𑀤𑁆𑀥𑀺𑀓𑀸𑀮𑀫𑀧𑁂𑀓𑁆𑀔𑀦𑁆𑀢𑁄, 𑀢𑀢𑁆𑀣 𑀲𑀢𑁆𑀢𑀲𑀫𑀸𑀯𑀲𑀺.

𑀤𑁆𑀯𑁂 𑀫𑀸𑀢𑀼𑀮𑁂 𑀞𑀧𑁂𑀢𑁆𑀯𑀸𑀦, 𑀢𑀲𑁆𑀲 𑀲𑁂𑀲𑀝𑁆𑀞𑀫𑀸𑀢𑀼𑀮𑀸;

𑀬𑀼𑀤𑁆𑀥𑀲𑀚𑁆𑀚𑀸 𑀅𑀭𑀺𑀝𑁆𑀞𑀁 𑀢𑀁, 𑀉𑀧𑀲𑀗𑁆𑀓𑀫𑁆𑀫 𑀧𑀩𑁆𑀩𑀢𑀁.

𑀔𑀦𑁆𑀥𑀸𑀯𑀸𑀭𑀁 𑀦𑀕𑀭𑀓𑁂, 𑀦𑀺𑀯𑁂𑀲𑁂𑀢𑁆𑀯𑀸 𑀘𑀫𑀽𑀧𑀢𑀺𑀁;

𑀤𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁, 𑀲𑀫𑀦𑁆𑀢𑀸’𑀭𑀺𑀝𑁆𑀞𑀧𑀩𑁆𑀩𑀢𑀁.

𑀬𑀓𑁆𑀔𑀺𑀦𑀺𑀬𑀸 𑀫𑀦𑁆𑀢𑀬𑀺𑀢𑁆𑀯𑀸, 𑀢𑀲𑁆𑀲𑀸 𑀯𑀘𑀦𑀬𑀼𑀢𑁆𑀢𑀺𑀬𑀸;

𑀤𑀢𑁆𑀯𑀸 𑀭𑀸𑀚𑀧𑀭𑀺𑀓𑁆𑀔𑀸𑀭𑀁, 𑀧𑀡𑁆𑀡𑀸𑀓𑀸𑀭𑀸 𑀬𑀼𑀯𑀸𑀦𑀺 𑀘.

‘‘𑀕𑀡𑁆𑀳𑀸𑀣 ¶ 𑀲𑀩𑁆𑀩𑀸𑀦𑁂’𑀢𑀸𑀦𑀺, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀯𑁄 𑀅𑀳𑀁’’;

𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑁂𑀲𑀺, 𑀓𑀼𑀫𑀸𑀭𑁄 𑀧𑀼𑀭𑀢𑁄 𑀩𑀮𑀁.

𑀕𑀡𑁆𑀳𑀺𑀲𑁆𑀲𑀸𑀫𑀺 𑀧𑀯𑀺𑀝𑁆𑀞𑀦𑁆𑀢𑀺, 𑀯𑀺𑀲𑁆𑀲𑀝𑁆𑀞𑁂𑀲𑀼 𑀢𑀼 𑀢𑁂𑀲𑀼 𑀲𑁄;

𑀆𑀭𑀼𑀬𑁆𑀳 𑀬𑀓𑁆𑀔𑀯𑀴𑀯𑀁, 𑀫𑀳𑀸𑀩𑀮𑀧𑀼𑀭𑀓𑁆𑀔𑀢𑁄.

𑀬𑀼𑀤𑁆𑀥𑀸𑀬 𑀧𑀸𑀯𑀺𑀲𑀺 𑀬𑀓𑁆𑀔𑀻, 𑀫𑀳𑀸𑀭𑀸𑀯 𑀫𑀭𑀸𑀧𑀺𑀲𑀸;

𑀅𑀦𑁆𑀢𑁄 𑀩𑀳𑀺𑀩𑀮𑀜𑁆𑀘𑀲𑁆𑀲, 𑀉𑀓𑁆𑀓𑀼𑀝𑁆𑀞𑀺𑀁 𑀫𑀳𑀢𑀺𑀁 𑀅𑀓𑀸.

𑀓𑀼𑀫𑀸𑀭𑀧𑀼𑀭𑀺𑀲𑀸 𑀲𑀩𑁆𑀩𑁂, 𑀧𑀭𑀲𑁂𑀦𑀸 𑀦𑀭𑁂 𑀩𑀳𑀽;

𑀖𑀸𑀢𑁂𑀢𑁆𑀯𑀸 𑀫𑀸𑀢𑀼𑀮𑁂 𑀘’𑀢𑁆𑀣, 𑀲𑀻𑀲𑀭𑀸𑀲𑀺𑀁 𑀅𑀓𑀁𑀲𑀼 𑀢𑁂.

𑀲𑁂𑀦𑀸𑀧𑀢𑀺 𑀧𑀸𑀮𑀬𑀺𑀢𑁆𑀯𑀸, 𑀕𑀼𑀫𑁆𑀩𑀝𑁆𑀞𑀸𑀦𑀁 𑀲𑀧𑀸𑀯𑀺𑀲𑀺;

𑀲𑁂𑀦𑀸𑀧𑀢𑀺 𑀕𑀼𑀫𑁆𑀩𑀓𑁄’𑀢𑀺, 𑀢𑁂𑀦 𑀏𑀲 𑀧𑀯𑀼𑀘𑁆𑀘𑀢𑀺.

𑀉𑀧𑀭𑀺𑀝𑁆𑀞𑀫𑀸𑀢𑀼𑀮𑀲𑀺𑀭𑀁, 𑀲𑀻𑀲𑀭𑀸𑀲𑀺𑀁 𑀲𑀧𑀲𑁆𑀲𑀺𑀬;

𑀮𑀸𑀩𑀼𑀭𑀸𑀲𑀻’𑀯 𑀇𑀘𑁆𑀙𑀸𑀳, 𑀢𑁂𑀦𑀸’𑀲𑀺 𑀮𑀸𑀩𑀼𑀕𑀸𑀫𑀓𑁄.

𑀏𑀯𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀢𑀢𑁄 𑀲𑁄 𑀧𑀡𑁆𑀟𑀼𑀓𑀸𑀪𑀬𑁄;

𑀅𑀬𑁆𑀬𑀓𑀲𑁆𑀲𑀸’𑀦𑀼𑀭𑀸𑀥𑀲𑁆𑀲, 𑀯𑀲𑀦𑀞𑀸𑀦𑀫𑀸𑀕𑀫𑀺.

𑀅𑀢𑁆𑀢𑀦𑁄 𑀭𑀸𑀚𑀕𑁂𑀳𑀁 𑀲𑁄, 𑀢𑀲𑁆𑀲 𑀤𑀢𑁆𑀯𑀸𑀦 𑀅𑀬𑁆𑀬𑀓𑁄;

𑀅𑀜𑁆𑀜𑀢𑁆𑀣𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀲𑁄 𑀢𑀼 𑀢𑀲𑁆𑀫𑀺𑀁 𑀖𑀭𑁂 𑀯𑀲𑀺.

𑀧𑀼𑀘𑁆𑀙𑀸𑀧𑁂𑀢𑁆𑀯𑀸𑀦 𑀦𑁂𑀫𑀺𑀢𑁆𑀢𑀁, 𑀯𑀢𑁆𑀣𑀼𑀯𑀺𑀚𑁆𑀚𑀸’𑀯𑀺𑀤𑀼𑀁 𑀢𑀣𑀸;

𑀦𑀕𑀭𑀁 𑀧𑀯𑀭𑀁 𑀢𑀲𑁆𑀫𑀺𑀁, 𑀕𑀸𑀫𑁂𑀬𑁂𑀯 𑀅𑀫𑀸𑀧𑀬𑀺.

𑀦𑀺𑀯𑀸𑀲𑀢𑁆𑀢𑀸’𑀦𑀼𑀭𑀸𑀥𑀸𑀦𑀁, 𑀅𑀦𑀼𑀭𑀸𑀥𑀧𑀼𑀭𑀁 𑀅𑀳𑀼;

𑀦𑀓𑁆𑀔𑀢𑁆𑀢𑁂𑀦𑀸’𑀦𑀼𑀭𑀸𑀥𑁂𑀦, 𑀧𑀢𑀺𑀝𑁆𑀞𑀸𑀧𑀺𑀢 𑀢𑀸𑀬 𑀘.

𑀆𑀡𑀸𑀧𑁂𑀢𑁆𑀯𑀸 𑀫𑀸𑀢𑀼𑀮𑀸𑀦𑀁, 𑀙𑀢𑁆𑀢𑀁 𑀚𑀸𑀢𑀲𑁆𑀲𑀭𑁂 𑀇𑀥;

𑀥𑁄𑀯𑀸𑀧𑁂𑀢𑁆𑀯𑀸 𑀥𑀸𑀭𑀬𑀺𑀢𑁆𑀯𑀸, 𑀢𑀁 𑀲𑀭𑁂𑀬𑁂𑀯 𑀯𑀸𑀭𑀺𑀦𑀸.

𑀅𑀢𑁆𑀢𑀦𑁄 𑀅𑀪𑀺𑀲𑁂𑀓𑀁 𑀲𑁄, 𑀓𑀸𑀭𑁂𑀲𑀺 𑀧𑀡𑁆𑀟𑀼𑀓𑀸𑀪𑀬𑁄;

𑀲𑀼𑀯𑀡𑁆𑀡𑀧𑀸𑀮𑀺𑀁 𑀤𑁂𑀯𑀺𑀁 𑀢𑀁, 𑀫𑀳𑁂𑀲𑀺𑀢𑁆𑀢𑁂 𑀪𑀺𑀲𑁂𑀘𑀬𑀺.

𑀅𑀤𑀸 𑀘𑀦𑁆𑀤𑀓𑀼𑀫𑀸𑀭𑀲𑁆𑀲, 𑀧𑁄𑀭𑁄𑀳𑀺𑀘𑁆𑀘𑀁 𑀬𑀣𑀸𑀯𑀺𑀥𑀺;

𑀞𑀸𑀦𑀦𑁆𑀢𑀭𑀸𑀦𑀺 𑀲𑁂𑀲𑀸𑀦𑀁, 𑀪𑀘𑁆𑀘𑀸𑀦𑀜𑁆𑀘 𑀬𑀣𑀸𑀭𑀳𑀁.

𑀫𑀸𑀢𑀼𑀬𑀸 𑀉𑀧𑀓𑀸𑀭𑀢𑁆𑀢𑀸, 𑀅𑀢𑁆𑀢𑀦𑁄 𑀘 𑀫𑀳𑀻𑀧𑀢𑀺𑀁;

𑀅𑀖𑀸𑀢𑀬𑀺𑀢𑁆𑀯𑀸 𑀚𑁂𑀝𑁆𑀞𑀁 𑀢𑀁, 𑀫𑀸𑀢𑀼𑀮𑀁 𑀅𑀪𑀬𑀁 𑀧𑀦.

𑀭𑀢𑁆𑀢𑀺𑀭𑀚𑁆𑀚𑀁 𑀅𑀤𑀸 𑀢𑀲𑁆𑀲, 𑀅𑀳𑀼 𑀦𑀕𑀭𑀕𑀼𑀢𑁆𑀢𑀺𑀓𑁄;

𑀢𑀤𑀼𑀧𑀸𑀤𑀸𑀬 𑀦𑀕𑀭𑁂, 𑀅𑀳𑀽 𑀦𑀕𑀭𑀕𑀼𑀢𑁆𑀢𑀺𑀓𑁄.

𑀲𑀲𑁆𑀲𑀼𑀭𑀁 ¶ 𑀢𑀁 𑀅𑀖𑀸𑀢𑁂𑀢𑁆𑀯𑀸, 𑀕𑀺𑀭𑀺𑀓𑀡𑁆𑀟𑀲𑀺𑀯𑀫𑁆𑀧𑀺 𑀘;

𑀕𑀺𑀭𑀺𑀓𑀡𑁆𑀡𑀤𑁂𑀲𑀁 𑀢𑀲𑁆𑀲𑁂’𑀯, 𑀫𑀸𑀢𑀼𑀮𑀲𑁆𑀲 𑀅𑀤𑀸𑀲𑀺 𑀲𑁄.

𑀲𑀭𑀁 𑀢𑀜𑁆𑀘 𑀔𑀡𑀸𑀧𑁂𑀢𑁆𑀯𑀸, 𑀓𑀸𑀭𑀸𑀧𑁂𑀲𑀺 𑀩𑀳𑀽 𑀤𑀓𑀁;

𑀚𑀬𑁂 𑀚𑀮𑀲𑁆𑀲 𑀕𑀸𑀳𑁂𑀦, 𑀚𑀬𑀯𑀸𑀧𑀻𑀢𑀺 𑀅𑀳𑀼𑀢𑀁.

𑀓𑀸𑀮𑀯𑁂𑀮𑀁 𑀦𑀺𑀯𑀸𑀲𑁂𑀲𑀺, 𑀬𑀓𑁆𑀔𑀁𑀧𑀼𑀭 𑀧𑀼𑀭𑀢𑁆𑀣𑀺𑀫𑁂;

𑀬𑀓𑁆𑀔𑀁 𑀢𑀼 𑀘𑀺𑀢𑁆𑀢𑀭𑀸𑀚𑀁 𑀢𑀁, 𑀳𑁂𑀝𑁆𑀞𑁄 𑀅𑀪𑀬𑀯𑀸𑀧𑀺𑀬𑀸.

𑀧𑀼𑀩𑁆𑀩𑁄𑀧𑀓𑀸𑀭𑀺𑀁 𑀤𑀸𑀲𑀺𑀁 𑀢𑀁, 𑀦𑀺𑀩𑁆𑀩𑀢𑁆𑀢𑀁 𑀬𑀓𑁆𑀔𑀬𑁄𑀦𑀺𑀬𑀸;

𑀧𑀼𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂, 𑀲𑁄 𑀓𑀢𑀜𑁆𑀜𑀽 𑀦𑀺𑀯𑀸𑀲𑀬𑀺.

𑀅𑀦𑁆𑀢𑁄 𑀦𑀭𑀺𑀦𑁆𑀤𑀯𑀢𑁆𑀣𑀼𑀲𑁆𑀲, 𑀯𑀴𑀯𑀸𑀫𑀼𑀔𑀬𑀓𑁆𑀔𑀺𑀦𑀺𑀁;

𑀦𑀺𑀯𑀸𑀲𑁂𑀲𑀺 𑀩𑀮𑀺𑀁 𑀢𑁂𑀲𑀁, 𑀅𑀜𑁆𑀜𑁂𑀲𑀜𑁆𑀘𑀸𑀦𑀼𑀯𑀲𑁆𑀲𑀓𑀁.

𑀤𑀸𑀧𑁂𑀲𑀺 𑀙𑀡𑀓𑀸𑀮𑁂 𑀢𑀼, 𑀘𑀺𑀢𑁆𑀢𑀭𑀸𑀚𑁂𑀦 𑀲𑁄 𑀲𑀳;

𑀲𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀤𑀺𑀩𑁆𑀩𑀫𑀸𑀦𑀼𑀲𑀦𑀸𑀝𑀓𑀁.

𑀓𑀸𑀭𑁂𑀦𑁆𑀢𑁄’𑀪𑀺𑀭𑀫𑀺 𑀭𑀸𑀚𑀸, 𑀭𑀢𑀺𑀔𑀺𑀟𑁆𑀟𑀸 𑀲𑀫𑀧𑁆𑀧𑀺𑀢𑁄;

𑀤𑁆𑀯𑀸𑀭𑀕𑀸𑀫𑁂 𑀘 𑀘𑀢𑀼𑀭𑁄, 𑀪𑀬𑀯𑀸𑀧𑀺𑀜𑁆𑀘 𑀓𑀸𑀭𑀬𑀺.

𑀫𑀳𑀸𑀲𑀼𑀲𑀸𑀦𑀖𑀸𑀢𑀦𑀁, 𑀧𑀘𑁆𑀙𑀺𑀫𑀭𑀸𑀚𑀺𑀦𑀺𑀁 𑀢𑀣𑀸;

𑀯𑁂𑀲𑁆𑀲𑀯𑀡𑀲𑁆𑀲 𑀦𑀺𑀕𑁆𑀭𑁄𑀥𑀁, 𑀩𑁆𑀬𑀸𑀥𑀺𑀤𑁂𑀯𑀲𑁆𑀲 𑀢𑀸𑀮𑀓𑀁.

𑀬𑁄𑀦𑀲𑀪𑀸𑀕 𑀯𑀢𑁆𑀣𑀼𑀜𑁆𑀘, 𑀫𑀳𑁂𑀚𑁆𑀚𑀖𑀭𑀫𑁂𑀯 𑀘;

𑀏𑀢𑀸𑀦𑀺 𑀧𑀘𑁆𑀙𑀺𑀫𑀤𑁆𑀯𑀸𑀭-𑀤𑀺𑀲𑀸𑀪𑀸𑀕𑁂 𑀦𑀺𑀯𑁂𑀲𑀬𑀺.

𑀧𑀜𑁆𑀘𑀲𑀢𑀸𑀦𑀺 𑀘𑀡𑁆𑀟𑀸𑀮-𑀧𑀼𑀭𑀺𑀲𑁂 𑀧𑀼𑀭𑀲𑁄𑀥𑀓𑁂;

𑀤𑀼𑀯𑁂𑀲𑀢𑀸𑀦𑀺 𑀘𑀡𑁆𑀟𑀸𑀮-𑀧𑀼𑀭𑀺𑀲𑁂 𑀯𑀘𑁆𑀘𑀲𑁄𑀥𑀓𑁂.

𑀤𑀺𑀬𑀟𑁆𑀠𑀲𑀢𑀘𑀡𑁆𑀟𑀸𑀮𑁂, 𑀫𑀢𑀦𑀻𑀳𑀸𑀭𑀓𑁂’𑀧𑀺 𑀘;

𑀲𑀼𑀲𑀸𑀦 𑀕𑁄𑀧𑀘𑀡𑁆𑀟𑀸𑀮𑁂, 𑀢𑀢𑁆𑀢𑀓𑁂𑀬𑁂𑀯 𑀆𑀤𑀺𑀲𑀺.

𑀢𑁂𑀲𑀁 𑀕𑀸𑀫𑀁 𑀦𑀺𑀯𑁂𑀲𑁂𑀲𑀺, 𑀲𑀼𑀲𑀸𑀦𑀸 𑀧𑀘𑁆𑀙𑀺𑀫𑀼𑀢𑁆𑀢𑀭𑁂;

𑀬𑀣𑀸 𑀯𑀺𑀳𑀺𑀢𑀓𑀫𑁆𑀫𑀸𑀦𑀺, 𑀢𑀸𑀦𑀺 𑀦𑀺𑀘𑁆𑀘𑀁 𑀅𑀓𑀁𑀲𑀼𑀢𑁂.

𑀢𑀲𑁆𑀲 𑀘𑀡𑁆𑀟𑀸𑀮𑀕𑀸𑀫𑀲𑁆𑀲, 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀬 𑀢𑀼;

𑀦𑀻𑀘𑀲𑀼𑀲𑀸𑀦𑀓𑀁 𑀦𑀸𑀫, 𑀘𑀡𑁆𑀟𑀸𑀮𑀸𑀦𑀫𑀓𑀸𑀭𑀬𑀺.

𑀢𑀲𑁆𑀲𑀼𑀢𑁆𑀢𑀭𑁂 𑀲𑀼𑀲𑀸𑀦𑀲𑁆𑀲, 𑀧𑀸𑀲𑀸𑀡𑀧𑀩𑁆𑀩𑀢𑀦𑁆𑀢𑀭𑁂;

𑀆𑀯𑀸𑀲𑀧𑀸𑀮𑀺𑀛𑀸𑀥𑀸𑀦𑀁, 𑀢𑀤𑀸 𑀆𑀲𑀺 𑀦𑀺𑀯𑁂𑀲𑀺𑀢𑀸.

𑀢𑀤𑀼𑀢𑁆𑀢𑀭𑁂 ¶ 𑀤𑀺𑀲𑀸𑀪𑀸𑀕𑁂, 𑀬𑀸𑀯 𑀕𑀸𑀫𑀡𑀺 𑀯𑀸𑀧𑀺𑀬𑀸;

𑀢𑀸𑀧𑀲𑀸𑀦𑀁 𑀅𑀦𑁂𑀓𑁂𑀲𑀁, 𑀅𑀲𑁆𑀲𑀫𑁄 𑀆𑀲𑀺 𑀓𑀸𑀭𑀺𑀢𑁄.

𑀢𑀲𑁆𑀲𑁂𑀯 𑀘 𑀲𑀼𑀲𑀸𑀦𑀲𑁆𑀲, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀢𑀼;

𑀚𑁄𑀢𑀺𑀬𑀲𑁆𑀲 𑀦𑀺𑀕𑀡𑁆𑀞𑀲𑁆𑀲, 𑀖𑀭𑀁 𑀓𑀸𑀭𑁂𑀲𑀺 𑀪𑀽𑀧𑀢𑀺.

𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑀲𑁆𑀫𑀺𑀁, 𑀦𑀺𑀕𑀡𑁆𑀞𑁄 𑀕𑀺𑀭𑀺𑀦𑀸𑀫𑀓𑁄;

𑀦𑀸𑀦𑀸𑀧𑀸𑀲𑀡𑁆𑀟𑀓𑀸 𑀘𑁂𑀯, 𑀯𑀲𑀺𑀁𑀲𑀼 𑀲𑀫𑀡𑀸 𑀩𑀳𑀽.

𑀢𑀢𑁆𑀣𑁂𑀯 𑀘 𑀤𑁂𑀯𑀓𑀼𑀮𑀁, 𑀅𑀓𑀸𑀭𑁂𑀲𑀺 𑀫𑀳𑀻𑀧𑀢𑀺;

𑀓𑀼𑀪𑀡𑁆𑀟𑀲𑁆𑀲 𑀦𑀺𑀕𑀡𑁆𑀞𑀲𑁆𑀲, 𑀢𑀁𑀦𑀸𑀫𑀓𑀫𑀳𑁄𑀲𑀺𑀢𑀁.

𑀢𑀢𑁄 𑀢𑀼 𑀧𑀘𑁆𑀙𑀺𑀫𑁂 𑀪𑀸𑀕𑁂, 𑀛𑀸𑀥𑀧𑀸𑀮𑀺𑀧𑀼𑀭𑀢𑁆𑀣𑀺𑀫𑁂;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀸𑀦𑀁 𑀢𑀼, 𑀯𑀲𑀻 𑀧𑀜𑁆𑀘𑀲𑀢𑀁 𑀢𑀳𑀺𑀁.

𑀧𑀭𑀁 𑀚𑁄𑀢𑀺𑀬𑀕𑁂𑀳𑀫𑁆𑀳𑀸, 𑀑𑀭𑀁 𑀕𑀸𑀫𑀡𑀺 𑀯𑀸𑀧𑀺𑀬𑀸;

𑀲𑁄 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁, 𑀓𑀸𑀭𑀸𑀧𑁂𑀲𑀺 𑀢𑀣𑁂𑀯 𑀘.

𑀆𑀚𑀻𑀯𑀓𑀸𑀦𑀁 𑀕𑁂𑀳𑀜𑁆𑀘, 𑀩𑁆𑀭𑀸𑀳𑁆𑀫𑀡𑀯𑀝𑁆𑀝𑀫𑁂𑀯 𑀘;

𑀲𑀺𑀯𑀺𑀓𑀸 𑀲𑁄𑀢𑁆𑀣𑀺𑀲𑀸𑀮𑀸 𑀘, 𑀅𑀓𑀸𑀭𑁂𑀲𑀺 𑀢𑀳𑀺𑀁 𑀢𑀳𑀺𑀁.

𑀤𑀲𑀯𑀲𑁆𑀲𑀸𑀪𑀺𑀲𑁂𑀓𑁄 𑀲𑁄, 𑀕𑀸𑀫𑀲𑀻𑀫𑀸 𑀦𑀺𑀯𑁂𑀲𑀬𑀺;

𑀮𑀁𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀮𑀁𑀓𑀺𑀦𑁆𑀤𑁄 𑀧𑀡𑁆𑀟𑀼𑀓𑀸𑀪𑀬𑁄.

𑀲𑁄 𑀓𑀸𑀮𑀯𑁂𑀮𑀘𑀺𑀢𑁆𑀢𑁂𑀳𑀺, 𑀤𑀺𑀲𑁆𑀲𑀫𑀸𑀦𑁂𑀳𑀺 𑀪𑀽𑀧𑀢𑀺;

𑀲𑀳𑀸’𑀦𑀼 𑀪𑁄𑀲𑀺 𑀲𑀫𑁆𑀧𑀢𑀺𑀁, 𑀬𑀓𑁆𑀔𑀪𑀽𑀢𑀲𑀳𑀸𑀬 𑀯𑀸.

𑀧𑀡𑁆𑀟𑀼𑀓𑀸𑀪𑀬𑀭𑀜𑁆𑀜𑁄 𑀘, 𑀅𑀪𑀬𑀲𑁆𑀲 𑀘 𑀅𑀦𑁆𑀢𑀭𑁂;

𑀭𑀸𑀚𑀲𑀼𑀜𑁆𑀜𑀸𑀦𑀺 𑀯𑀲𑁆𑀲𑀸𑀦𑀺, 𑀅𑀳𑁂𑀲𑀼𑀁 𑀤𑀲𑀲𑀢𑁆𑀢 𑀘.

𑀲𑁄 𑀧𑀡𑁆𑀟𑀼𑀓𑀸𑀪𑀬𑀫𑀳𑀻𑀧𑀢𑀺 𑀲𑀢𑁆𑀢𑀢𑀺𑀁𑀲𑁋

𑀯𑀲𑁆𑀲𑁄’𑀥𑀺𑀕𑀫𑁆𑀫 𑀥𑀺𑀢𑀺𑀫𑀸 𑀥𑀭𑀡𑀻 𑀧𑀢𑀺𑀢𑁆𑀢𑀁;

𑀭𑀫𑁆𑀫𑁂 𑀅𑀦𑀼𑀦𑀫𑀦𑀼𑀭𑀸𑀥𑀧𑀼𑀭𑁂 𑀲𑀫𑀺𑀤𑁆𑀥𑁂;

𑀯𑀲𑁆𑀲𑀸𑀦𑀺 𑀅𑀓𑀸𑀭𑀬𑀺 𑀭𑀚𑁆𑀚𑀫𑁂𑀢𑁆𑀣𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀸𑀪𑀺𑀲𑁂𑀓𑁄

𑀢𑀲𑁆𑀲𑀘𑁆𑀘𑀬𑁂 ¶ 𑀢𑀲𑁆𑀲 𑀲𑀼𑀢𑁄, 𑀫𑀼𑀝𑀲𑀺𑀯𑁄’𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀼𑀯𑀡𑁆𑀡𑀧𑀸𑀮𑀺𑀬𑀸 𑀧𑀼𑀢𑁆𑀢𑁄, 𑀧𑀢𑁆𑀢𑁄 𑀭𑀚𑁆𑀚𑀫𑀦𑀸𑀓𑀼𑀮𑀁.

𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀦𑀸𑀫𑀦𑀼𑀕𑀕𑀼𑀡𑁄𑀤𑀺𑀢𑀁;

𑀨𑀮𑀧𑀼𑀧𑁆𑀨𑀢𑀭𑀼𑀧𑁂𑀢𑀁, 𑀲𑁄 𑀭𑀸𑀚𑀸 𑀓𑀸𑀭𑀬𑀺 𑀲𑀼𑀪𑀁.

𑀉𑀬𑁆𑀬𑀸𑀦𑀞𑀸𑀦𑀕𑁆𑀕𑀳𑀡𑁂, 𑀫𑀳𑀸𑀫𑁂𑀖𑁄 𑀅𑀓𑀸𑀮𑀚𑁄;

𑀧𑀸𑀯𑀲𑁆𑀲𑀺𑀢𑁂𑀦 𑀉𑀬𑁆𑀬𑀸𑀦𑀁, 𑀫𑀳𑀸𑀫𑁂𑀖𑀯𑀦𑀁 𑀅𑀳𑀼.

𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀫𑀼𑀝𑀲𑀺𑀯𑁄, 𑀭𑀸𑀚𑀸 𑀭𑀸𑀚𑁆𑀚𑀫𑀓𑀸𑀭𑀬𑀺;

𑀅𑀦𑀼𑀭𑀸𑀥𑁂 𑀧𑀼𑀭𑀯𑀭𑁂, 𑀮𑀁𑀓𑀸 𑀪𑀼𑀯𑀤𑀦𑁂 𑀲𑀼𑀪𑁂.

𑀢𑀲𑁆𑀲 𑀧𑀼𑀢𑁆𑀢𑀸 𑀤𑀲𑀸’𑀳𑁂𑀲𑀼𑀁, 𑀅𑀜𑁆𑀜𑀫𑀜𑁆𑀜𑀳𑀺𑀢𑁂𑀲𑀺𑀦𑁄;

𑀤𑀼𑀯𑁂 𑀥𑀻𑀢𑀸 𑀘𑀸’𑀦𑀼𑀓𑀼𑀮𑀸, 𑀓𑀼𑀮𑀸𑀦𑀼𑀘𑁆𑀙𑀯𑀺𑀓𑀸 𑀅𑀳𑀽.

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑁄𑀢𑀺, 𑀯𑀺𑀲𑁆𑀲𑀼𑀢𑁄 𑀤𑀼𑀢𑀺𑀬𑁄 𑀲𑀼𑀢𑁄;

𑀢𑁂𑀲𑀼 𑀪𑀸𑀢𑀽𑀲𑀼 𑀲𑀩𑁆𑀩𑁂𑀲𑀼, 𑀧𑀼𑀜𑁆𑀜𑀸𑀧𑀜𑁆𑀜𑀸𑀥𑀺𑀓𑁄 𑀅𑀳𑀼.

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀭𑀸𑀚𑀸’𑀲𑀺 𑀧𑀺𑀢𑀼𑀅𑀘𑁆𑀘𑀬𑁂;

𑀢𑀲𑁆𑀲𑀸’𑀪𑀺𑀲𑁂𑀓𑁂𑀦 𑀲𑀫𑀁, 𑀩𑀳𑀽𑀦’𑀘𑁆𑀙𑀭𑀺𑀬𑀸𑀦’𑀳𑀼𑀁.

𑀮𑀁𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀦𑀺𑀥𑀬𑁄 𑀭𑀢𑀦𑀸𑀦𑀺 𑀘;

𑀅𑀦𑁆𑀢𑁄𑀞𑀺𑀢𑀸𑀦𑀺 𑀉𑀕𑁆𑀕𑀦𑁆𑀢𑁆𑀯𑀸, 𑀧𑀣𑀯𑀻𑀢𑀮𑀫𑀸𑀭𑀼𑀳𑀼𑀁.

𑀮𑀁𑀓𑀸𑀤𑀻𑀧𑀲𑀫𑀻𑀧𑀫𑁆𑀳𑀺, 𑀪𑀺𑀦𑁆𑀦𑀦𑀸𑀯𑀸𑀕𑀢𑀸𑀦𑀺 𑀘;

𑀢𑀢𑁆𑀭𑀚𑀸𑀢𑀸𑀦𑀺 𑀘 𑀣𑀮𑀁, 𑀭𑀢𑀦𑀸𑀦𑀺 𑀲𑀫𑀸𑀭𑀼𑀳𑀼𑀁.

𑀙𑀸𑀢𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀢𑀺𑀲𑁆𑀲𑁄 𑀘 𑀯𑁂𑀴𑀼𑀬𑀝𑁆𑀞𑀺𑀬𑁄;

𑀚𑀸𑀢𑀸𑀭𑀣𑀧𑀢𑁄𑀤𑁂𑀦, 𑀲𑀫𑀸𑀦𑀸 𑀧𑀭𑀺𑀫𑀸𑀡𑀢𑁄.

𑀢𑀸𑀲𑀼 𑀏𑀓𑀸𑀮𑀢𑀸𑀬𑀝𑁆𑀞𑀺, 𑀭𑀚𑀢𑀸’𑀪𑀸 𑀢𑀳𑀺𑀁 𑀮𑀢𑀸;

𑀲𑀼𑀯𑀡𑁆𑀡𑀸𑀯𑀡𑁆𑀡𑀸𑀭𑀼𑀘𑀺𑀭𑀸, 𑀤𑀺𑀲𑁆𑀲𑀦𑁆𑀢𑁂𑀢𑀸 𑀫𑀦𑁄𑀭𑀫𑀸.

𑀏𑀓𑀸 𑀓𑀼𑀲𑀼𑀫𑀸 𑀬𑀝𑁆𑀞𑀻𑀢𑀼, 𑀓𑀼𑀲𑀼𑀫𑀸𑀦𑀺 𑀢𑀳𑀺𑀁 𑀧𑀦;

𑀦𑀸𑀦𑀸𑀦𑀺 𑀦𑀸𑀦𑀸𑀯𑀡𑁆𑀡𑀸𑀦𑀺, 𑀤𑀺𑀲𑁆𑀲𑀦𑁆𑀢𑁂’𑀢𑀺 𑀨𑀼𑀝𑀸𑀦𑀺 𑀘.

𑀏𑀓𑀸𑀲𑀓𑀼𑀡𑀬𑀝𑁆𑀞𑀺𑀢𑀼 ¶ , 𑀢𑀳𑀺𑀁 𑀧𑀓𑁆𑀔𑀺𑀫𑀺𑀕𑀸 𑀩𑀳𑀽;

𑀦𑀸𑀦𑀸 𑀘 𑀦𑀸𑀦𑀸𑀯𑀡𑁆𑀡𑀸 𑀘, 𑀲𑀚𑀻𑀯𑀸 𑀯𑀺𑀬 𑀤𑀺𑀲𑁆𑀲𑀭𑁂.

𑀪𑀬𑀕𑀚𑀭𑀣𑀸𑀫𑀮𑀓𑀸, 𑀯𑀮𑀬𑀗𑁆𑀕𑀼𑀮𑀺𑀯𑁂𑀞𑀓𑀸;

𑀓𑀓𑀼𑀥𑀨𑀮𑀸𑀧𑀸𑀓𑀢𑀺𑀓𑀸, 𑀇𑀘𑁆𑀘𑁂𑀢𑀸 𑀅𑀝𑁆𑀞𑀚𑀸𑀢𑀺𑀬𑁄.

𑀫𑀼𑀢𑁆𑀢𑀸𑀲𑀫𑀼𑀤𑀸 𑀉𑀕𑁆𑀕𑀦𑁆𑀢𑁆𑀯𑀸, 𑀢𑀻𑀭𑁂 𑀯𑀝𑁆𑀝𑀺 𑀯𑀺𑀬 𑀞𑀺𑀢𑀸;

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑀲𑁆𑀲, 𑀲𑀩𑁆𑀩𑀁 𑀧𑀼𑀜𑁆𑀜𑀯𑀺𑀚𑀫𑁆𑀪𑀺𑀢𑀁.

𑀇𑀦𑁆𑀤𑀦𑀻𑀮𑀁 𑀯𑁂𑀴𑀼𑀭𑀺𑀬𑀁, 𑀮𑁄𑀳𑀺𑀢𑀗𑁆𑀓𑀫𑀡𑀺𑀥𑀺’𑀫𑁂;

𑀭𑀚𑀢𑀸𑀦𑀺 𑀧𑀦𑁂’𑀢𑀸𑀦𑀺, 𑀫𑀼𑀢𑁆𑀢𑀸 𑀢𑀸 𑀢𑀸𑀯𑀬𑀝𑁆𑀞𑀺𑀬𑁄.

𑀲𑀢𑁆𑀢𑀳𑀩𑁆𑀪𑀦𑁆𑀢𑀭𑁂𑀬𑁂𑀯, 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀳𑀭𑀼𑀁;

𑀢𑀸𑀦𑀺 𑀤𑀺𑀲𑁆𑀯𑀸 𑀧𑀢𑀻𑀢𑁄 𑀲𑁄, 𑀭𑀸𑀚𑀸 𑀇𑀢𑀺 𑀯𑀺𑀘𑀺𑀦𑁆𑀢𑀬𑀺.

𑀭𑀢𑀦𑀸𑀦𑀺 𑀅𑀦𑀕𑁆𑀖𑀸𑀦𑀺, 𑀥𑀫𑁆𑀫𑀸𑀲𑁄𑀓𑁄 𑀇𑀫𑀸𑀦𑀺𑀫𑁂;

𑀲𑀳𑀸𑀬𑁄’𑀭𑀳𑀢𑁂𑀦𑀸’𑀜𑁆𑀜𑁄, 𑀢𑀲𑁆𑀲 𑀤𑀲𑁆𑀲𑀁 𑀇𑀫𑀸𑀦’𑀢𑁄.

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑁄 𑀘, 𑀥𑀫𑁆𑀫𑀸𑀲𑁄𑀓𑁄 𑀘 𑀢𑁂 𑀇𑀫𑁂;

𑀤𑁆𑀯𑁂 𑀅𑀤𑀺𑀝𑁆𑀞𑀲𑀳𑀸𑀬𑀸𑀳𑀺, 𑀘𑀺𑀭𑀧𑁆𑀧𑀪𑀼𑀢𑀺 𑀪𑀽𑀧𑀢𑀺.

𑀪𑀸𑀕𑀺𑀦𑁂𑀬𑁆𑀬𑀁 𑀫𑀳𑀸𑀭𑀺𑀝𑁆𑀞𑀁, 𑀅𑀫𑀘𑁆𑀘𑀁 𑀧𑀫𑀼𑀔𑀁 𑀢𑀢𑁄;

𑀤𑀺𑀚𑀁 𑀅𑀫𑀘𑁆𑀘𑀁 𑀕𑀡𑀢𑀁, 𑀭𑀸𑀚𑀸 𑀢𑁂 𑀘𑀢𑀼𑀭𑁄 𑀚𑀦𑁂.

𑀤𑀽𑀢𑁄 𑀓𑀢𑁆𑀯𑀸𑀦 𑀧𑀸𑀳𑁂𑀲𑀺, 𑀩𑀮𑁄𑀖𑀧𑀭𑀺𑀯𑀸𑀭𑀺𑀢𑁂;

𑀕𑀸𑀳𑀸 𑀧𑁂𑀢𑁆𑀯𑀸 𑀅𑀦𑀕𑁆𑀖𑀸𑀦𑀺, 𑀭𑀢𑀦𑀸𑀦𑀺 𑀇𑀫𑀸𑀦𑀺 𑀲𑁄.

𑀫𑀡𑀺𑀚𑀸𑀢𑀻 𑀘 𑀢𑀺𑀲𑁆𑀲𑁄 𑀢𑀸, 𑀢𑀺𑀲𑁆𑀲𑁄 𑀘 𑀭𑀣𑀬𑀝𑁆𑀞𑀺𑀬𑁄;

𑀲𑀗𑁆𑀔𑀜𑁆𑀘 𑀤𑀓𑁆𑀔𑀺𑀡𑀸𑀯𑀢𑁆𑀢𑀁, 𑀫𑀼𑀢𑁆𑀢𑀸 𑀚𑀸𑀢𑀻 𑀘 𑀅𑀝𑁆𑀞 𑀢𑀸.

𑀆𑀭𑀼𑀬𑁆𑀳 𑀚𑀫𑁆𑀩𑀼𑀓𑁄𑀮𑀫𑁆𑀳𑀺, 𑀦𑀸𑀯𑀁 𑀲𑀢𑁆𑀢𑀤𑀺𑀦𑁂𑀦 𑀢𑁂;

𑀲𑀼𑀔𑁂𑀦 𑀢𑀺𑀢𑁆𑀣𑀁 𑀮𑀤𑁆𑀥𑀸𑀦, 𑀲𑀢𑁆𑀢𑀸𑀳𑁂𑀦 𑀢𑀢𑁄 𑀧𑀼𑀦.

𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀦𑁆𑀢𑁆𑀯𑀸𑀦, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀅𑀤𑀁𑀲𑀼 𑀧𑀡𑁆𑀡𑀸𑀓𑀸𑀭𑁂𑀢𑁂, 𑀤𑀺𑀲𑁆𑀯𑀸 𑀢𑀸𑀦𑀺 𑀧𑀲𑀻𑀤𑀺 𑀲𑁄.

𑀭𑀢𑀦𑀸𑀦𑀺’𑀤𑀺𑀲𑀸𑀦𑁂𑀢𑁆𑀣, 𑀦𑀢𑁆𑀣𑀺 𑀫𑁂 𑀇𑀢𑀺 𑀘𑀺𑀦𑁆𑀢𑀺𑀬;

𑀅𑀤𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀢𑀼𑀝𑁆𑀞𑁄’𑀭𑀺𑀝𑁆𑀞𑀲𑁆𑀲 𑀪𑀽𑀧𑀢𑀺.

𑀧𑁄𑀭𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀲𑁆𑀲, 𑀤𑀡𑁆𑀟𑀦𑀸𑀬𑀢𑀁 𑀧𑀦;

𑀅𑀤𑀸𑀲𑀺 𑀢𑀲𑁆𑀲𑀸’𑀫𑀘𑁆𑀘𑀲𑁆𑀲, 𑀲𑁂𑀝𑁆𑀞𑀺𑀢𑁆𑀢𑀁 𑀕𑀡𑀓𑀲𑁆𑀲 𑀢𑀼.

𑀢𑁂𑀲𑀁 𑀅𑀦𑀧𑁆𑀧𑀓𑁂 𑀪𑁄𑀕𑁂, 𑀤𑀢𑁆𑀯𑀸 𑀯𑀸𑀲𑀖𑀭𑀸𑀦𑀺 𑀘;

𑀫𑀳𑀸𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀦𑁆𑀢𑁄, 𑀧𑀲𑁆𑀲𑀺𑀢𑁆𑀯𑀸 𑀧𑀝𑀺𑀧𑀸𑀪𑀢𑀁.

𑀯𑀸𑀮𑀩𑀻𑀚𑀦𑀻 ¶ 𑀫𑀼𑀡𑁆𑀳𑀺𑀲𑀁, 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘 𑀧𑀸𑀤𑀼𑀓𑀁;

𑀫𑁄𑀴𑀺𑀁 𑀯𑀢𑀁 𑀲𑀧𑀸𑀫𑀗𑁆𑀕𑀁, 𑀪𑀺𑀗𑁆𑀓𑀸𑀭𑀁 𑀳𑀭𑀺𑀘𑀦𑁆𑀤𑀦𑀁.

𑀅𑀥𑁄𑀯𑀺𑀫𑀁 𑀯𑀢𑁆𑀣𑀓𑁄𑀝𑀺𑀁, 𑀫𑀳𑀕𑁆𑀖𑀁 𑀳𑀢𑁆𑀣𑀧𑀼𑀜𑁆𑀙𑀦𑀺𑀁;

𑀦𑀸𑀕𑀸’𑀳𑀝𑀁 𑀅𑀜𑁆𑀚𑀦𑀜𑁆𑀘, 𑀅𑀭𑀼𑀡𑀸𑀪𑀜𑁆𑀘 𑀫𑀢𑁆𑀢𑀺𑀓𑀁.

𑀅𑀦𑁄𑀢𑀢𑁆𑀢𑁄𑀤𑀓𑀜𑁆𑀘𑁂𑀯, 𑀕𑀗𑁆𑀕𑀸𑀲𑀮𑀺𑀮𑀫𑁂𑀯 𑀘;

𑀲𑀗𑁆𑀔𑀜𑁆𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀁, 𑀯𑀟𑁆𑀠𑀫𑀸𑀦𑀁 𑀓𑀼𑀫𑀸𑀭𑀺𑀓𑀁.

𑀳𑁂𑀫𑀪𑁄𑀚𑀦𑀓𑀡𑁆𑀟𑀜𑁆𑀘, 𑀲𑀺𑀯𑀺𑀓𑀜𑁆𑀘 𑀫𑀳𑀸𑀭𑀳𑀁;

𑀳𑀭𑀻𑀝𑀓𑀁 𑀆𑀫𑀮𑀓𑀁, 𑀫𑀳𑀕𑁆𑀖𑀁 𑀅𑀫𑀢𑁄𑀲𑀥𑀁.

𑀲𑀼𑀓𑀸𑀳𑀝𑀸𑀦𑀁 𑀲𑀸𑀮𑀻𑀦𑀁, 𑀲𑀝𑁆𑀞𑀺𑀯𑀸𑀳𑀲𑀢𑀸𑀦𑀺 𑀘;

𑀅𑀪𑀺𑀲𑁂𑀓𑁄 𑀧𑀓𑀭𑀡𑀁, 𑀧𑀭𑀺𑀯𑀸𑀭𑀯𑀺𑀲𑁂𑀲𑀺𑀢𑀁.

𑀤𑀢𑁆𑀯𑀸 𑀓𑀸𑀮𑁂 𑀪𑀳𑀸𑀬𑀲𑁆𑀲, 𑀧𑀡𑁆𑀡𑀸𑀓𑀸𑀭𑁂 𑀦𑀭𑀺𑀲𑁆𑀲𑀭𑁄;

𑀤𑀽𑀢𑁂 𑀧𑀸𑀳𑁂𑀲𑀺𑀲𑀤𑁆𑀥𑀫𑁆𑀫-𑀧𑀡𑁆𑀡𑀸𑀓𑀸𑀭𑀫𑀺𑀫𑀫𑁆𑀧𑀺𑀘.

𑀅𑀳𑀁 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀉𑀧𑀸𑀲𑀓𑀢𑁆𑀢𑀁 𑀤𑁂𑀲𑁂𑀲𑀺𑀁, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑀢𑁆𑀯𑀫𑁆𑀧𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀉𑀢𑁆𑀢𑀫𑀸𑀦𑀺 𑀦𑀭𑀼𑀢𑁆𑀢𑀫;

𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀢𑁆𑀯𑀸𑀦, 𑀲𑀤𑁆𑀥𑀸𑀬 𑀲𑀭𑀡𑀁 𑀯𑀚.

‘‘𑀓𑀭𑁄𑀣 𑀫𑁂 𑀲𑀳𑀸𑀬𑀲𑁆𑀲, 𑀅𑀪𑀺𑀲𑁂𑀓𑀁 𑀧𑀼𑀦𑁄’’ 𑀇𑀢𑀺;

𑀯𑀢𑁆𑀯𑀸 𑀲𑀳𑀬𑀸’𑀫𑀘𑁆𑀘𑁂𑀢𑁂, 𑀲𑀓𑁆𑀓𑀭𑀺𑀢𑁆𑀯𑀸 𑀘 𑀧𑁂𑀲𑀬𑀺.

𑀧𑀜𑁆𑀘𑀫𑀸𑀲𑁂 𑀯𑀲𑀺𑀢𑁆𑀯𑀸𑀦, 𑀢𑁂 𑀫𑀘𑁆𑀘𑀸’𑀢𑀺𑀯𑀲𑀓𑁆𑀓𑀢𑀸;

𑀯𑁂𑀲𑀸𑀔𑀲𑀼𑀓𑁆𑀔𑀧𑀓𑁆𑀔𑀸𑀤𑀺-𑀤𑀺𑀦𑁂 𑀤𑀽𑀢𑀸 𑀯𑀺𑀦𑀺𑀕𑁆𑀕𑀢𑀸.

𑀢𑀸𑀫𑀮𑀺𑀢𑁆𑀢𑀺𑀬𑀫𑀸𑀭𑀼𑀬𑁆𑀳, 𑀦𑀸𑀯𑀁 𑀢𑁂𑀚𑀫𑁆𑀩𑀼𑀓𑁄𑀮𑀓𑁂;

𑀑𑀭𑀼𑀬𑁆𑀳 𑀓𑀽𑀧𑀁 𑀧𑀲𑁆𑀲𑀺𑀁𑀲𑀼, 𑀧𑀢𑁆𑀯𑀸 𑀤𑁆𑀯𑀸𑀤𑀲𑀺𑀬𑀁 𑀇𑀥.

𑀅𑀤𑀁𑀲𑀼 𑀧𑀡𑁆𑀡𑀸𑀓𑀸𑀭𑁂 𑀢𑁂, 𑀤𑀽𑀢𑀸 𑀮𑀁𑀓𑀸𑀤𑀻𑀧𑀲𑁆𑀲𑀢𑁂;

𑀢𑁂𑀲𑀁 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁, 𑀮𑀁𑀓𑀸𑀧𑀢𑀺 𑀅𑀓𑀸𑀭𑀬𑀺.

𑀢𑁂 𑀫𑀕𑁆𑀕𑀲𑀺𑀭𑀫𑀸𑀲𑀲𑁆𑀲, 𑀆𑀤𑀺𑀘𑀦𑁆𑀤𑁄𑀤𑀬𑁂𑀚𑀺𑀦𑁂;

𑀅𑀪𑀺𑀲𑀺𑀢𑁆𑀢𑀜𑁆𑀘 𑀮𑀁𑀓𑀺𑀦𑁆𑀤𑀁, 𑀅𑀫𑀘𑁆𑀘𑀸 𑀲𑀸𑀫𑀺𑀪𑀢𑁆𑀢𑀺𑀦𑁄.

𑀥𑀫𑁆𑀫𑀸𑀲𑁄𑀓𑀲𑁆𑀲 𑀯𑀘𑀦𑀁, 𑀯𑀢𑁆𑀯𑀸 𑀲𑀸𑀫𑀺 𑀳𑀺𑀢𑁂𑀭𑀢𑀸;

𑀧𑀼𑀦𑁄𑀧𑀺 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀮𑀁𑀓𑀸𑀳𑀺𑀢𑀲𑀼𑀔𑁂𑀭𑀢𑀁.

𑀯𑁂𑀲𑀸𑀔𑁂 ¶ 𑀦𑀭𑀧𑀢𑀺 𑀧𑀼𑀡𑁆𑀡𑀫𑀸𑀬𑀫𑁂𑀯𑀁;

𑀤𑁂𑀯𑀸𑀦𑀁 𑀧𑀺𑀬𑀯𑀘𑀦𑁄 𑀧𑀕𑀽𑀴𑀦𑀸𑀫𑁄;

𑀮𑀁𑀓𑀸𑀬𑀁 𑀧𑀯𑀻𑀢𑀢𑀧𑀻𑀢𑀺 𑀉𑀲𑁆𑀲𑀯𑀸𑀬𑀁;

𑀅𑀢𑁆𑀢𑀸𑀦𑀁 𑀚𑀦𑀲𑀼𑀔𑀤𑁄’𑀪𑀺𑀲𑁂𑀘𑀬𑀻 𑀲𑁄𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀸𑀪𑀺𑀲𑁂𑀓𑁄𑀦𑀸𑀫

𑀣𑁂𑀭𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑁄, 𑀚𑀺𑀦𑀲𑀸𑀲𑀦 𑀚𑁄𑀢𑀓𑁄;

𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀲𑀁𑀕𑀻𑀢𑀺𑀁, 𑀧𑁂𑀓𑁆𑀔𑀫𑀸𑀦𑁄 𑀅𑀦𑀸𑀕𑀢𑀁.

𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁, 𑀧𑀘𑁆𑀘𑀦𑁆𑀢𑁂𑀲𑀼 𑀅𑀯𑁂𑀓𑁆𑀔𑀺𑀬;

𑀧𑁂𑀲𑁂𑀲𑀺 𑀓𑀢𑁆𑀢𑀺𑀓𑁂 𑀫𑀸𑀲𑁂, 𑀢𑁂𑀢𑁂 𑀣𑁂𑀭𑁂 𑀢𑀳𑀺𑀁 𑀢𑀳𑀺𑀁.

𑀣𑁂𑀭𑀁 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀁, 𑀫𑀚𑁆𑀛𑀦𑁆𑀢𑀺𑀓𑀫𑀧𑁂𑀲𑀬𑀺;

𑀅𑀧𑁂𑀲𑀬𑀻 𑀫𑀳𑀸𑀤𑁂𑀯-𑀢𑁆𑀣𑁂𑀭𑀁 𑀫𑀳𑀺𑀲𑀫𑀡𑁆𑀟𑀮𑀁.

𑀯𑀦𑀯𑀸𑀲𑀺𑀁 𑀅𑀧𑁂𑀲𑀬𑀺, 𑀣𑁂𑀭𑀁 𑀭𑀓𑁆𑀔𑀺𑀢𑀦𑀸𑀫𑀓𑀁;

𑀢𑀣𑀸’𑀧𑀭𑀦𑁆𑀢𑀓𑀁 𑀬𑁄𑀦-𑀥𑀫𑁆𑀫𑀭𑀓𑁆𑀔𑀺𑀢𑀦𑀸𑀫𑀓𑀁.

𑀫𑀳𑀸𑀭𑀝𑁆𑀞𑀁 𑀫𑀳𑀸𑀥𑀫𑁆𑀫-𑀭𑀓𑁆𑀔𑀺𑀢𑀢𑁆𑀣𑁂𑀭 𑀦𑀸𑀫𑀓𑀁;

𑀫𑀳𑀸𑀭𑀓𑁆𑀔𑀺𑀢 𑀣𑁂𑀭𑀁 𑀢𑀁, 𑀬𑁄𑀦 𑀮𑁄𑀓𑀫𑀧𑁂𑀲𑀬𑀺.

𑀧𑁂𑀲𑁂𑀲𑀺 𑀫𑀚𑁆𑀛𑀺𑀫𑀁 𑀣𑁂𑀭𑀁, 𑀳𑀺𑀫𑀯𑀦𑁆𑀢𑀧𑀤𑁂𑀲𑀓𑀁;

𑀲𑀼𑀯𑀡𑁆𑀡𑀪𑀽𑀫𑀺𑀁 𑀣𑁂𑀭𑁂 𑀤𑁆𑀯𑁂, 𑀲𑁄𑀡𑀫𑀼𑀢𑁆𑀢𑀭 𑀫𑁂𑀯 𑀘.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀢𑀁, 𑀣𑁂𑀭 𑀇𑀝𑁆𑀝𑀺𑀬𑀫𑀼𑀢𑁆𑀢𑀺𑀬𑀁;

𑀲𑀫𑁆𑀩𑀮𑀁 𑀪𑀤𑁆𑀤𑀲𑀸𑀮𑀜𑁆𑀘, 𑀲𑀓𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂.

𑀮𑀁𑀓𑀸𑀤𑀻𑀧𑁂 ¶ 𑀫𑀦𑀼𑀜𑁆𑀜𑀫𑁆𑀳𑀺, 𑀫𑀦𑀼𑀜𑁆𑀜𑀁 𑀚𑀺𑀦𑀲𑀸𑀲𑀦𑀁;

𑀧𑀢𑀺𑀝𑁆𑀞𑀸𑀧𑁂𑀣 𑀢𑀼𑀫𑁆𑀳𑁂’𑀢𑀺, 𑀧𑀜𑁆𑀘 𑀣𑁂𑀭𑁂 𑀅𑀧𑁂𑀲𑀬𑀺.

𑀢𑀤𑀸 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑁂, 𑀧𑀓𑁆𑀓𑀁 𑀲𑀲𑁆𑀲𑀁 𑀫𑀳𑀺𑀤𑁆𑀥𑀺𑀓𑁄;

𑀅𑀭𑀯𑀸𑀮𑁄 𑀦𑀸𑀕𑀭𑀸𑀚𑀸, 𑀯𑀲𑁆𑀲𑀁 𑀓𑀭𑀓𑀲𑀜𑁆𑀜𑀺𑀢𑀁.

𑀯𑀲𑁆𑀲𑀸 𑀧𑁂𑀢𑁆𑀯𑀸 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀲𑀩𑁆𑀩𑀁 𑀔𑀺𑀧𑀢𑀺𑀤𑀸𑀭𑀼𑀡𑁄;

𑀢𑀢𑁆𑀭 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄, 𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀬𑀲𑀸.

𑀅𑀭𑀯𑀸𑀮𑀤𑀳𑁂𑀯𑀸𑀭𑀺-𑀧𑀺𑀝𑁆𑀞𑁂 𑀘𑀗𑁆𑀓𑀫𑀦𑀸𑀤𑀺𑀓𑁂;

𑀅𑀓𑀸𑀲𑀺 𑀤𑀺𑀲𑁆𑀯𑀸 𑀢𑀁𑀦𑀸𑀕𑀸, 𑀭𑀼𑀝𑁆𑀞𑀸𑀭𑀜𑁆𑀜𑁄 𑀦𑀺𑀯𑁂𑀤𑀬𑀼𑀁.

𑀦𑀸𑀕𑀭𑀸𑀚𑀸’𑀣𑀭𑀼𑀝𑁆𑀞𑁄 𑀲𑁄, 𑀯𑀺𑀯𑀺𑀥𑀸 𑀪𑀺𑀲𑀺𑀓𑀸’𑀓𑀭𑀺;

𑀯𑀸𑀢𑀸 𑀫𑀳𑀦𑁆𑀢𑀸 𑀯𑀸𑀬𑀦𑁆𑀢𑀺, 𑀫𑁂𑀖𑁄 𑀕𑀚𑁆𑀚𑀢𑀺 𑀯𑀲𑁆𑀲𑀢𑀺.

𑀨𑀮𑀦𑁆𑀢𑁆𑀬’𑀲𑀦𑀺𑀬𑁄 𑀯𑀺𑀚𑁆𑀚𑀼, 𑀦𑀺𑀘𑁆𑀙𑀭𑀦𑁆𑀢𑀺 𑀢𑀢𑁄 𑀢𑀢𑁄;

𑀫𑀳𑀺𑀭𑀼𑀳𑀸 𑀧𑀩𑁆𑀩𑀢𑀸𑀦𑀁, 𑀓𑀽𑀝𑀸𑀦𑀺 𑀧𑀧𑀢𑀦𑁆𑀢𑀺 𑀘.

𑀯𑀺𑀭𑀽𑀧𑀭𑀽𑀧𑀸 𑀦𑀸𑀕𑀸 𑀘, 𑀪𑀺𑀁𑀲𑀸𑀧𑁂𑀦𑁆𑀢𑀺 𑀲𑀫𑀦𑁆𑀢𑀢𑁄;

𑀲𑀬𑀁 𑀥𑀼𑀧𑀸𑀬𑀢𑀺 𑀚𑀮𑀢𑀺, 𑀅𑀓𑁆𑀓𑁄𑀲𑀦𑁆𑀢𑁄 𑀅𑀦𑁂𑀓𑀥𑀸.

𑀲𑀩𑁆𑀩𑀁 𑀢𑀁 𑀇𑀤𑁆𑀥𑀺𑀬𑀸 𑀣𑁂𑀭𑁄, 𑀧𑀝𑀺𑀩𑀸𑀳𑀺𑀬 𑀪𑀺𑀁𑀲𑀦𑀁;

𑀅𑀯𑁄𑀘 𑀦𑀸𑀕𑀭𑀸𑀚𑀁 𑀢𑀁, 𑀤𑀲𑁆𑀲𑁂𑀦𑁆𑀢𑁄 𑀩𑀮𑀫𑀼𑀢𑁆𑀢𑀫𑀁.

𑀲𑀤𑁂𑀯 𑀓𑁄𑀧𑀺 𑀘𑁂 𑀮𑁄𑀓𑁄, 𑀆𑀕𑀦𑁆𑀢𑁆𑀯𑀸 𑀢𑀸𑀲𑀬𑁂𑀬𑁆𑀬 𑀫𑀁;

𑀦 𑀫𑁂 𑀧𑀝𑀺𑀩𑀮𑁄 𑀅𑀲𑁆𑀲, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁.

𑀲𑀘𑁂’𑀧𑀺 𑀢𑁆𑀯𑀁 𑀫𑀳𑀺𑀁 𑀲𑀩𑁆𑀩𑀁, 𑀲𑀲𑀫𑀼𑀤𑁆𑀤𑀁 𑀲𑀧𑀩𑁆𑀩𑀢𑀁;

𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀦𑀸𑀕, 𑀔𑀺𑀧𑁂𑀬𑁆𑀬𑀸𑀲𑀺 𑀫𑀫𑁄’𑀧𑀭𑀺.

𑀦𑁂𑀯 𑀫𑁂 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁;

𑀅𑀜𑁆𑀜𑀤𑀢𑁆𑀣𑀼 𑀢𑀯𑁂‘𑀯’𑀲𑁆𑀲, 𑀯𑀺𑀖𑀸𑀢𑁄 𑀉𑀭𑀕𑀸𑀥𑀺𑀧.

𑀢𑀁𑀲𑀼𑀢𑁆𑀯𑀸 𑀦𑀺𑀫𑁆𑀫𑀤𑀲𑁆𑀲’𑀲𑁆𑀲, 𑀣𑁂𑀭𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀢𑀢𑁄 𑀲𑀭𑀡𑀲𑀻𑀮𑁂𑀲𑀼, 𑀦𑀸𑀕𑀭𑀸𑀚𑀸 𑀧𑀢𑀺𑀝𑁆𑀞𑀳𑀺.

𑀢𑀣𑁂𑀯 𑀘𑀢𑀼𑀭𑀸𑀲𑀻𑀢𑀺-𑀲𑀳𑀲𑁆𑀲𑀸𑀦𑀺 𑀪𑀼𑀚𑀗𑁆𑀕𑀫𑀸;

𑀳𑀺𑀫𑀯𑀦𑁆𑀢𑁂𑀯 𑀕𑀦𑁆𑀥𑀩𑁆𑀩𑀸, 𑀬𑀓𑁆𑀔𑀸 𑀓𑀼𑀫𑁆𑀪𑀡𑁆𑀟𑀓𑀸 𑀩𑀳𑀽.

𑀧𑀡𑁆𑀟𑀓𑁄 𑀦𑀸𑀫 𑀬𑀓𑁆𑀔𑁄 𑀢𑀼, 𑀲𑀤𑁆𑀥𑀺𑀁𑀳𑀸𑀭𑀺𑀢 𑀬𑀓𑁆𑀔𑀺𑀬𑀸;

𑀧𑀜𑁆𑀘𑀲𑀢𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀨𑀮𑀁 𑀧𑀸𑀧𑀼𑀡𑀺 𑀆𑀤𑀺𑀓𑀁.

‘‘𑀫𑀸’’𑀤𑀸𑀦𑀺 ¶ 𑀓𑁄𑀥𑀁 𑀚𑀦𑀺𑀬𑀺𑀢𑁆𑀣, 𑀇𑀢𑁄 𑀉𑀤𑁆𑀥𑀁 𑀬𑀣𑀸𑀧𑀼𑀭𑁂;

𑀲𑀲𑀖𑀸𑀢𑀜𑁆𑀘 𑀫𑀸’𑀓𑀢𑁆𑀣, 𑀲𑀼𑀔𑀓𑀸𑀫𑀸𑀳𑀺 𑀧𑀸𑀡𑀺𑀦𑁄.

𑀓𑀭𑁄𑀣 𑀫𑁂𑀢𑁆𑀢𑀁 𑀲𑀢𑁆𑀢𑁂𑀲𑀼, 𑀯𑀲𑀦𑁆𑀢𑀼 𑀫𑀦𑀼𑀚𑀸 𑀲𑀼𑀔𑀁;

𑀇𑀢𑀺 𑀢𑁂𑀦𑀸’𑀦𑀼𑀲𑀺𑀝𑁆𑀞𑀸 𑀢𑁂, 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀲𑀼𑀁.

𑀢𑀢𑁄 𑀭𑀢𑀦𑀧𑀮𑁆𑀮𑀗𑁆𑀓𑁂, 𑀣𑁂𑀭𑀁 𑀲𑁄 𑀉𑀭𑀕𑀸𑀥𑀺𑀧𑁄;

𑀦𑀺𑀲𑀻𑀤𑀸𑀧𑀺𑀬 𑀅𑀝𑁆𑀞𑀸𑀲𑀺, 𑀩𑀻𑀚𑀫𑀸𑀦𑁄 𑀢𑀤𑀦𑁆𑀢𑀺𑀓𑁂.

𑀢𑀤𑀸 𑀓𑀲𑁆𑀫𑀻𑀭𑀕𑀦𑁆𑀥𑀸𑀭-𑀯𑀸𑀲𑀺𑀦𑁄 𑀫𑀦𑀼𑀚𑀸’𑀕𑀢𑀸;

𑀦𑀸𑀕𑀭𑀸𑀚𑀲𑁆𑀲 𑀧𑀽𑀚𑀢𑁆𑀣𑀁, 𑀫𑀦𑁆𑀢𑁆𑀯𑀸 𑀣𑁂𑀭𑀁 𑀫𑀳𑀺𑀤𑁆𑀥𑀺𑀓𑀁.

𑀣𑁂𑀭𑀫𑁂𑀯𑀸’𑀪𑀺 𑀯𑀸𑀤𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀲𑀼𑀁;

𑀢𑁂𑀲𑀁 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀣𑁂𑀭𑁄 𑀆𑀲𑀺𑀯𑀺𑀲𑁄𑀧𑀫𑀁.

𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀲𑀢𑀲𑀳𑀲𑁆𑀲 𑀧𑀼𑀭𑀺𑀲𑀸, 𑀧𑀩𑁆𑀩𑀚𑀼𑀁 𑀣𑁂𑀭𑀲𑀦𑁆𑀢𑀺𑀓𑁂.

𑀢𑀢𑁄𑀧𑁆𑀧𑀪𑀼𑀧𑀢𑀺 𑀓𑀲𑁆𑀫𑀺𑀭-𑀕𑀦𑁆𑀥𑀸𑀭𑀁 𑀢𑁂 𑀇𑀤𑀸𑀦𑀺𑀧𑀺;

𑀆𑀲𑀼𑀁 𑀓𑀸𑀲𑀸𑀯 𑀧𑀚𑁆𑀚𑁄𑀢𑀸, 𑀯𑀢𑁆𑀣𑀼𑀢𑁆𑀢𑀬𑀧𑀭𑀸𑀬𑀦𑀸.

𑀕𑀦𑁆𑀢𑁆𑀯𑀸 𑀫𑀳𑀸𑀤𑁂𑀯𑀢𑁆𑀣𑁂𑀭𑁄, 𑀤𑁂𑀲𑀁 𑀫𑀳𑀺𑀲𑀫𑀡𑁆𑀟𑀮𑀁;

𑀲𑀼𑀢𑁆𑀢𑀦𑁆𑀢𑀁 𑀤𑁂𑀯𑀤𑀽𑀢𑀁 𑀲𑁄, 𑀓𑀣𑁂𑀲𑀺 𑀚𑀦𑀫𑀚𑁆𑀛𑀕𑁄.

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀼𑀁;

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀧𑀩𑁆𑀩𑀚𑀺𑀁𑀲𑀼 𑀢𑀤𑀦𑁆𑀢𑀺𑀓𑁂.

𑀕𑀦𑁆𑀢𑁆𑀯𑀸’𑀣 𑀭𑀓𑁆𑀔𑀺𑀢𑀢𑁆𑀣𑁂𑀭𑁄, 𑀯𑀦𑀯𑀸𑀲𑀺𑀁 𑀦𑀪𑁂 𑀞𑀺𑀢𑁄;

𑀲𑀁𑀬𑀼𑀢𑁆𑀢𑀫𑀦𑀫𑀢𑀕𑁆𑀕𑀁, 𑀓𑀣𑁂𑀲𑀺 𑀚𑀦𑀫𑀚𑁆𑀛𑀕𑁄.

𑀲𑀝𑁆𑀞𑀺 𑀦𑀭𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀲𑀢𑁆𑀢𑀢𑀺𑀁𑀲 𑀲𑀳𑀲𑁆𑀲𑀸𑀦𑀺, 𑀧𑀩𑁆𑀩𑀚𑀺𑀁𑀲𑀼 𑀢𑀤𑀦𑁆𑀢𑀺𑀓𑁂.

𑀯𑀺𑀳𑀸𑀭𑀸𑀦𑀁 𑀧𑀜𑁆𑀘𑀲𑀢𑀁, 𑀢𑀲𑁆𑀫𑀺𑀁𑀤𑁂𑀲𑁂 𑀧𑀢𑀺𑀝𑁆𑀞𑀳𑀺;

𑀧𑀢𑀺𑀝𑁆𑀞𑀸𑀧𑁂𑀲𑀺 𑀢𑀢𑁆𑀣𑁂𑀯𑀁, 𑀣𑁂𑀭𑁄 𑀲𑁄 𑀚𑀺𑀦𑀲𑀸𑀲𑀦𑀁.

𑀕𑀦𑁆𑀢𑁆𑀯𑀸’𑀧𑀭𑀦𑁆𑀢𑀓𑀁 𑀣𑁂𑀭𑁄, 𑀬𑁄𑀦𑀓𑁄 𑀥𑀫𑁆𑀫𑀭𑀓𑁆𑀔𑀺𑀢𑁄;

𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀁 𑀲𑀼𑀢𑁆𑀢𑀁, 𑀓𑀣𑁂𑀢𑁆𑀯𑀸 𑀚𑀦𑀫𑀚𑁆𑀛𑀕𑁄.

𑀲𑀢𑁆𑀢𑀢𑀺𑀁𑀲 𑀲𑀳𑀲𑁆𑀲𑀸𑀦𑀺, 𑀧𑀸𑀡𑁂 𑀢𑀢𑁆𑀣 𑀲𑀫𑀸𑀕𑀢𑁂;

𑀥𑀫𑁆𑀫𑀸𑀫𑀢𑀫𑀧𑀸𑀬𑁂𑀲𑀺, 𑀥𑀫𑁆𑀫𑀸 𑀥𑀫𑁆𑀫𑁂𑀲𑀼 𑀓𑁄𑀯𑀺𑀤𑁄.

𑀧𑀼𑀭𑀺𑀲𑀸𑀦𑀜𑁆𑀘 𑀲𑀳𑀲𑁆𑀲𑀜𑁆𑀘, 𑀇𑀢𑁆𑀣𑀺𑀬𑁄 𑀘 𑀢𑀢𑁄’𑀥𑀺𑀓𑀸;

𑀔𑀢𑁆𑀢𑀺𑀬𑀸𑀦𑀁 𑀓𑀼𑀮𑀸𑀬𑁂𑀯, 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀧𑀩𑁆𑀩𑀚𑀼𑀁.

𑀫𑀳𑀸𑀭𑀝𑁆𑀞𑀫𑀺𑀲𑀻 ¶ 𑀕𑀦𑁆𑀢𑁆𑀯𑀸, 𑀲𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑁄;

𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀯𑁆𑀳𑀁, 𑀚𑀸𑀢𑀓𑀁 𑀓𑀣𑀬𑀻 𑀢𑀳𑀺𑀁.

𑀫𑀕𑁆𑀕𑀨𑀮𑀁 𑀧𑀸𑀧𑀼𑀡𑀺𑀁𑀲𑀼, 𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀓𑀸;

𑀢𑁂𑀭𑀲𑀦𑁆𑀢𑀼 𑀲𑀳𑀲𑁆𑀲𑀸𑀦𑀺, 𑀧𑀩𑁆𑀩𑀚𑀺𑀁𑀲𑀼 𑀢𑀤𑀦𑁆𑀢𑀺𑀓𑁂.

𑀕𑀦𑁆𑀢𑁆𑀯𑀸𑀦 𑀬𑁄𑀦𑀯𑀺𑀲𑀬𑀁, 𑀲𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑁄 𑀇𑀲𑀺;

𑀓𑀸𑀴𑀓𑀸𑀭𑀸𑀫 𑀲𑀼𑀢𑁆𑀢𑀦𑁆𑀢𑀁, 𑀓𑀣𑁂𑀲𑀺 𑀚𑀦𑀫𑀚𑁆𑀛𑀕𑁄.

𑀧𑀸𑀡𑀲𑀢 𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀘 𑀲𑀢𑁆𑀢𑀢𑀺;

𑀫𑀕𑁆𑀕𑀨𑀮𑀁 𑀧𑀸𑀧𑀼𑀡𑀺𑀁𑀲𑀼, 𑀤𑀲 𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀼𑀁.

𑀕𑀦𑁆𑀢𑁆𑀯𑀸 𑀘𑀢𑀽𑀳𑀺 𑀣𑁂𑀭𑁂𑀳𑀺, 𑀤𑁂𑀲𑁂𑀲𑀺 𑀫𑀚𑁆𑀛𑀺𑀫𑁄 𑀇𑀲𑀺;

𑀳𑀺𑀫𑀯𑀦𑁆𑀢𑀧𑀤𑁂𑀲𑀲𑁆𑀫𑀺𑀁, 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀁.

𑀫𑀕𑁆𑀕𑀨𑀮𑀧𑀸𑀧𑀼𑀡𑀺𑀁𑀲𑀼, 𑀅𑀲𑀻𑀢𑀺𑀧𑀸𑀡 𑀓𑁄𑀝𑀺𑀬𑁄;

𑀯𑀺𑀲𑀼𑀁 𑀢𑁂 𑀧𑀜𑁆𑀘𑀭𑀝𑁆𑀞𑀸𑀦𑀺, 𑀧𑀜𑁆𑀘𑀣𑁂𑀭𑀸 𑀧𑀲𑀸𑀤𑀬𑀼𑀁.

𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀺, 𑀏𑀓𑁂𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂;

𑀧𑀩𑁆𑀩𑀚𑀺𑀁𑀲𑀼 𑀧𑀲𑀸𑀤𑁂𑀦, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥 𑀲𑀸𑀲𑀦𑁂.

𑀲𑀤𑁆𑀥𑀺𑀁 𑀉𑀢𑁆𑀢𑀭𑀣𑁂𑀭𑁂𑀦, 𑀲𑁄𑀡𑀢𑁆𑀣𑁂𑀭𑁄 𑀫𑀳𑀺𑀤𑁆𑀥𑀺𑀓𑁄;

𑀲𑀼𑀯𑀡𑁆𑀡𑀪𑀽𑀫𑀺𑀁 𑀅𑀕𑀫𑀸, 𑀢𑀲𑁆𑀫𑀺𑀁 𑀢𑀼 𑀲𑀫𑀬𑁂 𑀧𑀦.

𑀚𑀸𑀢𑁂 𑀚𑀸𑀢𑁂 𑀭𑀸𑀚𑀕𑁂𑀳𑁂, 𑀤𑀸𑀭𑀓𑁂 𑀭𑀼𑀤𑁆𑀤𑀭𑀓𑁆𑀔𑀲𑀻;

𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀪𑀓𑁆𑀔𑀺𑀢𑁆𑀯𑀸 𑀧𑀦 𑀕𑀘𑁆𑀙𑀢𑀺.

𑀣𑁂𑀭𑁂 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸,

𑀇𑀢𑀺 𑀘𑀺𑀦𑁆𑀢𑀺𑀬 𑀫𑀸𑀭𑁂𑀢𑀼𑀁, 𑀲𑀸 𑀬𑀼𑀯𑀸 𑀉𑀧𑀲𑀗𑁆𑀓𑀫𑀼𑀁;

‘‘𑀓𑀺𑀫𑁂𑀢𑀦𑁆𑀢𑀺’’𑀘 𑀧𑀼𑀘𑁆𑀙𑀺𑀢𑁆𑀯𑀸, 𑀣𑁂𑀭𑀁 𑀢𑁂 𑀏𑀯 𑀫𑀸𑀳𑀼𑀢𑁂.

𑀲𑀫𑀡𑀸 𑀫𑀬𑀁 𑀳𑀺𑀫𑀯𑀦𑁆𑀢𑀸, 𑀦 𑀭𑀓𑁆𑀔𑀲𑀺 𑀲𑀳𑀸𑀬𑀓𑀸;

𑀭𑀓𑁆𑀔𑀲𑀻 𑀲𑀸 𑀲𑀧𑀭𑀺𑀲𑀸, 𑀦𑀺𑀓𑁆𑀔𑀦𑁆𑀢𑀸 𑀳𑁄𑀢𑀺 𑀲𑀸𑀕𑀭𑀸.

𑀢𑀁 𑀤𑀺𑀲𑁆𑀯𑀸𑀦 𑀫𑀳𑀸𑀭𑀸𑀯𑀁, 𑀯𑀺𑀭𑀯𑀺𑀁𑀲𑀼 𑀫𑀳𑀸𑀚𑀦𑀸;

𑀤𑀺𑀕𑀼𑀡𑁂 𑀭𑀓𑁆𑀔𑀲𑁂 𑀣𑁂𑀭𑁄, 𑀫𑀸𑀧𑀬𑀺𑀢𑁆𑀯𑀸 𑀪𑀬𑀸𑀦𑀓𑁂.

𑀢𑀁 ¶ 𑀭𑀓𑁆𑀔𑀲𑀺𑀁 𑀲𑀧𑀭𑀺𑀲𑀁, 𑀧𑀭𑀺𑀓𑁆𑀔𑀺𑀧𑀺 𑀲𑀫𑀦𑁆𑀢𑀢𑁄;

𑀇𑀤𑀁 𑀇𑀫𑁂𑀳𑀺 𑀉𑀤𑁆𑀥𑀦𑁆𑀢𑀺, 𑀫𑀦𑁆𑀢𑁆𑀯𑀸 𑀪𑀻𑀢𑀸 𑀧𑀮𑀸𑀬𑀺𑀲𑀸.

𑀢𑀲𑁆𑀲 𑀤𑁂𑀲𑀲𑁆𑀲 𑀆𑀭𑀓𑁆𑀔𑀁, 𑀞𑀧𑁂𑀢𑁆𑀯𑀸𑀦 𑀲𑀫𑀦𑁆𑀢𑀢𑁄;

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀣𑁂𑀭𑁄, 𑀩𑁆𑀭𑀳𑁆𑀫𑀚𑀸𑀮𑀫𑀤𑁂𑀲𑀬𑀺.

𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼, 𑀅𑀝𑁆𑀞𑀁𑀲𑀼 𑀩𑀳𑀯𑁄 𑀚𑀦𑀸;

𑀲𑀝𑁆𑀞𑀺𑀬𑀸 𑀢𑀼 𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀧𑀩𑁆𑀩𑀚𑀼𑀁 𑀓𑀼𑀮𑀤𑀸𑀭𑀓𑀸;

𑀧𑀩𑁆𑀩𑀚𑀺𑀁𑀲𑀼 𑀤𑀺𑀬𑀟𑁆𑀠𑀦𑁆𑀢𑀼, 𑀲𑀳𑀲𑁆𑀲𑀁 𑀓𑀼𑀮𑀥𑀻𑀢𑀭𑁄.

𑀢𑀢𑁄𑀧𑁆𑀧𑀪𑀼𑀢𑀺 𑀲𑀜𑁆𑀚𑀸𑀢𑁂, 𑀭𑀸𑀚𑀕𑁂𑀳𑁂 𑀓𑀼𑀫𑀸𑀭𑀓𑁂;

𑀦𑀸𑀫𑀁 𑀓𑀭𑀺𑀁𑀲𑀼 𑀭𑀸𑀚𑀸𑀦𑁄, 𑀲𑁄𑀡𑀼𑀢𑁆𑀢𑀭 𑀲𑀦𑀸𑀫𑀓𑁂.

𑀫𑀳𑀸𑀚𑀦𑀲𑁆𑀲𑀸𑀧𑀺 𑀚𑀺𑀦𑀲𑁆𑀲 𑀓𑀟𑁆𑀠𑀦𑀁;

𑀯𑀺𑀳𑀸𑀬 𑀧𑀢𑁆𑀢𑀁 𑀅𑀫𑀢𑀁 𑀲𑀼𑀔𑀫𑁆𑀧𑀺𑀢𑁂;

𑀓𑀭𑀺𑀁𑀲𑀼 𑀮𑁄𑀓𑀲𑁆𑀲 𑀳𑀺𑀢𑀁 𑀢𑀳𑀺𑀁 𑀢𑀳𑀺𑀁;

𑀪𑀯𑁂𑀬𑁆𑀬 𑀬𑁄 𑀮𑁄𑀓𑀳𑀺𑀢𑁂 𑀧𑀫𑀸𑀤𑀯𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀦𑀸𑀦𑀸𑀤𑁂𑀲𑀧𑀲𑀸𑀤𑁄 𑀦𑀸𑀫 𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀲𑁄, 𑀢𑀤𑀸 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄;

𑀉𑀧𑀚𑁆𑀛𑀸𑀬𑁂𑀦 𑀆𑀡𑀢𑁆𑀢𑁄, 𑀲𑀗𑁆𑀖𑁂𑀦 𑀘 𑀫𑀳𑀸𑀫𑀢𑀻.

𑀢𑀤𑀦𑁆𑀢𑀭𑁂 ¶ 𑀜𑀸𑀢𑀺𑀕𑀡𑀁, 𑀤𑀝𑁆𑀞𑀼𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀉𑀧𑀚𑁆𑀛𑀸𑀬𑀜𑁆𑀘 𑀲𑀗𑁆𑀖𑀜𑁆𑀘, 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙 𑀪𑀽𑀧𑀢𑀺𑀁.

𑀆𑀤𑀸𑀬 𑀘𑀢𑀼𑀭𑁄 𑀣𑁂𑀭𑁂, 𑀲𑀗𑁆𑀖𑀫𑀺𑀢𑁆𑀢𑀸𑀬 𑀅𑀢𑁆𑀭𑀚𑀁;

𑀲𑀼𑀫𑀦𑀁 𑀲𑀸𑀫𑀡𑁂𑀭𑀜𑁆𑀘, 𑀙𑀴𑀸𑀪𑀺𑀜𑁆𑀜𑀁 𑀫𑀳𑀺𑀤𑁆𑀥𑀺𑀓𑀁.

𑀜𑀸𑀢𑀻𑀦𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁, 𑀅𑀕𑀫𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀁;

𑀢𑀢𑁄 𑀢𑀢𑁆𑀣 𑀘𑀭𑀦𑁆𑀢𑀲𑁆𑀲, 𑀙𑀫𑁆𑀫𑀸𑀲𑀸 𑀲𑀫𑀢𑀺𑀓𑁆𑀓𑀫𑀼𑀁.

𑀓𑀫𑁂𑀦 𑀯𑁂𑀤𑀺𑀲𑀕𑀺𑀭𑀺𑀁, 𑀦𑀕𑀭𑀁 𑀫𑀸𑀢𑀼𑀤𑁂𑀯𑀺𑀬𑀸;

𑀲𑀫𑁆𑀧𑀢𑁆𑀯𑀸 𑀫𑀢𑀭𑀁 𑀧𑀲𑁆𑀲𑀺, 𑀤𑁂𑀯𑀻 𑀤𑀺𑀲𑁆𑀯𑀸 𑀧𑀺𑀬𑀁 𑀲𑀼𑀢𑀁.

𑀪𑁄𑀚𑀬𑀺𑀢𑁆𑀯𑀸 𑀲𑀧𑀭𑀺𑀲𑀁, 𑀅𑀢𑁆𑀢𑀦𑀸𑀬𑁂𑀯 𑀓𑀸𑀭𑀺𑀢𑀁;

𑀯𑀺𑀳𑀸𑀭𑀁 𑀘𑁂𑀢𑀺𑀬𑀕𑀺𑀭𑀺𑀁, 𑀣𑁂𑀭𑀁 𑀆𑀭𑁄𑀧𑀬𑀻 𑀲𑀼𑀪𑀁.

𑀅𑀯𑀦𑁆𑀢𑀺𑀭𑀝𑁆𑀞𑀁 𑀪𑀼𑀜𑁆𑀚𑀦𑁆𑀢𑁄, 𑀧𑀺𑀢𑀭𑀸 𑀤𑀺𑀦𑁆𑀦𑀫𑀢𑁆𑀢𑀦𑁄;

𑀲𑁄 𑀅𑀲𑁄𑀓 𑀓𑀼𑀫𑀸𑀭𑁄 𑀳𑀺, 𑀉𑀚𑁆𑀚𑁂𑀦𑀻𑀕𑀫𑀦𑀸 𑀧𑀼𑀭𑀸.

𑀯𑁂𑀤𑀺𑀲𑁂 𑀦𑀕𑀭𑁂 𑀯𑀸𑀲𑀁, 𑀉𑀧𑀕𑀦𑁆𑀢𑁆𑀯𑀸 𑀢𑀳𑀺𑀁 𑀲𑀼𑀪𑀁;

𑀤𑁂𑀯𑀺𑀦𑁆𑀦𑀸𑀫 𑀮𑀪𑀺𑀢𑁆𑀯𑀸𑀦, 𑀓𑀼𑀫𑀸𑀭𑀺𑀁 𑀲𑁂𑀝𑁆𑀞𑀺𑀥𑀻𑀢𑀭𑀁.

𑀲𑀁𑀯𑀸𑀲𑀁 𑀢𑀸𑀬 𑀓𑀧𑁆𑀧𑁂𑀲𑀺, 𑀕𑀩𑁆𑀪𑀁 𑀕𑀡𑁆𑀳𑀺𑀬 𑀢𑁂𑀦 𑀲𑀸;

𑀉𑀚𑁆𑀚𑁂𑀦𑀺𑀬𑀁 𑀓𑀼𑀫𑀸𑀭𑀁 𑀢𑀁, 𑀫𑀳𑀺𑀦𑁆𑀤𑀁 𑀚𑀦𑀬𑀻 𑀲𑀼𑀪𑀁.

𑀯𑀲𑁆𑀲𑀤𑁆𑀯𑀬𑀫𑀢𑀺𑀓𑁆𑀓𑀫𑁆𑀫, 𑀲𑀗𑁆𑀖𑀫𑀺𑀢𑁆𑀢𑀜𑁆𑀘 𑀥𑀻𑀢𑀭𑀁;

𑀢𑀲𑁆𑀫𑀺𑀁 𑀓𑀸𑀮𑁂 𑀯𑀲𑀢𑀺 𑀲𑀸, 𑀯𑁂𑀤𑀺𑀲𑁂 𑀦𑀕𑀭𑁂 𑀢𑀳𑀺𑀁.

𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀸𑀮𑀜𑁆𑀜𑀽 𑀇𑀢𑀺 𑀘𑀺𑀦𑁆𑀢𑀬𑀺;

𑀧𑀺𑀢𑀭𑀸 𑀫𑁂 𑀲𑀫𑀸𑀡𑀢𑁆𑀢𑀁, 𑀅𑀪𑀺𑀲𑁂𑀓 𑀫𑀳𑀼𑀲𑁆𑀲𑀯𑀁.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀫𑀳𑀸𑀭𑀸𑀚𑀸’𑀦𑀼𑀪𑁄𑀢𑀼 𑀘;

𑀯𑀢𑁆𑀣𑀼𑀢𑁆𑀢𑀬𑀕𑀼𑀡𑁂 𑀘𑀸𑀧𑀺, 𑀲𑀼𑀢𑁆𑀯𑀸 𑀚𑀸𑀦𑀸𑀢𑀼 𑀤𑀽𑀳𑀢𑁄.

𑀆𑀭𑁄𑀳𑀢𑀼 𑀫𑀺𑀲𑁆𑀲𑀦𑀕𑀁, 𑀚𑁂𑀝𑁆𑀞𑀫𑀸𑀲𑀲𑁆𑀲𑀼’𑀧𑁄𑀲𑀣𑁂;

𑀢𑀤𑀳𑁂𑀯 𑀕𑀫𑀺𑀲𑁆𑀲𑀸𑀫, 𑀮𑀁𑀓𑀸𑀤𑀻𑀧𑀯𑀭𑀁 𑀫𑀬𑀁.

𑀫𑀳𑀺𑀦𑁆𑀤𑁄 𑀉𑀧𑀲𑀗𑁆𑀓𑀫𑁆𑀫, 𑀫𑀳𑀺𑀦𑁆𑀤𑀢𑁆𑀣𑁂𑀭 𑀫𑀼𑀢𑁆𑀢𑀫𑀁;

𑀬𑀸𑀳𑀺 𑀮𑀁𑀓𑀁 𑀧𑀲𑀸𑀤𑁂𑀢𑀼𑀁, 𑀲𑀫𑁆𑀩𑀼𑀤𑁆𑀥𑁂𑀦𑀸’𑀲𑀺 𑀩𑁆𑀬𑀸𑀓𑀢𑁄.

𑀫𑀬𑀫𑁆𑀧𑀺 𑀢𑀢𑁆𑀣𑀼𑀧𑀢𑁆𑀣𑀫𑁆𑀪𑀸, 𑀪𑀯𑀺𑀲𑁆𑀲𑀸𑀫𑀸’𑀢𑀺 𑀅𑀩𑁆𑀭𑀯𑀺;

𑀤𑁂𑀯𑀺𑀬𑀸 𑀪𑀕𑀺𑀦𑀻 𑀥𑀻𑀢𑀼-𑀧𑀼𑀢𑁆𑀢𑁄 𑀪𑀡𑁆𑀟𑀼𑀓 𑀦𑀸𑀫𑀓𑁄.

𑀣𑁂𑀭𑁂𑀦 𑀤𑁂𑀯𑀺𑀬𑀸 𑀥𑀫𑁆𑀫𑀁, 𑀲𑀼𑀢𑁆𑀯𑀸 𑀤𑁂𑀲𑀺𑀢𑀫𑁂𑀯 𑀢𑀼;

𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸, 𑀯𑀲𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀢𑀢𑁆𑀣 ¶ 𑀫𑀸𑀲𑀁 𑀯𑀲𑀺𑀢𑁆𑀯𑀸𑀦, 𑀚𑁂𑀝𑁆𑀞𑀫𑀸𑀲𑀲𑁆𑀲𑀼’ 𑀧𑁄𑀲𑀣𑁂;

𑀣𑁂𑀭𑁄 𑀘𑀢𑀽𑀳𑀺 𑀣𑁂𑀭𑁂𑀳𑀺, 𑀲𑀼𑀫𑀦𑁂𑀦𑀸’𑀣 𑀪𑀡𑁆𑀟𑀼𑀦𑀸.

𑀲𑀤𑁆𑀥𑀺𑀁 𑀢𑁂𑀦 𑀕𑀳𑀝𑁆𑀞𑁂𑀦, 𑀦 𑀭𑀢𑁄 𑀜𑀸𑀢𑀺𑀳𑁂𑀢𑀼𑀦𑀸;

𑀢𑀲𑁆𑀫𑀸 𑀯𑀺𑀳𑀸𑀭𑀸 𑀆𑀓𑀸𑀲𑀁, 𑀉𑀕𑁆𑀕𑀦𑁆𑀢𑁆𑀯𑀸 𑀲𑁄 𑀫𑀳𑀺𑀤𑁆𑀥𑀺𑀓𑁄.

𑀔𑀡𑁂𑀦𑁂𑀯 𑀇𑀥𑀸𑀕𑀫𑁆𑀫, 𑀭𑀫𑁆𑀫𑁂 𑀫𑀺𑀲𑁆𑀲𑀓 𑀧𑀩𑁆𑀩𑀢𑁂;

𑀅𑀝𑁆𑀞𑀸𑀲𑀺 𑀯𑀺𑀮𑀼𑀓𑀽𑀝𑀫𑁆𑀳𑀺, 𑀭𑀼𑀘𑀺𑀭𑀫𑁆𑀩𑀢𑁆𑀣𑀮𑁂 𑀯𑀭𑁂.

𑀮𑀁𑀓𑀸𑀧𑀲𑀸𑀤 𑀕𑀼𑀡𑁂𑀦 𑀯𑀺𑀬𑀸𑀓𑀢𑁄 𑀲𑁄;

𑀮𑀁𑀓𑀸𑀳𑀺𑀢𑀸𑀬 𑀫𑀼𑀦𑀺𑀦𑀸 𑀲𑀬𑀺𑀢𑁂𑀦 𑀅𑀦𑁆𑀢𑁂;

𑀮𑀁𑀓𑀸𑀬 𑀲𑀢𑁆𑀣𑀼𑀲𑀤𑀺𑀲𑁄 𑀳𑀺𑀢𑀳𑁂𑀢𑀼 𑀢𑀲𑁆𑀲𑀸;

𑀮𑀁𑀓𑀸𑀫𑀭𑀽𑀳𑀺 𑀫𑀳𑀺𑀢𑁄’𑀪𑀺𑀦𑀺𑀲𑀻𑀤𑀺 𑀢𑀢𑁆𑀢𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀭𑀸𑀚𑀸 𑀲𑀮𑀺𑀮𑀓𑀻𑀴𑀺𑀢𑀁;

𑀤𑀢𑁆𑀯𑀸 𑀦𑀕𑀭𑀯𑀸𑀲𑀻𑀦𑀁, 𑀫𑀺𑀕𑀯𑀁 𑀓𑀻𑀴𑀺𑀢𑀼𑀁 𑀅𑀕𑀸.

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑁂𑀳𑀺, 𑀦𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀥𑀸𑀯𑀦𑁆𑀢𑁄 𑀧𑀤𑀲𑀸𑀬𑁂𑀯, 𑀅𑀕𑀫𑀸 𑀫𑀺𑀲𑁆𑀲𑀓𑀁 𑀦𑀕𑀁.

𑀣𑁂𑀭𑁂 𑀤𑀲𑁆𑀲𑁂𑀢𑀼𑀫𑀺𑀘𑁆𑀙𑀦𑁆𑀢𑁄, 𑀤𑁂𑀯𑁄 𑀢𑀲𑁆𑀫𑀺𑀁 𑀫𑀳𑀻𑀥𑀭𑁂;

𑀕𑀼𑀫𑁆𑀪𑀁𑀪𑀓𑁆𑀔𑀬𑀫𑀸𑀦𑁄’𑀯, 𑀅𑀝𑁆𑀞𑀸 𑀕𑁄𑀓𑀡𑁆𑀡𑀭𑀽𑀧𑀯𑀸.

𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀧𑀫𑀢𑁆𑀢𑀁 𑀢𑀁, 𑀦 𑀬𑀼𑀢𑁆𑀢𑀁 𑀯𑀺𑀚𑁆𑀛𑀺𑀢𑀼𑀁’’ 𑀇𑀢𑀺;

𑀚𑀺𑀬𑀸 𑀲𑀤𑁆𑀤𑀫𑀓𑀸𑀥𑀸𑀧𑀺, 𑀕𑁄𑀓𑀡𑁆𑀡𑁄 𑀧𑀩𑁆𑀩𑀢𑀦𑁆𑀢𑀭𑀁.

𑀭𑀸𑀚𑀸’𑀦𑀼𑀥𑀸𑀯𑀺 ¶ 𑀲𑁄𑀥𑀺𑀁, 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀢𑁄;

𑀣𑁂𑀭𑁂 𑀤𑀺𑀝𑁆𑀞𑁂 𑀦𑀭𑀺𑀦𑁆𑀤𑁂𑀦, 𑀲𑀬𑀫𑀦𑁆𑀢𑀭𑀥𑀸𑀬𑀺𑀲𑁄.

𑀣𑁂𑀭𑁄 ‘‘𑀩𑀳𑀽𑀲𑀼 𑀤𑀺𑀝𑁆𑀞𑁂𑀲𑀼, 𑀅𑀢𑀺𑀪𑀸𑀬𑀺𑀲𑁆𑀲𑀢𑀻’’ 𑀢𑀺𑀲𑁄;

𑀅𑀢𑁆𑀢𑀸𑀦𑀫𑁂𑀯 𑀤𑀲𑁆𑀲𑁂𑀲𑀺, 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀫𑀳𑀻𑀧𑀢𑀺𑀁.

𑀪𑀻𑀢𑁄 𑀅𑀝𑁆𑀞𑀸𑀲𑀺 𑀢𑀁 𑀣𑁂𑀭𑁄, ‘‘𑀏𑀳𑀺 𑀢𑀺𑀲𑁆𑀲𑀸𑀢𑀺 𑀅𑀩𑁆𑀭𑀯𑀺;

𑀢𑀺𑀲𑁆𑀲𑀸’𑀢𑀺 𑀯𑀘𑀦𑁂𑀦𑁂𑀯, 𑀭𑀸𑀚𑀸 𑀬𑀓𑁆𑀔𑁄’’𑀢𑀺 𑀘𑀺𑀦𑁆𑀢𑀬𑀻.

𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸;

𑀢𑀫𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸.

𑀇𑀘𑁆𑀘𑀸𑀳 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸, 𑀭𑀸𑀚𑀸 𑀯𑀻𑀢𑀪𑀬𑁄 𑀅𑀳𑀼;

𑀲𑀭𑀺𑀢𑁆𑀯𑀸 𑀲𑀔𑀻𑀲𑀦𑁆𑀤𑁂𑀲𑀁, ‘‘𑀲𑀫𑀸𑀡𑀸’’ 𑀇𑀢𑀺 𑀦𑀺𑀘𑁆𑀙𑀺𑀢𑁄.

𑀥𑀦𑀼𑀁 𑀲𑀭𑀜𑁆𑀘 𑀦𑀺𑀓𑁆𑀔𑀺𑀧𑁆𑀧, 𑀉𑀧𑀲𑀗𑁆𑀓𑀫𑁆𑀫 𑀢𑀁 𑀇𑀲𑀺𑀁;

𑀲𑀫𑁆𑀫𑁄𑀤𑀫𑀸𑀦𑁄 𑀣𑁂𑀭𑁂𑀦, 𑀲𑁄 𑀦𑀺𑀲𑀻𑀤𑀺 𑀢𑀤𑀦𑁆𑀢𑀺𑀓𑁂.

𑀢𑀤𑀸 𑀢𑀲𑁆𑀲 𑀫𑀦𑀼𑀲𑁆𑀲𑀸 𑀢𑁂, 𑀆𑀕𑀫𑁆𑀫 𑀧𑀭𑀺𑀯𑀸𑀭𑀬𑀼𑀁;

𑀢𑀤𑀸 𑀲𑁂𑀲𑁂 𑀙 𑀤𑀲𑁆𑀲𑁂𑀲𑀺, 𑀫𑀳𑀸𑀣𑁂𑀭𑁄 𑀲𑀳𑀸𑀕𑀢𑁂.

𑀢𑁂 𑀤𑀺𑀲𑁆𑀯𑀸 𑀅𑀩𑁆𑀭𑀯𑀻 𑀭𑀸𑀚𑀸, ‘‘𑀓𑀤𑀸’’ 𑀫𑁂 𑀆𑀕𑀢𑀸 𑀇𑀢𑀺;

‘‘𑀫𑀬𑀸 𑀲𑀤𑁆𑀥𑀺𑀁’’𑀢𑀺 𑀣𑁂𑀭𑁂𑀦, 𑀯𑀼𑀢𑁆𑀢𑁂 𑀧𑀼𑀘𑁆𑀙𑀺 𑀇𑀤𑀁 𑀧𑀼𑀦.

‘‘𑀲𑀦𑁆𑀢𑀺 𑀈𑀤𑀺𑀲𑀓𑀸 𑀅𑀜𑁆𑀜𑁂, 𑀚𑀫𑁆𑀩𑀼𑀤𑀻𑀧𑁂 𑀬𑀢𑀻’’ 𑀇𑀢𑀺;

𑀆𑀳 ‘‘𑀓𑀸𑀲𑀸𑀯𑀧𑀚𑁆𑀚𑁄 𑀢𑁄, 𑀚𑀫𑁆𑀩𑀼𑀤𑀻𑀧𑁄 𑀢𑀳𑀺𑀁 𑀧𑀦.

𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑁆𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑀸;

‘‘𑀤𑀺𑀩𑁆𑀩𑀲𑁄𑀢𑀸’𑀭𑀳𑀦𑁆𑀢𑁄 𑀘, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸’’.

𑀧𑀼𑀘𑁆𑀙𑀺 ‘‘𑀓𑁂𑀦𑀸𑀕𑀢𑀢𑁆𑀣𑀸’’𑀢𑀺, 𑀦 𑀣𑀮𑁂𑀦 𑀦 𑀯𑀸𑀭𑀺𑀦𑀸;

𑀆𑀕𑀢𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀲𑁄, 𑀯𑀺𑀚𑀸𑀦𑀺 𑀦𑀪𑀲𑀸𑀕𑀫𑀁.

𑀯𑀻𑀫𑀁𑀲𑀁𑀲𑁄 𑀫𑀳𑀸𑀧𑀜𑁆𑀜𑁄, 𑀓𑀡𑁆𑀳𑀁 𑀧𑀜𑁆𑀳𑀫𑀧𑀼𑀘𑁆𑀙𑀺𑀢𑀁;

𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀢𑀁𑀢𑀁 𑀧𑀜𑁆𑀳𑀁 𑀫𑀳𑀻𑀧𑀢𑀺.

𑀭𑀼𑀓𑁆𑀔𑁄𑀬𑀁 𑀭𑀸𑀚𑀓𑀺𑀦𑁆𑀦𑀸𑀫𑁄, 𑀅𑀜𑁆𑀜𑁄 𑀦𑀸𑀫 𑀅𑀬𑀁 𑀢𑀭𑀼;

𑀇𑀫𑀁 𑀫𑀼𑀜𑁆𑀘𑀺𑀬 𑀅𑀢𑁆𑀣’𑀫𑁆𑀩𑁄, 𑀲𑀦𑁆𑀢𑀺 𑀅𑀫𑁆𑀩𑀢𑀭𑀽 𑀩𑀳𑀼𑀁.

𑀇𑀫𑀜𑁆𑀘 𑀅𑀫𑁆𑀩𑀁 𑀢𑁂𑀘’𑀫𑁆𑀩𑁂, 𑀫𑀼𑀜𑁆𑀘𑀺𑀬𑀢𑁆𑀣𑀺 𑀫𑀳𑀻𑀭𑀼𑀳𑀸;

𑀲𑀦𑁆𑀢𑀺 𑀪𑀦𑁆𑀢𑁂 𑀩𑀳𑀼 𑀭𑀼𑀓𑁆𑀔𑀸, 𑀅𑀦𑀫𑁆𑀩𑀸𑀧𑀦 𑀢𑁂 𑀢𑀭𑀼.

𑀅𑀜𑁆𑀜𑁂 ¶ 𑀅𑀫𑁆𑀩𑁂 𑀅𑀦𑀫𑁆𑀩𑁂 𑀘, 𑀫𑀼𑀜𑁆𑀘𑀺𑀬’𑀢𑁆𑀣𑀺 𑀫𑀳𑀻𑀭𑀼𑀳𑀸;

𑀅𑀬𑀁 𑀪𑀦𑁆𑀢𑁂 𑀅𑀫𑁆𑀩𑀭𑀼𑀓𑁆𑀔𑁄, 𑀧𑀡𑁆𑀟𑀺𑀢𑁄’𑀲𑀺 𑀦𑀭𑀺𑀲𑁆𑀲𑀭.

𑀲𑀦𑁆𑀢𑀺 𑀢𑁂 𑀜𑀸𑀢𑀓𑀸 𑀭𑀸𑀚, 𑀲𑀦𑁆𑀢𑀺 𑀪𑀦𑁆𑀢𑁂 𑀩𑀳𑀼𑀚𑁆𑀚𑀦𑀸;

𑀲𑀦𑁆𑀢𑀺 𑀅𑀜𑁆𑀜𑀸𑀢𑀓𑀸 𑀭𑀸𑀚, 𑀲𑀦𑁆𑀢𑀺 𑀢𑁂 𑀜𑀸𑀢𑀺𑀢𑁄 𑀩𑀳𑀽.

𑀜𑀸𑀢𑀓𑁂 𑀢𑁂 𑀘 𑀅𑀜𑁆𑀜𑁂 𑀘, 𑀫𑀼𑀜𑁆𑀘𑀺𑀬’𑀜𑁆𑀜𑁄𑀧𑀺 𑀅𑀢𑁆𑀣𑀺 𑀦𑀼;

‘‘𑀪𑀦𑁆𑀢𑁂’’ 𑀳𑀫𑁂𑀯 𑀲𑀸𑀥𑀼 𑀢𑁆𑀯𑀁, 𑀧𑀡𑁆𑀟𑀺𑀢𑁄’𑀲𑀺 𑀦𑀭𑀺𑀲𑁆𑀲𑀭.

𑀧𑀡𑁆𑀟𑀺𑀢𑁄’𑀢𑀺 𑀯𑀺𑀤𑀺𑀢𑁆𑀯𑀸𑀦, 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀁;

𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑀬𑀻 𑀣𑁂𑀭𑁄, 𑀫𑀳𑀻𑀧𑀲𑁆𑀲 𑀫𑀳𑀸𑀫𑀢𑀻.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂, 𑀲𑀤𑁆𑀥𑀺𑀁 𑀢𑁂𑀳𑀺 𑀦𑀭𑁂𑀳𑀺 𑀲𑁄;

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑁂𑀳𑀺, 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺.

𑀪𑀢𑁆𑀢𑀸’𑀪𑀻𑀳𑀸𑀭𑀁 𑀲𑀸𑀬𑀦𑁆𑀳𑁂, 𑀭𑀜𑁆𑀜𑁄 𑀅𑀪𑀺𑀳𑀭𑀼𑀁 𑀢𑀤𑀸;

‘‘𑀦 𑀪𑀼𑀜𑁆𑀚𑀺𑀲𑁆𑀲’’𑀦𑁆𑀢𑀺 𑀤𑀸𑀦𑀺 𑀫𑁂, 𑀇𑀢𑀺 𑀚𑀦𑀫𑁆𑀫𑀺 𑀪𑀽𑀧𑀢𑀺.

𑀧𑀼𑀘𑁆𑀙𑀺𑀢𑀼𑀁𑀬𑁂𑀯 𑀬𑀼𑀢𑁆𑀢𑀦𑁆𑀢𑀺, 𑀪𑀢𑁆𑀢𑁂𑀦𑀸’𑀧𑀼𑀘𑁆𑀙𑀺𑀢𑁂 𑀇𑀲𑀺;

𑀦 𑀪𑀼𑀜𑁆𑀚𑀸𑀫 𑀇𑀤𑀸𑀦𑀻’𑀢𑀺, 𑀯𑀼𑀢𑁆𑀢𑁂 𑀓𑀸𑀮𑀜𑁆𑀘 𑀧𑀼𑀘𑁆𑀙𑀺𑀲𑁄.

𑀓𑀸𑀮𑀁 𑀯𑀼𑀢𑁆𑀢𑁂’𑀩𑁆𑀭𑀯𑀺 𑀏𑀯𑀁, ‘‘𑀕𑀘𑁆𑀙𑀸𑀫 𑀦𑀕𑀭𑀁’’𑀇𑀢𑀺;

𑀢𑀼𑀯𑀁 𑀕𑀘𑁆𑀙 𑀫𑀳𑀸𑀭𑀸𑀚, 𑀯𑀲𑀺𑀲𑁆𑀲𑀸𑀫 𑀫𑀬𑀁 𑀇𑀥.

𑀏𑀯𑀁 𑀲𑀢𑀺 𑀓𑀼𑀫𑀸𑀭𑁄’𑀬𑀁, 𑀅𑀫𑁆𑀳𑁂𑀳𑀺 𑀲𑀳 𑀕𑀘𑁆𑀙𑀢𑀼;

𑀅𑀬𑀜𑁆𑀳𑀺 𑀆𑀕𑀢𑀨𑀮𑁄, 𑀭𑀸𑀚 𑀯𑀺𑀜𑁆𑀜𑀸𑀢𑀲𑀸𑀲𑀦𑁄.

𑀅𑀧𑁂𑀓𑁆𑀔𑀫𑀸𑀦𑁄 𑀧𑀩𑁆𑀩𑀚𑁆𑀚𑀁, 𑀯𑀲𑀢’𑀫𑁆𑀳𑀸𑀓𑀫𑀦𑁆𑀢𑀺𑀓𑁂;

𑀇𑀤𑀸𑀦𑀺 𑀧𑀩𑁆𑀩𑀚𑁂𑀲𑁆𑀲𑀸𑀫, 𑀇𑀫𑀁 𑀢𑁆𑀯𑀁 𑀕𑀘𑁆𑀙 𑀪𑀽𑀫𑀺𑀧.

𑀧𑀸𑀢𑁄 𑀭𑀣𑀁 𑀧𑁂𑀲𑀬𑀺𑀲𑁆𑀲𑀁, 𑀢𑀼𑀫𑁆𑀳𑁂 𑀢𑀢𑁆𑀣 𑀞𑀺𑀢𑀸 𑀧𑀼𑀭𑀁;

𑀬𑀸𑀣𑀸’𑀢𑀺 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸, 𑀪𑀡𑁆𑀟𑀼𑀁𑀦𑁂𑀢𑁆𑀯’𑀓 𑀫𑀦𑁆𑀢𑀓𑀁.

𑀧𑀼𑀘𑁆𑀙𑀺 𑀣𑁂𑀭𑀸𑀥𑀺𑀓𑀸𑀭𑀁𑀲𑁄, 𑀭𑀜𑁆𑀜𑁄 𑀲𑀩𑁆𑀩𑀫𑀪𑀸𑀲𑀺 𑀲𑁄;

𑀣𑁂𑀭𑀁 𑀜𑀢𑁆𑀯𑀸’𑀢𑀺 𑀢𑀼𑀝𑁆𑀞𑁄𑀲𑁄, ‘‘𑀮𑀸𑀪𑀸 𑀫𑁂’’𑀇𑀢𑀺 𑀘𑀺𑀦𑁆𑀢𑀬𑀺.

𑀪𑀡𑁆𑀟𑀼𑀲𑁆𑀲 𑀕𑀻𑀳𑀺𑀪𑀸𑀯𑁂𑀦, 𑀕𑀢𑀸𑀲𑀗𑁆𑀓𑁄 𑀦𑀭𑀺𑀲𑁆𑀲𑀭𑁄;

𑀅𑀜𑁆𑀜𑀸𑀲𑀺 𑀦𑀭𑀪𑀸𑀯𑀁 𑀲𑁄, ‘‘𑀧𑀩𑁆𑀩𑀸𑀚𑁂𑀫 𑀇𑀫𑀁’’ 𑀇𑀢𑀺.

𑀣𑁂𑀭𑁄 𑀢𑀁 𑀕𑀸𑀫𑀲𑀻𑀫𑀸𑀬𑀁, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀅𑀓𑀸;

𑀪𑀡𑁆𑀟𑀼𑀓𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀧𑀩𑁆𑀩𑀚𑁆𑀚𑀫𑀼𑀧𑀲𑀫𑁆𑀧𑀤𑀁.

𑀢𑀲𑁆𑀫𑀺𑀁𑀬𑁂𑀯 ¶ 𑀔𑀡𑁂 𑀲𑁄 𑀘, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺;

𑀲𑀼𑀫𑀦𑀁 𑀲𑀸𑀫𑀡𑁂𑀭𑀁 𑀢𑀁, 𑀣𑁂𑀭𑁄 𑀆𑀫𑀦𑁆𑀢𑀬𑀻 𑀢𑀢𑁄.

𑀥𑀫𑁆𑀫𑀲𑀯𑀦𑀓𑀸𑀮𑀁 𑀢𑁆𑀯𑀁, 𑀖𑁄𑀲𑁂𑀳𑀻’’𑀢𑀺 𑀅𑀧𑀼𑀘𑁆𑀙𑀺𑀲𑁄;

𑀲𑀸𑀯𑁂𑀦𑁆𑀢𑁄 𑀓𑀺𑀢𑁆𑀢𑀓𑀁 𑀞𑀸𑀦𑀁, 𑀪𑀦𑁆𑀢𑁂 𑀖𑁄𑀲𑁂𑀫’𑀳𑀁 𑀇𑀢𑀺.

‘‘𑀲𑀓𑀮𑀁 𑀢𑀫𑁆𑀩𑀧𑀡𑁆𑀡𑀻’’𑀢𑀺, 𑀯𑀼𑀢𑁆𑀢𑁂 𑀣𑁂𑀭𑁂𑀦 𑀇𑀤𑁆𑀥𑀺𑀬𑀸;

𑀲𑀸𑀯𑁂𑀦𑁆𑀢𑁄 𑀲𑀓𑀮𑀁 𑀮𑀁𑀓𑀁, 𑀥𑀫𑁆𑀫𑀓𑀸𑀮𑀫𑀖𑁄𑀲𑀬𑀻.

𑀭𑀸𑀚𑀸 𑀦𑀸𑀕𑀘𑀢𑀼𑀢𑁆𑀢𑁂𑀲𑁄, 𑀲𑁄𑀡𑁆𑀡𑀺𑀧𑀲𑁆𑀲𑁂 𑀦𑀺𑀲𑀻𑀤𑀺𑀬;

𑀪𑀼𑀜𑁆𑀚𑀦𑁆𑀢𑁄 𑀢𑀁 𑀭𑀯𑀁 𑀲𑀼𑀢𑁆𑀯𑀸, 𑀣𑁂𑀭𑀦𑁆𑀢𑀺𑀓 𑀫𑀧𑁂𑀲𑀬𑀺.

‘‘𑀉𑀧𑀤𑁆𑀤𑀯𑁄 𑀦𑀼 𑀅𑀢𑁆𑀣𑀻’’𑀢𑀺, 𑀆𑀳 𑀦𑀢𑁆𑀣𑀺 𑀉𑀤𑁆𑀤𑀯𑁄;

𑀲𑁄𑀢𑀼𑀁 𑀲𑀫𑁆𑀩𑀼𑀤𑁆𑀥𑀯𑀘𑀦𑀁, 𑀓𑀸𑀮𑁄 𑀖𑁄𑀲𑀸𑀧𑀺𑀢𑁄 𑀇𑀢𑀺.

𑀲𑀸𑀫𑀡𑁂𑀭 𑀭𑀯𑀁 𑀲𑀼𑀢𑁆𑀯𑀸, 𑀪𑀼𑀫𑁆𑀫𑀸𑀤𑁂𑀯𑀸 𑀅𑀖𑁄𑀲𑀬𑀼𑀁;

𑀅𑀦𑀼𑀓𑁆𑀓𑀫𑁂𑀦 𑀲𑁄 𑀲𑀤𑁆𑀤𑁄, 𑀩𑁆𑀭𑀳𑁆𑀫𑀮𑁄𑀓𑀁 𑀲𑀫𑀸𑀭𑀼𑀳𑀺.

𑀢𑁂𑀦 𑀖𑁄𑀲𑁂𑀦 𑀤𑁂𑀯𑀸𑀦𑀁, 𑀲𑀦𑁆𑀦𑀺𑀧𑀸𑀢𑁄 𑀫𑀳𑀸 𑀅𑀳𑀼;

𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀁 𑀤𑁂𑀲𑁂𑀲𑀺, 𑀣𑁂𑀭𑁄 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂.

𑀅𑀲𑀁𑀔𑀺𑀬𑀸𑀦𑀁 𑀤𑁂𑀯𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀩𑀳𑀽 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀘, 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀬𑀼𑀁.

𑀬𑀣𑁂𑀤𑀁 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀪𑀸𑀲𑀢𑁄;

𑀢𑀣𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲, 𑀅𑀳𑀼 𑀤𑁂𑀯𑀲𑀫𑀸𑀕𑀫𑁄.

𑀭𑀸𑀚𑀸 𑀧𑀪𑀸 𑀢𑁂 𑀧𑀸𑀳𑁂𑀲𑀺, 𑀭𑀣𑀁 𑀲𑀸𑀭𑀣𑀺 𑀲𑁄 𑀕𑀢𑁄;

‘‘𑀆𑀭𑁄𑀳𑀣 𑀭𑀣𑀁 𑀬𑀸𑀫, 𑀦𑀕𑀭𑀁’’ 𑀇𑀢𑀺 𑀢𑁂’𑀩𑁆𑀭𑀯𑀺.

𑀦𑀸’𑀭𑁄𑀳𑀸𑀫 𑀭𑀣𑀁 𑀕𑀘𑁆𑀙, 𑀕𑀘𑁆𑀙𑀸𑀫 𑀢𑀯 𑀧𑀘𑁆𑀙𑀢𑁄;

𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑁂𑀢𑁆𑀯𑀸, 𑀲𑀸𑀭𑀣𑀺𑀁 𑀲𑀼𑀫𑀦𑁄𑀭𑀣𑀁.

𑀯𑁂𑀳𑀸𑀲𑀫𑀩𑁆𑀪𑀼𑀕𑀦𑁆𑀢𑁆𑀯𑀸, 𑀢𑁂 𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀢𑁄;

𑀧𑀞𑀫𑀢𑁆𑀣𑀽𑀧𑀝𑁆𑀞𑀸𑀦𑀫𑁆𑀳𑀺, 𑀑𑀢𑀭𑀺𑀁𑀲𑀼 𑀫𑀳𑀺𑀤𑁆𑀥𑀺𑀓𑀸.

𑀣𑁂𑀭𑁂𑀳𑀺 𑀧𑀞𑀫𑁄𑀢𑀺𑀡𑁆𑀡-𑀞𑀸𑀦𑀫𑁆𑀳𑀺 𑀓𑀢𑀘𑁂𑀢𑀺𑀬𑀁;

𑀅𑀚𑁆𑀚𑀸𑀧𑀺 𑀯𑀼𑀘𑁆𑀘𑀢𑁂 𑀢𑁂𑀦, 𑀏𑀯𑀁 𑀧𑀞𑀫𑀘𑁂𑀢𑀺𑀬𑀁.

𑀭𑀜𑁆𑀜𑀸 𑀣𑁂𑀭𑀕𑀼𑀡𑀁 𑀲𑀼𑀢𑁆𑀯𑀸, 𑀲𑀩𑁆𑀩𑀸 𑀅𑀦𑁆𑀢𑁂𑀧𑀼𑀭𑀺𑀢𑁆𑀣𑀺𑀬𑁄;

𑀣𑁂𑀭𑀤𑀲𑁆𑀲𑀦𑀫𑀺𑀘𑁆𑀙𑀺𑀁𑀲𑀼, 𑀬𑀲𑁆𑀫𑀸 𑀢𑀲𑁆𑀫𑀸𑀫𑀳𑀻𑀧𑀢𑀺.

𑀅𑀦𑁆𑀢𑁄’𑀯 ¶ 𑀭𑀸𑀚𑀯𑀢𑁆𑀣𑀼𑀲𑁆𑀲, 𑀭𑀫𑁆𑀫𑀁 𑀓𑀸𑀭𑁂𑀲𑀺 𑀫𑀡𑁆𑀟𑀧𑀁;

𑀲𑁂𑀢𑁂𑀳𑀺 𑀯𑀢𑁆𑀣𑀧𑀼𑀧𑁆𑀨𑁂𑀳𑀺, 𑀙𑀸𑀤𑀺𑀢𑀁 𑀲𑀫𑀮𑀗𑁆𑀓𑀢𑀁.

𑀉𑀘𑁆𑀘𑀲𑁂𑀬𑁆𑀬𑀸𑀯𑀺𑀭𑀫𑀡𑀁, 𑀲𑀼𑀢𑀢𑁆𑀢𑀸 𑀣𑁂𑀭𑀲𑀦𑁆𑀢𑀺𑀓𑁂;

𑀓𑀗𑁆𑀔𑀻 ‘‘𑀉𑀘𑁆𑀘𑀸𑀲𑀦𑁂 𑀣𑁂𑀭𑁄, 𑀦𑀺𑀲𑀻𑀤𑀺𑀤𑁂𑀬𑁆𑀬𑀦𑀼𑀦𑁄𑀢𑀺 𑀘.

𑀢𑀤𑀦𑁆𑀢𑀭𑁂 𑀲𑀸𑀭𑀣𑀺 𑀲𑁄, 𑀣𑁂𑀭𑁂 𑀤𑀺𑀲𑁆𑀯𑀸 𑀢𑀳𑀺𑀁 𑀞𑀺𑀢𑁂;

𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂 𑀢𑁂, 𑀅𑀢𑀺𑀯𑀺𑀫𑁆𑀳𑀺𑀢 𑀫𑀸𑀦𑀲𑁄.

𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺, 𑀲𑀼𑀢𑁆𑀯𑀸 𑀲𑀩𑁆𑀩𑀁 𑀫𑀳𑀻𑀫𑀢𑀺;

‘‘𑀦𑀺𑀲𑀚𑁆𑀚𑀁 𑀦 𑀓𑀭𑀺𑀲𑁆𑀲𑀦𑁆𑀢𑀺, 𑀧𑀻𑀞𑀓𑁂𑀲𑀽’’𑀢𑀺 𑀦𑀺𑀘𑁆𑀙𑀺𑀢𑁄.

‘‘𑀲𑀼𑀲𑀸𑀥𑀼 𑀪𑀼𑀫𑁆𑀫𑀢𑁆𑀣𑀭𑀡𑀁, 𑀧𑀜𑁆𑀜𑀸𑀧𑁂𑀣𑀸’’𑀢𑀺 𑀪𑀸𑀲𑀺𑀬;

𑀕𑀦𑁆𑀢𑁆𑀯𑀸 𑀧𑀝𑀺𑀧𑀣𑀁 𑀣𑁂𑀭𑁂, 𑀲𑀓𑁆𑀓𑀘𑁆𑀘𑀁 𑀅𑀪𑀺𑀯𑀸𑀤𑀺𑀬.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲, 𑀳𑀢𑁆𑀣𑀢𑁄 𑀧𑀢𑁆𑀢𑀫𑀸𑀤𑀺𑀬;

𑀲𑀓𑁆𑀓𑀸𑀭𑀧𑀽𑀚𑀸𑀯𑀺𑀥𑀺𑀦𑀸, 𑀧𑀼𑀭𑀁 𑀣𑁂𑀭𑀁 𑀧𑀯𑁂𑀲𑀬𑀺.

𑀤𑀺𑀲𑁆𑀯𑀸 𑀆𑀲𑀦𑀧𑀜𑁆𑀜𑀢𑁆𑀢𑀺𑀁, 𑀦𑁂𑀫𑀺𑀢𑁆𑀢𑀸 𑀩𑁆𑀬𑀸𑀓𑀭𑀼𑀁 𑀇𑀢𑀺;

‘‘𑀕𑀳𑀺𑀢𑀸 𑀧𑀣𑀯𑀻’𑀫𑁂𑀳𑀺, 𑀤𑀻𑀧𑁂 𑀳𑁂𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀸.

𑀦𑀭𑀺𑀦𑁆𑀤𑁄 𑀧𑀽𑀚𑀬𑀦𑁆𑀢𑁄 𑀢𑁂, 𑀣𑁂𑀭𑁂 𑀅𑀦𑁆𑀢𑁂𑀧𑀼𑀭𑀁 𑀦𑀬𑀺;

𑀢𑀢𑁆𑀣 𑀢𑁂 𑀤𑀼𑀲𑁆𑀲𑀧𑀻𑀞𑁂𑀲𑀼𑀁, 𑀦𑀺𑀲𑀻𑀤𑀺𑀁𑀲𑀼 𑀬𑀣𑀸𑀭𑀳𑀁.

𑀢𑁂 𑀬𑀸𑀕𑀼𑀔𑀚𑁆𑀚𑀪𑁄𑀚𑁆𑀚𑁂𑀳𑀺, 𑀲𑀬𑀁 𑀭𑀸𑀚𑀸 𑀅𑀢𑀧𑁆𑀧𑀬𑀺;

𑀦𑀺𑀝𑁆𑀞𑀺𑀢𑁂 𑀪𑀢𑁆𑀢𑀓𑀺𑀘𑁆𑀘𑀫𑁆𑀳𑀺, 𑀲𑀬𑀁 𑀉𑀧𑀦𑀺𑀲𑀻𑀤𑀺𑀬.

𑀓𑀦𑀺𑀝𑁆𑀞𑀲𑁆𑀲𑁄𑀧𑀭𑀸𑀚𑀲𑁆𑀲, 𑀫𑀳𑀸𑀦𑀸𑀕𑀲𑁆𑀲 𑀚𑀸𑀬𑀺𑀓𑀁;

𑀯𑀲𑀦𑁆𑀢𑀺𑀁 𑀭𑀸𑀚𑀕𑁂𑀳𑁂’𑀯, 𑀧𑀓𑁆𑀓𑁄𑀲𑀸 𑀧𑁂𑀲𑀺𑀘𑀸’𑀦𑀼𑀮𑀁.

𑀆𑀕𑀫𑁆𑀫 𑀅𑀦𑀼𑀮𑀸𑀤𑁂𑀯𑀻, 𑀧𑀜𑁆𑀘 𑀇𑀢𑁆𑀣𑀺𑀲𑀢𑁂𑀳𑀺 𑀲𑀸;

𑀣𑁂𑀭𑁂𑀯𑀦𑁆𑀤𑀺𑀬 𑀧𑀽𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀫𑀼𑀧𑀸𑀯𑀺𑀲𑀺.

𑀧𑁂𑀢𑀯𑀢𑁆𑀣𑀼𑀁 𑀯𑀺𑀫𑀸𑀦𑀜𑁆𑀘, 𑀲𑀘𑁆𑀘𑀲𑀁𑀬𑀼𑀢𑁆𑀢𑀫𑁂𑀯 𑀘;

𑀤𑁂𑀲𑁂𑀲𑀺 𑀣𑁂𑀭𑁄 𑀢𑀸 𑀇𑀢𑁆𑀣𑀻, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀼𑀁.

𑀳𑀺𑀬𑁆𑀬𑁄 𑀤𑀺𑀝𑁆𑀞𑀫𑀦𑀼𑀲𑁆𑀲𑁂𑀳𑀺, 𑀲𑀼𑀢𑁆𑀯𑀸 𑀣𑁂𑀭𑀕𑀼𑀡𑁂 𑀩𑀳𑀽;

𑀣𑁂𑀭𑀤𑀲𑁆𑀲𑀦𑀫𑀺𑀘𑁆𑀙𑀦𑁆𑀢𑀸, 𑀲𑀫𑀸𑀕𑀦𑁆𑀢𑁆𑀯𑀸𑀦 𑀦𑀸𑀕𑀭𑀸.

𑀭𑀸𑀚𑀤𑁆𑀯𑀸𑀭𑁂 𑀫𑀳𑀸𑀲𑀤𑁆𑀤𑀁, 𑀅𑀓𑀭𑀼𑀁 𑀢𑀁 𑀫𑀳𑀻𑀧𑀢𑀺;

𑀲𑀼𑀢𑁆𑀯𑀸 𑀧𑀼𑀘𑁆𑀙𑀺𑀬 𑀚𑀸𑀦𑀺𑀢𑁆𑀯𑀸, 𑀆𑀳 𑀢𑁂𑀲𑀁 𑀳𑀺𑀢𑀢𑁆𑀣𑀺𑀓𑁄.

𑀲𑀩𑁆𑀩𑁂𑀲𑀁 ¶ 𑀇𑀥 𑀲𑀫𑁆𑀩𑀸𑀥𑁄, 𑀲𑀸𑀮𑀸𑀫𑀗𑁆𑀕𑀮𑀳𑀢𑁆𑀣𑀺𑀦𑁄;

𑀲𑁄𑀥𑁂𑀣 𑀢𑀢𑁆𑀣 𑀤𑀓𑁆𑀔𑀦𑁆𑀢𑀺, 𑀣𑁂𑀭𑁂’𑀫𑁂 𑀦𑀸𑀕𑀭𑀸’𑀇𑀢𑀺.

𑀲𑁄𑀥𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀢𑀁, 𑀯𑀺𑀢𑀸𑀦𑀸𑀤𑀻𑀳𑀺 𑀲𑀚𑁆𑀚𑀼𑀓𑀁;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀬𑀦𑁂, 𑀧𑀜𑁆𑀜𑀧𑁂𑀲𑀼𑀁 𑀬𑀣𑀸𑀭𑀳𑀁.

𑀲𑀣𑁂𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀣𑁂𑀭𑁄 𑀦𑀺𑀲𑀻𑀤𑀺𑀬;

𑀲𑁄 𑀤𑁂𑀯𑀤𑀽𑀢𑀲𑀼𑀢𑁆𑀢𑀦𑁆𑀢𑀁, 𑀓𑀣𑁂𑀲𑀻 𑀓𑀣𑀺𑀓𑁄 𑀫𑀳𑀸.

𑀢𑀁 𑀲𑀼𑀢𑁆𑀯𑀸𑀦 𑀧𑀲𑀻𑀤𑀺𑀁𑀲𑀼, 𑀦𑀕𑀭𑀸 𑀢𑁂 𑀲𑀫𑀸𑀕𑀢𑀸;

𑀢𑁂𑀲𑀼 𑀧𑀸𑀡𑀲𑀳𑀲𑁆𑀲𑀁𑀢𑀼, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀸.

𑀮𑀁𑀓𑀸𑀤𑀻𑀧𑁂 𑀲𑁄 𑀲𑀢𑁆𑀣𑀼𑀓𑀧𑁆𑀧𑁄 𑀅𑀓𑀧𑁆𑀧𑁄;

𑀮𑀁𑀓𑀸𑀥𑀺𑀝𑁆𑀞𑀸𑀦𑁂 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀣𑁂𑀭𑁄;

𑀥𑀫𑁆𑀫𑀁 𑀪𑀸𑀲𑀺𑀢𑁆𑀯𑀸 𑀤𑀻𑀧𑀪𑀸𑀲𑀸𑀬 𑀏𑀯𑀁;

𑀲𑀤𑁆𑀥𑀫𑁆𑀫𑁄 𑀢𑀸𑀭𑀁 𑀓𑀸𑀭𑀬𑀻 𑀤𑀻𑀧𑀤𑀻𑀧𑁄𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀳𑀢𑁆𑀣𑀺𑀲𑀸𑀮𑀸𑀧𑀺 𑀲𑀫𑁆𑀩𑀸𑀥𑀸, 𑀇𑀢𑀺 𑀢𑀢𑁆𑀣 𑀲𑀫𑀸𑀕𑀢𑀸;

𑀢𑁂 𑀦𑀦𑁆𑀤𑀦𑀯𑀦𑁂 𑀭𑀫𑁆𑀫𑁂, 𑀤𑀓𑁆𑀔𑀺𑀡𑀤𑁆𑀯𑀸𑀭𑀢𑁄 𑀩𑀳𑀺.

𑀭𑀸𑀚𑀼𑀬𑁆𑀬𑀸𑀦𑁂 𑀖𑀦𑀘𑁆𑀙𑀸𑀬𑁂, 𑀲𑀻𑀢𑀮𑁂 𑀦𑀻𑀮𑀲𑀤𑁆𑀤𑀮𑁂;

𑀧𑀜𑁆𑀜𑀸𑀧𑁂𑀲𑀼𑀁 𑀆𑀲𑀦𑀸𑀦𑀺, 𑀣𑁂𑀭𑀸𑀦𑀁 𑀲𑀸𑀤𑀭𑀸 𑀦𑀭𑀸.

𑀦𑀺𑀓𑁆𑀔𑀫𑁆𑀫 𑀤𑀓𑁆𑀔𑀺𑀡𑀤𑁆𑀯𑀸𑀭𑀸, 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺 𑀘;

𑀫𑀳𑀸𑀓𑀼𑀮𑀻𑀦𑀸 𑀘𑀸’𑀕𑀫𑁆𑀫, 𑀇𑀢𑁆𑀣𑀺𑀬𑁄 𑀩𑀳𑀼𑀓𑀸 𑀢𑀳𑀺𑀁.

𑀣𑁂𑀭𑀁 ¶ 𑀉𑀧𑀦𑀺𑀲𑀻𑀤𑀺𑀁𑀲𑀼, 𑀉𑀬𑁆𑀬𑀸𑀦𑀁 𑀧𑀽𑀭𑀬𑀦𑁆𑀢𑀺𑀬𑁄;

𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀦𑁆𑀢𑀁, 𑀢𑀸𑀲𑀁 𑀣𑁂𑀭𑁄 𑀅𑀤𑁂𑀲𑀬𑀺.

𑀲𑀳𑀲𑁆𑀲𑀁 𑀇𑀢𑁆𑀣𑀺𑀬𑁄 𑀢𑀸𑀲𑀼, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀼𑀁;

𑀏𑀯𑀁 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑁂, 𑀲𑀸𑀬𑀡𑁆𑀳𑀲𑀫𑀬𑁄 𑀅𑀳𑀼.

𑀢𑀢𑁄 𑀣𑁂𑀭𑀸 𑀦𑀺𑀓𑁆𑀔𑀫𑀺𑀁𑀲𑀼, ‘‘𑀬𑀸𑀫 𑀢𑀁 𑀧𑀩𑁆𑀩𑀢𑀁’’ 𑀇𑀢𑀺;

𑀭𑀜𑁆𑀜𑁄 𑀧𑀝𑀺𑀦𑀺𑀯𑁂𑀤𑁂𑀲𑀼𑀁, 𑀲𑀻𑀖𑀁 𑀭𑀸𑀚𑀸 𑀉𑀧𑀸𑀕𑀫𑀺.

𑀉𑀧𑀸𑀕𑀫𑁆𑀫𑀸’𑀩𑁆𑀭𑀯𑀻 𑀣𑁂𑀭𑀁, ‘‘𑀲𑀸𑀬𑀁 𑀤𑀽𑀭𑁄 𑀘 𑀧𑀩𑁆𑀩𑀢𑁄;

𑀇𑀥𑁂𑀯 𑀦𑀦𑁆𑀤𑀦𑀼𑀬𑁆𑀬𑀸𑀦𑁂, 𑀦𑀺𑀯𑀸𑀲𑁄 𑀨𑀸𑀲𑀼𑀓𑁄 𑀇𑀢𑀺.

𑀧𑀼𑀭𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀢𑁆𑀢𑀸, ‘‘𑀅𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀪𑀸𑀲𑀺𑀢𑁂;

‘‘𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀦𑀸𑀢𑀺𑀤𑀽𑀭𑀸𑀢𑀺 𑀲𑀦𑁆𑀢𑀺𑀓𑁂.

𑀭𑀫𑁆𑀫𑀁 𑀙𑀸𑀬𑀽𑀤𑀓𑀽𑀧𑁂𑀢𑀁, 𑀦𑀺𑀯𑀸𑀲𑁄 𑀢𑀢𑁆𑀣 𑀭𑁄𑀘𑀢𑀼;

𑀦𑀺𑀯𑀢𑁆𑀢𑀺𑀢𑀩𑁆𑀩𑀁 𑀪𑀦𑁆𑀢𑁂’’𑀦𑁆𑀢𑀺, 𑀣𑁂𑀭𑁄 𑀢𑀢𑁆𑀣 𑀦𑀺𑀯𑀢𑁆𑀢𑀬𑀺.

𑀢𑀲𑁆𑀫𑀺𑀁 𑀦𑀺𑀯𑀢𑁆𑀢𑀞𑀸𑀦𑀫𑁆𑀳𑀺, 𑀓𑀤𑀫𑁆𑀩𑀦𑀤𑀺𑀬𑀦𑁆𑀢𑀺𑀓𑁂;

𑀦𑀺𑀯𑀢𑁆𑀢𑀘𑁂𑀢𑀺𑀬𑀁 𑀦𑀸𑀫, 𑀓𑀢𑀁 𑀯𑀼𑀘𑁆𑀘𑀢𑀺 𑀘𑁂𑀢𑀺𑀬𑀁.

𑀢𑀁 𑀦𑀦𑁆𑀤𑀦𑀸 𑀤𑀓𑁆𑀔𑀺𑀡𑁂𑀦, 𑀦𑀬𑀁 𑀣𑁂𑀭𑀁 𑀭𑀣𑁂𑀲𑀪𑁄;

𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀧𑀸𑀘𑀺𑀦𑀤𑁆𑀯𑀸𑀭𑀓𑀁 𑀦𑀬𑀺.

𑀢𑀢𑁆𑀣 𑀭𑀸𑀚𑀖𑀭𑁂 𑀭𑀫𑁆𑀫𑁂, 𑀫𑀜𑁆𑀘𑀧𑀻𑀞𑀸𑀦𑀺 𑀲𑀸𑀥𑀼𑀓𑀁;

𑀲𑀸𑀥𑀽𑀢𑀺 𑀲𑀦𑁆𑀣𑀭𑀸𑀧𑁂𑀢𑁆𑀯𑀸, ‘‘𑀯𑀲𑀢𑁂’𑀢𑁆𑀢 𑀲𑀼𑀔𑀁’’ 𑀇𑀢𑀺.

𑀭𑀸𑀚𑀸 𑀣𑁂𑀭𑁂’𑀪𑀺𑀯𑀸𑀤𑁂𑀢𑁆𑀯𑀸, 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄;

𑀧𑀼𑀭𑀁 𑀧𑀸𑀯𑀺𑀲𑀺 𑀣𑁂𑀭𑀸 𑀢𑀼, 𑀢𑀁 𑀭𑀢𑁆𑀢𑀺𑀁 𑀢𑀢𑁆𑀣 𑀢𑁂 𑀯𑀲𑀼𑀁.

𑀧𑀪𑀸𑀢𑁂𑀬𑁂𑀯 𑀧𑀼𑀧𑁆𑀨𑀸𑀦𑀺, 𑀕𑀸𑀳𑁂𑀢𑁆𑀯𑀸 𑀥𑀭𑀡𑀻𑀧𑀢𑀺;

𑀣𑁂𑀭𑁂 𑀉𑀧𑀘𑁆𑀘 𑀯𑀦𑁆𑀤𑀺𑀢𑁆𑀯𑀸, 𑀧𑀽𑀚𑁂𑀢𑁆𑀯𑀸 𑀓𑀼𑀲𑀼𑀫𑁂𑀳𑀺 𑀘.

𑀧𑀼𑀘𑁆𑀙𑀺 𑀓𑀘𑁆𑀘𑀺 𑀲𑀼𑀔𑀁 𑀯𑀼𑀝𑁆𑀞𑀁, 𑀉𑀬𑁆𑀬𑀸𑀦𑀁 𑀨𑀸𑀲𑀼𑀓𑀁 𑀇𑀢𑀺;

𑀲𑀼𑀔𑀁 𑀯𑀼𑀢𑁆𑀣𑀁 𑀫𑀳𑀸𑀭𑀸𑀚, 𑀉𑀬𑁆𑀬𑀸𑀦𑀁 𑀬𑀢𑀺 𑀨𑀸𑀲𑀼𑀓𑀁.

𑀆𑀭𑀸𑀫𑁄 𑀓𑀧𑁆𑀧𑀢𑁂 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀼𑀘𑁆𑀙𑀺 𑀲𑁄;

‘‘𑀓𑀧𑁆𑀧𑀢𑁂’’𑀇𑀢𑀺 𑀯𑀢𑁆𑀯𑀸𑀦, 𑀓𑀧𑁆𑀧𑀸𑀓𑀧𑁆𑀧𑁂𑀲𑀼 𑀓𑁄𑀯𑀺𑀤𑁄.

𑀣𑁂𑀭𑁄 𑀯𑁂𑀴𑀼𑀯𑀦𑀸𑀭𑀸𑀫, 𑀧𑀝𑀺𑀕𑁆𑀕𑀳𑀡𑀫𑀩𑁆𑀭𑀯𑀺;

𑀢𑀁 𑀲𑀼𑀢𑁆𑀯𑀸 𑀅𑀪𑀺𑀳𑀝𑁆𑀞𑁄 𑀲𑁄, 𑀢𑀼𑀝𑁆𑀞𑀳𑀝𑁆𑀞𑁄 𑀫𑀳𑀸𑀚𑀦𑁄.

𑀣𑁂𑀭𑀸𑀦𑀁 ¶ 𑀯𑀦𑁆𑀤𑀦𑀢𑁆𑀣𑀸𑀬, 𑀤𑁂𑀯𑀻 𑀢𑀼 𑀅𑀦𑀼𑀮𑀸𑀕𑀢𑀸;

𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑀺𑀢𑁆𑀣𑀻𑀳𑀺, 𑀤𑀼𑀢𑀺𑀬𑀁 𑀨𑀮𑀫𑀚𑁆𑀛𑀕𑀸.

𑀲𑀸 𑀧𑀜𑁆𑀘𑀲𑀢𑀸 𑀤𑁂𑀯𑀻, 𑀅𑀦𑀼𑀮𑀸’𑀳 𑀫𑀳𑀻𑀧𑀢𑀺;

‘‘𑀧𑀩𑁆𑀩𑀚𑀺𑀲𑁆𑀲𑀸𑀫 𑀤𑁂𑀯𑀸’’𑀢𑀺, 𑀭𑀸𑀚𑀸 𑀣𑁂𑀭𑀫𑀯𑁄𑀘 𑀲𑁄.

𑀧𑀩𑁆𑀩𑀸𑀚𑁂𑀣 𑀇𑀫𑀸𑀬𑁄’’𑀢𑀺, 𑀣𑁂𑀭𑁄 𑀆𑀳 𑀫𑀳𑀻𑀧𑀢𑀺𑀁;

‘‘𑀦 𑀓𑀧𑁆𑀧𑀢𑀺 𑀫𑀳𑀸𑀭𑀸𑀚, 𑀧𑀩𑁆𑀩𑀸𑀚𑁂𑀢𑀼𑀁 𑀣𑀺𑀬𑁄 𑀳𑀺𑀦𑁄.

𑀅𑀢𑁆𑀣𑀺 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀺𑀁, 𑀪𑀺𑀓𑁆𑀔𑀼𑀦𑀻 𑀫𑁂 𑀓𑀦𑀺𑀝𑁆𑀞𑀺𑀓𑀸;

𑀲𑀗𑁆𑀖𑀫𑀺𑀢𑁆𑀢𑀸𑀢𑀺 𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑀸 𑀲𑀸 𑀩𑀳𑀼𑀲𑁆𑀲𑀼𑀢𑀸.

𑀦𑀭𑀺𑀦𑁆𑀤𑀲𑀫𑀡𑀺𑀦𑁆𑀤𑀲𑁆𑀲, 𑀫𑀳𑀸𑀩𑁄𑀥𑀺𑀤𑀼𑀫𑀺𑀦𑁆𑀤𑀢𑁄;

𑀤𑀓𑁆𑀔𑀺𑀡𑀁 𑀲𑀸𑀔𑀫𑀸𑀤𑀸𑀬, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀭𑀸.

𑀆𑀕𑀘𑁆𑀙𑀢𑀽’𑀢𑀺 𑀧𑁂𑀲𑁂𑀳𑀺, 𑀭𑀜𑁆𑀜𑁄 𑀦𑁄 𑀧𑀺𑀢𑀼 𑀲𑀦𑁆𑀢𑀺𑀓𑀁;

𑀧𑀩𑁆𑀩𑀸𑀚𑁂𑀲𑁆𑀲𑀢𑀺 𑀲𑀸 𑀣𑁂𑀭𑀻, 𑀆𑀕𑀢𑀸 𑀇𑀢𑁆𑀣𑀺𑀬𑁄 𑀇𑀫𑀸.

‘‘𑀲𑀸𑀥𑀼’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸, 𑀭𑀸𑀚𑀸 𑀪𑀺𑀗𑁆𑀓𑀸𑀭𑀫𑀼𑀢𑁆𑀢𑀫𑀁;

‘‘𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀤𑀫𑁆𑀫𑀺 𑀲𑀗𑁆𑀖𑀲𑁆𑀲𑀺’𑀫𑀁 𑀇𑀢𑀺.

𑀫𑀳𑀺𑀦𑁆𑀤𑀣𑁂𑀭𑀲𑁆𑀲 𑀓𑀭𑁂, 𑀤𑀓𑁆𑀔𑀺𑀡𑁄𑀤𑀓𑀫𑀸’𑀓𑀺𑀭𑀻;

𑀫𑀳𑀺𑀬𑀸 𑀧𑀢𑀺𑀢𑁂 𑀢𑁄𑀬𑁂, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸 𑀫𑀳𑀻.

‘‘𑀢𑀲𑁆𑀫𑀸 𑀓𑀫𑁆𑀧𑀢𑀺 𑀪𑀽𑀫𑀻’’𑀢𑀺, 𑀪𑀽𑀫𑀺𑀧𑀸𑀮𑁄 𑀅𑀧𑀼𑀘𑁆𑀙𑀺 𑀢𑀁;

𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀤𑀻𑀧𑀫𑁆𑀳𑀺, 𑀲𑀸𑀲𑀦𑀲𑁆𑀲𑀸’𑀢𑀺 𑀲𑁄 𑀩𑁆𑀭𑀯𑀺.

𑀣𑁂𑀭𑀲𑁆𑀲 𑀉𑀧𑀦𑀸𑀫𑁂𑀲𑀺, 𑀚𑀸𑀢𑀺𑀧𑀼𑀧𑁆𑀨𑀸𑀦𑀺 𑀚𑀸𑀢𑀺𑀫𑀸;

𑀣𑁂𑀭𑁄 𑀭𑀸𑀚𑀖𑀭𑀁 𑀕𑀦𑁆𑀢𑁆𑀯𑀸, 𑀢𑀲𑁆𑀲 𑀤𑀓𑁆𑀔𑀺𑀡𑀢𑁄 𑀞𑀺𑀢𑁄.

𑀭𑀼𑀓𑁆𑀔𑀫𑁆𑀳𑀺 𑀧𑀺𑀘𑀼𑀮𑁂 𑀅𑀝𑁆𑀞, 𑀧𑀼𑀧𑁆𑀨𑀫𑀼𑀝𑁆𑀞𑀻 𑀲𑀫𑁄𑀓𑀺𑀭𑀻;

𑀢𑀢𑁆𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑀅𑀳𑁄𑀲𑀺 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁, 𑀓𑀸𑀮𑁂’𑀧𑀺 𑀇𑀥 𑀫𑀸𑀮𑀓𑁄;

𑀦𑀭𑀺𑀦𑁆𑀤𑀲𑀗𑁆𑀖𑀓𑀫𑁆𑀫𑀢𑁆𑀣𑀁, 𑀪𑀯𑀺𑀲𑁆𑀲𑀢𑀺 𑀇𑀤𑀸𑀦𑀺𑀧𑀺.

𑀭𑀸𑀚𑀕𑁂𑀳𑀸 𑀉𑀢𑁆𑀢𑀭𑀢𑁄, 𑀘𑀸𑀭𑀼𑀧𑁄𑀓𑁆𑀔𑀭𑀡𑀺𑀁 𑀅𑀕𑀸;

𑀢𑀢𑁆𑀢𑀓𑀸 𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀣𑁂𑀭𑁄 𑀢𑀢𑁆𑀣𑀸𑀧𑀺 𑀑𑀓𑀺𑀭𑀺.

𑀢𑀢𑁆𑀣𑀸’𑀧𑀺 𑀧𑀼𑀣𑀼𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁;

‘‘𑀚𑀦𑁆𑀢𑀖𑀭 𑀧𑁄𑀓𑁆𑀔𑀭𑀡𑀻, 𑀅𑀬𑀁 𑀳𑁂𑀲𑁆𑀲𑀢𑀺 𑀪𑀽𑀫𑀺𑀧’’.

𑀢𑀲𑁆𑀲𑁂𑀯 ¶ 𑀭𑀸𑀚𑀕𑁂𑀳𑀲𑁆𑀲, 𑀕𑀦𑁆𑀢𑁆𑀯𑀸𑀦 𑀤𑁆𑀯𑀸𑀭𑀓𑁄𑀝𑁆𑀞𑀓𑀁;

𑀢𑀢𑁆𑀢𑀓𑁂𑀳𑁂’𑀯 𑀧𑀼𑀧𑁆𑀨𑁂𑀳𑀺, 𑀢𑀁 𑀞𑀸𑀦𑀁 𑀧𑀽𑀚𑀬𑀻 𑀇𑀲𑀺.

𑀢𑀢𑁆𑀣𑀸𑀧𑀺 𑀧𑀼𑀣𑀼𑀯𑀻𑀓𑀫𑁆𑀧𑀺, 𑀳𑀝𑁆𑀞𑀮𑁄𑀫𑁄 𑀅𑀢𑀻𑀯𑀲𑁄;

𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺, 𑀣𑁂𑀭𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀩𑀼𑀤𑁆𑀥𑀸𑀦𑀁, 𑀢𑀺𑀡𑁆𑀡𑀦𑁆𑀦𑀁 𑀩𑁄𑀥𑀺𑀭𑀼𑀓𑁆𑀔𑀢𑁄;

𑀆𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀲𑀸𑀔𑀸, 𑀭𑁄𑀧𑀺𑀢𑀸 𑀇𑀥 𑀪𑀽𑀫𑀺𑀧.

𑀢𑀣𑀸𑀕𑀢𑀲𑁆𑀲 𑀅𑀫𑁆𑀳𑀸𑀓𑀁, 𑀩𑁄𑀥𑀺𑀲𑀸𑀔𑀸𑀧𑀺 𑀤𑀓𑁆𑀔𑀺𑀡𑀸;

𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑀫𑁆𑀳𑀺, 𑀧𑀢𑀺𑀝𑁆𑀞𑀺𑀲𑁆𑀲𑀢𑀺 𑀪𑀽𑀫𑀺𑀧.

𑀢𑀢𑁄’𑀕𑀫𑀸 𑀫𑀳𑀸𑀣𑁂𑀭𑁄, 𑀫𑀳𑀸𑀫𑀼𑀘𑀮𑀫𑀸𑀮𑀓𑀁;

𑀢𑀢𑁆𑀢𑀓𑀸𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀓𑀺𑀭𑀺.

𑀢𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁;

𑀲𑀗𑁆𑀖𑀲𑁆𑀲𑀼 𑀧𑁄𑀲𑀣𑀸 𑀕𑀸𑀭𑀁, 𑀇𑀥 𑀳𑁂𑀲𑁆𑀲𑀢𑀺 𑀪𑀽𑀫𑀺𑀧.

𑀧𑀜𑁆𑀳𑀫𑁆𑀩𑀫𑀸𑀮𑀓𑀝𑁆𑀞𑀸𑀦𑀁, 𑀢𑀢𑁄’𑀕𑀫𑀸 𑀫𑀳𑀻𑀧𑀢𑀺;

𑀲𑀼𑀧𑀓𑁆𑀓𑀁 𑀅𑀫𑁆𑀩𑀧𑀓𑁆𑀓𑀜𑁆𑀘, 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀁.

𑀫𑀳𑀦𑁆𑀢𑀁 𑀉𑀧𑀦𑀸𑀫𑁂𑀲𑀺, 𑀭𑀜𑁆𑀜𑁄 𑀉𑀬𑁆𑀬𑀸𑀦𑀧𑀸𑀮𑀓𑁄;

𑀢𑀁 𑀣𑁂𑀭𑀲𑁆𑀲𑀼𑀧𑀦𑀸𑀫𑁂𑀲𑀺, 𑀭𑀸𑀚𑀸 𑀅𑀢𑀺𑀫𑀦𑁄𑀭𑀫𑀁.

𑀣𑁂𑀭𑁄 𑀦𑀺𑀲𑀻𑀤𑀦𑀸𑀓𑀸𑀭𑀁, 𑀤𑀲𑁆𑀲𑁂𑀲𑀺 𑀚𑀦𑀢𑀸 𑀳𑀺𑀢𑁄;

𑀅𑀢𑁆𑀣𑀭𑀸𑀧𑁂𑀲𑀺 𑀢𑀢𑁆𑀣𑁂𑀯, 𑀭𑀸𑀚𑀸 𑀅𑀢𑁆𑀣𑀭𑀡𑀁 𑀯𑀭𑀁.

𑀅𑀤𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲, 𑀣𑁂𑀭𑀲𑁆𑀲𑀫𑁆𑀩𑀁 𑀫𑀳𑀻𑀧𑀢𑀺;

𑀣𑁂𑀭𑁄 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸, 𑀭𑁄𑀧𑀦𑀢𑁆𑀣𑀸𑀬 𑀭𑀸𑀚𑀺𑀦𑁄.

𑀅𑀫𑁆𑀩𑀝𑁆𑀞𑀺𑀓𑀁 𑀅𑀤𑀸 𑀭𑀸𑀚𑀸, 𑀢𑀁 𑀲𑀬𑀁 𑀢𑀢𑁆𑀣 𑀭𑁄𑀧𑀬𑀺;

𑀳𑀢𑁆𑀣𑁂 𑀢𑀲𑁆𑀲𑁄𑀧𑀭𑀺𑀣𑁂𑀭𑁄, 𑀥𑁄𑀯𑀺 𑀢𑀲𑁆𑀲 𑀯𑀺𑀭𑀼𑀴𑁆𑀳𑀺𑀬𑀸.

𑀢𑀁 𑀔𑀡𑀁𑀬𑁂𑀯 𑀩𑀻𑀚𑀫𑁆𑀳𑀸, 𑀢𑀫𑁆𑀳𑀸 𑀦𑀺𑀓𑁆𑀔𑀫𑁆𑀫 𑀅𑀗𑁆𑀓𑀼𑀭𑁄;

𑀓𑀫𑁂𑀦𑀸’𑀢𑀺 𑀫𑀳𑀸𑀭𑀼𑀓𑁆𑀔𑁄, 𑀧𑀢𑁆𑀢𑀧𑀓𑁆𑀓𑀥𑀭𑁄 𑀅𑀳𑀼.

𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀭𑀺𑀲𑀸 𑀲𑀸 𑀲𑀭𑀸𑀚𑀺𑀓𑀸;

𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀸𑀲𑀺, 𑀣𑁂𑀭𑁂 𑀳𑀢𑁆𑀣𑀢𑀦𑀼𑀭𑀼𑀳𑀸.

𑀣𑁂𑀭𑁄 ¶ 𑀢𑀤𑀸 𑀧𑀼𑀧𑁆𑀨𑀫𑀼𑀝𑁆𑀞𑀺, 𑀅𑀝𑁆𑀞 𑀢𑀢𑁆𑀣 𑀲𑀫𑁄𑀓𑀺𑀭𑀺;

𑀢𑀣𑀸𑀧𑀺 𑀧𑀼𑀣𑀯𑀻𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑀲𑀗𑁆𑀖𑀲𑁆𑀲𑀧𑁆𑀧𑀦𑁆𑀦𑀮𑀸𑀪𑀸𑀦𑀁, 𑀅𑀦𑁂𑀓𑁂𑀲𑀁 𑀦𑀭𑀸𑀥𑀺𑀧;

𑀲𑀗𑁆𑀕𑀫𑁆𑀫𑀪𑀸𑀚𑀦𑀞𑀸𑀦𑀁, 𑀇𑀤𑀁 𑀞𑀸𑀦𑀁 𑀪𑀯𑀺𑀲𑁆𑀲𑀢𑀺.

𑀢𑀢𑁄 𑀕𑀦𑁆𑀢𑁆𑀯𑀸 𑀘𑀢𑀼𑀲𑁆𑀲𑀸𑀮-𑀞𑀸𑀦𑀁 𑀢𑀢𑁆𑀣 𑀲𑀫𑁄𑀓𑀺𑀭𑀺;

𑀢𑀢𑁆𑀢𑀓𑀸𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀓𑀫𑁆𑀧𑀺 𑀢𑀢𑁆𑀣𑀸𑀧𑀺 𑀫𑁂𑀤𑀺𑀦𑀻.

𑀢𑀁 𑀓𑀫𑁆𑀧𑀓𑀸𑀭𑀡𑀁 𑀧𑀼𑀘𑁆𑀙𑀺, 𑀭𑀸𑀚𑀸 𑀣𑁂𑀭𑁄 𑀯𑀺𑀬𑀸𑀓𑀭𑀺;

𑀢𑀺𑀡𑁆𑀡𑀦𑁆𑀦𑀁 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁, 𑀭𑀸𑀚𑀼𑀬𑁆𑀬𑀸𑀦 𑀧𑀝𑀺𑀕𑁆𑀕𑀳𑁂.

𑀤𑀸𑀦 𑀯𑀢𑁆𑀣𑀼𑀦𑀸’𑀳𑀝𑀸𑀦𑀺, 𑀤𑀻𑀧𑀯𑀸𑀲𑀻𑀳𑀺 𑀲𑀩𑁆𑀩𑀢𑁄;

𑀇𑀥 𑀞𑀧𑁂𑀢𑁆𑀯𑀸 𑀪𑁄𑀚𑁂𑀲𑀼𑀁, 𑀲𑀲𑀗𑁆𑀖𑁂 𑀲𑀼𑀕𑀢𑁂 𑀢𑀬𑁄.

𑀇𑀤𑀸𑀦𑀺 𑀧𑀦 𑀏𑀢𑁆𑀣𑁂𑀯, 𑀘𑀢𑀼𑀲𑁆𑀲𑀸𑀮𑀸 𑀪𑀯𑀺𑀲𑁆𑀲𑀢𑀺;

𑀲𑀗𑁆𑀖𑀲𑁆𑀲 𑀇𑀥 𑀪𑀢𑁆𑀢𑀕𑁆𑀕𑀁, 𑀪𑀯𑀺𑀲𑁆𑀲𑀢𑀺 𑀦𑀭𑀸𑀥𑀺𑀧.

𑀫𑀳𑀣𑀽𑀧𑀞𑀺𑀢𑀞𑀸𑀦𑀁, 𑀞𑀸𑀦𑀸𑀞𑀸𑀦𑀯𑀺𑀤𑀽𑀢𑀢𑁄;

𑀅𑀕𑀫𑀸𑀲𑀺 𑀫𑀳𑀸𑀣𑁂𑀭𑁄, 𑀫𑀳𑀺𑀦𑁆𑀤𑁄 𑀤𑀻𑀧𑀤𑀻𑀧𑀦𑁄.

𑀢𑀤𑀸 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁂, 𑀭𑀸𑀚𑀼𑀬𑁆𑀬𑀸𑀦𑀲𑁆𑀲 𑀔𑀼𑀤𑁆𑀤𑀺𑀓𑀸;

𑀓𑀓𑀼𑀥𑀯𑁆𑀳𑀸 𑀅𑀳𑀼 𑀯𑀸𑀧𑀻, 𑀢𑀲𑁆𑀲𑁄’𑀧𑀭𑀺 𑀚𑀮𑀦𑁆𑀢𑀺𑀓𑁂.

𑀣𑀽𑀧𑀸𑀭𑀳𑀁 𑀣𑀮𑀞𑀸𑀦𑀁, 𑀅𑀳𑀼 𑀣𑁂𑀭𑁂 𑀢𑀳𑀺𑀁 𑀕𑀢𑁂;

𑀭𑀜𑁆𑀜𑁄 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀁, 𑀧𑀼𑀝𑀓𑀸𑀦’𑀝𑁆𑀞 𑀆𑀳𑀭𑀼𑀁.

𑀢𑀸𑀦𑀺 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺, 𑀭𑀸𑀚𑀸 𑀣𑁂𑀭𑀲𑁆𑀲𑀼’𑀧𑀸𑀦𑀬𑀺;

𑀣𑁂𑀭𑁄 𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺, 𑀢𑁂𑀳𑀺 𑀧𑀽𑀚𑁂𑀲𑀺 𑀢𑀁 𑀨𑀮𑀁.

𑀢𑀢𑁆𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀭𑀸𑀚𑀸 𑀢𑀁 𑀓𑀫𑁆𑀧𑀓𑀸𑀭𑀡𑀁;

𑀧𑀼𑀘𑁆𑀙𑀺 𑀣𑁂𑀭𑁄’𑀦𑀼 𑀧𑀼𑀩𑁆𑀩𑁂𑀦, 𑀆𑀳𑀢𑀁 𑀓𑀫𑁆𑀧𑀓𑀸𑀭𑀡𑀁.

𑀇𑀤𑀁 𑀞𑀸𑀦𑀁 𑀫𑀳𑀸𑀭𑀸𑀚, 𑀘𑀢𑀼𑀩𑀼𑀤𑁆𑀥 𑀦𑀺𑀲𑁂𑀯𑀺𑀢𑀁;

𑀣𑀽𑀧𑀸𑀭𑀳𑀁 𑀳𑀺𑀢𑀢𑁆𑀣𑀸𑀬, 𑀲𑀼𑀔𑀢𑁆𑀣𑀸𑀬 𑀘 𑀧𑀸𑀡𑀺𑀦𑀁.

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀧𑀞𑀫𑀁, 𑀓𑀓𑀼𑀲𑀦𑁆𑀥𑁄 𑀚𑀺𑀦𑁄 𑀅𑀳𑀼;

𑀲𑀩𑁆𑀩 𑀥𑀫𑁆𑀫𑀯𑀺𑀤𑀽 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄.

𑀫𑀳𑀸𑀢𑀺𑀢𑁆𑀣𑀯𑁆𑀳𑀬𑀁 𑀆𑀲𑀺, 𑀫𑀳𑀸𑀫𑁂𑀖𑀯𑀦𑀁 𑀇𑀤𑀁;

𑀦𑀕𑀭𑀁 𑀅𑀪𑀬𑀁 𑀦𑀸𑀫, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬’𑀳𑀼.

𑀓𑀤𑀫𑁆𑀩 𑀦𑀤𑀺𑀬𑀸 𑀧𑀸𑀭𑁂, 𑀢𑀢𑁆𑀣 𑀭𑀸𑀚𑀸’𑀪𑀬𑁄 𑀅𑀳𑀼;

𑀑𑀚𑀤𑀻𑀧𑁄𑀢𑀺 𑀦𑀸𑀫𑁂𑀦, 𑀅𑀬𑀁 𑀤𑀻𑀧𑁄 𑀢𑀤𑀸𑀅𑀳𑀼.

𑀭𑀓𑁆𑀔𑀲𑁂𑀳𑀺 ¶ 𑀚𑀦𑀲𑁆𑀲𑁂’𑀢𑁆𑀣, 𑀭𑁄𑀕𑁄 𑀧𑀚𑁆𑀚𑀭𑀓𑁄 𑀅𑀳𑀼;

𑀓𑀓𑀼𑀲𑀦𑁆𑀥𑁄 𑀤𑀲𑀩𑀮𑁄, 𑀤𑀺𑀲𑁆𑀯𑀸𑀦 𑀢𑀤𑀼𑀧𑀤𑁆𑀤𑀯𑀁.

𑀢𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀯𑀺𑀦𑀬𑀁, 𑀧𑀯𑀢𑁆𑀢𑀺𑀁 𑀲𑀸𑀲𑀦𑀲𑁆𑀲 𑀘;

𑀓𑀸𑀢𑀼𑀁 𑀇𑀫𑀲𑁆𑀫𑀺𑀁 𑀤𑀻𑀧𑀲𑁆𑀫𑀺𑀁, 𑀓𑀭𑀼𑀡𑀸 𑀩𑀮𑀘𑁄𑀤𑀺𑀢𑁄.

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑁂𑀳𑀺, 𑀢𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀦𑀪𑀲𑀸’𑀕𑀫𑁆𑀫 𑀅𑀝𑁆𑀞𑀸𑀲𑀺, 𑀤𑁂𑀯𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂.

𑀲𑀫𑁆𑀩𑀼𑀤𑁆𑀥𑀲𑁆𑀲𑀸’𑀦𑀼𑀪𑀸𑀯𑁂𑀦, 𑀭𑁄𑀕𑁄 𑀧𑀚𑁆𑀚𑀭𑀓𑁄 𑀇𑀥;

𑀉𑀧𑀲𑀦𑁆𑀢𑁄 𑀫𑀳𑀸𑀭𑀸𑀚, 𑀤𑀻𑀧𑀫𑁆𑀳𑀺 𑀲𑀓𑀮𑁂 𑀢𑀤𑀸.

𑀓𑀢𑁆𑀣 𑀞𑀺𑀢𑁄 𑀅𑀥𑀺𑀝𑁆𑀞𑀸𑀲𑀺, 𑀦𑀭𑀺𑀲𑁆𑀲𑀭 𑀫𑀼𑀦𑀺𑀲𑁆𑀲𑀭𑁄;

𑀲𑀩𑁆𑀩𑁂 𑀫𑀁 𑀅𑀚𑁆𑀚 𑀧𑀲𑁆𑀲𑀦𑁆𑀢𑀼, 𑀑𑀚𑀤𑀻𑀧𑀫𑁆𑀳𑀺 𑀫𑀸𑀦𑀼𑀲𑀸.

𑀆𑀕𑀦𑁆𑀢𑀼𑀓𑀸𑀫𑀸 𑀲𑀩𑁆𑀩𑁂𑀯, 𑀫𑀦𑀼𑀲𑁆𑀲𑀸 𑀫𑀫 𑀲𑀦𑁆𑀢𑀺𑀓𑀁;

𑀆𑀕𑀘𑁆𑀙𑀦𑁆𑀢𑀼 𑀅𑀓𑀺𑀘𑁆𑀙𑁂𑀦, 𑀔𑀺𑀧𑁆𑀧𑀜𑁆𑀘𑀸𑀧𑀺 𑀫𑀳𑀸𑀫𑀼𑀦𑀺.

𑀑𑀪𑀸𑀲𑀬𑀦𑁆𑀢𑀁 𑀫𑀼𑀦𑀺𑀦𑁆𑀤𑀁 𑀢𑀁, 𑀑𑀪𑀸𑀲𑀦𑁆𑀢𑀜𑁆𑀘 𑀧𑀩𑁆𑀩𑀢𑀁;

𑀭𑀸𑀚𑀸 𑀘 𑀦𑀸𑀕𑀭𑀸 𑀘𑁂𑀯, 𑀤𑀺𑀲𑁆𑀯𑀸 𑀔𑀺𑀧𑁆𑀧𑀁 𑀉𑀧𑀸𑀕𑀫𑀼𑀁.

𑀤𑁂𑀯𑀢𑀸 𑀩𑀮𑀺𑀤𑀸𑀦𑀢𑁆𑀣𑀁, 𑀫𑀦𑀼𑀲𑁆𑀲𑀸 𑀘 𑀢𑀳𑀺𑀁 𑀕𑀢𑀸;

𑀤𑁂𑀯𑀢𑀸 𑀇𑀢𑀺 𑀫𑀜𑁆𑀜𑀺𑀁𑀲𑀼, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑀭𑀸𑀚𑀸 𑀲𑁄 𑀫𑀼𑀦𑀺𑀭𑀸𑀚𑀁 𑀢𑀁, 𑀅𑀢𑀺𑀳𑀝𑁆𑀞𑁄’𑀪𑀺 𑀯𑀸𑀤𑀺𑀬;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀪𑀢𑁆𑀢𑁂𑀦, 𑀆𑀦𑁂𑀢𑁆𑀯𑀸 𑀧𑀼𑀭𑀲𑀦𑁆𑀢𑀺 𑀓𑀁.

𑀲𑀲𑀗𑁆𑀖𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲, 𑀦𑀺𑀲𑀚𑁆𑀚𑀸𑀭𑀳𑀫𑀼𑀢𑁆𑀢𑀫𑀁;

𑀭𑀫𑀡𑀻𑀬𑀫𑀺𑀤𑀁 𑀞𑀸𑀦-𑀫𑀲𑀫𑁆𑀩𑀸𑀥𑀦𑁆𑀢𑀺 𑀘𑀺𑀦𑁆𑀢𑀺𑀬.

𑀓𑀸𑀭𑀺𑀢𑁂 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀧𑀮𑁆𑀮𑀗𑁆𑀓𑁂𑀲𑀼 𑀯𑀭𑁂 𑀲𑀼𑀢𑀁;

𑀦𑀺𑀲𑀻𑀤𑀸𑀧𑁂𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀇𑀥 𑀪𑀽𑀧𑀢𑀺.

𑀦𑀺𑀲𑀺𑀦𑁆𑀦𑀫𑁆𑀧𑀺 𑀘 𑀧𑀲𑁆𑀲𑀦𑁆𑀢𑀸, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀻𑀧𑁂 𑀫𑀦𑀼𑀲𑁆𑀲𑀸 𑀆𑀦𑁂𑀲𑀼𑀁, 𑀧𑀡𑁆𑀡𑀸𑀓𑀸𑀭𑁂 𑀲𑀫𑀦𑁆𑀢𑀢𑁄.

𑀅𑀢𑁆𑀢𑀦𑁄 𑀔𑀚𑁆𑀚𑀪𑁄𑀚𑁆𑀚𑁂𑀳𑀺, 𑀢𑁂𑀳𑀺 𑀢𑁂𑀳𑀸’𑀪𑀢𑁂𑀳𑀺 𑀘;

𑀲𑀦𑁆𑀢𑀧𑁆𑀧𑁂𑀲𑀺 𑀲𑀲𑀗𑁆𑀖𑀁 𑀢𑀁, 𑀭𑀸𑀚𑀸 𑀲𑁄 𑀮𑁄𑀓𑀦𑀸𑀬𑀓𑀁.

𑀇𑀥𑁂𑀯 𑀧𑀘𑁆𑀙𑀸𑀪𑀢𑁆𑀢𑀁 𑀢𑀁, 𑀦𑀺𑀲𑀺𑀦𑁆𑀦𑀲𑁆𑀲 𑀚𑀺𑀦𑀲𑁆𑀲 𑀲𑁄;

𑀫𑀳𑀸 𑀢𑀺𑀢𑁆𑀣𑀓𑀫𑀼𑀬𑁆𑀬𑀸𑀦𑀁, 𑀭𑀸𑀚𑀸’𑀤𑀸 𑀤𑀓𑁆𑀔𑀺𑀡𑀁 𑀯𑀭𑀁.

𑀅𑀓𑀸𑀮𑀧𑀼𑀧𑁆𑀨𑀸 ¶ 𑀮𑀗𑁆𑀓𑀸𑀭𑁂, 𑀫𑀳𑀸𑀢𑀺𑀢𑁆𑀣𑀯𑀦𑁂 𑀢𑀤𑀸;

𑀧𑀝𑀺𑀕𑁆𑀕𑀳𑀺𑀢𑁂 𑀩𑀼𑀤𑁆𑀥𑁂𑀦, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸𑀫𑀳𑀻.

𑀏𑀢𑁆𑀣𑁂𑀯 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄;

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀧𑀢𑁆𑀢𑀸 𑀫𑀕𑁆𑀕𑀨𑀮𑀁 𑀦𑀭𑀸.

𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸𑀦, 𑀫𑀳𑀸𑀢𑀺𑀢𑁆𑀣𑀯𑀦𑁂 𑀚𑀺𑀦𑁄;

𑀲𑀸𑀬𑀡𑁆𑀳𑀲𑀫𑀬𑁂 𑀕𑀦𑁆𑀢𑁆𑀯𑀸, 𑀩𑁄𑀥𑀺𑀞𑀸𑀦𑀸𑀭𑀳𑀁 𑀫𑀳𑀺.

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄;

𑀇𑀢𑀺 𑀘𑀺𑀦𑁆𑀢𑀬𑀺 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀢𑀢𑁆𑀣𑀁 𑀤𑀻𑀧𑀯𑀸𑀲𑀺𑀦𑀁.

𑀆𑀤𑀸𑀬 𑀤𑀓𑁆𑀔𑀺𑀡𑀁 𑀲𑀸𑀔𑀁, 𑀩𑁄𑀥𑀺𑀢𑁄 𑀫𑁂 𑀲𑀺𑀭𑀻𑀲𑀢𑁄;

𑀆𑀕𑀘𑁆𑀙𑀢𑀼 𑀭𑀽𑀧𑀦𑀦𑁆𑀤𑀸, 𑀪𑀺𑀓𑁆𑀔𑀼𑀦𑀻 𑀲𑀳𑀪𑀺𑀓𑁆𑀔𑀼𑀦𑀻.

𑀢𑀲𑁆𑀲 𑀢𑀁 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀲𑀸 𑀣𑁂𑀭𑀻 𑀢𑀤𑀦𑀦𑁆𑀢𑀭𑀁;

𑀕𑀳𑁂𑀢𑁆𑀯𑀸 𑀢𑀢𑁆𑀣 𑀭𑀸𑀚𑀸𑀦𑀁, 𑀉𑀧𑀲𑀗𑁆𑀓𑀫𑁆𑀫 𑀢𑀁 𑀢𑀭𑀼𑀁.

𑀮𑁂𑀔𑀁 𑀤𑀓𑁆𑀔𑀺𑀡𑀲𑀸𑀔𑀸𑀬, 𑀤𑀸𑀧𑁂𑀢𑁆𑀯𑀸𑀦 𑀫𑀳𑀺𑀤𑁆𑀥𑀺𑀓𑀸;

𑀫𑀦𑁄𑀲𑀺𑀮𑀸𑀬 𑀙𑀺𑀦𑁆𑀦𑀁 𑀢𑀁, 𑀞𑀺𑀢𑀁 𑀳𑁂𑀫𑀓𑀝𑀸𑀳𑀓𑁂.

𑀇𑀤𑁆𑀥𑀺𑀬𑀸 𑀩𑁄𑀥𑀺𑀫𑀸𑀤𑀸𑀬, 𑀲𑀧𑀜𑁆𑀘𑀲𑀢 𑀪𑀺𑀓𑁆𑀔𑀼𑀦𑀻;

𑀇𑀥𑀸’𑀦𑁂𑀢𑁆𑀯𑀸 𑀫𑀳𑀸𑀭𑀸𑀚, 𑀤𑁂𑀯𑀢𑀸 𑀧𑀭𑀺𑀯𑀸𑀭𑀺𑀢𑀸.

𑀲𑀲𑀼𑀯𑀡𑁆𑀡 𑀓𑀝𑀸𑀳𑀁 𑀢𑀁, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀸𑀭𑀺𑀢𑁂;

𑀞𑀧𑁂𑀲𑀺 𑀤𑀓𑁆𑀔𑀺𑀡𑁂 𑀳𑀢𑁆𑀣𑁂, 𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑁄.

𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀧𑀸𑀤𑀸𑀲𑀺, 𑀩𑁄𑀥𑀺𑀁 𑀭𑀜𑁆𑀜𑁄’𑀪𑀬𑀲𑁆𑀲 𑀢𑀁;

𑀫𑀳𑀸𑀢𑀺𑀢𑁆𑀣𑀫𑁆𑀳𑀺 𑀉𑀬𑁆𑀬𑀸𑀦𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑀢𑀢𑁄 𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄,

𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀳𑀺𑀁;

𑀯𑀻𑀲𑀢𑀺𑀬𑀸 𑀲𑀳𑀲𑁆𑀲𑀸𑀦𑀁, 𑀧𑀸𑀡𑀸𑀦𑀁 𑀆𑀲𑀺 𑀪𑀽𑀫𑀺𑀧.

𑀢𑀢𑁄𑀧𑀺 𑀉𑀢𑁆𑀢𑀭𑀁 𑀕𑀦𑁆𑀢𑁆𑀯𑀸, 𑀣𑀽𑀧𑀭𑀸𑀫𑀫𑀳𑀺𑀁 𑀚𑀺𑀦𑁄;

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄.

𑀥𑀫𑁆𑀫𑀁 ¶ 𑀤𑁂𑀲𑁂𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀧𑀭𑀺𑀲𑀸𑀬 𑀢𑀳𑀺𑀁𑀧𑀦;

𑀤𑀲𑀧𑀸𑀡 𑀲𑀳𑀲𑁆𑀲𑀸𑀦𑀺, 𑀧𑀢𑁆𑀢𑀫𑀕𑁆𑀕𑀨𑀮𑀸𑀦’𑀳𑀼𑀁.

𑀅𑀢𑁆𑀢𑀦𑁄 𑀥𑀫𑁆𑀫𑀓𑀭𑀡𑀁, 𑀫𑀦𑀼𑀲𑁆𑀲𑀸𑀦𑀁 𑀦𑀫𑀲𑁆𑀲𑀺𑀢𑀼𑀁;

𑀤𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀢𑀁, 𑀞𑀧𑁂𑀢𑁆𑀯𑀸 𑀇𑀥 𑀪𑀺𑀓𑁆𑀔𑀼𑀦𑀺𑀁.

𑀲𑀳 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀫𑀳𑀸𑀤𑁂𑀯𑀜𑁆𑀘 𑀲𑀸𑀯𑀓𑀁;

𑀞𑀧𑁂𑀢𑁆𑀯𑀸 𑀇𑀥 𑀲𑀫𑁆𑀩𑀼𑀤𑁆𑀥𑁄, 𑀢𑀢𑁄 𑀧𑀸𑀘𑀺𑀦𑀢𑁄 𑀧𑀦.

𑀞𑀺𑀢𑁄 𑀭𑀢𑀦𑀫𑀸𑀮𑀫𑁆𑀳𑀺, 𑀚𑀦𑀁 𑀲𑀫𑀦𑀼𑀲𑀸𑀲𑀺𑀬;

𑀲𑀲𑀗𑁆𑀖𑁄 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀚𑀫𑁆𑀩𑀼𑀤𑀻𑀧𑀁 𑀚𑀺𑀦𑁄 𑀅𑀕𑀸.

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀤𑀼𑀢𑀺𑀬𑀁, 𑀓𑁄𑀡𑀸𑀕𑀫𑀦 𑀦𑀸𑀬𑀓𑁄;

𑀅𑀳𑀼 𑀲𑀩𑁆𑀩𑀯𑀺𑀤𑀽 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄.

𑀫𑀳𑀸𑀦𑀸𑀫𑀯𑁆𑀳𑀬𑀁 𑀆𑀲𑀺, 𑀫𑀳𑀸𑀫𑁂𑀖𑀯𑀦𑀁 𑀇𑀤𑀁;

𑀯𑀟𑁆𑀠𑀫𑀸𑀦𑀧𑀼𑀭𑀁 𑀦𑀸𑀫, 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬’𑀳𑀼.

𑀲𑀫𑀺𑀤𑁆𑀥𑁄 𑀦𑀸𑀫 𑀦𑀸𑀫𑁂𑀦, 𑀢𑀢𑁆𑀣 𑀭𑀸𑀚𑀸 𑀢𑀤𑀸 𑀅𑀳𑀼;

𑀦𑀸𑀫𑁂𑀦 𑀯𑀭𑀤𑀻𑀧𑁄’𑀢𑀺, 𑀅𑀬𑀁 𑀤𑀻𑀧𑁄 𑀢𑀤𑀸 𑀅𑀳𑀼.

𑀤𑀼𑀩𑁆𑀩𑀼𑀝𑁆𑀞𑀼𑀧𑀤𑁆𑀤𑀯𑁄 𑀏𑀢𑁆𑀣, 𑀯𑀭𑀤𑀻𑀧𑁂 𑀢𑀤𑀸 𑀅𑀳𑀼;

𑀚𑀺𑀦𑁄 𑀲𑀓𑁄𑀡𑀸𑀕𑀫𑀦𑁄, 𑀤𑀺𑀲𑁆𑀯𑀸𑀦 𑀢𑀤𑀼𑀧𑀤𑁆𑀤𑀯𑀁.

𑀢𑀁 𑀳𑀼𑀢𑁆𑀯𑀸 𑀲𑀢𑁆𑀢𑀯𑀺𑀦𑀬𑀁, 𑀧𑀯𑀢𑁆𑀢𑀺𑀁 𑀲𑀸𑀲𑀦𑀲𑁆𑀲 𑀘;

𑀓𑀸𑀢𑀼𑀁 𑀇𑀫𑀲𑁆𑀫𑀺𑀁 𑀤𑀻𑀧𑀲𑁆𑀫𑀻𑀁, 𑀓𑀭𑀼𑀡𑀸 𑀩𑀮𑀘𑁄𑀤𑀺𑀢𑁄.

𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺, 𑀢𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀦𑀪𑀲𑀸’𑀕𑀫𑁆𑀫 𑀅𑀝𑁆𑀞𑀸𑀲𑀺, 𑀦𑀪𑁂 𑀲𑀼𑀫𑀦𑀓𑀽𑀝𑀓𑁂.

𑀲𑀫𑁆𑀩𑀼𑀤𑁆𑀥𑀲𑁆𑀲𑀸’𑀦𑀼𑀪𑀸𑀯𑁂𑀦, 𑀤𑀼𑀩𑁆𑀩𑀼𑀝𑁆𑀞𑀺 𑀲𑀸 𑀔𑀬𑀁 𑀕𑀢𑀸;

𑀲𑀸𑀲𑀦𑀸𑀦𑁆𑀢𑀭𑀥𑀸𑀦𑀢𑁆𑀢𑀸, 𑀲𑀼𑀯𑀼𑀝𑁆𑀞𑀺 𑀘 𑀢𑀤𑀸𑀅𑀳𑀼.

𑀢𑀢𑁆𑀢 𑀞𑀺𑀢𑁄 𑀅𑀥𑀺𑀝𑁆𑀞𑀸𑀲𑀺, 𑀦𑀭𑀺𑀲𑁆𑀲𑀭𑀫𑀼𑀦𑀺𑀲𑁆𑀲𑀭𑁄;

𑀲𑀩𑁆𑀩𑁂𑀯 𑀅𑀚𑁆𑀚 𑀧𑀲𑁆𑀲𑀦𑁆𑀢𑀼, 𑀯𑀭𑀤𑀻𑀧𑀫𑁆𑀳𑀺 𑀫𑀸𑀦𑀼𑀲𑀸.

𑀆𑀕𑀦𑁆𑀢𑀼𑀓𑀸𑀫𑀸 𑀲𑀩𑁆𑀩𑁂𑀯, 𑀫𑀦𑀼𑀲𑁆𑀲𑀸 𑀫𑀫 𑀲𑀦𑁆𑀢𑀺𑀓𑀁;

𑀆𑀕𑀘𑁆𑀙𑀦𑁆𑀢𑀼 𑀅𑀓𑀺𑀘𑁆𑀙𑁂𑀦, 𑀔𑀺𑀧𑁆𑀧𑀜𑁆𑀘𑀸’𑀢𑀺 𑀫𑀳𑀸𑀫𑀼𑀦𑀺.

𑀫𑀳𑀸𑀲𑀢𑁆𑀢𑀁 𑀫𑀼𑀦𑀺𑀦𑁆𑀤𑀁 𑀢𑀁, 𑀑𑀪𑀸𑀲𑀦𑁆𑀢𑀜𑁆𑀘 𑀧𑀩𑁆𑀩𑀢𑀁;

𑀭𑀸𑀚𑀸 𑀘 𑀦𑀸𑀕𑀭𑀸 𑀘𑁂𑀯, 𑀤𑀺𑀲𑁆𑀯𑀸 𑀔𑀺𑀧𑁆𑀧𑀫𑀼𑀧𑀸𑀕𑀫𑀼𑀁.

𑀤𑁂𑀯𑀢𑀸𑀩𑀮𑀺𑀤𑀸𑀦𑀢𑁆𑀣𑀁 ¶ , 𑀫𑀦𑀼𑀲𑁆𑀲𑀸 𑀘 𑀢𑀳𑀺𑀁 𑀕𑀢𑀸;

𑀤𑁂𑀯𑀢𑀸 𑀇𑀢𑀺 𑀫𑀜𑁆𑀜𑀺𑀁𑀲𑀼, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑀭𑀸𑀚𑀸 𑀲𑁄 𑀫𑀼𑀦𑀺𑀭𑀸𑀚𑀁 𑀢𑀁, 𑀅𑀢𑀺𑀳𑀝𑁆𑀞𑁄’𑀪𑀺𑀯𑀸𑀤𑀺𑀬;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀪𑀢𑁆𑀢𑁂𑀦, 𑀆𑀦𑁂𑀢𑁆𑀯𑀸 𑀧𑀼𑀭𑀲𑀦𑁆𑀢𑀺𑀓𑀁.

𑀲𑀲𑀗𑁆𑀖𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲, 𑀦𑀺𑀲𑀚𑁆𑀚𑀸𑀭𑀳 𑀫𑀼𑀢𑁆𑀢𑀫𑀁;

𑀭𑀫𑀡𑀻𑀬𑀫𑀺𑀤𑀁 𑀞𑀸𑀦𑀁, 𑀅𑀲𑀫𑁆𑀩𑀸𑀥𑀦𑁆𑀢𑀺 𑀘𑀺𑀦𑁆𑀢𑀺𑀬.

𑀓𑀸𑀭𑀺𑀢𑁂 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀧𑀮𑁆𑀮𑀗𑁆𑀓𑁂𑀲𑀼 𑀯𑀭𑁂𑀲𑀼 𑀢𑀁;

𑀦𑀺𑀲𑀻𑀤𑀸𑀧𑀬𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀇𑀥 𑀪𑀽𑀧𑀢𑀺.

𑀦𑀺𑀲𑀺𑀦𑁆𑀦𑀫𑁆𑀧𑀺’𑀥 𑀧𑀲𑁆𑀲𑀦𑁆𑀢𑀸, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀻𑀧𑁂 𑀫𑀦𑀼𑀲𑁆𑀲𑀸 𑀆𑀦𑁂𑀲𑀼𑀁, 𑀧𑀡𑁆𑀡𑀸𑀓𑀸𑀭𑁂 𑀲𑀫𑀦𑁆𑀢𑀢𑁄.

𑀇𑀥𑁂𑀯 𑀧𑀘𑁆𑀙𑀸𑀪𑀢𑁆𑀢𑀁 𑀢𑀁, 𑀦𑀺𑀲𑀺𑀦𑁆𑀦𑀲𑁆𑀲 𑀚𑀺𑀦𑀲𑁆𑀲 𑀲𑁄;

𑀫𑀳𑀸𑀦𑀸𑀫𑀓𑀫𑀼𑀬𑁆𑀬𑀸𑀦𑀁, 𑀭𑀸𑀚𑀸’𑀤𑀸 𑀤𑀓𑁆𑀔𑀺𑀡𑀁 𑀯𑀭𑀁.

𑀅𑀓𑀸𑀮𑀧𑀼𑀧𑁆𑀨𑀸𑀮𑀗𑁆𑀓𑀸𑀭𑁂, 𑀫𑀳𑀸𑀦𑀸𑀫𑀯𑀦𑁂 𑀢𑀤𑀸;

𑀧𑀝𑀺𑀕𑁆𑀕𑀳𑀺𑀢𑁂 𑀩𑀼𑀤𑁆𑀥𑁂𑀦, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸𑀫𑀳𑀻.

𑀏𑀢𑁆𑀣𑁂𑀯 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄;

𑀢𑀤𑀸 𑀢𑀺𑀁𑀲 𑀲𑀳𑀲𑁆𑀲𑀸𑀦𑀺, 𑀧𑀢𑁆𑀢𑀸 𑀫𑀕𑁆𑀕𑀨𑀮𑀁 𑀦𑀭𑀸.

𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸𑀦, 𑀫𑀳𑀸𑀦𑀸𑀫𑀯𑀦𑁂 𑀚𑀺𑀦𑁄;

𑀲𑀸𑀬𑀡𑁆𑀳𑀲𑀫𑀬𑁂 𑀕𑀦𑁆𑀢𑁆𑀯𑀸, 𑀧𑀼𑀩𑁆𑀩𑀥𑁄𑀥𑀺𑀞𑀺𑀢𑀁 𑀫𑀳𑀺𑀁.

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄;

𑀇𑀢𑀺 𑀘𑀺𑀦𑁆𑀢𑁂𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀢𑀢𑁆𑀣𑀁 𑀤𑀻𑀧𑀯𑀸𑀲𑀺𑀦𑀁.

𑀆𑀤𑀸𑀬 𑀤𑀓𑁆𑀔𑀺𑀡𑀁 𑀲𑀸𑀔𑀁, 𑀫𑀫𑁄𑀤𑀼𑀫𑁆𑀩𑀭𑀩𑁄𑀥𑀺𑀢𑁄;

𑀆𑀬𑀸𑀢𑀼 𑀓𑀦𑀓𑀤𑀢𑁆𑀢𑀸, 𑀪𑀺𑀓𑁆𑀔𑀼𑀦𑀻 𑀲𑀳𑀪𑀺𑀓𑁆𑀔𑀼𑀦𑀻.

𑀢𑀲𑁆𑀲 𑀢𑀁 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀲𑀸 𑀣𑁂𑀭𑀻 𑀢𑀤𑀦𑀦𑁆𑀢𑀭𑀁;

𑀕𑀳𑁂𑀢𑁆𑀯𑀸 𑀢𑀢𑁆𑀣 𑀭𑀸𑀚𑀸𑀦𑀁, 𑀉𑀧𑀲𑀗𑁆𑀓𑀫𑁆𑀫 𑀢𑀁 𑀢𑀭𑀼𑀁.

𑀮𑁂𑀔𑀁 ¶ 𑀤𑀓𑁆𑀔𑀺𑀡𑀲𑀸𑀔𑀸𑀬, 𑀤𑀸𑀧𑁂𑀢𑁆𑀯𑀸𑀦 𑀫𑀳𑀺𑀤𑁆𑀥𑀺𑀓𑀸;

𑀫𑀦𑁄𑀲𑀺𑀮𑀸𑀬 𑀙𑀺𑀦𑁆𑀦𑀁 𑀢𑀁, 𑀞𑀺𑀢𑀁 𑀳𑁂𑀫𑀓𑀝𑀸𑀳𑀓𑁂.

𑀇𑀤𑁆𑀥𑀺𑀬𑀸 𑀩𑁄𑀥𑀺𑀫𑀸𑀤𑀸𑀬, 𑀲𑀧𑀜𑁆𑀘𑀲𑀳𑀪𑀺𑀓𑁆𑀔𑀼𑀦𑀻;

𑀇𑀥𑀸𑀕𑀦𑁆𑀢𑁆𑀯𑀸 𑀫𑀳𑀸𑀭𑀸𑀚, 𑀤𑁂𑀯𑀢𑀸𑀧𑀭𑀺𑀯𑀸𑀭𑀺𑀢𑀸.

𑀲𑀲𑀼𑀯𑀡𑁆𑀡𑀓𑀝𑀸𑀳𑀁 𑀢𑀁, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀸𑀭𑀺𑀢𑁂;

𑀞𑀧𑁂𑀲𑀺 𑀤𑀓𑁆𑀔𑀺𑀡𑁂 𑀳𑀢𑁆𑀣𑁂, 𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑁄.

𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀭𑀜𑁆𑀜𑁄’𑀤𑀸, 𑀲𑀫𑀺𑀤𑁆𑀥𑀲𑁆𑀲 𑀲𑀢𑀁 𑀢𑀳𑀺𑀁;

𑀫𑀳𑀸𑀦𑀸𑀫𑀫𑁆𑀳𑀺 𑀉𑀬𑁆𑀬𑀸𑀦𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑀢𑀢𑁄 𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀺𑀭𑀻𑀲𑀫𑀸𑀮𑀓𑀼𑀢𑁆𑀢𑀭𑁂;

𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀦𑀺𑀲𑀺𑀦𑁆𑀦𑁄 𑀦𑀸𑀕𑀫𑀸𑀮𑀓𑁂.

𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀳𑀺𑀁;

𑀯𑀻𑀲𑀢𑀺𑀬𑀸 𑀲𑀳𑀲𑁆𑀲𑀸𑀦𑀁, 𑀧𑀸𑀡𑀸𑀦𑀁 𑀆𑀲𑀺 𑀪𑀽𑀫𑀺𑀧.

𑀧𑀼𑀩𑁆𑀩𑀩𑀼𑀤𑁆𑀥𑀦𑀺𑀲𑀺𑀦𑁆𑀦𑀁 𑀢𑀁, 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀭𑀼𑀢𑁆𑀢𑀭𑀁;

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄.

𑀥𑀫𑁆𑀫𑀁 𑀤𑁂𑀲𑁂𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀧𑀭𑀺𑀲𑀸𑀬 𑀢𑀳𑀺𑀁 𑀧𑀦;

𑀤𑀲𑀧𑀸𑀡𑀲𑀳𑀲𑁆𑀲𑀸𑀦𑀺, 𑀧𑀢𑁆𑀢𑀸 𑀫𑀕𑁆𑀕𑀨𑀮𑀁 𑀅𑀳𑀼𑀁.

𑀓𑀸𑀬𑀩𑀦𑁆𑀥𑀦𑀥𑀸𑀢𑀼𑀁 𑀲𑁄, 𑀫𑀦𑀼𑀲𑁆𑀲𑁂𑀳𑀺 𑀦𑀫𑀲𑁆𑀲𑀺𑀢𑀼𑀁;

𑀤𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀢𑀁, 𑀞𑀧𑁂𑀢𑁆𑀯𑀸 𑀇𑀥 𑀪𑀺𑀓𑁆𑀔𑀼𑀦𑀺𑀁.

𑀲𑀳 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀫𑀳𑀸𑀲𑀼𑀫𑁆𑀫𑀜𑁆𑀘 𑀲𑀸𑀯𑀓𑀁;

𑀞𑀧𑁂𑀢𑁆𑀯𑀸 𑀇𑀥 𑀲𑀫𑁆𑀩𑀼𑀤𑁆𑀥𑁄, 𑀑𑀭𑀁 𑀭𑀢𑀦𑀫𑀸𑀮𑀢𑁄.

𑀞𑀧𑁂𑀢𑁆𑀯𑀸 𑀲𑀼𑀤𑀲𑁆𑀲𑀦𑁂 𑀫𑀸𑀮𑁂, 𑀚𑀦𑀁 𑀲𑀫𑀦𑀼𑀲𑀸𑀲𑀺𑀬;

𑀲𑀲𑀗𑁆𑀖𑁄 𑀦𑀪𑀫𑀼𑀕𑁆𑀕𑀫𑁆𑀫, 𑀚𑀫𑁆𑀩𑀼𑀤𑀻𑀧𑀁 𑀚𑀺𑀦𑁄 𑀅𑀕𑀸.

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀢𑀢𑀺𑀬𑀁, 𑀓𑀲𑁆𑀲𑀧𑁄 𑀕𑁄𑀢𑁆𑀢𑀢𑁄 𑀚𑀺𑀦𑁄;

𑀅𑀳𑀼 𑀲𑀩𑁆𑀩𑀯𑀺𑀤𑀽 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄.

𑀫𑀳𑀸𑀫𑁂𑀖𑀯𑀦𑀁 𑀆𑀲𑀺, 𑀫𑀳𑀸𑀲𑀸𑀕𑀭𑀦𑀸𑀫𑀓𑀁;

𑀯𑀺𑀲𑀸𑀮𑀁 𑀦𑀸𑀫 𑀦𑀕𑀭𑀁, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬’𑀳𑀼.

𑀚𑀬𑀦𑁆𑀢𑁄 𑀦𑀸𑀫 𑀦𑀸𑀫𑁂𑀦, 𑀢𑀢𑁆𑀣 𑀭𑀸𑀚𑀸 𑀢𑀤𑀸 𑀅𑀳𑀼;

𑀦𑀸𑀫𑁂𑀦 𑀫𑀡𑁆𑀟𑀤𑀻𑀧𑁄𑀢𑀺, 𑀅𑀬𑀁 𑀤𑀻𑀧𑁄 𑀢𑀤𑀸 𑀅𑀳𑀼.

𑀢𑀤𑀸 ¶ 𑀚𑀬𑀦𑁆𑀢𑀭𑀜𑁆𑀜𑁄 𑀘, 𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀼 𑀘;

𑀬𑀼𑀤𑁆𑀥𑀁 𑀉𑀧𑀝𑁆𑀞𑀺𑀢𑀁 𑀆𑀲𑀺, 𑀪𑀺𑀁𑀲𑀦𑀁 𑀲𑀢𑁆𑀢𑀳𑀺𑀁𑀲𑀦𑀁.

𑀓𑀲𑁆𑀲𑀧𑁄 𑀲𑁄 𑀤𑀲𑀩𑀮𑁄, 𑀢𑁂𑀦 𑀬𑀼𑀤𑁆𑀥𑁂𑀦 𑀧𑀸𑀡𑀺𑀦𑀁;

𑀫𑀳𑀦𑁆𑀢𑀁 𑀩𑁆𑀬𑀲𑀦𑀁 𑀤𑀺𑀲𑁆𑀯𑀸, 𑀫𑀳𑀸𑀓𑀸𑀭𑀼𑀡𑀺𑀓𑁄 𑀫𑀼𑀦𑀺.

𑀢𑀁 𑀳𑀦𑁆𑀢𑁆𑀯𑀸 𑀲𑀢𑁆𑀢𑀯𑀺𑀦𑀬𑀁, 𑀧𑀯𑀢𑁆𑀢𑀺𑀁 𑀲𑀸𑀲𑀦𑀲𑁆𑀲 𑀘;

𑀓𑀸𑀢𑀼𑀁 𑀇𑀫𑀲𑁆𑀫𑀺𑀁 𑀤𑀻𑀧𑀲𑁆𑀫𑀺𑀁, 𑀓𑀭𑀼𑀡𑀸𑀩𑀮𑀘𑁄𑀤𑀺𑀢𑁄.

𑀯𑀻𑀲𑀢𑀺𑀬𑀸 𑀲𑀳𑀲𑁆𑀲𑁂𑀳𑀺, 𑀢𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀦𑀪𑀲𑀸’𑀕𑀫𑁆𑀫 𑀅𑀝𑁆𑀞𑀸𑀲𑀺, 𑀲𑀼𑀪𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂.

𑀢𑀢𑁆𑀭𑀞𑀺𑀢𑁄 𑀅𑀥𑀺𑀝𑁆𑀞𑀸𑀲𑀺, 𑀦𑀭𑀺𑀲𑁆𑀲𑀭 𑀫𑀼𑀦𑀺𑀲𑁆𑀲𑀭𑁄;

‘‘𑀲𑀩𑁆𑀩𑁂 𑀫𑀁 𑀅𑀚𑁆𑀚 𑀧𑀲𑁆𑀲𑀦𑁆𑀢𑀼, 𑀫𑀡𑁆𑀟𑀤𑀻𑀧𑀫𑁆𑀳𑀺 𑀫𑀸𑀦𑀼𑀲𑀸.

𑀆𑀕𑀦𑁆𑀢𑀼𑀓𑀸𑀫𑀸 𑀲𑀩𑁆𑀩𑁂𑀯, 𑀫𑀸𑀦𑀼𑀲𑀸 𑀫𑀫 𑀲𑀦𑁆𑀢𑀺𑀓𑀁;

𑀆𑀕𑀘𑁆𑀙𑀦𑁆𑀢𑀼 𑀅𑀓𑀺𑀘𑁆𑀙𑁂𑀦, 𑀔𑀺𑀧𑁆𑀧𑀜𑁆𑀘𑀸’𑀢𑀺 𑀫𑀳𑀸𑀫𑀼𑀦𑀺.

𑀑𑀪𑀸𑀲𑀦𑁆𑀢𑀁 𑀫𑀼𑀦𑀺𑀦𑁆𑀤𑀁 𑀢𑀁, 𑀑𑀪𑀸𑀲𑀦𑁆𑀢𑀜𑁆𑀘 𑀧𑀩𑁆𑀩𑀓𑀁;

𑀭𑀸𑀚𑀸 𑀘 𑀦𑀸𑀕𑀭𑀸 𑀘𑁂𑀯, 𑀤𑀺𑀲𑁆𑀯𑀸 𑀔𑀺𑀧𑁆𑀧𑀁 𑀉𑀧𑀸𑀕𑀫𑀼𑀁.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢-𑀯𑀺𑀚𑀬𑀸𑀬 𑀚𑀦𑀸 𑀩𑀳𑀽;

𑀤𑁂𑀯𑀢𑀸 𑀩𑀮𑀺𑀤𑀸𑀦𑀢𑁆𑀣𑀁, 𑀢𑀁 𑀧𑀩𑁆𑀩𑀢𑀫𑀼𑀧𑀸𑀕𑀢𑀸.

𑀤𑁂𑀯𑀢𑀸 𑀇𑀢𑀺 𑀫𑀜𑁆𑀜𑀺𑀁𑀲𑀼, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀭𑀸𑀚𑀸 𑀘 𑀲𑁄 𑀓𑀼𑀫𑀸𑀭𑁄 𑀘, 𑀬𑀼𑀤𑁆𑀥𑀫𑀼𑀚𑁆𑀛𑀺𑀁𑀲𑀼 𑀯𑀺𑀫𑁆𑀳𑀺𑀢𑀸.

𑀭𑀸𑀚𑀸 𑀲𑁄 𑀫𑀼𑀦𑀺𑀭𑀸𑀚𑀁 𑀢𑀁, 𑀅𑀢𑀺𑀳𑀝𑁆𑀞𑁄’𑀪𑀺𑀯𑀸𑀤𑀺𑀬;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀪𑀢𑁆𑀢𑁂𑀦, 𑀆𑀦𑁂𑀢𑁆𑀯𑀸 𑀧𑀼𑀭𑀲𑀦𑁆𑀢𑀺𑀓𑀁.

𑀲𑀲𑀗𑁆𑀖𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲, 𑀦𑀺𑀲𑀚𑁆𑀚𑀸𑀭𑀳𑀫𑀼𑀢𑁆𑀢𑀫𑀁;

𑀭𑀫𑀡𑀻𑀬𑀫𑀺𑀤𑀁 𑀞𑀸𑀦-𑀫𑀲𑀫𑁆𑀩𑀸𑀥𑀦𑁆𑀢𑀺 𑀘𑀺𑀦𑁆𑀢𑀺𑀬.

𑀓𑀸𑀭𑀺𑀢𑁂 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀧𑀮𑁆𑀮𑀗𑁆𑀓𑁂𑀲𑀼 𑀯𑀭𑁂𑀲𑀼 𑀢𑀁;

𑀦𑀺𑀲𑀻𑀤𑀸𑀧𑁂𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀇𑀥 𑀪𑀽𑀧𑀢𑀺.

𑀦𑀺𑀲𑀺𑀦𑁆𑀦𑀫𑁆𑀧𑀺𑀥 𑀧𑀲𑁆𑀲𑀦𑁆𑀢𑀸, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀻𑀧𑁂 𑀫𑀦𑀼𑀲𑁆𑀲𑀸 𑀆𑀦𑁂𑀲𑀼𑀁, 𑀧𑀡𑁆𑀡𑀸𑀓𑀸𑀭𑁂 𑀲𑀫𑀦𑁆𑀢𑀢𑁄.

𑀅𑀢𑁆𑀢𑀦𑁄 𑀔𑀚𑁆𑀚𑀪𑁄𑀚𑁆𑀚𑁂𑀳𑀺, 𑀢𑁂𑀳𑀺 𑀢𑁂𑀳𑀸’𑀪𑀢𑁂𑀳𑀺 𑀘;

𑀲𑀲𑀦𑁆𑀢𑀧𑁆𑀧𑁂𑀲𑀺 𑀲𑀲𑀗𑁆𑀖𑀁 𑀢𑀁, 𑀭𑀸𑀚𑀸 𑀲𑁄 𑀮𑁄𑀓𑀦𑀸𑀬𑀓𑀁.

𑀇𑀥𑁂’𑀯 𑀧𑀘𑁆𑀙𑀸𑀪𑀢𑁆𑀢𑀁 𑀢𑀁, 𑀦𑀺𑀲𑀺𑀦𑁆𑀦𑀲𑁆𑀲 𑀚𑀺𑀦𑀲𑁆𑀲 𑀲𑁄;

𑀫𑀳𑀸𑀲𑀸𑀕𑀭𑀫𑀼𑀬𑁆𑀬𑀸𑀦𑀁, 𑀭𑀸𑀚𑀸’𑀤𑀸 𑀤𑀓𑁆𑀔𑀺𑀡𑀁 𑀯𑀭𑀁.

𑀅𑀓𑀸𑀮𑀧𑀼𑀧𑁆𑀨𑀮𑀗𑁆𑀓𑀸𑀭𑁂 ¶ , 𑀫𑀳𑀸𑀲𑀸𑀕𑀭𑀓𑀸𑀦𑀦𑁂;

𑀧𑀝𑀺𑀕𑁆𑀕𑀳𑀺𑀢𑁂 𑀩𑀼𑀤𑁆𑀥𑁂𑀦, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸𑀫𑀳𑀻.

𑀏𑀢𑁆𑀣𑁂𑀯 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄;

𑀢𑀤𑀸 𑀯𑀻𑀲𑀁 𑀲𑀳𑀲𑁆𑀲𑀸𑀦𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦𑀭𑀸.

𑀤𑀺𑀯𑀸 𑀯𑀺𑀳𑀸𑀭𑀁 𑀓𑀢𑁆𑀯𑀸𑀦, 𑀫𑀳𑀸𑀲𑀸𑀕𑀭𑀓𑀸𑀦𑀦𑁂;

𑀲𑀸𑀬𑀦𑁆𑀳𑁂 𑀲𑀼𑀕𑀢𑁄 𑀕𑀦𑁆𑀢𑁆𑀯𑀸, 𑀧𑀼𑀩𑁆𑀩𑀩𑁄𑀥𑀺𑀝𑁆𑀞𑀺𑀢𑀁 𑀫𑀳𑀺𑀁.

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄;

𑀇𑀢𑀺 𑀘𑀺𑀦𑁆𑀢𑁂𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀢𑀢𑁆𑀣𑀁 𑀤𑀻𑀧𑀯𑀸𑀲𑀺𑀦𑀁.

𑀆𑀤𑀸𑀬 𑀤𑀓𑁆𑀔𑀺𑀡𑀁 𑀲𑀸𑀔𑀁, 𑀫𑀫 𑀦𑀺𑀕𑁆𑀭𑁄𑀥𑀩𑁄𑀥𑀺𑀢𑁄;

𑀲𑀼𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑀻 𑀏𑀢𑀼, 𑀇𑀤𑀸𑀦𑀺 𑀲𑀳𑀪𑀺𑀓𑁆𑀔𑀼𑀦𑀻.

𑀢𑀲𑁆𑀲 𑀢𑀁 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀲𑀸 𑀣𑁂𑀭𑀻 𑀢𑀤𑀦𑀦𑁆𑀢𑀭𑀁;

𑀕𑀳𑁂𑀢𑁆𑀯𑀸 𑀢𑀢𑁆𑀣 𑀭𑀸𑀚𑀸𑀦𑀁, 𑀉𑀧𑀲𑀗𑁆𑀓𑀫𑁆𑀫 𑀢𑀁 𑀢𑀭𑀼𑀁.

𑀮𑁂𑀔𑀁 𑀤𑀓𑁆𑀔𑀺𑀡𑀲𑀸𑀔𑀸𑀬, 𑀤𑀸𑀧𑁂𑀢𑁆𑀯𑀸𑀦 𑀫𑀳𑀺𑀤𑁆𑀥𑀺𑀓𑀸;

𑀫𑀦𑁄𑀲𑀺𑀮𑀸𑀬 𑀙𑀺𑀦𑁆𑀦𑀁 𑀢𑀁, 𑀞𑀺𑀢𑀁 𑀳𑁂𑀫𑀓𑀝𑀸𑀬𑀓𑁂.

𑀇𑀤𑁆𑀥𑀺𑀬𑀸 𑀩𑁄𑀥𑀺𑀫𑀸𑀤𑀸𑀬, 𑀲𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀻;

𑀇𑀥𑀸𑀦𑁂𑀢𑁆𑀯𑀸 𑀫𑀳𑀸𑀭𑀸𑀚, 𑀤𑁂𑀯𑀢𑀸𑀧𑀭𑀺𑀯𑀸𑀭𑀺𑀢𑀸.

𑀲𑀲𑀼𑀯𑀡𑁆𑀡𑀓𑀝𑀸𑀳𑀁 𑀢𑀁, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀸𑀭𑀺𑀢𑁂;

𑀞𑀧𑁂𑀲𑀺 𑀤𑀓𑁆𑀔𑀺𑀡𑁂 𑀳𑀢𑁆𑀣𑁂, 𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑁄.

𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀭𑀜𑁆𑀜𑁄’𑀤𑀸, 𑀚𑀬𑀦𑁆𑀢𑀲𑁆𑀲 𑀲𑀢𑀁 𑀢𑀳𑀺𑀁;

𑀫𑀳𑀸𑀲𑀸𑀕𑀭𑀫𑀼𑀬𑁆𑀬𑀸𑀦𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑀢𑀢𑁄 𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀦𑀸𑀕𑀫𑀸𑀴𑀓𑀉𑀢𑁆𑀢𑀭𑁂;

𑀥𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀦𑀺𑀲𑀺𑀦𑁆𑀦𑁄’𑀲𑁄𑀓𑀫𑀸𑀴𑀓𑁂.

𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀳𑀺𑀁;

𑀅𑀳𑀼 𑀧𑀸𑀡𑀲𑀳𑀲𑁆𑀲𑀸𑀦𑀁, 𑀘𑀢𑀼𑀦𑁆𑀦𑀁 𑀫𑀦𑀼𑀚𑀸𑀥𑀺𑀧.

𑀧𑀼𑀩𑁆𑀩𑀩𑀼𑀤𑁆𑀥𑀦𑀺𑀲𑀺𑀢𑀁 𑀢𑀁, 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦𑀼𑀢𑁆𑀢𑀭𑀁;

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀅𑀧𑁆𑀧𑁂𑀢𑁆𑀯𑀸, 𑀲𑀫𑀸𑀥𑀺𑀁 𑀯𑀼𑀝𑁆𑀞𑀺𑀢𑁄 𑀢𑀢𑁄.

𑀥𑀫𑁆𑀫𑀁 𑀤𑁂𑀲𑁂𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀧𑀭𑀺𑀲𑀸𑀬 𑀢𑀳𑀺𑀁 𑀧𑀦;

𑀤𑀲𑀧𑀸𑀡𑀲𑀳𑀲𑁆𑀲𑀸𑀦𑀺, 𑀧𑀢𑁆𑀢𑀫𑀕𑁆𑀕𑀨𑀮𑀸𑀦’𑀳𑀼𑀁.

𑀚𑀮𑀲𑀸𑀝𑀺𑀓𑀥𑀸𑀢𑀼𑀁 ¶ 𑀲𑁄, 𑀫𑀦𑀲𑁆𑀲𑁂𑀳𑀺 𑀦𑀫𑀲𑁆𑀲𑀺𑀢𑀼𑀁;

𑀤𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀢𑀁; 𑀞𑀧𑁂𑀢𑁆𑀯𑀸 𑀇𑀥 𑀪𑀺𑀓𑁆𑀔𑀼𑀦𑀻.

𑀲𑀳 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀲𑀩𑁆𑀩𑀦𑀦𑁆𑀤𑀺𑀜𑁆𑀘 𑀲𑀸𑀯𑀓𑀁;

𑀞𑀧𑁂𑀢𑁆𑀯𑀸 𑀦𑀤𑀻𑀢𑁄 𑀑𑀭𑀁, 𑀲𑁄 𑀲𑀼𑀤𑀲𑁆𑀲𑀦𑀫𑀸𑀴𑀢𑁄.

𑀲𑁄𑀫𑀦𑀲𑁆𑀲𑁂 𑀫𑀸𑀴𑀓𑀲𑁆𑀫𑀺𑀁, 𑀚𑀦𑀁 𑀲𑀫𑀦𑀼𑀲𑀸𑀲𑀺𑀬;

𑀲𑀗𑁆𑀖𑁂𑀦 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀚𑀫𑁆𑀩𑀼𑀤𑀻𑀧𑀁 𑀚𑀺𑀦𑁄 𑀅𑀕𑀸.

𑀅𑀳𑀼 𑀇𑀫𑀲𑁆𑀫𑀺𑀁 𑀓𑀧𑁆𑀧𑀲𑁆𑀫𑀺𑀁, 𑀘𑀢𑀼𑀢𑁆𑀣𑀁 𑀕𑁄𑀢𑀫𑁄 𑀚𑀺𑀦𑁄;

𑀲𑀩𑁆𑀩𑀥𑀫𑁆𑀫𑀯𑀺𑀤𑀽 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄.

𑀧𑀞𑀫𑀁 𑀲𑁄 𑀇𑀥𑀸𑀕𑀦𑁆𑀢𑁆𑀯𑀸, 𑀬𑀓𑁆𑀔𑀦𑀺𑀤𑁆𑀥𑀫𑀦𑀁 𑀅𑀓𑀸;

𑀤𑀼𑀢𑀺𑀬𑀁 𑀧𑀼𑀦𑀭𑀸𑀕𑀫𑁆𑀫, 𑀦𑀸𑀕𑀸𑀦𑀁 𑀤𑀫𑀦𑀁 𑀅𑀓𑀸.

𑀓𑀮𑁆𑀬𑀸𑀡𑀺𑀬𑀁 𑀫𑀡𑀺𑀅𑀓𑁆𑀔𑀺 𑀦𑀸𑀕𑁂𑀦𑀸’𑀪𑀺𑀦𑀺𑀫𑀦𑁆𑀢𑀺𑀢𑁄;

𑀢𑀢𑀺𑀬𑀁 𑀧𑀼𑀦𑀭𑀸𑀕𑀫𑁆𑀫, 𑀲𑀲𑀗𑁆𑀖𑁄 𑀢𑀢𑁆𑀣 𑀪𑀼𑀜𑁆𑀚𑀺𑀬.

𑀧𑀼𑀩𑁆𑀩𑀩𑁄𑀥𑀺𑀞𑀺𑀢𑀞𑀸𑀦𑀁, 𑀣𑀽𑀧𑀞𑀸𑀦𑀫𑀺𑀤𑀫𑁆𑀧𑀺 𑀘;

𑀧𑀭𑀺𑀪𑁄𑀕𑀥𑀸𑀢𑀼𑀞𑀸𑀦𑀜𑁆𑀘, 𑀦𑀺𑀲𑀚𑁆𑀚𑀸𑀬𑁄’𑀧𑀪𑀼𑀜𑁆𑀚𑀺𑀬.

𑀧𑀼𑀩𑁆𑀩𑀩𑀼𑀤𑁆𑀥𑀞𑀺𑀢𑀝𑁆𑀞𑀸𑀦𑀸, 𑀑𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑀼𑀦𑀺;

𑀮𑀁𑀓𑀸𑀤𑀻𑀧𑁂 𑀮𑁄𑀓𑀤𑀻𑀧𑁄, 𑀫𑀦𑀼𑀲𑁆𑀲𑀸𑀪𑀸𑀯𑀢𑁄 𑀢𑀤𑀸.

𑀤𑀻𑀧𑀝𑁆𑀞𑀁 𑀤𑁂𑀯𑀲𑀗𑁆𑀖𑀜𑁆𑀘, 𑀦𑀸𑀕𑁂 𑀲𑀫𑀦𑀼𑀲𑀸𑀲𑀺𑀬;

𑀲𑀲𑀗𑁆𑀖𑁄 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀚𑀫𑁆𑀩𑀼𑀤𑀻𑀧𑀁 𑀚𑀺𑀦𑁄 𑀅𑀕𑀸.

𑀏𑀯𑀁 𑀞𑀸𑀦𑀫𑀺𑀤𑀁 𑀭𑀸𑀚, 𑀘𑀢𑀼𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁;

𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀭𑀸𑀚, 𑀣𑀽𑀧𑁄 𑀳𑁂𑀲𑁆𑀲𑀢𑀺’𑀦𑀸𑀕𑀢𑁂.

𑀩𑀼𑀤𑁆𑀥𑀲𑀸𑀭𑀻𑀭𑀥𑀸𑀢𑀽𑀦𑀁, 𑀤𑁄𑀡𑀥𑀸𑀢𑀼𑀦𑀺𑀥𑀸𑀦𑀯𑀸;

𑀯𑀻𑀲𑀁𑀳𑀢𑁆𑀣𑀲𑀢𑀁 𑀉𑀘𑁆𑀘𑁄, 𑀳𑁂𑀫𑀫𑀸𑀮𑀻’𑀢𑀺 𑀯𑀺𑀲𑁆𑀲𑀼𑀢𑁄.

𑀅𑀳𑀫𑁂𑀯 𑀓𑀸𑀭𑁂𑀲𑁆𑀲𑀸𑀫𑀺, 𑀇𑀘𑁆𑀙𑀸𑀳 𑀧𑀼𑀣𑀯𑀺𑀲𑁆𑀲𑀭𑁄;

𑀇𑀥 𑀅𑀜𑁆𑀜𑀸𑀦𑀺 𑀓𑀺𑀘𑁆𑀘𑀸𑀦𑀺, 𑀩𑀳𑀽𑀦𑀺 𑀢𑀯 𑀪𑀽𑀫𑀺𑀧.

𑀢𑀸𑀦𑀺 𑀓𑀸𑀭𑁂𑀳𑀺 𑀦𑀢𑁆𑀢𑀸𑀢𑁂, 𑀓𑀸𑀭𑁂𑀲𑁆𑀲𑀢𑀺 𑀇𑀫𑀁 𑀧𑀦;

𑀫𑀳𑀸𑀦𑀸𑀕𑀲𑁆𑀲 𑀢𑁂 𑀪𑀸𑀢𑀼, 𑀉𑀧𑀭𑀸𑀚𑀲𑁆𑀲 𑀅𑀢𑁆𑀭𑀚𑁄.

𑀲𑁄 𑀬𑀝𑁆𑀞𑀸𑀮𑀬𑀢𑀺𑀲𑁆𑀲𑁄𑀢𑀺, 𑀭𑀸𑀚𑀸 𑀳𑁂𑀲𑁆𑀲𑀢’𑀦𑀸𑀕𑀢𑁂;

𑀭𑀸𑀚𑀸 𑀕𑁄𑀝𑁆𑀞𑀸𑀪𑀬𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺.

𑀢𑀲𑁆𑀲 ¶ 𑀧𑀼𑀢𑁆𑀢𑁄 𑀓𑀸𑀓𑀯𑀡𑁆𑀡-𑀢𑀺𑀲𑁆𑀲𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀢𑀲𑁆𑀲 𑀭𑀜𑁆𑀜𑁄 𑀲𑀼𑀢𑁄 𑀭𑀸𑀚, 𑀫𑀳𑀸𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.

𑀤𑀼𑀝𑁆𑀞𑀕𑀸𑀫𑀡𑀺𑀲𑀤𑁆𑀤𑁂𑀦, 𑀧𑀸𑀓𑀝𑁄’𑀪𑀬𑀦𑀸𑀫𑀓𑁄;

𑀓𑀸𑀭𑁂𑀲𑁆𑀲𑀢𑀻’𑀥 𑀣𑀽𑀧𑀁 𑀲𑁄, 𑀫𑀳𑀸 𑀢𑁂𑀚𑀺𑀤𑁆𑀥𑀺𑀯𑀺𑀓𑁆𑀓𑀫𑁄.

𑀇𑀘𑁆𑀘𑀸𑀳 𑀣𑁂𑀭𑁄 𑀣𑁂𑀭𑀲𑁆𑀲, 𑀯𑀘𑀦𑁂 𑀦𑁂’𑀢𑁆𑀣 𑀪𑀽𑀧𑀢𑀺;

𑀉𑀲𑁆𑀲𑀸𑀧𑁂𑀲𑀺 𑀲𑀺𑀮𑀸𑀣𑀫𑁆𑀪𑀁, 𑀢𑀁 𑀧𑀯𑀢𑁆𑀢𑀺𑀁 𑀮𑀺𑀔𑀸𑀧𑀺𑀬.

𑀭𑀫𑁆𑀫𑀁 𑀫𑀳𑀸𑀫𑁂𑀖𑀯𑀦𑀁, 𑀢𑀺𑀲𑁆𑀲𑀸𑀭𑀸𑀫𑀁 𑀫𑀳𑀸𑀫𑀳𑀻;

𑀫𑀳𑀸𑀫𑀳𑀺𑀦𑁆𑀤𑀣𑁂𑀭𑁄 𑀲𑁄, 𑀧𑀝𑀺𑀕𑁆𑀕𑀬𑁆𑀳 𑀫𑀳𑀺𑀤𑁆𑀥𑀺𑀓𑁄.

𑀅𑀓𑀫𑁆𑀧𑁄 𑀓𑀫𑁆𑀧𑀬𑀺𑀢𑁆𑀯𑀸𑀦, 𑀫𑀳𑀺𑀁 𑀞𑀸𑀦𑁂𑀲𑀼 𑀅𑀝𑁆𑀞𑀲𑀼;

𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸𑀦, 𑀦𑀕𑀭𑀁 𑀲𑀸𑀕𑀭𑀽𑀧𑀫𑀁.

𑀭𑀜𑁆𑀜𑁄 𑀖𑀭𑁂 𑀪𑀢𑁆𑀢𑀓𑀺𑀘𑁆𑀘𑀁, 𑀓𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀫𑀦𑁆𑀤𑀺𑀭𑀁;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀁 𑀢𑀳𑀺𑀁.

𑀲𑀼𑀢𑁆𑀢𑀁 𑀚𑀦𑀲𑁆𑀲 𑀤𑁂𑀲𑁂𑀢𑁆𑀯𑀸, 𑀲𑀳𑀲𑁆𑀲𑀁 𑀫𑀸𑀦𑀼𑀲𑁂 𑀢𑀳𑀺𑀁;

𑀧𑀸𑀧𑀬𑀺𑀢𑁆𑀯𑀸 𑀫𑀕𑁆𑀕𑀨𑀮𑀁, 𑀫𑀳𑀸𑀫𑁂𑀖𑀯𑀦𑁂 𑀯𑀲𑀺.

𑀢𑀢𑀺𑀬𑁂 𑀤𑀺𑀯𑀲𑁂 𑀣𑁂𑀭𑁄, 𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀬;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀤𑁂𑀲𑀺𑀬𑀸’𑀲𑀺𑀯𑀺𑀲𑁄𑀧𑀫𑀁.

𑀧𑀸𑀧𑀬𑀺𑀢𑁆𑀯𑀸’𑀪𑀺𑀲𑀫𑀬𑀁, 𑀲𑀳𑀲𑁆𑀲𑀧𑀼𑀭𑀺𑀲𑁂 𑀢𑀢𑁄;

𑀢𑀺𑀲𑁆𑀲𑀸𑀭𑀸𑀫𑀁 𑀅𑀕𑀸 𑀣𑁂𑀭𑁄, 𑀭𑀸𑀚𑀸 𑀘 𑀲𑀼𑀢𑀤𑁂𑀲𑀦𑁄.

𑀣𑁂𑀭𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸, 𑀲𑁄 𑀧𑀼𑀘𑁆𑀙𑀺 𑀚𑀺𑀦𑀲𑀸𑀲𑀦𑀁;

𑀧𑀢𑀺𑀝𑁆𑀞𑀺𑀢𑀦𑁆𑀦𑀼 𑀪𑀦𑁆𑀢𑁂’𑀢𑀺, 𑀦 𑀢𑀸𑀯 𑀫𑀦𑀼𑀚𑀸’𑀥𑀺𑀧.

𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀢𑁆𑀣𑀁, 𑀚𑀺𑀦𑀸’𑀡𑀸𑀬 𑀚𑀦𑀸𑀥𑀺𑀧;

𑀲𑀻𑀫𑀸𑀬 𑀇𑀥 𑀩𑀤𑁆𑀥𑀸𑀬, 𑀧𑀢𑀺𑀝𑁆𑀞𑀺𑀲𑁆𑀲𑀢𑀺 𑀲𑀸𑀲𑀦𑀁.

𑀇𑀘𑁆𑀘’𑀩𑁆𑀭𑀯𑀺 𑀫𑀳𑀸𑀣𑁂𑀭𑁄, 𑀢𑀁 𑀭𑀸𑀚𑀸 𑀇𑀤𑀫𑀩𑁆𑀭𑀯𑀺;

𑀲𑀫𑁆𑀩𑀼𑀤𑁆𑀥𑀸’𑀡𑀸𑀬 𑀅𑀦𑁆𑀢𑁄𑀳𑀁, 𑀯𑀲𑁆𑀲𑀺𑀲𑁆𑀲𑀸𑀫𑀺 𑀚𑀼𑀢𑀺𑀦𑁆𑀥𑀭.

𑀢𑀲𑁆𑀫𑀸 𑀓𑀢𑁆𑀯𑀸 𑀧𑀼𑀭𑀁 𑀅𑀦𑁆𑀢𑁄-𑀲𑀻𑀫𑀁 𑀩𑀦𑁆𑀥𑀣 𑀲𑀚𑁆𑀚𑀼𑀓𑀁;

𑀇𑀘𑁆𑀘𑀸’𑀩𑁆𑀭𑀯𑀺 𑀫𑀳𑀸𑀭𑀸𑀚𑀸, 𑀣𑁂𑀭𑁄 𑀢𑀁 𑀇𑀥𑀫𑀩𑁆𑀭𑀯𑀺.

𑀏𑀯𑀁 𑀲𑀢𑀺 𑀢𑀼𑀯𑀁𑀬𑁂𑀯, 𑀧𑀚𑀸𑀦 𑀧𑀼𑀣𑀯𑀺𑀲𑁆𑀲𑀭;

𑀲𑀻𑀫𑀸𑀬 𑀕𑀫𑀦𑀝𑁆𑀞𑀸𑀦𑀁, 𑀩𑀦𑁆𑀥𑀺𑀲𑁆𑀲𑀸𑀫 𑀫𑀬𑀁 𑀳𑀺𑀢𑀁.

‘‘𑀲𑀸𑀥𑀽’’𑀢𑀺 ¶ 𑀯𑀢𑁆𑀯𑀸 𑀪𑀽𑀫𑀺𑀦𑁆𑀤𑁄, 𑀤𑁂𑀯𑀺𑀦𑁆𑀤𑁄 𑀯𑀺𑀬 𑀦𑀦𑁆𑀤𑀦𑀸;

𑀫𑀳𑀸𑀫𑁂𑀖𑀯𑀦𑀸𑀭𑀫𑁆𑀫𑀸, 𑀧𑀸𑀯𑀺𑀲𑀺 𑀫𑀦𑁆𑀤𑀺𑀭𑀁 𑀲𑀓𑀁.

𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀣𑁂𑀭𑁄, 𑀭𑀜𑁆𑀜𑁄 𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀬;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀤𑁂𑀲𑁂𑀲’𑀦𑀫𑀦𑀕𑁆𑀕𑀺𑀬𑀁.

𑀧𑀸𑀬𑁂𑀢𑁆𑀯𑀸’𑀫𑀢𑀧𑀸𑀦𑀁 𑀲𑁄, 𑀲𑀳𑀲𑁆𑀲𑀧𑀼𑀭𑀺𑀲𑁂 𑀢𑀳𑀺𑀁;

𑀫𑀳𑀸𑀫𑁂𑀖𑀯𑀦𑀸𑀭𑀸𑀫𑀁, 𑀫𑀳𑀸𑀣𑁂𑀭𑁄 𑀉𑀧𑀸𑀕𑀫𑀺.

𑀧𑀸𑀢𑁄 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸, 𑀫𑀡𑁆𑀟𑀬𑀺𑀢𑁆𑀯𑀸 𑀧𑀼𑀭𑀁 𑀯𑀭𑀁;

𑀯𑀺𑀳𑀸𑀭𑀕𑀸𑀫𑀺𑀫𑀕𑁆𑀕𑀜𑁆𑀘, 𑀯𑀺𑀳𑀸𑀭𑀜𑁆𑀘 𑀲𑀫𑀦𑁆𑀢𑀢𑁄.

𑀭𑀣𑁂𑀲𑀪𑁄 𑀭𑀣𑀝𑁆𑀞𑁄 𑀲𑁄, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁄;

𑀲𑀳𑀸𑀫𑀘𑁆𑀘𑁄 𑀲𑀳𑁄𑀭𑁄𑀥𑁄, 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑁄.

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀲𑀓𑀸𑀭𑀸𑀫𑀫𑀼𑀧𑀸𑀕𑀫𑀺;

𑀢𑀢𑁆𑀣 𑀣𑁂𑀭𑁂 𑀉𑀧𑀕𑀦𑁆𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀯𑀦𑁆𑀤𑀦𑀸𑀭𑀳𑁂.

𑀲𑀳 𑀣𑁂𑀭𑁂𑀳𑀺 𑀕𑀦𑁆𑀢𑁆𑀯𑀸𑀦, 𑀦𑀤𑀺𑀬𑁄’𑀧𑀭𑀺𑀢𑀺𑀢𑁆𑀣𑀓𑀁;

𑀢𑀢𑁄 𑀓𑀲𑀦𑁆𑀢𑁄 𑀅𑀕𑀫𑀺, 𑀳𑁂𑀫𑀦𑀗𑁆𑀕𑀮𑀫𑀸𑀤𑀺𑀬.

𑀫𑀳𑀸𑀧𑀤𑀼𑀫𑁄 𑀓𑀼𑀜𑁆𑀚𑀭𑁄 𑀘, 𑀉𑀪𑁄 𑀦𑀸𑀕𑀸 𑀲𑀼𑀫𑀗𑁆𑀕𑀮𑀸;

𑀲𑀼𑀯𑀡𑁆𑀡𑀦𑀗𑁆𑀕𑀮𑁂 𑀬𑀼𑀢𑁆𑀢𑀸, 𑀧𑀞𑀫𑁂 𑀓𑀼𑀦𑁆𑀢𑀫𑀸𑀴𑀓𑁂.

𑀘𑀢𑀼𑀭𑀗𑁆𑀕𑀫𑀳𑀸 𑀲𑁂𑀦𑁄, 𑀲𑀳 𑀣𑁂𑀭𑁂𑀳𑀺 𑀔𑀢𑁆𑀢𑀺𑀬𑁄;

𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀁 𑀲𑀻𑀢𑀁, 𑀤𑀲𑁆𑀲𑀬𑀺𑀢𑁆𑀯𑀸 𑀅𑀭𑀺𑀦𑁆𑀤𑀫𑁄.

𑀲𑀫𑀮𑀗𑁆𑀓𑀢𑀁 𑀧𑀼𑀡𑁆𑀡𑀖𑀝𑀁, 𑀦𑀸𑀦𑀸𑀭𑀸𑀕𑀁 𑀥𑀚𑀁 𑀲𑀼𑀪𑀁;

𑀧𑀸𑀢𑀺𑀁 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘, 𑀲𑁄𑀡𑁆𑀡𑀭𑀚𑀢 𑀤𑀡𑁆𑀟𑀓𑀁.

𑀆𑀤𑀸𑀲𑀁 𑀧𑀼𑀧𑁆𑀨𑀪𑀭𑀺𑀢𑀁, 𑀲𑀫𑀼𑀕𑁆𑀕𑀁 𑀓𑀼𑀲𑀼𑀫𑀕𑁆𑀖𑀺𑀬𑀁;

𑀢𑁄𑀭𑀡𑀓𑀤𑀮𑀻𑀙𑀢𑁆𑀢𑀸𑀤𑀺𑀁, 𑀕𑀳𑀺𑀢𑀺𑀢𑁆𑀣𑀺 𑀧𑀭𑀺𑀯𑀸𑀭𑀺𑀢𑁄.

𑀦𑀸𑀦𑀸𑀢𑀼𑀭𑀺𑀬 𑀲𑀗𑁆𑀖𑀼𑀝𑁆𑀞𑁄, 𑀩𑀮𑁄𑀖 𑀧𑀭𑀺𑀯𑀸𑀭𑀺𑀢𑁄;

𑀣𑀼𑀢𑀺𑀫𑀗𑁆𑀕𑀮𑀕𑀻𑀢𑁂𑀳𑀺, 𑀧𑀽𑀭𑀬𑀦𑁆𑀢𑁄 𑀘𑀢𑀼𑀤𑁆𑀤𑀺𑀲𑀁.

𑀲𑀸𑀥𑀼𑀓𑀸𑀭 𑀦𑀺𑀦𑀸𑀤𑁂𑀢𑀺, 𑀘𑁂𑀮𑀼𑀓𑁆𑀔𑁂𑀧𑀲𑀢𑁂𑀳𑀺 𑀘;

𑀫𑀳𑀢𑀸 𑀙𑀡𑀧𑀼𑀚𑀸𑀬, 𑀓𑀲𑀦𑁆𑀢𑁄 𑀪𑀽𑀫𑀺𑀧𑁄 𑀅𑀕𑀸.

𑀯𑀺𑀳𑀸𑀭𑀜𑁆𑀘 𑀧𑀼𑀭𑀜𑁆𑀘𑁂𑀯, 𑀓𑀼𑀭𑀼𑀫𑀸𑀦𑁄 𑀧𑀤𑀓𑁆𑀔𑀺𑀡𑀁;

𑀲𑀻𑀫𑀸𑀬 𑀕𑀫𑀦𑀞𑀸𑀦𑀁, 𑀦𑀤𑀺𑀁 𑀧𑀢𑁆𑀯𑀸 𑀲𑀫𑀸𑀧𑀬𑀺.

𑀓𑁂𑀦𑀓𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀲𑀻𑀫𑀸 𑀏𑀢𑁆𑀣 𑀕𑀢𑀸𑀢𑀺 𑀘𑁂;

𑀏𑀯𑀁 𑀲𑀻𑀫𑀸𑀕𑀢𑀞𑀸𑀦𑀁, 𑀇𑀘𑁆𑀙𑀫𑀸𑀦𑀸 𑀦𑀺𑀩𑁄𑀥𑀣.

𑀦𑀚𑁆𑀚𑀸𑀧𑀸𑀲𑀸𑀡𑀢𑀺𑀢𑁆𑀣𑀫𑁆𑀳𑀺 ¶ , 𑀧𑀸𑀲𑀸𑀡𑁂 𑀓𑀼𑀟𑁆𑀟𑀯𑀸𑀝𑀓𑀁;

𑀢𑀢𑁄 𑀓𑀼𑀫𑁆𑀩𑀮𑀯𑀸𑀝𑀁 𑀢𑀁, 𑀫𑀳𑀸𑀦𑀺𑀧𑀁 𑀢𑀢𑁄 𑀅𑀕𑀸.

𑀢𑀢𑁄 𑀓𑀼𑀓𑀼𑀥𑀧𑀸𑀴𑀺𑀗𑁆𑀕𑁄, 𑀫𑀳𑀸𑀅𑀗𑁆𑀕𑀡𑀕𑁄 𑀢𑀢𑁄;

𑀢𑀢𑁄 𑀔𑀼𑀚𑁆𑀚𑀫𑀥𑀼𑀮𑀜𑁆𑀘, 𑀫𑀭𑀼𑀢𑁆𑀢𑀧𑁄𑀓𑁆𑀔𑀭𑀡𑀺𑀁𑀢𑀢𑁄.

𑀯𑀺𑀚𑀬𑀸𑀭𑀸𑀫 𑀉𑀬𑁆𑀬𑀸𑀦𑁂, 𑀉𑀢𑁆𑀢𑀭𑀤𑁆𑀯𑀸𑀭𑀓𑁄𑀝𑁆𑀞 𑀕𑁄;

𑀕𑀚𑀓𑀼𑀫𑁆𑀪𑀓 𑀧𑀸𑀲𑀸𑀡𑀁, 𑀣𑀼𑀲𑀯𑀝𑁆𑀞𑀺𑀓 𑀫𑀚𑁆𑀛𑀕𑁄.

𑀅𑀪𑀬𑁂 𑀩𑀮𑀸𑀓𑀧𑀸𑀲𑀸𑀡𑀁, 𑀫𑀳𑀸𑀲𑀼𑀲𑀸𑀦 𑀫𑀚𑁆𑀛𑀕𑁄;

𑀤𑀻𑀖𑀧𑀸𑀲𑀸𑀡𑀓𑀁 𑀕𑀦𑁆𑀢𑁆𑀯𑀸, 𑀓𑀫𑁆𑀫𑀸𑀭𑀤𑁂𑀯 𑀕𑀸𑀫𑀢𑁄.

𑀦𑀺𑀕𑁆𑀭𑁄𑀥 𑀫𑀗𑁆𑀕𑀡𑀁 𑀕𑀦𑁆𑀢𑁆𑀯𑀸, 𑀳𑀺𑀬𑀕𑀮𑁆𑀮𑀲𑀫𑀻𑀧𑀓𑁂;

𑀤𑀺𑀬𑀸𑀯𑀲𑀩𑁆𑀭𑀸𑀳𑁆𑀫𑀡𑀲𑁆𑀲, 𑀤𑁂𑀯𑁄𑀓𑀁 𑀧𑀼𑀩𑁆𑀩𑀤𑀓𑁆𑀔𑀺𑀡𑀁.

𑀢𑀢𑁄 𑀫𑀭𑀼𑀫𑁆𑀩𑀢𑀺𑀢𑁆𑀢𑀗𑁆𑀕𑁄, 𑀢𑀢𑁄 𑀉𑀤𑁆𑀥𑀁 𑀦𑀺𑀤𑀺𑀁 𑀅𑀕𑀸;

𑀧𑀞𑀫 𑀘𑁂𑀢𑀺𑀬 𑀧𑀸𑀘𑀺𑀦𑁂, 𑀤𑁆𑀯𑁂 𑀓𑀤𑀫𑁆𑀩𑀸 𑀅𑀚𑀸𑀬𑀺𑀲𑀼𑀁.

𑀲𑁂𑀦𑀺𑀦𑁆𑀤𑀕𑀼𑀢𑁆𑀢𑀭𑀚𑁆𑀚𑀫𑁆𑀳𑀺, 𑀤𑀫𑀺𑀴𑀸 𑀤𑀓𑀲𑀼𑀤𑁆𑀥𑀺𑀓𑀸;

𑀦𑀤𑀺𑀁 𑀤𑀽𑀭𑀦𑁆𑀢𑀺 𑀩𑀦𑁆𑀥𑀺𑀢𑁆𑀯𑀸, 𑀦𑀕𑀭𑀸𑀲𑀦𑁆𑀦𑀫𑀓𑀁𑀲𑀼 𑀢𑀁.

𑀚𑀻𑀯 𑀫𑀸𑀦𑀓𑀤𑀫𑁆𑀩𑀜𑁆𑀘, 𑀅𑀦𑁆𑀢𑁄𑀲𑀻𑀫𑀕𑀢𑀁 𑀅𑀳𑀼;

𑀫𑀢𑀓 𑀤𑀫𑁆𑀩𑀢𑀻𑀭𑁂𑀦, 𑀲𑀻𑀫𑀸𑀉𑀤𑁆𑀤𑀓𑀤𑀫𑁆𑀩𑀕𑀸.

𑀲𑀻𑀳𑀲𑀺𑀦𑀸 𑀦𑀢𑀺𑀢𑁆𑀣𑁂𑀦, 𑀉𑀕𑁆𑀕𑀦𑁆𑀢𑁆𑀯𑀸 𑀢𑀻𑀭𑀢𑁄 𑀯𑀚𑀁;

𑀧𑀸𑀲𑀸𑀡𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸𑀦, 𑀦𑀺𑀫𑀺𑀢𑁆𑀢𑀁 𑀖𑀝𑁆𑀝𑀬𑀺 𑀇𑀲𑀺.

𑀦𑀺𑀫𑀺𑀢𑁆𑀢𑁂𑀢𑀼 𑀧𑀦𑁂’𑀢𑀲𑁆𑀫𑀺𑀁, 𑀖𑀝𑁆𑀝𑀺𑀢𑁂 𑀤𑁂𑀯𑀫𑀸𑀦𑀼𑀲𑀸;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀼𑀁, 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑀭𑀜𑁆𑀜𑁄 𑀤𑀺𑀦𑁆𑀦𑀸𑀬 𑀲𑀻𑀢𑀸𑀬, 𑀦𑀺𑀫𑀺𑀢𑁆𑀢𑁂 𑀧𑀭𑀺𑀓𑀺𑀢𑁆𑀢𑀬𑀺;

𑀤𑁆𑀯𑀢𑁆𑀢𑀺𑀁𑀲𑀫𑀸𑀴𑀓𑀢𑁆𑀣𑀜𑁆𑀘, 𑀣𑀽𑀧𑀸𑀭𑀸𑀫𑀢𑁆𑀣𑀫𑁂𑀯 𑀘.

𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑀬𑀺𑀢𑁆𑀯𑀸𑀦, 𑀫𑀳𑀸𑀣𑁂𑀭𑁄 𑀫𑀳𑀸𑀫𑀢𑀺;

𑀲𑀻𑀫𑀦𑁆𑀢𑀭𑀦𑀺𑀫𑀺𑀢𑁆𑀢𑁂 𑀘, 𑀓𑀺𑀢𑁆𑀢𑀬𑀺𑀢𑁆𑀯𑀸 𑀬𑀣𑀸𑀯𑀺𑀥𑀺𑀁.

𑀅𑀩𑀦𑁆𑀥𑀻 ¶ 𑀲𑀩𑁆𑀩𑀸 𑀲𑀻𑀫𑀸𑀬𑁄, 𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂𑀯𑀲𑀻;

𑀫𑀳𑀸𑀫𑀳𑀻 𑀅𑀓𑀫𑁆𑀧𑀺𑀢𑁆𑀣, 𑀲𑀻𑀫𑀸𑀩𑀦𑁆𑀥𑁂 𑀲𑀫𑀸𑀧𑀺𑀢𑁂.

𑀧𑀜𑁆𑀘𑀫𑁂 𑀤𑀺𑀯𑀲𑁂 𑀣𑁂𑀭𑁄, 𑀭𑀜𑁆𑀜𑁄 𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀬;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀲𑀼𑀢𑁆𑀢𑀦𑁆𑀢𑀁 𑀔𑀚𑁆𑀚𑀦𑀻𑀬𑀓𑀁.

𑀫𑀳𑀸𑀚𑀦𑀲𑁆𑀲 𑀤𑁂𑀲𑁂𑀢𑁆𑀯𑀸, 𑀲𑀳𑀲𑁆𑀲𑀁 𑀫𑀸𑀦𑀼𑀲𑁂 𑀢𑀳𑀺𑀁;

𑀧𑀸𑀬𑁂𑀢𑁆𑀯𑀸 𑀅𑀫𑀢𑀁 𑀧𑀸𑀦𑀁, 𑀫𑀳𑀸𑀫𑁂𑀖𑀯𑀦𑁂 𑀯𑀲𑀻.

𑀙𑀝𑁆𑀞𑁂𑀧𑀺 𑀤𑀺𑀯𑀲𑁂 𑀣𑁂𑀭𑁄, 𑀭𑀜𑁆𑀜𑁄𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀬;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀲𑀼𑀢𑁆𑀢 𑀕𑁄𑀫𑀬 𑀧𑀺𑀡𑁆𑀟𑀺𑀓𑀁.

𑀤𑁂𑀲𑀬𑀺𑀢𑁆𑀯𑀸 𑀤𑁂𑀲𑀦𑀜𑁆𑀜𑀽, 𑀫𑀳𑀲𑁆𑀲𑀁𑀬𑁂𑀯 𑀫𑀸𑀦𑀼𑀲𑁂;

𑀧𑀸𑀧𑀬𑀺𑀢𑁆𑀯𑀸’𑀪𑀺𑀲𑀫𑀬𑀁, 𑀫𑀳𑀸 𑀫𑁂𑀖𑀯𑀦𑁂 𑀯𑀲𑀻.

𑀲𑀢𑁆𑀢𑀫𑁂𑀧𑀺 𑀤𑀺𑀦𑁂 𑀣𑁂𑀭𑁄, 𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀬;

𑀦𑀺𑀲𑀚𑁆𑀚 𑀦𑀦𑁆𑀤𑀦𑀯𑀦𑁂, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁.

𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑀬𑀺𑀢𑁆𑀯𑀸𑀦, 𑀲𑀳𑀲𑁆𑀲𑀁𑀬𑁂𑀯 𑀫𑀸𑀦𑀼𑀲𑁂;

𑀧𑀸𑀧𑀬𑀺𑀢𑁆𑀯𑀸’𑀪𑀺𑀲𑀫𑀬𑀁, 𑀫𑀳𑀸 𑀫𑁂𑀖𑀯𑀦𑁂 𑀯𑀲𑀺.

𑀏𑀯𑀜𑁆𑀳𑀺 𑀅𑀝𑁆𑀞 𑀦𑀯𑀫-𑀲𑀳𑀲𑁆𑀲𑀸𑀦𑀺 𑀚𑀼𑀢𑀺𑀦𑁆𑀥𑀭𑁄;

𑀓𑀸𑀭𑀬𑀺𑀢𑁆𑀯𑀸’𑀪𑀺𑀲𑀫𑀬𑀁, 𑀤𑀺𑀯𑀲𑁂𑀳𑁂𑀯 𑀲𑀢𑁆𑀢𑀢𑀺.

𑀢𑀁 𑀫𑀳𑀸𑀦𑀦𑁆𑀤𑀦𑀯𑀦𑀁, 𑀯𑀼𑀘𑁆𑀘𑀢𑁂 𑀢𑁂𑀦 𑀢𑀸𑀤𑀺𑀦𑀸;

𑀲𑀸𑀲𑀦𑀚𑁄𑀢𑀺𑀢𑀝𑁆𑀞𑀸𑀦-𑀫𑀻𑀢𑀺 𑀚𑁄𑀢𑀺𑀯𑀦𑀁 𑀇𑀢𑀺.

𑀲𑀼𑀓𑁆𑀔𑀸 𑀧𑁂𑀢𑁆𑀯𑀸𑀦 𑀫𑀢𑁆𑀢𑀺𑀓𑀸.

𑀓𑀸𑀴𑀧𑀸𑀲𑀸𑀤 𑀧𑀭𑀺𑀯𑁂𑀡-𑀫𑀻𑀢𑀺 𑀲𑀗𑁆𑀔𑀫𑀼𑀧𑀸𑀕𑀢𑀁.

𑀢𑀢𑁄 𑀫𑀳𑀸𑀩𑁄𑀥𑀺𑀖𑀭𑀁, 𑀮𑁄𑀳𑀧𑀸𑀲𑀸𑀤 𑀫𑁂𑀯 𑀘;

𑀲𑀮𑀸𑀓𑀕𑁆𑀕𑀜𑁆𑀘 𑀓𑀸𑀭𑁂𑀲𑀺, 𑀪𑀢𑁆𑀢𑀲𑀸𑀮𑀜𑁆𑀘 𑀲𑀸𑀥𑀼𑀓𑀁.

𑀩𑀳𑀽𑀦𑀺 ¶ 𑀧𑀭𑀺𑀯𑁂𑀡𑀸𑀦𑀺, 𑀲𑀸𑀥𑀼 𑀧𑁄𑀓𑁆𑀔𑀭𑀡𑀻𑀧𑀺 𑀘;

𑀭𑀢𑁆𑀢𑀺𑀞𑀸𑀦 𑀤𑀺𑀯𑀸𑀞𑀸𑀦-𑀧𑀪𑀼𑀢𑀻𑀦𑀺 𑀘 𑀓𑀸𑀭𑀬𑀺.

𑀢𑀲𑁆𑀲 𑀦𑀳𑀸𑀦𑀧𑀸𑀧𑀲𑁆𑀲, 𑀦𑁆𑀳𑀸𑀦𑀧𑁄𑀓𑁆𑀔𑀭𑀡𑀻𑀢𑀝𑁂;

𑀲𑀼𑀦𑀳𑀸𑀢𑀧𑀭𑀺𑀯𑁂𑀡𑀦𑁆𑀢𑀺, 𑀧𑀭𑀺𑀯𑁂𑀡𑀁 𑀧𑀯𑀼𑀘𑁆𑀘𑀢𑀺.

𑀢𑀲𑁆𑀲 𑀘𑀗𑁆𑀓𑀫𑀺𑀢𑀞𑀸𑀦𑁂, 𑀤𑀻𑀧 𑀤𑀻𑀧𑀲𑁆𑀲 𑀲𑀸𑀥𑀼𑀦𑁄;

𑀯𑀼𑀘𑁆𑀘𑀢𑁂 𑀧𑀭𑀺𑀯𑁂𑀡𑀁 𑀢𑀁, 𑀤𑀻𑀖𑀘𑀗𑁆𑀓𑀫𑀦𑀁 𑀇𑀢𑀺.

𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀁, 𑀲𑀫𑀸𑀧𑀚𑁆𑀚 𑀬𑀳𑀺𑀁 𑀢𑀼𑀲𑁄;

𑀨𑀮𑀕𑁆𑀕 𑀧𑀭𑀺𑀯𑁂𑀡𑀦𑁆𑀢𑀺, 𑀏𑀢𑀁 𑀢𑁂𑀦 𑀧𑀯𑀼𑀘𑁆𑀘𑀢𑀺.

𑀅𑀧𑀲𑁆𑀲𑀺𑀬 𑀅𑀧𑀲𑁆𑀲𑁂𑀦𑀁, 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀲𑁄;

𑀣𑁂𑀭𑀸 𑀧𑀲𑁆𑀲𑀬 𑀧𑀭𑀺𑀯𑁂𑀡𑀁, 𑀏𑀢𑀁 𑀢𑁂𑀦 𑀧𑀯𑀼𑀘𑁆𑀘𑀢𑀺.

𑀩𑀳𑀽 𑀫𑀭𑀼𑀕𑀡𑀸 𑀬𑀢𑁆𑀣, 𑀉𑀧𑀸𑀲𑀺𑀁𑀲𑀼 𑀉𑀧𑀘𑁆𑀘𑀢𑀁;

𑀢𑁂𑀦𑁂𑀯 𑀢𑀁 𑀫𑀭𑀼𑀕𑀡-𑀧𑀭𑀺𑀯𑁂𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑁂𑀦𑀸𑀧𑀢𑀺𑀢𑀲𑁆𑀲 𑀭𑀜𑁆𑀜𑁄, 𑀣𑁂𑀭𑀲𑁆𑀲 𑀤𑀻𑀖𑀲𑀦𑁆𑀤𑀓𑁄;

𑀓𑀸𑀭𑁂𑀲𑀺 𑀘𑀽𑀴𑀧𑀸𑀲𑀸𑀤𑀁, 𑀫𑀳𑀸𑀣𑀫𑁆𑀪𑁂𑀳𑀺 𑀅𑀝𑁆𑀞𑀳𑀺.

𑀤𑀻𑀖𑀲𑀦𑁆𑀤 𑀲𑁂𑀦𑀸𑀧𑀢𑀺-𑀧𑀭𑀺𑀯𑁂𑀡𑀦𑁆𑀢𑀺 𑀢𑀁 𑀢𑀳𑀺𑀁;

𑀯𑀼𑀘𑁆𑀘𑀢𑁂 𑀧𑀭𑀺𑀯𑁂𑀡𑀁 𑀢𑀁, 𑀧𑀫𑀼𑀔𑀁 𑀧𑀫𑀼𑀔𑀸𑀓𑀭𑀁.

𑀤𑁂𑀯𑀸𑀦𑀁𑀧𑀺𑀬𑀯𑀘𑀦𑁄’𑀧𑀕𑀼𑀴𑀦𑀸𑀫𑁄,

𑀮𑀁𑀓𑀸𑀬𑀁 𑀧𑀞𑀫𑀫𑀺𑀫𑀁 𑀫𑀳𑀸𑀯𑀺𑀳𑀸𑀭𑀁;

𑀭𑀸𑀚𑀸 𑀲𑁄 𑀲𑀼𑀫𑀢𑀺𑀫𑀳𑀸𑀫𑀳𑀺𑀦𑁆𑀤𑀣𑁂𑀭𑀁,

𑀆𑀕𑀫𑁆𑀫𑀸 𑀫𑀮𑀫𑀢𑀺𑀫𑁂𑀢𑁆𑀣𑀓𑀸𑀭𑀬𑀺𑀢𑁆𑀣𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀳𑀸𑀯𑀺𑀳𑀸𑀭𑀧𑀝𑀺𑀕𑁆𑀕𑀳𑀓𑁄 𑀦𑀸𑀫

𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭 𑀧𑀝𑀺𑀕𑁆𑀕𑀳𑀓𑁄

𑀧𑀼𑀭𑁂 ¶ 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬, 𑀓𑀭𑀺𑀢𑁆𑀯𑀸 𑀚𑀦𑀲𑀗𑁆𑀕𑀳𑀁;

𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀦𑁆𑀢𑁄, 𑀓𑀸𑀭𑁂𑀦𑁆𑀢𑁄 𑀭𑀸𑀚𑀲𑀗𑁆𑀕𑀳𑀁.

𑀙𑀩𑁆𑀩𑀲𑀤𑀺𑀯𑀲𑁂 𑀣𑁂𑀭𑁄, 𑀫𑀳𑀸𑀫𑁂𑀖𑀯𑀦𑁂 𑀯𑀲𑀻;

𑀆𑀲𑀴𑁆𑀳𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀢𑁂𑀭𑀲𑁂 𑀤𑀺𑀯𑀲𑁂 𑀧𑀦.

𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀢𑁆𑀯𑀸, 𑀫𑀳𑀸𑀭𑀜𑁆𑀜𑁄 𑀫𑀳𑀸𑀫𑀢𑀺;

𑀫𑀳𑀸’𑀧𑁆𑀧𑀫𑀸𑀤𑀲𑀼𑀢𑁆𑀢𑀦𑁆𑀢𑀁, 𑀤𑁂𑀲𑀬𑀺𑀢𑁆𑀯𑀸 𑀢𑀢𑁄 𑀘 𑀲𑁄.

𑀯𑀺𑀳𑀸𑀭𑀓𑀭𑀡𑀁 𑀇𑀘𑁆𑀙𑀁, 𑀢𑀢𑁆𑀣 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀦𑀺𑀓𑁆𑀔𑀫𑁆𑀫 𑀧𑀼𑀭𑀺𑀫𑀤𑁆𑀯𑀸𑀭𑀸, 𑀅𑀕𑀸 𑀘𑁂𑀢𑀺𑀬𑀧𑀩𑁆𑀩𑀢𑀁.

𑀣𑁂𑀭𑀁 𑀢𑀢𑁆𑀣 𑀕𑀢𑀁 𑀲𑀼𑀢𑁆𑀯𑀸, 𑀭𑀣𑀁 𑀆𑀭𑀼𑀬𑁆𑀳 𑀪𑀽𑀧𑀢𑀺;

𑀤𑁂𑀯𑀺𑀬𑁄 𑀤𑁆𑀯𑁂 𑀘 𑀆𑀤𑀸𑀬, 𑀣𑁂𑀭𑀲𑁆𑀲𑀸𑀦𑀼𑀧𑀤𑀁 𑀅𑀓𑀸.

𑀣𑁂𑀭𑀸 𑀦𑀸𑀕𑀘𑀢𑀼𑀓𑁆𑀓𑀫𑁆𑀳𑀺, 𑀦𑀳𑀸𑀢𑁆𑀯𑀸 𑀭𑀳𑀤𑁂 𑀢𑀳𑀺𑀁;

𑀧𑀩𑁆𑀩𑀢𑀸𑀭𑁄𑀳𑀡𑀢𑁆𑀣𑀸𑀬, 𑀅𑀝𑁆𑀞𑀁𑀲𑀼 𑀧𑀝𑀺𑀧𑀸𑀝𑀺𑀬𑀸.

𑀭𑀸𑀚𑀸 𑀭𑀣𑀸 𑀢𑀤𑁄’𑀭𑀼𑀬𑁆𑀳, 𑀲𑀩𑁆𑀩𑁂 𑀣𑁂𑀭𑁂’𑀪𑀺𑀯𑀸𑀤𑀬𑀺;

𑀉𑀡𑁆𑀳𑁂 𑀓𑀺𑀮𑀦𑁆𑀢𑁂 𑀓𑀺𑀁𑀭𑀸𑀚, 𑀆𑀕𑀢𑁄𑀲𑀻’𑀢𑀺 𑀅𑀳𑀼𑀢𑁂.

𑀢𑀼𑀫𑁆𑀳𑀸𑀓𑀁 𑀕𑀫𑀦𑀸𑀲𑀗𑁆𑀓𑀻, 𑀆𑀕𑀢𑁄𑀫𑁆𑀳𑀻’𑀢𑀺 𑀪𑀸𑀲𑀺𑀢𑁂;

𑀇𑀥𑁂𑀯 𑀯𑀲𑁆𑀲𑀁 𑀯𑀲𑀺𑀢𑀼𑀁, 𑀆𑀕𑀢𑀫𑁆𑀳𑀸’𑀢𑀺 𑀪𑀸𑀲𑀺𑀬.

𑀢𑀲𑁆𑀲𑀽𑀧𑀦𑀸𑀬𑀺𑀓𑀁 𑀣𑁂𑀭𑁄, 𑀔𑀦𑁆𑀥𑀓𑀁 𑀔𑀦𑁆𑀥𑀓𑁄𑀯𑀺𑀤𑁄;

𑀓𑀣𑁂𑀲𑀺 𑀭𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸, 𑀪𑀸𑀕𑀺𑀦𑁂𑀬𑁆𑀬𑁄 𑀘 𑀭𑀸𑀚𑀺𑀦𑁄.

𑀫𑀳𑀸𑀭𑀺𑀝𑁆𑀞𑁄 𑀫𑀳𑀸𑀫𑀘𑁆𑀘𑁄, 𑀧𑀜𑁆𑀘𑀧𑀜𑁆𑀜𑀸𑀲𑀪𑀸𑀢𑀼𑀳𑀺;

𑀲𑀤𑁆𑀥𑀺𑀁 𑀚𑁂𑀝𑁆𑀞𑀓𑀦𑀺𑀝𑁆𑀞𑁂𑀳𑀺, 𑀭𑀸𑀚𑀸𑀦𑀫𑀪𑀺𑀢𑁄 𑀞𑀺𑀢𑁄.

𑀬𑀸𑀘𑀺𑀢𑁆𑀯𑀸 𑀢𑀤𑀳𑀼 𑀘𑁂𑀯, 𑀧𑀩𑁆𑀩𑀚𑀼𑀁 𑀣𑁂𑀭𑀲𑀦𑁆𑀢𑀺𑀓𑁂;

𑀧𑀢𑁆𑀢𑀸𑀭𑀳𑀢𑁆𑀢𑀁 𑀲𑀩𑁆𑀩𑁂𑀧𑀺, 𑀢𑁂 𑀔𑀼𑀭𑀕𑁆𑀕𑁂 𑀫𑀳𑀸𑀫𑀢𑀻.

𑀓𑀦𑁆𑀢𑀓𑀘𑁂𑀢𑀺𑀬𑀞𑀸𑀦𑁂, 𑀧𑀭𑀺𑀢𑁄 𑀢𑀤𑀳𑁂𑀯 𑀲𑁄;

𑀓𑀫𑁆𑀫𑀸𑀦𑀺 𑀆𑀭𑀪𑀸𑀧𑁂𑀢𑁆𑀯𑀸, 𑀮𑁂𑀡𑀸𑀦𑀺 𑀅𑀝𑁆𑀞𑀲𑀝𑁆𑀞𑀺𑀬𑁄.

𑀅𑀕𑀫𑀸𑀲𑀺 ¶ 𑀧𑀼𑀭𑀁 𑀭𑀸𑀚𑀸, 𑀣𑁂𑀭𑀸 𑀢𑀢𑁆𑀣𑁂𑀯 𑀢𑁂 𑀯𑀲𑀼𑀁;

𑀓𑀸𑀮𑁂 𑀧𑀺𑀡𑁆𑀟𑀸𑀬 𑀦𑀕𑀭𑀁, 𑀧𑀯𑀺𑀲𑀦𑁆𑀢𑀸’𑀦𑀼𑀓𑀫𑁆𑀧𑀓𑀸.

𑀦𑀺𑀝𑁆𑀞𑀺𑀢𑁂 𑀮𑁂𑀡𑀓𑀫𑁆𑀫𑀫𑁆𑀳𑀺, 𑀆𑀲𑀴𑁆𑀳𑀺𑀧𑀼𑀡𑁆𑀡𑀫𑀸𑀲𑀺𑀬𑀁;

𑀕𑀦𑁆𑀢𑁆𑀯𑀸 𑀅𑀤𑀸𑀲𑀺 𑀣𑁂𑀭𑀸𑀦𑀁, 𑀭𑀸𑀚𑀸 𑀯𑀺𑀳𑀸𑀭𑀤𑀓𑁆𑀔𑀺𑀡𑀁.

𑀤𑁆𑀯𑀢𑁆𑀢𑀺𑀁𑀲𑀫𑀸𑀴𑀓𑀸𑀦𑀜𑁆𑀘, 𑀯𑀺𑀳𑀸𑀭𑀲𑁆𑀲 𑀘 𑀢𑀲𑁆𑀲 𑀔𑁄;

𑀲𑀻𑀫𑀁 𑀲𑀻𑀫𑀸𑀢𑀺𑀕𑁄 𑀣𑁂𑀭𑁄, 𑀩𑀦𑁆𑀥𑀺𑀢𑁆𑀯𑀸 𑀢𑀤𑀳𑁂𑀯 𑀲𑁄.

𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸𑀦𑀁, 𑀅𑀓𑀸𑀲𑀺 𑀉𑀧𑀲𑀫𑁆𑀧𑀤𑀁;

𑀲𑀩𑁆𑀩𑁂𑀲𑀁 𑀲𑀩𑁆𑀩𑀧𑀞𑀫𑀁, 𑀩𑀤𑁆𑀥𑁂 𑀢𑀼𑀫𑁆𑀩𑀭𑀼𑀫𑀸𑀴𑀓𑁂.

𑀏𑀢𑁂 𑀤𑁆𑀯𑀸𑀲𑀝𑁆𑀞𑀺 𑀅𑀭𑀳𑀦𑁆𑀢𑁄, 𑀲𑀩𑁆𑀩𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀭𑀸𑀚𑀲𑀗𑁆𑀕𑀳𑀁.

𑀢𑀜𑁆𑀘 𑀕𑀡𑀁 𑀕𑀼𑀡𑀯𑀺𑀢𑁆𑀣𑀢𑀓𑀺𑀢𑁆𑀢𑀺𑀁;

𑀧𑀼𑀜𑁆𑀜𑀘𑀬𑀁 𑀯𑀺𑀧𑀼𑀮𑀁 𑀅𑀓𑀭𑀺𑀁𑀲𑀽𑀢𑀺.

𑀲𑀼𑀚𑀦𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑀧𑀝𑀺𑀕𑁆𑀕𑀳𑀓𑁄 𑀦𑀸𑀫

𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸, 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀁;

𑀅𑀯𑁄𑀘𑁂’𑀤𑀁 𑀫𑀳𑀸𑀭𑀸𑀚𑀁, 𑀫𑀳𑀸𑀣𑁂𑀭𑁄 𑀫𑀳𑀸𑀫𑀢𑀺.

𑀘𑀺𑀭𑀤𑀺𑀝𑁆𑀞𑁄 𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀣𑀸 𑀦𑁄 𑀫𑀦𑀼𑀚𑀸𑀥𑀺𑀧;

𑀅𑀦𑀸𑀣𑀯𑀸𑀲𑀁 𑀅𑀯𑀲𑀺𑀫𑁆𑀳, 𑀦𑀢𑁆𑀣𑀺 𑀦𑁄 𑀧𑀽𑀚𑀺𑀬𑀁 𑀇𑀥.

‘‘𑀪𑀸𑀲𑀺𑀢𑁆𑀣 𑀦𑀦𑀼 𑀪𑀦𑁆𑀢𑁂𑀫𑁂, 𑀲𑀫𑁆𑀩𑀼𑀤𑁆𑀥𑁄 𑀦𑀺𑀩𑁆𑀩𑀼𑀢𑁄’’ 𑀇𑀢𑀺;

𑀆𑀳 𑀥𑀸𑀢𑀽𑀲𑀼 𑀤𑀺𑀝𑁆𑀞𑁂𑀲𑀼, 𑀤𑀺𑀝𑁆𑀞𑁄 𑀳𑁄𑀢𑀺 𑀚𑀺𑀦𑁄’’ 𑀇𑀢𑀺.

𑀯𑀺𑀤𑀺𑀢𑁄 ¶ 𑀯𑁄 𑀅𑀥𑀺𑀧𑁆𑀧𑀸𑀬𑁄, 𑀣𑀽𑀧𑀲𑁆𑀲 𑀓𑀸𑀭𑀡𑁂 𑀫𑀬𑀸;

𑀓𑀸𑀭𑁂𑀲𑁆𑀲𑀸𑀫𑀺 𑀅𑀳𑀁 𑀣𑀽𑀧𑀁, 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀥𑀸𑀢𑀼𑀬𑁄.

𑀫𑀦𑁆𑀢𑁂𑀳𑀺 𑀲𑀼𑀫𑀦𑁂𑀦𑀸𑀢𑀺, 𑀣𑁂𑀭𑁄 𑀭𑀸𑀚𑀸𑀦𑀫𑀩𑁆𑀭𑀯𑀺;

𑀭𑀸𑀚𑀸’𑀳 𑀲𑀸𑀫𑀡𑁂𑀭𑀁 𑀢𑀁, 𑀓𑀼𑀢𑁄 𑀮𑀘𑁆𑀙𑀸𑀫 𑀥𑀸𑀢𑀼𑀬𑁄.

𑀯𑀺𑀪𑀽𑀲𑀬𑀺𑀢𑁆𑀯𑀸 𑀦𑀕𑀭𑀁, 𑀫𑀕𑁆𑀕𑀜𑁆𑀘 𑀫𑀦𑀼𑀚𑀸𑀥𑀺𑀧;

𑀉𑀧𑁄𑀲𑀣𑀻 𑀲𑀧𑀭𑀺𑀲𑁄, 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀫𑀗𑁆𑀕𑀮𑀁.

𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀦𑁆𑀢𑁄, 𑀢𑀸𑀮𑀸𑀯𑀘𑀭𑀲𑀁𑀳𑀺𑀢𑁄;

𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀁, 𑀲𑀸𑀬𑀦𑁆𑀳𑀲𑀫𑀬𑁂 𑀯𑀚.

𑀥𑀸𑀢𑀼𑀪𑁂𑀤𑀜𑁆𑀜𑀼𑀦𑁄 𑀭𑀸𑀚, 𑀥𑀸𑀢𑀼𑀬𑁄 𑀢𑀢𑁆𑀣 𑀮𑀘𑁆𑀙𑀲𑀺;

𑀇𑀘𑁆𑀙𑀸𑀳 𑀲𑀸𑀫𑀡𑁂𑀭𑁄 𑀲𑁄, 𑀲𑀼𑀫𑀦𑁄 𑀢𑀁 𑀲𑀼𑀫𑀸𑀦𑀲𑀁.

𑀣𑁂𑀭𑁄’𑀣 𑀭𑀸𑀚𑀓𑀼𑀮𑀢𑁄, 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀁;

𑀆𑀫𑀦𑁆𑀢𑀺𑀬 𑀲𑀸𑀫𑀡𑁂𑀭𑀁, 𑀲𑀼𑀫𑀦𑀁 𑀲𑀼𑀫𑀦𑁄 𑀕𑀢𑀺𑀁.

𑀏𑀳𑀺 𑀢𑁆𑀯𑀁 𑀪𑀤𑁆𑀭 𑀲𑀼𑀫𑀦, 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀼𑀭𑀁 𑀯𑀭𑀁;

𑀅𑀬𑁆𑀬𑀓𑀁 𑀢𑁂 𑀫𑀳𑀸𑀭𑀸𑀚𑀁, 𑀏𑀯𑀁 𑀦𑁄 𑀯𑀘𑀦𑀁 𑀯𑀤.

𑀲𑀳𑀸𑀬𑁄 𑀢𑁂 𑀫𑀳𑀸𑀭𑀸𑀚, 𑀫𑀳𑀸𑀭𑀸𑀚𑀸 𑀫𑀭𑀼𑀧𑁆𑀧𑀺𑀬𑁄;

𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀫𑀬𑁂, 𑀣𑀽𑀧𑀁 𑀓𑀸𑀭𑁂𑀢𑀼𑀫𑀺𑀘𑁆𑀙𑀢𑀺.

𑀫𑀼𑀦𑀺𑀦𑁄 𑀥𑀸𑀢𑀼𑀬𑁄 𑀤𑁂𑀳𑀺, 𑀧𑀢𑁆𑀢𑀁 𑀪𑀼𑀢𑁆𑀢𑀜𑁆𑀘 𑀲𑀢𑁆𑀣𑀼𑀦𑀸;

𑀲𑀭𑀻𑀭𑀥𑀸𑀢𑀼𑀬𑁄 𑀲𑀦𑁆𑀢𑀺, 𑀩𑀳𑀯𑁄 𑀳𑀺 𑀢𑀯𑀦𑁆𑀢𑀺𑀓𑁂.

𑀧𑀢𑁆𑀢𑀧𑀽𑀭𑀸 𑀕𑀳𑁂𑀢𑁆𑀯𑀸 𑀢𑀸, 𑀕𑀦𑁆𑀢𑁆𑀯𑀸 𑀤𑁂𑀯𑀧𑀼𑀭𑀁 𑀯𑀭𑀁;

𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀢𑀁, 𑀏𑀯𑀁 𑀦𑁄 𑀯𑀘𑀦𑀁 𑀯𑀤.

𑀢𑀺𑀮𑁄𑀓𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲, 𑀤𑀸𑀞𑀸𑀥𑀸𑀢𑀼 𑀘 𑀤𑀓𑁆𑀔𑀺𑀡𑀸;

𑀢𑀯𑀦𑁆𑀢𑀺𑀓𑀫𑁆𑀳𑀺 𑀤𑁂𑀯𑀺𑀦𑁆𑀤, 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀘.

𑀤𑀸𑀞𑀁 𑀢𑁆𑀯𑀫𑁂𑀯 𑀧𑀽𑀚𑁂𑀳𑀺, 𑀅𑀓𑁆𑀔𑀓𑀁 𑀤𑁂𑀳𑀺 𑀲𑀢𑁆𑀣𑀼𑀦𑁄;

𑀮𑀁𑀓𑀸𑀤𑀻𑀧𑀲𑁆𑀲 𑀓𑀺𑀘𑁆𑀘𑁂𑀲𑀼, 𑀫𑀸𑀧𑀫𑀚𑁆𑀚 𑀲𑀼𑀭𑀸𑀥𑀺𑀧.

‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀲𑁄, 𑀲𑀸𑀫𑀡𑁂𑀭𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀗𑁆𑀔𑀡𑀁𑀬𑁂𑀯 𑀅𑀕𑀫𑀸, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀲𑀦𑁆𑀢𑀺𑀓𑀁.

𑀲𑀸𑀮𑀫𑀽𑀮𑀫𑁆𑀳𑀺 𑀞𑀧𑀺𑀢𑀁, 𑀫𑀳𑀸𑀩𑁄𑀥𑀺𑀁 𑀢𑀳𑀺𑀁 𑀲𑀼𑀢𑀁;

𑀓𑀢𑁆𑀢𑀺𑀓𑀘𑁆𑀙𑀡𑀧𑀽𑀚𑀸𑀳𑀺, 𑀧𑀽𑀚𑀺𑀬𑀁 𑀢𑀜𑁆𑀘 𑀅𑀤𑁆𑀤𑀲.

𑀣𑁂𑀭𑀲𑁆𑀲 ¶ 𑀯𑀘𑀦𑀁 𑀯𑀢𑁆𑀯𑀸, 𑀭𑀸𑀚𑀢𑁄 𑀮𑀤𑁆𑀥𑀥𑀸𑀢𑀼𑀬𑁄;

𑀧𑀢𑁆𑀢𑀧𑀽𑀭𑀁 𑀕𑀳𑁂𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺.

𑀳𑀺𑀫𑀯𑀦𑁆𑀢𑁂 𑀞𑀧𑁂𑀢𑁆𑀯𑀸𑀦, 𑀲𑀥𑀸𑀢𑀼𑀁 𑀧𑀢𑁆𑀢𑀫𑀼𑀢𑁆𑀢𑀫𑀁;

𑀤𑁂𑀯𑀺𑀦𑁆𑀤𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀣𑁂𑀭𑀲𑁆𑀲 𑀯𑀘𑀦𑀁 𑀪𑀡𑀺.

𑀘𑀽𑀴𑀸𑀫𑀡𑀺 𑀘𑁂𑀢𑀺𑀬𑀫𑁆𑀳𑀸, 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀁;

𑀲𑀸𑀫𑀡𑁂𑀭𑀲𑁆𑀲 𑀧𑀸𑀤𑀸𑀲𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀲𑁆𑀲𑀭𑁄.

𑀢𑀁 𑀥𑀸𑀢𑀼𑀁 𑀥𑀸𑀢𑀼𑀧𑀢𑁆𑀢𑀜𑁆𑀘, 𑀆𑀤𑀸𑀬 𑀲𑀼𑀫𑀦𑁄 𑀢𑀢𑁄;

𑀆𑀕𑀫𑁆𑀫 𑀘𑁂𑀢𑀺𑀬𑀕𑀺𑀭𑀺𑀁, 𑀣𑁂𑀭𑀲𑁆𑀲’𑀤𑀸𑀲𑀺 𑀢𑀁 𑀬𑀢𑀺.

𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀁, 𑀯𑀼𑀢𑁆𑀢𑁂𑀦𑀸 𑀯𑀺𑀥𑀺𑀦𑀸’𑀕𑀫𑀸;

𑀲𑀸𑀬𑀦𑁆𑀳𑀸𑀲𑀫𑀬𑁂 𑀭𑀸𑀚𑀸, 𑀭𑀸𑀚𑀲𑁂𑀦𑀸 𑀧𑀼𑀭𑀓𑁆𑀔𑀢𑁄.

𑀞𑀧𑁂𑀲𑀺 𑀥𑀸𑀢𑀼𑀬𑁄 𑀲𑀩𑁆𑀩𑀸, 𑀣𑁂𑀭𑁄 𑀢𑀢𑁆𑀣𑁂𑀯 𑀧𑀩𑁆𑀩𑀢𑁂;

𑀫𑀺𑀲𑁆𑀲𑀓𑀁 𑀧𑀩𑁆𑀩𑀢𑀁 𑀢𑀲𑁆𑀫𑀸, 𑀆𑀳𑀼 𑀘𑁂𑀢𑀺𑀬 𑀧𑀩𑁆𑀩𑀢𑀁.

𑀞𑀧𑁂𑀢𑁆𑀯𑀸 𑀥𑀸𑀢𑀼𑀧𑀢𑁆𑀢𑀁 𑀢𑀁, 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀕𑀳𑁂𑀢𑁆𑀯𑀸 𑀅𑀓𑁆𑀔𑀓𑀁 𑀥𑀸𑀢𑀼𑀁, 𑀲𑀗𑁆𑀓𑁂𑀢𑀁 𑀲𑀕𑀡𑁄’𑀕𑀫𑀸.

𑀲𑀘𑀸𑀬𑀁 𑀫𑀼𑀦𑀺𑀦𑁄 𑀥𑀸𑀢𑀼, 𑀙𑀢𑁆𑀢𑀁 𑀦𑀫𑀢𑀼 𑀫𑁂 𑀲𑀬𑀁;

𑀚𑀡𑁆𑀡𑀼𑀓𑁂𑀳𑀺 𑀓𑀭𑀻𑀥𑀸𑀢𑀼, 𑀥𑀸𑀢𑀼𑀘𑀗𑁆𑀓𑁄𑀝𑀓𑁄 𑀅𑀬𑀁.

𑀲𑀺𑀭𑀲𑁆𑀫𑀺𑀁 𑀫𑁂 𑀧𑀢𑀺𑀝𑁆𑀞𑀸𑀢𑀼, 𑀆𑀕𑀫𑁆𑀫 𑀲𑀳 𑀥𑀸𑀢𑀼𑀓𑁄;

𑀇𑀢𑀺 𑀭𑀸𑀚𑀸 𑀯𑀺𑀘𑀺𑀦𑁆𑀢𑁂𑀲𑀺, 𑀘𑀺𑀦𑁆𑀢𑀺𑀢𑀁 𑀢𑀁 𑀢𑀣𑀸 𑀅𑀳𑀼.

𑀅𑀫𑀢𑁂𑀦𑀸’𑀪𑀺𑀲𑀺𑀢𑁆𑀢𑁄𑀯, 𑀅𑀳𑀼 𑀳𑀝𑁆𑀞𑁄’𑀢𑀺 𑀪𑀽𑀧𑀢𑀺;

𑀲𑀻𑀲𑀢𑁄 𑀢𑀁 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀧𑁂𑀲𑀺𑀢𑀁.

𑀳𑀝𑁆𑀞𑁄 𑀳𑀢𑁆𑀢𑀻 𑀓𑀼𑀜𑁆𑀘𑀦𑀸𑀤𑀁, 𑀅𑀓𑀸 𑀓𑀫𑁆𑀧𑀺𑀢𑁆𑀣 𑀫𑁂𑀤𑀺𑀦𑀻;

𑀢𑀢𑁄 𑀦𑀸𑀕𑁄 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀲𑀣𑁂𑀭 𑀩𑀮𑀯𑀸𑀳𑀦𑁄.

𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦, 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀁 𑀲𑀼𑀪𑀁;

𑀤𑀓𑁆𑀔𑀺𑀡𑁂𑀦 𑀘 𑀤𑁆𑀯𑀸𑀭𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀧𑀼𑀦.

𑀣𑀽𑀧𑀸𑀭𑀸𑀫𑁂 𑀘𑁂𑀢𑀺𑀬𑀲𑁆𑀲, 𑀞𑀸𑀦𑀢𑁄 𑀧𑀘𑁆𑀙𑀢𑁄 𑀓𑀢𑀁;

𑀧𑀫𑁄𑀚𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸𑀦, 𑀩𑁄𑀥𑀺𑀞𑀸𑀦𑁂 𑀦𑀺𑀯𑀢𑁆𑀢𑀺𑀬.

𑀧𑀼𑀭𑀢𑁆𑀣𑀸𑀯𑀤𑀦𑁄 𑀅𑀞𑀸, 𑀣𑀽𑀧𑀞𑀸𑀦𑀁 𑀢𑀤𑀸 𑀳𑀺𑀢𑀁;

𑀓𑀤𑀫𑁆𑀩𑀧𑀼𑀧𑁆𑀨𑀆𑀤𑀸𑀭𑀺-𑀯𑀮𑁆𑀮𑀻𑀳𑀺 𑀘𑀺𑀢𑀓𑀁 𑀅𑀳𑀼.

𑀫𑀦𑀼𑀲𑁆𑀲𑀤𑁂𑀯𑁄 ¶ 𑀤𑁂𑀯𑁂𑀳𑀺, 𑀢𑀁 𑀞𑀸𑀦𑀁 𑀭𑀓𑁆𑀔𑀺𑀢𑀁 𑀲𑀼𑀘𑀺𑀁;

𑀲𑁄𑀥𑀸𑀧𑁂𑀢𑁆𑀯𑀸 𑀪𑀽𑀲𑀬𑀺𑀢𑁆𑀯𑀸, 𑀢𑀗𑁆𑀔𑀡𑀁𑀬𑁂𑀯 𑀲𑀸𑀥𑀼𑀓𑀁.

𑀥𑀸𑀢𑀼𑀁 𑀑𑀭𑁄𑀧𑀦𑀢𑁆𑀣𑀸𑀬, 𑀆𑀭𑀪𑀻 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄;

𑀦𑀸𑀕𑁄 𑀦 𑀇𑀘𑁆𑀙𑀺𑀢𑀁 𑀭𑀸𑀚𑀸, 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀣 𑀢𑀁 𑀫𑀦𑀁.

𑀅𑀢𑁆𑀢𑀦𑁄 𑀔𑀦𑁆𑀥𑀲𑀫𑀓𑁂, 𑀞𑀸𑀦𑁂 𑀞𑀧𑀦𑀫𑀺𑀘𑁆𑀙𑀢𑀺;

𑀥𑀸𑀢𑀼𑀑𑀭𑁄𑀧𑀦𑀁 𑀢𑁂𑀦, 𑀦 𑀇𑀝𑁆𑀞𑀫𑀻’𑀢𑀺 𑀲𑁄 𑀩𑁆𑀭𑀯𑀺.

𑀅𑀮𑀗𑁆𑀓𑀭𑀺𑀢𑁆𑀯𑀸𑀦 𑀩𑀳𑀼𑀥𑀸, 𑀭𑀸𑀚𑀸 𑀢𑀁 𑀞𑀸𑀦𑀫𑀼𑀢𑁆𑀢𑀫𑀁;

𑀑𑀭𑁄𑀧𑁂𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸, 𑀥𑀸𑀢𑀼𑀁 𑀢𑀢𑁆𑀣 𑀞𑀧𑁂𑀲𑀺𑀢𑀁.

𑀥𑀸𑀢𑀸𑀭𑀓𑁆𑀔𑀁 𑀲𑀁𑀯𑀺𑀥𑀸𑀬, 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀳𑀢𑁆𑀣𑀺𑀦𑀁;

𑀥𑀸𑀢𑀼𑀣𑀽𑀧𑀲𑁆𑀲 𑀓𑀭𑀡𑁂, 𑀭𑀸𑀚𑀸 𑀢𑀼𑀭𑀺𑀢𑀫𑀸𑀦𑀲𑁄.

𑀩𑀳𑀽 𑀫𑀦𑀼𑀲𑁆𑀲𑁂 𑀬𑁄𑀚𑁂𑀢𑁆𑀯𑀸, 𑀇𑀢𑁆𑀣𑀺𑀓𑀸𑀓𑀭𑀡𑁂 𑀮𑀳𑀼𑀁;

𑀥𑀸𑀢𑀼𑀓𑀺𑀘𑁆𑀘𑀁 𑀯𑀺𑀘𑀺𑀦𑁆𑀢𑁂𑀦𑁆𑀢𑁄, 𑀲𑀸𑀫𑀘𑁆𑀘𑁄 𑀧𑀸𑀯𑀺𑀲𑀻 𑀧𑀼𑀭𑀁.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀢𑀼, 𑀫𑀳𑀸 𑀫𑁂𑀖𑀯𑀦𑀁 𑀲𑀼𑀪𑀁;

𑀲𑀕𑀡𑁄 𑀅𑀪𑀺𑀕𑀦𑁆𑀢𑁆𑀯𑀸𑀦, 𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑀬𑀺.

𑀭𑀢𑁆𑀢𑀺𑀁 𑀦𑀸𑀕𑁄’𑀦𑀼𑀧𑀭𑀺𑀬𑀸𑀢𑀺, 𑀢𑀁 𑀞𑀸𑀦𑀁 𑀲𑁄 𑀲𑀥𑀸𑀢𑀼 𑀓𑀁;

𑀩𑁄𑀥𑀺𑀞𑀸𑀦𑀫𑁆𑀳𑀺 𑀲𑀸𑀮𑀸𑀬, 𑀤𑀺𑀯𑀸𑀞𑀸𑀢𑀺 𑀲𑀥𑀸𑀢𑀼𑀓𑁄.

𑀯𑀢𑁆𑀣𑀼𑀲𑁆𑀲 𑀢𑀲𑁆𑀲𑁄’𑀧𑀭𑀺𑀢𑁄, 𑀣𑀽𑀧𑀁 𑀣𑁂𑀭𑀫𑀢𑀸𑀦𑀼 𑀕𑁄;

𑀚𑀗𑁆𑀖𑀸𑀫𑀢𑁆𑀢𑀁 𑀘𑀺𑀢𑀸𑀧𑁂𑀢𑁆𑀯𑀸, 𑀓𑀢𑀺𑀧𑀸𑀳𑁂𑀦 𑀪𑀽𑀧𑀢𑀺.

𑀢𑀢𑁆𑀣 𑀥𑀸𑀢𑀼𑀧𑀢𑀺𑀝𑁆𑀞𑀸𑀦𑀁, 𑀖𑁄𑀲𑀸𑀧𑁂𑀢𑁆𑀯𑀸 𑀉𑀧𑀸𑀕𑀫𑀺;

𑀢𑀢𑁄 𑀢𑀢𑁄 𑀲𑀫𑀦𑁆𑀢𑁄 𑀘, 𑀲𑀫𑀸𑀕𑀫𑀺 𑀫𑀳𑀸𑀚𑀦𑁄.

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀥𑀸𑀢𑀼, 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀦𑀕𑀸𑀕𑁆𑀕𑀢𑀸;

𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀫𑁆𑀳𑀺, 𑀤𑀺𑀲𑁆𑀲𑀦𑁆𑀢𑀺 𑀦𑀪𑀲𑀺𑀝𑁆𑀞𑀺𑀢𑀸.

𑀯𑀺𑀫𑁆𑀳𑀸𑀧𑀬𑀦𑁆𑀢𑀺 𑀚𑀦𑀢𑀁, 𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁;

𑀓𑀡𑁆𑀡𑀫𑁆𑀩𑀫𑀽𑀮𑁂 𑀩𑀼𑀤𑁆𑀥𑁄’𑀯, 𑀅𑀓𑀭𑀺 𑀮𑁄𑀫𑀳𑀁𑀲𑀦𑀁.

𑀢𑀢𑁄 ¶ 𑀦𑀺𑀓𑁆𑀔𑀦𑁆𑀢𑀚𑀸𑀮𑀸𑀳𑀺, 𑀚𑀮𑀥𑀸𑀭𑀸𑀳𑀺 𑀘𑀸’𑀲𑀓𑀺𑀁;

𑀅𑀬𑀁 𑀑𑀪𑀸𑀲𑀺𑀢𑀸’𑀲𑀺𑀢𑁆𑀢𑀸, 𑀲𑀩𑁆𑀩𑀸𑀮𑀁𑀓𑀸𑀫𑀳𑀻 𑀫𑀳𑀼.

𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁂𑀦 𑀚𑀺𑀦𑁂𑀦 𑀳𑀺;

𑀓𑀢𑀁 𑀫𑀳𑀸𑀅𑀥𑀺𑀝𑁆𑀞𑀸𑀦-𑀧𑀜𑁆𑀘𑀓𑀁 𑀧𑀜𑁆𑀘𑀘𑀓𑁆𑀔𑀼𑀦𑀸.

𑀕𑀬𑁆𑀳𑀫𑀸𑀦𑀸 𑀫𑀳𑀸𑀩𑁄𑀥𑀺 𑀲𑀸𑀔𑀸𑀲𑁄𑀓𑁂𑀦 𑀤𑀓𑁆𑀔𑀺𑀡𑀸;

𑀙𑀺𑀚𑁆𑀚𑀺𑀢𑁆𑀯𑀸𑀦 𑀲𑀬𑀁𑀬𑁂𑀯, 𑀧𑀢𑀺𑀝𑁆𑀞𑀸𑀢𑀼 𑀓𑀝𑀸𑀳𑀓𑁂.

𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀸 𑀲𑀸𑀔𑀸, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀼𑀪𑀸;

𑀭𑀜𑁆𑀚𑀬𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀨𑀮𑀧𑀢𑁆𑀢𑁂𑀳𑀺 𑀫𑀼𑀘𑁆𑀘𑀢𑀼.

𑀲𑀲𑀼𑀯𑀡𑁆𑀡𑀓𑀝𑀸𑀳𑀸 𑀲𑀸, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀫𑀦𑁄𑀭𑀫𑀸;

𑀅𑀤𑀺𑀲𑁆𑀲𑀫𑀸𑀦𑀸 𑀲𑀢𑁆𑀢𑀸𑀳𑀁, 𑀳𑀺𑀫𑀕𑀩𑁆𑀪𑀫𑁆𑀳𑀺 𑀢𑀺𑀝𑁆𑀞𑀢𑀼.

𑀣𑀽𑀧𑀸𑀭𑀸𑀫𑁂 𑀧𑀢𑀺𑀝𑁆𑀞𑀦𑁆𑀢𑀁, 𑀫𑀫 𑀤𑀓𑁆𑀔𑀺𑀡𑀅𑀓𑁆𑀔𑀓𑀁;

𑀓𑀭𑁄𑀢𑀼 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀬𑀫𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀮𑀗𑁆𑀓𑀸 𑀮𑀗𑁆𑀓𑀸𑀭𑀪𑀽𑀢𑀫𑁆𑀳𑀺, 𑀳𑁂𑀫𑀫𑀸𑀮𑀺𑀓𑀘𑁂𑀢𑀺𑀬𑁂;

𑀧𑀢𑀺𑀝𑁆𑀞𑀳𑀦𑁆𑀢𑀺𑀬𑁄 𑀥𑀸𑀢𑀼, 𑀤𑁄𑀡𑀫𑀢𑁆𑀢𑀸 𑀧𑀫𑀸𑀡𑀢𑁄.

𑀩𑀼𑀤𑁆𑀥𑀯𑁂𑀲𑀥𑀭𑀸 𑀳𑀼𑀢𑁆𑀯𑀸, 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀲𑀺𑀝𑁆𑀞𑀺𑀢𑀸;

𑀧𑀢𑀺𑀝𑁆𑀞𑀁 𑀢𑀼 𑀓𑀭𑀺𑀢𑁆𑀯𑀸𑀦, 𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀅𑀥𑀺𑀝𑁆𑀞𑀸𑀦𑀸𑀦𑀺 𑀧𑀜𑁆𑀘𑁂’𑀯, 𑀅𑀥𑀺𑀝𑁆𑀞𑀸𑀲𑀺 𑀢𑀣𑀸𑀕𑀢𑁄;

𑀅𑀓𑀸𑀲𑀺 𑀢𑀲𑁆𑀫𑀸 𑀲𑀸 𑀥𑀸𑀢𑀼, 𑀢𑀤𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀆𑀓𑀸𑀲𑀸 𑀑𑀢𑀭𑀺𑀢𑁆𑀯𑀸 𑀲𑀸, 𑀅𑀝𑁆𑀞𑀸𑀪𑀽𑀧𑀲𑁆𑀲 𑀫𑀼𑀤𑁆𑀥𑀦𑀺;

𑀅𑀢𑀻𑀯𑀳𑀝𑁆𑀞𑁄 𑀢𑀁 𑀭𑀸𑀚𑀸, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀘𑁂𑀢𑀺𑀬𑁂.

𑀧𑀢𑀺𑀝𑁆𑀞𑀺𑀢𑀸𑀬 𑀢𑀲𑁆𑀲𑀸 𑀘, 𑀥𑀸𑀢𑀼𑀬𑀸 𑀘𑁂𑀢𑀺𑀬𑁂 𑀢𑀤𑀸;

𑀅𑀳𑀼 𑀫𑀳𑀸𑀪𑀽𑀫𑀺𑀘𑀸𑀮𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄.

𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀲𑀻𑀤𑀺𑀁𑀲𑀼 𑀚𑀦𑁂 𑀚𑀦𑀸;

𑀫𑀢𑁆𑀢𑀸𑀪𑀬𑁄 𑀭𑀸𑀚𑀧𑀼𑀢𑁆𑀢𑁄, 𑀓𑀦𑀺𑀝𑁆𑀞𑁄 𑀭𑀸𑀚𑀺𑀦𑁄 𑀧𑀦.

𑀫𑀼𑀦𑀺𑀲𑁆𑀲𑀭𑁂 𑀧𑀲𑀻𑀤𑀺𑀢𑁆𑀯𑀸, 𑀬𑀸𑀘𑀺𑀢𑁆𑀯𑀸𑀦 𑀦𑀭𑀺𑀲𑁆𑀲𑀭𑀁;

𑀧𑀼𑀭𑀺𑀲𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀳 𑀧𑀩𑁆𑀩𑀚𑀺𑀲𑀸𑀲𑀦𑁂.

𑀘𑁂𑀢𑀸𑀭𑀺𑀕𑀸𑀫𑀢𑁄 ¶ 𑀘𑀸𑀧𑀺, 𑀤𑁆𑀯𑀸𑀭𑀫𑀡𑁆𑀟𑀮𑀢𑁄𑀧𑀺 𑀘;

𑀯𑀺𑀳𑀻𑀭𑀩𑀻𑀚𑀢𑁄 𑀘𑀸𑀧𑀺, 𑀢𑀣𑀸 𑀕𑀮𑁆𑀮𑀓𑀧𑀺𑀝𑁆𑀞𑀺𑀢𑁄.

𑀢𑀣𑁄’𑀧𑀢𑀺𑀲𑁆𑀲𑀕𑀸𑀫𑀸 𑀘, 𑀧𑀜𑁆𑀘 𑀧𑀜𑁆𑀘 𑀲𑀢𑀸𑀦𑀺 𑀘;

𑀧𑀩𑁆𑀩𑀚𑀼𑀁 𑀤𑀸𑀭𑀓𑀸 𑀳𑀝𑁆𑀞𑀸, 𑀚𑀸𑀢𑀲𑀤𑁆𑀥𑀸 𑀢𑀣𑀸𑀕𑀢𑁂.

𑀏𑀯𑀁 𑀧𑀼𑀭𑀸 𑀩𑀸𑀳𑀺𑀭𑀸 𑀘, 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀸 𑀢𑀤𑀸;

𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀅𑀳𑁂𑀲𑀼𑀁 𑀚𑀺𑀦𑀲𑀸𑀲𑀦𑁂.

𑀣𑀽𑀧𑀸𑀭𑀸𑀫𑁂 𑀣𑀽𑀧𑀯𑀭𑀁, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀭𑀢𑀦𑀸𑀤𑀻𑀳𑀺’𑀦𑁂𑀓𑁂𑀳𑀺, 𑀲𑀤𑀸 𑀧𑀽𑀚𑀫𑀓𑀸𑀭𑀬𑀺.

𑀭𑀸𑀚𑁄𑀭𑁄𑀥𑀸 𑀔𑀢𑁆𑀢𑀺𑀬𑀸 𑀘, 𑀅𑀫𑀘𑁆𑀘𑀸 𑀦𑀸𑀕𑀭𑀸 𑀢𑀣𑀸;

𑀲𑀩𑁆𑀩𑁂 𑀚𑀦𑀧𑀤𑀸 𑀘𑁂𑀯, 𑀧𑀼𑀚𑀸’𑀓𑀁𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁.

𑀣𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀭𑀸𑀚𑀸, 𑀯𑀺𑀳𑀸𑀭𑀁 𑀢𑀢𑁆𑀣 𑀓𑀸𑀭𑀬𑀺;

𑀣𑀽𑀧𑀸𑀭𑀸𑀫𑁄𑀢𑀺 𑀢𑁂𑀦𑁂’𑀲, 𑀯𑀺𑀳𑀸𑀭𑁄 𑀯𑀺𑀲𑁆𑀲𑀼𑀢𑁄 𑀅𑀳𑀼.

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄𑀧𑀺 𑀮𑁄𑀓𑀦𑀸𑀣𑁄;

𑀚𑀦𑀓𑀸𑀬𑀳𑀺𑀢𑀁 𑀲𑀼𑀔𑀜𑁆𑀘 𑀲𑀫𑁆𑀫𑀸,

𑀩𑀳𑀼𑀥𑀸’𑀓𑀸𑀲𑀺 𑀞𑀺𑀢𑁂 𑀚𑀺𑀦𑁂 𑀓𑀣𑀸𑀯𑀓𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀳𑀸𑀩𑁄𑀥𑀺𑀜𑁆𑀘 𑀣𑁂𑀭𑀺𑀜𑁆𑀘, 𑀆𑀡𑀸𑀧𑁂𑀢𑀼𑀁 𑀫𑀳𑀻𑀧𑀢𑀺;

𑀣𑁂𑀭𑁂𑀦 𑀯𑀼𑀢𑁆𑀢𑀯𑀘𑀦𑀁, 𑀲𑀭𑀫𑀸𑀦𑁄 𑀲𑀓𑁂 𑀖𑀭𑁂.

𑀅𑀦𑁆𑀢𑁄𑀯𑀲𑁆𑀲𑁂’𑀓 𑀤𑀺𑀯𑀲𑀁, 𑀦𑀺𑀲𑀺𑀦𑁆𑀦𑁄 𑀣𑁂𑀭𑀲𑀦𑁆𑀢𑀺𑀓𑁂;

𑀲𑀳𑀸’𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀢𑁆𑀯𑀸, 𑀪𑀸𑀕𑀺𑀦𑁂𑀬𑁆𑀬𑀁 𑀲𑀬𑀁 𑀲𑀓𑀁.

𑀅𑀭𑀺𑀝𑁆𑀞𑀦𑀸𑀫𑀓𑀸’𑀫𑀘𑁆𑀘𑀁 ¶ , 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑁄𑀚𑀺𑀢𑀼𑀁;

𑀫𑀦𑁆𑀢𑁆𑀯𑀸 𑀆𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑀢𑀸 𑀲𑀓𑁆𑀔𑀺𑀲𑁆𑀲𑀲𑀺…, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀲𑀦𑁆𑀢𑀺𑀓𑀸;

𑀫𑀳𑀸𑀩𑁄𑀥𑀺𑀁 𑀲𑀗𑁆𑀖𑀫𑀺𑀢𑁆𑀢𑀁, 𑀣𑁂𑀭𑀺𑀁 𑀆𑀦𑀬𑀺𑀢𑀼𑀁 𑀇𑀥.

𑀲𑀓𑁆𑀔𑀺𑀲𑁆𑀲𑀸𑀫𑀺 𑀅𑀳𑀁 𑀤𑁂𑀯, 𑀆𑀦𑁂𑀢𑀼𑀁 𑀢𑀁 𑀤𑀼𑀯𑁂 𑀢𑀢𑁄;

𑀇𑀥𑀸’𑀕𑀢𑁄 𑀧𑀩𑁆𑀩𑀚𑀺𑀢𑀼𑀁, 𑀲𑀘𑁂 𑀮𑀘𑁆𑀙𑀸𑀫𑀺 𑀫𑀸𑀦𑀤.

𑀏𑀯𑀁 𑀳𑁄𑀢𑀽𑀢𑀺 𑀯𑀢𑁆𑀯𑀸𑀦, 𑀭𑀸𑀚𑀸 𑀢𑀁 𑀢𑀢𑁆𑀣 𑀧𑁂𑀲𑀬𑀺;

𑀲𑁄 𑀣𑁂𑀭𑀲𑁆𑀲 𑀘 𑀭𑀜𑁆𑀜𑁄 𑀘, 𑀲𑀸𑀲𑀦𑀁 𑀕𑀬𑁆𑀳 𑀯𑀦𑁆𑀤𑀺𑀬.

𑀅𑀲𑁆𑀲𑀬𑀼𑀚𑀲𑀼𑀓𑁆𑀓𑀧𑀓𑁆𑀔𑁂, 𑀦𑀺𑀓𑁆𑀔𑀦𑁆𑀢𑁄 𑀤𑀼𑀢𑀺𑀬𑁂’𑀳𑀦𑀺;

𑀲𑀸𑀦𑀼𑀬𑀼𑀢𑁆𑀢𑁄 𑀚𑀫𑁆𑀩𑀼𑀓𑁄𑀮𑁂, 𑀦𑀸𑀯𑀫𑀸𑀭𑀼𑀬𑁆𑀳 𑀧𑀝𑁆𑀝𑀦𑁂.

𑀫𑀳𑁄𑀤𑀫𑀺𑀁 𑀓𑀭𑀺𑀢𑁆𑀯𑀸𑀦, 𑀣𑁂𑀭𑀸𑀥𑀺𑀝𑁆𑀞𑀸𑀦𑀬𑁄𑀕𑀢𑁄;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀬𑁂𑀯, 𑀭𑀫𑁆𑀫𑀁 𑀧𑀼𑀧𑁆𑀨𑀧𑀼𑀭𑀁 𑀅𑀕𑀸.

𑀢𑀤𑀸 𑀢𑀼 𑀅𑀦𑀼𑀮𑀸𑀤𑁂𑀯𑀻, 𑀧𑀜𑁆𑀘𑀓𑀜𑁆𑀜𑀸𑀲𑀢𑁂𑀳𑀺 𑀘;

𑀅𑀦𑁆𑀢𑁂𑀧𑀼𑀭𑀺𑀓𑀇𑀢𑁆𑀣𑀻𑀦𑀁, 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑁂𑀳𑀺 𑀘.

𑀤𑀲𑀲𑀻𑀮𑀁 𑀲𑀫𑀸𑀤𑀸𑀬, 𑀓𑀸𑀲𑀸𑀬 𑀯𑀲𑀦𑀸 𑀲𑀼𑀘𑀺;

𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀺 𑀦𑀺𑀲𑁂𑀔𑀸, 𑀧𑁂𑀓𑁆𑀔𑀦𑁆𑀢𑀺 𑀣𑁂𑀭𑀺𑀬𑀸’𑀕𑀫𑀁.

𑀦𑀕𑀭𑀲𑁆𑀲𑁂’𑀓𑀤𑁂𑀲𑀫𑁆𑀳𑀺, 𑀭𑀫𑁆𑀫𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂;

𑀓𑀸𑀭𑀸𑀧𑀺𑀢𑁂 𑀦𑀭𑀺𑀦𑁆𑀤𑁂𑀦, 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀲𑀼𑀩𑁆𑀩𑀢𑀸.

𑀉𑀧𑀸𑀲𑀺𑀓𑀸𑀳𑀺 𑀢𑀸𑀳𑁂’𑀲, 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄;

𑀉𑀧𑀸𑀲𑀺𑀓𑀸 𑀯𑀺𑀳𑀸𑀭𑁄𑀢𑀺, 𑀢𑁂𑀦 𑀮𑀁𑀓𑀸𑀬 𑀯𑀺𑀲𑁆𑀲𑀼𑀢𑁄.

𑀪𑀸𑀕𑀺𑀦𑁂𑀬𑁆𑀬𑁄 𑀫𑀳𑀸’𑀭𑀺𑀝𑁆𑀞𑁄, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀅𑀧𑁆𑀧𑁂𑀢𑁆𑀯𑀸 𑀭𑀸𑀚𑀲𑀦𑁆𑀤𑁂𑀲𑀁, 𑀣𑁂𑀭𑀲𑀦𑁆𑀤𑁂𑀲’𑀫𑀩𑁆𑀭𑀯𑀺.

𑀪𑀸𑀢𑀼𑀚𑀬𑀸 𑀲𑀳𑀸𑀬𑀲𑁆𑀲, 𑀭𑀜𑁆𑀜𑁄 𑀢𑁂 𑀭𑀸𑀚𑀓𑀼𑀜𑁆𑀚𑀭;

𑀆𑀓𑀗𑁆𑀔𑀫𑀸𑀦𑀸 𑀧𑀩𑁆𑀩𑀚𑁆𑀚𑀁, 𑀦𑀺𑀘𑁆𑀘𑀁 𑀯𑀲𑀢𑀺 𑀲𑀜𑁆𑀜𑀢𑀸.

𑀲𑀗𑁆𑀖𑀫𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀢𑀁, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀺𑀲𑀚𑁆𑀚𑀬;

𑀢𑀸𑀬 𑀲𑀤𑁆𑀥𑀺𑀁 𑀫𑀳𑀸𑀩𑁄𑀥𑀺-𑀤𑀓𑁆𑀔𑀺𑀡𑀲𑀸𑀔𑀫𑁂𑀯 𑀘.

𑀣𑁂𑀭𑀺𑀬𑀸 𑀘 𑀢𑀫𑁂𑀯𑀢𑁆𑀣𑀁, 𑀅𑀩𑁆𑀭𑀯𑀺 𑀣𑁂𑀭𑀪𑀸𑀲𑀺𑀢𑀁;

𑀕𑀦𑁆𑀢𑁆𑀯𑀸 𑀧𑀺𑀢𑀼𑀲𑀫𑀻𑀧𑀁 𑀲𑀸, 𑀣𑁂𑀭𑀻 𑀣𑁂𑀭𑀫𑀢𑀁 𑀩𑁆𑀭𑀯𑀻.

𑀆𑀳 ¶ 𑀭𑀸𑀚𑀸 𑀢𑀼𑀯𑀁 𑀅𑀫𑁆𑀫, 𑀅𑀧𑀲𑁆𑀲𑀦𑁆𑀢𑁄 𑀓𑀣𑀁 𑀅𑀳𑀁;

𑀲𑁄𑀓𑀁 𑀯𑀺𑀦𑁄𑀤𑀬𑀺𑀲𑁆𑀲𑀸𑀫𑀺, 𑀧𑀼𑀢𑁆𑀢𑀦𑀢𑁆𑀢𑀯𑀺𑀬𑁄𑀕𑀚𑀁.

𑀆𑀳 𑀲𑀸 𑀫𑁂 𑀫𑀳𑀸𑀭𑀸𑀚, 𑀪𑀸𑀢𑀼𑀦𑁄 𑀯𑀘𑀦𑀁 𑀕𑀭𑀼;

𑀧𑀩𑁆𑀩𑀸𑀚𑀦𑀻𑀬𑀸 𑀘 𑀩𑀳𑀽, 𑀕𑀦𑁆𑀢𑀩𑁆𑀩𑀁 𑀢𑀢𑁆𑀣 𑀢𑁂𑀦 𑀫𑁂.

‘‘𑀲𑀢𑁆𑀣𑀖𑀸𑀢𑀫𑀦𑀸𑀭𑀳𑀸, 𑀫𑀳𑀸𑀩𑁄𑀥𑀺𑀫𑀳𑀻𑀭𑀼𑀳𑀸;

𑀓𑀣𑀦𑁆𑀦𑀼 𑀲𑀸𑀔𑀁 𑀕𑀡𑀺𑀲𑁆𑀲𑀁’’, 𑀇𑀢𑀺 𑀭𑀸𑀚𑀸 𑀯𑀺𑀘𑀺𑀦𑁆𑀢𑀬𑀻.

𑀅𑀫𑀘𑁆𑀘𑀲𑁆𑀲 𑀫𑀳𑀸𑀤𑁂𑀯-𑀦𑀸𑀫𑀓𑀲𑁆𑀲 𑀫𑀢𑁂𑀦 𑀲𑁄;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸 𑀧𑀼𑀘𑁆𑀙𑀺 𑀪𑀽𑀧𑀢𑀺𑀁.

𑀪𑀦𑁆𑀢𑁂 𑀮𑀁𑀓𑀁 𑀫𑀳𑀸𑀩𑁄𑀥𑀺, 𑀧𑁂𑀲𑁂𑀢𑀩𑁆𑀩𑀸 𑀦𑀼 𑀔𑁄 𑀇𑀢𑀺;

𑀣𑁂𑀭𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑁄, 𑀧𑁂𑀲𑁂𑀢𑀩𑁆𑀩𑀸𑀢𑀺 𑀪𑀸𑀲𑀺𑀬.

𑀓𑀢𑀁 𑀫𑀳𑀸𑀅𑀥𑀺𑀝𑁆𑀞𑀸𑀦-𑀧𑀜𑁆𑀘𑀓𑀁 𑀧𑀜𑁆𑀘𑀘𑀓𑁆𑀔𑀼𑀦𑀸;

𑀆𑀪𑀸𑀲𑀺 𑀭𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸, 𑀢𑀼𑀲𑁆𑀲𑀺𑀢𑁆𑀯𑀸 𑀥𑀭𑀡𑀻𑀧𑀢𑀺.

𑀲𑀢𑁆𑀢𑀬𑁄𑀚𑀦𑀺𑀓𑀁 𑀫𑀕𑁆𑀕𑀁, 𑀲𑁄 𑀫𑀳𑀸𑀩𑁄𑀥𑀺𑀕𑀸𑀫𑀺𑀦𑀁;

𑀲𑁄𑀥𑀸𑀧𑁂𑀢𑁆𑀯𑀸𑀦 𑀲𑀓𑁆𑀓𑀘𑁆𑀘𑀁, 𑀪𑀽𑀲𑀸𑀧𑁂𑀢𑀺 𑀅𑀦𑁂𑀓𑀥𑀸.

𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀲𑀺, 𑀓𑀝𑀸𑀳𑀓𑀭𑀡𑀸𑀬 𑀘;

𑀯𑀺𑀲𑁆𑀲𑀓𑀫𑁆𑀫𑁄 𑀘 𑀆𑀕𑀦𑁆𑀢𑁆𑀯𑀸, 𑀲𑀢𑀼𑀮𑀸𑀥𑀸𑀭𑀭𑀽𑀧𑀯𑀸.

‘‘𑀓𑀝𑀸𑀳𑀁 𑀓𑀺𑀁 𑀧𑀫𑀸𑀡𑀁 𑀦𑀼, 𑀓𑀭𑁄𑀫𑀻’𑀢𑀺 𑀅𑀧𑀼𑀘𑁆𑀙𑀺𑀢𑀁;

‘‘𑀜𑀢𑁆𑀯𑀸 𑀧𑀫𑀸𑀡𑀁 𑀢𑁆𑀯𑀁𑀬𑁂𑀯, 𑀓𑀭𑁄𑀳𑀺’’ 𑀇𑀢𑀺 𑀪𑀸𑀲𑀺𑀬.

𑀲𑀼𑀯𑀡𑁆𑀡𑀸 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺𑀬;

𑀓𑀝𑀸𑀳𑀁 𑀢𑀗𑁆𑀔𑀡𑀁𑀬𑁂𑀯, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀓𑁆𑀓𑀫𑀺.

𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀁, 𑀧𑀜𑁆𑀘𑀳𑀢𑁆𑀣𑀁 𑀕𑀪𑀻𑀭𑀢𑁄;

𑀢𑀺𑀳𑀢𑁆𑀣𑀯𑀺𑀓𑁆𑀔𑀫𑁆𑀪𑀬𑀼𑀢𑀁, 𑀅𑀝𑁆𑀞𑀗𑁆𑀕𑀼𑀮𑀖𑀦𑀁 𑀲𑀼𑀪𑀁.

𑀬𑀼𑀯𑀲𑁆𑀲 𑀳𑀢𑁆𑀣𑀺𑀦𑁄 𑀲𑁄𑀡𑁆𑀟-𑀧𑀫𑀸𑀡𑀫𑀼𑀔𑀯𑀝𑁆𑀝𑀺𑀓𑀁;

𑀕𑀸𑀳𑀸 𑀧𑁂𑀢𑁆𑀯𑀸𑀦 𑀢𑀁 𑀭𑀸𑀚𑀸, 𑀩𑀸𑀮𑀲𑀼𑀭𑀲𑀫𑀧𑁆𑀧𑀓𑀁.

𑀲𑀢𑁆𑀢𑀬𑁄𑀚𑀦𑀤𑀻𑀖𑀸𑀬, 𑀯𑀺𑀢𑁆𑀣𑀢𑀸𑀬𑀢𑀺 𑀬𑁄𑀚𑀦𑀁;

𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀦𑁆𑀬𑀸, 𑀫𑀳𑀸𑀪𑀺𑀓𑁆𑀔𑀼𑀕𑀡𑁂𑀦 𑀘.

𑀉𑀧𑀕𑀫𑁆𑀫 𑀫𑀳𑀸𑀩𑁄𑀥𑀺𑀁, 𑀦𑀸𑀦𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀁 𑀢𑀁, 𑀯𑀺𑀯𑀺𑀥𑀤𑁆𑀥𑀚𑀫𑀸𑀮𑀺𑀦𑀺𑀁.

𑀦𑀸𑀦𑀸𑀓𑀼𑀲𑀼𑀫𑀲𑀁𑀓𑀺𑀡𑁆𑀡𑀁 ¶ , 𑀦𑀸𑀦𑀸𑀢𑀼𑀭𑀺𑀬𑀖𑁄𑀲𑀺𑀢𑀁;

𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀭𑀺𑀓𑁆𑀔𑀺𑀧𑀺𑀬 𑀲𑀸𑀡𑀺𑀬𑀸.

𑀫𑀳𑀸𑀣𑁂𑀭𑀲𑀳𑀲𑁆𑀲𑁂𑀦, 𑀧𑀫𑀼𑀔𑁂𑀦 𑀫𑀳𑀸𑀕𑀡𑁂;

𑀭𑀜𑁆𑀜𑀁 𑀧𑀢𑁆𑀢𑀸𑀪𑀺𑀲𑁂𑀓𑀸𑀦𑀁, 𑀲𑀳𑀲𑁆𑀲𑁂𑀦𑀸’𑀥𑀺𑀓𑁂𑀦 𑀘.

𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀫𑀳𑀸𑀩𑁄𑀥𑀺𑀜𑁆𑀘 𑀲𑀸𑀥𑀼𑀓𑀁;

𑀑𑀮𑁄𑀓𑁂𑀲𑀺 𑀫𑀳𑀸𑀩𑁄𑀥𑀺𑀁, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁.

𑀢𑀲𑁆𑀲𑀸 𑀤𑀓𑁆𑀔𑀺𑀡𑀲𑀸𑀔𑀸𑀬, 𑀘𑀢𑀼𑀳𑀢𑁆𑀣𑀧𑀫𑀸𑀡𑀓𑀁;

𑀞𑀸𑀦𑀁 𑀔𑀦𑁆𑀥𑀜𑁆𑀘 𑀯𑀚𑁆𑀚𑁂𑀢𑁆𑀯𑀸, 𑀲𑀸𑀔𑀸 𑀅𑀦𑁆𑀢𑀭𑀥𑀸𑀬𑀺𑀲𑀼𑀁.

𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀢𑀻𑀢𑁄 𑀧𑀼𑀣𑀯𑀻𑀧𑀢𑀺;

‘‘𑀧𑀽𑀚𑁂𑀫’𑀳𑀁 𑀫𑀳𑀸𑀩𑁄𑀥𑀺𑀁, 𑀭𑀚𑁆𑀚𑁂𑀦𑀸’𑀳𑀺 𑀉𑀤𑀻𑀭𑀺𑀬.

𑀅𑀪𑀺𑀲𑀺𑀜𑁆𑀘𑀺 𑀫𑀳𑀸𑀩𑁄𑀥𑀻𑀁, 𑀫𑀳𑀸𑀭𑀚𑁆𑀚𑁂 𑀫𑀳𑀻𑀧𑀢𑀺;

𑀧𑀼𑀧𑁆𑀨𑀸𑀤𑀻𑀳𑀺 𑀫𑀳𑀸𑀩𑁄𑀥𑀺𑀁, 𑀧𑀽𑀚𑁂𑀢𑁆𑀯𑀸𑀦 𑀧𑀤𑀓𑁆𑀔𑀺𑀡𑀁.

𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼, 𑀯𑀦𑁆𑀤𑀺𑀢𑁆𑀯𑀸𑀦 𑀓𑀢𑀜𑁆𑀚𑀮𑀻;

𑀲𑀼𑀯𑀡𑁆𑀡𑀔𑀘𑀺𑀢𑁂 𑀧𑀻𑀞𑁂, 𑀦𑀸𑀦𑀸𑀭𑀢𑀦𑀫𑀡𑁆𑀟𑀺𑀢𑁂.

𑀲𑁆𑀯𑀸𑀭𑁄𑀳𑁂 𑀬𑀸𑀯 𑀲𑀸𑀉𑀘𑁆𑀘𑁂, 𑀢𑀁 𑀲𑀼𑀯𑀡𑁆𑀡𑀓𑀝𑀸𑀳𑀓𑀁;

𑀞𑀧𑀸𑀧𑁂𑀢𑁆𑀯𑀸𑀦 𑀆𑀭𑀼𑀬𑁆𑀳, 𑀕𑀳𑁂𑀢𑀼𑀁 𑀲𑀸𑀔𑀫𑀼𑀢𑁆𑀢𑀫𑀁.

𑀆𑀤𑀺𑀬𑀺𑀢𑁆𑀯𑀸𑀦 𑀲𑁄𑀯𑀡𑁆𑀡 𑀢𑀼𑀮𑀺𑀓𑀸𑀬 𑀫𑀦𑁄𑀲𑀺𑀮𑀁;

𑀮𑁂𑀔𑀁 𑀤𑀢𑁆𑀯𑀸𑀦 𑀲𑀸𑀔𑀸𑀬, 𑀲𑀘𑁆𑀘𑀓𑁆𑀭𑀺𑀬𑀫𑀓𑀸 𑀇𑀢𑀺.

‘‘𑀮𑀁𑀓𑀸𑀤𑀻𑀧𑀁 𑀬𑀤𑀺 𑀇𑀢𑁄, 𑀕𑀦𑁆𑀢𑀩𑁆𑀩𑀁 𑀉𑀭𑀼𑀩𑁄𑀥𑀺𑀬𑀸;

𑀦𑀺𑀩𑁆𑀩𑁂𑀫𑀢𑀺𑀓𑁄 𑀩𑀼𑀤𑁆𑀥𑀲𑁆𑀲, 𑀲𑀸𑀲𑀦𑀫𑁆𑀳𑀺 𑀲𑀘𑁂 𑀅𑀳𑀁.

𑀲𑀬𑀁𑀬𑁂𑀯 𑀫𑀳𑀸𑀩𑁄𑀥𑀺-𑀲𑀸𑀔𑀸𑀬𑀁 𑀤𑀓𑁆𑀔𑀺𑀡𑀸 𑀲𑀼𑀪𑀸;

𑀙𑀺𑀚𑁆𑀚𑀺𑀢𑁆𑀯𑀸𑀦 𑀧𑀢𑀺𑀝𑁆𑀞𑀸𑀢𑀼, 𑀇𑀥 𑀳𑁂𑀫𑀓𑀝𑀸𑀳𑀓𑁂.

𑀮𑁂𑀔𑀞𑀸𑀦𑁂 𑀫𑀳𑀸𑀩𑁄𑀥𑀺, 𑀙𑀺𑀚𑁆𑀚𑀺𑀢𑁆𑀯𑀸 𑀲𑀬𑀫𑁂𑀯 𑀲𑀸;

𑀕𑀦𑁆𑀥𑀓𑀤𑁆𑀤𑀫𑀧𑀽𑀭𑀲𑁆𑀲, 𑀓𑀝𑀸𑀳𑀲𑁆𑀲𑁄’𑀧𑀭𑀺𑀝𑁆𑀞𑀺𑀢𑀸.

𑀫𑀽𑀮𑀮𑁂𑀔𑀸𑀬 𑀉𑀧𑀭𑀺, 𑀢𑀺𑀬𑀗𑁆𑀕𑀼𑀮𑀢𑀺𑀬𑀗𑁆𑀕𑀼𑀮𑁂;

𑀤𑀤𑀁 𑀫𑀦𑁄𑀲𑀺𑀮𑀸 𑀮𑁂𑀔𑀸, 𑀧𑀭𑀺𑀓𑁆𑀔𑀺𑀧𑀺 𑀦𑀭𑀺𑀲𑁆𑀲𑀭𑁄.

𑀆𑀤𑀺𑀬𑀸 𑀣𑀽𑀮𑀫𑀽𑀮𑀸𑀦𑀺, 𑀔𑀼𑀤𑁆𑀤𑀓𑀸𑀦𑀺’𑀢𑀭𑀸𑀳𑀺 𑀢𑀼;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀲 𑀤𑀲, 𑀚𑀸𑀮𑀻𑀪𑀽𑀢𑀸 𑀦𑀺𑀑𑀢𑀭𑀼𑀁.

𑀢𑀁 ¶ 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀭𑀸𑀚𑀸’𑀢𑀻𑀯 𑀧𑀫𑁄𑀤𑀺𑀢𑁄;

𑀢𑀢𑁆𑀣𑁂𑀯𑀸’𑀓𑀸𑀲𑀺 𑀉𑀓𑁆𑀓𑀼𑀝𑁆𑀞𑀺𑀁, 𑀲𑀫𑀦𑁆𑀢𑀸 𑀧𑀭𑀺𑀲𑀸𑀧𑀺 𑀘.

𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀸𑀥𑀼𑀓𑀸𑀭𑀁, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀧𑀫𑁄𑀤𑀬𑀺;

𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺, 𑀧𑀯𑀢𑁆𑀢𑀺𑀁𑀲𑀼 𑀲𑀫𑀦𑁆𑀢𑀢𑁄.

𑀏𑀯𑀁 𑀲𑀢𑁂𑀦 𑀫𑀽𑀮𑀸𑀦𑀁, 𑀢𑀢𑁆𑀣 𑀲𑀸 𑀕𑀦𑁆𑀥𑀓𑀤𑁆𑀤𑀫𑁂;

𑀧𑀢𑀺𑀝𑁆𑀞𑀸𑀲𑀺 𑀫𑀳𑀸𑀩𑁄𑀥𑀺, 𑀧𑀲𑀸𑀤𑁂𑀦𑁆𑀢𑀻 𑀫𑀳𑀸𑀚𑀦𑀁.

𑀢𑀲𑁆𑀲𑀸 𑀔𑀦𑁆𑀥𑁄 𑀤𑀲𑀳𑀢𑁆𑀣𑁄, 𑀧𑀜𑁆𑀘𑀲𑀸𑀔𑀸 𑀫𑀦𑁄𑀭𑀫𑀸;

𑀘𑀢𑀼𑀳𑀢𑁆𑀣𑀸 𑀘𑀢𑀼𑀳𑀢𑁆𑀣𑀸, 𑀤𑀲𑀟𑁆𑀠𑀨𑀮𑀫𑀡𑁆𑀟𑀺𑀢𑀸.

𑀲𑀳𑀲𑁆𑀲𑀦𑁆𑀢𑀼 𑀧𑀲𑀸𑀔𑀸𑀦𑀁, 𑀲𑀸𑀔𑀸𑀦𑀁 𑀢𑀸𑀲𑀫𑀸𑀲𑀺 𑀘;

𑀏𑀯𑀁 𑀆𑀲𑀺 𑀫𑀳𑀸𑀩𑁄𑀥𑀺, 𑀫𑀦𑁄𑀳𑀭𑀲𑀺𑀭𑀺𑀥𑀭𑀸.

𑀓𑀝𑀸𑀳𑀫𑁆𑀳𑀺 𑀫𑀳𑀸𑀩𑁄𑀥𑀺-𑀧𑀢𑀺𑀝𑁆𑀞𑀺𑀢𑀓𑁆𑀔𑀡𑁂 𑀫𑀳𑀻;

𑀅𑀓𑀫𑁆𑀧𑀺 𑀧𑀸𑀝𑀺𑀳𑀻𑀭𑀸𑀦𑀺, 𑀅𑀳𑁂𑀲𑀼𑀁 𑀯𑀺𑀯𑀺𑀥𑀸𑀦𑀺 𑀘.

𑀲𑀬𑀁 𑀦𑀸𑀤𑁂𑀳𑀺 𑀢𑀽𑀭𑀺𑀬𑀸𑀦𑀁, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀸𑀥𑀼𑀓𑀸𑀭𑀦𑀺𑀦𑀸𑀤𑁂𑀢𑀺, 𑀤𑁂𑀯𑀩𑁆𑀭𑀳𑁆𑀫𑀕𑀡𑀲𑁆𑀲 𑀘.

𑀫𑁂𑀖𑀸𑀦𑀁 𑀫𑀺𑀕𑀧𑀓𑁆𑀔𑀺𑀦𑀁, 𑀬𑀓𑁆𑀔𑀸𑀤𑀻𑀦𑀁 𑀭𑀯𑁂𑀳𑀺 𑀘;

𑀭𑀯𑁂𑀳𑀺𑀘𑀫𑀳𑀻𑀓𑀫𑁆𑀧𑁂, 𑀏𑀓𑀓𑁄𑀮𑀸𑀳𑀮𑀁 𑀅𑀳𑀼.

𑀩𑁄𑀥𑀺𑀬𑀸 𑀨𑀮𑀧𑀢𑁆𑀢𑁂𑀳𑀺, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀼𑀪𑀸;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀁, 𑀲𑀓𑀮𑀸 𑀲𑁄𑀪𑀬𑀺𑀁𑀲𑀼 𑀘.

𑀲𑀓𑀝𑀸𑀳𑀸 𑀫𑀳𑀸𑀩𑁄𑀥𑀺, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀢𑀢𑁄 𑀦𑀪𑀁;

𑀅𑀝𑁆𑀞𑀸𑀲𑀺 𑀳𑀺𑀫𑀕𑀩𑁆𑀪𑀫𑁆𑀳𑀺, 𑀲𑀢𑁆𑀢𑀸𑀳𑀸𑀦𑀺 𑀅𑀤𑀲𑁆𑀲𑀦𑀸.

𑀭𑀸𑀚𑀸 𑀑𑀭𑀼𑀬𑁆𑀳 𑀧𑀻𑀞𑀫𑁆𑀳𑀸, 𑀢𑀁 𑀲𑀢𑁆𑀢𑀸𑀳𑀁 𑀢𑀳𑀺𑀁 𑀯𑀲𑀁;

𑀦𑀺𑀘𑁆𑀘𑀁 𑀫𑀳𑀸𑀩𑁄𑀥𑀺𑀧𑀽𑀚𑀁, 𑀅𑀓𑀸𑀲𑀺 𑀘 𑀅𑀦𑁂𑀓𑀥𑀸.

𑀅𑀢𑀻𑀢𑁂 𑀢𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀲𑀩𑁆𑀩𑁂 𑀳𑀺𑀫𑀯𑀮𑀸𑀯𑀓𑀸;

𑀧𑀯𑀺𑀲𑀺𑀁𑀲𑀼 𑀫𑀳𑀸𑀩𑁄𑀥𑀺𑀁, 𑀲𑀩𑁆𑀩𑀸𑀓𑀸 𑀭𑀁𑀲𑀺𑀬𑁄𑀧𑀺 𑀘.

𑀲𑀼𑀤𑁆𑀥𑁂𑀦𑀓𑀤𑀺𑀲𑀺𑀲𑁆𑀲𑀺𑀢𑁆𑀣, 𑀲𑀸𑀓𑀝𑀸𑀳𑁂 𑀧𑀢𑁆𑀢𑀺𑀝𑁆𑀞𑀺𑀢𑀸;

𑀫𑀳𑀸𑀚𑀦𑀲𑁆𑀲 𑀲𑀩𑁆𑀩𑀲𑁆𑀲, 𑀫𑀳𑀸𑀩𑁄𑀥𑀺 𑀫𑀦𑁄𑀭𑀫𑀸.

𑀧𑀯𑀢𑁆𑀢𑀫𑁆𑀳𑀺 𑀫𑀳𑀸𑀩𑁄𑀥𑀺, 𑀯𑀺𑀯𑀺𑀥𑁂 𑀧𑀸𑀝𑀺𑀳𑀸𑀭𑀺𑀬𑁂;

𑀯𑀺𑀫𑁆𑀳𑀸𑀧𑀬𑀦𑁆𑀢𑀺 𑀚𑀦𑀢𑀁, 𑀧𑀣𑀯𑀻𑀢𑀮𑀫𑁄𑀭𑀼𑀳𑀺.

𑀧𑀸𑀝𑀺𑀳𑀺𑀭𑁂𑀳𑀺’𑀦𑁂𑀓𑁂𑀳𑀺 ¶ , 𑀢𑁂𑀳𑀺 𑀲𑁄 𑀧𑀻𑀡𑀺𑀢𑁄 𑀧𑀼𑀦;

𑀫𑀳𑀸𑀭𑀸𑀚𑀸 𑀫𑀳𑀸𑀩𑁄𑀥𑀺𑀁, 𑀫𑀳𑀸𑀭𑀚𑁆𑀚𑁂𑀦 𑀧𑀽𑀚𑀬𑀺.

𑀫𑀳𑀸𑀩𑁄𑀥𑀺𑀁 𑀫𑀳𑀸𑀭𑀚𑁆𑀚𑁂-𑀦𑀸𑀪𑀺𑀲𑀺𑀜𑁆𑀘𑀺𑀬 𑀧𑀽𑀚𑀬𑀁;

𑀦𑀸𑀦𑀸𑀧𑀽𑀚𑀸𑀳𑀺 𑀲𑀢𑁆𑀢𑀸𑀳𑀁, 𑀧𑀼𑀦 𑀢𑀢𑁆𑀣𑁂𑀯 𑀲𑁄 𑀯𑀲𑀺.

𑀅𑀲𑁆𑀲𑀬𑀼𑀚𑀲𑀼𑀓𑁆𑀓𑀧𑀓𑁆𑀔𑁂, 𑀧𑀦𑁆𑀦𑀭𑀲𑀉𑀧𑁄𑀲𑀣𑁂;

𑀅𑀕𑁆𑀕𑀳𑁂𑀲𑀺 𑀫𑀳𑀸𑀩𑁄𑀥𑀺𑀁, 𑀤𑁆𑀯𑀺𑀲𑀢𑁆𑀢𑀸𑀳𑀫𑀘𑁆𑀘𑀬𑁂 𑀢𑀢𑁄.

𑀅𑀲𑁆𑀲𑀬𑀼𑀚𑀓𑀸𑀴𑀧𑀓𑁆𑀔𑁂, 𑀘𑀢𑀼𑀤𑁆𑀤𑀲𑀉𑀧𑁄𑀲𑀣𑁂;

𑀭𑀣𑁂 𑀲𑀼𑀪𑁂 𑀞𑀧𑁂𑀢𑁆𑀯𑀸𑀦, 𑀫𑀳𑀸𑀩𑁄𑀥𑀺𑀁 𑀭𑀣𑁂𑀲𑀪𑁄.

𑀧𑀽𑀚𑁂𑀦𑁆𑀢𑁄 𑀢𑀁 𑀤𑀺𑀦𑀁𑀬𑁂𑀯, 𑀉𑀧𑀦𑁂𑀢𑁆𑀯𑀸 𑀲𑀓𑀁 𑀧𑀼𑀭𑀁;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑀳𑀼𑀥𑀸, 𑀓𑀸𑀭𑁂𑀢𑁆𑀯𑀸 𑀫𑀡𑁆𑀟𑀧𑀁 𑀲𑀼𑀪𑀁.

𑀓𑀢𑁆𑀢𑀺𑀓𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀤𑀺𑀦𑁂 𑀧𑀸𑀝𑀺𑀧𑀤𑁂 𑀢𑀳𑀺𑀁;

𑀫𑀳𑀸𑀩𑁄𑀥𑀺𑀁 𑀫𑀳𑀸𑀲𑀸𑀮-𑀫𑀽𑀮𑁂 𑀧𑀸𑀘𑀺𑀦𑀢𑁂 𑀲𑀼𑀪𑁂.

𑀞𑀧𑀸𑀧𑁂𑀢𑁆𑀯𑀸𑀦 𑀓𑀸𑀭𑁂𑀲𑀺, 𑀧𑀽𑀚𑀸’𑀦𑁂𑀓𑀸 𑀤𑀺𑀦𑁂 𑀤𑀺𑀦𑁂;

𑀕𑀸𑀳𑀢𑁄 𑀲𑀢𑁆𑀢𑀭𑀲𑀫𑁂, 𑀯𑀺𑀯𑀲𑁂 𑀢𑀼 𑀦𑀯𑀗𑁆𑀓𑀺𑀭𑀸.

𑀲𑀓𑀺𑀁 𑀬𑁂𑀯𑀅𑀚𑀸𑀬𑀺𑀁𑀲𑀼, 𑀢𑀲𑁆𑀲𑀸’𑀦𑁂𑀓𑀦𑀭𑀸𑀥𑀺𑀧𑁄;

𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀩𑁄𑀥𑀺𑀁, 𑀧𑀼𑀦 𑀭𑀚𑁆𑀚𑁂𑀦 𑀧𑀽𑀚𑀬𑀺.

𑀫𑀳𑀸𑀭𑀚𑁆𑀚𑁂’𑀪𑀺 𑀲𑀺𑀜𑁆𑀘𑀺𑀢𑁆𑀯𑀸, 𑀫𑀳𑀸𑀩𑁄𑀥𑀺𑀁 𑀫𑀳𑀺𑀲𑁆𑀲𑀭𑁄;

𑀓𑀸𑀭𑁂𑀲𑀺 𑀘 𑀫𑀳𑀸𑀩𑁄𑀥𑀺-𑀧𑀽𑀚𑀸 𑀦𑀸𑀦𑀧𑁆𑀧𑀓𑀸𑀭𑀓𑀁.

𑀇𑀢𑀺 𑀓𑀼𑀲𑀼𑀫𑀧𑀼𑀭𑁂 𑀲𑀭𑁂𑀲𑀭𑀁𑀲𑀸,

𑀩𑀳𑀼𑀯𑀺𑀥𑀘𑀸𑀭𑀼𑀥𑀚𑀸𑀓𑀼𑀮𑀸𑀯𑀺𑀲𑀸𑀮𑀸;

𑀲𑀼𑀭𑀼𑀘𑀺𑀭𑀧𑀯𑀭𑁄𑀭𑀼 𑀩𑁄𑀥𑀺𑀧𑀽𑀚𑀸,

𑀫𑀭𑀼𑀦𑀭𑀘𑀺𑀢𑁆𑀢𑀯𑀺𑀓𑀸𑀲𑀺𑀦𑀻 𑀅𑀳𑁄𑀲𑀻𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀳𑀸𑀩𑁄𑀥𑀺𑀭𑀓𑁆𑀔𑀡𑀢𑁆𑀣𑀁 ¶ , 𑀅𑀝𑁆𑀞𑀸𑀭𑀲 𑀭𑀣𑁂 𑀲𑀪𑁄;

𑀤𑁂𑀯𑀓𑀼𑀮𑀸𑀦𑀺 𑀤𑀢𑁆𑀯𑀸𑀦, 𑀅𑀝𑁆𑀞𑀸𑀫𑀘𑁆𑀘𑀸 𑀓𑀼𑀮𑀸𑀦𑀺 𑀘.

𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀺, 𑀅𑀝𑁆𑀞 𑀯𑀲𑁆𑀲𑀓𑀼𑀮𑀸𑀦𑀺 𑀘;

𑀕𑁄𑀧𑀓𑀸𑀦𑀁 𑀢𑀭𑀘𑁆𑀙𑀸𑀦𑀁, 𑀓𑀼𑀮𑀺𑀗𑁆𑀕𑀸𑀦𑀁 𑀓𑀼𑀮𑀸𑀦𑀺 𑀘.

𑀢𑀣𑁂𑀯 𑀧𑁂𑀲𑀓𑀸𑀭𑀸𑀦𑀁, 𑀓𑀼𑀫𑁆𑀪𑀓𑀸𑀭𑀸𑀦𑀫𑁂𑀯 𑀘;

𑀲𑀩𑁆𑀩𑁂 𑀲𑀜𑁆𑀘𑀸𑀧𑀺 𑀲𑁂𑀦𑀻𑀦𑀁, 𑀦𑀸𑀕𑀬𑀓𑁆𑀔𑀸𑀦𑀫𑁂𑀯 𑀘.

𑀳𑁂𑀫𑀲𑀚𑁆𑀚𑀼𑀖𑀝𑁂𑀘𑁂𑀯, 𑀤𑀢𑁆𑀯𑀸 𑀅𑀝𑁆𑀞𑀝𑁆𑀞 𑀫𑀸𑀦𑀤𑁄;

𑀆𑀭𑁄𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀁, 𑀦𑀸𑀯𑀁 𑀕𑀗𑁆𑀕𑀸𑀬 𑀪𑀽𑀲𑀺𑀢𑀁.

𑀲𑀗𑁆𑀖𑀫𑀺𑀢𑁆𑀢 𑀫𑀳𑀸𑀣𑁂𑀭𑀻, 𑀲𑀳𑁂 𑀓𑀤𑀲 𑀪𑀺𑀓𑁆𑀔𑀼𑀦𑀺𑀁;

𑀢𑀣𑁂𑀯𑀸’𑀭𑁄𑀧𑀬𑀺𑀢𑁆𑀯𑀸𑀦, 𑀅𑀭𑀺𑀝𑁆𑀞𑀧𑀫𑀼𑀔𑁂𑀧𑀺 𑀘.

𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑀺𑀜𑁆𑀚𑀸𑀝𑀯𑀺𑀫𑀢𑀺𑀘𑁆𑀘𑀲𑁄;

𑀢𑀸𑀫𑀮𑀺𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀢𑁆𑀢𑀸𑀳𑁂𑀦𑁂’𑀯 𑀪𑀽𑀧𑀢𑀺.

𑀅𑀘𑁆𑀘𑀼𑀴𑀸 𑀭𑀸𑀳𑀺 𑀧𑀽𑀚𑀸𑀬𑀺, 𑀤𑁂𑀯𑀸𑀦𑀸𑀕𑀸𑀦𑀭𑀸𑀧𑀺 𑀘;

𑀫𑀳𑀸𑀩𑁄𑀥𑀺𑀁 𑀧𑀽𑀚𑀬𑀦𑁆𑀢𑀸, 𑀲𑀢𑁆𑀢𑀸𑀳𑁂𑀦’𑀯𑀼𑀧𑀸𑀕𑀫𑀼𑀁.

𑀫𑀳𑀸𑀲𑀫𑀼𑀤𑁆𑀤𑀢𑀻𑀭𑀫𑁆𑀳𑀺, 𑀫𑀳𑀸𑀩𑁄𑀥𑀺𑀁 𑀫𑀳𑀻𑀧𑀢𑀺;

𑀞𑀧𑀸𑀧𑁂𑀢𑁆𑀯𑀸𑀦 𑀧𑀽𑀚𑁂𑀲𑀺, 𑀫𑀳𑀸𑀭𑀚𑁆𑀚𑁂𑀦 𑀲𑁄 𑀧𑀼𑀦.

𑀫𑀳𑀸𑀩𑁄𑀥𑀺𑀁 𑀫𑀳𑀸𑀭𑀚𑁆𑀚𑁂, 𑀅𑀪𑀺𑀲𑀺𑀜𑁆𑀘𑀻𑀬𑀓𑀸𑀫𑀤𑁄;

𑀅𑀕𑁆𑀕𑀲𑀺𑀭 𑀲𑀼𑀓𑁆𑀓𑀧𑀓𑁆𑀔𑁂, 𑀤𑀺𑀦𑁂 𑀧𑀸𑀝𑀺𑀧𑀤𑁂 𑀢𑀢𑁄.

𑀉𑀘𑁆𑀘𑀸𑀭𑁂𑀢𑀼𑀁 𑀫𑀳𑀸𑀩𑁄𑀥𑀺𑀁, 𑀢𑁂𑀳𑀺𑀬𑁂𑀯’𑀝𑁆𑀞 𑀅𑀝𑁆𑀞𑀳𑀺;

𑀲𑀸𑀮𑀫𑀽𑀮𑀫𑁆𑀳𑀺 𑀤𑀺𑀦𑁆𑀦𑁂𑀳𑀺, 𑀥𑀸𑀢𑀼𑀕𑁆𑀕𑀢𑀓𑀼𑀮𑁂𑀳𑀺 𑀲𑁄.

𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁, 𑀕𑀮𑀫𑀢𑁆𑀢𑀁 𑀚𑀮𑀁 𑀢𑀳𑀺𑀁;

𑀑𑀕𑀸𑀳𑁂𑀢𑁆𑀯𑀸 𑀲𑀦𑀸𑀯𑀸𑀬, 𑀧𑀢𑀺𑀝𑁆𑀞𑀸𑀧𑀬𑀺 𑀲𑀸𑀥𑀼𑀓𑀁.

𑀦𑀸𑀯𑀁 ¶ 𑀆𑀭𑁄𑀧𑀬𑀺𑀢𑁆𑀯𑀸 𑀢𑀁, 𑀫𑀳𑀸𑀣𑁂𑀭𑀺𑀁 𑀲𑀣𑁂𑀭𑀺𑀓𑀁;

𑀫𑀳𑀸𑀭𑀺𑀝𑁆𑀞𑀁 𑀫𑀳𑀸𑀫𑀘𑁆𑀘𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀅𑀳𑀁 𑀭𑀚𑁆𑀚𑁂𑀦 𑀢𑀺𑀓𑁆𑀔𑀢𑁆𑀢𑀼𑀁, 𑀫𑀳𑀸𑀩𑁄𑀥𑀺𑀫𑀧𑀽𑀚𑀬𑀺𑀁;

𑀏𑀯 𑀫𑁂𑀯𑀸’𑀪𑀺 𑀧𑀽𑀚𑁂𑀢𑀼, 𑀭𑀸𑀚𑀸 𑀭𑀚𑁆𑀚𑁂𑀦 𑀫𑁂 𑀲𑀔𑀸’’.

𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀢𑀻𑀭𑁂 𑀧𑀜𑁆𑀚𑀮𑀺𑀓𑁄 𑀞𑀺𑀢𑁄;

𑀕𑀘𑁆𑀙𑀫𑀸𑀦𑀁 𑀫𑀳𑀸𑀩𑁄𑀥𑀺𑀁, 𑀧𑀲𑁆𑀲𑀁 𑀅𑀲𑁆𑀲𑀽𑀦𑀺𑀯𑀢𑁆𑀢𑀬𑀺.

𑀓𑀦𑁆𑀦𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸,

𑀫𑀳𑀸𑀩𑁄𑀥𑀺 𑀲𑀫𑀸𑀭𑀼𑀴𑁆𑀳𑀸, 𑀦𑀸𑀯𑀸𑀧𑀓𑁆𑀔𑀦𑁆𑀥𑀻 𑀢𑁄𑀬𑀥𑀺𑀁;

𑀲𑀫𑀦𑁆𑀢𑀸 𑀬𑁄𑀚𑀦𑁂 𑀯𑀺𑀘𑀻, 𑀲𑀦𑁆𑀦𑀺𑀲𑀻𑀤𑀺 𑀫𑀳𑀡𑁆𑀡𑀯𑁂.

𑀧𑀼𑀧𑁆𑀨𑀺𑀁𑀲𑀼 𑀧𑀜𑁆𑀘𑀯𑀡𑁆𑀡𑀸𑀦𑀺, 𑀧𑀤𑀼𑀫𑀸𑀦𑀺 𑀲𑀫𑀦𑁆𑀢𑀢𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀧𑀯𑀚𑁆𑀚𑀺𑀁𑀲𑀼, 𑀅𑀦𑁂𑀓 𑀢𑀽𑀭𑀺𑀬𑀸𑀦𑀺 𑀘.

𑀤𑁂𑀯𑀢𑀸𑀳𑀺 𑀅𑀦𑁂𑀓𑀸𑀳𑀺, 𑀧𑀽𑀚𑀸’𑀦𑁂𑀓𑀸 𑀧𑀯𑀢𑁆𑀢𑀺𑀢𑀸;

𑀕𑀳𑁂𑀢𑀼𑀜𑁆𑀘 𑀫𑀳𑀸𑀩𑁄𑀥𑀺, 𑀦𑀸𑀕𑀸’𑀓𑀸𑀲𑀼𑀁 𑀯𑀺𑀓𑀼𑀩𑁆𑀩𑀦𑀁.

𑀲𑀗𑁆𑀖𑀫𑀺𑀢𑁆𑀢𑀸 𑀫𑀳𑀸𑀣𑁂𑀭𑀺, 𑀅𑀪𑀺𑀜𑁆𑀜𑀸𑀩𑀮𑀧𑀸𑀭𑀕𑀸;

𑀲𑀼𑀧𑀡𑁆𑀡𑀭𑀽𑀧𑀸 𑀳𑀼𑀢𑁆𑀯𑀸𑀦, 𑀢𑁂 𑀢𑀸𑀲𑁂𑀲𑀺 𑀫𑀳𑁄𑀭𑀕𑁂.

𑀢𑁂 𑀢𑀸𑀲𑀺𑀢𑀸 𑀫𑀳𑀸𑀣𑁂𑀭𑀺𑀁, 𑀬𑀸𑀘𑀺𑀢𑁆𑀯𑀸𑀦 𑀫𑀳𑁄𑀭𑀕𑀸;

𑀦𑀬𑀺𑀢𑁆𑀯𑀸𑀦 𑀫𑀳𑀸𑀩𑁂𑀫𑀥𑀺𑀁, 𑀪𑀼𑀚𑀗𑁆𑀕𑀪𑀯𑀦𑀁 𑀢𑀢𑁄.

𑀲𑀢𑁆𑀢𑀸𑀳𑀁 𑀦𑀸𑀕𑀭𑀚𑁆𑀚𑁂𑀦, 𑀧𑀽𑀚𑀸𑀳𑀺 𑀯𑀺𑀯𑀺𑀥𑀸𑀳𑀺 𑀘;

𑀧𑀽𑀚𑀬𑀺𑀢𑁆𑀯𑀸𑀦 𑀆𑀦𑁂𑀢𑁆𑀯𑀸, 𑀦𑀸𑀯𑀸𑀬𑀁 𑀞𑀧𑀬𑀺𑀁𑀲𑀼 𑀢𑁂.

𑀢𑀤𑀳𑁂𑀯 𑀫𑀳𑀸𑀩𑁄𑀥𑀺, 𑀚𑀫𑁆𑀩𑀼𑀓𑁄𑀮𑀫𑀺𑀥𑀕𑀫𑀸;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀢𑀼, 𑀭𑀸𑀚𑀸 𑀮𑁄𑀓𑀳𑀺𑀢𑁂 𑀭𑀢𑁄.

𑀲𑀼𑀫𑀦𑀸 𑀲𑀸𑀫𑀡𑁂𑀭𑀫𑁆𑀳𑀸, 𑀧𑀼𑀩𑁆𑀩𑁂 𑀲𑀼𑀢𑀢𑀤𑀸𑀕𑀫𑁄;

𑀫𑀕𑁆𑀕𑀲𑀺𑀭𑀸𑀤𑀺𑀤𑀺𑀦𑀖𑁄, 𑀧𑀪𑀼𑀢𑀺 𑀯𑀘𑀲𑀸𑀤𑀭𑁄.

𑀉𑀢𑁆𑀢𑀭𑀤𑁆𑀯𑀸𑀭𑀢𑁄 ¶ 𑀬𑀸𑀯, 𑀚𑀫𑁆𑀩𑀼𑀓𑁄𑀮𑀁 𑀫𑀳𑀸𑀧𑀣𑀁;

𑀯𑀺𑀪𑀽𑀲𑀬𑀺𑀢𑁆𑀯𑀸 𑀲𑀓𑀮𑀁, 𑀫𑀳𑀸𑀩𑁄𑀥𑀺𑀕𑀢𑀸𑀲𑀬𑁄.

𑀲𑀫𑀼𑀤𑁆𑀤𑀸𑀲𑀦𑀲𑀸𑀮𑀸𑀬, 𑀞𑀸𑀦𑁂 𑀞𑀢𑁆𑀯𑀸 𑀫𑀳𑀡𑁆𑀡𑀯𑁂;

𑀆𑀕𑀘𑁆𑀙𑀦𑁆𑀢𑀁 𑀫𑀳𑀸𑀩𑁄𑀥𑀺𑀁, 𑀫𑀳𑀸𑀣𑁂𑀭𑀺𑀤𑁆𑀥𑀺𑀬𑀸’𑀤𑁆𑀤𑀲.

𑀢𑀲𑁆𑀫𑀺𑀁𑀞𑀸𑀦𑁂 𑀓𑀢𑀸 𑀲𑀸𑀮𑀸, 𑀧𑀓𑀸 𑀲𑁂𑀢𑀼𑀁 𑀢𑀫𑀩𑁆𑀪𑀼𑀢𑀁;

𑀲𑀫𑀼𑀤𑁆𑀤𑀸𑀲𑀦𑀲𑀸𑀮𑀸𑀢𑀺, 𑀦𑀸𑀫𑁂𑀦𑀸‘𑀲𑀺’𑀥 𑀧𑀸𑀓𑀝𑀸.

𑀫𑀳𑀸𑀣𑁂𑀭𑀸𑀦𑀼𑀪𑀸𑀯𑁂𑀦, 𑀲𑀤𑁆𑀥𑀺𑀁 𑀣𑁂𑀭𑁂𑀳𑀺 𑀢𑁂𑀳𑀺 𑀘;

𑀢𑀤𑀳𑁂𑀯’𑀕𑀫𑀸 𑀭𑀸𑀚𑀸, 𑀚𑀫𑁆𑀩𑀼𑀓𑁄𑀮𑀁 𑀲 𑀲𑁂𑀦𑀓𑁄.

𑀫𑀳𑀸𑀩𑁄𑀥𑀸 𑀕𑀫𑁂𑀧𑀻𑀢𑀺-𑀯𑁂𑀕𑁂𑀦𑀼’𑀦𑁆𑀦𑁄 𑀉𑀤𑀸𑀦𑀬𑀁;

𑀕𑀮𑀧𑁆𑀧𑀫𑀸𑀡𑀁 𑀲𑀮𑀺𑀮𑀁, 𑀯𑀺𑀕𑀸𑀳𑁂𑀢𑁆𑀯𑀸 𑀲𑀼𑀯𑀺𑀕𑁆𑀕𑀳𑁄.

𑀫𑀳𑀸𑀩𑁄𑀥𑀺𑀁 𑀲𑁄𑀴𑀲𑀳𑀺, 𑀓𑀼𑀮𑁂𑀳𑀺 𑀲𑀳 𑀫𑀼𑀤𑁆𑀥𑀦𑀸;

𑀆𑀤𑀸𑀬𑁄’𑀭𑁄𑀧𑀬𑀺𑀢𑁆𑀯𑀸𑀦, 𑀯𑁂𑀮𑀸𑀬𑀁 𑀫𑀡𑁆𑀟𑀧𑁂 𑀲𑀼𑀪𑁂.

𑀞𑀧𑀬𑀺𑀢𑁆𑀯𑀸𑀦 𑀮𑀁𑀓𑀺𑀦𑁆𑀤𑁄, 𑀮𑀁𑀓𑀸𑀭𑀚𑁆𑀚𑁂𑀦 𑀧𑀽𑀚𑀬𑀺;

𑀲𑁄𑀴𑀲𑀦𑁆𑀦𑀁 𑀲𑀫𑀧𑁆𑀧𑁂𑀢𑁆𑀯𑀸, 𑀓𑀼𑀮𑀸𑀦𑀁 𑀭𑀚𑁆𑀚𑀫𑀢𑁆𑀢𑀦𑁄.

𑀲𑀬𑀁 𑀤𑁄𑀯𑀸𑀭𑀺𑀓𑀞𑀸𑀦𑁂, 𑀞𑀢𑁆𑀯𑀸𑀦 𑀤𑀺𑀯𑀲𑁂 𑀢𑀬𑁄;

𑀢𑀢𑁆𑀣𑁂𑀯 𑀧𑀽𑀚𑀁 𑀓𑀸𑀭𑁂𑀲𑀺, 𑀯𑀺𑀯𑀺𑀥𑀁 𑀫𑀦𑀼𑀚𑀸𑀥𑀺𑀧𑁄.

𑀫𑀳𑀸𑀩𑁄𑀥𑀺𑀁 𑀤𑀲𑀫𑀺𑀬𑀁, 𑀆𑀭𑁄𑀧𑁂𑀢𑁆𑀯𑀸 𑀭𑀣𑁂𑀲𑀼𑀪𑁂;

𑀆𑀦𑀬𑀦𑁆𑀢𑁄 𑀫𑀦𑀼𑀲𑁆𑀲𑀺𑀦𑁆𑀤𑁄, 𑀤𑀼𑀫𑀺𑀦𑁆𑀤𑀁 𑀢𑀁 𑀞𑀧𑀸𑀧𑀬𑀺.

𑀧𑀸𑀘𑀺𑀦𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀞𑀸𑀦𑁂 𑀞𑀸𑀦𑀯𑀺𑀘𑀓𑁆𑀔𑀡𑁄;

𑀧𑀸𑀢𑀭𑀸𑀲𑀁 𑀧𑀯𑀢𑁆𑀢𑁂𑀲𑀺, 𑀲𑀲𑀗𑁆𑀖𑀲𑁆𑀲 𑀚𑀦𑀲𑁆𑀲 𑀲𑁄.

𑀫𑀳𑀸𑀫𑀳𑀺𑀦𑁆𑀤𑀣𑁂𑀭𑁂’𑀢𑁆𑀣, 𑀓𑀢𑀁 𑀤𑀲𑀩𑀮𑁂𑀦 𑀢𑀁;

𑀓𑀣𑁂𑀲𑀺 𑀦𑀸𑀕𑀤𑀫𑀦𑀁, 𑀭𑀜𑁆𑀜𑁄 𑀢𑀲𑁆𑀲 𑀅𑀲𑁂𑀲𑀢𑁄.

𑀣𑁂𑀭𑀲𑁆𑀲 𑀲𑀼𑀢𑁆𑀯𑀸 𑀓𑀸𑀭𑁂𑀢𑁆𑀯𑀸, 𑀲𑀜𑁆𑀜𑀸𑀡𑀸𑀦𑀺 𑀢𑀳𑀺𑀁 𑀢𑀳𑀺𑀁;

𑀧𑀭𑀺𑀪𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼, 𑀦𑀺𑀲𑀚𑁆𑀚𑀸𑀤𑀻𑀳𑀺 𑀲𑀢𑁆𑀣𑀼𑀦𑀸.

𑀢𑀺𑀯𑀓𑁆𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀕𑀸𑀫𑀤𑁆𑀯𑀸𑀭𑁂 𑀘 𑀪𑀽𑀧𑀢𑀺;

𑀞𑀧𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀁, 𑀞𑀸𑀦𑁂𑀲𑀼 𑀢𑁂𑀲𑀼 𑀢𑁂𑀲𑀼 𑀘.

𑀲𑀼𑀤𑁆𑀥𑀯𑀸𑀮𑀼𑀓 𑀲𑀦𑁆𑀣𑀸𑀭𑁂, 𑀦𑀸𑀦𑀸𑀧𑀼𑀧𑁆𑀨𑀲𑀫𑀸𑀓𑀼𑀮𑁂;

𑀧𑀕𑁆𑀕𑀳𑀺𑀢𑀥𑀚𑁂 𑀫𑀕𑁆𑀕𑁂, 𑀧𑀼𑀧𑁆𑀨𑀕𑁆𑀖𑀺𑀓𑀯𑀺𑀪𑀽𑀲𑀺𑀢𑁂.

𑀫𑀳𑀸𑀩𑁄𑀥𑀺𑀁 ¶ 𑀧𑀽𑀚𑀬𑀦𑁆𑀢𑁄, 𑀭𑀢𑁆𑀢𑀺𑀦𑁆𑀤𑀺𑀯 𑀫𑀢𑀦𑁆𑀤𑀺𑀢𑁄;

𑀆𑀦𑀬𑀺𑀢𑁆𑀯𑀸 𑀘𑀼𑀤𑁆𑀤𑀲𑀺𑀬𑀁, 𑀅𑀦𑀼𑀭𑀸𑀥 𑀧𑀼𑀭𑀦𑁆𑀢𑀺𑀓𑀁.

𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬, 𑀧𑀼𑀭𑀁 𑀲𑀸𑀥𑀼 𑀯𑀺𑀪𑀽𑀲𑀺𑀢𑀁;

𑀉𑀢𑁆𑀢𑀭𑁂𑀦 𑀘 𑀤𑁆𑀯𑀸𑀭𑁂𑀦, 𑀧𑀽𑀚𑀬𑀦𑁆𑀢𑁄 𑀧𑀯𑁂𑀲𑀺𑀬.

𑀤𑀓𑁆𑀔𑀺𑀡𑁂𑀦 𑀘 𑀤𑁆𑀯𑀸𑀭𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀯𑁂𑀲𑀺𑀬;

𑀫𑀳𑀸 𑀫𑁂𑀖𑀯𑀦𑀸𑀭𑀸𑀫𑀁, 𑀘𑀢𑀼𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁.

𑀲𑀼𑀫𑀦𑀲𑁆𑀲𑁂𑀯 𑀯𑀘𑀲𑀸, 𑀧𑀤𑁂𑀲𑀁 𑀲𑀸𑀥𑀼𑀲𑀗𑁆𑀔𑀢𑀁;

𑀧𑀼𑀩𑁆𑀩𑀩𑁄𑀥𑀺𑀞𑀺𑀢𑀝𑁆𑀞𑀸𑀦𑀁, 𑀉𑀧𑀦𑁂𑀢𑁆𑀯𑀸 𑀫𑀦𑁄𑀭𑀫𑀁.

𑀓𑀼𑀮𑁂𑀳𑀺 𑀲𑁄 𑀲𑁄𑀴𑀲𑀳𑀺, 𑀭𑀸𑀚𑀸 𑀮𑀗𑁆𑀓𑀸𑀭𑀥𑀸𑀭𑀺𑀳𑀺;

𑀑𑀭𑁄𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀁, 𑀧𑀢𑀺𑀝𑁆𑀞𑀸 𑀧𑁂𑀢𑀼 𑀫𑁄𑀲𑁆𑀲𑀚𑁆𑀚𑀺.

𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑀲𑀸, 𑀅𑀲𑀻𑀢𑀺𑀭𑀢𑀦𑀁 𑀦𑀪𑀁;

𑀉𑀕𑁆𑀕𑀦𑁆𑀢𑁆𑀯𑀸𑀦 𑀞𑀺𑀢𑀸 𑀫𑀼𑀜𑁆𑀘𑀺, 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀲𑀼𑀪𑀸.

𑀤𑀻𑀧𑁂 𑀧𑀢𑁆𑀣𑀭𑀺𑀬𑀸’𑀳𑀘𑁆𑀘, 𑀩𑁆𑀭𑀳𑁆𑀫𑀮𑁄𑀓𑀁 𑀞𑀺𑀢𑀸 𑀅𑀳𑀼;

𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸𑀬𑀸𑀯, 𑀭𑀲𑁆𑀫𑀺𑀬𑁄 𑀢𑀸 𑀫𑀦𑁄𑀭𑀫𑀸.

𑀧𑀼𑀭𑀺𑀲𑀸 𑀤𑀲𑀲𑀳𑀲𑁆𑀲𑀸𑀦𑀺, 𑀧𑀲𑀦𑁆𑀦𑀸 𑀧𑀸𑀝𑀺𑀳𑀸𑀭𑀺𑀬𑁂;

𑀯𑀺𑀧𑀲𑁆𑀲𑀺𑀢𑁆𑀯𑀸𑀦𑀸’𑀭𑀳𑀢𑁆𑀣𑀁, 𑀧𑀢𑁆𑀯𑀸𑀦 𑀇𑀥 𑀧𑀩𑁆𑀩𑀚𑀼𑀁.

𑀑𑀭𑁄𑀳𑀺𑀢𑁆𑀯𑀸 𑀫𑀳𑀸𑀩𑁄𑀥𑀺, 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑁂 𑀢𑀢𑁄;

𑀭𑁄𑀳𑀺𑀡𑀺𑀬𑀸 𑀧𑀢𑀺𑀝𑁆𑀞𑀸𑀲𑀺, 𑀫𑀳𑀺𑀬𑀁 𑀓𑀫𑁆𑀧𑀺 𑀫𑁂𑀤𑀺𑀦𑀻.

𑀫𑀽𑀮𑀸𑀦𑀺 𑀢𑀸𑀦𑀺 𑀉𑀕𑁆𑀕𑀦𑁆𑀢𑁆𑀯𑀸, 𑀓𑀝𑀸𑀳𑀫𑀼𑀔𑀯𑀝𑁆𑀝𑀺𑀢𑁄;

𑀯𑀺𑀦𑀦𑁆𑀥𑀦𑁆𑀢𑀸 𑀓𑀝𑀸𑀳𑀁 𑀢𑀁, 𑀑𑀢𑀭𑀺𑀁𑀲𑀼 𑀫𑀳𑀻𑀢𑀮𑀁.

𑀧𑀢𑀺𑀝𑁆𑀞𑀺𑀢𑀁 𑀫𑀳𑀸𑀩𑁄𑀥𑀺𑀁, 𑀚𑀦𑀸 𑀲𑀩𑁆𑀩𑁂 𑀲𑀫𑀕𑀢𑀸;

𑀕𑀦𑁆𑀥𑀫𑀸𑀮𑀸𑀤𑀺 𑀧𑀽𑀚𑀸𑀳𑀺, 𑀧𑀽𑀚𑀬𑀺𑀁𑀲𑀼 𑀲𑀫𑀦𑁆𑀢𑀢𑁄.

𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀺𑀢𑁆𑀣, 𑀳𑀺𑀫𑀕𑀩𑁆𑀪𑀸 𑀲𑀫𑀦𑁆𑀢𑀢𑁄;

𑀫𑀳𑀸𑀩𑁄𑀥𑀺𑀁 𑀙𑀸𑀤𑀬𑀺𑀁𑀲𑀼, 𑀲𑀻𑀢𑀮𑀸𑀦𑀺 𑀖𑀦𑀸𑀦𑀺 𑀘.

𑀲𑀢𑁆𑀢𑀸𑀳𑀸𑀦𑀺 𑀫𑀳𑀸𑀩𑁄𑀥𑀺𑀁, 𑀢𑀳𑀺𑀁𑀬𑁂𑀯 𑀅𑀤𑀲𑁆𑀲𑀦𑀸;

𑀳𑀺𑀫𑀕𑀩𑁆𑀪𑁂 𑀲𑀦𑁆𑀦𑀺𑀲𑀻𑀤𑀺, 𑀧𑀲𑀸𑀤𑀚𑀦𑀦𑀻 𑀚𑀦𑁂.

𑀲𑀢𑁆𑀢𑀸𑀳𑀸 𑀢𑀺𑀓𑁆𑀓𑀫𑁂 𑀫𑁂𑀖𑀸, 𑀲𑀩𑁆𑀩𑁂 𑀅𑀧𑀕𑀫𑀺𑀁𑀲𑀼 𑀢𑁂;

𑀫𑀳𑀸𑀩𑁄𑀥𑀺 𑀘 𑀤𑀺𑀲𑁆𑀲𑀺𑀢𑁆𑀣, 𑀙𑀩𑁆𑀩𑀡𑁆𑀡𑀸 𑀭𑀁𑀲𑀺𑀬𑁄𑀧𑀺 𑀘.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄𑀘, 𑀲𑀗𑁆𑀖𑀫𑀺𑀢𑁆𑀢𑀸 𑀘 𑀪𑀺𑀓𑁆𑀔𑀼𑀦𑀻;

𑀢𑀢𑁆𑀣𑀸’𑀕𑀜𑁆𑀙𑀼𑀁𑀲𑀧𑀭𑀺𑀲𑀸, 𑀭𑀸𑀚𑀸 𑀲𑀧𑀭𑀺𑀲𑁄𑀧𑀺 𑀘.

𑀔𑀢𑁆𑀢𑀺𑀬𑀸 ¶ 𑀓𑀸𑀚𑀭𑀕𑁆𑀕𑀸𑀫𑁂, 𑀘𑀦𑁆𑀤𑀦𑀕𑁆𑀕𑀸𑀫 𑀔𑀢𑁆𑀢𑀺𑀬𑀸;

𑀢𑀺𑀯𑀓𑁆𑀓 𑀩𑁆𑀭𑀸𑀳𑁆𑀫𑀡𑁄 𑀘𑁂𑀯, 𑀤𑀻𑀧𑀯𑀸𑀲𑀻 𑀚𑀦𑀸𑀧𑀺 𑀘.

𑀤𑁂𑀯𑀸𑀦𑀼𑀪𑀸𑀯𑁂𑀦𑀸’𑀕𑀜𑁆𑀙𑀼𑀁, 𑀫𑀳𑀸𑀩𑁄𑀥𑀺 𑀫𑀳𑀼𑀲𑁆𑀲𑀼𑀓𑁆𑀓𑀸;

𑀫𑀳𑀸𑀲𑀫𑀸𑀕𑀫𑁂 𑀢𑀲𑁆𑀫𑀺𑀁, 𑀧𑀸𑀝𑀺𑀳𑀸𑀭𑀺𑀬𑀯𑀺𑀫𑁆𑀳𑀺𑀢𑁂.

𑀧𑀓𑁆𑀓𑀁 𑀧𑀸𑀘𑀺𑀦𑀲𑀸𑀔𑀸𑀬, 𑀧𑁂𑀓𑁆𑀔𑀢𑀁 𑀧𑀓𑁆𑀓’𑀫𑀓𑁆𑀔𑀢𑀁;

𑀣𑁂𑀭𑁄 𑀧𑀢𑀦𑁆𑀢𑀫𑀸𑀤𑀸𑀬, 𑀭𑁄𑀧𑁂𑀢𑀼𑀁 𑀭𑀸𑀚𑀺𑀦𑁄 𑀅𑀤𑀸.

𑀧𑀁𑀲𑀽𑀦𑀁 𑀕𑀦𑁆𑀥𑀫𑀺𑀲𑁆𑀲𑀸𑀦𑀁, 𑀧𑀼𑀡𑁆𑀡𑁂 𑀲𑁄𑀡𑁆𑀡 𑀓𑀝𑀸𑀳𑀓𑁂;

𑀫𑀳𑀸𑀲𑀦𑀲𑁆𑀲 𑀞𑀸𑀦𑁂 𑀢𑀁, 𑀞𑀧𑀺𑀢𑀁 𑀭𑁄𑀧’𑀬𑀺𑀲𑁆𑀲𑀭𑁄.

𑀧𑁂𑀓𑁆𑀔𑀢𑀁𑀬𑁂𑀯 𑀲𑀩𑁆𑀩𑁂𑀲𑀁, 𑀉𑀕𑁆𑀕𑀦𑁆𑀢𑁆𑀯𑀸 𑀅𑀝𑁆𑀞 𑀅𑀗𑁆𑀓𑀼𑀭𑀸;

𑀚𑀸𑀬𑀺𑀁𑀲𑀼 𑀩𑁄𑀥𑀺𑀢𑀭𑀼𑀡𑀸, 𑀅𑀝𑁆𑀞𑀁𑀲𑀼 𑀘𑀢𑀼𑀳𑀢𑁆𑀣𑀓𑀸.

𑀭𑀸𑀚𑀸 𑀢𑁂 𑀩𑁄𑀥𑀺𑀢𑀭𑀼𑀡𑁂, 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑁄;

𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑁂𑀲𑀺, 𑀅𑀪𑀺𑀲𑁂𑀓𑀫𑀤𑀸𑀲𑀺 𑀘.

𑀧𑀢𑀺𑀝𑁆𑀞𑀸𑀧𑁂𑀲𑀺 𑀅𑀝𑁆𑀞𑀦𑁆𑀦𑀁, 𑀚𑀫𑁆𑀩𑀼𑀓𑁄𑀮𑀫𑁆𑀳𑀺 𑀧𑀝𑁆𑀝𑀦𑁂;

𑀫𑀳𑀸𑀩𑁄𑀥𑀺 𑀞𑀺𑀢 𑀞𑀸𑀦𑁂, 𑀦𑀸𑀯𑀸𑀬𑁄 𑀭𑁄𑀳𑀦𑁂 𑀢𑀤𑀸.

𑀢𑀺𑀯𑀓𑁆𑀓𑀩𑁆𑀭𑀸𑀳𑁆𑀫𑀡𑀕𑀸𑀫𑁂, 𑀣𑀽𑀧𑀸𑀭𑀸𑀫𑁂 𑀢𑀣𑁂𑀯 𑀘;

𑀇𑀲𑁆𑀲𑀭𑀲𑀫𑀡𑀸𑀭𑀸𑀫𑁂, 𑀧𑀞𑀫𑁂 𑀘𑁂𑀢𑀺𑀬𑀗𑁆𑀕𑀡𑁂.

𑀘𑁂𑀢𑀺𑀬 𑀧𑀩𑁆𑀩𑀢𑀸 𑀭𑀸𑀫𑁂, 𑀢𑀣𑀸 𑀓𑀸𑀚𑀭𑀕𑀸𑀫𑀓𑁂;

𑀘𑀦𑁆𑀤𑀦𑀕𑀸𑀫𑀓𑁂 𑀘𑀸𑀢𑀺, 𑀏𑀓𑁂𑀓𑀁 𑀩𑁄𑀥𑀺𑀮𑀝𑁆𑀞𑀺𑀓𑀁.

𑀲𑁂𑀲𑀸 𑀘𑀢𑀼𑀧𑀓𑁆𑀓𑀚𑀸𑀢𑀸, 𑀤𑁆𑀯𑀢𑁆𑀢𑀺𑀁𑀲 𑀩𑁄𑀥𑀺𑀮𑀝𑁆𑀞𑀺𑀬𑁄;

𑀲𑀫𑀦𑁆𑀢𑀸 𑀬𑁄𑀚𑀦𑀞𑀸𑀦𑁂, 𑀯𑀺𑀳𑀸𑀭𑁂𑀲𑀼 𑀢𑀳𑀺𑀁 𑀢𑀳𑀺𑀁.

𑀤𑀻𑀧𑀸𑀯𑀸𑀲𑀻 𑀚𑀦𑀲𑁆𑀲𑁂𑀯, 𑀳𑀺𑀢𑀢𑁆𑀣𑀸𑀬 𑀧𑀢𑀺𑀝𑁆𑀞𑀺𑀢𑁂;

𑀫𑀳𑀸𑀩𑁄𑀥𑀺 𑀤𑀼𑀫𑀺𑀦𑁆𑀤𑀫𑁆𑀳𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥 𑀢𑁂𑀚𑀲𑀸.

𑀅𑀦𑀼𑀮𑀸𑀲𑀸𑀲 𑀧𑀭𑀺𑀲𑀸, 𑀲𑀗𑁆𑀖𑀫𑀺𑀢𑁆𑀢𑀸𑀬 𑀣𑁂𑀭𑀺𑀬𑀸;

𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺.

𑀅𑀭𑀺𑀝𑁆𑀞𑁄 𑀲𑁄 𑀧𑀜𑁆𑀘𑀲𑀢-𑀧𑀭𑀺𑀯𑀸𑀭𑁄 𑀘 𑀔𑀢𑁆𑀢𑀺𑀬𑁄;

𑀣𑁂𑀭𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺.

𑀬𑀸𑀦𑀺 𑀲𑁂𑀝𑁆𑀞𑀺𑀓𑀼𑀮𑀸𑀦’𑀝𑁆𑀞-𑀫𑀳𑀸𑀩𑁄𑀥𑀺𑀫𑀺𑀥𑀸𑀳𑀭𑀼𑀁;

𑀩𑁄𑀥𑀸𑀳𑀭𑀓𑀼𑀮𑀸𑀦𑀻𑀢𑀺, 𑀢𑀸𑀦𑀺 𑀢𑁂𑀦 𑀧𑀯𑀼𑀘𑁆𑀘𑀭𑁂.

𑀉𑀧𑀸𑀲𑀺𑀓𑀸 𑀯𑀺𑀳𑀸𑀭𑁄𑀢𑀺, 𑀜𑀸𑀢𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂;

𑀲𑀲𑀗𑁆𑀖𑀸 𑀲𑀗𑁆𑀖𑀫𑀺𑀢𑁆𑀢𑀸 𑀲𑀸, 𑀫𑀳𑀸𑀣𑁂𑀭𑀻 𑀢𑀳𑀺𑀁 𑀯𑀲𑀺.

𑀅𑀕𑀸𑀭𑀢𑁆𑀢𑀬𑀧𑀸𑀫𑁄𑀓𑁆𑀔𑁂 ¶ , 𑀅𑀕𑀸𑀭𑁂 𑀢𑀢𑁆𑀣 𑀓𑀸𑀭𑀬𑀺;

𑀤𑁆𑀯𑀸𑀤𑀲 𑀢𑁂𑀲𑀼 𑀏𑀓𑀲𑁆𑀫𑀺𑀁, 𑀫𑀳𑀸𑀕𑀸𑀭𑁂 𑀞𑀧𑀸𑀧𑀬𑀺.

𑀫𑀳𑀸𑀩𑁄𑀥𑀺𑀲𑀫𑁂𑀢𑀸𑀬, 𑀦𑀸𑀯𑀸𑀬 𑀓𑀽𑀧𑀬𑀝𑁆𑀞𑀺𑀓𑀁;

𑀏𑀓𑀲𑁆𑀫𑀺𑀁 𑀧𑀺𑀬 𑀫𑁂𑀓𑀲𑁆𑀫𑀺𑀁, 𑀅𑀭𑀺𑀢𑁆𑀢𑀁 𑀢𑁂𑀳𑀺 𑀢𑁂𑀯𑀺𑀤𑀼𑀁.

𑀚𑀸𑀢𑁂 𑀅𑀜𑁆𑀜𑀦𑀺𑀓𑀸𑀬𑁂𑀧𑀺, 𑀅𑀕𑀸𑀭𑀸 𑀤𑁆𑀯𑀸𑀤𑀲𑀸𑀧𑀺 𑀢𑁂;

𑀳𑀢𑁆𑀣𑀸𑀴𑀓 𑀪𑀺𑀓𑁆𑀔𑀼𑀦𑀻𑀳𑀺, 𑀯𑀴𑀜𑁆𑀚𑀬𑀺𑀁𑀲𑀼 𑀲𑀩𑁆𑀩𑀤𑀸.

𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀺 𑀲𑁄, 𑀯𑀺𑀘𑀭𑀦𑁆𑀢𑁄 𑀬𑀣𑀸𑀲𑀼𑀔𑀁;

𑀧𑀼𑀭𑀲𑁆𑀲 𑀏𑀓𑀧𑀲𑁆𑀲𑀫𑁆𑀳𑀺, 𑀓𑀦𑁆𑀤𑀭𑀦𑁆𑀢𑀫𑁆𑀳𑀺 𑀲𑀻𑀢𑀮𑁂.

𑀓𑀤𑀫𑁆𑀩𑀧𑀼𑀧𑁆𑀨𑀕𑀼𑀫𑁆𑀩𑀦𑁆𑀢𑁂, 𑀅𑀝𑁆𑀞𑀸𑀲𑀺 𑀕𑁄𑀘𑀭𑀁 𑀘𑀭𑀁;

𑀳𑀢𑁆𑀣𑀺𑀁 𑀢𑀢𑁆𑀣𑀭𑀢𑀁 𑀜𑀢𑁆𑀯𑀸, 𑀅𑀓𑀁𑀲𑀼 𑀢𑀢𑁆𑀣 𑀆𑀴𑁆𑀳𑀓𑀁.

𑀅𑀣𑁂𑀓 𑀤𑀺𑀯𑀲𑀁 𑀳𑀢𑁆𑀣𑀻, 𑀦𑀕𑀡𑁆𑀳𑀺 𑀓𑀩𑀴𑀸𑀦𑀺 𑀲𑁄;

𑀤𑀻𑀧𑀧𑁆𑀧𑀲𑀸𑀤𑀓𑀁 𑀣𑁂𑀭𑀁, 𑀭𑀸𑀚𑀸 𑀲𑁄 𑀧𑀼𑀘𑁆𑀙𑀺𑀢𑀁 𑀫𑀢𑀁.

𑀓𑀤𑀫𑁆𑀩𑀧𑀼𑀧𑁆𑀨𑀕𑀼𑀫𑁆𑀩𑀲𑁆𑀫𑀺𑀁, 𑀣𑀽𑀧𑀲𑁆𑀲 𑀓𑀭𑀡𑀁 𑀓𑀭𑀻;

𑀇𑀘𑁆𑀙𑀢𑀻𑀢𑀺 𑀫𑀳𑀸𑀣𑁂𑀭𑁄, 𑀫𑀳𑀸𑀭𑀸𑀚𑀲𑁆𑀲 𑀅𑀩𑁆𑀭𑀯𑀺.

𑀲𑀥𑀸𑀢𑀼𑀓𑀁 𑀢𑀢𑁆𑀣 𑀣𑀽𑀧𑀁, 𑀣𑀽𑀧𑀲𑁆𑀲 𑀖𑀭𑀫𑁂𑀯 𑀘;

𑀔𑀺𑀧𑁆𑀧𑀁 𑀭𑀸𑀚𑀸 𑀅𑀓𑀸𑀭𑁂𑀲𑀺, 𑀦𑀺𑀘𑁆𑀘𑀁 𑀚𑀦𑀳𑀺𑀢𑁂𑀭𑀢𑁄.

𑀲𑀗𑁆𑀖𑀫𑀺𑀢𑁆𑀢𑀸 𑀫𑀳𑀸𑀣𑁂𑀭𑀻, 𑀲𑀼𑀜𑁆𑀜𑀸𑀕𑀸𑀭𑀸𑀪𑀺𑀮𑀸𑀲𑀺𑀦𑀻;

𑀆𑀓𑀺𑀡𑁆𑀡𑀢𑁆𑀢𑀸 𑀯𑀺𑀳𑀸𑀭𑀲𑁆𑀲, 𑀯𑀼𑀲𑁆𑀲𑀫𑀸𑀦𑀲𑁆𑀲 𑀢𑀲𑁆𑀲 𑀲𑀸.

𑀯𑀼𑀤𑁆𑀥𑀢𑁆𑀣𑀺𑀦𑀻 𑀲𑀸𑀲𑀦𑀲𑁆𑀲, 𑀪𑀺𑀓𑁆𑀔𑀼𑀦𑀻𑀦𑀁 𑀳𑀺𑀢𑀸𑀬 𑀘;

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀅𑀜𑁆𑀜𑀁, 𑀇𑀘𑁆𑀙𑀫𑀸𑀦𑀸 𑀯𑀺𑀘𑀓𑁆𑀔𑀡𑀸.

𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀕𑁂𑀳𑀁 𑀢𑀁, 𑀧𑀯𑀺𑀯𑁂𑀓𑀲𑀼𑀔𑀁 𑀪𑀼𑀲𑀁;

𑀤𑀺𑀯𑀸𑀯𑀺𑀳𑀸𑀭𑀁 𑀓𑀧𑁆𑀧𑁂𑀲𑀺, 𑀯𑀺𑀳𑀸𑀭𑀓𑀼𑀲𑀮𑀸’𑀫𑀮𑀸.

𑀣𑁂𑀭𑀺𑀬𑀸 𑀯𑀦𑁆𑀤𑀦𑀢𑁆𑀣𑀸𑀬, 𑀭𑀸𑀚𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀕𑀦𑁆𑀢𑁆𑀯𑀸 𑀢𑀢𑁆𑀣 𑀕𑀢𑀁 𑀲𑀼𑀢𑁆𑀯𑀸, 𑀕𑀦𑁆𑀢𑁆𑀯𑀸𑀦 𑀢𑀢𑁆𑀣 𑀯𑀦𑁆𑀤𑀺𑀬.

𑀲𑀫𑁆𑀫𑁄𑀤𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁, 𑀢𑀢𑁆𑀣𑀸𑀕𑀫𑀦𑀓𑀸𑀭𑀡𑀁;

𑀢𑀲𑁆𑀲𑀸 𑀜𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁, 𑀅𑀥𑀺𑀧𑁆𑀧𑀸𑀬 𑀯𑀺𑀤𑀽 𑀯𑀺𑀤𑀽.

𑀲𑀫𑀦𑁆𑀢𑀸 𑀣𑀽𑀧𑀕𑁂𑀳𑀲𑁆𑀲, 𑀭𑀫𑁆𑀫𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀫𑀳𑀸𑀭𑀸𑀚𑀸 𑀅𑀓𑀸𑀭𑀬𑀺.

𑀳𑀢𑁆𑀣𑀸𑀴𑁆𑀳𑀓𑀲𑀫𑀻𑀧𑀫𑁆𑀳𑀺 ¶ , 𑀓𑀢𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄;

𑀳𑀢𑁆𑀣𑀸𑀴𑁆𑀳𑀓𑀯𑀺𑀳𑀸𑀭𑁄𑀢𑀺, 𑀯𑀺𑀲𑁆𑀲𑀼𑀢𑁄 𑀆𑀲𑀺 𑀢𑁂𑀦 𑀲𑁄.

𑀲𑀼𑀫𑀺𑀢𑁆𑀢𑀸 𑀲𑀗𑁆𑀖𑀫𑀺𑀢𑁆𑀢𑀸 𑀲𑀸, 𑀫𑀳𑀸𑀣𑁂𑀭𑀻 𑀫𑀳𑀸𑀫𑀢𑀻;

𑀢𑀲𑁆𑀫𑀺𑀜𑁆𑀳𑀺 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀭𑀫𑁆𑀫𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂.

𑀏𑀯𑀁 𑀮𑀁𑀓𑀸 𑀮𑁄𑀓𑀳𑀺𑀢𑀁 𑀲𑀸𑀲𑀦𑀯𑀼𑀤𑁆𑀥𑀺𑀁;

𑀲𑀁𑀲𑁄𑀥𑁂𑀦𑁆𑀢𑁄 𑀏𑀲 𑀫𑀳𑀸𑀩𑁄𑀥𑀺 𑀤𑀼𑀫𑀺𑀦𑁆𑀤𑁄;

𑀮𑀁𑀓𑀸𑀤𑀻𑀧𑁂 𑀭𑀫𑁆𑀫𑁂 𑀫𑀳𑀸𑀫𑁂𑀖𑀯𑀦𑀲𑁆𑀫𑀺𑀁,

𑀅𑀝𑁆𑀞𑀸 𑀲𑀻𑀖𑀁 𑀓𑀸𑀮𑀫𑀦𑁂𑀓𑀩𑁆𑀪𑀽𑀢𑀬𑀼𑀢𑁆𑀢𑁄𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀅𑀝𑁆𑀞𑀸𑀭𑀲𑀫𑁆𑀳𑀺 𑀯𑀲𑁆𑀲𑀫𑁆𑀳𑀺, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀫𑀳𑀸𑀫𑁂𑀖𑀯𑀦𑀸𑀭𑀸𑀫𑁂, 𑀫𑀳𑀸𑀩𑁄𑀥𑀺 𑀧𑀢𑀺𑀝𑁆𑀞𑀢𑀺.

𑀢𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀧𑀺𑀬𑀸 𑀅𑀲𑀦𑁆𑀥𑀻𑀫𑀺𑀢𑁆𑀢𑀸 𑀲𑀸, 𑀫𑀢𑀸 𑀲𑀫𑁆𑀩𑀼𑀤𑁆𑀥𑀫𑀸𑀫𑀓𑀸.

𑀢𑀢𑁄 𑀘𑀢𑀼𑀢𑁆𑀣𑁂 𑀯𑀲𑁆𑀲𑀫𑁆𑀳𑀺, 𑀥𑀫𑁆𑀫𑀸𑀲𑁄𑀓𑁄 𑀫𑀳𑀻𑀧𑀢𑀺;

𑀢𑀺𑀲𑁆𑀲𑀭𑀓𑁆𑀔 𑀫𑀳𑁂𑀲𑀺𑀢𑁆𑀢𑁂, 𑀞𑀧𑁂𑀲𑀺 𑀯𑀺𑀲𑀫𑀸𑀲𑀬𑀁.

𑀢𑀢𑁄 𑀢𑀼 𑀢𑀢𑀺𑀬𑁂 𑀯𑀲𑁆𑀲𑁂, 𑀲𑀸𑀩𑀸𑀮𑀸 𑀭𑀽𑀧𑀫𑀸𑀦𑀺𑀦𑀻;

‘‘𑀫𑀬𑀸𑀧𑀺 𑀘 𑀅𑀬𑀁 𑀭𑀸𑀚𑀸, 𑀫𑀳𑀸𑀩𑁄𑀥𑀺𑀁 𑀫 𑀫𑀸𑀬𑀢𑀺’’.

𑀇𑀢𑀺 𑀓𑁄𑀥𑀯𑀲𑀁 𑀕𑀦𑁆𑀢𑁆𑀯𑀸, 𑀅𑀢𑁆𑀢𑀦𑁄’𑀦𑀢𑁆𑀣 𑀓𑀸𑀭𑀺𑀓𑀸;

𑀫𑀡𑁆𑀟𑀼𑀓𑀡𑁆𑀝𑀓𑀬𑁄𑀕𑁂𑀦, 𑀫𑀳𑀸𑀩𑁄𑀥𑀺 𑀫𑀖𑀸 𑀢𑀬𑀺.

𑀢𑀢𑁄 ¶ 𑀘 𑀢𑀼𑀢𑁆𑀣𑁂𑀯𑀲𑁆𑀲𑀫𑁆𑀳𑀺, 𑀥𑀫𑁆𑀫𑀸 𑀲𑁄𑀓𑁄 𑀫𑀳𑀸𑀬𑀲𑁄;

𑀅𑀦𑀺𑀘𑁆𑀘 𑀢𑀸𑀯 𑀲𑀁𑀧𑀢𑁆𑀢𑁄, 𑀲𑀢𑁆𑀢𑀢𑀺𑀁𑀲𑀲𑀫𑀸 𑀇𑀫𑁂.

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑁄 𑀢𑀼, 𑀭𑀸𑀚𑀸 𑀥𑀫𑁆𑀫𑀕𑀼𑀡𑁂 𑀭𑀢𑁄;

𑀫𑀳𑀸𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀁, 𑀢𑀣𑀸 𑀘𑁂𑀢𑀺𑀬𑀧𑀩𑁆𑀩𑀢𑁂.

𑀣𑀽𑀧𑀸𑀭𑀸𑀫𑁂 𑀦𑀯𑀓𑀫𑁆𑀫𑀁, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀣𑀸𑀭𑀳𑀁;

𑀤𑀻𑀧𑀧𑁆𑀧𑀲𑀸𑀤𑀓𑀁 𑀣𑁂𑀭𑀁, 𑀧𑀼𑀘𑁆𑀙𑀺 𑀧𑀼𑀘𑁆𑀙𑀺𑀢𑀓𑁄𑀯𑀺𑀤𑀁.

𑀓𑀸𑀭𑀸𑀧𑁂𑀲𑁆𑀲𑀫𑀳𑀁 𑀪𑀦𑁆𑀢𑁂, 𑀯𑀺𑀳𑀸𑀭𑁂𑀲𑀼 𑀩𑀳𑀽 𑀇𑀥;

𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀣𑀽𑀧𑁂𑀲𑀼, 𑀓𑀣𑀁 𑀮𑀘𑁆𑀙𑀸𑀫 𑀥𑀸𑀢𑀼𑀬𑁄.

𑀲𑀫𑁆𑀩𑀼𑀤𑁆𑀥𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀲𑀼𑀫𑀦𑁂𑀦𑀸’𑀳𑀝𑀸 𑀇𑀥;

𑀘𑁂𑀢𑀺𑀬𑀧𑀩𑁆𑀩𑀢𑁂 𑀭𑀸𑀚, 𑀞𑀧𑀺𑀢𑀸 𑀅𑀢𑁆𑀣𑀺 𑀥𑀸𑀢𑀼𑀬𑁄.

𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀢𑀸, 𑀥𑀸𑀢𑀼𑀬𑁄 𑀇𑀥 𑀆𑀳𑀭;

𑀇𑀢𑀺 𑀯𑀼𑀢𑁆𑀢𑁄 𑀲𑀣𑁂𑀭𑁂𑀦, 𑀢𑀣𑀸 𑀆𑀳𑀭𑀺 𑀥𑀸𑀢𑀼𑀬𑁄.

𑀯𑀺𑀳𑀸𑀭𑁂 𑀓𑀸𑀭𑀬𑀺𑀢𑁆𑀯𑀸𑀦, 𑀞𑀸𑀦𑁂 𑀬𑁄𑀚𑀦𑀬𑁄𑀚𑀦𑁂;

𑀥𑀸𑀢𑀼𑀬𑁄 𑀢𑀢𑁆𑀣 𑀣𑀽𑀧𑁂𑀲𑀼, 𑀦𑀺𑀥𑀸𑀧𑁂𑀲𑀺 𑀬𑀣𑀸𑀭𑀳𑀁.

𑀲𑀫𑁆𑀩𑀼𑀤𑁆𑀥𑀪𑀼𑀢𑁆𑀢𑀧𑀢𑁆𑀢𑀁 𑀢𑀼, 𑀭𑀸𑀚𑀯𑀢𑁆𑀣𑀼𑀖𑀭𑁂 𑀲𑀼𑀪𑁂;

𑀞𑀧𑀬𑀺𑀢𑁆𑀯𑀸𑀦 𑀧𑀽𑀚𑁂𑀲𑀺, 𑀦𑀸𑀦𑀸𑀧𑀽𑀚𑀸𑀳𑀺 𑀲𑀩𑁆𑀩𑀤𑀸.

𑀧𑀜𑁆𑀘𑀲𑀢𑁂𑀳𑀺’𑀲𑁆𑀲𑀭𑁂𑀢𑀺, 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀧𑀩𑁆𑀩𑀚𑁆𑀚𑀯𑀲𑀺𑀢𑀞𑀸𑀦𑁂, 𑀇𑀲𑁆𑀲𑀭𑀲𑀫𑀡𑀓𑁄 𑀅𑀳𑀼.

𑀧𑀜𑁆𑀘𑀲𑀢𑁂𑀳𑀺 𑀯𑀲𑁆𑀲𑁂𑀳𑀺, 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀧𑀩𑁆𑀩𑀚𑁆𑀚𑀯𑀲𑀺𑀢𑀞𑀸𑀦𑁂, 𑀢𑀣𑀸 𑀯𑀲𑁆𑀲𑀕𑀺𑀭𑀺 𑀅𑀳𑀼.

𑀬𑀸 𑀬𑀸 𑀫𑀳𑀸𑀫𑀳𑀺𑀦𑁆𑀤𑁂𑀦, 𑀣𑁂𑀭𑁂𑀦 𑀯𑀲𑀺𑀢𑀸 𑀕𑀼𑀳𑀸;

𑀲𑀧𑀩𑁆𑀩𑀢𑀯𑀺𑀳𑀸𑀭𑁂𑀲𑀼, 𑀲𑀸 𑀫𑀳𑀺𑀦𑁆𑀤𑀕𑀼𑀳𑀸 𑀅𑀳𑀼.

𑀫𑀳𑀸𑀯𑀺𑀳𑀸𑀭𑀁 𑀧𑀞𑀫𑀁, 𑀤𑀼𑀢𑀺𑀬𑀁 𑀘𑁂𑀢𑀺𑀬𑀯𑁆𑀳𑀬𑀁;

𑀣𑀽𑀧𑀸𑀭𑀸𑀫𑀁 𑀢𑀼 𑀢𑀢𑀺𑀬𑀁, 𑀣𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀲𑀼𑀪𑀁.

𑀘𑀢𑀼𑀢𑁆𑀣𑀁 𑀢𑀼 𑀫𑀳𑀸𑀩𑁄𑀥𑀺-𑀧𑀢𑀺𑀝𑁆𑀞𑀸𑀧𑀦𑀫𑁂𑀯 𑀘;

𑀣𑀽𑀧𑀞𑀸𑀦𑀻𑀬𑀪𑀽𑀢𑀲𑁆𑀲, 𑀧𑀜𑁆𑀘𑀫𑀁 𑀧𑀦 𑀲𑀸𑀥𑀼𑀓𑀁.

𑀫𑀳𑀸𑀘𑁂𑀢𑀺𑀬𑀞𑀸𑀦𑀫𑁆𑀳𑀺, 𑀲𑀺𑀮𑀸𑀣𑀽𑀧𑀲𑁆𑀲 𑀘𑀸𑀭𑀼𑀦𑁄;

𑀲𑀫𑁆𑀩𑀼𑀤𑁆𑀥𑀕𑀻𑀯𑀸𑀥𑀸𑀢𑀼𑀲𑁆𑀲, 𑀧𑀢𑀺𑀝𑁆𑀞𑀸𑀧𑀦𑀫𑁂𑀯 𑀘.

𑀇𑀲𑁆𑀲𑀭𑀲𑀫𑀡𑀁 ¶ 𑀙𑀝𑁆𑀞𑀁, 𑀢𑀺𑀲𑁆𑀲𑀯𑀸𑀧𑀺𑀦𑁆𑀢𑀼𑀲𑀢𑁆𑀢𑀫𑀁;

𑀅𑀝𑁆𑀞𑀫𑀁 𑀧𑀞𑀫𑀁 𑀣𑀽𑀧𑀁, 𑀦𑀯𑀫𑀁 𑀯𑀲𑁆𑀲𑀕𑀺𑀭𑀺𑀯𑁆𑀳𑀬𑀁.

𑀉𑀧𑀸𑀲𑀺𑀓𑀸𑀯𑁆𑀳𑀬𑀁 𑀭𑀫𑁆𑀫𑀁, 𑀢𑀣𑀸 𑀳𑀢𑁆𑀣𑀸𑀴𑁆𑀳𑀓𑀯𑁆𑀳𑀬𑀁;

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀓𑁂 𑀤𑁆𑀯𑁂’𑀫𑁂, 𑀪𑀺𑀓𑁆𑀔𑀼𑀦𑀻 𑀨𑀸𑀲𑀼𑀓𑀸𑀭𑀡𑀸.

𑀳𑀢𑁆𑀣𑀸𑀴𑁆𑀳𑀓𑁂 𑀑𑀲𑀭𑀺𑀢𑁆𑀯𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑁆𑀲𑀬𑁂;

𑀕𑀦𑁆𑀢𑁆𑀯𑀸𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀪𑀢𑁆𑀢𑀕𑁆𑀕𑀳𑀡𑀓𑀸𑀭𑀡𑀸.

𑀳𑀢𑁆𑀢𑀲𑀸𑀮𑀁 𑀲𑀽𑀧𑀳𑀸𑀭𑀁, 𑀫𑀳𑀸𑀧𑀸𑀴𑀺𑀓𑀦𑀸𑀫𑀓𑀁;

𑀲𑀩𑁆𑀩𑀼𑀧𑀓𑀭𑀡𑀽𑀧𑁂𑀢𑀁, 𑀲𑀫𑁆𑀧𑀢𑁆𑀢𑀧𑀭𑀺𑀘𑀸𑀭𑀺𑀓𑀁.

𑀢𑀣𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲, 𑀲𑀧𑀭𑀺𑀓𑁆𑀔𑀸𑀭𑀫𑀼𑀢𑁆𑀢𑀫𑀁;

𑀧𑀯𑀸𑀭𑀡𑀸𑀬 𑀤𑀸𑀦𑀜𑁆𑀘, 𑀅𑀦𑀼𑀯𑀲𑁆𑀲𑀓𑀫𑁂𑀯 𑀘.

𑀦𑀸𑀕𑀤𑀻𑀧𑁂 𑀚𑀫𑁆𑀩𑀼𑀓𑁄𑀮-𑀯𑀺𑀳𑀸𑀭𑀁 𑀢 𑀫𑁆𑀳𑀺𑀧𑀝𑁆𑀝𑀦𑁂;

𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀜𑁆𑀘, 𑀧𑀸𑀘𑀻𑀦𑀸𑀭𑀸𑀫 𑀫𑁂𑀯 𑀘.

𑀇𑀢𑀺 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺, 𑀮𑀁𑀓𑀸𑀚𑀦𑀳𑀺𑀢𑀢𑁆𑀣𑀺𑀓𑁄;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀮𑀁𑀓𑀺𑀦𑁆𑀤𑁄 𑀧𑀼𑀜𑁆𑀜𑀧𑀜𑁆𑀜𑀯𑀸.

𑀧𑀞𑀫𑁂𑀬𑁂𑀯 𑀯𑀲𑁆𑀲𑀫𑁆𑀳𑀺, 𑀓𑀸𑀭𑀸𑀧𑁂𑀲𑀺 𑀕𑀼𑀡𑀧𑁆𑀧𑀺𑀬𑁄;

𑀬𑀸𑀯 𑀚𑀻𑀯𑀦𑁆𑀢𑀼𑀦𑁂𑀓𑀸𑀦𑀺, 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀆𑀘𑀺𑀦𑀺.

𑀅𑀬𑀁 𑀤𑀻𑀧𑁄 𑀅𑀳𑀼 𑀞𑀺𑀢𑁄, 𑀯𑀺𑀚𑀺𑀢𑁂 𑀢𑀲𑁆𑀲 𑀭𑀸𑀚𑀺𑀦𑁄;

𑀯𑀲𑁆𑀲𑀸𑀦𑀺 𑀘𑀢𑁆𑀢𑀸𑀮𑀻𑀲𑀁 𑀲𑁄, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀢𑀲𑁆𑀲’𑀘𑁆𑀘 𑀬𑁂 𑀢𑀁 𑀓𑀦𑀺𑀝𑁆𑀞𑁄, 𑀉𑀢𑁆𑀢𑀺𑀬𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀭𑀸𑀚𑀧𑀼𑀢𑁆𑀢𑁄 𑀅𑀧𑀼𑀢𑁆𑀢𑀁 𑀢𑀁, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀲𑀸𑀥𑀼𑀓𑀁.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀢𑀼, 𑀚𑀺𑀦𑀲𑀸𑀲𑀦𑀫𑀼𑀢𑁆𑀢𑀫𑀁;

𑀧𑀭𑀺𑀬𑀢𑁆𑀢𑀺𑀁 𑀧𑀝𑀺𑀧𑀢𑁆𑀢𑀺𑀁, 𑀧𑀝𑀺𑀯𑁂𑀥𑀜𑁆𑀘 𑀲𑀸𑀥𑀼𑀓𑀁.

𑀮𑀁𑀓𑀸𑀤𑀻𑀧𑀫𑁆𑀳𑀺 𑀤𑀻𑀧𑁂𑀢𑁆𑀯𑀸, 𑀮𑀁𑀓𑀸𑀤𑀻𑀧𑁄 𑀫𑀳𑀸𑀕𑀡𑀺;

𑀮𑀁𑀓𑀸𑀬𑀲𑁄 𑀲𑀢𑁆𑀣𑀼 𑀓𑀧𑁆𑀧𑁄, 𑀓𑀢𑁆𑀯𑀸 𑀮𑀁𑀓𑀸𑀳𑀺𑀢𑀁 𑀩𑀳𑀼𑀁.

𑀢𑀲𑁆𑀲 𑀉𑀢𑁆𑀢𑀺𑀬𑀭𑀸𑀚𑀲𑁆𑀲, 𑀚𑀬𑀯𑀲𑁆𑀲𑀫𑁆𑀳𑀺 𑀅𑀝𑁆𑀞𑀫𑁂;

𑀅𑀦𑁆𑀢𑁄𑀯𑀲𑁆𑀲𑀁 𑀲𑀝𑁆𑀞𑀺𑀯𑀲𑁆𑀲𑁄, 𑀘𑁂𑀢𑀺𑀬𑀧𑀩𑁆𑀩𑀢𑁂 𑀯𑀲𑀁.

𑀅𑀲𑁆𑀲𑀬𑀼𑀚𑀲𑁆𑀲 𑀫𑀸𑀲𑀲𑁆𑀲, 𑀲𑀼𑀓𑁆𑀓𑀧𑀓𑁆𑀔𑀞𑀫𑁂 𑀤𑀺𑀦𑁂;

𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑁂 𑀦𑁂𑀢𑀁, 𑀤𑀺𑀦𑀁 𑀢𑀦𑁆𑀦𑀸𑀫𑀓𑀁 𑀅𑀳𑀼.

[𑀦𑀺𑀩𑁆𑀩𑀼𑀢𑀲𑁆𑀲 ¶ 𑀫𑀳𑀺𑀦𑁆𑀤𑀲𑁆𑀲, 𑀅𑀝𑁆𑀞𑀫𑀺𑀬𑀁 𑀤𑀺𑀦𑁂 𑀧𑀦,

𑀢𑁂𑀦 𑀢𑀁 𑀤𑀺𑀯𑀲𑀁 𑀦𑀸𑀫, 𑀅𑀝𑁆𑀞𑀫𑀺𑀬𑀸𑀢𑀺 𑀲𑀫𑁆𑀫𑀢𑀁.]

𑀢𑀁 𑀲𑀼𑀢𑁆𑀯𑀸 𑀉𑀢𑁆𑀢𑀺𑀬𑁄 𑀭𑀸𑀚𑀸, 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄;

𑀕𑀦𑁆𑀢𑁆𑀯𑀸𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀩𑀳𑀼𑀥𑀸 𑀩𑀳𑀼𑀁.

𑀆𑀲𑀺𑀢𑁆𑀢𑀕𑀦𑁆𑀥𑀢𑁂𑀮𑀸𑀬, 𑀩𑀳𑀼𑀁 𑀲𑁄𑀯𑀡𑁆𑀡𑀤𑁄𑀡𑀺𑀬𑀸;

𑀣𑁂𑀭𑀤𑁂𑀪𑀁 𑀔𑀺𑀧𑀸𑀧𑁂𑀢𑁆𑀯𑀸, 𑀢𑀁 𑀤𑁄𑀡𑀺𑀁 𑀲𑀸𑀥𑀼𑀨𑀼𑀲𑁆𑀲𑀺𑀢𑀁.

𑀲𑁄𑀯𑀡𑁆𑀡𑀓𑀽𑀝𑀸𑀕𑀸𑀭𑀫𑁆𑀳𑀺, 𑀞𑀧𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑁂;

𑀓𑀽𑀝𑀸𑀕𑀸𑀭𑀁 𑀕𑀸𑀳𑀬𑀺𑀢𑁆𑀯𑀸, 𑀓𑀸𑀭𑁂𑀦𑁆𑀢𑁄 𑀲𑀸𑀥𑀼𑀓𑀻𑀴𑀺𑀢𑀁.

𑀫𑀳𑀢𑀸 𑀘 𑀚𑀦𑁄𑀖𑁂𑀦, 𑀆𑀕𑀢𑁂𑀦𑀢𑀢𑁄 𑀢𑀢𑁄;

𑀫𑀳𑀢𑀸 𑀘 𑀩𑀮𑁄𑀖𑁂𑀦, 𑀓𑀸𑀭𑁂𑀦𑁆𑀢𑁄 𑀧𑀽𑀚𑀦𑀸𑀯𑀺𑀥𑀺𑀁.

𑀅𑀮𑀗𑁆𑀓𑀢𑁂𑀦 𑀫𑀕𑁆𑀕𑁂𑀦, 𑀩𑀳𑀼𑀥𑀸’𑀮𑀗𑁆𑀓𑀢𑀁 𑀧𑀼𑀭𑀁;

𑀆𑀦𑀬𑀺𑀢𑁆𑀯𑀸𑀦 𑀦𑀕𑀭𑁂, 𑀘𑀸𑀭𑁂𑀢𑁆𑀯𑀸 𑀭𑀸𑀚𑀯𑀻𑀣𑀺𑀬𑁄.

𑀫𑀳𑀸𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸, 𑀏𑀢𑁆𑀣 𑀧𑀜𑁆𑀳𑀫𑁆𑀩𑀫𑀸𑀴𑀓𑁂;

𑀓𑀼𑀝𑀸𑀕𑀸𑀭𑀁 𑀞𑀧𑀸𑀧𑁂𑀢𑁆𑀯𑀸, 𑀲𑀢𑁆𑀢𑀸𑀳𑀁 𑀲𑁄 𑀫𑀳𑀻𑀧𑀢𑀺.

𑀢𑁄𑀭𑀡𑀤𑁆𑀥𑀚𑀧𑀼𑀧𑁆𑀨𑁂𑀳𑀺, 𑀕𑀦𑁆𑀥𑀧𑀼𑀡𑁆𑀡𑀖𑀝𑁂𑀳𑀺 𑀘;

𑀯𑀺𑀳𑀸𑀭𑀜𑁆𑀘 𑀲𑀫𑀦𑁆𑀢𑀸 𑀘, 𑀫𑀡𑁆𑀟𑀺𑀳𑀁 𑀬𑁄𑀚𑀦𑀢𑁆𑀢𑀬𑀁.

𑀅𑀳𑀼 𑀭𑀸𑀚𑀸𑀦𑀼𑀪𑀸𑀯𑁂𑀦, 𑀤𑀻𑀧𑀦𑁆𑀢𑀼 𑀲𑀓𑀮𑀁 𑀧𑀦;

𑀆𑀦𑀼𑀪𑀸𑀯𑁂𑀦 𑀤𑁂𑀯𑀸𑀦𑀁, 𑀢𑀣𑁂𑀯𑀸’𑀮𑀗𑁆𑀓𑀢𑀁 𑀅𑀳𑀼.

𑀦𑀸𑀦𑀸𑀧𑀽𑀚𑀁 𑀓𑀸𑀭𑀬𑀺𑀢𑁆𑀯𑀸, 𑀲𑀢𑁆𑀢𑀸𑀳𑀁 𑀲𑁄 𑀫𑀳𑀻𑀧𑀢𑀺;

𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂, 𑀣𑁂𑀭𑀸𑀦𑀁 𑀩𑀤𑁆𑀥𑀫𑀸𑀴𑀓𑁂.

𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀘𑀺𑀢𑀓𑀁, 𑀫𑀳𑀸𑀣𑀽𑀧𑀁 𑀧𑀤𑀓𑁆𑀔𑀺𑀡𑀁;

𑀓𑀭𑁄𑀦𑁆𑀢𑁄 𑀢𑀢𑁆𑀣 𑀦𑁂𑀢𑁆𑀯𑀸 𑀢𑀁, 𑀓𑀽𑀝𑀸𑀕𑀸𑀭𑀁 𑀫𑀦𑁄𑀭𑀫𑀁.

𑀘𑀺𑀢𑀓𑀫𑁆𑀳𑀺 𑀞𑀧𑀸𑀧𑁂𑀢𑁆𑀯𑀸, 𑀲𑀓𑁆𑀓𑀸𑀭𑀁 𑀅𑀦𑁆𑀢𑀺𑀫𑀁 𑀅𑀓𑀸;

𑀘𑁂𑀢𑀺𑀬𑀜𑁆𑀘𑁂𑀢𑁆𑀣 𑀓𑀸𑀭𑁂𑀲𑀺, 𑀕𑀸𑀳𑀸 𑀧𑁂𑀢𑁆𑀯𑀸𑀦 𑀥𑀸𑀢𑀼𑀬𑁄.

𑀉𑀧𑀟𑁆𑀠𑀥𑀸𑀢𑀼𑀁 ¶ 𑀕𑀸𑀳𑁂𑀢𑁆𑀯𑀸, 𑀘𑁂𑀢𑀺𑀬𑁂 𑀧𑀩𑁆𑀩𑀢𑁂𑀧𑀺 𑀘;

𑀲𑀩𑁆𑀩𑁂𑀲𑀼 𑀘 𑀯𑀺𑀳𑀸𑀭𑁂𑀲𑀼, 𑀣𑀽𑀧𑁂 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀇𑀲𑀺𑀦𑁄 𑀤𑁂𑀳𑀦𑀺𑀓𑁆𑀔𑁂𑀧-𑀓𑀢𑀞𑀸𑀦𑀜𑁆𑀳𑀺 𑀢𑀲𑁆𑀲 𑀢𑀁;

𑀯𑀼𑀘𑁆𑀘𑀢𑁂 𑀩𑀳𑀼𑀫𑀸𑀦𑁂𑀦, 𑀇𑀲𑀺𑀪𑀽𑀫𑀗𑁆𑀕𑀦𑀁 𑀇𑀢𑀺.

𑀢𑀢𑁄 𑀧𑀪𑀼𑀢𑁆𑀬’𑀭𑀺𑀬𑀸𑀦𑀁, 𑀲𑀫𑀦𑁆𑀢𑀸 𑀬𑁄𑀚𑀦𑀢𑁆𑀢𑀬𑁂;

𑀲𑀭𑀻𑀭𑀁 𑀆𑀳𑀭𑀺𑀢𑁆𑀯𑀸𑀦, 𑀢𑀫𑁆𑀳𑀺 𑀤𑁂𑀲𑀫𑁆𑀳𑀺 𑀟𑀬𑁆𑀳𑀢𑀺.

𑀲𑀗𑁆𑀖𑀫𑀺𑀢𑁆𑀢𑀸 𑀫𑀳𑀸𑀣𑁂𑀭𑀻, 𑀫𑀳𑀸’𑀪𑀺𑀜𑁆𑀜𑀸 𑀫𑀳𑀸𑀫𑀢𑀻;

𑀓𑀢𑁆𑀯𑀸 𑀲𑀸𑀲𑀦𑀓𑀺𑀘𑁆𑀘𑀸𑀦𑀺, 𑀢𑀣𑀸 𑀮𑁄𑀓𑀳𑀺𑀢𑀁 𑀩𑀳𑀼𑀁.

𑀏𑀓𑀽𑀦𑀲𑀝𑁆𑀞𑀺𑀯𑀲𑁆𑀲𑀸 𑀲𑀸, 𑀉𑀢𑁆𑀢𑀺𑀬𑀲𑁆𑀲𑁂’𑀯 𑀭𑀸𑀚𑀺𑀦𑁄;

𑀯𑀲𑁆𑀲𑀫𑁆𑀳𑀺 𑀦𑀯𑀫𑁂 𑀔𑁂𑀫𑁂, 𑀳𑀢𑁆𑀣𑀸𑀴𑁆𑀳𑀓𑀉𑀧𑀲𑁆𑀲𑀬𑁂.

𑀯𑀲𑀦𑁆𑀢𑀻 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀭𑀸𑀚𑀸 𑀢𑀲𑁆𑀲𑀸𑀧𑀺 𑀓𑀸𑀭𑀬𑀺;

𑀣𑁂𑀭𑀲𑁆𑀲 𑀯𑀺𑀬 𑀲𑀢𑁆𑀢𑀸𑀳𑀁, 𑀧𑀽𑀚𑀸𑀲𑀓𑁆𑀓𑀸𑀭 𑀫𑀼𑀢𑁆𑀢𑀫𑀁.

𑀲𑀩𑁆𑀩𑀸 𑀅𑀮𑀗𑁆𑀓𑀢𑀸 𑀮𑀁𑀓𑀸, 𑀣𑁂𑀭𑀲𑁆𑀲 𑀯𑀺𑀬 𑀆𑀲𑀺 𑀘;

𑀓𑀽𑀝𑀸𑀕𑀸𑀭𑀕𑀢𑀁 𑀣𑁂𑀭𑀺-𑀤𑁂𑀳𑀁 𑀲𑀢𑁆𑀢𑀤𑀺𑀦𑀘𑁆𑀘𑀬𑁂.

𑀦𑀺𑀓𑁆𑀔𑀸𑀫𑁂𑀢𑁆𑀯𑀸𑀦 𑀦𑀕𑀭𑀁, 𑀣𑀽𑀧𑀭𑀸𑀫 𑀧𑀼𑀭𑀢𑁆𑀣𑀢𑁄;

𑀘𑀺𑀢𑁆𑀢𑀲𑀸𑀮𑀸 𑀲𑀫𑀻𑀧𑀫𑁆𑀳𑀺, 𑀫𑀳𑀸𑀩𑁄𑀥𑀺𑀧 𑀤𑀲𑁆𑀲𑀬𑁂.

𑀣𑁂𑀭𑀺𑀬𑀸 𑀯𑀼𑀝𑁆𑀞𑀞𑀸𑀦𑀫𑁆𑀳𑀺, 𑀅𑀕𑁆𑀕𑀺𑀓𑀺𑀘𑁆𑀘 𑀫𑀓𑀸𑀭𑀬𑀺;

𑀣𑀽𑀧𑀜𑁆𑀘 𑀢𑀢𑁆𑀣 𑀓𑀸𑀭𑁂𑀲𑀺, 𑀉𑀢𑁆𑀢𑀺𑀬𑁄 𑀲𑁄 𑀫𑀳𑀻𑀧𑀢𑀺.

𑀧𑀜𑁆𑀘𑀸𑀧𑀺 𑀢𑁂 𑀫𑀳𑀸𑀣𑁂𑀭𑀸, 𑀣𑁂𑀭𑀸𑀭𑀺𑀝𑁆𑀞𑀸𑀤𑀬𑁄𑀧𑀺 𑀘;

𑀢𑀣𑀸’𑀦𑁂𑀓 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑀸𑀧𑀺 𑀘.

𑀲𑀗𑁆𑀖𑀫𑀺𑀢𑁆𑀢𑀸 𑀧𑀪𑀼𑀢𑀺𑀬𑁄, 𑀢𑀸 𑀘 𑀤𑁆𑀯𑀸𑀤𑀲𑀣𑁂𑀭𑀺𑀬𑁄;

𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀘.

𑀩𑀳𑀼𑀲𑁆𑀲𑀼𑀢𑀸 𑀫𑀳𑀸𑀧𑀜𑁆𑀜𑀸, 𑀯𑀺𑀦𑀬𑀸𑀤𑀺𑀚𑀸𑀦𑀸𑀕𑀫𑀁;

𑀚𑁄𑀢𑀬𑀺𑀢𑁆𑀯𑀸𑀦 𑀓𑀸𑀮𑁂𑀦, 𑀧𑀬𑀸𑀢𑀸’𑀦𑀺𑀘𑁆𑀘𑀢𑀸𑀯𑀲𑀁.

𑀤𑀲𑀯𑀲𑁆𑀲𑀸𑀦𑀺 𑀲𑁄 𑀭𑀸𑀚𑀸, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀉𑀢𑁆𑀢𑀺𑀬𑁄;

𑀏𑀯𑀁 𑀅𑀦𑀺𑀘𑁆𑀘𑀢𑀸 𑀏𑀲𑀸, 𑀲𑀩𑁆𑀩𑀮𑁄𑀓𑀯𑀺𑀦𑀸𑀲𑀺𑀦𑀻.

𑀢𑀁 ¶ 𑀏𑀢𑀁 𑀅𑀢𑀺𑀲𑀸𑀳𑀲𑀁 𑀅𑀢𑀺𑀩𑀮𑀁 𑀦 𑀯𑀸𑀭𑀺𑀬𑀁 𑀦𑀭𑁄;

𑀚𑀸𑀦𑀦𑁆𑀢𑁄𑀧𑀺 𑀅𑀦𑀺𑀘𑁆𑀘𑀢𑀁 𑀪𑀯𑀕𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑁂𑀦𑁂𑀯 𑀘;

𑀦𑀺𑀩𑁆𑀩𑀺𑀦𑁆𑀤𑁄 𑀯𑀺𑀭𑀢𑀺𑀁 𑀭𑀢𑀺𑀁 𑀦 𑀓𑀼𑀭𑀼𑀢𑁂 𑀧𑀸𑀧𑁂𑀳𑀺 𑀧𑀼𑀜𑁆𑀜𑁂𑀳𑀺 𑀘;

𑀢𑀲𑁆𑀲𑁂’𑀲𑀸𑀅𑀢𑀺𑀫𑁄𑀳𑀚𑀸𑀮𑀩𑀮𑀢𑀸𑀚𑀸𑀦𑀫𑁆𑀧𑀺 𑀲𑀫𑁆𑀫𑀼𑀬𑁆𑀳𑀢𑀻𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀉𑀢𑁆𑀢𑀺𑀬𑀲𑁆𑀲 ¶ 𑀓𑀦𑀺𑀝𑁆𑀞𑁄 𑀢𑀼, 𑀫𑀳𑀸𑀲𑀺𑀯𑁄 𑀢𑀤𑀘𑁆𑀘𑀬𑁂;

𑀤𑀲 𑀯𑀲𑁆𑀲𑀸𑀦𑀺 𑀓𑀸𑀭𑁂𑀲𑀺, 𑀭𑀚𑁆𑀚𑀁 𑀲𑀼𑀚𑀦 𑀲𑁂𑀯𑀓𑁄.

𑀪𑀤𑁆𑀤𑀲𑀸𑀮𑀫𑁆𑀳𑀺 𑀲𑁄 𑀣𑁂𑀭𑁂, 𑀧𑀲𑀻𑀤𑀺𑀢𑁆𑀯𑀸 𑀫𑀦𑁄𑀭𑀫𑀁;

𑀓𑀸𑀭𑁂𑀲𑀺 𑀧𑀼𑀭𑀺𑀫𑀸𑀬𑀦𑁆𑀢𑀼, 𑀯𑀺𑀳𑀸𑀭𑀁 𑀦𑀕𑀭𑀗𑁆𑀕𑀡𑀁.

𑀫𑀳𑀸𑀲𑀺𑀯𑀓𑀦𑀺𑀝𑁆𑀞𑁄 𑀢𑀼, 𑀲𑀼𑀭𑀢𑀺𑀲𑁆𑀲𑁄 𑀢𑀤𑀘𑁆𑀘𑀬𑁂;

𑀤𑀲𑀯𑀲𑁆𑀲𑀸𑀦𑀺 𑀓𑀸𑀭𑁂𑀲𑀺, 𑀭𑀚𑁆𑀚𑀁 𑀧𑀼𑀜𑁆𑀜𑁂𑀲𑀼 𑀲𑀸𑀤𑀭𑁄.

𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬𑀁 𑀲𑁄, 𑀯𑀺𑀳𑀸𑀭𑀁 𑀦𑀕𑀭𑀁 𑀕𑀡𑀁;

𑀧𑀼𑀭𑀺𑀫𑀸𑀬 𑀳𑀢𑁆𑀣𑀺𑀓𑁆𑀔𑀦𑁆𑀥𑀜𑁆𑀘, 𑀕𑁄𑀓𑀡𑁆𑀡𑀕𑀺𑀭𑀺𑀫𑁂𑀯 𑀘.

𑀯𑀗𑁆𑀕𑀼𑀢𑁆𑀢𑀭𑁂 𑀧𑀩𑁆𑀩𑀢𑀫𑁆𑀳𑀺, 𑀧𑀸𑀘𑀺𑀦 𑀧𑀩𑁆𑀩𑀢𑀯𑁆𑀳𑀬𑀁;

𑀭𑀳𑁂𑀡𑀓𑀲𑀫𑀻𑀧𑀫𑁆𑀳𑀺, 𑀢𑀣𑀸 𑀓𑁄𑀴𑀫𑁆𑀩𑀓𑀸𑀴𑀓𑀁.

𑀅𑀭𑀺𑀝𑁆𑀞𑀧𑀸𑀤𑁂 𑀫𑀁 𑀕𑀼𑀮𑀓𑀁, 𑀧𑀼𑀭𑀺𑀫𑀸𑀬’𑀘𑁆𑀙 𑀕𑀮𑁆𑀮𑀓𑀁;

𑀕𑀺𑀭𑀺𑀦𑁂𑀮𑀧𑀦𑀸𑀬𑀓𑀡𑁆𑀟𑀁, 𑀦𑀕𑀭𑀲𑁆𑀲𑀼𑀢𑁆𑀣𑀭𑀸𑀬 𑀢𑀼.

𑀧𑀜𑁆𑀘𑀲𑀢𑀸 ¶ 𑀦𑁂𑀯 𑀫𑀸𑀤𑀺-𑀯𑀺𑀳𑀸𑀭𑁂 𑀧𑀼𑀣𑀯𑀻 𑀧𑀢𑀺;

𑀕𑀗𑁆𑀕𑀸𑀬 𑀑𑀭𑀧𑀸𑀭𑀜𑁆𑀳𑀺, 𑀮𑀁𑀓𑀸𑀤𑀻𑀧𑁂 𑀢𑀳𑀺𑀁 𑀢𑀳𑀺𑀁.

𑀧𑀼𑀭𑁂 𑀭𑀚𑁆𑀚𑀸 𑀘 𑀭𑀚𑁆𑀚𑁂 𑀘, 𑀲𑀝𑁆𑀞𑀻𑀯𑀲𑁆𑀲𑀸𑀦𑀺 𑀲𑀸𑀥𑀼𑀓𑀁;

𑀓𑀸𑀭𑁂𑀲𑀺 𑀭𑀫𑁆𑀫𑁂 𑀥𑀫𑁆𑀫𑁂𑀦, 𑀭𑀢𑀦𑀢𑁆𑀢𑀬 𑀕𑀸𑀭𑀯𑁄.

𑀲𑀼𑀯𑀡𑁆𑀡𑀧𑀺𑀡𑁆𑀟𑀢𑀺𑀲𑁆𑀲𑁄𑀢𑀺, 𑀦𑀸𑀫𑀁 𑀭𑀚𑁆𑀚𑀸 𑀢𑀲𑁆𑀲𑀸 𑀅𑀳𑀼;

𑀲𑀼𑀭𑀢𑀺𑀲𑁆𑀲𑁄𑀢𑀺 𑀦𑀸𑀫𑀦𑁆𑀢𑀼, 𑀢𑀲𑁆𑀲𑀸’𑀧𑀼𑀭𑀚𑁆𑀚𑀧𑀢𑁆𑀢𑀺𑀬𑀸.

𑀅𑀲𑁆𑀲𑀦𑀸𑀯𑀺𑀓𑀧𑀼𑀢𑁆𑀢𑀸 𑀤𑁆𑀯𑁂, 𑀤𑀫𑀺𑀴𑀸 𑀲𑁂𑀦𑀕𑀼𑀢𑁆𑀢𑀺𑀓𑀸;

𑀲𑀼𑀭𑀢𑀺𑀲𑁆𑀲𑀫𑀳𑀻𑀧𑀸𑀮𑀁, 𑀢𑀁 𑀕𑀳𑁂𑀢𑁆𑀯𑀸 𑀫𑀳𑀩𑁆𑀩𑀮𑀸.

𑀤𑀼𑀯𑁂 𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀥𑀫𑁆𑀫𑁂𑀦 𑀓𑀸𑀭𑀬𑀼𑀁;

𑀢𑁂 𑀕𑀳𑁂𑀢𑁆𑀯𑀸 𑀅𑀲𑁂𑀮𑁄 𑀢𑀼, 𑀫𑀼𑀝𑀲𑀺𑀯𑀲𑁆𑀲 𑀅𑀢𑁆𑀭𑀚𑁄.

𑀲𑁄𑀤𑀭𑀺𑀬𑀸𑀦𑀁 𑀪𑀸𑀢𑀽𑀦𑀁, 𑀦𑀯𑀫𑁄 𑀪𑀢𑀼𑀓𑁄 𑀢𑀢𑁄;

𑀅𑀦𑀼𑀭𑀸𑀥𑀧𑀼𑀭𑁂 𑀭𑀚𑁆𑀚𑀁, 𑀤𑀲𑀯𑀲𑁆𑀲𑀸𑀦𑀺 𑀓𑀸𑀭𑀬𑀺.

𑀘𑁄𑀴𑀭𑀝𑁆𑀞𑀸 𑀇𑀥 𑀕𑀫𑁆𑀫, 𑀭𑀚𑁆𑀚𑀢𑁆𑀣𑀁 𑀉𑀚𑀼𑀚𑀸𑀢𑀺𑀓𑁄;

𑀏𑀴𑀸𑀭𑁄 𑀦𑀸𑀫 𑀤𑀫𑀺𑀴𑁄, 𑀕𑀳𑁂𑀢𑁆𑀯𑀸’𑀲𑁂𑀮𑀪𑀽𑀧𑀢𑀺𑀁.

𑀯𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀻𑀲𑀜𑁆𑀘, 𑀘𑀢𑁆𑀢𑀸𑀭𑀺 𑀘 𑀅𑀓𑀸𑀭𑀬𑀺;

𑀭𑀚𑁆𑀚𑀁 𑀯𑁄𑀳𑀸𑀭𑀲𑀫𑀬𑁂, 𑀫𑀚𑁆𑀛𑀢𑁆𑀢𑁄 𑀫𑀺𑀢𑁆𑀢𑀲𑀢𑁆𑀢𑀼𑀲𑀼.

𑀲𑀬𑀦𑀲𑁆𑀲 𑀲𑀺𑀭𑁄𑀧𑀲𑁆𑀲𑁂, 𑀖𑀡𑁆𑀝𑀁 𑀲𑀼𑀤𑀻𑀖𑀬𑁄𑀢𑁆𑀢𑀓𑀁;

𑀮𑀫𑁆𑀩𑀸𑀧𑁂𑀲𑀺 𑀯𑀻𑀭𑀸𑀯𑁂𑀢𑀼𑀁, 𑀇𑀘𑁆𑀙𑀦𑁆𑀢𑁂𑀳𑀺 𑀯𑀺𑀦𑀺𑀘𑁆𑀙𑀬𑀁.

𑀏𑀓𑁄 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘, 𑀅𑀳𑁂𑀲𑀼𑀁 𑀢𑀲𑁆𑀲 𑀭𑀸𑀚𑀺𑀦𑁄;

𑀭𑀣𑁂𑀦 𑀢𑀺𑀲𑁆𑀲𑀯𑀸𑀧𑀺𑀁 𑀲𑁄, 𑀕𑀘𑁆𑀙𑀦𑁆𑀢𑁄 𑀪𑀽𑀫𑀺𑀧𑀸𑀮𑀚𑁄.

𑀢𑀭𑀼𑀡𑀁 𑀯𑀘𑁆𑀙𑀓𑀁 𑀫𑀕𑁆𑀕𑁂, 𑀦𑀺𑀧𑀦𑁆𑀦𑀁 𑀲𑀳𑀥𑁂𑀦𑀼𑀓𑀁;

𑀕𑀻𑀯𑀁 𑀅𑀓𑁆𑀓𑀫𑁆𑀫𑀘𑀓𑁆𑀓𑁂𑀦, 𑀅𑀲𑀜𑁆𑀘𑀺𑀘𑁆𑀘 𑀅𑀖𑀸𑀢𑀬𑀺.

𑀕𑀦𑁆𑀢𑁆𑀯𑀸𑀦 𑀥𑁂𑀦𑀼𑀖𑀡𑁆𑀝𑀁 𑀢𑀁, 𑀖𑀝𑁆𑀝𑁂𑀲𑀺 𑀖𑀝𑁆𑀝𑀺𑀢𑀸𑀲𑀬𑀸;

𑀭𑀸𑀚𑀸 𑀢𑁂𑀦𑁂𑀯 𑀘𑀓𑁆𑀓𑁂𑀦, 𑀲𑀻𑀲𑀁 𑀧𑀼𑀢𑁆𑀢𑀲𑁆𑀲 𑀙𑁂𑀤𑀬𑀺.

𑀤𑀺𑀚𑀧𑁄𑀢𑀁 𑀢𑀸𑀮𑀭𑀼𑀓𑁆𑀔𑁂, 𑀏𑀓𑁄 𑀲𑀧𑁆𑀧𑁄 𑀅𑀪𑀓𑁆𑀔𑀬𑀺;

𑀢𑀫𑁆𑀧𑁄𑀢𑀫𑀸𑀢𑀸 𑀲𑀓𑀼𑀡𑀻, 𑀕𑀦𑁆𑀢𑁆𑀯𑀸 𑀖𑀡𑁆𑀝𑀫𑀖𑀝𑁆𑀝𑀬𑀺.

𑀆𑀡𑀸𑀧𑁂𑀢𑁆𑀯𑀸𑀦 𑀢𑀁 𑀭𑀸𑀚𑀸, 𑀓𑀼𑀘𑁆𑀙𑀺𑀁 𑀢𑀲𑁆𑀲 𑀯𑀺𑀤𑀸𑀴𑀺𑀬;

𑀧𑁄𑀢𑀁 𑀢𑀁 𑀦𑀻𑀳𑀭𑀸𑀧𑁂𑀢𑁆𑀯𑀸, 𑀢𑀸𑀮𑁂 𑀲𑀧𑁆𑀧𑀫𑀲𑀧𑁆𑀧𑀬𑀺.

𑀭𑀢𑀦𑀕𑁆𑀕𑀲𑁆𑀲 ¶ 𑀭𑀢𑀦-𑀢𑁆𑀢𑀬𑀲𑁆𑀲 𑀕𑀼𑀡𑀲𑀸𑀭𑀢𑀁;

𑀅𑀚𑀸𑀦𑀦𑁆𑀢𑁄𑀧𑀺 𑀲𑁄 𑀭𑀸𑀚𑀸, 𑀘𑀸𑀭𑀺𑀢𑁆𑀢𑀫𑀦𑀼𑀧𑀸𑀮𑀬𑀁.

𑀘𑁂𑀢𑀺𑀬𑀤𑀩𑁆𑀩𑀢𑀁 𑀕𑀦𑁆𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑀺𑀬;

𑀆𑀕𑀘𑁆𑀙𑀦𑁆𑀢𑁄 𑀭𑀣𑀕𑀢𑁄, 𑀭𑀣𑀲𑁆𑀲 𑀬𑀼𑀕𑀓𑁄𑀝𑀺𑀬𑀸.

𑀅𑀲𑀜𑁆𑀘𑀺𑀘𑁆𑀘 𑀓𑀢𑁂‘𑀧𑁂’𑀲, 𑀭𑀸𑀚𑀸 𑀑𑀭𑀼𑀬𑁆𑀳 𑀲𑀦𑁆𑀤𑀦𑀸;

‘‘𑀘𑀓𑁆𑀓𑁂𑀦 𑀫𑀫 𑀲𑀻𑀲𑀫𑁆𑀧𑀺, 𑀙𑀺𑀦𑁆𑀤𑀣𑀸’𑀢𑀺 𑀧𑀣𑁂𑀲𑀬𑀺.

‘‘𑀧𑀭𑀳𑀺𑀁𑀲𑀁 𑀫𑀳𑀸𑀭𑀸𑀚, 𑀲𑀢𑁆𑀣𑀸 𑀦𑁄 𑀦𑁂𑀯 𑀇𑀘𑁆𑀙𑀢𑀺;

𑀣𑀽𑀧𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀔𑀫𑀸𑀧𑁂𑀳𑀻’’𑀢𑀺 𑀆𑀳𑀼 𑀢𑀁.

𑀢𑁂 𑀞𑀧𑁂𑀢𑀼𑀁 𑀧𑀜𑁆𑀘𑀤𑀲, 𑀧𑀸𑀲𑀸𑀡𑁂 𑀧𑀢𑀺𑀢𑁂 𑀢𑀳𑀺𑀁;

𑀓𑀳𑀸𑀧𑀡 𑀲𑀳𑀲𑁆𑀲𑀸𑀦𑀺, 𑀅𑀤𑀸 𑀧𑀜𑁆𑀘𑀤𑀲𑁂 𑀯𑀲𑁄.

𑀅𑀓𑀸 𑀫𑀳𑀮𑁆𑀮𑀺𑀓𑀸 𑀯𑀻𑀳𑀺𑀁, 𑀲𑁄 𑀲𑁂𑀢𑀼𑀁 𑀆𑀢𑀧𑁂 𑀔𑀺𑀧𑀺;

𑀤𑁂𑀯𑁄 𑀅𑀓𑀸𑀮𑁂 𑀯𑀲𑁆𑀲𑀺𑀢𑁆𑀯𑀸, 𑀢𑀲𑁆𑀲𑀸 𑀯𑀺𑀳𑀺𑀁 𑀅𑀢𑁂𑀫𑀬𑀺.

𑀯𑀻𑀳𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀸, 𑀖𑀡𑁆𑀝𑀁 𑀢𑀁 𑀲𑀫𑀖𑀝𑁆𑀝𑀬𑀺;

𑀅𑀓𑀸𑀮𑀯𑀲𑁆𑀲𑀁 𑀲𑀼𑀢𑁆𑀯𑀸 𑀢𑀁, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀫𑀢𑁆𑀢𑀺𑀓𑀁.

𑀭𑀸𑀚𑀸 𑀥𑀫𑁆𑀫𑀫𑁆𑀳𑀺 𑀯𑀢𑁆𑀢𑀦𑁆𑀢𑁄, ‘‘𑀓𑀸𑀮𑁂 𑀯𑀲𑁆𑀲𑀁 𑀮𑀪𑁂’’𑀇𑀢𑀺;

𑀢𑀲𑁆𑀲𑀸 𑀯𑀺𑀦𑀺𑀘𑁆𑀙𑀬𑀢𑁆𑀣𑀸𑀬, 𑀉𑀧𑀯𑀸𑀲𑀁 𑀦𑀺𑀧𑀚𑁆𑀚𑀺 𑀲𑁄.

𑀩𑀮𑀺𑀕𑁆𑀕𑀸𑀳𑀻 𑀤𑁂𑀯𑀧𑀼𑀢𑁆𑀢𑁄, 𑀭𑀜𑁆𑀜𑁄 𑀢𑁂𑀚𑁂𑀦 𑀑𑀢𑁆𑀣𑀝𑁄;

𑀕𑀦𑁆𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚-𑀲𑀦𑁆𑀢𑀺𑀓𑀁 𑀢𑀁 𑀦𑀺𑀯𑁂𑀤𑀬𑀺.

𑀢𑁂 𑀢𑀫𑀸𑀤𑀸𑀬 𑀕𑀦𑁆𑀢𑁆𑀯𑀸𑀦, 𑀲𑀓𑁆𑀓𑀲𑁆𑀲 𑀧𑀝𑀺𑀯𑁂𑀤𑀬𑀼𑀁;

𑀲𑀓𑁆𑀓𑁄 𑀧𑀚𑁆𑀚𑀼𑀦𑁆𑀦𑀫𑀸𑀳𑀼𑀬, 𑀓𑀸𑀮𑁂 𑀯𑀲𑁆𑀲𑀁 𑀉𑀧𑀸𑀤𑀺𑀬𑀺.

𑀩𑀮𑀺𑀕𑁆𑀕𑀸𑀳𑀻 𑀤𑁂𑀯𑀧𑀼𑀢𑁆𑀢𑁄, 𑀭𑀸𑀚𑀺𑀦𑁄 𑀢𑀁 𑀦𑀺𑀯𑁂𑀤𑀬𑀺;

𑀢𑀢𑁄𑀧𑁆𑀧𑀪𑀼𑀢𑀺 𑀢𑀁 𑀭𑀚𑁆𑀚𑁂, 𑀤𑀺𑀯𑀸 𑀤𑁂𑀯𑁄 𑀦 𑀯𑀲𑁆𑀲𑀣.

𑀭𑀢𑁆𑀢𑀺𑀁 𑀤𑁂𑀯𑁄’𑀦𑀼 𑀲𑀢𑁆𑀢𑀸𑀳𑀁, 𑀯𑀲𑁆𑀲𑀺𑀬𑀸𑀫𑀫𑁆𑀳𑀺 𑀫𑀚𑁆𑀛𑀺𑀫𑁂;

𑀧𑀼𑀡𑁆𑀡𑀸𑀦’𑀳𑁂𑀲𑀼𑀁 𑀲𑀩𑁆𑀩𑀢𑁆𑀣, 𑀔𑀼𑀤𑁆𑀤𑀓𑀸 𑀯𑀸𑀝𑀓𑀸𑀦𑀺𑀧𑀺.

𑀅𑀕𑀢𑀺𑀕𑀫𑀦𑀤𑁄𑀲𑁄 ¶ 𑀫𑀼𑀢𑁆𑀢𑀫𑀢𑁆𑀢𑁂𑀦 𑀏𑀲𑁄,

𑀅𑀦𑀼𑀧𑀳𑀢 𑀓𑀼𑀤𑀺𑀝𑁆𑀞𑀺𑀧𑀻𑀤𑀺𑀲𑀺𑀁 𑀧𑀸𑀧𑀼𑀡𑀻’𑀤𑁆𑀥𑀺𑀁;

𑀅𑀕𑀢𑀺𑀕𑀫𑀦𑀤𑁄𑀲𑀁 𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑀫𑀸𑀦𑁄,

𑀓𑀣𑀫𑀺𑀥𑀳𑀺 𑀫𑀦𑀼𑀲𑁆𑀲𑁄 𑀩𑀼𑀤𑁆𑀥𑀺𑀫𑀸 𑀦𑁄 𑀚𑀳𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀴𑀸𑀭𑀁 𑀖𑀸𑀢𑀬𑀺𑀢𑁆𑀯𑀸𑀦, 𑀭𑀸𑀚𑀸’𑀳𑀼 𑀤𑀼𑀝𑁆𑀞𑀕𑀸𑀫𑀡𑀺;

𑀢𑀤𑀢𑁆𑀣 𑀤𑀻𑀧𑀦𑀢𑁆𑀣𑀸𑀬, 𑀅𑀦𑀼𑀧𑀼𑀩𑁆𑀩𑀓𑀣𑀸 𑀅𑀬𑀁.

𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑀲𑁆𑀲, 𑀭𑀜𑁆𑀜𑁄 𑀤𑀼𑀢𑀺𑀬𑀪𑀸𑀢𑀺𑀓𑁄;

𑀉𑀧𑀭𑀸𑀚𑀸 𑀫𑀳𑀸𑀦𑀸𑀕𑁄, 𑀦𑀸𑀫𑀸𑀦𑀼 𑀪𑀸𑀢𑀼𑀦𑁄 𑀧𑀺𑀬𑁄.

𑀭𑀜𑁆𑀜𑁄 𑀤𑁂𑀯𑀻 𑀲𑀧𑀼𑀢𑁆𑀢𑀲𑁆𑀲, 𑀩𑀸𑀮𑀸 𑀭𑀚𑁆𑀚𑀸𑀪𑀺𑀓𑀸𑀫𑀺𑀦𑀺;

𑀉𑀧𑀭𑀸𑀚𑀯𑀥𑀢𑁆𑀣𑀸𑀬, 𑀚𑀸𑀢𑀘𑀺𑀢𑁆𑀢𑀸 𑀦𑀺𑀭𑀦𑁆𑀢𑀭𑀁.

𑀯𑀸𑀧𑀺𑀁 𑀢𑀭𑀘𑁆𑀙𑀦𑀸𑀫𑀁 𑀲𑀸, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀧𑀸𑀳𑀺𑀡𑀺;

𑀅𑀫𑁆𑀩𑀁 𑀯𑀺𑀲𑁂𑀦 𑀬𑁄𑀚𑁂𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀅𑀫𑁆𑀩𑀫𑀢𑁆𑀣𑀓𑁂.

𑀢𑀲𑁆𑀲𑀸 𑀧𑀼𑀢𑁆𑀢𑁄 𑀲𑀳𑀕𑀢𑁄, 𑀉𑀧𑀭𑀸𑀚𑁂𑀦 𑀩𑀸𑀮𑀓𑁄;

𑀪𑀸𑀚𑀦𑁂 𑀯𑀺𑀯𑀝𑁂𑀬𑁂𑀯, 𑀢𑀁 𑀅𑀫𑁆𑀩𑀁 𑀔𑀸𑀤𑀺𑀬𑀸’𑀫𑀭𑀺.

𑀉𑀧𑀭𑀸𑀚𑀸 𑀢𑀢𑁄𑀬𑁂𑀯, 𑀲𑀤𑀸𑀭 𑀩𑀮 𑀯𑀸𑀳𑀦𑁄;

𑀭𑀓𑁆𑀔𑀺𑀳𑀼𑀁 𑀲𑀓𑀫𑀢𑁆𑀢𑀸𑀦𑀁, 𑀭𑁄𑀳𑀡𑀸’𑀪𑀺𑀫𑀼𑀔𑁄 𑀅𑀕𑀸.

𑀬𑀝𑁆𑀞𑀸𑀮𑀬 𑀯𑀺𑀳𑀸𑀭𑀲𑁆𑀫𑀺𑀁, 𑀫𑀳𑁂𑀲𑀻 𑀢𑀲𑁆𑀲 𑀕𑀩𑁆𑀪𑀺𑀦𑀻;

𑀧𑀼𑀢𑁆𑀢𑀁 𑀚𑀦𑁂𑀲𑀺 𑀲𑁄 𑀢𑀲𑁆𑀲, 𑀪𑀸𑀢𑀼 𑀦𑀸𑀫 𑀫𑀓𑀸𑀭𑀬𑀺.

𑀓𑀸𑀭𑁂𑀲𑀺 𑀲𑁄 𑀦𑀸𑀕𑀫𑀳𑀸-𑀯𑀺𑀳𑀸𑀭𑀁 𑀲𑀓𑀦𑀸𑀫𑀓𑀁;

𑀉𑀤𑁆𑀥𑀓𑀦𑁆𑀤𑀭𑀓𑀸𑀤𑀻 𑀘, 𑀧𑀺𑀳𑀸𑀭𑁂 𑀓𑀸𑀭𑀬𑀻 𑀩𑀳𑀽.

𑀬𑀝𑁆𑀞𑀸𑀮𑀬 𑀓𑀢𑀺𑀲𑁆𑀲𑁄 𑀲𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀢𑀤𑀘𑁆𑀘𑀬𑁂;

𑀳𑀢𑁆𑀣𑁂𑀯 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀧𑀼𑀢𑁆𑀢𑁄’𑀪𑀬𑁄 𑀢𑀣𑀸.

𑀕𑁄𑀝𑁆𑀞𑀸𑀪𑀬𑀲𑀼𑀢𑁄 𑀓𑀸𑀓-𑀯𑀡𑁆𑀡𑀢𑀺𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀳𑁄;

𑀢𑀤𑀘𑁆𑀘𑀬𑁂 𑀢𑀢𑁆𑀣 𑀭𑀚𑁆𑀚𑀁, 𑀲𑁄 𑀅𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀯𑀺𑀳𑀸𑀭𑀤𑁂𑀯𑀺 𑀦𑀸𑀫𑀸’𑀲𑀺, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀲𑀤𑁆𑀥𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸, 𑀥𑀻𑀢𑀸 𑀓𑀮𑁆𑀬𑀸𑀡𑀺 𑀭𑀸𑀚𑀺𑀦𑁄.

𑀓𑀮𑁆𑀬𑀸𑀡𑀺𑀬𑀁 𑀦𑀭𑀺𑀦𑁆𑀤𑁄 𑀳𑀺, 𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀤𑁂𑀯𑀺𑀲𑀜𑁆𑀜𑁄𑀕𑀚𑀦𑀺𑀢-𑀓𑁄 𑀧𑁄𑀢𑀲𑁆𑀲 𑀓𑀦𑀺𑀝𑁆𑀞𑀓𑁄.

𑀪𑀻𑀢𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸, 𑀅𑀬𑁆𑀬𑀉𑀢𑁆𑀢𑀺𑀬 𑀦𑀸𑀫𑀓𑁄;

𑀅𑀜𑁆𑀜𑀢𑁆𑀣 𑀯𑀲𑀺 𑀲𑁄 𑀤𑁂𑀲𑁄, 𑀢𑁂𑀦 𑀢𑀁 𑀦𑀸𑀫𑀓𑁄 𑀅𑀳𑀼.

𑀤𑀢𑁆𑀯𑀸 𑀭𑀳𑀲𑁆𑀲𑀮𑁂𑀔𑀁 𑀲𑁄, 𑀪𑀺𑀓𑁆𑀔𑀼𑀯𑁂𑀲𑀥𑀭𑀁 𑀦𑀭𑀁;

𑀧𑀸𑀳𑁂𑀲𑀺 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸, 𑀭𑀸𑀚𑀤𑁆𑀯𑀸𑀭𑁂 𑀞𑀺𑀢𑁄 𑀢𑀼𑀲𑁄.

𑀭𑀸𑀚 𑀕𑁂𑀳𑁂 𑀅𑀭𑀳𑀢𑀸, 𑀪𑀼𑀜𑁆𑀚𑀫𑀸𑀦𑁂𑀦 𑀲𑀩𑁆𑀩𑀤𑀸;

𑀅𑀜𑁆𑀜𑀸𑀬𑀫𑀸𑀦𑁄 𑀣𑁂𑀭𑁂𑀦, 𑀭𑀜𑁆𑀜𑁄 𑀖𑀭𑀫𑀼𑀧𑀸𑀕𑀫𑀺.

𑀣𑁂𑀭𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀭𑀜𑁆𑀜𑁄 𑀲𑀳 𑀯𑀺𑀦𑀺𑀕𑁆𑀕𑀫𑁂;

𑀧𑀸𑀢𑁂𑀲𑀺 𑀪𑀽𑀫𑀺𑀬𑀁 𑀮𑁂𑀔𑀁, 𑀧𑁂𑀓𑁆𑀔𑀫𑀸𑀦𑀸𑀬 𑀤𑁂𑀯𑀺𑀬𑀸.

𑀲𑀤𑁆𑀤𑁂𑀦 𑀢𑁂𑀦 𑀭𑀸𑀚𑀸𑀦𑀁, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀮𑁄𑀓𑀬𑀁;

𑀜𑀢𑁆𑀯𑀸𑀦 𑀮𑁂𑀔𑀲𑀦𑁆𑀤𑁂𑀲𑀁, 𑀓𑀼𑀤𑁆𑀥𑁄 𑀣𑁂𑀭𑀲𑁆𑀲 𑀤𑀼𑀫𑁆𑀫𑀢𑀺.

𑀣𑁂𑀭𑀁 𑀢𑀁 𑀧𑀼𑀭𑀺𑀲𑀁 𑀢𑀜𑁆𑀘, 𑀫𑀸𑀭𑀸𑀧𑁂𑀢𑁆𑀯𑀸𑀦 𑀓𑁄𑀥𑀲𑀸;

𑀲𑀫𑀼𑀤𑁆𑀤𑀲𑁆𑀫𑀺𑀁 𑀔𑀺𑀧𑀸𑀧𑁂𑀲𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀢𑁂𑀦 𑀤𑁂𑀯𑀢𑀸.

𑀲𑀫𑀼𑀤𑁆𑀤𑁂𑀦𑁄’𑀢𑁆𑀣𑀭𑀸 𑀧𑁂𑀲𑀼𑀁, 𑀢𑀁 𑀤𑁂𑀲𑀁 𑀲𑁄𑀢𑀼𑀪𑀽𑀧𑀢𑀺;

𑀅𑀢𑁆𑀢𑀦𑁄 𑀥𑀻𑀢𑀭𑀁 𑀬𑀼𑀤𑁆𑀥𑀁, 𑀤𑁂𑀯𑀺𑀁 𑀦𑀸𑀫 𑀲𑀼𑀭𑀼𑀧𑀺𑀦𑀺𑀁.

𑀮𑀺𑀔𑀺𑀢𑁆𑀯𑀸 𑀭𑀸𑀚𑀥𑀻𑀢𑀸𑀢𑀺, 𑀲𑁄𑀯𑀡𑁆𑀡𑀓𑁆𑀔𑀮𑀺𑀬𑀸 𑀮𑀳𑀼𑀁;

𑀦𑀺𑀲𑀻𑀤𑀸𑀧𑀺𑀬 𑀢𑀢𑁆𑀣𑁂𑀯, 𑀲𑀫𑀼𑀤𑁆𑀤𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀬𑀺.

𑀑𑀓𑁆𑀓𑀦𑁆𑀢𑀁 ¶ 𑀢𑀁 𑀢𑀢𑁄 𑀮𑀁𑀓𑁂-𑀓𑀸𑀓𑀯𑀡𑁆𑀡𑁄 𑀫𑀳𑀻𑀧𑀢𑀺;

𑀅𑀪𑀺𑀲𑁂𑀘𑀬𑀺 𑀢𑁂𑀦𑀸’𑀲𑀺, 𑀯𑀺𑀳𑀸𑀭𑁄𑀧𑀧𑀤𑀯𑁆𑀳𑀬𑀸.

𑀢𑀺𑀲𑁆𑀲 𑀫𑀳𑀸𑀯𑀺𑀳𑀸𑀭𑀜𑁆𑀘, 𑀢𑀣𑀸 𑀘𑀺𑀢𑁆𑀢𑀮𑀧𑀩𑁆𑀩𑀢𑀁;

𑀕𑀫𑀺𑀢𑁆𑀣𑀯𑀸𑀮𑀺𑀁 𑀓𑀼𑀝𑀸𑀮𑀺𑀁, 𑀯𑀺𑀳𑀸𑀭𑁂 𑀏𑀯𑀫𑀸𑀤𑀺𑀓𑁂.

𑀓𑀸𑀭𑁂𑀢𑁆𑀯𑀸 𑀲𑀼𑀧𑀲𑀦𑁆𑀦𑁂𑀦, 𑀫𑀦𑀲𑀸𑀭𑀢𑀦𑀢𑁆𑀢𑀬𑁂;

𑀉𑀧𑀝𑁆𑀞𑀳𑀺 𑀢𑀤𑀸 𑀲𑀗𑁆𑀖𑀁, 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺 𑀲𑁄.

𑀓𑁄𑀝𑀺𑀧𑀩𑁆𑀩𑀢 𑀦𑀸𑀫𑀫𑁆𑀳𑀺, 𑀯𑀺𑀳𑀸𑀭𑁂 𑀲𑀻𑀮𑀯𑀢𑁆𑀢𑀺𑀫𑀸;

𑀢𑀤𑀸 𑀅𑀳𑀼 𑀲𑀸𑀫𑀡𑁂𑀭𑁄, 𑀦𑀸𑀦𑀸𑀧𑀼𑀜𑁆𑀜𑀓𑀭𑁄 𑀲𑀤𑀸.

𑀲𑀼𑀔𑁂𑀦𑀸𑀭𑁄𑀳𑀡𑀢𑁆𑀣𑀸𑀬, 𑀅𑀓𑀸𑀲 𑀘𑁂𑀢𑀺𑀬𑀗𑁆𑀕𑀡𑁂;

𑀞𑀧𑁂𑀲𑀺 𑀢𑀻𑀡𑀺 𑀧𑀸𑀲𑀸𑀡𑁂, 𑀧𑀸𑀲𑀸𑀡 𑀨𑀮𑀓𑀸𑀦𑀺 𑀲𑁄.

𑀅𑀤𑀸 𑀧𑀸𑀦𑀻𑀬 𑀤𑀸𑀦𑀜𑁆𑀘, 𑀯𑀢𑁆𑀢𑀁 𑀲𑀗𑁆𑀖𑀲𑁆𑀲 𑀘𑀸’𑀓𑀭𑀺;

𑀲𑀤𑀸 𑀓𑀺𑀮𑀦𑁆𑀢𑀓𑀸𑀬𑀲𑁆𑀲, 𑀢𑀲𑁆𑀲𑀸’𑀩𑁄𑀥𑁄 𑀫𑀳𑀸 𑀅𑀳𑀼.

𑀲𑀺𑀯𑀺𑀓𑀸𑀬 𑀓𑀫𑀸𑀦𑁂𑀢𑁆𑀯𑀸, 𑀪𑀺𑀓𑁆𑀔𑀯𑁄 𑀓𑀢𑀯𑁂𑀤𑀺𑀦𑁄;

𑀲𑀺𑀮𑀸𑀧𑀲𑁆𑀲𑀬 𑀧𑀭𑀺𑀯𑁂𑀡𑁂, 𑀢𑀺𑀲𑁆𑀲𑀸𑀭𑀸𑀫𑁂 𑀉𑀧𑀝𑁆𑀞𑀳𑀼𑀁.

𑀲𑀤𑀸 𑀯𑀺𑀳𑀸𑀭𑀤𑁂𑀯𑀻𑀲𑀸, 𑀭𑀸𑀚𑀕𑁂𑀳𑁂 𑀲𑀼𑀲𑀗𑁆𑀔𑀢𑁂;

𑀧𑀼𑀭𑁂𑀪𑀢𑁆𑀢𑀁 𑀫𑀳𑀸𑀤𑀸𑀦𑀁, 𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀲𑀜𑁆𑀜𑀢𑀸.

𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀁, 𑀪𑁂𑀲𑀚𑁆𑀚𑀯𑀲𑀦𑀸𑀦𑀺 𑀘;

𑀕𑀸𑀳𑀬𑀺𑀢𑁆𑀯𑀸 𑀕𑀢𑀸’𑀭𑀸𑀫𑀁, 𑀲𑀓𑁆𑀓𑀭𑁄𑀢𑀺 𑀬𑀣𑀸𑀭𑀳𑀁.

𑀢𑀤𑀸 𑀢𑀣𑁂𑀯 𑀓𑀢𑁆𑀯𑀸 𑀲𑀸, 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀦𑀺𑀲𑀻𑀤𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀣𑁂𑀭𑁄 𑀢𑀁 𑀇𑀥 𑀫𑀩𑁆𑀭𑀯𑀺.

‘‘𑀫𑀳𑀸𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑁂𑀳𑀺, 𑀮𑀤𑁆𑀥𑀸’𑀬𑀁 𑀧𑀼𑀜𑁆𑀜𑀓𑀫𑁆𑀫𑀼𑀦𑀸;

𑀅𑀧𑁆𑀧𑀫𑀸𑀤𑁄’𑀯 𑀓𑀸𑀢𑀩𑁆𑀩𑁄, 𑀧𑀼𑀜𑁆𑀜𑀓𑀫𑁆𑀫𑁂 𑀇𑀤𑀸𑀦𑀺𑀧𑀺’’.

𑀏𑀯𑀁 𑀯𑀼𑀢𑁆𑀢𑁂 𑀢𑀼 𑀲𑀸 𑀆𑀳, ‘‘𑀓𑀺𑀁 𑀲𑀫𑁆𑀧𑀢𑁆𑀢𑀺 𑀅𑀬𑀁 𑀇𑀥;

𑀬𑁂𑀲𑀁 𑀦𑁄 𑀤𑀸𑀭𑀓𑀸 𑀦𑀢𑁆𑀣𑀺, 𑀯𑀜𑁆𑀛𑀸𑀲𑀫𑁆𑀧𑀢𑁆𑀢𑀺 𑀢𑁂𑀦 𑀦𑁄’’.

𑀙𑀴𑀪𑀺𑀜𑁆𑀜𑁄 𑀫𑀳𑀸𑀣𑁂𑀭𑁄, 𑀧𑀼𑀢𑁆𑀢𑀮𑀸𑀪𑀫𑀯𑁂𑀓𑁆𑀔𑀺𑀬;

‘‘𑀕𑀺𑀮𑀸𑀦𑀁 𑀲𑀸𑀫𑀡𑁂𑀭𑀁 𑀢𑀁, 𑀧𑀲𑁆𑀲𑀤𑁂𑀯𑀻’’𑀢𑀺 𑀅𑀩𑁆𑀭𑀯𑀺.

𑀲𑀸 𑀕𑀦𑁆𑀢𑁆𑀯𑀸’𑀲𑀦𑁆𑀦 𑀫𑀭𑀡𑀁, 𑀲𑀸𑀫𑀡𑁂𑀭𑀫𑀯𑁄𑀘 𑀢𑀁;

‘‘𑀧𑀢𑁆𑀣𑁂𑀳𑀺 𑀫𑀫 𑀧𑀼𑀢𑁆𑀢𑀢𑁆𑀢𑀁, 𑀲𑀫𑁆𑀧𑀢𑁆𑀢𑀻 𑀫𑀳𑀢𑀻 𑀳𑀺 𑀦𑁄’’.

𑀦 ¶ 𑀇𑀘𑁆𑀙𑀢𑀻𑀢𑀺 𑀜𑀢𑁆𑀯𑀸𑀦, 𑀢𑀤𑀢𑁆𑀣𑀁 𑀫𑀳𑀢𑀺𑀁 𑀲𑀼𑀪𑀁;

𑀧𑀼𑀧𑁆𑀨𑀧𑀽𑀚𑀁 𑀓𑀸𑀭𑀬𑀺𑀢𑁆𑀯𑀸, 𑀧𑀼𑀦 𑀬𑀸𑀘𑀺 𑀲𑀼𑀫𑁂𑀥𑀲𑀸.

𑀏𑀯𑀫𑁆𑀧’𑀦𑀺𑀘𑁆𑀙𑀫𑀸𑀦𑀲𑁆𑀲, 𑀅𑀢𑁆𑀣𑀸𑀬𑀼’𑀧𑀸𑀬𑀓𑁄𑀯𑀺𑀤𑀸;

𑀦𑀸𑀦𑀸 𑀪𑁂𑀲𑀚𑁆𑀚 𑀯𑀢𑁆𑀣𑀸𑀦𑀺, 𑀲𑀗𑁆𑀖𑁂 𑀤𑀢𑁆𑀯𑀸’𑀣 𑀬𑀸𑀘𑀺𑀢𑀁.

𑀧𑀢𑁆𑀣𑁂𑀲𑀺 𑀲𑁄 𑀭𑀸𑀚𑀓𑀼𑀮𑀁, 𑀲𑀸 𑀢𑀁 𑀞𑀸𑀦𑀁 𑀅𑀦𑁂𑀓𑀥𑀸;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, 𑀬𑀸𑀦𑀫𑀸𑀭𑀼𑀬𑁆𑀳 𑀧𑀓𑁆𑀓𑀫𑀺.

𑀢𑀢𑁄 𑀘𑀼𑀢𑁄 𑀲𑀸𑀫𑀡𑁂𑀭𑁄, 𑀕𑀘𑁆𑀙𑀫𑀸𑀦𑀸𑀬 𑀤𑁂𑀯𑀺𑀬𑀸;

𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀢𑀁 𑀚𑀸𑀦𑀺𑀬 𑀦𑀺𑀯𑀢𑁆𑀢𑀺𑀲𑀸.

𑀭𑀜𑁆𑀜𑁄 𑀢𑀁 𑀲𑀸𑀲𑀦𑀁 𑀤𑀢𑁆𑀯𑀸, 𑀭𑀜𑁆𑀜𑀸 𑀲𑀳 𑀧𑀼𑀦𑀸’𑀕𑀫𑀸;

𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸, 𑀲𑀸𑀫𑀡𑁂𑀭𑀲𑁆𑀲𑀼’𑀪𑁄𑀧𑀺𑀢𑁂.

𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑁂𑀡𑁂, 𑀯𑀲𑀦𑁆𑀢𑀸 𑀲𑀦𑁆𑀢𑀫𑀸𑀦𑀲𑀸;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀤𑀸.

𑀢𑀲𑁆𑀲𑁂’𑀯𑀁 𑀤𑁄𑀳𑀴𑁄 𑀆𑀳𑀺, 𑀫𑀳𑀸 𑀧𑀼𑀜𑁆𑀜𑀸𑀬 𑀫𑀸𑀢𑀼𑀬𑀸;

‘‘𑀉𑀲𑀪𑀫𑀢𑁆𑀢𑀁 𑀫𑀥𑀼𑀕𑀡𑁆𑀟𑀁, 𑀓𑀢𑁆𑀯𑀸 𑀉𑀲𑁆𑀲𑀻𑀲𑀓𑁂 𑀲𑀬𑀁.

𑀯𑀸𑀫𑁂𑀢𑀭𑁂𑀦 𑀧𑀲𑁆𑀲𑁂𑀦, 𑀦𑀺𑀧𑀦𑁆𑀦𑀸𑀲𑀬𑀦𑁂 𑀲𑀼𑀪𑁂;

𑀤𑁆𑀯𑀸𑀤𑀲𑀦𑁆𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀲𑁂𑀲𑀓𑀁.

𑀫𑀥𑀼𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸’𑀲𑀺, 𑀅𑀣 𑀏𑀴𑀸𑀭 𑀭𑀸𑀚𑀺𑀦𑁄;

𑀬𑁄𑀥𑀸𑀦 𑀫𑀕𑁆𑀕𑀬𑁄𑀥𑀲𑁆𑀲, 𑀲𑀻𑀲𑀘𑁆𑀙𑀺𑀦𑁆𑀦𑀸𑀲𑀺𑀤𑁂𑀯𑀦𑀁.

𑀢𑀲𑁆𑀲𑁂𑀯 𑀲𑀻𑀲𑁂 𑀞𑀢𑁆𑀯𑀸𑀦, 𑀧𑀸𑀢𑀼𑀜𑁆𑀘𑁂𑀯 𑀅𑀓𑀸𑀫𑀬𑀺;

𑀅𑀦𑀼𑀭𑀸𑀥 𑀧𑀼𑀭𑀲𑁆𑀲𑁂𑀯, 𑀉𑀧𑁆𑀧𑀮𑀓𑁆𑀔𑁂𑀢𑁆𑀢𑀢𑁄 𑀧𑀦.

𑀆𑀦𑀻𑀢𑀼𑀧𑁆𑀧𑀮𑀫𑀸𑀮𑀜𑁆𑀘, 𑀅𑀫𑀺𑀮𑀸 𑀢𑀁 𑀧𑀺𑀮𑀦𑁆𑀥𑀺𑀢𑀼𑀁;

𑀢𑀁 𑀤𑁂𑀯𑀻 𑀭𑀸𑀚𑀺𑀦𑁄 𑀆𑀳, 𑀦𑁂𑀫𑀺𑀢𑁆𑀢𑁂 𑀧𑀼𑀘𑁆𑀙𑀺 𑀪𑀽𑀧𑀢𑀺.

𑀢𑀁 𑀲𑀼𑀢𑁆𑀯𑀸 𑀆𑀳𑀼 𑀦𑁂𑀫𑀺𑀢𑁆𑀢𑀸, ‘‘𑀤𑁂𑀯𑀺𑀧𑀼𑀢𑁆𑀢𑁄 𑀦𑀺𑀖𑀸𑀢𑀺𑀬;

𑀤𑀫𑀺𑀴𑁂 𑀓𑀢𑁆𑀯𑁂’𑀓𑀭𑀚𑁆𑀚𑀁, 𑀲𑀸𑀲𑀦𑀁 𑀚𑁄𑀢𑀬𑀺𑀲𑁆𑀲𑀢𑀺’’.

𑀏𑀤𑀺𑀲𑀁 𑀫𑀥𑀼𑀕𑀡𑁆𑀟𑀁 𑀲𑁄, 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀈𑀤𑀺𑀲𑀺𑀁;

𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀭𑀸𑀚𑀸’’𑀢𑀺, 𑀖𑁄𑀲𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀕𑁄𑀝𑁆𑀞𑀲𑀫𑀼𑀤𑁆𑀤𑀯𑁂𑀮𑀦𑁆𑀢𑁂, 𑀫𑀥𑀼𑀧𑀼𑀡𑁆𑀡𑀁 𑀦𑀺𑀓𑀼𑀚𑁆𑀚𑀺𑀢𑀁;

𑀦𑀸𑀯𑀁 𑀜𑀢𑁆𑀯𑀸𑀦 𑀆𑀘𑀺𑀓𑁆𑀔𑀺, 𑀭𑀜𑁆𑀜𑁄 𑀚𑀦𑀧𑀤𑁂 𑀦𑀭𑁄.

𑀭𑀸𑀚𑀸 ¶ 𑀤𑁂𑀯𑀺𑀁 𑀢𑀳𑀺𑀁 𑀦𑁂𑀢𑁆𑀯𑀸, 𑀫𑀡𑁆𑀟𑀧𑀫𑁆𑀳𑀺 𑀲𑀼𑀲𑀗𑁆𑀔𑀢𑁂;

𑀬𑀣𑀺𑀘𑁆𑀙𑀺𑀣𑀁 𑀢𑀸𑀬 𑀫𑀥𑀼𑀁, 𑀧𑀭𑀺𑀪𑁄𑀕𑀫𑀓𑀸𑀭𑀬𑀺.

𑀇𑀢𑀭𑁂 𑀤𑁄𑀳𑀴𑁂 𑀢𑀲𑁆𑀲𑀸, 𑀲𑀫𑁆𑀧𑀸𑀤𑁂𑀢𑀼𑀁 𑀫𑀳𑀻𑀧𑀢𑀺;

𑀯𑁂𑀴𑀼𑀲𑀼𑀫𑀦 𑀦𑀸𑀫𑀁 𑀢𑀁, 𑀬𑁄𑀥𑀁 𑀢𑀢𑁆𑀣 𑀦𑀺𑀬𑁄𑀚𑀬𑀺.

𑀲𑁄’𑀦𑀼𑀭𑀸𑀥𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀗𑁆𑀕𑀮𑀯𑀸𑀚𑀺𑀦𑁄;

𑀕𑁄𑀧𑀓𑁂𑀦 𑀅𑀓𑀸 𑀫𑁂𑀢𑁆𑀢𑀺𑀁, 𑀢𑀲𑁆𑀲 𑀓𑀺𑀘𑁆𑀘𑀜𑁆𑀘 𑀲𑀩𑁆𑀩𑀤𑀸.

𑀢𑀲𑁆𑀲 𑀯𑀺𑀲𑁆𑀲𑀢𑁆𑀣 𑀢𑀁 𑀜𑀢𑁆𑀯𑀸, 𑀧𑀸𑀢𑁄𑀯 𑀉𑀧𑁆𑀧𑀮𑀸𑀦’𑀲𑀺𑀁;

𑀓𑀤𑀫𑁆𑀩𑀦𑀤𑀺𑀬𑀸 𑀢𑀻𑀭𑁂, 𑀞𑀧𑁂𑀢𑁆𑀯𑀸𑀦 𑀅𑀲𑀗𑁆𑀓𑀺𑀢𑁄.

𑀅𑀲𑁆𑀲𑀁 𑀦𑁂𑀢𑁆𑀯𑀸 𑀢𑀫𑀸𑀭𑀼𑀬𑁆𑀳, 𑀕𑀡𑁆𑀳𑀺𑀢𑁆𑀯𑀸𑀦 𑀉𑀧𑁆𑀧𑀮𑀸𑀦’𑀲𑀺𑀁;

𑀦𑀺𑀯𑁂𑀤𑀬𑀺𑀢𑁆𑀯𑀸𑀦 𑀅𑀢𑁆𑀢𑀸𑀦𑀁, 𑀅𑀲𑁆𑀲𑀯𑁂𑀕𑁂𑀦 𑀧𑀓𑁆𑀓𑀫𑀺.

𑀲𑀼𑀢𑁆𑀯𑀸 𑀭𑀸𑀚𑀸 𑀕𑀳𑁂𑀢𑀼𑀁 𑀢𑀁, 𑀫𑀳𑀸 𑀬𑁄𑀥𑀸𑀦𑀧𑁂𑀲𑀬𑀺;

𑀤𑀼𑀢𑀺𑀬𑀁 𑀲𑀫𑁆𑀫𑀣𑀁 𑀅𑀲𑁆𑀲𑀁, 𑀆𑀭𑀼𑀬𑁆𑀳 𑀲𑁄𑀦𑀼𑀥𑀸𑀧𑀺𑀢𑀁.

𑀲𑁄 𑀕𑀼𑀫𑁆𑀩𑀦𑀺𑀲𑁆𑀲𑀺𑀢𑁄 𑀅𑀲𑁆𑀲-𑀧𑀺𑀝𑁆𑀞𑁂𑀬𑁂𑀯 𑀦𑀺𑀲𑀻𑀤𑀺𑀬;

𑀏𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀢𑀲𑁆𑀲, 𑀉𑀩𑁆𑀩𑀬𑁆𑀳𑀸’𑀲𑀺𑀁 𑀧𑀲𑀸𑀭𑀬𑀺.

𑀅𑀲𑁆𑀲𑀯𑁂𑀕𑁂𑀦𑀬𑀦𑁆𑀢𑀲𑁆𑀲, 𑀲𑀻𑀲𑀁 𑀙𑀺𑀚𑁆𑀚 𑀉𑀪𑁄𑀳𑀬𑁂;

𑀲𑀻𑀲𑀜𑁆𑀘𑀸’𑀤𑀸𑀬 𑀲𑀸𑀬𑀁 𑀲𑁄, 𑀫𑀳𑀸𑀕𑀸𑀫𑀫𑀼𑀧𑀸𑀕𑀫𑀺.

𑀤𑁄𑀳𑀴𑁂 𑀢𑁂 𑀘 𑀲𑀸 𑀤𑁂𑀯𑀻, 𑀧𑀭𑀺𑀪𑀼𑀜𑁆𑀚𑀺 𑀬𑀣𑀸𑀭𑀼𑀘𑀺;

𑀭𑀸𑀚𑀸 𑀬𑁄𑀥𑀲𑁆𑀲 𑀲𑀓𑁆𑀓𑀸𑀭𑀁, 𑀓𑀸𑀭𑀸𑀧𑁂𑀲𑀺 𑀬𑀣𑀸𑀭𑀳𑀁.

𑀲𑀸 𑀤𑁂𑀯𑀻 𑀲𑀫𑀬𑁂 𑀥𑀜𑁆𑀜𑀁, 𑀚𑀦𑀬𑀻 𑀧𑀼𑀢𑁆𑀢𑀫𑀼𑀢𑁆𑀢𑀫𑀁;

𑀫𑀳𑀸𑀭𑀸𑀚𑀓𑀼𑀮𑁂 𑀢𑀲𑁆𑀫𑀺𑀁, 𑀆𑀦𑀦𑁆𑀤𑁄 𑀘 𑀫𑀳𑀸 𑀅𑀳𑀼.

𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀢𑀤𑀳𑁂𑀯 𑀉𑀧𑀸𑀕𑀫𑀼𑀁;

𑀦𑀸𑀦𑀸𑀭𑀢𑀦𑀲𑀫𑁆𑀧𑀼𑀡𑁆𑀡𑀸, 𑀲𑀢𑁆𑀢𑀦𑀸𑀯𑀸 𑀢𑀢𑁄 𑀢𑀢𑁄.

𑀢𑀲𑁆𑀲𑁂𑀯 𑀧𑀼𑀜𑁆𑀜𑀢𑁂𑀚𑁂𑀦, 𑀙𑀤𑁆𑀤𑀦𑁆𑀢𑀓𑀼𑀮𑀢𑁄 𑀓𑀭𑀻;

𑀳𑀢𑁆𑀣𑀺𑀘𑁆𑀙𑀸𑀧𑀁 𑀆𑀳𑀭𑀺𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀇𑀥 𑀧𑀓𑁆𑀓𑀫𑀺.

𑀢𑀁 𑀢𑀺𑀢𑁆𑀣𑀲𑀭𑀢𑀻𑀭𑀫𑁆𑀳𑀺, 𑀤𑀺𑀲𑁆𑀯𑀸 𑀕𑀼𑀫𑁆𑀩𑀦𑁆𑀢𑀭𑁂 𑀞𑀺𑀢𑀁;

𑀓𑀡𑁆𑀟𑀼𑀮𑀯𑁆𑀳𑁄 𑀩𑀸𑀮𑀺𑀲𑀺𑀓𑁄, 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺 𑀢𑀸𑀯𑀤𑁂.

𑀧𑁂𑀲𑁂𑀢𑁆𑀯𑀸’𑀘𑀭𑀺𑀬𑁂 𑀭𑀸𑀚𑀸, 𑀢𑀫𑀸𑀡𑀸𑀧𑀺𑀬 𑀧𑁄𑀲𑀬𑀺;

𑀓𑀡𑁆𑀟𑀼𑀮𑁄 𑀇𑀢𑀺 𑀜𑀸𑀬𑀺𑀢𑁆𑀣, 𑀤𑀺𑀝𑁆𑀞𑀢𑁆𑀢𑀸 𑀓𑀡𑁆𑀟𑀼𑀮𑁂𑀦 𑀲𑁄.

‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀤𑀻𑀦𑀁 ¶ , 𑀧𑀼𑀡𑁆𑀡𑀸 𑀦𑀸𑀯𑀸 𑀇𑀥𑀸𑀕𑀢𑀸’’;

𑀇𑀢𑀺 𑀭𑀜𑁆𑀜𑁄 𑀦𑀺𑀯𑁂𑀤𑀲𑀼𑀁, 𑀭𑀸𑀚𑀸 𑀢𑀸𑀦𑀸’𑀳𑀭𑀸𑀧𑀬𑀺.

𑀧𑀼𑀢𑁆𑀢𑀲𑁆𑀲 𑀦𑀸𑀫𑀓𑀭𑀡𑁂, 𑀫𑀗𑁆𑀕𑀮𑀫𑁆𑀳𑀺 𑀫𑀳𑀻𑀧𑀢𑀺;

𑀤𑁆𑀯𑀸𑀤𑀲 𑀲𑀳𑀲𑁆𑀲𑀲𑀗𑁆𑀔𑀁, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑀺𑀬.

𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀬𑀤𑀺𑀫𑁂, 𑀧𑀼𑀢𑁆𑀢𑁄 𑀮𑀁𑀓𑀸𑀢𑀮𑁂’𑀔𑀺𑀮𑁂;

𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥-𑀲𑀸𑀲𑀦𑀁 𑀚𑁄𑀢𑀬𑀺𑀲𑁆𑀲𑀢𑀺.

𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀜𑁆𑀘, 𑀪𑀺𑀓𑁆𑀔𑀯𑁄 𑀧𑀯𑀺𑀲𑀦𑁆𑀢𑀼 𑀘;

𑀲𑀩𑁆𑀩𑁂 𑀢𑁂 𑀉𑀤𑁆𑀥𑀧𑀢𑁆𑀢𑀜𑁆𑀘, 𑀘𑀻𑀯𑀭𑀁 𑀧𑀸𑀭𑀧𑀦𑁆𑀢𑀼 𑀘.

𑀧𑀞𑀫𑀁 𑀤𑀓𑁆𑀔𑀺𑀡𑀁 𑀧𑀸𑀤𑀁, 𑀉𑀫𑁆𑀫𑀸𑀭𑀦𑁆𑀢𑁄 𑀞𑀧𑁂𑀦𑁆𑀢𑀼 𑀘;

𑀏𑀓𑀘𑁆𑀙𑀢𑁆𑀢𑀬𑀼𑀢𑀁 𑀥𑀫𑁆𑀫-𑀓𑀭𑀡𑀁 𑀦𑀻𑀳𑀭𑀦𑁆𑀢𑀼 𑀘.

𑀕𑁄𑀢𑀫𑁄 𑀦𑀸𑀫 𑀣𑁂𑀭𑁄 𑀘, 𑀧𑀢𑀺𑀕𑁆𑀕𑀡𑁆𑀳𑀸𑀢𑀼 𑀧𑀼𑀢𑁆𑀢𑀓𑀁;

𑀲𑁄 𑀘 𑀲𑀭𑀡𑀲𑀺𑀓𑁆𑀔𑀸 𑀬𑁄, 𑀤𑁂𑀢𑀼’’ 𑀲𑀩𑁆𑀩𑀁 𑀢𑀣𑀸 𑀅𑀳𑀼.

𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸𑀦, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀻𑀧𑀢𑀺;

𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀧𑀸𑀬𑀸𑀲𑀁, 𑀦𑀸𑀫𑀁 𑀧𑀼𑀢𑁆𑀢𑀲𑁆𑀲 𑀓𑀸𑀭𑀬𑀺.

𑀫𑀳𑀸𑀕𑀸𑀫𑁂 𑀦𑀸𑀬𑀓𑀢𑁆𑀢𑀁, 𑀧𑀺𑀢𑀼𑀦𑀸𑀫𑀜𑁆𑀘 𑀏𑀓𑀢𑁄;

𑀉𑀪𑁄 𑀓𑀢𑁆𑀯𑀸𑀦 𑀏𑀓𑀚𑁆𑀛𑀁, 𑀕𑀸𑀫𑀡𑀺𑀅𑀪𑀬𑁄 𑀇𑀢𑀺.

𑀫𑀳𑀸𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, 𑀦𑀯𑀫𑁂 𑀤𑀺𑀯𑀲𑁂 𑀢𑀢𑁄;

𑀲𑀗𑁆𑀕𑀫𑀁 𑀤𑁂𑀯𑀺𑀬𑀸 𑀓𑀸𑀲𑀺, 𑀢𑁂𑀦 𑀕𑀩𑁆𑀪𑀫𑀕𑀡𑁆𑀳𑀺 𑀲𑀸.

𑀓𑀸𑀮𑁂 𑀚𑀸𑀢𑀁 𑀲𑀼𑀢𑀁 𑀭𑀸𑀚𑀸, 𑀢𑀺𑀲𑁆𑀲𑀦𑀸𑀫𑀁 𑀅𑀓𑀸𑀭𑀬𑀺;

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀉𑀪𑀢𑁄 𑀯𑀟𑁆𑀠𑀺𑀁𑀲𑀼 𑀤𑀸𑀭𑀓𑀸.

𑀲𑀺𑀢𑁆𑀣𑀧𑁆𑀧𑀯𑁂𑀲𑀫𑀗𑁆𑀕𑀮-𑀓𑀸𑀮𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀤𑀭𑁄;

𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀦𑀁, 𑀤𑀸𑀧𑀬𑀺𑀢𑁆𑀯𑀸𑀦 𑀧𑀸𑀬𑀲𑀁.

𑀢𑁂𑀳𑀺 𑀉𑀧𑀟𑁆𑀠𑁂 𑀪𑀼𑀢𑁆𑀢𑀫𑁆𑀳𑀺, 𑀕𑀳𑁂𑀢𑁆𑀯𑀸 𑀣𑁄𑀓𑀣𑁄𑀓𑀓𑀁;

𑀲𑁄𑀯𑀡𑁆𑀡𑀲𑀭𑀓𑁂𑀦𑁂’𑀲𑀁, 𑀤𑁂𑀯𑀺𑀬𑀸 𑀲𑀳 𑀪𑀽𑀧𑀢𑀺.

‘‘𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁 𑀢𑀼𑀫𑁆𑀳𑁂, 𑀬𑀤𑀺 𑀙𑀟𑁆𑀟𑁂𑀣 𑀧𑀼𑀢𑁆𑀢𑀓𑀸;

𑀫𑀸 𑀚𑀻𑀭𑀢𑀼 𑀓𑀼𑀘𑁆𑀙𑀺𑀕𑀢𑀁, 𑀇𑀤𑀁 𑀯𑁄’’𑀢𑀺 𑀅𑀧𑀸𑀧𑀬𑀺.

𑀯𑀺𑀜𑁆𑀜𑀸𑀬 𑀪𑀸𑀲𑀺𑀢𑀢𑁆𑀣𑀁 𑀢𑁂, 𑀉𑀪𑁄 𑀭𑀸𑀚𑀓𑀼𑀫𑀸𑀭𑀓𑀸;

𑀧𑀸𑀬𑀸𑀲𑀁 𑀢𑀁 𑀅𑀪𑀼𑀜𑁆𑀚𑀺𑀁𑀲𑀼, 𑀢𑀼𑀝𑁆𑀞𑀘𑀺𑀢𑁆𑀢𑀸’𑀫𑀢𑀁 𑀯𑀺𑀬.

𑀤𑀲 𑀤𑁆𑀯𑀸𑀤𑀲𑀯𑀲𑁆𑀲𑁂𑀲𑀼, 𑀢𑁂𑀲𑀼 𑀯𑀻𑀫𑀁𑀲𑀦𑀢𑁆𑀣𑀺𑀓𑁄;

𑀢𑀣𑁂𑀯 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸, 𑀢𑁂𑀲𑀁 𑀉𑀘𑁆𑀙𑀺𑀝𑁆𑀞𑀫𑁄𑀤𑀦𑀁.

𑀕𑀸𑀳𑀬𑀺𑀢𑁆𑀯𑀸 ¶ 𑀢𑀝𑁆𑀝𑀓𑁂𑀦, 𑀞𑀧𑀸𑀧𑁂𑀢𑁆𑀯𑀸 𑀢𑀤𑀦𑁆𑀢𑀺𑀓𑁂;

𑀢𑀺𑀪𑀸𑀕𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀇𑀥 𑀫𑀸𑀳 𑀫𑀳𑀻𑀧𑀢𑀺.

‘‘𑀓𑀼𑀮𑀤𑁂𑀯𑀢𑀸𑀦𑀁 𑀦𑁄 𑀢𑀸𑀢𑀸, 𑀪𑀺𑀓𑁆𑀔𑀽𑀦𑀁 𑀯𑀺𑀫𑀼𑀔𑀸 𑀫𑀬𑀁;

𑀦 𑀳𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀪𑀸𑀕𑀁 𑀪𑀼𑀜𑁆𑀚𑀣𑀺’𑀫𑀦𑁆𑀢𑀺 𑀘.

‘‘𑀤𑁆𑀯𑁂 𑀪𑀸𑀢𑀭𑁄 𑀫𑀬𑀁 𑀦𑀺𑀘𑁆𑀘𑀁, 𑀅𑀜𑁆𑀜𑀫𑀜𑁆𑀜𑀫𑀤𑀽𑀪𑀓𑀸;

𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀪𑀸𑀕𑀁 𑀪𑀼𑀜𑁆𑀚𑀺𑀣𑀺’𑀫𑀦𑁆𑀢𑀺 𑀘.

𑀅𑀫𑀢𑀁 𑀯𑀺𑀬 𑀪𑀼𑀜𑁆𑀚𑀺𑀁𑀲𑀼, 𑀢𑁂 𑀤𑁆𑀯𑁂 𑀪𑀸𑀕𑁂 𑀉𑀪𑁄𑀧𑀺 𑀘;

‘‘𑀦 𑀬𑀼𑀚𑁆𑀛𑀺𑀲𑁆𑀲𑀸𑀫 𑀤𑀫𑀺𑀴𑁂𑀳𑀺’’, 𑀇𑀢𑀺 𑀪𑀼𑀜𑁆𑀚𑀣𑀺’𑀫𑀁 𑀇𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀢𑀼 𑀢𑀺𑀲𑁆𑀲𑁄 𑀲𑁄, 𑀧𑀸𑀡𑀺𑀦𑀸 𑀔𑀺𑀧𑀺 𑀪𑁄𑀚𑀦𑀁;

𑀕𑀸𑀫𑀡𑀺𑀪𑀢𑁆𑀢𑀧𑀺𑀡𑁆𑀟𑀁 𑀢𑀼, 𑀔𑀺𑀧𑀺𑀢𑁆𑀯𑀸 𑀲𑀬𑀦𑀁 𑀕𑀢𑁄.

𑀲𑀁𑀓𑀼𑀘𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀁, 𑀦𑀺𑀧𑀚𑁆𑀚𑀺 𑀲𑀬𑁂𑀦 𑀲𑀬𑀁;

𑀤𑁂𑀯𑀻 𑀕𑀦𑁆𑀢𑁆𑀯𑀸 𑀢𑁄𑀲𑀬𑀦𑁆𑀢𑀻, 𑀕𑀸𑀫𑀡𑀺𑀁 𑀏𑀢𑀤𑀩𑁆𑀭𑀯𑀺.

𑀧𑀲𑀸𑀭𑀺𑀢𑀗𑁆𑀕𑁄 𑀲𑀬𑀦𑁂, 𑀓𑀺𑀁 𑀦𑀲𑁂𑀲𑀺 𑀲𑀼𑀔𑀁 𑀲𑀼𑀢;

‘‘𑀕𑀗𑁆𑀕𑀸𑀧𑀸𑀭𑀫𑁆𑀳𑀺 𑀤𑀫𑀻𑀴𑀸, 𑀇𑀢𑁄 𑀕𑁄𑀝𑁆𑀞𑀫𑀳𑁄𑀤𑀥𑀺.

𑀓𑀣𑀁 𑀧𑀲𑀸𑀭𑀺𑀢𑀗𑁆𑀕𑁄’𑀳𑀁, 𑀦𑀺𑀧𑀚𑁆𑀚𑀸𑀫𑀻’𑀢𑀺 𑀲𑁄 𑀩𑁆𑀭𑀯𑀺;

𑀲𑀼𑀢𑁆𑀯𑀸𑀦 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁, 𑀢𑀼𑀡𑁆𑀳𑀻 𑀆𑀲𑀺 𑀫𑀳𑀻𑀧𑀢𑀺.

𑀲𑁄 𑀓𑀫𑁂𑀦𑀸’𑀪𑀺𑀯𑀟𑁆𑀠𑀦𑁆𑀢𑁄, 𑀅𑀳𑀼 𑀲𑁄𑀴𑀲𑀯𑀲𑁆𑀲𑀺𑀓𑁄;

𑀧𑀼𑀜𑁆𑀜𑀯𑀸 𑀬𑀲𑀯𑀸 𑀥𑀻𑀫𑀸, 𑀢𑁂𑀚𑁄 𑀩𑀮𑀧𑀭𑀓𑁆𑀓𑀫𑁄.

𑀘𑀮𑀸𑀘𑀮𑀸𑀬𑀁 𑀕𑀢𑀺𑀬𑀜𑁆𑀳𑀺 𑀧𑀸𑀡𑀺𑀦𑁄,

𑀉𑀧𑁂𑀦𑁆𑀢𑀺 𑀧𑀼𑀜𑁆𑀜𑁂𑀦 𑀬𑀣𑀸𑀭𑀼𑀘𑀺𑀁 𑀕𑀢𑀺𑀁;

𑀇𑀢𑀻𑀢𑀺 𑀫𑀦𑁆𑀢𑁂𑀢𑁆𑀯𑀸 𑀲𑀢𑀢𑀁 𑀫𑀳𑀸𑀤𑀭𑁄,

𑀪𑀯𑁂𑀬𑁆𑀬 𑀧𑀼𑀜𑁆𑀜𑀧𑀘𑀬𑀫𑁆𑀳𑀺 𑀩𑀼𑀤𑁆𑀥𑀺𑀫𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀦𑀦𑁆𑀤𑀻𑀫𑀺𑀢𑁆𑀢𑁄 𑀲𑀼𑀭𑀦𑀺𑀫𑀺𑀮𑁄, 𑀫𑀳𑀸𑀲𑁄𑀡𑁄 𑀕𑁄𑀝𑁆𑀞𑀬𑀺𑀫𑁆𑀩𑀭𑁄;

𑀣𑁂𑀭𑀧𑀼𑀢𑁆𑀢𑀸𑀪𑀬𑁄 𑀪𑀭𑀡𑁄, 𑀯𑁂𑀴𑀼𑀲𑀼𑀫𑀦𑁄 𑀢𑀣𑁂𑀯 𑀘.

𑀔𑀜𑁆𑀚𑀤𑁂𑀯𑁄 𑀨𑀼𑀲𑁆𑀲𑀤𑁂𑀯𑁄, 𑀮𑀪𑀺𑀬𑁆𑀬 𑀯𑀲𑀪𑁄𑀧𑀺 𑀘;

𑀏𑀢𑁂 𑀤𑀲 𑀫𑀳𑀸𑀬𑁄𑀥𑀸, 𑀢𑀲𑁆𑀲𑀸’𑀳𑁂𑀲𑀼𑀁 𑀫𑀳𑀩𑁆𑀩𑀮𑀸.

𑀅𑀳𑀼 𑀏𑀴𑀸𑀭𑀭𑀸𑀚𑀲𑁆𑀲, 𑀫𑀺𑀢𑁆𑀢𑁄 𑀦𑀸𑀫 𑀘𑀫𑀽𑀧𑀢𑀺;

𑀢𑀲𑁆𑀲 𑀓𑀫𑁆𑀫𑀦𑁆𑀢𑀕𑀸𑀫𑀫𑁆𑀳𑀺, 𑀧𑀸𑀘𑀻𑀦𑀔𑀡𑁆𑀟𑀭𑀸𑀚𑀺𑀬𑀸.

𑀘𑀺𑀢𑁆𑀢𑀧𑀩𑁆𑀩𑀢𑀲𑀸𑀫𑀦𑁆𑀢𑀸, 𑀅𑀳𑀼 𑀪𑀕𑀺𑀦𑀺𑀬𑀸 𑀲𑀼𑀢𑁄;

𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄, 𑀫𑀸𑀢𑀼𑀮𑀲𑁆𑀲𑁂𑀯 𑀦𑀸𑀫𑀢𑁄.

𑀤𑀽𑀭𑀫𑁆𑀧𑀺 𑀧𑀭𑀺𑀲𑀧𑁆𑀧𑀦𑁆𑀢𑀁, 𑀤𑀳𑀭𑀁 𑀢𑀁 𑀓𑀼𑀫𑀸𑀭𑀓𑀁;

𑀆𑀩𑀚𑁆𑀛 𑀦𑀦𑁆𑀤𑀺𑀬𑀸 𑀓𑀝𑁆𑀬𑀁, 𑀦𑀺𑀲𑀤𑀫𑁆𑀳𑀺 𑀅𑀩𑀦𑁆𑀥𑀺𑀲𑀼.

𑀦𑀺𑀲𑀤𑀁 𑀓𑀟𑁆𑀠𑀢𑁄 𑀢𑀲𑁆𑀲, 𑀪𑀽𑀫𑀺𑀬𑀁 𑀧𑀭𑀺𑀲𑀧𑁆𑀧𑀢𑁄;

𑀉𑀫𑁆𑀫𑀸𑀭𑀸𑀢𑀺𑀓𑁆𑀓𑀫𑁂 𑀦𑀦𑁆𑀤𑀺, 𑀲𑀸 𑀙𑀚𑁆𑀚𑀢𑀺 𑀬𑀢𑁄 𑀢𑀢𑁄.

𑀦𑀦𑁆𑀤𑀺𑀫𑀺𑀢𑁆𑀢𑁄𑀢𑀺 𑀜𑀸𑀬𑀺𑀢𑁆𑀣, 𑀤𑀲𑀦𑀸𑀕𑀩𑀮𑁄 𑀅𑀳𑀼;

𑀯𑀼𑀤𑁆𑀥𑁄 𑀦𑀕𑀭𑀫𑀸𑀕𑀫𑁆𑀫, 𑀲𑁄 𑀉𑀧𑀝𑁆𑀞𑀸𑀲𑀺 𑀫𑀸𑀢𑀼𑀮𑀁.

𑀣𑀽𑀧𑀸𑀤𑀻𑀲𑀼 𑀅𑀲𑀓𑁆𑀓𑀸𑀭𑀁, 𑀓𑀭𑁄𑀦𑁆𑀢𑁄 𑀤𑀫𑀺𑀴𑁂 𑀢𑀤𑀸;

𑀊𑀭𑀼𑀁 𑀅𑀓𑁆𑀓𑀫𑁆𑀫𑀧𑀸𑀤𑁂𑀦, 𑀳𑀢𑁆𑀣𑁂𑀦 𑀇𑀢𑀭𑀁 𑀢𑀼𑀲𑁄.

𑀕𑀳𑁂𑀢𑁆𑀯𑀸 𑀲𑀫𑁆𑀧𑀤𑀸𑀮𑁂𑀢𑁆𑀯𑀸, 𑀩𑀳𑀺𑀓𑁆𑀔𑀧𑀢𑀺𑀁 𑀣𑀸𑀫𑀯𑀸;

𑀤𑁂𑀯𑀸 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀺, 𑀢𑁂𑀦 𑀔𑀺𑀢𑁆𑀢𑀁 𑀓𑀴𑁂𑀯𑀭𑀁.

𑀤𑀫𑀺𑀴𑀸𑀦𑀁 𑀔𑀬𑀁 𑀤𑀺𑀲𑁆𑀯𑀸, 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁 𑀲𑀼𑀢𑀁;

‘‘𑀲𑀳𑁄𑀝𑁆𑀝𑀁 𑀕𑀡𑁆𑀳𑀣𑁂𑀢𑀁’’𑀢𑀺, 𑀯𑀼𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑀼𑀁.

𑀘𑀺𑀦𑁆𑀢𑁂𑀲𑀺 ¶ 𑀦𑀦𑁆𑀤𑀺𑀫𑀺𑀢𑁆𑀢𑁄 𑀲𑁄, ‘‘𑀏𑀯𑀫𑁆𑀧𑀺 𑀓𑀭𑀢𑁄 𑀫𑀫;

𑀚𑀦𑀓𑁆𑀔𑀬𑁄 𑀓𑁂𑀯𑀮𑀜𑁆𑀳𑀺, 𑀦𑀢𑁆𑀣𑀺 𑀲𑀸𑀲𑀦𑀚𑁄𑀢𑀦𑀁.

𑀭𑁄𑀳𑀡𑁂 𑀔𑀢𑁆𑀢𑀺𑀬𑀸 𑀲𑀦𑁆𑀢𑀺, 𑀧𑀲𑀦𑁆𑀦𑀁 𑀭𑀢𑀦𑀢𑁆𑀢𑀬𑁂;

𑀢𑀢𑁆𑀣 𑀓𑀢𑁆𑀯𑀸 𑀭𑀸𑀚𑀲𑁂𑀯𑀁, 𑀕𑀡𑁆𑀳𑀺𑀢𑁆𑀯𑀸 𑀤𑀫𑀺𑀴𑁂’𑀔𑀺𑀮𑁂.

𑀭𑀚𑁆𑀚𑀁 𑀤𑀢𑁆𑀯𑀸 𑀔𑀢𑁆𑀢𑀺𑀬𑀸𑀦𑀁, 𑀚𑁄𑀢𑁂𑀲𑁆𑀲𑀁 𑀩𑀼𑀤𑁆𑀥𑀲𑀸𑀲𑀦𑀁’’;

𑀇𑀢𑀺 𑀕𑀦𑁆𑀢𑁆𑀯𑀸 𑀕𑀸𑀫𑀡𑀺𑀲𑁆𑀲, 𑀢𑀁 𑀓𑀼𑀫𑀸𑀭𑀲𑁆𑀲 𑀲𑀸𑀯𑀬𑀺.

𑀫𑀸𑀢𑀼𑀬𑀸 𑀫𑀦𑁆𑀢𑀬𑀺𑀢𑁆𑀯𑀸 𑀲𑁄, 𑀲𑀓𑁆𑀓𑀸𑀭𑀁 𑀢𑀲𑁆𑀲 𑀓𑀸𑀭𑀬𑀺;

𑀲𑀓𑁆𑀓𑀢𑁄 𑀦𑀦𑁆𑀤𑀺𑀫𑀺𑀢𑁆𑀢𑁄 𑀲𑁄, 𑀬𑁄𑀥𑁄 𑀯𑀲𑀺 𑀢𑀤𑀦𑁆𑀢𑀺𑀓𑁂.

𑀓𑀸𑀓𑀯𑀡𑁆𑀡𑁄 𑀢𑀺𑀲𑁆𑀲𑀭𑀸𑀚𑀸, 𑀯𑀸𑀭𑁂𑀢𑀼𑀁 𑀤𑀫𑀺𑀴𑀺𑀲𑀤𑀸;

𑀫𑀳𑀸𑀕𑀗𑁆𑀕𑀸𑀬 𑀢𑀺𑀢𑁆𑀣𑁂𑀲𑀼, 𑀭𑀓𑁆𑀔𑀁 𑀲𑀩𑁆𑀩𑁂𑀲𑀼 𑀓𑀸𑀭𑀬𑀺.

𑀅𑀳𑀼 𑀤𑀻𑀖𑀸𑀪𑀬𑁄 𑀦𑀸𑀫, 𑀭𑀜𑁆𑀜𑁄’𑀜𑁆𑀜 𑀪𑀭𑀺𑀬𑀸 𑀲𑀼𑀢𑁄;

𑀓𑀘𑁆𑀙𑀓𑀢𑀺𑀢𑁆𑀣𑁂 𑀕𑀗𑁆𑀕𑀸𑀬, 𑀢𑁂𑀦 𑀭𑀓𑁆𑀔𑀫𑀓𑀸𑀭𑀬𑀺.

𑀲𑁄 𑀭𑀓𑁆𑀔𑀸𑀓𑀭𑀡𑀢𑁆𑀣𑀸𑀬, 𑀲𑀫𑀦𑁆𑀢𑀸 𑀬𑁄𑀚𑀦𑀤𑁆𑀯𑀬𑁂;

𑀫𑀳𑀸𑀓𑀼𑀮𑀫𑁆𑀳𑀸 𑀏𑀓𑁂𑀓𑀁, 𑀧𑀼𑀢𑁆𑀢𑀁 𑀆𑀡𑀸𑀧𑀬𑀺 𑀢𑀳𑀺𑀁.

𑀓𑁄𑀝𑁆𑀞𑀺𑀯𑀸𑀮𑁂 𑀚𑀦𑀧𑀤𑁂, 𑀕𑀸𑀫𑁂 𑀔𑀡𑁆𑀟𑀓𑀯𑀺𑀝𑁆𑀞𑀺𑀓𑁂;

𑀲𑀢𑁆𑀢𑀧𑀼𑀢𑁆𑀢𑁄 𑀓𑀼𑀮𑀧𑀢𑀺, 𑀲𑀗𑁆𑀖𑁄 𑀦𑀸𑀫𑀸’𑀲𑀺 𑀇𑀲𑁆𑀲𑀭𑁄.

𑀢𑀲𑁆𑀲𑀸𑀧𑀺 𑀥𑀽𑀢𑀁 𑀧𑀸𑀳𑁂𑀲𑀺, 𑀭𑀸𑀚𑀧𑀼𑀢𑁆𑀢𑁄 𑀲𑀼𑀢𑀢𑁆𑀣𑀺𑀓𑁄;

𑀲𑀢𑁆𑀢𑀫𑁄 𑀦𑀺𑀫𑀺𑀮𑁄 𑀦𑀸𑀫, 𑀤𑀲𑀳𑀢𑁆𑀣𑀺𑀩𑀮𑁄 𑀲𑀼𑀢𑁄.

𑀢𑀲𑁆𑀲 𑀅𑀓𑀫𑁆𑀫𑀲𑀻𑀮𑀢𑁆𑀢𑀸, 𑀔𑀻𑀬𑀦𑁆𑀢𑀸 𑀙𑀧𑀺 𑀪𑀸𑀢𑀭𑁄;

𑀭𑁄𑀘𑀬𑀼𑀁 𑀢𑀲𑁆𑀲 𑀕𑀫𑀦𑀁, 𑀦 𑀢𑀼 𑀫𑀸𑀢𑀸 𑀧𑀺𑀢𑀸 𑀧𑀦.

𑀓𑀼𑀚𑁆𑀛𑀺𑀢𑁆𑀯𑀸 𑀲𑁂𑀲𑀪𑀸𑀢𑀽𑀦𑀁, 𑀧𑀸𑀢𑁄𑀬𑁂𑀯 𑀢𑀺𑀬𑁄𑀚𑀦𑀁;

𑀕𑀦𑁆𑀢𑁆𑀯𑀸 𑀲𑀼𑀭𑀕𑁆𑀕𑀫𑁂𑀬𑁂𑀯, 𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀺𑀲𑁄.

𑀲𑁄 𑀢𑀁 𑀯𑀺𑀫𑀁𑀲𑀦𑀢𑁆𑀣𑀸𑀬, 𑀤𑀽𑀭𑁂 𑀓𑀺𑀘𑁆𑀘𑁂 𑀦𑀺𑀬𑁄𑀚𑀬𑀺;

𑀘𑁂𑀢𑀺𑀬 𑀧𑀩𑁆𑀩𑀢𑀸 𑀲𑀦𑁆𑀦𑁂, 𑀤𑁆𑀯𑀸𑀭 𑀫𑀡𑁆𑀟𑀮𑀕𑀸𑀫𑀓𑁂.

𑀩𑁆𑀭𑀸𑀳𑁆𑀫𑀡𑁄 𑀓𑀼𑀡𑁆𑀟𑀮𑁄 𑀦𑀸𑀫, 𑀯𑀺𑀚𑁆𑀚 𑀢𑁂 𑀫𑁂 𑀲𑀳𑀸𑀬𑀓𑁄;

𑀲𑀫𑀼𑀤𑁆𑀤𑀧𑀸𑀭𑁂 𑀪𑀡𑁆𑀟𑀸𑀦𑀺, 𑀢𑀲𑁆𑀲 𑀯𑀺𑀚𑁆𑀚𑀦𑁆𑀢𑀺 𑀲𑀦𑁆𑀢𑀺𑀓𑁂.

𑀕𑀦𑁆𑀢𑁆𑀯𑀸 𑀢𑀁 𑀢𑁂𑀦 𑀤𑀺𑀦𑁆𑀦𑀸𑀦𑀺, 𑀪𑀡𑁆𑀟𑀓𑀸𑀦𑀺 𑀇𑀥𑀸’𑀳𑀭;

𑀇𑀢𑀺 𑀯𑀢𑁆𑀯𑀸𑀦 𑀪𑁄𑀚𑁂𑀢𑁆𑀯𑀸, 𑀮𑁂𑀔𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀬𑀺.

𑀢𑀢𑁄 𑀦𑀯 𑀬𑁄𑀚𑀦𑀜𑁆𑀳𑀺, 𑀅𑀦𑀼𑀭𑀸𑀥𑀧𑀼𑀭𑀁 𑀇𑀤𑀁;

𑀧𑀼𑀩𑁆𑀩𑀡𑁆𑀳𑁂𑀬𑁂𑀯 𑀕𑀦𑁆𑀢𑁆𑀯𑀸𑀦, 𑀲𑁄 𑀢𑀁 𑀩𑁆𑀭𑀸𑀳𑁆𑀫𑀡 𑀫𑀤𑁆𑀤𑀲.

‘‘𑀦𑁆𑀳𑀢𑁆𑀯𑀸 ¶ 𑀯𑀸𑀧𑀺𑀬𑀁 𑀢𑀸𑀢, 𑀏𑀳𑀻’’𑀢𑀺 𑀆𑀳 𑀩𑁆𑀭𑀸𑀳𑁆𑀫𑀡𑁄;

𑀇𑀥𑀸’𑀦𑀸𑀕𑀢 𑀧𑀼𑀩𑁆𑀩𑀢𑁆𑀢𑀸, 𑀦𑁆𑀳𑀢𑁆𑀯𑀸𑀦 𑀢𑀺𑀲𑁆𑀲𑀯𑀸𑀧𑀺𑀬𑀁.

𑀫𑀳𑀸𑀩𑁄𑀥𑀺𑀜𑁆𑀘 𑀧𑀽𑀚𑁂𑀢𑁆𑀯𑀸, 𑀣𑀽𑀧𑀸𑀭𑀸𑀫𑁂 𑀘 𑀘𑁂𑀢𑀺𑀬𑀁;

𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀧𑀲𑁆𑀲𑀺𑀢𑁆𑀯𑀸 𑀲𑀓𑀮𑀁 𑀧𑀼𑀭𑀁.

𑀆𑀧𑀡𑀸 𑀕𑀦𑁆𑀥𑀫𑀸𑀤𑀸𑀬, 𑀉𑀢𑁆𑀢𑀭 𑀤𑁆𑀯𑀸𑀭𑀢𑁄 𑀢𑀢𑁄;

𑀦𑀺𑀓𑁆𑀔𑀫𑁆𑀫𑀼𑀧𑁆𑀧𑀮 𑀔𑁂𑀢𑁆𑀢𑀫𑁆𑀳𑀸, 𑀕𑀳𑁂𑀢𑁆𑀯𑀸 𑀉𑀧𑁆𑀧𑀮𑀸𑀦𑀺 𑀘.

𑀉𑀧𑀸𑀕𑀫𑀺 𑀩𑁆𑀭𑀸𑀳𑁆𑀫𑀡𑀁 𑀢𑀁, 𑀧𑀼𑀝𑁆𑀞𑁄 𑀢𑁂𑀦𑀸’𑀳 𑀲𑁄 𑀕𑀢𑀺𑀁;

𑀲𑀼𑀢𑁆𑀯𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲, 𑀧𑀼𑀩𑁆𑀩𑀸𑀕𑀫𑀫𑀺𑀥𑀸𑀕𑀫𑀁.

𑀯𑀺𑀫𑁆𑀳𑀺𑀢𑁄 𑀘𑀺𑀦𑁆𑀢𑀬𑀻 𑀏𑀯𑀁, ‘‘𑀧𑀼𑀭𑀺𑀲𑀸 𑀚𑀸𑀦𑀻𑀬𑁄 𑀅𑀬𑀁;

𑀲𑀘𑁂 𑀚𑀸𑀦𑁂𑀬𑁆𑀬 𑀏𑀴𑀸𑀭𑁄, 𑀇𑀫𑀁 𑀳𑀢𑁆𑀣𑁂 𑀓𑀭𑀺𑀲𑁆𑀲𑀢𑀺.

𑀢𑀲𑁆𑀫𑀸’𑀬𑀁 𑀤𑀫𑀺𑀴𑀸’𑀲𑀦𑁆𑀦𑁂, 𑀯𑀸𑀲𑁂𑀢𑀼𑀁 𑀦𑁂𑀯 𑀅𑀭𑀳𑀢𑀺;

𑀭𑀸𑀚𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀦𑁄, 𑀲𑀦𑁆𑀢𑀺𑀓𑁂 𑀯𑀸𑀲𑀫𑀭𑀳𑀢𑀺’’.

𑀏𑀯 𑀫𑁂𑀯𑀁 𑀮𑀺𑀔𑀺𑀢𑁆𑀯𑀸𑀦, 𑀮𑁂𑀔𑀁 𑀢𑀲𑁆𑀲 𑀲𑀫𑀧𑁆𑀧𑀬𑀺;

𑀧𑀼𑀡𑁆𑀡𑀯𑀟𑁆𑀠𑀦 𑀯𑀢𑁆𑀣𑀸𑀦𑀺, 𑀧𑀡𑁆𑀡𑀸𑀓𑀸𑀭𑁂 𑀩𑀳𑀽𑀧𑀺 𑀘.

𑀤𑀢𑁆𑀯𑀸 𑀢𑀁 𑀪𑁄𑀚𑀬𑀺𑀢𑁆𑀯𑀸 𑀘, 𑀧𑁂𑀲𑁂𑀲𑀻 𑀲𑀔𑀺𑀲𑀦𑁆𑀢𑀺𑀓𑀁;

𑀲𑁄 𑀯𑀟𑁆𑀠𑀫𑀸𑀦𑀘𑁆𑀙𑀸𑀬𑀸𑀬𑀁, 𑀕𑀢𑁆𑀯𑀸 𑀭𑀸𑀚𑀲𑀼𑀢𑀦𑁆𑀢𑀺 𑀓𑀁.

𑀮𑁂𑀔𑀜𑁆𑀘 𑀧𑀡𑁆𑀡𑀸𑀓𑀸𑀭𑁂 𑀘, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀅𑀧𑁆𑀧𑀬𑀺;

𑀢𑀼𑀝𑁆𑀞𑁄 𑀆𑀳 ‘‘𑀲𑀳𑀲𑁆𑀲𑁂𑀦, 𑀧𑀲𑀸𑀤𑁂𑀣 𑀇𑀫’’𑀦𑁆𑀢𑀺 𑀲𑁄.

𑀇𑀲𑁆𑀲𑀁 𑀓𑀭𑀺𑀁𑀲𑀼 𑀢𑀲𑁆𑀲’𑀜𑁆𑀜𑁂, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀲𑁂𑀯𑀓𑀸;

𑀲𑁄 𑀢𑀁 𑀤𑀲𑀲𑀳𑀲𑁆𑀲𑁂𑀦, 𑀧𑀲𑀸𑀤𑀸𑀧𑁂𑀲𑀺 𑀤𑀸𑀭𑀓𑀁.

𑀢𑀲𑁆𑀲 𑀓𑁂𑀲𑀁 𑀮𑀺𑀔𑀸𑀧𑁂𑀢𑁆𑀯𑀸, 𑀕𑀗𑁆𑀕𑀸𑀬𑁂𑀯 𑀦𑀳𑀸𑀧𑀺𑀬;

𑀧𑀼𑀡𑁆𑀡𑀯𑀟𑁆𑀠𑀦 𑀯𑀢𑁆𑀣𑀬𑀼𑀕𑀁, 𑀕𑀦𑁆𑀥𑀫𑀸𑀮𑀜𑁆𑀘 𑀲𑀼𑀦𑁆𑀤𑀭𑀁;

𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀮𑀺𑀫𑁆𑀧𑁂𑀢𑁆𑀯𑀸, 𑀫𑀡𑁆𑀟𑀬𑀺𑀢𑁆𑀯𑀸 𑀲𑀼𑀭𑀽𑀧𑀓𑀁.

𑀲𑀻𑀲𑀁 𑀤𑀼𑀓𑀽𑀮𑀧𑀝𑁆𑀝𑁂𑀦, 𑀯𑁂𑀞𑀬𑀺𑀢𑁆𑀯𑀸 𑀉𑀧𑀸𑀦𑀬𑀼𑀁;

𑀅𑀢𑁆𑀢𑀦𑁄 𑀧𑀭𑀺𑀳𑀸𑀭𑁂𑀦, 𑀪𑀢𑁆𑀢𑀁 𑀢𑀲𑁆𑀲 𑀅𑀤𑀸𑀧𑀬𑀺.

𑀅𑀢𑁆𑀢𑀦𑁄 𑀤𑀲𑀲𑀳𑀲𑁆𑀲-𑀅𑀕𑁆𑀖𑀦𑀲𑀬𑀦𑀁 𑀲𑀼𑀪𑀁;

𑀲𑀬𑀦𑀢𑁆𑀣𑀁 𑀅𑀤𑀸𑀧𑁂𑀲𑀺, 𑀢𑀲𑁆𑀲 𑀬𑁄𑀥𑀲𑁆𑀲 𑀔𑀢𑁆𑀢𑀺𑀬𑁄.

𑀲𑁄 ¶ 𑀲𑀩𑁆𑀩𑀁 𑀏𑀓𑀢𑁄 𑀓𑀢𑁆𑀯𑀸, 𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀦𑁆𑀢𑀺𑀓𑀁;

𑀫𑀸𑀢𑀼𑀬𑀸 𑀤𑀲𑀲𑀳𑀲𑁆𑀲𑀁, 𑀲𑀬𑀦𑀁 𑀧𑀺𑀢𑀼𑀦𑁄 𑀅𑀤𑀸.

𑀢𑀁𑀬𑁂𑀯 𑀭𑀢𑁆𑀢𑀺𑀁 𑀆𑀕𑀦𑁆𑀢𑁆𑀯𑀸, 𑀭𑀓𑁆𑀔𑀞𑀸𑀦𑁂 𑀅𑀤𑁆𑀤𑀲𑁆𑀲𑀬𑀺;

𑀧𑀪𑀸𑀢𑁂 𑀭𑀸𑀚𑀧𑀼𑀢𑁆𑀢𑁄 𑀢𑀁, 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀦𑁄 𑀅𑀳𑀼.

𑀤𑀢𑁆𑀯𑀸 𑀧𑀭𑀺𑀘𑁆𑀙𑀤𑀁 𑀢𑀲𑁆𑀲, 𑀧𑀭𑀺𑀯𑀸𑀭𑀚𑀦𑀁 𑀢𑀣𑀸;

𑀤𑀢𑁆𑀯𑀸 𑀤𑀲𑀲𑀳𑀲𑁆𑀲𑀸𑀦𑀻, 𑀧𑁂𑀲𑁂𑀲𑀺 𑀧𑀺𑀢𑀼𑀲𑀦𑁆𑀢𑀺𑀓𑀁.

𑀬𑁄𑀥𑁄 𑀤𑀲𑀲𑀳𑀲𑁆𑀲𑀸𑀦𑀺, 𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀦𑁆𑀢𑀺𑀓𑀁;

𑀢𑁂𑀲𑀁 𑀤𑀢𑁆𑀯𑀸 𑀓𑀸𑀓𑀯𑀡𑁆𑀡-𑀢𑀺𑀲𑁆𑀲𑁄 𑀭𑀸𑀚𑀸 𑀫𑀼𑀧𑀸𑀕𑀫𑀺.

𑀲𑁄 𑀕𑀸𑀫𑀡𑀺𑀓𑀼𑀫𑀸𑀭𑀲𑁆𑀲, 𑀢𑀫𑀧𑁆𑀧𑁂𑀲𑀺 𑀫𑀳𑀻𑀧𑀢𑀺;

𑀲𑀓𑁆𑀓𑀢𑁄 𑀲𑀼𑀭𑀦𑀺𑀫𑀺𑀮𑁄, 𑀬𑁄𑀥𑁄 𑀯𑀲𑀺 𑀢𑀤𑀦𑁆𑀢𑀺𑀓𑁂.

𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂𑀧𑀺, 𑀢𑀸𑀮𑀕𑀘𑁆𑀙𑁂 𑀅𑀮𑀼𑀜𑁆𑀘𑀺 𑀲𑁄;

𑀤𑀲 𑀯𑀲𑁆𑀲𑀺𑀓𑀓𑀸𑀮𑀫𑁆𑀳𑀺, 𑀢𑀸𑀮𑁂 𑀮𑀼𑀜𑁆𑀘𑀺𑀫𑀳𑀩𑁆𑀩𑀮𑁄.

𑀕𑀸𑀫𑀡𑀺𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀅𑀤𑀸𑀲𑀺 𑀧𑁄𑀲𑀦𑀢𑁆𑀣𑀺𑀓𑁄;

𑀢𑁂𑀦 𑀲𑁄 𑀮𑀤𑁆𑀥𑀲𑀓𑁆𑀓𑀸𑀭𑁄, 𑀬𑁄𑀥𑁄 𑀯𑀲𑀺 𑀢𑀤𑀦𑁆𑀢𑀺𑀓𑁂.

𑀕𑀺𑀭𑀺𑀦𑀸𑀫𑁂 𑀚𑀦𑀧𑀤𑁂, 𑀕𑀸𑀫𑁂 𑀦𑀺𑀘𑁆𑀙𑁂𑀮𑀯𑀺𑀝𑁆𑀞𑀺𑀓𑁂;

𑀤𑀲𑀳𑀢𑁆𑀣𑀺𑀩𑀮𑁄 𑀆𑀲𑀺, 𑀫𑀳𑀸𑀦𑀸𑀕𑀲𑁆𑀲 𑀅𑀢𑁆𑀭𑀚𑁄.

𑀮𑀓𑀼𑀡𑁆𑀝𑀓𑀲𑀭𑀻𑀭𑀢𑁆𑀢𑀸, 𑀅𑀳𑀼 𑀕𑁄𑀝𑁆𑀞𑀓 𑀦𑀸𑀫𑀓𑁄;

𑀓𑀭𑁄𑀦𑁆𑀢𑀺 𑀓𑁂𑀴𑀺𑀧𑀭𑀺𑀳𑀸𑀲𑀁, 𑀢𑀲𑁆𑀲 𑀚𑁂𑀝𑁆𑀞𑀸 𑀙 𑀪𑀸𑀢𑀭𑁄.

𑀢𑁂 𑀕𑀦𑁆𑀢𑁆𑀯𑀸 𑀫𑀸𑀲𑀔𑁂𑀢𑁆𑀢𑀢𑁆𑀣𑀁, 𑀓𑁄𑀝𑁆𑀝𑀬𑀺𑀢𑁆𑀯𑀸 𑀫𑀳𑀸𑀯𑀦𑀁;

𑀢𑀲𑁆𑀲 𑀪𑀸𑀕𑀁 𑀞𑀧𑁂𑀢𑁆𑀯𑀸𑀦, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀦𑀺𑀯𑁂𑀤𑀬𑀼𑀁.

𑀲𑁄 ¶ 𑀕𑀦𑁆𑀢𑁆𑀯𑀸 𑀢𑀁 𑀔𑀡𑀁𑀬𑁂𑀯, 𑀭𑀼𑀓𑁆𑀔𑁂 𑀇𑀫𑁆𑀩𑀭𑀲𑀜𑁆𑀜𑀺𑀢𑁂;

𑀮𑀼𑀜𑁆𑀘𑀺𑀢𑁆𑀯𑀸𑀦 𑀲𑀫𑀁 𑀓𑀢𑁆𑀯𑀸, 𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀦𑀺𑀯𑁂𑀤𑀬𑀺.

𑀕𑀦𑁆𑀢𑁆𑀯𑀸𑀦 𑀪𑀸𑀢𑀭𑁄 𑀢𑀲𑁆𑀲, 𑀤𑀺𑀲𑁆𑀯𑀸 𑀓𑀫𑁆𑀫𑀦𑁆𑀢 𑀫𑀩𑁆𑀪𑀼𑀢𑀁;

𑀢𑀲𑁆𑀲 𑀓𑀫𑁆𑀫𑀁 𑀓𑀺𑀢𑁆𑀢𑀬𑀦𑁆𑀢𑀸, 𑀆𑀕𑀘𑁆𑀙𑀺𑀁𑀲𑀼 𑀢𑀤𑀦𑁆𑀢𑀺𑀓𑀁.

𑀢𑀤𑀼𑀧𑀸𑀤𑀸𑀬 𑀲𑁄 𑀆𑀲𑀺, 𑀕𑁄𑀝𑁆𑀞𑀬𑀺𑀫𑁆𑀩𑀭𑀦𑀸𑀫𑀓𑁄;

𑀢𑀣𑁂𑀯 𑀭𑀸𑀚𑀸 𑀧𑀸𑀳𑁂𑀲𑀺, 𑀢𑀫𑁆𑀩𑀺 𑀕𑀸𑀫𑀡𑀺𑀲𑀦𑁆𑀢𑀺𑀓𑀁.

𑀓𑁄𑀝𑀺𑀧𑀩𑁆𑀩𑀢𑀲𑀸𑀫𑀦𑁆𑀢𑀸, 𑀓𑀺𑀢𑁆𑀢𑀺𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑁄;

𑀭𑁄𑀳𑀡𑁄 𑀦𑀸𑀫 𑀕𑀳𑀧𑀢𑀺, 𑀚𑀸𑀢𑀁 𑀧𑀼𑀢𑁆𑀢𑀓𑀫𑀢𑁆𑀢𑀦𑁄.

𑀲𑀫𑀸𑀦 𑀦𑀸𑀫𑀁 𑀓𑀸𑀭𑁂𑀲𑀺, 𑀕𑁄𑀝𑁆𑀞𑀓𑀸𑀳𑀬𑀭𑀸𑀚𑀺𑀦𑁄;

𑀤𑀸𑀭𑀓𑁄 𑀲𑁄 𑀩𑀮𑀻 𑀆𑀲𑀺, 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄.

𑀅𑀲𑀓𑁆𑀓𑀼𑀡𑁂𑀬𑁆𑀬𑀧𑀸𑀲𑀸𑀡𑁂, 𑀉𑀤𑁆𑀥𑀢𑁆𑀢𑀼𑀁 𑀘𑀢𑀼𑀧𑀜𑁆𑀘𑀳𑀺;

𑀓𑀻𑀴𑀫𑀸𑀦𑁄 𑀔𑀺𑀧𑀺 𑀢𑀤𑀸, 𑀲𑁄 𑀓𑀻𑀴𑀸𑀕𑀼𑀴𑀓𑁂 𑀯𑀺𑀬.

𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀲𑁆𑀲, 𑀧𑀺𑀢𑀸 𑀕𑀤𑀫𑀓𑀸𑀭𑀬𑀺;

𑀅𑀝𑁆𑀞𑀢𑀺𑀁𑀲𑀗𑁆𑀕𑀼𑀮𑀯𑀝𑁆𑀝𑀁, 𑀲𑁄𑀴𑀲𑀳𑀢𑁆𑀣𑀤𑀻𑀖𑀓𑀁.

𑀢𑀣𑁂𑀯 𑀭𑀸𑀚𑀸 𑀧𑀸𑀳𑁂𑀲𑀺, 𑀢𑀫𑁆𑀧𑀺 𑀕𑀸𑀫𑀡𑀺𑀲𑀦𑁆𑀢𑀺𑀓𑁂;

𑀉𑀧𑀝𑁆𑀞𑀸𑀓𑁄 𑀫𑀳𑀸𑀲𑀼𑀫𑁆𑀫-𑀣𑁂𑀭𑀲𑁆𑀲𑀸’𑀲𑀺 𑀧𑀺𑀢𑀸 𑀧𑀦.

𑀲𑁄 𑀫𑀳𑀸𑀲𑀼𑀫𑁆𑀫𑀣𑁂𑀭𑀲𑁆𑀲, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑁄;

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀯𑀺𑀳𑀸𑀭𑁂 𑀓𑁄𑀴𑀧𑀩𑁆𑀩𑀢𑁂.

𑀲𑁄𑀢𑀼 𑀲𑀜𑁆𑀚𑀸𑀢𑀲𑀁𑀯𑁂𑀕𑁄, 𑀆𑀭𑁄𑀘𑁂𑀢𑁆𑀯𑀸𑀦 𑀭𑀸𑀚𑀺𑀦𑁄;

𑀤𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀧𑀼𑀢𑁆𑀢𑀲𑁆𑀲, 𑀧𑀩𑁆𑀩𑀚𑀺 𑀣𑁂𑀭𑀲𑀦𑁆𑀢𑀺𑀓𑁂.

𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺;

𑀧𑀼𑀢𑁆𑀢𑁄 𑀢𑁂𑀦’𑀲𑁆𑀲 𑀧𑀜𑁆𑀜𑀸𑀬𑀺, 𑀣𑁂𑀭𑀧𑀼𑀢𑁆𑀢𑀸𑀪𑀬𑁄 𑀇𑀢𑀺.

𑀓𑀧𑁆𑀧𑀓𑀦𑁆𑀤𑀭𑀕𑀸𑀫𑀫𑁆𑀳𑀺, 𑀓𑀼𑀫𑀸𑀭𑀲𑁆𑀲 𑀲𑀼𑀢𑁄 𑀅𑀳𑀼;

𑀪𑀭𑀡𑁄 𑀦𑀸𑀫 𑀲𑁄 𑀓𑀸𑀮𑁂, 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁂.

𑀤𑀸𑀭𑀓𑁂𑀳𑀺 ¶ 𑀯𑀦𑀁 𑀕𑀦𑁆𑀢𑁆𑀯𑀸’-𑀦𑀼𑀩𑀦𑁆𑀥𑀺𑀢𑁆𑀯𑀸 𑀲𑀲𑁂 𑀩𑀳𑀽;

𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸𑀦, 𑀤𑁆𑀯𑀺𑀔𑀡𑁆𑀟𑀁 𑀪𑀽𑀫𑀺𑀬𑀁 𑀔𑀺𑀧𑀺.

𑀕𑀸𑀫𑀺𑀓𑁂𑀳𑀺 𑀯𑀦𑀁 𑀕𑀦𑁆𑀢𑁆𑀯𑀸, 𑀲𑁄𑀴𑀲𑀯𑀲𑁆𑀲𑀺𑀓𑁄 𑀧𑀦;

𑀢𑀣𑁂𑀯 𑀧𑀸𑀢𑁂𑀲𑀺 𑀮𑀳𑀼𑀁, 𑀫𑀺𑀕 𑀕𑁄𑀓𑀡𑁆𑀡𑀲𑀽𑀓𑀭𑁂.

𑀕𑀺𑀭𑀺𑀕𑀸𑀫𑁂 𑀚𑀦𑀧𑀤𑁂, 𑀓𑀼𑀝𑀼𑀫𑁆𑀩𑀺𑀬𑀗𑁆𑀕𑀡𑀕𑀸𑀫𑀓𑁂;

𑀓𑀼𑀝𑀼𑀫𑁆𑀧𑀺𑀯𑀲𑀪𑁄 𑀦𑀸𑀫, 𑀅𑀳𑁄𑀲𑀺 𑀢𑀢𑁆𑀣 𑀲𑀫𑁆𑀫𑀢𑁄.

𑀯𑁂𑀴𑁄 𑀚𑀦𑀧𑀤𑁄 𑀢𑀲𑁆𑀲, 𑀲𑀼𑀫𑀦𑁄 𑀕𑀺𑀭𑀺𑀪𑁄𑀚𑀓𑁄;

𑀲𑀳𑀸𑀬𑀲𑁆𑀲 𑀲𑀼𑀢𑁂 𑀚𑀸𑀢𑁂, 𑀧𑀡𑁆𑀡𑀸𑀓𑀸𑀭𑀧𑀼𑀭𑀲𑁆𑀲𑀭𑀸.

𑀕𑀦𑁆𑀢𑁆𑀯𑀸 𑀉𑀪𑁄 𑀲𑀓𑀁 𑀦𑀸𑀫𑀁, 𑀤𑀸𑀭𑀓𑀲𑁆𑀲 𑀅𑀓𑀸𑀭𑀬𑀼𑀁;

𑀢𑀁 𑀯𑀼𑀤𑁆𑀥𑀁 𑀅𑀢𑁆𑀢𑀦𑁄 𑀕𑁂𑀳𑁂, 𑀯𑀸𑀲𑁂𑀲𑀺 𑀲𑀺𑀭𑀺𑀪𑁄𑀚𑀓𑁄.

𑀢𑀲𑁆𑀲𑁂’𑀓𑁄 𑀲𑀺𑀦𑁆𑀥𑀯𑁄 𑀧𑁄𑀲𑀁, 𑀓𑀜𑁆𑀘𑀺𑀦𑀸 𑀭𑁄𑀳𑀺𑀢𑀼𑀁 𑀅𑀤𑀸;

𑀤𑀺𑀲𑁆𑀯𑀸 𑀢𑀼 𑀯𑁂𑀴𑀼𑀲𑀼𑀫𑀦𑀁, 𑀅𑀬𑀁 𑀅𑀭𑁄𑀳𑀓𑁄 𑀫𑀫.

𑀅𑀦𑀼𑀭𑀽𑀧𑁄’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸,

𑀲𑁄 𑀅𑀲𑁆𑀲𑀁 𑀆𑀭𑀼𑀳𑀺𑀢𑁆𑀯𑀸 𑀢𑀁, 𑀲𑀻𑀖𑀁 𑀥𑀸𑀯𑀬𑀺 𑀫𑀡𑁆𑀟𑀮𑁂;

𑀫𑀡𑁆𑀟𑀮𑁂 𑀲𑀓𑀮𑁂 𑀅𑀲𑁆𑀲𑁄, 𑀏𑀓𑀸𑀩𑀤𑁆𑀥𑁄 𑀅𑀤𑀺𑀲𑁆𑀲𑀺 𑀲𑁄.

𑀦𑀺𑀲𑀻𑀤𑀺 𑀥𑀸𑀯𑀢𑁄 𑀘’𑀲𑁆𑀲, 𑀯𑀲𑁆𑀲𑀳𑀸𑀭𑁄’𑀯 𑀧𑀺𑀝𑁆𑀞𑀺𑀬𑀁;

𑀫𑁄𑀘𑁂𑀢𑀺𑀧𑀺 𑀉𑀢𑁆𑀢𑀭𑀺𑀬𑀁, 𑀩𑀦𑁆𑀥𑀢𑀺𑀧𑀺 𑀅𑀦𑀸𑀤𑀭𑁄.

𑀢𑀁 𑀤𑀺𑀲𑁆𑀯𑀸 𑀧𑀭𑀺𑀲𑀸 𑀲𑀩𑁆𑀩𑀸, 𑀉𑀓𑁆𑀓𑀼𑀝𑁆𑀞𑀺𑀁 𑀲𑀫𑁆𑀧𑀯𑀢𑁆𑀢𑀬𑀺;

𑀤𑀢𑁆𑀯𑀸 𑀤𑀲𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀲𑁄 𑀕𑀺𑀭𑀺𑀪𑁄𑀚𑀓𑁄.

𑀭𑀸𑀚𑀸𑀦𑀼𑀘𑁆𑀙𑀯𑀺𑀓𑁄’𑀬𑀁𑀢𑀺, 𑀳𑀝𑁆𑀞𑁄 𑀭𑀜𑁆𑀜𑁄 𑀅𑀤𑀸𑀲𑀺 𑀢𑀁;

𑀭𑀸𑀚𑀸 𑀢𑀁 𑀯𑁂𑀴𑀼𑀲𑀼𑀫𑀦𑀁, 𑀅𑀢𑁆𑀢𑀦𑁄𑀬𑁂𑀯 𑀲𑀦𑁆𑀢𑀺𑀓𑁂.

𑀓𑀸𑀭𑁂𑀢𑁆𑀯𑀸 ¶ 𑀢𑀲𑁆𑀲 𑀲𑀓𑁆𑀓𑀸𑀭𑀁, 𑀯𑀸𑀲𑁂𑀲𑀺 𑀩𑀳𑀼𑀫𑀸𑀦𑀬𑀁;

𑀦𑀓𑀼𑀮𑀦𑀕𑀭𑀓𑀡𑁆𑀡𑀺𑀓𑀸𑀬𑀁, 𑀕𑀸𑀫𑁂 𑀫𑀳𑀺𑀦𑁆𑀤 𑀤𑁄𑀡𑀺𑀓𑁂.

𑀅𑀪𑀬𑀲𑁆𑀲’𑀦𑁆𑀢𑀺𑀫𑁂 𑀧𑀼𑀢𑁆𑀢𑁄, 𑀤𑁂𑀯𑁄𑀦𑀸𑀫𑀸’𑀲𑀺 𑀣𑀸𑀫𑀯𑀸;

𑀈𑀲𑀓𑀁 𑀧𑀦 𑀔𑀜𑁆𑀚𑀢𑁆𑀢𑀸, 𑀔𑀜𑁆𑀚𑀤𑁂𑀯𑁄𑀢𑀺 𑀢𑀁 𑀯𑀺𑀤𑀼𑀁.

𑀫𑀺𑀕𑀫𑀁 𑀕𑀸𑀫𑀯𑀸𑀲𑀻𑀳𑀺, 𑀲𑀳 𑀕𑀦𑁆𑀢𑁆𑀯𑀸𑀦 𑀲𑁄 𑀢𑀤𑀸;

𑀫𑀳𑀺𑀲𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸, 𑀫𑀳𑀦𑁆𑀢𑁂 𑀉𑀝𑁆𑀞𑀺𑀢𑀼𑀝𑁆𑀞𑀺𑀢𑁂.

𑀳𑀢𑁆𑀣𑁂𑀦 𑀧𑀸𑀤𑁂 𑀕𑀡𑁆𑀳𑀺𑀢𑁆𑀯𑀸, 𑀪𑀫𑁂𑀢𑁆𑀯𑀸 𑀲𑀻𑀲𑀫𑀢𑁆𑀣𑀓𑁂;

𑀅𑀲𑀼𑀫𑁆𑀳 𑀪𑀽𑀫𑀺𑀁 𑀘𑀼𑀡𑁆𑀡𑁂𑀢𑀺, 𑀢𑁂𑀲𑀁 𑀅𑀝𑁆𑀞𑀻𑀦𑀺 𑀫𑀸𑀡𑀯𑁄.

𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀺𑀢𑁆𑀯𑀸𑀯, 𑀔𑀜𑁆𑀚𑀤𑁂𑀯𑀁 𑀫𑀳𑀻𑀧𑀢𑀺;

𑀯𑀸𑀲𑁂𑀲𑀺 𑀆𑀳𑀭𑀸𑀧𑁂𑀢𑁆𑀯𑀸, 𑀕𑀸𑀫𑀡𑀺𑀲𑁆𑀲𑁂’𑀯 𑀲𑀦𑁆𑀢𑀺𑀓𑁂.

𑀘𑀺𑀢𑁆𑀢𑀮𑀧𑀩𑁆𑀩𑀢𑀸’𑀲𑀦𑁆𑀦𑁂, 𑀕𑀸𑀫𑁂 𑀓𑀧𑀺𑀝𑁆𑀞𑀦𑀸𑀫𑀓𑁂;

𑀉𑀧𑁆𑀧𑀮𑀲𑁆𑀲 𑀲𑀼𑀢𑁄 𑀆𑀲𑀺, 𑀨𑀼𑀲𑁆𑀲𑀤𑁂𑀯𑁄𑀢𑀺 𑀦𑀸𑀫𑀓𑁄.

𑀕𑀦𑁆𑀢𑁆𑀯𑀸 𑀲𑀳 𑀓𑀼𑀫𑀸𑀭𑁂𑀳𑀺, 𑀯𑀺𑀳𑀸𑀭𑀁 𑀲𑁄 𑀓𑀼𑀫𑀸𑀭𑀓𑁄;

𑀩𑁄𑀥𑀺𑀬𑀸 𑀧𑀽𑀚𑀺𑀢𑀁 𑀲𑀗𑁆𑀔𑀁, 𑀆𑀤𑀸𑀬 𑀥𑀫𑀺𑀣𑀸𑀫𑀲𑀸.

𑀅𑀲𑀦𑀻𑀧𑀸𑀢𑀲𑀤𑁆𑀤𑁄𑀯, 𑀲𑀤𑁆𑀤𑁄 𑀢𑀲𑁆𑀲 𑀫𑀳𑀸 𑀅𑀳𑀼;

𑀉𑀫𑁆𑀫𑀢𑁆𑀢𑀸 𑀯𑀺𑀬 𑀆𑀲𑀼𑀁 𑀢𑁂, 𑀪𑀻𑀢𑀸 𑀲𑀩𑁆𑀩𑁂𑀧𑀺 𑀤𑀸𑀭𑀓𑀸.

𑀢𑁂𑀦 𑀲𑁄 𑀆𑀲𑀺 𑀉𑀫𑁆𑀫𑀸𑀤-𑀨𑀼𑀲𑁆𑀲 𑀤𑁂𑀯𑁄𑀢𑀺 𑀧𑀸𑀓𑀝𑁄;

𑀥𑀦𑀼𑀲𑀺𑀧𑁆𑀧𑀁 𑀅𑀓𑀸𑀭𑁂𑀲𑀺, 𑀢𑀲𑁆𑀲 𑀯𑀁𑀲𑀸𑀕𑀢𑀁 𑀧𑀺𑀢𑀸.

𑀲𑀤𑁆𑀤𑀯𑁂𑀥𑀺 𑀯𑀺𑀚𑁆𑀚𑀼𑀯𑁂𑀥𑀻, 𑀯𑀸𑀮𑀯𑁂𑀥𑀻 𑀘 𑀲𑁄 𑀅𑀳𑀼;

𑀯𑀸𑀮𑀼𑀓𑀸𑀧𑀼𑀡𑁆𑀡𑀲𑀓𑀝𑀁, 𑀩𑀤𑁆𑀥𑀥𑀫𑁆𑀫𑀲𑀢𑀁 𑀢𑀣𑀸.

𑀅𑀲𑀦𑁄 𑀤𑀼𑀫𑁆𑀩𑀭𑀫𑀬𑀁, 𑀅𑀝𑁆𑀞𑀲𑁄𑀴𑀲𑀅𑀗𑁆𑀕𑀼𑀮𑀁;

𑀢𑀣𑀸 𑀅𑀬𑁄 𑀮𑁄𑀳𑀫𑀬𑀁, 𑀧𑀝𑁆𑀝𑀁𑀤𑀺 𑀘𑀢𑀼𑀭𑀗𑁆𑀕𑀮𑀺.

𑀦𑀺𑀩𑁆𑀩𑁂𑀥𑀬𑀢𑀺𑀓𑀡𑁆𑀡𑁂𑀦, 𑀓𑀡𑁆𑀟𑁄 𑀢𑁂𑀦 𑀯𑀺𑀲𑀚𑁆𑀚𑀺𑀢𑁄;

𑀣𑀮𑁂 𑀅𑀝𑁆𑀞𑀼𑀲𑀪𑀁 𑀬𑀸𑀢𑀺, 𑀚𑀮𑁂 𑀢𑀼 𑀉𑀲𑀪𑀁 𑀧𑀦.

𑀢𑀁 𑀲𑀼𑀡𑀺𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀧𑀯𑀢𑁆𑀢𑀺𑀁 𑀧𑀺𑀢𑀼𑀲𑀦𑁆𑀢𑀺𑀓𑀸;

𑀢𑀫𑁆𑀧𑀺 𑀆𑀡𑀸𑀧𑀬𑀺𑀢𑁆𑀯𑀸𑀦, 𑀕𑀸𑀫𑀡𑀺𑀫𑁆𑀳𑀺 𑀅𑀯𑀸𑀲𑀬𑀺.

𑀢𑀼𑀮𑀸𑀥𑀸𑀭𑀦𑀕𑀸𑀲𑀦𑁆𑀦𑁂, 𑀯𑀺𑀳𑀸𑀭𑀯𑀸𑀧𑀺 𑀕𑀸𑀫𑀓𑁂;

𑀫𑀢𑁆𑀢𑀓𑀼𑀝𑀼𑀫𑁆𑀩𑀺𑀲𑁆𑀲 𑀲𑀼𑀢𑁄, 𑀅𑀳𑀼 𑀯𑀲𑀪𑀦𑀸𑀫𑀓𑁄.

𑀢𑀁 ¶ 𑀲𑀼𑀚𑀸𑀢𑀲𑀭𑀻𑀭𑀢𑁆𑀢𑀸, 𑀮𑀪𑀺𑀬 𑀯𑀲𑀪𑀁 𑀯𑀺𑀤𑀼𑀁;

𑀲𑁄 𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀫𑁆𑀳𑀺, 𑀫𑀳𑀸𑀓𑀸𑀬𑀩𑀮𑁄 𑀅𑀳𑀼.

𑀆𑀤𑀸𑀬 𑀲𑁄 𑀓𑀢𑀺𑀧𑀬𑁄, 𑀧𑀼𑀭𑀺𑀲𑁂𑀬𑁂𑀯 𑀆𑀭𑀪𑀺;

𑀔𑁂𑀢𑁆𑀢𑀢𑁆𑀣𑀺𑀓𑁄 𑀫𑀳𑀸𑀯𑀸𑀧𑀺𑀁, 𑀓𑀭𑁄𑀦𑁆𑀢𑁄 𑀢𑀁 𑀫𑀳𑀩𑁆𑀩𑀮𑁄.

𑀤𑀲𑀳𑀺 𑀤𑁆𑀯𑀸𑀤𑀲𑀳𑀺 𑀯𑀸, 𑀯𑀳𑀺𑀢𑀩𑁆𑀩𑁂 𑀥𑀼𑀭𑁂𑀳𑀺𑀧𑀺;

𑀯𑀳𑀦𑁆𑀢𑁄 𑀧𑀁𑀲𑀼𑀧𑀺𑀡𑁆𑀟𑁂 𑀲𑁄, 𑀮𑀳𑀼𑀁 𑀯𑀸𑀧𑀺𑀁 𑀲𑀫𑀸𑀧𑀬𑀺.

𑀢𑁂𑀦 𑀲𑁄 𑀧𑀸𑀓𑀝𑁄 𑀆𑀲𑀺, 𑀢𑀫𑁆𑀧𑀺 𑀆𑀤𑀸𑀬 𑀪𑀽𑀫𑀺𑀧𑁄;

𑀤𑀢𑁆𑀯𑀸 𑀢𑀁 𑀢𑀲𑁆𑀲 𑀲𑀓𑁆𑀓𑀸𑀭𑀁, 𑀕𑀸𑀫𑀡𑀺𑀲𑁆𑀲 𑀅𑀤𑀸𑀲𑀺 𑀢𑀁.

𑀯𑀲𑀪𑁄𑀤𑀓𑀯𑀸𑀭𑁄𑀢𑀺, 𑀓𑀁 𑀔𑁂𑀢𑁆𑀢𑀁 𑀧𑀸𑀓𑀝𑀁 𑀅𑀳𑀼;

𑀏𑀯𑀁 𑀮𑀪𑀺𑀬𑀸𑀯𑀲𑀪𑁄, 𑀯𑀲𑀺 𑀕𑀸𑀫𑀡𑀺𑀲𑀦𑁆𑀢𑀺𑀓𑁂.

𑀫𑀳𑀸𑀬𑁄𑀥𑀸𑀦𑀫𑁂𑀢𑁂𑀲𑀁, 𑀤𑀲𑀦𑁆𑀦𑀫𑁆𑀧𑀺 𑀫𑀳𑀺𑀧𑀢𑀺;

𑀧𑀼𑀢𑁆𑀢𑀲𑁆𑀲 𑀲𑀓𑁆𑀓𑀸𑀭𑀲𑀫𑀁, 𑀲𑀓𑁆𑀓𑀸𑀭𑀁 𑀓𑀸𑀭𑀬𑀺 𑀢𑀤𑀸.

𑀆𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀬𑁄𑀥𑁂, 𑀤𑀲𑀸𑀧𑀺 𑀘 𑀤𑀺𑀲𑀫𑁆𑀧𑀢𑀺;

‘‘𑀬𑁄𑀥𑁂 𑀤𑀲𑀤𑀲𑁂’𑀓𑁂𑀓𑁄, 𑀏𑀲𑀣𑀸’𑀢𑀺 𑀉𑀤𑀸𑀳𑀭𑀺.

𑀢𑁂 𑀢𑀣𑁂𑀯𑀸’𑀦𑀬𑀼𑀁 𑀬𑁄𑀥𑁂, 𑀢𑁂𑀲𑀫𑁆𑀧𑀸𑀳 𑀫𑀳𑀻𑀧𑀢𑀺;

𑀢𑀲𑁆𑀲 𑀬𑁄𑀥𑀲𑀳𑀲𑁆𑀲𑀸𑀧𑀺, 𑀢𑀣𑁂𑀯 𑀧𑀭𑀺𑀬𑁂𑀲𑀺𑀢𑀼𑀁.

𑀢𑀣𑀸 𑀢𑁂𑀧𑀸’𑀦𑀬𑀼𑀁 𑀬𑁄𑀥𑁂, 𑀢𑁂𑀲𑀫𑁆𑀧𑀸𑀳𑀁 𑀫𑀳𑀻𑀧𑀢𑀺;

𑀧𑀼𑀦𑀬𑁄𑀥𑀲𑀳𑀲𑁆𑀲𑀲𑁆𑀲, 𑀢𑀣𑁂𑀯 𑀧𑀭𑀺𑀬𑁂𑀲𑀺𑀢𑀼𑀁.

𑀢𑀣𑀸 𑀢𑁂𑀧𑀸’𑀦𑀬𑀼𑀁 𑀬𑁄𑀥𑁂, 𑀲𑀩𑁆𑀩𑁂 𑀲𑀫𑁆𑀧𑀺𑀡𑁆𑀟𑀺𑀢𑀸 𑀢𑀼 𑀢𑁂;

𑀏𑀓𑀸𑀤𑀲𑀲𑀳𑀲𑁆𑀲𑀸𑀦𑀺, 𑀬𑁄𑀥𑀸𑀲𑀢𑀁 𑀢𑀣𑀸 𑀤𑀲.

𑀲𑀩𑁆𑀩𑁂 𑀢𑁂 𑀮𑀤𑁆𑀥𑀲𑀓𑁆𑀓𑀸𑀭𑀸, 𑀪𑀽𑀫𑀺𑀧𑀸𑀮𑁂𑀦 𑀲𑀩𑁆𑀩𑀤𑀸;

𑀕𑀸𑀫𑀡𑀺𑀁 𑀭𑀸𑀚𑀧𑀼𑀢𑁆𑀢𑀁 𑀢𑀁, 𑀯𑀲𑀺𑀁𑀲𑀼 𑀧𑀭𑀺𑀯𑀸𑀭𑀺𑀬.

𑀲𑀼𑀡𑀺𑀬 𑀦𑀭𑁄 𑀫𑀢𑀺𑀫𑀸 𑀲𑀼𑀔𑀢𑁆𑀢𑀺𑀓𑁄;

𑀓𑀼𑀲𑀮𑀧𑀣𑁂’𑀪𑀺𑀭𑀫𑁂𑀬𑁆𑀬 𑀲𑀩𑁆𑀩𑀤𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀳𑀢𑁆𑀣𑀲𑁆𑀲 ¶ 𑀣𑀭𑀼𑀓𑀫𑁆𑀫𑀲𑁆𑀲, 𑀓𑀼𑀲𑀮𑁄 𑀓𑀢𑀼𑀧𑀸𑀲𑀦𑁄;

𑀲𑁄 𑀕𑀸𑀫𑀡𑀺𑀭𑀸𑀚𑀲𑀼𑀢𑁄, 𑀫𑀳𑀸𑀕𑀸𑀫𑁂 𑀯𑀲𑀻 𑀢𑀤𑀸.

𑀭𑀸𑀚𑀸 𑀭𑀸𑀚𑀲𑀼𑀢𑀁 𑀢𑀺𑀲𑁆𑀲𑀁, 𑀤𑀻𑀖𑀯𑀸𑀧𑀺𑀫𑁆𑀳𑀺 𑀯𑀸𑀲𑀬𑀺;

𑀆𑀭𑀓𑁆𑀔𑀺𑀢𑀼𑀁 𑀚𑀦𑀧𑀤𑀁, 𑀲𑀫𑁆𑀧𑀦𑁆𑀦 𑀩𑀮𑀯𑀸𑀳𑀦𑀁.

𑀓𑀼𑀫𑀸𑀭𑁄 𑀕𑀸𑀫𑀡𑀺𑀓𑀸𑀮𑁂, 𑀲𑀫𑁆𑀧𑀲𑁆𑀲𑀦𑁆𑀢𑁄 𑀩𑀮𑀁 𑀲𑀓𑀁;

‘‘𑀬𑀼𑀚𑁆𑀛𑀺𑀲𑁆𑀲𑀁 𑀤𑀫𑀺𑀴𑁂𑀳𑀻’’𑀢𑀺, 𑀧𑀺𑀢𑀼𑀭𑀜𑁆𑀜𑁄 𑀓𑀣𑀸𑀧𑀬𑀻.

𑀭𑀸𑀚𑀸 𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, ‘‘𑀑𑀭𑀕𑀗𑁆𑀕𑀁 𑀅𑀮𑀁’’ 𑀇𑀢𑀺;

𑀯𑀸𑀭𑁂𑀲𑀺 𑀬𑀸𑀯𑀢𑀢𑀺𑀬𑀁, 𑀲𑁄 𑀢𑀣𑁂𑀯 𑀓𑀣𑀸𑀧𑀬𑀻.

𑀧𑀺𑀢𑀸 𑀫𑁂 𑀧𑀼𑀭𑀺𑀲𑁄 𑀳𑁄𑀦𑁆𑀢𑁄, 𑀦𑁂’𑀯𑀁 𑀯𑀓𑁆𑀔𑀢𑀺 𑀢𑁂𑀦𑀺’𑀤𑀁;

𑀧𑀺𑀮𑀦𑁆𑀥𑀢𑀽𑀢𑀺 𑀧𑁂𑀲𑁂𑀲𑀺, 𑀇𑀢𑁆𑀣𑀸𑀮𑀗𑁆𑀓𑀸𑀭𑀫𑀲𑁆𑀲 𑀲𑁄.

𑀭𑀸𑀚𑀸’𑀳 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸, ‘‘𑀓𑀭𑁄𑀣 𑀳𑁂𑀫𑀲𑀗𑁆𑀔𑀮𑀺𑀁;

𑀢𑀸𑀬 𑀢𑀁 𑀩𑀦𑁆𑀥𑀬𑀺𑀲𑁆𑀲𑀸𑀫𑀺, 𑀦𑀸’𑀜𑁆𑀜𑀣𑀸 𑀭𑀓𑁆𑀔𑀺𑀬𑁄 𑀳𑀺 𑀲𑁄.

𑀧𑀮𑀸𑀬𑀺𑀢𑁆𑀯𑀸𑀦 𑀫𑀮𑀬𑀁, 𑀓𑀼𑀚𑁆𑀛𑀺𑀢𑁆𑀯𑀸 𑀧𑀺𑀢𑀼𑀦𑁄 𑀅𑀕𑀸;

𑀤𑀼𑀝𑁆𑀞𑀢𑁆𑀢𑀸𑀬𑁂𑀯 𑀧𑀺𑀢𑀭𑀺, 𑀆𑀳𑀼 𑀢𑀁 𑀤𑀼𑀝𑁆𑀞𑀕𑀸𑀫𑀡𑀺.

𑀭𑀸𑀚𑀸’𑀣 𑀆𑀭𑀪𑀻 𑀓𑀸𑀢𑀼𑀁, 𑀫𑀳𑀸𑀫𑀗𑁆𑀕𑀮𑀘𑁂𑀢𑀺𑀬𑀁;

𑀦𑀺𑀝𑁆𑀞𑀺𑀢𑁂 𑀘𑁂𑀢𑀺𑀬𑁂 𑀲𑀗𑁆𑀖𑀁, 𑀲𑀦𑁆𑀦𑀺𑀧𑀸𑀢𑀬𑀺 𑀪𑀽𑀧𑀢𑀺.

𑀤𑁆𑀯𑀸𑀤𑀲𑀸’𑀲𑀼𑀁 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀘𑀺𑀢𑁆𑀢𑀮𑀧𑀩𑁆𑀩𑀢𑀸;

𑀢𑀢𑁄 𑀢𑀢𑁄 𑀤𑁆𑀯𑀸𑀤𑀲𑁂𑀯, 𑀲𑀳𑀲𑁆𑀲𑀸𑀦𑀺 𑀲𑀫𑀸𑀕𑀫𑀼𑀁.

𑀓𑀢𑁆𑀯𑀸𑀦 𑀘𑁂𑀢𑀺𑀬𑀫𑀳𑀁, 𑀭𑀸𑀚𑀸 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸;

𑀲𑀩𑁆𑀩𑁂 𑀬𑁄𑀥𑁂 𑀲𑀫𑀸𑀦𑁂𑀢𑁆𑀯𑀸, 𑀓𑀸𑀭𑁂𑀲𑀺 𑀲𑀧𑀣𑀁 𑀢𑀤𑀸.

‘‘𑀧𑀼𑀢𑁆𑀢𑀸𑀦𑀁 𑀓𑀮𑀳𑀝𑁆𑀞𑀸𑀦𑀁, 𑀦 𑀕𑀘𑁆𑀙𑀺𑀲𑁆𑀲𑀸𑀫 𑀦𑁄’’𑀇𑀢𑀺;

𑀅𑀓𑀁𑀲𑀼 𑀲𑀧𑀣𑀁 𑀲𑀩𑁆𑀩𑁂, 𑀢𑀁 𑀬𑀼𑀤𑁆𑀥𑀁 𑀢𑁂𑀦 𑀦𑀸𑀕𑀫𑀼𑀁.

𑀘𑀢𑀼𑀲𑀝𑁆𑀞𑀺 𑀯𑀺𑀳𑀸𑀭𑁂 𑀲𑁄, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀢𑀢𑁆𑀢𑀓𑀸𑀦𑁂𑀯 𑀯𑀲𑁆𑀲𑀸𑀦𑀺, 𑀞𑀢𑁆𑀯𑀸 𑀫𑀭𑀺𑀢𑀳𑀺𑀁 𑀢𑀤𑀸.

𑀭𑀜𑁆𑀜𑁄 ¶ 𑀲𑀭𑀻𑀭𑀁 𑀕𑀸𑀳𑁂𑀢𑁆𑀯𑀸, 𑀙𑀦𑁆𑀦𑀬𑀸𑀦𑁂𑀦 𑀭𑀸𑀚𑀺𑀦𑀺;

𑀦𑁂𑀢𑁆𑀯𑀸 𑀢𑀺𑀲𑁆𑀲 𑀫𑀳𑀸𑀭𑀸𑀫𑀁, 𑀢𑀁 𑀲𑀗𑁆𑀖𑀲𑁆𑀲 𑀦𑀺𑀯𑁂𑀤𑀬𑀺.

𑀲𑀼𑀢𑁆𑀯𑀸 𑀢𑀺𑀲𑁆𑀲𑀓𑀼𑀫𑀸𑀭𑁄 𑀢𑀁, 𑀆𑀕𑀦𑁆𑀢𑁆𑀯𑀸 𑀤𑀻𑀖𑀯𑀸𑀧𑀺𑀢𑁄;

𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸, 𑀲𑀓𑁆𑀓𑀘𑁆𑀘𑀁 𑀧𑀺𑀢𑀼𑀦𑁄 𑀲𑀬𑀁.

𑀫𑀸𑀢𑀭𑀁 𑀓𑀡𑁆𑀟𑀼𑀮𑀁 𑀳𑀢𑁆𑀣𑀺𑀁, 𑀆𑀤𑀺𑀬𑀺𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀪𑀸𑀢𑀼𑀪𑀬𑀸 𑀤𑀻𑀖𑀯𑀸𑀧𑀺𑀁, 𑀅𑀕𑀫𑀸𑀲𑀺 𑀮𑀳𑀼𑀁 𑀢𑀢𑁄.

𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀢𑀼𑀁, 𑀤𑀼𑀝𑁆𑀞𑀕𑀸𑀫𑀡𑀺 𑀲𑀦𑁆𑀢𑀺𑀓𑀁;

𑀮𑁂𑀔𑀁 𑀤𑀢𑁆𑀯𑀸 𑀯𑀺𑀲𑀚𑁆𑀚𑁂𑀲𑀼𑀁, 𑀲𑀘𑁆𑀘𑁂𑀫𑀘𑁆𑀘𑀸 𑀲𑀫𑀸𑀕𑀢𑀸.

𑀲𑁄 𑀕𑀼𑀢𑁆𑀢𑀳𑀸𑀮𑀫𑀸𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀘𑀸𑀭𑁂 𑀯𑀺𑀲𑀚𑁆𑀚𑀺𑀬;

𑀫𑀳𑀸𑀕𑀸𑀫𑀫𑀼𑀧𑀕𑀦𑁆𑀢𑁆𑀯𑀸, 𑀲𑀬𑀁 𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀫𑀸𑀢𑀢𑁆𑀣𑀁 𑀓𑀡𑁆𑀟𑀽𑀮𑀢𑁆𑀣𑀜𑁆𑀘, 𑀪𑀸𑀢𑀼𑀮𑁂𑀔𑀁 𑀯𑀺𑀲𑀚𑁆𑀚𑀬𑀺;

𑀅𑀮𑀤𑁆𑀥𑀸 𑀬𑀸𑀯𑀢𑀢𑀺𑀬𑀁, 𑀬𑀼𑀤𑁆𑀥𑀸𑀬 𑀲𑀫𑀼𑀧𑀸𑀕𑀫𑀺.

𑀅𑀳𑀼 𑀤𑁆𑀯𑀺𑀦𑁆𑀦𑀁 𑀫𑀳𑀸𑀬𑀼𑀤𑁆𑀥𑀁, 𑀘𑀽𑀴𑀗𑁆𑀕𑀡𑀺𑀬𑀧𑀺𑀝𑁆𑀞𑀺𑀬𑀁;

𑀢𑀢𑁆𑀣 𑀦𑁂𑀓𑀲𑀳𑀲𑁆𑀲𑀸𑀦𑀺, 𑀧𑀢𑀺𑀁𑀲𑀼 𑀭𑀸𑀚𑀺𑀦𑁄 𑀦𑀭𑀸.

𑀭𑀸𑀚𑀸 𑀘 𑀢𑀺𑀲𑁆𑀲𑀸𑀫𑀘𑁆𑀘𑁄 𑀘, 𑀯𑀴𑀯𑀸𑀤𑀻𑀖𑀼𑀢𑀼𑀦𑀺𑀓𑀸;

𑀢𑀬𑁄𑀬𑁂𑀯 𑀧𑀮𑀸𑀬𑀺𑀁𑀲𑀼, 𑀓𑀼𑀫𑀸𑀭𑁄 𑀅𑀦𑀼𑀩𑀦𑁆𑀥𑀺𑀢𑁂.

𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀪𑀺𑀓𑁆𑀔𑀽, 𑀫𑀦𑁆𑀢𑀬𑀺𑀁𑀲𑀼 𑀫𑀳𑀻𑀥𑀭𑀁;

𑀢𑀁 𑀤𑀺𑀲𑁆𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀓𑀫𑁆𑀫𑀁’’ 𑀇𑀢𑀺 𑀦𑀺𑀯𑀢𑁆𑀢𑀺 𑀲𑁄.

𑀓𑀧𑁆𑀧𑀓𑀦𑁆𑀤𑀭𑀦𑀚𑁆𑀚𑀸𑀲𑁄, 𑀚𑀯𑀫𑀸𑀮𑀺𑀢𑀺𑀢𑁆𑀣𑀫𑀸𑀕𑀢𑁄;

𑀭𑀸𑀚𑀸’𑀳 𑀢𑀺𑀲𑁆𑀲𑀫𑀘𑁆𑀘𑀁 𑀢𑀁, ‘‘𑀙𑀸𑀢𑀚𑁆𑀛𑀢𑁆𑀢𑀸 𑀫𑀬𑀁’’𑀇𑀢𑀺.

𑀲𑀼𑀯𑀡𑁆𑀡𑀲𑀭𑀓𑁂 𑀔𑀺𑀢𑁆𑀢-𑀪𑀢𑁆𑀢𑀁 𑀦𑀻𑀳𑀭𑀺𑀢𑀲𑁆𑀲 𑀲𑁄;

𑀲𑀗𑁆𑀖𑁂 𑀤𑀢𑁆𑀯𑀸 𑀪𑀼𑀜𑁆𑀚𑀦𑀢𑁄, 𑀓𑀸𑀭𑁂𑀢𑁆𑀯𑀸 𑀘𑀢𑀼𑀪𑀸𑀕𑀓𑀁.

‘‘𑀖𑁄𑀲𑁂𑀳𑀺 𑀓𑀸𑀮’’𑀫𑀺𑀘𑁆𑀘𑀸’𑀳,

𑀣𑁂𑀭𑁄 𑀧𑀺𑀬𑀗𑁆𑀕𑀼 𑀤𑀻𑀧𑀝𑁆𑀞𑁄, 𑀣𑁂𑀭𑀁 𑀢𑀢𑁆𑀣 𑀦𑀺𑀬𑁄𑀚𑀬𑀺;

𑀢𑀺𑀲𑁆𑀲𑀁 𑀓𑀼𑀝𑀼𑀫𑁆𑀩𑀺𑀓𑀲𑀼𑀢𑀁, 𑀲𑁄 𑀢𑀢𑁆𑀣 𑀦𑀪𑀲𑀸’𑀕𑀫𑀸.

𑀢𑀲𑁆𑀲 𑀢𑀺𑀲𑁆𑀲𑁄 𑀓𑀭𑀸𑀧𑀢𑁆𑀢-𑀆𑀤𑀸𑀬𑀸’𑀤𑀸𑀲𑀺 𑀭𑀸𑀚𑀺𑀦𑁄;

𑀲𑀗𑁆𑀖𑀲𑁆𑀲 𑀪𑀸𑀕𑀁 𑀲𑀫𑁆𑀪𑀸𑀕𑀁, 𑀭𑀸𑀚𑀸 𑀧𑀢𑁆𑀢𑁂 𑀔𑀺𑀧𑀸𑀧𑀬𑀺.

𑀲𑀫𑁆𑀪𑀸𑀕𑀁 ¶ 𑀔𑀺𑀧𑀺 𑀢𑀺𑀲𑁆𑀲𑁄 𑀘, 𑀲𑀫𑁆𑀪𑀸𑀕𑀁 𑀯𑀴𑀯𑀸𑀧𑀺 𑀘;

𑀦 𑀇𑀘𑁆𑀙𑀺𑀢𑀲𑁆𑀲𑀸𑀪𑀸𑀕𑀜𑁆𑀘, 𑀢𑀺𑀲𑁆𑀲𑁄 𑀧𑀢𑁆𑀢𑀫𑁆𑀳𑀺 𑀧𑀓𑁆𑀔𑀺𑀧𑀺.

𑀪𑀢𑁆𑀢𑀲𑁆𑀲 𑀧𑀼𑀡𑁆𑀡𑀧𑀢𑁆𑀢𑀁 𑀢𑀁, 𑀅𑀤𑀸𑀣𑁂𑀭𑀲𑁆𑀲 𑀪𑀽𑀧𑀢𑀺;

𑀅𑀤𑀸 𑀕𑁄𑀢𑀫𑀣𑁂𑀭𑀲𑁆𑀲, 𑀲𑁄 𑀕𑀦𑁆𑀢𑁆𑀯𑀸 𑀦𑀪𑀲𑀸 𑀮𑀳𑀼𑀁.

𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀤𑀢𑁆𑀯𑀸 𑀆𑀮𑁄𑀧𑀪𑀸𑀕𑀲𑁄;

𑀧𑀜𑁆𑀘𑀲𑀢𑀸𑀦𑀁 𑀲𑁄 𑀣𑁂𑀭𑁄, 𑀮𑀤𑁆𑀥𑁂𑀳𑀺 𑀢𑀼 𑀢𑀤𑀦𑁆𑀢𑀺𑀓𑀸.

𑀪𑀸𑀕𑁂𑀳𑀺 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀆𑀓𑀸𑀲𑁂 𑀔𑀺𑀧𑀺 𑀭𑀸𑀚𑀺𑀦𑁄;

𑀤𑀺𑀲𑁆𑀯𑀸’ 𑀕𑀢𑀁 𑀕𑀳𑁂𑀢𑁆𑀯𑀸 𑀢𑀁, 𑀢𑀺𑀲𑁆𑀲𑁄 𑀪𑁄𑀚𑀺𑀲𑀺 𑀪𑀽𑀧𑀢𑀺𑀁.

𑀪𑀼𑀜𑁆𑀚𑀺𑀢𑁆𑀯𑀸𑀦 𑀲𑀬𑀜𑁆𑀚𑀸𑀧𑀺, 𑀯𑀴𑀯𑀜𑁆𑀘 𑀅𑀪𑁄𑀚𑀬𑀺;

𑀲𑀢𑁆𑀢𑀸𑀳𑀁 𑀘𑀼𑀫𑁆𑀩𑀝𑀁 𑀓𑀢𑁆𑀯𑀸, 𑀭𑀸𑀚𑀸 𑀧𑀢𑁆𑀢𑀁 𑀯𑀺𑀲𑀚𑁆𑀚𑀬𑀺.

𑀕𑀦𑁆𑀢𑁆𑀯𑀸𑀦 𑀲𑁄 𑀫𑀳𑀸𑀕𑀸𑀫𑀁, 𑀲𑀫𑀸𑀤𑀸𑀬 𑀩𑀮𑀁 𑀧𑀼𑀦;

𑀲𑀝𑁆𑀞𑀺𑀲𑀳𑀲𑁆𑀲𑀁 𑀬𑀼𑀤𑁆𑀥𑀸𑀬, 𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀺 𑀲𑀪𑀸𑀢𑀭𑀸.

𑀭𑀸𑀚𑀸 𑀯𑀴𑀯𑀫𑀸𑀭𑀼𑀬𑁆𑀳, 𑀢𑀺𑀲𑁆𑀲𑁄 𑀓𑀡𑁆𑀟𑀽𑀮 𑀳𑀢𑁆𑀣𑀺𑀦𑀁;

𑀤𑁆𑀯𑁂 𑀪𑀸𑀢𑀭𑁄 𑀲𑀫𑀸𑀕𑀜𑁆𑀙𑀼𑀁, 𑀬𑀼𑀚𑁆𑀛𑀫𑀸𑀦𑀸 𑀭𑀡𑁂 𑀢𑀤𑀸.

𑀭𑀸𑀚𑀸 𑀓𑀭𑀺𑀁 𑀓𑀭𑀺𑀢𑁆𑀯’𑀦𑁆𑀢𑁄, 𑀯𑀴𑀯𑀸𑀫𑀡𑁆𑀟𑀮𑀁 𑀅𑀓𑀸;

𑀢𑀣𑀸𑀧𑀺 𑀙𑀺𑀤𑁆𑀤𑀁 𑀦𑁄 𑀤𑀺𑀲𑁆𑀯𑀸, 𑀮𑀗𑁆𑀖𑀸 𑀧𑁂𑀢𑀼𑀁 𑀫𑀢𑀺𑀁𑀅𑀓𑀸.

𑀯𑀴𑀯𑀁 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀳𑀢𑁆𑀣𑀺𑀦𑀁 𑀪𑀸𑀢𑀺𑀓𑁄’𑀧𑀭𑀺;

𑀢𑁄𑀫𑀭𑀁 𑀔𑀺𑀧𑀺 𑀘𑀫𑁆𑀫𑀁𑀯, 𑀬𑀣𑀸 𑀙𑀺𑀚𑁆𑀚𑀢𑀺 𑀧𑀺𑀝𑁆𑀞𑀺𑀬𑀁.

𑀅𑀦𑁂𑀓𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀓𑀼𑀫𑀸𑀭𑀲𑁆𑀲 𑀦𑀭𑀸𑀢𑀳𑀺𑀁;

𑀧𑀢𑀺𑀁𑀲𑀼 𑀬𑀼𑀤𑁆𑀥𑁂 𑀬𑀼𑀚𑁆𑀛𑀦𑁆𑀢𑀸, 𑀪𑀺𑀚𑁆𑀚 𑀘𑁂𑀯 𑀫𑀳𑀩𑁆𑀩𑀮𑀁.

‘‘𑀆𑀭𑁄𑀳𑀓𑀲𑁆𑀲 𑀯𑁂𑀓𑀮𑁆𑀮𑀸, 𑀇𑀢𑁆𑀣𑀻 𑀫𑀁 𑀮𑀗𑁆𑀖𑀬𑀻’’𑀇𑀢𑀺;

𑀓𑀼𑀤𑁆𑀥𑁄𑀓𑀭𑀻 𑀢𑀁 𑀘𑀸𑀮𑁂𑀦𑁆𑀢𑁄, 𑀭𑀼𑀓𑁆𑀔𑀫𑁂𑀓 𑀫𑀼𑀧𑀸𑀕𑀫𑀺.

𑀓𑀼𑀫𑀸𑀭𑁄 𑀆𑀭𑀼𑀳𑀻 𑀭𑀼𑀓𑁆𑀔𑀁, 𑀳𑀢𑁆𑀣𑀻 𑀲𑀸𑀫𑀺𑀫𑀼𑀧𑀸𑀕𑀫𑀺;

𑀢𑀫𑀸𑀭𑀼𑀬𑁆𑀳 𑀧𑀮𑀸𑀬𑀦𑁆𑀢𑀁, 𑀓𑀼𑀫𑀸𑀭𑁄 𑀫𑀦𑀼𑀩𑀦𑁆𑀥𑀺 𑀲𑁄.

𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀸𑀭𑀁 𑀲𑁄, 𑀫𑀳𑀸𑀣𑁂𑀭 𑀖𑀭𑀁𑀕𑀢𑁄;

𑀦𑀺𑀧𑀚𑁆𑀚𑀳𑁂𑀝𑁆𑀞𑀸 𑀫𑀜𑁆𑀘𑀲𑁆𑀲, 𑀓𑀼𑀫𑀸𑀭𑁄 𑀪𑀸𑀢𑀼𑀦𑁄𑀪𑀬𑀸.

𑀧𑀲𑀸𑀭𑀬𑀺 𑀫𑀳𑀸𑀣𑁂𑀭𑁄, 𑀘𑀻𑀯𑀭𑀁 𑀢𑀢𑁆𑀣 𑀫𑀜𑁆𑀘𑀓𑁂;

𑀭𑀸𑀚𑀸 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸, ‘‘𑀓𑀼𑀳𑀺𑀁 𑀢𑀺𑀲𑁆𑀲𑁄’’𑀢𑀺 𑀧𑀼𑀘𑁆𑀙𑀣.

‘‘𑀫𑀜𑁆𑀘𑁂 ¶ 𑀢𑀢𑁆𑀣 𑀫𑀳𑀸𑀭𑀸𑀚’’, 𑀇𑀢𑀺 𑀣𑁂𑀭𑁄 𑀅𑀯𑁄𑀘 𑀢𑀁;

𑀳𑁂𑀝𑁆𑀞𑀸 𑀫𑀜𑁆𑀘𑁂𑀢𑀺 𑀚𑀸𑀦𑀺𑀢𑁆𑀯𑀸, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀪𑀽𑀧𑀢𑀺.

𑀲𑀫𑀦𑁆𑀢𑀢𑁄 𑀯𑀺𑀳𑀸𑀭𑀲𑁆𑀲, 𑀭𑀓𑁆𑀔𑀁 𑀓𑀸𑀭𑀬𑀺 𑀢𑀁 𑀧𑀦;

𑀧𑀜𑁆𑀘𑀓𑀫𑁆𑀳𑀺 𑀦𑀺𑀧𑀚𑁆𑀚𑁂𑀢𑁆𑀯𑀸, 𑀤𑀢𑁆𑀯𑀸 𑀉𑀧𑀭𑀺 𑀘𑀻𑀯𑀭𑀁.

𑀫𑀜𑁆𑀘𑀧𑀸𑀤𑁂𑀲𑀼 𑀕𑀡𑁆𑀳𑀺𑀢𑁆𑀯𑀸, 𑀘𑀢𑁆𑀢𑀸𑀭𑁄 𑀤𑀳𑀭𑀸 𑀬𑀢𑀻;

𑀫𑀢𑀪𑀺𑀓𑁆𑀔𑀼𑀦𑀺𑀬𑀸𑀫𑁂𑀦, 𑀓𑀼𑀫𑀸𑀭𑀁 𑀩𑀳𑀺 𑀦𑀻𑀳𑀭𑀼𑀁.

𑀦𑀻𑀬𑀫𑀸𑀦𑀦𑁆𑀢𑀼 𑀢𑀁 𑀜𑀢𑁆𑀯𑀸, 𑀇𑀥 𑀫𑀸𑀳 𑀫𑀳𑀻𑀧𑀢𑀺;

‘‘𑀢𑀺𑀲𑁆𑀲 𑀢𑁆𑀯𑀁 𑀓𑀼𑀮𑀤𑁂𑀯𑀢𑀸𑀦𑀁, 𑀲𑀻𑀲𑁂 𑀳𑀼𑀢𑁆𑀯𑀸𑀦 𑀦𑀺𑀬𑁆𑀬𑀸𑀲𑀺.

𑀩𑀮𑀓𑁆𑀓𑀸𑀭𑁂𑀦 𑀕𑀳𑀡𑀁, 𑀓𑀼𑀮𑀤𑁂𑀯𑁂𑀳𑀺 𑀦𑀢𑁆𑀣𑀺 𑀫𑁂;

𑀕𑀼𑀡𑀁 𑀢𑁆𑀯𑀁 𑀓𑀼𑀮𑀤𑁂𑀯𑀸𑀦𑀁, 𑀲𑀭𑁂𑀬𑁆𑀬𑀸𑀲𑀺 𑀓𑀤𑀸𑀘𑀺𑀧𑀺’’.

𑀢𑀢𑁄𑀬𑁂𑀯 𑀫𑀳𑀸𑀕𑀸𑀫𑀁, 𑀅𑀕𑀫𑀸𑀲𑀺 𑀫𑀳𑀻𑀧𑀢𑀺;

𑀆𑀡𑀸𑀧𑁂𑀲𑀺 𑀘 𑀢𑀢𑁆𑀣𑁂𑀯, 𑀫𑀸𑀢𑀭𑀁 𑀫𑀸𑀢𑀼𑀕𑀸𑀭𑀯𑁄.

[𑀯𑀲𑁆𑀲𑀸𑀦𑀺 𑀅𑀝𑁆𑀞𑀲𑀝𑁆𑀞𑀺𑀁𑀲𑁄, 𑀅𑀝𑁆𑀞𑀸 𑀥𑀫𑁆𑀫𑀝𑁆𑀞𑀫𑀸𑀦𑀲𑁄;

𑀅𑀝𑁆𑀞𑀲𑀝𑁆𑀞𑀺𑀯𑀺𑀳𑀸𑀭𑁂 𑀘, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.]

𑀦𑀺𑀓𑁆𑀔𑀸𑀫𑀺𑀢𑁄 𑀲𑁄 𑀪𑀺𑀓𑁆𑀔𑀽𑀳𑀺, 𑀢𑀺𑀲𑁆𑀲𑁄𑀭𑀸𑀚 𑀲𑀼𑀢𑁄 𑀧𑀦;

𑀤𑀻𑀖𑀯𑀸𑀧𑀺𑀁 𑀢𑀢𑁄𑀬𑁂𑀯, 𑀅𑀕𑀫’𑀜𑁆𑀜𑀢𑀭𑁄 𑀯𑀺𑀬.

𑀓𑀼𑀫𑀸𑀭𑁄 𑀕𑁄𑀥𑀕𑀢𑁆𑀢𑀲𑁆𑀲, 𑀢𑀺𑀲𑁆𑀲𑀣𑁂𑀭𑀲𑁆𑀲 𑀆𑀳 𑀲𑁄;

‘‘𑀲𑀸𑀧𑀭𑀸𑀥𑁄 𑀅𑀳𑀁 𑀪𑀦𑁆𑀢𑁂, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀪𑀸𑀢𑀭𑀁.

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀓𑀸𑀭𑀁, 𑀢𑀺𑀲𑁆𑀲𑀁 𑀧𑀜𑁆𑀘𑀲𑀢𑀸𑀦𑀺 𑀘;

𑀪𑀺𑀓𑁆𑀔𑀼𑀦𑀫𑀸𑀤𑀺𑀬𑀺𑀢𑁆𑀯𑀸 𑀲𑁄, 𑀣𑁂𑀭𑁄 𑀭𑀸𑀚 𑀫𑀼𑀧𑀸𑀕𑀫𑀺.

𑀭𑀸𑀚𑀧𑀼𑀢𑁆𑀢𑀁 𑀞𑀧𑁂𑀢𑁆𑀯𑀸𑀦, 𑀣𑁂𑀭𑁄 𑀲𑁄𑀧𑀸𑀦 𑀫𑀢𑁆𑀣𑀓𑁂;

𑀲𑀲𑀗𑁆𑀖𑁄 𑀧𑀸𑀯𑀺𑀲𑀺 𑀲𑀤𑁆𑀥𑁄, 𑀦𑀺𑀲𑀻𑀤𑀸𑀯𑀺𑀬 𑀪𑀽𑀫𑀺𑀧𑁄.

𑀉𑀧𑀸𑀦𑀬𑀻 𑀬𑀸𑀕𑀼𑀆𑀤𑀺𑀁, 𑀣𑁂𑀭𑁄 𑀧𑀢𑁆𑀢𑀁 𑀯𑀺𑀥𑁂𑀲𑀺𑀲𑁄;

‘‘𑀓𑀺𑀦𑁆𑀢𑀺 𑀯𑀼𑀢𑁆𑀢𑁄’𑀩𑁆𑀭𑀯𑀺 𑀢𑀺𑀲𑁆𑀲𑀁, 𑀆𑀤𑀸𑀬 𑀅𑀕𑀢𑀸’’𑀇𑀢𑀺.

‘‘𑀓𑀼𑀳𑀺𑀁 𑀘𑁄𑀭𑁄’’𑀢𑀺 𑀯𑀼𑀢𑁆𑀢𑁄 𑀘, 𑀞𑀺𑀢𑀞𑀸𑀦𑀁 𑀦𑀺𑀯𑁂𑀤𑀬𑀺;

𑀯𑀺𑀳𑀸𑀭𑀤𑁂𑀯𑀻 𑀕𑀦𑁆𑀢𑁆𑀯𑀸𑀦, 𑀙𑀸𑀤𑀺𑀬𑀞𑀸𑀲𑀺 𑀧𑀼𑀢𑁆𑀢𑀓.

𑀚𑀦𑀓𑁆𑀔𑀬𑀁 𑀯𑀺𑀦𑀸𑀬𑁂𑀯, 𑀓𑀮𑀳𑁄 𑀦 𑀪𑀯𑁂𑀬𑁆𑀬 𑀦𑁄;

𑀭𑀸𑀚𑀸 𑀲𑀗𑁆𑀖𑀲𑁆𑀲 𑀤𑁄𑀲𑁂𑀲𑁄, 𑀪𑀁𑀖𑁂 𑀤𑀡𑁆𑀟𑀁 𑀓𑀭𑀺𑀲𑁆𑀲𑀢𑀺.

𑀤𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲,

𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑀫𑁆𑀳𑀺, 𑀦𑀺𑀲𑀺𑀦𑁆𑀦𑁄 𑀪𑀸𑀢𑀭𑀸 𑀲𑀳;

𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀢𑁄𑀬𑁂𑀯, 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀯𑀺𑀲𑀚𑁆𑀚𑀬𑀺.

𑀲𑀲𑁆𑀲𑀓𑀫𑁆𑀫𑀸𑀦𑀺 𑀓𑀸𑀭𑁂𑀢𑀼𑀁, 𑀢𑀺𑀲𑁆𑀲𑀁 𑀢𑀢𑁆𑀣𑁂𑀯 𑀧𑀸𑀳𑀺𑀡𑀺;

𑀲𑀬𑀫𑁆𑀧𑀺 𑀪𑁂𑀭𑀺𑀁 𑀘𑀸𑀭𑁂𑀢𑁆𑀯𑀸, 𑀲𑀲𑁆𑀲𑀓𑀫𑁆𑀫𑀸𑀦𑀺 𑀓𑀸𑀭𑀬𑀺.

𑀇𑀢𑀺 𑀯𑁂𑀭𑀫𑀦𑁂𑀓𑀯𑀺𑀓𑀧𑁆𑀧𑀘𑀺𑀢𑀁,

𑀲𑀫𑀬𑀦𑁆𑀢𑀺 𑀩𑀳𑀼𑀁 𑀅𑀧𑀺 𑀲𑀧𑁆𑀧𑀼𑀭𑀺𑀲𑀁;

𑀇𑀢𑀺 𑀘𑀺𑀦𑁆𑀢𑀺𑀬 𑀓𑁄𑀳𑀺 𑀦𑀭𑁄 𑀫𑀢𑀺𑀫𑀸,

𑀦 𑀪𑀯𑁂𑀬𑁆𑀬 𑀧𑀭𑁂𑀲𑀼 𑀲𑀼𑀲𑀦𑁆𑀢 𑀫𑀦𑁄𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑀼𑀝𑁆𑀞𑀕𑀸𑀫𑀡𑀺𑀭𑀸𑀚𑀸’𑀣 ¶ , 𑀓𑀢𑁆𑀯𑀸𑀦 𑀚𑀦𑀲𑀗𑁆𑀕𑀳𑀁;

𑀓𑀼𑀦𑁆𑀢𑁂 𑀥𑀸𑀢𑀼𑀁 𑀦𑀺𑀥𑀸𑀧𑁂𑀢𑁆𑀯𑀸, 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑁄.

𑀕𑀦𑁆𑀢𑁆𑀯𑀸 𑀢𑀺𑀲𑁆𑀲𑀫𑀳𑀸𑀭𑀸𑀫𑀁, 𑀯𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀫𑀩𑁆𑀭𑀯𑀺;

‘‘𑀧𑀸𑀭𑀕𑀗𑁆𑀕𑀁 𑀕𑀫𑀺𑀲𑁆𑀲𑀸𑀫𑀺, 𑀚𑁄𑀢𑁂𑀢𑀼𑀁 𑀲𑀸𑀲𑀦𑀁 𑀅𑀳𑀁.

𑀲𑀓𑁆𑀓𑀸𑀢𑀼𑀁 𑀪𑀺𑀓𑁆𑀔𑀯𑁄 𑀤𑁂𑀣, 𑀅𑀫𑁆𑀳𑁂𑀳𑀺 𑀲𑀳𑀕𑀸𑀫𑀺𑀦𑁄;

𑀫𑀗𑁆𑀕𑀮𑀜𑁆𑀘𑁂𑀯 𑀭𑀓𑁆𑀔𑀸 𑀘, 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀁 𑀳𑀺𑀦𑁄.

𑀅𑀤𑀸𑀲𑀺 𑀤𑀡𑁆𑀟𑀓𑀫𑁆𑀫𑀢𑁆𑀣𑀁, 𑀲𑀗𑁆𑀖𑁄 𑀧𑀜𑁆𑀘𑀲𑀢𑀁 𑀬𑀢𑀻;

𑀪𑀺𑀓𑁆𑀔𑀼𑀲𑀗𑁆𑀖𑀢𑀫𑀸𑀤𑀸𑀬, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀪𑀽𑀧𑀢𑀺.

𑀲𑁄𑀥𑀸𑀧𑁂𑀢𑁆𑀯𑀸𑀦 𑀫𑀮𑀬𑁂, 𑀇𑀥𑀸𑀕𑀫𑀦𑀫𑀜𑁆𑀚𑀲𑀁;

𑀓𑀡𑁆𑀟𑀼𑀮𑀁 𑀳𑀢𑁆𑀣𑀺𑀫𑀸𑀭𑀼𑀬𑁆𑀳, 𑀬𑁄𑀥𑁂𑀳𑀺 𑀧𑀭𑀺𑀯𑀸𑀭𑀺𑀢𑁄.

𑀫𑀳𑀢𑀸 𑀩𑀮𑀓𑀸𑀬𑁂𑀦, 𑀬𑀼𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑀺;

𑀫𑀳𑀸𑀕𑀸𑀫𑁂𑀦 𑀲𑀫𑁆𑀩𑀤𑁆𑀥𑀸, 𑀲𑁂𑀦𑀸𑀕𑀸’𑀕𑀼𑀢𑁆𑀢𑀳𑀸𑀮𑀓𑀁.

𑀫𑀳𑀺𑀬𑀗𑁆𑀕𑀡𑀫𑀸𑀕𑀫𑁆𑀫, 𑀙𑀢𑁆𑀢𑀁 𑀤𑀫𑀺𑀴𑀫𑀕𑁆𑀕𑀳𑀻;

𑀖𑀸𑀢𑁂𑀢𑁆𑀯𑀸 𑀤𑀫𑀺𑀴𑁂 𑀢𑀢𑁆𑀣, 𑀆𑀕𑀦𑁆𑀢𑁆𑀯𑀸 𑀅𑀫𑁆𑀩𑀢𑀺𑀢𑁆𑀣𑀓𑀁.

𑀕𑀗𑁆𑀕𑀸 𑀧𑀭𑀺𑀔𑀸𑀲𑀫𑁆𑀧𑀦𑁆𑀦𑀁, 𑀢𑀺𑀢𑁆𑀣𑀫𑁆𑀩𑀤𑀫𑀺𑀴𑀁 𑀧𑀦;

𑀬𑀼𑀚𑁆𑀛𑀁 𑀘𑀢𑀽𑀳𑀺 𑀫𑀸 𑀲𑁂𑀳𑀺, 𑀓𑀢𑀳𑀢𑁆𑀣𑀁 𑀫𑀳𑀩𑁆𑀩𑀮𑀁.

𑀫𑀸𑀢𑀭𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀢𑁂𑀦 𑀮𑁂𑀲𑁂𑀦 𑀅𑀕𑁆𑀕𑀳𑀺;

𑀢𑀢𑁄𑀑𑀭𑀼𑀬𑁆𑀳 𑀤𑀫𑀺𑀴𑁂, 𑀲𑀢𑁆𑀢𑀭𑀸𑀚𑁂 𑀫𑀳𑀩𑁆𑀩𑀮𑁂.

𑀏𑀓𑀸𑀳𑁂𑀦𑁂𑀯 𑀕𑀡𑁆𑀳𑀺𑀢𑁆𑀯𑀸, 𑀔𑁂𑀫𑀁 𑀓𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀩𑀮𑀲𑁆𑀲𑀸’𑀤𑀸 𑀥𑀦𑀁 𑀢𑁂𑀦, 𑀔𑁂𑀫𑀸𑀭𑀸𑀫𑁄𑀢𑀺 𑀯𑀼𑀘𑁆𑀘𑀢𑀺.

𑀫𑀳𑀸𑀓𑁄𑀝𑁆𑀞𑀦𑁆𑀢𑀭𑁂 𑀲𑁄𑀩𑁆𑀪𑁂, 𑀤𑁄𑀡𑁄 𑀕𑀯𑀭𑀫𑀕𑁆𑀕𑀳𑀻;

𑀳𑀸𑀮𑀓𑁄𑀮𑁂 𑀇𑀲𑁆𑀲𑀭𑀺𑀬𑀁, 𑀦𑀸𑀴𑀺𑀲𑁄𑀩𑁆𑀪𑀫𑁆𑀳𑀺 𑀦𑀸𑀴𑀺𑀓𑀁.

𑀤𑀻𑀖𑀸𑀪𑀬𑀕𑀮𑁆𑀮𑀓𑀫𑁆𑀳𑀺, 𑀕𑀡𑁆𑀳𑀺 𑀤𑀻𑀖𑀸𑀪𑀬𑀫𑁆𑀧𑀺 𑀘;

𑀓𑀘𑁆𑀙𑀺𑀧𑀺𑀝𑁆𑀞𑁂 𑀓𑀧𑀺𑀲𑀻𑀲𑀁, 𑀘𑀢𑀼𑀫𑀸𑀲𑁂𑀦 𑀅𑀕𑁆𑀕𑀳𑀺.

𑀓𑁄𑀝𑀦𑀕𑀭𑁂 ¶ 𑀓𑁄𑀝𑀜𑁆𑀘, 𑀢𑀢𑁄 𑀳𑀸𑀮𑀯𑀳𑀸𑀡𑀓𑀁;

𑀯𑀳𑀺𑀝𑁆𑀞𑁂 𑀯𑀳𑀺𑀝𑁆𑀞𑀤𑀫𑀺𑀴𑀁, 𑀕𑀸𑀫𑀡𑀺𑀫𑁆𑀳𑀺 𑀘 𑀕𑀸𑀫𑀡𑀺𑀁.

𑀓𑀼𑀫𑁆𑀪𑀕𑀸𑀫𑀫𑁆𑀳𑀺 𑀓𑀼𑀫𑁆𑀪𑀜𑁆𑀘, 𑀦𑀦𑁆𑀤𑀺𑀕𑀸𑀫𑀫𑁆𑀳𑀺 𑀦𑀦𑁆𑀤𑀺𑀓𑀁;

𑀕𑀡𑁆𑀳𑀺 𑀔𑀸𑀡𑀼𑀁 𑀔𑀸𑀡𑀼𑀕𑀸𑀫𑁂, 𑀤𑁆𑀯𑁂 𑀢𑀼 𑀢𑀫𑁆𑀩𑀼𑀡𑁆𑀡𑀫𑁂 𑀧𑀦.

𑀫𑀸𑀢𑀼𑀮𑀁 𑀪𑀸𑀕𑀺𑀦𑁂𑀬𑁆𑀬𑀜𑁆𑀘, 𑀢𑀫𑁆𑀩𑀉𑀡𑁆𑀡𑀫𑀦𑀸𑀫𑀓𑁂;

𑀚𑀫𑁆𑀩𑀼𑀘𑀕𑁆𑀕𑀳𑀻 𑀲𑁄𑀲𑁄 𑀘, 𑀕𑀸𑀫𑁄’𑀳𑀼 𑀢𑀁 𑀢𑀤𑀯𑁆𑀳𑀬𑁄.

‘‘𑀅𑀚𑀸𑀦𑀺𑀢𑁆𑀯𑀸 𑀲𑀓𑀁𑀲𑁂𑀦𑀁, 𑀖𑀸𑀢𑁂𑀦𑁆𑀢𑀺 𑀲𑀚𑀦𑀸’’ 𑀇𑀢𑀺;

𑀲𑀼𑀢𑁆𑀯𑀸𑀦 𑀲𑀘𑁆𑀘𑀓𑀺𑀭𑀺𑀬𑀁, 𑀅𑀓𑀭𑀻 𑀢𑀢𑁆𑀣 𑀪𑀽𑀧𑀢𑀺.

𑀭𑀚𑁆𑀚𑀲𑀼𑀔𑀸𑀬 𑀯𑀸𑀬𑀸𑀫𑁄, 𑀦𑀸𑀬𑀁 𑀫𑀫 𑀓𑀤𑀸𑀘𑀺𑀧𑀺;

𑀲𑀫𑁆𑀩𑀼𑀤𑁆𑀥 𑀲𑀸𑀲𑀦𑀲𑁆𑀲𑁂𑀯, 𑀞𑀧𑀦𑀸𑀬 𑀅𑀬𑀁 𑀫𑀫.

𑀢𑁂𑀦 𑀲𑀘𑁆𑀘𑁂𑀦 𑀫𑁂𑀲𑁂𑀦𑀸-𑀓𑀸𑀬𑁄𑀧𑀕𑀢𑀪𑀡𑁆𑀟𑀺𑀓𑀁;

𑀚𑀸𑀮𑀯𑀡𑁆𑀡𑀁𑀯 𑀳𑁄𑀢𑀽𑀢𑀺, 𑀢𑀁 𑀢𑀣𑁂𑀯𑀢𑀤𑀸 𑀅𑀳𑀼.

𑀕𑀗𑁆𑀕𑀸𑀢𑀻𑀭𑀫𑁆𑀳𑀺 𑀤𑀫𑀺𑀴𑀸, 𑀲𑀩𑁆𑀩𑁂 𑀖𑀸𑀢𑀺𑀢𑀲𑁂𑀲𑀓𑀸;

𑀯𑀺𑀚𑀺𑀢𑀁 𑀦𑀕𑀭𑀁 𑀦𑀸𑀫, 𑀲𑀭𑀡𑀢𑁆𑀣𑀸𑀬 𑀧𑀸𑀯𑀺𑀲𑀼𑀁.

𑀨𑀸𑀲𑀼𑀓𑁂 𑀅𑀗𑁆𑀕𑀡𑀞𑀸𑀦𑁂, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺;

𑀢𑀁 𑀔𑀦𑁆𑀥𑀸𑀯𑀸𑀭… 𑀞𑀻𑀢𑀺, 𑀦𑀸𑀫𑁂𑀦𑀸’𑀳𑁄𑀲𑀺 𑀧𑀸𑀓𑀝𑀁.

𑀯𑀺𑀚𑀺𑀢𑀦𑀕𑀭𑀕𑀸𑀳𑀢𑁆𑀣𑀁, 𑀯𑀻𑀫𑀁𑀲𑀦𑁆𑀢𑁄 𑀦𑀭𑀸𑀥𑀺𑀧𑁄;

𑀤𑀺𑀲𑁆𑀯𑀸’𑀬𑀦𑁆𑀢𑀁 𑀦𑀦𑁆𑀤𑀺𑀫𑀺𑀢𑁆𑀢𑀁, 𑀯𑀺𑀲𑀚𑁆𑀚𑀸𑀧𑁂𑀲𑀺 𑀓𑀡𑁆𑀟𑀼𑀮𑀁.

𑀕𑀡𑁆𑀳𑀺𑀢𑀼𑀁 𑀆𑀕𑀢𑀁 𑀳𑀢𑁆𑀣𑀺𑀁, 𑀦𑀦𑁆𑀤𑀻𑀫𑀺𑀢𑁆𑀢𑁄 𑀓𑀭𑁂𑀳𑀺𑀢𑀁;

𑀉𑀪𑁄 𑀤𑀦𑁆𑀢𑁂 𑀧𑀻𑀴𑀬𑀺𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀬𑀺.

𑀳𑀢𑁆𑀣𑀺𑀦𑀸 𑀦𑀦𑁆𑀤𑀺𑀫𑀺𑀢𑁆𑀢𑁄 𑀢𑀼, 𑀬𑀲𑁆𑀫𑀸 𑀬𑀢𑁆𑀣 𑀅𑀬𑀼𑀚𑁆𑀛𑀺 𑀲𑁄;

𑀢𑀲𑁆𑀫𑀸 𑀢𑀢𑁆𑀣 𑀢𑀢𑁄 𑀕𑀸𑀫𑁄, 𑀳𑀢𑁆𑀣𑀺𑀧𑁄𑀭𑁄𑀢𑀺 𑀯𑀼𑀘𑁆𑀘𑀢𑀺.

𑀯𑀻𑀫𑀁𑀲𑀺𑀢𑁆𑀯𑀸 𑀉𑀪𑁄 𑀭𑀸𑀚𑀸, 𑀯𑀺𑀚𑀺𑀢𑀁 𑀦𑀕𑀭𑀁 𑀅𑀕𑀸;

𑀬𑁄𑀥𑀸𑀦𑀁 𑀤𑀓𑁆𑀔𑀺𑀡𑀤𑁆𑀯𑀸𑀭𑁂, 𑀲𑀗𑁆𑀕𑀸𑀫𑁄 𑀆𑀲𑀺 𑀪𑀺𑀁𑀲𑀦𑁄.

𑀧𑀼𑀭𑀢𑁆𑀣𑀺𑀫𑀫𑁆𑀳𑀺 𑀤𑁆𑀯𑀸𑀭𑀫𑁆𑀳𑀺, 𑀲𑁄 𑀯𑁂𑀴𑀼𑀲𑀼𑀫𑀦𑁄 𑀧𑀦;

𑀅𑀦𑁂𑀓 𑀲𑀗𑁆𑀔𑁂 𑀤𑀫𑀺𑀴𑁂, 𑀅𑀲𑁆𑀲𑀸𑀭𑀼𑀴𑁆𑀳𑁂 𑀅𑀖𑀸𑀢𑀬𑀺.

𑀤𑁆𑀯𑀸𑀭𑀁 𑀣𑀓𑁂𑀲𑀼𑀁 𑀤𑀫𑀺𑀴𑀸, 𑀭𑀸𑀚𑀸 𑀬𑁄𑀥𑁂 𑀯𑀺𑀲𑀚𑁆𑀚𑀬𑀺;

𑀓𑀡𑁆𑀡𑀼𑀮𑁄 𑀦𑀦𑁆𑀤𑀺𑀫𑀺𑀢𑁆𑀢𑁄 𑀘, 𑀲𑀼𑀭𑀦𑀺𑀫𑀺𑀮𑁄 𑀘 𑀤𑀓𑁆𑀔𑀺𑀡𑁂.

𑀦𑀕𑀭𑀁 𑀢𑀁 𑀢𑀺𑀧𑀭𑀺𑀔𑀁, 𑀉𑀘𑁆𑀘𑀧𑀸𑀓𑀸𑀭 𑀕𑁄𑀧𑀺𑀢𑀁;

𑀅𑀬𑁄𑀓𑀫𑁆𑀫𑀓𑀢𑀤𑁆𑀯𑀸𑀭𑀁, 𑀅𑀭𑀻𑀳𑀺 𑀤𑀼𑀧𑁆𑀧𑀥𑀁𑀲𑀺𑀬𑀁.

𑀚𑀸𑀡𑀽𑀳𑀺 𑀞𑀢𑁆𑀯𑀸 𑀤𑀸𑀞𑀸𑀳𑀺, 𑀪𑀺𑀦𑁆𑀤𑀺𑀢𑁆𑀯𑀸𑀦 𑀲𑀺𑀮𑀸𑀬𑀼𑀥𑀸;

𑀇𑀝𑁆𑀞𑀓𑀸 𑀘𑁂𑀯 𑀳𑀢𑁆𑀣𑀺 𑀲𑁄, 𑀅𑀬𑁄𑀤𑁆𑀯𑀸𑀭𑀫𑀼𑀧𑀸𑀕𑀫𑀺.

𑀕𑁄𑀧𑀼𑀭𑀝𑁆𑀞𑀸 𑀢𑀼 𑀤𑀫𑀺𑀴𑀸, 𑀔𑀺𑀧𑀺𑀁𑀲𑀼 𑀯𑀺𑀯𑀺𑀥𑀸’𑀬𑀼𑀥𑁂;

𑀧𑀓𑁆𑀓𑀁 𑀅𑀬𑁄𑀕𑀼𑀴𑀜𑁆𑀘𑁂𑀯, 𑀓𑀣𑀺𑀓𑀜𑁆𑀘 𑀲𑀺𑀮𑁂𑀲𑀺𑀓𑀁.

𑀧𑀺𑀝𑁆𑀞𑀺𑀁 𑀔𑀺𑀢𑁆𑀢𑁂 𑀲𑀺𑀮𑁂𑀲𑀫𑁆𑀳𑀺, 𑀥𑀽𑀧𑀸𑀬𑀦𑁆𑀢𑁂’𑀣 𑀓𑀡𑁆𑀟𑀼𑀮𑁄;

𑀯𑁂𑀤𑀦𑀝𑁆𑀝𑁄’𑀤𑀓𑀞𑀸𑀦𑀁, 𑀕𑀦𑁆𑀢𑁆𑀯𑀸𑀦 𑀢𑀢𑁆𑀣 𑀑𑀕𑀳𑀻.

𑀦 𑀇𑀤𑀁 𑀲𑀼𑀭𑀸𑀧𑀸𑀡𑀁 𑀢𑁂, 𑀅𑀬𑁄𑀤𑁆𑀯𑀸𑀭 𑀯𑀺𑀖𑀸𑀝𑀦𑀁;

𑀕𑀘𑁆𑀙 𑀤𑁆𑀯𑀸𑀭𑀁 𑀯𑀺𑀖𑀸𑀝𑁂𑀳𑀺, 𑀇𑀘𑁆𑀘𑀸𑀳𑀕𑁄𑀝𑁆𑀞𑀬𑀺𑀫𑁆𑀩𑀭𑁄.

𑀲𑁄 𑀫𑀸𑀦𑀁 𑀚𑀦𑀬𑀺𑀢𑁆𑀯𑀸𑀦, 𑀓𑁄𑀜𑁆𑀘𑀁 𑀓𑀢𑁆𑀯𑀸 𑀕𑀚𑀼𑀢𑁆𑀢𑀫𑁄;

𑀉𑀤𑀓𑀸 𑀉𑀝𑁆𑀞𑀳𑀺𑀢𑁆𑀯𑀸𑀦, 𑀣𑀮𑁂 𑀅𑀝𑁆𑀞𑀸𑀲𑀺 𑀤𑀧𑁆𑀧𑀯𑀸.

𑀳𑀢𑁆𑀣𑀺𑀯𑀚𑁆𑀚𑁂 𑀯𑀺𑀬𑁄𑀚𑁂𑀢𑁆𑀯𑀸, 𑀲𑀺𑀮𑁂𑀲𑀁 𑀑𑀲𑀥𑀁 𑀅𑀓𑀸;

𑀭𑀸𑀚𑀸 𑀆𑀭𑀼𑀬𑁆𑀳 𑀳𑀢𑁆𑀣𑀺𑀁 𑀢𑀁, 𑀓𑀼𑀫𑁆𑀪𑁂 𑀨𑀼𑀲𑀺𑀬𑀧𑀸𑀡𑀺𑀦𑀸.

‘‘𑀮𑀁𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀭𑀚𑁆𑀚𑀁 𑀢𑁂 𑀢𑀸𑀢 𑀓𑀡𑁆𑀟𑀼𑀮;

𑀤𑀫𑁆𑀫𑀻’’𑀢𑀺 𑀢𑀁 𑀢𑁄𑀲𑀬𑀺𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸 𑀯𑀭𑀪𑁄𑀚𑀦𑀁.

𑀯𑁂𑀞𑀬𑀺𑀢𑁆𑀯𑀸 𑀲𑀸𑀝𑀓𑁂𑀦, 𑀓𑀸𑀭𑀬𑀺𑀢𑁆𑀯𑀸 𑀲𑀼𑀯𑀫𑁆𑀫𑀺𑀢𑀁;

𑀲𑀢𑁆𑀢𑀕𑀼𑀡𑀁 𑀫𑀸𑀳𑀺𑀲𑀘𑀫𑁆𑀫𑀁, 𑀩𑀦𑁆𑀥𑁂𑀢𑁆𑀯𑀸 𑀘𑀫𑁆𑀫𑀧𑀺𑀝𑁆𑀞𑀺𑀬𑀁.

𑀢𑀲𑁆𑀲𑁄’ 𑀧𑀭𑀺𑀢𑁂𑀮𑀘𑀫𑁆𑀫𑀁, 𑀤𑀸𑀧𑁂𑀢𑁆𑀯𑀸 𑀢𑀁 𑀯𑀺𑀲𑀚𑁆𑀚𑀬𑀺;

𑀅𑀲𑀦𑀻𑀯𑀺𑀬 𑀕𑀚𑁆𑀚𑀦𑁆𑀢𑁄, 𑀲𑁄 𑀕𑀳𑁂𑀢𑁆𑀯𑀸’𑀧𑀤𑁆𑀤𑀯𑁂 𑀲𑀳.

𑀧𑀤𑀭𑀁 𑀯𑀺𑀚𑁆𑀛𑀺 𑀤𑀸𑀞𑀸𑀳𑀺, 𑀉𑀫𑁆𑀫𑀸𑀭𑀁 𑀧𑀤𑀲𑀸’𑀳𑀦𑀺;

𑀲𑀤𑁆𑀥𑀸𑀭𑀩𑀸𑀳𑀁 𑀢𑀁 𑀤𑁆𑀯𑀸𑀭𑀁, 𑀪𑀽𑀫𑀺𑀬𑀁 𑀲𑀭𑀯𑀁 𑀧𑀢𑀺.

𑀕𑁄𑀧𑀼𑀭𑁂 𑀤𑀩𑁆𑀩𑀲𑀫𑁆𑀪𑀸𑀭𑀁, 𑀧𑀢𑀦𑁆𑀢𑀁 𑀳𑀢𑁆𑀢𑀺𑀧𑀺𑀝𑁆𑀞𑀺𑀬𑀁;

𑀩𑀸𑀳𑀸𑀳𑀺 𑀧𑀭𑀺𑀳𑀭𑀺𑀢𑁆𑀯𑀸𑀦, 𑀦𑀦𑁆𑀤𑀻𑀫𑀺𑀢𑁆𑀢𑁄 𑀧𑀯𑀝𑁆𑀝𑀬𑀺.

𑀤𑀺𑀲𑁆𑀯𑀸𑀦 ¶ 𑀢𑀲𑁆𑀲 𑀓𑀺𑀭𑀺𑀬𑀁, 𑀓𑀡𑁆𑀟𑀼𑀮𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀤𑀸𑀞𑀸𑀧𑀻𑀞𑀦𑀯𑁂𑀭𑀁 𑀢𑀁, 𑀙𑀟𑁆𑀠𑁂𑀲𑀺 𑀧𑀞𑀫𑀁 𑀓𑀢𑀁.

𑀅𑀢𑁆𑀣𑀦𑁄 𑀧𑀺𑀝𑁆𑀞𑀺𑀢𑁄𑀬𑁂𑀯, 𑀧𑀯𑁂𑀲𑀢𑁆𑀣𑀸𑀬 𑀓𑀡𑁆𑀟𑀼𑀮𑁄;

𑀦𑀺𑀯𑀢𑁆𑀢𑀺𑀢𑁆𑀯𑀸𑀦 𑀑𑀮𑁄𑀓𑀺, 𑀬𑁄𑀥𑀁 𑀢𑀢𑁆𑀣 𑀕𑀚𑀼𑀢𑁆𑀢𑀫𑁄.

‘‘𑀳𑀢𑁆𑀣𑀺𑀦𑀸𑀓𑀢𑀫𑀕𑁆𑀕𑁂𑀦, 𑀦𑀧𑁆𑀧𑀯𑁂𑀓𑁆𑀔𑀸𑀫𑀳𑀁’’𑀇𑀢𑀺;

𑀦𑀦𑁆𑀤𑀻𑀫𑀺𑀢𑁆𑀢𑁄 𑀯𑀺𑀘𑀺𑀦𑁆𑀢𑁂𑀢𑁆𑀯𑀸, 𑀧𑀸𑀓𑀸𑀭𑀁 𑀳𑀦𑀺 𑀩𑀸𑀳𑀼𑀦𑀸.

𑀲𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀘𑁆𑀘𑁄, 𑀧𑀢𑀺𑀅𑀝𑁆𑀞𑀼𑀲𑀪𑁄 𑀓𑀺𑀭;

𑀑𑀮𑁄𑀓𑀺 𑀲𑀼𑀭𑀦𑀺𑀫𑀮𑀁, 𑀅𑀦𑀺𑀘𑁆𑀙𑀁 𑀲𑁄𑀧𑀺 𑀢𑀁 𑀧𑀣𑀁.

𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀫𑁂𑀓𑁂𑀓𑀁,

𑀳𑀢𑁆𑀢𑀻 𑀕𑀳𑁂𑀢𑁆𑀯𑀸 𑀭𑀣𑀘𑀓𑁆𑀓𑀁, 𑀫𑀺𑀢𑁆𑀢𑁄 𑀲𑀓𑀝𑀧𑀜𑁆𑀚𑀭𑀁;

𑀦𑀸𑀴𑀺𑀓𑁂𑀭𑀢𑀭𑀼𑀁 𑀕𑁄𑀝𑁆𑀞𑁄, 𑀦𑀺𑀫𑁆𑀫𑀮𑁄 𑀔𑀕𑁆𑀕𑀫𑀼𑀢𑁆𑀢𑀫𑀁.

𑀢𑀸𑀮𑀭𑀼𑀓𑁆𑀔𑀁 𑀫𑀳𑀸𑀲𑁄𑀡𑁄, 𑀣𑁂𑀭𑀧𑀼𑀢𑁆𑀢𑁄 𑀫𑀳𑀸𑀕𑀤𑀁;

𑀯𑀺𑀲𑀼𑀁 𑀯𑀺𑀲𑀼𑀁 𑀯𑀻𑀣𑀺𑀕𑀢𑀸, 𑀤𑀫𑀺𑀴𑁂 𑀢𑀢𑁆𑀣 𑀘𑀼𑀡𑁆𑀡𑀬𑀼𑀁.

𑀯𑀺𑀚𑀺𑀢𑀁 𑀦𑀕𑀭𑀁 𑀪𑁂𑀢𑁆𑀯𑀸, 𑀘𑀢𑀼𑀫𑀸𑀲𑁂𑀦 𑀔𑀢𑁆𑀢𑀺𑀬𑁄;

𑀢𑀣𑁄 𑀕𑀺𑀭𑀺𑀮𑀓𑀁 𑀕𑀦𑁆𑀢𑁆𑀯𑀸, 𑀕𑀺𑀭𑀺𑀬𑀁 𑀤𑀫𑀺𑀴𑀁 𑀳𑀦𑀺.

𑀕𑀦𑁆𑀢𑁆𑀯𑀸 𑀫𑀳𑁂𑀮𑀦𑀕𑀭𑀁, 𑀢𑀺𑀫𑀳𑀸𑀧𑀭𑀺𑀔𑀁 𑀢𑀢𑁄;

𑀓𑀤𑀫𑁆𑀩 𑀧𑀼𑀧𑁆𑀨𑀯𑀮𑁆𑀮𑀻𑀳𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑀁.

𑀏𑀓𑀤𑁆𑀯𑀸𑀭𑀁 𑀤𑀼𑀧𑁆𑀧𑀯𑁂𑀲𑀁, 𑀘𑀢𑀼𑀫𑀸𑀲𑁂 𑀯𑀲𑀁 𑀢𑀳𑀺𑀁;

𑀕𑀡𑁆𑀳𑀺 𑀫𑀳𑁂𑀮𑀭𑀸𑀚𑀸𑀦𑀁, 𑀫𑀦𑁆𑀢𑀬𑀼𑀤𑁆𑀥𑁂𑀦 𑀪𑀽𑀫𑀺𑀧𑁄.

𑀢𑀢𑁄’𑀦𑀼𑀭𑀸𑀥𑀦𑀕𑀭𑀁, 𑀆𑀕𑀘𑁆𑀙𑀦𑁆𑀢𑁄 𑀫𑀳𑀻𑀧𑀢𑀺;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀲𑀺, 𑀧𑀭𑀺𑀢𑁄𑀓𑀸𑀲𑀧𑀩𑁆𑀩𑀢𑀁.

𑀫𑀸𑀲𑀫𑁆𑀳𑀺 𑀚𑁂𑀝𑁆𑀞𑀫𑀽𑀮𑀫𑁆𑀳𑀺, 𑀢𑀴𑀸𑀓𑀁 𑀢𑀢𑁆𑀣 𑀓𑀸𑀭𑀺𑀬;

𑀚𑀮𑀁 𑀓𑀻𑀴𑀺 𑀢𑀳𑀺𑀁 𑀕𑀸𑀫𑁄, 𑀧𑁄𑀲𑁄𑀦𑀦𑀕𑀭𑀯𑁆𑀳𑀬𑁄.

𑀢𑀁 ¶ 𑀬𑀼𑀤𑁆𑀥𑀸𑀬𑀸𑀕𑀢𑀁 𑀲𑀼𑀢𑁆𑀯𑀸, 𑀭𑀸𑀚𑀸𑀦𑀁 𑀤𑀼𑀝𑁆𑀞𑀕𑀸𑀫𑀡𑀺𑀁;

𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀏𑀴𑀸𑀭𑁄 𑀆𑀳 𑀪𑀽𑀫𑀺𑀧𑁄.

𑀓𑀺𑀦𑁆𑀢𑀺 𑀫𑀜𑁆𑀜𑀦𑁆𑀢𑀺 𑀦𑁄 𑀇𑀫𑁂.

𑀤𑀻𑀖𑀚𑀢𑁆𑀢𑀼𑀧𑁆𑀧𑀪𑀼𑀢𑀬𑁄, 𑀬𑁄𑀥𑀸 𑀏𑀴𑀸𑀭𑀭𑀸𑀚𑀺𑀦𑁄;

‘‘𑀲𑀼𑀯𑁂 𑀬𑀼𑀤𑁆𑀥𑀁 𑀓𑀭𑀺𑀲𑁆𑀲𑀸𑀫𑀺’’, 𑀇𑀢𑀺 𑀢𑁂 𑀦𑀺𑀘𑁆𑀙𑀬𑀁 𑀓𑀭𑀼𑀁.

𑀤𑀼𑀝𑁆𑀞𑀕𑀸𑀫𑀡𑀺𑀭𑀸𑀚𑀸𑀧𑀺, 𑀫𑀦𑁆𑀢𑁂𑀢𑁆𑀯𑀸 𑀫𑀸𑀢𑀼𑀬𑀸 𑀲𑀳;

𑀢𑀲𑁆𑀲𑀸 𑀫𑀢𑁂𑀦 𑀓𑀸𑀭𑁂𑀲𑀺, 𑀤𑁆𑀯𑀢𑁆𑀢𑀺𑀁𑀲 𑀩𑀮𑀓𑁄𑀝𑁆𑀞𑀓𑁂.

𑀭𑀸𑀚𑀘𑁆𑀙𑀢𑁆𑀢𑀥𑀭𑁂 𑀢𑀢𑁆𑀣, 𑀞𑀧𑁂𑀲𑀺 𑀭𑀸𑀚𑀭𑀽𑀧𑀓𑁂;

𑀅𑀩𑁆𑀪𑀦𑁆𑀢𑀭𑁂 𑀓𑁄𑀝𑁆𑀞𑀓𑁂 𑀢𑀼, 𑀲𑀬𑀁 𑀅𑀝𑁆𑀞𑀸𑀲𑀺 𑀪𑀽𑀧𑀢𑀺.

𑀏𑀴𑀸𑀭𑀭𑀸𑀚𑀸 𑀲𑀦𑁆𑀦𑀤𑁆𑀥𑁄, 𑀫𑀳𑀸𑀧𑀩𑁆𑀩𑀢 𑀳𑀢𑁆𑀣𑀺𑀦𑀁;

𑀆𑀭𑀼𑀬𑁆𑀳 𑀅𑀕𑀫𑀸 𑀢𑀢𑁆𑀣, 𑀲𑀬𑁄𑀕𑁆𑀕 𑀩𑀮𑀯𑀸𑀳𑀦𑁄.

𑀲𑀗𑁆𑀕𑀸𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀤𑀻𑀖𑀚𑀢𑁆𑀢𑀼 𑀫𑀳𑀩𑁆𑀩𑀮𑁄;

𑀆𑀤𑀸𑀬 𑀔𑀕𑁆𑀕𑀨𑀮𑀓𑀁, 𑀬𑀼𑀚𑁆𑀛𑀫𑀸𑀦𑁄 𑀪𑀬𑀸𑀦𑀓𑁄.

𑀳𑀢𑁆𑀣𑁂 𑀅𑀝𑁆𑀞𑀭𑀲𑀼’𑀕𑁆𑀕𑀦𑁆𑀢𑁆𑀯𑀸, 𑀦𑀪𑀁 𑀢𑀁 𑀭𑀸𑀚𑀭𑀽𑀧𑀓𑀁;

𑀙𑀺𑀦𑁆𑀤𑀺𑀢𑁆𑀯𑀸 𑀅𑀲𑀺𑀦𑀸 𑀪𑀺𑀦𑁆𑀤𑀺, 𑀧𑀞𑀫𑀁 𑀩𑀮𑀓𑁄𑀝𑁆𑀞𑀓𑀁.

𑀏𑀯𑀁 𑀲𑁂𑀲𑁂𑀧𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀫𑀮𑀓𑁄𑀝𑁆𑀞𑁂 𑀫𑀳𑀩𑁆𑀩𑀮𑁄;

𑀞𑀺𑀢𑀁 𑀕𑀸𑀫𑀡𑀺𑀭𑀸𑀚𑁂𑀦, 𑀩𑀮𑀓𑁄𑀝𑁆𑀞𑀫𑀼𑀧𑀸𑀕𑀫𑀺.

𑀬𑁄𑀥𑁄 𑀲𑁄 𑀲𑀼𑀭𑀦𑀺𑀫𑀮𑁄, 𑀕𑀘𑁆𑀙𑀦𑁆𑀢𑀁 𑀭𑀸𑀚𑀺𑀦𑁄’𑀧𑀭𑀺;

𑀲𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀫𑀁, 𑀢𑀫𑀓𑁆𑀓𑁄𑀲𑀺 𑀫𑀳𑀩𑁆𑀩𑀮𑁄.

𑀇𑀢𑀭𑁄 ‘‘𑀢𑀁 𑀯𑀥𑀺𑀲𑁆𑀲’’𑀦𑁆𑀢𑀺, 𑀓𑀼𑀤𑁆𑀥𑁄 𑀆𑀓𑀸𑀲𑀫𑀼𑀕𑁆𑀕𑀫𑀺;

𑀇𑀢𑀭𑁄 𑀑𑀢𑀭𑀦𑁆𑀢𑀲𑁆𑀲, 𑀨𑀮𑀓𑀁 𑀉𑀧𑀦𑀸𑀫𑀬𑀺.

‘‘𑀙𑀺𑀦𑁆𑀤𑀸 𑀫𑁂𑀢𑀁 𑀲𑀨𑀮𑀓𑀁’’, 𑀇𑀢𑀺 𑀘𑀺𑀦𑁆𑀢𑀺𑀬 𑀲𑁄 𑀧𑀦;

𑀨𑀮𑀓𑀁 𑀳𑀦𑀺 𑀔𑀕𑁆𑀕𑁂𑀦, 𑀢𑀁 𑀫𑀼𑀜𑁆𑀘𑀺𑀬𑀺’ 𑀢𑀭𑁄𑀲𑀬𑀺.

𑀓𑀧𑁆𑀧𑁂𑀦𑁆𑀢𑁄 𑀫𑀼𑀢𑁆𑀢𑀨𑀮𑀓𑀁, 𑀤𑀻𑀖𑀚𑀢𑁆𑀢𑀼 𑀢𑀳𑀺𑀁 𑀧𑀢𑀺;

𑀉𑀝𑁆𑀞𑀸𑀬 𑀲𑀽𑀭𑀦𑀺𑀫𑀺𑀮𑁄, 𑀧𑀢𑀺𑀢𑀁 𑀲𑀢𑁆𑀢𑀺𑀬𑀸’𑀳𑀦𑀺.

𑀲𑀗𑁆𑀔𑀁 ¶ 𑀥𑀫𑀺 𑀨𑀼𑀲𑁆𑀲𑀤𑁂𑀯𑁄, 𑀲𑁂𑀦𑀸 𑀪𑀺𑀚𑁆𑀚𑀺𑀢𑁆𑀣 𑀤𑀸𑀫𑀺𑀴𑀺;

𑀏𑀴𑀭𑁄𑀧𑀺 𑀦𑀺𑀯𑀢𑁆𑀢𑀺𑀢𑁆𑀣, 𑀖𑀸𑀢𑁂𑀲𑀼𑀁 𑀤𑀫𑀺𑀴𑁂 𑀩𑀳𑀽.

𑀢𑀢𑁆𑀣 𑀯𑀸𑀧𑀺 𑀚𑀮𑀁 𑀆𑀲𑀺, 𑀳𑀢𑀸𑀦𑀁 𑀮𑁄𑀳𑀺𑀢𑀸 𑀯𑀺𑀮𑀁;

𑀢𑀲𑁆𑀫𑀸 𑀓𑀼𑀮𑀢𑁆𑀣𑀯𑀸 𑀧𑀻𑀢𑀺, 𑀦𑀸𑀫𑀢𑁄 𑀯𑀺𑀲𑁆𑀲𑀼𑀢𑀁 𑀅𑀳𑀼.

𑀘𑀭𑀸𑀧𑁂𑀢𑁆𑀯𑀸 𑀢𑀳𑀺𑀁 𑀪𑁂𑀭𑀺𑀁, 𑀤𑀼𑀝𑁆𑀞𑀕𑀸𑀫𑀡𑀺 𑀪𑀽𑀧𑀢𑀺;

‘‘𑀦 𑀳𑀦𑀺𑀲𑁆𑀲𑀢𑀼 𑀏𑀴𑀸𑀭𑀁, 𑀫𑀁𑀫𑀼𑀜𑁆𑀘𑀺𑀬 𑀧𑀭𑁄’’𑀇𑀢𑀺.

𑀲𑀦𑁆𑀦𑀤𑁆𑀥𑁄 𑀲𑀬𑀫𑀸𑀭𑀼𑀬𑁆𑀳, 𑀲𑀦𑁆𑀦𑀤𑁆𑀥𑀁 𑀓𑀡𑁆𑀟𑀼𑀮𑀁 𑀓𑀭𑀺𑀁;

𑀏𑀴𑀸𑀭𑀁 𑀅𑀦𑀼𑀩𑀦𑁆𑀥𑀦𑁆𑀢𑁄, 𑀤𑀓𑁆𑀔𑀺𑀡𑀤𑁆𑀯𑀸𑀭𑀫𑀸𑀕𑀫𑀺.

𑀧𑀼𑀭𑀤𑀓𑁆𑀔𑀺𑀡𑀤𑁆𑀯𑀸𑀭𑀫𑁆𑀳𑀺, 𑀉𑀪𑁄 𑀬𑀼𑀚𑁆𑀛𑀺𑀁𑀲𑀼 𑀪𑀽𑀫𑀺𑀧𑀸;

𑀢𑁄𑀫𑀭𑀁 𑀔𑀺𑀧𑀺 𑀏𑀴𑀸𑀭𑁄, 𑀕𑀸𑀫𑀡𑀺 𑀢𑀫𑀯𑀜𑁆𑀘𑀬𑀺.

𑀯𑀺𑀚𑁆𑀛𑀸𑀧𑁂𑀲𑀺 𑀘 𑀤𑀦𑁆𑀢𑁂𑀳𑀺, 𑀢𑀁 𑀳𑀢𑁆𑀣𑀺𑀁 𑀲𑀓𑀳𑀢𑁆𑀣𑀺𑀦𑀸;

𑀢𑁄𑀫𑀭𑀁 𑀔𑀺𑀧𑀺 𑀏𑀴𑀸𑀭𑀁, 𑀲𑀳𑀢𑁆𑀣𑀺 𑀢𑀢𑁆𑀣 𑀲𑁄 𑀧𑀢𑀺.

𑀢𑀢𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑁄;

𑀮𑀁𑀓𑀁 𑀏𑀓𑀸𑀢𑀧𑀢𑁆𑀢𑀁 𑀲𑁄, 𑀓𑀢𑁆𑀯𑀸𑀦 𑀧𑀸𑀯𑀺𑀲𑀺 𑀧𑀼𑀭𑀁.

𑀧𑀼𑀭𑀫𑁆𑀳𑀺 𑀪𑁂𑀭𑀺𑀁 𑀘𑀸𑀭𑁂𑀢𑁆𑀯𑀸, 𑀲𑀫𑀦𑁆𑀢𑀸 𑀬𑁄𑀚𑀦𑁂 𑀚𑀦𑁂;

𑀲𑀦𑁆𑀦𑀺𑀧𑀸𑀢𑀺𑀬 𑀓𑀸𑀭𑁂𑀲𑀺, 𑀧𑀽𑀚𑀁 𑀏𑀴𑀸𑀭𑀭𑀸𑀚𑀺𑀦𑁄.

𑀢𑀁 𑀤𑁂𑀳𑀧𑀢𑀺𑀢𑀞𑀸𑀦𑁂, 𑀓𑀽𑀝𑀸𑀕𑀸𑀭𑁂𑀦 𑀛𑀸𑀧𑀬𑀺;

𑀘𑁂𑀢𑀺𑀬𑀁 𑀢𑀢𑁆𑀣 𑀓𑀸𑀭𑁂𑀲𑀺, 𑀧𑀭𑀺𑀳𑀸𑀭𑀫𑀤𑀸𑀲𑀺 𑀘.

𑀅𑀚𑁆𑀚𑀸𑀧𑀺 𑀮𑀁𑀓𑀸𑀧𑀢𑀺𑀦𑁄, 𑀢𑀁 𑀧𑀤𑁂𑀲𑀲𑀫𑀻𑀧𑀕𑀸;

𑀢𑁂𑀦𑁂𑀯 𑀧𑀭𑀺𑀳𑀸𑀭𑁂𑀦, 𑀦 𑀯𑀸𑀤𑀸𑀧𑁂𑀦𑁆𑀢𑀺 𑀢𑀽𑀭𑀺𑀬𑀁.

𑀏𑀯𑀁 𑀤𑁆𑀯𑀢𑁆𑀢𑀺𑀁𑀲 𑀤𑀫𑀺𑀴, 𑀭𑀸𑀚𑀸𑀦𑁄 𑀤𑀼𑀝𑁆𑀞𑀕𑀸𑀫𑀡𑀺;

𑀕𑀡𑁆𑀳𑀺𑀢𑁆𑀯𑀸 𑀏𑀓𑀘𑁆𑀙𑀢𑁆𑀢𑁂𑀦, 𑀮𑀁𑀓𑀸𑀭𑀚𑁆𑀚𑀫𑀓𑀸𑀲𑀺 𑀲𑁄.

𑀯𑀺𑀚𑀺𑀢𑁂 𑀦𑀕𑀭𑁂 𑀪𑀺𑀦𑁆𑀦𑁂, 𑀬𑁄𑀥𑁄 𑀲𑁄 𑀤𑀻𑀖𑀚𑀢𑁆𑀢𑀼𑀓𑁄;

𑀏𑀴𑀸𑀭𑀲𑁆𑀲 𑀦𑀺𑀯𑁂𑀤𑁂𑀢𑁆𑀯𑀸, 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀬𑁄𑀥𑀢𑀁.

𑀢𑀲𑁆𑀲 𑀳𑀮𑁆𑀮𑀼𑀓 𑀦𑀸𑀫𑀲𑁆𑀲, 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀅𑀢𑁆𑀢𑀦𑁄;

𑀧𑁂𑀲𑀬𑀻 𑀘𑀸𑀕𑀫𑀢𑁆𑀣𑀸𑀬, 𑀢𑀲𑁆𑀲 𑀲𑀼𑀢𑁆𑀯𑀸𑀦 𑀳𑀮𑁆𑀮𑀼𑀓𑁄.

𑀏𑀴𑀸𑀭𑀤𑀟𑁆𑀠𑀤𑀺𑀯𑀲𑀸, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀥;

𑀧𑀼𑀭𑀺𑀲𑀸𑀦𑀁 𑀲𑀳𑀲𑁆𑀲𑁂𑀳𑀺, 𑀲𑀝𑁆𑀞𑀺𑀬𑀸 𑀲𑀳 𑀑𑀢𑀭𑀺.

𑀑𑀢𑀺𑀡𑁆𑀡𑁄 𑀲𑁄 𑀲𑀼𑀡𑀺𑀢𑁆𑀯𑀸𑀧𑀺, 𑀧𑀢𑀦𑀁 𑀢𑀲𑁆𑀲 𑀭𑀸𑀚𑀺𑀦𑁄;

‘‘𑀬𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀮𑀚𑁆𑀚𑀸𑀬, 𑀫𑀳𑀸𑀢𑀺𑀢𑁆𑀣𑀁 𑀇𑀥𑀸𑀕𑀫𑀸.

𑀔𑀦𑁆𑀥𑀸𑀯𑀸𑀭𑀁 ¶ 𑀦𑀺𑀯𑁂𑀲𑁂𑀲𑀺, 𑀕𑀸𑀫𑁂 𑀓𑁄𑀴𑀫𑁆𑀩𑀳𑀸𑀮𑀓𑁂;

𑀭𑀸𑀚𑀸 𑀢𑀲𑁆𑀲𑀸’𑀕𑀫𑀁 𑀲𑀼𑀢𑁆𑀯𑀸, 𑀬𑀼𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑀺.

𑀬𑀼𑀤𑁆𑀥𑀲𑀦𑁆𑀦𑀳 𑀲𑀦𑁆𑀦𑀤𑁆𑀥𑁄, 𑀳𑀢𑁆𑀣𑀺𑀫𑀸𑀭𑀼𑀬𑁆𑀳 𑀓𑀡𑁆𑀟𑀼𑀮𑀁;

𑀳𑀢𑁆𑀣𑀲𑁆𑀲 𑀭𑀣𑀬𑁄 𑀥𑁂𑀳𑀺, 𑀧𑀦𑁆𑀢𑀻𑀳𑀺 𑀘 𑀅𑀦𑀼𑀦𑀓𑁄.

𑀉𑀫𑁆𑀫𑀸𑀤𑀨𑀼𑀲𑁆𑀲𑁄 𑀤𑁂𑀯𑁄 𑀲𑁄, 𑀤𑀻𑀧𑁂 𑀅𑀕𑁆𑀕𑀥𑀦𑀼𑀕𑁆𑀕𑀳𑁄;

𑀤𑀲𑀟𑁆𑀠𑀸𑀬𑀼𑀥𑀲𑀦𑀤𑁆𑀥𑁄, 𑀲𑁂𑀲𑀬𑁄𑀥𑀸 𑀘 𑀅𑀦𑁆𑀯𑀕𑀼𑀁.

𑀧𑀯𑀢𑁆𑀢𑁂 𑀢𑀼𑀫𑀽𑀮𑁂 𑀬𑀼𑀤𑁆𑀥𑁂, 𑀲𑀦𑁆𑀦𑀤𑁆𑀥𑁄 𑀪𑀮𑁆𑀮𑀼𑀓𑁄 𑀢𑀳𑀺𑀁;

𑀭𑀸𑀚𑀸𑀪𑀺𑀫𑀼𑀔 𑀫𑀸𑀬𑀸𑀲𑀺, 𑀦𑀸𑀕𑀭𑀸𑀚𑀸 𑀢𑀼 𑀓𑀡𑁆𑀟𑀼𑀮𑁄.

𑀢𑀁 𑀯𑁂𑀕𑀫𑀦𑁆𑀤𑀺𑀪𑀸𑀯𑀢𑁆𑀣𑀁, 𑀧𑀘𑁆𑀘𑁄𑀲𑀓𑁆𑀓𑀺 𑀲𑀦𑀺𑀁 𑀲𑀦𑀺𑀁;

𑀲𑁂𑀦𑀸𑀧𑀺 𑀲𑀤𑁆𑀥𑀺𑀁 𑀢𑁂𑀦𑁂𑀯, 𑀧𑀘𑁆𑀘𑁄𑀲𑀓𑁆𑀓𑀺 𑀲𑀦𑀺𑀁 𑀲𑀦𑀺𑀁.

𑀭𑀸𑀚𑀸𑀳 ‘‘𑀧𑀼𑀩𑁆𑀩𑁂 𑀬𑀼𑀤𑁆𑀥𑁂𑀲𑀼, 𑀅𑀝𑁆𑀞𑀯𑀻𑀲𑀢𑀺𑀬𑀸 𑀅𑀬𑀁;

𑀦 𑀧𑀘𑁆𑀘𑁄𑀲𑀓𑁆𑀓𑀺 𑀓𑀺𑀁 𑀏𑀢𑀁, 𑀨𑀼𑀲𑁆𑀲𑀤𑁂𑀯𑀸’’𑀢𑀺 𑀆𑀳 𑀲𑁄.

𑀚𑀬𑁄 𑀦𑁄 𑀧𑀭𑀫𑁄 𑀤𑁂𑀯, 𑀚𑀬𑀪𑀽𑀫𑀺 𑀫𑀬𑀁 𑀕𑀚𑁄;

𑀧𑀘𑁆𑀘𑁄𑀲𑀓𑁆𑀓𑀢𑀺 𑀧𑁂𑀓𑁆𑀔𑀦𑁆𑀢𑁄, 𑀚𑀬𑀞𑀸𑀦𑀫𑁆𑀳𑀺 𑀞𑀲𑁆𑀲𑀢𑀺.

𑀦𑀸𑀕𑁄’𑀣 𑀧𑀘𑁆𑀘𑁄𑀲𑀓𑁆𑀓𑀺𑀢𑁆𑀯𑀸, 𑀨𑀼𑀲𑁆𑀲𑀤𑁂𑀯𑀲𑁆𑀲 𑀧𑀲𑁆𑀲𑀢𑁄;

𑀫𑀳𑀸𑀯𑀺𑀳𑀸𑀭𑀲𑀻𑀫𑀦𑁆𑀢𑁂, 𑀅𑀝𑁆𑀞𑀸𑀲𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄.

𑀢𑀢𑁆𑀭𑀝𑁆𑀞𑀺𑀢𑁄 𑀦𑀸𑀕𑀭𑀸𑀚𑀸, 𑀪𑀮𑁆𑀮𑀼𑀓𑁄 𑀤𑀫𑀺𑀴𑁄 𑀢𑀳𑀺𑀁;

𑀭𑀸𑀚𑀸𑀪𑀺𑀫𑀼𑀔𑀫𑀸𑀕𑀦𑁆𑀢𑁆𑀯𑀸, 𑀉𑀧𑁆𑀧𑀡𑁆𑀟𑁂𑀲𑀺 𑀫𑀳𑀻𑀧𑀢𑀺.

𑀫𑀼𑀔𑀁 𑀧𑀺𑀥𑀸𑀬 𑀔𑀕𑁆𑀕𑁂𑀦, 𑀭𑀸𑀚𑀸 𑀅𑀓𑁆𑀓𑁄𑀲𑀺 𑀢𑀁 𑀧𑀦;

‘‘𑀭𑀜𑁆𑀜𑁄 𑀫𑀼𑀔𑀫𑁆𑀳𑀺 𑀧𑀸𑀢𑁂𑀫𑀺’’, 𑀇𑀢𑀺 𑀓𑀡𑁆𑀟𑀜𑁆𑀘 𑀲𑁄 𑀔𑀺𑀧𑀺.

𑀆𑀳𑀘𑁆𑀘 𑀲𑁄 𑀔𑀕𑁆𑀕𑀢𑀮𑀁, 𑀓𑀡𑁆𑀟𑁄 𑀧𑀧𑀢𑀺 𑀪𑀽𑀫𑀺𑀬𑀁;

‘‘𑀫𑀼𑀔𑁂 𑀯𑀺𑀤𑁆𑀥𑁄’’𑀢𑀺 𑀲𑀜𑁆𑀜𑀸𑀬, 𑀉𑀓𑁆𑀓𑀝𑁆𑀞𑀺𑀁 𑀪𑀮𑁆𑀮𑀼𑀓𑁄 𑀅𑀓𑀸.

𑀭𑀜𑁆𑀜𑁄 𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀪𑁄, 𑀨𑀼𑀲𑁆𑀲𑀤𑁂𑀯𑁄 𑀫𑀳𑀩𑁆𑀩𑀮𑁄;

𑀓𑀡𑁆𑀟 𑀔𑀺𑀧𑀺𑀫𑀼𑀔𑁂 𑀢𑀲𑁆𑀲, 𑀖𑀝𑁆𑀝𑁂𑀦𑁆𑀢𑁄 𑀭𑀸𑀚𑀓𑀼𑀡𑁆𑀟𑀮𑀁.

𑀭𑀸𑀚𑀸𑀦𑀁 𑀧𑀸𑀤𑀢𑁄 𑀓𑀢𑁆𑀯𑀸, 𑀧𑀢𑀫𑀸𑀦𑀲𑁆𑀲 𑀢𑀲𑁆𑀲 𑀢𑀼;

𑀔𑀺𑀧𑀺𑀢𑁆𑀯𑀸 𑀅𑀧𑀭𑀁 𑀓𑀡𑁆𑀟𑀁, 𑀯𑀺𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀚𑀡𑁆𑀟𑀼𑀓𑀁.

𑀭𑀸𑀚𑀸𑀦𑀁 𑀲𑀻𑀲𑀢𑁄 𑀓𑀢𑁆𑀯𑀸, 𑀧𑀸𑀢𑁂𑀲𑀻 𑀮𑀳𑀼𑀳𑀢𑁆𑀣𑀓𑁄;

𑀪𑀮𑁆𑀮𑀼𑀓𑁂 𑀧𑀢𑀺𑀢𑁂 𑀢𑀲𑁆𑀫𑀺𑀁, 𑀚𑀬𑀦𑀸𑀤𑁄 𑀧𑀯𑀢𑁆𑀢𑀣.

𑀨𑀼𑀲𑁆𑀲𑀤𑁂𑀯𑁄 ¶ 𑀢𑀳𑀺𑀁𑀬𑁂𑀯, 𑀜𑀸𑀧𑁂𑀢𑀼𑀁 𑀤𑁄𑀲 𑀫𑀢𑁆𑀢𑀦𑁄;

𑀓𑀡𑁆𑀟𑀯𑀮𑁆𑀮𑀺𑀁 𑀲𑀓𑀁 𑀙𑁂𑀢𑁆𑀯𑀸, 𑀧𑀲𑀢𑀁 𑀮𑁄𑀳𑀺𑀢𑀁 𑀲𑀬𑀁.

𑀭𑀥𑀜𑁆𑀜𑀸 𑀤𑀲𑁆𑀲𑁂𑀲𑀺 𑀢𑀁 𑀤𑀺𑀲𑁆𑀯𑀸, 𑀭𑀸𑀚𑀸 𑀢𑀁 𑀧𑀼𑀘𑁆𑀙𑀺‘‘𑀓𑀺𑀁’’𑀇𑀢𑀺;

𑀭𑀸𑀚 𑀤𑀡𑁆𑀟𑁄 𑀓𑀢𑁄 𑀫𑁂𑀢𑀺, 𑀲𑁄 𑀅𑀯𑁄𑀘 𑀫𑀳𑀻𑀧𑀢𑀺.

𑀇𑀢𑀺 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀓𑀢𑀜𑁆𑀜𑀼 𑀇𑀥 𑀫𑀸𑀳 𑀘;

‘‘𑀓𑀡𑁆𑀟𑀸𑀦𑀼𑀘𑁆𑀙𑀯𑀺𑀓𑁄 𑀢𑀼𑀬𑁆𑀳𑀁, 𑀲𑀓𑁆𑀓𑀸𑀭𑁄 𑀳𑁂𑀲𑁆𑀲𑀢𑁂 𑀫𑀳𑀸.

𑀖𑀸𑀢𑁂𑀢𑁆𑀯𑀸 𑀤𑀫𑀺𑀴𑁂 𑀲𑀩𑁆𑀩𑁂, 𑀭𑀸𑀚𑀸 𑀮𑀤𑁆𑀥𑀚𑀬𑁄 𑀓𑀢𑁄;

𑀧𑀸𑀲𑀸𑀤 𑀢𑀮𑀫𑀸𑀭𑀼𑀬𑁆𑀳, 𑀲𑀻𑀳𑀸𑀲𑀦𑀕𑀢𑁄 𑀢𑀳𑀺𑀁.

𑀦𑀸𑀝𑀓𑀸𑀫𑀘𑁆𑀘 𑀫𑀚𑁆𑀛𑀫𑁆𑀳𑀺, 𑀨𑀼𑀲𑁆𑀲𑀤𑁂𑀯𑀲𑁆𑀲 𑀢𑀁 𑀲𑀭𑀁;

𑀆𑀡𑀸𑀧𑁂𑀢𑁆𑀯𑀸 𑀞𑀧𑀸𑀧𑁂𑀢𑁆𑀯𑀸, 𑀧𑀼𑀁𑀔𑁂𑀦 𑀉𑀚𑀼𑀓𑀁 𑀢𑀮𑁂.

𑀓𑀳𑀸𑀧𑀡𑁂𑀳𑀺 𑀓𑀡𑁆𑀟𑀁 𑀢𑀁, 𑀆𑀲𑀺𑀢𑁆𑀢𑁂’𑀬𑀼 𑀧𑀭𑀽𑀧𑀭𑀺;

𑀙𑀸𑀤𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺, 𑀨𑀼𑀲𑁆𑀲𑀤𑁂𑀯𑀲𑁆𑀲 𑀢𑀁 𑀔𑀡𑁂.

𑀦𑀭𑀺𑀦𑁆𑀤𑀧𑀸𑀲𑀸𑀤𑀢𑀮𑁂, 𑀦𑀭𑀺𑀦𑁆𑀤𑁄𑀣 𑀅𑀮𑀗𑁆𑀓𑀢𑁂;

𑀲𑀼𑀕𑀦𑁆𑀥𑀤𑀻𑀧𑀼𑀚𑁆𑀚𑀮𑀺𑀢𑁂, 𑀦𑀸𑀦𑀸𑀕𑀦𑁆𑀥𑀲𑀫𑀸𑀬𑀼𑀢𑁂.

𑀦𑀸𑀝𑀓 𑀚𑀦𑀬𑁄𑀕𑁂𑀦, 𑀅𑀘𑁆𑀙𑀭𑀸𑀳𑀺 𑀘 𑀪𑀽𑀲𑀺𑀢𑁂;

𑀅𑀦𑀕𑁆𑀖𑀢𑁆𑀣𑀭𑀡𑀢𑁆𑀣𑀺𑀡𑁆𑀡𑁂, 𑀫𑀼𑀤𑀼𑀓𑁂 𑀲𑀬𑀦𑁂 𑀲𑀼𑀪𑁂.

𑀲𑀬𑀺𑀢𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁, 𑀫𑀳𑀢𑀺𑀁 𑀅𑀧𑀺𑀧𑁂𑀓𑁆𑀔𑀺𑀬;

𑀓𑀢𑀁 𑀅𑀓𑁆𑀔𑁄𑀪𑀺𑀡𑀺𑀖𑀸𑀢𑀁, 𑀲𑀭𑀦𑁆𑀢𑁄 𑀦 𑀲𑀼𑀔𑀁 𑀮𑀪𑀺.

𑀬𑀺𑀬𑀗𑁆𑀕𑀼𑀤𑀻𑀧𑁂 𑀅𑀭𑀳𑀦𑁆𑀢𑁄, 𑀜𑀢𑁆𑀯𑀸 𑀢𑀁 𑀢𑀲𑁆𑀲𑀢𑀓𑁆𑀓𑀺𑀢𑀁;

𑀅𑀝𑁆𑀞𑀸’𑀭𑀳𑀦𑁆𑀢𑁂 𑀧𑀸𑀳𑁂𑀲𑀼𑀁, 𑀢𑀫𑀲𑁆𑀲𑀸𑀲𑁂𑀢𑀼𑀫𑀺𑀲𑁆𑀲𑀭𑀁.

𑀆𑀕𑀫𑁆𑀫 𑀢𑁂 𑀫𑀚𑁆𑀛𑀸𑀬𑀸𑀫𑁂, 𑀭𑀸𑀚 𑀤𑁆𑀯𑀸𑀭𑀫𑁆𑀳𑀺 𑀑𑀢𑀭𑀼𑀁;

𑀦𑀺𑀯𑁂𑀤𑀺 𑀢𑀩𑁆𑀪𑀸𑀕𑀫𑀦𑀸, 𑀧𑀸𑀲𑀸𑀤 𑀢𑀮𑁂𑀫𑀸𑀭𑀼𑀳𑀼𑀁.

𑀯𑀦𑁆𑀤𑀺𑀢𑁆𑀯𑀸 ¶ 𑀢𑁂 𑀫𑀳𑀸𑀭𑀸𑀚, 𑀦𑀺𑀲𑀻𑀤𑀸𑀧𑀺𑀬 𑀆𑀲𑀦𑁂;

𑀓𑀢𑁆𑀯𑀸 𑀯𑀺𑀯𑀺𑀥𑀲𑀓𑁆𑀓𑀸𑀭𑀁, 𑀧𑀼𑀘𑁆𑀙𑀺 𑀆𑀕𑀢𑀓𑀸𑀭𑀡𑀁.

𑀧𑀺𑀬𑀗𑁆𑀕𑀼𑀤𑀻𑀧𑁂 𑀲𑀗𑁆𑀖𑁂𑀦, 𑀧𑁂𑀲𑀺𑀢𑀁 𑀫𑀦𑀼𑀚𑀸𑀥𑀺𑀧;

𑀢𑀫𑀲𑁆𑀲𑀸 𑀲𑀬𑀺𑀢𑀼𑀁 𑀅𑀫𑁆𑀳𑁂, 𑀇𑀢𑀺 𑀭𑀸𑀚𑀸 𑀧𑀼𑀦𑀸’𑀳𑀢𑁂.

‘‘𑀓𑀣𑀁 𑀦𑀼 𑀪𑀦𑁆𑀢𑁂 𑀅𑀲𑁆𑀲𑀸𑀲𑁄, 𑀫𑀫 𑀳𑁂𑀲𑁆𑀲𑀢𑀺 𑀬𑁂𑀦 𑀫𑁂;

𑀅𑀓𑁆𑀔𑁄𑀪𑀺𑀡𑀺𑀫𑀳𑀸𑀲𑁂𑀦, 𑀖𑀸𑀢𑁄 𑀓𑀸𑀭𑀸𑀧𑀺𑀢𑁄’’𑀇𑀢𑀺.

‘‘𑀲𑀕𑁆𑀕𑀫𑀕𑁆𑀕𑀦𑁆𑀢𑀭𑀸𑀬𑁄 𑀘, 𑀦𑀢𑁆𑀣𑀺 𑀢𑁂 𑀢𑁂𑀦 𑀓𑀫𑁆𑀫𑀼𑀦𑀸;

𑀤𑀻𑀬𑀟𑁆𑀠𑀫𑀦𑀼𑀚𑀸 𑀘𑁂’𑀢𑁆𑀣, 𑀖𑀸𑀢𑀺𑀢𑀸 𑀫𑀦𑀼𑀚𑀸𑀥𑀺𑀧.

𑀲𑀭𑀡𑁂𑀲𑀼 𑀞𑀺𑀢𑁄 𑀏𑀓𑁄, 𑀧𑀜𑁆𑀘𑀲𑀻𑀮𑁂𑀧𑀺 𑀘𑀸’𑀧𑀭𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀤𑀼𑀲𑁆𑀲𑀻𑀮𑁄, 𑀲𑁂𑀲𑀸 𑀧𑀲𑀼𑀲𑀫𑀸𑀫𑀢𑀸.

𑀚𑁄𑀢𑀬𑀺𑀲𑁆𑀲𑀲𑀺 𑀘𑁂𑀯 𑀢𑁆𑀯𑀁, 𑀩𑀳𑀼𑀥𑀸 𑀩𑀼𑀤𑁆𑀥𑀲𑀸𑀲𑀦𑀁;

𑀫𑀦𑁄𑀯𑀺𑀮𑁂𑀔𑀁 𑀢𑀲𑁆𑀫𑀸 𑀢𑁆𑀯𑀁, 𑀯𑀺𑀦𑁄𑀤𑀬 𑀦𑀭𑀺𑀲𑁆𑀲𑀭.

𑀇𑀢𑀺 𑀯𑀼𑀢𑁆𑀢𑁄 𑀫𑀳𑀸𑀭𑀸𑀚𑀸, 𑀢𑁂𑀳𑀺 𑀅𑀲𑁆𑀲𑀸𑀲𑀫𑀸𑀕𑀢𑁄;

𑀯𑀦𑁆𑀤𑀺𑀢𑁆𑀯𑀸 𑀢𑁂 𑀯𑀺𑀲𑀚𑁆𑀚𑁂𑀢𑁆𑀯𑀸, 𑀲𑀬𑀺𑀢𑁄 𑀧𑀼𑀦 𑀘𑀺𑀦𑁆𑀢𑀬𑀺.

𑀯𑀺𑀦𑀸 𑀲𑀗𑁆𑀖𑁂𑀦 𑀆𑀳𑀸𑀭𑀁, 𑀫𑀸𑀪𑀼𑀜𑁆𑀚𑁂𑀣 𑀓𑀤𑀸𑀘𑀺𑀧𑀺’’;

𑀇𑀢𑀺 𑀫𑀸𑀢𑀸𑀧𑀺𑀢𑀸’𑀳𑀸𑀭𑁂, 𑀲𑀧𑀺𑀁𑀲𑀼 𑀤𑀳𑀭𑁂’ 𑀯𑀦𑁄.

𑀅𑀤𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀪𑀼𑀢𑁆𑀢𑀁 𑀅𑀢𑁆𑀣𑀺 𑀦𑀼𑀔𑁄 𑀇𑀢𑀺;

𑀅𑀤𑁆𑀤𑀲 𑀧𑀸𑀢𑀭𑀸𑀲𑀫𑁆𑀳𑀺, 𑀏𑀓𑀁 𑀫𑀭𑀺𑀘𑀯𑀝𑁆𑀝𑀺𑀓𑀁.

𑀲𑀗𑁆𑀖𑀲𑁆𑀲 𑀅𑀝𑁆𑀞𑀧𑁂𑀢𑁆𑀯𑀸𑀯 𑀧𑀭𑀺𑀪𑀼𑀢𑁆𑀢𑀁 𑀲𑀢𑀺𑀁 𑀯𑀺𑀦𑀸;

𑀢𑀤𑀢𑁆𑀣𑀁 𑀤𑀡𑁆𑀟𑀓𑀫𑁆𑀫𑀁 𑀫𑁂, 𑀓𑀢𑁆𑀢𑀩𑁆𑀩𑀦𑁆𑀢𑀺 𑀘 𑀘𑀺𑀦𑁆𑀢𑀬𑀺.

𑀏𑀢𑁂 𑀢𑁂𑀦𑁂𑀓𑀓𑁄𑀝𑀺 𑀇𑀥 𑀫𑀦𑀼𑀚𑀕𑀡𑁂 𑀖𑀸𑀢𑀺𑀢𑁂 𑀘𑀺𑀦𑁆𑀢𑀬𑀺𑀢𑁆𑀯𑀸,

𑀓𑀸𑀫𑀸𑀦𑀁 𑀳𑁂𑀢𑀼 𑀏𑀢𑀁 𑀫𑀦𑀲𑀺 𑀘 𑀓𑀬𑀺𑀭𑀸 𑀲𑀸𑀥𑀼 𑀆𑀤𑀻𑀦𑀯𑀁 𑀢𑀁;

𑀲𑀩𑁆𑀩𑁂𑀲𑀁 𑀖𑀸𑀢𑀦𑀺𑀁 𑀢𑀁 𑀫𑀦𑀲𑀺 𑀘 𑀓𑀬𑀺𑀭𑀸’ 𑀦𑀺𑀘𑁆𑀘𑀢𑀁 𑀲𑀸𑀥𑀼 𑀲𑀸𑀥𑀼,

𑀏𑀯𑀁 𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀁 𑀲𑀼𑀪𑀕𑀢𑀺 𑀫𑀳𑀯𑀸 𑀧𑀸𑀧𑀼𑀡𑁂𑀬𑁆𑀬𑀸’𑀘𑀻𑀭𑁂𑀦𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀜𑁆𑀘𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀓𑀘𑁆𑀙𑀢𑁆𑀢𑀁 ¶ 𑀓𑀭𑀺𑀢𑁆𑀯𑀸𑀦, 𑀮𑀁𑀓𑀸𑀭𑀚𑁆𑀚𑀁 𑀫𑀳𑀸𑀬𑀲𑁄;

𑀦𑀸𑀦𑀦𑁆𑀢𑀭𑀁 𑀲𑀁𑀯𑀺𑀤𑀳𑀺, 𑀬𑁄𑀥𑀸𑀦𑀁 𑀲𑁄 𑀬𑀣𑀸𑀭𑀳𑀁.

𑀣𑁂𑀭𑀧𑀼𑀢𑁆𑀢𑀸𑀪𑀬𑁄 𑀬𑁄𑀥𑁄, 𑀤𑀺𑀬𑁆𑀬𑀫𑀸𑀦𑀁 𑀦 𑀇𑀘𑁆𑀙𑀺𑀢𑀁;

𑀧𑀼𑀘𑁆𑀙𑀺𑀢𑁄𑀯 𑀓𑀺𑀫𑀢𑁆𑀣𑀦𑁆𑀢𑀺, 𑀬𑀼𑀤𑁆𑀥𑀫𑀢𑁆𑀣𑀻𑀢𑀺 𑀅𑀩𑁆𑀭𑀯𑀺.

𑀏𑀓𑀭𑀚𑁆𑀚𑁂 𑀓𑀢𑁂 𑀬𑀼𑀤𑁆𑀥𑀁, 𑀓𑀺𑀦𑀸𑀫𑀢𑁆𑀢𑀻𑀢𑀺 𑀧𑀼𑀘𑁆𑀙𑀺𑀢𑁄;

𑀬𑀼𑀤𑁆𑀥𑀁 𑀓𑀺𑀮𑁂𑀲 𑀘𑁄𑀭𑁂𑀳𑀺, 𑀓𑀭𑀺𑀲𑁆𑀲𑀸𑀫𑀺 𑀲𑀼𑀤𑀼𑀚𑁆𑀚𑀬𑀁.

𑀇𑀘𑁆𑀘𑁂𑀯 𑀫𑀸𑀳 𑀢𑀁 𑀭𑀸𑀚𑀸, 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑁂𑀥𑀬𑀺;

𑀧𑀼𑀦𑀧𑁆𑀧𑀼𑀦𑀁 𑀲𑁄𑀬𑀸𑀘𑀺𑀢𑁆𑀯𑀸, 𑀭𑀜𑁆𑀜𑁄𑀦𑀼𑀜𑁆𑀜𑀸𑀬 𑀧𑀩𑁆𑀩𑀚𑀺.

𑀧𑀩𑁆𑀩𑀚𑀺𑀢𑁆𑀯𑀸 𑀘 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺;

𑀧𑀜𑁆𑀘𑀔𑀻𑀡𑀸𑀲𑀯𑀲𑀢-𑀧𑀭𑀺𑀯𑀸𑀏𑀭𑀸 𑀅𑀳𑁄𑀲𑀺 𑀘.

𑀙𑀢𑁆𑀢𑀫𑀗𑁆𑀕𑀮 𑀲𑀢𑁆𑀢𑀸𑀳𑁂, 𑀕𑀢𑁂 𑀕𑀢𑀪𑀬𑁄’ 𑀪𑀬𑁄;

𑀭𑀸𑀚𑀸 𑀓𑀢𑀸 𑀪𑀺𑀲𑁂𑀓𑁄𑀯, 𑀫𑀳𑀢𑀸 𑀯𑀺𑀪𑀯𑁂𑀦 𑀲𑁄.

𑀢𑀺𑀲𑁆𑀲𑀯𑀸𑀧𑀺’𑀫𑀕𑀸 𑀓𑀻𑀴-𑀯𑀺𑀥𑀺𑀦𑀸 𑀲𑀫𑀮𑀗𑁆𑀓 𑀢𑀁;

𑀓𑀻𑀴𑀺𑀢𑀼𑀁 𑀅𑀪𑀺𑀲𑀺𑀢𑁆𑀢𑀸𑀦𑀁, 𑀘𑀸𑀭𑀺𑀢𑁆𑀢𑀜𑁆𑀘𑀸 𑀦𑀼𑀭𑀓𑁆𑀔𑀺𑀢𑀼𑀁.

𑀭𑀜𑁆𑀜𑁄 𑀧𑀭𑀺𑀘𑁆𑀙𑀤𑀁 𑀲𑀩𑁆𑀩𑀁, 𑀉𑀧𑀸𑀬𑀦𑀲𑀢𑀸𑀦𑀺 𑀘;

𑀫𑀭𑀺𑀘𑀯𑀝𑁆𑀝𑀺𑀯𑀺𑀳𑀸𑀭𑀲𑁆𑀲, 𑀞𑀸𑀦𑀫𑁆𑀳𑀺 𑀞𑀧𑀬𑀺𑀁𑀲𑀼 𑀘.

𑀢𑀢𑁆𑀣𑁂𑀯 𑀣𑀽𑀧𑀞𑀸𑀦𑀫𑁆𑀳𑀺, 𑀲𑀥𑀸𑀢𑀼𑀁 𑀓𑀼𑀦𑁆𑀢𑀫𑀼𑀢𑁆𑀢𑀫𑀁;

𑀞𑀧𑁂𑀲𑀼𑀁 𑀓𑀼𑀦𑁆𑀢𑀥𑀭𑀓𑀸, 𑀉𑀚𑀼𑀓𑀁 𑀭𑀸𑀚𑀫𑀸𑀦𑀼𑀲𑀸.

𑀲𑀳𑁄𑀭𑁄𑀥𑁄 𑀫𑀳𑀸𑀭𑀸𑀚𑀸, 𑀓𑀻𑀴𑀺𑀢𑁆𑀯𑀸 𑀲𑀮𑀺𑀮𑁂 𑀤𑀺𑀯𑀸;

𑀲𑀸𑀬𑀫𑀸𑀳𑀁 𑀕𑀫𑀺𑀲𑁆𑀲𑀸𑀫, 𑀓𑀼𑀦𑁆𑀢𑀁 𑀯𑀟𑁆𑀠𑁂𑀣 𑀪𑁄’’𑀇𑀢𑀺.

𑀘𑀸𑀮𑁂𑀢𑀼𑀁 𑀢𑀁 𑀦 𑀲𑀓𑁆𑀔𑀺𑀁𑀲𑀼, 𑀓𑀼𑀦𑁆𑀢𑀁 𑀭𑀸𑀚𑀸𑀥𑀺𑀓𑀸𑀭𑀺𑀓𑀸;

𑀕𑀦𑁆𑀥𑀸𑀫𑀸𑀮𑀸𑀳𑀺 𑀧𑀽𑀚𑁂𑀲𑀼𑀁, 𑀭𑀸𑀚𑀲𑁂𑀦𑀸𑀲𑀫𑀸𑀕𑀢𑀸.

𑀭𑀸𑀚𑀸 ¶ 𑀫𑀳𑀦𑁆𑀢𑀁 𑀅𑀘𑁆𑀙𑁂𑀭𑀁, 𑀤𑀺𑀲𑁆𑀯𑀸 𑀢𑀁 𑀳𑀝𑁆𑀞𑀫𑀸𑀦𑀲𑁄;

𑀯𑀺𑀥𑀸𑀬 𑀢𑀢𑁆𑀣 𑀆𑀭𑀓𑁆𑀔𑀁, 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀁 𑀢𑀢𑁄.

𑀓𑀼𑀦𑁆𑀢𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸, 𑀘𑁂𑀢𑀺𑀬𑀁 𑀢𑀢𑁆𑀣 𑀓𑀸𑀭𑀬𑀺;

𑀣𑀽𑀧𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸, 𑀯𑀺𑀳𑀸𑀭𑀜𑁆𑀘 𑀅𑀓𑀸𑀭𑀬𑀺.

𑀢𑀻𑀳𑀺 𑀯𑀲𑁆𑀲𑁂𑀳𑀺 𑀦𑀺𑀞𑀸𑀲𑀺, 𑀯𑀺𑀳𑀸𑀭𑁄 𑀲𑁄 𑀦𑀭𑀺𑀲𑁆𑀲𑀭𑁄;

𑀲𑀗𑁆𑀖𑀁 𑀲𑀲𑀦𑁆𑀦𑀺𑀧𑀸𑀢𑁂𑀲𑀺, 𑀯𑀺𑀳𑀭𑀫𑀳𑀸𑀓𑀸𑀭𑀡𑀸.

𑀪𑀺𑀓𑁆𑀔𑀼𑀦𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀢𑀤𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀦;

𑀦𑀯𑀼𑀢𑀺 𑀘 𑀲𑀳𑀲𑁆𑀲𑀸𑀦𑀺, 𑀅𑀪𑀯𑀺𑀁𑀲𑀼 𑀲𑀫𑀸𑀕𑀢𑀸.

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀲𑀗𑁆𑀖𑀁, 𑀇𑀤𑀫𑀸𑀓 𑀫𑀳𑀻𑀧𑀢𑀺;

‘‘𑀲𑀗𑁆𑀖𑀁 𑀪𑀦𑁆𑀢𑁂 𑀯𑀺𑀲𑀭𑀺𑀢𑁆𑀯𑀸, 𑀪𑀼𑀜𑁆𑀚𑀺𑀁 𑀫𑀭𑀺𑀘𑀯𑀝𑁆𑀝𑀺𑀓𑀁.

𑀳𑀲𑁆𑀲𑁂’𑀢𑀁 𑀤𑀡𑁆𑀟𑀓𑀫𑁆𑀫𑀁 𑀫𑁂, 𑀪𑀯𑀢𑀽𑀢𑀺 𑀅𑀓𑀸𑀭𑀬𑀺;

𑀲𑀘𑁂𑀢𑀺𑀬𑀁 𑀫𑀭𑀺𑀘𑀯𑀝𑁆𑀝𑀺-𑀯𑀺𑀳𑀸𑀭𑀁 𑀲𑀼𑀫𑀦𑁄𑀳𑀭𑀁.

𑀧𑀢𑀺𑀕𑁆𑀕𑀡𑁆𑀳𑀸𑀢𑀼 𑀢𑀁 𑀲𑀗𑁆𑀖𑁄, 𑀇𑀢𑀺 𑀲𑁄 𑀤𑀓𑁆𑀔𑀺𑀡𑁄𑀤𑀓𑀁;

𑀧𑀸𑀢𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀯𑀺𑀳𑀸𑀭𑀁 𑀲𑀼𑀫𑀦𑁄 𑀅𑀤𑀸.

𑀯𑀺𑀳𑀸𑀭𑁂 𑀢𑀁 𑀲𑀫𑀦𑁆𑀢𑀸𑀧𑀺, 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀲𑀼𑀪𑀁;

𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀲𑀗𑁆𑀖𑀲𑁆𑀲, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺.

𑀲𑀢𑁆𑀢𑀸𑀳𑀁 𑀅𑀦𑁆𑀦𑀧𑀸𑀦𑀸𑀤𑀺𑀁, 𑀤𑀢𑁆𑀯𑀸𑀦 𑀫𑀦𑀼𑀚𑀸𑀥𑀺𑀧𑁄;

𑀅𑀤𑀸 𑀲𑀸𑀫𑀡𑀓𑀁 𑀲𑀩𑁆𑀩𑀁, 𑀧𑀭𑀺𑀓𑁆𑀔𑀸𑀭𑀁 𑀫𑀳𑀸𑀭𑀳𑀁.

𑀅𑀳𑀼 𑀲𑀢𑀲𑀳𑀲𑁆𑀲𑀕𑁆𑀖𑁄, 𑀧𑀭𑀺𑀓𑁆𑀔𑀸𑀭𑁄 𑀲 𑀆𑀤𑀺𑀓𑁄;

𑀅𑀦𑁆𑀢𑁂 𑀲𑀳𑀲𑁆𑀲𑀕𑁆𑀖𑀦𑀓𑁄, 𑀲𑀩𑁆𑀩 𑀲𑀗𑁆𑀖𑁄 𑀘 𑀢𑀁𑀮𑀪𑀺.

𑀬𑀼𑀤𑁆𑀥𑁂 𑀤𑀸𑀦𑁂 𑀘 𑀲𑀽𑀭𑁂𑀦, 𑀲𑀽𑀭𑀺𑀦𑀸 𑀭𑀢𑀦𑀢𑁆𑀢𑀬𑁂;

𑀧𑀲𑀦𑁆𑀦𑀸𑀫𑀮𑀘𑀺𑀢𑁆𑀢𑁂𑀦, 𑀲𑀸𑀲𑀦𑀼𑀚𑁄𑀢 𑀦𑀢𑁆𑀣𑀺𑀦𑀸.

𑀭𑀜𑁆𑀜𑀸 ¶ 𑀓𑀢𑀜𑁆𑀜𑀼𑀦𑀸 𑀢𑁂𑀦, 𑀣𑀽𑀧𑀓𑀸𑀭𑀸𑀧𑀦𑀸𑀤𑀺𑀢𑁄;

𑀯𑀺𑀳𑀸𑀭 𑀫𑀳𑀦𑀦𑁆𑀢𑀸𑀦𑀺, 𑀧𑀽𑀚𑁂𑀢𑀼𑀁 𑀭𑀢𑀦𑀢𑁆𑀢𑀬𑀁.

𑀧𑀭𑀺𑀘𑁆𑀘𑀢𑁆𑀢𑀥𑀦𑀸𑀦𑁂’𑀢𑁆𑀣, 𑀅𑀦𑀕𑁆𑀖𑀸𑀦𑀺 𑀯𑀺𑀫𑀼𑀜𑁆𑀘𑀺𑀬;

𑀲𑁂𑀲𑀸𑀦𑀺 𑀳𑁄𑀦𑁆𑀢𑀺 𑀏𑀓𑀸𑀬, 𑀊𑀦𑀯𑀻𑀲𑀢𑀺𑀓𑁄𑀝𑀺𑀬𑁄.

𑀢𑁄𑀕𑀸 𑀤𑀲𑀤𑁆𑀥𑀯𑀺𑀥 𑀤𑁄𑀲𑀯𑀺𑀤𑀽𑀲𑀺𑀢𑀸𑀧𑀺,

𑀧𑀜𑁆𑀜𑀸𑀯𑀺𑀲𑁂𑀲 𑀲𑀳𑀺𑀢𑁂𑀳𑀺 𑀚𑀦𑁂𑀳𑀺 𑀧𑀢𑁆𑀢𑀸;

𑀳𑁄𑀦𑁆𑀢𑁂𑀯 𑀧𑀜𑁆𑀘𑀕𑀼𑀡𑀬𑁄𑀕 𑀕𑀳𑀺𑀢𑀲𑀸𑀭𑀁,

𑀇𑀘𑁆𑀘𑀲𑁆𑀲 𑀲𑀸𑀭𑀕𑀳𑀡𑁂 𑀫𑀢𑀺𑀫𑀸𑀬𑀢𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀭𑀺𑀘𑀯𑀝𑁆𑀝𑀺𑀓𑀯𑀺𑀳𑀸𑀭𑀫𑀳𑁄𑀦𑀸𑀫

𑀢𑀢𑁄 𑀭𑀸𑀚𑀸 𑀯𑀺𑀘𑀺𑀦𑁆𑀢𑁂𑀲𑀺, 𑀯𑀺𑀲𑁆𑀲𑀼𑀢𑀁 𑀲𑀼𑀲𑁆𑀲𑀼𑀢𑀁 𑀲𑀼𑀢𑀁;

𑀫𑀳𑀸𑀧𑀜𑁆𑀜𑁄 𑀲𑀤𑀸 𑀧𑀼𑀜𑁆𑀜𑁄, 𑀧𑀜𑁆𑀜𑀸𑀬 𑀓𑀢𑀦𑀺𑀘𑁆𑀙𑀬𑁄.

‘‘𑀤𑀻𑀧𑀧𑁆𑀧𑀲𑀸𑀤𑀓𑁄 𑀣𑁂𑀭𑁄, 𑀭𑀸𑀚𑀺𑀦𑁄 𑀅𑀬𑁆𑀬𑀓𑀲𑁆𑀲 𑀫𑁂;

𑀏𑀯𑀁 𑀓𑀺𑀭𑀸𑀳𑀦𑀢𑁆𑀢𑀸 𑀢𑁂, 𑀤𑀼𑀝𑁆𑀞𑀕𑀸𑀫𑀡𑀺𑀪𑀽𑀧𑀢𑀺.

𑀫𑀳𑀸𑀧𑀼𑀜𑁆𑀜𑁄 𑀫𑀳𑀸𑀣𑀽𑀧𑀁, 𑀲𑁄𑀡𑁆𑀡𑀫𑀸𑀮𑀺𑀁 𑀫𑀦𑁄𑀭𑀫𑀁;

𑀯𑀻𑀲𑀁𑀳𑀢𑁆𑀣𑀲𑀢𑀁 𑀉𑀘𑁆𑀘𑀁, 𑀓𑀸𑀭𑁂𑀲𑁆𑀲𑀢𑀺 𑀅𑀦𑀸𑀕𑀢𑁂.

𑀧𑀼𑀦𑁄 𑀉𑀧𑁄𑀲𑀣𑀸𑀕𑀸𑀭𑀁, 𑀦𑀸𑀦𑀸𑀭𑀢𑀦𑀫𑀡𑁆𑀟𑀺𑀢𑀁;

𑀦𑀯𑀪𑀽𑀫𑀁 𑀓𑀭𑀺𑀢𑁆𑀯𑀸𑀦, 𑀮𑁄𑀳𑀧𑀸𑀲𑀸𑀤 𑀫𑁂𑀯 𑀘.

𑀇𑀢𑀺 𑀘𑀺𑀦𑁆𑀢𑀺𑀬 𑀪𑀽𑀫𑀺𑀦𑁆𑀤𑁄, 𑀮𑀺𑀔𑀺𑀢𑁆𑀯𑁂𑀯𑀁 𑀞𑀧𑀸𑀧𑀺𑀢𑀁;

𑀧𑁂𑀓𑁆𑀔𑀸𑀧𑁂𑀦𑁆𑀢𑁄 𑀭𑀸𑀚𑀕𑁂𑀳𑁂, 𑀞𑀺𑀢𑀁 𑀏𑀯 𑀓𑀭𑀡𑁆𑀟𑀓𑁂.

𑀲𑁄𑀯𑀡𑁆𑀡𑀧𑀝𑁆𑀝𑀁 𑀮𑀤𑁆𑀥𑀸𑀦, 𑀮𑁂𑀔𑀁 𑀢𑀢𑁆𑀣 𑀅𑀯𑀸𑀘𑀬𑀺;

‘‘𑀘𑀢𑁆𑀢𑀸𑀮𑀻𑀲𑀲𑀢𑀁 𑀯𑀲𑁆𑀲𑀁, 𑀅𑀢𑀺𑀓𑁆𑀓𑀫𑁆𑀫 𑀅𑀦𑀸𑀕𑀢𑁂.

𑀓𑀸𑀓𑀯𑀡𑁆𑀡𑀲𑀼𑀢𑁄 ¶ 𑀤𑀼𑀝𑁆𑀞-𑀕𑀸𑀫𑀡𑀺𑀫𑀦𑀼𑀚𑀸𑀥𑀺𑀧𑁄;

𑀇𑀤𑀜𑁆𑀘𑀺𑀤𑀜𑁆𑀘 𑀏𑀯𑀜𑁆𑀘, 𑀓𑀸𑀭𑁂𑀲𑁆𑀲𑀢𑀻’’𑀢𑀺 𑀯𑀸𑀘𑀺𑀢𑀁.

𑀲𑀼𑀢𑁆𑀯𑀸 𑀳𑀝𑁆𑀞𑁄 𑀉𑀤𑀸𑀦𑁂𑀢𑁆𑀯𑀸, 𑀅𑀧𑁆𑀧𑁄𑀝𑁆𑀞𑁂𑀲𑀺 𑀫𑀳𑀻𑀧𑀢𑀺;

𑀢𑀢𑁄 𑀧𑀸𑀢𑁄’𑀯 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀫𑁂𑀖𑀯𑀦𑀁 𑀲𑀼𑀪𑀁.

𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑀬𑀺𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀩𑁆𑀭𑀯𑀺;

‘‘𑀯𑀺𑀫𑀸𑀦𑀢𑀼𑀮𑁆𑀬𑀁 𑀧𑀸𑀲𑀸𑀤𑀁, 𑀓𑀸𑀭𑀬𑀺𑀲𑁆𑀲𑀸𑀫𑀺 𑀯𑁄 𑀅𑀳𑀁.

𑀤𑀺𑀩𑁆𑀩𑀁 𑀯𑀺𑀫𑀸𑀦𑀁 𑀧𑁂𑀲𑁂𑀢𑁆𑀯𑀸, 𑀢𑀤𑀸 𑀮𑁂𑀔𑀁 𑀅𑀤𑀸𑀣 𑀫𑁂’’;

𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀺𑀲𑀚𑁆𑀚𑁂𑀲𑀺, 𑀅𑀝𑁆𑀞 𑀔𑀻𑀡𑀸𑀲𑀯𑁂 𑀢𑀳𑀺𑀁.

𑀓𑀲𑁆𑀲𑀧𑀫𑀼𑀦𑀺𑀦𑁄 𑀓𑀸𑀮𑁂, 𑀅𑀲𑁄𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀝𑁆𑀞 𑀲𑀮𑀸𑀓𑀪𑀢𑁆𑀢𑀸𑀦𑀺, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑀺𑀬.

𑀪𑀭𑀡𑀺𑀁 𑀦𑀸𑀫 𑀤𑀸𑀲𑀺𑀁 𑀲𑁄, ‘‘𑀦𑀺𑀘𑁆𑀘𑀁 𑀤𑁂𑀳𑀻’’𑀢𑀺 𑀅𑀩𑁆𑀭𑀯𑀺;

𑀤𑀢𑁆𑀯𑀸 𑀲𑀸 𑀢𑀸𑀦𑀺 𑀲𑀓𑁆𑀓𑀘𑁆𑀘𑀁, 𑀬𑀸𑀯𑀚𑀻𑀯𑀁 𑀢𑀢𑁄 𑀘𑀼𑀢𑀸.

𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀺𑀭𑀼𑀘𑀺𑀭𑁂 𑀲𑀼𑀪𑁂;

𑀅𑀘𑁆𑀙𑀭𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀤𑀸’𑀲𑀺 𑀧𑀭𑀺𑀯𑀸𑀭𑀺𑀢𑀸.

𑀢𑀲𑁆𑀲𑀸 𑀭𑀢𑀦𑀧𑀸𑀲𑀸𑀤𑁄, 𑀤𑁆𑀯𑀸𑀤𑀲𑀬𑁄𑀚𑀦𑀼𑀕𑁆𑀕𑀢𑁄;

𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑁂𑀧𑁄, 𑀘𑀢𑁆𑀢𑀸𑀮𑀻𑀲𑀜𑁆𑀘 𑀅𑀝𑁆𑀞 𑀘.

𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑁂𑀦, 𑀫𑀡𑁆𑀟𑀺𑀢𑁄 𑀦𑀯𑀪𑀽𑀫𑀺𑀓𑁄;

𑀲𑀳𑀲𑁆𑀲𑀕𑀩𑁆𑀪𑀲𑀫𑁆𑀧𑀦𑁆𑀦𑁄, 𑀭𑀸𑀚𑀫𑀸𑀦𑁄 𑀘𑀢𑀼𑀫𑁆𑀫𑀼𑀔𑁄.

𑀲𑀳𑀲𑁆𑀲𑀲𑀗𑁆𑀔𑀲𑀁𑀯𑀼𑀢𑁆𑀢𑀺, 𑀲𑀻𑀳𑀧𑀜𑁆𑀚𑀭 𑀦𑁂𑀢𑁆𑀢𑀯𑀸;

𑀲𑀓𑀺𑀗𑁆𑀓𑀡𑀺𑀓𑀚𑀸𑀮𑀸𑀬, 𑀲𑀚𑁆𑀚𑀺𑀢𑁄 𑀯𑁂𑀤𑀺𑀓𑀸𑀬 𑀘.

𑀅𑀫𑁆𑀩𑀮𑀝𑁆𑀞𑀺𑀓𑀧𑀸𑀲𑀸𑀤𑁄, 𑀢𑀲𑁆𑀲 𑀫𑀚𑁆𑀛𑁂 𑀞𑀺𑀢𑁄 𑀅𑀳𑀼;

𑀲𑀦𑁆𑀢𑀫𑀢𑁄 𑀤𑀺𑀲𑁆𑀲𑀫𑀸𑀦𑁄, 𑀧𑀕𑁆𑀕𑀳𑀺𑀢𑀥𑀚𑀸𑀓𑀼𑀮𑁄.

𑀢𑀸𑀯𑀢𑀺𑀁𑀲𑀜𑁆𑀘 𑀕𑀘𑁆𑀙𑀦𑁆𑀢𑀸, 𑀤𑀺𑀲𑁆𑀯𑀸 𑀣𑁂𑀭𑀁 𑀢𑀫𑁂𑀯 𑀢𑁂;

𑀳𑀺𑀗𑁆𑀕𑀼𑀮𑁂𑀦 𑀢𑀤𑀸 𑀮𑁂𑀔𑀁, 𑀮𑁂𑀔𑀬𑀺𑀢𑁆𑀯𑀸 𑀧𑀝𑁂 𑀢𑀢𑁄.

𑀦𑀺𑀯𑀢𑁆𑀢𑀺𑀢𑁆𑀯𑀸𑀦 𑀆𑀕𑀦𑁆𑀢𑁆𑀯𑀸, 𑀧𑀝𑀁 𑀲𑀗𑁆𑀖𑀲𑁆𑀲 𑀤𑀲𑁆𑀲𑀬𑀼𑀁;

𑀲𑀗𑁆𑀖𑁄 𑀧𑀝𑀁 𑀕𑀳𑁂𑀢𑁆𑀯𑀸 𑀢𑀁, 𑀧𑀸𑀳𑁂𑀲𑀺 𑀭𑀸𑀚𑀲𑀦𑁆𑀢𑀺𑀓𑀁.

𑀢𑀁 ¶ 𑀤𑀺𑀲𑁆𑀯𑀸 𑀲𑀼𑀫𑀦𑁄 𑀭𑀸𑀚𑀸, 𑀆𑀕𑀫𑁆𑀫𑀸𑀭𑀸𑀫 𑀫𑀼𑀢𑁆𑀢𑀫𑀁;

𑀆𑀮𑁂𑀔𑀢𑀼𑀮𑁆𑀬𑀁 𑀓𑀸𑀭𑁂𑀲𑀺, 𑀮𑁄𑀳𑀧𑀸𑀲𑀸𑀤 𑀫𑀼𑀢𑁆𑀢𑀫𑀁.

𑀓𑀫𑁆𑀫𑀸𑀭𑀫𑁆𑀪𑀦𑀓𑀸𑀮𑁂𑀯, 𑀘𑀢𑀼𑀤𑁆𑀯𑀸𑀭𑀫𑁆𑀳𑀺 𑀪𑁄𑀕𑀯𑀸;

𑀅𑀝𑁆𑀞𑀲𑀢𑀲𑀳𑀲𑁆𑀲𑀸𑀦𑀺, 𑀳𑀺𑀭𑀜𑁆𑀜𑀸𑀦𑀺 𑀞𑀧𑀸𑀧𑀬𑀺.

𑀧𑀼𑀝𑀲𑀳𑀲𑁆𑀲 𑀯𑀢𑁆𑀣𑀸𑀦𑀺, 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀞𑀧𑀸𑀧𑀬𑀺;

𑀕𑀼𑀴 𑀢𑁂𑀮𑀲𑀓𑁆𑀔𑀭𑀫𑀥𑀼-𑀧𑀼𑀭𑀸 𑀘𑀸𑀦𑁂𑀓 𑀘𑀸𑀝𑀺𑀬𑁄.

‘‘𑀅𑀫𑀽𑀮𑀓𑀓𑀫𑁆𑀫 𑀫𑁂𑀢𑁆𑀣, 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀸𑀲𑀺𑀬;

𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁, 𑀢𑁂𑀲𑀁 𑀫𑀽𑀮𑀫𑀤𑀸𑀧𑀬𑀺.

𑀳𑀢𑁆𑀣𑀲𑀢𑀁 𑀳𑀢𑁆𑀣𑀲𑀢𑀁, 𑀆𑀲𑀺 𑀏𑀓𑁂𑀓 𑀧𑀲𑁆𑀲𑀢𑁄;

𑀉𑀘𑁆𑀘𑀢𑁄 𑀢𑀢𑁆𑀢𑀓𑁄𑀬𑁂𑀯, 𑀧𑀸𑀲𑀸𑀤𑁄 𑀳𑀺 𑀘𑀢𑀼𑀫𑁆𑀫𑀼𑀔𑁄.

𑀢𑀲𑁆𑀫𑀺𑀁 𑀧𑀸𑀲𑀸𑀤 𑀲𑁂𑀝𑁆𑀞𑀲𑁆𑀫𑀺𑀁, 𑀅𑀳𑁂𑀲𑀼𑀁 𑀦𑀯𑀪𑀽𑀫𑀺𑀬𑁄;

𑀏𑀓𑁂𑀓𑀺𑀲𑁆𑀲𑀸 𑀪𑀽𑀫𑀺𑀬𑀸 𑀘, 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀘.

𑀓𑀽𑀝𑀸𑀕𑀸𑀭𑀸𑀦𑀺 𑀲𑀩𑁆𑀩𑀸𑀦𑀺, 𑀲𑀚𑁆𑀛𑀼𑀦𑀸 𑀔𑀘𑀺𑀢𑀸 𑀦’𑀬𑀼𑀁;

𑀧𑀯𑀸𑀮𑀯𑁂𑀤𑀺𑀓𑀸 𑀢𑁂𑀲𑀁, 𑀦𑀸𑀦𑀸𑀭𑀢𑀦 𑀪𑀽𑀲𑀺𑀢𑀸.

𑀦𑀸𑀦𑀸𑀭𑀢𑀦 𑀘𑀺𑀢𑁆𑀢𑀸𑀦𑀺, 𑀢𑀸𑀲𑀁 𑀧𑀤𑀼𑀫𑀓𑀸𑀦𑀺 𑀘;

𑀲𑀚𑁆𑀛𑀓𑀺𑀁𑀓𑀺𑀡𑀺𑀓𑀸𑀧𑀦𑁆𑀢𑀺-𑀧𑀭𑀺𑀓𑁆𑀔𑀺𑀢𑁆𑀢𑀸𑀯 𑀢𑀸 𑀅𑀳𑀼.

𑀲𑀳𑀲𑁆𑀲𑀁 𑀢𑀢𑁆𑀣 𑀧𑀸𑀲𑀸𑀤𑁄, 𑀕𑀩𑁆𑀪𑀸 𑀆𑀲𑀼𑀁 𑀲𑀼𑀲𑀗𑁆𑀔𑀢𑀸;

𑀦𑀸𑀦𑀸𑀭𑀢𑀦 𑀔𑀘𑀺𑀢𑀸, 𑀲𑀻𑀳𑀧𑀜𑁆𑀚𑀭𑀦𑁂𑀢𑁆𑀢𑀯𑀸.

𑀦𑀸𑀭𑀺𑀯𑀸𑀳𑀦𑀬𑀸𑀦𑀦𑁆𑀢𑀼, 𑀲𑀼𑀢𑁆𑀯𑀸 𑀯𑁂𑀲𑁆𑀲𑀯𑀡𑀲𑁆𑀲 𑀲𑁄;

𑀢𑀤𑀸 𑀓𑀸𑀭𑀫𑀓𑀸𑀭𑁂𑀲𑀺, 𑀫𑀚𑁆𑀛𑁂 𑀭𑀢𑀦𑀫𑀡𑁆𑀟𑀧𑀁.

𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑁂𑀳𑀺, 𑀤𑁂𑀯𑀢𑀸 𑀭𑀽𑀧𑀓𑁂𑀳𑀺 𑀘;

𑀅𑀳𑀼 𑀭𑀢𑀦𑀫𑀬𑁄𑀳𑁂’𑀲, 𑀣𑀫𑁆𑀪𑁂𑀳𑀺 𑀘 𑀯𑀺𑀪𑀽𑀲𑀺𑀢𑁄.

𑀫𑀼𑀢𑁆𑀢𑀸𑀚𑀸𑀮𑀧𑀭𑀺𑀓𑁆𑀔𑁂𑀧𑁄, 𑀫𑀡𑁆𑀟𑀧𑀦𑁆𑀢𑁂 𑀲𑀫𑀦𑁆𑀢𑀢𑁄;

𑀧𑀯𑀸𑀮𑀯𑁂𑀤𑀺𑀓𑀸 𑀘𑁂𑀢𑁆𑀣, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀥𑀸 𑀅𑀳𑀼.

𑀲𑀢𑁆𑀢𑀭𑀢𑀦 𑀘𑀺𑀢𑁆𑀢𑀲𑁆𑀲, 𑀯𑁂𑀫𑀚𑁆𑀛𑁂 𑀫𑀡𑁆𑀟𑀧𑀲𑁆𑀲 𑀢𑀼;

𑀭𑀼𑀘𑀺𑀭𑁄 𑀤𑀦𑁆𑀢𑀧𑀮𑁆𑀮𑀗𑁆𑀓𑁄, 𑀭𑀫𑁆𑀫𑁄 𑀨𑀮𑀺𑀓𑀲𑀦𑁆𑀣𑀭𑁄.

𑀤𑀦𑁆𑀢𑀫𑀬𑀸𑀧𑀲𑁆𑀲𑀬𑁂’𑀢𑁆𑀣, 𑀲𑀼𑀯𑀡𑁆𑀡𑀫𑀬 𑀲𑀽𑀭𑀺𑀬𑁄;

𑀲𑀚𑁆𑀛𑀼𑀫𑀬𑁂 𑀘𑀦𑁆𑀤𑀺𑀫𑀸 𑀘, 𑀢𑀸𑀭𑀸 𑀘 𑀫𑀼𑀢𑁆𑀢𑀓𑀸 𑀫𑀬𑀸.

𑀦𑀸𑀦𑀸𑀭𑀢𑀦 ¶ 𑀧𑀤𑀼𑀫𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀚𑀸𑀢𑀓𑀸𑀦𑀺 𑀘 𑀢𑀢𑁆𑀣𑁂𑀯, 𑀆𑀲𑀼𑀁 𑀲𑁄𑀡𑁆𑀡𑀮𑀢𑀦𑁆𑀢𑀭𑁂.

𑀫𑀳𑀕𑁆𑀖𑀧𑀘𑁆𑀘𑀢𑁆𑀣𑀭𑀡𑁂, 𑀧𑀮𑁆𑀮𑀗𑁆𑀓𑁂’𑀢𑀺 𑀫𑀦𑁄𑀭𑀫𑁂;

𑀫𑀦𑁄𑀳𑀭𑀸’𑀲𑀺𑀝𑁆𑀞𑀧𑀺𑀢𑀸, 𑀭𑀼𑀘𑀺𑀭𑀁 𑀤𑀦𑁆𑀢𑀩𑀻𑀚𑀦𑀻.

𑀧𑀯𑀸𑀮𑀧𑀸𑀤𑀼𑀓𑀸 𑀢𑀢𑁆𑀣, 𑀨𑀮𑀺𑀓𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀸;

𑀲𑁂𑀢𑀘𑁆𑀙𑀢𑁆𑀢𑀁 𑀲𑀚𑁆𑀛𑀼𑀤𑀡𑁆𑀟𑀁, 𑀧𑀮𑁆𑀮𑀗𑁆𑀓𑁄’𑀧𑀭𑀺𑀲𑁄𑀪𑀣.

𑀲𑀢𑁆𑀢𑀭𑀢𑀦 𑀫𑀬𑀸𑀦𑁂𑀢𑁆𑀣, 𑀅𑀝𑁆𑀞𑀫𑀗𑁆𑀕𑀮𑀺𑀓𑀸𑀦𑀺 𑀘;

𑀘𑀢𑀼𑀧𑁆𑀧𑀤𑀸𑀦𑀁 𑀧𑀦𑁆𑀢𑀻 𑀘, 𑀫𑀡𑀺𑀫𑀼𑀢𑁆𑀢𑀦𑁆𑀢𑀭𑀸 𑀅𑀳𑀼𑀁.

𑀭𑀚𑀢𑀸𑀦𑀜𑁆𑀘 𑀖𑀡𑁆𑀝𑀸𑀦𑀁, 𑀧𑀦𑁆𑀢𑀻 𑀪𑀢𑁆𑀢𑀦𑁆𑀢𑀮𑀫𑁆𑀩𑀺𑀢𑀸;

𑀧𑀸𑀲𑀸𑀤𑀙𑀢𑁆𑀢𑀧𑀮𑁆𑀮𑀗𑁆𑀓-𑀫𑀡𑁆𑀟𑀧𑀸’𑀲𑀼𑀁 𑀅𑀦𑀕𑁆𑀖𑀺𑀓𑀸.

𑀫𑀳𑀕𑁆𑀖 𑀧𑀜𑁆𑀜𑀧𑀸𑀧𑁂𑀲𑀺, 𑀫𑀜𑁆𑀘𑀧𑀻𑀞𑀁 𑀬𑀣𑀸𑀭𑀳𑀁;

𑀢𑀣𑁂𑀯 𑀪𑀽𑀫𑀢𑁆𑀣𑀭𑀡𑀁, 𑀓𑀫𑁆𑀩𑀮𑀜𑁆𑀘 𑀫𑀳𑀸𑀭𑀳𑀁.

𑀆𑀘𑀸𑀫 𑀓𑀼𑀫𑁆𑀪𑀺𑀲𑁄𑀯𑀡𑁆𑀡𑀸, 𑀉𑀮𑀼𑀗𑁆𑀓𑁄 𑀘 𑀅𑀳𑀼 𑀢𑀳𑀺𑀁;

𑀧𑀸𑀲𑀸𑀤 𑀧𑀭𑀺𑀪𑁄𑀕𑁂𑀲𑀼, 𑀲𑁂𑀲𑁂𑀲𑀼 𑀘 𑀓𑀣𑀸’ 𑀯𑀓𑀸.

𑀦𑀝𑁆𑀞𑀺𑀢𑁂 𑀮𑁄𑀳𑀧𑀸𑀲𑀸𑀤𑁂, 𑀲𑁄 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀬𑀺;

𑀭𑀸𑀚𑀸 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺, 𑀫𑀭𑀺𑀘𑀯𑀝𑁆𑀝𑀺𑀫𑀳𑁂 𑀯𑀺𑀬.

𑀧𑀼𑀣𑀼𑀚𑁆𑀚𑀦𑀸’𑀯 𑀅𑀝𑁆𑀞𑀁𑀲𑀼, 𑀪𑀺𑀓𑁆𑀔𑀽 𑀧𑀞𑀫𑀪𑀽𑀫𑀺𑀬𑀁;

𑀢𑁂𑀧𑀺𑀝𑀓𑀸 𑀤𑀼𑀢𑀺𑀬𑀸𑀬, 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀦.

𑀏𑀓𑁂 ¶ 𑀓𑁂𑀬𑁂𑀯 𑀅𑀝𑁆𑀞𑀁𑀲𑀼, 𑀢𑀢𑀺𑀬𑀸𑀤𑀻𑀲𑀼 𑀪𑀽𑀫𑀺𑀲𑀼;

𑀅𑀭𑀳𑀦𑁆𑀢𑁄 𑀘 𑀅𑀝𑁆𑀞𑀁𑀲𑀼, 𑀉𑀤𑁆𑀥𑀁 𑀘𑀢𑀽𑀲𑀼 𑀪𑀽𑀫𑀺𑀲𑀼.

𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀧𑀸𑀲𑀸𑀤𑀁, 𑀤𑀓𑁆𑀔𑀺𑀡𑀫𑁆𑀩𑀼𑀧𑀼𑀭𑀲𑁆𑀲𑀭𑀁;

𑀭𑀸𑀚𑀸’𑀤𑀢𑁆𑀣 𑀫𑀳𑀸𑀤𑀸𑀦𑀁, 𑀲𑀢𑁆𑀢𑀸𑀳𑀁 𑀧𑀼𑀩𑁆𑀩𑀓𑀁 𑀧𑀺𑀬.

𑀧𑀸𑀲𑀸𑀤 𑀫𑀳𑀘𑀢𑁆𑀢𑀸𑀦𑀺, 𑀫𑀳𑀸𑀘𑀸𑀕𑁂𑀦 𑀭𑀸𑀚𑀺𑀦𑀸;

𑀅𑀦𑀕𑁆𑀖𑀸𑀦𑀺 𑀞𑀧𑁂𑀢𑁆𑀯𑀸𑀦, 𑀅𑀳𑁂𑀲𑀼𑀁 𑀢𑀺𑀁𑀲𑀓𑁄𑀝𑀺𑀬𑁄.

𑀦𑀺𑀲𑁆𑀲𑀸𑀭𑁂 𑀥𑀦𑀦𑀺𑀘𑀬𑁂 𑀯𑀺𑀲𑁂𑀲𑀲𑀸𑀭𑀁,

𑀬𑁂 𑀤𑀸𑀦𑀁 𑀧𑀭𑀺𑀕𑀡𑀬𑀦𑁆𑀢𑀺 𑀲𑀸𑀥𑀼𑀧𑀜𑁆𑀜𑀸;

𑀢𑁂 𑀤𑀸𑀦𑀁 𑀯𑀺𑀧𑀼𑀮𑀫𑀧𑁂𑀢 𑀘𑀺𑀢𑁆𑀢𑀲𑀗𑁆𑀕𑀸,

𑀲𑀢𑁆𑀢𑀸𑀦𑀁 𑀳𑀺𑀢𑀧𑀭𑀫𑀸 𑀤𑀤𑀦𑁆𑀢𑀺 𑀏𑀯𑀁𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀢𑁆𑀢𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀢𑀢𑁄 𑀲𑀢𑀲𑀳𑀲𑁆𑀲𑀁 𑀲𑁄, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀓𑀸𑀭𑀸𑀧𑁂𑀲𑀺 𑀫𑀳𑀸𑀩𑁄𑀥𑀺-𑀧𑀽𑀚𑀁 𑀲𑀼𑀴𑀸𑀭𑀫𑀼𑀢𑁆𑀢𑀫𑀁.

𑀢𑀢𑁄 𑀧𑀼𑀭𑀁 𑀧𑀯𑀺𑀲𑀺𑀦𑁆𑀢𑁄, 𑀣𑀽𑀧𑀞𑀸𑀦𑁂 𑀦𑀺𑀯𑁂𑀲𑀺𑀢𑀁;

𑀧𑀲𑁆𑀲𑀺𑀢𑁆𑀯𑀸𑀦 𑀲𑀻𑀮𑀸𑀬𑀽𑀧𑀁, 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀓𑀁 𑀲𑀼𑀢𑀺𑀁.

‘‘𑀓𑀸𑀭𑁂𑀲𑁆𑀲𑀸𑀫𑀺 𑀫𑀳𑀸𑀣𑀽𑀧𑀁’’, 𑀇𑀢𑀺 𑀳𑀝𑁆𑀞𑁄 𑀫𑀳𑀸𑀢𑀮𑀁;

𑀆𑀭𑀼𑀬𑁆𑀳 𑀭𑀢𑁆𑀢𑀺𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀲𑀬𑀺𑀢𑁄 𑀇𑀢𑀺 𑀘𑀺𑀦𑁆𑀢𑀬𑀺.

‘‘𑀤𑀫𑀺𑀴𑁂 ¶ 𑀫𑀤𑁆𑀤𑀫𑀸𑀦𑁂𑀦, 𑀮𑁄𑀓𑁄’𑀬𑀁 𑀧𑀻𑀴𑀺𑀢𑁄 𑀫𑀬𑀸;

𑀦 𑀲𑀓𑁆𑀓𑀸 𑀩𑀮𑀺𑀫𑀼𑀤𑁆𑀥𑀢𑁆𑀢𑀼𑀁, 𑀢𑀁 𑀯𑀚𑁆𑀚𑀺𑀬 𑀩𑀮𑀺𑀁 𑀅𑀳𑀁.

𑀓𑀸𑀭𑀬𑀦𑁆𑀢𑁄 𑀫𑀳𑀸𑀣𑀽𑀧𑀁, 𑀓𑀢𑀁 𑀥𑀫𑁆𑀫𑁂𑀦 𑀇𑀝𑁆𑀞𑀺𑀓𑀸;

𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺 ‘‘𑀇𑀘𑁆𑀘𑁂𑀯𑀁, 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀘𑀺𑀦𑁆𑀢𑀺𑀢𑀁.

𑀙𑀢𑁆𑀢𑀫𑁆𑀳𑀺 𑀤𑁂𑀯𑀢𑀸𑀚𑀸𑀦𑀻, 𑀢𑀢𑁄 𑀓𑁄𑀮𑀸𑀳𑀮𑀁 𑀅𑀳𑀼;

𑀤𑁂𑀯𑁂𑀲𑀼 𑀜𑀢𑁆𑀯𑀸 𑀢𑀁 𑀲𑀓𑁆𑀓𑁄, 𑀯𑀺𑀲𑁆𑀲𑀓𑀫𑁆𑀫𑀸𑀦 𑀫𑀩𑁆𑀭𑀯𑀺.

‘‘𑀇𑀝𑁆𑀞𑀓𑀢𑁆𑀢𑀁 𑀘𑁂𑀢𑀺𑀬𑀲𑁆𑀲, 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑀕𑀸𑀫𑀡𑀺;

𑀕𑀦𑁆𑀢𑁆𑀯𑀸 𑀧𑀼𑀭𑀸 𑀬𑁄𑀚𑀦𑀫𑁆𑀳𑀺, 𑀕𑀫𑁆𑀪𑀻𑀭 𑀦𑀤𑀻 𑀬𑀦𑁆𑀢𑀺𑀓𑁂.

𑀫𑀸𑀧𑁂𑀳𑀺 𑀇𑀝𑁆𑀞𑀺𑀓𑀸 𑀢𑀢𑁆𑀢𑀁’, 𑀇𑀢𑀺 𑀲𑀓𑁆𑀓𑁂 𑀦 𑀪𑀸𑀲𑀺𑀢𑁄;

𑀯𑀺𑀲𑁆𑀲𑀓𑀫𑁆𑀫𑁄 𑀇𑀥𑀸𑀕𑀫𑁆𑀫, 𑀫𑀸𑀧𑁂𑀲𑀺 𑀢𑀢𑁆𑀣 𑀇𑀝𑁆𑀞𑀺𑀓𑀸.

𑀧𑀪𑀸𑀢𑁂 𑀮𑀼𑀤𑁆𑀤𑀓𑁄 𑀢𑀢𑁆𑀣, 𑀲𑀼𑀦𑀔𑁂𑀳𑀺 𑀯𑀦𑀁 𑀅𑀕𑀸;

𑀯𑁄𑀥𑀸𑀭𑀽𑀧𑁂𑀦 𑀤𑀲𑁆𑀲𑁂𑀲𑀺, 𑀮𑀼𑀤𑁆𑀤𑀓𑀁 𑀪𑀼𑀫𑁆𑀫𑀤𑁂𑀯𑀢𑀸.

𑀮𑀼𑀤𑁆𑀤𑀓𑁄 𑀢𑀁’𑀦𑀼𑀩𑀦𑁆𑀥𑀦𑁆𑀢𑁄, 𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸𑀦 𑀇𑀝𑁆𑀞𑀓𑀸;

𑀅𑀦𑁆𑀢𑀭𑀳𑀺𑀢𑀸𑀬 𑀕𑁄𑀥𑀸𑀬, 𑀇𑀢𑀺 𑀘𑀺𑀥𑀦𑁆𑀢𑀲𑀺 𑀲𑁄 𑀢𑀳𑀺𑀁.

‘‘𑀓𑀸𑀭𑁂𑀢𑀼 𑀓𑀸𑀫𑁄 𑀓𑀺𑀭 𑀦𑁄, 𑀫𑀳𑀸𑀣𑀽𑀧𑀁 𑀫𑀳𑀻𑀧𑀢𑀺;

𑀉𑀧𑀸𑀬𑀦𑀫𑀺𑀤𑀁 𑀢𑀲𑁆𑀲𑀁’, 𑀇𑀢𑀺 𑀕𑀦𑁆𑀢𑁆𑀯𑀸 𑀦𑀺𑀯𑁂𑀤𑀬𑀺.

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀺𑀬𑀁 𑀚𑀦𑀳𑀺 𑀢𑀧𑁆𑀧𑀺𑀬𑁄;

𑀭𑀸𑀚𑀸 𑀓𑀸𑀭𑁂𑀲𑀺 𑀲𑀓𑁆𑀓𑀸𑀭𑀁, 𑀫𑀳𑀦𑁆𑀢𑀁 𑀢𑀼𑀝𑁆𑀞𑀫𑀸𑀦𑀲𑁄.

𑀧𑀼𑀭𑀸𑀧𑀼𑀩𑁆𑀩𑀼𑀢𑁆𑀢𑀭𑁂 𑀤𑁂𑀲𑁂, 𑀬𑁄𑀚𑀦𑀢𑁆𑀢𑀬 𑀫𑀢𑁆𑀣𑀓𑁂;

𑀆𑀘𑀸𑀭 𑀯𑀺𑀝𑁆𑀞𑀺𑀕𑀸𑀫𑀫𑁆𑀳𑀺, 𑀲𑁄𑀴𑀲𑀓𑀭𑀻𑀲𑁂 𑀓𑀮𑁂.

𑀲𑁄𑀯𑀡𑁆𑀡 𑀩𑀻𑀚𑀸𑀦𑀼’𑀝𑁆𑀞𑀺𑀁𑀲𑀼, 𑀯𑀺𑀯𑀺𑀥𑀸𑀦𑀺 𑀧𑀫𑀸𑀡𑀢𑁄;

𑀯𑀺𑀤𑀢𑁆𑀣𑀼𑀓𑁆𑀓𑀝𑁆𑀞 𑀫𑀸𑀡𑀸𑀦𑀺, 𑀅𑀗𑁆𑀕𑀼𑀮𑀺𑀫𑀸𑀡𑀸 𑀦𑀺𑀳𑁂𑀞𑀢𑁄.

𑀲𑀼𑀯𑀡𑁆𑀡 𑀧𑀼𑀡𑁆𑀡𑀁 𑀢𑀁 𑀪𑀽𑀫𑀺𑀁, 𑀤𑀺𑀲𑁆𑀯𑀸 𑀲𑀗𑁆𑀕𑀸𑀫𑀯𑀸𑀲𑀺𑀓𑀸;

𑀲𑀼𑀯𑀡𑁆𑀡 𑀧𑀸𑀳𑀺𑀁 𑀆𑀤𑀸𑀬, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑀬𑀼𑀁.

𑀧𑀼𑀭𑀸𑀧𑀸𑀘𑀺𑀦 𑀧𑀲𑁆𑀲𑀫𑁆𑀳𑀺, 𑀲𑀢𑁆𑀢 𑀬𑁄𑀚𑀦 𑀫𑀢𑁆𑀣𑀓𑁂;

𑀕𑀗𑁆𑀕𑀸𑀧𑀸𑀭𑁂 𑀢𑀫𑁆𑀩𑀧𑀺𑀝𑁆𑀞𑁂, 𑀢𑀫𑁆𑀩𑀮𑁄𑀳𑀁 𑀲𑀫𑀼𑀝𑁆𑀞𑀳𑀺.

𑀢𑀗𑁆𑀕𑀸𑀫𑀺𑀓𑀸 𑀢𑀫𑁆𑀩𑀮𑁄𑀳-𑀩𑀻𑀚𑀫𑀸𑀤𑀸𑀬 𑀧𑀸𑀢𑀺𑀬𑀸;

𑀭𑀸𑀚𑀸𑀦 𑀫𑀼𑀧𑀲𑀗𑁆𑀓𑀫𑁆𑀫, 𑀢𑀫𑀢𑁆𑀣𑀜𑁆𑀘 𑀦𑀺𑀯𑁂𑀤𑀬𑀼𑀁.

𑀧𑀼𑀩𑁆𑀩𑀤𑀓𑁆𑀔𑀺𑀡𑀤𑁂𑀲𑀫𑁆𑀳𑀺, 𑀧𑀼𑀭𑀢𑁄 𑀘𑀢𑀼𑀬𑁄𑀚𑀦𑁂;

𑀲𑀼𑀫𑀦 𑀯𑀸𑀧𑀺 𑀕𑀸𑀫𑀫𑁆𑀳𑀺, 𑀉𑀝𑁆𑀞𑀳𑀺𑀁𑀲𑀼 𑀫𑀡𑀻𑀩𑀳𑀽.

𑀉𑀧𑀮 ¶ 𑀓𑀼𑀭𑀼𑀯𑀺𑀦𑁆𑀤𑁂𑀳𑀺, 𑀫𑀺𑀲𑁆𑀲𑀓𑀸𑀦𑁂𑀯 𑀕𑀸𑀫𑀺𑀓𑀸;

𑀆𑀤𑀸𑀬 𑀧𑀸𑀢𑀺𑀬𑀸𑀏𑀯, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑀬𑀼𑀁.

𑀧𑀼𑀭𑀢𑁄 𑀤𑀓𑁆𑀔𑀺𑀡𑁂 𑀧𑀲𑁆𑀲𑁂, 𑀅𑀝𑁆𑀞𑀬𑁄𑀚𑀦𑀫𑀢𑁆𑀣𑀓𑁂;

𑀅𑀫𑁆𑀩𑀝𑁆𑀞 𑀓𑁄𑀮𑀮𑁂𑀡𑀫𑁆𑀳𑀺, 𑀭𑀚𑀢𑀁 𑀉𑀧𑀧𑀚𑁆𑀚𑀣.

𑀦𑀕𑀭𑁂 𑀯𑀸𑀡𑀺𑀚𑁄 𑀏𑀓𑁄, 𑀆𑀤𑀸𑀬 𑀲𑀓𑀝𑁂 𑀩𑀳𑀽;

𑀫𑀮𑀬𑀸 𑀲𑀺𑀗𑁆𑀕𑀻𑀯𑁂𑀭𑀸𑀤𑀺𑀁, 𑀆𑀦𑁂𑀢𑀼𑀁 𑀫𑀮𑀬𑀁 𑀕𑀢𑁄.

𑀮𑁂𑀡𑀲𑁆𑀲 𑀅𑀯𑀺𑀤𑀽𑀭𑀫𑁆𑀳𑀺, 𑀲𑀓𑀝𑀸𑀦𑀺𑀝𑁆𑀞 𑀧𑀸𑀧𑀺𑀬;

𑀧𑀢𑁄𑀤𑀸𑀤𑀸𑀭𑀼𑀦𑀺𑀘𑁆𑀙𑀦𑁆𑀢𑁄, 𑀆𑀭𑀼𑀴𑁆𑀳𑁄 𑀢𑀁 𑀫𑀳𑀻𑀥𑀭𑀁.

𑀘𑀸𑀝𑀺𑀧𑁆𑀧𑀫𑀸𑀡 𑀢𑀁 𑀢𑀢𑁆𑀣, 𑀧𑀓𑁆𑀓𑀪𑀸𑀭𑁂𑀦 𑀦𑀸𑀫𑀺 𑀢𑀁;

𑀤𑀺𑀲𑁆𑀯𑀸 𑀧𑀦 𑀲𑀮𑀝𑁆𑀞𑀺𑀜𑁆𑀘, 𑀧𑀸𑀲𑀸𑀡𑀝𑁆𑀞𑀜𑁆𑀘 𑀢𑀁 𑀨𑀮𑀁.

𑀯𑀡𑁆𑀝𑁂 𑀢𑀁 𑀯𑀸𑀲𑀺𑀬𑀸 𑀙𑁂𑀢𑁆𑀯𑀸, 𑀤𑀲𑁆𑀲𑀸𑀫’𑀕𑁆𑀕𑀦𑁆𑀢𑀺 𑀘𑀺𑀦𑁆𑀢𑀺𑀬;

𑀓𑀸𑀮𑀁 𑀖𑁄𑀲𑁂𑀲𑀺 𑀲𑀤𑁆𑀥𑀸𑀬, 𑀘𑀢𑁆𑀢𑀸𑀭𑁄’𑀦𑀸𑀲𑀯𑀸𑀕𑀫𑀼𑀁.

𑀳𑀝𑁆𑀞𑁄 𑀲𑁄 𑀢𑁂’𑀪𑀺𑀯𑀸𑀤𑁂𑀢𑁆𑀯𑀸, 𑀦𑀺𑀲𑀻𑀤𑀸𑀧𑀺𑀬 𑀲𑀸𑀤𑀭𑁄;

𑀯𑀸𑀲𑀺𑀬𑀸 𑀯𑀡𑁆𑀝𑀲𑀸𑀫𑀦𑁆𑀢𑀸, 𑀢𑀘𑀁 𑀙𑁂𑀢𑁆𑀯𑀸 𑀅𑀧𑀲𑁆𑀲𑀬𑀁.

𑀫𑀼𑀜𑁆𑀚𑀺𑀢𑁆𑀯𑀸’𑀯𑀸𑀝 𑀧𑀼𑀡𑁆𑀡𑀁 𑀢𑀁, 𑀬𑀽𑀲𑀁 𑀧𑀢𑁆𑀢𑁂𑀳𑀻 𑀆𑀤𑀺𑀬;

𑀘𑀢𑁆𑀢𑀸𑀭𑁄 𑀬𑀽𑀲 𑀧𑀽𑀭𑁂𑀢𑁂, 𑀧𑀢𑁆𑀢𑁂 𑀢𑁂𑀲𑀫𑀤𑀸𑀲𑀺𑀲𑁄.

𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀼𑀁,

𑀢𑁂𑀲𑀁 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀲𑁄, 𑀧𑀢𑁆𑀢𑀸𑀫𑀺𑀜𑁆𑀚𑀳𑀺 𑀧𑀽𑀭𑀺𑀬;

𑀅𑀤𑀸𑀲𑀺 𑀢𑁂𑀲𑀁 𑀧𑀓𑁆𑀓𑀸𑀫𑀼𑀁, 𑀢𑀬𑁄 𑀏𑀓𑁄 𑀦𑀧𑀓𑁆𑀓𑀫𑀺.

𑀭𑀚𑀢𑀁 𑀢𑀲𑁆𑀲 𑀤𑀲𑁆𑀲𑁂𑀢𑀼𑀁, 𑀑𑀭𑁄𑀳𑀺𑀢𑁆𑀯𑀸 𑀢𑀢𑁄 𑀳𑀺 𑀲𑁄;

𑀦𑀺𑀲𑀚𑁆𑀚 𑀮𑁂𑀡𑀸𑀲𑀦𑁆𑀦𑀫𑁆𑀳𑀺, 𑀢𑀸𑀫𑀺𑀜𑁆𑀚𑀸 𑀧𑀭𑀺𑀪𑀼𑀜𑁆𑀚𑀣.

𑀲𑁂𑀲𑀸𑀫𑀺𑀜𑁆𑀚𑀸 𑀯𑀸𑀡𑀺𑀚𑁄’𑀧𑀺, 𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀓𑀁;

𑀪𑀡𑁆𑀟𑀺𑀓𑀸𑀬 𑀕𑀳𑁂𑀢𑁆𑀯𑀸𑀦, 𑀲𑁂𑀲𑀣𑁂𑀭𑀧𑀤𑀸𑀦𑀼𑀕𑁄.

𑀅𑀜𑁆𑀚𑀲𑀸 ¶ 𑀇𑀫𑀺𑀦𑀸 𑀢𑁆𑀯𑀫𑁆𑀧𑀺, 𑀕𑀘𑁆𑀙 𑀤𑀸𑀦𑀻 𑀉𑀧𑀸𑀲𑀓;

𑀕𑀦𑁆𑀢𑁆𑀯𑀸𑀦 𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸, 𑀯𑁂𑀬𑁆𑀬𑀸𑀯𑀘𑁆𑀘 𑀫𑀳𑀸𑀲𑀺 𑀘.

𑀣𑁂𑀭𑁄 𑀘 𑀮𑁂𑀡𑀤𑁆𑀯𑀸𑀭𑁂𑀦, 𑀢𑀲𑁆𑀲 𑀫𑀕𑁆𑀕 𑀅𑀫𑀸𑀧𑀬𑀺;

𑀣𑁂𑀭𑀁 𑀯𑀦𑁆𑀤𑀺𑀬 𑀲𑁄 𑀢𑁂𑀦, 𑀕𑀘𑁆𑀙𑀦𑁆𑀢𑁄 𑀮𑁂𑀡𑀫𑀤𑁆𑀤𑀲.

𑀮𑁂𑀡 𑀤𑁆𑀯𑀸𑀭𑀫𑁆𑀳𑀺 𑀞𑀢𑁆𑀯𑀸𑀦, 𑀧𑀲𑁆𑀲𑀺𑀢𑁆𑀯𑀸 𑀭𑀚𑀢𑀫𑁆𑀧𑀺 𑀲𑁄;

𑀯𑀸𑀲𑀺𑀬𑀸 𑀆𑀳𑀦𑀺𑀢𑁆𑀯𑀸𑀦, 𑀭𑀚𑀢𑀢𑀺 𑀯𑀺𑀚𑀸𑀦𑀺𑀬.

𑀕𑀳𑁂𑀢𑁆𑀯𑁂𑀓𑀁 𑀲𑀚𑁆𑀛𑀼𑀧𑀺𑀡𑁆𑀟𑀁, 𑀕𑀦𑁆𑀢𑁆𑀯𑀸𑀦 𑀲𑀓𑀝𑀦𑁆𑀢𑀺𑀓𑀁;

𑀲𑀓𑀝𑀸𑀦𑀺 𑀞𑀧𑀸𑀧𑁂𑀢𑁆𑀯𑀸, 𑀲𑀚𑁆𑀛𑀼𑀧𑀺𑀡𑁆𑀟𑀁 𑀢𑀫𑀸𑀤𑀺𑀬.

𑀮𑀳𑀼𑀁 𑀅𑀦𑀼𑀭𑀸𑀥 𑀧𑀼𑀭𑀁, 𑀆𑀕𑀫𑁆𑀫 𑀯𑀭𑀯𑀸𑀡𑀺𑀚𑁄;

𑀤𑀲𑁆𑀲𑁂𑀢𑁆𑀯𑀸 𑀭𑀚𑀢𑀁 𑀭𑀜𑁆𑀜𑁄, 𑀢𑀫𑀢𑁆𑀣𑀫𑁆𑀧𑀺 𑀦𑀺𑀯𑁂𑀤𑀬𑀺.

𑀧𑀼𑀭𑀢𑁄 𑀧𑀘𑁆𑀙𑀺𑀫𑁂 𑀧𑀲𑁆𑀲𑁂, 𑀧𑀜𑁆𑀘𑀬𑁄𑀚𑀦 𑀫𑀢𑁆𑀣𑀓𑁂;

𑀉𑀭𑀼𑀯𑁂𑀮𑀧𑀝𑁆𑀝𑀦𑁂 𑀫𑀼𑀢𑁆𑀢𑀸, 𑀫𑀳𑀸𑀫𑀮𑀓 𑀫𑀢𑁆𑀢𑀺𑀬𑁄.

𑀧𑀯𑀸𑀮𑀦𑁆𑀢𑀭𑀺𑀓𑀸 𑀲𑀤𑁆𑀥𑀺𑀁, 𑀲𑀫𑀼𑀤𑁆𑀤𑀸𑀣𑀮𑀫𑁄𑀓𑁆𑀓𑀫𑀼𑀁;

𑀓𑁂𑀯𑀝𑁆𑀝𑀸 𑀢𑀸 𑀲𑀫𑁂𑀓𑁆𑀔𑀺𑀢𑁆𑀯𑀸, 𑀭𑀸𑀲𑀺𑀁 𑀓𑀢𑁆𑀯𑀸𑀦 𑀏𑀓𑀢𑁄.

𑀧𑀸𑀢𑀺𑀬𑀸 𑀆𑀦𑀬𑀺𑀢𑁆𑀯𑀸𑀦, 𑀫𑀼𑀢𑁆𑀢𑀸 𑀲𑀳 𑀧𑀯𑀸𑀮𑀓𑀸;

𑀭𑀸𑀚𑀸𑀦 𑀫𑀼𑀧𑀲𑀗𑁆𑀓𑀫𑁆𑀫, 𑀢𑀫𑀢𑁆𑀣𑀫𑁆𑀧𑀺 𑀦𑀺𑀯𑁂𑀤𑀬𑀼𑀁.

𑀧𑀼𑀭𑀢𑁄 𑀉𑀢𑁆𑀢𑀭𑁂 𑀧𑀲𑁆𑀲𑁂, 𑀲𑀢𑁆𑀢 𑀬𑁄𑀚𑀦 𑀫𑀢𑁆𑀣𑀓𑁂;

𑀧𑁂𑀴𑀺𑀯𑀸𑀧𑀺𑀓 𑀕𑀸𑀫𑀲𑁆𑀲, 𑀯𑀸𑀧𑀺𑀧𑀓𑁆𑀔𑀦𑁆𑀢𑀓𑀦𑁆𑀤𑀭𑁂.

𑀚𑀸𑀬𑀺𑀁𑀲𑀼 𑀯𑀸𑀮𑀼𑀓𑀸𑀧𑀺𑀝𑁆𑀞𑁂, 𑀘𑀢𑁆𑀢𑀸𑀭𑁄 𑀉𑀢𑁆𑀢𑀫𑀸 𑀫𑀡𑀻;

𑀦𑀻𑀲𑀤 𑀧𑁄𑀢𑀧𑁆𑀧𑀫𑀸𑀡𑀸, 𑀉𑀫𑁆𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀼𑀪𑀸.

𑀢𑁂 𑀤𑀺𑀲𑁆𑀯𑀸 𑀲𑀼𑀦𑀔𑁄 𑀮𑀼𑀤𑁆𑀤𑁄, 𑀅𑀕𑀦𑁆𑀢𑁆𑀯𑀸 𑀭𑀸𑀚𑀲𑀦𑁆𑀢𑀺𑀓𑀁;

‘‘𑀏𑀯𑀭𑀽𑀧𑀸 𑀫𑀡𑀻𑀤𑀺𑀝𑁆𑀞𑁄, 𑀫𑀬𑀸’’𑀇𑀢𑀺 𑀦𑀺𑀯𑁂𑀤𑀬𑀺.

𑀇𑀝𑁆𑀞𑀓𑀸𑀤𑀻𑀦𑀺 𑀏𑀢𑀸𑀦𑀺 𑀫𑀳𑀸𑀧𑀼𑀜𑁆𑀜𑁄 𑀫𑀳𑀸𑀫𑀢𑀺;

𑀫𑀳𑀸𑀣𑀽𑀧𑀢𑁆𑀣𑀫𑀼𑀧𑁆𑀧𑀦𑁆𑀦𑀸-𑀦’𑀲𑁆𑀲𑁄𑀲𑀺 𑀢𑀤𑀳𑁂𑀯 𑀲𑁄.

𑀬𑀣𑀸𑀦𑀼𑀭𑀽𑀧𑀁 𑀲𑀓𑁆𑀓𑀸𑀭𑀁, 𑀢𑁂𑀲𑀁 𑀓𑀢𑁆𑀯𑀸 𑀲𑀼𑀫𑀸𑀦𑀢𑁄;

𑀏𑀢𑁂 𑀯𑀸 𑀭𑀓𑁆𑀔𑀓𑁂 𑀓𑀢𑁆𑀯𑀸, 𑀲𑀩𑁆𑀩𑀸𑀦𑀺 𑀆𑀳𑀭𑀸𑀧𑀬𑀺.

𑀔𑁂𑀤𑀫𑁆𑀧𑀺 ¶ 𑀓𑀸𑀬𑀚𑀫𑀲𑀬𑁆𑀳𑀫𑀘𑀺𑀦𑁆𑀢𑀬𑀺𑀢𑁆𑀯𑀸,

𑀧𑀼𑀜𑁆𑀜𑀁 𑀧𑀲𑀦𑁆𑀦𑀫𑀦𑀲𑁄 𑀧𑀘𑀺𑀢 𑀳𑀺 𑀏𑀯𑀁;

𑀲𑀸𑀥𑁂𑀢𑀺 𑀲𑀸𑀥𑀦 𑀲𑀢𑀸𑀦𑀺 𑀲𑀼𑀔𑀸 𑀓𑀭𑀸𑀦𑀺,

𑀢𑀲𑁆𑀫𑀸 𑀧𑀲𑀦𑁆𑀦𑀫𑀦𑀲𑁄’𑀯 𑀓𑀭𑁂𑀬𑁆𑀬 𑀧𑀼𑀜𑁆𑀜𑀦𑁆𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀝𑁆𑀞𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀲𑀫𑀢𑁆𑀢𑁂 𑀲𑀫𑁆𑀪𑀸𑀭𑁂, 𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀲𑀻𑀬𑀁;

𑀧𑀢𑁆𑀢𑁂 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂, 𑀫𑀳𑀸𑀣𑀽𑀧𑀢𑁆𑀣𑀫𑀸𑀭𑀪𑀺.

𑀳𑀸𑀭𑁂𑀢𑁆𑀯𑀸𑀦 𑀢𑀳𑀺𑀁 𑀣𑀽𑀧𑀁, 𑀣𑀽𑀧𑀞𑀸𑀦𑀫𑀔𑀸𑀡𑀬𑀺;

𑀲𑀢𑁆𑀣𑀳𑀢𑁆𑀣𑁄 𑀫𑀳𑀻𑀧𑀸𑀮𑁄, 𑀣𑀺𑀭𑀻 𑀓𑀸𑀢𑀼𑀁 𑀫𑀦𑁂𑀓𑀥𑀸.

𑀬𑁄𑀥𑁂𑀳𑀺 𑀆𑀳𑀭𑀸𑀧𑁂𑀢𑁆𑀯𑀸, 𑀕𑀼𑀴𑀧𑀸𑀲𑀸𑀡𑀓𑁂 𑀢𑀳𑀺𑀁;

𑀓𑀽𑀝𑁂𑀳𑀺 𑀆𑀳𑀦𑀸𑀧𑁂𑀢𑁆𑀯𑀸, 𑀧𑀸𑀲𑀸𑀡𑁂 𑀘𑀼𑀡𑁆𑀡𑀺𑀢𑁂 𑀅𑀣.

𑀘𑀫𑁆𑀫𑀯𑀦𑀤𑁆𑀥 𑀧𑀸𑀤𑁂𑀳𑀺, 𑀫𑀳𑀸𑀳𑀢𑁆𑀣𑀻𑀳𑀺 𑀫𑀤𑁆𑀤𑀬𑀺;

𑀪𑀽𑀫𑀺𑀬𑀸 𑀣𑀺𑀭𑀻𑀪𑀸𑀯𑀢𑁆𑀣𑀁, 𑀅𑀢𑁆𑀣𑀸𑀦𑀢𑁆𑀣𑀯𑀺𑀘𑀓𑁆𑀔𑀡𑁄.

𑀆𑀓𑀸𑀲 𑀕𑀗𑁆𑀕𑀸𑀧𑀢𑀺𑀢-𑀝𑁆𑀞𑀸𑀦𑁂 𑀲𑀢𑀢𑀢𑀺𑀦𑁆𑀢𑀓𑁂;

𑀫𑀢𑁆𑀢𑀺𑀓𑀸 𑀲𑀼𑀔𑀼𑀫𑀸 𑀢𑀢𑁆𑀣, 𑀲𑀫𑀦𑁆𑀢𑀸 𑀢𑀺𑀁 𑀲𑀬𑁄𑀚𑀦𑁂.

𑀦𑀯𑀦𑀻𑀢 𑀫𑀢𑁆𑀢𑀺𑀓𑀸’𑀢𑁂𑀲𑀸, 𑀲𑀼𑀔𑀼𑀫𑀢𑁆𑀢𑀸 𑀧𑀧𑀼𑀘𑁆𑀘𑀢𑀺;

𑀔𑀻𑀡𑀸𑀲𑀯𑀸 𑀲𑀸𑀫𑀡𑁂𑀭𑀸, 𑀫𑀢𑁆𑀢𑀺𑀓𑀸 𑀆𑀳𑀭𑀼𑀁 𑀢𑀢𑁄.

𑀫𑀢𑁆𑀢𑀺𑀓𑀸 𑀅𑀢𑁆𑀣𑀭𑀸𑀧𑁂𑀲𑀺, 𑀢𑀢𑁆𑀣 𑀧𑀸𑀲𑀸𑀡𑀓𑁄𑀝𑁆𑀝𑀺𑀫𑁂;

𑀇𑀝𑁆𑀞𑀓𑀸 𑀅𑀢𑁆𑀣𑀭𑀸𑀧𑁂𑀲𑀺, 𑀫𑀢𑁆𑀢𑀺𑀓𑁄 𑀧𑀭𑀺𑀇𑀲𑁆𑀲𑀭𑁄.

𑀢𑀲𑁆𑀲𑁄 ¶ 𑀧𑀭𑀺𑀔𑀭𑀲𑀼𑀥𑀁, 𑀓𑀼𑀭𑀼𑀯𑀺𑀦𑁆𑀤𑀁 𑀢𑀢𑁄𑀧𑀭𑀺;

𑀢𑀲𑁆𑀲𑁄 𑀧𑀭𑀺𑀅𑀬𑁄𑀚𑀸𑀮𑀁, 𑀫𑀭𑀼𑀫𑁆𑀩𑀦𑁆𑀢𑀼 𑀢𑀢𑁄𑀧𑀭𑀁.

𑀆𑀳𑀝𑀁 𑀲𑀸𑀫𑀡𑁂𑀭𑁂𑀳𑀺, 𑀳𑀺𑀫𑀯𑀦𑁆𑀢𑀸 𑀲𑀼𑀕𑀦𑁆𑀥𑀓𑀁;

𑀲𑀦𑁆𑀣𑀭𑀸𑀧𑁂𑀲𑀺 𑀪𑀽𑀫𑀺𑀦𑁆𑀤𑁄, 𑀨𑀴𑀺𑀓𑀦𑁆𑀢𑀼 𑀢𑀢𑁄𑀧𑀭𑀺.

𑀲𑀻𑀮𑀸𑀬𑁄 𑀲𑀦𑁆𑀣𑀭𑀸𑀧𑁂𑀲𑀺𑀘𑁆𑀙 𑀨𑀴𑀺𑀓𑀲𑀦𑁆𑀣𑀭𑁄 𑀧𑀭𑀺;

𑀲𑀩𑁆𑀩𑀢𑁆𑀣 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑁂, 𑀦𑀯𑀦𑀻𑀢𑀯𑁆𑀳𑀬𑀸 𑀅𑀳𑀼.

𑀦𑀺𑀬𑁆𑀬𑀸𑀲𑁂𑀦 𑀓𑀧𑀺𑀝𑁆𑀞𑀲𑁆𑀲, 𑀲𑀦𑁆𑀦𑀺𑀢𑁂𑀦 𑀭𑀲𑁄𑀤𑀓𑁂;

𑀅𑀝𑁆𑀞𑀗𑁆𑀕𑀼𑀮𑀁 𑀩𑀳𑀮𑀏𑀢𑀸, 𑀮𑁄𑀳𑀧𑀝𑁆𑀝𑀁 𑀲𑀻𑀮𑁄𑀧𑀭𑀺.

𑀫𑀦𑁄𑀲𑀺𑀮𑀸𑀬𑀢𑀺𑀮𑀢𑁂-𑀮𑀲𑀦𑁆𑀦𑀺𑀢𑀸𑀬 𑀢𑀢𑁄 𑀧𑀭𑀺;

𑀲𑀢𑁆𑀢𑀗𑁆𑀕𑀼𑀮𑀁 𑀲𑀚𑁆𑀚𑀼𑀧𑀝𑁆𑀝𑀁, 𑀲𑀦𑁆𑀣𑀭𑁂𑀲𑀺 𑀭𑀣𑁂𑀲𑀪𑁄.

𑀫𑀳𑀸𑀣𑀽𑀧 𑀧𑀢𑀺𑀝𑁆𑀞𑀸𑀦-𑀞𑀸𑀦𑁂 𑀏𑀯𑀁 𑀫𑀳𑀻𑀧𑀢𑀺;

𑀓𑀸𑀭𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀸𑀦𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀆𑀲𑀴𑁆𑀳𑀻 𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀤𑀺𑀯𑀲𑀫𑁆𑀳𑀺 𑀘𑀢𑀼𑀤𑁆𑀤𑀲𑁂;

𑀓𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀲𑀦𑁆𑀦𑀺𑀧𑀸𑀢𑀫𑀺𑀤𑀁 𑀯𑀤𑀺.

𑀫𑀳𑀸𑀘𑁂𑀢𑀺𑀬 𑀫𑀢𑁆𑀣𑀸𑀬, 𑀪𑀤𑀦𑁆𑀢𑀸𑀫𑀗𑁆𑀕𑀮𑀺𑀝𑁆𑀞𑀓𑀁;

𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀁 𑀲𑁆𑀯𑁂 𑀏𑀢𑁆𑀣, 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀫𑁂𑀢𑀼𑀦𑁄.

𑀩𑀼𑀤𑁆𑀥 𑀧𑀽𑀚𑀸 𑀧𑀬𑁄𑀕𑁂𑀦, 𑀫𑀳𑀸𑀚𑀦𑀳𑀻𑀢𑀢𑁆𑀣𑀺𑀓𑁄;

‘‘𑀫𑀳𑀸𑀚𑀦𑁄’ 𑀧𑁄𑀲𑀣𑀺𑀓𑁄, 𑀕𑀦𑁆𑀥𑀫𑀸𑀮𑀸𑀤𑀺𑀕𑀡𑁆𑀳𑀺𑀬.

𑀫𑀳𑀸𑀣𑀽𑀧 𑀧𑀢𑀺𑀝𑁆𑀞𑀸𑀦-𑀞𑀸𑀦𑀁 𑀬𑀸𑀢𑀼 𑀲𑀼𑀯𑁂’’𑀇𑀢𑀺;

𑀘𑁂𑀢𑀺𑀬 𑀞𑀸𑀦 𑀪𑀽𑀲𑀸𑀬, 𑀅𑀫𑀘𑁆𑀘𑁂 𑀘 𑀦𑀺𑀬𑁄𑀚𑀬𑀺.

𑀆𑀡𑀸𑀧𑀺𑀢𑀸 𑀦𑀭𑀺𑀦𑁆𑀤𑁂𑀦, 𑀫𑀼𑀦𑀺𑀦𑁄 𑀧𑀺𑀬𑀕𑀸𑀭𑀯𑀸;

𑀅𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺, 𑀢𑁂 𑀢𑀁 𑀞𑀸𑀦𑀫𑀮𑀗𑁆𑀓𑀭𑀼𑀁.

𑀦𑀕𑀭𑀁 𑀲𑀓𑀮𑀜𑁆𑀘𑁂𑀯, 𑀫𑀕𑁆𑀕𑀜𑁆𑀘𑁂𑀯 𑀇𑀥𑀸𑀕𑀢𑀁;

𑀅𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺, 𑀅𑀮𑀗𑁆𑀓𑀸𑀭𑀬𑀺 𑀪𑀽𑀧𑀢𑀺.

𑀧𑀪𑀸𑀢𑁂 𑀘 𑀘𑀢𑀼𑀤𑁆𑀯𑀸𑀭𑁂, 𑀦𑀕𑀭𑀲𑁆𑀲 𑀞𑀧𑀸𑀧𑀬𑀺;

𑀦𑀳𑀸𑀧𑀺𑀢𑁂 𑀦𑀳𑀸𑀧𑀓𑁂 𑀘, 𑀅𑀧𑁆𑀧𑀓𑁂 𑀘 𑀩𑀳𑀽𑀢𑀣𑀸.

𑀯𑀢𑁆𑀣𑀸𑀦𑀺 ¶ 𑀕𑀦𑁆𑀥𑀫𑀸𑀮𑀸 𑀘, 𑀅𑀦𑁆𑀦𑀸𑀦𑀺 𑀫𑀥𑀼𑀭𑀸𑀦𑀺 𑀘;

𑀫𑀳𑀸𑀚𑀦𑀢𑁆𑀣𑀁 𑀪𑀽𑀫𑀺𑀦𑁆𑀤𑁄, 𑀫𑀳𑀸𑀚𑀦𑀳𑀺𑀢𑁂 𑀭𑀢𑁄.

𑀧𑀝𑀺𑀬𑀢𑁆𑀢𑀸𑀦𑀺 𑀏𑀢𑀸𑀦𑀺, 𑀲𑀸𑀤𑀺𑀬𑀺𑀢𑁆𑀯𑀸 𑀬𑀣𑀸𑀭𑀼𑀘𑀺;

𑀧𑁄𑀭𑀸𑀚𑀸𑀦𑀧𑀤𑀸𑀘𑁂𑀯 𑀣𑀽𑀧𑀞𑀸𑀦𑀫𑀼𑀧𑀸𑀕𑀫𑀼𑀁.

𑀲𑀼𑀫𑀡𑁆𑀟𑀺𑀢𑁂𑀳𑀺 𑀦𑁂𑀓𑁂𑀳𑀺, 𑀞𑀸𑀦𑀦𑁆𑀢𑀭 𑀯𑀺𑀥𑀸𑀦𑀢𑁄;

𑀆𑀭𑀓𑁆𑀔𑀺𑀢𑁄 𑀅𑀫𑀘𑁆𑀘𑁂𑀳𑀺, 𑀬𑀣𑀸𑀞𑀸𑀦𑀁 𑀫𑀳𑀻𑀧𑀢𑀺.

𑀲𑀼𑀫𑀡𑁆𑀟𑀺𑀢𑀸𑀳𑀺 𑀦𑁂𑀓𑀸𑀳𑀺, 𑀤𑁂𑀯𑀓𑀜𑁆𑀜𑀽𑀧𑀫𑀸𑀳𑀺 𑀘;

𑀦𑀸𑀝𑀓𑀻𑀳𑀺 𑀧𑀭𑀺𑀩𑁆𑀩𑀼𑀴𑁆𑀳𑁄, 𑀲𑀼𑀫𑀡𑁆𑀟𑀺𑀢 𑀧𑀲𑁆𑀲𑀸𑀥𑀺𑀢𑁄.

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑁂𑀳𑀺, 𑀦𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀦𑀸𑀦𑀸 𑀢𑀽𑀭𑀺𑀬 𑀲𑀗𑁆𑀖𑀼𑀝𑁆𑀞𑁄, 𑀤𑁂𑀯𑀭𑀸𑀚 𑀯𑀺𑀮𑀸𑀲𑀯𑀸.

𑀫𑀳𑀸𑀣𑀽𑀧 𑀧𑀢𑀺𑀝𑁆𑀞𑀸𑀦𑀁, 𑀞𑀸𑀦𑀸𑀞𑀸𑀦 𑀯𑀺𑀘𑀓𑁆𑀔𑀡𑁄;

𑀅𑀧𑀭𑀡𑁆𑀳𑁂 𑀉𑀧𑀸𑀕𑀜𑁆𑀙𑀺, 𑀦𑀦𑁆𑀤𑀬𑀦𑁆𑀢𑁄 𑀫𑀳𑀸𑀚𑀦𑀁.

𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀁 𑀲𑁄, 𑀲𑀸𑀝𑀓𑀸𑀦𑀺𑀝𑁆𑀞𑀧𑀸𑀧𑀺𑀬;

𑀧𑀼𑀝𑀩𑀤𑁆𑀥𑀸𑀦𑀺 𑀫𑀚𑁆𑀛𑀫𑁆𑀳𑀺, 𑀘𑀢𑀼𑀧𑀲𑁆𑀲𑁂 𑀢𑀢𑁄 𑀧𑀦.

𑀯𑀢𑁆𑀣𑀸𑀦𑀺 𑀭𑀸𑀲𑀻𑀁𑀓𑀸𑀭𑁂𑀲𑀺, 𑀅𑀦𑁂𑀓𑀸𑀦𑀺 𑀫𑀳𑀻𑀧𑀢𑀺;

𑀫𑀥𑀼𑀲𑀧𑁆𑀧𑀺 𑀕𑀼𑀴𑀸𑀤𑀻𑀳𑀺 𑀘, 𑀫𑀗𑁆𑀕𑀮𑀢𑁆𑀣𑀁 𑀞𑀧𑀸𑀧𑀬𑀺.

𑀦𑀸𑀦𑀸𑀤𑁂𑀲𑁂𑀳𑀺𑀧𑀸’𑀕𑀜𑁆𑀙𑀼𑀁, 𑀩𑀳𑀯𑁄 𑀪𑀺𑀓𑁆𑀔𑀯𑁄 𑀇𑀥;

𑀇𑀥 𑀤𑀻𑀧𑀝𑁆𑀞𑀲𑀗𑁆𑀖𑀲𑁆𑀲, 𑀓𑀸 𑀓𑀣𑀸𑀯 𑀇𑀥𑀸𑀕𑀫𑁂.

𑀣𑁂𑀭𑁄’ 𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀆𑀤𑀸𑀬 𑀆𑀕𑀫𑀸;

𑀭𑀸𑀚𑀕𑀳𑀲𑁆𑀲 𑀲𑀸𑀫𑀦𑁆𑀢𑀸, 𑀇𑀦𑁆𑀤𑀕𑀼𑀢𑁆𑀢𑁄 𑀫𑀳𑀸𑀕𑀡𑀻.

𑀲𑀳𑀲𑁆𑀲𑀸𑀦𑀺’𑀲𑀺𑀧𑀢𑀦𑀸, 𑀪𑀺𑀓𑁆𑀔𑀽𑀦𑀁 𑀤𑁆𑀯𑀸𑀤𑀲𑀸’𑀤𑀺𑀬;

𑀥𑀫𑁆𑀫𑀲𑁂𑀦𑁄 𑀫𑀳𑀸𑀣𑁂𑀭𑁄, 𑀘𑁂𑀢𑀺𑀬𑀞𑀸𑀦𑀫𑀸𑀕𑀫𑀸.

𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀆𑀤𑀸𑀬 𑀇𑀥𑀫𑀸𑀕𑀫𑀸;

𑀧𑀻𑀬𑀤𑀲𑁆𑀲𑀻 𑀫𑀳𑀸𑀣𑁂𑀭𑁄, 𑀚𑁂𑀢𑀸𑀭𑀸𑀫 𑀯𑀺𑀳𑀸𑀭𑀢𑁄.

𑀯𑁂𑀲𑀸𑀮𑀻 𑀫𑀳𑀸𑀯𑀦𑀢𑁄, 𑀣𑁂𑀭𑁄𑀭𑀼 𑀩𑀼𑀤𑁆𑀥𑀭𑀓𑁆𑀔𑀺𑀢𑁄;

𑀅𑀝𑁆𑀞𑀸𑀭𑀲 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀆𑀤𑀸𑀬 𑀆𑀕𑀫𑀸.

𑀓𑁄𑀲𑀫𑁆𑀩𑀻 𑀖𑁄𑀲𑀺𑀢𑀸𑀭𑀸𑀫𑀸, 𑀣𑁂𑀭𑁄𑀭𑀼 𑀥𑀫𑁆𑀫𑀭𑀓𑁆𑀔𑀺𑀢𑁄;

𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀆𑀤𑀸𑀬 𑀇𑀥 𑀆𑀕𑀫𑀸.

𑀆𑀤𑀸𑀬𑀼𑀚𑁆𑀚𑁂𑀦𑀻𑀬𑀁 ¶ 𑀣𑁂𑀭𑁄, 𑀤𑀓𑁆𑀔𑀺𑀡 𑀕𑀺𑀭𑀺𑀢𑁄 𑀬𑀢𑀺;

𑀘𑀢𑁆𑀢𑀸𑀭𑀻𑀲 𑀲𑀳𑀲𑁆𑀲𑀸𑀦𑀺, 𑀅𑀕𑁄𑀭𑀼 𑀲𑀗𑁆𑀖𑀭𑀓𑁆𑀔𑀺𑀢𑁄.

𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀁, 𑀲𑀝𑁆𑀞𑀲𑀳𑀲𑁆𑀲𑀸𑀦𑀺 𑀘𑀸’𑀤𑀺𑀬;

𑀧𑀼𑀧𑁆𑀨𑀧𑀼𑀭𑁂’𑀲𑁄𑀓𑀭𑀸𑀫𑀸, 𑀣𑁂𑀭𑁄 𑀫𑀺𑀢𑁆𑀢𑀺𑀡𑁆𑀡 𑀦𑀸𑀫𑀓𑁄.

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀅𑀲𑀻𑀢𑀺 𑀘;

𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸𑀦𑀼’𑀢𑁆𑀢𑀺𑀡𑁆𑀡𑁄, 𑀣𑁂𑀭𑁄 𑀓𑀲𑁆𑀫𑀺𑀭𑀫𑀡𑁆𑀟𑀮𑀸.

𑀘𑀢𑁆𑀢𑀸𑀭𑀻𑀲𑀢 𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀘 𑀲𑀝𑁆𑀞𑀺 𑀘;

𑀪𑀺𑀓𑁆𑀔𑀽 𑀧𑀮𑁆𑀮𑀯𑀪𑁄𑀕𑀫𑁆𑀳𑀸, 𑀫𑀳𑀸𑀤𑁂𑀯𑁄 𑀫𑀳𑀸𑀫𑀢𑀻.

𑀬𑁄𑀦𑀦𑀕𑀭𑀸’𑀮𑀲𑀦𑁆𑀤𑀸𑀲𑁄, 𑀬𑁄𑀦 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑁄;

𑀣𑁂𑀭𑁄 𑀢𑀺𑀁𑀲 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀆𑀤𑀸𑀬 𑀆𑀕𑀫𑀸.

𑀯𑀜𑁆𑀛𑀸𑀝𑀯𑀺𑀯𑀢𑁆𑀢𑀦𑀺𑀬𑀸, 𑀲𑁂𑀦𑀸𑀲𑀦𑀸 𑀢𑀼 𑀉𑀢𑁆𑀢𑀭𑁄;

𑀣𑁂𑀭𑁄 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀆𑀤𑀸𑀬 𑀆𑀕𑀫𑀸.

𑀘𑀺𑀢𑁆𑀢𑀕𑀼𑀢𑁆𑀢𑁄 𑀫𑀳𑀸𑀣𑁂𑀭𑁄, 𑀩𑁄𑀥𑀺𑀫𑀡𑁆𑀟𑀯𑀺𑀳𑀸𑀭𑀢𑁄;

𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀆𑀤𑀺𑀬𑀺𑀢𑁆𑀯𑀸 𑀇𑀥𑀸𑀕𑀫𑀸.

𑀘𑀦𑁆𑀤𑀕𑀼𑀢𑁆𑀢𑁄 𑀫𑀳𑀸𑀣𑁂𑀭𑁄, 𑀯𑀦𑀯𑀸𑀲𑀧𑀤𑁂𑀲𑀢𑁄;

𑀆𑀕𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀆𑀤𑀺𑀬𑀺𑀢𑁆𑀯𑀸 𑀬𑀢𑀻 𑀇𑀥.

𑀲𑀽𑀭𑀺𑀬𑀕𑀼𑀢𑁆𑀢𑁄𑀫𑀳𑀸𑀣𑁂𑀭𑁄, 𑀓𑁂𑀮𑀸𑀲𑀫𑁆𑀳𑀸 𑀯𑀺𑀳𑀸𑀭𑀢𑁄;

𑀙𑀦𑁆𑀦𑀯𑀼𑀢𑀺 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽𑀆𑀤𑀸𑀬 𑀆𑀕𑀫𑀸.

𑀪𑀺𑀓𑁆𑀔𑀽𑀦𑀁 𑀤𑀻𑀧𑀯𑀸𑀲𑀺𑀦𑀁, 𑀆𑀕𑀢𑀸𑀦𑀜𑁆𑀘 𑀲𑀩𑁆𑀩𑀲𑁄;

𑀕𑀡𑀦𑀸𑀬 𑀧𑀭𑀺𑀘𑁆𑀙𑁂𑀤𑁄, 𑀧𑁄𑀭𑀸𑀡𑁂𑀳𑀺 𑀦 𑀪𑀸𑀲𑀺𑀢𑁄.

𑀲𑀫𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁, 𑀪𑀺𑀓𑁆𑀔𑀼𑀦𑀁 𑀢𑀁 𑀲𑀫𑀸𑀕𑀫𑁂;

𑀯𑀼𑀢𑁆𑀢𑀸 𑀔𑀻𑀡𑀸𑀲𑀯𑀸𑀬𑁂𑀯, 𑀢𑁂 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀬𑁄.

𑀢𑁂 𑀫𑀳𑀸𑀘𑁂𑀢𑀺𑀬𑀞𑀸𑀦𑀁, 𑀧𑀭𑀺𑀯𑀸𑀭𑁂𑀢𑁆𑀯𑀸 𑀬𑀣𑀸𑀭𑀳𑀁;

𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀑𑀓𑀸𑀲𑀁, 𑀭𑀜𑁆𑀜𑁄 𑀅𑀝𑁆𑀞𑀁𑀲𑀼 𑀪𑀺𑀓𑁆𑀔𑀯𑁄.

𑀧𑀯𑀺𑀲𑀺𑀢𑁆𑀯𑀸 𑀢𑀳𑀺𑀁 𑀭𑀸𑀚𑀸, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀢𑀣𑀸 𑀞𑀺𑀢𑀁;

𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦, 𑀯𑀦𑁆𑀤𑀺𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄.

𑀕𑀦𑁆𑀥𑀫𑀸𑀮𑀸𑀳𑀺 𑀧𑀽𑀚𑁂𑀢𑁆𑀯𑀸, 𑀓𑀢𑁆𑀯𑀸𑀦 𑀢𑀺𑀧𑀤𑀓𑁆𑀔𑀺𑀡𑀁;

𑀫𑀚𑁆𑀛𑁂 𑀧𑀼𑀡𑁆𑀡𑀖𑀝𑀞𑀸𑀦𑀁, 𑀧𑀯𑀺𑀲𑀺𑀢𑁆𑀯𑀸 𑀲𑀫𑀗𑁆𑀕𑀮𑀁.

𑀲𑀼𑀯𑀡𑁆𑀡𑀔𑀻𑀮𑁂 ¶ 𑀧𑀝𑀺𑀫𑀼𑀓𑁆𑀓𑀁, 𑀧𑀭𑀺𑀩𑁆𑀪𑀫𑀦𑀤𑀡𑁆𑀟𑀓𑀁;

𑀭𑀸𑀚𑀢𑁂𑀦 𑀓𑀢𑀁 𑀲𑀼𑀤𑁆𑀥𑀁, 𑀲𑀼𑀤𑁆𑀥𑀧𑀻𑀢𑀺 𑀩𑀮𑁄𑀤𑀬𑁄.

𑀕𑀸𑀳𑀬𑀺𑀢𑁆𑀯𑀸 𑀅𑀫𑀘𑁆𑀘𑁂𑀦, 𑀫𑀡𑁆𑀟𑀺𑀢𑁂𑀦 𑀲𑀼𑀚𑀸𑀢𑀺𑀦𑀸;

𑀅𑀪𑀺𑀫𑀗𑁆𑀕𑀮𑀪𑀽𑀢𑁂𑀦, 𑀪𑀽𑀢𑀪𑀽𑀢𑀺𑀧𑀭𑀸𑀬𑀡𑁄.

𑀫𑀳𑀦𑁆𑀢𑀁 𑀘𑁂𑀢𑀺𑀬𑀸𑀯𑀝𑁆𑀝𑀁, 𑀓𑀸𑀭𑁂𑀢𑀼𑀁 𑀓𑀢𑀦𑀺𑀘𑁆𑀙𑀬𑁄;

𑀪𑀫𑀸𑀧𑀬𑀺𑀢𑀼 𑀫𑀸𑀭𑀤𑁆𑀥𑁄, 𑀧𑀭𑀺𑀓𑀫𑁆𑀫𑀺𑀢 𑀪𑀽𑀫𑀺𑀬𑀁.

𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀦𑀸𑀫𑁂𑀦, 𑀫𑀳𑀸𑀣𑁂𑀭𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀣𑀸𑀓𑀭𑁄𑀦𑁆𑀢𑀁 𑀭𑀸𑀚𑀸𑀦𑀁, 𑀤𑀻𑀖𑀤𑀲𑁆𑀲𑀻 𑀦𑀺𑀯𑀸𑀭𑀬𑀺.

‘‘𑀏𑀯𑀁 𑀫𑀳𑀦𑁆𑀢𑀁 𑀣𑀽𑀧𑀜𑁆𑀘, 𑀅𑀬𑀁 𑀭𑀸𑀚𑀸’𑀭𑀪𑀺𑀲𑁆𑀲𑀢𑀺;

𑀣𑀽𑀧𑁂 𑀅𑀦𑀺𑀝𑁆𑀞𑀺𑀢𑁂𑀬𑁂𑀯, 𑀫𑀭𑀡𑀁 𑀅𑀲𑁆𑀲 𑀳𑁂𑀲𑁆𑀲𑀢𑀺.

𑀪𑀯𑀺𑀲𑁆𑀲𑀢𑀺 𑀫𑀳𑀦𑁆𑀢𑁄 𑀘, 𑀣𑀽𑀧𑁄𑀤𑀼𑀧𑁆𑀧𑀝𑀺𑀲𑀗𑁆𑀔𑀭𑁄;

𑀇𑀢𑀺 𑀲𑁄 𑀦𑀸𑀕𑀢𑀁 𑀧𑀲𑁆𑀲𑀁, 𑀫𑀳𑀦𑁆𑀢𑀢𑁆𑀢𑀁 𑀦𑀺𑀯𑀸𑀭𑀬𑀺.

𑀲𑀗𑁆𑀖𑀲𑁆𑀲 𑀘 𑀅𑀦𑀼𑀜𑁆𑀜𑀸𑀬, 𑀣𑁂𑀭𑁄 𑀲𑀫𑁆𑀪𑀸𑀯𑀦𑀸𑀬𑀘;

𑀫𑀳𑀦𑁆𑀢𑀁 𑀓𑀢𑁆𑀢𑀼𑀓𑀸𑀫𑁄’𑀧𑀺, 𑀕𑀡𑁆𑀳𑀺𑀢𑁆𑀯𑀸 𑀣𑁂𑀭𑀪𑀸𑀲𑀺𑀢𑀁.

𑀣𑁂𑀭𑀲𑁆𑀲 𑀉𑀧𑀤𑁂𑀲𑁂𑀦, 𑀢𑀲𑁆𑀲 𑀭𑀸𑀚𑀸 𑀅𑀓𑀸𑀭𑀬𑀺;

𑀫𑀚𑁆𑀛𑀺𑀫𑀁 𑀘𑁂𑀢𑀺𑀬𑀸𑀯𑀝𑁆𑀝𑀁, 𑀧𑀢𑀺𑀝𑁆𑀞𑀸𑀧𑁂𑀢𑀼𑀫𑀺𑀝𑁆𑀞𑀺𑀓𑀸.

𑀲𑁄𑀯𑀡𑁆𑀡𑀭𑀚𑀢𑁂 𑀘𑁂𑀯, 𑀖𑀝𑁂 𑀫𑀚𑁆𑀛𑁂𑀝𑁆𑀞𑀧𑀸𑀧𑀬𑀺;

𑀅𑀝𑁆𑀞𑀝𑁆𑀞 𑀅𑀝𑁆𑀞𑀺𑀢𑀼𑀲𑁆𑀲𑀸𑀳𑁄, 𑀧𑀭𑀺𑀯𑀸𑀭𑀺𑀬 𑀢𑁂 𑀧𑀦.

𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀜𑁆𑀘, 𑀞𑀧𑀸𑀧𑁂𑀲𑀺 𑀦𑀯𑁂 𑀖𑀝𑁂;

𑀅𑀝𑁆𑀞𑀼𑀢𑁆𑀢𑀭𑁂 𑀅𑀝𑁆𑀞𑀼𑀢𑁆𑀢𑀭𑁂, 𑀯𑀢𑁆𑀣𑀸𑀦𑀁 𑀢𑀼 𑀲𑀢𑁂 𑀧𑀦.

𑀇𑀝𑁆𑀞𑀺𑀓𑀸𑀧𑀯𑀭𑀸 𑀅𑀝𑁆𑀞, 𑀞𑀧𑀸𑀧𑁂𑀲𑀺 𑀯𑀺𑀲𑀼𑀁 𑀯𑀺𑀲𑀼𑀁;

𑀲𑀫𑁆𑀫𑀢𑁂𑀦 𑀅𑀫𑀘𑁆𑀘𑁂𑀦, 𑀪𑀽𑀲𑀺𑀢𑁂𑀦 𑀅𑀦𑁂𑀓𑀥𑀸.

𑀢𑀢𑁄 𑀏𑀓𑀁 𑀕𑀸𑀳𑀬𑀺𑀢𑁆𑀯𑀸, 𑀦𑀸𑀦𑀸𑀫𑀗𑁆𑀕𑀮𑀲𑀗𑁆𑀔𑀢𑁂;

𑀧𑀼𑀭𑀺𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂, 𑀧𑀞𑀫𑀁 𑀫𑀗𑁆𑀕𑀮𑀺𑀢𑁆𑀣𑀺𑀓𑀁.

𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀓𑁆𑀓𑀘𑁆𑀘𑀁, 𑀫𑀦𑀼𑀜𑁆𑀜𑁂 𑀕𑀦𑁆𑀥𑀓𑀤𑁆𑀤𑀫𑁂;

𑀚𑀸𑀢𑀺𑀲𑀼𑀫𑀦 𑀧𑀼𑀧𑁆𑀨𑁂𑀲𑀼, 𑀧𑀽𑀚𑀺𑀢𑁂𑀲𑀼 𑀢𑀳𑀺𑀁 𑀧𑀦.

𑀅𑀳𑁄𑀲𑀺 𑀧𑀼𑀣𑀯𑀻𑀓𑀫𑁆𑀧𑁄, 𑀲𑁂𑀲𑀸 𑀲𑀢𑁆𑀢𑀸𑀧𑀺 𑀲𑀢𑁆𑀢𑀳𑀺;

𑀧𑀢𑁆𑀢𑀺𑀝𑁆𑀞𑀸𑀧𑁂𑀲’ 𑀫𑀘𑁆𑀘𑁂𑀳𑀺, 𑀫𑀗𑁆𑀕𑀮𑀸𑀦𑀺 𑀘 𑀓𑀸𑀭𑀬𑀺.

𑀏𑀯𑀁 ¶ 𑀅𑀲𑀸𑀴𑁆𑀳𑀫𑀸𑀲𑀲𑁆𑀲, 𑀲𑀼𑀓𑁆𑀓𑀧𑀓𑁆𑀔𑁂’𑀪𑀺𑀲𑀫𑁆𑀫𑀢𑁂;

𑀉𑀧𑁄𑀲𑀣𑁂 𑀧𑀦𑁆𑀦𑀭𑀲𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀇𑀝𑁆𑀞𑀺𑀓𑀸.

𑀘𑀢𑀼𑀤𑁆𑀤𑀺𑀲𑀁 𑀞𑀺𑀢𑁂 𑀢𑀢𑁆𑀣, 𑀫𑀳𑀸𑀣𑁂𑀭𑁂 𑀅𑀦𑀸𑀲𑀯𑁂;

𑀯𑀦𑁆𑀤𑀺𑀢𑁆𑀯𑀸 𑀧𑀽𑀚𑀬𑀺𑀢𑁆𑀯𑀸 𑀘, 𑀲𑀼𑀧𑁆𑀧𑀢𑀺𑀢𑁄 𑀓𑀫𑁂𑀦 𑀲𑁄.

𑀧𑀼𑀩𑁆𑀩𑀼𑀢𑁆𑀢𑀭𑀁 𑀤𑀺𑀲𑀁 𑀕𑀦𑁆𑀢𑁆𑀯𑀸, 𑀧𑀺𑀬𑀤𑀲𑁆𑀲𑀺𑀁 𑀅𑀦𑀸𑀲𑀯𑀁;

𑀯𑀦𑁆𑀤𑀺𑀢𑁆𑀯𑀸𑀦 𑀫𑀳𑀸𑀣𑁂𑀭𑀁, 𑀅𑀝𑁆𑀞𑀸𑀲𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑀫𑀗𑁆𑀕𑀮𑀁 𑀢𑀢𑁆𑀣 𑀯𑀟𑁆𑀠𑁂𑀦𑁆𑀢𑁄, 𑀢𑀲𑁆𑀲 𑀥𑀫𑁆𑀫𑀫𑀪𑀸𑀲𑀺𑀲𑁄;

𑀣𑁂𑀭𑀲𑁆𑀲 𑀤𑁂𑀲𑀦𑀸 𑀢𑀲𑁆𑀲, 𑀚𑀦𑀲𑁆𑀲𑀸’𑀳𑁄𑀲𑀺 𑀲𑀸𑀢𑁆𑀣𑀺𑀓𑀸.

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀳𑀼.

𑀲𑀳𑀲𑁆𑀲𑀁 𑀲𑀓𑀤𑀸𑀕𑀸𑀫𑀺, 𑀅𑀦𑀸𑀕𑀸𑀫𑀺 𑀘 𑀢𑀢𑁆𑀢𑀓𑀸;

𑀲𑀳𑀲𑁆𑀲𑀁𑀬𑁂𑀯 𑀅𑀭𑀳𑀦𑁆𑀢𑁄, 𑀢𑀢𑁆𑀣’𑀳𑁂𑀲𑀼𑀁 𑀕𑀺𑀳𑀻𑀚𑀦𑀸.

𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽𑀪𑀺𑀓𑁆𑀔𑀼𑀦𑀺𑀬𑁄 𑀧𑀦;

𑀘𑀼𑀤𑁆𑀤𑀲𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀬𑀼𑀁.

𑀏𑀯𑀫𑁆𑀧𑀧𑀲𑀦𑁆𑀦𑀫𑀢𑀺𑀫𑀸 𑀭𑀢𑀦𑀢𑁆𑀢𑀬𑀫𑁆𑀳𑀺,

𑀘𑀸𑀕𑀸𑀫𑀺𑀫𑀼𑀢𑁆𑀢𑀫𑀦𑀲𑀸𑀚𑀦𑀢𑀸𑀳𑀺 𑀢𑁂𑀦;

𑀮𑁄𑀓𑀢𑁆𑀣𑀲𑀺𑀤𑁆𑀥𑀺 𑀧𑀭𑀫𑀸 𑀪𑀯𑀢𑀻𑀢𑀺 𑀜𑀢𑁆𑀯𑀸,

𑀲𑀤𑁆𑀥𑀸𑀤𑀺𑀦𑁂𑀓𑀕𑀼𑀡𑀬𑁄𑀕 𑀭𑀢𑀺𑀁 𑀓𑀭𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁 𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀯𑀦𑁆𑀤𑀺𑀢𑁆𑀯𑀸𑀦 ¶ 𑀫𑀳𑀸𑀭𑀸𑀚𑀸, 𑀲𑀩𑁆𑀩𑀁 𑀲𑀗𑁆𑀖𑀁 𑀦𑀺𑀫𑀦𑁆𑀢𑀬𑀺;

‘‘𑀬𑀸𑀯𑀘𑁂𑀢𑀺𑀬𑀦𑀺𑀝𑁆𑀞𑀸𑀦𑀸, 𑀪𑀺𑀓𑁆𑀔𑀁 𑀕𑀡𑁆𑀳𑀣 𑀫𑁂’’𑀇𑀢𑀺.

𑀲𑀗𑁆𑀖𑁄 𑀢𑀁 𑀦𑀸𑀥𑀺𑀯𑀸𑀲𑁂𑀲𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀲𑁄 𑀧𑀦;

𑀬𑀸𑀯𑀦𑁆𑀢𑁄 𑀬𑀸𑀯 𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀫𑀥𑀺𑀯𑀸𑀲𑀦𑀁.

𑀅𑀮𑀢𑁆𑀣𑁄’𑀧𑀟𑁆𑀠𑀪𑀺𑀓𑁆𑀔𑀽𑀳𑀺, 𑀢𑁂 𑀮𑀤𑁆𑀥𑀸 𑀲𑀼𑀫𑀦𑁄’𑀯 𑀲𑁄;

𑀅𑀝𑁆𑀞𑀸𑀭𑀲𑀲𑀼 𑀞𑀸𑀦𑁂𑀲𑀼, 𑀣𑀽𑀧𑀞𑀸𑀦𑀲𑀫𑀦𑁆𑀢𑀢𑁄.

𑀫𑀡𑁆𑀟𑀧𑁂 𑀓𑀸𑀭𑀬𑀺𑀢𑁆𑀯𑀸𑀦, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺;

𑀲𑀢𑁆𑀣𑀸𑀳𑀁 𑀢𑀢𑁆𑀣 𑀲𑀗𑁆𑀖𑀲𑁆𑀲, 𑀢𑀢𑁄 𑀲𑀗𑁆𑀖𑀁 𑀯𑀺𑀲𑁆𑀲𑀚𑁆𑀚𑀬𑀺.

𑀢𑀢𑁄 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸, 𑀇𑀝𑁆𑀞𑀓𑀸 𑀯𑀟𑁆𑀠𑀓𑀻 𑀮𑀳𑀼𑀁;

𑀲𑀦𑁆𑀦𑀺𑀧𑀸𑀢𑁂𑀲𑀺 𑀢𑁂 𑀆𑀲𑀼𑀁, 𑀧𑀜𑁆𑀘𑀫𑀢𑁆𑀢𑀲𑀢𑀸𑀦𑀺 𑀳𑀺.

𑀓𑀣𑀁 𑀓𑀭𑀺𑀲𑁆𑀲𑀲𑀺 𑀦𑁂’𑀓𑁄, 𑀧𑀼𑀘𑁆𑀙𑀺𑀢𑁄 𑀆𑀳 𑀪𑀽𑀧𑀢𑀺;

‘‘𑀧𑁂𑀲𑁆𑀲𑀺𑀬𑀸𑀦𑀁 𑀲𑀢𑀁 𑀮𑀤𑁆𑀥𑀸, 𑀧𑀁𑀲𑀽𑀦𑀁 𑀲𑀓𑀝𑀁 𑀅𑀳𑀁.

𑀔𑁂𑀧𑀬𑀺𑀲𑁆𑀲𑀸𑀫𑀺 𑀏𑀓𑁆𑀓𑀸’𑀳𑀁, 𑀢𑀁 𑀭𑀸𑀚𑀸 𑀧𑀝𑀺𑀩𑀸𑀳𑀬𑀺;

𑀢𑀢𑁄 𑀉𑀧𑀟𑁆𑀠𑀼𑀧𑀟𑁆𑀠𑀜𑁆𑀘, 𑀧𑀁𑀲𑀽 𑀤𑁆𑀯𑁂 𑀅𑀫𑁆𑀫𑀡𑀸𑀦𑀺 𑀘.

𑀆𑀳𑀁𑀲𑀼 𑀭𑀸𑀚𑀸 𑀧𑀝𑀺𑀩𑀸𑀳𑀺, 𑀘𑀢𑀼𑀭𑁄 𑀢𑁂𑀧𑀺 𑀯𑀟𑁆𑀠𑀓𑀻;

𑀅𑀣𑁂𑀓𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄, 𑀯𑀟𑁆𑀠𑀓𑀻 𑀆𑀳 𑀪𑀽𑀧𑀢𑀺𑀁.

‘‘𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑀬𑀺𑀢𑁆𑀯𑀸, 𑀅𑀳𑀁 𑀲𑀼𑀧𑁆𑀧𑁂𑀳𑀺 𑀯𑀝𑁆𑀝𑀺𑀢𑀁;

𑀧𑀺𑀁𑀲𑀸𑀧𑀬𑀺𑀢𑁆𑀯𑀸 𑀦𑀺𑀲𑀤𑁂, 𑀏𑀢𑀁 𑀧𑀁𑀲𑀽𑀦𑀫𑀫𑁆𑀫𑀡𑀁.

𑀇𑀢𑀺 𑀯𑀼𑀢𑁆𑀢𑁄 𑀅𑀦𑀼𑀜𑁆𑀜𑀸𑀲𑀺, 𑀢𑀺𑀡𑀸𑀤𑀺𑀦𑁂𑀢𑁆𑀣𑀦𑁄 𑀲𑀺𑀬𑀼𑀁;

𑀘𑁂𑀢𑀺𑀬𑀫𑁆𑀳𑀻𑀢𑀺 𑀪𑀽𑀫𑀺𑀦𑁆𑀤𑁄, 𑀇𑀦𑁆𑀤𑀢𑀼𑀮𑁆𑀬𑀧𑀭𑀓𑁆𑀓𑀫𑁄.

‘‘𑀓𑀁 𑀲𑀡𑁆𑀞𑀸𑀦𑀁 𑀘𑁂𑀢𑀺𑀬𑀁 𑀢𑀁, 𑀓𑀭𑀺𑀲𑁆𑀲𑀲𑀺 𑀢𑀼𑀯𑀁 𑀇𑀢𑀺;

𑀧𑀼𑀘𑁆𑀙𑀺𑀢𑀁 𑀢𑀁𑀔𑀡𑀁𑀬𑁂𑀯, 𑀯𑀺𑀲𑁆𑀲𑀓𑀫𑁆𑀫𑁄 𑀢𑀫𑀸𑀯𑀺𑀲𑀺.

𑀲𑁄𑀯𑀡𑁆𑀡𑀧𑀸𑀢𑀺𑀁 𑀢𑁄 𑀬𑀲𑁆𑀲, 𑀧𑀼𑀭𑀸𑀧𑁂𑀢𑁆𑀯𑀸𑀯 𑀯𑀟𑁆𑀠𑀓𑀻;

𑀧𑀸𑀡𑀺𑀦𑀸 𑀯𑀸𑀭𑀺𑀫𑀸𑀤𑀸𑀬, 𑀯𑀸𑀭𑀺𑀧𑀺𑀝𑁆𑀞𑀺𑀬𑀫𑀸𑀳𑀦𑀻.

𑀨𑀮𑀺𑀓 ¶ 𑀮𑁄𑀮𑀲𑀤𑀺𑀲𑀁, 𑀫𑀳𑀸𑀨𑀼𑀩𑁆𑀩𑀼𑀴𑀫𑀼𑀝𑁆𑀞𑀳𑀺;

𑀆𑀳𑀻’𑀤𑀺𑀲𑀁 𑀓𑀭𑀺𑀲𑁆𑀲𑀢𑀺, 𑀢𑀼𑀲𑁆𑀲𑀺𑀢𑁆𑀯𑀸𑀦’𑀲𑁆𑀲 𑀪𑀽𑀧𑀢𑀺.

𑀲𑀳𑀲𑁆𑀲𑀕𑁆𑀖𑀁 𑀯𑀢𑁆𑀣𑀬𑀼𑀕𑀁, 𑀢𑀣𑀸’𑀮𑀗𑁆𑀓𑀸𑀭 𑀧𑀸𑀤𑀼𑀓𑀸;

𑀓𑀳𑀸𑀧𑀦𑀸𑀦𑀺 𑀤𑁆𑀯𑀸𑀤𑀲-𑀲𑀳𑀲𑁆𑀲𑀸𑀦𑀺 𑀘 𑀤𑀸𑀧𑀧𑀺.

‘‘𑀇𑀝𑁆𑀞𑀓𑀸 𑀆𑀳𑀸𑀭𑀸𑀧𑁂𑀲𑁆𑀲𑀁, 𑀅𑀧𑀻𑀴𑁂𑀦𑁆𑀢𑁄 𑀓𑀣𑀁 𑀦𑀭𑁂’’;

𑀇𑀢𑀺 𑀭𑀸𑀚𑀸 𑀯𑀺𑀘𑀺𑀦𑁆𑀢𑁂𑀲𑀺, 𑀭𑀢𑁆𑀢𑀺𑀁𑀜𑀢𑁆𑀯𑀸𑀦 𑀢𑀁 𑀫𑀭𑀽.

𑀘𑁂𑀢𑀺𑀬𑀲𑁆𑀲 𑀘𑀢𑀼𑀤𑁆𑀥𑀸𑀭𑁂, 𑀆𑀳𑀭𑀺𑀢𑁆𑀯𑀸𑀦 𑀇𑀝𑁆𑀞𑀓𑀸;

𑀭𑀢𑁆𑀢𑀺𑀁 𑀭𑀢𑁆𑀢𑀺𑀁 𑀞𑀧𑀬𑀺𑀁𑀲𑀼, 𑀏𑀓𑁂𑀓𑀸𑀳𑀧𑀳𑁄𑀦𑀓𑀸.

𑀢𑀁 𑀲𑀼𑀢𑁆𑀯𑀸 𑀲𑀼𑀫𑀦𑁄𑀭𑀸𑀚𑀸, 𑀘𑁂𑀢𑀺𑀬𑁂 𑀓𑀫𑁆𑀫𑀫𑀸𑀭𑀪𑀺;

𑀅𑀫𑀽𑀮𑀫𑁂𑀢𑁆𑀣 𑀓𑀫𑁆𑀫𑀜𑁆𑀘, 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀜𑀸𑀧𑀬𑀺.

𑀏𑀓𑁂𑀓𑀲𑁆𑀫𑀺𑀁 𑀤𑀼𑀯𑀸𑀭𑀲𑁆𑀫𑀺𑀁, 𑀞𑀧𑀸𑀧𑁂𑀲𑀺 𑀓𑀳𑀸𑀧𑀡𑁂;

𑀲𑁄𑀴𑀲𑀲𑀢𑀲𑀳𑀲𑁆𑀲𑀸𑀦𑀺, 𑀯𑀢𑁆𑀣𑀸𑀦𑀺𑀲𑀼 𑀩𑀳𑀽𑀦𑀺 𑀘.

𑀯𑀺𑀯𑀺𑀥𑀜𑁆𑀘 𑀅𑀮𑀗𑁆𑀓𑀸𑀭𑀁, 𑀔𑀚𑁆𑀚𑀁𑀪𑁄𑀚𑁆𑀚𑀁 𑀲𑀧𑀸𑀦𑀓𑀁;

𑀕𑀦𑁆𑀥𑀫𑀸𑀮𑀸𑀕𑀼𑀴𑀸𑀤𑀺𑀘, 𑀫𑀼𑀔𑀯𑀸𑀲𑀓𑀧𑀜𑁆𑀘𑀓𑀁.

‘‘𑀬𑀣𑀸𑀭𑀼𑀘𑀺𑀢𑀁 𑀕𑀡𑁆𑀳𑀦𑁆𑀢𑀼, 𑀓𑀫𑁆𑀫𑀁 𑀓𑀢𑁆𑀯𑀸 𑀬𑀣𑀸𑀭𑀼𑀘𑀺𑀁;

𑀢𑁂 𑀢𑀣𑁂𑀯 𑀅𑀧𑁂𑀓𑁆𑀔𑀺𑀢𑁆𑀯𑀸, 𑀅𑀤𑀁𑀲𑀼 𑀭𑀸𑀚𑀓𑀫𑁆𑀫𑀺𑀓𑀸.

𑀣𑀽𑀧𑀓𑀫𑁆𑀫𑀲𑀳𑀸𑀬𑀢𑁆𑀢𑀁, 𑀏𑀓𑁄 𑀪𑀺𑀓𑁆𑀔𑀼𑀦𑀺𑀓𑀸𑀫𑀬𑀁;

𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀫𑀸𑀤𑀸𑀬, 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁.

𑀕𑀦𑁆𑀢𑁆𑀯𑀸𑀦 𑀘𑁂𑀢𑀺𑀬𑀝𑁆𑀞𑀸𑀦𑀁, 𑀯𑀟𑁆𑀠𑁂𑀢𑁆𑀯𑀸 𑀭𑀸𑀚𑀓𑀫𑁆𑀫𑀺𑀓𑁂;

𑀅𑀤𑀸𑀲𑀺 𑀢𑀁 𑀯𑀟𑁆𑀠𑀓𑀺𑀲𑁆𑀲, 𑀕𑀡𑁆𑀳𑀦𑁆𑀢𑁄𑀬𑁂𑀯 𑀚𑀸𑀦𑀺𑀲𑁄.

𑀢𑀲𑁆𑀲𑀸 𑀓𑀸𑀭𑀁 𑀯𑀺𑀤𑀺𑀢𑁆𑀯𑀸𑀦, 𑀢𑀢𑁆𑀣𑀸𑀳𑁄𑀲𑀺 𑀓𑀼𑀢𑀽𑀳𑀮𑀁;

𑀓𑀫𑁂𑀦 𑀭𑀸𑀚𑀸 𑀲𑀼𑀢𑁆𑀯𑀸𑀦, 𑀆𑀕𑀢𑁄 𑀧𑀼𑀘𑁆𑀙𑀺 𑀯𑀟𑁆𑀠𑀓𑀻.

𑀤𑁂𑀯 𑀏𑀓𑁂𑀦 𑀳𑀢𑁆𑀣𑁂𑀦, 𑀧𑀼𑀧𑁆𑀨𑀸𑀦𑀸’𑀤𑀸𑀬 𑀪𑀺𑀓𑁆𑀔𑀯𑁄;

𑀏𑀓𑁂𑀦 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁, 𑀤𑁂𑀦𑁆𑀢𑀺 𑀫𑀬𑁆𑀳𑀁 𑀅𑀳𑀁 𑀧𑀦.

𑀅𑀬𑀁 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼, 𑀅𑀬𑀁 𑀦𑁂𑀯𑀸𑀲𑀺𑀓𑁄 𑀇𑀢𑀺;

𑀚𑀸𑀦𑀸𑀫𑀺𑀦𑁂𑀯𑀸’𑀢𑀺 𑀯𑀘𑁄, 𑀲𑀼𑀢𑁆𑀯𑀸 𑀭𑀸𑀚𑀸𑀲𑀫𑀧𑁆𑀧𑀬𑀺.

𑀏𑀓𑁄𑀩𑀮𑀢𑁆𑀣𑀁 𑀤𑀲𑁆𑀲𑁂𑀢𑀼𑀁, 𑀫𑀢𑁆𑀢𑀺𑀓𑀸 𑀤𑀸𑀬𑀓𑀁 𑀬𑀢𑀺𑀁;

𑀲𑁄 𑀩𑀮𑀢𑀲𑁆𑀲 𑀤𑀲𑁆𑀲𑁂𑀲𑀺, 𑀲𑁄 𑀢𑀁 𑀭𑀜𑁆𑀜𑁄 𑀦𑀺𑀯𑁂𑀤𑀬𑀺.

𑀚𑀸𑀢𑀺𑀫𑀓𑀼𑀮𑀓𑀼𑀫𑁆𑀪𑁂𑀲𑁄 ¶ , 𑀫𑀳𑀸𑀩𑁄𑀥𑀗𑁆𑀕𑀡𑁂 𑀢𑀬𑁄;

𑀞𑀧𑀸𑀧𑁂𑀢𑁆𑀯𑀸 𑀩𑀮𑀢𑁆𑀣𑁂𑀦, 𑀭𑀸𑀚𑀸 𑀤𑀸𑀧𑁂𑀲𑀺 𑀪𑀺𑀓𑁆𑀔𑀼𑀦𑁄.

𑀅𑀚𑀸𑀦𑀺𑀢𑁆𑀯𑀸 𑀧𑀽𑀚𑀬𑀺𑀢𑁆𑀯𑀸, 𑀞𑀺𑀢𑀲𑁆𑀲𑁂’𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀩𑀮𑀢𑁆𑀣𑁄 𑀢𑀁 𑀦𑀺𑀯𑁂𑀤𑁂𑀲𑀺, 𑀢𑀤𑀸 𑀢𑀁 𑀚𑀸𑀦𑀺 𑀲𑁄 𑀬𑀢𑀺.

𑀓𑁂𑀮𑀺𑀯𑀸𑀢𑁂 𑀚𑀦𑀧𑀤𑁂, 𑀧𑀺𑀬𑀗𑁆𑀕𑀮𑁆𑀮𑀦𑀺𑀯𑀸𑀲𑀺𑀓𑁄;

𑀣𑁂𑀭𑁄 𑀘𑁂𑀢𑀺𑀬𑀓𑀫𑁆𑀫𑀲𑁆𑀫𑀺𑀁, 𑀲𑀳𑀸𑀬𑀢𑁆𑀢𑀁 𑀦𑀺𑀓𑀸𑀫𑀬𑀁.

𑀢𑀲𑁆𑀲𑀺𑀢𑁆𑀣𑀺𑀓𑀸𑀯𑀟𑁆𑀠𑀓𑀺𑀲𑁆𑀲, 𑀜𑀸𑀢𑀓𑁄 𑀇𑀥 𑀆𑀕𑀢𑁄;

𑀢𑀲𑁆𑀲𑀺𑀝𑁆𑀞𑀺𑀓𑀸 𑀲𑀫𑀢𑁆𑀢𑁂𑀦, 𑀜𑀸𑀢𑁄 𑀓𑀢𑁆𑀯𑀸𑀦 𑀇𑀝𑁆𑀞𑀓𑀁.

𑀓𑀫𑁆𑀫𑀺𑀬𑁂𑀯𑀟𑁆𑀠𑀬𑀺𑀢𑁆𑀯𑀸𑀦, 𑀯𑀟𑁆𑀠𑀓𑀺𑀲𑁆𑀲 𑀅𑀤𑀸𑀲𑀺𑀢𑀁;

𑀲𑁄 𑀢𑀁 𑀢𑀢𑁆𑀣 𑀦𑀺𑀬𑁄𑀚𑁂𑀲𑀺, 𑀓𑁄𑀮𑀸𑀳𑀮𑀫𑀳𑁄𑀲𑀺 𑀘.

𑀭𑀸𑀚𑀸 𑀲𑀼𑀢𑁆𑀯𑀸𑀯’ 𑀢𑀁 𑀆𑀳, ‘‘𑀜𑀸𑀢𑀼𑀁 𑀲𑀓𑁆𑀓𑀸 𑀢𑀫𑀺𑀝𑁆𑀞𑀺𑀓𑀁’’;

𑀚𑀸𑀦𑀦𑁆𑀢𑁄𑀧𑀺 𑀦 𑀲𑀓𑁆𑀓𑀸𑀢𑀺, 𑀭𑀸𑀚𑀸𑀦𑀁 𑀆𑀳 𑀯𑀟𑁆𑀠𑀓𑀻.

‘‘𑀚𑀸𑀦𑀸𑀲𑀺 𑀢𑀁 𑀢𑁆𑀯𑀁 𑀣𑁂𑀭𑀁𑀢𑀺’’,

𑀩𑀮𑀢𑁆𑀣𑁄 𑀢𑁂𑀦 𑀢𑀁 𑀜𑀢𑁆𑀯𑀸, 𑀭𑀸𑀚𑀸𑀦𑀼𑀜𑁆𑀜𑀸𑀬𑀼𑀧𑀸𑀕𑀢𑁄;

𑀓𑀝𑁆𑀞𑀳𑀸𑀮𑀧𑀭𑀺𑀯𑁂𑀡𑁂, 𑀣𑁂𑀭𑀁 𑀧𑀲𑁆𑀲𑀺𑀬 𑀫𑀦𑁆𑀢𑀺𑀬.

𑀣𑁂𑀭𑀲𑁆𑀲 𑀫𑀕𑀫𑀦𑀸𑀳𑀜𑁆𑀘, 𑀕𑀢𑀺𑀞𑀸𑀦𑀜𑁆𑀘 𑀚𑀸𑀦𑀺𑀬;

‘‘𑀢𑀼𑀫𑁆𑀳𑁂𑀳𑀺 𑀲𑀳 𑀕𑀘𑁆𑀙𑀸𑀫𑀺, 𑀲𑀓𑀁 𑀕𑀸𑀫𑀁’’𑀦𑁆𑀢𑀺 𑀪𑀸𑀲𑀺𑀬.

𑀭𑀜𑁆𑀜𑁄 𑀲𑀩𑁆𑀩𑀁 𑀦𑀺𑀯𑁂𑀤𑁂𑀲𑀺, 𑀭𑀸𑀚𑀸 𑀢𑀲𑁆𑀲 𑀅𑀤𑀸𑀧𑀬𑀺;

𑀯𑀢𑁆𑀣𑀬𑀼𑀕𑀁 𑀲𑀳𑀲𑁆𑀲𑀕𑁆𑀖𑀁, 𑀫𑀳𑀕𑁆𑀖𑀁 𑀭𑀢𑁆𑀢𑀓𑀫𑁆𑀩𑀮𑀁.

𑀲𑀸𑀫𑀡𑀓𑁂 𑀧𑀭𑀺𑀓𑁆𑀔𑀸𑀭𑁂, 𑀩𑀳𑀼𑀓𑁂 𑀲𑀓𑁆𑀔𑀭𑀫𑁆𑀧𑀺 𑀘;

𑀲𑀼𑀕𑀦𑁆𑀥 𑀢𑁂𑀮𑀦𑀸𑀴𑀺𑀜𑁆𑀘, 𑀤𑀸𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀺𑀢𑀁.

𑀣𑁂𑀭𑁂𑀦 𑀲𑀳 𑀕𑀦𑁆𑀢𑁆𑀯𑀸 𑀲𑁄, 𑀤𑀺𑀲𑁆𑀲𑀦𑁆𑀢𑁂 𑀧𑀺𑀬𑀕𑀮𑁆𑀮𑀓𑁂;

𑀣𑁂𑀭𑀁 𑀲𑀻𑀢𑀸𑀬 𑀙𑀸𑀬𑀸𑀬, 𑀲𑁄𑀤𑀓𑀸𑀬 𑀦𑀺𑀲𑀻𑀤𑀺𑀬.

𑀲𑀓𑁆𑀔𑀭𑀧𑀸𑀡𑀓𑀁 𑀤𑀢𑁆𑀯𑀸, 𑀧𑀸𑀤𑁂 𑀢𑁂𑀮𑁂𑀦 𑀫𑀓𑁆𑀔𑀺𑀬;

𑀉𑀧𑀸𑀳𑀦𑀸𑀦𑀺 𑀬𑁄𑀚𑁂𑀢𑁆𑀯𑀸, 𑀧𑀭𑀺𑀓𑁆𑀔𑀸𑀭𑁂 𑀉𑀧𑀸𑀦𑀬𑀺.

𑀓𑀼𑀮𑀽𑀧𑀕𑀲𑁆𑀲 ¶ 𑀣𑁂𑀭𑀲𑁆𑀲, 𑀕𑀳𑀺𑀢𑀸 𑀫𑁂 𑀇𑀫𑁂 𑀫𑀬𑀸;

𑀯𑀢𑁆𑀣𑀬𑀼𑀕𑀁𑀢𑀼 𑀧𑀼𑀢𑁆𑀢𑀲𑁆𑀲, 𑀲𑀩𑁆𑀩𑁂 𑀢𑀸𑀦𑀺 𑀤𑀤𑀸𑀫𑀺 𑀯𑁄.

𑀇𑀢𑀺 𑀯𑀢𑁆𑀯𑀸𑀦 𑀤𑀢𑁆𑀯𑀸 𑀢𑁂, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑁄 𑀧𑀦;

𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀯𑀘𑀲𑀸, 𑀭𑀜𑁆𑀜𑁄 𑀲𑀦𑁆𑀤𑁂𑀲𑀫𑀸𑀳 𑀲𑁄.

𑀫𑀳𑀸𑀣𑀽𑀧𑁂 𑀓𑀬𑀺𑀭𑀫𑀸𑀦𑁂, 𑀲𑀢𑀺𑀬𑀸𑀓𑀫𑁆𑀫𑀓𑀸𑀭𑀓𑀸;

𑀅𑀦𑁂𑀓𑀲𑀗𑁆𑀔𑀸𑀳𑀺 𑀚𑀦𑀸, 𑀧𑀲𑀦𑁆𑀦𑀸 𑀲𑀼𑀕𑀢𑀺𑀁 𑀕𑀢𑀸.

𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑀢𑁆𑀢𑁂𑀦, 𑀲𑀼𑀕𑀢𑁂 𑀕𑀢𑀺𑀉𑀢𑁆𑀢𑀫𑀸;

𑀮𑀩𑁆𑀪𑀢𑀻𑀢𑀺 𑀯𑀺𑀤𑀺𑀢𑁆𑀯𑀸𑀦, 𑀣𑀽𑀧𑀧𑀽𑀚𑀁 𑀓𑀭𑁂 𑀩𑀼𑀥𑁄.

𑀏𑀢𑁆𑀣𑁂𑀯 𑀪𑀢𑀺𑀬𑀸 𑀓𑀫𑁆𑀫𑀁, 𑀓𑀭𑀺𑀢𑁆𑀯𑀸 𑀇𑀢𑁆𑀣𑀺𑀬𑁄 𑀤𑀼𑀯𑁂;

𑀢𑀸𑀯𑀢𑀺𑀁𑀲𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀫𑀳𑀸𑀣𑀽𑀧𑀫𑁆𑀳𑀺 𑀦𑀺𑀝𑁆𑀞𑀺𑀢𑁂.

𑀆𑀯𑀚𑁆𑀚𑀺𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁, 𑀤𑀺𑀝𑁆𑀞𑀓𑀫𑁆𑀫𑀨𑀮𑀸 𑀉𑀪𑁄;

𑀕𑀦𑁆𑀥𑀫𑀸𑀮𑀸’𑀤𑀺𑀬𑀺𑀢𑁆𑀯𑀸𑀦, 𑀣𑀽𑀧𑀁 𑀧𑀽𑀚𑁂𑀢𑀼𑀫𑀸𑀕𑀢𑀸.

𑀕𑀦𑁆𑀥𑀫𑀸𑀮𑀸𑀳𑀺 𑀧𑀽𑀚𑁂𑀢𑁆𑀯𑀸, 𑀘𑁂𑀢𑀺𑀬𑀁 𑀅𑀪𑀺𑀯𑀦𑁆𑀤𑀺𑀲𑀼𑀁;

𑀢𑀲𑁆𑀫𑀺𑀁 𑀔𑀡𑁂 𑀪𑀸𑀢𑀺𑀯𑀗𑁆𑀓-𑀯𑀸𑀲𑀻 𑀣𑁂𑀭𑁄 𑀫𑀳𑀸𑀲𑀺𑀯𑁄.

𑀭𑀢𑁆𑀢𑀺𑀪𑀸𑀕𑁂 𑀫𑀳𑀸𑀣𑀽𑀧𑀁, 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄;

𑀢𑀸𑀤𑀺𑀲𑁆𑀯𑀸𑀦 𑀫𑀳𑀸𑀲𑀢𑁆𑀢-𑀧𑀡𑁆𑀡𑀺𑀭𑀼𑀓𑁆𑀔𑀫 𑀧𑀲𑁆𑀲𑀺𑀢𑁄.

𑀅𑀤𑀲𑁆𑀲𑀬𑀺𑀢𑁆𑀯𑀸 𑀅𑀢𑁆𑀢𑀸𑀦𑀁, 𑀧𑀲𑁆𑀲𑀁 𑀲𑀫𑁆𑀧𑀢𑁆𑀢𑀺𑀫𑀩𑁆𑀪𑀼𑀢𑀁;

𑀞𑀢𑁆𑀯𑀸 𑀢𑀸𑀲𑀁 𑀯𑀦𑁆𑀤𑀦𑀸𑀬, 𑀧𑀭𑀺𑀬𑁄𑀲𑀸𑀦𑁂 𑀅𑀧𑀼𑀘𑁆𑀙𑀺𑀢𑀁.

𑀫𑀳𑀸𑀣𑀽𑀧𑁂 𑀓𑀢𑀁 𑀓𑀫𑁆𑀫𑀁, 𑀢𑀲𑁆𑀲 𑀆𑀳𑀁𑀲𑀼 𑀤𑁂𑀯𑀢𑀸;

𑀏𑀯𑀁 𑀢𑀣𑀸𑀕𑀢𑁂 𑀳𑁂𑀯, 𑀧𑀲𑀸𑀤𑁄 𑀳𑀺 𑀫𑀳𑀧𑁆𑀨𑀮𑁄.

𑀧𑀼𑀧𑁆𑀨𑀥𑀸𑀦𑀢𑁆𑀢𑀬𑀁 𑀣𑀽𑀧𑁂, 𑀇𑀝𑁆𑀞𑀺𑀓𑀸𑀳𑀺 𑀘𑀺𑀢𑀁 𑀘𑀺𑀢𑀁;

𑀲𑀫𑀁 𑀧𑀣𑀯𑀺𑀬𑀸 𑀓𑀢𑁆𑀯𑀸, 𑀇𑀤𑁆𑀥𑀺𑀫𑀦𑁆𑀢𑁄’𑀯 𑀲𑀻𑀤𑀬𑀼𑀁.

𑀦𑀯 𑀯𑀸𑀭𑁂 𑀘𑀺𑀢𑀁 𑀲𑀩𑁆𑀩𑀁, 𑀏𑀯𑀁 𑀑𑀲𑀻𑀤𑀬𑀺𑀁𑀲𑀼 𑀢𑁂;

𑀅𑀣 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖-𑀲𑀦𑁆𑀦𑀺𑀧𑀸𑀢 𑀫𑀓𑀸𑀭𑀬𑀺.

𑀢𑀢𑁆𑀣𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 ¶ , 𑀲𑀦𑁆𑀦𑀺𑀧𑀸𑀢𑀫𑁆𑀳𑀺 𑀪𑀺𑀓𑁆𑀔𑀯𑁄;

𑀭𑀸𑀚𑀸 𑀲𑀗𑁆𑀖𑀫𑀼𑀧𑀸𑀕𑀫𑁆𑀫, 𑀧𑀽𑀚𑁂𑀢𑁆𑀯𑀸 𑀅𑀪𑀺𑀯𑀦𑁆𑀤𑀺𑀬.

𑀇𑀝𑁆𑀞𑀓𑁄𑀲𑀺𑀤𑀦𑁂𑀳𑁂𑀢𑀼𑀁, 𑀧𑀼𑀘𑁆𑀙𑀺 𑀲𑀗𑁆𑀖𑁄 𑀯𑀺𑀬𑀸𑀓𑀭𑀺;

‘‘𑀦𑁄 𑀲𑀻𑀤𑀦𑀢𑁆𑀣𑀁 𑀣𑀽𑀧𑀲𑁆𑀲, 𑀇𑀤𑁆𑀥𑀺𑀫𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺.

𑀓𑀢𑀁 𑀏𑀢𑀁 𑀫𑀳𑀸𑀭𑀸𑀚, 𑀦 𑀇𑀤𑀸𑀦𑀺 𑀓𑀭𑀺𑀲𑁆𑀲𑀢𑁂;

𑀅𑀜𑁆𑀜𑀣𑀢𑁆𑀢𑀫𑀓𑀢𑁆𑀯𑀸 𑀢𑀁, 𑀫𑀳𑀸𑀣𑀽𑀧𑀁 𑀲𑀫𑀸𑀧𑀬.

𑀢𑀁 𑀲𑀼𑀢𑁆𑀯𑀸 𑀲𑀼𑀫𑀦𑁄 𑀭𑀸𑀚𑀸, 𑀣𑀽𑀧𑀓𑀫𑁆𑀫𑀫𑀓𑀸𑀭𑀬𑀺;

𑀧𑀼𑀧𑁆𑀨𑀸𑀥𑀸𑀦𑁂𑀲𑀼 𑀤𑀲𑀲𑀼, 𑀇𑀝𑁆𑀞𑀺𑀓𑀸 𑀤𑀲𑀓𑁄𑀝𑀺𑀬𑁄.

𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀸𑀫𑀡𑁂𑀭𑁂, 𑀉𑀢𑁆𑀢𑀭𑀁 𑀲𑀼𑀫𑀦𑀫𑁆𑀧𑀺 𑀘;

‘‘𑀘𑁂𑀪𑀺𑀬 𑀥𑀸𑀢𑀼𑀕𑀩𑁆𑀪𑀢𑁆𑀣𑀁, 𑀧𑀸𑀲𑀸𑀡𑁂 𑀫𑁂𑀖𑀯𑀡𑁆𑀡𑀓𑁂.

𑀆𑀳𑀭𑀣𑀸’’𑀢𑀺 𑀬𑁄𑀚𑁂𑀲𑀺, 𑀢𑁂 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀁 𑀓𑀼𑀭𑀼𑀁;

𑀅𑀲𑀻𑀢𑀺 𑀭𑀢𑀦𑀸𑀬𑀸𑀫, 𑀯𑀺𑀢𑁆𑀣𑀸𑀭𑁂 𑀭𑀯𑀺𑀪𑀸𑀲𑀼𑀭𑁂.

𑀅𑀝𑁆𑀞𑀗𑁆𑀕𑀼𑀮𑀸𑀦𑀺 𑀩𑀳𑀮𑁂, 𑀕𑀡𑁆𑀞𑀺𑀧𑀼𑀧𑁆𑀨𑀦𑀺𑀪𑁂 𑀲𑀼𑀪𑁂;

𑀙𑀫𑁂𑀖𑀯𑀡𑁆𑀡𑀧𑀸𑀲𑀸𑀡𑁂, 𑀆𑀳𑀭𑀺𑀁𑀲𑀼 𑀔𑀡𑁂𑀢𑀢𑁄.

𑀧𑀼𑀧𑁆𑀨𑀥𑀸𑀦𑀲𑁆𑀲 𑀉𑀧𑀭𑀺, 𑀫𑀚𑁆𑀛𑁂 𑀏𑀓𑀁 𑀦𑀺𑀧𑀸𑀢𑀺𑀬;

𑀘𑀢𑀼𑀧𑀲𑁆𑀲𑀫𑁆𑀳𑀺 𑀘𑀢𑀼𑀭𑁄, 𑀫𑀜𑁆𑀚𑀽𑀲𑀁 𑀯𑀺𑀬 𑀬𑁄𑀚𑀺𑀬.

𑀏𑀓𑀁 𑀧𑀺𑀥𑀸𑀦𑀓𑀢𑁆𑀣𑀸𑀬, 𑀤𑀺𑀲𑀸𑀪𑀸𑀕𑁂 𑀧𑀼𑀭𑀢𑁆𑀣𑀺𑀫𑁂;

𑀅𑀤𑀲𑁆𑀲𑀦𑀁 𑀓𑀭𑀺𑀢𑁆𑀯𑀸 𑀢𑁂, 𑀞𑀧𑀬𑀺𑀁𑀲𑀼 𑀫𑀳𑀺𑀤𑁆𑀥𑀺𑀓𑀸.

𑀫𑀚𑁆𑀛𑀫𑁆𑀳𑀺 𑀥𑀸𑀢𑀼𑀕𑀩𑁆𑀪𑀲𑁆𑀲, 𑀢𑀲𑁆𑀲 𑀭𑀸𑀚𑀸 𑀅𑀓𑀸𑀭𑀬𑀺;

𑀭𑀢𑀦𑀫𑀬𑀁 𑀩𑁄𑀥𑀺𑀭𑀼𑀓𑁆𑀔𑀁, 𑀲𑀩𑁆𑀩𑀸𑀓𑀸𑀭𑀫𑀦𑁄𑀭𑀫𑀁.

𑀅𑀝𑁆𑀞𑀸𑀭𑀲 𑀭𑀢𑀦𑀺𑀓𑁄, 𑀔𑀦𑁆𑀥𑁄 𑀲𑀸𑀔𑀸𑀲𑁆𑀲 𑀧𑀜𑁆𑀘 𑀘;

𑀧𑀯𑀸𑀮𑀫𑀬𑀫𑀽𑀮𑁄 𑀲𑁄, 𑀇𑀦𑁆𑀤𑀦𑀻𑀮𑁂 𑀧𑀢𑀺𑀝𑁆𑀞𑀺𑀢𑁄.

𑀲𑀼𑀲𑀼𑀤𑁆𑀥𑀭𑀚𑀢𑀓𑁆𑀔𑀦𑁆𑀥𑁄, 𑀫𑀡𑀺𑀧𑀢𑁆𑀢𑁂𑀳𑀺 𑀲𑁄𑀪𑀺𑀢𑁄;

𑀳𑁂𑀫𑀫𑀬𑀧𑀡𑁆𑀟𑀼𑀧𑀢𑁆𑀢, 𑀨𑀮𑁄 𑀧𑀯𑀸𑀴𑀅𑀗𑁆𑀓𑀼𑀭𑁄.

𑀅𑀣 𑀫𑀗𑁆𑀕𑀮𑀺𑀓𑀸 𑀢𑀲𑁆𑀲, 𑀔𑀦𑁆𑀥𑁂 𑀧𑀼𑀧𑁆𑀨𑀮𑀢𑀸𑀧𑀺 𑀘;

𑀘𑀢𑀼𑀧𑁆𑀧𑀤𑀸𑀦𑀁 𑀧𑀦𑁆𑀢𑀻𑀥, 𑀳𑀁𑀲𑀧𑀦𑁆𑀢𑀺 𑀘 𑀲𑁄𑀪𑀦𑀸.

𑀉𑀤𑁆𑀥𑀁 𑀘𑀸𑀭𑀼𑀯𑀺𑀢𑀸𑀦𑀦𑁆𑀢𑁂, 𑀫𑀼𑀢𑁆𑀢𑀸 𑀓𑀺𑀁 𑀓𑀺𑀡𑀺𑀚𑀸𑀮𑀓𑀸;

𑀲𑀼𑀯𑀡𑁆𑀡 𑀖𑀡𑁆𑀝𑀸𑀧𑀦𑁆𑀢𑀻𑀥, 𑀤𑀸𑀫𑀸𑀦𑀺 𑀘 𑀢𑀳𑀺𑀁 𑀢𑀳𑀺𑀁.

𑀯𑀺𑀢𑀸𑀦 ¶ 𑀘𑀢𑀼𑀓𑁄𑀡𑀫𑁆𑀳𑀺, 𑀫𑀼𑀢𑁆𑀢𑀸𑀤𑀸𑀫𑀓𑀮𑀸𑀧𑀓𑁄;

𑀦𑀯𑀲𑀢 𑀲𑀳𑀲𑁆𑀲𑀕𑁆𑀖𑁄, 𑀏𑀓𑁂 𑀓𑁄 𑀅𑀲𑀺𑀮𑀫𑁆𑀩𑀺𑀢𑁄.

𑀭𑀯𑀺𑀘𑀦𑁆𑀤𑀢𑀸𑀭 𑀭𑀽𑀧𑀸𑀦𑀺, 𑀦𑀸𑀦𑀸𑀧𑀤𑀼𑀫𑀓𑀸𑀦𑀺 𑀘;

𑀭𑀢𑀦𑁂𑀳𑀺 𑀓𑀢𑀸𑀦𑁂𑀯, 𑀥𑀺𑀢𑀸𑀦𑁂 𑀅𑀧𑁆𑀧𑀺𑀢𑀸𑀦’𑀬𑀼𑀁.

𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀸𑀦𑀺, 𑀯𑀢𑁆𑀢𑀸𑀦𑀺 𑀯𑀺𑀯𑀺𑀥𑀸𑀦𑀺 𑀘;

𑀫𑀳𑀕𑁆𑀖𑀦𑀸𑀦𑀸𑀭𑀗𑁆𑀕𑀸𑀦𑀺, 𑀯𑀺𑀢𑀸𑀦𑁂 𑀮𑀫𑁆𑀩𑀺𑀢𑀸𑀦’𑀬𑀼𑀁.

𑀩𑁄𑀥𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀦𑀸𑀦𑀸𑀭𑀢𑀦𑀯𑁂𑀤𑀺𑀓𑀸;

𑀫𑀳𑀸𑀫𑀮𑀓 𑀫𑀼𑀢𑁆𑀢𑀸𑀳𑀺, 𑀲𑀦𑁆𑀣𑀸𑀭𑁂𑀢𑀼 𑀢𑀤𑀦𑁆𑀢𑀭𑁂.

𑀦𑀸𑀦𑀸𑀭𑀢𑀦 𑀧𑀼𑀧𑁆𑀨𑀸𑀦𑀁, 𑀘𑀢𑀼𑀕𑀦𑁆𑀥𑀽𑀤𑀓𑀲𑁆𑀲 𑀘;

𑀧𑀼𑀡𑁆𑀡𑀸 𑀧𑀼𑀡𑁆𑀡𑀖𑀝𑀧𑀦𑁆𑀢𑀺, 𑀩𑁄𑀥𑀺𑀫𑀽𑀮𑁂 𑀓𑀢𑀸𑀦’𑀬𑀼𑀁.

𑀩𑁄𑀥𑀺 𑀧𑀸𑀘𑀺𑀦 𑀧𑀜𑁆𑀜𑀢𑁆𑀢𑁂, 𑀧𑀮𑁆𑀮𑀗𑁆𑀓𑁂𑀓𑁄𑀝𑀺𑀅𑀕𑁆𑀖𑀓𑁂;

𑀲𑁄𑀯𑀡𑁆𑀡 𑀩𑀼𑀤𑁆𑀥𑀧𑀝𑀺𑀫𑀁, 𑀦𑀺𑀲𑀻𑀤𑀸𑀧𑁂𑀲𑀺 𑀪𑀸𑀲𑀼𑀭𑀁.

𑀲𑀭𑀻𑀭𑀸𑀯𑀬𑀯𑀸𑀢𑀲𑁆𑀲𑀸, 𑀧𑀝𑀺𑀫𑀸𑀬 𑀬𑀣𑀸𑀭𑀳𑀁;

𑀦𑀸𑀦𑀸𑀯𑀡𑁆𑀡𑁂𑀳𑀺 𑀭𑀢𑀦𑁂𑀳𑀺, 𑀓𑀢𑀸 𑀲𑀼𑀭𑀼𑀘𑀺𑀭𑀸 𑀅𑀳𑀼𑀁.

𑀫𑀳𑀸𑀩𑁆𑀭𑀳𑁆𑀫𑀸 𑀞𑀺𑀢𑁄 𑀢𑀢𑁆𑀣, 𑀭𑀸𑀚𑀢𑀘𑁆𑀙𑀢𑁆𑀢 𑀥𑀸𑀭𑀓𑁄;

𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑁂𑀦, 𑀲𑀓𑁆𑀓𑁄 𑀘 𑀅𑀪𑀺𑀲𑁂𑀓𑀤𑁄.

𑀯𑀺𑀡𑀸𑀳𑀢𑁆𑀣𑁄 𑀧𑀜𑁆𑀘𑀲𑀺𑀔𑁄, 𑀓𑀸𑀴𑀦𑀸𑀕𑁄 𑀲𑀦𑀸𑀝𑀺𑀓𑁄;

𑀲𑀳𑀲𑁆𑀲𑀳𑀢𑁆𑀣𑁄 𑀫𑀸𑀭𑁄 𑀘, 𑀲𑀳𑀢𑁆𑀢𑀻𑀲𑀳 𑀓𑀺𑀁𑀓𑀭𑁄.

𑀧𑀸𑀘𑀺𑀦𑀧𑀮𑁆𑀮𑀗𑁆𑀓𑀦𑀺𑀪𑀸, 𑀢𑀻𑀲𑀼 𑀲𑁂𑀲𑀤𑀺𑀲𑀸𑀲𑀼 𑀘;

𑀓𑁄𑀝𑀺𑀓𑁄𑀝𑀺𑀥𑀦𑀕𑁆𑀖𑀸 𑀘, 𑀧𑀮𑁆𑀮𑀗𑁆𑀓𑀸 𑀅𑀢𑁆𑀣𑀢𑀸 𑀅𑀳𑀼𑀁.

𑀩𑁄𑀥𑀺𑀁 𑀉𑀲𑁆𑀲𑀺𑀲𑀓𑁂 𑀓𑀢𑁆𑀯𑀸, 𑀦𑀸𑀦𑀸𑀭𑀢𑀦𑀫𑀡𑁆𑀟𑀺𑀢𑀁;

𑀓𑁄𑀝𑀺 𑀥𑀦𑀕𑁆𑀖𑀓𑀁𑀬𑁂𑀯, 𑀧𑀜𑁆𑀜𑀢𑁆𑀢𑀁 𑀲𑀬𑀦𑀁 𑀅𑀳𑀼.

𑀲𑀢𑁆𑀢𑀲𑀢𑁆𑀢𑀸𑀳 𑀞𑀸𑀦𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀅𑀥𑀺𑀓𑀸𑀭𑁂 𑀅𑀓𑀸𑀭𑁂𑀲𑀺, 𑀩𑁆𑀭𑀳𑁆𑀫𑀬𑀸𑀘𑀦𑀫𑁂𑀯 𑀘.

𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀜𑁆𑀘, 𑀬𑀲𑀧𑀩𑁆𑀩𑀚𑀦𑀫𑁆𑀧𑀺 𑀘;

𑀪𑀤𑁆𑀤𑀯𑀕𑁆𑀕𑀺𑀬 𑀧𑀩𑁆𑀩𑀚𑁆𑀚𑀁, 𑀚𑀝𑀺𑀮𑀸𑀦𑀁 𑀤𑀫𑀦𑀫𑁆𑀧𑀺 𑀘.

𑀩𑀺𑀫𑁆𑀩𑀺𑀲𑀸𑀭𑀸𑀕𑀫𑀜𑁆𑀘𑀸𑀧𑀺 ¶ , 𑀭𑀸𑀚𑀕𑁂𑀳𑀧𑁆𑀧𑀯𑁂𑀲𑀦𑀁;

𑀯𑁂𑀴𑀼𑀯𑀦𑀲𑁆𑀲𑀕𑀳𑀦𑀁, 𑀅𑀲𑀻𑀢𑀺𑀲𑀸𑀯𑀓𑁂 𑀢𑀣𑀸.

𑀓𑀧𑀺𑀮 𑀯𑀢𑁆𑀣𑀼𑀕𑀫𑀦𑀁, 𑀢𑀣𑀸 𑀭𑀢𑀦 𑀘𑀗𑁆𑀓𑀫𑀁;

𑀭𑀸𑀳𑀼𑀮𑀸𑀦𑀦𑁆𑀤𑀧𑀩𑁆𑀩𑀚𑁆𑀚𑀁, 𑀕𑀳𑀡𑀁 𑀚𑁂𑀢𑀯𑀦𑀲𑁆𑀲 𑀘.

𑀅𑀫𑁆𑀩𑀫𑀽𑀮𑁂 𑀧𑀸𑀝𑀺𑀳𑀻𑀭𑀁, 𑀢𑀸𑀯𑀢𑀺𑀁𑀲𑀫𑁆𑀳𑀺 𑀤𑁂𑀲𑀦𑀁;

𑀤𑁂𑀯𑁄𑀭𑁄𑀳𑀡𑀧𑀸𑀝𑀺𑀳𑀻𑀭𑀁, 𑀣𑁂𑀭𑀧𑀜𑁆𑀳𑀲𑀫𑀸𑀕𑀫𑀁.

𑀫𑀳𑀸𑀲𑀫𑀬 𑀲𑀼𑀢𑁆𑀢𑀦𑁆𑀢𑀁, 𑀭𑀸𑀳𑀼𑀮𑁄𑀯𑀸𑀤𑀫𑁂𑀯𑀘;

𑀫𑀳𑀸𑀫𑀗𑁆𑀕𑀮𑀲𑀼𑀢𑁆𑀢𑀜𑁆𑀘, 𑀥𑀦𑀧𑀸𑀮𑀲𑀫𑀸𑀕𑀫𑀁.

𑀆𑀴𑀯𑀓𑀗𑁆𑀕𑀼𑀮𑀺𑀫𑀸𑀮, 𑀅𑀧𑀮𑀸𑀮𑀤𑀫𑀦𑀫𑁆𑀧𑀺 𑀘;

𑀧𑀸𑀭𑀸𑀬𑀦𑀓𑀲𑀫𑀺𑀢𑀺𑀁, 𑀆𑀬𑀼𑀯𑁄𑀲𑁆𑀲𑀚𑁆𑀚𑀦𑀁 𑀢𑀣𑀸.

𑀲𑀽𑀓𑀭𑀫𑀤𑁆𑀤𑀯𑀕𑁆𑀕𑀸𑀳𑀁, 𑀲𑀺𑀗𑁆𑀕𑀻𑀯𑀡𑁆𑀡𑀬𑀼𑀕𑀲𑁆𑀲 𑀘;

𑀧𑀲𑀦𑁆𑀦𑁄𑀤𑀓𑀧𑀸𑀦𑀜𑁆𑀘, 𑀧𑀭𑀺𑀦𑀺𑀩𑁆𑀩𑀸𑀦 𑀫𑁂𑀯 𑀘.

𑀤𑁂𑀯𑀫𑀦𑀼𑀲𑁆𑀲 𑀧𑀭𑀺𑀤𑁂𑀯𑀁, 𑀣𑁂𑀭𑁂𑀦 𑀧𑀸𑀤𑀯𑀦𑁆𑀤𑀦𑀁;

𑀤𑀳𑀦𑀁 𑀅𑀕𑁆𑀕𑀺𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀲𑀓𑁆𑀓𑀸𑀭 𑀫𑁂𑀯 𑀘.

𑀥𑀸𑀢𑀼𑀯𑀺𑀢𑀗𑁆𑀕 𑀤𑁄𑀡𑁂𑀦, 𑀧𑀲𑀸𑀤𑀚𑀦𑀓𑀸𑀦𑀺 𑀘;

𑀬𑁂𑀪𑀼𑀬𑁆𑀬𑁂𑀦 𑀅𑀓𑀸𑀭𑁂𑀲𑀺, 𑀚𑀸𑀢𑀓𑀸𑀦𑀺 𑀲𑀼𑀚𑀸𑀢𑀺𑀫𑀸.

𑀯𑁂𑀲𑁆𑀲𑀦𑁆𑀢𑀭 𑀚𑀸𑀢𑀓𑀦𑁆𑀢𑀼, 𑀯𑀺𑀢𑁆𑀣𑀸𑀭𑁂𑀦 𑀅𑀓𑀸𑀭𑀬𑀺;

𑀓𑀼𑀲𑀺𑀦𑀸𑀧𑀼𑀭𑀢𑁄 𑀬𑀸𑀯, 𑀩𑁄𑀥𑀺𑀫𑀦𑁆𑀢𑀺 𑀢𑀣𑁂𑀯 𑀘.

𑀘𑀢𑀼𑀤𑁆𑀤𑀺𑀲𑀁 𑀢𑁂 𑀘𑀢𑁆𑀢𑀸𑀭𑁄, 𑀫𑀳𑀸𑀭𑀸𑀚𑀸 𑀞𑀺𑀢𑀸 𑀅𑀳𑀼𑀁;

𑀢𑁂𑀢𑁆𑀢𑀺𑀁𑀲𑀤𑁂𑀯 𑀧𑀼𑀢𑁆𑀢𑀸 𑀘, 𑀩𑀸𑀢𑁆𑀢𑀺𑀁𑀲 𑀘 𑀓𑀼𑀫𑀸𑀭𑀺𑀬𑁄.

𑀬𑀓𑁆𑀔𑀲𑁂𑀦𑀸𑀧𑀢𑀺𑀅𑀝𑁆𑀞, 𑀯𑀻𑀲𑀢𑀺 𑀘 𑀢𑀢𑁄 𑀧𑀭𑀺;

𑀅𑀜𑁆𑀚𑀮𑀻𑀧𑀕𑁆𑀕𑀳𑀸𑀤𑁂𑀯𑀸, 𑀧𑀼𑀧𑁆𑀨𑀧𑀼𑀡𑁆𑀡𑀖𑀝𑀸 𑀢𑀢𑁄.

𑀦𑀘𑁆𑀘𑀓𑀸 𑀤𑁂𑀯𑀢𑀸𑀘𑁂𑀯, 𑀢𑀽𑀭𑀺𑀬𑀯𑀸𑀤𑀓 𑀤𑁂𑀯𑀢𑀸;

𑀆𑀤𑀸𑀲𑀕𑀸𑀳𑀓𑀸 𑀤𑁂𑀯𑀸, 𑀧𑀼𑀧𑁆𑀨𑀲𑀸𑀔𑀸 𑀥𑀭𑀸 𑀢𑀣𑀸.

𑀧𑀤𑀼𑀫𑀸𑀤𑀺𑀕𑀸𑀳𑀓𑀸 𑀤𑁂𑀯𑀸, 𑀅𑀜𑁆𑀜𑁂 𑀤𑁂𑀯𑀸 𑀘 𑀦𑁂𑀓𑀥𑀸;

𑀭𑀢𑀦𑀕𑁆𑀖𑀺𑀬 𑀧𑀦𑁆𑀢𑀺 𑀘, 𑀥𑀫𑁆𑀫𑀘𑀓𑁆𑀓𑀸𑀦 𑀫𑁂𑀯 𑀘.

𑀔𑀕𑁆𑀕𑀥𑀭𑀸𑀤𑁂𑀯𑀧𑀦𑁆𑀢𑀺, 𑀤𑁂𑀯𑀸𑀧𑀸𑀢𑀺𑀥𑀭𑀸 𑀢𑀣𑀸;

𑀢𑁂𑀲𑀁 𑀲𑀻𑀲𑁂 𑀧𑀜𑁆𑀘𑀳𑀢𑁆𑀣𑀸, 𑀕𑀦𑁆𑀥𑀢𑁂𑀮𑀲𑁆𑀲 𑀧𑀽𑀭𑀺𑀢𑀸.

𑀤𑀼𑀓𑀽𑀮𑀯𑀝𑁆𑀝𑀺𑀓𑀸 ¶ 𑀧𑀦𑁆𑀢𑀺, 𑀲𑀤𑀸𑀧𑀜𑁆𑀚𑀮𑀺𑀢𑀸 𑀅𑀳𑀼;

𑀨𑀮𑀺𑀓𑀕𑁆𑀖𑀺𑀬𑁂 𑀘𑀢𑀼𑀓𑁆𑀓𑀡𑁆𑀡𑁂, 𑀏𑀓𑁂𑀓𑁄 𑀘 𑀫𑀳𑀸𑀫𑀡𑀺.

𑀲𑀼𑀯𑀡𑁆𑀡𑀫𑀡𑀺 𑀫𑀼𑀢𑁆𑀢𑀸𑀦𑀁, 𑀭𑀸𑀲𑀺𑀬𑁄 𑀯𑀚𑀺𑀭𑀲𑁆𑀲 𑀘;

𑀘𑀢𑀼𑀓𑁆𑀓𑀡𑁆𑀡𑁂𑀲𑀼 𑀘𑀢𑁆𑀢𑀸𑀭𑁄, 𑀓𑀣𑀸’𑀳𑁂𑀲𑀼𑀁 𑀧𑀪𑀲𑁆𑀲𑀭𑀸.

𑀫𑁂𑀤𑀯𑀡𑁆𑀡𑀓𑀧𑀸𑀲𑀸𑀡, 𑀪𑀺𑀢𑁆𑀢𑀺𑀬𑀁𑀬𑁂𑀯 𑀉𑀚𑁆𑀚𑀮𑀸;

𑀯𑀺𑀚𑁆𑀚𑀸𑀢𑀸 𑀅𑀧𑁆𑀧𑀺𑀢𑀸 𑀆𑀲𑀼𑀁, 𑀥𑀸𑀢𑀼𑀕𑀩𑁆𑀪𑁂𑀯𑀺𑀪𑀽𑀲𑀺𑀢𑀸.

𑀭𑀽𑀧𑀓𑀸𑀦𑁂𑀢𑁆𑀢𑀲𑀩𑁆𑀩𑀸𑀦𑀺, 𑀥𑀸𑀢𑀼𑀕𑀩𑁆𑀪𑁂 𑀫𑀦𑁄𑀭𑀫𑁂;

𑀖𑀦𑀓𑁄𑀝𑁆𑀝𑀺 𑀫𑀳𑁂𑀫𑀲𑁆𑀲, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑁄 𑀏𑀢𑁆𑀣, 𑀲𑀩𑁆𑀩𑀁 𑀲𑀁𑀯𑀺𑀤𑀳𑀺 𑀇𑀫𑀁;

𑀇𑀦𑁆𑀤𑀕𑀼𑀢𑁆𑀢𑁄 𑀫𑀳𑀸𑀣𑁂𑀭𑁄, 𑀙𑀴𑀪𑀺𑀜𑁆𑀜𑁄 𑀫𑀳𑀸𑀫𑀢𑀻.

𑀲𑀩𑁆𑀩𑀁 𑀭𑀸𑀚𑀺𑀤𑁆𑀥𑀺𑀬𑀸 𑀏𑀢𑀁, 𑀤𑁂𑀯𑀢𑀸𑀦𑀜𑁆𑀘 𑀇𑀤𑁆𑀥𑀺𑀬𑀸;

𑀇𑀤𑁆𑀥𑀺𑀬𑀸 𑀅𑀭𑀺𑀬𑀸𑀦𑀜𑁆𑀘, 𑀅𑀲𑀫𑁆𑀩𑀸𑀥𑀁 𑀧𑀢𑀺𑀝𑁆𑀞𑀺𑀢𑀁.

𑀦𑀺𑀝𑁆𑀞𑀦𑁆𑀢𑀁 𑀲𑀼𑀕𑀢𑀜𑁆𑀘 𑀧𑀽𑀚𑀺𑀬𑀢𑀫𑀁 𑀮𑁄𑀓𑀼𑀢𑁆𑀢𑀫𑀁 𑀦𑀺𑀢𑁆𑀢𑀫𑀁;

𑀥𑀸𑀢𑀼 𑀢𑀲𑁆𑀲 𑀯𑀺𑀘𑀼𑀡𑁆𑀡𑀺𑀢𑀁 𑀚𑀦𑀳𑀺𑀢𑀁 𑀆𑀲𑀺𑀁𑀲𑀢𑀸 𑀧𑀽𑀚𑀺𑀬;

𑀧𑀼𑀜𑁆𑀜𑀁 𑀢𑀁 𑀲𑀫𑀫𑀺𑀘𑁆𑀘’𑀘𑁂𑀘𑁆𑀘 𑀫𑀢𑀺𑀫𑀸 𑀲𑀤𑁆𑀥𑀸𑀕𑀼𑀡𑀮𑀗𑁆𑀓𑀢𑁄;

𑀢𑀺𑀝𑁆𑀞𑀦𑁆𑀢𑀁 𑀲𑀼𑀕𑀢𑀁 𑀯𑀺𑀬’𑀲𑁆𑀲 𑀫𑀼𑀦𑀺𑀦𑁄 𑀥𑀸𑀢𑀼 𑀘 𑀲𑀫𑁆𑀩𑀽𑀚𑀬𑁂.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀥𑀸𑀢𑀼𑀕𑀩𑁆𑀪𑀫𑁆𑀳𑀺 ¶ 𑀓𑀫𑁆𑀫𑀸𑀦𑀺, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀭𑀺𑀦𑁆𑀤𑀫𑁄;

𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑀬𑀺𑀢𑁆𑀯𑀸, 𑀲𑀗𑁆𑀖𑀲𑁆𑀲 𑀇𑀥𑀫𑀩𑁆𑀭𑀯𑀺.

𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀓𑀫𑁆𑀫𑀸𑀦𑀺, 𑀫𑀬𑀸 𑀦𑀺𑀝𑁆𑀞𑀸𑀧𑀺 𑀢𑀸𑀦𑀺 𑀳𑀺;

𑀲𑀼𑀯𑁂 𑀥𑀸𑀢𑀼𑀁 𑀦𑀺𑀥𑁂𑀲𑁆𑀲𑀸𑀫𑀺, 𑀪𑀦𑁆𑀢𑁂 𑀚𑀸𑀦𑀸𑀣 𑀥𑀸𑀢𑀼𑀬𑁄’’.

𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀦𑀕𑀭𑀁 𑀧𑀸𑀯𑀺𑀲𑀻 𑀢𑀢𑁄;

𑀥𑀸𑀢𑀼 𑀆𑀳𑀭𑀓𑀁 𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀺𑀘𑀺𑀦𑁆𑀢𑀺𑀬.

𑀲𑁄𑀡𑀼𑀢𑁆𑀢𑀭𑀁 𑀦𑀸𑀫𑀬𑀢𑀺𑀁, 𑀧𑀽𑀚𑀸𑀧𑀭𑀺𑀯𑁂𑀡𑀯𑀸𑀲𑀺 𑀓𑀁;

𑀥𑀸𑀢𑀸𑀳𑀭𑀡 𑀓𑀫𑁆𑀫𑀫𑁆𑀳𑀺, 𑀙𑀴𑀪𑀺𑀜𑁆𑀜𑀁 𑀦𑀺𑀬𑁄𑀚𑀬𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑀫𑁆𑀳𑀺, 𑀦𑀸𑀣𑁂 𑀮𑁄𑀓𑀳𑀺𑀢𑀸𑀬𑀳𑀺;

𑀦𑀦𑁆𑀤𑀼𑀢𑁆𑀢𑀭𑁄’𑀢𑀺 𑀦𑀸𑀫𑁂𑀦, 𑀕𑀗𑁆𑀕𑀸𑀢𑀻𑀭𑀫𑁆𑀳𑀺 𑀫𑀸𑀡𑀯𑁄.

𑀦𑀺𑀫𑀦𑁆𑀢𑁂𑀢𑁆𑀯𑀸’𑀪𑀺𑀲𑀫𑁆𑀩𑀼𑀤𑁆𑀥𑀁, 𑀲𑀳 𑀲𑀗𑁆𑀖𑀁 𑀅𑀪𑁄𑀚𑀬𑀺;

𑀲𑀢𑁆𑀣𑀸𑀧𑀬𑁄𑀕𑀧𑀝𑁆𑀞𑀸𑀦𑁂, 𑀲𑀲𑀗𑁆𑀖𑁄𑀦𑀸𑀯𑀫𑀸𑀭𑀼𑀳𑀺.

𑀢𑀢𑁆𑀣 𑀪𑀤𑁆𑀤𑀚𑀺𑀣𑁂𑀭𑁄 𑀢𑀼, 𑀙𑀴𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀚𑀮𑀧𑀓𑁆𑀔𑀮𑀺𑀢𑀝𑁆𑀞𑀸𑀦𑀁, 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀤𑀁 𑀯𑀤𑀻.

‘‘𑀫𑀳𑀸 𑀧𑀦𑀸𑀤𑀪𑀽𑀢𑁂𑀦, 𑀫𑀬𑀸 𑀯𑀼𑀢𑁆𑀢𑁄 𑀲𑀼𑀯𑀡𑁆𑀡𑀬𑁄;

𑀧𑀸𑀲𑀸𑀤𑁄 𑀧𑀢𑀺𑀢𑁄 𑀏𑀢𑁆𑀣, 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀓𑁄.

𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀕𑀗𑁆𑀕𑀸𑀬, 𑀚𑀮𑀁 𑀧𑀓𑁆𑀔𑀺𑀮𑀺 𑀢𑀁 𑀇𑀥;

𑀪𑀺𑀓𑁆𑀔𑀽 𑀅𑀲𑀤𑁆𑀤𑀳𑀦𑁆𑀢𑀸 𑀢𑀁, 𑀲𑀢𑁆𑀣𑀼𑀦𑁄 𑀢𑀁 𑀦𑀺𑀯𑁂𑀤𑀬𑀼𑀁.

𑀲𑀢𑁆𑀣𑀸’𑀳 ‘‘𑀓𑀗𑁆𑀔𑀁 𑀪𑀺𑀓𑁆𑀔𑀼𑀦𑀁, 𑀯𑀺𑀦𑁄𑀤𑁂𑀳𑀻’’𑀢𑀺𑀲𑁄𑀢𑀢𑁄;

𑀜𑀸𑀧𑁂𑀢𑀼𑀁 𑀩𑁆𑀭𑀳𑁆𑀫𑀮𑁄𑀓𑁂’𑀧𑀺, 𑀯𑀲𑀯𑀢𑁆𑀢𑀺𑀲𑀫𑀢𑁆𑀣 𑀢𑀁.

𑀇𑀤𑁆𑀥𑀺𑀬𑀸 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀲𑀢𑁆𑀢𑀢𑀸𑀮𑀲𑀫𑁂 𑀞𑀺𑀢𑁄;

𑀤𑀽𑀲𑁆𑀲𑀣𑀽𑀧𑀁 𑀩𑁆𑀭𑀳𑁆𑀫𑀮𑁄𑀓𑁂, 𑀞𑀧𑁂𑀢𑁆𑀯𑀸 𑀯𑀟𑁆𑀠𑀺𑀢𑁂 𑀓𑀭𑁂.

𑀇𑀥𑀸’𑀦𑁂𑀢𑁆𑀯𑀸 ¶ 𑀤𑀲𑁆𑀲𑀬𑀺𑀢𑁆𑀯𑀸, 𑀚𑀦𑀲𑁆𑀲 𑀧𑀼𑀦 𑀢𑀁 𑀢𑀳𑀺𑀁;

𑀞𑀧𑀬𑀺𑀢𑁆𑀯𑀸 𑀬𑀣𑀸𑀞𑀸𑀦𑁂, 𑀇𑀤𑁆𑀥𑀺𑀬𑀸 𑀕𑀗𑁆𑀕𑀸𑀫𑀸𑀕𑀢𑁄.

𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀧𑀸𑀲𑀸𑀤𑀁, 𑀕𑀳𑁂𑀢𑁆𑀯𑀸 𑀣𑀼𑀧𑀺𑀓𑀸𑀬𑀲𑁄;

𑀉𑀲𑁆𑀲𑀸𑀧𑁂𑀢𑁆𑀯𑀸𑀦 𑀤𑀲𑁆𑀲𑁂𑀢𑁆𑀯𑀸, 𑀚𑀦𑀲𑁆𑀲 𑀔𑀺𑀧𑀺 𑀢𑀁 𑀢𑀳𑀺𑀁.

𑀦𑀦𑁆𑀤𑀼𑀢𑁆𑀢𑀭𑁄 𑀫𑀸𑀡𑀯𑀓𑁄, 𑀤𑀺𑀲𑁆𑀯𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁;

𑀧𑀭𑀸𑀬𑀢𑁆𑀢𑀫𑀳𑀁 𑀥𑀸𑀢𑀼𑀁, 𑀧𑀳𑀼𑀆𑀦𑀬𑀺𑀢𑀼𑀁 𑀲𑀺𑀬𑀁.

𑀇𑀢𑀺 𑀧𑀢𑁆𑀣𑀬𑀺 𑀢𑁂𑀦𑁂𑀢𑀁, 𑀲𑀗𑁆𑀖𑁄 𑀲𑁄𑀡𑀼𑀢𑁆𑀢𑀭𑀁 𑀬𑀢𑀺𑀁;

𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑁄𑀚𑁂𑀲𑀺, 𑀲𑁄𑀴𑀲𑀯𑀲𑁆𑀲𑀺𑀓𑀁 𑀅𑀧𑀺.

‘‘𑀆𑀳𑀭𑀸𑀫𑀺 𑀓𑀼𑀢𑁄 𑀥𑀸𑀢𑀼𑀁’’, 𑀇𑀢𑀺 𑀲𑀗𑁆𑀖𑀫𑀧𑀼𑀘𑁆𑀙𑀺𑀲𑁄;

𑀓𑀣𑁂𑀲𑀺 𑀲𑀗𑁆𑀖𑁄 𑀣𑁂𑀭𑀲𑁆𑀲, 𑀢𑀲𑁆𑀲 𑀢𑀸 𑀥𑀸𑀢𑀼𑀬𑁄 𑀇𑀢𑀺.

‘‘𑀧𑀭𑀺𑀦𑀺𑀩𑁆𑀩𑀸𑀦 𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁄 𑀮𑁄𑀓 𑀦𑀸𑀬𑀓𑁄;

𑀥𑀸𑀢𑀽𑀳𑀺𑀧𑀺𑀮𑁄𑀓𑀳𑀺 𑀢𑀁, 𑀓𑀸𑀢𑀼𑀁 𑀤𑁂𑀯𑀺𑀦𑁆𑀤 𑀫𑀩𑁆𑀭𑀼𑀯𑀺.

𑀤𑁂𑀯𑀺𑀦𑁆𑀤’𑀝𑁆𑀞𑀲𑀼 𑀤𑁄𑀡𑁂𑀲𑀼, 𑀫𑀫 𑀲𑀸𑀭𑀺𑀭𑀥𑀸𑀣𑀼𑀲𑀼;

𑀏𑀓𑀁 𑀤𑁄𑀡𑀁 𑀭𑀸𑀫𑀕𑀸𑀫𑁂, 𑀓𑁄𑀴𑀺𑀬𑁂𑀳𑀺 𑀘 𑀲𑀓𑁆𑀓𑀢𑀁.

𑀦𑀸𑀕𑀮𑁄𑀓𑀁 𑀢𑀢𑁄 𑀦𑀺𑀢𑀁, 𑀢𑀢𑁄 𑀦𑀸𑀕𑁂𑀳𑀺 𑀲𑀓𑁆𑀓𑀢𑀁;

𑀮𑀁𑀓𑀸𑀤𑀺𑀧𑁂 𑀫𑀳𑀸𑀣𑀽𑀧𑁂, 𑀦𑀺𑀥𑀸𑀦𑀸𑀬 𑀪𑀯𑀺𑀲𑁆𑀲𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀧𑀺, 𑀤𑀻𑀖𑀤𑀲𑁆𑀲𑀻 𑀫𑀳𑀸𑀬𑀢𑀺;

𑀥𑀫𑁆𑀫𑀸𑀲𑁄𑀓 𑀦𑀭𑀺𑀦𑁆𑀤𑁂𑀦, 𑀥𑀸𑀢𑀼𑀯𑀺𑀢𑁆𑀣𑀸𑀭𑀓𑀸𑀭𑀓𑁄.

𑀭𑀸𑀚𑀕𑀳𑀲𑁆𑀲 𑀲𑀸𑀫𑀦𑁆𑀢𑁂, 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸;

𑀓𑀸𑀭𑀸𑀧𑁂𑀦𑁆𑀢𑁄 𑀫𑀳𑀸𑀥𑀸𑀢𑀼𑀁, 𑀦𑀺𑀥𑀸𑀦𑀁 𑀲𑀸𑀥𑀼 𑀲𑀗𑁆𑀔𑀢𑀁.

𑀲𑀢𑁆𑀢 𑀤𑁄𑀡𑀸𑀦𑀺 𑀥𑀸𑀢𑀽𑀦𑀁, 𑀆𑀳𑀭𑀺𑀢𑁆𑀯𑀸𑀦 𑀓𑀸𑀭𑀬𑀺;

𑀭𑀸𑀫𑀕𑀸𑀫𑀫𑁆𑀳𑀺 𑀤𑁄𑀡𑀦𑁆𑀢𑀼, 𑀲𑀢𑁆𑀢𑀼𑀘𑀺𑀢𑁆𑀢𑀜𑁆𑀜𑀼𑀦’𑀕𑁆𑀕𑀳𑀺.

𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑀁 𑀢𑀁, 𑀥𑀫𑁆𑀫𑀸𑀲𑁄𑀓𑁄𑀧𑀺 𑀪𑀽𑀧𑀢𑀺;

𑀧𑀲𑁆𑀲𑀺𑀢𑁆𑀯𑀸 𑀅𑀝𑁆𑀞𑀫𑀁 𑀤𑁄𑀡𑀁, 𑀆𑀡𑀸𑀧𑁂𑀢𑀼𑀁𑀫𑀓𑀺𑀁 𑀅𑀓𑀸.

𑀫𑀳𑀸𑀣𑀽𑀧𑁂 𑀦𑀺𑀥𑀸𑀦𑀢𑁆𑀣𑀁, 𑀯𑀺𑀳𑀺𑀢𑀁 𑀢𑀁 𑀚𑀺𑀦𑁂𑀦𑀺’𑀢𑀺;

𑀥𑀫𑁆𑀫𑀸𑀲𑁄𑀓𑀁 𑀦𑀺𑀯𑀸𑀭𑁂𑀲𑀼𑀁, 𑀢𑀢𑁆𑀣 𑀔𑀺𑀡𑀸𑀲𑀯𑀸𑀬𑀢𑀺.

𑀭𑀸𑀫𑀕𑀸𑀫𑀫𑁆𑀳𑀺 𑀣𑀽𑀧𑁄𑀢𑀼, 𑀕𑀗𑁆𑀕𑀸𑀢𑀻𑀭𑁂 𑀓𑀢𑁄 𑀢𑀢𑁄;

𑀪𑀺𑀚𑁆𑀚𑀺𑀕𑀗𑁆𑀕𑀸𑀬 𑀑𑀖𑁂𑀦, 𑀲𑁄𑀢𑀼 𑀥𑀸𑀢𑀼 𑀓𑀭𑀡𑁆𑀟𑀓𑁄.

𑀲𑀫𑀼𑀤𑁆𑀤𑀁 ¶ 𑀧𑀯𑀺𑀲𑀺𑀢𑁆𑀯𑀸𑀦, 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂 𑀚𑀮𑁂 𑀢𑀳𑀺𑀁;

𑀦𑀸𑀦𑀸𑀭𑀢𑀦𑀧𑀺𑀝𑁆𑀞𑀫𑁆𑀳𑀺, 𑀅𑀝𑁆𑀞𑀸𑀭𑀲𑁆𑀫𑀺𑀁 𑀲𑀫𑀸𑀓𑀼𑀮𑁄.

𑀦𑀸𑀕𑀸 𑀤𑀺𑀲𑁆𑀯𑀸 𑀓𑀭𑀡𑁆𑀟𑀁 𑀢𑀁, 𑀓𑀸𑀴𑀦𑀸𑀕𑀲𑁆𑀲 𑀭𑀸𑀚𑀺𑀦𑁄;

𑀫𑀜𑁆𑀚𑁂𑀭𑀺𑀓𑀦𑀸𑀕𑀪𑀯𑀦𑀁, 𑀉𑀧𑀕𑀫𑁆𑀫 𑀦𑀺𑀯𑁂𑀤𑀬𑀼𑀁.

𑀤𑀲𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀕𑀦𑁆𑀢𑁆𑀯𑀸 𑀦𑀸𑀕𑁂𑀳𑀺 𑀲𑁄 𑀢𑀳𑀺𑀁;

𑀥𑀸𑀢𑀽 𑀢𑀸 𑀅𑀪𑀺𑀧𑀽𑀚𑁂𑀦𑁆𑀢𑁄, 𑀦𑁂𑀢𑁆𑀯𑀸𑀦 𑀪𑀯𑀦𑀁 𑀲𑀓𑀁.

𑀲𑀩𑁆𑀩𑀭𑀢𑀦𑀫𑀬𑀁 𑀣𑀽𑀧𑀁, 𑀢𑀲𑁆𑀲𑁄𑀧𑀭𑀺𑀖𑀭𑀁 𑀢𑀣𑀸;

𑀫𑀸𑀧𑁂𑀢𑁆𑀯𑀸 𑀲𑀳 𑀦𑀸𑀕𑁂𑀳𑀺, 𑀲𑀤𑀸 𑀧𑀽𑀚𑁂𑀲𑀺 𑀲𑀸𑀤𑀭𑁄.

𑀆𑀭𑀓𑁆𑀔𑀸𑀫𑀳𑀢𑀻 𑀢𑀢𑁆𑀣, 𑀕𑀦𑁆𑀢𑁆𑀯𑀸 𑀥𑀸𑀢𑀼𑀇𑀥𑀸𑀦𑀬;

𑀲𑀼𑀯𑁂 𑀥𑀸𑀢𑀼𑀦𑀺𑀥𑀸𑀦𑀜𑁆𑀳𑀺, 𑀪𑀽𑀫𑀺𑀧𑀸𑀮𑁄 𑀓𑀭𑀺𑀲𑁆𑀲𑀢𑀺’’.

𑀇𑀘𑁆𑀘𑁂𑀯𑀁 𑀲𑀗𑁆𑀖𑀯𑀘𑀦𑀁, 𑀲𑀼𑀢𑁆𑀯𑀸 𑀲𑀸𑀥𑀽𑀢𑀺 𑀲𑁄 𑀧𑀦;

𑀧𑀢𑁆𑀢𑀩𑁆𑀩𑀓𑀸𑀮𑀁 𑀧𑁂𑀓𑁆𑀔𑀦𑁆𑀢𑁄, 𑀧𑀭𑀺𑀯𑁂𑀡 𑀫𑀕𑀸𑀲𑀓𑀁.

𑀪𑀯𑀺𑀲𑁆𑀲𑀢𑀺 𑀲𑀼𑀯𑁂 𑀥𑀸𑀢𑀼, 𑀦𑀺𑀥𑀸𑀦𑀦𑁆𑀢𑀺 𑀫𑀳𑀻𑀧𑀢𑀺;

𑀘𑀸𑀭𑁂𑀲𑀺 𑀦𑀕𑀭𑁂 𑀪𑁂𑀭𑀺𑀁, 𑀲𑀩𑁆𑀩 𑀓𑀺𑀘𑁆𑀘𑀁 𑀯𑀺𑀥𑀸𑀬 𑀢𑀁.

𑀦𑀕𑀭𑀁 𑀲𑀓𑀮𑀜𑁆𑀘𑁂𑀯, 𑀇𑀥𑀸𑀕𑀸𑀫𑀺𑀜𑁆𑀘 𑀅𑀜𑁆𑀚𑀲𑀁;

𑀅𑀮𑀗𑁆𑀓𑀸𑀭𑀬𑀺 𑀲𑀓𑁆𑀓𑀘𑁆𑀘𑀁, 𑀦𑀕𑀭𑁂 𑀘 𑀯𑀺𑀪𑀽𑀲𑀬𑀺.

𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀘, 𑀮𑀁𑀓𑀸𑀤𑀻𑀧𑀫𑀲𑁂𑀲𑀓𑀁;

𑀆𑀫𑀦𑁆𑀢𑁂𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁, 𑀅𑀮𑀗𑁆𑀓𑀸𑀭𑀬𑀺𑀦𑁂𑀓𑀥𑀸.

𑀦𑀕𑀭𑀲𑁆𑀲 𑀘𑀢𑀼𑀤𑁆𑀯𑀸𑀭𑁂, 𑀯𑀢𑁆𑀢𑀪𑀢𑁆𑀢𑀁𑀳𑀺 𑀦𑁂𑀓𑀥𑀸;

𑀫𑀳𑀸𑀚𑀦𑁄𑀧𑀪𑁄𑀕𑀢𑁆𑀣𑀁, 𑀞𑀧𑀸𑀧𑁂𑀲𑀺 𑀦𑀭𑀸𑀥𑀺𑀧𑁄.

𑀉𑀧𑁄𑀲𑀣𑁂 𑀧𑀦𑁆𑀦𑀭𑀲𑁂, 𑀅𑀧𑀭𑀦𑁆𑀳𑁂 𑀲𑀼𑀫𑀸𑀦𑀲𑁄;

𑀧𑀡𑁆𑀟𑀺𑀢𑁄 𑀭𑀸𑀚𑀓𑀺𑀘𑁆𑀘𑁂𑀲𑀼, 𑀲𑀩𑁆𑀩𑀸𑀮𑀗𑁆𑀓𑀸𑀭 𑀫𑀡𑁆𑀟𑀺𑀢𑁄.

𑀲𑀩𑁆𑀩𑀸𑀳𑀺 𑀦𑀸𑀝𑀓𑀢𑁆𑀣𑀻𑀳𑀺, 𑀬𑁄𑀥𑁂𑀳𑀺 𑀲𑀸𑀬𑀼𑀥𑁂𑀳𑀺 𑀘;

𑀫𑀳𑀢𑀸 𑀘 𑀩𑀮𑁄𑀖𑁂𑀦, 𑀳𑀢𑁆𑀣𑀺𑀯𑀸 𑀚𑀺𑀭𑀣𑁂𑀳𑀺 𑀘.

𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑁂𑀳𑀺, 𑀲𑀩𑁆𑀩𑀢𑁄 𑀧𑀭𑀺𑀯𑀸𑀭𑀺𑀢𑁄;

𑀆𑀭𑀼𑀬𑁆𑀳 𑀲𑀼𑀭𑀣𑀁 𑀅𑀝𑁆𑀞𑀸, 𑀲𑀼𑀲𑁂𑀢 𑀘 𑀲𑀼𑀲𑀺𑀦𑁆𑀥𑀯𑀁.

𑀪𑀽𑀲𑀺𑀢𑀁 𑀓𑀡𑁆𑀟𑀽𑀮𑀁 𑀳𑀢𑁆𑀣𑀺𑀁, 𑀓𑀸𑀭𑁂𑀢𑁆𑀯𑀸 𑀧𑀼𑀭𑀢𑁄𑀲𑀼𑀪𑀁;

𑀲𑀼𑀯𑀡𑁆𑀡𑀘𑀗𑁆𑀕𑁄𑀝𑀥𑀭𑁄, 𑀲𑁄𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸𑀢𑁄.

𑀅𑀝𑁆𑀞𑀼𑀢𑁆𑀢𑀭 ¶ 𑀲𑀳𑀲𑁆𑀲𑀸𑀦𑀺, 𑀦𑀸𑀕𑀭𑀦𑀸𑀭𑀺𑀬𑁄 𑀲𑀼𑀪𑀸;

𑀲𑀼𑀧𑀼𑀡𑁆𑀡𑀖𑀝𑀪𑀽𑀲𑀸𑀬𑁄, 𑀢𑀁 𑀭𑀝𑁆𑀞𑀁 𑀧𑀭𑀺𑀯𑀸𑀭𑀬𑀼𑀁.

𑀦𑀸𑀦𑀸𑀧𑀼𑀧𑁆𑀨𑀲𑀫𑀼𑀕𑁆𑀕𑀸𑀦𑀺, 𑀢𑀣𑁂𑀯 𑀤𑀡𑁆𑀟𑀤𑀻𑀧𑀺𑀓𑀸;

𑀢𑀢𑁆𑀢𑀓𑀸 𑀢𑀢𑁆𑀢𑀓𑀸 𑀏𑀯, 𑀥𑀸𑀭𑀬𑀺𑀢𑁆𑀯𑀸𑀦 𑀇𑀢𑁆𑀣𑀺𑀬𑁄.

𑀅𑀝𑁆𑀞𑀼𑀢𑁆𑀢𑀭 𑀲𑀳𑀲𑁆𑀲𑀸𑀦𑀺, 𑀤𑀸𑀭𑀓𑀸 𑀲𑀫𑀮𑀗𑁆𑀓𑀢𑀸;

𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀼𑀁, 𑀦𑀸𑀦𑀸𑀯𑀡𑁆𑀡𑀥𑀚𑁂 𑀲𑀼𑀪𑁂.

𑀦𑀸𑀦𑀸𑀢𑀽𑀭𑀺𑀬𑀖𑁄𑀲𑁂𑀳𑀺, 𑀅𑀦𑁂𑀓𑁂𑀳𑀺 𑀢𑀳𑀺𑀁 𑀢𑀳𑀺𑀁;

𑀳𑀢𑁆𑀣𑀲𑀭𑀣𑀲𑀤𑁆𑀤𑁂𑀳𑀺, 𑀪𑀺𑀚𑁆𑀚𑀦𑁆𑀢𑁂 𑀯𑀺𑀬 𑀪𑀽𑀢𑀮𑁂.

𑀬𑀦𑁆𑀢𑁄 𑀫𑀳𑀸𑀫𑁂𑀖𑀯𑀦𑀁, 𑀲𑀺𑀭𑀺𑀬𑀸 𑀲𑁄 𑀫𑀳𑀸𑀬𑀲𑁄;

𑀬𑀦𑁆𑀢𑁂’𑀯 𑀦𑀦𑁆𑀤𑀦𑀯𑀦𑀁, 𑀤𑁂𑀯𑀭𑀸𑀚𑀸 𑀅𑀲𑁄𑀪𑀣.

𑀭𑀜𑁆𑀜𑁄 𑀦𑀺𑀕𑁆𑀕𑀫𑀦𑀸𑀭𑀫𑁆𑀪𑁂, 𑀫𑀳𑀸𑀢𑀽𑀭𑀺𑀬 𑀭𑀯𑀁𑀧𑀼𑀭𑁂;

𑀧𑀭𑀺𑀯𑁂𑀡𑁂 𑀦𑀺𑀲𑀺𑀦𑁆𑀦𑁄’𑀯, 𑀲𑀼𑀢𑁆𑀯𑀸 𑀲𑁄𑀡𑀼𑀢𑁆𑀢𑀭𑁄 𑀬𑀢𑀺.

𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀣𑀼𑀯𑀺𑀬𑀸, 𑀕𑀦𑁆𑀢𑁆𑀯𑀸𑀦 𑀦𑀸𑀕𑀫𑀦𑁆𑀤𑀺𑀭𑀁;

𑀦𑀸𑀕𑀭𑀸𑀚𑀲𑁆𑀲 𑀧𑀼𑀭𑀢𑁄, 𑀢𑀢𑁆𑀣 𑀧𑀸𑀢𑀽𑀭𑀳𑀼𑀮𑀳𑀼𑀁.

𑀯𑀼𑀝𑁆𑀞𑀸𑀬 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀮𑁆𑀮𑀗𑁆𑀓𑁂 𑀢𑀁 𑀦𑀺𑀯𑁂𑀲𑀻𑀮;

𑀲𑀓𑁆𑀓𑀭𑀺𑀢𑁆𑀯𑀸𑀦 𑀦𑀸𑀕𑀺𑀦𑁆𑀤𑁄, 𑀧𑀼𑀘𑁆𑀙𑀺 𑀆𑀕𑀢 𑀤𑁂𑀲𑀓𑀁.

𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀅𑀣𑁄𑀧𑀼𑀘𑁆𑀙𑀺, 𑀣𑁂𑀭𑀸𑀕𑀫𑀦𑀓𑀸𑀭𑀡𑀁;

𑀧𑀢𑁆𑀯𑀸’𑀥𑀺𑀓𑀸𑀭𑀁 𑀲𑀩𑁆𑀩𑀁 𑀲𑁄, 𑀲𑀗𑁆𑀖 𑀲𑀦𑁆𑀤𑁂𑀲 𑀫𑀩𑁆𑀭𑀼𑀯𑀺.

𑀫𑀳𑀸𑀣𑀽𑀧𑁂 𑀦𑀺𑀥𑀸𑀦𑀢𑁆𑀣𑀁, 𑀩𑀼𑀤𑁆𑀥𑁂𑀦 𑀯𑀺𑀳𑀺𑀢𑀸 𑀇𑀥;

𑀢𑀯 𑀳𑀢𑁆𑀣𑀕𑀢𑀸 𑀥𑀸𑀢𑀼, 𑀤𑁂𑀳𑀺𑀢𑀸 𑀓𑀺𑀭 𑀫𑁂 𑀢𑀼𑀯𑀁.

𑀢𑀁 𑀲𑀼𑀢𑁆𑀯𑀸 𑀦𑀸𑀕𑀭𑀸𑀚𑀸𑀲𑁄, 𑀅𑀢𑀻𑀯 𑀤𑁄𑀫𑀦𑀲𑁆𑀲𑀺 𑀢𑁄;

‘‘𑀧𑀳𑀽 𑀅𑀬𑀜𑁆𑀳𑀺 𑀲𑀫𑀡𑁄, 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀺𑀢𑀼𑀁.

𑀢𑀲𑁆𑀫𑀸 𑀅𑀜𑁆𑀜𑀢𑁆𑀣 𑀦𑁂𑀢𑀩𑁆𑀩𑀸, 𑀥𑀸𑀢𑀼𑀬𑁄’’𑀇𑀢𑀺 𑀘𑀺𑀦𑁆𑀢𑀺𑀬;

𑀢𑀢𑁆𑀣 𑀞𑀺𑀢𑀁 𑀪𑀸𑀕𑀺𑀦𑁂𑀬𑁆𑀬𑀁, 𑀆𑀓𑀸𑀭𑁂𑀦 𑀦𑀺𑀯𑁂𑀤𑀬𑀺.

𑀦𑀸𑀫𑁂𑀦 𑀯𑀸𑀲𑀼𑀮𑀤𑀢𑁆𑀢𑁄, 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀇𑀗𑁆𑀕𑀺𑀢𑀁;

𑀕𑀦𑁆𑀢𑁆𑀯𑀸 𑀢𑀁 𑀘𑁂𑀢𑀺𑀬𑀖𑀭𑀁, 𑀕𑀺𑀮𑀺𑀢𑁆𑀯𑀸𑀦 𑀓𑀭𑀡𑁆𑀟𑀓𑀁.

𑀲𑀺𑀦𑁂𑀭𑀼𑀧𑀸𑀤𑀁 ¶ 𑀕𑀦𑁆𑀢𑁆𑀯𑀸𑀦, 𑀓𑀼𑀡𑁆𑀟𑀮𑀸𑀯𑀝𑁆𑀝𑀓𑁄𑀲𑀬𑀺;

𑀢𑀺𑀬𑁄𑀚𑀦𑀲𑀢𑀁 𑀤𑀻𑀖𑁄, 𑀪𑁄𑀕𑁄𑀬𑁄𑀚𑀦𑀯𑀝𑁆𑀝𑀯𑀸.

𑀅𑀦𑁂𑀓𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀫𑀸𑀧𑁂𑀢𑁆𑀯𑀸𑀦 𑀨𑀡𑀸𑀦𑀺 𑀘;

𑀥𑀽𑀧𑀸𑀬𑀢𑀺 𑀧𑀚𑁆𑀚𑀮𑀢𑀺, 𑀲𑀬𑀺𑀢𑁆𑀯𑀸 𑀲𑁄 𑀫𑀳𑀺𑀤𑁆𑀥𑀺𑀓𑁄.

𑀅𑀦𑁂𑀓𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀅𑀳𑀺;

𑀫𑀸𑀧𑀬𑀺𑀢𑁆𑀯𑀸 𑀲𑀬𑀸𑀧𑁂𑀲𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑁂.

𑀩𑀳𑀽 𑀤𑁂𑀯𑀸 𑀘 𑀦𑀸𑀕𑀸 𑀘, 𑀑𑀲𑀭𑀺𑀁𑀲𑀼 𑀢𑀳𑀺𑀁 𑀢𑀤𑀸;

‘‘𑀬𑀼𑀤𑁆𑀥𑀁 𑀉𑀪𑀺𑀦𑁆𑀦𑀁 𑀦𑀸𑀕𑀸𑀦𑀁, 𑀧𑀲𑀺𑀲𑁆𑀲𑀸𑀫 𑀫𑀬𑀁’’𑀇𑀢𑀺.

𑀫𑀸𑀢𑀼𑀮𑁄 𑀪𑀸𑀕𑀺𑀦𑁂𑀬𑁆𑀬𑁂𑀦, 𑀳𑀝𑀸𑀢𑀸 𑀥𑀸𑀢𑀼𑀬𑁄 𑀇𑀢𑀺;

𑀜𑀢𑁆𑀯𑀸’𑀦𑀳 𑀣𑁂𑀭𑀁 𑀢𑀁, 𑀥𑀸𑀢𑀼𑀦𑀢𑁆𑀣𑀺 𑀫𑁂 𑀲𑀦𑁆𑀢𑀺𑀓𑁂 𑀇𑀢𑀺.

𑀆𑀤𑀺𑀢𑁄𑀧𑁆𑀧𑀪𑀼𑀢𑀺𑀣𑁂𑀭𑁄, 𑀢𑀸𑀲𑀁 𑀥𑀸𑀢𑀽𑀦𑀫𑀸𑀕𑀫𑀁;

𑀯𑀢𑁆𑀯𑀸𑀦 𑀦𑀸𑀕𑀭𑀸𑀚𑀁 𑀢𑀁, ‘‘𑀤𑁂𑀳𑀺 𑀥𑀸𑀢𑀽’’𑀢𑀺 𑀅𑀩𑁆𑀭𑀼𑀯𑀺.

𑀅𑀜𑁆𑀜𑀣𑀸 𑀲𑀜𑁆𑀜𑀸𑀧𑁂𑀢𑀼𑀁 𑀢𑀁, 𑀣𑁂𑀭𑀁 𑀲𑁄 𑀉𑀭𑀕𑀸𑀥𑀺𑀧𑁄;

𑀆𑀤𑀸𑀬 𑀘𑁂𑀢𑀺𑀬 𑀖𑀭𑀁, 𑀕𑀦𑁆𑀢𑁆𑀯𑀸 𑀢𑀁 𑀢𑀲𑁆𑀲 𑀯𑀡𑁆𑀡𑀬𑀺.

𑀅𑀦𑁂𑀓𑀥𑀸 𑀅𑀦𑁂𑀓𑁂𑀳𑀺, 𑀭𑀢𑀦𑁂𑀳𑀺 𑀲𑀼𑀲𑀗𑁆𑀔𑀢𑀁;

𑀘𑁂𑀢𑀺𑀬𑀁 𑀘𑁂𑀢𑀺𑀬𑀖𑀭𑀁, 𑀧𑀲𑁆𑀲 𑀪𑀺𑀓𑁆𑀔𑀼 𑀲𑀼𑀦𑀺𑀫𑁆𑀫𑀺𑀢𑀁.

𑀮𑀁𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀲𑀩𑁆𑀩𑀸𑀦𑀺 𑀭𑀢𑀦𑀸𑀦𑀺𑀧𑀺;

𑀲𑁄𑀧𑀸𑀦𑀦𑁆𑀢𑁂 𑀧𑀸𑀝𑀺𑀓𑀫𑁆𑀧𑀺, 𑀦𑀸𑀕𑁆𑀖𑀦𑁆𑀢’𑀜𑁆𑀜𑁂𑀲𑀼 𑀓𑀸 𑀓𑀣𑀸.

𑀫𑀳𑀸𑀲𑀓𑁆𑀓𑀸𑀭𑀞𑀸𑀦𑀫𑁆𑀳𑀸, 𑀅𑀧𑁆𑀧𑀲𑀓𑁆𑀓𑀸𑀭𑀞𑀸𑀦 𑀓𑀁;

𑀥𑀸𑀢𑀽𑀦𑀁 𑀦𑀬𑀦𑀁 𑀦𑀸𑀫, 𑀦𑀬𑀼𑀢𑁆𑀢𑀁 𑀪𑀺𑀓𑁆𑀔𑀼𑀯𑁄 𑀇𑀤𑀁.

‘‘𑀲𑀘𑁆𑀘𑀸𑀪𑀺𑀲𑀫𑀬𑁄 𑀦𑀸𑀫, 𑀢𑀼𑀫𑁆𑀳𑀸𑀓𑀁 𑀳𑀻𑀦 𑀯𑀺𑀚𑁆𑀚𑀢𑀺;

𑀲𑀘𑁆𑀘𑀸𑀪𑀺𑀲𑀫𑀬𑀞𑀸𑀦𑀁, 𑀦𑁂𑀢𑀼𑀁 𑀬𑀼𑀢𑁆𑀢𑀜𑁆𑀳𑀺 𑀥𑀸𑀢𑀼𑀬𑁄’’.

‘‘𑀲𑀁𑀲𑀸𑀭 𑀤𑀼𑀓𑁆𑀔 𑀫𑁄𑀓𑁆𑀔𑀸𑀬, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸;

𑀩𑀼𑀤𑁆𑀥𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄, 𑀢𑁂𑀦𑀦𑁂𑀲𑁆𑀲𑀸𑀫 𑀥𑀸𑀢𑀼𑀬𑁄.

𑀥𑀸𑀢𑀼𑀦𑀺𑀥𑀸𑀦𑀁 𑀅𑀚𑁆𑀚𑁂’𑀯, 𑀲𑁄 𑀳𑀺 𑀭𑀸𑀚𑀸 𑀓𑀭𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀧𑀧𑀜𑁆𑀘𑀫𑀓𑀭𑀺𑀢𑁆𑀯𑀸, 𑀮𑀳𑀼𑀁 𑀫𑁂 𑀤𑁂𑀳𑀺 𑀥𑀸𑀢𑀼𑀬𑁄’’.

𑀦𑀸𑀕𑁄𑀆𑀳𑀲𑀘𑁂 𑀪𑀦𑁆𑀢𑁂, 𑀢𑀼𑀯𑀁 𑀧𑀲𑁆𑀲𑀲𑀺 𑀥𑀸𑀢𑀼𑀬𑁄;

𑀕𑀳𑁂𑀢𑁆𑀯𑀸 𑀬𑀸𑀳𑀺 𑀢𑀁 𑀣𑁂𑀭𑁄, 𑀢𑀺𑀓𑁆𑀔𑀢𑁆𑀢𑀼𑀁 𑀢𑀁 𑀪𑀡𑀸𑀧𑀺𑀬.

𑀲𑀼𑀔𑀼𑀫𑀁 ¶ 𑀓𑀭𑀁 𑀫𑀸𑀧𑀬𑀺𑀢𑁆𑀯𑀸, 𑀣𑁂𑀭𑁄 𑀢𑀢𑁆𑀭𑀞𑀺𑀢𑁄’𑀯𑀲𑁄;

𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀯𑀤𑀦𑁂, 𑀳𑀢𑁆𑀣𑀁 𑀧𑀓𑁆𑀔𑀺𑀧𑁆𑀧 𑀢𑀸𑀯𑀤𑁂.

𑀥𑀸𑀢𑀼𑀓𑀭𑀡𑁆𑀟𑀁 𑀆𑀤𑀸𑀬, ‘‘𑀢𑀺𑀝𑁆𑀞 𑀦𑀸𑀕𑀸’’𑀢𑀺 𑀪𑀸𑀲𑀺𑀬;

𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀣𑀯𑀺𑀬𑀁, 𑀧𑀭𑀺𑀯𑁂𑀡𑀫𑁆𑀳𑀺 𑀉𑀝𑁆𑀞𑀳𑀺.

𑀦𑀸𑀕𑀭𑀸𑀚𑀸 𑀕𑀢𑁄 𑀪𑀺𑀓𑁆𑀔𑀼, 𑀅𑀫𑁆𑀳𑁂𑀳𑀺 𑀯𑀜𑁆𑀘𑀺𑀢𑁄’’𑀇𑀢𑀺;

𑀥𑀸𑀢𑀼 𑀆𑀦𑀬𑀦𑀢𑁆𑀣𑀸𑀬, 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀧𑀸𑀳𑀺𑀡𑀺.

𑀪𑀸𑀕𑀺𑀦𑁂𑀬𑁆𑀬𑁄’𑀣 𑀓𑀼𑀘𑁆𑀙𑀺𑀫𑁆𑀳𑀺, 𑀅𑀧𑀲𑁆𑀲𑀺𑀢𑁆𑀯𑀸 𑀓𑀭𑀡𑁆𑀟𑀓𑀁;

𑀧𑀭𑀺𑀤𑁂𑀯𑀫𑀸𑀦𑁄 𑀆𑀕𑀦𑁆𑀢𑁆𑀯𑀸, 𑀫𑀸𑀢𑀼𑀮𑀲𑁆𑀲 𑀦𑀺𑀯𑁂𑀤𑀬𑀺.

𑀢𑀤𑀸 𑀲𑁄 𑀦𑀸𑀕𑀭𑀸𑀚𑀸𑀧𑀺, ‘‘𑀯𑀜𑁆𑀘𑀺𑀢𑀫𑁆𑀳 𑀫𑀬𑀁’’𑀇𑀢𑀺;

𑀧𑀭𑀺𑀤𑁂𑀯𑀺 𑀦𑀸𑀕𑀸 𑀲𑀩𑁆𑀩𑁂𑀧𑀺, 𑀧𑀭𑀺𑀤𑁂𑀯𑀺𑀁𑀲𑀼 𑀧𑀻𑀴𑀺𑀢𑀸.

𑀪𑀺𑀓𑁆𑀔𑀼 𑀦𑀸𑀕𑀲𑁆𑀲 𑀯𑀺𑀚𑀬𑁂, 𑀢𑀼𑀝𑁆𑀞𑀸 𑀤𑁂𑀯𑀸 𑀲𑀫𑀸𑀕𑀢𑀸;

𑀥𑀸𑀢𑀼𑀬𑁄 𑀧𑀽𑀚𑀬𑀦𑁆𑀢𑀸𑀢𑀸, 𑀢𑁂𑀦𑁂𑀯 𑀲𑀳 𑀆𑀕𑀫𑀼𑀁.

𑀧𑀭𑀺𑀤𑁂𑀯𑀫𑀸𑀦𑀸 𑀆𑀕𑀦𑁆𑀢𑁆𑀯𑀸, 𑀦𑀸𑀕𑀸 𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂;

𑀩𑀳𑀼𑀥𑀸 𑀧𑀭𑀺𑀤𑁂𑀯𑀺𑀁𑀲𑀼, 𑀥𑀸𑀢𑀸𑀳𑀭𑀡 𑀤𑀼𑀓𑁆𑀔𑀺𑀢𑀸.

𑀢𑁂𑀲𑀁 𑀲𑀗𑁆𑀖𑁄’𑀦𑀼𑀓𑀫𑁆𑀧𑀸𑀬, 𑀣𑁄𑀓𑀁 𑀥𑀸𑀢𑀼𑀫𑀤𑀸𑀧𑀬𑀺;

𑀢𑁂 𑀢𑁂𑀦 𑀢𑀼𑀝𑁆𑀞𑀸 𑀕𑀦𑁆𑀢𑁆𑀯𑀸𑀦, 𑀧𑀽𑀚𑀸 𑀪𑀡𑁆𑀟𑀸𑀦𑀺 𑀆𑀳𑀭𑀼𑀁.

𑀲𑀓𑁆𑀓𑁄 𑀭𑀢𑀦𑀧𑀮𑁆𑀮𑀗𑁆𑀓𑀁, 𑀲𑁄𑀡𑁆𑀡𑀘𑀗𑁆𑀓𑁄𑀝𑀫𑁂𑀯 𑀘;

𑀆𑀤𑀸𑀬 𑀲𑀳 𑀤𑁂𑀯𑁂𑀳𑀺, 𑀢𑀁 𑀞𑀸𑀦𑀁 𑀲𑀫𑀼𑀧𑀸𑀕𑀢𑁄.

𑀣𑁂𑀭𑀲𑁆𑀲 𑀉𑀕𑁆𑀕𑀢𑀞𑀸𑀦𑁂, 𑀓𑀸𑀭𑀺𑀢𑁂 𑀯𑀺𑀲𑁆𑀲𑀓𑀫𑁆𑀫𑀼𑀦𑀸;

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁, 𑀲𑀼𑀪𑁂 𑀭𑀢𑀦𑀫𑀡𑁆𑀟𑀧𑁂.

𑀫𑀸𑀢𑀼𑀓𑀭𑀡𑁆𑀟𑀫𑀸𑀤𑀸𑀬, 𑀢𑀲𑁆𑀲 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄;

𑀘𑀗𑁆𑀓𑁄𑀝𑀓𑁂 𑀞𑀧𑁂𑀢𑁆𑀯𑀸𑀦, 𑀧𑀮𑁆𑀮𑀗𑁆𑀓𑁂 𑀧𑀯𑀭𑁂𑀞𑀧𑀺.

𑀩𑁆𑀭𑀳𑁆𑀫𑀸 𑀙𑀢𑁆𑀢𑀫𑀥𑀸𑀭𑁂𑀲𑀺, 𑀲𑀦𑁆𑀢𑀼𑀲𑁆𑀲𑀺𑀢𑁄 𑀯𑀸𑀴𑀩𑀻𑀚𑀦𑀺𑀁;

𑀫𑀡𑀺𑀢𑀸𑀮𑀯𑀡𑁆𑀝𑀁 𑀲𑀼𑀬𑀸𑀫𑁄, 𑀲𑀓𑁆𑀓𑁄 𑀲𑀗𑁆𑀔𑀁 𑀢𑀼𑀲𑁄𑀤𑀓𑀁.

𑀘𑀢𑁆𑀢𑀸𑀭𑁄 𑀢𑀼 𑀫𑀳𑀸𑀭𑀸𑀚𑀸, 𑀅𑀝𑁆𑀞𑀁𑀲𑀼 𑀔𑀕𑁆𑀕𑀧𑀸𑀡𑀺𑀦𑁄;

𑀲𑀫𑀼𑀕𑁆𑀕𑀳𑀢𑁆𑀣𑀸 𑀢𑁂𑀢𑁆𑀢𑀺𑀁𑀲, 𑀤𑁂𑀯𑀧𑀼𑀢𑁆𑀢𑀸 𑀫𑀳𑀺𑀤𑁆𑀥𑀺𑀓𑀸.

𑀧𑀸𑀭𑀺𑀘𑁆𑀙𑀢𑁆𑀢𑀓 𑀧𑀼𑀧𑁆𑀨𑁂𑀳𑀺, 𑀧𑀽𑀚𑀬𑀦𑁆𑀢𑀸 𑀢𑀳𑀺𑀁𑀞𑀺𑀢𑀸;

𑀓𑀼𑀫𑀸𑀭𑀺𑀬𑁄𑀢𑀼 𑀤𑁆𑀯𑀢𑁆𑀢𑀺𑀁𑀲, 𑀤𑀡𑁆𑀟𑀤𑀻𑀧𑀥𑀭𑀸 𑀞𑀺𑀢𑀸.

𑀧𑀮𑀸𑀧𑁂𑀢𑁆𑀯𑀸 ¶ 𑀤𑀼𑀝𑁆𑀞𑀬𑀓𑁆𑀔𑁂, 𑀬𑀓𑁆𑀔𑀲𑁂𑀦𑀸𑀧𑀢𑀺 𑀧𑀦;

𑀅𑀝𑁆𑀞𑀯𑀻𑀲𑀢𑀺 𑀅𑀝𑁆𑀞𑀁𑀲𑀼, 𑀆𑀭𑀓𑁆𑀔𑀁 𑀓𑀼𑀭𑀼𑀫𑀸𑀦𑀓𑀸.

𑀯𑀻𑀡𑀁 𑀯𑀸𑀤𑀬𑀫𑀸𑀦𑁄’𑀯, 𑀅𑀝𑁆𑀞𑀸 𑀧𑀜𑁆𑀘𑀲𑀺𑀔𑁄 𑀢𑀳𑀺𑀁;

𑀭𑀗𑁆𑀕𑀪𑀽𑀫𑀺𑀁 𑀫𑀸𑀧𑀬𑀺𑀢𑁆𑀯𑀸, 𑀢𑀺𑀫𑁆𑀧𑀭𑀼𑀢𑀼𑀭𑀺𑀬 𑀖𑁄𑀲𑀯𑀸.

𑀅𑀦𑁂𑀓𑀤𑁂𑀯𑀧𑀼𑀢𑁆𑀢𑀸 𑀘, 𑀲𑀸𑀥𑀼𑀕𑀻𑀢𑀧𑁆𑀧𑀬𑁄𑀚𑀓𑀸;

𑀫𑀳𑀸𑀓𑀸𑀴𑁄 𑀦𑀸𑀕𑀭𑀸𑀚𑀸, 𑀣𑀼𑀬𑀫𑀸𑀦𑁄 𑀅𑀦𑁂𑀓𑀥𑀸.

𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀚𑁆𑀚𑀦𑁆𑀢𑀺, 𑀤𑀺𑀩𑁆𑀩𑀲𑀁𑀕𑀻𑀢𑀺 𑀯𑀢𑁆𑀢𑀢𑀺;

𑀤𑀺𑀩𑁆𑀩𑀕𑀦𑁆𑀥𑀸𑀤𑀺𑀯𑀲𑁆𑀲𑀸𑀦𑀺, 𑀯𑀲𑁆𑀲𑀧𑁂𑀦𑁆𑀢𑀺 𑀘 𑀤𑁂𑀯𑀢𑀸.

𑀲𑁄 𑀇𑀦𑁆𑀤𑀕𑀼𑀢𑁆𑀢𑀣𑁂𑀭𑁄𑀢𑀼, 𑀫𑀸𑀭𑀲𑁆𑀲 𑀧𑀝𑀺𑀩𑀸𑀳𑀦𑀁;

𑀘𑀓𑁆𑀓𑀯𑀸𑀴𑀲𑀫𑀁 𑀓𑀢𑁆𑀯𑀸, 𑀮𑁄𑀳𑀘𑁆𑀙𑀢𑁆𑀢𑀫𑀫𑀸𑀧𑀬𑀺.

𑀫𑀸𑀢𑀽𑀦𑀁 𑀧𑀼𑀭𑀢𑁄 𑀘𑁂𑀯, 𑀢𑀢𑁆𑀣 𑀢𑀢𑁆𑀣 𑀘 𑀧𑀜𑁆𑀘𑀲𑀼;

𑀞𑀸𑀦𑁂𑀲𑀼 𑀕𑀡𑀲𑀚𑁆𑀛𑀸𑀬𑀁, 𑀓𑀭𑀺𑀁𑀲𑁆𑀯 𑀔𑀺𑀮𑀪𑀺𑀓𑁆𑀔𑀯𑁄.

𑀢𑀢𑁆𑀣𑀸’𑀕𑀫𑀸 𑀫𑀳𑀸𑀭𑀸𑀚𑀸, 𑀧𑀳𑀝𑁆𑀞𑁄 𑀤𑀼𑀝𑁆𑀞𑀕𑀸𑀫𑀡𑀺;

𑀲𑀻𑀲𑁂𑀦𑀸’𑀤𑀸𑀬 𑀆𑀦𑀻𑀢𑁂, 𑀘𑀗𑁆𑀓𑁄𑀝𑀫𑁆𑀳𑀺 𑀲𑀼𑀯𑀡𑁆𑀡𑀬𑁂.

𑀞𑀧𑁂𑀢𑁆𑀯𑀸 𑀥𑀸𑀢𑀼 𑀘𑀗𑁆𑀓𑁄𑀝𑀁, 𑀧𑀢𑀺𑀝𑁆𑀞𑀸𑀧𑀺𑀬 𑀆𑀲𑀦𑁂;

𑀥𑀸𑀢𑀼𑀁 𑀧𑀽𑀚𑀻𑀬 𑀯𑀦𑁆𑀤𑀺𑀢𑁆𑀯𑀸, 𑀞𑀺𑀢𑁄 𑀧𑀜𑁆𑀘𑀮𑀻𑀓𑁄 𑀢𑀳𑀺𑀁.

𑀤𑀺𑀩𑁆𑀩𑀘𑁆𑀙𑀢𑁆𑀢𑀸𑀤𑀺𑀓𑀸𑀦𑁂𑀢𑁆𑀣, 𑀤𑀺𑀩𑁆𑀩𑀕𑀦𑁆𑀥𑀸𑀤𑀺𑀓𑀸𑀦𑀺 𑀘;

𑀧𑀲𑁆𑀲𑀺𑀢𑁆𑀯𑀸 𑀤𑀺𑀩𑁆𑀩𑀢𑀽𑀭𑀺𑀬𑀸𑀤𑀺-𑀲𑀤𑁆𑀤𑁂 𑀲𑀼𑀢𑁆𑀯𑀸 𑀘 𑀔𑀢𑁆𑀢𑀺𑀬𑁄.

𑀅𑀧𑀲𑁆𑀲𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑁂𑀯𑁄, 𑀢𑀼𑀝𑁆𑀞𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑁄;

𑀥𑀸𑀢𑀼𑀙𑀢𑁆𑀢𑁂𑀦 𑀧𑀽𑀚𑁂𑀲𑀺, 𑀮𑀁𑀓𑀸𑀭𑀚𑁆𑀚𑁂’𑀪𑀺𑀲𑀺𑀜𑁆𑀘𑀺 𑀘.

‘‘𑀤𑀺𑀩𑁆𑀩𑀘𑁆𑀙𑀢𑁆𑀢𑀁 𑀫𑀸𑀦𑀼𑀲𑀜𑁆𑀘, 𑀯𑀺𑀫𑀼𑀢𑁆𑀢𑀺𑀘𑁆𑀙𑀢𑁆𑀢𑀫𑁂𑀯 𑀘;

𑀇𑀢𑀺 𑀢𑀺𑀘𑁆𑀙𑀺𑀢𑁆𑀢𑀥𑀸𑀭𑀺𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄.

𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀫𑁂 𑀭𑀚𑁆𑀚𑀁, 𑀤𑀫𑁆𑀫𑀻’𑀢𑀺 𑀳𑀝𑁆𑀞𑀫𑀸𑀦𑀲𑁄;

𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀥𑀸𑀢𑀽𑀦𑀁, 𑀮𑀁𑀓𑀸𑀭𑀚𑁆𑀚𑀫𑀤𑀸𑀲𑀺𑀲𑁄.

𑀧𑀽𑀚𑀬𑀦𑁆𑀢𑁄 𑀥𑀸𑀢𑀼𑀬𑁄𑀢𑀸, 𑀤𑁂𑀯𑁂𑀳𑀺 𑀫𑀸𑀦𑀼𑀲𑁂𑀳𑀺 𑀘;

𑀲𑀳 𑀘𑀗𑁆𑀓𑁄𑀝𑀓𑁂𑀳𑁂𑀯, 𑀲𑀻𑀲𑁂𑀦𑀸𑀤𑀸𑀬 𑀔𑀢𑁆𑀢𑀺𑀬𑁄.

𑀪𑀺𑀓𑁆𑀔𑀼𑀲𑀗𑁆𑀖 𑀧𑀭𑀺𑀩𑁆𑀬𑀼𑀴𑁆𑀳𑁄, 𑀓𑀢𑁆𑀯𑀸 𑀣𑀽𑀧𑀁 𑀧𑀤𑀓𑁆𑀔𑀺𑀡𑀁;

𑀧𑀸𑀘𑀺𑀦𑀢𑁄 𑀆𑀳𑀭𑀺𑀢𑁆𑀯𑀸, 𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀑𑀢𑀭𑀺.

𑀅𑀭𑀳𑀦𑁆𑀢𑁄 𑀙𑀦𑁆𑀦𑀯𑀼𑀢𑀺-𑀓𑁄𑀝𑀺𑀬𑁄 𑀣𑀽𑀧𑀫𑀼𑀢𑁆𑀢𑀫𑀁;

𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀅𑀝𑁆𑀞𑀁𑀲𑀼 𑀓𑀢𑀧𑀜𑁆𑀚𑀮𑀻.

𑀑𑀢𑀭𑀺𑀢𑁆𑀯𑀸 ¶ 𑀥𑀸𑀢𑀼𑀕𑀩𑁆𑀪𑀁, 𑀫𑀳𑀕𑁆𑀖𑁂 𑀲𑀬𑀦𑁂𑀲𑀼𑀪𑁂;

𑀞𑀧𑁂𑀲𑁆𑀲𑀸𑀫𑀺𑀢𑀺 𑀘𑀺𑀦𑁆𑀢𑁂𑀦𑁆𑀢𑁂, 𑀧𑀻𑀢𑀺𑀧𑀼𑀡𑁆𑀡𑀦𑀭𑀺𑀲𑁆𑀲𑀭𑁂.

𑀲𑀥𑀸𑀢𑀼 𑀥𑀸𑀢𑀼𑀘𑀗𑁆𑀓𑁄𑀝𑁄, 𑀉𑀕𑁆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀻𑀲𑀢𑁄;

𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀫𑁆𑀳𑀺, 𑀆𑀓𑀸𑀲𑀫𑁆𑀳𑀺 𑀞𑀺𑀢𑁄 𑀢𑀢𑁄.

𑀲𑀬𑀁 𑀓𑀭𑀡𑁆𑀟𑁄 𑀯𑀺𑀯𑀭𑀺, 𑀉𑀕𑁆𑀕𑀦𑁆𑀢𑁆𑀯𑀸 𑀥𑀸𑀢𑀼𑀬𑁄 𑀢𑀢𑁄;

𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸𑀦, 𑀮𑀓𑁆𑀔𑀡𑁂𑀩𑁆𑀬𑀜𑁆𑀚𑀦𑀼𑀚𑁆𑀚𑀮𑀁.

𑀕𑀡𑁆𑀟𑀫𑁆𑀩𑀫𑀽𑀮𑁂 𑀩𑀼𑀤𑁆𑀥𑁄’𑀯, 𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁;

𑀅𑀓𑀁𑀲𑀼 𑀥𑀭𑀫𑀸𑀦𑁂𑀦, 𑀲𑀼𑀕𑀢𑁂𑀦 𑀅𑀥𑀺𑀝𑁆𑀞𑀺𑀢𑀁.

𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀲𑀦𑁆𑀦𑁂𑀓𑀕𑁆𑀕𑀫𑀸𑀦𑀲𑀸;

𑀤𑁂𑀯𑀸𑀫𑀦𑀼𑀲𑁆𑀲𑀸 𑀅𑀭𑀳𑀢𑁆𑀢𑀁, 𑀧𑀢𑁆𑀢𑀸 𑀤𑁆𑀯𑀸𑀤𑀲 𑀓𑁄𑀝𑀺𑀬𑁄.

𑀲𑁂𑀲𑀸 𑀨𑀮𑀢𑁆𑀢𑀬𑀁 𑀧𑀢𑁆𑀢𑀸, 𑀅𑀢𑀻𑀢𑀸 𑀕𑀡𑀦𑀸𑀧𑀣𑀁;

𑀳𑀺𑀢𑁆𑀯𑀸’𑀣 𑀩𑀼𑀤𑁆𑀥𑀯𑁂𑀲𑀁 𑀢𑀸, 𑀓𑀭𑀡𑁆𑀟𑀫𑁆𑀳𑀺 𑀧𑀢𑀺𑀝𑁆𑀞𑀬𑀼𑀁.

𑀢𑀢𑁄 𑀑𑀭𑀼𑀬𑁆𑀳 𑀘𑀗𑁆𑀓𑁄𑀝𑁄, 𑀭𑀜𑁆𑀜𑁄 𑀲𑀻𑀲𑁂 𑀧𑀢𑀺𑀝𑁆𑀞𑀳𑀺;

𑀲𑀳𑀺𑀦𑁆𑀤𑀕𑀼𑀢𑁆𑀢𑀣𑁂𑀭𑁂𑀦, 𑀦𑀸𑀝𑀓𑀻𑀳𑀺 𑀘 𑀲𑁄 𑀧𑀦.

𑀥𑀸𑀢𑀼𑀕𑀩𑁆𑀪𑀁𑀧𑀭𑀺𑀳𑀭𑀁, 𑀧𑀢𑁆𑀯𑀸𑀦 𑀲𑀬𑀦𑀁 𑀲𑀼𑀪𑀁;

𑀘𑀗𑁆𑀓𑁄𑀝𑀁 𑀭𑀢𑀦𑀧𑀮𑁆𑀮𑀗𑁆𑀓𑁂, 𑀞𑀧𑀬𑀺𑀢𑁆𑀯𑀸 𑀚𑀼𑀢𑀺𑀦𑁆𑀥𑀭𑁄.

𑀥𑁄𑀯𑀺𑀢𑁆𑀯𑀸𑀦 𑀧𑀼𑀦𑁄𑀳𑀢𑁆𑀣𑁂, 𑀕𑀦𑁆𑀥𑀯𑀸𑀲𑀺𑀢 𑀯𑀸𑀭𑀺𑀦𑀸;

𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀦, 𑀉𑀩𑁆𑀩𑀢𑁂𑀢𑁆𑀯𑀸 𑀲𑀕𑀸𑀭𑀯𑁄.

𑀓𑀭𑀡𑁆𑀟𑀁 𑀯𑀺𑀯𑀭𑀺𑀢𑁆𑀯𑀸𑀦, 𑀢𑀸𑀕𑀳𑁂𑀢𑁆𑀯𑀸𑀦 𑀥𑀸𑀢𑀼𑀬𑁄;

𑀇𑀢𑀺 𑀘𑀺𑀦𑁆𑀢𑀬𑀺 𑀪𑀽𑀫𑀺𑀦𑁆𑀤𑁄, 𑀫𑀳𑀸𑀚𑀦𑀳𑀺𑀢𑀢𑁆𑀣𑀺𑀓𑁄.

𑀅𑀦𑀸𑀓𑀼𑀮𑀁 𑀓𑁂𑀳𑀺𑀘𑀺𑀧𑀺, 𑀬𑀤𑀺 𑀳𑁂𑀲𑁆𑀲𑀦𑁆𑀢𑀺 𑀥𑀸𑀢𑀼𑀬𑁄;

𑀚𑀦𑀲𑁆𑀲 𑀲𑀭𑀡𑀁 𑀳𑀼𑀢𑁆𑀯𑀸, 𑀬𑀤𑀺 𑀞𑀲𑁆𑀲𑀦𑁆𑀢𑀺 𑀥𑀸𑀢𑀼𑀬𑁄.

𑀲𑀢𑁆𑀣𑀼𑀦𑀺𑀧𑀦𑁆𑀦𑀸𑀓𑀸𑀭𑁂𑀦, 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀓𑁂;

𑀦𑀺𑀧𑀚𑁆𑀚𑀦𑁆𑀢𑀼 𑀲𑀼𑀧𑀜𑁆𑀜𑀢𑁆𑀢𑁂, 𑀲𑀬𑀦𑀫𑁆𑀳𑀺 𑀫𑀳𑀸𑀭𑀳𑁂.

𑀇𑀢𑀺 𑀘𑀺𑀦𑁆𑀢𑀺𑀬 𑀲𑁄 𑀥𑀸𑀢𑀽, 𑀞𑀧𑁂𑀲𑀺 𑀲𑀬𑀦𑀼𑀢𑁆𑀢𑀫𑁂;

𑀢𑀤𑀸 𑀓𑀸𑀭𑀸 𑀥𑀸𑀢𑀼𑀬𑁄 𑀘, 𑀲𑀳𑀺𑀁𑀲𑀼 𑀲𑀬𑀦𑀼𑀢𑁆𑀢𑀫𑁂.

𑀆𑀲𑀴𑁆𑀳𑀻𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀧𑀦𑁆𑀦𑀭𑀲𑀉𑀧𑁄𑀲𑀣𑁂;

𑀉𑀢𑁆𑀢𑀭𑀸𑀲𑀴𑁆𑀳𑀦𑀓𑁆𑀔𑀢𑁆𑀢𑁂, 𑀏𑀯𑀁 𑀥𑀸𑀢𑀼𑀧𑀢𑀺𑀝𑁆𑀞𑀺𑀢𑀸.

𑀲𑀳 ¶ 𑀥𑀸𑀢𑀼𑀧𑀢𑀺𑀝𑁆𑀞𑀸𑀦𑀸, 𑀅𑀓𑁆𑀔𑀫𑁆𑀧𑀺𑀢𑁆𑀣 𑀫𑀳𑀸𑀫𑀳𑀻;

𑀧𑀸𑀝𑀺𑀳𑀻𑀭𑀸𑀦𑀺𑀦𑁂𑀓𑀸𑀦𑀺, 𑀧𑀯𑀢𑁆𑀢𑀺𑀁𑀲𑀼 𑀅𑀦𑁂𑀓𑀥𑀸.

𑀭𑀸𑀚𑀸 𑀧𑀲𑀦𑁆𑀦𑁄𑀥𑀸𑀢𑀼𑀢𑀸, 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑀬𑀺;

𑀮𑀁𑀓𑀸𑀬 𑀭𑀚𑁆𑀚𑀁 𑀲𑀓𑀮𑀁, 𑀲𑀢𑁆𑀢𑀸𑀳𑀸𑀦𑀺 𑀅𑀤𑀸𑀲𑀺 𑀘.

𑀓𑀸𑀬𑁂 𑀘 𑀲𑀩𑁆𑀩𑀸𑀮𑀗𑁆𑀓𑀸𑀭𑀁, 𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀧𑀽𑀚𑀬𑀺;

𑀢𑀣𑀸𑀦𑀸𑀝𑀓𑀺𑀬𑁄’𑀫𑀘𑁆𑀙𑀸, 𑀧𑀭𑀺𑀲𑀸 𑀤𑁂𑀯𑀢𑀸𑀧𑀺 𑀘.

𑀯𑀢𑁆𑀣𑀕𑀼𑀴𑀖𑀢𑀸𑀤𑀻𑀦𑀺, 𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀪𑀽𑀧𑀢𑀺;

𑀪𑀺𑀓𑁆𑀔𑀽𑀳𑀺 𑀕𑀡𑀲𑀚𑁆𑀛𑀸𑀬𑀁, 𑀓𑀸𑀭𑁂𑀢𑁆𑀯𑀸’𑀔𑀺𑀮𑀭𑀢𑁆𑀢𑀺𑀬𑀁.

𑀧𑀼𑀦𑀸𑀳𑀦𑀺 𑀧𑀼𑀭𑁂𑀪𑁂𑀭𑀺𑀁, 𑀘𑀸𑀭𑁂𑀲𑀺 ‘‘𑀲𑀓𑀮𑀸 𑀚𑀦𑀸;

𑀯𑀺𑀦𑁆𑀤𑀦𑁆𑀢𑀼 𑀥𑀸𑀢𑀼𑀲𑀢𑁆𑀢𑀸𑀳𑀁, 𑀇𑀫𑀁’’𑀢𑀺 𑀚𑀦𑀢𑀸𑀳𑀺𑀢𑁄.

𑀇𑀦𑁆𑀤𑀕𑀼𑀢𑁆𑀢𑁄 𑀫𑀳𑀸𑀣𑁂𑀭𑁄, 𑀅𑀤𑀺𑀝𑁆𑀞𑀸𑀲𑀺 𑀫𑀳𑀺𑀤𑁆𑀥𑀺𑀓𑁄;

‘‘𑀥𑀸𑀢𑀼 𑀯𑀦𑁆𑀤𑀺𑀢𑀼𑀓𑀸𑀫𑀸𑀬𑁂, 𑀮𑀁𑀓𑀸𑀤𑀻𑀧𑀫𑁆𑀳𑀺 𑀫𑀸𑀦𑀼𑀲𑀸.

𑀢𑀗𑁆𑀔𑀡𑀁𑀬𑁂𑀯 𑀆𑀕𑀦𑁆𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀥𑀸𑀢𑀼𑀬𑁄 𑀇𑀥;

𑀬𑀣𑀸 𑀲𑀓𑀁 𑀖𑀭𑀁 𑀬𑀦𑁆𑀢𑀼’’, 𑀢𑀁 𑀬𑀣𑀸𑀥𑀺𑀝𑁆𑀞𑀺𑀢𑀁 𑀅𑀳𑀼.

𑀲𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀫𑀳𑀸𑀭𑀸𑀚𑀸 𑀫𑀳𑀸𑀬𑀲𑁄;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀁.

𑀆𑀘𑀺𑀓𑁆𑀔𑀺𑀥𑀸𑀢𑀼𑀕𑀩𑁆𑀪𑀫𑁆𑀳𑀺, 𑀓𑀺𑀘𑁆𑀘𑀁 𑀦𑀺𑀞𑀸𑀧𑀺𑀢𑀁 𑀫𑀬𑀸;

𑀥𑀸𑀢𑀼𑀕𑀩𑁆𑀪𑀧𑀺𑀥𑀸𑀦𑀁𑀢𑀼, 𑀲𑀗𑁆𑀖𑁄 𑀚𑀸𑀦𑀺𑀢𑀼𑀫𑀭𑀳𑀢𑀺.

𑀲𑀗𑁆𑀖𑁄 𑀢𑁂 𑀤𑁆𑀯𑁂 𑀲𑀸𑀫𑀡𑁂𑀭𑁂, 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑁄𑀚𑀬𑀺;

𑀧𑀺𑀤𑀳𑀺𑀁𑀲𑀼 𑀥𑀸𑀢𑀼𑀕𑀩𑁆𑀪𑀁, 𑀧𑀸𑀲𑀸𑀡𑁂𑀦𑀸’𑀳𑀝𑁂𑀦 𑀢𑁂.

‘‘𑀫𑀸𑀮𑁂𑀢𑁆𑀣 𑀫𑀸 𑀫𑀺𑀮𑀸𑀬𑀦𑁆𑀢𑀼, 𑀕𑀦𑁆𑀥𑀸𑀲𑀼𑀲𑁆𑀲𑀦𑁆𑀢𑀼𑀫𑀸 𑀇𑀫𑁂;

𑀫𑀸 𑀦𑀺𑀩𑁆𑀩𑀸𑀬𑀦𑁆𑀢𑀼 𑀤𑀻𑀧𑀸𑀯, 𑀫𑀸 𑀓𑀺𑀜𑁆𑀘𑀸𑀧𑀺 𑀯𑀺𑀯𑀚𑁆𑀚𑀢𑀼.

𑀫𑁂𑀤𑀯𑀡𑁆𑀡 𑀙 𑀧𑀸𑀲𑀸𑀡𑀸, 𑀲𑀦𑁆𑀥𑀺𑀬𑀦𑁆𑀢𑀼𑀦𑀺𑀭𑀦𑁆𑀢𑀭𑀸’’;

𑀇𑀢𑀺 𑀖𑀻𑀡𑀸𑀲𑀯𑀸 𑀏𑀢𑁆𑀣, 𑀲𑀩𑁆𑀩𑀫𑁂𑀢𑀁 𑀅𑀥𑀺𑀝𑁆𑀞𑀬𑀼𑀁.

𑀆𑀡𑀸𑀧𑁂𑀲𑀺 𑀫𑀳𑀸𑀭𑀸𑀚𑀸, ‘‘𑀬𑀣𑀸𑀲𑀢𑁆𑀢𑀺𑀁 𑀫𑀳𑀸𑀚𑀦𑁄;

𑀥𑀸𑀢𑀼𑀦𑀺𑀥𑀸𑀦𑀓𑀸𑀦𑁂’𑀢𑁆𑀣, 𑀓𑀭𑁄𑀢𑀽’’𑀢𑀺 𑀳𑀺𑀢𑀢𑁆𑀣𑀺𑀓𑁄.

𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑀲𑁆𑀲, 𑀧𑀺𑀝𑁆𑀞𑀺𑀫𑁆𑀳𑀺 𑀘 𑀫𑀳𑀸𑀚𑀦𑁄;

𑀅𑀓𑀸 𑀲𑀳𑀲𑁆𑀲 𑀥𑀸𑀢𑀼𑀦𑀁, 𑀦𑀺𑀥𑀸𑀦𑀸𑀦𑀺 𑀬𑀣𑀸𑀩𑀮𑀁.

𑀧𑀺𑀤𑀳𑀸𑀧𑀺𑀬𑀢𑀁 𑀲𑀩𑁆𑀩𑀁, 𑀭𑀸𑀚𑀸𑀣𑀽𑀧𑀁 𑀲𑀫𑀸𑀧𑀬𑀺;

𑀘𑀢𑀼𑀭𑀲𑁆𑀲 𑀘 𑀬𑀜𑁆𑀘𑁂𑀢𑁆𑀣, 𑀘𑁂𑀢𑀺𑀬𑀫𑁆𑀳𑀺 𑀲𑀫𑀸𑀧𑀬𑀺.

𑀧𑀼𑀜𑁆𑀜𑀸𑀦𑀺 ¶ 𑀏𑀯𑀫𑀫𑀮𑀸𑀦𑀺 𑀲𑀬𑀜𑁆𑀘𑀲𑀦𑁆𑀢𑁄,

𑀓𑀼𑀩𑁆𑀩𑀦𑁆𑀢𑀺 𑀲𑀩𑁆𑀩𑀯𑀺𑀪𑀯𑀼𑀢𑁆𑀢𑀫𑀧𑀢𑁆𑀢𑀺 𑀳𑁂𑀢𑀼;

𑀓𑀸𑀭𑁂𑀦𑁆𑀢𑀺 𑀘𑀸𑀧𑀺𑀳𑀺’𑀔𑀺𑀮𑀸 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸,

𑀦𑀸𑀦𑀸𑀯𑀺𑀲𑁂𑀲𑀚𑀸𑀦𑀢𑀸 𑀧𑀭𑀺𑀯𑀸𑀭𑀳𑁂𑀢𑀽’’𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀅𑀦𑀺𑀝𑁆𑀞𑀺𑀢𑁂 𑀙𑀢𑁆𑀢𑀓𑀫𑁆𑀫𑁂, 𑀲𑀼𑀥𑀸𑀓𑀫𑁆𑀫𑁂 𑀘 𑀘𑁂𑀢𑀺𑀬𑁂;

𑀫𑀸𑀭𑀡𑀦𑁆𑀢𑀺𑀓𑀭𑁄𑀕𑁂𑀦, 𑀭𑀸𑀚𑀸 𑀆𑀲𑀺 𑀕𑀺𑀮𑀸𑀦𑀓𑁄.

𑀢𑀺𑀲𑁆𑀲𑀁 𑀧𑀓𑁆𑀓𑁄𑀲𑀬𑀺𑀢𑁆𑀯𑀸 𑀲𑁄, 𑀓𑀦𑀺𑀝𑁆𑀞𑀁 𑀤𑀻𑀖𑀯𑀸𑀧𑀺𑀢𑁄;

‘‘𑀣𑀽𑀧𑁂 𑀅𑀦𑀺𑀝𑁆𑀞𑀺𑀢𑀁 𑀓𑀫𑁆𑀫𑀁, 𑀦𑀺𑀝𑁆𑀞𑀸𑀧𑁂𑀳𑀻𑀢𑀺 𑀅𑀩𑁆𑀭𑀯𑀺.

𑀪𑀸𑀢𑀼𑀦𑁄 𑀤𑀼𑀩𑁆𑀩𑀮𑀢𑁆𑀢𑀸𑀲𑁄, 𑀢𑀼𑀦𑁆𑀦𑀯𑀸𑀬𑁂𑀳𑀺 𑀓𑀸𑀭𑀺𑀬;

𑀓𑀜𑁆𑀘𑀼𑀓𑀁 𑀲𑀼𑀤𑁆𑀥𑀯𑀢𑁆𑀣𑁂𑀳𑀺, 𑀢𑁂𑀦 𑀙𑀸𑀤𑀺𑀬 𑀘𑁂𑀢𑀺𑀬𑀁.

𑀘𑀺𑀢𑁆𑀢𑀓𑀸𑀭𑁂𑀳𑀺 𑀓𑀸𑀭𑁂𑀲𑀺, 𑀯𑁂𑀤𑀺𑀓𑀁 𑀢𑀢𑁆𑀣 𑀲𑀸𑀥𑀼𑀓𑀁;

𑀧𑀦𑁆𑀢𑀺𑀧𑀼𑀡𑁆𑀡𑀖𑀝𑀸𑀦𑀜𑁆𑀘, 𑀧𑀜𑁆𑀘𑀗𑁆𑀕𑀼𑀮𑀓𑀧𑀦𑁆𑀢𑀺𑀓𑀁.

𑀙𑀢𑁆𑀢𑀸𑀓𑀸𑀭𑁂𑀳𑀺 𑀓𑀸𑀭𑁂𑀲𑀺, 𑀙𑀢𑁆𑀢𑀁 𑀯𑁂𑀴𑀼𑀫𑀬𑀁 𑀢𑀣𑀸;

𑀔𑀭𑀧𑀢𑁆𑀢𑀫𑀬𑁂 𑀘𑀦𑁆𑀤-𑀲𑀽𑀭𑀺𑀬𑁂 𑀫𑀼𑀤𑁆𑀥𑀯𑁂𑀤𑀺𑀬𑀁.

𑀮𑀸𑀔𑀸𑀓𑀼𑀗𑁆𑀓𑀼𑀫𑀓𑁂𑀳𑁂’𑀢𑀁, 𑀘𑀺𑀢𑁆𑀢𑀬𑀺𑀢𑁆𑀯𑀸 𑀲𑀼𑀘𑀺𑀢𑁆𑀢𑀺𑀢𑀁;

𑀭𑀜𑁆𑀜𑁄 𑀦𑀺𑀯𑁂𑀤𑀬𑀺’’𑀣𑀽𑀧𑁂, 𑀓𑀢𑁆𑀢𑀩𑁆𑀩𑀁 𑀦𑀺𑀝𑁆𑀞𑀺𑀢𑀁’’𑀇𑀢𑀺.

𑀲𑀺𑀯𑀺𑀓𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀇𑀥𑀸𑀕𑀦𑁆𑀢𑁆𑀯𑀸 𑀫𑀳𑀻𑀧𑀢𑀺;

𑀧𑀤𑀓𑁆𑀔𑀺𑀡𑀁 𑀓𑀭𑀺𑀢𑁆𑀯𑀸𑀦, 𑀲𑀺𑀯𑀺𑀓𑀸𑀬𑁂’𑀯 𑀘𑁂𑀢𑀺𑀬𑀁.

𑀯𑀦𑁆𑀤𑀺𑀢𑁆𑀯𑀸 ¶ 𑀤𑀓𑁆𑀔𑀺𑀡𑀤𑁆𑀯𑀸𑀭𑁂, 𑀲𑀬𑀦𑁂 𑀪𑀽𑀫𑀺𑀲𑀦𑁆𑀣𑀢𑁂;

𑀲𑀬𑀺𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑁂𑀦, 𑀲𑁄 𑀫𑀳𑀸𑀣𑀽𑀧 𑀫𑀼𑀢𑁆𑀢𑀫𑀁.

𑀲𑀬𑀺𑀢𑁆𑀯𑀸 𑀯𑀸𑀫𑀧𑀲𑁆𑀲𑁂𑀲, 𑀮𑁄𑀳𑀧𑀸𑀲𑀸𑀤 𑀫𑀼𑀢𑁆𑀢𑀫𑀁;

𑀧𑀲𑁆𑀲𑀦𑁆𑀢𑁄 𑀲𑀼𑀫𑀦𑁄 𑀆𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑁂𑀓𑁆𑀔𑀢𑁄.

𑀕𑀺𑀮𑀸𑀦𑀧𑀼𑀘𑁆𑀙𑀦𑀢𑁆𑀣𑀸𑀬, 𑀆𑀕𑀢𑀸𑀳𑀺 𑀢𑀢𑁄 𑀢𑀢𑁄;

𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀬𑁄 𑀪𑀺𑀓𑁆𑀔𑀽, 𑀢𑀲𑁆𑀫𑀺𑀁 𑀆𑀲𑀼𑀁 𑀲𑀫𑀸𑀕𑀫𑁂.

𑀕𑀡𑀲𑀚𑁆𑀛𑀸𑀬𑀫𑀓𑀭𑀼𑀁, 𑀯𑀕𑁆𑀕𑀩𑀦𑁆𑀥𑁂𑀦 𑀪𑀺𑀓𑁆𑀔𑀯𑁄;

𑀣𑁂𑀭𑀧𑀼𑀢𑁆𑀢𑀸𑀪𑀬𑀁 𑀣𑁂𑀭𑀁, 𑀢𑀢𑁆𑀣𑀸’𑀤𑀺𑀲𑁆𑀯𑀸 𑀫𑀳𑀻𑀧𑀢𑀺.

𑀅𑀝𑁆𑀞𑀯𑀻𑀲 𑀫𑀳𑀸𑀬𑀼𑀤𑁆𑀥𑀁, 𑀬𑀼𑀚𑁆𑀛𑀦𑁆𑀢𑁄 𑀅𑀧𑀭𑀸𑀚𑀬𑀁;

𑀬𑁄 𑀲𑁄 𑀦 𑀧𑀘𑁆𑀘𑀼𑀤𑀸𑀯𑀢𑁆𑀢𑁄, 𑀫𑀳𑀸𑀬𑁄𑀥𑁄 𑀯𑀲𑀻 𑀫𑀫.

𑀫𑀘𑁆𑀘𑀼𑀬𑀼𑀤𑁆𑀥𑀫𑁆𑀳𑀺 𑀲𑀫𑁆𑀧𑀢𑁆𑀢𑁂, 𑀤𑀺𑀲𑁆𑀯𑀸 𑀫𑀜𑁆𑀜𑁂 𑀧𑀭𑀸𑀚𑀬𑀁;

𑀇𑀤𑀸𑀦𑀺 𑀲𑁄 𑀫𑀁 𑀦𑁄 𑀧𑁂𑀢𑀺, 𑀣𑁂𑀭𑁄 𑀣𑁂𑀭𑀧𑀼𑀢𑁆𑀢𑀪𑀬𑁄.

𑀇𑀢𑀺 𑀘𑀺𑀦𑁆𑀢𑀬𑀺 𑀲𑁄𑀣𑁂𑀭𑁄, 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀘𑀺𑀦𑁆𑀢𑀺𑀢𑀁;

𑀓𑀭𑀺𑀦𑁆𑀤𑀦𑀤𑀺𑀬𑀸 𑀲𑀺𑀲𑁂, 𑀯𑀲𑀁 𑀧𑀜𑁆𑀚𑀮𑀺𑀧𑀩𑁆𑀩𑀢𑁂.

𑀧𑀜𑁆𑀘𑀔𑀻𑀡𑀸𑀲𑀯𑀲𑀢-𑀧𑀭𑀺𑀯𑀸𑀭𑁂𑀦 𑀇𑀤𑁆𑀥𑀺𑀬𑀸;

𑀦𑀪𑀲𑀸𑀕𑀫𑁆𑀫 𑀭𑀸𑀚𑀸𑀦𑀁, 𑀅𑀝𑁆𑀞𑀸𑀲𑀺 𑀧𑀭𑀺𑀯𑀸𑀭𑀺𑀬.

𑀭𑀸𑀚𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀢𑀁, 𑀧𑀼𑀭𑀢𑁄 𑀘 𑀦𑀺𑀲𑀻𑀤𑀺𑀬;

𑀢𑀼𑀫𑁆𑀳𑁂 𑀤𑀲𑀫𑀳𑀸𑀬𑁄𑀥𑁂, 𑀕𑀡𑁆𑀳𑀺𑀢𑁆𑀯𑀸𑀦 𑀧𑀼𑀭𑁂 𑀅𑀳𑀁.

𑀬𑀼𑀚𑁆𑀛𑀺𑀁 𑀇𑀤𑀸𑀦𑀺 𑀏𑀓𑁄’𑀯, 𑀫𑀘𑁆𑀘𑀼𑀦𑀸 𑀬𑀼𑀤𑁆𑀥𑀫𑀸𑀭𑀪𑀺𑀁;

𑀫𑀘𑁆𑀘𑀼𑀲𑀢𑁆𑀢𑀼𑀁 𑀧𑀭𑀸𑀚𑁂𑀢𑀼𑀁, 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳 𑀘.

𑀆𑀳 𑀣𑁂𑀭𑁄 ‘‘𑀫𑀳𑀸𑀭𑀸𑀚-𑀫𑀸 𑀪𑀸𑀬𑀺 𑀫𑀦𑀼𑀚𑀸𑀥𑀺𑀧;

𑀓𑀺𑀮𑁂𑀲𑀲𑀢𑁆𑀢𑀼𑀁 𑀅𑀚𑀺𑀢𑁆𑀯𑀸, 𑀅𑀚𑁂𑀬𑁆𑀬𑁄 𑀫𑀘𑁆𑀘𑀼𑀲𑀢𑁆𑀢𑀼𑀓𑁄.

𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁, 𑀅𑀯𑀲𑁆𑀲𑀁𑀬𑁂𑀯 𑀪𑀺𑀚𑁆𑀚𑀢𑀺;

‘‘𑀅𑀦𑀺𑀘𑁆𑀘𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’, 𑀇𑀢𑀺 𑀯𑀼𑀢𑁆𑀢𑀁𑀳𑀺 𑀲𑀢𑁆𑀣𑀼𑀦𑀸.

𑀮𑀚𑁆𑀚𑀸 𑀲𑀸𑀭𑀚𑁆𑀚𑀭𑀳𑀺𑀢𑀸, 𑀩𑀼𑀤𑁆𑀥𑁂𑀧𑁂’𑀢𑀺 𑀅𑀦𑀺𑀘𑁆𑀘𑀢𑀸;

𑀢𑀲𑁆𑀫𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀤𑀼𑀓𑁆𑀔𑀸’𑀦𑀢𑁆𑀢𑀸𑀢𑀺 𑀘𑀺𑀦𑁆𑀢𑀬.

𑀤𑀼𑀢𑀺𑀬𑁂 𑀅𑀢𑁆𑀢𑀸𑀪𑀸𑀯𑁂𑀧𑀺, 𑀥𑀫𑁆𑀫𑀘𑁆𑀙𑀦𑁆𑀤𑁄 𑀫𑀳𑀸𑀳𑀺𑀢𑁂;

𑀉𑀧𑀝𑁆𑀞𑀺𑀢𑁂 𑀤𑁂𑀯𑀮𑁄𑀓𑁂, 𑀳𑀺𑀢𑁆𑀯𑀸 𑀤𑀺𑀩𑁆𑀩𑀁 𑀲𑀼𑀔𑀁 𑀢𑀼𑀯𑀁.

𑀇𑀥𑀸𑀕𑀫𑁆𑀫 𑀩𑀳𑀼𑀁 𑀧𑀼𑀜𑁆𑀜𑀁, 𑀅𑀓𑀸𑀲𑀺 𑀘 𑀅𑀦𑁂𑀓𑀥𑀸;

𑀓𑀭𑀡𑀫𑁆𑀧𑁂𑀓𑀭𑀚𑁆𑀚𑀲𑁆𑀲, 𑀲𑀸𑀲𑀦𑀼𑀚𑁆𑀚𑁄𑀢𑀦𑀸𑀬𑀢𑁂.

𑀫𑀳𑀸𑀧𑀼𑀜𑁆𑀜𑀓𑀢𑀁 ¶ 𑀧𑀼𑀜𑁆𑀜𑀁, 𑀬𑀸𑀯𑀚𑁆𑀚𑀤𑀺𑀯𑀲𑀸 𑀢𑀬𑀸;

𑀲𑀩𑁆𑀩𑀁𑀦𑀼𑀲𑁆𑀲𑀭𑀫𑁂𑀯𑀁 𑀢𑁂, 𑀲𑀼𑀔𑀁 𑀲𑀚𑁆𑀚𑀼 𑀪𑀯𑀺𑀲𑁆𑀲𑀢𑀺.

𑀣𑁂𑀭𑀲𑁆𑀲𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀅𑀳𑀼;

‘‘𑀅𑀯𑀲𑁆𑀲𑀬𑁄 𑀫𑀘𑁆𑀘𑀼𑀬𑀼𑀤𑁆𑀥𑁂𑀧𑀺, 𑀢𑁆𑀯𑀁 𑀫𑁂 𑀲𑀻’’𑀢𑀺 𑀅𑀪𑀸𑀲𑀺𑀢𑀁.

𑀢𑀤𑀸 𑀘 𑀆𑀳𑀭𑀸𑀧𑁂𑀢𑁆𑀯𑀸, 𑀧𑀳𑀝𑁆𑀞𑁄 𑀧𑀼𑀜𑁆𑀜 𑀧𑁄𑀢𑁆𑀣𑀓𑀁;

𑀯𑀸𑀘𑁂𑀢𑀼𑀁 𑀮𑁂𑀔𑀓𑀁 𑀆𑀳, 𑀲𑁄 𑀢𑀁 𑀯𑀸𑀘𑁂𑀲𑀺 𑀧𑁄𑀢𑁆𑀣𑀓𑀁.

𑀏𑀓𑀽𑀦𑀲𑀢𑀯𑀺𑀳𑀸𑀭𑀸, 𑀫𑀳𑀸𑀭𑀸𑀚𑁂𑀦 𑀓𑀸𑀭𑀺𑀢𑀸;

𑀏𑀓𑀽𑀦𑀯𑀻𑀲𑀓𑁄𑀝𑀻𑀳𑀺, 𑀯𑀺𑀳𑀸𑀭𑁄 𑀫𑀭𑀺𑀘 𑀯𑀝𑁆𑀝𑀺 𑀘.

𑀫𑀳𑀸𑀣𑀽𑀧𑀫𑁆𑀳𑀺 𑀲𑁂𑀲𑀸𑀦𑀺, 𑀓𑀸𑀭𑀺𑀢𑀸𑀦𑀺 𑀲𑀼𑀩𑀼𑀤𑁆𑀥𑀺𑀦𑀸;

𑀓𑁄𑀝𑀺𑀲𑀳𑀲𑁆𑀲𑀁 𑀅𑀕𑁆𑀖𑀦𑁆𑀢𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀸𑀘𑀬𑀺.

‘‘𑀓𑁄𑀝𑁆𑀞𑀦𑀸𑀫𑀫𑁆𑀳𑀺 𑀫𑀮𑀬𑁂, 𑀅𑀓𑁆𑀔𑀓𑁆𑀔𑀸𑀬𑀺𑀓 𑀙𑀸𑀢𑀓𑁂;

𑀓𑀼𑀡𑁆𑀟𑀮𑀸𑀦𑀺 𑀫𑀳𑀕𑁆𑀖𑀸𑀦𑀺, 𑀤𑀼𑀯𑁂 𑀤𑀢𑁆𑀯𑀸𑀦 𑀕𑀡𑁆𑀳𑀺𑀬.

𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀳𑀸𑀣𑁂𑀭𑀸𑀦 𑀫𑀼𑀢𑁆𑀢𑀫𑁄;

𑀤𑀺𑀦𑁆𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁂𑀦, 𑀓𑀗𑁆𑀕𑀼𑀅𑀫𑁆𑀩𑀺𑀮𑀧𑀺𑀡𑁆𑀟𑀓𑁄.

𑀘𑀽𑀴𑀗𑁆𑀕𑀦𑀺𑀬 𑀬𑀼𑀤𑁆𑀥𑀫𑁆𑀳𑀺, 𑀧𑀭𑀸𑀚𑀺𑀢𑁆𑀯𑀸 𑀧𑀮𑀸𑀬𑀢𑀸;

𑀓𑀸𑀮𑀁 𑀖𑁄𑀲𑀸𑀧𑀬𑀺𑀢𑁆𑀯𑀸𑀦, 𑀆𑀕𑀢𑀲𑁆𑀲 𑀯𑀺𑀳𑀸𑀬𑀲𑀸.

𑀔𑀻𑀡𑀸𑀲𑀯𑀲𑁆𑀲 𑀬𑀢𑀺𑀦𑁄, 𑀅𑀢𑁆𑀢𑀸𑀦𑀫𑀦𑀧𑁂𑀓𑁆𑀔𑀺𑀬;

𑀤𑀺𑀦𑁆𑀦𑀁 𑀲𑀭𑀓𑀪𑀢𑁆𑀢’𑀦𑁆𑀢𑀺, 𑀯𑀼𑀢𑁆𑀢𑁂 𑀆𑀳 𑀫𑀳𑀻𑀧𑀢𑀺.

𑀯𑀺𑀳𑀸𑀭𑀫𑀳𑀲𑀢𑁆𑀢𑀸𑀳𑁂, 𑀧𑀸𑀲𑀸𑀤𑀲𑁆𑀲 𑀫𑀳𑁂𑀢𑀣𑀸;

𑀣𑀽𑀧𑀸𑀭𑀫𑁆𑀪𑁂 𑀢𑀼 𑀲𑀢𑁆𑀢𑀸𑀳𑁂, 𑀢𑀣𑀸 𑀥𑀸𑀢𑀼𑀦𑀺𑀥𑀸𑀦𑀓𑁂.

𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀉𑀪𑀢𑁄, 𑀲𑀗𑁆𑀖𑀲𑁆𑀲 𑀉𑀪𑀢𑁄 𑀫𑀬𑀸;

𑀫𑀳𑀸𑀭𑀳𑀁 𑀫𑀳𑀸𑀤𑀸𑀦𑀁, 𑀅𑀯𑀺𑀲𑁂𑀲𑀁 𑀧𑀯𑀢𑁆𑀢𑀺𑀢𑀁.

𑀫𑀳𑀸𑀯𑁂𑀲𑀸𑀔𑀧𑀽𑀚𑀸 𑀘, 𑀘𑀢𑀼𑀯𑀻𑀲𑀢𑀺 𑀓𑀸𑀭𑀬𑀺;

𑀤𑀻𑀧𑁂 𑀲𑀗𑁆𑀖𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑀲𑀢𑁆𑀢𑀲𑀢𑁆𑀢 ¶ 𑀤𑀺𑀦𑀸𑀦𑁂𑀯, 𑀤𑀻𑀧𑁂 𑀭𑀚𑁆𑀚𑀫𑀳𑀁 𑀇𑀫𑀁;

𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀲𑀸𑀲𑀦𑀫𑁆𑀳𑀺, 𑀅𑀤𑀸𑀲𑀺𑀁 𑀳𑀝𑁆𑀞𑀫𑀸𑀦𑀲𑁄.

𑀲𑀢𑀢𑀁 𑀤𑁆𑀯𑀸𑀤𑀲𑀞𑀸𑀦𑁂, 𑀲𑀧𑁆𑀧𑀺𑀦𑀸 𑀲𑀼𑀤𑁆𑀥𑀯𑀝𑁆𑀝𑀺𑀬𑀸;

𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀲𑀺𑀁, 𑀧𑀽𑀚𑁂𑀦𑁆𑀢𑁄 𑀲𑀼𑀕𑀢𑀁 𑀅𑀳𑀁.

𑀦𑀺𑀘𑁆𑀘𑀁 𑀅𑀝𑁆𑀞𑀸𑀭𑀲𑀞𑀸𑀦𑁂, 𑀯𑀚𑁆𑀚𑁂𑀳𑀺 𑀯𑀺𑀳𑀺𑀢𑀁 𑀅𑀳𑀁;

𑀕𑀺𑀮𑀸𑀦 𑀪𑀢𑁆𑀢𑀪𑁂𑀲𑀚𑁆𑀚𑀁, 𑀕𑀺𑀮𑀸𑀦𑀸𑀦𑀫𑀤𑀸𑀧𑀬𑀺𑀁.

𑀘𑀢𑀼𑀢𑁆𑀢𑀸𑀮𑀻𑀲𑀞𑀸𑀦𑀫𑁆𑀳𑀺, 𑀲𑀗𑁆𑀔𑀢𑀁 𑀫𑀥𑀼𑀧𑀸𑀬𑀲𑀁;

𑀢𑀢𑁆𑀢𑀓𑁂𑀲𑁆𑀯𑁂𑀯 𑀞𑀸𑀦𑁂𑀲𑀼, 𑀢𑁂𑀮𑀼𑀮𑁆𑀮𑁄𑀧𑀓𑀫𑁂𑀯 𑀘.

𑀖𑀢𑁂 𑀧𑀓𑁆𑀓𑁂 𑀫𑀳𑀸𑀚𑀸𑀮, 𑀧𑀽𑀯𑁂 𑀞𑀸𑀦𑀫𑁆𑀳𑀺 𑀢𑀢𑁆𑀢𑀓𑁂;

𑀢𑀣𑁂𑀯 𑀲𑀳 𑀪𑀢𑁆𑀢𑁂𑀳𑀺, 𑀦𑀺𑀘𑁆𑀘 𑀏𑀫𑀯 𑀅𑀤𑀸𑀧𑀬𑀺𑀁.

𑀉𑀧𑁄𑀲𑀣𑁂𑀲𑀼 𑀤𑀺𑀯𑀲𑁂𑀲𑀼, 𑀫𑀸𑀲𑁂 𑀫𑀸𑀲𑁂 𑀘 𑀅𑀝𑁆𑀞𑀲𑀼;

𑀮𑀁𑀓𑀸𑀤𑀻𑀧𑁂 𑀯𑀺𑀳𑀸𑀭𑁂𑀲𑀼, 𑀤𑀻𑀧 𑀢𑁂𑀮𑀫𑀤𑀸𑀧𑀬𑀺𑀁.

𑀥𑀫𑁆𑀫𑀤𑀸𑀦𑀁 𑀫𑀳𑀦𑁆𑀢𑀦𑁆𑀢𑀺, 𑀲𑀼𑀢𑁆𑀯𑀸 𑀅𑀫𑀺𑀲𑀤𑀸𑀦𑀢𑁄;

𑀮𑁄𑀳 𑀧𑀸𑀲𑀸𑀤𑀢𑁄 𑀳𑁂𑀝𑁆𑀞𑀸, 𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀆𑀲𑀦𑁂.

‘‘𑀑𑀲𑀸𑀭𑁂𑀲𑁆𑀲𑀸𑀫𑀺 𑀲𑀗𑁆𑀖𑀲𑁆𑀲, 𑀫𑀗𑁆𑀕𑀮𑀲𑀼𑀢𑁆𑀢’’𑀫𑀺𑀘𑁆𑀘𑀳𑀁;

𑀦𑀺𑀲𑀺𑀦𑁆𑀦𑁄 𑀑𑀲𑀸𑀭𑀬𑀺𑀢𑀼𑀁, 𑀦𑀸𑀲𑀓𑁆𑀔𑀺𑀁 𑀲𑀗𑁆𑀖𑀕𑀸𑀭𑀯𑀸.

𑀢𑀢𑁄𑀧𑁆𑀧𑀪𑀼𑀢𑀺 𑀮𑀁𑀓𑀸𑀬, 𑀯𑀺𑀳𑀸𑀭𑁂𑀲𑀼 𑀢𑀳𑀺𑀁 𑀢𑀳𑀺𑀁;

𑀥𑀫𑁆𑀫𑀓𑀣𑀁 𑀓𑀣𑀸𑀧𑁂𑀲𑀺𑀁, 𑀲𑀓𑁆𑀓𑀭𑀺𑀢𑁆𑀯𑀸𑀦 𑀤𑁂𑀲𑀓𑁂.

𑀥𑀫𑁆𑀫𑀓𑀣𑀺𑀓 𑀲𑁆𑀲𑁂𑀓𑀲𑁆𑀲, 𑀲𑀧𑁆𑀧𑀺𑀨𑀸𑀡𑀺𑀢𑀲𑀓𑁆𑀔𑀭𑀁;

𑀦𑀸𑀴𑀺𑀁 𑀦𑀸𑀴𑀺𑀫𑀤𑀸𑀧𑁂𑀲𑀺𑀁, 𑀤𑀸𑀧𑁂𑀲𑀺𑀁 𑀘𑀢𑀼𑀭𑀗𑁆𑀕𑀼𑀮𑀁.

𑀫𑀼𑀝𑁆𑀞𑀺𑀓𑀁 𑀬𑀝𑁆𑀞𑀺𑀫𑀥𑀼𑀓𑀁, 𑀤𑀸𑀧𑁂𑀲𑀺𑀁 𑀲𑀸𑀝𑀓𑀤𑁆𑀯𑀬𑀁;

𑀲𑀩𑁆𑀩𑀁𑀧𑀺𑀲𑁆𑀲𑀭𑀺𑀬𑁂 𑀤𑀸𑀦𑀁, 𑀦𑀫𑁂 𑀳𑀸𑀲𑁂𑀲𑀺 𑀫𑀸𑀦𑀲𑀁.

𑀚𑀻𑀯𑀺𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸, 𑀤𑀼𑀕𑁆𑀕𑀢𑁂𑀦 𑀲𑀢𑀸 𑀫𑀬𑀸;

𑀤𑀺𑀦𑁆𑀦 𑀤𑀸𑀦 𑀤𑁆𑀯𑀬𑀁𑀬𑁂𑀯, 𑀢𑀁 𑀫𑁂 𑀳𑀸𑀲𑁂𑀲𑀺 𑀫𑀸𑀦𑀲𑀁.

𑀢𑀁 𑀲𑀼𑀢𑁆𑀯𑀸 𑀅𑀪𑀬𑁄 𑀣𑁂𑀭𑁄, 𑀢𑀁 𑀤𑀸𑀦𑀤𑁆𑀯𑀬𑀫𑁂𑀯 𑀲𑁄;

𑀭𑀜𑁆𑀜𑁄 𑀘𑀺𑀢𑁆𑀢𑀧𑁆𑀧𑀲𑀸𑀤𑀢𑁆𑀣𑀁, 𑀲𑀁 𑀯𑀡𑁆𑀡𑁂𑀲𑀺 𑀅𑀦𑁂𑀓𑀥𑀸.

𑀢𑁂𑀲𑀼 𑀧𑀜𑁆𑀘𑀲𑀼 𑀣𑁂𑀭𑁂𑀲𑀼, 𑀓𑀗𑁆𑀕𑀼𑀅𑀫𑁆𑀩𑀺𑀮𑀕𑀸𑀳𑀓𑁄;

𑀫𑀮𑀺𑀬 𑀤𑁂𑀯 𑀫𑀳𑀸𑀣𑁂𑀭𑁄, 𑀲𑀼𑀫𑀦𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂.

𑀦𑀯𑀦𑁆𑀦𑀁 ¶ 𑀪𑀺𑀓𑁆𑀔𑀼𑀲𑀢𑀸𑀦𑀁, 𑀤𑀢𑁆𑀯𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺 𑀲𑁄;

𑀧𑀣𑀯𑀻𑀘𑀸𑀮𑀓𑁄 𑀥𑀫𑁆𑀫, 𑀲𑀼𑀢𑁆𑀢𑀣𑁂𑀭𑁄 𑀢𑀼 𑀢𑀁 𑀧𑀦.

𑀓𑀮𑁆𑀬𑀸𑀡𑀺𑀓𑀯𑀺𑀳𑀸𑀭𑀫𑁆𑀳𑀺, 𑀪𑀺𑀓𑁆𑀔𑀽𑀦𑀁 𑀲𑀁𑀯𑀺𑀪𑀸𑀚𑀺𑀬;

𑀤𑀲𑀤𑁆𑀥𑀲 𑀢𑀲𑀗𑁆𑀔𑀸𑀦𑀁, 𑀧𑀭𑀺𑀪𑁄𑀕 𑀫𑀓𑀸𑀲𑀬𑀁.

𑀢𑀮𑀗𑁆𑀕𑀭 𑀯𑀸𑀲𑀺𑀓𑁄 𑀥𑀫𑁆𑀫, 𑀤𑀺𑀦𑁆𑀦𑀢𑁆𑀣𑁂𑀭𑁄 𑀧𑀺𑀬𑀗𑁆𑀕𑀼𑀓𑁂;

𑀤𑀻𑀧𑁂 𑀤𑀲𑀲𑀳𑀲𑁆𑀲𑀸𑀦𑀁, 𑀤𑀢𑁆𑀯𑀸𑀦 𑀧𑀭𑀺𑀪𑀼𑀜𑁆𑀚𑀺𑀢𑀁.

𑀫𑀗𑁆𑀕𑀡𑀯𑀸𑀲𑀺𑀓𑁄 𑀔𑀼𑀤𑁆𑀤, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀫𑀳𑀺𑀤𑁆𑀥𑀺𑀓𑁄;

𑀓𑁂𑀮𑀸𑀲𑁂 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁, 𑀤𑀢𑁆𑀯𑀸𑀦 𑀧𑀭𑀺𑀪𑀼𑀜𑁆𑀚𑀺 𑀢𑀁.

𑀫𑀳𑀸𑀩𑁆𑀬𑀕𑁆𑀖𑁄 𑀘 𑀣𑁂𑀭𑁄 𑀢𑀁, 𑀉𑀓𑁆𑀓𑀦𑀕𑀭𑀯𑀺𑀳𑀸𑀭𑀓𑁂;

𑀤𑀢𑁆𑀯𑀸 𑀲𑀢𑀸𑀦𑀁 𑀲𑀢𑁆𑀢𑀸𑀦𑀁, 𑀧𑀭𑀺𑀪𑁄𑀕𑀫𑀓𑀸𑀲𑀬𑀁.

𑀲𑀭𑀓𑀪𑀢𑁆𑀢𑀕𑀸𑀳𑀻 𑀢𑀼, 𑀣𑁂𑀭𑁄 𑀧𑀺𑀬𑀗𑁆𑀕𑀼𑀤𑀻𑀧𑀓𑁂;

𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀤𑀢𑁆𑀯𑀸𑀦 𑀧𑀭𑀺𑀪𑀼𑀜𑁆𑀚𑀺𑀢𑀁.

𑀇𑀢𑀺 𑀯𑀢𑁆𑀯𑀸’𑀪𑀬𑀢𑁆𑀣𑁂𑀭𑁄, 𑀭𑀜𑁆𑀜𑁄 𑀳𑀸𑀲𑁂𑀲𑀺 𑀫𑀸𑀦𑀲𑀁;

𑀭𑀸𑀚𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀁 𑀣𑁂𑀭𑀁 𑀇𑀥 𑀫𑀩𑁆𑀭𑀼𑀯𑀺.

‘‘𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀓𑁄;

𑀅𑀳 𑀫𑁂𑀯𑀁 𑀳𑁄𑀢𑀼 𑀓𑀸𑀬𑁄’𑀧𑀺, 𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀓𑁄.

𑀫𑀳𑀸𑀣𑀽𑀧 𑀤𑀲𑁆𑀲𑀦𑀞𑀸𑀦𑁂, 𑀲𑀗𑁆𑀖𑀲𑁆𑀲 𑀓𑀫𑁆𑀫𑀫𑀸𑀴𑀓𑁂;

𑀲𑀭𑀻𑀭𑀁 𑀲𑀗𑁆𑀖𑀤𑀸𑀲𑀲𑁆𑀲, 𑀢𑀼𑀫𑁆𑀳𑁂 𑀛𑀸𑀧𑁂𑀣 𑀫𑁂’’𑀇𑀢𑀺.

𑀓𑀦𑀺𑀝𑁆𑀞𑀁 𑀆𑀳 ‘‘𑀪𑁄 𑀢𑀺𑀲𑁆𑀲, 𑀫𑀳𑀸𑀣𑀽𑀧𑁂 𑀅𑀦𑀺𑀝𑁆𑀞𑀺𑀢𑀁;

𑀦𑀺𑀝𑁆𑀞𑀸𑀧𑁂𑀳𑀺 𑀢𑀼𑀯𑀁 𑀲𑀩𑁆𑀩𑀁, 𑀓𑀫𑁆𑀫𑀁 𑀲𑀓𑁆𑀓𑀘𑁆𑀘 𑀲𑀸𑀥𑀼𑀓𑀁.

𑀲𑀸𑀬𑀁 𑀧𑀸𑀢𑁄 𑀘 𑀧𑀼𑀧𑁆𑀨𑀸𑀦𑀺, 𑀫𑀳𑀸𑀣𑀽𑀧𑀫𑁆𑀳𑀺 𑀧𑀽𑀚𑀬;

𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀳𑀸𑀭𑀜𑁆𑀘, 𑀫𑀳𑀸𑀣𑀽𑀧𑀲𑁆𑀲 𑀓𑀸𑀭𑀬.

𑀧𑀝𑀺𑀬𑀸𑀤𑀺𑀢𑀜𑁆𑀘 𑀬𑀁 𑀯𑀢𑁆𑀢𑀁, 𑀫𑀬𑀸 𑀲𑀼𑀕𑀢 𑀲𑀸𑀲𑀦𑁂;

𑀲𑀩𑁆𑀩𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸, 𑀢𑀸𑀢 𑀯𑀢𑁆𑀢𑀬 𑀢𑀁 𑀢𑀼𑀯𑀁.

𑀲𑀗𑁆𑀖𑀲𑁆𑀲 𑀢𑀸𑀢 𑀓𑀺𑀘𑁆𑀘𑁂𑀲𑀼, 𑀫𑀸 𑀧𑀫𑀚𑁆𑀚𑀺𑀢𑁆𑀣 𑀲𑀩𑁆𑀩𑀤𑀸’’;

𑀇𑀢𑀁 𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸, 𑀢𑀼𑀡𑁆𑀳𑀻 𑀆𑀲𑀺 𑀫𑀳𑀻𑀧𑀢𑀺.

𑀢𑀗𑁆𑀔𑀡𑀁 ¶ 𑀕𑀡𑀲𑀚𑁆𑀛𑀸𑀬𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀓𑀸𑀲𑀺 𑀘;

𑀤𑁂𑀯𑀢𑀸 𑀙 𑀭𑀣𑁂 𑀘𑁂𑀯, 𑀙𑀳𑀺 𑀤𑁂𑀯𑁂𑀳𑀺 𑀆𑀦𑀬𑀼𑀁.

𑀬𑀸𑀘𑀼𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁂𑀯𑀸, 𑀭𑀸𑀚𑀸𑀦𑀁 𑀢𑁂 𑀭𑀣𑁂 𑀞𑀺𑀢𑀸;

‘‘𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑀁 𑀢𑁆𑀯𑀁, 𑀏𑀳𑀺 𑀭𑀸𑀚𑀫𑀦𑁄𑀭𑀫𑀁’’.

𑀭𑀸𑀚𑀸 𑀢𑁂𑀲𑀁 𑀯𑀘𑁄 𑀲𑀼𑀢𑁆𑀯𑀸, ‘‘𑀬𑀸𑀯 𑀥𑀫𑁆𑀫𑀁 𑀲𑀼𑀡𑁄𑀫𑀳𑀁;

𑀅𑀥𑀺𑀯𑀸𑀲𑁂𑀣 𑀢𑀸𑀯𑀸’’𑀢𑀺, 𑀳𑀢𑁆𑀣𑀸𑀓𑀸𑀭𑁂𑀦 𑀯𑀸𑀭𑀬𑀺.

𑀯𑀸𑀭𑁂𑀢𑀺 𑀕𑀡𑀲𑀚𑁆𑀛𑀸𑀬, 𑀫𑀻𑀪𑀺 𑀫𑀦𑁆𑀢𑁆𑀯𑀸𑀦 𑀪𑀺𑀓𑁆𑀔𑀯𑁄;

𑀲𑀚𑁆𑀛𑀸𑀬𑀁 𑀞𑀧𑀬𑀼𑀁 𑀭𑀸𑀚𑀸, 𑀧𑀼𑀘𑁆𑀙𑀺𑀢𑀁 𑀞𑀸𑀦𑀓𑀸𑀭𑀡𑀁.

‘‘𑀆𑀕𑀫𑁂𑀣𑀸’’𑀢𑀺 𑀲𑀜𑁆𑀜𑀸𑀬, 𑀤𑀺𑀦𑁆𑀦𑀢𑁆𑀢𑀸’𑀢𑀺 𑀯𑀤𑀺𑀁𑀲𑀼 𑀢𑁂;

𑀭𑀸𑀚𑀸 ‘‘𑀦𑁂𑀢𑀁 𑀢𑀣𑀸 𑀪𑀦𑁆𑀢𑁂’’, 𑀇𑀢𑀺 𑀯𑀢𑁆𑀯𑀸𑀦 𑀢𑀁 𑀯𑀤𑀺.

𑀢𑀁 𑀲𑀼𑀢𑁆𑀯𑀸𑀦 𑀚𑀦𑀸 𑀓𑁂𑀘𑀺, ‘‘𑀪𑀻𑀢𑁄 𑀫𑀘𑁆𑀘𑀼𑀪𑀬𑀸 𑀅𑀬𑀁;

𑀮𑀸𑀮𑀧𑁆𑀧𑀢𑀻’’𑀢𑀺 𑀫𑀜𑁆𑀜𑀺𑀁𑀲𑀼, 𑀢𑁂𑀲𑀁 𑀓𑀗𑁆𑀔𑀸𑀯𑀺𑀦𑁄𑀤𑀦𑀁.

𑀓𑀸𑀭𑁂𑀢𑀼𑀁 𑀅𑀪𑀬𑀢𑁆𑀣𑁂𑀭𑁄, 𑀭𑀸𑀚𑀸𑀦𑀁 𑀏𑀯𑀫𑀸𑀳 𑀲𑁄;

‘‘𑀚𑀸𑀦𑀸𑀧𑁂𑀢𑀼𑀁 𑀓𑀣𑀁 𑀲𑀓𑁆𑀓𑀸, 𑀆𑀦𑀻𑀢𑀸 𑀢𑁂 𑀭𑀣𑀸’’𑀇𑀢𑀺.

𑀧𑀼𑀧𑁆𑀨𑀤𑀸𑀦𑀁 𑀔𑀺𑀧𑀸𑀧𑁂𑀲𑀺, 𑀭𑀸𑀚 𑀦𑀪𑀲𑀺 𑀧𑀡𑁆𑀟𑀺𑀢𑁄;

𑀢𑀸𑀦𑀺 𑀮𑀕𑁆𑀕𑀸𑀦𑀺 𑀮𑀫𑁆𑀩𑀺𑀁𑀲𑀼, 𑀭𑀣𑀻𑀲𑀸𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁.

𑀆𑀓𑀸𑀲𑁂 𑀮𑀫𑁆𑀩𑀫𑀸𑀦𑀸𑀦𑀺, 𑀢𑀸𑀦𑀺 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄;

𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀲𑀺, 𑀭𑀸𑀚𑀸 𑀣𑁂𑀭𑀫𑀪𑀸𑀲𑀺𑀢𑀁.

𑀭𑀫𑁆𑀫𑁄 𑀪𑀦𑁆𑀢𑁂’’𑀢𑀺 𑀲𑁄 𑀩𑁆𑀭𑀼𑀯𑀺;

𑀩𑀼𑀤𑁆𑀥𑀪𑀸𑀯𑀸𑀬 𑀲𑀫𑀬𑀁, 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀤𑀬𑁄;

𑀫𑁂𑀢𑁆𑀢𑁂𑀬𑁆𑀬𑁄 𑀩𑁄𑀥𑀺𑀲𑀢𑁆𑀢𑁄 𑀳𑀺, 𑀯𑀲𑀢𑁂 𑀢𑀼𑀲𑀺𑀢𑁂 𑀧𑀼𑀭𑁂.

𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀫𑀳𑀸𑀭𑀸𑀚𑀸 𑀫𑀳𑀸𑀫𑀢𑀻;

𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀣𑀽𑀧𑀁, 𑀦𑀺𑀧𑀦𑁆𑀦𑁄𑀯 𑀦𑀺𑀫𑀻𑀮𑀬𑀺.

𑀘𑀯𑀺𑀢𑁆𑀯𑀸 𑀢𑀁𑀔𑀡𑀁𑀬𑁂𑀯, 𑀢𑀼𑀲𑀺𑀢𑀸 𑀅𑀳𑀝𑁂 𑀭𑀣𑁂;

𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀞𑀺𑀢𑁄𑀬𑁂𑀯, 𑀤𑀺𑀩𑁆𑀩𑀤𑁂𑀳𑁄 𑀅𑀤𑀺𑀲𑁆𑀲𑀣.

𑀓𑀢𑀲𑁆𑀲 ¶ 𑀧𑀼𑀜𑁆𑀜𑀓𑀫𑁆𑀫𑀲𑁆𑀲, 𑀨𑀮𑀁 𑀤𑀲𑁆𑀲𑁂𑀢𑀼𑀫𑀢𑁆𑀢𑀦𑁄;

𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀦𑁆𑀢𑁄, 𑀅𑀢𑁆𑀢𑀸𑀦𑀁 𑀲𑀫𑀮𑀗𑁆𑀓𑀢𑀁.

𑀭𑀣𑀝𑁆𑀞𑁄𑀬𑁂𑀯 𑀢𑀺𑀓𑁆𑀔𑀢𑁆𑀢𑀼𑀁, 𑀫𑀳𑀸𑀣𑀽𑀧𑀁 𑀧𑀤𑀓𑁆𑀔𑀺𑀡𑀁;

𑀓𑀢𑁆𑀯𑀸𑀦 𑀣𑀽𑀧𑀁 𑀲𑀗𑁆𑀖𑀜𑁆𑀘, 𑀯𑀦𑁆𑀤𑀺𑀢𑁆𑀯𑀸 𑀢𑀼𑀲𑀺𑀢𑀁 𑀅𑀕𑀸.

𑀦𑀸𑀝𑀓𑀺𑀬𑁄 𑀇𑀥𑀸𑀕𑀦𑁆𑀢𑁆𑀯𑀸, 𑀫𑀓𑀼𑀝𑀁 𑀬𑀢𑁆𑀣 𑀫𑁄𑀘𑀬𑀼𑀁;

‘‘𑀫𑀓𑀼𑀝𑀫𑀼𑀢𑁆𑀢𑀲𑀸𑀮𑀸’’𑀢𑀺, 𑀏𑀢𑁆𑀣 𑀲𑀸𑀮𑀸 𑀓𑀢𑀸 𑀅𑀳𑀼.

𑀘𑀺𑀢𑀓𑁂 𑀞𑀧𑀺𑀢𑁂 𑀭𑀜𑁆𑀜𑁂, 𑀲𑀭𑀻𑀭𑀫𑁆𑀳𑀺 𑀫𑀳𑀸𑀚𑀦𑁄;

𑀬𑀢𑁆𑀣𑀸𑀭𑀯𑀺 ‘‘𑀭𑀸𑀯𑀯𑀝𑁆𑀝𑀺-𑀲𑀸𑀮𑀸’’𑀦𑀸𑀫 𑀢𑀳𑀺𑀁 𑀅𑀳𑀼.

𑀭𑀜𑁆𑀜𑁄 𑀲𑀭𑀻𑀭𑀁 𑀛𑀸𑀧𑁂𑀲𑀼𑀁, 𑀬𑀲𑁆𑀫𑀺𑀁 𑀦𑀺𑀲𑁆𑀲𑀻𑀫𑀫𑀸𑀴𑀓𑁂;

𑀲𑁄 𑀏𑀯 𑀫𑀸𑀴𑀓𑁄 𑀏𑀢𑁆𑀣, 𑀯𑀼𑀘𑁆𑀘𑀢𑁂 ‘‘𑀭𑀸𑀚 𑀫𑀸𑀴𑀓𑁄’’.

𑀤𑀼𑀝𑁆𑀞𑀕𑀸𑀫𑀡𑀺𑀭𑀸𑀚𑀸 𑀲𑁄, 𑀭𑀸𑀚𑀸 𑀦𑀸𑀫𑀸𑀭𑀳𑁄 𑀫𑀳𑀸;

𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄, 𑀳𑁂𑀲𑁆𑀲𑀢𑀺 𑀅𑀕𑁆𑀕𑀲𑀸𑀯𑀓𑁄.

𑀲𑀤𑁆𑀥𑀸𑀢𑀺𑀲𑁆𑀲𑁄 𑀓𑀦𑀺𑀝𑁆𑀞𑁄 𑀢𑀼,

𑀏𑀯𑀁 𑀬𑁄 𑀓𑀼𑀲𑀮𑀧𑀭𑁄 𑀓𑀭𑁄𑀢𑀺 𑀧𑀼𑀜𑁆𑀜𑀁,

𑀙𑀸𑀤𑁂𑀦𑁆𑀢𑁄 𑀅𑀦𑀺𑀬𑀢𑀧𑀸𑀧𑀓𑀁 𑀩𑀳𑀼𑀫𑁆𑀧𑀺;

𑀲𑁄 𑀲𑀕𑁆𑀕𑀁 𑀲𑀓𑀮𑁂 𑀭𑀫𑀺 𑀯𑁄 𑀧𑀬𑀸𑀢𑀺 𑀢𑀲𑁆𑀫𑀸,

𑀲𑀧𑁆𑀧𑀜𑁆𑀜𑁄 𑀲 𑀢𑀢𑀭𑀢𑁄 𑀪𑀯𑁂𑀬𑁆𑀬 𑀧𑀼𑀜𑁆𑀜𑁂𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑀢𑁆𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀼𑀝𑁆𑀞𑀕𑀸𑀫𑀡𑀺𑀭𑀜𑁆𑀜𑁄 ¶ 𑀢𑀼, 𑀭𑀚𑁆𑀚𑁂𑀞𑀺𑀢𑀸 𑀚𑀦𑀸 𑀅𑀳𑀽;

𑀲𑀸𑀮𑀺𑀭𑀸𑀚𑀓𑀼𑀫𑀸𑀭𑁄𑀢𑀺, 𑀳𑀲𑁆𑀲𑀸𑀲𑀺 𑀯𑀺𑀲𑁆𑀲𑀼𑀢𑁄 𑀲𑀼𑀢𑁄.

𑀅𑀢𑀻𑀯 𑀥𑀜𑁆𑀜𑁄 𑀲𑁄 𑀆𑀲𑀺, 𑀧𑀼𑀜𑁆𑀜𑀓𑀫𑁆𑀫𑀭𑀢𑁄 𑀲𑀤𑀸;

𑀅𑀢𑀻𑀯 𑀘𑀸𑀭𑀼𑀭𑀼𑀧𑀸𑀬, 𑀲𑀢𑁆𑀢𑁄 𑀘𑀡𑁆𑀟𑀸𑀮𑀺𑀬𑀸 𑀅𑀳𑀼.

𑀅𑀲𑁄𑀓𑀫𑀸𑀮𑀸𑀤𑁂𑀯𑀺𑀁𑀢𑀁, 𑀲𑀫𑁆𑀩𑀦𑁆𑀥𑀁 𑀧𑀼𑀩𑁆𑀩𑀚𑀸𑀢𑀺𑀬𑀸;

𑀭𑀽𑀧𑁂𑀦𑀸’𑀢𑀺 𑀧𑀺𑀬𑀸𑀬𑀦𑁆𑀢𑁄, 𑀲𑁄 𑀭𑀚𑁆𑀚𑀁 𑀦𑁂𑀯𑀓𑀸𑀫𑀬𑀺.

𑀤𑀼𑀝𑁆𑀞𑀕𑀸𑀫𑀡𑀺𑀪𑀸𑀢𑀸’𑀲𑁄, 𑀲𑀤𑁆𑀥𑀸𑀢𑀺𑀲𑁆𑀲𑁄 𑀢𑀤𑀘𑁆𑀙𑀬𑁂;

𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀸’𑀪𑀺𑀲𑀺𑀢𑁆𑀢𑁄, 𑀅𑀝𑁆𑀞𑀸𑀭𑀲𑁆𑀲 𑀲𑀫𑀸’𑀲𑀫𑁄.

𑀙𑀓𑁆𑀓𑀓𑀫𑁆𑀫𑀁 𑀲𑀼𑀥𑀸𑀓𑀫𑁆𑀫𑀁, 𑀳𑀢𑁆𑀣𑀺𑀧𑀸𑀓𑀸𑀭𑀫𑁂𑀯 𑀘;

𑀫𑀳𑀸𑀣𑀽𑀧𑀲𑁆𑀲 𑀓𑀸𑀭𑁂𑀲𑀺, 𑀲𑁄 𑀲𑀤𑁆𑀥𑀸𑀓𑀢𑀦𑀸𑀫𑀓𑁄.

𑀤𑀻𑀧𑁂𑀦 𑀮𑁄𑀳𑀧𑀸𑀲𑀸𑀤𑁄, 𑀉𑀟𑁆𑀟𑀺𑀬𑁆𑀳𑀺𑀢𑁆𑀣 𑀲𑀼𑀲𑀗𑁆𑀔𑀢𑁄;

𑀓𑀸𑀭𑁂𑀲𑀺 𑀮𑁄𑀳𑀧𑀸𑀲𑀸𑀤𑀁, 𑀧𑀼𑀦 𑀲𑁄 𑀲𑀢𑁆𑀢𑀪𑀽𑀫𑀓𑀁.

𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀕𑁆𑀖𑁄, 𑀧𑀸𑀲𑀸𑀤𑁄 𑀆𑀲𑀺 𑀲𑁄 𑀢𑀤𑀸;

𑀤𑀓𑁆𑀔𑀺𑀡𑀕𑀻𑀭𑀺𑀯𑀺𑀳𑀸𑀭𑀁, 𑀓𑀮𑁆𑀮𑀓𑀮𑁂𑀡 𑀫𑁂𑀯 𑀘.

𑀓𑀼𑀴𑀼𑀫𑁆𑀩𑀸𑀮𑀯𑀺𑀳𑀸𑀭𑀜𑁆𑀘, 𑀢𑀣𑀸𑀧𑁂𑀢𑁆𑀢𑀗𑁆𑀕 𑀯𑀸𑀮𑀺𑀓𑀁;

𑀯𑁂𑀮𑀗𑁆𑀕𑀯𑀝𑁆𑀝𑀺𑀓𑀜𑁆𑀘𑁂𑀯, 𑀤𑀼𑀩𑁆𑀩𑀮𑀯𑀸𑀧𑀺𑀢𑀺𑀲𑁆𑀲𑀢𑀁.

𑀤𑀼𑀭𑀢𑀺𑀲𑁆𑀲𑀓𑀯𑀸𑀧𑀺𑀜𑁆𑀘, 𑀢𑀣𑀸𑀫𑀸𑀢𑀼𑀯𑀺𑀳𑀸𑀭𑀓𑀁;

𑀓𑀸𑀭𑁂𑀲𑀺 𑀆𑀤𑀻𑀖𑀯𑀸𑀧𑀺𑀁, 𑀯𑀺𑀳𑀸𑀭𑀁𑀬𑁄𑀚𑀦 𑀬𑁄𑀚𑀦𑁂.

𑀤𑀻𑀖𑀯𑀸𑀧𑀺𑀯𑀺𑀳𑀸𑀭𑀜𑁆𑀘, 𑀓𑀸𑀭𑁂𑀲𑀺 𑀲𑀳𑀘𑁂𑀢𑀺𑀬𑀁;

𑀦𑀸𑀦𑀸𑀭𑀢𑀦𑀓𑀘𑁆𑀙𑀦𑁆𑀦𑀁, 𑀢𑀢𑁆𑀣 𑀓𑀸𑀭𑁂𑀲𑀺 𑀘𑁂𑀢𑀺𑀬𑁂.

𑀲𑀦𑁆𑀥𑀺𑀬𑀁 𑀲𑀦𑁆𑀥𑀺𑀬𑀁 𑀢𑀢𑁆𑀣, 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀓𑀁;

𑀲𑁄𑀯𑀡𑁆𑀡𑀫𑀸𑀮𑀁 𑀓𑀸𑀭𑁂𑀢𑁆𑀯𑀸, 𑀮𑀕𑁆𑀕𑀸𑀧𑁂𑀲𑀺 𑀫𑀦𑁄𑀭𑀫𑀁.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁 ¶ , 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀫𑀺𑀲𑁆𑀲𑀭𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀧𑀽𑀚𑀸𑀘𑀸𑀧𑀺 𑀅𑀓𑀸𑀭𑀬𑀺.

𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑁄, 𑀅𑀦𑁂𑀓𑀸𑀦𑀺 𑀫𑀳𑀻𑀧𑀢𑀺;

𑀓𑀸𑀬𑀲𑁆𑀲𑀪𑁂𑀤𑀸 𑀤𑁂𑀯𑁂𑀲𑀼, 𑀢𑀼𑀲𑀺𑀢𑁂𑀲𑀼’𑀧𑀧𑀚𑁆𑀚𑀣.

𑀲𑀤𑁆𑀥𑀸𑀢𑀺𑀲𑁆𑀲𑀧𑀓𑀸𑀭𑀸𑀚𑁂, 𑀯𑀲𑀦𑁆𑀢𑁂 𑀤𑀻𑀖𑀯𑀸𑀧𑀺𑀬𑀁;

𑀮𑀚𑁆𑀚𑀻𑀢𑀺𑀲𑁆𑀲𑁄 𑀚𑁂𑀝𑁆𑀞𑀲𑀼𑀢𑁄, 𑀕𑀺𑀭𑀺𑀓𑀼𑀫𑁆𑀪𑀺𑀫𑀦𑀸𑀫𑀓𑀁.

𑀯𑀺𑀳𑀸𑀭𑀁 𑀓𑀸𑀭𑀬𑀺 𑀭𑀫𑁆𑀫𑀁, 𑀢𑀁𑀓𑀦𑀺𑀝𑁆𑀞𑀲𑀼𑀢𑁄 𑀧𑀦;

𑀣𑀼𑀮𑁆𑀮𑀢𑁆𑀣𑀦𑁄 𑀅𑀓𑀸𑀭𑁂𑀲𑀺, 𑀯𑀺𑀳𑀸𑀭𑀁 𑀓𑀦𑁆𑀤𑀭𑀯𑁆𑀳𑀬𑀁.

𑀧𑀺𑀢𑀭𑀸 𑀣𑀼𑀮𑁆𑀮𑀢𑁆𑀣𑀦𑀓𑁄, 𑀪𑀸𑀢𑀼𑀲𑀦𑁆𑀢𑀺𑀓𑀫𑀸𑀬𑀢𑀸;

𑀲𑀳𑁂𑀯𑀸’𑀳 𑀯𑀺𑀳𑀸𑀭𑀲𑁆𑀲, 𑀲𑀗𑁆𑀖𑀪𑁄𑀕𑀢𑁆𑀣𑀫𑀢𑁆𑀢𑀦𑁄.

𑀲𑀤𑁆𑀥𑀸𑀢𑀺𑀲𑁆𑀲𑁂𑀉𑀧𑀭𑀢𑁂, 𑀲𑀩𑁆𑀩𑁂’𑀫𑀘𑁆𑀘𑀸 𑀲𑀫𑀸𑀕𑀢𑀸;

𑀣𑀽𑀧𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀲𑀓𑀮𑀁 𑀲𑀦𑁆𑀦𑀺𑀧𑀸𑀢𑀺𑀬.

𑀲𑀗𑁆𑀖𑀸𑀦𑀼𑀜𑁆𑀜𑀸𑀬𑀭𑀝𑁆𑀞𑀲𑁆𑀲, 𑀭𑀓𑁆𑀔𑀡𑀢𑁆𑀣𑀁 𑀓𑀼𑀫𑀸𑀭𑀓𑀁;

𑀅𑀪𑀺𑀲𑀺𑀜𑁆𑀘𑀼𑀁 𑀣𑀼𑀮𑁆𑀮𑀢𑁆𑀣𑀦𑀁, 𑀢𑀁 𑀲𑀼𑀢𑁆𑀯𑀸 𑀮𑀚𑁆𑀚𑀻𑀢𑀺𑀲𑁆𑀲𑀢𑁄.

𑀇𑀥𑀸𑀕𑀦𑁆𑀢𑁆𑀯𑀸 𑀕𑀳𑁂𑀢𑁆𑀯𑀸 𑀢𑀁, 𑀲𑀬𑀁 𑀭𑀚𑁆𑀚𑀫𑀓𑀸𑀭𑀬𑀺;

𑀫𑀸𑀲𑀜𑁆𑀘𑁂𑀯 𑀤𑀲𑀸𑀳𑀜𑁆𑀘, 𑀭𑀸𑀚𑀸 𑀣𑀼𑀮𑁆𑀮𑀢𑁆𑀣𑀦𑁄 𑀧𑀦.

𑀢𑀺𑀲𑁆𑀲𑁄𑀲𑀫𑀁 𑀮𑀚𑁆𑀚𑀻𑀢𑀺𑀲𑁆𑀲𑁄, 𑀲𑀗𑁆𑀖𑁄 𑀳𑀼𑀢𑁆𑀯𑀸 𑀅𑀦𑀸𑀤𑀭𑁄;

‘‘𑀦 𑀚𑀸𑀦𑀺𑀁𑀲𑀼 𑀬𑀣𑀸𑀯𑀼𑀟𑁆𑀠𑀁’’ 𑀫𑀻𑀢𑀺 𑀢𑀁 𑀧𑀭𑀺𑀪𑀸𑀲𑀬𑀺.

𑀧𑀘𑁆𑀙𑀸 𑀲𑀗𑁆𑀖𑀁 𑀔𑀫𑀸𑀧𑁂𑀢𑁆𑀯𑀸, 𑀤𑀡𑁆𑀟𑀓𑀫𑁆𑀫𑀢𑁆𑀣𑀫𑀺𑀲𑁆𑀲𑀭𑁄;

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀤𑀢𑁆𑀯𑀸𑀦 𑀉𑀭𑀼𑀘𑁂𑀢𑀺𑀬𑁂.

𑀲𑀺𑀮𑀸𑀫𑀬𑀸𑀦𑀺 𑀓𑀸𑀭𑁂𑀲𑀺, 𑀧𑀼𑀧𑁆𑀨𑀬𑀸𑀦𑀸𑀦𑀺 𑀢𑀻𑀡𑀺𑀲𑁄;

𑀅𑀣𑁄 𑀲𑀢𑀲𑀳𑀲𑁆𑀲𑁂𑀦, 𑀘𑀺𑀢𑀸𑀧𑁂𑀲𑀺 𑀘 𑀅𑀦𑁆𑀢𑀭𑀸.

𑀫𑀳𑀸𑀣𑀽𑀧𑀣𑀽𑀧𑀸𑀭𑀸𑀫𑀸𑀦𑀁, 𑀪𑀽𑀫𑀺𑀁𑀪𑀽𑀫𑀺𑀲𑁆𑀲𑀭𑁄 𑀲𑀫𑀁;

𑀣𑀽𑀧𑀸𑀭𑀸𑀫𑁂 𑀘 𑀣𑀽𑀧𑀲𑁆𑀲, 𑀲𑀺𑀮𑀸𑀓𑀜𑁆𑀘𑀼𑀓 𑀫𑀼𑀢𑁆𑀢𑀫𑀁.

𑀣𑀽𑀧𑀸𑀭𑀸𑀫𑀲𑁆𑀲 𑀧𑀼𑀭𑀢𑁄, 𑀲𑀺𑀮𑀸𑀣𑀽𑀧𑀓𑀫𑁂𑀯 𑀘;

𑀮𑀚𑁆𑀚𑀻𑀓𑀸𑀲𑀦𑀲𑀸𑀮𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀸𑀭𑀬𑀺.

𑀓𑀜𑁆𑀘𑀼𑀓𑀁 ¶ 𑀓𑀡𑁆𑀝𑀓𑁂 𑀣𑀽𑀧𑁂, 𑀓𑀸𑀭𑀸𑀧𑁂𑀲𑀺 𑀲𑀺𑀮𑀸𑀫𑀬𑀁;

𑀤𑀢𑁆𑀯𑀸𑀦 𑀲𑀢𑀲𑀳𑀲𑁆𑀲𑀁, 𑀯𑀺𑀳𑀸𑀭𑁂 𑀘𑁂𑀢𑀺𑀬𑀯𑁆𑀳𑀬𑁂.

𑀕𑀺𑀭𑀺𑀓𑀼𑀫𑁆𑀪𑀺𑀮𑀦𑀸𑀫𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀫𑀳𑀫𑁆𑀳𑀺 𑀲𑁄;

𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑀅𑀭𑀺𑀝𑁆𑀞𑀯𑀺𑀳𑀸𑀭𑀁 𑀓𑀸𑀭𑁂𑀲𑀺, 𑀢𑀣𑀸𑀓𑀦𑁆𑀤𑀭𑀳𑀺𑀦𑀓𑀁;

𑀕𑀸𑀫𑀺𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁, 𑀪𑁂𑀲𑀚𑁆𑀚𑀸𑀦𑀺 𑀅𑀤𑀸𑀧𑀬𑀺.

𑀓𑀺𑀫𑀺𑀘𑁆𑀙𑀓𑀁 𑀢𑀡𑁆𑀟𑀼𑀮𑀜𑁆𑀘, 𑀪𑀺𑀓𑁆𑀔𑀼𑀦𑀻𑀦𑀫𑀤𑀸𑀧𑀬𑀺;

𑀲𑀫𑀸𑀦𑀯’𑀞𑀫𑀸𑀲𑀜𑁆𑀘, 𑀭𑀚𑁆𑀚𑀁 𑀲𑁄 𑀓𑀸𑀭𑀬𑀻 𑀇𑀥.

𑀫𑀢𑁂 𑀮𑀚𑁆𑀚𑀺𑀓𑀢𑀺𑀲𑁆𑀲𑀫𑁆𑀳𑀺, 𑀓𑀦𑀺𑀝𑁆𑀞𑁄 𑀢𑀲𑁆𑀲 𑀓𑀸𑀭𑀬𑀺;

𑀭𑀚𑁆𑀚𑀁 𑀙𑀴𑁂𑀯 𑀯𑀲𑁆𑀲𑀸𑀦𑀺, 𑀔𑀮𑁆𑀮𑀸𑀝𑀦𑀸𑀕𑀦𑀸𑀫𑀓𑁄.

𑀮𑁄𑀳𑀧𑀸𑀲𑀸𑀤𑀧𑀭𑀺𑀯𑀸𑀭𑁂, 𑀧𑀸𑀲𑀸𑀤𑁂’𑀢𑀺 𑀫𑀦𑁄𑀭𑀫𑁂;

𑀮𑁄𑀳𑀧𑀸𑀲𑀸𑀤𑀲𑁄𑀪𑀢𑁆𑀣𑀁, 𑀏𑀲𑁄 𑀤𑁆𑀯𑀢𑁆𑀢𑀺𑀁𑀲𑀓𑀸𑀭𑀬𑀺.

𑀫𑀳𑀸𑀣𑀽𑀧𑀲𑁆𑀲 𑀧𑀭𑀺𑀢𑁄, 𑀘𑀸𑀭𑀼𑀦𑁄 𑀳𑁂𑀫𑀫𑀸𑀮𑀺𑀦𑁄;

𑀯𑀸𑀮𑀺𑀓𑀗𑁆𑀕𑀡𑀫𑀭𑀺𑀬𑀸𑀤𑀁, 𑀧𑀸𑀓𑀸𑀭𑀜𑁆𑀘 𑀅𑀓𑀸𑀭𑀬𑀺.

𑀲𑁄𑀯𑀓𑀼𑀭𑀼𑀦𑁆𑀤𑀧𑀸𑀲𑀓𑀁, 𑀯𑀺𑀳𑀸𑀭𑀜𑁆𑀘 𑀅𑀓𑀸𑀭𑀬𑀺;

𑀧𑀼𑀜𑁆𑀜𑀓𑀫𑁆𑀫𑀸𑀦𑀺𑀘𑀜𑁆𑀜𑀸𑀦𑀺, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀢𑀁 𑀫𑀳𑀸𑀭𑀢𑁆𑀢𑀢𑁄𑀦𑀸𑀫, 𑀲𑁂𑀦𑀸𑀧𑀢𑀺 𑀫𑀳𑀻𑀧𑀢𑀺𑀁;

𑀔𑀮𑁆𑀮𑀸𑀝𑀦𑀸𑀕𑀭𑀸𑀚𑀸𑀦𑀁, 𑀦𑀕𑀭𑁂𑀬𑁂𑀯 𑀅𑀕𑁆𑀕𑀳𑀺.

𑀢𑀲𑁆𑀲 𑀭𑀜𑁆𑀜𑁄 𑀓𑀦𑀺𑀝𑁆𑀞𑁄𑀢𑀼, 𑀯𑀝𑁆𑀝𑀕𑀸𑀫𑀡𑀺𑀦𑀸𑀫𑀓𑁄;

𑀢𑀁 𑀤𑀼𑀝𑁆𑀞𑀲𑁂𑀦𑀸𑀧𑀢𑀺𑀓𑀁, 𑀳𑀦𑁆𑀢𑁆𑀯𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀔𑀮𑁆𑀮𑀸𑀝𑀦𑀸𑀕𑀭𑀜𑁆𑀜𑁄𑀲𑁄, 𑀧𑀼𑀢𑁆𑀢𑀓𑀁 𑀲𑀓𑀪𑀸𑀢𑀼𑀦𑁄;

𑀫𑀳𑀸𑀘𑀽𑀮𑀺𑀓𑀦𑀸𑀫𑀸𑀦𑀁, 𑀧𑀼𑀢𑁆𑀢𑀞𑀸𑀦𑁂 𑀞𑀧𑁂𑀲𑀺 𑀘.

𑀢𑀫𑁆𑀫𑀸𑀢𑀭𑀁 𑀦𑀼𑀴𑀸𑀤𑁂𑀯𑀺𑀁, 𑀫𑀳𑁂𑀲𑀺𑀜𑁆𑀘 𑀅𑀓𑀸𑀲𑀺𑀲𑁄;

𑀧𑀻𑀢𑀺𑀞𑀸𑀦𑁂 𑀞𑀺𑀢𑀢𑀸’𑀲𑁆𑀲, 𑀧𑀻𑀢𑀺𑀭𑀸𑀚𑀸𑀢𑀺 𑀅𑀩𑁆𑀭𑀯𑀼𑀁.

𑀏𑀯𑀁 𑀭𑀚𑁆𑀚𑁂’𑀪𑀺𑀲𑀺𑀢𑁆𑀢𑀲𑁆𑀲, 𑀢𑀲𑁆𑀲 𑀫𑀸𑀲𑀫𑁆𑀳𑀺 𑀧𑀜𑁆𑀘𑀫𑁂;

𑀭𑁄𑀳𑀡𑁂 𑀦𑀓𑀼𑀮𑀦𑀕𑀭𑁂, 𑀏𑀓𑁄 𑀩𑁆𑀭𑀸𑀳𑁆𑀫𑀡𑀘𑁂𑀝𑀢𑁄.

𑀢𑀺𑀬𑁄 ¶ 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀯𑀘𑁄 𑀲𑀼𑀢𑁆𑀯𑀸 𑀅𑀧𑀡𑁆𑀟𑀺𑀢𑁄;

𑀘𑁄𑀭𑁄 𑀅𑀲𑀼 𑀫𑀳𑀸𑀢𑀲𑁆𑀲, 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺 𑀘.

𑀲𑀕𑀡𑀸𑀲𑀢𑁆𑀢𑀤𑀫𑀺𑀴𑀸, 𑀫𑀳𑀸𑀢𑀺𑀢𑁆𑀣𑀫𑁆𑀳𑀺 𑀑𑀢𑀭𑀼𑀁;

𑀢𑀤𑀸 𑀩𑁆𑀭𑀸𑀳𑁆𑀫𑀡𑀢𑀺𑀬𑁄 𑀘, 𑀢𑁂 𑀲𑀢𑁆𑀢𑀤𑀫𑀺𑀴𑀸𑀧𑀺𑀘.

𑀙𑀓𑁆𑀓𑀢𑁆𑀣𑀸𑀬 𑀯𑀺𑀲𑀚𑁆𑀚𑁂𑀲𑀼𑀁, 𑀮𑁂𑀔𑀁 𑀪𑀽𑀧𑀢𑀺𑀲𑀦𑁆𑀢𑀺𑀓𑀁;

𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀢𑀺𑀬𑀲𑁆𑀲, 𑀮𑁂𑀔𑀁 𑀧𑁂𑀲𑁂𑀲𑀺 𑀦𑀻𑀢𑀺𑀫𑀸.

‘‘𑀭𑀚𑁆𑀚𑀁 𑀢𑀯 𑀇𑀤𑀸𑀦𑁂𑀯, 𑀕𑀡𑁆𑀳 𑀢𑁆𑀯𑀁 𑀤𑀫𑀺𑀴𑁂’’ 𑀇𑀢𑀺;

𑀲𑀸𑀥𑀽𑀢𑀺 𑀲𑁄 𑀤𑀫𑀺𑀴𑁂𑀳𑀺, 𑀬𑀼𑀚𑁆𑀛𑀺 𑀕𑀡𑁆𑀳𑀺𑀁𑀲𑀼 𑀢𑁂 𑀢𑀼 𑀢𑀁.

𑀢𑀢𑁄 𑀢𑁂 𑀤𑀫𑀺𑀴𑀸 𑀬𑀼𑀤𑁆𑀥𑀁, 𑀭𑀜𑁆𑀜𑀸 𑀲𑀳 𑀧𑀯𑀢𑁆𑀢𑀬𑀼𑀁;

𑀓𑁄𑀴𑀫𑁆𑀩𑀸𑀮𑀓𑀲𑀸𑀫𑀦𑁆𑀢𑀸, 𑀬𑀼𑀤𑁆𑀥𑁂 𑀭𑀸𑀚𑀸 𑀧𑀭𑀸𑀚𑀺𑀢𑁄.

𑀢𑀺𑀢𑁆𑀣𑀸𑀭𑀸𑀫𑀤𑀼𑀯𑀸𑀭𑁂𑀦, 𑀭𑀣𑀸𑀭𑀼𑀴𑁆𑀳𑁄 𑀧𑀮𑀸𑀬𑀢𑀺;

𑀧𑀡𑁆𑀟𑀼𑀓𑀸𑀪𑀬𑀭𑀸𑀚𑁂𑀦, 𑀢𑀺𑀢𑁆𑀣𑀸𑀭𑀸𑀫𑁄𑀳𑀺 𑀓𑀸𑀭𑀺𑀢𑁄;

𑀯𑀸𑀲𑀺𑀢𑁄 𑀘 𑀢𑀤𑀸 𑀆𑀲𑀺, 𑀏𑀓𑀯𑀻𑀲𑀢𑀺 𑀭𑀸𑀚𑀼𑀲𑀽.

𑀢𑀁 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀁, 𑀦𑀺𑀕𑀡𑁆𑀞𑁄𑀕𑀺𑀭𑀺𑀦𑀸𑀫𑀓𑁄;

‘‘𑀧𑀮𑀸𑀬𑀢𑀺 𑀫𑀳𑀸𑀓𑀸𑀴-𑀲𑀻𑀳𑀴𑁄’’𑀢𑀺 𑀪𑀼𑀲𑀁 𑀭𑀯𑀺.

𑀢𑀁 𑀲𑀼𑀢𑁆𑀯𑀸𑀦 𑀫𑀳𑀸𑀭𑀸𑀚𑀸, ‘‘𑀲𑀺𑀤𑁆𑀥𑁂 𑀫𑀫 𑀫𑀦𑁄𑀭𑀣𑁂;

𑀯𑀺𑀳𑀸𑀭𑀁 𑀏𑀢𑁆𑀣 𑀓𑀸𑀭𑁂𑀲𑁆𑀲𑀁’’, 𑀇𑀘𑁆𑀘𑁂𑀯𑀁 𑀘𑀺𑀦𑁆𑀢𑀬𑀻 𑀢𑀤𑀸.

𑀲𑀕𑀩𑁆𑀪𑀁 𑀅𑀦𑀼𑀮𑀸𑀤𑁂𑀯𑀺𑀁, 𑀅𑀕𑁆𑀕𑀳𑀻 𑀭𑀓𑁆𑀔𑀺𑀬𑀸 𑀇𑀢𑀺;

𑀫𑀳𑀸𑀘𑀽𑀴 𑀫𑀳𑀸𑀦𑀸𑀕-𑀓𑀼𑀫𑀸𑀭𑁂𑀘𑀸𑀧𑀻 𑀭𑀓𑁆𑀔𑀺𑀬𑁂.

𑀭𑀣𑀲𑁆𑀲 𑀮𑀳𑀼𑀪𑀸𑀯𑀢𑁆𑀣𑀁, 𑀟𑀢𑁆𑀯𑀸 𑀘𑀽𑀴𑀸𑀫𑀡𑀺𑀁𑀲𑀼𑀪𑀁;

𑀑𑀢𑀸𑀭𑁂𑀲𑀺 𑀲𑁄𑀫𑀤𑁂𑀯𑀺𑀁, 𑀢𑀲𑁆𑀲’𑀦𑀼𑀜𑁆𑀜𑀸𑀬 𑀪𑀽𑀧𑀢𑀺.

𑀬𑀼𑀤𑁆𑀥𑀸𑀬𑀕𑀫𑀦𑁂𑀬𑁂𑀯, 𑀧𑀼𑀢𑁆𑀢𑀓𑁂 𑀤𑁆𑀯𑁂 𑀘 𑀤𑁂𑀯𑀺𑀬𑁄;

𑀕𑀸𑀳𑀬𑀺𑀢𑁆𑀯𑀸𑀦 𑀦𑀺𑀓𑁆𑀔𑀦𑁆𑀢𑁄, 𑀲𑀗𑁆𑀓𑀺𑀢𑁄 𑀲𑁄 𑀧𑀭𑀸𑀚𑀬𑁂.

𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀕𑀸𑀳𑁂𑀢𑀼𑀁, 𑀧𑀢𑁆𑀢𑀁 𑀪𑀼𑀢𑁆𑀢𑀁 𑀚𑀺𑀦𑁂𑀦 𑀢𑀁;

𑀧𑀮𑀸𑀬𑀺𑀢𑁆𑀯𑀸 𑀯𑁂𑀲𑁆𑀲𑀕𑀻𑀭𑀺-𑀯𑀦𑁂 𑀅𑀪𑀺𑀦𑀺𑀬𑀺𑀬𑀺𑀲𑁄.

𑀓𑀼𑀢𑁆𑀣𑀺𑀓𑁆𑀓𑀼𑀮𑀫𑀳𑀸𑀢𑀺𑀲𑁆𑀲-𑀣𑁂𑀭𑁄 𑀤𑀺𑀲𑁆𑀯𑀸 𑀢𑀳𑀁 𑀢𑀼 𑀢𑀁;

𑀪𑀢𑁆𑀢𑀁 𑀧𑀸𑀤𑀸 𑀅𑀦𑀸𑀫𑀝𑁆𑀞𑀁, 𑀧𑀺𑀡𑁆𑀟𑀤𑀸𑀦𑀁 𑀯𑀺𑀯𑀚𑁆𑀚𑀺𑀬.

𑀅𑀣 ¶ 𑀓𑁂𑀢𑀓𑀺𑀧𑀢𑁆𑀢𑀫𑁆𑀳𑀺, 𑀮𑀺𑀔𑀺𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄;

𑀲𑀗𑁆𑀖𑀪𑁄𑀕𑀁 𑀯𑀺𑀳𑀸𑀭𑀲𑁆𑀲, 𑀢𑀲𑁆𑀲 𑀧𑀸𑀤𑀸𑀫𑀳𑀻𑀧𑀢𑀺.

𑀢𑀢𑁄 𑀕𑀦𑁆𑀢𑁆𑀯𑀸 𑀲𑀺𑀮𑀸𑀲𑁄𑀩𑁆𑀪-𑀓𑀡𑁆𑀟𑀓𑀫𑁆𑀳𑀺 𑀯𑀲𑀻 𑀢𑀢𑁄;

𑀕𑀦𑁆𑀢𑁆𑀯𑀸𑀦 𑀫𑀸𑀢𑀼𑀯𑁂𑀮𑀗𑁆𑀕𑁂, 𑀲𑀸𑀮𑀕𑀮𑀲𑀫𑀻𑀧𑀕𑁄.

𑀢𑀢𑁆𑀣𑀤𑁆𑀤𑀲 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀣𑁂𑀭𑀁 𑀣𑁂𑀭𑁄 𑀫𑀳𑀻𑀧𑀢𑀺𑀁;

𑀉𑀧𑀝𑁆𑀞𑀸𑀓𑀲𑁆𑀲 𑀅𑀧𑁆𑀧𑁂𑀲𑀺, 𑀢𑀦𑀲𑀺𑀯𑀲𑁆𑀲 𑀲𑀸𑀥𑀼𑀓𑀁.

𑀢𑀲𑁆𑀲 𑀲𑁄 𑀢𑀦𑀲𑀺𑀯𑀲𑁆𑀲, 𑀭𑀝𑁆𑀞𑀺𑀓𑀲𑁆𑀲’𑀦𑁆𑀢𑀺𑀓𑁂 𑀢𑀳𑀺𑀁;

𑀭𑀸𑀚𑀸 𑀘𑀼𑀤𑁆𑀤𑀲𑀯𑀲𑁆𑀲𑀸𑀦𑀺, 𑀯𑀲𑀻 𑀢𑁂𑀦 𑀉𑀧𑀝𑁆𑀞𑀺𑀢𑁄.

𑀲𑀢𑁆𑀢𑀲𑀼 𑀤𑀫𑀻𑀴𑁂𑀲𑁆𑀯𑁂’𑀓𑁄, 𑀲𑁄𑀫𑀸𑀤𑁂𑀯𑀺𑀁 𑀫𑀤𑀸𑀯𑀳𑀁;

𑀭𑀸𑀕𑀭𑀢𑁆𑀢𑁄 𑀕𑀳𑁂𑀢𑁆𑀯𑀸𑀦, 𑀧𑀭𑀢𑀻𑀭𑀫𑀕𑀸𑀮𑀳𑀼𑀁.

𑀏𑀓𑁄𑀧𑀢𑁆𑀢𑀁 𑀤𑀲𑀩𑀮𑀲𑁆𑀲, 𑀅𑀦𑀼𑀭𑀸𑀥𑀧𑀼𑀭𑁂 𑀞𑀺𑀢𑀁;

𑀆𑀤𑀸𑀬 𑀢𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀧𑀭𑀢𑀻𑀭𑀫𑀕𑀸𑀮𑀳𑀼𑀁.

𑀧𑀼𑀴𑀳𑀢𑁆𑀣𑁄 𑀢𑀼 𑀤𑀫𑀺𑀴𑁄, 𑀢𑀻𑀡𑀺𑀯𑀲𑁆𑀲𑀸𑀦𑀺 𑀓𑀸𑀭𑀬𑀺;

𑀭𑀚𑁆𑀚𑀁 𑀲𑁂𑀦𑀸𑀧𑀢𑀺𑀁 𑀓𑀢𑁆𑀯𑀸, 𑀤𑀫𑀺𑀴𑀁 𑀩𑀸𑀳𑀺𑀬𑀯𑁆𑀳𑀬𑀁.

𑀧𑀼𑀴𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀁, 𑀤𑀽𑀭𑁂 𑀯𑀲𑁆𑀲𑀸𑀦𑀺 𑀩𑀸𑀳𑀻𑀬𑁄;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀢𑀲𑁆𑀲𑀸’𑀲𑀺, 𑀧𑀡𑀬𑀫𑀸𑀭𑁄 𑀘𑀫𑀽𑀧𑀢𑀺.

𑀩𑀸𑀳𑀻𑀬𑀁 𑀢𑀁 𑀕𑀳𑁂𑀢𑁆𑀯𑀸𑀦, 𑀭𑀸𑀚𑀸’𑀲𑀺 𑀧𑀡𑀬𑀫𑀸𑀭𑀓𑁄;

𑀲𑀢𑁆𑀢𑀯𑀲𑁆𑀲𑀸𑀦𑀺 𑀢𑀲𑁆𑀲𑀸’𑀲𑀺, 𑀧𑀺𑀴𑀬𑀫𑀸𑀭𑁄 𑀘𑀫𑀽𑀧𑀢𑀺.

𑀧𑀡𑀬𑀫𑀸𑀭𑀁 𑀕𑀳𑁂𑀢𑁆𑀯𑀸 𑀲𑁄, 𑀭𑀸𑀚𑀸𑀲𑀺 𑀧𑀻𑀴𑀬𑀫𑀸𑀭𑀓𑁄;

𑀲𑀢𑁆𑀢𑀫𑀸𑀲𑀸𑀦𑀺 𑀢𑀲𑁆𑀲𑀸𑀲𑀺, 𑀤𑀸𑀞𑀺𑀬𑁄 𑀢𑀼 𑀘𑀫𑀽𑀧𑀢𑀺.

𑀧𑀻𑀴𑀬𑀫𑀸𑀭𑀁 𑀕𑀳𑁂𑀢𑁆𑀯𑀸 𑀲𑁄, 𑀤𑀸𑀞𑀺𑀬𑁄 𑀤𑀫𑀺𑀴𑁄 𑀧𑀦;

𑀭𑀚𑁆𑀚𑀁’𑀦𑀼𑀭𑀸𑀥𑀦𑀕𑀭𑁂, 𑀤𑀼𑀯𑁂 𑀯𑀲𑁆𑀲𑀸𑀦𑀺 𑀓𑀸𑀭𑀬𑀺.

𑀏𑀯𑀁 𑀤𑀫𑀺𑀴𑀭𑀸𑀚𑀽𑀦𑀁, 𑀢𑁂𑀲𑀁 𑀧𑀜𑁆𑀘𑀦𑁆𑀦𑀫𑁂𑀯𑀳𑀺;

𑀳𑁄𑀦𑁆𑀢𑀺 𑀘𑀼𑀤𑁆𑀤𑀲𑀯𑀲𑁆𑀲𑀸𑀦𑀻, 𑀲𑀢𑁆𑀢𑀫𑀸𑀲𑀸 𑀘 𑀉𑀢𑁆𑀢𑀭𑀺𑀁.

𑀕𑀢𑀸𑀬 𑀢𑀼 𑀦𑀺𑀯𑀸𑀲𑀢𑁆𑀣𑀁, 𑀫𑀮𑀬𑁂’𑀦𑀼𑀮𑀤𑁂𑀯𑀺𑀬𑀸;

𑀪𑀭𑀺𑀬𑀸𑀓𑀦𑀲𑀺𑀯𑀲𑁆𑀲, 𑀧𑀸𑀤𑀸𑀧𑀳𑀭𑀺 𑀧𑀘𑁆𑀙𑀺𑀬𑀁.

𑀓𑀼𑀚𑁆𑀛𑀺𑀢𑁆𑀯𑀸 𑀭𑁄𑀤𑀫𑀸𑀦𑀸𑀲𑀸, 𑀭𑀸𑀚𑀸𑀦𑀁 𑀉𑀧𑀲𑀓𑀺𑀫𑀺;

𑀢𑀁 𑀲𑀼𑀢𑁆𑀯𑀸 𑀢𑀦𑀲𑀺𑀯𑁄𑀲𑁄, 𑀫𑀦𑀼𑀫𑀸𑀤𑀸𑀬 𑀦𑀺𑀓𑁆𑀔𑀫𑀺.

𑀤𑁂𑀯𑀺𑀬𑀸 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀢𑀲𑁆𑀲 𑀆𑀕𑀫𑀦𑀸 𑀧𑀼𑀭𑀸;

𑀤𑁆𑀯𑀺𑀧𑀼𑀢𑁆𑀢𑀁 𑀤𑁂𑀯𑀺𑀫𑀸𑀤𑀸𑀬, 𑀢𑀢𑁄 𑀭𑀸𑀚𑀸’𑀧𑀺 𑀦𑀺𑀓𑁆𑀔𑀫𑀺.

𑀥𑀦𑀼𑀁 𑀲𑀦𑁆𑀥𑀸𑀬 𑀆𑀬𑀦𑁆𑀢𑀁, 𑀲𑀻𑀯𑀁 𑀯𑀺𑀚𑁆𑀛𑀺 𑀫𑀳𑀸𑀲𑀻𑀯𑁄;

𑀭𑀸𑀚𑀸 𑀦𑀸𑀫𑀁 𑀪𑀸𑀯𑀬𑀺𑀢𑁆𑀯𑀸, 𑀅𑀓𑀸𑀲𑀺 𑀚𑀺𑀦𑀲𑀗𑁆𑀕𑀳𑀁.

𑀅𑀮𑀢𑁆𑀣 𑀅𑀝𑁆𑀞𑀸𑀫𑀘𑁆𑀘𑁂𑀘, 𑀫𑀳𑀦𑁆𑀢𑁂 𑀬𑁄𑀥𑀲𑀫𑁆𑀫𑀢𑁂;

𑀧𑀭𑀺𑀯𑀸𑀭𑁄 𑀫𑀳𑀸𑀆𑀲𑀻, 𑀧𑀭𑀺𑀳𑀸𑀭𑁄 𑀘 𑀭𑀸𑀚𑀺𑀦𑁄.

𑀓𑀼𑀫𑁆𑀪𑀻𑀮𑀓𑀫𑀳𑀸𑀢𑀺𑀲𑁆𑀲-𑀣𑁂𑀭 𑀤𑀺𑀲𑁆𑀯𑀸 𑀫𑀳𑀸𑀬𑀲𑁄;

𑀅𑀘𑁆𑀙𑀕𑀮𑁆𑀮𑀯𑀺𑀳𑀸𑀭𑀫𑁆𑀳𑀺, 𑀩𑀼𑀤𑁆𑀥𑀧𑀽𑀚𑀫𑀓𑀸𑀭𑀬𑀺.

𑀯𑀢𑁆𑀣𑀼𑀁 𑀲𑁄𑀥𑁂𑀢𑀼𑀫𑀸𑀭𑀼𑀴𑁆𑀳𑁄, 𑀅𑀓𑀸𑀲𑀘𑁂𑀢𑀺𑀬𑀗𑁆𑀕𑀡𑀁;

𑀓𑀯𑀺𑀲𑀻𑀲𑁂 𑀅𑀫𑀘𑁆𑀘𑀫𑁆𑀳𑀺, 𑀑𑀭𑁄𑀳𑀦𑁆𑀢𑁄𑀫𑀳𑀻𑀧𑀢𑀺.

𑀆𑀭𑁄𑀳𑀦𑁆𑀢𑁄 𑀲𑀤𑁂𑀯𑀺𑀓𑁄, 𑀤𑀺𑀲𑁆𑀯𑀸 𑀫𑀕𑁆𑀕𑁂 𑀦𑀺𑀲𑀺𑀦𑁆𑀦𑀓𑀁;

‘‘𑀦 𑀦𑀺𑀧𑀦𑁆𑀦𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸, 𑀓𑀯𑀺𑀲𑀻𑀲𑀁 𑀅𑀖𑀸𑀢𑀬𑀺.

𑀲𑁂𑀲𑀸 𑀲𑀢𑁆𑀢𑀅𑀫𑀘𑁆𑀘𑀸𑀯𑀺, 𑀦𑀺𑀩𑁆𑀩𑀺𑀦𑁆𑀦𑀸 𑀢𑁂𑀦 𑀭𑀸𑀚𑀺𑀦𑀸;

𑀢𑀲𑁆𑀲’𑀦𑁆𑀢𑀺𑀓𑀸 𑀧𑀮𑀸𑀬𑀺𑀢𑁆𑀯𑀸, 𑀧𑀓𑁆𑀓𑀫𑀦𑁆𑀢𑀸 𑀬𑀣𑀸𑀭𑀼𑀘𑀺.

𑀫𑀕𑁆𑀕𑁂 𑀯𑀺𑀮𑀼𑀢𑁆𑀢𑀸 𑀘𑁄𑀭𑁂𑀳𑀺, 𑀯𑀺𑀳𑀸𑀭𑀁 𑀳𑀫𑁆𑀩𑀼𑀕𑀮𑁆𑀮𑀓𑀁;

𑀧𑀯𑀺𑀲𑀺𑀢𑁆𑀯𑀸𑀦 𑀅𑀤𑁆𑀤𑀓𑁆𑀔𑀼𑀁, 𑀢𑀺𑀲𑁆𑀲𑀢𑁆𑀣𑁂𑀭𑀁 𑀩𑀳𑀼𑀲𑁆𑀲𑀼𑀢𑀁.

𑀘𑀢𑀼𑀦𑁂𑀓𑀸𑀬𑀺𑀓𑁄 𑀣𑁂𑀭𑁄, 𑀬𑀣𑀸𑀮𑀤𑁆𑀥𑀸𑀦𑀺 𑀤𑀸𑀧𑀬𑀺;

𑀯𑀢𑁆𑀣𑀨𑀸𑀡𑀺𑀢𑀢𑁂𑀮𑀸𑀦𑀺, 𑀢𑀡𑁆𑀟𑀼𑀮𑀸 𑀧𑀸𑀳𑀼𑀡𑀸 𑀢𑀣𑀸.

‘‘𑀓𑀼𑀳𑀺𑀁𑀬𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁂;

‘‘𑀓𑀸𑀭𑁂𑀢𑀼𑀁 𑀓𑁂𑀳𑀺 𑀲𑀓𑁆𑀓𑀸 𑀦𑀼, 𑀚𑀺𑀦𑀲𑀸𑀲𑀦𑀧𑀕𑁆𑀕𑀳𑀁;

𑀤𑀫𑀺𑀴𑁂𑀳𑀺 𑀯𑀸’𑀣 𑀭𑀜𑁆𑀜𑀸, 𑀇𑀢𑀺 𑀧𑀼𑀝𑁆𑀞𑀸 𑀢𑀼 𑀢𑁂 𑀧𑀦.

‘‘𑀭𑀜𑁆𑀜𑁄 𑀲𑀓𑁆𑀓𑀸’’𑀢𑀺 𑀆𑀳𑀁𑀲𑀼, 𑀲𑀜𑁆𑀜𑀸𑀧𑁂𑀢𑁆𑀯𑀸𑀦 𑀢𑁂 𑀇𑀢𑀺;

𑀉𑀪𑁄 𑀢𑀺𑀲𑁆𑀲 𑀫𑀳𑀸𑀢𑀺𑀲𑁆𑀲-𑀣𑁂𑀭𑀸 𑀆𑀤𑀸𑀬 𑀢𑁂 𑀢𑀢𑁄.

𑀭𑀸𑀚𑀺𑀦𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑀬𑀼𑀁;

𑀭𑀸𑀚𑀸 𑀘 𑀢𑁂 𑀅𑀫𑀘𑁆𑀘𑀸 𑀘, 𑀣𑁂𑀭𑁄 𑀏𑀯 𑀫𑀬𑀸𑀘𑀬𑀼𑀁.

𑀲𑀺𑀤𑁆𑀥𑁂 ¶ 𑀓𑀫𑁆𑀫𑁂 𑀧𑁂𑀲𑀺𑀢𑁂𑀦𑁄, 𑀕𑀦𑁆𑀢𑀩𑁆𑀩𑀁 𑀲𑀦𑁆𑀢𑀺𑀓𑀁 𑀇𑀢𑀺;

𑀣𑁂𑀭𑀸 𑀤𑀢𑁆𑀯𑀸 𑀧𑀝𑀺𑀜𑁆𑀜𑀁 𑀢𑁂, 𑀬𑀣𑀸𑀞𑀸𑀦𑀫𑀕𑀜𑁆𑀙𑀺𑀲𑀼𑀁.

𑀅𑀦𑀼𑀭𑀸𑀥𑀧𑀼𑀭𑀁 𑀭𑀸𑀚𑀸, 𑀆𑀕𑀦𑁆𑀢𑁆𑀯𑀸𑀦 𑀫𑀳𑀸𑀬𑀲𑁄;

𑀤𑀸𑀞𑀺𑀓𑀁 𑀤𑀫𑀺𑀴𑀁 𑀳𑀦𑁆𑀢𑁆𑀯𑀸, 𑀲𑀬𑀁 𑀭𑀚𑁆𑀚𑀫𑀓𑀸𑀭𑀬𑀺.

𑀢𑀢𑁄 𑀦𑀺𑀕𑀡𑁆𑀞𑀸𑀭𑀸𑀫𑀁 𑀢𑀁, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀯𑀺𑀳𑀸𑀭𑀁 𑀓𑀸𑀭𑀬𑀺 𑀢𑀢𑁆𑀣, 𑀤𑁆𑀯𑀸𑀤𑀲 𑀧𑀭𑀺𑀯𑁂𑀡𑀓𑀁.

𑀫𑀳𑀸𑀯𑀺𑀳𑀸𑀭𑀧𑀝𑁆𑀞𑀸𑀦𑀸, 𑀤𑁆𑀯𑀻𑀲𑀼 𑀯𑀲𑁆𑀲𑀲 𑀢𑁂𑀲𑀼 𑀘;

𑀲𑀢𑁆𑀢𑀭𑀲𑀲𑀼 𑀯𑀲𑁆𑀲𑁂𑀲𑀼, 𑀤𑀲𑀫𑀸𑀲𑀸’𑀫𑀺𑀓𑁂𑀲𑀼 𑀘.

𑀢𑀣𑀸 𑀤𑀺𑀦𑁂𑀲𑀼 𑀤𑀲𑀲𑀼, 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀲𑀸𑀤𑀭𑁄;

𑀅𑀪𑀬𑀕𑀺𑀭𑀺 𑀯𑀺𑀳𑀸𑀭𑀁𑀲𑁄, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑀅𑀓𑁆𑀓𑁄𑀲𑀺𑀬𑀺𑀢𑁆𑀯𑀸 𑀢𑁂 𑀣𑁂𑀭𑁂, 𑀢𑁂𑀲𑀼 𑀧𑀼𑀩𑁆𑀩𑀼𑀧𑀓𑀸𑀭𑀺𑀦𑁄;

𑀢𑀁 𑀫𑀳𑀸𑀢𑀺𑀲𑁆𑀲 𑀣𑁂𑀭𑀲𑁆𑀲, 𑀯𑀺𑀳𑀸𑀭𑀁 𑀫𑀸𑀦𑀤𑁄 𑀅𑀤𑀸.

𑀕𑀺𑀭𑀺𑀲𑁆𑀲 𑀬𑀲𑁆𑀫𑀸 𑀕𑀸𑀭𑀸𑀫𑁂, 𑀭𑀸𑀚𑀸 𑀓𑀸𑀭𑁂𑀲𑀺 𑀲𑁄𑀪𑀬𑁄;

𑀢𑀲𑁆𑀫𑀸’𑀪𑀬 𑀕𑀺𑀭𑀺𑀢𑁆𑀯𑁂𑀯, 𑀯𑀺𑀳𑀸𑀭𑁄 𑀦𑀸𑀫𑀓𑁄 𑀅𑀳𑀼.

𑀭𑀣𑀸 𑀑𑀭𑁄𑀧𑀺𑀢𑀸 𑀲𑀸 𑀳𑀺, 𑀢𑀲𑁆𑀫𑀺𑀁𑀞𑀸𑀦𑁂 𑀯𑀭𑀗𑁆𑀕𑀦𑀸;

𑀓𑀤𑁆𑀤𑀫𑁆𑀩𑀧𑀼𑀧𑁆𑀨 𑀕𑀼𑀫𑁆𑀩𑀫𑁆𑀳𑀺, 𑀦𑀺𑀮𑀺𑀦𑀸 𑀢𑀢𑁆𑀣 𑀅𑀤𑁆𑀤𑀲.

𑀫𑀼𑀢𑁆𑀢𑀬𑀦𑁆𑀢𑀁 𑀲𑀸𑀫𑀡𑁂𑀭𑀁, 𑀫𑀕𑁆𑀕𑀁 𑀳𑀢𑁆𑀣𑁂𑀦 𑀙𑀸𑀤𑀺𑀬;

𑀭𑀸𑀚𑀸 𑀢𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀯𑀺𑀳𑀸𑀭𑀁 𑀢𑀢𑁆𑀣 𑀓𑀸𑀭𑀬𑀺.

𑀢𑁂𑀲𑀼 𑀲𑀢𑁆𑀢𑀲𑀼 𑀬𑁄𑀥𑁂𑀲𑀼, 𑀉𑀢𑁆𑀢𑀺𑀬𑁄 𑀦𑀸𑀫 𑀓𑀸𑀭𑀬𑀺;

𑀦𑀕𑀭𑀫𑁆𑀳𑀸 𑀤𑀓𑁆𑀔𑀺𑀡𑀢𑁄, 𑀯𑀺𑀳𑀸𑀭𑀁 𑀤𑀓𑁆𑀔𑀺𑀡𑀯𑁆𑀳𑀬𑀁.

𑀢𑀢𑁆𑀢𑁂𑀯 ¶ 𑀫𑀽𑀮𑀯𑁄𑀓𑀸𑀲, 𑀯𑀻𑀳𑀸𑀭𑀁 𑀫𑀽𑀮𑀦𑀸𑀫𑀓𑁄;

𑀅𑀫𑀘𑁆𑀘𑁄 𑀓𑀸𑀭𑀬𑀻 𑀢𑁂𑀦, 𑀲𑁄𑀧𑀺 𑀢𑀁𑀦𑀸𑀫𑀓𑁄 𑀅𑀳𑀼.

𑀓𑀸𑀭𑁂𑀲𑀺 𑀲𑀸𑀮𑀺𑀬𑀸𑀭𑀸𑀫𑀁, 𑀅𑀫𑀘𑁆𑀘𑁄 𑀲𑀸𑀮𑀺𑀬𑀯𑁆𑀳𑀬𑁄;

𑀓𑀸𑀭𑁂𑀲𑀺 𑀧𑀩𑁆𑀩𑀢𑀸𑀭𑀸𑀫𑀁, 𑀅𑀫𑀘𑁆𑀘𑁄 𑀧𑀩𑁆𑀩𑀢𑀯𑁆𑀳𑀬𑁄.

𑀉𑀢𑁆𑀢𑀭𑀢𑀺𑀲𑁆𑀲𑀭𑀸𑀫𑀦𑁆𑀢𑀼, 𑀢𑀺𑀲𑁆𑀲𑀸𑀫𑀘𑁆𑀘𑁄 𑀅𑀓𑀸𑀭𑀬𑀺;

𑀯𑀺𑀳𑀸𑀭𑁂 𑀦𑀺𑀝𑁆𑀞𑀺𑀢𑁂 𑀭𑀫𑁆𑀫𑁂, 𑀢𑀺𑀲𑁆𑀲𑀣𑁂𑀭 𑀫𑀼𑀧𑀘𑁆𑀘𑀢𑁂.

‘‘𑀢𑀼𑀫𑁆𑀳𑀸𑀓𑀁 𑀧𑀝𑀺𑀲𑀦𑁆𑀣𑀸𑀭, 𑀯𑀲𑁂𑀦’𑀫𑁆𑀳𑁂𑀳𑀺 𑀓𑀸𑀭𑀺𑀢𑁂;

𑀯𑀺𑀳𑀸𑀭𑁂 𑀤𑁂𑀫 𑀢𑀼𑀫𑁆𑀳𑀸𑀓𑀁, 𑀇𑀢𑀺 𑀯𑀢𑁆𑀯𑀸 𑀅𑀤𑀁𑀲𑀼 𑀘.

𑀣𑁂𑀭𑁄 𑀲𑀩𑁆𑀩𑀢𑁆𑀣𑀯𑀸𑀲𑁂𑀲𑀺, 𑀢𑁂 𑀢𑁂 𑀪𑀺𑀓𑁆𑀔𑀽 𑀬𑀣𑀸 𑀭𑀳𑀁;

𑀅𑀫𑀘𑁆𑀘𑀸’𑀤𑀁𑀲𑀼 𑀲𑀗𑁆𑀖𑀲𑁆𑀲, 𑀯𑀺𑀯𑀺𑀥𑁂 𑀲𑀫𑀡𑀸𑀭𑀳𑁂.

𑀭𑀸𑀚𑀸 𑀲𑀓𑀯𑀺𑀳𑀸𑀭𑀫𑁆𑀳𑀺, 𑀯𑀲𑀦𑁆𑀢𑁂 𑀲𑀫𑀼𑀧𑀝𑁆𑀞𑀳𑀺;

𑀧𑀘𑁆𑀘𑀬𑁂𑀳𑀺 𑀅𑀦𑀼𑀦𑁂𑀳𑀺, 𑀢𑁂𑀦 𑀢𑁂 𑀩𑀳𑀯𑁄 𑀅𑀳𑀼𑀁.

𑀣𑁂𑀭𑀁 𑀓𑀼𑀮𑁂𑀳𑀻 𑀲𑀁𑀲𑀝𑁆𑀞𑀁, 𑀫𑀳𑀸𑀢𑀺𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑀁;

𑀓𑀼𑀮𑀲𑀁𑀲𑀝𑁆𑀞 𑀤𑁄𑀲𑁂𑀦, 𑀲𑀗𑁆𑀖𑁄 𑀢𑀁 𑀦𑀻𑀳𑀭𑀺 𑀇𑀢𑁄.

𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀧𑀺𑀲𑁆𑀲𑀼𑀢𑁄;

𑀓𑀼𑀤𑁆𑀥𑁄’𑀪𑀬𑀕𑀺𑀭𑀺𑀁 𑀕𑀦𑁆𑀢𑁆𑀯𑀸,

𑀢𑀢𑁄𑀧𑁆𑀧𑀪𑀼𑀢𑀺 𑀢𑁂 𑀪𑀺𑀓𑁆𑀔𑀽, 𑀫𑀳𑀸𑀯𑀺𑀳𑀸𑀭𑀦𑀸𑀕𑀫𑀼𑀁;

𑀏𑀯𑀁 𑀢𑁂’𑀪𑀬𑀕𑀺𑀭𑀺𑀓𑀸, 𑀦𑀺𑀕𑁆𑀕𑀢𑀸 𑀣𑁂𑀭𑀯𑀸𑀤𑀢𑁄.

𑀧𑀪𑀺𑀦𑁆𑀦𑀸’𑀪𑀬𑀕𑀺𑀭𑀺𑀓𑁂𑀳𑀺, 𑀤𑀓𑁆𑀔𑀺𑀡𑀯𑀺𑀳𑀸𑀭𑀺𑀓𑀸𑀬𑀢𑀺;

𑀏𑀯𑀁 𑀢𑁂 𑀣𑁂𑀭𑀯𑀸𑀤𑀻𑀳𑀺, 𑀧𑀪𑀺𑀦𑁆𑀦𑀸 𑀪𑀺𑀓𑁆𑀔𑀯𑁄 𑀤𑁆𑀯𑀺𑀥𑀸.

𑀫𑀳𑀸 𑀅𑀪𑀬𑀪𑀺𑀓𑁆𑀔𑀽 𑀢𑁂, 𑀯𑀟𑁆𑀠𑁂𑀢𑀼𑀁 𑀤𑀻𑀧𑀯𑀸𑀲𑀺𑀦𑁄;

𑀯𑀝𑁆𑀝𑀕𑀸𑀫𑀡𑀺𑀪𑀽𑀫𑀺𑀦𑁆𑀤𑁄, 𑀧𑀢𑁆𑀢𑀺𑀁 𑀦𑀸𑀫 𑀅𑀤𑀸𑀲𑀺 𑀲𑁄.

𑀯𑀺𑀳𑀸𑀭𑀧𑀭𑀺𑀯𑁂𑀡𑀸𑀦𑀺, 𑀖𑀝𑀸𑀩𑀤𑁆𑀥𑁂 𑀅𑀓𑀸𑀭𑀬𑀺;

‘‘𑀧𑀝𑀺𑀲𑀗𑁆𑀔𑀭𑀡𑀁 𑀏𑀯𑀁, 𑀳𑁂𑀲𑁆𑀲𑀢𑀻𑀢𑀺 𑀯𑀺𑀘𑀺𑀦𑁆𑀢𑀺𑀬.

𑀧𑀺𑀝𑀓𑀢𑁆𑀢𑀬𑀧𑀸𑀴𑀺𑀜𑁆𑀘, 𑀢𑀲𑁆𑀲 𑀅𑀝𑁆𑀞𑀓𑀣𑀫𑁆𑀧𑀺 𑀘;

𑀫𑀼𑀔𑀧𑀸𑀞𑁂𑀦 𑀆𑀦𑁂𑀲𑀼𑀁, 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽 𑀫𑀳𑀸𑀫𑀢𑀺.

𑀳𑀸𑀦𑀺𑀁 ¶ 𑀤𑀺𑀲𑁆𑀯𑀸𑀦 𑀲𑀢𑁆𑀢𑀸𑀦𑀁, 𑀢𑀤𑀸 𑀪𑀺𑀓𑁆𑀔𑀽 𑀲𑀫𑀸𑀕𑀢𑀸;

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀸𑀧𑀬𑀼𑀁.

𑀯𑀝𑁆𑀝𑀕𑀸𑀫𑀡𑀺 𑀅𑀪𑀬𑁄, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺;

𑀇𑀢𑀺 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺, 𑀧𑀜𑁆𑀘𑀫𑀸𑀲𑁂𑀲𑀼 𑀆𑀤𑀺𑀢𑁄.

𑀇𑀢𑀻 𑀧𑀭𑀳𑀺𑀢 𑀫𑀢𑁆𑀢𑀦𑁄 𑀳𑀺𑀢𑀜𑁆𑀘,

𑀧𑀝𑀺𑀮𑀪𑀺𑀬𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀺 𑀧𑀜𑁆𑀜𑁄;

𑀯𑀺𑀧𑀼𑀮𑀫𑀧𑀺 𑀓𑀼𑀩𑀼𑀤𑁆𑀥𑀺𑀮𑀤𑁆𑀥𑀪𑁄𑀯𑀁,

𑀉𑀪𑀬𑀳𑀺𑀢𑀁 𑀦 𑀓𑀭𑁄𑀢𑀺 𑀪𑁄𑀕𑀮𑀼𑀤𑁆𑀥𑁄’𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀢𑁂𑀢𑁆𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀘𑀢𑀼𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀤𑀘𑁆𑀘𑀬𑁂 𑀫𑀳𑀸𑀘𑀽𑀮𑀻-𑀫𑀳𑀸𑀢𑀺𑀲𑁆𑀲𑁄 𑀅𑀓𑀸𑀭𑀬𑀺;

𑀭𑀚𑁆𑀚𑀁 𑀘𑀼𑀤𑁆𑀤𑀲𑀯𑀲𑁆𑀲𑀸𑀦𑀺, 𑀥𑀫𑁆𑀫𑁂𑀦 𑀘 𑀲𑀫𑁂𑀦 𑀘.

𑀲𑀳𑀢𑁆𑀣𑁂𑀦 𑀓𑀢𑀁 𑀤𑀸𑀦𑀁, 𑀲𑁄 𑀲𑀼𑀢𑁆𑀯𑀸𑀦 𑀫𑀳𑀧𑁆𑀨𑀮𑀁;

𑀧𑀞𑀫𑁂𑀬𑁂𑀯 𑀯𑀲𑁆𑀲𑀫𑁆𑀳𑀺, 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀢𑀯𑁂𑀲𑀯𑀸.

𑀓𑀢𑁆𑀯𑀸𑀦 𑀲𑀸𑀮𑀺𑀮𑀯𑀦𑀁, 𑀮𑀤𑁆𑀥𑀸𑀬 𑀪𑀢𑀺𑀬𑀸 𑀢𑀢𑁄;

𑀧𑀺𑀡𑁆𑀟𑀧𑀸𑀢𑀁 𑀫𑀳𑀸𑀲𑀼𑀫𑁆𑀫-𑀣𑁂𑀭𑀲𑁆𑀲𑀸’𑀤𑀸 𑀫𑀳𑀻𑀧𑀢𑀺.

𑀲𑁄𑀡𑁆𑀡𑀕𑀺𑀭𑀺𑀫𑁆𑀳𑀺 𑀧𑀼𑀦 𑀲𑁄, 𑀢𑀻𑀡𑀺𑀯𑀲𑁆𑀲𑀸𑀦𑀺 𑀔𑀢𑁆𑀢𑀺𑀬𑁄;

𑀕𑀼𑀴𑀬𑀦𑁆𑀢𑀫𑁆𑀳𑀺 𑀓𑀢𑁆𑀯𑀸𑀦, 𑀪𑀢𑀺𑀁𑀮𑀤𑁆𑀥𑀸 𑀕𑀼𑀴𑁂 𑀢𑀢𑁄.

𑀢𑁂 𑀕𑀼𑀴𑁂 𑀆𑀳𑀭𑀸𑀧𑁂𑀢𑁆𑀯𑀸, 𑀧𑀼𑀭𑀁 𑀆𑀕𑀫𑁆𑀫 𑀪𑀽𑀧𑀢𑀺;

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑀸𑀲𑀺, 𑀫𑀳𑀸𑀤𑀸𑀦𑀁 𑀫𑀳𑀻𑀧𑀢𑀺.

𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲, 𑀅𑀤𑀸 𑀅𑀘𑁆𑀙𑀸𑀤𑀦𑀸𑀦𑀺 𑀘;

𑀤𑁆𑀯𑀸𑀤𑀲𑀦𑁆𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀻𑀦𑀁 𑀢𑀣𑁂𑀯 𑀘.

𑀓𑀸𑀭𑀬𑀺𑀢𑁆𑀯𑀸 ¶ 𑀫𑀳𑀻𑀧𑀸𑀮𑁄, 𑀯𑀺𑀳𑀸𑀭𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁;

𑀲𑀝𑁆𑀞𑀺𑀪𑀺𑀓𑁆𑀔𑀼 𑀲𑀳𑀲𑁆𑀲𑀲𑁆𑀲, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑀢𑀺𑀁𑀲 𑀲𑀳𑀲𑁆𑀲 𑀲𑀗𑁆𑀔𑀸𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀸𑀧𑀬𑀺;

𑀫𑀡𑁆𑀟𑀯𑀸𑀧𑀺 𑀯𑀺𑀳𑀸𑀭𑀁 𑀲𑁄, 𑀢𑀣𑀸 𑀅𑀪𑀬𑀕𑀮𑁆𑀮𑀓𑀁.

𑀯𑀗𑁆𑀕𑀼𑀧𑀝𑁆𑀝𑀗𑁆𑀕𑀕𑀮𑁆𑀮𑀜𑁆𑀘, 𑀤𑀻𑀖𑀩𑀸𑀳𑀼𑀓𑀕𑀮𑁆𑀮𑀓𑀁;

𑀯𑀸𑀮𑀕𑀸𑀫 𑀯𑀺𑀳𑀸𑀭𑀜𑁆𑀘, 𑀭𑀸𑀚𑀸 𑀲𑁄𑀬𑁂𑀯 𑀓𑀸𑀭𑀬𑀺.

𑀏𑀯𑀁 𑀲𑀤𑁆𑀥𑀸𑀬 𑀲𑁄 𑀭𑀸𑀚𑀸, 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺𑀦𑁂𑀓𑀥𑀸;

𑀘𑀢𑀼𑀤𑁆𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁, 𑀅𑀘𑁆𑀘𑀬𑁂𑀦 𑀤𑀺𑀯𑀁 𑀅𑀕𑀸.

𑀯𑀝𑁆𑀝𑀕𑀸𑀫𑀡𑀺𑀦𑁄 𑀧𑀼𑀢𑁆𑀢𑁄, 𑀘𑁄𑀭𑀦𑀸𑀕𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀫𑀳𑀸𑀘𑀽𑀴𑀺𑀲𑁆𑀲𑀭𑀚𑁆𑀚𑀫𑁆𑀳𑀺, 𑀘𑁄𑀭𑁄 𑀳𑀼𑀢𑁆𑀯𑀸 𑀘𑀭𑀺𑀢𑀤𑀸.

𑀫𑀳𑀸𑀘𑀽𑀴𑁂 𑀉𑀧𑀭𑀢𑁂, 𑀭𑀚𑁆𑀚𑀁 𑀓𑀸𑀭𑀬𑀺 𑀆𑀕𑀢𑁄;

𑀅𑀢𑁆𑀢𑀦𑁄 𑀘𑁄𑀭𑀓𑀸𑀮𑁂 𑀲𑁄, 𑀦𑀺𑀯𑀸𑀲𑀁 𑀬𑁂𑀲𑀼𑀦𑀸𑀮𑀪𑀺.

𑀅𑀝𑁆𑀞𑀭𑀲𑀯𑀺𑀳𑀸𑀭𑁂 𑀢𑁂, 𑀯𑀺𑀤𑁆𑀥𑀁𑀲𑀸𑀧𑁂𑀲𑀺 𑀤𑀼𑀫𑁆𑀫𑀢𑀺;

𑀭𑀚𑁆𑀚𑀁 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺, 𑀘𑁄𑀭𑀦𑀸𑀕𑁄 𑀅𑀓𑀸𑀭𑀬𑀺.

𑀮𑁄𑀓𑀦𑁆𑀢𑀭𑀺𑀓 𑀦𑀺𑀭𑀬𑀁, 𑀧𑀸𑀧𑁄𑀲𑁄𑀉𑀧𑀧𑀚𑁆𑀚𑀣;

𑀢𑀤𑀘𑁆𑀘𑀬𑁂 𑀫𑀳𑀸𑀘𑀽𑀴𑁆𑀳𑀺-𑀭𑀜𑁆𑀜𑁄 𑀧𑀼𑀢𑁆𑀢𑁄 𑀅𑀓𑀸𑀭𑀬𑀺.

𑀭𑀚𑁆𑀚𑀁 𑀢𑀻𑀡𑁂𑀯 𑀯𑀲𑁆𑀲𑀸𑀦𑀺, 𑀭𑀸𑀚𑀸𑀢𑀺𑀲𑁆𑀲𑁄’𑀢𑀺 𑀯𑀺𑀲𑁆𑀲𑀼𑀢𑁄;

𑀘𑁄𑀭𑀦𑀸𑀕𑀲𑁆𑀲 𑀤𑁂𑀯𑀻𑀢𑀼, 𑀯𑀻𑀲𑀫𑀁 𑀯𑀻𑀲𑀫𑀸𑀦𑀼𑀮𑀸.

𑀯𑀻𑀲𑀁 𑀤𑀢𑁆𑀯𑀸𑀦 𑀫𑀸𑀭𑁂𑀲𑀺, 𑀩𑀮𑀢𑁆𑀣𑁂𑀭𑀢𑁆𑀢𑀫𑀸𑀦𑀲𑀸;

𑀢𑀲𑁆𑀫𑀺𑀁𑀬𑁂𑀯𑀩𑀮𑀢𑁆𑀣𑁂𑀲𑀸, 𑀅𑀦𑀼𑀮𑀸𑀭𑀢𑁆𑀢𑀫𑀸𑀦𑀲𑀸.

𑀢𑀺𑀲𑁆𑀲𑀁 𑀯𑀻𑀲𑁂𑀦𑀖𑀸𑀢𑁂𑀢𑁆𑀯𑀸, 𑀢𑀲𑁆𑀲 𑀭𑀚𑁆𑀚𑀫𑀤𑀸𑀲𑀺𑀲𑀸;

𑀲𑀻𑀯𑁄 𑀦𑀸𑀫 𑀩𑀮𑀢𑁆𑀣𑁄𑀲𑁄, 𑀚𑁂𑀝𑁆𑀞𑀤𑁄𑀯𑀸𑀭𑀺𑀓𑁄 𑀢𑀳𑀺𑀁.

𑀓𑀢𑁆𑀯𑀸 𑀫𑀳𑁂𑀲𑀺𑀁 𑀅𑀦𑀼𑀮𑀁, 𑀯𑀲𑁆𑀲𑀁 𑀫𑀸𑀲𑀤𑁆𑀯𑀬𑀸’𑀘𑀺𑀓𑀁;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀕𑀭𑁂, 𑀯𑀝𑀼𑀓𑁂 𑀤𑀫𑀺𑀴𑁂’𑀦𑀼𑀮𑀸.

𑀭𑀢𑁆𑀢𑀸 𑀯𑀻𑀲𑁂𑀦 𑀢𑀁 𑀳𑀦𑁆𑀢𑁆𑀯𑀸, 𑀯𑀝𑀼𑀓𑁂 𑀭𑀚𑁆𑀚𑀫𑀧𑁆𑀧𑀬𑀺;

𑀯𑀝𑀼𑀓𑁄 𑀤𑀫𑀺𑀴𑁄 𑀲𑁄 𑀳𑀺, 𑀧𑀼𑀭𑁂 𑀦𑀕𑀭𑀯𑀟𑁆𑀠𑀓𑀻.

𑀫𑀳𑁂𑀲𑀺𑀁 𑀅𑀦𑀼𑀮𑀁 𑀓𑀢𑁆𑀯𑀸, 𑀯𑀲𑁆𑀲𑀁 𑀫𑀸𑀲𑀤𑁆𑀯𑀬𑀸𑀥𑀺𑀓𑀁;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀕𑀭𑁂, 𑀅𑀦𑀼𑀮𑀸 𑀢𑀢𑁆𑀣 𑀆𑀕𑀢𑀁.

𑀧𑀲𑁆𑀲𑀺𑀢𑁆𑀯𑀸 𑀤𑀸𑀭𑀼𑀪𑀢𑀺𑀓𑀁, 𑀢𑀲𑁆𑀫𑀺𑀁 𑀲𑀸𑀭𑀢𑁆𑀢𑀫𑀸𑀦𑀲𑀸;

𑀳𑀦𑁆𑀢𑁆𑀯𑀸 𑀯𑀺𑀲𑁂𑀦 𑀯𑀝𑀼𑀓𑀁, 𑀢𑀲𑁆𑀲 𑀭𑀚𑁆𑀚𑀁 𑀲𑀫𑀧𑁆𑀧𑀬𑀺.

𑀤𑀸𑀭𑀼𑀪𑀢𑀺𑀓𑀢𑀺𑀲𑁆𑀲𑁄 ¶ 𑀲𑁄, 𑀫𑀳𑁂𑀲𑀺𑀁 𑀓𑀭𑀺𑀬𑀸𑀦𑀼𑀮𑀁;

𑀏𑀓𑀫𑀸𑀲𑀸𑀥𑀺𑀓𑀁 𑀯𑀲𑁆𑀲𑀁, 𑀧𑀼𑀭𑁂 𑀭𑀚𑁆𑀚𑀫𑀓𑀸𑀭𑀬𑀺.

𑀓𑀸𑀭𑁂𑀲𑀺 𑀲𑁄 𑀧𑁄𑀓𑁆𑀔𑀭𑀡𑀺𑀁, 𑀫𑀳𑀸𑀫𑁂𑀖𑀯𑀦𑁂 𑀮𑀳𑀼𑀁;

𑀦𑀺𑀮𑀻𑀬𑁂 𑀦𑀸𑀫 𑀤𑀫𑀺𑀴𑁂, 𑀲𑀸 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑁂.

𑀭𑀸𑀕𑁂𑀦 𑀭𑀢𑁆𑀢𑀸 𑀅𑀦𑀼𑀮𑀸, 𑀢𑁂𑀦 𑀲𑀁𑀯𑀸𑀲𑀓𑀸𑀫𑀺𑀦𑀻;

𑀤𑀸𑀭𑀼𑀪𑀢𑀺𑀓𑀢𑀺𑀲𑁆𑀲𑀁𑀢𑀁, 𑀯𑀻𑀲𑀁 𑀤𑀢𑁆𑀯𑀸𑀦 𑀖𑀸𑀢𑀺𑀬.

𑀦𑀺𑀮𑀻𑀬𑀲𑁆𑀲 𑀅𑀤𑀸 𑀭𑀚𑁆𑀚𑀁, 𑀲𑁄𑀧𑀺 𑀦𑀺𑀮𑀻𑀬𑀩𑁆𑀭𑀸𑀳𑁆𑀫𑀡𑁄;

𑀢𑀁 𑀫𑀳𑁂𑀲𑀺𑀁 𑀓𑀭𑀺𑀢𑁆𑀯𑀸𑀦, 𑀦𑀺𑀘𑁆𑀘𑀁 𑀢𑀸𑀬 𑀉𑀧𑀝𑁆𑀞𑀺𑀢𑁄.

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀙𑀫𑁆𑀫𑀸𑀲𑀁, 𑀅𑀦𑀼𑀭𑀸𑀥𑀧𑀼𑀭𑁂 𑀇𑀥;

𑀤𑁆𑀯𑀢𑁆𑀢𑀺𑀁𑀲𑀸𑀬 𑀩𑀮𑀢𑁆𑀣𑁂𑀳𑀺, 𑀯𑀢𑁆𑀣𑀼𑀓𑀸𑀫𑀸 𑀬𑀣𑀸𑀭𑀼𑀘𑀺𑀁.

𑀯𑀻𑀲𑁂𑀦 𑀢𑀁 𑀖𑀸𑀢𑀬𑀺𑀢𑁆𑀯𑀸, 𑀦𑀺𑀮𑀻𑀬𑀁 𑀔𑀢𑁆𑀢𑀺𑀬𑀸𑀦𑀼𑀮𑀸;

𑀭𑀚𑁆𑀚𑀁 𑀲𑀸 𑀅𑀦𑀼𑀮𑀸𑀤𑁂𑀯𑀻, 𑀘𑀢𑀼𑀫𑀸𑀲𑀫𑀓𑀸𑀭𑀬𑀺.

𑀫𑀳𑀸𑀘𑀽𑀴𑀺𑀓𑀭𑀸𑀚𑀲𑁆𑀲, 𑀧𑀼𑀢𑁆𑀢𑁄 𑀤𑀼𑀢𑀺𑀬𑀓𑁄 𑀧𑀦;

𑀓𑀽𑀝𑀓𑀡𑁆𑀡𑀢𑀺𑀲𑁆𑀲𑁄 𑀦𑀸𑀫, 𑀪𑀻𑀢𑁄 𑀲𑁄’𑀦𑀼𑀮𑀤𑁂𑀯𑀺𑀬𑀸.

𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸, 𑀓𑀸𑀮𑁂 𑀧𑀢𑁆𑀢𑀩𑀮𑁄 𑀇𑀥;

𑀆𑀕𑀦𑁆𑀢𑁆𑀯𑀸 𑀖𑀸𑀢𑀬𑀺𑀢𑁆𑀯𑀸, 𑀢𑀁 𑀅𑀦𑀼𑀮𑀁 𑀤𑀼𑀝𑁆𑀞𑀫𑀸𑀦𑀲𑀁.

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀤𑁆𑀯𑀸𑀯𑀻𑀲𑀁, 𑀯𑀲𑁆𑀲𑀸𑀦𑀺 𑀫𑀦𑀼𑀚𑀸𑀥𑀺𑀧𑁄;

𑀫𑀳𑀸𑀉𑀧𑁄𑀲𑀣𑀸𑀕𑀸𑀭𑀁, 𑀅𑀓𑀸 𑀘𑁂𑀢𑀺𑀬𑀧𑀩𑁆𑀩𑀢𑁂.

𑀖𑀭𑀲𑁆𑀲 𑀢𑀲𑁆𑀲 𑀧𑀼𑀭𑀢𑁄, 𑀲𑀺𑀮𑀸𑀣𑀽𑀧𑀫𑀓𑀸𑀭𑀬𑀺;

𑀩𑁄𑀥𑀺𑀁 𑀭𑁄𑀧𑁂𑀲𑀺 𑀢𑀢𑁆𑀣𑁂𑀯, 𑀲𑁄𑀯 𑀘𑁂𑀢𑀺𑀬𑁂𑀧𑀩𑁆𑀩𑀢𑁂.

𑀧𑁂𑀮𑀕𑀸𑀫𑀯𑀺𑀳𑀸𑀭𑀜𑁆𑀘, 𑀅𑀦𑁆𑀢𑀭𑀕𑀗𑁆𑀕𑀸𑀬 𑀓𑀸𑀭𑀬𑀺;

𑀢𑀢𑁆𑀣𑁂𑀯 𑀯𑀡𑁆𑀡𑀓𑀁 𑀦𑀸𑀫, 𑀫𑀳𑀸𑀫𑀸𑀢𑀺𑀓𑀫𑁂𑀯 𑀘.

𑀅𑀫𑁆𑀩𑀤𑀼𑀕𑁆𑀕𑀫𑀳𑀸𑀯𑀸𑀧𑀺𑀁, 𑀪𑀬𑁄𑀮𑀼𑀧𑁆𑀧𑀮𑀫𑁂𑀯 𑀘;

𑀲𑀢𑁆𑀢𑀳𑀢𑁆𑀣𑀼𑀘𑁆𑀘𑀧𑀸𑀓𑀸𑀭𑀁, 𑀧𑀼𑀭𑀲𑁆𑀲 𑀧𑀭𑀺𑀔𑀁 𑀢𑀣𑀸.

𑀫𑀳𑀸𑀯𑀢𑁆𑀣𑀼𑀫𑁆𑀳𑀺 𑀅𑀦𑀼𑀮𑀁, 𑀛𑀸𑀧𑀬𑀺𑀢𑁆𑀯𑀸 𑀅𑀲𑀜𑁆𑀜𑀢𑀁;

𑀅𑀧𑀦𑀻𑀬 𑀢𑀢𑁄 𑀣𑁄𑀓𑀁, 𑀫𑀳𑀸𑀯𑀢𑁆𑀣𑀼𑀫𑀓𑀸𑀭𑀬𑀺.

𑀧𑀤𑀼𑀫𑀲𑁆𑀲𑀭𑀯𑀦𑀼𑀬𑁆𑀬𑀸𑀦𑀁, 𑀦𑀕𑀭𑁂𑀬𑁂𑀯 𑀓𑀸𑀭𑀬𑀺;

𑀫𑀢𑀸’𑀲𑁆𑀲 𑀤𑀦𑁆𑀢𑁂 𑀥𑁄𑀯𑀺𑀢𑁆𑀯𑀸, 𑀧𑀩𑁆𑀩𑀚𑀺 𑀚𑀺𑀦𑀲𑀸𑀲𑀦𑁂.

𑀓𑀼𑀮𑀲𑀦𑁆𑀢𑀓𑁂 ¶ 𑀖𑀭𑀝𑁆𑀞𑀸𑀦𑁂, 𑀫𑀸𑀢𑀼𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀓𑀸𑀭𑁂𑀲𑀺 𑀤𑀦𑁆𑀢𑀕𑁂𑀳𑀦𑁆𑀢𑀺, 𑀯𑀺𑀲𑁆𑀲𑀢𑁄 𑀆𑀲𑀺 𑀢𑁂𑀦 𑀲𑁄.

𑀢𑀤𑀘𑁆𑀘𑀬𑁂 𑀢𑀲𑁆𑀲 𑀧𑀼𑀢𑁆𑀢𑁄, 𑀦𑀸𑀫𑀓𑁄 𑀪𑀸𑀢𑀺𑀓𑀸𑀪𑀬𑁄;

𑀅𑀝𑁆𑀞𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀫𑀳𑀸𑀤𑀸𑀝𑁆𑀞𑀺𑀓𑀭𑀸𑀚𑀲𑁆𑀲, 𑀪𑀸𑀢𑀺𑀓𑀢𑁆𑀢𑀸𑀫𑀳𑀻𑀧𑀢𑀺;

𑀤𑀻𑀧𑁂 ‘‘𑀪𑀸𑀢𑀺𑀓𑀭𑀸𑀚𑀸’’𑀢𑀺, 𑀧𑀸𑀓𑀝𑁄 𑀆𑀲𑀺 𑀥𑀫𑁆𑀫𑀺𑀓𑁄.

𑀓𑀸𑀭𑁂𑀲𑀺 𑀮𑁄𑀳𑀧𑀸𑀲𑀸𑀤𑁂, 𑀧𑀝𑀺𑀲𑀗𑁆𑀔𑀸𑀭𑀫𑁂𑀢𑁆𑀣𑀲𑁄;

𑀫𑀳𑀸𑀣𑀽𑀧𑁂 𑀯𑁂𑀤𑀺𑀓𑀸 𑀤𑁆𑀯𑁂, 𑀣𑀽𑀧𑀯𑁆𑀳𑁂’𑀧𑁄𑀲𑀣𑀯𑁆𑀳𑀬𑀁.

𑀅𑀢𑁆𑀢𑀦𑁄 𑀩𑀮𑀺𑀫𑀼𑀚𑁆𑀛𑀺𑀢𑁆𑀯𑀸, 𑀦𑀕𑀭𑀲𑁆𑀲 𑀲𑀫𑀦𑁆𑀢𑀢𑁄;

𑀭𑁄𑀧𑀸𑀧𑁂𑀢𑁆𑀯𑀸 𑀬𑁄𑀚𑀦𑀫𑁆𑀳𑀺, 𑀲𑀼𑀫𑀦𑀸𑀦’𑀚𑁆𑀚𑀼𑀓𑀸𑀦𑀺 𑀘.

𑀧𑀸𑀤𑀯𑁂𑀘𑀺𑀓𑀢𑁄 𑀬𑀸𑀯, 𑀥𑀼𑀭𑀘𑁆𑀙𑀢𑁆𑀢𑀸𑀦𑀭𑀸𑀥𑀺𑀧𑁄;

𑀘𑀢𑀼𑀭𑀗𑁆𑀕𑀮𑀩𑀳𑀮𑁂𑀦, 𑀕𑀦𑁆𑀥𑁂𑀦 𑀉𑀭𑀼𑀘𑁂𑀢𑀺𑀬𑀁.

𑀮𑀺𑀫𑁆𑀧𑀸𑀧𑁂𑀢𑁆𑀯𑀸𑀦 𑀧𑀼𑀧𑁆𑀨𑀸𑀦𑀺, 𑀯𑀡𑁆𑀝𑁂𑀳𑀺 𑀢𑀢𑁆𑀣 𑀲𑀸𑀥𑀼𑀓𑀁;

𑀦𑀺𑀯𑁂𑀲𑀺𑀢𑁆𑀯𑀸𑀦 𑀓𑁄𑀭𑁂𑀲𑀺, 𑀣𑀽𑀧𑀁 𑀫𑀸𑀮𑀸𑀕𑀼𑀮𑁄𑀧𑀫𑀁.

𑀧𑀼𑀦𑀤𑁆𑀯𑀗𑁆𑀕𑀼𑀮𑀩𑀳𑀮𑀸𑀬, 𑀫𑀦𑁄𑀲𑀺𑀮𑀸𑀬 𑀘𑁂𑀢𑀺𑀬𑀁;

𑀮𑀺𑀫𑁆𑀧𑀸𑀧𑁂𑀢𑁆𑀯𑀸𑀦 𑀓𑀸𑀭𑁂𑀲𑀺, 𑀢𑀣𑁂𑀯 𑀓𑀼𑀲𑀼𑀫𑀸𑀘𑀺𑀢𑀁.

𑀧𑀼𑀦 𑀲𑁄𑀧𑀸𑀦𑀢𑁄 𑀬𑀸𑀯, 𑀥𑀼𑀭𑀘𑁆𑀙𑀢𑁆𑀢𑀸𑀯 𑀘𑁂𑀢𑀺𑀬𑀁;

𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀸𑀧𑁂𑀢𑁆𑀯𑀸, 𑀙𑀸𑀤𑁂𑀲𑀺 𑀧𑀼𑀧𑁆𑀨𑀭𑀸𑀲𑀺𑀦𑁄.

𑀉𑀝𑁆𑀞𑀸𑀧𑁂𑀢𑁆𑀯𑀸𑀦 𑀬𑀦𑁆𑀢𑁂𑀳𑀺, 𑀚𑀮𑀁 𑀅𑀪𑀬𑀯𑀸𑀧𑀺𑀢𑁄;

𑀚𑀮𑁂𑀳𑀺 𑀣𑀽𑀧𑀁 𑀲𑁂𑀯𑀦𑁆𑀢𑁄, 𑀩𑀮𑀧𑀽𑀚𑀫𑀓𑀸𑀭𑀬𑀺.

𑀲𑀓𑀝𑀲𑀢𑁂𑀦 𑀫𑀼𑀢𑁆𑀢𑀸𑀦𑀁, 𑀲𑀤𑁆𑀥𑀺𑀁 𑀢𑁂𑀮𑁂𑀦 𑀲𑀸𑀥𑀼𑀓𑀁;

𑀫𑀤𑁆𑀤𑀸𑀧𑁂𑀢𑁆𑀯𑀸 𑀲𑀼𑀥𑀸𑀧𑀺𑀡𑁆𑀟𑀁, 𑀲𑀼𑀥𑀸𑀓𑀫𑁆𑀫𑀫𑀓𑀸𑀭𑀬𑀺.

𑀧𑀯𑀸𑀮𑀚𑀸𑀮𑀁 𑀓𑀸𑀭𑁂𑀢𑁆𑀯𑀸, 𑀢𑀁 𑀔𑀺𑀧𑀸𑀧𑀺𑀬 𑀘𑁂𑀢𑀺𑀬𑁂;

𑀲𑁄𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀲𑀦𑁆𑀥𑀺𑀲𑀼.

𑀮𑀕𑁆𑀕𑀸𑀧𑁂𑀢𑁆𑀯𑀸 𑀢𑀢𑁄 𑀫𑀼𑀢𑁆𑀢𑀸-𑀓𑀮𑀸𑀧𑁂 𑀬𑀸𑀯 𑀳𑁂𑀝𑁆𑀞𑀺𑀫𑀸;

𑀧𑀤𑀼𑀫𑀸’𑀮𑀫𑁆𑀩𑀬𑀺𑀢𑁆𑀯𑀸𑀦, 𑀫𑀳𑀸𑀣𑀽𑀧𑀫𑀧𑀽𑀚𑀬𑀺.

𑀕𑀡𑀲𑀚𑁆𑀛𑀸𑀬𑀲𑀤𑁆𑀤𑀁 ¶ 𑀲𑁄, 𑀥𑀸𑀢𑀼𑀕𑀩𑁆𑀪𑀫𑁆𑀳𑀺𑀢𑀸𑀤𑀺𑀦𑀺;

𑀲𑀼𑀢𑁆𑀯𑀸 ‘‘𑀅𑀤𑀺𑀲𑁆𑀯𑀸 𑀢𑀁𑀦𑀸’𑀳𑀁, 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀦𑀺𑀘𑁆𑀙𑀺𑀢𑁄.

𑀧𑀸𑀘𑀺𑀦𑀸𑀤𑀺𑀓𑀫𑀽𑀮𑀫𑁆𑀳𑀺, 𑀅𑀦𑀸𑀳𑀸𑀭𑁄 𑀦𑀺𑀧𑀚𑁆𑀚𑀣;

𑀣𑁂𑀭𑀸 𑀤𑁆𑀯𑀸𑀭𑀁 𑀫𑀸𑀧𑀬𑀺𑀢𑁆𑀯𑀸, 𑀥𑀸𑀢𑀼𑀕𑀩𑁆𑀪𑀁 𑀦𑀬𑀺𑀁𑀲𑀼 𑀢𑀁.

𑀥𑀸𑀢𑀼𑀕𑀩𑁆𑀪𑀯𑀺𑀪𑀽𑀢𑀺𑀁𑀲𑁄, 𑀲𑀩𑁆𑀩𑀁 𑀤𑀺𑀲𑁆𑀯𑀸 𑀫𑀳𑀻𑀧𑀢𑀺;

𑀦𑀺𑀓𑁆𑀔𑀦𑁆𑀢𑁄 𑀢𑀸𑀤𑀺𑀲𑁂𑀳𑁂𑀯, 𑀧𑁄𑀢𑁆𑀣𑀭𑀽𑀧𑁂𑀳𑀺 𑀧𑀽𑀚𑀬𑀺.

𑀫𑀥𑀼𑀕𑀦𑁆𑀥𑁂𑀳𑀺 𑀕𑀦𑁆𑀥𑁂𑀳𑀺, 𑀖𑀝𑁂𑀳𑀺 𑀲𑀭𑀲𑁂𑀳𑀺 𑀘;

𑀅𑀜𑁆𑀚𑀦𑀳𑀭𑀺𑀢𑀸𑀮𑁂𑀳𑀺, 𑀢𑀣𑀸𑀫𑀦𑁄𑀲𑀺𑀮𑀸𑀳𑀺 𑀘.

𑀫𑀦𑁄𑀲𑀺𑀮𑀸𑀲𑀼 𑀯𑀲𑁆𑀲𑁂𑀦, 𑀪𑀲𑁆𑀲𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂;

𑀞𑀺𑀢𑀸𑀲𑀼 𑀕𑁄𑀧𑁆𑀨𑀫𑀢𑁆𑀢𑀸𑀲𑀼, 𑀭𑀘𑀺𑀢𑁂 𑀧𑀼’𑀧𑁆𑀧𑀮𑁂𑀳𑀺 𑀘.

𑀣𑀽𑀧𑀗𑁆𑀕𑀡𑀫𑁆𑀳𑀺 𑀲𑀓𑀮𑁂, 𑀧𑀼𑀭𑀺𑀢𑁂 𑀕𑀦𑁆𑀥𑀓𑀤𑁆𑀤𑀫𑁂;

𑀘𑀺𑀢𑁆𑀢𑀓𑀺𑀮𑀜𑁆𑀚𑀙𑀺𑀤𑁆𑀤𑁂𑀲𑀼, 𑀭𑀘𑀺𑀢𑁂 𑀧𑀼’𑀧𑁆𑀧𑀮𑁂𑀳𑀺 𑀘.

𑀯𑀸𑀭𑀬𑀺𑀢𑁆𑀯𑀸 𑀯𑀸𑀭𑀺𑀫𑀕𑁆𑀕𑀁, 𑀢𑀣𑁂𑀯 𑀧𑀼𑀭𑀺𑀢𑁂 𑀖𑀝𑁂;

𑀤𑀻𑀧𑀯𑀝𑁆𑀝𑀺𑀳𑀺 𑀦𑁂𑀓𑀸𑀦𑀺, 𑀓𑀢𑀯𑀝𑁆𑀝𑀺𑀲𑀺𑀔𑀸𑀳𑀺 𑀘.

𑀫𑀥𑀼𑀓𑀢𑁂𑀮𑀫𑁆𑀳𑀺 𑀢𑀣𑀸, 𑀢𑀺𑀮𑀢𑁂𑀮𑁂 𑀢𑀣𑁂𑀯 𑀘;

𑀢𑀣𑁂𑀯 𑀧𑀝𑁆𑀝𑀯𑀝𑁆𑀝𑀻𑀦𑀁, 𑀲𑀼 𑀩𑀳𑀽𑀳𑀺 𑀲𑀺𑀔𑀸𑀳𑀺 𑀘.

𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀢𑁂𑀳𑀺, 𑀫𑀳𑀸𑀣𑀽𑀧𑀲𑁆𑀲 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀧𑀽𑀚𑀸’𑀓𑀸𑀲𑀺 𑀯𑀺𑀲𑀼𑀁 𑀯𑀺𑀲𑀼𑀁.

𑀅𑀦𑀼𑀯𑀲𑁆𑀲𑀜𑁆𑀘 𑀦𑀺𑀬𑀢𑀁, 𑀲𑀼𑀥𑀸𑀫𑀗𑁆𑀕𑀮𑀫𑀼𑀢𑁆𑀢𑀫𑀁;

𑀩𑁄𑀥𑀺𑀲𑀺𑀦𑀸𑀦𑀧𑀽𑀚𑀸 𑀘, 𑀢𑀣𑁂𑀯 𑀉𑀭𑀼𑀩𑁄𑀥𑀺𑀬𑀸.

𑀫𑀳𑀸𑀯𑁂𑀲𑀸𑀔 𑀧𑀽𑀚𑀸 𑀘, 𑀉𑀴𑀸𑀭𑀸 𑀅𑀝𑁆𑀞𑀯𑀻𑀲𑀢𑀺;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀧𑀽𑀚𑀸 𑀘 𑀅𑀦𑀼𑀴𑀸𑀭𑀺𑀓𑀸.

𑀯𑀺𑀯𑀺𑀥𑀁 𑀦𑀝𑀦𑀘𑁆𑀘𑀜𑁆𑀘, 𑀦𑀸𑀦𑀸𑀢𑀽𑀭𑀺𑀬𑀯𑀸𑀤𑀺𑀢𑀁;

𑀫𑀳𑀸𑀣𑀽𑀧𑁂 𑀫𑀳𑀸𑀧𑀽𑀚𑀁, 𑀲𑀤𑁆𑀥𑀸𑀦𑀼𑀦𑁆𑀦𑁄 𑀅𑀓𑀸𑀭𑀬𑀺.

𑀤𑀺𑀯𑀲𑀲𑁆𑀲 𑀘 𑀢𑀺𑀓𑁆𑀔𑀢𑁆𑀢𑀼𑀁, 𑀩𑀼𑀤𑁆𑀥𑀼𑀧𑁆𑀧𑀝𑁆𑀞𑀸𑀦𑀫𑀸𑀕𑀫𑀸;

𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀧𑀼𑀧𑁆𑀨𑀪𑁂𑀭𑀺𑀜𑁆𑀘, 𑀦𑀺𑀬𑀢𑀁 𑀲𑁄 𑀅𑀓𑀸𑀭𑀬𑀺.

𑀦𑀺𑀬𑀢𑀜𑁆𑀘𑀦𑀤𑀸𑀦𑀜𑁆𑀘, 𑀧𑀯𑀸𑀭𑀡𑀸𑀤𑀸𑀦𑀫𑁂𑀯 𑀘;

𑀢𑁂𑀮𑀨𑀸𑀡𑀺𑀢𑀯𑀢𑁆𑀣𑀸𑀤𑀺-𑀧𑀭𑀺𑀓𑁆𑀔𑀸𑀭𑀁 𑀲𑀫𑀡𑀸𑀭𑀳𑀁.

𑀩𑀳𑀼𑀁 ¶ 𑀧𑀸𑀤𑀸𑀲𑀺 𑀲𑀗𑁆𑀖𑀲𑁆𑀲, 𑀘𑁂𑀢𑀺𑀬𑀔𑁂𑀢𑁆𑀢𑀫𑁂𑀯 𑀘;

𑀘𑁂𑀢𑀺𑀬𑁂 𑀧𑀭𑀺𑀓𑀫𑁆𑀫𑀢𑁆𑀣𑀁, 𑀅𑀤𑀸𑀲𑀺 𑀢𑀢𑁆𑀣 𑀔𑀢𑁆𑀢𑀺𑀬𑁄.

𑀲𑀤𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲, 𑀯𑀺𑀳𑀸𑀭𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀲𑀮𑀸𑀓𑀯𑀢𑁆𑀢𑀪𑀢𑁆𑀢𑀜𑁆𑀘, 𑀲𑁄 𑀤𑀸𑀧𑁂𑀲𑀺 𑀘 𑀪𑀽𑀧𑀢𑀺.

𑀘𑀺𑀦𑁆𑀢𑀸𑀫𑀡𑀺𑀫𑀼𑀘𑁂𑀮𑀯𑁆𑀳𑁂, 𑀉𑀧𑀝𑁆𑀞𑀸𑀦𑀢𑁆𑀢𑀬𑁂 𑀘 𑀲𑁄;

𑀢𑀣𑀸 𑀧𑀤𑀼𑀫𑀖𑀭𑁂 𑀙𑀢𑁆𑀢-𑀧𑀸𑀲𑀸𑀤𑁂 𑀘 𑀫𑀦𑁄𑀭𑀫𑁂.

𑀪𑁄𑀚𑁂𑀦𑁆𑀢𑁄 𑀧𑀜𑁆𑀘𑀞𑀸𑀦𑀫𑁆𑀳𑀺, 𑀪𑀺𑀓𑁆𑀔𑀽𑀕𑀦𑁆𑀣𑀥𑀼𑀭𑁂 𑀬𑀼𑀢𑁂;

𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺, 𑀲𑀤𑀸 𑀥𑀫𑁆𑀫𑁂 𑀲𑀕𑀸𑀭𑀯𑁄.

𑀧𑁄𑀭𑀸𑀡𑀭𑀸𑀚𑀦𑀺𑀬𑀸𑀢𑀁, 𑀬𑀁𑀓𑀺𑀜𑁆𑀘𑀺 𑀲𑀸𑀲𑀦𑀲𑁆𑀲𑀺𑀢𑀁;

𑀅𑀓𑀸𑀲𑀺 𑀧𑀼𑀜𑁆𑀜𑀓𑀫𑁆𑀫𑀁𑀲𑁄, 𑀲𑀩𑁆𑀩𑀁 𑀪𑀸𑀢𑀺𑀓𑀪𑀽𑀧𑀢𑀺.

𑀢𑀲𑁆𑀲 𑀪𑀸𑀪𑀓𑀭𑀸𑀚𑀲𑁆𑀲, 𑀅𑀘𑁆𑀘𑀬𑁂 𑀢𑀁 𑀓𑀦𑀺𑀝𑁆𑀞𑀓𑁄;

𑀫𑀳𑀸𑀤𑀸𑀞𑀺𑀫𑀳𑀸𑀦𑀸𑀕-𑀦𑀸𑀫𑁄 𑀭𑀚𑁆𑀚𑀫𑀓𑀸𑀭𑀬𑀺.

𑀤𑁆𑀯𑀸𑀤𑀲𑀁𑀬𑁂𑀯 𑀯𑀲𑁆𑀲𑀸𑀦𑀺, 𑀦𑀸𑀦𑀸𑀧𑀼𑀜𑁆𑀜𑀧𑀭𑀸𑀬𑀦𑁄;

𑀫𑀳𑀸𑀣𑀽𑀧𑀫𑁆𑀳𑀺 𑀓𑀺𑀜𑁆𑀚𑀓𑁆𑀔- 𑀧𑀸𑀲𑀸𑀡𑁂 𑀅𑀢𑁆𑀣𑀭𑀸𑀧𑀬𑀺.

𑀯𑀸𑀮𑀺𑀓𑀸𑀫𑀭𑀺𑀬𑀸𑀤𑀜𑁆𑀘, 𑀓𑀸𑀭𑁂𑀲𑀺 𑀯𑀺𑀢𑁆𑀣𑀢𑀗𑁆𑀕𑀡𑀁;

𑀤𑀻𑀧𑁂 𑀲𑀩𑁆𑀩𑀯𑀺𑀳𑀸𑀭𑁂𑀲𑀼, 𑀥𑀫𑁆𑀫𑀸𑀲𑀦𑀫𑀤𑀸𑀧𑀬𑀺.

𑀅𑀫𑁆𑀩𑀢𑁆𑀣𑀮 𑀫𑀳𑀸𑀣𑀽𑀧𑀁, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺;

𑀘 𑀬𑁂𑀅𑀦𑀺𑀝𑁆𑀞𑀫𑀸𑀦𑀫𑁆𑀳𑀺, 𑀲𑀭𑀺𑀢𑁆𑀯𑀸 𑀫𑀼𑀦𑀺𑀦𑁄 𑀕𑀼𑀡𑀁.

𑀘𑀚𑀺𑀢𑁆𑀯𑀸𑀦 𑀲𑀓𑀁 𑀧𑀸𑀡𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀬𑀁 𑀢𑀳𑀺𑀁;

𑀞𑀧𑀬𑀺𑀢𑁆𑀯𑀸 𑀘𑀬𑀁 𑀢𑀲𑁆𑀲, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀘𑁂𑀢𑀺𑀬𑀁.

𑀘𑀢𑀼𑀤𑁆𑀯𑀸𑀭𑁂 𑀞𑀧𑀸𑀧𑁂𑀲𑀺, 𑀘𑀢𑀼𑀭𑁄 𑀭𑀢𑀦𑀕𑁆𑀖𑀺𑀓𑁂;

𑀲𑀼𑀲𑀺𑀧𑁆𑀧𑀺𑀓𑁂𑀳𑀺 𑀲𑀼𑀯𑀺𑀪𑀢𑁆𑀢𑁂, 𑀦𑀸𑀦𑀸𑀭𑀢𑀦𑀚𑁄𑀢𑀺𑀢𑁂.

𑀘𑁂𑀢𑀺𑀬𑁂 𑀧𑀝𑀺𑀫𑁄𑀘𑁂𑀢𑁆𑀯𑀸, 𑀦𑀸𑀦𑀸𑀭𑀢𑀦𑀓𑀜𑁆𑀘𑀼𑀓𑀁;

𑀓𑀜𑁆𑀘𑀦 𑀩𑀼𑀩𑁆𑀩𑀼𑀮𑀜𑁆𑀘𑁂𑀢𑁆𑀣, 𑀫𑀼𑀢𑁆𑀢𑁄𑀮𑀫𑁆𑀩𑀜𑁆𑀘 𑀤𑀸𑀧𑀬𑀺.

𑀘𑁂𑀢𑀺𑀬 𑀧𑀩𑁆𑀩𑀢𑀸𑀯𑀝𑁆𑀝𑁂, 𑀅𑀮𑀗𑁆𑀓𑀭𑀺𑀬 𑀬𑁄𑀚𑀦𑀁;

𑀬𑁄𑀚𑀸𑀧𑁂𑀢𑁆𑀯𑀸 𑀘𑀢𑀼𑀤𑁆𑀯𑀸𑀭𑀁, 𑀲𑀫𑀦𑁆𑀢𑀸 𑀘𑀸𑀭𑀼𑀯𑀻𑀣𑀺𑀓𑀁.

𑀯𑀻𑀣𑀺𑀬𑀸 𑀉𑀪𑀢𑁄 𑀧𑀲𑁆𑀲𑁂, 𑀆𑀧𑀡𑀸𑀦𑀺 𑀧𑀲𑀸𑀭𑀺𑀬;

𑀥𑀚𑀕𑁆𑀖𑀺𑀓 𑀢𑁄 𑀭𑀡𑀸𑀦𑀺, 𑀫𑀡𑁆𑀟𑀬𑀺𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁.

𑀤𑀻𑀧𑀫𑀸𑀮𑀸 ¶ 𑀲𑀫𑀼𑀚𑁆𑀚𑁄𑀢𑀁, 𑀓𑀸𑀭𑀬𑀺𑀢𑁆𑀯𑀸 𑀲𑀫𑀦𑁆𑀢𑀢𑁄;

𑀦𑀝𑀦𑀘𑁆𑀘𑀸𑀦𑀺 𑀕𑀻𑀢𑀸𑀦𑀺, 𑀯𑀸𑀤𑀺𑀢𑀸𑀦𑀺 𑀘 𑀓𑀸𑀭𑀬𑀺.

𑀫𑀕𑁆𑀕𑁂 𑀓𑀤𑀫𑁆𑀩𑀦𑀤𑀺𑀢𑁄, 𑀬𑀸𑀯𑀘𑁂𑀢𑀺𑀬 𑀧𑀩𑁆𑀩𑀢𑀸;

𑀕𑀦𑁆𑀢𑀼𑀁 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺, 𑀓𑀸𑀭𑀬𑀺’𑀢𑁆𑀣𑀭𑀡𑀢𑁆𑀣𑀢𑀁.

𑀲𑀦𑀘𑁆𑀘𑀕𑀻𑀢𑀯𑀸𑀤𑁂𑀳𑀺, 𑀲𑀫𑀚𑁆𑀚𑀫𑀓𑀭𑀼𑀁 𑀢𑀳𑀺𑀁;

𑀦𑀕𑀭𑀲𑁆𑀲 𑀘𑀢𑀼𑀤𑁆𑀯𑀸𑀭𑁂, 𑀫𑀳𑀸 𑀤𑀸𑀦𑀜𑁆𑀘 𑀤𑀸𑀧𑀬𑀺.

𑀅𑀓𑀸𑀲𑀺 𑀲𑀓𑀮𑁂 𑀤𑀻𑀧𑁂, 𑀤𑀻𑀧𑀫𑀸𑀮𑀸𑀦𑀺𑀭𑀦𑁆𑀢𑀭𑀁;

𑀲𑀮𑀺𑀮𑁂𑀧𑀺 𑀲𑀫𑀼𑀤𑁆𑀤𑀲𑁆𑀲, 𑀲𑀫𑀦𑁆𑀢𑀸 𑀬𑁄𑀚𑀦𑀦𑁆𑀢𑀭𑁂.

𑀘𑁂𑀢𑀺𑀬𑀲𑁆𑀲 𑀫𑀳𑁂𑀢𑁂𑀦, 𑀧𑀽𑀚𑀸 𑀲𑀸 𑀓𑀸𑀭𑀺𑀢𑀸 𑀲𑀼𑀪𑀸;

𑀕𑀺𑀭𑀺𑀪𑀡𑁆𑀟𑀸 𑀫𑀳𑀸𑀧𑀽𑀚𑀸, 𑀉𑀴𑀸𑀭𑀸 𑀯𑀼𑀘𑁆𑀘𑀢𑁂 𑀇𑀥.

𑀲𑀫𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀢𑀲𑁆𑀫𑀺𑀁 𑀧𑀽𑀚𑀸 𑀲𑀫𑀸𑀕𑀫𑁂;

𑀤𑀸𑀦𑀁 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼, 𑀞𑀧𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺.

𑀢𑀸𑀴𑀬𑀺𑀢𑁆𑀯𑀸𑀦 𑀢𑀢𑁆𑀭𑀝𑁆𑀞𑀸, 𑀅𑀝𑁆𑀞𑀲𑁄𑀯𑀡𑁆𑀡𑀪𑁂𑀭𑀺𑀬𑁄;

𑀘𑀢𑀼𑀯𑀻𑀲𑀲𑀳𑀲𑁆𑀲𑀸𑀦𑀁, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺.

𑀙𑀘𑀻𑀯𑀭𑀸𑀦𑀺 𑀧𑀸𑀤𑀸𑀲𑀺, 𑀩𑀦𑁆𑀥𑀫𑁄𑀓𑁆𑀔𑀜𑁆𑀘 𑀓𑀸𑀭𑀬𑀺;

𑀘𑀢𑀼𑀤𑁆𑀯𑀸𑀭𑁂𑀦𑁆𑀯𑀸𑀧𑀺𑀢𑁂𑀳𑀺, 𑀲𑀤𑀸 𑀓𑀫𑁆𑀫𑀫𑀓𑀸𑀭𑀬𑀺.

𑀧𑀼𑀩𑁆𑀩𑀭𑀸𑀚𑀽𑀳𑀺 𑀞𑀧𑀺𑀢𑀁, 𑀪𑀸𑀢𑀭𑀁 𑀞𑀧𑀺𑀢𑀁 𑀢𑀣𑀸;

𑀧𑀼𑀜𑁆𑀜𑀓𑀫𑁆𑀫𑀁 𑀅𑀳𑀸𑀧𑁂𑀢𑁆𑀯𑀸, 𑀲𑀩𑁆𑀩𑀁 𑀓𑀸𑀭𑀬𑀺𑀪𑀽𑀧𑀢𑀺.

𑀅𑀢𑁆𑀢𑀸𑀦𑀁 𑀤𑁂𑀯𑀺𑀁𑀧𑀼𑀢𑁆𑀢𑁂 𑀤𑁆𑀯𑁂, 𑀳𑀢𑁆𑀣𑀺𑀁 𑀅𑀲𑁆𑀲𑀜𑁆𑀘 𑀫𑀗𑁆𑀕𑀮𑀁;

𑀯𑀸𑀭𑀺𑀬𑀦𑁆𑀢𑁄’𑀧𑀺 𑀲𑀗𑁆𑀖𑁂𑀦, 𑀲𑀗𑁆𑀖𑀲𑁆𑀲𑀸’𑀤𑀸𑀲𑀺 𑀪𑀽𑀧𑀢𑀺.

𑀙𑀲𑀢 𑀲𑀳𑀲𑁆𑀲𑀕𑁆𑀖𑀓𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑁄 𑀅𑀤𑀸;

𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁, 𑀪𑀺𑀓𑁆𑀔𑀽𑀦𑀻𑀦𑀁 𑀕𑀡𑀲𑁆𑀲 𑀢𑀼.

𑀤𑀢𑁆𑀯𑀸𑀦 𑀓𑀧𑁆𑀧𑀺𑀬𑀁 𑀪𑀡𑁆𑀟𑀁, 𑀯𑀺𑀯𑀺𑀥𑀁 𑀯𑀺𑀥𑀺𑀓𑁄𑀯𑀺𑀤𑁄;

𑀅𑀢𑁆𑀢𑀸𑀦𑀜𑁆𑀘’𑀯 𑀲𑁂𑀲𑁂 𑀘, 𑀲𑀗𑁆𑀖𑀢𑁄 𑀅𑀪𑀺𑀦𑀻𑀳𑀭𑀺.

𑀓𑀸𑀮𑀸𑀬𑀦 𑀓𑀡𑁆𑀡𑀺𑀓𑀫𑁆𑀳𑀺, 𑀫𑀡𑀺𑀦𑀸𑀕 𑀧𑀩𑁆𑀩𑀢𑀯𑁆𑀳𑀬𑀁;

𑀯𑀺𑀳𑀸𑀭𑀜𑁆𑀘 𑀓𑀴𑀯𑁆𑀳𑀬𑀁, 𑀓𑀸𑀭𑁂𑀲𑀺 𑀫𑀦𑀼𑀚𑀸𑀥𑀺𑀧𑁄.

𑀓𑀼𑀩𑀼 ¶ 𑀩𑀦𑁆𑀥𑀦𑀤𑀻𑀢𑀻𑀭𑁂, 𑀲𑀫𑀼𑀤𑁆𑀤𑀯𑀺𑀳𑀸𑀭𑀫𑁂𑀯 𑀘;

𑀳𑀼𑀯𑀸𑀯𑀓𑀡𑁆𑀡𑀺𑀓𑁂 𑀘𑀽𑀴, 𑀦𑀕𑀧𑀩𑁆𑀩𑀢𑀲𑀯𑁆𑀳𑀬𑀁.

𑀧𑀸𑀲𑀸𑀡𑀤𑀻𑀧𑀓𑀯𑁆𑀳𑀫𑁆𑀳𑀺, 𑀯𑀺𑀳𑀸𑀭𑁂 𑀓𑀸𑀭𑀺𑀢𑁂 𑀲𑀬𑀁;

𑀧𑀸𑀦𑀺𑀬𑀁 𑀉𑀧𑀦𑀺𑀢𑀲𑁆𑀲, 𑀲𑀸𑀫𑀡𑁂𑀭𑀲𑁆𑀲 𑀔𑀢𑁆𑀢𑀺𑀬𑁄.

𑀉𑀧𑀘𑀸𑀭𑁂 𑀧𑀲𑀻𑀤𑀺𑀢𑁆𑀯𑀸, 𑀲𑀫𑀦𑁆𑀢𑀸 𑀅𑀝𑁆𑀞𑀬𑁄𑀚𑀦𑀁;

𑀲𑀗𑁆𑀖𑀪𑁄𑀕𑀫𑀤𑀸𑀢𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀫𑀳𑀻𑀧𑀢𑀺.

𑀫𑀡𑁆𑀟𑀯𑀸𑀧𑀺 𑀯𑀺𑀳𑀸𑀭𑁂 𑀘, 𑀲𑀸𑀫𑀡𑁂𑀭𑀲𑁆𑀲 𑀔𑀢𑁆𑀢𑀺𑀬𑁄;

𑀢𑀼𑀝𑁆𑀞𑁄 𑀯𑀺𑀳𑀸𑀭𑀁 𑀤𑀸𑀧𑁂𑀲𑀺, 𑀲𑀗𑁆𑀖𑁂 𑀪𑁄𑀕𑀁 𑀢𑀣𑁂𑀯 𑀲𑁄.

𑀇𑀢𑀺 𑀯𑀺𑀪𑀯𑀫𑀦𑀧𑁆𑀧𑀁 𑀲𑀸𑀥𑀼𑀧𑀜𑁆𑀜𑀸 𑀮𑀪𑀺𑀢𑁆𑀯𑀸,

𑀯𑀺𑀕𑀢𑀫𑀤𑀧𑀫𑀸𑀤𑀸𑀘𑀢𑁆𑀢 𑀓𑀸𑀫𑀧𑀲𑀗𑁆𑀕𑀸;

𑀅𑀓𑀭𑀺𑀬𑀚𑀦𑀔𑁂𑀤𑀁 𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀭𑀸𑀫𑀸,

𑀯𑀺𑀧𑀼𑀮𑀯𑀺𑀯𑀺𑀥𑀧𑀼𑀜𑁆𑀜𑀁 𑀲𑀼𑀧𑁆𑀧𑀦𑁆𑀦𑀸𑀓𑀭𑁄𑀦𑁆𑀢𑀻𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑀢𑀼𑀢𑁆𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀆𑀫𑀡𑁆𑀟𑀕𑀸𑀫𑀡𑁆𑀬𑀪𑀬𑁄, 𑀫𑀳𑀸𑀤𑀸𑀞𑀺𑀓𑀅𑀘𑁆𑀘𑀬𑁂;

𑀦𑀯𑀯𑀲𑁆𑀲𑀦𑀝𑁆𑀞𑀫𑀸𑀲𑁂, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀢𑀁 𑀲𑀼𑀢𑁄.

𑀙𑀢𑁆𑀢𑀸𑀢𑀺 𑀙𑀢𑁆𑀢𑀁 𑀓𑀸𑀭𑁂𑀲𑀺, 𑀫𑀳𑀸𑀣𑀽𑀧𑁂 𑀫𑀦𑁄𑀭𑀫𑁂;

𑀢𑀣𑁂𑀯 𑀧𑀸𑀤𑀯𑁂𑀤𑀺𑀜𑁆𑀘, 𑀫𑀼𑀤𑁆𑀥𑀯𑁂𑀤𑀺𑀜𑁆𑀘 𑀓𑀸𑀭𑀬𑀺.

𑀢𑀣𑁂𑀯 𑀮𑁄𑀳𑀧𑀸𑀲𑀸𑀤, 𑀣𑀽𑀧𑀯𑁆𑀳𑁂 𑀧𑁄𑀲𑀣𑀯𑁆𑀳𑀬𑁂;

𑀓𑀸𑀭𑁂𑀲𑀺 𑀓𑀼𑀘𑁆𑀙𑀺𑀆𑀚𑀺𑀭𑀁, 𑀓𑀼𑀘𑁆𑀙𑀺𑀆𑀴𑀺𑀦𑁆𑀤𑀫𑁂𑀯 𑀘.

𑀉𑀪𑀬𑀢𑁆𑀣𑀸𑀧𑀺 ¶ 𑀓𑀸𑀭𑁂𑀲𑀺, 𑀘𑀸𑀭𑀼𑀁 𑀭𑀢𑀦𑀧𑀡𑁆𑀟𑀧𑀁;

𑀭𑀚𑀢𑀮𑁂𑀡 𑀯𑀺𑀳𑀸𑀭𑀜𑁆𑀘, 𑀓𑀸𑀭𑀸𑀧𑁂𑀲𑀺 𑀦𑀭𑀸𑀥𑀺𑀧𑁂.

𑀫𑀳𑀸𑀕𑀸𑀫𑁂𑀡𑁆𑀟𑀯𑀸𑀧𑀺𑀁𑀲𑁄, 𑀧𑀲𑁆𑀲𑁂 𑀓𑀸𑀭𑀺𑀬 𑀤𑀓𑁆𑀔𑀺𑀡𑁂;

𑀤𑀓𑁆𑀔𑀺𑀡𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀅𑀤𑀸𑀲𑀺 𑀧𑀼𑀜𑁆𑀜𑀤𑀓𑁆𑀔𑀺𑀡𑁄.

𑀫𑀸𑀖𑀸𑀢𑀁 𑀲𑀓𑀮𑁂 𑀤𑀻𑀧𑁂, 𑀓𑀸𑀭𑁂𑀲𑀺 𑀫𑀦𑀼𑀚𑀸𑀥𑀺𑀧𑁄;

𑀯𑀮𑁆𑀮𑀺𑀨𑀮𑀸𑀦𑀺 𑀲𑀩𑁆𑀩𑀸𑀦𑀺, 𑀭𑁄𑀧𑀸𑀧𑁂𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁.

𑀫𑀁 𑀲𑀓𑀼𑀪𑀡𑁆𑀟𑀓𑀁 𑀦𑀸𑀫, 𑀆𑀫𑀡𑁆𑀟𑀺𑀬 𑀫𑀳𑀻𑀧𑀢𑀺;

𑀧𑀢𑁆𑀢𑀁 𑀧𑀽𑀭𑀸𑀧𑀬𑀺𑀢𑁆𑀯𑀸𑀦, 𑀓𑀸𑀭𑁂𑀢𑁆𑀯𑀸 𑀯𑀢𑁆𑀣𑀘𑀼𑀫𑁆𑀩𑀝𑀁.

𑀤𑀸𑀧𑁂𑀲𑀺 𑀲𑀩𑁆𑀩𑀲𑀗𑁆𑀖𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀧𑀢𑁆𑀢𑁂 𑀧𑀽𑀭𑀸𑀧𑀬𑀺𑀢𑁆𑀯𑀸 𑀲𑁄, 𑀆𑀫𑀡𑁆𑀟 𑀕𑀸𑀫𑀡𑀺𑀯𑀺𑀤𑀽.

𑀢𑀗𑁆𑀓𑀦𑀺𑀝𑁆𑀞𑁄𑀓𑀡𑀺𑀭𑀸𑀚𑀸-𑀢𑀺𑀲𑁆𑀲𑁄 𑀖𑀸𑀢𑀺𑀬 𑀢𑀸𑀢𑀭𑀁;

𑀢𑀻𑀡𑀺 𑀯𑀲𑁆𑀲𑀸𑀦𑀺 𑀦𑀕𑀭𑁂, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀉𑀧𑁄𑀲𑀣𑀖𑀭𑀝𑁆𑀝𑀁 𑀏𑀲𑀸, 𑀦𑀺𑀘𑁆𑀙𑀺𑀦𑀺 𑀘𑁂𑀓𑀺𑀬𑀯𑁆𑀳𑀬𑁂;

𑀭𑀸𑀚𑀸𑀧𑀭𑀸𑀥𑀓𑀫𑁆𑀫𑀫𑁆𑀳𑀺, 𑀧𑀼𑀢𑁆𑀢𑁂 𑀲𑀝𑁆𑀞𑀺𑀢𑀼 𑀪𑀺𑀓𑁆𑀔𑀯𑁄.

𑀲𑀳𑁄𑀟𑁆𑀟𑁂 𑀕𑀸𑀳𑀬𑀺𑀢𑁆𑀯𑀸𑀦, 𑀭𑀸𑀚𑀸 𑀘𑁂𑀢𑀺𑀬 𑀧𑀩𑁆𑀩𑀢𑁂;

𑀔𑀺𑀧𑀸𑀧𑁂𑀲𑀺 𑀓𑀡𑀺𑀭𑀯𑁆𑀳𑁂, 𑀧𑀩𑁆𑀪𑀸𑀭𑀫𑁆𑀳𑀺 𑀅𑀲𑀻𑀮𑀓𑁂.

𑀓𑀡𑀺𑀭𑀸𑀚𑀸 𑀅𑀘𑁆𑀘𑀬𑁂𑀦, 𑀆𑀫𑀡𑁆𑀟𑀕𑀸𑀫𑀡𑀺 𑀲𑀼𑀢𑁄;

𑀘𑀽𑀴𑀸𑀪𑀬𑁄 𑀯𑀲𑁆𑀲𑀫𑁂𑀓𑀁, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀲𑁄 𑀕𑁄𑀡𑀓𑀦𑀤𑀻𑀢𑀻𑀭𑁂, 𑀧𑀼𑀭𑀧𑀲𑁆𑀲𑀫𑁆𑀳𑀺 𑀤𑀓𑁆𑀔𑀺𑀡𑁂;

𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀸𑀮𑁄, 𑀯𑀺𑀳𑀸𑀭𑁂 𑀘𑀽𑀴𑀕𑀮𑁆𑀮𑀓𑀁.

𑀘𑀽𑀴𑀸𑀪𑀬𑀲𑁆𑀲’𑀘𑁆𑀘 𑀬𑁂𑀦, 𑀲𑀻𑀯𑀮𑀺 𑀢𑀁 𑀓𑀦𑀺𑀝𑁆𑀞𑀺𑀓𑀸;

𑀆𑀫𑀡𑁆𑀟𑀥𑀻𑀢𑀸 𑀘𑀢𑀼𑀭𑁄, 𑀫𑀸𑀲𑁂 𑀭𑀚𑁆𑀚𑀫𑀓𑀸𑀭𑀬𑀺.

𑀆𑀫𑀡𑁆𑀟 𑀪𑀸𑀕𑀺𑀦𑁂𑀬𑁆𑀬𑀸 𑀢𑀼, 𑀲𑀻𑀯𑀮𑀺𑀁 𑀅𑀧𑀦𑀻𑀬𑀢𑀁;

𑀇𑀴𑀦𑀸𑀕𑁄𑀢𑀺 𑀦𑀸𑀫𑁂𑀦, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺 𑀧𑀼𑀭𑁂.

𑀢𑀺𑀲𑁆𑀲𑀯𑀸𑀧𑀺𑀁 𑀕𑀢𑁂 𑀢𑀲𑁆𑀫𑀺𑀁, 𑀆𑀤𑀺𑀯𑀲𑁆𑀲𑁂 𑀦𑀭𑀸𑀥𑀺𑀧𑁂;

𑀢𑀁 𑀳𑀺𑀢𑁆𑀯𑀸 𑀧𑀼𑀭𑀫𑀸𑀕𑀜𑁆𑀙𑀼𑀁, 𑀩𑀳𑀯𑁄𑀮𑀫𑁆𑀩𑀓𑀡𑁆𑀡𑀓𑀸.

𑀢𑀳𑀺𑀁 𑀅𑀤𑀺𑀲𑁆𑀯𑀸 𑀢𑁂 𑀭𑀸𑀚𑀸, 𑀓𑀼𑀤𑁆𑀥𑁄 𑀢𑁂𑀳𑀺 𑀅𑀓𑀸𑀭𑀬𑀺;

𑀫𑀤𑁆𑀤𑀬𑀁 𑀯𑀸𑀧𑀺𑀬𑀸 𑀧𑀲𑁆𑀲𑁂, 𑀫𑀳𑀸𑀣𑀽𑀧𑀜𑁆𑀚𑀲𑀁𑀲𑀬𑀁.

𑀢𑁂𑀲𑀁 ¶ 𑀯𑀺𑀘𑀸𑀭𑀓𑁂 𑀓𑀢𑁆𑀯𑀸, 𑀘𑀡𑁆𑀟𑀸𑀮𑁂 𑀘 𑀞𑀧𑀸𑀧𑀬𑀺;

𑀢𑁂𑀦 𑀓𑀼𑀤𑁆𑀥𑀸𑀮𑀫𑁆𑀩𑀓𑀡𑁆𑀡𑀸, 𑀲𑀩𑁆𑀩𑁂 𑀳𑀼𑀢𑁆𑀯𑀸𑀦 𑀏𑀓𑀢𑁄.

𑀭𑀸𑀚𑀸𑀦𑀁 𑀢𑀁 𑀕𑀳𑁂𑀢𑁆𑀯𑀸𑀦, 𑀭𑀼𑀦𑁆𑀥𑀺𑀢𑁆𑀯𑀸𑀦 𑀲𑀓𑁂 𑀖𑀭𑁂;

𑀲𑀬𑀁 𑀭𑀚𑁆𑀚𑀁 𑀯𑀺𑀘𑀸𑀭𑁂𑀲𑀼𑀁, 𑀭𑀜𑁆𑀜𑁄 𑀤𑁂𑀯𑀻 𑀢𑀤𑀸 𑀲𑀓𑀁.

𑀧𑀼𑀢𑁆𑀢𑀁 𑀘𑀦𑁆𑀤𑀫𑀼𑀔𑀲𑀺𑀯𑀁, 𑀫𑀡𑁆𑀟𑀬𑀺𑀢𑁆𑀯𑀸 𑀓𑀼𑀫𑀸𑀭𑀓𑀁;

𑀤𑀢𑁆𑀯𑀸𑀦 𑀳𑀢𑁆𑀣𑁂 𑀥𑀸𑀢𑀻𑀦𑀁, 𑀫𑀗𑁆𑀕𑀮𑀳𑀢𑁆𑀣𑀺 𑀲𑀦𑁆𑀢𑀺𑀓𑁂.

𑀧𑁂𑀲𑁂𑀲𑀺 𑀯𑀢𑁆𑀯𑀸 𑀲𑀦𑁆𑀤𑁂𑀲𑀁, 𑀦𑁂𑀢𑁆𑀯𑀸 𑀢𑀁 𑀥𑀸𑀢𑀺𑀬𑁄 𑀢𑀳𑀺𑀁;

𑀯𑀤𑀺𑀁𑀲𑀼 𑀤𑁂𑀯𑀺𑀲𑀦𑁆𑀤𑁂𑀲𑀁, 𑀲𑀩𑁆𑀩𑀁 𑀫𑀗𑁆𑀕𑀮 𑀳𑀢𑁆𑀣𑀺𑀦𑁄.

𑀢𑁆𑀯𑀫𑁂𑀦𑀁 𑀓𑀺𑀭 𑀖𑀸𑀢𑁂𑀳𑀺, 𑀇𑀤𑀁 𑀤𑁂𑀯𑀺𑀯𑀘𑁄’’𑀇𑀢𑀺;

𑀯𑀢𑁆𑀯𑀸 𑀢𑀼 𑀲𑀬𑀸𑀧𑁂𑀲𑀼𑀁, 𑀧𑀸𑀤𑀫𑀽𑀮𑀫𑁆𑀳𑀺 𑀳𑀢𑁆𑀣𑀺𑀦𑁄.

𑀤𑀼𑀓𑁆𑀔𑀺𑀢𑁄 𑀲𑁄 𑀭𑀼𑀤𑀺𑀢𑁆𑀯𑀸𑀦, 𑀦𑀸𑀕𑁄 𑀪𑁂𑀢𑁆𑀯𑀸𑀦 𑀆𑀴𑀓𑀁;

𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀯𑀢𑁆𑀣𑀼𑀁, 𑀤𑁆𑀯𑀸𑀭𑀁 𑀧𑀸𑀢𑀺𑀬 𑀣𑀸𑀫𑀲𑀸.

𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀗𑁆𑀕𑀡𑀫𑁆𑀳𑀺, 𑀉𑀕𑁆𑀖𑀸𑀝𑁂𑀢𑁆𑀯𑀸 𑀓𑀯𑀸𑀝𑀓𑀁;

𑀦𑀺𑀲𑀻𑀤𑀸𑀧𑀺𑀬 𑀢𑀁 𑀔𑀦𑁆𑀥𑁂, 𑀫𑀳𑀸𑀢𑀺𑀢𑁆𑀣𑀫𑀼𑀧𑀸𑀕𑀫𑀺.

𑀦𑀸𑀯𑀁 𑀆𑀭𑁄 𑀧𑀬𑀺𑀢𑁆𑀯𑀸𑀦, 𑀭𑀸𑀚𑀸𑀦𑀁 𑀢𑀢𑁆𑀣 𑀓𑀼𑀜𑁆𑀚𑀭𑁄;

𑀧𑀘𑁆𑀙𑀺𑀫𑁄 𑀤𑀥𑀺𑀢𑀻𑀭𑁂𑀦, 𑀲𑀬𑀁 𑀫𑀮𑀬 𑀫𑀸𑀭𑀼𑀳𑀻.

𑀧𑀭𑀢𑀻𑀭𑁂 𑀯𑀲𑀺𑀢𑁆𑀯𑀸 𑀲𑁄, 𑀢𑀻𑀡𑀺𑀯𑀲𑁆𑀲𑀸𑀦𑀺 𑀔𑀢𑁆𑀢𑀺𑀬𑁄;

𑀩𑀮𑀓𑀸𑀬𑀁 𑀕𑀳𑁂𑀢𑁆𑀯𑀸𑀦, 𑀆𑀕𑀸 𑀦𑀸𑀯𑀸𑀢𑀺 𑀭𑁄𑀳𑀡𑀁.

𑀢𑀺𑀢𑁆𑀣𑁂 𑀲𑀓𑁆𑀔𑀭𑀲𑁄𑀩𑁆𑀪𑀫𑁆𑀳𑀺, 𑀑𑀢𑀭𑀺𑀢𑁆𑀯𑀸𑀦 𑀪𑀽𑀧𑀢𑀺;

𑀅𑀓𑀸𑀲𑀺 𑀭𑁄𑀳𑀡𑁂 𑀢𑀢𑁆𑀣, 𑀫𑀳𑀦𑁆𑀢𑀁 𑀩𑀮𑀲𑀗𑁆𑀕𑀳𑀁.

𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀺𑀲𑁄, 𑀤𑀓𑁆𑀔𑀺𑀡𑀁 𑀫𑀮𑀬𑀁 𑀢𑀢𑁄;

𑀭𑁄𑀳𑀡𑀁𑀬𑁂’𑀯𑀼𑀧𑀸𑀕𑀜𑁆𑀙𑀺, 𑀢𑀲𑁆𑀲 𑀓𑀫𑁆𑀫𑀸𑀦𑀺 𑀓𑀸𑀢𑀯𑁂.

𑀫𑀳𑀸𑀧𑀤𑀼𑀫𑀦𑀸𑀫𑀲𑁆𑀲, 𑀢𑀢𑁆𑀣 𑀚𑀸𑀢𑀓𑀪𑀸𑀡𑀺𑀦𑁄;

𑀢𑀼𑀮𑀸𑀥𑀸𑀭𑀯𑁆𑀳𑀯𑀸𑀲𑀺𑀲𑁆𑀲, 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀓𑀧𑀺𑀚𑀸𑀢𑀓𑀁 ¶ 𑀲𑀼𑀢𑁆𑀯𑀸𑀦, 𑀩𑁄𑀥𑀺𑀲𑀢𑁆𑀢𑁂 𑀧𑀲𑀸𑀤𑀯𑀸;

𑀦𑀸𑀕𑀫𑀳𑀸𑀯𑀺𑀳𑀸𑀭𑀁 𑀲𑁄, 𑀚𑀺𑀬𑀸𑀫𑀼𑀢𑁆𑀢𑀥𑀦𑀼𑀲𑁆𑀲𑀢𑀁.

𑀓𑀢𑁆𑀯𑀸 𑀓𑀸𑀭𑁂𑀲𑀺 𑀣𑀽𑀧𑀜𑁆𑀘, 𑀯𑀟𑁆𑀠𑀸𑀧𑁂𑀲𑀺 𑀬𑀣𑀸𑀞𑀺𑀢𑀁;

𑀢𑀺𑀲𑁆𑀲𑀯𑀸𑀧𑀺𑀜𑁆𑀘 𑀓𑀸𑀭𑁂𑀲𑀺, 𑀢𑀣𑀸 𑀤𑀼𑀭𑀯𑁆𑀳𑀯𑀸𑀧𑀺𑀓𑀁.

𑀲𑁄 𑀕𑀳𑁂𑀢𑁆𑀯𑀸 𑀩𑀮𑀁 𑀭𑀸𑀚𑀸, 𑀬𑀼𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑀺;

𑀢𑀁 𑀲𑀼𑀢𑁆𑀯𑀸 𑀮𑀫𑁆𑀩𑀓𑀡𑁆𑀡𑀸 𑀘, 𑀬𑀼𑀤𑁆𑀥𑀸𑀬 𑀅𑀪𑀺𑀲𑀁𑀬𑀼𑀢𑀸.

𑀧𑀧𑀮𑁆𑀮𑀓𑁆𑀔𑀦𑁆𑀥𑀤𑁆𑀯𑀸𑀭𑀫𑁆𑀳𑀺, 𑀔𑁂𑀢𑁆𑀢𑁂 𑀳𑀺𑀗𑁆𑀓𑀭𑀯𑀸𑀧𑀺𑀓𑁂;

𑀬𑀼𑀤𑁆𑀥𑀁 𑀉𑀪𑀺𑀦𑁆𑀦𑀁 𑀯𑀢𑁆𑀢𑀺𑀢𑁆𑀣, 𑀅𑀜𑁆𑀜𑀫𑀜𑁆𑀜𑀯𑀺𑀳𑁂𑀲𑀦𑀁.

𑀦𑀸𑀯𑀸𑀓𑀺𑀮𑀦𑁆𑀢𑀤𑁂𑀳𑀢𑁆𑀢𑀸, 𑀧𑁄𑀲𑀸 𑀲𑀻𑀤𑀦𑁆𑀢𑀺 𑀭𑀸𑀚𑀺𑀦𑁄;

𑀭𑀸𑀚𑀸 𑀦𑀸𑀫𑀁 𑀲𑀸𑀯𑀬𑀺𑀢𑁆𑀯𑀸, 𑀲𑀬𑀁 𑀧𑀸𑀯𑀺𑀲𑀺 𑀢𑁂𑀦 𑀲𑁄.

𑀢𑁂𑀦 𑀪𑀻𑀢𑀸𑀮𑀫𑁆𑀩𑀓𑀡𑁆𑀡𑀸, 𑀲𑀬𑀺𑀁𑀲𑀼 𑀉𑀤𑀭𑁂𑀦 𑀲𑁄;

𑀢𑁂𑀲𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸, 𑀭𑀢𑀦𑀸𑀪𑀺𑀲𑀫𑀁𑀓𑀭𑀺.

𑀢𑀺𑀓𑁆𑀔𑀢𑁆𑀢𑀼𑀫𑁂𑀯𑀦𑁆𑀢𑀼𑀓𑀢𑁂, 𑀓𑀭𑀼𑀡𑀸𑀬 𑀫𑀳𑀻𑀧𑀢𑀺;

‘‘𑀅𑀫𑀸𑀭𑁂𑀢𑁆𑀯𑀸’𑀯 𑀕𑀡𑁆𑀳𑀸𑀣, 𑀚𑀻𑀯𑀕𑁆𑀕𑀸𑀳’𑀦𑁆𑀢𑀺 𑀅𑀩𑁆𑀭𑀼𑀯𑀺.

𑀢𑀢𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀧𑀼𑀭𑀁 𑀆𑀕𑀫𑁆𑀫 𑀪𑀽𑀧𑀢𑀺;

𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺𑀢𑁆𑀯𑀸𑀦 𑀢𑀺𑀲𑁆𑀲𑀯𑀸𑀧𑀺 𑀙𑀡𑀁 𑀅𑀕𑀸.

𑀚𑀮𑀓𑀻𑀴𑀸𑀬 𑀉𑀕𑁆𑀕𑀦𑁆𑀢𑁆𑀯𑀸, 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄;

𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁, 𑀤𑀺𑀲𑁆𑀯𑀸 𑀢𑀲𑁆𑀲𑀦𑁆𑀢𑀭𑀸𑀬𑀺𑀓𑁂.

𑀮𑀫𑁆𑀩𑀓𑀡𑁆𑀡𑁂 𑀲𑀭𑀺𑀢𑁆𑀯𑀸𑀦, 𑀓𑀼𑀤𑁆𑀥𑁄 𑀲𑁄 𑀬𑁄𑀚𑀬𑀻𑀭𑀣𑁂;

𑀬𑀼𑀕𑀧𑀭𑀫𑁆𑀧𑀭𑀸 𑀢𑁂𑀲𑀁, 𑀧𑀼𑀭𑀢𑁄 𑀧𑀸𑀯𑀺𑀲𑀻 𑀧𑀼𑀭𑀁.

𑀫𑀳𑀸𑀯𑀢𑁆𑀣𑀼𑀲𑁆𑀲 𑀉𑀫𑁆𑀫𑀸𑀭𑁂, 𑀞𑀢𑁆𑀯𑀸 𑀭𑀸𑀚𑀸𑀡𑀧𑁂𑀲𑀺 𑀲𑁄;

‘‘𑀇𑀫𑁂𑀲𑀁 𑀲𑀻𑀲𑀫𑀼𑀫𑁆𑀫𑀸𑀭𑁂, 𑀅𑀲𑁆𑀫𑀺𑀁 𑀙𑀺𑀦𑁆𑀤𑀣 𑀪𑁄’’𑀇𑀢𑀺.

𑀕𑁄𑀡𑀸 𑀏𑀢𑁂𑀭𑀣𑁂 𑀬𑀼𑀢𑁆𑀢𑀸, 𑀢𑀯 𑀳𑁄𑀦𑁆𑀢𑀺 𑀭𑀣𑁂𑀲𑀪;

𑀲𑀺𑀗𑁆𑀕𑀁𑀔𑀼𑀭𑀜𑁆𑀘 𑀏𑀢𑁂𑀲𑀁, 𑀙𑁂𑀤𑀸𑀧𑀬𑀢 𑀪𑁄’’𑀇𑀢𑀺.

𑀫𑀸𑀢𑀼𑀬𑀸 𑀅𑀣 𑀲𑀜𑁆𑀜𑀢𑁆𑀢𑁄, 𑀲𑀻𑀲𑀘𑁆𑀙𑁂𑀤𑀁 𑀦𑀺𑀯𑀸𑀭𑀺𑀬;

𑀦𑀸𑀲𑀜𑁆𑀘 𑀧𑀸𑀤𑀗𑁆𑀕𑀼𑀝𑁆𑀞𑀜𑁆𑀘, 𑀢𑁂𑀲𑀁 𑀭𑀸𑀚𑀸 𑀅𑀙𑁂𑀤𑀬𑀺.

𑀳𑀢𑁆𑀣𑀺𑀯𑀼𑀢𑁆𑀣𑀁 𑀚𑀦𑀧𑀤𑀁, 𑀅𑀤𑀸 𑀳𑀢𑁆𑀣𑀺𑀲𑁆𑀲 𑀔𑀢𑁆𑀢𑀺𑀬𑁄;

𑀳𑀢𑁆𑀣𑀺𑀪𑁄𑀕𑁄 𑀚𑀦𑀧𑀤𑁄, 𑀇𑀢𑀺 𑀢𑁂𑀦𑀸𑀲𑀺 𑀦𑀸𑀫𑀢𑁄.

𑀏𑀯𑀁 𑀅𑀦𑀼𑀭𑀸𑀥𑀧𑀼𑀭𑁂, 𑀇𑀴𑀸𑀦𑀸𑀕𑁄 𑀫𑀳𑀻𑀧𑀢𑀺;

𑀙𑀩𑁆𑀩𑀲𑁆𑀲𑀸𑀦𑀺 𑀅𑀦𑀼𑀦𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑀇𑀴𑀦𑀸𑀕𑀘𑁆𑀘𑀬𑁂 ¶ 𑀢𑀲𑁆𑀲, 𑀧𑀼𑀢𑁆𑀢𑁄 𑀘𑀦𑁆𑀤𑀫𑀼𑀔𑁄𑀲𑀺𑀯𑁄;

𑀅𑀝𑁆𑀞𑀯𑀲𑁆𑀲𑀁 𑀲𑀢𑁆𑀢𑀫𑀸𑀲𑀁, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀫𑀡𑀺𑀓𑀸𑀭𑀕𑀸𑀫𑁂 𑀯𑀸𑀧𑀺, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀇𑀲𑁆𑀲𑀭𑀲𑀫𑀡𑀯𑁆𑀳𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀅𑀤𑀸𑀲𑀺 𑀲𑁄.

𑀢𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀘, 𑀲𑀗𑁆𑀕𑀸𑀫𑁂 𑀧𑀢𑁆𑀢𑀺𑀫𑀢𑁆𑀢𑀦𑁄;

𑀢𑀲𑁆𑀲𑁂𑀯𑀸’𑀤𑀸 𑀯𑀺𑀳𑀸𑀭𑀲𑁆𑀲, 𑀤𑀫𑀺𑀴𑀤𑁂𑀯𑀻𑀢𑀺 𑀯𑀺𑀲𑁆𑀲𑀼𑀢𑀸.

𑀢𑀁 𑀢𑀺𑀲𑁆𑀲𑀯𑀸𑀧𑀻 𑀓𑀻𑀴𑀸𑀬, 𑀳𑀦𑁆𑀢𑁆𑀯𑀸 𑀘𑀦𑁆𑀤𑀫𑀼𑀔𑀁 𑀲𑀺𑀯𑀁;

𑀬𑀲𑀴𑀸𑀮𑀓𑀢𑀺𑀲𑁆𑀲𑁄’𑀢𑀺, 𑀯𑀺𑀲𑁆𑀲𑀼𑀢𑁄 𑀢𑀗𑁆𑀓𑀦𑀺𑀝𑁆𑀞𑀓𑁄.

𑀅𑀦𑀼𑀭𑀸𑀥𑀧𑀼𑀭𑁂 𑀭𑀫𑁆𑀫𑁂, 𑀮𑀗𑁆𑀓𑀸𑀪𑀼𑀯𑀤𑀦𑁂 𑀲𑀼𑀪𑁂;

𑀲𑀢𑁆𑀢𑀯𑀲𑁆𑀲𑀸𑀦𑀝𑁆𑀞𑀫𑀸𑀲𑁂, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀤𑁄𑀯𑀺𑀭𑀺𑀓𑀲𑁆𑀲 𑀤𑀢𑁆𑀢𑀲𑁆𑀲, 𑀧𑀼𑀢𑁆𑀣𑁄 𑀤𑁄𑀯𑀸𑀭𑀺𑀓𑁄 𑀲𑀬𑀁;

𑀭𑀜𑁆𑀜𑁄 𑀲𑀤𑀺𑀲𑀭𑀽𑀧𑁂𑀦, 𑀅𑀳𑁄𑀲𑀺 𑀲𑀼𑀪𑀦𑀸𑀫𑀯𑀸.

𑀲𑀼𑀪𑀁 𑀩𑀮𑀢𑁆𑀣𑀁 𑀢𑀁 𑀭𑀸𑀚𑀸, 𑀭𑀸𑀚𑀪𑀽𑀲𑀸𑀬 𑀪𑀽𑀲𑀺𑀬;

𑀦𑀺𑀲𑀺𑀤𑀸𑀧𑀺𑀬 𑀧𑀮𑁆𑀮𑀗𑁆𑀓𑁂, 𑀳𑀸𑀲𑀢𑁆𑀣𑀁 𑀬𑀲𑀴𑀸𑀮𑀓𑁄.

𑀲𑀻𑀲𑀘𑁄𑀴𑀁 𑀩𑀮𑀢𑁆𑀣𑀲𑁆𑀲, 𑀲𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺𑀬;

𑀬𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑁂𑀦, 𑀤𑁆𑀯𑀸𑀭𑀫𑀽𑀮𑁂 𑀞𑀺𑀢𑁄 𑀲𑀬𑀁.

𑀯𑀦𑁆𑀤𑀦𑁆𑀢𑁂𑀲𑀼 𑀅𑀫𑀘𑁆𑀘𑁂𑀲𑀼, 𑀦𑀺𑀲𑀺𑀦𑁆𑀦𑀁 𑀆𑀲𑀦𑀫𑁆𑀳𑀺 𑀢𑀁;

𑀭𑀸𑀚𑀸 𑀳𑀲𑀢𑀺 𑀏𑀯𑀁 𑀲𑁄, 𑀓𑀼𑀭𑀼𑀢𑁂 𑀅𑀦𑁆𑀢𑀭𑀦𑁆𑀢𑀭𑀸.

‘‘𑀩𑀮𑀢𑁆𑀣𑁄 𑀏𑀓𑀤𑀺𑀯𑀲𑀁, 𑀭𑀸𑀚𑀸𑀦𑀁 𑀳𑀲𑀫𑀸𑀦𑀓𑀁;

𑀅𑀬𑀁 𑀩𑀮𑀢𑁆𑀣𑁄 𑀓𑀲𑁆𑀫𑀸 𑀫𑁂, 𑀲𑀫𑁆𑀫𑀼𑀔𑀸𑀳𑀲𑀢𑀻’’𑀢𑀺 𑀲𑁄.

𑀫𑀸𑀭𑀸𑀧𑀬𑀺𑀢𑁆𑀯𑀸 𑀭𑀸𑀚𑀸𑀦𑀁, 𑀩𑀮𑀢𑁆𑀣𑁄 𑀲𑁄 𑀲𑀼𑀪𑁄 𑀇𑀥;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀙𑀩𑁆𑀩𑀲𑁆𑀲𑀁, 𑀲𑀼𑀪𑀭𑀸𑀚𑀸𑀢𑀺 𑀯𑀺𑀲𑁆𑀲𑀼𑀢𑁄.

𑀤𑁆𑀯𑀺𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼, 𑀲𑀼𑀪𑀭𑀸𑀚𑀸 𑀫𑀦𑁄𑀭𑀫𑀁;

𑀧𑀭𑀺𑀯𑁂𑀡𑀧𑀦𑁆𑀢𑀺𑀁 𑀲𑀼𑀪-𑀦𑀸𑀫𑀓𑀁𑀬𑁂𑀯 𑀓𑀸𑀭𑀬𑀺.

𑀉𑀭𑀼𑀯𑁂𑀮𑀲𑀫𑀻𑀧𑀫𑁆𑀳𑀺, 𑀢𑀣𑀸 𑀯𑁂𑀮𑁆𑀮𑀺𑀯𑀺𑀳𑀸𑀭𑀓𑀁;

𑀧𑀼𑀭𑀢𑁆𑀣𑀺𑀫𑁂 𑀏𑀓𑀤𑁆𑀯𑀸𑀭𑀁, 𑀕𑀗𑁆𑀕𑀦𑁆𑀢𑁂 𑀦𑀦𑁆𑀤𑀺𑀕𑀸𑀫𑀓𑀁.

𑀮𑀫𑁆𑀩𑀓𑀡𑁆𑀡𑀲𑀼𑀢𑁄 ¶ 𑀏𑀓𑁄, 𑀉𑀢𑁆𑀢𑀭𑀧𑀲𑁆𑀲𑀯𑀸𑀲𑀺𑀓𑁄;

𑀲𑁂𑀦𑀸𑀧𑀢𑀺𑀫𑀼𑀧𑀝𑁆𑀞𑀸𑀲𑀺, 𑀯𑀲𑀪𑁄 𑀦𑀸𑀫 𑀫𑀸𑀢𑀼𑀮𑀁.

𑀳𑁂𑀲𑁆𑀲𑀢𑀺 𑀯𑀲𑀪𑁄 𑀦𑀸𑀫, 𑀭𑀸𑀚𑀸’𑀢𑀺 𑀲𑀼𑀢𑀺𑀬𑀸𑀲𑀤𑀸;

𑀖𑀸𑀢𑁂𑀢𑀺 𑀭𑀸𑀚𑀸𑀤𑀻𑀧𑀫𑁆𑀳𑀺, 𑀲𑀩𑁆𑀩𑁂 𑀯𑀲𑀪𑀦𑀸𑀫𑀓𑁂.

‘‘𑀭𑀜𑁆𑀜𑁄 𑀤𑀲𑁆𑀲𑀸𑀫 𑀯𑀲𑀢𑀁, 𑀇𑀫’’𑀦𑁆𑀢𑀺 𑀪𑀭𑀺𑀬𑀸𑀬 𑀲𑁄;

𑀲𑁂𑀦𑀸𑀧𑀢𑀺𑀫𑀦𑁆𑀢𑀬𑀺𑀢𑁆𑀯𑀸, 𑀧𑀸𑀢𑁄 𑀭𑀸𑀚𑀓𑀼𑀮𑀁 𑀅𑀕𑀸.

𑀕𑀘𑁆𑀙𑀢𑁄 𑀢𑁂𑀦 𑀲𑀳𑀲𑀸, 𑀢𑀫𑁆𑀩𑀼𑀮𑀁 𑀘𑀼𑀡𑁆𑀡𑀯𑀚𑁆𑀚𑀺𑀢𑀁;

𑀳𑀢𑁆𑀣𑀫𑁆𑀳𑀺 𑀯𑀲𑀪𑀲𑁆𑀲𑀸’𑀤𑀸, 𑀢𑀁 𑀲𑀸𑀥𑀼 𑀧𑀭𑀺𑀭𑀓𑁆𑀔𑀺𑀢𑀼𑀁.

𑀭𑀸𑀚𑀕𑁂𑀳𑀲𑁆𑀲 𑀤𑁆𑀯𑀸𑀭𑀫𑁆𑀳𑀺, 𑀢𑀫𑁆𑀩𑀼𑀮𑀁 𑀘𑀼𑀡𑁆𑀡𑀯𑀚𑁆𑀚𑀺𑀢𑀁;

𑀲𑁂𑀦𑀸𑀧𑀢𑀺 𑀉𑀤𑀺𑀓𑁆𑀔𑀺𑀢𑁆𑀯𑀸, 𑀢𑀁 𑀘𑀼𑀡𑁆𑀡𑀢𑁆𑀣𑀁 𑀯𑀺𑀲𑀚𑁆𑀚𑀬𑀺.

𑀲𑁂𑀦𑀸𑀧𑀢𑀺𑀲𑁆𑀲 𑀪𑀭𑀺𑀬𑀸, 𑀘𑀼𑀡𑁆𑀡𑀢𑁆𑀣𑀁 𑀯𑀲𑀪𑀁 𑀕𑀢𑀁;

𑀯𑀢𑁆𑀯𑀸 𑀭𑀳𑀲𑁆𑀲𑀁 𑀤𑀢𑁆𑀯𑀸 𑀘, 𑀲𑀳𑀲𑁆𑀲𑀁 𑀢𑀁 𑀧𑀮𑀸𑀧𑀬𑀺.

𑀫𑀳𑀸𑀯𑀺𑀳𑀸𑀭𑀞𑀸𑀦𑀁 𑀲𑁄, 𑀕𑀦𑁆𑀢𑁆𑀯𑀸𑀦 𑀯𑀲𑀪𑁄 𑀧𑀦;

𑀢𑀢𑁆𑀣 𑀣𑁂𑀭𑁂𑀳𑀺 𑀔𑀺𑀭𑀦𑁆𑀦-𑀯𑀢𑁆𑀣𑁂𑀳𑀺 𑀓𑀢𑀲𑀗𑁆𑀕𑀳𑁄.

𑀢𑀢𑁄 𑀧𑀭𑀁 𑀓𑀼𑀝𑁆𑀞𑀺𑀦𑁄 𑀘, 𑀭𑀸𑀚𑀪𑀸𑀯𑀸𑀬 𑀦𑀺𑀘𑁆𑀙𑀺𑀢𑀁;

𑀲𑀼𑀢𑁆𑀯𑀸𑀦 𑀯𑀘𑀦𑀁𑀳𑀝𑁆𑀞𑁄, ‘‘𑀘𑁄𑀭𑁄 𑀳𑁂𑀲𑁆𑀲’’𑀦𑁆𑀢𑀺 𑀦𑀺𑀘𑁆𑀙𑀺𑀢𑁄.

𑀮𑀤𑁆𑀥𑀲𑀫𑀢𑁆𑀣𑀧𑀼𑀭𑀺𑀲𑁂, 𑀕𑀸𑀫𑀖𑀸𑀢𑀁 𑀢𑀢𑁄 𑀧𑀭𑀁;

𑀓𑀭𑁄𑀦𑁆𑀢𑁄 𑀭𑁄𑀳𑀡𑀁 𑀕𑀦𑁆𑀢𑁆𑀯𑀸, 𑀓𑀧𑀮𑁆𑀮𑀧𑀼𑀯𑁄𑀧𑀤𑁂𑀲𑀢𑁄.

𑀓𑀫𑁂𑀦 𑀭𑀝𑁆𑀞𑀁 𑀓𑀡𑁆𑀳𑀦𑁆𑀣𑁄, 𑀲𑀫𑁆𑀧𑀢𑁆𑀢𑀩𑀮𑀯𑀸𑀳𑀦𑁄;

𑀲𑁄 𑀭𑀸𑀚𑀸 𑀤𑁆𑀯𑀻𑀳𑀺 𑀯𑀲𑁆𑀲𑁂𑀳𑀺, 𑀆𑀕𑀫𑁆𑀫 𑀧𑀼𑀭𑀲𑀦𑁆𑀢𑀺𑀓𑀁.

𑀲𑀼𑀪𑀭𑀸𑀚𑀁 𑀭𑀡𑁂 𑀳𑀦𑁆𑀢𑁆𑀯𑀸, 𑀯𑀲𑀪𑁄 𑀲𑁄 𑀫𑀳𑀩𑁆𑀩𑀮𑁄;

𑀉𑀲𑁆𑀲𑀸𑀧𑀬𑀺 𑀧𑀼𑀭𑁂𑀪𑀢𑁆𑀢𑀁, 𑀫𑀸𑀢𑀼𑀮𑁄’𑀧𑀺 𑀭𑀡𑁂 𑀧𑀢𑀺.

𑀢𑀁 𑀫𑀸𑀢𑀼𑀮𑀲𑁆𑀲 𑀲𑀭𑀺𑀭𑀁, 𑀧𑀼𑀩𑁆𑀩𑀪𑀽𑀢𑁄𑀧𑀓𑀸𑀭𑀺𑀓𑀁;

𑀅𑀓𑀸𑀲𑀺 𑀯𑀲𑀪𑁄 𑀭𑀸𑀚𑀸, 𑀫𑀳𑁂𑀲𑀺𑀁 𑀫𑁂𑀢𑁆𑀢𑀦𑀸𑀫𑀺𑀓𑀁.

𑀲𑁄𑀳𑁄𑀭𑀧𑀸𑀞𑀓𑀁 𑀧𑀼𑀘𑁆𑀙𑀺, 𑀆𑀬𑀼𑀧𑁆𑀧𑀫𑀸𑀡𑀫𑀢𑁆𑀢𑀦𑁄;

‘‘𑀆𑀳 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺’’, 𑀭𑀳𑁄𑀬𑁂𑀯𑀲𑁆𑀲 𑀲𑁄𑀧𑀺 𑀘.

𑀭𑀳𑀲𑁆𑀲𑀁 𑀭𑀓𑁆𑀔𑀡𑀢𑁆𑀣𑀸𑀬, 𑀲𑀳𑀲𑁆𑀲𑀁 𑀢𑀲𑁆𑀲𑀸 𑀤𑀸𑀧𑀺𑀬;

𑀲𑀗𑁆𑀖𑀁 𑀲𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑀪𑀽𑀧𑀢𑀺.

‘‘𑀲𑀺𑀬𑀸𑀦𑀼 ¶ 𑀪𑀦𑁆𑀢𑁂 𑀆𑀬𑀼𑀲𑁆𑀲, 𑀯𑀟𑁆𑀠𑀦𑀓𑀸𑀭𑀡𑀁’’𑀇𑀢𑀺;

‘‘𑀅𑀢𑁆𑀣𑀻’’𑀢𑀺 𑀲𑀗𑁆𑀖𑁄 𑀆𑀘𑀺𑀓𑁆𑀔𑀺, 𑀅𑀦𑁆𑀢𑀭𑀸𑀬𑀯𑀺𑀫𑁄𑀘𑀦𑀁.

𑀧𑀭𑀺𑀲𑁆𑀲𑀸𑀯𑀦𑀤𑀸𑀦𑀜𑁆𑀘, 𑀆𑀯𑀸𑀲𑀤𑀸𑀦 𑀫𑁂𑀯 𑀘;

𑀕𑀺𑀮𑀸𑀦𑀯𑀢𑁆𑀢𑀤𑀸𑀦𑀜𑁆𑀘, 𑀤𑀸𑀢𑀩𑁆𑀩𑀁 𑀫𑀦𑀼𑀚𑀸𑀥𑀺𑀧.

‘‘𑀓𑀸𑀢𑀩𑁆𑀩𑀁 𑀚𑀺𑀡𑁆𑀡𑀓𑀸𑀯𑀸𑀲-𑀧𑀝𑀺𑀲𑀗𑁆𑀔𑀭𑀡𑀁 𑀢𑀣𑀸;

𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀁, 𑀓𑀢𑁆𑀯𑀸 𑀢𑀁 𑀲𑀸𑀥𑀼𑀭𑀓𑁆𑀔𑀺𑀬𑀁.

𑀉𑀧𑁄𑀲𑀣𑀽𑀧𑀯𑀸𑀲𑁄 𑀘, 𑀓𑀢𑁆𑀢𑀩𑁆𑀩𑁄’ 𑀧𑁄𑀲𑀣𑁂’’𑀇𑀢𑀺;

𑀭𑀸𑀚𑀸 𑀲𑀸𑀥𑀽𑀢𑀺 𑀕𑀦𑁆𑀢𑁆𑀯𑀸𑀦, 𑀢𑀣𑀸 𑀲𑀩𑁆𑀩𑀁 𑀫𑀓𑀸𑀲𑀺 𑀲𑁄.

𑀢𑀺𑀡𑁆𑀡𑀁 𑀢𑀺𑀡𑁆𑀡𑀜𑁆𑀘 𑀯𑀲𑁆𑀲𑀸𑀦𑀁, 𑀅𑀘𑁆𑀘𑀬𑁂𑀦 𑀫𑀳𑀻𑀧𑀢𑀺;

𑀤𑀻𑀧𑀫𑁆𑀳𑀺 𑀲𑀩𑁆𑀩𑀲𑀗𑁆𑀖𑀲𑁆𑀲, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑀅𑀦𑀸𑀕𑀢𑀸𑀦𑀁 𑀣𑁂𑀭𑀸𑀦𑀁, 𑀧𑁂𑀲𑀬𑀺𑀢𑁆𑀯𑀸𑀦 𑀤𑀸𑀧𑀬𑀺;

𑀤𑁆𑀯𑀢𑁆𑀢𑀺𑀁𑀲𑀸𑀬𑀳𑀺 𑀞𑀸𑀦𑁂𑀲𑀼, 𑀤𑀸𑀧𑁂𑀲𑀺 𑀫𑀥𑀼𑀧𑀸𑀬𑀲𑀁.

𑀘𑀢𑀼𑀲𑀝𑁆𑀞𑀺𑀬𑀸 𑀘 𑀞𑀸𑀦𑁂𑀲𑀼, 𑀫𑀳𑀸𑀤𑀸𑀦𑀁𑀢𑀼 𑀫𑀺𑀲𑁆𑀲𑀓𑀁;

𑀲𑀳𑀲𑁆𑀲𑀯𑀝𑁆𑀝𑀺 𑀘𑀢𑀼𑀲𑀼, 𑀞𑀸𑀦𑁂𑀲𑀼 𑀘 𑀚𑀮𑀸𑀧𑀬𑀺.

𑀘𑁂𑀢𑀺𑀬𑀧𑀩𑁆𑀩𑀢𑁂 𑀘𑁂𑀯, 𑀣𑀽𑀧𑀸𑀭𑀸𑀫𑁂 𑀘 𑀘𑁂𑀢𑀺𑀬𑁂;

𑀫𑀳𑀸𑀣𑀽𑀧𑁂 𑀫𑀳𑀸𑀩𑁄𑀥𑀺-𑀖𑀭𑁂 𑀇𑀢𑀺 𑀇𑀫𑁂𑀲𑀼 𑀳𑀺.

𑀘𑀺𑀢𑁆𑀢𑀮𑀓𑀽𑀝𑁂 𑀓𑀸𑀭𑁂𑀲𑀺, 𑀤𑀲𑀣𑀽𑀧𑁂 𑀫𑀦𑁄𑀭𑀫𑁂;

𑀤𑀻𑀧𑁂’𑀔𑀺𑀮𑀫𑁆𑀳𑀺 𑀆𑀯𑀸𑀲𑁂, 𑀚𑀺𑀡𑁆𑀡𑁂 𑀘 𑀧𑀝𑀺𑀲𑀗𑁆𑀔𑀭𑀺.

𑀯𑀮𑁆𑀮𑀺𑀬𑁂𑀭𑀯𑀺𑀳𑀸𑀭𑁂 𑀘, 𑀣𑁂𑀭𑀲𑁆𑀲 𑀲𑁄 𑀧𑀲𑀻𑀤𑀺𑀬;

𑀫𑀳𑀸𑀯𑀮𑁆𑀮𑀺𑀕𑁄𑀢𑁆𑀢𑀁 𑀦𑀸𑀫, 𑀯𑀺𑀳𑀸𑀭𑀜𑁆𑀘 𑀅𑀓𑀸𑀭𑀬𑀺.

𑀓𑀸𑀭𑁂𑀲𑀺 𑀅𑀦𑀼𑀭𑀸𑀭𑀸𑀫𑀁, 𑀫𑀳𑀸𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂;

𑀳𑁂𑀴𑀺𑀕𑀸𑀫𑀝𑁆𑀞𑀓𑀭𑀺𑀲, 𑀲𑀳𑀲𑁆𑀲𑀁 𑀢𑀲𑁆𑀲 𑀤𑀸𑀧𑀬𑀺.

𑀫𑀼𑀘𑁂𑀮𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸, 𑀲𑁄 𑀢𑀺𑀲𑁆𑀲𑀯𑀟𑁆𑀠𑀫𑀸𑀦𑀓𑁂;

𑀆𑀴𑀺𑀲𑀸𑀭𑁄𑀤𑀓𑀪𑀸𑀕𑀁, 𑀯𑀺𑀳𑀸𑀭𑀲𑁆𑀲 𑀅𑀤𑀸𑀧𑀬𑀺.

𑀓𑀮𑀫𑁆𑀩𑀢𑀺𑀢𑁆𑀣𑁂 𑀣𑀽𑀧𑀫𑁆𑀳𑀺, 𑀓𑀸𑀭𑁂𑀲𑀺𑀝𑁆𑀞𑀺𑀓𑀓𑀜𑁆𑀘𑀼𑀓𑀁;

𑀓𑀸𑀭𑁂𑀲𑀼𑀧𑁄𑀲𑀣𑀸 𑀕𑀸𑀭𑀁, 𑀯𑀝𑁆𑀝𑀺𑀢𑁂𑀮𑀢𑁆𑀣 𑀫𑀲𑁆𑀲𑀢𑀼.

𑀲𑀳𑀲𑁆𑀲𑀓𑀭𑀻𑀲𑀯𑀸𑀧𑀺𑀁𑀲𑁄 ¶ , 𑀓𑀸𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺 𑀘;

𑀓𑀸𑀭𑁂𑀲𑀼𑀧𑁄𑀲𑀣𑀸𑀕𑀸𑀭𑀁, 𑀯𑀺𑀳𑀸𑀭𑁂 𑀓𑀼𑀫𑁆𑀪𑀺𑀕𑀮𑁆𑀮𑀓𑁂.

𑀲𑁄𑀬𑁂’𑀯𑀼 𑀧𑁄𑀲𑀣𑀸𑀕𑀸𑀭𑀁, 𑀇𑀲𑁆𑀲𑀭𑀲𑀫𑀡𑀓𑁂 𑀇𑀥;

𑀣𑀽𑀧𑀸𑀭𑀸𑀫𑁂𑀣𑀽𑀧𑀖𑀭𑀁, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀫𑀳𑀸𑀯𑀺𑀳𑀸𑀭𑁂 𑀧𑀭𑀺𑀯𑁂𑀡, 𑀧𑀦𑁆𑀢𑀺𑀁 𑀧𑀘𑁆𑀙𑀺𑀫𑀧𑁂𑀓𑁆𑀔𑀺𑀦𑀺𑀁;

𑀓𑀸𑀭𑁂𑀲𑀺 𑀘 𑀘𑀢𑀼𑀲𑀸𑀮𑀜𑁆𑀘, 𑀚𑀺𑀡𑁆𑀡𑀓𑀁 𑀧𑀝𑀺𑀲𑀗𑁆𑀔𑀭𑀺.

𑀘𑀢𑀼𑀩𑀼𑀤𑁆𑀥𑀧𑀝𑀺𑀫𑀸𑀭𑀫𑁆𑀫𑀁, 𑀧𑀝𑀺𑀫𑀸𑀦𑀁𑀖𑀭𑀁𑀢𑀣𑀸;

𑀫𑀳𑀸𑀩𑁄𑀥𑀺𑀗𑁆𑀕𑀡𑁂 𑀭𑀫𑁆𑀫𑁂, 𑀭𑀸𑀚𑀸 𑀲𑁄𑀬𑁂𑀯 𑀓𑀸𑀭𑀬𑀺.

𑀢𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀲𑀸, 𑀯𑀼𑀢𑁆𑀢𑀦𑀸𑀫𑀸 𑀫𑀦𑁄𑀭𑀫𑀁;

𑀣𑀽𑀧𑀁 𑀣𑀽𑀧𑀖𑀭𑀜𑁆𑀘𑁂𑀯, 𑀭𑀫𑁆𑀫𑀁 𑀢𑀣𑁂𑀯 𑀓𑀸𑀭𑀬𑀺.

𑀣𑀽𑀧𑀸𑀭𑀸𑀫𑁂 𑀣𑀽𑀧𑀖𑀭𑀁, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀢𑀲𑁆𑀲 𑀦𑀺𑀝𑁆𑀞𑀸𑀧𑀺𑀢𑀫𑀳𑁂, 𑀫𑀳𑀸𑀤𑀸𑀦𑀫𑀤𑀸𑀲𑀺 𑀘.

𑀬𑀼𑀢𑁆𑀢𑀸𑀦𑀁 𑀩𑀼𑀤𑁆𑀥𑀯𑀘𑀦𑁂, 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀫𑁆𑀧𑀺 𑀘;

𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁, 𑀲𑀧𑁆𑀧𑀺𑀨𑀸𑀡𑀺𑀢𑀫𑁂𑀯 𑀘.

𑀦𑀕𑀭𑀲𑁆𑀲 𑀘𑀢𑀼𑀤𑁆𑀯𑀸𑀭𑁂, 𑀓𑀧𑀡𑀯𑀝𑁆𑀝𑀜𑁆𑀘 𑀤𑀸𑀧𑀬𑀺;

𑀕𑀺𑀮𑀸𑀦𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁, 𑀕𑀺𑀮𑀸𑀦𑀯𑀝𑁆𑀝𑀫𑁂𑀯 𑀘.

𑀫𑀬𑁂𑀢𑁆𑀢𑀺𑀁 𑀭𑀸𑀚𑀼𑀧𑁆𑀧𑀮𑀯𑀸𑀧𑀺𑀁, 𑀯𑀳𑀓𑁄𑀮𑀫𑁆𑀩𑀕𑀸𑀫𑀓𑀁;

𑀫𑀳𑀸𑀦𑀺𑀓 𑀯𑀺𑀢𑁆𑀢𑀯𑀸𑀧𑀺𑀁, 𑀫𑀳𑀸𑀭𑀸𑀫𑁄𑀢𑁆𑀢𑀺 𑀫𑁂𑀯 𑀘.

𑀓𑁂𑀳𑀸𑀮𑀁 𑀓𑀸𑀴𑀺𑀯𑀸𑀧𑀺𑀜𑁆𑀘, 𑀘𑀫𑁆𑀩𑀼𑀝𑁆𑀞𑀺𑀁 𑀯𑀸𑀢𑀫𑀗𑁆𑀕𑀦𑀁;

𑀅𑀪𑀺𑀯𑀟𑁆𑀠𑀫𑀸𑀦𑀓𑀜𑁆𑀘, 𑀇𑀘𑁆𑀘𑁂𑀓𑀸𑀤𑀲 𑀯𑀸𑀧𑀺𑀬𑁄.

𑀤𑁆𑀯𑀸𑀤𑀲 𑀫𑀸𑀢𑀺𑀓𑀸 𑀘𑁂𑀯, 𑀲𑀼𑀪𑀺𑀓𑁆𑀔𑀢𑁆𑀣𑀫𑀓𑀸𑀭𑀬𑀺;

𑀕𑀼𑀢𑁆𑀢𑀢𑁆𑀣 𑀧𑀼𑀭𑀧𑀸𑀓𑀸𑀭𑀁, 𑀘𑁂𑀯 𑀫𑀼𑀘𑁆𑀘𑀫𑀓𑀸𑀭𑀬𑀺.

𑀕𑁄𑀧𑀼𑀭𑀜𑁆𑀘 𑀘𑀢𑀼𑀤𑁆𑀯𑀸𑀭𑁂, 𑀫𑀳𑀸𑀯𑀢𑁆𑀣𑀼𑀜𑁆𑀘 𑀓𑀸𑀭𑀬𑀺;

𑀲𑀭𑀁 𑀓𑀸𑀭𑁂𑀲𑀺 𑀉𑀬𑁆𑀬𑀸𑀦𑁂, 𑀳𑀁𑀲𑁂𑀢𑀢𑁆𑀣𑀯𑀺𑀲𑀚𑁆𑀚𑀬𑀺.

𑀧𑀼𑀭𑁂 𑀩𑀳𑀽 𑀧𑁄𑀓𑁆𑀔𑀭𑀡𑀻, 𑀓𑀸𑀭𑀸𑀧𑁂𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁;

𑀉𑀫𑁆𑀫𑀕𑁆𑀕𑁂𑀦 𑀚𑀮𑀁 𑀢𑀢𑁆𑀣, 𑀧𑀯𑁂𑀲𑁂𑀲𑀺 𑀫𑀳𑀻𑀧𑀢𑀺.

𑀏𑀯𑀁 ¶ 𑀦𑀸𑀦𑀸𑀯𑀺𑀥𑀁 𑀧𑀼𑀜𑁆𑀜𑀁, 𑀓𑀢𑁆𑀯𑀸 𑀯𑀲𑀪𑀪𑀽𑀧𑀢𑀺;

𑀳𑀢𑀦𑁆𑀢𑀭𑀸𑀬𑁄 𑀲𑁄 𑀳𑀼𑀢𑁆𑀯𑀸, 𑀧𑀼𑀜𑁆𑀜𑀓𑀫𑁆𑀫𑁂 𑀲𑀤𑀸𑀤𑀭𑁄.

𑀘𑀢𑀼𑀢𑁆𑀢𑀸𑀲𑀻𑀲𑀯𑀲𑁆𑀲𑀸𑀦𑀺, 𑀧𑀼𑀭𑁂 𑀭𑀚𑁆𑀚𑀫𑀓𑀸𑀭𑀬𑀺;

𑀘𑀢𑀼𑀢𑁆𑀢𑀸𑀮𑀻𑀲𑀯𑁂𑀲𑀸𑀔, 𑀧𑀽𑀚𑀸 𑀬𑁄 𑀘 𑀅𑀓𑀸𑀭𑀬𑀺.

𑀲𑀼𑀪𑀭𑀸𑀚𑀸 𑀥𑀭𑀦𑁆𑀢𑁄 𑀲𑁄, 𑀅𑀢𑁆𑀢𑀦𑁄 𑀏𑀓𑀥𑀻𑀢𑀭𑀁;

𑀯𑀲𑀪𑁂𑀦 𑀪𑀬𑀸𑀲𑀁𑀓𑀻, 𑀅𑀧𑁆𑀧𑁂𑀲𑀺’𑀞𑀺𑀓 𑀯𑀟𑁆𑀠𑀓𑀺𑀁.

𑀅𑀢𑁆𑀢𑀦𑁄 𑀓𑀫𑁆𑀩𑀮𑀜𑁆𑀘𑁂𑀯, 𑀭𑀸𑀚𑀸 𑀪𑀡𑁆𑀟𑀸𑀦𑀺 𑀘’𑀧𑁆𑀧𑀬𑀺;

𑀯𑀲𑀪𑁂𑀦 𑀳𑀢𑁂 𑀢𑀲𑁆𑀫𑀺𑀁, 𑀢𑀫𑀸𑀤𑀸𑀲𑀺𑀝𑁆𑀞𑀯𑀟𑁆𑀠𑀓𑀻.

𑀥𑀻𑀢𑀺𑀞𑀸𑀦𑁂 𑀞𑀧𑁂𑀢𑁆𑀯𑀸𑀦, 𑀯𑀟𑁆𑀠𑁂𑀢𑀺 𑀅𑀢𑁆𑀢𑀦𑁄 𑀖𑀭𑁂;

𑀲𑀓𑀫𑁆𑀫𑀁 𑀓𑀭𑀢𑁄 𑀢𑀲𑁆𑀲, 𑀪𑀢𑁆𑀢𑀁 𑀆𑀳𑀭𑀺 𑀤𑀸𑀭𑀺𑀓𑀸.

𑀲𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀁, 𑀢𑀤𑀫𑁆𑀩𑀧𑀼𑀧𑁆𑀨 𑀕𑀼𑀫𑁆𑀩𑀓𑁂;

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀺𑀲𑁆𑀯𑀸, 𑀪𑀢𑁆𑀢𑀁 𑀫𑁂𑀥𑀸𑀯𑀻𑀦𑀻 𑀅𑀤𑀸.

𑀧𑀼𑀦 𑀪𑀢𑁆𑀢𑀁 𑀭𑀦𑁆𑀥𑀬𑀺𑀢𑁆𑀯𑀸, 𑀧𑀺𑀢𑀼𑀦𑁄 𑀪𑀢𑁆𑀢𑀫𑀸𑀳𑀭𑀺;

𑀧𑀧𑀜𑁆𑀘𑀓𑀸𑀭𑀡𑀁 𑀧𑀼𑀝𑁆𑀞𑀸, 𑀢𑀫𑀢𑁆𑀣𑀁 𑀧𑀺𑀢𑀼𑀦𑁄 𑀯𑀤𑀺.

𑀢𑀼𑀝𑁆𑀞𑁄 𑀧𑀼𑀦𑀧𑁆𑀧𑀼𑀦𑀜𑁆𑀘𑁂’𑀲𑁄, 𑀪𑀢𑁆𑀢𑀁 𑀣𑁂𑀭𑀲𑁆𑀲 𑀤𑀸𑀧𑀬𑀺;

𑀯𑀺𑀲𑁆𑀲𑀢𑁆𑀣𑁄’𑀦𑀸𑀕𑀢𑀁 𑀤𑀺𑀲𑁆𑀯𑀸, 𑀣𑁂𑀭𑁄 𑀆𑀳 𑀓𑀼𑀫𑀸𑀭𑀺𑀓𑀁.

‘‘𑀢𑀯𑀇𑀲𑁆𑀲𑀭𑀺𑀬𑁂𑀚𑀸𑀢𑁂, 𑀇𑀫𑀁 𑀞𑀸𑀦𑀁 𑀓𑀼𑀫𑀸𑀭𑀺𑀓𑁂;

𑀲𑀭𑁂𑀬𑁆𑀬𑀸𑀲𑀻’𑀢𑀺 𑀣𑁂𑀭𑁄 𑀢𑀼, 𑀢𑀤𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀲𑀓𑁂 𑀲𑁄 𑀯𑀲𑀪𑁄 𑀭𑀸𑀚𑀸, 𑀯𑀬𑀧𑁆𑀧𑀢𑁆𑀢𑀫𑁆𑀳𑀺 𑀧𑀼𑀢𑁆𑀢𑀓𑁂;

𑀯𑀗𑁆𑀓𑀦𑀸𑀲𑀺𑀓𑀢𑀺𑀲𑁆𑀲𑀫𑁆𑀳𑀺, 𑀓𑀜𑁆𑀜𑀁𑀢𑀲𑁆𑀲𑀸𑀦𑀼𑀭𑀽𑀧𑀺𑀓𑀁.

𑀕𑀯𑁂𑀲𑀸𑀧𑁂𑀲𑀺 𑀧𑀼𑀭𑀺𑀲𑀸, 𑀢𑀁 𑀤𑀺𑀲𑁆𑀯𑀸𑀦 𑀓𑀼𑀫𑀸𑀭𑀺𑀓𑀁;

𑀇𑀝𑁆𑀞𑀓𑀯𑀟𑁆𑀠𑀓𑀻𑀕𑀸𑀫𑁂, 𑀇𑀢𑁆𑀣𑀺𑀮𑀓𑁆𑀔𑀡 𑀓𑁄𑀯𑀺𑀤𑀸.

𑀭𑀜𑁆𑀜𑁄 𑀦𑀺𑀯𑁂𑀤𑀬𑀼𑀁 𑀭𑀸𑀚𑀸, 𑀢𑀫𑀸𑀡𑀸𑀧𑁂𑀢𑀼𑀫𑀸𑀭𑀪𑀺;

𑀢𑀲𑁆𑀲𑀸𑀳 𑀭𑀸𑀚𑀥𑀻𑀢𑀢𑁆𑀢𑀁, 𑀇𑀝𑁆𑀞𑀓𑀯𑀟𑁆𑀠𑀓𑀻 𑀢𑀤𑀸.

𑀲𑀼𑀪𑀭𑀜𑁆𑀜𑁄 𑀢𑀼 𑀥𑀻𑀢𑀢𑁆𑀢𑀁, 𑀓𑀫𑁆𑀩𑀮𑀸𑀤𑀻𑀳𑀺 𑀜𑀸𑀧𑀬𑀺;

𑀭𑀸𑀚𑀸 𑀢𑀼𑀝𑁆𑀞𑁄 𑀲𑀼𑀢𑀲𑁆𑀲𑀸’𑀤𑀸, 𑀢𑀁 𑀲𑀸𑀥𑀼 𑀓𑀢𑀫𑀗𑁆𑀕𑀮𑀁.

𑀯𑀲𑀪𑀲𑁆𑀲𑀘𑁆𑀘𑀬𑁂 𑀧𑀼𑀢𑁆𑀢𑁄, 𑀯𑀗𑁆𑀓𑀦𑀸𑀲𑀺𑀓 𑀢𑀺𑀲𑁆𑀲𑀓𑁄;

𑀅𑀦𑀼𑀭𑀸𑀥𑀧𑀼𑀭𑁂 𑀭𑀚𑁆𑀚𑀁, 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀓𑀸𑀭𑀬𑀺.

𑀲𑁄 ¶ 𑀕𑁄𑀡𑀦𑀤𑀺𑀬𑀸 𑀢𑀻𑀭𑁂, 𑀫𑀳𑀸𑀫𑀗𑁆𑀕𑀮𑀦𑀸𑀫𑀓𑀁;

𑀯𑀺𑀳𑀸𑀭𑀁 𑀓𑀸𑀭𑀬𑀺 𑀭𑀸𑀚𑀸, 𑀯𑀗𑁆𑀓𑀦𑀸𑀲𑀺𑀓𑀢𑀺𑀲𑁆𑀲𑀓𑁄.

𑀫𑀳𑀸𑀫𑀢𑁆𑀢𑀸 𑀢𑀼 𑀤𑁂𑀯𑀻 𑀲𑀸, 𑀲𑀭𑀦𑁆𑀢𑀻 𑀣𑁂𑀭𑀪𑀸𑀲𑀺𑀢𑀁;

𑀯𑀺𑀳𑀸𑀭𑀓𑀸𑀭𑀡𑀢𑁆𑀣𑀸𑀬, 𑀅𑀓𑀸𑀲𑀺 𑀥𑀦𑀲𑀜𑁆𑀘𑀬𑀁.

𑀯𑀗𑁆𑀓𑀦𑀸𑀲𑀺𑀓𑀢𑀺𑀲𑁆𑀲𑀲𑁆𑀲, 𑀅𑀘𑁆𑀘𑀬𑁂 𑀓𑀸𑀭𑀬𑀻 𑀲𑀼𑀢𑁄;

𑀭𑀚𑁆𑀚𑀁 𑀩𑀸𑀯𑀻𑀲𑀯𑀲𑁆𑀲𑀸𑀦𑀺, 𑀕𑀚𑁆𑀚𑀩𑀸𑀳𑀼𑀓𑀕𑀸𑀫𑀡𑀺.

𑀲𑀼𑀢𑁆𑀯𑀸 𑀲𑁄 𑀫𑀸𑀢𑀼𑀯𑀘𑀦𑀁, 𑀫𑀸𑀢𑀼𑀤𑀢𑁆𑀣𑀸𑀬 𑀓𑀸𑀭𑀬𑀺;

𑀓𑀤𑀫𑁆𑀩𑀧𑀼𑀧𑁆𑀨𑀞𑀸𑀦𑀫𑁆𑀳𑀺, 𑀭𑀸𑀚𑀫𑀸𑀢𑀼𑀯𑀺𑀳𑀸𑀭𑀓𑀁.

𑀫𑀸𑀢𑀸 𑀲𑀢𑀲𑀳𑀲𑁆𑀲𑀁 𑀲𑀸, 𑀪𑀽𑀫𑀺𑀅𑀢𑁆𑀣𑁄𑀬 𑀧𑀡𑁆𑀟𑀺𑀢𑀸;

𑀅𑀤𑀸 𑀫𑀳𑀸𑀯𑀺𑀳𑀸𑀭𑀲𑁆𑀲, 𑀯𑀺𑀳𑀸𑀭𑀜𑁆𑀘 𑀅𑀓𑀸𑀭 𑀬𑀺.

𑀲𑀬𑀫𑁂𑀯 𑀅𑀓𑀸𑀭𑁂𑀲𑀺, 𑀢𑀢𑁆𑀣 𑀣𑀽𑀧𑀁 𑀲𑀺𑀮𑀸𑀫𑀬𑀁;

𑀲𑀗𑁆𑀖𑀪𑁄𑀕𑀜𑁆𑀘 𑀧𑀸𑀤𑀸𑀲𑀺, 𑀓𑀺𑀡𑀺𑀢𑁆𑀯𑀸𑀦 𑀢𑀢𑁄 𑀢𑀢𑁄.

𑀅𑀪𑀬𑀼𑀢𑁆𑀢𑀭 𑀫𑀳𑀸𑀣𑀽𑀧𑀁, 𑀯𑀟𑁆𑀠𑀸𑀧𑁂𑀢𑁆𑀯𑀸 𑀘𑀺𑀢𑀸𑀧𑀬𑀺;

𑀘𑀢𑀼𑀤𑁆𑀯𑀸𑀭𑁂 𑀘 𑀢𑀢𑁆𑀣𑁂𑀯, 𑀆𑀤𑀺𑀫𑀼𑀔𑀫𑀓𑀸𑀭𑀬𑀺.

𑀕𑀸𑀫𑀡𑀺𑀢𑀺𑀲𑁆𑀲𑀯𑀸𑀧𑀺𑀁 𑀲𑁄, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀅𑀪𑀬𑀕𑀺𑀭𑀺 𑀯𑀺𑀳𑀸𑀭𑀲𑁆𑀲, 𑀧𑀸𑀓𑀯𑀝𑁆𑀝𑀸𑀬’𑀤𑀸𑀲𑀺 𑀘.

𑀫𑀭𑀺𑀘𑀯𑀝𑁆𑀝𑀺𑀓𑀣𑀽𑀧𑀫𑁆𑀳𑀺, 𑀓𑀜𑁆𑀘𑀼𑀓𑀜𑁆𑀘 𑀅𑀓𑀸𑀭𑀬𑀺;

𑀓𑀺𑀡𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑁂𑀦, 𑀲𑀗𑁆𑀖𑀪𑁄𑀕𑀫𑀤𑀸𑀲𑀺 𑀘.

𑀓𑀸𑀭𑁂𑀲𑀺 𑀧𑀘𑁆𑀙𑀺𑀫𑁂 𑀯𑀲𑁆𑀲𑁂, 𑀯𑀺𑀳𑀸𑀭𑀁 𑀭𑀸𑀫𑀓𑀯𑁆𑀳𑀬𑀁;

𑀫𑀳𑁂𑀚𑀲𑀦𑀲𑀸𑀮𑀜𑁆𑀘, 𑀦𑀕𑀭𑀫𑁆𑀳𑀺 𑀅𑀓𑀸𑀭𑀬𑀺.

𑀕𑀚𑀩𑀸𑀳𑀼𑀲𑁆𑀲𑀘𑁆𑀘𑀬𑁂𑀦, 𑀲𑀲𑀼𑀭𑁄 𑀢𑀲𑁆𑀲 𑀭𑀸𑀚𑀺𑀦𑁄;

𑀭𑀚𑁆𑀚𑀁 𑀫𑀳𑀮𑁆𑀮𑀓𑁄 𑀦𑀸𑀕𑁄, 𑀙𑀩𑁆𑀩𑀲𑁆𑀲𑀸𑀦𑀺 𑀅𑀓𑀸𑀭𑀬𑀺.

𑀧𑀼𑀭𑀢𑁆𑀣𑀺𑀫𑁂 𑀧𑁂𑀚𑀮𑀓𑀁, 𑀤𑀓𑁆𑀔𑀺𑀡𑁂 𑀓𑁄𑀝𑀺 𑀧𑀩𑁆𑀩𑀢𑀁;

𑀧𑀘𑁆𑀙𑀺𑀫𑁂 𑀤𑀓𑀧𑀸𑀲𑀸𑀡𑁂, 𑀦𑀸𑀕𑀤𑀻𑀧𑁂 𑀲𑀸𑀮𑀺𑀧𑀩𑁆𑀩𑀢𑀁.

𑀩𑀻𑀚𑀕𑀸𑀫𑁂 𑀢𑀦𑀯𑁂𑀴𑀺𑀁, 𑀭𑁄𑀳𑀡𑁂 𑀚𑀦𑀧𑀤𑁂 𑀧𑀦;

𑀢𑁄𑀩𑁆𑀩𑀮𑀦𑀸𑀕𑀧𑀩𑁆𑀩𑀢𑀜𑁆𑀘, 𑀅𑀦𑁆𑀢𑁄𑀝𑁆𑀞𑁂 𑀕𑀺𑀭𑀺𑀳𑀸𑀮𑀺𑀓𑀁.

𑀏𑀢𑁂 ¶ 𑀲𑀢𑁆𑀢 𑀯𑀺𑀳𑀸𑀭𑁂 𑀲𑁄, 𑀫𑀳𑀮𑁆𑀮𑀦𑀸𑀕𑀪𑀽𑀧𑀢𑀺;

𑀧𑀭𑀺𑀢𑁆𑀢𑁂𑀦𑀧𑀺 𑀓𑀸𑀮𑁂𑀦, 𑀓𑀸𑀭𑀸𑀧𑁂𑀲𑀺 𑀫𑀳𑀸𑀫𑀢𑀻.

𑀏𑀯𑀁 𑀅𑀲𑀸𑀭𑁂𑀳𑀺 𑀥𑀦𑁂𑀳𑀺 𑀲𑀸𑀭𑀁,

𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦 𑀩𑀳𑀽𑀦𑀺 𑀧𑀜𑁆𑀜𑀸;

𑀆𑀤𑁂𑀦𑁆𑀢𑀺 𑀩𑀸𑀮𑀸 𑀧𑀦 𑀓𑀸𑀫 𑀳𑁂𑀢𑀼,

𑀩𑀳𑀽𑀦𑀺 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀸 𑀫𑁄𑀳𑀸’𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀜𑁆𑀘𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀫𑀳𑀮𑁆𑀮𑀦𑀸𑀕𑀘𑁆𑀘𑀬𑁂𑀦 ¶ , 𑀧𑀼𑀢𑁆𑀢𑁄 𑀪𑀸𑀢𑀺𑀓𑀢𑀺𑀲𑁆𑀲𑀓𑁄;

𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀮𑀁𑀓𑀸𑀭𑀚𑁆𑀚𑀫𑀓𑀸𑀭𑀬𑀺.

𑀫𑀳𑀸𑀯𑀺𑀳𑀸𑀭𑁂 𑀧𑀸𑀓𑀸𑀭𑀁, 𑀓𑀸𑀭𑀸𑀧𑁂𑀲𑀺 𑀲𑀫𑀦𑁆𑀢𑀢𑁄;

𑀕𑀯𑀭𑀢𑀺𑀲𑁆𑀲𑀯𑀺𑀳𑀸𑀭𑀁, 𑀲𑁄 𑀓𑀸𑀭𑀬𑀺𑀢𑁆𑀯𑀸 𑀫𑀳𑀻𑀧𑀢𑀺.

𑀫𑀳𑀸𑀕𑀸𑀫𑀡𑀺𑀓𑀁 𑀯𑀸𑀧𑀺𑀁, 𑀯𑀺𑀳𑀸𑀭𑀲𑁆𑀲’𑀲𑁆𑀲’𑀤𑀸𑀲𑀺 𑀘;

𑀯𑀺𑀳𑀸𑀭𑀜𑁆𑀘 𑀅𑀓𑀸𑀭𑁂𑀲𑀺, 𑀪𑀸𑀢𑀺𑀬𑀢𑀺𑀲𑁆𑀲 𑀦𑀸𑀫𑀓𑀁.

𑀓𑀸𑀭𑁂𑀲𑀼𑀧𑁄𑀲𑀣𑀸𑀕𑀸𑀭𑀁, 𑀣𑀽𑀧𑀸𑀭𑀸𑀫𑁂 𑀫𑀦𑁄𑀭𑀫𑁂;

𑀭𑀦𑁆𑀥𑀓𑀡𑁆𑀟𑀓𑀯𑀸𑀧𑀺𑀜𑁆𑀘, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀲𑀢𑁆𑀢𑁂𑀲𑀼 𑀫𑀼𑀤𑀼𑀘𑀺𑀢𑁆𑀢𑁄𑀲𑁄, 𑀲𑀗𑁆𑀖𑀫𑁆𑀳𑀺 𑀢𑀺𑀩𑁆𑀩𑀕𑀸𑀭𑀯𑁄;

𑀉𑀪𑀢𑁄𑀲𑀗𑁆𑀖𑁂 𑀫𑀳𑀻𑀧𑀸𑀮𑁄, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺.

𑀪𑀸𑀢𑀺𑀓𑀢𑀺𑀲𑁆𑀲𑀘𑁆𑀘𑀬𑁂𑀦, 𑀢𑀲𑁆𑀲 𑀓𑀦𑀺𑀝𑁆𑀞𑀢𑀺𑀲𑁆𑀲𑀓𑁄;

𑀅𑀝𑁆𑀞𑀯𑀻𑀲𑀲𑀫𑀸𑀭𑀚𑁆𑀚𑀁, 𑀮𑀁𑀓𑀸𑀤𑀻𑀧𑁂 𑀅𑀓𑀸𑀭𑀬𑀺.

𑀪𑀽𑀢𑀸𑀭𑀸𑀫 ¶ 𑀫𑀳𑀸𑀦𑀸𑀕, 𑀣𑁂𑀭𑀲𑁆𑀫𑀺𑀁 𑀲𑁄 𑀧𑀲𑀻𑀤𑀺𑀬;

𑀓𑀸𑀭𑁂𑀲𑀺 𑀭𑀢𑀦𑀧𑀸𑀲𑀸𑀤𑀁, 𑀅𑀪𑀬𑀕𑀺𑀭𑀺𑀫𑁆𑀳𑀺 𑀲𑀸𑀥𑀼𑀓𑀁.

𑀅𑀪𑀬𑀕𑀺𑀭𑀺𑀫𑁆𑀳𑀺 𑀧𑀸𑀓𑀸𑀭𑀁, 𑀫𑀳𑀸𑀧𑀭𑀺𑀯𑁂𑀡𑀫𑁂𑀯 𑀘;

𑀓𑀸𑀭𑁂𑀲𑀺 𑀫𑀡𑀺𑀲𑁄𑀫𑀯𑁆𑀳𑁂, 𑀫𑀳𑀸𑀧𑀭𑀺𑀯𑁂𑀡𑀫𑁂𑀯 𑀘.

𑀢𑀢𑁆𑀣𑁂𑀯 𑀘𑁂𑀢𑀺𑀬𑀖𑀭𑀁, 𑀅𑀫𑁆𑀩𑀢𑁆𑀣𑀮𑁂 𑀢𑀣𑁂𑀯 𑀘;

𑀓𑀸𑀭𑁂𑀲𑀺 𑀧𑀝𑀺𑀲𑀗𑁆𑀔𑀸𑀭𑀁, 𑀦𑀸𑀕𑀤𑀻𑀧𑁂 𑀖𑀭𑁂 𑀧𑀦.

𑀫𑀳𑀸𑀯𑀺𑀳𑀸𑀭𑀲𑀻𑀫𑀁𑀲𑁄, 𑀫𑀤𑁆𑀤𑀺𑀢𑁆𑀯𑀸 𑀢𑀢𑁆𑀣 𑀓𑀸𑀭𑀬𑀺;

𑀓𑀼𑀓𑁆𑀓𑀼𑀝𑀕𑀺𑀭𑀺 𑀧𑀭𑀺𑀯𑁂𑀡, 𑀧𑀦𑁆𑀢𑀺𑀁 𑀲𑀓𑁆𑀓𑀘𑁆𑀘 𑀪𑀽𑀧𑀢𑀺.

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀤𑁆𑀯𑀸𑀤𑀲 𑀫𑀦𑀼𑀚𑀸𑀥𑀺𑀧𑁄;

𑀫𑀳𑀸𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁂, 𑀤𑀲𑁆𑀲𑀦𑁂𑀬𑁆𑀬𑁂𑀫𑀦𑁄𑀭𑀫𑁂.

𑀤𑀓𑁆𑀔𑀺𑀡𑀯𑀺𑀳𑀸𑀭 𑀣𑀽𑀧𑀫𑁆𑀳𑀺, 𑀓𑀜𑁆𑀘𑀼𑀓𑀜𑁆𑀘 𑀅𑀓𑀸𑀭𑀬𑀺;

𑀪𑀢𑁆𑀢𑀲𑀸𑀮𑀁 𑀫𑀳𑀸𑀫𑁂𑀖, 𑀯𑀦𑀸𑀲𑀺𑀫𑀜𑁆𑀘 𑀫𑀤𑁆𑀤𑀺𑀬.

𑀫𑀳𑀸𑀯𑀺𑀳𑀸𑀭𑀧𑀸𑀓𑀸𑀭𑀁, 𑀧𑀲𑁆𑀲𑀢𑁄 𑀅𑀧𑀦𑀻𑀬𑀲𑁄;

𑀫𑀕𑁆𑀕𑀁 𑀤𑀓𑁆𑀔𑀺𑀡𑀯𑀺𑀳𑀸𑀭, 𑀕𑀸𑀫𑀺𑀜𑁆𑀘𑀸𑀧𑀺 𑀅𑀓𑀸𑀭𑀬𑀺.

𑀪𑀽𑀢𑀸𑀭𑀸𑀫 𑀯𑀺𑀳𑀸𑀭𑀜𑁆𑀘, 𑀭𑀸𑀫𑀕𑁄𑀡𑀓𑀫𑁂𑀯 𑀘;

𑀢𑀣𑁂𑀯 𑀦𑀦𑁆𑀤𑀢𑀺𑀲𑁆𑀲𑀲𑁆𑀲, 𑀆𑀭𑀸𑀫𑀜𑁆𑀘 𑀅𑀓𑀸𑀭𑀬𑀺.

𑀧𑀸𑀘𑀺𑀦𑀢𑁄 𑀅𑀦𑀼𑀴𑀸𑀢𑀺𑀲𑁆𑀲, 𑀧𑀩𑁆𑀩𑀢𑀁 𑀕𑀗𑁆𑀕𑀭𑀸𑀚𑀺𑀬𑀁;

𑀦𑀺𑀬𑁂𑀮𑀢𑀺𑀲𑁆𑀲𑀸𑀭𑀸𑀫𑀜𑁆𑀘, 𑀧𑀺𑀴 𑀧𑀺𑀝𑁆𑀞𑀺 𑀯𑀺𑀳𑀸𑀭𑀓𑀁.

𑀭𑀸𑀚𑀫𑀳𑀸𑀯𑀺𑀳𑀸𑀭𑀜𑁆𑀘, 𑀓𑀸𑀭𑁂𑀲𑀺 𑀫𑀦𑀼𑀚𑀸𑀥𑀺𑀧𑁄;

𑀲𑁄𑀬𑁂𑀯 𑀢𑀻𑀲𑀼 𑀞𑀸𑀦𑁂𑀲𑀼, 𑀓𑀸𑀭𑁂𑀲𑀼’𑀧𑁄𑀲𑀣𑀸𑀮𑀬𑀁.

𑀓𑀮𑁆𑀬𑀸𑀡𑀻𑀓 𑀯𑀺𑀳𑀸𑀭𑁂 𑀘, 𑀫𑀡𑁆𑀟𑀮𑀕𑀺𑀭𑀺𑀓𑁂 𑀢𑀣𑀸;

𑀤𑀼𑀩𑁆𑀩𑀮𑀯𑀸𑀧𑀺𑀢𑀺𑀲𑁆𑀲𑀯𑁆𑀳𑁂, 𑀯𑀺𑀳𑀸𑀭𑁂𑀲𑀼 𑀇𑀫𑁂𑀲𑀼 𑀳𑀺.

𑀓𑀦𑀺𑀝𑁆𑀞𑀢𑀺𑀲𑁆𑀲𑀘𑁆𑀘𑀬𑁂𑀦, 𑀢𑀲𑁆𑀲 𑀧𑀼𑀢𑁆𑀢𑁄 𑀅𑀓𑀸𑀭𑀬𑀺;

𑀭𑀚𑁆𑀚𑀁 𑀤𑁆𑀯𑁂𑀬𑁂𑀯 𑀯𑀲𑁆𑀲𑀸𑀦𑀺, 𑀘𑀽𑀴𑀦𑀸𑀕𑁄𑀢𑀺 𑀯𑀺𑀲𑁆𑀲𑀼𑀢𑁄.

𑀘𑀽𑀴𑀦𑀸𑀕𑀓𑀦𑀺𑀝𑁆𑀞𑁄𑀢𑀼, 𑀭𑀸𑀚𑀸𑀖𑀸𑀢𑀺𑀬 𑀪𑀸𑀢𑀺𑀓𑀁;

𑀏𑀓𑀯𑀲𑁆𑀲𑀁 𑀓𑀼𑀟𑁆𑀟𑀦𑀸𑀕𑁄, 𑀭𑀚𑁆𑀚𑀁 𑀮𑀁𑀓𑀸𑀬 𑀓𑀸𑀭𑀬𑀺.

𑀫𑀳𑀸𑀧𑁂𑀴𑀜𑁆𑀘 𑀯𑀟𑁆𑀠𑁂𑀲𑀺, 𑀏𑀓𑀦𑀸𑀴𑀺𑀓𑀙𑀸𑀢𑀓𑁂;

𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑀁 𑀫𑀳𑀻𑀧𑀢𑀺.

𑀓𑀼𑀟𑁆𑀟𑀦𑀸𑀕𑀲𑁆𑀲 ¶ 𑀭𑀜𑁆𑀜𑁄 𑀢𑀼, 𑀤𑁂𑀯𑀻𑀬𑀸 𑀪𑀸𑀢𑀼𑀓𑁄 𑀢𑀤𑀸;

𑀲𑁂𑀦𑀸𑀧𑀢𑀺 𑀲𑀺𑀭𑀺𑀦𑀸𑀕𑁄, 𑀘𑁄𑀭𑁄 𑀳𑀼𑀢𑁆𑀯𑀸𑀦 𑀭𑀸𑀚𑀺𑀦𑁄.

𑀩𑀮𑀯𑀸𑀳𑀦 𑀲𑀫𑁆𑀧𑀦𑁆𑀦𑁄, 𑀆𑀕𑀫𑁆𑀫 𑀦𑀕𑀭𑀦𑁆𑀢𑀺𑀓𑀁;

𑀭𑀸𑀚𑀩𑀮𑁂𑀦 𑀬𑀼𑀚𑁆𑀛𑀦𑁆𑀢𑁄, 𑀓𑀼𑀟𑁆𑀟𑀦𑀸𑀕𑀁 𑀫𑀳𑀻𑀧𑀢𑀺𑀁.

𑀧𑀮𑀸𑀧𑁂𑀢𑁆𑀯𑀸 𑀮𑀤𑁆𑀥𑀚𑀬𑁄, 𑀅𑀦𑀼𑀭𑀸𑀥 𑀧𑀼𑀭𑁂 𑀯𑀭𑁂;

𑀮𑀁𑀓𑀸𑀭𑀚𑁆𑀚𑀫𑀓𑀸𑀭𑁂𑀲𑀺, 𑀯𑀲𑁆𑀲𑀸𑀦𑁂𑀓𑀽𑀦𑀯𑀻𑀲𑀢𑀺.

𑀫𑀳𑀸𑀣𑀽𑀧𑀯𑀭𑁂 𑀙𑀢𑁆𑀢𑀁, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀪𑀽𑀧𑀢𑀺;

𑀲𑀼𑀯𑀡𑁆𑀡𑀓𑀫𑁆𑀫𑀁 𑀓𑀸𑀭𑁂𑀲𑀺, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁.

𑀓𑀸𑀭𑁂𑀲𑀺 𑀮𑁄𑀳𑀧𑀸𑀲𑀸𑀤𑀁, 𑀲𑀁𑀔𑀺𑀢𑁆𑀢𑀁 𑀧𑀜𑁆𑀘𑀪𑀽𑀫𑀓𑀁;

𑀫𑀳𑀸𑀩𑁄𑀥𑀺 𑀘𑀢𑀼𑀤𑁆𑀯𑀸𑀭𑁂, 𑀲𑁄𑀧𑀸𑀦𑀁 𑀧𑀼𑀦𑀓𑀸𑀭𑀬𑀺.

𑀓𑀸𑀭𑁂𑀢𑁆𑀯𑀸 𑀙𑀢𑁆𑀢𑀧𑀸𑀲𑀸𑀤𑀁, 𑀫𑀳𑁂 𑀧𑀽𑀚𑀫𑀓𑀸𑀭𑀬𑀺;

𑀓𑀼𑀮𑀫𑁆𑀩𑀡𑀜𑁆𑀘 𑀤𑀻𑀧𑀲𑁆𑀫𑀺𑀁, 𑀯𑀺𑀲𑁆𑀲𑀚𑁆𑀚𑁂𑀲𑀺 𑀤𑀬𑀸𑀧𑀭𑁄.

𑀲𑀺𑀭𑀺𑀦𑀸𑀕𑀘𑁆𑀘𑀬𑁂 𑀢𑀲𑁆𑀲, 𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀅𑀓𑀸𑀭𑀬𑀺;

𑀭𑀚𑁆𑀚𑀁 𑀤𑁆𑀯𑀸𑀯𑀻𑀲𑀯𑀲𑁆𑀲𑀸𑀦𑀺, 𑀥𑀫𑁆𑀫𑀯𑁄𑀳𑀸𑀭 𑀓𑁄𑀯𑀺𑀤𑁄.

𑀞𑀧𑁂𑀲𑀺 𑀲𑁄 𑀳𑀺 𑀯𑁄𑀳𑀸𑀭𑀁, 𑀳𑀺𑀁𑀲𑀸 𑀫𑀼𑀢𑁆𑀢𑀁 𑀬𑀢𑁄𑀇𑀥;

𑀯𑁄𑀳𑀸𑀭𑀓 𑀢𑀺𑀲𑁆𑀲𑀭𑀸𑀚𑀸, 𑀇𑀢𑀺 𑀦𑀸𑀫𑀁 𑀢𑀢𑁄 𑀅𑀳𑀼.

𑀓𑀫𑁆𑀩𑀼𑀕𑀸𑀫𑀓𑀯𑀸𑀲𑀺𑀲𑁆𑀲, 𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀓𑀫𑁆𑀫𑀁, 𑀧𑀜𑁆𑀘𑀸𑀯𑀸𑀲𑁂 𑀅𑀓𑀸𑀭𑀬𑀺.

𑀫𑀳𑀸𑀢𑀺𑀲𑁆𑀲𑀲𑁆𑀲 𑀣𑁂𑀭𑀲𑁆𑀲, 𑀅𑀦𑀼𑀭𑀸 𑀭𑀸𑀫𑀯𑀸𑀲𑀺𑀦𑁄;

𑀧𑀲𑀦𑁆𑀦𑁄 𑀫𑀼𑀘𑁂𑀮𑀧𑀝𑁆𑀝𑀦𑁂, 𑀤𑀸𑀦 𑀯𑀝𑁆𑀝𑀫𑀓𑀸𑀭𑀬𑀺.

𑀢𑀺𑀲𑁆𑀲𑀭𑀸𑀚 𑀫𑀡𑁆𑀟𑀧𑀜𑁆𑀘, 𑀫𑀳𑀸𑀯𑀺𑀳𑀸𑀭𑀤𑁆𑀯𑀬𑁂𑀧𑀺 𑀲𑁄;

𑀫𑀳𑀸𑀩𑁄𑀥𑀺𑀖𑀭𑁂 𑀧𑀸𑀘𑀺, 𑀮𑁄𑀳𑀭𑀽𑀧𑀤𑁆𑀥𑀬𑀫𑁆𑀧𑀺 𑀘.

𑀲𑀢𑁆𑀢𑀧𑀡𑁆𑀡𑀺𑀓𑀧𑀸𑀲𑀸𑀤𑀁, 𑀓𑀸𑀭𑁂𑀢𑁆𑀯𑀸 𑀲𑀼𑀔𑀯𑀸𑀲𑀓𑀁;

𑀫𑀸𑀲𑁂 𑀫𑀸𑀲𑁂 𑀲𑀳𑀲𑁆𑀲𑀁 𑀲𑁄, 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀸𑀧𑀬𑀺.

𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑁂, 𑀤𑀓𑁆𑀔𑀺𑀡𑀫𑀽𑀮𑀲𑀯𑁆𑀳𑀬𑁂;

𑀫𑀭𑀺𑀘𑀯𑀝𑁆𑀝𑀺 𑀯𑀺𑀳𑀸𑀭𑀫𑁆𑀳𑀺, 𑀓𑀼𑀮𑀸𑀮𑀺𑀢𑀺𑀲𑁆𑀲𑀲𑀯𑁆𑀳𑀬𑁂.

𑀫𑀳𑀺𑀬𑀗𑁆𑀕𑀡 𑀯𑀺𑀳𑀸𑀭𑀫𑁆𑀳𑀺, 𑀫𑀳𑀸𑀕𑀸𑀫𑀓𑀲𑀯𑁆𑀳𑀬𑁂;

𑀫𑀳𑀸𑀦𑀸𑀕𑀢𑀺𑀲𑁆𑀲𑀯𑁆𑀳𑀫𑁆𑀳𑀺, 𑀢𑀣𑀸 𑀓𑀮𑁆𑀬𑀸𑀡𑀻𑀓𑀯𑁆𑀳𑀬𑁂.

𑀇𑀢𑀺 ¶ 𑀅𑀝𑁆𑀞𑀲𑀼 𑀣𑀽𑀧𑁂𑀲𑀼, 𑀙𑀢𑁆𑀢𑀓𑀫𑁆𑀫𑀫𑀓𑀸𑀭𑀬𑀺;

𑀫𑀽𑀓𑀦𑀸𑀕𑀲𑁂𑀦𑀸𑀧𑀢𑀺, 𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑁂 𑀢𑀣𑀸.

𑀫𑀭𑀺𑀘 𑀯𑀝𑁆𑀝𑀺 𑀯𑀺𑀳𑀸𑀭𑀫𑁆𑀳𑀺, 𑀧𑀼𑀢𑁆𑀢𑀪𑀸𑀕𑀯𑁆𑀳𑀬𑁂 𑀢𑀣𑀸;

𑀇𑀲𑁆𑀲𑀭𑀲𑀫𑀡𑀯𑁆𑀳𑀫𑁆𑀳𑀺, 𑀢𑀺𑀲𑁆𑀲𑀯𑁆𑀳𑁂 𑀦𑀸𑀕𑀤𑀻𑀧𑀓𑁂.

𑀇𑀢𑀺 𑀙𑀲𑀼 𑀯𑀺𑀳𑀸𑀭𑁂𑀲𑀼, 𑀧𑀸𑀓𑀸𑀭𑀜𑁆𑀘 𑀅𑀓𑀸𑀭𑀬𑀺;

𑀓𑀸𑀭𑁂𑀲𑀼’ 𑀧𑁄𑀲𑀣𑀸𑀕𑀸𑀭𑀁, 𑀅𑀦𑀼𑀭𑀸𑀭𑀸𑀫𑀲𑀯𑁆𑀳𑀬𑁂.

𑀅𑀭𑀺𑀬𑀯𑀁𑀲𑀓𑀣𑀸𑀞𑀸𑀦𑁂, 𑀮𑀁𑀓𑀸𑀤𑀻𑀧𑁂𑀔𑀺𑀮𑁂𑀧𑀺 𑀘;

𑀤𑀸𑀦 𑀯𑀝𑁆𑀝𑀁 𑀞𑀧𑀸𑀧𑁂𑀲𑀺, 𑀲𑀤𑁆𑀥𑀫𑁆𑀫𑁂 𑀕𑀸𑀭𑀯𑁂𑀦 𑀲𑁄.

𑀢𑀺𑀡𑀻 𑀲𑀢𑀲𑀳𑀲𑁆𑀲𑀸𑀦𑀺, 𑀤𑀢𑁆𑀯𑀸𑀦 𑀫𑀦𑀼𑀚𑀸𑀥𑀺𑀧𑁄;

𑀇𑀡𑀢𑁄 𑀲𑀬𑀺𑀓𑁂 𑀪𑀺𑀓𑁆𑀔𑀽, 𑀫𑁄𑀘𑁂𑀲𑀺 𑀲𑀸𑀲𑀦𑀧𑁆𑀧𑀺𑀬𑁄.

𑀫𑀳𑀸 𑀯𑁂𑀲𑀸𑀔 𑀧𑀽𑀚𑀁 𑀲𑁄, 𑀓𑀸𑀭𑁂𑀢𑁆𑀯𑀸 𑀤𑀻𑀧𑀯𑀸𑀲𑀺𑀦𑀁;

𑀲𑀩𑁆𑀩𑁂 𑀲𑀁𑀬𑁂𑀯 𑀪𑀺𑀓𑁆𑀔𑀽𑀦𑀁, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑀯𑁂𑀢𑀼𑀮𑁆𑀮𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸, 𑀓𑀸𑀭𑁂𑀢𑁆𑀯𑀸 𑀧𑀸𑀧𑀦𑀺𑀕𑁆𑀕𑀳𑀁;

𑀓𑀧𑀺𑀮𑁂𑀦 𑀅𑀫𑀘𑁆𑀘𑁂𑀦, 𑀲𑀸𑀲𑀦𑀁 𑀚𑁄𑀢𑀬𑀻𑀘 𑀲𑁄.

𑀯𑀺𑀲𑁆𑀲𑀼𑀢𑁄’𑀪𑀬𑀦𑀸𑀕𑁄’𑀢𑀺, 𑀓𑀦𑀺𑀝𑁆𑀞𑁄 𑀢𑀲𑁆𑀲𑀭𑀸𑀚𑀺𑀦𑁄;

𑀤𑁂𑀯𑀺𑀬𑀸 𑀢𑀲𑁆𑀲 𑀲𑀁𑀲𑀝𑁆𑀞𑁄, 𑀜𑀸𑀢𑁄 𑀪𑀻𑀢𑁄 𑀲𑀪𑀸𑀢𑀭𑀸.

𑀧𑀮𑀸𑀬𑀺𑀢𑁆𑀯𑀸 𑀳𑀮𑁆𑀮𑀢𑀺𑀢𑁆𑀣𑀁, 𑀕𑀦𑁆𑀢𑁆𑀯𑀸𑀦 𑀲𑀳𑀲𑁂𑀯𑀓𑁄;

𑀓𑀼𑀤𑁆𑀥𑁄 𑀯𑀺𑀬 𑀫𑀸𑀢𑀼𑀮𑀲𑁆𑀲, 𑀳𑀢𑁆𑀣𑀧𑀸𑀤𑀜𑁆𑀘 𑀙𑁂𑀤𑀬𑀺.

𑀭𑀸𑀚𑀺𑀦𑁄 𑀭𑀝𑁆𑀞𑀢𑁂𑀤𑀢𑁆𑀣𑀁, 𑀞𑀧𑁂𑀢𑁆𑀯𑀸𑀦 𑀇𑀥𑁂𑀯 𑀢𑀁;

𑀲𑀼𑀦𑀔𑁄𑀧𑀫𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸’𑀢𑀺 𑀲𑀺𑀦𑀺𑀤𑁆𑀥𑀓𑁂.

𑀢𑀢𑁆𑀣𑁂𑀯 𑀦𑀸𑀯𑀁 𑀆𑀭𑀼𑀬𑁆𑀳, 𑀧𑀭𑀢𑀻𑀭𑀫𑀕𑀸𑀲𑀬𑀁;

𑀲𑀼𑀪𑀯𑁄 𑀫𑀸𑀢𑀼𑀮𑁄 𑀢𑀼, 𑀉𑀧𑀕𑀫𑁆𑀫 𑀫𑀳𑀻𑀧𑀢𑀺.

𑀲𑀼𑀳𑀤𑁄 𑀯𑀺𑀬 𑀳𑀼𑀢𑁆𑀯𑀸𑀦, 𑀢𑀲𑁆𑀫𑀺𑀁 𑀭𑀝𑁆𑀞𑀫𑀪𑀺𑀦𑁆𑀤𑀺𑀲𑁄;

𑀅𑀪𑀬𑁄 𑀢𑀁 𑀚𑀸𑀦𑀦𑀢𑁆𑀣𑀁, 𑀤𑀽𑀢𑀁 𑀇𑀥 𑀯𑀺𑀲𑀚𑁆𑀚𑀬𑀺.

𑀢𑀁 𑀤𑀺𑀲𑁆𑀯𑀸 𑀧𑀽𑀕𑀭𑀼𑀓𑁆𑀔𑀁 𑀲𑁄, 𑀲𑀫𑀦𑁆𑀢𑀸 𑀓𑀼𑀦𑁆𑀢𑀦𑀸𑀴𑀺𑀬𑀸;

𑀧𑀭𑀺𑀩𑁆𑀪𑀫𑀦𑁆𑀢𑁄 𑀫𑀤𑁆𑀤𑀺𑀢𑁆𑀯𑀸, 𑀓𑀢𑁆𑀯𑀸 𑀤𑀼𑀩𑁆𑀩𑀮𑀫𑀽𑀮𑀓𑀁.

𑀩𑀸𑀳𑀼𑀦𑀸𑀬𑁂𑀯 𑀧𑀸𑀢𑁂𑀢𑁆𑀯𑀸, 𑀢𑀚𑁆𑀚𑁂𑀢𑁆𑀯𑀸 𑀢𑀁 𑀧𑀮𑀸𑀧𑀬𑀺;

𑀤𑀽𑀢𑁄 𑀕𑀦𑁆𑀢𑁆𑀯𑀸 𑀅𑀪𑀬𑀲𑁆𑀲, 𑀢𑀁 𑀧𑀯𑀢𑁆𑀢𑀺𑀁 𑀧𑀯𑁂𑀤𑀬𑀺.

𑀜𑀢𑁆𑀯𑀸’𑀪𑀬𑁄 ¶ 𑀢𑀁 𑀤𑀫𑀺𑀴𑁂, 𑀆𑀤𑀸𑀬 𑀩𑀲𑀼𑀓𑁂 𑀢𑀢𑁄;

𑀦𑀕𑀭𑀦𑁆𑀢𑀺𑀓𑀫𑀸𑀕𑀜𑁆𑀙𑀺, 𑀪𑀸𑀢𑀭𑀸 𑀲𑀳 𑀬𑀼𑀚𑁆𑀛𑀺𑀢𑀼𑀁.

𑀢𑀁 𑀜𑀢𑁆𑀯𑀸𑀦 𑀧𑀮𑀸𑀬𑀺𑀢𑁆𑀯𑀸, 𑀅𑀲𑁆𑀲𑀫𑀸𑀭𑀼𑀬𑁆𑀳𑀤𑁂𑀯𑀺𑀬𑀸;

𑀫𑀮𑀬𑀁 𑀆𑀕𑀫𑀸 𑀭𑀸𑀚𑀸, 𑀢𑀁𑀓𑀦𑀺𑀝𑁆𑀞𑁄’𑀦𑀼 𑀩𑀦𑁆𑀥𑀺𑀬.

𑀭𑀸𑀚𑀸𑀦𑀁 𑀫𑀮𑀬𑁂 𑀳𑀦𑁆𑀢𑁆𑀯𑀸, 𑀤𑁂𑀯𑀻𑀫𑀸𑀤𑀸𑀬 𑀆𑀕𑀢𑁄;

𑀓𑀸𑀭𑁂𑀲𑀺 𑀦𑀕𑀭𑁂 𑀭𑀚𑁆𑀚𑀁, 𑀅𑀝𑁆𑀞𑀯𑀲𑁆𑀲𑀸𑀦𑀺 𑀪𑀽𑀧𑀢𑀺.

𑀧𑀸𑀲𑀸𑀡𑀯𑁂𑀤𑀺𑀁 𑀓𑀸𑀭𑁂𑀲𑀺, 𑀫𑀳𑀸𑀩𑁄𑀥𑀺𑀲𑀫𑀦𑁆𑀢𑀢𑁄;

𑀮𑁄𑀳𑀧𑀸𑀲𑀸𑀤𑀗𑁆𑀕𑀡𑀫𑁆𑀳𑀺, 𑀭𑀸𑀚𑀸 𑀫𑀡𑁆𑀟𑀧𑀫𑁂𑀯 𑀘.

𑀤𑁆𑀯𑀺𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀦𑁂𑀓𑀯𑀢𑁆𑀣𑀸𑀦𑀺 𑀪𑀸𑀕𑀺𑀬;

𑀤𑀻𑀧𑀫𑁆𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀯𑀢𑁆𑀣𑀤𑀸𑀦𑀫𑀤𑀸𑀲𑀺 𑀲𑁄.

𑀅𑀪𑀬𑀲𑁆𑀲’𑀘𑁆𑀘𑀬𑁂 𑀪𑀸𑀢𑀼, 𑀢𑀲𑁆𑀲𑀲𑁆𑀲 𑀢𑀲𑁆𑀲 𑀅𑀢𑁆𑀭𑀚𑁄;

𑀤𑁆𑀯𑁂𑀯𑀲𑁆𑀲𑀸𑀦𑀺 𑀲𑀺𑀭𑀺𑀦𑀸𑀕𑁄, 𑀮𑀁𑀓𑀸𑀭𑀚𑁆𑀚 𑀫𑀓𑀸𑀭𑀬𑀺.

𑀧𑀝𑀺𑀲𑀗𑁆𑀔𑀭𑀺𑀬 𑀧𑀸𑀓𑀸𑀭𑀁, 𑀫𑀳𑀸𑀩𑁄𑀥𑀺𑀲𑀫𑀦𑁆𑀢𑀢𑁄;

𑀫𑀳𑀸𑀩𑁄𑀥𑀺𑀖𑀭𑀲𑁆𑀲𑁂𑀯, 𑀲𑁄𑀬𑁂𑀯 𑀯𑀸𑀮𑀺𑀓𑀸𑀢𑀮𑁂.

𑀫𑀽𑀘𑁂𑀮𑀭𑀼𑀓𑁆𑀔𑀧𑀭𑀢𑁄, 𑀳𑀁𑀲𑀯𑀝𑁆𑀝𑀁 𑀫𑀦𑁄𑀭𑀫𑀁;

𑀫𑀳𑀦𑁆𑀢𑀁 𑀫𑀡𑁆𑀟𑀧𑀜𑁆𑀘𑁂𑀯, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.

𑀯𑀺𑀚𑀬𑀓𑀼𑀫𑀸𑀭𑀓𑁄 𑀦𑀸𑀫, 𑀲𑀺𑀭𑀺𑀦𑀸𑀕𑀲𑁆𑀲 𑀅𑀢𑁆𑀭𑀚𑁄;

𑀧𑀺𑀢𑀼𑀦𑁄 𑀅𑀘𑁆𑀘𑀬𑁂 𑀭𑀚𑁆𑀚𑀁, 𑀏𑀓𑀯𑀲𑁆𑀲𑀫𑀓𑀸𑀭𑀬𑀺.

𑀮𑀫𑁆𑀩𑀓𑀡𑁆𑀡𑀸 𑀢𑀬𑁄 𑀆𑀲𑀼𑀁, 𑀲𑀳𑀸𑀢𑀸 𑀫𑀳𑀺𑀬𑀗𑁆𑀕𑀡𑁂;

𑀲𑀗𑁆𑀖𑀢𑀺𑀲𑁆𑀲𑁄 𑀲𑀗𑁆𑀖𑀩𑁄𑀥𑀺, 𑀢𑀢𑀺𑀬𑁄 𑀕𑁄𑀝𑁆𑀞𑀓𑀸𑀪𑀬𑁄.

𑀢𑁂 𑀢𑀺𑀲𑁆𑀲𑀯𑀸𑀧𑀺𑀫𑀭𑀺𑀬𑀸𑀤-𑀕𑀢𑁄 𑀅𑀦𑁆𑀥𑁄 𑀯𑀺𑀘𑀓𑁆𑀔𑀡𑁄;

𑀭𑀸𑀚𑀼𑀧𑀝𑁆𑀞𑀸𑀦𑀫𑀸𑀬𑀦𑁆𑀢𑁂, 𑀧𑀤𑀲𑀤𑁆𑀤𑁂𑀦 𑀅𑀩𑁆𑀭𑀯𑀺.

‘‘𑀧𑀣𑀯𑀻𑀲𑀸𑀫𑀺𑀦𑁄 𑀏𑀢𑁂, 𑀢𑀬𑁄 𑀯𑀳𑀢𑀺𑀪𑀽’𑀇𑀢𑀺;

𑀢𑀁 𑀲𑀼𑀢𑁆𑀯𑀸 𑀅𑀪𑀬𑁄 𑀧𑀘𑁆𑀙𑀸, 𑀬𑀦𑁆𑀢𑁄 𑀧𑀼𑀘𑁆𑀙𑀺 𑀧𑀼𑀦𑀸𑀳𑀲𑁄.

𑀢𑁂 ¶ 𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀢𑀬𑁄 𑀭𑀜𑁆𑀜𑁄’𑀢𑀺 𑀯𑀮𑁆𑀮𑀪𑁄;

𑀭𑀸𑀚𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀦𑁆𑀢𑀸, 𑀯𑀲𑀦𑁆𑀢𑀸 𑀭𑀸𑀚𑀲𑀦𑁆𑀢𑀺𑀓𑁂.

𑀳𑀦𑁆𑀢𑁆𑀯𑀸 𑀯𑀺𑀚𑀬𑀭𑀸𑀚𑀸𑀦𑀁, 𑀭𑀸𑀚𑀕𑁂𑀳𑀫𑁆𑀳𑀺 𑀏𑀓𑀢𑁄;

𑀲𑁂𑀦𑀸𑀧𑀢𑀺𑀁𑀲𑀗𑁆𑀖𑀢𑀺𑀲𑁆𑀲𑀁, 𑀤𑀼𑀯𑁂𑀭𑀚𑁆𑀚𑁂’𑀪𑀺𑀲𑁂𑀘𑀬𑀼𑀁.

𑀏𑀯𑀁 𑀲𑁄 𑀅𑀪𑀺𑀲𑀺𑀢𑁆𑀢𑁄𑀯, 𑀅𑀦𑀼𑀭𑀸𑀥𑀧𑀼𑀭𑀼𑀢𑁆𑀢𑀫𑁂;

𑀭𑀚𑁆𑀚𑀁 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀲𑀗𑁆𑀖𑀢𑀺𑀲𑁆𑀲𑁄 𑀅𑀓𑀸𑀭𑀬𑀺.

𑀫𑀳𑀸𑀣𑀽𑀧𑀫𑁆𑀳𑀺 𑀙𑀢𑁆𑀢𑀜𑁆𑀘, 𑀳𑁂𑀫𑀓𑀫𑁆𑀫𑀜𑁆𑀘 𑀓𑀸𑀭𑀬𑀺;

𑀯𑀺𑀲𑀼𑀁 𑀲𑀢𑀲𑀳𑀲𑁆𑀲𑀕𑁆𑀖𑁂, 𑀘𑀢𑀼𑀭𑁄 𑀘 𑀫𑀳𑀸𑀫𑀡𑀺.

𑀫𑀚𑁆𑀛𑁂 𑀘𑀢𑀼𑀦𑁆𑀦𑀁 𑀲𑀽𑀭𑀺𑀬𑀸𑀦𑀁, 𑀞𑀧𑀸𑀧𑁂𑀲𑀺 𑀫𑀳𑀻𑀧𑀢𑀺;

𑀣𑀽𑀧𑀲𑁆𑀲 𑀫𑀼𑀤𑁆𑀥𑀦𑀺 𑀢𑀣𑀸-𑀦𑀕𑁆𑀖𑀯𑀚𑀺𑀭𑀘𑀼𑀫𑁆𑀩𑀝𑀁.

𑀲𑁄 𑀙𑀢𑁆𑀢𑀫𑀳𑀧𑀽𑀚𑀸𑀬, 𑀲𑀗𑁆𑀖𑀲𑁆𑀲 𑀫𑀦𑀼𑀚𑀸𑀥𑀺𑀧𑁄;

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀲𑁆𑀲, 𑀙 𑀘𑀻𑀯𑀭𑀫𑀤𑀸𑀧𑀬𑀺.

𑀢𑀁 𑀫𑀳𑀸𑀤𑁂𑀯𑀣𑁂𑀭𑁂𑀦, 𑀤𑀸𑀫𑀕𑀮𑁆𑀮𑀓 𑀯𑀸𑀲𑀺𑀦𑁄;

𑀤𑁂𑀲𑀺𑀢𑀁 𑀔𑀦𑁆𑀥𑀓𑁂 𑀲𑀼𑀢𑁆𑀢𑀁, 𑀬𑀸𑀕𑀸𑀦𑀺𑀲𑀁𑀲 𑀤𑀻𑀧𑀦𑀁.

𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀲𑀗𑁆𑀖𑀲𑁆𑀲, 𑀬𑀸𑀕𑀼𑀤𑀸𑀦𑀫𑀤𑀸𑀧𑀬𑀺;

𑀦𑀕𑀭𑀲𑁆𑀲 𑀘𑀢𑀼𑀤𑁆𑀯𑀸𑀭𑁂, 𑀲𑀓𑁆𑀓𑀘𑁆𑀘𑀜𑁆𑀘𑁂𑀯 𑀲𑀸𑀥𑀼 𑀘.

𑀲𑁄 𑀅𑀦𑁆𑀢𑀭𑀦𑁆𑀢𑀭𑁂 𑀭𑀸𑀚𑀸, 𑀚𑀫𑁆𑀩𑀼𑀧𑀓𑁆𑀓𑀸𑀦𑀺 𑀔𑀸𑀤𑀺𑀢𑀼𑀁;

𑀲𑀳𑁄𑀭𑁄𑀥𑁄 𑀲𑀳𑀸𑀫𑀘𑁆𑀘𑁄, 𑀅𑀕𑀸𑀧𑀸𑀘𑀺𑀦 𑀤𑀻𑀧𑀓𑀁.

𑀉𑀧𑀤𑁆𑀤𑀼𑀢𑀁’𑀲𑁆𑀲 𑀕𑀫𑀦𑁂, 𑀫𑀦𑀼𑀲𑁆𑀲𑀸 𑀧𑀸𑀘𑀺 𑀯𑀸𑀲𑀺𑀦𑁄;

𑀯𑀺𑀲𑀁 𑀨𑀮𑁂𑀲𑀼 𑀬𑁄 𑀚𑁂𑀲𑀼𑀁, 𑀭𑀸𑀚𑀪𑁄𑀚𑁆𑀚𑀸𑀬 𑀚𑀫𑁆𑀩𑀼𑀬𑀸.

𑀔𑀸𑀤𑀺𑀢𑁆𑀯𑀸 𑀚𑀫𑁆𑀩𑀼𑀧𑀓𑁆𑀓𑀸𑀦𑀺, 𑀢𑀸𑀦𑀺 𑀢𑀢𑁆𑀣𑁂𑀯 𑀲𑁄 𑀫𑀢𑁄;

𑀲𑁂𑀦𑀸𑀧𑀢𑀺 𑀲𑀗𑁆𑀖𑀥𑀩𑀸𑀥𑀻𑀁-𑀪𑀬𑁄 𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀭𑀸𑀚𑀸𑀲𑀺𑀭𑀺 𑀲𑀗𑁆𑀖 𑀩𑁄𑀥𑀺, 𑀯𑀺𑀲𑁆𑀲𑀼𑀢𑁄 𑀧𑀜𑁆𑀘𑀲𑀻𑀮𑀯𑀸;

𑀅𑀦𑀼𑀭𑀸𑀥𑀧𑀼𑀭𑁂 𑀭𑀚𑁆𑀚𑀁, 𑀤𑀼𑀯𑁂 𑀯𑀲𑁆𑀲𑀸𑀦𑀺 𑀓𑀸𑀭𑀬𑀺.

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀲𑀮𑀸𑀓𑀕𑁆𑀕𑀁 𑀫𑀦𑁄𑀭𑀫𑀁;

𑀢𑀤𑀸𑀤𑀻𑀧𑁂 𑀫𑀦𑀼𑀲𑁆𑀲𑁂𑀲𑁄, 𑀜𑀢𑁆𑀯𑀸 𑀤𑀼𑀩𑁆𑀩𑀼𑀝𑁆𑀞𑀼𑀧𑀤𑁆𑀤𑀼𑀢𑁂.

𑀓𑀭𑀼𑀡𑀸𑀬 𑀓𑀫𑁆𑀧𑀺𑀢𑀫𑀦𑁄, 𑀫𑀳𑀸𑀣𑀽𑀧𑀗𑁆𑀕𑀡𑁂 𑀲𑀬𑀁;

𑀦𑀺𑀧𑀚𑁆𑀚𑀺 𑀪𑀽𑀫𑀺𑀬𑀁 𑀭𑀸𑀚𑀸, 𑀓𑀢𑁆𑀯𑀸𑀦 𑀇𑀢𑀺 𑀦𑀺𑀘𑁆𑀙𑀬𑀁.

‘‘𑀧𑀯𑀲𑁆𑀲𑀺𑀢𑁆𑀯𑀸𑀦 ¶ 𑀤𑁂𑀯𑁂𑀦, 𑀚𑀮𑁂𑀦𑀼𑀧𑀮𑀸𑀯𑀺𑀢𑁂 𑀫𑀬𑀺;

𑀦𑀳𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀫𑀭𑀫𑀸𑀦𑁄𑀧𑀳𑀁 𑀇𑀥’’.

𑀏𑀯𑀁 𑀦𑀺𑀧𑀦𑁆𑀦𑁂 𑀪𑀽𑀫𑀺𑀦𑁆𑀤𑁂, 𑀤𑁂𑀯𑁄 𑀧𑀸𑀯𑀲𑁆𑀲𑀺 𑀢𑀸𑀯𑀤𑁂;

𑀮𑀁𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀧𑀺𑀡𑀬𑀦𑁆𑀢𑁄 𑀫𑀳𑀸𑀫𑀳𑀺𑀁.

𑀢𑀣𑀸𑀧𑀺 𑀦𑀼𑀝𑁆𑀞𑀳𑀢𑀺𑀲𑁄, 𑀅𑀧𑀺𑀮𑀸𑀧𑀦𑀢𑁄 𑀚𑀮𑁂;

𑀆𑀯𑀭𑀺𑀁𑀲𑀼 𑀢𑀢𑁄’𑀫𑀘𑁆𑀘𑀸, 𑀚𑀮𑀦𑀺𑀕𑁆𑀕𑀫𑀦𑀸𑀴𑀺𑀬𑁄.

𑀢𑀢𑁄 𑀚𑀮𑀫𑁆𑀳𑀺 𑀧𑀺𑀮𑀯𑀁, 𑀭𑀸𑀚𑀸 𑀯𑀼𑀝𑁆𑀞𑀸𑀲𑀺 𑀥𑀫𑁆𑀫𑀺𑀓𑁄;

𑀓𑀭𑀼𑀡𑀸𑀬𑀦𑀼𑀤𑀺 𑀏𑀯𑀁, 𑀤𑀻𑀧𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀪𑀬𑀁.

𑀘𑁄𑀭𑀸𑀢𑀳𑀺𑀁 𑀢𑀳𑀺𑀁 𑀚𑀸𑀢𑀸, 𑀇𑀢𑀺 𑀲𑀼𑀢𑁆𑀯𑀸𑀦 𑀪𑀽𑀧𑀢𑀺;

𑀘𑁄𑀭𑁂 𑀆𑀡𑀸𑀧𑀬𑀺𑀢𑁆𑀯𑀸𑀦, 𑀭𑀳𑀲𑁆𑀲𑁂𑀦 𑀧𑀮𑀸𑀧𑀻𑀬.

𑀆𑀡𑀸𑀧𑁂𑀢𑁆𑀯𑀸 𑀭𑀳𑀲𑁆𑀲𑁂𑀦, 𑀫𑀢𑀸𑀦𑀁 𑀲𑁄 𑀓𑀮𑁂𑀯𑀭𑀁;

𑀅𑀕𑁆𑀕𑀻𑀳𑀺 𑀉𑀢𑁆𑀢𑀸𑀲𑁂𑀢𑁆𑀯𑀸𑀦, 𑀳𑀦𑀺𑀢𑀁 𑀘𑁄𑀭𑀼𑀧𑀤𑁆𑀤𑀯𑀁.

𑀏𑀓𑁄 𑀬𑀓𑁆𑀔𑁄 𑀇𑀥𑀸𑀕𑀫𑁆𑀫, 𑀭𑀢𑁆𑀢𑀓𑁆𑀔𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀓𑀭𑁄𑀢𑀺 𑀭𑀢𑁆𑀢𑀸𑀦’𑀓𑁆𑀔𑀻𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀢𑀳𑀺𑀁 𑀢𑀳𑀺𑀁.

𑀅𑀜𑁆𑀜𑀫𑀜𑁆𑀜𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀸𑀬𑀺𑀢𑁆𑀯𑀸 𑀭𑀢𑁆𑀢𑀦𑁂𑀢𑁆𑀢𑀢𑀁;

𑀦𑀭𑀸𑀫𑀭𑀦𑁆𑀢𑀺 𑀢𑁂 𑀬𑀓𑁆𑀔𑁄, 𑀲𑁄𑀪𑀓𑁆𑀔𑁂𑀲𑀺 𑀅𑀲𑀗𑁆𑀓𑀺𑀢𑁄.

𑀭𑀸𑀚𑀸 𑀉𑀧𑀤𑁆𑀤𑀯𑀁 𑀢𑁂𑀲𑀁, 𑀲𑀼𑀢𑁆𑀯𑀸 𑀲𑀦𑁆𑀢𑀢𑁆𑀢𑀫𑀸𑀦𑀲𑁄;

𑀏𑀓𑁄’𑀧𑀯𑀸𑀲 𑀕𑀩𑁆𑀪𑀫𑁆𑀳𑀺, 𑀳𑀼𑀢𑁆𑀯𑀸 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀺.

‘‘𑀅𑀧𑀲𑁆𑀲𑀺𑀢𑁆𑀯𑀸𑀦 𑀢𑀁 𑀬𑀓𑁆𑀔𑀁, 𑀦 𑀘𑀼𑀝𑁆𑀞𑀸𑀫𑀻’’𑀢𑀺 𑀲𑁄 𑀲𑀬𑀺;

𑀢𑀲𑁆𑀲 𑀲𑁄 𑀥𑀫𑁆𑀫𑀢𑁂𑀚𑁂𑀦, 𑀅𑀕𑀸 𑀬𑀓𑁆𑀔𑁄 𑀢𑀤𑀦𑁆𑀢𑀺𑀓𑀁.

𑀢𑁂𑀦 ‘‘𑀓𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀘, 𑀲𑁄 ‘‘𑀅𑀳’’𑀦𑁆𑀢𑀺 𑀧𑀯𑁂𑀤𑀬𑀺;

‘‘𑀓𑀲𑁆𑀫𑀸 𑀧𑀚𑀁 𑀫𑁂 𑀪𑀓𑁆𑀔𑁂𑀲𑀺, 𑀫𑀸 𑀔𑀸𑀤’’𑀇𑀢𑀺 𑀲𑁄𑀩𑁆𑀭𑀯𑀺.

‘‘𑀏𑀓𑀲𑁆𑀫𑀺𑀁 𑀫𑁂 𑀚𑀦𑀧𑀤𑁂, 𑀦𑀭𑁂 𑀤𑁂𑀳𑀻’’𑀢𑀺 𑀲𑁄𑀩𑁆𑀭𑀯𑀺;

‘‘𑀦 𑀲𑀓𑁆𑀓𑀸 𑀇𑀢𑀺 𑀯𑀼𑀢𑁆𑀢𑁂 𑀲𑁄, 𑀓𑀫𑁂𑀦𑁂𑀓𑀁𑀢𑀺 𑀅𑀩𑁆𑀭𑀯𑀺.

‘‘𑀅𑀜𑁆𑀜𑀁 𑀦 𑀲𑀓𑁆𑀓𑀸 𑀤𑀸𑀢𑀼𑀁 𑀫𑁂, 𑀫𑀁 𑀔𑀸𑀤’’ 𑀇𑀢𑀺 𑀲𑁄𑀩𑁆𑀭𑀯𑀺;

‘‘𑀦 𑀲𑀓𑁆𑀓𑀸’’𑀇𑀢𑀺 𑀢𑀁 𑀬𑀸𑀘𑀺, 𑀕𑀸𑀫𑁂 𑀕𑀸𑀫𑁂 𑀩𑀮𑀺𑀜𑁆𑀘 𑀲𑁄.

𑀲𑀸𑀥𑀽𑀢𑀺 𑀯𑀢𑁆𑀯𑀸 𑀪𑀽𑀫𑀺𑀦𑁆𑀤𑁄, 𑀤𑀺𑀧𑀫𑁆𑀧𑀺 𑀲𑀓𑀮𑁂𑀧𑀺 𑀘;

𑀕𑀸𑀫𑀯𑀭𑁂 𑀦𑀺𑀯𑁂𑀲𑁂𑀢𑁆𑀯𑀸, 𑀩𑀮𑀺𑀁𑀢𑀲𑁆𑀲 𑀅𑀤𑀸𑀧𑀬𑀺.

𑀫𑀳𑀸𑀲𑀢𑁆𑀢𑁂𑀦 ¶ 𑀢𑁂𑀦𑁂𑀯, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑀸;

𑀫𑀳𑀸𑀭𑁄𑀕𑀪𑀬𑀁 𑀚𑀸𑀢𑀁, 𑀤𑀻𑀧𑀤𑀻𑀧𑁂𑀦 𑀦𑀸𑀲𑀺𑀢𑀁.

𑀧𑀭𑀺𑀲𑁆𑀲𑀸𑀯𑀦𑀫𑀸𑀤𑀸𑀬, 𑀭𑀸𑀚𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀢𑁄;

𑀧𑀭𑀳𑀺𑀁𑀲𑀫𑀭𑁄𑀘𑁂𑀦𑁆𑀢𑁄, 𑀏𑀓𑀓𑁄𑀯 𑀧𑀮𑀸𑀬𑀺 𑀲𑁄.

𑀧𑀼𑀝𑀪𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀢𑁄 𑀧𑀣𑀺;

𑀪𑀢𑁆𑀢𑀪𑁄𑀕𑀸𑀬𑀭𑀸𑀚𑀸𑀦𑀁, 𑀦𑀺𑀩𑀦𑁆𑀥𑀺𑀢𑁆𑀣 𑀧𑀼𑀦𑀧𑁆𑀧𑀼𑀦𑀁.

𑀚𑀮𑀁 𑀧𑀭𑀺𑀲𑁆𑀲𑀸𑀯𑀬𑀺𑀢𑁆𑀯𑀸, 𑀪𑀼𑀜𑁆𑀚𑀺𑀢𑁆𑀯𑀸𑀦 𑀤𑀬𑀸𑀮𑀼𑀓𑁄;

𑀢𑀲𑁆𑀲𑁂𑀯𑀁’𑀦𑀼𑀕𑁆𑀕𑀳𑀁 𑀓𑀸𑀢𑀼𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀼𑀯𑀺.

‘‘𑀲𑀗𑁆𑀖𑀩𑁄𑀥𑀺 𑀅𑀳𑀁 𑀭𑀸𑀚𑀸, 𑀕𑀳𑁂𑀢𑁆𑀯𑀸 𑀫𑀫𑀪𑁄 𑀲𑀻𑀭𑀁;

𑀕𑁄𑀝𑁆𑀞𑀸𑀪𑀬𑀲𑁆𑀲 𑀤𑀲𑁆𑀲𑁂𑀳𑀺, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦𑀁.

𑀦 𑀇𑀘𑁆𑀙𑀺𑀢𑁄 𑀢𑀣𑀸𑀓𑀸𑀢𑀼𑀁, 𑀢𑀲𑁆𑀲𑀢𑁆𑀣𑀸𑀬 𑀫𑀳𑀻𑀧𑀢𑀺;

𑀦𑀺𑀲𑀺𑀦𑁆𑀦𑁄𑀬𑁂𑀯 𑀅𑀫𑀭𑀺, 𑀲𑁄 𑀲𑀻𑀲𑀁 𑀢𑀲𑁆𑀲 𑀆𑀤𑀺𑀬.

𑀕𑁄𑀝𑁆𑀞𑀸𑀪𑀬𑀲𑁆𑀲 𑀤𑀲𑁆𑀲𑁂𑀲𑀺, 𑀲𑁄𑀢𑀼 𑀯𑀺𑀫𑁆𑀳𑀺𑀢𑀫𑀸𑀦𑀲𑁄;

𑀤𑀢𑁆𑀯𑀸 𑀢𑀲𑁆𑀲 𑀥𑀦𑀁 𑀭𑀜𑁆𑀜𑁄, 𑀲𑀓𑁆𑀓𑀸𑀭𑀁 𑀲𑀸𑀥𑀼𑀓𑀸𑀭𑀬𑀺.

𑀏𑀯𑀁 𑀕𑁄𑀝𑁆𑀞𑀸𑀪𑀬𑁄 𑀏𑀲𑁄, 𑀫𑁂𑀖𑀯𑀡𑁆𑀡𑀸𑀪𑀬𑁄’𑀢𑀺 𑀘;

𑀯𑀺𑀲𑁆𑀲𑀼𑀢𑁄 𑀢𑁂𑀭𑀲 𑀲𑀫𑀸, 𑀮𑀁𑀓𑀸𑀭𑀚𑁆𑀚𑀫𑀓𑀸𑀭𑀬𑀺.

𑀫𑀳𑀸𑀯𑀢𑁆𑀣𑀼𑀁 𑀓𑀸𑀭𑀬𑀺𑀢𑁆𑀯𑀸, 𑀯𑀢𑁆𑀣𑀼𑀤𑁆𑀯𑀸𑀭𑀫𑁆𑀳𑀺 𑀫𑀡𑁆𑀟𑀧𑀁;

𑀓𑀸𑀭𑀬𑀺𑀢𑁆𑀯𑀸 𑀫𑀡𑁆𑀟𑀬𑀺𑀢𑁆𑀯𑀸, 𑀲𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀲𑀗𑁆𑀖𑀢𑁄.

𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀸𑀦𑀺, 𑀦𑀺𑀲𑀻𑀤𑁂𑀢𑁆𑀯𑀸 𑀤𑀺𑀦𑁂 𑀤𑀺𑀦𑁂;

𑀬𑀸𑀕𑀼𑀔𑀚𑁆𑀚𑀓 𑀪𑁄𑀚𑁆𑀚𑁂𑀳𑀺, 𑀲𑀸𑀤𑀽𑀳𑀺 𑀯𑀺𑀯𑀺𑀥𑁂𑀳𑀺 𑀘.

𑀲𑀘𑀻𑀯𑀭𑁂𑀳𑀺 𑀓𑀧𑁆𑀧𑁂𑀢𑁆𑀯𑀸, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺;

𑀏𑀓𑀯𑀻𑀲𑀤𑀺𑀦𑀸 𑀦𑁂𑀯𑀁, 𑀦𑀺𑀩𑀤𑁆𑀥𑀜𑁆𑀘𑀲𑁆𑀲 𑀓𑀸𑀭𑀬𑀺.

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀲𑀺𑀮𑀸𑀫𑀡𑁆𑀟𑀧 𑀫𑀼𑀢𑁆𑀢𑀫𑀁;

𑀮𑁄𑀳𑀧𑀸𑀲𑀸𑀤𑀣𑀫𑁆𑀪𑁂 𑀘, 𑀧𑀭𑀺𑀯𑀢𑁆𑀢𑀺𑀬 𑀞𑀸𑀧𑀬𑀺.

𑀫𑀳𑀸𑀩𑁄𑀥𑀺 ¶ 𑀲𑀺𑀮𑀸𑀯𑁂𑀤𑀺𑀁, 𑀉𑀢𑁆𑀢𑀭𑀤𑁆𑀯𑀸𑀭𑀢𑁄𑀭𑀡𑀁;

𑀧𑀢𑀺𑀝𑁆𑀞𑀸𑀧𑁂𑀲𑀺 𑀣𑀫𑁆𑀪𑁂 𑀘, 𑀘𑀓𑀼𑀓𑀡𑁆𑀡𑁂 𑀲𑀘𑀓𑁆𑀓𑀓𑁂.

𑀢𑀺𑀲𑁆𑀲𑁄 𑀲𑀻𑀮𑀸𑀧𑀝𑀺𑀫𑀸𑀬𑁄, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀓𑀸𑀭𑀬𑀺;

𑀞𑀧𑀸𑀧𑁂𑀲𑀺 𑀘 𑀧𑀮𑁆𑀮𑀗𑁆𑀓𑀁, 𑀤𑀓𑁆𑀔𑀺𑀡𑀫𑁆𑀳𑀺 𑀲𑀺𑀮𑀸𑀫𑀬𑀁.

𑀧𑀥𑀸𑀦𑀪𑀽𑀫𑀺𑀁 𑀓𑀸𑀭𑁂𑀲𑀺, 𑀫𑀳𑀸𑀯𑀺𑀳𑀸𑀭𑀧𑀘𑁆𑀙𑀢𑁄;

𑀤𑀻𑀧𑀫𑁆𑀳𑀺 𑀚𑀺𑀡𑁆𑀡𑀓𑀸𑀯𑀸𑀲𑀁, 𑀲𑀩𑁆𑀩𑀜𑁆𑀘 𑀧𑀝𑀺𑀲𑀗𑁆𑀔𑀭𑀺.

𑀣𑀽𑀧𑀸𑀭𑀸𑀫𑁂 𑀣𑀽𑀧𑀖𑀭𑀁, 𑀣𑁂𑀭𑀫𑁆𑀩𑀢𑁆𑀣𑀮𑀓𑁂 𑀢𑀣𑀸;

𑀆𑀭𑀸𑀫𑁂 𑀫𑀡𑀺𑀲𑁄𑀫𑀯𑁆𑀳𑁂, 𑀧𑀝𑀺𑀲𑀗𑁆𑀔𑀸𑀭𑀬𑀺 𑀘 𑀲𑁄.

𑀣𑀽𑀧𑀸𑀭𑀸𑀫𑁂 𑀫𑀡𑀺𑀲𑁄𑀫𑀸-𑀭𑀸𑀫𑁂 𑀫𑀭𑀺𑀘𑀯𑀝𑁆𑀝𑀓𑁂;

𑀤𑀓𑁆𑀔𑀺𑀡𑀯𑁆𑀳 𑀯𑀺𑀳𑀸𑀭𑁂 𑀘, 𑀉𑀧𑁄𑀲𑀣𑀖𑀭𑀸𑀦𑀺 𑀘.

𑀫𑁂𑀖𑀯𑀡𑁆𑀡𑀸𑀪𑀬𑀯𑁆𑀳𑀜𑁆𑀘, 𑀦𑀯𑀯𑀺𑀳𑀸𑀭𑀫𑀓𑀸𑀭𑀬𑀺;

𑀯𑀺𑀳𑀸𑀭𑀫𑀳𑀧𑀽𑀚𑀸𑀬𑀁, 𑀧𑀺𑀡𑁆𑀟𑁂𑀢𑁆𑀯𑀸 𑀤𑀻𑀧𑀯𑀸𑀲𑀻𑀦𑀁.

𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀙𑀘𑀻𑀯𑀭𑀫𑀤𑀸𑀲𑀺 𑀘;

𑀫𑀳𑀸𑀯𑁂𑀲𑀸𑀔𑀧𑀽𑀚𑀜𑁆𑀘, 𑀢𑀤𑀸 𑀏𑀯𑀁 𑀅𑀓𑀸𑀭𑀬𑀺.

𑀅𑀦𑀼𑀯𑀲𑁆𑀲𑀜𑁆𑀘 𑀲𑀗𑁆𑀖𑀲𑁆𑀲, 𑀙𑀘𑀻𑀯𑀭𑀫𑀤𑀸𑀫𑀬𑀺;

𑀧𑀸𑀧𑀓𑀸𑀦𑀁 𑀦𑀺𑀕𑁆𑀕𑀳𑁂𑀦, 𑀲𑁄𑀥𑁂𑀦𑁆𑀢𑁄 𑀲𑀸𑀲𑀦𑀁 𑀢𑀼 𑀲𑁄.

𑀯𑁂𑀢𑀼𑀮𑁆𑀮𑀯𑀸𑀤𑀺𑀦𑁄 𑀪𑀺𑀓𑁆𑀔𑀽, 𑀅𑀪𑀬𑀕𑀺𑀭𑀺𑀦𑀺𑀯𑀸𑀲𑀺𑀦𑁄;

𑀕𑀸𑀳𑀬𑀺𑀢𑁆𑀯𑀸𑀲𑀝𑁆𑀞𑀺𑀫𑀢𑁆𑀢𑁂, 𑀚𑀺𑀦𑀲𑀸𑀲𑀦𑀓𑀡𑁆𑀝𑀓𑁂.

𑀓𑀢𑁆𑀯𑀸𑀦 𑀦𑀺𑀕𑁆𑀕𑀳𑀁 𑀢𑁂𑀲𑀁, 𑀧𑀭𑀢𑀺𑀭𑁂 𑀔𑀺𑀧𑀸𑀧𑀬𑀺;

𑀢𑀢𑁆𑀣 𑀔𑀺𑀢𑁆𑀢𑀲𑁆𑀲 𑀣𑁂𑀭𑀲𑁆𑀲, 𑀦𑀺𑀲𑁆𑀲𑀺𑀢𑁄 𑀪𑀺𑀓𑁆𑀔𑀼𑀘𑁄𑀴𑀺𑀓𑁄.

𑀲𑀗𑁆𑀖𑀫𑀺𑀢𑁆𑀢𑁄’𑀢𑀺𑀦𑀸𑀫𑁂𑀦, 𑀪𑀽𑀢𑀺𑀯𑀺𑀚𑁆𑀚𑀸𑀤𑀺𑀓𑁄𑀯𑀺𑀤𑁄;

𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀦𑀁, 𑀓𑀼𑀚𑁆𑀛𑀺𑀢𑁆𑀯𑀸𑀦 𑀇𑀥𑀕𑀫𑀸.

𑀣𑀽𑀧𑀸𑀭𑀸𑀫𑁂 𑀲𑀦𑁆𑀦𑀺𑀧𑀸𑀢𑀁, 𑀧𑀯𑀺𑀲𑀺𑀢𑁆𑀯𑀸 𑀅𑀲𑀜𑁆𑀜𑀢𑁄;

𑀲𑀗𑁆𑀖𑀧𑀸𑀮𑀲𑁆𑀲 𑀧𑀭𑀺𑀯𑁂𑀡, 𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀢𑀢𑁆𑀣 𑀲𑁄.

𑀕𑁄𑀝𑁆𑀞𑀸𑀲𑀬𑀲𑁆𑀲 𑀣𑁂𑀭𑀲𑁆𑀲, 𑀫𑀸𑀢𑀼𑀮𑀲𑁆𑀲’𑀲𑁆𑀲 𑀭𑀸𑀚𑀺𑀦𑁄;

𑀭𑀜𑁆𑀜𑁄 𑀦𑀸𑀫𑁂𑀦𑀸‘‘𑀮𑀧𑀦𑁆𑀢𑁄, 𑀯𑀘𑀦𑀁 𑀧𑀝𑀺𑀩𑀸𑀳𑀺𑀬.

𑀭𑀜𑁆𑀜𑁄 𑀓𑀼𑀮𑀽𑀧𑀕𑁄 𑀆𑀲𑀺, 𑀭𑀸𑀚𑀸 𑀢𑀲𑁆𑀫𑀺𑀁 𑀧𑀲𑀻𑀤𑀺𑀬;

𑀚𑁂𑀝𑁆𑀞𑀧𑀼𑀢𑁆𑀢𑀁 𑀚𑁂𑀝𑁆𑀞𑀢𑀺𑀲𑁆𑀲𑀁, 𑀫𑀳𑀸𑀲𑁂𑀦𑀁 𑀓𑀦𑀺𑀝𑁆𑀞𑀓𑀁.

𑀅𑀧𑁆𑀧𑁂𑀲𑀺 ¶ 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀲𑁄 𑀲𑀗𑁆𑀕𑀡𑁆𑀳𑀺 𑀤𑀼𑀢𑀺𑀬𑀓𑀁;

𑀉𑀧𑀦𑀦𑁆𑀥𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁, 𑀚𑁂𑀝𑁆𑀞𑀢𑀺𑀲𑁆𑀲𑁄 𑀓𑀼𑀫𑀸𑀭𑀓𑁄.

𑀧𑀺𑀢𑀼𑀦𑁄 𑀅𑀘𑁆𑀘𑀬𑁂 𑀚𑁂𑀝𑁆𑀞, 𑀲𑀺𑀲𑁆𑀲𑁄 𑀭𑀸𑀚𑀸𑀅𑀳𑁄𑀲𑀺𑀲𑁄;

𑀧𑀺𑀢𑀼 𑀲𑀸𑀭𑀻𑀭 𑀲𑀓𑁆𑀓𑀸𑀭𑁂, 𑀦𑀺𑀕𑁆𑀕𑀦𑁆𑀢𑀼𑀁 𑀦𑀺𑀘𑁆𑀙𑀫𑀸𑀦𑀓𑁂.

𑀤𑀼𑀝𑁆𑀞𑀸𑀫𑀘𑁆𑀘𑁂 𑀦𑀺𑀕𑁆𑀕𑀳𑁂𑀢𑀼𑀁, 𑀲𑀬𑀁 𑀦𑀺𑀓𑁆𑀔𑀫𑁆𑀫 𑀪𑀽𑀧𑀢𑀺;

𑀓𑀦𑀺𑀝𑁆𑀞𑀁 𑀧𑀼𑀭𑀢𑁄 𑀓𑀢𑁆𑀯𑀸, 𑀧𑀺𑀢𑀼𑀓𑀸𑀬𑀁 𑀅𑀦𑀦𑁆𑀢𑀭𑀁.

𑀢𑀢𑁄 𑀅𑀫𑀘𑁆𑀘𑁂 𑀓𑀢𑁆𑀯𑀸𑀦, 𑀲𑀬𑀁 𑀳𑀼𑀢𑁆𑀯𑀸𑀦 𑀧𑀘𑁆𑀙𑀢𑁄;

𑀓𑀦𑀺𑀝𑁆𑀞𑁂 𑀧𑀺𑀢𑀼𑀓𑀸𑀬𑁂 𑀘, 𑀦𑀺𑀓𑁆𑀔𑀦𑁆𑀢𑁂 𑀢𑀤𑀦𑀦𑁆𑀢𑀭𑀁.

𑀤𑁆𑀯𑀸𑀭𑀁 𑀲𑀁𑀯𑀭𑀬𑀺𑀢𑁆𑀯𑀸𑀦, 𑀤𑀼𑀝𑁆𑀞𑀫𑀘𑁆𑀘𑁂 𑀦𑀺𑀖𑀸𑀢𑀺𑀬;

𑀲𑀽𑀮𑁂 𑀅𑀧𑁆𑀧𑁂𑀲𑀺 𑀧𑀺𑀢𑀼𑀦𑁄, 𑀘𑀺𑀢𑀓𑀸𑀬𑀲𑀫𑀦𑁆𑀢𑀢𑁄.

𑀢𑁂𑀦’𑀲𑁆𑀲 𑀓𑀫𑁆𑀫𑀼𑀦𑀸 𑀦𑀸𑀫𑀁, 𑀓𑀓𑁆𑀔𑀮𑁄𑀧𑀧𑀤𑀁𑀅𑀳𑀼;

𑀲𑀗𑁆𑀖𑀫𑀺𑀢𑁆𑀢𑁄𑀢𑀼 𑀲𑁄 𑀪𑀺𑀓𑁆𑀔𑀼, 𑀪𑀻𑀢𑁄 𑀢𑀲𑁆𑀫𑀺𑀁 𑀦𑀭𑀸𑀥𑀺𑀧𑀸.

𑀢𑀲𑁆𑀲𑀸𑀪𑀺𑀲𑁂𑀓𑀲𑀫𑀓𑀸𑀮𑀁, 𑀫𑀳𑀸𑀲𑁂𑀦𑁂𑀦 𑀫𑀦𑁆𑀢𑀺𑀬;

𑀢𑀲𑁆𑀲𑀸𑀪𑀺𑀲𑁂𑀓𑀁 𑀧𑁂𑀓𑁆𑀔𑀦𑁆𑀢𑁄, 𑀧𑀭𑀢𑀻𑀭𑀁 𑀕𑀢𑁄 𑀇𑀢𑁄.

𑀧𑀺𑀢𑀭𑀸 𑀲𑁄 𑀯𑀺𑀧𑁆𑀧𑀓𑀢𑀁, 𑀮𑁄𑀳𑀧𑀸𑀲𑀸𑀤 𑀫𑀼𑀢𑁆𑀢𑀫𑀁;

𑀓𑁄𑀝𑀺𑀥𑀦𑀁 𑀅𑀕𑁆𑀖𑀦𑀓𑀁, 𑀓𑀸𑀭𑁂𑀲𑀺 𑀲𑀢𑁆𑀢𑀪𑀽𑀫𑀓𑀁.

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀕𑁆𑀖𑀁, 𑀧𑀽𑀚𑀬𑀺𑀢𑁆𑀯𑀸 𑀫𑀡𑀺𑀁𑀢𑀳𑀺𑀁;

𑀓𑀸𑀭𑁂𑀲𑀺 𑀚𑁂𑀝𑁆𑀞𑀢𑀺𑀲𑁆𑀲𑁄𑀢𑀁, 𑀫𑀡𑀺𑀧𑀸𑀲𑀸𑀤𑀦𑀸𑀫𑀓𑀁.

𑀫𑀡𑀺 𑀤𑀼𑀯𑁂 𑀫𑀳𑀕𑁆𑀖𑁂 𑀘, 𑀫𑀳𑀸𑀣𑀽𑀧𑁂 𑀅𑀧𑀽𑀚𑀬𑀺;

𑀫𑀳𑀸𑀩𑁄𑀥𑀺𑀖𑀭𑁂 𑀢𑀻𑀡𑀺, 𑀢𑁄𑀭𑀡𑀸𑀦𑀺 𑀘 𑀓𑀸𑀭𑀬𑀺.

𑀓𑀸𑀭𑀬𑀺𑀢𑁆𑀯𑀸 𑀯𑀺𑀳𑀸𑀭𑀁 𑀲𑁄, 𑀧𑀸𑀘𑀺𑀦𑀢𑀺𑀲𑁆𑀲 𑀧𑀩𑁆𑀩𑀢𑀁;

𑀧𑀜𑁆𑀘𑀯𑀸𑀲𑁂𑀲𑀼 𑀲𑀗𑁆𑀖𑀲𑁆𑀲, 𑀅𑀤𑀸𑀲𑀺 𑀧𑀼𑀣𑀼𑀯𑀻 𑀧𑀢𑀺.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁂𑀦, 𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀁 𑀧𑀼𑀭𑀸;

𑀣𑀽𑀧𑀸𑀭𑀸𑀫𑁂 𑀉𑀭𑀼𑀲𑀺𑀮𑀸, 𑀧𑀝𑀺𑀫𑀁 𑀘𑀸𑀭𑀼𑀤𑀲𑁆𑀲𑀦𑀁.

𑀦𑁂𑀢𑁆𑀯𑀸𑀦 𑀣𑀽𑀧𑀸𑀭𑀸𑀫𑀯𑁆𑀳𑀁, 𑀚𑁂𑀝𑁆𑀞𑀢𑀺𑀲𑁆𑀲𑁄 𑀫𑀳𑀻𑀧𑀳𑀺;

𑀧𑀢𑀺𑀝𑁆𑀞𑀸𑀧𑁂𑀲𑀺 𑀆𑀭𑀸𑀫𑁂, 𑀧𑀸𑀘𑀺𑀦𑀢𑀺𑀲𑁆𑀲 𑀧𑀩𑁆𑀩𑀢𑁂.

𑀓𑀸𑀴𑀫𑀢𑁆𑀢𑀺𑀓𑀯𑀸𑀧𑀺𑀁𑀲𑁄, 𑀅𑀤𑀸𑀘𑁂𑀢𑀺𑀬 𑀧𑀩𑁆𑀩𑀢𑁂;

𑀯𑀺𑀳𑀸𑀭 𑀧𑀸𑀲𑀸𑀤 𑀫𑀳𑀁, 𑀫𑀳𑀸𑀯𑁂𑀲𑀸𑀔𑀫𑁂𑀯 𑀘.

𑀓𑀢𑁆𑀯𑀸 ¶ 𑀢𑀺𑀁𑀲 𑀲𑀳𑀲𑁆𑀲𑀲𑁆𑀲, 𑀲𑀗𑁆𑀖𑀲𑁆𑀲’𑀤𑀸 𑀙𑀘𑀻𑀯𑀭𑀁;

𑀆𑀴𑀫𑁆𑀩𑀕𑀸𑀫𑀯𑀸𑀧𑀺𑀁𑀲𑁄, 𑀚𑁂𑀝𑁆𑀞𑀢𑀺𑀲𑁆𑀲𑁄 𑀅𑀓𑀸𑀭𑀬𑀺.

𑀏𑀯𑀁 𑀲𑁄 𑀯𑀺𑀯𑀺𑀥𑀁 𑀧𑀼𑀜𑁆𑀜𑀁, 𑀧𑀸𑀲𑀸𑀤𑀓𑀭𑀡𑀸𑀤𑀺𑀓𑀁;

𑀓𑀸𑀭𑁂𑀦𑁆𑀢𑁄 𑀤𑀲𑀯𑀲𑁆𑀲𑀸𑀦𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀇𑀢𑀺 𑀩𑀳𑀼𑀯𑀺𑀥 𑀧𑀼𑀜𑁆𑀜 𑀳𑁂𑀢𑀼 𑀪𑀽𑀢𑀸,

𑀦𑀭𑀧𑀢𑀺𑀢𑀸 𑀩𑀳𑀼𑀧𑀸𑀧𑀳𑁂𑀢𑀼 𑀘𑀸𑀢𑀺;

𑀫𑀥𑀼𑀭𑀫𑀺𑀯 𑀯𑀺𑀲𑁂𑀦𑀫𑀺𑀲𑁆𑀲𑀫𑀦𑁆𑀦𑀁,

𑀲𑀼𑀚𑀦𑀫𑀦𑁄 𑀪𑀚𑀢𑁂 𑀦 𑀢𑀁 𑀓𑀤𑀸𑀧𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀙𑀢𑁆𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀚𑁂𑀝𑁆𑀞𑀢𑀺𑀲𑁆𑀲𑀘𑁆𑀘𑀬𑁂 𑀢𑀲𑁆𑀲, 𑀫𑀳𑀸𑀲𑁂𑀦𑁄 𑀓𑀦𑀺𑀝𑁆𑀞𑀓𑁄;

𑀲𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑀢𑀲𑁆𑀲𑀸𑀪𑀺𑀲𑁂𑀓𑀁 𑀓𑀸𑀭𑁂𑀢𑁆𑀯𑀸, 𑀅𑀜𑁆𑀜𑀁 𑀓𑀺𑀘𑁆𑀘𑀜𑁆𑀘𑀦𑁂𑀓𑀥𑀸;

𑀫𑀳𑀸𑀯𑀺𑀳𑀸𑀭 𑀯𑀺𑀤𑁆𑀥𑀁𑀲𑀁, 𑀓𑀸𑀢𑀼𑀓𑀸𑀫𑁄 𑀅𑀲𑀜𑁆𑀜𑀢𑁄.

𑀅𑀯𑀺𑀦𑀬𑀯𑀸𑀤𑀺𑀦𑁄 𑀏𑀢𑁂, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄;

𑀯𑀺𑀦𑀬𑀯𑀸𑀤𑀻 𑀫𑀬𑀁 𑀭𑀸𑀚, 𑀇𑀢𑀺 𑀕𑀸𑀳𑀺𑀬 𑀪𑀽𑀧𑀪𑀺𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀲𑁆𑀲 ¶ , 𑀆𑀳𑀸𑀭𑀁 𑀤𑁂𑀢𑀺 𑀪𑀺𑀓𑁆𑀔𑀼𑀦𑁄;

𑀬𑁄 𑀲𑁄 𑀲𑀢𑀁 𑀤𑀡𑁆𑀟𑀺𑀬𑁄’𑀢𑀺, 𑀭𑀜𑁆𑀜𑀸 𑀤𑀡𑁆𑀟𑀁 𑀞𑀧𑀸𑀧𑀬𑀺.

𑀉𑀧𑀤𑁆𑀤𑀼𑀢𑀸 𑀢𑁂𑀳𑀺 𑀪𑀺𑀓𑁆𑀔𑀽, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄;

𑀫𑀳𑀸𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸, 𑀫𑀮𑀬𑀁 𑀭𑁄𑀳𑀡𑀁 𑀅𑀕𑀼𑀁.

𑀢𑁂𑀦 𑀫𑀳𑀸𑀯𑀺𑀳𑀸𑀭𑁄’𑀬𑀁, 𑀦𑀯𑀯𑀲𑁆𑀲𑀸𑀦𑀺 𑀙𑀟𑁆𑀟𑀺𑀢𑁄;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺, 𑀪𑀺𑀓𑁆𑀔𑀽𑀳𑀺 𑀆𑀲𑀺 𑀲𑀼𑀜𑁆𑀜𑀓𑁄.

‘‘𑀳𑁄𑀢𑀺 𑀅𑀲𑁆𑀲𑀸𑀫𑀺𑀓𑀁 𑀯𑀢𑁆𑀣𑀼, 𑀧𑀼𑀢𑀼𑀯𑀺𑀲𑀸𑀫𑀺𑀦𑁄’’𑀇𑀢𑀺;

𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑁄, 𑀣𑁂𑀭𑁄 𑀤𑀼𑀫𑁆𑀫𑀢𑀺 𑀤𑀼𑀫𑁆𑀫𑀢𑀺𑀁.

𑀫𑀳𑀸𑀯𑀺𑀳𑀸𑀭𑀁 𑀦𑀸𑀲𑁂𑀢𑀼𑀁, 𑀮𑀤𑁆𑀥𑀸𑀦𑀼𑀫𑀢𑀺 𑀭𑀸𑀚𑀢𑁄;

𑀢𑀣𑀸 𑀓𑀸𑀢𑀼𑀁 𑀫𑀦𑀼𑀲𑁆𑀲𑁂 𑀲𑁄, 𑀬𑁄𑀚𑁂𑀲𑀺 𑀤𑀼𑀝𑁆𑀞𑀫𑀸𑀦𑀲𑁄.

𑀲𑀗𑁆𑀖𑀫𑀺𑀢𑁆𑀢𑀲𑁆𑀲 𑀣𑁂𑀭𑀲𑁆𑀲, 𑀲𑁂𑀯𑀓𑁄 𑀭𑀸𑀚𑀯𑀮𑁆𑀮𑀪𑁄;

𑀲𑁄𑀡𑀸𑀫𑀘𑁆𑀘𑁄 𑀤𑀸𑀭𑀡𑁄 𑀘, 𑀪𑀺𑀓𑁆𑀔𑀯𑁄 𑀘 𑀅𑀮𑀚𑁆𑀚𑀺𑀦𑁄.

𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀲𑀢𑁆𑀢𑀪𑀽𑀫𑀓 𑀫𑀼𑀢𑁆𑀢𑀫𑀁;

𑀖𑀭𑁂 𑀦𑀸𑀦𑀧𑁆𑀧𑀓𑀸𑀭𑁂 𑀘, 𑀇𑀢𑁄’𑀪𑀬𑀕𑀺𑀭𑀺𑀁 𑀦𑀬𑀼𑀁.

𑀫𑀳𑀸𑀯𑀺𑀳𑀸𑀭𑀸 𑀦𑀻𑀢𑁂𑀳𑀺, 𑀧𑀸𑀲𑀸𑀤𑁂𑀳𑀺 𑀩𑀳𑀽𑀳𑀺 𑀘;

𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑁄𑀬𑀁, 𑀩𑀳𑀼𑀧𑀸𑀲𑀸𑀤𑀓𑁄 𑀅𑀳𑀼.

𑀲𑀗𑁆𑀖𑀫𑀺𑀢𑁆𑀢𑀁 𑀧𑀸𑀧𑀫𑀺𑀢𑁆𑀢𑀁, 𑀣𑁂𑀭𑀁 𑀲𑁄𑀡𑀜𑁆𑀘 𑀲𑁂𑀯𑀓𑀁;

𑀆𑀕𑀫𑁆𑀫 𑀲𑀼𑀩𑀳𑀼𑀁 𑀧𑀸𑀧𑀁, 𑀅𑀓𑀸𑀲𑀺 𑀲𑁄 𑀫𑀳𑀻𑀧𑀢𑀺.

𑀫𑀳𑀸𑀲𑀺𑀮𑀸𑀧𑀝𑀺𑀫𑀁 𑀲𑁄, 𑀧𑀸𑀘𑀺𑀦𑀢𑀺𑀲𑁆𑀲𑀧𑀩𑁆𑀩𑀢𑀸;

𑀆𑀦𑁂𑀢𑁆𑀯𑀸’𑀪𑀬𑀕𑀺𑀭𑀺𑀫𑁆𑀳𑀺, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑀧𑀝𑀺𑀫𑀸𑀖𑀭𑀁 𑀩𑁄𑀥𑀺𑀖𑀭𑀁, 𑀥𑀸𑀢𑀼𑀲𑀸𑀮𑀁 𑀫𑀦𑁄𑀭𑀫𑀁;

𑀘𑀢𑀼𑀲𑀸𑀮𑀜𑁆𑀘 𑀓𑀸𑀭𑁂𑀲𑀻, 𑀲𑀗𑁆𑀔𑀭𑀻 𑀓𑀼𑀓𑁆𑀓𑀼𑀝𑀯𑁆𑀳𑀬𑀁.

𑀲𑀗𑁆𑀖𑀫𑀺𑀢𑁆𑀢𑁂𑀦 𑀣𑁂𑀭𑁂𑀦, 𑀢𑁂𑀦 𑀤𑀸𑀭𑀼𑀡𑀓𑀫𑁆𑀫𑀼𑀦𑀸;

𑀯𑀺𑀳𑀸𑀭𑁄 𑀲𑁄’𑀪𑀬𑀕𑀺𑀭𑀺, 𑀤𑀲𑁆𑀲𑀦𑁂𑀬𑁆𑀬𑁄 𑀅𑀳𑀼 𑀢𑀤𑀸.

𑀫𑁂𑀖𑀯𑀡𑁆𑀡𑀸𑀪𑀬𑁄 𑀦𑀸𑀫, 𑀭𑀜𑁆𑀜𑁄 𑀲𑀩𑁆𑀩𑀢𑁆𑀣 𑀲𑀸𑀔𑀓𑁄;

𑀲𑀔𑀸 𑀅𑀫𑀘𑁆𑀘𑁄 𑀓𑀼𑀚𑁆𑀛𑀺𑀢𑁆𑀯𑀸, 𑀫𑀳𑀸𑀯𑀺𑀳𑀸𑀭𑀦𑀸𑀲𑀦𑁂.

𑀘𑁄𑀭𑁄 𑀳𑀼𑀢𑁆𑀯𑀸𑀦 𑀫𑀮𑀬𑀁, 𑀕𑀦𑁆𑀢𑁆𑀯𑀸 𑀮𑀤𑁆𑀥𑀫𑀳𑀩𑁆𑀩𑀮𑁄;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀲𑀺, 𑀤𑀼𑀭𑀢𑀺𑀲𑁆𑀲𑀓𑀯𑀸𑀧𑀺𑀬𑀁.

𑀢𑀢𑁆𑀭𑀸’𑀕𑀢𑀁 ¶ 𑀢𑀁 𑀲𑀼𑀢𑁆𑀯𑀸, 𑀲𑀳𑀸𑀬𑀁 𑀲𑁄 𑀫𑀳𑀻𑀧𑀢𑀺;

𑀬𑀼𑀤𑁆𑀥𑀸𑀳 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺.

𑀲𑀸𑀥𑀼𑀁 𑀧𑀸𑀦𑀜𑁆𑀘 𑀫𑀁𑀲𑀜𑁆𑀘, 𑀮𑀪𑀺𑀢𑁆𑀯𑀸 𑀫𑀮𑀬𑀸𑀕𑀢𑀁;

‘‘𑀦 𑀲𑁂𑀯𑀺𑀲𑁆𑀲𑀁 𑀲𑀳𑀸𑀬𑁂𑀦, 𑀯𑀺𑀦𑀸 𑀭𑀜𑁆𑀜𑀸’’𑀢𑀺 𑀘𑀺𑀦𑁆𑀢𑀺𑀬.

𑀆𑀤𑀸𑀬 𑀢𑀁 𑀲𑀬𑀁𑀬𑁂𑀯, 𑀭𑀢𑁆𑀢𑀺𑀁 𑀦𑀺𑀓𑁆𑀔𑀫𑁆𑀫 𑀏𑀓𑀓𑁄;

𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀕𑀫𑁆𑀫, 𑀢𑀫𑀢𑁆𑀣𑀁 𑀧𑀝𑀺𑀯𑁂𑀤𑀬𑀺.

𑀢𑁂𑀦𑀸’𑀪𑀢𑀁 𑀢𑁂𑀦 𑀲𑀳, 𑀯𑀺𑀲𑁆𑀲𑀢𑁆𑀣𑁄 𑀧𑀭𑀺𑀪𑀼𑀜𑁆𑀚𑀺𑀬;

‘‘𑀓𑀲𑁆𑀫𑀸 𑀘𑁄𑀭𑁄 𑀅𑀳𑀼 𑀫𑁂 𑀢𑁆𑀯𑀁, ‘‘𑀇𑀢𑀺 𑀭𑀸𑀚𑀸 𑀅𑀧𑀼𑀘𑁆𑀙𑀺𑀢𑀁.

‘‘𑀢𑀬𑀸 𑀫𑀳𑀸𑀯𑀺𑀳𑀸𑀭𑀲𑁆𑀲, 𑀦𑀸𑀲𑀺𑀢𑀢𑁆𑀢𑀸’’𑀢𑀺 𑀅𑀩𑁆𑀭𑀼𑀯𑀺;

‘‘𑀯𑀺𑀳𑀸𑀭𑀁 𑀯𑀸𑀲𑀬𑀺𑀲𑁆𑀲𑀸𑀫𑀺, 𑀔𑁂𑀫𑀫𑁂𑀢𑀁 𑀫𑀫𑀘𑁆𑀘𑀬𑀁.

𑀇𑀘𑁆𑀙𑁂𑀯 𑀫𑀩𑁆𑀭𑀯𑀻 𑀭𑀸𑀚𑀸, 𑀭𑀸𑀚𑀸𑀦𑀁 𑀲𑁄 𑀔𑀫𑀸𑀧𑀬𑀺;

𑀢𑁂𑀦 𑀲𑀜𑁆𑀜𑀸𑀧𑀺𑀢𑁄 𑀭𑀸𑀚𑀸, 𑀦𑀕𑀭𑀁𑀬𑁂𑀯 𑀆𑀕𑀫𑀺.

𑀭𑀸𑀚𑀸𑀦𑀁 𑀲𑀜𑁆𑀜𑀧𑁂𑀢𑁆𑀯𑀸 𑀲𑁄, 𑀫𑁂𑀖𑀯𑀡𑁆𑀡𑀸𑀪𑀬𑁄 𑀧𑀦;

𑀭𑀜𑁆𑀜𑀸 𑀲𑀳 𑀦 𑀆𑀕𑀜𑁆𑀙𑀺, 𑀤𑀩𑁆𑀩𑀲𑀫𑁆𑀪𑀸𑀭𑀓𑀸𑀭𑀡𑀸.

𑀯𑀮𑀪𑀸 𑀪𑀭𑀺𑀬𑀸 𑀭𑀜𑁆𑀜𑁄, 𑀏𑀓𑀁 𑀮𑁂𑀔𑀓𑀥𑀻𑀢𑀺𑀓𑀸;

𑀫𑀳𑀸𑀯𑀺𑀳𑀸𑀭𑀦𑀸𑀲𑀫𑁆𑀳𑀺, 𑀤𑀼𑀓𑁆𑀔𑀺𑀢𑀁 𑀢𑀁 𑀯𑀺𑀦𑀸𑀲𑀓𑀁.

𑀣𑁂𑀭𑀁 𑀫𑀸𑀭𑀸𑀧𑀬𑀺 𑀓𑀼𑀤𑁆𑀥𑀸, 𑀲𑀁𑀕𑀳𑁂𑀢𑁆𑀯𑀸𑀦 𑀯𑀟𑁆𑀠𑀓𑀺𑀁;

𑀣𑀽𑀧𑀸𑀭𑀸𑀫𑀁 𑀯𑀺𑀦𑀸𑀲𑁂𑀢𑀼𑀁, 𑀆𑀕𑀢𑀁 𑀤𑀼𑀝𑁆𑀞𑀫𑀸𑀦𑀲𑀁.

𑀫𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢-𑀢𑁆𑀣𑁂𑀭𑀁 𑀤𑀸𑀭𑀼𑀡𑀓𑀸𑀭𑀓𑀁;

𑀲𑁄𑀡𑀸𑀫𑀘𑁆𑀘𑀤𑀸𑀭𑀡𑀜𑁆𑀘, 𑀖𑀸𑀢𑀬𑀺𑀁𑀲𑀼 𑀅𑀲𑀜𑁆𑀜𑀓𑀸.

𑀆𑀦𑁂𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁, 𑀫𑁂𑀖𑀯𑀡𑁆𑀡𑀸𑀪𑀬𑁄 𑀢𑀼 𑀲𑁄;

𑀫𑀳𑀸𑀯𑀺𑀳𑀸𑀭𑁂𑀦𑁂𑀓𑀸𑀦𑀺, 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀬𑀺.

𑀅𑀪𑀬𑁂𑀦𑀪𑀬𑁄 𑀢𑀲𑁆𑀫𑀺𑀁, 𑀯𑀽𑀧𑀲𑀦𑁆𑀢𑁂 𑀢𑀼 𑀪𑀺𑀓𑁆𑀔𑀯𑁄;

𑀫𑀳𑀸𑀯𑀺𑀳𑀸𑀭𑀁 𑀯𑀸𑀲𑁂𑀲𑀼𑀁, 𑀆𑀕𑀦𑁆𑀢𑁆𑀯𑀸𑀦 𑀢𑀢𑁄 𑀢𑀢𑁄.

𑀭𑀸𑀚𑀸 𑀫𑀳𑀸𑀩𑁄𑀥𑀺𑀖𑀭𑁂, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀢𑀼;

𑀓𑀸𑀭𑁂𑀢𑁆𑀯𑀸 𑀮𑁄𑀳𑀭𑀽𑀧𑀸𑀦𑀺, 𑀞𑀧𑀸𑀧𑁂𑀲𑀺 𑀤𑀼𑀯𑁂 𑀢𑀼 𑀲𑁄.

𑀤𑀓𑁆𑀔𑀺𑀡𑀸𑀭𑀸𑀫𑀯𑀸𑀲𑀺𑀫𑁆𑀳𑀺, 𑀓𑀼𑀳𑀓𑁂 𑀚𑀺𑀫𑁆𑀳𑀫𑀸𑀦𑀲𑁂;

𑀧𑀲𑀻𑀤𑀺𑀢𑁆𑀯𑀸 𑀧𑀸𑀧𑀫𑀺𑀢𑁆𑀢𑁂, 𑀢𑀺𑀲𑁆𑀲𑀢𑁆𑀣𑁂𑀭𑁂 𑀅𑀲𑀜𑁆𑀜𑀢𑁂.

𑀫𑀳𑀸𑀯𑀺𑀳𑀸𑀭𑀲𑀻𑀫𑀦𑁆𑀢𑁂 ¶ , 𑀉𑀬𑁆𑀬𑀸𑀦𑁂 𑀚𑁄𑀢𑀺𑀦𑀸𑀫𑀓𑁂;

𑀚𑁂𑀢𑀯𑀦𑀯𑀺𑀳𑀸𑀭𑀁 𑀲𑁄, 𑀯𑀸𑀭𑀬𑀦𑁆𑀢𑁄𑀧𑀺 𑀓𑀸𑀭𑀬𑀺.

𑀢𑀢𑁄 𑀲𑀻𑀫𑀁 𑀲𑀫𑀼𑀕𑁆𑀖𑀸𑀢𑀼𑀁, 𑀪𑀺𑀓𑁆𑀔𑀼𑀲𑀗𑁆𑀖𑀫𑀬𑀸𑀘𑀺𑀲𑁄;

𑀅𑀤𑀸𑀢𑀼𑀓𑀸𑀫𑀸 𑀢𑀁 𑀪𑀺𑀓𑁆𑀔𑀽, 𑀯𑀺𑀳𑀸𑀭𑀫𑁆𑀳𑀸 𑀅𑀧𑀓𑁆𑀓𑀫𑀼𑀁.

𑀇𑀥 𑀲𑀻𑀫𑀸𑀲𑀫𑀼𑀕𑁆𑀖𑀸𑀢𑀁, 𑀧𑀭𑁂𑀳𑀺 𑀓𑀭𑀺𑀬𑀫𑀸𑀦𑀓𑀁;

𑀓𑁄𑀧𑁂𑀢𑀼𑀁 𑀪𑀺𑀓𑁆𑀔𑀯𑁄 𑀓𑁂𑀘𑀺, 𑀦𑀺𑀮𑀻𑀬𑀺𑀁𑀲𑀼 𑀢𑀳𑀺𑀁 𑀢𑀳𑀺𑀁.

𑀫𑀳𑀸𑀯𑀺𑀳𑀸𑀭𑁄 𑀦𑀯𑀫𑀸𑀲𑁂, 𑀏𑀯𑀁 𑀪𑀺𑀓𑁆𑀔𑀽𑀳𑀺 𑀯𑀚𑁆𑀚𑀺𑀢𑁄;

‘‘𑀲𑀫𑀼𑀕𑁆𑀖𑀸𑀢𑀁 𑀓𑀭𑀺𑀫𑁆𑀳𑀸’’𑀢𑀺-𑀧𑀭𑁂 𑀪𑀺𑀓𑁆𑀔𑀽 𑀅𑀫𑀜𑁆𑀜𑀺𑀲𑀼𑀁.

𑀢𑀢𑁄 𑀲𑀻𑀫𑀸𑀲𑀫𑀼𑀕𑁆𑀖𑀸𑀢𑁂, 𑀩𑁆𑀬𑀸𑀧𑀸𑀭𑁂 𑀧𑀭𑀺𑀦𑀺𑀝𑁆𑀞𑀺𑀢𑁂;

𑀫𑀳𑀸𑀯𑀺𑀳𑀸𑀭𑀁 𑀯𑀸𑀲𑁂𑀲𑀼𑀁, 𑀇𑀥𑀸𑀕𑀦𑁆𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

𑀢𑀲𑁆𑀲 𑀯𑀺𑀳𑀸𑀭𑀕𑀸𑀳𑀺𑀲𑁆𑀲, 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀘𑁄𑀤𑀦𑀸;

𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀆𑀲𑀺, 𑀪𑀽𑀢𑀢𑁆𑀣𑀁 𑀲𑀗𑁆𑀖𑀫𑀚𑁆𑀛𑀕𑀸.

𑀯𑀺𑀦𑀺𑀘𑁆𑀙𑀺𑀬 𑀫𑀳𑀸𑀫𑀘𑁆𑀘𑁄, 𑀢𑀣𑀸 𑀥𑀫𑁆𑀫𑀺𑀓𑀲𑀫𑁆𑀫𑀢𑁄;

𑀉𑀧𑁆𑀧𑀩𑁆𑀩𑀸𑀚𑁂𑀲𑀺 𑀥𑀫𑁆𑀫𑁂𑀦, 𑀢𑀁 𑀅𑀦𑀺𑀘𑁆𑀙𑀸𑀬 𑀭𑀸𑀚𑀺𑀦𑁄.

𑀲𑁄𑀬𑁂𑀯 𑀭𑀸𑀚𑀸 𑀓𑀸𑀭𑁂𑀲𑀺, 𑀯𑀺𑀳𑀸𑀭𑀁 𑀫𑀡𑀺𑀳𑀻𑀭𑀓𑀁;

𑀢𑀬𑁄 𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀤𑁂𑀯𑀸𑀮𑀬𑀁 𑀯𑀺𑀦𑀸𑀲𑀺𑀬.

𑀕𑁄𑀓𑀡𑁆𑀡𑀁 𑀏𑀭𑀓𑀸𑀧𑀺𑀮𑁆𑀮𑀁, 𑀓𑀮𑀦𑁆𑀤𑀩𑁆𑀭𑀸𑀳𑁆𑀫𑀡𑀕𑀸𑀫𑀓𑁂;

𑀫𑀺𑀕𑀕𑀸𑀫𑀯𑀺𑀳𑀸𑀭𑀜𑁆𑀘, 𑀕𑀗𑁆𑀕𑀲𑁂𑀦𑀓𑀧𑀩𑁆𑀩𑀢𑀁.

𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬𑀸𑀣, 𑀥𑀸𑀢𑀼𑀲𑁂𑀦𑀜𑁆𑀘 𑀧𑀩𑁆𑀩𑀢𑀁;

𑀭𑀸𑀚𑀸 𑀫𑀳𑀸𑀯𑀺𑀳𑀸𑀭𑀜𑁆𑀘, 𑀓𑁄𑀓𑀯𑀸𑀢𑀫𑁆𑀳𑀺 𑀓𑀸𑀭𑀬𑀺.

𑀭𑀽𑀧𑀸𑀭𑀫𑁆𑀫𑀯𑀺𑀳𑀸𑀭𑀜𑁆𑀘, 𑀘𑀽𑀴𑀯𑀺𑀝𑁆𑀝𑀜𑁆𑀘 𑀓𑀸𑀭𑀬𑀺;

𑀉𑀢𑁆𑀢𑀭𑀸𑀪𑀬𑀲𑀯𑁆𑀳𑁂 𑀘, 𑀤𑀼𑀯𑁂 𑀪𑀺𑀓𑁆𑀔𑀽𑀦𑀼𑀧𑀲𑁆𑀲𑀬𑁂.

𑀓𑀸𑀮𑀯𑁂𑀴𑀓𑀬𑀓𑁆𑀔𑀲𑁆𑀲, 𑀞𑀸𑀦𑁂 𑀣𑀽𑀧𑀜𑁆𑀘 𑀓𑀸𑀭𑀬𑀺;

𑀤𑀻𑀧𑀫𑁆𑀳𑀺 𑀚𑀺𑀡𑁆𑀡𑀓𑀸𑀯𑀸𑀲𑁂, 𑀩𑀳𑀽 𑀘 𑀧𑀝𑀺𑀲𑀗𑁆𑀔𑀭𑀺.

𑀲𑀗𑁆𑀖𑀢𑁆𑀣𑁂𑀭𑀲𑀳𑀲𑁆𑀲𑀲𑁆𑀲, 𑀲𑀳𑀲𑁆𑀲𑀕𑁆𑀖𑀫𑀤𑀸𑀲𑀺 𑀲𑁄;

𑀣𑁂𑀭𑀤𑀸𑀦𑀜𑁆𑀘 𑀲𑀩𑁆𑀩𑁂𑀲𑀁, 𑀅𑀦𑀼𑀯𑀲𑁆𑀲𑀜𑁆𑀘 𑀘𑀻𑀯𑀭𑀁.

𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀦𑀲𑁆𑀲, 𑀧𑀭𑀺𑀘𑁆𑀙𑁂𑀤𑁄 𑀦 𑀯𑀺𑀚𑁆𑀚𑀢𑀺;

𑀲𑀼𑀪𑀺𑀓𑁆𑀔𑀢𑁆𑀣𑀸𑀬 𑀓𑀸𑀭𑁂𑀲𑀺, 𑀲𑁄’𑀯 𑀲𑁄𑀴𑀲 𑀯𑀸𑀧𑀺𑀬𑁄.

𑀫𑀡𑀺𑀳𑀻𑀭𑀫𑀳𑀸𑀯𑀸𑀧𑀺𑀁 ¶ , 𑀚𑀮𑁆𑀮𑀼𑀭𑀁 𑀔𑀸𑀡𑀼𑀦𑀸𑀫𑀓𑀁;

𑀫𑀳𑀸𑀫𑀡𑀺𑀁 𑀓𑁄𑀓𑀯𑀸𑀢𑀁, 𑀫𑁄𑀭𑀓𑀧𑀭𑀓𑀯𑀸𑀧𑀺𑀓𑀁.

𑀓𑀼𑀩𑁆𑀩𑀸𑀳𑀓𑀁 𑀯𑀸𑀳𑀓𑀜𑁆𑀘, 𑀭𑀢𑁆𑀢𑀫𑀸𑀮𑀓𑀡𑁆𑀟𑀓𑀫𑁆𑀧𑀺 𑀘;

𑀢𑀺𑀲𑁆𑀲𑀯𑀟𑁆𑀠𑀫𑀸𑀦𑀓𑀜𑁆𑀘, 𑀯𑁂𑀴𑀗𑁆𑀕𑀯𑀺𑀝𑁆𑀞𑀺𑀓𑀫𑁆𑀧𑀺 𑀘.

𑀫𑀳𑀸𑀕𑀮𑁆𑀮𑀘𑀻𑀭𑀯𑀸𑀧𑀺𑀁, 𑀫𑀳𑀸𑀤𑀸𑀭𑀕𑀮𑁆𑀮𑀓𑀫𑁆𑀧𑀺 𑀘;

𑀓𑀸𑀴𑀧𑀸𑀲𑀸𑀡𑀯𑀸𑀧𑀺𑀜𑁆𑀘, 𑀇𑀫𑀸 𑀲𑁄𑀴𑀲 𑀯𑀸𑀧𑀺𑀬𑁄.

𑀕𑀗𑁆𑀕𑀸𑀬 𑀧𑀩𑁆𑀩𑀯𑀯𑁆𑀳𑀁𑀲𑁄, 𑀫𑀳𑀸𑀫𑀸𑀢𑀺𑀜𑁆𑀘 𑀓𑀸𑀭𑀬𑀺;

𑀏𑀯𑀁 𑀧𑀼𑀜𑁆𑀜𑀫𑀧𑀼𑀜𑁆𑀜𑀜𑁆𑀘, 𑀲𑀼𑀩𑀳𑀼𑀁 𑀲𑁄 𑀉𑀧𑀸𑀘𑀺𑀦𑀻𑀢𑀺.

𑀅𑀲𑀸𑀥𑀼𑀲𑀗𑁆𑀕𑀫𑁂𑀦𑁂𑀯𑀁, 𑀬𑀸𑀯𑀚𑀻𑀯𑀁 𑀲𑀼𑀪𑀸𑀲𑀼𑀪𑀁;

𑀓𑀢𑁆𑀯𑀸 𑀕𑀢𑁄 𑀬𑀣𑀸𑀓𑀫𑁆𑀫𑀁, 𑀲𑁄 𑀫𑀳𑀸𑀲𑁂𑀦𑀪𑀽𑀧𑀢𑀺.

𑀢𑀲𑁆𑀫𑀸 𑀅𑀲𑀸𑀥𑀼𑀲𑀁𑀲𑀕𑁆𑀕𑀁, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀺𑀬;

𑀅𑀳𑀺𑀁 𑀯𑀸’𑀲𑀺 𑀯𑀺𑀲𑀁 𑀔𑀺𑀧𑁆𑀧𑀁, 𑀓𑀭𑁂𑀬𑁆𑀬’𑀢𑁆𑀣𑀳𑀺𑀢𑀁 𑀩𑀼𑀥𑁄.

𑀅𑀳𑀼 𑀭𑀸𑀚𑀸 𑀲𑀺𑀭𑀺𑀫𑁂𑀖-𑀯𑀡𑁆𑀡𑁄 𑀢𑀲𑁆𑀲 𑀲𑀼𑀢𑁄 𑀢𑀢𑁄;

𑀯𑀦𑁆𑀥𑀸𑀢𑀸 𑀯𑀺𑀬 𑀮𑁄𑀓𑀲𑁆𑀲, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄.

𑀫𑀳𑀸𑀲𑁂𑀦𑁂𑀦 𑀧𑀸𑀧𑀸𑀦𑀁, 𑀯𑀲𑀕𑁂𑀦 𑀯𑀺𑀦𑀸𑀲𑀺𑀢𑁂;

𑀫𑀳𑀸𑀯𑀺𑀳𑀸𑀭𑁂 𑀲𑀩𑁆𑀩𑁂𑀧𑀺, 𑀲𑀦𑁆𑀦𑀺𑀧𑀸𑀢𑀺𑀬 𑀪𑀺𑀓𑁆𑀔𑀯𑁄.

𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 𑀲𑀸𑀤𑀭𑁄;

‘‘𑀧𑀺𑀢𑀭𑀸 𑀲𑀗𑁆𑀖𑀫𑀺𑀢𑁆𑀢𑀲𑁆𑀲, 𑀲𑀳𑀸𑀬𑁂𑀦 𑀯𑀺𑀦𑀸𑀲𑀺𑀢𑀁.

𑀓𑀺𑀁 𑀓𑀺𑀫𑁂𑀯𑀸’’𑀢𑀺 𑀆𑀳𑀁𑀲𑀼, 𑀪𑀺𑀓𑁆𑀔𑀯𑁄 𑀢𑀁 𑀦𑀭𑀺𑀲𑁆𑀲𑀭𑀁;

‘‘𑀲𑀻𑀫𑀸𑀬𑀼𑀕𑁆𑀖𑀸𑀝𑀦𑀁 𑀓𑀸𑀢𑀼𑀁, 𑀯𑀸𑀬𑀫𑀺𑀢𑁆𑀯𑀸𑀧𑀺 𑀢𑁂 𑀧𑀺𑀢𑀸.

𑀦𑀸𑀲𑀓𑁆𑀔𑀺 𑀅𑀦𑁆𑀢𑁄𑀲𑀻𑀫𑀸𑀬𑀁, 𑀪𑀺𑀓𑁆𑀔𑀽𑀦𑀁 𑀯𑀺𑀚𑁆𑀚𑀫𑀸𑀦𑀢𑁄;

𑀪𑀽𑀫𑀺𑀕𑀩𑁆𑀪𑀦𑀺𑀮𑀻𑀦𑀸𑀳𑀺, 𑀲𑀢𑁆𑀢𑀸𑀲𑀼𑀁 𑀏𑀢𑁆𑀣 𑀪𑀺𑀓𑁆𑀔𑀯𑁄.

𑀅𑀫𑀘𑁆𑀘𑁄 𑀲𑁄𑀡𑀸𑀫𑀘𑁆𑀘𑁄 𑀘, 𑀲𑀗𑁆𑀖𑀫𑀺𑀢𑁆𑀢𑁄 𑀘 𑀧𑀸𑀧𑀺𑀬𑁄;

𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸𑀦, 𑀅𑀧𑀼𑀜𑁆𑀜𑀁 𑀢𑁂𑀦 𑀓𑀸𑀭𑀬𑀼𑀁.

𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀲𑀢𑁆𑀢𑀪𑀽𑀫𑀓𑀫𑀼𑀢𑁆𑀢𑀫𑀁;

𑀖𑀭𑁂 𑀦𑀸𑀦𑀧𑁆𑀧𑀓𑀸𑀭𑁂 𑀘, 𑀇𑀢𑁄’𑀪𑀬𑀕𑀺𑀭𑀺𑀁 𑀦𑀬𑀼𑀁.

𑀫𑀸𑀲𑀓𑁂 𑀘𑀢𑀼𑀩𑀼𑀤𑁆𑀥𑁂𑀳𑀺, 𑀦𑀺𑀯𑀼𑀢𑁆𑀣𑁂 𑀘𑁂𑀢𑀺𑀬𑀗𑁆𑀕𑀡𑁂;

𑀯𑀧𑀸𑀧𑁂𑀲𑀼𑀜𑁆𑀘 𑀤𑀼𑀧𑁆𑀧𑀜𑁆𑀜𑀸, 𑀧𑀲𑁆𑀲 𑀩𑀸𑀮𑀲𑀫𑀸𑀕𑀫𑀁’’.

𑀢𑀁 ¶ 𑀲𑀼𑀢𑁆𑀯𑀸 𑀧𑀺𑀢𑀼𑀓𑀫𑁆𑀫𑀁 𑀲𑁄, 𑀦𑀺𑀩𑁆𑀩𑀺𑀦𑁆𑀦𑁄 𑀩𑀸𑀮𑀲𑀗𑁆𑀕𑀫𑁂;

𑀧𑀺𑀢𑀭𑀸 𑀦𑀸𑀲𑀺𑀢𑀁 𑀢𑀢𑁆𑀣, 𑀲𑀩𑁆𑀩𑀁 𑀧𑀸𑀓𑀢𑀺𑀓𑀁 𑀅𑀓𑀸.

𑀮𑁄𑀳𑀧𑀸𑀲𑀸𑀤𑀫𑀕𑀤𑁄’𑀯, 𑀓𑀸𑀲𑀺 𑀧𑀸𑀲𑀸𑀤𑀫𑀼𑀢𑁆𑀢𑀫𑀁;

𑀭𑀜𑁆𑀜𑁄 𑀫𑀳𑀸𑀧𑀦𑀸𑀤𑀲𑁆𑀲, 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀪𑀽𑀢𑀮𑁂.

𑀧𑀭𑀺𑀯𑁂𑀡𑀸𑀦𑀺 𑀲𑀩𑁆𑀩𑀸𑀦𑀺, 𑀦𑀸𑀲𑀺𑀢𑀸𑀦𑀺 𑀦𑀺𑀯𑁂𑀲𑀬𑀺;

𑀪𑁄𑀕𑁂 𑀆𑀭𑀸𑀫𑀺𑀓𑀸𑀦𑀜𑁆𑀘, 𑀬𑀣𑀸𑀞𑀸𑀦𑁂 𑀞𑀧𑁂𑀲𑀺 𑀲𑁄.

𑀧𑀺𑀢𑀭𑀸 𑀧𑀘𑁆𑀘𑀬𑀸𑀦𑀜𑁆𑀘, 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀩𑀼𑀤𑁆𑀥𑀺𑀦𑀸;

𑀙𑀺𑀤𑁆𑀤𑀸𑀯𑀸𑀲𑀁 𑀖𑀦𑀸𑀯𑀸𑀲𑀁, 𑀯𑀺𑀳𑀸𑀭𑀁’𑀓𑀸𑀲𑀺 𑀩𑀼𑀤𑁆𑀥𑀺𑀫𑀸.

𑀓𑀸𑀭𑀺𑀢𑁂 𑀧𑀺𑀢𑀭𑀸 𑀚𑁄𑀢𑀺 𑀯𑀦𑁂𑀘𑁂’𑀲𑁄 𑀯𑀺𑀳𑀸𑀭𑀓𑁂;

𑀓𑀫𑁆𑀫𑀁 𑀯𑀺𑀧𑁆𑀧𑀓𑀢𑀁 𑀲𑀩𑁆𑀩𑀁, 𑀦𑀺𑀝𑁆𑀞𑀸𑀧𑁂𑀲𑀺 𑀦𑀭𑀺𑀲𑁆𑀲𑀭𑁄.

𑀣𑁂𑀭𑀲𑁆𑀲𑀸’𑀣 𑀫𑀳𑀺𑀦𑁆𑀤𑀲𑁆𑀲, 𑀲𑀫𑀡𑀺𑀦𑁆𑀤𑀲𑁆𑀲 𑀲𑀼𑀦𑀼𑀦𑁄;

𑀲𑀼𑀢𑁆𑀯𑀸𑀦 𑀫𑀦𑀼𑀚𑀺𑀦𑁆𑀤𑁄 𑀲𑁄, 𑀧𑀯𑀢𑁆𑀢𑀺𑀁 𑀲𑀩𑁆𑀩𑀫𑀸𑀤𑀺𑀢𑁄.

𑀧𑀲𑀻𑀤𑀺𑀢𑁆𑀯𑀸 𑀕𑀼𑀡𑁂 𑀢𑀲𑁆𑀲, 𑀭𑀸𑀚𑀸 𑀤𑀺𑀧𑁆𑀧𑀧𑀲𑀸𑀤𑀓𑁂;

‘‘𑀇𑀲𑁆𑀲𑀭𑁄 𑀯𑀢 𑀤𑀻𑀧𑀲𑁆𑀲, 𑀣𑁂𑀭𑁄’’ 𑀇𑀢𑀺 𑀯𑀺𑀘𑀺𑀦𑁆𑀢𑀺𑀬.

𑀧𑀝𑀺𑀩𑀺𑀫𑁆𑀩𑀁 𑀲𑀼𑀯𑀡𑁆𑀡𑀲𑁆𑀲, 𑀓𑀢𑁆𑀯𑀸 𑀢𑀫𑁆𑀫𑀸𑀡 𑀦𑀺𑀲𑁆𑀲𑀺𑀢𑀁;

𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲, 𑀧𑀩𑁆𑀩𑀧𑀓𑁆𑀔𑁂 𑀢𑀼 𑀲𑀢𑁆𑀢𑀫𑁂.

𑀤𑀺𑀦𑁂 𑀦𑁂𑀢𑁆𑀯𑀸 𑀘𑁂𑀢𑀺𑀬𑀫𑁆𑀩-𑀣𑀮𑁂 𑀣𑁂𑀭𑀫𑁆𑀩𑀲𑀜𑁆𑀜𑀺𑀢𑁂;

𑀢𑀢𑁆𑀭𑀝𑁆𑀞𑀫𑁂 𑀦𑀺𑀯𑀸𑀲𑁂𑀢𑁆𑀯𑀸, 𑀢𑀢𑁄 𑀢𑀼 𑀦𑀯𑀫𑁂 𑀧𑀦.

𑀫𑀳𑀸𑀲𑁂𑀦𑀁 𑀕𑀳𑁂𑀢𑁆𑀯𑀸 𑀲𑁄, 𑀤𑁂𑀯𑀲𑁂𑀦𑀸 𑀲𑀫𑀽𑀧𑀫𑀁;

𑀑𑀭𑁄𑀥𑁂 𑀦𑀕𑀭𑁂 𑀘𑁂𑀯, 𑀕𑁂𑀳𑀭𑀓𑁆𑀔𑀡𑀓𑁂 𑀯𑀺𑀦𑀸.

𑀮𑀁𑀓𑀸𑀤𑀻𑀧𑁂 𑀘 𑀲𑀓𑀮𑁂, 𑀲𑀩𑁆𑀩𑁂 𑀆𑀤𑀸𑀬 𑀪𑀺𑀓𑁆𑀔𑀯𑁄;

𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀘, 𑀦𑀕𑀭𑁂 𑀘𑀸𑀭𑀓𑀝𑁆𑀞𑀺𑀢𑁂.

𑀧𑀝𑁆𑀞𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁, 𑀅𑀬𑀜𑁆𑀘𑀸𑀔𑀺𑀮𑀧𑀸𑀡𑀺𑀦𑀁;

𑀧𑀽𑀚𑀁 𑀲𑀩𑁆𑀩𑁄𑀧𑀳𑀸𑀭𑁂𑀳𑀺, 𑀓𑀭𑁄𑀦𑁆𑀢𑁄 𑀘 𑀅𑀦𑀽𑀧𑀫𑀁.

𑀧𑀘𑁆𑀘𑀼𑀕𑁆𑀕𑀫𑀦𑀫𑁂𑀢𑀲𑁆𑀲, 𑀤𑀻𑀧𑀲𑀢𑁆𑀣𑀼𑀲𑁆𑀲 𑀲𑀢𑁆𑀣𑀼𑀦𑁄;

𑀯𑀭𑀧𑀼𑀢𑁆𑀢𑀲𑁆𑀲 𑀲𑁄 𑀓𑀢𑁆𑀯𑀸, 𑀤𑁂𑀯𑀭𑀸𑀚𑀸’𑀯 𑀲𑀢𑁆𑀣𑀼𑀦𑁄.

𑀘𑁂𑀢𑀺𑀬𑀫𑁆𑀩𑀣𑀮𑀸 𑀬𑀸𑀯, 𑀦𑀕𑀭𑀁 𑀲𑀸𑀥𑀼𑀲𑀚𑁆𑀚𑀬𑀺;

𑀫𑀕𑁆𑀕𑀁 𑀯𑁂𑀲𑀸𑀮𑀺𑀢𑁄 𑀬𑀸𑀯, 𑀲𑀸𑀯𑀢𑁆𑀣𑀺𑀦𑀕𑀭𑀁 𑀬𑀣𑀸.

𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ¶ 𑀢𑀳𑀺𑀁 𑀪𑁄𑀕𑀁, 𑀲𑀩𑁆𑀩𑀁 𑀣𑁂𑀭𑀲𑁆𑀲 𑀲𑁄 𑀧𑀺𑀢𑀸;

𑀭𑀸𑀚𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀲𑁆𑀲, 𑀣𑁂𑀭𑀲𑁆𑀲𑀸’𑀕𑀫𑀦𑁂 𑀯𑀺𑀬.

𑀤𑀢𑁆𑀯𑀸 𑀢𑀢𑁆𑀣 𑀫𑀳𑀸𑀤𑀸𑀦𑀁, 𑀓𑀧𑀡𑀤𑁆𑀥𑀺𑀯𑀦𑀺𑀩𑁆𑀩𑀓𑁂;

𑀪𑀺𑀓𑁆𑀔𑀯𑁄𑀧𑀺 𑀘 𑀢𑁄𑀲𑁂𑀢𑁆𑀯𑀸, 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺’𑀧𑀺.

𑀣𑁂𑀭𑀲𑁆𑀲𑀸’𑀕𑀫𑀦𑁂 𑀏𑀯𑀁, 𑀧𑀲𑁆𑀲𑀢𑀽𑀢𑀺 𑀫𑀳𑀸𑀚𑀦𑁂;

𑀕𑀳𑁂𑀢𑁆𑀯𑀸 𑀢𑀁𑀫𑀳𑀦𑁆𑀢𑁂𑀦, 𑀲𑀓𑁆𑀓𑀸𑀭𑁂𑀦 𑀫𑀳𑀸𑀬𑀲𑁄.

𑀢𑀫𑁆𑀳𑀸 𑀑𑀭𑀼𑀬𑁆𑀳 𑀲𑁄 𑀫𑀳𑀸, 𑀲𑀬𑀁 𑀳𑀼𑀢𑁆𑀯𑀸 𑀧𑀼𑀭𑁂𑀘𑀭𑁄;

𑀪𑀺𑀓𑁆𑀔𑀯𑁄 𑀘𑀸𑀧𑀺 𑀓𑀢𑁆𑀯𑀸𑀦, 𑀧𑀭𑀺𑀯𑀸𑀭𑁂 𑀲𑀫𑀦𑁆𑀢𑀢𑁄.

𑀣𑁂𑀭𑀲𑁆𑀲 𑀩𑀺𑀫𑁆𑀩𑀁 𑀲𑁄𑀯𑀡𑁆𑀡𑀁, 𑀔𑀺𑀭𑀲𑀸𑀕𑀭𑀫𑀚𑁆𑀛𑀕𑁄;

𑀲𑀜𑁆𑀛𑀸 𑀖𑀦𑀧𑀭𑀺𑀓𑁆𑀔𑀺𑀢𑁆𑀢𑁄, 𑀳𑁂𑀫𑀫𑁂𑀭𑀼’𑀯 𑀲𑁄𑀪𑀣.

𑀯𑁂𑀲𑀸𑀮𑀺𑀦𑀕𑀭𑀁 𑀲𑀼𑀢𑁆𑀢𑀁, 𑀤𑁂𑀲𑁂𑀢𑀼𑀁 𑀮𑁄𑀓𑀦𑀸𑀬𑀓𑁄;

𑀅𑀕𑀫𑀸 𑀏𑀯𑀫𑁂𑀯𑀸𑀢𑀺, 𑀤𑀲𑁆𑀲𑁂𑀲𑀺 𑀘 𑀫𑀳𑀸𑀚𑀦𑀁.

𑀏𑀯𑀁 𑀓𑀭𑁄𑀦𑁆𑀢𑁄 𑀲𑀓𑁆𑀓𑀸𑀭-𑀲𑀫𑁆𑀫𑀸𑀦𑀁 𑀲𑁄 𑀦𑀭𑀸𑀲𑀪𑁄;

𑀦𑀕𑀭𑀲𑁆𑀲’𑀲𑁆𑀲 𑀧𑀸𑀘𑀺𑀦-𑀤𑁆𑀯𑀸𑀭𑀧𑀲𑁆𑀲𑁂 𑀲𑀬𑀁𑀓𑀢𑀁.

𑀉𑀧𑀲𑀗𑁆𑀓𑀫𑁆𑀫 𑀲𑀸𑀬𑀡𑁆𑀳𑁂, 𑀯𑀺𑀳𑀸𑀭𑀁 𑀲𑁄𑀢𑁆𑀣𑀺𑀬𑀸 𑀓𑀭𑀁;

𑀢𑀻𑀳𑀁 𑀢𑀢𑁆𑀣𑀸𑀧𑀺 𑀯𑀸𑀲𑁂𑀲𑀺, 𑀩𑀺𑀫𑁆𑀩𑀁 𑀢𑀁 𑀚𑀺𑀦𑀲𑀼𑀦𑀼𑀦𑁄.

𑀦𑀕𑀭𑀁 𑀲𑀸𑀥𑀼𑀲𑀚𑁆𑀚𑁂𑀢𑁆𑀯𑀸, 𑀢𑀢𑁄 𑀤𑁆𑀯𑀸𑀤𑀲𑀫𑁂 𑀤𑀺𑀦𑁂;

𑀲𑀢𑁆𑀣𑀼𑀲𑁆𑀲𑀸’𑀤𑀺𑀧𑁆𑀧𑀯𑁂𑀲𑀫𑁆𑀳𑀺, 𑀧𑀼𑀭𑀁 𑀭𑀸𑀚𑀕𑀳𑀁 𑀬𑀣𑀸.

𑀧𑀝𑀺𑀫𑀁 𑀦𑀻𑀳𑀭𑀺𑀢𑁆𑀯𑀸 𑀢𑀁, 𑀯𑀺𑀳𑀸𑀭𑀁 𑀲𑁄𑀢𑁆𑀣𑀺𑀬𑀸 𑀓𑀭𑀁;

𑀦𑀕𑀭𑁂 𑀲𑀸𑀕𑀭𑀸𑀓𑀸𑀭𑁂, 𑀯𑀢𑁆𑀢𑀫𑀸𑀦𑁂 𑀫𑀳𑀸𑀫𑀳𑁂.

𑀫𑀳𑀸𑀯𑀺𑀳𑀸𑀭𑀁 𑀦𑁂𑀢𑁆𑀯𑀸𑀦, 𑀢𑁂𑀫𑀸𑀲𑀁 𑀩𑁄𑀥𑀺𑀬𑀗𑁆𑀕𑀡𑁂;

𑀦𑀺𑀯𑀸𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸, 𑀢𑁂𑀦𑁂𑀯 𑀯𑀺𑀥𑀺𑀦𑀸 𑀧𑀼𑀭𑀁.

𑀭𑀸𑀚𑀕𑁂𑀳𑀲𑀫𑀻𑀧𑀫𑁆𑀳𑀺, 𑀧𑀼𑀩𑁆𑀩𑀤𑀓𑁆𑀔𑀺𑀡𑀓𑁄𑀡𑀓𑁂;

𑀧𑀝𑀺𑀩𑀺𑀫𑁆𑀩𑀲𑁆𑀲 𑀓𑀸𑀭𑁂𑀲𑀺, 𑀢𑀲𑁆𑀲 𑀲𑀸𑀥𑀼𑀦𑀺𑀯𑁂𑀲𑀦𑀁.

𑀓𑀸𑀭𑁂𑀢𑁆𑀯𑀸 𑀇𑀤𑁆𑀥𑀺𑀬𑀸𑀤𑀻𑀦𑀁, 𑀧𑀝𑀺𑀫𑀸𑀬𑁄 𑀯𑀺𑀲𑀸𑀭𑀤𑁄;

𑀣𑁂𑀭𑁂𑀦 𑀲𑀳 𑀢𑀢𑁆𑀣𑁂’𑀯, 𑀦𑀺𑀯𑁂𑀲𑁂𑀲𑀺 𑀫𑀳𑀸𑀧𑀢𑀺.

𑀆𑀭𑀓𑁆𑀔𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀧𑀽𑀚𑀸𑀬 𑀘 𑀧𑀭𑀺𑀩𑁆𑀩𑀬𑀁;

𑀅𑀦𑀼𑀲𑀁𑀯𑀘𑁆𑀙𑀭𑀁 𑀓𑀸𑀢𑀼𑀁, 𑀏𑀯𑀫𑁂𑀯 𑀦𑀺𑀬𑁄𑀚𑀬𑀺.

𑀢𑀲𑁆𑀲𑀸𑀡𑀫𑀦𑀼𑀭𑀓𑁆𑀔𑀦𑁆𑀢𑀸 ¶ , 𑀭𑀸𑀚𑀸 𑀢𑀩𑁆𑀩𑀁𑀲𑀺𑀓𑀸 𑀇𑀥;

𑀬𑀸𑀯’𑀚𑁆𑀚𑀧𑀭𑀺𑀭𑀓𑁆𑀔𑀦𑁆𑀢𑀺, 𑀢𑀁 𑀯𑀺𑀥𑀺𑀁 𑀦 𑀯𑀺𑀦𑀸𑀲𑀺𑀬.

𑀧𑀯𑀸𑀭𑀡𑀸𑀤𑀺𑀦𑁂 𑀦𑁂𑀢𑁆𑀯𑀸, 𑀯𑀺𑀳𑀸𑀭𑀁 𑀦𑀕𑀭𑀸 𑀢𑀢𑁄;

𑀓𑀸𑀢𑀼𑀁 𑀢𑁂𑀭𑀲𑀺𑀬𑀁 𑀧𑀽𑀚𑀁, 𑀅𑀦𑀼𑀯𑀲𑁆𑀲𑀁 𑀦𑀺𑀬𑁄𑀚𑀬𑀺.

𑀯𑀺𑀳𑀸𑀭𑁂 𑀅𑀪𑀬𑁂 𑀢𑀺𑀲𑁆𑀲-𑀯𑀲𑀪𑁂 𑀩𑁄𑀥𑀺𑀧𑀸𑀤𑀧𑁂;

𑀲𑀺𑀮𑀸𑀯𑁂𑀤𑀺𑀜𑁆𑀘 𑀓𑀸𑀭𑁂𑀲𑀺, 𑀧𑀸𑀓𑀸𑀭𑀜𑁆𑀘 𑀫𑀦𑁄𑀳𑀭𑀁.

𑀦𑀯𑀫𑁂 𑀢𑀲𑁆𑀲 𑀯𑀲𑁆𑀲𑀫𑁆𑀳𑀺, 𑀤𑀸𑀞𑀸𑀥𑀸𑀢𑀼𑀁 𑀫𑀳𑁂𑀲𑀺𑀦𑁄;

𑀩𑁆𑀭𑀸𑀳𑁆𑀫𑀡𑀻𑀓𑀸𑀘𑀺 𑀆𑀤𑀺𑀬, 𑀓𑀸𑀮𑀺𑀗𑁆𑀕𑀫𑁆𑀳𑀸 𑀇𑀥𑀸𑀦𑀬𑀺.

𑀤𑀸𑀞𑀸𑀥𑀸𑀢𑀼𑀲𑁆𑀲 𑀯𑀁𑀲𑀫𑁆𑀳𑀺, 𑀯𑀼𑀢𑁆𑀢𑁂𑀦 𑀯𑀺𑀥𑀲𑀦𑀁;

𑀕𑀳𑁂𑀢𑁆𑀯𑀸 𑀩𑀳𑀼𑀫𑀸𑀦𑁂𑀦, 𑀓𑀢𑁆𑀯𑀸 𑀲𑀫𑁆𑀫𑀸 𑀦 𑀫𑀼𑀢𑁆𑀢𑀫𑀁.

𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀭𑀡𑁆𑀟𑀫𑁆𑀳𑀺, 𑀯𑀺𑀲𑀼𑀤𑁆𑀥𑀨𑀮𑀺𑀓𑀼𑀫𑁆𑀪𑀯𑁆𑀳𑁂;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁂𑀦, 𑀭𑀸𑀚𑀯𑀢𑁆𑀣𑀼𑀫𑁆𑀳𑀺 𑀓𑀸𑀭𑀺𑀢𑁂.

𑀥𑀫𑁆𑀫𑀘𑀓𑁆𑀓𑀯𑁆𑀳𑀬𑁂 𑀕𑁂𑀳𑁂, 𑀯𑀟𑁆𑀠𑀬𑀺𑀢𑁆𑀣 𑀫𑀳𑀻𑀧𑀢𑀺;

𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀕𑁂𑀳𑀁, 𑀤𑀸𑀞𑀸𑀥𑀸𑀢𑀼𑀖𑀭𑀁 𑀅𑀳𑀼.

𑀭𑀸𑀚𑀸 𑀲𑀢𑀲𑀳𑀲𑁆𑀲𑀸𑀦𑀁, 𑀦𑀯𑀓𑀁 𑀧𑀼𑀡𑁆𑀡𑀫𑀸𑀦𑀲𑁄;

𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄’𑀓𑀸𑀲𑀺, 𑀤𑀸𑀞𑀸𑀥𑀸𑀢𑀼 𑀫𑀳𑀸𑀫𑀳𑀁.

𑀅𑀦𑀼𑀲𑀁𑀯𑀘𑁆𑀙𑀭𑀁 𑀦𑁂𑀢𑁆𑀯𑀸, 𑀯𑀺𑀳𑀸𑀭𑀫𑀪𑀬𑀼𑀢𑁆𑀢𑀭𑀁;

𑀢𑀲𑁆𑀲 𑀧𑀽𑀚𑀸𑀯𑀺𑀥𑀺𑀁 𑀓𑀸𑀢𑀼, 𑀫𑁂𑀯 𑀭𑀽𑀧𑀁 𑀦𑀺𑀬𑁄𑀚𑀬𑀺.

𑀅𑀝𑁆𑀞𑀸𑀭𑀲 𑀯𑀺𑀳𑀸𑀭𑁂 𑀘, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺;

𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀻𑀦𑀁, 𑀯𑀸𑀧𑀺𑀬𑁄 𑀘 𑀣𑀺𑀭𑁄𑀤𑀺𑀓𑀸.

𑀩𑁄𑀥𑀺 𑀧𑀽𑀚𑀸𑀤𑀺 𑀧𑀼𑀜𑁆𑀜𑀸𑀦𑀺, 𑀅𑀧𑁆𑀧𑀫𑁂𑀬𑁆𑀬𑀸𑀦𑀺 𑀓𑀸𑀭𑀺𑀬;

𑀅𑀝𑁆𑀞𑀯𑀻𑀲𑀢𑀺𑀫𑁂 𑀯𑀲𑁆𑀲𑁂, 𑀕𑀪𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺.

𑀓𑀼𑀫𑀸𑀭𑁄 𑀚𑁂𑀝𑁆𑀞𑀢𑀺𑀲𑁄’𑀣, 𑀪𑀸𑀢𑀸 𑀢𑀲𑁆𑀲 𑀓𑀦𑀺𑀝𑁆𑀞𑀓𑁄;

𑀙𑀢𑁆𑀢𑀁 𑀮𑀗𑁆𑀖𑁂𑀲𑀺 𑀲𑀁𑀓𑀸𑀬𑀁, 𑀤𑀦𑁆𑀢𑀲𑀺𑀧𑁆𑀧𑀫𑁆𑀳𑀺 𑀓𑁄𑀯𑀺𑀤𑁄.

𑀓𑀢𑁆𑀯𑀸 𑀓𑀫𑁆𑀫𑀸𑀦𑀺 𑀘𑀢𑁆𑀭𑀸𑀦𑀺, 𑀤𑀼𑀓𑁆𑀓𑀭𑀸𑀦𑀺 𑀫𑀳𑀻𑀧𑀢𑀺;

𑀲𑀺𑀧𑁆𑀧𑀸𑀬𑀢𑀦 𑀫𑁂𑀢𑀁 𑀲𑁄, 𑀢𑀺𑀓𑁆𑀔𑀸𑀧𑁂𑀲𑀺 𑀩𑀳𑀽𑀚𑀦𑁂.

𑀅𑀡𑀢𑁆𑀢𑁄 𑀧𑀺𑀢𑀼𑀦𑀸’𑀓𑀸𑀲𑀺, 𑀇𑀤𑁆𑀥𑀺𑀳𑀺 𑀯𑀺𑀬 𑀦𑀺𑀫𑁆𑀫𑀺𑀢𑀁;

𑀩𑁄𑀥𑀺𑀲𑀢𑁆𑀢 𑀲𑀭𑀽𑀧𑀜𑁆𑀘, 𑀭𑀽𑀧𑀁 𑀲𑀸𑀥𑀼 𑀫𑀦𑁄𑀳𑀭𑀁.

𑀅𑀧𑀲𑀬𑀜𑁆𑀘 ¶ 𑀧𑀮𑁆𑀮𑀗𑁆𑀓𑀁, 𑀙𑀢𑁆𑀢𑀁 𑀭𑀢𑀦𑀫𑀡𑁆𑀟𑀧𑀁;

𑀘𑀺𑀢𑁆𑀭𑀤𑀦𑁆𑀢𑀫𑀬𑀁 𑀓𑀺𑀜𑁆𑀘𑀺, 𑀢𑀲𑁆𑀲 𑀓𑀫𑁆𑀫𑀁 𑀢𑀳𑀺𑀁 𑀢𑀳𑀺𑀁.

𑀓𑀢𑁆𑀯𑀸 𑀲𑁄 𑀦𑀯𑀯𑀲𑁆𑀲𑀸𑀦𑀺, 𑀮𑀁𑀓𑀸𑀤𑀻𑀧𑀸𑀦𑀼𑀲𑀸𑀲𑀦𑀁;

𑀅𑀦𑁂𑀓𑀸𑀦𑀺 𑀘 𑀧𑀼𑀜𑁆𑀜𑀸𑀦𑀺, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀩𑀼𑀤𑁆𑀥𑀤𑀸𑀲𑁄 𑀢𑀢𑁄 𑀢𑀲𑁆𑀲, 𑀧𑀼𑀢𑁆𑀢𑁄 𑀆𑀲𑀺 𑀫𑀳𑀻𑀧𑀢𑀺;

𑀕𑀼𑀡𑀸𑀦𑀁 𑀆𑀓𑀭𑁄 𑀲𑀩𑁆𑀩-𑀭𑀢𑀦𑀸𑀦𑀁’𑀯 𑀲𑀸𑀕𑀭𑁄.

𑀲𑀼𑀔𑀁 𑀲𑀩𑁆𑀩𑀧𑀬𑁄𑀕𑁂𑀳𑀺, 𑀓𑀭𑁄𑀦𑁆𑀢𑁄 𑀤𑀻𑀧𑀯𑀸𑀲𑀺𑀦𑀁;

𑀭𑀓𑁆𑀔𑀫𑀸𑀮𑀓𑀫𑀦𑁆𑀤𑀁’𑀯, 𑀧𑀼𑀭𑀁 𑀯𑀲𑁆𑀲𑀯𑀡𑁄 𑀥𑀦𑀻.

𑀧𑀜𑁆𑀜𑀸 𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑁄, 𑀯𑀺𑀲𑀼𑀤𑁆𑀥𑀓𑀭𑀼𑀡𑀸𑀮𑀬𑁄;

𑀢𑀣𑀸 𑀤𑀲𑀳𑀺 𑀭𑀸𑀚𑀽𑀦𑀁, 𑀥𑀫𑁆𑀫𑁂𑀳𑀺 𑀲𑀫𑀼𑀕𑀸𑀕𑀢𑁄.

𑀘𑀢𑀲𑁆𑀲𑁄 𑀅𑀕𑀢𑀺 𑀳𑀺𑀢𑁆𑀯𑀸, 𑀓𑀸𑀭𑀬𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀁;

𑀚𑀦𑀁 𑀲𑀗𑁆𑀕𑀳𑀯𑀢𑁆𑀣𑀽𑀳𑀺, 𑀲𑀗𑁆𑀕𑀳𑁂𑀲𑀺 𑀘𑀢𑀽𑀳𑀺𑀧𑀺.

𑀘𑀭𑀺𑀬𑀁 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀤𑀲𑁆𑀲𑁂𑀦𑁆𑀢𑁄 𑀲𑀓𑁆𑀔𑀺𑀧𑀸𑀡𑀺𑀦𑀁;

𑀧𑀺𑀢𑀸’𑀯 𑀧𑀼𑀢𑁆𑀢𑁂 𑀲𑁄 𑀲𑀢𑁆𑀢𑁂, 𑀅𑀦𑀼𑀓𑀫𑁆𑀧𑀺𑀢𑁆𑀣 𑀪𑀽𑀧𑀢𑀺.

𑀤𑀴𑀺𑀤𑁆𑀤𑁂 𑀥𑀦𑀤𑀸𑀦𑁂𑀦𑀸-𑀓𑀸𑀲𑀺 𑀧𑀼𑀡𑁆𑀡𑀫𑀦𑁄𑀭𑀣𑁂;

𑀲𑀼𑀔𑀺𑀢𑁂 𑀲𑀩𑁆𑀩𑀪𑁄𑀕𑀸𑀦𑀁, 𑀚𑀻𑀯𑀺𑀢𑀲𑁆𑀲 𑀘 𑀕𑀼𑀢𑁆𑀢𑀺𑀬𑀸.

𑀲𑀸𑀥𑀯𑁄 𑀲𑀗𑁆𑀕𑀳𑁂𑀦𑀸’𑀣, 𑀦𑀺𑀕𑁆𑀕𑀳𑁂𑀦 𑀅𑀲𑀸𑀥𑀯𑁄;

𑀕𑀺𑀮𑀸𑀦𑁂 𑀯𑁂𑀚𑁆𑀚𑀓𑀫𑁆𑀫𑁂𑀦, 𑀲𑀗𑁆𑀕𑀳𑁂𑀲𑀺 𑀫𑀳𑀸𑀧𑀢𑀺.

𑀅𑀣𑁂𑀓 𑀤𑀺𑀯𑀲𑀁 𑀭𑀸𑀚𑀸, 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀁 𑀕𑀢𑁄;

𑀢𑀺𑀲𑁆𑀲𑀯𑀸𑀧𑀺𑀁 𑀦𑀳𑀸𑀦𑀢𑁆𑀢𑀁, 𑀕𑀘𑁆𑀙𑀫𑀸𑀦𑁄 𑀫𑀳𑀸𑀧𑀣𑁂.

𑀅𑀤𑁆𑀤𑀲𑁂’𑀓𑀁 𑀫𑀳𑀸𑀦𑀸𑀕𑀁, 𑀓𑀼𑀘𑁆𑀙𑀺𑀭𑁄𑀕 𑀲𑀫𑀧𑁆𑀧𑀺𑀢𑀁;

𑀧𑀼𑀢𑁆𑀢𑀪𑀸𑀕 𑀯𑀺𑀳𑀸𑀭𑀲𑁆𑀲, 𑀧𑀲𑁆𑀲𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂.

𑀉𑀢𑁆𑀢𑀸𑀦 𑀫𑀼𑀤𑀭𑁂 𑀭𑁄𑀕𑀁, 𑀤𑀲𑁆𑀲𑁂𑀢𑀼𑀁 𑀕𑀡𑁆𑀟𑀲𑀜𑁆𑀜𑀺𑀢𑀁;

𑀦𑀺𑀧𑀦𑁆𑀦𑀁𑀲𑁄’𑀣 𑀘𑀺𑀦𑁆𑀢𑁂𑀲𑀺, 𑀢𑀢𑁄 𑀭𑁄𑀕𑀻𑀢𑀺 𑀦𑀺𑀘𑁆𑀙𑀬𑀁.

𑀅𑀣𑁄’𑀭𑀼𑀬𑁆𑀳 𑀫𑀳𑀸𑀦𑀸𑀕𑀁, 𑀫𑀳𑀸𑀦𑀸𑀕 𑀲𑀫𑀻𑀧𑀕𑁄;

𑀏𑀯𑀫𑀸𑀳 𑀫𑀳𑀸𑀦𑀸𑀕𑁄, 𑀫𑀳𑀸𑀦𑀸𑀕𑀫𑀦𑀸𑀕𑀯𑀸.

‘‘𑀓𑀸𑀭𑀡𑀁 𑀢𑁂 𑀫𑀳𑀸𑀦𑀸𑀕, 𑀜𑀸𑀢𑀫𑀸𑀕𑀫𑀦𑁂 𑀫𑀬𑀸;

𑀓𑀼𑀫𑁆𑀳𑁂 𑀔𑀮𑀼 𑀫𑀳𑀸𑀢𑁂𑀚𑀸, 𑀔𑀺𑀧𑁆𑀧𑀁 𑀓𑀼𑀧𑁆𑀧𑀺𑀢𑀲𑀻𑀮𑀺𑀦𑁄.

𑀢𑀲𑁆𑀫𑀸 𑀨𑀼𑀲𑀺𑀢𑁆𑀯𑀸 𑀢𑀁 𑀓𑀫𑁆𑀫𑀁, 𑀓𑀸𑀢𑀼𑀁 𑀲𑀓𑁆𑀓𑀸 𑀦 𑀢𑁂 𑀫𑀬𑀸;

𑀅𑀨𑀼𑀲𑀺𑀢𑁆𑀯𑀸𑀧𑀺 𑀦𑁄 𑀲𑀓𑁆𑀓𑀸, 𑀓𑀺𑀦𑁆𑀦𑀼𑀓𑀸𑀢𑀩𑁆𑀩𑀫𑁂𑀢𑁆𑀣𑀻’𑀢𑀺.

𑀏𑀯𑀁 ¶ 𑀧𑀼𑀢𑁆𑀢𑁂 𑀨𑀡𑀺𑀦𑁆𑀤𑁄 𑀲𑁄, 𑀓𑁂𑀯𑀮𑀁 𑀨𑀡𑀫𑀢𑁆𑀢𑀦𑁄;

𑀩𑀺𑀮𑀲𑁆𑀲’𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸, 𑀦𑀺𑀧𑁆𑀧𑀚𑁆𑀚𑀺𑀢𑁆𑀣 𑀲𑀫𑀸𑀳𑀺𑀢𑁄.

𑀅𑀣𑁂’𑀦 𑀫𑀼𑀧𑀲𑀗𑁆𑀓𑀫𑁆𑀫, 𑀉𑀘𑁆𑀙𑀗𑁆𑀕𑀕𑀢𑀫𑀢𑁆𑀢𑀦𑁄

𑀲𑀢𑁆𑀣𑀁 𑀕𑀳𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸, 𑀉𑀤𑀭𑀁 𑀢𑀲𑁆𑀲 𑀪𑁄𑀕𑀺𑀦𑁄.

𑀦𑀻𑀳𑀭𑀺𑀢𑁆𑀯𑀸 𑀢𑀢𑁄 𑀤𑁄𑀲𑀁, 𑀓𑀢𑁆𑀯𑀸 𑀪𑁂𑀲𑀚𑁆𑀚 𑀫𑀼𑀢𑁆𑀢𑀫𑀁;

𑀲𑀧𑁆𑀧𑀁 𑀢𑀁 𑀢𑀗𑁆𑀔𑀡𑁂𑀦𑁂𑀯, 𑀅𑀓𑀸𑀲𑀺 𑀲𑀼𑀔𑀺𑀢𑀁 𑀢𑀤𑀸.

𑀅𑀢𑁆𑀢𑀸𑀦 𑀫𑁂𑀯𑀁 𑀣𑁄𑀫𑁂𑀲𑀺, ‘‘𑀫𑀳𑀸𑀓𑀸𑀭𑀼𑀜𑁆𑀜𑀢𑀁 𑀫𑀫;

𑀢𑀺𑀭𑀘𑁆𑀙𑀸𑀦𑀸𑀧𑀺 𑀚𑀸𑀦𑀺𑀁𑀲𑀼, 𑀲𑀸𑀥𑀼 𑀭𑀚𑁆𑀚𑀦𑁆𑀢𑀺 𑀫𑁂 𑀓𑀢𑀁.

𑀤𑀺𑀲𑁆𑀯𑀸 𑀲𑀼𑀔𑀺𑀢𑀫𑀢𑁆𑀢𑀸𑀦𑀁, 𑀧𑀦𑁆𑀦𑀕𑁄𑀲𑁄 𑀫𑀳𑀻𑀧𑀢𑀺𑀁;

𑀧𑀽𑀚𑁂𑀢𑀼𑀁 𑀢𑀲𑁆𑀲 𑀧𑀸𑀤𑀸𑀲𑀺, 𑀫𑀳𑀕𑁆𑀖𑀁 𑀫𑀡𑀺𑀫𑀢𑁆𑀢𑀦𑁄.

𑀲𑀺𑀮𑀸𑀫𑀬𑀸𑀬 𑀲𑀫𑁆𑀩𑀼𑀤𑁆𑀥-𑀧𑀝𑀺𑀫𑀸𑀬 𑀅𑀓𑀸𑀭𑀬𑀺;

𑀫𑀺𑀡𑀺𑀁 𑀢𑀁 𑀦𑀬𑀦𑀁 𑀭𑀸𑀚𑀸, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂.

𑀏𑀓𑁄𑀧𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀦𑁆𑀢𑁄, 𑀕𑀸𑀫𑀫𑁆𑀳𑀺 𑀣𑀼𑀲𑀯𑀺𑀢𑁆𑀣𑀺𑀓𑁂;

𑀲𑀼𑀓𑁆𑀔𑀁 𑀪𑀺𑀓𑁆𑀔𑀁 𑀮𑀪𑀺𑀢𑁆𑀯𑀸𑀦, 𑀔𑀻𑀭𑀪𑀺𑀓𑁆𑀔𑀸𑀬 𑀲𑀜𑁆𑀘𑀭𑀁.

𑀔𑀻𑀭𑀁 𑀲𑀧𑁆𑀧𑀸𑀡𑀓𑀁 𑀮𑀤𑁆𑀥𑀸, 𑀧𑀭𑀺𑀪𑀼𑀜𑁆𑀚𑀺𑀢𑁆𑀣 𑀓𑀼𑀘𑁆𑀙𑀺𑀬𑀁;

𑀧𑀸𑀡𑀓𑀸 𑀩𑀮𑀯𑁄 𑀳𑀼𑀢𑁆𑀯𑀸, 𑀉𑀤𑀭𑀁 𑀢𑀲𑁆𑀲 𑀔𑀸𑀤𑀺𑀲𑀼𑀁.

𑀢𑀢𑁄 𑀲𑁄 𑀉𑀧𑀲𑀗𑁆𑀓𑀫𑁆𑀫, 𑀢𑀁 𑀦𑀺𑀯𑁂𑀤𑁂𑀲𑀺 𑀭𑀸𑀚𑀺𑀦𑁄;

𑀭𑀸𑀳 ‘‘𑀚𑀸𑀢𑁄 𑀲𑀼𑀮𑁄’𑀬𑀁, 𑀓𑀤𑀸 𑀳𑀸𑀭𑁂𑀲𑀺 𑀓𑀻𑀤𑀺𑀲𑀁.

𑀲𑁄 𑀆𑀳’’ 𑀣𑀼𑀲𑀯𑀺𑀢𑁆𑀣𑀺𑀫𑁆𑀳𑀺, 𑀕𑀸𑀫𑁂 𑀔𑀻𑀭𑁂𑀦 𑀪𑁄𑀚𑀦𑁂;

𑀪𑀼𑀢𑁆𑀢𑁂’𑀢𑀺 𑀭𑀸𑀚𑀸 𑀅𑀜𑁆𑀜𑀸𑀲𑀺, 𑀔𑀻𑀭𑀁 𑀲𑀧𑁆𑀧𑀸𑀡𑀓𑀁’’𑀇𑀢𑀺.

𑀢𑀤𑁂𑀯 𑀅𑀲𑁆𑀲𑁄 𑀏𑀓𑁄𑀧𑀺, 𑀲𑀺𑀭𑀸𑀯𑁂𑀥 𑀢𑀺𑀓𑀺𑀘𑁆𑀙𑀺𑀬𑁄;

𑀭𑀸𑀚𑀸 𑀢𑀲𑁆𑀲 𑀲𑀺𑀭𑀸𑀯𑁂𑀥𑀁, 𑀓𑀢𑁆𑀯𑀸 𑀆𑀤𑀸𑀬 𑀮𑁄𑀳𑀺𑀢𑀁.

𑀧𑀸𑀬𑁂𑀢𑁆𑀯𑀸 𑀲𑀫𑀡𑀁 𑀆𑀳, 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑀬;

‘‘𑀅𑀲𑁆𑀲𑀮𑁄𑀳𑀺𑀢𑀫𑀡’’𑀦𑁆𑀢𑀺, 𑀢𑀁 𑀲𑀼𑀢𑁆𑀯𑀸 𑀲𑀫𑀡𑁄𑀯𑀫𑀺.

𑀧𑀸𑀡𑀓𑀸 𑀮𑁄𑀳𑀺𑀢𑁂𑀦𑁂𑀯, 𑀦𑀺𑀓𑁆𑀔𑀫𑀺𑀁𑀪𑀼 𑀲𑀼𑀔𑀻 𑀅𑀳𑀼;

𑀪𑀺𑀓𑁆𑀔𑀼𑀁 𑀭𑀸𑀚𑀸 𑀦𑀺𑀯𑁂𑀤𑁂𑀲𑀺, 𑀓𑀼𑀘𑁆𑀙𑀺𑀫𑁂𑀯𑀁 𑀧𑀦𑀢𑁆𑀢𑀦𑁄.

‘‘𑀏𑀓𑀲𑀢𑁆𑀣𑀧𑀳𑀸𑀭𑁂𑀦 ¶ , 𑀧𑀸𑀡𑀓𑀸 𑀲𑀫𑀡𑁄 𑀳𑀬𑁄;

𑀓𑀢𑀸 𑀅𑀭𑁄𑀕𑀸 𑀲𑀫𑁆𑀫𑀫𑁂, 𑀯𑁂𑀚𑁆𑀚𑀓𑀫𑁆𑀫 𑀫𑀳𑁄’’𑀇𑀢𑀺.

𑀅𑀦𑁆𑀢𑁄 𑀢𑀼 𑀤𑀺𑀢𑁆𑀣𑀢𑀼𑀡𑁆𑀟𑁂𑀦, 𑀢𑁂𑀦 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄;

𑀭𑀸𑀚𑀸𑀦𑀁 𑀫𑀕𑀫𑀸 𑀭𑀸𑀚𑀸, 𑀦𑀺𑀤𑀸𑀦𑀁 𑀢𑀲𑁆𑀲 𑀧𑀼𑀘𑁆𑀙𑀺𑀬.

𑀅𑀦𑁆𑀢𑁄 𑀢𑀼 𑀤𑀺𑀢𑁆𑀣𑀢𑀼𑀡𑁆𑀟𑁂𑀦, 𑀢𑁂𑀦 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄;

𑀭𑀸𑀚𑀸𑀦𑀁 𑀫𑀕𑀫𑀸 𑀭𑀸𑀚𑀸, 𑀦𑀺𑀤𑀸𑀦𑀁 𑀢𑀲𑁆𑀲 𑀧𑀼𑀘𑁆𑀙𑀺𑀬.

𑀅𑀏𑀦𑁆𑀢𑀸 𑀲𑀧𑁆𑀧𑁄’𑀢𑀺 𑀯𑀺𑀜𑁆𑀜𑀸𑀬, 𑀲𑀢𑁆𑀢𑀸𑀳𑀫𑀼𑀧𑀯𑀸𑀲𑀺𑀬;

𑀲𑀼𑀦𑁆𑀳𑀸𑀢𑀲𑀼 𑀯𑀺𑀮𑀺𑀢𑁆𑀢𑀜𑁆𑀘, 𑀲𑀬𑀦𑁂 𑀲𑀸𑀥𑀼 𑀲𑀦𑁆𑀣𑀢𑁂.

𑀲𑀬𑀸𑀧𑁂𑀲𑀺 𑀢𑀢𑁄 𑀲𑁄’𑀢𑀺, 𑀦𑀺𑀤𑁆𑀤𑀸𑀬 𑀫𑀼𑀔𑀫𑀢𑁆𑀢𑀦𑁄;

𑀯𑀺𑀯𑀭𑀺𑀢𑁆𑀯𑀸 𑀢𑀤𑀸 𑀲𑀼𑀢𑁆𑀢𑁄, 𑀢𑀢𑁄 𑀢𑀲𑁆𑀲 𑀫𑀼𑀔𑀦𑁆𑀢𑀺𑀓𑁂.

𑀫𑀁𑀲𑀧𑁂𑀲𑀺𑀁 𑀞𑀧𑀸𑀧𑁂𑀲𑀺, 𑀲𑀭𑀚𑁆𑀚𑀼𑀁 𑀢𑀲𑁆𑀲 𑀦𑀺𑀕𑁆𑀕𑀢𑁄;

𑀕𑀦𑁆𑀥𑁂𑀦 𑀢𑀁 𑀟𑀁𑀲𑀺𑀢𑁆𑀯𑀸𑀦, 𑀅𑀦𑁆𑀢𑁄 𑀯𑀺𑀲𑀺𑀢𑀼𑀫𑀸𑀭𑀪𑀺.

𑀭𑀚𑁆𑀚𑀼𑀬𑀸’𑀣 𑀕𑀳𑁂𑀢𑁆𑀯𑀸𑀦, 𑀲𑀫𑀸𑀓𑀟𑁆𑀠𑀺𑀓 𑀧𑀸𑀡𑀺𑀬𑀁;

𑀉𑀤𑀓𑁂 𑀧𑀸𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀯𑁂𑀚𑁆𑀚𑁄 𑀅𑀳𑁄𑀲𑀺 𑀲𑀫𑁆𑀫𑀸𑀲-𑀫𑁆𑀩𑀼𑀤𑁆𑀥𑀲𑁆𑀲 𑀓𑀺𑀭 𑀚𑀻𑀯𑀓𑁄;

𑀓𑀫𑁆𑀫𑀁 𑀯𑀺𑀚𑁆𑀚𑀢𑀺 𑀮𑁄𑀓𑀲𑁆𑀲, 𑀓𑀢𑀁 𑀓𑀺𑀁𑀢𑁂𑀦 𑀤𑀼𑀓𑁆𑀓𑀭𑀁.

𑀈𑀤𑀺𑀲𑀁 𑀓𑀲𑀺𑀭𑀸𑀲𑁄’𑀧𑀺, 𑀓𑀫𑁆𑀫𑀁 𑀦𑀢𑁆𑀣𑁂’𑀢𑁆𑀣 𑀲𑀁𑀲𑀬𑁄;

𑀲𑀩𑁆𑀩𑀸𑀤𑀭𑁂𑀦 𑀓𑀼𑀩𑁆𑀩𑀦𑁆𑀢𑁄, 𑀅𑀳𑁄 𑀧𑀼𑀜𑁆𑀜𑁄 𑀤𑀬𑁄 𑀫𑀫.

𑀢𑀣𑀸 𑀳𑁂𑀮𑁆𑀮𑁄𑀮𑀺𑀕𑀸𑀫𑀫𑁆𑀳𑀺, 𑀘𑀡𑁆𑀟𑀸𑀮𑀺 𑀫𑀼𑀴𑁆𑀳𑀕𑀩𑁆𑀪𑀺𑀦𑀺𑀁;

𑀚𑀸𑀢𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼, 𑀲𑀕𑀩𑁆𑀪𑀁 𑀲𑀼𑀔𑀺𑀢𑀁 𑀅𑀓𑀸.

𑀯𑀸𑀢𑀩𑁄𑀥𑁂𑀦 𑀏𑀓𑁄’𑀧𑀺, 𑀪𑀺𑀓𑁆𑀔𑀼 𑀉𑀝𑁆𑀞𑀸𑀧𑀺𑀢𑁄 𑀅𑀳𑀼;

𑀕𑁄𑀧𑀸𑀦𑀲𑀻 𑀕𑀢𑁂𑀢𑀫𑁆𑀳𑀺, 𑀤𑀼𑀓𑁆𑀔𑀸𑀫𑁄𑀘𑁂𑀲𑀺 𑀩𑀼𑀤𑁆𑀥𑀺𑀫𑀸.

𑀧𑀺𑀯𑀦𑁆𑀢𑀲𑁆𑀲𑀸𑀧𑀺 𑀫𑀡𑁆𑀟𑀽𑀓, 𑀚𑀻𑀩𑀬𑀼𑀢𑁆𑀢𑀁 𑀚𑀮𑀁 𑀮𑀳𑀼𑀁;

𑀦𑀸𑀲𑀺𑀓𑀸 𑀩𑀺𑀮𑀢𑁄 𑀕𑀦𑁆𑀢𑁆𑀯𑀸, 𑀩𑀻𑀚𑀫𑀸𑀭𑀼𑀬𑁆𑀳 𑀫𑀢𑁆𑀣𑀓𑀁.

𑀪𑀺𑀚𑁆𑀚𑀺𑀢𑁆𑀯𑀸 𑀆𑀲𑀺 𑀫𑀡𑁆𑀟𑀽𑀓𑁄, 𑀲𑁄 𑀯𑀼𑀤𑁆𑀥𑁄 𑀢𑀢𑁆𑀣 𑀕𑀘𑁆𑀙𑀢𑀺;

𑀫𑁂𑀖𑀲𑁆𑀲𑀸’𑀕𑀫𑀦𑁂 𑀢𑁂𑀦, 𑀲𑁄’𑀦𑀺𑀩𑁆𑀩𑀚𑁆𑀚𑀢𑀺 𑀫𑀸𑀡𑀯𑁄.

𑀨𑀸𑀮𑁂𑀢𑁆𑀯𑀸 ¶ 𑀫𑀢𑁆𑀣𑀓𑀁 𑀭𑀸𑀚𑀸, 𑀫𑀡𑁆𑀟𑀽𑀓𑀫𑀧𑀦𑀻𑀬 𑀲𑁄;

𑀓𑀧𑀸𑀮𑀸𑀦𑀺 𑀖𑀝𑁂𑀢𑁆𑀯𑀸𑀦-𑀓𑀸𑀲𑀺 𑀧𑀸𑀓𑀢𑀺𑀓𑀁 𑀔𑀡𑁂.

𑀳𑀺𑀢𑀢𑁆𑀣𑀁 𑀤𑀻𑀧𑀸𑀯𑀸𑀲𑀺𑀦𑀁, 𑀕𑀸𑀫𑁂 𑀕𑀸𑀫𑁂 𑀫𑀳𑀻𑀧𑀢𑀺;

𑀓𑀸𑀭𑁂𑀢𑁆𑀯𑀸 𑀯𑁂𑀚𑁆𑀚𑀲𑀸𑀮𑀸𑀬𑁄, 𑀯𑀚𑁆𑀚𑁂 𑀢𑀢𑁆𑀣 𑀦𑀺𑀬𑁄𑀚𑀬𑀺.

𑀲𑀩𑁆𑀩𑁂𑀲𑀁 𑀯𑀚𑁆𑀚𑀲𑀢𑁆𑀣𑀸𑀦𑀁, 𑀓𑀢𑁆𑀯𑀸 𑀲𑀸𑀭𑀢𑁆𑀣𑀲𑀗𑁆𑀕𑀳𑀁;

𑀞𑀧𑁂𑀲𑀺 𑀯𑁂𑀚𑁆𑀚𑁂 𑀤𑀻𑀧𑀲𑁆𑀲, 𑀢𑀺𑀓𑀺𑀘𑁆𑀙𑀢𑁆𑀣𑀫𑀦𑀸𑀕𑀢𑁂;

𑀬𑁄𑀚𑁂𑀲𑀺 𑀯𑁂𑀚𑁆𑀚 𑀫𑁂𑀓𑁂𑀓𑀁, 𑀭𑀸𑀚𑀸 𑀕𑀸𑀫 𑀤𑁆𑀯𑀺𑀧𑀜𑁆𑀘𑀓𑁂.

𑀅𑀤𑀸 𑀯𑀺𑀲𑀤𑁆𑀥 𑀔𑁂𑀢𑁆𑀢𑀸𑀦𑀁, 𑀯𑁂𑀚𑁆𑀚𑀸𑀦𑀫𑀼𑀧𑀚𑀻𑀯𑀦𑀁;

𑀯𑁂𑀚𑁆𑀚𑁂𑀳𑀢𑁆𑀣𑀻𑀦𑀫𑀲𑁆𑀲𑀸𑀦𑀁, 𑀩𑀮𑀲𑁆𑀲 𑀘 𑀦𑀺𑀬𑁄𑀚𑀬𑀺.

𑀧𑀺𑀝𑁆𑀞𑀲𑀧𑁆𑀧𑀺𑀦𑀫𑀦𑁆𑀯𑀸𑀦𑀁, 𑀲𑀸𑀮𑀸𑀬𑁄 𑀘 𑀢𑀳𑀺𑀁 𑀢𑀳𑀺𑀁;

𑀓𑀸𑀭𑁂𑀲𑀺 𑀲𑀳 𑀪𑁄𑀕𑁂𑀦, 𑀲𑀸𑀮𑀸𑀬𑁄 𑀘 𑀫𑀳𑀸𑀧𑀣𑁂.

𑀦𑀺𑀘𑁆𑀘𑀫𑀲𑁆𑀲𑁄𑀲𑀺 𑀲𑀤𑁆𑀥𑀫𑁆𑀫𑀁, 𑀲𑀓𑁆𑀓𑀢𑁆𑀯𑀸 𑀥𑀫𑁆𑀫𑀪𑀸𑀡𑀓𑁂;

𑀥𑀫𑁆𑀫𑀪𑀸𑀡𑀓𑀯𑀝𑁆𑀝𑀜𑁆𑀘, 𑀧𑀝𑁆𑀞𑀧𑁂𑀲𑀺 𑀢𑀳𑀺𑀁 𑀢𑀳𑀺𑀁.

𑀲𑀸𑀝𑀓𑀦𑁆𑀢𑀭𑀢𑁄 𑀓𑀢𑁆𑀯𑀸, 𑀲𑀢𑁆𑀣 𑀯𑀝𑁆𑀝𑀺𑀁 𑀫𑀳𑀸𑀤𑀬𑁄;

𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀧𑀫𑁄𑀘𑁂𑀲𑀺, 𑀤𑀼𑀓𑁆𑀔𑀫𑁆𑀳𑀸 𑀤𑀼𑀓𑁆𑀔𑀺𑀢𑁂 𑀚𑀦𑁂.

𑀅𑀣𑁂𑀓 𑀤𑀺𑀯𑀲𑀁 𑀭𑀸𑀚𑀸, 𑀭𑀸𑀚𑀸𑀪𑀭𑀡 𑀫𑀡𑁆𑀟𑀺𑀢𑁄;

𑀲𑀤𑁆𑀥𑀺𑀁 𑀕𑀘𑁆𑀙𑀢𑀺 𑀲𑁂𑀦𑀸𑀬, 𑀤𑁂𑀯𑁂𑀳𑀺 𑀯𑀺𑀬 𑀯𑀸𑀲𑀯𑁄.

𑀢𑀁 𑀤𑀺𑀲𑁆𑀯𑀸 𑀲𑀺𑀭𑀺𑀲𑁄𑀪𑀕𑁆𑀕-𑀫𑀕𑁆𑀕𑀁 𑀧𑀢𑁆𑀢𑀁 𑀫𑀳𑀻 𑀧𑀢𑀺𑀁;

𑀭𑀸𑀚𑀺𑀤𑁆𑀥𑀺𑀳𑀺 𑀯𑀺𑀭𑀸𑀚𑀦𑁆𑀢𑀁, 𑀩𑀤𑁆𑀥𑀯𑁂𑀭𑁄 𑀪𑀯𑀦𑁆𑀢𑀭𑁂.

𑀓𑀼𑀝𑁆𑀞𑀺 𑀏𑀓𑁄 𑀧𑀓𑀼𑀧𑁆𑀧𑀺𑀢𑁆𑀯𑀸, 𑀳𑀝𑁆𑀞𑁂𑀦𑀸𑀳𑀦𑀺𑀬𑀸’𑀯𑀢𑀺𑀁;

𑀧𑁄𑀣𑁂𑀦𑁆𑀢𑁄 𑀢𑀜𑁆𑀘 𑀧𑁄𑀣𑁂𑀦𑁆𑀢𑁄, 𑀪𑀽𑀫𑀺𑀁 𑀓𑀢𑁆𑀢𑀭𑀬𑀝𑁆𑀞𑀺𑀬𑀸.

𑀅𑀓𑁆𑀓𑁄𑀲𑁂𑀲𑀺 𑀅𑀦𑁂𑀓𑁂𑀳𑀺, 𑀅𑀓𑁆𑀓𑁄𑀲𑀯𑀘𑀦𑁂𑀳𑀺 𑀘;

𑀯𑀺𑀧𑁆𑀧𑀓𑀸𑀭𑀁𑀫𑀺𑀫𑀁 𑀤𑀺𑀲𑁆𑀯𑀸, 𑀤𑀽𑀭𑀢𑁄’𑀯 𑀫𑀳𑀻𑀧𑀢𑀺.

‘‘𑀦𑀸𑀳𑀁 𑀲𑀭𑀸𑀫𑀺 𑀲𑀢𑁆𑀢𑀲𑁆𑀲, 𑀓𑀲𑁆𑀲𑀸’𑀧𑀺 𑀓𑀢𑀫𑀧𑁆𑀧𑀺𑀬𑀁;

𑀧𑀼𑀩𑁆𑀩𑀯𑁂𑀭𑀻 𑀅𑀬𑀁 𑀚𑀸𑀢𑀼, 𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀺𑀢𑀁’’ 𑀇𑀢𑀺.

𑀅𑀡𑀸𑀧𑁂𑀲𑀺 𑀲𑀫𑀻𑀧𑀝𑁆𑀞𑀁, 𑀧𑀼𑀭𑀺𑀲𑀁 ‘‘𑀕𑀘𑁆𑀙 𑀓𑀼𑀝𑁆𑀞𑀺𑀦𑁄;

𑀅𑀫𑀼𑀓𑀲𑁆𑀲𑀸’𑀪𑀺𑀚𑀸𑀦𑀸𑀳𑀺, 𑀘𑀺𑀢𑁆𑀢𑀸𑀘𑀸𑀭’’𑀦𑁆𑀢𑀺 𑀲𑁄 𑀢𑀢𑁄.

𑀲𑀳𑀸𑀬𑁄 ¶ 𑀯𑀺𑀬 𑀓𑀼𑀝𑁆𑀞𑀺𑀲𑁆𑀲, 𑀲𑀫𑀻𑀧𑀫𑁆𑀳𑀺 𑀦𑀺𑀲𑀻𑀤𑀺𑀬;

‘‘𑀭𑀼𑀝𑁆𑀞𑁄 𑀓𑀺𑀫𑀢𑁆𑀣𑀁 𑀪𑁄 𑀢𑁆𑀯’’𑀦𑁆𑀢𑀺, 𑀧𑀼𑀘𑁆𑀙𑀺 𑀲𑀩𑁆𑀩𑀫𑀯𑁄𑀘 𑀲𑁄.

‘‘𑀤𑀸𑀲𑁄 𑀫𑁂 𑀩𑀼𑀤𑁆𑀥𑀤𑀸𑀲𑁄’𑀬𑀁, 𑀭𑀸𑀚𑀸𑀳𑀼 𑀧𑀼𑀜𑁆𑀜𑀓𑀫𑁆𑀫𑀼𑀦𑀸;

𑀅𑀯𑀫𑀜𑁆𑀜𑀸𑀬 𑀫𑀁 𑀫𑀬𑁆𑀳𑀁, 𑀧𑀭𑀢𑁄 𑀢𑁄 𑀬𑀸𑀢𑀺 𑀳𑀢𑁆𑀣𑀺𑀦𑀸.

𑀚𑀸𑀦𑀸𑀧𑁂𑀲𑁆𑀲𑀸𑀫𑀺 𑀅𑀢𑁆𑀢𑀸𑀦𑀁, 𑀓𑀢𑀺𑀧𑀸𑀳𑁂𑀦 𑀲𑁄𑀬𑀤𑀺;

𑀳𑀢𑁆𑀣𑀁 𑀫𑁂 𑀏𑀢𑀺 𑀓𑀸𑀭𑁂𑀢𑁆𑀯𑀸, 𑀲𑀩𑁆𑀩𑀁 𑀤𑀸𑀲𑀸𑀦 𑀦𑀺𑀕𑁆𑀕𑀳𑀁.

𑀦𑁄 𑀘𑁂 𑀳𑀢𑁆𑀣𑀁 𑀫𑀫𑀸’𑀬𑀸𑀢𑀺, 𑀫𑀸𑀭𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑀁;

𑀧𑀺𑀯𑀺𑀲𑁆𑀲𑀸𑀫𑀺 𑀦 𑀲𑀦𑁆𑀤𑁂𑀳𑁄, 𑀦 𑀘𑀺𑀭𑁂𑀦𑁂𑀯 𑀧𑀲𑁆𑀲𑀲𑀺’’.

𑀲𑁄 𑀕𑀦𑁆𑀢𑁆𑀯𑀸 𑀦𑀭𑀧𑀸𑀮𑀲𑁆𑀲, 𑀧𑀯𑀢𑁆𑀢𑀺𑀁 𑀢𑀁 𑀦𑀺𑀯𑁂𑀤𑀬𑀺;

‘‘𑀧𑀼𑀩𑁆𑀩𑀯𑁂𑀭𑀺 𑀫𑀫𑀸𑀬𑀦𑁆𑀢𑀺, 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀳𑀸𑀫𑀢𑀺.

𑀯𑀺𑀦𑁄 𑀤𑁂𑀢𑀼𑀫𑀼𑀧𑀸𑀬𑁂𑀦, 𑀧𑀼𑀢𑁆𑀢𑀁𑀯𑁂𑀭𑀦𑁆𑀢𑀺 𑀯𑁂𑀭𑀺𑀦𑁄;

‘‘𑀲𑀸𑀥𑀼 𑀲𑀗𑁆𑀕𑀡𑀼𑀢𑀁 𑀢𑁆𑀯’’𑀦𑁆𑀢𑀺, 𑀧𑀼𑀭𑀺𑀲𑀁 𑀢𑀁 𑀦𑀺𑀬𑁂𑀚𑀬𑀺.

𑀲𑁄 𑀓𑀼𑀝𑁆𑀞𑀺𑀫𑀼𑀧𑀲𑀗𑁆𑀓𑀫𑁆𑀫, 𑀲𑀳𑀸𑀬𑁄 𑀧𑀺𑀬 𑀆𑀳𑀢𑀁;

‘‘𑀭𑀸𑀚𑀸𑀦𑀁 𑀢𑀁 𑀯𑀺𑀦𑀸𑀲𑁂𑀢𑀼𑀁, 𑀘𑁂𑀢𑁂𑀢𑁆𑀯𑀸 𑀓𑀸𑀮𑀫𑁂𑀢𑁆𑀢𑀓𑀁.

𑀅𑀮𑀪𑀦𑁆𑀢𑁄 𑀲𑀳𑀸𑀬𑀁 𑀫𑁂, 𑀦𑀸𑀲𑀓𑁆𑀔𑀺 𑀢𑀲𑁆𑀲 𑀖𑀸𑀢𑀦𑁂;

𑀮𑀤𑁆𑀥𑀸𑀢𑀼𑀫𑁆𑀳𑁂 𑀦𑀬𑀺𑀲𑁆𑀲𑀸𑀫𑀺, 𑀫𑀢𑁆𑀣𑀓𑀁 𑀫𑁂 𑀫𑀦𑁄𑀭𑀣𑀁.

𑀏𑀣 𑀕𑁂𑀳𑁂 𑀯𑀲𑀺𑀢𑁆𑀯𑀸 𑀫𑁂, 𑀳𑁄𑀣 𑀫𑁂 𑀅𑀦𑀼𑀯𑀢𑁆𑀢𑀓𑀸;

𑀅𑀳𑀫𑁂𑀯’𑀲𑁆𑀲 𑀦𑀸𑀲𑁂𑀫𑀺, 𑀓𑀢𑀺𑀧𑀸𑀳𑁂𑀦 𑀚𑀻𑀯𑀺𑀢𑀁.

𑀇𑀢𑀺 𑀯𑀢𑁆𑀯𑀸𑀦 𑀢𑀁 𑀓𑀼𑀝𑁆𑀞𑀁, 𑀦𑁂𑀢𑁆𑀯𑀸 𑀲𑁄 𑀖𑀭𑀫𑀢𑁆𑀢𑀦𑁄;

𑀲𑀼𑀦𑁆𑀳𑀸𑀢 𑀲𑀼𑀯𑀺𑀮𑀺𑀢𑁆𑀢𑀜𑁆𑀘, 𑀦𑀺𑀯𑀢𑁆𑀣𑀲𑀼𑀔𑀼𑀫𑀫𑁆𑀩𑀭𑀁.

𑀲𑀼𑀪𑀼𑀢𑁆𑀢𑀫𑀥𑀼𑀭𑀸𑀳𑀸𑀭𑀁, 𑀬𑁄𑀩𑁆𑀩𑀦𑀺𑀢𑁆𑀣𑀺𑀓𑀣𑀸𑀤𑀭𑀁;

𑀲𑀬𑀸𑀧𑁂𑀲𑀺 𑀫𑀦𑀼𑀜𑁆𑀜𑀫𑁆𑀳𑀺, 𑀲𑀬𑀦𑁂 𑀲𑀸𑀥𑀼 𑀲𑀦𑁆𑀣𑀢𑁂.

𑀏𑀢𑁂 𑀦𑁂𑀯 𑀦𑀺𑀬𑀸𑀫𑁂𑀦, 𑀓𑀢𑀺𑀧𑀸𑀳𑀁 𑀦𑀻𑀯𑀸𑀲𑀺𑀬;

𑀜𑀢𑁆𑀯𑀸 𑀢𑀁 𑀚𑀸𑀢𑀯𑀺𑀲𑁆𑀲𑀸𑀲𑀁, 𑀲𑀼𑀔𑀺𑀢𑀁 𑀧𑀺𑀡𑀺𑀢𑀺𑀦𑁆𑀤𑁆𑀭𑀺𑀬𑀁.

‘‘𑀭𑀜𑁆𑀜𑁄 𑀤𑀺𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸𑀦, 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀓𑀁 𑀅𑀤𑀸;

𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀲𑁂𑀥𑁂𑀢𑁆𑀯𑀸, 𑀢𑁂𑀦’𑀚𑁆𑀛𑀺𑀝𑁆𑀞𑁄 𑀦𑀫𑀕𑁆𑀕𑀳𑀺.

𑀪𑀽𑀧𑀸𑀮𑁂𑀦 𑀓𑀫𑁂𑀦𑀸’𑀲𑀺, 𑀯𑀺𑀲𑁆𑀲𑀢𑁆𑀣𑁄’𑀢𑀺𑀯 𑀪𑀽𑀫𑀺𑀧𑁄;

𑀫𑀢𑁄𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲𑀸-𑀲𑀺 𑀳𑀤𑀬𑀁 𑀨𑀮𑀺𑀢𑀁 𑀤𑁆𑀯𑀺𑀥𑀸.

𑀏𑀯𑀁 ¶ 𑀭𑁄𑀕𑁂 𑀢𑀺𑀓𑀺𑀘𑁆𑀙𑁂𑀲𑀺, 𑀭𑀸𑀚𑀸 𑀲𑀸𑀭𑀻𑀭𑀫𑀸𑀦𑀲𑁂;

𑀞𑀧𑁂𑀲𑀺 𑀯𑁂𑀚𑁆𑀚𑁂 𑀤𑀻𑀧𑀲𑁆𑀲, 𑀢𑀺𑀓𑀘𑁆𑀙𑀢𑁆𑀣 𑀫𑀦𑀸𑀕𑀢𑁂.

𑀧𑀜𑁆𑀘𑀯𑀻𑀲𑀢𑀺𑀳𑀢𑁆𑀣𑁂𑀦, 𑀧𑀸𑀲𑀸𑀤𑁂 𑀦𑁄𑀧𑀲𑁄𑀪𑀺𑀢𑀁;

𑀫𑀳𑀸𑀯𑀺𑀳𑀸𑀭𑁂𑀫𑁄𑀭𑀯𑁆𑀳-𑀧𑀭𑀺𑀯𑁂𑀡𑀫𑀓𑀸𑀭𑀬𑀺.

𑀲𑀫𑀡𑀁 𑀕𑁄𑀴𑀧𑀸𑀦𑀼𑀜𑁆𑀘, 𑀅𑀤𑀸 𑀕𑀸𑀫𑀤𑁆𑀯𑀬𑀁 𑀢𑀳𑀺𑀁;

𑀥𑀫𑁆𑀫𑀖𑀸𑀲𑀓 𑀪𑀺𑀓𑁆𑀔𑀽𑀦𑀁, 𑀪𑁄𑀕𑁂 𑀓𑀧𑁆𑀧𑀺𑀬𑀓𑀸𑀭𑀓𑁂.

𑀯𑀺𑀳𑀸𑀭𑁂 𑀧𑀭𑀺𑀯𑁂𑀡𑁂 𑀘, 𑀲𑀫𑁆𑀧𑀦𑁆𑀦 𑀘𑀢𑀼𑀧𑀘𑁆𑀘𑀬𑁂;

𑀯𑀸𑀧𑀺𑀬𑁄 𑀤𑀸𑀦𑀲𑀸𑀮𑀸𑀬𑁄, 𑀧𑀝𑀺𑀫𑀸𑀬𑁄𑀘 𑀓𑀸𑀭𑀬𑀺.

𑀢𑀲𑁆𑀲𑁂𑀯 𑀭𑀜𑁆𑀜𑁄 𑀭𑀚𑁆𑀚𑀫𑁆𑀳𑀺, 𑀫𑀳𑀸𑀥𑀫𑁆𑀫𑀓𑀣𑀻𑀬𑀢𑀺;

𑀲𑀼𑀢𑁆𑀢𑀸𑀦𑀺 𑀧𑀭𑀺𑀯𑀢𑁆𑀢𑁂𑀲𑀺, 𑀲𑀻𑀳𑀴𑀸𑀬𑀦𑀺𑀭𑀼𑀢𑁆𑀢𑀺𑀬𑀸.

𑀅𑀪𑀻𑀢𑀺 𑀧𑀼𑀢𑁆𑀢𑀸 𑀢𑀲𑁆𑀲𑀸’𑀲𑀼𑀁, 𑀲𑀽𑀭𑀸𑀯𑀺𑀭𑀗𑁆𑀕𑀭𑀽𑀧𑀺𑀦𑁄;

𑀅𑀲𑀻𑀢𑀺𑀬𑀸 𑀲𑀸𑀯𑀓𑀸𑀦𑀁, 𑀦𑀸𑀫𑀓𑀸𑀬𑀺𑀧𑀤𑀲𑁆𑀲𑀦𑀸.

𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀦𑀸𑀫𑁂𑀳𑀺, 𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀩𑀼𑀤𑁆𑀥𑀤𑀸𑀲𑁄 𑀲𑀲𑀫𑁆𑀩𑀼𑀤𑁆𑀥-𑀭𑀸𑀚𑀸𑀯𑀺𑀬 𑀯𑀺𑀭𑁄𑀘𑀣.

𑀏𑀯𑀁 𑀓𑀢𑁆𑀯𑀸 𑀳𑀺𑀢𑀁𑀤𑀻𑀧-𑀯𑀻𑀲𑀻𑀦𑀁 𑀢𑀺𑀤𑀺𑀯𑀁 𑀕𑀢𑁄;

𑀯𑀲𑁆𑀲𑁂 𑀏𑀓𑀽𑀦𑀢𑀺𑀁𑀲𑀫𑁆𑀳𑀺, 𑀩𑀼𑀤𑁆𑀥𑀤𑀸𑀲𑁄 𑀦𑀭𑀸𑀥𑀺𑀧𑁄.

𑀢𑀢𑁄 𑀚𑁂𑀝𑁆𑀞𑀲𑀼𑀢𑁄 𑀢𑀲𑁆𑀲, 𑀉𑀧𑀢𑀺𑀲𑁆𑀲𑁄’𑀲𑀺 𑀪𑀽𑀧𑀢𑀺;

𑀲𑀩𑁆𑀩𑀭𑀸𑀚𑀕𑀼𑀡𑁄𑀧𑁂𑀲𑁄, 𑀦𑀺𑀘𑁆𑀘𑀲𑀻𑀮𑁄 𑀫𑀳𑀸𑀤𑀬𑁄.

𑀤𑀲𑀸𑀧𑀼𑀜𑁆𑀜𑀓𑁆𑀭𑀺𑀬𑀸𑀳𑀺𑀢𑁆𑀯𑀸, 𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀸’𑀤𑀻𑀬𑀺;

𑀭𑀸𑀚𑀥𑀫𑁆𑀫𑁂𑀘 𑀧𑀽𑀭𑁂𑀲𑀺, 𑀭𑀸𑀚𑀧𑀸𑀭𑀫𑀺𑀢𑀸 𑀤𑀲.

𑀕𑀡𑁆𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺, 𑀘𑀣𑀽𑀳𑀺 𑀘 𑀘𑀢𑀼𑀤𑁆𑀤𑀺𑀲𑀁;

𑀫𑀳𑀸𑀧𑀸𑀴𑀺𑀫𑁆𑀳𑀺 𑀤𑀸𑀧𑁂𑀲𑀺, 𑀭𑀸𑀚𑀸𑀭𑀸𑀚𑀸𑀦𑀼𑀪𑁄𑀚𑀦𑀁.

𑀉𑀢𑁆𑀢𑀭𑀫𑁆𑀳𑀺 𑀤𑀺𑀲𑀸𑀪𑀸𑀕𑁂, 𑀘𑁂𑀢𑀺𑀬𑀫𑁆𑀳𑀸 𑀢𑀼 𑀫𑀗𑁆𑀕𑀮𑀸;

𑀣𑀽𑀧𑀜𑁆𑀘 𑀧𑀝𑀺𑀫𑀸𑀕𑁂𑀳𑀁, 𑀧𑀝𑀺𑀫𑀜𑁆𑀘𑀸’𑀧𑀺 𑀓𑀸𑀭𑀬𑀺.

𑀓𑀭𑁄𑀦𑁆𑀢𑁄 𑀢𑀜𑁆𑀘 𑀲𑁄 𑀭𑀸𑀚𑀸, 𑀫𑀸𑀔𑀺𑀚𑁆𑀚𑀦𑁆𑀢𑀼 𑀚𑀦𑀸 𑀇𑀢𑀺;

𑀓𑀸𑀭𑀸𑀧𑁂𑀲𑀺 𑀓𑀼𑀫𑀸𑀭𑁂𑀳𑀺, 𑀤𑀸𑀧𑁂𑀢𑁆𑀯𑀸 𑀕𑀼𑀴𑀓𑀡𑁆𑀟𑀼𑀮𑀁.

𑀭𑀸𑀚𑀼𑀧𑁆𑀧𑀮𑀯𑁆𑀳𑀬𑀁 ¶ 𑀕𑀺𑀚𑁆𑀛-𑀓𑀽𑀝𑀁 𑀧𑁄𑀓𑁆𑀔𑀭𑀧𑀸𑀲𑀬𑀁;

𑀯𑀸𑀮𑀸𑀳𑀲𑁆𑀲𑀜𑁆𑀘 𑀅𑀫𑁆𑀩𑀼𑀝𑁆𑀞𑀺𑀁, 𑀕𑁄𑀡𑁆𑀟𑀺𑀕𑁄𑀫𑀫𑁆𑀳𑀺 𑀯𑀸𑀧𑀺𑀓𑀁.

𑀯𑀺𑀳𑀸𑀭𑀁 𑀔𑀡𑁆𑀟𑀭𑀸𑀚𑀺𑀜𑁆𑀘, 𑀯𑀸𑀧𑀺𑀬𑁄 𑀘 𑀣𑀺𑀭𑁄𑀤𑀺𑀓𑀸;

𑀅𑀧𑁆𑀧𑀫𑀸𑀡𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀓𑀸𑀭𑀸𑀧𑁂𑀲𑀺 𑀢𑀳𑀺𑀁 𑀢𑀳𑀺𑀁.

𑀯𑀲𑁆𑀲𑀸𑀫𑀸𑀦𑁂𑀧𑀺 𑀲𑁄 𑀯𑀲𑁆𑀲𑁂, 𑀲𑀬𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑀓𑁄;

𑀓𑁂𑀯𑀮𑀁 𑀧𑀭𑀺𑀡𑀸𑀫𑁂𑀲𑀺, 𑀭𑀢𑁆𑀢𑀺𑀁 ‘‘𑀔𑁂𑀤𑁄 𑀚𑀦𑀲𑁆𑀲𑀻’’𑀢𑀺.

𑀜𑀢𑁆𑀯𑀸 𑀅𑀫𑀘𑁆𑀘𑁄 𑀢𑀁 𑀦𑁂𑀢𑁆𑀯𑀸, 𑀉𑀬𑁆𑀬𑀸𑀦𑀁 𑀚𑀸𑀤𑀬𑀻𑀖𑀭𑀁;

𑀏𑀯𑀁 𑀧𑀝𑀺𑀘𑁆𑀘 𑀅𑀢𑁆𑀢𑀸𑀦𑀁, 𑀤𑀼𑀓𑁆𑀔𑀁 𑀦𑀸𑀓𑀸𑀲𑀺 𑀧𑀸𑀡𑀺𑀦𑀁.

𑀓𑀸𑀮𑁂 𑀢𑀲𑁆𑀲𑀸’𑀲𑀻 𑀤𑀼𑀓𑁆𑀔𑀺𑀢𑁆𑀢-𑀭𑁄𑀕𑀤𑀼𑀓𑁆𑀔𑁂𑀳𑀺 𑀧𑀻𑀴𑀺𑀢𑁄;

𑀤𑀻𑀧𑁄 𑀤𑀻𑀧𑁄 𑀧𑀫𑁄𑀧𑀸𑀧-𑀢𑀫𑀲𑁄 𑀲𑁄 𑀲𑀼𑀫𑀸𑀦𑀲𑁄.

𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀢𑁆𑀣’’𑀓𑀺𑀁𑀪𑀦𑁆𑀢𑁂, 𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀪𑀬𑀤𑁆𑀤𑀺𑀢𑁂;

𑀮𑁄𑀓𑁂 𑀮𑁄𑀓𑀳𑀺𑀢𑀁 𑀦𑀢𑁆𑀣𑀺, 𑀓𑀢𑀁 𑀓𑀺𑀜𑁆𑀘𑀺 𑀫𑀳𑁂𑀲𑀻𑀦𑀸.

𑀕𑀳𑁆𑀖𑀸𑀭𑁄𑀳𑀡𑀲𑀼𑀢𑁆𑀢𑀲𑁆𑀲, 𑀉𑀧𑁆𑀧𑀢𑁆𑀢𑀺𑀁𑀢𑀲𑁆𑀲 𑀦𑀺𑀤𑁆𑀤𑀺𑀲𑀼𑀁;

𑀲𑀼𑀢𑁆𑀯𑀸 𑀢𑀁 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀩𑀺𑀫𑁆𑀩𑀁 𑀲𑀫𑁆𑀩𑀼𑀤𑁆𑀥𑀥𑀸𑀢𑀼𑀦𑁄.

𑀓𑀢𑁆𑀯𑀸 𑀲𑀢𑁆𑀣𑀼𑀲𑀺𑀮𑀸𑀧𑀢𑁆𑀢𑀁, 𑀲𑁄𑀤𑀓𑀁 𑀧𑀸𑀡𑀺𑀲𑀫𑁆𑀧𑀼𑀝𑁂;

𑀞𑀧𑁂𑀢𑁆𑀯𑀸 𑀢𑀲𑁆𑀲 𑀢𑁂 𑀭𑀽𑀧-𑀫𑀸𑀭𑁄𑀧𑁂𑀢𑁆𑀯𑀸 𑀫𑀳𑀸𑀭𑀣𑀁.

𑀲𑀬𑀁 𑀲𑀻𑀮𑀁 𑀲𑀫𑀸𑀤𑀸𑀬, 𑀲𑀫𑀸𑀤𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀅𑀪𑀬𑀁 𑀢𑀫𑁆𑀩𑀧𑀸𑀡𑀺𑀦𑀁.

𑀅𑀮𑀗𑁆𑀓𑀢𑁆𑀯𑀸 𑀘 𑀦𑀕𑀭𑀁, 𑀤𑁂𑀯𑀮𑁄𑀓𑀫𑀦𑁄𑀳𑀭𑀁;

𑀤𑀻𑀧𑀯𑀸𑀲𑀻𑀳𑀺 𑀲𑀩𑁆𑀩𑁂𑀳𑀺, 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀸𑀭𑀺𑀢𑁄.

𑀑𑀢𑀭𑀺𑀢𑁆𑀣 𑀫𑀳𑀸𑀯𑀻𑀣𑀺𑀁, 𑀪𑀺𑀓𑁆𑀔𑀽 𑀢𑀢𑁆𑀣 𑀲𑀫𑀸𑀕𑀢𑀸;

𑀪𑀡𑀦𑁆𑀢𑀸 𑀭𑀢𑀦𑀁 𑀲𑀼𑀢𑁆𑀢𑀁, 𑀲𑀺𑀜𑁆𑀘𑀫𑀸𑀦𑀸 𑀚𑀮𑀁 𑀢𑀣𑀸.

𑀭𑀸𑀚𑀕𑁂𑀳𑀦𑁆𑀢𑀺𑀓𑁂 𑀯𑀻𑀢𑀺-𑀫𑀕𑁆𑀕𑁂 𑀧𑀸𑀓𑀸𑀭𑀲𑀦𑁆𑀢𑀺𑀓𑁂;

𑀯𑀺𑀘𑀭𑀺𑀁𑀲𑀼 𑀢𑀺𑀬𑀸𑀫𑀦𑁆𑀢𑁂, 𑀓𑀼𑀭𑀼𑀫𑀸𑀦𑀸 𑀧𑀤𑀓𑁆𑀔𑀺𑀡𑀁.

𑀪𑀺𑀚𑁆𑀚𑀫𑀸𑀦𑁂’𑀭𑀼𑀡𑁂 𑀯𑀲𑁆𑀲𑀺, 𑀫𑀳𑀸𑀫𑁂𑀖𑁄 𑀫𑀳𑀻𑀢𑀮𑁂;

𑀭𑁄𑀕𑀸𑀢𑀼𑀭𑀸𑀘 𑀲𑀩𑁆𑀩𑁂𑀧𑀺, 𑀲𑀼𑀔𑀺𑀢𑀸𑀓𑀁𑀲𑀼 𑀉𑀲𑁆𑀲𑀯𑀁.

‘‘𑀬𑀤𑀸 𑀤𑀼𑀩𑁆𑀪𑀺𑀓𑁆𑀔𑀭𑁄𑀕𑀸𑀤𑀺-𑀪𑀬𑀁 𑀤𑀻𑀧𑀫𑁆𑀳𑀺 𑀳𑁂𑀲𑁆𑀲𑀢𑀺;

𑀏𑀯𑀫𑁂𑀯 𑀓𑀭𑁄𑀦𑁆𑀢𑀽’’𑀢𑀺, 𑀦𑀺𑀬𑁄𑀚𑁂𑀲𑀺 𑀦𑀭𑀸𑀥𑀺𑀧𑁄.

𑀆𑀭𑀼𑀴𑁆𑀳𑁄 ¶ 𑀘𑁂𑀢𑀺𑀬𑀁 𑀓𑀼𑀦𑁆𑀢-𑀓𑀺𑀧𑀺𑀮𑁆𑀮𑀸𑀤𑀺𑀫𑀯𑁂𑀓𑁆𑀔𑀺𑀬;

𑀧𑀼𑀘𑁆𑀙𑀺𑀢𑁆𑀯𑀸 𑀫𑁄𑀭𑀧𑀺𑀜𑁆𑀘𑁂𑀦, ‘‘𑀲𑀡𑀺𑀓𑀁 𑀬𑀦𑁆𑀢𑀼𑀯𑀦𑀁𑀢𑀺 𑀘.

𑀲𑀗𑁆𑀔𑀁 𑀲𑁄𑀤𑀓𑀫𑀸𑀤𑀸𑀬, 𑀘𑀭𑀢𑀸’𑀲𑀦𑀥𑁄𑀯𑀦𑁂;

𑀤𑀓𑁆𑀔𑀺𑀡𑀧𑀭𑀺𑀢𑁄𑀡𑀫𑁆𑀳𑀺, 𑀓𑀸𑀭𑁂𑀢𑁆𑀯𑀸 𑀭𑀸𑀚𑀕𑁂𑀳𑀢𑁄.

𑀉𑀧𑁄𑀲𑀣𑀖𑀭𑀁 𑀩𑀼𑀤𑁆𑀥-𑀧𑀝𑀺𑀫𑀸𑀕𑁂𑀳 𑀫𑁂𑀯 𑀘;

𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀉𑀬𑁆𑀬𑀸𑀦𑀜𑁆𑀘 𑀫𑀦𑁄𑀭𑀫𑀁.

𑀘𑀸𑀢𑀼𑀤𑁆𑀤𑀲𑀺𑀁𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀫𑀼𑀧𑀸𑀕𑀢𑀁.

𑀉𑀧𑁄𑀲𑀣𑀁𑀲𑀫𑀸𑀤𑀸𑀬, 𑀲𑀸𑀧𑀤𑀸𑀦𑀁 𑀢𑀳𑀁 𑀯𑀲𑀻;

𑀬𑀸𑀯𑀚𑀻𑀯𑀜𑁆𑀘 𑀲𑁄 𑀪𑀼𑀜𑁆𑀚𑀺, 𑀫𑀳𑀸𑀧𑀸𑀴𑀺𑀫𑁆𑀳𑀺 𑀪𑁄𑀚𑀦𑀁.

𑀘𑀭𑀦𑁆𑀢𑁄𑀘𑀓𑀮𑀦𑁆𑀤𑀸𑀦 𑀫𑀼𑀬𑁆𑀬𑀸𑀦𑁂 𑀪𑀢𑁆𑀢𑀫𑀢𑁆𑀢𑀦𑁄;

𑀓𑀢𑁆𑀯𑀸 𑀦𑀺𑀯𑀸𑀧𑀁 𑀤𑀸𑀧𑁂𑀲𑀺, 𑀢𑀤𑀚𑁆𑀚𑀸𑀧𑀺 𑀘 𑀯𑀢𑁆𑀢𑀢𑀺.

𑀘𑁄𑀭𑀁 𑀯𑀚𑁆𑀚𑀫𑀼𑀧𑀦𑀻𑀢𑀁, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀙𑀯𑀁 𑀲𑀼𑀲𑀸𑀦𑀁 𑀆𑀦𑁂𑀢𑁆𑀯𑀸, 𑀔𑀺𑀧𑀺𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀬𑀁.

𑀤𑀢𑁆𑀯𑀸 𑀥𑀫𑀁 𑀧𑀮𑀸𑀧𑁂𑀢𑁆𑀯𑀸, 𑀘𑁄𑀭𑀁 𑀭𑀢𑁆𑀢𑀺𑀬𑀫𑀼𑀕𑁆𑀕𑀢𑁂;

𑀲𑀽𑀭𑀺𑀬𑁂 𑀓𑀼𑀚𑁆𑀛𑀺𑀢𑁄 𑀘𑁄𑀭𑀁-𑀯𑀺𑀬𑀛𑀸𑀧𑀬𑀺 𑀢𑀁 𑀙𑀯𑀁.

𑀅𑀓𑀸 𑀤𑀻𑀧𑀫𑁆𑀳𑀺 𑀲𑀩𑁆𑀩𑁂𑀲𑀁, 𑀘𑁂𑀢𑀺𑀬𑀸𑀦𑀁 𑀫𑀳𑀸𑀫𑀳𑀁;

𑀣𑀽𑀧𑀸𑀭𑀸𑀫𑁂 𑀘 𑀣𑀽𑀧𑀲𑁆𑀲, 𑀳𑁂𑀫𑀘𑀼𑀫𑁆𑀩𑀝𑀓𑀜𑁆𑀘𑀼𑀓𑀁.

𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺, 𑀓𑀢𑁆𑀯𑀸 𑀯𑀜𑁆𑀘𑀼𑀁𑀔𑀡𑀫𑁆𑀧𑀺𑀲𑁄;

𑀓𑀢𑁆𑀯𑀸 𑀧𑀼𑀜𑁆𑀜𑀫𑀼𑀧𑀸𑀕𑀜𑁆𑀙𑀺, 𑀤𑁂𑀯𑀭𑀸𑀚𑀲𑀳𑀩𑁆𑀬𑀢𑀁.

𑀭𑀜𑁆𑀜𑁄 𑀢𑀲𑁆𑀲 𑀓𑀦𑀺𑀝𑁆𑀞𑁂𑀦, 𑀫𑀳𑀸𑀦𑀸𑀫𑁂𑀦 𑀯𑀮𑁆𑀮𑀪𑀸;

𑀤𑁂𑀯𑀻 𑀲𑀢𑁆𑀣𑀁 𑀦𑀺𑀧𑀸𑀢𑁂𑀢𑁆𑀯𑀸, 𑀢𑀫𑀞𑀸𑀦𑀫𑁆𑀳𑀺 𑀫𑀸𑀭𑀬𑀺.

𑀧𑀩𑁆𑀩𑀚𑀺𑀢𑁆𑀓𑀸 𑀓𑀦𑀺𑀝𑁆𑀞𑁄 𑀲𑁄, 𑀚𑀻𑀯𑀫𑀸𑀦𑀫𑁆𑀳𑀺 𑀪𑀸𑀢𑀭𑀺;

𑀳𑀢𑁂 𑀭𑀸𑀚𑀺𑀦𑀺 𑀪𑀻𑀢𑀸𑀬, 𑀆𑀯𑀢𑁆𑀢𑀺𑀢𑁆𑀯𑀸’𑀲𑀺 𑀪𑀽𑀧𑀢𑀺.

𑀫𑀳𑁂𑀲𑀺𑀁𑀅𑀢𑁆𑀢𑀦𑁄’𑀓𑀸𑀲𑀺, 𑀫𑀳𑁂𑀲𑀺𑀁 𑀪𑀸𑀢𑀼𑀖𑀸𑀢𑀺𑀦𑀺𑀁;

𑀕𑀺𑀮𑀸𑀦𑀲𑀸𑀮𑀸 𑀓𑀸𑀭𑁂𑀲𑀺, 𑀫𑀳𑀸𑀧𑀸𑀴𑀺𑀜𑁆𑀘 𑀯𑀟𑁆𑀠𑀬𑀺.

𑀮𑁄𑀳𑀤𑁆𑀯𑀸𑀭 ¶ 𑀭𑀮𑀕𑁆𑀕𑀸𑀫-𑀓𑁄𑀝𑀺𑀧𑀲𑁆𑀲𑀯𑀦𑀯𑁆𑀳𑀬𑁂;

𑀢𑀬𑁄 𑀯𑀺𑀳𑀸𑀭𑁂 𑀓𑀢𑁆𑀯𑀸’𑀤𑀸, 𑀪𑀺𑀓𑁆𑀔𑀽𑀦𑀫𑀪𑀬𑀼𑀢𑁆𑀢𑀭𑁂.

𑀯𑀺𑀳𑀸𑀭𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀥𑀼𑀫𑀭𑀓𑁆𑀔𑀫𑁆𑀳𑀺 𑀧𑀩𑁆𑀩𑀢𑁂;

𑀫𑀳𑁂𑀲𑀺𑀬𑀸 𑀦𑀬𑁂𑀦𑀸’𑀤𑀸, 𑀪𑀺𑀓𑁆𑀔𑀽𑀦𑀁 𑀣𑁂𑀭𑀯𑀸𑀤𑀻𑀦𑀁.

𑀦𑀯𑀓𑀫𑁆𑀫𑀜𑁆𑀘 𑀚𑀺𑀡𑁆𑀡𑁂𑀲𑀼, 𑀯𑀺𑀳𑀸𑀭𑁂𑀲𑀼 𑀲𑀓𑀸𑀭𑀬𑀺;

𑀤𑀸𑀦𑀲𑀻𑀮𑀭𑀢𑁄 𑀯𑀢𑁆𑀣𑀼-𑀧𑀽𑀚𑀓𑁄 𑀘 𑀅𑀳𑀼 𑀲𑀤𑀸.

𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑀫𑁆𑀳𑀺, 𑀚𑀸𑀢𑁄 𑀩𑁆𑀭𑁄𑀳𑁆𑀫𑀡𑀫𑀸𑀡𑀯𑁄;

𑀯𑀺𑀚𑁆𑀚𑀸𑀲𑀺𑀧𑁆𑀧𑀓𑀮𑀸𑀯𑁂𑀤𑀻, 𑀢𑀻𑀲𑀼 𑀯𑁂𑀤𑁂𑀲𑀼 𑀧𑀸𑀭𑀕𑁄.

𑀲𑀫𑁆𑀫𑀸𑀯𑀺𑀜𑁆𑀜𑀸𑀢𑀲𑀫𑀬𑁄, 𑀲𑀩𑁆𑀩𑀯𑀸𑀤𑀯𑀺𑀲𑀸𑀭𑀤𑁄;

𑀯𑀸𑀤𑀢𑁆𑀣𑀺 𑀚𑀫𑁆𑀩𑀼𑀤𑀻𑀧𑀫𑁆𑀳𑀺, 𑀆𑀳𑀺𑀡𑁆𑀟𑀦𑁆𑀢𑁄 𑀧𑀯𑀸𑀤𑀺𑀓𑁄.

𑀯𑀺𑀳𑀸𑀭𑀫𑁂𑀓𑀁 𑀆𑀕𑀫𑁆𑀫, 𑀭𑀢𑁆𑀢𑀺𑀁 𑀧𑀸𑀢𑀜𑁆𑀚𑀮𑀁 𑀫𑀢𑀁;

𑀧𑀭𑀺𑀯𑀢𑁆𑀢𑁂𑀲𑀺 𑀲𑀫𑁆𑀧𑀼𑀡𑁆𑀡-𑀧𑀤𑀁 𑀲𑀼𑀧𑀭𑀺𑀫𑀡𑁆𑀟𑀮𑀁.

𑀢𑀢𑁆𑀣𑁂𑀓𑁄 𑀭𑁂𑀯𑀢𑁄𑀦𑀸𑀫, 𑀫𑀳𑀸𑀣𑁂𑀭𑁄 𑀯𑀺𑀚𑀸𑀦𑀺𑀬;

‘‘𑀫𑀳𑀸𑀧𑀜𑁆𑀜𑁄 𑀅𑀬𑀁 𑀲𑀢𑁆𑀣𑁄, 𑀤𑀫𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑁄.

‘‘𑀓𑁄 𑀦𑀼 𑀕𑀤𑁆𑀭𑀪𑀭𑀸𑀯𑁂𑀦, 𑀯𑀺𑀭𑀯𑀦𑁆𑀢𑁄’’𑀢𑀺 𑀅𑀩𑁆𑀭𑀯𑀺;

‘‘𑀕𑀤𑁆𑀭𑀪𑀸𑀦𑀁 𑀭𑀯𑁂 𑀅𑀢𑁆𑀣𑀁, 𑀓𑀺𑀁 𑀚𑀸𑀦𑀸𑀲𑀻’’𑀢𑀺 𑀆𑀳𑀢𑀁.

‘‘𑀅𑀳𑀁 𑀚𑀸𑀦𑁂’’𑀢𑀺 𑀯𑀼𑀢𑁆𑀢𑁄𑀲𑁄, 𑀑𑀢𑀸𑀭𑁂𑀲𑀺 𑀲𑀓𑀁 𑀫𑀢𑀁;

𑀯𑀼𑀢𑁆𑀢𑀁 𑀯𑀼𑀢𑁆𑀢𑀁 𑀯𑀺𑀬𑀸𑀓𑀸𑀲𑀺, 𑀯𑀺𑀭𑁄𑀥𑀫𑁆𑀧𑀺 𑀘 𑀤𑀲𑁆𑀲𑀬𑀺.

‘‘𑀢𑁂𑀦𑀳𑀺 𑀢𑁆𑀯𑀁 𑀲𑀓𑀯𑀸𑀤-𑀫𑁄𑀢𑀸𑀭𑁂𑀳𑀻’’𑀢𑀺 𑀘𑁄𑀤𑀺𑀢𑁄;

𑀧𑀸𑀴𑀺𑀫𑀸𑀳𑀸’𑀪𑀺𑀥𑀫𑁆𑀫𑀲𑁆𑀲, 𑀅𑀢𑁆𑀣𑀫𑀲𑁆𑀲 𑀦 𑀲𑁄’𑀫𑀺𑀕𑀸.

𑀆𑀳 𑀓𑀲𑁆𑀲𑁂’𑀲𑀫𑀦𑁆𑀢𑁄’𑀢𑀺, 𑀩𑀼𑀤𑁆𑀥𑀫𑀦𑁆𑀢𑁄’𑀢𑀺 𑀲𑁄𑀩𑁆𑀭𑀯𑀺;

‘‘𑀤𑁂𑀳𑀺 𑀫𑁂 𑀢’’𑀦𑁆𑀢𑀺 𑀯𑀼𑀢𑁆𑀢𑁂𑀳𑀺, ‘‘𑀕𑀡𑁆𑀳𑀼 𑀧𑀩𑁆𑀩𑀚𑁆𑀚𑀢𑀁’’𑀇𑀢𑀺.

𑀫𑀦𑁆𑀢𑀢𑁆𑀣𑀻 𑀧𑀩𑁆𑀩𑀚𑀺𑀢𑁆𑀯𑀸𑀲𑁄, 𑀉𑀕𑁆𑀕𑀡𑁆𑀳𑀺 𑀧𑀺𑀝𑀓𑀢𑁆𑀢𑀬𑀁;

‘‘𑀏𑀓𑀸𑀬𑀦𑁄 𑀅𑀬𑀁 𑀫𑀕𑁆𑀕𑁄’’, 𑀇𑀢𑀺 𑀧𑀘𑁆𑀙𑀸 𑀢𑀫𑀕𑁆𑀕𑀳𑀺.

𑀩𑀼𑀤𑁆𑀥𑀲𑁆𑀲 𑀯𑀺𑀬 𑀕𑀫𑁆𑀪𑀻𑀭-𑀖𑁄𑀲𑀢𑁆𑀢𑀸𑀢𑀁 𑀯𑀺𑀬𑀸𑀓𑀭𑀼𑀁;

‘‘𑀩𑀼𑀤𑁆𑀥𑀖𑁄𑀲𑁄’’𑀢𑀺 𑀖𑁄𑀲𑁄𑀳𑀺, 𑀩𑀼𑀤𑁆𑀥𑁄 𑀯𑀺𑀬 𑀫𑀳𑀻𑀢𑀮𑁂.

𑀢𑀢𑁆𑀣 𑀜𑀸𑀡𑁄𑀤𑀬𑀁 𑀦𑀸𑀫, 𑀓𑀢𑁆𑀯𑀸 𑀫𑀓𑀭𑀡𑀁 𑀢𑀤𑀸;

𑀥𑀫𑁆𑀫𑀲𑀗𑁆𑀕𑀡𑀻𑀬𑀸’𑀓𑀸𑀲𑀺, 𑀓𑀘𑁆𑀙𑀁 𑀲𑁄 𑀅𑀝𑁆𑀞𑀲𑀸𑀮𑀺𑀦𑀺𑀁.

𑀧𑀢𑀺𑀢𑁆𑀢𑀝𑁆𑀞𑀓𑀣𑀜𑁆𑀘𑁂𑀯 ¶ , 𑀓𑀸𑀭𑀸𑀫𑀸𑀭𑀪𑀺𑀩𑀼𑀤𑁆𑀥𑀺𑀫𑀸;

𑀢𑀁 𑀤𑀺𑀲𑁆𑀯𑀸 𑀭𑁂𑀯𑀢𑁄 𑀣𑁂𑀭𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀼𑀯𑀺.

𑀧𑀸𑀴𑀺𑀫𑀢𑁆𑀢𑀇𑀥𑀸𑀦𑀺𑀢𑀁, 𑀦𑀢𑁆𑀣𑀺 𑀅𑀝𑁆𑀞𑀓𑀣𑀸 𑀇𑀥;

𑀢𑀣𑀸𑀘𑀭𑀺𑀬𑀯𑀸𑀤𑀸 𑀘, 𑀪𑀺𑀦𑁆𑀦𑀭𑀽𑀧𑀸 𑀦 𑀯𑀺𑀚𑁆𑀚𑀭𑁂.

𑀲𑀻𑀳𑀴𑀸𑀝𑁆𑀞𑀓𑀣𑀸 𑀲𑀼𑀤𑁆𑀥𑀸, 𑀫𑀳𑀺𑀦𑁆𑀤𑁂𑀦 𑀫𑀢𑀻𑀫𑀢𑀸;

𑀲𑀁𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁.

𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀕𑀻𑀢𑀜𑁆𑀘, 𑀓𑀣𑀸𑀫𑀕𑁆𑀕𑀁 𑀲𑀫𑁂𑀓𑁆𑀔𑀺𑀬;

𑀏𑀓𑀸 𑀲𑀻𑀳𑀴𑀪𑀸𑀲𑀸𑀬, 𑀲𑀻𑀳𑀴𑁂𑀲𑀼 𑀧𑀯𑀢𑁆𑀢𑀢𑀺.

𑀢𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀼𑀢𑁆𑀯𑀸 𑀢𑀁, 𑀫𑀸𑀕𑀥𑀸𑀦𑀁 𑀦𑀺𑀭𑀼𑀢𑁆𑀢𑀺𑀬𑀸;

𑀧𑀭𑀺𑀯𑀢𑁆𑀢𑁂𑀲𑀺 𑀲𑀸 𑀳𑁄𑀢𑀺, 𑀲𑀩𑁆𑀩𑀮𑁄𑀓𑀳𑀺𑀢𑀸 𑀯𑀳𑀸.

𑀏𑀯𑀁 𑀯𑀼𑀢𑁆𑀢𑁄 𑀧𑀲𑀦𑁆𑀦𑁄 𑀲𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄𑀇𑀫𑀁;

𑀤𑀻𑀧𑀫𑀸𑀕𑀸 𑀇𑀫𑀲𑁆𑀲𑁂𑀯, 𑀭𑀜𑁆𑀜𑁄𑀓𑀸𑀮𑁂 𑀫𑀳𑀸𑀫𑀢𑀺.

𑀫𑀳𑀸𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑁄, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀸𑀥𑀽𑀦𑀁;

𑀫𑀳𑀸𑀧𑀥𑀸𑀦𑀖𑀭𑀁 𑀕𑀦𑁆𑀢𑁆𑀯𑀸, 𑀲𑀗𑁆𑀖𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀸.

𑀲𑀻𑀳𑀴𑀝𑁆𑀞𑀓𑀣𑀸 𑀲𑀼𑀤𑁆𑀥𑀸, 𑀣𑁂𑀭𑀯𑀸𑀤𑀜𑁆𑀘 𑀲𑀩𑁆𑀩𑀲𑁄;

‘‘𑀥𑀫𑁆𑀫𑀲𑀸𑀫𑀺𑀲𑁆𑀲 𑀏𑀲𑁄𑀯, 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀦𑀺𑀘𑁆𑀙𑀺𑀬.

𑀢𑀢𑁆𑀣 𑀲𑀗𑁆𑀖𑀁 𑀲𑀫𑀸𑀦𑁂𑀢𑁆𑀯𑀸, ‘‘𑀓𑀸𑀢𑀼𑀫𑀝𑁆𑀞𑀓𑀣𑀸𑀫𑀫;

𑀧𑁄𑀢𑁆𑀣𑀓𑁂 𑀤𑁂𑀣 𑀲𑀩𑁆𑀩𑁂’’𑀢𑀺, 𑀆𑀳 𑀯𑀻𑀫𑀁𑀲𑀺𑀢𑀼𑀁 𑀲𑀢𑀁.

𑀲𑀗𑁆𑀖𑁄 𑀕𑀸𑀣𑀸𑀤𑁆𑀯𑀬𑀁 𑀢𑀲𑁆𑀲𑀸-𑀤𑀸𑀲𑀺 ‘‘𑀲𑀸𑀫𑀢𑁆𑀢𑀺𑀬𑀁 𑀢𑀯;

𑀏𑀢𑁆𑀣 𑀤𑀲𑁆𑀲𑁂𑀳𑀺 𑀢𑀁 𑀤𑀺𑀲𑁆𑀯𑀸, 𑀲𑀩𑁆𑀩𑁂 𑀤𑁂𑀫𑀸’’𑀢𑀺 𑀧𑁄𑀢𑁆𑀣𑀓𑁂.

𑀧𑀺𑀝𑀓𑀢𑁆𑀢𑀬𑀫𑁂𑀢𑁆𑀣𑁂𑀯, 𑀲𑀤𑁆𑀥𑀺𑀫𑀝𑁆𑀞𑀓𑀣𑀸𑀬 𑀲𑁄;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀦𑀸𑀫𑀸𑀓𑀸, 𑀲𑀗𑁆𑀕𑀳𑁂𑀢𑁆𑀯𑀸 𑀲𑀫𑀸𑀲𑀢𑁄.

𑀢𑀢𑁄 𑀲𑀗𑁆𑀖𑀁 𑀲𑀫𑀼𑀳𑁂𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀫𑀢𑀓𑁄𑀯𑀺𑀤𑀁;

𑀫𑀳𑀸𑀩𑁄𑀥𑀺𑀲𑀫𑀻𑀧𑀫𑁆𑀳𑀺, 𑀲𑁄 𑀢𑀁 𑀯𑀸𑀘𑁂𑀢𑀼𑀫𑀸𑀭𑀪𑀺.

𑀤𑁂𑀯𑀢𑀸 𑀢𑀲𑁆𑀲 𑀦𑁂𑀧𑀼𑀜𑁆𑀜𑀁, 𑀧𑀓𑀸𑀲𑁂𑀢𑀼𑀁 𑀫𑀳𑀸𑀚𑀦𑁂;

𑀙𑀸𑀤𑁂𑀲𑀼𑀁 𑀧𑁄𑀢𑁆𑀣𑀓𑀁𑀲𑁄’𑀬𑀺, 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀁 𑀅𑀓𑀸.

𑀯𑀸𑀘𑁂𑀢𑀼𑀁 𑀢𑀢𑀺𑀬𑁂 𑀯𑀸𑀭𑁂, 𑀧𑁄𑀢𑁆𑀣𑀓𑁂 𑀲𑀫𑀼𑀤𑀸𑀳𑀝𑁂;

𑀧𑁄𑀢𑁆𑀣𑀓𑀤𑁆𑀯𑀬𑀫𑀜𑁆𑀜𑀫𑁆𑀧𑀺, 𑀲𑀡𑁆𑀞𑀸𑀧𑁂𑀲𑀼𑀁 𑀢𑀳𑀺𑀁 𑀫𑀭𑀽.

𑀯𑀸𑀘𑀬𑀺𑀁𑀲𑀼 ¶ 𑀢𑀤𑀸𑀪𑀺𑀓𑁆𑀔𑀽, 𑀧𑁄𑀢𑁆𑀣𑀓𑀢𑁆𑀢𑀬 𑀫𑁂𑀓𑀢𑁄;

𑀕𑀦𑁆𑀣𑀢𑁄 𑀅𑀢𑁆𑀣𑀢𑁄 𑀘𑀸𑀧𑀺, 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀯𑀸.

𑀣𑁂𑀭𑀯𑀸𑀤𑁂𑀳𑀺 𑀧𑀸𑀴𑀺𑀳𑀺, 𑀧𑀤𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀘;

𑀅𑀜𑁆𑀜𑀢𑁆𑀣𑀢𑁆𑀢𑀫𑀳𑀽𑀦𑁂𑀯, 𑀧𑁄𑀢𑁆𑀣𑀢𑁆𑀣𑀓𑁂𑀲𑀼𑀧𑀺 𑀢𑀻𑀲𑀼𑀧𑀺.

𑀅𑀣 𑀉𑀕𑁆𑀖𑁄𑀲𑀬𑀺 𑀲𑀗𑁆𑀖𑁄, 𑀢𑀼𑀝𑁆𑀞𑀳𑀝𑁆𑀞𑁄 𑀢𑀺𑀲𑁂𑀲𑀢𑁄;

‘‘𑀦𑀺𑀲𑁆𑀲𑀁𑀲𑀬𑀸’𑀬𑀁 𑀫𑁂𑀢𑁆𑀢𑁂𑀬𑁆𑀬𑁄’’, 𑀇𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁.

𑀲𑀤𑁆𑀥𑀺𑀫𑀝𑁆𑀞𑀓𑀣𑀸𑀬𑀸’𑀤𑀸, 𑀧𑁄𑀢𑁆𑀣𑀓𑁂 𑀧𑀺𑀝𑀓𑀢𑁆𑀢𑀬𑁂;

𑀕𑀦𑁆𑀣𑀓𑀸𑀭𑁂 𑀯𑀲𑀦𑁆𑀢𑁄 𑀲𑁄, 𑀯𑀺𑀳𑀸𑀭𑁂 𑀤𑀼𑀭𑀲𑀗𑁆𑀓𑀭𑁂.

𑀧𑀭𑀺𑀯𑀢𑁆𑀢𑁂𑀲𑀺 𑀲𑀩𑁆𑀩𑀸𑀧𑀺, 𑀲𑀻𑀳𑀴𑀝𑁆𑀞𑀓𑀣𑀸 𑀢𑀤𑀸;

𑀲𑀩𑁆𑀩𑁂𑀲𑀁 𑀫𑀽𑀮𑀪𑀸𑀲𑀸𑀬, 𑀫𑀸𑀕𑀥𑀸𑀬 𑀦𑀺𑀭𑀼𑀢𑁆𑀢𑀺𑀬𑀸.

‘‘𑀲𑀢𑁆𑀢𑀸𑀦𑀁 𑀲𑀩𑁆𑀩𑀪𑀸𑀲𑀸𑀦𑀁, 𑀲𑀸 𑀅𑀳𑁄𑀲𑀺 𑀳𑀺𑀢𑀸𑀯𑀳𑀸;

𑀣𑁂𑀭𑀺𑀬𑀸 𑀘𑀭𑀺𑀬𑀸𑀲𑀩𑁆𑀩𑁂, 𑀧𑀸𑀴𑀺𑀁𑀯𑀺𑀬 𑀢𑀫𑀕𑁆𑀕𑀬𑁆𑀳𑀁.

𑀅𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼, 𑀕𑀳𑁂𑀢𑀼 𑀧𑀭𑀺𑀦𑀺𑀝𑁆𑀞𑀺𑀢𑀺𑀁;

𑀯𑀦𑁆𑀤𑀺𑀢𑀼𑀁 𑀲𑁄 𑀫𑀳𑀸𑀩𑁄𑀥𑀺𑀁, 𑀚𑀫𑁆𑀩𑀼𑀤𑀻𑀧𑀫𑀼𑀧𑀸𑀕𑀫𑀺.

𑀲𑀼𑀢𑁆𑀯𑀸 𑀤𑁆𑀯𑀸𑀯𑀻𑀲𑀯𑀲𑁆𑀲𑀸𑀦𑀺, 𑀫𑀳𑀸𑀦𑀸𑀫𑁄 𑀫𑀳𑀸𑀫𑀳𑀺𑀁;

𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀘𑀺𑀢𑁆𑀭𑀸𑀦𑀺, 𑀬𑀣𑀸 𑀓𑀫𑁆𑀫𑀫𑀼𑀕𑀸𑀕𑀫𑀺.

𑀲𑀩𑁆𑀩𑁂’𑀧𑁂 𑀢𑁂 𑀥𑀭𑀡𑀻𑀧𑀢𑀬𑁄 𑀫𑀘𑁆𑀘𑀼𑀫𑀘𑁆𑀘𑁂𑀢𑀼𑀫𑀦𑁆𑀢𑁂,

𑀦𑁄 𑀲𑀓𑁆𑀔𑀺𑀁 𑀲𑀽𑀧𑀘𑀺𑀢𑀲𑀼𑀔𑀩𑀮𑀸𑀲𑀸𑀥𑀼 𑀲𑀫𑁆𑀧𑀦𑁆𑀦𑀪𑁄𑀕𑁄;

𑀏𑀯𑀁 𑀲𑀩𑁆𑀩𑁂 𑀦𑀺𑀥𑀦𑀯𑀲𑀕𑀸 𑀳𑁄𑀦𑁆𑀢𑀺 𑀲𑀢𑁆𑀢𑀸’𑀢𑀺 𑀦𑀺𑀘𑁆𑀘𑀁,

𑀭𑀸𑀕𑀁 𑀲𑀫𑁆𑀫𑀸 𑀯𑀺𑀦𑀬𑀢𑀼𑀥𑀦𑁂 𑀚𑀻𑀯𑀺𑀢𑁂 𑀘𑀸𑀧𑀺 𑀥𑀻𑀫𑀸.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀢𑁆𑀢𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀫𑀳𑀸𑀦𑀸𑀫 ¶ 𑀲𑀼𑀢𑁄 𑀆𑀲𑀺, 𑀤𑀫𑀺𑀴𑀻 𑀓𑀼𑀘𑁆𑀙𑀺𑀲𑀫𑁆𑀪𑀯𑁄;

𑀲𑁄𑀢𑁆𑀣𑀺𑀲𑁂𑀦𑁄, 𑀢𑀣𑀸𑀲𑀗𑁆𑀖𑁄-𑀥𑀻𑀢𑀸 𑀘𑀸’𑀲𑀺 𑀫𑀳𑁂𑀲𑀺𑀬𑀸.

𑀲𑁄𑀢𑁆𑀣𑀺𑀲𑁂𑀦𑁄 𑀢𑀤𑀸 𑀭𑀚𑁆𑀚𑀁, 𑀧𑀢𑁆𑀯𑀸 𑀲𑀗𑁆𑀖𑀬𑀦𑀸𑀲𑀺𑀢𑁄;

𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂 𑀪𑁂𑀭𑀺𑀁, 𑀘𑀭𑀸𑀧𑁂𑀢𑁆𑀯𑀸 𑀢𑀤𑀸 𑀢𑀼 𑀲𑀸.

𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲𑀤𑀸, 𑀙𑀢𑁆𑀢𑀕𑁆𑀕𑀸𑀳𑀓𑀚𑀦𑁆𑀢𑀼𑀦𑁄;

𑀙𑀢𑁆𑀢𑀕𑁆𑀕𑀸𑀳𑀓𑀯𑀸𑀧𑀺𑀁 𑀲𑁄, 𑀓𑀢𑁆𑀯𑀸 𑀲𑀁𑀯𑀘𑁆𑀙𑀭𑁂 𑀫𑀢𑁄.

𑀅𑀣 𑀫𑀘𑁆𑀘𑁄 𑀫𑀳𑀸𑀧𑀜𑁆𑀜𑁄, 𑀲𑀳𑀸𑀬𑁄 𑀢𑀲𑁆𑀲 𑀢𑀁 𑀫𑀢𑀁;

𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀛𑀸𑀧𑁂𑀢𑁆𑀯𑀸, 𑀯𑀻𑀳𑀺𑀘𑁄𑀭𑀁 𑀫𑀳𑀸𑀩𑀮𑀁.

𑀭𑀚𑁆𑀚𑀬𑁄𑀕𑁆𑀕𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀓𑀢𑁆𑀯𑀸 𑀢𑀁 𑀪𑀽𑀧𑀢𑀺𑀁 𑀭𑀳𑁄;

𑀅𑀦𑁆𑀢𑁄𑀬𑁂𑀯 𑀦𑀺𑀯𑀸𑀲𑁂𑀢𑁆𑀯𑀸, 𑀭𑀸𑀚𑀸 𑀭𑁄𑀕𑀸𑀢𑀼𑀭𑁄 𑀇𑀢𑀺.

𑀬𑀲𑀁 𑀭𑀚𑁆𑀚𑀁 𑀯𑀺𑀘𑀸𑀭𑁂𑀲𑀺, 𑀙𑀡𑁂 𑀧𑀢𑁆𑀢𑁂 𑀫𑀳𑀸𑀚𑀦𑀸;

𑀭𑀸𑀚𑀸 𑀘𑁂 𑀅𑀢𑁆𑀣𑀺 𑀅𑀫𑁆𑀳𑁂𑀳𑀺, 𑀲𑀤𑁆𑀥𑀺𑀁 𑀫𑁂𑀢𑀽𑀢𑀺 𑀖𑁄𑀲𑀬𑀼𑀁.

𑀢𑀁 𑀲𑀼𑀢𑁆𑀯𑀸 𑀦𑀭𑀧𑀸𑀮𑁄 𑀲𑁄, 𑀲𑀩𑁆𑀩𑀮𑀗𑁆𑀓𑀸𑀭𑀫𑀡𑁆𑀟𑀺𑀢𑁄;

𑀲𑀫𑀸𑀦𑀁𑀢𑁂 𑀫𑀳𑀸𑀦𑀸𑀕𑁂, 𑀦𑁂𑀲𑀬𑁄𑀕𑁆𑀕𑀸 𑀫𑀫𑀸’𑀢𑀺𑀲𑁄.

𑀤𑀸𑀝𑁆𑀞𑀸𑀥𑀸𑀢𑀼𑀖𑀭𑀞𑀸𑀦𑁂, 𑀲𑀼𑀯𑀸 𑀦𑀸𑀕𑀁 𑀲𑀫𑀸𑀤𑀺𑀲𑀺;

𑀭𑀜𑁆𑀜𑁄 𑀆𑀡𑀸𑀢𑀺 𑀯𑀼𑀢𑁆𑀢𑁂 𑀲𑁄, 𑀅𑀕𑀸 𑀆𑀭𑀼𑀬𑁆𑀳 𑀢𑀁 𑀧𑀼𑀭𑀁.

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀕𑀦𑁆𑀢𑁆𑀯𑀸, 𑀧𑀸𑀘𑀺𑀦𑀤𑁆𑀯𑀸𑀭𑀢𑁄 𑀩𑀳𑀺;

𑀧𑀞𑀫𑁂 𑀘𑁂𑀢𑀺𑀬𑀞𑀸𑀦𑁂, 𑀥𑀸𑀢𑀼𑀦𑀸𑀕𑀁 𑀲𑀫𑀧𑁆𑀧𑀬𑀺.

𑀫𑀳𑀸𑀘𑁂𑀢𑀺𑀢𑁆𑀢𑀬𑁂 𑀳𑀢𑁆𑀣𑀺-𑀧𑀸𑀓𑀸𑀭𑁂’𑀓𑀸𑀲𑀺 𑀢𑁄𑀭𑀡𑀁;

𑀫𑀺𑀢𑁆𑀢𑀲𑁂𑀦𑁄 𑀩𑀳𑀼𑀁 𑀧𑀼𑀜𑁆𑀜𑀁, 𑀓𑀢𑁆𑀯𑀸 𑀯𑀲𑁆𑀲𑁂𑀦 𑀲𑁄 𑀘𑀼𑀢𑁄.

𑀫𑀺𑀢𑁆𑀢𑀲𑁂𑀦𑀁 𑀭𑀡𑁂 𑀳𑀦𑁆𑀢𑁆𑀯𑀸, 𑀤𑀫𑀺𑀴𑁄 𑀧𑀡𑁆𑀟𑀼𑀦𑀸𑀫𑀓𑁄;

𑀆𑀕𑀢𑁄 𑀧𑀭𑀢𑀻𑀭𑀫𑁆𑀳𑀸, 𑀮𑀗𑁆𑀓𑀸𑀭𑀚𑁆𑀚𑀫𑀓𑀸𑀭𑀬𑀺.

𑀚𑀦𑀸 𑀓𑀼𑀮𑀻𑀦𑀸 𑀲𑀩𑁆𑀩𑁂𑀧𑀺, 𑀭𑁄𑀳𑀡𑀁 𑀲𑀫𑀼𑀧𑀸𑀕𑀢𑀸;

𑀑𑀭𑀕𑀗𑁆𑀕𑀸𑀬 𑀇𑀲𑁆𑀲𑁂𑀭𑀁, 𑀤𑀫𑀺𑀴𑀸 𑀏𑀯 𑀓𑀧𑁆𑀧𑀬𑀼𑀁.

𑀬𑁂 ¶ 𑀲𑀼𑀪𑀲𑁆𑀲 𑀩𑀮𑀝𑁆𑀞𑀲𑁆𑀲, 𑀪𑀻𑀢𑀸𑀫𑁄𑀭𑀺𑀬𑀯𑀁𑀲𑀚𑀸;

𑀩𑀮𑀸𑀬𑀺𑀢𑁆𑀯𑀸 𑀦𑀭𑀸𑀯𑀸𑀲𑀁, 𑀓𑀧𑁆𑀧𑀬𑀺𑀁𑀲𑀼 𑀢𑀳𑀺𑀁 𑀢𑀳𑀺𑀁.

𑀢𑁂𑀲𑀫𑀜𑁆𑀜𑀢𑀫𑁄 𑀦𑀦𑁆𑀤𑀺-𑀯𑀸𑀧𑀺 𑀕𑀸𑀫𑁂 𑀓𑀼𑀝𑀺𑀫𑁆𑀩𑀓𑁄;

𑀥𑀸𑀢𑀼𑀲𑁂𑀦𑀯𑁆𑀳𑀬𑁄 𑀆𑀲𑀺, 𑀤𑀸𑀞𑀸𑀦𑀸𑀫𑁄 𑀘 𑀢𑀁 𑀲𑀼𑀢𑁄.

𑀕𑀸𑀫𑁂 𑀅𑀫𑁆𑀩𑀺𑀮𑀬𑀸𑀕𑀼𑀫𑁆𑀳𑀺, 𑀯𑀲𑀁 𑀧𑀼𑀢𑁆𑀢𑁂 𑀤𑀼𑀯𑁂 𑀮𑀪𑀺;

𑀥𑀸𑀢𑀼𑀲𑁂𑀦𑀁 𑀲𑀺𑀮𑀸𑀢𑀺𑀲𑁆𑀲-𑀩𑁄𑀥𑀺𑀁𑀘 𑀲𑀫𑁆𑀧𑀚𑀸𑀢𑀺𑀓𑁂.

𑀫𑀸𑀢𑀼𑀲𑁄 𑀤𑀭𑀺𑀬𑁄 𑀢𑁂𑀲𑀁, 𑀲𑀤𑁆𑀥𑁄 𑀧𑀩𑁆𑀩𑀚𑁆𑀚 𑀯𑀢𑁆𑀢𑀢𑀺;

𑀤𑀻𑀖𑀲𑀦𑁆𑀤𑀓𑀢𑀸𑀯𑀸𑀲𑁂, 𑀥𑀸𑀢𑀼𑀲𑁂𑀦𑀸𑀧𑀺 𑀫𑀸𑀡𑀯𑁄.

𑀲𑀦𑁆𑀢𑀺𑀓𑁂 𑀢𑀲𑁆𑀲 𑀧𑀩𑁆𑀩𑀚𑁆𑀚-𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀏𑀓𑀤𑀸;

𑀲𑀚𑁆𑀛𑀸𑀬𑀢𑀺 𑀧𑀯𑀺𑀲𑁆𑀲𑀺𑀢𑁆𑀣, 𑀫𑁂𑀖𑁄 𑀦𑀸𑀕𑁄𑀢𑀼𑀧𑀲𑁆𑀲𑀺𑀬.

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑁄𑀕𑁂𑀳𑀺, 𑀙𑀸𑀤𑀬𑀺𑀢𑁆𑀯𑀸 𑀨𑀡𑁂𑀦 𑀘;

𑀧𑁄𑀢𑁆𑀣𑀓𑀜𑁆𑀘 𑀓𑀼𑀫𑀸𑀭𑀜𑁆𑀘, 𑀭𑀓𑁆𑀔𑀺𑀢𑀁 𑀧𑀲𑁆𑀲𑀺 𑀫𑀸𑀢𑀼𑀮𑁄.

𑀲𑀻𑀲𑁂 𑀆𑀓𑀺𑀭𑀺 𑀲𑀗𑁆𑀓𑀸𑀭𑀁, 𑀢𑀲𑁆𑀲 𑀭𑀼𑀝𑁆𑀞𑁄 𑀧𑀭𑁄𑀬𑀢𑀺;

𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀦 𑀤𑀽𑀲𑁂𑀲𑀺, 𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀫𑀸𑀢𑀼𑀮𑁄.

𑀉𑀢𑁆𑀢𑀫𑁄 𑀯𑀢’𑀬𑀁 𑀲𑀢𑁆𑀢𑁄, 𑀭𑀸𑀚𑀸 𑀳𑁂𑀲𑁆𑀲𑀢𑀺 𑀦𑀺𑀘𑁆𑀙𑀬𑀁;

𑀭𑀓𑁆𑀔𑀺𑀢𑀩𑁆𑀩𑁄’𑀢𑀺 𑀆𑀤𑀸𑀬, 𑀢𑀁 𑀯𑀺𑀳𑀸𑀭𑀫𑀼𑀧𑀸𑀕𑀢𑁄.

𑀕𑁄𑀡𑀺𑀲𑀸𑀤𑀺 𑀯𑀺𑀳𑀸𑀭𑁂’𑀬𑀁, 𑀓𑀢𑁆𑀢𑀩𑁆𑀩𑁄 𑀦𑀻𑀢𑀺𑀫𑀸 𑀇𑀢𑀺;

𑀲𑀺𑀓𑁆𑀔𑀸𑀧𑁂𑀲𑀺 𑀓𑀼𑀫𑀸𑀭𑀁 𑀢𑀁, 𑀧𑀡𑁆𑀟𑀼𑀓𑁄 𑀢𑀁 𑀯𑀺𑀚𑀸𑀦𑀺𑀬.

𑀕𑀡𑁆𑀳𑀣𑁂𑀢𑀦𑁆𑀢𑀺𑀧𑁂𑀲𑁂𑀲𑀺, 𑀲𑁂𑀯𑀓𑁂 𑀢𑀲𑁆𑀲𑀸𑀭𑀢𑁆𑀢𑀺𑀬𑀁;

𑀤𑀺𑀲𑁆𑀯𑀸𑀦 𑀲𑀼𑀧𑀺𑀦𑀁 𑀣𑁂𑀭𑁄, 𑀦𑀻𑀳𑀭𑀺𑀢𑁆𑀣 𑀓𑀼𑀫𑀸𑀭𑀓𑀁.

𑀢𑀲𑁆𑀫𑀺𑀁 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀫𑁆𑀳𑀺, 𑀲𑁂𑀯𑀓𑀁 𑀧𑀭𑀺𑀯𑀸𑀭𑀺𑀬;

𑀧𑀭𑀺𑀯𑁂𑀡𑁂 𑀦 𑀧𑀲𑁆𑀲𑀺𑀁𑀲𑀼, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀢𑁂 𑀉𑀪𑁄.

𑀤𑀓𑁆𑀔𑀺𑀡𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂, 𑀕𑁄𑀡 𑀦𑀸𑀫𑀁 𑀫𑀳𑀸𑀦𑀤𑀺𑀁;

𑀧𑀢𑁆𑀯𑀸 𑀲𑀫𑁆𑀧𑀼𑀡𑁆𑀡𑀫𑀝𑁆𑀞𑀁𑀲𑀼, 𑀕𑀦𑁆𑀢𑀼𑀓𑀸𑀫𑀸𑀧𑀺 𑀯𑁂𑀕𑀲𑀸.

𑀬𑀣𑀸 𑀦𑀤𑀺𑀬𑀁 𑀯𑀸𑀭𑁂𑀢𑀺, 𑀅𑀫𑁆𑀳𑁂 𑀢𑀁 𑀢𑁆𑀯𑀫𑁆𑀧𑀺 𑀯𑀸𑀭𑀬;

𑀯𑀸𑀧𑀺𑀁𑀕𑀳𑁂𑀢𑁆𑀯𑀸 𑀏𑀢𑁆𑀣𑁂’𑀢𑀺, 𑀯𑀢𑁆𑀯𑀸 𑀣𑁂𑀭𑁄 𑀢𑀤𑀸 𑀦𑀤𑀺𑀁.

𑀑𑀢𑀭𑀺𑀢𑁆𑀣𑀓𑀼𑀫𑀸𑀭𑁂𑀦, 𑀲𑀤𑁆𑀥𑀺𑀁 𑀤𑀺𑀲𑁆𑀯𑀸𑀦 𑀢𑁂 𑀉𑀪𑁄;

𑀦𑀸𑀕𑀭𑀸𑀚𑀸 𑀢𑀤𑀸 𑀏𑀓𑁄, 𑀧𑀺𑀝𑁆𑀞𑀺𑀁 𑀧𑀸𑀤𑀸𑀲𑀺 𑀢𑁂𑀦 𑀲𑁄.

𑀉𑀢𑁆𑀢𑀭𑀺𑀢𑁆𑀯𑀸 𑀓𑀼𑀫𑀸𑀭𑀁 𑀢𑀁, 𑀦𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀫𑀸𑀯𑀲𑀁;

𑀮𑀤𑁆𑀥𑀸 𑀔𑀻𑀭𑁄𑀤𑀦𑀁 𑀲𑀼𑀢𑁆𑀯𑀸, 𑀲𑁂𑀲𑀁 𑀧𑀢𑁆𑀢𑁂𑀦 𑀢𑀲𑁆𑀲’𑀤𑀸.

𑀘𑀺𑀢𑁆𑀢𑀓𑀸𑀭𑁂𑀦 ¶ 𑀣𑁂𑀭𑀫𑁆𑀳𑀺, 𑀪𑀢𑁆𑀢𑀁 𑀧𑀓𑁆𑀔𑀺𑀧𑁆𑀧 𑀪𑀽𑀫𑀺𑀬𑀁;

𑀪𑀼𑀜𑁆𑀚𑀺 𑀣𑁂𑀭𑁄𑀧𑀺 𑀢𑀁 𑀚𑀸𑀦𑀺, 𑀪𑀼𑀜𑁆𑀚 𑀢𑁂 𑀬𑀁 𑀫𑀳𑀺𑀁 𑀇𑀢𑀺.

𑀧𑀡𑁆𑀟𑀼𑀭𑀸𑀚𑀸𑀧𑀺 𑀓𑀢𑁆𑀯𑀸𑀦, 𑀭𑀚𑁆𑀚𑀁 𑀯𑀲𑁆𑀲𑀫𑁆𑀳𑀺 𑀧𑀜𑁆𑀘𑀫𑁂;

𑀘𑀼𑀢𑁄 𑀧𑀼𑀢𑁆𑀢𑁄 𑀧𑀺𑀧𑀸𑀭𑀺𑀦𑁆𑀤𑁄, 𑀢𑀢𑀺𑀬𑁄 𑀢𑀲𑁆𑀲 𑀪𑀸𑀢𑀼𑀓𑁄.

𑀓𑀡𑀺𑀝𑁆𑀞𑁄 𑀔𑀼𑀤𑁆𑀤𑀧𑀸𑀭𑀺𑀦𑁆𑀤𑁄, 𑀓𑀼𑀩𑁆𑀩𑀁 𑀭𑀚𑁆𑀚𑀁 𑀫𑀳𑀸𑀫𑀳𑀺𑀁;

𑀥𑀸𑀢𑀼𑀲𑁂𑀦𑀸𑀦𑀼𑀕𑁂 𑀲𑀩𑁆𑀩𑁂, 𑀯𑀺𑀳𑁂𑀞𑁂𑀲𑀺 𑀫𑀳𑀸𑀚𑀦𑁂.

𑀲𑀗𑁆𑀕𑀳𑁂𑀢𑁆𑀯𑀸 𑀚𑀦𑁂 𑀲𑀸𑀥𑀼-𑀲𑁂𑀦𑁄 𑀬𑀼𑀚𑁆𑀚𑀺𑀢𑁆𑀣 𑀭𑀸𑀚𑀺𑀦𑀸;

𑀲𑁄 𑀲𑁄𑀴𑀲𑀳𑀺 𑀯𑀲𑁆𑀲𑁂𑀳𑀺, 𑀧𑀼𑀜𑁆𑀜𑀧𑀸𑀧𑀓𑀭𑁄𑀫𑀢𑁄.

𑀦𑀺𑀭𑀺𑀢𑀭𑁄 𑀢𑀢𑁄 𑀆𑀲𑀺, 𑀭𑀸𑀚𑀸𑀫𑀸𑀲𑀤𑁆𑀯𑀬𑁂𑀦 𑀢𑀁;

𑀥𑀸𑀢𑀼𑀲𑁂𑀦𑁄 𑀯𑀺𑀦𑀸𑀲𑁂𑀲𑀺, 𑀢𑁂𑀦 𑀓𑀢𑁆𑀯𑀸 𑀫𑀳𑀸𑀳𑀯𑀁.

𑀳𑀢𑁂 𑀢𑀲𑁆𑀫𑀺𑀁 𑀫𑀳𑀻𑀧𑀸𑀮𑁂, 𑀤𑀸𑀞𑀺𑀬𑁄 𑀤𑀫𑀺𑀴𑁄 𑀢𑀢𑁄;

𑀭𑀸𑀚𑀸 𑀯𑀲𑁆𑀲𑀢𑁆𑀣 𑀬𑁂 𑀳𑀼𑀢𑁆𑀯𑀸, 𑀥𑀸𑀢𑀼𑀲𑁂𑀦𑀳𑀢𑁄𑀢𑀢𑁄.

𑀧𑀺𑀝𑁆𑀞𑀺𑀬𑁄 𑀤𑀫𑀺𑀴𑁄 𑀲𑀢𑁆𑀢-𑀫𑀸𑀲𑁂𑀦 𑀦𑀺𑀥𑀦𑀁 𑀕𑀢𑁄;

𑀥𑀸𑀢𑀼𑀲𑁂𑀦𑁂𑀦 𑀬𑀼𑀚𑁆𑀛𑀺𑀢𑁆𑀯𑀸, 𑀯𑀁𑀲𑁄 𑀧𑀘𑁆𑀙𑀺𑀚𑁆𑀚𑀺 𑀤𑀸𑀫𑀺𑀴𑁄.

𑀅𑀣𑀸’𑀲𑀺 𑀭𑀸𑀚𑀸𑀮𑀗𑁆𑀓𑀸𑀬𑀁, 𑀥𑀸𑀢𑀼𑀲𑁂𑀦𑁄 𑀇𑀭𑀸𑀥𑀺𑀧𑁄;

𑀪𑀸𑀢𑀭𑀸 𑀲𑀳 𑀤𑀻𑀧𑀫𑁆𑀳𑀺, 𑀤𑀫𑀺𑀴𑁂 𑀤𑀻𑀧𑀖𑀸𑀢𑀓𑁂.

𑀉𑀧𑀸𑀬𑁂𑀳𑀺 𑀅𑀦𑁂𑀓𑁂𑀬𑀺, 𑀏𑀓𑀯𑀻𑀲𑀧𑁆𑀧𑀫𑀸𑀡𑀓𑁂;

𑀔𑀦𑁆𑀥𑀯𑀸𑀭𑁂 𑀦𑀺𑀯𑁂𑀲𑁂𑀢𑁆𑀯𑀸, 𑀓𑀢𑁆𑀯𑀸 𑀬𑀼𑀤𑁆𑀥𑀫𑀲𑁂𑀲𑀢𑁄.

𑀲𑁄𑀥𑁂𑀢𑁆𑀯𑀸 𑀫𑁂𑀤𑀺𑀦𑀺𑀁 𑀲𑀸𑀥𑀼, 𑀓𑀢𑁆𑀯𑀸 𑀘 𑀲𑀼𑀔𑀺𑀢𑀁𑀚𑀦𑀁;

𑀲𑀸𑀲𑀦𑀜𑁆𑀘 𑀬𑀣𑀸𑀞𑀸𑀦𑁂, 𑀞𑀧𑁂𑀲𑀺 𑀧𑀭𑀦𑀸𑀲𑀺𑀢𑀁.

𑀤𑀫𑀺𑀴𑁂 𑀬𑁂’𑀦𑀼𑀯𑀢𑁆𑀢𑀺𑀁𑀲𑀼, 𑀓𑀼𑀮𑀻𑀦𑀸 𑀓𑀼𑀮𑀕𑀸𑀫𑀯𑀸;

𑀢𑁂 𑀫𑀁 𑀯𑀸 𑀲𑀸𑀲𑀦𑀁 𑀯𑀸 𑀦𑁄, 𑀭𑀓𑁆𑀔𑀺𑀁𑀲𑀽’𑀢𑀺 𑀧𑀓𑀼𑀧𑁆𑀧𑀺𑀬.

𑀢𑁂𑀲𑀁 𑀕𑀸𑀫𑁂 𑀕𑀳𑁂𑀢𑁆𑀯𑀸𑀦, 𑀕𑀸𑀫𑁂 𑀲𑁆𑀯𑀸𑀓𑀸𑀲𑀺𑀭𑀓𑁆𑀔𑀓𑁂;

𑀭𑁄𑀳𑀡𑀸’𑀕𑀫𑁆𑀫 𑀢𑁂 𑀲𑀩𑁆𑀩𑁂, 𑀓𑀼𑀮𑀻𑀦𑀸 𑀢𑀫𑀼𑀧𑀝𑁆𑀞𑀳𑀼𑀁.

𑀢𑁂𑀲𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁, 𑀬𑀣𑀸𑀬𑁄𑀕𑀫𑀓𑀸𑀲𑀺 𑀲𑁄;

𑀅𑀫𑀘𑁆𑀘𑁂 𑀅𑀢𑁆𑀢𑀦𑁄 𑀤𑀼𑀓𑁆𑀔-𑀲𑀳𑀸𑀬𑁂𑀘𑀸’𑀪𑀺 𑀢𑁄𑀲𑀬𑀺.

𑀩𑀦𑁆𑀥𑀸𑀧𑁂𑀢𑁆𑀯𑀸 𑀫𑀳𑀸𑀕𑀗𑁆𑀕𑀁, 𑀓𑁂𑀤𑀸𑀭𑁂’𑀓𑀸 𑀣𑀺𑀭𑁄𑀤𑀓𑁂;

𑀫𑀳𑀸𑀧𑀸𑀴𑀫𑁆𑀳𑀺 𑀪𑀺𑀓𑁆𑀔𑀽𑀦𑀁, 𑀲𑀸𑀮𑀺𑀪𑀢𑁆𑀢𑀜𑁆𑀘 𑀤𑀸𑀧𑀬𑀺.

𑀧𑀗𑁆𑀕𑀼𑀭𑁄𑀕𑀸 𑀢𑀼𑀭𑀝𑁆𑀝𑀸𑀦𑀁, 𑀲𑀸𑀮𑀸𑀬𑁄𑀓𑀸𑀲𑀺 𑀩𑀼𑀤𑁆𑀥𑀺𑀫𑀸;

𑀓𑀸𑀴𑀯𑀸𑀧𑀺𑀁𑀘 𑀕𑀡𑁆𑀳𑀺𑀢𑁆𑀯𑀸, 𑀩𑀦𑁆𑀥𑀺 𑀕𑁄𑀡𑀁 𑀫𑀳𑀸𑀦𑀤𑀺𑀁.

𑀫𑀳𑀸𑀯𑀺𑀳𑀸𑀭𑀁 ¶ 𑀓𑀢𑁆𑀯𑀸𑀦, 𑀧𑀦𑁆𑀢𑀺𑀬𑀼𑀢𑁆𑀢𑀫𑀦𑀸𑀓𑀼𑀮𑀁;

𑀢𑀣𑀸 𑀩𑁄𑀥𑀺𑀖𑀭𑀜𑁆𑀘𑁂𑀯, 𑀤𑀲𑁆𑀲𑀦𑁂𑀬𑁆𑀬 𑀫𑀓𑀸𑀭𑀬𑀺.

𑀪𑀺𑀓𑁆𑀔𑀯𑁄 𑀧𑀭𑀺𑀢𑁄𑀲𑁂𑀢𑁆𑀯𑀸, 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺𑀧𑀺;

𑀥𑀫𑁆𑀫𑀸𑀲𑁄𑀓𑁄’𑀯 𑀲𑁄𑀓𑀸𑀲𑀺, 𑀲𑀗𑁆𑀕𑀳𑀁 𑀧𑀺𑀝𑀓𑀢𑁆𑀢𑀬𑁂.

𑀅𑀝𑁆𑀞𑀸𑀭𑀲𑀯𑀺𑀳𑀸𑀭𑁂 𑀘, 𑀣𑁂𑀭𑀺𑀬𑀸𑀦 𑀫𑀓𑀸𑀭𑀬𑀺;

𑀲𑀫𑁆𑀧𑀦𑁆𑀦𑀪𑁄𑀕𑁂 𑀤𑀻𑀧𑀫𑁆𑀳𑀺, 𑀅𑀝𑁆𑀞𑀸𑀭𑀲 𑀘 𑀯𑀸𑀧𑀺𑀬𑁄.

𑀓𑀸𑀴𑀯𑀸𑀧𑀻 𑀯𑀺𑀳𑀸𑀭𑁄 𑀘, 𑀓𑁄𑀝𑀺𑀧𑀲𑁆𑀲𑀸𑀯𑀦𑀸𑀫𑀓𑁄;

𑀤𑀓𑁆𑀔𑀺𑀡 𑀕𑀺𑀭𑀺𑀦𑀸𑀫𑁄 𑀘, 𑀯𑀺𑀳𑀸𑀭𑁄 𑀯𑀟𑁆𑀠𑀫𑀸𑀦𑀓𑁄.

𑀧𑀡𑁆𑀡𑀯𑀮𑁆𑀮𑀓𑀪𑀽𑀢𑁄 𑀘, 𑀪𑀮𑁆𑀮𑀸𑀢𑀓𑀲𑀦𑀸𑀫𑀓𑁄;

𑀧𑀸𑀲𑀸𑀡𑀲𑀺𑀦𑁆𑀦𑁂 𑀤𑁂𑀲𑀫𑁆𑀳𑀺, 𑀥𑀸𑀢𑀼𑀲𑁂𑀦𑁄 𑀘 𑀧𑀩𑁆𑀩𑀢𑁄.

𑀫𑀁 𑀕𑀦𑁄 𑀣𑀽𑀧𑀯𑀺𑀝𑁆𑀞𑀺 𑀘, 𑀥𑀸𑀢𑀼𑀲𑁂𑀦𑁄𑀧𑀺 𑀉𑀢𑁆𑀢𑀭𑁂;

𑀧𑀸𑀘𑀺𑀦 𑀓𑀫𑁆𑀩𑀯𑀺𑀝𑁆𑀞𑀺 𑀘, 𑀢𑀣𑀸 𑀅𑀦𑁆𑀢𑀭𑀫𑁂 𑀕𑀺𑀭𑀺.

𑀅𑀦𑁆𑀢𑀸𑀴𑀺 𑀥𑀸𑀢𑀼𑀲𑁂𑀦𑁄 𑀘, 𑀓𑀲𑁆𑀲𑀧𑀺𑀝𑁆𑀞𑀺𑀓 𑀧𑀼𑀩𑁆𑀩𑀓𑁄;

𑀭𑁄𑀳𑀡𑁂𑀤𑀸𑀬𑀕𑀸𑀫𑁄 𑀘, 𑀲𑀸𑀮𑀯𑀸𑀡𑁄 𑀯𑀺𑀪𑀻𑀲𑀦𑁄.

𑀯𑀺𑀳𑀸𑀭𑁄 𑀪𑀮𑁆𑀮𑀺𑀯𑀸𑀡𑁄 𑀘, 𑀅𑀝𑁆𑀞𑀸𑀭𑀲𑀦𑀭𑀼𑀢𑁆𑀢𑀫𑁄;

𑀧𑀸𑀤𑀽𑀮𑀓𑀁 𑀳𑀫𑁆𑀩𑀮𑀝𑁆𑀞𑀺, 𑀫𑀳𑀸𑀤𑀢𑁆𑀣𑀸𑀤𑀺𑀯𑀸𑀧𑀺 𑀬𑁄.

𑀔𑀼𑀤𑁆𑀤𑀓𑁂 𑀘 𑀯𑀺𑀳𑀸𑀭𑁂𑀲𑁄, 𑀅𑀝𑁆𑀞𑀸𑀭𑀲𑀦𑀭𑀼𑀢𑁆𑀢𑀫𑁄;

𑀯𑀸𑀧𑀻𑀬𑁄 𑀘 𑀢𑀣𑀸𑀓𑀢𑁆𑀯𑀸, 𑀢𑁂𑀲𑀫𑁂𑀯 𑀢𑀼 𑀤𑀸𑀧𑀬𑀺.

𑀧𑀜𑁆𑀘𑀯𑀻𑀲𑀢𑀺 𑀳𑀢𑁆𑀣𑀜𑁆𑀘, 𑀫𑀬𑀽𑀭𑀧𑀭𑀺𑀯𑁂𑀡𑀓𑀁;

𑀳𑀭𑀺𑀢𑁆𑀯𑀸’𑀓𑀸𑀲𑀺𑀧𑀸𑀲𑀸𑀤-𑀫𑁂𑀓𑀯𑀻𑀲𑀢𑀺 𑀳𑀢𑁆𑀣𑀓𑀁.

𑀓𑀼𑀫𑀸𑀭𑀲𑁂𑀦𑀲𑁆𑀲’𑀧𑁂𑀢𑁆𑀯𑀸, 𑀧𑀼𑀩𑁆𑀩𑀪𑁄𑀕𑀁 𑀯𑀺𑀲𑁄𑀥𑀬𑀺;

𑀓𑀸𑀴𑀯𑀸𑀧𑀺𑀫𑁆𑀫𑀺𑀪𑀸𑀕𑀤𑁆𑀥𑀁, 𑀔𑁂𑀢𑁆𑀢𑀸𑀦𑀜𑁆𑀘 𑀲𑀢𑀤𑁆𑀯𑀬𑀁.

𑀮𑁄𑀳 𑀧𑀸𑀲𑀤𑀓𑁂 𑀚𑀺𑀡𑁆𑀡𑁂, 𑀦𑀯𑀓𑀫𑁆𑀫𑀫𑀓𑀸𑀭𑀬𑀺;

𑀫𑀳𑀸𑀣𑀽𑀧𑁂𑀲𑀼 𑀙𑀢𑁆𑀢𑀸𑀦𑀺, 𑀢𑀻𑀲𑀼 𑀚𑀺𑀡𑁆𑀡𑀸𑀦𑀺 𑀓𑀸𑀭𑀬𑀺.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁂𑀦, 𑀓𑀢𑀁 𑀩𑁄𑀥𑀺𑀫𑀳𑀁 𑀯𑀺𑀬;

𑀲𑀺𑀦𑁆𑀳𑀸𑀦𑀧𑀽𑀚𑀁 𑀩𑁄𑀥𑀺𑀲𑁆𑀲, 𑀯𑀭𑀩𑁄𑀥𑀺𑀲𑁆𑀲 𑀓𑀸𑀭𑀬𑀺.

𑀥𑀸𑀯𑀦𑀸 𑀮𑁄𑀪𑀦𑀸𑀯𑀸𑀬𑁄, 𑀢𑀢𑁆𑀣 𑀧𑀽𑀚𑁂𑀲𑀺 𑀲𑁄𑀴𑀲;

𑀅𑀮𑀗𑁆𑀓𑀸𑀭𑀁 𑀫𑀼𑀦𑀺𑀦𑁆𑀤𑀲𑁆𑀲, 𑀅𑀪𑀺𑀲𑁂𑀓𑀜𑁆𑀘 𑀓𑀸𑀭𑀬𑀺.

𑀫𑀳𑀸𑀩𑁄𑀥𑀺 𑀧𑀢𑀺𑀝𑁆𑀞𑀸𑀦𑀸, 𑀑𑀭𑀁 𑀮𑀗𑁆𑀓𑀸𑀬 𑀪𑀽𑀫𑀺𑀧𑀸;

𑀬𑀸𑀯 𑀤𑁆𑀯𑀸𑀤𑀲𑀫𑀁 𑀯𑀲𑁆𑀲𑀁, 𑀩𑁄𑀥𑀺𑀧𑀽𑀚𑀫𑀓𑀸𑀭𑀬𑀼𑀁.

𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 ¶ , 𑀓𑀸𑀭𑁂𑀢𑁆𑀯𑀸 𑀧𑀝𑀺𑀩𑀺𑀫𑁆𑀩𑀓𑀁;

𑀣𑁂𑀭𑀲𑁆𑀲𑀸’𑀮𑀸𑀳𑀦𑀁 𑀦𑁂𑀢𑁆𑀯𑀸, 𑀓𑀸𑀢𑀼𑀁 𑀧𑀽𑀚𑀁 𑀫𑀳𑀸𑀭𑀳𑀁.

𑀤𑀢𑁆𑀯𑀸 𑀲𑀳𑀲𑁆𑀲𑀁 𑀤𑀻𑀧𑁂𑀢𑀼𑀁, 𑀤𑀻𑀧𑀯𑀁𑀲𑀁 𑀲𑀫𑀸𑀤𑀺𑀲𑀺;

𑀞𑀺𑀢𑀸𑀦𑀁 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁, 𑀤𑀸𑀢𑀼𑀜𑁆𑀘𑀸𑀡𑀸𑀧𑀬𑀺𑀕𑀼𑀴𑀁.

𑀪𑀺𑀓𑁆𑀔𑀼𑀲𑁆𑀲 𑀅𑀢𑁆𑀢𑀦𑁄 𑀲𑀻𑀲𑁂, 𑀲𑀗𑁆𑀓𑀸𑀭𑁄𑀓𑀺𑀭𑀡𑀁 𑀲𑀭𑀁;

𑀮𑀸𑀪𑀁 𑀦𑀸𑀤𑀸𑀲𑀺 𑀯𑀼𑀢𑁆𑀣𑀲𑁆𑀲, 𑀧𑀭𑀺𑀯𑁂𑀡𑀲𑁆𑀲 𑀅𑀢𑁆𑀢𑀦𑁄.

𑀨𑀸𑀢𑀺𑀓𑀫𑁆𑀫𑀁 𑀩𑀳𑀼𑀁’𑀓𑀸𑀲𑀺, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀲𑀺𑀮𑀸𑀲𑀢𑁆𑀣𑀼𑀲𑁆𑀲 𑀓𑀸𑀭𑁂𑀲𑀺, 𑀫𑀦𑁆𑀤𑀺𑀭𑀜𑁆𑀘 𑀲𑀫𑀡𑁆𑀟𑀧𑀁.

𑀩𑀼𑀤𑁆𑀥 𑀤𑀸𑀲𑀓𑀢𑁂𑀦𑁂𑀢𑁆𑀢𑁂, 𑀦𑀝𑁆𑀞𑁂’𑀦𑀕𑁆𑀖𑀫𑀡𑀺 𑀤𑁆𑀯𑀬𑀁;

𑀅𑀓𑀸𑀲𑀺 𑀦𑁂𑀢𑁆𑀢𑀁 𑀲𑀢𑁆𑀣𑀼𑀲𑁆𑀲, 𑀭𑀁𑀲𑀺 𑀘𑀽𑀴𑀸𑀫𑀡𑀺𑀁𑀢𑀣𑀸.

𑀫𑀡𑀺𑀳𑀺 𑀖𑀦𑀦𑀻𑀮𑁂𑀳𑀺, 𑀓𑁂𑀲𑀸 𑀯𑀢𑁆𑀢𑀁 𑀲𑀼𑀫𑀼𑀢𑁆𑀢𑀫𑀁;

𑀳𑁂𑀫𑀧𑀝𑁆𑀝𑀁 𑀢𑀣𑁂𑀯𑀼𑀡𑁆𑀡-𑀮𑁄𑀫𑀁 𑀲𑁄𑀯𑀡𑁆𑀡 𑀘𑀻𑀯𑀭𑀁.

𑀧𑀸𑀤𑀚𑀸𑀮𑀁 𑀲𑀼𑀯𑀡𑁆𑀡𑀲𑁆𑀲, 𑀧𑀤𑀼𑀫𑀁 𑀤𑀻𑀧𑀫𑀼𑀢𑁆𑀢𑀫𑀁;

𑀦𑀸𑀦𑀸𑀭𑀸𑀕𑀫𑁆𑀩𑀭𑀁 𑀢𑀢𑁆𑀣, 𑀧𑀽𑀚𑀬𑀺𑀢𑁆𑀣 𑀅𑀲𑀁𑀔𑀺𑀬𑀁.

𑀅𑀓𑀸𑀲𑀺 𑀧𑀝𑀺𑀫𑀸 𑀕𑁂𑀳𑁂, 𑀩𑀳𑀼𑀫𑀗𑁆𑀕𑀮𑀘𑁂𑀢𑀺𑀬𑁂;

𑀩𑁄𑀥𑀺𑀲𑀢𑁆𑀢𑁂 𑀢𑀣𑀸’𑀓𑀸𑀲𑀺, 𑀓𑀸𑀴𑀲𑁂𑀮𑀲𑁆𑀲 𑀲𑀢𑁆𑀣𑀼𑀦𑁄.

𑀉𑀧𑀲𑀼𑀫𑁆𑀪𑀯𑁆𑀳𑀬𑀲𑁆𑀲𑀸𑀧𑀺, 𑀮𑁄𑀓𑀦𑀸𑀣𑀲𑁆𑀲 𑀓𑀸𑀭𑀬𑀺;

𑀭𑀁𑀲𑀻𑀘𑀽𑀴𑀸𑀫𑀡𑀺𑀜𑁆𑀘𑁂𑀯, 𑀅𑀪𑀺𑀲𑁂𑀓𑀯𑁆𑀳𑀬𑀲𑁆𑀲 𑀘.

𑀩𑀼𑀤𑁆𑀥𑀩𑀺𑀫𑁆𑀩𑀲𑁆𑀲 𑀓𑀸𑀭𑁂𑀲𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀺𑀴𑀦𑁆𑀥𑀦𑀁;

𑀯𑀸𑀫𑀧𑀲𑁆𑀲𑀫𑁆𑀳𑀺 𑀩𑁄𑀥𑀺𑀲𑁆𑀲, 𑀩𑁄𑀥𑀺𑀲𑀢𑁆𑀢𑀖𑀭𑀁 𑀢𑀣𑀸.

𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀘 𑀓𑀸𑀭𑁂𑀲𑀺, 𑀲𑀩𑁆𑀩𑀁 𑀭𑀸𑀚𑀧𑀺𑀴𑀦𑁆𑀥𑀦𑀁;

𑀲𑀫𑀦𑁆𑀢𑀸 𑀬𑁄𑀚𑀦𑁂 𑀢𑀲𑁆𑀲, 𑀢𑀤𑀸 𑀭𑀓𑁆𑀔𑀜𑁆𑀘 𑀬𑁄𑀚𑀬𑀺.

𑀓𑀸𑀭𑀸𑀧𑁂𑀲𑀺 𑀯𑀺𑀳𑀸𑀭𑁂𑀲𑀼, 𑀥𑀸𑀢𑀼𑀭𑀸𑀚𑀯𑁆𑀳𑀧𑀦𑁆𑀢𑀺𑀬𑁄;

𑀢𑀣𑀸 𑀲𑀢𑀲𑀳𑀲𑁆𑀲𑁂𑀦, 𑀫𑀳𑀸𑀩𑁄𑀥𑀺𑀖𑀭𑀁 𑀯𑀭𑀁.

𑀣𑀽𑀧𑀸𑀭𑀫𑀫𑁆𑀳𑀺 𑀣𑀽𑀧𑀲𑁆𑀲, 𑀧𑀽𑀚𑀁 𑀚𑀺𑀡𑁆𑀡𑀯𑀺𑀲𑁄𑀥𑀦𑀁;

𑀤𑀸𑀞𑀸 𑀥𑀸𑀢𑀼𑀖𑀭𑁂𑀘𑀸𑀧𑀺, 𑀚𑀺𑀡𑁆𑀡𑀲𑁆𑀲 𑀧𑀝𑀺𑀲𑀗𑁆𑀔𑀭𑀁.

𑀤𑀸𑀞𑀸𑀥𑀸𑀢𑀼𑀓𑀭𑀼𑀡𑁆𑀟𑀜𑁆𑀘, 𑀭𑀁𑀲𑀺𑀜𑁆𑀘 𑀖𑀦𑀓𑁄𑀝𑁆𑀝𑀺𑀫𑀁;

𑀫𑀳𑀕𑁆𑀖𑀫𑀦𑀺𑀲𑀁𑀓𑀺𑀡𑁆𑀡𑀁, 𑀲𑀼𑀯𑀡𑁆𑀡 𑀧𑀤𑀼𑀫𑀸𑀦𑀺 𑀘.

𑀤𑀸𑀞𑀸𑀥𑀸𑀢𑀼𑀫𑁆𑀳𑀺 𑀧𑀽𑀚𑁂𑀲𑀺, 𑀧𑀽𑀚𑀸𑀘𑀸𑀓𑀸 𑀅𑀲𑀗𑁆𑀔𑀺𑀬𑀸;

𑀘𑀻𑀯𑀭𑀸𑀤𑀻𑀦𑀺 𑀤𑀸𑀧𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀤𑀻𑀧𑀯𑀸𑀲𑀺𑀦𑀁.

𑀓𑀸𑀭𑀸𑀧𑁂𑀢𑁆𑀯𑀸 ¶ 𑀯𑀺𑀳𑀸𑀭𑁂𑀲𑀼, 𑀦𑀯𑀓𑀫𑁆𑀫𑀁 𑀢𑀳𑀺𑀁 𑀢𑀳𑀺𑀁;

𑀧𑀸𑀓𑀸𑀭𑁂 𑀘 𑀖𑀭𑁂𑀢𑁆𑀯𑀸’𑀓𑀸, 𑀲𑀼𑀥𑀸𑀓𑀫𑁆𑀫𑀁 𑀫𑀦𑁄𑀳𑀭𑀁.

𑀫𑀳𑀸𑀘𑁂𑀢𑀺𑀢𑁆𑀢𑀬𑁂 𑀓𑀢𑁆𑀯𑀸, 𑀲𑀼𑀥𑀸𑀓𑀫𑁆𑀫𑀁 𑀫𑀳𑀸𑀭𑀳𑀁;

𑀲𑀼𑀯𑀡𑁆𑀡𑀙𑀢𑁆𑀢𑀁 𑀓𑀸𑀭𑁂𑀲𑀺, 𑀢𑀣𑀸 𑀯𑀚𑀺𑀭𑀘𑀼𑀫𑁆𑀩𑀝𑀁.

𑀫𑀳𑀸𑀯𑀺𑀳𑀸𑀭𑁂 𑀧𑀸𑀧𑁂𑀦, 𑀫𑀳𑀸𑀲𑁂𑀦𑁂𑀦 𑀦𑀸𑀲𑀺𑀢𑁂;

𑀯𑀲𑀺𑀲𑀼𑀁 𑀥𑀫𑁆𑀫𑀭𑀼𑀘𑀺𑀓𑀸, 𑀪𑀺𑀓𑁆𑀔𑀽 𑀘𑁂𑀢𑀺𑀬𑀧𑀩𑁆𑀩𑀢𑁂.

𑀓𑀢𑁆𑀯𑀸 𑀅𑀫𑁆𑀩𑀢𑁆𑀣𑀮𑀁 𑀣𑁂𑀭-𑀯𑀸𑀤𑀸𑀦𑀁 𑀤𑀸𑀢𑀼 𑀓𑀸𑀫𑀓𑁄;

𑀬𑀸𑀘𑀺𑀢𑁄 𑀢𑁂𑀳𑀺 𑀢𑁂𑀲𑀁’𑀯, 𑀅𑀤𑀸𑀲𑀺 𑀥𑀭𑀡𑀻 𑀧𑀢𑀺.

𑀤𑀸𑀢𑀼 𑀧𑀞𑀸𑀦𑀦𑀸𑀯𑀜𑁆𑀘, 𑀓𑀸𑀭𑁂𑀢𑁆𑀯𑀸 𑀓𑀁𑀲𑀮𑁄𑀳𑀚𑀁;

𑀤𑀸𑀦𑀯𑀝𑁆𑀝𑀁 𑀧𑀯𑀢𑁆𑀢𑁂𑀲𑀺, 𑀅𑀫𑁆𑀩𑀡𑁂𑀪𑀺 𑀤𑁆𑀯𑀺𑀧𑀜𑁆𑀘𑀳𑀺.

𑀅𑀦𑁆𑀢𑁄 𑀩𑀳𑀺 𑀘 𑀓𑀸𑀭𑁂𑀢𑁆𑀯𑀸, 𑀦𑀕𑀭𑀲𑁆𑀲 𑀚𑀺𑀦𑀸𑀮𑀬𑁂;

𑀧𑀝𑀺𑀫𑀸𑀬𑁄 𑀘 𑀧𑀽𑀚𑁂𑀲𑀺, 𑀥𑀫𑁆𑀫𑀸𑀲𑁄𑀓𑀲𑀫𑁄’𑀲𑀫𑁄.

𑀢𑀲𑁆𑀲 𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀸𑀦𑀺, 𑀯𑀢𑁆𑀣𑀼 𑀧𑀝𑀺𑀧𑀤𑀁 𑀦𑀭𑁄;

𑀓𑁄 𑀳𑀺 𑀦𑀸𑀫 𑀲𑀫𑀢𑁆𑀣𑁄𑀢𑀺, 𑀫𑀼𑀔𑀫𑀢𑁆𑀢𑀁 𑀦𑀺𑀤𑀲𑁆𑀲𑀺𑀢𑀁.

𑀢𑀲𑁆𑀲 𑀧𑀼𑀢𑁆𑀢𑀤𑀼𑀯𑁂 𑀆𑀲𑀼𑀁, 𑀓𑀲𑁆𑀲𑀧𑁄 𑀪𑀺𑀦𑁆𑀦𑀫𑀸𑀢𑀺𑀓𑁄;

𑀲𑀫𑀸𑀦𑀫𑀸𑀢𑀺𑀓𑁄 𑀘𑁂𑀯, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀩𑁆𑀩𑀮𑁄.

𑀢𑀣𑀸 𑀧𑀸𑀡𑀲𑀫𑀸 𑀏𑀓𑀸, 𑀤𑀼𑀳𑀺𑀢𑀸 𑀘 𑀫𑀦𑁄𑀭𑀫𑀸;

𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀧𑀸𑀤𑀸𑀲𑀺, 𑀲𑁂𑀦𑀸𑀧𑀘𑁆𑀘𑀜𑁆𑀘 𑀢𑀜𑁆𑀘 𑀲𑁄.

𑀯𑀺𑀦𑀸 𑀤𑁄𑀲𑁂𑀦 𑀢𑀸𑀴𑁂𑀲𑀺, 𑀓𑀲𑀸𑀬𑀽𑀭𑀼𑀲𑀼 𑀲𑁄’𑀧𑀺𑀢𑀁;

𑀭𑀸𑀚𑀸 𑀤𑀺𑀲𑁆𑀯𑀸𑀦 𑀤𑀼𑀳𑀺𑀢𑀼-𑀯𑀢𑁆𑀣𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁.

𑀜𑀢𑁆𑀯𑀸 𑀢𑀁 𑀫𑀸𑀢𑀭𑀁 𑀢𑀲𑁆𑀲, 𑀦𑀕𑁆𑀕𑀁 𑀛𑀧𑁂𑀲𑀺 𑀓𑀼𑀚𑁆𑀛𑀺𑀬;

𑀢𑀢𑁄𑀧𑁆𑀧𑀪𑀼𑀢𑀺𑀲𑁄 𑀩𑀤𑁆𑀥-𑀯𑁂𑀭𑁄 𑀲𑀗𑁆𑀕𑀫𑁆𑀫 𑀓𑀲𑁆𑀲𑀧𑀁.

𑀭𑀚𑁆𑀚𑁂 𑀦𑁂𑀢𑀁 𑀧𑀮𑁄𑀪𑁂𑀢𑁆𑀯𑀸, 𑀪𑀺𑀦𑁆𑀤𑀺𑀢𑁆𑀯𑀸 𑀧𑀺𑀢𑀼𑀅𑀦𑁆𑀢𑀭𑁂;

𑀲𑀗𑁆𑀕𑀳𑁂𑀢𑁆𑀯𑀸 𑀚𑀦𑀁 𑀚𑀯-𑀕𑀸𑀳𑀁 𑀕𑀸𑀳𑀸𑀧𑀬𑀻 𑀧𑀢𑀺𑀁.

𑀉𑀲𑁆𑀲𑀸𑀧𑁂𑀲𑀺 𑀢𑀢𑁄 𑀙𑀢𑁆𑀢𑀁, 𑀓𑀲𑁆𑀲𑀧𑁄 𑀧𑀺𑀢𑀼𑀧𑀓𑁆𑀔𑀺𑀬𑁂;

𑀯𑀺𑀦𑀸𑀲𑁂𑀢𑁆𑀯𑀸 𑀚𑀦𑁂 𑀮𑀤𑁆𑀥-𑀲𑀩𑁆𑀩𑀧𑀸𑀧𑀲𑀳𑀸𑀬𑀓𑁄.

𑀫𑀳𑀸𑀭𑀚𑁆𑀚 ¶ 𑀯𑀺𑀦𑀸𑀲𑁂𑀦, 𑀯𑀺𑀬𑁄𑀕𑁂𑀦 𑀘 𑀲𑀽𑀦𑀼𑀦𑁄;

𑀩𑀤𑁆𑀥𑀦𑀸𑀕𑀸𑀭𑀯𑀸𑀲𑁂𑀦, 𑀤𑀼𑀓𑁆𑀔𑀺𑀢𑀫𑁆𑀧𑀺 𑀤𑀼𑀭𑀸𑀥𑀺𑀧𑀁.

𑀤𑀼𑀓𑁆𑀔𑀸𑀧𑁂𑀢𑀼𑀫𑀧𑀜𑁆𑀜𑁄𑀲𑁄, 𑀆𑀳 𑀓𑀲𑁆𑀲𑀧𑀭𑀸𑀚𑀓𑀁;

𑀦𑀺𑀥𑀺 𑀭𑀸𑀚𑀓𑀼𑀮𑁂𑀭𑀸𑀚-𑀕𑀼𑀢𑁆𑀢 𑀢𑁂 𑀧𑀺𑀢𑀭𑀸 𑀇𑀢𑀺.

𑀦𑁂’𑀢𑀺 𑀕𑀼𑀢𑁆𑀢𑁂 𑀦 𑀚𑀸𑀦𑀸𑀲𑀺, 𑀘𑀺𑀢𑁆𑀢𑀫𑁂𑀢𑀲𑁆𑀲 𑀪𑀽𑀫𑀺𑀧;

𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀓𑀸𑀧𑁂𑀢𑀺, 𑀦𑀺𑀥𑀺𑀁𑀲𑁄𑀢𑀺 𑀢𑀤𑀩𑁆𑀭𑀽𑀯𑀺.

𑀲𑀼𑀢𑁆𑀯𑀸 𑀢𑀁 𑀓𑀼𑀧𑀺𑀢𑁄 𑀤𑀽𑀢𑁂, 𑀧𑀸𑀳𑁂𑀲𑀻 𑀧𑀺𑀢𑀼𑀲𑀦𑁆𑀢𑀺𑀓𑀁;

𑀆𑀘𑀺𑀓𑁆𑀔𑀢𑀼 𑀦𑀺𑀥𑀺𑀞𑀸𑀦-𑀫𑀺𑀢𑀺 𑀯𑀢𑁆𑀯𑀸 𑀦𑀭𑀸𑀥𑀫𑁄.

𑀫𑀸𑀭𑁂𑀢𑀼 𑀅𑀫𑁆𑀳𑁂 𑀧𑀸𑀧𑀲𑁆𑀲, 𑀢𑀲𑁆𑀲𑀼𑀧𑀸𑀬𑁄’𑀢𑀺 𑀘𑀺𑀦𑁆𑀢𑀺𑀬;

𑀢𑀼𑀡𑁆𑀳𑀻 𑀅𑀳𑁄𑀲𑀺 𑀢𑁂 𑀕𑀦𑁆𑀢𑁆𑀯𑀸, 𑀭𑀸𑀚𑀓𑀲𑁆𑀲 𑀦𑀺𑀯𑁂𑀤𑀬𑀼𑀁.

𑀢𑀢𑁄’𑀢𑀻𑀯 𑀧𑀓𑀼𑀧𑁆𑀧𑀺𑀢𑁆𑀯𑀸, 𑀧𑁂𑀲𑀬𑀺𑀢𑁆𑀣 𑀧𑀼𑀦𑀧𑁆𑀧𑀼𑀦𑀁;

𑀲𑀸𑀥𑀼 𑀤𑀺𑀲𑁆𑀯𑀸 𑀲𑀳𑀸𑀬𑀫𑁆𑀫𑁂, 𑀦𑁆𑀳𑀢𑁆𑀯𑀸𑀦 𑀓𑀸𑀴𑀯𑀸𑀧𑀺𑀬𑀁.

𑀧𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀆𑀳 𑀤𑀽𑀢𑁂 𑀲𑀘𑁂 𑀫𑀫𑀁;

𑀓𑀸𑀴𑀯𑀸𑀧𑀺𑀁𑀲𑀫𑀸𑀧𑁂𑀢𑀺, 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀢𑁂 𑀕𑀢𑀸.

𑀭𑀜𑁆𑀜𑁄 𑀆𑀳𑀁𑀲𑀼 𑀭𑀸𑀚𑀸𑀧𑀺, 𑀢𑀼𑀝𑁆𑀞𑀳𑀝𑁆𑀞𑁄 𑀥𑀦𑀢𑁆𑀣𑀺𑀓𑁄;

𑀧𑁂𑀲𑁂𑀲𑀺 𑀤𑀽𑀢𑁂 𑀤𑀢𑁆𑀯𑀸𑀦, 𑀭𑀣𑀁 𑀚𑀺𑀡𑁆𑀡𑁂𑀦 𑀯𑀸𑀚𑀺𑀦𑀸.

𑀏𑀯𑀁 𑀕𑀘𑁆𑀙𑀢𑀺 𑀪𑀽𑀧𑀸𑀮𑁂, 𑀧𑀸𑀚𑁂𑀦𑁆𑀢𑁄 𑀭𑀣𑀺𑀓𑁄 𑀭𑀣𑀁;

𑀔𑀸𑀤𑀦𑁆𑀢𑁄 𑀮𑀸𑀚𑀫𑀲𑁆𑀲𑀸𑀧𑀺, 𑀓𑀺𑀜𑁆𑀘𑀺 𑀫𑀢𑁆𑀢𑀁 𑀅𑀤𑀸𑀲𑀺 𑀲𑁄.

𑀢𑀁 𑀔𑀸𑀤𑀺𑀢𑁆𑀯𑀸 𑀧𑀲𑀻𑀤𑀺𑀢𑁆𑀯𑀸, 𑀢𑀲𑁆𑀫𑀺𑀁 𑀧𑀸𑀡𑀫𑀤𑀸 𑀢𑀤𑀸;

𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀢𑀁 𑀓𑀸𑀢𑀼𑀁, 𑀲𑀗𑁆𑀕𑀳𑀁 𑀤𑁆𑀯𑀸𑀭𑀦𑀸𑀬𑀓𑀁.

𑀏𑀯𑀁 𑀲𑀫𑁆𑀧𑀢𑁆𑀢𑀺𑀬𑁄 𑀦𑀸𑀫, 𑀘𑀮𑀸 𑀯𑀺𑀚𑁆𑀚𑀼𑀮𑁆𑀮𑀢𑁄𑀧𑀫𑀸;

𑀢𑀲𑁆𑀫𑀸 𑀢𑀸𑀲𑀼 𑀧𑀫𑀚𑁆𑀚𑁂𑀬𑁆𑀬, 𑀓𑁄 𑀳𑀺 𑀦𑀸𑀫 𑀲𑀘𑁂𑀢𑀦𑁄.

𑀭𑀸𑀚𑀸 𑀏𑀢𑀻𑀢𑀺𑀲𑀼𑀢𑁆𑀯𑀸𑀦, 𑀣𑁂𑀭𑁄 𑀲𑁄 𑀢𑀲𑁆𑀲 𑀲𑁄𑀳 𑀤𑁄;

𑀮𑀤𑁆𑀥𑀸 𑀫𑀸𑀲𑁄𑀤𑀦𑀁 𑀫𑀁𑀲𑀁, 𑀲𑀸𑀡𑀼𑀡𑀜𑁆𑀘 𑀯𑀭𑀁 𑀲𑀭𑀁.

𑀭𑀸𑀚𑀸 𑀭𑁄𑀘𑁂𑀢𑀺 𑀏𑀢𑀦𑁆𑀢𑀺, 𑀕𑁄𑀧𑀬𑀺𑀢𑁆𑀯𑀸 𑀉𑀧𑀸𑀯𑀺𑀲𑀺;

𑀕𑀦𑁆𑀢𑁆𑀯𑀸 𑀭𑀸𑀚𑀸𑀧𑀺 𑀯𑀦𑁆𑀤𑀺𑀢𑁆𑀯𑀸, 𑀏𑀓𑀫𑀦𑁆𑀢𑀫𑀼𑀧𑀸𑀯𑀺𑀲𑀻.

𑀏𑀯𑀁 𑀦𑀺𑀲𑀺𑀦𑁆𑀦𑀸 𑀲𑀫𑁆𑀧𑀢𑁆𑀢-𑀭𑀚𑁆𑀚𑀸 𑀯𑀺𑀬 𑀉𑀪𑁄𑀧𑀺 𑀢𑁂;

𑀅𑀜𑁆𑀜𑀫𑀜𑁆𑀜𑀸’𑀪𑀺𑀮𑀸𑀧𑁂𑀦, 𑀦𑀺𑀩𑁆𑀩𑀸𑀧𑁂𑀲𑀼𑀁 𑀫𑀳𑀸𑀤𑀭𑀁.

𑀪𑁄𑀚𑀬𑀺𑀢𑁆𑀯𑀸𑀦 𑀢𑀁 𑀣𑁂𑀭𑁄, 𑀑𑀯𑀤𑀺𑀢𑁆𑀯𑀸 𑀅𑀦𑁂𑀓𑀥𑀸;

𑀅𑀧𑁆𑀧𑀫𑀸𑀤𑁂 𑀦𑀺𑀬𑁄𑀚𑁂𑀲𑀺, 𑀤𑀲𑁆𑀲𑁂𑀢𑁆𑀯𑀸 𑀮𑁄𑀓𑀥𑀫𑁆𑀫𑀢𑀁.

𑀢𑀢𑁄 ¶ 𑀯𑀸𑀧𑀻 𑀫𑀼𑀧𑀕𑀫𑁆𑀫, 𑀑𑀕𑁆𑀕𑀬𑁆𑀳𑀺𑀢𑁆𑀯𑀸 𑀬𑀣𑀸 𑀲𑀼𑀔𑀁;

𑀦𑁆𑀳𑀬𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀆𑀳𑁂𑀯𑀁 𑀭𑀸𑀚𑀲𑁂𑀯𑀓𑁂.

𑀏𑀢𑁆𑀢𑀓𑀁 𑀫𑁂 𑀥𑀦𑀁 𑀪𑁄’𑀢𑀺, 𑀲𑀼𑀢𑁆𑀯𑀸 𑀢𑀁 𑀭𑀸𑀚𑀲𑁂𑀯𑀓𑀸;

𑀆𑀧𑀭𑀺𑀢𑁆𑀯𑀸 𑀧𑀼𑀭𑀁𑀭𑀜𑁆𑀜𑁄, 𑀦𑀺𑀯𑁂𑀤𑁂𑀲𑀼𑀁 𑀦𑀺𑀭𑀺𑀲𑁆𑀲𑀭𑁄.

𑀥𑀦𑀁 𑀭𑀓𑁆𑀔𑀢𑀺 𑀧𑀼𑀢𑁆𑀢𑀲𑁆𑀲, 𑀤𑀻𑀧𑁂 𑀪𑀺𑀦𑁆𑀤𑀢𑀺 𑀫𑀸𑀦𑀼𑀲𑁂;

𑀚𑀻𑀯𑀦𑁆𑀢𑁄’𑀬𑀁𑀢𑀻 𑀓𑀼𑀚𑁆𑀛𑀺𑀢𑁆𑀯𑀸, 𑀆𑀡𑀸𑀧𑁂𑀲𑀺 𑀘𑀫𑀽𑀧𑀢𑀺𑀁.

𑀫𑀸𑀭𑁂𑀳𑀺 𑀧𑀺𑀢𑀭𑀁 𑀫𑁂𑀢𑀺, 𑀤𑀺𑀝𑁆𑀞𑀸 𑀧𑀺𑀝𑁆𑀞𑀻𑀢𑀺 𑀯𑁂𑀭𑀺𑀦𑁄;

𑀳𑀝𑁆𑀞𑀢𑀼𑀝𑁆𑀞𑁄 𑀢𑀺𑀭𑀼𑀝𑁆𑀞𑁄𑀲𑁄, 𑀲𑀩𑁆𑀩𑀸𑀮𑀗𑁆𑀓𑀭𑀫𑀡𑁆𑀟𑀺𑀢𑁄.

𑀭𑀸𑀚𑀸𑀦𑀫𑀼𑀧𑀲𑀗𑁆𑀓𑀫𑁆𑀫, 𑀧𑀼𑀭𑀢𑁄 𑀘’𑀲𑁆𑀲 𑀘𑀗𑁆𑀓𑀫𑀺;

𑀭𑀸𑀚𑀸𑀤𑀺𑀲𑁆𑀯𑀸 𑀘 𑀘𑀺𑀦𑁆𑀢𑁂𑀲𑀺, 𑀧𑀸𑀧𑀺𑀬𑁄’𑀬𑀁 𑀫𑀢𑀁 𑀫𑀫.

𑀓𑀸𑀬𑀁 𑀯𑀺𑀬 𑀤𑀼𑀓𑁆𑀔𑀸𑀧𑁂𑀢𑁆𑀯𑀸, 𑀦𑀭𑀓𑀁 𑀳𑁂𑀢𑀼 𑀫𑀺𑀘𑁆𑀙𑀢𑀺;

𑀭𑁄𑀲𑀼𑀧𑁆𑀧𑀸𑀤𑁂𑀦 𑀢𑀲𑁆𑀲𑁂𑀯, 𑀓𑀺𑀁𑀧𑀼𑀭𑁂𑀫𑀺 𑀫𑀦𑁄𑀭𑀣𑀁.

𑀇𑀢𑀺 𑀫𑁂𑀢𑁆𑀢𑀸𑀬𑀫𑀸𑀦𑁄 𑀢𑀁, 𑀆𑀳 𑀲𑁂𑀦𑀸𑀧𑀢𑀺𑀁 𑀧𑀢𑀺;

𑀫𑁄𑀕𑁆𑀕𑀮𑁆𑀮𑀸𑀦𑁂 𑀢𑁆𑀯𑀬𑀺𑀘𑁂𑀯, 𑀏𑀓𑀘𑀺𑀢𑁆𑀢𑁄 𑀅𑀳𑀁 𑀇𑀢𑀺.

𑀳𑀲𑀁𑀘𑀸𑀮𑁂𑀲𑀺 𑀲𑀻𑀲𑀁𑀲𑁄, 𑀤𑀺𑀲𑁆𑀯𑀸 𑀢𑀁 𑀚𑀸𑀦𑀺𑀪𑀽𑀧𑀢𑀺;

‘‘𑀦𑀽𑀦 𑀫𑀸𑀭𑁂𑀢𑀺 𑀅𑀚𑁆𑀚𑀸’’𑀢𑀺, 𑀢𑀤𑀸 𑀲𑀸𑀳𑀲𑀺𑀓𑁄𑀧𑀺 𑀲𑁄.

𑀦𑀕𑁆𑀕𑀁 𑀓𑀢𑁆𑀯𑀸𑀦 𑀭𑀸𑀚𑀸𑀦𑀁, 𑀲𑀲𑀗𑁆𑀔𑀮𑀺𑀓 𑀩𑀦𑁆𑀥𑀦𑀁;

𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀁 𑀓𑀢𑁆𑀯𑀸, 𑀅𑀦𑁆𑀢𑁄𑀩𑀦𑁆𑀥𑀺𑀬 𑀪𑀺𑀢𑁆𑀢𑀺𑀬𑀁.

𑀫𑀢𑁆𑀢𑀺𑀓𑀸𑀬 𑀯𑀺𑀮𑀺𑀫𑁆𑀧𑁂𑀲𑀺, 𑀏𑀯𑀁 𑀤𑀺𑀲𑁆𑀯𑀸𑀧𑀺 𑀧𑀡𑁆𑀟𑀺𑀢𑁄;

𑀓𑁄 𑀳𑀺 𑀭𑀚𑁆𑀚𑁂𑀬𑁆𑀬 𑀪𑁄𑀕𑁂𑀲𑀼, 𑀚𑀻𑀯𑀺𑀢𑁂𑀧𑀺 𑀬𑀲𑁂𑀧𑀺 𑀯𑀸.

𑀥𑀸𑀢𑀼𑀲𑁂𑀦𑁄 𑀦𑀭𑀺𑀦𑁆𑀤𑁄 𑀲𑁄, 𑀏𑀯𑀁 𑀧𑀼𑀢𑁆𑀢𑀳𑀢𑁄 𑀕𑀢𑁄;

𑀅𑀝𑁆𑀞𑀸𑀭𑀲𑀳𑀺 𑀯𑀲𑁆𑀲𑁂𑀳𑀺, 𑀤𑁂𑀯𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁.

𑀓𑀸𑀴𑀯𑀸𑀧𑀻 𑀫𑀬𑀁 𑀭𑀸𑀚𑀸, 𑀓𑀸𑀭𑀸𑀧𑁂𑀦𑁆𑀢𑁄 𑀲𑀫𑀸𑀳𑀺𑀢𑀁;

𑀧𑀲𑁆𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀫𑁂𑀢𑀦𑁆𑀢𑀼, 𑀯𑀼𑀝𑁆𑀞𑀸𑀧𑁂𑀢𑀼𑀁 𑀲𑀫𑀸𑀥𑀺𑀢𑁄.

𑀅𑀲𑀓𑁆𑀓𑁄𑀦𑁆𑀢𑁄 𑀔𑀺𑀧𑀸𑀧𑁂𑀲𑀺, 𑀧𑀁𑀲𑀼𑀁 𑀪𑀺𑀓𑁆𑀔𑀼𑀲𑁆𑀲 𑀫𑀢𑁆𑀣𑀓𑁂;

𑀲𑀦𑁆𑀥𑀺𑀝𑁆𑀞𑀺𑀓𑁄 𑀯𑀺𑀧𑀸𑀓𑁄𑀬𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀻𑀧𑀺𑀢𑁄.

𑀉𑀧𑀸𑀕𑀫𑀼𑀁 𑀫𑀘𑁆𑀘𑀼𑀫𑀼𑀔𑀁 𑀲𑀪𑁄𑀯𑀸;

𑀤𑀺𑀲𑁆𑀯𑀸 𑀲𑀧𑀜𑁆𑀜𑁄 𑀯𑀺𑀪𑀯𑀁 𑀇𑀘𑁆𑀙𑁂.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀝𑁆𑀞𑀢𑀺𑀁𑀲𑀢𑀺𑀏𑀫𑀸 𑀧𑀭𑀺𑀘𑁆𑀙𑁂𑀤𑁄.

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀢𑁄 𑀓𑀲𑁆𑀲𑀧𑀦𑀸𑀫𑁄 𑀲𑁄, 𑀧𑀸𑀧𑀓𑁄 𑀦𑀭𑀧𑀸𑀮𑀓𑁄;

𑀅𑀲𑁆𑀲 𑀕𑁄 𑀧𑀜𑁆𑀘𑀲𑀽𑀤𑀜𑁆𑀘, 𑀧𑁂𑀲𑀬𑀺𑀢𑁆𑀯𑀸𑀦 𑀪𑀸𑀢𑀺𑀓𑀁.

𑀫𑀸𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄, 𑀪𑀻𑀢𑁄 𑀲𑀻𑀳𑀕𑀺𑀭𑀺𑀁 𑀕𑀢𑁄;

𑀤𑀼𑀭𑀸𑀭𑁄𑀳𑀁 𑀫𑀦𑀼𑀲𑁆𑀲𑁂𑀳𑀺, 𑀲𑁄𑀥𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀢𑁄.

𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑁆𑀧, 𑀲𑀻𑀳𑀸𑀓𑀸𑀭𑁂𑀦 𑀓𑀸𑀭𑀬𑀺;

𑀢𑀢𑁆𑀣 𑀦𑀺𑀲𑁆𑀲𑁂𑀡𑀺 𑀕𑁂𑀳𑀸𑀦𑀺, 𑀢𑁂𑀦 𑀢𑀁 𑀦𑀸𑀫𑀓𑁄 𑀅𑀳𑀽.

𑀲𑀁𑀳𑀭𑀺𑀢𑁆𑀯𑀸 𑀥𑀦𑀁 𑀢𑀢𑁆𑀣, 𑀦𑀺𑀤𑀳𑀺𑀢𑁆𑀯𑀸 𑀲𑀼𑀕𑁄𑀧𑀺𑀢𑀁;

𑀅𑀢𑁆𑀢𑀦𑁄 𑀦𑀺𑀳𑀺𑀢𑀸𑀦𑀁 𑀲𑁄, 𑀭𑀓𑁆𑀔𑀁 𑀤𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁.

𑀓𑀢𑁆𑀯𑀸 𑀭𑀸𑀚𑀖𑀭𑀁 𑀢𑀢𑁆𑀣, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁;

𑀤𑀼𑀢𑀺𑀬𑀸𑀮𑀓𑀫𑀦𑁆𑀤𑀁𑀯, 𑀓𑀼𑀯𑁂𑀭𑁄𑀯 𑀢𑀳𑀺𑀁 𑀯𑀲𑀺.

𑀫𑀺𑀕𑀸𑀭𑁄 𑀦𑀸𑀫 𑀓𑀸𑀭𑁂𑀲𑀺, 𑀲𑁂𑀦𑀸𑀧𑀢𑀺 𑀲𑀦𑀸𑀫𑀓𑀁;

𑀧𑀭𑀺𑀯𑁂𑀡𑀁 𑀢𑀣𑀸𑀕𑁂𑀳-𑀫𑀪𑀺𑀲𑁂𑀓𑀚𑀺𑀦𑀺𑀲𑁆𑀲 𑀘.

𑀢𑀲𑁆𑀲𑀸𑀪𑀺𑀲𑁂𑀓𑀁 𑀬𑀸𑀘𑀺𑀢𑁆𑀯𑀸, 𑀲𑀺𑀮𑀸𑀲𑀫𑁆𑀩𑀼𑀤𑁆𑀥𑀢𑁄’𑀥𑀺𑀭𑀁;

𑀅𑀮𑀤𑁆𑀥𑀸𑀲𑀸𑀫𑀺 𑀦𑁄 𑀭𑀚𑁆𑀚𑁂, 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀲𑀡𑁆𑀞𑀳𑀺.

𑀳𑀼𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀲𑁄, 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀦𑀸;

𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀓𑀢𑀁 𑀦𑀼’𑀢𑀺, 𑀧𑀼𑀜𑁆𑀜𑀁 𑀓𑀸𑀲𑀺 𑀅𑀦𑀧𑁆𑀧𑀓𑀁.

𑀫𑀳𑀸 ¶ 𑀯𑀢𑁆𑀣𑀼𑀦𑀺 𑀓𑀸𑀭𑁂𑀲𑀺, 𑀤𑁆𑀯𑀸𑀭𑁂𑀲𑀼 𑀦𑀕𑀭𑀲𑁆𑀲 𑀲𑁄;

𑀅𑀫𑁆𑀩𑀼𑀬𑁆𑀬𑀸𑀦𑁂 𑀘 𑀓𑀸𑀭𑁂𑀲𑀺, 𑀤𑀻𑀧𑁂 𑀬𑁄𑀚𑀦 𑀬𑁄𑀚𑀦𑁂.

𑀇𑀲𑁆𑀲𑀭𑀲𑀫𑀡𑀸𑀭𑀸𑀫𑀁, 𑀓𑀸𑀭𑁂𑀢𑁆𑀯𑀸 𑀧𑀼𑀩𑁆𑀩𑀯𑀢𑁆𑀣𑀼𑀢𑁄;

𑀅𑀥𑀺𑀓𑀁 𑀪𑁄𑀕𑀕𑀸𑀫𑁂 𑀘, 𑀅𑀥𑀺𑀓𑀁 𑀢𑀲𑁆𑀲 𑀤𑀸𑀧𑀬𑀺.

𑀩𑁄𑀥𑀺 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀢𑀲𑁆𑀲𑀸𑀲𑀼𑀁 𑀥𑀻𑀢𑀭𑁄 𑀤𑀼𑀯𑁂;

𑀯𑀺𑀳𑀸𑀭𑀲𑁆𑀲’𑀲𑁆𑀲 𑀓𑀸𑀭𑁂𑀲𑀺, 𑀦𑀸𑀫𑀁 𑀢𑀸𑀲𑀜𑁆𑀘 𑀅𑀢𑁆𑀢𑀦𑁄.

𑀤𑁂𑀦𑁆𑀢𑁂 𑀢𑀲𑁆𑀫𑀺𑀁 𑀦 𑀇𑀘𑁆𑀙𑀺𑀁𑀲𑀼, 𑀲𑀫𑀡𑀸 𑀣𑁂𑀭𑀯𑀸𑀤𑀺𑀦𑁄;

‘‘𑀧𑀺𑀢𑀼𑀖𑀸𑀢𑀺𑀲𑁆𑀲 𑀓𑀫𑁆𑀫’’𑀦𑁆𑀢𑀺, 𑀮𑁄𑀓𑀕𑀸𑀭𑀬𑁆𑀳 𑀪𑀻𑀭𑀼𑀦𑁄.

𑀤𑀸𑀢𑀼𑀓𑀸𑀫𑁄𑀲 𑀢𑁂𑀲𑀁’𑀯, 𑀲𑀫𑁆𑀩𑀼𑀤𑁆𑀥 𑀧𑀝𑀺𑀫𑀸𑀬’𑀤𑀸;

𑀪𑀺𑀓𑁆𑀔𑀯𑁂 𑀅𑀥𑀺𑀯𑀸𑀲𑁂𑀲𑀼𑀁, 𑀪𑁄𑀕𑁄 𑀦𑁄 𑀲𑀢𑁆𑀣𑀼𑀦𑁄 𑀇𑀢𑀺.

𑀓𑀣𑀸 𑀦𑀺𑀬𑁆𑀬𑀦𑁆𑀢𑀺 𑀉𑀬𑁆𑀬𑀸𑀦𑁂, 𑀲𑀫𑀻𑀧𑁂 𑀧𑀩𑁆𑀩𑀢𑀲𑁆𑀲 𑀲𑁄;

𑀓𑀸𑀭𑀸𑀧𑁂𑀲𑀺 𑀯𑀺𑀳𑀸𑀭𑀁 𑀲𑁄, 𑀢𑁂𑀲𑀁 𑀦𑀸𑀫𑁄 𑀢𑀢𑁄 𑀅𑀳𑀼.

𑀅𑀤𑀸 𑀥𑀫𑁆𑀫𑀭𑀼𑀘𑀺𑀦𑀁 𑀢𑀁, 𑀲𑀫𑁆𑀧𑀢𑁆𑀢 𑀘𑀢𑀼𑀧𑀘𑁆𑀘𑀬𑀁;

𑀯𑀺𑀳𑀸𑀭𑀜𑁆𑀘𑁂𑀯 𑀉𑀬𑁆𑀬𑀸𑀦𑀁, 𑀤𑀺𑀲𑀸𑀪𑀸𑀕𑀫𑁆𑀳𑀺 𑀉𑀢𑁆𑀢𑀭𑁂.

𑀪𑀢𑁆𑀢𑀁 𑀲𑀦𑀻𑀭𑀧𑀓𑁆𑀓𑀁 𑀲𑁄, 𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀦𑁆𑀦𑀫𑀺𑀢𑁆𑀣𑀺𑀬𑀸;

𑀲𑀧𑁆𑀧𑀺𑀬𑀼𑀢𑁆𑀢𑀁 𑀫𑀦𑀼𑀜𑁆𑀜𑁂𑀳𑀺, 𑀲𑀽𑀧𑁂𑀳𑀺 𑀅𑀪𑀺𑀲𑀗𑁆𑀔𑀢𑀁.

𑀫𑀦𑀼𑀜𑁆𑀜𑀫𑀺𑀤𑀫𑀬𑁆𑀬𑀸𑀦𑀁, 𑀤𑀲𑁆𑀲𑀫𑁂𑀯𑀦𑁆𑀢𑀺 𑀢𑀸𑀤𑀺𑀲𑀁;

𑀪𑀢𑁆𑀢𑀁 𑀧𑀸𑀤𑀸𑀲𑀺 𑀪𑀺𑀓𑁆𑀔𑀽𑀦𑀁, 𑀲𑀩𑁆𑀩𑁂𑀲𑀜𑁆𑀘 𑀲𑀘𑀻𑀯𑀭𑀁.

𑀉𑀧𑁄𑀲𑀣𑀫𑀥𑀺𑀝𑁆𑀞𑀸𑀲𑀺, 𑀅𑀧𑁆𑀧𑀫𑀜𑁆𑀜𑀜𑁆𑀘 𑀪𑀸𑀯𑀬𑀺,

𑀲𑀫𑀸𑀤𑀺𑀬𑀺 𑀥𑀼𑀢𑀗𑁆𑀕𑁂 𑀘, 𑀮𑀺𑀔𑀸𑀧𑁂𑀲𑀺 𑀘 𑀧𑁄𑀢𑁆𑀣𑀓𑁂.

𑀧𑀝𑀺𑀫𑀸𑀤𑀸𑀦 𑀲𑀸𑀮𑀸𑀤𑀺𑀁, 𑀓𑀸𑀭𑀸𑀧𑁂𑀲𑀺 𑀅𑀦𑀧𑁆𑀧𑀓𑀁;

𑀪𑀺𑀢𑁄 𑀲𑁄 𑀧𑀭𑀮𑁄𑀓𑀫𑁆𑀳𑀸, 𑀫𑁄𑀕𑁆𑀕𑀮𑁆𑀮𑀸𑀦𑀸 𑀘 𑀯𑀢𑁆𑀢𑀢𑀺.

𑀢𑀢𑁄 𑀅𑀝𑁆𑀞𑀸𑀭𑀲𑁂 𑀯𑀲𑁆𑀲𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀸𑀪𑀝𑁄;

𑀆𑀤𑁂𑀲𑁂𑀦 𑀦𑀺𑀕𑀡𑁆𑀞𑀸𑀦𑀁, 𑀤𑁆𑀯𑀸𑀤𑀲𑀕𑁆𑀕𑀲𑀳𑀸𑀬 𑀯𑀸.

𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀫𑁆𑀫, 𑀤𑁂𑀲𑁂 𑀅𑀫𑁆𑀩𑀝𑁆𑀞𑀓𑁄𑀮𑀓𑁂;

𑀓𑀼𑀴𑀸𑀭𑀻 𑀦𑀸𑀫𑁂 𑀩𑀦𑁆𑀥𑀺𑀢𑁆𑀣, 𑀯𑀺𑀳𑀸𑀭𑁂 𑀩𑀮𑀲𑀜𑁆𑀘𑀬𑀁.

𑀭𑀸𑀚𑀸 𑀲𑀼𑀢𑁆𑀯𑀸 𑀕𑀳𑁂𑀢𑁆𑀯𑀸 𑀢𑀁, 𑀪𑀜𑁆𑀚𑀺𑀲𑁆𑀲𑀸𑀫𑀺𑀢𑀺 𑀦𑀺𑀓𑁆𑀔𑀫𑀺;

𑀦𑁂𑀫𑀺𑀢𑁆𑀢𑁂𑀳𑀺 𑀦 𑀲𑀓𑁆𑀓𑀸𑀢𑀺, 𑀯𑀤𑀦𑁆𑀢𑁂𑀧𑀺 𑀫𑀳𑀸𑀩𑀮𑁄.

𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀲𑀦𑁆𑀦𑀤𑁆𑀥 𑀩𑀮𑁄 𑀲𑀽𑀭𑀲𑀳𑀸𑀬 𑀯𑀸;

𑀕𑀘𑁆𑀙𑀦𑁆𑀢𑁄 𑀲𑀼𑀭𑀲𑀗𑁆𑀕𑀸𑀫𑀁, 𑀤𑁂𑀯𑁄 𑀯𑀺𑀬 𑀲𑀼𑀚𑀫𑁆𑀧𑀢𑀺.

𑀅𑀜𑁆𑀜𑀫𑀜𑁆𑀜𑀁 ¶ 𑀉𑀧𑀸𑀕𑀫𑁆𑀫, 𑀪𑀺𑀦𑁆𑀦𑀯𑁂𑀮𑀸𑀯 𑀲𑀸𑀕𑀭𑀸;

𑀆𑀭𑀪𑀺𑀁𑀲𑀼 𑀫𑀳𑀸𑀬𑀼𑀤𑁆𑀥𑀁, 𑀩𑀮𑀓𑀸𑀬𑀸 𑀉𑀪𑁄𑀧𑀺 𑀢𑁂.

𑀓𑀲𑁆𑀲𑀧𑁄 𑀧𑀼𑀭𑀢𑁄 𑀤𑀺𑀲𑁆𑀯𑀸, 𑀫𑀳𑀦𑁆𑀢𑀁 𑀓𑀤𑁆𑀤𑀫𑀸𑀲𑀬𑀁;

𑀕𑀦𑁆𑀢𑀼𑀫𑀜𑁆𑀜𑁂𑀦 𑀫𑀕𑁆𑀕𑁂𑀦, 𑀧𑀭𑀺𑀯𑀢𑁆𑀢𑁂𑀲𑀺 𑀤𑀦𑁆𑀢𑀺𑀦𑀁.

𑀤𑀺𑀲𑁆𑀯𑀸 𑀢𑀁 𑀲𑀸𑀫𑀺𑀓𑁄𑀦𑁄’𑀬𑀁, 𑀧𑀮𑀸𑀬𑀢𑀺 𑀪𑀡𑁂 𑀇𑀢𑀺;

𑀩𑀮𑀓𑀸𑀬𑁄 𑀧𑀪𑀺𑀚𑁆𑀚𑀺𑀢𑁆𑀣, ‘‘𑀤𑀺𑀝𑁆𑀞𑀁 𑀧𑀺𑀞’’𑀦𑁆𑀢𑀺 𑀖𑁄𑀲𑀬𑀼𑀁.

𑀫𑁄𑀕𑁆𑀕𑀮𑀸𑀦 𑀩𑀮𑀸𑀭𑀸𑀚𑀸, 𑀙𑁂𑀢𑁆𑀯𑀸 𑀦𑀺𑀓𑀭𑀡𑁂𑀦 𑀲𑁄;

𑀲𑀻𑀲𑀁 𑀉𑀓𑁆𑀔𑀺𑀧𑀺𑀬𑀸’𑀓𑀸𑀲𑀁, 𑀙𑀼𑀭𑀺𑀓𑀁 𑀓𑁄𑀲𑀺𑀬𑀁 𑀔𑀺𑀧𑀺.

𑀓𑀢𑁆𑀯𑀸’𑀴𑀸𑀳𑀦 𑀓𑀺𑀘𑁆𑀘𑀁 𑀲𑁄, 𑀢𑀲𑁆𑀲 𑀓𑀫𑁆𑀫𑁂 𑀧𑀲𑀻𑀤𑀺𑀬;

𑀲𑀩𑁆𑀩𑀁𑀲𑁄 𑀥𑀦𑀫𑀸𑀤𑀸𑀬, 𑀆𑀕𑀜𑁆𑀙𑀺 𑀦𑀕𑀭𑀁 𑀯𑀭𑀁.

𑀪𑀺𑀓𑁆𑀔𑀽 𑀲𑀼𑀢𑁆𑀯𑀸 𑀧𑀯𑀢𑁆𑀢𑀺𑀁 𑀢𑀁, 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸;

𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀜𑁆𑀘, 𑀅𑀝𑁆𑀞𑀁𑀲𑀼 𑀧𑀝𑀺𑀧𑀸𑀝𑀺𑀬𑀸.

𑀫𑀳𑀸𑀫𑁂𑀖𑀯𑀦𑀁 𑀧𑀢𑁆𑀯𑀸, 𑀤𑁂𑀯𑀭𑀸𑀚𑀸𑀯 𑀦𑀦𑁆𑀤𑀦𑀁;

𑀫𑀳𑀸𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀳𑀢𑁆𑀣𑀺𑀧𑀸𑀓𑀸𑀭𑀢𑁄 𑀩𑀳𑀺.

𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸, 𑀲𑀗𑁆𑀖𑁂 𑀢𑀲𑁆𑀫𑀺𑀁 𑀧𑀲𑀻𑀤𑀺𑀬;

𑀙𑀢𑁆𑀢𑀢𑁆𑀢𑁂𑀦 𑀲𑀗𑁆𑀖𑀁 𑀧𑀽𑀚𑁂𑀲𑀺, 𑀲𑀗𑁆𑀖𑁄 𑀢𑀲𑁆𑀲𑁂𑀯 𑀢𑀁 𑀅𑀤𑀸.

𑀢𑀁 𑀞𑀸𑀦𑀁 𑀙𑀢𑁆𑀢𑀯𑀟𑁆𑀠𑀻𑀢𑀺, 𑀯𑁄𑀳𑀭𑀺𑀁𑀲𑀼 𑀢𑀳𑀺𑀁 𑀓𑀢𑀁;

𑀧𑀭𑀺𑀯𑁂𑀡𑀫𑁆𑀧𑀺 𑀢𑀁 𑀦𑀸𑀫𑀁, 𑀅𑀳𑁄𑀲𑀺 𑀧𑀼𑀭𑀫𑀸𑀕𑀢𑁄.

𑀯𑀺𑀳𑀸𑀭𑁂 𑀤𑁆𑀯𑁂𑀧𑀺 𑀕𑀦𑁆𑀢𑁆𑀯𑀸𑀦, 𑀲𑀗𑁆𑀖𑀁 𑀢𑀢𑁆𑀣𑀸’𑀪𑀺𑀯𑀦𑁆𑀤𑀺𑀬;

𑀧𑀸𑀧𑀼𑀡𑀺𑀢𑁆𑀯𑀸 𑀫𑀳𑀸𑀭𑀚𑁆𑀚𑀁, 𑀮𑁄𑀓𑀁 𑀥𑀫𑁆𑀫𑁂𑀦 𑀧𑀸𑀮𑀬𑀺.

𑀓𑀼𑀤𑁆𑀥𑁄 𑀦𑀻𑀳𑀭𑀺 𑀤𑀸𑀞𑀁𑀲𑁄, 𑀖𑀸𑀢𑀓𑀁 𑀧𑀺𑀢𑀼𑀦𑁄 𑀫𑀫;

𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀫𑀘𑁆𑀘𑀸𑀢𑀺, 𑀢𑁂𑀦 𑀭𑀓𑁆𑀔𑀲 𑀦𑀸𑀫 𑀯𑀸.

𑀅𑀢𑀺𑀭𑁂𑀓𑀲𑀳𑀲𑁆𑀲𑀁 𑀲𑁄, 𑀅𑀫𑀘𑁆𑀘𑀸𑀦𑀁 𑀯𑀺𑀦𑀸𑀲𑀬𑀺;

𑀓𑀡𑁆𑀡𑀦𑀸𑀲𑀸𑀤𑀺 𑀙𑁂𑀤𑁂𑀲𑀺, 𑀧𑀩𑁆𑀩𑀸𑀚𑁂𑀲𑀺 𑀢𑀣𑀸 𑀩𑀳𑀽.

𑀢𑀢𑁄 𑀲𑀼𑀢𑁆𑀯𑀸𑀦 𑀲𑀤𑁆𑀥𑀫𑁆𑀫-𑀫𑀼𑀧𑀲𑀦𑁆𑀦𑁄 𑀲𑀼𑀫𑀸𑀦𑀲𑁄;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀫𑁂𑀖𑁄 𑀯𑀺𑀬 𑀫𑀳𑀻𑀢𑀮𑁂.

𑀨𑀼𑀲𑁆𑀲𑀧𑀼𑀡𑁆𑀡𑀫𑀻𑀬𑀁 𑀤𑀸𑀦-𑀫𑀦𑀼𑀯𑀲𑁆𑀲𑀁 𑀧𑀯𑀢𑁆𑀢𑀬𑀺;

𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀤𑀸𑀦𑀁, 𑀤𑀻𑀧𑁂 𑀅𑀚𑁆𑀚𑀸𑀧𑀺 𑀯𑀢𑁆𑀢𑀢𑀺.

𑀲𑁄𑀧𑀺 𑀲𑀸𑀭𑀣𑀺𑀓𑁄 𑀮𑀸𑀚-𑀤𑀸𑀬𑀓𑁄 𑀧𑀺𑀢𑀼𑀭𑀸𑀚𑀺𑀦𑁄;

𑀆𑀦𑁂𑀢𑁆𑀯𑀸 𑀧𑀺𑀢𑀼𑀲𑀦𑁆𑀤𑁂 𑀲𑀁, 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀤𑀲𑁆𑀲𑀬𑀺.

𑀢𑀁 ¶ 𑀤𑀺𑀲𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸, 𑀧𑀺𑀢𑀼𑀦𑁄 𑀧𑁂𑀫 𑀫𑀢𑁆𑀢𑀦𑀻;

𑀯𑀡𑁆𑀡𑁂𑀢𑁆𑀯𑀸 𑀢𑀲𑁆𑀲 𑀧𑀸𑀤𑀸𑀲𑀺, 𑀤𑁆𑀯𑀸𑀭𑀦𑀸𑀬𑀓𑀢𑀁 𑀯𑀺𑀪𑀽.

𑀲𑁂𑀦𑀸𑀧𑀢𑀺 𑀫𑀺𑀕𑀸𑀭𑁄𑀳𑀺, 𑀦𑀺𑀯𑁂𑀤𑁂𑀢𑁆𑀯𑀸 𑀬𑀣𑀸 𑀯𑀺𑀥𑀺𑀁;

𑀅𑀪𑀺𑀲𑁂𑀓 𑀚𑀺𑀦𑀲𑁆𑀲𑀸’𑀓𑀸, 𑀅𑀪𑀺𑀲𑁂𑀓𑀁 𑀬𑀣𑀸𑀭𑀼𑀘𑀺𑀁.

𑀲𑀻𑀳𑀸’𑀘𑀮𑁂 𑀤𑀴𑁆𑀳𑀦𑀸𑀫𑀁, 𑀤𑀸𑀞𑀸 𑀓𑁄𑀡𑁆𑀟𑀜𑁆𑀜𑀓𑀫𑁆𑀧𑀺 𑀘;

𑀯𑀺𑀳𑀸𑀭𑀁 𑀥𑀫𑁆𑀫𑀭𑀼𑀘𑀺𑀦𑀁, 𑀲𑀸𑀕𑀮𑀺𑀦𑀜𑁆𑀘 𑀤𑀸𑀧𑀬𑀺.

𑀧𑀩𑁆𑀩𑀢𑀦𑁆𑀢𑀼 𑀯𑀺𑀳𑀸𑀭𑀁𑀲𑁄, 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀤𑀸𑀧𑀬𑀺;

𑀫𑀳𑀸𑀦𑀸𑀫𑀲𑀦𑀸𑀫𑀲𑁆𑀲, 𑀤𑀻𑀖𑀲𑀡𑁆𑀟 𑀯𑀺𑀳𑀸𑀭𑀓𑁂.

𑀭𑀸𑀚𑀺𑀦𑀺𑀦𑀸𑀫𑀓𑀜𑁆𑀘𑁂𑀯, 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀅𑀤𑀸 𑀲𑀸𑀕𑀮𑀺𑀓𑀸𑀦𑀁 𑀲𑁄, 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀫𑀢𑀺.

𑀮𑀫𑁆𑀩𑀓𑀡𑁆𑀡𑀓𑀕𑁄𑀢𑁆𑀢𑁄𑀧𑀺, 𑀤𑀸𑀞𑀸 𑀧𑀪𑀼𑀢𑀺 𑀦𑀸𑀫𑀓𑁄;

𑀓𑀲𑁆𑀲𑀧𑀲𑁆𑀲 𑀉𑀧𑀞𑀸𑀦𑁂, 𑀓𑁄𑀘𑀺 𑀦𑀺𑀩𑁆𑀩𑀺𑀦𑁆𑀦 𑀫𑀸𑀦𑀲𑁄.

𑀲𑁄𑀧𑀺 𑀓𑀲𑁆𑀲𑀧𑀢𑁄 𑀪𑀻𑀢𑁄, 𑀜𑀸𑀢𑀓𑁂𑀦 𑀲𑀳’𑀢𑁆𑀢𑀦𑁄;

𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀕𑀦𑁆𑀢𑁆𑀯𑀸𑀦, 𑀚𑀫𑁆𑀩𑀼𑀤𑀻𑀧𑀢𑀮𑀁 𑀇𑀢𑁄.

𑀩𑁄𑀥𑀺𑀧𑀡𑁆𑀟𑀯𑀺𑀳𑀸𑀭𑀫𑁆𑀧𑀺, 𑀧𑀩𑁆𑀩𑀚𑁆𑀚𑀁 𑀲𑀫𑀼𑀧𑀸𑀕𑀢𑁄;

𑀓𑀭𑁄𑀦𑁆𑀢𑁄 𑀲𑀗𑁆𑀖𑀓𑀺𑀘𑁆𑀘𑀸𑀦𑀺, 𑀲𑀸𑀤𑀭𑁄 𑀲𑁄 𑀲𑀼𑀧𑁂𑀲𑀮𑁄.

𑀅𑀫𑁆𑀫𑀁 𑀲𑀗𑁆𑀖𑀲𑁆𑀲 𑀧𑀸𑀤𑀸𑀲𑀺, 𑀲𑀗𑁆𑀖𑁄 𑀢𑀲𑁆𑀫𑀺𑀁 𑀧𑀲𑀻𑀤𑀺𑀬;

𑀆𑀳’𑀫𑁆𑀩 𑀲𑀸𑀫𑀡𑁂𑀭𑁄’𑀢𑀺, 𑀢𑁂𑀦 𑀢𑀁 𑀦𑀸𑀫𑀓𑁄 𑀅𑀳𑀼.

𑀲𑁄 𑀓𑁂𑀲𑀥𑀸𑀢𑀼𑀯𑀁𑀲𑀫𑁆𑀳𑀺, 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀢𑀢𑁄;

𑀓𑁂𑀲𑀥𑀸𑀢𑀼𑀁 𑀮𑀪𑀺𑀢𑁆𑀯𑀸𑀦, 𑀢𑀲𑁆𑀲 𑀭𑀚𑁆𑀚𑁂 𑀇𑀥𑀸’𑀦𑀬𑀺.

𑀢𑀲𑁆𑀲 𑀓𑀢𑁆𑀯𑀸𑀦 𑀲𑀓𑁆𑀓𑀸𑀭𑀁, 𑀕𑀳𑁂𑀢𑁆𑀯𑀸 𑀓𑁂𑀲 𑀥𑀸𑀢𑀼𑀬𑁄;

𑀫𑀳𑀕𑁆𑀖𑁂 𑀦𑀺𑀤𑀳𑀺𑀢𑁆𑀯𑀸𑀦, 𑀓𑀭𑀡𑁆𑀟𑁂 𑀨𑀮𑀺𑀓𑀼𑀫𑁆𑀪𑀯𑁆𑀳𑁂.

𑀤𑀻𑀧𑀗𑁆𑀓𑀭𑀲𑁆𑀲 𑀦𑀸𑀣𑀲𑁆𑀲, 𑀧𑀝𑀺𑀫𑀸𑀬 𑀖𑀭𑁂 𑀯𑀭𑁂;

𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀳𑀸𑀭𑁂𑀦, 𑀫𑀳𑀸𑀧𑀽𑀚𑀁 𑀧𑀯𑀢𑁆𑀢𑀬𑀺.

𑀫𑀸𑀢𑀼𑀮𑀁 𑀪𑀭𑀺𑀬𑀜𑁆𑀘’𑀲𑁆𑀲, 𑀓𑀢𑁆𑀯𑀸 𑀲𑁄𑀯𑀡𑁆𑀡𑀬𑀁 𑀢𑀳𑀺𑀁;

𑀞𑀧𑁂𑀲𑀺 𑀧𑀝𑀺𑀫𑀸𑀬𑁄 𑀘, 𑀅𑀲𑁆𑀲 𑀩𑀺𑀫𑁆𑀩𑀜𑁆𑀘 𑀘𑀸𑀭𑀼𑀓𑀁.

𑀓𑁂𑀲𑀥𑀸𑀢𑀼𑀓𑀭𑀡𑁆𑀟𑀜𑁆𑀘 ¶ , 𑀙𑀢𑁆𑀢𑀁 𑀭𑀢𑀦𑀫𑀡𑁆𑀟𑀧𑀁;

𑀲𑀸𑀯𑀓𑀕𑁆𑀕𑀬𑀼𑀁𑀕𑀁 𑀯𑀸𑀴-𑀩𑀻𑀚𑀦𑀺𑀜𑁆𑀘 𑀲𑀓𑀸𑀭𑀬𑀺.

𑀧𑀭𑀺𑀳𑀸𑀭𑀜𑁆𑀘 𑀢𑀲𑁆𑀲’𑀤𑀸, 𑀭𑀸𑀚𑀸 𑀅𑀥𑀺𑀓𑀫𑀢𑁆𑀢𑀦𑁄;

𑀲𑀺𑀮𑀸𑀓𑀸𑀴 𑀫𑀲𑀺𑀕𑁆𑀕𑀸𑀳𑀁, 𑀓𑀢𑁆𑀯𑀸 𑀭𑀓𑁆𑀔𑀸𑀬 𑀬𑁄𑀚𑀬𑀺.

𑀅𑀲𑀺𑀕𑁆𑀕𑀸𑀳𑀲𑀺𑀮𑀸𑀓𑀸𑀴𑁄, 𑀇𑀢𑀺 𑀢𑁂𑀦𑀸’𑀲𑀺 𑀯𑀺𑀲𑁆𑀲𑀼𑀢𑁄;

𑀪𑀕𑀺𑀦𑀺𑀜𑁆𑀘’𑀲𑁆𑀲 𑀧𑀸𑀤𑀸𑀲𑀺, 𑀲𑀤𑁆𑀥𑀺𑀁 𑀪𑁄𑀕𑁂𑀦 𑀪𑀽𑀫𑀺𑀧𑁄.

𑀯𑀼𑀢𑁆𑀢𑁄’𑀬𑀫𑀢𑀺 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀩𑁆𑀩𑀲𑁄;

𑀓𑁂𑀲𑀥𑀸𑀢𑀼𑀓𑀯𑀁𑀲𑀫𑁆𑀳𑀸, 𑀕𑀳𑁂𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑀩𑀦𑁆𑀥𑀺𑀢𑁆𑀯𑀸 𑀲𑀸𑀕𑀭𑀸 𑀭𑀓𑁆𑀔𑀁, 𑀤𑀻𑀧𑀜𑁆𑀘 𑀓𑀸𑀲𑀺𑀦𑀺𑀩𑁆𑀪𑀬𑀁;

𑀥𑀫𑁆𑀫𑀓𑀫𑁆𑀫𑀦 𑀲𑁄𑀥𑁂𑀲𑀺, 𑀲𑀥𑀫𑁆𑀫𑀁 𑀚𑀺𑀦𑀲𑀸𑀲𑀦𑀁.

𑀲𑁂𑀦𑀸𑀧𑀢𑀺𑀲 𑀦𑀸𑀫𑀁’𑀓𑀸, 𑀧𑀥𑀸𑀦𑀖𑀭 𑀫𑀼𑀢𑁆𑀢𑀭𑁄;

𑀓𑀢𑁆𑀯𑀸’𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂, 𑀲𑁄 𑀧𑀼𑀜𑁆𑀜𑀸𑀦𑀺 𑀔𑀬𑀁 𑀕𑀢𑁄.

𑀓𑀲𑁆𑀲𑀧𑀢𑁄 𑀚𑀺𑀢𑁄 𑀅𑀢𑀺𑀩𑀮𑀺 𑀧𑀼𑀜𑁆𑀜𑀓𑁆𑀔𑀬𑁂 𑀲𑀗𑁆𑀔𑀢𑁂;

𑀚𑁂𑀢𑀼𑀁 𑀦𑁄 𑀯𑀺𑀲𑀳𑀺𑀢𑁆𑀣 𑀫𑀘𑁆𑀘𑀼𑀫𑀼𑀧𑀕𑀁 𑀲𑁄 𑀬𑁂𑀯𑀤𑀸𑀲𑁄𑀯𑀺𑀬;

𑀢𑀲𑁆𑀫𑀸 𑀫𑀘𑁆𑀘𑀼𑀩𑀮𑀁 𑀦𑀺𑀳𑀘𑁆𑀘 𑀲𑀼𑀔𑀺𑀦𑁄 𑀳𑁂𑀲𑁆𑀲𑀦𑁆𑀢𑀺 𑀫𑁂𑀥𑀸𑀯𑀺𑀦𑁄;

𑀦𑀺𑀩𑁆𑀩𑀸𑀦𑀁 𑀧𑀭𑀫𑀘𑁆𑀘𑀼𑀢𑀁 𑀲𑀺𑀯𑀧𑀤𑀁 𑀧𑀢𑁆𑀢𑀩𑁆𑀩𑀫𑀢𑁆𑀢𑀜𑁆𑀜𑀼𑀦𑀸.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀢𑀲𑁆𑀲𑀘𑁆𑀘𑀬𑁂 𑀓𑀼𑀫𑀸𑀭𑀸𑀤𑀺-𑀥𑀸𑀢𑀼𑀲𑁂𑀦𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀳𑀼 𑀢𑀲𑁆𑀲 𑀲𑀼𑀢𑁄 𑀭𑀸𑀚𑀸, 𑀤𑁂𑀯𑀭𑀽𑀧𑁄 𑀫𑀳𑀸𑀩𑀮𑁄.

𑀓𑀸𑀭𑀺𑀢𑁂 𑀧𑀺𑀢𑀭𑀸’𑀓𑀸𑀲𑀺, 𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀓𑀁;

𑀓𑀸𑀭𑁂𑀢𑁆𑀯𑀸 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀧𑀭𑀺𑀲𑁄𑀥𑁂𑀢𑀺 𑀲𑀸𑀲𑀦𑀁.

𑀲𑀦𑁆𑀢𑀧𑁆𑀧𑁂𑀲𑀺 ¶ 𑀫𑀳𑀸𑀲𑀗𑁆𑀖𑀁, 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺𑀧𑀺;

𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺’𑀦𑁂𑀓𑀸𑀦𑀺, 𑀦𑀯𑀫𑁂 𑀳𑀸𑀬𑀦𑁂’𑀢𑀺𑀕𑀸.

𑀢𑀺𑀢𑁆𑀢𑀺𑀲𑁂𑀦𑁄 𑀲𑀼𑀢𑁄 𑀢𑀲𑁆𑀲, 𑀭𑀸𑀚𑀸 𑀳𑀼𑀢𑁆𑀯𑀸 𑀅𑀦𑁂𑀓𑀥𑀸;

𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀭𑀚𑁆𑀚𑀁 𑀢𑀁, 𑀫𑀸𑀲𑀫𑁆𑀧𑀺 𑀦𑀯𑀫𑁂 𑀚𑀳𑀺.

𑀲𑀺𑀯𑁄 𑀢𑀁 𑀫𑀸𑀢𑀼𑀮𑁄 𑀳𑀦𑁆𑀢𑁆𑀯𑀸, 𑀳𑀼𑀢𑁆𑀯𑀸 𑀭𑀸𑀚𑀸 𑀅𑀦𑀧𑁆𑀧𑀓𑀁;

𑀧𑀼𑀜𑁆𑀜𑀁 𑀓𑀢𑁆𑀯𑁄’𑀧𑀢𑀺𑀲𑁆𑀲𑁂𑀦, 𑀧𑀜𑁆𑀘𑀯𑀻𑀲 𑀤𑀺𑀦𑁂 𑀳𑀢𑁄.

𑀉𑀧𑀢𑀺𑀲𑁆𑀲𑁄 𑀢𑀢𑁄 𑀆𑀲𑀺, 𑀭𑀸𑀚𑀸 𑀳𑀦𑁆𑀢𑁆𑀯𑀸𑀦 𑀲𑀻𑀯𑀓𑀁;

𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀪𑀕𑀺𑀦𑀻, 𑀲𑀸𑀫𑀺𑀓𑁄 𑀥𑀚𑀺𑀦𑀻𑀧𑀢𑀺.

𑀭𑀸𑀚𑀸 𑀞𑀸𑀦𑀦𑁆𑀢𑀭𑀸𑀤𑀻𑀳𑀺, 𑀓𑀢𑁆𑀯𑀸𑀦 𑀚𑀦𑀲𑀗𑁆𑀕𑀳𑀁;

𑀲𑀻𑀮𑀸𑀓𑀸𑀴𑀲𑁆𑀲 𑀧𑀸𑀤𑀸𑀲𑀺, 𑀲𑀳 𑀪𑁄 𑀓𑀦𑀥𑀻𑀯𑀭𑀁.

𑀏𑀓𑁄 𑀧𑀼𑀢𑁆𑀢𑁄 𑀅𑀳𑀼 𑀭𑀜𑁆𑀜𑁄, 𑀉𑀧𑀢𑀺𑀲𑁆𑀲𑀲𑁆𑀲 𑀓𑀲𑁆𑀲𑀧𑁄;

𑀲𑀲𑁄𑀴𑀲 𑀲𑀳𑀸𑀬𑁂𑀳𑀺, 𑀲𑀽𑀭𑁄 𑀲𑀽𑀧𑁂𑀳𑀺 𑀲𑀜𑁆𑀜𑀼𑀢𑁄.

𑀏𑀓 𑀯𑀼𑀢𑁆𑀢𑀺𑀲𑀳𑀸𑀬𑁂𑀳𑀺, 𑀤𑀸𑀦𑀫𑀸𑀦 𑀫𑀳𑀸𑀥𑀦𑁄;

𑀥𑀫𑁆𑀫𑀝𑁆𑀞𑁄 𑀯𑀻𑀭𑀺𑀬𑀸𑀚𑀻𑀯𑀺, 𑀲𑀸𑀥𑀼 𑀚𑁂𑀝𑁆𑀞𑀧𑀘𑀸𑀬𑀓𑁄.

𑀲𑀺𑀮𑀸 𑀓𑀸𑀴𑁄𑀢𑀢𑁄 𑀭𑀚𑁆𑀚-𑀮𑁄𑀪𑀯𑀜𑁆𑀘𑀺𑀢 𑀫𑀸𑀦𑀲𑁄;

𑀤𑀓𑁆𑀔𑀺𑀡𑀁 𑀫𑀮𑀬𑀁 𑀕𑀦𑁆𑀢𑁆𑀯𑀸, 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀸 𑀩𑀮𑀁.

𑀯𑀺𑀮𑀼𑀫𑁆𑀧𑀫𑀸𑀦𑁄 𑀧𑀘𑁆𑀘𑀦𑁆𑀢𑀺, 𑀲𑀫𑁆𑀧𑀢𑁆𑀢𑁄 𑀦𑀕𑀭𑀦𑁆𑀢𑀺𑀓𑀁;

𑀢𑀁 𑀲𑀼𑀢𑁆𑀯𑀸 𑀓𑀲𑁆𑀲𑀧𑁄 𑀚𑁂𑀝𑁆𑀞𑁄, 𑀯𑀭𑀫𑀸𑀭𑀼𑀬𑁆𑀳 𑀓𑀼𑀜𑁆𑀚𑀭𑀁.

𑀅𑀲𑁆𑀲𑀸 𑀲𑁂𑀢𑁆𑀯𑀸𑀦 𑀧𑀺𑀢𑀭𑀁, 𑀲𑀫𑀸𑀤𑀸𑀬 𑀲𑀳𑀸𑀬𑀓𑁂;

𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀕𑀘𑁆𑀙𑀺, 𑀲𑀺𑀮𑀸𑀓𑀸𑀮𑀲𑁆𑀲 𑀤𑀲𑁆𑀲𑀦𑀁.

𑀏𑀯𑀁 𑀲𑀢𑁆𑀢’𑀝𑁆𑀞 𑀯𑀸𑀭𑁂𑀲𑀼, 𑀧𑀮𑀸𑀢𑁄 𑀮𑀻𑀦𑀯𑀼𑀢𑁆𑀢𑀺𑀓𑁄;

𑀳𑀢𑁆𑀣𑁂 𑀓𑀢𑁆𑀯𑀸 𑀉𑀧𑀸𑀬𑁂𑀦, 𑀤𑁂𑀲𑁂 𑀧𑀸𑀘𑀺𑀦 𑀧𑀘𑁆𑀙𑀺𑀫𑁂.

𑀬𑀼𑀚𑁆𑀛𑀺𑀢𑀼𑀁 𑀧𑀼𑀦 𑀧𑀸𑀘𑀺𑀦-𑀢𑀺𑀲𑁆𑀲 𑀧𑀩𑁆𑀩𑀢𑀫𑀸𑀕𑀫𑀺;

𑀓𑀲𑁆𑀲𑀧𑁄𑀧𑀺 𑀲𑀳𑀸𑀬𑁂𑀳𑀺, 𑀲𑀤𑁆𑀥𑀺𑀫𑀸𑀭𑀼𑀬𑁆𑀳 𑀤𑀦𑁆𑀢𑀺𑀦𑀁.

𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸, 𑀘𑁄𑀭𑀁 𑀧𑀩𑁆𑀩𑀢𑀫𑀢𑁆𑀣𑀓𑀁;

𑀆𑀭𑁄𑀧𑁂𑀲𑀺 𑀫𑀳𑀸𑀦𑀸𑀕𑀁, 𑀢𑁂𑀦𑀸’𑀲𑀺 𑀕𑀺𑀭𑀺𑀓𑀲𑁆𑀲𑀧𑁄.

𑀫𑀸𑀦𑀢𑁆𑀣𑀤𑁆𑀥𑁄 𑀲𑀺𑀮𑀸𑀓𑀸𑀴𑁄, 𑀪𑀺𑀬𑁆𑀬𑁄 𑀭𑀝𑁆𑀞𑀁 𑀧𑀪𑀺𑀦𑁆𑀤𑀺𑀬;

𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀅𑀚𑁂𑀬𑁆𑀬 𑀩𑀮𑀯𑀸𑀳𑀦𑁄.

𑀆𑀕𑀫𑁆𑀫 𑀦𑀕𑀭𑀁 𑀭𑀼𑀦𑁆𑀥𑀺, 𑀲𑀢𑁆𑀣𑀸𑀳𑀁 𑀭𑀸𑀚𑀲𑁂𑀯𑀓𑀸;

𑀬𑀼𑀚𑁆𑀛𑀺𑀢𑁆𑀯𑀸 𑀯𑀺𑀭𑀮𑀸 𑀆𑀲𑀼𑀁, 𑀢𑀢𑁄 𑀘𑀺𑀦𑁆𑀢𑁂𑀲𑀺 𑀓𑀲𑁆𑀲𑀧𑁄.

𑀏𑀢𑁂 ¶ 𑀦𑀕𑀭𑀭𑁄𑀥𑁂𑀦, 𑀲𑀩𑁆𑀩𑁂 𑀪𑀺𑀚𑁆𑀚𑀦𑁆𑀢𑀺 𑀧𑀸𑀡𑀺𑀦𑁄;

𑀧𑀭𑀺𑀳𑀻𑀦𑀁 𑀩𑀮𑀁 𑀭𑀸𑀚𑀸, 𑀅𑀦𑁆𑀥𑀓𑁄 𑀘 𑀫𑀳𑀮𑁆𑀮𑀓𑁄.

𑀫𑁂𑀭𑀼𑀓𑀦𑁆𑀤𑀭𑀓𑁂 𑀓𑀢𑁆𑀯𑀸, 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘 𑀫𑁂;

𑀅𑀗𑁆𑀕𑀳𑁂𑀢𑁆𑀯𑀸 𑀩𑀮𑀁 𑀧𑀘𑁆𑀙𑀸, 𑀘𑁄𑀭𑁄 𑀦𑀺𑀕𑁆𑀕𑀡𑁆𑀳𑀺 𑀬𑁄 𑀇𑀢𑀺.

𑀭𑀢𑁆𑀢𑀺𑀬𑀁 𑀲𑁄 𑀲𑀳𑀸𑀬𑁂 𑀘, 𑀭𑀸𑀚𑀲𑀸𑀥𑀦𑀫𑁂𑀯𑀘;

𑀆𑀤𑀸𑀬 𑀧𑀺𑀢𑀭𑁄 𑀘𑁂𑀯, 𑀫𑀮𑀬𑀁 𑀕𑀦𑁆𑀢𑀼𑀫𑀸𑀭𑀪𑀺.

𑀢𑀤𑀸 𑀫𑀕𑁆𑀕𑀫𑀚𑀸𑀦𑀦𑁆𑀢𑀸, 𑀲𑀫𑁆𑀫𑀽𑀴𑀸 𑀫𑀕𑁆𑀕𑀤𑁂𑀲𑀓𑀸;

𑀦𑀕𑀭𑀲𑁆𑀲 𑀲𑀫𑀻𑀧𑁂𑀯, 𑀲𑀫𑁆𑀪𑀫𑀺𑀁𑀲𑀼 𑀇𑀢𑁄 𑀢𑀢𑁄.

𑀲𑀺𑀮𑀸𑀓𑀸𑀴𑁄 𑀧𑀯𑀢𑁆𑀢𑀺𑀁 𑀢𑀁, 𑀲𑀼𑀢𑁆𑀯𑀸 𑀲𑀗𑁆𑀕𑀫𑁆𑀫 𑀯𑁂𑀕𑀲𑀸;

𑀧𑀭𑀺𑀯𑀸𑀭𑁂𑀲𑀺 𑀲𑀗𑁆𑀕𑀸𑀫𑁄, 𑀢𑀢𑁆𑀣 𑀪𑀺𑀁𑀲𑀦𑀓𑁄 𑀅𑀳𑀼.

𑀤𑁂𑀯𑀸𑀲𑀼𑀭𑀭𑀡𑀸𑀓𑀸𑀭𑁂, 𑀯𑀢𑁆𑀢𑀫𑀸𑀦𑁂 𑀫𑀳𑀸𑀳𑀯𑁂;

𑀧𑀢𑀺𑀢𑁂𑀲𑀼 𑀲𑀳𑀸𑀬𑁂𑀲𑀼, 𑀲𑀻𑀤𑀫𑀸𑀦𑁂 𑀫𑀳𑀸𑀕𑀚𑁂.

𑀳𑀢𑁆𑀣𑀸𑀭𑁄𑀳𑀲𑁆𑀲 𑀤𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀲𑀫𑀢𑁆𑀢𑀦𑁄;

𑀧𑀼𑀜𑁆𑀙𑀺𑀢𑁆𑀯𑀸 𑀮𑁄𑀳𑀺𑀢𑀁 𑀓𑀢𑁆𑀯𑀸, 𑀓𑁄𑀲𑀺𑀬𑀁 𑀅𑀲𑀺 𑀧𑀼𑀢𑁆𑀢𑀺𑀓𑀁.

𑀳𑀢𑁆𑀣𑀺𑀓𑀼𑀫𑁆𑀪𑁂 𑀉𑀪𑁄 𑀳𑀢𑁆𑀣𑁂, 𑀞𑀧𑁂𑀢𑁆𑀯𑀸𑀦 𑀅𑀯𑀢𑁆𑀣𑀭𑀺;

𑀉𑀧𑀢𑀺𑀲𑁆𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸, 𑀲𑁄𑀓𑀲𑀮𑁆𑀮𑀸𑀳𑀢𑁄 𑀫𑀭𑀺.

𑀏𑀯𑀁 𑀤𑀺𑀬𑀟𑁆𑀠𑀯𑀲𑁆𑀲𑁂𑀦, 𑀉𑀧𑀢𑀺𑀲𑁆𑀲𑁂 𑀤𑀺𑀯𑀁𑀕𑀢𑁂;

𑀭𑀸𑀚𑀸’𑀳𑁄𑀲𑀺 𑀲𑀺𑀮𑀸𑀓𑀸𑀴𑁄, 𑀧𑀼𑀩𑁆𑀩𑀦𑀸𑀫𑁂𑀦 𑀏𑀓𑀢𑁄.

𑀢𑀁 𑀅𑀫𑁆𑀩𑀲𑀸𑀫𑀡𑁂𑀭𑀸𑀤𑀺-𑀲𑀺𑀮𑀸𑀓𑀸𑀴𑁄𑀢𑀺 𑀯𑁄𑀳𑀭𑀼𑀁;

𑀢𑀺𑀢𑁆𑀣𑀁 𑀢𑁂𑀭𑀲𑀯𑀲𑁆𑀲𑀸𑀦𑀺, 𑀤𑀺𑀧𑀁 𑀥𑀫𑁆𑀫𑁂𑀦 𑀧𑀸𑀮𑀬𑀺.

𑀫𑀳𑀸𑀧𑀸𑀴𑀺𑀫𑁆𑀳𑀺 𑀤𑀸𑀧𑁂𑀲𑀺, 𑀧𑀘𑁆𑀘𑀕𑁆𑀖𑀁 𑀭𑀸𑀚𑀪𑁄𑀚𑀦𑀁;

𑀯𑁂𑀚𑁆𑀚𑀲𑀸𑀮𑀸𑀲𑀼 𑀪𑁄𑀕𑁂 𑀘, 𑀯𑀟𑁆𑀠𑁂𑀲𑀺 𑀚𑀦𑀢𑀸𑀳𑀺𑀢𑁄.

𑀅𑀦𑁆𑀯𑀳𑀁 𑀧𑀽𑀚𑀬𑀺 𑀩𑁄𑀥𑀺𑀁, 𑀧𑀝𑀺𑀫𑀸𑀬𑁄 𑀘 𑀓𑀸𑀭𑀬𑀺;

𑀲𑀩𑁆𑀩𑁂𑀲𑀁 𑀤𑀻𑀧𑀯𑀸𑀲𑀻𑀦𑀁, 𑀪𑀺𑀓𑁆𑀔𑀽𑀦𑀁’𑀤𑀸 𑀢𑀺𑀘𑀻𑀯𑀭𑀁.

𑀫𑀸𑀖𑀸𑀢𑀁 𑀓𑀸𑀭𑀬𑀺𑀤𑀻𑀧𑁂, 𑀲𑀩𑁆𑀩𑁂𑀲𑀁𑀬𑁂𑀯 𑀧𑀸𑀡𑀺𑀦𑀁;

𑀆𑀦𑀺𑀢𑀁 𑀅𑀢𑁆𑀢𑀦𑀸 𑀓𑁂𑀲-𑀥𑀸𑀢𑀼𑀁 𑀲𑀫𑁆𑀫𑀸 𑀅𑀧𑀽𑀚𑀬𑀺.

𑀭𑀳𑁂𑀭𑀤𑀓𑀯𑀸𑀭𑀜𑁆𑀘, 𑀅𑀤𑀸𑀲𑀺 𑀅𑀪𑀬𑀼𑀢𑁆𑀢𑀭𑁂;

𑀧𑀼𑀭𑀢𑁆𑀣𑀺𑀫𑀸 𑀣𑁂𑀭𑀻𑀬𑀸𑀦𑀁, 𑀯𑀺𑀳𑀸𑀭𑀓𑀼𑀦𑁆𑀣𑀦𑀸𑀫 𑀲𑁄.

𑀆𑀦𑁂𑀢𑁆𑀯𑀸 𑀆𑀲𑀦𑀁 𑀢𑀢𑁆𑀣, 𑀞𑀧𑁂𑀲𑀺 𑀤𑀼𑀫𑀭𑀸𑀚𑀓𑁂;

𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑁂𑀲𑀺, 𑀧𑀼𑀜𑁆𑀜𑀓𑀫𑁆𑀫𑀫𑀲𑀗𑁆𑀔𑀺𑀬𑀁.

𑀫𑁄𑀕𑁆𑀕𑀮𑁆𑀮𑀸𑀦𑁄 ¶ 𑀢𑀣𑀸 𑀤𑀸𑀞𑀸, 𑀧𑀪𑀼𑀢𑀺 𑀘𑁄’𑀧𑀢𑀺𑀲𑁆𑀲𑀓𑁄;

𑀧𑀼𑀢𑁆𑀢𑁄 𑀢𑀲𑁆𑀲𑀸’𑀲𑀼𑀫𑀕𑁆𑀕𑀲𑁆𑀲, 𑀤𑁂𑀲𑀁 𑀤𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁.

𑀤𑀢𑁆𑀯𑀸 𑀞𑀸𑀦𑀦𑁆𑀢𑀭𑀜𑁆𑀘𑀸𑀤𑀺-𑀧𑀸𑀤𑀲𑀜𑁆𑀜𑀁 𑀯𑀺𑀲𑀚𑁆𑀚𑀬𑀺;

𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑀸𑀳𑀻𑀢𑀺, 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀢𑀳𑀺𑀁 𑀯𑀲𑀺.

𑀞𑀸𑀦𑀁 𑀫𑀮𑀬𑀭𑀸𑀚𑀕𑁆𑀕𑀁, 𑀤𑁂𑀲𑀁 𑀤𑀢𑁆𑀯𑀸𑀦 𑀤𑀓𑁆𑀔𑀺𑀡𑀁;

𑀭𑀓𑁆𑀔𑀡𑀢𑁆𑀣𑀁 𑀲𑀫𑀼𑀤𑁆𑀤𑀲𑁆𑀲, 𑀫𑀚𑁆𑀛𑀺𑀫𑀁 𑀢𑀼 𑀦𑀺𑀬𑁄𑀚𑀬𑀺.

𑀉𑀧𑀢𑀺𑀲𑁆𑀲𑀁 𑀢𑀼 𑀯𑀸𑀲𑁂𑀲𑀺, 𑀲𑀦𑁆𑀢𑀺𑀓𑁂𑀬𑁂𑀯 𑀅𑀢𑁆𑀢𑀦𑁄;

𑀯𑀺𑀲𑁂𑀲𑁂𑀦 𑀫𑀫𑀸𑀬𑀦𑁆𑀢𑁄, 𑀬𑀽𑀦𑀁 𑀓𑀮𑁆𑀬𑀸𑀦𑀤𑀲𑁆𑀲𑀦𑀁.

𑀢𑀲𑁆𑀲 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂, 𑀇𑀢𑁄 𑀓𑀸𑀲𑀺 𑀧𑀼𑀭𑀁 𑀕𑀢𑁄;

𑀥𑀫𑁆𑀫𑀸𑀢𑀼 𑀫𑀺𑀥𑀸’𑀦𑁂𑀲𑀺, 𑀢𑀢𑁄 𑀯𑀸𑀡𑀺𑀚 𑀫𑀸𑀡𑀯𑁄.

𑀭𑀸𑀚𑀸 𑀤𑀺𑀲𑁆𑀯𑀸’𑀲𑀫𑀢𑁆𑀣𑁄 𑀲𑁄, 𑀥𑀫𑁆𑀫𑀸𑀥𑀫𑁆𑀫𑀯𑀺𑀘𑀸𑀭𑀡𑁂;

𑀳𑁂𑀫𑀲𑀜𑁆𑀜𑀸𑀬 𑀤𑀻𑀧𑀫𑁆𑀳𑀺, 𑀧𑀢𑀦𑁆𑀢𑁄 𑀲𑀮𑀪𑁄 𑀯𑀺𑀬.

𑀩𑀼𑀤𑁆𑀥𑀥𑀫𑁆𑀫𑁄𑀢𑀺 𑀲𑀜𑁆𑀜𑀸𑀬, 𑀢𑀁 𑀕𑀳𑁂𑀢𑁆𑀯𑀸𑀦 𑀲𑀸𑀥𑀼𑀓𑀁;

𑀓𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁, 𑀕𑁂𑀳𑁂 𑀭𑀸𑀚𑀖𑀭𑀦𑁆𑀢𑀺𑀓𑁂.

𑀞𑀧𑁂𑀢𑁆𑀯𑀸 𑀅𑀦𑀼𑀯𑀲𑁆𑀲𑀁 𑀢𑀼, 𑀦𑁂𑀢𑁆𑀯𑀸 𑀚𑁂𑀢𑀯𑀦𑀁 𑀫𑀳𑀁;

𑀓𑀸𑀢𑀼𑀁 𑀓𑀸𑀭𑁂𑀲𑀺 𑀘𑀸𑀭𑀺𑀢𑁆𑀢𑀁, 𑀳𑀺𑀢𑀁 𑀫𑀦𑁆𑀢𑁆𑀯𑀸𑀦 𑀧𑀸𑀡𑀺𑀦𑀁.

𑀏𑀯𑀁 𑀓𑀢𑁆𑀯𑀸 𑀲𑀺𑀮𑀸𑀓𑀸𑀴𑁄, 𑀧𑀼𑀜𑁆𑀜𑀓𑀫𑁆𑀫𑀫𑀦𑀧𑁆𑀧𑀓𑀁;

𑀧𑀢𑁆𑀢𑁂 𑀢𑁂𑀭𑀲𑀫𑁂 𑀯𑀲𑁆𑀲𑁂, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀤𑀸𑀞𑀧𑁆𑀧𑀪𑀼𑀢𑀺𑀓𑁄 𑀭𑀚𑁆𑀚𑀁, 𑀕𑀳𑁂𑀢𑁆𑀯𑀸 𑀪𑀸𑀢𑀭𑀁𑀲𑀓𑀁;

𑀅𑀓𑁆𑀓𑀫𑁄𑀢𑀺 𑀦𑀺𑀯𑀸𑀭𑁂𑀦𑁆𑀢𑀁, 𑀫𑀸𑀭𑀸𑀧𑁂𑀲𑀺 𑀯𑀺𑀩𑀼𑀤𑁆𑀥𑀺𑀓𑁄.

𑀫𑁄𑀕𑁆𑀕𑀮𑁆𑀮𑀸𑀦𑁄’𑀣 𑀢𑀁 𑀲𑀼𑀢𑁆𑀯𑀸, 𑀅𑀧𑁆𑀧𑀢𑁆𑀢𑀁 𑀭𑀚𑁆𑀚𑀫𑀕𑁆𑀕𑀳𑀺;

𑀅𑀓𑀸𑀭𑀡𑁂 𑀫𑁂 𑀫𑀸𑀭𑁂𑀲𑀺, 𑀓𑀡𑀺𑀝𑁆𑀞𑀁 𑀥𑀫𑁆𑀫𑀯𑀸𑀤𑀻𑀦𑀁.

𑀓𑀸𑀭𑀸𑀧𑁂𑀲𑁆𑀲𑀸𑀫𑀳𑀫𑁆𑀧𑀚𑁆𑀚, 𑀭𑀚𑁆𑀚𑀦𑁆𑀢𑀺 𑀧𑀭𑀺𑀓𑀼𑀧𑁆𑀧𑀺𑀬;

𑀲𑀫𑀸𑀤𑀸𑀬 𑀫𑀳𑀸𑀲𑁂𑀦𑀁, 𑀅𑀕𑀸𑀭𑀸𑀳𑁂𑀭 𑀧𑀩𑁆𑀩𑀢𑀁.

𑀭𑀸𑀚𑀸𑀧𑀺 𑀲𑀼𑀢𑁆𑀯𑀸 𑀲𑀦𑁆𑀦𑀤𑁆𑀥-𑀩𑀮𑀓𑀸𑀬𑁄 𑀓𑀭𑀺𑀦𑁆𑀤𑀓𑁂;

𑀧𑀩𑁆𑀩𑀢𑁂 𑀲𑀺𑀯𑀺𑀭𑀁 𑀩𑀦𑁆𑀥𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀺𑀲𑀫𑁆𑀫𑀢𑀁.

𑀲𑀸𑀧𑀭𑀸𑀥𑀸𑀦 𑀢𑁂 𑀫𑁂 𑀯𑀸, 𑀫𑀦𑀼𑀲𑁆𑀲𑀸 𑀤𑀻𑀧𑀯𑀸𑀲𑀺𑀦𑁄;

𑀏𑀓𑀲𑁆𑀫𑀺𑀜𑁆𑀘 𑀫𑀢𑁂 𑀭𑀚𑁆𑀚-𑀫𑀼𑀪𑀺𑀦𑁆𑀦𑀁𑀬𑁂𑀯 𑀦𑁄𑀲𑀺𑀬𑀸.

𑀢𑀲𑁆𑀫𑀸 𑀅𑀜𑁆𑀜𑁂𑀦 𑀬𑀼𑀚𑁆𑀛𑀦𑁆𑀢𑀼, 𑀉𑀪𑁄𑀬𑁂𑀯 𑀫𑀬𑀁 𑀇𑀥;

𑀳𑀢𑁆𑀣𑀺𑀬𑀼𑀤𑁆𑀥𑀁 𑀓𑀭𑁄𑀫𑀸𑀢𑀺, 𑀭𑀜𑁆𑀜𑁄 𑀧𑁂𑀲𑁂𑀲𑀺 𑀲𑀸𑀲𑀦𑀁.

𑀲𑁄𑀧𑀺 ¶ 𑀲𑀸𑀥𑀽𑀢𑀺 𑀯𑀢𑁆𑀯𑀸𑀦, 𑀩𑀤𑁆𑀥𑀧𑀜𑁆𑀘𑀸𑀬𑀼𑀥𑁄 𑀕𑀚𑀁;

𑀆𑀭𑀼𑀬𑁆𑀳 𑀫𑀼𑀦𑀺𑀦𑁄 𑀫𑀸𑀭𑁄 𑀯𑀺𑀬 𑀑𑀢𑁆𑀣𑀭𑀺 𑀢𑀸𑀯𑀤𑁂.

𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀲𑀦𑁆𑀦𑀤𑁆𑀥𑁄, 𑀆𑀭𑀼𑀬𑁆𑀳 𑀓𑀭𑀻𑀦𑀁 𑀯𑀭𑀁;

𑀢𑀢𑁆𑀣𑀸’𑀕𑁄 𑀅𑀜𑁆𑀜𑀫𑀜𑁆𑀜𑀁 𑀢𑁂, 𑀧𑀸𑀧𑀼𑀡𑀺𑀁𑀲𑀼 𑀫𑀳𑀸𑀕𑀚𑀸.

𑀲𑀤𑁆𑀤𑁄 𑀲𑀽𑀬𑀺𑀢𑁆𑀣 𑀲𑀗𑁆𑀖𑀝𑁆𑀝𑁂, 𑀅𑀲𑀦𑀺𑀭𑀸𑀯 𑀲𑀦𑁆𑀦𑀺𑀪𑁄;

𑀤𑀦𑁆𑀢𑀖𑀸𑀢𑁂𑀦 𑀉𑀝𑁆𑀞𑀸𑀲𑀺, 𑀚𑀸𑀮𑀸 𑀯𑀺𑀚𑁆𑀚𑀼𑀮𑁆𑀮𑀢𑀸 𑀯𑀺𑀬.

𑀲𑀜𑁆𑀛𑀸𑀖𑀦𑀲𑀪𑀸𑀕𑀸’𑀲𑀼𑀁, 𑀕𑀚𑀸 𑀮𑁄𑀳𑀺𑀢𑀫𑀓𑁆𑀔𑀺𑀢𑀸;

𑀫𑁄𑀕𑁆𑀕𑀮𑁆𑀮𑀸𑀦𑀕𑀚𑀸𑀯𑀺𑀤𑁆𑀥𑁄, 𑀭𑀜𑁆𑀜𑁄𑀑𑀲𑀓𑁆𑀓𑀺 𑀓𑀼𑀜𑁆𑀚𑀭𑁄.

𑀭𑀸𑀚𑀸 𑀆𑀭𑀪𑀺 𑀢𑀁 𑀤𑀺𑀲𑁆𑀯𑀸, 𑀙𑀺𑀦𑁆𑀤𑀺𑀢𑀼𑀁 𑀲𑀻𑀲𑀫𑀢𑁆𑀢𑀦𑁄;

𑀫𑁄𑀕𑁆𑀕𑀮𑁆𑀮𑀸𑀦𑁄’𑀣 𑀯𑀦𑁆𑀤𑀦𑁆𑀢𑁄, 𑀬𑀸𑀘𑀺’𑀫𑁂’𑀯𑀁 𑀓𑀺𑀭𑀻𑀇𑀢𑀺.

𑀬𑀸𑀘𑀫𑀸𑀦𑁂𑀧𑀺 𑀲𑁄𑀫𑀸𑀦𑀁, 𑀫𑀸𑀦𑁂𑀦𑁆𑀢𑁄 𑀙𑀺𑀦𑁆𑀤𑀺𑀓𑀦𑁆𑀥𑀭𑀁;

𑀙𑀟𑁆𑀟𑁂𑀲𑀺 𑀙𑀳𑀺 𑀲𑁄 𑀭𑀚𑁆𑀚𑀁, 𑀫𑀸𑀲𑁂𑀳𑀺 𑀤𑀺𑀯𑀲𑁂𑀳𑀺 𑀘.

𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀢𑁄 𑀭𑀸𑀚𑀸, 𑀆𑀲𑀺 𑀤𑀻𑀧𑁂 𑀫𑀳𑀸𑀩𑀮𑁄;

𑀫𑀸𑀢𑀼𑀮𑀜𑁆𑀘 𑀧𑀝𑀺𑀘𑁆𑀘𑁂𑀫𑀁, 𑀘𑀽𑀮𑀦𑀸𑀫𑁂𑀦 𑀯𑁄𑀳𑀭𑀼𑀁.

𑀆𑀲𑀸𑀥𑀸𑀭𑀡𑀓𑀸𑀯𑁂𑀬𑁆𑀬𑁄, 𑀯𑀢𑁆𑀣𑀼𑀢𑁆𑀢𑀬 𑀧𑀭𑀸𑀬𑀡𑁄;

𑀤𑀸𑀦𑀲𑀁𑀬𑀫 𑀲𑁄𑀘𑁂𑀬𑁆𑀬𑁄, 𑀲𑁄𑀭𑀘𑁆𑀘𑀸𑀤𑀺𑀕𑀼𑀡𑀸𑀮𑀬𑁄.

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀅𑀢𑁆𑀣𑀲𑁆𑀲 𑀘𑀭𑀺𑀬𑀸𑀬 𑀘;

𑀲𑀫𑀸𑀦𑀢𑁆𑀢𑀲𑁆𑀲𑀪𑀸𑀯𑁂𑀦, 𑀲𑀗𑁆𑀕𑀳𑁂𑀲𑀺 𑀫𑀳𑀸𑀚𑀦𑀁.

𑀧𑀺𑀡𑁆𑀟𑀧𑀸𑀢𑀯𑀺𑀳𑀸𑀭𑁂𑀳𑀺, 𑀪𑁂𑀲𑀚𑁆𑀚𑀘𑁆𑀙𑀸𑀤𑀦𑁂𑀳𑀺 𑀘;

𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀳𑀺 𑀲𑀗𑁆𑀕𑀡𑁆𑀳𑀺, 𑀥𑀫𑁆𑀫𑀺𑀓𑀸𑀬 𑀘 𑀕𑀼𑀢𑁆𑀢𑀺𑀬𑀸.

𑀅𑀢𑀺𑀭𑁂𑀓𑀸𑀬 𑀧𑀽𑀚𑀸𑀬, 𑀧𑀽𑀚𑁂𑀢𑁆𑀯𑀸 𑀥𑀫𑁆𑀫𑀪𑀸𑀡𑀓𑁂;

𑀧𑀺𑀝𑀓𑁂 𑀢𑀻𑀡𑀺 𑀯𑀸𑀘𑁂𑀲𑀺, 𑀲𑀤𑁆𑀥𑀺𑀫𑀝𑁆𑀞𑀓𑀣𑀸𑀬 𑀲𑁄.

𑀓𑀼𑀫𑀸𑀭𑁂 𑀉𑀧𑀮𑀸𑀮𑁂𑀢𑁆𑀯𑀸, 𑀦𑀺𑀯𑀸𑀧𑁂𑀦 𑀬𑀣𑀸𑀭𑀼𑀘𑀺𑀁;

𑀲𑀚𑁆𑀛𑀸𑀧𑁂𑀲𑀺 𑀲𑀤𑀸 𑀥𑀫𑁆𑀫𑀁, 𑀥𑀫𑁆𑀫𑀤𑀻𑀧𑁄 𑀫𑀳𑀸𑀫𑀢𑀺.

𑀥𑀫𑁆𑀫𑀤𑀻𑀧𑀜𑁆𑀘 𑀲𑁄 𑀓𑀢𑁆𑀯𑀸, 𑀓𑀼𑀜𑁆𑀚𑀭𑀲𑁂𑀔𑀭𑁂𑀦𑀺 𑀲𑀸;

𑀥𑀫𑁆𑀫𑀸𑀯𑀸𑀲𑀸𑀦𑁂 𑀯𑀸𑀘𑁂𑀲𑀺, 𑀧𑀼𑀭𑀫𑁆𑀳𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑀩𑀦𑁆𑀥𑀸𑀧𑁂𑀲𑀺 𑀓𑀤𑀫𑁆𑀩𑀜𑁆𑀘, 𑀦𑀤𑀺𑀁𑀧𑀩𑁆𑀩𑀢𑀫𑀚𑁆𑀛𑀢𑁄;

𑀧𑀢𑁆𑀢𑀧𑀲𑀸𑀡𑀯𑀸𑀧𑀺𑀜𑁆𑀘, 𑀥𑀦𑀯𑀸𑀧𑀺𑀁 𑀕𑀭𑀺𑀢𑀭𑀁.

𑀕𑀡𑁆𑀳𑀸𑀧𑁂𑀲𑀺 𑀲𑀤𑀻𑀖𑀸𑀬𑀼-𑀳𑁂𑀢𑀼 𑀓𑀫𑁆𑀫𑀦𑁆𑀢𑀺 𑀲𑀸𑀤𑀭𑁄;

𑀮𑀺𑀔𑀸𑀧𑁂𑀲𑀺 𑀘 𑀲𑀤𑁆𑀥𑀫𑁆𑀫𑀁, 𑀯𑀢𑁆𑀣𑀼𑀧𑀽𑀚𑀜𑁆𑀘 𑀓𑀸𑀭𑀬𑀺.

𑀮𑁄𑀓𑀁 ¶ 𑀲𑁄 𑀅𑀦𑀼𑀓𑀫𑁆𑀧𑀺𑀢𑁆𑀯𑀸, 𑀫𑀸𑀢𑀸𑀧𑀼𑀢𑁆𑀢𑀁𑀯 𑀑𑀭𑀲𑀁;

𑀤𑀢𑁆𑀯𑀸 𑀪𑀼𑀢𑁆𑀯𑀸 𑀬𑀣𑀸𑀓𑀸𑀫𑀁, 𑀯𑀲𑁆𑀲𑁂 𑀯𑀻𑀲𑀢𑀺𑀫𑁂 𑀫𑀭𑀺.

𑀫𑀳𑁂𑀲𑀻 𑀢𑀲𑁆𑀲 𑀖𑀸𑀢𑁂𑀢𑁆𑀯𑀸, 𑀯𑀺𑀲𑀬𑁄𑀕𑁂𑀦 𑀜𑀸𑀢𑀓𑁂;

𑀧𑀼𑀢𑁆𑀢𑀁 𑀭𑀚𑁆𑀚𑁂’𑀪𑀺𑀲𑀺𑀜𑁆𑀘𑀺𑀢𑁆𑀯𑀸, 𑀲𑀬𑀁 𑀭𑀚𑁆𑀚𑀁 𑀯𑀺𑀘𑀸𑀭𑀬𑀺.

𑀢𑀣𑀸𑀪𑀺𑀲𑀺𑀢𑁆𑀢𑁄 𑀲𑁄 𑀓𑀺𑀢𑁆𑀢𑀺-𑀲𑀺𑀭𑀺𑀫𑁂𑀖𑁄 𑀦𑀭𑀸𑀥𑀺𑀧𑁄;

𑀢𑀺𑀧𑀼𑀧𑀢𑁆𑀢𑁂𑀳𑀺 𑀙𑀸𑀤𑁂𑀲𑀺, 𑀤𑀼𑀫𑀺𑀦𑁆𑀤𑀥𑀭𑀫𑀸𑀤𑀺𑀢𑁄.

𑀓𑀧𑀡𑀤𑁆𑀥𑀺𑀯𑀡𑀺𑀩𑁆𑀩𑀸𑀦𑀁, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺;

𑀫𑀕𑁆𑀕𑀧𑀸𑀮𑁄 𑀢𑀣𑀸𑀓𑀸𑀭𑁄, 𑀅𑀳𑀼 𑀲𑀩𑁆𑀩𑁄𑀧𑀪𑁄𑀕𑀺𑀬𑁄.

𑀫𑀳𑁂𑀲𑀻 𑀲𑀸 𑀲𑀤𑀸 𑀆𑀲𑀺, 𑀧𑀥𑀸𑀦𑀸 𑀲𑀩𑁆𑀩𑀓𑀫𑁆𑀫𑀲𑀼;

𑀭𑀚𑁆𑀚𑀁 𑀢𑀲𑁆𑀲𑀸’𑀲𑀺 𑀢𑁂𑀦𑁂𑀯, 𑀳𑁂𑀝𑁆𑀞𑀼𑀧𑀭𑀺𑀬𑀯𑀢𑁆𑀢𑀺𑀓𑀁.

𑀭𑀸𑀚𑀸𑀧𑀸𑀤𑀸 𑀫𑀳𑀸𑀫𑀘𑁆𑀘𑀸’-𑀳𑁂𑀲𑀼𑀁 𑀮𑀜𑁆𑀘𑀧𑀭𑀸𑀬𑀦𑀸;

𑀤𑀼𑀩𑁆𑀩𑀮𑁂 𑀘 𑀯𑀺𑀳𑁂𑀞𑁂𑀲𑀼𑀁, 𑀩𑀮𑀻 𑀚𑀸𑀦𑀧𑀤𑀸 𑀦𑀭𑀸.

𑀲𑀺𑀮𑀸𑀓𑀸𑀴𑀲𑁆𑀲 𑀓𑀸𑀮𑀫𑁆𑀳𑀺, 𑀕𑀸𑀫𑁂 𑀲𑀗𑁆𑀕𑀺𑀮𑁆𑀮𑀦𑀸𑀫𑀓𑁂;

𑀪𑀬𑀯𑀲𑀻𑀯𑁆𑀳𑀬𑁄 𑀧𑁄𑀲𑁄, 𑀅𑀳𑀼 𑀫𑁄𑀭𑀺𑀬𑀯𑀁𑀲𑀚𑁄.

𑀅𑀳𑁄𑀲𑀺 𑀧𑀼𑀢𑁆𑀢𑁄 𑀲𑀻𑀯𑀲𑁆𑀲, 𑀅𑀕𑁆𑀕𑀩𑁄𑀥𑀺 𑀲𑀦𑀸𑀫𑀓𑁄;

𑀪𑀸𑀕𑀺𑀦𑁂𑀬𑁆𑀬𑁄𑀧𑀺 𑀢𑀲𑁆𑀲𑀸𑀲𑀺, 𑀫𑀳𑀸𑀦𑀸𑀕𑁄𑀢𑀺 𑀯𑀺𑀲𑁆𑀲𑀼𑀢𑁄.

𑀪𑀸𑀕𑀺𑀦𑁂𑀬𑁄 𑀫𑀳𑀸𑀦𑀸𑀕𑁄, 𑀅𑀕𑁆𑀕𑀩𑁄𑀥𑀺 𑀘 𑀲𑀼𑀦𑁆𑀤𑀭𑁄;

𑀉𑀴𑀸𑀭𑀚𑁆𑀛𑀸𑀲𑀬𑀢𑁆𑀢𑀸 𑀲𑁄, 𑀫𑀳𑀸𑀦𑀸𑀕𑁄 𑀫𑀳𑀩𑁆𑀩𑀮𑁄.

𑀳𑀺𑀢𑁆𑀯𑀸 𑀓𑀲𑁆𑀲𑀓𑀓𑀫𑁆𑀫𑀸𑀦𑀺, 𑀘𑁄𑀭𑀓𑀫𑁆𑀫𑀫𑀓𑀸 𑀯𑀦𑁂;

𑀕𑁄𑀥𑀁 𑀮𑀤𑁆𑀥𑀸𑀦 𑀧𑁂𑀲𑁂𑀲𑀺, 𑀫𑀸𑀢𑀼𑀮𑀸𑀦𑀺𑀬 𑀲𑀦𑁆𑀢𑀺𑀓𑀁.

𑀕𑁄𑀥𑀁 𑀤𑀺𑀲𑁆𑀯𑀸’𑀯𑀲𑀸 𑀜𑀢𑁆𑀯𑀸, 𑀥𑀜𑁆𑀜𑀧𑀘𑁆𑀙𑀺𑀫𑀧𑁂𑀲𑀬𑀺;

𑀓𑀫𑁆𑀫𑀸𑀭𑀲𑁆𑀲𑀸’𑀧𑀺 𑀧𑁂𑀲𑁂𑀲𑀺, 𑀲𑀲𑀁 𑀲𑁄𑀧𑀺 𑀢𑀣𑁂𑀯𑀓𑀸.

𑀩𑀻𑀚𑀁 𑀪𑀕𑀺𑀦𑀻 𑀫𑀸𑀬𑀸𑀘𑀺, 𑀩𑀻𑀚𑀕𑀸𑀳𑀜𑁆𑀘 𑀢𑀲𑁆𑀲 𑀲𑀸;

𑀤𑀸𑀲𑀜𑁆𑀘 𑀜𑀢𑁆𑀯𑀸 𑀧𑁂𑀲𑁂𑀲𑀺, 𑀅𑀦𑁆𑀦𑀧𑀸𑀦𑀸𑀤𑀺𑀦𑀸 𑀭𑀳𑁄.

𑀢𑀤𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑀫𑁆𑀳𑀺, 𑀏𑀓𑁄 𑀫𑀦𑁆𑀢𑀥𑀭𑁄 𑀦𑀭𑁄;

𑀪𑀺𑀓𑁆𑀔𑀸𑀮𑀸𑀪𑀸𑀬 𑀲𑀤𑁆𑀥𑁂𑀳𑀺, 𑀪𑀺𑀓𑁆𑀔𑀼𑀯𑁂𑀲𑁂𑀦 𑀪𑀺𑀓𑁆𑀔𑀢𑀺.

𑀢𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄, 𑀅𑀮𑀤𑁆𑀥𑀸 𑀓𑀺𑀜𑁆𑀘𑀺 𑀪𑁄𑀚𑀦𑀁;

𑀅𑀪𑀺𑀪𑀽𑀢𑁄 𑀚𑀺𑀖𑀘𑁆𑀙𑀸𑀬, 𑀓𑀫𑁆𑀧𑀫𑀸𑀦𑁄 𑀦𑀺𑀕𑀘𑁆𑀙𑀢𑀺.

𑀢𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬𑀦𑁆𑀢𑁄, 𑀫𑀳𑀸𑀦𑀸𑀕𑁄 𑀫𑀳𑀸𑀤𑀬𑁄;

𑀧𑀢𑁆𑀢𑀫𑀸𑀤𑀸𑀬 𑀕𑀸𑀫𑀦𑁆𑀢-𑀫𑀸𑀳𑀺𑀡𑁆𑀟𑀺𑀢𑁆𑀯𑀸𑀧𑀺 𑀲𑀩𑁆𑀩𑀲𑁄.

𑀬𑀸𑀕𑀼𑀫𑀢𑁆𑀢𑀫𑁆𑀧𑀺 ¶ 𑀦𑀸𑀮𑀢𑁆𑀣, 𑀢𑀢𑁄 𑀉𑀢𑁆𑀢𑀭𑀲𑀸𑀝𑀓𑀁;

𑀤𑀢𑁆𑀯𑀸 𑀆𑀳𑀭𑀺 𑀆𑀳𑀸𑀭𑀁, 𑀲𑁄 𑀢𑀁 𑀪𑀼𑀢𑁆𑀯𑀸 𑀧𑀲𑀻𑀤𑀺𑀬.

𑀭𑀚𑁆𑀚𑀸𑀭𑀳𑀫𑀺𑀫𑀁 𑀤𑀻𑀧𑁂, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑀺𑀬;

𑀢𑀫𑀸𑀤𑀸𑀬 𑀔𑀡𑁂𑀦𑀸’𑀕𑀸, 𑀕𑁄𑀓𑀡𑁆𑀡𑀓𑀫𑀳𑀡𑁆𑀡𑀯𑀁.

𑀅𑀣 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀜𑁆𑀚𑀧𑀦𑁆𑀢𑁄 𑀬𑀣𑀸𑀯𑀺𑀥𑀺𑀁𑀫;

𑀫𑀦𑁆𑀢𑁄𑀦𑀸’𑀦𑁂𑀲𑀺 𑀦𑀸𑀕𑀺𑀦𑁆𑀤𑀁, 𑀨𑀼𑀲𑁆𑀲𑀧𑀼𑀡𑁆𑀡𑀫𑀭𑀢𑁆𑀢𑀺𑀬𑀁.

𑀫𑀳𑀸𑀦𑀸𑀕𑀁 𑀨𑀼𑀲𑀸𑀳𑀻𑀢𑀺, 𑀫𑀳𑀸𑀦𑀸𑀕𑀁 𑀦𑀺𑀬𑁄𑀚𑀬𑀺;

𑀲𑁄 𑀪𑀻𑀢𑁄 𑀧𑀼𑀭𑀺𑀫𑁂 𑀬𑀸𑀫𑁂, 𑀆𑀕𑀢𑀁 𑀢𑀁 𑀦 𑀲𑀫𑁆𑀪𑀼𑀲𑀻.

𑀢𑀣𑀸 𑀫𑀚𑁆𑀛𑀺𑀫𑀬𑀸𑀫𑁂𑀧𑀺, 𑀧𑀘𑁆𑀙𑀺𑀫𑁂 𑀧𑀦 𑀦𑀗𑁆𑀕𑀮𑁂;

𑀕𑀳𑁂𑀢𑁆𑀯𑀸 𑀔𑀺𑀧𑀺 𑀢𑀻𑀳𑁂𑀯, 𑀅𑀗𑁆𑀕𑀼𑀮𑀻𑀳𑀺 𑀲𑀢𑀁 𑀙𑀼𑀧𑀺.

𑀲𑁄 𑀢𑀁 𑀩𑁆𑀬𑀸𑀓𑀸𑀲𑀺 𑀢𑀁 𑀤𑀺𑀢𑁆𑀯𑀸, 𑀲𑀩𑀮𑀁 𑀫𑁂 𑀧𑀭𑀺𑀲𑁆𑀲𑀫𑀁;

𑀢𑀻𑀳𑀺 𑀭𑀸𑀚𑀽𑀳𑀺 𑀬𑀼𑀚𑁆𑀛𑀺𑀢𑁆𑀯𑀸, 𑀘𑀢𑀼𑀢𑁆𑀣𑀁 𑀢𑁆𑀯𑀁 𑀦𑀺𑀖𑀸𑀢𑀺𑀬.

𑀯𑀼𑀟𑁆𑀠𑁄 𑀢𑀻𑀡𑁂𑀯 𑀯𑀲𑁆𑀲𑀸𑀦𑀺, 𑀭𑀸𑀚𑀸 𑀳𑀼𑀢𑁆𑀯𑀸 𑀦 𑀚𑀻𑀯𑀲𑀺;

𑀢𑀣𑀸 𑀳𑁂𑀲𑁆𑀲𑀦𑁆𑀢𑀺 𑀭𑀸𑀚𑀸𑀦𑁄, 𑀢𑀬𑁄 𑀢𑁂 𑀯𑀁𑀲𑀚𑀸 𑀦𑀭𑀸.

𑀕𑀦𑁆𑀢𑁆𑀯𑀸 𑀲𑁂𑀯𑀲𑁆𑀲𑀼 𑀭𑀸𑀚𑀸𑀦𑀁, 𑀧𑀘𑁆𑀙𑀸 𑀧𑀲𑁆𑀲𑀲𑀺 𑀫𑁂𑀔𑀮𑀁;

𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑁂𑀲𑀺, 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀦𑀭𑀺𑀲𑁆𑀲𑀭𑀁.

𑀧𑀲𑁆𑀲𑀺𑀢𑁆𑀯𑀸 𑀢𑀫𑀼𑀧𑀝𑁆𑀞𑀸𑀲𑀺, 𑀭𑀸𑀚𑀸 𑀭𑁄𑀳𑀡𑀓𑀫𑁆𑀫𑀺𑀓𑀁;

𑀢𑀁 𑀅𑀓𑀸𑀲𑀺 𑀢𑀤𑀼𑀝𑁆𑀞𑀸𑀦𑀁, 𑀪𑀡𑁆𑀟𑀫𑀸𑀳𑀭𑀺 𑀲𑁄 𑀩𑀳𑀼𑀁.

𑀭𑀸𑀚𑀸 𑀢𑀲𑁆𑀫𑀺𑀁 𑀧𑀲𑀻𑀤𑀺𑀢𑁆𑀯𑀸, 𑀅𑀦𑁆𑀥𑀲𑁂𑀦𑀸𑀧𑀢𑀺𑀯𑁆𑀳𑀬𑀁;

𑀤𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀢𑀲𑁆𑀲, 𑀕𑀦𑁆𑀢𑀼𑀁 𑀢𑀢𑁆𑀣𑁂𑀯 𑀬𑁄𑀚𑀬𑀺.

𑀪𑀬𑀲𑀻𑀯𑀲𑁆𑀲 𑀧𑀼𑀢𑁆𑀢𑀜𑁆𑀘, 𑀪𑀸𑀕𑀺𑀦𑁂𑀬𑁆𑀬𑀜𑁆𑀘 𑀅𑀢𑁆𑀢𑀦𑁄;

𑀆𑀤𑀸𑀬 𑀕𑀦𑁆𑀢𑁆𑀯𑀸 𑀢𑀁 𑀤𑁂𑀲𑀁, 𑀧𑀭𑀺𑀯𑀢𑁆𑀢𑁂𑀲𑀺 𑀲𑀩𑁆𑀩𑀲𑁄.

𑀧𑀘𑁆𑀘𑁂𑀓𑀪𑁄𑀕𑀁 𑀓𑀢𑁆𑀯𑀸𑀦, 𑀭𑁄𑀳𑀡𑀁 𑀢𑀢𑁆𑀣 𑀲𑁄 𑀯𑀲𑀁;

𑀤𑀸𑀞𑀧𑁆𑀧𑀪𑀽𑀢𑀺𑀦𑀸 𑀓𑀸𑀢𑀼𑀁, 𑀬𑀼𑀤𑁆𑀥𑀁𑀕𑀦𑁆𑀢𑁆𑀯𑀸 𑀫𑀳𑀩𑁆𑀩𑀮𑁄.

𑀫𑁄𑀕𑁆𑀕𑀮𑁆𑀮𑀸𑀦𑀪𑀬𑀸 𑀕𑀦𑁆𑀢𑁆𑀯𑀸, 𑀭𑁄𑀳𑀡𑀜𑁆𑀘 𑀢𑀳𑀺𑀁 𑀯𑀲𑀻;

𑀲𑀼𑀢𑁆𑀯𑀸 𑀓𑀺𑀢𑁆𑀢𑀺𑀲𑀺𑀭𑀻𑀫𑁂𑀖𑀯𑀡𑁆𑀡-𑀭𑀜𑁆𑀜𑁄 𑀭𑀚𑁆𑀚𑁂 𑀲𑀫𑀜𑁆𑀚𑀲𑀁.

𑀭𑀚𑁆𑀚𑀁 𑀕𑀳𑁂𑀢𑀼𑀁 𑀓𑀸𑀮𑁄𑀢𑀺, 𑀲𑀻𑀖𑀁 𑀆𑀕𑀫𑁆𑀫 𑀭𑁄𑀳𑀡𑀸;

𑀏𑀓𑀽𑀦𑀯𑀺𑀲𑁂 𑀤𑀺𑀯𑀲𑁂, 𑀫𑀸𑀭𑀬𑀺𑀢𑁆𑀯𑀸 𑀫𑀳𑀻𑀧𑀢𑀺𑀁.

𑀲𑀬𑀁 𑀳𑀼𑀢𑁆𑀯𑀸 𑀫𑀳𑀻𑀧𑀸𑀮𑁄, 𑀤𑁂𑀲𑀁 𑀓𑀢𑁆𑀯𑀸 𑀬𑀣𑀸 𑀧𑀼𑀭𑁂;

𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀧𑀸𑀳𑁂𑀲𑀺, 𑀧𑀡𑁆𑀡𑀫𑀸𑀕𑀘𑁆𑀙𑀢𑀽𑀢𑀺 𑀲𑁄.

𑀆𑀕𑀘𑁆𑀙𑀦𑁆𑀢𑁄 ¶ 𑀦𑀺𑀫𑀺𑀢𑁆𑀢𑁂𑀦, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀭𑀺𑀢𑁆𑀣 𑀲𑁄;

𑀢𑀢𑁄 𑀫𑀸𑀢𑀼𑀮𑀧𑀼𑀢𑁆𑀢𑀁’𑀓𑀸, 𑀉𑀧𑀭𑀚𑁆𑀚𑀁 𑀓𑀢𑀜𑁆𑀜𑀼𑀓𑁄.

𑀆𑀮𑀯𑀸𑀮𑀁 𑀤𑀼𑀫𑀺𑀦𑁆𑀤𑀲𑁆𑀲, 𑀓𑀢𑁆𑀯𑀸 𑀳𑁂𑀫𑀫𑀬𑀁 𑀖𑀭𑀁;

𑀙𑀸𑀤𑀸𑀧𑁂𑀲𑀺 𑀫𑀼𑀦𑀺𑀦𑁆𑀤𑀲𑁆𑀲, 𑀧𑀝𑀺𑀫𑀸𑀬𑁄 𑀘 𑀲𑀦𑁆𑀤𑀳𑀺.

𑀫𑀳𑀸𑀘𑁂𑀢𑀺𑀢𑁆𑀢𑀬𑁂 𑀓𑀸𑀲𑀺, 𑀲𑀼𑀥𑀸𑀓𑀫𑁆𑀫𑀜𑁆𑀘 𑀘𑀼𑀫𑁆𑀩𑀝𑀁;

𑀳𑀢𑁆𑀣𑀺𑀯𑁂𑀤𑀺𑀜𑁆𑀘 𑀓𑀸𑀭𑁂𑀢𑁆𑀯𑀸, 𑀘𑀺𑀢𑁆𑀢𑀓𑀫𑁆𑀫𑀫𑀓𑀸𑀭𑀬𑀺.

𑀧𑁂𑀲𑀓𑀸𑀭𑀓𑀕𑀸𑀫𑀁 𑀲𑁄, 𑀚𑀫𑁆𑀩𑁂𑀮𑀯𑁆𑀳𑀬𑀫𑀼𑀢𑁆𑀢𑀭𑁂;

𑀫𑀳𑀸𑀯𑀺𑀳𑀸𑀭𑁂𑀘𑀸𑀩𑀦𑁆𑀥𑀺, 𑀕𑀸𑀫𑀁 𑀢𑀺𑀦𑁆𑀢𑀺𑀡𑀺𑀓𑀯𑁆𑀳𑀬𑀁.

𑀉𑀤𑁆𑀥𑀕𑀸𑀫𑀫𑁆𑀳𑀺 𑀯𑀲𑀪-𑀕𑀸𑀫𑀁 𑀚𑁂𑀢𑀯𑀦𑀲𑁆𑀲’𑀤𑀸;

𑀯𑀢𑁆𑀣𑀤𑀸𑀦𑀁 𑀦𑀺𑀓𑀸𑀬𑁂𑀲𑀼, 𑀢𑀻𑀲𑀼 𑀘𑁂𑀯 𑀧𑀯𑀢𑁆𑀢𑀬𑀺.

𑀔𑁂𑀢𑁆𑀢𑀸𑀦𑀁 𑀳𑀺𑀲𑀢𑀁 𑀤𑀢𑁆𑀯𑀸, 𑀯𑀺𑀳𑀸𑀭𑁂 𑀚𑁂𑀢𑀦𑀸𑀫𑀓𑁂;

𑀬𑀸𑀕𑀼𑀁 𑀢𑀢𑁆𑀣 𑀧𑀯𑀢𑁆𑀢𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀲𑀩𑁆𑀩𑀓𑀸𑀮𑀺𑀓𑀁.

𑀲𑀳𑀲𑁆𑀲 𑀤𑀽𑀭𑀢𑀺𑀲𑁆𑀲𑀯𑁆𑀳𑀸, 𑀔𑁂𑀢𑁆𑀢𑀁 𑀤𑀢𑁆𑀯𑀸 𑀢𑀧𑀲𑁆𑀲𑀺𑀦𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀬𑀸𑀕𑀼𑀁 𑀦𑀺𑀘𑁆𑀘𑀁 𑀧𑀯𑀢𑁆𑀢𑀬𑀺.

𑀘𑀺𑀭𑀫𑀸𑀢𑀺𑀓𑀯𑀸𑀭𑀜𑁆𑀘, 𑀢𑀢𑁆𑀣𑁂𑀯’𑀤𑀸 𑀕𑀼𑀡𑁂 𑀭𑀢𑁄;

𑀫𑀬𑀽𑀭𑀧𑀭𑀺𑀯𑁂𑀡𑁂 𑀘, 𑀦𑀯𑀓𑀫𑁆𑀫𑀫𑀓𑀸𑀭𑀬𑀺.

𑀓𑀸𑀲𑀺𑀔𑀡𑁆𑀟𑁂 𑀫𑀳𑀸𑀤𑁂𑀯-𑀭𑀢𑁆𑀢𑀓𑀼𑀭𑀯𑀦𑀸𑀫𑀓𑁂;

𑀯𑀺𑀳𑀸𑀭𑁂 𑀅𑀦𑀼𑀭𑀸𑀭𑀸𑀫𑀁, 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀭𑀻.

𑀓𑀫𑀁 𑀲𑁄𑀯𑀕𑁆𑀕𑀺𑀓𑀁 𑀓𑀢𑁆𑀯𑀸, 𑀏𑀯𑀫𑀸𑀤𑀺𑀁 𑀦𑀭𑀺𑀲𑁆𑀲𑀭𑁄;

𑀅𑀕𑀫𑀸 𑀢𑀻𑀳𑀺 𑀯𑀲𑁆𑀲𑁂𑀳𑀺, 𑀤𑁂𑀯𑀭𑀸𑀚𑀲𑀳𑀩𑁆𑀬𑀢𑀁.

𑀅𑀝𑁆𑀞𑁂𑀢𑁂 𑀓𑀼𑀝𑁆𑀞𑀘𑀺𑀢𑁆𑀢𑀸’𑀧𑀭𑀺𑀫𑀺𑀢𑀯𑀺𑀪𑀯𑀸 𑀭𑀸𑀚𑀭𑀸𑀚𑁂𑀦𑀭𑀽𑀧𑀸;

𑀭𑀸𑀚𑀸𑀦𑁄 𑀭𑀸𑀚𑀫𑀸𑀦𑀸 𑀦𑀭𑀓𑀭𑀺𑀢𑀼𑀭𑀕𑀸𑀲𑀽𑀭𑀲𑁂𑀦𑀸𑀭𑀣𑁂𑀳𑀺;

𑀅𑀦𑁆𑀢𑁂 𑀳𑀺𑀢𑁆𑀯𑀸’𑀔𑀺𑀮𑀁 𑀢𑀁 𑀯𑀺𑀕𑀢𑀧𑀭𑀺𑀚𑀦𑀸’𑀴𑀸𑀳𑀦𑀁 𑀲𑀗𑁆𑀔𑀢𑀸𑀲𑀼𑀁;

𑀲𑀧𑁆𑀧𑀜𑁆𑀜𑁄 𑀢𑀁 𑀲𑀭𑀦𑁆𑀢𑁄 𑀪𑀯𑀢𑀼 𑀪𑀯𑀲𑀼𑀔𑀁 𑀯𑀦𑁆𑀢𑀼𑀓𑀸𑀫𑁄 𑀳𑀺𑀢𑁂𑀲𑀻.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀫𑀳𑀸𑀦𑀸𑀕𑀦𑀭𑀺𑀦𑁆𑀤𑀲𑁆𑀲 ¶ , 𑀪𑀸𑀕𑀺𑀦𑁂𑀬𑁆𑀬𑁄 𑀲𑀼𑀪𑀸𑀕𑀺𑀬𑁄;

𑀲𑁄 𑀅𑀕𑁆𑀕𑀩𑁄𑀥𑀺𑀭𑀸𑀚𑀸𑀲𑀺, 𑀅𑀕𑁆𑀕𑀩𑁄𑀥𑀺𑀕𑀢𑀸𑀲𑀬𑁄.

𑀢𑁂𑀚𑁂𑀦 𑀩𑀸𑀳𑀼𑀁 𑀲𑁄𑀫𑁆𑀫𑁂𑀦, 𑀘𑀦𑁆𑀤𑀁 𑀲𑀫𑁆𑀧𑀼𑀡𑁆𑀡𑀫𑀡𑁆𑀟𑀮𑀁;

𑀲𑀼𑀫𑁂𑀭𑀼𑀫𑀘𑀮𑀦𑁆𑀢𑁂𑀦, 𑀕𑀫𑁆𑀪𑀺𑀭𑁂𑀦 𑀫𑀳𑁄𑀤𑀥𑀺𑀁.

𑀯𑀲𑀼𑀦𑁆𑀥𑀭𑀸 𑀧𑀓𑀫𑁆𑀧𑁂𑀦, 𑀫𑀸𑀭𑀼𑀢𑀁 𑀲𑀫𑁆𑀧𑀯𑀼𑀢𑁆𑀢𑀺𑀬𑀸;

𑀩𑀼𑀤𑁆𑀥𑀺𑀬𑀸𑀫𑀭𑀫𑀦𑁆𑀢𑀸𑀭𑀁, 𑀲𑀼𑀤𑁆𑀥𑀺𑀬𑀸 𑀲𑀭𑀤𑀫𑁆𑀩𑀭𑀁.

𑀓𑀸𑀫𑀪𑁄𑀕𑁂𑀦 𑀤𑁂𑀯𑀺𑀦𑁆𑀤, 𑀫𑀢𑁆𑀣𑁂𑀦 𑀘 𑀦𑀭𑀺𑀲𑁆𑀲𑀭𑀁;

𑀥𑀫𑁆𑀫𑁂𑀦 𑀲𑀼𑀤𑁆𑀥𑀯𑀸𑀲𑁂𑀝𑁆𑀞𑀁, 𑀯𑀺𑀓𑁆𑀓𑀫𑁂𑀦 𑀫𑀺𑀕𑀸𑀥𑀺𑀧𑀁.

𑀭𑀸𑀚𑀥𑀫𑁆𑀫𑁂𑀳𑀺 𑀭𑀚𑁆𑀚𑁂𑀳𑀺, 𑀘𑀓𑁆𑀓𑀯𑀢𑁆𑀢𑀺𑀦𑀭𑀺𑀲𑁆𑀲𑀭𑀁;

𑀯𑁂𑀲𑁆𑀲𑀦𑁆𑀢𑀭𑀜𑁆𑀘 𑀤𑀸𑀦𑁂𑀦, 𑀅𑀦𑀼𑀕𑀦𑁆𑀢𑁆𑀯𑀸 𑀚𑀦𑁂 𑀲𑀼𑀢𑁄.

𑀫𑀸𑀢𑀼𑀮𑀁 𑀉𑀧𑀭𑀸𑀚𑀯𑁆𑀳𑁂, 𑀪𑀸𑀢𑀭𑀁 𑀬𑀼𑀯𑀭𑀸𑀚𑀓𑁂;

𑀪𑀸𑀕𑀺𑀦𑁂𑀬𑁆𑀬𑀜𑁆𑀘 𑀫𑀮𑀬-𑀭𑀸𑀚𑀞𑀸𑀦𑁂 𑀞𑀧𑁂𑀲𑀺 𑀲𑁄.

𑀞𑀸𑀦𑀦𑁆𑀢𑀭𑁂 𑀬𑀣𑀸𑀬𑁄𑀕𑀁-𑀲𑁂𑀝𑁆𑀞𑀸𑀫𑀘𑁆𑀘𑁂 𑀞𑀧𑁂𑀲𑀺 𑀘;

𑀚𑀦𑀁 𑀲𑀗𑁆𑀕𑀳𑀯𑀢𑁆𑀣𑀽𑀳𑀻, 𑀭𑀸𑀚𑀥𑀫𑁆𑀫𑁂𑀳𑀺 𑀘𑀕𑁆𑀕𑀳𑀺.

𑀤𑁂𑀲𑀁 𑀲𑀬𑁄𑀕𑁆𑀕𑀁 𑀧𑀸𑀤𑀸𑀲𑀺, 𑀬𑀼𑀯𑀭𑀸𑀚𑀲𑁆𑀲 𑀤𑀓𑁆𑀔𑀺𑀡𑀁;

𑀯𑀲𑀁 𑀢𑀢𑁆𑀣 𑀲𑀺𑀭𑀻𑀯𑀟𑁆𑀠-𑀫𑀸𑀦𑀯𑀸𑀧𑀺𑀁 𑀲𑀕𑀸𑀳𑀬𑀺.

𑀓𑀢𑁆𑀯𑀸 𑀕𑀺𑀭𑀺𑀯𑀺𑀳𑀸𑀭𑀜𑁆𑀘, 𑀲𑀗𑁆𑀖𑀺𑀓𑀁 𑀢𑀲𑁆𑀲 𑀤𑀸𑀧𑀬𑀺;

𑀔𑁂𑀢𑁆𑀢𑀸𑀦𑀁 𑀤𑁆𑀯𑀺𑀲𑀢𑀁 𑀲𑀗𑁆𑀖-𑀪𑁄𑀕𑀢𑁆𑀣𑀸𑀬 𑀫𑀳𑀸𑀫𑀢𑀺.

𑀅𑀤𑀸 𑀫𑀮𑀬𑀭𑀸𑀚𑀲𑁆𑀲, 𑀤𑀸𑀞𑀸𑀦𑀸𑀫𑀁 𑀲𑀥𑀻𑀢𑀭𑀁;

𑀧𑀭𑀺𑀯𑁂𑀡𑀁 𑀲𑀻𑀭𑀺𑀲𑀗𑁆𑀖-𑀩𑁄𑀥𑀺𑀦𑀸𑀫𑀜𑁆𑀘 𑀓𑀸𑀭𑀬𑀺.

𑀫𑀳𑀸𑀲𑀺𑀯𑀲𑁆𑀲 𑀓𑀸𑀭𑁂𑀲𑀺, 𑀧𑀭𑀺𑀯𑁂𑀡𑀁 𑀲𑀦𑀸𑀫𑀓𑀁;

𑀧𑀭𑀺𑀯𑀸𑀭𑁄’𑀧𑀺 𑀢𑀲𑁆𑀲𑀸𑀲𑀺, 𑀏𑀯𑀁 𑀧𑀼𑀜𑁆𑀜𑀧𑀭𑀸𑀬𑀦𑁄.

𑀓𑀢𑁆𑀯𑀸 𑀲𑀸𑀥𑀼𑀧𑀘𑀸𑀭𑁂𑀦, 𑀧𑁄𑀭𑀸𑀡𑀁 𑀲𑀗𑁆𑀕𑀳𑀁 𑀯𑀺𑀥𑀺𑀁;

𑀅𑀦𑁆𑀢𑀭𑀸𑀬𑀁 𑀯𑀺𑀲𑁄𑀥𑁂𑀢𑀼𑀁, 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀭𑀺.

𑀓𑀯𑀬𑁄 ¶ 𑀢𑀲𑁆𑀲 𑀭𑀚𑁆𑀚𑀫𑁆𑀳𑀺, 𑀲𑀻𑀳𑀴𑀸𑀬 𑀦𑀺𑀭𑀼𑀢𑁆𑀢𑀺𑀬𑀸;

𑀓𑀸𑀯𑁂𑀬𑁆𑀬𑁂 𑀩𑀳𑀼𑀓𑁂’𑀓𑀸𑀲𑀼𑀁, 𑀯𑀺𑀘𑀺𑀢𑁆𑀭𑀦𑀬𑀸𑀲𑀸𑀮𑀺𑀦𑁄.

𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑁂 𑀓𑀸𑀲𑀺, 𑀧𑀸𑀲𑀸𑀤𑀁 𑀲𑀼𑀫𑀦𑁄𑀳𑀭𑀁;

𑀅𑀓𑀸 𑀦𑀯𑀳𑀺 𑀯𑀲𑁆𑀲𑁂𑀳𑀺, 𑀤𑀺𑀧𑁂 𑀓𑀡𑁆𑀝𑀓𑀲𑁄𑀥𑀦𑀁.

𑀓𑀼𑀭𑀼𑀦𑁆𑀤𑀦𑀸𑀫𑀁 𑀓𑀸𑀭𑁂𑀢𑁆𑀯𑀸, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀗𑁆𑀖𑀺𑀓𑀁;

𑀯𑀸𑀧𑀺𑀁 𑀢𑀦𑁆𑀦𑀸𑀫𑀓𑀁 𑀦𑀸𑀴𑀺-𑀓𑁂𑀭𑀸𑀭𑀸𑀫𑀁 𑀢𑀺𑀬𑁄𑀚𑀦𑀁.

𑀫𑀳𑀸𑀲𑀺𑀯𑀯𑁆𑀳𑀬𑁂 𑀘𑁂𑀯, 𑀲𑀲𑁆𑀲𑀁 𑀓𑀸𑀭𑀬𑀺𑀢𑀼𑀁 𑀅𑀤𑀸;

𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀫𑀸𑀦-𑀫𑀸𑀭𑀸𑀫𑀺𑀓𑀲𑀢𑀁 𑀢𑀤𑀸.

𑀯𑀺𑀳𑀸𑀭𑀁 𑀢𑀁 𑀲𑀫𑀻𑀧𑀫𑁆𑀳𑀺, 𑀓𑀢𑁆𑀯𑀸 𑀅𑀫𑁆𑀩𑀺𑀮𑀧𑀲𑁆𑀲𑀯𑀁;

𑀕𑀸𑀫𑀁 𑀢𑀦𑁆𑀦𑀸𑀫𑀓𑀁 𑀘𑀸𑀤𑀸, 𑀣𑁂𑀭𑀺𑀬𑀸𑀦𑀁 𑀢𑀧𑀲𑁆𑀲𑀻𑀦𑀁.

𑀉𑀢𑁆𑀢𑀭𑀯𑀮𑁆𑀮𑀺𑀯𑀺𑀳𑀸𑀭𑀲𑁆𑀲, 𑀭𑀢𑀦𑀁 𑀤𑀻𑀖𑀯𑀡𑁆𑀡𑀺𑀢𑀁;

𑀤𑀢𑁆𑀯𑀸 𑀕𑀸𑀫𑀁 𑀧𑀢𑀺𑀝𑁆𑀞𑁂𑀲𑀺, 𑀲𑀢𑁆𑀣𑀼𑀩𑀺𑀫𑁆𑀩𑀁 𑀲𑀺𑀮𑀸𑀫𑀬𑀁.

𑀓𑁂𑀴𑀺𑀯𑀸𑀢𑁂 𑀘 𑀓𑀸𑀭𑁂𑀲𑀺, 𑀲𑀼𑀫𑀦𑀁 𑀦𑀸𑀫 𑀧𑀩𑁆𑀩𑀢𑀁;

𑀫𑀳𑀸𑀢𑁂𑀮𑀯𑀝𑀁𑀩𑁄𑀥𑀺-𑀖𑀭𑁂 𑀧𑀸𑀲𑀸𑀡𑀯𑁂𑀤𑀺𑀓𑀁.

𑀓𑀸𑀭𑁂𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀧𑀸𑀲𑀸𑀤𑀫𑀳𑀦𑁂 𑀅𑀤𑀸;

𑀙𑀢𑁆𑀢𑀺𑀁𑀲𑀸𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀲𑁄 𑀢𑀺𑀘𑀻𑀯𑀭𑀁.

𑀕𑀸𑀫𑀁 𑀤𑀢𑁆𑀯𑀸 𑀦𑀺𑀬𑁄𑀚𑁂𑀲𑀺, 𑀆𑀭𑀓𑁆𑀔𑀁 𑀥𑀻𑀢𑀼 𑀦𑀸𑀫𑀓𑀁;

𑀳𑀢𑁆𑀣𑀺𑀓𑀼𑀘𑁆𑀙𑀺𑀯𑀺𑀳𑀸𑀭𑁂𑀧𑀺, 𑀧𑀸𑀲𑀸𑀤𑀁 𑀓𑀸𑀲𑀺 𑀩𑀼𑀤𑁆𑀥𑀺𑀫𑀸.

𑀤𑀸𑀞𑀸 𑀲𑀺𑀯𑀲𑁆𑀲 𑀞𑀢𑁆𑀯𑀸𑀦, 𑀑𑀯𑀸𑀤𑁂 𑀲𑀸𑀥𑀼 𑀪𑀺𑀓𑁆𑀔𑀼𑀦𑁄;

𑀲𑀫𑀸𑀘𑀭𑀦𑁆𑀢𑁄 𑀥𑀫𑁆𑀫𑁂𑀦, 𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀳𑀺.

𑀫𑀽𑀕𑀲𑁂𑀦𑀸𑀧𑀢𑀺𑀁 𑀘𑀸𑀓𑀸, 𑀯𑀺𑀳𑀸𑀭𑀁 𑀲𑁄 𑀯𑀺𑀲𑀸𑀮𑀓𑀁;

𑀕𑀸𑀫𑀁 𑀮𑀚𑁆𑀚𑀺𑀓𑀫𑁂𑀢𑀲𑁆𑀲, 𑀤𑀸𑀲 𑀪𑁄𑀕𑀸𑀬’𑀤𑀸𑀲𑀺 𑀘.

𑀫𑀳𑀸𑀦𑀸𑀕𑀲𑁆𑀲 𑀧𑀼𑀜𑁆𑀜𑀢𑁆𑀣𑀁, 𑀭𑀜𑁆𑀜𑁄 𑀢𑀁𑀦𑀸𑀫𑀓𑀁 𑀅𑀓𑀸;

𑀫𑀳𑀸𑀣𑁂𑀭𑀲𑁆𑀲 𑀢𑀜𑁆𑀘𑀸’𑀤𑀸, 𑀭𑀸𑀚𑀸 𑀢𑁂𑀧𑀺𑀝𑀓𑀲𑁆𑀲 𑀲𑁄.

𑀅𑀢𑁆𑀢𑀦𑁄 𑀲𑀤𑀺𑀲𑀸𑀦𑀜𑁆𑀘, 𑀬𑁄𑀕𑀻𑀦𑀁 𑀯𑀺𑀕𑀢𑀸𑀮𑀬𑁄;

𑀪𑀺𑀓𑁆𑀔𑀽𑀦𑀁 𑀘𑀢𑀼𑀲𑀝𑁆𑀞𑀻𑀦𑀁, 𑀯𑀺𑀳𑀸𑀭𑀁 𑀢𑀁 𑀢𑀤𑀸 𑀅𑀤𑀸.

𑀓𑀢𑁆𑀯𑀸 𑀢𑀲𑁆𑀲𑁂𑀯 𑀫𑀳𑀸-𑀧𑀭𑀺𑀯𑁂𑀡𑀦𑀺𑀯𑀸𑀲𑀺𑀦𑁄;

𑀪𑀺𑀦𑁆𑀦𑁄𑀭𑀼𑀤𑀻𑀧𑀁 𑀤𑀢𑁆𑀯𑀸𑀦, 𑀯𑀝𑁆𑀝𑀓𑀸𑀓𑀸𑀭𑀧𑀺𑀝𑁆𑀞𑀺𑀢𑁄.

𑀤𑀓𑁆𑀔𑀺𑀡𑀕𑀻𑀭𑀺𑀤𑀴𑁆𑀳𑀯𑁆𑀳𑁂, 𑀫𑀳𑀸𑀦𑀸𑀕𑁂 𑀘 𑀧𑀩𑁆𑀩𑀢𑁂;

𑀓𑀸𑀴𑀯𑀸𑀧𑀸𑀤𑀺𑀓𑁂 𑀘𑀸’𑀓𑀸, 𑀯𑀺𑀳𑀸𑀭𑁂 𑀧𑁄𑀲𑀣𑀸𑀮𑀬𑁂.

𑀯𑀺𑀳𑀸𑀭𑁂 ¶ 𑀅𑀪𑀬𑁂’𑀓𑀸𑀲𑀺, 𑀫𑀳𑀸𑀧𑁄𑀓𑁆𑀔𑀭𑀡𑀺𑀁 𑀢𑀣𑀸;

𑀘𑁂𑀢𑀺𑀬𑀧𑀩𑁆𑀩𑀢𑁂 𑀘𑀸𑀓𑀸, 𑀦𑀸𑀕𑀲𑁄𑀡𑁆𑀟𑀺𑀁 𑀣𑀺𑀭𑁄𑀤𑀺𑀓𑀁.

𑀫𑀳𑀺𑀦𑁆𑀤𑀢𑀝𑀯𑀸𑀯𑀺𑀜𑁆𑀘, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀲𑀸𑀥𑀼𑀓𑀁;

𑀏𑀢𑀺𑀲𑁆𑀲𑀸 𑀫𑀭𑀺𑀬𑀸𑀤𑀸𑀬, 𑀣𑁂𑀭𑀁 𑀦𑁂𑀢𑀼𑀁 𑀦𑀺𑀬𑁄𑀚𑀬𑀺.

𑀫𑀳𑀸𑀫𑀳𑀺𑀦𑁆𑀤 𑀣𑁂𑀭𑀫𑁆𑀳𑀺, 𑀢𑀁𑀞𑀸𑀦𑀲𑀫𑀼𑀧𑀸𑀕𑀢𑁄;

𑀢𑀭𑀘𑁆𑀙𑀸 𑀏𑀯 𑀦𑁂𑀢𑀼𑀦𑁆𑀢𑀺, 𑀓𑀢𑀺𑀓𑀜𑁆𑀘𑁂𑀯 𑀓𑀸𑀭𑀬𑀺.

𑀙𑀢𑁆𑀢𑀁 𑀲𑁄𑀡𑁆𑀡𑀜𑁆𑀘 𑀓𑀸𑀭𑁂𑀲𑀺, 𑀦𑀺𑀓𑀸𑀬𑁂𑀲𑀼𑀧𑀺 𑀢𑀻𑀲𑀼 𑀲𑁄;

𑀲𑀢𑁆𑀢𑀸𑀝𑁆𑀞𑀦𑀯 𑀯𑀸𑀭𑁂𑀲𑀼, 𑀫𑀳𑀕𑁆𑀖𑀭𑀢𑀦𑁂𑀳𑀺 𑀘.

𑀫𑀳𑀸𑀢𑀽𑀧𑁂 𑀘𑀢𑀼𑀩𑁆𑀩𑀻𑀲-𑀪𑀸𑀭𑀁 𑀙𑀢𑁆𑀢𑀁 𑀲𑀼𑀯𑀡𑁆𑀡𑀬𑀁;

𑀢𑀢𑁆𑀣 𑀢𑀢𑁆𑀣 𑀘 𑀧𑀽𑀚𑁂𑀲𑀺, 𑀫𑀳𑀕𑁆𑀖𑀁 𑀭𑀢𑀦𑀼𑀢𑁆𑀢𑀫𑀁.

𑀤𑀸𑀞𑀸𑀥𑀸𑀢𑀼𑀖𑀭𑀁 𑀓𑀢𑁆𑀯𑀸, 𑀯𑀺𑀘𑀺𑀢𑁆𑀭𑀭𑀢𑀦𑀼𑀚𑁆𑀚𑀮𑀁;

𑀓𑀸𑀲𑀺 𑀳𑁂𑀫𑀓𑀭𑀡𑁆𑀟𑀜𑁆𑀘, 𑀮𑁄𑀳𑀦𑀸𑀯𑀜𑁆𑀘 𑀧𑀸𑀴𑀺𑀬𑀁.

𑀫𑀡𑀺𑀫𑁂𑀔𑀮𑀦𑀸𑀫𑀜𑁆𑀘, 𑀩𑀦𑁆𑀥𑀸𑀧𑁂𑀲𑀺 𑀲𑀩𑀦𑁆𑀥𑀦𑀁;

𑀫𑀳𑀸𑀫𑀸𑀢𑀺𑀜𑁆𑀘 𑀕𑀡𑁆𑀳𑁂𑀲𑀺, 𑀫𑀡𑀺𑀳𑀻𑀭𑀓𑀯𑀸𑀧𑀺𑀬𑀁.

𑀢𑀤𑀸 𑀏𑀓𑁄 𑀫𑀳𑀸𑀣𑁂𑀭𑁄, 𑀚𑁄𑀢𑀺𑀧𑀸𑀮𑀓𑀦𑀸𑀫𑀓𑁄;

𑀧𑀭𑀸𑀚𑁂𑀲𑀺 𑀯𑀺𑀯𑀸𑀤𑁂𑀦, 𑀤𑀻𑀧𑁂 𑀯𑁂𑀢𑀼𑀮𑁆𑀮𑀯𑀸𑀤𑀺𑀦𑁄.

𑀤𑀸𑀞𑀸𑀧𑀪𑀼𑀢𑀺𑀦𑀸𑀫𑁄’𑀣, 𑀆𑀤𑀺𑀧𑀸𑀤𑁄’𑀢𑀺𑀮𑀚𑁆𑀚𑀺𑀢𑁄;

𑀳𑀢𑁆𑀣𑀫𑀼𑀓𑁆𑀔𑀺𑀧𑁆𑀧𑀺 𑀢𑀁 𑀳𑀦𑁆𑀢𑀼𑀁, 𑀕𑀡𑁆𑀟𑁄 𑀲𑀜𑁆𑀚𑀸𑀬𑀺 𑀢𑀁𑀔𑀡𑁂.

𑀭𑀸𑀚𑀸 𑀢𑀲𑁆𑀫𑀺𑀁 𑀧𑀲𑀻𑀤𑀺𑀢𑁆𑀯𑀸, 𑀯𑀺𑀳𑀸𑀭𑁂𑀬𑁂𑀯 𑀯𑀸𑀲𑀬𑀺;

𑀫𑀸𑀦𑁂𑀦 𑀢𑀁 𑀅𑀦𑀸𑀕𑀫𑁆𑀫, 𑀤𑀸𑀞𑀸𑀧𑀪𑀽𑀫𑀢𑁄 𑀓𑀺𑀭.

𑀤𑀢𑁆𑀯𑀸 𑀫𑀳𑀸𑀤𑀺𑀧𑀸𑀤𑀢𑁆𑀢𑀁, 𑀪𑀸𑀕𑀺𑀦𑁂𑀬𑁆𑀬𑀕𑁆𑀕𑀩𑁄𑀥𑀺𑀦𑁄;

𑀭𑀓𑁆𑀔𑀺𑀢𑀼𑀁 𑀢𑀁 𑀦𑀺𑀬𑁄𑀚𑁂𑀲𑀺, 𑀣𑁂𑀭𑀁 𑀲𑁄𑀧𑀺 𑀢𑀫𑀸𑀘𑀭𑀺.

𑀦𑀻𑀮𑀕𑁂𑀳𑀧𑀭𑀺𑀘𑁆𑀙𑁂𑀤𑀁, 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀲𑁄 𑀅𑀤𑀸;

𑀓𑀢𑁆𑀯𑁂𑀯𑀁 𑀩𑀳𑀼𑀥𑀸 𑀧𑀼𑀜𑁆𑀜𑀁, 𑀘𑀢𑀼𑀢𑁆𑀢𑀺𑀁𑀲𑁂 𑀲𑀫𑁂 𑀫𑀢𑁄.

𑀅𑀕𑁆𑀕𑀩𑁄𑀥𑀺 𑀢𑀢𑁄 𑀆𑀲𑀺, 𑀭𑀸𑀚𑀸 𑀧𑀼𑀩𑁆𑀩𑀲𑁆𑀲 𑀭𑀸𑀚𑀺𑀦𑁄;

𑀫𑀳𑀮𑁆𑀮𑀓𑀢𑁆𑀢𑀸𑀦𑀁 𑀔𑀼𑀤𑁆𑀤-𑀦𑀸𑀫𑁂𑀦 𑀧𑀭𑀺𑀤𑀻𑀧𑀬𑀼𑀁.

𑀲𑁄 𑀤𑀻𑀧𑀁 𑀧𑀭𑀺𑀧𑀸𑀮𑁂𑀲𑀺, 𑀧𑀼𑀩𑁆𑀩𑀘𑀸𑀭𑀺𑀢𑁆𑀢𑀓𑁄𑀯𑀺𑀤𑁄;

𑀅𑀓𑀸𑀲𑀺 𑀘 𑀫𑀳𑁂𑀲𑀺𑀁 𑀲𑁄, 𑀫𑀸𑀢𑀼𑀮𑀥𑀻𑀢𑀼𑀫𑀢𑁆𑀢𑀦𑁄.

𑀲𑀗𑁆𑀖𑀪𑀤𑁆𑀤𑀁 𑀅𑀲𑀺𑀕𑁆𑀕𑀸𑀳𑀁, 𑀓𑀸𑀲𑀺 𑀩𑀦𑁆𑀥𑀼𑀁 𑀫𑀳𑁂𑀲𑀺𑀬𑀸;

𑀬𑀣𑀸𑀭𑀳𑀫𑀤𑀸 𑀘𑁂𑀯, 𑀞𑀸𑀦𑀦𑁆𑀢𑀭𑀫𑀦𑀸𑀮𑀬𑁄.

𑀓𑀢𑁆𑀯𑀸 ¶ 𑀯𑁂𑀴𑀼𑀯𑀦𑀁 𑀭𑀸𑀚𑀸, 𑀲𑀸𑀕𑀮𑀻𑀦𑀁 𑀦𑀺𑀬𑁄𑀚𑀬𑀻;

𑀚𑀫𑁆𑀩𑀼𑀭𑀦𑁆𑀢𑀭𑀕𑀮𑁆𑀮𑀜𑁆𑀘, 𑀓𑀸𑀲𑀺 𑀫𑀸𑀢𑀺𑀓𑀧𑀺𑀝𑁆𑀞𑀺𑀓𑀁.

𑀭𑀜𑁆𑀜𑁄 𑀢𑀲𑁆𑀲𑁂’𑀯 𑀭𑀚𑁆𑀚𑀫𑁆𑀳𑀺, 𑀓𑀸𑀮𑀺𑀗𑁆𑀕𑁂𑀲𑀼 𑀫𑀳𑀻𑀧𑀢𑀺;

𑀲𑀢𑁆𑀢𑀸𑀦𑀁 𑀫𑀭𑀡𑀁 𑀬𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄.

𑀇𑀫𑀁 𑀤𑀻𑀧𑀫𑀼𑀧𑀸𑀕𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀓𑀢𑀦𑀺𑀘𑁆𑀙𑀬𑁄;

𑀚𑁄𑀢𑀺𑀧𑀸𑀮𑀫𑁆𑀳𑀺 𑀧𑀩𑁆𑀩𑀚𑀺, 𑀭𑀸𑀚𑀸 𑀲𑀓𑁆𑀓𑀸𑀲𑀺 𑀢𑀁 𑀘𑀺𑀭𑀁.

𑀧𑀥𑀸𑀦𑀞𑀸𑀦𑀁 𑀢𑀲𑁆𑀲’𑀓𑀸, 𑀯𑀺𑀳𑀸𑀭𑁂 𑀫𑀢𑁆𑀢𑀧𑀩𑁆𑀩𑀢𑁂;

𑀢𑀲𑁆𑀲𑀸𑀫𑀘𑁆𑀘𑁄 𑀫𑀳𑁂𑀲𑀻 𑀘, 𑀢𑀣𑁂𑀯𑀸’𑀕𑀫𑁆𑀫 𑀧𑀩𑁆𑀩𑀚𑀼𑀁.

𑀭𑀜𑁆𑀜𑁄 𑀫𑀳𑁂𑀲𑀻 𑀲𑀼𑀢𑁆𑀯𑀸𑀦, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀫𑀼𑀢𑁆𑀢𑀫𑀁;

𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀸𑀲𑀺, 𑀭𑀢𑀦𑀯𑁆𑀳𑀜𑁆𑀘 𑀓𑀸𑀭𑀬𑀺.

𑀅𑀤𑀸 𑀭𑀸𑀚𑀸 𑀅𑀫𑀘𑁆𑀘𑀲𑁆𑀲, 𑀧𑀸𑀘𑀻𑀦𑀓𑀡𑁆𑀟𑀭𑀸𑀚𑀺𑀬𑀁;

𑀯𑁂𑀢𑁆𑀢𑀯𑀸𑀲𑀯𑀺𑀳𑀸𑀭𑀜𑁆𑀘, 𑀲𑁄’𑀤𑀸 𑀲𑀗𑁆𑀖𑀲𑁆𑀲 𑀢𑀁 𑀬𑀢𑀺.

𑀭𑀸𑀚𑀢𑁆𑀣𑁂𑀭𑁂𑀫𑀢𑁂 𑀭𑀸𑀚𑀸, 𑀲𑁄𑀘𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀬;

𑀧𑀥𑀸𑀦𑀞𑀸𑀦𑀁 𑀓𑀸𑀭𑁂𑀲𑀺, 𑀘𑀽𑀴𑀕𑀮𑁆𑀮𑀯𑀺𑀳𑀸𑀭𑀓𑁂.

𑀧𑀮𑀁𑀦𑀕𑀭𑀕𑀜𑁆𑀘𑁂𑀯, 𑀢𑀲𑁆𑀲 𑀞𑀸𑀦𑀜𑁆𑀳𑀺 𑀓𑀸𑀭𑀬𑀺;

𑀏𑀯𑀁 𑀢𑀤𑀢𑁆𑀣𑀁 𑀧𑀼𑀜𑁆𑀜𑀸𑀦𑀺, 𑀩𑀳𑀽𑀦𑀺’𑀧𑀺 𑀫𑀳𑀻𑀧𑀢𑀺.

𑀚𑁄𑀢𑀺𑀧𑀸𑀮𑀺𑀢 𑀣𑁂𑀭𑀫𑁆𑀳𑀺, 𑀢𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑀁;

𑀯𑀦𑁆𑀤𑀫𑀸𑀦𑁂 𑀧𑀪𑀺𑀚𑁆𑀚𑀺𑀢𑁆𑀯𑀸, 𑀪𑀸𑀕𑁄 𑀢𑀁 𑀧𑀼𑀭𑀢𑁄 𑀧𑀢𑀺.

𑀧𑀓𑁆𑀓𑁄𑀲𑀺𑀢𑁆𑀯𑀸𑀦 𑀭𑀸𑀚𑀸𑀦𑀁, 𑀣𑁂𑀭𑁄 𑀤𑀲𑁆𑀲𑁂𑀲𑀺 𑀤𑀼𑀓𑁆𑀔𑀺𑀢𑁄;

𑀭𑀸𑀚𑀸 𑀤𑀺𑀲𑁆𑀯𑀸𑀯 𑀲𑀁𑀯𑀺𑀕𑁆𑀕𑁄, 𑀓𑀫𑁆𑀫𑀁 𑀧𑀝𑁆𑀞𑀧𑀺 𑀢𑀁𑀔𑀡𑁂.

𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼𑀁 𑀲𑁄, 𑀮𑁄𑀳𑀧𑀸𑀲𑀸𑀤𑀓𑀼𑀘𑁆𑀙𑀺𑀬𑀁;

𑀲𑀸𑀭𑀓𑁆𑀔𑀁 𑀞𑀧𑀬𑀺𑀢𑁆𑀯𑀸𑀦, 𑀭𑀢𑁆𑀢𑀺𑀦𑁆𑀤𑀺𑀯𑀫𑀧𑀽𑀚𑀬𑀺.

𑀦𑀯𑀓𑀫𑁆𑀫𑁂 𑀘𑀺𑀭𑀸𑀬𑀦𑁆𑀢𑁂, 𑀣𑀽𑀧𑀸𑀭𑀸𑀫𑀫𑁆𑀳𑀺 𑀤𑁂𑀯𑀢𑀸;

𑀲𑀼𑀧𑀺𑀦𑀁 𑀢𑀲𑁆𑀲 𑀤𑀲𑁆𑀲𑁂𑀲𑀼𑀁, 𑀭𑀢𑁆𑀢𑀺𑀫𑀸𑀭𑀸𑀫𑀺𑀓𑀸 𑀯𑀺𑀬.

𑀲𑀘𑁂 𑀭𑀸𑀚𑀸 𑀧𑀧𑀜𑁆𑀘𑁂𑀢𑀺, 𑀓𑀸𑀢𑀼𑀁 𑀥𑀸𑀢𑀼𑀖𑀭𑀁 𑀫𑀬𑀁;

𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫, 𑀬𑀢𑁆𑀣𑀢𑀢𑁆𑀣𑀸’𑀢𑀺 𑀢𑀁𑀔𑀡𑁂.

𑀭𑀸𑀚𑀸 𑀧𑀩𑀼𑀤𑁆𑀥𑁄 𑀲𑀁𑀯𑀺𑀕𑁆𑀕𑁄, 𑀦 𑀘𑀺𑀭𑁂𑀦𑁂𑀯 𑀓𑀸𑀭𑀬𑀺;

𑀓𑀫𑁆𑀫𑀁 𑀥𑀸𑀢𑀼𑀖𑀭𑁂𑀲𑀩𑁆𑀩𑀁, 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀲𑀜𑁆𑀜𑀼𑀢𑁆𑀢𑀁.

𑀘𑀢𑀲𑁆𑀲𑁄 𑀧𑀝𑀺𑀫𑀸𑀬𑁄 𑀘, 𑀧𑀮𑁆𑀮𑀗𑁆𑀓𑁂 𑀘 𑀲𑀺𑀮𑀸𑀫𑀬𑁂;

𑀳𑁂𑀫𑀘𑁆𑀙𑀢𑁆𑀢𑀁 𑀲𑀺𑀮𑀸𑀤𑀦𑁆𑀢-𑀓𑀫𑁆𑀫𑀁 𑀕𑁂𑀳𑀫𑁆𑀳𑀺 𑀲𑀩𑁆𑀩𑀲𑁄.

𑀫𑀳𑀸𑀫𑀘𑁆𑀘𑀸𑀤𑀬𑁄’𑀓𑀁𑀲𑀼 ¶ , 𑀓𑀭𑀡𑁆𑀟𑀸𑀦𑀁 𑀲𑀢𑀁 𑀦𑀯;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲, 𑀓𑀫𑁆𑀫𑀜𑁆𑀘 𑀦𑀺𑀔𑀺𑀮𑀁 𑀦𑀯𑀁.

𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀓𑀸𑀭𑁂𑀢𑁆𑀯𑀸, 𑀫𑀳𑀸𑀧𑀽𑀚𑀁 𑀬𑀣𑀸𑀭𑀳𑀁;

𑀆𑀦𑁂𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀸, 𑀥𑀸𑀢𑀼𑀁 𑀲𑀩𑁆𑀩𑀸𑀤𑀭𑁂𑀦 𑀲𑁄.

𑀚𑁄𑀢𑀺𑀧𑀸𑀮𑀁 𑀫𑀳𑀸𑀣𑁂𑀭𑀁, 𑀲𑀲𑀗𑁆𑀖𑀁 𑀧𑀭𑀺𑀯𑀸𑀭𑀺𑀬;

𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑁂𑀲𑀺, 𑀥𑀸𑀢𑀼𑀁 𑀥𑀸𑀢𑀼𑀓𑀭𑀡𑁆𑀟𑀓𑁂.

𑀥𑀸𑀢𑀼𑀕𑁂𑀳𑀲𑁆𑀲 𑀧𑀸𑀤𑀸𑀲𑀺, 𑀮𑀗𑁆𑀓𑀸𑀤𑀻𑀧𑀁 𑀲𑀳𑀢𑁆𑀢𑀦𑀸;

𑀮𑀸𑀪𑀕𑁆𑀕𑀸𑀫-𑀫𑀤𑀸 𑀢𑀲𑁆𑀲𑀸, 𑀭𑀓𑁆𑀔𑀓𑀸𑀦𑀁 𑀫𑀳𑁂𑀲𑀺𑀬𑀸.

𑀦𑀸𑀕𑀤𑀻𑀧𑀫𑁆𑀳𑀺 𑀕𑁂𑀳𑀜𑁆𑀘, 𑀭𑀸𑀚𑀸𑀬𑀢𑀦𑀥𑀸𑀢𑀼𑀬𑀸;

𑀉𑀡𑁆𑀡𑀮𑁄𑀫𑀖𑀭𑀜𑁆𑀘𑁂𑀯, 𑀙𑀢𑁆𑀢𑀫𑀸𑀫𑀮𑀘𑁂𑀢𑀺𑀬𑁂.

𑀢𑀢𑁆𑀣 𑀕𑀸𑀫𑀁 𑀯𑀺𑀳𑀸𑀭𑀲𑁆𑀲, 𑀬𑀸𑀕𑀼𑀤𑀸𑀦𑀸𑀬’𑀤𑀸𑀲𑀺 𑀘;

𑀯𑀺𑀳𑀸𑀭𑀲𑁆𑀲’𑀪𑀬𑀲𑁆𑀲𑀸’𑀤𑀸, 𑀕𑀸𑀫𑀫𑀗𑁆𑀕𑀡𑀲𑀸𑀮𑀓𑀁.

𑀦𑀸𑀫𑀁 𑀓𑀢𑁆𑀯𑀸𑀦 𑀲𑁄’𑀓𑀸𑀲𑀺, 𑀅𑀢𑁆𑀢𑀦𑁄 𑀘 𑀫𑀳𑁂𑀲𑀺𑀬𑀸;

𑀤𑀸𑀞𑀕𑁆𑀕𑀩𑁄𑀥𑀺𑀫𑀸𑀯𑀸𑀲𑀁, 𑀯𑀺𑀳𑀸𑀭𑁂 𑀅𑀢𑀬𑀼𑀢𑁆𑀢𑀭𑁂.

𑀤𑁂𑀯𑀻 𑀓𑀧𑀸𑀮𑀦𑀸𑀕𑀁 𑀲𑀸, 𑀯𑀺𑀳𑀸𑀭𑀁 𑀲𑀸𑀥𑀼𑀓𑀸𑀭𑀺𑀬;

𑀢𑀲𑁆𑀲𑁂’𑀯𑀸𑀤𑀸 𑀯𑀺𑀳𑀸𑀭𑀲𑁆𑀲, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑀕𑁂𑀳𑀁 𑀚𑁂𑀢𑀯𑀦𑁂 𑀓𑀸𑀲𑀺, 𑀭𑀸𑀚𑀸 𑀭𑀸𑀚𑀢𑀘𑀼𑀫𑁆𑀩𑀝𑀁;

𑀉𑀤𑀧𑀸𑀦𑀁 𑀫𑀡𑀸𑀧𑁂𑀲𑀺, 𑀲𑁄𑀯 𑀩𑁄𑀥𑀺𑀖𑀭𑀦𑁆𑀢𑀺𑀓𑁂.

𑀕𑀗𑁆𑀕𑀸𑀢𑀝𑀁 𑀯𑀮𑀸𑀳𑀲𑁆𑀲𑀁, 𑀯𑀸𑀧𑀺𑀁 𑀕𑀺𑀭𑀺𑀢𑀝𑀜𑁆𑀘𑀓𑀸;

𑀫𑀳𑀸𑀧𑀸𑀴𑀺𑀁𑀧𑀺 𑀯𑀟𑁆𑀠𑁂𑀲𑀺, 𑀪𑀢𑀦𑀸𑀯𑀜𑁆𑀘 𑀓𑀸𑀭𑀬𑀺.

𑀪𑀺𑀓𑁆𑀔𑀽𑀦𑀻𑀦𑀁 𑀫𑀳𑁂𑀲𑀻 𑀘, 𑀪𑀢𑁆𑀢𑀯𑀁𑀲𑀁 𑀲𑀫𑀸𑀤𑀺𑀲𑀺;

𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑁄, 𑀤𑀺𑀯𑀁’𑀕𑀸 𑀤𑀲𑀫𑁂 𑀲𑀫𑁂.

𑀏𑀯𑀁 𑀧𑀼𑀜𑁆𑀜𑀭𑀢𑀸 𑀦𑀭𑀸𑀥𑀺𑀧𑀢𑀬𑁄 𑀲𑀫𑁆𑀧𑀦𑁆𑀦𑀪𑁄𑀕𑀸 𑀕𑀫𑀼𑀁;

𑀫𑀘𑁆𑀘𑀼𑀲𑁆𑀲𑁂𑀯 𑀯𑀲𑀁 𑀢𑀢𑁄𑀳𑀺 𑀫𑀢𑀺𑀫𑀸 𑀲𑀫𑁆𑀫𑀸 𑀪𑀯𑀲𑁆𑀲𑀻𑀤𑀺𑀲𑀁;

𑀧𑀲𑁆𑀲𑀦𑁆𑀢𑁄 𑀦𑀺𑀬𑀫𑀁 𑀯𑀺𑀳𑀸𑀬 𑀯𑀺𑀥𑀺𑀦𑀸 𑀲𑀩𑁆𑀩𑀁 𑀪𑀯𑁂 𑀲𑀗𑁆𑀕𑀢𑀺𑀁;

𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀘𑀭𑁂𑀬𑁆𑀬 𑀥𑀺𑀢𑀺𑀫𑀸 𑀧𑀩𑁆𑀩𑀚𑁆𑀚𑀫𑀚𑁆𑀛𑀽𑀧𑀕𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀤𑁆𑀯𑀺𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀲𑀗𑁆𑀖𑀢𑀺𑀲𑁆𑀲𑁄 ¶ 𑀢𑀢𑁄 𑀆𑀲𑀺, 𑀅𑀲𑀺𑀕𑁆𑀕𑀸𑀳𑁄 𑀫𑀳𑀻𑀧𑀢𑀺;

𑀲𑀸𑀲𑀦𑀲𑁆𑀲 𑀘 𑀭𑀝𑁆𑀞𑀲𑁆𑀲, 𑀯𑀼𑀤𑁆𑀥𑀺𑀓𑀸𑀫𑁄 𑀦𑀬𑁂 𑀭𑀢𑁄.

𑀞𑀸𑀦𑀦𑁆𑀢𑀭𑀁 𑀬𑀣𑀸𑀭𑀳𑀁, 𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀺𑀲𑁄 𑀚𑀦𑀁;

𑀢𑀤𑀸 𑀔𑀼𑀤𑁆𑀤𑀓𑀭𑀸𑀚𑀲𑁆𑀲, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑀫𑀽𑀧𑀢𑀺.

𑀯𑀲𑀦𑁆𑀢𑁄 𑀭𑁄𑀳𑀡𑁂 𑀲𑀼𑀢𑁆𑀯𑀸, 𑀲𑀗𑁆𑀖𑀢𑀺𑀲𑁆𑀲𑀲𑁆𑀲 𑀭𑀸𑀚𑀢𑀁;

𑀔𑀦𑁆𑀥𑀯𑀸𑀭𑀁 𑀲𑀬𑀼𑀤𑁆𑀥𑀢𑁆𑀣𑀁, 𑀫𑀳𑀸𑀕𑀮𑁆𑀮𑁂 𑀦𑀺𑀯𑁂𑀲𑀬𑀺.

𑀲𑀗𑁆𑀖𑀢𑀺𑀲𑁆𑀲𑁄 𑀘 𑀲𑀼𑀢𑁆𑀯𑀸 𑀢𑀁, 𑀩𑀮𑀓𑀸𑀬𑀫𑀧𑁂𑀲𑀬𑀺;

𑀬𑀼𑀚𑁆𑀛𑀺𑀢𑀼𑀁 𑀢𑁂𑀦 𑀢𑀚𑁆𑀚𑁂𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀩𑁆𑀩𑀮𑁄.

𑀢𑀢𑁄 𑀳𑀢𑁆𑀣𑀲𑁆𑀲𑀫𑀸𑀤𑀸𑀬, 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀯𑀺𑀳𑀸𑀭𑀓𑀁;

𑀩𑀮𑀁 𑀲𑁄 𑀲𑀦𑁆𑀦𑀺𑀧𑀸𑀢𑁂𑀦𑁆𑀢𑁄, 𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑀬𑀺.

𑀭𑀸𑀚𑀸 𑀲𑀼𑀢𑁆𑀯𑀸 𑀧𑀼𑀦𑀸’𑀕𑀦𑁆𑀢𑁆𑀯𑀸, 𑀓𑀤𑀮𑁆𑀮𑀸𑀤𑀻𑀦𑀺𑀯𑀸𑀢𑀓𑁂;

𑀬𑀼𑀚𑁆𑀛𑀺𑀢𑁆𑀯𑀸 𑀢𑀁 𑀧𑀮𑀸𑀧𑁂𑀢𑁆𑀯𑀸, 𑀧𑁂𑀲𑁂𑀢𑁆𑀯𑀸 𑀩𑀮𑀫𑀢𑁆𑀢𑀦𑁄.

𑀲𑀬𑀁 𑀧𑀼𑀭𑀫𑀼𑀧𑀸𑀕𑀜𑁆𑀙𑀺, 𑀲𑁄𑀧𑀺 𑀦𑀝𑁆𑀞𑀁 𑀲𑀯𑀸𑀳𑀺𑀦𑀺𑀁;

𑀧𑀼𑀦 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀓𑀭𑁂𑀳𑁂𑀭𑀫𑀼𑀧𑀸𑀕𑀫𑀺.

𑀭𑀜𑁆𑀜𑁄 𑀲𑁂𑀦𑀸𑀧𑀢𑀺 𑀧𑀼𑀢𑁆𑀢𑀁, 𑀧𑁂𑀲𑁂𑀢𑁆𑀯𑀸 𑀘𑁄𑀭𑀲𑀦𑁆𑀢𑀺𑀓𑀁;

𑀬𑁂𑀦 𑀓𑁂𑀦𑀘𑀺 𑀮𑁂𑀲𑁂𑀦, 𑀲𑀬𑀁 𑀤𑀼𑀓𑁆𑀔𑀺𑀯 𑀤𑀼𑀫𑁆𑀫𑀦𑁄.

𑀆𑀢𑀼𑀭𑁄 𑀯𑀺𑀬 𑀩𑀸𑀴𑁆𑀳𑀁 𑀲𑁄, 𑀳𑁄𑀲𑀺 𑀫𑀜𑁆𑀘𑀧𑀭𑀸𑀬𑀦𑁄;

𑀭𑀸𑀚𑀸 𑀲𑀼𑀢𑁆𑀯𑀸 𑀧𑀯𑀢𑁆𑀢𑀺𑀢𑀁, 𑀉𑀧𑀲𑀗𑁆𑀓𑀫𑁆𑀫 𑀢𑀗𑁆𑀔𑀡𑁂.

𑀫𑀸 𑀢𑁆𑀯𑀁 𑀲𑁄𑀘𑀺 𑀓𑀼𑀫𑀸𑀭𑀲𑁆𑀲, 𑀲𑀫𑁆𑀫𑀸𑀦𑁂𑀢𑁆𑀯𑀸𑀦𑀼𑀲𑀸𑀲𑀺𑀬;

𑀳𑀦𑁆𑀤 𑀢𑁆𑀯𑀁 𑀦𑀕𑀭𑀁 𑀭𑀓𑁆𑀔, 𑀦𑀢𑁂 𑀲𑀓𑁆𑀓𑀸 𑀫𑀬𑀸 𑀲𑀳.

𑀬𑀼𑀤𑁆𑀥𑀫𑀡𑁆𑀟𑀮𑀫𑀸𑀕𑀦𑁆𑀢𑀼𑀁, 𑀕𑀺𑀮𑀸𑀦𑀢𑁆𑀢𑀸𑀢𑀺 𑀬𑁄𑀚𑀬𑀺;

𑀉𑀩𑁆𑀩𑀸𑀲𑀺𑀢𑁂 𑀚𑀦𑁂 𑀲𑀩𑁆𑀩𑁂, 𑀯𑀺𑀘𑁆𑀙𑀺𑀦𑁆𑀦𑁂 𑀭𑀸𑀚𑀪𑁄𑀚𑀦𑁂.

𑀫𑀳𑀸𑀧𑀸𑀴𑀺𑀫𑁆𑀳𑀺 𑀲𑀫𑁆𑀧𑀓𑁆𑀓𑀁, 𑀭𑀜𑁆𑀜𑁄 𑀪𑁄𑀚𑀦𑀫𑀸𑀳𑀭𑀼𑀁;

𑀭𑀸𑀚𑀸 𑀤𑁆𑀯𑀺𑀲𑁆𑀯𑀸’𑀢𑀺 𑀦𑀺𑀩𑀺𑀦𑁆𑀦𑁄, 𑀬𑀸𑀯 𑀫𑀦𑁆𑀤𑁄 𑀦 𑀳𑁂𑀲𑁆𑀲𑀢𑀺.

𑀏𑀓𑁆𑀓𑁄 ¶ 𑀧𑀻𑀢𑀺 𑀯𑀺𑀘𑀺𑀦𑁆𑀢𑁂𑀢𑁆𑀯𑀸, 𑀬𑀼𑀤𑁆𑀥𑀸𑀬 𑀲𑀫𑀸𑀲𑀸’𑀕𑀫𑀸;

𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦 𑀆𑀭𑀼𑀬𑁆𑀳, 𑀳𑀢𑁆𑀣𑀺𑀁𑀲𑀦𑁆𑀦𑀤𑁆𑀥𑀯𑀸𑀳𑀦𑁄.

𑀣𑁄𑀓𑁂𑀦𑁂𑀯 𑀩𑀮𑁂𑀦𑀸𑀕𑀸, 𑀧𑀸𑀘𑀺𑀦𑀢𑀺𑀲𑁆𑀲𑀧𑀩𑁆𑀩𑀢𑀁;

𑀏𑀯𑀁 𑀉𑀪𑀬𑀢𑁄 𑀘𑀽𑀴-𑀲𑀗𑁆𑀕𑀸𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂.

𑀲𑁂𑀦𑀸𑀧𑀢𑀺𑀲𑀫𑀺𑀢𑁆𑀢𑀤𑁆𑀤𑀼, 𑀬𑀼𑀤𑁆𑀥𑀫𑀸𑀭𑀪𑀺 𑀧𑀘𑁆𑀙𑀢𑁄;

𑀧𑀼𑀢𑁆𑀢𑁄 𑀤𑀺𑀲𑁆𑀯𑀸 𑀦𑀭𑀺𑀦𑁆𑀤𑀲𑁆𑀲, 𑀖𑀸𑀢𑁂𑀲𑁆𑀲𑀸𑀫𑀺 𑀇𑀫𑀁 𑀇𑀢𑀺.

𑀆𑀳 𑀭𑀸𑀚𑀸 𑀦𑀺𑀯𑀸𑀭𑁂𑀲𑀺, 𑀫𑀸 𑀢𑁂 𑀭𑀼𑀘𑁆𑀘𑀺 𑀩𑀮𑀁 𑀇𑀤𑀁;

𑀦𑁂𑀯 𑀲𑀓𑁆𑀓𑀸’𑀥𑀺𑀯𑀸𑀲𑁂𑀢𑀼𑀁, 𑀅𑀢𑀺𑀫𑀦𑁆𑀤𑀁 𑀳𑀦𑀺𑀲𑁆𑀲𑀢𑀺.

𑀤𑀼𑀯𑀺𑀦𑁆𑀦𑀁 𑀩𑀮𑀓𑀸𑀬𑀸𑀦𑀁, 𑀭𑀸𑀚𑀸𑀫𑀚𑁆𑀛𑀕𑀢𑁄 𑀅𑀳𑀼;

𑀢𑀢𑁄 𑀲𑁂𑀦𑀸 𑀤𑁆𑀯𑀺𑀥𑀸’𑀳𑁄𑀲𑀺, 𑀘𑁄𑀭𑀲𑁂𑀦𑀸𑀧𑀢𑀻𑀧𑀢𑀺.

𑀭𑀜𑁆𑀜𑁄 𑀦𑀸𑀕𑁄 𑀫𑀥𑀼𑀓𑀯𑁆𑀳 𑀭𑀼𑀓𑁆𑀔𑀘𑁆𑀙𑀸𑀬𑀁 𑀲𑀫𑀸𑀯𑀺𑀲𑀺;

𑀢𑀤𑀸 𑀙𑀢𑁆𑀢𑀁 𑀧𑀢𑀺𑀢𑀲𑁆𑀲, 𑀲𑀸𑀔𑀫𑀸𑀳𑀘𑁆𑀘 𑀪𑀽𑀫𑀺𑀬𑀁.

𑀘𑁄𑀭𑀲𑁆𑀲 𑀲𑁂𑀦𑀸 𑀢𑀁 𑀤𑀺𑀢𑁆𑀯𑀸, 𑀳𑀭𑀺𑀢𑁆𑀯𑀸 𑀲𑀸𑀫𑀺𑀦𑁄 𑀅𑀤𑀸;

𑀲𑁄 𑀢𑀁 𑀉𑀲𑁆𑀲𑀸𑀧𑀬𑀺𑀙𑀢𑁆𑀢𑀁, 𑀞𑀢𑁆𑀯𑀸𑀧𑀩𑁆𑀩𑀢𑀫𑀼𑀤𑁆𑀥𑀦𑀺.

𑀢𑀤𑀸 𑀭𑀸𑀚𑀩𑀮𑀁 𑀭𑀸𑀚𑀸, 𑀦𑀼𑀦𑀫𑁂𑀲𑁄𑀢𑀺 𑀘𑀺𑀦𑁆𑀢𑀺𑀬;

𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀲𑀺, 𑀭𑀸𑀚𑀸 𑀆𑀲𑀺 𑀢𑀤𑁂𑀓𑀓𑁄.

𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀢𑀤𑁄𑀭𑀼𑀬𑁆𑀳-𑀧𑀼𑀢𑁆𑀢𑀁’𑀫𑀘𑁆𑀘𑀜𑁆𑀘 𑀲𑁄𑀳𑀤𑀁;

𑀉𑀧𑀸𑀯𑀺𑀲𑀺 𑀲𑀫𑀻𑀧𑀫𑁆𑀳𑀺, 𑀫𑁂𑀭𑀼𑀫𑀚𑁆𑀚𑀭𑀓𑀸𑀦𑀦𑀁.

𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀢𑁄 𑀮𑀤𑁆𑀥-𑀚𑀬𑁄 𑀯𑀸𑀳𑀦𑀫𑀸𑀤𑀺𑀬;

𑀲𑁂𑀦𑀸𑀧𑀢𑀺𑀁𑀘 𑀫𑀺𑀢𑁆𑀢𑀤𑁆𑀤𑀼𑀁, 𑀢𑀲𑁆𑀲 𑀧𑀼𑀢𑁆𑀢𑀜𑁆𑀘 𑀧𑀸𑀧𑀺𑀦𑀁.

𑀉𑀧𑀸𑀕𑀫𑁆𑀫 𑀧𑀼𑀭𑀁 𑀭𑀸𑀚𑀸, 𑀆𑀲𑀻 𑀮𑀗𑁆𑀓𑀸 𑀢𑀮𑀸𑀥𑀺𑀧𑁄;

𑀢𑀢𑁄 𑀘𑀺𑀦𑁆𑀢𑁂𑀲𑀺 𑀚𑀻𑀯𑀦𑁆𑀢𑁂, 𑀲𑀢𑁆𑀢𑀼𑀫𑁆𑀳𑀺 𑀦 𑀲𑀼𑀔𑀁 𑀇𑀢𑀺.

𑀲𑁄 𑀲𑀼𑀢𑁆𑀯𑀸 𑀧𑀼𑀩𑁆𑀩𑀭𑀸𑀚𑀲𑁆𑀲, 𑀧𑀼𑀢𑁆𑀢𑁄 𑀏𑀢𑁆𑀣𑀸𑀢𑀺 𑀓𑀼𑀚𑁆𑀛𑀺𑀬;

𑀆𑀡𑀸𑀧𑁂𑀲𑀺 𑀘 𑀢𑀲𑁆𑀲𑀸’𑀲𑀼, 𑀳𑀢𑁆𑀣𑀧𑀸𑀤𑀸𑀦𑀺 𑀙𑀺𑀦𑁆𑀤𑀺𑀢𑀼𑀁.

𑀉𑀧𑀓𑁆𑀓𑀫𑀺 𑀢𑀤𑀸 𑀭𑀜𑁆𑀜𑀸, 𑀆𑀡𑀢𑁆𑀢𑁄 𑀧𑀼𑀭𑀺𑀲𑁄 𑀔𑀡𑁂;

𑀙𑀺𑀦𑁆𑀤𑀺𑀢𑀼𑀁 𑀳𑀢𑁆𑀣𑀧𑀸𑀤𑀁 𑀲𑁄, 𑀓𑀼𑀫𑀸𑀭𑁄 𑀭𑁄𑀤𑀺 𑀤𑀼𑀫𑁆𑀫𑀦𑁄.

𑀧𑀽𑀯𑀔𑀸𑀤𑀓𑀳𑀢𑁆𑀣𑀁 𑀫𑁂, 𑀙𑀺𑀦𑁆𑀤𑁂𑀬𑁆𑀬𑀁 𑀘𑁂 𑀢𑀤𑀸 𑀅𑀳𑀁;

𑀔𑀸𑀤𑀺𑀲𑀁 𑀢𑁂𑀦 𑀧𑀽𑀯𑁂𑀢𑀺, 𑀳𑀁 𑀲𑀼𑀢𑁆𑀯𑀸 𑀭𑀸𑀚𑀓𑀫𑁆𑀫𑀺𑀓𑁄.

𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸, 𑀭𑀸𑀚𑀸𑀡𑀸𑀬 𑀤𑀼𑀔𑀤𑁆𑀤𑀺𑀢𑁄;

𑀯𑀸𑀫𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘, 𑀢𑀲𑁆𑀲 𑀙𑀺𑀦𑁆𑀤𑀺 𑀦𑀭𑀸𑀥𑀫𑁄.

𑀚𑁂𑀝𑁆𑀞𑀢𑀺𑀲𑁆𑀲𑁄 ¶ 𑀧𑀮𑀸𑀬𑀺𑀢𑁆𑀯𑀸, 𑀭𑀜𑁆𑀜𑁄 𑀧𑀼𑀢𑁆𑀢𑁄’𑀧𑀭𑁄 𑀅𑀕𑀸;

𑀅𑀜𑁆𑀜𑀢𑁄 𑀫𑀮𑀬𑀁 𑀤𑁂𑀲𑀁, 𑀫𑁂𑀭𑀼𑀓𑀦𑁆𑀤𑀭𑀦𑀸𑀫𑀓𑀁.

𑀭𑀸𑀚𑀸’𑀣 𑀲𑀲𑀼𑀢𑀸’𑀫𑀘𑁆𑀘𑁄, 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑀁 𑀭𑀳𑁄;

𑀘𑁄𑀤𑀺𑀢𑁄 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺, 𑀓𑀸𑀲𑀸𑀯𑀸𑀦𑀺 𑀲𑀫𑀸𑀤𑀺𑀬𑀺.

𑀪𑀺𑀓𑁆𑀔𑀼𑀯𑁂𑀲𑀁 𑀕𑀳𑁂𑀢𑁆𑀯𑀸𑀦, 𑀭𑁄𑀳𑀡𑀁 𑀕𑀦𑁆𑀢𑀼𑀫𑀸𑀦𑀲𑁄;

𑀫𑀡𑀺𑀳𑀻𑀭𑀁 𑀲𑀫𑀸𑀕𑀜𑁆𑀙𑀺, 𑀢𑀢𑁆𑀭𑀞𑀸 𑀭𑀸𑀚𑀲𑁂𑀯𑀓𑀸.

𑀲𑀜𑁆𑀚𑀸𑀦𑀺𑀢𑁆𑀯𑀸 𑀢𑀬𑁄𑀧𑁂𑀢𑁂, 𑀢𑁂𑀲𑀁 𑀧𑀸𑀤𑁂𑀯𑀭𑀼𑀚𑁆𑀛𑀺𑀬;

𑀲𑀸𑀲𑀦𑀁 𑀢𑀲𑁆𑀲 𑀧𑁂𑀲𑁂𑀲𑀼𑀁, 𑀭𑀸𑀚𑀸 𑀲𑀼𑀢𑁆𑀯𑀸 𑀯𑀺𑀲𑁂𑀲𑀢𑁄.

𑀢𑀼𑀝𑁆𑀞𑁄 𑀆𑀡𑀸𑀧𑀬𑀺 𑀕𑀦𑁆𑀢𑁆𑀯𑀸, 𑀲𑀻𑀖𑀫𑀸𑀤𑀸𑀬 𑀢𑁂𑀚𑀦𑁂;

𑀢𑀢𑁄 𑀲𑀻𑀳𑀕𑀺𑀭𑀺𑀁𑀦𑁂𑀢𑁆𑀯𑀸, 𑀢𑀺𑀲𑁆𑀲𑀗𑁆𑀓𑀁 𑀦𑀺𑀭𑀼𑀧𑀤𑁆𑀤𑀯𑀁.

𑀲𑀻𑀲𑀁 𑀕𑀡𑁆𑀳𑀣 𑀢𑀢𑁆𑀣𑁂𑀯, 𑀭𑀜𑁆𑀜𑁄 𑀘 𑀢𑀦𑀬𑀲𑁆𑀲 𑀘;

𑀅𑀫𑀘𑁆𑀘𑀁 𑀧𑀦 𑀚𑀻𑀯𑀦𑁆𑀢-𑀫𑀸𑀦𑁂𑀬𑁆𑀬𑀸𑀣 𑀫𑀫’𑀦𑁆𑀢𑀺𑀓𑀁.

𑀫𑀦𑀼𑀲𑁆𑀲𑀸 𑀏𑀯𑀫𑀸𑀡𑀢𑁆𑀢𑀸, 𑀢𑁂 𑀕𑀳𑁂𑀢𑁆𑀯𑀸 𑀢𑀬𑁄𑀚𑀦𑁂;

𑀦𑁂𑀢𑁆𑀯𑀸 𑀲𑀻𑀳𑀕𑀺𑀭𑀺𑀁𑀓𑀸𑀢𑀼𑀁, 𑀬𑀣𑀸𑀯𑀼𑀢𑁆𑀢𑀫𑀼𑀧𑀓𑁆𑀓𑀫𑀼𑀁.

𑀢𑀢𑁄 𑀭𑀸𑀚𑀲𑀼𑀢𑁄 𑀆𑀳, 𑀧𑀼𑀭𑀺𑀲𑁂 𑀓𑀫𑁆𑀫𑀓𑀸𑀭𑀓𑁂;

𑀲𑀻𑀲𑀁 𑀫𑁂 𑀧𑀞𑀫𑀁 𑀙𑁂𑀢𑁆𑀯𑀸, 𑀤𑁂𑀣 𑀫𑀬𑁆𑀳𑀁 𑀲𑀼𑀔𑀁 𑀇𑀢𑀺.

𑀭𑀸𑀚𑀧𑁄𑀲𑀸 𑀢𑀣𑀸’𑀓𑀸𑀲𑀼𑀁, 𑀧𑀘𑁆𑀙𑀸𑀙𑀺𑀦𑁆𑀤𑀺𑀁𑀲𑀼 𑀭𑀸𑀚𑀺𑀦𑁄;

𑀲𑀻𑀲𑀁 𑀧𑀲𑁆𑀲𑀣 𑀩𑀸𑀮𑀸𑀦𑀁, 𑀓𑀫𑁆𑀫𑀁 𑀓𑀫𑁆𑀫𑀯𑀺𑀤𑀽𑀚𑀦𑀸.

𑀏𑀯𑀁 𑀅𑀦𑀺𑀘𑁆𑀘𑀸 𑀪𑁄𑀕𑀸𑀳𑀺, 𑀅𑀥𑀼𑀯𑀸 𑀅𑀲𑀬𑀁𑀯𑀲𑀻;

𑀢𑀢𑁆𑀣 𑀮𑀕𑁆𑀕𑀸 𑀓𑀣𑀁 𑀦𑀺𑀘𑁆𑀘𑀁, 𑀲𑀼𑀔𑀁 𑀪𑁄 𑀦 𑀕𑀯𑁂𑀲𑀣.

𑀭𑀜𑁆𑀜𑁄 𑀲𑀸𑀲𑀦𑀫𑀸𑀳𑀁𑀲𑀼, 𑀅𑀫𑀘𑁆𑀘𑀲𑁆𑀲 𑀳𑀺𑀢𑁂𑀲𑀺𑀦𑁄;

𑀢𑀁 𑀲𑀼𑀢𑁆𑀯𑀸𑀦 𑀳𑀲𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑀙𑀺𑀦𑁆𑀦𑀲𑀻𑀲𑁄 𑀫𑀬𑀸 𑀤𑀺𑀝𑁆𑀞𑁄, 𑀫𑀬𑀺 𑀚𑀻𑀯𑀢𑀺 𑀲𑀸𑀫𑀺𑀓𑁄;

𑀞𑀧𑁂𑀢𑁆𑀯𑀸 𑀳𑀫𑁆𑀧𑀺 𑀲𑁂𑀯𑀸𑀫𑀺, 𑀅𑀳𑁄 𑀅𑀜𑁆𑀜𑀜𑁆𑀳𑀺 𑀲𑀸𑀫𑀺𑀓𑀁.

𑀇𑀥 𑀢𑀁 𑀫𑀸𑀭𑀬𑀺𑀢𑁆𑀯𑀸𑀦, 𑀙𑀸𑀬𑀁 𑀢𑀲𑁆𑀲 𑀳𑀭𑀺𑀲𑁆𑀲𑀣;

𑀅𑀳𑁄 𑀅𑀜𑁆𑀜𑀸𑀡𑀓𑀸 𑀢𑀼𑀫𑁆𑀳𑁂, 𑀫𑀜𑁆𑀜𑁂 𑀉𑀫𑁆𑀫𑀢𑁆𑀢𑀓𑀸 𑀇𑀢𑀺.

𑀇𑀢𑀺 𑀯𑀢𑁆𑀯𑀸𑀦 𑀲𑁄 𑀧𑀸𑀤𑁂, 𑀕𑀳𑁂𑀢𑁆𑀯𑀸 𑀲𑀸𑀫𑀺𑀦𑁄 𑀲𑀬𑀺;

𑀢𑀲𑁆𑀲 𑀢𑁂 𑀳𑀭𑀡𑁄𑀧𑀸𑀬𑀁, 𑀅𑀧𑀲𑁆𑀲𑀦𑁆𑀢𑀸 𑀬𑀣𑀸 𑀢𑀣𑀸.

𑀢𑀲𑁆𑀲𑀸𑀧𑀺 𑀲𑀻𑀲𑀁 𑀙𑁂𑀢𑁆𑀯𑀸𑀦, 𑀫𑀘𑁆𑀘𑀸 𑀆𑀤𑀸𑀬 𑀢𑀻𑀡𑀺’𑀧𑀺;

𑀭𑀜𑁆𑀜𑁄 𑀤𑀲𑁆𑀲𑁂𑀢𑀼𑀫𑀸𑀳𑀘𑁆𑀘, 𑀭𑀸𑀚𑀸 𑀢𑀼𑀲𑀺𑀢𑁆𑀣 𑀦𑀺𑀩𑁆𑀪𑀬𑁄.

𑀤𑀼𑀝𑁆𑀞𑀲𑁂𑀦𑀸 ¶ 𑀧𑀢𑀺𑀲𑁆𑀲𑀸’𑀤𑀸, 𑀢𑀢𑁄 𑀫𑀮𑀬𑀭𑀸𑀚𑀢𑀁;

𑀅𑀲𑀺𑀕𑁆𑀕𑀸𑀳𑀓𑀞𑀸𑀦𑀫𑁆𑀳𑀺, 𑀢𑀲𑁆𑀲 𑀧𑀼𑀢𑁆𑀢𑀁 𑀞𑀧𑁂𑀲𑀺 𑀘.

𑀣𑀽𑀧𑀢𑁆𑀢𑀬𑀫𑁆𑀧𑀺 𑀙𑀸𑀤𑁂𑀲𑀺, 𑀯𑀢𑁆𑀣𑁂𑀳𑀺 𑀅𑀳𑀢𑁂𑀳𑀺 𑀲𑁄;

𑀢𑀣𑀸 𑀮𑀗𑁆𑀓𑀸𑀢𑀮𑁂 𑀲𑀩𑁆𑀩𑁂, 𑀣𑀽𑀧𑁂𑀓𑀸𑀲𑀺 𑀫𑀳𑀼𑀲𑁆𑀲𑀯𑀁.

𑀓𑁂𑀲𑀥𑀸𑀢𑀼𑀜𑁆𑀘 𑀦𑀸𑀣𑀲𑁆𑀲, 𑀤𑀸𑀞𑀸𑀥𑀸𑀢𑀼𑀁 𑀢𑀣𑁂𑀯 𑀘;

𑀫𑀳𑀸𑀩𑁄𑀥𑀺𑀁 𑀲𑀲𑀓𑁆𑀓𑀘𑁆𑀘𑀁, 𑀫𑀳𑀸𑀧𑀽𑀚𑀸𑀬 𑀲𑀓𑁆𑀓𑀭𑀺.

𑀲𑀩𑁆𑀩𑀁 𑀯𑁂𑀲𑀸𑀔𑀧𑀽𑀚𑀸𑀤𑀺𑀁, 𑀘𑀸𑀭𑀺𑀢𑁆𑀢𑀁𑀦𑀼𑀕𑀢𑀁 𑀅𑀓𑀸;

𑀥𑀫𑁆𑀫𑀓𑀫𑁆𑀫𑁂𑀦 𑀲𑁄𑀥𑁂𑀲𑀺, 𑀲𑀩𑁆𑀩𑀁 𑀲𑀼𑀕𑀢𑀲𑀸𑀲𑀦𑀁.

𑀧𑀺𑀝𑀓𑀸𑀦𑀜𑁆𑀘 𑀲𑀚𑁆𑀛𑀸𑀬𑀁, 𑀫𑀳𑀸𑀧𑀽𑀚𑀸𑀬 𑀓𑀸𑀭𑀬𑀺;

𑀮𑀸𑀪𑀁 𑀤𑀢𑁆𑀯𑀸 𑀢𑀺𑀭𑁂𑀓𑁂𑀦, 𑀧𑀽𑀚𑀬𑀺𑀢𑁆𑀣 𑀩𑀳𑀼𑀲𑁆𑀲𑀼𑀢𑁂.

𑀪𑀺𑀓𑁆𑀔𑀽𑀦𑀁 𑀤𑀻𑀧𑀯𑀸𑀲𑀻𑀦𑀁, 𑀲𑀩𑁆𑀩𑁂𑀲𑀁 𑀘𑀻𑀯𑀭𑀁 𑀅𑀕𑀸;

𑀆𑀯𑀸𑀲𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑀬𑀺.

𑀧𑀝𑀺𑀫𑀸𑀬𑁄 𑀘 𑀓𑀸𑀭𑁂𑀲𑀺, 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀭𑀺;

𑀮𑁄𑀡𑀓𑁆𑀔𑁂𑀢𑁆𑀢𑀜𑁆𑀘 𑀧𑀸𑀤𑀸𑀲𑀺, 𑀲𑀗𑁆𑀖𑀲𑁆𑀲 𑀢𑀺𑀲𑀢𑀸𑀥𑀺𑀓𑀁.

𑀓𑀸𑀭𑀧𑀺𑀝𑁆𑀞𑀺𑀫𑁆𑀳𑀺 𑀓𑀸𑀭𑁂𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦 𑀯𑀺𑀳𑀸𑀭𑀓𑀁;

𑀯𑀺𑀳𑀸𑀭𑀸 𑀧𑀺𑀝𑁆𑀞𑀺𑀕𑀸𑀫𑀜𑁆𑀘, 𑀲𑀕𑀸𑀫𑀁 𑀯𑀝𑀕𑀸𑀫𑀓𑀁.

𑀢𑀣𑀸 𑀘𑁂𑀢𑀺𑀬𑀕𑁂𑀳𑀜𑁆𑀘’-𑀓𑀸𑀲𑀺 𑀭𑀓𑁆𑀔𑀯𑀺𑀳𑀸𑀭𑀓𑁂;

𑀯𑀺𑀳𑀸𑀭𑀁 𑀦𑀁 𑀩𑀳𑀼𑀦𑁆𑀦𑀁 𑀲𑁄, 𑀪𑁄𑀕𑀕𑀸𑀫𑁂 𑀩𑀳𑀽 𑀅𑀤𑀸.

𑀏𑀯𑀁 𑀧𑀼𑀜𑁆𑀜𑀸𑀦𑀻 𑀲𑁄’𑀓𑀸𑀲𑀺, 𑀅𑀧𑁆𑀧𑀫𑁂𑀬𑁆𑀬𑀸𑀦𑀺 𑀪𑀽𑀫𑀺𑀧𑁄;

𑀲𑀫𑁆𑀧𑀢𑁆𑀢𑀻𑀦𑀫𑀦𑀺𑀘𑀢𑁆𑀢𑀁, 𑀲𑀭𑀦𑁆𑀢𑁄 𑀧𑀼𑀩𑁆𑀩𑀭𑀸𑀚𑀺𑀦𑁄.

𑀢𑀤𑀸 𑀓𑁂𑀦𑀘𑀺 𑀤𑁄𑀲𑁂𑀦, 𑀓𑀼𑀤𑁆𑀥𑁄𑀫𑀮𑀬𑀭𑀸𑀚𑀺𑀦𑁄;

𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀭𑀸𑀚𑀲𑁆𑀲, 𑀓𑀢𑀁 𑀢𑁂𑀦 𑀯𑀺𑀭𑀽𑀧𑀓𑀁.

𑀉𑀧𑀸𑀬𑁂𑀦 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑀧𑀸𑀤𑀜𑁆𑀘 𑀙𑁂𑀤𑀬𑀺;

𑀢𑀁 𑀲𑀼𑀢𑁆𑀯𑀸 𑀲𑁄 𑀅𑀲𑀺𑀕𑁆𑀕𑀸𑀳𑁄, 𑀲𑀧𑀼𑀢𑁆𑀢𑁄 𑀭𑁄𑀳𑀡𑀁𑀕𑀢𑁄.

𑀯𑀲𑀦𑁆𑀢𑁄 𑀢𑀢𑁆𑀣 𑀲𑁄 𑀓𑀢𑁆𑀯𑀸, 𑀳𑀢𑁆𑀣𑁂 𑀚𑀦𑀧𑀤𑀁 𑀮𑀳𑀼𑀁;

𑀚𑁂𑀝𑁆𑀞𑀲𑀺𑀲𑁆𑀲𑀫𑀼𑀧𑀕𑀜𑁆𑀙𑀺, 𑀦𑀺𑀮𑀻𑀦𑀁 𑀫𑀮𑀬𑁂 𑀞𑀺𑀢𑀁.

𑀲𑀤𑁆𑀥𑀺𑀁 𑀢𑁂𑀦𑀲𑀖𑀸𑀢𑁂𑀦𑁆𑀢𑁄, 𑀭𑀝𑁆𑀞𑀁 𑀚𑀦𑀧𑀤𑀁 𑀔𑀡𑁂;

𑀤𑁄𑀴𑀧𑀩𑁆𑀩𑀢𑀫𑀸𑀕𑀫𑁆𑀫, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺.

𑀭𑀸𑀚𑀸 𑀲𑀼𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀲𑀦𑁆𑀦𑀤𑁆𑀥𑀩𑀮𑀯𑀸𑀳𑀦𑁄;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀲𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁.

𑀢𑀤𑀸 ¶ 𑀧𑀚𑁆𑀚𑀭𑀭𑁄𑀕𑁂𑀦, 𑀫𑀦𑀼𑀲𑁆𑀲𑀸𑀭𑀸𑀚𑀺𑀦𑁄 𑀩𑀳𑀽;

𑀉𑀧𑀤𑁆𑀤𑀼𑀢𑀸 𑀫𑀢𑀸 𑀆𑀲𑀼𑀁, 𑀢𑀁 𑀲𑀼𑀢𑁆𑀯𑀸 𑀲𑁄 𑀅𑀲𑀺𑀕𑁆𑀕𑀳𑁄.

𑀬𑀼𑀤𑁆𑀥𑀫𑀸𑀭𑀪𑀺𑀯𑁂𑀕𑁂𑀦, 𑀭𑀜𑁆𑀜𑁄 𑀲𑁂𑀦𑀸𑀢𑀺𑀤𑀼𑀩𑁆𑀩𑀮𑀸;

𑀧𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀣, 𑀭𑀸𑀚𑀸𑀧𑀘𑁆𑀙𑀸 𑀧𑀮𑀸𑀬𑀺 𑀲𑁄.

𑀤𑀺𑀲𑁆𑀯𑀸 𑀏𑀓𑀸𑀓𑀺𑀦𑀁 𑀬𑀦𑁆𑀢𑀁, 𑀲𑀻𑀳𑀧𑀩𑁆𑀩𑀢𑀲𑀦𑁆𑀢𑀺𑀓𑁂;

𑀅𑀲𑀺𑀕𑁆𑀕𑀸𑀳𑁄 𑀫𑀳𑀸𑀭𑀸𑀚𑀁, 𑀫𑀸𑀭𑀬𑀺𑀢𑁆𑀣 𑀲𑀧𑀭𑀺𑀲𑀁.

𑀑𑀳𑀻𑀦𑀁 𑀧𑀘𑁆𑀙𑀢𑁄 𑀚𑁂𑀝𑁆𑀞-𑀢𑀺𑀲𑁆𑀲𑀫𑁆𑀧𑀺 𑀧𑀦 𑀫𑀸𑀭𑀺𑀢𑀼𑀁;

𑀲𑀸𑀲𑀦𑀁 𑀢𑀲𑁆𑀲 𑀧𑁂𑀲𑁂𑀲𑀺, 𑀏𑀳𑀺 𑀭𑀸𑀚𑀸 𑀪𑀯𑀸𑀳𑀻𑀢𑀺.

𑀲𑁄 𑀢𑀜𑁆𑀜𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸, 𑀦𑀺𑀯𑀢𑁆𑀢𑁄 𑀫𑀮𑀬𑀁 𑀅𑀕𑀸;

𑀓𑀣𑀜𑁆𑀳𑀺 𑀮𑀤𑁆𑀥𑀁 𑀓𑀺𑀘𑁆𑀙𑁂𑀦, 𑀭𑀚𑁆𑀚𑀁𑀲𑁄 𑀤𑁂𑀢𑀺 𑀫𑁂 𑀇𑀢𑀺.

𑀏𑀯𑀁 𑀔𑁄 𑀤𑀮𑁆𑀮𑀦𑀸𑀫𑀁 𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀭𑀺𑀲𑁆𑀲𑀭𑀁;

𑀫𑀸𑀭𑁂𑀢𑁆𑀯𑀸 𑀙𑀳𑀺 𑀯𑀲𑁆𑀲𑁂𑀳𑀺, 𑀲𑀫𑁆𑀧𑀢𑁆𑀢𑀩𑀮𑀯𑀸𑀳𑀦𑁄.

𑀅𑀣𑀸’𑀕𑀦𑁆𑀢𑁆𑀯𑀸 𑀅𑀲𑀺𑀕𑁆𑀕𑀸𑀳𑁄, 𑀅𑀦𑀼𑀭𑀸𑀥𑀧𑀼𑀭𑀁 𑀯𑀭𑀁;

𑀭𑀸𑀚𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑁂𑀲𑀺, 𑀆𑀡𑀸𑀘𑀓𑁆𑀓𑀁 𑀫𑀳𑀻𑀢𑀮𑁂.

𑀲 𑀲𑀺𑀮𑀸𑀫𑁂𑀖𑀯𑀡𑁆𑀡𑀯𑁆𑀳𑁄, 𑀲𑀗𑁆𑀖𑀁 𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀬;

𑀣𑀽𑀧𑀢𑁆𑀢𑀬𑀜𑁆𑀘 𑀲𑀓𑁆𑀓𑀸𑀲𑀺, 𑀫𑀳𑀸𑀧𑀸𑀴𑀺𑀜𑁆𑀘 𑀯𑀟𑁆𑀠𑀬𑀺.

𑀧𑀸𑀬𑀸𑀲𑀁’𑀤𑀸𑀲𑀺 𑀲𑀗𑁆𑀖𑀲𑁆𑀲, 𑀲𑀧𑁆𑀧𑀺𑀨𑀸𑀡𑀺𑀢𑀲𑀗𑁆𑀔𑀢𑀁;

𑀙𑀸𑀢𑀓𑁂 𑀅𑀢𑀺𑀓𑀺𑀘𑁆𑀙𑀫𑁆𑀳𑀺, 𑀧𑀭𑀺𑀲𑁆𑀲𑀸𑀯𑀦𑀫𑁂𑀯 𑀘.

𑀲𑀩𑁆𑀩𑀤𑀸𑀦𑁂𑀦 𑀲𑀗𑁆𑀕𑀡𑁆𑀳𑀻, 𑀓𑀧𑀡𑀤𑁆𑀥𑀺𑀯𑀡𑀺𑀩𑁆𑀩𑀓𑁂;

𑀧𑀽𑀯𑀫𑀽𑀮𑀥𑀦𑀁𑀘𑀸’𑀤𑀸, 𑀓𑀼𑀫𑀸𑀭𑀸𑀦𑀁 𑀫𑀳𑀸𑀤𑀬𑁄.

𑀯𑀺𑀳𑀸𑀭𑁂 𑀅𑀪𑀬𑁂 𑀩𑀼𑀤𑁆𑀥𑀁, 𑀧𑀽𑀚𑀬𑀺𑀢𑁆𑀣 𑀲𑀻𑀮𑀸𑀫𑀬𑀁;

𑀚𑀺𑀡𑁆𑀡𑀜𑁆𑀘 𑀕𑁂𑀳𑀁 𑀢𑀲𑁆𑀲𑀸’𑀓𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀓𑀁.

𑀓𑁄𑀮𑀯𑀸𑀧𑀺𑀜𑁆𑀘 𑀤𑀢𑁆𑀯𑀸𑀦, 𑀆𑀭𑀓𑁆𑀔𑀢𑁆𑀣𑀁 𑀚𑀺𑀦𑀲𑁆𑀲 𑀲𑁄;

𑀧𑀽𑀚𑀁 𑀲𑀩𑁆𑀩𑁄𑀧𑀳𑀸𑀭𑁂𑀳𑀺, 𑀲𑀩𑁆𑀩𑀓𑀸𑀮𑀁 𑀧𑀯𑀢𑁆𑀢𑀬𑀺.

𑀏𑀯𑀁 𑀢𑀲𑁆𑀫𑀺𑀁 𑀫𑀳𑀻𑀧𑀸𑀮𑁂, 𑀯𑀲𑀦𑁆𑀢𑁂 𑀧𑀼𑀜𑁆𑀜𑀪𑀸𑀚𑀦𑁂;

𑀦𑀸𑀬𑀓𑁄 𑀲𑀺𑀭𑀺𑀦𑀸𑀕𑀯𑁆𑀳𑁄, 𑀚𑁂𑀝𑁆𑀞𑀢𑀺𑀲𑁆𑀲𑀲𑁆𑀲 𑀫𑀸𑀢𑀼𑀮𑁄.

𑀕𑀦𑁆𑀢𑁆𑀯𑀸𑀦 𑀧𑀭𑀢𑀻𑀭𑀁 𑀲𑁄, 𑀆𑀤𑀸𑀬 𑀤𑀫𑀺𑀴𑁂 𑀩𑀳𑀽;

𑀆𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀁 𑀤𑁂𑀲𑀁, 𑀕𑀡𑁆𑀳𑀺𑀢𑀼𑀁 𑀢𑀫𑀼𑀧𑀓𑁆𑀓𑀫𑀺.

𑀭𑀸𑀚𑀸𑀧𑀺 𑀲𑀼𑀢𑁆𑀯𑀸 𑀢𑀁 𑀕𑀦𑁆𑀢𑁆𑀯𑀸, 𑀬𑀼𑀚𑁆𑀛𑀺𑀢𑁆𑀯𑀸 𑀭𑀸𑀚𑀫𑀺𑀢𑁆𑀢𑀓𑁂;

𑀕𑀸𑀫𑁂 𑀳𑀦𑁆𑀢𑁆𑀯𑀸𑀦 𑀢𑀁 𑀢𑁂𑀦, 𑀤𑀫𑀺𑀴𑁂 𑀲𑀤𑁆𑀥𑀺𑀫𑀸𑀕𑀢𑁂.

𑀳𑀢𑀲𑁂𑀲𑁂 ¶ 𑀕𑀳𑁂𑀢𑁆𑀯𑀸𑀦, 𑀓𑀢𑁆𑀯𑀸 𑀧𑀭𑀺𑀪𑀯𑀁 𑀩𑀳𑀼𑀁;

𑀅𑀤𑀸𑀲𑀺 𑀤𑀸𑀲𑁂 𑀓𑀢𑁆𑀯𑀸𑀦, 𑀯𑀺𑀳𑀸𑀭𑁂𑀲𑀼 𑀢𑀳𑀺𑀁 𑀢𑀳𑀺𑀁.

𑀏𑀯𑀁𑀲𑀫𑁆𑀧𑀢𑁆𑀢𑀯𑀺𑀚𑀬𑁂, 𑀧𑀼𑀭𑀫𑀸𑀕𑀫𑁆𑀫𑀪𑀽𑀫𑀺𑀧𑁂;

𑀲𑀩𑁆𑀩𑀁 𑀭𑀝𑁆𑀞𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀯𑀲𑀦𑁆𑀢𑁂 𑀅𑀓𑀼𑀢𑁄 𑀪𑀬𑁂.

𑀪𑀺𑀓𑁆𑀔𑀼𑀩𑁄𑀥𑀻 𑀲𑀦𑀸𑀫𑁄’𑀣, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀤𑀼𑀲𑁆𑀲𑀻𑀮𑁂 𑀩𑀳𑀼𑀮𑁂 𑀤𑀺𑀲𑁆𑀯𑀸, 𑀧𑀩𑁆𑀩𑀚𑁆𑀚𑀸𑀬 𑀦𑀯𑁄𑀧𑀺 𑀲𑁄.

𑀭𑀸𑀚𑀸𑀦𑀫𑀼𑀧𑀲𑀗𑁆𑀓𑀫𑁆𑀫, 𑀥𑀫𑁆𑀫𑀓𑀫𑁆𑀫𑀫𑀬𑀸𑀘𑀣;

𑀭𑀸𑀚𑀸 𑀢𑁂 𑀦𑁂𑀯 𑀓𑀸𑀭𑁂𑀲𑀺, 𑀥𑀫𑁆𑀫𑀓𑀫𑁆𑀫𑀁 𑀯𑀺𑀳𑀸𑀭𑀓𑁂.

𑀤𑀼𑀲𑁆𑀲𑀻𑀮𑀸 𑀦𑀺𑀳𑀝𑀸 𑀢𑁂𑀦, 𑀲𑀩𑁆𑀩𑁂 𑀫𑀦𑁆𑀢𑀺𑀬 𑀏𑀓𑀢𑁄;

𑀭𑀳𑁄 𑀢𑀁 𑀫𑀸𑀭𑀬𑀺𑀢𑁆𑀯𑀸𑀦, 𑀢𑀁 𑀓𑀫𑁆𑀫𑀁 𑀧𑀝𑀺𑀩𑀸𑀳𑀬𑁆𑀬𑀼𑀁.

𑀭𑀸𑀚𑀸 𑀲𑀼𑀢𑁆𑀯𑀸 𑀢𑀤𑀸 𑀓𑀼𑀤𑁆𑀥𑁄, 𑀲𑀩𑁆𑀩𑁂𑀕𑀡𑁆𑀳𑀺𑀬 𑀏𑀓𑀢𑁄;

𑀅𑀓𑀸 𑀧𑁄𑀓𑁆𑀔𑀭𑀡𑀻 𑀧𑀸𑀮𑁂, 𑀙𑀺𑀦𑁆𑀦𑀳𑀢𑁆𑀣𑁂 𑀲𑀩𑀦𑁆𑀥𑀦𑁂.

𑀅𑀜𑁆𑀜𑁂 𑀢𑀢𑁆𑀣 𑀲𑀢𑀁 𑀪𑀺𑀓𑁆𑀔𑀽, 𑀚𑀫𑁆𑀩𑀼𑀤𑀻𑀧𑁂 𑀔𑀺𑀧𑀸𑀧𑀬𑀺;

𑀲𑀭𑀦𑁆𑀢𑁄 𑀢𑀲𑁆𑀲 𑀉𑀲𑁆𑀲𑀸𑀳𑀁, 𑀧𑀭𑀺𑀲𑁄𑀥𑁂𑀲𑀺 𑀲𑀸𑀲𑀦𑀁.

𑀪𑀺𑀓𑁆𑀔𑀽 𑀣𑁂𑀭𑀺𑀬𑀯𑀸𑀤𑁂 𑀲𑁄, 𑀓𑀸𑀢𑀼𑀁 𑀢𑁂𑀳𑀺 𑀉𑀧𑁄𑀲𑀣𑀁;

𑀆𑀭𑀸𑀥𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀧𑀓𑀼𑀧𑁆𑀧𑀺𑀢𑁆𑀯𑀸 𑀅𑀦𑀸𑀤𑀭𑁄.

𑀅𑀓𑁆𑀓𑁄𑀲𑀺𑀢𑁆𑀯𑀸 𑀘 𑀪𑀸𑀲𑀺𑀢𑁆𑀯𑀸, 𑀯𑀸𑀘𑀸𑀳𑀺 𑀨𑀭𑀼𑀲𑀸𑀳𑀺 𑀲𑁄;

𑀪𑀺𑀓𑁆𑀔𑀽 𑀢𑁂 𑀅𑀓𑁆𑀔𑀫𑀸𑀧𑁂𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀤𑁂𑀲𑀫𑀚𑁆𑀛𑀕𑀸.

𑀢𑀲𑁆𑀲 𑀲𑁄 𑀫𑀳𑀢𑀸 𑀨𑀼𑀝𑁆𑀞𑁄, 𑀭𑁄𑀕𑁂𑀦 𑀫𑀭𑀺𑀲𑀚𑁆𑀚𑀼𑀓𑀁;

𑀏𑀯𑀁 𑀦𑀯𑀳𑀺 𑀯𑀲𑁆𑀲𑁂𑀳𑀺, 𑀧𑀭𑀺𑀘𑁆𑀘𑀚𑀺 𑀫𑀳𑀻𑀢𑀮𑀁.

𑀢𑀲𑁆𑀲 𑀧𑀼𑀢𑁆𑀢𑁄 𑀢𑀢𑁄 𑀅𑀕𑁆𑀕-𑀩𑁄𑀥𑀺 𑀦𑀸𑀫𑁄 𑀓𑀼𑀫𑀸𑀭𑀓𑁄;

𑀆𑀲𑀺 𑀭𑀸𑀚𑀸𑀲𑀺𑀭𑀺𑀲𑀗𑁆𑀖-𑀩𑁄𑀥𑀺𑀦𑀸𑀫𑁂𑀦 𑀯𑀺𑀲𑀼𑀢𑁄.

𑀓𑀡𑀺𑀝𑁆𑀞𑀁 𑀪𑀸𑀢𑀭𑀁 𑀫𑀸𑀡𑀁, 𑀑𑀧𑀭𑀚𑁆𑀚𑁂’𑀪𑀺𑀲𑀜𑁆𑀘𑀺𑀬;

𑀢𑀲𑁆𑀲𑀸’𑀤𑀸 𑀤𑀓𑁆𑀔𑀺𑀡𑀁 𑀤𑁂𑀲𑀁, 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑀁.

𑀭𑀸𑀚𑀸 𑀲𑁄 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀧𑀯𑀢𑁆𑀢𑀁 𑀦 𑀯𑀺𑀦𑀸𑀲𑀺𑀬;

𑀭𑀝𑁆𑀞𑀁 𑀥𑀫𑁆𑀫𑁂𑀦 𑀧𑀸𑀮𑁂𑀲𑀺, 𑀲𑀗𑁆𑀖𑀜𑁆𑀘 𑀩𑀳𑀼𑀫𑀸𑀦𑀬𑀺.

𑀚𑁂𑀝𑁆𑀞𑀢𑀺𑀲𑁆𑀲𑁄’𑀣 𑀢𑀁 𑀲𑀩𑁆𑀩𑀁, 𑀲𑀼𑀡𑀺𑀢𑁆𑀯𑀸 𑀫𑀮𑀬𑁂 𑀞𑀺𑀢𑁄;

𑀅𑀭𑀺𑀝𑁆𑀞𑀁 𑀕𑀺𑀭𑀺𑀫𑀸𑀕𑀫𑁆𑀫, 𑀲𑀗𑁆𑀕𑀳𑁂𑀲𑀺 𑀫𑀳𑀸𑀚𑀦𑀁.

𑀓𑀢𑁆𑀯𑀸 𑀳𑀢𑁆𑀣𑀕𑀢𑁂 𑀧𑀼𑀩𑁆𑀩-𑀤𑀓𑁆𑀔𑀺𑀡𑁂 𑀲𑀼𑀲𑀫𑀸𑀦𑀲𑁂;

𑀓𑀫𑁂𑀦 𑀧𑀼𑀭𑀫𑀸𑀕𑀦𑁆𑀢𑀼-𑀫𑀸𑀭𑀪𑀺𑀢𑁆𑀣 𑀫𑀳𑀸𑀩𑀮𑁄.

𑀤𑀸𑀞𑀸𑀲𑀺𑀯 ¶ 𑀫𑀫𑀘𑁆𑀘𑀜𑁆𑀘, 𑀕𑀳𑁂𑀢𑀼𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁;

𑀧𑁂𑀲𑀬𑀺𑀢𑁆𑀯𑀸 𑀲𑀬𑀁 𑀕𑀸𑀫𑁂, 𑀯𑀲𑀺𑀢𑁆𑀣 𑀲𑀺𑀭𑀺𑀧𑀺𑀝𑁆𑀞𑀺𑀓𑁂.

𑀭𑀸𑀚𑀸 𑀦𑀺𑀲𑀫𑁆𑀫 𑀢𑀁𑀲𑀩𑁆𑀩𑀁, 𑀉𑀧𑀭𑀸𑀚𑀁 𑀯𑀺𑀲𑀚𑁆𑀚𑀬𑀺;

𑀲𑀩𑀮𑀁 𑀧𑀘𑁆𑀙𑀺𑀫𑀁 𑀤𑁂𑀲𑀁, 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀮𑀸𑀧𑀬𑀺.

𑀧𑁄𑀢𑀓𑀁𑀯 𑀓𑀼𑀮𑀸𑀯𑀫𑁆𑀳𑀺, 𑀲𑀓𑁆𑀓𑀸 𑀳𑀦𑁆𑀢𑀼𑀦𑁆𑀢𑀺 𑀤𑀸𑀭𑀓𑀁;

𑀫𑀸𑀬𑁂𑀢𑁆𑀢𑀁 𑀆𑀕𑀢𑀁 𑀭𑀸𑀚𑀸, 𑀓𑀼𑀫𑀸𑀭𑀸’𑀫𑀘𑁆𑀘 𑀫𑀕𑁆𑀕𑀳𑀻.

𑀚𑁂𑀝𑁆𑀞𑀢𑀺𑀲𑁆𑀲𑀁𑀧𑀺 𑀏𑀢𑀁𑀯, 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑀺𑀬;

𑀣𑁄𑀓𑁂𑀦𑁂𑀯 𑀩𑀮𑁂𑀦𑀸𑀕𑀸, 𑀦𑀺𑀭𑀸𑀲𑀗𑁆𑀓𑁄𑀢𑀺𑀯𑀺𑀓𑁆𑀓𑀫𑁄.

𑀚𑁂𑀝𑁆𑀞𑀲𑀺𑀲𑁆𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸, 𑀲𑀦𑁆𑀦𑀤𑁆𑀥𑀩𑀮𑀯𑀸𑀳𑀦𑁄;

𑀲𑀸𑀕𑀭𑁄 𑀪𑀺𑀦𑁆𑀦𑀯𑁂𑀮𑁄𑀯, 𑀭𑀸𑀚𑀲𑁂𑀦𑀁 𑀲𑀫𑁄𑀢𑁆𑀣𑀭𑀺.

𑀭𑀸𑀚𑀲𑁂𑀦𑀸 𑀧𑀪𑀺𑀚𑁆𑀚𑀺𑀢𑁆𑀣, 𑀭𑀸𑀚𑀸 𑀆𑀭𑀼𑀬𑁆𑀳 𑀓𑀼𑀜𑁆𑀚𑀭𑀁;

𑀏𑀓𑁄 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀧𑀮𑀸𑀬𑀺𑀢𑁆𑀯𑀸 𑀔𑀡𑁂𑀦 𑀲𑁄.

𑀙𑀝𑁆𑀞𑁂 𑀫𑀸𑀲𑀫𑁆𑀳𑀺 𑀭𑀚𑁆𑀚𑀫𑁆𑀳𑀸, 𑀦𑀸𑀯𑀫𑀸𑀭𑀼𑀬𑁆𑀳 𑀲𑀚𑁆𑀚𑀼𑀓𑀁;

𑀚𑀫𑁆𑀩𑀼𑀤𑀻𑀧𑀫𑀕𑀸𑀳𑀺𑀢𑁆𑀯𑀸, 𑀥𑀦𑀁 𑀤𑁂𑀲𑀜𑁆𑀘 𑀜𑀸𑀢𑀓𑁂.

𑀚𑁂𑀝𑁆𑀞𑀢𑀺𑀲𑁆𑀲𑁄 𑀢𑀢𑁄 𑀳𑀼𑀢𑁆𑀯𑀸, 𑀧𑀼𑀭𑁂 𑀭𑀸𑀚𑀸𑀬𑀣𑀸 𑀧𑀼𑀭𑁂;

𑀲𑀩𑁆𑀩𑀁 𑀓𑀺𑀘𑁆𑀘𑀁 𑀧𑀯𑀢𑁆𑀢𑁂𑀲𑀺, 𑀧𑀭𑀺𑀧𑀸𑀮𑁂𑀲𑀺 𑀲𑀸𑀲𑀦𑀁.

𑀫𑀳𑀸𑀤𑀸𑀭𑀕𑀺𑀭𑀺𑀁 𑀲𑁄’𑀤𑀸, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀫𑀳𑀸𑀯𑀺𑀳𑀸𑀭𑀲𑁆𑀲𑀸’𑀤𑀸𑀲𑀺, 𑀫𑀳𑀸𑀫𑁂𑀢𑁆𑀢𑀯𑁆𑀳𑀩𑁄𑀥𑀺𑀓𑀁.

𑀕𑁄𑀡𑁆𑀟𑀺𑀕𑀸𑀫𑀜𑁆𑀘 𑀧𑀸𑀤𑀸𑀲𑀺, 𑀭𑀸𑀚𑀸 𑀚𑁂𑀢𑀯𑀦𑀲𑁆𑀲 𑀲𑁄;

𑀫𑀸𑀢𑀼𑀮𑀗𑁆𑀕𑀡𑀓𑀜𑁆𑀘𑁂𑀯, 𑀕𑀸𑀫𑀜𑁆𑀘𑁄 𑀤𑀼𑀫𑁆𑀩𑀭𑀗𑁆𑀕𑀡𑀁.

𑀫𑀳𑀸𑀦𑀸𑀕𑀲𑁆𑀲 𑀧𑀸𑀤𑀸𑀲𑀺, 𑀧𑀥𑀸𑀦𑀖𑀭𑀓𑀲𑁆𑀲 𑀲𑁄;

𑀓𑀲𑁆𑀲𑀧𑀲𑁆𑀲 𑀕𑀺𑀭𑀺𑀲𑁆𑀲𑀸𑀧𑀺, 𑀆𑀳𑀸𑀭𑀁 𑀅𑀫𑁆𑀩𑀺𑀮𑀸𑀧𑀺𑀓𑀁.

𑀕𑀸𑀫𑀁 𑀓𑀓𑁆𑀔𑀮𑀯𑀺𑀢𑁆𑀣𑀺𑀜𑁆𑀘, 𑀅𑀤𑀸𑀯𑁂𑀴𑀼𑀯𑀦𑀲𑁆𑀲 𑀲𑁄;

𑀕𑀗𑁆𑀕𑀸𑀫𑀸𑀢𑀺 𑀯𑀺𑀳𑀸𑀭𑀲𑁆𑀲, 𑀓𑁂𑀳𑁂𑀢𑀁 𑀕𑀸𑀫𑀓𑀁 𑀅𑀤𑀸.

𑀅𑀦𑁆𑀢𑀭𑀸𑀕𑀗𑁆𑀕𑀲𑀯𑁆𑀳𑀲𑁆𑀲, 𑀘𑀼𑀮𑁆𑀮𑀫𑀸𑀢𑀺𑀓𑀕𑀸𑀫𑀓𑀁;

𑀫𑀬𑁂𑀢𑁆𑀢𑀺𑀓𑀲𑁆𑀲𑀧𑀸𑀯𑀸𑀲𑁂, 𑀲𑀳𑀦𑁆𑀦 𑀦𑀕𑀭𑀁 𑀅𑀤𑀸.

𑀓𑀸𑀴𑀯𑀸𑀧𑀺 𑀯𑀺𑀳𑀸𑀭𑀲𑁆𑀲, 𑀉𑀤𑀯𑁆𑀳𑀁 𑀕𑀸𑀫𑀫𑀸𑀤𑀺𑀲𑀺;

𑀏𑀢𑁂 𑀘𑀜𑁆𑀜𑁂𑀘 𑀲𑁄 𑀪𑁄𑀕-𑀕𑀸𑀫𑁂𑀳𑀺 𑀧𑀭𑀺𑀧𑀽𑀭𑀬𑀺.

𑀚𑀺𑀡𑁆𑀡𑀁 𑀲𑀢𑀲𑀳𑀲𑁆𑀲𑁂𑀳𑀺, 𑀢𑀻𑀳𑀺 𑀲𑁄 𑀧𑀝𑀺𑀲𑀗𑁆𑀔𑀭𑀺;

𑀪𑀺𑀓𑁆𑀔𑀽𑀦𑀁 𑀤𑀻𑀧𑀯𑀸𑀲𑀻𑀦𑀁, 𑀢𑀺𑀘𑀻𑀯𑀭𑀫𑀤𑀸𑀲𑀺 𑀘.

𑀚𑀫𑁆𑀩𑀼𑀤𑀻𑀧𑀕𑀢𑀲𑁆𑀲𑀸’𑀲𑀼𑀁 ¶ , 𑀭𑀜𑁆𑀜𑁄 𑀲𑁄𑀤𑀭𑀺𑀬𑀸 𑀦𑀭𑀸;

𑀢𑀢𑁆𑀣 𑀢𑀢𑁆𑀣 𑀦𑀺𑀮𑀻𑀦𑀸 𑀢𑁂, 𑀤𑁂𑀲𑀁 𑀳𑀦𑁆𑀢𑀼𑀫𑀼𑀧𑀓𑁆𑀓𑀫𑀼𑀁.

𑀲𑀼𑀢𑁆𑀯𑀸 𑀢𑀁 𑀚𑁂𑀝𑁆𑀞𑀢𑀺𑀲𑁆𑀲𑁄’𑀣, 𑀓𑀸𑀴𑀯𑀸𑀧𑀺𑀁𑀉𑀧𑀘𑁆𑀘 𑀲𑁄;

𑀬𑀼𑀚𑁆𑀛𑀦𑁆𑀢𑁄 𑀢𑁂𑀳𑀺 𑀢𑀢𑁆𑀣𑁂𑀯, 𑀯𑀸𑀲𑀁’𑀓𑀸𑀲𑀺 𑀲𑀯𑀸𑀳𑀦𑁄.

𑀧𑀭𑀢𑀻𑀭𑀁 𑀕𑀢𑁄 𑀭𑀸𑀚𑀸, 𑀕𑀳𑁂𑀢𑁆𑀯𑀸 𑀤𑀫𑀺𑀴𑀁 𑀩𑀮𑀁;

𑀓𑀸𑀴𑀯𑀸𑀧𑀺𑀫𑀼𑀧𑀸𑀕𑀫𑁆𑀫, 𑀓𑀸𑀢𑀼𑀁 𑀬𑀼𑀤𑁆𑀥𑀫𑀼𑀧𑀓𑁆𑀓𑀫𑀺.

𑀚𑁂𑀝𑁆𑀞𑀢𑀺𑀲𑁆𑀲𑁄𑀧𑀺 𑀲𑀦𑁆𑀦𑀤𑁆𑀥 𑀩𑀮𑀓𑀸𑀬𑁄 𑀥𑀦𑀸𑀬𑀼𑀥𑁄;

𑀚𑀫𑁆𑀩𑀼𑀤𑀻𑀧𑀁 𑀕𑀫𑀸𑀧𑁂𑀢𑁆𑀯𑀸, 𑀅𑀫𑀘𑁆𑀘𑀁 𑀤𑀸𑀞𑀲𑀺𑀯𑀓𑀁.

𑀯𑀫𑁆𑀫𑀺𑀢𑀁 𑀕𑀚𑀫𑀸𑀭𑀼𑀬𑁆𑀳, 𑀬𑀼𑀚𑁆𑀛𑀦𑁆𑀢𑁄 𑀅𑀢𑁆𑀢𑀦𑁄 𑀩𑀮𑀁;

𑀑𑀳𑀻𑀬𑀫𑀸𑀦𑀁 𑀤𑀺𑀲𑁆𑀯𑀸𑀦, 𑀆𑀭𑀼𑀴𑁆𑀳𑀁 𑀅𑀢𑁆𑀢𑀦𑀸 𑀲𑀳.

𑀫𑀳𑀸𑀫𑀘𑁆𑀘𑀯𑀘𑁄 𑀯𑁂𑀤𑀁, 𑀲𑀦𑁆𑀤𑁂𑀲𑀁 𑀫𑁂 𑀫𑀳𑁂𑀲𑀺𑀬𑀸;

𑀆𑀭𑁄𑀘𑁂𑀳𑀺 𑀬𑀣𑀸𑀓𑀸𑀫𑀁, 𑀧𑀘𑁆𑀙𑀸 𑀢𑀯 𑀓𑀭𑀺𑀲𑁆𑀲𑀢𑀺.

𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀤𑁂𑀯𑀻, 𑀲𑀚𑁆𑀛𑀸𑀬𑀺𑀢𑁆𑀯𑀸 𑀘 𑀆𑀕𑀫𑀁;

𑀅𑀪𑀺𑀥𑀫𑁆𑀫𑀁 𑀓𑀣𑁂𑀢𑁆𑀯𑀸𑀦, 𑀧𑀢𑁆𑀢𑀺𑀁 𑀤𑁂𑀳𑀻𑀢𑀺 𑀭𑀸𑀚𑀺𑀦𑁄.

𑀇𑀘𑁆𑀘𑁂𑀢𑀁 𑀲𑀸𑀲𑀦𑀁 𑀤𑀢𑁆𑀯𑀸, 𑀤𑀫𑀺𑀴𑁂 𑀆𑀕𑀢𑀸𑀕𑀢𑁂;

𑀬𑀸𑀯 𑀬𑀼𑀤𑁆𑀥𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀆𑀬𑀼𑀫𑁆𑀳𑀺 𑀔𑀬𑀫𑀸𑀕𑀢𑁂.

𑀯𑁂𑀴𑀼𑀧𑁆𑀧𑀤𑀫𑀺𑀴𑀁 𑀦𑀸𑀫, 𑀤𑀺𑀲𑁆𑀯𑀸 𑀬𑀼𑀚𑁆𑀛𑀺𑀢𑀼𑀫𑀸𑀕𑀢𑀁;

𑀢𑀫𑁆𑀩𑀼𑀮𑀢𑁆𑀣𑀯𑀺𑀬𑀁 𑀳𑀢𑁆𑀣𑁂, 𑀭𑀓𑁆𑀔𑀦𑁆𑀢𑁄 𑀙𑀼𑀭𑀺𑀓𑀁 𑀢𑀤𑀸.

𑀢𑀢𑁄 𑀦𑀺𑀓𑁆𑀓𑀭𑀡𑀺𑀁 𑀲𑀫𑁆𑀫𑀸, 𑀕𑀳𑁂𑀢𑁆𑀯𑀸 𑀲𑀻𑀲𑀫𑀢𑁆𑀢𑀦𑁄;

𑀙𑁂𑀢𑁆𑀯𑀸 𑀳𑀢𑁆𑀣𑀺𑀫𑁆𑀳𑀺 𑀅𑀧𑁆𑀧𑁂𑀢𑁆𑀯𑀸, 𑀙𑀼𑀭𑀺𑀓𑀁 𑀓𑁄𑀲𑀺𑀬𑀁 𑀔𑀺𑀧𑀺.

𑀉𑀕𑁆𑀖𑁄𑀲𑀬𑀺 𑀫𑀳𑀸𑀲𑁂𑀦𑀸, 𑀫𑀳𑀸𑀫𑀘𑁆𑀘𑁄𑀧𑀺 𑀲𑁄 𑀢𑀤𑀸;

𑀕𑀦𑁆𑀢𑁆𑀯𑀸’𑀪𑀺𑀬𑁄𑀕𑀁 𑀯𑀢𑁆𑀯𑀸𑀦, 𑀲𑀻𑀲𑀘𑁆𑀙𑁂𑀤𑀫𑁆𑀳𑀺 𑀭𑀸𑀚𑀺𑀦𑁄.

𑀲𑀦𑁆𑀤𑁂𑀲𑀁 𑀤𑁂𑀯𑀺𑀬𑀸 𑀯𑀢𑁆𑀯𑀸, 𑀢𑀸𑀬 𑀧𑀩𑁆𑀩𑀚𑁆𑀚𑀲𑀸𑀲𑀦𑁂;

𑀲𑀫𑀸𑀧𑀺𑀢𑁄 𑀪𑀺𑀥𑀫𑁆𑀫𑀫𑁆𑀳𑀺, 𑀲𑀤𑁆𑀥𑀺𑀫𑀝𑁆𑀞𑀓𑀣𑀸𑀬 𑀳𑀺.

𑀥𑀫𑁆𑀫𑀸𑀲𑀦𑀸 𑀲𑀫𑁄𑀭𑀼𑀬𑁆𑀳, 𑀦𑀺𑀲𑀻𑀤𑀺𑀬 𑀫𑀳𑀻𑀢𑀮𑁂;

𑀏𑀳𑀺 𑀭𑀜𑁆𑀜𑁄 𑀫𑀳𑀸𑀓𑀸𑀭𑀁, 𑀤𑀲𑁆𑀲𑁂𑀳𑀻’𑀢𑀺 𑀦𑀺𑀬𑁄𑀚𑀺𑀢𑁄.

𑀦𑀺𑀲𑀚𑁆𑀚 𑀧𑀼𑀭𑀢𑁄 𑀢𑀲𑁆𑀲𑀸, 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀲𑀫𑀢𑁆𑀢𑀦𑁄;

𑀔𑀺𑀧𑀺𑀢𑁆𑀯𑀸 𑀙𑀼𑀭𑀺𑀓𑀁 𑀆𑀳, 𑀏𑀯𑀁 𑀤𑁂𑀯𑁄 𑀫𑀢𑁄 𑀇𑀢𑀺.

𑀲𑀸 𑀢𑀁 𑀤𑀺𑀲𑁆𑀯𑀸-𑀢𑀺𑀲𑁄𑀓𑁂𑀦, 𑀨𑀸𑀮𑁂𑀢𑁆𑀯𑀸 𑀳𑀤𑀬𑀁 𑀫𑀢𑀸;

𑀏𑀯𑀁 𑀧𑀜𑁆𑀘𑀳𑀺 𑀫𑀸𑀲𑁂𑀳𑀺, 𑀭𑀸𑀚𑀸 𑀲𑁄 𑀢𑀺𑀤𑀺𑀯𑀁 𑀕𑀢𑁄.

𑀏𑀯𑀁 ¶ 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀲𑀢𑁆𑀢𑀯𑁄 𑀅𑀪𑀺𑀫𑀤𑁆𑀤𑀺𑀬;

𑀭𑀚𑁆𑀚𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀯𑀺𑀳𑀭𑀦𑁆𑀢𑁄 𑀧𑀼𑀭𑁂 𑀯𑀭𑁂.

𑀉𑀧𑀭𑀸𑀚𑀲𑁆𑀲 𑀦𑀸𑀫𑁂𑀦, 𑀓𑀸𑀭𑀺𑀢𑀲𑁆𑀲 𑀧𑀦’𑀢𑁆𑀢𑀦𑀸;

𑀫𑀳𑀮𑁆𑀮𑀭𑀸𑀚𑀸 𑀲𑀯𑁆𑀳𑀲𑁆𑀲, 𑀧𑀥𑀸𑀦𑀖𑀭𑀓𑀲𑁆𑀲 𑀲𑁄.

𑀅𑀤𑁆𑀥𑀸 𑀕𑀸𑀫𑀤𑁆𑀯𑀬𑀁 𑀭𑀸𑀚𑀸, 𑀳𑀗𑁆𑀓𑀸𑀭𑀁 𑀲𑀸𑀫𑀼𑀕𑀸𑀫𑀓𑀁;

𑀓𑁂𑀳𑁂𑀮𑁆𑀮𑀭𑀸𑀚𑀪𑀸𑀕𑀜𑁆𑀘, 𑀲𑀩𑁆𑀩𑁂𑀧𑀺 𑀧𑀭𑀺𑀘𑀸𑀭𑀓𑁂.

𑀢𑀣𑀸 𑀚𑁂𑀢𑀯𑀦𑀲𑁆𑀲’𑀤𑀸, 𑀫𑀳𑀸𑀫𑀡𑀺𑀓𑀕𑀸𑀫𑀓𑀁;

𑀫𑀬𑁂𑀢𑁆𑀢𑀺𑀓𑀲𑁆𑀲𑀧𑀸𑀯𑀸𑀲𑀁, 𑀲𑀸𑀮𑀕𑀸𑀫𑁂𑀦 𑀧𑀽𑀚𑀬𑀺.

𑀅𑀫𑁆𑀩𑀺𑀮𑁆𑀮𑀧𑀤𑀭𑀁 𑀘𑀸’𑀤𑀸, 𑀘𑁂𑀢𑀺𑀬𑀲𑁆𑀲 𑀕𑀺𑀭𑀺𑀲𑁆𑀲 𑀲𑁄;

𑀧𑀼𑀮𑀢𑁆𑀣𑀺𑀦𑀕𑀭𑁂 𑀓𑀸𑀲𑀺, 𑀫𑀳𑀸𑀧𑀸𑀦𑀸𑀤𑀺 𑀤𑀻𑀧𑀓𑀁.

𑀅𑀫𑀘𑁆𑀘𑀸 𑀢𑀲𑁆𑀲 𑀫𑀸𑀭𑁂𑀲𑀼𑀁, 𑀫𑀸𑀡𑀯𑁆𑀳𑀁 𑀬𑀼𑀯𑀭𑀸𑀚𑀓𑀁;

𑀅𑀦𑁆𑀢𑁄𑀧𑀼𑀭𑁂’𑀧𑀭𑀚𑁆𑀛𑀺𑀢𑁆𑀯𑀸, 𑀤𑀢𑁆𑀯𑀸𑀧𑀺 𑀲𑀫𑀫𑁂𑀢𑁆𑀢𑀺𑀓𑀁.

𑀢𑀢𑁄 𑀓𑀲𑁆𑀲𑀧𑀦𑀸𑀫𑀁 𑀲𑁄, 𑀓𑀡𑀺𑀝𑁆𑀞𑀁 𑀲𑀓𑀪𑀸𑀢𑀭𑀁;

𑀧𑀸𑀮𑁂𑀦𑁆𑀢𑁄 𑀲𑀦𑁆𑀢𑀢𑀺𑀁 𑀭𑀸𑀚𑀸, 𑀑𑀧𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀫𑀸𑀡𑀲𑁆𑀲 𑀫𑀭𑀡𑀁 𑀲𑀼𑀢𑁆𑀯𑀸, 𑀕𑀳𑁂𑀢𑁆𑀯𑀸 𑀤𑀫𑀺𑀴𑁂 𑀮𑀳𑀼𑀁;

𑀤𑀸𑀞𑀸𑀲𑀺𑀯𑁄 𑀲𑀫𑀸𑀕𑀜𑁆𑀙𑀺, 𑀕𑀸𑀫𑀁 𑀢𑀺𑀦𑁆𑀢𑀺𑀡𑀻 𑀦𑀸𑀫𑀓𑀁.

𑀢𑀲𑁆𑀲𑀸𑀕𑀫𑀦𑀫𑀜𑁆𑀜𑀸𑀫, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀯𑀸𑀳𑀦𑁄;

𑀬𑀼𑀚𑁆𑀛𑀦𑁆𑀢𑁄 𑀤𑁆𑀯𑀸𑀭𑀲𑁂 𑀯𑀲𑁆𑀲𑁂, 𑀚𑀫𑁆𑀩𑀼𑀤𑀻𑀧𑀁 𑀧𑀮𑀸𑀢𑀯𑀸.

𑀧𑀳𑀸𑀬 𑀲𑀩𑁆𑀩𑀁 𑀕𑀘𑁆𑀙𑀦𑁆𑀢𑁄, 𑀲𑀜𑁆𑀜𑀸𑀡𑀢𑁆𑀣𑀸𑀬 𑀅𑀢𑁆𑀢𑀦𑁄;

𑀏𑀓𑀸𑀯𑀮𑀺𑀁 𑀕𑀳𑁂𑀢𑁆𑀯𑀸𑀯, 𑀏𑀓𑀸𑀓𑀻 𑀲𑁄 𑀳𑀺 𑀦𑀺𑀓𑁆𑀔𑀫𑀺.

𑀏𑀓𑀸𑀯𑀮𑀺𑀁 𑀯𑀺𑀦𑀸𑀘𑁂𑀯, 𑀭𑀸𑀚𑀸 𑀳𑀼𑀢𑁆𑀯𑀸 𑀬𑀣𑀸𑀯𑀺𑀥𑀺𑀁;

𑀅𑀳𑀼 𑀤𑀸𑀞𑁄𑀧𑀢𑀺𑀲𑁆𑀲𑁄𑀢𑀺, 𑀯𑀺𑀲𑀼𑀢𑁄 𑀥𑀭𑀡𑀻 𑀢𑀮𑁂.

𑀇𑀢𑀭𑁄 𑀮𑀤𑁆𑀥𑀑𑀓𑀸𑀲𑁄, 𑀭𑀚𑁆𑀚𑀫𑀕𑁆𑀕𑀳𑀺 𑀬𑀼𑀚𑁆𑀛𑀺𑀬;

𑀅𑀜𑁆𑀜𑀫𑀜𑁆𑀜𑀁 𑀧𑀮𑀸𑀧𑁂𑀲𑀼𑀁, 𑀏𑀯𑀁 𑀢𑁂 𑀅𑀦𑁆𑀢𑀭𑀦𑁆𑀢𑀭𑀸.

𑀏𑀯𑀁 𑀉𑀪𑀺𑀦𑁆𑀦𑀁 𑀭𑀸𑀚𑀽𑀦𑀁, 𑀲𑀗𑁆𑀕𑀸𑀫𑁂𑀦𑀸’𑀪𑀺𑀧𑀻𑀴𑀺𑀢𑁄;

𑀮𑁄𑀓𑁄 𑀉𑀧𑀤𑁆𑀤𑀼𑀢𑁄-𑀲𑀩𑁆𑀩𑁄 𑀯𑀺𑀳𑀻𑀦𑀥𑀦𑀥𑀜𑁆𑀜𑀯𑀸.

𑀤𑀸𑀞𑁄𑀧𑀢𑀺𑀲𑁆𑀲𑁄 𑀦𑀸𑀲𑁂𑀲𑀺, 𑀲𑀩𑁆𑀩𑀁 𑀧𑀼𑀩𑁆𑀩𑀓𑀭𑀸𑀚𑀽𑀦𑀁;

𑀕𑀡𑁆𑀳𑀻 𑀢𑀻𑀲𑀼 𑀦𑀺𑀓𑀸𑀬𑁂𑀲𑀼, 𑀲𑀸𑀭𑀁 𑀥𑀸𑀢𑀼𑀖𑀭𑁂𑀲𑀼 𑀘.

𑀲𑀼𑀯𑀡𑁆𑀡𑀧𑀝𑀺𑀫𑀸𑀬𑁄 𑀲𑁄, 𑀲𑀼𑀯𑀡𑁆𑀡𑀁 𑀕𑀡𑁆𑀳𑀺 𑀪𑀺𑀦𑁆𑀤𑀺𑀬;

𑀲𑁄𑀡𑁆𑀡𑀫𑀸𑀮𑀸𑀤𑀺𑀓𑀁 𑀲𑀩𑁆𑀩𑀁, 𑀧𑀽𑀚𑀸𑀪𑀡𑁆𑀟𑀁 𑀦𑀺𑀭𑀸𑀓𑀭𑀺.

𑀣𑀽𑀧𑀸𑀭𑀸𑀫𑁂 ¶ 𑀢𑀣𑀸𑀕𑀡𑁆𑀳𑀺, 𑀲𑁄𑀯𑀡𑁆𑀡𑀁 𑀣𑀼𑀧𑀺𑀓𑀁 𑀖𑀭𑁂;

𑀫𑀳𑀕𑁆𑀖𑀭𑀢𑀦𑀸𑀓𑀺𑀡𑁆𑀡𑀁, 𑀙𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀣 𑀘𑁂𑀢𑀺𑀬𑁂.

𑀫𑀳𑀸𑀧𑀸𑀴𑀺𑀫𑁆𑀳𑀺 𑀦𑀸𑀯𑀸𑀬𑁄, 𑀤𑀫𑀺𑀴𑀸𑀦𑀁 𑀲𑀤𑀸𑀧𑀬𑀺;

𑀭𑀸𑀚𑀕𑁂𑀳𑀸 𑀦𑀺𑀛𑀸𑀧𑁂𑀲𑀼𑀁, 𑀲𑀤𑁆𑀥𑀺𑀁 𑀥𑀸𑀢𑀼𑀖𑀭𑁂𑀦 𑀢𑁂.

𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀲𑁄, 𑀤𑁂𑀲𑁂𑀢𑀼𑀁, 𑀧𑀸𑀧𑀫𑀢𑁆𑀢𑀦𑁄;

𑀓𑀸𑀭𑁂𑀲𑀺 𑀲𑀳 𑀪𑁄𑀕𑁂𑀦, 𑀲𑀸𑀓𑀯𑀢𑁆𑀣𑀼𑀯𑀺𑀳𑀸𑀭𑀓𑀁.

𑀪𑀸𑀕𑀺𑀦𑁂𑀬𑁆𑀬𑁄𑀧𑀺 𑀭𑀢𑀦-𑀤𑀸𑀞𑁄 𑀇𑀢𑀺 𑀚𑀦𑁂 𑀲𑀼𑀢𑁄;

𑀫𑀳𑀸𑀤𑀻𑀧𑀸𑀤𑁄 𑀳𑀼𑀢𑁆𑀯𑀸𑀦, 𑀲𑀪𑁄𑀕𑁄 𑀢𑀫𑀼𑀧𑀝𑁆𑀞𑀳𑀺.

𑀅𑀕𑁆𑀕𑀩𑁄𑀥𑀺𑀫𑁆𑀳𑀺 𑀲𑀫𑁆𑀧𑀢𑁆𑀢𑁂, 𑀭𑀚𑁆𑀚𑀁 𑀬𑀼𑀤𑁆𑀥𑀩𑀮𑁂𑀦 𑀘;

𑀓𑀲𑁆𑀲𑀧𑁄 𑀬𑀼𑀯𑀭𑀸𑀚𑀸 𑀲𑁄, 𑀲𑁂𑀦𑀁 𑀭𑀓𑁆𑀔𑀺𑀢𑀼𑀫𑀢𑁆𑀢𑀦𑁄.

𑀤𑀼𑀧𑁆𑀧𑀜𑁆𑀜𑁄 𑀲𑀳𑀲𑀸 𑀪𑁂𑀢𑁆𑀯𑀸, 𑀣𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑀁;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁂𑀦, 𑀔𑀼𑀤𑁆𑀤𑀭𑀸𑀚𑁂𑀦 𑀘𑁂𑀯 𑀳𑀺.

𑀧𑀼𑀩𑁆𑀩𑀓𑁂𑀳𑀺𑀘 𑀭𑀸𑀚𑀽𑀳𑀺, 𑀧𑀽𑀚𑀺𑀢𑀁𑀥𑀦𑀲𑀸𑀭𑀓𑀁;

𑀅𑀕𑁆𑀕𑀳𑁂𑀲𑀺 𑀤𑀼𑀦𑁆𑀦𑀺𑀢𑀻𑀳𑀺, 𑀧𑀸𑀧𑀓𑁂𑀳𑀺 𑀧𑀼𑀭𑀓𑁆𑀔𑀢𑁄.

𑀤𑀓𑁆𑀔𑀺𑀡𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀘𑁂𑀢𑀺𑀬𑀁 𑀧𑀭𑀺𑀪𑀺𑀦𑁆𑀤𑀺𑀬;

𑀅𑀕𑁆𑀕𑀳𑁂𑀲𑀺 𑀥𑀦𑀁 𑀲𑀸𑀭𑀁, 𑀏𑀯𑀫𑀜𑁆𑀜𑁂𑀧𑀺 𑀪𑀺𑀦𑁆𑀤𑀬𑀺.

𑀏𑀯𑀁 𑀓𑀭𑁄𑀦𑁆𑀢𑀁 𑀢𑀁 𑀭𑀸𑀚𑀸, 𑀤𑀼𑀦𑁆𑀦𑀺𑀢𑀺𑀓𑀧𑀼𑀭𑀓𑁆𑀔𑀢𑀁;

𑀦𑀸𑀲𑀓𑁆𑀔𑀺 𑀓𑀺𑀭 𑀯𑀸𑀭𑁂𑀢𑀼𑀁, 𑀅𑀳𑁄 𑀧𑀸𑀧𑀸 𑀦𑀺𑀯𑀸𑀭𑀺𑀬𑀸.

𑀢𑀁 𑀯𑀸𑀭𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄, 𑀣𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑀁;

𑀪𑀺𑀦𑁆𑀦𑀁 𑀢𑁂𑀦 𑀲𑀓𑀸𑀭𑁂𑀲𑀺, 𑀲𑀳𑀲𑁆𑀲𑁂𑀦 𑀲𑀫𑀗𑁆𑀕𑀮𑀁.

𑀢𑀤𑀸 𑀤𑀸𑀞𑁄𑀧𑀢𑀺𑀲𑁆𑀲𑁂𑀦, 𑀅𑀕𑁆𑀕𑀩𑁄𑀥𑀺 𑀦𑀭𑀺𑀲𑁆𑀲𑀭𑁄;

𑀚𑀺𑀢𑁄 𑀭𑁄𑀳𑀡𑀫𑁂𑀯𑀸’𑀕𑀸, 𑀲𑀚𑁆𑀚𑁂𑀢𑀼𑀁 𑀩𑀮𑀯𑀸𑀳𑀦𑀁.

𑀢𑀢𑁆𑀭 𑀞𑀺𑀢𑁄 𑀲𑁄𑀴𑀲𑀫𑁂, 𑀯𑀲𑁆𑀲𑁂 𑀩𑁆𑀬𑀸𑀥𑀺𑀳𑀢𑁄 𑀫𑀢𑁄;

𑀢𑀤𑀸 𑀢𑀲𑁆𑀲 𑀓𑀡𑀺𑀝𑁆𑀞𑁄 𑀲𑁄, 𑀬𑀼𑀯𑀭𑀸𑀚𑀸𑀧𑀺 𑀓𑀲𑁆𑀲𑀧𑁄.

𑀤𑀸𑀞𑁄𑀧𑀢𑀺𑀲𑁆𑀲 𑀭𑀸𑀚𑀸𑀦𑀁, 𑀚𑀫𑁆𑀩𑀼𑀤𑀻𑀧𑀁 𑀧𑀮𑀸𑀧𑀺𑀬;

𑀏𑀓𑀭𑀚𑁆𑀚𑀫𑀓𑀸𑀤𑁂𑀲𑀁, 𑀫𑀓𑀼𑀝𑀦𑁆𑀢𑀼 𑀦 𑀥𑀸𑀭𑀬𑀺.

𑀲𑀸𑀥𑀽𑀦𑀁 𑀲𑀗𑁆𑀕𑀫𑁂𑀦𑁂’𑀲, 𑀳𑀼𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀓𑁄;

𑀦𑀸𑀲𑀁 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑀺𑀬.

𑀧𑀼𑀧𑁆𑀨𑀸𑀭𑀸𑀫𑁂 𑀨𑀮𑀸𑀭𑀸𑀫𑁂, 𑀯𑀸𑀧𑀺𑀬𑁄’𑀧𑀺 𑀘 𑀓𑀸𑀭𑀬𑀺;

𑀫𑀳𑀸𑀘𑁂𑀢𑀺𑀢𑁆𑀢𑀬𑀜𑁆𑀘𑀸𑀧𑀺, 𑀫𑀳𑀸𑀧𑀽𑀚𑀸𑀳𑀺 𑀲𑀓𑁆𑀓𑀭𑀺.

𑀣𑀽𑀧𑀸𑀭𑀸𑀫𑀜𑁆𑀘 ¶ 𑀧𑀽𑀚𑁂𑀢𑁆𑀯𑀸, 𑀏𑀓𑀁𑀕𑀸𑀫𑀜𑁆𑀘 𑀢𑀲𑁆𑀲𑀤𑀸;

𑀲𑀩𑁆𑀩𑀸𑀕𑀫𑀺𑀬𑀪𑀺𑀓𑁆𑀔𑀽𑀳𑀺, 𑀥𑀫𑁆𑀫𑀁𑀤𑁂𑀲𑀸𑀧𑀬𑀺𑀢𑁆𑀣 𑀘.

𑀓𑀢𑁆𑀯𑀸 𑀫𑀭𑀺𑀘𑀯𑀝𑁆𑀝𑀺𑀫𑁆𑀳𑀺, 𑀧𑀸𑀲𑀸𑀤𑀁 𑀲𑀼𑀢𑁆𑀣𑀺𑀭𑀁 𑀢𑀳𑀺𑀁;

𑀯𑀸𑀲𑀬𑀺𑀢𑁆𑀣 𑀫𑀳𑀸𑀣𑁂𑀭𑀁, 𑀦𑀸𑀕𑀲𑀸𑀮 𑀦𑀺𑀯𑀸𑀲𑀺𑀢𑀁.

𑀢𑀢𑁆𑀭𑀝𑁆𑀞𑀁 𑀢𑀫𑀼𑀧𑀝𑁆𑀞𑀸𑀬, 𑀧𑀘𑁆𑀘𑀬𑁂𑀢𑀺 𑀘𑀢𑀽𑀳𑀺’𑀧𑀺;

𑀅𑀪𑀺𑀥𑀫𑁆𑀫𑀁 𑀓𑀣𑀸𑀧𑁂𑀲𑀺, 𑀲𑀤𑁆𑀥𑀺𑀫𑀝𑁆𑀞𑀓𑀣𑀸𑀬 𑀲𑁄.

𑀦𑀸𑀕𑀲𑀸𑀮𑀓𑀫𑀸𑀯𑀸𑀲𑀁, 𑀓𑀢𑁆𑀯𑀸 𑀢𑀲𑁆𑀲𑁂𑀯’𑀤𑀸𑀲𑀺 𑀲𑁄;

𑀫𑀳𑀸𑀦𑀺𑀝𑁆𑀞𑀺𑀮𑀕𑀸𑀫𑀜𑁆𑀘, 𑀧𑀘𑁆𑀘𑀬𑀢𑁆𑀣𑀸𑀬 𑀢𑀲𑁆𑀲’𑀤𑀸.

𑀅𑀣 𑀤𑀸𑀣𑁄𑀧𑀢𑀺𑀲𑁆𑀲𑁄 𑀲𑁄, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑁄;

𑀫𑀳𑀦𑁆𑀢𑀁 𑀩𑀮𑀫𑀸𑀤𑀸𑀬, 𑀓𑀭𑁄𑀦𑁆𑀢𑁄 𑀢𑁂𑀦 𑀆𑀳𑀯𑀁.

𑀓𑀲𑁆𑀲𑀧𑁂𑀦 𑀲𑀼𑀲𑀦𑁆𑀦𑀤𑁆𑀥-𑀯𑀸𑀳𑀦𑁂𑀦 𑀢𑀢𑁄 𑀫𑀭𑀺;

𑀤𑁆𑀯𑀸𑀤𑀲𑀸𑀲𑀼𑀁 𑀓𑀺𑀭𑁂𑀢𑀲𑁆𑀲, 𑀭𑀸𑀚𑀪𑀽𑀢𑀲𑁆𑀲 𑀳𑀸𑀬𑀦𑀸.

𑀢𑀲𑁆𑀲 𑀤𑀸𑀞𑁄𑀧𑀢𑀺𑀲𑁆𑀲𑀲𑁆𑀲, 𑀪𑀸𑀕𑀺𑀦𑁂𑀬𑁆𑀬𑁄 𑀲𑀦𑀸𑀫𑀓𑁄;

𑀚𑀫𑁆𑀩𑀼𑀤𑀻𑀧𑀁 𑀧𑀮𑀸𑀬𑀺𑀢𑁆𑀣, 𑀪𑀻𑀢𑁄 𑀢𑀫𑁆𑀳𑀸 𑀫𑀳𑀸𑀭𑀡𑁂.

𑀏𑀯𑀁 𑀅𑀦𑀺𑀘𑁆𑀘𑀸 𑀯𑀢 𑀲𑀩𑁆𑀩𑀪𑁄𑀕𑀸,

𑀲𑀼𑀤𑀼𑀮𑁆𑀮𑀪𑀸 𑀘𑁂𑀯 𑀔𑀡𑁂𑀯 𑀲𑁄𑀪𑀸;

𑀢𑀲𑁆𑀫𑀸𑀳𑀺 𑀏𑀢𑁂𑀲𑀼 𑀭𑀢𑀺𑀁 𑀯𑀺𑀳𑀸𑀬,

𑀪𑀯𑁂𑀬𑁆𑀬 𑀥𑀫𑁆𑀫𑀸𑀪𑀺𑀫𑀼𑀔𑁄 𑀳𑀺𑀢𑁂𑀲𑀻.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑀺𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀢𑁂𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀢𑁄 ¶ 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀓𑀲𑁆𑀲𑀧𑁄 𑀧𑀼𑀭𑀺𑀢𑀸𑀲𑀬𑁄;

𑀫𑀳𑀸𑀧𑀸𑀴𑀺𑀫𑁆𑀳𑀺 𑀲𑀗𑁆𑀖𑀲𑁆𑀲, 𑀲𑀫𑀺𑀤𑁆𑀥𑀁 𑀪𑁄𑀚𑀦𑀁 𑀅𑀓𑀸.

𑀦𑀸𑀕𑀲𑀸𑀮𑀸 𑀦𑀺𑀯𑀸𑀲𑀺𑀁 𑀲𑁄, 𑀫𑀳𑀸𑀥𑀫𑁆𑀫𑀓𑀣𑀺𑀁 𑀬𑀢𑀺𑀁;

𑀫𑀳𑀸𑀧𑀽𑀚𑀸𑀬 𑀧𑀽𑀚𑁂𑀢𑁆𑀯𑀸, 𑀲𑀤𑁆𑀥𑀫𑁆𑀫𑀁 𑀢𑁂𑀦 𑀯𑀸𑀘𑀬𑀺.

𑀯𑀲𑀦𑁆𑀢𑀁 𑀪𑀸𑀢𑀼𑀆𑀯𑀸𑀲𑁂, 𑀲𑀫𑀼𑀤𑁆𑀤𑀺𑀲𑁆𑀲 𑀮𑀺𑀔𑀸𑀧𑀬𑀺;

𑀓𑀝𑀦𑁆𑀥𑀓𑀸𑀭𑀯𑀸𑀲𑀺𑀁 𑀲𑁄, 𑀧𑀸𑀴𑀺 𑀲𑀩𑁆𑀩𑀁 𑀲𑀲𑀗𑁆𑀕𑀳𑀁.

𑀚𑀺𑀡𑁆𑀡𑀁 𑀲𑀗𑁆𑀔𑀭𑀺𑀓𑀫𑁆𑀫𑀜𑁆𑀘, 𑀦𑀯𑀁 𑀓𑀸𑀭𑁂𑀲𑀺 𑀘𑁂𑀢𑀺𑀬𑁂;

𑀲𑀗𑁆𑀖𑀪𑁄𑀕𑀫𑀦𑁂𑀓𑀜𑁆𑀘, 𑀢𑀢𑁆𑀣 𑀢𑀢𑁆𑀣 𑀧𑀯𑀢𑁆𑀢𑀬𑀺.

𑀦𑀸𑀦𑀸𑀫𑀡𑀺𑀲𑀫𑀼𑀚𑁆𑀚𑁄𑀢𑀁, 𑀓𑀸𑀲𑀺 𑀘𑀽𑀴𑀫𑀡𑀺𑀢𑁆𑀢𑀬𑀁;

𑀲𑀢𑀁 𑀧𑀡𑁆𑀟𑀼𑀧𑀮𑀸𑀲𑀸𑀦𑀁, 𑀯𑀢𑁆𑀣𑀤𑀸𑀦𑁂𑀦 𑀢𑀧𑁆𑀧𑀬𑀺.

𑀢𑀲𑁆𑀲𑀸𑀲𑀼𑀁 𑀩𑀳𑀯𑁄 𑀧𑀼𑀢𑁆𑀢𑀸, 𑀚𑁂𑀝𑁆𑀞𑁄 𑀢𑁂𑀲𑀜𑁆𑀘 𑀫𑀸𑀡𑀓𑁄;

𑀲𑀩𑁆𑀩𑁂 𑀢𑁂 𑀦 𑀯𑀬𑀧𑁆𑀧𑀢𑁆𑀢𑀸, 𑀩𑀸𑀮𑀸𑀯𑀺𑀕𑀢𑀩𑀼𑀤𑁆𑀥𑀺𑀦𑁄.

𑀢𑀢𑁄 𑀲𑁄 𑀩𑁆𑀬𑀸𑀥𑀺𑀦𑀸 𑀨𑀼𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁂𑀦 𑀓𑁂𑀦𑀘𑀺;

𑀧𑀼𑀢𑁆𑀢𑀸 𑀫𑁂 𑀩𑀸𑀮𑀓𑀸 𑀲𑀩𑁆𑀩𑁂, 𑀦𑁂’𑀢𑁂 𑀭𑀚𑁆𑀚𑀓𑁆𑀔𑀫𑀸 𑀇𑀢𑀺.

𑀯𑀲𑀦𑁆𑀢𑀁 𑀭𑁄𑀳𑀡𑁂 𑀤𑁂𑀲𑁂, 𑀪𑀸𑀕𑀺𑀦𑁂𑀬𑁆𑀬𑀁 𑀫𑀳𑀸𑀫𑀢𑀺𑀁;

𑀆𑀳𑀼𑀬 𑀲𑀩𑁆𑀩𑀁 𑀧𑀸𑀤𑀸𑀲𑀺, 𑀭𑀚𑁆𑀚𑀁 𑀧𑀼𑀢𑁆𑀢𑁂𑀳𑀺 𑀅𑀢𑁆𑀢𑀦𑁄.

𑀕𑀦𑁆𑀥𑀫𑀸𑀮𑀸𑀤𑀺𑀧𑀽𑀚𑀸𑀳𑀺, 𑀧𑀽𑀚𑀬𑀺𑀢𑁆𑀯𑀸𑀦 𑀘𑁂𑀢𑀺𑀬𑁂;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀔𑀫𑀸𑀥𑀧𑀲𑀺, 𑀤𑀢𑁆𑀯𑀸𑀦 𑀘𑀢𑀼𑀧𑀘𑁆𑀘𑀬𑀁.

𑀏𑀯𑀁 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀫𑀺𑀢𑁆𑀢𑀸𑀫𑀘𑁆𑀘𑀚𑀦𑁂𑀲𑀼 𑀘;

𑀕𑀢𑁄 𑀦𑀯𑀳𑀺 𑀯𑀲𑁆𑀲𑁂𑀳𑀺, 𑀬𑀣𑀸𑀓𑀫𑁆𑀫𑀁 𑀦𑀭𑀸𑀥𑀺𑀧𑁄.

𑀓𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑁄, 𑀫𑀸𑀢𑀼𑀮𑀲𑁆𑀲 𑀲𑀕𑀸𑀭𑀯𑁄;

𑀲𑀗𑁆𑀕𑀳𑀦𑁆𑀢𑁄 𑀚𑀦𑀁 𑀫𑀸𑀡𑁄, 𑀤𑀫𑀺𑀴𑁂 𑀦𑀻𑀳𑀭𑀸𑀧𑀬𑀺.

𑀏𑀓𑀢𑁄 𑀤𑀫𑀺𑀴𑀸 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀲𑁂𑀫 𑀇𑀫𑀁 𑀇𑀢𑀺;

𑀢𑀲𑁆𑀫𑀺𑀁 𑀞𑀺𑀢𑁂 𑀩𑀳𑀺𑀤𑁆𑀥𑀸𑀯, 𑀅𑀕𑁆𑀕𑀳𑁂𑀲𑀼𑀁 𑀧𑀼𑀭𑀁 𑀲𑀬𑀁.

𑀳𑀢𑁆𑀢 ¶ 𑀤𑀸𑀞𑀲𑁆𑀲 𑀧𑁂𑀲𑁂𑀲𑀺, 𑀚𑀫𑁆𑀩𑀼𑀤𑀻𑀧𑀕𑀢𑀲𑁆𑀲 𑀢𑁂;

𑀆𑀕𑀦𑁆𑀢𑀼𑀁𑀢𑀯 𑀓𑀸𑀮𑁄𑀢𑀺, 𑀲𑀸𑀲𑀦𑀁 𑀭𑀚𑁆𑀚𑀕𑀸𑀳𑀡𑁂.

𑀫𑀸𑀡𑁄’𑀧𑀺 𑀲𑀗𑁆𑀖𑀁 𑀧𑁂𑀲𑁂𑀲𑀺, 𑀲𑀸𑀲𑀦𑀁 𑀧𑀺𑀢𑀼𑀭𑁄𑀳𑀡𑀁;

𑀧𑀺𑀢𑀸 𑀲𑀼𑀢𑁆𑀯𑀸𑀦 𑀢𑀁 𑀆𑀕𑀸, 𑀦 𑀘𑀻𑀭𑁂𑀦𑁂𑀯 𑀭𑁄𑀳𑀡𑀸.

𑀉𑀪𑁂 𑀢𑁂 𑀫𑀦𑁆𑀢𑀬𑀺𑀢𑁆𑀯𑀸𑀦, 𑀅𑀓𑀁𑀲𑀼 𑀲𑀦𑁆𑀥𑀺𑀮𑁂𑀲𑀓𑀁;

𑀉𑀫𑀺𑀴𑁂𑀳𑀺 𑀢𑀢𑁄 𑀚𑀸𑀢𑀸, 𑀲𑀩𑁆𑀩𑁂 𑀢𑁂 𑀲𑀫𑀯𑀼𑀢𑁆𑀢𑀺𑀦𑁄.

𑀢𑀢𑁄 𑀲𑁄 𑀧𑀺𑀢𑀭𑀁 𑀭𑀚𑁆𑀚𑁂, 𑀅𑀪𑀺𑀲𑀺𑀜𑁆𑀘𑀺𑀢𑁆𑀣 𑀫𑀸𑀡𑀓𑁄;

𑀲𑁄’𑀪𑀺𑀲𑀺𑀢𑁆𑀢𑁄 𑀦𑀺𑀓𑀸𑀬𑀸𑀦𑀁, 𑀲𑀳𑀲𑁆𑀲𑀸𑀦𑀁 𑀢𑀬𑀁 𑀅𑀤𑀸.

𑀲𑀗𑁆𑀖𑀁 𑀭𑀝𑁆𑀞𑀜𑁆𑀘 𑀲𑀗𑁆𑀕𑀬𑁆𑀳, 𑀲𑀩𑁆𑀩𑀁 𑀭𑀸𑀚𑀓𑀼𑀮𑀝𑁆𑀞𑀺𑀢𑀁;

𑀪𑀡𑁆𑀟𑀁 𑀧𑁂𑀲𑁂𑀲𑀺 𑀲𑀢𑁆𑀢𑀽𑀳𑀺, 𑀭𑀓𑁆𑀔𑀡𑀢𑁆𑀣𑀸𑀬 𑀭𑁄𑀳𑀡𑀁.

𑀳𑀢𑁆𑀣𑀤𑀸𑀞𑁄𑀧𑀺 𑀲𑀼𑀢𑁆𑀯𑀸𑀦, 𑀤𑀫𑀺𑀴𑀸𑀦𑀁 𑀢𑀼 𑀲𑀸𑀲𑀦𑀁;

𑀔𑀡𑁂𑀦𑀸’𑀕𑀸 𑀇𑀫𑀁 𑀤𑀻𑀧𑀁, 𑀕𑀳𑁂𑀢𑁆𑀯𑀸 𑀤𑀫𑀺𑀴𑁆𑀳𑀁 𑀩𑀮𑀁.

𑀢𑀤𑀸 𑀢𑁂 𑀤𑀫𑀺𑀴𑀸 𑀲𑀩𑁆𑀩𑁂, 𑀧𑀭𑀺𑀪𑀽𑀢𑀸 𑀇𑀥 𑀞𑀺𑀢𑀸;

𑀆𑀬𑀦𑁆𑀢𑀫𑁂𑀯 𑀢𑀁 𑀕𑀦𑁆𑀢𑁆𑀯𑀸, 𑀧𑀭𑀺𑀯𑀸𑀭𑁂𑀲𑀼 𑀫𑀜𑁆𑀚𑀲𑁂.

𑀫𑀸𑀡𑁄𑀧𑀺 𑀲𑀼𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀦𑀸𑀬𑀁 𑀓𑀸𑀮𑁄𑀢𑀺 𑀬𑀼𑀚𑁆𑀛𑀺𑀢𑀼𑀁;

𑀧𑁂𑀲𑁂𑀢𑁆𑀯𑀸 𑀧𑀺𑀢𑀼𑀭𑀸𑀚𑀸𑀦𑀁, 𑀲𑀤𑁆𑀥𑀺𑀁 𑀲𑀸𑀭𑁂𑀦 𑀭𑁄𑀳𑀡𑀁.

𑀧𑀼𑀩𑁆𑀩𑀤𑁂𑀲𑀁 𑀲𑀬𑀁 𑀕𑀦𑁆𑀢𑁆𑀯𑀸, 𑀲𑀗𑁆𑀕𑀡𑁆𑀳𑀦𑁆𑀢𑁄 𑀚𑀦𑀁 𑀯𑀲𑀻;

𑀮𑀤𑁆𑀥𑀸 𑀤𑀫𑀺𑀴𑀧𑀓𑁆𑀔𑀁 𑀲𑁄, 𑀕𑀳𑁂𑀢𑁆𑀯𑀸 𑀭𑀸𑀚𑀓𑀁 𑀧𑀼𑀭𑀁.

𑀤𑀸𑀞𑁄𑀧𑀢𑀺𑀲𑁆𑀲𑁄 𑀭𑀸𑀚𑀸𑀢𑀺, 𑀦𑀸𑀫𑀁 𑀲𑀸𑀯𑁂𑀢𑀺 𑀅𑀢𑁆𑀢𑀦𑁄;

𑀫𑀸𑀢𑀼𑀮𑀁 𑀯𑀺𑀬 𑀢𑀁 𑀮𑁄𑀓𑁄, 𑀢𑁂𑀦 𑀦𑀸𑀫𑁂𑀦 𑀯𑁄𑀳𑀭𑀺.

𑀧𑀺𑀢𑀼𑀘𑁆𑀙𑀧𑀼𑀢𑁆𑀢𑀫𑀸𑀦𑁂𑀢𑁆𑀯𑀸, 𑀅𑀕𑁆𑀕𑀩𑁄𑀥𑀺 𑀲𑀦𑀸𑀫𑀓𑀁;

𑀞𑀧𑁂𑀢𑁆𑀯𑀸 𑀬𑀼𑀯𑀭𑀸𑀚𑀢𑁆𑀢𑁂, 𑀤𑁂𑀲𑀜𑁆𑀘𑀸’𑀤𑀸𑀲𑀺 𑀤𑀓𑁆𑀔𑀺𑀡𑀁.

𑀞𑀸𑀦𑀦𑁆𑀢𑀭𑀜𑁆𑀘 𑀧𑀸𑀤𑀸𑀲𑀺, 𑀦𑀺𑀲𑁆𑀲𑀺𑀢𑀸𑀦𑀁 𑀬𑀣𑀸𑀭𑀳𑀁;

𑀲𑀸𑀲𑀦𑀲𑁆𑀲 𑀘 𑀮𑁄𑀓𑀲𑁆𑀲, 𑀲𑀩𑁆𑀩𑀁 𑀓𑀢𑁆𑀢𑀩𑁆𑀩𑀫𑀸𑀘𑀭𑀺.

𑀫𑀳𑀸𑀧𑀸𑀴𑀺𑀫𑁆𑀳𑀺 𑀤𑀸𑀧𑁂𑀲𑀺, 𑀲𑀯𑀢𑁆𑀣𑀁 𑀤𑀥𑀺𑀪𑀢𑁆𑀢𑀓𑀁;

𑀔𑀻𑀭𑀁 𑀧𑀸𑀬𑀸𑀲𑀓𑀜𑁆𑀘𑁂𑀯, 𑀥𑀫𑁆𑀫𑀁 𑀲𑀼𑀡𑀺 𑀉𑀧𑁄𑀲𑀣𑀺.

𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀧𑀽𑀚𑀸𑀬𑁄, 𑀤𑁂𑀲𑀸 𑀧𑁂𑀢𑁆𑀯𑀸𑀦 𑀤𑁂𑀲𑀦𑀁;

𑀏𑀯𑀫𑀸𑀤𑀻𑀳𑀺 𑀧𑀼𑀜𑁆𑀜𑁂𑀳𑀺, 𑀅𑀢𑁆𑀢𑀸𑀦𑀁’𑀓𑀸𑀲𑀺 𑀪𑀤𑁆𑀤𑀓𑀁.

𑀓𑀲𑁆𑀲𑀧𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀤𑀢𑁆𑀯𑀸𑀲𑁂𑀦𑀯𑁆𑀳𑀕𑀸𑀫𑀓𑀁;

𑀫𑀳𑀸𑀕𑀮𑁆𑀮𑀜𑁆𑀘 𑀧𑀸𑀤𑀸𑀲𑀺, 𑀧𑀥𑀸𑀦𑀖𑀭𑀓𑀲𑁆𑀲 𑀲𑁄.

𑀧𑀭𑀺𑀯𑁂𑀡𑀲𑁆𑀲 ¶ 𑀫𑁄𑀭𑀲𑁆𑀲, 𑀅𑀓𑀸𑀲𑀺 𑀲𑀓𑀕𑀸𑀫𑀓𑀁;

𑀣𑀽𑀧𑀸𑀭𑀸𑀫𑀲𑁆𑀲 𑀧𑀼𑀡𑁆𑀡𑁄𑀴𑀺𑀁, 𑀤𑀢𑁆𑀯𑀸 𑀲𑀓𑁆𑀓𑀸𑀲𑀺 𑀘𑁂𑀢𑀺𑀬𑀁.

𑀓𑀧𑁆𑀧𑀽𑀭𑀧𑀭𑀺𑀯𑁂𑀡𑀁 𑀲𑁄, 𑀓𑀸𑀭𑁂𑀲𑀺 𑀅𑀪𑀬𑀼𑀢𑁆𑀢𑀭𑁂;

𑀯𑀺𑀳𑀸𑀭𑀁 𑀢𑀺𑀧𑀼𑀣𑀼𑀮𑁆𑀮𑀯𑁆𑀳𑀁, 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀤𑀸𑀧𑀬𑀺.

𑀢𑀲𑁆𑀫𑀺𑀁 𑀓𑀭𑁄𑀦𑁆𑀢𑁂 𑀯𑀸𑀭𑁂𑀲𑀼𑀁, 𑀲𑀻𑀫𑀸𑀬𑀦𑁆𑀢𑁄’𑀢𑀺 𑀪𑀺𑀓𑁆𑀔𑀯𑁄;

𑀣𑁂𑀭𑀺𑀬𑀸 𑀢𑁂 𑀓𑀺𑀩𑀸𑀳𑁂𑀢𑁆𑀯𑀸, 𑀩𑀮𑀁 𑀢𑀣𑁂𑀯 𑀓𑀸𑀭𑀬𑀺.

𑀅𑀣 𑀢𑁂 𑀢𑁂 𑀣𑁂𑀭𑀺𑀬𑀸 𑀪𑀺𑀓𑁆𑀔𑀽, 𑀤𑀼𑀫𑁆𑀫𑀜𑁆𑀜𑀽 𑀢𑀢𑁆𑀣 𑀭𑀸𑀚𑀺𑀦𑀺;

𑀅𑀲𑁆𑀲𑀤𑁆𑀥𑀁 𑀢𑀁 𑀯𑀺𑀤𑀺𑀢𑁆𑀯𑀸𑀦, 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀁 𑀓𑀭𑀼𑀁.

𑀯𑀼𑀢𑁆𑀢𑀜𑁆𑀳𑀺 𑀫𑀼𑀦𑀺𑀦𑀸 𑀢𑁂𑀦, 𑀅𑀲𑁆𑀲𑀤𑁆𑀥𑁄 𑀬𑁄 𑀉𑀧𑀸𑀲𑀓𑁄;

𑀅𑀮𑀸𑀪𑀸𑀬 𑀘 𑀪𑀺𑀓𑁆𑀔𑀽𑀦𑀁, 𑀘𑁂𑀢𑁂𑀢’𑀓𑁆𑀓𑁄𑀲𑀢𑀺 𑀘 𑀢𑁂.

𑀧𑀢𑁆𑀢𑀦𑀺𑀓𑀼𑀚𑁆𑀚𑀦𑀁 𑀢𑀲𑁆𑀲, 𑀓𑀢𑁆𑀢𑀩𑁆𑀩𑀦𑁆𑀢𑀺 𑀢𑀢𑁄 𑀳𑀺 𑀢𑁂;

𑀢𑀲𑁆𑀲 𑀢𑀁 𑀓𑀫𑁆𑀫𑀫𑀓𑀭𑀼𑀁, 𑀮𑁄𑀓𑁄 𑀫𑀜𑁆𑀜𑀺𑀢𑁆𑀣 𑀅𑀜𑁆𑀜𑀣𑀸.

𑀆𑀤𑀸𑀬𑀼 𑀓𑀼𑀚𑁆𑀚𑀺𑀢𑀁 𑀧𑀢𑁆𑀢𑀁, 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼𑀪𑀺𑀓𑁆𑀔𑀓𑀁;

𑀦𑀺𑀓𑀼𑀚𑁆𑀚𑁂𑀬𑁆𑀬 𑀖𑀭𑀤𑁆𑀯𑀸𑀭𑁂, 𑀢𑀲𑁆𑀲𑀸’𑀢𑀺 𑀓𑀣𑀺𑀓𑀁 𑀓𑀭𑀼𑀁.

𑀢𑀲𑁆𑀫𑀺𑀁 𑀲𑁄 𑀲𑀫𑀬𑁂 𑀨𑀼𑀝𑁆𑀞𑁄, 𑀩𑁆𑀬𑀸𑀥𑀺𑀦𑀸 𑀫𑀳𑀢𑀸𑀫𑀭𑀺;

𑀯𑀲𑁆𑀲𑀫𑁆𑀳𑀺 𑀦𑀯𑀫𑁂 𑀭𑀸𑀚𑀸, 𑀲𑀫𑁆𑀧𑀢𑁆𑀢𑁄 𑀚𑀻𑀯𑀺𑀢𑀓𑁆𑀔𑀬𑀁.

𑀤𑀧𑁆𑀧𑀼𑀮𑁄𑀧𑀺 𑀢𑀢𑁄 𑀭𑀸𑀚𑀸, 𑀕𑀢𑁄 𑀭𑁄𑀳𑀡𑀓𑀁 𑀲𑀓𑀁;

𑀯𑀸𑀲𑀁 𑀓𑀧𑁆𑀧𑁂𑀲𑀺 𑀢𑀢𑁆𑀣𑁂𑀯, 𑀓𑀭𑁄𑀦𑁆𑀢𑁄 𑀧𑀼𑀜𑁆𑀜𑀲𑀜𑁆𑀘𑀬𑀁.

𑀇𑀢𑁄 𑀧𑀝𑁆𑀞𑀸𑀬 𑀯𑀓𑁆𑀔𑀸𑀫, 𑀢𑀲𑁆𑀲 𑀯𑀁𑀲𑀫𑀦𑀸𑀓𑀼𑀮𑀁;

𑀯𑀼𑀘𑁆𑀘𑀫𑀸𑀦𑀫𑁆𑀳𑀺 𑀏𑀢𑁆𑀣𑁂𑀯, 𑀢𑀲𑁆𑀫𑀺𑀁 𑀳𑁄𑀢𑀺 𑀅𑀲𑀗𑁆𑀓𑀭𑁄.

𑀚𑀸𑀢𑁄 𑀑𑀓𑁆𑀓𑀸𑀓𑀯𑀁𑀲𑀫𑁆𑀳𑀺, 𑀫𑀳𑀸𑀢𑀺𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀆𑀲𑀺 𑀏𑀓𑁄 𑀫𑀳𑀸𑀧𑀼𑀜𑁆𑀜𑁄, 𑀲𑀫𑀸𑀓𑀺𑀡𑁆𑀡𑀕𑀼𑀡𑀸𑀓𑀭𑁄.

𑀢𑀲𑁆𑀲𑁂’𑀓𑀸 𑀪𑀭𑀺𑀬𑀸 𑀆𑀲𑀺, 𑀲𑀗𑁆𑀖𑀧𑀺𑀯𑀸𑀢𑀺 𑀯𑀻𑀲𑁆𑀲𑀼𑀢𑀸;

𑀥𑀜𑁆𑀜𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑀸, 𑀥𑀻𑀢𑀸 𑀭𑁄𑀳𑀡𑀲𑀸𑀫𑀺𑀦𑁄.

𑀢𑀲𑁆𑀲𑀸𑀧𑀼𑀢𑁆𑀢𑀸 𑀢𑀬𑁄 𑀆𑀲𑀼𑀁, 𑀧𑀞𑀫𑁄 𑀅𑀕𑁆𑀕𑀩𑁂𑀥𑀺𑀓𑁄;

𑀤𑀼𑀢𑀺𑀬𑁄 𑀤𑀧𑁆𑀧𑀼𑀮𑁄 𑀦𑀸𑀫, 𑀢𑀢𑀺𑀬𑁄 𑀫𑀡𑀺𑀅𑀓𑁆𑀔𑀺𑀓𑁄.

𑀏𑀓𑀸𑀯 𑀥𑀻𑀢𑀸 𑀢𑀲𑁆𑀲𑀸𑀲𑀺, 𑀭𑀸𑀚𑀦𑀫𑀕𑀫𑀸 𑀘 𑀲𑀸;

𑀚𑁂𑀝𑁆𑀞𑁄 𑀭𑁄𑀳𑀡𑀦𑀸𑀫𑀲𑁆𑀲, 𑀤𑁂𑀲𑀲𑁆𑀲𑀸’𑀲𑀺 𑀲𑀬𑀁 𑀯𑀲𑀻.

𑀫𑀳𑀸𑀧𑀸𑀴𑀺𑀁 𑀲 𑀓𑀸𑀭𑁂𑀲𑀺, 𑀫𑀳𑀸𑀕𑀸𑀫𑁂 𑀫𑀳𑀸𑀥𑀦𑁄;

𑀤𑀸𑀞𑀕𑁆𑀕𑀩𑁄𑀥𑀺𑀦𑀸𑀫𑀜𑁆𑀘, 𑀧𑀭𑀺𑀯𑁂𑀡𑀁 𑀢𑀳𑀺 𑀯𑀁𑀲𑁄.

𑀓𑀸𑀡𑀕𑀸𑀫𑀫𑁆𑀳𑀺 ¶ 𑀓𑀸𑀡𑀸𑀦𑀁, 𑀕𑀺𑀮𑀸𑀦𑀸𑀦𑀜𑁆𑀘 𑀲𑀸𑀮𑀓𑁂;

𑀯𑀺𑀳𑀸𑀭𑁂 𑀧𑀝𑀺𑀫𑀸𑀯𑁆𑀳𑁂 𑀘, 𑀫𑀳𑀦𑁆𑀢𑀁 𑀧𑀝𑀺𑀫𑀸𑀖𑀭𑀁.

𑀧𑀢𑀺𑀝𑁆𑀞𑀧𑁂𑀲𑀺 𑀓𑀢𑁆𑀯𑀸𑀦, 𑀩𑀼𑀤𑁆𑀥𑀢𑀢𑁆𑀣 𑀲𑀺𑀮𑀸𑀫𑀬𑀁;

𑀫𑀳𑀦𑁆𑀢𑀦𑀸𑀫𑀁 𑀲𑀧𑁆𑀧𑀜𑁆𑀜𑁄, 𑀇𑀤𑁆𑀥𑀻𑀳𑀺 𑀯𑀺𑀬 𑀦𑀺𑀫𑁆𑀫𑀺𑀢𑀁.

𑀲𑀸𑀮𑀯𑀸𑀡𑀜𑁆𑀘 𑀓𑀸𑀭𑁂𑀲𑀺, 𑀯𑀺𑀳𑀸𑀭𑀁 𑀅𑀢𑁆𑀢𑀦𑀸𑀫𑀓𑀁,

𑀧𑀭𑀺𑀯𑁂𑀡𑀯𑀺𑀳𑀸𑀭𑀜𑁆𑀘, 𑀢𑀣𑀸 𑀓𑀸𑀚𑀭𑀕𑀸𑀫𑀓𑀁.

𑀦𑀯𑀓𑀫𑁆𑀫𑀸𑀦𑀺 𑀓𑀸𑀭𑁂𑀢𑁆𑀯𑀸, 𑀥𑀫𑁆𑀫𑀲𑀸𑀮𑀯𑀺𑀳𑀸𑀭𑀓𑁂;

𑀲𑀬𑀁 𑀯𑀘𑁆𑀘𑀓𑀼𑀝𑀻 𑀏𑀲, 𑀢𑀢𑁆𑀣 𑀲𑁄𑀥𑁂𑀲𑀺 𑀩𑀼𑀤𑁆𑀥𑀺𑀫𑀸.

𑀉𑀘𑁆𑀘𑀺𑀝𑁆𑀞𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀪𑁄𑀚𑀦𑀁 𑀧𑀭𑀺𑀪𑀼𑀜𑁆𑀚𑀺𑀬;

𑀫𑀡𑁆𑀟𑀕𑀸𑀫𑀜𑁆𑀘 𑀲𑀗𑁆𑀖𑀲𑁆𑀲, 𑀕𑀸𑀫𑀁’𑀤𑀸𑀲𑀺 𑀫𑀲𑀸𑀤𑀯𑀸.

𑀧𑀼𑀜𑁆𑀜𑀸𑀦𑁂’𑀢𑀸𑀦𑀺𑀘𑀜𑁆𑀜𑀸𑀦𑀺, 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀤𑀺𑀯𑀗𑁆𑀕𑀢𑁂;

𑀆𑀲𑀻 𑀢𑀲𑁆𑀲𑀸’𑀦𑀼𑀚𑁄 𑀢𑀢𑁆𑀣, 𑀲𑀸𑀫𑀺 𑀤𑀧𑁆𑀧𑀼𑀮𑀦𑀸𑀫𑀓𑁄.

𑀇𑀲𑁆𑀲𑁂𑀭𑀁 𑀢𑀢𑁆𑀣 𑀯𑀢𑁆𑀢𑁂𑀲𑀺, 𑀲𑀫𑁆𑀧𑀫𑀤𑁆𑀤𑀺𑀬 𑀲𑀢𑁆𑀢 𑀯𑁄;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀦𑀺𑀲𑁆𑀲𑀗𑁆𑀓𑀁 𑀭𑁄𑀳𑀡𑀁 𑀅𑀕𑀸.

𑀢𑀲𑁆𑀲 𑀢𑀼𑀝𑁆𑀞𑁄 𑀚𑀦𑁄 𑀆𑀳, 𑀫𑀳𑀸𑀲𑀸𑀫𑀻𑀢𑀺 𑀏𑀲𑀦𑁄;

𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀮𑁄𑀓𑁄-𑀫𑀳𑀸𑀲𑀸𑀫𑀻𑀢𑀺 𑀯𑁄𑀳𑀭𑀺.

𑀲𑀼𑀢𑁆𑀯𑀸𑀦 𑀢𑀁 𑀲𑀺𑀮𑀸𑀤𑀸𑀞𑁄, 𑀦𑀭𑀺𑀦𑁆𑀤𑁄 𑀲𑀓𑀥𑀻𑀢𑀭𑀁;

𑀢𑀲𑁆𑀲 𑀧𑀸𑀤𑀸𑀲𑀺 𑀲𑀦𑁆𑀢𑀼𑀝𑁆𑀞𑁄, 𑀕𑀼𑀡𑁂𑀳𑀺 𑀩𑀳𑀼𑀓𑁂𑀳𑀺 𑀘.

𑀬𑀼𑀚𑀭𑀸𑀚𑀢𑁆𑀢𑀫𑀲𑁆𑀲𑀸𑀤𑀸, 𑀭𑀚𑁆𑀚𑀬𑁄𑀕𑁆𑀕𑁄𑀢𑀺 𑀫𑀸𑀦𑀺𑀢𑀼𑀁;

𑀫𑀸𑀡𑀯𑀫𑁆𑀫𑀸𑀤𑀬𑁄 𑀢𑀲𑁆𑀲, 𑀧𑀼𑀢𑁆𑀢𑀸 𑀆𑀲𑀼𑀁 𑀫𑀳𑀸𑀲𑀬𑀸.

𑀧𑀸𑀲𑀸𑀡𑀤𑀺𑀧𑀯𑀸𑀲𑀺𑀲𑁆𑀲, 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀻𑀤𑀺𑀢𑁆𑀯𑀸, 𑀢𑀲𑁆𑀫𑀺𑀁 𑀢𑀁 𑀩𑀳𑀼𑀫𑀸𑀦𑀺𑀢𑀼𑀁.

𑀯𑀺𑀳𑀸𑀭𑀁 𑀭𑁄𑀳𑀡𑁂 𑀓𑀢𑁆𑀯𑀸, 𑀢𑀲𑁆𑀲 𑀧𑀸𑀤𑀸𑀲𑀺 𑀲𑁄𑀧𑀺 𑀢𑀁;

𑀘𑀸𑀢𑀼𑀤𑁆𑀤𑀺𑀲𑀺𑀬𑀲𑀗𑁆𑀖𑀲𑁆𑀲, 𑀧𑀭𑀺𑀪𑁄𑀕𑀸𑀬 𑀯𑀺𑀲𑁆𑀲𑀚𑁆𑀚𑀺.

𑀅𑀫𑁆𑀩𑀫𑀸𑀮𑀸 𑀯𑀺𑀳𑀸𑀭𑀸𑀤𑀺, 𑀯𑀺𑀳𑀸𑀭𑁂 𑀓𑀸𑀭𑀬𑀺 𑀩𑀳𑀽;

𑀔𑀤𑀺𑀭𑀸𑀮𑀺𑀯𑀺𑀳𑀸𑀭𑀜𑁆𑀘, 𑀓𑀢𑁆𑀯𑀸 𑀤𑁂𑀯 𑀫𑀧𑀽𑀚𑀬𑀺.

𑀧𑀸𑀲𑀸𑀤𑀫𑀦𑀼𑀭𑀸𑀭𑀸𑀫𑀁, 𑀫𑀼𑀢𑁆𑀢𑁄𑀮𑀫𑁆𑀩𑀁 𑀲𑀼𑀚𑀺𑀡𑁆𑀡𑀓𑀁;

𑀲𑀻𑀭𑀺𑀯𑀟𑁆𑀠𑀜𑁆𑀘 𑀧𑀸𑀲𑀸𑀤𑀁, 𑀢𑀣𑀸 𑀢𑀓𑁆𑀓𑀫𑁆𑀩𑀺𑀮𑀁 𑀧𑀭𑀁.

𑀲𑁄𑀥𑁂𑀢𑁆𑀯𑀸 𑀪𑀺𑀓𑁆𑀔𑀯𑁄 𑀢𑀢𑁆𑀣, 𑀤𑁆𑀯𑀢𑁆𑀢𑀺𑀁𑀲 𑀧𑀭𑀺𑀯𑀸𑀲𑀬𑀺;

𑀲𑀩𑁆𑀩𑀧𑀘𑁆𑀘𑀬𑀤𑀸𑀦𑁂𑀦, 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀫𑀳𑀻𑀫𑀢𑀺.

𑀅𑀤𑀸 ¶ 𑀓𑁂𑀯𑀝𑁆𑀝𑀕𑀫𑁆𑀪𑀻𑀭𑀁, 𑀕𑀸𑀫𑀁 𑀦𑀸𑀕𑀯𑀺𑀳𑀸𑀭𑀓𑁂;

𑀢𑀣𑀸 𑀭𑀸𑀚𑀯𑀺𑀳𑀸𑀭𑀲𑁆𑀲, 𑀕𑁄𑀦𑁆𑀦𑀕𑀸𑀫𑀁 𑀲𑀫𑀸𑀤𑀺𑀬𑀺.

𑀅𑀤𑀸 𑀢𑀻𑀲𑀯𑀺𑀳𑀸𑀭𑀲𑁆𑀲, 𑀢𑀣𑀸𑀓𑀦𑁆𑀢𑀺𑀓𑀧𑀩𑁆𑀩𑀓𑀁;

𑀘𑀺𑀢𑁆𑀢𑀮𑀧𑀩𑁆𑀩𑀢𑀲𑁆𑀲𑀸’𑀤𑀸, 𑀕𑀸𑀫𑀁 𑀲𑁄 𑀕𑁄𑀦𑁆𑀦𑀯𑀺𑀝𑁆𑀞𑀺𑀓𑀁.

𑀤𑀢𑁆𑀯𑀸 𑀭𑀺𑀬𑀸𑀓𑀭𑀲𑁆𑀲𑁂𑀲, 𑀕𑀸𑀫𑀁 𑀲𑁄𑀫𑀸𑀮𑀯𑀢𑁆𑀣𑀼𑀓𑀁;

𑀅𑀓𑀸𑀲𑀺 𑀧𑀝𑀺𑀫𑀸𑀕𑁂𑀳𑀁, 𑀢𑀣𑁂𑀯 𑀲𑀼𑀫𑀦𑁄𑀳𑀭𑀁.

𑀢𑀢𑁆𑀭𑀝𑁆𑀞𑀲𑁆𑀲 𑀚𑀺𑀦𑀲𑁆𑀲𑀸’𑀓𑀸, 𑀉𑀡𑁆𑀡𑀮𑁄𑀫𑀁 𑀫𑀳𑀕𑁆𑀖𑀺𑀬𑀁;

𑀳𑁂𑀫𑀧𑀝𑁆𑀝𑀜𑁆𑀘 𑀓𑀸𑀭𑁂𑀲𑀺, 𑀲𑀩𑁆𑀩𑀁 𑀧𑀽𑀚𑀸𑀯𑀺𑀥𑀺𑀁 𑀲’𑀓𑀸.

𑀘𑁂𑀢𑀺𑀬𑁂 𑀧𑀭𑀺𑀚𑀺𑀡𑁆𑀡𑁂 𑀲𑁄, 𑀲𑀼𑀥𑀸𑀓𑀫𑁆𑀫𑁂𑀦 𑀭𑀜𑁆𑀚𑀬𑀺;

𑀢𑀺𑀧𑀜𑁆𑀘𑀳𑀢𑁆𑀣𑀁 𑀓𑀸𑀭𑁂𑀲𑀺, 𑀫𑁂𑀢𑁆𑀢𑁂𑀬𑁆𑀬𑀁 𑀲𑀼𑀕𑀢𑀁 𑀧𑀭𑀁.

𑀏𑀯𑀫𑀸𑀤𑀺𑀦𑀺 𑀧𑀼𑀜𑁆𑀜𑀸𑀦𑀺, 𑀅𑀧𑁆𑀧𑀫𑁂𑀬𑁆𑀬𑀸𑀦𑀺 𑀲𑁄 𑀯𑀺𑀪𑀽;

𑀅𑀓𑀸𑀲𑀺 𑀘 𑀲𑀬𑀁 𑀲𑀸𑀥𑀼, 𑀧𑀭𑀺𑀯𑀸𑀭𑁂𑀳𑀻 𑀓𑀸𑀭𑀬𑀺.

𑀧𑀭𑀺𑀯𑀸𑀭𑀸 𑀘 𑀢𑀲𑁆𑀲𑀸𑀲𑀼𑀁, 𑀩𑀳𑀽𑀧𑀼𑀜𑁆𑀜𑀓𑀭𑀸 𑀦𑀭𑀸;

𑀯𑀺𑀳𑀸𑀭𑀸 𑀦𑁂𑀓𑀓𑀸 𑀆𑀲𑀼𑀁, 𑀓𑀢𑀸 𑀢𑁂𑀳𑀺 𑀲𑀧𑁆𑀧𑀘𑁆𑀘𑀬𑀸.

𑀓𑀤𑀸𑀘𑀺 𑀫𑀕𑁆𑀕𑀁 𑀕𑀘𑁆𑀙𑀁 𑀲𑁄, 𑀅𑀭𑀜𑁆𑀜𑀫𑁆𑀳𑀺 𑀅𑀕𑀸𑀫𑀓𑁂;

𑀲𑁂𑀦𑀁 𑀲𑀁𑀯𑀺𑀤𑀳𑀺𑀢𑁆𑀯𑀸𑀦, 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀭𑀢𑁆𑀢𑀺𑀬𑀁.

𑀲𑀼𑀦𑀳𑀸𑀢𑀯𑀺𑀮𑁆𑀮𑀺𑀢𑁆𑀢𑁄 𑀲𑁄, 𑀲𑀼𑀪𑀼𑀢𑁆𑀢𑁄𑀲𑀬𑀦𑁂 𑀲𑀼𑀔𑁂;

𑀦𑀺𑀧𑀦𑁆𑀦𑁂𑀲𑀼 𑀖𑀭𑁂 𑀭𑀫𑁆𑀫𑁂, 𑀦𑀺𑀤𑁆𑀤𑀸𑀬𑀺𑀢𑀼𑀫𑀼𑀧𑀓𑁆𑀓𑀫𑀺.

𑀅𑀮𑀪𑀦𑁆𑀢𑁄 𑀢𑀤𑀸 𑀦𑀺𑀤𑁆𑀤𑀁, 𑀓𑀺𑀦𑁆𑀦𑀼 𑀔𑁄 𑀇𑀢𑀺 𑀓𑀸𑀭𑀡𑀁;

𑀧𑀯𑀢𑁆𑀢𑀺𑀁 𑀉𑀧𑀥𑀸𑀭𑁂𑀦𑁆𑀢𑁄, 𑀤𑀺𑀯𑀲𑁂 𑀲𑀩𑁆𑀩𑀫𑀢𑁆𑀢𑀦𑁄.

𑀅𑀤𑀺𑀲𑁆𑀯𑀸 𑀓𑀸𑀭𑀡𑀁 𑀅𑀦𑁆𑀢𑁄, 𑀅𑀯𑀲𑁆𑀲𑀁 𑀩𑀳𑀺 𑀳𑁂𑀲𑁆𑀲𑀢𑀺;

𑀇𑀢𑀺 𑀘𑀺𑀦𑁆𑀢𑀺𑀬 𑀬𑁄𑀚𑁂𑀲𑀺, 𑀫𑀦𑀼𑀲𑁆𑀲𑁂𑀢𑀁 𑀕𑀯𑁂𑀲𑀺𑀢𑀼𑀁.

𑀏𑀯𑀫𑀸𑀳 𑀘 𑀦𑀺𑀲𑁆𑀲𑀗𑁆𑀓𑀁, 𑀅𑀬𑁆𑀬𑀓𑀸 𑀫𑀫 𑀭𑀢𑁆𑀢𑀺𑀬𑀁;

𑀢𑁂𑀫𑁂𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀞𑀺𑀢𑀸 𑀆𑀦𑁂𑀣 𑀢𑁂 𑀇𑀢𑀺.

𑀢𑁂𑀧𑀺 𑀕𑀦𑁆𑀢𑁆𑀯𑀸 𑀕𑀯𑁂𑀲𑀦𑁆𑀢𑀸, 𑀤𑀻𑀧𑀳𑀢𑁆𑀣𑀸 𑀫𑀳𑀸𑀚𑀦𑀸;

𑀫𑀳𑀸𑀕𑀸𑀫𑀸’𑀕𑀢𑁂 𑀪𑀺𑀓𑁆𑀔𑀽, 𑀭𑀼𑀓𑁆𑀔𑀫𑀽𑀮𑀕𑀢𑁂 𑀢𑀤𑀸.

𑀢𑁂 𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀭𑀜𑁆𑀜𑁄, 𑀆𑀭𑁄𑀘𑁂𑀲𑀼𑀁 𑀧𑀥𑀸𑀯𑀺𑀲𑁄;

𑀤𑀺𑀲𑁆𑀯𑀸 𑀘 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄, 𑀦𑁂𑀢𑁆𑀯𑀸 𑀯𑀸𑀲𑀖𑀭𑀁 𑀲𑀓𑀁.

𑀦𑀺𑀘𑁆𑀘𑀤𑀸𑀦𑀸𑀬 𑀪𑀺𑀓𑁆𑀔𑀽𑀦𑀁, 𑀞𑀧𑀺𑀢𑁂 𑀭𑀢𑁆𑀢𑀘𑀻𑀯𑀭𑁂;

𑀢𑁂𑀲𑀁 𑀤𑀢𑁆𑀯𑀸𑀦 𑀢𑀺𑀦𑁆𑀢𑀸𑀦𑀺, 𑀘𑀻𑀯𑀭𑀸𑀦𑀺 𑀲𑀫𑀸𑀤𑀺𑀬.

𑀲𑀼𑀓𑁆𑀔𑀸𑀧𑀺𑀬 ¶ 𑀘 𑀓𑀢𑁆𑀯𑀸𑀦, 𑀧𑀸𑀤𑀥𑁄𑀯𑀦𑀓𑀸𑀤𑀺𑀓𑀁;

𑀦𑀺𑀲𑀻𑀤𑀸𑀧𑀺𑀬 𑀢𑁂 𑀲𑀩𑁆𑀩𑁂, 𑀲𑀬𑀦𑁂 𑀲𑀸𑀥𑀼 𑀲𑀦𑁆𑀣𑀢𑁂.

𑀪𑁂𑀲𑀚𑁆𑀚𑀁 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀲𑀬𑀫𑁂𑀯𑁄’𑀧𑀦𑀸𑀫𑀺𑀬;

𑀧𑀘𑁆𑀘𑀽𑀲𑁂𑀧𑀺 𑀘 𑀓𑀢𑁆𑀯𑀸𑀦, 𑀓𑀢𑁆𑀢𑀩𑁆𑀩𑀁 𑀪𑁄𑀚𑀦𑀸𑀤𑀺𑀓𑀁.

𑀤𑀢𑁆𑀯𑀸 𑀓𑀧𑁆𑀧𑀺𑀬 𑀓𑀸𑀭𑁂’𑀣, 𑀯𑀺𑀲𑁆𑀲𑀚𑁆𑀚𑁂𑀲𑀺 𑀬𑀣𑀸𑀭𑀼𑀘𑀺𑀁;

𑀏𑀯𑀁 𑀧𑀼𑀜𑁆𑀜𑀭𑀢𑀲𑁆𑀲𑁂𑀯, 𑀢𑀲𑁆𑀲𑀸’𑀲𑀺 𑀤𑀺𑀯𑀲𑀁 𑀕𑀢𑀁.

𑀏𑀯𑀁 𑀧𑀼𑀜𑁆𑀜𑀧𑀭𑁂𑀢𑀲𑁆𑀫𑀺𑀁, 𑀯𑀲𑀫𑀸𑀦𑁂 𑀦𑀭𑀼𑀢𑁆𑀢𑀫𑁂;

𑀭𑀝𑁆𑀞𑀁 𑀚𑀦𑀧𑀤𑀁 𑀲𑀩𑁆𑀩𑀁, 𑀬𑁄𑀚𑁂𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑁂𑀲𑀼.

𑀫𑀸𑀡𑁄 𑀧𑀸𑀘𑀺𑀦𑀤𑁂𑀲𑀫𑁆𑀳𑀺, 𑀯𑀲𑀦𑁆𑀢𑁄 𑀩𑀮𑀲𑀗𑁆𑀕𑀳𑀁;

𑀓𑀢𑁆𑀯𑀸𑀦 𑀧𑀺𑀢𑀼𑀦𑁄 𑀲𑁂𑀦𑀁, 𑀥𑀦𑀁 𑀘𑁂𑀯𑀸 𑀳𑀭𑀸𑀧𑀺𑀬.

𑀓𑀸𑀢𑀼𑀁 𑀲𑀗𑁆𑀕𑀸𑀫𑀫𑀸𑀕𑀜𑁆𑀙𑀺, 𑀢𑀺𑀧𑀼𑀘𑀼𑀮𑁆𑀮𑀲𑀕𑀸𑀫𑀓𑀁;

𑀤𑀸𑀞𑁄𑀧𑀢𑀺𑀲𑁆𑀲𑁄 𑀢𑀁 𑀲𑀼𑀢𑁆𑀯𑀸, 𑀢𑀫𑁆𑀩𑀮𑀁𑀕𑀸 𑀫𑀳𑀸𑀩𑀮𑁄.

𑀢𑀢𑁆𑀣𑀸’𑀓𑀁𑀲𑀼 𑀫𑀳𑀸𑀬𑀼𑀤𑁆𑀥𑀁, 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀢𑀸;

𑀬𑁄𑀥𑀸 𑀤𑀸𑀞𑁄 𑀧𑀢𑀺𑀲𑁆𑀲𑀲𑁆𑀲, 𑀫𑀸𑀡𑀁 𑀲𑀗𑁆𑀕𑀁𑀯 𑀫𑀸𑀭𑀬𑀼𑀁.

𑀢𑀁 𑀲𑀼𑀢𑁆𑀯𑀸 𑀤𑀧𑁆𑀧𑀼𑀮𑁄 𑀲𑁄𑀧𑀺, 𑀲𑁄𑀓𑀲𑀮𑁆𑀮𑀳𑀢𑁄 𑀫𑀭𑀺;

𑀲𑀢𑁆𑀢𑀸𑀳 𑀫𑀦𑀼𑀭𑀸𑀥𑀫𑁆𑀳𑀺, 𑀯𑀲𑀁 𑀭𑀚𑁆𑀚𑀫𑀓𑀸𑀭𑀬𑀺.

𑀭𑁄𑀳𑀡𑁂 𑀢𑀻𑀡𑀺 𑀯𑀲𑁆𑀲𑀸𑀦𑀺, 𑀏𑀲 𑀭𑀚𑁆𑀚𑀫𑀓𑀸𑀭𑀬𑀺;

𑀢𑀲𑁆𑀫𑀸 𑀢𑀲𑁆𑀲 𑀓𑀣𑀸 𑀆𑀲𑀺, 𑀭𑁄𑀳𑀡𑀫𑁆𑀳𑀺 𑀇𑀥𑀸𑀧𑀺 𑀘.

𑀓𑀺𑀘𑁆𑀙𑁂𑀦 𑀮𑀤𑁆𑀥𑀸𑀯 𑀦𑀭𑁂𑀦 𑀪𑁄𑀕𑀸;

𑀆𑀲𑀼𑀁 𑀔𑀡𑁂 𑀯𑀺𑀚𑁆𑀚𑀼𑀮𑀢𑁄𑀧 𑀪𑁄𑀕𑀸,

𑀓𑁄 𑀩𑀼𑀤𑁆𑀥𑀺𑀫𑀸 𑀢𑁂𑀲𑀼 𑀭𑀢𑀺𑀁 𑀓𑀭𑁂𑀬𑁆𑀬.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀢𑁂𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀘𑀢𑀼𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀅𑀘𑁆𑀘𑀬𑁂 ¶ 𑀳𑀢𑁆𑀣𑀤𑀸𑀞𑀲𑁆𑀲, 𑀅𑀕𑁆𑀕𑀩𑁄𑀥𑀺𑀓𑀼𑀫𑀸𑀭𑀓𑁄;

𑀓𑀡𑀺𑀝𑁆𑀞𑁄 𑀭𑀸𑀚𑀺𑀦𑁄 𑀆𑀲𑀺, 𑀲𑀺𑀭𑀺𑀲𑀗𑁆𑀖𑀸𑀤𑀺 𑀩𑁄𑀥𑀺𑀓𑁄.

𑀥𑀫𑁆𑀫𑀭𑀸𑀚𑀸 𑀅𑀬𑀁 𑀆𑀲𑀺, 𑀲𑀫𑁆𑀫𑀸 𑀤𑀲𑁆𑀲𑀦𑀲𑀜𑁆𑀜𑀼𑀢𑁄;

𑀢𑀲𑁆𑀫𑀸 𑀲𑁄 𑀧𑀼𑀜𑁆𑀜𑀓𑀫𑁆𑀫𑀸𑀦𑀺, 𑀅𑀧𑁆𑀧𑀫𑁂𑀬𑁆𑀬𑀸𑀦𑀺 𑀯𑀢𑁆𑀢𑀬𑀺.

𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀦𑀁, 𑀪𑀢𑁆𑀢𑀕𑁆𑀕𑀫𑀯𑀮𑁄𑀓𑀬𑀺;

𑀫𑀳𑀸𑀧𑀸𑀴𑀺𑀜𑁆𑀘 𑀯𑀟𑁆𑀠𑁂𑀲𑀺, 𑀫𑀸𑀖𑀸𑀢𑀜𑁆𑀘𑁂𑀯 𑀓𑀸𑀭𑀬𑀺.

𑀞𑀸𑀦𑀦𑁆𑀢𑀭𑀜𑁆𑀘 𑀤𑀸𑀧𑁂𑀲𑀺, 𑀬𑀣𑀸𑀭𑀳 𑀫𑀦𑀸𑀮𑀬𑁄;

𑀲𑀺𑀧𑀕𑁄𑀢𑁆𑀢𑀸𑀤𑀺𑀬𑁄𑀕𑁆𑀕𑁂𑀳𑀺, 𑀲𑀁𑀕𑀢𑁂𑀳𑀺 𑀘 𑀲𑀁𑀕𑀳𑀺.

𑀬𑀢𑁆𑀣 𑀓𑀢𑁆𑀣𑀘𑀺 𑀤𑀺𑀲𑁆𑀯𑀸𑀧𑀺, 𑀪𑀺𑀓𑁆𑀔𑀯𑁄 𑀲𑁄 𑀫𑀳𑀸𑀫𑀢𑀺;

𑀲𑀓𑁆𑀓𑀢𑁆𑀯𑀸 𑀲𑁄𑀪𑀡𑀸𑀧𑁂𑀲𑀺, 𑀧𑀭𑀺𑀢𑁆𑀢𑀁 𑀲𑀸𑀲𑀦𑁄𑀕𑀥𑀁.

𑀣𑁂𑀭𑀁 𑀲𑁄 𑀉𑀧𑀲𑀗𑁆𑀓𑀫𑁆𑀫, 𑀦𑀸𑀕𑀲𑀸𑀮𑀦𑀺𑀯𑀸𑀲𑀺𑀦𑀁;

𑀤𑀸𑀞𑀸𑀲𑀺𑀯𑀁 𑀫𑀳𑀸𑀧𑀜𑁆𑀜𑀁, 𑀲𑀻𑀮𑀯𑀦𑁆𑀢𑀁 𑀩𑀳𑀼𑀲𑁆𑀲𑀼𑀢𑀁.

𑀲𑀓𑁆𑀓𑀘𑁆𑀘 𑀦𑀁 𑀢𑀢𑁄 𑀲𑀼𑀢𑁆𑀯𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀥𑀫𑁆𑀫𑁂’𑀢𑀻𑀯𑀧𑀲𑀻𑀤𑀺𑀢𑁆𑀯𑀸, 𑀲𑀩𑁆𑀩𑀲𑀦𑁆𑀢𑀺𑀓𑀭𑁄 𑀇𑀢𑀺.

𑀲𑀼𑀢𑁆𑀯𑀸 𑀣𑁂𑀭𑀺𑀬𑀯𑀸𑀤𑀸𑀦𑀁, 𑀧𑀼𑀩𑁆𑀩𑀜𑀸𑀢𑀻𑀦𑀫𑀢𑁆𑀢𑀦𑁄;

𑀧𑀸𑀧𑀸𑀦𑀁 𑀤𑀼𑀝𑁆𑀞𑀘𑀺𑀢𑁆𑀢𑀸𑀦𑀁, 𑀅𑀧𑀓𑀸𑀭𑁂 𑀓𑀢𑁂 𑀩𑀳𑀽.

𑀯𑀺𑀳𑀸𑀭𑁂 𑀧𑀭𑀺𑀯𑁂𑀡𑁂 𑀘, 𑀚𑀺𑀡𑁆𑀡𑁂𑀧𑀸𑀓𑀢𑀺𑀓𑁂 𑀅𑀓𑀸;

𑀪𑁄𑀕𑀕𑀸𑀫𑁂 𑀘 𑀤𑀸𑀧𑁂𑀲𑀺, 𑀢𑀢𑁆𑀣 𑀢𑀢𑁆𑀣 𑀩𑀳𑀽𑀤𑀬𑁂.

𑀯𑀺𑀘𑁆𑀙𑀺𑀦𑁆𑀦𑀧𑀘𑁆𑀘𑀬𑁂 𑀘𑀸𑀓𑀸, 𑀢𑀤𑀸𑀢𑁆𑀬𑀁 𑀓𑀼𑀭𑀺𑀢𑁂 𑀯𑀺𑀬;

𑀤𑀸𑀲𑀓𑁂𑀧𑀺 𑀘 𑀲𑀗𑁆𑀖𑀲𑁆𑀲, 𑀬𑀣𑀸𑀞𑀸𑀦𑁂 𑀞𑀧𑀸𑀧𑀬𑀺.

𑀧𑀥𑀸𑀦𑀖𑀭 𑀫𑁂𑀢𑀲𑁆𑀲, 𑀣𑁂𑀭𑀲𑁆𑀲’𑀓𑀸𑀲𑀦𑀸𑀫𑀓𑀁;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀲𑁄’𑀧𑀺, 𑀲𑀗𑁆𑀖𑀲𑁆𑀲𑀸’𑀤𑀸 𑀫𑀳𑀸𑀫𑀢𑀻.

𑀪𑁄𑀕𑀕𑀸𑀫𑁂 𑀘 𑀢𑀲𑁆𑀲𑀸’𑀤𑀸, 𑀪𑀭𑀢𑁆𑀢𑀸𑀮𑀁 𑀓𑀺𑀳𑀺𑀫𑁆𑀩𑀺𑀮𑀁;

𑀓𑀢𑀓𑀜𑁆𑀘 𑀢𑀼𑀮𑀸𑀥𑀸𑀭𑀁, 𑀅𑀦𑁆𑀥𑀓𑀸𑀭𑀓𑀫𑁂𑀯 𑀘.

𑀅𑀦𑁆𑀥𑀓𑀸𑀭𑀁 ¶ 𑀅𑀦𑁆𑀢𑀼𑀭𑁂𑀴𑀺𑀁, 𑀩𑀸𑀮𑀯𑀁 𑀤𑁆𑀯𑀸𑀭𑀦𑀸𑀬𑀓𑀁;

𑀫𑀳𑀸𑀦𑀺𑀓𑀟𑁆𑀠𑀺𑀓𑀜𑁆𑀘𑁂𑀯, 𑀧𑁂𑀴𑀳𑀸𑀴𑀁 𑀢𑀣𑀸𑀧𑀭𑀁.

𑀏𑀢𑁂 𑀅𑀜𑁆𑀜𑁂 𑀘 𑀲𑁄 𑀤𑀢𑁆𑀯𑀸, 𑀪𑁄𑀕𑀕𑀸𑀫𑁂 𑀦𑀭𑀺𑀲𑁆𑀲𑀭𑁄;

𑀤𑀸𑀲𑀺 𑀆𑀭𑀸𑀫𑀺𑀓𑁂 𑀘𑁂𑀯, 𑀅𑀢𑁆𑀢𑀦𑁄 𑀓𑀺𑀭 𑀜𑀸𑀢𑀓𑁂.

𑀢𑀣𑀸 𑀤𑁆𑀯𑀺𑀦𑁆𑀦𑀁 𑀦𑀺𑀓𑀸𑀬𑀸𑀦𑀁, 𑀯𑀺𑀳𑀸𑀭𑁂 𑀫𑀦𑁆𑀤𑀧𑀘𑁆𑀘𑀬𑁂;

𑀤𑀺𑀲𑁆𑀯𑀸𑀧𑀺 𑀘 𑀲𑀼𑀢𑁆𑀯𑀸 𑀯𑀸, 𑀪𑁄𑀕𑀕𑀸𑀫𑁂 𑀩𑀳𑀽 𑀅𑀤𑀸.

𑀩𑀳𑀼𑀦𑀸 𑀓𑀺𑀦𑁆𑀢𑀼𑀯𑀼𑀢𑁆𑀢𑁂𑀦, 𑀦𑀺𑀓𑀸𑀬𑁂𑀲𑀼’𑀧𑀺 𑀢𑀻𑀲𑀼’𑀧𑀺;

𑀅𑀤𑀸 𑀕𑀸𑀫𑀲𑀳𑀲𑁆𑀲𑀁 𑀲𑁄, 𑀩𑀳𑀼𑀧𑁆𑀧𑀸𑀤𑀁 𑀦𑀺𑀭𑀸𑀓𑀼𑀮𑀁.

𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑁄 𑀢𑀺𑀡𑁆𑀡𑀁, 𑀭𑀢𑀦𑀸𑀦𑀁 𑀕𑀼𑀡𑁂 𑀯𑀭𑁂;

𑀏𑀓𑀸𑀯𑀮𑀺𑀁 𑀕𑀳𑁂𑀢𑁆𑀯𑀸𑀦, 𑀅𑀓𑁆𑀔𑀫𑀸𑀮 𑀫𑀓𑀸 𑀓𑀺𑀭.

𑀏𑀯𑀁 𑀲𑀩𑁆𑀩𑀧𑁆𑀧𑀬𑁄𑀕𑁂𑀳𑀺, 𑀲𑁄’𑀳𑀼 𑀥𑀫𑁆𑀫𑀧𑀭𑀸𑀬𑀦𑁄;

𑀲𑀩𑁆𑀩𑁂 𑀢𑀫𑀦𑀼𑀲𑀺𑀓𑁆𑀔𑀦𑁆𑀢𑀸, 𑀳𑁂𑀲𑀼 𑀥𑀫𑁆𑀫𑀓𑀭𑀸 𑀦𑀭𑀸.

𑀤𑀫𑀺𑀴𑁄 𑀧𑁄𑀢𑁆𑀣𑀓𑀼𑀝𑁆𑀞𑀯𑁄, 𑀢𑀲𑁆𑀲 𑀓𑀫𑁆𑀫𑀓𑀭𑁄 𑀢𑀤𑀸;

𑀫𑀸𑀝𑀫𑁆𑀩𑀺𑀬𑀯𑁆𑀳𑀁 𑀓𑀸𑀭𑁂𑀲𑀺, 𑀧𑀥𑀸𑀦𑀖𑀭𑀫𑀩𑁆𑀪𑀼𑀢𑀁.

𑀩𑀽𑀓𑀓𑀮𑁆𑀮𑁂 𑀅𑀫𑁆𑀩𑀯𑀸𑀧𑀺𑀁, 𑀢𑀦𑁆𑀢𑀯𑀸𑀬𑀺𑀓𑀘𑀸𑀝𑀺𑀓𑀁;

𑀕𑀸𑀫𑀁 𑀦𑀺𑀝𑁆𑀞𑀺𑀮𑀯𑁂𑀝𑁆𑀞𑀺𑀜𑁆𑀘, 𑀢𑀲𑁆𑀲𑀸’𑀤𑀸 𑀲𑁄 𑀲𑀤𑀸 𑀲𑀓𑀁.

𑀓𑀧𑁆𑀧𑀽𑀭𑀧𑀭𑀺𑀯𑁂𑀡𑁂 𑀘, 𑀓𑀼𑀭𑀼𑀦𑁆𑀤𑀧𑀺𑀮𑁆𑀮𑀓𑁂 𑀢𑀣𑀸;

𑀫𑀳𑀸𑀭𑀸𑀚𑀖𑀭𑁂 𑀘𑁂𑀯, 𑀧𑀸𑀲𑀸𑀤𑁂 𑀲𑁄’𑀯 𑀓𑀸𑀭𑀬𑀺.

𑀅𑀜𑁆𑀜𑀢𑁆𑀣𑀸’𑀤𑀸 𑀢𑀬𑁄 𑀕𑀸𑀫𑁂, 𑀯𑀺𑀳𑀸𑀭𑁂𑀲𑀼 𑀫𑀳𑀸𑀥𑀦𑁄;

𑀧𑁄𑀢𑁆𑀣𑀲𑀸𑀢𑀯𑁆𑀳𑀬𑁄 𑀧𑀜𑁆𑀜𑁄, 𑀯𑀺𑀳𑀸𑀭𑁂 𑀚𑁂𑀢𑀦𑀸𑀫𑀓𑁂.

𑀲𑁂𑀦𑀸𑀧𑀢𑀺𑀭𑀸𑀚𑀦𑀸𑀫𑀁, 𑀧𑀭𑀺𑀯𑁂𑀡𑀁 𑀲𑀫𑀸𑀧𑀬𑀺;

𑀫𑀳𑀸𑀓𑀦𑁆𑀤𑁄 𑀘 𑀤𑀫𑀺𑀴𑁄, 𑀧𑀭𑀺𑀯𑁂𑀡𑀁 𑀲𑀦𑀸𑀫𑀓𑀁.

𑀘𑀼𑀮𑁆𑀮𑀧𑀦𑁆𑀣𑀁 𑀢𑀣𑀸 𑀏𑀓𑁄, 𑀲𑁂𑀳𑀸𑀮𑀉𑀧𑀭𑀸𑀚𑀓𑀁;

𑀉𑀧𑀭𑀸𑀚𑀸 𑀲𑀓𑀸𑀭𑁂𑀲𑀺, 𑀲𑀗𑁆𑀖𑀢𑀺𑀲𑁆𑀲𑁄’𑀧𑀺 𑀭𑀸𑀚𑀺𑀦𑁄.

𑀅𑀜𑁆𑀜𑁂𑀲𑀼 𑀩𑀳𑀯𑁄 𑀆𑀲𑀼𑀁, 𑀯𑀺𑀳𑀸𑀭𑁂 𑀏𑀯𑀫𑀸𑀤𑀺𑀓𑁂;

𑀪𑀲𑁆𑀲 𑀭𑀜𑁆𑀜𑁄’ 𑀦𑀼𑀯𑀢𑁆𑀢𑀦𑁆𑀢𑀸, 𑀏𑀯𑀁 𑀥𑀫𑁆𑀫𑀻𑀳𑀺 𑀧𑀸𑀡𑀺𑀦𑁄.

𑀚𑁂𑀝𑁆𑀞𑀦𑀸𑀫𑀸 ¶ 𑀫𑀳𑀸𑀧𑀼𑀜𑁆𑀜𑀸, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀚𑁂𑀝𑁆𑀞𑀸𑀭𑀸𑀫𑀜𑁆𑀘 𑀓𑀸𑀭𑁂𑀲𑀺, 𑀪𑀺𑀓𑁆𑀔𑀽𑀦𑀻𑀦𑀫𑀼𑀧𑀲𑁆𑀲𑀬𑀁.

𑀢𑀲𑁆𑀲𑀸’𑀤𑀸𑀲𑀺 𑀘 𑀤𑁆𑀯𑁂 𑀕𑀸𑀫𑁂, 𑀧𑀓𑁆𑀓𑀧𑀸𑀲𑀸𑀡𑀪𑀽𑀫𑀺𑀬𑀁;

𑀢𑀫𑁆𑀩𑀼𑀤𑁆𑀥𑀁 𑀪𑁂𑀮𑀕𑀸𑀫𑀜𑁆𑀘, 𑀆𑀭𑀸𑀫𑀺𑀓𑀲𑀢𑀁 𑀢𑀣𑀸.

𑀅𑀓𑀸 𑀫𑀮𑀬𑀭𑀸𑀚𑀸𑀧𑀺, 𑀥𑀸𑀢𑀼𑀕𑁂𑀳𑀁 𑀫𑀳𑀸𑀭𑀳𑀁;

𑀫𑀡𑁆𑀟𑀮𑀕𑀺𑀭𑀺𑀯𑀺𑀳𑀸𑀭𑀫𑁆𑀳𑀺, 𑀘𑁂𑀢𑀺𑀬𑀲𑁆𑀲 𑀫𑀳𑀸𑀥𑀦𑁄.

𑀮𑁄𑀳𑀧𑀸𑀲𑀸𑀤𑀓𑁂 𑀲𑁄’𑀯, 𑀙𑀸𑀤𑁂𑀲𑀺 𑀫𑀚𑁆𑀛𑀓𑀽𑀝𑀓𑀁;

𑀩𑁄𑀥𑀺𑀢𑀺𑀲𑁆𑀲𑀯𑀺𑀳𑀸𑀭𑀜𑁆𑀘, 𑀩𑁄𑀥𑀺𑀢𑀲𑁆𑀲𑁄 𑀫𑀳𑀸𑀬𑀲𑁄.

𑀤𑀻𑀧𑁂 𑀫𑀡𑁆𑀟𑀮𑀺𑀓𑀸 𑀲𑀩𑁆𑀩𑁂, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀩𑀮𑀁;

𑀯𑀺𑀳𑀸𑀭𑁂 𑀧𑀭𑀺𑀯𑁂𑀡𑁂 𑀘, 𑀓𑀸𑀭𑀬𑀺𑀁𑀲𑀼 𑀅𑀦𑀧𑁆𑀧𑀓𑁂.

𑀢𑀲𑁆𑀲 𑀓𑀸𑀮𑁄 𑀦𑀭𑀺𑀦𑁆𑀤𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀫𑀬𑁄 𑀇𑀥;

𑀅𑀢𑀺𑀯𑀺𑀢𑁆𑀣𑀸𑀭𑀪𑀻𑀢𑁂𑀦, 𑀲𑀩𑁆𑀩𑀲𑁄 𑀦 𑀯𑀺𑀘𑀸𑀭𑀺𑀢𑀁.

𑀧𑀼𑀩𑁆𑀩𑀓𑁄𑀧𑀺 𑀓𑀣𑀸𑀫𑀕𑁆𑀕𑁄, 𑀆𑀓𑀼𑀮𑁄 𑀯𑀺𑀬 𑀪𑀸𑀢𑀺𑀫𑁂;

𑀬𑀣𑀸𑀧𑀥𑀸𑀦𑀁 𑀓𑀣𑀺𑀢𑀁, 𑀳𑁂𑀢𑀽𑀦𑀁 𑀉𑀧𑀮𑀓𑁆𑀔𑀡𑀁.

𑀅𑀣𑀸𑀧𑀭𑁂𑀦 𑀓𑀸𑀮𑁂𑀦, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀕𑀢𑁄;

𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑁂𑀲𑀺, 𑀓𑀭𑁄𑀦𑁆𑀢𑁄 𑀧𑀼𑀜𑁆𑀜𑀲𑀜𑁆𑀘𑀬𑀁.

𑀅𑀢𑁂𑀓𑀺𑀘𑁆𑀙𑀺𑀬𑀭𑁄𑀕𑁂𑀦, 𑀲𑀫𑁆𑀨𑀼𑀝𑁆𑀞𑁄 𑀓𑀸𑀮𑀫𑀢𑁆𑀢𑀦𑁄;

𑀫𑀭𑀡𑀲𑁆𑀲 𑀯𑀺𑀤𑀺𑀢𑁆𑀯𑀸𑀦, 𑀢𑀫𑀸𑀳𑀼𑀬𑀫𑀳𑀸𑀚𑀦𑀁.

𑀑𑀯𑀤𑀺𑀢𑁆𑀯𑀸𑀦 𑀥𑀫𑁆𑀫𑁂𑀦, 𑀫𑀭𑀡𑀁 𑀲𑁄 𑀉𑀧𑀸𑀕𑀫𑀺;

𑀫𑀳𑀸𑀚𑀦𑁄 𑀫𑀢𑁂 𑀢𑀲𑁆𑀫𑀺𑀁, 𑀩𑀸𑀴𑁆𑀳𑀲𑁄𑀓𑁄 𑀧𑀭𑁄𑀤𑀺𑀬.

𑀓𑀢𑁆𑀯𑀸 𑀆𑀴𑀳𑀡𑁂 𑀢𑀲𑁆𑀲, 𑀓𑀺𑀘𑁆𑀘𑀁 𑀲𑀩𑁆𑀩𑀫𑀲𑁂𑀲𑀢𑁄;

𑀢𑀲𑁆𑀲𑀸𑀴𑀸𑀳𑀡𑀪𑀲𑁆𑀫𑀫𑁆𑀧𑀺, 𑀓𑀢𑁆𑀯𑀸 𑀪𑁂𑀲𑀚𑁆𑀚𑀫𑀢𑁆𑀢𑀦𑁄.

𑀭𑀸𑀚𑀸 𑀪𑀡𑁆𑀟𑀜𑁆𑀘 𑀢𑀁 𑀲𑀩𑁆𑀩𑀁, 𑀲𑀩𑁆𑀩𑀜𑁆𑀘 𑀩𑀮𑀯𑀸𑀳𑀦𑀁;

𑀲𑀫𑁆𑀫𑀸 𑀆𑀤𑀸𑀬 𑀕𑁄𑀧𑁂𑀢𑁆𑀯𑀸, 𑀦𑀕𑀭𑀁 𑀲𑀫𑀼𑀧𑀸𑀕𑀫𑀺.

𑀏𑀯𑀁 𑀲𑁄𑀴𑀲𑀫𑁂 𑀯𑀲𑁆𑀲𑁂, 𑀭𑀸𑀚𑀸 𑀆𑀲𑀺 𑀤𑀺𑀯𑀗𑁆𑀕𑀢𑁄;

𑀧𑁄𑀢𑁆𑀣𑀓𑀼𑀝𑁆𑀞𑁄𑀧𑀺 𑀤𑀫𑀺𑀴𑁄, 𑀭𑀚𑁆𑀚𑀁 𑀢𑀲𑁆𑀲 𑀯𑀺𑀘𑀸𑀭𑀬𑀺.

𑀉𑀧𑀭𑀸𑀚𑀁 𑀕𑀳𑁂𑀢𑁆𑀯𑀸𑀦, 𑀤𑀸𑀞𑀸𑀲𑀺𑀯𑀁 𑀔𑀺𑀧𑀸𑀧𑀬𑀺;

𑀘𑀸𑀭𑀓𑁄 𑀯𑀺𑀳𑀺𑀢𑀼𑀁 𑀲𑀫𑁆𑀫𑀸, 𑀭𑀓𑁆𑀔𑀸𑀯𑀭𑀡 𑀫𑀸𑀤𑀺𑀲𑀺.

𑀯𑀺𑀦𑀸 𑀭𑀜𑁆𑀜𑀸 𑀦 𑀲𑀓𑁆𑀓𑀸𑀢𑀺, 𑀫𑁂𑀤𑀺𑀦𑀺𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁;

𑀆𑀦𑁂𑀢𑁆𑀯𑀸 𑀤𑀢𑁆𑀢𑀦𑀸𑀫𑀓𑀁, 𑀥𑀦𑀧𑀺𑀝𑁆𑀞𑀧𑁆𑀧𑀥𑀸𑀦𑀓𑀁.

𑀉𑀧𑁆𑀧𑀦𑁆𑀦𑀁 ¶ 𑀭𑀸𑀚𑀯𑀁𑀲𑀫𑁆𑀳𑀺, 𑀭𑀚𑁆𑀚𑁂 𑀢𑀁 𑀅𑀪𑀺𑀲𑀺𑀜𑁆𑀘𑀺𑀬;

𑀢𑀲𑁆𑀲 𑀦𑀸𑀫𑀁 𑀞𑀧𑁂𑀢𑁆𑀯𑀸𑀦, 𑀲𑀬𑀁 𑀲𑀩𑁆𑀩𑀁 𑀯𑀺𑀘𑀸𑀭𑀬𑀺.

𑀤𑀦𑁆𑀢𑁄 𑀲𑁄 𑀥𑀦𑀧𑀺𑀝𑁆𑀞𑀺𑀫𑁆𑀳𑀺, 𑀯𑀺𑀳𑀸𑀭𑀁 𑀲𑀓𑀦𑀸𑀫𑀓𑀁;

𑀓𑀸𑀭𑀬𑀺𑀢𑁆𑀯𑀸𑀦 𑀧𑀼𑀜𑁆𑀜𑀸𑀦𑀺, 𑀅𑀜𑁆𑀜𑀸𑀦𑀺𑀧𑀺 𑀲𑀫𑀸𑀘𑀺𑀦𑀺.

𑀲𑀫𑀓𑀦𑁆𑀢𑀼 𑀲𑁄 𑀞𑀢𑁆𑀯𑀸’𑀯, 𑀯𑀲𑁆𑀲𑀤𑁆𑀯𑀬 𑀫𑀳𑀼𑀫𑀢𑁄;

𑀧𑁄𑀢𑁆𑀣𑀓𑀼𑀝𑁆𑀞𑁄 𑀫𑀢𑁂𑀢𑀲𑁆𑀫𑀺𑀁, 𑀧𑀼𑀦 𑀅𑀜𑁆𑀜𑀫𑁆𑀧𑀺 𑀫𑀸𑀡𑀯𑀁.

𑀳𑀢𑁆𑀣𑀤𑀸𑀞𑀁 𑀲𑀫𑀸𑀳𑀽𑀬, 𑀉𑀡𑁆𑀳𑀸 𑀦𑀕𑀭𑀲𑀫𑁆𑀪𑀯𑀁;

𑀢𑀫𑁆𑀧𑀺 𑀭𑀚𑁆𑀚𑁂 𑀪𑀺𑀲𑀺𑀜𑁆𑀘𑀺𑀢𑁆𑀯𑀸, 𑀬𑀣𑀸 𑀧𑀼𑀩𑁆𑀩𑀁 𑀲𑀬𑀁𑀯𑀲𑀻.

𑀓𑀸𑀴𑀤𑀻𑀖𑀸𑀯𑀺𑀓𑀁 𑀓𑀢𑁆𑀯𑀸, 𑀧𑀥𑀸𑀦𑀖𑀭𑀓𑀁 𑀢𑀣𑀸;

𑀧𑀼𑀜𑁆𑀜𑀫𑀜𑁆𑀜𑀁 𑀙𑀫𑀸𑀲𑁂𑀳𑀺, 𑀲𑁄’𑀧𑀺 𑀫𑀘𑁆𑀘𑀼𑀯𑀲𑀁 𑀕𑀢𑁄.

𑀏𑀯𑀁 𑀯𑀺𑀤𑀺𑀢𑁆𑀯𑀸 𑀩𑀳𑀼𑀧𑀤𑁆𑀤𑀯𑀸𑀦𑀺;

𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀯𑀸𑀳𑀦𑀸𑀦𑀺;

𑀯𑀺𑀳𑀸𑀬 𑀭𑀚𑁆𑀚𑁂𑀲𑀼 𑀭𑀢𑀺𑀁𑀲𑀧𑁆𑀧𑀜𑁆𑀜𑀸;

𑀫𑀦𑀼𑀜𑁆𑀜𑀧𑀼𑀜𑁆𑀜𑀸𑀪𑀺𑀭𑀢𑀸 𑀪𑀯𑁂𑀬𑁆𑀬𑀼𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑀢𑀼𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀭𑀜𑁆𑀜𑁄 𑀢𑀲𑁆𑀲𑀘𑁆𑀘𑀬𑁂 𑀭𑀸𑀚𑀸, 𑀫𑀸𑀡𑀯𑀫𑁆𑀫𑁄 𑀅𑀳𑁄𑀲𑀺 𑀲𑁄;

𑀓𑀺𑀁 𑀕𑁄𑀢𑁆𑀢𑁄 𑀓𑀲𑁆𑀲 𑀧𑀼𑀢𑁆𑀢𑁄 𑀘, 𑀓𑀣𑀁 𑀭𑀚𑁆𑀚𑀫𑀧𑀸𑀧𑀼𑀡𑀺.

𑀫𑀳𑀸𑀲𑀫𑁆𑀫𑀢𑀯𑀁𑀲𑀫𑁆𑀳𑀺, 𑀚𑀸𑀢𑁄 𑀚𑀸𑀢𑀺𑀕𑀼𑀡𑀸𑀯𑀳𑁄;

𑀧𑀼𑀢𑁆𑀢𑁄 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀣𑀽𑀧𑀸𑀭𑀸𑀫𑀲𑁆𑀲 𑀪𑁂𑀤𑀺𑀦𑁄.

𑀥𑀻𑀢𑀸 𑀫𑀮𑀬𑀭𑀸𑀚𑀲𑁆𑀲, 𑀲𑀗𑁆𑀖𑀦𑀸𑀫𑀲𑁆𑀲 𑀭𑀸𑀚𑀺𑀦𑁄;

𑀢𑀁 𑀮𑀪𑀺𑀢𑁆𑀯𑀸 𑀯𑀲𑀁 𑀤𑁂𑀲𑁂, 𑀉𑀢𑁆𑀢𑀭𑁂 𑀮𑀻𑀦𑀯𑀼𑀢𑁆𑀢𑀺𑀓𑁄.

𑀳𑀢𑁆𑀣𑀤𑀸𑀞𑀦𑀭𑀺𑀦𑁆𑀤𑁂𑀦, 𑀢𑀲𑁆𑀫𑀺𑀁 𑀅𑀢𑁆𑀣𑁂𑀯 𑀥𑀸𑀭𑀺𑀢𑁂;

𑀚𑀫𑁆𑀩𑀼𑀤𑀻𑀧𑀫𑀼𑀧𑀸𑀕𑀫𑁆𑀫, 𑀦𑀭𑀲𑀻𑀳𑀁 𑀫𑀳𑀻𑀧𑀢𑀺.

𑀕𑀦𑁆𑀢𑁆𑀯𑀸 𑀯𑀢𑁆𑀯𑀸 ¶ 𑀲𑀓𑀁 𑀦𑀸𑀫𑀁, 𑀲𑁂𑀯𑀺𑀢𑀼𑀁 𑀢𑀫𑀼𑀧𑀓𑁆𑀓𑀫𑀺;

𑀆𑀭𑀸𑀥𑁂𑀲𑀺 𑀘 𑀲𑀩𑁆𑀩𑁂𑀳𑀺, 𑀧𑀬𑁄𑀕𑁂𑀳𑀺 𑀦𑀭𑀸𑀥𑀻𑀧𑀁.

𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀲𑁄𑀳𑀚𑁆𑀚𑀁, 𑀦𑁂𑀢𑁆𑀯𑀸 𑀪𑀭𑀺𑀬𑀫𑀢𑁆𑀢𑀦𑁄;

𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑁂𑀲𑀺, 𑀲𑁂𑀯𑀫𑀸𑀦𑁄 𑀤𑀺𑀯𑀸𑀦𑀺𑀲𑀁.

𑀲𑁄𑀧𑀺 𑀆𑀭𑀸𑀥𑀺𑀢𑁄 𑀢𑁂𑀦, 𑀓𑀡𑁆𑀟𑀼𑀯𑁂𑀝𑁆𑀞𑀺 𑀦𑀭𑀼𑀢𑁆𑀢𑀫𑁄;

𑀲𑀩𑁆𑀩𑀁 𑀦𑁂𑀦𑁆𑀢𑁄𑀯 𑀢𑀁 𑀭𑀚𑁆𑀚𑀁, 𑀫𑀳𑀸𑀪𑁄𑀕𑀫𑀤𑀸𑀧𑀬𑀺.

𑀢𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀪𑀭𑀺𑀬𑀸 𑀲𑀗𑁆𑀖𑀦𑀸𑀫𑀺𑀓𑀸;

𑀘𑀢𑀲𑁆𑀲𑁄 𑀥𑀻𑀢𑀭𑁄 𑀧𑀼𑀢𑁆𑀢𑁂, 𑀘𑀢𑁆𑀢𑀸𑀭𑁄𑀧𑀺 𑀯𑀺𑀚𑀸𑀬𑀣.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸, 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀁 𑀕𑀢𑁄;

𑀲𑀜𑁆𑀘𑀭𑀦𑁆𑀢𑁄 𑀬𑀣𑀸𑀓𑀸𑀫𑀁, 𑀫𑀸𑀡𑀯𑀫𑁆𑀫𑁂𑀦 𑀏𑀓𑀢𑁄.

𑀦𑀸𑀴𑀺𑀓𑁂𑀭𑀁 𑀧𑀺𑀯𑀺𑀢𑁆𑀯𑀸𑀦, 𑀢𑀢𑁆𑀭𑀝𑁆𑀞𑁄𑀯 𑀧𑀺𑀧𑀸𑀲𑀺𑀢𑁄;

𑀫𑀸𑀡𑀯𑀫𑁆𑀫𑀲𑁆𑀲 𑀧𑀸𑀤𑀸𑀲𑀺, 𑀫𑀜𑁆𑀜𑀦𑁆𑀢𑁄 𑀅𑀜𑁆𑀜𑀫𑁂𑀯 𑀢𑀁.

𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺, 𑀲𑀔𑀁 𑀧𑁂𑀲 𑀦𑀭𑀸𑀥𑀺𑀧𑁄;

𑀉𑀘𑁆𑀙𑀺𑀝𑁆𑀞𑀁 𑀦𑀸𑀫 𑀓𑀺𑀁 𑀳𑁄𑀢𑀺, 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄.

𑀢𑀲𑁆𑀫𑀸 𑀬𑀼𑀢𑁆𑀢𑀁 𑀫𑀬𑀸𑀧𑀸𑀢𑀼-𑀫𑀻𑀢𑀺 𑀘𑀺𑀦𑁆𑀢𑀺𑀬 𑀢𑀁 𑀧𑀺𑀯𑀺;

𑀏𑀯𑀁 𑀳𑁄𑀦𑁆𑀢𑀺 𑀫𑀳𑀼𑀲𑁆𑀲𑀸𑀳𑀸, 𑀤𑁂𑀢𑀼𑀓𑀸𑀫𑀸𑀳𑀺 𑀩𑀼𑀤𑁆𑀥𑀺𑀦𑁄.

𑀭𑀸𑀚𑀸𑀧𑀺 𑀤𑀺𑀲𑁆𑀯𑀸 𑀢𑀁 𑀪𑀻𑀢𑁄, 𑀢𑀲𑁆𑀲𑀧𑀻 𑀢𑀸𑀯 𑀲𑁂𑀲𑀓𑀁;

𑀲𑀬𑀁 𑀧𑀺𑀯𑀺 𑀢𑀣𑀸𑀳𑁄𑀢𑀺, 𑀓𑀫𑁆𑀫𑀁 𑀧𑀼𑀜𑁆𑀜𑀯𑀢𑀁 𑀲𑀤𑀸.

𑀞𑀧𑁂𑀲𑀺 𑀲𑀓𑀯𑁂𑀲𑁂𑀯, 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄;

𑀪𑁄𑀚𑀦𑁂 𑀲𑀬𑀦𑁂 𑀘𑁂𑀯, 𑀧𑀭𑀺𑀳𑀸𑀭𑁂 𑀘 𑀯𑀸𑀳𑀦𑁂.

𑀏𑀯𑀁 𑀢𑁂𑀲𑀼 𑀯𑀲𑀦𑁆𑀢𑁂𑀲𑀼, 𑀬𑀼𑀤𑁆𑀥𑀢𑁆𑀣𑀸𑀬𑀫𑀼𑀧𑀓𑁆𑀓𑀫𑀺;

𑀯𑀮𑁆𑀮𑀪𑁄 𑀦𑀭𑀲𑀻𑀳𑁂𑀦, 𑀦𑀭𑀲𑀻𑀳𑁄 𑀯𑀺𑀘𑀺𑀦𑁆𑀢𑀬𑀺.

𑀅𑀬𑀁 𑀔𑁄 𑀫𑀫 𑀲𑁂𑀯𑀸𑀬, 𑀭𑀚𑁆𑀚𑀁 𑀯𑀁𑀲 𑀕𑀢𑀁 𑀲𑀓𑀁;

𑀮𑀪𑀺𑀲𑁆𑀲𑀸𑀫𑀻𑀢𑀺 𑀲𑁂𑀯𑁂𑀢𑀺, 𑀭𑀢𑁆𑀢𑀺𑀁 𑀤𑀺𑀯 𑀫𑀢𑀦𑁆𑀤𑀺𑀢𑁄.

𑀲𑀘𑁂 𑀲𑁄𑀧𑀺 𑀫𑀬𑀸 𑀕𑀦𑁆𑀢𑁆𑀯𑀸, 𑀬𑀼𑀚𑁆𑀛𑀦𑁆𑀢𑁄 𑀫𑀭𑀡𑀁 𑀕𑀢𑁄;

𑀢𑀓𑁆𑀓𑀺𑀢𑀁 𑀢𑀲𑁆𑀲 𑀫𑀬𑁆𑀳𑀜𑁆𑀘, 𑀲𑀩𑁆𑀩𑀁 𑀢𑀫𑀨𑀮𑀁 𑀪𑀯𑁂.

𑀏𑀯𑀁 𑀘𑀺𑀦𑁆𑀢𑀺𑀬𑀢𑀁 𑀭𑀸𑀚𑀸, 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑁂 𑀧𑀼𑀭𑁂;

𑀲𑀬𑀁 𑀯𑀮𑁆𑀮𑀪𑀭𑀸𑀚𑁂𑀦, 𑀓𑀸𑀢𑀼𑀁 𑀲𑀗𑁆𑀕𑀸𑀫𑀫𑀸𑀭𑀲𑀺.

𑀫𑀸𑀡𑀯𑀫𑁆𑀫𑁄𑀧𑀺 𑀘𑀺𑀦𑁆𑀢𑁂𑀲𑀺, 𑀲𑀘𑁂’𑀬𑀁 𑀫𑀬𑀺 𑀚𑀻𑀯𑀺𑀢𑀺;

𑀭𑀸𑀚𑀸 𑀫𑀻𑀬𑀢𑀺 𑀬𑀼𑀤𑁆𑀥𑀫𑁆𑀳𑀺, 𑀓𑀺𑀁 𑀨𑀮𑀁 𑀫𑀫 𑀚𑀻𑀯𑀺𑀢𑁂.

𑀯𑀺𑀲𑁆𑀲𑀸𑀲𑁄 ¶ 𑀤𑀼𑀓𑁆𑀓𑀢𑁄 𑀢𑁂𑀦, 𑀪𑀯𑀺𑀲𑁆𑀲𑀢𑀺 𑀢𑀣𑀸𑀲𑀢𑀺;

𑀲𑀗𑁆𑀕𑀳𑁂𑀲𑀺 𑀓𑀺𑀫𑀢𑁆𑀣𑀁 𑀫𑀁, 𑀲𑀫𑀸𑀦𑀢𑁆𑀢𑁂𑀦 𑀅𑀢𑁆𑀢𑀦𑁄.

𑀢𑀲𑁆𑀫𑀸 𑀬𑀼𑀢𑁆𑀢𑀁 𑀫𑀬𑀸 𑀕𑀦𑁆𑀢𑀼𑀁, 𑀲𑀳𑀲𑀗𑁆𑀕𑀸𑀫 𑀫𑀡𑁆𑀟𑀮𑀁;

𑀲𑀼𑀔𑀜𑁆𑀳𑀺 𑀲𑀤𑁆𑀥𑀺𑀁 𑀢𑁂𑀦𑁂𑀢𑁆𑀣, 𑀚𑀻𑀯𑀺𑀢𑀁 𑀫𑀭𑀡𑀁𑀧𑀺 𑀯𑀸.

𑀏𑀯𑀁 𑀘𑀺𑀦𑁆𑀢𑀺𑀬 𑀲𑀦𑁆𑀦𑀤𑁆𑀥-𑀩𑀮𑁄 𑀳𑀢𑁆𑀣𑀺𑀯𑀭𑀁 𑀕𑀢𑁄;

𑀕𑀦𑁆𑀢𑁆𑀯𑀸 𑀤𑀲𑁆𑀲𑁂𑀲𑀺 𑀅𑀢𑁆𑀢𑀸𑀦𑀁, 𑀲𑁄 𑀢𑀁 𑀲𑀗𑁆𑀕𑀸𑀫 𑀫𑀡𑁆𑀟𑀮𑁂.

𑀦𑀭𑀲𑀻𑀳𑁄𑀯 𑀢𑀁 𑀤𑀺𑀲𑁆𑀯𑀸, 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑀼𑀕𑁆𑀕𑀺𑀭𑀺;

𑀲𑀳𑁄 𑀲𑀦𑁆𑀣𑀯𑀫𑁂𑀢𑀲𑁆𑀫𑀺𑀁, 𑀓𑀢𑁆𑀢𑀩𑁆𑀩𑀁 𑀫𑁂 𑀓𑀢𑀁 𑀇𑀢𑀺.

𑀢𑀢𑁄 𑀫𑀸𑀦𑀲𑁆𑀲 𑀲𑁂𑀦𑀸 𑀘, 𑀲𑁂𑀦𑀸 𑀘𑁂𑀯𑀲𑁆𑀲𑀭𑀸𑀚𑀺𑀦𑁄;

𑀲𑁂𑀦𑀁 𑀯𑀮𑁆𑀮𑀪𑀭𑀸𑀚𑀲𑁆𑀲, 𑀯𑀺𑀤𑁆𑀥𑀁𑀲𑁂𑀲𑀺 𑀲𑀫𑀸𑀕𑀢𑀸.

𑀫𑀸𑀡𑀯𑀫𑁆𑀫𑁄𑀧𑀺 𑀤𑀲𑁆𑀲𑁂𑀲𑀺, 𑀢𑀳𑀺𑀁 𑀲𑀼𑀭𑀢𑁆𑀢𑀫𑀢𑁆𑀢𑀦𑁄;

𑀧𑀭𑀓𑁆𑀓𑀫𑀦𑁆𑀢𑁄 𑀤𑁂𑀯𑀸𑀦𑀁, 𑀭𑀡𑁂 𑀦𑀸𑀭𑀸𑀬𑀡𑁄 𑀯𑀺𑀬.

𑀦𑀭𑀲𑀻𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄, 𑀫𑀸𑀡𑀯𑀫𑁆𑀫𑀲𑁆𑀲 𑀯𑀺𑀓𑁆𑀓𑀫𑁂;

𑀆𑀮𑀺𑀗𑁆𑀕𑀢𑁆𑀯𑀸 𑀲𑀺𑀦𑁂𑀳𑁂𑀦, 𑀢𑁆𑀯𑀁 𑀔𑁄 𑀫𑁂 𑀚𑀬𑀤𑁄 𑀇𑀢𑀺.

𑀅𑀢𑁆𑀢𑀦𑁄 𑀧𑀼𑀭𑀫𑀸𑀕𑀫𑁆𑀫, 𑀓𑀢𑁆𑀯𑀸 𑀯𑀺𑀚𑀬𑀫𑀗𑁆𑀕𑀮𑀁;

𑀫𑀸𑀡𑀯𑀫𑁆𑀫𑀲𑁆𑀲 𑀲𑁂𑀦𑀸𑀬, 𑀓𑀢𑁆𑀢𑀩𑁆𑀩𑀁 𑀲𑀩𑁆𑀩𑀫𑀸𑀘𑀭𑀺.

𑀅𑀣𑁂𑀯𑀁 𑀘𑀺𑀦𑁆𑀢𑀬𑀺 𑀭𑀸𑀚𑀸, 𑀓𑀢𑁆𑀢𑀩𑁆𑀩𑀁 𑀫𑁂 𑀲𑀳𑀸𑀬𑀓𑁄;

𑀅𑀢𑁆𑀢𑀦𑀸’𑀓𑀸𑀲𑀺 𑀲𑀩𑁆𑀩𑀜𑁆𑀘, 𑀅𑀦𑀡𑁄 𑀲𑁄 𑀫𑀫𑀚𑁆𑀚𑀢𑁄.

𑀇𑀡𑀁 𑀫𑀫𑀸𑀧𑀺 𑀲𑁄𑀥𑁂𑀫𑀺, 𑀓𑀢𑁆𑀯𑀸 𑀓𑀢𑁆𑀢𑀩𑁆𑀩𑀫𑀢𑁆𑀢𑀦𑀸;

𑀓𑀢𑁆𑀢𑀜𑁆𑀜𑀽 𑀓𑀢𑀯𑁂𑀤𑀻𑀳𑀺, 𑀧𑀼𑀭𑀺𑀲𑀸’𑀢𑀻𑀯𑀤𑀼𑀮𑁆𑀮𑀪𑀸.

𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺;

𑀲𑀳𑀸𑀬𑀲𑁆𑀲 𑀫𑀫𑁂𑀢𑀲𑁆𑀲, 𑀓𑀫𑁆𑀫𑁂 𑀢𑀼𑀫𑁆𑀳𑁂𑀧𑀺 𑀲𑀓𑁆𑀔𑀺𑀦𑁄.

𑀫𑀬𑀸𑀧𑀺 𑀢𑀲𑁆𑀲 𑀓𑀢𑁆𑀢𑀩𑁆𑀩𑀁, 𑀓𑀫𑁆𑀫𑀁 𑀲𑀸𑀥𑀼 𑀲𑀼𑀔𑀸𑀯𑀳𑀁;

𑀉𑀧𑀓𑀸𑀭𑁄 𑀳𑀺 𑀲𑀸𑀥𑀽𑀦𑀁, 𑀥𑀫𑁆𑀫𑁄 𑀧𑀼𑀩𑁆𑀩𑁄𑀧𑀓𑀸𑀭𑀺𑀦𑁄.

𑀏𑀯𑀁 𑀯𑀼𑀢𑁆𑀢𑁂 𑀅𑀫𑀘𑁆𑀘𑀸 𑀢𑁂, 𑀧𑀘𑁆𑀘𑀸𑀳𑀁𑀲𑀼 𑀫𑀳𑀻𑀧𑀢𑀺;

𑀬𑀁 𑀬𑀫𑀺𑀘𑁆𑀙𑀢𑀺 𑀤𑁂𑀯𑁄𑀳𑀺, 𑀢𑀁 𑀢𑀁 𑀭𑀼𑀘𑁆𑀘𑀢𑀺 𑀦𑁄 𑀇𑀢𑀺.

𑀅𑀣 𑀲𑁄 𑀫𑀸𑀡𑀯𑀫𑁆𑀫𑀲𑁆𑀲, 𑀲𑁂𑀦𑀁 𑀤𑀢𑁆𑀯𑀸 𑀲𑀯𑀸𑀳𑀦𑀁;

𑀲𑀩𑁆𑀩𑁄𑀧𑀓𑀭𑀡𑀜𑁆𑀘𑁂𑀯, 𑀲𑀩𑁆𑀩𑀓𑀫𑁆𑀫𑀓𑀭𑁂𑀧𑀺 𑀘.

𑀕𑀘𑁆𑀙𑀸𑀢𑀺 𑀯𑀢𑁆𑀯𑀸 𑀢𑀁 𑀬𑀦𑁆𑀢𑀁, 𑀲𑀳𑀲𑁂𑀦𑀸𑀬𑀧𑁂𑀓𑁆𑀔𑀺𑀬;

𑀧𑀭𑀺𑀤𑁂𑀯𑀺𑀢𑁆𑀣 𑀪𑀽𑀫𑀺𑀦𑁆𑀤𑁄, 𑀯𑀺𑀧𑁆𑀧𑀯𑀼𑀢𑁆𑀣𑀁’𑀯 𑀧𑀼𑀢𑁆𑀢𑀓𑀁.

𑀫𑀸𑀡𑀯𑀫𑁆𑀫𑁄𑀧𑀺 ¶ 𑀆𑀭𑀼𑀬𑁆𑀳, 𑀦𑀸𑀯𑀸𑀬𑁄 𑀚𑀮𑀥𑀻𑀢𑀝𑁂;

𑀦 𑀘𑀺𑀭𑁂𑀦𑁂𑀯 𑀆𑀕𑀫𑁆𑀫, 𑀲𑀫𑀢𑁆𑀢𑀺𑀓𑁆𑀓𑀫𑁆𑀫 𑀯𑁂𑀕𑀲𑀸.

𑀲𑀳 𑀲𑁂𑀦𑀸𑀬 𑀫𑀤𑁆𑀤𑀦𑁆𑀣𑁄, 𑀮𑀗𑁆𑀓𑀸𑀤𑀻𑀧𑀫𑀼𑀧𑀯𑀺𑀲𑀻;

𑀢𑀁 𑀲𑀼𑀢𑁆𑀯𑀸𑀦 𑀧𑀮𑀸𑀬𑀺𑀢𑁆𑀣, 𑀭𑀸𑀚𑀸 𑀤𑀸𑀞𑁄𑀧𑀢𑀺𑀲𑁆𑀲𑀓𑁄.

𑀫𑀸𑀡𑀯𑀫𑁆𑀫𑁄 𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀅𑀳𑀼𑀢𑁆𑀯𑀸𑀯 𑀦𑀭𑀸𑀥𑀺𑀧𑁄;

𑀧𑀮𑀸𑀢𑀫𑀦𑀼𑀩𑀦𑁆𑀥𑀺𑀢𑁆𑀣, 𑀧𑀤𑀸𑀦𑀼𑀧𑀤𑀫𑀼𑀕𑀢𑁄.

𑀢𑀤𑀸 𑀲𑀸 𑀤𑀫𑀺𑀴𑀺 𑀲𑁂𑀦𑀸, 𑀅𑀲𑁆𑀲𑁄𑀲𑀺 𑀓𑀺𑀭 𑀲𑀸𑀫𑀺𑀓𑁄;

𑀫𑀳𑀸𑀭𑁄𑀕𑀸’𑀪𑀺𑀪𑀽𑀢𑁄𑀢𑀺, 𑀲𑀼𑀢𑁆𑀯𑀸 𑀢𑀁 𑀲𑀸 𑀅𑀧𑀓𑁆𑀓𑀫𑀺.

𑀲𑀼𑀢𑁆𑀯𑀸 𑀤𑀸𑀞𑁄𑀧𑀢𑀺𑀲𑁆𑀲𑁄 𑀢𑀁, 𑀲𑀫𑀸𑀤𑀸𑀬 𑀫𑀳𑀸𑀩𑀮𑀁;

𑀫𑀸𑀡𑀯𑀫𑁆𑀫𑀁 𑀉𑀧𑀸𑀕𑀫𑁆𑀫, 𑀓𑀸𑀢𑀼𑀫𑀸𑀭𑀪𑀺 𑀲𑀁𑀬𑀼𑀥𑀁.

𑀫𑀸𑀡𑀯𑀫𑁆𑀫𑁄 𑀘 𑀘𑀺𑀦𑁆𑀢𑁂𑀲𑀺, 𑀲𑀩𑁆𑀩𑀸 𑀲𑁂𑀦𑀸 𑀕𑀢𑀸 𑀫𑀫;

𑀫𑀢𑁂 𑀫𑀬𑀺 𑀲𑀫𑀺𑀚𑁆𑀛𑁂𑀬𑁆𑀬, 𑀯𑁂𑀭𑀺𑀦𑁄 𑀫𑁂 𑀫𑀦𑁄𑀭𑀣𑀁.

𑀚𑀫𑁆𑀩𑀼𑀤𑀻𑀧𑀁𑀯 𑀢𑀲𑁆𑀫𑀸’𑀳𑀁, 𑀕𑀦𑁆𑀢𑁆𑀯𑀸’𑀤𑀸𑀲 𑀩𑀮𑀁 𑀢𑀢𑁄;

𑀧𑀼𑀦 𑀭𑀚𑁆𑀚𑀁 𑀕𑀳𑁂𑀲𑁆𑀲𑀁𑀢𑀺, 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺 𑀲𑁄.

𑀕𑀦𑁆𑀢𑁆𑀯𑀸 𑀧𑀼𑀦’𑀧𑀺 𑀤𑀺𑀲𑁆𑀯𑀸𑀦, 𑀲𑀳𑀸𑀬𑀁 𑀦𑀭𑀲𑀻𑀳𑀓𑀁;

𑀆𑀭𑀸𑀥𑀳𑀦𑁆𑀢𑁄 𑀦𑀺𑀧𑀼𑀡𑀁, 𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀳𑀺.

𑀬𑀸𑀯 𑀭𑀸𑀚𑀘𑀢𑀼𑀓𑁆𑀓𑀁𑀲𑁄, 𑀫𑀸𑀡𑀸𑀫𑁆𑀫𑁄 𑀢𑀳𑀺𑀁 𑀯𑀲𑀺;

𑀦𑀭𑀲𑀻𑀳𑁄’𑀣 𑀘𑀺𑀦𑁆𑀢𑁂𑀲𑀺, 𑀫𑀸𑀦𑀢𑁆𑀣𑀤𑁆𑀥𑁄 𑀬𑀲𑁄𑀥𑀦𑁄.

𑀭𑀚𑁆𑀚𑀢𑁆𑀣𑀁 𑀫𑁂 𑀲𑀳𑀸 𑀬𑁄 𑀫𑀁, 𑀲𑁂𑀯𑀦𑁆𑀢𑁄𑀬𑁂𑀯 𑀅𑀤𑁆𑀥𑀕𑁄;

𑀯𑀼𑀤𑁆𑀥𑁄 𑀳𑁂𑀲𑁆𑀲𑀢𑀺 𑀢𑀁 𑀧𑀲𑁆𑀲𑀁, 𑀓𑀣𑀁 𑀭𑀚𑁆𑀚𑀁 𑀓𑀭𑁄𑀫𑀳𑀁.

𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑀲𑁆𑀫𑀺𑀁, 𑀧𑁂𑀲𑀬𑀺𑀢𑁆𑀯𑀸 𑀩𑀮𑀁 𑀫𑀫;

𑀭𑀚𑁆𑀚𑀁 𑀢𑀁 𑀦 𑀕𑀳𑁂𑀲𑁆𑀲𑀸𑀫𑀺, 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦 𑀫𑁂.

𑀏𑀯𑀁 𑀘𑀺𑀦𑁆𑀢𑀺𑀬 𑀲𑁄 𑀲𑁂𑀦𑀁, 𑀲𑀦𑁆𑀦𑀺𑀧𑀸𑀢𑀺𑀬 𑀅𑀢𑁆𑀢𑀦𑁄;

𑀲𑀦𑁆𑀦𑀸𑀳𑁂𑀢𑁆𑀯𑀸 𑀬𑀣𑀸 𑀬𑁄𑀕𑀁, 𑀤𑀸𑀧𑁂𑀢𑁆𑀯𑀸𑀦 𑀬𑀣𑀸𑀭𑀼𑀘𑀺𑀁.

𑀲𑀬𑀫𑁂𑀯 𑀢𑀫𑀸𑀤𑀸𑀬, 𑀲𑀫𑀼𑀤𑁆𑀤𑀢𑀝𑀫𑀸𑀕𑀢𑁄;

𑀦𑀸𑀯𑀸𑀬𑁄 𑀘𑀺𑀢𑁆𑀢𑀭𑀽𑀧𑀸𑀬𑁄, 𑀓𑀸𑀭𑀬𑀺𑀢𑁆𑀯𑀸 𑀣𑀺𑀭𑀸 𑀩𑀳𑀽.

𑀅𑀫𑀘𑁆𑀘𑁂 𑀆𑀳 ‘‘𑀏𑀢𑁂𑀦, 𑀲𑀤𑁆𑀥𑀺𑀁 𑀕𑀘𑁆𑀙𑀣 𑀪𑁄’’𑀇𑀢𑀺;

𑀦𑀸𑀯𑀁 𑀆𑀭𑁄𑀳𑀺𑀢𑀼𑀁 𑀲𑀩𑁆𑀩𑁂, 𑀦 𑀇𑀘𑁆𑀙𑀺𑀁𑀲𑀼 𑀢𑀤𑀸 𑀚𑀦𑀸.

𑀢𑀤𑀸 𑀲𑀻𑀳𑁄 𑀯𑀺𑀘𑀺𑀦𑁆𑀢𑁂𑀢𑁆𑀯𑀸, 𑀲𑀬𑀁 𑀳𑀼𑀢𑁆𑀯𑀸 𑀢𑀺𑀭𑁄𑀳𑀺𑀢𑁄;

𑀅𑀢𑁆𑀢𑀦𑁄 𑀧𑀭𑀺𑀳𑀸𑀭𑀁 𑀲𑁄, 𑀭𑀸𑀚𑀮𑀓𑁆𑀔𑀡𑀲𑀫𑁆𑀫𑀢𑀁.

𑀲𑀩𑁆𑀩𑀁 ¶ 𑀢𑀲𑁆𑀲𑁂𑀯 𑀤𑀢𑁆𑀯𑀸𑀦, 𑀅𑀮𑀗𑁆𑀓𑀸𑀭𑀫𑁆𑀧𑀺 𑀅𑀢𑁆𑀢𑀦𑁄;

𑀆𑀭𑁄𑀧𑁂𑀢𑁆𑀯𑀸𑀦 𑀢𑀁 𑀦𑀸𑀯𑀁, 𑀕𑀘𑁆𑀙 𑀞𑀢𑁆𑀯𑀸𑀦 𑀲𑀸𑀕𑀭𑁂.

𑀇𑀫𑀁 𑀪𑁂𑀭𑀺𑀁𑀘 𑀯𑀸𑀤𑁂𑀳𑀺, 𑀓𑁄𑀝𑁆𑀞𑀦𑀸𑀫𑀦𑁆𑀢𑀺 𑀬𑁄𑀚𑀬𑀻;

𑀲𑁄’𑀧𑀺 𑀲𑀩𑁆𑀩𑀁 𑀢𑀣𑀸𑀓𑀸𑀲𑀺, 𑀭𑀸𑀚𑀸𑀦𑁄 𑀅𑀕𑀫𑀸 𑀇𑀢𑀺.

𑀆𑀭𑀼𑀳𑀺𑀁𑀲𑀼 𑀚𑀦𑀸 𑀦𑀸𑀯𑀁, 𑀏𑀓𑀁 𑀓𑀢𑁆𑀯𑀸 𑀦𑀭𑀸𑀥𑀺𑀧𑀁;

𑀲𑁄 𑀢𑀁 𑀲𑁂𑀦𑀗𑁆𑀕𑀫𑀸𑀤𑀸𑀬, 𑀫𑀸𑀡𑁄 𑀕𑀦𑁆𑀢𑀼𑀁 𑀲𑀫𑀸𑀭𑀪𑀺.

𑀓𑁂𑀯𑀮𑁄’𑀧𑀺 𑀲𑀫𑀼𑀤𑁆𑀤𑁄 𑀲𑁄, 𑀅𑀳𑁄𑀪𑀺 𑀦𑀕𑀭𑀽𑀧𑀫𑁄;

𑀅𑀣 𑀲𑁄 𑀧𑀝𑁆𑀝𑀦𑀁 𑀧𑀢𑁆𑀯𑀸, 𑀑𑀢𑀭𑀺𑀢𑁆𑀯𑀸 𑀲𑀯𑀸𑀳𑀦𑁄.

𑀯𑀺𑀲𑁆𑀲𑀸𑀫𑁂𑀢𑁆𑀯𑀸 𑀩𑀮𑀁 𑀢𑀢𑁆𑀣, 𑀯𑀲𑀁 𑀓𑀢𑀺𑀧𑀬𑁂 𑀤𑀺𑀦𑁂;

𑀉𑀢𑁆𑀢𑀭𑀁 𑀤𑁂𑀲𑀫𑀸𑀤𑀸𑀬, 𑀓𑀢𑁆𑀯𑀸 𑀳𑀢𑁆𑀣𑀕𑀢𑀁 𑀚𑀦𑀁.

𑀅𑀓𑁆𑀔𑁄𑀩𑁆𑀪𑀺𑀬 𑀫𑀳𑀸𑀲𑁂𑀦𑁄, 𑀦𑀕𑀭𑀁 𑀕𑀦𑁆𑀢𑀼𑀫𑀸𑀭𑀪𑀺;

𑀧𑁄𑀢𑁆𑀣𑀓𑀼𑀝𑁆𑀞𑁄𑀧𑀺 𑀢𑀁 𑀲𑀼𑀢𑁆𑀯𑀸, 𑀧𑀘𑁆𑀘𑀼𑀕𑁆𑀕𑀜𑁆𑀙𑀺 𑀫𑀳𑀸𑀩𑀮𑁄.

𑀲𑀁𑀕𑀘𑁆𑀙𑀺𑀁𑀲𑀼 𑀉𑀪𑁄 𑀲𑁂𑀦𑀸, 𑀪𑀺𑀦𑁆𑀦𑀯𑁂𑀮𑀸’𑀯 𑀲𑀸𑀕𑀭𑀸;

𑀫𑀸𑀡𑀯𑀫𑁆𑀫𑁄 𑀢𑀢𑁄 𑀳𑀢𑁆𑀣𑀺-𑀫𑀸𑀭𑀼𑀬𑁆𑀳 𑀕𑀳𑀺𑀢𑀸𑀬𑀼𑀥𑁄.

𑀧𑁄𑀢𑁆𑀣𑀓𑀼𑀝𑁆𑀞𑀜𑁆𑀘 𑀭𑀸𑀚𑀸𑀦𑀁, 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀧𑀮𑀸𑀧𑀬𑀺;

𑀳𑀢𑁆𑀣𑀤𑀸𑀞𑀁 𑀧𑀮𑀸𑀬𑀦𑁆𑀢𑀁, 𑀤𑀺𑀲𑁆𑀯𑀸 𑀚𑀦𑀧𑀤𑀸 𑀦𑀭𑀸.

𑀲𑀻𑀲𑀫𑀲𑁆𑀲 𑀕𑀳𑁂𑀢𑁆𑀯𑀸𑀦, 𑀫𑀸𑀡𑀯𑀫𑁆𑀫𑀲𑁆𑀲 𑀤𑀲𑁆𑀲𑀬𑀼𑀁;

𑀧𑁄𑀢𑁆𑀣𑀓𑀼𑀝𑁆𑀞𑁄𑀧𑀮𑀸𑀬𑀺𑀢𑁆𑀯𑀸, 𑀫𑁂𑀭𑀼𑀓𑀦𑁆𑀤𑀭𑀫𑀸𑀕𑀫𑀺.

𑀢𑀢𑁄 𑀢𑀁 𑀲𑀸𑀫𑀺𑀓𑁄 𑀤𑀺𑀲𑁆𑀯𑀸, 𑀲𑀳𑀸𑀬𑁄 𑀫𑁂 𑀅𑀬𑀁𑀘𑀺𑀭𑀁;

𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀘𑀟𑁆𑀟𑁂𑀢𑀼𑀁, 𑀆𑀧𑀤𑁂 𑀲𑀭𑀡𑀸𑀕𑀢𑀁.

𑀲𑀸𑀫𑀺𑀦𑁄 𑀘 𑀲𑀳𑀸𑀬𑀲𑁆𑀲, 𑀦𑀺𑀤𑁆𑀤𑁄𑀲𑁄𑀳𑀁 𑀓𑀣𑀁 𑀪𑀯𑁂;

𑀇𑀢𑀺 𑀘𑀺𑀦𑁆𑀢𑀺𑀬 𑀧𑀽𑀯𑀁 𑀲𑁄, 𑀲𑀯𑀺𑀲𑀁 𑀔𑀸𑀤𑀺𑀬𑀸’𑀫𑀭𑀺.

𑀓𑀼𑀝𑁆𑀞𑀓𑁄𑀧𑀺 𑀘 𑀢𑁂𑀦𑁂𑀯, 𑀔𑀸𑀤𑀺𑀢𑁆𑀯𑀸 𑀧𑀽𑀯𑀓𑀁 𑀫𑀢𑁄;

𑀫𑀸𑀡𑀯𑀫𑁆𑀫𑀲𑁆𑀲 𑀢𑀲𑁆𑀲𑁂𑀯𑀁, 𑀤𑀻𑀧𑁄 𑀆𑀲𑀺 𑀅𑀓𑀡𑁆𑀝𑀓𑁄.

𑀫𑀸𑀡𑀯𑀫𑁆𑀫𑁄 𑀢𑀢𑁄 𑀤𑀻𑀧𑁂, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺 𑀢𑀤𑀸;

𑀯𑀸𑀭𑁂𑀦𑁆𑀢𑁄 𑀯𑀺𑀬 𑀢𑁂𑀦𑁂𑀯, 𑀤𑀼𑀓𑁆𑀔𑀁 𑀤𑀻𑀧𑁂 𑀚𑀦𑀲𑁆𑀲 𑀲𑁄.

𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀲𑁄’𑀓𑀸𑀲𑀺, 𑀅𑀦𑀕𑁆𑀖𑀸𑀦𑀺 𑀩𑀳𑀽𑀦𑀺 𑀘;

𑀲𑀫𑀢𑁆𑀣𑁄 𑀓𑁄𑀳𑀺 𑀢𑀁 𑀲𑀩𑁆𑀩𑀁, 𑀯𑀢𑁆𑀢𑀼𑀁 𑀧𑀝𑀺𑀧𑀤𑀁 𑀦𑀭𑁄.

𑀓𑀧𑁆𑀧𑀕𑀸𑀫𑀯𑁆𑀳𑀬𑀜𑁆𑀘𑁂𑀯, 𑀢𑀣𑀸 𑀲𑁂𑀧𑀡𑁆𑀡𑀺𑀦𑀸𑀫𑀓𑀁;

𑀧𑀥𑀸𑀦𑀭𑀓𑁆𑀔𑁂 𑀘 𑀲𑀺𑀭𑀺𑀁, 𑀲𑀺𑀭𑀻𑀲𑀗𑁆𑀖𑀸𑀤𑀺 𑀩𑁄𑀥𑀺𑀓𑁂.

𑀧𑀸𑀲𑀸𑀤𑀁 ¶ 𑀲𑁄𑀯 𑀓𑀸𑀭𑁂𑀲𑀺, 𑀧𑀲𑀸𑀤𑀸𑀯𑀳𑀫𑀼𑀢𑁆𑀢𑀫𑁄;

𑀙𑀸𑀤𑁂𑀲𑀺 𑀮𑁄𑀳𑀧𑀸𑀲𑀸𑀤𑀁, 𑀣𑀽𑀧𑀸𑀭𑀸𑀫𑀖𑀭𑀁 𑀢𑀣𑀸.

𑀣𑀽𑀧𑀸𑀭𑀸𑀫𑁂 𑀘 𑀧𑀸𑀲𑀸𑀤𑀁 𑀓𑀢𑁆𑀯𑀸’𑀤𑀸 𑀧𑀁𑀲𑀼𑀓𑀽𑀮𑀺𑀦𑀁;

𑀚𑀺𑀡𑁆𑀡𑀓𑀁 𑀧𑀝𑀺𑀲𑀗𑁆𑀔𑀸𑀲𑀺 𑀙𑀢𑁆𑀢𑀁 𑀘𑁂𑀢𑀺𑀬𑀫𑀼𑀤𑁆𑀥𑀦𑀺;

𑀩𑀳𑀯𑁄 𑀚𑀺𑀡𑁆𑀡𑀓𑀸𑀯𑀸𑀲𑁂 𑀢𑀢𑁆𑀣𑁂𑀯 𑀧𑀝𑀺𑀲𑀗𑁆𑀔𑀭𑀺.

[𑀏𑀢𑁆𑀣 𑀫𑀸𑀡𑀯𑀫𑁆𑀫𑀲𑁆𑀲 𑀭𑀚𑁆𑀚𑀓𑀣𑀸𑀬 𑀊𑀦𑀢𑀸 𑀤𑀺𑀲𑁆𑀲𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀅𑀕𑁆𑀕𑀩𑁄𑀥𑀺𑀲𑁆𑀲 𑀭𑀚𑁆𑀚𑀧𑀝𑀺𑀩𑀤𑁆𑀥𑀸 𑀓𑀣𑀸 𑀯𑀺𑀭 𑀔𑀸𑀬𑀢𑀺.]

𑀙𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

…𑀯𑀸𑀲𑀁-𑀓𑀢𑁆𑀯𑀸 𑀲𑀼𑀮𑀪𑀧𑀘𑁆𑀘𑀬𑀁;

𑀤𑀸𑀲𑀺 𑀥𑀫𑁆𑀫𑀭𑀼𑀘𑀺𑀦𑀁 𑀲𑁄, 𑀭𑀸𑀚𑀺𑀦𑀻 𑀤𑀻𑀧𑀓𑀫𑁆𑀧𑀺 𑀘.

𑀓𑀸𑀭𑁂𑀢𑁆𑀯𑀸𑀦 𑀧𑀭𑀺𑀘𑁆𑀙𑁂𑀤𑀁, 𑀫𑀳𑀸𑀦𑁂𑀢𑁆𑀢𑀸𑀤𑀺 𑀧𑀸𑀤𑀺𑀓𑀁;

𑀢𑁂𑀲𑀫𑁂𑀯 𑀅𑀤𑀸 𑀓𑁄𑀴𑀼-𑀯𑀸𑀢𑁂 𑀲𑁄 𑀤𑁂𑀯𑀢𑀺𑀲𑁆𑀲𑀓𑀁.

𑀯𑀳𑀢𑁆𑀣𑀮𑁂 𑀘 𑀲𑁄 𑀓𑀢𑁆𑀯𑀸, 𑀓𑀤𑀫𑁆𑀩𑀕𑁄𑀦𑀦𑀸𑀫𑀓𑀁;

𑀤𑁂𑀯𑀧𑀸𑀴𑀺𑀫𑁆𑀳𑀺 𑀓𑀢𑁆𑀯𑀸𑀦, 𑀕𑀻𑀭𑀺𑀯𑁆𑀳𑀦𑀕𑀭𑀁 𑀢𑀣𑀸.

𑀓𑀢𑁆𑀯𑀸 𑀅𑀦𑁆𑀢𑀭𑀲𑁄𑀩𑁆𑀪𑀫𑁆𑀳𑀺, 𑀤𑁂𑀯𑀦𑀸𑀫𑀁 𑀯𑀺𑀳𑀸𑀭𑀓𑀁;

𑀭𑀸𑀚𑀫𑀸𑀢𑀺𑀓𑀫𑀸𑀭𑀸𑀫𑀁, 𑀓𑀢𑁆𑀯𑀸’𑀤𑀸 𑀧𑀁𑀲𑀼𑀓𑀽𑀮𑀺𑀦𑀁.

𑀕𑁄𑀓𑀡𑁆𑀡𑀓𑀯𑀺𑀳𑀸𑀭𑁂’𑀓𑀸, 𑀧𑀥𑀸𑀦𑀖𑀭𑀫𑁂𑀯 𑀘;

𑀚𑀺𑀡𑁆𑀡𑀕𑁂𑀳𑀜𑁆𑀘 𑀓𑀸𑀭𑁂𑀲𑀺, 𑀯𑀟𑁆𑀠𑀫𑀸𑀦𑀓𑀩𑁄𑀥𑀺𑀬𑀸.

𑀲𑀗𑁆𑀖𑀫𑀺𑀢𑁆𑀢𑀯𑁆𑀳𑀬𑁂 𑀘𑁂𑀯, 𑀅𑀜𑁆𑀜𑀢𑁆𑀣 𑀘 𑀫𑀳𑀸𑀬𑀲𑁄;

𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀭𑁂𑀲𑀼, 𑀦𑀯𑀓𑀫𑁆𑀫𑀫𑀓𑀸𑀭𑀬𑀺.

𑀙𑀩𑁆𑀩𑀻𑀲𑀢𑀺 𑀲𑀳𑀲𑁆𑀲𑀸𑀦𑀺, 𑀲𑀼𑀯𑀡𑁆𑀡𑀸𑀦𑀁 𑀲𑀫𑀧𑁆𑀧𑀺𑀬;

𑀚𑀺𑀡𑁆𑀡𑀸𑀦𑀺 𑀧𑀝𑀺𑀲𑀗𑁆𑀔𑀸𑀲𑀺, 𑀭𑀸𑀚𑀸 𑀘𑁂𑀢𑀺𑀬𑀧𑀩𑁆𑀩𑀢𑁂.

𑀢𑀸𑀮𑀯𑀢𑁆𑀣𑀼𑀯𑀺𑀳𑀸𑀭𑀜𑁆𑀘, 𑀓𑀸𑀭𑁂𑀢𑁆𑀯𑀸 𑀧𑀡𑁆𑀡𑀪𑀢𑁆𑀢𑀓𑀁;

𑀯𑀺𑀳𑀸𑀭𑀲𑁆𑀲 𑀫𑀳𑀸𑀲𑁂𑀦-𑀦𑀭𑀺𑀦𑁆𑀤𑀯𑁆𑀳𑀲𑁆𑀲 𑀤𑀸𑀧𑀬𑀺.

𑀕𑁄𑀡𑁆𑀟𑀺𑀕𑀸𑀫𑀺𑀓𑀯𑀸𑀧𑀺𑀜𑁆𑀘, 𑀙𑀺𑀦𑁆𑀦𑀁 𑀩𑀦𑁆𑀥𑀺 𑀬𑀣𑀸 𑀧𑀼𑀭𑀸;

𑀤𑀸𑀦𑀪𑀡𑁆𑀟𑀜𑁆𑀘 𑀲𑁄 𑀲𑀩𑁆𑀩𑀁, 𑀲𑀩𑁆𑀩𑁂𑀲𑀁 𑀤𑀸𑀲𑀺 𑀧𑀸𑀡𑀺𑀦𑀁.

𑀉𑀧𑁄𑀲𑀣𑀁 ¶ 𑀉𑀧𑀯𑀲𑀢𑀺, 𑀲𑀤𑁆𑀥𑀺𑀁 𑀤𑀻𑀧𑀚𑀦𑁂𑀳𑀺 𑀲𑁄;

𑀥𑀫𑁆𑀫𑀜𑁆𑀘 𑀢𑁂𑀲𑀁 𑀤𑁂𑀲𑁂𑀢𑀺, 𑀤𑀸𑀢𑀼𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀔𑀁.

𑀓𑀫𑁆𑀫𑀁 𑀲𑁄𑀯𑀕𑁆𑀕𑀺𑀬𑀁 𑀢𑀲𑁆𑀲, 𑀭𑀚𑁆𑀚𑁂 𑀲𑀩𑁆𑀩𑁄 𑀲𑀫𑀸𑀘𑀭𑀺;

𑀬𑀁 𑀓𑀭𑁄𑀢𑀺 𑀫𑀳𑀻𑀧𑀸𑀮𑁄, 𑀢𑀁 𑀢𑀲𑁆𑀲 𑀓𑀼𑀭𑀼𑀢𑁂 𑀚𑀦𑁄.

𑀢𑀲𑁆𑀫𑀸 𑀭𑀸𑀚𑀸 𑀫𑀳𑀸𑀧𑀜𑁆𑀜𑁄, 𑀥𑀫𑁆𑀫𑀫𑁂𑀯 𑀲𑀫𑀸𑀘𑀭𑁂;

𑀲𑁄 𑀦𑀺𑀯𑀼𑀢𑁆𑀣𑀦𑀺𑀯𑀼𑀢𑁆𑀣𑀫𑁆𑀳𑀺, 𑀞𑀸𑀦𑁂 𑀳𑁄𑀢𑀺 𑀫𑀳𑀸𑀬𑀲𑁄.

𑀲𑀫𑁆𑀧𑀢𑁆𑀢𑀧𑀭𑀺𑀯𑀸𑀭𑁄 𑀘, 𑀅𑀦𑁆𑀢𑁂 𑀕𑀘𑁆𑀙𑀢𑀺 𑀦𑀺𑀩𑁆𑀩𑀼𑀢𑀺𑀁;

𑀅𑀢𑁆𑀢𑀢𑁆𑀣𑀜𑁆𑀘 𑀧𑀭𑀢𑁆𑀣𑀜𑁆𑀘, 𑀢𑀲𑁆𑀫𑀸 𑀧𑀲𑁆𑀲𑁂𑀬𑁆𑀬 𑀩𑀼𑀤𑁆𑀥𑀺𑀫𑀸.

𑀅𑀢𑁆𑀢𑀦𑀸 𑀬𑀤𑀺 𑀏𑀓𑁂𑀦, 𑀯𑀺𑀦𑀺𑀢𑁂𑀦 𑀫𑀳𑀸𑀚𑀦𑀸;

𑀯𑀺𑀦𑀬𑀁 𑀬𑀦𑁆𑀢𑀺 𑀲𑀩𑁆𑀩𑁂𑀧𑀺, 𑀓𑁄𑀢𑀁 𑀦𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.

𑀧𑀬𑁄𑀕𑁄 𑀬𑁄 𑀳𑀺 𑀲𑀢𑁆𑀢𑀸𑀦𑀁, 𑀮𑁄𑀳𑀤𑁆𑀯𑀬 𑀳𑀺𑀢𑀸𑀯𑀳𑁄;

𑀲𑁄 𑀢𑁂𑀦 𑀅𑀓𑀢𑁄 𑀦𑀢𑁆𑀣𑀺, 𑀭𑀢𑁆𑀢𑀦𑁆𑀤𑀺𑀯𑀫𑀢𑀦𑁆𑀤𑀺𑀦𑀸.

𑀅𑀢𑁆𑀢𑀦𑁄 𑀲𑁄 𑀦𑀺𑀯𑀢𑁆𑀣𑀸𑀦𑀺, 𑀯𑀢𑁆𑀣𑀸𑀦𑀺 𑀲𑀼𑀔𑀼𑀫𑀸𑀦𑀺 𑀘;

𑀧𑀁𑀲𑀽𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀘𑀻𑀯𑀭𑀢𑁆𑀣𑀸𑀬 𑀤𑀸𑀧𑀬𑀺.

𑀅𑀝𑁆𑀞𑀸𑀦𑀯𑀺𑀦𑀺𑀬𑁄𑀕𑁄𑀧𑀺, 𑀲𑀗𑁆𑀕𑀳𑁄 𑀯𑀸 𑀯𑀺𑀭𑀽𑀧𑀓𑁄;

𑀲𑀸𑀯𑀚𑁆𑀚𑁄 𑀧𑀭𑀺𑀪𑁄𑀕𑁄 𑀯𑀸, 𑀢𑀲𑁆𑀲 𑀦𑀸𑀳𑁄𑀲𑀺 𑀲𑀩𑁆𑀩𑀲𑁄.

𑀬𑁂 𑀬𑁂 𑀲𑀢𑁆𑀢𑀸 𑀬𑀤𑀸 𑀳𑀸𑀭𑀸, 𑀢𑁂𑀲𑀁 𑀢𑀁 𑀢𑀁 𑀲𑀤𑀸𑀧𑀬𑀺;

𑀬𑁂 𑀬𑁂𑀦 𑀲𑀼𑀔𑀻 𑀳𑁄𑀦𑁆𑀢𑀺, 𑀢𑁂 𑀢𑁂 𑀢𑁂𑀦 𑀲𑀼𑀔𑀸𑀧𑀬𑀻.

𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦, 𑀙𑀩𑁆𑀩𑀲𑁆𑀲𑀸𑀦𑀺 𑀦𑀭𑀸𑀥𑀺𑀧𑁄;

𑀅𑀕𑀫𑀸 𑀤𑁂𑀯𑀭𑀸𑀚𑀲𑁆𑀲, 𑀲𑀦𑁆𑀢𑀺𑀓𑀁 𑀲𑀦𑁆𑀢𑀺𑀬𑀸𑀯𑀳𑁄.

𑀅𑀣 𑀢𑀲𑁆𑀲 𑀦𑀼𑀚𑁄 𑀭𑀸𑀚𑀸, 𑀓𑀲𑁆𑀲𑀧𑁄 𑀳𑁄𑀢𑀺 𑀔𑀢𑁆𑀢𑀺𑀬𑁄;

𑀲𑀫𑀢𑁆𑀣𑁄 𑀭𑀚𑁆𑀚𑀪𑀸𑀭𑀲𑁆𑀲, 𑀯𑀳𑀺𑀢𑀼𑀁 𑀧𑀼𑀩𑁆𑀩𑀯𑀼𑀢𑁆𑀢𑀺𑀦𑁄.

𑀧𑀺𑀢𑀸 𑀯𑀺𑀬 𑀦𑀺𑀬𑀁 𑀧𑀼𑀢𑁆𑀢𑀁, 𑀲𑁄 𑀲𑀗𑁆𑀕𑀡𑁆𑀳𑀺 𑀫𑀳𑀸𑀚𑀦𑀁;

𑀤𑀸𑀦𑁂𑀦 𑀧𑁂𑀬𑁆𑀬𑀯𑀚𑁆𑀚𑁂𑀦, 𑀅𑀢𑁆𑀣𑀲𑁆𑀲 𑀘𑀭𑀺𑀬𑀸𑀬 𑀘.

𑀞𑀸𑀦𑀦𑁆𑀢𑀭𑀜𑁆𑀘 𑀤𑀸𑀧𑁂𑀲𑀺, 𑀢𑀲𑁆𑀲 𑀢𑀲𑁆𑀲 𑀬𑀣𑀸𑀭𑀳𑀁;

𑀲𑀬𑀁 𑀪𑀼𑀜𑁆𑀚𑀺𑀢𑁆𑀣 𑀪𑁄𑀕𑁂𑀧𑀺, 𑀲𑀩𑁆𑀩𑀤𑀼𑀓𑁆𑀔𑀯𑀺𑀯𑀚𑁆𑀚𑀺𑀢𑁄.

𑀕𑀻𑀳𑀺𑀦𑀜𑁆𑀘𑁂𑀯 𑀪𑀺𑀓𑁆𑀔𑀽𑀦𑀁, 𑀩𑁆𑀭𑀳𑁆𑀫𑀡𑀸𑀦𑀜𑁆𑀘 𑀔𑀢𑁆𑀢𑀺𑀬𑁄;

𑀯𑀢𑁆𑀢𑀸𑀧𑀬𑀺 𑀲𑀓𑀸𑀯𑀸𑀭𑁂, 𑀫𑀸𑀖𑀸𑀢𑀜𑁆𑀘𑁂𑀯 𑀓𑀸𑀭𑀬𑀺.

𑀫𑀘𑁆𑀙𑀢𑀺𑀢𑁆𑀣𑁂 𑀤𑀼𑀯𑁂 𑀘𑁂𑀯, 𑀆𑀯𑀸𑀲𑀁 𑀳𑁂𑀴𑀺𑀕𑀸𑀫𑀓𑀁;

𑀯𑀡𑀺𑀚𑁆𑀚𑀕𑀸𑀫𑀫𑀸𑀭𑀸𑀫𑀁, 𑀓𑀲𑁆𑀲𑀧𑀸𑀤𑀻𑀕𑀺𑀭𑀺𑀁 𑀢𑀣𑀸.

𑀢𑀣𑀸 ¶ 𑀅𑀫𑁆𑀩𑀢𑀦𑀯𑁆𑀳𑀜𑁆𑀘, 𑀧𑀥𑀸𑀦𑀖𑀭 𑀫𑀼𑀢𑁆𑀢𑀫𑀁; 𑀪𑁄𑀕𑀕𑀸𑀫𑀜𑁆𑀘…

[𑀏𑀢𑁆𑀣𑀓𑀲𑁆𑀲𑀧𑀲𑁆𑀲 𑀭𑀚𑁆𑀚𑀧𑀝𑀺𑀩𑀤𑁆𑀥𑀸𑀬 𑀓𑀣𑀸𑀬 𑀊𑀦𑀢𑀸 𑀤𑀺𑀲𑁆𑀲𑀢𑀺.]

𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑁄𑀧𑀺, 𑀫𑀳𑀺𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀫𑁆𑀧𑀢𑁆𑀢𑀭𑀚𑁆𑀚𑁄 𑀦𑀸𑀳𑁄𑀲𑀺, 𑀭𑀸𑀚𑀸 𑀭𑀚𑁆𑀚 𑀥𑀼𑀭𑀦𑁆𑀥𑀭𑁄.

𑀢𑀲𑁆𑀲𑀧𑀺 𑀓𑀺𑀭 𑀦𑀺𑀮𑀯𑁆𑀳𑁄, 𑀲𑀳𑀸𑀬𑁄 𑀘𑀻𑀭𑀲𑀢𑁆𑀣𑀼𑀢𑁄;

𑀫𑀢𑁄 𑀧𑀼𑀩𑁆𑀩𑁂𑀯 𑀢𑀲𑁆𑀫𑀸, 𑀲𑁄 𑀲𑀭𑀦𑁆𑀢𑁄 𑀢𑀁 𑀦 𑀇𑀘𑁆𑀙𑀺𑀢𑀁.

𑀅𑀳𑁄𑀭𑀚𑁆𑀚𑀫𑁆𑀧𑀺 𑀤𑀻𑀧𑀫𑁆𑀳𑀺, 𑀦 𑀫𑀜𑁆𑀜𑀺𑀢𑁆𑀣 𑀲𑀼𑀔𑀸𑀯𑀳𑀁;

𑀅𑀪𑀸𑀯𑁂𑀦 𑀲𑀳𑀸𑀬𑀲𑁆𑀲, 𑀲𑀳𑀸𑀬𑀸’𑀢𑀻𑀯 𑀤𑀼𑀮𑁆𑀮𑀪𑀸.

𑀢𑁂𑀦𑁂𑀯 𑀯𑀼𑀢𑁆𑀢𑀁 𑀫𑀼𑀦𑀺𑀦𑀸, 𑀥𑀫𑁆𑀫𑀸 𑀬𑁂𑀓𑁂𑀘𑀺 𑀮𑁄𑀓𑀺𑀬𑀸;

𑀢𑀣𑀸 𑀮𑁄𑀓𑀼𑀢𑁆𑀢𑀭𑀸 𑀘𑁂𑀯, 𑀥𑀫𑁆𑀫𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑁄.

𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫, 𑀲𑀩𑁆𑀩𑁂 𑀢𑁂 𑀳𑁄𑀦𑁆𑀢𑀺 𑀧𑀸𑀡𑀺𑀦𑀁;

𑀢𑀲𑁆𑀫𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀲𑀼, 𑀓𑀢𑁆𑀢𑀩𑁆𑀩𑁄’𑀢𑀺 𑀲𑀤𑀸 𑀤𑀭𑁄.

𑀆𑀤𑀺𑀧𑀸𑀤𑁄𑀯 𑀲𑁄 𑀢𑀲𑁆𑀫𑀸, 𑀳𑀼𑀢𑁆𑀯𑀸 𑀭𑀚𑁆𑀚𑀁 𑀯𑀺𑀘𑀸𑀭𑀬𑀺;

𑀧𑀸𑀮𑁂𑀢𑀼𑀁𑀬𑁂𑀯 𑀤𑀻𑀧𑀫𑁆𑀳𑀺, 𑀚𑀺𑀯𑀦𑁆𑀢𑁄 𑀯𑀺𑀬 𑀧𑀸𑀡𑀺𑀦𑁄.

𑀓𑀲𑁆𑀲𑀧𑀲𑁆𑀲 𑀲𑀪𑀸𑀢𑀼𑀲𑁆𑀲, 𑀧𑀼𑀢𑁆𑀢𑀁 𑀲𑁄 𑀅𑀕𑁆𑀕𑀩𑁄𑀥𑀺𑀓𑀁;

𑀞𑀧𑁂𑀢𑁆𑀯𑀸 𑀑𑀧𑀭𑀚𑁆𑀚𑀫𑁆𑀳𑀺, 𑀤𑀢𑁆𑀯𑀸 𑀪𑁄𑀕𑀫𑀦𑀧𑁆𑀧𑀓𑀁.

𑀤𑁂𑀲𑀁 𑀤𑀢𑁆𑀯𑀸𑀦 𑀧𑀸𑀘𑀺𑀦𑀁, 𑀯𑀲𑀺𑀢𑀼𑀁 𑀢𑀢𑁆𑀣 𑀧𑁂𑀲𑀺𑀬;

𑀤𑁂𑀲𑀁 𑀤𑀓𑁆𑀔𑀺𑀡𑀫𑀸𑀤𑀸𑀲𑀺, 𑀭𑀸𑀚 𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄.

𑀫𑀳𑀸𑀧𑀸𑀴𑀺𑀫𑁆𑀳𑀺 𑀤𑀸𑀦𑀜𑁆𑀘, 𑀤𑀸𑀧𑁂𑀲𑀺 𑀤𑀲𑀯𑀸𑀳𑀡𑀁;

𑀲𑀩𑁆𑀩𑁂 𑀪𑁄𑀕𑁂 𑀲𑀫𑁂’𑀓𑀸𑀲𑀺, 𑀬𑀸𑀘𑀦𑀸𑀦𑀁 𑀲𑀳’𑀢𑁆𑀢𑀦𑀸.

𑀅𑀤𑀢𑁆𑀯𑀸 𑀬𑀸𑀘𑀓𑀸𑀦𑀁 𑀲𑁄, 𑀦𑀼 𑀓𑀺𑀜𑁆𑀘𑀺 𑀧𑀭𑀺𑀪𑀼𑀜𑁆𑀚𑀢𑀺;

𑀪𑀼𑀢𑁆𑀢𑀁 𑀯𑀸 𑀲𑀢𑀺𑀬𑀸 𑀤𑁂𑀢𑀺, 𑀤𑁆𑀯𑀺 𑀕𑀼𑀡𑀁 𑀅𑀢𑁆𑀢𑀪𑀼𑀢𑁆𑀢𑀢𑁄.

𑀲𑀓𑀦𑀸𑀫𑀁 𑀲𑀓𑀸𑀭𑁂𑀲𑀺, 𑀪𑀺𑀓𑁆𑀔𑀼𑀦𑀻 𑀦 𑀫𑀼𑀧𑀲𑁆𑀲𑀬𑀁;

𑀧𑀸𑀤𑀸𑀦𑀕𑀭𑀕𑀮𑁆𑀮𑀜𑁆𑀘, 𑀆𑀭𑀸𑀫 𑀫𑀭𑀺𑀬𑀸𑀤𑀓𑀁.

𑀫𑀳𑀺𑀦𑁆𑀤𑀢𑀝𑀫𑀸𑀭𑀸𑀫𑀁, 𑀲𑀫𑁆𑀧𑀢𑁆𑀢 𑀘𑀢𑀼𑀧𑀘𑁆𑀘𑀬𑀁;

𑀅𑀜𑁆𑀜𑀫𑁆𑀧𑀺 𑀩𑀳𑀼𑀥𑀸 𑀓𑀸𑀲𑀺, 𑀧𑀼𑀜𑁆𑀜𑀁 𑀧𑀼𑀜𑁆𑀜𑀕𑀼𑀡𑁂𑀭𑀢𑁄.

𑀢𑀺𑀡𑀻 𑀯𑀲𑁆𑀲𑀸𑀦𑀺 𑀓𑀸𑀭𑁂𑀢𑁆𑀯𑀸, 𑀭𑀚𑁆𑀚𑀫𑁂𑀯 𑀫𑀳𑀸𑀫𑀢𑀺;

𑀕𑀯𑁂𑀲𑀦𑁆𑀢𑁄 𑀲𑀳𑀸𑀬𑀁’𑀯, 𑀤𑁂𑀯𑀮𑁄𑀓𑀫𑀼𑀧𑀸𑀕𑀫𑀺.

𑀯𑀲𑀦𑁆𑀢𑁄 ¶ 𑀤𑀓𑁆𑀔𑀺𑀡𑁂 𑀤𑁂𑀲𑁂, 𑀅𑀕𑁆𑀕𑀩𑁄𑀥𑀺 𑀓𑀼𑀫𑀸𑀭𑀓𑁄;

𑀓𑁂𑀦𑀸𑀧𑀺 𑀓𑀭𑀡𑀻𑀬𑁂𑀦, 𑀦𑀕𑀭𑀁 𑀆𑀕𑀢𑁄 𑀅𑀳𑀼.

𑀢𑀲𑁆𑀫𑀺𑀁 𑀢𑀢𑁆𑀣 𑀯𑀲𑀦𑁆𑀢𑀫𑁆𑀳𑀺, 𑀆𑀤𑀺𑀧𑀸𑀤𑁄 𑀫𑀳𑀺𑀦𑁆𑀤𑀓𑁄;

𑀫𑀢𑁄 𑀆𑀲𑀺 𑀢𑀢𑁄 𑀢𑀲𑁆𑀲, 𑀭𑀚𑁆𑀚𑀁 𑀳𑀢𑁆𑀣𑀕𑀢𑀁 𑀅𑀳𑀼.

𑀲𑁄 𑀢𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀲𑀡𑁆𑀞𑀧𑁂𑀢𑁆𑀯𑀸𑀦 𑀲𑀸𑀲𑀦𑀁;

𑀧𑀸𑀘𑀺𑀦 𑀤𑁂𑀲𑀧𑀢𑀺𑀦𑁄, 𑀅𑀕𑁆𑀕𑀩𑁄𑀥𑀺𑀲𑁆𑀲 𑀧𑁂𑀲𑀬𑀺.

𑀲 𑀆𑀕𑀦𑁆𑀢𑁆𑀯𑀸 𑀅𑀳𑀼 𑀭𑀸𑀚𑀸, 𑀲𑀺𑀮𑀸𑀫𑁂𑀖𑁄𑀢𑀺 𑀲𑀜𑁆𑀜𑀺𑀢𑁄;

𑀑𑀧𑀭𑀚𑁆𑀚𑁂 𑀓𑀼𑀫𑀸𑀭𑀜𑁆𑀘, 𑀅𑀪𑀺𑀲𑀺𑀜𑁆𑀘𑀺𑀢𑁆𑀣 𑀪𑀽𑀧𑀢𑀺.

𑀲𑁄 𑀭𑀸𑀚𑀸 𑀦𑀁 𑀦𑀺𑀬𑁄𑀚𑁂𑀢𑁆𑀯𑀸, 𑀘𑀺𑀦𑁆𑀢𑀸 𑀪𑀸𑀭𑀁 𑀯𑀺𑀫𑀼𑀜𑁆𑀘𑀺𑀬;

𑀪𑁄𑀕𑁂 𑀪𑀼𑀜𑁆𑀚𑀣 𑀢𑀼𑀫𑁆𑀳𑁂𑀢𑀺, 𑀲𑀬𑀁 𑀭𑀚𑁆𑀚𑀁 𑀯𑀺𑀘𑀸𑀭𑀬𑀺.

𑀬𑀣𑀸𑀬𑁄𑀕𑀁 𑀚𑀦𑀲𑁆𑀲𑁂𑀲-𑀓𑀸𑀲𑀺 𑀦𑀺𑀕𑁆𑀕𑀳𑀲𑀁𑀕𑀳𑁂;

𑀤𑁂𑀲𑁂 𑀉𑀩𑁆𑀩𑀺𑀦𑀬𑀁 𑀲𑀩𑁆𑀩𑀁, 𑀫𑀕𑁆𑀕𑀁 𑀧𑀸𑀧𑁂𑀲𑀺 𑀘𑀓𑁆𑀔𑀼𑀫𑀸.

𑀏𑀯𑀁 𑀢𑁂𑀲𑀼 𑀯𑀲𑀦𑁆𑀢𑁂𑀲𑀼, 𑀑𑀢𑀸𑀭𑀁 𑀧𑀸𑀧𑀓𑀫𑁆𑀫𑀺𑀦𑁄;

𑀦 𑀮𑀪𑀦𑁆𑀢𑀸 𑀯𑀺𑀘𑀺𑀦𑁆𑀢𑁂𑀲𑀼𑀁, 𑀪𑀺𑀦𑁆𑀤𑀺𑀢𑀩𑁆𑀩𑀸 𑀇𑀫𑁂 𑀇𑀢𑀺.

𑀭𑀸𑀚𑀸𑀦𑀫𑀼𑀧𑀲𑀗𑁆𑀓𑀫𑁆𑀫, 𑀅𑀯𑁄𑀘𑀼𑀁 𑀧𑀺𑀲𑀼𑀦𑀁 𑀭𑀳𑁄;

𑀢𑀼𑀯𑀁 𑀭𑀸𑀚𑀸𑀲𑀺 𑀦𑀸𑀫𑁂𑀦, 𑀭𑀸𑀚𑀸 𑀅𑀜𑁆𑀜𑁄 𑀲𑀪𑀸𑀯𑀳𑁄.

𑀉𑀧𑀭𑀸𑀚𑀸 𑀅𑀬𑀁 𑀭𑀚𑁆𑀚𑀁, 𑀕𑀡𑁆𑀳𑀺𑀲𑁆𑀲𑀢𑀺 𑀫𑀳𑀸𑀚𑀦𑀁;

𑀲𑀗𑁆𑀕𑀬𑁆𑀳 𑀦 𑀘𑀺𑀭𑁂𑀦𑁂𑀯, 𑀳𑁄𑀢𑀺 𑀭𑀸𑀚𑀸 𑀦 𑀲𑀁𑀲𑀬𑁄.

𑀢𑀁 𑀲𑀼𑀢𑁆𑀯𑀸𑀦 𑀫𑀳𑀻𑀧𑀸𑀮𑁄, 𑀧𑀭𑀺𑀪𑀺𑀚𑁆𑀚𑀺 𑀓𑀼𑀫𑀸𑀭𑀓𑁂;

𑀓𑀼𑀫𑀸𑀭𑁄𑀧𑀺 𑀯𑀺𑀥𑀺𑀢𑁆𑀯𑀸 𑀢𑀁, 𑀘𑁄𑀭𑁄 𑀳𑀼𑀢𑁆𑀯𑀸𑀦 𑀭𑀸𑀚𑀺𑀦𑁆𑀤𑁄.

𑀧𑀮𑀸𑀬𑀺𑀢𑁆𑀯𑀸 𑀲𑀓𑀁 𑀤𑁂𑀲𑀁, 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀳𑀺𑀁 𑀚𑀦𑁂;

𑀫𑀳𑀦𑁆𑀢𑀁 𑀩𑀮𑀫𑀸𑀤𑀸𑀬, 𑀓𑀸𑀢𑀼𑀁 𑀲𑀗𑁆𑀕𑀸𑀫 𑀫𑀸𑀭𑀪𑀺.

𑀓𑀤𑀮𑁆𑀬𑀸𑀤𑀺𑀦𑀺𑀯𑀸𑀢𑀫𑁆𑀳𑀺, 𑀲𑀗𑁆𑀕𑀸𑀫𑁄 𑀪𑀺𑀁𑀲𑀦𑁄 𑀅𑀳𑀼;

𑀕𑀢𑁄 𑀢𑀢𑁆𑀣 𑀧𑀭𑀸𑀚𑀺𑀢𑁆𑀯𑀸, 𑀓𑀼𑀫𑀸𑀭𑁄 𑀫𑀮𑀬𑀁 𑀯𑀲𑁄.

𑀢𑀢𑁄 𑀭𑀸𑀚𑀸 𑀓𑀢𑀜𑁆𑀜𑀽 𑀲𑁄, 𑀉𑀧𑀓𑀸𑀭𑀁 𑀲𑀪𑀸𑀢𑀼𑀦𑁄;

𑀘𑀺𑀦𑁆𑀢𑁂𑀢𑁆𑀯𑀸 𑀭𑀚𑁆𑀚𑀤𑀸𑀦𑀸𑀤𑀺𑀁, 𑀧𑀭𑀺𑀤𑁂𑀯𑀺𑀢𑁆𑀣 𑀧𑀸𑀓𑀝𑀁.

𑀓𑀼𑀫𑀸𑀭𑁄𑀧𑀺 𑀘 𑀢𑀁 𑀲𑀼𑀢𑁆𑀯𑀸, 𑀅𑀳𑁄𑀲𑀺 𑀫𑀼𑀤𑀼𑀘𑀺𑀢𑁆𑀢𑀓𑁄;

𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲, 𑀲𑀺𑀦𑀺𑀤𑁆𑀥𑀦𑁆𑀢𑀁 𑀧𑀓𑀸𑀲𑀬𑀼𑀁.

𑀭𑀸𑀚𑀸 𑀕𑀦𑁆𑀢𑁆𑀯𑀸 𑀲𑀬𑀁𑀬𑁂𑀯, 𑀫𑀮𑀬𑀁 𑀏𑀓𑀓𑁄 𑀯𑀁𑀲𑁄;

𑀓𑀼𑀫𑀸𑀭𑀁 𑀢𑀁 𑀲𑀫𑀸𑀤𑀸𑀬, 𑀆𑀕𑀫𑀺𑀢𑁆𑀣 𑀲𑀓𑀁 𑀧𑀼𑀭𑀁.

𑀳𑁄𑀢𑀺 ¶ 𑀦𑀺𑀲𑁆𑀲𑀁𑀲𑀬𑀁 [𑀏𑀯𑀁𑀧𑀺 𑀘𑀺𑀢𑁆𑀢𑁄] 𑀅𑀢𑀻𑀯 𑀲𑁄;

𑀯𑀺𑀯𑀸𑀳𑀁 𑀢𑁂𑀦 𑀓𑀸𑀭𑁂𑀲𑀺, 𑀥𑀻𑀢𑀭𑀁 𑀲𑀗𑁆𑀖𑀦𑀸𑀫𑀺𑀓𑀁.

𑀢𑀸𑀬 𑀲𑀤𑁆𑀥𑀺𑀁 𑀯𑀲𑀦𑁆𑀢𑁄 𑀲𑁄, 𑀯𑀺𑀲𑁆𑀲𑀢𑁆𑀣𑁄 𑀢𑁂𑀦 𑀭𑀸𑀚𑀺𑀦𑀸;

𑀧𑀳𑀸𑀭𑀁 𑀢𑀸𑀬 𑀧𑀸𑀤𑀸𑀲𑀺, 𑀤𑀼𑀝𑁆𑀞𑁄 𑀤𑁄𑀲𑀫𑁆𑀳𑀺 𑀓𑀺𑀲𑁆𑀫𑀺𑀁𑀘𑀺.

𑀧𑀺𑀢𑀭𑀁 𑀲𑀸 𑀉𑀧𑀸𑀕𑀫𑁆𑀫, 𑀓𑀭𑀼𑀡𑀁 𑀭𑁄𑀤𑀺𑀢𑀫𑁆𑀧𑀢𑀺;

𑀅𑀓𑀸𑀭𑀡𑁂 𑀫𑀁 𑀫𑀸𑀭𑁂𑀢𑀺, 𑀤𑀺𑀦𑁆𑀦𑁄 𑀯𑁄 𑀲𑀸𑀫𑀺𑀓𑁄 𑀇𑀢𑀺.

𑀲𑁄𑀧𑀺 𑀢𑀁 𑀲𑀼𑀢𑀫𑀢𑁆𑀢𑁂𑀯, 𑀤𑀼𑀓𑁆𑀓𑀢𑀁 𑀯𑀢 𑀫𑁂 𑀇𑀢𑀺;

𑀧𑀩𑁆𑀩𑀸𑀚𑁂𑀲𑀺 𑀮𑀳𑀼𑀁 𑀕𑀦𑁆𑀢𑁆𑀯𑀸, 𑀪𑀺𑀓𑁆𑀔𑀽𑀦𑀻 𑀦 𑀫𑀼𑀧𑀲𑁆𑀲𑀬𑀁.

𑀅𑀕𑁆𑀕𑀩𑁄𑀥𑀺𑀲𑀦𑀸𑀫𑁄𑀣, 𑀢𑀲𑁆𑀲𑀸 𑀫𑀸𑀢𑀼𑀮 𑀧𑀼𑀢𑁆𑀢𑀓𑁄;

𑀲𑀼𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀢𑀲𑁆𑀲𑀁 𑀲𑀸 𑀭𑀢𑁆𑀢𑀫𑀸𑀦𑀲𑁄.

𑀓𑀸𑀮𑁄’𑀬𑀦𑁆𑀢𑀺 𑀯𑀺𑀤𑀺𑀢𑁆𑀯𑀸𑀦, 𑀢𑀫𑀸𑀤𑀸𑀬 𑀧𑀮𑀸𑀬𑀺𑀢𑀼𑀁;

𑀅𑀜𑁆𑀜𑀢𑁄 𑀢𑀁 𑀕𑀳𑁂𑀢𑁆𑀯𑀸𑀦, 𑀕𑀢𑁄 𑀏𑀓𑁄𑀯 𑀭𑁄𑀳𑀡𑀁.

𑀅𑀕𑁆𑀕𑀩𑁄𑀥𑀺𑀁 𑀦𑀭𑀺𑀦𑁆𑀤𑁄 𑀲𑁄, 𑀅𑀕𑁆𑀕𑀩𑁄𑀥𑀺 𑀦𑀫𑀸𑀤𑀺𑀬;

𑀅𑀕𑁆𑀕𑀩𑁄𑀥𑀺𑀁 𑀦𑀺𑀳𑀦𑁆𑀢𑀼𑀁 𑀢𑀁, 𑀭𑁄𑀳𑀡𑀁 𑀢𑀫𑀼𑀧𑀸𑀯𑀻𑀲𑀺.

𑀅𑀕𑁆𑀕𑀩𑁄𑀥𑀺 𑀦𑀺𑀲𑁂𑀥𑁂𑀢𑁆𑀯𑀸, 𑀅𑀕𑁆𑀕𑀩𑁄𑀥𑀺𑀁 𑀲𑀪𑀸𑀢𑀭𑀁;

𑀅𑀧𑀭𑁂 𑀧𑀩𑁆𑀩𑀢𑁂 𑀳𑀦𑁆𑀢𑀼-𑀫𑀕𑁆𑀕𑀩𑁄𑀥𑀺𑀁 𑀲𑀬𑀁 𑀕𑀢𑁄.

𑀓𑀲𑀺𑀡𑀁 𑀭𑁄𑀳𑀡𑀁 𑀳𑀢𑁆𑀣-𑀕𑀢𑀁 𑀓𑀢𑁆𑀯𑀸 𑀫𑀳𑀸 𑀩𑀮𑁄;

𑀬𑀼𑀚𑁆𑀛𑀺𑀢𑁆𑀯𑀸 𑀢𑁂𑀦 𑀢𑀁 𑀕𑀡𑁆𑀳𑀺, 𑀪𑀭𑀺𑀬𑀁 𑀲𑀗𑁆𑀖𑀫𑀢𑁆𑀢𑀦𑁄.

𑀢𑀢𑁄 𑀧𑀝𑁆𑀞𑀸𑀬 𑀲𑀼𑀔𑀺𑀢𑀸, 𑀲𑀫𑀕𑁆𑀕𑀸 𑀢𑁂 𑀢𑀬𑁄 𑀚𑀦𑀸;

𑀯𑀺𑀲𑁆𑀲𑀝𑁆𑀞𑀸 𑀅𑀜𑁆𑀜𑀫𑀜𑁆𑀜𑁂𑀲𑀼, 𑀯𑀺𑀳𑀭𑀺𑀁𑀲𑀼 𑀬𑀣𑀸𑀭𑀼𑀘𑀺𑀁.

𑀯𑀸𑀧𑀸𑀭𑀦𑀺𑀁 𑀅𑀓𑀸𑀭𑀸𑀫𑀁, 𑀢𑀣𑀸 𑀫𑀸𑀡𑀕𑁆𑀕𑀩𑁄𑀥𑀺𑀓𑀁;

𑀲𑀪𑀢𑁆𑀢𑀼𑀤𑁆𑀤𑁂𑀲𑀪𑁄𑀕𑀜𑁆𑀘, 𑀯𑀺𑀳𑀸𑀭𑁂 𑀅𑀢𑀺𑀬𑀼𑀢𑁆𑀢𑀭𑁂.

𑀳𑀢𑁆𑀣𑀺 𑀓𑀼𑀘𑁆𑀙𑀺𑀯𑀺𑀳𑀸𑀭𑁂 𑀘, 𑀯𑀺𑀳𑀸𑀭𑁂 𑀧𑀼𑀦 𑀧𑀺𑀝𑁆𑀞𑀺𑀓𑁂;

𑀫𑀳𑀸𑀤𑀻𑀧𑀭𑀺𑀯𑁂𑀡𑁂 𑀘, 𑀧𑀸𑀲𑀸𑀤𑁂 𑀯𑀸𑀳𑀤𑀻𑀧𑀓𑁂.

𑀣𑀽𑀧𑀸𑀭𑀸𑀫𑀫𑁆𑀳𑀺 𑀕𑁂𑀳𑀲𑁆𑀲, 𑀤𑁆𑀯𑀸𑀭𑁂 𑀘 𑀧𑀭𑀺𑀚𑀺𑀡𑁆𑀡𑀓𑁂;

𑀓𑀸𑀲𑀺 𑀧𑀸𑀓𑀢𑀺𑀓𑀁 𑀢𑀢𑁆𑀣, 𑀣𑀫𑁆𑀪𑁂 𑀘 𑀧𑀭𑀺𑀯𑀢𑁆𑀢𑀬𑀺.

𑀏𑀯𑀁 𑀓𑀢𑁆𑀯𑀸𑀦 𑀧𑀼𑀜𑁆𑀜𑀸𑀦𑀺, 𑀧𑀼𑀜𑁆𑀜𑀸𑀦𑀺 𑀘 𑀬𑀣𑀸𑀩𑀮𑀁;

𑀘𑀢𑁆𑀢𑀸𑀮𑀻𑀲𑀢𑀺𑀫𑁂 𑀯𑀲𑁆𑀲𑁂, 𑀬𑀣𑀸𑀓𑀫𑁆𑀫 𑀫𑀼𑀧𑀸𑀕𑀫𑀺.

𑀅𑀣𑁄𑀧𑀭𑀸𑀚𑀸 𑀭𑀸𑀚𑀸’𑀲𑀺, 𑀅𑀕𑁆𑀕𑀩𑁄𑀥𑀺 𑀲𑀺𑀭𑀻𑀥𑀭𑁄;

𑀢𑀦𑀬𑁄 𑀲𑁄 𑀫𑀳𑀺𑀦𑁆𑀤𑀲𑁆𑀲, 𑀆𑀤𑀺𑀧𑀸𑀤𑀲𑁆𑀲 𑀥𑀻𑀫𑀢𑁄.

𑀲𑀸𑀲𑀦𑀫𑁆𑀧𑀺 ¶ 𑀘 𑀮𑁄𑀓𑀜𑁆𑀘, 𑀲𑀗𑁆𑀕𑀡𑀺𑀢𑁆𑀣 𑀬𑀣𑀸𑀭𑀳𑀁;

𑀑𑀧𑀭𑀚𑁆𑀚𑁂’𑀪𑀺𑀲𑀺𑀜𑁆𑀘𑀢𑁆𑀣, 𑀫𑀳𑀺𑀦𑁆𑀤𑀁 𑀧𑀼𑀢𑁆𑀢𑀫𑀢𑁆𑀢𑀦𑁄.

𑀫𑀳𑀸𑀩𑁄𑀥𑀺𑀲𑁆𑀲 𑀓𑀸𑀭𑁂𑀲𑀺, 𑀖𑀭𑀁 𑀚𑀺𑀡𑁆𑀡𑀁 𑀦𑀯𑀁 𑀣𑀺𑀭𑀁;

𑀆𑀭𑀸𑀫𑁂 𑀤𑁆𑀯𑁂 𑀘 𑀓𑀸𑀭𑁂𑀲𑀺, 𑀓𑀴𑀦𑁆𑀤𑀁 𑀫𑀮𑁆𑀮𑀯𑀸𑀢𑀓𑀁.

𑀥𑀫𑁆𑀫𑀓𑀫𑁆𑀫𑁂𑀳𑀺 𑀲𑀓𑁆𑀓𑀘𑁆𑀘𑀁, 𑀲𑁄𑀥𑁂𑀲𑀺 𑀚𑀺𑀦𑀲𑀸𑀲𑀦𑀁;

𑀯𑀺𑀦𑀺𑀘𑁆𑀙𑀦𑀦𑁆𑀢𑁄 𑀥𑀫𑁆𑀫𑁂𑀦, 𑀙𑀺𑀦𑁆𑀤𑀺 𑀓𑀽𑀝𑀝𑁆𑀝𑀓𑀸𑀭𑀓𑁂.

𑀪𑁂𑀲𑀚𑁆𑀚𑀜𑁆𑀘 𑀕𑀺𑀮𑀸𑀦𑀸𑀦𑀁, 𑀫𑀗𑁆𑀕𑀮𑀁 𑀘𑀸𑀯𑀫𑀗𑁆𑀕𑀮𑀁;

𑀮𑀗𑁆𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀲𑀬𑀫𑁂𑀯 𑀯𑀺𑀘𑀸𑀭𑀬𑀻.

𑀲𑀮𑀸𑀓𑀪𑀢𑁆𑀢𑀁 𑀤𑀸𑀧𑁂𑀲𑀺, 𑀦𑀺𑀓𑀸𑀬𑀢𑁆𑀢𑀬 𑀯𑀸𑀲𑀺𑀦𑀁;

𑀪𑁄𑀚𑀦𑀁 𑀧𑀁𑀲𑀼𑀓𑀽𑀮𑀻𑀦𑀁, 𑀅𑀢𑁆𑀢𑀬𑁄𑀕𑁆𑀕𑀁 𑀫𑀳𑀸𑀭𑀳𑀁.

𑀏𑀯𑀫𑀸𑀤𑀻𑀦𑀺 𑀓𑀢𑁆𑀯𑀸𑀦, 𑀧𑀼𑀜𑁆𑀜𑀸𑀦𑀺 𑀲𑀲𑀬𑀁 𑀯𑀲𑀻;

𑀘𑀼𑀢𑁄’𑀲𑀺 𑀙𑀳𑀺 𑀯𑀲𑁆𑀲𑁂𑀳𑀺, 𑀧𑀼𑀮𑀢𑁆𑀣𑀺𑀦𑀕𑀭𑁂 𑀯𑀲𑀁.

𑀢𑀢𑁄 𑀧𑀼𑀩𑁆𑀩𑁂𑀯 𑀢𑀲𑁆𑀲𑀸𑀲𑀺, 𑀧𑀼𑀢𑁆𑀢𑁄 𑀲𑁄 𑀬𑀼𑀯𑀭𑀸𑀚𑀓𑁄;

𑀫𑀢𑁄 𑀓𑀺𑀭 𑀢𑀢𑁄 𑀭𑀚𑁆𑀚𑀁, 𑀅𑀧𑀼𑀢𑁆𑀢𑀁 𑀢𑀁 𑀢𑀤𑀸 𑀅𑀳𑀼.

𑀧𑀼𑀢𑁆𑀢𑁄 𑀫𑀳𑀺𑀦𑁆𑀤𑁄 𑀦𑀸𑀫𑀸’𑀲𑀺, 𑀲𑀺𑀮𑀸 𑀫𑁂𑀖𑀲𑁆𑀲 𑀭𑀸𑀚𑀺𑀦𑁄;

𑀭𑀚𑁆𑀚𑀬𑁄𑀕𑁆𑀕𑁄 𑀫𑀳𑀸𑀧𑀼𑀜𑁆𑀜𑁄, 𑀮𑁄𑀓𑀲𑀗𑁆𑀕𑀡𑁆𑀳 𑀦𑀓𑁆𑀔𑀫𑁄.

𑀢𑀲𑁆𑀲 𑀚𑀸𑀢𑀤𑀺𑀦𑁂𑀬𑁂𑀯, 𑀭𑀸𑀚𑀸 𑀦𑀓𑁆𑀔𑀢𑁆𑀢𑀧𑀸𑀞𑀓𑁂;

𑀧𑀼𑀘𑁆𑀙𑀺𑀢𑁆𑀯𑀸 𑀭𑀚𑁆𑀚𑀬𑁄𑀕𑁆𑀕𑁄𑀢𑀺, 𑀲𑀼𑀢𑁆𑀯𑀸 𑀢𑁂𑀳𑀺 𑀯𑀺𑀬𑀸𑀓𑀢𑀁.

𑀤𑀢𑁆𑀯𑀸 𑀢𑁂𑀲𑀁 𑀥𑀦𑀁 𑀲𑀸𑀥𑀼, 𑀧𑀯𑀢𑁆𑀢𑀺𑀁 𑀢𑀁 𑀦𑀺𑀕𑀽𑀳𑀬𑀺;

𑀅𑀣 𑀦𑀁 𑀲𑁄 𑀯𑀬𑀧𑁆𑀧𑀢𑁆𑀢𑀁, 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀁𑀲𑀓𑀁.

𑀭𑀚𑁆𑀚𑀁 𑀯𑀲𑁆𑀲𑁂𑀯 𑀓𑀢𑁆𑀯𑀸𑀦, 𑀲𑀩𑁆𑀩𑀁 𑀳𑀢𑁆𑀣𑁂 𑀲𑀬𑀁𑀯𑀲𑀻;

𑀲𑁄 𑀥𑀫𑁆𑀫𑁂𑀦 𑀯𑀺𑀘𑀸𑀭𑁂𑀲𑀺, 𑀭𑀸𑀚 𑀓𑀺𑀘𑁆𑀘𑀁 𑀫𑀳𑀸𑀫𑀢𑀺.

𑀫𑀢𑁂𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀸 𑀲𑁄, 𑀅𑀕𑁆𑀕𑀩𑁄𑀥𑀸𑀪𑀺𑀥𑀸𑀦𑀺𑀦𑁄;

𑀲𑁂𑀦𑀸𑀧𑀘𑁆𑀘𑀁 𑀦 𑀕𑀡𑁆𑀳𑀺𑀢𑁆𑀣, 𑀦𑀬𑀜𑁆𑀜𑀽 𑀢𑀲𑁆𑀲 𑀳𑀢𑁆𑀣𑀓𑁄.

𑀢𑀤𑀸 𑀓𑁂𑀦𑀘𑀺 𑀕𑀦𑁆𑀢𑁆𑀯𑀸 𑀲𑁄, 𑀓𑀭𑀡𑀻𑀬𑁂𑀦 𑀭𑀸𑀚𑀺𑀦𑁄;

𑀲𑀫𑀼𑀤𑁆𑀤𑀢𑀻𑀭𑁂 𑀯𑀲𑀢𑀺, 𑀫𑀳𑀸𑀢𑀺𑀢𑁆𑀣𑀫𑁆𑀳𑀺 𑀧𑀝𑁆𑀝𑀦𑁂.

𑀲𑀼𑀢𑁆𑀯𑀸 𑀲𑁄 𑀘𑀽𑀴𑀧𑀺𑀢𑀼𑀦𑁄, 𑀫𑀭𑀡𑀁 𑀯𑁂𑀕𑀲𑀸’𑀕𑀫𑀸;

𑀘𑁄𑀭𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸𑀦, 𑀦𑀸𑀲𑁂𑀬𑁆𑀬𑀼𑀁 𑀦𑀕𑀭𑀁 𑀇𑀢𑀺.

𑀢𑀢𑁄 𑀉𑀢𑁆𑀢𑀭𑀤𑁂𑀲𑀫𑁆𑀳𑀺, 𑀫𑀡𑁆𑀟𑀮𑀻𑀓𑀸 𑀲𑀭𑀝𑁆𑀞𑀺𑀬𑀸;

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀦 𑀢𑀁 𑀤𑁂𑀲𑀁, 𑀙𑀺𑀦𑁆𑀦𑀭𑀸𑀚𑀓𑀭𑀁 𑀓𑀭𑀼𑀁.

𑀲𑁄 ¶ 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑁂𑀦𑁄, 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁂𑀲𑀓𑀁;

𑀲𑀩𑁆𑀩𑁂 𑀦𑀺𑀫𑁆𑀫𑀣𑀬𑀺𑀢𑁆𑀯𑀸𑀦, 𑀫𑀡𑁆𑀟𑀮𑀻 𑀓𑁂𑀲𑀭𑀝𑁆𑀞𑀺𑀬𑁂.

𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀫𑀢𑀞𑀸𑀦𑀁, 𑀤𑀺𑀲𑁆𑀯𑀸 𑀤𑁂𑀯𑀺𑀁 𑀧𑀭𑁄𑀤𑀺𑀬;

𑀅𑀲𑁆𑀲𑀸𑀲𑁂𑀢𑁆𑀯𑀸 𑀬𑀣𑀸𑀓𑀸𑀮𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑀫𑀸𑀘𑀺𑀦𑁆𑀢𑁂𑀲𑀺 𑀫𑀳𑀸𑀤𑁂𑀯𑀻, 𑀫𑀢𑁄 𑀫𑁂 𑀲𑀸𑀫𑀺𑀓𑁄 𑀇𑀢𑀺;

𑀭𑀓𑁆𑀔𑀺𑀲𑁆𑀲𑀸𑀫𑀺 𑀅𑀳𑀁 𑀤𑀻𑀧𑀁, 𑀢𑀼𑀫𑁆𑀳𑁂 𑀭𑀚𑁆𑀚𑀁 𑀓𑀭𑀺𑀲𑁆𑀲𑀣.

𑀢𑀼𑀡𑁆𑀳𑀺𑀪𑀽𑀢𑀸’𑀥𑀺𑀯𑀸𑀲𑁂𑀢𑁆𑀯𑀸, 𑀧𑀺𑀬𑀲𑀸 𑀧𑀸𑀧𑀩𑀼𑀤𑁆𑀥𑀺𑀓𑀸;

𑀭𑀳𑁄 𑀬𑁄𑀚𑀬𑀻 𑀢𑀁 𑀳𑀦𑁆𑀢𑀼𑀁, 𑀯𑀢𑁆𑀣𑀼𑀓𑀸𑀫𑀸 𑀬𑀣𑀸𑀭𑀼𑀘𑀺𑀁.

𑀲𑁂𑀦𑀸𑀧𑀢𑀺 𑀢𑀁 𑀜𑀢𑁆𑀯𑀸𑀦, 𑀢𑀲𑁆𑀲𑀸’𑀭𑀓𑁆𑀔𑀁 𑀯𑀺𑀥𑀸𑀬 𑀲𑁄;

𑀢𑀁 𑀧𑀓𑁆𑀔𑀺𑀬𑁂𑀳𑀺 𑀬𑀼𑀚𑁆𑀛𑀺𑀢𑁆𑀯𑀸, 𑀧𑀮𑀸𑀧𑁂𑀲𑀺 𑀫𑀳𑀸𑀚𑀦𑀁.

𑀢𑀢𑁄 𑀤𑁂𑀯𑀺𑀁 𑀲𑀩𑀦𑁆𑀥𑁂𑀢𑁆𑀯𑀸, 𑀧𑀓𑁆𑀔𑀺𑀧𑀺𑀢𑁆𑀯𑀸𑀦 𑀬𑀸𑀦𑀓𑁂;

𑀆𑀤𑀸𑀬 𑀢𑀁 𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀚𑁆𑀚𑀁 𑀕𑀡𑁆𑀳𑀺 𑀲𑀲𑀸𑀥𑀦𑀁.

𑀲𑁄 𑀲𑁂𑀦𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀯𑀲𑀦𑁆𑀢𑁄 𑀓𑀸𑀴𑀯𑀸𑀧𑀺𑀬𑀁;

𑀓𑀸𑀢𑀼𑀁 𑀲𑀗𑁆𑀕𑀸𑀫 𑀫𑀸𑀕𑀜𑁆𑀙𑀺, 𑀲𑀗𑁆𑀕𑀕𑀸𑀫𑀧𑁆𑀧𑀤𑁂𑀲𑀓𑀁.

𑀲𑁂𑀦𑀸𑀧𑀢𑀺 𑀧𑀯𑀢𑁆𑀢𑀺𑀁 𑀢𑀁, 𑀲𑀼𑀢𑁆𑀯𑀸 𑀲𑀫𑁆𑀧𑀦𑁆𑀦𑀯𑀸𑀳𑀦𑁄;

𑀤𑁂𑀯𑀺𑀜𑁆𑀘 𑀢𑀁 𑀲𑀫𑀸𑀤𑀸𑀬, 𑀅𑀕𑀫𑀸 𑀢𑀢𑁆𑀣 𑀲𑀚𑁆𑀚𑀼𑀓𑀁.

𑀢𑁂𑀲𑀁 𑀢𑀢𑁆𑀣𑀲𑀺 𑀲𑀗𑁆𑀕𑀸𑀫𑁄, 𑀉𑀪𑀺𑀦𑁆𑀦𑀁 𑀮𑁄𑀫𑀳𑀁𑀲𑀦𑁄;

𑀆𑀤𑀺𑀧𑀸𑀤𑁄 𑀢𑀤𑀸𑀲𑁂𑀦𑀁, 𑀑𑀳𑀻𑀬𑀦𑁆𑀢𑀁 𑀲𑀫𑁂𑀓𑁆𑀔𑀺𑀬.

𑀧𑀮𑀸𑀬𑀺𑀢𑁆𑀯𑀸 𑀆𑀭𑀼𑀳𑀺𑀢𑁆𑀣, 𑀅𑀘𑁆𑀙𑀲𑁂𑀮𑀁 𑀲𑀯𑀸𑀳𑀦𑁄;

𑀧𑀮𑀸𑀧𑁂𑀢𑁆𑀯𑀸𑀦 𑀢𑀁 𑀢𑀢𑁆𑀣, 𑀲𑁂𑀦𑀸𑀧𑀢𑀺 𑀲𑀼𑀔𑀁 𑀯𑀲𑀺.

𑀲𑀼𑀜𑁆𑀜𑀁𑀢𑀺 𑀦𑀕𑀭𑀁 𑀲𑀼𑀢𑁆𑀯𑀸, 𑀫𑀡𑁆𑀟𑀮𑀻𑀓𑀸𑀧𑀺 𑀉𑀢𑁆𑀢𑀭𑁂;

𑀤𑁂𑀲𑁂 𑀲𑀩𑁆𑀩𑁂 𑀲𑀫𑀸𑀕𑀫𑁆𑀫, 𑀅𑀕𑁆𑀕𑀳𑁂𑀲𑀼𑀁 𑀧𑀼𑀭𑀁 𑀢𑀤𑀸.

𑀲𑁄 𑀳𑀺 𑀢𑁂 𑀧𑀝𑀺𑀩𑀸𑀳𑁂𑀲𑀺, 𑀲𑀽𑀭𑁄 𑀥𑀻𑀭𑀧𑀭𑀓𑁆𑀓𑀫𑁄;

𑀅𑀣𑀸𑀕𑀫𑁆𑀫 𑀧𑀼𑀭𑀁 𑀭𑀚𑁆𑀚𑀁, 𑀯𑀺𑀘𑀸𑀭𑁂𑀲𑀺 𑀬𑀣𑀸𑀦𑀬𑀁.

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑁄𑀓𑀲𑁆𑀲, 𑀫𑀘𑁆𑀙𑀸𑀦𑀁 𑀫𑀺𑀕𑀧𑀓𑁆𑀔𑀺𑀦𑀁;

𑀜𑀸𑀢𑀻𑀦𑀁 𑀩𑀮𑀓𑀸𑀬𑀲𑁆𑀲, 𑀓𑀢𑁆𑀢𑀩𑁆𑀩𑀁 𑀲𑀩𑁆𑀩𑀫𑀸𑀘𑀭𑀺.

𑀧𑀘𑁆𑀙𑀸 ¶ 𑀅𑀦𑀼 𑀩𑀮𑀧𑁆𑀧𑀢𑁆𑀢𑁄, 𑀤𑀧𑁆𑀧𑀼𑀮𑁄 𑀫𑀮𑀬𑀁 𑀕𑀢𑁄;

𑀪𑀸𑀕𑀺𑀦𑁂𑀬𑁆𑀬𑁄 𑀤𑀼𑀯𑁂 𑀘𑁂𑀯, 𑀧𑀓𑁆𑀓𑁄𑀲𑀺𑀢𑁆𑀯𑀸𑀦 𑀭𑁄𑀳𑀡𑀸.

𑀭𑀝𑁆𑀞𑁂 𑀚𑀦𑀧𑀤𑁂 𑀲𑀩𑁆𑀩𑁂, 𑀆𑀤𑀸𑀬 𑀩𑀳𑀼𑀯𑀸𑀳𑀦𑁄;

𑀭𑀢𑁆𑀢𑀺𑀬𑀁 𑀧𑀼𑀭𑀫𑀸𑀕𑀫𑁆𑀫, 𑀲𑀫𑀼𑀤𑁆𑀤𑁄 𑀯𑀺𑀬 𑀑𑀢𑁆𑀣𑀭𑀺.

𑀩𑀮𑀓𑀸𑀬𑁄 𑀧𑀼𑀭𑀁 𑀭𑀼𑀦𑁆𑀥𑀺, 𑀉𑀕𑁆𑀖𑁄𑀲𑁂𑀦𑁆𑀢𑁄 𑀲𑀫𑀦𑁆𑀢𑀢𑁄;

𑀳𑁂𑀲𑀺𑀢𑁂𑀦 𑀢𑀼𑀭𑀗𑁆𑀕𑀸𑀦𑀁, 𑀓𑁄𑀜𑁆𑀘𑀦𑀸𑀤𑁂 𑀦𑀤𑀦𑁆𑀢𑀺𑀦𑀁.

𑀢𑀸𑀴𑀸𑀯𑀘𑀭 𑀲𑀤𑁆𑀤𑀸𑀦𑀁, 𑀓𑀸𑀳𑀴𑀸𑀦𑀁 𑀭𑀯𑁂𑀦 𑀘;

𑀕𑀚𑁆𑀚𑀺𑀢𑁂𑀦 𑀪𑀝𑀸𑀦𑀜𑁆𑀘, 𑀆𑀓𑀸𑀲𑀁 𑀦 𑀢𑀤𑀸 𑀨𑀮𑀺.

𑀢𑀤𑀸 𑀲𑁂𑀦𑀸𑀧𑀢𑀺 𑀤𑀺𑀲𑁆𑀯𑀸, 𑀫𑀳𑀸𑀲𑁂𑀦𑀁 𑀧𑀫𑁄𑀤𑀺𑀬;

𑀆𑀭𑁄𑀘𑁂𑀲𑀺 𑀅𑀯𑀢𑁆𑀢𑀺𑀁 𑀢𑀁, 𑀩𑀮𑀓𑀸𑀬𑀲𑁆𑀲 𑀅𑀢𑁆𑀢𑀦𑁄.

𑀭𑀸𑀚𑀧𑀼𑀢𑁆𑀢𑀸 𑀢𑀬𑁄 𑀏𑀢𑁂, 𑀫𑀳𑀦𑁆𑀢𑀁 𑀩𑀮𑀫𑀸𑀤𑀺𑀬;

𑀦𑀕𑀭𑀁 𑀦𑁄’𑀧𑀭𑀼𑀦𑁆𑀥𑀺𑀁𑀲𑀼, 𑀓𑀺𑀦𑁆𑀢𑀼 𑀓𑀢𑁆𑀢𑀩𑁆𑀩 𑀫𑁂𑀢𑁆𑀣 𑀯𑁄.

𑀏𑀯𑀁 𑀯𑀼𑀢𑁆𑀢𑀸 𑀢𑀫𑀸𑀳𑀁𑀲𑀼, 𑀲𑀽𑀭𑀸 𑀢𑀲𑁆𑀲 𑀭𑀡𑀢𑁆𑀣𑀺𑀦𑁄;

𑀤𑁂𑀯𑀸𑀲𑁂𑀯𑀸 𑀤𑀺𑀦𑁂𑀬𑁂𑀯, 𑀲𑁂𑀯𑀓𑀸𑀦𑀁 𑀦 𑀚𑀻𑀯𑀺𑀢𑀁.

𑀏𑀯𑀁 𑀪𑀽𑀢𑁂 𑀲𑀘𑁂 𑀓𑀸𑀮𑁂, 𑀑𑀳𑀻𑀦𑀸 𑀚𑀻𑀯𑀺𑀪𑀢𑁆𑀣𑀺𑀦𑁄;

𑀧𑁄𑀲𑁂𑀲𑀺 𑀲𑀸𑀫𑀺 𑀓𑀺𑀁 𑀓𑀸𑀮-𑀫𑁂𑀢𑁆𑀢𑀓𑀁 𑀦𑁄 𑀬𑀣𑀸 𑀲𑀼𑀔𑀁.

𑀯𑀼𑀢𑁆𑀢𑁂 𑀏𑀯𑀁 𑀲𑀉𑀲𑁆𑀲𑀸𑀳𑁄, 𑀩𑀮𑀁 𑀲𑀚𑁆𑀚𑀺𑀬 𑀭𑀢𑁆𑀢𑀺𑀬𑀁;

𑀉𑀕𑁆𑀕𑀢𑁂 𑀅𑀭𑀼𑀡𑁂 𑀳𑀢𑁆𑀣𑀺-𑀫𑀸𑀭𑀼𑀬𑁆𑀳 𑀓𑀢𑀓𑀫𑁆𑀫𑀓𑀁.

𑀤𑁆𑀯𑀸𑀭𑁂𑀦𑁂’𑀓𑁂𑀦 𑀦𑀺𑀓𑁆𑀔𑀫𑁆𑀫, 𑀧𑀢𑀦𑁆𑀢𑁄 𑀅𑀲𑀦𑀻 𑀯𑀺𑀬;

𑀲𑀤𑁆𑀥𑀺𑀁 𑀬𑁄 𑀥𑀲𑀳𑀲𑁆𑀲𑁂𑀳𑀺, 𑀲𑀗𑁆𑀕𑀸𑀫𑀁 𑀓𑀸𑀲𑀺 𑀤𑀼𑀲𑁆𑀲𑀳𑀁.

𑀩𑀮𑀁 𑀢𑀁 𑀆𑀤𑀺𑀧𑀸𑀤𑀲𑁆𑀲, 𑀦𑀺𑀧𑁆𑀨𑁄𑀝𑁂𑀢𑁆𑀯𑀸 𑀢𑀢𑁄 𑀢𑀢𑁄;

𑀲𑀦𑁆𑀦𑀺𑀧𑀸𑀢𑀺𑀬 𑀏𑀓𑀚𑁆𑀛𑀁, 𑀦𑀺𑀬𑀢𑁆𑀢𑀺𑀁 𑀲𑀫𑁆𑀧𑀯𑁂𑀤𑀬𑀺.

𑀳𑀢𑀸𑀯𑀲𑁂𑀲𑁂 𑀆𑀤𑀸𑀬, 𑀆𑀤𑀺𑀧𑀸𑀤𑁄𑀧𑀺 𑀤𑀧𑁆𑀧𑀼𑀴𑁄;

𑀧𑀼𑀩𑁆𑀩𑀡𑁆𑀳𑁂𑀯 𑀧𑀭𑀸𑀚𑀺𑀢𑁆𑀯𑀸, 𑀧𑀮𑀸𑀬𑀺𑀢𑁆𑀯𑀸’𑀕 𑀭𑁄𑀳𑀡𑀁.

𑀭𑀸𑀚𑀧𑀼𑀢𑁆𑀢𑁂 𑀤𑀼𑀯𑁂 𑀘𑁂𑀯, 𑀭𑁄𑀳𑀡𑀫𑁆𑀳𑀸 𑀢𑀤𑀸 𑀕𑀢𑁂;

𑀚𑀻𑀯𑀕𑁆𑀕𑀸𑀳𑀁 𑀲𑀕𑀸𑀳𑁂𑀢𑁆𑀯𑀸, 𑀢𑁂 𑀆𑀤𑀸𑀬 𑀧𑀼𑀭𑀁 𑀕𑀢𑁄.

𑀏𑀯𑀁 𑀧𑀢𑁆𑀢𑀚𑀬𑁄 𑀲𑀽𑀭𑁄, 𑀤𑀻𑀧𑁂 𑀚𑀸𑀢𑁂 𑀦𑀺𑀭𑀸𑀓𑀼𑀮𑁂;

𑀧𑀸𑀘𑀺𑀦𑀤𑁂𑀲𑀁 𑀲𑀸𑀥𑁂𑀢𑀼𑀁, 𑀧𑁂𑀲𑀬𑀺𑀢𑁆𑀣 𑀲𑀯𑀸𑀳𑀦𑁂.

𑀢𑁂𑀧𑀺 𑀕𑀦𑁆𑀢𑁆𑀯𑀸𑀦 𑀤𑁂𑀲𑀁 𑀢𑀁, 𑀉𑀢𑁆𑀢𑀭𑀁 𑀤𑁂𑀲𑀫𑁂𑀯 𑀘;

𑀲𑀸𑀥𑀬𑀺𑀢𑁆𑀯𑀸’𑀘𑀺𑀭𑁂𑀦𑁂𑀯, 𑀲𑀗𑁆𑀕𑀳𑁂𑀲𑀼𑀁 𑀫𑀳𑀸𑀩𑀮𑀁.

𑀭𑀸𑀚𑀸𑀧𑀺 ¶ 𑀢𑀁 𑀫𑀳𑀸𑀤𑁂𑀯𑀺𑀁, 𑀪𑀭𑀺𑀬𑀁 𑀓𑀸𑀲𑀺 𑀅𑀢𑁆𑀢𑀦𑁄;

𑀧𑀭𑀺𑀘𑁆𑀘𑀢𑁆𑀢𑀼𑀜𑁆𑀘 𑀫𑀸𑀭𑁂𑀢𑀼𑀁, 𑀦 𑀲𑀓𑁆𑀓𑀸𑀬𑀦𑁆𑀢𑀺 𑀘𑀺𑀦𑁆𑀢𑀺𑀬.

𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀕𑀩𑁆𑀪𑁄 𑀆𑀲𑀺 𑀧𑀢𑀺𑀝𑁆𑀞𑀺𑀢𑁄;

𑀧𑀼𑀢𑁆𑀢𑀁 𑀯𑀺𑀚𑀸𑀬𑀺 𑀲𑀸𑀥𑀜𑁆𑀜-𑀧𑀼𑀜𑁆𑀜𑀮𑀓𑁆𑀔𑀡𑀲𑀜𑁆𑀜𑀼𑀢𑁆𑀢𑀁.

𑀭𑀜𑁆𑀜𑁄 𑀲𑀸’𑀢𑀺𑀧𑀺𑀬𑀸 𑀆𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑁄𑀧𑀺 𑀔𑁄;

𑀧𑀼𑀢𑁆𑀢𑀲𑁆𑀲 𑀢𑀲𑁆𑀲 𑀧𑀸𑀤𑀸𑀲𑀺, 𑀑𑀧𑀭𑀚𑁆𑀚𑀁 𑀲𑀪𑁄𑀕𑀺𑀬𑀁.

𑀞𑀺𑀢𑀸 𑀧𑀸𑀘𑀺𑀦𑀤𑁂𑀲𑀫𑁆𑀳𑀺, 𑀆𑀤𑀺𑀧𑀸𑀤𑀸 𑀦𑀺𑀲𑀫𑁆𑀫𑀢𑀁;

𑀯𑀺𑀦𑀸 𑀲𑁄’𑀬𑀦𑁆𑀢𑀺 𑀅𑀫𑁆𑀳𑀸𑀓𑀁, 𑀉𑀪𑁄 𑀳𑀼𑀢𑁆𑀯𑀸𑀦 𑀏𑀓𑀢𑁄.

𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀲𑁂𑀦𑀜𑁆𑀘, 𑀲𑀫𑀸𑀤𑀸𑀬 𑀫𑀳𑀸𑀥𑀦𑀁;

𑀲𑀦𑁆𑀥𑀺𑀁𑀪𑀸𑀢𑀭𑀫𑀸𑀳𑀽𑀬, 𑀓𑀢𑁆𑀯𑀸𑀭𑁄𑀳𑀡 𑀤𑁂𑀲𑀢𑁄.

𑀕𑀗𑁆𑀕𑀸𑀢𑀻𑀭𑀫𑁆𑀳𑀺 𑀯𑀸𑀲𑀁 𑀢𑁂, 𑀓𑀧𑁆𑀧𑀬𑀺𑀁𑀲𑀼 𑀫𑀳𑀩𑁆𑀩𑀮𑀸;

𑀭𑀸𑀚𑀸 𑀲𑀩𑁆𑀩𑀁 𑀦𑀺𑀲𑀫𑁆𑀫𑁂’𑀢𑀁, 𑀫𑀡𑁆𑀟𑀮𑀻𑀓𑁂 𑀢𑀳𑀺𑀁 𑀢𑀳𑀺𑀁.

𑀆𑀭𑀸𑀥𑁂𑀢𑁆𑀯𑀸 𑀕𑀳𑁂𑀢𑁆𑀯𑀸𑀦, 𑀤𑀼𑀝𑁆𑀞𑁂 𑀫𑀸𑀭𑀺𑀬 𑀓𑁂𑀘𑀦;

𑀭𑀓𑁆𑀔𑀁 𑀤𑀢𑁆𑀯𑀸𑀦 𑀦𑀕𑀭𑁂, 𑀓𑀢𑁆𑀢𑀩𑁆𑀩𑀁 𑀲𑀸𑀥𑀼𑀬𑁄𑀚𑀺𑀬.

𑀫𑀳𑀸𑀲𑁂𑀦𑀗𑁆𑀕𑀫𑀸𑀤𑀸𑀬, 𑀫𑀳𑁂𑀲𑀺𑀜𑁆𑀘 𑀢𑀫𑀸𑀤𑀺𑀬;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑀺, 𑀫𑀳𑀼𑀫𑁆𑀫𑀸𑀭𑀫𑁆𑀳𑀺 𑀕𑀸𑀫𑀓𑁂.

𑀢𑀲𑁆𑀲𑀸𑀕𑀫𑀦𑀫𑀜𑁆𑀜𑀸𑀬, 𑀆𑀤𑀺𑀧𑀸𑀤𑀸𑀧𑀺 𑀢𑁂 𑀢𑀬𑁄;

𑀓𑁄𑀯𑀺𑀴𑀸𑀭𑀯𑁆𑀳𑀬𑁂 𑀕𑀸𑀫𑁂, 𑀫𑀳𑀸𑀬𑀼𑀤𑁆𑀥𑀁 𑀧𑀯𑀢𑁆𑀢𑀬𑀼𑀁.

𑀅𑀣 𑀭𑀸𑀚𑀸 𑀫𑀳𑀸𑀲𑁂𑀦𑁄, 𑀲𑀫𑀼𑀕𑁆𑀖𑀸𑀢𑁂𑀲𑀺 𑀢𑀁 𑀩𑀮𑀁;

𑀤𑀧𑁆𑀧𑀼𑀴𑁄 𑀲𑁄 𑀧𑀮𑀸𑀬𑀺𑀢𑁆𑀣, 𑀆𑀤𑀺 𑀧𑀸𑀤𑀸 𑀤𑀼𑀯𑁂 𑀳𑀢𑀸.

𑀢𑀢𑁆𑀣𑀸𑀧𑀺 𑀮𑀤𑁆𑀥𑀯𑀺𑀚𑀬𑁄, 𑀧𑀼𑀭𑀫𑀸𑀕𑀫𑁆𑀫𑀪𑀽𑀫𑀺𑀧𑁄;

𑀭𑀸𑀚𑀓𑀺𑀘𑁆𑀘𑀁 𑀯𑀺𑀘𑀸𑀭𑁂𑀲𑀺, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺.

𑀫𑀳𑀸𑀩𑁄𑀥𑀺 𑀤𑀼𑀫𑀺𑀦𑁆𑀤𑀲𑁆𑀲, 𑀫𑀳𑀸𑀘𑁂𑀢𑀺𑀢𑁆𑀢𑀬𑀲𑁆𑀲 𑀘;

𑀥𑀸𑀢𑀽𑀦𑀫𑁆𑀧𑀺 𑀘 𑀲𑀓𑁆𑀓𑀘𑁆𑀘𑀁, 𑀫𑀳𑀸𑀧𑀽𑀚𑀸𑀫𑀓𑀸𑀭𑀬𑀻.

𑀭𑁄𑀳𑀡𑀁 𑀲𑀫𑀼𑀧𑀸𑀕𑀫𑁆𑀫, 𑀤𑀧𑁆𑀧𑀼𑀴𑁄 𑀲𑁄 𑀢𑀫𑀸𑀕𑀢𑁄;

𑀩𑀮𑀁 𑀲𑀫𑁆𑀧𑀝𑀺𑀧𑀸𑀤𑁂𑀲𑀺, 𑀬𑀼𑀚𑁆𑀛𑀺𑀢𑀼𑀁 𑀧𑀼𑀦 𑀭𑀸𑀚𑀺𑀦𑀸.

𑀭𑀸𑀚𑀸 𑀲𑁄 𑀧𑀼𑀢𑁆𑀢𑀦𑀢𑁆𑀢𑀸𑀦𑀁, 𑀤𑁂𑀲𑀁 𑀓𑀸𑀢𑀼𑀁 𑀦𑀺𑀭𑀸𑀓𑀼𑀮𑀁;

𑀣𑀽𑀧𑀸𑀭𑀸𑀫𑀫𑁆𑀳𑀺 𑀲𑀩𑁆𑀩𑁂𑀧𑀺, 𑀲𑀦𑁆𑀦𑀺𑀧𑀸𑀢𑀺𑀬 𑀪𑀺𑀓𑁆𑀔𑀯𑁄.

𑀅𑀜𑁆𑀜𑁂𑀧𑀺 𑀘 𑀫𑀳𑀸𑀧𑀜𑁆𑀜𑁂, 𑀬𑀼𑀢𑁆𑀢𑀸 𑀬𑀼𑀢𑁆𑀢𑀺𑀯𑀺𑀲𑀸𑀭𑀤𑁂;

𑀭𑀸𑀚𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀼, 𑀦𑀺𑀧𑀼𑀡𑁄 𑀦𑀬𑀓𑁄𑀯𑀺𑀤𑁄.

𑀆𑀭𑁄𑀘𑁂𑀢𑁆𑀯𑀸 ¶ 𑀧𑀯𑀢𑁆𑀢𑀺𑀁 𑀢𑀁, 𑀢𑁂𑀳𑀺 𑀲𑀫𑁆𑀫𑀸 𑀧𑀓𑀸𑀲𑀺𑀢𑁄;

𑀘𑀢𑀼𑀭𑀗𑁆𑀕𑀫𑀳𑀸𑀲𑁂𑀦𑁄, 𑀲𑀩𑁆𑀩𑀽𑀧𑀓𑀭𑀡𑀸𑀦𑀼𑀕𑁄.

𑀤𑀻𑀧𑁂 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑁆𑀯𑀸, 𑀓𑀢𑁆𑀢𑀩𑁆𑀩𑀁 𑀦𑀕𑀭𑁂𑀧𑀺 𑀘;

𑀦𑀺𑀓𑁆𑀔𑀦𑁆𑀢𑁄 𑀦 𑀘𑀺𑀭𑁂𑀦𑁂𑀯, 𑀅𑀕𑀫𑀸 𑀫𑀸𑀭𑀧𑀩𑁆𑀩𑀢𑀁.

𑀲𑀫𑁆𑀫𑀤𑁆𑀤𑀺𑀢𑁆𑀯𑀸𑀦 𑀢𑀁 𑀤𑁂𑀲𑀁, 𑀔𑀺𑀧𑁆𑀧𑀁 𑀧𑀩𑁆𑀩𑀢𑀫𑀸𑀭𑀼𑀳𑀻;

𑀢𑀁 𑀤𑀺𑀲𑁆𑀯𑀸 𑀭𑁄𑀳𑀡𑁂 𑀲𑀩𑁆𑀩𑁂, 𑀪𑀻𑀢𑀸 𑀢𑀁 𑀯𑀲𑀫𑀸𑀕𑀫𑀼𑀁.

𑀢𑀢𑁄 𑀲𑀦𑁆𑀥𑀺𑀁 𑀓𑀭𑀺𑀢𑁆𑀯𑀸𑀦, 𑀤𑀧𑁆𑀧𑀼𑀴𑁂𑀦 𑀲𑀤𑀧𑁆𑀧𑀓𑁄;

𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀫𑀡𑀬𑁄, 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄.

𑀕𑀸𑀴𑁆𑀳𑀕𑀗𑁆𑀕𑀜𑁆𑀘 𑀓𑀢𑁆𑀯𑀸𑀦, 𑀲𑀻𑀫𑀁 𑀭𑁄𑀳𑀡𑀪𑁄𑀕𑀺𑀦𑀁;

𑀑𑀭𑀕𑀗𑁆𑀕𑀁 𑀲𑀫𑀸𑀤𑀸𑀬, 𑀭𑀸𑀚𑀪𑁄𑀕𑀫𑀓𑀸𑀭𑀬𑀺.

𑀤𑀻𑀧𑀫𑁂𑀯𑀁 𑀫𑀳𑀸𑀢𑁂𑀚𑁄, 𑀓𑀢𑁆𑀯𑀸 𑀯𑀺𑀕𑀢𑀓𑀡𑁆𑀝𑀓𑀁;

𑀏𑀓𑀸𑀢𑀧𑀢𑁆𑀢𑁄 𑀆𑀕𑀫𑁆𑀫, 𑀧𑀼𑀭𑀁 𑀯𑀲𑀺 𑀬𑀣𑀸𑀲𑀼𑀔𑀁.

𑀧𑀭𑀺𑀯𑁂𑀡𑀁 𑀲𑀓𑀸𑀭𑁂𑀲𑀺, 𑀭𑀸𑀚𑀸 𑀤𑀸𑀫𑀯𑀺𑀳𑀸𑀭𑀓𑀁;

𑀢𑀣𑀸 𑀲𑀦𑁆𑀦𑀺𑀭𑀢𑀺𑀢𑁆𑀣𑀜𑁆𑀘, 𑀧𑀼𑀮𑀢𑁆𑀣𑀺𑀦𑀕𑀭𑁂 𑀯𑀺𑀪𑀽.

𑀫𑀳𑀸𑀮𑁂𑀔𑀜𑁆𑀘 𑀓𑀸𑀭𑁂𑀲𑀺, 𑀧𑀭𑀺𑀯𑁂𑀡𑀫𑀪𑀬𑀸 𑀘𑀮𑁂;

𑀢𑀣𑀸 𑀭𑀢𑀦𑀧𑀸𑀲𑀸𑀤𑀁, 𑀢𑀣𑁂𑀯 𑀲𑀼𑀫𑀦𑁄𑀳𑀭𑀁.

𑀅𑀦𑁂𑀓𑀪𑀽𑀫𑀁 𑀓𑀸𑀭𑁂𑀢𑁆𑀯𑀸, 𑀯𑁂𑀚𑀬𑀦𑁆𑀢𑀫𑀺𑀯𑀸𑀧𑀭𑀁;

𑀢𑀣𑀸 𑀲𑀢𑀲𑀳𑀲𑁆𑀲𑁂𑀳𑀺, 𑀢𑀻𑀳𑀺 𑀘𑁂𑀯 𑀫𑀳𑀸𑀥𑀦𑁄.

𑀚𑀫𑁆𑀩𑁄𑀦𑀤𑀢𑀼𑀯𑀡𑁆𑀡𑀲𑁆𑀲, 𑀲𑀳𑀲𑁆𑀲𑁂𑀳𑀺 𑀘 𑀲𑀝𑁆𑀞𑀺𑀳𑀺;

𑀩𑀺𑀫𑁆𑀩𑀁 𑀲𑀢𑁆𑀣𑀼𑀲𑁆𑀲 𑀓𑀸𑀭𑁂𑀢𑁆𑀯𑀸, 𑀦𑀕𑁆𑀖𑀁 𑀘𑀽𑀴𑀸𑀫𑀡𑀺𑀬𑀼𑀢𑀁.

𑀧𑀽𑀚𑀁 𑀲𑀩𑁆𑀩𑁄𑀧𑀳𑀸𑀭𑁂𑀦, 𑀓𑀸𑀭𑁂𑀢𑁆𑀯𑀸𑀦 𑀫𑀳𑀸𑀭𑀳𑀁;

𑀧𑀸𑀲𑀸𑀤𑀫𑀳𑀦𑁂 𑀲𑀩𑁆𑀩𑀁, 𑀭𑀚𑁆𑀚𑀁 𑀑𑀲𑁆𑀲𑀚𑁆𑀚𑀺 𑀅𑀢𑁆𑀢𑀦𑁄.

𑀩𑁄𑀥𑀺𑀲𑀢𑁆𑀢𑀜𑁆𑀘 𑀓𑀸𑀭𑁂𑀢𑁆𑀯𑀸, 𑀭𑀸𑀚𑀸𑀦𑀁 𑀲𑀼𑀫𑀦𑁄𑀳𑀭𑀁;

𑀲𑀡𑁆𑀞𑀧𑀺𑀢𑁆𑀣𑀲𑀺𑀮𑀸 𑀫𑁂𑀖𑁂, 𑀘𑀸𑀭𑀼𑀁 𑀪𑀺𑀓𑁆𑀔𑀽𑀦𑀼𑀧𑀲𑁆𑀲𑀬𑁂.

𑀣𑀽𑀧𑀸𑀭𑀸𑀫𑀫𑁆𑀳𑀺 𑀣𑀼𑀧𑀲𑁆𑀲, 𑀓𑀸𑀲𑀺 𑀲𑁄𑀯𑀡𑁆𑀡𑀓𑀜𑁆𑀘𑀼𑀓𑀁;

𑀧𑀝𑁆𑀝𑀁 𑀓𑀢𑁆𑀯𑀸 𑀯𑀺𑀘𑀺𑀢𑀢𑁆𑀣𑀁, 𑀭𑀚𑀢𑀁 𑀅𑀦𑁆𑀢𑀭𑀦𑁆𑀢𑀭𑀸.

𑀢𑀲𑁆𑀫𑀺𑀁𑀬𑁂𑀯 𑀘 𑀧𑀸𑀲𑀸𑀤𑀁, 𑀧𑀭𑀺𑀚𑀺𑀡𑁆𑀡𑀁 𑀲𑀓𑀸𑀭𑀬𑀺;

𑀅𑀪𑀺𑀥𑀫𑁆𑀫𑀁 𑀓𑀣𑀸𑀧𑁂𑀲𑀺, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀫𑀳𑀁.

𑀫𑀳𑀸𑀣𑁂𑀭𑁂𑀦 𑀲𑀢𑀺𑀫𑀸, 𑀳𑁂𑀫𑀲𑀸𑀮𑀺𑀦𑀺𑀯𑀸𑀲𑀺𑀦𑀸;

𑀢𑀢𑁆𑀣 𑀧𑁄𑀓𑁆𑀔𑀭𑀡𑀺𑀜𑁆𑀘𑀲𑁆𑀲, 𑀧𑀭𑀺𑀪𑁄𑀕𑀸𑀬 𑀓𑀸𑀭𑀬𑀺.

𑀚𑀺𑀡𑁆𑀡𑁂 ¶ 𑀤𑁂𑀯𑀓𑀽𑀮𑁂 𑀓𑀢𑁆𑀯𑀸, 𑀩𑀳𑀼𑀓𑁂 𑀢𑀢𑁆𑀣 𑀢𑀢𑁆𑀣 𑀲𑁄;

𑀤𑁂𑀯𑀸𑀦𑀁 𑀧𑀝𑀺𑀫𑀸𑀬𑁄 𑀘, 𑀓𑀸𑀭𑀬𑀺𑀢𑁆𑀣 𑀫𑀳𑀸𑀭𑀳𑀸.

𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀤𑀢𑁆𑀯𑀸𑀦, 𑀧𑀘𑁆𑀘𑀕𑁆𑀖𑀁 𑀭𑀸𑀚𑀪𑁄𑀚𑀦𑀁;

𑀧𑀸𑀬𑁂𑀲𑀺 𑀔𑀻𑀭𑀁 𑀲𑁄𑀯𑀡𑁆𑀡-𑀢𑀝𑁆𑀝𑀓𑁂𑀳𑀺 𑀲𑀲𑀓𑁆𑀔𑀭𑀁.

𑀉𑀲𑀪𑁂 𑀧𑀗𑁆𑀕𑀼𑀮𑀸𑀦𑀜𑁆𑀘, 𑀚𑀻𑀯𑀺𑀓𑀜𑁆𑀘 𑀲𑀤𑀸𑀧𑀬𑀻;

𑀤𑀫𑀺𑀴𑀸𑀦𑀦𑁆𑀢𑀼 𑀧𑀸𑀤𑀸𑀲𑀺, 𑀅𑀲𑁆𑀲𑁂 𑀕𑁄𑀡𑁂 𑀅𑀕𑀡𑁆𑀳𑀢𑀁.

𑀅𑀦𑀸𑀣𑀸 𑀬𑁂 𑀲𑀮𑀚𑁆𑀚𑀸 𑀘, 𑀢𑁂 𑀘 𑀲𑀗𑁆𑀕𑀡𑁆𑀳𑀺 𑀲𑁄 𑀭𑀳𑁄;

𑀅𑀲𑀁𑀕𑀳𑀺𑀢𑁄 𑀤𑀻𑀧𑀫𑁆𑀳𑀺, 𑀦𑀢𑁆𑀣𑀺 𑀢𑁂𑀦 𑀬𑀣𑀸𑀭𑀳𑀁.

𑀤𑀸𑀢𑀩𑁆𑀩𑁄𑀢𑀺 𑀓𑀣𑀁 𑀕𑀼𑀦𑁆𑀦-𑀫𑀳𑀸𑀭𑁄 𑀲𑁄 𑀯𑀺𑀘𑀺𑀦𑁆𑀢𑀺𑀬;

𑀲𑀲𑁆𑀲𑁂 𑀔𑀻𑀭𑀕𑀢𑁂’𑀤𑀸𑀲𑀺, 𑀢𑁂𑀲𑀁 𑀔𑁂𑀢𑁆𑀢𑀲𑀳𑀲𑁆𑀲𑀓𑁂.

𑀓𑀸𑀴𑀯𑀸𑀧𑀺𑀫𑁆𑀳𑀺 𑀲𑁄 𑀯𑀸𑀭𑀺-𑀲𑀫𑁆𑀧𑀸𑀢𑀁 𑀓𑀸𑀭𑀬𑀺 𑀣𑀺𑀭𑀁;

𑀧𑀼𑀜𑁆𑀜𑀫𑁂𑀯𑀁 𑀯𑀺𑀥𑀁 𑀢𑀲𑁆𑀲, 𑀅𑀧𑁆𑀧𑀫𑁂𑀬𑁆𑀬𑀁 𑀩𑀳𑀼𑀁 𑀓𑀺𑀭.

𑀢𑀲𑁆𑀲 𑀧𑀼𑀢𑁆𑀢𑁄 𑀢𑀤𑀸 𑀆𑀲𑀺, 𑀬𑀼𑀯𑀭𑀸𑀚𑀸 𑀤𑀺𑀯𑀗𑁆𑀕𑀢𑁄;

𑀚𑀸𑀢𑁄 𑀲𑁂𑀦𑀸𑀧𑀢𑀺 𑀓𑀸𑀮𑁂, 𑀅𑀧𑀭𑁄 𑀅𑀢𑁆𑀣𑀺 𑀤𑀸𑀭𑀓𑁄.

𑀢𑀁 𑀭𑀸𑀚𑀸 𑀭𑀸𑀚𑀧𑀼𑀢𑁆𑀢𑁂𑀳𑀺, 𑀪𑀻𑀢𑁄 𑀭𑀸𑀚𑀸𑀭𑀳𑁄 𑀇𑀢𑀺;

𑀫𑀸𑀭𑁂𑀢𑀼𑀁 𑀢𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀯𑀟𑁆𑀠𑀧𑁂𑀲𑀺 𑀬𑀣𑀸 𑀢𑀣𑀸.

𑀅𑀭𑀻𑀳𑀺 𑀦𑀕𑀭𑁂 𑀭𑀼𑀤𑁆𑀥𑁂, 𑀧𑀺𑀢𑀭𑀁 𑀲𑁄 𑀓𑀺𑀭𑁂𑀓𑀤𑀸;

𑀉𑀧𑀲𑀗𑁆𑀓𑀫𑁆𑀫 𑀬𑀸𑀘𑀺𑀢𑁆𑀣, 𑀲𑀗𑁆𑀕𑀫𑀸𑀯𑀘𑀭𑀁 𑀕𑀚𑀁.

𑀲𑁄 𑀤𑀸𑀧𑁂𑀲𑀺 𑀫𑀳𑀸𑀦𑀸𑀕𑀁, 𑀖𑁄𑀭𑀁 𑀫𑀸𑀭𑀓𑀭𑀽𑀧𑀫𑀁;

𑀓𑀢𑀳𑀢𑁆𑀣𑀁 𑀩𑀮𑀜𑁆𑀘𑁂𑀯, 𑀲𑀩𑁆𑀩𑀸𑀬𑀼𑀥 𑀯𑀺𑀲𑀸𑀭𑀤𑀁.

𑀓𑀸𑀮𑁄𑀬𑀫𑀻𑀢𑀺 𑀫𑀦𑁆𑀢𑁆𑀯𑀸 𑀲𑁄, 𑀩𑀦𑁆𑀥𑀺𑀢𑁆𑀯𑀸 𑀙𑀼𑀭𑀺𑀓𑀁 𑀢𑀤𑀸;

𑀓𑀼𑀜𑁆𑀚𑀭𑀁 𑀯𑀭𑀫𑀸𑀭𑀼𑀬𑁆𑀳, 𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀩𑀳𑀺.

𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀩𑀮𑀁 𑀲𑀩𑁆𑀩𑀁, 𑀤𑀼𑀚𑁆𑀚𑀬𑀁 𑀚𑀬𑀫𑀕𑁆𑀕𑀳𑀻;

𑀭𑀸𑀚𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀢𑀁, 𑀲𑁂𑀦𑀸𑀧𑀘𑁆𑀘𑀜𑁆𑀘 𑀢𑀲𑁆𑀲’𑀤𑀸.

𑀏𑀲𑁄𑀯 𑀓𑀺𑀭 𑀕𑀦𑁆𑀢𑁆𑀯𑀸𑀦, 𑀲𑀩𑀮𑁄 𑀤𑁂𑀲𑀫𑀼𑀢𑁆𑀢𑀭𑀁;

𑀧𑀮𑀸𑀧𑁂𑀲𑀺 𑀲𑀲𑁂𑀦𑀁 𑀢𑀁, 𑀆𑀤𑀺𑀧𑀸𑀤𑀜𑁆𑀘 𑀤𑀧𑁆𑀧𑀼𑀮𑀁.

𑀩𑀤𑁆𑀥𑀯𑁂𑀭𑁄 𑀢𑀢𑁄’𑀳𑁄𑀲𑀺, 𑀤𑀧𑁆𑀧𑀼𑀴𑁄 𑀢𑀫𑁆𑀳𑀺 𑀲𑀸𑀥𑀼𑀓𑀁;

𑀫𑀳𑀸𑀉𑀫𑁆𑀫𑀸𑀭𑀬𑀼𑀤𑁆𑀥𑀫𑁆𑀳𑀺, 𑀤𑀺𑀲𑁆𑀯𑀸 𑀢𑀫𑀢𑀻𑀓𑁄𑀥𑀯𑀸.

𑀲𑀻𑀖𑀁 𑀧𑁂𑀲𑁂𑀲𑀺 𑀢𑀁 𑀳𑀦𑁆𑀢𑀼𑀁, 𑀳𑀢𑁆𑀣𑀺𑀫𑀸𑀭𑀼𑀴𑁆𑀳𑀫𑀢𑁆𑀢𑀦𑀸;

𑀑𑀯𑀺𑀚𑁆𑀛𑀺𑀬 𑀧𑀮𑀸𑀧𑁂𑀲𑀺, 𑀢𑀫𑁂𑀲 𑀲𑀓𑀤𑀦𑁆𑀢𑀻𑀦𑀸.

𑀤𑀺𑀲𑁆𑀯𑀸 ¶ 𑀢𑀫𑀢𑀺𑀲𑀦𑁆𑀢𑀼𑀝𑁆𑀞𑁄, 𑀅𑀜𑁆𑀜𑁂𑀲𑀜𑁆𑀘 𑀅𑀪𑀸𑀯𑀢𑁄;

𑀭𑀚𑁆𑀚𑀬𑁄𑀕𑁂 𑀅𑀤𑀸 𑀢𑀲𑁆𑀲, 𑀉𑀧𑀭𑀸𑀚𑀢𑁆𑀢𑀫𑀢𑁆𑀢𑀦𑁄.

𑀏𑀯𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀤𑀻𑀧𑀫𑁂𑀢𑀁 𑀲𑀼𑀪𑀼𑀜𑁆𑀚𑀺𑀬;

𑀯𑀺𑀧𑀸𑀓𑀁 𑀧𑀼𑀜𑁆𑀜𑀓𑀫𑁆𑀫𑀲𑁆𑀲, 𑀪𑀼𑀜𑁆𑀚𑀺𑀢𑀼𑀜𑁆𑀘 𑀤𑀺𑀯𑀗𑁆𑀕𑀢𑁄.

𑀏𑀯𑀁 𑀅𑀦𑁂𑀓𑁂𑀳𑀺 𑀦𑀬𑁂𑀳𑀺 𑀣𑀤𑁆𑀥𑀸;

𑀚𑀦𑀲𑁆𑀲 𑀤𑀼𑀓𑁆𑀔𑁂𑀳𑀺 𑀯𑀺𑀭𑀽𑀧𑀓𑁂𑀳𑀺;

𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺 𑀔𑀡𑁂 𑀦 𑀲𑀩𑁆𑀩𑁂;

𑀅𑀳𑁄 𑀢𑀳𑀺𑀁𑀬𑁂𑀯 𑀭𑀫𑀦𑁆𑀢𑀺 𑀩𑀸𑀮𑀸.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀙𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀅𑀘𑁆𑀘𑀬𑁂 ¶ 𑀧𑀺𑀢𑀼𑀦𑁄 𑀭𑀸𑀚𑀸, 𑀉𑀧𑀭𑀸𑀚𑀸 𑀅𑀳𑁄𑀲𑀺 𑀲𑁄;

𑀲𑀫𑀢𑁆𑀣𑁄 𑀲𑀓𑁆𑀓𑀼𑀫𑀺𑀢𑁆𑀢𑀸𑀦𑀁, 𑀓𑀸𑀢𑀼𑀁 𑀦𑀺𑀕𑁆𑀕𑀳 𑀲𑀁𑀕𑀳𑁂.

𑀲𑁂𑀦𑀸 𑀦𑀸𑀫𑀲𑀺 𑀲𑀧𑁆𑀧𑀜𑁆𑀜𑀸, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀔𑀼𑀤𑁆𑀤𑀧𑀼𑀢𑁆𑀢𑀸 𑀧𑀻𑀬𑀸’𑀢𑀻𑀯, 𑀭𑀜𑁆𑀜𑁄 𑀓𑀮𑁆𑀬𑀸𑀡𑀤𑀲𑁆𑀲𑀦𑀸.

𑀅𑀤𑀸𑀲𑀺 𑀬𑀼𑀯𑀭𑀸𑀚𑀢𑁆𑀢𑀁, 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀆𑀤𑀺𑀧𑀸𑀤𑁂’𑀧𑀭𑁂𑀓𑀸𑀲𑀺, 𑀭𑀸𑀚𑀺𑀦𑀻𑀧𑀺 𑀘 𑀥𑀻𑀢𑀭𑁄.

𑀤𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀭𑀸𑀚𑀸, 𑀢𑁂𑀲𑀁 𑀢𑁂𑀲𑀁 𑀬𑀣𑀸𑀭𑀳𑀁;

𑀚𑀦𑀁 𑀲𑀗𑁆𑀕𑀳𑀯𑀢𑁆𑀣𑀽𑀳𑀺, 𑀲𑀗𑁆𑀕𑀳𑁂𑀲𑀺 𑀘𑀢𑀽𑀳𑀺𑀧𑀺.

𑀅𑀣 𑀓𑁂𑀦𑀸𑀧𑀺 𑀲𑁄 𑀕𑀦𑁆𑀢𑁆𑀯𑀸, 𑀳𑁂𑀢𑀼𑀦𑀸 𑀫𑀡𑀺𑀳𑀻𑀭𑀓𑀁;

𑀯𑀲𑀦𑁆𑀢𑁄 𑀓𑀺𑀭 𑀅𑀲𑁆𑀲𑁄𑀲𑀺, 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀇𑀢𑀺.

𑀢𑀢𑁄 𑀲𑁂𑀦𑀸𑀧𑀢𑀺𑀜𑁆𑀘𑁂𑀯, 𑀚𑁂𑀝𑁆𑀞𑀧𑀼𑀢𑁆𑀢𑀜𑁆𑀘 𑀅𑀢𑁆𑀢𑀦𑁄;

𑀕𑀦𑁆𑀢𑁆𑀯𑀸 𑀲𑀸𑀥𑁂𑀣 𑀢𑀁 𑀤𑁂𑀲-𑀫𑀻𑀢𑀺 𑀧𑁂𑀲𑁂𑀲𑀺 𑀲𑀚𑁆𑀚𑀼𑀓𑀁.

𑀢𑁂𑀲𑀼 𑀢𑀢𑁆𑀣𑁄𑀧𑀬𑀸𑀢𑁂𑀲𑀼, 𑀧𑀺𑀲𑀼𑀦𑀸 𑀪𑁂𑀤𑀘𑀺𑀦𑁆𑀢𑀓𑀸;

𑀯𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀪𑀺𑀦𑁆𑀤𑀺𑀁𑀲𑀼, 𑀢𑁂 𑀉𑀪𑁄𑀧𑀺 𑀦𑀭𑀸𑀥𑀺𑀧𑁂.

𑀢𑀢𑁄 ¶ 𑀤𑁆𑀯𑁂 𑀯𑁂𑀭𑀺𑀦𑁄 𑀳𑀼𑀢𑁆𑀯𑀸, 𑀤𑁂𑀲𑀁 𑀕𑀡𑁆𑀳𑀺𑀢𑀼𑀫𑀸𑀭𑀪𑀼𑀁;

𑀭𑀸𑀚𑀸 𑀲𑀼𑀢𑁆𑀯𑀸 𑀔𑀡𑁂𑀦𑁂𑀯, 𑀤𑀼𑀭𑀢𑀺𑀲𑁆𑀲 𑀫𑀼𑀧𑀸𑀕𑀫𑀺.

𑀢𑁂 𑀉𑀪𑁄 𑀢𑀢𑁆𑀣 𑀖𑀸𑀢𑁂𑀢𑁆𑀯𑀸, 𑀢𑁂𑀲𑀁 𑀲𑀩𑁆𑀩𑀁 𑀲𑀫𑀸𑀤𑀺𑀬;

𑀳𑀦𑁆𑀢𑁆𑀯𑀸 𑀢𑀁 𑀧𑀓𑁆𑀔𑀺𑀬𑁂 𑀲𑀩𑁆𑀩𑁂, 𑀧𑀼𑀴𑀢𑁆𑀣𑀺𑀦𑀕𑀭𑀁 𑀕𑀫𑀺.

𑀢𑀤𑀸 𑀭𑁄𑀳𑀡𑀤𑁂𑀲𑀫𑁆𑀳𑀺, 𑀪𑁄𑀕𑀸𑀥𑀺𑀧𑀢𑀺𑀦𑁄 𑀲𑀼𑀢𑁄;

𑀤𑀸𑀞𑀸𑀲𑀺𑀯𑀸𑀤𑀺𑀧𑀸𑀤𑀲𑁆𑀲, 𑀫𑀳𑀺𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄.

𑀧𑀺𑀢𑀼𑀦𑁄 𑀲𑁄’𑀧𑀭𑀺𑀚𑁆𑀛𑀺𑀢𑁆𑀯𑀸, 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀕𑀫𑀸;

𑀤𑀺𑀲𑁆𑀯𑀸 𑀭𑀸𑀚𑀸𑀧𑀺 𑀲𑀦𑁆𑀢𑀼𑀝𑁆𑀞𑁄, 𑀢𑀁 𑀲𑀗𑁆𑀕𑀡𑁆𑀳𑀺 𑀬𑀣𑀸𑀭𑀳𑀁.

𑀢𑁂𑀦 𑀫𑁂𑀢𑁆𑀢𑀺𑀁 𑀣𑀺𑀭𑀁 𑀓𑀸𑀢𑀼𑀁, 𑀥𑀻𑀢𑀭𑀁 𑀤𑁂𑀯 𑀦𑀸𑀫𑀺𑀓𑀁;

𑀢𑀲𑁆𑀲 𑀤𑀢𑁆𑀯𑀸𑀦 𑀧𑀸𑀳𑁂𑀲𑀺, 𑀩𑀮𑀁 𑀭𑁄𑀳𑀡𑀫𑁂𑀯𑀲𑁄.

𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀲𑁂𑀦𑀸𑀬, 𑀫𑀤𑁆𑀤𑀸𑀧𑁂𑀢𑁆𑀯𑀸𑀦 𑀭𑁄𑀳𑀡𑀁;

𑀚𑀫𑁆𑀩𑀼𑀤𑀻𑀧𑀁 𑀧𑀮𑀸𑀧𑁂𑀢𑁆𑀯𑀸, 𑀧𑀺𑀢𑀭𑀁 𑀭𑁄𑀳𑀡𑀁 𑀮𑀪𑀺.

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀲𑀮𑀸𑀓𑀕𑁆𑀕𑀁 𑀣𑀺𑀭𑀁 𑀲𑀼𑀪𑀁;

𑀔𑁄𑀮𑀓𑁆𑀔𑀺𑀬𑀫𑀼𑀦𑀺𑀦𑁆𑀤𑀲𑁆𑀲, 𑀧𑀭𑀺𑀳𑀸𑀭𑀸𑀬 𑀤𑀸𑀧𑀬𑀺.

𑀫𑀳𑀸𑀦𑀸𑀫𑀯𑁆𑀳𑀬𑀁 𑀕𑀸𑀫𑀁, 𑀧𑀽𑀚𑀬𑀺𑀢𑁆𑀯𑀸 𑀬𑀣𑀸𑀩𑀮𑀁;

𑀯𑀟𑁆𑀠𑀫𑀸𑀦𑀤𑀼𑀫𑀺𑀦𑁆𑀤𑀲𑁆𑀲, 𑀚𑀺𑀡𑁆𑀡𑀁 𑀕𑁂𑀳𑀜𑁆𑀘 𑀓𑀸𑀭𑀺𑀬.

𑀭𑀼𑀓𑁆𑀔𑀡𑀢𑁆𑀣𑀸𑀬 𑀢𑀲𑁆𑀲𑀸;𑀤𑀸, 𑀓𑁄𑀝𑁆𑀞𑀸𑀕𑀸𑀫𑀁 𑀩𑀳𑀼𑀤𑀬𑀁;

𑀦𑀻𑀮𑀸𑀭𑀸𑀫𑀲𑁆𑀲 𑀧𑀸𑀤𑀸𑀲𑀺, 𑀓𑀸𑀴𑀼𑀲𑁆𑀲𑀁 𑀦𑀸𑀫 𑀕𑀸𑀫𑀓𑀁.

𑀮𑁄𑀳𑀭𑀽𑀧𑀲𑁆𑀲 𑀧𑀸𑀤𑀸𑀲𑀺, 𑀆𑀭𑀸𑀫𑀲𑁆𑀲 𑀘 𑀕𑀸𑀫𑀓𑀁;

𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀲𑀺, 𑀧𑀝𑀺𑀫𑀸𑀬𑁄 𑀘 𑀓𑀸𑀭𑀬𑀺.

𑀧𑀸𑀲𑀸𑀤𑁂 𑀘𑁂𑀢𑀺𑀬𑁄 𑀘𑁂𑀯, 𑀯𑀺𑀳𑀸𑀭𑁂 𑀘 𑀅𑀦𑀧𑁆𑀧𑀓𑁂;

𑀧𑀼𑀴𑀢𑁆𑀣𑀺𑀦𑀕𑀭𑁂’𑀓𑀸𑀲𑀺, 𑀯𑁂𑀚𑁆𑀚𑀲𑀸𑀮𑀁 𑀫𑀳𑀸𑀤𑀬𑁄.

𑀢𑀣𑀸 𑀧𑀡𑁆𑀟𑀸 𑀯𑀺𑀬𑀜𑁆𑀘𑁂𑀯, 𑀪𑁄𑀕𑀕𑀸𑀫𑀲𑀫𑀸𑀬𑀼𑀢𑀁;

𑀧𑀺𑀝𑁆𑀞𑀲𑀧𑁆𑀧𑀺𑀦𑀫𑀦𑁆𑀥𑀸𑀦𑀁, 𑀲𑀸𑀮𑀸𑀬𑁄 𑀘 𑀢𑀳𑀺𑀁 𑀢𑀳𑀺𑀁.

𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀸𑀧𑁂𑀢𑁆𑀯𑀸, 𑀅𑀝𑁆𑀝𑁂 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀢𑁂;

𑀭𑀸𑀚𑀕𑁂𑀳𑁂 𑀞𑀧𑀸𑀧𑁂𑀲𑀺, 𑀉𑀓𑁆𑀓𑁄𑀝𑀦𑀪𑀬𑁂𑀦 𑀲𑁄.

𑀦𑀸𑀕𑀯𑀟𑁆𑀠𑀦𑀦𑀸𑀫𑀲𑁆𑀲, 𑀪𑁄𑀕𑀕𑀸𑀫𑁂 𑀩𑀳𑀽 𑀅𑀤𑀸;

𑀮𑁂𑀔𑁂’𑀧𑀼𑀩𑁆𑀩𑁂 𑀦 𑀯𑀸𑀭𑁂𑀢𑁆𑀯𑀸, 𑀧𑀸𑀮𑁂𑀢𑁆𑀯𑀸 𑀧𑀼𑀩𑁆𑀩𑀲𑀸𑀲𑀦𑀁.

𑀧𑀺𑀢𑀭𑀸 ¶ 𑀘 𑀫𑀳𑀸𑀤𑀸𑀦𑀁, 𑀧𑀼𑀜𑁆𑀜𑀫𑀜𑁆𑀜𑀫𑁆𑀧𑀺 𑀯𑀸 𑀓𑀢𑀁;

𑀲𑀩𑁆𑀩𑀁 𑀢𑀫𑀯𑀺𑀦𑀸𑀲𑁂𑀢𑁆𑀯𑀸, 𑀦𑀺𑀘𑁆𑀘𑀁 𑀲𑁄 𑀭𑀓𑁆𑀔𑀺 𑀲𑀸𑀤𑀭𑁄.

𑀫𑀳𑁂𑀲𑀻 𑀘 𑀫𑀳𑀸𑀭𑀜𑁆𑀜𑁄, 𑀧𑀼𑀜𑁆𑀜𑀸𑀦𑀺 𑀩𑀳𑀼𑀓𑀸𑀭𑀬𑀺;

𑀓𑀡𑁆𑀝𑀓𑀁 𑀘𑁂𑀢𑀺𑀬𑀁 𑀓𑀸𑀲𑀺, 𑀤𑁂𑀯𑀻 𑀘𑁂𑀢𑀺𑀬𑀧𑀩𑁆𑀩𑀢𑁂.

𑀓𑀸𑀭𑁂𑀢𑁆𑀯𑀸 𑀚𑀬𑀲𑁂𑀦𑀜𑁆𑀘, 𑀧𑀩𑁆𑀩𑀢𑀁 𑀕𑀸𑀫𑀺𑀓𑀲𑁆𑀲𑀤𑀸;

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀸 𑀕𑀸𑀫𑀁, 𑀫𑀳𑀼𑀫𑁆𑀫𑀸𑀭𑀜𑁆𑀘 𑀢𑀲𑁆𑀲 𑀤𑀸.

𑀲𑀺𑀮𑀸𑀫𑁂𑀖𑀯𑁆𑀳𑀬𑀁 𑀓𑀢𑁆𑀯𑀸, 𑀪𑀺𑀓𑁆𑀔𑀼𑀦𑀻𑀦𑀫𑀼𑀧𑀲𑁆𑀲𑀬𑀁;

𑀲𑀺𑀮𑀸𑀫𑁂𑀖𑀯𑁆𑀳𑀬𑁂 𑀤𑀸𑀲𑀺, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀧𑀘𑁆𑀘𑀬𑁂.

𑀕𑀸𑀫𑀸𑀬𑁂’𑀲𑀼𑀁 𑀧𑀼𑀭𑀸𑀓𑀻𑀢𑀸, 𑀯𑀺𑀳𑀸𑀭𑁄 𑀢𑀢𑁆𑀣 𑀲𑀸𑀥𑀦𑀁;

𑀤𑀢𑁆𑀯𑀸 𑀢𑁂 𑀫𑁂 𑀘𑀬𑀺𑀢𑁆𑀯𑀸𑀦, 𑀯𑀺𑀳𑀸𑀭𑀲𑁆𑀲𑁂𑀯 𑀤𑀸𑀧𑀬𑀺.

𑀙𑀸𑀤𑀬𑀺𑀢𑁆𑀯𑀸 𑀫𑀳𑀸𑀭𑀼𑀓𑁆𑀔𑁂, 𑀲𑀩𑁆𑀩𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀦𑀸𑀦𑀸𑀭𑀸𑀕𑁂 𑀥𑀚𑁂 𑀘𑁂𑀯, 𑀧𑀝𑀸𑀓𑀸𑀬𑁄 𑀘 𑀧𑀽𑀚𑀬𑀺.

𑀧𑀼𑀩𑁆𑀩𑀸𑀭𑀸𑀫𑀓𑀪𑀸𑀕𑀫𑁆𑀧𑀺, 𑀧𑀸𑀲𑀸𑀤𑀁 𑀧𑀝𑀺𑀲𑀗𑁆𑀔𑀭𑀺;

𑀉𑀲𑁆𑀲𑀸𑀦𑀯𑀺𑀝𑁆𑀞𑀺𑀁 𑀤𑀼𑀩𑁆𑀪𑁄𑀕𑀁, 𑀲𑀼𑀪𑁄𑀕𑀁 𑀢𑀲𑁆𑀲 𑀓𑀸𑀭𑀬𑀺.

𑀯𑀺𑀳𑀸𑀭𑀁 𑀕𑀺𑀭𑀺𑀪𑀡𑁆𑀟𑀜𑁆𑀘, 𑀦𑀝𑁆𑀞𑀁 𑀧𑀸𑀓𑀢𑀺𑀓𑀁 𑀓𑀭𑀺;

𑀪𑁄𑀕𑀕𑀸𑀫𑁂 𑀘 𑀤𑀸𑀧𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀢𑀦𑁆𑀦𑀺𑀯𑀸𑀲𑀺𑀦𑀁.

𑀅𑀫𑁆𑀩𑀼𑀬𑁆𑀬𑀸𑀦𑀫𑁆𑀳𑀺 𑀆𑀯𑀸𑀲𑀁, 𑀓𑀢𑁆𑀯𑀸 𑀤𑀧𑁆𑀧𑀼𑀴𑀧𑀩𑁆𑀩𑀢𑀁;

𑀪𑀺𑀓𑁆𑀔𑀽𑀦𑀁 𑀢𑀺𑀲𑀢𑀲𑁆𑀲𑀸’𑀤𑀸, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑀓𑀸𑀭𑁂𑀢𑁆𑀯𑀸 𑀦𑀻𑀮𑀕𑀮𑁆𑀮𑀜𑁆𑀘, 𑀆𑀭𑀸𑀫𑀁 𑀲𑁄 𑀫𑀦𑁄𑀭𑀫𑀁;

𑀤𑀓𑀯𑀸𑀭𑀁 𑀩𑀳𑀼𑀧𑁆𑀧𑀸𑀤𑀁, 𑀢𑀲𑁆𑀲 𑀤𑀸𑀧𑁂𑀲𑀺 𑀓𑀸𑀭𑀺𑀬.

𑀅𑀭𑀺𑀓𑀸𑀭𑀺 𑀯𑀺𑀳𑀸𑀭𑁂 𑀘, 𑀧𑀝𑀺𑀲𑀗𑁆𑀔𑀸𑀲𑀺 𑀚𑀺𑀡𑁆𑀡𑀓𑀁;

𑀲𑀮𑀸𑀓𑀕𑁆𑀕𑀜𑁆𑀘 𑀧𑀸𑀲𑀸𑀤𑀁, 𑀅𑀧𑀼𑀩𑁆𑀩𑀁𑀬𑁂𑀯 𑀓𑀸𑀭𑀬𑀺.

𑀯𑀸𑀳𑀤𑀻𑀧𑁂 𑀲𑀓𑀸𑀭𑁂𑀲𑀺, 𑀲𑁂𑀦𑀕𑁆𑀕𑀩𑁄𑀥𑀺𑀧𑀩𑁆𑀩𑀢𑀁;

𑀥𑀫𑁆𑀫𑀁 𑀢𑀻𑀲𑀼 𑀦𑀺𑀓𑀸𑀬𑁂𑀲𑀼, 𑀯𑀸𑀘𑀬𑀺𑀢𑁆𑀣 𑀩𑀳𑀼𑀲𑁆𑀲𑀼𑀢𑁂.

𑀕𑀡𑁆𑀳𑀸𑀧𑁂𑀲𑀺 𑀘 𑀪𑀺𑀓𑁆𑀔𑀽𑀦𑀁, 𑀅𑀬𑁄𑀧𑀢𑁆𑀢𑁂𑀲𑀼 𑀕𑀡𑁆𑀞𑀺𑀓𑁂;

𑀧𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀲𑁄, 𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑀬𑀺.

𑀓𑀼𑀮𑀻𑀦𑀸𑀦𑀫𑀦𑀸𑀣𑀸𑀦𑀁, 𑀇𑀢𑁆𑀣𑀻𑀦𑀁’𑀤𑀸 𑀧𑀺𑀴𑀦𑁆𑀥𑀦𑀁;

𑀪𑁄𑀚𑀦𑀁 𑀪𑁄𑀚𑀦𑀢𑁆𑀣𑀻𑀦𑀁, 𑀩𑀳𑀼 𑀲𑁄 𑀤𑀸𑀲𑀺 𑀭𑀢𑁆𑀢𑀺𑀬𑀁.

𑀕𑀼𑀦𑁆𑀦𑀁 𑀲𑀲𑁆𑀲𑀸𑀦𑀺 𑀧𑀸𑀤𑀸𑀲𑀺, 𑀓𑀸𑀓𑀸𑀤𑀻𑀦𑀜𑁆𑀘 𑀪𑀢𑁆𑀢𑀓𑀁;

𑀢𑀡𑁆𑀟𑀼𑀮𑀜𑁆𑀘 𑀓𑀼𑀫𑀸𑀭𑀸𑀦𑀁, 𑀫𑀥𑀼𑀨𑀸𑀡𑀺𑀢𑀲𑀁𑀬𑀼𑀢𑁆𑀢𑀁.

𑀏𑀯𑀁 ¶ 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦, 𑀦𑀭𑀺𑀦𑁆𑀤𑁄 𑀲𑁄 𑀲𑀧𑀸𑀭𑀺𑀲𑁄;

𑀪𑀼𑀢𑁆𑀯𑀸 𑀧𑀜𑁆𑀘𑀲𑀼 𑀯𑀲𑁆𑀲𑁂𑀲𑀼, 𑀫𑁂𑀤𑀺𑀦𑀺𑀁 𑀲𑀫𑁆𑀧𑀭𑀺𑀘𑁆𑀘𑀚𑀺.

𑀢𑀢𑁄 𑀢𑀲𑁆𑀲 𑀲𑀼𑀢𑁄 𑀆𑀲𑀺, 𑀲𑀻𑀳𑀴𑀸𑀦𑀁 𑀭𑀣𑁂𑀲𑀢𑁄;

𑀲𑀩𑁆𑀩𑀭𑀽𑀧𑀕𑀼𑀡𑁄𑀧𑁂𑀢𑁄, 𑀫𑀳𑀺𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄.

𑀲𑁄 𑀥𑀫𑁆𑀫𑀺𑀓𑀲𑀻𑀮𑀸𑀫𑁂𑀖𑁄, 𑀇𑀘𑁆𑀘𑀸𑀲𑀺 𑀥𑀭𑀡𑀻𑀢𑀮𑁂;

𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀥𑀚𑁄, 𑀲𑀼𑀤𑁆𑀥𑀥𑀫𑁆𑀫𑀧𑀭𑀸𑀬𑀦𑁄.

𑀧𑀼𑀩𑁆𑀩𑀓𑁂𑀳𑀺 𑀦𑀭𑀺𑀦𑁆𑀤𑁂𑀳𑀺, 𑀓𑀢𑀁 𑀥𑀫𑁆𑀫𑀧𑀣𑀸𑀦𑀼𑀕𑀁;

𑀲𑀩𑁆𑀩𑀁 𑀓𑀸𑀲𑀺 𑀅𑀳𑀸𑀧𑁂𑀢𑁆𑀯𑀸, 𑀅𑀥𑀫𑁆𑀫𑀁 𑀢𑀼 𑀯𑀺𑀯𑀚𑁆𑀚𑀬𑀺.

𑀭𑀸𑀚𑀸𑀭𑀢𑀦𑀧𑀸𑀲𑀸𑀤𑁂, 𑀓𑀸𑀢𑀼𑀁 𑀲𑁄 𑀦𑀯𑀓𑀫𑁆𑀫𑀓𑀁;

𑀲𑀩𑁆𑀩𑀓𑀸𑀮𑁂𑀲𑀼 𑀤𑀸𑀧𑁂𑀲𑀺, 𑀕𑁂𑀝𑁆𑀞𑀼𑀫𑁆𑀩𑀤𑀓𑀯𑀸𑀭𑀓𑀁.

𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀲𑀺, 𑀧𑀼𑀜𑁆𑀜𑀓𑀫𑁆𑀫𑀫𑀓𑀸𑀲𑀺 𑀘;

𑀭𑀚𑁆𑀚𑀁 𑀓𑀢𑁆𑀯𑀸𑀦 𑀘𑀢𑀽𑀲𑀼, 𑀯𑀲𑁆𑀲𑁂𑀲𑀼 𑀦𑀺𑀥𑀦𑀁 𑀕𑀢𑁄.

𑀅𑀕𑁆𑀕𑀩𑁄𑀥𑀺 𑀢𑀢𑁄 𑀭𑀸𑀚𑀸, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺 𑀧𑀼𑀭𑁂;

𑀓𑀸𑀭𑁂𑀦𑁆𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀳𑀺𑀢𑀁 𑀲𑀼𑀔𑀫𑀲𑁂𑀲𑀢𑁄.

𑀥𑀸𑀢𑀼𑀧𑀽𑀚𑀁 𑀲𑀓𑀸𑀭𑁂𑀲𑀺, 𑀲𑀢𑁆𑀣𑀼𑀲𑀩𑁆𑀩𑀕𑀼𑀡𑀸𑀭𑀳𑀁;

𑀧𑀺𑀢𑀸𑀫𑀳𑀓𑀢𑀲𑁆𑀲𑀸’𑀧𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀫𑀳𑀁.

𑀉𑀤𑀬𑀕𑁆𑀕𑀸𑀤𑀺𑀩𑁄𑀥𑀺𑀜𑁆𑀘, 𑀧𑀭𑀺𑀯𑁂𑀡𑀁 𑀲𑀓𑀸𑀭𑀬𑀺;

𑀦𑀸𑀫𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀦𑁄, 𑀅𑀢𑁆𑀢𑀦𑁄 𑀘 𑀦𑀭𑀸𑀥𑀺𑀧𑁄.

𑀲𑀪𑁄𑀕𑀁 𑀧𑀭𑀺𑀯𑁂𑀡𑀜𑁆𑀘, 𑀓𑀢𑁆𑀯𑀸 𑀢𑀁 𑀪𑀽𑀢𑀦𑀸𑀫𑀓𑀁;

𑀲𑀓𑀸𑀘𑀭𑀺𑀬𑀓𑀲𑁆𑀲𑀸’𑀤𑀸, 𑀪𑀺𑀓𑁆𑀔𑀽𑀦𑀁 𑀢𑀺𑀲𑀢𑀲𑁆𑀲 𑀘.

𑀭𑀸𑀚𑀲𑀸𑀮𑀸𑀬 𑀤𑀸𑀧𑁂𑀲𑀺, 𑀘𑀽𑀴𑀯𑀸𑀧𑀺𑀬𑀕𑀸𑀫𑀓𑀁;

𑀕𑀸𑀫𑀤𑁆𑀯𑀬𑀜𑁆𑀘 𑀤𑀸𑀧𑁂𑀲𑀺, 𑀓𑀸𑀴𑀽𑀮𑀫𑀮𑁆𑀮𑀯𑀸𑀢𑀓𑁂.

𑀧𑀯𑁂𑀲𑀁 𑀯𑀺𑀦𑀺𑀯𑀸𑀭𑁂𑀲𑀺, 𑀉𑀧𑁄𑀲𑀣𑀤𑀺𑀦𑁂𑀲𑀼 𑀲𑁄;

𑀫𑀘𑁆𑀙𑀫𑀁𑀲𑀲𑀼𑀭𑀸𑀤𑀻𑀦𑀁, 𑀅𑀦𑁆𑀢𑁄𑀦𑀕𑀭𑀫𑀢𑁆𑀢𑀦𑁄.

𑀪𑀺𑀓𑁆𑀔𑀽 𑀯𑀸 𑀘𑁂𑀢𑀺𑀬𑁂 𑀯𑀸 𑀲𑁄, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀁 𑀢𑀢𑁄;

𑀯𑀸𑀮𑀼𑀓𑀸 𑀳𑀸 𑀯𑀺𑀦𑀲𑁆𑀲𑀦𑁆𑀢𑀼, 𑀇𑀢𑀺 𑀧𑀸𑀤𑁂𑀲𑀼 𑀯𑁄𑀥𑀬𑀻.

𑀬𑀁 𑀬𑀁 𑀲𑁄𑀯𑀕𑁆𑀕𑀺𑀬𑀁 𑀓𑀫𑁆𑀫𑀁, 𑀓𑀫𑁆𑀫𑀁 𑀦𑀺𑀲𑁆𑀲𑀭𑀡𑀯𑀳𑀁;

𑀯𑀢𑁆𑀣𑀼𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑁄, 𑀓𑀫𑁆𑀫𑀁 𑀢𑀁 𑀲𑀩𑁆𑀩𑀫𑀸𑀘𑀭𑀺.

𑀫𑀸𑀢𑀼𑀧𑀝𑁆𑀞𑀸𑀦𑀦𑀺𑀭𑀢𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀳𑁄𑀲𑀺𑀲𑁄;

𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀁, 𑀧𑀸𑀢𑁄𑀯 𑀓𑀺𑀭 𑀪𑀽𑀧𑀢𑀺.

𑀲𑀻𑀲𑀁 ¶ 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀦 𑀚𑀮𑁆𑀮𑀺𑀓𑀁;

𑀦𑀔𑁂 𑀯𑀺𑀲𑀼𑀤𑁆𑀥𑁂 𑀓𑀢𑁆𑀯𑀸𑀦, 𑀦𑀳𑀸𑀧𑁂𑀢𑁆𑀯𑀸𑀦 𑀲𑀸𑀤𑀭𑀁.

𑀅𑀘𑁆𑀙𑀸𑀤𑁂𑀢𑁆𑀯𑀸 𑀦𑀯𑀁 𑀯𑀢𑁆𑀣𑀁, 𑀲𑀼𑀔𑀲𑀫𑁆𑀨𑀲𑁆𑀲𑀫𑀢𑁆𑀢𑀦𑁄;

𑀯𑀢𑁆𑀣𑀁 𑀙𑀟𑁆𑀟𑀺𑀢𑀫𑀸𑀤𑀸𑀬, 𑀧𑁂𑀮𑁆𑀮𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁.

𑀢𑀲𑁆𑀲 𑀢𑁄𑀬𑁂𑀦 𑀲𑀺𑀜𑁆𑀘𑀺𑀢𑁆𑀯𑀸, 𑀲𑀻𑀲𑀁 𑀲𑀫𑀓𑀼𑀝𑀁 𑀲𑀓𑀁;

𑀕𑀦𑁆𑀥𑀫𑀸𑀮𑀸𑀳𑀺 𑀢𑀁 𑀲𑀫𑁆𑀫𑀸, 𑀘𑁂𑀢𑀺𑀬𑀁 𑀯𑀺𑀳 𑀧𑀽𑀚𑀺𑀬.

𑀦𑀫𑀲𑁆𑀲𑀺𑀢𑁆𑀯𑀸𑀦 𑀢𑀺𑀓𑁆𑀔𑀢𑁆𑀢𑀼𑀁, 𑀓𑀢𑁆𑀯𑀸 𑀢𑀁 𑀲𑁄 𑀧𑀤𑀓𑁆𑀔𑀺𑀡𑀁;

𑀤𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬’𑀲𑁆𑀲𑀸, 𑀯𑀢𑁆𑀣𑀸𑀤𑀻𑀦𑀺 𑀬𑀣𑀸𑀭𑀼𑀘𑀺𑀁.

𑀲𑀳𑀢𑁆𑀣𑁂𑀦𑁂𑀯 𑀪𑁄𑀚𑁂𑀢𑁆𑀯𑀸, 𑀪𑁄𑀚𑀦𑀁 𑀢𑀁 𑀫𑀳𑀸𑀭𑀳𑀁;

𑀪𑀼𑀢𑁆𑀣𑀸𑀯𑀲𑁂𑀲𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀲𑀫𑀸𑀓𑀺𑀭𑀺𑀬𑀫𑀢𑁆𑀣𑀓𑁂.

𑀪𑁄𑀚𑁂𑀢𑁆𑀯𑀸 𑀧𑀭𑀺𑀲𑀁 𑀢𑀲𑁆𑀲𑀸, 𑀭𑀸𑀚𑀪𑁄𑀚𑀦𑀫𑀼𑀢𑁆𑀢𑀫𑀁;

𑀲𑀚𑁆𑀚𑁂𑀢𑁆𑀯𑀸 𑀯𑀸𑀲𑀕𑁂𑀳𑀜𑁆𑀘, 𑀲𑀼𑀕𑀦𑁆𑀥𑀧𑀭𑀺𑀯𑀸𑀲𑀺𑀢𑀁.

𑀲𑀳𑀢𑁆𑀣𑀸 𑀧𑀜𑁆𑀜𑀧𑁂𑀢𑁆𑀯𑀸𑀦, 𑀲𑀬𑀦𑀁 𑀢𑀢𑁆𑀣 𑀲𑀸𑀥𑀼𑀓𑀁;

𑀧𑀸𑀤𑁂 𑀥𑁄𑀯𑀺𑀬 𑀫𑀓𑁆𑀔𑁂𑀢𑁆𑀯𑀸, 𑀕𑀦𑁆𑀥𑀢𑁂𑀮𑁂𑀦 𑀲𑀡𑁆𑀳𑀓𑀁.

𑀲𑀫𑁆𑀩𑀸𑀳𑁂𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀢𑁆𑀯𑀸 𑀦𑀺𑀤𑁆𑀤𑀫𑀼𑀧𑁂𑀢𑀓𑀁;

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀫𑀜𑁆𑀘𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀥𑀼𑀯𑀦𑁆𑀤𑀺𑀬.

𑀆𑀭𑀓𑁆𑀔𑀓𑁂 𑀦𑀺𑀬𑁄𑀚𑁂𑀢𑁆𑀯𑀸, 𑀤𑀸𑀲𑁂𑀓𑀫𑁆𑀫𑀓𑀭𑁂𑀧𑀺 𑀘;

𑀢𑀲𑁆𑀲𑀸 𑀧𑀺𑀝𑁆𑀞𑀺𑀫𑀓𑀢𑁆𑀯𑀸𑀦, 𑀅𑀧𑀓𑁆𑀓𑀫𑁂𑀯 𑀧𑀺𑀝𑁆𑀞𑀺𑀢𑁄.

𑀞𑀢𑁆𑀯𑀸 𑀅𑀤𑀲𑁆𑀲𑀦𑁂 𑀞𑀸𑀦𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀦 𑀯𑀦𑁆𑀤𑀺𑀬;

𑀲𑀦𑁆𑀢𑀼𑀝𑁆𑀞𑁄 𑀢𑁂𑀦 𑀓𑀫𑁆𑀫𑁂𑀦, 𑀲𑀭𑀦𑁆𑀢𑁄 𑀢𑀁 𑀧𑀼𑀦𑀧𑁆𑀧𑀼𑀦𑀁.

𑀕𑁂𑀳𑀁 𑀬𑀸𑀢𑀺 𑀲𑀚𑀻𑀯𑀦𑁆𑀢𑀁, 𑀏𑀯𑀫𑁂𑀯 𑀉𑀧𑀝𑁆𑀞𑀳𑀺;

𑀏𑀓𑀤𑀸 𑀤𑀸𑀲𑀯𑀸𑀤𑁂𑀦, 𑀯𑀦𑁆𑀤𑀺𑀢𑁆𑀯𑀸 𑀤𑀸𑀲𑀫𑀢𑁆𑀢𑀦𑁄.

𑀢𑁂𑀦𑀢𑁆𑀢𑀦𑁄 𑀓𑀣𑀸𑀧𑁂𑀲𑀺, 𑀔𑀫𑀸𑀧𑁂𑀢𑀼𑀁 𑀲𑀬𑀁 𑀯𑀘𑁄;

𑀅𑀢𑁆𑀢𑀸𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀤𑀸𑀧𑀬𑀺𑀢𑁆𑀯𑀸𑀦 𑀫𑀸𑀢𑀭𑀸.

𑀥𑀦𑀫𑀢𑁆𑀣𑀕𑁆𑀖𑀦𑀁 𑀜𑀢𑁆𑀯𑀸, 𑀪𑀼𑀚𑀺𑀲𑁆𑀲𑁄 𑀆𑀲𑀺 𑀩𑀼𑀤𑁆𑀥𑀺𑀫𑀸;

𑀏𑀯𑀁 𑀧𑀼𑀜𑁆𑀜𑀧𑀭𑁄 𑀳𑀼𑀢𑁆𑀯𑀸, 𑀓𑀢𑁆𑀯𑀸 𑀤𑀻𑀧𑀲𑁆𑀲 𑀲𑀗𑁆𑀕𑀳𑀁.

𑀏𑀓𑀸𑀤𑀲𑀳𑀺 𑀯𑀲𑁆𑀲𑁂𑀳𑀺, 𑀤𑁂𑀯𑀮𑁄𑀓𑀫𑀼𑀧𑀸𑀕𑀫𑀺;

𑀢𑀲𑁆𑀲𑀸𑀦𑀼𑀚𑁄 𑀤𑀧𑁆𑀧𑀼𑀴𑁄’𑀣, 𑀭𑀸𑀚𑀸 𑀳𑁄𑀲𑀺 𑀢𑀤𑀘𑁆𑀘𑀬𑁂.

𑀲𑀩𑁆𑀩𑀁 𑀧𑀼𑀩𑁆𑀩𑀓𑀭𑀸𑀚𑀽𑀦𑀁, 𑀘𑀭𑀺𑀬𑀁 𑀲𑁄 𑀲𑀫𑀸𑀘𑀭𑀺;

𑀢𑀤𑀸 𑀫𑀳𑀺𑀦𑁆𑀤𑀦𑀸𑀫𑀲𑁆𑀲, 𑀧𑀼𑀢𑁆𑀢𑀸𑀭𑁄𑀳𑀡𑀲𑀸𑀫𑀺𑀦𑁄.

𑀧𑀺𑀢𑀭𑀸 ¶ 𑀦𑀺𑀳𑀝𑀸’𑀕𑀜𑁆𑀙𑀼𑀁, 𑀭𑀸𑀚𑀸𑀦𑀁 𑀫𑀸𑀢𑀼𑀮𑀁 𑀲𑀓𑀁;

𑀲𑁄 𑀢𑁂 𑀤𑀺𑀲𑁆𑀯𑀸 𑀧𑀯𑀢𑁆𑀢𑀺𑀁 𑀢𑀁, 𑀲𑀼𑀢𑁆𑀯𑀸 𑀤𑀢𑁆𑀯𑀸 𑀫𑀳𑀸𑀩𑀮𑀁.

𑀧𑀸𑀳𑁂𑀲𑀺 𑀧𑀺𑀢𑀭𑀸 𑀬𑀼𑀤𑁆𑀥𑀁, 𑀓𑀸𑀢𑀼𑀁 𑀩𑀦𑁆𑀥𑀼 𑀳𑀺𑀢𑁂 𑀭𑀢𑁂;

𑀫𑀳𑀺𑀦𑁆𑀤𑁄𑀧𑀺 𑀢𑀣𑀸𑀪𑀸𑀯𑀁, 𑀯𑀺𑀤𑀺𑀢𑁆𑀯𑀸 𑀭𑁄𑀳𑀡𑀸𑀥𑀺𑀧𑁄.

𑀬𑀼𑀤𑁆𑀥𑀁 𑀧𑀝𑀺𑀧𑀤𑁂𑀬𑁂𑀯, 𑀢𑁂𑀲𑀁’𑀓𑀸𑀲𑀺 𑀫𑀳𑀸𑀩𑀮𑁄;

𑀢𑁂 𑀉𑀪𑁄𑀧𑀺 𑀧𑀮𑀸𑀬𑀺𑀁𑀲𑀼, 𑀤𑀢𑁆𑀯𑀸 𑀲𑁂𑀦𑀸𑀬 𑀦𑀸𑀬𑀓𑀁.

𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀳𑀻𑀧𑀸𑀮𑀁, 𑀲𑁂𑀯𑀫𑀸𑀦𑀸 𑀇𑀥𑀸’𑀯𑀲𑀼𑀁;

𑀧𑀺𑀢𑀸𑀧𑀺 𑀢𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀅𑀜𑁆𑀜𑁂𑀦 𑀲𑀓𑀩𑀦𑁆𑀥𑀼𑀦𑀸.

𑀬𑀼𑀚𑁆𑀛𑀦𑁆𑀢𑁄 𑀫𑀭𑀡𑀁 𑀕𑀜𑁆𑀙𑀺, 𑀜𑀸𑀢𑀺𑀲𑁄𑀧𑀺 𑀫𑀢𑁄 𑀓𑀺𑀭;

𑀢𑀤𑀸’𑀤𑀸 𑀪𑀸𑀕𑀺𑀦𑁂𑀬𑁆𑀬𑀲𑁆𑀲, 𑀭𑀸𑀚𑀸 𑀓𑀺𑀢𑁆𑀢𑀕𑁆𑀕𑀩𑁄𑀥𑀺𑀦𑁄.

𑀲𑀩𑁆𑀩𑀭𑀽𑀧𑀕𑀼𑀡𑁄𑀧𑁂𑀢𑀁, 𑀥𑀺𑀢𑀭𑀁 𑀤𑁂𑀯 𑀦𑀸𑀫𑀺𑀓𑀁;

𑀲𑁄 𑀤𑀧𑁆𑀧𑀼𑀴𑀁 𑀞𑀧𑁂𑀢𑁆𑀯𑀸𑀦, 𑀲𑁂𑀯𑀢𑁆𑀣𑀁 𑀢𑀲𑁆𑀲 𑀭𑀸𑀚𑀺𑀦𑁄.

𑀲𑀬𑀁 𑀲𑁂𑀦𑀗𑁆𑀕𑀫𑀸𑀤𑀸𑀬, 𑀭𑁄𑀳𑀡𑀁 𑀲𑀫𑀼𑀧𑀸𑀕𑀫𑀺;

𑀭𑁄𑀳𑀡𑀸𑀥𑀺𑀧𑀢𑀺 𑀳𑀼𑀢𑁆𑀯𑀸, 𑀲𑀩𑁆𑀩𑀸𑀓𑀸𑀭𑀲𑀫𑀧𑁆𑀧𑀺𑀢𑁄.

𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑁂𑀦𑁆𑀢𑁄, 𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑀬𑀺;

𑀭𑀸𑀚𑀸𑀓𑀸𑀲𑀺 𑀤𑀼𑀫𑀺𑀦𑁆𑀤𑀲𑁆𑀲, 𑀖𑀭𑀁 𑀚𑀺𑀡𑁆𑀡𑀁 𑀦𑀯𑀁 𑀣𑀺𑀭𑀁.

𑀲𑁄𑀯𑀡𑁆𑀡𑀔𑀘𑀺𑀢𑀁 𑀓𑀫𑁆𑀫𑀁, 𑀫𑀗𑁆𑀕𑀮𑁂𑀦 𑀘 𑀢𑀲𑁆𑀲 𑀲𑁄;

𑀅𑀢𑁆𑀢𑀦𑁄 𑀭𑀸𑀚𑀪𑀸𑀯𑀲𑁆𑀲, 𑀲𑀢𑁆𑀣𑀼𑀧𑀸𑀭𑀫𑀺𑀢𑀸𑀬 𑀘.

𑀲𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸, 𑀫𑀳𑀸𑀧𑀽𑀚𑀁 𑀧𑀯𑀢𑁆𑀢𑀬𑀺;

𑀚𑀺𑀡𑁆𑀡𑀁 𑀓𑀸𑀭𑁂𑀲𑀺 𑀧𑀸𑀲𑀸𑀤𑀁, 𑀳𑀢𑁆𑀣𑀺𑀓𑀼𑀘𑁆𑀙𑀺𑀯𑀺𑀳𑀸𑀭𑀓𑁂.

𑀯𑀸𑀳𑀤𑀻𑀧𑀲𑁆𑀲 𑀆𑀭𑀸𑀫𑀁, 𑀮𑀸𑀯𑀭𑀸𑀯𑀜𑁆𑀘 𑀧𑀩𑁆𑀩𑀢𑀁;

𑀯𑀺𑀳𑀸𑀭𑁂 𑀚𑁂𑀢𑀦𑀸𑀫𑁂 𑀘, 𑀓𑀢𑁆𑀯𑀸 𑀲𑁄𑀯𑀡𑁆𑀡𑀬𑀁 𑀫𑀼𑀦𑀺𑀁.

𑀯𑀟𑁆𑀠𑁂𑀢𑁆𑀯𑀸 𑀩𑁄𑀥𑀺𑀕𑁂𑀳𑀫𑁆𑀳𑀺, 𑀧𑀽𑀚𑀁𑀓𑀸𑀲𑀺 𑀅𑀘𑀺𑀦𑁆𑀢𑀺𑀬𑀁;

𑀅𑀦𑀼𑀲𑀁𑀯𑀘𑁆𑀙𑀭𑀁 𑀤𑀻𑀧𑁂, 𑀯𑀢𑁆𑀣𑀤𑀸𑀦𑀁 𑀧𑀯𑀢𑁆𑀢𑀬𑀺.

𑀫𑀳𑀸𑀧𑀸𑀴𑀺𑀜𑁆𑀘 𑀯𑀟𑁆𑀠𑁂𑀲𑀺, 𑀪𑀢𑁆𑀢𑀕𑁆𑀕𑀫𑀯𑀮𑁄𑀓𑀬𑀻;

𑀢𑀼𑀮𑀸𑀪𑀸𑀭𑀜𑁆𑀘 𑀤𑀸𑀧𑁂𑀲𑀺, 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀭𑀺.

𑀘𑀸𑀭𑀺𑀢𑁆𑀢𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀧𑀸𑀮𑁂𑀲𑀺 𑀫𑀦𑀯𑀚𑁆𑀚𑀺𑀬𑀁;

𑀢𑀲𑁆𑀲𑀸’𑀲𑀺 𑀯𑀚𑀺𑀭𑁄 𑀦𑀸𑀫, 𑀲𑁂𑀦𑀸𑀧𑀢𑀺 𑀫𑀳𑀸𑀧𑀢𑀺.

𑀓𑀘𑁆𑀙𑀯𑀸𑀮𑀁 𑀲𑀓𑀸𑀭𑁂𑀲𑀺, 𑀆𑀭𑀸𑀫𑀁 𑀧𑀁𑀲𑀼𑀓𑀽𑀮𑀺𑀦𑀁;

𑀣𑀽𑀧𑀸𑀭𑀸𑀫𑀫𑁆𑀳𑀺 𑀣𑀽𑀧𑀲𑁆𑀲, 𑀖𑀭𑀁 𑀙𑀸𑀤𑁂𑀲𑀺 𑀲𑀸𑀥𑀼𑀓𑀁.

𑀇𑀝𑁆𑀞𑀓𑀸𑀳𑀺 ¶ 𑀲𑀼𑀯𑀡𑁆𑀡𑀸𑀳𑀺, 𑀳𑁂𑀫𑀤𑁆𑀯𑀸𑀭𑁂 𑀘 𑀓𑀸𑀭𑀬𑀺;

𑀏𑀯𑀁 𑀲𑁄𑀴𑀲𑀯𑀲𑁆𑀲𑀸𑀦𑀺, 𑀓𑀢𑁆𑀯𑀸 𑀭𑀚𑁆𑀚𑀁 𑀦𑀭𑀸𑀥𑀺𑀧𑁄.

𑀅𑀕𑀫𑀸 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀕𑀦𑁆𑀢𑀩𑁆𑀩𑀁 𑀤𑁂𑀲𑀫𑁂𑀯 𑀲𑁄;

𑀢𑀲𑁆𑀫𑀺𑀁 𑀭𑀸𑀚𑀺𑀦𑀺 𑀲𑀫𑁆𑀧𑀢𑁆𑀢𑁂, 𑀤𑁂𑀯𑀮𑁄𑀓𑀁 𑀢𑀤𑀸 𑀅𑀳𑀼.

𑀅𑀕𑁆𑀕𑀩𑁄𑀥𑀺𑀲𑀦𑀸𑀫𑁄’𑀣, 𑀆𑀡𑀸𑀪𑁂𑀭𑀺𑀁 𑀘𑀭𑀸𑀧𑀬𑀺;

𑀧𑀺𑀢𑀸 𑀢𑀲𑁆𑀲 𑀲𑀪𑀸𑀢𑀼𑀲𑁆𑀲, 𑀧𑀼𑀢𑁆𑀢𑀁 𑀫𑀳𑀺𑀦𑁆𑀤𑀦𑀸𑀫𑀓𑀁.

𑀭𑀚𑁆𑀚𑀢𑁆𑀣𑀁 𑀲𑀓𑀧𑀼𑀢𑁆𑀢𑀸𑀦𑀁, 𑀆𑀤𑀺𑀧𑀸𑀤𑀁 𑀦 𑀓𑀸𑀭𑀬𑀻;

𑀆𑀤𑀭𑀁 𑀲𑁄 𑀲𑀩𑀦𑁆𑀥𑀽𑀦𑀁, 𑀓𑀦𑀺𑀝𑁆𑀞𑀸𑀦𑀫𑁆𑀧𑀺 𑀓𑀸𑀢𑀯𑁂.

𑀅𑀲𑀳𑀦𑁆𑀢𑁄 𑀧𑀮𑀸𑀬𑀺𑀢𑁆𑀣, 𑀧𑀭𑀢𑀻𑀭𑀁 𑀲𑀫𑀸𑀓𑀼𑀮𑁄;

𑀢𑁂 𑀲𑀫𑀸𑀕𑀫𑀦𑀁 𑀲𑀼𑀢𑁆𑀯𑀸, 𑀧𑁂𑀲𑀬𑀺𑀢𑁆𑀯𑀸 𑀫𑀳𑀸𑀩𑀮𑀁.

𑀓𑀸𑀭𑁂𑀢𑁆𑀯𑀸 𑀬𑀼𑀤𑁆𑀥𑀫𑁂𑀢𑁂𑀳𑀺, 𑀲𑀻𑀲𑀁 𑀢𑁂𑀲𑀁 𑀲𑀕𑀡𑁆𑀳𑀬𑀺;

𑀦𑀺𑀓𑀸𑀬𑁂𑀲𑀼 𑀯𑀺𑀘𑀸𑀭𑁂𑀢𑁆𑀯𑀸, 𑀓𑀢𑁆𑀢𑀩𑁆𑀩𑀁 𑀲𑀩𑁆𑀩𑀫𑁂𑀯 𑀲𑁄.

𑀤𑀻𑀧𑁂’𑀧𑀺 𑀲𑀓𑀮𑁂 𑀓𑀸𑀲𑀺, 𑀧𑀸𑀧𑀸𑀘𑀸𑀭𑀦𑀺𑀯𑀸𑀭𑀡𑀁;

𑀪𑀺𑀓𑁆𑀔𑀽 𑀘𑀽𑀴𑀯𑀺𑀳𑀸𑀭𑁂𑀲𑀼, 𑀬𑀸𑀕𑀼𑀁 𑀕𑀡𑁆𑀳𑀦𑁆𑀢𑀺 𑀲𑀩𑁆𑀩𑀤𑀸.

𑀫𑀳𑀸𑀯𑀺𑀳𑀸𑀭𑁂 𑀢𑀁 𑀲𑀼𑀢𑁆𑀯𑀸, 𑀭𑀸𑀚𑀸 𑀦𑀺𑀩𑁆𑀩𑀺𑀦𑁆𑀦𑀫𑀸𑀦𑀲𑁄;

𑀓𑀡𑁆𑀞𑀧𑀺𑀝𑁆𑀞𑀺𑀫𑀳𑀸𑀕𑀸𑀫𑀁 𑀢𑀣𑀸 𑀬𑀸𑀩𑀸𑀮𑀕𑀸𑀫𑀓𑀁.

𑀢𑁂𑀮𑀕𑀸𑀫𑀁 𑀩𑀳𑀼𑀤𑀜𑁆𑀘, 𑀤𑀓𑀯𑀸𑀭𑀁 𑀧𑀤𑀸𑀧𑀺𑀬;

𑀬𑀸𑀕𑀼𑀁 𑀕𑀳𑁂𑀢𑀼𑀁 𑀬𑁄𑀚𑁂𑀲𑀺, 𑀯𑀺𑀳𑀸𑀭𑁂𑀲𑀼’𑀧𑀺 𑀪𑀺𑀓𑁆𑀔𑀯𑁄.

𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀬𑀸𑀕𑀼𑀁, 𑀲𑀩𑁆𑀩𑁂 𑀕𑀡𑁆𑀳𑀺𑀁𑀲𑀼 𑀲𑀸𑀤𑀭𑀸;

𑀤𑀻𑀧𑁂 𑀪𑁂𑀭𑀺𑀁𑀘 𑀭𑀸𑀧𑁂𑀢𑁆𑀯𑀸, 𑀲𑀦𑁆𑀦𑀺𑀧𑀸𑀢𑀺𑀬 𑀬𑀸𑀘𑀓𑁂.

𑀲𑀼𑀯𑀡𑁆𑀡𑀁 𑀲𑁄𑀧𑀤𑀸𑀧𑁂𑀲𑀺, 𑀬𑀣𑀺𑀘𑁆𑀙𑀁 𑀤𑀺𑀯𑀲𑀢𑁆𑀢𑀬𑀁;

𑀏𑀯𑀫𑀸𑀤𑀺𑀁 𑀲 𑀓𑀢𑁆𑀯𑀸𑀦, 𑀧𑀼𑀜𑁆𑀜𑀯𑀁 𑀯𑀲𑁆𑀲𑁂𑀳𑀺 𑀢𑀻𑀳𑀺 𑀘.

𑀯𑀢𑁆𑀣𑀼𑀢𑁆𑀢𑀬𑀧𑀲𑀸𑀤𑀲𑁆𑀲, 𑀨𑀮𑀁 𑀧𑀲𑁆𑀲𑀺𑀢𑀼𑀫𑀢𑁆𑀢𑀦𑁄;

𑀭𑀸𑀚𑀸 𑀤𑀺𑀩𑁆𑀩𑁂𑀦 𑀬𑀸𑀦𑁂𑀦, 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀲𑁄 𑀫𑀭𑀺.

𑀏𑀯𑀁 𑀅𑀦𑀺𑀘𑁆𑀘𑀸 𑀯𑀢 𑀲𑀩𑁆𑀩𑀤𑁂𑀳𑀺𑀦𑁄;

𑀲𑀩𑁆𑀩𑀜𑁆𑀜𑀽𑀦𑁄𑀧𑁂𑀯 𑀫𑀼𑀧𑁂𑀢𑀺 𑀫𑀘𑁆𑀘𑀼𑀁;

𑀩𑀼𑀥𑁄 𑀲𑀼𑀩𑀼𑀤𑁆𑀥𑀺𑀯𑀺𑀪𑀯𑁂 𑀪𑀯𑁂𑀬𑁆𑀬.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀢𑁄 ¶ 𑀢𑀲𑁆𑀲𑀸’𑀦𑀼𑀚𑁄 𑀲𑁂𑀦𑁄, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀻 𑀧𑀼𑀭𑁂;

𑀧𑀺𑀬𑀁’𑀯 𑀧𑀼𑀢𑁆𑀢𑀁 𑀧𑀲𑁆𑀲𑀦𑁆𑀢𑁄, 𑀲𑀢𑁆𑀢𑁂 𑀲𑀩𑁆𑀩𑁂 𑀫𑀳𑀸𑀥𑀦𑁄.

𑀘𑀭𑀺𑀬𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀲𑀫𑀸𑀘𑀭𑀺 𑀬𑀣𑀸𑀪𑀢𑀁;

𑀅𑀧𑀼𑀩𑁆𑀩𑀫𑁆𑀧𑀺 𑀘 𑀯𑀢𑁆𑀢𑁂𑀲𑀺, 𑀘𑀭𑀺𑀬𑀁 𑀥𑀫𑁆𑀫𑀲𑀁𑀳𑀺𑀢𑀁.

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀽𑀦𑀻𑀦𑀜𑁆𑀘, 𑀜𑀸𑀢𑀻𑀦𑀁 𑀤𑀻𑀧𑀯𑀸𑀲𑀺𑀦𑀁;

𑀫𑀘𑁆𑀙𑀸𑀦𑀁 𑀫𑀺𑀕𑀧𑀓𑁆𑀔𑀻𑀦𑀁, 𑀓𑀢𑁆𑀢𑀩𑁆𑀩𑀁 𑀲 𑀲𑀫𑀸𑀘𑀭𑀺.

𑀫𑀳𑀺𑀦𑁆𑀤𑀁 𑀧𑀭𑀢𑀻𑀭𑀁 𑀲𑁄, 𑀕𑀢𑀁 𑀬𑁄𑀚𑀺𑀬𑀫𑀸𑀭𑀬𑀺;

𑀏𑀯𑀁 𑀲𑁄 𑀲𑀼𑀯𑀺𑀲𑁄𑀥𑁂𑀲𑀺, 𑀭𑀚𑁆𑀚𑀧𑀘𑁆𑀘𑀢𑁆𑀣𑀺𑀓𑁂’𑀔𑀺𑀮𑁂.

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀬𑀸𑀘𑀓𑀸𑀦𑀁 𑀥𑀦𑁂𑀲𑀺𑀦𑀁;

𑀪𑀺𑀓𑁆𑀔𑀽𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘, 𑀫𑀦𑀼𑀜𑁆𑀜𑀁 𑀭𑀸𑀚𑀪𑁄𑀚𑀦𑀁.

𑀅𑀳𑁂𑀲𑀼𑀁 𑀅𑀦𑀼𑀚𑀸𑀢𑀲𑁆𑀲, 𑀫𑀳𑀺𑀦𑁆𑀤𑁄 𑀓𑀲𑁆𑀲𑀧𑁄 𑀢𑀣𑀸;

𑀉𑀤𑀬𑁄𑀢𑀺 𑀢𑀬𑁄 𑀢𑁂𑀲𑀼, 𑀫𑀳𑀺𑀦𑁆𑀤𑁄 𑀬𑀼𑀯𑀭𑀸𑀚𑀓𑁄.

𑀳𑀼𑀢𑁆𑀯𑀸 𑀢𑀲𑁆𑀲𑀸𑀦𑀼𑀯𑀢𑁆𑀢𑀦𑁆𑀢𑁄, 𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀳𑀺;

𑀲𑀗𑁆𑀖𑀸𑀦𑀸𑀫𑀸𑀲𑀺 𑀭𑀸𑀚𑀲𑁆𑀲, 𑀪𑀭𑀺𑀬𑀸 𑀢𑀲𑁆𑀲 𑀭𑀸𑀚𑀺𑀦𑀻.

𑀓𑀻𑀴𑀦𑀢𑁆𑀣𑀁 𑀲𑀫𑀼𑀤𑁆𑀤𑀲𑁆𑀲, 𑀕𑀢𑁂 𑀭𑀸𑀚𑀺𑀦𑀺 𑀧𑀝𑁆𑀝𑀦𑀁;

𑀉𑀤𑀬𑁄 𑀆𑀤𑀺𑀧𑀸𑀤𑁄𑀲𑁄, 𑀑𑀳𑀻𑀦𑁄 𑀦𑀕𑀭𑁂 𑀢𑀤𑀸.

𑀦𑀸𑀮𑀦𑀸𑀫𑀁 𑀕𑀳𑁂𑀢𑁆𑀯𑀸𑀦, 𑀥𑀻𑀢𑀭𑀁 𑀫𑀸𑀡𑀺𑀮𑀸𑀦𑀺𑀬𑀸;

𑀭𑀓𑁆𑀔𑀺𑀢𑀁 𑀭𑀸𑀚𑀭𑀓𑁆𑀔𑀸𑀬, 𑀧𑀼𑀴𑀢𑁆𑀣𑀺𑀦𑀕𑀭𑀁 𑀅𑀕𑀸.

𑀭𑀸𑀚𑀸 𑀢𑀲𑁆𑀫𑀺𑀁 𑀅𑀓𑀼𑀚𑁆𑀛𑀺𑀢𑁆𑀯𑀸, 𑀲𑀦𑁆𑀥𑀺𑀁 𑀓𑀢𑁆𑀯𑀸 𑀅𑀓𑀼𑀧𑁆𑀧𑀺𑀬𑀁;

𑀫𑀳𑀸𑀤𑀻𑀧𑀸𑀤𑀁 𑀧𑁂𑀲𑁂𑀢𑁆𑀯𑀸, 𑀢𑁄𑀲𑀢𑁆𑀯𑀸 𑀢𑀁 𑀇𑀥𑀸𑀦𑀬𑀺.

𑀏𑀯𑀁 𑀲𑀫𑀕𑁆𑀕𑀸 𑀢𑁂 𑀆𑀲𑀼𑀁, 𑀢𑀢𑁄 𑀧𑀝𑁆𑀞𑀸𑀬 𑀔𑀢𑁆𑀢𑀺𑀬𑀸;

𑀭𑀓𑁆𑀔𑀦𑁆𑀢𑀸 𑀲𑀸𑀲𑀦𑀁 𑀮𑁄𑀓𑀁, 𑀯𑀲𑀺𑀁𑀲𑀼 𑀲𑀼𑀲𑀫𑀸𑀳𑀺𑀢𑀸.

𑀢𑀢𑁄 𑀓𑁂𑀦𑀘𑀺 𑀓𑀸𑀮𑁂𑀦, 𑀧𑀡𑁆𑀟𑀼𑀭𑀸𑀚𑀸 𑀫𑀳𑀸𑀩𑀮𑁄;

𑀚𑀫𑁆𑀩𑀼𑀤𑀻𑀧𑀸 𑀇𑀥𑀸’𑀕𑀫𑁆𑀫, 𑀤𑀻𑀧 𑀕𑀡𑁆𑀳𑀺𑀢𑀼𑀫𑀸𑀭𑀪𑀺.

𑀭𑀸𑀚𑀸 ¶ 𑀲𑀼𑀢𑁆𑀯𑀸 𑀫𑀳𑀸𑀲𑁂𑀦𑀁, 𑀧𑁂𑀲𑀼𑀬𑀺𑀢𑁆𑀣 𑀢𑀤𑀦𑁆𑀢𑀺𑀓𑀁;

𑀅𑀫𑀘𑁆𑀘𑀸𑀦𑀁 𑀯𑀺𑀯𑀸𑀤𑁂𑀦, 𑀣𑀤𑁆𑀥𑁄𑀢𑀸𑀭𑁄 𑀦𑀸𑀭𑀸𑀥𑀺𑀧𑁄.

𑀧𑀡𑁆𑀟𑀼𑀭𑀸𑀚𑀸 𑀯𑀺𑀦𑀸𑀲𑁂𑀦𑁆𑀢𑁄, 𑀲𑀩𑁆𑀩𑀁 𑀢𑀁 𑀤𑁂𑀲𑀫𑀼𑀢𑁆𑀢𑀭𑀁;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀲𑀺, 𑀫𑀳𑀸𑀢𑀸𑀮𑀺𑀢𑀕𑀸𑀫𑀓𑁂.

𑀯𑀲𑀦𑁆𑀢𑀸 𑀤𑀫𑀺𑀴𑀸 𑀏𑀢𑁆𑀣, 𑀩𑀳𑀯𑁄 𑀬𑁂 𑀢𑀳𑀺𑀁 𑀢𑀳𑀺𑀁;

𑀲𑀩𑁆𑀩𑁂 𑀢𑀁 𑀧𑀓𑁆𑀔𑀺𑀬𑀸𑀳𑁂𑀲𑀼𑀁, 𑀢𑀢𑁄 𑀲𑁄 𑀩𑀮𑀯𑀸 𑀅𑀳𑀼.

𑀢𑀢𑁆𑀣 𑀕𑀦𑁆𑀢𑀸 𑀫𑀳𑀸𑀲𑁂𑀦𑀸, 𑀭𑀜𑁆𑀜𑁄 𑀬𑀼𑀚𑁆𑀛𑀺𑀢𑀼𑀫𑀸𑀭𑀪𑀺;

𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀧𑀡𑁆𑀟𑀼-𑀭𑀸𑀚𑀸𑀧𑀺 𑀲𑀫𑀼𑀧𑀸𑀯𑀺𑀲𑀺.

𑀅𑀳𑀼 𑀤𑀫𑀺𑀴𑀲𑁂𑀦𑀸𑀲𑀸, 𑀧𑀲𑁆𑀲𑀦𑁆𑀢𑀺 𑀲𑀸𑀫𑀺𑀦𑁄 𑀫𑀼𑀔𑀁;

𑀲𑀫𑁆𑀧𑀢𑁆𑀢𑀩𑀮𑀳𑀼𑀲𑁆𑀲𑀸𑀳𑀸, 𑀢𑀤𑀢𑁆𑀣𑁂 𑀘𑀢𑁆𑀢𑀚𑀻𑀯𑀺𑀢𑀸.

𑀤𑀻𑀧𑀲𑁂𑀦𑀸 𑀢𑀼 𑀲𑀸𑀫𑀺𑀦-𑀫𑀪𑀸𑀯𑁂𑀦 𑀦𑀺𑀭𑀼𑀲𑁆𑀲𑀼𑀓𑁆𑀓𑀸;

𑀬𑀼𑀚𑁆𑀛𑀦𑁆𑀢𑀺 𑀧𑀭𑀺𑀪𑀺𑀦𑁆𑀤𑀺𑀢𑁆𑀯𑀸, 𑀧𑀮𑀸𑀬𑀺𑀢𑁆𑀣 𑀢𑀢𑁄 𑀢𑀢𑁄.

𑀑𑀢𑀭𑀺𑀢𑁆𑀣𑀫𑀳𑀸𑀲𑁂𑀦𑀸, 𑀧𑀡𑁆𑀟𑀼𑀭𑀸𑀚𑀸𑀲𑁆𑀲 𑀢𑀗𑁆𑀔𑀡𑁂;

𑀫𑀸𑀭𑀲𑁂𑀦𑀸𑀯 𑀕𑀘𑁆𑀙𑀦𑁆𑀢𑀺, 𑀯𑀺𑀘𑀼𑀡𑁆𑀡𑁂𑀦𑁆𑀢𑀺 𑀫𑀳𑀸𑀚𑀦𑀁.

𑀭𑀸𑀚𑀸 𑀲𑁂𑀦𑀸𑀬 𑀪𑀺𑀦𑁆𑀦𑀢𑁆𑀢𑀁, 𑀲𑀼𑀓𑁆𑀓𑀸 𑀲𑀩𑁆𑀩𑀁 𑀲𑀫𑀸𑀤𑀺𑀬;

𑀳𑀢𑁆𑀣𑀲𑀸𑀭𑀁 𑀧𑀼𑀭𑀁 𑀳𑀺𑀢𑁆𑀯𑀸, 𑀫𑀮𑀬𑀸𑀪𑀺𑀫𑀼𑀔𑁄 𑀕𑀢𑁄.

𑀢𑀢𑁄 𑀳𑀢𑁆𑀣𑀺𑀁 𑀲𑀫𑀸𑀭𑀼𑀬𑁆𑀳, 𑀬𑀼𑀯𑀭𑀸𑀚𑀸 𑀫𑀳𑀺𑀦𑁆𑀤𑀓𑁄;

𑀬𑀼𑀚𑁆𑀛𑀦𑁆𑀢𑁄 𑀲𑀓𑀲𑁂𑀦𑀸𑀬, 𑀧𑀮𑀸𑀢𑀢𑁆𑀢𑀁 𑀲𑀫𑁂𑀓𑁆𑀔𑀺𑀬.

𑀏𑀓𑁂𑀦𑀫𑁂 𑀦 𑀲𑀓𑁆𑀓𑀸 𑀯𑁂, 𑀲𑀩𑁆𑀩𑁂 𑀏𑀢𑁂𑀳𑀺 𑀫𑀸𑀭𑀺𑀢𑀼𑀁;

𑀏𑀢𑁂𑀲𑀁 𑀦 𑀘 𑀦𑀻𑀘𑀸𑀦𑀁, 𑀳𑀢𑁆𑀣𑁂𑀲𑀼 𑀫𑀭𑀡𑀁 𑀲𑀼𑀔𑀁.

𑀢𑀲𑁆𑀫𑀸 𑀯𑀭𑀁 𑀫𑁂 𑀫𑀭𑀡𑀁, 𑀫𑀬𑀸 𑀏𑀯𑁂𑀢𑀺 𑀘𑀺𑀦𑁆𑀢𑀺𑀬;

𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄𑀬𑁂𑀯, 𑀙𑀺𑀦𑁆𑀤𑀺 𑀲𑁄 𑀲𑀻𑀲𑀫𑀢𑁆𑀢𑀦𑁄.

𑀢𑀁 𑀤𑀺𑀲𑁆𑀯𑀸 𑀩𑀳𑀯𑁄 𑀲𑀻𑀲𑁂, 𑀢𑀢𑁆𑀣 𑀙𑀺𑀦𑁆𑀤𑀺𑀁𑀲𑀼 𑀲𑁂𑀯𑀓𑀸;

𑀢𑀁 𑀤𑀺𑀲𑁆𑀯𑀸 𑀤𑀫𑀺𑀴𑀻 𑀲𑁂𑀦𑀸, 𑀳𑀝𑁆𑀞𑀢𑀼𑀝𑁆𑀞𑀸 𑀧𑀫𑁄𑀤𑀺𑀲𑀸.

𑀏𑀢𑀁 𑀲𑀩𑁆𑀩𑀁 𑀲𑀫𑁂𑀓𑁆𑀔𑀺𑀢𑁆𑀯𑀸, 𑀆𑀤𑀸𑀧𑀸𑀤𑁄 𑀲𑀓𑀲𑁆𑀲𑀧𑁄;

𑀢𑀼𑀭𑀗𑁆𑀕𑀯𑀭𑀫𑀸𑀭𑀼𑀬𑁆𑀳, 𑀲𑀼𑀲𑀦𑁆𑀦𑀤𑁆𑀥𑁄 𑀫𑀳𑀸𑀬𑀼𑀥𑁄.

𑀯𑀺𑀳𑀸𑀭𑀫𑀼𑀧𑀲𑀗𑁆𑀓𑀫𑁆𑀫, 𑀅𑀪𑀬𑀁 𑀏𑀓𑀓𑁄𑀯 𑀲𑁄;

𑀢𑀸𑀤𑀺𑀲𑀫𑁆𑀧𑀺 𑀫𑀳𑀸𑀲𑁂𑀦𑀁, 𑀑𑀕𑀸𑀳𑁂𑀢𑁆𑀯𑀸 𑀯𑀺𑀤𑀸𑀭𑀬𑀺.

𑀲𑀼𑀧𑀡𑁆𑀡𑁄 𑀯𑀺𑀬 𑀕𑀡𑁆𑀳𑀦𑁆𑀢𑁄, 𑀪𑀽𑀚𑀕𑁂𑀦 𑀲𑀮𑀺𑀮𑀸𑀮 𑀬𑁂;

𑀲𑁄 𑀢𑀁 𑀲𑀩𑁆𑀩𑀁 𑀦𑀺𑀯𑀢𑁆𑀢𑁂𑀲𑀺, 𑀅𑀢𑁆𑀢𑀸𑀦𑀜𑁆𑀘 𑀲𑀼𑀕𑁄𑀧𑀬𑀺.

𑀅𑀲𑁆𑀲𑁄 ¶ 𑀏𑀓𑁄𑀯 𑀤𑀺𑀲𑁆𑀲𑀺𑀢𑁆𑀣, 𑀢𑀼𑀭𑀗𑁆𑀕𑀸𑀯𑀮𑀺𑀲𑀦𑁆𑀦𑀺𑀪𑁄;

𑀅𑀢𑁆𑀢𑀦𑁄 𑀲𑁄 𑀚𑀦𑀁 𑀓𑀜𑁆𑀘𑀺, 𑀅𑀧𑀲𑁆𑀲𑀦𑁆𑀢𑁄’𑀦𑀼𑀕𑀸𑀫𑀺𑀦𑀁.

𑀓𑀺𑀁 𑀫𑁂 𑀏𑀓𑁂𑀦 𑀯𑁂𑀭𑀺𑀦𑀁, 𑀧𑀽𑀭𑀺𑀢𑁂𑀦 𑀫𑀦𑁄𑀭𑀣𑀁;

𑀓𑀸𑀮𑀦𑁆𑀢𑀭𑁂𑀳𑀁 𑀚𑀻𑀯𑀦𑁆𑀢𑁄, 𑀧𑀽𑀭𑁂𑀲𑁆𑀲𑀁 𑀫𑁂 𑀫𑀦𑁄𑀭𑀣𑀁.

𑀢𑀲𑁆𑀫𑀸 𑀕𑀦𑁆𑀢𑀼𑀁𑀯 𑀬𑀼𑀢𑁆𑀢𑀦𑁆𑀢𑀺, 𑀦𑀺𑀫𑁆𑀨𑁄𑀝𑁂𑀢𑁆𑀯𑀸 𑀫𑀳𑀸𑀩𑀮𑀁;

𑀦𑀺𑀩𑁆𑀪𑀬𑁄𑀯 𑀫𑀳𑀸𑀬𑁄𑀥𑁄, 𑀓𑁄𑀡𑁆𑀟𑀺𑀯𑀸𑀢𑀫𑀼𑀧𑀸𑀕𑀫𑀺.

𑀧𑀡𑁆𑀟𑀼𑀭𑀸𑀚𑀸 𑀫𑀳𑀸𑀲𑁂𑀦𑀸, 𑀅𑀕𑁆𑀕𑀳𑁂𑀲𑀺 𑀢𑀢𑁄 𑀧𑀼𑀭𑀁;

𑀲𑀻𑀲𑀁 𑀢𑀁 𑀬𑀼𑀯𑀭𑀸𑀚𑀲𑁆𑀲, 𑀧𑀡𑁆𑀟𑀼𑀭𑀸𑀚𑀲𑁆𑀲 𑀤𑀲𑁆𑀲𑀬𑀼𑀁.

𑀲𑁄 𑀢𑀁 𑀤𑀺𑀲𑁆𑀯𑀸 𑀘 𑀛𑀸𑀧𑁂𑀢𑁆𑀯𑀸, 𑀭𑀸𑀚𑀽𑀦𑀁 𑀧𑀡𑁆𑀟𑀼𑀤𑁂𑀲𑀺𑀦𑀁;

𑀲𑀩𑁆𑀩𑀫𑀸𑀴𑀸𑀳𑀦𑁂 𑀓𑀺𑀘𑁆𑀘𑀁, 𑀢𑀲𑁆𑀲 𑀓𑀸𑀢𑀼𑀁 𑀦𑀺𑀬𑁄𑀚𑀬𑀺.

𑀲𑀩𑁆𑀩𑀁 𑀲𑀸𑀭𑀁 𑀳𑀭𑀸𑀧𑁂𑀲𑀺, 𑀪𑀡𑁆𑀟𑀸𑀕𑀸𑀭𑀫𑁆𑀳𑀺 𑀭𑀸𑀚𑀺𑀦𑁄;

𑀅𑀕𑁆𑀕𑀡𑁆𑀳𑀺𑀢𑁆𑀣 𑀕𑀳𑁂𑀢𑀩𑁆𑀩𑀁, 𑀯𑀺𑀳𑀸𑀭𑁂 𑀦𑀕𑀭𑁂𑀧𑀺 𑀘.

𑀧𑀸𑀲𑀸𑀤𑁂 𑀭𑀢𑀦𑁂 𑀲𑀩𑁆𑀩𑁂, 𑀲𑁄𑀯𑀡𑁆𑀡𑀁𑀲𑀢𑁆𑀣𑀼𑀩𑀺𑀫𑁆𑀩𑀓𑀁;

𑀲𑀺𑀮𑀸𑀫𑀬 𑀫𑀼𑀦𑀺𑀦𑁆𑀤𑀲𑁆𑀲, 𑀘𑀓𑁆𑀔𑀼𑀪𑀽𑀓 𑀫𑀡𑀺𑀤𑁆𑀯𑀬𑀁.

𑀢𑀣𑀸 𑀲𑁄𑀯𑀡𑁆𑀡𑀧𑀝𑁆𑀝𑁂 𑀘, 𑀣𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑁂;

𑀲𑀼𑀯𑀡𑁆𑀡 𑀧𑀝𑀺𑀫𑀸𑀬𑁄 𑀘, 𑀯𑀺𑀳𑀸𑀭𑁂𑀲𑀼 𑀢𑀳𑀺𑀁 𑀢𑀳𑀺𑀁.

𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀸𑀭𑀁, 𑀮𑀗𑁆𑀓𑀸𑀤𑀻𑀧 𑀫𑀓𑀸𑀲𑀺 𑀲𑁄;

𑀙𑀟𑁆𑀟𑀬𑀺𑀢𑁆𑀣 𑀧𑀼𑀭𑀁 𑀭𑀫𑁆𑀫, 𑀬𑀓𑁆𑀔𑀪𑀓𑁆𑀔𑀺𑀢 𑀭𑀽𑀧𑀓𑀁.

𑀭𑀸𑀚𑀸’𑀧𑀺 𑀭𑀓𑁆𑀔𑀁 𑀤𑀢𑁆𑀯𑀸𑀦, 𑀫𑀳𑀸𑀫𑀕𑁆𑀕𑁂 𑀢𑀳𑀺𑀁 𑀢𑀳𑀺𑀁;

𑀕𑀗𑁆𑀕𑀸𑀤𑁆𑀯𑀬 𑀫𑀼𑀔𑁂 𑀯𑀸𑀲𑀁, 𑀓𑀧𑁆𑀧𑁂𑀲𑀺 𑀧𑀭𑀺𑀲𑀗𑁆𑀓𑀺𑀢𑁄.

𑀧𑀡𑁆𑀟𑀼𑀭𑀸𑀚𑀸 𑀢𑀢𑁄 𑀲𑀤𑁆𑀥𑀺𑀁, 𑀓𑀸𑀢𑀼𑀁 𑀲𑀻𑀳𑀴𑀲𑀸𑀫𑀺𑀦𑀸;

𑀅𑀫𑀘𑁆𑀘𑁂 𑀢𑀢𑁆𑀣 𑀧𑁂𑀲𑁂𑀲𑀺, 𑀤𑀺𑀲𑁆𑀯𑀸 𑀢𑁂 𑀲𑀻𑀳𑀮𑀸𑀥𑀺𑀧𑁄.

𑀲𑀼𑀡𑀺𑀢𑁆𑀯𑀸 𑀲𑀸𑀲𑀦𑀁 𑀢𑁂𑀲𑀁, 𑀲𑀩𑁆𑀩𑀁 𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀬;

𑀤𑀽𑀢𑀸𑀦𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀬𑀣𑀸𑀓𑀸𑀫𑁂𑀦 𑀲𑀗𑁆𑀕𑀳𑀁.

𑀳𑀢𑁆𑀣𑀺𑀤𑁆𑀯𑀬𑀁 𑀲𑀤𑀢𑁆𑀯𑀸𑀦, 𑀲𑀩𑁆𑀩𑀫𑀸𑀪𑀭𑀡𑀫𑁆𑀧𑀺 𑀘;

𑀢𑀲𑁆𑀲 𑀧𑁂𑀲𑁂𑀲𑀺 𑀤𑀽𑀢𑁂𑀲𑁄, 𑀅𑀢𑁆𑀢𑀦𑁄𑀧𑀺 𑀳𑀺𑀢𑀸𑀯𑀳𑁂.

𑀧𑀡𑁆𑀟𑀼𑀭𑀸𑀚𑀸 𑀲𑀺𑀢𑀁 𑀲𑀩𑁆𑀩𑀁, 𑀤𑀺𑀲𑁆𑀯𑀸 𑀲𑀦𑁆𑀢𑀼𑀝𑁆𑀞𑀫𑀸𑀦𑀲𑁄;

𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀦 𑀤𑀽𑀢𑀸𑀦𑀁, 𑀢𑀤𑀳𑁂𑀯 𑀫𑀳𑀸𑀧𑀼𑀭𑀁.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀸 𑀕𑀦𑁆𑀢𑁆𑀯𑀸, 𑀦 𑀘𑀺𑀭𑁂𑀦𑁂𑀯 𑀧𑀝𑁆𑀝𑀦𑀁;

𑀢𑀢𑁆𑀣 𑀆𑀭𑀼𑀬𑁆𑀳 𑀦𑀸𑀯𑀁 𑀲𑁄, 𑀲𑀓 𑀤𑁂𑀲 𑀫𑀼𑀧𑀸𑀕𑀫𑀺.

𑀢𑀢𑁄 ¶ 𑀆𑀕𑀫𑁆𑀫 𑀦𑀕𑀭𑀁, 𑀲𑀻𑀮𑀸𑀫𑁂𑀖𑁄 𑀫𑀳𑀻𑀧𑀢𑀺;

𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸𑀦, 𑀤𑀻𑀧𑀁 𑀯𑀲𑀺 𑀲𑀫𑀸𑀳𑀺𑀢𑁄.

𑀪𑀸𑀢𑀭𑀁 𑀤𑀼𑀢𑀺𑀬𑀁 𑀓𑀢𑁆𑀯𑀸, 𑀉𑀤𑀬𑀁 𑀦𑀸𑀫 𑀔𑀢𑁆𑀢𑀺𑀬𑀁;

𑀫𑀳𑀸𑀤𑀻𑀧𑀸𑀤𑀁 𑀢𑀲𑁆𑀲𑀸’𑀤𑀸, 𑀲𑁄𑀕𑀢𑁆𑀣𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁.

𑀲𑁄𑀧𑀺 𑀔𑁄 𑀦 𑀘𑀺𑀭𑁂𑀦𑁂𑀯, 𑀓𑀢𑁆𑀯𑀸 𑀧𑀼𑀜𑁆𑀜𑀁 𑀬𑀣𑀸𑀭𑀳𑀁;

𑀭𑁄𑀕𑁂𑀦𑁂𑀓𑁂𑀦 𑀲𑀫𑁆𑀨𑀼𑀝𑁆𑀞𑁄, 𑀧𑀯𑀺𑀝𑁆𑀞𑁄 𑀫𑀘𑁆𑀘𑀼𑀦𑁄 𑀫𑀼𑀔𑀁.

𑀓𑀲𑁆𑀲𑀧𑁄 𑀆𑀤𑀺𑀧𑀸𑀤𑁄𑀧𑀺, 𑀧𑀼𑀮𑀢𑁆𑀣𑀺𑀦𑀕𑀭𑁂 𑀯𑀲𑀁;

𑀬𑁄𑀚𑁂𑀢𑁆𑀯𑀸 𑀧𑀡𑁆𑀟𑀼𑀭𑀸𑀚𑁂𑀦, 𑀅𑀳𑁄𑀲𑀺 𑀓𑀺𑀭 𑀫𑀸𑀭𑀺𑀢𑁄.

𑀢𑀤𑀸 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀧𑀼𑀢𑁆𑀢𑀸 𑀆𑀲𑀼𑀁 𑀫𑀳𑀸𑀭𑀳𑀸;

𑀆𑀤𑀺𑀧𑀸𑀤𑀲𑁆𑀲 𑀘𑀢𑁆𑀢𑀸𑀭𑁄, 𑀥𑀜𑁆𑀜𑀮𑀓𑁆𑀔𑀡 𑀲𑀜𑁆𑀜𑀼𑀢𑀸.

𑀬𑁄 𑀲𑁂𑀦𑀁 𑀲𑀩𑁆𑀩𑀧𑀞𑀫𑁄, 𑀲𑁂𑀦𑁄 𑀦𑀸𑀫 𑀓𑀼𑀫𑀸𑀭𑀓𑁄;

𑀲𑀽𑀭𑁄 𑀯𑀻𑀭𑁄 𑀫𑀳𑀼𑀲𑁆𑀲𑀸𑀳𑁄, 𑀭𑀸𑀚𑀪𑀸𑀭𑀓𑁆𑀔𑀫𑁄 𑀲𑀫𑁄.

𑀭𑀸𑀚𑀸 𑀫𑀳𑀸𑀤𑀻𑀧𑀸𑀤𑀢𑁆𑀢𑀁, 𑀢𑀲𑁆𑀲 𑀤𑀢𑁆𑀯𑀸 𑀬𑀣𑀸𑀯𑀺𑀥𑀺𑀁;

𑀪𑁄𑀕𑀢𑁆𑀣𑀁 𑀤𑀓𑁆𑀔𑀺𑀡𑀁 𑀤𑁂𑀲𑀁, 𑀲𑀯𑀸𑀳𑀦 𑀫𑀼𑀧𑀸𑀤𑀺𑀲𑀺.

𑀭𑁄𑀳𑀡𑀸𑀥𑀺𑀧𑀢𑀺𑀲𑁆𑀲𑀸’𑀲𑀼𑀁, 𑀧𑀼𑀢𑁆𑀢𑀸 𑀓𑀺𑀢𑁆𑀢𑀕𑁆𑀕𑀩𑁄𑀥𑀺𑀢𑁄;

𑀘𑀢𑁆𑀢𑀸𑀭𑁄 𑀥𑀻𑀢𑀭𑁄 𑀢𑀺𑀲𑁆𑀲𑁄, 𑀤𑀲𑁆𑀲𑀦𑁂𑀬𑁆𑀬𑀸 𑀫𑀦𑁄𑀭𑀫𑀸.

𑀢𑀤𑀸 𑀚𑁂𑀝𑁆𑀞𑀲𑀼𑀢𑀁 𑀢𑀲𑁆𑀲, 𑀫𑀳𑀺𑀦𑁆𑀤𑀁 𑀦𑀸𑀫 𑀔𑀢𑁆𑀢𑀺𑀬𑀁;

𑀧𑀺𑀢𑀼𑀘𑁆𑀙𑀸 𑀫𑀸𑀭𑀬𑀺𑀢𑁆𑀯𑀸𑀦, 𑀤𑁂𑀲𑀁 𑀕𑀡𑁆𑀳𑀺 𑀲𑀲𑀸𑀥𑀦𑀁.

𑀭𑀸𑀚𑀸𑀧𑀺 𑀤𑀺𑀲𑁆𑀯𑀸 𑀢𑁂𑀢𑀻𑀯, 𑀫𑀫𑀸𑀬𑀦𑁆𑀢𑁄 𑀤𑀬𑀸𑀮𑀼𑀓𑁄;

𑀲𑀩𑁆𑀩𑁂 𑀤𑁂𑀯𑀓𑀼𑀫𑀸𑀭𑁂𑀯, 𑀲𑀼𑀔𑀁 𑀯𑀟𑁆𑀠𑁂𑀲𑀺 𑀧𑁂𑀫𑀯𑀸.

𑀢𑀢𑁄 𑀓𑀲𑁆𑀲𑀧𑀦𑀸𑀫𑀁 𑀲𑁄, 𑀢𑁂𑀲𑀁 𑀚𑁂𑀝𑁆𑀞𑀁 𑀦𑀭𑀺𑀲𑁆𑀲𑀭𑁄;

𑀤𑁂𑀲𑀁 𑀢𑀁 𑀕𑀡𑁆𑀳 𑀬𑀸𑀳𑀻𑀢𑀺, 𑀤𑀢𑁆𑀯𑀸 𑀩𑀮𑀫𑀧𑁂𑀲𑀬𑀺.

𑀲𑁄’𑀧𑀺 𑀕𑀦𑁆𑀢𑁆𑀯𑀸𑀦 𑀢𑀁 𑀳𑀦𑁆𑀢𑁆𑀯𑀸, 𑀭𑁄𑀳𑀡𑀁 𑀓𑀲𑀺𑀡𑀫𑁆𑀧𑀺 𑀢𑀁;

𑀓𑀢𑁆𑀯𑀸 𑀳𑀢𑁆𑀣𑀕𑀢𑀁 𑀢𑀢𑁆𑀣, 𑀯𑀲𑀺𑀢𑁆𑀣 𑀦𑀺𑀭𑀼𑀧𑀤𑁆𑀤𑀯𑁄.

𑀅𑀣 𑀲𑁄 𑀪𑀸𑀢𑀭𑁄 𑀤𑁆𑀯𑁂’𑀧𑀺, 𑀲𑁂𑀦𑀜𑁆𑀘 𑀉𑀤𑀬𑀁 𑀢𑀣𑀸;

𑀧𑀓𑁆𑀓𑁄𑀲𑀺𑀢𑁆𑀯𑀸𑀦, 𑀪𑀸𑀚𑁂𑀢𑁆𑀯𑀸, 𑀤𑁂𑀲𑀁 𑀢𑁂𑀳𑀺 𑀲𑀳𑀸𑀯𑀲𑀺.

𑀭𑀸𑀚𑀸 ¶ 𑀢𑀸 𑀲𑀸𑀥𑀼 𑀯𑀟𑁆𑀠𑁂𑀢𑁆𑀯𑀸, 𑀯𑀬𑀧𑀢𑁆𑀢𑀸𑀲𑀼 𑀢𑀻𑀲𑀼 𑀲𑁄;

𑀭𑀸𑀚𑀓𑀜𑁆𑀜𑀸𑀲𑀼 𑀥𑀜𑁆𑀜𑀸𑀲𑀼, 𑀤𑁂𑀯𑀘𑁆𑀙𑀭𑀲𑀽 𑀭𑀽𑀧𑀺𑀲𑀼.

𑀞𑀧𑁂𑀢𑁆𑀯𑀸 𑀭𑀸𑀚𑀺𑀦𑀺 𑀞𑀸𑀦𑁂, 𑀉𑀧𑀭𑀸𑀚𑀲𑁆𑀲 𑀤𑀸𑀧𑀬𑀺;

𑀲𑀗𑁆𑀖𑀦𑀸𑀫𑀁 𑀫𑀳𑀸𑀪𑁄𑀕𑀁, 𑀤𑀢𑁆𑀯𑀸 𑀭𑀚𑁆𑀚𑀲𑀭𑀺𑀓𑁆𑀔𑀓𑀁.

𑀓𑀡𑀺𑀝𑁆𑀞𑁄 𑀉𑀧𑀭𑀸𑀚𑀲𑁆𑀲, 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀸𑀢𑀼𑀓𑁄;

𑀅𑀢𑁆𑀣𑀺 𑀲𑀩𑁆𑀩𑀕𑀼𑀡𑁄𑀧𑁂𑀢𑁄, 𑀲𑀩𑁆𑀩𑀲𑀢𑁆𑀣𑀯𑀺𑀲𑀸𑀭𑀤𑁄.

𑀢𑀲𑁆𑀲𑀸’𑀤𑀸𑀲𑀺 𑀤𑀼𑀯𑁂 𑀭𑀸𑀚𑀸, 𑀭𑀸𑀚𑀓𑀜𑁆𑀜𑀸 𑀫𑀦𑁄𑀳𑀭𑀸;

𑀢𑀺𑀲𑁆𑀲𑀯𑁆𑀳𑀓𑀺𑀢𑁆𑀢 𑀦𑀸𑀫𑀜𑁆𑀘, 𑀤𑀢𑁆𑀯𑀸 𑀪𑁄𑀕𑀁 𑀬𑀣𑀸𑀭𑀼𑀘𑀺𑀁.

𑀏𑀯𑀁 𑀓𑀭𑁄𑀦𑁆𑀢𑁄 𑀜𑀸𑀢𑀻𑀦𑀁, 𑀲𑀁𑀕𑀳𑀁 𑀲𑁄 𑀬𑀣𑀸𑀭𑀳𑀁;

𑀆𑀭𑀸𑀥𑁂𑀦𑁆𑀢𑁄 𑀘 𑀤𑀸𑀦𑀸𑀤𑀺-𑀲𑀗𑁆𑀕𑀳𑁂𑀳𑀺 𑀫𑀳𑀸𑀚𑀦𑀁.

𑀭𑀸𑀚𑀸 𑀤𑀲𑀬𑀺 𑀭𑀸𑀚𑀽𑀦𑀁, 𑀥𑀫𑁆𑀫𑁂𑀳𑀺 𑀲𑀫𑀼𑀧𑀸𑀕𑀢𑁄;

𑀲𑀫𑀸𑀘𑀭𑀦𑁆𑀢𑁄 𑀧𑀼𑀜𑁆𑀜𑀸𑀦𑀺, 𑀧𑀭𑀺𑀪𑀼𑀜𑁆𑀚𑀺𑀢𑁆𑀣 𑀫𑁂𑀤𑀺𑀦𑀺𑀁.

𑀧𑀁𑀲𑀼𑀓𑀽𑀮𑀺𑀓 𑀪𑀺𑀓𑁆𑀔𑀽𑀦𑀁, 𑀓𑀢𑁆𑀯𑀸’𑀭𑀺𑀝𑁆𑀞𑀫𑁆𑀳𑀺 𑀧𑀩𑁆𑀩𑀢𑁂;

𑀫𑀳𑀸𑀪𑁄𑀕𑀁 𑀅𑀤𑀸𑀭𑀸𑀫𑀁, 𑀦𑀺𑀫𑁆𑀫𑀺𑀢𑀁 𑀯𑀺𑀬 𑀇𑀤𑁆𑀥𑀺𑀬𑀸.

𑀧𑀭𑀺𑀳𑀸𑀭𑀜𑁆𑀘 𑀢𑀲𑁆𑀲𑀤𑀸, 𑀭𑀸𑀚𑀸𑀭𑀳𑀫𑀲𑁂𑀲𑀢𑁄;

𑀆𑀭𑀸𑀫𑀺𑀓𑁂 𑀘 𑀩𑀳𑀯𑁄, 𑀤𑀸𑀲𑁂 𑀓𑀫𑁆𑀫𑀓𑀭𑁂𑀧𑀺 𑀘.

𑀧𑀸𑀲𑀸𑀤𑀁 𑀲𑁄𑀯 𑀓𑀸𑀭𑁂𑀲𑀺, 𑀯𑀺𑀳𑀸𑀭𑁂 𑀚𑁂𑀢𑀦𑀸𑀫𑀓𑁂;

𑀅𑀦𑁂𑀓𑀪𑀽𑀫𑀺𑀁 𑀪𑀽𑀫𑀺𑀦𑁆𑀤𑁄, 𑀩𑀼𑀤𑁆𑀥𑀪𑀽𑀫𑀺𑀕𑀢𑀸𑀲𑀬𑁄.

𑀯𑀟𑁆𑀠𑁂𑀢𑁆𑀯𑀸 𑀢𑀢𑁆𑀣 𑀓𑀸𑀭𑁂𑀢𑁆𑀯𑀸, 𑀲𑀩𑁆𑀩 𑀲𑁄𑀯𑀡𑁆𑀡𑀬𑀁 𑀚𑀺𑀦𑀁;

𑀲𑀡𑁆𑀞𑀧𑁂𑀢𑁆𑀯𑀸 𑀫𑀳𑀸𑀪𑁄𑀕𑀁, 𑀯𑀲𑀸𑀧𑁂𑀲𑀺 𑀘 𑀪𑀺𑀓𑁆𑀔𑀯𑁄.

𑀫𑀳𑀸𑀤𑀺 𑀧𑀭𑀺𑀯𑁂𑀡𑀫𑁆𑀳𑀺, 𑀓𑀸𑀭𑁂𑀲𑀺 𑀲𑀼𑀫𑀦𑁄𑀳𑀭𑀁;

𑀧𑀸𑀲𑀸𑀤 𑀫𑀕𑁆𑀕𑀺𑀲𑀦𑁆𑀤𑀁𑀟𑁆𑀠𑀁, 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑀓𑁂.

𑀓𑀢𑁆𑀯𑀸 𑀯𑀻𑀭𑀗𑁆𑀓𑀼𑀭𑀸𑀭𑀸𑀫𑀁, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀫𑀳𑀸𑀲𑀗𑁆𑀖𑀺𑀓 𑀪𑀺𑀓𑁆𑀔𑀽𑀦𑀁, 𑀣𑁂𑀭𑀺𑀬𑀸𑀦𑀜𑁆𑀘 𑀤𑀸𑀧𑀬𑀺.

𑀧𑀼𑀩𑁆𑀩𑀸𑀭𑀸𑀫𑀜𑁆𑀘 𑀓𑀸𑀭𑁂𑀲𑀺, 𑀲𑀫𑁆𑀧𑀦𑁆𑀦 𑀘𑀢𑀼𑀧𑀘𑁆𑀘𑀬𑀁;

𑀲𑀤𑁆𑀥𑀺𑀁 𑀲𑁄 𑀲𑀗𑁆𑀖𑀦𑀸𑀫𑀸𑀬, 𑀤𑁂𑀯𑀺𑀬𑀸𑀧𑀺 𑀘 𑀅𑀢𑁆𑀢𑀦𑁄.

𑀫𑀳𑀸𑀯𑀺𑀳𑀸𑀭𑁂𑀢𑀸𑀬𑁂𑀯, 𑀲𑀤𑁆𑀥𑀺𑀁 𑀓𑀸𑀭𑁂𑀲𑀺 𑀪𑀽𑀫𑀺𑀧𑁄;

𑀆𑀯𑀸𑀲𑀁 𑀲𑀗𑁆𑀖𑀲𑁂𑀦𑀯𑁆𑀳𑀁, 𑀫𑀳𑀸𑀪𑁄𑀕𑀁 𑀫𑀳𑀸𑀫𑀢𑀺.

𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀓𑁂𑀲𑀥𑀸𑀢𑀼 𑀓𑀭𑀡𑁆𑀟𑀓𑀁;

𑀫𑀳𑀸𑀧𑀽𑀚𑀁 𑀧𑀯𑀢𑁆𑀢𑁂𑀲𑀺, 𑀭𑀚𑁆𑀚𑀁 𑀯𑀺𑀲𑁆𑀲𑀚𑁆𑀚𑀺 𑀉𑀢𑁆𑀢𑀫𑁄.

𑀘𑁂𑀢𑀺𑀬𑀲𑁆𑀲 ¶ 𑀕𑀻𑀭𑀺𑀲𑁆𑀲𑀸𑀤𑀸, 𑀓𑀸𑀡𑀯𑀸𑀧𑀺𑀁 𑀩𑀳𑀼𑀤𑀬𑀁;

𑀪𑀺𑀓𑁆𑀔𑀽𑀦𑀁 𑀤𑀺𑀧𑀯𑀸𑀲𑀻𑀦𑀁, 𑀤𑀸𑀧𑁂𑀲𑀺 𑀘 𑀢𑀺𑀘𑀻𑀯𑀭𑀁.

𑀧𑀼𑀮𑀢𑁆𑀣𑀺 𑀦𑀕𑀭𑁂 𑀓𑀸𑀲𑀺, 𑀯𑀸𑀧𑀺𑀬𑁄 𑀣𑀼𑀲𑀯𑀸𑀧𑀺𑀬𑀸;

𑀲𑁂𑀦𑀕𑁆𑀕𑀩𑁄𑀥𑀺𑀫𑀸𑀯𑀸𑀲𑀁, 𑀕𑀸𑀫𑀸𑀭𑀸𑀫𑀺𑀓 𑀲𑀜𑁆𑀜𑀼𑀢𑀁.

𑀢𑀲𑁆𑀫𑀺𑀁𑀬𑁂𑀯 𑀘 𑀓𑀸𑀭𑁂𑀲𑀺, 𑀫𑀳𑀸𑀧𑀸𑀴𑀺𑀁 𑀲𑀼𑀪𑁄𑀚𑀦𑀁;

𑀫𑀳𑀸𑀧𑀸𑀴𑀺𑀜𑁆𑀘 𑀲𑀩𑁆𑀩𑁂𑀲𑀁, 𑀫𑀳𑀸𑀦𑁂𑀢𑁆𑀢𑀫𑁆𑀧𑀺 𑀧𑀩𑁆𑀩𑀢𑁂.

𑀯𑁂𑀚𑁆𑀚𑀲𑀸𑀮𑀫𑁆𑀧𑀺 𑀓𑀸𑀭𑁂𑀲𑀺, 𑀦𑀕𑀭𑀲𑁆𑀲 𑀘 𑀧𑀘𑁆𑀙𑀺𑀫𑁂;

𑀅𑀦𑀸𑀣𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀬𑀸𑀕𑀼𑀤𑀸𑀦𑀁 𑀲𑀔𑀚𑁆𑀚𑀓𑀁.

𑀧𑀁𑀲𑀼𑀓𑀽𑀮𑀺𑀓 𑀪𑀺𑀓𑁆𑀔𑀽𑀦𑀁, 𑀧𑀘𑁆𑀘𑁂𑀓𑀜𑁆𑀘 𑀫𑀳𑀸𑀦𑀲𑀁;

𑀓𑀢𑁆𑀯𑀸 𑀤𑀸𑀧𑁂𑀲𑀺 𑀲𑀓𑁆𑀓𑀘𑁆𑀘𑀁, 𑀦𑀺𑀘𑁆𑀘𑀁 𑀪𑁄𑀚𑀦𑀫𑀼𑀢𑁆𑀢𑀫𑁄.

𑀳𑀼𑀢𑁆𑀯𑀸 𑀫𑀳𑀸𑀤𑀺𑀧𑀸𑀤𑁄’𑀬𑀁, 𑀓𑀧𑁆𑀧𑀽𑀭 𑀧𑀭𑀺𑀯𑁂𑀡𑀓𑁂;

𑀉𑀢𑁆𑀢𑀭𑀸𑀴𑁆𑀳𑁂 𑀘 𑀓𑀸𑀭𑁂𑀲𑀺, 𑀧𑀭𑀺𑀘𑁆𑀙𑁂𑀤𑁂 𑀲𑀦𑀸𑀫𑀓𑁂.

𑀢𑀼𑀮𑀸𑀪𑀸𑀭𑀜𑁆𑀘 𑀧𑀸𑀤𑀸𑀲𑀻, 𑀢𑀺𑀓𑁆𑀔𑀢𑁆𑀢𑀼𑀁 𑀲𑁄 𑀫𑀳𑀸𑀥𑀦𑁂;

𑀧𑀼𑀜𑁆𑀜𑀫𑀜𑁆𑀜𑀫𑁆𑀧𑀺 𑀲𑁄’𑀓𑀸𑀲𑀺, 𑀭𑀸𑀚𑀸 𑀦𑀸𑀦𑀧𑁆𑀧𑀓𑀸𑀭𑀓𑀁.

𑀲𑀗𑁆𑀖𑀦𑀸𑀫𑀸𑀧𑀺 𑀲𑀸 𑀤𑁂𑀯𑀻, 𑀉𑀢𑁆𑀢𑀭𑀫𑁆𑀳𑀺 𑀯𑀺𑀳𑀸𑀭𑀓𑁂;

𑀓𑀢𑁆𑀯𑀸 𑀫𑀳𑀺𑀦𑁆𑀤𑀲𑁂𑀦𑀯𑁆𑀳𑀸-𑀯𑀸𑀲𑀁 𑀯𑀸𑀲𑁂𑀲𑀺 𑀪𑀺𑀓𑁆𑀔𑀯𑁄.

𑀆𑀭𑀤𑁆𑀥𑁄 𑀤𑀧𑁆𑀧𑀼𑀮𑀯𑁆𑀳𑀲𑁆𑀲, 𑀓𑀸𑀮𑁂 𑀭𑀸𑀚𑀲𑁆𑀲 𑀥𑀻𑀫𑀪𑁄;

𑀫𑀳𑀸𑀤𑁂𑀯𑁂𑀦 𑀲𑁄 𑀆𑀲𑀺, 𑀭𑀫𑁆𑀫𑁄 𑀤𑀧𑁆𑀧𑀼𑀮 𑀧𑀩𑁆𑀩𑀢𑁄.

𑀤𑀸𑀭𑀼𑀓𑀲𑁆𑀲𑀧𑀦𑀸𑀫𑁂𑀦, 𑀢𑀣𑀸 𑀓𑀲𑁆𑀲𑀧𑀭𑀸𑀚𑀺𑀓𑀁;

𑀉𑀪𑁄𑀧𑀺 𑀢𑁂 𑀯𑀺𑀧𑁆𑀧𑀓𑀢𑁂, 𑀭𑀸𑀚𑀸 𑀲𑁄 𑀯𑀲𑀫𑀸𑀧𑀬𑀺.

𑀪𑀤𑁆𑀤𑁄 𑀲𑁂𑀦𑀸𑀧𑀢𑀺 𑀢𑀲𑁆𑀲, 𑀪𑀤𑁆𑀤𑀲𑁂𑀦𑀸𑀧𑀢𑀺’𑀯𑁆𑀳𑀬𑀁;

𑀧𑀭𑀺𑀯𑁂𑀡𑀫𑁆𑀧𑀺 𑀓𑀸𑀭𑁂𑀲𑀺, 𑀤𑀸𑀲𑀪𑁄𑀕𑀲𑀫𑀸𑀬𑀼𑀢𑀁.

𑀉𑀢𑁆𑀢𑀭𑁄 𑀘 𑀅𑀫𑀘𑁆𑀘𑁄’𑀓𑀸, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀯𑀸𑀲𑀫𑀼𑀢𑁆𑀢𑀭𑀲𑁂𑀦𑀯𑁆𑀳𑀁, 𑀭𑀫𑁆𑀫 𑀫𑀼𑀢𑁆𑀢𑀭𑀧𑀘𑁆𑀘𑀬𑀁.

𑀯𑀚𑀺𑀭𑁄 𑀦𑀸𑀫 𑀢𑀢𑁆𑀣𑁂𑀯𑀸-𑀯𑀸𑀲𑀁 𑀯𑀚𑀺𑀭𑀲𑁂𑀦𑀓𑀁;

𑀓𑀸𑀲𑀺 𑀭𑀓𑁆𑀔𑀲𑀦𑀸𑀫𑁄𑀘𑀸-𑀯𑀸𑀲𑀁 𑀭𑀓𑁆𑀔𑀲𑀦𑀸𑀫𑀓𑀁.

𑀢𑀢𑁄 𑀯𑀻𑀲𑀢𑀺 𑀯𑀲𑁆𑀲𑁂𑀲𑀼, 𑀧𑀼𑀮𑀢𑁆𑀣𑀺 𑀦𑀕𑀭𑁂 𑀯𑀲𑀁;

𑀧𑀡𑁆𑀟𑀼𑀭𑀸𑀚𑀓𑀢𑀁 𑀓𑀸𑀭𑀁, 𑀲𑀭𑀦𑁆𑀢𑁄 𑀲𑀭𑀤𑀲𑁆𑀲𑀦𑁄.

𑀤𑀤𑀦𑁆𑀢𑁄 𑀯𑀺𑀬 𑀲𑁂𑀦𑀲𑁆𑀲, 𑀲𑀽𑀭𑀲𑁆𑀲𑀸𑀯𑀲𑀭𑀜𑁆𑀘𑀲𑁄;

𑀧𑀳𑀸𑀬 𑀤𑀻𑀧𑀁 𑀤𑀻𑀧𑁄’𑀯, 𑀫𑀳𑀸𑀯𑀸𑀢 𑀳𑀢𑁄 𑀕𑀢𑁄.

𑀪𑁄𑀕𑁄 ¶ 𑀅𑀦𑀺𑀘𑁆𑀘𑀸 𑀲𑀳 𑀚𑀻𑀯𑀺𑀢𑁂𑀦;

𑀧𑀕𑁂𑀯 𑀢𑁂 𑀩𑀦𑁆𑀥𑀼𑀚𑀦𑀸 𑀲𑀳𑀸𑀬𑀸;

𑀲𑀫𑀸𑀕𑀢𑀁 𑀫𑀘𑁆𑀘𑀼𑀫𑀼𑀔𑀁 𑀲𑀼𑀖𑁄𑀭𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀓𑀽𑀦𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀏𑀯𑀁 𑀢𑀲𑁆𑀫𑀺𑀁 𑀫𑀢𑁂 𑀢𑀲𑁆𑀲, 𑀓𑀸𑀢𑀩𑁆𑀩𑀁 𑀲𑀸𑀥𑀼𑀓𑀸𑀭𑀺𑀬;

𑀫𑀳𑀸𑀤𑀻𑀧𑀸𑀤𑁄 𑀲𑁂𑀦𑀯𑁆𑀳𑁄, 𑀆𑀤𑀸𑀬 𑀩𑀮𑀯𑀸𑀳𑀦𑀁.

𑀆𑀕𑀫𑁆𑀫 𑀦𑀕𑀭𑀁 𑀭𑀸𑀚𑀸, 𑀅𑀳𑁄𑀲𑀺 𑀥𑀭𑀡𑀻 𑀢𑀮𑁂;

𑀆𑀤𑀺𑀓𑀧𑁆𑀧𑀫𑁆𑀳𑀺 𑀭𑀸𑀚𑀽𑀦𑀁, 𑀤𑀲𑁆𑀲𑀦𑁆𑀢𑁄 𑀘𑀭𑀺𑀬𑀁 𑀧𑀺𑀬.

𑀲𑀤𑁆𑀥𑁄 𑀫𑀳𑀸𑀥𑀦𑁄 𑀲𑀽𑀭𑁄, 𑀫𑀼𑀢𑁆𑀢𑀘𑀸𑀕𑀻 𑀦𑀺𑀭𑀸𑀮𑀬𑁄;

𑀬𑀸𑀘𑀬𑁄𑀕𑁄 𑀫𑀳𑀸𑀪𑁄𑀕𑁄, 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑁄.

𑀓𑀺𑀢𑁆𑀢𑀺𑀬𑀸’𑀫𑀮𑀪𑀽𑀢𑀸𑀬, 𑀢𑀣𑀸 𑀢𑁂𑀚𑁄 𑀕𑀼𑀡𑁂𑀦 𑀘;

𑀲𑀦𑁆𑀦𑀺𑀧𑀸𑀢𑀁𑀯 𑀲𑁄 𑀘𑀦𑁆𑀤-𑀲𑀽𑀭𑀺𑀬𑀸𑀦𑀁 𑀦𑀺𑀤𑀲𑁆𑀲𑀬𑀺.

𑀅𑀲𑀗𑁆𑀓𑀺𑀡𑁆𑀡 𑀕𑀼𑀡𑀸𑀓𑀺𑀡𑁆𑀡𑁄, 𑀲𑀼𑀯𑀺𑀘𑀺𑀡𑁆𑀡 𑀕𑀼𑀡𑀸𑀕𑀼𑀡𑁄;

𑀦𑀺𑀢𑁆𑀣𑀺𑀡𑁆𑀡𑀧𑀸𑀧𑁄 𑀦𑀺𑀩𑁆𑀩𑀺𑀡𑁆𑀡-𑀲𑀁𑀲𑀸𑀭𑁄 𑀲𑀸𑀭𑀤𑀲𑁆𑀲𑀦𑁄.

𑀪𑀭𑀺𑀬𑀸 𑀢𑀲𑁆𑀲 𑀬𑀸 𑀆𑀲𑀺, 𑀲𑀗𑁆𑀖𑀸𑀢𑀁 𑀲𑁄 𑀪𑀺𑀲𑁂𑀘𑀬𑀺;

𑀫𑀳𑁂𑀲𑀻𑀪𑀸𑀯𑁂 𑀤𑀢𑁆𑀯𑀸𑀦, 𑀧𑀭𑀺𑀳𑀸𑀭𑀁 𑀬𑀣𑀸𑀪𑀢𑀁.

𑀫𑀳𑀺𑀦𑁆𑀤𑀁 𑀦𑀸𑀫 𑀲𑀧𑁆𑀧𑀜𑁆𑀜𑀁, 𑀓𑀡𑀺𑀝𑁆𑀞𑀁 𑀪𑀸𑀢𑀭𑀁 𑀲𑀓𑀁;

𑀤𑀢𑁆𑀯𑀸 𑀤𑀓𑁆𑀔𑀺𑀡𑀪𑀸𑀕𑀁 𑀲𑁄, 𑀑𑀧𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀅𑀦𑁆𑀢𑁂𑀧𑀼𑀭𑁂’𑀧𑀭𑀚𑁆𑀛𑀺𑀢𑁆𑀯𑀸, 𑀲𑁄 𑀭𑀜𑁆𑀜𑀸 𑀅𑀯𑀥𑀸𑀭𑀺𑀢𑁂;

𑀲𑀧𑀼𑀢𑁆𑀢𑀤𑀸𑀭𑁄 𑀯𑀼𑀝𑁆𑀞𑀸𑀬, 𑀅𑀜𑁆𑀜𑀸𑀢𑁄 𑀫𑀮𑀬𑀁 𑀅𑀕𑀸.

𑀉𑀧𑁆𑀧𑀚𑁆𑀚𑀺𑀢𑁆𑀣 ¶ 𑀢𑀤𑀸 𑀧𑀼𑀢𑁆𑀢𑁄, 𑀭𑀜𑁆𑀜𑁄 𑀲𑀗𑁆𑀖𑀸𑀬 𑀤𑁂𑀯𑀺𑀬𑀸;

𑀤𑀲𑁆𑀲𑁂𑀦𑁆𑀢𑁄’𑀯 𑀧𑀦𑀸𑀤𑀲𑁆𑀲, 𑀓𑀼𑀫𑀸𑀭 𑀭𑀽𑀧𑀫𑀢𑁆𑀢𑀦𑁄.

𑀭𑀸𑀚𑀸 𑀢𑀁 𑀚𑀸𑀢𑀫𑀢𑁆𑀢𑀁’𑀯, 𑀤𑀺𑀲𑁆𑀯𑀸 𑀲𑀦𑁆𑀣𑀼𑀝𑁆𑀞𑀫𑀸𑀦𑀼𑀲𑁄;

𑀲𑀺𑀤𑁆𑀥𑀢𑁆𑀣𑀁 𑀮𑀼𑀫𑁆𑀩𑀺𑀦𑀻𑀚𑀸𑀢𑀁, 𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑁄 𑀯𑀺𑀬.

𑀥𑀜𑁆𑀜𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑁄, 𑀞𑀧𑁂𑀢𑁆𑀯𑀸 𑀤𑀻𑀧𑀫𑁂𑀓𑀓𑀁;

𑀚𑀫𑁆𑀩𑀼𑀤𑀻𑀧𑁂’𑀧𑀺 𑀓𑀲𑀺𑀡𑁂, 𑀭𑀚𑁆𑀚𑀬𑁄𑀕𑁆𑀕𑁄𑀢𑀺 𑀫𑁂 𑀲𑀼𑀢𑁄.

𑀦𑀸𑀫𑀤𑀸𑀦 𑀤𑀺𑀦𑁂𑀬𑁂𑀯, 𑀧𑀭𑀺𑀳𑀸𑀭𑁂𑀦 𑀲𑀩𑁆𑀩𑀲𑁄;

𑀑𑀧𑀭𑀚𑁆𑀚𑁂 𑀪𑀺𑀲𑀺𑀜𑁆𑀘𑀺𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀤𑁂𑀲𑀫𑀲𑁆𑀲’𑀤𑀸.

𑀬𑀼𑀯𑀭𑀸𑀚𑀸𑀧𑀺 𑀫𑀮𑀬𑁂, 𑀯𑀲𑀦𑁆𑀢𑁄’𑀯 𑀫𑀳𑀻𑀧𑀢𑀺𑀁;

𑀆𑀭𑀸𑀥𑁂𑀢𑁆𑀯𑀸 𑀉𑀧𑀸𑀬𑁂𑀦, 𑀅𑀦𑀼𑀜𑁆𑀜𑀢𑁄 𑀲𑀪𑀸𑀢𑀭𑀸.

𑀦𑀺𑀓𑀸𑀬𑀢𑁆𑀢𑀬 𑀯𑀸 𑀲𑀻𑀳𑀺, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀳𑀺 𑀆𑀕𑀢𑁄;

𑀤𑀺𑀲𑁆𑀯𑀸 𑀭𑀸𑀚𑀸𑀦𑀫𑁂𑀢𑁆𑀣𑁂𑀯, 𑀲𑀦𑁆𑀥𑀻𑀁’𑀓𑀸𑀲𑀺 𑀅𑀓𑀼𑀧𑁆𑀧𑀺𑀬𑀁.

𑀬𑀸 𑀢𑀲𑁆𑀲 𑀬𑀼𑀯𑀭𑀸𑀚𑀲𑁆𑀲, 𑀪𑀭𑀺𑀬𑀸 𑀢𑀺𑀲𑁆𑀲𑀸 𑀦𑀸𑀫𑀺𑀓𑀸;

𑀭𑀸𑀚𑀺𑀦𑀻 𑀲𑀸 𑀯𑀺𑀚𑀸𑀬𑀺𑀢𑁆𑀣, 𑀥𑀻𑀢𑀭𑀁 𑀲𑀗𑁆𑀖𑀦𑀸𑀫𑀺𑀓𑀁.

𑀓𑀺𑀢𑁆𑀢𑀺𑀦𑀸𑀫𑀸’𑀧𑀭𑀸𑀬𑀸 𑀘, 𑀪𑀭𑀺𑀬𑀸 𑀲𑀸𑀧𑀺 𑀔𑁄 𑀧𑀦;

𑀯𑀺𑀚𑀸𑀬𑀺 𑀧𑀼𑀢𑁆𑀢𑁂 𑀘𑀢𑁆𑀢𑀸𑀭𑁄, 𑀢𑀣𑀸 𑀏𑀓𑀜𑁆𑀘 𑀥𑀻𑀢𑀭𑀁.

𑀢𑀤𑀸 𑀭𑀸𑀚𑀸𑀧𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀏𑀯𑀁 𑀲𑀢𑀺 𑀓𑀡𑀺𑀝𑁆𑀞𑀓𑁄;

𑀦𑀺𑀲𑁆𑀲𑀗𑁆𑀓𑁄 𑀫𑀬𑀺 𑀳𑁄𑀢𑀻𑀢𑀺, 𑀲𑀫𑁆𑀫𑀸 𑀫𑀦𑁆𑀢𑀻𑀳𑀺 𑀫𑀦𑁆𑀢𑀺𑀬.

𑀥𑀻𑀢𑀭𑀁 𑀬𑀼𑀯𑀭𑀸𑀚𑀲𑁆𑀲, 𑀲𑀼𑀭𑀽𑀧𑀺𑀁 𑀭𑀽𑀧𑀦𑀸𑀫𑀺𑀓𑀁;

𑀓𑀲𑁆𑀲𑀧𑀲𑁆𑀲’𑀢𑁆𑀢 𑀧𑀼𑀢𑁆𑀢𑀲𑁆𑀲, 𑀯𑀺𑀯𑀸𑀳𑀁 𑀓𑀸𑀭𑀬𑀺 𑀩𑀼𑀥𑁄.

𑀤𑀓𑁆𑀔𑀺𑀡𑀁 𑀤𑁂𑀲𑀫𑀲𑁆𑀲𑁂𑀯, 𑀓𑀡𑀺𑀝𑁆𑀞𑀲𑁆𑀲 𑀲𑀤𑀸𑀧𑀬𑀺;

𑀭𑀸𑀚𑀧𑀼𑀢𑁆𑀢𑀲𑁆𑀲 𑀧𑀸𑀤𑀸𑀧𑀺, 𑀧𑀘𑁆𑀘𑁂𑀓𑀁 𑀪𑁄𑀕𑀫𑀢𑁆𑀢𑀦𑁄.

𑀭𑀚𑁆𑀚𑀫𑁆𑀳𑀺 𑀲𑀩𑁆𑀩𑀁 𑀢𑀲𑁆𑀲𑁂𑀯, 𑀧𑀭𑀺𑀪𑁄𑀕𑀸𑀬 𑀤𑀸𑀧𑀬𑀺;

𑀓𑁂𑀯𑀮𑀦𑁆𑀢𑀼 𑀯𑀺𑀘𑀸𑀭𑁂𑀲𑀺, 𑀤𑀻𑀧𑀁 𑀤𑀻𑀧 𑀳𑀺𑀢𑀸𑀯𑀳𑁄.

𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀉𑀪𑀺𑀦𑁆𑀦𑀁 𑀧𑀼𑀜𑁆𑀜𑀓𑀫𑁆𑀫𑀺𑀦𑀁;

𑀥𑀜𑁆𑀜𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑀸, 𑀯𑀺𑀚𑀸𑀢𑀸 𑀧𑀼𑀢𑁆𑀢𑀥𑀻𑀢𑀭𑁄.

𑀓𑀢𑁆𑀯𑀸 𑀲𑀩𑁆𑀩𑁄𑀧𑀳𑀸𑀭𑁂𑀦, 𑀤𑀸𑀞𑀸𑀥𑀸𑀢𑀼 𑀫𑀳𑀸𑀫𑀳𑀁;

𑀆𑀭𑀼𑀬𑁆𑀳 𑀯𑀭𑀧𑀸𑀲𑀸𑀤𑀁, 𑀭𑀢𑀦𑀯𑁆𑀳𑀁 𑀫𑀳𑀻𑀧𑀢𑀺.

𑀢𑀤𑀸 𑀲𑁄𑀯𑀡𑁆𑀡𑀬𑀲𑁆𑀲𑀸𑀧𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀭𑀸 𑀞𑀺𑀢𑀁;

𑀲𑀼𑀜𑁆𑀜𑀁 𑀧𑀺𑀝𑁆𑀞𑀁 𑀲𑀬𑀁 𑀤𑀺𑀲𑁆𑀯𑀸, 𑀓𑀲𑁆𑀫𑀸 𑀏𑀯𑀦𑁆𑀢𑀺 𑀲𑀁𑀯𑀤𑀺.

𑀢𑀢𑁄 ¶ 𑀅𑀫𑀘𑁆𑀘𑀸 𑀆𑀳𑀁𑀲𑀼, 𑀦𑀸𑀚𑀸𑀦𑀸𑀲𑀺 𑀫𑀳𑀻𑀧𑀢𑀺;

𑀫𑀳𑀸𑀧𑀺𑀢𑀼𑀦𑀭𑀺𑀦𑁆𑀤𑀲𑁆𑀲, 𑀓𑀸𑀮𑁂 𑀢𑀯 𑀦𑀭𑀺𑀲𑁆𑀲𑀭𑀁.

𑀧𑀡𑁆𑀟𑀼𑀭𑀸𑀚𑀸 𑀇𑀥𑀸𑀕𑀫𑁆𑀫, 𑀤𑀻𑀧𑀫𑁂𑀢𑀁 𑀯𑀺𑀦𑀸𑀲𑀺𑀬;

𑀲𑀩𑁆𑀩𑀁 𑀲𑀸𑀭𑀕𑀢𑀁 𑀤𑀻𑀧𑁂, 𑀲𑀫𑀸𑀤𑀸𑀬 𑀕𑀢𑁄 𑀇𑀢𑀺.

𑀢𑀁 𑀲𑀼𑀢𑁆𑀯𑀸 𑀮𑀚𑁆𑀚𑀺𑀢𑁄 𑀭𑀸𑀚𑀸, 𑀲𑀬𑀁 𑀯𑀺𑀬 𑀧𑀭𑀸𑀚𑀺𑀢𑁄;

𑀢𑀤𑀳𑁂𑀯 𑀦𑀺𑀬𑁄𑀚𑁂𑀲𑀺, 𑀅𑀫𑀘𑁆𑀘𑁂 𑀩𑀮𑀲𑀗𑁆𑀕𑀳𑁂.

𑀢𑀤𑀸’𑀯 𑀓𑀺𑀭 𑀆𑀕𑀜𑁆𑀙𑀺, 𑀧𑀡𑁆𑀟𑀼𑀭𑀸𑀚𑀓𑀼𑀫𑀸𑀭𑀓𑁄;

𑀧𑀭𑀺𑀪𑀽𑀢𑁄 𑀲𑀭𑀸𑀚𑁂𑀦, 𑀭𑀚𑁆𑀚𑀢𑁆𑀣𑀁 𑀓𑀢 𑀦𑀺𑀘𑁆𑀙𑀬𑁄.

𑀭𑀸𑀚𑀸 𑀤𑀺𑀲𑁆𑀯𑀸’𑀢𑀺 𑀲𑀦𑁆𑀢𑀼𑀝𑁆𑀞𑁄, 𑀓𑀢𑁆𑀢𑀩𑁆𑀩𑀁 𑀢𑀲𑁆𑀲 𑀓𑀸𑀭𑀺𑀬;

𑀫𑀳𑀸𑀢𑀺𑀢𑁆𑀣 𑀫𑀼𑀧𑀸𑀕𑀫𑁆𑀫, 𑀧𑀝𑁆𑀝𑀦𑀁 𑀲𑁂𑀫𑀢𑁆𑀭𑀲𑁄.

𑀫𑀳𑀦𑁆𑀢𑀁 𑀩𑀮𑀓𑀸𑀬𑀜𑁆𑀘, 𑀢𑀲𑁆𑀲𑁄𑀧𑀓𑀭𑀡𑀸𑀦𑀺 𑀘;

𑀅𑀦𑀼𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀤𑁂𑀯𑀲𑁂𑀦𑀁𑀯 𑀲𑀚𑁆𑀚𑀺𑀢𑀁.

𑀧𑀡𑁆𑀟𑀼𑀭𑀸𑀚𑀓𑀼𑀫𑀸𑀭𑁂𑀦, 𑀲𑀤𑁆𑀥𑀺𑀁 𑀲𑁂𑀦𑀸𑀧𑀢𑀺 𑀲𑀓𑀁;

𑀕𑀦𑁆𑀢𑁆𑀯𑀸 𑀢𑀁 𑀧𑀡𑁆𑀟𑀼𑀭𑀸𑀚𑀸𑀦𑀁, 𑀳𑀦𑁆𑀢𑁆𑀯𑀸𑀦𑀺𑀓𑀫𑀺𑀢𑁄 𑀧𑀼𑀭𑀸.

𑀭𑀢𑀦𑀁 𑀲𑀩𑁆𑀩𑀫𑀸𑀤𑀸𑀬, 𑀤𑀢𑁆𑀯𑀸 𑀭𑀚𑁆𑀚𑀁 𑀇𑀫𑀲𑁆𑀲 𑀘;

𑀦 𑀘𑀺𑀭𑁂𑀦𑁂𑀯 𑀏𑀳𑀻𑀢𑀻, 𑀉𑀬𑁆𑀬𑁄𑀚𑁂𑀲𑀺 𑀫𑀳𑀸𑀬𑀲𑁄.

𑀲𑁄𑀧𑀺 𑀏𑀯𑀁 𑀓𑀭𑁄𑀫𑀻𑀢𑀺, 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀳𑀻𑀧𑀢𑀺𑀁;

𑀯𑀺𑀦𑁆𑀤𑀺𑀢𑁆𑀯𑀸 𑀩𑀮𑀫𑀸𑀤𑀸𑀬, 𑀦𑀸𑀫𑀫𑀸𑀭𑀼𑀬𑁆𑀳 𑀢𑀁 𑀔𑀡𑁂.

𑀧𑀭𑀢𑀻𑀭𑀁 𑀢𑀢𑁄 𑀕𑀦𑁆𑀢𑁆𑀯𑀸, 𑀲𑀁𑀯𑀼𑀴𑀳 𑀩𑀮𑀯𑀸𑀳𑀦𑁄;

𑀯𑀺𑀦𑀸𑀲𑀬𑀦𑁆𑀢𑁄 𑀧𑀘𑁆𑀘𑀦𑁆𑀢𑀁, 𑀯𑀸𑀭𑁂𑀲𑀺 𑀫𑀥𑀼𑀭𑀁 𑀧𑀼𑀭𑀁.

𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸𑀦, 𑀧𑀘𑁆𑀙𑀺𑀦𑁆𑀤𑀺𑀢𑁆𑀣 𑀕𑀢𑀸𑀕𑀢𑀁;

𑀢𑀢𑁄 𑀅𑀕𑁆𑀕𑀺𑀁 𑀔𑀺𑀧𑀸𑀧𑁂𑀲𑀺, 𑀕𑁄𑀧𑀼𑀭𑀝𑁆𑀝𑀸𑀮 𑀓𑁄𑀝𑁆𑀞𑀓𑁂.

𑀏𑀯𑀁 𑀲𑀻𑀳𑀴𑀲𑁂𑀦𑀸𑀬, 𑀧𑀯𑀺𑀝𑁆𑀞𑀸𑀬 𑀲𑀓𑀁 𑀧𑀼𑀭𑀁;

𑀲𑀩𑁆𑀩𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀬, 𑀲𑁂𑀦𑀗𑁆𑀕𑀁 𑀖𑀸𑀢𑀬𑀦𑁆𑀢𑀺𑀬𑀸.

𑀧𑀡𑁆𑀟𑀼𑀭𑀸𑀚𑀸 𑀦𑀺𑀲𑀫𑁆𑀫𑁂𑀢𑀁, 𑀲𑀫𑀸𑀤𑀸𑀬 𑀲𑀓𑀁 𑀩𑀮𑀁;

𑀯𑁂𑀕𑀲𑀸 𑀢𑀁 𑀲𑀫𑀸𑀕𑀫𑁆𑀫, 𑀬𑀼𑀤𑁆𑀥𑀁 𑀓𑀸𑀢𑀼𑀁 𑀲𑀫𑀸𑀭𑀪𑀺.

𑀅𑀲𑀫𑁆𑀧𑀼𑀡𑁆𑀡 𑀩𑀮𑀢𑁆𑀢𑀸 𑀲𑁄, 𑀯𑀺𑀤𑁆𑀥𑁄 𑀲𑀮𑁆𑀮𑁂𑀦 𑀪𑀽𑀧𑀢𑀺;

𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄𑀬𑁂𑀯, 𑀯𑀺𑀳𑀸𑀬 𑀧𑀼𑀭𑀫𑀢𑁆𑀢𑀦𑁄.

𑀧𑀮𑀸𑀬𑀺𑀢𑁆𑀯𑀸 𑀕𑀢𑀞𑀸𑀦𑁂, 𑀚𑀻𑀯𑀺𑀢𑀁 𑀦𑀺𑀚𑀫𑁂𑀲𑁆𑀲𑀚𑀺;

𑀪𑀭𑀺𑀬𑀸𑀯’𑀲𑁆𑀲 𑀢𑁂𑀦𑀸𑀲𑀺, 𑀲𑀫𑁆𑀧𑀢𑁆𑀢𑀸 𑀚𑀻𑀯𑀺𑀢𑀓𑁆𑀔𑀬𑀁.

𑀢𑀢𑁄 ¶ 𑀲𑀻𑀳𑀴𑀲𑁂𑀦𑀸𑀲𑀸, 𑀧𑀯𑀺𑀝𑁆𑀞𑀸 𑀦𑀺𑀩𑁆𑀪𑀬𑀸 𑀧𑀼𑀭𑀁;

𑀢𑀢𑁆𑀣 𑀲𑀩𑁆𑀩𑀁 𑀯𑀺𑀮𑀼𑀫𑁆𑀧𑀺𑀢𑁆𑀣, 𑀤𑁂𑀯𑀸’𑀲𑀺𑀭𑀧𑀼𑀭𑀁 𑀬𑀣𑀸.

𑀲𑁂𑀦𑀸𑀧𑀢𑀺 𑀢𑀢𑁄 𑀭𑀸𑀚-𑀕𑁂𑀳𑁂 𑀪𑀢𑁆𑀢𑀁 𑀲𑀫𑁂𑀓𑁆𑀔𑀺𑀬;

𑀤𑀻𑀧𑀸𑀦𑀺𑀢𑀫𑀺𑀫𑀫𑁆𑀳𑀸 𑀘, 𑀢𑀢𑁆𑀭𑀝𑁆𑀞𑀜𑁆𑀘 𑀫𑀳𑀸𑀭𑀳𑀁.

𑀲𑀸𑀭𑀁 𑀲𑀩𑁆𑀩𑀁𑀲𑀫𑀸𑀤𑀸𑀬, 𑀤𑁂𑀲𑁂 𑀘 𑀦𑀕𑀭𑁂 𑀞𑀺𑀢𑀁;

𑀓𑀢𑁆𑀯𑀸 𑀇𑀲𑁆𑀲𑀭𑀺𑀬𑀁 𑀢𑀢𑁆𑀣, 𑀯𑀲𑁂𑀯𑀢𑁆𑀢𑀺𑀬 𑀅𑀢𑁆𑀢𑀦𑁄.

𑀧𑀡𑁆𑀟𑀼𑀭𑀸𑀚 𑀓𑀼𑀫𑀸𑀭𑀁 𑀢𑀼, 𑀢𑀢𑁆𑀣 𑀭𑀚𑁆𑀚𑁂’𑀪𑀺 𑀲𑀺𑀜𑁆𑀘𑀺𑀬;

𑀓𑀸𑀭𑁂𑀢𑁆𑀯𑀸 𑀧𑀭𑀺𑀳𑀸𑀭𑀜𑁆𑀘, 𑀤𑁂𑀲𑀁 𑀢𑀲𑁆𑀲 𑀲𑀫𑀧𑁆𑀧𑀺𑀬.

𑀬𑀣𑀸𑀭𑀼𑀘𑀺𑀁 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑀺𑀅𑀲𑁆𑀲𑁂 𑀦𑀭𑁂’𑀧𑀺 𑀘;

𑀢𑀢𑁆𑀣 𑀢𑀢𑁆𑀣 𑀬𑀣𑀸 𑀓𑀸𑀫𑀁, 𑀯𑀲𑀦𑁆𑀢𑁄 𑀅𑀓𑀼𑀢𑁄 𑀪𑀬𑁄.

𑀲𑀫𑀼𑀤𑁆𑀤 𑀢𑀝𑀫𑀸𑀕𑀫𑁆𑀫, 𑀞𑀢𑁆𑀯𑀸 𑀢𑀢𑁆𑀣 𑀬𑀣𑀸𑀲𑀼𑀔𑀁;

𑀓𑀻𑀴𑀦𑁆𑀢𑁄 𑀯𑀺𑀬 𑀦𑀸𑀯𑀁 𑀲𑁄, 𑀲𑀫𑀸𑀭𑀼𑀬𑁆𑀳 𑀯𑀺𑀲𑀸𑀭𑀤𑁄.

𑀫𑀳𑀸𑀢𑀺𑀢𑁆𑀣 𑀫𑀼𑀧𑀸𑀕𑀫𑁆𑀫, 𑀯𑀦𑁆𑀤𑀺𑀢𑁆𑀯𑀸 𑀥𑀭𑀡𑀻 𑀧𑀢𑀺𑀁;

𑀢𑀁 𑀲𑀸𑀲𑀦𑀁 𑀦𑀺𑀯𑁂𑀤𑁂𑀢𑁆𑀯𑀸, 𑀲𑀸𑀭𑀁 𑀤𑀲𑁆𑀲𑁂𑀲𑀺 𑀆𑀳𑀝𑀁.

𑀭𑀸𑀚𑀸 𑀲𑀸𑀥𑀽𑀢𑀺 𑀯𑀢𑁆𑀯𑀸𑀦, 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀗𑁆𑀕𑀳𑀁;

𑀲𑀤𑁆𑀥𑀺𑀁 𑀲𑁂𑀦𑀸𑀬 𑀆𑀕𑀦𑁆𑀢𑁆𑀯𑀸, 𑀧𑀓𑀝𑁆𑀞𑀸𑀬 𑀲𑀓𑀁 𑀧𑀼𑀭𑀁.

𑀚𑀬𑀧𑀸𑀦𑀁 𑀧𑀺𑀯𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀯𑀺𑀚𑀬𑀫𑀗𑁆𑀕𑀮𑀁;

𑀫𑀳𑀸𑀥𑀸𑀕𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀬𑀸𑀘𑀓𑀸𑀦𑀁 𑀬𑀣𑀸 𑀭𑀼𑀘𑀺𑀁.

𑀲𑀩𑁆𑀩𑀁 𑀧𑀸𑀓𑀢𑀺𑀓𑀁 𑀓𑀸𑀲𑀺, 𑀲𑀸𑀭𑀁 𑀤𑀻𑀧𑁂 𑀦𑀺𑀭𑀸𑀮𑀬𑁄;

𑀲𑁄𑀯𑀡𑁆𑀡 𑀧𑀝𑀺𑀫𑀸𑀬𑁄 𑀘, 𑀬𑀣𑀸𑀞𑀸𑀦𑁂 𑀞𑀧𑀸𑀧𑀬𑀺.

𑀲𑀼𑀜𑁆𑀜𑀁 𑀭𑀢𑀦𑀧𑀸𑀲𑀸𑀤𑁂, 𑀧𑀺𑀝𑁆𑀞𑀁 𑀧𑀽𑀭𑁂𑀲𑀺 𑀲𑀢𑁆𑀣𑀼𑀦𑁄;

𑀓𑀸𑀲𑀺 𑀭𑀓𑁆𑀔𑀧𑀺𑀥𑀸𑀦𑁂𑀦, 𑀦𑀺𑀩𑁆𑀪𑀬𑀁 𑀥𑀭𑀡𑀻𑀢𑀮𑀁.

𑀢𑀢𑁄 𑀧𑀝𑁆𑀞𑀸𑀬 𑀤𑀻𑀧𑀁𑀲𑁄, 𑀅𑀭𑀻𑀦𑀁 𑀤𑀼𑀧𑁆𑀧𑀥𑀁𑀲𑀺𑀬𑀁;

𑀓𑀢𑁆𑀯𑀸 𑀯𑀟𑁆𑀠𑁂𑀲𑀺 𑀪𑁄𑀕𑁂𑀳𑀺, 𑀉𑀢𑁆𑀢𑀭𑀸𑀤𑀺𑀓𑀼𑀭𑀼𑀁 𑀧𑀺𑀬.

𑀔𑀺𑀦𑁆𑀦𑀸 𑀧𑀼𑀩𑁆𑀩𑀲𑁆𑀲 𑀭𑀸𑀚𑀲𑁆𑀲, 𑀓𑀸𑀮𑁂 𑀤𑀻𑀧𑀫𑁆𑀳𑀺 𑀧𑀸𑀡𑀺𑀦𑁄;

𑀦𑀺𑀩𑁆𑀩𑀼𑀢𑀸 𑀢𑀁 𑀲𑀫𑀸𑀕𑀫𑁆𑀫, 𑀖𑀫𑁆𑀫𑀸 𑀯𑀺𑀬 𑀯𑀮𑀸𑀳𑀓𑀸.

𑀢𑀲𑁆𑀲 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑀸 𑀳𑁂𑀲𑀼𑀁, 𑀧𑀁𑀲𑀼𑀓𑀽𑀮𑀺𑀓 𑀪𑀺𑀓𑁆𑀔𑀯𑁄.

𑀬𑀼𑀯𑀭𑀸𑀚𑀸 𑀫𑀳𑀺𑀦𑁆𑀤𑁄 𑀲𑁄, 𑀥𑀼𑀫𑀭𑀸𑀚𑀲𑁆𑀲 𑀲𑀢𑁆𑀣𑀼𑀦𑁄;

𑀓𑀸𑀭𑀸𑀧𑀬𑀺 𑀖𑀭𑀁 𑀭𑀫𑁆𑀫𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁.

𑀩𑁄𑀥𑀺𑀕𑁂𑀳𑀁 ¶ 𑀓𑀭𑁄𑀦𑁆𑀢𑁄 𑀢𑀁, 𑀤𑀺𑀲𑁆𑀯𑀸 𑀯𑀟𑁆𑀠𑀓𑀻𑀦𑁄 𑀢𑀤𑀸;

𑀯𑀁𑀲𑁂𑀦 𑀲𑀸𑀔𑀁 𑀆𑀳𑀘𑁆𑀘, 𑀪𑀺𑀚𑁆𑀚𑀦𑁆𑀢𑀁 𑀯𑀭𑀩𑁄𑀥𑀺𑀬𑀸.

𑀓𑀺𑀦𑁆𑀢𑀼 𑀓𑀸𑀢𑀩𑁆𑀩𑀫𑁂𑀢𑁆𑀣𑀸𑀢𑀺, 𑀬𑀼𑀯𑀭𑀸𑀚𑀁 𑀦𑀺𑀯𑁂𑀤𑀬𑀼𑀁;

𑀲𑁄 𑀢𑀁 𑀢𑀁 𑀫𑀼𑀧𑀲𑀁𑀓𑀫𑁆𑀫, 𑀫𑀳𑀸𑀧𑀽𑀚𑀸𑀬 𑀧𑀽𑀚𑀺𑀬.

𑀲𑀘𑁂 𑀲𑀢𑁆𑀣𑀸, 𑀳𑀺𑀢𑀢𑁆𑀣𑀸𑀬, 𑀲𑀫𑁆𑀪𑀽𑀢𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀮𑀤𑁆𑀥𑀼𑀁 𑀧𑀼𑀜𑁆𑀜𑀲𑁆𑀲’𑀦𑀕𑁆𑀖𑀲𑁆𑀲, 𑀖𑀭𑀲𑁆𑀲 𑀓𑀭𑀡𑁂𑀢𑀺’𑀥.

𑀲𑀸𑀔𑀸 𑀕𑀘𑁆𑀙𑀁 𑀢𑀼 𑀉𑀤𑁆𑀥𑀁𑀯, 𑀓𑀸𑀢𑀼𑀁 𑀲𑀓𑁆𑀓𑀸 𑀬𑀣𑀸𑀖𑀭𑀁;

𑀏𑀯𑀫𑀸𑀭𑀸𑀥𑀬𑀺𑀢𑁆𑀯𑀸𑀦, 𑀯𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀭𑀁 𑀕𑀢𑁄.

𑀢𑀤𑀸 𑀲𑀸𑀔𑀸 𑀤𑀼𑀫𑀺𑀦𑁆𑀤𑀲𑁆𑀲, 𑀭𑀢𑁆𑀢𑀺𑀬𑀁 𑀉𑀤𑁆𑀥𑀫𑀼𑀕𑁆𑀕𑀫𑀺;

𑀢𑀢𑁄 𑀓𑀫𑁆𑀫𑀓𑀭𑀸 𑀲𑀩𑁆𑀩𑀁, 𑀆𑀭𑁄𑀘𑁂𑀲𑀼𑀁 𑀲𑀲𑀸𑀫𑀺𑀦𑁄.

𑀬𑀼𑀯𑀭𑀸𑀚𑀸’𑀢𑀺 𑀲𑀦𑁆𑀢𑀼𑀝𑁆𑀞𑁄, 𑀪𑀸𑀢𑀼𑀭𑀜𑁆𑀜𑁄 𑀦𑀺𑀯𑁂𑀤𑀺𑀬;

𑀫𑀳𑀸𑀧𑀽𑀚𑀸𑀬 𑀧𑀽𑀚𑁂𑀲𑀺, 𑀯𑀺𑀲𑁆𑀲𑀚𑁆𑀚𑀺𑀬 𑀩𑀳𑀼𑀥𑀦𑀁.

𑀢𑀣𑀸 𑀫𑀳𑀺𑀦𑁆𑀤𑀲𑁂𑀦𑀯𑁆𑀳𑀁, 𑀧𑀭𑀺𑀯𑁂𑀡𑀜𑁆𑀘 𑀓𑀸𑀭𑀺𑀬;

𑀲𑀗𑁆𑀖𑀲𑁆𑀲𑀸’𑀤𑀸 𑀲𑀪𑁄𑀕𑀁 𑀲𑁄, 𑀧𑀼𑀜𑁆𑀜𑀸 𑀧𑀼𑀜𑁆𑀜𑀸𑀦𑀺𑀘𑀸𑀘𑀻𑀦𑀺.

𑀅𑀤𑀸 𑀲𑀧𑀭𑀺𑀲𑀁 𑀪𑀢𑁆𑀢𑀁, 𑀯𑀢𑁆𑀣𑀁 𑀙𑀢𑁆𑀢𑀫𑀼𑀧𑀸𑀳𑀦𑀁;

𑀢𑀣𑀸 𑀕𑀫𑀺𑀬𑀪𑀢𑁆𑀢𑀜𑁆𑀘, 𑀦𑀳𑀸𑀦𑀜𑁆𑀘 𑀲𑀪𑀢𑁆𑀢𑀓𑀁.

𑀏𑀯𑀁 𑀔𑀼𑀤𑁆𑀤𑀸𑀦𑀼 𑀔𑀼𑀤𑁆𑀤𑀸𑀦𑀺, 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀲𑁄 𑀯𑀺𑀪𑀽;

𑀭𑀜𑁆𑀜𑁄 𑀢𑁂𑀢𑁆𑀢𑀺𑀁𑀲𑀯𑀲𑁆𑀲𑀫𑁆𑀳𑀺, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀅𑀣 𑀭𑀸𑀚𑀸 𑀫𑀢𑁂𑀢𑀲𑁆𑀫𑀺𑀁, 𑀓𑀡𑀺𑀝𑁆𑀞𑀫𑀼𑀤𑀬𑀁 𑀲𑀓𑀁;

𑀢𑀲𑁆𑀲 𑀞𑀸𑀦𑁂 𑀞𑀧𑁂𑀢𑁆𑀯𑀸𑀦, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀢𑀲𑁆𑀲𑀤𑀸.

𑀢𑀼𑀮𑀸𑀪𑀸𑀭𑀲𑁆𑀲 𑀤𑀸𑀦𑁂𑀦, 𑀤𑀻𑀦𑀸𑀦𑀸𑀣𑁂 𑀲𑀢𑀧𑁆𑀧𑀬𑀺;

𑀥𑀫𑁆𑀫𑀓𑀫𑁆𑀫𑁂𑀦 𑀲𑁄𑀥𑁂𑀲𑀺, 𑀦𑀺𑀓𑀸𑀬𑀢𑁆𑀢𑀬𑀫𑁂𑀓𑀢𑁄.

𑀲𑁄𑀡𑁆𑀡𑀣𑀸𑀮𑀻𑀲𑀳𑀲𑁆𑀲𑀁 𑀲𑁄, 𑀫𑀼𑀢𑁆𑀢𑀸𑀳𑀺 𑀧𑀭𑀺𑀧𑀽𑀭𑀺𑀬;

𑀞𑀧𑁂𑀢𑁆𑀯𑀸 𑀫𑀡𑀺𑀫𑁂𑀓𑁂𑀓𑀁, 𑀢𑀲𑁆𑀲𑁄𑀧𑀭𑀺 𑀫𑀳𑀸𑀭𑀳𑀁.

𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀳𑀲𑁆𑀲𑀲𑁆𑀲, 𑀲𑀼𑀤𑁆𑀥𑁂 𑀭𑀢𑀦𑀪𑀸𑀚𑀦𑁂;

𑀪𑁄𑀚𑁂𑀢𑁆𑀯𑀸 𑀔𑀻𑀭𑀧𑀸𑀬𑀸𑀲𑀁, 𑀤𑀸𑀧𑁂𑀢𑁆𑀯𑀸 𑀳𑁂𑀫𑀲𑀼𑀢𑁆𑀢𑀓𑀁.

𑀢𑀣𑀸 𑀦𑀯𑁂𑀳𑀺 𑀯𑀢𑁆𑀣𑁂𑀳𑀺, 𑀅𑀘𑁆𑀙𑀸𑀤𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀁;

𑀲𑀦𑁆𑀢𑀧𑁆𑀧𑁂𑀲𑀺 𑀫𑀳𑀦𑁆𑀢𑁂𑀦, 𑀧𑀭𑀺𑀳𑀸𑀭𑁂𑀦 𑀧𑀼𑀜𑁆𑀜𑀯𑀸.

𑀪𑀺𑀓𑁆𑀔𑀽𑀦𑀁 𑀤𑀻𑀧𑀯𑀸𑀲𑀻𑀦𑀁, 𑀅𑀤𑀸𑀲𑀺 𑀘 𑀢𑀺𑀘𑀻𑀯𑀭𑀁;

𑀅𑀤𑀸 𑀲𑀩𑁆𑀩𑀸𑀲𑀫𑀺𑀢𑁆𑀣𑀻𑀦𑀁, 𑀯𑀢𑁆𑀣𑀜𑁆𑀘 𑀲𑀼𑀫𑀦𑁄𑀳𑀭𑀁.

𑀓𑀸𑀭𑁂𑀢𑁆𑀯𑀸 ¶ 𑀮𑁄𑀳𑀧𑀸𑀲𑀸𑀤𑀁, 𑀯𑁂𑀚𑀬𑀦𑁆𑀢𑀲𑀭𑀺𑀓𑁆𑀔𑀓𑀁;

𑀯𑀟𑁆𑀠𑁂𑀲𑀺 𑀧𑀝𑀺𑀫𑀁 𑀢𑀢𑁆𑀣, 𑀲𑀼𑀯𑀡𑁆𑀡𑀖𑀝𑀓𑁄𑀝𑁆𑀝𑀺𑀫𑀁.

𑀲𑀼𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭-𑀪𑀸𑀯𑀁 𑀲𑀩𑁆𑀩 𑀫𑀳𑁂𑀲𑀻𑀦𑀁;

𑀢𑀼𑀘𑁆𑀙𑁄 𑀬𑀁 𑀦𑁂𑀯 𑀳𑁄𑀢𑀽𑀢𑀺, 𑀯𑀸𑀲𑀁 𑀲𑀗𑁆𑀖𑀲𑁆𑀲 𑀢𑀁 𑀅𑀓𑀸.

𑀪𑁄𑀕𑀕𑀸𑀫𑁂 𑀘 𑀢𑀲𑁆𑀲𑀤𑀸, 𑀭𑀓𑁆𑀔𑀓𑁂 𑀘 𑀦𑀺𑀬𑁄𑀚𑀬𑀺;

𑀪𑀺𑀓𑁆𑀔𑀽 𑀤𑁆𑀯𑀢𑁆𑀢𑀺𑀁𑀲𑀫𑀢𑁆𑀢𑀸𑀳𑀺, 𑀯𑀲𑀦𑁆𑀢𑀽𑀢𑀺 𑀦𑀺𑀬𑀸𑀫𑀬𑀺.

𑀕𑀗𑁆𑀕𑀸𑀬 𑀫𑀭𑀺𑀬𑀸𑀤𑀁 𑀲𑁄, 𑀓𑀸𑀭𑁂𑀲𑀺 𑀫𑀡𑀺𑀫𑁂𑀔𑀮𑀁;

𑀢𑁄𑀬𑀦𑀺𑀤𑁆𑀥𑀫𑀦𑀜𑁆𑀘𑀸𑀓𑀸, 𑀫𑀡𑀺𑀳𑀻𑀭𑀓𑀯𑀸𑀧𑀺𑀬𑀸.

𑀓𑀝𑁆𑀞𑀼𑀦𑁆𑀢𑀦𑀕𑀭𑁂 𑀘𑁂𑀯, 𑀓𑀸𑀡𑀯𑀸𑀧𑀺𑀁𑀘 𑀩𑀦𑁆𑀥𑀬𑀺;

𑀯𑁂𑀚𑁆𑀚𑀲𑀸𑀮𑀜𑁆𑀘 𑀓𑀸𑀭𑁂𑀲𑀺, 𑀘𑁂𑀢𑀺𑀬𑀫𑁆𑀳𑀺 𑀕𑀺𑀭𑀺𑀫𑁆𑀳𑀺 𑀲𑁄.

𑀩𑀼𑀤𑁆𑀥𑀕𑀸𑀫𑀯𑀺𑀳𑀸𑀭𑀜𑁆𑀘, 𑀯𑀺𑀳𑀸𑀭𑀁 𑀫𑀳𑀺𑀬𑀗𑁆𑀕𑀡𑀁;

𑀓𑀽𑀝𑀢𑀺𑀲𑁆𑀲 𑀯𑀺𑀳𑀸𑀭𑀜𑁆𑀘, 𑀪𑁄𑀕𑀕𑀸𑀫𑁂 𑀦 𑀯𑀟𑁆𑀠𑀬𑀺.

𑀫𑀡𑁆𑀟𑀮𑀲𑁆𑀲 𑀕𑀺𑀭𑀺𑀲𑁆𑀲𑀸’𑀤𑀸, 𑀯𑀺𑀳𑀸𑀭𑀲𑁆𑀲 𑀲𑀕𑀸𑀫𑀓𑁂;

𑀉𑀢𑁆𑀢𑀭𑀸𑀴𑁆𑀳𑁂 𑀘 𑀓𑀸𑀭𑁂𑀲𑀺, 𑀧𑀸𑀲𑀸𑀤𑀁 𑀧𑀭𑀺𑀯𑁂𑀡𑀓𑁂.

𑀫𑀳𑀸𑀲𑁂𑀦𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀕𑀸𑀫𑀁 𑀤𑀢𑁆𑀯𑀸𑀦 𑀭𑀓𑁆𑀔𑀓𑁂;

𑀤𑀸𑀲𑀺 𑀲𑁄𑀩𑁆𑀪𑀯𑀺𑀳𑀸𑀭𑁂 𑀘, 𑀓𑀸𑀭𑁂𑀲𑀺 𑀧𑀝𑀺𑀫𑀸𑀖𑀭𑀁.

𑀩𑁄𑀥𑀺𑀲𑀢𑁆𑀢𑁂 𑀘 𑀯𑀟𑁆𑀠𑁂𑀲𑀺, 𑀧𑀸𑀲𑀸𑀤𑁂 𑀫𑀡𑀺𑀫𑁂𑀔𑀮𑁂;

𑀲𑀻𑀮𑀸𑀫𑀬𑀫𑀼𑀦𑀺𑀦𑁆𑀤𑀲𑁆𑀲, 𑀚𑀺𑀡𑁆𑀡𑀕𑁂𑀳𑀫𑁆𑀧𑀺 𑀓𑀸𑀭𑀬𑀺.

𑀭𑀸𑀚 𑀢𑀁 𑀩𑁄𑀥𑀺𑀲𑀢𑁆𑀢𑀜𑁆𑀘, 𑀲𑀖𑀭𑀁 𑀢𑀢𑁆𑀣 𑀲𑀦𑁆𑀦𑀳𑀺;

𑀆𑀮𑀯𑀸𑀮𑀁 𑀤𑀼𑀫𑀺𑀦𑁆𑀤𑀲𑁆𑀲, 𑀕𑀦𑁆𑀥𑀺𑀢𑁆𑀯𑀸 𑀓𑀸 𑀫𑀳𑀸𑀫𑀳𑀁.

𑀮𑀺𑀔𑀺𑀢𑁆𑀯𑀸 𑀳𑁂𑀫𑀧𑀝𑁆𑀝𑀫𑁆𑀳𑀺, 𑀲𑀩𑁆𑀩𑀭𑀢𑀦𑀲𑀼𑀢𑁆𑀢𑀓𑀁;

𑀫𑀳𑀸𑀧𑀽𑀚𑀫𑀓𑀸 𑀢𑀲𑁆𑀲, 𑀅𑀪𑀺𑀥𑀫𑁆𑀫𑀁 𑀓𑀣𑀸𑀧𑀬𑀺.

𑀆𑀦𑀦𑁆𑀤𑀧𑀝𑀺𑀫𑀁 𑀦𑁂𑀢𑁆𑀯𑀸, 𑀧𑀼𑀭𑀁 𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁;

𑀧𑀭𑀺𑀢𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀪𑀡𑀸𑀧𑁂𑀢𑁆𑀯𑀸 𑀬𑀣𑀸𑀯𑀺𑀥𑀺𑀁.

𑀧𑀭𑀺𑀢𑁆𑀢𑁄𑀤𑀓𑀲𑁂𑀓𑁂𑀦, 𑀚𑀦𑀁 𑀓𑀢𑁆𑀯𑀸 𑀦𑀺𑀭𑀸𑀢𑀼𑀭𑀁;

𑀭𑀸𑀚𑀸 𑀭𑁄𑀕𑀪𑀬𑀁 𑀧𑁂𑀯𑀁, 𑀦𑀻𑀳𑀭𑀺𑀢𑁆𑀣 𑀲𑀤𑁂𑀲𑀢𑁄.

𑀅𑀪𑀺𑀲𑁂𑀓𑀁 𑀕𑀳𑁂𑀢𑁆𑀯𑀸𑀦, 𑀳𑁂𑀫𑀯𑀸𑀮𑀼𑀓 𑀘𑁂𑀢𑀺𑀬𑁂;

𑀅𑀦𑀼𑀲𑀁𑀯𑀘𑁆𑀙𑀭𑀁 𑀓𑀸𑀢𑀼𑀁, 𑀢𑀁 𑀘𑀸𑀭𑀺𑀢𑁆𑀢𑀁 𑀮𑀺𑀔𑀸𑀧𑀬𑀺.

𑀅𑀤𑀸 𑀫𑀸𑀲𑀲𑁆𑀲 𑀘𑀢𑀽𑀲𑀼, 𑀉𑀧𑁄𑀲𑀣𑀤𑀺𑀦𑁂𑀲𑀼 𑀲𑁄;

𑀘𑀢𑀼𑀦𑁆𑀦𑀜𑁆𑀘 𑀲𑀳𑀲𑁆𑀲𑀸𑀦𑀁, 𑀯𑀢𑁆𑀣𑀤𑀸𑀦𑀁 𑀲𑀪𑀢𑁆𑀢𑀓𑀁.

𑀯𑁂𑀲𑀸𑀔𑀓𑀻𑀴𑀁 ¶ 𑀓𑀻𑀴𑀺𑀢𑁆𑀣, 𑀲𑀤𑁆𑀥𑀺𑀁 𑀤𑀼𑀕𑁆𑀕𑀢𑀓𑁂𑀳𑀺 𑀲𑁄;

𑀅𑀦𑁆𑀦𑀁 𑀧𑀸𑀦𑀜𑁆𑀘 𑀯𑀢𑁆𑀣𑀜𑁆𑀘, 𑀢𑁂𑀲𑀁 𑀤𑀢𑁆𑀯𑀸 𑀬𑀣𑀸𑀭𑀼𑀘𑀺𑀁.

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀻𑀧𑀫𑁆𑀳𑀺, 𑀦𑀺𑀘𑁆𑀘𑀤𑀸𑀦𑀁 𑀧𑀯𑀢𑁆𑀢𑀬𑀺;

𑀲𑀦𑁆𑀢𑀧𑁆𑀧𑁂𑀲𑀺 𑀘 𑀤𑀸𑀦𑁂𑀦, 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑁂.

𑀢𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀘, 𑀲𑀗𑁆𑀖𑀦𑀸𑀫𑀸 𑀅𑀓𑀸𑀭𑀬𑀺;

𑀧𑀩𑁆𑀩𑀢𑀁 𑀲𑀗𑁆𑀖𑀲𑁂𑀦𑀯𑁆𑀳𑀁, 𑀲𑀪𑁄𑀕𑀫𑀪𑀬𑀼𑀢𑁆𑀢𑀭𑁂.

𑀦𑀻𑀮𑀘𑀽𑀴𑀸𑀫𑀡𑀺𑀜𑁆𑀘𑀸𑀓𑀸, 𑀲𑀺𑀮𑀸𑀫𑀬 𑀫𑀳𑁂𑀲𑀺𑀦𑁄;

𑀧𑀽𑀚𑀁 𑀲𑀩𑁆𑀩𑁄𑀧𑀳𑀸𑀭𑁂𑀳𑀺, 𑀓𑀸𑀲𑀺 𑀲𑀢𑁆𑀣𑀼𑀲𑁆𑀲 𑀲𑀩𑁆𑀩𑀤𑀸.

𑀢𑀲𑁆𑀲 𑀲𑁂𑀦𑀸𑀧𑀢𑀺𑀘𑀸’𑀓𑀸, 𑀲𑁂𑀦𑀲𑁂𑀦𑀸𑀧𑀢𑀺𑀯𑁆𑀳𑀬𑀁;

𑀧𑀭𑀺𑀯𑁂𑀡𑀁 𑀫𑀳𑀸𑀪𑁄𑀕𑀁, 𑀲𑀽𑀭𑁄 𑀢𑀼𑀝𑁆𑀞𑀓𑀦𑀸𑀫𑀓𑁄.

𑀏𑀯𑀁 𑀲𑀧𑀭𑀺𑀲𑁄 𑀓𑀢𑁆𑀯𑀸, 𑀲𑀧𑀼𑀜𑁆𑀜𑀸𑀦𑀺 𑀫𑀳𑀸𑀬𑀲𑁄;

𑀧𑀜𑁆𑀘𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂, 𑀤𑁂𑀯𑀮𑁄𑀓𑀫𑀼𑀧𑀸𑀕𑀫𑀺.

𑀢𑀢𑁄 𑀢𑀲𑁆𑀲𑀸’𑀦𑀼𑀚𑁄 𑀆𑀲𑀺, 𑀉𑀤𑀬𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀭𑀸𑀚𑀸 𑀲𑀩𑁆𑀩𑀧𑁆𑀧𑀬𑁄𑀕𑁂𑀳𑀺, 𑀳𑀺𑀢𑁂𑀲𑀻 𑀤𑀻𑀧𑀯𑀸𑀲𑀻𑀦𑀁.

𑀳𑀼𑀢𑁆𑀯𑀸 𑀲𑁄 𑀲𑀬𑀁 𑀭𑀸𑀚𑀸, 𑀓𑀡𑀺𑀝𑁆𑀞𑀁 𑀲𑀓𑀪𑀸𑀢𑀭𑀁;

𑀫𑀳𑀸𑀤𑀻𑀧𑀸𑀤𑀞𑀸𑀦𑀫𑁆𑀳𑀺, 𑀞𑀧𑀺 𑀓𑀲𑁆𑀲𑀧𑀦𑀸𑀫𑀓𑀁.

𑀭𑀸𑀚𑀸 𑀘𑀺𑀦𑁆𑀢𑀺𑀬 𑀜𑀸𑀢𑀻𑀦𑀁, 𑀓𑀸𑀢𑀩𑁆𑀩𑁄 𑀲𑀗𑁆𑀕𑀳𑁄 𑀇𑀢𑀺;

𑀏𑀯𑀁 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀪𑀸𑀢𑀼𑀧𑀼𑀢𑁆𑀢𑀲𑁆𑀲 𑀥𑀻𑀢𑀭𑀁.

𑀬𑀼𑀯𑀭𑀸𑀚𑀲𑁆𑀲 𑀢𑀲𑁆𑀲𑀸’𑀓𑀸, 𑀪𑀭𑀺𑀬𑀁 𑀲𑁂𑀦𑀦𑀸𑀫𑀺𑀓𑀁;

𑀥𑀸𑀭𑁂𑀲𑀺𑀘 𑀲𑀬𑀁 𑀭𑀸𑀚𑀸, 𑀅𑀧𑀭𑀁 𑀢𑀺𑀲𑁆𑀲𑀲𑀯𑁆𑀳𑀬𑀁.

𑀫𑀳𑀺𑀦𑁆𑀤𑀲𑁆𑀲𑀼𑀧𑀭𑀸𑀚𑀲𑁆𑀲, 𑀭𑀸𑀚𑀥𑀻𑀢𑀸𑀬 𑀓𑀺𑀢𑁆𑀢𑀺𑀬𑀸;

𑀧𑀼𑀢𑁆𑀢𑁄 𑀓𑀺𑀢𑁆𑀢𑀕𑁆𑀕𑀩𑁄𑀥𑀻𑀢𑀺, 𑀆𑀤𑀺𑀧𑀸𑀤𑁄 𑀯𑀺𑀩𑀼𑀤𑁆𑀥𑀺𑀓𑁄.

𑀘𑁄𑀭𑁄 𑀳𑀼𑀢𑁆𑀯𑀸 𑀫𑀳𑀸𑀭𑀜𑁆𑀜𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀭𑀢𑁆𑀢𑀺𑀬𑀁;

𑀏𑀓𑁄 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀲𑀫𑀼𑀧𑀸𑀕𑀫𑁆𑀫𑀭𑁄𑀳𑀡𑀁.

𑀚𑀦𑀁 𑀳𑀢𑁆𑀢𑀕𑀢𑀁 𑀓𑀢𑁆𑀯𑀸, 𑀤𑁂𑀲𑀁 𑀲𑀩𑁆𑀩𑀁 𑀯𑀺𑀦𑀸𑀲𑀺𑀬;

𑀖𑀸𑀢𑀸𑀧𑀬𑀺𑀢𑁆𑀣 𑀢𑀢𑁆𑀭𑀝𑁆𑀞𑀁, 𑀲𑁄 𑀢𑀁 𑀫𑀸𑀢𑀼𑀮𑀫𑀢𑁆𑀢𑀦𑁄.

𑀢𑀁 𑀲𑀼𑀢𑁆𑀯𑀸 𑀥𑀭𑀡𑀻𑀧𑀸𑀮𑁄, 𑀢𑀲𑁆𑀫𑀺𑀁’𑀢𑀻𑀯 𑀧𑀓𑀼𑀧𑁆𑀧𑀺𑀬;

𑀆𑀦𑁂𑀢𑀼𑀁 𑀢𑀫𑀼𑀧𑀸𑀬𑀁 𑀲𑁄, 𑀕𑀯𑁂𑀲𑀦𑁆𑀢𑁄 𑀢𑀣𑀸 𑀢𑀣𑀸.

𑀪𑀸𑀢𑀼𑀧𑀼𑀢𑁆𑀢𑀁 𑀢𑀫𑀸𑀳𑀼𑀬, 𑀬𑀼𑀯𑀭𑀸𑀚𑀁 𑀲𑀓𑀲𑁆𑀲𑀧𑀁;

𑀆𑀫𑀦𑁆𑀢𑁂𑀲𑀺 𑀫𑀳𑀸𑀧𑀼𑀜𑁆𑀜, 𑀲𑀳𑀸𑀬𑁄 𑀳𑁄𑀢𑀺 𑀫𑁂 𑀇𑀢𑀺.

𑀓𑀺𑀁 ¶ 𑀫𑁂 𑀓𑀢𑁆𑀢𑀩𑁆𑀩’𑀫𑀺𑀘𑁆𑀘𑀸𑀳, 𑀧𑀘𑁆𑀘𑀸𑀳 𑀥𑀭𑀡𑀻𑀧𑀢𑀺;

𑀧𑀼𑀢𑁆𑀢𑁄 𑀢𑀯 𑀫𑀳𑀺𑀦𑁆𑀤𑁄 𑀲𑁄, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀳𑀸𑀩𑀮𑁄.

𑀮𑀸𑀪𑀻 𑀭𑁄𑀳𑀡𑀤𑁂𑀲𑀲𑁆𑀲, 𑀫𑀸𑀢𑀺𑀢𑁄 𑀧𑀺𑀢𑀺𑀢𑁄’𑀧𑀺 𑀘;

𑀲𑀽𑀭𑁄 𑀲𑀩𑁆𑀩𑀲𑀳𑁄 𑀯𑀻𑀭𑁄, 𑀓𑀼𑀲𑀮𑁄 𑀓𑀢𑀽𑀧𑀸𑀲𑀦𑁄.

𑀲𑀗𑁆𑀕𑀸𑀫𑀬𑁄𑀕𑁆𑀕𑁄 𑀫𑀢𑀺𑀫𑀸, 𑀦𑀺𑀧𑀼𑀡𑁄 𑀦𑀬𑀓𑁄𑀯𑀺𑀤𑁄;

𑀢𑀁 𑀧𑁂𑀲𑁂𑀢𑁆𑀯𑀸 𑀦𑀬𑀺𑀲𑁆𑀲𑀸𑀫, 𑀧𑀸𑀧𑀁 𑀫𑀸𑀢𑀼𑀮𑀖𑀸𑀢𑀓𑀁.

𑀢𑀁 𑀲𑀼𑀢𑁆𑀯𑀸 𑀯𑀘𑀦𑀁 𑀭𑀜𑁆𑀜𑁄, 𑀓𑀲𑁆𑀲𑀧𑁄 𑀪𑀸𑀲𑀺 𑀲𑀸𑀤𑀭𑁄;

𑀤𑁂𑀯 𑀤𑁂𑀯𑁂𑀦 𑀯𑀼𑀢𑁆𑀢𑁄’𑀳𑀁, 𑀕𑀘𑁆𑀙𑁂𑀬𑁆𑀬𑀁 𑀓𑀺𑀦𑁆𑀢𑀼 𑀫𑁂 𑀲𑀼𑀢𑁄.

𑀯𑀁𑀲𑁄 𑀫𑁂 𑀧𑀸𑀮𑀺𑀢𑁄 𑀳𑁄𑀢𑀺, 𑀧𑀲𑀸𑀤𑁄 𑀘 𑀢𑀯𑀸𑀥𑀺𑀧;

𑀢𑀲𑁆𑀫𑀸 𑀓𑀸𑀮𑀫𑀳𑀸𑀧𑁂𑀢𑁆𑀯𑀸, 𑀬𑀁 𑀇𑀘𑁆𑀙𑀲𑀺 𑀢𑀣𑀸 𑀓𑀼𑀭𑀼.

𑀲𑀼𑀢𑁆𑀯𑀸 𑀅𑀢𑀻𑀯𑀲𑀦𑁆𑀢𑀼𑀝𑁆𑀞𑁄, 𑀦𑀭𑀺𑀦𑁆𑀤𑁄 𑀢𑀲𑁆𑀲 𑀢𑀁 𑀯𑀘𑁄;

𑀫𑀳𑀦𑁆𑀣𑀁 𑀩𑀮𑀓𑀸𑀬𑀁 𑀲𑁄, 𑀲𑀩𑁆𑀩𑀲𑁄 𑀧𑀝𑀺𑀬𑀸𑀤𑀺𑀬.

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀫𑀳𑀺𑀦𑁆𑀤𑀁 𑀭𑀸𑀚𑀧𑁄𑀢𑀓𑀁;

𑀭𑀓𑁆𑀔𑀺𑀢𑀼𑀁 𑀢𑀁 𑀦𑀺𑀬𑁄𑀚𑁂𑀢𑁆𑀯𑀸, 𑀯𑀚𑀺𑀭𑀕𑁆𑀕𑀜𑁆𑀘 𑀦𑀸𑀬𑀓𑀁.

𑀢𑀼𑀘𑁆𑀙𑀁 𑀯𑀺𑀬 𑀧𑀼𑀭𑀁 𑀓𑀢𑁆𑀯𑀸, 𑀲𑀩𑁆𑀩𑀜𑁆𑀘 𑀩𑀮𑀯𑀸𑀳𑀦𑀁;

𑀲𑀩𑁆𑀩𑁄𑀧𑀓𑀭𑀡𑀜𑁆𑀘𑁂𑀯, 𑀅𑀦𑀽𑀦𑀁 𑀢𑀲𑁆𑀲 𑀤𑀸𑀧𑀺𑀬.

𑀲𑀬𑀁 𑀢𑀫𑀦𑀼𑀕𑀘𑁆𑀙𑀦𑁆𑀢𑁄, 𑀧𑀤𑀲𑀸’𑀯 𑀦𑀭𑀺𑀲𑁆𑀲𑀭𑁄;

𑀉𑀬𑁆𑀬𑁄𑀚𑁂𑀲𑀺 𑀫𑀳𑀸𑀧𑀼𑀜𑁆𑀜, 𑀕𑀘𑁆𑀙 𑀭𑀼𑀓𑁆𑀔𑀸𑀢𑀺 𑀫𑁂𑀤𑀺𑀦𑀺𑀁.

𑀫𑀳𑀺𑀦𑁆𑀤𑁄 𑀲𑁄 𑀫𑀳𑀺𑀦𑁆𑀤𑁄’𑀯, 𑀤𑁂𑀯𑀲𑁂𑀦𑀸 𑀧𑀼𑀭𑀓𑁆𑀔𑀢𑁄;

𑀕𑀘𑁆𑀙𑀦𑁆𑀢𑁄 𑀲𑀼𑀯𑀻𑀭𑁄𑀘𑀺𑀢𑁆𑀣, 𑀤𑁂𑀯𑀸𑀲𑀼𑀭𑀫𑀳𑀸𑀳𑀯𑀁.

𑀢𑀢𑁄 𑀕𑀦𑁆𑀢𑁆𑀯𑀸 𑀦 𑀘𑀺𑀭𑁂𑀦, 𑀕𑀼𑀢𑁆𑀢𑀲𑀸𑀮𑀫𑀼𑀧𑀸𑀕𑀫𑀺;

𑀢𑀢𑁄 𑀚𑀸𑀦𑀧𑀤𑀸 𑀲𑀩𑁆𑀩𑁂, 𑀫𑀡𑁆𑀟𑀮𑀺𑀓𑀸 𑀘 𑀭𑀝𑁆𑀞𑀺𑀬𑀸.

𑀢𑁂𑀦 𑀫𑀸𑀢𑀼𑀮𑀖𑀸𑀢𑁂𑀦, 𑀧𑀸𑀧𑀓𑁂𑀦 𑀉𑀧𑀤𑁆𑀤𑀼𑀢𑀸;

𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀲𑀼𑀁, 𑀮𑀤𑁆𑀥𑁄 𑀦𑁄 𑀲𑀸𑀫𑀺𑀓𑁄 𑀇𑀢𑀺.

𑀧𑀢𑀦𑁆𑀢𑁄 𑀲𑁄𑀧𑀺 𑀔𑁄 𑀘𑁄𑀭𑁄, 𑀞𑀺𑀢𑁄𑀯 𑀕𑀺𑀭𑀺𑀫𑀡𑁆𑀟𑀮𑁂;

𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀭𑀸𑀚𑀪𑀡𑁆𑀟𑀁 𑀫𑀳𑀕𑁆𑀖𑀺𑀬𑀁.

𑀳𑀢𑁆𑀣𑀻 𑀅𑀲𑁆𑀲𑁂𑀘 𑀆𑀤𑀸𑀬, 𑀕𑀦𑁆𑀢𑁆𑀯𑀸 𑀫𑀮𑀬𑀫𑀸𑀭𑀼𑀳𑀺;

𑀫𑀳𑀺𑀦𑁆𑀤𑀲𑁂𑀦𑀸 𑀖𑀸𑀢𑁂𑀦𑁆𑀢𑀻, 𑀢𑀲𑁆𑀲 𑀲𑁂𑀦𑀁 𑀢𑀳𑀺𑀁 𑀢𑀳𑀺𑀁.

𑀧𑀤𑀸𑀦𑀼𑀧𑀤𑀫𑀲𑁆𑀲𑁂’𑀯, 𑀕𑀘𑁆𑀙𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀓𑁂;

𑀤𑀺𑀲𑁆𑀯𑀸 𑀫𑀮𑀬𑀧𑀸𑀤𑀫𑁆𑀳𑀺, 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀲𑁄 𑀇𑀢𑀺.

𑀢𑀢𑁆𑀣 ¶ 𑀧𑀸𑀯𑀺𑀲𑀺𑀫𑀤𑁆𑀤𑀦𑁆𑀢𑀻, 𑀲𑀩𑁆𑀩𑀁 𑀫𑀮𑀬𑀓𑀸𑀦𑀦𑀁;

𑀦𑀤𑀻𑀬𑁄 𑀧𑀮𑁆𑀮𑀮𑁂 𑀘𑁂𑀯, 𑀓𑀭𑁄𑀦𑁆𑀢𑀺 𑀫𑀕𑁆𑀕𑀲𑀸𑀤𑀺𑀲𑁂.

𑀩𑀸𑀮𑀓𑁄𑀯 𑀚𑀦𑀁 𑀤𑀺𑀲𑁆𑀯𑀸, 𑀲𑀩𑁆𑀩𑀁 𑀭𑀢𑀦𑀫𑀢𑁆𑀢𑀦𑁄;

𑀓𑁄𑀥𑀸𑀪𑀺𑀪𑀽𑀢𑁄 𑀙𑀟𑁆𑀟𑁂𑀲𑀺, 𑀦𑀤𑀻 𑀲𑁄𑀩𑁆𑀪𑀢𑀝𑀸𑀤𑀻𑀲𑀼.

𑀏𑀓𑀓𑁄𑀯 𑀦𑀺𑀮𑀻𑀬𑀺𑀢𑁆𑀣, 𑀯𑀦𑁂 𑀧𑀩𑁆𑀩𑀢𑀓𑀦𑁆𑀤𑀭𑁂;

𑀕𑀯𑁂𑀲𑀦𑁆𑀢𑁄 𑀚𑀦𑁄 𑀤𑀺𑀲𑁆𑀯𑀸, 𑀢𑀫𑀕𑁆𑀕𑀳𑀺 𑀦𑀭𑀸𑀥𑀫𑁆𑀫𑀁.

𑀢𑀫𑀸𑀤𑀸𑀬’𑀢𑀺 𑀢𑀼𑀝𑁆𑀞𑁄 𑀲𑁄, 𑀚𑀦𑁄 𑀆𑀕𑀫𑁆𑀫 𑀲𑀚𑁆𑀚𑀼𑀓𑀁;

𑀫𑀳𑀺𑀦𑁆𑀤𑀫𑀼𑀧𑀤𑀲𑁆𑀲𑁂𑀲𑀺, 𑀦𑀺𑀲𑀺𑀦𑁆𑀦𑀁 𑀕𑀼𑀢𑁆𑀢𑀲𑀸𑀮𑀓𑁂.

𑀲𑀬𑀁 𑀲𑁂𑀦𑀁 𑀲𑀫𑀸𑀤𑀸𑀬, 𑀫𑀳𑀸𑀕𑀸𑀫𑀫𑀼𑀧𑀸𑀕𑀢𑁄;

𑀭𑁄𑀳𑀡𑀸 𑀥𑀺𑀧𑀢𑀺 𑀳𑀼𑀢𑁆𑀯𑀸, 𑀓𑀭𑁄𑀦𑁆𑀢𑁄 𑀮𑁄𑀓𑀲𑀗𑁆𑀕𑀳𑀁.

𑀚𑀦𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀩𑀸𑀮𑀓𑁂𑀦 𑀯𑀺𑀩𑀸𑀥𑀺𑀢𑀁;

𑀲𑀸𑀲𑀦𑀜𑁆𑀘 𑀬𑀣𑀸𑀞𑀸𑀦𑁂, 𑀞𑀧𑁂𑀢𑁆𑀯𑀸 𑀢𑁂𑀦 𑀦𑀸𑀲𑀺𑀢𑀁.

𑀧𑀼𑀧𑁆𑀨𑀸𑀭𑀸𑀫𑁂 𑀨𑀮𑀸𑀭𑀸𑀫𑁂, 𑀓𑀸𑀭𑀬𑀺𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁;

𑀯𑀸𑀧𑀺𑀬𑁄’𑀧𑀺 𑀘 𑀕𑀡𑁆𑀳𑀺𑀢𑁆𑀯𑀸, 𑀩𑀦𑁆𑀥𑀸𑀧𑁂𑀢𑁆𑀯𑀸 𑀫𑀳𑀸𑀦𑀤𑀺𑀁.

𑀲𑀩𑁆𑀩𑀢𑁆𑀣 𑀲𑀼𑀮𑀪𑀁 𑀓𑀢𑁆𑀯𑀸, 𑀲𑀗𑁆𑀖𑀲𑁆𑀲 𑀘𑀢𑀼𑀧𑀘𑁆𑀘𑀬𑀁;

𑀤𑀼𑀝𑁆𑀞𑁂 𑀘 𑀧𑀝𑀺𑀩𑀸𑀳𑁂𑀢𑁆𑀯𑀸, 𑀫𑀡𑁆𑀟𑀮𑀻𑀓𑁂 𑀘 𑀭𑀝𑁆𑀞𑀺𑀬𑁂.

𑀘𑁄𑀭𑁂 𑀘 𑀧𑀭𑀺𑀲𑁄𑀥𑁂𑀢𑁆𑀯𑀸, 𑀓𑀢𑁆𑀯𑀸 𑀯𑀺𑀕𑀢𑀓𑀡𑁆𑀝𑀓𑀁;

𑀢𑁄𑀲𑀬𑀦𑁆𑀢𑁄’𑀔𑀺𑀮𑀁 𑀮𑁄𑀓𑀁, 𑀘𑀸𑀕𑀪𑁄𑀕𑀲𑀫𑀧𑁆𑀧𑀺𑀢𑁄.

𑀉𑀧𑀸𑀲𑀦𑀺𑀬𑁄 𑀯𑀺𑀜𑁆𑀜𑀽𑀳𑀺, 𑀲𑁂𑀯𑀦𑀻𑀬𑁄 𑀥𑀦𑀢𑁆𑀣𑀻𑀳𑀺;

𑀓𑀧𑁆𑀧𑀭𑀼𑀓𑁆𑀔𑀽𑀧𑀫𑁄 𑀲𑀩𑁆𑀩-𑀬𑀸𑀘𑀓𑀸𑀦𑀁 𑀳𑀺𑀢𑀸𑀯𑀳𑁄.

𑀳𑀺𑀢𑁆𑀯𑀸 𑀤𑀼𑀩𑁆𑀩𑀺𑀦𑀬𑀁 𑀤𑁂𑀲𑁂, 𑀧𑀼𑀩𑁆𑀩𑀓𑁂𑀳𑀺 𑀧𑀯𑀢𑁆𑀢𑀺𑀢𑀁;

𑀲𑀫𑀸𑀘𑀭𑀦𑁆𑀢𑁄 𑀥𑀫𑁆𑀫𑀜𑁆𑀘, 𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑀬𑀺.

𑀆𑀤𑀺𑀧𑀸𑀤𑀁 𑀕𑀳𑁂𑀢𑁆𑀯𑀸𑀦, 𑀯𑀚𑀺𑀭𑀕𑁆𑀕𑁄 𑀯𑀺𑀦𑀸𑀬𑀓𑁄;

𑀅𑀦𑀼𑀭𑀸𑀥𑀫𑀼𑀧𑀸𑀕𑀫𑁆𑀫, 𑀭𑀸𑀚𑀸𑀦𑀫𑀪𑀺𑀤𑀲𑁆𑀲𑀬𑀺.

𑀭𑀸𑀚𑀸𑀧𑀺 𑀤𑀺𑀲𑁆𑀯𑀸 𑀢𑀁 𑀓𑀼𑀤𑁆𑀥𑁄, 𑀔𑀺𑀧𑁆𑀧𑀁 𑀧𑀓𑁆𑀔𑀺𑀧𑁆𑀧 𑀘𑀸𑀭𑀓𑁂;

𑀭𑀓𑁆𑀔𑀸𑀯𑀭𑀡𑀫𑀲𑁆𑀲𑀸𑀤𑀸, 𑀯𑀺𑀳𑁂𑀞𑁂𑀲𑀺 𑀘 𑀲𑀩𑁆𑀩𑀸𑀲𑁄.

𑀅𑀤𑀸𑀲𑀺 ¶ 𑀘 𑀢𑀼𑀮𑀸𑀪𑀸𑀭𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑁄 𑀫𑀳𑀸𑀬𑀲𑁄;

𑀣𑀽𑀧𑀸𑀭𑀸𑀫𑀫𑁆𑀳𑀺 𑀣𑀽𑀧𑀜𑁆𑀘, 𑀳𑁂𑀫𑀧𑀝𑁆𑀝𑁂𑀦 𑀙𑀸𑀤𑀬𑀺.

𑀓𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀲𑀸𑀤𑀁, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀯𑀸𑀲𑀺𑀬;

𑀯𑀺𑀳𑀸𑀭𑁂 𑀦𑀕𑀭𑁂 𑀘𑁂𑀯, 𑀧𑀝𑀺𑀲𑀗𑁆𑀔𑀸𑀲𑀺 𑀚𑀺𑀡𑁆𑀡𑀓𑀁.

𑀓𑀤𑀫𑁆𑀩𑀦𑀤𑀻𑀬𑀸’𑀓𑀸𑀲𑀺, 𑀦𑀺𑀚𑁆𑀛𑀭𑀁 𑀣𑀺𑀭𑀩𑀦𑁆𑀥𑀦𑀁;

𑀫𑀭𑀺𑀬𑀸𑀤𑀁 𑀧𑀯𑀟𑁆𑀠𑁂𑀲𑀺, 𑀯𑀸𑀧𑀺𑀬𑀁 𑀲𑁄 𑀫𑀬𑁂𑀢𑁆𑀢𑀺𑀬𑀁.

𑀢𑀢𑁆𑀣 𑀦𑀺𑀤𑁆𑀥𑀫𑀦𑀁𑀘𑀸’𑀓𑀸, 𑀅𑀦𑀼𑀯𑀲𑁆𑀲𑀫𑁆𑀧𑀺 𑀪𑀽𑀫𑀺𑀧𑁄;

𑀘𑀻𑀯𑀭𑀢𑁆𑀣𑀁 𑀲𑀼𑀯𑀢𑁆𑀣𑀸𑀦𑀺, 𑀲𑀼𑀲𑀡𑁆𑀳𑀸𑀦𑀺 𑀘 𑀤𑀸𑀧𑀬𑀺.

𑀤𑀼𑀩𑁆𑀪𑀺𑀓𑁆𑀔𑁂 𑀤𑀸𑀦𑀲𑀸𑀮𑀸𑀬𑁄, 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀧𑀸𑀡𑀺𑀦𑀁;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀫𑀳𑀸𑀧𑀸𑀴𑀺𑀜𑁆𑀘 𑀯𑀟𑁆𑀠𑀬𑀺.

𑀤𑀥𑀺𑀪𑀢𑁆𑀢𑀜𑁆𑀘 𑀤𑀸𑀧𑁂𑀲𑀺, 𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀺𑀦𑀁;

𑀦𑀺𑀘𑁆𑀘𑀁 𑀤𑀼𑀕𑁆𑀕𑀢𑀪𑀢𑁆𑀢𑀜𑁆𑀘, 𑀬𑀸𑀕𑀼𑀜𑁆𑀘𑁂𑀯 𑀲𑀔𑀚𑁆𑀚𑀓𑀁.

𑀏𑀯𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺, 𑀓𑀢𑁆𑀯𑀸 𑀲𑁄𑀯𑀕𑁆𑀕𑀺𑀬𑀸𑀦𑀺 𑀲𑁄;

𑀏𑀓𑀸𑀤𑀲𑀳𑀺 𑀯𑀲𑁆𑀲𑁂𑀳𑀺, 𑀕𑀢𑁄 𑀤𑁂𑀯𑀲𑀳𑀩𑁆𑀬𑀢𑀁.

𑀢𑀲𑁆𑀲𑁂𑀓𑀸𑀤𑀲𑀯𑀲𑁆𑀲𑁂𑀲𑀼, 𑀯𑀺𑀲𑁆𑀲𑀝𑁆𑀞𑀁 𑀲𑁄𑀡𑁆𑀡𑀫𑁂𑀯 𑀢𑀼;

𑀅𑀳𑀼 𑀲𑀢𑀲𑀳𑀲𑁆𑀲𑀸𑀦𑀁, 𑀢𑀬𑁄 𑀤𑀲𑀳𑀺 𑀲𑀫𑁆𑀫𑀺𑀢𑀁.

𑀲𑀼𑀤𑀼𑀚𑁆𑀚𑀬𑀁 𑀧𑀡𑁆𑀟𑀼𑀦𑀭𑀸𑀥𑀺𑀭𑀸𑀚,

𑀫𑁂𑀓𑁄𑀧𑀭𑁄 𑀭𑁄𑀳𑀡𑀫𑀼𑀕𑁆𑀕𑀤𑀼𑀕𑁆𑀕𑀁;

𑀓𑀢𑁆𑀯𑀸’𑀧𑀺 𑀏𑀢𑁂 𑀲𑀯𑀲𑁂 𑀦𑀭𑀺𑀦𑁆𑀤𑀸,

𑀲𑀬𑀁 𑀯𑀲𑀁 𑀫𑀘𑁆𑀘𑀼𑀫𑀼𑀧𑀸𑀕𑀫𑀺𑀁𑀲𑀼.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀽𑀦𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀢𑀢𑁄 ¶ 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬, 𑀓𑀲𑁆𑀲𑀧𑁄 𑀤𑀓𑁆𑀔𑀺𑀡𑀁 𑀤𑀺𑀲𑀁;

𑀅𑀤𑀸 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀬𑀼𑀯𑀭𑀸𑀚𑀲𑁆𑀲 𑀥𑀻𑀫𑀢𑁄.

𑀅𑀕𑁆𑀕𑀸𑀪𑀺𑀲𑁂𑀓𑀁 𑀤𑀸𑀧𑁂𑀲𑀺, 𑀬𑀼𑀯𑀭𑀸𑀚𑀲𑁆𑀲 𑀥𑀻𑀢𑀼𑀬𑀸;

𑀭𑀸𑀚𑀓𑀜𑁆𑀜𑀸𑀬 𑀢𑀺𑀲𑁆𑀲𑀸𑀬, 𑀪𑀭𑀺𑀬𑀸𑀬𑁂’𑀯 𑀅𑀢𑁆𑀢𑀦𑁄.

𑀬𑀸𑀘𑀓𑀸𑀦𑀜𑁆𑀘 𑀲𑀺𑀧𑁆𑀧𑀻𑀦𑀁, 𑀆𑀕𑀢𑀸𑀦𑀁 𑀢𑀢𑁄 𑀢𑀢𑁄;

𑀤𑀸𑀦𑀁 𑀤𑀡𑁆𑀟𑀺𑀲𑁆𑀲𑀭𑀁 𑀦𑀸𑀫, 𑀲𑀤𑀸 𑀤𑀸𑀧𑁂𑀲𑀺 𑀪𑀽𑀧𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀧𑀺𑀢𑁄 𑀭𑀸𑀚𑀸, 𑀩𑀮𑀁 𑀧𑁂𑀲𑁂𑀲𑀺 𑀅𑀢𑁆𑀢𑀦𑁄;

𑀬𑀼𑀚𑁆𑀛𑀺𑀢𑁆𑀯𑀸 𑀢𑀁 𑀧𑀭𑀸𑀚𑁂𑀲𑀺, 𑀫𑀳𑀺𑀦𑁆𑀤𑁄 𑀲𑁄 𑀫𑀳𑀸𑀪𑀝𑁄.

𑀢𑀢𑁄 𑀭𑀸𑀚𑀸 𑀦𑀺𑀯𑀢𑁆𑀢𑁂𑀢𑀼𑀁, 𑀧𑀺𑀢𑀭𑀁 𑀢𑀲𑁆𑀲 𑀧𑁂𑀲𑀬𑀺;

𑀓𑀲𑁆𑀲𑀧𑀁 𑀬𑀼𑀯𑀭𑀸𑀚𑀁 𑀢𑀁, 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑀦𑁆𑀢𑀺𑀓𑀁.

𑀦𑀸𑀦𑀸𑀥𑀫𑁆𑀫𑀓𑀣𑁄𑀧𑁂𑀢𑀁, 𑀯𑀢𑁆𑀯𑀸 𑀬𑀼𑀢𑁆𑀢𑀺𑀫𑀦𑁂𑀓𑀥𑀸;

𑀲𑀗𑁆𑀖𑀸𑀫𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀧𑀼𑀢𑁆𑀢𑀁 𑀲𑁄 𑀧𑀼𑀦𑀭𑀸𑀕𑀫𑀺.

𑀆𑀤𑀺𑀧𑀸𑀤𑁄 𑀢𑀼 𑀲𑁄 𑀧𑀘𑁆𑀙𑀸, 𑀖𑀸𑀢𑁂𑀢𑁆𑀯𑀸 𑀫𑀡𑁆𑀟𑀮𑀸𑀥𑀺𑀧𑁂;

𑀓𑀼𑀤𑁆𑀥𑁂𑀚𑀦𑀧𑀤𑁂 𑀤𑀺𑀲𑁆𑀯𑀸, 𑀅𑀕𑀫𑀸𑀲𑀺 𑀧𑀼𑀭𑀦𑁆𑀢𑀺𑀓𑀁.

𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀫𑀸𑀦𑁂𑀢𑁆𑀯𑀸, 𑀤𑀲𑁆𑀲𑁂𑀲𑀺 𑀯𑀲𑀼𑀥𑀸𑀥𑀺𑀧𑀁;

𑀤𑀢𑁆𑀯𑀸 𑀲𑁄 𑀥𑀻𑀢𑀭𑀁 𑀢𑀲𑁆𑀲𑀸, 𑀧𑁂𑀲𑁂𑀲𑀺 𑀧𑀼𑀦 𑀭𑁄𑀳𑀡𑀁.

𑀦𑀻𑀳𑀭𑀺𑀢𑁆𑀯𑀸𑀦 𑀤𑀼𑀲𑁆𑀲𑀻𑀮𑁂, 𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀲𑀼;

𑀕𑀸𑀳𑀸𑀧𑁂𑀲𑀺 𑀦𑀯𑁂 𑀪𑀺𑀓𑁆𑀔𑀽, 𑀆𑀯𑀸𑀲𑁂 𑀢𑀢𑁆𑀣 𑀢𑀢𑁆𑀣 𑀲𑁄.

𑀤𑁆𑀯𑀬𑀸𑀪𑀺𑀲𑁂𑀓𑀚𑀸𑀢𑁂𑀦, 𑀆𑀤𑀺𑀧𑀸𑀤𑁂𑀦 𑀲𑀼𑀦𑀼𑀦𑀸;

𑀫𑀳𑀸𑀯𑀺𑀳𑀸𑀭𑁂 𑀩𑁄𑀥𑀺𑀫𑁆𑀳𑀺, 𑀧𑀁𑀲𑀼𑀁 𑀯𑀟𑁆𑀠𑁂𑀲𑀺 𑀧𑀽𑀚𑀬𑀁.

𑀅𑀓𑀸𑀲𑀺 ¶ 𑀘 𑀦𑀺𑀓𑀸𑀬𑁂𑀲𑀼, 𑀢𑀻𑀲𑀼 𑀩𑀺𑀫𑁆𑀩𑁂 𑀲𑀺𑀮𑀸𑀫𑀬𑁂;

𑀲𑁄𑀯𑀡𑁆𑀡𑀬𑁂 𑀭𑀁𑀲𑀺𑀚𑀸𑀮𑁂, 𑀙𑀢𑁆𑀢𑀁 𑀘𑀽𑀴𑀸𑀫𑀡𑀺𑀁 𑀢𑀣𑀸.

𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀫𑁆𑀳𑀺, 𑀧𑀸𑀲𑀸𑀤𑀁 𑀲𑀓𑀦𑀸𑀫𑀓𑀁;

𑀓𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀲𑁂𑀢𑁆𑀯𑀸, 𑀪𑀺𑀓𑁆𑀔𑀼 𑀕𑀸𑀫𑀫𑀤𑀸𑀧𑀬𑀺.

𑀫𑀳𑀺𑀬𑀗𑁆𑀕𑀡𑀯𑀺𑀳𑀸𑀭𑀲𑁆𑀫𑀺𑀁, 𑀕𑀸𑀫𑀁 𑀲𑁄 𑀘𑁂𑀢𑀺𑀬𑀲𑁆𑀲’𑀤𑀸;

𑀲𑀯𑀢𑁆𑀣𑀁 𑀧𑀝𑀺𑀫𑀸𑀪𑀢𑁆𑀢𑀁, 𑀲𑀩𑁆𑀩𑀪𑀺𑀓𑁆𑀔𑀽𑀦 𑀤𑀸𑀧𑀬𑀺.

𑀣𑀮𑁂 𑀚𑀮𑁂 𑀘 𑀲𑀢𑁆𑀢𑀸𑀦𑀁, 𑀅𑀤𑀸𑀲𑀺 𑀅𑀪𑀬𑀁 𑀢𑀤𑀸;

𑀘𑀸𑀭𑀺𑀢𑁆𑀢𑀧𑀼𑀩𑁆𑀩𑀭𑀸𑀚𑀽𑀦𑀁, 𑀧𑀭𑀺𑀧𑀸𑀮𑁂𑀲𑀺 𑀲𑀩𑁆𑀩𑀤𑀸.

𑀢𑀲𑁆𑀲 𑀲𑁂𑀦𑀸𑀧𑀢𑀺 𑀲𑁂𑀦𑁄, 𑀇𑀮𑀗𑁆𑀕𑁄𑀭𑀸𑀚𑀯𑀁𑀲𑀚𑁄;

𑀣𑁂𑀭𑀺𑀬𑀸𑀦𑀁 𑀅𑀓𑀸’𑀯𑀸𑀲𑀁; 𑀣𑀽𑀧𑀸𑀭𑀸𑀫𑀲𑁆𑀲 𑀧𑀘𑁆𑀙𑀢𑁄.

𑀥𑀫𑁆𑀫𑀸𑀭𑀼𑀘𑀺𑀓𑀪𑀺𑀓𑁆𑀔𑀽𑀦𑀁, 𑀥𑀫𑁆𑀫𑀸𑀭𑀸𑀫𑀫𑀓𑀸𑀭𑀬𑀺;

𑀢𑀣𑀸 𑀲𑀸𑀕𑀮𑀺𑀓𑀸𑀦𑀜𑁆𑀘, 𑀓𑀲𑁆𑀲𑀧𑀲𑁂𑀦𑀦𑀸𑀫𑀓𑀁.

𑀳𑀤𑀬𑀼𑀡𑁆𑀳𑀸𑀪𑀺𑀥𑀸𑀦𑀁 𑀲𑁄, 𑀓𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀧𑀭𑀺𑀯𑁂𑀡𑀁 𑀅𑀤𑀸𑀥𑀫𑁆𑀫-𑀭𑀼𑀘𑀺𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁.

𑀆𑀭𑀸𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀭𑀸𑀫𑁂𑀲𑀼 𑀢𑀳𑀺𑀁 𑀢𑀳𑀺𑀁;

𑀏𑀓𑀫𑁂𑀓𑀁 𑀓𑀼𑀝𑀺𑀁 𑀓𑀢𑁆𑀯𑀸, 𑀤𑀸𑀧𑁂𑀲𑀺 𑀘 𑀘𑀫𑀽𑀧𑀢𑀺.

𑀭𑀢𑁆𑀢𑀫𑀸𑀮𑀕𑀺𑀭𑀺𑀲𑁆𑀫𑀺𑀁 𑀲𑁄, 𑀓𑀢𑁆𑀯𑀸 𑀭𑀫𑁆𑀫𑀁 𑀢𑀭𑀁 𑀲𑀼𑀪𑀁;

𑀓𑀼𑀘𑀺𑀁 𑀅𑀤𑀸 𑀲𑀸𑀲𑀦𑀲𑁆𑀲, 𑀲𑀸𑀫𑀺𑀓𑀸𑀦𑀁 𑀢𑀧𑀲𑁆𑀲𑀺𑀦𑀁.

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸, 𑀧𑀯𑀺𑀯𑁂𑀡𑀁 𑀯𑀭𑀁 𑀅𑀤𑀸;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀲𑀫𑀼𑀤𑁆𑀤𑀕𑀺𑀭𑀺𑀦𑀸𑀫𑀓𑀁.

𑀯𑀸𑀲𑀁 𑀅𑀭𑀜𑁆𑀜𑁂 𑀓𑀸𑀭𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀁𑀲𑀦𑀸𑀫𑀓𑀁;

𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁, 𑀯𑀦𑁂 𑀦𑀺𑀯𑀸𑀲𑀢𑀁 𑀅𑀤𑀸.

𑀯𑀺𑀳𑀸𑀭𑁂𑀲𑀽 𑀘 𑀚𑀺𑀡𑁆𑀡𑁂𑀲𑀼, 𑀦𑀯𑀓𑀫𑁆𑀫𑀫𑀓𑀸𑀭𑀬𑀺;

𑀤𑀸𑀧𑁂𑀲𑀺 𑀅𑀕𑁆𑀕𑀮𑀁 𑀲𑀩𑁆𑀩-𑀪𑀺𑀓𑁆𑀔𑀽𑀦𑀁 𑀚𑀺𑀡𑁆𑀡𑀘𑀻𑀯𑀭𑁂.

𑀢𑀺𑀲𑁆𑀲𑀸𑀭𑀸𑀫𑀁 𑀓𑀭𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽𑀦𑀻𑀦𑀫𑀼𑀧𑀲𑁆𑀲𑀬𑀁;

𑀫𑀭𑀺𑀘𑀯𑀝𑁆𑀝𑀺𑀫𑀳𑀸𑀩𑁄𑀥𑀺, 𑀧𑀭𑀺𑀳𑀸𑀭𑁂 𑀦𑀺𑀯𑁂𑀲𑀬𑀺.

𑀅𑀦𑀼𑀭𑀸𑀥𑀧𑀼𑀭𑁂 𑀘𑁂𑀯, 𑀧𑀼𑀮𑀢𑁆𑀣𑀺𑀦𑀕𑀭𑁂𑀧𑀺 𑀘;

𑀉𑀧𑀲𑀕𑁆𑀕𑀭𑁄𑀕𑀦𑀸𑀲𑀸𑀬, 𑀯𑁂𑀚𑁆𑀚𑀲𑀸𑀮𑀸𑀧𑀺 𑀓𑀸𑀭𑀬𑀺.

𑀅𑀢𑁆𑀢𑀦𑀸 𑀓𑀢𑀯𑀸𑀲𑀦𑀁, 𑀪𑁄𑀕𑀕𑀸𑀫𑁂 𑀘 𑀤𑀸𑀧𑀬𑀺;

𑀢𑀣𑀸𑀭𑀸𑀫𑀺𑀓𑀕𑀸𑀫𑁂 𑀘, 𑀧𑀝𑀺𑀫𑀸𑀪𑀭𑀡𑀜𑁆𑀘 𑀲𑁄.

𑀪𑁂𑀲𑀚𑁆𑀚𑀕𑁂𑀳𑀁 ¶ 𑀓𑀸𑀭𑁂𑀲𑀺, 𑀦𑀕𑀭𑁂 𑀢𑀢𑁆𑀣 𑀢𑀢𑁆𑀣 𑀲𑁄;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀪𑀢𑁆𑀢𑀁 𑀯𑀢𑁆𑀣𑀜𑁆𑀘 𑀤𑀸𑀧𑀬𑀺.

𑀔𑀦𑁆𑀥𑀻𑀓𑀢𑁂 𑀅𑀫𑁄𑀘𑁂𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀩𑀳𑀽;

𑀓𑀧𑀡𑀸𑀦𑀜𑁆𑀘 𑀤𑀸𑀧𑁂𑀲𑀺, 𑀫𑀳𑀸𑀤𑀸𑀦𑀁 𑀘𑀫𑀽𑀧𑀢𑀺.

𑀯𑀺𑀘𑀺𑀢𑁆𑀢𑀁 𑀩𑁆𑀬𑀜𑁆𑀚𑀦𑀁 𑀪𑀢𑁆𑀢𑀁, 𑀬𑀸𑀕𑀼𑀁 𑀯𑀺𑀯𑀺𑀥𑀔𑀚𑁆𑀚𑀓𑀁;

𑀓𑀢𑁆𑀯𑀸 𑀲𑀽𑀓𑀭𑀭𑀽𑀧𑀜𑁆𑀘, 𑀕𑀼𑀴𑀁 𑀪𑀺𑀓𑁆𑀔𑀽𑀦𑀁 𑀤𑀸𑀧𑀬𑀺.

𑀏𑀯𑀸𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺, 𑀓𑀢𑁆𑀯𑀸 𑀲𑁂𑀦𑀸𑀬 𑀦𑀸𑀬𑀓𑁄;

𑀲𑁂𑀦𑁄 𑀓𑀺𑀢𑁆𑀢𑀺𑀦𑁆𑀤𑀼𑀧𑀸𑀤𑁂𑀳𑀺, 𑀲𑀩𑁆𑀩𑀸 𑀑𑀪𑀸𑀲𑀬𑀻 𑀤𑀺𑀲𑀸.

𑀢𑀲𑁆𑀲𑁂𑀯 𑀜𑀸𑀢𑀓𑁄 𑀓𑀢𑁆𑀯𑀸, 𑀦𑀸𑀬𑀓𑁄 𑀭𑀓𑁆𑀔𑀲𑀯𑁆𑀳𑀬𑁄;

𑀲𑀯𑀸𑀭𑀓𑀫𑁆𑀳𑀺 𑀕𑀸𑀫𑀫𑁆𑀳𑀺, 𑀯𑀺𑀳𑀸𑀭𑀁 𑀲𑀼𑀫𑀦𑁄𑀳𑀭𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀲𑀸𑀭𑀸𑀦𑀁 𑀧𑀝𑀺𑀧𑀢𑁆𑀢𑀺𑀬𑀸;

𑀪𑀺𑀓𑁆𑀔𑀽𑀦𑀁 𑀲𑁄 𑀅𑀤𑀸 𑀲𑀸𑀥𑀼, 𑀞𑀧𑁂𑀢𑁆𑀯𑀸 𑀯𑀢𑁆𑀢𑀫𑀼𑀢𑁆𑀢𑀫𑀁.

𑀲𑁂𑀦𑁄 𑀦𑀸𑀫 𑀫𑀳𑀸𑀮𑁂𑀔𑁄, 𑀫𑀳𑀸𑀮𑁂𑀔𑀓𑀧𑀩𑁆𑀩𑀢𑀁;

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀯𑀸𑀲𑀫𑀼𑀢𑁆𑀢𑀫𑀁.

𑀘𑁄𑀴𑀭𑀸𑀚𑀸𑀪𑀺𑀥𑀸𑀦𑁄, 𑀘, 𑀅𑀫𑀘𑁆𑀘𑁄 𑀢𑀲𑁆𑀲 𑀭𑀸𑀚𑀺𑀦𑁄;

𑀧𑀭𑀺𑀯𑁂𑀡𑀁 𑀅𑀓𑀸𑀭𑀫𑁆𑀫𑀁, 𑀦𑀝𑁆𑀞𑀁 𑀢𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑀭𑀸𑀚𑀸 𑀢𑀻𑀲𑀼 𑀦𑀺𑀓𑀸𑀬𑁂𑀲𑀼, 𑀭𑀽𑀧𑀓𑀫𑁆𑀫𑀫𑀦𑁄𑀭𑀫𑀁;

𑀫𑀡𑁆𑀟𑀧𑀸𑀦𑀺 𑀯𑀺𑀘𑀺𑀢𑁆𑀢𑀸𑀦𑀺, 𑀯𑁂𑀚𑀬𑀦𑁆𑀢𑁄 𑀧𑀫𑀸𑀦𑀺 𑀘.

𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀧𑀽𑀚𑀸𑀬𑁄, 𑀓𑀢𑁆𑀯𑀸 𑀚𑀦𑀫𑀦𑁄𑀳𑀭𑀸;

𑀬𑀣𑀸 𑀓𑀫𑁆𑀫𑀁 𑀕𑀢𑁄 𑀞𑀢𑁆𑀯𑀸, 𑀯𑀲𑁆𑀲𑀸𑀦𑀺 𑀤𑀲𑀲𑀢𑁆𑀢 𑀘.

𑀤𑁆𑀯𑀬𑀸𑀪𑀺𑀲𑁂𑀓𑀲𑀜𑁆𑀚𑀸𑀢𑁄, 𑀬𑀼𑀯𑀭𑀸𑀚𑀸𑀣 𑀓𑀲𑁆𑀲𑀧𑁄;

𑀆𑀲𑀺 𑀮𑀤𑁆𑀥𑀸𑀪𑀺𑀲𑁂𑀓𑁄 𑀲𑁄, 𑀮𑀁𑀓𑀸𑀭𑀚𑁆𑀚𑁂𑀓𑀫𑀸𑀕𑀢𑁂.

𑀲𑀤𑁆𑀥𑁄 𑀆𑀕𑀢𑀫𑀕𑁆𑀕𑁄𑀯, 𑀲𑀸𑀪𑀺𑀜𑁆𑀜𑁄 𑀯𑀺𑀬 𑀧𑀜𑁆𑀜𑀯𑀸;

𑀯𑀢𑁆𑀢𑀸 𑀲𑁄 𑀫𑀭𑀫𑀦𑁆𑀢𑀺𑀯, 𑀘𑀸𑀕𑀯𑀸 𑀥𑀦𑀤𑁄 𑀯𑀺𑀬.

𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀻, 𑀲𑀩𑁆𑀩𑀲𑀺𑀧𑁆𑀧𑀯𑀺𑀲𑀸𑀭𑀤𑁄;

𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀘𑀸𑀭𑀸𑀬, 𑀦𑀺𑀧𑀼𑀡𑁄 𑀦𑀬𑀓𑁄𑀯𑀺𑀤𑁄.

𑀅𑀘𑀮𑁄 𑀇𑀦𑁆𑀤𑀮𑀻𑀮𑁄’𑀯, 𑀞𑀺𑀢𑁄 𑀲𑀼𑀕𑀢𑀲𑀸𑀲𑀦𑁂;

𑀧𑀭𑀧𑁆𑀧𑀯𑀸𑀤𑀺𑀯𑀸𑀢𑁂𑀳𑀺, 𑀲𑀩𑁆𑀩𑁂𑀳𑀺’𑀧𑀺 𑀅𑀓𑀫𑁆𑀧𑀺𑀬𑁄.

𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀤𑀺, 𑀧𑀸𑀧𑀸𑀦𑀜𑁆𑀘 𑀅𑀕𑁄𑀘𑀭𑁄;

𑀕𑀼𑀡𑀸𑀦𑀁 𑀆𑀓𑀭𑁄 𑀲𑀩𑁆𑀩-𑀭𑀢𑀦𑀸𑀦𑀁 𑀯𑀲𑀸𑀕𑀭𑁄.

𑀪𑀽𑀫𑀺𑀘𑀦𑁆𑀤𑁄 ¶ 𑀦𑀭𑀺𑀦𑁆𑀤𑁄 𑀲𑁄, 𑀯𑀁𑀲𑁂 𑀚𑀸𑀢𑀲𑁆𑀲 𑀅𑀢𑁆𑀢𑀦𑁄;

𑀤𑀧𑁆𑀧𑀼𑀴𑀲𑁆𑀲𑀸𑀤𑀻𑀧𑀸𑀤𑀲𑁆𑀲, 𑀬𑀼𑀯𑀭𑀸𑀚𑀧𑀤𑀁 𑀅𑀤𑀸.

𑀭𑀚𑁆𑀚𑀁 𑀤𑀲𑀳𑀺 𑀥𑀫𑁆𑀫𑁂𑀳𑀺, 𑀘𑀢𑀼𑀲𑀗𑁆𑀕𑀳𑀯𑀢𑁆𑀣𑀽𑀳𑀺;

𑀓𑀭𑁄𑀦𑁆𑀢𑁄 𑀧𑀭𑀺𑀧𑀸𑀮𑁂𑀲𑀺, 𑀮𑁄𑀓𑀁 𑀦𑁂𑀢𑁆𑀢𑀁𑀯 𑀅𑀢𑁆𑀢𑀦𑁄.

𑀲𑁄 𑀥𑁂𑀢𑁆𑀯𑀸 𑀲𑀸𑀲𑀦𑀁 𑀲𑀩𑁆𑀩𑀁, 𑀥𑀫𑁆𑀫𑀓𑀫𑁆𑀫𑁂𑀦 𑀲𑀢𑁆𑀣𑀼𑀦𑁄;

𑀕𑀳𑁂𑀢𑁆𑀯𑀸 𑀦𑀯𑀓𑁂 𑀪𑀺𑀓𑁆𑀔𑀽, 𑀅𑀓𑀸𑀲𑀸’𑀯𑀸𑀲𑀧𑀽𑀭𑀡𑀁.

𑀤𑀼𑀝𑁆𑀞𑀕𑀸𑀫𑀡𑀺𑀭𑀸𑀚𑁂𑀦, 𑀓𑀢𑀁 𑀫𑀭𑀺𑀘𑀯𑀝𑁆𑀝𑀺𑀓𑀁;

𑀦𑀝𑁆𑀞𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸, 𑀦𑀸𑀦𑀸𑀆𑀯𑀸𑀲 𑀪𑀽𑀲𑀺𑀢𑀁.

𑀣𑁂𑀭𑀯𑀁𑀲𑀚𑀪𑀺𑀓𑁆𑀔𑀽𑀦𑀁, 𑀅𑀤𑀸 𑀓𑀢𑁆𑀯𑀸 𑀫𑀳𑀸𑀫𑀳𑀁;

𑀢𑁂𑀲𑀁 𑀧𑀜𑁆𑀘𑀲𑀢𑀸𑀦𑀜𑁆𑀘, 𑀪𑁄𑀕𑀕𑀸𑀫𑁂 𑀘 𑀤𑀸𑀧𑀬𑀺.

𑀢𑀢𑁆𑀣 𑀲𑁄 𑀢𑀼𑀲𑀺𑀢𑁂 𑀭𑀫𑁆𑀫𑁂, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀫𑁂𑀢𑁆𑀢𑁂𑀬𑁆𑀬𑀁 𑀮𑁄𑀓𑀦𑀸𑀣𑀁 𑀢𑀁, 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁.

𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀮𑁄𑀓𑀲𑁆𑀲, 𑀯𑀺𑀳𑀸𑀭𑁂 𑀲𑀩𑁆𑀩𑀲𑀚𑁆𑀚𑀺𑀢𑁂;

𑀦𑀺𑀲𑀺𑀦𑁆𑀦𑁄 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑁂.

𑀦𑀕𑀭𑁂𑀳𑀺 𑀘 𑀲𑀩𑁆𑀩𑁂𑀳𑀺, 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀩𑀼𑀤𑁆𑀥𑀮𑀺𑀮𑀸𑀬 𑀮𑀁𑀓𑀺𑀦𑁆𑀤𑁄, 𑀅𑀪𑀺𑀥𑀫𑁆𑀫 𑀫𑀪𑀸𑀲𑀬𑀺.

𑀲𑁄𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸-𑀪𑀺𑀥𑀫𑁆𑀫𑀧𑀺𑀝𑀓𑀁 𑀢𑀤𑀸;

𑀥𑀫𑁆𑀫𑀲𑀗𑁆𑀕𑀡𑀺𑀓𑀁 𑀧𑁄𑀢𑁆𑀣𑀁, 𑀦𑀸𑀦𑀸𑀭𑀢𑀦 𑀪𑀽𑀲𑀺𑀢𑀁.

𑀓𑀢𑁆𑀯𑀸 𑀦𑀕𑀭𑀫𑀚𑁆𑀛𑀫𑁆𑀳𑀺, 𑀓𑀸𑀭𑁂𑀢𑁆𑀯𑀸 𑀳𑁂𑀫𑀫𑀼𑀢𑁆𑀢𑀫𑀁;

𑀢𑀁 𑀢𑀢𑁆𑀣 𑀞𑀧𑀬𑀺𑀢𑁆𑀯𑀸𑀦, 𑀧𑀭𑀺𑀳𑀸𑀭𑀫𑀤𑀸𑀧𑀬𑀺.

𑀲𑀓𑁆𑀓𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀤𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀧𑀭𑀺𑀳𑀸𑀭𑁂 𑀦𑀺𑀬𑁄𑀚𑁂𑀲𑀺, 𑀢𑀢𑁆𑀣 𑀢𑀁 𑀥𑀫𑁆𑀫𑀧𑁄𑀢𑁆𑀣𑀓𑁂.

𑀅𑀦𑀼𑀲𑀁𑀯𑀘𑁆𑀙𑀭𑀁 𑀭𑀸𑀚𑀸, 𑀧𑀼𑀭𑀁 𑀤𑁂𑀯𑀧𑀼𑀭𑀻 𑀯𑀺𑀬;

𑀯𑀺𑀪𑀽𑀲𑀺𑀢𑀸𑀬 𑀲𑁂𑀦𑀸𑀬, 𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀸𑀭𑀺𑀢𑁄.

𑀤𑁂𑀯𑀭𑀸𑀚𑀸𑀯 𑀲𑁄𑀪𑀦𑁆𑀢𑁄, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑁄;

𑀳𑀢𑁆𑀣𑀺𑀔𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀘𑀭𑀦𑁆𑀢𑁄 𑀧𑀼𑀭𑀯𑀻𑀣𑀺𑀬𑀁.

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀦𑁂𑀢𑁆𑀯𑀸 𑀢𑀁 𑀥𑀫𑁆𑀫𑀲𑀗𑁆𑀕𑀳𑀁;

𑀅𑀢𑁆𑀢𑀦𑀸 𑀓𑀸𑀭𑀺𑀢𑀁 𑀭𑀫𑁆𑀫𑀁, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀚𑁆𑀚𑀺𑀢𑀁.

𑀢𑀢𑁆𑀣 𑀥𑀸𑀢𑀼𑀕𑀢𑁂 𑀭𑀫𑁆𑀫𑁂, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑁂;

𑀫𑀡𑁆𑀟𑀧𑁂 𑀥𑀸𑀢𑀼𑀧𑀺𑀞𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸𑀧𑀺𑀬 𑀧𑀽𑀚𑀬𑀺.

𑀕𑀦𑁆𑀣𑀸𑀓𑀭𑀧𑀭𑀺𑀯𑁂𑀡𑀁 ¶ , 𑀫𑀳𑀸𑀫𑁂𑀖𑀯𑀦𑁂 𑀅𑀓𑀸;

𑀦𑀕𑀭𑁂 𑀯𑀚𑁆𑀚𑀲𑀸𑀮𑀸 𑀘, 𑀢𑁂𑀲𑀁 𑀕𑀸𑀫𑁂 𑀘 𑀤𑀸𑀧𑀬𑀺.

𑀪𑀡𑁆𑀟𑀺𑀓𑀧𑀭𑀺𑀯𑁂𑀡𑀜𑁆𑀘, 𑀲𑀺𑀮𑀸𑀫𑁂𑀖𑀜𑁆𑀘 𑀧𑀩𑁆𑀩𑀢𑀁;

𑀓𑀢𑁆𑀯𑀸’𑀪𑀬𑀕𑀺𑀭𑀺𑀲𑁆𑀫𑀺𑀁 𑀲𑁄, 𑀢𑁂𑀲𑀁 𑀕𑀸𑀫𑀫𑀤𑀸𑀧𑀬𑀺.

𑀚𑁄𑀢𑀺𑀯𑀦𑀯𑀺𑀳𑀸𑀭𑀲𑁆𑀫𑀺𑀁, 𑀭𑀸𑀚𑀸 𑀮𑀗𑁆𑀓𑀸𑀬 𑀦𑀸𑀬𑀓𑁄;

𑀪𑀢𑁆𑀢𑀕𑁆𑀕𑀲𑁆𑀲 𑀅𑀤𑀸 𑀕𑀸𑀫𑀁, 𑀢𑀣𑀸’𑀪𑀬𑀕𑀺𑀭𑀺𑀫𑁆𑀳𑀺 𑀘.

𑀤𑀓𑁆𑀔𑀺𑀡𑀕𑀺𑀭𑀺𑀦𑀸𑀫𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀘 𑀤𑀸𑀧𑀬𑀺;

𑀕𑀸𑀫𑀁 𑀓𑀢𑀜𑁆𑀜𑀼𑀪𑀸𑀯𑁂𑀦, 𑀭𑀸𑀚𑀸 𑀧𑀭𑀫𑀥𑀫𑁆𑀫𑀺𑀓𑁄.

𑀲𑀓𑁆𑀓𑀲𑁂𑀦𑀸𑀧𑀢𑀺 𑀭𑀫𑁆𑀫𑀁, 𑀧𑀭𑀺𑀯𑁂𑀡𑀁 𑀲𑀼𑀫𑀸𑀧𑀺𑀬;

𑀅𑀤𑀸𑀲𑀺 𑀲𑀳𑀕𑀸𑀫𑁂𑀳𑀺, 𑀣𑁂𑀭𑀺𑀬𑀸𑀦𑀁 𑀲𑀦𑀸𑀫𑀺𑀓𑀁.

𑀪𑀭𑀺𑀬𑀸 𑀯𑀚𑀺𑀭𑀸 𑀢𑀲𑁆𑀲, 𑀢𑁂𑀲𑀁𑀬𑁂𑀯 𑀅𑀤𑀸𑀧𑀬𑀺;

𑀧𑀭𑀺𑀯𑁂𑀡𑀁 𑀓𑀭𑀺𑀢𑁆𑀯𑀸𑀦, 𑀲𑀕𑀸𑀫𑀁 𑀲𑀓𑀦𑀸𑀫𑀓𑀁.

𑀉𑀧𑀲𑁆𑀲𑀬𑀁 𑀓𑀭𑀺𑀢𑁆𑀯𑀸𑀦, 𑀲𑀸 𑀏𑀯 𑀧𑀤𑀮𑀜𑁆𑀙𑀦𑁂;

𑀪𑀺𑀓𑁆𑀔𑀽𑀦𑀻𑀦𑀁 𑀅𑀤𑀸 𑀣𑁂𑀭-𑀯𑀁𑀲𑁂 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁂.

𑀲𑀓𑁆𑀓𑀲𑁂𑀦𑀸𑀧𑀢𑀺 𑀫𑀸𑀢𑀸, 𑀤𑁂𑀯𑀸’𑀭𑀜𑁆𑀜𑀓 𑀪𑀺𑀓𑁆𑀔𑀽𑀦𑀁;

𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁, 𑀅𑀓𑀸’𑀯𑀸𑀲𑀁 𑀲𑀦𑀸𑀫𑀓𑀁.

𑀲𑀸 𑀏𑀯 𑀧𑀝𑀺𑀩𑀺𑀫𑁆𑀩𑀲𑁆𑀲, 𑀲𑀢𑁆𑀣𑀼 𑀫𑀭𑀺𑀘𑀯𑀝𑁆𑀝𑀺𑀬𑀁;

𑀘𑀽𑀴𑀸𑀫𑀡𑀺𑀁 𑀧𑀸𑀤𑀚𑀮𑀁, 𑀅𑀓𑀸 𑀙𑀢𑁆𑀢𑀜𑁆𑀘 𑀘𑀻𑀯𑀭𑀁.

𑀭𑀸𑀚𑀸 𑀭𑀸𑀚𑀸𑀮𑀬𑁂𑀬𑁂𑀯, 𑀭𑀸𑀚𑀯𑀁𑀲𑀁 𑀲𑀦𑀸𑀫𑀓𑀁;

𑀅𑀓𑀸𑀲𑀺 𑀧𑀸𑀴𑀺𑀓𑀁 𑀦𑀸𑀫, 𑀧𑀸𑀲𑀸𑀤𑀁 𑀲𑀼𑀫𑀦𑁄 𑀳𑀭𑀁.

𑀧𑀽𑀚𑁂𑀲𑀺 𑀭𑀸𑀚𑀺𑀦𑀻 𑀦𑀸𑀫, 𑀭𑀸𑀚𑀺𑀦𑁄 𑀪𑀭𑀺𑀬𑀸’𑀧𑀭𑀸;

𑀧𑀝𑁆𑀝𑀓𑀜𑁆𑀘𑀼𑀓𑀧𑀽𑀚𑀸𑀬, 𑀳𑁂𑀫𑀫𑀸𑀮𑀺𑀓 𑀘𑁂𑀢𑀺𑀬𑀁.

𑀢𑀲𑁆𑀲𑀸 𑀧𑀼𑀢𑁆𑀢𑁄𑀲𑀺 𑀲𑀺𑀤𑁆𑀥𑀢𑁆𑀣𑁄, 𑀦𑀸𑀫 𑀇𑀲𑁆𑀲𑀭𑀺𑀬𑁂 𑀞𑀺𑀢𑁄;

𑀲𑀼𑀢𑁄 𑀫𑀮𑀬𑀭𑀸𑀚𑀸𑀢𑀺, 𑀭𑀽𑀧𑁂𑀦 𑀫𑀓𑀭𑀤𑁆𑀥𑀚𑁄.

𑀭𑀸𑀚𑀸 𑀢𑀲𑁆𑀫𑀺𑀁 𑀫𑀢𑁂 𑀓𑀢𑁆𑀯𑀸, 𑀲𑀸𑀮𑀁 𑀪𑀺𑀓𑁆𑀔𑀼𑀦𑀫𑀼𑀢𑁆𑀢𑀫𑀁;

𑀤𑀸𑀦𑀯𑀝𑁆𑀝𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀢𑀲𑁆𑀲 𑀧𑀢𑁆𑀢𑀺𑀫𑀤𑀸 𑀢𑀤𑀸.

𑀏𑀯𑀁 𑀥𑀫𑁆𑀫𑁂𑀦 𑀓𑀸𑀭𑁂𑀦𑁆𑀢𑁂, 𑀭𑀚𑁆𑀚𑀁 𑀮𑀗𑁆𑀓𑀸𑀤𑀻𑀧𑁂 𑀢𑀤𑀸;

𑀘𑁄𑀴𑀭𑀸𑀚𑁂𑀦 𑀬𑀼𑀚𑁆𑀛𑀺𑀢𑁆𑀯𑀸, 𑀧𑀡𑁆𑀟𑀼𑀭𑀸𑀚𑀸 𑀧𑀭𑀸𑀚𑀺𑀢𑁄.

𑀧𑀡𑁆𑀡𑀸𑀓𑀸𑀭𑀸𑀦𑀺 𑀦𑁂𑀓𑀸𑀦𑀺, 𑀩𑀮𑀁 𑀲𑀦𑁆𑀥𑀸𑀬 𑀧𑁂𑀲𑀬𑀺;

𑀭𑀸𑀚𑀸𑀮𑀁𑀓𑀺𑀲𑁆𑀲𑀭𑁄 𑀲𑀤𑁆𑀥𑀺𑀁, 𑀫𑀦𑁆𑀢𑁂𑀢𑁆𑀯𑀸 𑀲𑀘𑀺𑀯𑁂𑀳𑀺 𑀲𑁄.

𑀲𑀦𑁆𑀦𑀬𑁆𑀳 ¶ 𑀩𑀮𑀓𑀸𑀬𑀁 𑀲𑁄, 𑀲𑀓𑁆𑀓𑀲𑁂𑀦𑀸𑀧𑀢𑀺𑀁 𑀲𑀓𑀁;

𑀩𑀮𑀲𑁆𑀲 𑀦𑀸𑀬𑀓𑀁 𑀓𑀢𑁆𑀯𑀸, 𑀫𑀳𑀸𑀬𑀺𑀢𑁆𑀣𑀫𑀼𑀧𑀸𑀕𑀫𑀺.

𑀯𑀺𑀚𑀬𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀯𑀢𑁆𑀯𑀸 𑀯𑁂𑀮𑀸𑀢𑀝𑁂 𑀞𑀺𑀢𑁄;

𑀉𑀲𑁆𑀲𑀸𑀳𑀁 𑀚𑀦𑀬𑀺𑀢𑁆𑀯𑀸𑀦, 𑀦𑀸𑀯𑀁 𑀆𑀭𑁄𑀧𑀬𑀻 𑀩𑀮𑀁.

𑀩𑀮𑀓𑀸𑀬𑀁 𑀲𑀫𑀸𑀤𑀸𑀬, 𑀲𑀓𑁆𑀓𑀲𑁂𑀦𑀸𑀧𑀢𑀺𑀁 𑀢𑀤𑀸;

𑀲𑀼𑀔𑁂𑀦 𑀲𑀸𑀕𑀭𑀁 𑀢𑀺𑀡𑁆𑀡𑁄, 𑀧𑀡𑁆𑀟𑀼𑀤𑁂𑀲𑀫𑀼𑀧𑀸𑀕𑀫𑀺.

𑀤𑀺𑀲𑁆𑀯𑀸 𑀩𑀮𑀜𑁆𑀘 𑀢𑀜𑁆𑀘𑁂𑀯, 𑀧𑀡𑁆𑀟𑀼𑀭𑀸𑀚𑀸 𑀲𑀼𑀫𑀸𑀦𑀲𑁄;

𑀏𑀓𑀘𑁆𑀙𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀚𑀫𑁆𑀩𑀼𑀤𑀻𑀧𑀦𑁆𑀢𑀺 𑀅𑀩𑁆𑀭𑀯𑀺.

𑀩𑀮𑀤𑁆𑀯𑀬𑀁 𑀕𑀳𑁂𑀢𑁆𑀯𑀸𑀦, 𑀭𑀸𑀚𑀸 𑀲𑁄 𑀘𑁄𑀴𑀯𑀁𑀲𑀚𑀁;

𑀚𑁂𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸𑀦 𑀬𑀼𑀤𑁆𑀥𑀫𑀼𑀚𑁆𑀛𑀺𑀬 𑀦𑀺𑀓𑁆𑀔𑀫𑀺.

𑀬𑀼𑀚𑁆𑀛𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑀸𑀦, 𑀲𑀓𑁆𑀓𑀲𑁂𑀦𑀸𑀧𑀢𑀻 𑀧𑀼𑀦;

𑀦𑀺𑀲𑀺𑀦𑁆𑀦𑁄 𑀉𑀧𑀲𑀕𑁆𑀕𑁂𑀦, 𑀫𑀢𑁄 𑀧𑀸𑀧𑁂𑀦 𑀧𑀡𑁆𑀟𑀼𑀢𑁄.

𑀮𑀁𑀓𑀺𑀲𑁆𑀲𑀭𑁄 𑀩𑀮𑀲𑁆𑀲𑀸𑀧𑀺, 𑀢𑁂𑀦 𑀭𑁄𑀕𑁂𑀦 𑀦𑀸𑀦𑀲𑀁;

𑀲𑀼𑀢𑁆𑀯𑀸 𑀤𑀬𑀸𑀮𑀼𑀪𑀸𑀯𑁂𑀦, 𑀲𑁂𑀦𑀁 𑀆𑀡𑀸𑀧𑀬𑀻 𑀢𑀢𑁄.

𑀲𑀓𑁆𑀓 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲’𑀤𑀸 𑀢𑀤𑀸;

𑀯𑀟𑁆𑀠𑁂𑀲𑀺 𑀢𑁂𑀦 𑀢𑀁 𑀧𑀼𑀢𑁆𑀢𑀁, 𑀓𑀢𑁆𑀯𑀸 𑀲𑁂𑀦𑀸𑀬 𑀦𑀸𑀬𑀓𑀁.

𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀳𑀺, 𑀧𑀭𑀺𑀢𑁆𑀢𑀁 𑀦𑀕𑀭𑁂 𑀢𑀤𑀸;

𑀓𑀸𑀭𑁂𑀢𑁆𑀯𑀸 𑀭𑁄𑀕𑀤𑀼𑀩𑁆𑀩𑀼𑀝𑁆𑀞𑀺-𑀪𑀬𑀁 𑀦𑀸𑀲𑁂𑀲𑀺 𑀚𑀦𑁆𑀢𑀼𑀦𑀁.

𑀲𑀸𑀲𑀦𑀲𑁆𑀲 𑀘 𑀮𑁄𑀓𑀲𑁆𑀲, 𑀲𑀦𑁆𑀢𑀺𑀁 𑀓𑀢𑁆𑀯𑀸 𑀅𑀦𑁂𑀓𑀥𑀸;

𑀭𑀸𑀚𑀸 𑀲𑁄 𑀤𑀲𑀫𑁂 𑀯𑀲𑁆𑀲𑁂, 𑀲𑀼𑀔𑁂𑀦 𑀢𑀺𑀤𑀺𑀯𑀁 𑀕𑀢𑁄.

𑀮𑀁𑀓𑀸𑀭𑀚𑁆𑀚𑁂𑀧𑀺 𑀞𑀢𑁆𑀯𑀸 𑀓𑀣𑀺𑀢𑀢𑀺𑀧𑀺𑀝𑀓𑁄 𑀲𑀩𑁆𑀩𑀯𑀺𑀚𑁆𑀚𑀸𑀧𑀤𑀻𑀧𑁄,

𑀯𑀢𑁆𑀢𑀸𑀯𑀸𑀤𑀻 𑀓𑀯𑀻 𑀲𑁄 𑀲𑀢𑀺𑀥𑀻𑀢𑀺𑀯𑀺𑀲𑀤𑁄 𑀤𑁂𑀲𑀓𑁄 𑀪𑀸𑀯𑀓𑁄 𑀘;

𑀧𑀜𑁆𑀜𑀸𑀲𑀤𑁆𑀥𑀸𑀤𑀬𑀸 𑀯𑀸 𑀧𑀭𑀳𑀺𑀢𑀦𑀺𑀭𑀢𑁄 𑀮𑁄𑀓𑀯𑁂𑀤𑀻𑀯𑀤𑀜𑁆𑀜𑀽;

𑀭𑀸𑀚𑀺𑀦𑁆𑀤𑁄 𑀓𑀲𑁆𑀲𑀧𑁄’𑀬𑀁 𑀯𑀺𑀬 𑀯𑀺𑀫𑀮𑀕𑀼𑀡𑁄 𑀳𑁄𑀢𑀼𑀮𑁄𑀓𑁄𑀧𑀺 𑀲𑀩𑁆𑀩𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀬𑀼𑀯𑀭𑀸𑀚𑀸 ¶ 𑀢𑀤𑀸 𑀳𑀼𑀢𑁆𑀯𑀸, 𑀭𑀸𑀚𑀸 𑀤𑀧𑁆𑀧𑀼𑀴𑀦𑀸𑀫𑀓𑁄;

𑀞𑀧𑁂𑀲𑀺 𑀑𑀧𑀭𑀚𑁆𑀚𑀫𑁆𑀳𑀺, 𑀆𑀤𑀺𑀧𑀤𑀁 𑀲𑀦𑀸𑀫𑀓𑀁.

𑀫𑀭𑀺𑀘𑀯𑀝𑁆𑀝𑀺𑀯𑀺𑀳𑀸𑀭𑀲𑁆𑀲, 𑀕𑀸𑀫𑀁 𑀤𑀢𑁆𑀯𑀸 𑀢𑀢𑁄 𑀧𑀼𑀭𑁂;

𑀘𑀸𑀭𑀺𑀢𑁆𑀢𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀭𑀓𑁆𑀔𑀺𑀢𑁆𑀯𑀸𑀦 𑀫𑀳𑀺𑀁 𑀇𑀫𑀁.

𑀅𑀪𑀼𑀢𑁆𑀯𑀸 𑀤𑀻𑀖𑀓𑀸𑀮𑀜𑁆𑀳𑀺, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀅𑀢𑁆𑀢𑀦𑁄;

𑀭𑀸𑀚𑀸 𑀲𑁄 𑀲𑀢𑁆𑀢𑀫𑁂 𑀫𑀸𑀲𑁂, 𑀧𑀯𑀺𑀝𑁆𑀞𑁄 𑀧𑀘𑁆𑀘𑀼𑀦𑁄 𑀫𑀼𑀔𑀁.

𑀉𑀧𑀭𑀸𑀚𑀸 𑀅𑀳𑀼𑀭𑀸𑀚𑀸, 𑀤𑀧𑁆𑀧𑀼𑀴𑁄 𑀢𑀤𑀦𑀦𑁆𑀢𑀭𑀁;

𑀉𑀤𑀬𑀲𑁆𑀲𑀸𑀤𑀺𑀧𑀸𑀤𑀲𑁆𑀲, 𑀬𑀼𑀯𑀭𑀸𑀚𑀧𑀤𑀁 𑀅𑀤𑀸.

𑀢𑀤𑀸 𑀘𑁄𑀴𑀪𑀬𑀸 𑀧𑀡𑁆𑀟𑀼-𑀭𑀸𑀚𑀁 𑀚𑀦𑀧𑀤𑀁 𑀲𑀓𑀁;

𑀘𑀚𑀺𑀢𑁆𑀯𑀸 𑀦𑀸𑀯𑀫𑀸𑀭𑀼𑀬𑁆𑀳, 𑀫𑀳𑀸𑀢𑀺𑀢𑁆𑀣𑀫𑀼𑀧𑀸𑀕𑀫𑀺.

𑀆𑀡𑀸𑀧𑁂𑀢𑁆𑀯𑀸𑀦 𑀢𑀁 𑀭𑀸𑀚𑀸, 𑀤𑀺𑀲𑁆𑀯𑀸 𑀲𑀦𑁆𑀢𑀼𑀝𑁆𑀞𑀫𑀸𑀦𑀲𑁄;

𑀫𑀳𑀸𑀪𑁄𑀕𑀁 𑀅𑀤𑀸 𑀢𑀲𑁆𑀲, 𑀦𑀺𑀯𑀸𑀲𑁂𑀲𑀺 𑀧𑀼𑀭𑀸 𑀩𑀳𑀺.

𑀘𑁄𑀴𑀭𑀸𑀚𑁂𑀦 𑀬𑀼𑀚𑁆𑀛𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸 𑀧𑀝𑁆𑀝𑀦𑀤𑁆𑀯𑀬𑀁;

𑀧𑀡𑁆𑀟𑀼𑀭𑀸𑀚𑀲𑁆𑀲 𑀤𑀫𑁆𑀫𑀻𑀢𑀺, 𑀲𑀦𑁆𑀦𑀤𑁆𑀥𑁂 𑀮𑀗𑁆𑀓𑀭𑀸𑀚𑀺𑀦𑀺.

𑀓𑁂𑀦𑀸’𑀧𑀺 𑀓𑀭𑀡𑀻𑀬𑁂𑀦, 𑀔𑀢𑁆𑀢𑀺𑀬𑀸 𑀤𑀻𑀧𑀯𑀸𑀲𑀺𑀦𑁄;

𑀅𑀓𑀁𑀲𑀼 𑀯𑀺𑀕𑁆𑀕𑀳𑀁 𑀖𑁄𑀭𑀁, 𑀧𑀸𑀧𑀓𑀫𑁆𑀫𑁂𑀦 𑀧𑀡𑁆𑀟𑀼𑀦𑁄.

𑀧𑀡𑁆𑀟𑀼𑀭𑀸𑀚𑁂’𑀢𑁆𑀣 𑀯𑀸𑀲𑁂𑀦, 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀘𑀺𑀦𑁆𑀢𑀺𑀬;

𑀞𑀧𑁂𑀢𑁆𑀯𑀸 𑀫𑀓𑀼𑀝𑀸𑀤𑀻𑀦𑀺, 𑀕𑀢𑁄 𑀓𑁂𑀭𑀴𑀲𑀦𑁆𑀢𑀺𑀓𑀁.

𑀯𑀺𑀕𑁆𑀕𑀳𑁂 𑀦𑀺𑀝𑁆𑀞𑀺𑀢𑁂 𑀭𑀸𑀚𑀸, 𑀫𑀳𑀸𑀫𑁂𑀖𑀯𑀦𑁂 𑀢𑀤𑀸;

𑀫𑀳𑀸𑀩𑁄𑀥𑀺𑀖𑀭𑀲𑁆𑀲𑀸’𑀤𑀸, 𑀕𑀸𑀫𑀁 𑀦𑀕𑀭𑀲𑀦𑁆𑀢𑀺𑀓𑁂.

𑀆𑀯𑀸𑀲𑀁 𑀭𑀓𑁆𑀔𑀓𑁄 𑀦𑀸𑀫, 𑀢𑀲𑁆𑀲 𑀲𑁂𑀦𑀸𑀧𑀢𑀻 𑀅𑀓𑀸;

𑀣𑀽𑀧𑀸𑀭𑀸𑀫𑀲𑀫𑀻𑀧𑀫𑁆𑀳𑀺, 𑀇𑀴𑀗𑁆𑀕𑁄 𑀭𑀸𑀚𑀦𑀸𑀫𑀓𑀁.

𑀓𑀢𑀁 𑀢𑀁 𑀧𑀼𑀩𑁆𑀩𑀭𑀸𑀚𑁂𑀳𑀺, 𑀭𑀸𑀚𑀸 𑀲𑁄 𑀧𑀭𑀺𑀧𑀸𑀮𑀺𑀬;

𑀧𑀢𑁆𑀢𑁄 𑀤𑁆𑀯𑀸𑀤𑀲𑀫𑀁 𑀯𑀲𑁆𑀲𑀁, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀉𑀤𑀬𑁄 ¶ 𑀬𑀼𑀯𑀭𑀸𑀚𑀸’𑀲𑀺, 𑀮𑀁𑀓𑀸𑀯𑀸𑀲𑀻𑀦𑀫𑀺𑀲𑁆𑀲𑀭𑁄;

𑀲𑁂𑀦𑀦𑀸𑀫𑀸𑀤𑀺𑀧𑀸𑀤𑀁 𑀲𑁄, 𑀑𑀧𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑀭𑀜𑁆𑀜𑁄 𑀪𑀻𑀢𑀸 𑀢𑀤𑀸𑀫𑀘𑁆𑀘𑀸, 𑀧𑀯𑀺𑀲𑀺𑀁𑀲𑀼 𑀢𑀧𑁄𑀯𑀦𑀁;

𑀭𑀸𑀚𑁄𑀧𑀭𑀸𑀚𑀸 𑀕𑀦𑁆𑀢𑁆𑀯𑀸𑀦, 𑀢𑁂𑀲𑀁 𑀲𑀻𑀲𑀸𑀦𑀺 𑀙𑁂𑀤𑀬𑀼𑀁.

𑀢𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀺𑀦𑁆𑀦𑀸, 𑀬𑀢𑀬𑁄 𑀢𑀦𑁆𑀦𑀺𑀯𑀸𑀲𑀺𑀦𑁄;

𑀳𑀺𑀢𑁆𑀯𑀸 𑀚𑀦𑀧𑀤𑀁 𑀭𑀜𑁆𑀜𑁄, 𑀢𑀤𑀸𑀕𑀘𑁆𑀙𑀺𑀁𑀲𑀼 𑀭𑁄𑀳𑀡𑀁.

𑀢𑀤𑀸 𑀚𑀸𑀦𑀧𑀤𑀸 𑀘𑁂𑀯, 𑀦𑀸𑀕𑀭𑀸 𑀘 𑀩𑀮𑀸𑀦𑀺 𑀘;

𑀓𑀼𑀧𑀺𑀢𑀸 𑀘𑀡𑁆𑀟𑀼𑀯𑀸𑀢𑁂𑀦, 𑀲𑀸𑀕𑀭𑁄 𑀯𑀺𑀬 𑀓𑀫𑁆𑀧𑀺𑀢𑁄.

𑀭𑀢𑀦𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀯𑀺𑀳𑀸𑀭𑁂 𑀅𑀪𑀬𑀼𑀢𑁆𑀢𑀭𑁂;

𑀲𑀦𑁆𑀢𑀸𑀲𑁂𑀢𑁆𑀯𑀸𑀦 𑀭𑀸𑀚𑀸𑀦𑀁, 𑀤𑀲𑁆𑀲𑁂𑀢𑁆𑀯𑀸𑀦 𑀯𑀺𑀪𑀻𑀲𑀺𑀓𑀁.

𑀉𑀧𑀢𑁆𑀣𑀫𑁆𑀪𑀓𑀫𑀘𑁆𑀘𑀸𑀦𑀁, 𑀯𑀺𑀕𑁆𑀕𑀳𑀲𑁆𑀲 𑀢𑀧𑁄𑀯𑀦𑁂;

𑀢𑀤𑀸 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸, 𑀓𑀯𑀸𑀢𑁂𑀦 𑀦𑀺𑀧𑀸𑀢𑀬𑀼𑀁.

𑀢𑀁 𑀲𑀼𑀢𑁆𑀯𑀸 𑀬𑀼𑀯𑀭𑀸𑀚𑀸 𑀘, 𑀆𑀤𑀺𑀧𑀸𑀤𑁄 𑀘 𑀢𑀁 𑀲𑀔𑀸;

𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀦 𑀧𑀸𑀓𑀸𑀭𑀁, 𑀲𑀻𑀖𑀁 𑀕𑀘𑁆𑀙𑀺𑀁𑀲𑀼 𑀭𑁄𑀳𑀡𑀁.

𑀩𑀮𑀓𑀸𑀬𑁄𑀦𑀼𑀩𑀦𑁆𑀥𑀺𑀢𑁆𑀯𑀸, 𑀬𑀸𑀯 𑀓𑀡𑁆𑀳𑀦𑀤𑀻𑀢𑀝𑀸;

𑀅𑀮𑀸𑀪𑁂𑀦 𑀘 𑀦𑀸𑀯𑀸𑀦𑀁, 𑀢𑀺𑀡𑁆𑀡𑀢𑁆𑀢𑀸 𑀢𑁂𑀲𑀫𑀸𑀕𑀫𑀺.

𑀭𑀸𑀚𑀧𑀼𑀢𑁆𑀢𑀸𑀕𑀢𑀸 𑀢𑀢𑁆𑀣, 𑀯𑀦𑁂 𑀅𑀪𑀬𑀪𑁂𑀤𑀺𑀦𑁄;

𑀬𑀢𑀻𑀦𑀁 𑀧𑀼𑀭𑀢𑁄 𑀢𑁂𑀲𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀭𑁂𑀦 𑀢𑁂.

𑀅𑀮𑁆𑀮𑀯𑀢𑁆𑀣𑀸’𑀮𑁆𑀮𑀓𑁂𑀲𑀸 𑀘, 𑀧𑀭𑀺𑀤𑁂𑀯𑀺𑀢𑁆𑀣’𑀦𑁂𑀓𑀥𑀸;

𑀓𑀦𑁆𑀤𑀻𑀢𑁆𑀯𑀸 𑀭𑁄𑀤𑀦𑀁 𑀓𑀢𑁆𑀯𑀸, 𑀔𑀫𑀸𑀧𑁂𑀲𑀼𑀁 𑀢𑀧𑀲𑁆𑀲𑀺𑀦𑁄.

𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦, 𑀢𑁂𑀲𑀁 𑀲𑀸𑀲𑀦𑀲𑀸𑀫𑀺𑀦𑀁;

𑀧𑀼𑀜𑁆𑀜𑁄𑀤𑀬𑁄 𑀅𑀳𑀼 𑀢𑁂𑀲𑀁, 𑀉𑀪𑀺𑀦𑁆𑀦𑀁 𑀤𑀻𑀧𑀲𑀸𑀫𑀺𑀦𑀁.

𑀬𑀼𑀯𑀭𑀸𑀚𑀩𑀮𑀜𑁆𑀘𑁂𑀯, 𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀺𑀦𑁄;

𑀕𑀫𑀺𑀁𑀲𑀼 𑀢𑁂𑀲𑀫𑀸𑀦𑁂𑀢𑀼𑀁, 𑀲𑀦𑁆𑀢𑀺𑀪𑀽𑀢𑁂 𑀫𑀳𑀸𑀩𑀮𑁂.

𑀭𑀸𑀚𑀧𑀼𑀢𑁆𑀢𑀸 𑀉𑀪𑁄 𑀩𑁆𑀬𑀢𑁆𑀢𑀸, 𑀧𑀡𑁆𑀟𑀺𑀢𑀸 𑀧𑀁𑀲𑀼𑀓𑀽𑀮𑀺𑀦𑁄;

𑀬𑀸𑀘𑀺𑀢𑁆𑀯𑀸 𑀢𑁂𑀲𑀫𑀸𑀤𑀸𑀬, 𑀅𑀕𑀫𑀁𑀲𑀼 𑀲𑀓𑀁 𑀧𑀼𑀭𑀁.

𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀫𑀕𑁆𑀕𑀁, 𑀭𑀸𑀚𑀸𑀕𑀦𑁆𑀢𑀸 𑀔𑀫𑀸𑀧𑀬𑀺;

𑀆𑀤𑀸𑀬 𑀢𑁂 𑀯𑀦𑀁 𑀢𑁂𑀲𑀁, 𑀦𑁂𑀢𑁆𑀯𑀸 𑀭𑀸𑀚𑀖𑀭𑀁 𑀕𑀢𑁄.

𑀢𑀢𑁄 𑀧𑀝𑁆𑀞𑀸𑀬 𑀘𑀸𑀭𑀺𑀢𑁆𑀣𑀁, 𑀧𑀸𑀮𑁂𑀢𑁆𑀯𑀸 𑀧𑀼𑀩𑁆𑀩𑀭𑀸𑀚𑀼𑀦𑀁;

𑀭𑀸𑀚𑀸 𑀲𑁄 𑀢𑀢𑀺𑀬𑁂 𑀯𑀲𑁆𑀲𑁂, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀮𑀁𑀓𑀸𑀪𑀺𑀲𑁂𑀓𑀁 ¶ 𑀧𑀢𑁆𑀯𑀸𑀦, 𑀲𑁂𑀦𑁄 𑀲𑁄 𑀫𑀢𑀺𑀫𑀸 𑀢𑀢𑁄;

𑀉𑀤𑀬𑀁 𑀆𑀤𑀺𑀧𑀸𑀤𑀁 𑀢𑀁, 𑀬𑀼𑀯𑀭𑀸𑀚𑀁 𑀅𑀓𑀸 𑀲𑀔𑀁.

𑀓𑀳𑀸𑀧𑀡𑀲𑀳𑀲𑁆𑀲𑀁 𑀲𑁄, 𑀤𑀼𑀕𑁆𑀕𑀢𑀸𑀦𑀁 𑀉𑀧𑁄𑀲𑀣𑁂;

𑀳𑁄𑀢𑀼’𑀧𑁄𑀲𑀣𑀺𑀓𑁄 𑀤𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀦𑀭𑀸𑀥𑀺𑀧𑁄.

𑀧𑀝𑀺𑀫𑀸 𑀪𑀢𑁆𑀢𑀯𑀢𑁆𑀣𑀸𑀦𑀺, 𑀪𑀺𑀓𑁆𑀔𑀽𑀦𑀁 𑀥𑀭𑀡𑀻 𑀧𑀢𑀺;

𑀅𑀤𑀸 𑀤𑀡𑁆𑀟𑀺𑀲𑁆𑀲𑀭𑀁 𑀤𑀸𑀦𑀁, 𑀬𑀸𑀘𑀓𑀸𑀦𑀜𑁆𑀘 𑀲𑀺𑀧𑁆𑀧𑀻𑀦𑀁.

𑀞𑀸𑀦𑁂 𑀓𑀢𑁆𑀣𑀘𑀺 𑀲𑀺𑀧𑁆𑀧𑀻𑀦𑀁, 𑀧𑀸𑀲𑀸𑀤𑁂𑀲𑀼 𑀫𑀦𑁄𑀳𑀭𑁂;

𑀓𑀸𑀭𑁂𑀢𑁆𑀯𑀸 𑀪𑁄𑀕𑀕𑀸𑀫𑁂 𑀘, 𑀅𑀤𑀸𑀧𑁂𑀲𑀺 𑀫𑀳𑀸𑀫𑀢𑀺.

𑀓𑀳𑀸𑀧𑀡𑀲𑀳𑀲𑁆𑀲𑀁 𑀯𑀸, 𑀤𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀺 𑀯𑀸;

𑀮𑀗𑁆𑀓𑀸𑀬𑀁 𑀚𑀺𑀡𑁆𑀡𑀓𑀸𑀯𑀸𑀲𑁂, 𑀦𑀯𑀓𑀫𑁆𑀫𑀫𑀓𑀸𑀭𑀬𑀻.

𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺, 𑀅𑀪𑀬𑀼𑀢𑁆𑀢𑀭𑀘𑁂𑀢𑀺𑀬𑁂;

𑀲𑀺𑀮𑀸𑀧𑀢𑁆𑀣𑀭𑀡𑀢𑁆𑀣𑀸𑀬, 𑀤𑀸𑀧𑁂𑀲𑀺 𑀘 𑀫𑀳𑀻𑀧𑀢𑀺.

𑀫𑀳𑀸𑀯𑀸𑀧𑀻𑀲𑀼 𑀮𑀁𑀓𑀸𑀬𑀁, 𑀚𑀺𑀡𑁆𑀡𑀦𑀺𑀤𑁆𑀥𑀫𑀦𑁂 𑀅𑀓𑀸;

𑀦𑀯𑀓𑀫𑁆𑀫𑀜𑁆𑀘 𑀫𑀭𑀺𑀬𑀸𑀤𑀁, 𑀣𑀺𑀬𑀁 𑀧𑀸𑀲𑀸𑀡𑀧𑀁𑀲𑀼𑀦𑀸.

𑀅𑀓𑀸 𑀭𑀸𑀚𑀖𑀭𑁂 𑀭𑀫𑁆𑀫𑀁, 𑀫𑀸𑀮𑀸𑀕𑁂𑀳𑀁 𑀫𑀳𑀸𑀭𑀳𑀁;

𑀞𑀧𑀺𑀢𑀁 𑀧𑀼𑀦𑀭𑀸𑀚𑀽𑀳𑀺, 𑀤𑀸𑀦𑀁 𑀲𑀫𑁆𑀫𑀸𑀧𑀯𑀢𑁆𑀢𑀬𑀺.

𑀓𑀢𑀁 𑀫𑀮𑀬𑀭𑀸𑀚𑁂𑀦, 𑀅𑀫𑀘𑁆𑀘𑁂𑀦’𑀕𑁆𑀕 𑀩𑁄𑀥𑀺𑀦𑀸;

𑀧𑀭𑀺𑀯𑁂𑀡𑀁 𑀦𑀸𑀕𑀲𑀸𑀮𑀁, 𑀤𑀺𑀲𑁆𑀯𑀸 𑀕𑀸𑀫 𑀫𑀤𑀸 𑀢𑀤𑀸.

𑀓𑀢𑁆𑀯𑀸 𑀘𑀢𑀼𑀯𑀺𑀳𑀸𑀭𑁂𑀲𑀼, 𑀭𑀽𑀧𑀓𑀫𑁆𑀫𑀸𑀦𑀺 𑀲𑀸𑀥𑀼𑀓𑀁;

𑀫𑀡𑁆𑀟𑀧𑀸𑀦𑀺 𑀘 𑀭𑀫𑁆𑀫𑀸𑀦𑀺, 𑀥𑀸𑀢𑀼𑀧𑀽𑀚𑀁 𑀅𑀓𑀸 𑀲𑀤𑀸.

𑀏𑀯𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺, 𑀅𑀦𑁂𑀓𑀸𑀦𑀺 𑀅𑀦𑁂𑀓𑀥𑀸;

𑀓𑀢𑁆𑀯𑀸 𑀲𑁄 𑀦𑀯𑀫𑁂 𑀯𑀲𑁆𑀲𑁂, 𑀬𑀣𑀸𑀓𑀫𑁆𑀫𑀫𑀼𑀧𑀸𑀕𑀫𑀺.

𑀮𑀁𑀓𑀸𑀪𑀺𑀲𑁂𑀓𑀁 𑀧𑀢𑁆𑀯𑀸𑀦, 𑀬𑀼𑀯𑀭𑀸𑀚𑁄𑀤𑀬𑁄 𑀢𑀢𑁄;

𑀲𑁂𑀦𑀦𑀸𑀫𑀸𑀤𑀺𑀧𑀸𑀤𑀁 𑀲𑁄, 𑀑𑀧𑀭𑀚𑁆𑀚𑁂’𑀪𑀺 𑀲𑁂𑀘𑀬𑀺.

𑀦𑀺𑀤𑁆𑀤𑀸𑀮𑀼 𑀫𑀚𑁆𑀚𑀧𑁄 𑀆𑀲𑀺, 𑀭𑀸𑀚𑀸 𑀧𑀸𑀧𑁂𑀦 𑀚𑀦𑁆𑀢𑀼𑀦𑀁;

𑀘𑁄𑀴𑁄 𑀧𑀫𑀢𑁆𑀢𑀢𑀁 𑀢𑀲𑁆𑀲, 𑀲𑀼𑀢𑁆𑀯𑀸 𑀲𑀦𑁆𑀢𑀼𑀝𑁆𑀞𑀫𑀸𑀦𑀲𑁄.

𑀧𑀡𑁆𑀟𑀼𑀤𑁂𑀲𑀸𑀢𑀺𑀲𑁂𑀓𑀁 𑀲𑁄, 𑀧𑀢𑁆𑀢𑀼𑀓𑀸 𑀫𑁂𑀢𑁆𑀣 𑀧𑁂𑀲𑀬𑀺;

𑀫𑀓𑀼𑀝𑀸𑀤𑀻𑀦𑀫𑀢𑁆𑀣𑀸𑀬, 𑀞𑀧𑀺𑀢𑀸𑀦𑀁𑀯 𑀧𑀡𑁆𑀟𑀼𑀦𑀸.

𑀢𑀸𑀦𑀺 𑀦𑀸𑀤𑀸𑀲𑀺 𑀲𑁄 𑀭𑀸𑀚𑀸, 𑀢𑁂𑀦 𑀘𑁄𑀴𑁄 𑀫𑀳𑀩𑁆𑀩𑀮𑁄;

𑀩𑀮𑀁 𑀲𑀦𑁆𑀦𑀬𑁆𑀳 𑀧𑁂𑀲𑁂𑀲𑀺, 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀺𑀢𑀼𑀁.

𑀢𑀤𑀸 ¶ 𑀲𑁂𑀦𑀸𑀧𑀢𑀺 𑀏𑀢𑁆𑀣, 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀕𑀢𑁄;

𑀆𑀡𑀸𑀧𑁂𑀢𑁆𑀯𑀸𑀦 𑀢𑀁 𑀭𑀸𑀚𑀸, 𑀬𑀼𑀚𑁆𑀛𑀦𑀢𑁆𑀣𑀸𑀬 𑀧𑁂𑀲𑀬𑀺.

𑀳𑀢𑁄 𑀲𑁂𑀦𑀸𑀧𑀢𑀺 𑀢𑀢𑁆𑀣, 𑀬𑀼𑀚𑁆𑀛𑀺 𑀦 𑀭𑀡𑁂 𑀫𑀢𑁄;

𑀓𑀓𑀽𑀝𑀸𑀤𑀻𑀦𑀺 𑀆𑀤𑀸𑀬, 𑀭𑀸𑀚𑀸 𑀲𑁄 𑀭𑁄𑀳𑀡𑀁 𑀅𑀕𑀸.

𑀕𑀦𑁆𑀢𑁆𑀯𑀸 𑀘𑁄𑀴𑀩𑀮𑀁 𑀢𑀢𑁆𑀣, 𑀅𑀮𑀪𑀺𑀢𑁆𑀯𑀸 𑀧𑀯𑁂𑀲𑀦𑀁;

𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀓𑀁 𑀭𑀝𑁆𑀞𑀁, 𑀅𑀕𑀫𑀸𑀲𑀺 𑀇𑀥𑀢𑀸 𑀪𑀬𑀸.

𑀢𑀢𑁄 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂, 𑀯𑀺𑀤𑀼𑀭𑀕𑁆𑀕𑀁 𑀢𑀼 𑀦𑀸𑀬𑀓𑀁;

𑀞𑀧𑁂𑀲𑀺 𑀭𑀸𑀚𑀸 𑀮𑀁𑀓𑀺𑀦𑁆𑀤𑁄, 𑀢𑁂𑀚𑀯𑀦𑁆𑀢𑀁 𑀫𑀳𑀸𑀫𑀢𑀺𑀁.

𑀧𑀘𑁆𑀘𑀦𑁆𑀢𑀁 𑀘𑁄𑀴𑀭𑀸𑀚𑀲𑁆𑀲, 𑀖𑀸𑀢𑁂𑀢𑁆𑀯𑀸 𑀲𑁄 𑀘𑀫𑀽𑀧𑀢𑀺;

𑀆𑀡𑀸𑀧𑁂𑀲𑀺 𑀇𑀢𑁄 𑀦𑀻𑀢𑀁, 𑀤𑀲𑁆𑀲𑁂𑀢𑁆𑀯𑀸𑀦 𑀯𑀺𑀪𑀻𑀲𑀺𑀢𑀁.

𑀢𑀢𑁄 𑀤𑀸𑀧𑁂𑀲𑀺 𑀲𑁄 𑀲𑀩𑁆𑀩-𑀧𑀭𑀺𑀓𑁆𑀔𑀸𑀭𑀁 𑀫𑀳𑀸𑀭𑀳𑀁;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀲𑀩𑁆𑀩𑁂𑀲𑀁 𑀤𑀻𑀧𑀯𑀸𑀲𑀺𑀦𑀁.

𑀫𑀳𑀸𑀯𑀺𑀳𑀸𑀭𑁂 𑀮𑀁𑀓𑀺𑀦𑁆𑀤𑁄, 𑀧𑀝𑀺𑀩𑀺𑀫𑁆𑀩𑀲𑁆𑀲 𑀲𑀢𑁆𑀣𑀼𑀦𑁄;

𑀚𑀮𑀦𑁆𑀢𑀁 𑀫𑀡𑀺𑀭𑀁𑀲𑀻𑀳𑀺, 𑀅𑀓𑀸 𑀘𑀽𑀴𑀸𑀫𑀡𑀺𑀁 𑀢𑀤𑀸.

𑀑𑀭𑁄𑀥𑀸 𑀯𑀺𑀤𑀼𑀭𑀸 𑀢𑀲𑁆𑀲, 𑀧𑀸𑀤𑀚𑀸𑀮𑁂𑀦 𑀧𑀽𑀚𑀬𑀺;

𑀫𑀡𑀻𑀳𑀺 𑀧𑀚𑁆𑀚𑀮𑀦𑁆𑀢𑁂𑀳𑀺, 𑀧𑀝𑀺𑀫𑀁 𑀢𑀁 𑀲𑀺𑀮𑀸𑀫𑀬𑀁.

𑀛𑀸𑀧𑀺𑀢𑀁 𑀘𑁄𑀴𑀭𑀸𑀚𑀲𑁆𑀲, 𑀩𑀮𑁂𑀦 𑀫𑀡𑀺𑀦𑀸𑀫𑀓𑀁;

𑀧𑀸𑀲𑀸𑀤𑀁 𑀓𑀸𑀢𑀼𑀫𑀸𑀭𑀤𑁆𑀥𑁄, 𑀘𑀼𑀢𑁄 𑀯𑀲𑁆𑀲𑀫𑁆𑀳𑀺 𑀅𑀝𑁆𑀞𑀫𑁂.

𑀧𑀜𑁆𑀘𑁂𑀢𑁂 𑀯𑀲𑀼𑀥𑀸𑀥𑀺𑀧𑀸 𑀯𑀲𑀼𑀫𑀳𑀺𑀁 𑀏𑀓𑀸𑀢𑀧𑀢𑁆𑀢𑀗𑁆𑀓𑀺𑀢𑀁;

𑀪𑀼𑀢𑁆𑀯𑀸 𑀦𑀺𑀕𑁆𑀕𑀳𑀲𑀗𑁆𑀕𑀳𑁂𑀳𑀺 𑀲𑀓𑀮𑀁 𑀮𑁄𑀓𑀁 𑀯𑀲𑁂 𑀯𑀢𑁆𑀢𑀺𑀬;

𑀬𑀸 𑀢𑀸 𑀫𑀘𑁆𑀘𑀼𑀯𑀲𑀁 𑀲𑀧𑀼𑀢𑁆𑀢𑀯𑀡𑀺𑀢𑀸 𑀲𑀸𑀫𑀘𑁆𑀘𑀫𑀺𑀢𑁆𑀢𑀸𑀦𑀼𑀕𑀸;

𑀇𑀘𑁆𑀘𑁂𑀯𑀁 𑀲𑀢𑀢𑀁 𑀲𑀭𑀦𑁆𑀢𑀼 𑀲𑀼𑀚𑀦𑀸 𑀳𑀸𑀢𑀼𑀁 𑀧𑀫𑀸𑀤𑀁 𑀫𑀤𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀏𑀓𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀤𑁆𑀯𑀺𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀢𑀢𑁄 ¶ 𑀮𑀗𑁆𑀓𑀸𑀪𑀺𑀲𑁂𑀓𑀁 𑀲𑁄, 𑀧𑀢𑁆𑀯𑀸 𑀲𑁂𑀦𑁄 𑀓𑀫𑀸𑀕𑀢𑀁;

𑀫𑀳𑀺𑀦𑁆𑀤𑀲𑁆𑀲𑀸𑀤𑀺𑀧𑀸𑀤𑀲𑁆𑀲, 𑀬𑀼𑀯𑀭𑀸𑀚𑀧𑀤𑀁 𑀅𑀤𑀸.

𑀧𑀜𑁆𑀜𑁄 𑀫𑀳𑀸𑀓𑀯𑀻 𑀩𑁆𑀬𑀢𑁆𑀢𑁄, 𑀫𑀚𑁆𑀛𑀢𑁆𑀢𑁄 𑀫𑀺𑀢𑁆𑀢𑀲𑀢𑁆𑀢𑀼𑀲𑀼;

𑀬𑀼𑀢𑁆𑀢𑁄 𑀤𑀬𑀸𑀬 𑀫𑁂𑀢𑁆𑀢𑀸𑀬, 𑀭𑀸𑀚𑀸 𑀲𑁄 𑀲𑀩𑁆𑀩𑀤𑀸 𑀅𑀳𑀼.

𑀓𑀸𑀮𑀁 𑀤𑁂𑀯𑁄’𑀦𑀢𑀺𑀓𑁆𑀓𑀫𑁆𑀫, 𑀲𑀫𑁆𑀫𑀸 𑀥𑀸𑀭𑀸𑀪𑀺𑀯𑀲𑁆𑀲𑀢𑀺;

𑀭𑀝𑁆𑀞𑁂 𑀢𑀲𑁆𑀫𑀺𑀁 𑀯𑀲𑀦𑁆𑀢𑀸’𑀲𑀼𑀁, 𑀲𑀼𑀔𑀺𑀢𑀸 𑀦𑀺𑀩𑁆𑀪𑀬𑀸 𑀲𑀤𑀸.

𑀲𑀼𑀢𑁆𑀢𑀦𑁆𑀢𑀁 𑀮𑁄𑀳𑀧𑀸𑀲𑀸𑀤𑁂, 𑀦𑀺𑀲𑀺𑀦𑁆𑀦𑁄 𑀯𑀡𑁆𑀡𑀬𑀻 𑀢𑀤𑀸;

𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀳𑀺, 𑀭𑀸𑀚𑀸 𑀲𑁄 𑀧𑀭𑀺𑀯𑀸𑀭𑀺𑀢𑁄.

𑀤𑀸𑀞𑀥𑀸𑀢𑀼𑀓𑀭𑀡𑁆𑀟𑀁 𑀲𑁄, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑀁;

𑀅𑀓𑀸 𑀘𑀢𑀼𑀯𑀺𑀳𑀸𑀭𑁂𑀲𑀼, 𑀥𑀸𑀢𑀼𑀧𑀽𑀚𑀸 𑀘’𑀦𑁂𑀓𑀥𑀸.

𑀧𑀭𑀺𑀯𑁂𑀡𑀁 𑀲𑀺𑀢𑁆𑀣𑀕𑀸𑀫𑀁, 𑀓𑀸𑀭𑁂𑀢𑁆𑀯𑀸 𑀯𑀼𑀢𑁆𑀣𑀫𑀢𑁆𑀢𑀦𑀸;

𑀮𑁄𑀓𑀁 𑀧𑀼𑀢𑁆𑀢𑀁𑀯 𑀧𑀸𑀮𑁂𑀢𑁆𑀯𑀸, 𑀢𑀺𑀯𑀲𑁆𑀲𑁂𑀦 𑀤𑀺𑀯𑀗𑁆𑀕𑀢𑁄.

𑀬𑀼𑀯𑀭𑀸𑀚𑀸 𑀫𑀳𑀺𑀦𑁆𑀤𑁄 𑀲𑁄, 𑀭𑀸𑀚𑀸𑀲𑀺 𑀢𑀤𑀦𑀦𑁆𑀢𑀭𑀁;

𑀫𑀳𑀸𑀧𑀼𑀜𑁆𑀜𑁄 𑀫𑀳𑀸𑀢𑁂𑀚𑁄, 𑀫𑀳𑀸𑀲𑁂𑀦𑁄 𑀫𑀳𑀸𑀬𑀲𑁄.

𑀏𑀓𑀘𑁆𑀙𑀢𑁆𑀢𑀁 𑀅𑀓𑀸 𑀮𑀗𑁆𑀓𑀁, 𑀖𑀸𑀢𑁂𑀢𑁆𑀯𑀸 𑀘𑁄𑀭𑀼𑀧𑀤𑁆𑀤𑀯𑀁;

𑀅𑀓𑀁𑀲𑀼 𑀢𑀫𑀼𑀧𑀝𑁆𑀞𑀸𑀦𑀁, 𑀦𑀺𑀘𑁆𑀘𑀫𑀡𑁆𑀟𑀮𑀦𑀸𑀬𑀓𑀁.

𑀯𑀺𑀚𑁆𑀚𑀫𑀸𑀦𑁂𑀧𑀺 𑀮𑀗𑁆𑀓𑀸𑀬𑀁, 𑀔𑀢𑁆𑀢𑀺𑀬𑀸𑀦𑀁 𑀦𑀭𑀸𑀥𑀺𑀧𑁄;

𑀓𑀸𑀮𑀺𑀗𑁆𑀕𑀘𑀓𑁆𑀓𑀯𑀢𑁆𑀢𑀺𑀲𑁆𑀲, 𑀯𑀁𑀲𑁂 𑀚𑀸𑀢𑀁 𑀓𑀼𑀫𑀸𑀭𑀺𑀓𑀁.

𑀆𑀡𑀸𑀧𑁂𑀢𑁆𑀯𑀸𑀦 𑀢𑀁 𑀅𑀕𑁆𑀕-𑀫𑀳𑁂𑀲𑀺𑀁 𑀅𑀢𑁆𑀢𑀦𑁄 𑀅𑀓𑀸;

𑀢𑀲𑁆𑀲𑀸 𑀧𑀼𑀢𑁆𑀢𑀸 𑀤𑀼𑀯𑁂 𑀚𑀸𑀢𑀸, 𑀥𑀻𑀢𑀸 𑀏𑀓𑀸 𑀫𑀦𑁄𑀭𑀫𑀸.

𑀆𑀤𑀺𑀧𑀸𑀤𑁂 𑀅𑀓𑀸 𑀧𑀼𑀢𑁆𑀢𑁂, 𑀥𑀻𑀢𑀭𑀁 𑀘𑁄𑀧𑀭𑀸𑀚𑀺𑀦𑀺𑀁;

𑀇𑀢𑀺 𑀲𑀻𑀳𑀴𑀯𑀁𑀲𑀜𑁆𑀘, 𑀧𑀝𑁆𑀞𑀧𑁂𑀲𑀺 𑀲𑀪𑀽𑀧𑀢𑀺.

𑀩𑀮𑀓𑀸𑀬𑀁 𑀇𑀫𑀁 𑀤𑁂𑀲𑀁, 𑀫𑀤𑁆𑀤𑀦𑀢𑁆𑀣𑀸𑀬 𑀯𑀮𑁆𑀮𑀪𑁄;

𑀧𑁂𑀲𑁂𑀲𑀺 𑀦𑀸𑀕𑀤𑀻𑀧𑀁 𑀲𑁄, 𑀲𑀼𑀢𑁆𑀯𑀸 𑀢𑀁 𑀪𑀽𑀧𑀢𑀺 𑀇𑀥.

𑀩𑀮𑀁 ¶ 𑀤𑀢𑁆𑀯𑀸𑀦 𑀲𑁂𑀦𑀯𑁆𑀳-𑀭𑀸𑀚𑀲𑁂𑀦𑀸𑀧𑀢𑀺𑀁 𑀢𑀤𑀸;

𑀯𑀮𑁆𑀮𑀪𑀲𑁆𑀲 𑀩𑀮𑁂𑀦𑁂’𑀲, 𑀬𑀼𑀚𑁆𑀛𑀺𑀢𑀼𑀁 𑀢𑀢𑁆𑀣 𑀧𑁂𑀲𑀬𑀺.

𑀕𑀦𑁆𑀢𑁆𑀯𑀸 𑀲𑁂𑀦𑀸𑀧𑀢𑀻 𑀢𑀢𑁆𑀣, 𑀩𑀮𑁂𑀦𑁂’𑀢𑀲𑁆𑀲 𑀭𑀸𑀚𑀺𑀦𑁄;

𑀬𑀼𑀚𑁆𑀛𑀺𑀢𑁆𑀯𑀸 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸, 𑀕𑀡𑁆𑀳𑀺 𑀲𑁄 𑀬𑀼𑀤𑁆𑀥𑀫𑀡𑁆𑀟𑀮𑁂.

𑀅𑀲𑀓𑁆𑀓𑁂𑀦𑁆𑀢𑁄 𑀇𑀫𑀁 𑀚𑁂𑀢𑀼𑀁, 𑀭𑀸𑀚𑀸 𑀦𑀁 𑀯𑀮𑁆𑀮𑀪𑀸𑀤𑀬𑁄;

𑀭𑀸𑀚𑀸𑀦𑁄 𑀫𑀺𑀢𑁆𑀢𑀲𑀫𑁆𑀩𑀦𑁆𑀥𑀁, 𑀮𑀁𑀓𑀺𑀦𑁆𑀤𑁂𑀦 𑀅𑀓𑀁𑀲𑀼 𑀢𑁂.

𑀇𑀘𑁆𑀙𑁂𑀯𑀁 𑀭𑀸𑀚𑀺𑀦𑁄 𑀢𑁂𑀚𑁄, 𑀚𑀫𑁆𑀩𑀼𑀤𑀻𑀧𑀫𑀯𑀢𑁆𑀣𑀭𑀺;

𑀧𑀢𑁆𑀣𑀭𑀺𑀢𑁆𑀯𑀸𑀦 𑀮𑀁𑀓𑀸𑀬𑀁, 𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀦 𑀲𑀸𑀕𑀭𑀁.

𑀲𑀤𑁆𑀥𑀫𑁆𑀫𑀁 𑀓𑀣𑀸𑀬𑀦𑁆𑀢𑀸𑀦𑀁, 𑀓𑀢𑁆𑀯𑀸 𑀲𑀫𑁆𑀫𑀸 𑀦 𑀫𑀼𑀢𑁆𑀢𑀫𑀁;

𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀲𑁄 𑀭𑀸𑀚𑀸, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂.

𑀭𑀸𑀚𑀸 𑀲𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀯𑁄;

𑀬𑀸𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁, 𑀆𑀡𑀸𑀧𑁂𑀢𑁆𑀯𑀸𑀦 𑀲𑀸𑀥𑀼𑀓𑀁.

𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀦, 𑀦𑀺𑀲𑀻𑀤𑀸𑀧𑀺𑀬 𑀪𑁄𑀚𑀦𑀁;

𑀤𑀸𑀧𑁂𑀲𑀺 𑀯𑀺𑀧𑀼𑀮𑀁 𑀲𑀼𑀤𑁆𑀥𑀁, 𑀲𑀤𑀸 𑀏𑀓𑀤𑀺𑀦𑁂 𑀯𑀺𑀬.

𑀅𑀦𑁂𑀓𑀩𑁆𑀬𑀜𑁆𑀚𑀦𑀁 𑀭𑀸𑀚𑀸-𑀭𑀜𑁆𑀜𑀓𑀸𑀦𑀁 𑀢𑀧𑀲𑁆𑀲𑀺𑀦𑀁;

𑀧𑁂𑀲𑁂𑀲𑀺 𑀪𑁄𑀚𑀦𑀁 𑀲𑀼𑀤𑁆𑀥𑀁, 𑀫𑀳𑀕𑁆𑀖𑀁 𑀯𑀺𑀧𑀼𑀮𑀁 𑀲𑀤𑀸.

𑀯𑁂𑀚𑁆𑀚𑁂𑀯 𑀧𑁂𑀲𑀬𑀺𑀢𑁆𑀯𑀸𑀦, 𑀯𑀺𑀮𑀸𑀦𑀸𑀦𑀁 𑀢𑀧𑀲𑁆𑀲𑀺𑀦𑀁;

𑀲𑀦𑁆𑀢𑀺𑀓𑀁 𑀲𑁄 𑀤𑀬𑀸𑀯𑀸𑀲𑁄, 𑀢𑀺𑀓𑀺𑀘𑁆𑀙𑀸𑀧𑁂𑀲𑀺 𑀦𑀺𑀘𑁆𑀘𑀲𑁄.

𑀕𑀼𑀴𑀸𑀦𑀺 𑀖𑀦𑀧𑀸𑀓𑀸𑀦𑀺, 𑀮𑀲𑀼𑀡𑀸𑀦𑀁 𑀭𑀲𑀸𑀦𑀺 𑀘;

𑀢𑀫𑁆𑀩𑀼𑀮𑀫𑀼𑀔𑀯𑀸𑀲𑀜𑁆𑀘, 𑀧𑀘𑁆𑀙𑀪𑀢𑁆𑀢𑁂 𑀅𑀤𑀸 𑀲𑀤𑀸.

𑀧𑀢𑁆𑀢𑁂𑀲𑀼 𑀧𑀽𑀭𑀬𑀺𑀢𑁆𑀯𑀸𑀦, 𑀮𑀲𑀼𑀡𑀁 𑀫𑀭𑀺𑀘𑀫𑁆𑀧𑀺 𑀘;

𑀧𑀺𑀧𑁆𑀨𑀮𑀺𑀲𑀗𑁆𑀕𑀻𑀯𑁂𑀭𑀸𑀦𑀺, 𑀕𑀼𑀴𑀸𑀦𑀺 𑀢𑀺𑀨𑀮𑀸𑀦𑀺 𑀘.

𑀖𑀢𑀁 𑀢𑁂𑀮𑀁 𑀫𑀥𑀼𑀜𑁆𑀘𑀸𑀬, 𑀧𑀸𑀧𑀼𑀭𑀢𑁆𑀣𑀭𑀡𑀸𑀦𑀺 𑀘;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀧𑀘𑁆𑀘𑁂𑀓𑀁 𑀲𑀩𑁆𑀩𑀤𑀸 𑀅𑀤𑀸.

𑀘𑀻𑀯𑀭𑀸𑀤𑀻𑀦𑀺 𑀲𑀩𑁆𑀩𑀸𑀦𑀺, 𑀧𑀭𑀺𑀓𑁆𑀔𑀸𑀭𑀸𑀦𑀺 𑀪𑀽𑀧𑀢𑀺;

𑀓𑀸𑀭𑀸𑀧𑁂𑀢𑁆𑀯𑀸𑀦 𑀤𑀸𑀧𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀧𑀁𑀲𑀼𑀓𑀼𑀮𑀺𑀦𑀁.

𑀭𑀸𑀚𑀸 𑀫𑀳𑀸𑀯𑀺𑀳𑀸𑀭𑀲𑁆𑀫𑀺𑀁, 𑀏𑀓𑁂𑀓𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄;

𑀧𑀘𑁆𑀘𑁂𑀓𑀁 𑀦𑀯𑀯𑀢𑁆𑀣𑀸𑀦𑀺, 𑀘𑀻𑀯𑀭𑀢𑁆𑀣𑀸𑀬 𑀤𑀸𑀧𑀬𑀺.

𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀦𑀁, 𑀪𑀺𑀓𑁆𑀔𑀽𑀦𑀁 𑀮𑀸𑀪𑀯𑀸𑀲𑀺𑀦𑀁;

𑀢𑀼𑀮𑀸𑀪𑀸𑀭𑀫𑀤𑀸 𑀤𑁆𑀯𑀻𑀲𑀼, 𑀯𑀸𑀭𑁂𑀲𑀼 𑀲𑀫𑀳𑀻𑀧𑀢𑀺.

𑀓𑀣𑀸𑀧𑁂𑀢𑁆𑀯𑀸𑀦 𑀩𑀼𑀤𑁆𑀥𑀲𑁆𑀲, 𑀲𑀭𑀡𑀸𑀦𑀺 𑀕𑀼𑀡𑁂𑀦𑀯;

𑀅𑀦𑀸𑀣𑁂𑀳𑀺 𑀘 𑀢𑁂𑀲𑀜𑁆𑀘, 𑀪𑀢𑁆𑀢𑀯𑀢𑁆𑀣𑀸𑀦𑀺 𑀤𑀸𑀧𑀬𑀺.

𑀤𑀸𑀦𑀲𑀸𑀮𑀁 𑀓𑀭𑀺𑀢𑁆𑀯𑀸𑀦, 𑀳𑀢𑁆𑀣𑀺𑀲𑀸𑀮𑀓𑀪𑀽𑀫𑀺𑀬𑀁;

𑀬𑀸𑀘𑀓𑀸𑀦𑀁 𑀅𑀤𑀸 𑀤𑀸𑀦𑀁, 𑀢𑁂𑀲𑀜𑁆𑀘 𑀲𑀬𑀦𑀸𑀲𑀦𑀁.

𑀯𑁂𑀚𑁆𑀚𑀲𑀸𑀮𑀸𑀲𑀼 𑀲𑀩𑁆𑀩𑀸𑀲𑀼, 𑀪𑁂𑀲𑀚𑁆𑀚𑀁 𑀫𑀜𑁆𑀘𑀓𑀜𑁆𑀘 𑀲𑁄;

𑀘𑁄𑀭𑀸𑀦𑀁 𑀩𑀦𑁆𑀥𑀦𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀪𑀢𑁆𑀢𑀸𑀦𑀺 𑀤𑀸𑀧𑀬𑀺.

𑀯𑀸𑀦𑀭𑀸𑀦𑀁 𑀯𑀭𑀳𑀸𑀦𑀁, 𑀫𑀺𑀕𑀸𑀦𑀁 𑀲𑀼𑀦𑀔𑀸𑀦 𑀘;

𑀪𑀢𑁆𑀢𑀁 𑀧𑀽𑀯𑀜𑁆𑀘 𑀤𑀸𑀧𑁂𑀲𑀺, 𑀤𑀬𑀸𑀯𑀸𑀲𑁄 𑀬𑀣𑀺𑀘𑁆𑀙𑀓𑀁.

𑀭𑀸𑀚𑀸 𑀘𑀢𑀼𑀯𑀺𑀳𑀸𑀭𑁂𑀲𑀼, 𑀓𑀢𑁆𑀯𑀸 𑀲𑁄 𑀯𑀻𑀳𑀺𑀭𑀸𑀲𑀬𑁄;

𑀬𑀣𑀺𑀘𑁆𑀙𑀺𑀢𑁂𑀦 𑀕𑀡𑁆𑀳𑀦𑁆𑀢𑀼, 𑀅𑀦𑀸𑀣𑀸 𑀇𑀢𑀺 𑀤𑀸𑀧𑀬𑀺.

𑀦𑀸𑀦𑀸𑀧𑀽𑀚𑀸𑀳𑀺 𑀧𑀽𑀚𑁂𑀢𑁆𑀯𑀸, 𑀓𑀢𑁆𑀯𑀸 𑀫𑀗𑁆𑀕𑀮𑀫𑀼𑀢𑁆𑀢𑀫𑀁;

𑀓𑀣𑀸𑀧𑁂𑀲𑀺 𑀘 𑀪𑀺𑀓𑁆𑀔𑀽𑀳𑀺, 𑀩𑁆𑀬𑀢𑁆𑀢𑁂𑀳𑀺 𑀯𑀺𑀦𑀬𑀁 𑀢𑀤𑀸.

𑀣𑁂𑀭𑁂𑀦 𑀥𑀫𑁆𑀫𑀫𑀺𑀢𑁆𑀢𑁂𑀦-𑀲𑀺𑀢𑁆𑀣𑀕𑀸𑀫𑀓𑀯𑀸𑀲𑀺𑀦𑀸;

𑀧𑀽𑀚𑀬𑀺𑀢𑁆𑀯𑀸𑀦 𑀓𑀸𑀭𑁂𑀲𑀺, 𑀅𑀪𑀺𑀥𑀫𑁆𑀫𑀲𑁆𑀲 𑀯𑀡𑁆𑀡𑀦𑀁.

𑀤𑀸𑀞𑀸𑀦𑀸𑀕𑀸’𑀪𑀺𑀥𑀸𑀦𑁂𑀦, 𑀣𑁂𑀭𑁂𑀦𑀸’𑀭𑀜𑁆𑀜𑀯𑀸𑀲𑀺𑀦𑀸;

𑀮𑀁𑀓𑀸𑀮𑀁𑀓𑀸𑀭𑀪𑀽𑀢𑁂𑀦, 𑀅𑀪𑀺𑀥𑀫𑁆𑀫𑀁 𑀓𑀣𑀸𑀧𑀬𑀺.

𑀧𑀝𑁆𑀝𑀓𑀜𑁆𑀘𑀼𑀓𑀧𑀽𑀚𑀸𑀳𑀺, 𑀳𑁂𑀫𑀫𑀸𑀮𑀺𑀓𑀘𑁂𑀢𑀺𑀬𑀁;

𑀦𑀘𑁆𑀘𑀕𑀻𑀢𑁂𑀳𑀺 𑀕𑀦𑁆𑀥𑁂𑀳𑀺, 𑀧𑀼𑀧𑁆𑀨𑁂𑀳𑀺 𑀯𑀺𑀯𑀺𑀥𑁂𑀳𑀺 𑀘.

𑀤𑀻𑀧𑀫𑀸𑀮𑀸𑀳𑀺 𑀥𑀽𑀧𑁂𑀳𑀺, 𑀧𑀽𑀚𑀬𑀺𑀢𑁆𑀯𑀸𑀦’𑀦𑁂𑀓𑀥𑀸;

𑀢𑀲𑁆𑀲 𑀯𑀢𑁆𑀣𑀸𑀦𑀺 𑀪𑀸𑀚𑁂𑀢𑁆𑀯𑀸, 𑀪𑀺𑀓𑁆𑀔𑀽𑀦𑀁 𑀤𑀸𑀧𑀬𑀻 𑀲𑀬𑀁.

𑀲𑀤𑀸 𑀲𑁄 𑀅𑀢𑁆𑀢𑀦𑁄 𑀭𑀚𑁆𑀚𑁂, 𑀉𑀬𑁆𑀬𑀸𑀦𑁂𑀲𑀼 𑀢𑀳𑀺𑀁𑀢𑀳𑀺𑀁;

𑀆𑀡𑀸𑀧𑁂𑀢𑁆𑀯𑀸𑀦 𑀧𑀼𑀧𑁆𑀨𑀸𑀦𑀺, 𑀧𑀽𑀚𑁂𑀲𑀺 𑀭𑀢𑀦𑀢𑁆𑀢𑀬𑀁.

𑀧𑀸𑀲𑀸𑀤𑀁 𑀘𑀦𑁆𑀤𑀦𑀁 𑀦𑀸𑀫, 𑀓𑀸𑀢𑀼𑀁 𑀫𑀭𑀺𑀘𑀯𑀝𑁆𑀝𑀺𑀬𑀁;

𑀅𑀓𑀸𑀭𑀫𑁆𑀪𑀜𑁆𑀘 𑀪𑀺𑀓𑁆𑀔𑀽𑀦𑀁 𑀪𑁄𑀕𑀕𑀸𑀫𑁂 𑀘 𑀤𑀸𑀧𑀬𑀺.

𑀓𑁂𑀲𑀥𑀸𑀢𑀼𑀁 𑀦𑀺𑀥𑀸𑀧𑁂𑀢𑁆𑀯𑀸, 𑀓𑀭𑀡𑁆𑀟𑀁 𑀭𑀢𑀦𑁂𑀳𑀺 𑀲𑁄;

𑀓𑀸𑀭𑀬𑀺𑀢𑁆𑀯𑀸𑀦 𑀧𑀽𑀚𑁂𑀲𑀺, 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀪𑀽𑀧𑀢𑀺.

𑀲𑁄𑀡𑁆𑀡𑀭𑀚𑀢𑀧𑀝𑁆𑀝𑁂𑀳𑀺 ¶ , 𑀣𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑀁;

𑀙𑀸𑀤𑀸𑀧𑁂𑀢𑁆𑀯𑀸 𑀬𑀣𑀸𑀭𑀚𑁆𑀚𑀁, 𑀧𑀽𑀚𑀁 𑀓𑀸𑀭𑁂𑀲𑀺 𑀪𑀽𑀧𑀢𑀺.

𑀢𑀲𑁆𑀫𑀺𑀁 𑀥𑀸𑀢𑀼𑀖𑀭𑁂 𑀭𑀸𑀚𑀸, 𑀲𑁄𑀡𑁆𑀡𑀤𑁆𑀯𑀸𑀭𑀫𑀓𑀸𑀭𑀬𑀺;

𑀧𑀚𑁆𑀚𑀮𑀦𑁆𑀢𑀁 𑀲𑀺𑀦𑁂𑀭𑀼𑀁𑀯, 𑀭𑀁𑀲𑀻𑀳𑀺 𑀲𑀽𑀭𑀺𑀬𑀲𑁆𑀲 𑀲𑁄.

𑀛𑀸𑀧𑀺𑀢𑀁 𑀘𑁄𑀴𑀭𑀸𑀚𑀲𑁆𑀲, 𑀩𑀮𑁂𑀦 𑀧𑀤𑀮𑀜𑁆𑀙𑀦𑁂;

𑀘𑀢𑀼𑀦𑁆𑀦𑀁 𑀘𑁂𑀢𑀺𑀬𑀸𑀦𑀁 𑀲𑁄, 𑀭𑀫𑀦𑀻𑀬𑀁 𑀖𑀭𑀁 𑀅𑀓𑀸.

𑀛𑀸𑀢𑀁 𑀦𑀕𑀭𑀫𑀚𑁆𑀛𑀫𑁆𑀳𑀺, 𑀤𑀸𑀞𑀸𑀥𑀸𑀢𑀼𑀖𑀭𑀁 𑀅𑀓𑀸;

𑀥𑀫𑁆𑀫𑀲𑀗𑁆𑀕𑀡𑀻𑀕𑁂𑀳𑀜𑁆𑀘, 𑀫𑀳𑀸𑀧𑀸𑀴𑀺𑀜𑁆𑀘 𑀪𑀽𑀧𑀢𑀺.

𑀢𑀫𑁆𑀩𑀽𑀮𑀫𑀡𑁆𑀟𑀧𑀁 𑀓𑀢𑁆𑀯𑀸, 𑀢𑀢𑁆𑀣 𑀲𑀼𑀗𑁆𑀓𑀁 𑀫𑀳𑀻𑀧𑀢𑀺;

𑀪𑀺𑀓𑁆𑀔𑀽𑀦𑀁 𑀣𑁂𑀭𑀯𑀁𑀲𑁂 𑀲𑁄, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀤𑀸𑀧𑀬𑀺.

𑀉𑀧𑀲𑁆𑀲𑀬𑀁 𑀓𑀭𑀺𑀢𑁆𑀯𑀸𑀦, 𑀫𑀳𑀸𑀫𑀗𑁆𑀕𑀮𑀦𑀸𑀫𑀓𑀁;

𑀣𑁂𑀭𑀯𑀁𑀲𑀫𑁆𑀳𑀺 𑀚𑀸𑀢𑀸𑀦𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀤𑀸𑀧𑀬𑀺.

𑀫𑀸𑀢𑀼𑀮𑁄𑀤𑀬𑀭𑀸𑀚𑁂𑀦, 𑀆𑀭𑀤𑁆𑀥𑀁 𑀲𑀸𑀥𑀼𑀦𑀸 𑀢𑀤𑀸;

𑀦𑀺𑀝𑁆𑀞𑀸𑀧𑁂𑀲𑀺 𑀫𑀳𑀻𑀧𑀸𑀮𑁄, 𑀧𑀸𑀲𑀸𑀤𑀁 𑀫𑀡𑀺𑀦𑀸𑀫𑀓𑀁.

𑀧𑀭𑀺𑀯𑁂𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂 𑀢𑀤𑀸;

𑀓𑀸𑀭𑀸𑀧𑀬𑀺𑀁𑀲𑀼 𑀘𑀢𑁆𑀢𑀸𑀭𑁄, 𑀅𑀫𑀘𑁆𑀘𑀸 𑀢𑀲𑁆𑀲 𑀭𑀸𑀚𑀺𑀦𑁄.

𑀭𑀜𑁆𑀜𑁄 𑀓𑀺𑀢𑁆𑀢𑀺𑀲𑀫𑀸𑀤𑁂𑀯𑀻, 𑀓𑀺𑀢𑁆𑀢𑀺𑀦𑀸𑀫𑀸 𑀫𑀦𑁄𑀭𑀫𑀸;

𑀧𑀭𑀺𑀯𑁂𑀡𑀁 𑀅𑀓𑀸𑀭𑀸𑀫𑀁, 𑀣𑀽𑀧𑀸𑀭𑀸𑀫𑀲𑁆𑀲 𑀧𑀘𑁆𑀙𑀢𑁄.

𑀲𑀸 𑀢𑀲𑁆𑀫𑀺𑀁 𑀧𑀭𑀺𑀯𑁂𑀡𑁂 𑀘, 𑀅𑀓𑀸 𑀓𑀧𑁆𑀧𑀸𑀲𑀕𑀸𑀫𑀓𑁂;

𑀘𑀻𑀯𑀭𑀘𑁂𑀢𑀺𑀬𑁂 𑀘𑁂𑀯, 𑀢𑀺𑀲𑁆𑀲𑁄 𑀧𑁄𑀓𑁆𑀔𑀭𑀡𑀻 𑀲𑀼𑀘𑀺.

𑀤𑁆𑀯𑀸𑀤𑀲𑀭𑀢𑀦𑀸𑀬𑀸𑀫𑀁, 𑀥𑀚𑀁 𑀲𑁄𑀡𑁆𑀡𑀫𑀬𑀜𑁆𑀘 𑀲𑀸;

𑀧𑀽𑀚𑁂𑀲𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀁, 𑀳𑁂𑀫𑀫𑀸𑀮𑀺𑀓 𑀘𑁂𑀢𑀺𑀬𑁂.

𑀕𑀺𑀳𑀻𑀦𑀁 𑀯𑀚𑁆𑀚𑀲𑀸𑀮𑀜𑁆𑀘, 𑀧𑀼𑀢𑁆𑀢𑁄 𑀢𑀲𑁆𑀲𑀸 𑀧𑀼𑀭𑁂𑀅𑀓𑀸;

𑀕𑀼𑀡𑀯𑀸𑀲𑀓𑁆𑀓𑀲𑁂𑀦𑀸𑀦𑀻, 𑀪𑀺𑀓𑁆𑀔𑀽𑀦𑀜𑁆𑀘 𑀧𑀼𑀭𑀸𑀩𑀳𑀺.

𑀭𑀸𑀚𑀸 𑀘𑀢𑀼𑀯𑀺𑀳𑀸𑀭𑁂𑀲𑀼, 𑀤𑀺𑀩𑁆𑀩𑀧𑀸𑀲𑀸𑀤𑀲𑀦𑁆𑀦𑀺𑀪𑁂;

𑀫𑀡𑁆𑀟𑀧𑁂 𑀓𑀸𑀭𑀬𑀺𑀢𑁆𑀯𑀸𑀦, 𑀥𑀸𑀢𑀼𑀧𑀽𑀚𑀸 𑀅𑀦𑁂𑀓𑀥𑀸.

𑀯𑀲𑁆𑀲𑀫𑁂𑀓𑀫𑀢𑀺𑀓𑁆𑀓𑀫𑁆𑀫, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀘𑀸𑀭𑀺𑀢𑁆𑀢𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀧𑀭𑀺𑀧𑀸𑀮𑁂𑀲𑀺 𑀲𑀸𑀥𑀼𑀓𑀁.

𑀏𑀯𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺, 𑀉𑀴𑀸𑀭𑀸𑀦𑀺 𑀅𑀦𑁂𑀓𑀥𑀸;

𑀓𑀢𑁆𑀯𑀸 𑀲𑁄𑀴𑀲𑀫𑁂 𑀯𑀲𑁆𑀲𑁂, 𑀭𑀸𑀚𑀸 𑀲𑁄 𑀢𑀺𑀤𑀺𑀯𑀁 𑀕𑀢𑁄.

𑀚𑀸𑀢𑁄 ¶ 𑀧𑀝𑀺𑀘𑁆𑀘 𑀢𑀁 𑀭𑀸𑀚𑀁, 𑀲𑁂𑀦𑀸 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄;

𑀓𑀸𑀮𑀺𑀗𑁆𑀕𑀤𑁂𑀯𑀺𑀬𑀸 𑀧𑀼𑀢𑁆𑀢𑁄, 𑀧𑀢𑁆𑀢𑀭𑀚𑁆𑀚𑁄 𑀢𑀤𑀸 𑀅𑀳𑀼.

𑀉𑀤𑀬𑀲𑁆𑀲 𑀓𑀦𑀺𑀝𑁆𑀞𑀲𑁆𑀲, 𑀬𑀼𑀯𑀭𑀸𑀚𑀧𑀤𑀁 𑀅𑀤𑀸;

𑀧𑀺𑀢𑀼 𑀲𑁂𑀦𑀸𑀧𑀢𑀺 𑀲𑁂𑀦𑁄, 𑀢𑀲𑁆𑀲 𑀲𑁂𑀦𑀸𑀧𑀢𑀺 𑀅𑀳𑀼.

𑀧𑀘𑁆𑀘𑀦𑁆𑀢𑀁 𑀩𑀮𑀫𑀸𑀤𑀸𑀬, 𑀕𑀢𑁂 𑀲𑁂𑀦𑀸𑀧𑀢𑀺𑀫𑁆𑀳𑀺 𑀲𑁄;

𑀫𑀸𑀢𑀭𑀸 𑀲𑀳 𑀯𑀢𑁆𑀢𑀦𑁆𑀢𑀁, 𑀓𑀡𑀺𑀝𑁆𑀞𑀁 𑀢𑀲𑁆𑀲 𑀪𑀸𑀢𑀭𑀁.

𑀫𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀫𑀮𑁆𑀮𑀁, 𑀅𑀓𑀸 𑀲𑁂𑀦𑀸𑀧𑀢𑀺𑀁 𑀢𑀤𑀸;

𑀅𑀫𑀘𑁆𑀘𑀁 𑀉𑀤𑀬𑀁 𑀦𑀸𑀫, 𑀲𑀓𑀁 𑀯𑀘𑀦𑀓𑀸𑀭𑀓𑀁.

𑀢𑀁 𑀲𑀼𑀢𑁆𑀯𑀸 𑀓𑀼𑀧𑀺𑀢𑁄 𑀳𑀼𑀢𑁆𑀯𑀸, 𑀲𑁂𑀦𑁄 𑀲𑁂𑀦𑀸𑀧𑀢𑀺 𑀢𑀤𑀸;

𑀩𑀮𑀫𑀸𑀤𑀸𑀬 𑀆𑀕𑀜𑁆𑀙𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀢𑀯𑁄.

𑀲𑀼𑀢𑁆𑀯𑀸𑀦 𑀢𑀁 𑀫𑀳𑀻𑀧𑀸𑀮𑁄, 𑀓𑀢𑀯𑀦𑁆𑀢𑀁 𑀯𑀸𑀘𑀫𑀢𑁆𑀢𑀦𑁄;

𑀭𑀓𑁆𑀔𑀸𑀫𑀺 𑀢𑀁 𑀅𑀫𑀘𑁆𑀘𑀦𑁆𑀢𑀺, 𑀕𑀢𑁄 𑀦𑀺𑀓𑁆𑀔𑀫𑁆𑀫 𑀭𑁄𑀳𑀡𑀁.

𑀢𑀲𑁆𑀲 𑀫𑀸𑀬𑀸 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀬𑀼𑀯𑀭𑀸𑀚𑀜𑁆𑀘 𑀭𑀸𑀚𑀺𑀦𑀺𑀁;

𑀆𑀤𑀸𑀬 𑀓𑀼𑀧𑀺𑀢𑀸 𑀢𑁂𑀦 𑀆𑀡𑀸𑀧𑁂𑀲𑀺 𑀘𑀫𑀽𑀧𑀢𑀺𑀁.

𑀢𑀸𑀬 𑀲𑁄 𑀲𑀗𑁆𑀕𑀳𑀻𑀢𑁄𑀯, 𑀤𑀫𑀺𑀴𑁂 𑀲𑀦𑁆𑀦𑀺𑀧𑀸𑀢𑀺𑀬;

𑀤𑀢𑁆𑀯𑀸 𑀚𑀦𑀧𑀤𑀁 𑀢𑁂𑀲𑀁, 𑀧𑀼𑀝𑀢𑁆𑀣𑀺𑀦𑀕𑀭𑁂 𑀯𑀲𑀻.

𑀬𑀼𑀚𑁆𑀛𑀺𑀢𑀼𑀁 𑀢𑁂𑀦 𑀲𑁄 𑀭𑀸𑀚𑀸, 𑀩𑀮𑀁 𑀧𑁂𑀲𑁂𑀲𑀺 𑀭𑁄𑀳𑀡𑀸;

𑀲𑁂𑀦𑀸𑀧𑀢𑀺 𑀯𑀺𑀦𑀸𑀲𑁂𑀲𑀺, 𑀲𑀩𑁆𑀩𑀁 𑀢𑀁 𑀭𑀸𑀚𑀺𑀦𑁄 𑀩𑀮𑀁.

𑀤𑀫𑀺𑀴𑀸 𑀢𑁂 𑀚𑀦𑀧𑀤𑀁, 𑀧𑀻𑀴𑁂𑀢𑁆𑀯𑀸 𑀭𑀓𑁆𑀔𑀲𑀸 𑀯𑀺𑀬;

𑀯𑀺𑀮𑀼𑀫𑁆𑀧𑀺𑀢𑁆𑀯𑀸𑀦 𑀕𑀡𑁆𑀳𑀦𑁆𑀢𑀺, 𑀦𑀭𑀸𑀦𑀁 𑀲𑀦𑁆𑀢𑀓𑀁 𑀢𑀤𑀸.

𑀔𑀺𑀢𑁆𑀢𑀸 𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸𑀦, 𑀭𑁄𑀳𑀡𑀁 𑀭𑀸𑀚𑀲𑀦𑁆𑀢𑀺𑀓𑀁;

𑀦𑀺𑀯𑁂𑀤𑁂𑀲𑀼𑀁 𑀧𑀯𑀢𑁆𑀢𑀺𑀁 𑀢𑀁, 𑀫𑀦𑁆𑀢𑁂𑀢𑁆𑀯𑀸 𑀲𑀘𑀻𑀯𑁂𑀳𑀺 𑀲𑁄.

𑀭𑀓𑁆𑀔𑀺𑀢𑀼𑀁 𑀲𑀸𑀲𑀦𑀁 𑀭𑀝𑁆𑀞𑀁, 𑀢𑀫𑁆𑀧𑀳𑀸𑀬 𑀘𑀫𑀽𑀧𑀢𑀺𑀁;

𑀲𑀦𑁆𑀥𑀺𑀁 𑀓𑀢𑁆𑀯𑀸𑀦 𑀲𑁂𑀦𑁂𑀦, 𑀧𑀼𑀴𑀢𑁆𑀣𑀺𑀦𑀕𑀭𑀁 𑀅𑀕𑀸.

𑀫𑀳𑁂𑀲𑀺𑀁 𑀅𑀢𑁆𑀢𑀚𑀁 𑀓𑀢𑁆𑀯𑀸, 𑀧𑀸𑀮𑁂𑀢𑀼𑀁 𑀯𑀁𑀲𑀫𑀢𑁆𑀢𑀦𑁄;

𑀧𑀼𑀢𑁆𑀢𑀁 𑀉𑀧𑁆𑀧𑀸𑀤𑀬𑀺𑀢𑁆𑀯𑀸𑀦, 𑀓𑀲𑁆𑀲𑀧𑀁 𑀦𑀸𑀫 𑀉𑀢𑁆𑀢𑀫𑀁.

𑀯𑀲𑀦𑁆𑀢𑁂 𑀢𑀢𑁆𑀣 𑀮𑀁𑀓𑀺𑀦𑁆𑀤𑁂, 𑀅𑀳𑀺𑀢𑀸 𑀯𑀮𑁆𑀮𑀪𑀸 𑀚𑀦𑀸;

𑀅𑀮𑀪𑀦𑁆𑀢𑀸 𑀲𑀼𑀭𑀁 𑀧𑀸𑀢𑀼-𑀫𑀸𑀭𑀺𑀬𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑀫𑀚𑁆𑀚𑀧𑀸𑀦𑁂 𑀕𑀼𑀡𑀁 𑀯𑀢𑁆𑀯𑀸, 𑀧𑀸𑀬𑁂𑀲𑀼𑀁 𑀢𑀁 𑀫𑀳𑀻𑀧𑀢𑀺𑀁;

𑀧𑀺𑀯𑀺𑀢𑁆𑀯𑀸 𑀫𑀚𑁆𑀚𑀧𑀸𑀦𑀁 𑀲𑁄, 𑀫𑀢𑁆𑀢𑀩𑁆𑀬𑀸𑀴𑁄 𑀅𑀳𑀼 𑀢𑀤𑀸.

𑀆𑀳𑀸𑀭𑀸𑀦𑀁 ¶ 𑀔𑀬𑀁 𑀧𑀢𑁆𑀯𑀸, 𑀘𑀚𑀺𑀢𑁆𑀯𑀸 𑀤𑀼𑀮𑁆𑀮𑀪𑀁 𑀧𑀤𑀁;

𑀫𑀢𑁄 𑀲𑁄 𑀤𑀲𑀫𑁂 𑀯𑀲𑁆𑀲𑁂, 𑀢𑀭𑀼𑀡𑁄𑀬𑁂𑀯 𑀪𑀽𑀧𑀢𑀺.

𑀇𑀢𑁄 𑀯𑀺𑀤𑀺𑀢𑁆𑀯𑀸 𑀔𑀮𑀼𑀧𑀸𑀧𑀫𑀺𑀢𑁆𑀢-

𑀯𑀺𑀥𑁂𑀬𑁆𑀬𑀪𑀸𑀯𑀁 𑀧𑀭𑀺𑀳𑀸𑀦𑀺 𑀳𑁂𑀢𑀼𑀁;

𑀲𑀼𑀔𑀢𑁆𑀢𑀺𑀢𑁄𑀬𑁂𑀯 𑀇𑀤 𑀯𑀸 𑀳𑀼𑀭𑀁 𑀯𑀸;

𑀚𑀳𑀦𑁆𑀢𑀼 𑀢𑁂 𑀖𑁄𑀭𑀯𑀺𑀲𑀁’𑀯 𑀩𑀸𑀮𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂𑀢𑀺 𑀭𑀸𑀚𑀓𑁄 𑀦𑀸𑀫

𑀤𑁆𑀯𑀺𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀫𑀳𑀺𑀦𑁆𑀤𑁄 𑀢𑀁 𑀓𑀡𑀺𑀝𑁆𑀞𑁄 𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀢𑀤𑀘𑁆𑀘𑀬𑁂;

𑀉𑀲𑁆𑀲𑀸𑀧𑀺𑀬 𑀲𑁂𑀢𑀘𑁆𑀙𑀢𑁆𑀢-𑀫𑀦𑀼𑀭𑀸𑀥𑀧𑀼𑀭𑁂 𑀯𑀭𑁂.

𑀲𑁂𑀦 𑀲𑁂𑀦𑀸𑀦𑀻𑀦𑀸’𑀦𑀻𑀢 𑀤𑁂𑀲𑀦𑁆𑀢𑀭𑀚𑀦𑀸 𑀓𑀼𑀮𑁂;

𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑁂𑀲𑀺, 𑀓𑀺𑀘𑁆𑀙𑁂𑀦 𑀤𑀲𑀯𑀘𑁆𑀙𑀭𑁂.

𑀅𑀧𑁂𑀢𑀦𑀻𑀢𑀺 𑀫𑀕𑁆𑀕𑀲𑁆𑀲, 𑀫𑀼𑀤𑀼𑀪𑀽𑀢𑀲𑁆𑀲 𑀲𑀩𑁆𑀩𑀲𑁄;

𑀉𑀧𑁆𑀧𑀸𑀤𑀪𑀸𑀕𑀁 𑀦𑀸𑀤𑀁𑀲𑀼, 𑀢𑀲𑁆𑀲 𑀚𑀸𑀦𑀧𑀤𑀸 𑀢𑀤𑀸.

𑀅𑀘𑁆𑀘𑀦𑁆𑀢𑀁 𑀔𑀻𑀡𑀘𑀺𑀢𑁆𑀢𑁄 𑀲𑁄, 𑀯𑀲𑁆𑀲𑀫𑁆𑀳𑀺 𑀤𑀲𑀫𑁂 𑀯𑀺𑀪𑀽;

𑀯𑀼𑀢𑁆𑀢𑀺𑀤𑀸𑀦𑁂𑀦 𑀦𑀸𑀲𑀓𑁆𑀔𑀺, 𑀲𑀗𑁆𑀕𑀳𑁂𑀢𑀼𑀁 𑀲𑀓𑀁 𑀩𑀮𑀁.

𑀅𑀮𑀤𑁆𑀥 𑀯𑀼𑀢𑁆𑀢𑀺𑀦𑁄 𑀲𑀩𑁆𑀩𑁂, 𑀓𑁂𑀭𑀴𑀸 𑀲𑀳𑀺𑀢𑀸 𑀢𑀢𑁄;

𑀦 𑀯𑀼𑀢𑁆𑀢𑀺𑀤𑀸𑀦𑀁 𑀦𑁄 𑀬𑀸𑀯, 𑀳𑁄𑀢𑀺 𑀫𑀸𑀢𑀸𑀯 𑀪𑀼𑀜𑁆𑀚𑀢𑀼.

𑀇𑀢𑀺 𑀭𑀸𑀚𑀖𑀭𑀤𑁆𑀯𑀸𑀭𑁂, 𑀲𑀸𑀳𑀲𑁂𑀓𑀭𑀲𑀸 𑀪𑀼𑀲𑀁;

𑀘𑀸𑀧𑀳𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀲𑀦𑁆𑀦𑀤𑁆𑀥𑀙𑀼𑀭𑀺𑀓𑀸𑀬𑀼𑀥𑀸.

𑀳𑀢𑁆𑀣𑀲𑀸𑀭𑀁 𑀲𑀫𑀸𑀤𑀸𑀬, 𑀢𑁂 𑀯𑀺𑀯𑀜𑁆𑀘𑀺𑀬 𑀪𑀽𑀧𑀢𑀺;

𑀉𑀫𑁆𑀫𑀕𑁆𑀕𑀢𑁄 𑀯𑀺𑀦𑀺𑀕𑁆𑀕𑀫𑁆𑀫, 𑀢𑀼𑀭𑀺𑀢𑁄 𑀭𑁄𑀳𑀡𑀁 𑀅𑀕𑀸.

𑀲𑀻𑀤𑀼𑀧𑀩𑁆𑀩𑀢𑀕𑀸𑀫𑀫𑁆𑀳𑀺 ¶ , 𑀔𑀦𑁆𑀥𑀯𑀸𑀭𑀁 𑀦𑀺𑀩𑀦𑁆𑀥𑀺𑀬;

𑀪𑀸𑀢𑀼 𑀚𑀸𑀬𑀫𑁆𑀫 𑀳𑁂𑀲𑀺𑀢𑁆𑀢𑁂, 𑀞𑀧𑁂𑀢𑁆𑀯𑀸 𑀲𑁄 𑀢𑀳𑀺𑀁 𑀯𑀲𑀻.

𑀦 𑀘𑀺𑀭𑀲𑁆𑀲𑁂𑀯 𑀢𑀲𑁆𑀲𑀸𑀬, 𑀫𑀢𑀸 𑀬𑀲𑀫𑀳𑀻𑀧𑀢𑀺;

𑀫𑀳𑁂𑀲𑀺𑀢𑁆𑀢𑁂 𑀦𑀺𑀯𑁂𑀲𑁂𑀲𑀺, 𑀲𑀓𑀪𑀸𑀢𑀼𑀲𑁆𑀲 𑀥𑀻𑀢𑀭𑀁.

𑀤𑁂𑀯𑀺𑀬𑀸 𑀢𑀸𑀬 𑀲𑀜𑁆𑀚𑀸𑀢𑁂, 𑀲𑀼𑀢𑁂 𑀓𑀲𑁆𑀲𑀧𑀦𑀸𑀫𑀓𑁂;

𑀅𑀚𑁆𑀛𑀸𑀯𑀼𑀢𑁆𑀢𑀁 𑀯𑀺𑀳𑀸𑀬𑀸’𑀣, 𑀔𑀦𑁆𑀥𑀸𑀯𑀸𑀭𑀁 𑀫𑀳𑀻𑀫𑀢𑀺.

𑀓𑀸𑀭𑀬𑀺𑀢𑁆𑀯𑀸𑀦 𑀦𑀕𑀭𑀁, 𑀓𑀧𑁆𑀧𑀕𑀮𑁆𑀮𑀓𑀕𑀸𑀫𑀓𑁂;

𑀅𑀥𑀺𑀧𑀘𑁆𑀘𑀁 𑀧𑀯𑀢𑁆𑀢𑁂𑀦𑁆𑀢𑁄, 𑀭𑁄𑀳𑀡𑁂 𑀲𑀼𑀘𑀺𑀭𑀁 𑀯𑀲𑀻.

𑀢𑀢𑁄 𑀲𑁂𑀲𑁂𑀲𑀼 𑀞𑀸𑀦𑁂𑀲𑀼, 𑀓𑁂𑀭𑀴𑀸 𑀲𑀻𑀳𑀴𑀸 𑀢𑀤𑀸;

𑀓𑀡𑁆𑀡𑀸𑀝𑀸 𑀘 𑀬𑀣𑀸𑀓𑀸𑀫-𑀫𑀸𑀥𑀺𑀧𑀘𑁆𑀘𑀁 𑀧𑀯𑀢𑁆𑀢𑀬𑀼𑀁.

𑀅𑀣𑀲𑁆𑀲 𑀯𑀸𑀡𑀺𑀚𑁄 𑀏𑀓𑁄, 𑀧𑀭𑀢𑀻𑀭𑀁 𑀇𑀥𑀸𑀕𑀢𑁄;

𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀺𑀁 𑀮𑀁𑀓𑀸𑀬, 𑀘𑁄𑀴𑀭𑀜𑁆𑀜𑁄 𑀦𑀺𑀯𑁂𑀤𑀬𑀺.

𑀲𑁄𑀢𑀁 𑀲𑀼𑀡𑀺𑀢𑁆𑀯𑀸 𑀧𑁂𑀲𑁂𑀲𑀺, 𑀮𑀁𑀓𑀸𑀕𑀳𑀡𑀫𑀸𑀦𑀲𑁄;

𑀩𑀮𑀁 𑀫𑀳𑀦𑁆𑀢𑀁 𑀩𑀮𑀯𑀸, 𑀢𑀁 𑀔𑀺𑀧𑁆𑀧𑀁 𑀮𑀁𑀓𑀫𑁄𑀢𑀭𑀺.

𑀧𑀝𑁆𑀞𑀸𑀬𑁄 𑀢𑀺𑀡𑁆𑀡𑀞𑀸𑀦𑀫𑁆𑀳𑀸, 𑀯𑀺𑀳𑁂𑀞𑁂𑀦𑁆𑀢𑀁 𑀩𑀳𑀽 𑀚𑀦𑁂;

𑀅𑀦𑀼𑀓𑁆𑀓𑀫𑁂𑀦 𑀢𑀁 𑀘𑁄𑀴-𑀩𑀮𑀁 𑀭𑁄𑀳𑀡𑀫𑀚𑁆𑀛𑀕𑀸.

𑀙𑀢𑁆𑀢𑀺𑀁𑀲𑁂 𑀭𑀸𑀚𑀺𑀦𑁄 𑀯𑀲𑁆𑀲𑁂, 𑀫𑀳𑁂𑀲𑀺𑀁 𑀭𑀢𑀦𑀸𑀦𑀺 𑀘;

𑀫𑀓𑀼𑀝𑀜𑁆𑀘 𑀓𑀫𑀸𑀬𑀸𑀢𑀁, 𑀲𑀩𑁆𑀩𑀫𑀸𑀪𑀭𑀡𑀁 𑀢𑀣𑀸.

𑀅𑀫𑀽𑀮𑀺𑀓𑀜𑁆𑀘𑀯𑀚𑀺𑀭-𑀯𑀮𑀬𑀁 𑀤𑁂𑀯𑀤𑀢𑁆𑀢𑀺𑀬𑀁;

𑀅𑀘𑁆𑀙𑁂𑀚𑁆𑀚𑀘𑁆𑀙𑀼𑀭𑀺𑀓𑀁 𑀙𑀺𑀦𑁆𑀦-𑀧𑀝𑁆𑀝𑀺𑀓𑀸 𑀥𑀸𑀢𑀼𑀓𑀜𑁆𑀘 𑀢𑁂.

𑀧𑀯𑀺𑀝𑁆𑀞𑀁 𑀯𑀦𑀤𑀼𑀕𑁆𑀕𑀫𑁆𑀳𑀺, 𑀪𑀬𑀸𑀢𑀜𑁆𑀘 𑀫𑀳𑀻𑀧𑀢𑀺𑀁;

𑀚𑀻𑀯𑀕𑁆𑀕𑀸𑀳𑀫𑀕𑀡𑁆𑀳𑀺𑀁𑀲𑀼, 𑀲𑀦𑁆𑀥𑀺𑀮𑁂𑀲𑀫𑁆𑀧𑀤𑀲𑁆𑀲𑀺𑀬.

𑀫𑀳𑀻𑀧𑀸𑀮𑀁 𑀥𑀦𑀁 𑀢𑀜𑁆𑀘, 𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀢𑀢𑁄;

𑀧𑁂𑀲𑀬𑀺𑀁𑀲𑀼 𑀮𑀳𑀼𑀁 𑀘𑁄𑀴-𑀫𑀳𑀻𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀁.

𑀦𑀺𑀓𑀸𑀬𑀢𑁆𑀢𑀺𑀢𑀬𑁂 𑀥𑀸𑀢𑀼-𑀕𑀩𑁆𑀪𑁂 𑀮𑀁𑀓𑀸𑀢𑀮𑁂 𑀔𑀺𑀮𑁂;

𑀫𑀳𑀸𑀭𑀳𑁂 𑀲𑀼𑀯𑀡𑁆𑀡𑀸𑀤𑀺-𑀧𑀝𑀺𑀩𑀺𑀫𑁆𑀩𑁂 𑀘’𑀦𑀧𑁆𑀧𑀓𑁂.

𑀪𑀺𑀦𑁆𑀤𑀺𑀢𑁆𑀯𑀸 𑀲𑀳𑀲𑀸 𑀲𑀩𑁆𑀩𑁂, 𑀯𑀺𑀳𑀸𑀭𑁂 𑀘 𑀢𑀳𑀺𑀁 𑀢𑀳𑀺𑀁;

𑀬𑀣𑁄 𑀚𑁄𑀳𑀸𑀭𑀺𑀦𑁄 𑀬𑀓𑁆𑀔𑀸, 𑀮𑀗𑁆𑀓𑀸𑀬𑀁 𑀲𑀸𑀭𑀫𑀕𑁆𑀕𑀳𑀼𑀁.

𑀢𑁂 𑀘𑁄𑀴𑀸 𑀭𑀸𑀚𑀭𑀝𑁆𑀞𑀁 𑀢𑀁, 𑀧𑀼𑀮𑀢𑁆𑀣𑀺𑀧𑀼𑀭𑀦𑀺𑀲𑁆𑀲𑀺𑀢𑀸;

𑀭𑀓𑁆𑀔𑀧𑀸𑀲𑀸𑀡𑀓𑀡𑁆𑀟𑀯𑁆𑀳, 𑀞𑀸𑀦𑀸𑀯𑀥𑀺𑀫𑀪𑀼𑀜𑁆𑀚𑀺𑀲𑀼𑀁.

𑀢𑀁 ¶ 𑀓𑀼𑀫𑀸𑀭𑀓𑀫𑀸𑀤𑀸𑀬, 𑀓𑀲𑁆𑀲𑀧𑀁 𑀭𑀝𑁆𑀞𑀯𑀸𑀲𑀺𑀦𑁄;

𑀯𑀟𑁆𑀠𑁂𑀦𑁆𑀢𑀺 𑀘𑁄𑀴𑀪𑀬𑀢𑁄, 𑀕𑁄𑀧𑀬𑀦𑁆𑀢𑀸 𑀲𑀼𑀲𑀸𑀤𑀭𑀸.

𑀘𑁄𑀴𑀭𑀸𑀚𑀸 𑀓𑀼𑀫𑀸𑀭𑀁 𑀢𑀁, 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀁;

𑀕𑀳𑀡𑀢𑁆𑀣𑀸𑀬 𑀧𑁂𑀲𑁂𑀲𑀺, 𑀫𑀳𑀸𑀫𑀘𑁆𑀘𑁂 𑀫𑀳𑀸𑀩𑀮𑁂.

𑀊𑀦𑀁 𑀧𑀜𑁆𑀘𑀲𑀳𑀲𑁆𑀲𑁂𑀦, 𑀬𑁄𑀥𑀮𑀓𑁆𑀔𑀁 𑀲𑀫𑀸𑀤𑀺𑀬;

𑀲𑀩𑁆𑀩𑀁 𑀢𑁂 𑀭𑁄𑀳𑀡𑀁 𑀤𑁂𑀲𑀁, 𑀲𑀗𑁆𑀔𑁄𑀪𑁂𑀲𑀼 𑀫𑀺𑀢𑁄 𑀢𑀢𑁄.

𑀓𑀺𑀢𑁆𑀢𑀺𑀦𑀸𑀫𑁄’𑀣 𑀲𑀘𑀺𑀯𑁄, 𑀫𑀓𑁆𑀔𑀓𑀼𑀤𑁆𑀭𑀽𑀲𑀯𑀸𑀲𑀺𑀓𑁄;

𑀫𑀼𑀤𑁆𑀥𑀦𑀸𑀫𑁄 𑀢𑀣𑀸𑀫𑀘𑁆𑀘𑁄, 𑀫𑀸𑀭𑀕𑀮𑁆𑀮𑀓𑀯𑀸𑀲𑀺𑀓𑁄.

𑀉𑀪𑁄𑀧𑀺 𑀢𑁂 𑀫𑀳𑀸𑀯𑀻𑀭𑀸, 𑀬𑀼𑀤𑁆𑀥𑁄𑀧𑀸𑀬𑀯𑀺𑀘𑀓𑁆𑀔𑀡𑀸;

𑀘𑁄𑀴𑀲𑁂𑀦𑀁 𑀯𑀺𑀦𑀸𑀲𑁂𑀢𑀼-𑀫𑀘𑁆𑀘𑀦𑁆𑀢𑀓𑀢𑀦𑀺𑀘𑁆𑀙𑀬𑀸.

𑀧𑀮𑀼𑀝𑁆𑀞𑀕𑀺𑀭𑀺𑀦𑀸𑀫𑀫𑁆𑀳𑀺, 𑀞𑀸𑀦𑁂 𑀤𑀼𑀕𑁆𑀕𑁂 𑀦𑀺𑀯𑁂𑀲𑀺𑀬;

𑀓𑀢𑁆𑀯𑀸 𑀙𑀫𑀸𑀲𑀁 𑀲𑀗𑁆𑀕𑀸𑀫𑀁, 𑀳𑀦𑀺𑀁𑀲𑀼 𑀤𑀫𑀺𑀴𑁂 𑀩𑀳𑀽𑀁.

𑀳𑀢𑀸𑀯𑀲𑀺𑀝𑁆𑀞𑀸 𑀘𑁄𑀴𑀸𑀢𑀸, 𑀭𑀡𑁂 𑀢𑀲𑁆𑀫𑀺𑀁 𑀪𑀬𑀤𑁆𑀤𑀺𑀢𑀸;

𑀧𑀮𑀸𑀬𑀺𑀢𑁆𑀯𑀸 𑀬𑀣𑀸𑀧𑀼𑀩𑁆𑀩𑀁, 𑀧𑀼𑀮𑀢𑁆𑀢𑀺𑀧𑀼𑀭𑀫𑀸𑀯𑀲𑀼𑀁.

𑀓𑀼𑀫𑀸𑀭𑁄 𑀚𑀬𑀺𑀢𑁄 𑀤𑀺𑀲𑁆𑀯𑀸, 𑀉𑀪𑁄 𑀢𑁂 𑀲𑀘𑀺𑀯𑁂 𑀢𑀤𑀸;

𑀳𑀝𑁆𑀞𑀢𑀼𑀝𑁆𑀞𑁄 ‘‘𑀯𑀭𑀁 𑀢𑀸𑀢𑀸, 𑀕𑀡𑁆𑀳𑀣𑀸’’𑀢𑀺 𑀲 𑀘𑀩𑁆𑀭𑀯𑀻.

𑀩𑀼𑀤𑁆𑀥𑁄 𑀧𑀯𑁂𑀡𑀺𑀕𑀸𑀫𑀁 𑀲𑁄, 𑀯𑀭𑀁 𑀬𑀸𑀘𑀺𑀢𑁆𑀣 𑀓𑀺𑀢𑁆𑀢𑀺𑀓𑁄;

𑀲𑀗𑁆𑀖𑀺𑀓𑀁 𑀕𑀳𑀺𑀢𑀁 𑀪𑀸𑀕𑀁, 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀭𑀁 𑀯𑀭𑀺.

𑀭𑀸𑀚𑀧𑀼𑀢𑁆𑀢𑀯𑀭𑀸𑀮𑀤𑁆𑀥-𑀯𑀭𑀸’𑀫𑀘𑁆𑀘𑀯𑀭𑀸 𑀢𑀤𑀸;

𑀦𑀺𑀤𑁆𑀤𑀭𑀸 𑀲𑀸𑀤𑀭𑀸 𑀯𑀻𑀭𑀸, 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼 𑀢𑀲𑁆𑀲 𑀢𑁂.

𑀭𑀸𑀚𑀸 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺, 𑀯𑀲𑀺𑀢𑁆𑀯𑀸 𑀘𑁄𑀴𑀫𑀡𑁆𑀟𑀮𑁂;

𑀅𑀝𑁆𑀞𑀢𑀸𑀮𑀻𑀲𑀯𑀲𑁆𑀲𑀫𑁆𑀳𑀺, 𑀫𑀳𑀺𑀦𑁆𑀤𑁄 𑀲𑁄 𑀤𑀺𑀯𑀁𑀕𑀢𑁄.

𑀮𑀤𑁆𑀥𑀸’𑀧𑀺 𑀪𑁄𑀕𑀸𑀦𑀦𑀣𑀺𑀭𑀸 𑀪𑀯𑀦𑁆𑀢𑀺;

𑀇𑀘𑁆𑀘𑀧𑁆𑀧𑀫𑀁𑀤𑀁 𑀳𑀺𑀢𑀫𑀸𑀲𑀲𑀸𑀦𑁄,

𑀦𑀺𑀘𑁆𑀘𑀁 𑀲𑀼𑀯𑀺𑀜𑁆𑀜𑀽𑀲𑀼𑀲𑀫𑀸 𑀘𑀭𑁂𑀬𑁆𑀬.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀢𑀺𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀘𑀢𑀼𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀓𑀢𑁆𑀯𑀸 ¶ 𑀯𑀺𑀓𑁆𑀓𑀫𑁆𑀫 𑀩𑀸𑀳𑀽’𑀢𑀺, 𑀦𑀸𑀫 𑀪𑀽𑀧𑀸𑀮𑀲𑀽𑀦𑀼𑀢𑁄;

𑀢𑀲𑁆𑀲𑀸𑀡𑀸𑀬 𑀧𑀯𑀢𑁆𑀢𑀺𑀁𑀲𑀼, 𑀲𑀸𑀤𑀭𑀁 𑀲𑀻𑀳𑀴𑀸 𑀔𑀺𑀮𑀸.

𑀲𑁄 𑀭𑀸𑀚𑀸 𑀤𑀫𑀺𑀴𑁂 𑀳𑀦𑁆𑀢𑀼𑀁, 𑀥𑀦𑀁 𑀲𑀜𑁆𑀘𑀺𑀬’𑀦𑁂𑀓𑀸𑀥𑀸;

𑀲𑀗𑁆𑀕𑀳𑀁 𑀲𑁂𑀯𑀓𑀸𑀦𑀜𑁆𑀘, 𑀓𑀼𑀭𑀼𑀫𑀸𑀦𑁄 𑀬𑀣𑁄𑀘𑀺𑀢𑀁.

𑀅𑀮𑀗𑁆𑀓𑀸𑀭𑀓𑀺𑀭𑀻𑀝𑀸𑀦𑀺, 𑀙𑀢𑁆𑀢𑀲𑀻𑀳𑀸𑀲𑀦𑀸𑀦𑀺 𑀘;

𑀓𑀸𑀭𑀬𑀺𑀢𑁆𑀯𑀸’𑀪𑀺𑀲𑁂𑀓𑀢𑁆𑀣𑀁, 𑀲𑀘𑀺𑀯𑁂𑀳𑀸’𑀪𑀺𑀬𑀸𑀘𑀺𑀢𑁄.

𑀦 𑀬𑀸𑀯 𑀭𑀸𑀚𑀭𑀝𑁆𑀞𑀲𑁆𑀲, 𑀕𑀳𑀡𑀁 𑀳𑁄𑀢𑀺 𑀢𑀸𑀯 𑀫𑁂;

𑀙𑀢𑁆𑀢𑀼𑀲𑁆𑀲𑀸𑀧𑀦𑀓𑀫𑁆𑀫𑁂𑀦, 𑀓𑀺𑀁 𑀢𑁂𑀦𑀸’𑀢𑀺 𑀯𑀺𑀯𑀸𑀭𑀺𑀬.

𑀲𑀢𑀁 𑀦𑀭𑀲𑀳𑀲𑁆𑀲𑀸𑀦𑀁, 𑀲𑀗𑁆𑀓𑀮𑁂𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀲𑀗𑁆𑀕𑀸𑀫𑀸𑀭𑀩𑁆𑀪 𑀓𑀸𑀮𑀫𑁆𑀳𑀺, 𑀯𑀸𑀢𑀭𑁄𑀕𑀸𑀪𑀺𑀧𑀻𑀴𑀺𑀢𑁄.

𑀬𑀼𑀚𑁆𑀛𑀺𑀢𑀼𑀁 𑀲𑀫𑀬𑁄 𑀦𑁂𑀢𑀺, 𑀤𑁆𑀯𑀸𑀤𑀲𑁂 𑀯𑀘𑁆𑀙𑀭𑁂 𑀮𑀳𑀼𑀁;

𑀉𑀧𑁂𑀘𑁆𑀘 𑀤𑁂𑀯𑀦𑀕𑀭𑀁, 𑀕𑀜𑁆𑀙𑀺𑀤𑁂𑀯𑀲𑀳𑀩𑁆𑀬𑀢𑀁.

𑀓𑀺𑀢𑁆𑀢𑀺𑀦𑀸𑀫𑁄 𑀘 𑀲𑀘𑀺𑀯𑁄, 𑀲𑁂𑀦𑀸𑀧𑀘𑁆𑀘𑀫𑀥𑀺𑀝𑁆𑀞𑀺𑀢𑁄;

𑀭𑀚𑁆𑀚𑀢𑁆𑀣𑀺𑀓𑁄 𑀤𑀺𑀦𑀸𑀦𑀝𑁆𑀞, 𑀦𑀺𑀚𑀸𑀡𑀁 𑀲𑀫𑁆𑀧𑀯𑀢𑁆𑀢𑀬𑀺.

𑀖𑀸𑀢𑁂𑀢𑁆𑀯𑀸 𑀢𑀁 𑀫𑀳𑀸𑀮𑀸𑀦-𑀓𑀺𑀢𑁆𑀢𑀺𑀦𑀸𑀫𑁄 𑀫𑀳𑀩𑁆𑀩𑀮𑁄;

𑀧𑀢𑁆𑀯𑀸’𑀪𑀺𑀲𑁂𑀓𑀁 𑀪𑀼𑀜𑁆𑀚𑀦𑁆𑀢𑁄, 𑀤𑁂𑀲𑀁 𑀢𑀁 𑀭𑁄𑀳𑀡𑀯𑁆𑀳𑀬𑀁.

𑀲𑀁𑀯𑀘𑁆𑀙𑀭𑀫𑁆𑀳𑀺 𑀢𑀢𑀺𑀬𑁂, 𑀘𑁄𑀴𑀬𑀼𑀤𑁆𑀥𑁂 𑀧𑀭𑀸𑀚𑀺𑀢𑁄;

𑀲𑀳𑀢𑁆𑀣𑁂𑀦 𑀲𑀓𑀁 𑀲𑀻𑀲𑀁, 𑀙𑀺𑀦𑁆𑀤𑀺𑀢𑁆𑀯𑀸 𑀲𑀳𑀲𑀸 𑀫𑀭𑀺.

𑀢𑀤𑀸𑀧𑀺𑀢𑁂 𑀓𑀺𑀭𑀻𑀝𑀸𑀤𑀺-𑀥𑀦𑀲𑀸𑀭𑀁 𑀲𑀫𑀸𑀤𑀺𑀬;

𑀧𑁂𑀲𑁂𑀲𑀼𑀁 𑀤𑀫𑀺𑀴𑀸 𑀘𑁄𑀴-𑀫𑀳𑀻𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀁.

𑀪𑀬𑀸 𑀲𑀭𑀝𑁆𑀞𑀁 𑀳𑀺𑀢𑁆𑀯𑀸’𑀣, 𑀤𑀼𑀝𑁆𑀞𑀤𑁂𑀲𑁂 𑀯𑀲𑀁 𑀢𑀤𑀸;

𑀏𑀓𑁄 𑀯𑀺𑀓𑁆𑀓𑀫𑀧𑀡𑁆𑀟𑀽𑀢𑀺, 𑀯𑀺𑀲𑁆𑀲𑀼𑀢𑁄 𑀧𑀢𑁆𑀣𑀺𑀯𑀢𑁆𑀢𑀚𑁄.

𑀯𑀺𑀜𑁆𑀜𑀸𑀢𑀮𑀗𑁆𑀓𑀸𑀯𑀼𑀢𑁆𑀢𑀦𑁆𑀢𑁄, 𑀤𑁂𑀲𑀫𑀸𑀕𑀫𑁆𑀫 𑀭𑁄𑀳𑀡𑀁;

𑀓𑀸𑀴𑀢𑀺𑀢𑁆𑀣𑁂 𑀯𑀲𑀁 𑀯𑀲𑁆𑀲-𑀫𑁂𑀓𑀁 𑀭𑀚𑁆𑀚𑀫𑀓𑀸𑀭𑀬𑀺.

𑀭𑀸𑀫𑀦𑁆𑀯𑀬𑀲𑀫𑀼𑀩𑁆𑀪𑀽𑀢𑁄 ¶ , 𑀢𑀤𑀸𑀬𑀼𑀚𑁆𑀛 𑀧𑀼𑀭𑀸𑀕𑀢𑁄;

𑀚𑀕𑀢𑀻 𑀧𑀸𑀮𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑁄 𑀪𑀽𑀪𑀼𑀚𑀢𑁆𑀢𑀚𑁄.

𑀭𑀡𑁂 𑀯𑀺𑀓𑁆𑀓𑀫𑀧𑀡𑁆𑀟𑀼𑀢𑀁, 𑀖𑀸𑀢𑀸𑀧𑁂𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀢𑀢𑁄 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀭𑁄𑀳𑀡𑁂.

𑀢𑀫𑁆𑀧𑀺 𑀘𑁄𑀴𑀸𑀭𑀡𑁂 𑀳𑀦𑁆𑀢𑁆𑀯𑀸, 𑀫𑀳𑁂𑀲𑀺𑀁 𑀥𑀻𑀢𑀭𑀸 𑀲𑀳;

𑀯𑀺𑀢𑁆𑀢𑀲𑀸𑀭𑀜𑁆𑀘 𑀲𑀸𑀓𑀮𑀁, 𑀘𑁄𑀴𑀭𑀝𑁆𑀞𑀫𑀧𑁂𑀲𑀬𑀼𑀁.

𑀭𑀸𑀚𑀸 𑀧𑀭𑀓𑁆𑀓𑀫𑁄 𑀦𑀸𑀫, 𑀧𑀡𑁆𑀟𑀼𑀭𑀸𑀚𑀲𑀼𑀢𑁄 𑀢𑀢𑁄;

𑀅𑀓𑀸 𑀯𑀲𑁆𑀲𑀤𑁆𑀯𑀬𑀁 𑀘𑁄𑀴𑀸, 𑀖𑀸𑀢𑁂𑀲𑀼𑀁 𑀢𑀫𑁆𑀧𑀺 𑀬𑀼𑀚𑁆𑀛𑀺𑀬.

𑀕𑀢𑀸 𑀅𑀲𑁂𑀲𑀸 𑀯𑀺𑀯𑀲𑀸 𑀯𑀺𑀦𑀸𑀲𑀁;

𑀇𑀘𑁆𑀘𑁂𑀯𑀫𑀜𑁆𑀜𑀸𑀬 𑀲𑀤𑀸 𑀲𑀧𑀜𑁆𑀜𑁄,

𑀢𑀡𑁆𑀳𑀓𑁆𑀔𑀬𑁂𑀬𑁂𑀯 𑀭𑀢𑀺𑀁 𑀓𑀭𑁂𑀬𑁆𑀬.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑀢𑀼𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀧𑀜𑁆𑀘𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀮𑁄𑀓𑀦𑀸𑀫𑁄 𑀘𑀫𑀽𑀦𑀸𑀣𑁄, 𑀫𑀓𑁆𑀔𑀓𑀼𑀤𑁆𑀭𑀽𑀲𑀯𑀸𑀲𑀺𑀓𑁄;

𑀲𑀘𑁆𑀘𑀧𑀝𑀺𑀜𑁆𑀜𑁄 𑀥𑀻𑀢𑀺𑀫𑀸, 𑀘𑁄𑀴𑀤𑀧𑁆𑀧𑀯𑀺𑀖𑀸𑀢𑀦𑁄.

𑀅𑀪𑀺𑀪𑀽𑀬 𑀚𑀦𑁂 𑀧𑀢𑁆𑀯𑀸, 𑀭𑀚𑁆𑀚𑀁 𑀭𑁄𑀳𑀡𑀫𑀡𑁆𑀟𑀮𑁂;

𑀯𑀲𑀻 𑀓𑀸𑀚𑀭𑀕𑀸𑀫𑀫𑁆𑀳𑀺, 𑀘𑀸𑀭𑀺𑀢𑁆𑀢𑀯𑀺𑀥𑀺𑀓𑁄𑀯𑀺𑀤𑁄.

𑀅𑀳𑀼 𑀢𑀤𑀸 𑀓𑀺𑀢𑁆𑀢𑀺𑀦𑀸𑀫𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀢𑀲𑁆𑀲 𑀯𑀁𑀲𑀸𑀤𑀺𑀲𑀫𑁆𑀧𑀢𑁆𑀢𑀻, 𑀦𑀼𑀧𑀼𑀩𑁆𑀩𑁂𑀦 𑀧𑀯𑀼𑀘𑁆𑀘𑀢𑁂.

𑀲𑀼𑀢𑁄 𑀓𑀲𑁆𑀲𑀧𑀪𑀽𑀧𑀲𑁆𑀲, 𑀫𑀸𑀡𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁄;

𑀆𑀤𑀺𑀧𑀸𑀤𑁄 𑀅𑀳𑀼 𑀥𑀻𑀭𑁄, 𑀲𑀤𑀸𑀘𑀸𑀭𑀯𑀺𑀪𑀽𑀲𑀺𑀢𑁄.

𑀢𑀲𑁆𑀲𑀸’𑀣 ¶ 𑀚𑁂𑀝𑁆𑀞𑀓𑁄 𑀪𑀸𑀢𑀸, 𑀫𑀸𑀡𑀯𑀫𑁆𑀫𑁄 𑀫𑀳𑀸𑀫𑀢𑀺;

𑀕𑁄𑀓𑀡𑁆𑀡𑀓𑀲𑀫𑀻𑀧𑀝𑁆𑀞-𑀦𑀤𑀻𑀢𑀻𑀭𑁂 𑀦𑀺𑀲𑀻𑀤𑀺𑀬.

𑀓𑀢𑀫𑀦𑁆𑀢𑀼𑀧𑀘𑀸𑀭𑁄 𑀲𑁄, 𑀬𑀣𑀸𑀯𑀺𑀥𑀺𑀫𑀲𑁂𑀲𑀢𑁄;

𑀅𑀓𑁆𑀔𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀫𑀦𑁆𑀢𑀁 𑀚𑀧𑁆𑀧𑀺𑀢𑀼𑀫𑀸𑀭𑀪𑀺.

𑀓𑀼𑀫𑀸𑀭𑁄 𑀓𑀺𑀭 𑀪𑀢𑁆𑀢𑀕𑁆𑀕𑁂, 𑀧𑀸𑀢𑀼𑀭𑀸𑀲𑀺 𑀲𑀯𑀸𑀳𑀦𑁄;

𑀲𑀺𑀔𑀡𑁆𑀟𑀺 𑀫𑀼𑀔𑀢𑀼𑀡𑁆𑀟𑁂𑀦, 𑀩𑀮𑀺𑀧𑀝𑁆𑀝𑀁 𑀯𑀺𑀔𑀡𑁆𑀟𑀺𑀬.

𑀲𑀘𑁆𑀙𑀺𑀤𑁆𑀤𑀓𑁂 𑀦𑀸𑀴𑀺𑀓𑁂𑀭-𑀓𑀧𑀸𑀮𑁂 𑀯𑀺𑀘𑁆𑀘𑀼𑀦𑁄𑀤𑀓𑁂;

𑀮𑀽𑀔𑁂 𑀚𑀮𑀫𑀧𑀲𑁆𑀲𑀦𑁆𑀢𑁄, 𑀚𑀧𑀦𑁆𑀢𑀲𑁆𑀲 𑀫𑀼𑀔𑀁𑀕𑀢𑁄.

𑀢𑀢𑁄 𑀪𑀸𑀯𑀺𑀦𑀺𑀁 𑀲𑀺𑀤𑁆𑀥𑀺, 𑀫𑀧𑁂𑀓𑁆𑀔𑀁 𑀦𑀬𑀦𑀁 𑀲𑀓𑀁;

𑀢𑀲𑁆𑀲𑁄𑀧𑀦𑁂𑀲𑀺, 𑀦𑀺𑀩𑁆𑀪𑀺𑀚𑁆𑀚, 𑀲𑁄𑀧𑀺 𑀢𑀁 𑀲𑀳𑀲𑀸𑀧𑀺𑀘𑀺.

𑀓𑀼𑀫𑀸𑀭𑁄 𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑁄, 𑀓𑀼𑀫𑀸𑀭𑀲𑁆𑀲𑀸𑀪𑀺𑀧𑀢𑁆𑀣𑀺𑀢𑀁;

𑀯𑀭𑀁 𑀧𑀤𑀸𑀬 𑀦𑀪𑀲𑀸, 𑀭𑀸𑀚𑀫𑀸𑀦𑁄 𑀕𑀢𑁄 𑀢𑀢𑁄.

𑀪𑀺𑀦𑁆𑀦𑁂𑀓𑀦𑀬𑀦𑀁 𑀤𑀺𑀲𑁆𑀯𑀸, 𑀲𑀘𑀺𑀯𑀸𑀢𑀁 𑀧𑀭𑁄 𑀤𑀺𑀲𑀼𑀁;

𑀯𑀭𑀮𑀸𑀪𑀁 𑀧𑀓𑀸𑀲𑁂𑀢𑁆𑀯𑀸, 𑀲𑀫𑀲𑁆𑀲𑀸𑀲𑁂𑀲𑀺 𑀲𑁄 𑀚𑀦𑁂.

𑀢𑀢𑁄 𑀲𑁄 𑀲𑀘𑀺𑀯𑀸𑀢𑀲𑁆𑀲, 𑀲𑀦𑁆𑀢𑀼𑀝𑁆𑀞𑀸𑀭𑀸𑀥𑀬𑀺𑀁𑀲𑀼 𑀢𑀁;

𑀅𑀦𑀼𑀭𑀸𑀥𑀧𑀼𑀭𑀁 𑀧𑀢𑁆𑀯𑀸, 𑀪𑀺𑀲𑁂𑀓𑁄 𑀓𑀸𑀭𑀺𑀬𑁄 𑀇𑀢𑀺.

𑀅𑀢𑁆𑀣𑁄 𑀓𑁄 𑀫𑀫𑀭𑀚𑁆𑀚𑁂𑀦, 𑀯𑀺𑀓𑀮𑀗𑁆𑀕𑀲𑁆𑀲 𑀲𑀫𑁆𑀧𑀢𑀺;

𑀢𑀧𑁄𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑁆𑀚𑀫𑀼𑀧𑀕𑀫𑁆𑀫𑀳𑀁.

𑀓𑀡𑀺𑀝𑁆𑀞𑁄 𑀫𑀸𑀡𑀦𑀸𑀫𑁄 𑀘, 𑀮𑀗𑁆𑀓𑀸𑀭𑀚𑁆𑀚𑀁 𑀓𑀫𑀸𑀕𑀢𑀁;

𑀧𑀸𑀮𑁂𑀢𑀼 𑀇𑀢𑀺 𑀲𑁄 𑀭𑀚𑁆𑀚𑀁, 𑀲𑀫𑁆𑀧𑀢𑁆𑀢𑀁 𑀲𑀫𑁆𑀧𑀝𑀺𑀓𑁆𑀔𑀺𑀧𑀺.

𑀯𑀺𑀜𑁆𑀜𑀸𑀢𑀘𑀺𑀢𑁆𑀢𑀲𑀜𑁆𑀘𑀸𑀭𑀸, 𑀲𑀘𑀺𑀯𑀸 𑀢𑀲𑁆𑀲 𑀲𑀩𑁆𑀩𑀣𑀸;

𑀯𑀢𑁆𑀢𑀼𑀫𑁂𑀢𑀁 𑀓𑀡𑀺𑀝𑁆𑀞𑀲𑁆𑀲, 𑀧𑁂𑀲𑁂𑀲𑀼𑀁 𑀧𑀼𑀭𑀺𑀲𑁂 𑀢𑀤𑀸.

𑀲𑀼𑀢𑁆𑀯𑀸 𑀢𑀁 𑀲𑀻𑀖𑀫𑀸𑀕𑀫𑁆𑀫, 𑀧𑀲𑁆𑀲𑀺𑀢𑁆𑀯𑀸 𑀲𑀓𑀪𑀸𑀢𑀭𑀁;

𑀧𑀢𑀺𑀢𑁆𑀯𑀸 𑀧𑀸𑀤𑀫𑀽𑀮𑀫𑁆𑀳𑀺, 𑀩𑀳𑀼𑀁 𑀓𑀦𑁆𑀤𑀺𑀬 𑀭𑁄𑀤𑀺𑀬.

𑀚𑁂𑀝𑁆𑀞𑁂𑀦 𑀪𑀸𑀢𑀭𑀸 𑀲𑀤𑁆𑀥𑀺-𑀫𑀦𑀼𑀭𑀸𑀥𑀧𑀼𑀭𑀁 𑀕𑀢𑁄;

𑀫𑀓𑀼𑀝𑀁 𑀢𑀢𑁆𑀣 𑀥𑀸𑀭𑁂𑀲𑀺, 𑀚𑁂𑀝𑁆𑀞𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁄.

𑀢𑀢𑁄’𑀪𑀬𑀕𑀺𑀭𑀺𑀁 𑀕𑀦𑁆𑀢𑁆𑀯𑀸, 𑀧𑀩𑁆𑀩𑀚𑁆𑀚𑀁 𑀲𑀓𑀪𑀸𑀢𑀼𑀦𑁄;

𑀬𑀢 𑀬𑁄 𑀢𑀢𑁆𑀣 𑀬𑀸𑀘𑀺𑀢𑁆𑀣, 𑀩𑀳𑀼𑀫𑀸𑀦𑀧𑀼𑀭𑀲𑁆𑀲𑀭𑀁.

𑀢𑀢𑁄 𑀢𑁂 𑀬𑀢𑀬𑁄 𑀢𑀲𑁆𑀲, 𑀧𑀩𑁆𑀩𑀚𑁆𑀚𑀫𑀼𑀧𑀲𑀫𑁆𑀧𑀤𑀁;

𑀅𑀓𑀁𑀲𑀼 𑀯𑀺𑀓𑀮𑀗𑁆𑀕𑀲𑁆𑀲, 𑀲𑀺𑀓𑁆𑀔𑀸𑀧𑀤𑀦𑀺𑀭𑀸𑀤𑀭𑀸.

𑀧𑀭𑀺𑀯𑁂𑀡𑀫𑀼𑀢𑁆𑀢𑀭𑁄𑀴-𑀫𑀼𑀴𑀸𑀭𑀁 ¶ 𑀢𑀲𑁆𑀲 𑀓𑀸𑀭𑀺𑀬;

𑀓𑀢𑁆𑀯𑀸 𑀢𑀁 𑀧𑀭𑀺𑀯𑁂𑀡𑀲𑁆𑀲, 𑀲𑀸𑀫𑀺𑀓𑀁 𑀥𑀭𑀡𑀻 𑀧𑀢𑀺.

𑀪𑀺𑀓𑁆𑀔𑀽𑀦𑀁 𑀙𑀲𑀢𑀁 𑀢𑀢𑁆𑀣, 𑀯𑀺𑀥𑀸𑀬 𑀢𑀤𑀥𑀻𑀦𑀓𑀁;

𑀧𑀭𑀺𑀳𑀸𑀭𑁂 𑀅𑀤𑀸 𑀢𑀲𑁆𑀲, 𑀧𑁂𑀲𑁆𑀲𑀯𑀕𑁆𑀕𑁂 𑀘 𑀧𑀜𑁆𑀘 𑀲𑁄.

𑀲𑀫𑀧𑁆𑀧𑁂𑀲𑀺 𑀘 𑀲𑁄 𑀦𑀸𑀦𑀸-𑀲𑀺𑀧𑁆𑀧𑀓𑀫𑁆𑀫𑀯𑀺𑀘𑀓𑁆𑀔𑀡𑁂;

𑀚𑀦𑁂 𑀘𑀸𑀓𑀸 𑀢𑀤𑀸𑀬𑀢𑁆𑀢𑁂, 𑀲𑁄 𑀤𑀸𑀞𑀸𑀥𑀸𑀢𑀼𑀭𑀓𑁆𑀔𑀺𑀬𑁂.

𑀢𑀲𑁆𑀲𑁂𑀯𑀸𑀤𑀓𑀭𑀸’𑀳𑁂𑀲𑀼𑀁, 𑀪𑀺𑀓𑁆𑀔𑀽’𑀪𑀬𑀕𑀺𑀭𑀺𑀫𑁆𑀳𑀺 𑀢𑁂;

𑀭𑀸𑀚𑀸 𑀘 𑀮𑁄𑀓𑀁 𑀧𑀸𑀮𑁂𑀲𑀺, 𑀲𑀫𑁆𑀫𑀸 𑀢𑀲𑁆𑀲𑀸𑀦𑀼𑀲𑀺𑀝𑁆𑀞𑀺𑀬𑀸.

𑀚𑀦𑀸 𑀢𑀩𑁆𑀩𑀁𑀲𑀚𑀸 𑀓𑁂𑀘𑀺, 𑀢𑀁 𑀭𑀚𑁆𑀚𑀦𑀺𑀭𑀧𑁂𑀓𑁆𑀔𑀓𑀸;

𑀦𑀺𑀯𑀲𑀺𑀁𑀲𑀼 𑀬𑀣𑀸𑀓𑀸𑀫𑀁, 𑀫𑀳𑀸𑀲𑀸𑀫𑀺 𑀧𑀤𑀁𑀲𑀺𑀢𑀸.

𑀏𑀢𑀲𑁆𑀲 𑀫𑀸𑀡𑀯𑀫𑁆𑀫𑀲𑁆𑀲, 𑀭𑀜𑁆𑀜𑁄 𑀥𑀫𑁆𑀫𑀦𑀬𑀜𑁆𑀜𑀼𑀦𑁄;

𑀅𑀕𑁆𑀕𑀩𑁄𑀥𑀺𑀓𑀼𑀫𑀸𑀭𑀸𑀤𑀺-𑀧𑀼𑀢𑁆𑀢𑀦𑀢𑁆𑀢𑀼𑀓𑁆𑀓𑀫𑀸𑀕𑀢𑁂.

𑀯𑀁𑀲𑁂 𑀯𑀺𑀲𑀼𑀤𑁆𑀥𑁂 𑀚𑀸𑀢𑀲𑁆𑀲, 𑀪𑀽𑀧𑀸𑀮𑀦𑁆𑀯𑀬𑀫𑀼𑀤𑁆𑀥𑀦𑀺;

𑀲𑀫𑀸𑀲𑁄𑀴𑀲𑀓𑀗𑁆𑀓𑀸𑀬𑀁, 𑀲𑀫𑁆𑀫𑀸 𑀭𑀚𑁆𑀚𑀸𑀦𑀼𑀲𑀸𑀲𑀺𑀦𑁄.

𑀫𑀳𑀻𑀧𑀲𑁆𑀲 𑀫𑀳𑀺𑀦𑁆𑀤𑀲𑁆𑀲, 𑀤𑀼𑀯𑁂 𑀫𑀸𑀓𑀼𑀮𑀥𑀻𑀢𑀭𑁄;

𑀤𑁂𑀯𑀮𑀸 𑀮𑁄𑀓𑀺𑀓𑀸 𑀘𑀸𑀢𑀺, 𑀦𑀸𑀫𑀢𑁄 𑀯𑀺𑀲𑁆𑀲𑀼𑀢𑀸 𑀲𑀼𑀪𑀸.

𑀏𑀢𑀸𑀲𑀼 𑀤𑁆𑀯𑀻𑀲𑀼 𑀥𑀻𑀢𑀸𑀲𑀼, 𑀮𑁄𑀓𑀺𑀓𑀸 𑀫𑀸𑀢𑀼𑀮𑀢𑁆𑀢𑀚𑀁;

𑀧𑀝𑀺𑀘𑁆𑀘 𑀭𑀸𑀚𑀢𑀦𑀬𑀁, 𑀲𑀼𑀪𑀁 𑀓𑀲𑁆𑀲𑀧𑀦𑀸𑀫𑀓𑀁.

𑀲𑀸 𑀫𑁄𑀕𑁆𑀕𑀮𑁆𑀮𑀸𑀦 𑀮𑁄𑀓𑀯𑁆𑀳𑁂, 𑀧𑀼𑀢𑁆𑀢𑁂 𑀤𑁆𑀯𑁂 𑀮𑀪𑀺 𑀲𑁄𑀪𑀦𑁂;

𑀢𑁂𑀲𑀼 𑀚𑁂𑀝𑁆𑀞𑀲𑀼𑀢𑁄 𑀮𑁄𑀓-𑀲𑀸𑀲𑀦𑀸𑀥𑀸𑀭𑀓𑁄𑀯𑀺𑀤𑁄.

𑀫𑀳𑀸𑀲𑀸𑀫𑀻𑀢𑀺 𑀧𑀜𑁆𑀜𑀸𑀢𑁄, 𑀲𑀗𑁆𑀖𑀼𑀧𑀸𑀲𑀦𑀧𑀸𑀮𑀬𑁄;

𑀦𑁂𑀓𑀲𑀸𑀭𑀕𑀼𑀡𑀸𑀯𑀸𑀲𑁄, 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀭𑁄𑀳𑀡𑁂.

𑀤𑀸𑀞𑁄𑀧𑀢𑀺𑀲𑁆𑀲 𑀭𑀸𑀚𑀲𑁆𑀲, 𑀦𑀢𑁆𑀢𑀸 𑀲𑀼𑀕𑀢𑀲𑀸𑀲𑀦𑁂;

𑀧𑀩𑁆𑀩𑀚𑁆𑀚𑀽𑀧𑀕𑀢𑁄 𑀲𑀤𑁆𑀥𑁄, 𑀥𑀼𑀢𑀯𑀸 𑀲𑀻𑀮𑀲𑀁𑀯𑀼𑀢𑁄.

𑀧𑀳𑀺𑀢𑀢𑁆𑀢𑁄 𑀯𑀺𑀘𑀺𑀢𑁆𑀢𑁄𑀲𑁄, 𑀧𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀻;

𑀕𑀼𑀡𑀁 𑀲𑀩𑁆𑀩𑀢𑁆𑀣 𑀯𑀡𑁆𑀡𑁂𑀲𑀼𑀁, 𑀢𑀲𑁆𑀫𑀺𑀁 𑀤𑁂𑀯𑀸 𑀧𑀲𑀻𑀤𑀺𑀬.

𑀕𑀼𑀡𑀁 𑀲𑀼𑀡𑀺𑀢𑁆𑀯𑀸 𑀮𑀁𑀓𑀺𑀦𑁆𑀤𑁄, 𑀢𑀤𑀸 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀁;

𑀉𑀧𑀲𑀗𑁆𑀓𑀫𑁆𑀫 𑀢𑀁 𑀦𑀢𑁆𑀯𑀸, 𑀓𑀸𑀢𑀼𑀫𑀢𑁆𑀢𑀸𑀦𑀼𑀲𑀸𑀲𑀦𑀁.

𑀆𑀭𑀸𑀥𑀬𑀫𑀦𑀺𑀘𑁆𑀙𑀦𑁆𑀢𑀁, 𑀬𑀸𑀘𑀺𑀢𑁆𑀯𑀸𑀦 𑀧𑀼𑀦𑀧𑁆𑀧𑀼𑀦𑀁;

𑀆𑀦𑀻𑀬 𑀯𑀸𑀲𑀬𑀺𑀢𑁆𑀯𑀸 𑀢𑀁, 𑀧𑀸𑀲𑀸𑀤𑁂 𑀲𑀸𑀥𑀼𑀓𑀸𑀭𑀺𑀢𑁂.

𑀬𑀢𑀺𑀲𑁆𑀲𑀭𑀲𑁆𑀲 ¶ 𑀯𑀲𑀢𑁄, 𑀓𑀢𑁆𑀣 𑀭𑀸𑀚𑀸𑀕𑀼𑀡𑀧𑁆𑀧𑀺𑀬𑁄;

𑀢𑀲𑁆𑀲𑀸𑀦𑀼𑀲𑀺𑀝𑁆𑀞𑀺𑀫𑀕𑁆𑀕𑀝𑁆𑀞𑁄, 𑀮𑁄𑀓𑀁 𑀥𑀫𑁆𑀫𑁂𑀦 𑀧𑀸𑀮𑀬𑀺.

𑀉𑀤𑁆𑀤𑀺𑀲𑁆𑀲𑀸𑀭𑀸𑀥𑀦𑀁 𑀲𑀫𑁆𑀫𑀸, 𑀮𑀁𑀓𑀺𑀦𑁆𑀤𑁂𑀦 𑀓𑀢𑀁 𑀢𑀤𑀸;

𑀲𑁂𑀮𑀦𑁆𑀢𑀭𑀸𑀪𑀺𑀦𑀺𑀓𑁆𑀔𑀫𑁆𑀫, 𑀬𑀢𑀺𑀦𑁆𑀤𑁄 𑀲𑁄 𑀤𑀬𑀸𑀦𑀼𑀕𑁄.

𑀬𑀢𑁄 𑀪𑀺𑀓𑁆𑀔𑀽 𑀲𑀫𑀽𑀳𑁂𑀢𑁆𑀯𑀸, 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀬𑀢𑁆𑀣 𑀲𑁄;

𑀲𑁂𑀮𑀦𑁆𑀢𑀭𑀲𑀫𑀽𑀳𑁄’𑀢𑀺, 𑀯𑀺𑀓𑁆𑀔𑁆𑀬𑀸𑀢𑀺𑀁 𑀲𑁄 𑀢𑀢𑁄 𑀕𑀢𑁄.

𑀢𑀢𑁄 𑀧𑀝𑁆𑀞𑀸𑀬 𑀯𑀸𑀲𑁂𑀢𑁆𑀯𑀸, 𑀭𑀢𑁆𑀢𑀺𑀬𑀁 𑀤𑁂𑀯𑀧𑀮𑁆𑀮𑀺𑀬𑀁;

𑀤𑁂𑀯𑀢𑀸𑀦𑀼𑀫𑀢𑀁 𑀪𑀺𑀓𑁆𑀔𑀼𑀁, 𑀫𑀽𑀮𑀞𑀸𑀦𑁂 𑀞𑀧𑁂𑀦𑁆𑀢𑀺 𑀳𑀺.

𑀫𑀽𑀮𑀢𑁆𑀢𑀫𑀸𑀯𑀲𑀦𑁆𑀢𑀸𑀦𑀁, 𑀬𑀢𑀻𑀦𑀫𑀦𑀼𑀲𑀸𑀲𑀦𑀸;

𑀮𑀁𑀓𑀺𑀲𑁆𑀲𑀭𑀸 𑀧𑀯𑀢𑁆𑀢𑀦𑁆𑀢𑀺, 𑀧𑀸𑀮𑁂𑀦𑁆𑀢𑀸 𑀮𑁄𑀓𑀲𑀸𑀲𑀦𑀁.

𑀢𑀲𑁆𑀲 𑀤𑀸𑀞𑁄𑀧𑀢𑀺𑀲𑁆𑀲𑀲𑁆𑀲, 𑀯𑀁𑀲𑀚𑀁 𑀭𑀸𑀚𑀧𑀼𑀢𑁆𑀢𑀓𑀁;

𑀩𑁄𑀥𑀺𑀁 𑀧𑀝𑀺𑀘𑁆𑀘 𑀢𑀩𑁆𑀩𑀁𑀲𑀸, 𑀩𑀼𑀤𑁆𑀥𑀦𑀸𑀫𑀸 𑀓𑀼𑀫𑀸𑀭𑀺𑀓𑀸.

𑀅𑀮𑀢𑁆𑀣 𑀮𑁄𑀓𑀺𑀢𑀁 𑀦𑀸𑀫, 𑀥𑀻𑀢𑀭𑀁 𑀯𑀭𑀮𑀓𑁆𑀔𑀡𑀁;

𑀓𑀸𑀮𑁂𑀦 𑀲𑀸 𑀧𑀤𑀺𑀦𑁆𑀦𑀸’𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀥𑀻𑀫𑀢𑁄.

𑀲𑀸 𑀢𑀁 𑀧𑀝𑀺𑀘𑁆𑀘 𑀓𑀺𑀢𑁆𑀢𑀺𑀜𑁆𑀘, 𑀫𑀺𑀢𑁆𑀢𑀁 𑀦𑀸𑀫 𑀓𑀼𑀫𑀸𑀭𑀺𑀓𑀁;

𑀫𑀳𑀺𑀦𑁆𑀤𑀁 𑀭𑀓𑁆𑀔𑀺𑀢𑀁 𑀘𑀸𑀧𑀺, 𑀮𑀢𑀺𑀢𑁆𑀣 𑀘𑀢𑀼𑀭𑁄 𑀧𑀚𑀸.

𑀅𑀳𑀼 𑀚𑁂𑀝𑁆𑀞𑀲𑀼𑀢𑁄 𑀥𑀻𑀭𑁄, 𑀯𑀻𑀭𑁄 𑀢𑁂𑀭𑀲𑀯𑀲𑁆𑀲𑀺𑀓𑁄;

𑀓𑀢𑀳𑀢𑁆𑀣𑁄 𑀯𑀺𑀲𑁂𑀲𑁂𑀦, 𑀥𑀦𑀼𑀲𑀺𑀧𑁆𑀧𑀫𑁆𑀳𑀺 𑀲𑁄 𑀢𑀢𑁄.

𑀓𑀣𑀁 𑀮𑀗𑁆𑀓𑀁 𑀕𑀳𑁂𑀲𑁆𑀲𑀸𑀫𑀺, 𑀤𑀽𑀭𑁂𑀢𑁆𑀯𑀸’𑀭𑀸𑀢𑀺 𑀓𑀡𑁆𑀝𑀓𑀁;

𑀇𑀢𑀺 𑀘𑀺𑀦𑁆𑀢𑀸𑀧𑀭𑁄𑀕𑀸𑀫𑁂, 𑀫𑀽𑀮𑀲𑀸𑀮𑀯𑁆𑀳𑀬𑁂 𑀯𑀲𑀻.

𑀏𑀓𑁄 𑀫𑀳𑀸𑀩𑀮𑁄 𑀯𑀻𑀭𑁄, 𑀩𑀼𑀤𑁆𑀥𑀭𑀸𑀚𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀯𑀺𑀮𑁄𑀫𑀯𑀢𑁆𑀢𑀻 𑀳𑀼𑀢𑁆𑀯𑀸𑀦, 𑀮𑁄𑀓𑀲𑁂𑀦𑀸𑀦𑀺𑀦𑁄 𑀢𑀤𑀸.

𑀧𑀮𑀸𑀢𑁄 𑀘𑀼𑀡𑁆𑀡𑀲𑀸𑀮𑀯𑁆𑀳𑀁, 𑀔𑀺𑀧𑁆𑀧𑀁 𑀚𑀦𑀧𑀤𑀁 𑀢𑀳𑀺𑀁;

𑀓𑀺𑀢𑁆𑀢𑀸𑀤𑀺𑀓𑁂 𑀚𑀦𑁂 𑀦𑁂𑀓𑁂, 𑀯𑀲𑁂 𑀯𑀢𑁆𑀢𑀺𑀬 𑀲𑀩𑁆𑀩𑀣𑀸.

𑀲𑀤𑁆𑀥𑀺𑀁 𑀩𑀦𑁆𑀥𑀽𑀳𑀺 𑀲𑀗𑁆𑀕𑀸𑀫-𑀲𑀽𑀭𑁂𑀳𑀺 𑀩𑀳𑀼𑀓𑁂𑀳𑀺 𑀲𑁄;

𑀫𑀮𑀬𑀸𑀘𑀮𑀧𑀸𑀤𑁂𑀲𑀼, 𑀯𑀲𑀻 𑀤𑀼𑀧𑁆𑀧𑀲𑀳𑁄 𑀢𑀤𑀸.

𑀢𑀲𑁆𑀲’𑀦𑁆𑀢𑀺𑀓𑀫𑀼𑀧𑀸𑀕𑀫𑁆𑀫, 𑀲𑀁𑀯𑀘𑁆𑀙𑀭𑀺𑀓𑀦𑀸𑀬𑀓𑁄;

𑀲𑀗𑁆𑀖𑁄 𑀦𑀸𑀫 𑀓𑀼𑀫𑀸𑀭𑀲𑁆𑀲, 𑀲𑀭𑀽𑀧𑀁 𑀲𑀸𑀥𑀼𑀯𑀁 𑀩𑁆𑀭𑀯𑀺.

𑀫𑀳𑀸𑀲𑀸𑀫𑀺𑀲𑁆𑀲 𑀢𑀦𑀬𑁄, 𑀚𑁂𑀝𑁆𑀞𑁄 𑀓𑀺𑀢𑁆𑀢𑀺 𑀲𑀦𑀸𑀫𑀓𑁄;

𑀥𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀫𑀢𑀺𑀯𑀺𑀓𑁆𑀓𑀫𑁄.

𑀚𑀫𑁆𑀩𑀼𑀤𑀻𑀧𑁂𑀧𑀺 ¶ 𑀢𑀁 𑀭𑀚𑁆𑀚𑀁, 𑀓𑀢𑁆𑀢𑀼𑀫𑁂𑀓𑀸𑀢𑀧𑀢𑁆𑀢𑀓𑀁;

𑀲𑀫𑀢𑁆𑀣𑁄𑀢𑀺 𑀯𑀺𑀘𑀺𑀦𑁆𑀢𑁂𑀧𑀺, 𑀮𑀗𑁆𑀓𑀸𑀤𑀻𑀧𑀫𑁆𑀳𑀺 𑀓𑀸 𑀓𑀣𑀸.

𑀢𑀲𑁆𑀲 𑀲𑁄 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑁂𑀯𑀺𑀢𑀩𑁆𑀩𑁄 𑀓𑀼𑀫𑀸𑀭𑀓𑁄;

𑀇𑀢𑀺 𑀦𑀺𑀘𑁆𑀙𑀺𑀬 𑀧𑁂𑀲𑁂𑀲𑀺, 𑀓𑀼𑀫𑀸𑀭𑀲𑁆𑀲’𑀦𑁆𑀢𑀺𑀓𑀁 𑀚𑀦𑁂.

𑀲𑀼𑀡𑀺𑀢𑁆𑀯𑀸 𑀲𑁄 𑀯𑀘𑁄 𑀢𑁂𑀲𑀁, 𑀦𑀺𑀯𑀢𑁆𑀢𑀦𑀪𑀬𑀸 𑀯𑀺𑀪𑀽;

𑀅𑀚𑀸𑀦𑀳𑀁 𑀧𑀺𑀢𑀼𑀦𑁆𑀦𑀁 𑀲𑁄, 𑀯𑀻𑀭𑁄 𑀥𑀦𑀼𑀲𑀳𑀸𑀬𑀓𑁄.

𑀕𑁂𑀳𑀸 𑀦𑀺𑀓𑁆𑀔𑀫𑁆𑀫 𑀧𑀲𑁆𑀲𑀦𑁆𑀢𑁄, 𑀲𑀼𑀦𑀺𑀫𑀺𑀢𑁆𑀢𑀸𑀦𑀺𑀦𑁂𑀓𑀥𑀸;

𑀅𑀕𑀸𑀮𑀳𑀼𑀁 𑀲𑀭𑀻𑀯𑀕𑁆𑀕-𑀧𑀺𑀝𑁆𑀞𑀺𑀕𑀸𑀫𑀁 𑀫𑀳𑀸𑀫𑀢𑀺.

𑀢𑀳𑀺𑀁 𑀲𑁄 𑀦𑀺𑀯𑀲𑀁 𑀯𑀻𑀭𑁄, 𑀧𑁂𑀲𑀬𑀺𑀢𑁆𑀯𑀸 𑀲𑀲𑁂𑀯𑀓𑁂;

𑀯𑀺𑀧𑀓𑁆𑀔𑀸𑀥𑀺𑀝𑁆𑀞𑀺𑀢𑀁 𑀚𑁂𑀲𑀺, 𑀩𑁄𑀥𑀺𑀯𑀸𑀮𑀯𑁆𑀳𑀕𑀸𑀫𑀓𑀁.

𑀢𑀢𑁄’𑀪𑀺𑀫𑀸𑀦𑀻 𑀲𑁂𑀦𑀸𑀦𑀻, 𑀲𑁂𑀦𑀁 𑀲𑁄 𑀢𑀢𑁆𑀣 𑀧𑁂𑀲𑀬𑀺;

𑀲𑀸 𑀧𑀭𑀺𑀓𑁆𑀔𑀺𑀧𑀢𑀁 𑀕𑀸𑀫𑀁, 𑀲𑀗𑁆𑀕𑀸𑀫𑀸𑀬 𑀲𑀫𑀸𑀭𑀪𑀻.

𑀓𑀼𑀫𑀸𑀭𑁄 𑀢𑁂𑀳𑀺 𑀬𑀼𑀚𑁆𑀛𑀦𑁆𑀢𑁄, 𑀲𑀼𑀪𑀝𑁄 𑀧𑀝𑀼𑀯𑀺𑀓𑁆𑀓𑀫𑁄;

𑀤𑀺𑀲𑀸𑀲𑀼 𑀯𑀺𑀓𑀺𑀭𑀻𑀲𑀩𑁆𑀩𑁂, 𑀢𑀼𑀮𑀁 𑀘𑀡𑁆𑀟𑁄𑀯 𑀫𑀸𑀴𑀼𑀢𑁄.

𑀘𑀼𑀡𑁆𑀡𑀲𑀸𑀮𑀁 𑀚𑀦𑀧𑀤𑀁, 𑀕𑀦𑁆𑀢𑁆𑀯𑀸 𑀞𑀸𑀦𑀯𑀺𑀤𑀽 𑀢𑀤𑀸;

𑀢𑀳𑀺𑀁 𑀯𑀲𑀁 𑀯𑀲𑁂𑀓𑀸𑀲𑀺, 𑀲𑀩𑁆𑀩𑀁 𑀫𑀮𑀬𑀫𑀡𑁆𑀟𑀮𑀁.

𑀢𑀤𑀸𑀧𑀺 𑀲𑁂𑀦𑀁 𑀲𑁂𑀦𑀺𑀦𑁆𑀤𑁄, 𑀧𑁂𑀲𑁂𑀢𑁆𑀯𑀸 𑀅𑀲𑀓𑀺𑀁 𑀲𑀓𑀁;

𑀅𑀪𑀺𑀪𑀽𑀢𑀺𑀫𑀲𑀓𑁆𑀓𑁄𑀦𑁆𑀢𑁄, 𑀓𑀸𑀢𑀼𑀁 𑀤𑀼𑀫𑁆𑀫𑀦𑀢𑀁 𑀕𑀢𑁄.

𑀫𑀓𑁆𑀔𑀓𑀼𑀤𑁆𑀭𑀼𑀲𑀯𑀸𑀲𑀺𑀲𑁆𑀲, 𑀲𑀘𑀺𑀧𑀲𑁆𑀲𑀸𑀣 𑀓𑀺𑀢𑁆𑀢𑀺𑀦𑁄;

𑀲𑀼𑀢𑁄 𑀫𑀳𑀩𑁆𑀩𑀮𑁄 𑀤𑁂𑀯-𑀫𑀮𑁆𑀮𑁄𑀢𑀺 𑀯𑀺𑀤𑀺𑀢𑁄 𑀢𑀤𑀸.

𑀲𑀳𑀺𑀢𑁄 𑀩𑀦𑁆𑀥𑀼𑀫𑀺𑀢𑁆𑀢𑁂𑀳𑀺, 𑀩𑀳𑀽 𑀭𑁄𑀳𑀡𑀯𑀸𑀲𑀺𑀦𑁄;

𑀲𑀫𑀸𑀤𑀸𑀬𑀸’𑀪𑀺𑀕𑀦𑁆𑀢𑁆𑀯𑀸𑀦, 𑀓𑀼𑀫𑀸𑀭𑀁 𑀧𑀲𑁆𑀲𑀺 𑀲𑀸𑀤𑀭𑁄.

𑀩𑀦𑁆𑀥𑀺𑀬 𑀙𑀼𑀭𑀺𑀓𑀁 𑀙𑁂𑀓𑁄, 𑀲𑁄 𑀧𑀦𑁆𑀦𑀭𑀲𑀯𑀲𑁆𑀲𑀺𑀓𑁄;

𑀆𑀤𑀺𑀧𑀸𑀤𑀧𑀤𑀁 𑀢𑀢𑁆𑀣, 𑀲𑀫𑁆𑀧𑀸𑀧𑀼𑀡𑀺 𑀫𑀳𑀸𑀬𑀲𑁄.

𑀢𑀢𑁄 𑀳𑀺𑀭𑀜𑁆𑀜𑀫𑀮𑀬, 𑀫𑀼𑀧𑀸𑀕𑀫𑁆𑀫 𑀫𑀳𑀩𑁆𑀩𑀮𑁄;

𑀢𑀳𑀺𑀁 𑀭𑁂𑀫𑀼𑀡𑀲𑁂𑀮𑀫𑁆𑀳𑀺, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀩𑀦𑁆𑀥𑀬𑀺.

𑀢𑀢𑁆𑀣𑀸𑀧𑀺 𑀲𑁂𑀦𑀁 𑀧𑁂𑀲𑁂𑀢𑁆𑀯𑀸, 𑀲𑀗𑁆𑀕𑀸𑀫𑁂𑀦𑁆𑀢𑁄 𑀘𑀫𑀽𑀧𑀢𑀺;

𑀅𑀮𑀤𑁆𑀥𑀯𑀺𑀚𑀬𑁄 𑀙𑀦𑁆𑀤𑀁, 𑀧𑀼𑀦𑀬𑀼𑀤𑁆𑀥𑁂 𑀚𑀳𑀺𑀢𑀢𑁄.

𑀮𑁄𑀓𑀦𑀸𑀫𑁄 𑀘𑀫𑀽𑀦𑀸𑀣𑁄, 𑀮𑁄𑀓𑀁 𑀳𑀺𑀢𑁆𑀯𑀸 𑀲𑀓𑀁 𑀢𑀤𑀸;

𑀅𑀳𑀼 𑀯𑀲𑁆𑀲𑀫𑁆𑀳𑀺 𑀙𑀝𑁆𑀞𑁂𑀲𑁄, 𑀧𑀭𑀮𑁄𑀓𑀧𑀭𑀸𑀬𑀦𑁄.

𑀢𑀤𑀸 ¶ 𑀓𑀲𑁆𑀲𑀧𑀦𑀸𑀫𑁂𑀓𑁄, 𑀓𑁂𑀲𑀥𑀸𑀢𑀼𑀓𑀦𑀸𑀬𑀓𑁄;

𑀚𑀦𑁂’𑀪𑀺𑀪𑀽𑀬𑀯𑀢𑁆𑀢𑁂𑀲𑀺, 𑀦𑀻𑀚𑀸𑀡𑀁 𑀭𑁄𑀳𑀡𑁂 𑀢𑀤𑀸.

𑀲𑀼𑀢𑁆𑀯𑀸 𑀢𑀁 𑀘𑁄𑀴𑀲𑀸𑀫𑀦𑁆𑀢𑁄, 𑀧𑀼𑀴𑀢𑁆𑀣𑀺𑀦𑀕𑀭𑀸 𑀢𑀤𑀸;

𑀦𑀺𑀓𑁆𑀔𑀫𑁆𑀫 𑀬𑀼𑀤𑁆𑀥𑀲𑀦𑀤𑁆𑀥𑁄, 𑀕𑀦𑁆𑀢𑁆𑀯𑀸 𑀓𑀸𑀚𑀭𑀕𑀸𑀫𑀓𑀁.

𑀓𑁂𑀲𑀸𑀥𑀸𑀢𑀼 𑀢𑀢𑁄 𑀬𑀼𑀤𑁆𑀥𑁂, 𑀪𑀺𑀦𑁆𑀤𑀺𑀢𑁆𑀯𑀸 𑀤𑀫𑀺𑀴𑀁 𑀩𑀮𑀁;

𑀭𑀓𑁆𑀔𑀧𑀸𑀲𑀸𑀡𑀲𑀻𑀫𑀸𑀬𑀁, 𑀞𑀧𑁂𑀢𑁆𑀯𑀸 𑀭𑀓𑁆𑀔𑀺𑀬𑁂 𑀚𑀦𑁂.

𑀧𑀝𑀺𑀮𑀤𑁆𑀥𑀚𑀬𑀼𑀤𑁆𑀤𑀸𑀫𑁄, 𑀫𑀳𑀸𑀲𑁂𑀦𑀸 𑀧𑀼𑀭𑀓𑁆𑀔𑀢𑁄;

𑀧𑀼𑀦𑀭𑀸𑀕𑀫𑁆𑀫 𑀧𑀸𑀯𑁂𑀓𑁆𑀔𑀺, 𑀯𑀻𑀭𑁄 𑀓𑀸𑀚𑀭𑀕𑀸𑀫𑀓𑀁.

𑀢𑀤𑀸𑀤𑀺𑀧𑀸𑀤𑁄 𑀲𑀼𑀢𑁆𑀯𑀸𑀦, 𑀲𑀩𑁆𑀩𑀁 𑀲𑀼𑀢𑁆𑀣𑀻𑀭𑀥𑀸𑀢𑀼𑀓𑁄;

𑀓𑁂𑀲𑀥𑀸𑀢𑀼𑀁 𑀦𑀺𑀖𑀸𑀢𑁂𑀢𑀼𑀁, 𑀩𑀮𑀁 𑀲𑀦𑁆𑀦𑀬𑁆𑀳𑀺 𑀯𑁂𑀕𑀲𑀸.

𑀧𑀯𑀢𑁆𑀢𑀺𑀁 𑀢𑀁 𑀲𑀼𑀡𑀺𑀢𑁆𑀯𑀸 𑀲𑁄, 𑀲𑀸𑀪𑀺𑀫𑀸𑀦𑁄 𑀪𑀼𑀲𑀁𑀢𑀢𑁄;

𑀲𑀫𑀢𑁆𑀢𑀁 𑀩𑀮𑀫𑀸𑀤𑀸𑀬, 𑀲𑀺𑀧𑁆𑀧𑀢𑁆𑀣𑀮𑀓𑀫𑀸𑀕𑀫𑀸.

𑀧𑀜𑁆𑀘𑀬𑁄𑀚𑀦𑀭𑀝𑁆𑀞𑀸𑀤𑀺-𑀯𑀸𑀲𑀺𑀓𑁂𑀲𑀼 𑀩𑀳𑀽𑀚𑀦𑁂;

𑀲𑀫𑀸𑀤𑀸𑀬 𑀲𑀫𑀸𑀲𑀦𑁆𑀦𑁂, 𑀭𑀸𑀚𑀧𑀼𑀢𑁆𑀢𑁂 𑀲𑀼𑀤𑀼𑀚𑁆𑀚𑀬𑁂.

𑀯𑀺𑀭𑀢𑁆𑀢𑀢𑀜𑁆𑀘 𑀲𑁄 𑀜𑀢𑁆𑀯𑀸, 𑀩𑀳𑀼𑀦𑁆𑀦𑀁 𑀭𑀝𑁆𑀞𑀯𑀸𑀲𑀺𑀦𑀁;

𑀤𑀼𑀓𑁆𑀓𑀭𑀁 𑀏𑀢𑁆𑀣 𑀬𑀼𑀤𑁆𑀥𑀦𑁆𑀢𑀺, 𑀕𑀢𑁄 𑀲𑁄 𑀔𑀤𑀺𑀭𑀗𑁆𑀕𑀡𑀺𑀁.

𑀫𑀳𑀸𑀲𑁂𑀦𑀸𑀬 𑀪𑀽𑀧𑀸𑀮 𑀲𑀼𑀢𑁄 𑀲𑁄𑀴𑀲𑀯𑀲𑁆𑀲𑀻𑀓𑁄;

𑀔𑀺𑀧𑁆𑀧𑀁 𑀯𑀸𑀧𑁂𑀓𑁆𑀔𑀺 𑀲𑁄 𑀯𑀻𑀢-𑀤𑀭𑁄 𑀓𑀸𑀚𑀭𑀕𑀸𑀫𑀓𑀁.

𑀙𑀫𑁆𑀫𑀸𑀲𑀫𑀦𑀼𑀪𑁄𑀢𑁆𑀯𑀸𑀦, 𑀭𑁄𑀳𑀡𑀁 𑀭𑀼𑀝𑁆𑀞𑀫𑀸𑀦𑀲𑁄;

𑀓𑁂𑀲𑀥𑀸𑀢𑀼𑀓𑀦𑀸𑀣𑁄𑀧𑀺, 𑀲𑀗𑁆𑀕𑀸𑀫𑀢𑁆𑀣𑀸𑀬 𑀢𑀢𑁆𑀣𑀕𑀸.

𑀭𑀸𑀚𑀧𑀼𑀢𑁆𑀢𑀲𑁆𑀲 𑀲𑁂𑀦𑀸’𑀣, 𑀯𑀢𑁆𑀢𑁂𑀦𑁆𑀢𑀺 𑀲𑀫𑀭𑀁 𑀔𑀭𑀁;

𑀓𑁂𑀲𑀥𑀸𑀢𑀼𑀓𑀦𑀸𑀣𑀲𑁆𑀲, 𑀲𑀻𑀲𑀁 𑀕𑀡𑁆𑀳𑀺 𑀫𑀳𑀩𑁆𑀩𑀮𑀸.

𑀆𑀕𑀫𑁆𑀫 𑀲𑀢𑁆𑀢𑀭𑀲𑀯𑀬𑀁 𑀓𑀼𑀫𑀸𑀭𑁄;

𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀫𑀳𑀸𑀬𑀲𑀓𑀺𑀢𑁆𑀢𑀺𑀢𑁂𑀚𑁄;

𑀲𑀼𑀫𑀸𑀤𑀺𑀦𑁂𑀓 𑀯𑀺𑀥𑀺𑀬𑁄𑀕𑀯𑀺𑀲𑁂𑀲𑀤𑀓𑁆𑀔𑁄;

𑀔𑀻𑀡𑀸𑀭𑀺𑀓𑀡𑁆𑀝𑀓𑀫𑀓𑀸’𑀔𑀺𑀮𑀭𑁄𑀳𑀡𑀁 𑀢𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀜𑁆𑀘𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀬𑀼𑀯𑀭𑀸𑀚𑀧𑀤𑁂 ¶ 𑀢𑀲𑁆𑀲, 𑀞𑀺𑀢𑀲𑁆𑀲𑀸’𑀣 𑀦𑀬𑀜𑁆𑀜𑀼𑀦𑁄;

𑀅𑀳𑀽 𑀯𑀺𑀚𑀬𑀩𑀸𑀳𑀽𑀢𑀺, 𑀦𑀸𑀫𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀁.

𑀫𑀳𑀸𑀜𑁆𑀜𑀡𑁄 𑀦𑀺𑀚𑀸𑀡𑀸𑀬, 𑀢𑀢𑁆𑀣 𑀪𑁂𑀭𑀺𑀁 𑀘𑀭𑀸𑀯𑀺𑀬;

𑀞𑀧𑁂𑀦𑁆𑀢𑁄 𑀲𑀘𑀺𑀯𑁂’𑀦𑁂𑀓𑁂, 𑀧𑀢𑀺𑀭𑀽𑀧𑁂 𑀧𑀤𑀦𑁆𑀢𑀭𑁂.

𑀘𑁄𑀴𑀸𑀦𑀁 𑀫𑀤𑁆𑀤𑀦𑀢𑁆𑀣𑀸𑀬, 𑀭𑀸𑀚𑀭𑀝𑁆𑀞𑀸𑀥𑀺𑀯𑀸𑀲𑀺𑀦𑀁;

𑀘𑀢𑀼𑀭𑁄 𑀘𑀢𑀼𑀭𑁄𑀧𑀸𑀬𑁂, 𑀬𑁄 𑀚𑀬𑀁 𑀢𑀢𑁆𑀣 𑀲𑁄 𑀯𑀲𑀻.

𑀘𑁄𑀴𑀭𑀸𑀚𑀸 𑀲𑀼𑀡𑀺𑀢𑁆𑀯𑀸 𑀢𑀁, 𑀧𑀼𑀴𑀢𑁆𑀣𑀺𑀦𑀕𑀭𑁂 𑀞𑀺𑀢𑀁;

𑀲𑁂𑀦𑀸𑀧𑀢𑀺𑀫 𑀧𑁂𑀲𑁂𑀲𑀺, 𑀤𑀢𑁆𑀯𑀸𑀦 𑀩𑀮𑀯𑀸𑀳𑀦𑀁.

𑀲𑁂𑀦𑀺𑀦𑁆𑀤𑀁 𑀓𑀸𑀚𑀭𑀕𑁆𑀕𑀸𑀫-𑀲𑀫𑀻𑀧𑀁 𑀲𑀫𑀼𑀧𑀸𑀕𑀢𑀁;

𑀤𑀼𑀧𑁆𑀧𑀲𑀬𑁆𑀳𑀁 𑀯𑀺𑀤𑀺𑀢𑁆𑀯𑀸𑀦, 𑀕𑀺𑀭𑀺𑀤𑀼𑀕𑁆𑀕𑀫𑀕𑀸 𑀢𑀢𑁄.

𑀲𑁂𑀦𑀺𑀦𑁆𑀤𑁄 𑀓𑀸𑀚𑀭𑀕𑁆𑀕𑀸𑀫𑀁, 𑀯𑀺𑀮𑀼𑀫𑁆𑀧𑀺𑀢𑁆𑀯𑀸𑀦 𑀯𑁂𑀕𑀲𑀸;

𑀢𑀢𑁆𑀣 𑀯𑀢𑁆𑀣𑀼𑀫𑀲𑀓𑁆𑀓𑁄𑀦𑁆𑀢𑁄, 𑀲𑀤𑁂𑀲𑀁 𑀧𑀼𑀦 𑀭𑀸𑀕𑀫𑀺.

𑀢𑀢𑁄 𑀫𑀳𑀸𑀤𑀺𑀧𑀸𑀤𑁄’𑀧𑀺, 𑀆𑀕𑀫𑁆𑀫 𑀫𑀮𑀬𑀸 𑀮𑀳𑀼𑀁;

𑀫𑀳𑀢𑀸 𑀩𑀮𑀓𑀸𑀬𑁂𑀦, 𑀲𑀺𑀧𑁆𑀧𑀢𑁆𑀣𑀮𑀓𑀫𑀸𑀯𑀲𑀺.

𑀭𑀸𑀚𑀸 𑀭𑀸𑀫𑀜𑁆𑀜𑀯𑀺𑀲𑀬𑁂, 𑀭𑀸𑀚𑀺𑀦𑁄 𑀲𑀦𑁆𑀢𑀺𑀓𑀁 𑀚𑀦𑁂;

𑀧𑁂𑀲𑁂𑀲𑀺 𑀩𑀳𑀼𑀓𑁂𑀲𑀸𑀭𑀁, 𑀥𑀦𑀚𑀸𑀢𑀜𑁆𑀘’𑀦𑀧𑁆𑀧𑀓𑀁.

𑀯𑀺𑀘𑀺𑀢𑁆𑀢𑀯𑀢𑁆𑀣𑀓𑀧𑁆𑀧𑀽𑀭-𑀘𑀦𑁆𑀤𑀦𑀸𑀤𑀻𑀳𑀺 𑀯𑀢𑁆𑀣𑀽𑀳𑀺;

𑀧𑀭𑀺𑀧𑀼𑀡𑁆𑀡𑀸 𑀘 𑀦𑀸𑀯𑀸𑀬𑁄, 𑀦𑁂𑀓𑀸𑀢𑀺𑀢𑁆𑀣𑁂 𑀲𑀫𑁄𑀲𑀝𑀸.

𑀥𑀦𑀚𑀸 𑀢𑁂𑀳𑀺 𑀦𑁂𑀓𑁂𑀳𑀺, 𑀓𑀭𑁄𑀦𑁆𑀢𑁄 𑀪𑀝𑀲𑀗𑁆𑀕𑀳𑀁;

𑀢𑀢𑁄 𑀢𑀫𑁆𑀩𑀮𑀕𑀸𑀫𑀫𑁆𑀳𑀺, 𑀦𑀺𑀯𑀲𑀺𑀢𑁆𑀣 𑀫𑀳𑀩𑁆𑀩𑀮𑁄.

𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀢𑁆𑀢𑀸, 𑀭𑀸𑀚𑀸𑀭𑀝𑁆𑀞𑀸𑀥𑀺𑀯𑀸𑀲𑀺𑀦𑁄;

𑀉𑀧𑀕𑁆𑀕𑀫𑁆𑀫 𑀚𑀦𑀸 𑀲𑀩𑁆𑀩𑁂, 𑀓𑀭𑀁 𑀦𑁄 𑀤𑁂𑀦𑁆𑀢𑀺 𑀲𑀩𑁆𑀩𑀲𑁄.

𑀯𑀺𑀧𑀓𑁆𑀔𑀸𑀘𑁄𑀴𑀭𑀸𑀚𑀲𑁆𑀲, 𑀪𑀺𑀦𑁆𑀤𑀦𑁆𑀢𑀸’𑀡𑀁 𑀫𑀤𑀼𑀤𑁆𑀥𑀢𑀸;

𑀆𑀬𑀼𑀢𑁆𑀢𑀓𑁂 𑀯𑀺𑀳𑀺𑀁𑀲𑁂𑀦𑁆𑀢𑁄, 𑀬𑀣𑀸𑀓𑀸𑀫𑀁 𑀘𑀭𑀦𑁆𑀢𑀺 𑀘.

𑀢𑀁 ¶ 𑀲𑀼𑀢𑁆𑀯𑀸 𑀘𑁄𑀴𑀪𑀽𑀧𑀸𑀮𑁄, 𑀲𑀫𑁆𑀧𑀓𑁄𑀧𑀯𑀲𑀻𑀓𑀢𑁄;

𑀲𑁂𑀦𑀁 𑀫𑀳𑀦𑁆𑀢𑀺𑀁 𑀤𑀢𑁆𑀯𑀸𑀦, 𑀧𑁂𑀲𑁂𑀲𑀺 𑀲𑀘𑀺𑀯𑀁 𑀦𑀺𑀚𑀁.

𑀫𑀳𑀸𑀢𑀺𑀢𑁆𑀣𑁂’𑀯𑀳𑀺𑀡𑁆𑀡𑁄 𑀲𑁄, 𑀢𑀢𑁆𑀣 𑀢𑀢𑁆𑀣 𑀩𑀳𑀽𑀚𑀦𑁂;

𑀖𑀸𑀢𑁂𑀦𑁆𑀢𑁄 𑀲𑀯𑀲𑁂 𑀓𑀢𑁆𑀯𑀸, 𑀭𑀸𑀚𑀸𑀭𑀝𑁆𑀞𑀸𑀥𑀺𑀯𑀸𑀲𑀺𑀦𑁄.

𑀅𑀦𑀼𑀓𑁆𑀓𑀫𑁂𑀦 𑀕𑀦𑁆𑀢𑁆𑀯𑀸𑀦, 𑀔𑀭𑀸𑀡𑁄 𑀭𑁄𑀳𑀡𑀁 𑀢𑀤𑀸;

𑀅𑀚𑁆𑀛𑁄𑀢𑁆𑀣𑀭𑀺 𑀲𑀲𑁂𑀦𑁄 𑀲, 𑀪𑀺𑀦𑁆𑀦𑁄 𑀯𑁂𑀮𑁄𑀯𑀲𑀸𑀕𑀭𑁄.

𑀭𑀜𑁆𑀜𑁄 𑀧𑀘𑁆𑀘𑀢𑁆𑀣𑀺𑀓𑀸 𑀳𑀼𑀢𑁆𑀯𑀸, 𑀭𑀯𑀺𑀤𑁂𑀯𑀘𑀮𑀯𑁆𑀳𑀬𑀸;

𑀉𑀪𑁄 𑀤𑀫𑀺𑀴𑀲𑁂𑀦𑀺𑀦𑁆𑀤-𑀯𑀲𑀁 𑀬𑀸𑀢𑀸 𑀫𑀳𑀩𑁆𑀩𑀮𑀸.

𑀫𑀳𑀸𑀧𑀓𑁆𑀔𑀩𑀮𑁄𑀧𑁂𑀢𑁂, 𑀢𑁂 𑀧𑀲𑁆𑀲𑀺𑀬 𑀘𑀫𑀽𑀧𑀢𑀺;

𑀭𑁄𑀳𑀡𑀁 𑀲𑀓𑀮𑀁 𑀔𑀺𑀧𑁆𑀧𑀁, 𑀫𑀜𑁆𑀜𑀺𑀢𑁆𑀣 𑀲𑀓𑀳𑀢𑁆𑀣𑀕𑀁.

𑀏𑀓𑀸𑀤𑀲𑀫𑁆𑀳𑀺 𑀲𑁄 𑀯𑀲𑁆𑀲𑁂, 𑀭𑀸𑀚𑀸 𑀘𑁄𑀴𑀸𑀪𑀺𑀪𑀽𑀢𑀺𑀬𑀸;

𑀧𑀮𑀼𑀝𑁆𑀞𑀧𑀩𑁆𑀩𑀢𑁂 𑀤𑀼𑀕𑁆𑀕𑀁, 𑀧𑀯𑀺𑀥𑀸𑀬 𑀢𑀳𑀺𑀁 𑀯𑀲𑀻.

𑀘𑁄𑀴𑀲𑁂𑀦𑀸 𑀢𑀤𑀸𑀲𑁂𑀮𑀁, 𑀲𑀫𑀦𑁆𑀢𑀸 𑀲𑀫𑁆𑀧𑀭𑀺𑀓𑁆𑀔𑀺𑀧𑀺;

𑀢𑀢𑁆𑀣𑁄’𑀪𑀬𑁂𑀲𑀁 𑀲𑁂𑀦𑀸𑀦-𑀫𑀳𑀽 𑀪𑀺𑀁𑀲𑀦𑀓𑀁 𑀭𑀡𑀁.

𑀭𑀜𑁆𑀜𑁄 𑀪𑀝𑀸 𑀯𑀺𑀦𑀸𑀲𑁂𑀢𑁆𑀯𑀸, 𑀲𑀩𑁆𑀩𑀁 𑀢𑀁 𑀤𑀫𑀺𑀴𑀁 𑀩𑀮𑀁;

𑀧𑀮𑀸𑀬𑀦𑁆𑀢𑀁 𑀫𑀳𑀸𑀘𑁄𑀴-𑀲𑀸𑀫𑀦𑁆𑀢𑀜𑁆𑀘𑀸𑀦𑀼𑀩𑀦𑁆𑀥𑀺𑀬.

𑀕𑀳𑁂𑀢𑁆𑀯𑀸𑀦 𑀲𑀺𑀭𑀁 𑀢𑀲𑁆𑀲, 𑀕𑀸𑀫𑀲𑁆𑀫𑀺𑀁 𑀢𑀫𑁆𑀩𑀯𑀺𑀝𑁆𑀞𑀺𑀓𑁂

𑀲𑀤𑁆𑀥𑀺𑀁 𑀯𑀸𑀳𑀦𑀬𑀸𑀦𑁂𑀳𑀺, 𑀲𑀸𑀭𑀪𑀽𑀢𑀥𑀦𑁂𑀳𑀺 𑀘.

𑀢𑀳𑀺𑀁 𑀢𑀁 𑀲𑀓𑀮𑀁 𑀪𑀡𑁆𑀟𑀁, 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀧𑀤𑀲𑁆𑀲𑀺𑀬;

𑀧𑀼𑀴𑀢𑁆𑀣𑀺𑀦𑀕𑀭𑀁 𑀕𑀦𑁆𑀢𑀼𑀁, 𑀓𑀸𑀮𑁄 𑀇𑀢𑀺 𑀲𑀫𑀩𑁆𑀭𑀯𑀼𑀁.

𑀫𑀳𑀻𑀧𑀸𑀮𑁄𑀧𑀺 𑀢𑀁 𑀲𑀼𑀢𑁆𑀯𑀸, 𑀲𑀘𑀺𑀯𑀸𑀦𑀁 𑀯𑀘𑁄 𑀢𑀤𑀸;

𑀫𑀳𑀢𑀸 𑀩𑀮𑀓𑀸𑀬𑁂𑀦, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀕𑀢𑁄.

𑀧𑀯𑀢𑁆𑀢𑀺𑀫𑁂𑀢𑀁 𑀲𑀓𑀮𑀁, 𑀲𑀼𑀢𑁆𑀯𑀸 𑀘𑁄𑀴𑀦𑀭𑀺𑀲𑁆𑀲𑀭𑁄;

𑀢𑀺𑀩𑁆𑀩𑀓𑁄𑀧𑀯𑀲𑀁𑀬𑀸𑀢𑁄, 𑀪𑀽𑀧𑀸𑀮𑀕𑀳𑀡𑀢𑁆𑀣𑀺𑀓𑁄.

𑀲𑀸𑀫𑀁 𑀔𑀺𑀧𑁆𑀧𑀁 𑀲𑀫𑀸𑀕𑀫𑁆𑀫, 𑀯𑀻𑀭𑁄 𑀲𑀸𑀕𑀭𑀧𑀝𑁆𑀝𑀦𑀁;

𑀪𑀺𑀬𑁆𑀬𑁄𑀧𑀺 𑀫𑀳𑀢𑀺𑀁 𑀲𑁂𑀦𑀁, 𑀮𑀁𑀓𑀸𑀤𑀻𑀧𑀫𑀧𑁂𑀲𑀬𑀻.

𑀢𑀁 𑀯𑀺𑀚𑀸𑀦𑀺𑀬 𑀪𑀽𑀫𑀺𑀦𑁆𑀤𑁄, 𑀲𑁂𑀦𑀺𑀦𑁆𑀤𑀁 𑀧𑁂𑀲𑀬𑀻 𑀲𑀓𑀁;

𑀩𑀮𑀁 𑀫𑀳𑀦𑁆𑀢𑀁 𑀤𑀢𑁆𑀯𑀸𑀦, 𑀘𑁄𑀴𑀲𑁂𑀦𑀸𑀬 𑀬𑀼𑀚𑁆𑀛𑀺𑀢𑀼𑀁.

𑀕𑀘𑁆𑀙𑀫𑀸𑀦𑁄 𑀘𑀫𑀽𑀦𑀸𑀣𑁄, 𑀲𑁄’𑀦𑀼𑀭𑀸𑀥𑀧𑀼𑀭𑀦𑁆𑀢𑀺𑀓𑁂;

𑀲𑀤𑁆𑀥𑀺𑀁 𑀤𑀫𑀺𑀴𑀲𑁂𑀦𑀸𑀬, 𑀯𑀢𑁆𑀢𑁂𑀲𑀺 𑀢𑀼𑀫𑀼𑀮𑀁 𑀭𑀡𑀁.

𑀧𑀢𑀺𑀁𑀲𑀼 ¶ 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂, 𑀪𑀽𑀧𑀸𑀮𑀲𑁆𑀲 𑀦𑀭𑀸 𑀩𑀳𑀽;

𑀪𑀺𑀬𑁆𑀬𑁄𑀧𑀺 𑀤𑀫𑀺𑀴𑀸𑀬𑀢𑁆𑀢𑀸, 𑀚𑀸𑀢𑀸 𑀢𑀁 𑀭𑀝𑁆𑀞𑀯𑀸𑀲𑀺𑀦𑁄.

𑀯𑀺𑀳𑀸𑀬 𑀥𑀭𑀡𑀻𑀧𑀸𑀮𑁄, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀢𑀤𑀸;

𑀯𑀺𑀮𑁆𑀮𑀺𑀓𑀸𑀩𑀸𑀡𑀓𑀁 𑀭𑀝𑁆𑀞𑀁, 𑀲𑀫𑁆𑀧𑀸𑀧𑀼𑀡𑀺𑀬 𑀯𑁂𑀕𑀲𑀸.

𑀦𑀺𑀳𑀘𑁆𑀘𑀸𑀫𑀘𑁆𑀘𑀬𑀼𑀕𑀮𑀁, 𑀢𑀁 𑀭𑀝𑁆𑀞𑀸𑀥𑀺𑀝𑁆𑀞𑀺𑀢𑀁 𑀢𑀤𑀸;

𑀢𑀳𑀺𑀁 𑀯𑀸𑀲𑀫𑀓𑀧𑁆𑀧𑁂𑀲𑀺, 𑀲𑀪𑀝𑁂 𑀲𑀦𑁆𑀦𑀺𑀧𑀸𑀢𑀬𑀁.

𑀅𑀢𑁆𑀢𑀸𑀦𑀫𑀦𑀼𑀩𑀦𑁆𑀥𑀦𑁆𑀢𑀁, 𑀲𑀼𑀢𑁆𑀯𑀸 𑀘𑁄𑀴𑀘𑀫𑀽𑀧𑀢𑀺𑀁;

𑀕𑀦𑁆𑀢𑁆𑀯𑀸 𑀯𑀸𑀢𑀕𑀺𑀭𑀺𑀁 𑀦𑀸𑀫, 𑀲𑀫𑀬𑀜𑁆𑀜𑀽 𑀲𑀺𑀮𑀼𑀘𑁆𑀘𑀬𑀁.

𑀉𑀧𑀘𑁆𑀘𑀓𑀸𑀬 𑀲𑁂𑀮𑀲𑁆𑀲, 𑀢𑀢𑁆𑀣 𑀤𑀼𑀕𑁆𑀕𑀁 𑀦𑀺𑀯𑁂𑀲𑀺𑀬;

𑀭𑀡𑀁 𑀓𑀭𑁄𑀦𑁆𑀢𑁄 𑀢𑁂𑀫𑀸𑀲𑀁, 𑀤𑀫𑀺𑀴𑁂 𑀧𑀝𑀺𑀩𑀸𑀳𑀬𑀺.

𑀓𑁂𑀲𑀥𑀸𑀢𑀼𑀓𑀦𑀸𑀣𑀲𑁆𑀲, 𑀫𑀸𑀭𑀺𑀢𑀲𑁆𑀲 𑀧𑀼𑀭𑀸𑀭𑀡𑁂;

𑀪𑀸𑀢𑀸 𑀓𑀡𑀺𑀝𑁆𑀞𑁄 𑀲𑀫𑁆𑀧𑀢𑁆𑀢, 𑀫𑀳𑀸𑀧𑀓𑁆𑀔𑀩𑀮𑁄 𑀢𑀤𑀸.

𑀫𑀸𑀭𑀡𑀁 𑀲𑀓𑀪𑀸𑀢𑀼𑀲𑁆𑀲, 𑀲𑀭𑀦𑁆𑀢𑁄 𑀭𑀼𑀝𑁆𑀞𑀫𑀸𑀦𑀲𑁄;

𑀲𑀓𑀮𑀁 𑀧𑀭𑀺𑀯𑀢𑁆𑀢𑁂𑀲𑀺, 𑀕𑀼𑀢𑁆𑀢𑀳𑀸𑀮𑀓𑀫𑀡𑁆𑀟𑀮𑀁.

𑀅𑀣𑁄 𑀮𑀁𑀓𑀺𑀲𑁆𑀲𑀭𑁄 𑀢𑀢𑁆𑀣, 𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀞𑀸𑀦𑁂 𑀫𑀘𑁆𑀘𑀼𑀢𑁆𑀣𑀮𑁂 𑀦𑀸𑀫, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀩𑀦𑁆𑀥𑀺𑀬.

𑀔𑀤𑀺𑀭𑀗𑁆𑀕𑀡𑀺𑀤𑀼𑀕𑁆𑀕𑀫𑁆𑀳𑀸, 𑀧𑀮𑀸𑀧𑁂𑀢𑁆𑀯𑀸𑀦 𑀢𑀁 𑀭𑀡𑁂;

𑀞𑀸𑀦𑀸 𑀓𑀼𑀩𑀼𑀮𑀕𑀮𑁆𑀮𑀸 𑀘, 𑀬𑀼𑀚𑁆𑀛𑀦𑁆𑀢𑁄 𑀢𑀁 𑀧𑀮𑀸𑀧𑀬𑀺.

𑀯𑀺𑀳𑀸𑀬 𑀧𑀼𑀢𑁆𑀢𑀤𑀸𑀭𑀸𑀤𑀺-𑀲𑀩𑁆𑀩𑀁 𑀦𑁂𑀓𑀥𑀦𑀁 𑀩𑀮𑀁;

𑀧𑀮𑀸𑀬𑀫𑀸𑀦𑁄 𑀲𑁄 𑀭𑀝𑁆𑀞𑀁, 𑀘𑁄𑀴𑀸𑀬𑀢𑁆𑀢 𑀫𑀕𑀸𑀮𑀳𑀼𑀁.

𑀢𑀤𑀸 𑀦𑀭𑀺𑀲𑁆𑀲𑀭𑁄 𑀢𑀢, 𑀢𑀲𑁆𑀲 𑀲𑀩𑁆𑀩𑀁 𑀲𑀫𑀸𑀤𑀺𑀬;

𑀕𑀦𑁆𑀢𑁆𑀯𑀸 𑀢𑀫𑁆𑀩𑀮𑀕𑀸𑀫𑀫𑁆𑀳𑀺, 𑀦𑀯𑀁 𑀤𑀼𑀕𑁆𑀕𑀁 𑀦𑀺𑀯𑁂𑀲𑀺𑀬.

𑀅𑀦𑀼𑀓𑁆𑀓𑀫𑁂𑀦 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀦𑀸𑀕𑀳𑀼𑀮𑀯𑁆𑀳𑀬𑁂;

𑀧𑀼𑀭𑁂𑀯𑀲𑀻 𑀲𑀼𑀲𑀚𑁆𑀚𑁂𑀦𑁆𑀢𑁄, 𑀩𑀮𑀁 𑀘𑁄𑀴𑁂𑀳𑀺 𑀬𑀼𑀚𑁆𑀛𑀺𑀢𑀼𑀁.

𑀢𑀢𑁄 𑀭𑀸𑀚𑀸 𑀲𑀫𑀯𑁆𑀳𑀸𑀬, 𑀲𑀘𑀻𑀯𑁂 𑀤𑁆𑀯𑁂 𑀫𑀳𑀩𑁆𑀩𑀮𑁂;

𑀧𑁂𑀲𑁂𑀲𑀺 𑀤𑀺𑀓𑁆𑀔𑀺𑀡𑀁 𑀧𑀲𑁆𑀲𑀁, 𑀯𑀲𑀁 𑀦𑁂𑀢𑀼𑀁 𑀢𑀳𑀺𑀁 𑀚𑀦𑁂.

𑀲𑀫𑁆𑀧𑁂𑀲𑁂𑀲𑀺 𑀫𑀳𑀸𑀫𑀘𑁆𑀘-𑀬𑀼𑀕𑀮𑀁 𑀓𑀓𑁆𑀔𑀮𑀁 𑀯𑀺𑀪𑀽;

𑀘𑁄𑀴𑀤𑀧𑁆𑀧𑀯𑀺𑀦𑀸𑀲𑀸𑀬, 𑀢𑀢𑁄 𑀯𑁂𑀮𑀸 𑀫𑀳𑀸𑀧𑀣𑁂.

𑀧𑁂𑀲𑀺𑀢𑀸 𑀤𑀓𑁆𑀔𑀺𑀡𑀁 𑀧𑀲𑁆𑀲𑀁, 𑀅𑀫𑀘𑁆𑀘𑀸’𑀫𑁂 𑀫𑀳𑀩𑁆𑀩𑀮𑀸;

𑀫𑀼𑀳𑀼𑀦𑁆𑀦𑀭𑀼𑀕𑁆𑀕𑀫𑀤𑀼𑀕𑁆𑀕𑀁, 𑀩𑀤𑀴𑀢𑁆𑀣𑀮𑀫𑁂𑀯 𑀘.

𑀯𑀸𑀧𑀻𑀦𑀕𑀭𑀤𑀼𑀕𑁆𑀕𑀜𑁆𑀘 ¶ , 𑀩𑀼𑀤𑁆𑀥𑀕𑀸𑀫𑀓𑀫𑁂𑀯 𑀘;

𑀢𑀺𑀮𑀕𑀼𑀮𑁆𑀮𑀁 𑀫𑀳𑀸𑀕𑀮𑁆𑀮𑀁, 𑀫𑀡𑁆𑀟𑀕𑀮𑁆𑀮𑀓𑀫𑁂𑀯 𑀘.

𑀅𑀦𑀼𑀭𑀸𑀥𑀧𑀼𑀭𑀜𑁆𑀘𑀸𑀢𑀺, 𑀕𑀳𑁂𑀢𑁆𑀯𑀸𑀦 𑀓𑀫𑁂𑀦 𑀢𑁂;

𑀯𑀢𑁆𑀢𑁂𑀦𑁆𑀢𑀸 𑀲𑀯𑀲𑁂 𑀭𑀝𑁆𑀞𑀁, 𑀫𑀳𑀸𑀢𑀺𑀢𑁆𑀣𑀫𑀼𑀧𑀸𑀕𑀢𑀸.

𑀧𑁂𑀲𑀺𑀢𑀸 𑀲𑀘𑀺𑀯𑀸𑀤𑁆𑀯𑁂𑀢𑀼, 𑀢𑀢𑁄 𑀯𑁂𑀮𑀸 𑀫𑀳𑀸𑀧𑀣𑁂;

𑀯𑀺𑀮𑀼𑀫𑁆𑀧𑀦𑁆𑀢𑀸 𑀙𑀕𑀸𑀫𑀸𑀤𑀺-𑀔𑀦𑁆𑀥𑀸𑀯𑀸𑀭𑁂 𑀢𑀳𑀺𑀁 𑀢𑀳𑀺𑀁.

𑀧𑀼𑀮𑀢𑁆𑀣𑀺𑀦𑀕𑀭𑀸𑀲𑀦𑁆𑀦𑀁, 𑀓𑀫𑁂𑀦𑀸’𑀕𑀫𑁆𑀫 𑀧𑁂𑀲𑀬𑀼𑀁;

𑀤𑀽𑀢𑁂 𑀭𑀸𑀚𑀦𑁆𑀢𑀺𑀓𑀔𑀺𑀧𑁆𑀧-𑀫𑀸𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺𑀳.

𑀤𑀺𑀲𑀸𑀲𑀸 𑀤𑁆𑀯𑀻𑀲𑀼 𑀬𑀸𑀦𑁂𑀳𑀺, 𑀲𑀘𑀺𑀯𑁂𑀳𑀺 𑀧𑀯𑀢𑁆𑀢𑀺𑀢𑀁;

𑀯𑀺𑀓𑁆𑀓𑀫𑀸𑀢𑀺 𑀲𑀬𑀁 𑀲𑀼𑀢𑁆𑀯𑀸, 𑀓𑀸𑀮𑀜𑁆𑀜𑀽 𑀲𑁄 𑀫𑀳𑀻𑀧𑀳𑀺.

𑀲𑀻𑀖𑀁 𑀲𑀦𑁆𑀦𑀬𑁆𑀳 𑀲𑁂𑀦𑀗𑁆𑀕𑀁, 𑀲𑀫𑀕𑁆𑀕𑀁 𑀯𑀺𑀤𑀺𑀓𑁄𑀯𑀺𑀤𑁄;

𑀉𑀫𑁆𑀫𑀽𑀮𑀦𑀸𑀬𑀘𑁄𑀴𑀸𑀦𑀁, 𑀧𑀼𑀭𑀸𑀢𑀫𑁆𑀳𑀸’𑀪𑀺𑀦𑀺𑀓𑁆𑀔𑀫𑀺.

𑀕𑀘𑁆𑀙𑀁 𑀕𑀗𑁆𑀕𑀸𑀬 𑀫𑀳𑀺𑀬-𑀗𑁆𑀕𑀡𑀣𑀽𑀧𑀦𑁆𑀢𑀺𑀓𑁂 𑀯𑀺𑀪𑀽;

𑀲𑁂𑀦𑀸𑀦𑀺𑀯𑁂𑀲𑀁 𑀓𑀸𑀭𑁂𑀢𑁆𑀯𑀸 𑀓𑀜𑁆𑀘𑀺𑀓𑀸𑀮𑀁 𑀢𑀳𑀺𑀁 𑀯𑀲𑀻.

𑀓𑀫𑁂𑀦𑀸𑀕𑀫𑁆𑀫 𑀞𑀸𑀦𑀜𑁆𑀜𑀽, 𑀧𑀼𑀴𑀢𑁆𑀣𑀺𑀦𑀕𑀭𑀦𑁆𑀢𑀺𑀓𑁂;

𑀩𑀦𑁆𑀥𑀸𑀧𑁂𑀲𑀺 𑀫𑀳𑀸𑀯𑀻𑀭𑁄, 𑀔𑀦𑁆𑀥𑀸𑀯𑀸𑀭𑀁 𑀣𑀺𑀭𑀁 𑀯𑀭𑀁.

𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸 𑀲𑀽𑀭𑀸, 𑀘𑁄𑀴𑀸 𑀬𑁂 𑀓𑀓𑁆𑀔𑀮𑀸’𑀔𑀺𑀮𑀸;

𑀧𑀼𑀮𑀢𑁆𑀣𑀺𑀦𑀕𑀭𑁂 𑀬𑀼𑀤𑁆𑀥𑀁, 𑀓𑀸𑀢𑀼𑀁 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑁂.

𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀕𑀦𑁆𑀢𑁆𑀯𑀸, 𑀘𑁄𑀴𑀸 𑀩𑀳𑀺 𑀫𑀳𑀸𑀭𑀡𑀁;

𑀓𑀢𑁆𑀯𑀸 𑀧𑀭𑀸𑀚𑀺𑀢𑀸 𑀪𑀻𑀢𑀸, 𑀧𑀯𑀺𑀲𑁆𑀲 𑀦𑀕𑀭𑀁 𑀲𑀓𑀁.

𑀕𑀼𑀢𑁆𑀢𑀸 𑀲𑁂𑀲𑀧𑀼𑀭𑀤𑁆𑀯𑀸𑀭𑀸, 𑀕𑁄𑀧𑀼𑀭𑀝𑁆𑀝𑀸𑀮𑀦𑀺𑀲𑁆𑀲𑀺𑀢𑀸;

𑀫𑀳𑀸𑀳𑀯𑀁 𑀩𑀳𑀼𑀲𑁆𑀲𑀸𑀳𑀸, 𑀧𑀯𑀢𑁆𑀢𑁂𑀲𑀼𑀁 𑀪𑀬𑀸𑀯𑀳𑀁.

𑀤𑀺𑀬𑀟𑁆𑀠𑀫𑀸𑀲𑀁 𑀬𑀼𑀚𑁆𑀛𑀦𑁆𑀢𑀺, 𑀦𑀕𑀭𑀁 𑀢𑀫𑀼𑀧𑀭𑀼𑀦𑁆𑀥𑀺𑀬;

𑀲𑀸𑀥𑁂𑀢𑀼𑀁 𑀦𑁂𑀯𑀲𑀸’𑀲𑀓𑁆𑀔𑀺, 𑀪𑀽𑀧𑀸𑀮𑀲𑁆𑀲 𑀫𑀳𑀸𑀘𑀫𑀽.

𑀫𑀳𑀸𑀭𑀜𑁆𑀜𑁄 𑀫𑀳𑀸𑀯𑀻𑀭𑀸, 𑀫𑀳𑀸𑀲𑀽𑀭𑀸 𑀫𑀳𑀩𑁆𑀩𑀮𑀸;

𑀫𑀳𑀸𑀪𑀝𑀸 𑀫𑀳𑀸𑀫𑀸𑀦𑀸, 𑀭𑀯𑀺𑀤𑁂𑀯𑀘𑀮𑀸𑀤𑀬𑁄.

𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀦 𑀧𑀸𑀓𑀸𑀭𑀁, 𑀧𑀯𑀺𑀲𑁆𑀲 𑀲𑀳𑀲𑀸 𑀧𑀼𑀭𑀁;

𑀔𑀡𑁂𑀦 𑀤𑀫𑀺𑀴𑁂 𑀲𑀩𑁆𑀩𑁂, 𑀫𑀽𑀮𑀖𑀘𑁆𑀘𑀫𑀖𑀸𑀢𑀬𑀼𑀁.

𑀏𑀯𑀁 𑀮𑀤𑁆𑀥𑀚𑀬𑁄 𑀭𑀸𑀚𑀸, 𑀢𑀤𑀸 𑀯𑀺𑀚𑀬𑀩𑀸𑀳𑀼𑀲𑁄;

𑀘𑀭𑀸𑀧𑁂𑀲𑀺 𑀦𑀺𑀚𑀸𑀡𑀸𑀬, 𑀪𑁂𑀭𑀺𑀁 𑀪𑀽𑀭𑀺𑀫𑀢𑀺𑀧𑀼𑀭𑁂.

𑀢𑀁 ¶ 𑀲𑀼𑀢𑁆𑀯𑀸 𑀲𑀓𑀲𑁂𑀦𑀸𑀬, 𑀯𑀺𑀦𑀸𑀲𑀁 𑀘𑁄𑀴𑀪𑀽𑀧𑀢𑀺;

𑀲𑀻𑀳𑀴𑀸 𑀩𑀮𑀯𑀦𑁆𑀢𑁄𑀢𑀺, 𑀪𑀺𑀬𑁆𑀬𑁄 𑀲𑁂𑀦𑀁 𑀦 𑀧𑀸𑀳𑀺𑀡𑀺.

𑀯𑀻𑀭𑁄 𑀅𑀲𑁂𑀲𑀦𑀺𑀳𑀢𑀼𑀤𑁆𑀥𑀝 𑀘𑁄𑀴𑀲𑁂𑀝𑁆𑀞𑁄;

𑀯𑀺𑀜𑁆𑀜𑀽 𑀲𑀼𑀲𑀸𑀥𑀼𑀝𑁆𑀞𑀧𑀺𑀢𑀸𑀔𑀺𑀮𑀭𑀸𑀚𑀭𑀝𑁆𑀞𑁄;

𑀇𑀝𑁆𑀞𑀦𑁆𑀦𑀼𑀭𑀸𑀥𑀧𑀼𑀭𑀲𑁂𑀝𑁆𑀞𑀫𑀢𑀻𑀯 𑀳𑀝𑁆𑀞𑁄;

𑀯𑀲𑁆𑀲𑀫𑁆𑀳𑀺 𑀧𑀜𑁆𑀘𑀤𑀲𑀫𑁂 𑀕𑀫𑀺 𑀭𑀸𑀚𑀲𑁂𑀝𑁆𑀞𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀙𑀧𑁆𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀲𑀢𑁆𑀢𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀮𑀗𑁆𑀓𑀸𑀭𑀓𑁆𑀔𑀸𑀬 𑀲𑀘𑀺𑀯𑁂, 𑀩𑀮𑀺𑀦𑁄 𑀬𑁄𑀥𑀲𑀫𑁆𑀫𑀢𑁂;

𑀧𑀝𑀺𑀧𑀸𑀝𑀺𑀁 𑀲𑀫𑀼𑀤𑁆𑀤𑀺𑀲𑁆𑀲, 𑀲𑀫𑀦𑁆𑀢𑀸 𑀲𑀦𑁆𑀦𑀺𑀬𑁄𑀚𑀬𑀺.

𑀅𑀪𑀺𑀲𑁂𑀓𑀫𑀗𑁆𑀕𑀮𑀢𑁆𑀣𑀸𑀬, 𑀧𑀸𑀲𑀸𑀤𑀸𑀤𑀺𑀫𑀦𑁂𑀓𑀢𑀁;

𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑀦𑀻𑀬𑀦𑁆𑀢𑀺, 𑀲𑀘𑀺𑀯𑀁 𑀲𑀦𑁆𑀦𑀺𑀬𑁄𑀚𑀺𑀬.

𑀯𑀦𑁆𑀤𑀦𑀻𑀬𑁂’𑀪𑀺𑀯𑀦𑁆𑀤𑀦𑁆𑀢𑁄, 𑀧𑀤𑁂𑀲𑁂𑀦𑁂𑀓𑀓𑁂𑀢𑀳𑀺𑀁;

𑀦𑁂𑀢𑁆𑀯𑀸 𑀫𑀸𑀲𑀢𑁆𑀢𑀬𑀁 𑀕𑀜𑁆𑀙𑀺, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀧𑀼𑀦.

𑀯𑀺𑀲𑁆𑀲𑀼𑀢𑁄 𑀆𑀤𑀺𑀫𑀮𑀬-𑀦𑀸𑀫𑁂𑀦 𑀩𑀮𑀦𑀸𑀬𑀓𑁄;

𑀉𑀚𑀼𑀧𑀘𑁆𑀘𑀢𑁆𑀣𑀺𑀓𑁄 𑀳𑀼𑀢𑁆𑀯𑀸, 𑀫𑀳𑀻𑀧𑀸𑀮𑀲𑁆𑀲 𑀲𑀩𑁆𑀩𑀲𑁄.

𑀕𑀗𑁆𑀕𑀸 𑀫𑀢𑁆𑀣𑀬𑀼’𑀧𑀸𑀕𑀜𑁆𑀙𑀺, 𑀩𑀮𑀁 𑀲𑀩𑁆𑀩𑀁 𑀲𑀫𑀸𑀤𑀺𑀬;

𑀅𑀦𑁆𑀤𑀽𑀢𑀺 𑀯𑀺𑀲𑁆𑀲𑀼𑀢𑀁 𑀫𑀦𑁆𑀤-𑀧𑀜𑁆𑀜𑁄 𑀕𑀸𑀫𑀁 𑀧𑀼𑀭𑀦𑁆𑀢𑀺𑀓𑁂.

𑀮𑀁𑀓𑀺𑀲𑁆𑀲𑀭𑁄 𑀢𑀳𑀺𑀁 𑀕𑀦𑁆𑀢𑁆𑀯𑀸, 𑀉𑀤𑁆𑀥𑀭𑀺𑀢𑁆𑀯𑀸 𑀢𑀫𑀼𑀤𑁆𑀥𑀢𑀁;

𑀧𑀼𑀮𑀢𑁆𑀣𑀺𑀦𑀕𑀭𑀁 𑀕𑀜𑁆𑀙𑀺, 𑀯𑀲𑁂 𑀯𑀢𑁆𑀢𑀺𑀬 𑀢𑀁 𑀩𑀮𑀁.

𑀬𑀼𑀯𑀭𑀸𑀚𑀧𑀤𑀁𑀬𑁂𑀯, 𑀲𑀺𑀢𑁄 𑀲𑀦𑁆𑀢𑁄 𑀮𑀺𑀔𑀸𑀧𑀬𑀺;

𑀲𑁄 𑀲𑀢𑁆𑀢𑀭𑀲𑀯𑀲𑁆𑀲𑀸𑀦𑀺, 𑀲𑀧𑁆𑀧𑀜𑁆𑀜𑁄 𑀦𑀭𑀲𑀢𑁆𑀢𑀫𑁄.

𑀢𑀢𑁄’𑀦𑀼𑀭𑀸𑀥𑀦𑀕𑀭-𑀫𑀪𑀺𑀕𑀫𑁆𑀫 ¶ 𑀬𑀣𑀸𑀯𑀺𑀥𑀺𑀁;

𑀅𑀦𑀼𑀪𑁄𑀢𑁆𑀯𑀸 𑀯𑀺𑀥𑀸𑀦𑀜𑁆𑀜𑀽, 𑀅𑀪𑀺𑀲𑁂𑀓𑀫𑀳𑀼𑀲𑁆𑀲𑀯𑀁.

𑀅𑀝𑁆𑀞𑀺𑀢𑁄 𑀧𑀸𑀧𑀥𑀫𑁆𑀫𑁂𑀲𑀼, 𑀲𑀼𑀝𑁆𑀞𑀺𑀢𑁄 𑀲𑁂𑀝𑁆𑀞𑀓𑀫𑁆𑀫𑀦𑀺;

𑀲𑁄 𑀅𑀝𑁆𑀞𑀸𑀭𑀲𑀫𑀁 𑀯𑀲𑁆𑀲𑀁, 𑀮𑀺𑀔𑀸𑀧𑀬𑀺 𑀲𑀼𑀲𑀡𑁆𑀞𑀺𑀢𑁄.

𑀢𑀢𑁄 𑀆𑀕𑀫𑁆𑀫 𑀦𑀺𑀯𑀲𑀺, 𑀧𑀼𑀮𑀢𑁆𑀣𑀺𑀦𑀕𑀭𑁂 𑀯𑀭𑁂;

𑀲𑁄 𑀲𑀺𑀭𑀻𑀲𑀗𑁆𑀖𑀩𑁄𑀥𑀻’𑀢𑀺, 𑀦𑀸𑀫𑀥𑁂𑀬𑁆𑀬𑁂𑀦 𑀯𑀺𑀲𑁆𑀲𑀼𑀢𑁄.

𑀅𑀦𑀼𑀚𑀁 𑀲𑁄 𑀯𑀻𑀭𑀩𑀸𑀳𑀼-𑀫𑁄𑀧𑀭𑀚𑁆𑀚𑁂 𑀦𑀺𑀯𑁂𑀲𑀺𑀬;

𑀤𑀢𑁆𑀯𑀸𑀦 𑀤𑀓𑁆𑀔𑀺𑀡𑀁 𑀤𑁂𑀲𑀁, 𑀢𑀁 𑀲𑀗𑁆𑀕𑀡𑁆𑀳𑀺 𑀬𑀣𑀸𑀯𑀺𑀥𑀺𑀁.

𑀓𑀡𑀺𑀝𑁆𑀞𑀲𑁆𑀲𑀸𑀣 𑀪𑀸𑀢𑀼𑀲𑁆𑀲, 𑀚𑀬𑀩𑀸𑀳𑀼𑀲𑁆𑀲 𑀪𑀽𑀪𑀼𑀚𑁄;

𑀆𑀤𑀺𑀧𑀸𑀤𑀧𑀤𑀁 𑀤𑀢𑁆𑀯𑀸, 𑀭𑀝𑁆𑀞𑀁 𑀘𑀸’𑀤𑀸𑀲𑀺 𑀭𑁄𑀳𑀡𑀁.

𑀞𑀸𑀦𑀦𑁆𑀢𑀭𑀸𑀦𑀺 𑀲𑀩𑁆𑀩𑁂𑀲-𑀫𑀫𑀘𑁆𑀘𑀸𑀦𑀁 𑀬𑀣𑀸𑀭𑀳𑀁;

𑀤𑀢𑁆𑀯𑀸 𑀭𑀚𑁆𑀚𑁂 𑀬𑀣𑀸𑀜𑀸𑀬𑀁, 𑀓𑀭𑀁 𑀬𑁄𑀚𑁂𑀲𑀺 𑀕𑀡𑁆𑀳𑀺𑀢𑀼𑀁.

𑀘𑀺𑀭𑀲𑁆𑀲𑀁 𑀧𑀭𑀺𑀳𑀻𑀦𑀁 𑀲𑁄, 𑀤𑀬𑀸𑀯𑀸𑀲𑁄 𑀫𑀳𑀻𑀧𑀢𑀺;

𑀧𑀯𑀢𑁆𑀢𑁂𑀲𑀺 𑀬𑀣𑀸𑀥𑀫𑁆𑀫𑀁, 𑀞𑀺𑀢𑀥𑀫𑁆𑀫𑁄 𑀯𑀺𑀦𑀺𑀘𑁆𑀙𑀬𑀁.

𑀏𑀯𑀁 𑀲𑀫𑀼𑀤𑁆𑀥𑀝𑀸𑀦𑁂𑀓, 𑀭𑀺𑀧𑀼𑀓𑀡𑁆𑀝𑀓𑀲𑀜𑁆𑀘𑀬𑁂;

𑀦𑀺𑀘𑁆𑀘𑀁 𑀭𑀚𑁆𑀚𑀁 𑀧𑀲𑀸𑀲𑁂𑀦𑁆𑀢𑁂, 𑀮𑀗𑁆𑀓𑀁𑀲𑀫𑁆𑀫𑀸𑀦𑀭𑀺𑀲𑁆𑀲𑀭𑁂.

𑀙𑀢𑁆𑀢𑀕𑁆𑀕𑀸𑀳𑀓𑀦𑀸𑀣𑁄 𑀘, 𑀥𑀫𑁆𑀫𑀕𑁂𑀳𑀓𑀦𑀸𑀬𑀓𑁄;

𑀢𑀣𑁂𑀯 𑀲𑁂𑀝𑁆𑀞𑀺𑀦𑀸𑀣𑁄 𑀘, 𑀇𑀘𑁆𑀘𑁂𑀢𑁂 𑀪𑀸𑀢𑀭𑁄 𑀢𑀬𑁄.

𑀭𑀜𑁆𑀜𑁄 𑀯𑀺𑀭𑁄𑀥𑀺𑀢𑀁 𑀬𑀸𑀢𑀸, 𑀨𑀮𑀸𑀢𑀸 𑀚𑀫𑁆𑀧𑀼𑀤𑀻𑀧𑀓𑀁;

𑀮𑀗𑁆𑀓𑀁 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂, 𑀏𑀓𑁂𑀦𑀽𑀦𑁂 𑀲𑀫𑁄𑀢𑀭𑀼𑀁.

𑀢𑁂 𑀲𑀩𑁆𑀩𑁂 𑀭𑁄𑀳𑀡𑀁 𑀭𑀝𑁆𑀞𑀁, 𑀲𑀩𑁆𑀩𑀁 𑀫𑀮𑀬𑀫𑀡𑁆𑀟𑀮𑀁;

𑀲𑀩𑁆𑀩𑀁 𑀤𑀓𑁆𑀔𑀺𑀡𑀧𑀲𑁆𑀲𑀜𑁆𑀘, 𑀲𑀳𑀲𑀸 𑀧𑀭𑀺𑀯𑀢𑁆𑀢𑀬𑀼𑀁.

𑀦𑀺𑀧𑀼𑀡𑁄 𑀭𑁄𑀳𑀡𑀁 𑀕𑀦𑁆𑀢𑁆𑀯𑀸, 𑀢𑀣𑀸 𑀫𑀮𑀬𑀫𑀡𑁆𑀟𑀮𑀁;

𑀦𑀺𑀖𑀸𑀢𑁂𑀦𑁆𑀢𑁄 𑀩𑀳𑀽 𑀢𑀢𑁆𑀣, 𑀢𑀢𑁆𑀣 𑀧𑀘𑁆𑀘𑀢𑁆𑀣𑀺𑀓𑁂 𑀚𑀦𑁂.

𑀲𑀫𑁆𑀫𑀸𑀯𑀼𑀧𑀲𑀫𑁂𑀢𑁆𑀯𑀸 𑀢𑀁, 𑀞𑀧𑁂𑀢𑁆𑀯𑀸 𑀲𑀘𑀺𑀯𑁂 𑀢𑀳𑀺𑀁;

𑀤𑀓𑁆𑀔𑀺𑀡𑁄 𑀤𑀓𑁆𑀔𑀺𑀡𑀁 𑀤𑁂𑀲𑀁, 𑀲𑀬𑀁 𑀕𑀦𑁆𑀢𑁆𑀯𑀸 𑀫𑀳𑀩𑁆𑀩𑀮𑁄.

𑀧𑁂𑀲𑁂𑀢𑁆𑀯𑀸 𑀲𑀫𑀡𑀻𑀪𑀸𑀢𑀼-𑀯𑀁𑀲𑀚𑀁 𑀲𑀘𑀺𑀯𑀁 𑀢𑀤𑀸;

𑀕𑀸𑀳𑁂𑀢𑁆𑀯𑀸 𑀲𑀫𑀭𑁂𑀖𑁄𑀭𑁂, 𑀯𑀻𑀭𑁄 𑀢𑁂 𑀲𑀓𑀯𑁂𑀭𑀺𑀦𑁄.

𑀲𑀫𑀸𑀭𑁄𑀧𑀺𑀬𑀲𑀽𑀮𑀫𑁆𑀳𑀺, 𑀮𑀗𑁆𑀓𑀁 𑀯𑀺𑀕𑀢𑀓𑀡𑁆𑀝𑀓𑀁;

𑀓𑀸𑀭𑁂𑀢𑁆𑀯𑀸𑀦 𑀦𑀺𑀭𑀸𑀢𑀗𑁆𑀓𑀁, 𑀧𑀼𑀮𑀢𑁆𑀣𑀺𑀧𑀼𑀭𑀫𑀸𑀕𑀫𑀺.

𑀯𑀲𑀦𑁆𑀢𑀻 ¶ 𑀘𑁄𑀴𑀯𑀺𑀲𑀬𑁂, 𑀚𑀕𑀢𑀺𑀧𑀸𑀮𑀭𑀸𑀚𑀺𑀦𑀻;

𑀘𑁄𑀴𑀳𑀢𑁆𑀣𑀸 𑀧𑀫𑀼𑀜𑁆𑀘𑀺𑀢𑁆𑀯𑀸, 𑀲𑀤𑁆𑀥𑀺𑀁 𑀥𑀻𑀢𑀼 𑀓𑀼𑀫𑀸𑀭𑀺𑀬𑀸.

𑀮𑀻𑀮𑀸𑀯𑀢𑁆𑀬𑀸𑀪𑀺𑀥𑀸𑀦𑀸𑀬, 𑀦𑀸𑀯𑀸𑀫𑀸𑀭𑀼𑀬𑁆𑀳 𑀯𑁂𑀕𑀲𑀸;

𑀮𑀁𑀓𑀸𑀤𑀻𑀧𑀫𑁆𑀳𑀺 𑀑𑀢𑀺𑀡𑁆𑀡𑀸, 𑀧𑀲𑁆𑀲𑀺 𑀮𑀁𑀓𑀺𑀲𑁆𑀲𑀭𑀁 𑀢𑀤𑀸.

𑀲𑀼𑀢𑁆𑀯𑀸 𑀯𑀁𑀲𑀓𑁆𑀓𑀫𑀁 𑀢𑀲𑁆𑀲𑀸, 𑀲𑁄 𑀜𑀢𑁆𑀯𑀸 𑀲𑀼𑀤𑁆𑀥𑀯𑀁𑀲𑀢𑀁;

𑀮𑀻𑀮𑀸𑀯𑀢𑀺𑀁 𑀫𑀳𑀺𑀲𑀺𑀢𑁆𑀢𑁂, 𑀅𑀪𑀺𑀲𑀺𑀜𑁆𑀘𑀺 𑀦𑀭𑀺𑀲𑁆𑀲𑀭𑁄.

𑀲𑀸 𑀢𑀁 𑀧𑀝𑀺𑀘𑁆𑀘 𑀭𑀸𑀚𑀸𑀦𑀁, 𑀫𑀳𑁂𑀲𑀻 𑀥𑀻𑀢𑀭𑀁 𑀮𑀪𑀺;

𑀦𑀸𑀫𑀁 𑀬𑀲𑁄𑀥𑀭𑀸𑀢𑀺’𑀲𑁆𑀲𑀸, 𑀅𑀓𑀸𑀲𑀺 𑀥𑀭𑀡𑀻 𑀧𑀢𑀺.

𑀫𑁂𑀭𑀼𑀓𑀦𑁆𑀤𑀭𑀭𑀝𑁆𑀞𑁂𑀦, 𑀲𑀤𑁆𑀥𑀺𑀁 𑀭𑀸𑀚𑀸 𑀲𑀥𑀻𑀢𑀭𑀁;

𑀯𑀻𑀭𑀯𑀫𑁆𑀫𑀲𑁆𑀲 𑀧𑀸𑀤𑀸𑀲𑀺, 𑀲𑀸 𑀮𑀪𑀺 𑀥𑀻𑀢𑀭𑁄 𑀤𑀼𑀯𑁂.

𑀲𑀫𑀸𑀦𑀦𑀸𑀫𑀺𑀓𑀸 𑀚𑁂𑀝𑁆𑀞𑀸, 𑀲𑀸 𑀫𑀸𑀢𑀸 𑀫𑀳𑀺𑀬𑀸 𑀅𑀳𑀼;

𑀲𑀼𑀕𑀮𑀸 𑀦𑀸𑀫𑀺𑀓𑀸 𑀆𑀲𑀺, 𑀢𑀸𑀲𑀼 𑀤𑁆𑀯𑀻𑀲𑀼 𑀓𑀡𑀺𑀝𑁆𑀞𑀺𑀓𑀸.

𑀓𑀸𑀮𑀺𑀗𑁆𑀕𑀥𑀭𑀡𑀻𑀧𑀸𑀮-𑀯𑀁𑀲𑀚𑀁 𑀘𑀸𑀭𑀼𑀤𑀲𑁆𑀲𑀦𑀁;

𑀢𑀺𑀮𑁄𑀓𑀲𑀼𑀦𑁆𑀤𑀭𑀁 𑀦𑀸𑀫, 𑀲𑀼𑀓𑀼𑀫𑀸𑀭𑀁 𑀓𑀼𑀫𑀸𑀭𑀺𑀓𑀁.

𑀓𑀸𑀮𑀺𑀗𑁆𑀕𑀭𑀝𑁆𑀞𑀢𑁄 𑀭𑀸𑀚𑀸, 𑀆𑀡𑀸𑀧𑁂𑀢𑁆𑀯𑀸 𑀘𑀺𑀭𑀝𑁆𑀞𑀺𑀢𑀺𑀁;

𑀦𑀺𑀚𑀯𑀁𑀲𑀲𑁆𑀲 𑀇𑀘𑁆𑀙𑀦𑁆𑀢𑁄, 𑀫𑀳𑁂𑀲𑀺𑀢𑁆𑀢𑁂’𑀪𑀺 𑀲𑁂𑀘𑀬𑀺.

𑀲𑀼𑀪𑀤𑁆𑀤𑀸 𑀘 𑀲𑀼𑀫𑀺𑀢𑁆𑀢𑀸 𑀘, 𑀮𑁄𑀓𑀦𑀸𑀣𑀯𑁆𑀳𑀬𑀸𑀧𑀺 𑀘;

𑀭𑀢𑀦𑀸𑀯𑀮𑀻 𑀭𑀽𑀧𑀯𑀢𑀻, 𑀇𑀢𑀺𑀫𑀸 𑀧𑀜𑁆𑀘 𑀥𑀻𑀢𑀭𑁄.

𑀧𑀼𑀢𑁆𑀢𑀁 𑀯𑀺𑀓𑁆𑀓𑀫𑀩𑀸𑀳𑀼𑀜𑁆𑀘, 𑀲𑀸 𑀮𑀪𑀻 𑀥𑀜𑁆𑀜𑀮𑀓𑁆𑀔𑀡𑀁;

𑀲𑀫𑁆𑀧𑀢𑁆𑀢𑀸 𑀲𑀸 𑀧𑀚𑀯𑀼𑀤𑁆𑀥𑀺𑀁, 𑀳𑀭𑀦𑁆𑀢𑀺 𑀭𑀸𑀚𑀺𑀦𑁄 𑀫𑀢𑀁.

𑀇𑀢𑁆𑀣𑀸𑀕𑀸𑀭𑁂𑀲𑀼 𑀲𑁂𑀲𑁂𑀲𑀼, 𑀯𑀻𑀢𑀸 𑀲𑀫𑀓𑀼𑀮𑀗𑁆𑀕𑀦𑀸;

𑀕𑀩𑁆𑀪𑁄 𑀚𑀸𑀢𑀼𑀫𑀳𑀻𑀧𑀸𑀮𑀁, 𑀢𑀁 𑀧𑀝𑀺𑀘𑁆𑀘 𑀦 𑀲𑀡𑁆𑀞𑀳𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸, 𑀅𑀫𑀘𑁆𑀘𑀕𑀡𑀫𑀚𑁆𑀛𑀕𑁄;

𑀧𑀺𑀮𑁄𑀓𑀺𑀬𑀞𑀺𑀪𑀸 𑀲𑀩𑁆𑀩𑀸, 𑀥𑀻𑀢𑀭𑁄 𑀧𑀝𑀺𑀧𑀸𑀝𑀺𑀬𑀸.

𑀥𑀻𑀢𑀼 𑀦𑀯𑀫𑀯𑀲𑁂𑀲𑀸𑀦𑀁, 𑀞𑀧𑁂𑀢𑁆𑀯𑀸 𑀭𑀢𑀦𑀸𑀯𑀮𑀺𑀁;

𑀥𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦-𑀧𑀼𑀢𑁆𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀲𑀼𑀘𑀓𑀁.

𑀮𑀓𑁆𑀔𑀡𑀁 𑀮𑀓𑁆𑀔𑀡𑀜𑁆𑀜𑀽 𑀲𑁄, 𑀅𑀧𑀲𑁆𑀲𑀁 𑀧𑁂𑀫𑀘𑁂𑀕𑀯𑀸;

𑀭𑀢𑀦𑀸𑀯𑀮𑀺𑀫𑀸𑀳𑀽𑀬, 𑀢𑀲𑁆𑀲𑀸 𑀫𑀼𑀤𑁆𑀥𑀦𑀺 𑀘𑀼𑀫𑁆𑀩𑀺𑀬.

𑀢𑁂𑀚𑁄𑀕𑀼𑀡𑁂𑀳𑀺 ¶ 𑀘𑀸𑀕𑁂𑀳𑀺, 𑀥𑀺𑀬𑀸 𑀲𑀽𑀭𑀢𑁆𑀢𑀦𑁂𑀦 𑀘;

𑀪𑀽𑀢𑁂 𑀘 𑀪𑀸𑀯𑀺𑀦𑁄 𑀘𑁂𑀯, 𑀲𑀩𑁆𑀩𑁂 𑀪𑀽𑀧𑁂’𑀢𑀺𑀲𑀸𑀬𑀺𑀦𑁄.

𑀦𑀺𑀘𑁆𑀘𑀁 𑀮𑀗𑁆𑀓𑀁 𑀦𑀺𑀭𑀸𑀲𑀗𑁆𑀓-𑀫𑁂𑀓𑀘𑁆𑀙𑀢𑁆𑀢𑀓𑀫𑁂𑀯 𑀘;

𑀧𑀯𑀺𑀥𑀸𑀢𑀼𑀁 𑀲𑀫𑀢𑁆𑀣𑀲𑁆𑀲, 𑀲𑀫𑁆𑀫𑀸𑀲𑀸𑀲𑀦𑀢𑀸𑀬𑀺𑀦𑁄.

𑀲𑁄𑀪𑀦𑀸𑀦𑁂𑀓𑀯𑀢𑁆𑀢𑀲𑁆𑀲, 𑀇𑀫𑀺𑀲𑁆𑀲𑀸 𑀓𑀼𑀘𑁆𑀙𑀺𑀳𑁂𑀲𑁆𑀲𑀢𑀺;

𑀧𑀼𑀢𑁆𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀞𑀸𑀦𑀦𑁆𑀢𑀺, 𑀫𑀼𑀤𑀼𑀢𑁄 𑀲𑁄 𑀲𑀫𑀩𑁆𑀭𑀯𑀺.

𑀬𑀸𑀯𑀦𑁆𑀢𑀲𑁆𑀲𑀸𑀧𑀺𑀔𑁄𑀘𑁄𑀴-𑀫𑀳𑀻𑀧𑀸𑀮𑀲𑁆𑀲 𑀦𑁂𑀓𑀲𑁄;

𑀓𑀼𑀮𑀸𑀪𑀺𑀫𑀸𑀦𑀻 𑀭𑀸𑀚𑀸 𑀲𑁄, 𑀅𑀤𑀢𑁆𑀯𑀸𑀦 𑀓𑀡𑀻𑀬𑀲𑀺𑀁.

𑀆𑀡𑀸𑀧𑁂𑀢𑁆𑀯𑀸 𑀧𑀡𑁆𑀟𑀼𑀭𑀸𑀚𑀁, 𑀯𑀺𑀲𑀼𑀤𑁆𑀥𑀢𑁆𑀯𑀬𑀲𑀫𑁆𑀪𑀯𑀁;

𑀅𑀦𑀼𑀚𑀁 𑀭𑀸𑀚𑀺𑀦𑀺𑀁 𑀯𑀲𑁆𑀲, 𑀫𑀺𑀢𑁆𑀢𑀯𑁆𑀳𑀬𑀫𑀤𑀸𑀲𑀺𑀲𑁄.

𑀲𑀸𑀫𑀸𑀡𑀪𑀭𑀡𑀁 𑀓𑀺𑀢𑁆𑀢𑀺, 𑀲𑀺𑀭𑀻 𑀫𑁂𑀖𑀸𑀪𑀺𑀥𑀸𑀦𑀓𑀁;

𑀲𑀺𑀭𑀺𑀯𑀮𑁆𑀮𑀪𑀦𑀸𑀫𑀜𑁆𑀘, 𑀚𑀦𑁂𑀲𑀺 𑀢𑀦𑀬𑁂 𑀢𑀬𑁄.

𑀲𑀼𑀪𑀤𑁆𑀤 𑀯𑀻𑀭𑀩𑀸𑀳𑀼𑀲𑁆𑀲, 𑀲𑀼𑀫𑀺𑀢𑁆𑀢𑀁 𑀚𑀬𑀩𑀸𑀳𑀼𑀦𑁄;

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀧𑀸𑀤𑀸𑀲𑀺 𑀥𑀭𑀡𑀻 𑀧𑀢𑀺.

𑀅𑀤𑀸𑀲𑀺 𑀫𑀸𑀡𑀸𑀪𑀭𑀡𑁂, 𑀥𑀻𑀢𑀭𑀁 𑀭𑀢𑀦𑀸𑀯𑀮𑀺𑀁;

𑀮𑁄𑀓𑀦𑀸𑀣𑀯𑁆𑀳𑀬𑀁 𑀓𑀺𑀢𑁆𑀢𑀺 𑀲𑀺𑀭𑀺𑀫𑁂𑀖𑀲𑁆𑀲’𑀤𑀸𑀲𑀺𑀲𑁄.

𑀭𑀽𑀧𑀢𑁆𑀬𑀪𑀺𑀥𑀸𑀦𑀸𑀬, 𑀥𑀻𑀢𑀼𑀬𑁄 𑀧𑀭𑀢𑀸𑀬𑀳𑀺;

𑀲𑀭𑀻𑀭𑀺𑀯𑀮𑁆𑀮𑀪𑀲𑀸𑀤𑀸, 𑀲𑀼𑀕𑀮𑀯𑁆𑀳 𑀓𑀼𑀫𑀸𑀭𑀺𑀓𑀁.

𑀫𑀥𑀼𑀓𑀡𑁆𑀡𑀯𑀪𑀻𑀫𑀭𑀸𑀚, 𑀩𑀮𑀓𑁆𑀓𑀸𑀭 𑀲𑀦𑀸𑀫𑀓𑁂;

𑀫𑀳𑁂𑀲𑀻 𑀩𑀦𑁆𑀥𑀯𑁂𑀭𑀸𑀚-𑀧𑀼𑀢𑁆𑀢𑁂 𑀲𑀻𑀳𑀧𑀼𑀭𑀸𑀕𑀢𑁂.

𑀧𑀲𑁆𑀲𑀺𑀢𑁆𑀯𑀸𑀦 𑀧𑀳𑀻𑀧𑀸𑀮𑁄, 𑀢𑀤𑀸 𑀲𑀜𑁆𑀚𑀸𑀢𑀧𑀻𑀢𑀺𑀓𑁄;

𑀢𑁂𑀲𑀁 𑀧𑀸𑀤𑀸𑀲𑀺 𑀧𑀘𑁆𑀘𑁂𑀓𑀁, 𑀯𑀼𑀢𑁆𑀢𑀺𑀁 𑀲𑁄 𑀅𑀦𑀼𑀭𑀽𑀧𑀓𑀁.

𑀢𑁂 𑀲𑀩𑁆𑀩𑁂 𑀮𑀤𑁆𑀥𑀲𑀓𑁆𑀓𑀸𑀭 𑀲𑀫𑁆𑀫𑀸𑀦𑀸𑀥𑀭𑀡𑀻𑀧𑀢𑀺𑀁;

𑀆𑀭𑀸𑀥𑀬𑀦𑁆𑀢𑀸 𑀲𑀲𑀢𑀁, 𑀦𑀺𑀯𑀲𑀺𑀁𑀲𑀼 𑀬𑀣𑀸𑀭𑀼𑀘𑀺𑀁.

𑀏𑀢𑁂𑀲𑀁 𑀭𑀸𑀚𑀧𑀼𑀢𑁆𑀢𑀸𑀦𑀁, 𑀲𑀼𑀦𑁆𑀤𑀭𑀺𑀯𑁆𑀳𑀁 𑀓𑀡𑀺𑀝𑁆𑀞𑀓𑀁;

𑀅𑀤𑀸 𑀯𑀺𑀓𑁆𑀓𑀫𑀩𑀸𑀳𑀼𑀲𑁆𑀲, 𑀦𑀺𑀚𑀯𑀁𑀲𑀞𑀺𑀢𑀝𑁆𑀞𑀺𑀓𑁄.

𑀪𑀺𑀬𑁆𑀬𑁄 ¶ 𑀯𑀺𑀓𑁆𑀓𑀫𑀩𑀸𑀳𑀼𑀲𑁆𑀲, 𑀢𑀢𑁄 𑀮𑀻𑀮𑀸𑀯𑀢𑀺𑀁 𑀲𑀢𑀺𑀁;

𑀲𑀳 𑀪𑁄𑀕𑁂𑀦 𑀧𑀸𑀤𑀸𑀲𑀺, 𑀢𑀤𑀸 𑀩𑀦𑁆𑀥𑀼 𑀳𑀺𑀢𑁂𑀭𑀢𑁄.

𑀯𑀺𑀥𑀸𑀬 𑀏𑀯𑀁 𑀲𑀚𑀦𑁂 𑀚𑀦𑀺𑀦𑁆𑀤𑁄;

𑀦𑀺𑀲𑁆𑀲𑁂𑀲𑀢𑁄 𑀪𑁄𑀕𑀲𑀫𑀧𑁆𑀧𑀺𑀢𑁄;

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀢𑁆𑀢𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀝𑁆𑀞𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀯𑀺𑀘𑀺𑀦𑀺𑀢𑁆𑀯𑀸 𑀓𑀼𑀮𑀻𑀦𑁂 𑀲𑁄, 𑀚𑀦𑁂 𑀲𑀩𑁆𑀩𑁂 𑀲𑀫𑀸𑀤𑀺𑀬;

𑀲𑀓𑀸𑀭𑀓𑁆𑀔𑀸𑀬 𑀬𑁄𑀚𑁂𑀲𑀺, 𑀬𑀣𑀸𑀘𑀸𑀭𑀁 𑀫𑀳𑀻𑀧𑀢𑀺.

𑀉𑀘𑁆𑀘𑀁 𑀧𑀼𑀮𑀢𑁆𑀣𑀺𑀦𑀕𑀭𑁂, 𑀧𑀸𑀓𑀸𑀭𑀁 𑀓𑀸𑀭𑀬𑀻 𑀣𑀺𑀭𑀁;

𑀦𑁂𑀓𑀕𑁄𑀧𑀼𑀭𑀲𑀁𑀬𑀼𑀢𑁆𑀢𑀁, 𑀬𑀼𑀥𑀸𑀓𑀫𑁆𑀫𑀲𑀼𑀭𑀜𑁆𑀚𑀺𑀢𑀁.

𑀲𑀫𑀦𑁆𑀢𑀸𑀬𑀢𑀯𑀺𑀢𑁆𑀣𑀺𑀡𑁆𑀡-𑀕𑀫𑁆𑀪𑀻𑀭𑀧𑀭𑀺𑀔𑀸𑀬𑀼𑀢𑀁;

𑀉𑀘𑁆𑀘𑀧𑀢𑁆𑀣𑀡𑁆𑀟𑀺𑀮𑁄𑀧𑁂𑀢𑀁, 𑀤𑀼𑀧𑁆𑀧𑀥𑀁𑀲𑀫𑀭𑀸𑀢𑀺𑀳𑀺.

𑀉𑀧𑀲𑀫𑁆𑀧𑀤𑀓𑀫𑁆𑀫𑀲𑁆𑀲, 𑀕𑀡𑀧𑀽𑀭𑀓𑀪𑀺𑀓𑁆𑀔𑀽𑀦𑀁;

𑀅𑀧𑁆𑀧𑀳𑁄𑀦𑁂𑀓𑀪𑀸𑀯𑁂𑀦, 𑀲𑀸𑀲𑀦𑀞𑀺𑀢𑀺𑀫𑀸𑀦𑀲𑁄.

𑀅𑀦𑀼𑀭𑀼𑀤𑁆𑀥𑀦𑀭𑀺𑀦𑁆𑀤𑀲𑁆𑀲, 𑀲𑀳𑀸𑀬𑀲𑁆𑀲𑀸𑀣 𑀲𑀦𑁆𑀢𑀺𑀓𑀁;

𑀭𑀸𑀫𑀜𑁆𑀜𑀯𑀺𑀲𑀬𑀁 𑀤𑀽𑀢𑁂, 𑀧𑁂𑀲𑁂𑀢𑁆𑀯𑀸 𑀲𑀳𑀧𑀸𑀪𑀢𑁂.

𑀢𑀢𑁄 𑀆𑀡𑀸𑀧𑀬𑀺𑀢𑁆𑀯𑀸𑀦, 𑀧𑀺𑀝𑀓𑀢𑁆𑀢𑀬𑀧𑀸𑀭𑀕𑁂;

𑀲𑁄 𑀲𑀻𑀮𑀸𑀤𑀺𑀕𑀼𑀡𑀸𑀯𑀸𑀲𑁂, 𑀪𑀺𑀓𑁆𑀔𑀯𑁄 𑀣𑁂𑀭𑀲𑀫𑁆𑀫𑀢𑁂.

𑀢𑁂 𑀉𑀴𑀸𑀭𑀸𑀳𑀺 𑀧𑀽𑀚𑀸𑀳𑀺, 𑀧𑀽𑀚𑀬𑀺𑀢𑁆𑀯𑀸 𑀦𑀭𑀺𑀲𑁆𑀲𑀭𑁄;

𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀢𑁆𑀢𑀺, 𑀓𑀸𑀭𑀬𑀺𑀢𑁆𑀯𑀸 𑀅𑀦𑁂𑀓𑀲𑁄.

𑀧𑀺𑀝𑀓𑀢𑁆𑀢𑀬𑀜𑁆𑀘 𑀩𑀳𑀼𑀲𑁄, 𑀓𑀣𑀸𑀧𑁂𑀢𑁆𑀯𑀸 𑀲𑀯𑀡𑁆𑀡𑀦𑀁;

𑀮𑀗𑁆𑀓𑀸𑀬𑁄’𑀲𑀓𑁆𑀓𑀫𑀸𑀦𑀁 𑀲𑁄, 𑀚𑁄𑀢𑀬𑀻 𑀚𑀺𑀦𑀲𑀸𑀲𑀦𑀁.

𑀧𑀼𑀢𑀢𑁆𑀣𑀺𑀦𑀕𑀭𑀲𑁆𑀲𑀦𑁆𑀢𑁄 ¶ , 𑀧𑀤𑁂𑀲𑀲𑁆𑀫𑀺𑀁 𑀢𑀳𑀺𑀁 𑀢𑀳𑀺𑀁;

𑀯𑀺𑀳𑀸𑀭𑁂 𑀓𑀸𑀭𑀬𑀺𑀢𑁆𑀯𑀸𑀦, 𑀩𑀳𑀼𑀓𑁂 𑀲𑀼𑀫𑀦𑁄𑀳𑀭𑁂.

𑀪𑀺𑀓𑁆𑀔𑀯𑁄 𑀢𑀢𑁆𑀣 𑀯𑀸𑀲𑁂𑀢𑁆𑀯𑀸, 𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀺𑀦𑁄;

𑀧𑀘𑁆𑀘𑀬𑁂𑀳𑀺 𑀉𑀴𑀸𑀭𑁂𑀳𑀺, 𑀲𑀦𑁆𑀢𑀧𑁆𑀧𑁂𑀲𑀺 𑀘𑀢𑀽𑀳𑀺𑀧𑀺.

𑀨𑀮𑀺𑀓𑀢𑁆𑀣𑀫𑁆𑀪𑀓𑀘𑀸𑀭𑀼-𑀧𑀸𑀓𑀸𑀭𑀧𑀭𑀺𑀔𑀸𑀬𑀼𑀢𑀁;

𑀧𑀜𑁆𑀘𑀪𑀽𑀫𑀓𑀧𑀸𑀲𑀸𑀤-𑀧𑀯𑀭𑁂 𑀦𑁄’𑀧𑀲𑁄𑀪𑀺𑀢𑀁.

𑀲𑀫𑀲𑀦𑁆𑀢𑀸 𑀯𑀸𑀲𑀧𑀦𑁆𑀢𑀻𑀳𑀺, 𑀲𑀼𑀪𑀸𑀳𑀺 𑀲𑀼𑀯𑀺𑀭𑀸𑀚𑀺𑀢𑀁;

𑀦𑀺𑀭𑀓𑀺𑀡𑁆𑀡𑀫𑀲𑀫𑁆𑀩𑀸𑀥 𑀯𑀭𑀪𑀸𑀲𑀼𑀭 𑀕𑁄𑀧𑀼𑀭𑀁.

𑀯𑀺𑀳𑀸𑀭𑀁 𑀓𑀸𑀭𑀬𑀺𑀢𑁆𑀯𑀸𑀦, 𑀯𑀢𑁆𑀣𑀼𑀢𑁆𑀢𑀬𑀧𑀭𑀸𑀬𑀦𑁄;

𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀺𑀲𑁆𑀲, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲’𑀤𑀸𑀲𑀺𑀲𑁄.

𑀲𑀗𑁆𑀖𑀲𑁆𑀲 𑀧𑀸𑀓𑀯𑀝𑁆𑀝𑀢𑁆𑀣𑀁, 𑀭𑀝𑁆𑀞𑀁 𑀤𑀢𑁆𑀯𑀸’𑀴𑀺𑀲𑀸𑀭𑀓𑀁;

𑀲𑀓𑀮𑀁 𑀲𑀦𑁆𑀦𑀺𑀯𑀸𑀲𑀻𑀳𑀺, 𑀦𑁂𑀢𑁆𑀢𑀺𑀓𑁂𑀳𑀺 𑀲𑀳𑁂𑀯 𑀲𑁄.

𑀦𑁂𑀓𑀲𑀢𑀸𑀦𑀺𑀪𑀺𑀓𑁆𑀔𑀽𑀦𑀁, 𑀯𑀸𑀲𑀬𑀺𑀢𑁆𑀯𑀸𑀦 𑀢𑀢𑁆𑀣 𑀲𑁄;

𑀲𑀢𑀢𑀁 𑀲𑀫𑁆𑀧𑀯𑀢𑁆𑀢𑁂𑀲𑀺, 𑀉𑀴𑀸𑀭𑀁 𑀘𑀢𑀼𑀧𑀘𑁆𑀘𑀬𑀁.

𑀤𑀸𑀝𑁆𑀞𑀸𑀥𑀸𑀢𑀼𑀖𑀭𑀁𑀘𑀸𑀭𑀼, 𑀓𑀸𑀭𑀬𑀺𑀢𑁆𑀯𑀸 𑀫𑀳𑀸𑀭𑀳𑀁;

𑀤𑀸𑀞𑀸𑀥𑀸𑀢𑀼𑀲𑁆𑀲 𑀦𑀺𑀘𑁆𑀘𑀁 𑀲𑁄, 𑀫𑀳𑀸𑀫𑀳𑀫𑀓𑀸𑀭𑀬𑀺.

𑀕𑀡𑀲𑀗𑁆𑀕𑀡𑀺𑀓𑀸’𑀧𑁂𑀢𑁄, 𑀧𑁄𑀢𑁆𑀣𑀓𑀁 𑀥𑀫𑁆𑀫𑀲𑀗𑁆𑀕𑀡𑀺𑀁;

𑀧𑀭𑀺𑀯𑀢𑁆𑀢𑁂𑀲𑀺 𑀲𑁄𑀧𑀸𑀢𑁄, 𑀲𑀼𑀦𑁆𑀤𑀭𑁂 𑀥𑀫𑁆𑀫𑀫𑀦𑁆𑀤𑀺𑀭𑁂.

𑀦𑀘𑁆𑀘𑀸𑀤𑀺𑀕𑀦𑁆𑀥𑀫𑀸𑀮𑀸𑀤𑀺-𑀦𑁂𑀓𑀧𑀽𑀚𑀫𑁆𑀧𑀯𑀢𑁆𑀢𑀺𑀬;

𑀲𑀻𑀭𑁂𑀦 𑀲𑀤𑁆𑀥𑀸𑀲𑀫𑁆𑀩𑀦𑁆𑀥𑁄, 𑀲𑀫𑁆𑀩𑀼𑀤𑁆𑀥𑀫𑀪𑀺𑀯𑀦𑁆𑀤𑀢𑀺.

𑀚𑀫𑁆𑀩𑀼𑀤𑀻𑀧𑀸𑀕𑀢𑁂 𑀘𑀸𑀕, 𑀲𑀽𑀭𑁄 𑀲𑁄 𑀪𑀼𑀯𑀺𑀭𑀺𑀲𑀽𑀭𑀬𑁄;

𑀢𑀧𑁆𑀧𑁂𑀲𑀺 𑀥𑀦𑀤𑀸𑀦𑁂𑀦, 𑀤𑀸𑀦𑀺𑀬𑁂𑀦𑁂𑀓 𑀲𑁄 𑀯𑀺𑀪𑀽.

𑀲𑀤𑁆𑀥𑀫𑁆𑀫𑀓𑀣𑀺𑀓𑀸𑀦𑀁 𑀲𑁄, 𑀧𑀽𑀚𑀸 𑀓𑀢𑁆𑀯𑀸𑀦 𑀦𑁂𑀓𑀲𑁄;

𑀤𑁂𑀲𑀸𑀧𑁂𑀲𑀺𑀘 𑀲𑀤𑁆𑀥𑀫𑁆𑀫𑀁, 𑀲𑀤𑀸𑀥𑀫𑁆𑀫𑀕𑀼𑀡𑁂 𑀭𑀢𑁄.

𑀢𑀺𑀓𑁆𑀔𑀢𑁆𑀢𑀼𑀁 𑀲𑁄 𑀢𑀼𑀮𑀸𑀪𑀸𑀭-𑀤𑀸𑀦𑀁 𑀤𑀺𑀦𑁂𑀲𑀼 𑀤𑀸𑀧𑀬𑀺;

𑀉𑀧𑁄𑀲𑀣𑀁 𑀯𑁄𑀧𑀯𑀲𑀺, 𑀲𑀼𑀯𑀺𑀲𑀼𑀤𑁆𑀥𑀫𑀼𑀧𑁄𑀲𑀣𑁂.

𑀅𑀤𑀸 𑀤𑀡𑁆𑀟𑀺𑀲𑁆𑀲𑀭𑀁 𑀤𑀸𑀦-𑀫𑀦𑀼𑀲𑀁𑀯𑀘𑁆𑀙𑀭𑀁 𑀯𑀺𑀪𑀽;

𑀧𑀺𑀝𑀓𑀢𑁆𑀢𑀬𑀁 𑀮𑀺𑀔𑀸𑀧𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑀬𑀺.

𑀫𑀳𑀕𑁆𑀖𑀫𑀡𑀺𑀫𑀼𑀢𑁆𑀢𑀸𑀤𑀺-𑀭𑀢𑀦𑀸𑀦𑀺 ¶ 𑀲𑀧𑁂𑀲𑀺𑀬;

𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀩𑁄𑀥𑀺𑀁-𑀦𑁂𑀓𑀓𑁆𑀔𑀢𑁆𑀢𑀼𑀫 𑀧𑀽𑀚𑀬𑀺.

𑀓𑀡𑁆𑀡𑀸𑀝𑀪𑀽𑀫𑀺𑀧𑀸𑀮𑁂𑀦, 𑀘𑁄𑀴𑀭𑀜𑁆𑀜𑀸 𑀘 𑀧𑁂𑀲𑀺𑀢𑀸;

𑀤𑀽𑀢𑀸𑀫𑀳𑀦𑁆𑀢𑀫𑀸𑀤𑀸𑀬, 𑀧𑀡𑁆𑀡𑀸𑀓𑀸𑀭𑀫𑀺𑀥𑀸𑀕𑀢𑀸.

𑀅𑀤𑁆𑀤𑀲𑀁𑀲𑀼 𑀫𑀳𑀻𑀧𑀸𑀮𑀁, 𑀢𑀢𑁄 𑀲𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀢𑁂𑀲𑀁 𑀉𑀪𑀺𑀦𑁆𑀦𑀁 𑀤𑀽𑀢𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀲𑀸𑀥𑀼𑀓𑀸𑀭𑀺𑀬.

𑀢𑁂𑀲𑀼 𑀆𑀤𑁄’𑀯 𑀓𑀡𑁆𑀡𑀸𑀝-𑀤𑀽𑀢𑁂𑀳𑀺 𑀲𑀳 𑀧𑁂𑀲𑀺𑀬;

𑀤𑀽𑀢𑁂 𑀲𑀓𑀻𑀬𑁂 𑀓𑀡𑁆𑀡𑀸𑀝-𑀦𑀺𑀓𑀝𑀁 𑀲𑀸𑀭𑀧𑀸𑀪𑀢𑁂.

𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀢𑁆𑀢𑁂, 𑀘𑁄𑀴𑁄 𑀲𑀻𑀳𑀴 𑀤𑀽𑀢𑀓𑁂;

𑀲𑀳𑀲𑀸 𑀓𑀡𑁆𑀡𑀦𑀸𑀲𑀸𑀲𑀼, 𑀧𑀸𑀧𑀬𑀺𑀁𑀲𑀼 𑀯𑀺𑀭𑀽𑀧𑀢𑀁.

𑀲𑀫𑁆𑀧𑀢𑁆𑀢𑀯𑀺𑀧𑁆𑀧𑀓𑀸𑀭𑀸𑀓𑁂, 𑀇𑀥𑀸𑀕𑀦𑁆𑀢𑁆𑀯𑀸𑀦 𑀭𑀸𑀚𑀺𑀦𑁄;

𑀓𑀣𑀬𑀺𑀁𑀲𑀼 𑀢𑀤𑀸 𑀲𑀩𑁆𑀩𑀁, 𑀘𑁄𑀴𑁂𑀦 𑀓𑀢𑀫𑀢𑁆𑀢𑀦𑀺.

𑀉𑀤𑁆𑀤𑀺𑀧𑀺𑀢𑀸𑀪𑀺𑀫𑀸𑀦𑁄 𑀲𑁄, 𑀲𑀓𑀮𑀸𑀫𑀘𑁆𑀘𑀫𑀚𑁆𑀛𑀕𑁄;

𑀅𑀯𑁆𑀳𑀸𑀬 𑀤𑀫𑀺𑀴𑁂 𑀤𑀽𑀢𑁂, 𑀇𑀢𑀺 𑀘𑁄𑀴𑀲𑁆𑀲 𑀲𑀦𑁆𑀤𑀺𑀲𑀺.

𑀲𑁂𑀦𑀁 𑀯𑀺𑀦𑀸’𑀯 𑀏𑀓𑀲𑁆𑀫𑀺𑀁, 𑀤𑀻𑀧𑁂 𑀫𑀚𑁆𑀛𑁂 𑀫𑀳𑀡𑁆𑀡𑀯𑁂;

𑀩𑀸𑀳𑀸𑀩𑀮𑀧𑀭𑀺𑀓𑁆𑀔𑀸𑀯𑀸, 𑀳𑁄𑀢𑀼𑀦𑁄 𑀤𑁆𑀯𑀦𑁆𑀤𑀬𑀼𑀤𑁆𑀥𑀢𑁄.

𑀩𑀮𑀁 𑀲𑀦𑁆𑀦𑀬𑁆𑀳 𑀲𑀓𑀮𑀁, 𑀭𑀚𑁆𑀚𑁂 𑀢𑀼𑀬𑁆𑀳𑀁 𑀫𑀫𑀸’𑀣 𑀯𑀸;

𑀢𑀯𑀸’𑀪𑀺𑀫𑀢 𑀤𑁄𑀲𑀫𑁆𑀳𑀺, 𑀲𑀗𑁆𑀕𑀸𑀫𑁄 𑀯𑀸 𑀓𑀭𑀻𑀬𑀢𑀁.

𑀫𑀬𑀸 𑀯𑀼𑀢𑁆𑀢𑀓𑁆𑀓𑀫𑁂𑀦𑁂𑀯, 𑀯𑀢𑁆𑀢𑀩𑁆𑀩𑁄 𑀯𑁄 𑀚𑀦𑀸𑀥𑀺𑀧𑁄;

𑀇𑀢𑀺 𑀯𑀢𑁆𑀯𑀸𑀦 𑀢𑁂 𑀤𑀽𑀢𑁂, 𑀇𑀢𑁆𑀣𑀮𑀗𑁆𑀓𑀸𑀭 𑀫𑀡𑁆𑀟𑀺𑀢𑁂.

𑀯𑀺𑀲𑁆𑀲𑀚𑁆𑀚𑀺𑀬 𑀮𑀳𑀼𑀁𑀘𑁄𑀴-𑀫𑀳𑀻𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀁;

𑀢𑀢𑁄 𑀲𑁂𑀦𑀗𑁆𑀕𑀫𑀸𑀤𑀸𑀬, 𑀅𑀦𑀼𑀭𑀸𑀥 𑀧𑀼𑀭𑀁 𑀕𑀫𑀺.

𑀫𑀢𑁆𑀢𑀺𑀓𑀸𑀯𑀸𑀝𑀢𑀺𑀢𑁆𑀣𑁂 𑀘, 𑀫𑀳𑀸𑀢𑀺𑀢𑁆𑀣𑁂 𑀘 𑀧𑁂𑀲𑀬𑀻;

𑀘𑁄𑀴𑀭𑀝𑁆𑀞𑀁’𑀯 𑀕𑀦𑁆𑀢𑁆𑀯𑀸𑀦, 𑀬𑀼𑀚𑁆𑀛𑀺𑀢𑀼𑀁 𑀤𑁆𑀯𑁂 𑀘𑀫𑀽𑀧𑀢𑀺.

𑀲𑀚𑁆𑀚𑀦𑁆𑀢𑁂𑀲𑀼 𑀘𑀫𑀽𑀧𑁂𑀲𑀼, 𑀦𑀸𑀯𑀸𑀧𑀸𑀣𑁂𑀬𑁆𑀬𑀓𑀸𑀦𑀺 𑀘;

𑀬𑀼𑀤𑁆𑀥𑀢𑁆𑀣𑀸𑀬 𑀩𑀮𑀁 𑀘𑁄𑀴-𑀭𑀝𑁆𑀞𑀧𑁂𑀲𑀦𑀓𑀸𑀭𑀡𑀸.

𑀢𑀤𑀸 𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂, 𑀯𑁂𑀴𑀓𑁆𑀓𑀸𑀭𑀲𑀦𑀸𑀫𑀓𑀸;

𑀩𑀮𑀓𑀸𑀬𑀸 𑀢𑀳𑀺𑀁𑀕𑀦𑁆𑀢𑀼-𑀫𑀦𑀺𑀘𑁆𑀙𑀦𑁆𑀢𑀸 𑀯𑀺𑀭𑁄𑀥𑀺𑀦𑁄.

𑀫𑀸𑀭𑁂𑀢𑁆𑀯𑀸𑀦 𑀉𑀪𑁄 𑀲𑁂𑀦𑀸-𑀦𑀸𑀣𑁂 𑀫𑀢𑁆𑀢𑀕𑀚𑀸𑀯𑀺𑀬;

𑀲𑀫𑀦𑁆𑀢𑀢𑁄 𑀯𑀺𑀮𑀼𑀫𑁆𑀧𑀺𑀁𑀲𑀼, 𑀧𑀼𑀮𑀢𑁆𑀣𑀺𑀧𑀼𑀭𑀫𑀼𑀤𑁆𑀥𑀢𑀸.

𑀧𑀼𑀢𑁆𑀢𑁂𑀳𑀺 ¶ 𑀢𑀻𑀳𑀺 𑀲𑀳𑀺𑀢𑀁, 𑀭𑀸𑀚𑀺𑀦𑁄 𑀘 𑀓𑀡𑀻𑀬𑀲𑀺𑀁;

𑀕𑀡𑀺𑀢𑁆𑀯𑀸 𑀲𑀳𑀲𑀸 𑀭𑀸𑀚-𑀧𑀸𑀲𑀸𑀤𑀁 𑀘𑀸𑀧𑀺 𑀛𑀸𑀧𑀬𑀼𑀁.

𑀭𑀸𑀚𑀸 𑀦𑀺𑀓𑁆𑀔𑀫𑁆𑀫 𑀔𑀺𑀧𑁆𑀧𑀁 𑀲𑁄, 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀓𑀁;

𑀲𑁂𑀮𑁂 𑀯𑀸𑀢𑀕𑀺𑀭𑀺𑀯𑁆𑀳𑀲𑁆𑀫𑀺𑀁, 𑀲𑀸𑀭𑀁 𑀪𑀡𑁆𑀟𑀁 𑀞𑀧𑀸𑀧𑀺𑀬.

𑀯𑀻𑀭𑀩𑀸𑀳𑀼𑀧𑀭𑀸𑀚𑁂𑀦, 𑀲𑀻𑀳𑀯𑀺𑀓𑁆𑀓𑀫𑀲𑀸𑀮𑀺𑀦𑀸;

𑀫𑀳𑀢𑀸 𑀘 𑀩𑀮𑁄𑀖𑁂𑀦, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑁄.

𑀧𑀼𑀮𑀢𑁆𑀣𑀺𑀧𑀼𑀭𑀫𑀸𑀕𑀫𑁆𑀫, 𑀯𑀢𑁆𑀢𑁂𑀦𑁆𑀢𑁄 𑀤𑀸𑀭𑀼𑀡𑀁 𑀭𑀡𑀁;

𑀧𑀮𑀸𑀧𑁂𑀲𑀺 𑀔𑀡𑁂𑀦𑁂𑀯, 𑀩𑀮𑀓𑀸𑀬𑁂 𑀲𑀫𑀸𑀕𑀢𑁂.

𑀫𑀸𑀭𑀺𑀢𑀸𑀦 𑀘𑀫𑀽𑀧𑀸𑀦-𑀫𑀝𑁆𑀞𑀺𑀲𑀗𑁆𑀖𑀸𑀝𑀥𑀺𑀝𑁆𑀞𑀺𑀢𑀁;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑀓𑀁, 𑀯𑁂𑀭𑀺𑀪𑀽𑀢𑁂 𑀩𑀮𑀸𑀥𑀺𑀧𑁂.

𑀩𑀦𑁆𑀥𑀬𑀺𑀢𑁆𑀯𑀸𑀦 𑀔𑀸𑀡𑀼𑀫𑁆𑀳𑀺, 𑀧𑀘𑁆𑀙𑀸 𑀩𑀸𑀳𑀁 𑀲𑀼𑀩𑀦𑁆𑀥𑀦𑀁;

𑀧𑀭𑀺𑀢𑁄 𑀯𑀺𑀧𑁆𑀨𑀼𑀭𑀦𑁆𑀢𑀻𑀳𑀺, 𑀅𑀕𑁆𑀕𑀺𑀚𑀸𑀮𑀸𑀳𑀺 𑀛𑀸𑀧𑀬𑀺.

𑀖𑀸𑀢𑁂𑀢𑁆𑀯𑀸 𑀢𑀢𑁆𑀣 𑀫𑀸𑀦𑀻𑀢𑀁, 𑀕𑀸𑀫𑀸𑀦𑀺 𑀥𑀭𑀡𑀻𑀧𑀢𑀺;

𑀅𑀓𑀸𑀲𑀺 𑀮𑀗𑁆𑀓𑀸𑀯𑀲𑀼𑀥𑀁, 𑀲𑀩𑁆𑀩𑀣𑀸 𑀯𑀻𑀢𑀓𑀡𑁆𑀝𑀓𑀁.

𑀬𑀼𑀚𑁆𑀛𑀺𑀢𑀼𑀁 𑀲𑀳 𑀘𑁄𑀴𑁂𑀦, 𑀭𑀸𑀚𑀸 𑀅𑀢𑁆𑀢𑀓𑀢𑀸𑀯𑀥𑀺𑀁;

𑀅𑀦𑀢𑀺𑀓𑁆𑀓𑀫𑁆𑀫 𑀲𑁄 𑀧𑀜𑁆𑀘-𑀘𑀢𑁆𑀢𑀸𑀮𑀻𑀲𑀫𑁆𑀳𑀺 𑀯𑀘𑁆𑀙𑀭𑁂.

𑀲𑀦𑁆𑀦𑀤𑁆𑀥𑀁 𑀩𑀮𑀫𑀸𑀤𑀸𑀬, 𑀕𑀦𑁆𑀢𑁆𑀯𑀸 𑀲𑀸𑀕𑀭𑀧𑀝𑁆𑀝𑀦𑀁;

𑀢𑀲𑁆𑀲𑀸𑀪𑀺𑀕𑀫𑀦𑀁 𑀧𑀲𑁆𑀲𑀁, 𑀓𑀜𑁆𑀘𑀺𑀓𑀸𑀮𑀁 𑀢𑀳𑀺𑀁 𑀯𑀲𑀁.

𑀅𑀦𑀸𑀕𑀢𑀢𑁆𑀢𑀸 𑀘𑁄𑀴𑀲𑁆𑀲, 𑀢𑀲𑁆𑀲 𑀤𑀽𑀢𑁂 𑀯𑀺𑀲𑁆𑀲𑀚𑁆𑀚𑀺𑀬;

𑀧𑀼𑀦𑀸𑀕𑀦𑁆𑀢𑁆𑀯𑀸 𑀯𑀲𑀻𑀭𑀸𑀚𑀸, 𑀧𑀼𑀮𑀢𑁆𑀣𑀺𑀦𑀕𑀭𑁂 𑀘𑀺𑀭𑀁.

𑀫𑀳𑀸𑀳𑁂𑀴𑀺 𑀲𑀭𑁂𑀳𑀭𑀼, 𑀫𑀳𑀸𑀤𑀢𑁆𑀢𑀺𑀓𑀦𑀸𑀫𑀺𑀓𑀸;

𑀓𑀝𑀼𑀦𑁆𑀦𑀭𑀽𑀧𑀡𑁆𑀟𑀯𑀸𑀧𑀻, 𑀓𑀮𑁆𑀮𑀕𑀮𑁆𑀮𑀺𑀓 𑀦𑀸𑀫𑀺𑀓𑀸.

𑀏𑀭𑀡𑁆𑀟𑁂𑀕𑀮𑁆𑀮𑀯𑀸𑀧𑀻 𑀘, 𑀤𑀻𑀖𑀯𑀢𑁆𑀣𑀼𑀓𑀯𑀸𑀧𑀺𑀓𑀸;

𑀫𑀡𑁆𑀟𑀯𑀸𑀝𑀓𑀯𑀸𑀧𑀻, 𑀘, 𑀓𑀺𑀢𑁆𑀢𑀕𑁆𑀕𑀩𑁄𑀥𑀺𑀧𑀩𑁆𑀩𑀢𑀸.

𑀯𑀮𑀸𑀳𑀲𑁆𑀲 𑀫𑀳𑀸𑀤𑀸𑀭𑀼, 𑀕𑀮𑁆𑀮𑀓𑀼𑀫𑁆𑀪𑀻𑀮𑀲𑁄𑀩𑁆𑀪𑀓𑀸;

𑀧𑀢𑁆𑀢𑀧𑀸𑀲𑀸𑀡𑀯𑀸𑀧𑀻 𑀘, 𑀯𑀸𑀧𑀻 𑀘 𑀓𑀸𑀡𑀦𑀸𑀫𑀺𑀓𑀸.

𑀏𑀢𑀸 𑀘𑀜𑁆𑀜𑀸 𑀘 𑀲𑁄 𑀙𑀺𑀦𑁆𑀦-𑀫𑀭𑀺𑀬𑀸𑀤𑀸 𑀯𑀸𑀧𑀺𑀬𑁄 𑀩𑀳𑀽;

𑀩𑀦𑁆𑀥𑀸𑀧𑁂𑀲𑀺 𑀲𑀤𑀸𑀤𑀻𑀦-𑀲𑀢𑁆𑀢𑁂 𑀩𑀤𑁆𑀥 𑀳𑀺𑀢𑀸𑀲𑀬𑁄.

𑀪𑀽𑀫𑀺𑀦𑁆𑀤𑁄 ¶ 𑀓𑀦𑁆𑀤𑀭𑀸-𑀕𑀗𑁆𑀕𑀸-𑀦𑀤𑀻𑀲𑀼 𑀘 𑀢𑀳𑀺𑀁 𑀢𑀳𑀺𑀁;

𑀲𑀼𑀪𑀺𑀓𑁆𑀔𑀁 𑀓𑀸𑀭𑀬𑀻 𑀭𑀝𑁆𑀞𑀁, 𑀩𑀦𑁆𑀥𑁂𑀢𑁆𑀯𑀸’𑀯𑀭𑀡𑀸𑀦𑀺 𑀲𑁄.

𑀯𑀺𑀳𑀸𑀭𑀸’𑀪𑀬𑀘𑀸𑀭𑀺𑀢𑁆𑀢-𑀪𑁂𑀤𑀺𑀦𑀺𑀁 𑀫𑀳𑀺𑀲𑀁𑀲𑀓;

𑀧𑀭𑀺𑀳𑀸𑀭𑁂 𑀲𑀩𑁆𑀩𑀲𑁄𑀘𑁆𑀙𑀺𑀚𑁆𑀚-𑀕𑀸𑀳𑀬𑀺𑀢𑁆𑀯𑀸 𑀕𑀮𑀫𑁆𑀳𑀺 𑀢𑀁.

𑀧𑀼𑀭𑀫𑁆𑀪𑀸 𑀩𑀳𑀺 𑀓𑀸𑀭𑁂𑀢𑁆𑀯𑀸, 𑀫𑀳𑀸𑀲𑀗𑁆𑀖𑀁 𑀔𑀫𑀸𑀧𑀺𑀬;

𑀧𑀓𑀸𑀲𑁂𑀲𑀺 𑀘 𑀮𑁄𑀓𑀲𑁆𑀲, 𑀲𑀗𑁆𑀖𑀕𑀸𑀭𑀯𑀫𑀢𑁆𑀢𑀦𑁄.

𑀫𑀳𑀸𑀕𑀸𑀫𑁂 𑀦𑀺𑀓𑀸𑀬𑀸𑀦𑀁, 𑀢𑀺𑀢𑀬𑁂 𑀘𑁄𑀴𑀦𑀸𑀲𑀺𑀢𑁂;

𑀥𑀸𑀢𑀼𑀕𑀩𑁆𑀪𑁂 𑀘 𑀩𑀦𑁆𑀥𑁂𑀲𑀺, 𑀣𑀽𑀧𑀸𑀭𑀸𑀫𑀤𑁆𑀯𑀬𑁂’𑀧𑀺 𑀘.

𑀫𑀸𑀢𑀼𑀬𑀸’𑀴𑀸𑀳𑀡𑀞𑀸𑀦𑁂, 𑀢𑀣𑁂𑀯 𑀧𑀺𑀢𑀼𑀦𑁄𑀧𑀺 𑀘;

𑀅𑀓𑀸 𑀧𑀜𑁆𑀘 𑀫𑀳𑀸𑀯𑀸𑀲𑁂, 𑀢𑀣𑀸 𑀩𑀼𑀤𑀮𑀯𑀺𑀝𑁆𑀞𑀺𑀬𑀁.

𑀧𑀡𑁆𑀟𑀯𑀸𑀧𑀻 𑀘 𑀧𑀸𑀞𑀻𑀦𑁄, 𑀭𑀓𑁆𑀔𑀘𑁂𑀢𑀺𑀬𑀧𑀩𑁆𑀩𑀢𑁄;

𑀢𑀣𑁂𑀯 𑀫𑀡𑁆𑀟𑀮𑀕𑀺𑀭𑀺-𑀫𑀥𑀼𑀢𑁆𑀣𑀮𑀯𑀺𑀳𑀸𑀭𑀓𑁄.

𑀉𑀭𑀼𑀯𑁂𑀮𑀯𑁆𑀳𑀬𑁄 𑀤𑁂𑀯-𑀦𑀕𑀭𑁂 𑀘 𑀯𑀺𑀳𑀸𑀭𑀓𑁄;

𑀫𑀳𑀺𑀬𑀗𑁆𑀕𑀡𑀯𑀺𑀳𑀸𑀭𑁄 𑀘, 𑀲𑀻𑀢𑀮𑀕𑁆𑀕𑀸𑀫𑀮𑁂𑀡𑀓𑀁.

𑀚𑀫𑁆𑀩𑀼𑀓𑁄𑀮𑀯𑀺𑀳𑀸𑀭𑁄 𑀘, 𑀢𑀣𑁂𑀯 𑀕𑀺𑀭𑀺𑀓𑀡𑁆𑀟𑀓𑁄;

𑀓𑀼𑀭𑀼𑀦𑁆𑀤𑀺𑀬𑀯𑀺𑀳𑀸𑀭𑁄 𑀘, 𑀚𑀫𑁆𑀩𑀼𑀓𑁄𑀮𑀓𑀮𑁂𑀡𑀓𑀁.

𑀪𑀮𑁆𑀮𑀸𑀢𑀓𑀯𑀺𑀳𑀸𑀭𑁄 𑀘, 𑀢𑀣𑁂𑀯 𑀧𑀭𑀕𑀸𑀫𑀓𑁄;

𑀓𑀸𑀲𑀕𑀮𑁆𑀮𑀯𑁆𑀳𑀬𑁄 𑀘𑀦𑁆𑀤-𑀕𑀺𑀭𑀺𑀯𑁆𑀳𑀬 𑀯𑀺𑀳𑀸𑀭𑀓𑁄.

𑀯𑁂𑀮𑀕𑀸𑀫𑀯𑀺𑀳𑀸𑀭𑁄 𑀘, 𑀫𑀳𑀸𑀲𑁂𑀦𑀯𑁆𑀳𑀕𑀸𑀫𑀓𑁄;

𑀯𑀺𑀳𑀸𑀭𑁄 𑀘𑀸’𑀦𑀼𑀭𑀸𑀥𑀫𑁆𑀳𑀺, 𑀧𑀼𑀭𑁂 𑀩𑁄𑀥𑀺𑀖𑀭𑀁 𑀢𑀣𑀸.

𑀇𑀘𑁆𑀘𑁂𑀯𑀫𑀸𑀤𑀬𑁄𑀦𑁂𑀓𑁂, 𑀯𑀺𑀳𑀸𑀭𑁂 𑀘 𑀩𑀳𑀽 𑀯𑀺𑀪𑀽;

𑀧𑀝𑀺𑀲𑀗𑁆𑀔𑀭𑀺𑀚𑀺𑀡𑁆𑀡𑁂 𑀲𑁄, 𑀕𑀸𑀫𑁂 𑀘𑀸’𑀤𑀸 𑀯𑀺𑀲𑀼𑀁 𑀯𑀺𑀲𑀼𑀁.

𑀲𑀫𑀦𑁆𑀢𑀓𑀽𑀝 𑀲𑁂𑀮𑀢𑁆𑀣𑀁, 𑀫𑀼𑀦𑀺𑀦𑁆𑀤𑀧𑀤𑀮𑀜𑁆𑀚𑀦𑀁;

𑀧𑀡𑀫𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸, 𑀫𑀦𑀼𑀲𑁆𑀲𑀸 𑀤𑀼𑀕𑁆𑀕𑀫𑀜𑁆𑀚𑀲𑁂.

𑀲𑀩𑁆𑀩𑁂 𑀫𑀸 𑀓𑀺𑀮𑀫𑀦𑁆𑀢𑀽’𑀢𑀺, 𑀤𑀸𑀦𑀯𑀝𑁆𑀝𑀸𑀬 𑀤𑀸𑀧𑀬𑀺;

𑀲𑀸𑀮𑀺𑀓𑁆𑀔𑁂𑀢𑁆𑀢𑀸𑀤𑀺𑀲𑀫𑁆𑀧𑀦𑁆𑀦𑀁, 𑀕𑀺𑀮𑀻𑀫𑀮𑀬𑀦𑀸𑀫𑀓𑀁.

𑀓𑀤𑀮𑀻𑀕𑀸𑀫𑀫𑀕𑁆𑀕𑁂 𑀘, 𑀳𑀽𑀯𑀭𑀴𑀜𑁆𑀚𑀲𑁂 𑀢𑀣𑀸;

𑀕𑀸𑀫𑁂 𑀤𑀢𑁆𑀯𑀸𑀦 𑀧𑀘𑁆𑀘𑁂𑀓𑀁, 𑀲𑀸𑀮𑀸𑀬𑁄 𑀘𑀸𑀧𑀺 𑀓𑀸𑀭𑀬𑀺.

𑀅𑀦𑀸𑀕𑀢𑁂 𑀢𑀁 𑀪𑀽𑀧𑀸𑀮𑀸, 𑀫𑀸 𑀕𑀡𑁆𑀳𑀦𑁆𑀢𑀽’𑀢𑀺 𑀮𑁂𑀔𑀺𑀬;

𑀅𑀓𑁆𑀔𑀭𑀸𑀦𑀺 𑀲𑀺𑀮𑀸𑀣𑀫𑁆𑀪𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀫𑀺𑀧𑁄.

𑀕𑀸𑀫𑀁 ¶ 𑀅𑀦𑁆𑀢𑀭𑀯𑀺𑀝𑁆𑀞𑀺𑀜𑁆𑀘, 𑀢𑀣𑀸 𑀲𑀗𑁆𑀖𑀸𑀝𑀕𑀸𑀫𑀓𑀁;

𑀲𑀺𑀭𑀺𑀫𑀡𑁆𑀟𑀕𑀮𑀸𑀭𑀸𑀫𑀜𑁆𑀘, 𑀅𑀤𑀸𑀲𑁄 𑀮𑀸𑀪𑀯𑀸𑀲𑀺𑀦𑀁.

𑀯𑀦𑀚𑀻𑀯𑀓𑀪𑀺𑀓𑁆𑀔𑀽𑀦-𑀫𑀤𑀸 𑀲𑁄 𑀘𑀢𑀼𑀧𑀘𑁆𑀘𑀬𑁂;

𑀩𑀦𑁆𑀥𑀽𑀦𑀫𑁆𑀧𑀺 𑀘 𑀲𑁄 𑀢𑁂𑀲𑀁, 𑀪𑁄𑀕𑀕𑀸𑀫𑁂 𑀧𑀤𑀸𑀧𑀬𑀺.

𑀧𑀸𑀯𑀸𑀭𑀕𑁆𑀕𑀺𑀓𑀧𑀮𑁆𑀮𑀸𑀦𑀺, 𑀯𑀺𑀯𑀺𑀥𑁂 𑀑𑀲𑀥𑁂𑀧𑀺 𑀘;

𑀲𑀻𑀢𑁂 𑀉𑀢𑀼𑀫𑁆𑀳𑀺 𑀩𑀳𑀼𑀲𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑀬𑀺.

𑀅𑀤𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂, 𑀧𑀭𑀺𑀓𑁆𑀔𑀸𑀭𑁂 𑀢𑀣𑀸𑀢𑁆𑀣 𑀲𑁄;

𑀦𑁂𑀓𑀯𑀸𑀭𑁂𑀲𑀼 𑀲𑀓𑁆𑀓𑀘𑁆𑀘𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀺𑀫𑀸.

𑀲𑀗𑁆𑀖𑀲𑁆𑀲 𑀧𑀸𑀓𑀯𑀝𑁆𑀝𑀢𑁆𑀣𑀁, 𑀪𑀺𑀓𑁆𑀔𑀽𑀦𑀁 𑀮𑀸𑀪𑀯𑀸𑀲𑀺𑀦𑀁;

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸𑀦𑀜𑁆𑀘, 𑀧𑀽𑀚𑁂𑀢𑀼𑀁 𑀘𑁂𑀢𑀺𑀬𑀸𑀤𑀺𑀓𑀁.

𑀧𑀤𑀺𑀦𑁆𑀦𑀸 𑀧𑀼𑀩𑁆𑀩𑀭𑀸𑀚𑀽𑀳𑀺, 𑀬𑁂 𑀕𑀸𑀫𑀸 𑀭𑁄𑀳𑀡𑁂 𑀩𑀳𑀽;

𑀢𑁂𑀧𑀺 𑀲𑀩𑁆𑀩𑁂 𑀅𑀦𑀽𑀦𑁂 𑀲𑁄, 𑀬𑀣𑀸𑀧𑀼𑀩𑁆𑀩𑀁 𑀞𑀧𑁂𑀲𑀺 𑀘.

𑀅𑀤𑀸𑀲𑀺 𑀧𑀺𑀞𑀲𑀧𑁆𑀧𑀻𑀦-𑀫𑀼𑀲𑀪𑁂 𑀩𑀮𑀺𑀦𑁄 𑀩𑀳𑀺;

𑀪𑀢𑁆𑀢𑀁 𑀘𑀸’𑀤𑀸𑀲𑀺 𑀲𑁄 𑀓𑀸𑀓 𑀲𑁄𑀡𑀸𑀤𑀻𑀦𑀁 𑀤𑀬𑀸𑀧𑀭𑁄.

𑀅𑀤𑀸𑀲𑀺𑀦𑁂𑀓𑀢𑀸 𑀯𑁂𑀬𑁆𑀬-𑀓𑀸𑀭𑀓𑀸𑀦𑀁 𑀫𑀳𑀸𑀓𑀯𑀻;

𑀲𑀤𑁆𑀥𑀺𑀁 𑀧𑀯𑁂𑀡𑀺𑀕𑀸𑀫𑁂𑀳𑀺, 𑀯𑀺𑀢𑁆𑀢𑀚𑀸𑀢𑀫𑀦𑀧𑁆𑀧𑀓𑀁.

𑀭𑀸𑀚𑀸𑀫𑀘𑁆𑀘𑀸𑀤𑀺𑀧𑀼𑀢𑁆𑀢𑀸𑀦𑀁, 𑀲𑀺𑀮𑁄𑀓𑁂 𑀭𑀘𑀺𑀢𑁂 𑀲𑀼𑀡𑀁;

𑀬𑀣𑀸𑀦𑀼𑀭𑀽𑀧𑀁 𑀧𑀸𑀤𑀸𑀲𑀺, 𑀥𑀦𑀁 𑀢𑁂𑀲𑀁 𑀓𑀯𑀺𑀲𑁆𑀲𑀭𑁄.

𑀅𑀦𑁆𑀥𑀸𑀦𑀁 𑀧𑀗𑁆𑀕𑀼𑀮𑀸𑀦𑀜𑁆𑀘, 𑀕𑀸𑀫𑁂 𑀘𑀸’𑀤𑀸 𑀯𑀺𑀲𑀼𑀁 𑀯𑀺𑀲𑀼𑀁;

𑀦𑀸𑀦𑀸𑀤𑁂𑀯𑀓𑀼𑀮𑀸𑀦𑀜𑁆𑀘, 𑀤𑀺𑀦𑁆𑀦𑀁 𑀧𑀼𑀩𑁆𑀩𑀁 𑀦 𑀳𑀸𑀧𑀬𑀺.

𑀧𑀢𑁆𑀢𑀺 𑀯𑁄 𑀲𑁄 𑀓𑀼𑀮𑀺𑀢𑁆𑀣𑀻𑀦-𑀫𑀦𑀸𑀣𑀸𑀦𑀁 𑀬𑀣𑀸𑀭𑀳𑀁;

𑀯𑀺𑀥𑀯𑀸𑀦𑀫𑀤𑀸𑀕𑀸𑀫𑁂, 𑀪𑀢𑁆𑀢𑀅𑀘𑁆𑀙𑀸𑀤𑀦𑀸𑀦𑀺 𑀘.

𑀭𑀸𑀚𑀸 𑀲𑀻𑀳𑀴𑀓𑀸 𑀯𑁂𑀬𑁆𑀬-𑀓𑀭𑀡𑁂 𑀲𑁄 𑀫𑀳𑀸𑀧𑀢𑀺;

𑀅𑀕𑁆𑀕𑁄 𑀲𑀻𑀳𑀴𑀓𑀸𑀯𑁂𑀬𑁆𑀬-𑀓𑀸𑀭𑀓𑀸𑀦𑀫𑀳𑁄𑀲𑀺 𑀘.

𑀲𑀼𑀪𑁂 𑀩𑀤𑁆𑀥𑀸𑀤𑀭𑁄 𑀩𑀤𑁆𑀥 𑀕𑀼𑀡𑀯𑁆𑀳𑀬 𑀯𑀺𑀳𑀸𑀭𑀓𑁂;

𑀩𑀦𑁆𑀥𑁂𑀲𑀺 𑀉𑀧𑀭𑀸𑀚𑀸 𑀲𑁄, 𑀘𑁂𑀢𑀺𑀬𑀁 𑀘𑁄𑀴𑀦𑀸𑀲𑀺𑀢𑀁.

𑀫𑀼𑀢𑁆𑀢𑀘𑀸𑀕𑀻 𑀢𑀢𑁄 𑀢𑀲𑁆𑀲, 𑀯𑀺𑀳𑀸𑀭𑀧𑀯𑀭𑀲𑁆𑀲 𑀲𑁄;

𑀤𑀢𑁆𑀯𑀸 𑀕𑀸𑀫𑀯𑀭𑁂 𑀦𑀺𑀘𑁆𑀘𑀁, 𑀧𑀽𑀚𑀸𑀬𑁄 𑀲𑀫𑁆𑀧𑀯𑀢𑁆𑀢𑀬𑀺.

𑀲𑁄𑀯 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀉𑀧𑀘𑀸𑀭𑀯𑀦𑀦𑁆𑀢𑀺𑀓𑁂;

𑀩𑀦𑁆𑀥𑀸𑀧𑁂𑀲𑀺 𑀫𑀳𑀸𑀯𑀸𑀧𑀺𑀁, 𑀣𑀻𑀭𑀻𑀪𑀽𑀢𑀫𑀳𑁄𑀤𑀓𑀁.

𑀓𑀧𑁆𑀧𑀽𑀭𑀫𑀽𑀮𑀸𑀬𑀢𑀦𑁂 ¶ , 𑀭𑀜𑁆𑀜𑁄 𑀥𑀻𑀢𑀸 𑀬𑀲𑁄𑀥𑀭𑀸;

𑀅𑀓𑀸𑀭𑁂𑀲𑀺 𑀣𑀺𑀭𑀁 𑀭𑀫𑁆𑀫𑀁, 𑀫𑀳𑀦𑁆𑀢𑀁 𑀧𑀝𑀺𑀫𑀸𑀖𑀭𑀁.

𑀲𑁂𑀮𑀦𑁆𑀢𑀭𑀲𑀫𑀽𑀳𑀲𑁆𑀫𑀺𑀁, 𑀭𑀸𑀚𑀺𑀦𑁄 𑀭𑀸𑀚𑀺𑀦𑁄 𑀲𑀓𑀸;

𑀓𑀸𑀭𑁂𑀲𑀺 𑀘𑀸𑀭𑀼𑀧𑀸𑀲𑀸𑀤𑀁, 𑀧𑀲𑀸𑀤𑀸𑀯𑀳𑀫𑀼𑀕𑁆𑀕𑀢𑀁.

𑀢𑀤𑀸 𑀦𑁂𑀓𑁂 𑀘 𑀲𑀘𑀺𑀯𑀸, 𑀢𑀲𑁆𑀲𑁄 𑀭𑁄𑀥𑀚𑀦𑀸𑀧𑀺 𑀘;

𑀲𑀫𑀸𑀘𑀺𑀦𑀺𑀁𑀲𑀼 𑀧𑀼𑀜𑁆𑀜𑀸𑀦𑀺, 𑀅𑀦𑁂𑀓𑀸𑀦𑀺 𑀅𑀦𑁂𑀓𑀲𑁄.

𑀏𑀯𑀁 𑀲𑀫𑀦𑀼𑀲𑀸𑀲𑀦𑁆𑀢𑁂, 𑀮𑀁𑀓𑀁 𑀮𑀁𑀓𑀸 𑀦𑀭𑀺𑀲𑁆𑀲𑀭𑁂;

𑀉𑀧𑀭𑀸𑀚𑀸 𑀯𑀲𑀁𑀦𑀻𑀢𑁄, 𑀯𑀺𑀦𑀻𑀢𑁄 𑀖𑁂𑀭𑀫𑀘𑁆𑀘𑀼𑀦𑀸.

𑀢𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺, 𑀲𑀓𑀮𑀸𑀦𑀺 𑀲𑀫𑀸𑀧𑀺𑀬;

𑀚𑀬𑀩𑀸𑀳𑀼𑀲𑁆𑀲𑁄𑀧𑀭𑀚𑁆𑀚𑀁, 𑀪𑀺𑀓𑁆𑀔𑀽𑀦𑀁 𑀫𑀢𑀺𑀬𑀸 𑀅𑀤𑀸.

𑀅𑀣𑀸𑀤𑀺𑀧𑀸𑀤𑀧𑀤𑀯𑀺𑀁, 𑀤𑀢𑁆𑀯𑀸 𑀯𑀺𑀓𑁆𑀓𑀫𑀩𑀸𑀳𑀼𑀦𑁄;

𑀕𑀚𑀩𑀸𑀳𑀽’𑀢𑀺 𑀯𑀺𑀤𑀺𑀢𑁂, 𑀢𑀲𑁆𑀲 𑀚𑀸𑀢𑁂 𑀲𑀼𑀢𑁂 𑀢𑀢𑁄.

𑀫𑀳𑀸𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀢𑁆𑀯𑀸, 𑀭𑀸𑀚𑀸𑀧𑀼𑀢𑁆𑀢𑀳𑀺𑀢𑀢𑁆𑀣𑀺𑀓𑁄;

𑀭𑁄𑀳𑀡𑀁 𑀓𑀲𑀺𑀡𑀁 𑀤𑀢𑁆𑀯𑀸, 𑀢𑀳𑀺𑀁 𑀯𑀸𑀲𑀸𑀬 𑀧𑁂𑀲𑀬𑀺.

𑀢𑀢𑁄 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀦𑀸𑀕𑀳𑀼𑀮𑀁 𑀧𑀼𑀭𑀁;

𑀭𑀸𑀚𑀥𑀸𑀦𑀺𑀁 𑀓𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑀬𑀻.

𑀏𑀯𑀁 𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺’𑀳 𑀯𑀺𑀚𑀬𑀪𑀼𑀚𑁄 𑀯𑀢𑁆𑀢𑀬𑀺𑀢𑁆𑀯𑀸𑀦 𑀲𑀫𑁆𑀫𑀸,

𑀆𑀡𑀸𑀘𑀓𑁆𑀓𑀁 𑀚𑀦𑀺𑀦𑁆𑀤𑁄 𑀧𑁆𑀬𑀧𑀕𑀢𑀔𑀮𑀦𑀁 𑀏𑀲 𑀧𑀜𑁆𑀘𑀸𑀥𑀺𑀓𑀸𑀦𑀺;

𑀯𑀟𑁆𑀠𑁂𑀢𑁆𑀯𑀸 𑀲𑀸𑀲𑀦𑀁 𑀢𑀁 𑀔𑀮𑀤𑀫𑀺𑀴𑀪𑀬𑁄 𑀧𑀤𑁆𑀤𑀼𑀢𑀜𑁆𑀘𑀸𑀧𑀺𑀮𑁄𑀓𑀁,

𑀲𑀕𑁆𑀕𑀁 𑀮𑁄𑀓𑀁 𑀲𑀧𑀼𑀜𑁆𑀜𑀧𑁆𑀧𑀪𑀯𑀫𑀼𑀭𑀼𑀨𑀮𑀁 𑀧𑀲𑁆𑀲𑀺𑀢𑀼𑀁 𑀘𑀸’𑀭𑀼 𑀭𑁄𑀳.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀝𑁆𑀞𑀧𑀜𑁆𑀜𑀸𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀢𑀤𑀸𑀭𑀜𑁆𑀜𑁄 ¶ 𑀦𑀼𑀚𑀸𑀫𑀺𑀢𑁆𑀢𑀸, 𑀢𑀲𑁆𑀲 𑀧𑀼𑀢𑁆𑀢𑀸 𑀢𑀬𑁄’𑀧𑀺 𑀘;

𑀫𑀳𑀸𑀫𑀘𑁆𑀘𑀸 𑀘𑀬𑀢𑀬𑁄, 𑀢𑀣𑀸 𑀬𑀢𑀦𑀯𑀸𑀲𑀺𑀦𑁄.

𑀢𑀩𑁆𑀩𑁂𑀢𑁂 𑀆𑀤𑀺𑀧𑀸𑀤𑀲𑁆𑀲, 𑀭𑁄𑀳𑀡𑁂 𑀯𑀲𑀢𑁄 𑀲𑀢𑁄;

𑀅𑀦𑀸𑀭𑁄𑀘𑀸𑀧𑀬𑀺𑀢𑁆𑀯𑀸𑀦, 𑀪𑀽𑀧𑀸𑀮𑀫𑀢𑀲𑀸𑀲𑀦𑀁.

𑀲𑀫𑁆𑀪𑀽𑀬𑀫𑀦𑁆𑀢𑀬𑀺𑀢𑁆𑀯𑀸𑀦, 𑀲𑀫𑀸𑀦𑀘𑁆𑀙𑀦𑁆𑀤𑀢𑀁 𑀕𑀢𑀸;

𑀅𑀤𑀁𑀲𑀼 𑀬𑀼𑀯𑀭𑀸𑀚𑀲𑁆𑀲, 𑀮𑀗𑁆𑀓𑀸𑀭𑀚𑁆𑀚𑀸𑀪𑀺𑀲𑁂𑀘𑀦𑀁.

𑀑𑀧𑀭𑀚𑁆𑀚𑁂 𑀦𑀺𑀯𑁂𑀲𑁂𑀲𑀼𑀁, 𑀫𑀸𑀦𑀪𑀭𑀡𑀦𑀸𑀫𑀓𑀁;

𑀓𑀼𑀫𑀸𑀭𑀁 𑀧𑀼𑀩𑁆𑀩𑀘𑀸𑀭𑀺𑀢𑁆𑀢-𑀫𑀕𑁆𑀕𑀁 𑀮𑀗𑁆𑀖𑀺𑀢𑁆𑀣 𑀢𑁂’𑀔𑀺𑀮𑀸.

𑀢𑀬𑁄’𑀣 𑀪𑀸𑀢𑀭𑁄 𑀲𑀩𑁆𑀩𑁂, 𑀢𑁂 𑀫𑀸𑀡𑀪𑀭𑀡𑀸𑀤𑀬𑁄;

𑀚𑀬𑀩𑀸𑀳𑀼𑀫𑀳𑀻𑀧𑀸𑀮-𑀲𑀳𑀺𑀢𑀸 𑀲𑀳𑀲𑀸 𑀢𑀤𑀸.

𑀫𑀼𑀢𑁆𑀢𑀸𑀫𑀡𑀺𑀧𑁆𑀧𑀪𑀽𑀢𑀺𑀓𑀁, 𑀭𑀢𑀦𑀁 𑀲𑀸𑀭𑀲𑀫𑁆𑀫𑀢𑀁;

𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀯𑀸𑀳𑀦𑀜𑁆𑀘 𑀕𑀚𑀸𑀤𑀺𑀓𑀁.

𑀲𑀓𑀮𑀁 𑀩𑀮𑀫𑀸𑀤𑀸𑀬, 𑀧𑀼𑀮𑀢𑁆𑀣𑀺𑀦𑀕𑀭𑀸 𑀢𑀤𑀸;

𑀔𑀺𑀧𑁆𑀧𑀁 𑀢𑀁 𑀯𑀺𑀓𑁆𑀓𑀫𑀪𑀼𑀚𑀁, 𑀕𑀡𑁆𑀳𑀺𑀲𑀸𑀫𑀸’𑀢𑀺 𑀦𑀺𑀓𑁆𑀔𑀫𑀼𑀁.

𑀲𑀼𑀢𑁆𑀯𑀸 𑀧𑀯𑀢𑁆𑀢𑀺𑀁 𑀲𑀓𑀮𑀁, 𑀇𑀫𑀁 𑀯𑀺𑀓𑁆𑀓𑀫𑀩𑀸𑀳𑀼𑀲𑁄;

𑀢𑀸 𑀢𑀲𑁆𑀲𑀦𑁆𑀢𑀺𑀫𑀲𑀓𑁆𑀓𑀸𑀭𑀁, 𑀯𑀺𑀥𑀸𑀢𑀼𑀁 𑀳𑀦𑁆𑀤𑀦𑁄 𑀮𑀪𑀺𑀁.

𑀇𑀤𑀸𑀦𑀺 𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸𑀦, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀢𑀳𑀺𑀁,

𑀢𑀸 𑀢𑀲𑁆𑀲𑀸𑀴𑀸𑀳𑀦𑀝𑁆𑀞𑀸𑀦 𑀤𑀲𑁆𑀲𑀦𑁂 𑀦𑁂𑀯 𑀲𑁄 𑀅𑀳𑀁.

𑀲𑁄𑀓𑀪𑀸𑀭𑀁 𑀯𑀺𑀦𑁄𑀤𑁂𑀲𑁆𑀲𑀁, 𑀫𑀫 𑀘𑁂𑀢𑁄 𑀕𑀢𑀁 𑀇𑀢𑀺;

𑀓𑀢𑀤𑀴𑁆𑀳 𑀯𑀯𑀢𑁆𑀣𑀸𑀦𑁄, 𑀯𑀺𑀦𑀺𑀕𑁆𑀕𑀫𑁆𑀫 𑀢𑀢𑁄 𑀧𑀼𑀭𑀸.

𑀧𑀼𑀮𑀢𑁆𑀣𑀺𑀧𑀼𑀭𑀫𑀸𑀕𑀘𑁆𑀙𑀁, 𑀆𑀤𑀺𑀧𑀸𑀤𑁄’𑀢𑀺 𑀲𑀸𑀲𑀲𑁄;

𑀲𑀢𑁆𑀢𑀝𑁆𑀞𑀲𑀢𑀲𑀗𑁆𑀔𑁂𑀦, 𑀩𑀮𑁂𑀦 𑀧𑀭𑀺𑀯𑀸𑀭𑀺𑀢𑁄.

𑀅𑀦𑁆𑀢𑀭𑀸𑀮𑀧𑀣𑁂𑀬𑁂𑀯, 𑀕𑀼𑀢𑁆𑀢𑀳𑀸𑀮𑀓𑀫𑀡𑁆𑀟𑀮𑁂;

𑀕𑀸𑀫𑁂 𑀧𑀦 𑀲𑀫𑀼𑀓𑁆𑀓𑀯𑁆𑀳𑁂, 𑀤𑀺𑀲𑁆𑀯𑀸 𑀲𑁂𑀦𑀗𑁆𑀕𑀫𑀸𑀕𑀢𑀁.

𑀫𑀳𑀦𑁆𑀢𑀁 ¶ 𑀬𑀼𑀤𑁆𑀥𑀲𑀦𑁆𑀦𑀤𑁆𑀥𑀁, 𑀏𑀓𑀯𑀻𑀭𑁄 𑀪𑀬𑀸𑀢𑀺𑀓𑁄;

𑀬𑀼𑀚𑁆𑀛𑀺𑀢𑁆𑀯𑀸 𑀢𑁂 𑀧𑀮𑀸𑀧𑁂𑀲𑀺, 𑀔𑀡𑁂𑀦𑁂𑀯 𑀤𑀺𑀲𑁄𑀤𑀺𑀲𑀁.

𑀢𑀬𑁄 𑀢𑁂 𑀪𑀸𑀢𑀭𑁄 𑀢𑀢𑁆𑀣, 𑀲𑀫𑁆𑀧𑀢𑁆𑀢𑀸𑀯 𑀚𑀬𑀸 𑀢𑀢𑁄;

𑀅𑀪𑀺𑀫𑀸𑀦𑀼𑀤𑁆𑀥𑀢𑀸 𑀔𑀺𑀧𑁆𑀧𑀁, 𑀅𑀦𑁆𑀦𑀬𑁆𑀳 𑀩𑀮𑀯𑀸𑀳𑀦𑀁.

𑀆𑀤𑀺𑀧𑀸𑀤𑀓𑀚𑀫𑁆𑀩𑀽𑀢𑀺, 𑀯𑀺𑀲𑁆𑀲𑀼𑀢𑀫𑁆𑀳𑀺 𑀧𑀤𑁂𑀲𑀓𑁂;

𑀲𑀗𑁆𑀕𑀸𑀫𑁂𑀲𑀼𑀁 𑀧𑀭𑀸𑀚𑁂𑀲𑀺, 𑀪𑀺𑀬𑁆𑀬𑁄 𑀬𑀼𑀚𑁆𑀛𑀺𑀢𑁆𑀣 𑀲𑁄 𑀢𑀬𑁄.

𑀢𑀢𑀺𑀬𑀁 𑀓𑀝𑀕𑀸𑀫𑀲𑁆𑀫𑀺𑀁, 𑀓𑀸𑀴𑀯𑀸𑀧𑁆𑀬𑀁 𑀘𑀢𑀼𑀢𑁆𑀣𑀓𑀁;

𑀧𑀜𑁆𑀘𑀫𑀁 𑀉𑀤𑁆𑀥𑀝𑀤𑁆𑀯𑀸𑀭𑁂, 𑀙𑀝𑁆𑀞𑀁𑀲𑁄 𑀧𑀗𑁆𑀓𑀯𑁂𑀮𑀓𑁂.

𑀢𑁂𑀳𑀺 𑀬𑀼𑀤𑁆𑀥𑀁 𑀓𑀭𑀺𑀢𑁆𑀯𑀸𑀦, 𑀕𑀳𑀻𑀢𑀯𑀺𑀚𑀬𑁄 𑀲𑀤𑀸;

𑀧𑀼𑀮𑀢𑁆𑀣𑀺𑀧𑀼𑀭𑀫𑀸𑀕𑀜𑁆𑀘𑀺, 𑀲𑀳𑀸𑀫𑀘𑁆𑀘 𑀧𑀭𑀺𑀚𑁆𑀚𑀦𑁄.

𑀲𑀘𑀺𑀦𑁆𑀢𑀺𑀢𑀓𑁆𑀓𑀫𑁂𑀦𑁂𑀯, 𑀧𑀲𑁆𑀲𑀺𑀢𑁆𑀯𑀸𑀴𑀸𑀳𑀦𑀁 𑀧𑀺𑀢𑀼;

𑀯𑀺𑀤𑀽𑀭𑀺𑀢𑀫𑀳𑀸𑀲𑁂𑀓𑁄, 𑀮𑀤𑁆𑀥𑀲𑁆𑀲𑀸𑀲𑁄 𑀧𑀼𑀭𑁂𑀯𑀲𑀁.

𑀤𑀼𑀓𑁆𑀔𑁂 𑀲𑀳𑀸𑀬 𑀪𑀽𑀢𑀸𑀦-𑀫𑀢𑁆𑀢𑀦𑁄 𑀲𑁄 𑀬𑀣𑀸𑀭𑀳𑀁;

𑀅𑀫𑀘𑁆𑀘𑀸𑀦𑀫𑀤𑀸 𑀲𑀩𑁆𑀩-𑀪𑁄𑀕𑁂 𑀞𑀸𑀦𑀦𑁆𑀢𑀭𑁂 𑀳𑀺 𑀲𑁄.

𑀪𑀝𑀸𑀦𑀜𑁆𑀘𑀸𑀧𑀺 𑀲𑀩𑁆𑀩𑁂𑀲𑀁, 𑀲𑀳𑀸𑀬𑀸𑀢𑀸𑀦𑀫𑀢𑁆𑀢𑀦𑁄;

𑀅𑀦𑀼𑀭𑀽𑀧𑀫𑀤𑀸 𑀯𑀼𑀢𑁆𑀢𑀺𑀁, 𑀲𑀭𑀁 𑀤𑀼𑀓𑁆𑀔𑀲𑀳𑀸𑀬𑀢𑀁.

𑀫𑀸𑀡𑀸𑀪𑀭𑀡𑀪𑀽𑀧𑁄𑀧𑀺, 𑀲𑀤𑁆𑀥𑀺𑀁 𑀲𑁂𑀲𑁂𑀳𑀺 𑀪𑀸𑀢𑀽𑀳𑀺;

𑀓𑀭𑀺𑀢𑁆𑀯𑀸 𑀭𑁄𑀳𑀡𑀁 𑀧𑀲𑁆𑀲𑀁, 𑀭𑁄𑀳𑀡𑀜𑁆𑀘 𑀲𑀳𑀢𑁆𑀣𑀕𑀁.

𑀢𑀢𑁄 𑀓𑀺𑀢𑁆𑀢𑀺𑀲𑀺𑀭𑀻𑀫𑁂𑀖𑁂, 𑀲𑀤𑁆𑀯𑀸𑀤𑀲𑀲𑀳𑀲𑁆𑀲𑀓𑀁;

𑀭𑀝𑁆𑀞𑀁 𑀤𑀢𑁆𑀯𑀸𑀦 𑀯𑀲𑀺𑀢𑀼𑀁, 𑀢𑀳𑀺𑀁𑀬𑁂𑀯 𑀲𑀫𑀸𑀤𑀺𑀲𑀺.

𑀆𑀡𑀢𑁆𑀢𑁄 𑀪𑀸𑀢𑀭𑀸𑀓𑀺𑀢𑁆𑀢𑀺-𑀲𑀺𑀭𑀻𑀫𑁂𑀖𑁄 𑀚𑀦𑀸𑀥𑀺𑀧𑁄;

𑀕𑀦𑁆𑀢𑁆𑀯𑀸 𑀯𑀲𑀺 𑀧𑀼𑀭𑁂𑀢𑀢𑁆𑀣, 𑀫𑀳𑀸𑀦𑀸𑀕𑀳𑀼𑀮𑀯𑁆𑀳𑀬𑁂.

𑀲𑀺𑀭𑀻𑀯𑀮𑁆𑀮𑀪𑀦𑀸𑀫𑀲𑁆𑀲, 𑀓𑀼𑀫𑀸𑀭𑀲𑁆𑀲𑀸𑀧𑀺 𑀘𑀸𑀤𑀺𑀲𑀺;

𑀤𑁂𑀲𑀫𑀝𑁆𑀞𑀲𑀳𑀲𑁆𑀲𑀯𑁆𑀳𑀁, 𑀤𑀢𑁆𑀯𑀸𑀦 𑀯𑀲𑀺𑀢𑀼𑀁 𑀢𑀳𑀺𑀁.

𑀢𑀣𑁂𑀯 𑀲𑁄𑀧𑀺 𑀕𑀦𑁆𑀢𑁆𑀯𑀸𑀦, 𑀉𑀤𑁆𑀥𑀦𑀤𑁆𑀯𑀸𑀭𑀦𑀸𑀫𑀓𑀁;

𑀕𑀸𑀫𑀁 𑀓𑀢𑁆𑀯𑀸 𑀭𑀸𑀚𑀤𑀸𑀦𑀺𑀁, 𑀯𑀲𑀦𑁆𑀢𑁄 𑀅𑀦𑀼𑀲𑀸𑀲𑀺𑀢𑀁.

𑀲𑀬𑀜𑁆𑀘 𑀲𑀳𑀲𑁂𑀦𑀸𑀬, 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀓𑀁;

𑀯𑀻𑀭𑀩𑀸𑀳𑀽𑀢𑀺 𑀧𑀜𑁆𑀜𑀸𑀢𑁄, 𑀧𑀼𑀗𑁆𑀔𑀕𑀸𑀫𑀁 𑀲𑀫𑀸𑀯𑀲𑀺.

𑀫𑀸𑀢𑀸 𑀘 𑀢𑀺𑀡𑁆𑀡𑀁 𑀪𑀸𑀢𑀽𑀦𑀁, 𑀚𑀬𑀩𑀸𑀳𑀼 𑀘 𑀪𑀽𑀫𑀺𑀧𑁄;

𑀦𑀺𑀯𑀲𑀺𑀁𑀲𑀼 𑀢𑀤𑀸 𑀓𑀺𑀢𑁆𑀢𑀺-𑀲𑀺𑀭𑀺𑀫𑁂𑀖𑀲𑁆𑀲 𑀲𑀦𑁆𑀢𑀺𑀓𑁂.

𑀢𑀢𑁄 ¶ 𑀲𑀁𑀯𑀘𑁆𑀙𑀭𑁂’𑀢𑀻𑀢𑁂, 𑀢𑁂 𑀫𑀸𑀡𑀪𑀭𑀡𑀸𑀤𑀬𑁄;

𑀢𑁂𑀦𑀢𑁆𑀢𑀦𑀺 𑀓𑀢𑀁 𑀬𑀼𑀤𑁆𑀥𑁂, 𑀲𑀩𑁆𑀩𑀁 𑀯𑀺𑀓𑁆𑀓𑀫𑀩𑀸𑀳𑀼𑀦𑀸.

𑀤𑀼𑀭𑀸𑀭𑁄𑀳𑀁 𑀫𑀳𑀦𑁆𑀢𑀁 𑀢𑀁, 𑀧𑀭𑀸𑀚𑀬𑀢𑀭𑀸𑀪𑀯𑀁;

𑀅𑀦𑀼𑀲𑁆𑀲𑀭𑀦𑁆𑀢𑀩𑀳𑀼𑀲𑁄, 𑀅𑀪𑀺𑀫𑀸𑀦𑀲𑀫𑀼𑀦𑁆𑀦𑀢𑀸.

𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀭𑀸𑀚𑀽𑀦-𑀫𑁂𑀓𑀸𑀓𑀻𑀭𑀸𑀚𑀭𑀝𑁆𑀞𑀓𑀁;

𑀯𑀺𑀦𑀸𑀬𑀫𑀪𑀺𑀲𑁂𑀓𑁂𑀦, 𑀓𑀣𑀁 𑀦𑀸𑀫𑀸𑀦𑀼𑀪𑁄𑀲𑁆𑀲𑀢𑀺.

𑀇𑀢𑀺 𑀇𑀲𑁆𑀲𑀸 𑀧𑀭𑀢𑁆𑀢𑀜𑁆𑀘, 𑀬𑀸𑀢𑀸 𑀲𑀗𑁆𑀕𑀬𑁆𑀳𑀲𑀸𑀯𑀓𑁂;

𑀪𑀺𑀬𑁆𑀬𑁄 𑀲𑀫𑁆𑀪𑀽𑀬𑀲𑀗𑁆𑀕𑀸𑀫-𑀓𑀭𑀡𑀢𑁆𑀣𑀸𑀬 𑀦𑀺𑀓𑁆𑀔𑀫𑀼𑀁.

𑀲𑀼𑀢𑁆𑀯𑀸 𑀢𑀫𑀢𑁆𑀣𑀁 𑀤𑀽𑀢𑁂𑀳𑀺, 𑀲𑁄 𑀯𑀺𑀓𑁆𑀓𑀫𑀪𑀼𑀚𑁄𑀧𑀺 𑀘;

𑀅𑀕𑀸 𑀢𑁂𑀲𑀁𑀯 𑀯𑀺𑀲𑀬𑀁, 𑀫𑀳𑀸𑀲𑁂𑀦𑀸𑀧𑀼𑀭𑀓𑁆𑀔𑀢𑁄.

𑀤𑁂𑀲𑁂 𑀤𑀓𑁆𑀔𑀺𑀡𑀓𑁂 𑀩𑁄𑀥𑀺-𑀲𑁂𑀦𑀧𑀩𑁆𑀩𑀢𑀕𑀸𑀫𑀓𑁂;

𑀬𑀼𑀚𑁆𑀛𑀺𑀢𑁆𑀯𑀸 𑀢𑁂 𑀧𑀭𑀸𑀚𑁂𑀲𑀺, 𑀢𑀬𑁄 𑀯𑀺𑀓𑁆𑀓𑀫𑀩𑀸𑀳𑀼𑀲𑁄.

𑀭𑀺𑀧𑀯𑁄 𑀤𑀸𑀦𑀺 𑀫𑁂 𑀲𑀩𑁆𑀩𑁂, 𑀉𑀫𑁆𑀫𑀽𑀮𑁂𑀲𑁆𑀲𑀸𑀫𑀳𑀁 𑀇𑀢𑀺;

𑀧𑀮𑀸𑀬𑀦𑁆𑀢𑁂 𑀦𑀼𑀩𑀦𑁆𑀥𑀺𑀢𑁆𑀣, 𑀧𑀤𑀸𑀦𑀼𑀧𑀤𑀺𑀓𑀁’𑀯 𑀢𑁂.

𑀢𑁂 𑀘 𑀤𑀼𑀕𑁆𑀕𑀁 𑀧𑀮𑀸𑀬𑀺𑀁𑀲𑀼, 𑀧𑀜𑁆𑀘𑀬𑁄𑀚𑀦𑀭𑀝𑁆𑀞𑀓𑁂;

𑀔𑀺𑀧𑁆𑀧𑀁 𑀧𑀸𑀯𑁂𑀓𑁆𑀔𑀺 𑀓𑀮𑁆𑀬𑀸𑀡𑀺𑀁, 𑀲𑁄’𑀧𑀺 𑀢𑁂 𑀕𑀳𑀡𑀢𑁆𑀣𑀺𑀓𑁄.

𑀯𑀻𑀭𑁄 𑀅𑀭𑀺𑀬𑀤𑁂𑀲𑀺𑀬𑁄, 𑀯𑀻𑀭𑀤𑁂𑀯𑁄𑀢𑀺 𑀧𑀸𑀓𑀝𑁄;

𑀧𑀴𑀦𑁆𑀤𑀻𑀧𑀺𑀲𑁆𑀲𑀭𑁄 𑀏𑀓𑁄, 𑀪𑀽𑀲𑀁 𑀲𑀳𑀲𑀺𑀓𑁄 𑀢𑀤𑀸.

𑀲𑀤𑁆𑀥𑀺𑀁 𑀲𑀽𑀭𑁂𑀳𑀺 𑀬𑁄𑀥𑁂𑀳𑀺, 𑀫𑀳𑀸𑀢𑀺𑀢𑁆𑀣𑀫𑁆𑀳𑀺 𑀑𑀢𑀭𑀺;

𑀓𑀸𑀢𑀼𑀁 𑀳𑀢𑁆𑀣𑀕𑀳𑀁 𑀲𑀓𑁆𑀓𑀸, 𑀮𑀁𑀓𑀸𑀤𑀻𑀧𑀦𑁆𑀢𑀺 𑀘𑀺𑀦𑁆𑀢𑀺𑀬.

𑀲𑁄 𑀯𑀺𑀓𑁆𑀓𑀫𑀪𑀼𑀚𑁄 𑀲𑀼𑀢𑁆𑀯𑀸, 𑀧𑀯𑀢𑁆𑀢𑀺𑀁 𑀪𑀽𑀪𑀼𑀚𑁄 𑀢𑀤𑀸;

𑀬𑀸𑀯𑀢𑀸 𑀦𑀸𑀢𑁆𑀭 𑀮𑀁𑀓𑀸𑀬𑀁, 𑀮𑀤𑁆𑀥𑁄𑀕𑀸𑀳𑁄 𑀪𑀯𑀺𑀲𑁆𑀲𑀢𑀺.

𑀢𑀸𑀯 𑀉𑀫𑁆𑀫𑀽𑀮𑀦𑀻𑀬𑁄𑀢𑀺, 𑀓𑀮𑁆𑀬𑀸𑀡𑀺𑀫𑁆𑀳𑀸 𑀯𑀺𑀦𑀺𑀕𑁆𑀕𑀢𑁄;

𑀫𑀳𑀸𑀢𑀺𑀢𑁆𑀣𑀫𑁆𑀳𑀺 𑀫𑀦𑁆𑀦𑀸𑀭-𑀦𑀸𑀫𑀓𑀁 𑀕𑀸𑀫𑀓𑀁 𑀕𑀢𑁄.

𑀓𑀢𑁆𑀯𑀸𑀦 𑀯𑀻𑀭𑀤𑁂𑀯𑁄’𑀧𑀺, 𑀲𑀗𑁆𑀕𑀸𑀫𑀁 𑀢𑁂𑀦 𑀭𑀸𑀚𑀺𑀦𑀸;

𑀅𑀦𑀻𑀓𑀗𑁆𑀕𑀸𑀤𑀬𑁄 𑀭𑀸𑀚-𑀧𑀼𑀢𑁆𑀢𑁂 𑀤𑁆𑀯𑁂 𑀪𑀸𑀢𑀭𑁄𑀧𑀺 𑀘.

𑀲𑁂𑀦𑀸𑀥𑀺𑀦𑀸𑀬𑀓𑀜𑁆𑀘𑁂𑀯, 𑀓𑀺𑀢𑁆𑀢𑀺𑀦𑀸𑀫𑀧𑁆𑀧𑀓𑀸𑀲𑀺𑀢𑀁;

𑀖𑀸𑀢𑁂𑀢𑁆𑀯𑀸 𑀲𑀳𑀲𑀸 𑀯𑀻𑀭-𑀲𑀫𑁆𑀫𑀢𑁂 𑀘 𑀩𑀳𑀽𑀚𑀦𑁂.

𑀕𑀸𑀳𑁂𑀢𑁆𑀯𑀸 𑀚𑀻𑀯𑀕𑁆𑀕𑀸𑀳𑀁𑀲𑁄, 𑀭𑀓𑁆𑀔𑀓𑀜𑁆𑀘 𑀘𑀫𑀽𑀧𑀢𑀺𑀁;

𑀲𑀩𑀮𑀁 𑀢𑀁 𑀧𑀭𑀸𑀚𑁂𑀢𑁆𑀯𑀸, 𑀅𑀦𑀼𑀩𑀦𑁆𑀥𑀺 𑀧𑀤𑀸𑀧𑀤𑀁.

𑀧𑀮𑀸𑀬𑀫𑀸𑀦𑁄 ¶ 𑀲𑁄 𑀪𑀻𑀢𑁄, 𑀆𑀕𑀦𑁆𑀢𑁆𑀯𑀸𑀦 𑀦𑀺𑀚𑀁 𑀧𑀼𑀭𑀁;

𑀳𑀢𑁆𑀣𑀲𑀸𑀭𑀁 𑀲𑀫𑀸𑀤𑀸𑀬, 𑀓𑁄𑀝𑁆𑀞𑀲𑀸𑀭𑀁 𑀕𑀢𑁄 𑀮𑀳𑀼𑀁.

𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀯𑀻𑀭-𑀤𑁂𑀯𑁄 𑀢𑀫𑀦𑀼𑀩𑀦𑁆𑀥𑀺𑀬;

𑀆𑀕𑀦𑁆𑀢𑁆𑀯𑀸𑀦 𑀧𑀼𑀭𑁂𑀯𑀸𑀲𑀁, 𑀓𑀢𑀺𑀧𑀸𑀳𑀁 𑀯𑀺𑀥𑀸𑀬𑀲𑁄.

𑀕𑀡𑁆𑀳𑀺𑀢𑀼𑀁 𑀯𑀺𑀓𑁆𑀓𑀫𑀪𑀼𑀚𑀁, 𑀢𑀢𑁆𑀣𑁂𑀯 𑀢𑀼𑀭𑀺𑀢𑀁 𑀅𑀕𑀸;

𑀧𑁂𑀲𑀬𑀺𑀢𑁆𑀯𑀸 𑀲𑀓𑀁 𑀲𑁄𑀧𑀺, 𑀫𑀳𑀦𑁆𑀢𑀁 𑀲𑀓𑀮𑀁 𑀩𑀮𑀁.

𑀬𑀼𑀚𑁆𑀛𑀸𑀧𑁂𑀢𑁆𑀯𑀸𑀦 𑀖𑀸𑀢𑁂𑀢𑁆𑀯𑀸, 𑀕𑀸𑀫𑁂 𑀅𑀦𑁆𑀢𑀭𑀯𑀺𑀝𑁆𑀞𑀺𑀓𑁂;

𑀫𑀳𑀸𑀓𑀤𑁆𑀤𑀫𑀤𑀼𑀕𑁆𑀕𑀫𑁆𑀳𑀺, 𑀯𑀻𑀭𑀤𑁂𑀯𑀁 𑀫𑀳𑀩𑁆𑀩𑀮𑁄.

𑀅𑀪𑀺𑀲𑁂𑀓𑀁 𑀯𑀺𑀦𑀸𑀬𑁂𑀯, 𑀧𑀼𑀮𑀢𑁆𑀣𑀺 𑀦𑀕𑀭𑁂 𑀯𑀲𑀁;

𑀅𑀓𑀸𑀲𑀺 𑀭𑀸𑀚𑀭𑀝𑁆𑀞𑀲𑁆𑀲, 𑀧𑀲𑀸𑀲𑀦𑀯𑀺𑀥𑀺𑀁 𑀯𑀺𑀪𑀽.

𑀅𑀧𑀦𑀻𑀬𑀭𑀡𑁂 𑀙𑀦𑁆𑀤𑀁, 𑀪𑀸𑀢𑀭𑁄𑀧𑀺 𑀢𑀬𑁄 𑀢𑀢𑁄;

𑀆𑀯𑀲𑀺𑀁𑀲𑀼 𑀬𑀣𑀸𑀧𑀼𑀩𑁆𑀩𑀁, 𑀕𑀦𑁆𑀢𑁆𑀯𑀸 𑀭𑀝𑁆𑀞𑀁 𑀲𑀓𑀁 𑀲𑀓𑀁.

𑀘𑀢𑀼𑀭𑁄𑀧𑀺 𑀫𑀳𑀻𑀧𑀸𑀮𑀸, 𑀬𑀢𑀫𑀸𑀦𑀸 𑀘𑀺𑀭𑀁 𑀢𑀳𑀺𑀁;

𑀏𑀓𑀘𑁆𑀙𑀢𑁆𑀢𑀗𑁆𑀓𑀺𑀢𑀁 𑀓𑀸𑀢𑀼𑀁, 𑀦𑁂𑀯 𑀲𑀓𑁆𑀔𑀺𑀁𑀲𑀼 𑀲𑀩𑁆𑀩𑀲𑁄.

𑀅𑀦𑀺𑀲𑀫𑁆𑀫𑀓𑀸𑀭𑀺𑀪𑀸𑀯𑁂𑀦, 𑀓𑀼𑀮𑀻𑀦𑁂 𑀧𑀭𑀺𑀳𑀸𑀧𑀬𑀼𑀁;

𑀞𑀧𑁂𑀲𑀼𑀜𑁆𑀘 𑀫𑀳𑀦𑁆𑀢𑀢𑁆𑀢𑁂, 𑀳𑀻𑀦𑁂 𑀲𑀸𑀪𑀺𑀫𑀢𑁂 𑀚𑀦𑁂.

𑀯𑀟𑁆𑀠𑀺𑀢𑀁𑀦𑁂𑀓𑀥𑀸 𑀲𑀫𑁆𑀫𑀸, 𑀭𑀜𑁆𑀜𑀸 𑀯𑀺𑀚𑀬𑀩𑀸𑀳𑀼𑀦𑀸;

𑀲𑀸𑀲𑀦𑀜𑁆𑀘 𑀢𑀣𑀸𑀮𑁄𑀓𑀁, 𑀳𑀸𑀧𑀬𑀺𑀁𑀲𑀼 𑀲𑀼𑀩𑀼𑀤𑁆𑀥𑀺𑀦𑁄.

𑀓𑀼𑀮𑀻𑀦𑀸𑀦𑀁 𑀫𑀦𑀼𑀲𑁆𑀲𑀸𑀦-𑀫𑀪𑀸𑀯𑁂𑀧𑀺 𑀘 𑀢𑀸𑀤𑀺𑀲𑁂;

𑀤𑁄𑀲𑁂 𑀯𑀺𑀢𑁆𑀢𑀁 𑀢𑀤𑀸𑀬𑀢𑁆𑀢𑀁, 𑀧𑀲𑀬𑁆𑀳𑀸𑀯𑀳𑀭𑀺𑀁𑀲𑀼 𑀘.

𑀧𑀻𑀴𑁂𑀢𑀼𑀁 𑀲𑀓𑀮𑀁 𑀮𑁄𑀓-𑀫𑀼𑀤𑁆𑀥𑀭𑀦𑁆𑀢𑀸𑀥𑀺𑀓𑀁 𑀩𑀮𑀺𑀁;

𑀉𑀘𑁆𑀙𑀽𑀯 𑀉𑀘𑁆𑀙𑀼𑀬𑀦𑁆𑀢𑁂𑀢𑁂, 𑀔𑀻𑀡𑀓𑁄 𑀲𑀸𑀥𑀦𑁂𑀲𑀺𑀦𑁄.

𑀉𑀤𑁆𑀥𑀭𑀺𑀢𑁆𑀯𑀸𑀦 𑀩𑀼𑀤𑁆𑀥𑀸𑀤𑀺-𑀲𑀦𑁆𑀢𑀓𑁂 𑀪𑁄𑀕𑀕𑀸𑀫𑀓𑁂;

𑀲𑁄 𑀯𑀺𑀓𑁆𑀓𑀫𑀪𑀼𑀚𑁄 𑀭𑀸𑀚𑀸, 𑀲𑁂𑀯𑀓𑁂𑀲𑀼 𑀲𑀫𑀧𑁆𑀧𑀬𑀻.

𑀧𑀼𑀮𑀢𑁆𑀣𑀺𑀦𑀕𑀭𑁂 𑀦𑁂𑀓-𑀯𑀺𑀳𑀸𑀭𑁂 𑀥𑀸𑀢𑀼𑀫𑀡𑁆𑀟𑀺𑀢𑁂;

𑀲𑁄𑀯 𑀤𑁂𑀲𑀦𑁆𑀢𑀭𑀻𑀬𑀸𑀦𑀁, 𑀪𑀝𑀸𑀦𑀁 𑀯𑀲𑀺𑀢𑀼𑀁 𑀅𑀤𑀸.

𑀲𑀤𑁆𑀥𑁂𑀳𑀺 𑀧𑀢𑁆𑀢𑀥𑀸𑀢𑀼𑀲𑁆𑀲, 𑀤𑀸𑀞𑀸𑀥𑀸𑀢𑀼𑀯𑀭𑀲𑁆𑀲 𑀘;

𑀧𑀽𑀚𑀦𑀢𑁆𑀣𑀸𑀬 𑀤𑀺𑀦𑁆𑀦𑀸𑀦𑀺, 𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑀸𑀦𑀺 𑀘.

𑀘𑀦𑁆𑀤𑀦𑀸𑀕𑀭𑀼𑀓𑀧𑁆𑀧𑀼𑀭𑀁, 𑀲𑀼𑀯𑀡𑁆𑀡𑀸𑀤𑀺𑀫𑀬𑀸 𑀩𑀳𑀽;

𑀧𑀝𑀺𑀫𑀸𑀬𑁄 𑀘 𑀅𑀘𑁆𑀙𑀺𑀚𑁆𑀚, 𑀬𑀣𑀸𑀓𑀸𑀫𑀁 𑀯𑀬𑀁 𑀦𑀬𑀻.

𑀲𑀸𑀲𑀦𑀲𑁆𑀲 ¶ 𑀘 𑀮𑁄𑀓𑀲𑁆𑀲, 𑀓𑁆𑀭𑀺𑀬𑀫𑀸𑀦𑀫𑀼𑀧𑀤𑁆𑀤𑀯𑀁;

𑀧𑀲𑁆𑀲𑀦𑁆𑀢𑀸 𑀩𑀳𑀼𑀲𑁄 𑀢𑀲𑁆𑀫𑀺𑀁, 𑀢𑀤𑀸 𑀦𑀺𑀩𑁆𑀩𑀦𑁆𑀦𑀫𑀸𑀦𑀲𑀸.

𑀅𑀝𑁆𑀞𑀫𑀽𑀮𑀯𑀺𑀳𑀸𑀭𑁂𑀲𑀼, 𑀬𑀢𑀬𑁄 𑀕𑀭𑀼𑀲𑀫𑁆𑀫𑀢𑀸;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽 𑀘, 𑀓𑁄𑀝𑁆𑀞𑀸𑀲𑀤𑁆𑀯𑀬𑀦𑀺𑀲𑁆𑀲𑀺𑀢𑀸.

𑀏𑀯𑀁 𑀢𑀺𑀢𑁆𑀣𑀺𑀬𑀢𑀼𑀮𑁆𑀬𑀸𑀦𑀁, 𑀲𑀸𑀲𑀦𑁄𑀧𑀤𑁆𑀤𑀯𑀁 𑀩𑀳𑀼𑀁;

𑀓𑀭𑁄𑀦𑁆𑀢𑀸𑀦𑀁 𑀲𑀓𑀸 𑀲𑀫𑁆𑀪𑀸-𑀧𑀬𑀸𑀢𑀁 𑀧𑀯𑀭𑀁 𑀇𑀢𑀺.

𑀤𑀸𑀞𑀸𑀥𑀸𑀢𑀼𑀯𑀭𑀁 𑀧𑀢𑁆𑀢-𑀥𑀸𑀢𑀼𑀫𑀸𑀤𑀸𑀬 𑀭𑁄𑀳𑀡𑀁;

𑀕𑀦𑁆𑀢𑁆𑀯𑀸 𑀯𑀸𑀲𑀫𑀓𑀧𑁆𑀧𑁂𑀲𑀼𑀁, 𑀨𑀸𑀲𑀼𑀞𑀸𑀦𑁂 𑀢𑀳𑀺𑀁 𑀢𑀳𑀺𑀁.

𑀢𑀣𑁂𑀯 𑀨𑀸𑀲𑀼𑀞𑀸𑀦𑁂𑀲𑀼, 𑀯𑀺𑀧𑁆𑀧𑀓𑀺𑀡𑁆𑀡𑀸 𑀢𑀳𑀺𑀁 𑀢𑀳𑀺𑀁;

𑀢𑁂 𑀓𑀼𑀮𑀻𑀦𑀸 𑀦𑀺𑀮𑀻𑀦𑀸’𑀯, 𑀳𑀼𑀢𑁆𑀯𑀸 𑀯𑀸𑀲𑀫𑀓𑀧𑁆𑀧𑀬𑀼𑀁.

𑀧𑀓𑁆𑀔𑀤𑁆𑀯𑀬𑀫𑀳𑀻𑀧𑀸𑀮-𑀕𑀬𑁆𑀳𑀸𑀲𑀻𑀫𑀸 𑀲𑀼𑀞𑀸𑀧𑀺𑀢𑀸;

𑀲𑀸𑀫𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀓𑀭𑁄𑀦𑁆𑀢𑁄 𑀩𑀳𑀼𑀲𑁄 𑀭𑀡𑀁.

𑀲𑀼𑀲𑀫𑀺𑀤𑁆𑀥𑁂𑀲𑀼 𑀦𑁂𑀓𑁂𑀲𑀼, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;

𑀅𑀕𑁆𑀕𑀺𑀁 𑀤𑁂𑀦𑁆𑀢𑀸 𑀢𑀴𑀸𑀓𑁂 𑀘, 𑀙𑀺𑀦𑁆𑀤𑀦𑁆𑀢𑀸 𑀚𑀮𑀧𑀽𑀭𑀺𑀢𑁂.

𑀦𑀸𑀲𑁂𑀦𑁆𑀢𑀸 𑀲𑀩𑁆𑀩𑀣𑀸 𑀲𑀩𑁆𑀩-𑀫𑀸𑀢𑀺𑀓𑀸𑀯𑀭𑀡𑀸𑀦𑀺 𑀘;

𑀙𑀺𑀦𑁆𑀤𑀦𑁆𑀢𑀸 𑀦𑀸𑀴𑀺𑀓𑁂𑀭𑀸𑀤𑀺, 𑀲𑁄 𑀧𑀓𑀸𑀭𑁂 𑀘 𑀪𑀽𑀭𑀼𑀳𑁂.

𑀬𑀣𑀸 𑀧𑁄𑀭𑀸𑀡𑀓𑀕𑁆𑀕𑀸𑀫-𑀞𑀸𑀦𑀦𑁆𑀢𑀺𑀧𑀺 𑀦 𑀜𑀸𑀬𑀢𑁂;

𑀯𑀺𑀦𑀸𑀲𑁂𑀲𑀼𑀁 𑀢𑀣𑀸 𑀭𑀝𑁆𑀞𑀁, 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀦𑁄.

𑀢𑁂 𑀘 𑀪𑀽𑀫𑀺 𑀧𑀢𑀻𑀕𑀸𑀫-𑀯𑀺𑀮𑁄𑀧𑀁 𑀧𑀢𑁆𑀣𑀫𑁄𑀲𑀦𑀁;

𑀓𑀸𑀭𑁂𑀦𑁆𑀢𑀸 𑀦𑀺𑀚𑀘𑀸𑀭𑁂𑀳𑀺, 𑀆𑀘𑀭𑀼𑀁 𑀮𑁄𑀓𑀼𑀧𑀤𑁆𑀤𑀯𑀁.

𑀓𑀼𑀮𑀻𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀤𑀸𑀲𑀓𑀫𑁆𑀫𑀓𑀭𑀸𑀧𑀺 𑀘;

𑀲𑀲𑀸𑀫𑀺𑀦𑁄’𑀢𑀺 𑀯𑀢𑁆𑀢𑀦𑁆𑀢𑀸, 𑀦𑀺𑀲𑁆𑀲𑀗𑁆𑀓𑀸 𑀯𑀻𑀢𑀪𑀻𑀢𑀺𑀓𑀸.

𑀳𑀼𑀢𑁆𑀯𑀸 𑀬𑀼𑀥𑀻𑀬𑀸 𑀭𑀸𑀚𑀽𑀦𑀁, 𑀅𑀩𑁆𑀪𑀦𑁆𑀢𑀭𑀧𑀯𑀢𑁆𑀢𑀺𑀦𑁄;

𑀩𑀮𑀯𑀦𑁆𑀢𑀢𑀭𑀸 𑀚𑀸𑀢𑀸, 𑀮𑀤𑁆𑀥𑀞𑀸𑀦𑀦𑁆𑀢𑀭𑀸 𑀢𑀤𑀸.

𑀚𑀦𑀸 𑀲𑀫𑀦𑁆𑀢𑀓𑀽𑀝𑀸𑀤𑀺-𑀦𑁂𑀓𑀤𑀼𑀕𑁆𑀕𑀦𑀺𑀯𑀸𑀲𑀺𑀦𑁄;

𑀅𑀤𑁂𑀦𑁆𑀢𑀸 𑀪𑀽𑀫𑀺𑀧𑀸𑀮𑀸𑀦𑀁, 𑀧𑀼𑀩𑁆𑀩𑀧𑀝𑁆𑀞𑀧𑀺𑀢𑀁 𑀓𑀭𑀁.

𑀭𑀸𑀚𑀸𑀡𑀫𑀕𑀡𑁂𑀦𑁆𑀢𑀸 𑀢𑁂, 𑀕𑀢𑀸 𑀤𑀸𑀫𑀭𑀺𑀓𑀢𑁆𑀢𑀦𑀁;

𑀲𑀓𑀁 𑀲𑀓𑀁’𑀯 𑀯𑀺𑀲𑀬-𑀫𑀸𑀯𑀲𑀺𑀁𑀲𑀼 𑀲𑀫𑀼𑀤𑁆𑀥𑀢𑀸.

𑀅𑀦𑀢𑁆𑀣𑁂 𑀦𑀺𑀘𑀺𑀢𑀸 𑀦𑀸𑀫, 𑀧𑀭𑀺𑀯𑀢𑁆𑀢𑀦𑁆𑀢𑀺 𑀲𑀩𑁆𑀩𑀢𑀸;

𑀇𑀢𑀺 𑀯𑀢𑁆𑀢𑀩𑁆𑀩 𑀢𑀁𑀬𑁂𑀯, 𑀬𑀸𑀢𑀁 𑀮𑀗𑁆𑀓𑀸𑀢𑀮𑀁 𑀢𑀤𑀸.

𑀏𑀯𑀁 ¶ 𑀕𑀸𑀫𑀓𑀪𑁄𑀚𑀓𑀸 𑀯𑀺𑀬 𑀪𑀼𑀲𑀁𑀢𑁂𑀚𑁄 𑀯𑀺𑀳𑀻𑀦𑀸 𑀲𑀤𑀸;

𑀅𑀘𑁆𑀘𑀦𑁆𑀢𑀁 𑀩𑁆𑀬𑀲𑀦𑀸𑀢𑀺 𑀲𑀢𑁆𑀢𑀳𑀤𑀬𑀸 𑀭𑀸𑀚𑀸𑀪𑀺𑀫𑀸𑀦𑀼𑀚𑁆𑀛𑀺𑀢𑀸.

𑀦𑀺𑀘𑁆𑀘𑀁 𑀅𑀢𑁆𑀢𑀧𑀭𑀢𑁆𑀣𑀲𑀺𑀤𑁆𑀥𑀺𑀯𑀺𑀥𑀼𑀭𑀸𑀲𑀗𑁆𑀕𑀸 𑀯𑀺𑀳𑀻𑀦𑀸𑀲𑀬𑀸;

𑀲𑀩𑁆𑀩𑁂 𑀢𑁂 𑀯𑀺𑀳𑀭𑀺𑀁𑀲𑀼 𑀪𑀽𑀫𑀺𑀧𑀢𑀬𑁄 𑀘𑀸𑀭𑀺𑀢𑁆𑀢𑀫𑀕𑁆𑀕𑀸𑀢𑀺𑀕𑀸.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑀢𑀼𑀭𑀸𑀚𑀘𑀭𑀺𑀬𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀽𑀦𑀲𑀝𑁆𑀞𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀭𑁄𑀳𑀡𑁂 𑀦𑀺𑀯𑀲𑀺𑀢𑁆𑀣𑀸’𑀯, 𑀚𑀬𑀩𑀸𑀳𑀼𑀫𑀳𑀻𑀧𑀢𑀺;

𑀫𑀺𑀢𑁆𑀢𑀸𑀯𑁆𑀳𑀸 𑀭𑀸𑀚𑀺𑀦𑀻 𑀘𑁂𑀯, 𑀢𑀤𑀸 𑀓𑀸𑀮𑀫𑀓𑀁𑀲𑀼 𑀢𑁂.

𑀲𑀺𑀭𑀻𑀯𑀮𑁆𑀮𑀪𑀚𑀸𑀬𑀸’𑀣, 𑀚𑀦𑁂𑀲𑀺 𑀲𑀼𑀕𑀮𑀸 𑀤𑀼𑀯𑁂;

𑀫𑀸𑀡𑀪𑀭𑀡𑀓𑀁 𑀧𑀼𑀢𑁆𑀢𑀁, 𑀧𑀼𑀢𑁆𑀢𑀺𑀁 𑀮𑀻𑀮𑀸𑀯𑀢𑀺𑀫𑁆𑀧𑀺 𑀘.

𑀫𑀸𑀡𑀸𑀪𑀭𑀡𑀪𑀽𑀧𑀸𑀮-𑀤𑁂𑀯𑀻’𑀧𑀺 𑀭𑀢𑀦𑀸𑀯𑀮𑀻;

𑀫𑀺𑀢𑁆𑀢𑀁 𑀧𑀪𑀸𑀯𑀢𑀺𑀜𑁆𑀘𑀸𑀧𑀺, 𑀅𑀮𑀪𑀻 𑀥𑀻𑀢𑀭𑁄 𑀤𑀼𑀯𑁂.

𑀧𑀲𑁆𑀲𑀦𑁆𑀢𑀲𑁆𑀲 𑀉𑀪𑁄 𑀢𑀸𑀬𑁄, 𑀥𑀻𑀢𑀭𑁄 𑀯𑀻𑀭𑀩𑀸𑀳𑀼𑀦𑁄;

𑀢𑀤𑀸 𑀫𑀳𑀸𑀤𑀺𑀧𑀸𑀤𑀲𑁆𑀲, 𑀏𑀯𑀁 𑀆𑀲𑀺 𑀯𑀺𑀢𑀓𑁆𑀓𑀺𑀢𑀁.

𑀮𑁄𑀓𑀸𑀪𑀺𑀲𑀫𑁆𑀫𑀢𑁂 𑀲𑀩𑁆𑀩-𑀪𑀽𑀧𑀸𑀮𑀦𑁆𑀯𑀬𑀫𑀼𑀤𑁆𑀥𑀦𑀺;

𑀯𑀺𑀲𑀼𑀤𑁆𑀥𑁂 𑀲𑁄𑀫𑀯𑀁𑀲𑀫𑁆𑀳𑀺, 𑀅𑀪𑀺𑀚𑀸𑀢𑀸 𑀫𑀬𑀁 𑀧𑀦.

𑀧𑀺𑀳𑀦𑀻𑀬𑀢𑀭𑀸𑀓𑀸𑀭𑀸, 𑀲𑀩𑁆𑀩𑀲𑀢𑁆𑀢𑀺𑀲𑀫𑀼𑀦𑁆𑀦𑀢𑀸;

𑀦𑀸𑀦𑀸𑀯𑀺𑀚𑁆𑀚𑀸𑀲𑀼 𑀦𑀺𑀧𑀼𑀡𑀸, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀲𑀼𑀓𑁆𑀔𑀫𑀸.

𑀢𑀣𑀸 𑀧𑁂𑀓𑀸𑀓𑀺𑀦𑀸 𑀯𑁂’𑀢𑁂, 𑀢𑀬𑁄 𑀯𑀺𑀓𑁆𑀓𑀫𑀩𑀸𑀳𑀼𑀦𑀸;

𑀧𑀭𑀸𑀚𑀬𑀁 𑀧𑀭𑀺𑀪𑀯𑀁, 𑀧𑀸𑀧𑀺𑀢𑀸 𑀩𑀳𑀼𑀲𑁄 𑀭𑀡𑁂.

𑀲𑀽𑀦𑀼𑀦𑁄 𑀲𑀼𑀲𑀫𑀢𑁆𑀣𑀲𑁆𑀲, 𑀯𑀺𑀲𑁄𑀥𑁂𑀢𑀼 𑀫𑀺𑀫𑀁 𑀫𑀮𑀁;

𑀦 𑀤𑀺𑀲𑁆𑀲𑀢𑁂 𑀧𑀸𑀢𑀼𑀪𑀸𑀯𑁄, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑀚𑀦𑀯𑀸𑀤𑀓𑀺𑀮𑀺𑀝𑁆𑀞𑁂𑀦 ¶ , 𑀭𑀸𑀚𑀢𑁆𑀢𑁂𑀦𑀸𑀧𑀺 𑀓𑀺𑀁 𑀫𑀫;

𑀇𑀤𑀸𑀦𑀺 𑀯𑀺𑀲𑀬𑀸𑀲𑀗𑁆𑀕𑀁, 𑀳𑀺𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀲𑀼.

𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀢𑀢𑀁, 𑀦𑁂𑀢𑀩𑁆𑀩𑀸 𑀯𑀸𑀲𑀭𑀸’𑀇𑀢𑀺;

𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁, 𑀲𑀩𑁆𑀩𑀁 𑀭𑀚𑁆𑀚𑀯𑀺𑀘𑀸𑀭𑀡𑀁.

𑀢𑀳𑀺𑀁 𑀲𑀢𑁆𑀢’𑀝𑁆𑀞𑀫𑀸𑀲𑀜𑁆𑀳𑀺, 𑀯𑀲𑀁 𑀭𑀢𑁆𑀢𑀺𑀬𑀫𑁂𑀓𑀤𑀸;

𑀤𑁂𑀯𑀭𑀸𑀚𑀖𑀭𑁂𑀲𑁂𑀬𑁆𑀬𑀁, 𑀓𑀧𑁆𑀧𑁂𑀲𑀺 𑀲𑀻𑀮𑀲𑀁𑀬𑀢𑁄.

𑀢𑀢𑁄 𑀧𑀘𑁆𑀘𑀽𑀲𑀓𑀸𑀮𑀫𑁆𑀳𑀺, 𑀤𑁂𑀯𑀧𑀼𑀢𑁆𑀢𑀁 𑀫𑀳𑀺𑀤𑁆𑀥𑀺𑀓𑀁;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀁, 𑀕𑀦𑁆𑀥𑀫𑀸𑀮𑀸𑀯𑀺𑀪𑀽𑀲𑀺𑀢𑀁.

𑀉𑀴𑀸𑀭𑀢𑀭𑀭𑀽𑀧𑁂𑀦, 𑀤𑁂𑀳𑁄𑀪𑀸𑀲𑁂𑀦 𑀅𑀢𑁆𑀢𑀦𑁄;

𑀑𑀪𑀸𑀲𑁂𑀦𑁆𑀢𑀁 𑀅𑀲𑁂𑀲𑀸’𑀲𑀸, 𑀲𑀽𑀭𑀺𑀬𑀜𑁆𑀘 𑀦 𑀪𑀼𑀕𑁆𑀕𑀢𑀁.

𑀯𑀤𑀦𑁆𑀢𑀁 𑀲𑀼𑀧𑀺𑀦𑁂 𑀏𑀯𑀁, 𑀅𑀤𑀓𑁆𑀔𑀺 𑀤𑀭𑀡𑀻𑀧𑀢𑀺;

𑀧𑀲𑀻𑀤𑀲𑁆𑀲𑀼 𑀫𑀳𑀸𑀪𑀸𑀕, 𑀧𑀺𑀢𑁄𑀪𑀯 𑀫𑀳𑀺𑀧𑀢𑀺.

𑀥𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀇𑀘𑁆𑀙𑀺𑀢𑀢𑁆𑀣𑀲𑁆𑀲𑀲𑀸𑀥𑀓𑁄;

𑀯𑀺𑀦𑀻𑀢𑁄 𑀮𑁄𑀓𑀓𑀼𑀳𑀭-𑀩𑁆𑀬𑀸𑀧𑀺𑀢𑁂𑀚𑁄 𑀧𑀭𑀓𑁆𑀓𑀫𑁄.

𑀆𑀡𑀩𑀮𑀬𑀲𑁄𑀓𑀺𑀢𑁆𑀢𑀺-𑀪𑀸𑀲𑀼𑀭𑁄 𑀲𑀕𑁆𑀕𑀼𑀡𑀸𑀓𑀭𑁄;

𑀮𑁄𑀓𑀲𑀸𑀲𑀦𑀲𑀁𑀯𑀼𑀤𑁆𑀥𑀺-𑀓𑀭𑁄 𑀧𑀼𑀢𑁆𑀢𑀯𑀭𑁄 𑀢𑀯.

𑀮𑀩𑁆𑀪𑀻𑀲𑁆𑀲𑀢𑁂 𑀫𑀳𑀸𑀭𑀸𑀚, 𑀦 𑀘𑀺𑀭𑀲𑁆𑀲𑁂𑀯 𑀲𑀫𑁆𑀧𑀢𑀺;

𑀧𑀼𑀢𑁆𑀢𑀤𑀸𑀭𑀸𑀥𑀺𑀯𑀼𑀢𑁆𑀣𑀁 𑀢𑀁, 𑀧𑀼𑀭𑀁 𑀔𑀺𑀧𑁆𑀧𑀁 𑀧𑀬𑀸𑀳𑀻𑀢𑀺.

𑀧𑀩𑀼𑀚𑁆𑀛𑀺𑀢𑁆𑀯𑀸𑀦 𑀲𑀜𑁆𑀚𑀸𑀢-𑀧𑀻𑀢𑀺𑀯𑁂𑀕𑁄𑀣 𑀭𑀢𑁆𑀢𑀺𑀬𑀸;

𑀯𑀺𑀪𑀸𑀢𑀸𑀬 𑀢𑀢𑁄𑀧𑁄𑀗𑁆𑀔-𑀕𑀸𑀫𑀁 𑀕𑀜𑁆𑀙𑀺𑀦𑀭𑀼𑀢𑁆𑀢𑀫𑁄.

𑀬𑀣𑀸 𑀤𑀺𑀝𑁆𑀞𑀧𑁆𑀧𑀓𑀸𑀭𑀦𑁆𑀢𑀁, 𑀓𑀣𑁂𑀲𑀺 𑀲𑀼𑀧𑀺𑀦𑀁 𑀲𑀼𑀪𑀁;

𑀫𑀳𑁂𑀲𑀻 𑀧𑀫𑀼𑀔𑀸𑀦𑀁 𑀲𑁄, 𑀅𑀫𑀘𑁆𑀘𑀸𑀦𑀁 𑀫𑀳𑀻𑀧𑀢𑀺.

𑀲𑀤𑁆𑀥𑀺𑀁 𑀫𑀳𑁂𑀲𑀺𑀬𑀸 𑀢𑀢𑁆𑀣, 𑀧𑀢𑁆𑀣𑁂𑀦𑁆𑀢𑁄 𑀧𑀼𑀢𑁆𑀢𑀫𑀼𑀢𑁆𑀢𑀫𑀁;

𑀘𑀺𑀦𑁆𑀢𑁄𑀦𑁆𑀢𑁄 𑀤𑀸𑀦𑀲𑀻𑀮𑀸𑀤𑀺𑀁, 𑀲𑀼𑀪𑀁 𑀦𑀸𑀦𑀧𑁆𑀧𑀓𑀸𑀭𑀓𑀁.

𑀅𑀣𑁂𑀓𑀤𑀺𑀯𑀲𑀁𑀓𑀸𑀮𑁂, 𑀧𑀘𑁆𑀘𑀽𑀲𑁂 𑀲𑀼𑀧𑀺𑀦𑁂 𑀧𑀦;

𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀲𑁂𑀢𑀁 𑀫𑀦𑁄𑀳𑀭𑀁.

𑀤𑀦𑁆𑀢𑀻𑀧𑁄𑀢𑀯𑀭𑀁 𑀤𑀦𑁆𑀢𑀁, 𑀓𑀡𑁆𑀡𑁂 𑀕𑀡𑀺𑀬𑀧𑁂𑀫𑀢𑁄;

𑀧𑀯𑀺𑀲𑀦𑁆𑀢𑀫𑀺𑀯𑀢𑁆𑀢𑀸𑀦𑀁, 𑀲𑁂𑀬𑁆𑀬𑀸𑀕𑀩𑁆𑀪𑀁 𑀫𑀳𑁂𑀲𑀺𑀬𑀸.

𑀲𑀫𑁆𑀧𑀲𑁆𑀲𑀺𑀬 𑀧𑀩𑀼𑀚𑁆𑀛𑀺𑀢𑁆𑀯𑀸, 𑀉𑀝𑁆𑀞𑀸𑀬 𑀲𑀬𑀦𑀸𑀯𑀭𑀸;

𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚-𑀯𑁂𑀕𑀧𑀻𑀡𑀺𑀢𑀫𑀸𑀦𑀲𑁄.

𑀢𑀸𑀬𑀁 ¶ 𑀯𑁂𑀮𑀸𑀬𑀫𑁂𑀤𑀸𑀲𑀼-𑀲𑁂𑀬𑁆𑀬𑀸𑀕𑀩𑁆𑀪𑀁 𑀫𑀳𑁂𑀲𑀺𑀬𑀸;

𑀧𑀯𑀺𑀲𑁆𑀲𑀲𑀼𑀧𑀺𑀦𑀁 𑀢𑀲𑁆𑀲𑀸, 𑀬𑀣𑀸𑀤𑀺𑀝𑁆𑀞𑀁 𑀧𑀓𑀸𑀲𑀬𑀻.

𑀅𑀳𑀫𑁆𑀧𑀺 𑀢𑀸𑀤𑀺𑀲𑀁 𑀳𑀢𑁆𑀣𑀺-𑀧𑁄𑀢𑀓𑀁 𑀲𑀬𑀦𑀁 𑀫𑀫;

𑀧𑀤𑀓𑁆𑀔𑀺𑀡𑀁 𑀓𑀭𑀺𑀢𑁆𑀯𑀸𑀦, 𑀞𑀺𑀢𑀁 𑀲𑁄𑀡𑁆𑀟𑁂 𑀲𑀫𑀸𑀤𑀺𑀬.

𑀆𑀓𑀟𑁆𑀠𑀺𑀢𑁆𑀯𑀸𑀦 𑀲𑀬𑀦𑀁, 𑀲𑀫𑀸𑀭𑁄𑀧𑀺𑀬 𑀧𑁂𑀫𑀢𑁄;

𑀆𑀮𑀺𑀗𑁆𑀕𑀺𑀁 𑀲𑀼𑀧𑀺𑀦𑀫𑁆𑀳𑀻𑀢𑀺, 𑀤𑁂𑀯𑀻 𑀘𑀸𑀧𑀺 𑀢𑀫𑀩𑁆𑀭𑀯𑀻.

𑀉𑀪𑁄 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲, 𑀤𑀺𑀝𑁆𑀞𑀫𑁂𑀯𑀁 𑀧𑀓𑀸𑀲𑀺𑀬;

𑀉𑀝𑁆𑀞𑀸𑀧𑁂𑀲𑀼𑀁 𑀧𑀳𑀝𑁆𑀞𑀸𑀯, 𑀯𑀻𑀢𑀦𑀺𑀤𑁆𑀤𑀸𑀭𑀼𑀡𑀁 𑀢𑀤𑀸.

𑀢𑀢𑁄 𑀧𑀸𑀢𑁄 𑀉𑀧𑀝𑁆𑀞𑀸𑀢𑀼, 𑀫𑀼𑀧𑀬𑀸𑀢𑀁 𑀧𑀼𑀭𑁄𑀳𑀺𑀢𑀁;

𑀦𑁂𑀫𑀺𑀢𑁆𑀢𑀓𑁂 𑀘 𑀧𑀼𑀘𑁆𑀙𑀺𑀁𑀲𑀼, 𑀲𑀼𑀦𑀺𑀢𑁆𑀯𑀸 𑀢𑁂 𑀧𑀫𑁄𑀤𑀺𑀢𑀸.

𑀦 𑀘𑀺𑀭𑀲𑁆𑀲𑁂𑀯 𑀧𑀼𑀢𑁆𑀢𑀲𑁆𑀲, 𑀥𑀜𑁆𑀜𑀮𑀓𑁆𑀔𑀡𑀲𑀸𑀮𑀺𑀦𑁄;

𑀉𑀧𑁆𑀧𑀢𑁆𑀢𑀺𑀬𑀸 𑀅𑀯𑀲𑁆𑀲𑀁’𑀯, 𑀪𑀯𑀁𑀢𑀩𑁆𑀩𑀦𑁆𑀢𑀺 𑀓𑀺𑀢𑁆𑀢𑀬𑀼𑀁.

𑀢𑀁 𑀲𑀼𑀡𑀺𑀢𑁆𑀯𑀸 𑀅𑀫𑀘𑁆𑀘𑀸 𑀘, 𑀢𑀣𑀸 𑀦𑀕𑀭𑀯𑀸𑀲𑀺𑀦𑁄;

𑀅𑀯𑀺𑀦𑁆𑀤𑀺𑀁𑀲𑀼 𑀚𑀦𑀺𑀦𑁆𑀤𑁄 𑀘, 𑀲𑀩𑁆𑀩𑁂𑀧𑀻𑀢𑀺 𑀫𑀳𑀼𑀲𑁆𑀲𑀯𑀁.

𑀢𑀢𑁄 𑀧𑀝𑁆𑀞𑀸𑀬 𑀲𑁄𑀢𑁆𑀣𑀸𑀦𑀁, 𑀧𑀢𑁆𑀣𑀬𑀁 𑀧𑀢𑁆𑀣𑀺𑀯𑁄𑀪𑀼𑀲𑀁;

𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀩𑀳𑀼𑀲𑁄, 𑀪𑀡𑀸𑀧𑁂𑀲𑀺 𑀧𑀭𑀺𑀢𑁆𑀢𑀓𑀁.

𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑀁 𑀘𑀺𑀢𑁆𑀢𑀁, 𑀫𑀳𑀕𑁆𑀖𑀫𑀦𑀼𑀯𑀸𑀲𑀭𑀁;

𑀧𑀭𑀺𑀘𑁆𑀘𑀚𑀺 𑀤𑀸𑀦𑀫𑀼𑀔𑁂, 𑀬𑀸𑀘𑀓𑀸𑀦𑀫𑀦𑁂𑀓𑀲𑁄.

𑀧𑀼𑀭𑁄𑀳𑀺𑀢𑀸𑀤𑀺𑀯𑀺𑀧𑁆𑀧𑁂𑀳𑀺, 𑀯𑁂𑀤𑀯𑁂𑀤𑀗𑁆𑀕𑀯𑀺𑀜𑁆𑀜𑀽𑀳𑀺;

𑀯𑀢𑁆𑀢𑀸𑀧𑁂𑀲𑀺 𑀘 𑀳𑁄𑀫𑀸𑀤𑀺-𑀯𑀺𑀥𑀸𑀦𑀁 𑀲𑁄𑀢𑁆𑀣𑀺 𑀲𑀫𑁆𑀫𑀢𑀁.

𑀲𑀼𑀯𑀺𑀦𑀝𑁆𑀞𑁂 𑀯𑀺𑀳𑀸𑀭𑁂 𑀘, 𑀥𑀸𑀢𑀼𑀕𑀩𑁆𑀪𑁂 𑀘 𑀯𑀸𑀧𑀺𑀬𑁄;

𑀚𑀺𑀡𑁆𑀡𑀸 𑀘 𑀧𑀝𑀺𑀲𑀗𑁆𑀔𑀢𑁆𑀢𑀼𑀁, 𑀬𑁄𑀚𑀬𑀻 𑀭𑀸𑀚𑀓𑀧𑁆𑀧𑀺𑀓𑁂.

𑀤𑀺𑀦𑀁 𑀦𑀬𑀦𑁆𑀢𑁂 𑀓𑀮𑁆𑀬𑀸𑀡-𑀓𑀫𑁆𑀫𑁂𑀦𑁂’𑀯𑀁 𑀦𑀭𑀺𑀲𑁆𑀲𑀭𑁂;

𑀦 𑀘𑀺𑀭𑀁 𑀲𑀡𑁆𑀞𑀳𑀺 𑀕𑀩𑁆𑀪-𑀯𑀭𑁄 𑀓𑀼𑀘𑁆𑀙𑀺𑀫𑁆𑀳𑀺 𑀤𑁂𑀯𑀺𑀬𑀸.

𑀢𑀢𑁄𑀯𑀕𑀫𑁆𑀫 𑀢𑀁 𑀳𑀝𑁆𑀞-𑀧𑀳𑀝𑁆𑀞𑁄 𑀲𑁄 𑀦𑀭𑀺𑀲𑁆𑀲𑀭𑁄;

𑀫𑀳𑀦𑁆𑀢𑀁 𑀤𑁂𑀯𑀺𑀬𑀸 𑀕𑀩𑁆𑀪-𑀧𑀭𑀺𑀳𑀸𑀭𑀫𑀤𑀸𑀧𑀬𑀺.

𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀤𑁂𑀯𑀻, 𑀓𑀫𑁂𑀦 𑀚𑀦𑀬𑀻𑀲𑀼𑀓𑀁;

𑀲𑀫𑀬𑁂 𑀪𑀤𑁆𑀤𑀦𑀓𑁆𑀔𑀢𑁆𑀢-𑀫𑀼𑀳𑀼𑀢𑁆𑀢𑁂𑀦𑀪𑀺𑀮𑀓𑁆𑀔𑀺𑀢𑁂.

𑀲𑀼𑀧𑁆𑀧𑀲𑀦𑁆𑀦𑀸 𑀅𑀲𑁂𑀲𑀸 𑀘, 𑀤𑀺𑀲𑀸𑀬𑁄 𑀢𑀁𑀔𑀡𑁂 𑀅𑀳𑀼;

𑀲𑀫𑀻𑀭𑀡𑁂 𑀘 𑀯𑀸𑀲𑀺𑀁𑀲𑀼, 𑀲𑀼𑀕𑀦𑁆𑀥𑀺𑀫𑀼𑀤𑀼𑀲𑀻𑀢𑀮𑀸.

𑀤𑀦𑁆𑀢𑀻𑀦𑀁 ¶ 𑀓𑁄𑀜𑁆𑀘𑀦𑀸𑀤𑁂𑀦, 𑀳𑀬𑀸𑀦𑀁 𑀳𑁂𑀲𑀺𑀢𑁂𑀦 𑀘;

𑀭𑀸𑀚𑀗𑁆𑀕𑀡𑀁 𑀢𑀤𑀸𑀚𑀸𑀢𑀁, 𑀫𑀳𑀸𑀓𑁄𑀮𑀸𑀳𑀮𑀸 𑀓𑀽𑀮𑀁.

𑀅𑀘𑁆𑀙𑁂𑀭𑀸𑀢𑀺𑀲𑀬𑁂 𑀏𑀯𑀁, 𑀧𑀸𑀢𑀼𑀪𑀽𑀢𑁂 𑀅𑀦𑁂𑀓𑀥𑀸;

𑀤𑀺𑀲𑁆𑀯𑀸 𑀢𑀁 𑀯𑀺𑀫𑁆𑀳𑀬𑀧𑁆𑀧𑀢𑁆𑀢𑁄, 𑀫𑀸𑀡𑀪𑀭𑀡𑀪𑀽𑀧𑀢𑀺.

𑀲𑀼𑀢𑁆𑀯𑀸 𑀦𑀺𑀚𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀢𑀤𑀸 𑀲𑀜𑁆𑀚𑀸𑀢𑀲𑀸𑀲𑀦𑀁;

𑀅𑀫𑀢𑁂𑀦𑀸𑀪𑀺𑀲𑀺𑀢𑁆𑀢𑁄𑀯, 𑀧𑀻𑀢𑀺𑀧𑀼𑀡𑁆𑀡𑀫𑀦𑁄𑀭𑀣𑁄.

𑀫𑁄𑀘𑀸𑀧𑁂𑀢𑁆𑀯𑀸 𑀢𑀤𑀸 𑀓𑀸𑀭𑀸-𑀖𑀭𑁂 𑀩𑀤𑁆𑀥𑁂 𑀩𑀳𑀽𑀚𑀦𑁂;

𑀤𑀸𑀦𑀁 𑀉𑀴𑀸𑀭𑀁 𑀲𑀫𑀡-𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀤𑀸𑀧𑀬𑀺.

𑀅𑀫𑀘𑁆𑀘𑀧𑀫𑀼𑀔𑀸 𑀘𑀸𑀧𑀺, 𑀚𑀦𑀸𑀧𑀼𑀭𑀦𑀺𑀯𑀸𑀲𑀺𑀦𑁄;

𑀓𑀤𑀮𑀻𑀢𑁄𑀭𑀡𑀸𑀤𑀻𑀳𑀺, 𑀭𑀸𑀚𑀥𑀸𑀦𑀻 𑀫𑀦𑁂𑀓𑀥𑀸.

𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀓𑀮𑀁, 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸;

𑀙𑀡𑀁 𑀫𑀳𑀦𑁆𑀢𑀁 𑀯𑀢𑁆𑀢𑁂𑀲𑀼𑀁, 𑀓𑀢𑀺𑀧𑀸𑀳𑀁 𑀫𑀦𑁄𑀭𑀫𑀁.

𑀯𑁂𑀤𑁂 𑀯𑀼𑀢𑁆𑀢𑀯𑀺𑀥𑀸𑀦𑁂𑀦, 𑀚𑀸𑀢𑀓𑀫𑁆𑀫𑀸𑀤𑀺𑀓𑀁 𑀯𑀺𑀥𑀺𑀁;

𑀲𑀩𑁆𑀩𑀁 𑀲𑀫𑀸𑀧𑀬𑀺𑀢𑁆𑀯𑀸𑀦, 𑀓𑀼𑀫𑀸𑀭𑀲𑁆𑀲𑀸’𑀯𑀦𑀻𑀧𑀢𑀺.

𑀧𑀼𑀭𑁄𑀳𑀺𑀢𑀸𑀤𑀬𑁄 𑀯𑀺𑀧𑁆𑀧𑁂, 𑀢𑀢𑁄 𑀮𑀓𑁆𑀔𑀡𑀧𑀸𑀞𑀓𑁂;

𑀆𑀡𑀸𑀧𑁂𑀢𑁆𑀯𑀸𑀦 𑀲𑀓𑁆𑀓𑀸𑀭-𑀲𑀫𑁆𑀫𑀸𑀦𑀯𑀺𑀥𑀺𑀧𑀼𑀩𑁆𑀩𑀓𑀁.

𑀦𑀺𑀬𑁄𑀚𑁂𑀲𑀺 𑀓𑀼𑀫𑀸𑀭𑀲𑁆𑀲, 𑀮𑀓𑁆𑀔𑀡𑀸𑀦𑀁 𑀧𑀝𑀺𑀕𑁆𑀕𑀳𑁂;

𑀲𑀸𑀥𑀓𑀁 𑀲𑀓𑀮𑀁 𑀢𑀲𑁆𑀲, 𑀬𑀢𑁆𑀣𑀧𑀸𑀤𑀸𑀤𑀺𑀮𑀓𑁆𑀔𑀡𑀁.

𑀉𑀧𑀥𑀸𑀭𑀺𑀬 𑀫𑀳𑀸𑀫𑀘𑁆𑀘-𑀕𑀡𑀫𑀚𑁆𑀛𑀕𑀢𑀲𑁆𑀲 𑀢𑁂;

𑀭𑀸𑀚𑀺𑀦𑁄 𑀤𑁂𑀯𑀺𑀬𑀸 𑀘𑀸𑀧𑀺, 𑀧𑀓𑀸𑀲𑁂𑀲𑀼𑀁 𑀧𑀫𑁄𑀤𑀺𑀢𑀸.

𑀮𑀗𑁆𑀓𑀸𑀤𑀻𑀧𑀁 𑀞𑀧𑁂𑀢𑁆𑀯𑀸𑀦, 𑀚𑀫𑁆𑀩𑀼𑀤𑀻𑀧𑀢𑀮𑀫𑁆𑀧𑀺 𑀘;

𑀏𑀓𑀘𑁆𑀙𑀢𑁆𑀢𑀗𑁆𑀓𑀺𑀢𑀁 𑀓𑀢𑁆𑀯𑀸-𑀦𑀼𑀪𑁄𑀢𑁆𑀢𑀼𑀁 𑀦𑀺𑀧𑀼𑀡𑁄 𑀇𑀢𑀺.

𑀢𑁂 𑀲𑀦𑁆𑀢𑀧𑁆𑀧𑀺𑀬 𑀪𑁄𑀕𑁂𑀳𑀺, 𑀪𑀺𑀬𑁆𑀬𑁄 𑀧𑀼𑀘𑁆𑀙𑀺𑀢𑁆𑀣 𑀲𑀸𑀤𑀭𑀁;

𑀲𑀦𑁆𑀤𑀺𑀲𑁆𑀲𑀫𑀸𑀦𑀁 𑀬𑀁𑀓𑀺𑀜𑁆𑀘𑀺, 𑀅𑀭𑀺𑀝𑁆𑀞𑀁 𑀅𑀢𑁆𑀣𑀺 𑀦𑀢𑁆𑀣𑀻’𑀢𑀺.

𑀤𑀻𑀖𑀸𑀬𑀼𑀓𑁄 𑀓𑀼𑀫𑀸𑀭𑁄’𑀬𑀁, 𑀓𑀺𑀜𑁆𑀘𑀺 𑀧𑀜𑁆𑀜𑀸𑀬𑀢𑁂 𑀯𑀢;

𑀚𑀦𑀓𑀸𑀭𑀺𑀝𑁆𑀞𑀬𑁄𑀕𑁄’𑀢𑀺, 𑀢𑁂 𑀫𑀳𑀻𑀧𑀢𑀺𑀦𑁄’𑀩𑁆𑀭𑀯𑀼𑀁.

𑀢𑀲𑁆𑀲𑀸𑀭𑀺𑀚𑀦𑀲𑀫𑁆𑀫𑀤𑁆𑀤𑀺-𑀧𑀢𑀸𑀧𑀪𑀼𑀚𑀬𑁄 𑀕𑀢𑁄;

𑀲𑁄 𑀧𑀭𑀓𑁆𑀓𑀫𑀩𑀸𑀳𑀽’𑀢𑀺, 𑀅𑀦𑁆𑀯𑀢𑁆𑀣𑀦𑀸𑀫𑀫𑀕𑁆𑀕𑀳𑀻.

𑀓𑀡𑁆𑀡𑀯𑁂 𑀥𑀫𑀳𑀜𑁆𑀘𑁂𑀯, 𑀅𑀦𑁆𑀦𑀼𑀧𑀸𑀲𑀦𑀫𑀗𑁆𑀕𑀮𑀁;

𑀓𑀸𑀭𑀸𑀧𑀺𑀬 𑀯𑀺𑀥𑀸𑀦𑀜𑁆𑀜𑀽, 𑀬𑀣𑀸𑀯𑀺𑀥𑀺𑀫𑀲𑁂𑀲𑀢𑁄.

𑀭𑀜𑁆𑀜𑁄 ¶ 𑀯𑀺𑀓𑁆𑀓𑀫𑀩𑀸𑀳𑀼𑀲𑁆𑀲, 𑀲𑀧𑀼𑀢𑁆𑀢𑀼𑀧𑁆𑀧𑀢𑁆𑀢𑀺𑀲𑀸𑀲𑀦𑀁;

𑀯𑀢𑁆𑀢𑀼𑀁 𑀲𑀤𑀽𑀢𑁂 𑀧𑁂𑀲𑁂𑀲𑀺, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀢𑀤𑀸.

𑀢𑁂𑀳𑀺𑀲𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲, 𑀫𑀳𑀸𑀪𑀸𑀕𑀢𑁆𑀢𑀦𑀫𑁆𑀧𑀺 𑀘;

𑀚𑀦𑀓𑀸𑀭𑀺𑀝𑁆𑀞𑀬𑁄𑀕𑀜𑁆𑀘, 𑀲𑀼𑀢𑁆𑀯𑀸 𑀯𑀺𑀓𑁆𑀓𑀫𑀩𑀸𑀳𑀼𑀲𑁄.

𑀥𑀜𑁆𑀜𑀁 𑀯𑀺𑀚𑀬𑀭𑀸𑀚𑀸𑀤𑀺-𑀭𑀸𑀚𑀫𑀸𑀮𑀸𑀬 𑀦𑀸𑀬𑀓𑀁;

𑀫𑀡𑀺𑀁𑀯 𑀪𑀸𑀲𑀼𑀭𑀁 𑀫𑀬𑁆𑀳𑀁, 𑀪𑀸𑀕𑀺𑀦𑁂𑀬𑁆𑀬𑀁 𑀚𑀦𑁂𑀲𑀺𑀲𑁄.

𑀳𑀸𑀦𑀺 𑀬𑀸𑀓𑀸𑀘𑀺𑀲𑀢𑀢𑀁, 𑀬𑀣𑀸 𑀢𑀲𑁆𑀲 𑀦 𑀳𑁂𑀲𑁆𑀲𑀢𑀺;

𑀢𑀣𑀸 𑀫𑀫𑀦𑁆𑀢𑀺𑀓𑁂𑀬𑁂𑀯, 𑀓𑀼𑀫𑀸𑀭𑁄 𑀏𑀢𑁆𑀣 𑀯𑀟𑁆𑀠𑀢𑀁.

𑀅𑀮𑀤𑁆𑀥𑀁 𑀮𑀪𑀺𑀢𑀼𑀁 𑀮𑀸𑀪𑀁, 𑀮𑀤𑁆𑀥𑀜𑁆𑀘 𑀧𑀭𑀺𑀭𑀓𑁆𑀔𑀺𑀢𑀼𑀁;

𑀲𑀩𑁆𑀩𑀣𑀸 𑀦 𑀲𑀫𑀢𑁆𑀣𑁄𑀬𑀁, 𑀧𑀼𑀢𑁆𑀢𑁄 𑀕𑀚𑀩𑀸𑀳𑀼 𑀫𑀫.

𑀲𑀽𑀭𑀪𑀸𑀯𑀸𑀤𑀺𑀬𑀼𑀢𑁆𑀢𑁄’𑀧𑀺, 𑀫𑀳𑀺𑀦𑁆𑀤𑀯𑁆𑀳𑀧𑀭𑁄𑀲𑀼𑀢𑁄;

𑀦𑀺𑀳𑀻𑀦𑁄 𑀫𑀸𑀢𑀼𑀕𑁄𑀢𑁆𑀢𑁂𑀦, 𑀦 𑀭𑀚𑁆𑀚𑀲𑁆𑀲 𑀭𑀳𑁄 𑀫𑀫.

𑀞𑀺𑀢𑀲𑁆𑀲 𑀯𑀺𑀓𑁆𑀓𑀚𑀸𑀢𑁂𑀦, 𑀦𑁂𑀓𑀲𑁄 𑀲𑀜𑁆𑀘𑀺𑀢𑁂𑀦 𑀫𑁂;

𑀭𑀚𑁆𑀚𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄’𑀯, 𑀓𑀸𑀫𑀁 𑀪𑀸𑀕𑀻 𑀪𑀯𑀺𑀲𑁆𑀲𑀢𑀺.

𑀇𑀢𑀺𑀧𑁂𑀲𑁂𑀲𑀺 𑀤𑀽𑀢𑁂 𑀲𑁄, 𑀆𑀦𑁂𑀢𑀼𑀁 𑀢𑀁 𑀓𑀼𑀫𑀸𑀭𑀓𑀁;

𑀓𑀼𑀫𑀸𑀭𑀸 𑀪𑀭𑀡𑀁 𑀤𑀢𑁆𑀯𑀸, 𑀲𑁂𑀲𑀁 𑀲𑀸𑀭𑀜𑁆𑀘𑀼𑀧𑀸𑀬𑀦𑀁.

𑀲𑀩𑁆𑀩𑀁 𑀤𑀽𑀢𑀫𑀼𑀔𑀸 𑀲𑀼𑀢𑁆𑀯𑀸, 𑀯𑀻𑀭𑀩𑀸𑀳𑀼 𑀫𑀳𑀻𑀧𑀢𑀺;

𑀢𑀲𑁆𑀲𑁂𑀢𑀁 𑀯𑀘𑀦𑀁 𑀬𑀼𑀢𑁆𑀢𑀁, 𑀯𑀼𑀢𑁆𑀢𑀁 𑀫𑁂𑀳𑀺𑀢 𑀩𑀼𑀤𑁆𑀥𑀺𑀬𑀸.

𑀢𑀣𑀸𑀧𑀺 𑀘 𑀦𑀺𑀚𑀸𑀭𑀺𑀝𑁆𑀞-𑀧𑀝𑀺𑀓𑀸𑀭𑀢𑁆𑀣𑀫𑀻𑀤𑀺𑀲𑀁;

𑀑𑀭𑀲𑀁 𑀧𑀼𑀢𑁆𑀢𑀭𑀢𑀦𑀁, 𑀧𑁂𑀲𑁂𑀢𑀼𑀁 𑀦𑀸’𑀦𑀼𑀭𑀽𑀧𑀓𑀁.

𑀓𑀺𑀜𑁆𑀘 𑀢𑀢𑁆𑀣 𑀓𑀼𑀫𑀸𑀭𑀫𑁆𑀳𑀺, 𑀦𑀻𑀢𑁂 𑀯𑀺𑀓𑁆𑀓𑀫 𑀩𑀸𑀳𑀼𑀦𑁄;

𑀧𑀓𑁆𑀔𑁄 𑀮𑀤𑁆𑀥𑀫𑀳𑀸𑀯𑀸𑀳-𑀩𑀮𑁄 𑀯𑀺𑀬 𑀳𑀼𑀢𑀸𑀲𑀦𑁄.

𑀅𑀘𑁆𑀘𑀼𑀦𑁆𑀦𑀢𑁂𑀦 𑀫𑀳𑀢𑀸, 𑀢𑁂𑀚𑀲𑀸 𑀲𑀜𑁆𑀚𑀮𑀺𑀲𑁆𑀲𑀢𑀺;

𑀳𑀸𑀦𑀺𑀭𑁂𑀯 𑀯𑀢𑀫𑁆𑀳𑀸𑀓𑀁, 𑀫𑀳𑀢𑀻 𑀳𑁂𑀲𑁆𑀲𑀢𑁂 𑀪𑀼𑀲𑀁.

𑀇𑀢𑀺 𑀳𑀢𑁆𑀣𑁂 𑀕𑀢𑀸𑀦𑀁 𑀲𑁄, 𑀤𑀽𑀢𑀸𑀦𑀁 𑀣𑀦𑀬𑀁 𑀲𑀓𑀁;

𑀅𑀧𑁂𑀲𑁂𑀢𑁆𑀯𑀸 𑀯𑀺𑀲𑀚𑁆𑀚𑁂𑀲𑀺, 𑀧𑀲𑀸𑀤𑀺𑀬 𑀫𑀦𑁂𑀦 𑀲𑁄.

𑀲𑀧𑀼𑀢𑁆𑀢𑀤𑀸𑀭𑁂𑀳𑀺 ¶ 𑀲𑀫𑀕𑁆𑀕𑀯𑀸𑀲𑀁,

𑀦𑀭𑀸𑀤𑀺𑀦𑀸𑀣𑁄 𑀦𑀺𑀯𑀲𑀁 𑀢𑀳𑀺𑀁𑀲𑁄;

𑀢𑀺𑀩𑁆𑀩𑁂𑀦 𑀨𑀼𑀝𑁆𑀞𑁄 𑀫𑀳𑀢𑀸𑀕𑀤𑁂𑀦,

𑀭𑀚𑁆𑀚𑁂𑀦 𑀲𑀤𑁆𑀥𑀺𑀁 𑀯𑀺𑀚𑀳𑀺𑀢𑁆𑀣 𑀤𑁂𑀲𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂 𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀼𑀢𑁆𑀯𑀸 𑀤𑁆𑀯𑁂 𑀪𑀸𑀢𑀭𑁄 𑀅𑀜𑁆𑀜𑁂, 𑀚𑁂𑀝𑁆𑀞𑀲𑁆𑀲𑁄 𑀧𑀭𑀢𑀺𑀁𑀲𑀤𑀸;

𑀔𑀺𑀧𑁆𑀧𑀁 𑀲𑀭𑀝𑁆𑀞𑀸 𑀆𑀕𑀫𑁆𑀫, 𑀓𑀸𑀭𑁂𑀲𑀼𑀁 𑀅𑀦𑁆𑀢𑀺𑀫𑀁 𑀯𑀺𑀥𑀺𑀁.

𑀅𑀣 𑀓𑀺𑀢𑁆𑀢𑀺𑀲𑀺𑀭𑀺𑀫𑁂𑀖𑁄, 𑀭𑀝𑁆𑀞𑀁 𑀚𑁂𑀝𑁆𑀞𑀲𑁆𑀲 𑀪𑀸𑀢𑀼𑀦𑁄;

𑀅𑀢𑁆𑀢𑀸𑀥𑀻𑀦𑀁 𑀓𑀭𑀺𑀢𑁆𑀯𑀸𑀦, 𑀆𑀫𑀦𑁆𑀢𑀺𑀬 𑀓𑀡𑀺𑀝𑁆𑀞𑀓𑀁.

𑀤𑀢𑁆𑀯𑀸 𑀭𑀝𑁆𑀞𑀤𑁆𑀯𑀬𑀁 𑀅𑀜𑁆𑀜𑀁, 𑀯𑀢𑁆𑀣𑀼𑀁 𑀢𑀢𑁆𑀣𑁂𑀯 𑀆𑀤𑀺𑀲𑀺;

𑀲𑁄’𑀧𑀺 𑀚𑁂𑀝𑁆𑀞𑀲𑁆𑀲 𑀪𑀸𑀢𑀼𑀲𑁆𑀲, 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀬.

𑀲𑀫𑀸𑀤𑀸𑀬 𑀓𑀼𑀫𑀸𑀭𑀜𑁆𑀘, 𑀤𑁂𑀯𑀺𑀜𑁆𑀘 𑀭𑀢𑀦𑀸𑀯𑀮𑀺𑀁;

𑀥𑀻𑀢𑀭𑁄 𑀤𑁆𑀯𑁂 𑀘 𑀕𑀦𑁆𑀢𑀸𑀦, 𑀫𑀳𑀸 𑀦𑀸𑀫𑀳𑀼𑀮𑀁 𑀧𑀼𑀭𑀁.

𑀲𑀫𑀕𑁆𑀕𑀸 𑀦𑀺𑀯𑀲𑀁 𑀢𑀢𑁆𑀣, 𑀓𑀼𑀫𑀸𑀭𑀲𑁆𑀲 𑀲𑀺𑀔𑀸𑀫𑀳𑀁;

𑀓𑀸𑀭𑁂𑀢𑁆𑀯𑀸 𑀧𑀭𑀺𑀳𑀸𑀭𑁂𑀦, 𑀯𑀟𑁆𑀠𑁂𑀲𑀺 𑀫𑀳𑀢𑀸 𑀲𑀤𑀸.

𑀢𑀢𑁄 𑀲𑁄 𑀤𑁂𑀯𑀺𑀬𑀸 𑀚𑁂𑀝𑁆𑀞𑀁-𑀥𑀻𑀢𑀭𑀁 𑀫𑀺𑀢𑁆𑀢𑀦𑀸𑀫𑀺𑀓𑀁;

𑀤𑀸𑀢𑀼𑀓𑀸𑀫𑁄 𑀲𑀧𑀼𑀢𑁆𑀢𑀲𑁆𑀲, 𑀲𑀳𑀸𑀫𑀘𑁆𑀘𑁂𑀳𑀺 𑀫𑀦𑁆𑀢𑀬𑀺.

𑀓𑀸𑀮𑀺𑀗𑁆𑀕𑀦𑁆𑀯𑀬𑀲𑀫𑁆𑀪𑀽𑀢𑀸, 𑀧𑀸𑀬𑁂𑀦𑀔𑀮𑀼 𑀪𑀽𑀫𑀺𑀧𑀸;

𑀲𑀸𑀫𑀺𑀪𑀸𑀯𑀁 𑀕𑀢𑀸 𑀅𑀲𑁆𑀫𑀺𑀁, 𑀮𑀗𑁆𑀓𑀸𑀤𑀻𑀧𑀫𑁆𑀳𑀻 𑀪𑀽𑀬𑀲𑁄.

𑀓𑀸𑀮𑀺𑀗𑁆𑀕𑀕𑁄𑀢𑁆𑀢 𑀲𑀫𑁆𑀪𑀽𑀢, 𑀕𑀚𑀩𑀸𑀳𑀼𑀲𑁆𑀲 𑀤𑀸𑀢𑀯𑁂;

𑀕𑀽𑀴𑀭𑀽𑀧𑁂𑀦 𑀤𑁂𑀯𑀻’𑀬𑀁, 𑀬𑀤𑀺 𑀧𑁂𑀲𑁂𑀬𑁆𑀬 𑀥𑀻𑀢𑀭𑀁.

𑀪𑀺𑀬𑁆𑀬𑁄 ¶ 𑀯𑀺𑀯𑀸𑀳𑀲𑀫𑁆𑀩𑀤𑁆𑀥𑁄, 𑀩𑀮𑀯𑀸 𑀲𑁄 𑀪𑀯𑀺𑀲𑁆𑀲𑀢𑀺;

𑀫𑀬𑁆𑀳𑀁 𑀏𑀲𑁄 𑀦𑀺𑀭𑀸𑀮𑀫𑁆𑀩𑁄, 𑀧𑀼𑀢𑁆𑀢𑁄 𑀳𑁂𑀳𑀻𑀢𑀺 𑀲𑀩𑁆𑀩𑀣𑀸.

𑀢𑀲𑁆𑀫𑀸 𑀫𑁂 𑀲𑀼𑀦𑀽𑀦𑁄 𑀏𑀲𑀸, 𑀤𑀸𑀢𑀼𑀁 𑀬𑀼𑀢𑁆𑀢𑀸 𑀓𑀼𑀫𑀸𑀭𑀺𑀓𑀸;

𑀏𑀯𑀁 𑀲𑀢𑀺 𑀯𑀢𑀫𑁆𑀳𑀸𑀓𑀁, 𑀯𑀟𑁆𑀠𑀺𑀬𑁂’𑀯 𑀲𑀺𑀬𑀸 ‘‘𑀇𑀢𑀺’’.

𑀤𑁂𑀯𑀻𑀧𑀺 𑀲𑀼𑀢𑁆𑀯𑀸 𑀢𑀁 𑀲𑀩𑁆𑀩-𑀫𑀸𑀤𑀺𑀘𑁆𑀘𑀦𑁆𑀯𑀬 𑀫𑀡𑁆𑀟𑀦𑀸;

𑀲𑀩𑁆𑀩𑀣𑀸 𑀢𑀫𑀦𑀺𑀘𑁆𑀙𑀦𑁆𑀢𑀺, 𑀇𑀤𑀫𑀸𑀳 𑀫𑀳𑀻𑀧𑀢𑀺𑀁.

𑀖𑀸𑀢𑁂𑀢𑁆𑀯𑀸 𑀲𑀓𑀮𑁂 𑀬𑀓𑁆𑀔𑁂, 𑀓𑀼𑀫𑀸𑀭𑁄 𑀯𑀺𑀚𑀬𑀯𑁆𑀳𑀬𑁄;

𑀮𑀁𑀓𑀸𑀤𑀻𑀧𑀫𑀺𑀫𑀁’𑀓𑀸𑀲𑀺, 𑀫𑀦𑀼𑀲𑁆𑀲𑀸𑀯𑀸𑀲𑀓𑀁 𑀲𑀤𑀸.

𑀢𑀢𑁄 𑀧𑀪𑀼𑀢𑀺 𑀅𑀫𑁆𑀳𑀸𑀓𑀁, 𑀖𑀝𑁂𑀲𑀼𑀁 𑀯𑀺𑀚𑀬𑀦𑁆𑀯𑀬𑀁;

𑀓𑀸𑀮𑀺𑀗𑁆𑀕𑀯𑀁𑀲𑀚𑁂𑀳𑁂𑀯, 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯 𑀧𑀼𑀩𑁆𑀩𑀓𑀁.

𑀅𑀜𑁆𑀜𑀪𑀽𑀧𑀸𑀮 𑀲𑀫𑁆𑀩𑀦𑁆𑀥𑁄, 𑀲𑀼𑀢𑀧𑀼𑀩𑁆𑀩𑁄 𑀧𑀺𑀦𑀢𑁆𑀣𑀺𑀦𑁄;

𑀲𑁄𑀫𑀯𑀁𑀲 𑀲𑀫𑀼𑀫𑁆𑀪𑀽𑀢𑁂, 𑀞𑀧𑁂𑀢𑁆𑀯𑀸 𑀥𑀭𑀡𑀺𑀲𑁆𑀲𑀭𑁂.

𑀢𑀼𑀬𑁆𑀳𑀁 𑀚𑀸𑀢𑁄𑀢𑀺 𑀅𑀫𑁆𑀳𑀸𑀓𑀁, 𑀲𑀫𑁆𑀩𑀦𑁆𑀥𑁄 𑀲𑁄 𑀓𑀣𑀁 𑀲𑀺𑀬𑀸;

𑀅𑀭𑀺𑀬𑀦𑁆𑀯𑀬 𑀲𑀫𑁆𑀪𑀽𑀢, 𑀓𑀼𑀫𑀸𑀭𑁂𑀦 𑀲𑀳𑀸𑀫𑀼𑀦𑀸.

𑀏𑀯𑀁 𑀲𑁄 𑀤𑁂𑀯𑀺𑀬𑀸 𑀢𑀸𑀬, 𑀦𑁂𑀓𑀲𑁄 𑀯𑀸𑀭𑀬𑀦𑁆𑀢𑀺𑀬𑀸;

𑀧𑀲𑀬𑁆𑀳𑀲𑀓 𑀧𑀼𑀢𑁆𑀣𑀲𑁆𑀲, 𑀢𑀁 𑀓𑀼𑀫𑀸𑀭𑀺𑀫𑀤𑀸𑀧𑀬𑀺.

𑀲𑁄 𑀅𑀦𑁂𑀓𑀕𑀼𑀡𑁄𑀤𑀸𑀭- 𑀪𑀭𑀺𑀬𑀸𑀦𑀼𑀕𑀢𑁄 𑀢𑀢𑁄;

𑀭𑀜𑁆𑀚𑀬𑀦𑁆𑀢𑁄 𑀚𑀦𑁂 𑀲𑀩𑁆𑀩𑁂, 𑀚𑀦𑀓𑀲𑀦𑁆𑀢𑀺𑀓𑁂 𑀯𑀲𑀺.

𑀏𑀓𑀯𑀻𑀲𑀢𑀺𑀁 𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀯𑀺𑀓𑁆𑀓𑀫 𑀩𑀸𑀳𑀼𑀲𑁄;

𑀅𑀦𑀼𑀪𑁄𑀢𑁆𑀯𑀸 𑀬𑀣𑀸𑀓𑀫𑁆𑀫𑀁, 𑀓𑀸𑀬𑀪𑁂𑀤𑀸 𑀕𑀢𑁄 𑀧𑀭𑀁.

𑀢𑀢𑁄 𑀕𑀚𑀪𑀼𑀚𑁄 𑀞𑀺𑀢𑀁, 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑀁;

𑀭𑀚𑁆𑀚𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀧𑀼𑀮𑀢𑁆𑀢𑀺𑀦𑀕𑀭𑁂 𑀯𑀲𑀻.

𑀢𑀢𑁄 𑀓𑀺𑀢𑁆𑀢𑀺𑀲𑀺𑀭𑀻𑀫𑁂𑀖, 𑀲𑀺𑀭𑀻𑀯𑀮𑁆𑀮𑀪 𑀪𑀽𑀫𑀺𑀧𑀸;

𑀯𑀼𑀢𑁆𑀢𑀦𑁆𑀢 𑀫𑁂𑀢𑀁 𑀯𑀺𑀜𑁆𑀜𑀸𑀬, 𑀏𑀯𑀁 𑀲𑀫𑀦𑀼𑀘𑀺𑀦𑁆𑀢𑀬𑀼𑀁.

𑀢𑀲𑁆𑀲 𑀯𑀺𑀓𑁆𑀓𑀫 𑀩𑀸𑀳𑀼𑀲𑁆𑀲, 𑀯𑀼𑀤𑁆𑀥𑀪𑀸𑀯𑁂𑀦 𑀦𑁂𑀓𑀥𑀸;

𑀫𑀽𑀮𑀭𑀚𑁆𑀚𑀸𑀥𑀺𑀧𑀘𑁆𑀘𑀁 𑀢𑀁, 𑀅𑀫𑁆𑀫𑀁 𑀦𑀺𑀦𑁆𑀤𑀸𑀓𑀭𑀁 𑀦 𑀳𑀺.

𑀢𑀤𑀢𑁆𑀣𑀚𑀲𑁆𑀲 𑀩𑀸𑀮𑀲𑁆𑀲, 𑀫𑀽𑀮𑀭𑀚𑁆𑀚𑀁 𑀧𑀲𑀸𑀲𑀦𑁄;

𑀉𑀧𑁂𑀓𑁆𑀔𑀡𑀁 𑀧𑀦𑀫𑁆𑀳𑀸𑀓𑀁, 𑀦𑁂𑀯𑀸𑀦𑀼𑀘𑁆𑀙𑀯𑀺𑀓𑀁 𑀯𑀢.

𑀢𑁂 𑀲𑁄𑀬𑀸𑀯 𑀲𑀭𑀚𑁆𑀚𑀫𑁆𑀳𑀺, 𑀩𑀤𑁆𑀥𑀫𑀽𑀮𑁄 𑀪𑀯𑀺𑀲𑁆𑀲𑀢𑀺;

𑀧𑀲𑀬𑁆𑀳 𑀢𑀸𑀯 𑀢𑀁 𑀭𑀚𑁆𑀚𑀁, 𑀯𑀝𑁆𑀝𑀢𑀺 𑀕𑀡𑁆𑀳𑀺𑀢𑀼𑀁 𑀇𑀢𑀺.

𑀯𑁂𑀮𑀓𑁆𑀓𑀸𑀭 ¶ 𑀩𑀮𑀁 𑀲𑀩𑁆𑀩𑀁, 𑀪𑀺𑀦𑁆𑀤𑀺𑀁𑀲𑀼 𑀥𑀦 𑀤𑀸𑀦𑀢𑁄;

𑀞𑀧𑁂𑀢𑁆𑀯𑀸 𑀲𑁂𑀯𑀓𑁂 𑀓𑁂𑀘𑀺, 𑀢𑀲𑁆𑀲𑀩𑁆𑀪𑀦𑁆𑀢𑀭𑀺𑀓𑁂 𑀢𑀤𑀸.

𑀕𑀚𑀩𑀸𑀳𑀼 𑀫𑀳𑀻𑀧𑀸𑀮𑁂, 𑀯𑀺𑀭𑀢𑁆𑀢𑀸 𑀭𑀝𑁆𑀞𑀯𑀸𑀲𑀺𑀦𑁄;

𑀉𑀪𑀺𑀦𑁆𑀦𑀁 𑀭𑀸𑀚𑀽𑀦𑀁 𑀤𑀽𑀢𑁂, 𑀧𑁂𑀲𑀬𑀼𑀁 𑀦𑁂𑀓𑀲𑁄 𑀢𑀢𑁄.

𑀭𑀚𑁆𑀚𑀁 𑀲𑀸𑀥𑁂𑀢𑁆𑀯𑀸 𑀤𑀲𑁆𑀲𑀸𑀫, 𑀏𑀓𑀻𑀪𑀽𑀢𑀸 𑀫𑀬𑀁 𑀧𑀦;

𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁄’𑀯, 𑀓𑀸𑀢𑀩𑁆𑀩𑁄 𑀓𑁂𑀯𑀮𑀁 𑀇𑀢𑀺.

𑀢𑀢𑁄 𑀤𑁆𑀯𑁂 𑀪𑀸𑀢𑀼𑀓𑀸 𑀲𑁂𑀦𑀁, 𑀲𑀓𑀁 𑀲𑀦𑁆𑀦𑀬𑁆𑀳 𑀯𑁂𑀕𑀲𑀸;

𑀉𑀪𑀢𑁄 𑀫𑀼𑀔𑀢𑁄 𑀢𑀲𑁆𑀲, 𑀭𑀝𑁆𑀞𑀫𑀚𑁆𑀛𑀫𑀼𑀧𑀸𑀕𑀫𑀼𑀁.

𑀧𑀳𑀺𑀡𑀺𑀁𑀲𑀼 𑀘 𑀢𑁂 𑀤𑀽𑀢𑁂, 𑀢𑀢𑁄 𑀕𑀚𑀩𑁄𑀳𑀼𑀯𑁆𑀳𑀬𑁄;

𑀪𑀽𑀫𑀺𑀧𑀸𑀮𑁄 𑀦𑀺𑀚𑀸𑀫𑀘𑁆𑀘𑁂, 𑀲𑀦𑁆𑀦𑀺𑀧𑀸𑀢𑀺𑀬 𑀫𑀦𑁆𑀢𑀬𑀺.

𑀯𑁂𑀴𑀓𑁆𑀓𑀸𑀭𑀩𑀮𑀁 𑀲𑀩𑁆𑀩-𑀫𑀼𑀚𑀼𑀧𑀘𑁆𑀘𑀢𑁆𑀢𑀺𑀓𑀁 𑀅𑀳𑀼;

𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀦𑁄 𑀭𑀝𑁆𑀞𑀁, 𑀲𑀗𑁆𑀕𑀸𑀫𑀢𑁆𑀣𑀫𑀼𑀧𑀸𑀕𑀢𑀸.

𑀧𑀞𑀫𑀁 𑀢𑁂𑀲𑀼 𑀧𑀓𑁆𑀔𑀲𑁆𑀲, 𑀏𑀓𑀲𑁆𑀲 𑀩𑀮𑀺𑀦𑁄 𑀪𑀼𑀲𑀁;

𑀫𑀼𑀔𑀪𑀗𑁆𑀕𑁂 𑀓𑀢𑁂 𑀔𑀺𑀧𑁆𑀧𑀁, 𑀢𑀢𑁄 𑀅𑀜𑁆𑀜𑁂 𑀲𑀼𑀲𑀸𑀥𑀺𑀬𑀸.

𑀇𑀢𑀺 𑀦𑀺𑀘𑁆𑀙𑀺𑀬 𑀲𑁂𑀦𑀗𑁆𑀕𑀁, 𑀲𑀩𑁆𑀩𑀫𑀸𑀤𑀸𑀬 𑀅𑀢𑁆𑀢𑀦𑁄;

𑀲𑀺𑀭𑀺𑀯𑀮𑁆𑀮𑀪𑀭𑀸𑀚𑀸𑀪𑀺-𑀫𑀼𑀔𑀁 𑀬𑀼𑀤𑁆𑀥𑀸’𑀬𑀼𑀧𑀸𑀕𑀫𑀺.

𑀲𑀺𑀭𑀺𑀯𑀮𑁆𑀮𑀪𑀭𑀸𑀚𑀸𑀧𑀺, 𑀲𑀗𑁆𑀕𑀸𑀫 𑀫𑀳𑀺𑀪𑀺𑀁𑀲𑀦𑀁;

𑀧𑀸𑀢𑁄 𑀧𑀝𑁆𑀞𑀸𑀬 𑀲𑀸𑀬𑀦𑁆𑀳-𑀓𑀸𑀮𑀁 𑀬𑀸𑀯 𑀧𑀯𑀢𑁆𑀢𑀬𑀁.

𑀅𑀲𑀓𑁆𑀓𑀼𑀡𑀦𑁆𑀢𑁄’𑀪𑀺𑀪𑀯𑀁, 𑀯𑀺𑀥𑀸𑀢𑀼𑀁 𑀢𑀲𑁆𑀲 𑀓𑀜𑁆𑀘𑀺𑀧𑀺;

𑀢𑀢𑁄𑀯 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀲𑀓𑀁 𑀭𑀝𑁆𑀞𑀁 𑀕𑀢𑁄 𑀮𑀳𑀼𑀁.

𑀕𑀚𑀩𑀸𑀳𑀼𑀲𑁆𑀲𑀕𑁄𑀓𑀡𑁆𑀡-𑀲𑀘𑀺𑀯𑁂𑀦 𑀧𑀭𑀸𑀚𑀺𑀢𑁄;

𑀅𑀕𑀸 𑀭𑀝𑁆𑀞𑀁 𑀲𑀓𑀁 𑀓𑀺𑀢𑁆𑀢𑀺-𑀲𑀺𑀭𑀺𑀫𑁂𑀖𑁄’𑀧𑀺 𑀪𑀽𑀧𑀢𑀺.

𑀕𑀚𑀩𑀸𑀳𑀼𑀦𑀭𑀺𑀦𑁆𑀤𑁄𑀧𑀺, 𑀲𑀗𑁆𑀕𑀸𑀫𑁂 𑀢𑀫𑁆𑀳𑀺 𑀓𑀺𑀜𑁆𑀘𑀺𑀧𑀺;

𑀧𑀭𑀺𑀳𑀸𑀦𑀺𑀫𑀲𑀫𑁆𑀧𑀢𑁆𑀢𑁄, 𑀧𑀼𑀦𑀸’𑀕𑀫𑁆𑀫 𑀧𑀼𑀭𑀦𑁆𑀢𑀺𑀓𑀁.

𑀩𑀮𑀦𑀸𑀣𑁂 𑀯𑀺𑀦𑀺𑀕𑁆𑀕𑀬𑁆𑀳, 𑀲𑀸𑀧𑀭𑀸𑀥𑁂 𑀩𑀳𑀽 𑀩𑀮𑀻;

𑀭𑀝𑁆𑀞𑀁 𑀯𑀽𑀧𑀲𑀫𑁂𑀢𑁆𑀯𑀸𑀦, 𑀧𑀸𑀯𑁂𑀓𑁆𑀔𑀺 𑀦𑀕𑀭𑀁 𑀲𑀓𑀁.

𑀭𑀝𑁆𑀞𑁂 𑀲𑀓𑁂 𑀲𑀓𑁂𑀬𑁂𑀯, 𑀢𑀢𑁄 𑀧𑀪𑀽𑀢𑀺 𑀪𑀽𑀫𑀺𑀧𑀸;

𑀅𑀜𑁆𑀜𑁄𑀜𑁆𑀜𑀫𑀺𑀢𑁆𑀢𑁂 𑀲𑀫𑁆𑀩𑀦𑁆𑀥𑀁, 𑀯𑀺𑀥𑀸𑀬 𑀯𑀺𑀳𑀭𑀺𑀁𑀲𑀼 𑀢𑁂.

𑀢𑀢𑁄 𑀧𑀭𑀓𑁆𑀓𑀫𑀪𑀼𑀚𑁄, 𑀥𑀭𑀡𑀻 𑀧𑀸𑀮𑀦𑀦𑁆𑀤𑀦𑁄;

𑀫𑁂𑀥𑀸𑀯𑀻𑀦𑁂𑀓𑀲𑀺𑀧𑁆𑀧𑁂𑀲𑀼, 𑀲𑀺𑀓𑁆𑀔𑀫𑀸𑀦𑁄 𑀲𑀼𑀲𑀸𑀥𑀼𑀓𑀁.

𑀯𑀺𑀘𑀸𑀭𑀓𑁆𑀔𑀫𑀧𑀜𑁆𑀜𑀢𑁆𑀢𑀸 ¶ , 𑀓𑀺𑀘𑁆𑀘𑀸 𑀓𑀺𑀘𑁆𑀘𑁂𑀲𑀼 𑀦𑁂𑀓𑀲𑁄;

𑀅𑀘𑁆𑀘𑀼𑀴𑀸𑀭𑀸𑀲𑀬𑀢𑁆𑀢𑀸 𑀘, 𑀫𑀳𑀸𑀪𑀸𑀕𑀢𑁆𑀢𑀦𑁂𑀦 𑀘.

𑀅𑀢𑁆𑀢𑀦𑁄 𑀫𑀸𑀢𑀼𑀪𑀕𑀺𑀦𑀻, 𑀲𑀳𑀯𑀸𑀲 𑀲𑀼𑀔𑀫𑁆𑀳𑀺 𑀘;

𑀅𑀮𑀕𑁆𑀕𑀫𑀸𑀦𑀲𑁄𑀦𑁂𑀓, 𑀩𑀮𑀸𑀓𑀻𑀴𑀸𑀭𑀲𑁂𑀲𑀼 𑀘.

𑀲𑀽𑀭𑀪𑀸𑀯𑀸𑀤𑀺𑀲𑀁𑀬𑀼𑀢𑁆𑀢𑀸, 𑀭𑀸𑀚𑀧𑀼𑀢𑁆𑀢𑀸 𑀢𑀼 𑀫𑀸𑀤𑀺𑀲𑀸;

𑀧𑀘𑁆𑀘𑀦𑁆𑀢𑁂 𑀈𑀤𑀺𑀲𑁂 𑀤𑁂𑀲𑁂, 𑀓𑀣𑀁 𑀦𑀸𑀫 𑀯𑀲𑀺𑀲𑁆𑀲𑀭𑁂.

𑀚𑀸𑀢𑀤𑁂𑀲𑀜𑁆𑀘 𑀫𑁂 𑀤𑀸𑀦𑀺, 𑀬𑀼𑀯𑀭𑀸𑀚𑀧𑀪𑁄𑀕𑀺𑀬𑀁;

𑀕𑀫𑀺𑀲𑁆𑀲𑀸𑀫𑀻𑀢𑀺 𑀦𑀺𑀕𑁆𑀕𑀜𑁆𑀙𑀺, 𑀢𑀫𑁆𑀳𑀸 𑀧𑀭𑀺𑀚𑀦𑀢𑁆𑀣𑀺𑀢𑁄.

𑀓𑀫𑁂𑀦 𑀲𑀦𑁆𑀢𑀺𑀓𑀁 𑀲𑀗𑁆𑀔-𑀦𑀸𑀬𑀓𑀢𑁆𑀣𑀮𑀺𑀲𑀜𑁆𑀜𑀺𑀦𑁄;

𑀕𑀸𑀫𑀲𑁆𑀲𑀸𑀕𑀸 𑀅𑀳𑀺𑀁 𑀓𑀺𑀢𑁆𑀢𑀺-𑀲𑀺𑀭𑀺𑀫𑁂𑀖𑁄 𑀦𑀺𑀲𑀫𑁆𑀫 𑀢𑀁.

𑀅𑀪𑀸𑀯𑀸 𑀭𑀚𑁆𑀚 𑀤𑀸𑀬𑀸𑀤-𑀲𑀫𑀸𑀦𑀲𑁆𑀲’𑀢𑁆𑀭𑀚𑀲𑁆𑀲 𑀫𑁂;

𑀏𑀓𑀸𑀓𑀻’𑀳𑀦𑁆𑀢𑀺 𑀬𑁄 𑀘𑀺𑀢𑁆𑀢-𑀲𑀦𑁆𑀢𑀸𑀧𑁄 𑀲𑀦𑁆𑀢𑀢𑀁 𑀕𑀢𑁄.

𑀚𑁂𑀝𑁆𑀞𑀁𑀯 𑀪𑀸𑀢𑀭𑀁 𑀫𑀬𑁆𑀳𑀁, 𑀢𑀁 𑀤𑁂𑀳𑀧𑀝𑀺𑀩𑀺𑀫𑁆𑀩𑀓𑀁;

𑀤𑀝𑁆𑀞𑀼𑀁 𑀫𑁂 𑀲𑀢𑁆𑀢𑀢𑀁 𑀧𑀼𑀜𑁆𑀜𑀁, 𑀫𑀳𑀦𑁆𑀢𑀫𑀼𑀤𑀺𑀢𑀁𑀢𑀺𑀘.

𑀧𑀸𑀫𑀼𑀚𑁆𑀚𑀯𑁂𑀕𑀯𑀲𑀕𑁄, 𑀦𑀕𑀭𑀁 𑀢𑀁 𑀫𑀦𑁄𑀳𑀭𑀁;

𑀅𑀮𑀗𑁆𑀓𑀸𑀭𑀸 𑀧𑀬𑀺𑀢𑁆𑀯𑀸𑀦, 𑀢𑁄𑀭𑀡𑀸𑀤𑀻𑀳𑀺 𑀦𑁂𑀓𑀥𑀸.

𑀕𑀦𑁆𑀢𑁆𑀯𑀸 𑀧𑀝𑀺𑀧𑀣𑀁𑀬𑁂𑀯, 𑀩𑀮𑁄𑀖𑀧𑀭𑀺𑀯𑀸𑀭𑀺𑀢𑁄;

𑀦𑀭𑀺𑀦𑁆𑀤𑁄 𑀢𑀺𑀣𑀺𑀦𑀓𑁆𑀔𑀢𑁆𑀢-𑀯𑀺𑀲𑁂𑀲𑁂 𑀲𑀼𑀪𑀲𑀫𑁆𑀫𑀢𑁂.

𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀁, 𑀲𑀫𑁆𑀧𑀢𑁆𑀢𑁂𑀳𑀺 𑀕𑀼𑀡𑁂𑀳𑀺 𑀘;

𑀮𑀓𑁆𑀔𑀡𑁂𑀳𑀺 𑀘 𑀲𑀩𑁆𑀩𑁂𑀳𑀺, 𑀓𑀮𑁆𑀬𑀸𑀡𑁂𑀬𑀺 𑀲𑀼𑀲𑀁𑀬𑀼𑀢𑀁.

𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀲𑀦𑁆𑀢𑀼𑀝𑁆𑀞𑁄, 𑀆𑀮𑀺𑀗𑁆𑀕𑀺𑀢𑁆𑀯𑀸𑀦 𑀧𑁂𑀫𑀢𑁄;

𑀉𑀭𑁂 𑀓𑀢𑁆𑀯𑀸𑀦 𑀘𑀼𑀫𑁆𑀩𑀺𑀢𑁆𑀯𑀸, 𑀫𑀢𑁆𑀣𑀓𑀫𑁆𑀳𑀺 𑀧𑀼𑀦𑀧𑁆𑀧𑀼𑀦𑀁.

𑀚𑀦𑀲𑁆𑀲 𑀩𑀮𑀢𑁄 𑀢𑀲𑁆𑀲, 𑀧𑀲𑁆𑀲𑀢𑁄 𑀮𑁄𑀘𑀦𑁂𑀳𑀺 𑀲𑁄;

𑀲𑀦𑁆𑀢𑁄𑀲 𑀅𑀲𑁆𑀲𑀼𑀥𑀸𑀭𑀸𑀬𑁄, 𑀯𑀲𑁆𑀲𑀸𑀧𑁂𑀦𑁆𑀢𑁄 𑀦𑀺𑀭𑀦𑁆𑀢𑀭𑀁.

𑀫𑀦𑀼𑀜𑁆𑀜𑀫𑁂𑀓 𑀫𑀸𑀭𑀼𑀬𑁆𑀳, 𑀯𑀸𑀳𑀦𑀁 𑀲𑀳 𑀲𑀽𑀦𑀼𑀦𑀸;

𑀪𑁂𑀭𑀺𑀦𑀺 𑀤𑁂𑀦 𑀧𑀽𑀭𑁂𑀦𑁆𑀢𑁄, 𑀤𑀺𑀲𑀸 𑀤𑀲 𑀲𑀫𑀦𑁆𑀢𑀢𑁄.

𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀁 𑀢𑀢𑁆𑀣, 𑀅𑀮𑀗𑁆𑀓𑀸𑀭𑁂 𑀫𑀦𑁄𑀭𑀫𑁂;

𑀤𑀲𑁆𑀲𑀬𑀦𑁆𑀢𑁄 𑀲𑀧𑀼𑀢𑁆𑀢𑀲𑁆𑀲, 𑀧𑀸𑀯𑀺𑀲𑀺 𑀭𑀸𑀚𑀫𑀦𑁆𑀤𑀺𑀭𑀁.

𑀮𑀤𑁆𑀥𑀸 ¶ 𑀢𑀢𑁄 𑀓𑀜𑁆𑀘𑀼𑀓𑀻-𑀲𑀼𑀧𑀓𑀸𑀭,

𑀦𑀸𑀦𑀸𑀕𑀼𑀡𑀸 𑀭𑀸𑀥𑀺𑀢𑀫𑀸𑀦𑀲𑀲𑁆𑀲,

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀲𑀗𑁆𑀔𑀢𑁆𑀣𑀮𑀺𑀧𑀼𑀭𑀸𑀪𑀺𑀕𑀫𑀦𑁄 𑀦𑀸𑀫

𑀅𑀢𑁆𑀢𑀦𑀸𑀪𑀺𑀫𑀢𑀲𑁆𑀲𑀸’𑀲𑀼, 𑀚𑀸𑀢𑀤𑁂𑀲𑀲𑁆𑀲 𑀧𑀢𑁆𑀢𑀺𑀬𑀸;

𑀲𑀫𑁆𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑁄, 𑀤𑀼𑀲𑁆𑀲𑀗𑁆𑀓𑀧𑀯𑀺𑀯𑀚𑁆𑀚𑀺𑀢𑁄.

𑀯𑀚𑀺𑀭𑀽𑀧𑀫𑁄𑀭𑀼𑀧𑀜𑁆𑀜𑀸, 𑀩𑀮𑁂𑀦 𑀕𑀼𑀭𑀼𑀲𑀦𑁆𑀢𑀺𑀓𑁂;

𑀮𑀳𑀼𑀁 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄, 𑀲𑀺𑀧𑁆𑀧𑀚𑀸𑀢𑀫𑀦𑁂𑀓 𑀓𑀁.

𑀚𑀺𑀦𑀸𑀕𑀫𑁂𑀲𑀼 𑀦𑁂𑀓𑁂𑀲𑀼, 𑀓𑁄𑀝𑀺𑀮𑁆𑀮𑀸 𑀤𑀻𑀲𑀼 𑀦𑀻𑀢𑀺𑀲𑀼;

𑀲𑀤𑁆𑀤𑀲𑀢𑁆𑀣𑁂 𑀘 𑀓𑀸𑀯𑁂𑀬𑁆𑀬𑁂, 𑀲𑀦𑀺𑀖𑀡𑁆𑀟𑀼𑀓 𑀓𑁂𑀝𑀼𑀪𑁂.

𑀦𑀘𑁆𑀘𑀕𑀻𑀢𑁂𑀲𑀼 𑀲𑀢𑁆𑀣𑁂𑀲𑀼, 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀓𑁂𑀲𑀼 𑀘;

𑀥𑀦𑀼 𑀔𑀕𑁆𑀕𑀸𑀤𑀺𑀦𑁂𑀓𑁂𑀲𑀼, 𑀲𑀢𑁆𑀣𑁂𑀲𑀼 𑀘 𑀯𑀺𑀲𑁂𑀲𑀢𑁄.

𑀧𑀸𑀭𑀧𑁆𑀧𑀢𑁆𑀢𑁄 𑀯𑀺𑀦𑀻𑀢𑀢𑁆𑀢𑁄, 𑀧𑀺𑀢𑀼 𑀭𑀜𑁆𑀜𑁄 𑀲𑀫𑀸𑀘𑀭𑀺;

𑀅𑀥𑀺𑀧𑁆𑀧𑀸𑀬𑀸𑀦𑀼𑀓𑀼𑀮𑀁’𑀯, 𑀲𑀤𑀸 𑀪𑀢𑁆𑀢𑀺𑀧𑀼𑀭𑀲𑁆𑀲𑀭𑁄.

𑀢𑀤𑀸 𑀲𑀤𑀸 𑀤𑀭𑀸𑀘𑀸𑀭-𑀕𑀼𑀡𑀸𑀭𑀸𑀥𑀺𑀢𑀫𑀸𑀦𑀲𑁄;

𑀧𑀺𑀬𑁂𑀦 𑀯𑀺𑀬 𑀫𑀺𑀢𑁆𑀢𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀫𑀳𑀻𑀧𑀢𑀺.

𑀉𑀬𑁆𑀬𑀸𑀦𑀚𑀮𑀓𑀻𑀴𑀸𑀤𑀺-𑀲𑀼𑀔𑀁 𑀦𑀸𑀦𑀧𑁆𑀧𑀓𑀸𑀭𑀓𑀁;

𑀅𑀦𑀼𑀪𑁄𑀢𑁆𑀯𑀸 𑀲𑀤𑁂𑀲𑀲𑁆𑀫𑀺𑀁, 𑀲𑀜𑁆𑀘𑀭𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁.

𑀏𑀓𑀤𑀸𑀲𑀗𑁆𑀔𑀲𑁂𑀦𑀸𑀥𑀺-𑀧𑀢𑀺𑀦𑀸 𑀤𑀴𑁆𑀳𑀪𑀢𑁆𑀢𑀺𑀦𑀸;

𑀲𑀭𑀝𑁆𑀞𑀲𑀻𑀫𑀸 𑀭𑀓𑁆𑀔𑀸𑀬, 𑀬𑁄 𑀚𑀺𑀢𑁂𑀦 𑀩𑀮𑀻𑀬𑀲𑀸.

𑀅𑀚𑁆𑀛𑀸𑀯𑀼𑀢𑁆𑀣𑀲𑁆𑀲 ¶ 𑀘 𑀩𑀮𑀢𑁆𑀣-𑀮𑀺𑀦𑀫𑀲𑁆𑀲 𑀘 𑀲𑀦𑁆𑀢𑀺𑀓𑀁;

𑀕𑀸𑀫𑀲𑀸’𑀕𑀜𑁆𑀙𑀺 𑀲𑀼𑀢𑁆𑀯𑀸𑀦, 𑀢𑀫𑀢𑁆𑀣𑀁 𑀥𑀚𑀺𑀦𑀻𑀧𑀢𑀺.

𑀕𑀸𑀫𑀁 𑀢𑀁 𑀲𑀸𑀥𑀼𑀓𑀁 𑀲𑀚𑁆𑀚𑀼, 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀧𑀼𑀢𑁆𑀢𑀓𑀁;

𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀳𑀻𑀧𑀸𑀮𑀁, 𑀧𑀡𑀫𑀺𑀢𑁆𑀯𑀸 𑀞𑀺𑀢𑁄 𑀢𑀤𑀸.

𑀧𑀺𑀢𑀸 𑀧𑀼𑀢𑁆𑀢𑁄 𑀉𑀪𑁄 𑀢𑀲𑁆𑀲, 𑀲𑀫𑁆𑀪𑀸𑀲𑀺𑀬 𑀧𑀺𑀬𑀁 𑀯𑀘𑁄;

𑀦𑁂𑀓𑀥𑀸’𑀭𑀸𑀥𑀺𑀢𑀸 𑀢𑁂𑀦, 𑀢𑀁 𑀕𑀸𑀫𑀁 𑀲𑀫𑀼𑀧𑀸𑀕𑀕𑀼𑀁.

𑀢𑀳𑀺𑀁 𑀓𑀢𑀺𑀘𑀺 𑀪𑀽𑀧𑀸𑀮𑁄, 𑀯𑀸𑀲𑀭𑁂 𑀯𑀻𑀢𑀺𑀦𑀸𑀫𑀺𑀬;

𑀲𑁂𑀦𑀸𑀧𑀢𑀺𑀁 𑀲𑀫𑀸𑀳𑀽𑀬, 𑀇𑀤𑀁 𑀯𑀘𑀦𑀁 𑀫𑀩𑁆𑀭𑀯𑀺.

𑀧𑀼𑀢𑁆𑀢𑁄 𑀫𑁂 𑀤𑀸𑀦𑀺𑀯𑀬𑀲𑀺, 𑀞𑀺𑀢𑁄’ 𑀧𑀦𑀬𑀦𑀸𑀭𑀳𑁂;

𑀢𑀲𑁆𑀲𑁄𑀧𑀦𑀬𑀦𑀁 𑀓𑀸𑀢𑀼𑀁, 𑀫𑀳𑁄𑀧𑀓𑀭𑀡𑀁 𑀮𑀳𑀼𑀁.

𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀢𑀁 𑀲𑀼𑀢𑁆𑀯𑀸, 𑀲𑁄𑀧𑀺 𑀲𑁂𑀦𑀸𑀥𑀺𑀦𑀸𑀬𑀓𑁄;

𑀲𑀩𑁆𑀩𑀼𑀧𑀓𑀭𑀡𑀁 𑀔𑀺𑀧𑁆𑀧𑀁, 𑀫𑀗𑁆𑀕𑀮𑀢𑁆𑀣𑀁 𑀲𑀼𑀲𑀚𑁆𑀚𑀬𑀺.

𑀲𑀼𑀕𑀦𑁆𑀥 𑀤𑀻𑀧𑀧𑀼𑀧𑁆𑀨𑀸𑀤𑀺-𑀯𑀢𑁆𑀣𑀽𑀳𑀺 𑀤𑀺𑀯𑀲𑀢𑁆𑀢𑀬𑀁;

𑀧𑀼𑀩𑁆𑀩𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀫𑀳𑀦𑁆𑀢𑀁 𑀭𑀢𑀦𑀢𑁆𑀢𑀬𑁂.

𑀯𑁂𑀤𑀺𑀓𑀸𑀘𑀸𑀭𑀤𑀓𑁆𑀔𑁂𑀳𑀺, 𑀤𑁆𑀯𑀺𑀚𑁂𑀳𑀺 𑀧𑀼𑀣𑀼𑀯𑀻𑀧𑀢𑀺;

𑀲𑀫𑁆𑀧𑀪𑀸𑀯𑀸𑀦𑀼 𑀭𑀽𑀧𑀁𑀯, 𑀫𑀗𑁆𑀕𑀮𑀁 𑀢𑀁 𑀲𑀫𑀸𑀧𑀺𑀬.

𑀧𑀭𑀓𑁆𑀓𑀫𑀓𑀼𑀫𑀸𑀭𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀭𑀪𑀺;

𑀯𑀲𑀦𑁆𑀢𑀓𑀻𑀴𑀁 𑀫𑀳𑀢𑀺𑀁, 𑀲𑀸𑀫𑀘𑁆𑀘𑁄 𑀓𑀻𑀴𑀺𑀢𑀼𑀁 𑀢𑀤𑀸.

𑀭𑀸𑀚𑀸 𑀓𑀺𑀢𑁆𑀢𑀺 𑀲𑀺𑀭𑀻𑀫𑁂𑀖𑁄-𑀭𑁄𑀳𑀡𑁂 𑀯𑀲𑀢𑁄 𑀢𑀤𑀸;

𑀲𑀺𑀭𑀻𑀯𑀮𑁆𑀮𑀪𑀦𑀸𑀫𑀲𑁆𑀲, 𑀲𑀪𑀸𑀢𑀼 𑀫𑀭𑀡𑀫𑁆𑀧𑀺 𑀘.

𑀫𑀸𑀡𑀪𑀭𑀡𑀦𑀸𑀫𑀲𑁆𑀲, 𑀭𑀚𑁆𑀚𑀮𑀸𑀪𑀜𑁆𑀘 𑀤𑁂𑀯𑀺𑀬𑀸;

𑀫𑀺𑀢𑁆𑀢𑀸𑀬 𑀧𑀝𑀺𑀮𑀸𑀪𑀜𑁆𑀘, 𑀲𑀺𑀭𑀻𑀯𑀮𑁆𑀮𑀪𑀲𑀽𑀦𑀼 𑀦𑁄.

𑀭𑁄𑀳𑀡𑀸𑀕𑀢𑀤𑀽𑀢𑁂𑀳𑀺, 𑀲𑀼𑀡𑀺𑀢𑁆𑀯𑀸 𑀲𑀓𑀪𑀸𑀢𑀼𑀦𑁄;

𑀓𑀸𑀮𑀓𑁆𑀭𑀺𑀬𑀸𑀬 𑀲𑀜𑁆𑀚𑀸𑀢-𑀲𑁄𑀓𑀯𑁂𑀕𑀁 𑀲𑀼𑀤𑀼𑀲𑁆𑀲𑀳𑀁.

𑀫𑀺𑀢𑁆𑀢𑀸𑀬𑀢𑀦𑀬𑀼𑀧𑁆𑀧𑀢𑁆𑀢𑀺 𑀧𑀯𑀢𑁆𑀢𑀺𑀁 𑀲𑀯𑀡𑁂𑀦 𑀢𑀁;

𑀯𑀺𑀦𑁂𑀬𑁆𑀬 𑀯𑀺𑀭𑀢𑁄 𑀢𑀫𑁆𑀳𑀸, 𑀯𑀲𑀦𑁆𑀢𑀲𑀫𑀬𑀼𑀲𑁆𑀲𑀯𑀸.

𑀦𑀺𑀯𑀢𑁆𑀢𑁂𑀢𑁆𑀯𑀸𑀦 𑀢𑀢𑁆𑀣𑁂𑀯, 𑀲𑁂𑀦𑀸𑀦𑀺𑀁 𑀲𑀗𑁆𑀔𑀦𑀸𑀫𑀓𑀁;

𑀧𑀼𑀢𑁆𑀢𑁂𑀦 𑀲𑀳 𑀲𑁄 𑀲𑀗𑁆𑀔-𑀢𑁆𑀣𑀮𑀺 𑀦𑀸𑀫𑀁 𑀧𑀼𑀭𑀁 𑀕𑀫𑀺.

𑀧𑀭𑀓𑁆𑀓𑀫𑀓𑀼𑀫𑀸𑀭𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀢𑀳𑀺𑀁 𑀲𑀼𑀔𑀁;

𑀯𑀲𑀢𑁄 𑀢𑀲𑁆𑀲 𑀪𑀽𑀧𑀲𑁆𑀲, 𑀯𑀲𑁆𑀲𑀫𑁂𑀓𑀫𑀢𑀺𑀓𑁆𑀓𑀫𑀺.

𑀫𑀸𑀡𑀸𑀪𑀭𑀡𑀪𑀽𑀧𑀲𑁆𑀲 ¶ , 𑀤𑁂𑀯𑀻 𑀘𑀸𑀧𑀺 𑀧𑀪𑀸𑀯𑀢𑀻;

𑀮𑀪𑀺𑀢𑁆𑀣 𑀤𑀼𑀢𑀺𑀬𑀸 𑀓𑀺𑀢𑁆𑀢𑀺-𑀲𑀺𑀭𑀻 𑀫𑁂𑀖𑀯𑁆𑀳𑀬𑀁 𑀲𑀼𑀢𑀁.

𑀲𑀼𑀡𑀺𑀢𑁆𑀯𑀸 𑀢𑀜𑁆𑀘 𑀲𑁄 𑀅𑀫𑁆𑀳𑀁, 𑀯𑀁𑀲𑁄 𑀚𑀸𑀢𑁄 𑀫𑀳𑀸’’𑀇𑀢𑀺;

𑀅𑀳𑀼 𑀓𑀺𑀢𑁆𑀢𑀺𑀲𑀺𑀭𑀻𑀫𑁂𑀖𑁄, 𑀢𑀤𑀸 𑀅𑀢𑁆𑀢𑀫𑀦𑁄 𑀪𑀼𑀲𑀁.

𑀮𑀁𑀓𑀸𑀤𑀻𑀧𑁄𑀧𑀪𑁄𑀕𑁂𑀓-𑀳𑁂𑀢𑀼𑀦𑀸 𑀫𑀳𑀢𑀸 𑀲𑀢𑀸;

𑀅𑀲𑀸𑀥𑀸𑀭𑀡𑀪𑀽𑀪𑁂𑀦, 𑀘𑁄𑀤𑀺𑀢𑁄 𑀧𑀼𑀜𑁆𑀜𑀓𑀫𑁆𑀫𑀼𑀦𑀸.

𑀓𑀼𑀫𑀸𑀭𑁄 𑀲𑁄’𑀣 𑀧𑀺𑀢𑀭𑀸, 𑀧𑀺𑀬𑀫𑀺𑀢𑁆𑀢𑁂 𑀯𑀺𑀬𑀢𑁆𑀢𑀦𑀺;

𑀓𑀭𑀺𑀬𑀫𑀸𑀦𑀁 𑀲𑀲𑁆𑀦𑁂𑀳𑀁, 𑀫𑀳𑀦𑁆𑀢𑀁 𑀘𑁄’𑀧𑀮𑀸𑀮𑀦𑀁.

𑀲𑀘𑀺𑀯𑀸𑀦𑀫𑀦𑁂𑀓𑁂𑀲𑀁, 𑀪𑀬𑀪𑀢𑁆𑀢𑀻 𑀧𑀼𑀭𑀲𑁆𑀲𑀭𑀁;

𑀓𑁆𑀭𑀺𑀬𑀫𑀸𑀦𑀫𑀼𑀧𑀝𑁆𑀞𑀸𑀦𑀁, 𑀦 𑀫𑀜𑁆𑀜𑀦𑁆𑀢𑁄 𑀢𑀺𑀡𑀸𑀬𑀧𑀺.

𑀮𑀁𑀓𑀸𑀤𑀻𑀧𑀫𑀺𑀫𑀁 𑀲𑀩𑁆𑀩 𑀫𑁂𑀓𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑀁;

𑀔𑀺𑀧𑁆𑀧𑀁 𑀓𑀸𑀭𑁂𑀢𑀼𑀓𑀸𑀫𑁄 𑀲𑁄, 𑀲𑀬𑀁 𑀇𑀢𑀺 𑀯𑀺𑀘𑀺𑀦𑁆𑀢𑀬𑀺.

𑀓𑁂𑀲 𑀅𑀓𑁆𑀔𑀓 𑀕𑀻𑀯𑀝𑁆𑀞𑀺-𑀤𑀸𑀞𑀸 𑀧𑀢𑁆𑀢𑀸𑀦 𑀫𑁂𑀯 𑀘;

𑀧𑀤𑀘𑁂𑀢𑁆𑀬 𑀫𑀳𑀸𑀩𑁄𑀥𑀺-𑀲𑀸𑀔𑀸𑀦𑀜𑁆𑀘𑀸𑀧𑀺 𑀲𑀢𑁆𑀣𑀼𑀦𑁄.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀓𑁆𑀔𑀦𑁆𑀥𑀸𑀦 𑀫𑁂𑀯 𑀘;

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀧𑁆𑀧𑀸𑀦𑀁, 𑀆𑀥𑀸𑀭𑀢𑁆𑀢𑀸 𑀘 𑀦𑀺𑀘𑁆𑀘𑀲𑁄.

𑀆𑀓𑀭𑀢𑁆𑀢𑀸 𑀘 𑀦𑁂𑀓𑁂𑀲𑀁, 𑀫𑀡𑀺𑀫𑀼𑀢𑁆𑀢𑀸𑀤𑀺𑀯𑀢𑁆𑀣𑀽𑀦𑀁;

𑀲𑀫𑁆𑀫𑀢𑁄𑀧𑀺 𑀯𑀺𑀲𑀺𑀝𑁆𑀞𑁄𑀢𑀺, 𑀤𑀻𑀧𑁄𑀦𑀸𑀢𑀺 𑀫𑀳𑀸 𑀅𑀬𑀁.

𑀢𑀬𑁄 𑀫𑁂 𑀧𑀺𑀢𑀭𑁄 𑀪𑀽𑀧𑀸, 𑀫𑀸𑀢𑀼𑀮𑁄𑀧𑀺 𑀘 𑀲𑀩𑁆𑀩𑀣𑀸;

𑀏𑀓𑀘𑁆𑀙𑀢𑁆𑀢𑁂𑀦 𑀯𑀢𑁆𑀢𑁂𑀢𑀼, 𑀫𑀲𑀫𑀢𑁆𑀣𑀸 𑀯𑀺𑀪𑀚𑁆𑀚𑀺’𑀫𑀁.

𑀪𑀼𑀜𑁆𑀚𑀦𑁆𑀢𑀸 𑀏𑀢𑁆𑀢𑀓𑁂𑀦𑁂𑀯, 𑀓𑀢𑀓𑀺𑀘𑁆𑀘𑀸 𑀫𑀬𑀁 𑀇𑀢𑀺;

𑀫𑀜𑁆𑀜𑀦𑁆𑀢𑀸 𑀯𑀺𑀕𑀢𑀘𑁆𑀙𑀦𑁆𑀤𑀸’𑀪𑀺𑀲𑁂𑀓𑀫𑁆𑀳𑀺 𑀓𑀼𑀮𑁄𑀘𑀺𑀢𑁂.

𑀭𑀝𑁆𑀞𑁂𑀲𑀓𑁂 𑀲𑀓𑁂𑀬𑁂𑀯, 𑀇𑀲𑁆𑀲𑁂𑀭𑀁 𑀲𑀫𑁆𑀧𑀯𑀢𑁆𑀢𑀬𑀼𑀁;

𑀓𑀲𑀺𑀓𑀫𑁆𑀫𑀸𑀤𑀺𑀓𑀁 𑀕𑀸𑀫-𑀪𑁄𑀚𑀓𑀸 𑀯𑀺𑀬 𑀦𑀺𑀲𑁆𑀲𑀺𑀢𑀸.

𑀢𑁂𑀲𑀼 𑀓𑀺𑀢𑁆𑀢𑀺𑀲𑀺𑀭𑀺 𑀫𑁂𑀖𑀁, 𑀧𑁂𑀢𑁆𑀢𑁂𑀬𑁆𑀬𑀁 𑀫𑁂 𑀞𑀧𑁂𑀢𑁆𑀯 𑀢𑁂;

𑀅𑀕𑀫𑀁𑀲𑀼 𑀬𑀣𑀸𑀓𑀫𑁆𑀫𑀁, 𑀲𑁂𑀲𑀸 𑀪𑀽𑀧𑀢𑀬𑁄 𑀢𑀬𑁄.

𑀫𑀘𑁆𑀘𑀸𑀦𑀁 𑀧𑀭𑀫𑀁 𑀆𑀬𑀼, 𑀯𑀢𑁂’𑀤𑀸𑀦𑀺 𑀧𑀭𑀺𑀢𑁆𑀢𑀓𑀁;

𑀩𑀸𑀮𑀸𑀬𑀼𑀯𑀸𑀦𑁄 𑀯𑀼𑀤𑁆𑀥𑀸 𑀘, 𑀇𑀫𑁂 𑀲𑀢𑁆𑀢𑀸’𑀦𑀼𑀧𑀼𑀩𑁆𑀩𑀲𑁄.

𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀫𑀭𑀡-𑀫𑀻𑀢𑀺’𑀬𑀁 𑀦𑀺𑀬𑀫𑁄𑀧𑀺 𑀘;

𑀦 𑀳𑁂𑀯 𑀅𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀲𑀁𑀯𑀺𑀚𑁆𑀚𑀢𑀺 𑀓𑀤𑀸𑀘𑀺𑀧𑀺.

𑀢𑀲𑁆𑀫𑀸 ¶ 𑀲𑀭𑀻𑀭𑀓𑁂 𑀅𑀲𑁆𑀫𑀺𑀁, 𑀪𑀗𑁆𑀕𑀼𑀭𑁂 𑀲𑀸𑀭𑀯𑀚𑁆𑀚𑀺𑀢𑁂;

𑀳𑀻𑀴𑀺𑀢𑁂 𑀲𑀸𑀭𑀤𑀲𑁆𑀲𑀻𑀳𑀺, 𑀅𑀧𑁂𑀓𑁆𑀔𑀁 𑀳𑀺𑀢𑁆𑀯𑀸 𑀲𑀩𑁆𑀩𑀣𑀸.

𑀧𑀺𑀳𑀦𑀺𑀬𑁂 𑀬𑀲𑁄𑀤𑁂𑀳𑁂, 𑀘𑀺𑀭𑀝𑁆𑀞𑀸𑀬𑀺𑀫𑁆𑀳𑀺 𑀲𑀩𑁆𑀩𑀤𑀸;

𑀅𑀫𑁆𑀳𑀸𑀤𑀺𑀲𑁂𑀳𑀺 𑀓𑀢𑁆𑀢𑀩𑁆𑀩𑁄, 𑀭𑀸𑀚𑀧𑀼𑀢𑁆𑀢𑁂𑀳𑀺 𑀆𑀤𑀭𑁄.

𑀉𑀫𑁆𑀫𑀕𑁆𑀕𑀚𑀸𑀢𑀓𑀸𑀤𑀻𑀲𑀼, 𑀘𑀸𑀭𑀺𑀢𑁆𑀢𑀜𑁆𑀘𑀸𑀧𑀺 𑀪𑀽𑀫𑀺𑀲𑀼;

𑀯𑀺𑀳𑀺𑀢𑀁 𑀩𑁄𑀥𑀺𑀲𑀢𑁆𑀢𑁂𑀦, 𑀯𑀻𑀭𑀪𑀸𑀯𑀸𑀤𑀺𑀦𑀺𑀲𑁆𑀲𑀺𑀢𑀁.

𑀭𑀸𑀫𑀸𑀬𑀡𑀪𑀸𑀭𑀢𑀸𑀤𑀺-𑀮𑁄𑀓𑀺𑀬𑀸𑀲𑀼 𑀓𑀣𑀸𑀲𑀼𑀧𑀺;

𑀭𑀸𑀫𑀲𑁆𑀲 𑀯𑀺𑀓𑁆𑀓𑀫𑀜𑁆𑀘𑁂𑀯, 𑀢𑀲𑁆𑀲 𑀭𑀸𑀯𑀡𑀖𑀸𑀢𑀺𑀦𑁄.

𑀤𑀼𑀬𑁄𑀥𑀦𑀸𑀤𑀺𑀭𑀸𑀚𑀸𑀦𑁄, 𑀳𑀦𑁆𑀢𑁆𑀯𑀸𑀬𑀼𑀤𑁆𑀥𑁂 𑀧𑀯𑀢𑁆𑀢𑀺𑀢𑀁;

𑀯𑀺𑀓𑁆𑀓𑀫𑀸𑀢𑀺 𑀲𑀬𑀜𑁆𑀘𑁂𑀯, 𑀧𑀜𑁆𑀘𑀦𑁆𑀦𑀁 𑀧𑀡𑁆𑀟𑀼𑀲𑀽𑀦𑀽𑀦𑀁.

𑀇𑀢𑀺𑀳𑀸𑀲𑀓𑀣𑀸𑀬𑀜𑁆𑀘, 𑀤𑁂𑀯𑀸𑀲𑀼𑀭𑀭𑀡𑁂 𑀧𑀼𑀭𑀸;

𑀤𑀼𑀲𑁆𑀲𑀦𑁆𑀢𑀸𑀤𑀺𑀫𑀳𑀻𑀧𑁂𑀳𑀺, 𑀓𑀢𑀜𑁆𑀘 𑀘𑀭𑀺𑀢𑀩𑁆𑀪𑀽𑀢𑀁.

𑀉𑀫𑁆𑀫𑀽𑀮𑀺𑀢𑀯𑀢𑁄 𑀢𑀲𑁆𑀲, 𑀦𑀦𑁆𑀤𑀯𑀁𑀲𑀦𑀭𑀺𑀲𑁆𑀲𑀭𑁂;

𑀘𑀸𑀭𑀓𑁆𑀓𑀤𑁆𑀯𑀺𑀚𑀲𑁂𑀝𑁆𑀞𑀲𑁆𑀲, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀺𑀩𑀮𑀫𑁆𑀧𑀺 𑀘.

𑀲𑀩𑁆𑀩𑀸 𑀦𑁂𑀢𑀸𑀦𑀺 𑀮𑁄𑀓𑀫𑁆𑀳𑀺, 𑀬𑀸𑀯𑀚𑁆𑀚𑀤𑀺𑀯𑀲𑀸 𑀪𑀼𑀯𑀺;

𑀢𑁂𑀲𑀁 𑀅𑀲𑀦𑁆𑀦𑀺𑀥𑀸𑀦𑁂𑀧𑀺, 𑀲𑀼𑀧𑁆𑀧𑀲𑀺𑀤𑁆𑀥𑀺𑀁 𑀕𑀢𑀸𑀦𑀺 𑀳𑀺.

𑀲𑀼𑀮𑀤𑁆𑀥𑀁 𑀚𑀻𑀯𑀺𑀢𑀁 𑀢𑁂𑀲𑀁, 𑀅𑀲𑀸𑀥𑀸𑀭𑀡𑀫𑀻𑀤𑀺𑀲𑀁;

𑀘𑀭𑀺𑀢𑀸𑀢𑀺𑀲𑀬𑀁 𑀓𑀢𑁆𑀢𑀼𑀁, 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺 𑀬𑁂 𑀪𑀼𑀯𑀺.

𑀚𑀸𑀬𑀺𑀢𑁆𑀯𑀸 𑀔𑀢𑁆𑀢𑀯𑀁𑀲𑀫𑁆𑀳𑀺, 𑀔𑀢𑁆𑀢𑀯𑀻𑀭𑀯𑀭𑁄𑀥𑀺𑀢𑀁;

𑀬𑀤𑀺𑀳𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀫𑁄𑀖𑀸 𑀫𑁂 𑀚𑀸𑀢𑀺 𑀳𑁂𑀲𑁆𑀲𑀢𑀺.

𑀢𑁂𑀲𑀫𑀩𑁆𑀪𑀥𑀺𑀓𑀸 𑀓𑀸𑀮-𑀲𑀫𑁆𑀧𑀤𑀸𑀬𑁂𑀯 𑀓𑁂𑀯𑀮𑀁;

𑀫𑀬𑀸 𑀢𑁂 𑀅𑀥𑀺𑀓𑀸 𑀓𑀺𑀦𑁆𑀢𑀼, 𑀧𑀜𑁆𑀜𑀸𑀤𑀻𑀳𑀻𑀢𑀺 𑀘𑀺𑀦𑁆𑀢𑀺𑀬.

𑀧𑀺𑀢𑀼𑀭𑀸𑀚𑀸 𑀘 𑀫𑁂’𑀤𑀸𑀦𑀺, 𑀧𑀘𑁆𑀙𑀺𑀫𑁂 𑀯𑀬𑀲𑀺𑀝𑁆𑀞𑀺𑀢𑁄;

𑀬𑀤𑀺𑀤𑀁 𑀧𑁂𑀢𑁆𑀢𑀺𑀓𑀁 𑀭𑀚𑁆𑀚𑀁, 𑀫𑀫 𑀳𑀢𑁆𑀣𑀕𑀢𑀩𑁆𑀪𑀯𑁂.

𑀭𑀸𑀚𑀮𑀓𑁆𑀔𑀺𑀯 𑀲𑁄 𑀧𑁂𑀢-𑀘𑁂𑀢𑀲𑁄 𑀫𑁂 𑀧𑀫𑀸𑀤𑀢𑁄;

𑀬𑀣𑀺𑀘𑁆𑀙𑀺𑀢𑀜𑁆𑀘𑁂 𑀦 𑀪𑀯𑁂, 𑀫𑀳𑀢𑀻 𑀚𑀸𑀦𑀺 𑀫𑁂 𑀪𑀼𑀲𑀁.

𑀏𑀢𑁆𑀣𑁂𑀯 𑀦𑀺𑀯𑀲𑀦𑁆𑀢𑁄’𑀳𑀁, 𑀘𑀭𑀸𑀧𑀺𑀬 𑀲𑀓𑁂 𑀯𑀭𑁂;

𑀧𑀭𑀫𑀡𑁆𑀟𑀮𑀯𑀼𑀢𑁆𑀢𑀦𑁆𑀢𑀁, 𑀚𑀸𑀦𑁂𑀬𑁆𑀬𑀁 𑀬𑀤𑀺 𑀢𑀢𑁆𑀢𑀦𑁄.

𑀭𑀦𑁆𑀥𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀦𑁆𑀢𑀼, 𑀧𑀓𑀸𑀲𑁂𑀢𑀼𑀁 𑀭𑀣𑀸𑀢𑀣𑀁;

𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀫𑁂, 𑀲𑀫𑀢𑁆𑀣𑀸 𑀯𑀸 𑀦 𑀯𑀸𑀘𑀭𑀸.

𑀬𑁂 ¶ 𑀓𑁂𑀘𑀺’𑀥 𑀚𑀦𑀸 𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀫𑀫 𑀲𑀫𑁆𑀫𑀼𑀔𑀸;

𑀩𑀮𑀻𑀬𑀢𑁆𑀢𑀁’𑀯 𑀲𑀢𑁆𑀢𑀽𑀦𑀁, 𑀓𑀣𑀬𑀦𑁆𑀢𑀺 𑀅𑀦𑁂𑀓𑀲𑁄.

𑀧𑀘𑁆𑀘𑁂𑀓𑀭𑀝𑁆𑀞𑀲𑀸𑀫𑀻𑀳𑀺, 𑀧𑀺𑀢𑀼𑀪𑀽𑀧𑁂𑀳𑀺 𑀢𑀺𑀳𑀺𑀧𑀺;

𑀏𑀓𑀻𑀪𑀽𑀬 𑀓𑀭𑀺𑀢𑁆𑀯𑀸𑀦, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀳𑀯𑀁.

𑀲𑀸𑀥𑁂𑀢𑀼𑀁 𑀤𑀼𑀓𑁆𑀓𑀭𑀁 𑀭𑀝𑁆𑀞𑀁, 𑀪𑀯𑀢𑁂 𑀓𑀸𑀓𑀺𑀦𑀸 𑀓𑀣𑀁;

𑀲𑀺𑀲𑀼𑀦𑀸 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑀸, 𑀔𑀼𑀤𑁆𑀤𑀭𑀚𑁆𑀚𑁄 𑀧𑀪𑁄𑀕𑀺𑀦𑀸.

𑀲𑀼𑀓𑀭𑀁 𑀫𑀽𑀮𑀪𑀽𑀢𑀲𑁆𑀲, 𑀢𑀲𑁆𑀲 𑀭𑀚𑁆𑀚𑀲𑁆𑀲 𑀲𑀸𑀥𑀦𑀁;

𑀇𑀢𑀺 𑀤𑀼𑀘𑁆𑀘𑀺𑀦𑁆𑀢𑀁𑀢𑀁 𑀢𑀼𑀬𑁆𑀳𑀁, 𑀤𑀽𑀭𑁂 𑀢𑀩𑁆𑀩𑀫𑀺𑀤𑀁’’𑀇𑀢𑀺.

𑀓𑀡𑁆𑀡𑁂 𑀢𑀢𑁆𑀣𑀲𑀮𑀸𑀓𑀸𑀬𑁄, 𑀧𑀯𑁂𑀲𑁂𑀦𑁆𑀢𑀸’𑀯 𑀦𑁂𑀓𑀲𑁄;

𑀫𑀳𑀦𑁆𑀢𑀢𑁆𑀢𑀁 𑀓𑀣𑁂𑀦𑁆𑀢𑁂’𑀯𑀁, 𑀩𑀳𑀼𑀥𑀸 𑀧𑀭𑀫𑀡𑁆𑀟𑀮𑁂.

𑀅𑀚𑀸𑀦𑀦𑀁 𑀬𑀣𑀸𑀪𑀽𑀢𑀁, 𑀯𑀤𑀦𑁆𑀢𑀸𑀦𑀁 𑀓𑀼𑀩𑀼𑀤𑁆𑀥𑀺𑀦𑀁;

𑀲𑀩𑁆𑀩𑀫𑁂𑀢𑀁 𑀯𑀘𑁄 𑀚𑀸𑀢𑀼, 𑀲𑀤𑁆𑀥𑀸𑀢𑀩𑁆𑀩𑀁 𑀲𑀺𑀬𑀸 𑀦 𑀳𑀺.

𑀮𑁂𑀲𑁂𑀦𑁂𑀓𑁂𑀦 𑀕𑀦𑁆𑀢𑁆𑀯𑀸𑀦, 𑀔𑀺𑀧𑁆𑀧𑀁’𑀯 𑀧𑀭𑀫𑀡𑁆𑀟𑀮𑀁;

𑀲𑀭𑀽𑀧𑀁 𑀢𑀢𑁆𑀣 𑀉𑀲𑁆𑀲𑀸𑀫𑀺, 𑀅𑀳𑀫𑁂𑀯𑁂𑀢𑀺 𑀘𑀺𑀦𑁆𑀢𑀬𑀺.

𑀬𑀤𑀺 𑀫𑁂 𑀧𑀻𑀢𑀼𑀪𑀽𑀧𑀸𑀮𑁄, 𑀯𑀺𑀜𑁆𑀜𑀸𑀬𑁂𑀢𑀁 𑀯𑀺𑀢𑀓𑁆𑀓𑀺𑀢𑀁;

𑀅𑀪𑀺𑀚𑀸𑀢𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀯𑀁𑀲𑀚𑁄𑀢𑀺𑀓𑀭𑀲𑁆𑀲 𑀫𑁂.

𑀕𑀢𑀲𑁆𑀲 𑀲𑀢𑁆𑀣𑀼 𑀯𑀺𑀲𑀬-𑀫𑀦𑀢𑁆𑀣𑁄𑀧𑀺 𑀲𑀺𑀬𑀸 𑀇𑀢𑀺;

𑀅𑀦𑀼𑀓𑀫𑁆𑀧𑀸𑀥𑀺𑀬𑀸 𑀫𑀬𑁆𑀳𑀁, 𑀕𑀫𑀦𑀁 𑀯𑀸𑀭𑀬𑀺𑀲𑁆𑀲𑀢𑀺.

𑀫𑀦𑁄𑀭𑀣𑀲𑁆𑀲 𑀲𑀁𑀲𑀺𑀤𑁆𑀥𑀺, 𑀲𑀩𑁆𑀩𑀣𑀸 𑀫𑁂𑀦 𑀳𑁂𑀲𑁆𑀲𑀢𑀺;

𑀢𑀲𑁆𑀫𑀸 𑀦𑀺𑀕𑀼𑀴𑀭𑀽𑀧𑁂𑀦, 𑀕𑀫𑀦𑀁 𑀪𑀤𑁆𑀤𑀓𑀁 𑀇𑀢𑀺.

𑀮𑀤𑁆𑀥𑀸𑀦 𑀭𑀢𑁆𑀢𑀺𑀬𑀫 𑀣𑁂𑀓𑀤𑀺𑀦𑀁 𑀔𑀡𑀜𑁆𑀜𑀽,

𑀲𑁄 𑀢𑀸𑀤𑀺𑀲𑀁 𑀔𑀡𑀫𑀔𑀻𑀡𑀢𑀭𑁄𑀭𑀽𑀧𑀸𑀬𑁄;

𑀚𑀸𑀦𑀸𑀢𑀺 𑀦𑁄 𑀲𑀓𑀧𑀺𑀢𑀸𑀕𑀫𑀦𑀁 𑀢𑀣𑀸𑀢𑀁,

𑀕𑁂𑀳𑀸’𑀪𑀺𑀦𑀺𑀓𑁆𑀔𑀫𑀺𑀢𑀣𑀸 𑀘𑀢𑀼𑀭𑁄 𑀓𑀼𑀫𑀸𑀭𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑀺𑀲𑀝𑁆𑀞𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀚𑀸𑀬𑀼𑀥𑀤𑀼𑀢𑀺𑀬𑀲𑁆𑀲 ¶ , 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀢𑀲𑁆𑀲 𑀳𑀺;

𑀢𑀁 𑀔𑀡𑀁 𑀧𑀼𑀭𑀢𑁄 𑀓𑁄’𑀧𑀺, 𑀲𑀗𑁆𑀔𑀲𑀤𑁆𑀤𑁄 𑀲𑀫𑀼𑀕𑁆𑀕𑀢𑁄.

𑀢𑀢𑁄 𑀦𑁂𑀓𑀦𑀺𑀫𑀺𑀢𑁆𑀢𑀜𑁆𑀜𑀽, 𑀓𑀼𑀫𑀸𑀭𑁄 𑀢𑀁 𑀲𑀼𑀡𑀺 𑀢𑁆𑀯 𑀲𑁄;

𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺 𑀲𑀗𑁆𑀓𑀧𑁆𑀧𑁄, 𑀔𑀺𑀧𑁆𑀧𑀁 𑀬𑁂𑀯𑁂𑀢𑀺 𑀫𑁄𑀤𑀯𑀸.

𑀢𑀢𑁆𑀣 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀦𑀁, 𑀭𑀓𑁆𑀔𑀓𑀸𑀦𑀫𑀚𑀸𑀦𑀢𑀁;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀸𑀯𑀻𑀢-𑀪𑀬𑁄 𑀲𑀻𑀳𑀧𑀭𑀓𑁆𑀓𑀫𑁄.

𑀯𑁂𑀕𑁂𑀦 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸𑀦, 𑀧𑀜𑁆𑀘𑀕𑀸𑀯𑀼𑀢𑀫𑀢𑁆𑀢𑀓𑀁;

𑀩𑀤𑀮𑀢𑁆𑀣𑀮𑀕𑀸𑀫𑀲𑁆𑀲, 𑀧𑀤𑁂𑀲𑁂𑀦𑀸𑀢𑀺 𑀤𑀽𑀭𑀓𑁂.

𑀕𑀸𑀫 𑀫𑁂𑀓𑀫𑀼𑀧𑀸𑀕𑀜𑁆𑀘𑀺, 𑀧𑀺𑀮𑀺𑀁 𑀯𑀢𑁆𑀣𑀽𑀢𑀺 𑀲𑀜𑁆𑀜𑀺𑀢𑀁;

𑀚𑀦𑀸𑀦𑀁 𑀲𑀦𑁆𑀦𑀺𑀧𑀸𑀢𑀸𑀬, 𑀦𑀺𑀚𑀸𑀦𑀁 𑀲𑁄 𑀓𑀢𑀸𑀯𑀥𑀺.

𑀦𑀺𑀚𑀸𑀕𑀫𑀦𑀢𑁄 𑀧𑀼𑀩𑁆𑀩𑀁, 𑀧𑀝𑀺𑀫𑀕𑁆𑀕𑁂 𑀦𑀺𑀲𑀻𑀤𑀺𑀢𑀼𑀁;

𑀧𑀝𑀺𑀮𑀤𑁆𑀥𑀦𑀺𑀬𑁄𑀕𑀸𑀦𑀁, 𑀬𑁂𑀘𑀺 𑀤𑁂𑀯𑀸𑀕𑀢𑁂 𑀢𑀤𑀸.

𑀢𑀳𑀺𑀁 𑀞𑀺𑀢𑁂 𑀲𑁄 𑀧𑀲𑁆𑀲𑀺𑀢𑁆𑀯𑀸, 𑀏𑀢𑁆𑀢𑀓𑀸 𑀓𑀺𑀦𑁆𑀦𑀼 𑀆𑀕𑀢𑀸;

𑀇𑀢𑀺 𑀧𑀼𑀘𑁆𑀙𑀺 𑀓𑀼𑀫𑀸𑀭𑁄𑀣, 𑀢𑁂𑀧𑀺 𑀢𑀁 𑀇𑀤 𑀫𑀩𑁆𑀭𑀯𑀼𑀁.

𑀮𑁄𑀓𑀧𑁆𑀧𑀯𑀢𑁆𑀢𑀺𑀁 𑀲𑀓𑀮𑀁, 𑀚𑀸𑀦𑀦𑁆𑀢𑁂𑀦𑀸𑀧𑀺 𑀲𑀸𑀫𑀺𑀦𑀸;

𑀓𑀺𑀫𑁂𑀯 𑀫𑀼𑀘𑁆𑀘𑀢𑁂 𑀫𑀘𑁆𑀘𑀼-𑀪𑀬𑀁 𑀓𑁂𑀲𑀁 𑀦 𑀯𑀺𑀚𑁆𑀚𑀢𑀺.

𑀩𑀸𑀮𑀸𑀢𑀸𑀦𑀼𑀕𑀢𑁄 𑀲𑀸𑀫𑀺, 𑀞𑀺𑀢𑁄 𑀯𑀬𑀲𑀺 𑀈𑀤𑀺𑀲𑁂;

𑀅𑀚𑁆𑀚𑀸𑀧𑀺 𑀳𑀺 𑀫𑀼𑀔𑁂 𑀢𑀼𑀬𑁆𑀳𑀁, 𑀔𑀻𑀭𑀕𑀦𑁆𑀥𑁄 𑀧𑀯𑀸𑀬𑀢𑀺.

𑀦 𑀳𑁂𑀯𑀢𑁆𑀣𑀺 𑀯𑀺𑀲𑀼𑀁 𑀯𑀺𑀢𑁆𑀢-𑀚𑀸𑀢𑀁 𑀲𑀗𑁆𑀕𑀳𑀺𑀢𑀁 𑀢𑀯;

𑀢𑀤𑀜𑁆𑀜𑀸 𑀘𑁄𑀧𑀓𑀭𑀡-𑀲𑀸𑀫𑀕𑁆𑀕𑀻 𑀦𑁂𑀯 𑀯𑀺𑀚𑁆𑀚𑀢𑁂.

𑀘𑀺𑀭𑀫𑁆𑀧𑀭𑀺𑀘𑀺𑀢𑀢𑁆𑀢𑁂𑀳𑀺, 𑀤𑀴𑁆𑀳𑀁 𑀲𑀸𑀭𑀼𑀴𑀪𑀢𑁆𑀢𑀺𑀳𑀺;

𑀯𑀺𑀦𑀸’𑀫𑁆𑀳𑁂𑀳𑀺 𑀯𑀺𑀲𑀼𑀁 𑀓𑁂𑀯𑀸’𑀦𑀼𑀕𑀦𑁆𑀢𑀸𑀭𑁄 𑀚𑀦𑀸𑀢𑀼𑀯𑀁.

𑀓𑀺𑀜𑁆𑀘𑀸𑀕𑀢𑀸𑀦𑀫𑀫𑁆𑀳𑀸𑀓𑀁, 𑀧𑀺𑀢𑀸 𑀢𑀼𑀬𑁆𑀳𑀁 𑀦𑀭𑀺𑀲𑁆𑀲𑀭𑁄;

𑀓𑀸𑀭𑁂𑀲𑁆𑀲𑀢𑀺 𑀇𑀤𑀁 𑀦𑀸𑀫, 𑀲𑀩𑁆𑀩𑀣𑀸 𑀦𑁂𑀯 𑀜𑀸𑀬𑀢𑁂.

𑀅𑀫𑁆𑀳𑀸𑀓𑀫𑀦𑁆𑀢𑀭𑀸𑀫𑀕𑁆𑀕𑁂 ¶ , 𑀲𑀗𑁆𑀔𑁄 𑀦𑀸𑀫 𑀘𑀫𑀽𑀧𑀢𑀺;

𑀫𑀳𑀩𑁆𑀩𑀮𑁄 𑀫𑀳𑀸𑀯𑀻𑀭𑁄, 𑀭𑀚𑁆𑀚𑀲𑀻𑀫𑀁 𑀢𑀫𑀸𑀯𑀲𑀁.

𑀧𑀘𑁆𑀘𑀢𑁆𑀣𑀺𑀢𑁂 𑀞𑀧𑁂𑀢𑁆𑀯𑀜𑁆𑀜𑁂, 𑀏𑀢𑁂 𑀓𑀢𑀺𑀧𑀬𑀸 𑀫𑀬𑀁;

𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀦𑀺𑀬𑀢-𑀫𑀸𑀲𑀗𑁆𑀓𑀻 𑀳𑀤𑀬𑀸 𑀪𑀼𑀲𑀁.

𑀅𑀭𑀼𑀡𑀼𑀕𑁆𑀕𑀫𑀯𑁂𑀮𑀸 𑀘, 𑀲𑀫𑀸𑀲𑀦𑁆𑀦𑀢𑀭𑀸𑀥𑀼𑀦𑀸;

𑀇𑀢𑀺 𑀪𑀻𑀢𑀺𑀁 𑀧𑀓𑀸𑀲𑁂𑀲𑀼𑀁, 𑀧𑀘𑁆𑀘𑁂𑀓𑀁 𑀳𑀤𑀬𑀲𑁆𑀲𑀺𑀢𑀁.

𑀦𑀺𑀲𑀫𑁆𑀫 𑀢𑁂𑀲𑀁 𑀯𑀘𑀦𑀁, 𑀯𑀺𑀥𑀸𑀬 𑀫𑀥𑀼𑀭𑀁 𑀲𑀺𑀢𑀁;

𑀯𑀻𑀢𑀲𑀗𑁆𑀓𑁄 𑀓𑀼𑀫𑀸𑀭𑁄 𑀲𑁄, 𑀫𑀼𑀔𑀸𑀦𑁂’𑀲𑀁 𑀯𑀺𑀮𑁄𑀓𑀺𑀬.

𑀘𑀭𑀺𑀢𑁆𑀯𑀸𑀧𑀺 𑀫𑀬𑀸 𑀲𑀤𑁆𑀥𑀺-𑀫𑁂𑀢𑁂’𑀳𑁄 𑀓𑀸𑀮𑀫𑁂𑀢𑁆𑀢𑀓𑀁;

𑀦 𑀚𑀸𑀦𑀺𑀁𑀲𑀼 𑀫𑀫𑀁 𑀲𑀩𑁆𑀩𑁂, 𑀬𑁂𑀲𑀜𑁆𑀳𑀺 𑀪𑀬𑀫𑀺𑀤𑀺𑀲𑀁.

𑀇𑀢𑀺 𑀯𑀢𑁆𑀯𑀸 𑀪𑀬𑀁 𑀢𑁂𑀲𑀁, 𑀯𑀺𑀦𑁄𑀤𑁂𑀢𑀼 𑀫𑀼𑀧𑀝𑁆𑀞𑀺𑀢𑀁;

𑀲𑀻𑀳𑀦𑀸𑀤𑀁 𑀢𑀤𑀸’𑀓𑀸𑀲𑀺, 𑀫𑀳𑀦𑁆𑀢𑀁 𑀲𑀻𑀳𑀯𑀺𑀓𑁆𑀓𑀫𑁄.

𑀢𑀺𑀝𑁆𑀞𑀦𑁆𑀢𑀼 𑀫𑀸𑀦𑀼𑀲𑀸 𑀲𑀩𑁆𑀩𑁂, 𑀫𑀬𑀺 𑀳𑀢𑁆𑀣𑀕𑀢𑀸𑀬𑀼𑀥𑁂;

𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄𑀧𑀺, 𑀓𑀼𑀧𑀺𑀢𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑀩𑀸𑀮𑁄𑀢𑀺 𑀫𑀁 𑀘𑀺𑀦𑁆𑀢𑀬 𑀢𑀁, 𑀚𑀸𑀢𑀸 𑀯𑁄 𑀓𑀼𑀫𑀢𑀻𑀤𑀺𑀲𑀻;

𑀧𑀭𑀺𑀓𑁆𑀔𑀻𑀬𑀢𑀺 𑀢𑁂 𑀚𑀸𑀡𑀸, 𑀦𑀯𑀬𑁄’𑀢𑀺 𑀦 𑀓𑀺𑀁 𑀲𑀼𑀢𑀁.

𑀅𑀚𑁆𑀚𑁂𑀯 𑀓𑀸𑀢𑀼𑀫𑁂𑀓𑁂𑀦, 𑀓𑀫𑁆𑀫𑀼𑀦𑀸 𑀘𑀺𑀦𑁆𑀢𑀺𑀢𑁂𑀦 𑀫𑁂;

𑀲𑀤𑁂𑀲𑀧𑀭 𑀤𑁂𑀲𑀝𑁆𑀞𑀸, 𑀪𑀬𑀪𑀢𑁆𑀢𑀻 𑀬𑀣𑀸𑀫𑀬𑀺.

𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀯𑁂𑀤𑀁, 𑀪𑀬𑀁 𑀢𑀼𑀫𑁆𑀳𑁂 𑀚𑀳𑀺𑀲𑁆𑀲𑀣;

𑀢𑀣𑀸 𑀭𑀢𑁆𑀢𑀺𑀬𑀫𑁂𑀢𑀸𑀬, 𑀯𑀺𑀪𑀸𑀢𑀸𑀫𑀬 𑀔𑀡𑁂𑀦 𑀫𑁂.

𑀉𑀦𑁆𑀦𑀢𑁂 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀺 𑀲𑀸𑀳𑀲𑀯𑀺𑀓𑁆𑀓𑀫𑁂;

𑀅𑀦𑀼𑀥𑀸𑀯𑀢𑀺 𑀫𑀁 𑀢𑀸𑀢, 𑀲𑁂𑀢𑁂𑀳𑀺 𑀬𑀤𑀺 𑀯𑁄 𑀪𑀬𑀁.

𑀧𑀼𑀭𑀢𑁄 𑀳𑁄𑀣 𑀢𑀼𑀫𑁆𑀳𑁂𑀳𑀺, 𑀯𑀢𑁆𑀯𑀸 𑀢𑁂 𑀕𑀳𑀺𑀢𑀸𑀬𑀼𑀥𑁄;

𑀲𑀸𑀳𑀲𑁂𑀓𑀭𑀲𑁄 𑀯𑀻𑀭𑁄, 𑀢𑀫𑁆𑀳𑀸 𑀦𑀺𑀓𑁆𑀔𑀫𑁆𑀫 𑀕𑀸𑀫𑀢𑁄.

𑀉𑀤𑀬𑀸’𑀘𑀮𑀲𑀻𑀲𑀝𑁆𑀞𑀁, 𑀚𑁂𑀢𑀼𑀫𑀸𑀤𑀺𑀘𑁆𑀘𑀫𑀡𑁆𑀟𑀮𑀁;

𑀅𑀧𑀭𑀁 𑀭𑀯𑀺 𑀩𑀺𑀫𑁆𑀩𑀁𑀯, 𑀧𑀘𑁆𑀙𑀺𑀫𑀸 𑀲𑀸 𑀫𑀼𑀔𑁄𑀤𑀺𑀢𑀁.

𑀢𑁂𑀚𑀲𑀸 𑀧𑀲𑀭𑀦𑁆𑀢𑁂𑀦, 𑀚𑀦𑀸𑀦𑀁 𑀧𑀯𑀺𑀓𑀸𑀲𑀬𑀁;

𑀦𑁂𑀢𑀫𑁆𑀩𑀼𑀚𑀯𑀦𑀁 𑀧𑀸𑀢𑁄, 𑀩𑀤𑀮𑀢𑁆𑀣𑀮𑀺𑀫𑀸𑀕𑀫𑀺.

𑀚𑀖𑀲𑀗𑁆𑀔𑀲𑁆𑀲𑀭𑁂𑀦𑀸’𑀣, 𑀲𑁂𑀦𑀸 𑀦𑀸𑀣𑁄 𑀧𑀩𑀼𑀚𑁆𑀛𑀺𑀬;

𑀲𑀜𑁆𑀚𑀸𑀢𑀲𑀫𑁆𑀪𑀫𑁄 𑀜𑀢𑁆𑀯𑀸, 𑀭𑀸𑀚𑀧𑀼𑀢𑁆𑀢𑀫𑀼𑀧𑀸𑀕𑀢𑀁.

𑀲𑀤𑁆𑀥𑀺𑀁 ¶ 𑀩𑀮𑁂𑀦 𑀫𑀳𑀢𑀸, 𑀧𑀥𑀼𑀕𑁆𑀕𑀫𑁆𑀫𑀓𑀢𑀸𑀤𑀭𑁄;

𑀧𑀡𑀸𑀫𑀫𑀼𑀘𑀺𑀢𑀁 𑀓𑀢𑁆𑀢𑀼-𑀫𑀸𑀦𑀢𑁄 𑀯𑀲𑀼𑀥𑀸𑀢𑀮𑁂.

𑀅𑀫𑁆𑀳𑀸𑀓𑀫𑁂𑀲𑀚𑀻𑀯𑀦𑁆𑀢𑁄, 𑀓𑀺𑀁 𑀦𑀸𑀫𑀢𑁆𑀣𑀁 𑀓𑀭𑀺𑀲𑁆𑀲𑀢𑀺;

𑀫𑀸𑀭𑁂𑀢𑀩𑁆𑀩𑁄’𑀥𑀼𑀦𑁂𑀯𑁂𑀢𑀺, 𑀧𑀲𑁆𑀲𑀦𑁆𑀢𑁂 𑀲𑀫𑀼𑀔𑀁 𑀪𑀝𑁂.

𑀦𑁂𑀯𑀸’𑀤𑀺𑀝𑁆𑀞𑀸𑀧𑀭𑀸𑀥𑀲𑁆𑀲, 𑀫𑀭𑀡𑀁 𑀧𑀼𑀭𑀺𑀲𑁄 𑀘𑀺𑀢𑀁;

𑀯𑀥𑁄 𑀯𑀺𑀭𑁄𑀥𑁂 𑀲𑀓𑁆𑀓𑀸’𑀢𑀺, 𑀇𑀗𑁆𑀕𑀺𑀢𑁂𑀦 𑀦𑀺𑀯𑀸𑀭𑀺𑀬.

𑀲𑁂𑀦𑀸𑀧𑀢𑀺𑀲𑁆𑀲 𑀲𑁄 𑀳𑀢𑁆𑀣𑀁, 𑀕𑀳𑁂𑀢𑁆𑀯𑀸 𑀲𑀻𑀳𑀲𑀦𑁆𑀦𑀺𑀪𑁄;

𑀪𑀸𑀲𑀦𑁆𑀢𑁄 𑀫𑀥𑀼𑀭𑀁 𑀯𑀸𑀘𑀁, 𑀢𑀲𑁆𑀲𑁂𑀯𑀸’𑀕𑀜𑁆𑀙𑀺 𑀫𑀦𑁆𑀤𑀺𑀭𑀁.

𑀅𑀣𑀲𑁆𑀲 𑀕𑀫𑀦𑀁 𑀭𑀜𑁆𑀜𑁄, 𑀪𑀯𑀺𑀢𑀩𑁆𑀩𑀫𑀚𑀸𑀦𑀢𑀸;

𑀲𑀭𑀽𑀧𑀁 𑀬𑀸𑀯 𑀚𑀸𑀦𑀸𑀫𑀺, 𑀢𑀸𑀯𑀲𑁆𑀲𑁂𑀢𑁂 𑀲𑀳𑀸𑀕𑀢𑀸.

𑀬𑀣𑀸 𑀦 𑀲𑀳𑀺𑀢𑀸 𑀳𑁄𑀦𑁆𑀢𑀺, 𑀞𑀧𑁂𑀢𑀩𑁆𑀩𑀸 𑀯𑀺𑀲𑀼𑀁 𑀯𑀺𑀲𑀼𑀁;

𑀓𑀼𑀫𑀸𑀭𑁄’𑀯 𑀫𑀫𑀸𑀕𑀸𑀭𑁂, 𑀯𑀲𑀢𑀽’𑀢𑀺 𑀯𑀺𑀘𑀺𑀦𑁆𑀢𑀺𑀬.

𑀢𑀣𑀸 𑀲𑁂𑀦𑀸𑀧𑀢𑀺 𑀓𑀢𑁆𑀯𑀸, 𑀯𑀜𑁆𑀘𑁂𑀢𑀼𑀁 𑀢𑀁 𑀫𑀳𑀸𑀫𑀢𑀺𑀁;

𑀤𑀲𑁆𑀲𑁂𑀢𑁆𑀯𑀸’𑀢𑀺 𑀣𑀻𑀲𑀓𑁆𑀓𑀸𑀭𑀁, 𑀭𑀜𑁆𑀜𑁄 𑀤𑀽𑀢𑁂 𑀲 𑀧𑁂𑀲𑀬𑀺.

𑀓𑀼𑀫𑀸𑀭𑁄’𑀣 𑀯𑀺𑀤𑀺𑀢𑁆𑀯𑀸𑀦, 𑀢𑁂𑀦 𑀢𑀁 𑀯𑀜𑁆𑀘𑀦𑀁 𑀓𑀢𑀁;

𑀓𑀢𑁆𑀢𑀩𑁆𑀩𑀫𑁂𑀢𑁆𑀣𑀸’𑀓𑀢𑁆𑀯𑀸𑀳, 𑀫𑀼𑀤𑀸𑀲𑀻𑀦𑁄 𑀪𑀯𑁂 𑀬𑀤𑀺.

𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀦𑀺𑀧𑁆𑀨𑀢𑁆𑀢𑀺, 𑀦 𑀫𑁂 𑀚𑀸𑀢𑀼 𑀪𑀯𑀺𑀲𑁆𑀲𑀢𑀺;

𑀅𑀬𑀁 𑀢𑀸𑀯𑀸’𑀥𑀼𑀦𑀸𑀯𑀲𑁆𑀲𑀁, 𑀫𑀸𑀭𑁂𑀢𑀩𑁆𑀩𑁄𑀢𑀺 𑀘𑀺𑀦𑁆𑀢𑀺𑀬.

𑀲𑀳𑀸𑀕𑀢𑀁 𑀧𑀬𑁄𑀚𑁂𑀢𑁆𑀯𑀸, 𑀖𑀸𑀢𑀸𑀧𑀬𑀺 𑀘𑀫𑀽𑀧𑀢𑀺𑀁;

𑀳𑀢𑁄 𑀲𑁂𑀦𑀸𑀥𑀺𑀦𑀸𑀣𑁄’𑀢𑀺, 𑀫𑀳𑀦𑁆𑀢𑀁 𑀔𑀼𑀪𑀺𑀢𑀁 𑀅𑀳𑀼.

𑀲𑁂𑀦𑀸𑀦𑀸𑀣𑀪𑀝𑁄 𑀏𑀓𑁄, 𑀲𑀼𑀢𑁆𑀯𑀸 𑀲𑁂𑀦𑀸𑀧𑀢𑀺𑀁 𑀳𑀢𑀁;

𑀫𑀸𑀭𑀡𑀁 𑀲𑀸𑀫𑀺𑀦𑁄 𑀫𑀬𑁆𑀳𑀁, 𑀓𑀺𑀁 𑀦𑀺𑀫𑀺𑀢𑁆𑀢𑀫𑀻𑀢𑀺 𑀩𑁆𑀭𑀯𑀺.

𑀦𑁂𑀢𑁆𑀢𑀺𑀁 𑀲𑀧𑀸𑀡𑀻 𑀲𑀳𑀲𑀸, 𑀓𑀼𑀫𑀸𑀭𑀁 𑀞𑀺𑀢𑀫𑁂𑀓𑀓𑀁;

𑀅𑀪𑀺𑀤𑀸𑀯𑀺 𑀲𑀲𑀸𑀫𑀺𑀲𑁆𑀲, 𑀧𑀭𑀺𑀘𑀢𑁆𑀢𑀢𑁆𑀢𑀚𑀻𑀯𑀺𑀦𑁄.

𑀓𑀼𑀫𑀸𑀭𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸, 𑀯𑁂𑀥𑀫𑀸𑀦𑁄 𑀪𑀬𑁂𑀦 𑀲𑁄;

𑀧𑀼𑀭𑁂 𑀞𑀸𑀢𑀼𑀫𑀲𑀓𑁆𑀓𑁄𑀦𑁆𑀢𑁄, 𑀧𑀸𑀤𑀫𑀽𑀮𑁂 𑀢𑀢𑁄 𑀲𑀬𑀺.

𑀕𑀡𑁆𑀳𑀣𑁂’𑀢𑀦𑁆𑀢𑀺𑀯𑀘𑀦𑀸-𑀓𑀼𑀫𑀸𑀭𑀲𑁆𑀲 ¶ 𑀧𑀼𑀭𑁂𑀢𑀭𑀁;

𑀢𑀲𑁆𑀲𑁂𑀯𑁂𑀓𑁄 𑀲𑀳𑀘𑀭𑁄, 𑀪𑀝𑀫𑁂𑀢𑀁 𑀯𑀺𑀖𑀸𑀢𑀬𑀺.

𑀦𑀺𑀬𑁄𑀕𑀁 𑀫𑁂 𑀯𑀺𑀦𑀸 𑀢𑁂𑀦, 𑀓𑀢𑀁 𑀓𑀫𑁆𑀫𑀁 𑀦 𑀬𑀼𑀚𑁆𑀚𑀢𑀺;

𑀇𑀢𑀺 𑀤𑀡𑁆𑀟𑀦𑀫𑁂𑀢𑀲𑁆𑀲, 𑀓𑀸𑀭𑀸𑀧𑁂𑀲𑀺𑀬𑀣𑁄𑀘𑀺𑀢𑀁.

𑀅𑀣 𑀢𑀁 𑀓𑀸𑀮𑀬𑀫𑁆𑀪𑀽𑀢-𑀲𑀗𑁆𑀔𑁄𑀪𑀫𑀢𑀺𑀪𑀺𑀁𑀲𑀦𑀁;

𑀪𑀫𑀼𑀓𑁆𑀔𑀺𑀧𑀦𑀫𑀢𑁆𑀢𑁂𑀦, 𑀭𑀸𑀚𑀧𑀼𑀢𑁆𑀢𑁄 𑀲𑀫𑀁 𑀦𑀬𑀺.

𑀯𑀻𑀭𑁄 𑀬𑀲𑁄𑀥𑀭𑀥𑀦𑁄 𑀥𑀺𑀢𑀺𑀫𑀸 𑀓𑀼𑀫𑀸𑀭𑁄;

𑀯𑀻𑀭𑁄𑀧𑀓𑀸𑀭𑀘𑀢𑀼𑀭𑁄 𑀯𑀭𑀓𑀺𑀢𑁆𑀢𑀺𑀲𑀸𑀭𑁄;

𑀲𑁂𑀦𑀺𑀦𑁆𑀤𑀲𑀜𑁆𑀘𑀺𑀢𑀫𑀦𑀧𑁆𑀧𑀥𑀦𑀁 𑀪𑀝𑀸𑀦𑀁;

𑀲𑀩𑁆𑀩𑀁 𑀯𑀺𑀲𑀚𑁆𑀚𑀬𑀺 𑀬𑀣𑀸𑀭𑀼𑀘𑀺𑀬𑀸 𑀕𑀳𑁂𑀢𑀼𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂