📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑀁 (𑀧𑀤𑀫𑀸𑀮𑀸)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀥𑀻𑀭𑁂𑀳𑀺 ¶ 𑀫𑀕𑁆𑀕𑀦𑀸𑀬𑁂𑀦, 𑀬𑁂𑀦 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀲𑀺𑀢𑀁 𑀥𑀫𑁆𑀫𑀫𑀺𑀥𑀜𑁆𑀜𑀸𑀬, 𑀜𑀸𑀬𑀢𑁂 𑀅𑀫𑀢𑀁 𑀧𑀤𑀁.

𑀢𑀁 𑀦𑀫𑀺𑀢𑁆𑀯𑀸 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀜𑁆𑀜𑀼𑀁 𑀮𑁄𑀓𑀦𑀸𑀬𑀓𑀁;

𑀫𑀳𑀸𑀓𑀸𑀭𑀼𑀡𑀺𑀓𑀁 𑀲𑁂𑀝𑁆𑀞𑀁, 𑀯𑀺𑀲𑀼𑀤𑁆𑀥𑀁 𑀲𑀼𑀤𑁆𑀥𑀺𑀤𑀸𑀬𑀓𑀁.

𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲 𑀧𑀽𑀚𑁂𑀢𑁆𑀯𑀸, 𑀲𑀼𑀤𑁆𑀥𑀁 𑀲𑀦𑁆𑀢𑀫𑀲𑀗𑁆𑀔𑀢𑀁;

𑀅𑀢𑀓𑁆𑀓𑀸𑀯𑀘𑀭𑀁 𑀲𑀼𑀝𑁆𑀞𑀼, 𑀯𑀺𑀪𑀢𑁆𑀢𑀁 𑀫𑀥𑀼𑀭𑀁 𑀲𑀺𑀯𑀁.

𑀲𑀗𑁆𑀖𑀲𑁆𑀲 𑀘’𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺-𑀯𑀺𑀲𑀼𑀤𑁆𑀥𑀕𑀼𑀡𑀚𑁄𑀢𑀺𑀦𑁄.

𑀦𑀫𑀲𑁆𑀲𑀦𑀸𑀤𑀺𑀧𑀼𑀜𑁆𑀜𑀲𑁆𑀲, 𑀓𑀢𑀲𑁆𑀲 𑀭𑀢𑀦𑀢𑁆𑀢𑀬𑁂;

𑀢𑁂𑀚𑀲𑀸𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄.

𑀮𑁄𑀓𑀦𑀻𑀢𑀺𑀯𑀺𑀬𑀢𑁆𑀢𑀲𑁆𑀲, 𑀲𑀢𑁆𑀣𑀼 𑀲𑀤𑁆𑀥𑀫𑁆𑀫𑀦𑀻𑀢𑀺𑀦𑁄;

𑀲𑀸𑀲𑀦𑀢𑁆𑀣𑀁 𑀧𑀯𑀓𑁆𑀔𑀸𑀫𑀺, 𑀲𑀤𑁆𑀤𑀦𑀻𑀢𑀺𑀫𑀦𑀸𑀓𑀼𑀮𑀁.

𑀆𑀲𑀯𑀓𑁆𑀔𑀬𑀮𑀸𑀪𑁂𑀦, 𑀳𑁄𑀢𑀺 𑀲𑀸𑀲𑀦𑀲𑀫𑁆𑀧𑀤𑀸;

𑀆𑀲𑀯𑀓𑁆𑀔𑀬𑀮𑀸𑀪𑁄 𑀘, 𑀲𑀘𑁆𑀘𑀸𑀥𑀺𑀕𑀫𑀳𑁂𑀢𑀼𑀓𑁄.

𑀲𑀘𑁆𑀘𑀸𑀥𑀺𑀕𑀫𑀦𑀁 ¶ 𑀢𑀜𑁆𑀘, 𑀧𑀝𑀺𑀧𑀢𑁆𑀢𑀺𑀲𑁆𑀲𑀺𑀢𑀁 𑀫𑀢𑀁;

𑀧𑀝𑀺𑀧𑀢𑁆𑀢𑀺 𑀘 𑀲𑀸 𑀓𑀸𑀫𑀁, 𑀧𑀭𑀺𑀬𑀢𑁆𑀢𑀺𑀧𑀭𑀸𑀬𑀡𑀸.

𑀧𑀭𑀺𑀬𑀢𑁆𑀢𑀸𑀪𑀺𑀬𑀼𑀢𑁆𑀢𑀸𑀦𑀁, 𑀯𑀺𑀤𑀺𑀢𑁆𑀯𑀸 𑀲𑀤𑁆𑀤𑀮𑀓𑁆𑀔𑀡𑀁;

𑀬𑀲𑁆𑀫𑀸 𑀦 𑀳𑁄𑀢𑀺 𑀲𑀫𑁆𑀫𑁄𑀳𑁄, 𑀅𑀓𑁆𑀔𑀭𑁂𑀲𑀼 𑀧𑀤𑁂𑀲𑀼 𑀘.

𑀬𑀲𑁆𑀫𑀸 𑀘𑀸𑀫𑁄𑀳𑀪𑀸𑀯𑁂𑀦, 𑀅𑀓𑁆𑀔𑀭𑁂𑀲𑀼 𑀧𑀤𑁂𑀲𑀼 𑀘;

𑀧𑀸𑀴𑀺𑀬𑀢𑁆𑀣𑀁 𑀯𑀺𑀚𑀸𑀦𑀦𑁆𑀢𑀺, 𑀯𑀺𑀜𑁆𑀜𑀽 𑀲𑀼𑀕𑀢𑀲𑀸𑀲𑀦𑁂.

𑀧𑀸𑀴𑀺𑀬𑀢𑁆𑀣𑀸𑀯𑀩𑁄𑀥𑁂𑀦, 𑀬𑁄𑀦𑀺𑀲𑁄 𑀲𑀢𑁆𑀣𑀼𑀲𑀸𑀲𑀦𑁂;

𑀲𑀧𑁆𑀧𑀜𑁆𑀜𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀧𑀝𑀺𑀧𑀢𑁆𑀢𑀺𑀫𑀢𑀦𑁆𑀤𑀺𑀓𑀸.

𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸, 𑀥𑀫𑁆𑀫𑀁 𑀮𑁄𑀓𑀼𑀢𑁆𑀢𑀭𑀁 𑀯𑀭𑀁;

𑀧𑀸𑀧𑀼𑀡𑀦𑁆𑀢𑀺 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸.

𑀢𑀲𑁆𑀫𑀸 𑀢𑀤𑀢𑁆𑀣𑀺𑀓𑀸 𑀲𑀼𑀤𑁆𑀥𑀁, 𑀦𑀬𑀁 𑀦𑀺𑀲𑁆𑀲𑀸𑀬 𑀯𑀺𑀜𑁆𑀜𑀼𑀦𑀁;

𑀪𑀜𑁆𑀜𑀫𑀸𑀦𑀁 𑀫𑀬𑀸 𑀲𑀤𑁆𑀤-𑀦𑀻𑀢𑀺𑀁 𑀕𑀡𑁆𑀳𑀦𑁆𑀢𑀼 𑀲𑀸𑀥𑀼𑀓𑀁.

𑀥𑀸𑀢𑀼 𑀥𑀸𑀢𑀽𑀳𑀺 𑀦𑀺𑀧𑁆𑀨𑀦𑁆𑀦-𑀭𑀽𑀧𑀸𑀦𑀺 𑀘 𑀲𑀮𑀓𑁆𑀔𑀡𑁄;

𑀲𑀦𑁆𑀥𑀺𑀦𑀸𑀫𑀸𑀤𑀺𑀪𑁂𑀤𑁄 𑀘, 𑀧𑀤𑀸𑀦𑀁 𑀢𑀼 𑀯𑀺𑀪𑀢𑁆𑀢𑀺 𑀘.

𑀧𑀸𑀴𑀺𑀦𑀬𑀸𑀤𑀬𑁄𑀘𑁆𑀘𑁂𑀯-𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀢𑁄;

𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀸𑀬, 𑀪𑀯𑀺𑀲𑁆𑀲𑀢𑀺 𑀯𑀺𑀪𑀸𑀯𑀦𑀸.

𑁧. 𑀲𑀯𑀺𑀓𑀭𑀡𑀸𑀔𑁆𑀬𑀸𑀢𑀯𑀺𑀪𑀸𑀕

𑀢𑀢𑁆𑀣 𑀥𑀸𑀢𑀽𑀢𑀺 𑀓𑁂𑀦𑀝𑁆𑀞𑁂𑀦 𑀥𑀸𑀢𑀼? 𑀲𑀓𑀢𑁆𑀣𑀫𑁆𑀧𑀺 𑀥𑀸𑀭𑁂𑀢𑀻𑀢𑀺 𑀥𑀸𑀢𑀼, 𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑀢𑁄 𑀧𑀭𑀢𑁆𑀣𑀫𑁆𑀧𑀺 𑀥𑀸𑀭𑁂𑀢𑀻𑀢𑀺 𑀥𑀸𑀢𑀼, 𑀯𑀻𑀲𑀢𑀺𑀬𑀸 𑀉𑀧𑀲𑀕𑁆𑀕𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀲𑀕𑁆𑀕𑁂𑀦 𑀅𑀢𑁆𑀣𑀯𑀺𑀲𑁂𑀲𑀓𑀸𑀭𑀡𑁂𑀦 𑀧𑀝𑀺𑀩𑀤𑁆𑀥𑀸 𑀅𑀢𑁆𑀣𑀯𑀺𑀲𑁂𑀲𑀫𑁆𑀧𑀺 𑀥𑀸𑀭𑁂𑀢𑀻𑀢𑀺 𑀥𑀸𑀢𑀼, ‘‘𑀅𑀬𑀁 𑀇𑀫𑀺𑀲𑁆𑀲𑀸 𑀅𑀢𑁆𑀣𑁄, 𑀅𑀬𑀫𑀺𑀢𑁄 𑀧𑀘𑁆𑀘𑀬𑁄 𑀧𑀭𑁄’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀧𑀡𑁆𑀟𑀺𑀢𑁂𑀳𑀺 𑀥𑀸𑀭𑀺𑀬𑀢𑀺 𑀏𑀲𑀸𑀢𑀺𑀧𑀺 𑀥𑀸𑀢𑀼, 𑀯𑀺𑀤𑀳𑀦𑁆𑀢𑀺 𑀯𑀺𑀤𑀼𑀦𑁄 𑀏𑀢𑀸𑀬 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺𑀁 𑀅𑀬𑀮𑁄𑀳𑀸𑀤𑀺𑀫𑀬𑀁 ¶ 𑀅𑀬𑀮𑁄𑀳𑀸𑀤𑀺𑀥𑀸𑀢𑀽𑀳𑀺 𑀯𑀺𑀬𑀸𑀢𑀺𑀧𑀺 𑀥𑀸𑀢𑀼. 𑀏𑀯𑀁 𑀢𑀸𑀯 𑀥𑀸𑀢𑀼𑀲𑀤𑁆𑀤𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀥𑀸𑀢𑀼𑀲𑀤𑁆𑀤𑁄 𑀚𑀺𑀦𑀫𑀢𑁂, 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀦𑁂 𑀫𑀢𑁄;

𑀲𑀢𑁆𑀣𑁂 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀲𑁆𑀫𑀺𑀁, 𑀓𑀘𑁆𑀘𑀸𑀬𑀦𑀫𑀢𑁂 𑀤𑁆𑀯𑀺𑀲𑀼.

𑀅𑀣 𑀯𑀸 𑀚𑀺𑀦𑀫𑀢𑁂 ‘‘𑀢𑀢𑁄 𑀕𑁄𑀢𑀫𑀺𑀥𑀸𑀢𑀽𑀦𑀻’’𑀢𑀺 𑀏𑀢𑁆𑀣 𑀥𑀸𑀢𑀼𑀲𑀤𑁆𑀤𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂 𑀯𑀢𑁆𑀢𑀢𑀺 ‘‘𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘𑀸’’𑀢𑀺 𑀏𑀢𑁆𑀣 𑀧𑀩𑁆𑀩𑀢𑀲𑀤𑁆𑀤𑁄 𑀯𑀺𑀬, 𑀦 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 ‘‘𑀅𑀝𑁆𑀞𑀺𑀯𑀸𑀘𑀓𑀢𑁆𑀢𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄’’𑀢𑀺 𑀅𑀝𑁆𑀞𑀺𑀯𑀸𑀘𑀓𑀢𑁆𑀢𑁂𑀧𑀺 ‘‘𑀥𑀸𑀢𑀼𑀬𑁄’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀤𑀲𑁆𑀲𑀦𑀢𑁄. 𑀪𑀽𑀯𑀸𑀤𑀬𑁄 𑀲𑀤𑁆𑀤𑀸 𑀥𑀸𑀢𑀯𑁄. 𑀲𑁂𑀬𑁆𑀬𑀣𑀺𑀤𑀁? 𑀪𑀽 𑀇 𑀓𑀼 𑀓𑁂 𑀢𑀓𑁆𑀓 𑀢𑀓 𑀢𑀓𑀺 𑀲𑀼𑀓𑀇𑀘𑁆𑀘𑀸𑀤𑀬𑁄. 𑀕𑀡𑀢𑁄 𑀢𑁂 𑀅𑀝𑁆𑀞𑀯𑀺𑀥𑀸 𑀪𑀽𑀯𑀸𑀤𑀺𑀕𑀡𑁄 𑀭𑀼𑀥𑀸𑀤𑀺𑀕𑀡𑁄 𑀤𑀺𑀯𑀸𑀤𑀺𑀕𑀡𑁄 𑀲𑁆𑀯𑀸𑀤𑀺𑀕𑀡𑁄 𑀓𑀺𑀬𑀸𑀤𑀺𑀕𑀡𑁄 𑀕𑀳𑀸𑀤𑀺𑀕𑀡𑁄 𑀢𑀦𑀸𑀤𑀺𑀕𑀡𑁄 𑀘𑀼𑀭𑀸𑀤𑀺𑀕𑀡𑁄 𑀘𑀸𑀢𑀺. 𑀇𑀤𑀸𑀦𑀺 𑀢𑁂𑀲𑀁 𑀯𑀺𑀓𑀭𑀡𑀲𑀜𑁆𑀜𑀺𑀢𑁂 𑀧𑀘𑁆𑀘𑀬𑁂 𑀤𑀲𑁆𑀲𑁂𑀲𑁆𑀲𑀸𑀫. 𑀅𑀦𑁂𑀓𑀯𑀺𑀥𑀸 𑀳𑀺 𑀧𑀘𑁆𑀘𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀲𑀼 𑀦𑀸𑀫𑀦𑀸𑀫 𑀓𑀺𑀢𑀦𑀸𑀫 𑀲𑀫𑀸𑀲𑀦𑀸𑀫 𑀢𑀤𑁆𑀥𑀺𑀢𑀦𑀸𑀫𑀸𑀔𑁆𑀬𑀸𑀢𑁂𑀲𑀼 𑀧𑀯𑀢𑁆𑀢𑀦𑀢𑁄. 𑀲𑀗𑁆𑀔𑁂𑀧𑀢𑁄 𑀧𑀦 𑀤𑀼𑀯𑀺𑀥𑀸𑀯 𑀦𑀸𑀫𑀧𑀘𑁆𑀘𑀬𑁄 𑀆𑀔𑁆𑀬𑀸𑀢𑀧𑀘𑁆𑀘𑀬𑁄 𑀘𑀸𑀢𑀺. 𑀢𑀢𑁆𑀭𑀸𑀧𑀺 𑀆𑀔𑁆𑀬𑀸𑀢𑀧𑀘𑁆𑀘𑀬𑀸 𑀤𑀼𑀯𑀺𑀥𑀸 𑀯𑀺𑀓𑀭𑀡𑀧𑀘𑁆𑀘𑀬𑀦𑁄𑀯𑀺𑀓𑀭𑀡𑀧𑀘𑁆𑀘𑀬𑀯𑀲𑁂𑀦. 𑀢𑀢𑁆𑀣 𑀯𑀺𑀓𑀭𑀡𑀧𑀘𑁆𑀘𑀬𑁄 𑀅𑀓𑀸𑀭𑀸𑀤𑀺𑀲𑀢𑁆𑀢𑀭𑀲𑀯𑀺𑀥𑁄 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦𑁆𑀦𑀭𑀲𑀯𑀺𑀥𑁄 𑀘. 𑀦𑁄𑀯𑀺𑀓𑀭𑀡𑀧𑀘𑁆𑀘𑀬𑁄 𑀧𑀦 𑀔 𑀙 𑀲𑀸𑀤𑀺𑀦𑁂𑀓𑀯𑀺𑀥𑁄. 𑀬𑁂 𑀭𑀽𑀧𑀦𑀺𑀧𑁆𑀨𑀢𑁆𑀢𑀺𑀬𑀸 𑀉𑀧𑀓𑀸𑀭𑀓𑀸 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀚𑁄𑀢𑀓𑀸 𑀯𑀸 𑀅𑀚𑁄𑀢𑀓𑀸 𑀯𑀸 𑀮𑁄𑀧𑀦𑀻𑀬𑀸 𑀯𑀸 𑀅𑀮𑁄𑀧𑀦𑀻𑀬𑀸 𑀯𑀸, 𑀢𑁂 𑀲𑀤𑁆𑀤𑀸 𑀧𑀘𑁆𑀘𑀬𑀸.

𑀧𑀝𑀺𑀘𑁆𑀘 𑀓𑀸𑀭𑀡𑀁 𑀢𑀁 𑀢𑀁, 𑀏𑀦𑁆𑀢𑀻𑀢𑀺 𑀧𑀘𑁆𑀘𑀬𑀸𑀣 𑀯𑀸;

𑀧𑀝𑀺𑀘𑁆𑀘 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺, 𑀇𑀢𑁄 𑀏𑀢𑀻𑀢𑀺 𑀧𑀘𑁆𑀘𑀬𑀸.

𑀦𑀸𑀫𑀺𑀓𑀧𑁆𑀧𑀘𑁆𑀘𑀬𑀸𑀦𑀁 ¶ 𑀬𑁄, 𑀯𑀺𑀪𑀸𑀕𑁄 𑀆𑀯𑀺 𑀳𑁂𑀲𑁆𑀲𑀢𑀺;

𑀦𑀸𑀫𑀓𑀧𑁆𑀧𑁂 𑀬𑀢𑁄 𑀢𑀲𑁆𑀫𑀸, 𑀦 𑀢𑀁 𑀯𑀺𑀢𑁆𑀣𑀸𑀭𑀬𑀸𑀫𑀲𑁂.

𑀬𑁄 𑀦𑁄𑀯𑀺𑀓𑀭𑀡𑀸𑀦𑀁 𑀢𑀼, 𑀧𑀘𑁆𑀘𑀬𑀸𑀦𑀁 𑀯𑀺𑀪𑀸𑀕𑀢𑁄;

𑀲𑁄 𑀧𑀦𑀸𑀔𑁆𑀬𑀸𑀢𑀓𑀧𑁆𑀧𑀫𑁆𑀳𑀺, 𑀯𑀺𑀢𑁆𑀣𑀸𑀭𑁂𑀦𑀸’𑀕𑀫𑀺𑀲𑁆𑀲𑀢𑀻𑀢𑀺.

𑀇𑀘𑁆𑀘𑀸𑀦𑁂𑀓𑀯𑀺𑀥𑁂𑀲𑀼 𑀧𑀘𑁆𑀘𑀬𑁂𑀲𑀼 ‘‘𑀯𑀺𑀓𑀭𑀡𑀧𑀘𑁆𑀘𑀬𑀸 𑀦𑀸𑀫 𑀇𑀫𑁂’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀓𑀣𑀁? 𑀪𑀽𑀯𑀸𑀤𑀺𑀕𑀡𑀢𑁄 𑀅𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺, 𑀭𑀼𑀥𑀸𑀤𑀺𑀕𑀡𑀢𑁄 𑀅𑀓𑀸𑀭𑀺𑀯𑀡𑁆𑀡𑁂𑀓𑀸𑀭𑁄𑀓𑀸𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺, 𑀧𑀼𑀩𑁆𑀩𑀫𑀚𑁆𑀛𑀝𑁆𑀞𑀸𑀦𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘, 𑀤𑀺𑀯𑀸𑀤𑀺𑀕𑀡𑀢𑁄 𑀬𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺, 𑀲𑁆𑀯𑀸𑀤𑀺𑀕𑀡𑀢𑁄 𑀡𑀼 𑀡𑀸 𑀉𑀡𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺, 𑀓𑀺𑀬𑀸𑀤𑀺𑀕𑀡𑀢𑁄 𑀦𑀸𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺, 𑀕𑀳𑀸𑀤𑀺𑀕𑀡𑀢𑁄 𑀧𑁆𑀧 𑀡𑁆𑀳𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺, 𑀢𑀦𑀸𑀤𑀺𑀕𑀡𑀢𑁄 𑀑 𑀬𑀺𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺, 𑀘𑀼𑀭𑀸𑀤𑀺𑀕𑀡𑀢𑁄 𑀡𑁂 𑀡𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺.

𑀅𑀓𑀸𑀭𑁄 𑀘 𑀇𑀯𑀡𑁆𑀡𑁄 𑀘, 𑀏 𑀑𑀓𑀸𑀭𑀸 𑀘 𑀬𑁄 𑀢𑀣𑀸;

𑀡𑀼 𑀡𑀸 𑀉𑀡𑀸 𑀘 𑀦𑀸 𑀧𑁆𑀧 𑀡𑁆𑀳𑀸-𑀬𑀺𑀭𑀸 𑀡𑁂 𑀡𑀬𑀧𑀘𑁆𑀘𑀬𑀸.

𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦, 𑀏𑀯𑀁 𑀧𑀦𑁆𑀦𑀭𑀲𑁂’𑀭𑀺𑀢𑀸;

𑀯𑀺𑀓𑀭𑀡𑀯𑁆𑀳𑀬𑀸 𑀏𑀢𑁂, 𑀧𑀘𑁆𑀘𑀬𑀸𑀢𑀺 𑀯𑀺𑀪𑀸𑀯𑀬𑁂.

𑀬𑁂 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑁂𑀳𑀺 𑀯𑀺𑀓𑀭𑀡𑀧𑀘𑁆𑀘𑀬𑁂𑀳𑀺 𑀢𑀤𑀜𑁆𑀜𑁂𑀳𑀺 𑀘 𑀲𑀧𑁆𑀧𑀘𑁆𑀘𑀬𑀸 𑀅𑀝𑁆𑀞𑀯𑀺𑀥𑀸 𑀥𑀸𑀢𑀼𑀕𑀡𑀸 𑀲𑀼𑀢𑁆𑀢𑀦𑁆𑀢𑁂𑀲𑀼 𑀩𑀳𑀽𑀧𑀓𑀸𑀭𑀸, 𑀢𑁂𑀲𑁆𑀯𑀸𑀬𑀁 𑀪𑀽𑀯𑀸𑀤𑀺𑀕𑀡𑁄. 𑀪𑀽 𑀲𑀢𑁆𑀢𑀸𑀬𑀁, 𑀪𑀽𑀥𑀸𑀢𑀼 𑀯𑀺𑀚𑁆𑀚𑀫𑀸𑀦𑀢𑀸𑀬𑀁 𑀯𑀢𑁆𑀢𑀢𑀺. 𑀲𑀓𑀫𑁆𑀫𑀺𑀓𑀸𑀓𑀫𑁆𑀫𑀺𑀓𑀸𑀲𑀼 𑀥𑀸𑀢𑀽𑀲𑀼 𑀅𑀬𑀁 𑀅𑀓𑀫𑁆𑀫𑀺𑀓𑀸 𑀥𑀸𑀢𑀼, 𑀦 𑀧𑀦 ‘‘𑀥𑀫𑁆𑀫𑀪𑀽𑀢𑁄’’𑀢𑀺𑀆𑀤𑀻𑀲𑀼 𑀧𑀢𑁆𑀢𑀺𑀅𑀢𑁆𑀣𑀯𑀸𑀘𑀺𑀓𑀸 𑀅𑀧𑀭𑀸 𑀪𑀽𑀥𑀸𑀢𑀼 𑀯𑀺𑀬 𑀲𑀓𑀫𑁆𑀫𑀺𑀓𑀸. 𑀏𑀲𑀸 𑀳𑀺 𑀧𑀭𑀺𑀅𑀪𑀺𑀆𑀤𑀻𑀳𑀺 𑀉𑀧𑀲𑀕𑁆𑀕𑁂𑀳𑀺 𑀬𑀼𑀢𑁆𑀢𑀸𑀬𑁂𑀯 𑀲𑀓𑀫𑁆𑀫𑀺𑀓𑀸 𑀪𑀯𑀢𑀺, 𑀦 𑀉𑀧 𑀧𑀭𑀸 𑀧𑀸𑀢𑀼𑀆𑀤𑀻𑀳𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀳𑀺 𑀬𑀼𑀢𑁆𑀢𑀸𑀧𑀺. 𑀅𑀢𑁄 𑀇𑀫𑀺𑀲𑁆𑀲𑀸 𑀲𑀺𑀤𑁆𑀥𑀸𑀦𑀺 𑀭𑀽𑀧𑀸𑀦𑀺 𑀤𑁆𑀯𑀺𑀥𑀸 𑀜𑁂𑀬𑁆𑀬𑀸𑀦𑀺 𑀅𑀓𑀫𑁆𑀫𑀓𑀧𑀤𑀸𑀦𑀺 𑀲𑀓𑀫𑁆𑀫𑀓𑀧𑀤𑀸𑀦𑀺 𑀘𑀸𑀢𑀺.

𑀲𑀼𑀤𑁆𑀥𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀦𑀺𑀤𑁆𑀤𑁂𑀲

𑀢𑀢𑁆𑀭 ¶ 𑀪𑀯𑀢𑀺 𑀉𑀩𑁆𑀪𑀯𑀢𑀺 𑀲𑀫𑀼𑀩𑁆𑀪𑀯𑀢𑀺 𑀧𑀪𑀯𑀢𑀺 𑀧𑀭𑀸𑀪𑀯𑀢𑀺 𑀲𑀫𑁆𑀪𑀯𑀢𑀺 𑀯𑀺𑀪𑀯𑀢𑀺, 𑀪𑁄𑀢𑀺 𑀲𑀫𑁆𑀪𑁄𑀢𑀺 𑀯𑀺𑀪𑁄𑀢𑀺 𑀧𑀸𑀢𑀼𑀪𑀯𑀢𑀺 𑀧𑀸𑀢𑀼𑀩𑁆𑀪𑀯𑀢𑀺 𑀧𑀸𑀢𑀼𑀪𑁄𑀢𑀺, 𑀇𑀫𑀸𑀦𑀺 𑀅𑀓𑀫𑁆𑀫𑀓𑀧𑀤𑀸𑀦𑀺. 𑀏𑀢𑁆𑀣 𑀧𑀸𑀢𑀼𑀇𑀢𑀺 𑀦𑀺𑀧𑀸𑀢𑁄, 𑀲𑁄 ‘‘𑀆𑀯𑀺𑀪𑀯𑀢𑀺 𑀢𑀺𑀭𑁄𑀪𑀯𑀢𑀻’’𑀢𑀺𑀆𑀤𑀻𑀲𑀼 𑀆𑀯𑀺 𑀢𑀺𑀭𑁄𑀦𑀺𑀧𑀸𑀢𑀸 𑀯𑀺𑀬 𑀪𑀽𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀸𑀔𑁆𑀬𑀸𑀢𑀲𑀤𑁆𑀤𑀲𑁆𑀲 𑀦𑁂𑀯 𑀯𑀺𑀲𑁂𑀲𑀓𑀭𑁄, 𑀦 𑀘 𑀲𑀓𑀫𑁆𑀫𑀓𑀢𑁆𑀢𑀲𑀸𑀥𑀓𑁄. 𑀉𑀇𑀘𑁆𑀘𑀸𑀤𑀬𑁄 𑀉𑀧𑀲𑀕𑁆𑀕𑀸, 𑀢𑁂 𑀧𑀦 𑀯𑀺𑀲𑁂𑀲𑀓𑀭𑀸, 𑀦 𑀲𑀓𑀫𑁆𑀫𑀓𑀢𑁆𑀢𑀲𑀸𑀥𑀓𑀸. 𑀬𑁂𑀲𑀫𑀢𑁆𑀣𑁄 𑀓𑀫𑁆𑀫𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑁄 𑀦 𑀳𑁄𑀢𑀺, 𑀢𑀸𑀦𑀺 𑀧𑀤𑀸𑀦𑀺 𑀅𑀓𑀫𑁆𑀫𑀓𑀸𑀦𑀺. 𑀅𑀓𑀫𑁆𑀫𑀓𑀧𑀤𑀸𑀦𑀁 𑀬𑀣𑀸𑀭𑀳𑀁 𑀲𑀓𑀫𑁆𑀫𑀓𑀸𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄. 𑀧𑀭𑀺𑀪𑁄𑀢𑀺 𑀧𑀭𑀺𑀪𑀯𑀢𑀺, 𑀅𑀪𑀺𑀪𑁄𑀢𑀺 𑀅𑀪𑀺𑀪𑀯𑀢𑀺, 𑀅𑀥𑀺𑀪𑁄𑀢𑀺 𑀅𑀥𑀺𑀪𑀯𑀢𑀺, 𑀅𑀢𑀺𑀪𑁄𑀢𑀺 𑀅𑀢𑀺𑀪𑀯𑀢𑀺, 𑀅𑀦𑀼𑀪𑁄𑀢𑀺 𑀅𑀦𑀼𑀪𑀯𑀢𑀺, 𑀲𑀫𑀦𑀼𑀪𑁄𑀢𑀺 𑀲𑀫𑀦𑀼𑀪𑀯𑀢𑀺, 𑀅𑀪𑀺𑀲𑀫𑁆𑀪𑁄𑀢𑀺 𑀅𑀪𑀺𑀲𑀫𑁆𑀪𑀯𑀢𑀺, 𑀇𑀫𑀸𑀦𑀺 𑀲𑀓𑀫𑁆𑀫𑀓𑀧𑀤𑀸𑀦𑀺. 𑀏𑀢𑁆𑀣 𑀧𑀭𑀺𑀇𑀘𑁆𑀘𑀸𑀤𑀬𑁄 𑀉𑀧𑀲𑀕𑁆𑀕𑀸, 𑀢𑁂 𑀪𑀽𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀸𑀔𑁆𑀬𑀸𑀢𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀓𑀭𑀸 𑀘𑁂𑀯 𑀲𑀓𑀫𑁆𑀫𑀓𑀢𑁆𑀢𑀲𑀸𑀥𑀓𑀸 𑀘. 𑀬𑁂𑀲𑀫𑀢𑁆𑀣𑁄 𑀓𑀫𑁆𑀫𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑁄, 𑀢𑀸𑀦𑀺 𑀧𑀤𑀸𑀦𑀺 𑀲𑀓𑀫𑁆𑀫𑀓𑀸𑀦𑀺. 𑀲𑀓𑀫𑁆𑀫𑀓𑀧𑀤𑀸𑀦𑀁 𑀲𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄, 𑀓𑁆𑀯𑀘𑀺 𑀅𑀓𑀫𑁆𑀫𑀓𑀯𑀲𑁂𑀦𑀧𑀺. 𑀏𑀯𑀁 𑀲𑀼𑀤𑁆𑀥𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀉𑀤𑁆𑀤𑁂𑀲𑁄𑀬𑀁.

𑀢𑀢𑁆𑀭 𑀪𑀯𑀢𑀻𑀢𑀺 𑀳𑁄𑀢𑀺 𑀯𑀺𑀚𑁆𑀚𑀢𑀺 𑀧𑀜𑁆𑀜𑀸𑀬𑀢𑀺 𑀲𑀭𑀽𑀧𑀁 𑀮𑀪𑀢𑀺. 𑀉𑀩𑁆𑀪𑀯𑀢𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀲𑀭𑀽𑀧𑀁 𑀮𑀪𑀢𑀺. 𑀲𑀫𑀼𑀩𑁆𑀪𑀯𑀢𑀻𑀢𑀺 𑀲𑀫𑀼𑀧𑁆𑀧𑀚𑁆𑀚𑀢𑀺 𑀲𑀭𑀽𑀧𑀁 𑀮𑀪𑀢𑀺. 𑀧𑀪𑀯𑀢𑀻𑀢𑀺 𑀳𑁄𑀢𑀺 𑀲𑀫𑁆𑀪𑀯𑀢𑀺. 𑀅𑀣 𑀯𑀸 𑀧𑀪𑀯𑀢𑀻𑀢𑀺 𑀬𑀢𑁄 𑀓𑀼𑀢𑁄𑀘𑀺 𑀲𑀦𑁆𑀤𑀢𑀺, 𑀦 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀅𑀯𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀺, 𑀢𑀁 𑀢𑀁 𑀞𑀸𑀦𑀁 𑀯𑀺𑀲𑀭𑀢𑀺. 𑀧𑀭𑀸𑀪𑀯𑀢𑀻𑀢𑀺 𑀧𑀭𑀸𑀪𑀯𑁄 𑀳𑁄𑀢𑀺 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀅𑀯𑀼𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀲𑀫𑁆𑀪𑀯𑀢𑀻𑀢𑀺 𑀲𑀼𑀝𑁆𑀞𑀼 𑀪𑀯𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀯𑀺𑀪𑀯𑀢𑀻𑀢𑀺 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀯𑀺𑀧𑀚𑁆𑀚𑀢𑀺, 𑀯𑀺𑀲𑁂𑀲𑀢𑁄 𑀯𑀸 𑀪𑀯𑀢𑀺 𑀲𑀫𑁆𑀧𑀚𑁆𑀚𑀢𑀺. 𑀪𑁄𑀢𑀺 𑀲𑀫𑁆𑀪𑁄𑀢𑀺 𑀯𑀺𑀪𑁄𑀢𑀻𑀢𑀺 𑀇𑀫𑀸𑀦𑀺 ‘‘𑀪𑀯𑀢𑀺 ¶ 𑀲𑀫𑁆𑀪𑀯𑀢𑀺 𑀯𑀺𑀪𑀯𑀢𑀻’’𑀢𑀺 𑀇𑀫𑁂𑀳𑀺 𑀬𑀣𑀸𑀓𑁆𑀓𑀫𑀁 𑀲𑀫𑀸𑀦𑀦𑀺𑀤𑁆𑀤𑁂𑀲𑀸𑀦𑀺. 𑀧𑀸𑀢𑀼𑀪𑀯𑀢𑀻𑀢𑀺 𑀧𑀓𑀸𑀲𑀢𑀺 𑀤𑀺𑀲𑁆𑀲𑀢𑀺 𑀧𑀜𑁆𑀜𑀸𑀬𑀢𑀺 𑀧𑀸𑀓𑀝𑀁 𑀳𑁄𑀢𑀺. 𑀧𑀸𑀢𑀼𑀩𑁆𑀪𑀯𑀢𑀺 𑀧𑀸𑀢𑀼𑀪𑁄𑀢𑀻𑀢𑀺 𑀇𑀫𑀸𑀦𑀺 ‘‘𑀧𑀸𑀢𑀼𑀪𑀯𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀦𑀺𑀤𑁆𑀤𑁂𑀲𑀸𑀦𑀺. 𑀏𑀯𑀁 𑀅𑀓𑀫𑁆𑀫𑀓𑀧𑀤𑀸𑀦𑀁 𑀬𑀣𑀸𑀭𑀳𑀁 𑀲𑀓𑀫𑁆𑀫𑀓𑀸𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀅𑀜𑁆𑀜𑁂𑀲𑀫𑁆𑀧𑀺 𑀅𑀓𑀫𑁆𑀫𑀓𑀧𑀤𑀸𑀦𑀁.

𑀧𑀭𑀺𑀪𑁄𑀢𑀺𑀤𑀼𑀓𑀸𑀤𑀻𑀲𑀼 𑀧𑀦 𑀲𑀢𑁆𑀢𑀲𑀼 𑀤𑀼𑀓𑁂𑀲𑀼 𑀬𑀣𑀸𑀓𑁆𑀓𑀫𑀁 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀲𑀫𑀸𑀦𑀢𑁆𑀣𑀸𑀦𑀺, 𑀢𑀲𑁆𑀫𑀸 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺𑀬𑁂𑀯 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀲𑁆𑀲𑀸𑀫. 𑀢𑀢𑁆𑀭 𑀧𑀭𑀺𑀪𑁄𑀢𑀺 𑀧𑀭𑀺𑀪𑀯𑀢𑀻𑀢𑀺 𑀧𑀭𑀁 𑀳𑀺𑀁𑀲𑀢𑀺 𑀧𑀻𑀴𑁂𑀢𑀺, 𑀅𑀣 𑀯𑀸 𑀳𑀻𑀴𑁂𑀢𑀺 𑀅𑀯𑀚𑀸𑀦𑀸𑀢𑀺. 𑀅𑀪𑀺𑀪𑁄𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀁 𑀅𑀚𑁆𑀛𑁄𑀢𑁆𑀣𑀭𑀢𑀺 𑀫𑀤𑁆𑀤𑀢𑀺. 𑀅𑀥𑀺𑀪𑁄𑀢𑀺 𑀅𑀥𑀺𑀪𑀯𑀢𑀻𑀢𑀺 𑀧𑀭𑀁 𑀅𑀪𑀺𑀫𑀤𑁆𑀤𑀺𑀢𑁆𑀯𑀸 𑀪𑀯𑀢𑀺 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑀸𑀧𑁂𑀢𑀺. 𑀅𑀢𑀺𑀪𑁄𑀢𑀺 𑀅𑀢𑀺𑀪𑀯𑀢𑀻𑀢𑀺 𑀧𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀯𑀢𑀺. 𑀅𑀦𑀼𑀪𑁄𑀢𑀺 𑀅𑀦𑀼𑀪𑀯𑀢𑀻𑀢𑀺 𑀲𑀼𑀔𑀤𑀼𑀓𑁆𑀔𑀁 𑀯𑁂𑀤𑁂𑀢𑀺 𑀧𑀭𑀺𑀪𑀼𑀜𑁆𑀚𑀢𑀺 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀺. 𑀲𑀫𑀦𑀼𑀪𑁄𑀢𑀺 𑀲𑀫𑀦𑀼𑀪𑀯𑀢𑀻𑀢𑀺 𑀲𑀼𑀔𑀤𑀼𑀓𑁆𑀔𑀁 𑀲𑀼𑀝𑁆𑀞𑀼 𑀯𑁂𑀤𑁂𑀢𑀺 𑀲𑀼𑀝𑁆𑀞𑀼 𑀧𑀭𑀺𑀪𑀼𑀜𑁆𑀚𑀢𑀺 𑀲𑀼𑀝𑁆𑀞𑀼 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀺. 𑀅𑀪𑀺𑀲𑀫𑁆𑀪𑁄𑀢𑀺 𑀅𑀪𑀺𑀲𑀫𑁆𑀪𑀯𑀢𑀻𑀢𑀺 𑀧𑀭𑀁 𑀅𑀚𑁆𑀛𑁄𑀢𑁆𑀣𑀭𑀢𑀺 𑀫𑀤𑁆𑀤𑀢𑀺. 𑀏𑀯𑀁 𑀲𑀓𑀫𑁆𑀫𑀓𑀧𑀤𑀸𑀦𑀁 𑀲𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀢𑁆𑀣𑀘𑀺 𑀧𑀦 𑀕𑀘𑁆𑀙𑀢𑀻𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀅𑀓𑀫𑁆𑀫𑀓𑀯𑀲𑁂𑀦𑀧𑀺. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀅𑀜𑁆𑀜𑁂𑀲𑀁 𑀲𑀓𑀫𑁆𑀫𑀓𑀧𑀤𑀸𑀦𑀁.

𑀅𑀧𑀘𑁆𑀘𑀬𑁄 𑀧𑀭𑁄 𑀳𑁄𑀢𑀺, 𑀪𑀽𑀯𑀸𑀤𑀺𑀕𑀡𑀢𑁄 𑀲𑀢𑀺;

𑀲𑀼𑀤𑁆𑀥𑀓𑀢𑁆𑀢𑀼𑀓𑁆𑀭𑀺𑀬𑀸𑀔𑁆𑀬𑀸𑀦𑁂, 𑀲𑀩𑁆𑀩𑀥𑀸𑀢𑀼𑀓𑀦𑀺𑀲𑁆𑀲𑀺𑀢𑁂.

𑀅𑀬𑀁 𑀲𑀼𑀤𑁆𑀥𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄.

𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀦𑀺𑀤𑁆𑀤𑁂𑀲

𑀪𑀸𑀯𑁂𑀢𑀺 𑀯𑀺𑀪𑀸𑀯𑁂𑀢𑀺𑀲𑀫𑁆𑀪𑀸𑀯𑁂𑀢𑀺 𑀧𑀭𑀺𑀪𑀸𑀯𑁂𑀢𑀺, 𑀏𑀯𑀁 𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀏𑀓𑀓𑀫𑁆𑀫𑀓𑀯𑀲𑁂𑀦𑁂𑀲𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ¶ . 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀤𑁆𑀯𑀺𑀓𑀫𑁆𑀫𑀓𑀯𑀲𑁂𑀦𑀧𑀺. 𑀧𑀭𑀺𑀪𑀸𑀯𑀸𑀧𑁂𑀢𑀺 𑀅𑀪𑀺𑀪𑀸𑀯𑀸𑀧𑁂𑀢𑀺 𑀅𑀦𑀼𑀪𑀸𑀯𑀸𑀧𑁂𑀢𑀺, 𑀏𑀯𑀫𑁆𑀧𑀺 𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀤𑁆𑀯𑀺𑀓𑀫𑁆𑀫𑀓𑀯𑀲𑁂𑀦𑁂𑀲𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀘𑁆𑀘𑁂𑀯𑀁 𑀤𑁆𑀯𑀺𑀥𑀸 𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀜𑁂𑀬𑁆𑀬𑀸𑀦𑀺, 𑀅𑀜𑁆𑀜𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀪𑀸𑀯𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀪𑀸𑀯𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀪𑀸𑀯𑁂𑀢𑀺 𑀆𑀲𑁂𑀯𑀢𑀺 𑀩𑀳𑀼𑀮𑀻𑀓𑀭𑁄𑀢𑀺, 𑀅𑀣 𑀯𑀸 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀯𑀺𑀪𑀸𑀯𑁂𑀢𑀻𑀢𑀺 𑀪𑀸𑀯𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀯𑀺𑀪𑀸𑀯𑁂𑀢𑀺 𑀯𑀺𑀲𑁂𑀲𑁂𑀦 𑀪𑀸𑀯𑁂𑀢𑀺, 𑀯𑀺𑀯𑀺𑀥𑁂𑀦 𑀯𑀸 𑀆𑀓𑀸𑀭𑁂𑀦 𑀪𑀸𑀯𑁂𑀢𑀺 𑀪𑀸𑀯𑀬𑀢𑀺 𑀯𑀟𑁆𑀠𑁂𑀢𑀺, 𑀅𑀣 𑀯𑀸 𑀯𑀺𑀪𑀸𑀯𑁂𑀢𑀻𑀢𑀺 𑀅𑀪𑀸𑀯𑁂𑀢𑀺 𑀅𑀦𑁆𑀢𑀭𑀥𑀸𑀧𑁂𑀢𑀺. 𑀲𑀫𑁆𑀪𑀸𑀯𑁂𑀢𑀻𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀼𑀡𑀁 𑀲𑀫𑁆𑀪𑀸𑀯𑁂𑀢𑀺 𑀲𑀫𑁆𑀪𑀸𑀯𑀬𑀢𑀺 𑀲𑀼𑀝𑁆𑀞𑀼 𑀧𑀓𑀸𑀲𑁂𑀢𑀺 𑀉𑀓𑁆𑀓𑀁𑀲𑁂𑀢𑀺. 𑀧𑀭𑀺𑀪𑀸𑀯𑁂𑀢𑀻𑀢𑀺 𑀧𑀭𑀺𑀪𑀸𑀯𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀪𑀸𑀯𑁂𑀢𑀺 𑀧𑀭𑀺𑀪𑀸𑀯𑀬𑀢𑀺 𑀲𑀫𑀦𑁆𑀢𑀢𑁄 𑀯𑀟𑁆𑀠𑁂𑀢𑀺. 𑀏𑀯𑀁 𑀏𑀓𑀓𑀫𑁆𑀫𑀓𑀯𑀲𑁂𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀧𑀭𑀺𑀪𑀸𑀯𑁂𑀢𑀻𑀢𑀺 𑀯𑀸𑀲𑁂𑀢𑀩𑁆𑀩𑀁 𑀯𑀢𑁆𑀣𑀼𑀁 𑀧𑀭𑀺𑀪𑀸𑀯𑁂𑀢𑀺 𑀧𑀭𑀺𑀪𑀸𑀯𑀬𑀢𑀺 𑀯𑀸𑀲𑁂𑀢𑀺 𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑀺. 𑀏𑀯𑀁 𑀤𑁆𑀯𑀺𑀓𑀫𑁆𑀫𑀓𑀯𑀲𑁂𑀦𑀸𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀧𑀢𑁆𑀢𑀁 𑀧𑀭𑀺𑀪𑀸𑀯𑀸𑀧𑁂𑀢𑀺 𑀳𑀺𑀁𑀲𑀸𑀧𑁂𑀢𑀺, 𑀅𑀣 𑀯𑀸 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺 𑀳𑀻𑀴𑀸𑀧𑁂𑀢𑀺 𑀅𑀯𑀚𑀸𑀦𑀸𑀧𑁂𑀢𑀺. 𑀅𑀪𑀺𑀪𑀸𑀯𑀸𑀧𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀧𑀢𑁆𑀢𑀁 𑀅𑀪𑀺𑀪𑀸𑀯𑀸𑀧𑁂𑀢𑀺 𑀅𑀚𑁆𑀛𑁄𑀢𑁆𑀣𑀭𑀸𑀧𑁂𑀢𑀺. 𑀅𑀦𑀼𑀪𑀸𑀯𑀸𑀧𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀸𑀯𑀸𑀧𑁂𑀢𑀺 𑀧𑀭𑀺𑀪𑁄𑀚𑁂𑀢𑀺.

𑀧𑀬𑀼𑀢𑁆𑀢𑁄 𑀓𑀢𑁆𑀢𑀼𑀦𑀸 𑀬𑁄𑀕𑁂, 𑀞𑀺𑀢𑁄𑀬𑁂𑀯𑀸𑀧𑁆𑀧𑀥𑀸𑀦𑀺𑀬𑁂;

𑀓𑁆𑀭𑀺𑀬𑀁 𑀲𑀸𑀥𑁂𑀢𑀺 𑀏𑀢𑀲𑁆𑀲, 𑀤𑀻𑀧𑀓𑀁 𑀲𑀸𑀲𑀦𑁂 𑀧𑀤𑀁.

𑀓𑀭𑀡𑀯𑀘𑀦𑀁𑀬𑁂𑀯, 𑀬𑁂𑀪𑀼𑀬𑁆𑀬𑁂𑀦 𑀧𑀤𑀺𑀲𑁆𑀲𑀢𑀺;

𑀆𑀔𑁆𑀬𑀸𑀢𑁂 𑀓𑀸𑀭𑀺𑀢𑀝𑁆𑀞𑀸𑀦𑀁, 𑀲𑀦𑁆𑀥𑀸𑀬 𑀓𑀣𑀺𑀢𑀁 𑀇𑀤𑀁.

𑀦 ¶ 𑀦𑀸𑀫𑁂 𑀓𑀸𑀭𑀺𑀢𑀝𑁆𑀞𑀸𑀦𑀁, ‘‘𑀩𑁄𑀥𑁂𑀢𑀸’’ 𑀇𑀢𑀺𑀆𑀤𑀺𑀓𑀁;

‘‘𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺’’, 𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀘;

𑀆𑀳𑀭𑀺𑀢𑁆𑀯𑀸𑀦 𑀤𑀻𑀧𑁂𑀬𑁆𑀬, 𑀧𑀬𑁄𑀕𑀓𑀼𑀲𑀮𑁄 𑀩𑀼𑀥𑁄.

𑀢𑀢𑁆𑀭𑀺𑀤𑀁 𑀓𑀭𑀡𑀯𑀘𑀦𑀁 𑀓𑀫𑁆𑀫𑀢𑁆𑀣𑀤𑀻𑀧𑀓𑀁, 𑀉𑀧𑀬𑁄𑀕𑀲𑀸𑀫𑀺𑀯𑀘𑀦𑀸𑀦𑀺𑀧𑀺 𑀢𑀤𑁆𑀤𑀻𑀧𑀓𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀣𑀁? 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀲𑀧𑀢𑁆𑀢𑀁 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺, 𑀢𑀣𑀸 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀲𑀧𑀢𑁆𑀢𑀁 𑀧𑀭𑀺𑀪𑀸𑀯𑀸𑀧𑁂𑀢𑀻𑀢𑀺. 𑀲𑁂𑀲𑀸𑀦𑀺 𑀦𑀬𑀸𑀦𑀼𑀲𑀸𑀭𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀲𑀩𑁆𑀩𑀸𑀦𑁂𑀢𑀸𑀦𑀺 𑀓𑀭𑀡𑁄𑀧𑀬𑁄𑀕𑀲𑀸𑀫𑀺𑀯𑀘𑀦𑀸𑀦𑀺 𑀓𑀫𑁆𑀫𑀢𑁆𑀣𑀤𑀻𑀧𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑀺𑀓𑀫𑁆𑀫𑀓𑀯𑀲𑁂𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀅𑀬𑀁 𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄.

𑀓𑀫𑁆𑀫𑀓𑁆𑀭𑀺𑀬𑀸𑀧𑀤𑀦𑀺𑀤𑁆𑀤𑁂𑀲

𑀪𑀯𑀺𑀬𑀢𑁂 𑀯𑀺𑀪𑀯𑀺𑀬𑀢𑁂 𑀧𑀭𑀺𑀪𑀯𑀺𑀬𑀢𑁂 𑀅𑀪𑀺𑀪𑀯𑀺𑀬𑀢𑁂 𑀅𑀦𑀼𑀪𑀯𑀺𑀬𑀢𑁂 𑀧𑀭𑀺𑀪𑀽𑀬𑀢𑁂 𑀅𑀪𑀺𑀪𑀽𑀬𑀢𑁂 𑀅𑀦𑀼𑀪𑀽𑀬𑀢𑁂, 𑀏𑀯𑀁 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀅𑀜𑁆𑀜𑀣𑀸 𑀘 𑀪𑀯𑀺𑀬𑁆𑀬𑀢𑁂 𑀯𑀺𑀪𑀯𑀺𑀬𑁆𑀬𑀢𑁂 𑀧𑀭𑀺𑀪𑀯𑀺𑀬𑁆𑀬𑀢𑁂 𑀅𑀪𑀺𑀪𑀯𑀺𑀬𑁆𑀬𑀢𑁂 𑀅𑀦𑀼𑀪𑀯𑀺𑀬𑁆𑀬𑀢𑁂 𑀧𑀭𑀺𑀪𑀼𑀬𑁆𑀬𑀢𑁂 𑀅𑀪𑀺𑀪𑀼𑀬𑁆𑀬𑀢𑁂 𑀅𑀦𑀼𑀪𑀼𑀬𑁆𑀬𑀢𑁂𑀢𑀺. 𑀏𑀢𑁆𑀣 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀺𑀬𑁂𑀯 𑀓𑀫𑁆𑀫𑀓𑀢𑁆𑀢𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀺 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀯𑀺𑀲𑀼𑀜𑁆𑀳𑀺 𑀓𑀫𑁆𑀫𑀓𑀢𑁆𑀢𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺.

𑀢𑀢𑁆𑀭 𑀪𑀯𑀺𑀬𑀢𑁂𑀢𑀺 𑀪𑀸𑀯𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀧𑀼𑀕𑁆𑀕𑀮𑁂𑀦 𑀪𑀸𑀯𑀺𑀬𑀢𑁂 𑀆𑀲𑁂𑀯𑀺𑀬𑀢𑁂 𑀩𑀳𑀼𑀮𑀻𑀓𑀭𑀺𑀬𑀢𑁂, 𑀅𑀣 𑀯𑀸 𑀪𑀯𑀺𑀬𑀢𑁂𑀢𑀺 𑀯𑀟𑁆𑀠𑀺𑀬𑀢𑁂. 𑀯𑀺𑀪𑀯𑀺𑀬𑀢𑁂𑀢𑀺 𑀯𑀺𑀪𑀸𑀯𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀧𑀼𑀕𑁆𑀕𑀮𑁂𑀦 𑀯𑀺𑀪𑀯𑀺𑀬𑀢𑁂 𑀯𑀺𑀲𑁂𑀲𑁂𑀦 𑀪𑀯𑀺𑀬𑀢𑁂, 𑀯𑀺𑀯𑀺𑀥𑁂𑀦 ¶ 𑀯𑀸 𑀆𑀓𑀸𑀭𑁂𑀦 𑀪𑀯𑀺𑀬𑀢𑁂 𑀯𑀟𑁆𑀠𑀺𑀬𑀢𑁂, 𑀅𑀣 𑀯𑀸 𑀯𑀺𑀪𑀯𑀺𑀬𑀢𑁂𑀢𑀺 𑀅𑀪𑀯𑀺𑀬𑀢𑁂 𑀅𑀦𑁆𑀢𑀭𑀥𑀸𑀧𑀺𑀬𑀢𑁂. 𑀧𑀭𑀺𑀪𑀯𑀺𑀬𑀢𑁂𑀢𑀺 𑀲𑀧𑀢𑁆𑀢𑁄 𑀧𑀼𑀕𑁆𑀕𑀮𑁂𑀦 𑀧𑀭𑀺𑀪𑀯𑀺𑀬𑀢𑁂 𑀳𑀺𑀁𑀲𑀺𑀬𑀢𑁂, 𑀅𑀣 𑀯𑀸 𑀧𑀭𑀺𑀪𑀯𑀺𑀬𑀢𑁂𑀢𑀺 𑀳𑀻𑀴𑀺𑀬𑀢𑁂 𑀅𑀯𑀚𑀸𑀦𑀺𑀬𑀢𑁂. 𑀅𑀪𑀺𑀪𑀯𑀺𑀬𑀢𑁂𑀢𑀺 𑀲𑀧𑀢𑁆𑀢𑁄 𑀧𑀼𑀕𑁆𑀕𑀮𑁂𑀦 𑀅𑀪𑀺𑀪𑀯𑀺𑀬𑀢𑁂 𑀅𑀚𑁆𑀛𑁄𑀢𑁆𑀣𑀭𑀺𑀬𑀢𑁂 𑀅𑀪𑀺𑀫𑀤𑁆𑀤𑀺𑀬𑀢𑁂. 𑀅𑀦𑀼𑀪𑀯𑀺𑀬𑀢𑁂𑀢𑀺 𑀲𑀫𑁆𑀧𑀢𑁆𑀢𑀺 𑀧𑀼𑀕𑁆𑀕𑀮𑁂𑀦 𑀅𑀦𑀼𑀪𑀯𑀺𑀬𑀢𑁂 𑀧𑀭𑀺𑀪𑀼𑀜𑁆𑀚𑀺𑀬𑀢𑁂. 𑀧𑀭𑀺𑀪𑀽𑀬𑀢𑁂𑀢𑀺𑀆𑀤𑀻𑀦𑀺 𑀢𑀻𑀡𑀺 ‘‘𑀧𑀭𑀺𑀪𑀯𑀺𑀬𑀢𑁂’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀲𑀫𑀸𑀦𑀦𑀺𑀤𑁆𑀤𑁂𑀲𑀸𑀦𑀺. 𑀲𑁂𑀲𑀸𑀦𑀺 𑀧𑀦 𑀬𑀣𑀸𑀯𑀼𑀢𑁆𑀢𑁂𑀳𑀺 𑀬𑀁 𑀓𑀫𑁆𑀫𑀫𑁂𑀯 𑀧𑀥𑀸𑀦𑀢𑁄 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀬𑀢𑀺 𑀧𑀤𑀁, 𑀢𑀁 𑀓𑀫𑁆𑀫𑀢𑁆𑀣𑀤𑀻𑀧𑀓𑀁. 𑀢𑀲𑁆𑀫𑀸 𑀓𑀢𑁆𑀢𑀭𑀺 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 𑀬𑀤𑀺 𑀓𑀫𑁆𑀫𑀁 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀩𑀳𑀼𑀯𑀘𑀦𑀦𑁆𑀢𑀜𑁆𑀜𑁂𑀯 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀁 𑀤𑀺𑀲𑁆𑀲𑀢𑀺. 𑀬𑀤𑀺 𑀧𑀦𑁂𑀓𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀏𑀓𑀯𑀘𑀦𑀦𑁆𑀢𑀜𑁆𑀜𑁂𑀯. 𑀢𑀣𑀸 𑀓𑀢𑁆𑀢𑀭𑀺 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 𑀬𑀤𑀺 𑀓𑀫𑁆𑀫𑀁 𑀏𑀓𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀏𑀓𑀯𑀘𑀦𑀦𑁆𑀢𑀜𑁆𑀜𑁂𑀯 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀁 𑀤𑀺𑀲𑁆𑀲𑀢𑀺. 𑀬𑀤𑀺 𑀧𑀦 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀩𑀳𑀼𑀯𑀘𑀦𑀦𑁆𑀢𑀜𑁆𑀜𑁂𑀯. 𑀓𑀣𑀁? 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑁄 𑀪𑀯𑀺𑀬𑀢𑁂, 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑀸 𑀪𑀯𑀺𑀬𑀦𑁆𑀢𑁂, 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑁄 𑀪𑀯𑀺𑀬𑀢𑁂, 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑀸 𑀪𑀯𑀺𑀬𑀦𑁆𑀢𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑁂𑀲𑀼 𑀯𑁄𑀳𑀸𑀭𑁄 𑀓𑀸𑀢𑀩𑁆𑀩𑁄. 𑀬𑀲𑁆𑀫𑀺𑀁 𑀧𑀦 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑁂 𑀓𑀫𑁆𑀫𑀢𑁆𑀣𑀤𑀻𑀧𑀓𑁂 𑀓𑀫𑁆𑀫𑀪𑀽𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀓𑀢𑁆𑀢𑀼𑀪𑀸𑀯𑀧𑀭𑀺𑀓𑀧𑁆𑀧𑁄 𑀳𑁄𑀢𑀺, 𑀢𑀁 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑀤𑀻𑀧𑀓𑀁, 𑀢𑀁 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀢𑁄 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁂 𑀧𑀬𑁄𑀕𑀭𑀘𑀦𑀸. 𑀲𑀬𑀫𑁂𑀯 𑀧𑀭𑀺𑀪𑀯𑀺𑀬𑀢𑁂 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁 𑀩𑀸𑀮𑁄 𑀢𑀧𑁆𑀧𑀘𑁆𑀘𑀬𑀸 𑀅𑀜𑁆𑀜𑁂𑀳𑀺 𑀧𑀭𑀺𑀪𑀽𑀢𑁄𑀧𑀺, 𑀲𑀬𑀫𑁂𑀯 𑀅𑀪𑀺𑀪𑀯𑀺𑀬𑀢𑁂 𑀧𑀸𑀧𑀓𑀸𑀭𑀻 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑁂𑀳𑀺 𑀅𑀪𑀺𑀪𑀽𑀢𑁄𑀧𑀺 𑀢𑀣𑀸𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀲𑀬𑀁 𑀓𑀢𑀢𑁆𑀢𑀸𑀢𑀺. 𑀏𑀢𑁆𑀣 𑀳𑀺 𑀲𑀬𑀫𑁂𑀯 𑀧𑀻𑀬𑀢𑁂 𑀧𑀸𑀦𑀻𑀬𑀁, 𑀲𑀬𑀫𑁂𑀯 𑀓𑀝𑁄 𑀓𑀭𑀺𑀬𑀢𑁂𑀢𑀺𑀆𑀤𑀻𑀲𑀼 𑀯𑀺𑀬 ¶ 𑀲𑀼𑀔𑀸𑀪𑀺𑀲𑀗𑁆𑀔𑀭𑀡𑀻𑀬𑀢𑀸 𑀮𑀩𑁆𑀪𑀢𑁂𑀯, 𑀢𑀢𑁄 𑀓𑀫𑁆𑀫𑀓𑀢𑁆𑀢𑀼𑀢𑀸 𑀘.

𑀅𑀬𑀁 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄.

𑀪𑀸𑀯𑀓𑁆𑀭𑀺𑀬𑀸𑀧𑀤𑀦𑀺𑀤𑁆𑀤𑁂𑀲

𑀪𑀽𑀬𑀢𑁂 𑀪𑀯𑀺𑀬𑀢𑁂 𑀉𑀩𑁆𑀪𑀯𑀺𑀬𑀢𑁂, 𑀏𑀯𑀁 𑀪𑀸𑀯𑀲𑁆𑀲 𑀓𑁆𑀭𑀺𑀬𑀸𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀅𑀜𑁆𑀜𑀣𑀸 𑀘 𑀪𑀼𑀬𑁆𑀬𑀢𑁂 𑀪𑀯𑀺𑀬𑁆𑀬𑀢𑁂 𑀉𑀩𑁆𑀪𑀯𑀺𑀬𑁆𑀬𑀢𑁂𑀢𑀺. 𑀢𑀢𑁆𑀭 𑀬𑀣𑀸 𑀞𑀻𑀬𑀢𑁂𑀧𑀤𑀲𑁆𑀲 𑀞𑀸𑀦𑀦𑁆𑀢𑀺 𑀪𑀸𑀯𑀯𑀲𑁂𑀦 𑀅𑀢𑁆𑀣𑀓𑀣𑀦𑀫𑀺𑀘𑁆𑀙𑀦𑁆𑀢𑀺, 𑀏𑀯𑀁 𑀪𑀽𑀬𑀢𑁂𑀢𑀺𑀆𑀤𑀻𑀦𑀫𑁆𑀧𑀺 𑀪𑀯𑀦𑀦𑁆𑀢𑀺𑀆𑀤𑀺𑀦𑀸 𑀪𑀸𑀯𑀯𑀲𑁂𑀦 𑀅𑀢𑁆𑀣𑀓𑀣𑀦𑀫𑀺𑀘𑁆𑀙𑀺𑀢𑀩𑁆𑀩𑀁. 𑀬𑀣𑀸 𑀘 𑀞𑀸𑀦𑀁 𑀞𑀺𑀢𑀺 𑀪𑀯𑀦𑀦𑁆𑀢𑀺𑀆𑀤𑀻𑀳𑀺 𑀪𑀸𑀯𑀯𑀸𑀘𑀓𑀓𑀺𑀢𑀦𑁆𑀢𑀦𑀸𑀫𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑁄𑀚𑀦𑀫𑀺𑀘𑁆𑀙𑀦𑁆𑀢𑀺, 𑀦 𑀢𑀣𑀸 𑀞𑀻𑀬𑀢𑁂 𑀪𑀽𑀬𑀢𑁂𑀢𑀺𑀆𑀤𑀻𑀳𑀺 𑀪𑀸𑀯𑀯𑀸𑀘𑀓𑀸𑀔𑁆𑀬𑀸𑀢𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑁄𑀚𑀦𑀸 𑀇𑀘𑁆𑀙𑀺𑀢𑀩𑁆𑀩𑀸 𑀲𑀫𑁆𑀩𑀦𑁆𑀥𑁂 𑀧𑀯𑀢𑁆𑀢𑀙𑀝𑁆𑀞𑀺𑀬𑀦𑁆𑀢𑀲𑀤𑁆𑀤𑁂𑀳𑀺 𑀅𑀲𑀫𑁆𑀩𑀦𑁆𑀥𑀦𑀻𑀬𑀢𑁆𑀢𑀸 𑀆𑀔𑁆𑀬𑀸𑀢𑀺𑀓𑀧𑀤𑀸𑀦𑀁. 𑀬𑀲𑁆𑀫𑀺𑀁 𑀧𑀬𑁄𑀕𑁂 𑀬𑀁 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑁂𑀦 𑀲𑀫𑀸𑀦𑀕𑀢𑀺𑀓𑀁 𑀓𑀢𑁆𑀯𑀸 𑀯𑀺𑀦𑀸 𑀓𑀫𑁆𑀫𑁂𑀦 𑀦𑀺𑀤𑁆𑀤𑀺𑀲𑀺𑀬𑀢𑀺 𑀓𑁆𑀭𑀺𑀬𑀸𑀧𑀤𑀁, 𑀓𑀢𑁆𑀢𑀼𑀯𑀸𑀘𑀓𑀧𑀤𑀁 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑁂𑀦 𑀯𑀸 𑀓𑀭𑀡𑀯𑀘𑀦𑁂𑀦 𑀯𑀸 𑀦𑀺𑀤𑁆𑀤𑀺𑀲𑀺𑀬𑀢𑀺, 𑀢𑀁 𑀢𑀢𑁆𑀣 𑀪𑀸𑀯𑀢𑁆𑀣𑀤𑀻𑀧𑀓𑀁. 𑀦 𑀳𑀺 𑀲𑀩𑁆𑀩𑀣𑀸 𑀓𑀢𑁆𑀢𑀸𑀭𑀫𑀦𑀺𑀲𑁆𑀲𑀸𑀬 𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀸𑀯𑁄 𑀦𑀸𑀫 𑀓𑁂𑀯𑀮𑁄 𑀪𑀯𑀦𑀮𑀯𑀦𑀧𑀘𑀦𑀸𑀤𑀺𑀓𑁄 𑀥𑀸𑀢𑀼𑀅𑀢𑁆𑀣𑁄𑀬𑁂𑀯. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 ‘‘𑀞𑀻𑀬𑀢𑁂 𑀪𑀽𑀬𑀢𑁂’’𑀢𑀺𑀆𑀤𑀻𑀲𑀼 𑀪𑀸𑀯𑀯𑀺𑀲𑀬𑁂𑀲𑀼 𑀓𑀭𑀡𑀯𑀘𑀦𑀫𑁂𑀯 𑀧𑀬𑀼𑀜𑁆𑀚𑀦𑁆𑀢𑀺 ‘‘𑀦𑀦𑀼 𑀦𑀸𑀫 𑀧𑀩𑁆𑀩𑀚𑀺𑀢𑁂𑀦 𑀲𑀼𑀦𑀺𑀯𑀢𑁆𑀣𑁂𑀦 𑀪𑀯𑀺𑀢𑀩𑁆𑀩𑀁 𑀲𑀼𑀧𑀸𑀭𑀼𑀢𑁂𑀦 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂 ‘‘𑀢𑁂𑀦 𑀉𑀩𑁆𑀪𑀯𑀺𑀬𑀢𑁂’’𑀢𑀺 𑀓𑀭𑀡𑀯𑀘𑀦𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀚𑀺𑀦𑀫𑀢𑁂𑀦 𑀧𑀦 ‘‘𑀲𑁄 𑀪𑀽𑀬𑀢𑁂’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀢𑁆𑀢𑀯𑀘𑀦𑁂𑀦𑁂𑀯. 𑀲𑀘𑁆𑀘𑀲𑀗𑁆𑀔𑁂𑀧𑀧𑁆𑀧𑀓𑀭𑀡𑁂 𑀳𑀺 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁂𑀦, 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 𑀧𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸, 𑀥𑀚𑀕𑁆𑀕𑀲𑀼𑀢𑁆𑀢𑀦𑁆𑀢𑁂 𑀪𑀕𑀯𑀢𑀸 𑀘 𑀪𑀸𑀯𑀧𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀸𑀧𑁂𑀓𑁆𑀔𑀯𑀲𑁂𑀦𑀼’𑀘𑁆𑀘𑀸𑀭𑀺𑀢𑀁.

𑀓𑀣𑀺𑀢𑁄 ¶ 𑀲𑀘𑁆𑀘𑀲𑀗𑁆𑀔𑁂𑀧𑁂, 𑀧𑀘𑁆𑀘𑀢𑁆𑀢𑀯𑀘𑀦𑁂𑀦 𑀯𑁂,

‘‘𑀪𑀽𑀬𑀢𑁂’’ 𑀇𑀢𑀺 𑀲𑀤𑁆𑀤𑀲𑁆𑀲, 𑀲𑀫𑁆𑀩𑀦𑁆𑀥𑁄 𑀪𑀸𑀯𑀤𑀻𑀧𑀦𑁄.

𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀭𑀽𑀧𑀁, 𑀯𑀺𑀪𑁄𑀢𑀺 𑀯𑀺𑀪𑀯𑀺𑀬𑁆𑀬𑀢𑀺’’;

𑀇𑀢𑀺 𑀤𑀲𑁆𑀲𑀦𑀢𑁄 𑀯𑀸𑀧𑀺, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀣𑀺𑀭𑀁.

𑀢𑀣𑀸 𑀥𑀚𑀕𑁆𑀕𑀲𑀼𑀢𑁆𑀢𑀦𑁆𑀢𑁂, 𑀫𑀼𑀦𑀺𑀦𑀸𑀳𑀘𑁆𑀘𑀪𑀸𑀲𑀺𑀢𑁂;

‘‘𑀲𑁄 𑀧𑀳𑀻𑀬𑀺𑀲𑁆𑀲𑀢𑀺’’ 𑀇𑀢𑀺, 𑀧𑀸𑀴𑀺𑀤𑀲𑁆𑀲𑀦𑀢𑁄𑀧𑀺 𑀘.

𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦, 𑀫𑀳𑁂𑀲𑀻𑀦𑀁𑀯 𑀤𑁂𑀳𑀢𑁄;

𑀲𑀦𑁆𑀢𑀺 𑀦𑀺𑀧𑁆𑀨𑀸𑀤𑀦𑀸, 𑀦𑁂𑀯, 𑀲𑀓𑁆𑀓𑀢𑀸𑀤𑀺𑀯𑀘𑁄 𑀯𑀺𑀬.

𑀧𑀘𑁆𑀘𑀢𑁆𑀢𑀤𑀲𑁆𑀲𑀦𑁂𑀦𑁂𑀯, 𑀧𑀼𑀭𑀺𑀲𑀢𑁆𑀢𑀬𑀬𑁄𑀚𑀦𑀁;

𑀏𑀓𑀯𑀘𑀦𑀺𑀓𑀜𑁆𑀘𑀸𑀧𑀺, 𑀩𑀳𑀼𑀯𑀘𑀦𑀺𑀓𑀫𑁆𑀧𑀺 𑀘;

𑀓𑀸𑀢𑀩𑁆𑀩𑀫𑀺𑀢𑀺 𑀦𑁄 𑀔𑀦𑁆𑀢𑀺, 𑀧𑀭𑀲𑁆𑀲𑀧𑀤𑀆𑀤𑀺𑀓𑁂.

𑀢𑀲𑁆𑀫𑀸 𑀭𑀽𑀧𑀁 𑀯𑀺𑀪𑀯𑀺𑀬𑁆𑀬𑀢𑀺, 𑀭𑀽𑀧𑀸𑀦𑀺 𑀯𑀺𑀪𑀯𑀺𑀬𑁆𑀬𑀦𑁆𑀢𑀺, 𑀢𑁆𑀯𑀁 𑀯𑀺𑀪𑀯𑀺𑀬𑁆𑀬𑀲𑀺, 𑀢𑀼𑀫𑁆𑀳𑁂 𑀯𑀺𑀪𑀯𑀺𑀬𑁆𑀬𑀣, 𑀅𑀳𑀁 𑀯𑀺𑀪𑀯𑀺𑀬𑁆𑀬𑀸𑀫𑀺, 𑀫𑀬𑀁 𑀯𑀺𑀪𑀯𑀺𑀬𑁆𑀬𑀸𑀫, 𑀭𑀽𑀧𑀁 𑀯𑀺𑀪𑀯𑀺𑀬𑁆𑀬𑀢𑁂, 𑀭𑀽𑀧𑀸𑀦𑀺 𑀯𑀺𑀪𑀯𑀺𑀬𑁆𑀬𑀦𑁆𑀢𑁂 𑀇𑀘𑁆𑀘𑁂𑀯𑀫𑀸𑀤𑀺 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀢𑁄 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀭𑀸𑀬𑀁 𑀧𑀤𑀲𑁄𑀥𑀦𑀸 𑁋

𑀯𑀺𑀪𑀯𑀺𑀬𑁆𑀬𑀢𑀻𑀢𑀺 𑀇𑀤𑀁, 𑀓𑀫𑁆𑀫𑀧𑀤𑀲𑀫𑀸𑀦𑀓𑀁;

𑀦 𑀘 𑀓𑀫𑁆𑀫𑀧𑀤𑀁 𑀦𑀸𑀧𑀺, 𑀓𑀫𑁆𑀫𑀓𑀢𑁆𑀢𑀼𑀧𑀤𑀸𑀤𑀺𑀓𑀁.

𑀬𑀤𑀺 𑀓𑀫𑁆𑀫𑀧𑀤𑀁 𑀏𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀧𑀦;

𑀓𑀫𑁆𑀫𑀁 𑀤𑀻𑀧𑁂𑀬𑁆𑀬 𑀓𑀭𑀡-𑀯𑀘𑀦𑀁 𑀓𑀢𑁆𑀢𑀼𑀤𑀻𑀧𑀓𑀁.

𑀬𑀤𑀺 𑀓𑀫𑁆𑀫𑀓𑀢𑁆𑀢𑀼𑀧𑀤𑀁, ‘‘𑀧𑀻𑀬𑀢𑁂’’𑀢𑀺 𑀧𑀤𑀁 𑀯𑀺𑀬;

𑀲𑀺𑀬𑀸 𑀲𑀓𑀫𑁆𑀫𑀓𑀁, 𑀦𑁂𑀢𑀁, 𑀢𑀣𑀸 𑀳𑁄𑀢𑀻𑀢𑀺 𑀤𑀻𑀧𑀬𑁂.

𑀬𑀤𑀺 𑀓𑀢𑁆𑀢𑀼𑀧𑀤𑀁 𑀏𑀢𑀁, 𑀯𑀺𑀪𑀯𑀢𑀺𑀧𑀤𑀁 𑀯𑀺𑀬;

𑀯𑀺𑀦𑀸 𑀬𑀧𑀘𑁆𑀘𑀬𑀁 𑀢𑀺𑀝𑁆𑀞𑁂, 𑀦 𑀢𑀣𑀸 𑀢𑀺𑀝𑁆𑀞𑀢𑁂 𑀇𑀤𑀁.

𑀦 𑀓𑀢𑁆𑀢𑀭𑀺 𑀪𑀼𑀯𑀸𑀤𑀻𑀦𑀁, 𑀕𑀡𑁂 𑀬𑀧𑀘𑁆𑀘𑀬𑁄 𑀭𑀼𑀢𑁄;

𑀤𑀺𑀯𑀸𑀤𑀻𑀦𑀁 𑀕𑀡𑁂𑀬𑁂𑀯, 𑀓𑀢𑁆𑀢𑀭𑀺 𑀲𑀫𑀼𑀤𑀻𑀭𑀺𑀢𑁄.

𑀦 ¶ 𑀪𑀽𑀥𑀸𑀢𑀼 𑀤𑀺𑀯𑀸𑀤𑀻𑀦𑀁, 𑀥𑀸𑀢𑀽𑀦𑀁 𑀤𑀺𑀲𑁆𑀲𑀢𑁂 𑀕𑀡𑁂;

𑀪𑀽𑀯𑀸𑀤𑀺𑀓𑀘𑀼𑀭𑀸𑀤𑀻𑀦𑀁, 𑀕𑀡𑁂𑀲𑀼𑀬𑁂𑀯 𑀤𑀺𑀲𑁆𑀲𑀢𑀺.

‘‘𑀯𑀺𑀪𑀯𑀺𑀬𑁆𑀬𑀢𑀺’’ 𑀇𑀘𑁆𑀘𑀸𑀤𑁄, 𑀢𑀲𑁆𑀫𑀸 𑀬𑀧𑀘𑁆𑀘𑀬𑁄 𑀧𑀦;

𑀪𑀸𑀯𑁂𑀬𑁂𑀯𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑀏𑀢𑁆𑀣 𑀳𑀺 𑀧𑀸𑀓𑀝𑀁 𑀓𑀢𑁆𑀯𑀸, 𑀪𑀸𑀯𑀓𑀸𑀭𑀓𑀮𑀓𑁆𑀔𑀡𑀁;

𑀤𑀲𑁆𑀲𑀬𑀺𑀲𑁆𑀲𑀸𑀫𑀳𑀁 𑀤𑀸𑀦𑀺, 𑀲𑀓𑁆𑀓𑀘𑁆𑀘𑀁 𑀫𑁂 𑀦𑀺𑀩𑁄𑀥𑀣.

‘‘𑀢𑀺𑀲𑁆𑀲𑁄 𑀕𑀘𑁆𑀙𑀢𑀺’’𑀇𑀘𑁆𑀘𑀢𑁆𑀭, 𑀓𑀢𑁆𑀢𑀸𑀭𑀁 𑀓𑀢𑁆𑀢𑀼𑀦𑁄 𑀧𑀤𑀁;

‘‘𑀥𑀫𑁆𑀫𑁄 𑀤𑁂𑀲𑀺𑀬𑀢𑀺’’𑀘𑁆𑀘𑀢𑁆𑀭, 𑀓𑀫𑁆𑀫𑀁 𑀢𑀼 𑀓𑀫𑁆𑀫𑀼𑀦𑁄 𑀧𑀤𑀁.

𑀲𑀭𑀽𑀧𑀢𑁄 𑀧𑀓𑀸𑀲𑁂𑀢𑀺, 𑀢𑀲𑁆𑀫𑀸 𑀢𑁂 𑀧𑀸𑀓𑀝𑀸 𑀉𑀪𑁄;

𑀢𑀣𑀸 𑀯𑀺𑀪𑀯𑀺𑀬𑁆𑀬𑀢𑀻𑀢𑀺-𑀆𑀤𑀺𑀪𑀸𑀯𑀧𑀤𑀁 𑀧𑀦.

𑀲𑀭𑀽𑀧𑀢𑁄 𑀦 𑀤𑀻𑀧𑁂𑀢𑀺, 𑀓𑀸𑀭𑀓𑀁 𑀪𑀸𑀯𑀦𑀸𑀫𑀓𑀁;

𑀤𑀩𑁆𑀩𑀪𑀽𑀢𑀁 𑀢𑀼 𑀓𑀢𑁆𑀢𑀸𑀭𑀁, 𑀧𑀓𑀸𑀲𑁂𑀢𑀺 𑀲𑀭𑀽𑀧𑀢𑁄.

𑀓𑀢𑁆𑀢𑀸𑀭𑀁 𑀧𑀦 𑀤𑀻𑀧𑁂𑀦𑁆𑀢𑀁, 𑀓𑀢𑁆𑀢𑀼𑀲𑀦𑁆𑀦𑀺𑀲𑁆𑀲𑀺𑀢𑀫𑁆𑀧𑀺 𑀢𑀁;

𑀪𑀸𑀯𑀁 𑀤𑀻𑀧𑁂𑀢𑀺 𑀲𑁆𑀯𑀸𑀓𑀸𑀭𑁄, 𑀧𑀘𑁆𑀘𑀬𑁂𑀦 𑀯𑀺𑀪𑀸𑀯𑀺𑀢𑁄.

𑀬𑀲𑁆𑀫𑀸 𑀘 𑀓𑀢𑁆𑀢𑀼𑀪𑀸𑀯𑁂𑀦, 𑀪𑀸𑀯𑁄 𑀦𑀸𑀫 𑀦 𑀢𑀺𑀝𑁆𑀞𑀢𑀺;

𑀓𑀢𑁆𑀢𑀸𑀯 𑀓𑀢𑁆𑀢𑀼𑀪𑀸𑀯𑁂𑀦, 𑀪𑀸𑀯𑀝𑁆𑀞𑀸𑀦𑁂 𑀞𑀺𑀢𑁄 𑀢𑀢𑁄.

𑀬𑀚𑁆𑀚𑁂𑀯𑀁 𑀓𑀢𑁆𑀢𑀼𑀯𑁄𑀳𑀸𑀭𑁄, 𑀪𑀸𑀯𑀲𑁆𑀲 𑀢𑀼 𑀓𑀣𑀁 𑀲𑀺𑀬𑀸;

‘‘𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄, 𑀅𑀳𑁄𑀲𑀺’’𑀇𑀢𑀺𑀆𑀤𑀺𑀲𑀼.

𑀇𑀢𑀺 𑀘𑁂 𑀦𑀺𑀲𑁆𑀲𑀬𑀸𑀦𑀁 𑀢𑀼, 𑀯𑀲𑀸 𑀦𑀺𑀲𑁆𑀲𑀺𑀢𑀲𑀫𑁆𑀪𑀯𑀸;

𑀓𑀢𑁆𑀢𑀼𑀝𑁆𑀞𑀸𑀦𑁂𑀧𑀺 𑀪𑀸𑀯𑀲𑁆𑀲, 𑀓𑀢𑁆𑀢𑀼𑀧𑀜𑁆𑀜𑀢𑁆𑀢𑀺 𑀲𑀺𑀚𑁆𑀛𑀢𑀺.

𑀓𑀸𑀭𑀓𑁂 𑀓𑀢𑁆𑀢𑀼𑀓𑀫𑁆𑀫𑀯𑁆𑀳𑁂, 𑀓𑁆𑀭𑀺𑀬𑀸𑀲𑀦𑁆𑀦𑀺𑀲𑁆𑀲𑀬𑁂 𑀬𑀣𑀸;

𑀥𑀸𑀭𑁂𑀦𑁆𑀢𑀻 𑀆𑀲𑀦𑀣𑀸𑀮𑀻, 𑀓𑁆𑀭𑀺𑀬𑀸𑀥𑀸𑀭𑁄𑀢𑀺 𑀓𑀧𑁆𑀧𑀺𑀢𑀸.

𑀢𑀣𑀸 𑀪𑀸𑀯𑀧𑀤𑀁 𑀥𑀻𑀭𑀸, 𑀓𑀢𑁆𑀢𑀸𑀭𑀁 𑀪𑀸𑀯𑀦𑀺𑀲𑁆𑀲𑀬𑀁;

𑀤𑀻𑀧𑀬𑀦𑁆𑀢𑀫𑁆𑀧𑀺 𑀓𑀧𑁆𑀧𑁂𑀦𑁆𑀢𑀺, 𑀪𑀸𑀯𑀲𑁆𑀲 𑀯𑀸𑀘𑀓𑀁 𑀇𑀢𑀺.

𑀓𑁂𑀘𑀺 ¶ 𑀅𑀤𑀩𑁆𑀩𑀪𑀽𑀢𑀲𑁆𑀲, 𑀪𑀸𑀯𑀲𑁆𑀲𑁂𑀓𑀢𑁆𑀢𑀢𑁄 𑀩𑁆𑀭𑀯𑀼𑀁;

𑀪𑀸𑀯𑁂𑀤𑁂𑀓𑀯𑀘𑁄𑀯𑀸𑀤𑀺-𑀧𑀼𑀭𑀺𑀲𑀲𑁆𑀲𑁂𑀯 𑀳𑁄𑀢𑀺𑀢𑀺.

𑀧𑀸𑀴𑀺𑀁 𑀧𑀢𑁆𑀯𑀸𑀦 𑀢𑁂𑀲𑀁 𑀢𑀼, 𑀯𑀘𑀦𑀁 𑀅𑀧𑁆𑀧𑀫𑀸𑀡𑀓𑀁;

‘‘𑀢𑁂 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸, 𑀧𑀳𑀻𑀬𑀺𑀲𑁆𑀲𑀦𑁆𑀢𑀺’’ 𑀇𑀢𑀺 𑀳𑀺.

𑀧𑀸𑀞𑁄 𑀧𑀸𑀯𑀘𑀦𑁂 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂;

𑀧𑀘𑁆𑀘𑀢𑁆𑀢𑀤𑀲𑁆𑀲𑀦𑁂𑀦𑁂𑀯, 𑀧𑀼𑀭𑀺𑀲𑀢𑁆𑀢𑀬𑀬𑁄𑀚𑀦𑀁.

𑀯𑀘𑀦𑁂𑀳𑀺 𑀬𑀼𑀢𑀁 𑀤𑁆𑀯𑀻𑀳𑀺, 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀦𑁄 𑀭𑀼𑀘𑀺;

𑀪𑀸𑀯𑁂 𑀓𑁆𑀭𑀺𑀬𑀸𑀧𑀤𑀁 𑀦𑀸𑀫, 𑀧𑀸𑀴𑀺𑀬𑀁 𑀅𑀢𑀺𑀤𑀼𑀤𑁆𑀤𑀲𑀁;

𑀢𑀲𑁆𑀫𑀸 𑀢𑀕𑁆𑀕𑀳𑀡𑀽𑀧𑀸𑀬𑁄, 𑀯𑀼𑀢𑁆𑀢𑁄 𑀏𑀢𑁆𑀢𑀸𑀯𑀢𑀸 𑀫𑀬𑀸𑀢𑀺.

𑀅𑀬𑀁 𑀪𑀸𑀯𑀲𑁆𑀲 𑀓𑁆𑀭𑀺𑀬𑀸𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄.

𑀏𑀯𑀁 𑀲𑀼𑀤𑁆𑀥𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀳𑁂𑀢𑀼𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑀸𑀦𑀺 𑀓𑀫𑁆𑀫𑀼𑀦𑁄 𑀓𑁆𑀭𑀺𑀬𑀸𑀧𑀤𑀸𑀦𑀺, 𑀪𑀸𑀯𑀲𑁆𑀲 𑀓𑁆𑀭𑀺𑀬𑀸𑀧𑀤𑀸𑀦𑀺 𑀘𑀸𑀢𑀺 𑀘𑀢𑀼𑀥𑀸, 𑀓𑀫𑁆𑀫𑀓𑀢𑁆𑀢𑀼𑀓𑁆𑀭𑀺𑀬𑀸𑀧𑀤𑁂𑀳𑀺 𑀯𑀸 𑀧𑀜𑁆𑀘𑀥𑀸 𑀪𑀽𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀏𑀢𑀸𑀦𑀺 𑀮𑁄𑀓𑀺𑀬𑀸𑀦𑀁 𑀪𑀸𑀯𑀪𑁂𑀤𑀯𑀲𑁂𑀦 𑀯𑁄𑀳𑀸𑀭𑀪𑁂𑀤𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺. 𑀅𑀢𑁆𑀣𑀢𑁄 𑀧𑀦 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀓𑀸𑀭𑀓𑀢𑁆𑀢𑀬𑀯𑀲𑁂𑀦 𑀢𑀺𑀯𑀺𑀥𑀸𑀦𑁂𑀯. 𑀳𑁂𑀢𑀼𑀓𑀢𑁆𑀢𑀸 𑀳𑀺 𑀲𑀼𑀤𑁆𑀥𑀓𑀢𑁆𑀢𑀼𑀲𑀗𑁆𑀔𑀸𑀢𑁂 𑀓𑀸𑀭𑀓𑁂 𑀢𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀗𑁆𑀕𑀳𑀫𑀼𑀧𑀕𑀘𑁆𑀙𑀢𑀺, 𑀢𑀣𑀸 𑀓𑀫𑁆𑀫𑀓𑀢𑁆𑀢𑀸 𑀓𑀫𑁆𑀫𑀓𑀸𑀭𑀓𑁂, 𑀪𑀸𑀯𑁄 𑀧𑀦 𑀓𑁂𑀯𑀮𑁄. 𑀲𑁄 𑀳𑀺 𑀕𑀫𑀦𑀧𑀘𑀦𑀮𑀯𑀦𑀸𑀤𑀺𑀯𑀲𑁂𑀦𑀸𑀦𑁂𑀓𑀯𑀺𑀥𑁄𑀧𑀺 𑀓𑁆𑀭𑀺𑀬𑀸𑀲𑀪𑀸𑀯𑀢𑁆𑀢𑀸 𑀪𑁂𑀤𑀭𑀳𑀺𑀢𑁄 𑀓𑀸𑀭𑀓𑀦𑁆𑀢𑀭𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀤𑀩𑁆𑀩𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀤𑀩𑁆𑀩𑀪𑁂𑀤𑁂𑀦 𑀪𑀺𑀚𑁆𑀚𑀢𑀺. 𑀢𑁂𑀦 𑀧𑀸𑀯𑀘𑀦𑁂 𑀪𑀸𑀯𑀯𑀸𑀘𑀓𑀁 𑀧𑀤𑀁 𑀩𑀳𑀼𑀯𑀘𑀦𑀦𑁆𑀢𑀫𑁆𑀧𑀺 𑀤𑀺𑀲𑁆𑀲𑀢𑀺. 𑀆𑀔𑁆𑀬𑀸𑀢𑀺𑀓𑀧𑀤𑁂 𑀪𑀸𑀯𑀓𑀸𑀭𑀓𑀯𑁄𑀳𑀸𑀭𑁄 𑀦𑀺𑀭𑀼𑀢𑁆𑀢𑀺𑀦𑀬𑀁 𑀦𑀺𑀲𑁆𑀲𑀸𑀬 𑀕𑀢𑁄, 𑀅𑀢𑁆𑀣𑀢𑁄 𑀧𑀦 𑀪𑀸𑀯𑀲𑁆𑀲 𑀓𑀸𑀭𑀓𑀢𑀸 𑀦𑀼𑀧𑀧𑀚𑁆𑀚𑀢𑀺. 𑀲𑁄 𑀳𑀺 𑀦 ¶ 𑀓𑀺𑀜𑁆𑀘𑀺 𑀚𑀦𑁂𑀢𑀺, 𑀦 𑀘 𑀓𑁆𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀁. 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢𑀪𑀸𑀯𑁄𑀬𑁂𑀯 𑀳𑀺 𑀓𑀸𑀭𑀓𑀮𑀓𑁆𑀔𑀡𑀁. 𑀇𑀢𑀺 𑀫𑀼𑀔𑁆𑀬𑀢𑁄 𑀯𑀸 𑀳𑁂𑀢𑀼𑀢𑁄 𑀯𑀸 𑀪𑀸𑀯𑀲𑁆𑀲 𑀓𑀸𑀭𑀓𑀢𑀸 𑀦 𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑁄 𑀓𑀭𑀡𑀫𑀢𑁆𑀢𑀢𑁆𑀢𑀸 𑀓𑀸𑀭𑀓𑀁. 𑀢𑀣𑀸 𑀳𑀺 𑀓𑀭𑀡𑀁 𑀓𑀸𑀭𑁄, 𑀓𑁆𑀭𑀺𑀬𑀸, 𑀢𑀤𑁂𑀯 𑀓𑀸𑀭𑀓𑀦𑁆𑀢𑀺 𑀪𑀸𑀯𑀲𑁆𑀲 𑀓𑀸𑀭𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢𑀪𑀸𑀯𑁄𑀬𑁂𑀯 𑀓𑀸𑀭𑀓𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀦𑀸𑀫𑀺𑀓𑀧𑀤𑁂 𑀓𑀸𑀭𑀓𑀮𑀓𑁆𑀔𑀡𑁂 𑀪𑀸𑀯𑀓𑀸𑀭𑀓𑀦𑁆𑀢𑀺 𑀯𑁄𑀳𑀸𑀭𑀁 𑀧𑀳𑀸𑀬 𑀓𑀢𑁆𑀢𑀼𑀓𑀫𑁆𑀫𑀓𑀭𑀡𑀲𑀫𑁆𑀧𑀤𑀸𑀦𑀸𑀧𑀸𑀤𑀸𑀦𑀸𑀥𑀺𑀓𑀭𑀡𑀸𑀦𑀁 𑀙𑀦𑁆𑀦𑀁 𑀯𑀢𑁆𑀣𑀽𑀦𑀁 𑀓𑀢𑁆𑀢𑀼𑀓𑀸𑀭𑀓𑀓𑀫𑁆𑀫𑀓𑀸𑀭𑀓𑀦𑁆𑀢𑀺𑀆𑀤𑀺 𑀯𑁄𑀳𑀸𑀭𑁄 𑀓𑀭𑀺𑀬𑀢𑀺 𑀯𑁂𑀬𑁆𑀬𑀸𑀓𑀭𑀡𑁂𑀳𑀺. 𑀏𑀯𑀁 𑀦𑀺𑀭𑀼𑀢𑁆𑀢𑀺𑀦𑀬𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁 𑀪𑀸𑀯𑀓𑀸𑀭𑀓𑀜𑁆𑀘 𑀤𑁆𑀯𑁂 𑀘 𑀓𑀫𑁆𑀫𑀓𑀢𑁆𑀢𑀼𑀓𑀸𑀭𑀓𑀸𑀦𑀻𑀢𑀺 𑀓𑀸𑀭𑀓𑀢𑁆𑀢𑀬𑀁 𑀪𑀯𑀢𑀺. 𑀢𑀤𑁆𑀤𑀻𑀧𑀓𑀜𑁆𑀘𑀸𑀔𑁆𑀬𑀸𑀢𑀺𑀓𑀧𑀤𑀁 𑀢𑀺𑀓𑀸𑀭𑀓𑀁.

𑀇𑀫𑀫𑀢𑁆𑀣𑀜𑁆𑀳𑀺 𑀲𑀦𑁆𑀥𑀸𑀬, 𑀯𑀼𑀢𑁆𑀢𑀫𑀸𑀘𑀭𑀺𑀬𑁂𑀳𑀺𑀧𑀺;

𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀳𑀺, 𑀦𑀺𑀭𑀼𑀢𑁆𑀢𑀺𑀦𑀬𑀤𑀲𑁆𑀲𑀺𑀪𑀺.

‘‘𑀬𑀁 𑀢𑀺𑀓𑀸𑀮𑀁 𑀢𑀺𑀧𑀼𑀭𑀺𑀲𑀁, 𑀓𑁆𑀭𑀺𑀬𑀸𑀯𑀸𑀘𑀺 𑀢𑀺𑀓𑀸𑀭𑀓𑀁;

𑀅𑀢𑀺𑀮𑀺𑀗𑁆𑀕𑀁 𑀤𑁆𑀯𑀺𑀯𑀘𑀦𑀁, 𑀢𑀤𑀸𑀔𑁆𑀬𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀇𑀥 𑀪𑀸𑀯𑀓𑀫𑁆𑀫𑁂𑀲𑀼 𑀅𑀢𑁆𑀢𑀦𑁄𑀧𑀤𑀼𑀧𑁆𑀧𑀢𑁆𑀢𑀺𑀁 𑀓𑁂𑀘𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀅𑀯𑀲𑁆𑀲𑀫𑀺𑀘𑁆𑀙𑀦𑁆𑀢𑀻𑀢𑀺 𑀢𑁂𑀲𑀁 𑀫𑀢𑀺𑀯𑀺𑀪𑀸𑀯𑀦𑀢𑁆𑀣𑀫𑀫𑁆𑀳𑁂𑀳𑀺 𑀪𑀸𑀯𑀓𑀫𑁆𑀫𑀸𑀦𑀁 𑀓𑁆𑀭𑀺𑀬𑀸𑀧𑀤𑀸𑀦𑀺 𑀅𑀢𑁆𑀢𑀦𑁄𑀧𑀤𑀯𑀲𑁂𑀦𑀼𑀤𑁆𑀤𑀺𑀝𑁆𑀞𑀸𑀦𑀺 𑀘𑁂𑀯 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀘. 𑀲𑀩𑁆𑀩𑀸𑀦𑀺𑀧𑀺 𑀧𑀦𑁂𑀢𑀸𑀦𑀺 𑀢𑀺𑀓𑀸𑀭𑀓𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀓𑁆𑀭𑀺𑀬𑀸𑀧𑀤𑀫𑀸𑀮𑀫𑀺𑀘𑁆𑀙𑀢𑀸 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀧𑀸𑀴𑀺𑀆𑀤𑀻𑀲𑀼 𑀳𑀺 𑀢𑀺𑀓𑀸𑀭𑀓𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑀯𑀲𑁂𑀦 𑀤𑁆𑀯𑀺𑀥𑀸 𑀞𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀲𑀫𑀸𑀥𑀺𑀚𑁆𑀛𑀸𑀦𑀓𑀼𑀲𑀮𑀸, 𑀯𑀦𑁆𑀤𑀦𑁆𑀢𑀺 𑀮𑁄𑀓𑀦𑀸𑀬𑀓𑀁. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀺. 𑀓𑀣𑀁 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀁 𑀯𑀺𑀪𑁄𑀢𑀺 𑀯𑀺𑀪𑀯𑀺𑀬𑁆𑀬𑀢𑀺. 𑀲𑁄 ¶ 𑀧𑀳𑀻𑀬𑀺𑀲𑁆𑀲𑀢𑀺. 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀁 𑀪𑀸𑀲𑀢𑁂 𑀢𑀧𑀢𑁂. 𑀧𑀽𑀚𑀓𑁄 𑀮𑀪𑀢𑁂 𑀧𑀽𑀚𑀁. 𑀧𑀼𑀢𑁆𑀢𑀓𑀸𑀫𑀸 𑀣𑀺𑀬𑁄 𑀬𑀸𑀘𑀁, 𑀮𑀪𑀦𑁆𑀢𑁂 𑀢𑀸𑀤𑀺𑀲𑀁 𑀲𑀼𑀢𑀁. 𑀅𑀲𑀺𑀢𑁄 𑀢𑀸𑀤𑀺 𑀯𑀼𑀘𑁆𑀘𑀢𑁂 𑀲𑀩𑁆𑀭𑀳𑁆𑀫𑀸. 𑀅𑀕𑁆𑀕𑀺𑀚𑀸𑀤𑀺 𑀧𑀼𑀩𑁆𑀩𑁂𑀯 𑀪𑀽𑀬𑀢𑁂. 𑀲𑁄 𑀧𑀳𑀻𑀬𑁂𑀣𑀸𑀧𑀺 𑀦𑁄 𑀧𑀳𑀻𑀬𑁂𑀣𑀸𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀞𑀺𑀢𑀸𑀦𑀺. 𑀅𑀢𑁆𑀭𑀺𑀤𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑁋

𑀢𑀺𑀓𑀸𑀭𑀓𑀸𑀦𑀺 𑀲𑀩𑁆𑀩𑀸𑀦𑀺, 𑀓𑁆𑀭𑀺𑀬𑀸𑀧𑀤𑀸𑀦𑀺 𑀧𑀸𑀬𑀢𑁄;

𑀧𑀭𑀲𑁆𑀲𑀧𑀤𑀬𑁄𑀕𑁂𑀦, 𑀤𑀺𑀲𑁆𑀲𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂.

𑀅𑀢𑁆𑀢𑀦𑁄𑀧𑀤𑀬𑀼𑀢𑁆𑀢𑀸𑀦𑀺, 𑀘𑀼𑀡𑁆𑀡𑀺𑀬𑁂𑀲𑀼 𑀧𑀤𑁂𑀲𑀼 𑀳𑀺;

𑀅𑀢𑀻𑀯𑀧𑁆𑀧𑀸𑀦𑀺 𑀕𑀸𑀣𑀸𑀲𑀼, 𑀧𑀤𑀸𑀦𑀻𑀢𑀺 𑀩𑀳𑀽𑀦𑀺 𑀢𑀼.

𑀕𑀸𑀣𑀸𑀲𑀼 𑀘𑁂𑀯𑀺𑀢𑀭𑀸𑀦𑀺, 𑀘𑀼𑀡𑁆𑀡𑀺𑀬𑁂𑀲𑀼 𑀧𑀤𑁂𑀲𑀼 𑀘;

𑀲𑀼𑀩𑀳𑀽𑀦𑁂𑀯 𑀳𑀼𑀢𑁆𑀯𑀸𑀦, 𑀤𑀺𑀲𑁆𑀲𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄 𑀧𑀦𑀢𑀺 𑀅𑀦𑁆𑀢𑀺𑀆𑀤𑀻𑀦𑀁 𑀢𑁂𑀲𑀁 𑀢𑁂𑀲𑀁 𑀯𑀘𑀦𑀸𑀦𑀫𑀦𑀼𑀭𑀽𑀧𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀁 𑀢𑀺𑀓𑀸𑀭𑀓𑀓𑁆𑀭𑀺𑀬𑀸𑀧𑀤𑀸𑀦𑀺 𑀲𑀭𑀽𑀧𑀢𑁄 𑀯𑀯𑀢𑁆𑀣𑀸𑀦𑀢𑁄 𑀦𑀺𑀤𑁆𑀤𑁂𑀲𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀦𑁄𑀧𑀲𑀕𑁆𑀕𑀸𑀓𑀫𑁆𑀫𑀺𑀓𑀸𑀤𑀺𑀯𑀲𑁂𑀦 𑀪𑀯𑀢𑀺𑀲𑁆𑀲 𑀥𑀸𑀢𑀼𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀯𑀤𑀸𑀫 𑁋

𑀦𑁄𑀧𑀲𑀕𑁆𑀕𑀸 𑀅𑀓𑀫𑁆𑀫𑀸 𑀘, 𑀲𑁄𑀧𑀲𑀕𑁆𑀕𑀸 𑀅𑀓𑀫𑁆𑀫𑀺𑀓𑀸;

𑀲𑁄𑀧𑀲𑀕𑁆𑀕𑀸 𑀲𑀓𑀫𑁆𑀫𑀸 𑀘, 𑀇𑀢𑀺 𑀪𑀽𑀢𑀺 𑀯𑀺𑀪𑀸𑀯𑀺𑀢𑀸.

𑀇𑀤𑀁 𑀢𑀼 𑀯𑀘𑀦𑀁 ‘‘𑀥𑀫𑁆𑀫-𑀪𑀽𑀢𑁄 𑀪𑀼𑀢𑁆𑀯𑀸’’𑀢𑀺𑀆𑀤𑀺𑀲𑀼;

𑀧𑀢𑁆𑀢𑀸𑀦𑀼𑀪𑀯𑀦𑀢𑁆𑀣𑀁 𑀫𑁂, 𑀯𑀺𑀯𑀚𑁆𑀚𑁂𑀢𑁆𑀯𑀸 𑀉𑀤𑀻𑀭𑀺𑀢𑀁.

𑀏𑀢𑁂𑀦 𑀧𑀦 𑀅𑀢𑁆𑀣𑁂𑀦, 𑀦𑁄𑀧𑀲𑀕𑁆𑀕𑀲𑀓𑀫𑁆𑀫𑀺𑀓𑀁;

𑀕𑀳𑁂𑀢𑁆𑀯𑀸 𑀘𑀢𑀼𑀥𑀸 𑀳𑁄𑀢𑀺, 𑀇𑀢𑀺 𑀜𑁂𑀬𑁆𑀬𑀁 𑀯𑀺𑀲𑁂𑀲𑀢𑁄.

𑀦𑁄𑀧𑀲𑀕𑁆𑀕𑀸 𑀅𑀓𑀫𑁆𑀫𑀸 𑀘, 𑀲𑁄𑀧𑀲𑀕𑁆𑀕𑀸 𑀅𑀓𑀫𑁆𑀫𑀺𑀓𑀸;

𑀪𑀽𑀥𑀸𑀢𑀼 𑀓𑀸𑀭𑀺𑀢𑁂 𑀲𑀦𑁆𑀢𑁂, 𑀏𑀓𑀓𑀫𑁆𑀫𑀸 𑀪𑀯𑀦𑁆𑀢𑀺 𑀳𑀺.

‘‘𑀪𑀸𑀯𑁂𑀢𑀺 ¶ 𑀓𑀼𑀲𑀮𑀁 𑀥𑀫𑁆𑀫𑀁, 𑀯𑀺𑀪𑀸𑀯𑁂𑀢𑀻’’𑀢𑀺𑀫𑀸𑀦𑀺𑀥;

𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀽𑀳𑀺, 𑀲𑀸𑀲𑀦𑀜𑁆𑀜𑀽𑀳𑀺 𑀲𑀸𑀲𑀦𑁂.

𑀲𑁄𑀧𑀲𑀕𑁆𑀕𑀸 𑀲𑀓𑀫𑁆𑀫𑀸 𑀢𑀼, 𑀓𑀸𑀭𑀺𑀢𑀧𑁆𑀧𑀘𑁆𑀘𑀬𑁂 𑀲𑀢𑀺;

𑀤𑁆𑀯𑀺𑀓𑀫𑁆𑀫𑀸𑀬𑁂𑀯 𑀳𑁄𑀢𑀻𑀢𑀺, 𑀜𑀸𑀢𑀩𑁆𑀩𑀁 𑀯𑀺𑀜𑁆𑀜𑀼𑀦𑀸 𑀓𑀣𑀁.

𑀅𑀪𑀺𑀪𑀸𑀯𑁂𑀦𑁆𑀢𑀺 𑀧𑀼𑀭𑀺𑀲𑀸, 𑀧𑀼𑀭𑀺𑀲𑁂 𑀧𑀸𑀡𑀚𑀸𑀢𑀺𑀓𑀁;

𑀅𑀦𑀼𑀪𑀸𑀯𑁂𑀢𑀺 𑀧𑀼𑀭𑀺𑀲𑁄, 𑀲𑀫𑁆𑀧𑀢𑁆𑀢𑀺𑀁 𑀧𑀼𑀭𑀺𑀲𑀁 𑀇𑀢𑀺.

𑀇𑀤𑀁 𑀲𑀓𑀫𑁆𑀫𑀓𑀁 𑀦𑀸𑀫, 𑀅𑀓𑀫𑁆𑀫𑀓𑀫𑀺𑀤𑀁 𑀇𑀢𑀺;

𑀓𑀣𑀫𑀫𑁆𑀳𑁂𑀳𑀺 𑀜𑀸𑀢𑀩𑁆𑀩𑀁, 𑀯𑀺𑀢𑁆𑀣𑀸𑀭𑁂𑀦 𑀯𑀤𑁂𑀣 𑀦𑁄.

𑀯𑀺𑀢𑁆𑀣𑀸𑀭𑁂𑀦𑁂𑀯 𑀓𑀺𑀁 𑀯𑀢𑁆𑀢𑀼𑀁, 𑀲𑀓𑁆𑀓𑁄𑀫𑀺 𑀏𑀓𑀤𑁂𑀲𑀢𑁄;

𑀓𑀣𑀬𑀺𑀲𑁆𑀲𑀸𑀫𑀺 𑀲𑀓𑁆𑀓𑀘𑁆𑀘𑀁, 𑀯𑀤𑀢𑁄 𑀫𑁂 𑀦𑀺𑀩𑁄𑀥𑀣.

𑀆𑀔𑁆𑀬𑀸𑀢𑀺𑀓𑀧𑀤𑀁 𑀦𑀸𑀫, 𑀤𑀼𑀯𑀺𑀥𑀁 𑀲𑀫𑀼𑀤𑀻𑀭𑀺𑀢𑀁;

𑀲𑀓𑀫𑁆𑀫𑀓𑀫𑀓𑀫𑁆𑀫𑀜𑁆𑀘, 𑀇𑀢𑀺 𑀯𑀺𑀜𑁆𑀜𑀽 𑀯𑀺𑀪𑀸𑀯𑀬𑁂.

𑀢𑀢𑁆𑀭 𑀬𑀲𑁆𑀲 𑀧𑀬𑁄𑀕𑀫𑁆𑀳𑀺, 𑀧𑀤𑀲𑁆𑀲 𑀓𑀢𑁆𑀢𑀼𑀦𑀸 𑀓𑁆𑀭𑀺𑀬𑀸;

𑀦𑀺𑀧𑁆𑀨𑀸𑀤𑀺𑀢𑀸 𑀯𑀺𑀦𑀸 𑀓𑀫𑁆𑀫𑀁, 𑀦 𑀳𑁄𑀢𑀺 𑀢𑀁 𑀲𑀓𑀫𑁆𑀫𑀓𑀁.

‘‘𑀧𑀘𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀢𑀼, 𑀬𑁂𑀦 𑀓𑁂𑀦𑀘𑀺 𑀚𑀦𑁆𑀢𑀼𑀦𑀸;

𑀑𑀤𑀦𑀁 𑀯𑀸 𑀧𑀦𑀜𑁆𑀜𑀁 𑀯𑀸, 𑀓𑀺𑀜𑁆𑀘𑀺 𑀯𑀢𑁆𑀣𑀼𑀦𑁆𑀢𑀺 𑀜𑀸𑀬𑀢𑀺.

𑀬𑀲𑁆𑀲 𑀧𑀦 𑀧𑀬𑁄𑀕𑀫𑁆𑀳𑀺, 𑀓𑀫𑁆𑀫𑁂𑀦 𑀭𑀳𑀺𑀢𑀸 𑀓𑁆𑀭𑀺𑀬𑀸;

𑀧𑀤𑀲𑁆𑀲 𑀜𑀸𑀬𑀢𑁂 𑀏𑀢𑀁, 𑀅𑀓𑀫𑁆𑀫𑀓𑀦𑁆𑀢𑀺 𑀢𑀻𑀭𑀬𑁂.

‘‘𑀢𑀺𑀝𑁆𑀞𑀢𑀺 𑀤𑁂𑀯𑀤𑀢𑁆𑀢𑁄’’𑀢𑀺, 𑀯𑀼𑀢𑁆𑀢𑁂 𑀓𑁂𑀦𑀘𑀺 𑀚𑀦𑁆𑀢𑀼𑀦𑀸;

𑀞𑀸𑀦𑀁𑀯 𑀩𑀼𑀤𑁆𑀥𑀺𑀯𑀺𑀲𑀬𑁄, 𑀓𑀫𑁆𑀫𑀪𑀽𑀢𑀁 𑀦 𑀓𑀺𑀜𑁆𑀘𑀺𑀧𑀺.

𑀲𑀓𑀫𑁆𑀫𑀓𑀧𑀤𑀁 𑀢𑀢𑁆𑀣, 𑀓𑀢𑁆𑀢𑀸𑀭𑀁 𑀓𑀫𑁆𑀫𑀫𑁂𑀯 𑀘;

𑀧𑀓𑀸𑀲𑁂𑀢𑀺 𑀬𑀣𑀸𑀬𑁄𑀕-𑀫𑀺𑀢𑀺 𑀯𑀺𑀜𑁆𑀜𑀽 𑀯𑀺𑀪𑀸𑀯𑀬𑁂.

‘‘𑀑𑀤𑀦𑀁 𑀧𑀘𑀢𑀺 𑀧𑁄𑀲𑁄, 𑀑𑀤𑀦𑁄 𑀧𑀘𑁆𑀘𑀢𑁂 𑀲𑀬𑀁’’;

𑀇𑀘𑁆𑀘𑀼𑀤𑀸𑀳𑀭𑀡𑀸 𑀜𑁂𑀬𑁆𑀬𑀸, 𑀅𑀯𑀼𑀢𑁆𑀢𑁂𑀧𑀺 𑀅𑀬𑀁 𑀦𑀬𑁄.

𑀅𑀓𑀫𑁆𑀫𑀓𑀧𑀤𑀁 ¶ 𑀦𑀸𑀫, 𑀓𑀢𑁆𑀢𑀸𑀭𑀁 𑀪𑀸𑀯𑀫𑁂𑀯 𑀘;

𑀬𑀣𑀸𑀭𑀳𑀁 𑀧𑀓𑀸𑀲𑁂𑀢𑀺, 𑀇𑀢𑀺 𑀥𑀻𑀭𑁄𑀧𑀮𑀓𑁆𑀔𑀬𑁂.

𑀓𑀢𑁆𑀢𑀸𑀭𑀁 ‘‘𑀢𑀺𑀝𑁆𑀞𑀢𑀺’’𑀘𑁆𑀘𑀢𑁆𑀭, 𑀲𑀽𑀘𑁂𑀢𑀺 𑀪𑀸𑀯𑀦𑀸𑀫𑀓𑀁;

‘‘𑀉𑀧𑀝𑁆𑀞𑀻𑀬𑀢𑀺’’ 𑀇𑀘𑁆𑀘𑀢𑁆𑀭, 𑀅𑀯𑀼𑀢𑁆𑀢𑁂𑀧𑀺 𑀅𑀬𑀁 𑀦𑀬𑁄.

𑀏𑀯𑀁 𑀲𑀓𑀫𑁆𑀫𑀓𑀸𑀓𑀫𑁆𑀫𑀁, 𑀜𑀢𑁆𑀯𑀸 𑀬𑁄𑀚𑁂𑀬𑁆𑀬 𑀩𑀼𑀤𑁆𑀥𑀺𑀫𑀸;

𑀢𑀺𑀓𑀫𑁆𑀫𑀓𑀜𑁆𑀘 𑀚𑀸𑀦𑁂𑀬𑁆𑀬, 𑀓𑀭𑀸𑀤𑁄 𑀓𑀸𑀭𑀺𑀢𑁂 𑀲𑀢𑀺.

‘‘𑀲𑀼𑀯𑀡𑁆𑀡𑀁 𑀓𑀝𑀓𑀁 𑀧𑁄𑀲𑁄, 𑀓𑀸𑀭𑁂𑀢𑀺 𑀧𑀼𑀭𑀺𑀲’’𑀦𑁆𑀢𑀺 𑀘;

‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑁂 𑀕𑀸𑀫𑀁, 𑀭𑀣𑀁 𑀯𑀸𑀳𑁂𑀢𑀺’’𑀇𑀘𑁆𑀘𑀧𑀺.

𑀏𑀢𑁆𑀣 𑀪𑀯𑀢𑀺𑀥𑀸𑀢𑀼𑀫𑁆𑀳𑀺, 𑀦𑀬𑁄 𑀏𑀲𑁄 𑀦 𑀮𑀩𑁆𑀪𑀢𑀺;

𑀢𑀲𑁆𑀫𑀸 𑀤𑁆𑀯𑀺𑀓𑀫𑁆𑀫𑀓𑀜𑁆𑀜𑁂𑀯, 𑀧𑀤𑀫𑁂𑀢𑁆𑀣 𑀯𑀺𑀪𑀸𑀯𑀺𑀢𑀁.

𑀏𑀤𑀺𑀲𑁄 𑀘 𑀦𑀬𑁄 𑀦𑀸𑀫, 𑀧𑀸𑀴𑀺𑀬𑀁 𑀢𑀼 𑀦 𑀤𑀺𑀲𑁆𑀲𑀢𑀺;

𑀏𑀓𑀘𑁆𑀘𑀸𑀦𑀁 𑀫𑀢𑁂𑀦𑁂𑀯, 𑀫𑀬𑀸 𑀏𑀯𑀁 𑀧𑀓𑀸𑀲𑀺𑀢𑁄.

𑀏𑀢𑁆𑀣 𑀘 ‘‘𑀢𑀫𑁂𑀦𑀁 𑀭𑀸𑀚𑀸, 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸;

𑀓𑀸𑀭𑀸𑀧𑁂𑀢𑀻’’𑀢𑀺 𑀬𑁄 𑀧𑀸𑀞𑁄, 𑀦𑀺𑀤𑁆𑀤𑁂𑀲𑁂 𑀢𑀁 𑀲𑀼𑀦𑀺𑀤𑁆𑀤𑀺𑀲𑁂.

‘‘𑀫𑀦𑀼𑀲𑁆𑀲𑁂𑀳𑀻’’𑀢𑀺 𑀆𑀳𑀭𑀺𑀢𑁆𑀯𑀸, 𑀧𑀸𑀞𑀲𑁂𑀲𑀁 𑀲𑀼𑀫𑁂𑀥𑀲𑁄;

‘‘𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺’’, 𑀇𑀢𑀺 𑀧𑀸𑀞𑀲𑁆𑀲 𑀤𑀲𑁆𑀲𑀦𑀸.

𑀏𑀢𑀁 𑀦𑀬𑀁 𑀯𑀺𑀤𑀽 𑀜𑀢𑁆𑀯𑀸, 𑀬𑁄𑀚𑁂 𑀧𑀸𑀞𑀸𑀦𑀼𑀭𑀽𑀧𑀢𑁄;

‘‘𑀲𑀼𑀯𑀡𑁆𑀡𑀁 𑀓𑀝𑀓𑀁 𑀧𑁄𑀲𑁄, 𑀓𑀸𑀭𑁂𑀢𑀺 𑀧𑀼𑀭𑀺𑀲𑁂𑀦𑀺’’𑀢𑀺.

𑀯𑀺𑀓𑀭𑀡𑀧𑁆𑀧𑀘𑁆𑀘𑀬𑀸𑀯, 𑀯𑀼𑀢𑁆𑀢𑀸 𑀏𑀢𑁆𑀣 𑀲𑀭𑀽𑀧𑀢𑁄;

𑀲𑀕𑀡𑁂 𑀲𑀕𑀡𑁂 𑀢𑁂𑀲𑀁, 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀼𑀫𑁂𑀯 𑀘.

‘‘𑀅𑀲𑁆𑀫𑀺𑀁 𑀕𑀡𑁂 𑀅𑀬𑀁 𑀥𑀸𑀢𑀼, 𑀳𑁄𑀢𑀻’’𑀢𑀺 𑀢𑁂𑀳𑀺 𑀯𑀺𑀜𑁆𑀜𑀼𑀦𑁄;

𑀯𑀺𑀜𑁆𑀜𑀸𑀧𑁂𑀢𑀼𑀜𑁆𑀘 𑀅𑀜𑁆𑀜𑁂𑀳𑀺, 𑀜𑀸𑀧𑀦𑀸 𑀧𑀘𑁆𑀘𑀬𑁂𑀳𑀺 𑀦.

𑀢𑀣𑀸 𑀳𑀺 𑀪𑀸𑀯𑀓𑀫𑁆𑀫𑁂𑀲𑀼, 𑀯𑀺𑀳𑀺𑀢𑁄 𑀧𑀘𑁆𑀘𑀬𑁄 𑀢𑀼 𑀬𑁄;

𑀅𑀝𑁆𑀞𑀯𑀺𑀥𑁂𑀧𑀺 𑀥𑀸𑀢𑀽𑀦𑀁, 𑀕𑀡𑀲𑁆𑀫𑀺𑀁 𑀲𑀫𑁆𑀧𑀯𑀢𑁆𑀢𑀢𑀺.

𑀪𑀽𑀥𑀸𑀢𑀼𑀚𑁂𑀲𑀼 ¶ 𑀭𑀽𑀧𑁂𑀲𑀼, 𑀅𑀲𑀫𑁆𑀫𑁄𑀳𑀸𑀬 𑀲𑁄𑀢𑀼𑀦𑀁;

𑀦𑀸𑀦𑀸𑀯𑀺𑀥𑁄 𑀦𑀬𑁄 𑀏𑀯𑀁, 𑀫𑀬𑀸 𑀏𑀢𑁆𑀣 𑀧𑀓𑀸𑀲𑀺𑀢𑁄.

𑀬𑁂 𑀮𑁄𑀓𑁂 𑀅𑀧𑁆𑀧𑀬𑀼𑀢𑁆𑀢𑀸 𑀯𑀺𑀯𑀺𑀥𑀯𑀺𑀓𑀭𑀡𑀸𑀔𑁆𑀬𑀸𑀢𑀲𑀤𑁆𑀤𑁂𑀲𑁆𑀯𑀙𑁂𑀓𑀸,

𑀢𑁂 𑀧𑀢𑁆𑀯𑀸𑀔𑁆𑀬𑀸𑀢𑀲𑀤𑁆𑀤𑁂 𑀅𑀯𑀺𑀕𑀢𑀯𑀺𑀫𑀢𑀻 𑀳𑁄𑀦𑁆𑀢𑀺 𑀜𑀸𑀡𑀻𑀧𑀺 𑀢𑀲𑁆𑀫𑀸;

𑀅𑀘𑁆𑀘𑀦𑁆𑀢𑀜𑁆𑀜𑁂𑀯 𑀥𑀻𑀭𑁄 𑀲𑀧𑀭𑀳𑀺𑀢𑀭𑀢𑁄 𑀲𑀸𑀲𑀦𑁂 𑀤𑀴𑁆𑀳𑀧𑁂𑀫𑁄,

𑀬𑁄𑀕𑀁 𑀢𑁂𑀲𑀁 𑀧𑀬𑁄𑀕𑁂 𑀧𑀝𑀼𑀢𑀭𑀫𑀢𑀺𑀢𑀁 𑀧𑀢𑁆𑀣𑀬𑀸𑀦𑁄 𑀓𑀭𑁂𑀬𑁆𑀬.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼

𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀓𑀭𑀡𑀸𑀔𑁆𑀬𑀸𑀢𑀯𑀺𑀪𑀸𑀕𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀪𑀯𑀢𑀺𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀯𑀺𑀪𑀸𑀕

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑁄𑀢𑀽𑀦𑀁 𑀫𑀢𑀺𑀯𑀟𑁆𑀠𑀦𑀁;

𑀓𑁆𑀭𑀺𑀬𑀸𑀧𑀤𑀓𑁆𑀓𑀫𑀁 𑀦𑀸𑀫, 𑀯𑀺𑀪𑀢𑁆𑀢𑀸𑀤𑀻𑀦𑀺 𑀤𑀻𑀧𑀬𑀁.

𑀢𑀢𑁆𑀭 𑀆𑀔𑁆𑀬𑀸𑀢𑀺𑀓𑀲𑁆𑀲 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑁆𑀢𑀲𑀽𑀘𑀺𑀓𑀸 𑀢𑁆𑀬𑀸𑀤𑀬𑁄 𑀯𑀺𑀪𑀢𑁆𑀢𑀺𑀬𑁄, 𑀢𑀸 𑀅𑀝𑁆𑀞𑀯𑀺𑀥𑀸 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀻 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦.

𑀢𑀢𑁆𑀣𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫, 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀢𑀼 𑀅𑀦𑁆𑀢𑀼, 𑀳𑀺 𑀣, 𑀫𑀺 𑀫, 𑀢𑀁 𑀅𑀦𑁆𑀢𑀁, 𑀲𑀼 𑀯𑁆𑀳𑁄, 𑀏 𑀆𑀫𑀲𑁂 𑀇𑀘𑁆𑀘𑁂𑀢𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀏𑀬𑁆𑀬 ¶ 𑀏𑀬𑁆𑀬𑀼𑀁, 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀣, 𑀏𑀬𑁆𑀬𑀸𑀫𑀺 𑀏𑀬𑁆𑀬𑀸𑀫, 𑀏𑀣 𑀏𑀭𑀁, 𑀏𑀣𑁄 𑀏𑀬𑁆𑀬𑀸𑀯𑁆𑀳𑁄, 𑀏𑀬𑁆𑀬𑀁 𑀏𑀬𑁆𑀬𑀸𑀫𑁆𑀳𑁂 𑀇𑀘𑁆𑀘𑁂𑀢𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀅 𑀉, 𑀏 𑀢𑁆𑀣, 𑀅𑀁 𑀫𑁆𑀳, 𑀢𑁆𑀣 𑀭𑁂, 𑀢𑁆𑀣𑁄 𑀯𑁆𑀳𑁄, 𑀇𑀁 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀆 𑀊, 𑀑 𑀢𑁆𑀣, 𑀅𑀁 𑀫𑁆𑀳𑀸, 𑀢𑁆𑀣 𑀢𑁆𑀣𑀼𑀁, 𑀲𑁂 𑀯𑁆𑀳𑀁, 𑀇𑀁 𑀫𑁆𑀳𑀲𑁂 𑀇𑀘𑁆𑀘𑁂𑀢𑀸 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀈 𑀉𑀁, 𑀑 𑀢𑁆𑀣, 𑀇𑀁 𑀫𑁆𑀳𑀸, 𑀆 𑀊, 𑀲𑁂 𑀯𑁆𑀳𑀁, 𑀅𑀁 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑁆𑀲𑀢𑀺 𑀲𑁆𑀲𑀦𑁆𑀢𑀺, 𑀲𑁆𑀲𑀲𑀺 𑀲𑁆𑀲𑀣, 𑀲𑁆𑀲𑀸𑀫𑀺 𑀲𑁆𑀲𑀸𑀫, 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀁 𑀲𑁆𑀲𑀸𑀫𑁆𑀳𑁂 𑀇𑀘𑁆𑀘𑁂𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑁆𑀲𑀸 𑀲𑁆𑀲𑀁𑀲𑀼, 𑀲𑁆𑀲𑁂 𑀲𑁆𑀲𑀣, 𑀲𑁆𑀲𑀁 𑀲𑁆𑀲𑀸𑀫𑁆𑀳𑀸, 𑀲𑁆𑀲𑀣 𑀲𑁆𑀲𑀺𑀲𑀼, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀺𑀁 𑀲𑁆𑀲𑀸𑀫𑁆𑀳𑀲𑁂 𑀇𑀘𑁆𑀘𑁂𑀢𑀸 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑀩𑁆𑀩𑀸𑀲𑀫𑁂𑀢𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺 𑀦𑀸𑀫. 𑀬𑀸𑀦𑀺 𑀬𑀸𑀦𑀺 𑀧𑀦 𑀧𑀭𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀦𑀸𑀫. 𑀢𑀢𑁆𑀣 𑀧𑀭𑀲𑁆𑀲𑀧𑀤𑀸𑀦𑀺 𑀯𑀢𑁆𑀢𑀫𑀸𑀦𑀸 𑀙, 𑀧𑀜𑁆𑀘𑀫𑀺𑀬𑁄 𑀙, 𑀲𑀢𑁆𑀢𑀫𑀺𑀬𑁄 𑀙, 𑀧𑀭𑁄𑀓𑁆𑀔𑀸 𑀙, 𑀳𑀺𑀬𑁆𑀬𑀢𑁆𑀢𑀦𑀺𑀬𑁄 𑀙, 𑀅𑀚𑁆𑀚𑀢𑀦𑀺𑀬𑁄 𑀙, 𑀪𑀯𑀺𑀲𑁆𑀲𑀦𑁆𑀢𑀺𑀬𑁄 𑀙, 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑁄 𑀙𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀺𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀇𑀢𑀭𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀸𑀦𑀺.

𑀧𑀭𑀲𑁆𑀲𑀧𑀤𑀸𑀦𑀫𑀢𑁆𑀢𑀦𑁄𑀧𑀤𑀸𑀦𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸 𑀦𑀸𑀫. 𑀢𑁂 𑀯𑀢𑁆𑀢𑀫𑀸𑀦𑀸𑀤𑀻𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄, 𑀅𑀝𑁆𑀞𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲, 𑀧𑀺𑀡𑁆𑀟𑀺𑀢𑀸𑀦𑀺 𑀧𑀭𑀺𑀫𑀸𑀡𑀸𑀦𑁂𑀯.

𑀤𑁆𑀯𑀻𑀲𑀼 ¶ 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀧𑀞𑀫𑀁 𑀧𑀞𑀫𑀁 𑀏𑀓𑀯𑀘𑀦𑀁, 𑀤𑀼𑀢𑀺𑀬𑀁 𑀤𑀼𑀢𑀺𑀬𑀁 𑀩𑀳𑀼𑀯𑀘𑀦𑀁.

𑀢𑀢𑁆𑀭 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀻𑀦𑀦𑁆𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫 𑀇𑀘𑁆𑀘𑁂𑀢𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺. 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂 𑀇𑀘𑁆𑀘𑁂𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺. 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑁂𑀲𑀼𑀧𑀺𑀢𑀺 𑀅𑀦𑁆𑀢𑀺 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑀺𑀣 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀫𑀺 𑀫 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸, 𑀢𑁂 𑀅𑀦𑁆𑀢𑁂 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑁂 𑀯𑁆𑀳𑁂 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀏 𑀫𑁆𑀳𑁂 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸.

𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑁂𑀲𑀼𑀧𑀺 𑀢𑀺-𑀇𑀢𑀺 𑀏𑀓𑀯𑀘𑀦𑀁, 𑀅𑀦𑁆𑀢𑀺-𑀇𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀏𑀯𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀓𑀫𑀢𑁄 𑀜𑁂𑀬𑁆𑀬𑀸𑀦𑀺. 𑀏𑀯𑀁 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀜𑁂𑀬𑁆𑀬𑀸𑀦𑀺.

𑀢𑀢𑁆𑀣 𑀯𑀺𑀪𑀢𑁆𑀢𑀻𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀪𑀢𑁆𑀢𑀺? 𑀓𑀸𑀮𑀸𑀤𑀺𑀯𑀲𑁂𑀦 𑀥𑀸𑀢𑁆𑀯𑀢𑁆𑀣𑀁 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀲𑁆𑀬𑀸𑀤𑀻𑀳𑀺 𑀦𑀸𑀫𑀺𑀓𑀯𑀺𑀪𑀢𑁆𑀢𑀻𑀳𑀺 𑀲𑀳 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 𑀲𑀓𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀓𑀫𑁆𑀫𑀸𑀤𑀬𑁄 𑀯𑀸 𑀓𑀸𑀭𑀓𑁂 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀯𑀺𑀪𑀚𑀺𑀢𑀩𑁆𑀩𑀸 𑀜𑀸𑀡𑁂𑀦𑀸𑀢𑀺𑀧𑀺 𑀯𑀺𑀪𑀢𑁆𑀢𑀺, 𑀯𑀺𑀪𑀚𑀦𑁆𑀢𑀺 𑀅𑀢𑁆𑀣𑁂 𑀏𑀢𑀸𑀬𑀸𑀢𑀺𑀧𑀺 𑀯𑀺𑀪𑀢𑁆𑀢𑀺, 𑀅𑀣 𑀯𑀸 𑀲𑀢𑀺𑀧𑀺 𑀚𑀺𑀦𑀲𑀸𑀲𑀦𑁂 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀪𑀢𑁆𑀢𑀻𑀳𑀺 𑀯𑀺𑀦𑀸 𑀅𑀢𑁆𑀣𑀲𑁆𑀲𑀸’𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑁂𑀦 𑀯𑀺𑀯𑀺𑀥𑁂𑀦 𑀯𑀸 𑀆𑀓𑀸𑀭𑁂𑀦 𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀦𑀁 𑀧𑀡𑁆𑀟𑀺𑀢𑀸𑀢𑀺𑀧𑀺 𑀯𑀺𑀪𑀢𑁆𑀢𑀺. 𑀢𑀢𑁆𑀣 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑀮𑀓𑁆𑀔𑀡𑀁 𑀯𑀤𑀸𑀫 𑀲𑀳 𑀧𑀬𑁄𑀕𑀦𑀺𑀤𑀲𑁆𑀲𑀦𑀸𑀤𑀻𑀳𑀺.

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀦𑀸𑀫𑀺𑀓𑁂𑀲𑀼𑀧𑀮𑀩𑁆𑀪𑀢𑀺;

𑀦𑀸𑀔𑁆𑀬𑀸𑀢𑁂𑀲𑀽𑀢𑀺 𑀯𑀺𑀜𑁆𑀜𑁂𑀬𑁆𑀬-𑀫𑀺𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀦𑀺𑀕𑁆𑀭𑁄𑀥𑁄𑀯 𑀫𑀳𑀸𑀭𑀼𑀓𑁆𑀔𑁄, 𑀣𑁂𑀭 𑀯𑀸𑀤𑀸𑀦𑀫𑀼𑀢𑁆𑀢𑀫𑁄;

𑀅𑀦𑀽𑀦𑀁 𑀅𑀦𑀥𑀺𑀓𑀜𑁆𑀘, 𑀓𑁂𑀯𑀮𑀁 𑀚𑀺𑀦𑀲𑀸𑀲𑀦𑀁.

𑀢𑀢𑁆𑀭 ¶ 𑀣𑁂𑀭-𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄, 𑀣𑁂𑀭𑀸𑀦𑀁 𑀅𑀬𑀦𑁆𑀢𑀺 𑀣𑁂𑀭𑁄. 𑀓𑁄 𑀲𑁄? 𑀯𑀸𑀤𑁄. 𑀣𑁂𑀭𑀯𑀸𑀤𑁄 𑀅𑀜𑁆𑀜𑁂𑀲𑀁 𑀯𑀸𑀤𑀸𑀦𑀁 𑀉𑀢𑁆𑀢𑀫𑁄𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀓𑀸𑀬𑁄 𑀢𑁂 𑀲𑀩𑁆𑀩 𑀲𑁄𑀯𑀡𑁆𑀡𑁄’’, 𑀇𑀘𑁆𑀘𑀸𑀤𑀺𑀫𑁆𑀳𑀺𑀧𑀺 𑀦𑀸𑀫𑀺𑀓𑁂;

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀕𑀳𑁂𑀢𑀩𑁆𑀩𑁄 𑀦𑀬𑀜𑁆𑀜𑀼𑀦𑀸.

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀦𑀦𑁆𑀯𑀸𑀔𑁆𑀬𑀸𑀢𑁂𑀧𑀺 𑀤𑀺𑀲𑁆𑀲𑀢𑀺;

‘‘𑀪𑁄 𑀔𑀸𑀤 𑀧𑀺𑀯’’𑀇𑀘𑁆𑀘𑀢𑁆𑀭, 𑀯𑀤𑁂 𑀬𑁄 𑀓𑁄𑀘𑀺 𑀘𑁄𑀤𑀓𑁄.

𑀬𑀤𑀺 𑀏𑀯𑀁 𑀫𑀢𑁂𑀦𑀲𑁆𑀲, 𑀪𑀯𑁂𑀬𑁆𑀬 𑀅𑀯𑀺𑀪𑀢𑁆𑀢𑀺𑀓𑀁;

‘‘𑀪𑀺𑀓𑁆𑀔𑀼, 𑀪𑁄 𑀧𑀼𑀭𑀺𑀲𑀺’’𑀘𑁆𑀘𑀸𑀤𑀺, 𑀧𑀤𑀫𑁆𑀧𑀺, 𑀦 𑀳𑀺𑀤𑀁 𑀢𑀣𑀸.

‘‘𑀪𑀺𑀓𑁆𑀔𑀼, 𑀪𑁄 𑀧𑀼𑀭𑀺𑀲𑀺’’𑀘𑁆𑀘𑀸𑀤𑀺, 𑀲𑀺 𑀕 𑀮𑁄𑀧𑁂𑀦 𑀯𑀼𑀘𑁆𑀘𑀢𑀺;

𑀢𑀣𑀸 ‘‘𑀔𑀸𑀤𑀸’’𑀢𑀺𑀆𑀤𑀻𑀦𑀺, 𑀳𑀺 𑀮𑁄𑀧𑁂𑀦 𑀧𑀯𑀼𑀘𑁆𑀘𑀭𑁂.

𑀏𑀯𑀁 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀆𑀔𑁆𑀬𑀸𑀢𑁂𑀲𑀼 𑀦 𑀮𑀩𑁆𑀪𑀢𑀺, 𑀦𑀸𑀫𑁂𑀲𑀼𑀬𑁂𑀯 𑀮𑀩𑁆𑀪𑀢𑀺. 𑀢𑀢𑁆𑀭𑀸𑀧𑀺 ‘‘𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂’’𑀢𑀺 𑀏𑀢𑁆𑀣 𑀙𑀦𑁆𑀤𑀯𑀲𑁂𑀦 𑀧𑀼𑀕𑁆𑀕𑀮 𑀇𑀢𑀺 𑀭𑀲𑁆𑀲𑀓𑀭𑀡𑀁 𑀤𑀝𑁆𑀞𑀩𑁆𑀩𑀁, 𑀦 ‘‘𑀓𑀓𑀼𑀲𑀦𑁆𑀥 𑀓𑁄𑀡𑀸𑀕𑀫𑀦𑁄 𑀘 𑀓𑀲𑁆𑀲𑀧𑁄’’𑀢𑀺 𑀏𑀢𑁆𑀣 𑀓𑀓𑀼𑀲𑀦𑁆𑀥 𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀯𑀺𑀬 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸’’𑀢𑀺 𑀏𑀢𑁆𑀣 𑀧𑀦 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀪𑀺𑀓𑁆𑀔𑀼𑀫𑁆𑀳𑀻𑀢𑀺 𑀯𑀢𑁆𑀢𑀩𑁆𑀩𑀢𑁆𑀣𑀢𑁆𑀢𑀸 𑀪𑀼𑀫𑁆𑀫𑁂 𑀧𑀘𑁆𑀘𑀢𑁆𑀢𑀦𑁆𑀢𑀺𑀧𑀺 𑀅𑀤𑀺𑀝𑁆𑀞𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀦 𑀙𑀦𑁆𑀤𑀯𑀲𑁂𑀦 𑀓𑀢𑀭𑀲𑁆𑀲𑀢𑁆𑀢𑀸 𑀢𑀸𑀦𑀺 𑀧𑀤𑀸𑀦𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑀧𑀓𑁆𑀔𑀫𑁆𑀧𑀺 𑀪𑀚𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀺.

𑀢𑀢𑁆𑀣 𑀧𑀭𑀲𑁆𑀲𑀧𑀤𑀸𑀦𑀻𑀢𑀺 𑀧𑀭𑀲𑁆𑀲 𑀅𑀢𑁆𑀣𑀪𑀽𑀢𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺. 𑀏𑀢𑁆𑀣𑀼𑀢𑁆𑀢𑀫𑀧𑀼𑀭𑀺𑀲𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀣𑁂𑀲𑀼𑀧𑀺 𑀅𑀢𑁆𑀢𑀦𑁄𑀧𑀤𑀯𑁄𑀳𑀸𑀭𑁄 𑀦 𑀓𑀭𑀺𑀬𑀢𑀺.

𑀓𑀺𑀜𑁆𑀘𑀸𑀧𑀺 ¶ 𑀅𑀢𑁆𑀢𑀦𑁄 𑀅𑀢𑁆𑀣𑀸, 𑀧𑀼𑀭𑀺𑀲𑀸 𑀉𑀢𑁆𑀢𑀫𑀯𑁆𑀳𑀬𑀸;

𑀢𑀣𑀸𑀧𑀺 𑀇𑀢𑀭𑁂𑀲𑀸𑀦-𑀫𑀼𑀲𑁆𑀲𑀦𑁆𑀦𑀢𑁆𑀢𑀸𑀯 𑀢𑀩𑁆𑀩𑀲𑀸;

𑀢𑀩𑁆𑀩𑁄𑀳𑀸𑀭𑁄 𑀇𑀫𑁂𑀲𑀸𑀦𑀁, 𑀧𑁄𑀭𑀸𑀡𑁂𑀳𑀺 𑀦𑀺𑀭𑁄𑀧𑀺𑀢𑁄.

𑀅𑀢𑁆𑀢𑀦𑁄𑀧𑀤𑀸𑀦𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑀸𑀦𑀺 𑀧𑀤𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺. 𑀏𑀢𑁆𑀣 𑀧𑀦 𑀧𑀞𑀫𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀲𑀼 𑀧𑀭𑀲𑁆𑀲𑀢𑁆𑀣𑁂𑀲𑀼𑀧𑀺 𑀧𑀭𑀲𑁆𑀲𑀧𑀤𑀯𑁄𑀳𑀸𑀭𑁄 𑀦 𑀓𑀭𑀺𑀬𑀢𑀺.

𑀧𑀞𑀫𑀫𑀚𑁆𑀛𑀺𑀫𑀸 𑀘𑁂𑀢𑁂, 𑀧𑀭𑀲𑁆𑀲𑀢𑁆𑀣𑀸 𑀢𑀣𑀸𑀧𑀺 𑀘;

𑀇𑀢𑀭𑁂𑀲𑀁 𑀦𑀺𑀭𑀽𑀴𑁆𑀳𑀢𑁆𑀢𑀸, 𑀢𑀩𑁆𑀩𑁄𑀳𑀸𑀭𑀲𑁆𑀲 𑀲𑀘𑁆𑀘𑀢𑁄.

𑀇𑀫𑀲𑁆𑀲 𑀧𑀦𑀺𑀫𑁂𑀲𑀸𑀦𑀁, 𑀧𑀼𑀩𑁆𑀩𑀯𑁄𑀳𑀸𑀭𑀢𑀸𑀬 𑀘;

𑀢𑀣𑀸 𑀲𑀗𑁆𑀓𑀭𑀤𑁄𑀲𑀲𑁆𑀲, 𑀳𑀭𑀡𑀢𑁆𑀣𑀸𑀬 𑀲𑁄 𑀅𑀬𑀁;

𑀅𑀢𑁆𑀢𑀦𑁄𑀧𑀤𑀯𑁄𑀳𑀸𑀭𑁄, 𑀏𑀲𑀫𑀸𑀭𑁄𑀧𑀺𑀢𑁄 𑀥𑀼𑀯𑀁.

𑀧𑀭𑀲𑁆𑀲𑀧𑀤𑀲𑀜𑁆𑀜𑀸𑀤𑀺-𑀲𑀜𑁆𑀜𑀸𑀬𑁄 𑀩𑀳𑀼𑀓𑀸 𑀇𑀥;

𑀧𑁄𑀭𑀸𑀡𑁂𑀳𑀺 𑀓𑀢𑀢𑁆𑀢𑀸𑀢𑀸, 𑀲𑀜𑁆𑀜𑀸 𑀧𑁄𑀭𑀸𑀡𑀺𑀓𑀸 𑀫𑀢𑀸.

𑀢𑀲𑁆𑀫𑀸 𑀇𑀥 𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀼𑀭𑀺𑀲𑀸𑀦𑀁 𑀯𑀘𑀦𑀢𑁆𑀣𑀁 𑀦 𑀧𑀭𑀺𑀬𑁂𑀲𑀸𑀫. 𑀭𑀽𑀴𑁆𑀳𑀺𑀬𑀸 𑀳𑀺 𑀧𑁄𑀭𑀸𑀡𑁂𑀳𑀺 𑀢𑁆𑀬𑀸𑀤𑀻𑀦𑀁 𑀧𑀼𑀭𑀺𑀲𑀲𑀜𑁆𑀜𑀸 𑀯𑀺𑀳𑀺𑀢𑀸.

𑀏𑀓𑀯𑀘𑀦𑀩𑀳𑀼𑀯𑀘𑀦𑁂𑀲𑀼 𑀧𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀯𑀘𑀦𑀁 𑀏𑀓𑀯𑀘𑀦𑀁. 𑀩𑀳𑀽𑀦𑀫𑀢𑁆𑀣𑀸𑀦𑀁 𑀯𑀘𑀦𑀁 𑀩𑀳𑀼𑀯𑀘𑀦𑀁. 𑀅𑀣 𑀯𑀸 𑀩𑀳𑀼𑀢𑁆𑀢𑁂𑀧𑀺 𑀲𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀚𑀸𑀢𑀺𑀯𑀲𑁂𑀦 𑀯𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑀻𑀓𑀢𑀲𑁆𑀲𑀢𑁆𑀣𑀲𑁆𑀲 𑀏𑀓𑀲𑁆𑀲 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁, 𑀩𑀳𑀼𑀢𑁆𑀢𑁂 𑀦𑀺𑀲𑁆𑀲𑀺𑀢𑀲𑁆𑀲 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀲𑁆𑀲 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁, 𑀏𑀓𑀢𑁆𑀢𑀮𑀓𑁆𑀔𑀡𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁. 𑀅𑀩𑀳𑀼𑀢𑁆𑀢𑁂𑀧𑀺 𑀲𑀢𑀺 𑀅𑀢𑁆𑀢𑀕𑀭𑀼𑀓𑀸𑀭𑀸𑀧𑀭𑀺𑀘𑁆𑀙𑁂𑀤𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑀧𑀼𑀘𑁆𑀙𑀸𑀲𑀪𑀸𑀕𑀧𑀼𑀣𑀼𑀘𑀺𑀢𑁆𑀢- 𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁆𑀣𑀲𑁆𑀲 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀁 𑀩𑀳𑀼𑀯𑀘𑀦𑀁, 𑀢𑀣𑀸 𑀬𑁂 𑀬𑁂 𑀩𑀳𑀯𑁄 𑀢𑀦𑁆𑀦𑀺𑀯𑀸𑀲𑀢𑀁𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲𑁂𑀓𑀲𑁆𑀲𑀢𑁆𑀣𑀲𑁆𑀲 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀜𑁆𑀜𑁂𑀦𑀢𑁆𑀣𑁂𑀦 𑀏𑀓𑀸𑀪𑀺𑀥𑀸𑀦𑀯𑀲𑁂𑀦 𑀩𑀳𑀽𑀦𑀁 ¶ 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀦𑀺𑀲𑁆𑀲𑀺𑀢𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀆𑀭𑀫𑁆𑀫𑀡𑀪𑁂𑀤𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁. 𑀏𑀯𑀫𑀺𑀫𑁂𑀳𑀺 𑀆𑀓𑀸𑀭𑁂𑀳𑀺 𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂, 𑀏𑀓𑀫𑁆𑀳𑀺 𑀯𑀺𑀬 𑀘 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂, 𑀩𑀳𑀼𑀫𑁆𑀳𑀺 𑀯𑀺𑀬 𑀘 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀣𑀼𑀯𑀘𑀦𑀁, 𑀅𑀦𑁂𑀓𑀯𑀘𑀦𑀦𑁆𑀢𑀺 𑀘 𑀇𑀫𑀲𑁆𑀲𑁂𑀯 𑀦𑀸𑀫𑀁.

𑀯𑀘𑀦𑁂𑀲𑀼 𑀅𑀬𑀁 𑀅𑀢𑁆𑀣𑁄, 𑀦𑀸𑀫𑀸𑀔𑁆𑀬𑀸𑀢𑀯𑀺𑀪𑀢𑁆𑀢𑀺𑀦𑀁;

𑀯𑀲𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑁄, 𑀲𑀸𑀲𑀦𑀢𑁆𑀣𑀕𑀯𑁂𑀲𑀺𑀦𑀸.

𑀢𑀲𑁆𑀫𑀸 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀇𑀥 𑀦𑀸𑀫𑀺𑀓𑀧𑀬𑁄𑀕𑁂𑀳𑀺 𑀲𑀳𑁂𑀯𑀸𑀔𑁆𑀬𑀸𑀢𑀧𑀬𑁄𑀕𑁂 𑀧𑀯𑀓𑁆𑀔𑀸𑀫 𑁋 ‘‘𑀭𑀸𑀚𑀸 𑀆𑀕𑀘𑁆𑀙𑀢𑀺, 𑀲𑀳𑀸𑀬𑁄 𑀫𑁂 𑀆𑀕𑀘𑁆𑀙𑀢𑀺, 𑀏𑀓𑀁 𑀘𑀺𑀢𑁆𑀢’’ 𑀫𑀺𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀏𑀓𑀯𑀘𑀦𑀧𑀬𑁄𑀕𑀸. ‘‘𑀭𑀸𑀚𑀸𑀦𑁄 𑀆𑀕𑀘𑁆𑀙𑀦𑁆𑀢𑀺, 𑀲𑀳𑀸𑀬𑀸 𑀫𑁂 𑀆𑀕𑀘𑁆𑀙𑀦𑁆𑀢𑀺, 𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀤𑁆𑀯𑁂 𑀢𑀻𑀡𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀩𑀯𑁆𑀳𑀢𑁆𑀣𑀸𑀦𑀁 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀲𑀸 𑀲𑁂𑀦𑀸 𑀫𑀳𑀢𑀻 𑀆𑀲𑀺, 𑀩𑀳𑀼𑀚𑁆𑀚𑀦𑁄 𑀧𑀲𑀦𑁆𑀦𑁄𑀲𑀺, 𑀲𑀩𑁆𑀩𑁄 𑀢𑀁 𑀚𑀦𑁄 𑀑𑀚𑀺𑀦𑀸𑀬𑀢𑀼, 𑀇𑀢𑁆𑀣𑀺𑀕𑀼𑀫𑁆𑀩𑀲𑁆𑀲 𑀧𑀯𑀭𑀸, 𑀩𑀼𑀤𑁆𑀥𑀲𑁆𑀲𑀸𑀳𑀁 𑀯𑀢𑁆𑀣𑀬𑀼𑀕𑀁 𑀅𑀤𑀸𑀲𑀺𑀁, 𑀤𑁆𑀯𑀬𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀧𑁂𑀫𑀁 𑀫𑀳𑀦𑁆𑀢𑀁 𑀭𑀢𑀦𑀢𑁆𑀢𑀬𑀲𑁆𑀲, 𑀓𑀭𑁂 𑀧𑀲𑀸𑀤𑀜𑁆𑀘 𑀦𑀭𑁄 𑀅𑀯𑀲𑁆𑀲𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀩𑀮𑀓𑀸𑀬𑁄, 𑀤𑁂𑀯𑀦𑀺𑀓𑀸𑀬𑁄, 𑀅𑀭𑀺𑀬𑀕𑀡𑁄’’- 𑀇𑀘𑁆𑀘𑁂𑀯𑀫𑀸𑀤𑀬𑁄, ‘‘𑀤𑁆𑀯𑀺𑀓𑀁 𑀢𑀺𑀓’’𑀫𑀺𑀘𑁆𑀘𑀸𑀤𑀬𑁄 𑀘 𑀲𑀫𑀼𑀤𑀸𑀬𑀯𑀲𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸.

𑀓𑀢𑁆𑀣𑀘𑀺 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀩𑀳𑀼𑀯𑀘𑀦𑀧𑀬𑁄𑀕𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸 𑀳𑀺 ‘‘𑀧𑀽𑀚𑀺𑀢𑀸 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸, 𑀲𑀩𑁆𑀩𑁂𑀢𑁂 𑀤𑁂𑀯𑀦𑀺𑀓𑀸𑀬𑀸, 𑀤𑁆𑀯𑁂 𑀤𑁂𑀯𑀲𑀗𑁆𑀖𑀸, 𑀢𑀻𑀡𑀺 ¶ 𑀤𑀼𑀓𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀯𑀓𑀸𑀦𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀏𑀓𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀩𑀳𑀼𑀲𑀫𑀼𑀤𑀸𑀬𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸𑀢𑀺 𑀕𑀳𑁂𑀢𑀩𑁆𑀩𑀸, 𑀲𑀗𑁆𑀕𑀬𑁆𑀳𑀫𑀸𑀦𑀸 𑀘 𑀩𑀯𑁆𑀳𑀢𑁆𑀣𑀩𑀳𑀼𑀯𑀘𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀯𑀺𑀲𑀼𑀁𑀬𑁂𑀯 𑀯𑀸, 𑀢𑀲𑁆𑀫𑀸 𑀩𑀳𑀼𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀦𑁆𑀢𑀺 𑀏𑀢𑁂𑀲𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀧𑀸𑀡𑀁 𑀦 𑀳𑀦𑁂, 𑀲𑀲𑁆𑀲𑁄 𑀲𑀫𑁆𑀧𑀚𑁆𑀚𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀚𑀸𑀢𑀺𑀯𑀲𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸, 𑀢𑀩𑁆𑀪𑀸𑀯𑀲𑀸𑀫𑀜𑁆𑀜𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

‘‘𑀦𑀸𑀕𑀁 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑀁, 𑀲𑀸𑀯𑀢𑁆𑀣𑀻 𑀲𑀤𑁆𑀥𑀸 𑀅𑀳𑁄𑀲𑀺 𑀧𑀲𑀦𑁆𑀦𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀦𑀺𑀲𑁆𑀲𑀬𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸𑀦𑀫𑁂𑀓𑀯𑀘𑀦𑀧𑀬𑁄𑀕𑀸.

‘‘𑀢𑀺𑀮𑀓𑁆𑀔𑀡𑀁, 𑀓𑀼𑀲𑀮𑀸𑀓𑀼𑀲𑀮𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀥𑀫𑁆𑀫𑀯𑀺𑀦𑀬𑁄, 𑀘𑀺𑀢𑁆𑀢𑀲𑁂𑀦𑁄 𑀘 𑀕𑀦𑁆𑀥𑀩𑁆𑀩𑁄, 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺, 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀢𑁆𑀢𑀮𑀓𑁆𑀔𑀡𑁂 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸.

‘‘𑀏𑀯𑀁 𑀫𑀬𑀁 𑀕𑀡𑁆𑀳𑀸𑀫, 𑀅𑀫𑁆𑀳𑀸𑀓𑀁 𑀧𑀓𑀢𑀺, 𑀧𑀥𑀸𑀦𑀦𑁆𑀢𑀺 𑀔𑁄 𑀫𑁂𑀖𑀺𑀬 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀢𑁆𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀢𑁂 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 ‘𑀪𑀼𑀜𑁆𑀚𑀣 𑀪𑀦𑁆𑀢𑁂’𑀢𑀺, 𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀩𑁆𑀪𑀸𑀕𑀢𑀸𑀦𑀸’𑀲𑀦𑀓𑀁 𑀅𑀤𑀸𑀲𑀺𑀁’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀕𑀭𑀼𑀓𑀸𑀭𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀅𑀧𑁆𑀧𑀘𑁆𑀘𑀬𑀸 ¶ 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸, 𑀅𑀦𑀺𑀬𑀫𑀺𑀢𑀲𑀗𑁆𑀔𑀸𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸 𑀯𑀸.

𑀓𑁂𑀘𑀺 𑀧𑀦 ‘‘𑀤𑁂𑀲𑀦𑀸𑀲𑁄𑀢𑀧𑀸𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸’’𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀢𑀣𑀸𑀕𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀭𑀳𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀼𑀢𑁆𑀢𑀺 𑀘 𑀦 𑀤𑀺𑀲𑁆𑀲𑀢𑀺 ‘‘𑀫𑀸𑀢𑀺𑀓𑀸𑀬𑀁 𑀧𑀼𑀘𑁆𑀙𑀸𑀬𑀁 𑀯𑀺𑀲𑁆𑀲𑀚𑁆𑀚𑀦𑁂 𑀘𑀸𑀢𑀺 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀅𑀧𑁆𑀧𑀘𑁆𑀘𑀬𑀸𑀤𑀺𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀼𑀦𑀧𑁆𑀧𑀼𑀦𑀁 𑀩𑀳𑀼𑀯𑀘𑀦𑀯𑀲𑁂𑀦 𑀤𑁂𑀲𑀦𑀸𑀲𑁄𑀢𑁂 𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺.

‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀬𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀦𑁄 𑀧𑀭𑀸𑀫𑀸𑀲𑀸, 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻’’𑀢𑀺 𑀅𑀬𑀫𑁂𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀣𑀼𑀘𑀺𑀢𑁆𑀢𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑁄.

‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂,

𑀲𑀦𑁆𑀢𑀺 ¶ 𑀧𑀼𑀢𑁆𑀢𑀸 𑀯𑀺𑀤𑁂𑀳𑀸𑀦𑀁, 𑀤𑀻𑀖𑀸𑀯𑀼 𑀭𑀝𑁆𑀞𑀯𑀟𑁆𑀠𑀦𑁄;

𑀢𑁂 𑀭𑀚𑁆𑀚𑀁 𑀓𑀸𑀭𑀬𑀺𑀲𑁆𑀲𑀦𑁆𑀢𑀺, 𑀫𑀺𑀣𑀺𑀮𑀸𑀬𑀁 𑀧𑀚𑀸𑀧𑀢𑀺’’ 𑁋

𑀇𑀘𑁆𑀘𑁂𑀯𑀫𑀸𑀤𑀬𑁄 𑀲𑀤𑁆𑀤𑀸 𑀬𑁂 𑀬𑁂 𑀩𑀳𑀯𑁄, 𑀢𑀦𑁆𑀦𑀺𑀯𑀸𑀲𑀢𑀁𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲𑁂𑀓𑀢𑁆𑀣𑀲𑁆𑀲 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀲𑀺 ‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑀸𑀭𑀺𑀧𑀼𑀢𑁆𑀢𑀸 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀣, 𑀢𑀼𑀫𑁆𑀳𑀸𑀓𑀁 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄’𑀢𑀺’’, ‘‘𑀓𑀘𑁆𑀘𑀺 𑀯𑁄 𑀓𑀼𑀮𑀧𑀼𑀢𑁆𑀢𑀸, 𑀏𑀣 𑀩𑁆𑀬𑀕𑁆𑀖𑀸 𑀦𑀺𑀯𑀢𑁆𑀢𑀯𑁆𑀳𑁄’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀜𑁆𑀜𑁂𑀦𑀢𑁆𑀣𑁂𑀦 𑀏𑀓𑀸𑀪𑀺𑀥𑀸𑀦𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀦𑀺𑀲𑁆𑀲𑀺𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀅𑀬𑀫𑀸𑀭𑀫𑁆𑀫𑀡𑀪𑁂𑀤𑁂𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀩𑀳𑀼𑀯𑀘𑀦𑀧𑀬𑁄𑀕𑁄.

‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 𑀅𑀬𑀁 𑀧𑀦 𑀓𑀺𑀘𑁆𑀘𑀪𑁂𑀤𑁂𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀩𑀳𑀼𑀯𑀘𑀦𑀧𑀬𑁄𑀕𑁄.

𑀢𑀢𑁆𑀣 𑀏𑀓𑀢𑁆𑀣𑁂𑀓𑀯𑀘𑀦𑀁, 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀚𑀸𑀢𑁆𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀏𑀓𑀢𑁆𑀢𑀮𑀓𑁆𑀔𑀡𑁂𑀓𑀯𑀘𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀏𑀓𑀯𑀘𑀦𑀁 𑀪𑀯𑀢𑀺. 𑀏𑀢𑁆𑀣 𑀧𑀦 𑀚𑀸𑀢𑁆𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁 𑀅𑀢𑁆𑀣𑀢𑁄 𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑁂𑀓𑀯𑀘𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀩𑀯𑁆𑀳𑀢𑁆𑀣𑀩𑀳𑀼𑀯𑀘𑀦𑀁, 𑀩𑀳𑀼𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀁, 𑀅𑀢𑁆𑀢𑀩𑀳𑀼𑀯𑀘𑀦𑀁, 𑀕𑀭𑀼𑀓𑀸𑀭𑀩𑀳𑀼𑀯𑀘𑀦𑀁, 𑀅𑀧𑀭𑀺𑀘𑁆𑀙𑁂𑀤𑀩𑀳𑀼𑀯𑀘𑀦𑀁, 𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑀩𑀳𑀼𑀯𑀘𑀦𑀁, 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀬𑀩𑀳𑀼𑀯𑀘𑀦𑀁, 𑀧𑀼𑀘𑁆𑀙𑀸𑀲𑀪𑀸𑀕𑀩𑀳𑀼𑀯𑀘𑀦𑀁, 𑀧𑀼𑀣𑀼𑀘𑀺𑀢𑁆𑀢𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀩𑀳𑀼𑀯𑀘𑀦𑀁, 𑀢𑀦𑁆𑀦𑀺𑀯𑀸𑀲𑀩𑀳𑀼𑀯𑀘𑀦𑀁, 𑀢𑀁𑀧𑀼𑀢𑁆𑀢𑀩𑀳𑀼𑀯𑀘𑀦𑀁, 𑀏𑀓𑀸𑀪𑀺𑀥𑀸𑀦𑀩𑀳𑀼𑀯𑀘𑀦𑀁, 𑀢𑀦𑁆𑀦𑀺𑀲𑁆𑀲𑀺𑀢𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀁 ¶ , 𑀆𑀭𑀫𑁆𑀫𑀡𑀪𑁂𑀤𑀩𑀳𑀼𑀯𑀘𑀦𑀁, 𑀓𑀺𑀘𑁆𑀘𑀪𑁂𑀤𑀩𑀳𑀼𑀯𑀘𑀦𑀦𑁆𑀢𑀺 𑀧𑀦𑁆𑀦𑀭𑀲𑀯𑀺𑀥𑀁 𑀩𑀳𑀼𑀯𑀘𑀦𑀁 𑀪𑀯𑀢𑀺. 𑀇𑀘𑁆𑀘𑁂𑀯𑀁 𑀯𑀻𑀲𑀥𑀸 𑀲𑀩𑁆𑀩𑀸𑀦𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀅𑀢𑁆𑀭𑀺𑀤𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑁋

𑀏𑀓𑀢𑁆𑀣𑁂 𑀤𑁂𑀓𑀯𑀘𑀦-𑀜𑁆𑀘𑀺𑀢𑀭𑀲𑁆𑀫𑀺𑀢𑀭𑀫𑁆𑀧𑀺 𑀘;

𑀲𑀫𑀼𑀤𑀸𑀬𑀚𑀸𑀢𑀺𑀏𑀓𑀢𑁆𑀢-𑀮𑀓𑁆𑀔𑀡𑁂𑀓𑀯𑀘𑁄𑀧𑀺 𑀘;

𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀫𑁆𑀳𑀺, 𑀧𑀸𑀞𑁂 𑀧𑀸𑀬𑁂𑀦 𑀤𑀺𑀲𑁆𑀲𑀭𑁂.

𑀕𑀭𑀼𑀫𑁆𑀳𑀺 𑀘𑀢𑁆𑀢𑀦𑁂𑀓𑀲𑁆𑀫𑀺𑀁, 𑀩𑀳𑀼𑀯𑀘𑀦𑀓𑀁 𑀧𑀦;

𑀧𑀸𑀴𑀺𑀬𑀁 𑀅𑀧𑁆𑀧𑀓𑀁 𑀅𑀝𑁆𑀞-𑀓𑀣𑀸𑀝𑀻𑀓𑀸𑀲𑀼 𑀢𑀁 𑀩𑀳𑀼𑀁.

𑀢𑀣𑀸 𑀳𑀺 𑀩𑀳𑀼𑀓𑀁 𑀤𑁂𑀓-𑀯𑀘𑀦𑀁𑀬𑁂𑀯 𑀧𑀸𑀴𑀺𑀬𑀁;

𑀕𑀭𑀼𑀫𑁆𑀳𑀺 𑀘𑀢𑁆𑀢𑀦𑁂𑀓𑀲𑁆𑀫𑀺𑀁, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀢𑀯 𑀲𑀸𑀲𑀦𑀫𑀸𑀕𑀫𑁆𑀫, 𑀧𑀢𑁆𑀢𑁄𑀫𑁆𑀳𑀺 𑀅𑀫𑀢𑀁 𑀧𑀤𑀁’’.

𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀸𑀞𑀸, 𑀩𑀳𑀼𑀥𑀸 𑀚𑀺𑀦𑀲𑀸𑀲𑀦𑁂;

𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀚𑀸𑀦𑁂𑀬𑁆𑀬, 𑀯𑀺𑀤𑁆𑀯𑀸 𑀅𑀓𑁆𑀔𑀭𑀘𑀺𑀦𑁆𑀢𑀓𑁄.

𑀲𑀸𑀢𑀺𑀲𑀬𑀁 𑀕𑀭𑀼𑀓𑀸𑀭𑀸-𑀭𑀳𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄;

𑀏𑀓𑀯𑀘𑀦𑀬𑁄𑀕𑁂𑀦, 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑁂 𑀬𑀢𑁄.

𑀢𑀢𑁄 𑀯𑁄𑀳𑀸𑀭𑀓𑀼𑀲𑀮𑁄, 𑀓𑀭𑁂𑀬𑁆𑀬𑀢𑁆𑀣𑀸𑀦𑀼𑀭𑀽𑀧𑀢𑁄;

𑀏𑀓𑀯𑀘𑀦𑀬𑁄𑀕𑀁 𑀯𑀸, 𑀇𑀢𑀭𑀁 𑀯𑀸 𑀲𑀼𑀫𑁂𑀥𑀲𑁄.

𑀧𑀸𑀬𑁂𑀦 𑀢𑀦𑁆𑀦𑀺𑀯𑀸𑀲𑀫𑁆𑀳𑀺, 𑀩𑀳𑀼𑀯𑀘𑀦𑀓𑀁 𑀞𑀺𑀢𑀁;

𑀢𑀁𑀧𑀼𑀢𑁆𑀢𑁂 𑀅𑀧𑁆𑀧𑀓𑀁 𑀢𑀦𑁆𑀦𑀺-𑀲𑁆𑀲𑀬𑁂𑀓𑀯𑀘𑀦𑀫𑁆𑀧𑀺 𑀘.

𑀧𑀼𑀣𑀼𑀘𑀺𑀢𑁆𑀢𑀸𑀧𑀭𑀺𑀘𑁆𑀙𑁂𑀤-𑀫𑀸𑀢𑀺𑀓𑀸𑀲𑀦𑁆𑀥𑀺𑀆𑀤𑀺𑀲𑀼;

𑀩𑀳𑀼𑀯𑀘𑀦𑀓𑀜𑁆𑀘𑀸𑀧𑀺, 𑀅𑀧𑁆𑀧𑀓𑀦𑁆𑀢𑀺 𑀧𑀓𑀸𑀲𑀬𑁂.

𑀏𑀓𑀸𑀪𑀺𑀥𑀸𑀦𑀢𑁄 𑀓𑀺𑀘𑁆𑀘𑀸, 𑀢𑀣𑀸 𑀕𑁄𑀘𑀭𑀢𑁄𑀧𑀺 𑀘;

𑀩𑀳𑀼𑀯𑀘𑀦𑀓𑀁 𑀢𑀦𑁆𑀦𑀺-𑀲𑁆𑀲𑀺𑀢𑀸𑀧𑁂𑀓𑁆𑀔𑀜𑁆𑀘 𑀅𑀧𑁆𑀧𑀓𑀁.

𑀇𑀘𑁆𑀘𑁂𑀯𑀁 ¶ 𑀲𑀧𑁆𑀧𑀬𑁄𑀕𑀁 𑀢𑀼, 𑀜𑀢𑁆𑀯𑀸𑀦 𑀯𑀘𑀦𑀤𑁆𑀯𑀬𑀁;

𑀓𑀸𑀢𑀩𑁆𑀩𑁄 𑀧𑀦 𑀯𑁄𑀳𑀸𑀭𑁄, 𑀬𑀣𑀸𑀧𑀸𑀴𑀺 𑀯𑀺𑀪𑀸𑀯𑀺𑀦𑀸.

𑀇𑀤𑀸𑀦𑀺 𑀓𑀸𑀮𑀸𑀤𑀺𑀯𑀲𑁂𑀦 𑀆𑀔𑁆𑀬𑀸𑀢𑀧𑁆𑀧𑀯𑀢𑁆𑀢𑀺𑀁 𑀤𑀻𑀧𑀬𑀺𑀲𑁆𑀲𑀸𑀫 𑁋 𑀓𑀸𑀮𑀓𑀸𑀭𑀓𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀁 𑀆𑀔𑁆𑀬𑀸𑀢𑀺𑀓𑀁. 𑀢𑀢𑁆𑀭 𑀓𑀸𑀮𑀦𑁆𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀢𑀬𑁄 𑀓𑀸𑀮𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀧𑀦 𑀙, 𑀢𑁂 𑀏𑀓𑁂𑀓𑀸 𑀢𑀺𑀧𑀼𑀭𑀺𑀲𑀓𑀸.

𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀸𑀮𑁂𑀲𑀼, 𑀬𑀤𑀺𑀤𑀁 𑀯𑀢𑁆𑀢𑀢𑁂 𑀬𑀢𑁄;

𑀆𑀔𑁆𑀬𑀸𑀢𑀺𑀓𑀁 𑀢𑀢𑁄 𑀢𑀲𑁆𑀲, 𑀓𑀸𑀮𑀤𑀻𑀧𑀦𑀢𑀸 𑀫𑀢𑀸.

𑀓𑀸𑀭𑀓𑀦𑁆𑀢𑀺 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀸. 𑀢𑁂 𑀳𑀺 𑀉𑀧𑀘𑀸𑀭𑀫𑀼𑀔𑁆𑀬𑀲𑀪𑀸𑀯𑀯𑀲𑁂𑀦 𑀓𑀭𑁄𑀦𑁆𑀢𑀺 𑀓𑀭𑀡𑀦𑁆𑀢𑀺 𑀘 ‘‘𑀓𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀯 𑀬𑀣𑀸𑀓𑁆𑀓𑀫𑀁 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢 𑀢𑀁𑀲𑀸𑀥𑀓 𑀢𑀁𑀲𑀪𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀁 𑀓𑀢𑁆𑀢𑀸 𑀘 𑀪𑀸𑀯𑁄 𑀘, 𑀇𑀘𑁆𑀘𑁂𑀯𑀁 𑀓𑀸𑀭𑀓𑀸 𑀢𑀺𑀥𑀸;

𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀸 𑀏𑀢𑁆𑀣, 𑀯𑀼𑀢𑁆𑀢𑀸 𑀦𑀸𑀜𑁆𑀜𑀢𑁆𑀭 𑀲𑀘𑁆𑀘𑀢𑁄.

‘‘𑀧𑀭𑀺𑀪𑀯𑀺𑀬𑁆𑀬𑀢𑀺’’𑀘𑁆𑀘𑀸𑀤𑀻, 𑀓𑀫𑁆𑀫𑁂 𑀲𑀺𑀚𑁆𑀛𑀦𑁆𑀢𑀺 𑀓𑀸𑀭𑀓𑁂;

‘‘𑀲𑀫𑁆𑀪𑀯𑀢𑀻’’𑀢𑀺𑀆𑀤𑀻𑀦𑀺, 𑀲𑀺𑀚𑁆𑀛𑀭𑁂 𑀓𑀢𑁆𑀢𑀼𑀓𑀸𑀭𑀓𑁂.

‘‘𑀯𑀺𑀪𑀯𑀺𑀬𑁆𑀬𑀢𑀺’’𑀇𑀘𑁆𑀘𑀸𑀤𑀻, 𑀪𑀸𑀯𑁂 𑀲𑀺𑀚𑁆𑀛𑀦𑁆𑀢𑀺 𑀓𑀸𑀭𑀓𑁂;

𑀢𑀺𑀯𑀺𑀥𑁂𑀲𑁆𑀯𑁂𑀯𑀫𑁂𑀢𑁂𑀲𑀼, 𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀸 𑀫𑀢𑀸.

𑀓𑀸𑀭𑀓𑀢𑁆𑀢𑀬𑀫𑀼𑀢𑁆𑀢𑀁 𑀬𑀁, 𑀆𑀔𑁆𑀬𑀸𑀢𑀁 𑀦𑀢𑁆𑀣𑀺 𑀲𑀩𑁆𑀩𑀲𑁄;

𑀢𑀲𑁆𑀫𑀸 𑀢𑀤𑁆𑀤𑀻𑀧𑀦𑀢𑁆𑀢𑀫𑁆𑀧𑀺, 𑀢𑀲𑁆𑀲𑀸𑀔𑁆𑀬𑀸𑀢𑀲𑁆𑀲 𑀪𑀸𑀲𑀺𑀢𑀁.

𑀓𑀸𑀭𑀓𑀢𑁆𑀢𑀁 𑀢𑀼 𑀪𑀸𑀯𑀲𑁆𑀲, 𑀲𑀘𑁂𑀧𑀺 𑀦 𑀲𑀫𑀻𑀭𑀺𑀢𑀁;

𑀓𑀸𑀭𑀓𑀮𑀓𑁆𑀔𑀡𑁂 𑀢𑁂𑀦, 𑀪𑀸𑀯𑁂𑀦 𑀘 𑀅𑀯𑀢𑁆𑀣𑀼𑀦𑀸.

𑀓𑁆𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺 ¶ 𑀦𑀢𑁆𑀣𑀻𑀢𑀺, 𑀬𑀼𑀢𑁆𑀢𑀺𑀢𑁄𑀧𑀺 𑀘 𑀦𑀢𑁆𑀣𑀺 𑀢𑀁;

𑀢𑀣𑀸𑀧𑀸𑀔𑁆𑀬𑀸𑀢𑀺𑀓𑁂 𑀢𑀲𑁆𑀲, 𑀢𑀩𑁆𑀩𑁄𑀳𑀸𑀭𑁄 𑀦𑀺𑀭𑀼𑀢𑁆𑀢𑀺𑀬𑀁;

𑀧𑀢𑀺𑀝𑁆𑀞𑀺𑀢𑀦𑀬𑁄𑀯𑀸𑀢𑀺, 𑀫𑀦𑁆𑀢𑁆𑀯𑀸 𑀅𑀫𑁆𑀳𑁂𑀳𑀺 𑀪𑀸𑀲𑀺𑀢𑁄.

𑀧𑀼𑀭𑀺𑀲𑁄𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑀸 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸. 𑀢𑀢𑁆𑀣 𑀧𑀞𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀢𑀼𑀫𑁆𑀳𑀸’𑀫𑁆𑀳𑀲𑀤𑁆𑀤𑀯𑀚𑁆𑀚𑀺𑀢𑁂 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀦𑀸𑀫𑀫𑁆𑀳𑀺 ‘‘𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀺, 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 ‘‘𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸, 𑀧𑀻𑀴𑀺𑀬𑀓𑁆𑀔𑁄𑀢𑀺 𑀫𑀁 𑀯𑀺𑀤𑀽, 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀓𑀢𑁆𑀣𑀘𑀺 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑁂 𑀦𑀸𑀫𑀲𑁆𑀲 𑀅𑀧𑁆𑀧𑀬𑀼𑀢𑁆𑀢𑀢𑁆𑀢𑀸 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑀢𑁆𑀣𑁄 𑀤𑀼𑀭𑀦𑀼𑀩𑁄𑀥𑁄 𑀪𑀯𑀢𑀺, 𑀬𑀣𑀸 ‘‘𑀤𑀼𑀓𑁆𑀔𑀁 𑀢𑁂 𑀯𑁂𑀤𑀬𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀅𑀲𑁆𑀲𑀸𑀲𑀬𑀦𑁆𑀢𑀼 𑀫’’𑀦𑁆𑀢𑀺. 𑀢𑀣𑀸 𑀳𑀺 𑀏𑀢𑁆𑀣 ‘‘𑀧𑀸𑀤𑀸’’𑀢𑀺 𑀧𑀸𑀞𑀲𑁂𑀲𑁄, 𑀢𑀲𑁆𑀫𑀺𑀁 𑀤𑀼𑀓𑁆𑀔𑀲𑀸𑀲𑀦𑀸𑀭𑁄𑀘𑀦𑁂 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑀯𑀲𑁂𑀦 𑀓𑀺𑀮𑀫𑀦𑁆𑀢𑀁 𑀫𑀁 𑀤𑁂𑀯𑀲𑁆𑀲 𑀉𑀪𑁄 𑀧𑀸𑀤𑀸 𑀅𑀲𑁆𑀲𑀸𑀲𑁂𑀦𑁆𑀢𑀼, 𑀯𑀺𑀲𑁆𑀲𑀝𑁆𑀞𑁄 𑀓𑀣𑁂𑀳𑀻𑀢𑀺 𑀫𑀁 𑀯𑀤𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀘 𑀪𑀯𑀢𑀺.

𑀅𑀥𑀺𑀧𑁆𑀧𑀸𑀬𑁄 𑀲𑀼𑀤𑀼𑀩𑁆𑀩𑁄𑀥𑁄, 𑀬𑀲𑁆𑀫𑀸 𑀯𑀺𑀚𑁆𑀚𑀢𑀺 𑀧𑀸𑀴𑀺𑀬𑀁;

𑀢𑀲𑁆𑀫𑀸 𑀉𑀧𑀝𑁆𑀞𑀳𑀁 𑀕𑀡𑁆𑀳𑁂, 𑀕𑀭𑀼𑀁 𑀕𑀭𑀼𑀫𑀢𑀁 𑀯𑀺𑀤𑀽.

𑀢𑀢𑁆𑀭𑀺𑀫𑀸𑀦𑀺 𑀪𑀽𑀥𑀸𑀢𑀸𑀥𑀺𑀓𑀸𑀭𑀢𑁆𑀢𑀸 𑀪𑀽𑀥𑀸𑀢𑀼𑀯𑀲𑁂𑀦 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀲𑁄 𑀧𑀭𑀺𑀪𑀯𑀢𑀺, 𑀢𑁂 𑀧𑀭𑀺𑀪𑀯𑀦𑁆𑀢𑀺, 𑀧𑀭𑀺𑀪𑀯𑀢𑀺, 𑀧𑀭𑀺𑀪𑀯𑀦𑁆𑀢𑀺. 𑀲𑀧𑀢𑁆𑀢𑁄 𑀅𑀪𑀺𑀪𑀯𑀺𑀬𑀢𑁂, 𑀲𑀩𑁆𑀩𑀸 𑀯𑀺𑀢𑁆𑀬𑀸’𑀦𑀼𑀪𑀽𑀬𑀢𑁂, 𑀅𑀪𑀺𑀪𑀯𑀺𑀬𑀢𑁂, 𑀅𑀦𑀼𑀪𑀽𑀬𑀢𑁂𑀢𑀺. 𑀬𑀢𑁆𑀣 𑀲𑀢𑀺𑀧𑀺 𑀦𑀸𑀫𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀢𑀢𑁆𑀣 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘 𑀧𑀞𑀫𑀧𑀼𑀭𑀺𑀲𑀸𑀤𑀬𑁄 𑀢𑀬𑁄 𑀮𑀩𑁆𑀪𑀦𑁆𑀢𑀺. 𑀢𑀁 ¶ 𑀬𑀣𑀸? 𑀧𑀭𑀺𑀪𑀯𑀺𑀬𑁆𑀬𑀢𑁂 𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀭𑀺𑀪𑀯𑀺𑀬𑁆𑀬𑀲𑁂 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦, 𑀧𑀭𑀺𑀪𑀯𑀺𑀬𑁆𑀬𑀫𑁆𑀳𑁂 𑀫𑀬𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀏𑀢𑁆𑀣 𑀧𑀦𑀺𑀤𑀁 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁 ‘‘𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀺𑀦’𑀦𑁆𑀢𑀺𑀆𑀤𑀻𑀲𑀼 𑀲𑀢𑀺𑀧𑀺 𑀦𑀸𑀫𑀲𑁆𑀲 𑀓𑀫𑁆𑀫𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀻𑀢𑀺 𑀧𑀞𑀫𑀧𑀼𑀭𑀺𑀲𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸’’𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘‘𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀺𑀦’’𑀦𑁆𑀢𑀺𑀆𑀤𑀻𑀲𑀼 ‘‘𑀚𑀦𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀲𑁆𑀲 𑀲𑀸𑀥𑀓𑀯𑀸𑀘𑀓𑀲𑁆𑀲 𑀦𑀸𑀫𑀲𑁆𑀲 𑀲𑀤𑁆𑀥𑀺𑀫𑀸𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀦𑀬𑁄.

𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀢𑀼𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀢𑁆𑀯𑀁 𑀅𑀢𑀺𑀪𑀯𑀲𑀺, 𑀢𑀼𑀫𑁆𑀳𑁂 𑀅𑀢𑀺𑀪𑀯𑀣, 𑀅𑀢𑀺𑀪𑀯𑀲𑀺, 𑀅𑀢𑀺𑀪𑀯𑀣. 𑀢𑁆𑀯𑀁 𑀧𑀭𑀺𑀪𑀯𑀺𑀬𑀲𑁂 𑀤𑁂𑀯𑀤𑀢𑁆𑀢𑁂𑀦, 𑀢𑀼𑀫𑁆𑀳𑁂 𑀧𑀭𑀺𑀪𑀯𑀺𑀬𑀯𑁆𑀳𑁂. 𑀬𑀢𑁆𑀣 𑀲𑀢𑀺𑀧𑀺 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀦 𑀢𑀢𑁆𑀣 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀳𑁄𑀢𑀺. 𑀇𑀢𑀭𑁂 𑀧𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘. 𑀢𑀁 𑀬𑀣𑀸? 𑀢𑀬𑀸 𑀅𑀪𑀺𑀪𑀯𑀺𑀬𑀢𑁂 𑀲𑀧𑀢𑁆𑀢𑁄, 𑀢𑀬𑀸 𑀅𑀪𑀺𑀪𑀯𑀺𑀬𑁂 𑀅𑀳𑀁.

𑀉𑀢𑁆𑀢𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀅𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀅𑀳𑀁 𑀧𑀭𑀺𑀪𑀯𑀸𑀫𑀺, 𑀫𑀬𑀁 𑀧𑀭𑀺𑀪𑀯𑀸𑀫, 𑀧𑀭𑀺𑀪𑀯𑀸𑀫𑀺, 𑀧𑀭𑀺𑀪𑀯𑀸𑀫. 𑀅𑀳𑀁 𑀧𑀭𑀺𑀪𑀯𑀺𑀬𑁆𑀬𑀸𑀫𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀬𑀁 𑀧𑀭𑀺𑀪𑀯𑀺𑀬𑁆𑀬𑀸𑀫, 𑀧𑀭𑀺𑀪𑀯𑀺𑀬𑁆𑀬𑀸𑀫𑀺, 𑀧𑀭𑀺𑀪𑀯𑀺𑀬𑁆𑀬𑀸𑀫. 𑀬𑀢𑁆𑀣 𑀲𑀢𑀺𑀧𑀺 𑀅𑀫𑁆𑀳𑀲𑀤𑁆𑀤𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀦 𑀢𑀢𑁆𑀣 ¶ 𑀉𑀢𑁆𑀢𑀫𑀧𑀼𑀭𑀺𑀲𑁄 𑀳𑁄𑀢𑀺. 𑀇𑀢𑀭𑁂 𑀧𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘. 𑀢𑀁 𑀬𑀣𑀸? 𑀫𑀬𑀸 𑀅𑀦𑀼𑀪𑀯𑀺𑀬𑀢𑁂 𑀲𑀫𑁆𑀧𑀢𑁆𑀢𑀺, 𑀫𑀬𑀸 𑀅𑀪𑀺𑀪𑀯𑀺𑀬𑀲𑁂 𑀢𑁆𑀯𑀁. 𑀏𑀯𑀁 𑀬𑀢𑁆𑀣 𑀬𑀢𑁆𑀣 𑀲𑀸𑀥𑀓𑀯𑀸𑀘𑀓𑀸𑀦𑀁 𑀯𑀸 𑀓𑀫𑁆𑀫𑀯𑀸𑀘𑀓𑀸𑀦𑀁 𑀯𑀸 𑀦𑀸𑀫𑀸𑀤𑀻𑀦𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀸𑀦𑀁 𑀆𑀔𑁆𑀬𑀸𑀢𑀧𑀤𑁂𑀳𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑁂 𑀮𑀤𑁆𑀥𑁂 𑀢𑀢𑁆𑀣 𑀢𑀢𑁆𑀣 𑀧𑀞𑀫𑀧𑀼𑀭𑀺𑀲𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀫𑀸𑀤𑀻𑀦𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀸𑀦𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑁄𑀬𑁂𑀯 𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀫𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁.

𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀼𑀭𑀺𑀲𑀸𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀏𑀓𑀸𑀪𑀺𑀥𑀸𑀦𑀁 𑀦𑀸𑀫 𑀏𑀓𑀢𑁄 𑀅𑀪𑀺𑀥𑀸𑀦𑀁 𑀏𑀓𑀓𑀸𑀮𑀸𑀪𑀺𑀥𑀸𑀦𑀜𑁆𑀘. 𑀢𑀜𑁆𑀘 𑀔𑁄 𑀘𑀲𑀤𑁆𑀤𑀧𑀬𑁄𑀕𑁂𑀬𑁂𑀯, 𑀅𑀘𑀲𑀤𑁆𑀤𑀧𑀬𑁄𑀕𑁂 𑀪𑀺𑀦𑁆𑀦𑀓𑀸𑀮𑀸𑀪𑀺𑀥𑀸𑀦𑁂 𑀢𑀕𑁆𑀕𑀳𑀡𑀸𑀪𑀸𑀯𑀢𑁄. ‘‘𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀢𑀧𑁆𑀧𑀬𑁄𑀕𑀸. 𑀢𑀢𑁆𑀣 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣 𑁋 𑀇𑀘𑁆𑀘𑁂𑀢𑀲𑁆𑀫𑀺𑀁 𑀯𑁄𑀳𑀸𑀭𑁂 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣𑀸’’𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. ‘‘𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀧𑀦 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 ‘‘𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀏𑀯𑀫𑁆𑀧𑀺 𑀤𑁆𑀯𑀺𑀦𑁆𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁂 𑀘 𑀅𑀢𑁆𑀣𑀓𑀼𑀲𑀮𑀸 𑀪𑀯𑀦𑁆𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀢𑀼𑀫𑁆𑀳𑁂 𑀘 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀏𑀯𑀁 𑀢𑀺𑀡𑁆𑀡𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄.

𑀅𑀧𑀭𑁄𑀧𑀺 ¶ 𑀅𑀢𑁆𑀣𑀦𑀬𑁄 𑀯𑀼𑀘𑁆𑀘𑀢𑀺 𑁋 ‘‘𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣𑀸’’𑀢𑀺 𑀯𑀸 ‘‘𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑁄 𑀅𑀢𑁆𑀣𑀦𑀬𑁄. 𑀏𑀯𑀁 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀜𑁆𑀘𑀫𑀻𑀲𑀢𑁆𑀢𑀫𑀺𑀬𑀸𑀤𑀻𑀲𑀼 𑀧𑀭𑁄𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. 𑀲𑀩𑁆𑀩𑁂𑀲𑀼 𑀘 𑀓𑁆𑀭𑀺𑀬𑀸𑀧𑀤𑁂𑀲𑀼 𑀩𑀯𑁆𑀳𑀢𑁆𑀣𑀯𑀸𑀘𑀓𑁂𑀲𑀼 𑀩𑀳𑀼𑀯𑀘𑀦𑀦𑁆𑀢𑁂𑀲𑀼, 𑀦 𑀧𑀦 𑀩𑀳𑀼𑀯𑀘𑀦𑀦𑁆𑀢𑁂𑀲𑀼𑀧𑀺 𑀏𑀓𑀲𑁆𑀲𑀢𑁆𑀢𑀦𑁄 𑀯𑀸𑀘𑀓𑁂𑀲𑀼 𑀕𑀭𑀼𑀓𑀸𑀢𑀩𑁆𑀩𑀲𑁆𑀲𑁂𑀓𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁂𑀲𑀼 𑀘 𑀓𑁆𑀭𑀺𑀬𑀸𑀧𑀤𑁂𑀲𑀼. 𑀏𑀢𑁆𑀣 𑀘𑁄𑀤𑀦𑀸𑀲𑀦𑁆𑀤𑀻𑀧𑀦𑀺𑀬𑁄 𑀇𑀫𑀸 𑀕𑀸𑀣𑀸 𑁋

‘‘𑀢𑁆𑀯𑀜𑁆𑀘 𑀪𑀯𑀲𑀺 𑀲𑁄 𑀘𑀸𑀧𑀺, 𑀪𑀯𑀢𑀺’’𑀘𑁆𑀘𑀸𑀤𑀺𑀪𑀸𑀲𑀦𑁂;

‘‘𑀢𑀼𑀫𑁆𑀳𑁂 𑀪𑀯𑀣’’ 𑀇𑀘𑁆𑀘𑀸𑀤𑀺, 𑀧𑀭𑁄𑀧𑁄𑀲𑁄 𑀓𑀣𑀁 𑀲𑀺𑀬𑀸?;

‘‘𑀅𑀳𑀁 𑀪𑀯𑀸𑀫𑀺 𑀲𑁄 𑀘𑀸𑀧𑀺, 𑀪𑀯𑀢𑀺’’𑀘𑁆𑀘𑀸𑀤𑀺𑀪𑀸𑀲𑀦𑁂;

‘‘𑀫𑀬𑀁 𑀪𑀯𑀸𑀫’’𑀇𑀘𑁆𑀘𑀸𑀤𑀺, 𑀉𑀢𑁆𑀢𑀫𑁄 𑀘 𑀓𑀣𑀁 𑀲𑀺𑀬𑀸?;

𑀏𑀢𑁆𑀣 𑀘 𑀯𑀼𑀘𑁆𑀘𑀢𑁂 𑁋

𑀧𑀘𑁆𑀙𑀸 𑀯𑀼𑀢𑁆𑀢𑁄 𑀧𑀭𑁄 𑀦𑀸𑀫, 𑀲𑀜𑁆𑀜𑀸𑀬 𑀧𑀝𑀺𑀧𑀸𑀝𑀺𑀬𑀸;

𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑁄, 𑀧𑀭𑁄𑀧𑀼𑀭𑀺𑀲𑀦𑀸𑀫𑀓𑁄.

𑀧𑀞𑀫𑀫𑁆𑀳𑀸 𑀧𑀭𑁄 𑀦𑀸𑀫, 𑀫𑀚𑁆𑀛𑀺𑀫𑁄 𑀉𑀢𑁆𑀢𑀫𑁄𑀧𑀺 𑀘;

𑀫𑀚𑁆𑀛𑀺𑀫𑀫𑁆𑀳𑀸 𑀧𑀭𑁄 𑀦𑀸𑀫, 𑀉𑀢𑁆𑀢𑀫𑁄 𑀧𑀼𑀭𑀺𑀲𑁄 𑀭𑀼𑀢𑁄.

𑀏𑀯𑀁 𑀢𑀼 𑀕𑀳𑀡𑀜𑁆𑀳𑁂𑀢𑁆𑀣, 𑀯𑁄𑀳𑀸𑀭𑀲𑁆𑀲𑀸𑀦𑀼𑀮𑁄𑀫𑀓𑀁;

𑀤𑁄𑀲𑁄 𑀢𑀤𑀦𑀼𑀮𑁄𑀫𑀫𑁆𑀳𑀺, 𑀕𑀳𑀡𑀲𑁆𑀫𑀺𑀁 𑀦 𑀯𑀺𑀚𑁆𑀚𑀢𑀺.

‘‘𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺, 𑀏𑀲𑁄 𑀘𑀸𑀧𑀺 𑀫𑀳𑀸𑀫𑀺𑀕𑁄’’;

𑀇𑀢𑀺 𑀧𑀸𑀞𑁄 𑀬𑀢𑁄 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘𑀢𑀼𑀫𑁆𑀳𑁂 𑀤𑁆𑀯𑁂 𑀲𑀼𑀔𑀺𑀢𑀸 𑀳𑁄𑀣’’, 𑀇𑀘𑁆𑀘𑀢𑁆𑀣𑁄 𑀢𑀢𑁆𑀣 𑀤𑀺𑀲𑁆𑀲𑀢𑀺;

𑀏𑀯𑀁𑀧𑁆𑀬𑀬𑀁 𑀦𑀬𑁄 𑀯𑀼𑀢𑁆𑀢𑁄, 𑀅𑀢𑁆𑀢𑀦𑁄𑀫𑀢𑀺𑀬𑀸 𑀫𑀫.

𑀅𑀢𑁆𑀢𑀦𑁄𑀫𑀢𑀺 ¶ 𑀓𑀺𑀜𑁆𑀘𑀸𑀧𑀺, 𑀓𑀣𑀺𑀢𑀸 𑀲𑀩𑁆𑀩𑀤𑀼𑀩𑁆𑀩𑀮𑀸;

𑀢𑀣𑀸𑀧𑀺 𑀦𑀬𑀫𑀸𑀤𑀸𑀬, 𑀓𑀣𑀺𑀢𑀢𑁆𑀢𑀸 𑀅𑀓𑁄𑀧𑀺𑀬𑀸.

‘‘𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀺𑀢𑁆𑀣 𑀫𑀁;

𑀢𑁆𑀯𑀜𑁆𑀘 𑀚𑀸𑀦𑀧𑀤𑀸 𑀘𑁂𑀯, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸’’.

‘‘𑀅𑀳𑀜𑁆𑀘 𑀫𑀤𑁆𑀤𑀺𑀤𑁂𑀯𑀻 𑀘, 𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀅𑀜𑁆𑀜𑀫𑀜𑁆𑀜𑀁 𑀲𑁄𑀓𑀦𑀼𑀤𑀸, 𑀯𑀲𑀸𑀫 𑀅𑀲𑁆𑀲𑀫𑁂 𑀢𑀤𑀸’’.

𑀏𑀢𑀸 𑀕𑀸𑀣𑀸𑀧𑀺 𑀏𑀢𑀲𑁆𑀲, 𑀅𑀢𑁆𑀣𑀲𑁆𑀲 𑀧𑀦 𑀲𑀸𑀥𑀺𑀓𑀸;

𑀢𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀅𑀢𑁆𑀣𑁄 𑀲𑀼𑀧𑀸𑀓𑀝𑁄 𑀲𑀺𑀬𑀸;

𑀏𑀯𑀁 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀩𑀳𑀼𑀦𑀸 𑀪𑀸𑀲𑀺𑀢𑁂𑀦 𑀓𑀺𑀁.

𑀆𑀓𑀸𑀭𑁂𑀦 𑀫𑀦𑀸𑀧𑁂𑀦, 𑀓𑀣𑀦𑁂 𑀬𑁂𑀦 𑀓𑁂𑀦𑀘𑀺;

𑀦 𑀯𑀺𑀭𑀼𑀚𑁆𑀛𑀢𑀺 𑀘𑁂 𑀅𑀢𑁆𑀣𑁄, 𑀢𑀁 𑀧𑀫𑀸𑀡𑀁 𑀲𑀼𑀥𑀻𑀫𑀢𑀁.

𑀧𑀼𑀭𑀺𑀲𑀢𑁆𑀢𑀬𑀢𑁄 𑀏𑀲𑁄, 𑀧𑀭𑁄𑀧𑀼𑀭𑀺𑀲𑀦𑀸𑀫𑀓𑁄;

𑀦𑀼𑀧𑀮𑀩𑁆𑀪𑀢𑀺 𑀧𑀘𑁆𑀘𑁂𑀓𑀁, 𑀢𑀤𑀦𑁆𑀢𑁄𑀕𑀥𑀢𑁄𑀯 𑀬𑀁.

𑀧𑀸𑀝𑀯𑀢𑁆𑀣𑀸𑀬 𑀲𑁄𑀢𑀽𑀦𑀁, 𑀯𑁄𑀳𑀸𑀭𑀢𑁆𑀣𑁂𑀲𑀼 𑀲𑀩𑁆𑀩𑀲𑁄;

𑀯𑀺𑀲𑀼𑀁 𑀅𑀮𑀩𑁆𑀪𑀫𑀸𑀦𑁄𑀧𑀺, 𑀮𑀩𑁆𑀪𑀫𑀸𑀦𑁄𑀯 𑀉𑀤𑁆𑀥𑀝𑁄.

𑀲𑀗𑁆𑀔𑁂𑀧𑀢𑁄𑀧𑁂𑀢𑁆𑀣 𑀧𑀼𑀭𑀺𑀲𑀧𑁆𑀧𑀯𑀢𑁆𑀢𑀺 𑀏𑀯𑀁 𑀉𑀧𑀮𑀓𑁆𑀔𑀺𑀢𑀩𑁆𑀩𑀸 ‘‘𑀅𑀫𑁆𑀳𑀯𑀘𑀦𑀢𑁆𑀣𑁂 𑀉𑀢𑁆𑀢𑀫𑁄, 𑀢𑀼𑀫𑁆𑀳𑀯𑀘𑀦𑀢𑁆𑀣𑁂 𑀫𑀚𑁆𑀛𑀺𑀫𑁄, 𑀅𑀜𑁆𑀜𑁂𑀲𑀁 𑀯𑀘𑀦𑀢𑁆𑀣𑁂 𑀧𑀞𑀫𑁄’’𑀢𑀺.

𑀢𑁆𑀬𑀸𑀤𑀻𑀦𑀁 𑀧𑀼𑀭𑀺𑀲𑀲𑀜𑁆𑀜𑀸, 𑀬𑀲𑁆𑀫𑀸 𑀯𑀼𑀢𑁆𑀢𑀸 𑀢𑀢𑁄 𑀇𑀤𑀁;

𑀢𑀩𑁆𑀩𑀦𑁆𑀢𑀸𑀔𑁆𑀬𑀸𑀢𑀺𑀓𑀁 𑀜𑁂𑀬𑁆𑀬𑀁, 𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁.

𑀏𑀯𑀁 𑀲𑀩𑁆𑀩𑀣𑀸𑀧𑀺 𑀆𑀔𑁆𑀬𑀸𑀢𑀺𑀓𑀲𑁆𑀲 𑀓𑀸𑀮𑀓𑀸𑀭𑀓𑀧𑀼𑀭𑀺𑀲𑀧𑀭𑀺𑀤𑀻𑀧𑀦𑀢𑀸 𑀯𑀼𑀢𑁆𑀢𑀸.

𑀓𑁆𑀭𑀺𑀬𑀸𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀆𑀔𑁆𑀬𑀸𑀢𑀺𑀓𑀲𑁆𑀲 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑀸 𑀯𑁂𑀤𑀺𑀢𑀩𑁆𑀩𑀸?

𑀮𑀓𑁆𑀔𑀺𑀬𑀢𑀺 ¶ 𑀓𑁆𑀭𑀺𑀬𑀸𑀬𑁂𑀢𑀁, 𑀓𑁆𑀭𑀺𑀬𑀸 𑀯𑀸 𑀅𑀲𑁆𑀲 𑀮𑀓𑁆𑀔𑀡𑀁;

𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑀸 𑀏𑀯𑀁, 𑀯𑁂𑀤𑀺𑀢𑀩𑁆𑀩𑀸 𑀢𑀣𑀸 𑀳𑀺 𑀘.

‘‘𑀕𑀘𑁆𑀙𑀢𑀺’’𑀘𑁆𑀘𑀸𑀤𑀺𑀓𑀁 𑀲𑀼𑀢𑁆𑀯𑀸, 𑀓𑁆𑀭𑀺𑀬𑀸𑀲𑀦𑁆𑀤𑀻𑀧𑀦𑀁 𑀧𑀤𑀁;

‘‘𑀆𑀔𑁆𑀬𑀸𑀢𑀺𑀓’’𑀦𑁆𑀢𑀺 𑀥𑀻𑀭𑁂𑀳𑀺, 𑀆𑀔𑁆𑀬𑀸𑀢𑀜𑁆𑀜𑀽𑀳𑀺 𑀲𑀜𑁆𑀜𑀺𑀢𑀁.

𑀮𑀓𑁆𑀔𑀡𑀁 𑀳𑁄𑀢𑀺 𑀦𑀸𑀫𑀲𑁆𑀲, 𑀬𑀣𑀸 𑀲𑀢𑁆𑀯𑀸𑀪𑀺𑀥𑀸𑀦𑀢𑀸;

𑀓𑁆𑀭𑀺𑀬𑀸𑀪𑀺𑀥𑀸𑀦𑀢𑀸 𑀏𑀯𑀁, 𑀆𑀔𑁆𑀬𑀸𑀢𑀲𑁆𑀲𑁂𑀯 𑀮𑀓𑁆𑀔𑀡𑀁.

𑀅𑀢𑁆𑀣𑀢𑁄 𑀧𑀦 𑀏𑀢𑀲𑁆𑀲, 𑀓𑁆𑀭𑀺𑀬𑀸𑀯𑀸𑀘𑀓𑀢𑀸 𑀇𑀥;

𑀮𑀓𑁆𑀔𑀡𑀁 𑀇𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀮𑀓𑁆𑀔𑀡𑀜𑁆𑀜𑀽𑀳𑀺 𑀮𑀓𑁆𑀔𑀺𑀢𑀁.

‘‘𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀼𑀝𑁆𑀞𑀲𑁆𑀲, ‘‘𑀧𑀘𑀸𑀫𑀺’’𑀘𑁆𑀘𑀸𑀤𑀺𑀦𑀸 ‘‘𑀅𑀳𑀁’’;

𑀧𑀝𑀺𑀯𑀸𑀘𑀸𑀬 𑀤𑀸𑀦𑁂𑀦, 𑀓𑁆𑀭𑀺𑀬𑀸𑀯𑀸𑀘𑀓𑀢𑀸 𑀫𑀢𑀸.

𑀏𑀯𑀫𑀸𑀔𑁆𑀬𑀸𑀢𑀺𑀓𑀲𑁆𑀲 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑀸 𑀯𑁂𑀤𑀺𑀢𑀩𑁆𑀩𑀸;

𑀇𑀤𑀸𑀦𑀺 𑀓𑀸𑀮𑁂𑀲𑀼 𑀯𑀺𑀪𑀢𑁆𑀢𑀺𑀧𑁆𑀧𑀯𑀢𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀓𑀸𑀮𑀲𑁆𑀫𑀺𑀁, 𑀯𑀢𑁆𑀢𑀫𑀸𑀦𑀸 𑀧𑀯𑀢𑁆𑀢𑀢𑀺;

𑀆𑀲𑀺𑀝𑁆𑀞𑀸𑀡𑀸𑀧𑀦𑀢𑁆𑀣𑁂𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀧𑀜𑁆𑀘𑀫𑀻.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀭𑀺𑀓𑀧𑁆𑀧𑀸-𑀦𑀼𑀫𑀢𑁆𑀬𑀢𑁆𑀣𑁂𑀲𑀼 𑀲𑀢𑁆𑀢𑀫𑀻;

𑀅𑀧𑁆𑀧𑀘𑁆𑀘𑀓𑁆𑀔𑁂 𑀅𑀢𑀻𑀢𑀫𑁆𑀳𑀺, 𑀧𑀭𑁄𑀓𑁆𑀔𑀸 𑀲𑀫𑁆𑀧𑀯𑀢𑁆𑀢𑀢𑀺.

𑀳𑀺𑀬𑁆𑀬𑁄 𑀧𑀪𑀼𑀢𑀺 𑀓𑀸𑀮𑀲𑁆𑀫𑀺𑀁, 𑀅𑀢𑀻𑀢𑀫𑁆𑀳𑀺 𑀧𑀯𑀢𑁆𑀢𑀢𑀺;

𑀧𑀘𑁆𑀘𑀓𑁆𑀔𑁂 𑀯𑀸 𑀅𑀧𑀘𑁆𑀘𑀓𑁆𑀔𑁂, 𑀳𑀺𑀬𑁆𑀬𑀢𑁆𑀢𑀦𑀻 𑀦𑀺𑀭𑀼𑀢𑁆𑀢𑀺𑀢𑀸.

𑀅𑀚𑁆𑀚𑀧𑁆𑀧𑀪𑀼𑀢𑀺 𑀓𑀸𑀮𑀲𑁆𑀫𑀺𑀁, 𑀅𑀢𑀻𑀢𑀫𑁆𑀳𑀺 𑀧𑀯𑀢𑁆𑀢𑀢𑀺;

𑀧𑀘𑁆𑀘𑀓𑁆𑀔𑁂 𑀯𑀸 𑀅𑀧𑀘𑁆𑀘𑀓𑁆𑀔𑁂, 𑀲𑀫𑀻𑀧𑁂𑀚𑁆𑀚𑀢𑀦𑀯𑁆𑀳𑀬𑀸.

𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻, 𑀓𑀸𑀮𑀲𑁆𑀫𑀺𑀁 𑀲𑀫𑁆𑀧𑀯𑀢𑁆𑀢𑀢𑀺;

𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑀫𑀢𑁆𑀢𑀫𑁆𑀳𑀺, 𑀢𑀻𑀢𑁂 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀸;

𑀅𑀦𑀸𑀕𑀢𑁂𑀧𑀺 𑀳𑁄𑀢𑀻𑀢𑀺, 𑀦𑀺𑀭𑀼𑀢𑁆𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

𑀏𑀯𑀁 𑀓𑀸𑀮𑁂𑀲𑀼 𑀯𑀺𑀪𑀢𑁆𑀢𑀺𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀬𑁂 𑀢𑁂 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀺𑀘𑀺𑀢𑁆𑀢𑀸 𑀲𑀼𑀯𑀺𑀲𑀤𑀯𑀺𑀧𑀼𑀮𑀢𑀺𑀔𑀺𑀡𑀩𑀼𑀤𑁆𑀥𑀺𑀯𑀺𑀲𑀬𑀪𑀽𑀢𑀸 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀧𑀸𑀝𑀯𑀫𑀺𑀘𑁆𑀙𑀦𑁆𑀢𑁂𑀳𑀺 𑀢𑁆𑀬𑀸𑀤𑀺𑀓𑁆𑀓𑀫𑁂𑀦 𑀯𑀼𑀘𑁆𑀘𑀫𑀸𑀦𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸 ¶ 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀸 𑁋 𑀪𑀯𑀢𑀺, 𑀪𑀯𑀦𑁆𑀢𑀺. 𑀪𑀯𑀲𑀺, 𑀪𑀯𑀣. 𑀪𑀯𑀸𑀫𑀺, 𑀪𑀯𑀸𑀫. 𑀪𑀯𑀢𑁂, 𑀪𑀯𑀦𑁆𑀢𑁂. 𑀪𑀯𑀲𑁂, 𑀪𑀯𑀯𑁆𑀳𑁂. 𑀪𑀯𑁂, 𑀪𑀯𑀸𑀫𑁆𑀳𑁂. 𑀅𑀬𑀁 𑀅𑀜𑁆𑀜𑀬𑁄𑀕𑀸𑀤𑀺𑀭𑀳𑀺𑀢𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸.

𑀤𑀺𑀲𑁆𑀲𑀦𑁆𑀢𑀺 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀢𑁆𑀣𑀲𑀫𑁆𑀪𑀯𑁂𑀧𑀺 𑀅𑀜𑁆𑀜𑀬𑁄𑀕𑀸𑀤𑀺𑀭𑀳𑀺𑀢𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀁 𑀫𑀁 𑀪𑀡𑀲𑀺 𑀲𑀸𑀭𑀣𑀺. 𑀅𑀜𑁆𑀜𑀁 𑀲𑁂𑀧𑀡𑁆𑀡𑀺 𑀕𑀘𑁆𑀙𑀸𑀫𑀺’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀧𑀭𑀺𑀤𑀻𑀧𑀦𑀺𑀬𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸.

𑀏𑀢𑁆𑀣 𑀢𑀺𑀯𑀺𑀥𑁄 𑀓𑁆𑀭𑀺𑀬𑀸𑀧𑀤𑁂𑀲𑀼 𑀬𑁄𑀕𑁄 𑀢𑀬𑁄𑀕𑁄, 𑀫𑀬𑁄𑀕𑁄, 𑀅𑀜𑁆𑀜𑀬𑁄𑀕𑁄 𑀘. 𑀢𑀢𑁆𑀣 𑀫𑀚𑁆𑀛𑀺𑀫𑀧𑀼𑀭𑀺𑀲𑀸 𑀢𑀬𑁄𑀕𑀯𑀲𑁂𑀦 𑀕𑀳𑁂𑀢𑀩𑁆𑀩𑀸, 𑀉𑀢𑁆𑀢𑀫𑀧𑀼𑀭𑀺𑀲𑀸 𑀫𑀬𑁄𑀕𑀯𑀲𑁂𑀦. 𑀧𑀞𑀫𑀧𑀼𑀭𑀺𑀲𑀸 𑀅𑀜𑁆𑀜𑀬𑁄𑀕𑀯𑀲𑁂𑀦. 𑀢𑁆𑀬𑀸𑀤𑀻𑀦𑀫𑁂𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀅𑀬𑀁 𑀅𑀦𑀼𑀕𑀻𑀢𑀺 𑁋

𑀅𑀜𑁆𑀜𑀬𑁄𑀕𑁂𑀦 𑀧𑀞𑀫𑀸, 𑀢𑀬𑁄𑀕𑁂𑀦 𑀢𑀼 𑀫𑀚𑁆𑀛𑀺𑀫𑀸;

𑀫𑀬𑁄𑀕𑁂𑀦𑀼𑀢𑁆𑀢𑀫𑀸 𑀳𑁄𑀦𑁆𑀢𑀺, 𑀕𑀳𑁂𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀲𑁄𑀢𑀽𑀦𑀁 𑀧𑀬𑁄𑀕𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀅𑀜𑁆𑀜𑀬𑁄𑀕𑀸𑀤𑀺𑀲𑀳𑀺𑀢𑀫𑀧𑀭𑀫𑁆𑀧𑀺 𑀓𑁆𑀭𑀺𑀬𑀸𑀧𑀤𑀫𑀸𑀮𑀁 𑀯𑀤𑀸𑀫 𑁋 𑀲𑁄 𑀪𑀯𑀢𑀺, 𑀢𑁂 𑀪𑀯𑀦𑁆𑀢𑀺. 𑀢𑁆𑀯𑀁 𑀪𑀯𑀲𑀺, 𑀢𑀼𑀫𑁆𑀳𑁂 𑀪𑀯𑀣. 𑀅𑀳𑀁 𑀪𑀯𑀸𑀫𑀺, 𑀫𑀬𑀁 𑀪𑀯𑀸𑀫. 𑀲𑁄 𑀪𑀯𑀢𑁂, 𑀢𑁂 𑀪𑀯𑀦𑁆𑀢𑁂. 𑀢𑁆𑀯𑀁 𑀪𑀯𑀲𑁂, 𑀢𑀼𑀫𑁆𑀳𑁂 𑀪𑀯𑀯𑁆𑀳𑁂. 𑀅𑀳𑀁 𑀪𑀯𑁂, 𑀫𑀬𑀁 𑀪𑀯𑀸𑀫𑁆𑀳𑁂. 𑀅𑀬𑀁 𑀅𑀜𑁆𑀜𑀬𑁄𑀕𑀸𑀤𑀺𑀲𑀳𑀺𑀢𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸.

𑀤𑀺𑀲𑁆𑀲𑀦𑁆𑀢𑀺 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀜𑁆𑀜𑀬𑁄𑀕𑀸𑀤𑀺𑀲𑀳𑀺𑀢𑀸𑀦𑀺𑀧𑀺 𑀓𑁆𑀭𑀺𑀬𑀸𑀧𑀤𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀬𑀁𑀧𑀸𑀬𑀁 𑀤𑁂𑀯 𑀓𑀼𑀫𑀸𑀭𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀇𑀤𑀫𑁆𑀧𑀺𑀫𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺, 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺 ¶ , 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀢𑀺, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫, 𑀅𑀳𑀫𑁆𑀧𑀺 𑀤𑀝𑁆𑀞𑀼𑀓𑀸𑀫𑁄𑀲𑁆𑀫𑀺, 𑀧𑀺𑀢𑀭𑀁 𑀫𑁂 𑀇𑀥𑀸𑀕𑀢𑀁’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀧𑀭𑀺𑀤𑀻𑀧𑀦𑀺𑀬𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸.

𑀬𑁄 𑀢𑀼𑀫𑁆𑀳𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 𑀦𑀺𑀧𑀢𑀢𑀺, 𑀦 𑀧𑀦 𑀳𑁄𑀢𑀺 𑀢𑀼𑀫𑁆𑀳𑀢𑁆𑀣𑀯𑀸𑀘𑀓𑁄, 𑀦𑁂𑀲𑁄 𑀲𑀤𑁆𑀤𑁄 𑀓𑁆𑀭𑀺𑀬𑀸𑀧𑀤𑀲𑁆𑀲 𑀢𑀬𑁄𑀕𑀲𑀳𑀺𑀢𑀢𑁆𑀢𑀁 𑀲𑀸𑀥𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀜𑁆𑀜𑀬𑁄𑀕𑀲𑀳𑀺𑀢𑀢𑁆𑀢𑀜𑁆𑀜𑁂𑀯 𑀲𑀸𑀥𑁂𑀢𑀺. 𑀬𑁄 𑀘 𑀅𑀫𑁆𑀳𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 𑀦𑀺𑀧𑀢𑀢𑀺, 𑀦 𑀧𑀦 𑀳𑁄𑀢𑀺 𑀅𑀫𑁆𑀳𑀢𑁆𑀣𑀯𑀸𑀘𑀓𑁄, 𑀦 𑀲𑁄𑀧𑀺 𑀲𑀤𑁆𑀤𑁄 𑀓𑁆𑀭𑀺𑀬𑀸𑀧𑀤𑀲𑁆𑀲 𑀫𑀬𑁄𑀕𑀲𑀳𑀺𑀢𑀢𑁆𑀢𑀁 𑀲𑀸𑀥𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀜𑁆𑀜𑀬𑁄𑀕𑀲𑀳𑀺𑀢𑀢𑁆𑀢𑀜𑁆𑀜𑁂𑀯 𑀲𑀸𑀥𑁂𑀢𑀺.

𑀢𑀢𑁆𑀭 𑀢𑀼𑀫𑁆𑀳𑀲𑀤𑁆𑀤𑁂𑀦 𑀢𑀸𑀯 𑀯𑀢𑁆𑀢𑀩𑁆𑀩𑀢𑁆𑀣𑁂 𑁋 ‘‘𑀦 𑀪𑀯𑀁 𑀏𑀢𑀺 𑀧𑀼𑀜𑁆𑀜𑀢𑁆𑀣𑀁, 𑀲𑀺𑀯𑀺𑀭𑀸𑀚𑀲𑁆𑀲 𑀤𑀲𑁆𑀲𑀦𑀁. 𑀫𑀸𑀬𑀲𑁆𑀫𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀺. 𑀇𑀥 𑀪𑀦𑁆𑀢𑁂 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀥𑁄𑀯𑀢𑀽’’𑀢𑀺 𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀅𑀫𑁆𑀳𑀲𑀤𑁆𑀤𑁂𑀦 𑀧𑀦 𑀯𑀢𑁆𑀢𑀩𑁆𑀩𑀢𑁆𑀣𑁂 ‘‘𑀉𑀧𑀸𑀮𑀺 𑀢𑀁 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄. 𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀲𑀭𑀡𑁄 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄’’𑀢𑀺 𑀘 𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀇𑀤𑀫𑁂𑀢𑁆𑀣𑀼𑀧𑀮𑀓𑁆𑀔𑀺𑀢𑀩𑁆𑀩𑀁 ‘‘𑀢𑁆𑀯𑀁 𑀢𑀼𑀫𑁆𑀳𑁂 𑀅𑀳𑀁 𑀫𑀬’’𑀦𑁆𑀢𑀺 𑀅𑀢𑁆𑀣𑀤𑀻𑀧𑀓 𑀢𑀬𑁄𑀕 𑀫𑀬𑁄𑀕𑀢𑁄 𑀅𑀜𑁆𑀜𑁄 𑀅𑀜𑁆𑀜𑀢𑁆𑀣𑀤𑀻𑀧𑀦𑁄 𑀧𑀬𑁄𑀕𑁄𑀬𑁂𑀯 𑀅𑀜𑁆𑀜𑀬𑁄𑀕𑁄 𑀦𑀸𑀫, 𑀢𑀢𑁆𑀣 𑀧𑀞𑀫𑀧𑀼𑀭𑀺𑀲𑁄 𑀪𑀯𑀢𑀻𑀢𑀺.

𑀬𑀚𑁆𑀚𑁂𑀯𑀁 ‘‘𑀲𑀩𑁆𑀩𑀸𑀬𑀲𑀁 𑀓𑀽𑀝𑀫𑀢𑀺𑀧𑁆𑀧𑀫𑀸𑀡𑀁, 𑀧𑀕𑁆𑀕𑀬𑁆𑀳 𑀲𑁄 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂. 𑀏𑀲 𑀲𑀼𑀢𑁆𑀯𑀸 𑀧𑀲𑀻𑀤𑀸𑀫𑀺, 𑀯𑀘𑁄 𑀢𑁂 𑀇𑀲𑀺𑀲𑀢𑁆𑀢𑀫𑀸’’𑀢𑀺𑀆𑀤𑀻𑀲𑀼 𑀓𑀣𑀁. 𑀏𑀢𑁆𑀣 𑀳𑀺 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀲𑀫𑁆𑀪𑀯𑁄𑀬𑁂𑀯 𑀤𑀺𑀲𑁆𑀲𑀢𑀺, 𑀦 𑀢𑀼 𑀧𑀞𑀫𑀧𑀼𑀭𑀺𑀲𑀲𑀫𑁆𑀪𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀲𑀩𑁆𑀩𑀸𑀬𑀲𑀁 𑀓𑀽𑀝𑀫𑀢𑀺𑀧𑁆𑀧𑀫𑀸𑀡𑀁, 𑀧𑀕𑁆𑀕𑀬𑁆𑀳 𑀲𑁄 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺𑀆𑀤𑀻𑀲𑀼 ‘‘𑀲𑁄’’𑀢𑀺𑀆𑀤𑀺𑀓𑀲𑁆𑀲 𑀦𑀸𑀫𑀲𑀤𑁆𑀤𑀲𑁆𑀲 𑀢𑀼𑀫𑁆𑀳’𑀫𑁆𑀳𑀲𑀤𑁆𑀤𑀲𑁆𑀲𑀢𑁆𑀣𑀯𑀸𑀘𑀓𑀲𑀤𑁆𑀤𑁂𑀳𑀺‘‘𑀢𑀺𑀝𑁆𑀞𑀲𑀻’’𑀢𑀺𑀆𑀤𑀻𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀧𑀤𑀸𑀦𑀁 𑀤𑀲𑁆𑀲𑀦𑀢𑁄 𑀅𑀘𑁆𑀘𑀦𑁆𑀢𑀫𑀚𑁆𑀛𑀸𑀳𑀭𑀺𑀢𑀩𑁆𑀩𑁂𑀳𑀺 ¶ 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀢𑀕𑁆𑀕𑀼𑀡𑀪𑀽𑀢𑀢𑁆𑀢𑀸 𑀘 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀲𑀫𑁆𑀪𑀯𑁄 𑀲𑀫𑀥𑀺𑀕𑀦𑁆𑀢𑀩𑁆𑀩𑁄. 𑀈𑀤𑀺𑀲𑁂𑀲𑀼 𑀧𑀬𑁄𑀕𑁂𑀲𑀼 𑀲𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀸𑀦𑀺 ‘‘𑀢𑁆𑀯𑀫𑀳’’𑀫𑀺𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀓𑀢𑁆𑀣𑀘𑀺 𑀧𑀦 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀲𑀸𑀢𑁆𑀯𑀁 𑀯𑀗𑁆𑀓𑀫𑀦𑀼𑀧𑁆𑀧𑀢𑁆𑀢𑀸, 𑀓𑀣𑀁 𑀫𑀤𑁆𑀤𑀺 𑀓𑀭𑀺𑀲𑁆𑀲𑀲𑀺. 𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭’’𑀦𑁆𑀢𑀺 𑀇𑀘𑁆𑀘𑁂𑀯𑀫𑀸𑀤𑀻𑀲𑀼.

𑀆𑀔𑁆𑀬𑀸𑀢𑀺𑀓𑀲𑁆𑀲 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑁆𑀢𑀸 𑀅𑀮𑀺𑀗𑁆𑀕𑀪𑁂𑀤𑀢𑁆𑀢𑀸 𑀘 𑀢𑀺𑀡𑁆𑀡𑀁 𑀮𑀺𑀗𑁆𑀕𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑀧𑀭𑀺𑀤𑀻𑀧𑀦𑀢𑁆𑀣𑀁 𑀅𑀧𑀭𑀫𑁆𑀧𑀺 𑀓𑁆𑀭𑀺𑀬𑀸𑀧𑀤𑀫𑀸𑀮𑀁 𑀯𑀤𑀸𑀫 𑁋

𑀧𑀼𑀭𑀺𑀲𑁄 𑀪𑀯𑀢𑀺, 𑀓𑀜𑁆𑀜𑀸 𑀪𑀯𑀢𑀺, 𑀘𑀺𑀢𑁆𑀢𑀁 𑀪𑀯𑀢𑀺, 𑀧𑀼𑀭𑀺𑀲𑀸 𑀪𑀯𑀦𑁆𑀢𑀺, 𑀓𑀜𑁆𑀜𑀸𑀬𑁄 𑀪𑀯𑀦𑁆𑀢𑀺, 𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀪𑁄 𑀧𑀼𑀭𑀺𑀲 𑀢𑁆𑀯𑀁 𑀪𑀯𑀲𑀺, 𑀪𑁄𑀢𑀺 𑀓𑀜𑁆𑀜𑁂 𑀢𑁆𑀯𑀁 𑀪𑀯𑀲𑀺, 𑀪𑁄 𑀘𑀺𑀢𑁆𑀢 𑀢𑁆𑀯𑀁 𑀪𑀯𑀲𑀺, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀢𑀼𑀫𑁆𑀳𑁂 𑀪𑀯𑀣, 𑀪𑁄𑀢𑀺𑀬𑁄 𑀓𑀜𑁆𑀜𑀸𑀬𑁄 𑀢𑀼𑀫𑁆𑀳𑁂 𑀪𑀯𑀣, 𑀪𑀯𑀦𑁆𑀢𑁄 𑀘𑀺𑀢𑁆𑀢𑀸𑀦𑀺 𑀢𑀼𑀫𑁆𑀳𑁂 𑀪𑀯𑀣. 𑀅𑀳𑀁 𑀧𑀼𑀭𑀺𑀲𑁄 𑀪𑀯𑀸𑀫𑀺, 𑀅𑀳𑀁 𑀓𑀜𑁆𑀜𑀸 𑀪𑀯𑀸𑀫𑀺, 𑀅𑀳𑀁 𑀘𑀺𑀢𑁆𑀢𑀁 𑀪𑀯𑀸𑀫𑀺, 𑀫𑀬𑀁 𑀧𑀼𑀭𑀺𑀲𑀸 𑀪𑀯𑀸𑀫, 𑀫𑀬𑀁 𑀓𑀜𑁆𑀜𑀸𑀬𑁄 𑀪𑀯𑀸𑀫, 𑀫𑀬𑀁 𑀘𑀺𑀢𑁆𑀢𑀸𑀦𑀺 𑀪𑀯𑀸𑀫.

𑀏𑀲 𑀦𑀬𑁄 𑀅𑀢𑁆𑀢𑀦𑁄𑀧𑀤𑁂𑀲𑀼, 𑀲𑁂𑀲𑀯𑀺𑀪𑀢𑁆𑀢𑀻𑀦𑀁 𑀲𑀩𑁆𑀩𑀧𑀤𑁂𑀲𑀼𑀧𑀺. 𑀅𑀬𑀫𑀸𑀔𑁆𑀬𑀸𑀢𑀺𑀓𑀲𑁆𑀲 𑀢𑀺𑀡𑁆𑀡𑀁 𑀮𑀺𑀗𑁆𑀕𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑀧𑀭𑀺𑀤𑀻𑀧𑀦𑀻 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀯.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀓𑁆𑀭𑀺𑀬𑀸𑀮𑀓𑁆𑀔𑀡𑀫𑀸𑀔𑁆𑀬𑀸𑀢𑀺𑀓𑀫𑀮𑀺𑀗𑁆𑀕𑀪𑁂𑀤’’𑀫𑀺𑀢𑀺. 𑀢𑀢𑁆𑀭 𑀅𑀮𑀺𑀗𑁆𑀕𑀪𑁂𑀤𑀫𑀺𑀢𑀺 𑀓𑁄 𑀅𑀢𑁆𑀣𑁄? 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀸𑀦𑀁 𑀅𑀯𑀺𑀲𑁂𑀲𑀢𑁆𑀣𑁄 𑀯𑀼𑀘𑁆𑀘𑀢𑁂 ‘‘𑀅𑀮𑀺𑀗𑁆𑀕𑀪𑁂𑀤’’𑀫𑀺𑀢𑀺. 𑀬𑀣𑀸 ‘‘𑀧𑀼𑀭𑀺𑀲𑁄 𑀕𑀘𑁆𑀙𑀢𑀺, 𑀓𑀜𑁆𑀜𑀸 𑀕𑀘𑁆𑀙𑀢𑀺, 𑀘𑀺𑀢𑁆𑀢𑀁 𑀕𑀘𑁆𑀙𑀢𑀻’’𑀢𑀺. 𑀘𑀢𑀼𑀥𑀸 𑀉𑀤𑁆𑀤𑀺𑀝𑁆𑀞𑀓𑁆𑀭𑀺𑀬𑀸𑀧𑀤𑁂𑀲𑀼 𑀬𑀣𑀸 ‘‘𑀪𑀯𑀢𑀻’’𑀢𑀺 𑀅𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀁 𑀕𑀳𑁂𑀢𑁆𑀯𑀸 ‘‘𑀪𑀯𑀢𑀺 𑀪𑀯𑀦𑁆𑀢𑀺 𑀪𑀯𑀲𑀻’’𑀢𑀺𑀆𑀤𑀺𑀦𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸 𑀲𑀩𑁆𑀩𑀣𑀸 𑀓𑀢𑀸, 𑀏𑀯𑀁 ‘‘𑀉𑀩𑁆𑀪𑀯𑀢𑀺’’𑀘𑁆𑀘𑀸𑀤𑀻𑀦𑀺𑀧𑀺 𑀅𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀉𑀩𑁆𑀪𑀯𑀢𑀺 𑀉𑀩𑁆𑀪𑀯𑀦𑁆𑀢𑀺 𑀉𑀩𑁆𑀪𑀯𑀲𑀻’’𑀢𑀺𑀆𑀤𑀺𑀦𑀸 ¶ 𑀓𑁆𑀭𑀺𑀬𑀸𑀧𑀤𑀫𑀸𑀮𑀸 𑀲𑀩𑁆𑀩𑀣𑀸 𑀓𑀸𑀢𑀩𑁆𑀩𑀸. ‘‘𑀪𑁄𑀢𑀺 𑀲𑀫𑁆𑀪𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀦 𑀑𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀺, ‘‘𑀪𑀸𑀯𑁂𑀢𑀺 𑀯𑀺𑀪𑀸𑀯𑁂𑀢𑀻’’𑀢𑀺𑀆𑀤𑀻𑀦𑀺 𑀘 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸, 𑀦𑀬𑀺𑀥 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀤𑀼𑀭𑀦𑀼𑀩𑁄𑀥𑀸 𑀓𑁆𑀭𑀺𑀬𑀸𑀧𑀤𑀕𑀢𑀺. 𑀅𑀢𑁄 𑀮𑀩𑁆𑀪𑀫𑀸𑀦𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀦 𑀳𑀺 𑀮𑁄𑀓𑁂 𑀮𑁄𑀓𑀺𑀬𑀸 𑀲𑀩𑁆𑀩𑁂 𑀥𑀸𑀢𑀼𑀲𑀤𑁆𑀤𑁂 𑀧𑀘𑁆𑀘𑁂𑀓𑀁 𑀲𑀩𑁆𑀩𑁂𑀳𑀺𑀧𑀺 𑀙𑀦𑁆𑀦𑀯𑀼𑀢𑀺𑀬𑀸 𑀯𑀘𑀦𑁂𑀳𑀺 𑀬𑁄𑀚𑁂𑀢𑁆𑀯𑀸 𑀯𑀤𑀦𑁆𑀢𑀺, 𑀏𑀯𑀁 𑀅𑀯𑀤𑀦𑁆𑀢𑀸𑀦𑀫𑁆𑀧𑀺 𑀦𑁂𑀲𑀁 𑀓𑀣𑀸 𑀅𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀚𑁆𑀚𑁂𑀢𑀩𑁆𑀩𑀝𑁆𑀞𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀬𑀣𑀸𑀲𑀫𑁆𑀪𑀯𑀁 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀧𑀜𑁆𑀘𑀫𑀺𑀬𑀸𑀤𑀻𑀲𑀼𑀧𑀺 𑀯𑀺𑀪𑀢𑁆𑀢𑀻𑀲𑀼. 𑀅𑀬𑀁 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀬𑀣𑀼𑀤𑁆𑀤𑀺𑀝𑁆𑀞𑀧𑀤𑀸𑀦𑁂𑀯 𑀧𑀭𑀺𑀡𑀸𑀫𑁂𑀢𑁆𑀯𑀸 𑀧𑀭𑀺𑀡𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑀺𑀬𑀸𑀤𑀻𑀦𑀁 𑀫𑀸𑀢𑀺𑀓𑀸𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀤𑀸𑀦𑀺 𑀧𑀦 𑀢𑀬𑁄𑀕𑀸𑀤𑀺𑀲𑀳𑀺𑀢𑀸𑀲𑀳𑀺𑀢𑀯𑀲𑁂𑀦 𑀤𑁆𑀯𑀺𑀥𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀬𑁄 𑀤𑀲𑁆𑀲𑁂𑀲𑁆𑀲𑀸𑀫 𑀓𑁆𑀯𑀘𑀸𑀤𑁂𑀲𑀯𑀲𑁂𑀦 𑀲𑀫𑁆𑀪𑀽𑀢𑀸𑀦𑀺 𑀘 𑀭𑀽𑀧𑀦𑁆𑀢𑀭𑀸𑀦𑀺 𑀲𑁄𑀢𑀽𑀦𑀁 𑀲𑀼𑀔𑀥𑀸𑀭𑀡𑀢𑁆𑀣𑀜𑁆𑀘𑁂𑀯 𑀧𑀼𑀭𑀺𑀲𑀧𑁆𑀧𑀬𑁄𑀕𑁂 𑀅𑀲𑀫𑁆𑀫𑁄𑀳𑀢𑁆𑀣𑀜𑁆𑀘.

𑀪𑀯𑀢𑀼, 𑀪𑀯𑀦𑁆𑀢𑀼. 𑀪𑀯𑀸𑀳𑀺, 𑀪𑀯, 𑀪𑀯𑀣. 𑀪𑀯𑀸𑀫𑀺, 𑀪𑀯𑀸𑀫. 𑀪𑀯𑀢𑀁, 𑀪𑀯𑀦𑁆𑀢𑀁. 𑀪𑀯𑀲𑁆𑀲𑀼, 𑀪𑀯𑀯𑁆𑀳𑁄. 𑀪𑀯𑁂, 𑀪𑀯𑀸𑀫𑀲𑁂. 𑀲𑁄 𑀪𑀯𑀢𑀼, 𑀢𑁂 𑀪𑀯𑀦𑁆𑀢𑀼. 𑀢𑁆𑀯𑀁 𑀪𑀯𑀸𑀳𑀺, 𑀪𑀯, 𑀢𑀼𑀫𑁆𑀳𑁂 𑀪𑀯𑀣. 𑀅𑀳𑀁 𑀪𑀯𑀸𑀫𑀺, 𑀫𑀬𑀁 𑀪𑀯𑀸𑀫. 𑀲𑁄 𑀪𑀯𑀢𑀁, 𑀢𑁂 𑀪𑀯𑀦𑁆𑀢𑀁. 𑀢𑁆𑀯𑀁 𑀪𑀯𑀲𑁆𑀲𑀼, 𑀢𑀼𑀫𑁆𑀳𑁂 𑀪𑀯𑀯𑁆𑀳𑁄. 𑀅𑀳𑀁 𑀪𑀯𑁂, 𑀫𑀬𑀁 𑀪𑀯𑀸𑀫𑀲𑁂. 𑀅𑀬𑀁 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀪𑀯𑁂𑀬𑁆𑀬, 𑀪𑀯𑁂, 𑀪𑀯𑁂𑀬𑁆𑀬𑀼𑀁. 𑀪𑀯𑁂𑀬𑁆𑀬𑀸𑀲𑀺, 𑀪𑀯𑁂𑀬𑁆𑀬𑀸𑀣. 𑀪𑀯𑁂𑀬𑁆𑀬𑀸𑀫𑀺, 𑀪𑀯𑁂𑀬𑁆𑀬𑀸𑀫, 𑀪𑀯𑁂𑀫𑀼. 𑀪𑀯𑁂𑀣, 𑀪𑀯𑁂𑀭𑀁. 𑀪𑀯𑁂𑀣𑁄, 𑀪𑀯𑁂𑀬𑁆𑀬𑀸𑀯𑁆𑀳𑁄. 𑀪𑀯𑁂𑀬𑁆𑀬𑀁, 𑀪𑀯𑁂𑀬𑁆𑀬𑀸𑀫𑁆𑀳𑁂 𑀇𑀢𑀺 𑀯𑀸, 𑀲𑁄 𑀪𑀯𑁂𑀬𑁆𑀬 ¶ , 𑀪𑀯𑁂, 𑀢𑁂 𑀪𑀯𑁂𑀬𑁆𑀬𑀼𑀁. 𑀢𑁆𑀯𑀁 𑀪𑀯𑁂𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀪𑀯𑁂𑀬𑁆𑀬𑀸𑀣. 𑀅𑀳𑀁 𑀪𑀯𑁂𑀬𑁆𑀬𑀸𑀫𑀺, 𑀫𑀬𑀁 𑀪𑀯𑁂𑀬𑁆𑀬𑀸𑀫, 𑀪𑀯𑁂𑀫𑀼. 𑀲𑁄 𑀪𑀯𑁂𑀣, 𑀢𑁂 𑀪𑀯𑁂𑀭𑀁. 𑀢𑁆𑀯𑀁 𑀪𑀯𑁂𑀣𑁄, 𑀢𑀼𑀫𑁆𑀳𑁂 𑀪𑀯𑁂𑀬𑁆𑀬𑀸𑀯𑁆𑀳𑁄. 𑀅𑀳𑀁 𑀪𑀯𑁂𑀬𑁆𑀬𑀁, 𑀫𑀬𑀁 𑀪𑀯𑁂𑀬𑁆𑀬𑀸𑀫𑁆𑀳𑁂 𑀇𑀢𑀺 𑀯𑀸. 𑀅𑀬𑀁 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀩𑀪𑀽𑀯, 𑀩𑀪𑀽𑀯𑀼. 𑀩𑀪𑀽𑀯𑁂, 𑀩𑀪𑀽𑀯𑀺𑀢𑁆𑀣. 𑀩𑀪𑀽𑀯𑀁, 𑀩𑀪𑀽𑀯𑀺𑀫𑁆𑀳. 𑀩𑀪𑀽𑀯𑀺𑀢𑁆𑀣, 𑀩𑀪𑀽𑀯𑀺𑀭𑁂. 𑀩𑀪𑀽𑀯𑀺𑀢𑁆𑀣𑁄, 𑀩𑀪𑀽𑀯𑀺𑀯𑁆𑀳𑁄. 𑀩𑀪𑀽𑀯𑀺𑀁, 𑀩𑀪𑀽𑀯𑀺𑀫𑁆𑀳𑁂 𑀇𑀢𑀺 𑀯𑀸, 𑀲𑁄 𑀩𑀪𑀽𑀯, 𑀢𑁂 𑀩𑀪𑀽𑀯𑀼. 𑀢𑁆𑀯𑀁 𑀩𑀪𑀽𑀯𑁂, 𑀢𑀼𑀫𑁆𑀳𑁂 𑀩𑀪𑀽𑀯𑀺𑀢𑁆𑀣. 𑀅𑀳𑀁 𑀩𑀪𑀽𑀯𑀁, 𑀫𑀬𑀁 𑀩𑀪𑀽𑀯𑀺𑀫𑁆𑀳. 𑀲𑁄 𑀩𑀪𑀽𑀯𑀺𑀢𑁆𑀣, 𑀢𑁂 𑀩𑀪𑀽𑀯𑀺𑀭𑁂. 𑀢𑁆𑀯𑀁 𑀩𑀪𑀽𑀯𑀺𑀢𑁆𑀣𑁄, 𑀢𑀼𑀫𑁆𑀳𑁂 𑀩𑀪𑀽𑀯𑀺𑀯𑁆𑀳𑁄. 𑀅𑀳𑀁 𑀩𑀪𑀽𑀯𑀺𑀁, 𑀫𑀬𑀁 𑀩𑀪𑀽𑀯𑀺𑀫𑁆𑀳𑁂 𑀇𑀢𑀺 𑀯𑀸. 𑀅𑀬𑀁 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀅𑀪𑀯𑀸, 𑀅𑀪𑀯𑀽. 𑀅𑀪𑀯𑁄, 𑀅𑀪𑀯𑀢𑁆𑀣. 𑀅𑀪𑀯𑀁, 𑀅𑀪𑀯𑀫𑁆𑀳𑀸. 𑀅𑀪𑀯𑀢𑁆𑀣, 𑀅𑀪𑀯𑀢𑁆𑀣𑀼𑀁. 𑀅𑀪𑀯𑀲𑁂, 𑀅𑀪𑀯𑀯𑁆𑀳𑀁. 𑀅𑀪𑀯𑀺𑀁, 𑀅𑀪𑀯𑀫𑁆𑀳𑀲𑁂 𑀇𑀢𑀺 𑀯𑀸, 𑀲𑁄 𑀅𑀪𑀯𑀸, 𑀢𑁂 𑀅𑀪𑀯𑀽. 𑀢𑁆𑀯𑀁 𑀅𑀪𑀯𑁄, 𑀢𑀼𑀫𑁆𑀳𑁂 𑀅𑀪𑀯𑀢𑁆𑀣. 𑀅𑀳𑀁 𑀅𑀪𑀯𑀁, 𑀫𑀬𑀁 𑀅𑀪𑀯𑀫𑁆𑀳𑀸. 𑀲𑁄 𑀅𑀪𑀯𑀢𑁆𑀣, 𑀢𑁂 𑀅𑀪𑀯𑀢𑁆𑀣𑀼𑀁. 𑀢𑁆𑀯𑀁 𑀅𑀪𑀯𑀲𑁂, 𑀢𑀼𑀫𑁆𑀳𑁂 𑀅𑀪𑀯𑀯𑁆𑀳𑀁. 𑀅𑀳𑀁 𑀅𑀪𑀯𑀺𑀁, 𑀫𑀬𑀁 𑀅𑀪𑀯𑀫𑁆𑀳𑀲𑁂 𑀇𑀢𑀺 𑀯𑀸. 𑀅𑀬𑀁 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀅𑀪𑀯𑀺, 𑀅𑀪𑀯𑀼𑀁. 𑀅𑀪𑀯𑁄, 𑀅𑀪𑀯𑀺𑀢𑁆𑀣. 𑀅𑀪𑀯𑀺𑀁, 𑀅𑀪𑀯𑀺𑀫𑁆𑀳𑀸. 𑀅𑀪𑀯𑀸, 𑀅𑀪𑀯𑀽. 𑀅𑀪𑀯𑀲𑁂, 𑀅𑀪𑀯𑀺𑀯𑁆𑀳𑀁. 𑀅𑀪𑀯𑁆𑀳𑀁, 𑀅𑀪𑀯𑀺𑀫𑁆𑀳𑁂 𑀇𑀢𑀺 𑀯𑀸, 𑀲𑁄 𑀅𑀪𑀯𑀺, 𑀢𑁂 𑀅𑀪𑀯𑀼𑀁. 𑀢𑁆𑀯𑀁 𑀅𑀪𑀯𑁄, 𑀢𑀼𑀫𑁆𑀳𑁂 𑀅𑀪𑀯𑀺𑀢𑁆𑀣. 𑀅𑀳𑀁 𑀅𑀪𑀯𑀺𑀁, 𑀫𑀬𑀁 𑀅𑀪𑀯𑀺𑀫𑁆𑀳𑀸. 𑀲𑁄 𑀅𑀪𑀯𑀸, 𑀢𑁂 𑀅𑀪𑀯𑀽. 𑀢𑁆𑀯𑀁 𑀅𑀪𑀯𑀲𑁂, 𑀢𑀼𑀫𑁆𑀳𑁂 𑀅𑀪𑀯𑀺𑀯𑁆𑀳𑀁. 𑀅𑀳𑀁 𑀅𑀪𑀯𑀁, 𑀫𑀬𑀁 𑀅𑀪𑀯𑀺𑀫𑁆𑀳𑁂 𑀇𑀢𑀺 𑀯𑀸. 𑀅𑀬𑀁 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀏𑀢𑁆𑀣 𑀧𑀦𑀚𑁆𑀚𑀢𑀦𑀺𑀬𑀸 𑀉𑀁𑀯𑀘𑀦𑀲𑁆𑀲 𑀇𑀁𑀲𑀼𑀫𑀸𑀤𑁂𑀲𑀯𑀲𑁂𑀦 𑀪𑀯𑀢𑀺𑀦𑁄 𑀭𑀽𑀧𑀦𑁆𑀢𑀭𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? 𑀢𑁂 𑀪𑀯𑀺𑀁𑀲𑀼, 𑀲𑀫𑀼𑀩𑁆𑀪𑀯𑀺𑀁𑀲𑀼, 𑀧𑀪𑀯𑀺𑀁𑀲𑀼, 𑀧𑀭𑀸𑀪𑀯𑀺𑀁𑀲𑀼, 𑀲𑀫𑁆𑀪𑀯𑀺𑀁𑀲𑀼, 𑀧𑀸𑀢𑀼𑀪𑀯𑀺𑀁𑀲𑀼, 𑀧𑀸𑀢𑀼𑀩𑁆𑀪𑀯𑀺𑀁𑀲𑀼 ¶ , 𑀇𑀫𑀸𑀦𑀺 𑀅𑀓𑀫𑁆𑀫𑀓𑀧𑀤𑀸𑀦𑀺. 𑀧𑀭𑀺𑀪𑀯𑀺𑀁𑀲𑀼, 𑀅𑀪𑀺𑀪𑀯𑀺𑀁𑀲𑀼, 𑀅𑀥𑀺𑀪𑀯𑀺𑀁𑀲𑀼, 𑀅𑀢𑀺𑀪𑀯𑀺𑀁𑀲𑀼, 𑀅𑀦𑀼𑀪𑀯𑀺𑀁𑀲𑀼, 𑀲𑀫𑀦𑀼𑀪𑀯𑀺𑀁𑀲𑀼, 𑀅𑀪𑀺𑀲𑀫𑁆𑀪𑀯𑀺𑀁𑀲𑀼.

‘‘𑀅𑀥𑀺𑀪𑁄𑀲𑀼’’𑀦𑁆𑀢𑀺 𑀭𑀽𑀧𑀫𑁆𑀧𑀺, 𑀬𑀲𑁆𑀫𑀸 𑀤𑀺𑀲𑁆𑀲𑀢𑀺 𑀧𑀸𑀴𑀺𑀬𑀁;

𑀢𑀲𑁆𑀫𑀸 𑀳𑀺 𑀦𑀬𑀢𑁄 𑀜𑁂 𑀬𑁆𑀬𑀁, ‘‘𑀧𑀭𑀺𑀪𑁄𑀲𑀼’’𑀦𑁆𑀢𑀺𑀆𑀤𑀺𑀓𑀁.

𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 ‘‘𑀏𑀯𑀁𑀯𑀺𑀳𑀸𑀭𑀺𑀜𑁆𑀘𑀸𑀯𑀼𑀲𑁄 𑀪𑀺𑀓𑁆𑀔𑀼𑀁 𑀭𑀽𑀧𑀸 𑀅𑀥𑀺𑀪𑁄𑀲𑀼𑀁, 𑀦 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀥𑀺𑀪𑁄𑀲𑀻’’𑀢𑀺. 𑀇𑀫𑀸𑀦𑀺 𑀲𑀓𑀫𑁆𑀫𑀓𑀧𑀤𑀸𑀦𑀺, 𑀏𑀯𑀫𑀚𑁆𑀚𑀢𑀦𑀺𑀬𑀸 𑀉𑀁𑀯𑀘𑀦𑀲𑁆𑀲 𑀇𑀁𑀲𑀼𑀫𑀸𑀤𑁂𑀲𑀯𑀲𑁂𑀦 𑀪𑀯𑀢𑀺𑀦𑁄 𑀭𑀽𑀧𑀦𑁆𑀢𑀭𑀸𑀦𑀺 𑀪𑀯𑀦𑁆𑀢𑀺. 𑀅𑀧𑀺𑀘

‘‘𑀅𑀦𑁆𑀯𑀪𑀺’’ 𑀇𑀢𑀺𑀭𑀽𑀧𑀫𑁆𑀧𑀺, 𑀅𑀚𑁆𑀚𑀢𑀦𑁆𑀬𑀸 𑀧𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀳𑀺 𑀦𑀬𑀢𑁄 𑀜𑁂𑀬𑁆𑀬𑀁, ‘‘𑀅𑀚𑁆𑀛𑀪𑀺’’𑀘𑁆𑀘𑀸𑀤𑀺𑀓𑀫𑁆𑀧𑀺 𑀘.

𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀯𑀁 𑀲𑀫𑀓𑁆𑀓𑀫𑀺, 𑀲𑀼𑀔𑀜𑁆𑀘 𑀔𑀺𑀟𑁆𑀟𑀸𑀭𑀢𑀺𑀬𑁄 𑀘 𑀅𑀦𑁆𑀯𑀪𑀻𑀢𑀺. 𑀢𑀢𑁆𑀣 𑀅𑀦𑁆𑀯𑀪𑀻𑀢𑀺 𑀅𑀦𑀼 𑀅𑀪𑀻𑀢𑀺 𑀙𑁂𑀤𑁄. 𑀅𑀦𑀽𑀢𑀺 𑀉𑀧𑀲𑀕𑁆𑀕𑁄. 𑀅𑀪𑀻𑀢𑀺 𑀆𑀔𑁆𑀬𑀸𑀢𑀺𑀓𑀧𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺. 𑀪𑀯𑀺𑀲𑁆𑀲𑀲𑀺, 𑀪𑀯𑀺𑀲𑁆𑀲𑀣. 𑀪𑀯𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀸𑀫. 𑀪𑀯𑀺𑀲𑁆𑀲𑀢𑁂, 𑀪𑀯𑀺𑀲𑁆𑀲𑀦𑁆𑀢𑁂. 𑀪𑀯𑀺𑀲𑁆𑀲𑀲𑁂, 𑀪𑀯𑀺𑀲𑁆𑀲𑀯𑁆𑀳𑁂. 𑀪𑀯𑀺𑀲𑁆𑀲𑀁, 𑀪𑀯𑀺𑀲𑁆𑀲𑀸𑀫𑁆𑀳𑁂 𑀇𑀢𑀺 𑀯𑀸, 𑀲𑁄 𑀪𑀯𑀺𑀲𑁆𑀲𑀢𑀺, 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺, 𑀢𑀼𑀫𑁆𑀳𑁂 𑀪𑀯𑀺𑀲𑁆𑀲𑀣. 𑀅𑀳𑀁 𑀪𑀯𑀺𑀲𑁆𑀲𑀸𑀫𑀺, 𑀫𑀬𑀁 𑀪𑀯𑀺𑀲𑁆𑀲𑀸𑀫. 𑀲𑁄 𑀪𑀯𑀺𑀲𑁆𑀲𑀢𑁂, 𑀢𑁂 𑀪𑀯𑀺𑀲𑁆𑀲𑀦𑁆𑀢𑁂. 𑀢𑁆𑀯𑀁 𑀪𑀯𑀺𑀲𑁆𑀲𑀲𑁂, 𑀢𑀼𑀫𑁆𑀳𑁂 𑀪𑀯𑀺𑀲𑁆𑀲𑀯𑁆𑀳𑁂. 𑀅𑀳𑀁 𑀪𑀯𑀺𑀲𑁆𑀲𑀁, 𑀫𑀬𑀁 𑀪𑀯𑀺𑀲𑁆𑀲𑀸𑀫𑁆𑀳𑁂 𑀇𑀢𑀺 𑀯𑀸. 𑀅𑀬𑀁 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀅𑀪𑀯𑀺𑀲𑁆𑀲𑀸, 𑀅𑀪𑀯𑀺𑀲𑁆𑀲𑀁𑀲𑀼. 𑀅𑀪𑀯𑀺𑀲𑁆𑀲𑁂, 𑀅𑀪𑀯𑀺𑀲𑁆𑀲𑀣. 𑀅𑀪𑀯𑀺𑀲𑁆𑀲𑀁, 𑀅𑀪𑀯𑀺𑀲𑁆𑀲𑀸𑀫𑁆𑀳𑀸. 𑀅𑀪𑀯𑀺𑀲𑁆𑀲𑀣, 𑀅𑀪𑀯𑀺𑀲𑁆𑀲𑀺𑀲𑀼. 𑀅𑀪𑀯𑀺𑀲𑁆𑀲𑀲𑁂, 𑀅𑀪𑀯𑀺𑀲𑁆𑀲𑀯𑁆𑀳𑁂. 𑀅𑀪𑀯𑀺𑀲𑁆𑀲𑀺𑀁, 𑀅𑀪𑀯𑀺𑀲𑁆𑀲𑀸𑀫𑁆𑀳𑀲𑁂 𑀇𑀢𑀺 𑀯𑀸, 𑀲𑁄 𑀅𑀪𑀯𑀺𑀲𑁆𑀲𑀸, 𑀢𑁂 𑀅𑀪𑀯𑀺𑀲𑁆𑀲𑀁𑀲𑀼. 𑀢𑁆𑀯𑀁 𑀅𑀪𑀯𑀺𑀲𑁆𑀲𑁂, 𑀢𑀼𑀫𑁆𑀳𑁂 ¶ 𑀅𑀪𑀯𑀺𑀲𑁆𑀲𑀣. 𑀅𑀳𑀁 𑀅𑀪𑀯𑀺𑀲𑁆𑀲𑀁, 𑀫𑀬𑀁 𑀅𑀪𑀯𑀺𑀲𑁆𑀲𑀸𑀫𑁆𑀳𑀸. 𑀲𑁄 𑀅𑀪𑀯𑀺𑀲𑁆𑀲𑀣, 𑀢𑁂 𑀅𑀪𑀯𑀺𑀲𑁆𑀲𑀺𑀲𑀼. 𑀢𑁆𑀯𑀁 𑀅𑀪𑀯𑀺𑀲𑁆𑀲𑀲𑁂, 𑀢𑀼𑀫𑁆𑀳𑁂 𑀅𑀪𑀯𑀺𑀲𑁆𑀲𑀯𑁆𑀳𑁂. 𑀅𑀳𑀁 𑀅𑀪𑀯𑀺𑀲𑁆𑀲𑀺𑀁, 𑀫𑀬𑀁 𑀅𑀪𑀯𑀺𑀲𑁆𑀲𑀸𑀫𑁆𑀳𑀲𑁂 𑀇𑀢𑀺 𑀯𑀸. 𑀅𑀬𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺𑀯𑀲𑁂𑀦 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀦𑀺𑀤𑁆𑀤𑁂𑀲𑁄.

𑀯𑁄𑀳𑀸𑀭𑀪𑁂𑀤𑀓𑀼𑀲𑀮𑁂𑀦 𑀲𑀼𑀩𑀼𑀤𑁆𑀥𑀺𑀦𑀸 𑀬𑁄,

𑀓𑀘𑁆𑀘𑀸𑀬𑀦𑁂𑀦 𑀓𑀣𑀺𑀢𑁄 𑀚𑀺𑀦𑀲𑀸𑀲𑀦𑀢𑁆𑀣𑀁;

𑀢𑁆𑀬𑀸𑀤𑀺𑀓𑁆𑀓𑀫𑁄 𑀢𑀤𑀦𑀼𑀕𑀁 𑀓𑀺𑀭𑀺𑀬𑀸𑀧𑀤𑀸𑀦𑀁,

𑀓𑀢𑁆𑀯𑀸 𑀓𑀫𑁄 𑀪𑀯𑀢𑀺𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑁄.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀪𑀯𑀢𑀺𑀦𑁄 𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀯𑀺𑀪𑀸𑀕𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀁;

𑀲𑀧𑁆𑀧𑀬𑁄𑀕𑁂𑀲𑀼 𑀅𑀢𑁆𑀣𑁂𑀲𑀼, 𑀯𑀺𑀜𑁆𑀜𑀽𑀦𑀁 𑀧𑀸𑀝𑀯𑀢𑁆𑀣𑀬𑀸.

𑀢𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁄, 𑀅𑀢𑁆𑀣𑀲𑀤𑁆𑀤𑀘𑀺𑀦𑁆𑀢𑀸, 𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑁄, 𑀲𑀫𑀸𑀦𑀸𑀲𑀫𑀸𑀦𑀯𑀲𑁂𑀦𑀯𑀘𑀦𑀲𑀗𑁆𑀕𑀳𑁄, 𑀆𑀕𑀫𑀮𑀓𑁆𑀔𑀡𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄, 𑀓𑀸𑀮𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄, 𑀓𑀸𑀮𑀲𑀗𑁆𑀕𑀳𑁄, 𑀧𑀓𑀭𑀡𑀲𑀁𑀲𑀦𑁆𑀤𑀦𑀸, 𑀯𑀢𑁆𑀢𑀫𑀸𑀦𑀸𑀤𑀻𑀦𑀁 𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑀸 𑀘𑀸𑀢𑀺 𑀦𑀯𑀥𑀸 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀼𑀤𑁆𑀥𑀸𑀭𑁂 𑀢𑀸𑀯 𑀲𑀫𑀸𑀦𑀲𑀼𑀢𑀺𑀓𑀧𑀤𑀸𑀦𑀫𑀢𑁆𑀣𑀼𑀤𑁆𑀥𑀸𑀭𑀡𑀁 𑀓𑀭𑀺𑀲𑁆𑀲𑀸𑀫. 𑀏𑀢𑁆𑀣𑀸𑀔𑁆𑀬𑀸𑀢𑀧𑀤𑀲𑀜𑁆𑀜𑀺𑀢𑀸𑀦𑀁 𑀪𑁄𑀢𑀺𑀲𑀤𑁆𑀤 𑀪𑀯𑁂𑀲𑀤𑁆𑀤𑀸𑀦𑀫𑀢𑁆𑀣𑁄 𑀉𑀤𑁆𑀥𑀭𑀺𑀢𑀩𑁆𑀩𑁄. 𑀢𑀣𑀸 𑀳𑁂𑀢𑁂 𑀦𑀸𑀫𑀺𑀓𑀧𑀤𑀲𑀜𑁆𑀜𑀺𑀢𑁂𑀳𑀺 𑀅𑀧𑀭𑁂𑀳𑀺 𑀪𑁄𑀢𑀺𑀲𑀤𑁆𑀤 𑀪𑀯𑁂𑀲𑀤𑁆𑀤𑁂𑀳𑀺 𑀲𑀫𑀸𑀦𑀲𑀼𑀢𑀺𑀓𑀸𑀧𑀺 𑀅𑀲𑀫𑀸𑀦𑀢𑁆𑀣𑀸 𑀘𑁂𑀯 𑀳𑁄𑀦𑁆𑀢𑀺 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀸 𑀘. 𑀲𑀸𑀲𑀦𑀲𑁆𑀫𑀺𑀜𑁆𑀳𑀺 ¶ 𑀓𑁂𑀘𑀺 𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀲𑀼𑀢𑀺𑀓𑀸 𑀲𑀫𑀸𑀦𑀸𑀧𑀺 𑀅𑀲𑀫𑀸𑀦𑀢𑁆𑀣𑀸 𑀅𑀲𑀫𑀸𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸 𑀅𑀲𑀫𑀸𑀦𑀮𑀺𑀗𑁆𑀕𑀸 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀸 𑀅𑀲𑀫𑀸𑀦𑀯𑀘𑀦𑀓𑀸 𑀅𑀲𑀫𑀸𑀦𑀦𑁆𑀢𑀸 𑀅𑀲𑀫𑀸𑀦𑀓𑀸𑀮𑀺𑀓𑀸 𑀅𑀲𑀫𑀸𑀦𑀧𑀤𑀚𑀸𑀢𑀺𑀓𑀸 𑀘 𑀪𑀯𑀦𑁆𑀢𑀺.

𑀢𑁂𑀲𑀫𑀲𑀫𑀸𑀦𑀢𑁆𑀣𑀢𑁆𑀢𑁂 ‘‘𑀲𑀩𑁆𑀩𑀜𑁆𑀳𑀺 𑀢𑀁 𑀚𑀻𑀭𑀢𑀺 𑀤𑁂𑀳𑀦𑀺𑀲𑁆𑀲𑀺𑀢𑀁. 𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀺. 𑀲𑀦𑁆𑀢𑁄 𑀢𑀲𑀺𑀢𑁄. 𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀺. 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀺. 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂. 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀏𑀢𑁆𑀣 𑀚𑀻𑀭𑀢𑀺𑀲𑀤𑁆𑀤𑀤𑁆𑀯𑀬𑀁 𑀬𑀣𑀸𑀲𑀫𑁆𑀪𑀯𑀁 𑀦𑀯𑀪𑀸𑀯𑀸𑀧𑀕𑀫𑀯𑀟𑁆𑀠𑀦𑀯𑀸𑀘𑀓𑀁. 𑀲𑀦𑁆𑀢𑁄𑀲𑀤𑁆𑀤𑀧𑀜𑁆𑀘𑀓𑀁 𑀬𑀣𑀸𑀲𑀫𑁆𑀪𑀯𑀁 𑀧𑀭𑀺𑀲𑁆𑀲𑀫𑀧𑁆𑀧𑀢𑁆𑀢𑀲𑀫𑀸𑀦𑁄𑀧𑀲𑀦𑁆𑀢𑁄𑀧𑀮𑀩𑁆𑀪𑀫𑀸𑀦𑀯𑀸𑀘𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑁂 𑀧𑀦 ‘‘𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻, 𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽𑀘𑀸’’𑀢𑀺𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀘 𑀅𑀓𑀢𑀜𑁆𑀜𑀽𑀲𑀤𑁆𑀤𑀤𑁆𑀯𑀬𑀁 𑀓𑀢𑀸𑀓𑀢𑀸𑀚𑀸𑀦𑀦𑀚𑀸𑀦𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀢𑁆𑀢𑀸 𑀅𑀲𑀫𑀸𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀮𑀺𑀗𑁆𑀕𑀢𑁆𑀢𑁂 ‘‘𑀲𑀼𑀔𑀻 𑀳𑁄𑀢𑀼 𑀧𑀜𑁆𑀘𑀲𑀺𑀔 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄. 𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺. 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀲𑀼𑀔𑀻𑀲𑀤𑁆𑀤𑀤𑁆𑀯𑀬𑀁 𑀲𑀸𑀲𑀤𑁆𑀤𑀤𑁆𑀯𑀬𑀜𑁆𑀘 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀅𑀲𑀫𑀸𑀦𑀮𑀺𑀗𑁆𑀕𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀢𑁆𑀢𑁂 ‘‘𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄. 𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀬𑀢𑁄𑀲𑀤𑁆𑀤𑀤𑁆𑀯𑀬𑀁 ¶ 𑀧𑀞𑀫𑀸𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀲𑀳𑀺𑀢𑀢𑁆𑀢𑀸 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀯𑀘𑀦𑀓𑀢𑁆𑀢𑁂 𑀇𑀫𑁂 𑀧𑀬𑁄𑀕𑀸 𑁋

‘‘𑀬𑀸𑀬 𑀫𑀸𑀢𑀼 𑀪𑀢𑁄 𑀧𑁄𑀲𑁄, 𑀇𑀫𑀁 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺;

𑀢𑀫𑁆𑀧𑀺 𑀧𑀸𑀡𑀤𑀤𑀺𑀁 𑀲𑀦𑁆𑀢𑀺𑀁, 𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺

𑀆𑀤𑀻𑀲𑀼 𑀳𑀦𑁆𑀢𑀺𑀲𑀤𑁆𑀤𑁄 𑀏𑀓𑀯𑀘𑀦𑁄.

‘‘𑀇𑀫𑁂 𑀦𑀽𑀦 𑀅𑀭𑀜𑁆𑀜𑀲𑁆𑀫𑀺𑀁, 𑀫𑀺𑀕𑀲𑀗𑁆𑀖𑀸𑀦𑀺 𑀮𑀼𑀤𑁆𑀤𑀓𑀸;

𑀯𑀸𑀓𑀼𑀭𑀸𑀳𑀺 𑀧𑀭𑀺𑀓𑁆𑀔𑀺𑀧𑁆𑀧, 𑀲𑁄𑀩𑁆𑀪𑀁 𑀧𑀸𑀢𑁂𑀢𑁆𑀯𑀸 𑀢𑀸𑀯𑀤𑁂;

𑀯𑀺𑀓𑁆𑀓𑁄𑀲𑀫𑀸𑀦𑀸 𑀢𑀺𑀩𑁆𑀩𑀸𑀳𑀺, 𑀳𑀦𑁆𑀢𑀺 𑀦𑁂𑀲𑀁 𑀯𑀭𑀁 𑀯𑀭’’𑀦𑁆𑀢𑀺.

𑀆𑀤𑀻𑀲𑀼 𑀧𑀦 𑀩𑀳𑀼𑀯𑀘𑀦𑁄. ‘‘𑀲𑀻𑀮𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄. 𑀏𑀣 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀲𑀻𑀮𑀯𑀸 𑀳𑁄𑀣. 𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻. 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺. 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀻 𑀲𑁄. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀻𑀮𑀯𑀸𑀲𑀤𑁆𑀤𑀸𑀤𑀬𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑀸.

𑀅𑀲𑀫𑀸𑀦𑀦𑁆𑀢𑀢𑁆𑀢𑁂 𑀧𑀦 𑀬𑀢𑁆𑀣 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀢𑁆𑀢𑀁 𑀯𑀸 𑀅𑀲𑀫𑀸𑀦𑀯𑀘𑀦𑀢𑁆𑀢𑀁 𑀯𑀸 𑀉𑀧𑀮𑀩𑁆𑀪𑀢𑀺. 𑀢𑁂𑀬𑁂𑀯 𑀧𑀬𑁄𑀕𑀸. 𑀢𑀁 𑀬𑀣𑀸? ‘‘𑀲𑀢𑀁 𑀲𑀫𑁆𑀧𑀚𑀸𑀦𑀁, 𑀲𑀢𑀁 𑀥𑀫𑁆𑀫𑁄, 𑀲𑀦𑁆𑀢𑁄 𑀤𑀦𑁆𑀢𑁄, 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄.

𑀅𑀲𑀫𑀸𑀦𑀓𑀸𑀮𑀢𑁆𑀢𑁂 ‘‘𑀦𑀦𑀼 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡 𑀪𑀜𑁆𑀜𑀫𑀸𑀦𑁂, 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲. 𑀢𑁂 𑀚𑀦𑀸 𑀧𑀸𑀭𑀫𑀺𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭’’𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀇𑀲𑁆𑀲𑀦𑁆𑀢𑀺𑀲𑀤𑁆𑀤𑀤𑁆𑀯𑀬𑀁 𑀯𑀢𑁆𑀢𑀫𑀸𑀦𑀸𑀪𑀯𑀺𑀲𑁆𑀲𑀦𑁆𑀢𑀻𑀓𑀸𑀮𑀯𑀲𑁂𑀦 𑀅𑀲𑀫𑀸𑀦𑀓𑀸𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀢𑀫𑀸𑀦𑀸𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺𑀯𑀲𑁂𑀦 𑀧𑀦 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀦𑁆𑀢𑀺𑀧𑀺.

𑀅𑀲𑀫𑀸𑀦𑀧𑀤𑀚𑀸𑀢𑀺𑀓𑀢𑁆𑀢𑁂 ¶ ‘‘𑀲𑀬𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀁. 𑀧𑀣𑁂 𑀥𑀸𑀯𑀦𑁆𑀢𑀺𑀬𑀸 𑀧𑀢𑀺, 𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀧𑀢𑀺. 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀲𑀬𑀁𑀲𑀤𑁆𑀤𑀤𑁆𑀯𑀬𑀁 𑀦𑀸𑀫𑀦𑀺𑀧𑀸𑀢𑀯𑀲𑁂𑀦 𑀧𑀢𑀺𑀲𑀤𑁆𑀤𑀢𑁆𑀢𑀬𑀁 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀯𑀲𑁂𑀦 𑀅𑀲𑀫𑀸𑀦𑀧𑀤𑀚𑀸𑀢𑀺𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀯𑀁 𑀲𑀸𑀲𑀦𑀲𑁆𑀫𑀺𑀁 𑀓𑁂𑀘𑀺 𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀲𑀼𑀢𑀺𑀓𑀸 𑀲𑀫𑀸𑀦𑀸𑀧𑀺 𑀅𑀲𑀫𑀸𑀦𑀢𑁆𑀣𑀸 𑀅𑀲𑀫𑀸𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸 𑀅𑀲𑀫𑀸𑀦𑀮𑀺𑀗𑁆𑀕𑀸 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀸 𑀅𑀲𑀫𑀸𑀦𑀯𑀘𑀦𑀓𑀸 𑀅𑀲𑀫𑀸𑀦𑀦𑁆𑀢𑀸 𑀅𑀲𑀫𑀸𑀦𑀓𑀸𑀮𑀺𑀓𑀸 𑀅𑀲𑀫𑀸𑀦𑀧𑀤𑀚𑀸𑀢𑀺𑀓𑀸 𑀘 𑀪𑀯𑀦𑁆𑀢𑀺. 𑀏𑀢𑀸𑀤𑀺𑀲𑁂𑀲𑀼 𑀲𑀤𑁆𑀤𑁂𑀲𑀼 𑀬𑁄 𑀓𑁆𑀭𑀺𑀬𑀸𑀧𑀤𑀢𑁆𑀢𑀁 𑀧𑀓𑀸𑀲𑁂𑀢𑀺, 𑀦 𑀲𑁄 𑀦𑀸𑀫𑀺𑀓𑀧𑀤𑀢𑁆𑀢𑀁. 𑀬𑁄 𑀘 𑀦𑀸𑀫𑀺𑀓𑀧𑀤𑀢𑁆𑀢𑀁 𑀧𑀓𑀸𑀲𑁂𑀢𑀺, 𑀦 𑀲𑁄 𑀓𑁆𑀭𑀺𑀬𑀸𑀧𑀤𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀼𑀢𑀺𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀣𑀼𑀤𑁆𑀥𑀸𑀭𑁄 𑀓𑀭𑀡𑀻𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑁆𑀭𑀺𑀬𑀸𑀧𑀤𑀸𑀦𑀁 𑀦𑀸𑀫𑀧𑀤𑁂𑀳𑀺 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀪𑁄𑀢𑀺𑀲𑀤𑁆𑀤 𑀪𑀯𑁂 𑀲𑀤𑁆𑀤𑀸𑀦𑀫𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫.

𑀓𑀣𑀁? 𑀪𑁄𑀢𑀺𑀲𑀤𑁆𑀤𑁄 𑀓𑀢𑁆𑀢𑀼𑀬𑁄𑀕𑁂 𑀓𑁆𑀭𑀺𑀬𑀸𑀧𑀤𑀁, 𑀓𑁆𑀭𑀺𑀬𑀸𑀬𑁄𑀕𑁂 𑀦𑀸𑀫𑀺𑀓𑀧𑀤𑀁, 𑀢𑀲𑁆𑀫𑀸 𑀲𑁄 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺 𑀓𑁆𑀭𑀺𑀬𑀸𑀧𑀤𑀢𑁆𑀣𑁂 𑀦𑀸𑀫𑀺𑀓𑀧𑀤𑀢𑁆𑀣𑁂 𑀘. 𑀢𑀢𑁆𑀣 𑀓𑁆𑀭𑀺𑀬𑀸𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀲𑁂𑀦, 𑀦𑀸𑀫𑀺𑀓𑀧𑀤𑀢𑁆𑀣𑁂 𑀧𑀦𑀸𑀮𑀧𑀦𑀯𑀲𑁂𑀦. 𑀓𑁆𑀭𑀺𑀬𑀸𑀧𑀤𑀢𑁆𑀣𑁂 𑀢𑀸𑀯 ‘‘𑀏𑀓𑁄 𑀪𑁄𑀢𑀺’’, 𑀦𑀸𑀫𑀺𑀓𑀧𑀤𑀢𑁆𑀣𑁂 ‘‘𑀫𑀸 𑀪𑁄𑀢𑀺 𑀧𑀭𑀺𑀤𑁂𑀯𑁂𑀲𑀺’’. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀪𑀸𑀯𑁂 𑀦𑀸𑀫𑀧𑀤𑀢𑁆𑀣𑁂 𑀘, 𑀆𑀮𑀧𑀦𑀯𑀺𑀲𑁂𑀲𑀺𑀢𑁂;

𑀇𑀫𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼, 𑀪𑁄𑀢𑀺𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀪𑀯𑁂𑀲𑀤𑁆𑀤𑁄 ¶ 𑀧𑀦 ‘‘𑀪𑀯𑀸𑀫𑀻’’𑀢𑀺𑀫𑀲𑁆𑀲 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲𑀢𑁆𑀣𑁂𑀧𑀺 𑀯𑀢𑁆𑀢𑀢𑀺. ‘‘𑀪𑀯𑀸𑀫𑀻’’𑀢𑀺𑀫𑀲𑁆𑀲 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 𑀆𑀡𑀢𑁆𑀬𑀸𑀲𑀻𑀲𑀦𑀢𑁆𑀣𑁂𑀲𑀼𑀧𑀺 𑀯𑀢𑁆𑀢𑀢𑀺. ‘‘𑀪𑀯𑁂𑀬𑁆𑀬𑀸𑀫𑀻’’𑀢𑀺𑀫𑀲𑁆𑀲 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀲𑀳𑀺𑀢𑀲𑁆𑀲 𑀲𑀤𑁆𑀤𑀲𑁆𑀲 𑀅𑀦𑀼𑀫𑀢𑀺𑀧𑀭𑀺𑀓𑀧𑁆𑀧𑀢𑁆𑀣𑁂𑀲𑀼𑀧𑀺 𑀯𑀢𑁆𑀢𑀢𑀺. 𑀢𑀢𑁆𑀭𑀺𑀤𑀁 𑀧𑀞𑀫𑀢𑁆𑀣𑀲𑁆𑀲 𑀲𑀸𑀥𑀓𑀁 𑀆𑀳𑀘𑁆𑀘𑀯𑀘𑀦𑀁 𑁋

‘‘𑀤𑁂𑀯𑀸𑀦𑀁 𑀅𑀥𑀺𑀓𑁄 𑀳𑁄𑀫𑀺, 𑀪𑀯𑀸𑀫𑀺 𑀫𑀦𑀼𑀚𑀸𑀥𑀺𑀧𑁄;

𑀭𑀽𑀧𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀸𑀬 𑀅𑀲𑀫𑁄 𑀪𑀯𑁂’’𑀢𑀺.

𑀅𑀬𑀁 𑀧𑀦 𑀲𑀩𑁆𑀩𑁂𑀲𑀁 𑀢𑁂𑀲𑀫𑀢𑁆𑀣𑀸𑀦𑀁 𑀲𑀸𑀥𑀺𑀓𑀸 𑀅𑀫𑁆𑀳𑀸𑀓𑀁 𑀕𑀸𑀣𑀸𑀭𑀘𑀦𑀸 𑁋

‘‘𑀲𑀼𑀔𑀻 𑀪𑀯𑀢𑀺 𑀏𑀲𑁄 𑀘, 𑀅𑀳𑀜𑁆𑀘𑀸𑀧𑀺 𑀲𑀼𑀔𑀻 𑀪𑀯𑁂;

𑀲𑀼𑀔𑀻 𑀪𑀯𑀢𑀼 𑀏𑀲𑁄 𑀘, 𑀅𑀳𑀜𑁆𑀘𑀸𑀧𑀺 𑀲𑀼𑀔𑀻 𑀪𑀯𑁂.

𑀇𑀫𑀸𑀬 𑀩𑀼𑀤𑁆𑀥𑀧𑀽𑀚𑀸𑀬, 𑀪𑀯𑀦𑁆𑀢𑀼 𑀲𑀼𑀔𑀺𑀢𑀸 𑀧𑀚𑀸;

𑀪𑀯𑁂’𑀳𑀜𑁆𑀘 𑀲𑀼𑀔𑀧𑁆𑀧𑀢𑁆𑀢𑁄, 𑀲𑀸𑀫𑀘𑁆𑀘𑁄 𑀲𑀳 𑀜𑀸𑀢𑀺𑀪𑀺.

𑀲𑀼𑀔𑀻 𑀪𑀯𑁂𑀬𑁆𑀬 𑀏𑀲𑁄 𑀘, 𑀅𑀳𑀜𑁆𑀘𑀸𑀧𑀺 𑀲𑀼𑀔𑀻 𑀪𑀯𑁂;

𑀲𑀼𑀔𑀻 𑀪𑀯𑁂𑀬𑁆𑀬 𑀘𑁂 𑀏𑀲𑁄, 𑀅𑀳𑀜𑁆𑀘𑀸𑀧𑀺 𑀲𑀼𑀔𑀻 𑀪𑀯𑁂’’𑀢𑀺.

𑀇𑀘𑁆𑀘𑁂𑀯𑀁 𑁋

𑀯𑀢𑁆𑀢𑀫𑀸𑀦𑀸𑀬 𑀧𑀜𑁆𑀘𑀫𑁆𑀬𑀁, 𑀲𑀢𑁆𑀢𑀫𑁆𑀬𑀜𑁆𑀘 𑀯𑀺𑀪𑀢𑁆𑀢𑀺𑀬𑀁;

𑀏𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼, 𑀪𑀯𑁂𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀏𑀓𑀥𑀸 𑀯𑀢𑁆𑀢𑀫𑀸𑀦𑀸𑀬𑀁, 𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀲𑀼 𑀘;

𑀤𑁆𑀯𑁂𑀥𑀸 𑀤𑁆𑀯𑁂𑀥𑀸𑀢𑀺𑀫𑀲𑁆𑀲𑀢𑁆𑀣𑀁, 𑀧𑀜𑁆𑀘𑀥𑀸 𑀧𑀭𑀺𑀤𑀻𑀧𑀬𑁂.

𑀤𑁆𑀯𑁂𑀥𑀸 𑀯𑀸 𑀯𑀢𑁆𑀢𑀫𑀸𑀦𑀸𑀬-𑀫𑀸𑀤𑀺𑀧𑀼𑀭𑀺𑀲𑀯𑀸𑀘𑀓𑁄;

𑀅𑀢𑁆𑀣𑁄 ‘‘𑀪𑀯𑁂’’𑀢𑀺 𑀏𑀢𑀲𑁆𑀲, ‘‘𑀪𑀯𑀢𑀻’’𑀢𑀺𑀧𑀺𑀬𑀼𑀚𑁆𑀚𑀢𑀺.

𑀇𑀤𑀸𑀦𑀺 𑀧𑀦 𑀏𑀢𑀲𑁆𑀲, 𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁;

𑀏𑀢𑁆𑀣 𑀧𑀸𑀴𑀺𑀧𑁆𑀧𑀤𑁂𑀲𑀁 𑀢𑀼, 𑀆𑀳𑀭𑀺𑀲𑁆𑀲𑀁 𑀲𑀼𑀡𑀸𑀣 𑀫𑁂.

𑀓𑁄’𑀬𑀁 ¶ 𑀫𑀚𑁆𑀛𑁂𑀲𑀫𑀼𑀤𑁆𑀤𑀲𑁆𑀫𑀺𑀁, 𑀅𑀧𑀲𑁆𑀲𑀁 𑀢𑀻𑀭𑀫𑀸𑀬𑀼𑀳𑁂;

𑀓𑀁 𑀢𑁆𑀯𑀁 𑀅𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀏𑀯𑀁 𑀯𑀸𑀬𑀫𑀲𑁂 𑀪𑀼𑀲𑀁.

𑀦𑀺𑀲𑀫𑁆𑀫 𑀯𑀢𑁆𑀢𑀁 𑀮𑁄𑀓𑀲𑁆𑀲, 𑀯𑀸𑀬𑀸𑀫𑀲𑁆𑀲 𑀘 𑀤𑁂𑀯𑀢𑁂;

𑀢𑀲𑁆𑀫𑀸 𑀫𑀚𑁆𑀛𑁂𑀲𑀫𑀼𑀤𑁆𑀤𑀲𑁆𑀫𑀺𑀁, 𑀅𑀧𑀲𑁆𑀲𑀁 𑀢𑀻𑀭𑀫𑀸𑀬𑀼𑀳𑁂.

𑀅𑀲𑁆𑀲𑀁 𑀧𑀼𑀭𑀺𑀫𑀕𑀸𑀣𑀸𑀬𑀁, ‘‘𑀆𑀬𑀼𑀳𑁂’’𑀢𑀺𑀧𑀤𑀲𑁆𑀲 𑀳𑀺;

‘‘𑀆𑀬𑀽𑀳𑀢𑀻’’𑀢𑀺 𑀅𑀢𑁆𑀣𑁄𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑀯𑀺𑀪𑀢𑁆𑀢𑀺𑀬𑀸 𑀯𑀺𑀧𑀮𑁆𑀮𑀸𑀲-𑀯𑀲𑁂𑀦𑀸𑀬𑀁 𑀲𑀫𑀻𑀭𑀺𑀢𑁄;

𑀯𑀢𑁆𑀢𑀫𑀸𑀦𑁂 𑀲𑀢𑁆𑀢𑀫𑀻𑀢𑀺, 𑀢𑀺𑀲𑁆𑀲𑁂𑀓𑀸𑀭𑀯𑀲𑁂𑀦 𑀯𑀸.

𑀧𑀘𑁆𑀙𑀺𑀫𑀸𑀬 𑀘 𑀕𑀸𑀣𑀸𑀬𑀁, ‘‘𑀆𑀬𑀼𑀳𑁂’’𑀢𑀺𑀧𑀤𑀲𑁆𑀲 𑀢𑀼;

‘‘𑀆𑀬𑀽𑀳𑀸𑀫𑀻’’𑀢𑀺 𑀅𑀢𑁆𑀣𑁄𑀢𑀺, 𑀲𑀤𑁆𑀤𑀢𑁆𑀣𑀜𑁆𑀜𑀽 𑀯𑀺𑀪𑀸𑀯𑀬𑁂.

𑀢𑀣𑀸 ‘‘𑀪𑀯𑁂’’𑀢𑀺𑀏𑀢𑀲𑁆𑀲, 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀬𑀁;

‘‘𑀪𑀯𑀢𑀻’’𑀢𑀺, ‘‘𑀪𑀯𑀸𑀫𑀻’’𑀢𑀺, 𑀘𑀢𑁆𑀣𑀁 𑀤𑁆𑀯𑁂𑀥𑀸 𑀯𑀺𑀪𑀸𑀯𑀬𑁂.

𑀏𑀯𑀁𑀯𑀺𑀥𑁂𑀲𑀼 𑀅𑀜𑁆𑀜𑁂𑀲𑀼, 𑀧𑀸𑀞𑁂𑀲𑀼𑀧𑀺 𑀅𑀬𑀁 𑀦𑀬𑁄;

𑀦𑁂𑀢𑀩𑁆𑀩𑁄 𑀦𑀬𑀤𑀓𑁆𑀔𑁂𑀦, 𑀦𑀬𑀲𑀸𑀕𑀭𑀲𑀸𑀲𑀦𑁂.

𑀏𑀯𑀫𑀬𑀁 𑀪𑀯𑁂𑀲𑀤𑁆𑀤𑁄 𑀧𑀜𑁆𑀘𑀲𑀼 𑀙𑀲𑀼 𑀯𑀸 𑀓𑁆𑀭𑀺𑀬𑀸𑀧𑀤𑀢𑁆𑀣𑁂𑀲𑀼 𑀧𑀯𑀢𑁆𑀢𑀢𑀺. 𑀢𑀣𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀬𑀦𑁆𑀢𑀦𑀸𑀫𑀺𑀓𑀧𑀤𑀲𑁆𑀲 𑀯𑀼𑀤𑁆𑀥𑀺𑀲𑀁𑀲𑀸𑀭𑀓𑀫𑁆𑀫𑀪𑀯𑀽𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁂𑀲𑀼 𑀅𑀢𑁆𑀣𑁂𑀲𑀼𑀧𑀺. 𑀢𑀣𑀸 𑀳𑀺 ‘‘𑀅𑀪𑀯𑁂 𑀦𑀦𑁆𑀤𑀢𑀺 𑀢𑀲𑁆𑀲, 𑀪𑀯𑁂 𑀢𑀲𑁆𑀲 𑀦 𑀦𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀤𑁆𑀥𑀺𑀫𑁆𑀳𑀺. ‘‘𑀪𑀯𑁂 𑀯𑀺𑀘𑀭𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀲𑀁𑀲𑀸𑀭𑁂. ‘‘𑀪𑀯𑁂 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀻𑀲𑀼 𑀓𑀫𑁆𑀫𑀪𑀯𑁂. ‘‘𑀏𑀯𑀁 𑀪𑀯𑁂𑀯𑀺𑀚𑁆𑀚𑀫𑀸𑀦𑁂’’𑀢𑀺𑀆𑀤𑀻𑀲𑀼 𑀉𑀧𑀧𑀢𑁆𑀢𑀺𑀪𑀯𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀪𑀽𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀸𑀦𑀁 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑁂𑀲𑀁 𑀓𑁆𑀭𑀺𑀬𑀸𑀧𑀤𑀸𑀦𑀁 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑁄 𑀉𑀤𑁆𑀥𑀭𑀺𑀢𑀩𑁆𑀩𑁄.

𑀆𑀔𑁆𑀬𑀸𑀢𑀢𑁆𑀣𑀫𑁆𑀳𑀺𑀫𑁂 ¶ 𑀅𑀢𑁆𑀣𑀸, 𑀦 𑀮𑀸𑀢𑀩𑁆𑀩𑀸 𑀓𑀼𑀤𑀸𑀘𑀦𑀁;

𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦𑁂𑀢𑁂, 𑀉𑀤𑁆𑀥𑀝𑀸 𑀦𑀸𑀫𑀢𑁄 𑀬𑀢𑁄.

𑀇𑀤𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑀦𑀺𑀤𑀲𑁆𑀲𑀦𑀁.

𑀅𑀢𑁆𑀣𑀲𑀤𑁆𑀤𑀘𑀺𑀦𑁆𑀢𑀸𑀬𑀁 𑀧𑀦 𑀏𑀯𑀫𑀼𑀧𑀮𑀓𑁆𑀔𑁂𑀢𑀩𑁆𑀩𑀁 𑁋 ‘‘𑀪𑀯𑀦𑁆𑀢𑁂, 𑀧𑀭𑀸𑀪𑀯𑀦𑁆𑀢𑁂, 𑀧𑀭𑀸𑀪𑀯𑁂’’𑀇𑀘𑁆𑀘𑀸𑀤𑀬𑁄 𑀕𑀘𑁆𑀙𑀢𑀺 𑀕𑀘𑁆𑀙𑀁 𑀕𑀘𑁆𑀙𑀢𑁄𑀲𑀤𑁆𑀤𑀸𑀤𑀬𑁄 𑀯𑀺𑀬 𑀯𑀺𑀲𑁂𑀲𑀲𑀤𑁆𑀤𑀸, 𑀦 𑀬𑀸𑀘𑀦𑁄𑀧𑀢𑀸𑀧𑀦𑀢𑁆𑀣𑀸𑀤𑀺𑀯𑀸𑀘𑀓𑁄 𑀦𑀸𑀣𑀢𑀺𑀲𑀤𑁆𑀤𑁄 𑀯𑀺𑀬, 𑀦 𑀘 𑀭𑀸𑀚𑀤𑁂𑀯𑀢𑀸𑀤𑀺𑀯𑀸𑀘𑀓𑁄 𑀤𑁂𑀯𑀲𑀤𑁆𑀤𑁄 𑀯𑀺𑀬 𑀲𑀸𑀫𑀜𑁆𑀜𑀲𑀤𑁆𑀤𑀸. 𑀬𑁂 𑀘𑁂𑀢𑁆𑀣 𑀯𑀺𑀲𑁂𑀲𑀲𑀤𑁆𑀤𑀸, 𑀢𑁂 𑀲𑀩𑁆𑀩𑀓𑀸𑀮𑀁 𑀯𑀺𑀲𑁂𑀲𑀲𑀤𑁆𑀤𑀸𑀯. 𑀬𑁂 𑀘 𑀲𑀸𑀫𑀜𑁆𑀜𑀲𑀤𑁆𑀤𑀸, 𑀢𑁂𑀧𑀺 𑀲𑀩𑁆𑀩𑀓𑀸𑀮𑀁 𑀲𑀸𑀫𑀜𑁆𑀜𑀲𑀤𑁆𑀤𑀸𑀯.

𑀢𑀢𑁆𑀭 𑀕𑀘𑁆𑀙𑀢𑀻𑀢𑀺𑀆𑀤𑀻𑀦𑀁 𑀯𑀺𑀲𑁂𑀲𑀲𑀤𑁆𑀤𑀢𑀸 𑀏𑀯𑀁 𑀤𑀝𑁆𑀞𑀩𑁆𑀩𑀸 𑁋 𑀕𑀘𑁆𑀙𑀢𑀻𑀢𑀺 𑀏𑀓𑀁 𑀦𑀸𑀫𑀧𑀤𑀁, 𑀏𑀓𑀫𑀸𑀔𑁆𑀬𑀸𑀢𑀁. 𑀢𑀣𑀸 𑀕𑀘𑁆𑀙𑀦𑁆𑀢𑀺 𑀏𑀓𑀁 𑀦𑀸𑀫𑀧𑀤𑀁, 𑀏𑀓𑀫𑀸𑀔𑁆𑀬𑀸𑀢𑀁. 𑀕𑀘𑁆𑀙𑀢𑁄𑀢𑀺 𑀏𑀓𑁄 𑀓𑀺𑀢𑀦𑁆𑀢𑁄, 𑀅𑀧𑀭𑁄 𑀭𑀽𑀴𑁆𑀳𑀻𑀲𑀤𑁆𑀤𑁄. 𑀲𑀢𑀺𑀧𑀺 𑀯𑀺𑀲𑁂𑀲𑀲𑀤𑁆𑀤𑀢𑁆𑀢𑁂 𑀲𑀤𑀺𑀲𑀢𑁆𑀢𑀸 𑀲𑀼𑀢𑀺𑀲𑀸𑀫𑀜𑁆𑀜𑀢𑁄 𑀢𑀩𑁆𑀩𑀺𑀲𑀬𑀁 𑀩𑀼𑀤𑁆𑀥𑀺𑀁 𑀦𑀼𑀧𑁆𑀧𑀸𑀤𑁂𑀢𑀺 𑀯𑀺𑀦𑀸𑀯’𑀢𑁆𑀣𑀧𑁆𑀧𑀓𑀭𑀡𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑁂𑀦. 𑀢𑀣𑀸 𑀳𑀺 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑁂𑀦 ‘‘𑀕𑀘𑁆𑀙𑀢𑀺 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀢𑁆𑀢𑀫𑁆𑀬𑀦𑁆𑀢𑀁 𑀦𑀸𑀫𑀧𑀤𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀘𑁆𑀙𑀢𑀺 𑀢𑀺𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 𑀧𑀦𑀸𑀔𑁆𑀬𑀸𑀢𑀦𑁆𑀢𑀺. 𑀢𑀣𑀸 ‘‘𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀞𑀫𑀦𑁆𑀢𑀁 𑀦𑀸𑀫𑀧𑀤𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀘𑁆𑀙𑀁 𑀧𑀼𑀢𑁆𑀢𑀦𑀺𑀯𑁂𑀤𑀓𑁄’’𑀢𑀺 𑀯𑀼𑀢𑁆𑀢𑁂 𑀆𑀔𑁆𑀬𑀸𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀘𑁆𑀙𑀢𑁄 𑀳𑀬𑀢𑁄 𑀧𑀢𑀺𑀢𑁄’’𑀢𑀺 𑀯𑀼𑀢𑁆𑀢𑁂 𑀓𑀺𑀢𑀦𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀘𑁆𑀙𑀢𑁄 𑀧𑀡𑁆𑀡𑀧𑀼𑀧𑁆𑀨𑀸𑀦𑀺 𑀧𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀭𑀼𑀓𑁆𑀔𑀯𑀸𑀘𑀓𑁄 𑀭𑀽𑀴𑁆𑀳𑀻𑀲𑀤𑁆𑀤𑁄𑀢𑀺. 𑀇𑀢𑀺 𑀯𑀺𑀲𑁂𑀲𑀲𑀤𑁆𑀤𑀸𑀦𑀁 𑀆𑀔𑁆𑀬𑀸𑀢𑀦𑀸𑀫𑀸𑀦𑀁 𑀦𑀸𑀫𑀸𑀔𑁆𑀬𑀸𑀢𑁂𑀳𑀺 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀢𑁆𑀣𑀸𑀪𑀺𑀲𑀫𑁆𑀩𑀦𑁆𑀥𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀅𑀢𑁆𑀣𑀯𑀺𑀲𑁂𑀲𑀜𑀸𑀧𑀓𑁄 𑀲𑀫𑁆𑀩𑀦𑁆𑀥𑁄 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑁄. 𑀏𑀯𑀁 ‘‘𑀕𑀘𑁆𑀙𑀢𑀻’’𑀢𑀺𑀆𑀤𑀻𑀦𑀁 𑀆𑀔𑁆𑀬𑀸𑀢𑀦𑀸𑀫𑀢𑁆𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑁂𑀓𑀁 𑀞𑀺𑀢𑀸𑀦𑀁 𑀏𑀓𑁂𑀓𑀢𑁆𑀣𑀯𑀸𑀘𑀓𑀸𑀦𑀁 𑀯𑀺𑀲𑁂𑀲𑀲𑀤𑁆𑀤𑀢𑀸 𑀤𑀝𑁆𑀞𑀩𑁆𑀩𑀸.

‘‘𑀦𑀸𑀣𑀢𑀺 ¶ 𑀤𑁂𑀯𑁄’’𑀢𑀺𑀆𑀤𑀻𑀦𑀁 𑀧𑀦 𑀆𑀔𑁆𑀬𑀸𑀢𑀦𑀸𑀫𑀸𑀦𑀁 𑀦𑀸𑀫𑀸𑀔𑁆𑀬𑀸𑀢𑁂𑀳𑀺 𑀅𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀦𑁂𑀓𑀢𑁆𑀣𑀯𑀸𑀘𑀓𑀸𑀦𑀁 𑀲𑀸𑀫𑀜𑁆𑀜𑀲𑀤𑁆𑀤𑀢𑀸 𑀏𑀯 𑀤𑀝𑁆𑀞𑀩𑁆𑀩𑀸. 𑀅𑀢𑁆𑀣𑀲𑀫𑁆𑀩𑀦𑁆𑀥𑀸𑀤𑀻𑀲𑀼 𑀳𑀺 𑀯𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀲𑀫𑁆𑀩𑀦𑁆𑀥𑁂𑀦 ‘‘𑀦𑀸𑀣𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀬𑀸𑀘𑀢𑀻’’𑀢𑀺 𑀯𑀸 ‘‘𑀉𑀧𑀢𑀸𑀧𑁂𑀢𑀻’’𑀢𑀺 𑀯𑀸 ‘‘𑀇𑀲𑁆𑀲𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀯𑀸 ‘‘𑀆𑀲𑀻𑀲𑀢𑀻’’𑀢𑀺 𑀯𑀸 𑀅𑀢𑁆𑀣𑁄 𑀧𑀝𑀺𑀪𑀸𑀢𑀺, 𑀢𑀣𑀸 ‘‘𑀤𑁂𑀯𑁄’’𑀢𑀺 𑀯𑀼𑀢𑁆𑀢𑁂 ‘‘𑀫𑁂𑀖𑁄’’𑀢𑀺 𑀯𑀸 ‘‘𑀆𑀓𑀸𑀲𑁄’’𑀢𑀺 𑀯𑀸 ‘‘𑀭𑀸𑀚𑀸’’𑀢𑀺 𑀯𑀸 ‘‘𑀤𑁂𑀯𑀢𑀸’’𑀢𑀺 𑀯𑀸 ‘‘𑀯𑀺𑀲𑀼𑀤𑁆𑀥𑀺𑀤𑁂𑀯𑁄’’𑀢𑀺 𑀯𑀸 𑀅𑀢𑁆𑀣𑁄 𑀧𑀝𑀺𑀪𑀸𑀢𑀺. 𑀬𑀤𑀸 𑀧𑀦 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑁂𑀦 ‘‘𑀦𑀸𑀣𑀢𑀺 𑀲𑀼𑀧𑁆𑀧𑀝𑀺𑀧𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀸 ‘‘𑀦𑀸𑀣𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀲𑁆𑀲 ‘‘𑀬𑀸𑀘𑀢𑀻’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, ‘‘𑀦𑀸𑀣𑀢𑀺 𑀲𑀩𑁆𑀩𑀓𑀺𑀮𑁂𑀲𑁂’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀢𑀸𑀧𑁂𑀢𑀻’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀦𑀸𑀣𑀢𑀺 𑀲𑀓𑀘𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀇𑀲𑁆𑀲𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀦𑀸𑀣𑀢𑀺 𑀮𑁄𑀓𑀲𑁆𑀲 𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀲𑀻𑀲𑀢𑀻’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 ‘‘𑀤𑁂𑀯𑁄 𑀕𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯𑁄’’𑀢𑀺 𑀦𑀸𑀫𑀧𑀤𑀲𑁆𑀲 ‘‘𑀫𑁂𑀖𑁄’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀯𑀺𑀤𑁆𑀥𑁄 𑀯𑀺𑀕𑀢𑀯𑀮𑀸𑀳𑀓𑁄 𑀤𑁂𑀯𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀓𑀸𑀲𑁄’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀧𑀺𑀯𑀢𑀼 𑀤𑁂𑀯𑁄 𑀧𑀸𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀤𑁂𑀯𑁄 𑀤𑁂𑀯𑀓𑀸𑀬𑀸 𑀘𑀯𑀢𑀺 𑀆𑀬𑀼𑀲𑀗𑁆𑀔𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯𑀢𑀸’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀤𑁂𑀯𑀸𑀢𑀺𑀤𑁂𑀯𑁄 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁂 ‘‘𑀯𑀺𑀲𑀼𑀤𑁆𑀥𑀺𑀤𑁂𑀯𑁄’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀧𑀺 𑀲𑀸𑀫𑀜𑁆𑀜𑀲𑀤𑁆𑀤𑀸 𑀜𑀸𑀢𑀩𑁆𑀩𑀸.

𑀲𑀩𑁆𑀩𑀫𑁂𑀢𑀁 𑀜𑀢𑁆𑀯𑀸 𑀬𑀣𑀸 𑀅𑀢𑁆𑀣𑁄 𑀲𑀤𑁆𑀤𑁂𑀦, 𑀲𑀤𑁆𑀤𑁄 𑀘𑀢𑁆𑀣𑁂𑀦 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸𑀢𑁆𑀣𑀲𑀤𑁆𑀤𑀸 𑀘𑀺𑀦𑁆𑀢𑀦𑀻𑀬𑀸. 𑀢𑀢𑁆𑀭𑀺𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀘𑀺𑀦𑁆𑀢𑀸𑀓𑀸𑀭𑀦𑀺𑀤𑀲𑁆𑀲𑀦𑀁 𑁋 ‘‘𑀅𑀢𑁆𑀣𑀓𑀼𑀲𑀮𑀸 𑀪𑀯𑀦𑁆𑀢𑁂’’𑀢𑀺 𑀯𑀸 ‘‘𑀓𑀺𑀘𑁆𑀘𑀸𑀦𑀺 𑀪𑀯𑀦𑁆𑀢𑁂’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀪𑀯𑀦𑁆𑀢𑁂’’𑀢𑀺 𑀇𑀤𑀁 ‘‘𑀪𑀯𑀦𑁆𑀢𑀻’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀪𑀯𑀦𑁆𑀢𑁂 𑀧𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀇𑀘𑁆𑀙𑀸𑀫𑀻’’𑀢𑀺 𑀯𑀸 𑀯𑀼𑀢𑁆𑀢𑁂 𑀉𑀧𑀬𑁄𑀕𑀢𑁆𑀣𑀯𑀁 ¶ 𑀦𑀸𑀫𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀪𑀯𑀦𑁆𑀢𑁂 𑀚𑀦𑁂 𑀧𑀲𑀁𑀲𑀢𑀻’’𑀢𑀺 𑀯𑀸 ‘‘𑀓𑀸𑀫𑁂𑀢𑀻’’𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀢𑁆𑀣𑀯𑀦𑁆𑀢𑀸𑀦𑀺 𑀤𑁆𑀯𑁂 𑀦𑀸𑀫𑀧𑀤𑀸𑀦𑀻𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀘𑁄𑀭𑀸 𑀧𑀭𑀸𑀪𑀯𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀭𑀸𑀪𑀯𑀦𑁆𑀢𑁂’’𑀢𑀺 𑀇𑀤𑀁 ‘‘𑀧𑀭𑀸𑀪𑀯𑀦𑁆𑀢𑀻’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀫𑀸𑀔𑁆𑀬𑀸𑀢𑀺𑀓𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀧𑀭𑀸𑀪𑀯𑀦𑁆𑀢𑁂 𑀚𑀦𑀸 𑀇𑀘𑁆𑀙𑀦𑁆𑀢𑀺 𑀅𑀫𑀺𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀧𑀭𑀸𑀪𑀯𑀦𑁆𑀢𑁂’’𑀢𑀺 𑀇𑀫𑀸𑀦𑀺 𑀉𑀧𑀬𑁄𑀕𑀧𑀘𑁆𑀘𑀢𑁆𑀢𑀢𑁆𑀣𑀯𑀦𑁆𑀢𑀸𑀦𑀺 𑀤𑁆𑀯𑁂 𑀦𑀸𑀫𑀧𑀤𑀸𑀦𑀻𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀏𑀲𑁄 𑀧𑀭𑀸𑀪𑀯𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀭𑀸𑀪𑀯𑁂’’𑀢𑀺 𑀇𑀤𑀁 ‘‘𑀧𑀭𑀸𑀪𑀯𑁂𑀬𑁆𑀬𑀸’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀏𑀢𑁂 𑀧𑀭𑀸𑀪𑀯𑁂 𑀮𑁄𑀓𑁂, 𑀧𑀡𑁆𑀟𑀺𑀢𑁄 𑀲𑀫𑀯𑁂𑀓𑁆𑀔𑀺𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀭𑀸𑀪𑀯𑁂’’𑀢𑀺 𑀇𑀤𑀁 𑀉𑀧𑀬𑁄𑀕𑀢𑁆𑀣𑀯𑀁 𑀩𑀳𑀼𑀯𑀘𑀦𑀁 𑀦𑀸𑀫𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀧𑀭𑀸𑀪𑀯𑁂 𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀪𑀸𑀯𑀮𑀓𑁆𑀔𑀡𑀪𑀼𑀫𑁆𑀫𑀢𑁆𑀣𑁂𑀓𑀯𑀘𑀦𑀓𑀁 𑀦𑀸𑀫𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀢𑀼𑀫𑁆𑀳𑁂 𑀫𑁂 𑀧𑀲𑀸𑀤𑀸 𑀲𑀫𑁆𑀪𑀯𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀫𑁆𑀪𑀯𑁂’’𑀢𑀺 𑀇𑀤𑀁 ‘‘𑀲𑀫𑁆𑀪𑀯𑀣𑀸’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀏𑀳𑀺 𑀢𑁆𑀯𑀁 𑀲𑀫𑁆𑀪𑀯𑀯𑁆𑀳𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀫𑁆𑀪𑀯𑀯𑁆𑀳𑁂’’𑀢𑀺 𑀇𑀤𑀁 𑀲𑀫𑁆𑀪𑀯𑀸𑀬 𑀦𑀸𑀫 𑀇𑀢𑁆𑀣𑀺𑀬𑀸 𑀯𑀸𑀘𑀓𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀲𑀸𑀮𑀧𑀦𑀁 𑀦𑀸𑀫𑀺𑀓𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀏𑀳𑀺 𑀢𑁆𑀯𑀁 𑀲𑀫𑁆𑀪𑀯𑀯𑁆𑀳𑁂𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀫𑁆𑀪𑀯𑀦𑀸𑀫𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀸𑀘𑀓𑀁 𑀧𑀼𑀮𑁆𑀮𑀺𑀗𑁆𑀕𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄.

‘‘𑀯𑀭𑀼𑀡𑁄 𑀩𑁆𑀭𑀳𑁆𑀫𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀫𑁆𑀪𑀯𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑁋

𑀳𑀺 𑀧𑀸𑀴𑀺. ‘‘𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀸𑀢𑀼𑀪𑀯𑀦𑁆𑀢𑁂’’𑀢𑀺 𑀇𑀤𑀁 ‘‘𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀲𑀦𑀺𑀧𑀸𑀢𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀧𑀸𑀢𑀼 𑀪𑀯𑀦𑁆𑀢𑁂 𑀚𑀦𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑁂 𑀚𑀦𑁂 𑀪𑀯𑀁 𑀭𑀓𑁆𑀔𑀢𑀽’’𑀢𑀺 𑀅𑀢𑁆𑀣𑀯𑀸𑀘𑀓𑀸𑀦𑀺 𑀆𑀔𑁆𑀬𑀸𑀢𑀓𑀺𑀢𑀦𑁆𑀢𑀲𑀩𑁆𑀩𑀦𑀸𑀫𑀺𑀓𑀧𑀤𑀸𑀦𑀻𑀢𑀺 ¶ 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀧𑀸𑀢𑀼𑀪𑀯𑀲𑁂 𑀢𑁆𑀯𑀁 𑀕𑀼𑀡𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀸𑀢𑀼𑀪𑀯𑀲𑁂’’𑀢𑀺 𑀇𑀤𑀁 ‘‘𑀧𑀸𑀢𑀼𑀪𑀯𑀲𑀻’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀧𑀸𑀢𑀼𑀪𑀯𑀲𑁂 𑀕𑀼𑀡𑁂 𑀬𑁄 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀧𑀸𑀢𑀼𑀪𑀯𑀸𑀳𑀺 𑀅𑀢𑁆𑀢𑀦𑁄 𑀕𑀼𑀡𑀳𑁂𑀢𑀼 𑀢𑁆𑀯’’𑀦𑁆𑀢𑀺 𑀅𑀢𑁆𑀣𑀯𑀸𑀘𑀓𑀸𑀦𑀺𑀦𑀺𑀧𑀸𑀢𑀬𑀼𑀢𑁆𑀢𑀸𑀔𑁆𑀬𑀸𑀢𑀦𑀸𑀫𑀧𑀤𑀸𑀦𑀻𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀅𑀳𑀫𑀢𑁆𑀢𑀦𑁄 𑀕𑀼𑀡𑁂𑀳𑀺 𑀧𑀸𑀢𑀼𑀪𑀯𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀸𑀢𑀼𑀪𑀯𑁂’’𑀢𑀺 𑀇𑀤𑀁 ‘‘𑀧𑀸𑀢𑀼𑀪𑀯𑀸𑀫𑀻’’𑀢𑀺𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀲𑀦𑀺𑀧𑀸𑀢𑀫𑀸𑀔𑁆𑀬𑀸𑀢𑀧𑀤𑀦𑁆𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. ‘‘𑀫𑀁 𑀧𑀸𑀢𑀼 𑀪𑀯𑁂 𑀇𑀤𑀁 𑀧𑀼𑀜𑁆𑀜𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀁 𑀭𑀓𑁆𑀔𑀢𑀼 𑀲𑀁𑀲𑀸𑀭𑁂 𑀇𑀤𑀁 𑀧𑀼𑀜𑁆𑀜𑀓𑀫𑁆𑀫’’𑀦𑁆𑀢𑀺 𑀅𑀢𑁆𑀣𑀯𑀸𑀘𑀓𑀸𑀦𑀺 𑀆𑀔𑁆𑀬𑀸𑀢𑀦𑀸𑀫𑀧𑀤𑀸𑀦𑀻𑀢𑀺 𑀏𑀯𑀫𑀢𑁆𑀣𑁄 𑀘 𑀲𑀤𑁆𑀤𑁄 𑀘 𑀘𑀺𑀦𑁆𑀢𑀦𑀻𑀬𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀫𑀢𑁆𑀣𑀲𑀤𑁆𑀤𑀸 𑀘𑀺𑀦𑁆𑀢𑀦𑀻𑀬𑀸. 𑀢𑀢𑁆𑀣 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁 ‘‘𑀦 𑀢𑁂𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺. 𑀦 𑀢𑁂𑀲𑀁 𑀅𑀦𑁆𑀢𑀭𑀸 𑀕𑀘𑁆𑀙𑁂. 𑀲𑀢𑁆𑀢 𑀯𑁄 𑀮𑀺𑀘𑁆𑀙𑀯𑀻 𑀅𑀧𑀭𑀺𑀳𑀸𑀦𑀻𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀇𑀫𑁂 𑀢𑁂 𑀤𑁂𑀯 𑀲𑀢𑁆𑀢𑀯𑁄, 𑀢𑁆𑀯𑀜𑁆𑀘 𑀉𑀢𑁆𑀢𑀫𑀲𑀢𑁆𑀢𑀯𑁄’’𑀢𑀺𑀆𑀤𑀻𑀲𑀼 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀯𑀺𑀬 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀇𑀘𑁆𑀙𑀦𑀻𑀬𑁄. 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑁂 𑀳𑀺 𑀲𑀢𑀺 𑀧𑀤𑀸𑀦𑀺 𑀧𑀭𑀺𑀩𑁆𑀬𑀢𑁆𑀢𑀸𑀦𑀺, 𑀧𑀤𑁂𑀲𑀼 𑀧𑀭𑀺𑀩𑁆𑀬𑀢𑁆𑀢𑁂𑀲𑀼 𑀅𑀢𑁆𑀣𑁄 𑀧𑀭𑀺𑀩𑁆𑀬𑀢𑁆𑀢𑁄 𑀳𑁄𑀢𑀺, 𑀅𑀢𑁆𑀣𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀅𑀢𑁆𑀣𑀸𑀥𑀺𑀕𑀫𑁄 𑀅𑀓𑀺𑀘𑁆𑀙𑁄 𑀳𑁄𑀢𑀺, 𑀲𑀼𑀧𑀭𑀺𑀲𑀼𑀤𑁆𑀥𑀸𑀤𑀸𑀲𑀢𑀮𑁂 𑀧𑀝𑀺𑀩𑀺𑀫𑁆𑀩𑀤𑀲𑁆𑀲𑀦𑀁 𑀯𑀺𑀬, 𑀲𑁄 𑀘 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑀲𑁆𑀲 𑀅𑀢𑁆𑀣𑀲𑀫𑁆𑀩𑀦𑁆𑀥𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀜𑀸𑀢𑁂𑀬𑁂𑀯 𑀳𑁄𑀢𑀺, 𑀦 𑀇𑀢𑀭𑀣𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀯𑀺𑀲𑀬𑀢𑁆𑀢𑀫𑀦𑀸𑀧𑀦𑁆𑀦𑀸, 𑀲𑀤𑁆𑀤𑀸 𑀦𑁂𑀯𑀢𑁆𑀣𑀩𑁄𑀥𑀓𑀸;

𑀦 𑀧𑀤𑀫𑀢𑁆𑀢𑀢𑁄 𑀅𑀢𑁆𑀣𑁂, 𑀢𑁂 𑀅𑀜𑁆𑀜𑀸𑀢𑀸 𑀧𑀓𑀸𑀲𑀓𑀸’’𑀢𑀺.

𑀬𑀤𑀺𑀤𑀫𑁂𑀢𑁆𑀣 𑀯𑀼𑀢𑁆𑀢𑀫𑀫𑁆𑀳𑁂𑀳𑀺 ‘‘𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀇𑀘𑁆𑀙𑀦𑀻𑀬𑁄’’𑀢𑀺. 𑀅𑀢𑁆𑀭𑀸𑀬𑀫𑀼𑀘𑁆𑀘𑀸𑀭𑀡𑀯𑀺𑀲𑁂𑀲𑀤𑀻𑀧𑀦𑀻 𑀕𑀸𑀣𑀸 𑀲𑀳𑀢𑁆𑀣𑀧𑁆𑀧𑀓𑀸𑀲𑀦𑀦𑀬𑀤𑀸𑀦𑀕𑀸𑀣𑀸𑀬.

‘‘𑀦 ¶ 𑀢𑁂 𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺’’, 𑀇𑀢𑀺 𑀧𑀸𑀞𑁂 𑀲𑀼𑀫𑁂𑀥𑀲𑁄;

𑀧𑀤𑀁 ‘‘𑀦 𑀢𑁂’’𑀢𑀺 𑀙𑀺𑀦𑁆𑀤𑀺𑀢𑁆𑀯𑀸, ‘‘𑀲𑀁 𑀓𑁄𑀝𑁆𑀞𑁂’’𑀢𑀺 𑀧𑀞𑁂𑀬𑁆𑀬 𑀯𑁂.

‘‘𑀲𑀁 𑀦 𑀑𑀧𑁂𑀦𑁆𑀢𑀺 𑀓𑁄𑀝𑁆𑀞𑁂 𑀢𑁂, 𑀪𑀺𑀓𑁆𑀔𑀽’’𑀢𑀺 𑀅𑀢𑁆𑀣𑀫𑀻𑀭𑀬𑁂;

𑀏𑀯𑀫𑀺𑀫𑁂𑀲𑀼 𑀅𑀜𑁆𑀜𑁂𑀲𑀼, 𑀧𑀸𑀞𑁂𑀲𑀼𑀧𑀺 𑀅𑀬𑀁 𑀦𑀬𑁄.

𑀅𑀣 𑀬𑀁 𑀧𑀦𑀺𑀤𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀓𑁂𑀲𑀜𑁆𑀘𑀻’’𑀢𑀺, 𑀢𑀁 𑀓𑀺𑀫𑀢𑁆𑀣𑀁? ‘‘𑀕𑀘𑁆𑀙𑀢𑀺 𑀧𑀢𑀺𑀝𑁆𑀞𑀺𑀢𑀁, 𑀕𑀘𑁆𑀙𑀢𑀺 𑀢𑀺𑀲𑁆𑀲𑁄, 𑀪𑀯𑀦𑁆𑀢𑁂 𑀧𑀲𑁆𑀲𑀸𑀫𑀺, 𑀅𑀢𑁆𑀣𑀓𑀼𑀲𑀮𑀸 𑀪𑀯𑀦𑁆𑀢𑁂, 𑀯𑀤𑀦𑁆𑀢𑀁 𑀏𑀓𑀧𑁄𑀓𑁆𑀔𑀭𑀸, 𑀯𑀤𑀦𑁆𑀢𑀁 𑀧𑀝𑀺𑀯𑀤𑀢𑀻’’𑀢𑀺𑀆𑀤𑀻𑀲𑀼 𑀲𑀫𑀸𑀦𑀲𑀼𑀢𑀺𑀓𑀸𑀦𑀫𑀼𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀦 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑀲𑁆𑀫𑀸 𑀇𑀤𑀫𑁂𑀢𑁆𑀣 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋 𑀬𑀢𑁆𑀣 𑀲𑀫𑀸𑀦𑀲𑀼𑀢𑀺𑀓𑀸𑀦𑀫𑀼𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀮𑀩𑁆𑀪𑀢𑀺 𑀅𑀢𑁆𑀣𑀯𑀺𑀲𑁂𑀲𑁄 𑀘 𑀧𑀤𑀸𑀦𑀁 𑀯𑀺𑀪𑀸𑀕𑀯𑀲𑁂𑀦 𑀯𑀸 𑀅𑀯𑀺𑀪𑀸𑀕𑀯𑀲𑁂𑀦 𑀯𑀸, 𑀢𑀢𑁆𑀣 𑀧𑀬𑁄𑀕𑁂 𑀲𑀫𑀸𑀦𑀲𑀼𑀢𑀺𑀓𑀫𑁂𑀓𑀘𑁆𑀘𑀁 𑀧𑀤𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁? ‘‘𑀳𑁂𑀢𑀼 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀪𑀸𑀲𑀢𑀺, 𑀲𑁄𑀢𑁂𑀦 𑀯𑀼𑀬𑁆𑀳𑀢𑀺. 𑀪𑀯𑀦𑁆𑀢𑁂 𑀚𑀦𑁂 𑀧𑀲𑀁𑀲𑀢𑀺, 𑀪𑀯𑀦𑁆𑀢𑁂 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀏𑀢𑁆𑀣 ‘‘𑀳𑁂𑀢𑀽’’𑀢𑀺 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀢𑀣𑀸 ‘‘𑀲𑁄’’𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. ‘‘𑀪𑀯’’𑀦𑁆𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑁂 𑀚𑀦𑁂’’𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁.

𑀲𑁂𑀲𑀁 𑀧𑀦 𑀲𑀫𑀸𑀦𑀲𑀼𑀢𑀺𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀅𑀯𑀺𑀘𑁆𑀙𑀺𑀦𑁆𑀤𑀦𑀻𑀬𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀞𑀺𑀢𑀲𑁆𑀲 𑀅𑀢𑁆𑀣𑁄 𑀤𑀼𑀝𑁆𑀞𑁄 𑀳𑁄𑀢𑀺. 𑀏𑀯𑀁 𑀧𑀤𑀯𑀺𑀪𑀸𑀕𑀸𑀯𑀺𑀪𑀸𑀕𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀫𑀢𑁆𑀣𑀼𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀲𑁄 𑀢𑁂𑀦𑀸’’𑀢𑀺𑀆𑀤𑀻𑀲𑀼 𑀤𑁆𑀯𑀺𑀧𑀤𑀢𑁆𑀣𑀕𑁆𑀕𑀳𑀡𑀁 𑀯𑀺𑀪𑀸𑀕𑁄, 𑀏𑀓𑀧𑀤𑀢𑁆𑀣𑀕𑁆𑀕𑀳𑀡𑀫𑀯𑀺𑀪𑀸𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀏𑀢𑁆𑀣 𑀘 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀸𑀦𑀁 𑀅𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑀸𑀦𑀲𑀼𑀢𑀺𑀓𑀪𑀸𑀯𑀧𑀭𑀺𑀓𑀧𑁆𑀧𑀦𑀁 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀜𑁆𑀘𑁂𑀯 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀜𑁆𑀘. 𑀦 𑀳𑀺 𑀏𑀢𑀸𑀦𑀺 ¶ ‘‘𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀏𑀓𑀲𑁆𑀫𑀺𑀁𑀬𑁂𑀯𑀢𑁆𑀣𑁂 𑀲𑀫𑀸𑀦𑀲𑀼𑀢𑀺𑀓𑀸𑀦𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀏𑀓𑀚𑁆𑀛𑀓𑀭𑀡𑁂𑀦 𑀮𑀤𑁆𑀥𑀁 𑀲𑀫𑀸𑀦𑀲𑀼𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀲𑀫𑀸𑀦𑀲𑀼𑀢𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼. 𑀇𑀤𑀫𑁂𑀢𑁆𑀣 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋

𑀬𑀢𑁆𑀣 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀝𑁆𑀞𑀸𑀭𑀲𑀸𑀓𑀸𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀢𑁆𑀣𑀯𑀺𑀲𑁂𑀲𑁄 𑀮𑀩𑁆𑀪𑀢𑀺, 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀦 𑀉𑀘𑁆𑀘𑀸𑀭𑀡𑁂 𑀲𑀤𑁆𑀤𑀯𑀺𑀮𑀸𑀲𑁄 𑀦 𑀳𑁄𑀢𑀺, 𑀅𑀢𑁆𑀣𑁄 𑀯𑀸 𑀤𑀼𑀝𑁆𑀞𑁄 𑀳𑁄𑀢𑀺, 𑀦 𑀢𑀸𑀤𑀺𑀲𑁂𑀲𑀼 𑀧𑀬𑁄𑀕𑁂𑀲𑀼 𑀲𑀫𑀸𑀦𑀲𑀼𑀢𑀺𑀓𑀸𑀦𑀺 𑀧𑀤𑀸𑀦𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀸𑀦𑀺. 𑀢𑀢𑁆𑀭 𑀓𑀢𑀫𑁂𑀦 𑀘𑀸𑀓𑀸𑀭𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁄 𑀪𑀯𑀢𑀺? 𑀧𑀤𑀸𑀦𑀁 𑀯𑀺𑀪𑀸𑀕𑀯𑀲𑁂𑀦 𑀯𑀸 𑀅𑀯𑀺𑀪𑀸𑀕𑀯𑀲𑁂𑀦 𑀯𑀸 𑀅𑀓𑁆𑀔𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀯𑀸 𑀧𑀤𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀯𑀸 𑀧𑀤𑀓𑁆𑀔𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀯𑀸 𑀯𑀺𑀘𑁆𑀙𑀸𑀯𑀲𑁂𑀦 𑀯𑀸 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀯𑀲𑁂𑀦 𑀯𑀸 𑀪𑀬𑀓𑁄𑀥𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀓𑀣𑀺𑀢𑀸𑀫𑁂𑀟𑀺𑀢𑀯𑀘𑀦𑀯𑀲𑁂𑀦 𑀯𑀸 𑀕𑀼𑀡𑀯𑀸𑀘𑀓𑀲𑀤𑁆𑀤𑀲𑁆𑀲 𑀤𑁆𑀯𑀺𑀭𑀼𑀢𑁆𑀢𑀯𑀲𑁂𑀦 𑀯𑀸 𑀓𑁆𑀭𑀺𑀬𑀸𑀧𑀤𑀲𑁆𑀲 𑀤𑁆𑀯𑀺𑀭𑀼𑀢𑁆𑀢𑀯𑀲𑁂𑀦 𑀯𑀸 𑀲𑀁𑀳𑀺𑀢𑀸𑀧𑀤𑀘𑁆𑀙𑁂𑀤𑀯𑀲𑁂𑀦 𑀯𑀸 𑀅𑀕𑀸𑀭𑀯𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸 𑀦𑀺𑀭𑀦𑁆𑀢𑀭𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸 𑀦𑀦𑀺𑀭𑀦𑁆𑀢𑀭𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸 ‘‘𑀧𑀼𑀦𑀧𑁆𑀧𑀼𑀦’’𑀫𑀺𑀘𑁆𑀘𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸 𑀉𑀧𑀫𑀸𑀦𑁂 𑀇𑀯 𑀲𑀤𑁆𑀤𑀯𑀲𑁂𑀦 𑀯𑀸 𑀇𑀢𑀺𑀲𑀤𑁆𑀤𑀁 𑀧𑀝𑀺𑀘𑁆𑀘 𑀲𑀤𑁆𑀤𑀧𑀤𑀢𑁆𑀣𑀯𑀸𑀘𑀓𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀸𑀢𑀺 𑀇𑀫𑁂𑀲𑀼𑀝𑁆𑀞𑀸𑀭𑀲𑀸𑀓𑀸𑀭𑁂𑀲𑀼, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀙𑀩𑁆𑀩𑀻𑀲𑀸𑀬 𑀆𑀓𑀸𑀭𑁂𑀲𑀼 𑀢𑀢𑁄 𑀯𑀸𑀥𑀺𑀓𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁄 𑀪𑀯𑀢𑀺.

𑀏𑀢𑁆𑀣 𑀧𑀤𑀸𑀦𑀁 𑀢𑀸𑀯 𑀯𑀺𑀪𑀸𑀕𑀯𑀲𑁂𑀦 𑀯𑀸 𑀅𑀯𑀺𑀪𑀸𑀕𑀯𑀲𑁂𑀦 𑀯𑀸 𑀲𑀫𑀸𑀦𑀲𑀼𑀢𑀺𑀓𑀸𑀦𑀫𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀲𑀸 𑀦𑀁 𑀲𑀗𑁆𑀕𑀢𑀺 𑀧𑀸𑀮𑁂𑀢𑀺, 𑀅𑀪𑀺𑀓𑁆𑀓𑀫𑁄 𑀲𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀫𑀸𑀦𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸.

𑀅𑀓𑁆𑀔𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 ¶ 𑀧𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀲𑀦𑁆𑀢𑁂𑀳𑀺 𑀫𑀳𑀺𑀢𑁄 𑀳𑀺𑀢𑁄. 𑀲𑀗𑁆𑀕𑀸 𑀲𑀗𑁆𑀕𑀸𑀫𑀚𑀺𑀁 𑀫𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁. 𑀤𑀸𑀞𑀻 𑀤𑀸𑀞𑀻𑀲𑀼 𑀧𑀓𑁆𑀔𑀦𑁆𑀤𑀺, 𑀫𑀜𑁆𑀜𑀫𑀸𑀦𑁄 𑀬𑀣𑀸 𑀧𑀼𑀭𑁂. 𑀲𑀩𑁆𑀩𑀸𑀪𑀺𑀪𑀼𑀁𑀯 𑀲𑀺𑀭𑀲𑀸𑀲𑀺𑀭𑀲𑀸 𑀦𑀫𑀸𑀫𑀺. 𑀪𑀽𑀫𑀺𑀢𑁄 𑀉𑀝𑁆𑀞𑀺𑀢𑀸 𑀬𑀸𑀯, 𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀥𑀸𑀯𑀢𑀺. 𑀅𑀘𑁆𑀘𑀺 𑀅𑀘𑁆𑀘𑀺𑀫𑀢𑁄 𑀮𑁄𑀓𑁂, 𑀟𑀬𑁆𑀳𑀫𑀸𑀦𑀫𑁆𑀳𑀺 𑀢𑁂𑀚𑀲𑀸’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸.

𑀧𑀤𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀆𑀧𑁄 𑀆𑀧𑁄𑀕𑀢𑀁. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄, 𑀲𑀼𑀔𑁄’𑀮𑁄𑀓𑀲𑁆𑀲 𑀮𑁄𑀓𑀲𑁆𑀲, 𑀓𑀸𑀭𑀓𑁄 𑀜𑀸𑀡𑀘𑀓𑁆𑀔𑀼𑀤𑁄, 𑀦𑀺𑀭𑀸𑀧𑀤𑁂 𑀧𑀤𑁂 𑀦𑀺𑀦𑁆𑀦𑁄, 𑀅𑀦𑀦𑁆𑀢𑀜𑀸𑀡𑀁 𑀓𑀭𑀼𑀡𑀸𑀮𑀬𑀁 𑀮𑀬𑀁, 𑀫𑀮𑀲𑁆𑀲 𑀩𑀼𑀤𑁆𑀥𑀁 𑀲𑀼𑀲𑀫𑀸𑀳𑀺𑀢𑀁 𑀳𑀺𑀢𑀁. 𑀦𑀫𑀸𑀫𑀺 𑀥𑀫𑁆𑀫𑀁 𑀪𑀯𑀲𑀁𑀯𑀭𑀁 𑀯𑀭𑀁, 𑀕𑀼𑀡𑀸𑀓𑀭𑀜𑁆𑀘𑁂𑀯 𑀦𑀺𑀭𑀗𑁆𑀕𑀡𑀁 𑀕𑀡’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸.

𑀧𑀤𑀓𑁆𑀔𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀧𑀫𑀸𑀡𑀭𑀳𑀺𑀢𑀁 𑀳𑀺𑀢𑀁, 𑀲𑀺𑀤𑁆𑀥𑀢𑁆𑀣𑁄 𑀲𑀩𑁆𑀩𑀲𑀺𑀤𑁆𑀥𑀢𑁆𑀣𑁄, 𑀢𑀺𑀮𑁄𑀓𑀫𑀳𑀺𑀢𑁄 𑀳𑀺𑀢𑁄. 𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀻’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀢𑀢𑁆𑀭𑀺𑀫𑀸 𑀅𑀓𑁆𑀔𑀭𑀲𑀦𑁆𑀦𑀺𑀥𑀸𑀦𑀸𑀤𑀻𑀲𑀼 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀺𑀬𑁄 𑀕𑀸𑀣𑀸 𑁋

𑀫𑀳𑀺𑀢𑁄𑀇𑀢𑀺 𑀲𑀤𑁆𑀤𑀫𑁆𑀳𑀸, 𑀫𑀓𑀸𑀭𑁄 𑀘𑁂 𑀯𑀺𑀯𑁂𑀘𑀺𑀢𑁄;

𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑁄 𑀏𑀢𑁆𑀣, ‘‘𑀅𑀓𑁆𑀔𑀭’’𑀦𑁆𑀢𑀺 𑀯𑀤𑁂 𑀩𑀼𑀥𑁄.

𑀜𑁂𑀬𑁆𑀬𑀸 𑀅𑀓𑁆𑀔𑀭𑀬𑁄𑀕𑁂𑀦,

‘‘𑀲𑀦𑁆𑀢𑁂𑀳𑀺 𑀫𑀳𑀺𑀢𑁄 𑀳𑀺𑀢𑁄’’;

𑀇𑀘𑁆𑀘𑀸𑀤𑀻𑀲𑀼 𑀲𑀭𑀽𑀧𑀸𑀦𑀁,

𑀳𑁄𑀢𑀺 𑀅𑀢𑁆𑀣𑀯𑀺𑀲𑁂𑀲𑀢𑀸.

𑀉𑀧𑀲𑀕𑁆𑀕𑀸 𑀦𑀺𑀧𑀸𑀢𑀸 𑀘, 𑀬𑀜𑁆𑀘𑀜𑁆𑀜𑀁 𑀅𑀢𑁆𑀣𑀚𑁄𑀢𑀓𑀁;

𑀏𑀓𑀓𑁆𑀔𑀭𑀫𑁆𑀧𑀺 𑀯𑀺𑀜𑁆𑀜𑀽𑀳𑀺, 𑀢𑀁 ‘‘𑀧𑀤’’𑀦𑁆𑀢𑀺 𑀲𑀫𑀻𑀭𑀺𑀢𑀁.

𑀧𑀤𑀸𑀦𑀁 ¶ 𑀲𑀦𑁆𑀦𑀺𑀥𑀸𑀦𑀜𑁆𑀘, 𑀧𑀤𑀓𑁆𑀔𑀭𑀸𑀦𑀫𑁂𑀯 𑀘;

𑀲𑀫𑀸𑀲𑁂 𑀮𑀩𑁆𑀪𑀫𑀸𑀦𑀢𑁆𑀢𑀁, 𑀲𑀦𑁆𑀥𑀸𑀬 𑀮𑀧𑀺𑀢𑀁 𑀫𑀬𑀸.

𑀯𑀺𑀘𑁆𑀙𑀸𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀕𑀸𑀫𑁂 𑀕𑀸𑀫𑁂 𑀲𑀢𑀁 𑀓𑀼𑀫𑁆𑀪𑀸, 𑀕𑀸𑀫𑁄 𑀕𑀸𑀫𑁄 𑀭𑀫𑀡𑀻𑀬𑁄’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀏𑀢𑁆𑀣 𑀳𑀺 𑀯𑀺𑀘𑁆𑀙𑀸𑀯𑀲𑁂𑀦 𑀲𑀩𑁆𑀩𑁂𑀧𑀺 𑀕𑀸𑀫𑀸 𑀧𑀭𑀺𑀕𑁆𑀕𑀳𑀺𑀢𑀸.

𑀦𑀸𑀦𑀸𑀥𑀺𑀓𑀭𑀡𑀸𑀦𑀁 𑀢𑀼, 𑀯𑀢𑁆𑀢𑀼𑀫𑁂𑀓𑀓𑁆𑀔𑀡𑀫𑁆𑀳𑀺 𑀬𑀸;

𑀇𑀘𑁆𑀙𑀢𑁄 𑀩𑁆𑀬𑀸𑀧𑀺𑀢𑀼𑀁 𑀇𑀘𑁆𑀙𑀸, 𑀲𑀸 𑀯𑀺𑀘𑁆𑀙𑀸𑀢𑀺 𑀧𑀓𑀺𑀢𑁆𑀢𑀺𑀢𑀸.

𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄’’𑀢𑀺 𑀧𑀬𑁄𑀕𑀸, 𑀭𑀼𑀓𑁆𑀔𑀸𑀦𑀁 𑀉𑀧𑀭𑀺 𑀉𑀧𑀭𑀺 𑀯𑀺𑀚𑁆𑀚𑁄𑀢𑀢𑁂𑀢𑀺 𑀅𑀢𑁆𑀣𑁄.

𑀪𑀬𑀓𑁄𑀥𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀓𑀣𑀺𑀢𑀸𑀫𑁂𑀟𑀺𑀢𑀯𑀘𑀦𑀯𑀲𑁂𑀦 𑀧𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 𑀇𑀫𑁂 𑀧𑀬𑁄𑀕𑀸 𑁋 𑀪𑀬𑁂 𑀢𑀸𑀯 ‘‘𑀘𑁄𑀭𑁄 𑀘𑁄𑀭𑁄, 𑀲𑀧𑁆𑀧𑁄 𑀲𑀧𑁆𑀧𑁄’’𑀇𑀘𑁆𑀘𑀸𑀤𑀬𑁄. 𑀓𑁄𑀥𑁂 ‘‘𑀯𑀲𑀮 𑀯𑀲𑀮, 𑀘𑀡𑁆𑀟𑀸𑀮 𑀘𑀡𑁆𑀟𑀸𑀮, 𑀯𑀺𑀚𑁆𑀛 𑀯𑀺𑀚𑁆𑀛, 𑀧𑀳𑀭 𑀧𑀳𑀭’’𑀇𑀘𑁆𑀘𑀸𑀤𑀬𑁄. 𑀧𑀲𑀁𑀲𑀸𑀬𑀁 ‘‘𑀲𑀸𑀥𑀼 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢, 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂’’𑀇𑀘𑁆𑀘𑀸𑀤𑀬𑁄. 𑀢𑀼𑀭𑀺𑀢𑁂 ‘‘𑀅𑀪𑀺𑀓𑁆𑀓𑀫 𑀯𑀸𑀲𑁂𑀝𑁆𑀞 𑀅𑀪𑀺𑀓𑁆𑀓𑀫 𑀯𑀸𑀲𑁂𑀝𑁆𑀞, 𑀕𑀘𑁆𑀙 𑀕𑀘𑁆𑀙, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀺’’𑀇𑀘𑁆𑀘𑀸𑀤𑀬𑁄. 𑀓𑁄𑀢𑀽𑀳𑀮𑁂 ‘‘𑀆𑀕𑀘𑁆𑀙 𑀆𑀕𑀘𑁆𑀙’’𑀇𑀘𑁆𑀘𑀸𑀤𑀬𑁄. 𑀅𑀘𑁆𑀙𑀭𑀺𑀬𑁂 ‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀩𑀼𑀤𑁆𑀥𑁄’’𑀇𑀘𑁆𑀘𑀸𑀤𑀬𑁄. 𑀳𑀸𑀲𑁂 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔𑀁, 𑀅𑀳𑁄 𑀫𑀦𑀸𑀧𑀁 𑀅𑀳𑁄 𑀫𑀦𑀸𑀧𑀁’’𑀇𑀘𑁆𑀘𑀸𑀤𑀬𑁄. 𑀲𑁄𑀓𑁂 ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓 𑀓𑀳𑀁 𑀏𑀓𑀧𑀼𑀢𑁆𑀢𑀓’’𑀇𑀘𑁆𑀘𑀸𑀤𑀬𑁄. 𑀧𑀲𑀸𑀤𑁂 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻 𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻’’𑀇𑀘𑁆𑀘𑀸𑀤𑀬𑁄. 𑀏𑀯𑀁 𑀪𑀬𑀓𑁄𑀥𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀓𑀣𑀺𑀢𑀸𑀫𑁂𑀟𑀺𑀢𑀯𑀘𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁄 𑀪𑀯𑀢𑀺. 𑀏𑀢𑁆𑀣 𑀧𑀦 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑁂𑀧𑀺 𑀤𑀴𑁆𑀳𑀻𑀓𑀫𑁆𑀫𑀯𑀲𑁂𑀦 𑀧𑀤𑀸𑀦𑀫𑀢𑁆𑀣𑀚𑁄𑀢𑀓𑀪𑀸𑀯𑁄𑀬𑁂𑀯 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁄.

𑀪𑀬𑁂 ¶ 𑀓𑁄𑀥𑁂 𑀧𑀲𑀁𑀲𑀸𑀬𑀁,

𑀢𑀼𑀭𑀺𑀢𑁂 𑀓𑁄𑀢𑀽𑀳𑀮’𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘,

𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄.

𑀘𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀕𑀭𑀳𑀸𑀅𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀧𑀸𑀧𑁄 𑀧𑀸𑀧𑁄’’𑀢𑀺𑀆𑀤𑀻𑀲𑀼 𑀳𑀺 𑀕𑀭𑀳𑀸𑀬𑀁. ‘‘𑀅𑀪𑀺𑀭𑀽𑀧𑀓 𑀅𑀪𑀺𑀭𑀽𑀧𑀓𑀸’’𑀢𑀺𑀆𑀤𑀻𑀲𑀼 𑀅𑀲𑀫𑁆𑀫𑀸𑀦𑁂. ‘‘𑀓𑁆𑀯𑀸𑀬𑀁 𑀅𑀩𑀮𑀩𑀮𑁄 𑀯𑀺𑀬𑀸’’𑀢𑀺𑀆𑀤𑀻𑀲𑀼 𑀅𑀢𑀺𑀲𑀬𑀢𑁆𑀣𑁂 𑀆𑀫𑁂𑀟𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀕𑀼𑀡𑀯𑀸𑀘𑀓𑀲𑁆𑀲 𑀤𑁆𑀯𑀺𑀭𑀼𑀢𑁆𑀢𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀓𑀡𑁆𑀳𑁄 𑀓𑀡𑁆𑀳𑁄 𑀘 𑀖𑁄𑀭𑁄 𑀘𑀸’’𑀢𑀺 𑀏𑀯𑀫𑀸𑀤𑀬𑁄. ‘‘𑀓𑀡𑁆𑀳𑁄 𑀓𑀡𑁆𑀳𑁄’’𑀢𑀺 𑀳𑀺 𑀅𑀢𑀻𑀯 𑀓𑀡𑁆𑀳𑁄𑀢𑀺 𑀅𑀢𑁆𑀣𑁄. 𑀓𑁆𑀭𑀺𑀬𑀸𑀧𑀤𑀲𑁆𑀲 𑀤𑁆𑀯𑀺𑀭𑀼𑀢𑁆𑀢𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂’’𑀢𑀺 𑀏𑀯𑀫𑀸𑀤𑀬𑁄. 𑀢𑀢𑁆𑀣 𑀥𑀫𑁂 𑀥𑀫𑁂𑀢𑀺 𑀥𑀫𑁂𑀬𑁆𑀬 𑀦𑁄 𑀦 𑀥𑀫𑁂𑀬𑁆𑀬. 𑀦𑀸𑀢𑀺𑀥𑀫𑁂𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀧𑀦 𑀦 𑀥𑀫𑁂𑀬𑁆𑀬. 𑀲𑀁𑀳𑀺𑀢𑀸𑀧𑀤𑀘𑁆𑀙𑁂𑀤𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀦𑀭𑀸𑀦𑀭𑀸, 𑀲𑀼𑀭𑀸𑀲𑀼𑀭𑀸, 𑀓𑀢𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀅𑀦𑀼𑀲𑁄𑀘𑀦𑀁 𑀓𑀼𑀓𑁆𑀓𑀼𑀘𑁆𑀘’’𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀧𑀦 𑀯𑀺𑀜𑁆𑀜𑀽𑀦𑀁 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀲𑀺𑀮𑁄𑀓𑀁 𑀭𑀘𑀬𑀸𑀫 𑁋

𑀳𑀺𑀢𑀸𑀳𑀺𑀢𑀸 𑀳𑀺𑀢𑀁𑀳𑀺𑀢𑀁, 𑀆𑀦𑀼𑀪𑀸𑀯𑁂𑀦 𑀢𑁂 𑀚𑀺𑀦;

𑀧𑀯𑀭𑀸𑀧𑀯𑀭𑀸𑀳𑀘𑁆𑀘, 𑀪𑀯𑀸𑀫𑀸’𑀦𑀸𑀫𑀬𑀸 𑀫𑀬𑀦𑁆𑀢𑀺.

𑀅𑀕𑀸𑀭𑀯𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀢𑀼𑀯𑀁𑀢𑀼𑀯𑀁 𑀧𑁂𑀲𑀼𑀜𑁆𑀜𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸’’𑀢𑀺 𑀏𑀯𑀫𑀸𑀤𑀬𑁄. 𑀦𑀺𑀭𑀦𑁆𑀢𑀭𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀬𑁄. 𑀦𑀦𑀺𑀭𑀦𑁆𑀢𑀭𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ¶ ‘‘𑀔𑀡𑁂 𑀔𑀡𑁂 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀫𑀸𑀤𑀬𑁄. ‘‘𑀧𑀼𑀦𑀧𑁆𑀧𑀼𑀦’’𑀫𑀺𑀘𑁆𑀘𑀢𑁆𑀣𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀫𑀼𑀳𑀼𑀁 𑀫𑀼𑀳𑀼𑀁 𑀪𑀸𑀬𑀬𑀢𑁂 𑀓𑀼𑀫𑀸𑀭𑁂’’𑀢𑀺 𑀏𑀯𑀫𑀸𑀤𑀬𑁄. 𑀉𑀧𑀫𑀸𑀦𑁂 𑀇𑀯𑀲𑀤𑁆𑀤𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀭𑀸𑀚𑀸 𑀭𑀓𑁆𑀔𑀢𑀼 𑀥𑀫𑁆𑀫𑁂𑀦, 𑀅𑀢𑁆𑀢𑀦𑁄𑀯 𑀧𑀚𑀁 𑀧𑀚’’𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀇𑀢𑀺𑀲𑀤𑁆𑀤𑀁 𑀧𑀝𑀺𑀘𑁆𑀘 𑀲𑀤𑁆𑀤𑀧𑀤𑀢𑁆𑀣𑀯𑀸𑀘𑀓𑀢𑁆𑀢𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀓𑀣𑀬𑀦𑁆𑀢𑁄, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺’’𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀧𑀭𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀮𑀸𑀪𑁂 ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, 𑀫𑀕𑁆𑀕𑀁 𑀲𑁄𑀥𑁂𑀫𑀳𑀁 𑀢𑀤𑀸’’𑀢𑀺 𑀏𑀯𑀫𑀸𑀤𑀬𑁄. 𑀏𑀯𑀁 𑀈𑀤𑀺𑀲𑁂𑀲𑀼 𑀧𑀬𑁄𑀕𑁂𑀲𑀼 𑀲𑀫𑀸𑀦𑀲𑀼𑀢𑀺𑀓𑀧𑀤𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀺 𑀉𑀘𑁆𑀘𑀸𑀭𑀡𑁂 𑀲𑀢𑀺 𑀲𑀤𑁆𑀤𑀯𑀺𑀮𑀸𑀲𑁄 𑀦 𑀪𑀯𑀢𑀺, 𑀓𑀢𑁆𑀣𑀘𑀺 𑀧𑀦 ‘‘𑀓𑀢𑀸𑀓𑀢𑀸𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑀺𑀢𑀲𑁆𑀲 𑀅𑀢𑁆𑀣𑁄 𑀤𑀼𑀝𑁆𑀞𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁, 𑀏𑀓𑀸𑀩𑀤𑁆𑀥𑀁𑀬𑁂𑀯 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀇𑀢𑀺 𑀲𑀫𑀸𑀦𑀲𑀼𑀢𑀺𑀓𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀙𑀩𑁆𑀩𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀥𑀺𑀓𑁂𑀳𑀺 𑀘 𑀫𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑀺𑀢𑁄.

𑀬𑀲𑁆𑀫𑀸 𑀧𑀦 𑀲𑀫𑀸𑀦𑀲𑀼𑀢𑀺𑀓𑁂𑀲𑀼 𑀯𑀺𑀦𑀺𑀘𑁆𑀙𑀬𑁂 𑀤𑀲𑁆𑀲𑀺𑀢𑁂 𑀅𑀲𑀫𑀸𑀦𑀲𑀼𑀢𑀺𑀓𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀬𑀢𑁆𑀣 𑀦𑀺𑀕𑁆𑀕𑀳𑀻𑀢𑀫𑁆𑀳𑀸 𑀧𑀭𑀸𑀓𑀸𑀭𑀮𑁄𑀧𑁄𑀧𑀺 𑀧𑀸𑀞𑁄 𑀧𑀜𑁆𑀜𑀸𑀬𑀢𑀺, 𑀲𑀁𑀬𑁄𑀕𑀩𑁆𑀬𑀜𑁆𑀚𑀦𑀲𑁆𑀲 𑀯𑀺𑀲𑀁𑀬𑁄𑀕𑀢𑁆𑀢𑀫𑁆𑀧𑀺. 𑀢𑁂𑀲𑀼 𑀧𑀬𑁄𑀕𑁂𑀲𑀼 𑀦𑀺𑀕𑁆𑀕𑀳𑀻𑀢𑀧𑀤𑀁 𑀅𑀦𑀦𑁆𑀢𑀭𑀧𑀤𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁𑀬𑁂𑀯 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀓𑀢𑀫𑀸𑀦𑀺 𑀢𑀸𑀦𑀺? ‘‘𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁-𑀲𑀸’𑀚𑀻𑀯𑁄 𑀕𑀭𑀳𑀺𑀢𑁄 𑀫𑀫. 𑀧𑀼𑀧𑁆𑀨𑀁’𑀲𑀸 𑀉𑀧𑁆𑀧𑀚𑁆𑀚𑀺. 𑀔𑀬𑀫𑀢𑁆𑀢𑀁 𑀦 𑀦𑀺𑀩𑁆𑀩𑀸𑀦𑀁’𑀲 𑀕𑀫𑁆𑀪𑀻𑀭𑀸𑀤𑀺𑀯𑀸𑀘𑀢𑁄’’𑀢𑀺 𑀏𑀯𑀫𑀸𑀤𑀬𑁄. 𑀏𑀢𑁆𑀣 𑀳𑀺 ‘‘𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀘𑁆𑀙𑁂𑀤𑀫𑀓𑀢𑁆𑀯𑀸 ¶ 𑀅𑀦𑀦𑁆𑀢𑀭𑁂 𑀤𑁆𑀯𑀻𑀲𑀼 𑀕𑀸𑀣𑀸𑀧𑀤𑁂𑀲𑀼 𑀅𑀦𑁆𑀢𑀭𑀻𑀪𑀽𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀲𑀼𑀢𑀺𑀓𑀧𑀤𑀸𑀦𑀁 𑀏𑀓𑀢𑁄 𑀉𑀘𑁆𑀘𑀸𑀭𑀡𑀫𑀺𑀯 𑀅𑀦𑀦𑁆𑀢𑀭𑀧𑀤𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀼𑀘𑁆𑀘𑀸𑀭𑀡𑀯𑀲𑁂𑀦 ‘‘𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁-𑀲𑀸’𑀚𑀻𑀯𑁄 𑀕𑀭𑀳𑀺𑀢𑁄 𑀫𑀫𑀸’’𑀢𑀺𑀆𑀤𑀺𑀦𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀏𑀯𑀭𑀽𑀧𑁄𑀬𑁂𑀯 𑀳𑀺 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑁄 𑀲𑀓𑀮𑁂𑀳𑀺𑀧𑀺 𑀧𑁄𑀭𑀸𑀡𑁂𑀳𑀺 𑀯𑀺𑀜𑁆𑀜𑀽𑀳𑀺 𑀅𑀦𑀼𑀫𑀢𑁄 𑀉𑀘𑁆𑀘𑀸𑀭𑀺𑀢𑁄 𑀘 ‘‘𑀅𑀲𑁆𑀲 𑀆𑀚𑀻𑀯𑁄 𑀕𑀭𑀳𑀺𑀢𑁄 𑀫𑀫, 𑀅𑀲𑁆𑀲𑀸 𑀉𑀧𑁆𑀧𑀚𑁆𑀚𑀺, 𑀅𑀲𑁆𑀲 𑀕𑀫𑁆𑀪𑀻𑀭𑀸𑀤𑀺𑀯𑀸𑀘𑀢𑁄’’𑀢𑀺𑀏𑀯𑀫𑀸𑀤𑀺𑀅𑀢𑁆𑀣𑀧𑁆𑀧𑀝𑀺𑀧𑀸𑀤𑀦𑀲𑁆𑀲𑀸𑀦𑀼𑀭𑀽𑀧𑀢𑁆𑀢𑀸.

𑀬𑀢𑁆𑀣 𑀧𑀦 𑀬𑀸𑀤𑀺𑀲𑁂 𑀉𑀘𑁆𑀘𑀸𑀭𑀡𑁂 𑀓𑀭𑀺𑀬𑀫𑀸𑀦𑁂 𑀅𑀢𑁆𑀣𑁄 𑀧𑀭𑀺𑀩𑁆𑀬𑀢𑁆𑀢𑁄 𑀳𑁄𑀢𑀺, 𑀢𑁂𑀲𑀼 𑀧𑀬𑁄𑀕𑁂𑀲𑀼 𑀓𑁆𑀯𑀘𑀺 𑀘𑀲𑀤𑁆𑀤 𑀧𑀦𑀲𑀤𑁆𑀤𑀸𑀤𑀺𑀬𑁄𑀕𑀝𑁆𑀞𑀸𑀦𑁂 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀤𑀫𑀼𑀘𑁆𑀘𑀸𑀭𑁂𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁? ‘‘𑀯𑀸𑀴𑀸 𑀘 𑀮𑀧𑀲𑀓𑁆𑀔𑀭𑀸. 𑀅𑀘𑁆𑀘𑀦𑁆𑀢𑀲𑀦𑁆𑀢𑀸 𑀧𑀦 𑀬𑀸, 𑀅𑀬𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀤𑀸, ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀸𑀘𑀁 𑀪𑀸𑀲𑀢𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺? 𑀆𑀫𑀦𑁆𑀢𑀸. 𑀇𑀢𑀺 𑀘 𑀤𑀦𑁆𑀢𑀺 𑀘 𑀤𑀼𑀢𑀺 𑀘 𑀔𑀦𑁆𑀢𑀺 𑀘 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸.

𑀏𑀢𑁂𑀲𑀼 𑀳𑀺 𑀧𑀞𑀫𑀧𑀬𑁄𑀕𑁂 ‘‘𑀯𑀸𑀴𑀸 𑀘𑀸’’𑀢𑀺 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀮𑀧𑀲𑀓𑁆𑀔𑀭𑀸’’𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀮𑀧𑀲𑀓𑁆𑀔𑀭𑀸𑀢𑀺 𑀲𑀓𑁆𑀔𑀭𑀲𑀤𑀺𑀲𑀫𑀥𑀼𑀭𑀯𑀘𑀦𑀸. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀦𑀺𑀭𑀢𑁆𑀣𑀓𑀯𑀘𑀦𑁂𑀳𑀺 𑀲𑀓𑁆𑀔𑀭𑀸 𑀯𑀺𑀬 𑀫𑀥𑀼𑀭𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸𑀢𑁆𑀭 𑀩𑀳𑀼𑀩𑁆𑀩𑀻𑀳𑀺𑀢𑀧𑁆𑀧𑀼𑀭𑀺𑀲𑀯𑀲𑁂𑀦 𑀤𑁆𑀯𑀺𑀥𑀸 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄 ‘‘𑀮𑀧𑀸 𑀲𑀓𑁆𑀔𑀭𑀸 𑀯𑀺𑀬 𑀬𑀸𑀲𑀁 𑀢𑀸 𑀮𑀧𑀲𑀓𑁆𑀔𑀭𑀸, 𑀮𑀧𑁂𑀳𑀺 𑀯𑀸 𑀲𑀓𑁆𑀔𑀭𑀸 𑀯𑀺𑀬𑀸𑀢𑀺 𑀮𑀧𑀲𑀓𑁆𑀔𑀭𑀸’’𑀢𑀺.

𑀤𑀼𑀢𑀺𑀬𑀧𑀬𑁄𑀕𑁂 ‘‘𑀅𑀘𑁆𑀘𑀦𑁆𑀢𑀲𑀦𑁆𑀢𑀸 𑀧𑀦’’𑀇𑀢𑀺 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀬𑀸’’𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀬𑀸 𑀧𑀦 𑀅𑀬𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀤𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀸𑀢𑀺 𑀳𑀺 𑀅𑀢𑁆𑀣𑁄.

𑀢𑀢𑀺𑀬𑀧𑀬𑁄𑀕𑁂 ¶ 𑀇𑀢𑀺 𑀘 𑀤𑀦𑁆𑀢𑀺 𑀘 𑀤𑀼𑀢𑀺 𑀘 𑀔𑀦𑁆𑀢𑀺 𑀘𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀇𑀓𑀸𑀭𑀜𑁆𑀘 𑀤𑀁𑀓𑀸𑀭𑀜𑁆𑀘 𑀤𑀼𑀓𑀸𑀭𑀜𑁆𑀘 𑀔𑀁𑀓𑀸𑀭𑀜𑁆𑀘 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀢𑀺 𑀘 𑀲𑀤𑁆𑀤𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀸.

𑀏𑀢𑁆𑀣 𑀳𑀺 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑀡𑁂 𑀲𑀢𑀺 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 𑀅𑀢𑁆𑀣𑁄 𑀤𑀼𑀝𑁆𑀞𑁄 𑀪𑀯𑀢𑀺. 𑀓𑀣𑀁? 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑀡𑁂 𑀲𑀢𑀺 𑀇𑀢𑀺𑀲𑀤𑁆𑀤𑁄 𑀏𑀯𑀦𑁆𑀢𑀺 𑀅𑀢𑁆𑀣𑀯𑀸𑀘𑀓𑁄 𑀦𑀺𑀧𑀸𑀢𑁄 𑀲𑀺𑀬𑀸, 𑀲𑀦𑁆𑀥𑀺𑀯𑀲𑁂𑀦 𑀧𑀦 𑀇𑀓𑀸𑀭𑀢𑁆𑀣𑀯𑀸𑀘𑀓𑁄 𑀭𑀽𑀴𑁆𑀳𑀻𑀲𑀤𑁆𑀤𑁄 𑀦 𑀲𑀺𑀬𑀸. 𑀤𑀦𑁆𑀢𑀺𑀲𑀤𑁆𑀤𑁄 𑀤𑀫𑀦𑀢𑁆𑀣𑁄 𑀲𑀺𑀬𑀸, 𑀤𑀁𑀓𑀸𑀭𑀯𑀸𑀘𑀓𑁄 𑀦 𑀲𑀺𑀬𑀸. 𑀤𑀼𑀢𑀺𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸, 𑀤𑀼𑀓𑀸𑀭𑀯𑀸𑀘𑀓𑁄 𑀦 𑀲𑀺𑀬𑀸. 𑀔𑀦𑁆𑀢𑀺𑀲𑀤𑁆𑀤𑁄 𑀔𑀫𑀦𑀢𑁆𑀣𑁄 𑀲𑀺𑀬𑀸, 𑀔𑀁𑀓𑀸𑀭𑀯𑀸𑀘𑀓𑁄 𑀦 𑀲𑀺𑀬𑀸. 𑀢𑀲𑁆𑀫𑀸 𑀇𑀓𑀸𑀭 𑀤𑀁𑀓𑀸𑀭 𑀤𑀼𑀓𑀸𑀭 𑀔𑀁𑀓𑀸𑀭𑀸𑀦𑀺 𑀈𑀲𑀓𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺.

𑀏𑀢𑁆𑀣 𑀳𑀺 𑀇𑀇𑀢𑀺 𑀤𑀁𑀇𑀢𑀺 𑀤𑀼𑀇𑀢𑀺 𑀔𑀁𑀇𑀢𑀻𑀢𑀺𑀆𑀤𑀺𑀦𑀸 𑀲𑀁𑀳𑀺𑀢𑀸𑀧𑀤𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀭𑀪𑀽𑀢𑀲𑁆𑀲 𑀘 𑀇𑀓𑀸𑀭𑀲𑁆𑀲 𑀮𑁄𑀧𑁄. 𑀦 𑀧𑀦𑁂𑀢𑁆𑀣 𑀇𑀤𑀁 𑀯𑀢𑁆𑀢𑀩𑁆𑀩𑀁 ‘‘𑀲𑀭𑀽𑀧𑀲𑀭𑀸𑀦𑀁 𑀯𑀺𑀲𑀬𑁂 𑀧𑀭𑀪𑀽𑀢𑀲𑁆𑀲 𑀲𑀭𑀽𑀧𑀲𑀭𑀲𑁆𑀲 𑀮𑁄𑀧𑁄 𑀦 𑀳𑁄𑀢𑀺, 𑀧𑀼𑀩𑁆𑀩𑀲𑀭𑀲𑁆𑀲𑁂𑀯 𑀮𑁄𑀧𑁄 𑀳𑁄𑀢𑀺 𑀢𑀢𑁆𑀭𑀸𑀬𑀦𑁆𑀢𑀺 𑀏𑀢𑁆𑀣 𑀯𑀺𑀬𑀸’’𑀢𑀺 ‘‘𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀧𑀣𑁂 𑀔𑀡𑀦𑁆𑀢𑀸, 𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼’’𑀦𑁆𑀢𑀺 𑀧𑀸𑀴𑀺𑀬𑀁 𑀲𑀭𑀽𑀧𑀧𑀭𑀲𑀭𑀲𑁆𑀲 𑀮𑁄𑀧𑀤𑀲𑁆𑀲𑀦𑀢𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀧𑀯𑀤𑁆𑀥𑀁 𑀆𑀧𑀁 𑀧𑀧’’𑀦𑁆𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄. 𑀢𑀲𑁆𑀫𑀸 ‘‘𑀇𑀢𑀺 𑀘𑀸’’𑀢𑀺 𑀏𑀢𑁆𑀣𑀸𑀧𑀺 𑀇𑀇𑀢𑀺 𑀘𑀸𑀢𑀺 𑀙𑁂𑀤𑀁 𑀓𑀢𑁆𑀯𑀸 𑀤𑁆𑀯𑀻𑀲𑀼 𑀇𑀓𑀸𑀭𑁂𑀲𑀼 𑀧𑀭𑀲𑁆𑀲 𑀇𑀓𑀸𑀭𑀲𑁆𑀲 𑀮𑁄𑀧𑁄 𑀓𑀸𑀢𑀩𑁆𑀩𑁄, 𑀦 𑀧𑀼𑀩𑁆𑀩𑀲𑁆𑀲.

𑀧𑀼𑀩𑁆𑀩𑀲𑁆𑀫𑀺𑀜𑁆𑀳𑀺 𑀇𑀓𑀸𑀭𑀯𑀸𑀘𑀓𑁂 𑀇𑀓𑀸𑀭𑁂 𑀦𑀝𑁆𑀞𑁂 𑀲𑀢𑀺 𑀦𑀺𑀧𑀸𑀢𑀪𑀽𑀢𑁂𑀦 𑀇𑀢𑀺𑀲𑀤𑁆𑀤𑁂𑀦 𑀇𑀓𑀸𑀭𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀦 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀦𑀺𑀧𑀸𑀢𑀪𑀽𑀢𑀲𑁆𑀲 𑀧𑀦 𑀇𑀢𑀺𑀲𑀤𑁆𑀤𑀲𑁆𑀲 𑀇𑀓𑀸𑀭𑁂 𑀦𑀝𑁆𑀞𑁂𑀧𑀺 𑀲𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯 ‘‘𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀏𑀢𑁆𑀣 ¶ 𑀤𑁂𑀯𑀤𑀢𑁆𑀢𑀧𑀤𑀢𑁆𑀣𑁄 𑀯𑀺𑀬. 𑀢𑀲𑁆𑀫𑀸 𑀇𑀢𑀺𑀲𑀤𑁆𑀤𑀲𑁆𑀲 𑀧𑀭𑀪𑀽𑀢𑀲𑁆𑀲 𑀇𑀓𑀸𑀭𑀲𑁆𑀲𑁂𑀯 𑀮𑁄𑀧𑁄 𑀓𑀸𑀢𑀩𑁆𑀩𑁄, 𑀦 𑀧𑀼𑀩𑁆𑀩𑀲𑁆𑀲 𑀇𑀓𑀸𑀭𑀯𑀸𑀘𑀓𑀲𑁆𑀲 𑀇𑀓𑀸𑀭𑀲𑁆𑀲. 𑀓𑀘𑁆𑀘𑀸𑀬𑀦𑁂 𑀧𑀦 𑀬𑁂𑀪𑀼𑀬𑁆𑀬𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀅𑀲𑀭𑀽𑀧𑀲𑀭𑀢𑁄 𑀧𑀭𑀲𑁆𑀲𑁂𑀯 𑀅𑀲𑀭𑀽𑀧𑀲𑀭𑀲𑁆𑀲 𑀮𑁄𑀧𑁄 𑀯𑀼𑀢𑁆𑀢𑁄, 𑀦 𑀲𑀭𑀽𑀧𑀲𑀭𑀢𑁄 𑀧𑀭𑀲𑁆𑀲 𑀲𑀭𑀽𑀧𑀲𑀭𑀲𑁆𑀲. 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑁂𑀳𑀺 𑀯𑀸 𑀲𑀭𑀽𑀧𑀲𑁆𑀲 𑀧𑀭𑀲𑀭𑀲𑁆𑀲 𑀮𑁄𑀧𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀘𑀲𑀤𑁆𑀤𑀸𑀤𑀺𑀬𑁄𑀕𑀝𑁆𑀞𑀸𑀦𑁂𑀧𑀺 𑀲𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀤𑀁 𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀬𑀢𑁆𑀣 𑀘 𑀆𑀕𑀫𑀓𑁆𑀔𑀭𑀸𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀧𑀬𑁄𑀕𑁂𑀲𑀼 𑀧𑀼𑀩𑁆𑀩𑀧𑀤𑀸𑀦𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀸𑀦𑀺, 𑀆𑀕𑀫𑀓𑁆𑀔𑀭𑀯𑀦𑁆𑀢𑁂𑀳𑀺 𑀧𑀭𑀧𑀤𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀉𑀘𑁆𑀘𑀸𑀭𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁. 𑀪𑀕𑀯𑀸 𑀏𑀢𑀤𑀯𑁄𑀘’’𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀬𑀢𑁆𑀣 𑀬𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑁄 𑀤𑀺𑀲𑁆𑀲𑀢𑀺, 𑀅𑀢𑁆𑀣𑁄 𑀘 𑀬𑀼𑀚𑁆𑀚𑀢𑀺, 𑀢𑀢𑁆𑀣 𑀢𑀸𑀦𑀺 𑀅𑀢𑁆𑀣𑀸𑀦𑀼𑀭𑀽𑀧𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀏𑀢𑁆𑀣 𑀳𑀺 ‘‘𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀻’’𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺’’𑀦𑁆𑀢𑀺 𑀉𑀘𑁆𑀘𑀸𑀭𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀦 𑀓𑁂𑀯𑀮𑀁 𑀲𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂𑀬𑁂𑀯 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀅𑀣 𑀔𑁄 𑀬𑀸𑀕𑀼𑀬𑀸𑀧𑀺 𑀔𑀸𑀤𑀦𑀻𑀬𑁂𑀧𑀺 𑀪𑀢𑁆𑀢𑀲𑁆𑀫𑀺𑀫𑁆𑀧𑀺 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀲𑀫𑀢𑁆𑀣𑁄 𑀪𑀯𑀢𑀺, 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀲𑀫𑀼𑀘𑁆𑀘𑀬𑀢𑁆𑀣𑀯𑀸𑀘𑀓𑁄 𑀅𑀧𑀺𑀲𑀤𑁆𑀤𑁄.

𑀬𑀢𑁆𑀣 𑀧𑀦 𑀬𑁂𑀲𑀫𑀺𑀢𑀭𑁂𑀦 𑀯𑀸 𑀇𑀢𑀭𑁂𑀦 𑀯𑀸 𑀏𑀓𑁂𑀓𑀧𑀤𑁂𑀦 𑀉𑀪𑀬𑀧𑀤𑁂𑀳𑀺 𑀯𑀸 𑀲𑀫𑁆𑀩𑀦𑁆𑀥𑁄 𑀤𑀺𑀲𑁆𑀲𑀢𑀺 𑀲𑀳𑁂𑀯𑀢𑁆𑀣𑀬𑀼𑀢𑁆𑀢𑀺𑀬𑀸, 𑀢𑀢𑁆𑀣 𑀢𑀸𑀦𑀺 𑀬𑀣𑀸𑀭𑀳𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀧𑀓𑀸𑀲𑁂𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣. 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀧𑀬𑁄𑀕𑀸. 𑀢𑀢𑁆𑀭𑀺𑀫𑀸 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀺𑀓𑀸 𑀕𑀸𑀣𑀸 𑁋

𑀥𑀫𑁆𑀫𑀲𑀤𑁆𑀤𑁂𑀦 𑀯𑀸 𑀩𑁆𑀭𑀳𑁆𑀫-𑀘𑀭𑀺𑀬𑀲𑀤𑁆𑀤𑁂𑀦 𑀯𑀸 𑀧𑀤𑀁;

𑀬𑁄𑀚𑁂𑀢𑁆𑀯𑀸 𑀈𑀭𑀬𑁂 𑀯𑀺𑀜𑁆𑀜𑀽, ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺𑀤𑀁.

‘‘𑀲𑀸𑀥𑀼𑀓’’𑀦𑁆𑀢𑀺 𑀧𑀤𑀁 𑀯𑀺𑀜𑁆𑀜𑀽, ‘‘𑀲𑀼𑀡𑀸𑀣𑀸’’𑀢𑀺 𑀧𑀤𑁂𑀦 𑀯𑀸;

𑀢𑀣𑀸 ‘‘𑀫𑀦𑀲𑀺𑀓𑀭𑁄𑀣’’, 𑀇𑀢𑀺 𑀯𑀼𑀢𑁆𑀢𑀧𑀤𑁂𑀦 𑀯𑀸;

𑀈𑀭𑀬𑁂 𑀬𑁄𑀚𑀬𑀺𑀢𑁆𑀯𑀸𑀦, 𑀉𑀪𑀬𑁂𑀳𑀺 𑀧𑀤𑁂𑀳𑀺 𑀯𑀸.

𑀏𑀓𑀫𑁂𑀓𑁂𑀦 𑀲𑀫𑁆𑀩𑀦𑁆𑀥𑁄, 𑀲𑀫𑁆𑀩𑀦𑁆𑀥𑁄 𑀉𑀪𑀬𑁂𑀳𑀺 𑀯𑀸;

𑀤𑀺𑀲𑁆𑀲𑀢𑀻𑀢𑀺 𑀯𑀺𑀚𑀸𑀦𑁂𑀬𑁆𑀬, 𑀲𑀤𑁆𑀥𑀺𑀫𑁂𑀯𑀢𑁆𑀣𑀬𑀼𑀢𑁆𑀢𑀺𑀬𑀸.

𑀦𑀢𑁆𑀢𑀦𑁄𑀫𑀢𑀺𑀬𑀸 𑀏𑀲𑁄, 𑀅𑀢𑁆𑀣𑁄 𑀏𑀢𑁆𑀣 𑀫𑀬𑀸 𑀭𑀼𑀢𑁄;

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀦𑀬𑀁 𑀦𑀺𑀲𑁆𑀲𑀸𑀬 𑀫𑁂 𑀭𑀼𑀢𑁄.

𑀏𑀯𑀁𑀯𑀺𑀥𑁂𑀲𑀼 𑀅𑀜𑁆𑀜𑁂𑀲𑀼, 𑀧𑀸𑀞𑁂𑀲𑀼𑀧𑀺 𑀅𑀬𑀁 𑀦𑀬𑁄;

𑀦𑁂𑀢𑀩𑁆𑀩𑁄 𑀦𑀬𑀤𑀓𑁆𑀔𑁂𑀦, 𑀲𑀸𑀲𑀦𑀢𑁆𑀣𑀕𑀯𑁂𑀲𑀺𑀦𑀸.

𑀅𑀢𑁆𑀣𑀸𑀦𑀼𑀭𑀽𑀧𑀢𑁄 𑀲𑀤𑁆𑀤𑀁, 𑀅𑀢𑁆𑀣𑀁 𑀲𑀤𑁆𑀤𑀸𑀦𑀼𑀭𑀽𑀧𑀢𑁄;

𑀘𑀺𑀦𑁆𑀢𑀬𑀺𑀢𑁆𑀯𑀸𑀦 𑀫𑁂𑀥𑀸𑀯𑀻, 𑀯𑁄𑀳𑀭𑁂 𑀦 𑀬𑀣𑀸 𑀢𑀣𑀸𑀢𑀺.

𑀅𑀬𑀫𑁂𑀢𑁆𑀣 𑀅𑀢𑁆𑀣𑀲𑀤𑁆𑀤𑀘𑀺𑀦𑁆𑀢𑀸.

𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑁂 𑀏𑀯𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀁 𑁋 𑀪𑀽𑀥𑀸𑀢𑀼𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑀢𑁄 𑀯𑀟𑁆𑀠𑀦𑁂 𑀤𑀺𑀝𑁆𑀞𑀸 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀮𑀺𑀘𑁆𑀙𑀯𑀻 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 ‘𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻 𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻’𑀢𑀺’’ 𑀇𑀢𑀺 𑀯𑀸 ‘‘𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲𑀸’’𑀢𑀺 𑀯𑀸 ‘‘𑀯𑁂𑀤𑀸 𑀦 𑀢𑀸𑀡𑀸𑀬 𑀪𑀯𑀦𑁆𑀢𑀺𑀤𑀲𑁆𑀲, 𑀫𑀺𑀢𑁆𑀢𑀤𑁆𑀤𑀼𑀦𑁄 𑀪𑀽𑀦𑀳𑀼𑀦𑁄 𑀦𑀭𑀲𑁆𑀲𑀸’’𑀢𑀺 𑀯𑀸 ‘‘𑀪𑀽𑀦𑀳𑀘𑁆𑀘𑀁 𑀓𑀢𑀁 𑀫𑀬𑀸’’𑀢𑀺 𑀯𑀸 𑀏𑀯𑀁 𑀯𑀟𑁆𑀠𑀦𑁂 𑀤𑀺𑀝𑁆𑀞𑀸.

𑀯𑀘𑀦𑀲𑀗𑁆𑀕𑀳𑁂 ¶ 𑀏𑀯𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀁 𑁋 𑀯𑀢𑁆𑀢𑀫𑀸𑀦𑀸𑀬 𑀯𑀺𑀪𑀢𑁆𑀢𑀺𑀬𑀸 𑀧𑀭𑀲𑁆𑀲𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀧𑀜𑁆𑀘𑀫𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀲𑀤𑀺𑀲𑀁. 𑀢𑀼𑀫𑁆𑀳𑁂 𑀪𑀯𑀣.

𑀯𑀢𑁆𑀢𑀫𑀸𑀦𑀧𑀜𑁆𑀘𑀫𑀻𑀦𑀁 𑀧𑀭𑀲𑁆𑀲𑀧𑀤𑁂 𑀉𑀢𑁆𑀢𑀫𑀧𑀼𑀭𑀺𑀲𑀘𑀢𑀼𑀓𑁆𑀓𑁂 𑀏𑀓𑀯𑀘𑀦𑀁 𑀏𑀓𑀯𑀘𑀦𑁂𑀦, 𑀩𑀳𑀼𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑁂𑀦 𑀲𑀤𑀺𑀲𑀁. 𑀅𑀳𑀁 𑀪𑀯𑀸𑀫𑀺, 𑀫𑀬𑀁 𑀪𑀯𑀸𑀫.

𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀢𑀦𑁄𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀦𑀁 𑀅𑀢𑁆𑀢𑀦𑁄𑀧𑀤𑁂𑀳𑀺 𑀤𑁆𑀯𑀻𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀳𑀺 𑀲𑀤𑀺𑀲𑀁 𑀓𑀢𑁆𑀣𑀘𑀺 𑀯𑀡𑁆𑀡𑀲𑀫𑀼𑀤𑀸𑀬𑀯𑀲𑁂𑀦 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀯𑀚𑁆𑀚𑁂𑀢𑁆𑀯𑀸, 𑀏𑀲 𑀦𑀬𑁄 𑀉𑀢𑁆𑀢𑀭𑀢𑁆𑀭𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀢𑁆𑀯𑀁 𑀪𑀯𑀲𑁂, 𑀇𑀤𑀁 𑀯𑀢𑁆𑀢𑀫𑀸𑀦𑀸𑀬 𑀭𑀽𑀧𑀁. 𑀢𑁆𑀯𑀁 𑀅𑀪𑀯𑀲𑁂, 𑀇𑀤𑀁 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀦𑀁 𑀭𑀽𑀧𑀁.

𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀢𑀦𑁄𑀧𑀤𑀁 𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀧𑀜𑁆𑀘𑀫𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘 𑀧𑀭𑁄𑀓𑁆𑀔𑀸𑀬 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀅𑀳𑀁 𑀪𑀯𑁂, 𑀇𑀤𑀁 𑀯𑀢𑁆𑀢𑀫𑀸𑀦𑀧𑀜𑁆𑀘𑀫𑀻𑀦𑀁 𑀭𑀽𑀧𑀁. 𑀢𑁆𑀯𑀁 𑀩𑀪𑀽𑀯𑁂, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁.

𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀢𑀦𑁄𑀧𑀤𑀁 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀧𑀭𑁄𑀓𑁆𑀔𑀚𑁆𑀚𑀢𑀦𑀻𑀦𑀁 𑀅𑀢𑁆𑀢𑀦𑁄𑀧𑀤𑁂𑀳𑀺 𑀤𑁆𑀯𑀻𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀫𑀬𑀁 𑀪𑀯𑀸𑀫𑁆𑀳𑁂, 𑀇𑀤𑀁 𑀯𑀢𑁆𑀢𑀫𑀸𑀦𑀸𑀬 𑀭𑀽𑀧𑀁. 𑀫𑀬𑀁 𑀩𑀪𑀽𑀯𑀺𑀫𑁆𑀳𑁂, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁. 𑀫𑀬𑀁 𑀅𑀪𑀯𑀺𑀫𑁆𑀳𑁂, 𑀇𑀤𑀫𑀚𑁆𑀚𑀢𑀦𑀺𑀬𑀸 𑀭𑀽𑀧𑀁.

𑀧𑀜𑁆𑀘𑀫𑀺𑀬𑀸 𑀅𑀢𑁆𑀢𑀦𑁄𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀧𑀭𑁄𑀓𑁆𑀔𑀸𑀬 𑀅𑀢𑁆𑀢𑀦𑁄𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀲𑀤𑀺𑀲𑀁. 𑀢𑀼𑀫𑁆𑀳𑁂 𑀪𑀯𑀯𑁆𑀳𑁄, 𑀇𑀤𑀁 𑀧𑀜𑁆𑀘𑀫𑀺𑀬𑀸 𑀭𑀽𑀧𑀁. 𑀢𑀼𑀫𑁆𑀳𑁂 𑀩𑀪𑀽𑀯𑀺𑀯𑁆𑀳𑁄, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁.

𑀧𑀭𑁄𑀓𑁆𑀔𑀸𑀬 𑀧𑀭𑀲𑁆𑀲𑀧𑀤𑀁 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀘 𑀅𑀚𑁆𑀚𑀢𑀦𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀢𑁂 𑀩𑀪𑀽𑀯𑀼, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁. 𑀢𑁂 𑀅𑀪𑀯𑀼, 𑀇𑀤𑀁 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀦𑀁 𑀭𑀽𑀧𑀁.

𑀧𑀭𑁄𑀓𑁆𑀔𑀸𑀬 ¶ 𑀧𑀭𑀲𑁆𑀲𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀅𑀢𑁆𑀢𑀦𑁄𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀘 𑀅𑀢𑁆𑀢𑀦𑁄𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘 𑀅𑀚𑁆𑀚𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀘𑀸𑀢𑀺 𑀘𑀢𑀽𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀢𑀼𑀫𑁆𑀳𑁂 𑀩𑀪𑀽𑀯𑀺𑀢𑁆𑀣, 𑀲𑁄 𑀩𑀪𑀽𑀯𑀺𑀢𑁆𑀣, 𑀇𑀫𑀸𑀦𑀺 𑀧𑀭𑁄𑀓𑁆𑀔𑀸𑀬 𑀭𑀽𑀧𑀸𑀦𑀺. 𑀢𑀼𑀫𑁆𑀳𑁂 𑀅𑀪𑀯𑀢𑁆𑀣, 𑀲𑁄 𑀅𑀪𑀯𑀢𑁆𑀣, 𑀇𑀫𑀸𑀦𑀺 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀭𑀽𑀧𑀸𑀦𑀺. 𑀢𑀼𑀫𑁆𑀳𑁂 𑀅𑀪𑀯𑀺𑀢𑁆𑀣, 𑀇𑀤𑀫𑀚𑁆𑀚𑀢𑀦𑀺𑀬𑀸 𑀭𑀽𑀧𑀁.

𑀧𑀭𑁄𑀓𑁆𑀔𑀸𑀬 𑀧𑀭𑀲𑁆𑀲𑀧𑀤𑀁 𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘 𑀅𑀚𑁆𑀚𑀢𑀦𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀅𑀳𑀁 𑀩𑀪𑀽𑀯𑀁, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁. 𑀅𑀳𑀁 𑀅𑀪𑀯𑀁, 𑀇𑀤𑀁 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀦𑀁 𑀭𑀽𑀧𑀁.

𑀧𑀭𑁄𑀓𑁆𑀔𑀸𑀬 𑀧𑀭𑀲𑁆𑀲𑀧𑀤𑀁 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀲𑀤𑀺𑀲𑀁. 𑀫𑀬𑀁 𑀩𑀪𑀽𑀯𑀺𑀫𑁆𑀳, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁. 𑀫𑀬𑀁 𑀅𑀪𑀯𑀫𑁆𑀳, 𑀇𑀤𑀁 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀭𑀽𑀧𑀁.

𑀧𑀭𑁄𑀓𑁆𑀔𑀸𑀬 𑀅𑀢𑁆𑀢𑀦𑁄𑀧𑀤𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘 𑀅𑀚𑁆𑀚𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀅𑀳𑀁 𑀩𑀪𑀽𑀯𑀺𑀁, 𑀇𑀤𑀁 𑀧𑀭𑁄𑀓𑁆𑀔𑀸𑀬 𑀭𑀽𑀧𑀁. 𑀅𑀳𑀁 𑀅𑀪𑀯𑀺𑀁, 𑀇𑀤𑀁 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀦𑀁 𑀭𑀽𑀧𑀁.

𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑀁 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀅𑀚𑁆𑀚𑀢𑀦𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀲𑀤𑀺𑀲𑀁. 𑀲𑁄 𑀅𑀪𑀯𑀸.

𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀅𑀚𑁆𑀚𑀢𑀦𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀲𑀤𑀺𑀲𑀁. 𑀢𑁆𑀯𑀁 𑀅𑀪𑀯𑁄.

𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀧𑀭𑀲𑁆𑀲𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀧𑀭𑀲𑁆𑀲𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀅𑀢𑁆𑀢𑀦𑁄𑀧𑀤𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀲𑀤𑀺𑀲𑀁. 𑀢𑀼𑀫𑁆𑀳𑁂 ¶ 𑀪𑀯𑀺𑀲𑁆𑀲𑀣, 𑀇𑀤𑀁 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀁. 𑀢𑀼𑀫𑁆𑀳𑁂 𑀅𑀪𑀯𑀺𑀲𑁆𑀲𑀣, 𑀲𑁄 𑀅𑀪𑀯𑀺𑀲𑁆𑀲𑀣, 𑀇𑀫𑀸𑀦𑀺 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀸𑀦𑀺.

𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀲𑀤𑀺𑀲𑀁. 𑀢𑁆𑀯𑀁 𑀪𑀯𑀺𑀲𑁆𑀲𑀲𑁂, 𑀇𑀤𑀁 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀁. 𑀢𑁆𑀯𑀁 𑀅𑀪𑀯𑀺𑀲𑁆𑀲𑀲𑁂, 𑀇𑀤𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀁.

𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑁂𑀦 𑀲𑀤𑀺𑀲𑀁. 𑀢𑀼𑀫𑁆𑀳𑁂 𑀪𑀯𑀺𑀲𑁆𑀲𑀯𑁆𑀳𑁂, 𑀇𑀤𑀁 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀁. 𑀢𑀼𑀫𑁆𑀳𑁂 𑀅𑀪𑀯𑀺𑀲𑁆𑀲𑀯𑁆𑀳𑁂, 𑀇𑀤𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀁.

𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀅𑀢𑁆𑀢𑀦𑁄𑀧𑀤𑀁 𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀧𑀭𑀲𑁆𑀲𑀧𑀤𑁂𑀦𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀲𑀤𑀺𑀲𑀁. 𑀅𑀳𑀁 𑀪𑀯𑀺𑀲𑁆𑀲𑀁, 𑀇𑀤𑀁 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀁. 𑀅𑀳𑀁 𑀅𑀪𑀯𑀺𑀲𑁆𑀲𑀁, 𑀇𑀤𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀁. 𑀲𑁂𑀲𑀸𑀦𑀺 𑀲𑀩𑁆𑀩𑀸𑀲𑀫𑀝𑁆𑀞𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀘𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀯𑀦𑁆𑀢𑀺 𑀘𑀢𑁆𑀭 𑁋

𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀼, 𑀣𑀤𑁆𑀯𑀬𑀁 𑀲𑀫𑀼𑀤𑀻𑀭𑀺𑀢𑀁;

‘‘𑀢𑀼𑀫𑁆𑀳𑁂 𑀪𑀯𑀣’’𑀇𑀘𑁆𑀘𑀢𑁆𑀭, 𑀉𑀤𑀸𑀳𑀭𑀡𑀓𑀁 𑀤𑁆𑀯𑀺𑀥𑀸.

𑀫𑀺𑀤𑁆𑀯𑀬𑀁 𑀫𑀤𑁆𑀯𑀬𑀜𑁆𑀘𑁂𑀯, 𑀢𑀸𑀲𑀼 𑀯𑀼𑀢𑁆𑀢𑀁 𑀤𑁆𑀯𑀺𑀥𑀸 𑀤𑁆𑀯𑀺𑀥𑀸;

‘‘𑀪𑀯𑀸𑀫𑀻’’𑀢𑀺 ‘‘𑀪𑀯𑀸𑀫𑀸’’𑀢𑀺, 𑀘𑁂𑀢𑁆𑀣 𑀭𑀽𑀧𑀸𑀦𑀺 𑀦𑀺𑀤𑁆𑀤𑀺𑀲𑁂.

𑀯𑀢𑁆𑀢𑀫𑀸𑀦𑀓𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀲𑀼;

𑀲𑁂𑀢𑁆𑀢𑀬𑀁 ‘‘𑀪𑀯𑀲𑁂 𑀢𑁆𑀯’’𑀦𑁆𑀢𑀺, 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀢𑁄;

‘‘𑀅𑀪𑀯𑀲𑁂’’𑀢𑀺 𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀢𑁄.

𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀺𑀓𑀸-𑀧𑀭𑁄𑀓𑁆𑀔𑀸𑀲𑀼 𑀯𑀺𑀪𑀢𑁆𑀢𑀺𑀲𑀼;

𑀏𑀢𑁆𑀢𑀬𑀁 𑀮𑀧𑀺𑀢𑀁 𑀢𑀢𑁆𑀣, 𑀆𑀤𑁄 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀢𑀼.

𑀚𑀜𑁆𑀜𑀸 ‘‘𑀅𑀳𑀁 𑀪𑀯𑁂’’𑀢𑀺 ‘‘𑀢𑁆𑀯𑀁, 𑀩𑀪𑀽𑀯𑁂’’𑀢𑀺 𑀧𑀭𑁄𑀓𑁆𑀔𑀢𑁄;

𑀯𑀢𑁆𑀢𑀫𑀸𑀦𑀸𑀧𑀭𑁄𑀓𑁆𑀔𑀚𑁆𑀚-𑀢𑀦𑀻𑀲𑀼 𑀢𑀻𑀲𑀼 𑀲𑀤𑁆𑀤𑀺𑀢𑀁.

𑀫𑁆𑀳𑁂𑀢𑁆𑀢𑀬𑀁 ¶ 𑀓𑀫𑀢𑁄 𑀭𑀽𑀧𑀁, 𑀫𑀬𑀁𑀲𑀤𑁆𑀤𑀯𑀺𑀲𑁂𑀲𑀺𑀬𑀁;

‘‘𑀲𑀫𑁆𑀪𑀯𑀸𑀫𑁆𑀳𑁂 𑀩𑀪𑀽𑀯𑀺𑀫𑁆𑀳𑁂, 𑀅𑀪𑀯𑀺𑀫𑁆𑀳𑁂’’𑀢𑀺 𑀦𑀺𑀤𑁆𑀤𑀺𑀲𑁂.

𑀧𑀜𑁆𑀘𑀫𑀺𑀓𑀸𑀧𑀭𑁄𑀓𑁆𑀔𑀸𑀲𑀼, 𑀯𑁆𑀳𑁄𑀤𑁆𑀯𑀬𑀁 𑀭𑀽𑀧𑀫𑁂𑀢𑁆𑀣 𑀳𑀺;

‘‘𑀪𑀯𑀯𑁆𑀳𑁄 𑀩𑀪𑀽𑀯𑀺𑀯𑁆𑀳𑁄’’𑀢𑀺, 𑀢𑀼𑀫𑁆𑀳𑁂𑀲𑀤𑁆𑀤𑀯𑀺𑀲𑁂𑀲𑀺𑀬𑀁.

𑀧𑀭𑁄𑀓𑁆𑀔𑀫𑁆𑀳𑀺 𑀯𑀸 𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀲𑀼;

𑀉𑀢𑁆𑀢𑀬𑀁 ‘‘𑀢𑁂 𑀩𑀪𑀽𑀯𑀽’’𑀢𑀺, 𑀭𑀽𑀧𑀁 𑀚𑀜𑁆𑀜𑀸 𑀧𑀭𑁄𑀓𑁆𑀔𑀢𑁄;

𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀺𑀢𑁄, 𑀚𑀜𑁆𑀜𑀸 ‘‘𑀢𑁂 𑀅𑀪𑀯𑀽’’𑀇𑀢𑀺.

𑀧𑀭𑁄𑀓𑁆𑀔𑀫𑁆𑀳𑀺 𑀯𑀸 𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀲𑀼;

𑀲𑀤𑁆𑀤𑀺𑀢𑀁 𑀢𑀣𑀲𑀁𑀬𑁄𑀕- 𑀧𑀜𑁆𑀘𑀓𑀁 𑀇𑀢𑀺 𑀦𑀺𑀤𑁆𑀤𑀺𑀲𑁂.

𑀩𑀪𑀽𑀯𑀺𑀢𑁆𑀣𑀤𑁆𑀯𑀬𑀁 𑀢𑀢𑁆𑀣, 𑀭𑀽𑀧𑀁 𑀚𑀜𑁆𑀜𑀸 𑀧𑀭𑁄𑀓𑁆𑀔𑀚𑀁;

𑀩𑀯𑁆𑀳𑀢𑁆𑀢𑁂𑀓𑀢𑁆𑀢𑀢𑁄 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑀧𑀞𑀫𑀯𑁆𑀳𑀬𑀁.

𑀅𑀪𑀯𑀢𑁆𑀣𑀤𑁆𑀯𑀬𑀁 𑀜𑁂𑀬𑁆𑀬𑀁, 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺𑀚𑀁;

𑀩𑀯𑁆𑀳𑀢𑁆𑀢𑁂𑀓𑀢𑁆𑀢𑀢𑁄 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑁄 𑀧𑀞𑀫𑁄 𑀘 𑀲𑁄;

‘‘𑀅𑀪𑀯𑀺𑀢𑁆𑀣𑀸’’𑀢𑀺𑀤𑀁 𑀭𑀽𑀧𑀁, 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀚𑀁.

𑀢𑀜𑁆𑀘 𑀔𑁄 𑀩𑀳𑀼𑀓𑀢𑁆𑀢𑀫𑁆𑀳𑀺, 𑀢𑀼𑀫𑁆𑀳𑁂𑀲𑀤𑁆𑀤𑁂𑀦 𑀬𑁄𑀚𑀬𑁂;

𑀧𑀭𑁄𑀓𑁆𑀔𑀸𑀯𑁆𑀳𑀬𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀲𑀼 𑀓𑀺𑀢𑁆𑀢𑀺𑀢𑀁.

𑀅𑀁𑀢𑀬𑀁 𑀢𑀢𑁆𑀣 𑀆𑀤𑀺𑀬𑀁, ‘‘𑀩𑀪𑀽𑀯𑀁’’𑀭𑀽𑀧𑀫𑀻𑀭𑀺𑀢𑀁;

𑀤𑀼𑀯𑀺𑀦𑁆𑀦𑀁 𑀅𑀪𑀯𑀁𑀭𑀽𑀧𑀁, 𑀅𑀳𑀁𑀲𑀤𑁆𑀤𑁂𑀦 𑀬𑁄𑀚𑀬𑁂.

𑀧𑀭𑁄𑀓𑁆𑀔𑀓𑀸𑀳𑀺𑀬𑁆𑀬𑀢𑁆𑀢𑀦𑀻-𑀯𑀲𑁂𑀦 𑀫𑁆𑀳𑀤𑀼𑀓𑀁 ‘‘𑀫𑀬𑀁;

𑀩𑀪𑀽𑀯𑀺𑀫𑁆𑀳 𑀅𑀪𑀯𑀺𑀫𑁆𑀳’’, 𑀇𑀢𑀺 𑀭𑀽𑀧𑀤𑁆𑀯𑀬𑀁 𑀓𑀫𑀸.

𑀧𑀭𑁄𑀓𑁆𑀔𑀸𑀯𑁆𑀳𑀬𑀳𑀺𑀬𑁆𑀬𑀢𑁆𑀢-𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀲𑀼;

𑀇𑀁𑀢𑀬𑀁 𑀢𑀼 𑀢𑀳𑀺𑀁 𑀭𑀽𑀧𑀁, ‘‘𑀩𑀪𑀽𑀯𑀺’’𑀦𑁆𑀢𑀺 𑀧𑀭𑁄𑀓𑁆𑀔𑀚𑀁;

‘‘𑀅𑀪𑀯𑀺’’𑀦𑁆𑀢𑀻𑀢𑀭𑀸𑀲𑀁 𑀢𑀼, 𑀅𑀳𑀁𑀲𑀤𑁆𑀤𑀬𑀼𑀢𑀸𑀔𑀺𑀮𑀁.

𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀲𑀼 ¶ , 𑀆𑀤𑁆𑀯𑀬𑀁 𑀫𑀢𑀫𑁂𑀢𑁆𑀣 𑀳𑀺;

‘‘𑀅𑀪𑀯𑀸’’ 𑀇𑀢𑀺 𑀏𑀓𑀢𑁆𑀢𑁂, 𑀭𑀽𑀧𑀁 𑀧𑀞𑀫𑀧𑁄𑀭𑀺𑀲𑀁.

𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀲𑀼, 𑀑𑀤𑁆𑀯𑀬𑀁 𑀯𑀼𑀢𑁆𑀢𑀫𑁂𑀢𑁆𑀣 𑀢𑀼;

‘‘𑀅𑀪𑀯𑁄’’𑀇𑀢𑀺 𑀏𑀓𑀢𑁆𑀢𑁂, 𑀭𑀽𑀧𑀁 𑀫𑀚𑁆𑀛𑀺𑀫𑀧𑁄𑀭𑀺𑀲𑀁.

𑀪𑀯𑀺𑀲𑁆𑀲𑀦𑁆𑀢𑀺𑀬𑀓𑀸𑀮𑀸𑀢𑀺-𑀧𑀢𑁆𑀢𑀻𑀲𑀼 𑀤𑁆𑀯𑀻𑀲𑀼 𑀪𑀸𑀲𑀺𑀢𑀁;

𑀩𑀯𑁆𑀳𑀢𑁆𑀢𑁂 𑀩𑀳𑀼𑀏𑀓𑀢𑁆𑀢𑁂, 𑀲𑀲𑀁𑀬𑁄𑀕𑀁 𑀲𑁆𑀲𑀣𑀢𑁆𑀢𑀬𑀁.

‘‘𑀢𑀼𑀫𑁆𑀳𑁂 𑀪𑀯𑀺𑀲𑁆𑀲𑀣𑀺’’𑀘𑁆𑀘𑁂𑀢𑀁, 𑀪𑀯𑀺𑀲𑁆𑀲𑀦𑁆𑀢𑀺𑀬𑀢𑁄 𑀫𑀢𑀁;

‘‘𑀅𑀪𑀯𑀺𑀲𑁆𑀲𑀣 𑀢𑀼𑀫𑁆𑀳𑁂’’𑀢𑀺, ‘‘𑀅𑀪𑀯𑀺𑀲𑁆𑀲𑀣 𑀲𑁄’’𑀢𑀺 𑀘;

𑀓𑀸𑀮𑀸𑀢𑀺𑀧𑀢𑁆𑀢𑀺𑀢𑁄 𑀯𑀼𑀢𑁆𑀢𑀁, 𑀏𑀢𑀜𑁆𑀳𑀺 𑀯𑀘𑀦𑀤𑁆𑀯𑀬𑀁.

𑀪𑀯𑀺𑀲𑁆𑀲𑀦𑁆𑀢𑀺𑀬𑀓𑀸𑀮𑀸𑀢𑀺-𑀧𑀢𑁆𑀢𑀻𑀲𑀼 𑀲𑀫𑀼𑀤𑀻𑀭𑀺𑀢𑀁;

𑀫𑀚𑁆𑀛𑀺𑀫𑀧𑀼𑀭𑀺𑀲𑀝𑁆𑀞𑀸𑀦𑁂, 𑀲𑀲𑀁𑀬𑁄𑀕𑀁 𑀲𑁆𑀲𑀲𑁂𑀬𑀼𑀕𑀁.

‘‘𑀪𑀯𑀺𑀲𑁆𑀲𑀲𑁂 𑀢𑁆𑀯’’𑀫𑀺𑀘𑁆𑀘𑁂𑀢𑀁, ‘‘𑀢𑁆𑀯𑀁 𑀅𑀪𑀯𑀺𑀲𑁆𑀲𑀲𑁂’’𑀢𑀺 𑀘;

𑀇𑀫𑀸𑀦𑀺 𑀢𑀼 𑀧𑀬𑁄𑀕𑀸𑀦𑀺, 𑀢𑀢𑁆𑀣 𑀯𑀺𑀜𑁆𑀜𑀽 𑀧𑀓𑀸𑀲𑀬𑁂.

𑀲𑁆𑀲𑀯𑁆𑀳𑁂𑀤𑁆𑀯𑀬𑀁 𑀲𑁂𑀦 𑀬𑀼𑀢𑀁, 𑀲𑁆𑀲𑀁𑀤𑁆𑀯𑀬𑀜𑁆𑀘 𑀘𑀢𑀼𑀓𑁆𑀓𑀓𑀁;

𑀇𑀤𑀫𑁆𑀧𑀺 𑀓𑀣𑀺𑀢𑀁 𑀤𑁆𑀯𑀻𑀲𑀼, 𑀬𑀣𑀸𑀭𑀼𑀢𑀯𑀺𑀪𑀢𑁆𑀢𑀺𑀲𑀼.

‘‘𑀪𑀯𑀺𑀲𑁆𑀲𑀯𑁆𑀳𑁂’’𑀢𑀺 𑀩𑀯𑁆𑀳𑀢𑁆𑀢𑁂, 𑀪𑀯𑀺𑀲𑁆𑀲𑀦𑁆𑀢𑀺𑀓𑀫𑀚𑁆𑀛𑀺𑀫𑁄;

𑀩𑀯𑁆𑀳𑀢𑁆𑀢𑁂 ‘‘𑀅𑀪𑀯𑀺𑀲𑁆𑀲𑀯𑁆𑀳𑁂’’, 𑀓𑀸𑀮𑀸𑀢𑀺𑀧𑀢𑁆𑀢𑀺𑀫𑀚𑁆𑀛𑀺𑀫𑁄.

‘‘𑀪𑀯𑀺𑀲𑁆𑀲𑀁’’ 𑀇𑀢𑀺 𑀏𑀓𑀢𑁆𑀢𑁂, 𑀪𑀯𑀺𑀲𑁆𑀲𑀦𑁆𑀢𑀺𑀓𑀫𑀼𑀢𑁆𑀢𑀫𑁄;

‘‘𑀅𑀪𑀯𑀺𑀲𑁆𑀲’’𑀦𑁆𑀢𑀺 𑀏𑀓𑀢𑁆𑀢𑁂, 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀼𑀢𑁆𑀢𑀫𑁄.

𑀇𑀢𑀺 𑀯𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑁂𑀳𑀺, 𑀯𑀘𑀦𑁂𑀳𑀺 𑀲𑀫𑀸𑀦𑀢𑀁;

𑀬𑀦𑁆𑀢𑁂’𑀓𑀘𑁆𑀘𑁂𑀳𑀺 𑀢𑀁 𑀲𑀩𑁆𑀩𑀁, 𑀏𑀓𑀢𑀸𑀮𑀻𑀲𑀥𑀸 𑀞𑀺𑀢𑀁.

𑀲𑁂𑀲𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲, 𑀅𑀲𑀫𑀸𑀦𑀸𑀦𑀺 𑀲𑀩𑁆𑀩𑀣𑀸;

𑀏𑀢𑀁 𑀦𑀬𑀁 𑀕𑀳𑁂𑀢𑁆𑀯𑀸𑀦, 𑀯𑀤𑁂 𑀲𑀩𑁆𑀩𑀢𑁆𑀣 𑀲𑀫𑁆𑀪𑀯𑀸𑀢𑀺.

𑀅𑀬𑀫𑁂𑀢𑁆𑀣 𑀲𑀫𑀸𑀦𑀸𑀲𑀫𑀸𑀦𑀯𑀲𑁂𑀦 𑀯𑀘𑀦𑀲𑀗𑁆𑀕𑀳𑁄.

𑀆𑀕𑀫𑀮𑀓𑁆𑀔𑀡𑀯𑀲𑁂𑀦 ¶ 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁂 𑀏𑀯𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀁 𑁋

𑀪𑀯𑀺𑀲𑁆𑀲𑀦𑁆𑀢𑀻𑀧𑀭𑁄𑀓𑁆𑀔𑀚𑁆𑀚-𑀢𑀦𑀻𑀓𑀸𑀮𑀸𑀢𑀺𑀧𑀢𑁆𑀢𑀺𑀲𑀼;

𑀦𑀺𑀘𑁆𑀘𑀁 𑀓𑁆𑀯𑀘𑀺 𑀓𑁆𑀯𑀘𑀸’𑀦𑀺𑀘𑁆𑀘𑀁, 𑀇𑀓𑀸𑀭𑀸𑀕𑀫𑀦𑀁 𑀪𑀯𑁂.

𑀇𑀓𑀸𑀭𑀸𑀕𑀫𑀦𑀁 𑀢𑀜𑁆𑀳𑀺, 𑀧𑀭𑁄𑀓𑁆𑀔𑀸𑀬𑀁 𑀯𑀺𑀪𑀢𑁆𑀢𑀺𑀬𑀁;

𑀩𑀯𑁆𑀳𑀢𑁆𑀢𑁂 𑀫𑀚𑁆𑀛𑀺𑀫𑀝𑁆𑀞𑀸𑀦𑁂, 𑀩𑀯𑁆𑀳𑀢𑁆𑀢𑁂 𑀘𑀼𑀢𑁆𑀢𑀫𑁂 𑀲𑀺𑀬𑀸;

𑀧𑀭𑀲𑁆𑀲𑀧𑀤𑀁 𑀲𑀦𑁆𑀥𑀸𑀬, 𑀇𑀤𑀁 𑀯𑀘𑀦𑀫𑀻𑀭𑀺𑀢𑀁.

𑀉𑀢𑁆𑀢𑀫𑁂𑀓𑀯𑀘𑁄 𑀘𑀸𑀧𑀺, 𑀦𑁂𑀢𑀲𑁆𑀲 𑀅𑀢𑁆𑀢𑀦𑁄𑀧𑀤𑁂;

𑀳𑁄𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀁, 𑀪𑀯𑀺𑀲𑁆𑀲𑀦𑁆𑀢𑀺𑀫𑁆𑀳𑀺 𑀲𑀩𑁆𑀩𑀲𑁄.

𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀺𑀓-𑀓𑀸𑀮𑀸𑀢𑀺𑀧𑀢𑁆𑀢𑀻𑀲𑀼 𑀧𑀦;

𑀅𑀓𑀸𑀭𑀸𑀕𑀫𑀦𑀁 𑀳𑁄𑀢𑀺, 𑀲𑀩𑁆𑀩𑀲𑁄 𑀇𑀢𑀺 𑀮𑀓𑁆𑀔𑀬𑁂.

𑀅𑀚𑁆𑀚𑀢𑀦𑀺𑀫𑁆𑀳𑀺 𑀩𑀯𑁆𑀳𑀢𑁆𑀢𑁂, 𑀫𑀚𑁆𑀛𑀺𑀫𑁂 𑀉𑀢𑁆𑀢𑀫𑁂 𑀢𑀣𑀸;

𑀩𑀯𑁆𑀳𑀢𑁆𑀢𑀫𑁆𑀳𑀺 𑀅𑀓𑀸𑀭𑁂𑀦, 𑀇𑀓𑀸𑀭𑀸𑀕𑀫𑀦𑀁 𑀪𑀯𑁂.

𑀇𑀓𑀸𑀭𑀸𑀕𑀫𑀦𑀁 𑀦𑀺𑀘𑁆𑀘𑀁, 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀁 𑀪𑀯𑁂;

𑀅𑀓𑀸𑀭𑀸𑀕𑀫𑀦𑀁 𑀢𑀢𑁆𑀣, 𑀅𑀦𑁂𑀓𑀦𑁆𑀢𑀺𑀓𑀫𑀻𑀭𑀺𑀢𑀁.

𑀅𑀓𑀸𑀭𑀸𑀕𑀫𑀦𑀁𑀬𑁂𑀯, 𑀳𑀺𑀬𑁆𑀬𑀢𑁆𑀢𑀦𑁆𑀬𑀁 𑀧𑀓𑀸𑀲𑀢𑀺;

𑀧𑀭𑁄𑀓𑁆𑀔𑀸𑀬𑀁 𑀪𑀯𑀺𑀲𑁆𑀲𑀦𑁆𑀢𑁆𑀬-𑀜𑁆𑀘𑀺𑀓𑀸𑀭𑁄𑀬𑁂𑀯 𑀤𑀺𑀲𑁆𑀲𑀢𑀺.

𑀅𑀓𑀸𑀭𑀸𑀕𑀫𑀦𑀜𑁆𑀘𑁂𑀯, 𑀇𑀓𑀸𑀭𑀸𑀕𑀫𑀦𑀫𑁆𑀧𑀺 𑀘;

𑀅𑀚𑁆𑀚𑀢𑀦𑀺𑀓𑀓𑀸𑀮𑀸𑀢𑀺-𑀧𑀢𑁆𑀢𑀻𑀲𑀼 𑀧𑀦 𑀤𑀺𑀲𑁆𑀲𑀢𑀺.

𑀢𑀻𑀲𑀼 𑀲𑁂𑀲𑀯𑀺𑀪𑀢𑁆𑀢𑀻𑀲𑀼, 𑀦𑀸’𑀓𑀸𑀭𑀢𑁆𑀢𑀬𑀫𑀻𑀭𑀺𑀢𑀁;

𑀯𑀢𑁆𑀢𑀫𑀸𑀦𑀸𑀬 𑀧𑀜𑁆𑀘𑀫𑁆𑀬𑀁, 𑀲𑀢𑁆𑀢𑀫𑀺𑀬𑀦𑁆𑀢𑀺 𑀲𑀩𑁆𑀩𑀲𑁄.

𑀇𑀓𑀸𑀭𑁂𑀦𑁂𑀯 𑀲𑀳𑀺𑀢𑀸, 𑀤𑁆𑀯𑁂 𑀪𑀯𑀦𑁆𑀢𑀺 𑀯𑀺𑀪𑀢𑁆𑀢𑀺𑀬𑁄;

𑀲𑀢𑁆𑀢 𑀤𑁆𑀯𑀸𑀤𑀲 𑀳𑁄𑀦𑁆𑀢𑁂𑀢𑁆𑀣, 𑀯𑀘𑀦𑀸𑀦𑀻𑀢𑀺 𑀮𑀓𑁆𑀔𑀬𑁂.

𑀅𑀓𑀸𑀭𑁂𑀦𑁂𑀯 𑀲𑀳𑀺𑀢𑀸, 𑀏𑀓𑀸𑀬𑁂𑀯 𑀯𑀺𑀪𑀢𑁆𑀢𑀺 𑀢𑀼;

𑀤𑁆𑀯𑀸𑀤𑀲 𑀯𑀘𑀦𑀸𑀦𑁂𑀢𑁆𑀣, 𑀪𑀯𑀦𑁆𑀢𑀻𑀢𑀺 𑀘 𑀮𑀓𑁆𑀔𑀬𑁂.

𑀅𑀓𑀸𑀭𑀺𑀓𑀸𑀭𑀲𑀳𑀺𑀢𑀸 ¶ , 𑀤𑀼𑀯𑁂𑀬𑁂𑀯 𑀯𑀺𑀪𑀢𑁆𑀢𑀺𑀬𑁄;

𑀘𑀢𑁆𑀢𑀸𑀭𑀺 𑀤𑁆𑀯𑀸𑀤𑀲𑀜𑁆𑀘𑁂𑀯, 𑀯𑀘𑀦𑀸𑀦𑀺 𑀪𑀯𑀦𑁆𑀢𑀺𑀥.

𑀆𑀓𑀸𑀭𑀢𑁆𑀢𑀬𑀫𑀼𑀢𑁆𑀢𑀸 𑀢𑀼, 𑀢𑀺𑀲𑁆𑀲𑁄𑀬𑁂𑀯 𑀯𑀺𑀪𑀢𑁆𑀢𑀺𑀬𑁄;

𑀯𑀘𑀦𑀸𑀦𑁂𑀢𑁆𑀣 𑀙𑀢𑁆𑀢𑀺𑀁𑀲, 𑀳𑁄𑀦𑁆𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑀧𑀭𑁄𑀓𑁆𑀔𑀸𑀅𑀚𑁆𑀚𑀢𑀦𑀻𑀲𑀼, 𑀧𑀜𑁆𑀘𑀝𑁆𑀞 𑀘 𑀬𑀣𑀸𑀓𑁆𑀓𑀫𑀁;

𑀇𑀓𑀸𑀭𑀢𑁄 𑀯𑀺𑀫𑀼𑀢𑁆𑀢𑀸𑀦𑀺, 𑀯𑀘𑀦𑀸𑀦𑀺 𑀪𑀯𑀦𑁆𑀢𑀺𑀢𑀺.

𑀏𑀯𑀫𑁂𑀢𑁆𑀣 𑀯𑀺𑀪𑀢𑁆𑀢𑀻𑀦𑀁, 𑀙𑀦𑁆𑀦𑀯𑀼𑀢𑀺𑀯𑀺𑀥𑀸𑀦 𑀘;

𑀲𑀗𑁆𑀕𑀳𑁄 𑀯𑀘𑀦𑀸𑀦𑀦𑁆𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸𑀢𑀺.

𑀅𑀬𑀫𑁂𑀢𑁆𑀣 𑀆𑀕𑀫𑀮𑀓𑁆𑀔𑀡𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄.

𑀓𑀸𑀮𑀯𑀲𑁂𑀦 𑀧𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁂 𑀤𑀼𑀯𑀺𑀥𑁄 𑀲𑀗𑁆𑀕𑀳𑁄 𑀓𑀸𑀮𑀢𑁆𑀢𑀬𑀯𑀲𑁂𑀦 𑀲𑀗𑁆𑀕𑀳𑁄, 𑀓𑀸𑀮𑀙𑀓𑁆𑀓𑀯𑀲𑁂𑀦 𑀲𑀗𑁆𑀕𑀳𑁄 𑀘𑀸𑀢𑀺. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸, 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀸𑀦𑀺. 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀅𑀢𑀻𑀢𑀓𑀸𑀮𑀺𑀓𑀸, 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀅𑀢𑀻𑀢𑀯𑀘𑀦𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺 𑀅𑀦𑀸𑀕𑀢𑀓𑀸𑀮𑀺𑀓𑀸, 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀅𑀦𑀸𑀕𑀢𑀯𑀘𑀦𑀸𑀦𑀺. 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺 𑀧𑀦 𑀓𑀢𑁆𑀣𑀘𑀺 𑀅𑀢𑀻𑀢𑀓𑀸𑀮𑀺𑀓𑀸 𑀓𑀢𑁆𑀣𑀘𑀺 𑀅𑀦𑀸𑀕𑀢𑀓𑀸𑀮𑀺𑀓𑀸, 𑀢𑀲𑁆𑀫𑀸 𑀢𑀤𑀦𑁆𑀢𑀸𑀦𑀺 𑀧𑀤𑀸𑀦𑀺 𑀅𑀢𑀻𑀢𑀯𑀘𑀦𑀸𑀦𑀺𑀧𑀺 𑀅𑀦𑀸𑀕𑀢𑀯𑀘𑀦𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀅𑀬𑀁 𑀓𑀸𑀮𑀢𑁆𑀢𑀬𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄.

𑀅𑀬𑀁 𑀧𑀦 𑀓𑀸𑀮𑀙𑀓𑁆𑀓𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄 𑁋 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀅𑀢𑀻𑀢𑀓𑀸𑀮𑀺𑀓𑀸, 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀅𑀢𑀻𑀢𑀯𑀘𑀦𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺 𑀅𑀦𑀸𑀕𑀢𑀓𑀸𑀮𑀺𑀓𑀸, 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀅𑀦𑀸𑀕𑀢𑀯𑀘𑀦𑀸𑀦𑀺. 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸, 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀸𑀦𑀺. 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀆𑀡𑀢𑁆𑀢𑀺𑀓𑀸𑀮𑀺𑀓𑀸 ¶ , 𑀧𑀜𑁆𑀘𑀫𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀆𑀡𑀢𑁆𑀢𑀺𑀯𑀘𑀦𑀸𑀦𑀺. 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀧𑀭𑀺𑀓𑀧𑁆𑀧𑀓𑀸𑀮𑀺𑀓𑀸, 𑀲𑀢𑁆𑀢𑀫𑀻𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀺. 𑀏𑀢𑁆𑀣 𑀧𑀦 ‘‘𑀆𑀡𑀢𑁆𑀢𑀺𑀯𑀘𑀦𑀸𑀦𑀻’’𑀢𑀺 𑀘 ‘‘𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀻’’𑀢𑀺 𑀘 𑀇𑀤𑀁 𑀢𑀣𑀸𑀲𑀻𑀲𑀫𑀢𑁆𑀢𑀁 𑀆𑀲𑀺𑀝𑁆𑀞𑀸𑀦𑀼𑀫𑀢𑁆𑀬𑀸𑀤𑀻𑀲𑀼 𑀧𑀜𑁆𑀘𑀫𑁆𑀬𑀸𑀤𑀻𑀦𑀁 𑀤𑀺𑀲𑁆𑀲𑀦𑀢𑁄. 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀸𑀮𑀺𑀓𑀸, 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀧𑀤𑀸𑀦𑀺 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀘𑀦𑀸𑀦𑀺. 𑀏𑀯𑀁 𑀓𑀸𑀮𑀙𑀓𑁆𑀓𑀯𑀲𑁂𑀦 𑀯𑀺𑀪𑀢𑁆𑀢𑀺𑀯𑀘𑀦𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀮𑀲𑀗𑁆𑀕𑀳𑁂 𑀢𑀺𑀯𑀺𑀥𑁄 𑀓𑀸𑀮𑀲𑀗𑁆𑀕𑀳𑁄 𑀓𑀸𑀮𑀢𑁆𑀢𑀬𑀲𑀗𑁆𑀕𑀳𑁄 𑀓𑀸𑀮𑀘𑀢𑀼𑀓𑁆𑀓𑀲𑀗𑁆𑀕𑀳𑁄 𑀓𑀸𑀮𑀙𑀓𑁆𑀓𑀲𑀗𑁆𑀕𑀳𑁄 𑀘𑀸𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀸, 𑀧𑀜𑁆𑀘𑀫𑀻 𑀲𑀢𑁆𑀢𑀫𑀻 𑀘𑀺𑀫𑀸;

𑀳𑁄𑀦𑁆𑀢𑀸𑀢𑀻𑀢𑁂 𑀧𑀭𑁄𑀓𑁆𑀔𑀸𑀤𑀻, 𑀲𑀳 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸.

𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻, 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀸𑀧𑀺 𑀯𑀸;

𑀏𑀯𑀁 𑀓𑀸𑀮𑀢𑁆𑀢𑀬𑀁 𑀜𑁂𑀬𑁆𑀬𑀁, 𑀆𑀔𑁆𑀬𑀸𑀢𑀁 𑀢𑀧𑁆𑀧𑀓𑀸𑀲𑀓𑀁.

𑀦𑀦𑀼 𑀓𑀘𑁆𑀘𑀸𑀬𑀦𑁂 𑀕𑀦𑁆𑀣𑁂, 𑀓𑀸𑀮𑁄 𑀯𑀼𑀢𑁆𑀢𑁄 𑀘𑀢𑀼𑀩𑁆𑀩𑀺𑀥𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀼𑀢𑁆𑀢𑀓𑀸𑀮𑁂, 𑀅𑀢𑀻𑀢𑁂𑀦𑀸𑀕𑀢𑁂 𑀇𑀢𑀺.

𑀲𑀘𑁆𑀘𑀁 𑀯𑀼𑀢𑁆𑀢𑁄 𑀦𑀼𑀢𑁆𑀢𑀓𑀸𑀮𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀇𑀘𑁆𑀙𑀺𑀢𑁄;

𑀲𑀫𑀻𑀧𑁂 𑀯𑀼𑀢𑁆𑀢𑀓𑀸𑀮𑁄𑀢𑀺, 𑀅𑀢𑁆𑀣𑀲𑀫𑁆𑀪𑀯𑀢𑁄 𑀧𑀦.

𑀢𑀣𑀸 𑀳𑀺 ‘‘𑀬𑀁 𑀢𑀺𑀓𑀸𑀮’’𑀦𑁆𑀢𑀺, 𑀯𑀼𑀢𑁆𑀢𑀫𑀸𑀘𑀭𑀺𑀬𑁂𑀳𑀺𑀧𑀺;

𑀦 𑀓𑀸𑀮𑀢𑁄 𑀯𑀺𑀦𑀺𑀫𑀼𑀢𑁆𑀢𑀁, 𑀆𑀔𑁆𑀬𑀸𑀢𑀁 𑀓𑀺𑀜𑁆𑀘𑀺 𑀤𑀺𑀲𑁆𑀲𑀢𑀺.

𑀦𑀦𑀼 𑀘𑀸𑀯𑀼𑀢𑁆𑀢𑀓𑀸𑀮𑁂𑀢𑀺, 𑀅𑀢𑁆𑀣𑁄 𑀢𑀢𑁆𑀭 𑀢𑀼 𑀬𑀼𑀚𑁆𑀚𑀢𑀺;

𑀢𑀣𑀸 𑀳𑀺 𑀙𑀩𑁆𑀩𑀺𑀥𑁄 𑀓𑀸𑀮𑁄, 𑀦𑀺𑀭𑀼𑀢𑁆𑀢𑀺𑀫𑁆𑀳𑀺 𑀧𑀓𑀸𑀲𑀺𑀢𑁄.

𑀅𑀢𑀻𑀢𑀸𑀦𑀸𑀕𑀢𑁄 𑀧𑀘𑁆𑀘𑀼-𑀧𑁆𑀧𑀦𑁆𑀦𑁄 𑀆𑀡𑀢𑁆𑀢𑀺𑀫𑁂𑀯 𑀘;

𑀧𑀭𑀺𑀓𑀧𑁆𑀧𑁄 𑀘 𑀓𑀸𑀮𑀲𑁆𑀲, 𑀅𑀢𑀺𑀧𑀢𑁆𑀢𑀻𑀢𑀺 𑀙𑀩𑁆𑀩𑀺𑀥𑁄.

𑀤𑀼𑀯𑁂 𑀯𑀺𑀪𑀢𑁆𑀢𑀺𑀬𑁄 𑀢𑀢𑁆𑀣, 𑀆𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀺𑀓𑀸;

𑀓𑀸𑀮𑀫𑀦𑀸𑀫𑀲𑀺𑀢𑁆𑀯𑀸𑀧𑀺, 𑀦𑀺𑀭𑀼𑀢𑁆𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

‘‘𑀕𑀘𑁆𑀙𑀢𑀼 ¶ 𑀕𑀘𑁆𑀙𑁂𑀬𑁆𑀬𑀺’’𑀘𑁆𑀘𑀸𑀤𑀺-𑀯𑀘𑀦𑁂 𑀓𑀣𑀺𑀢𑁂 𑀦 𑀳𑀺;

𑀓𑁆𑀭𑀺𑀬𑀸 𑀦𑀺𑀧𑁆𑀨𑀚𑁆𑀚𑀢𑀺 𑀦𑀺𑀝𑁆𑀞𑀁, 𑀦𑀸𑀕𑀢𑀸 𑀦𑀸𑀢𑀺𑀧𑀦𑁆𑀦𑀺𑀓𑀸.

𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀸 𑀲𑀤𑁆𑀤𑀸, 𑀅𑀢𑀻𑀢𑁂𑀦𑀸𑀕𑀢𑁂𑀧𑀺 𑀘;

𑀪𑀯𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀸, 𑀦𑀺𑀭𑀼𑀢𑁆𑀢𑀺𑀫𑁆𑀳𑀺 𑀯𑀺𑀤𑀽𑀳𑀺 𑀯𑁂.

𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀯𑁆𑀳𑀺𑀢𑀸, 𑀆𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀺𑀓𑀸;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀪𑀯𑀦𑁆𑀢𑀻𑀢𑀺, 𑀦 𑀢𑀣𑀸 𑀢𑀢𑁆𑀣 𑀪𑀸𑀲𑀺𑀢𑀸.

𑀢𑀲𑁆𑀫𑀸 𑀓𑀘𑁆𑀘𑀸𑀬𑀦𑁂 𑀕𑀦𑁆𑀣𑁂, ‘‘𑀦𑀼𑀢𑁆𑀢𑀓𑀸𑀮𑁂’’𑀢𑀺 𑀬𑀁 𑀧𑀤𑀁;

𑀅𑀢𑁆𑀣𑁄 ‘‘𑀅𑀯𑀼𑀢𑁆𑀢𑀓𑀸𑀮𑁂’’𑀢𑀺, 𑀢𑀲𑁆𑀲 𑀜𑀸𑀬𑀢𑀺𑀫𑁂𑀯𑀺𑀤𑀁.

𑀲𑀘𑁆𑀘𑀫𑁂𑀯𑀁 𑀢𑀼 𑀲𑀦𑁆𑀢𑁂𑀧𑀺, 𑀆𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀺𑀓𑀸;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀤𑀝𑁆𑀞𑀩𑁆𑀩𑀸, 𑀧𑀡𑁆𑀟𑀺𑀢𑁂𑀦 𑀦𑀬𑀜𑁆𑀜𑀼𑀦𑀸.

𑀓𑀲𑁆𑀫𑀸𑀢𑀺 𑀘𑁂 𑀆𑀡𑀸𑀧𑀦𑀁, 𑀧𑀭𑀺𑀓𑀧𑁆𑀧𑁄 𑀘 𑀲𑀘𑁆𑀘𑀢𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀬𑀢𑁄 𑀅𑀢𑁆𑀣𑀸, 𑀦𑀺𑀧𑁆𑀨𑀦𑁆𑀦𑀸 𑀤𑀺𑀲𑁆𑀲𑀭𑁂 𑀇𑀫𑁂.

‘‘𑀅𑀦𑀼𑀢𑁆𑀢𑀓𑀸𑀮𑁂’’𑀢𑀺 𑀧𑀤𑀁, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀚𑁄𑀢𑀓𑀁;

‘‘𑀲𑀫𑀻𑀧𑁂 𑀯𑀼𑀢𑁆𑀢𑀓𑀸𑀮𑁂’’𑀢𑀺, 𑀅𑀢𑁆𑀣𑀤𑀻𑀧𑀦𑀢𑁄𑀣 𑀯𑀸.

𑀅𑀢𑁆𑀣𑀸𑀦𑀁 𑀕𑀫𑀦𑀸𑀤𑀻𑀦𑀁, 𑀦𑀺𑀧𑁆𑀨𑀢𑁆𑀢𑀺 𑀦 𑀢𑀼 𑀤𑀺𑀲𑁆𑀲𑀢𑀺;

‘‘𑀕𑀘𑁆𑀙𑀢𑀼 𑀕𑀘𑁆𑀙𑁂𑀬𑁆𑀬𑀺’’𑀘𑁆𑀘𑀸𑀤𑀺, 𑀯𑀼𑀢𑁆𑀢𑀓𑀸𑀮𑁂 𑀬𑀢𑁄 𑀢𑀢𑁄;

𑀅𑀯𑀼𑀢𑁆𑀢𑀓𑀸𑀮𑁂 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀤𑁆𑀤𑀻𑀧𑀓𑀯𑀺𑀪𑀢𑁆𑀢𑀺𑀬𑁄.

𑀓𑀸𑀮𑁄 𑀯𑀸 𑀯𑀼𑀢𑁆𑀢𑀓𑀸𑀮𑁄𑀢𑀺, 𑀇𑀘𑁆𑀘𑁂𑀯𑀁 𑀕𑀳𑀺𑀢𑁄 𑀇𑀥;

𑀤𑀓𑁆𑀔𑀺𑀡𑀸𑀲𑀼𑀤𑁆𑀥𑀺𑀧𑀸𑀞𑀫𑁆𑀳𑀺, 𑀓𑀢𑀸𑀯 𑀢𑀢𑀺𑀬𑀸 𑀅𑀬𑀁;

𑀓𑀸𑀮𑀤𑀻𑀧𑀦𑀢𑀸 𑀢𑀸𑀲𑀁, 𑀇𑀢𑀺 𑀬𑀼𑀚𑁆𑀚𑀢𑀺 𑀦𑀸𑀜𑁆𑀜𑀣𑀸.

𑀅𑀢𑁆𑀣𑀤𑁆𑀯𑀬𑀁 𑀧𑀓𑀸𑀲𑁂𑀢𑀼𑀁, 𑀕𑀦𑁆𑀣𑁂 𑀓𑀘𑁆𑀘𑀸𑀬𑀦𑀯𑁆𑀳𑀬𑁂;

𑀣𑁂𑀭𑁄 𑀓𑀘𑁆𑀘𑀸𑀬𑀦𑁄 ‘‘𑀦𑀼𑀢𑁆𑀢-𑀓𑀸𑀮𑁂’’𑀢𑀺 𑀧𑀤𑀫𑀩𑁆𑀭𑀯𑀺.

𑀏𑀯𑀁 𑀢𑀺𑀥𑀸 𑀘𑀢𑀼𑀥𑀸𑀧𑀺, 𑀯𑀼𑀢𑁆𑀢𑁄 𑀓𑀸𑀮𑀸𑀦 𑀲𑀗𑁆𑀕𑀳𑁄;

𑀙𑀥𑀸 𑀇𑀤𑀸𑀦𑀺 𑀓𑀸𑀮𑀸𑀦𑀁, 𑀲𑀗𑁆𑀕𑀳𑁄 𑀦𑀸𑀫 𑀦𑀺𑀬𑁆𑀬𑀢𑁂.

𑀯𑀺𑀪𑀢𑁆𑀢𑀺𑀬𑁄 ¶ 𑀧𑀭𑁄𑀓𑁆𑀔𑀸 𑀘, 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺𑀬𑁄;

𑀅𑀣 𑀅𑀚𑁆𑀚𑀢𑀦𑀻 𑀘𑀸𑀢𑀺, 𑀢𑀺𑀲𑁆𑀲𑁄’𑀢𑀻𑀢𑁂 𑀧𑀓𑀸𑀲𑀺𑀢𑀸.

𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻, 𑀪𑀯𑀢𑀻𑀢𑀺 𑀧𑀓𑀺𑀢𑁆𑀢𑀺𑀢𑀸;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀸, 𑀢𑀺𑀓𑀸𑀮𑁂 𑀧𑀜𑁆𑀘𑀥𑀸 𑀓𑀢𑀸.

𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀯𑁆𑀳𑀺𑀢𑀸, 𑀆𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀺𑀓𑀸;

𑀲𑀗𑁆𑀕𑀬𑁆𑀳𑀫𑀸𑀦𑀸 𑀢𑀸 𑀬𑀦𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀲𑀗𑁆𑀕𑀳𑀁.

𑀬𑀲𑁆𑀫𑀸 𑀧𑀜𑁆𑀘𑀫𑀺𑀪𑀽𑀢𑀸𑀬, 𑀯𑀢𑁆𑀢𑀫𑀸𑀦𑀸𑀬 𑀞𑀸𑀦𑀢𑁄;

𑀲𑀫𑀸𑀦𑀸 𑀧𑀜𑁆𑀘𑀫𑀻 𑀳𑁄𑀢𑀺, 𑀢𑀲𑁆𑀫𑀸 𑀲𑀸 𑀧𑀜𑁆𑀘𑀫𑀻 𑀫𑀢𑀸.

𑀲𑀢𑁆𑀢𑀫𑀻 𑀧𑀦 𑀓𑀺𑀜𑁆𑀘𑀸𑀧𑀺, 𑀲𑀫𑀸𑀦𑀸 𑀢𑀸𑀳𑀺 𑀲𑀢𑁆𑀢𑀫𑀸;

𑀳𑁄𑀢𑀺 𑀬𑀲𑁆𑀫𑀸 𑀢𑀢𑁄 𑀯𑀼𑀢𑁆𑀢𑀸, 𑀲𑀢𑁆𑀢𑀫𑀻𑀢𑁆𑀯𑁂𑀯 𑀦𑁄 𑀫𑀢𑀺.

𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸𑀤𑀻𑀳𑀺, 𑀬𑀚𑁆𑀚𑁂𑀯𑀁 𑀯𑀢𑁆𑀢𑀫𑀸𑀦𑀺𑀓𑀸;

𑀙𑀝𑁆𑀞𑀻 𑀪𑀯𑁂𑀬𑁆𑀬 𑀓𑀸𑀮𑀸𑀢𑀺-𑀧𑀢𑁆𑀢𑀺𑀓𑀸𑀢𑀻𑀢𑀯𑀸𑀘𑀺𑀓𑀸.

𑀧𑀜𑁆𑀘𑀫𑀻 𑀢𑀸𑀬 𑀙𑀝𑁆𑀞𑀲𑁆𑀲, 𑀢𑀼𑀮𑁆𑀬𑀢𑁆𑀢𑀸 𑀞𑀸𑀦𑀢𑁄 𑀦𑀦𑀼;

𑀢𑀸𑀳𑀺 𑀲𑀢𑁆𑀢𑀯𑀺𑀪𑀢𑁆𑀢𑀻𑀳𑀺, 𑀲𑀢𑁆𑀢𑀫𑀻 𑀅𑀝𑁆𑀞𑀫𑀻 𑀲𑀺𑀬𑀸.

𑀇𑀢𑀺 𑀘𑁂 𑀓𑁄𑀘𑀺 𑀪𑀸𑀲𑁂𑀬𑁆𑀬, ‘‘𑀢𑀦𑁆𑀦𑀸’’𑀢𑀺 𑀧𑀝𑀺𑀲𑁂𑀥𑀬𑁂;

𑀅𑀢𑀻𑀢𑁂𑀦𑀸𑀕𑀢𑁂 𑀘𑀸𑀧𑀺, 𑀓𑀸𑀮𑀸𑀢𑀺𑀧𑀢𑁆𑀢𑀺𑀲𑀫𑁆𑀪𑀯𑀸.

𑀢𑀣𑀸 𑀳𑀺 𑀪𑀸𑀲𑀺𑀢𑀸 𑀘𑀽𑀴-𑀦𑀺𑀭𑀼𑀢𑁆𑀢𑀺𑀫𑁆𑀳𑀺 𑀯𑀺𑀲𑀼𑀁 𑀅𑀬𑀁;

𑀓𑀸𑀮𑀸𑀢𑀺𑀧𑀢𑁆𑀬𑀢𑀻𑀢𑀫𑁆𑀳𑀸-𑀦𑀸𑀕𑀢𑁂 𑀘𑀸𑀢𑀺 𑀤𑀻𑀧𑀬𑁂.

𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑁂𑀢𑀻𑀢𑁂𑀢𑀺, 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑁂 𑀭𑀼𑀢𑀁;

𑀅𑀣𑀸𑀧𑀺 𑀘𑁂 𑀯𑀤𑁂𑀬𑁆𑀬𑀢𑁆𑀭, ‘‘𑀧𑀸𑀬𑁂𑀦𑀸’’𑀢𑀺 𑀧𑀓𑀸𑀲𑀬𑁂.

𑀬𑁂𑀪𑀼𑀬𑁆𑀬𑁂𑀦 𑀳𑀺 𑀮𑁄𑀓𑀲𑁆𑀫𑀺𑀁, 𑀅𑀢𑀻𑀢𑀫𑁆𑀳𑀺 𑀧𑀯𑀢𑁆𑀢𑀢𑀺;

𑀓𑀸𑀮𑀸𑀢𑀺𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑁄, 𑀯𑁄𑀳𑀸𑀭𑁄 𑀇𑀢𑀺 𑀮𑀓𑁆𑀔𑀬𑁂.

𑀅𑀢𑁆𑀭𑀺𑀤𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀢𑀻𑀢𑀯𑀘𑀦𑀁 𑁋 ‘‘𑀲𑀘𑀸𑀬𑀁 𑀪𑀺𑀓𑁆𑀔𑀯𑁂 𑀭𑀸𑀚𑀸 𑀧𑀺𑀢𑀭𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑁆𑀲𑀣, 𑀇𑀫𑀲𑁆𑀫𑀺𑀁𑀬𑁂𑀯𑀲𑁆𑀲 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼 ¶ 𑀉𑀧𑁆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺. ‘‘𑀧𑀲𑁆𑀲𑀸𑀦𑀦𑁆𑀤 𑀇𑀫𑀁 𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀤𑁆𑀯𑁂𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀔𑁂𑀧𑁂𑀢𑁆𑀯𑀸 𑀪𑀭𑀺𑀬𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁. 𑀲𑀘𑁂 𑀳𑀺 𑀅𑀬𑀁 𑀧𑀞𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲𑀸, 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀕𑁆𑀕𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲𑀸. 𑀲𑀘𑁂 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸, 𑀪𑀭𑀺𑀬𑀸𑀧𑀺𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀸. 𑀲𑀘𑁂 𑀫𑀚𑁆𑀛𑀺𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲𑀸, 𑀤𑀼𑀢𑀺𑀬𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲𑀸. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀅𑀦𑀸𑀕𑀸𑀫𑀻 𑀅𑀪𑀯𑀺𑀲𑁆𑀲𑀸, 𑀪𑀭𑀺𑀬𑀸𑀧𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀸. 𑀲𑀘𑁂 𑀧𑀘𑁆𑀙𑀺𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲𑀸, 𑀢𑀢𑀺𑀬𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲𑀸. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀲𑀓𑀤𑀸𑀕𑀸𑀫𑀻 𑀅𑀪𑀯𑀺𑀲𑁆𑀲𑀸, 𑀪𑀭𑀺𑀬𑀸𑀧𑀺𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀸’’ 𑀇𑀢𑀺 𑀯𑀸, ‘‘𑀲𑀘𑁂 𑀲𑀢𑁆𑀣𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀸, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀪𑀯𑀺𑀲𑁆𑀲𑀸. 𑀭𑀸𑀳𑀼𑀮𑀲𑀸𑀫𑀡𑁂𑀭𑁄 𑀧𑀭𑀺𑀡𑀸𑀬𑀓𑀭𑀢𑀦𑀁, 𑀣𑁂𑀭𑀻 𑀇𑀢𑁆𑀣𑀺𑀭𑀢𑀦𑀁, 𑀲𑀓𑀮𑀘𑀓𑁆𑀓𑀯𑀸𑀴𑀭𑀚𑁆𑀚𑀁 𑀏𑀢𑁂𑀲𑀜𑁆𑀜𑁂𑀯 𑀅𑀪𑀯𑀺𑀲𑁆𑀲𑀸’’ 𑀇𑀢𑀺 𑀯𑀸 𑀏𑀯𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀢𑀻𑀢𑀯𑀘𑀦𑀁 𑀪𑀯𑀢𑀺.

𑀓𑀣𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀦𑀸𑀕𑀢𑀯𑀘𑀦𑀁 𑀪𑀯𑀢𑀺? ‘‘𑀘𑀺𑀭𑀫𑁆𑀧𑀺 𑀪𑀓𑁆𑀔𑁄 𑀅𑀪𑀯𑀺𑀲𑁆𑀲𑀸, 𑀲𑀘𑁂 𑀦 𑀯𑀺𑀯𑀤𑀸𑀫𑀲𑁂. 𑀅𑀲𑀻𑀲𑀓𑀁 𑀅𑀦𑀗𑁆𑀕𑀼𑀝𑁆𑀞𑀁, 𑀲𑀺𑀗𑁆𑀕𑀸𑀮𑁄 𑀳𑀭𑀢𑀺 𑀭𑁄𑀳𑀺𑀢𑀁’’𑀇𑀢𑀺𑀯𑀸, ‘‘𑀲𑀘𑁂 𑀆𑀦𑀦𑁆𑀤 𑀦𑀸𑀮𑀪𑀺𑀲𑁆𑀲𑀸 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀘𑀺𑀭𑀝𑁆𑀞𑀺𑀢𑀺𑀓𑀁 𑀆𑀦𑀦𑁆𑀤 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀯𑀺𑀲𑁆𑀲𑀸’’𑀢𑀺 𑀇𑀢𑀺 𑀯𑀸, ‘‘𑀅𑀬𑀁 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀫𑀸𑀢𑀸 ‘𑀅𑀗𑁆𑀕𑀼𑀮𑀺𑀫𑀸𑀮𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀕𑀘𑁆𑀙𑀢𑀺, 𑀲𑀘𑁂 𑀲𑀫𑀸𑀕𑀫𑀺𑀲𑁆𑀲𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮𑁄 ‘𑀅𑀗𑁆𑀕𑀼𑀮𑀺𑀲𑀳𑀲𑁆𑀲𑀁 𑀧𑀽𑀭𑁂𑀲𑁆𑀲𑀸𑀫𑀻’𑀢𑀺 𑀫𑀸𑀢𑀭𑀁 𑀫𑀸𑀭𑁂𑀲𑁆𑀲𑀢𑀺. 𑀲𑀘𑀸𑀳𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀳𑀸𑀚𑀸𑀦𑀺𑀓𑁄 𑀅𑀪𑀯𑀺𑀲𑁆𑀲𑀸’’ 𑀇𑀢𑀺 𑀯𑀸 𑀏𑀯𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀅𑀦𑀸𑀕𑀢𑀯𑀘𑀦𑀁 𑀪𑀯𑀢𑀺 ¶ . 𑀓𑀘𑁆𑀘𑀸𑀬𑀦𑁂 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀅𑀢𑀻𑀢𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺𑀬𑀸 𑀅𑀢𑀻𑀢𑀓𑀸𑀮𑀺𑀓𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀘𑁆𑀘𑀸𑀬𑀦𑁂𑀧𑀺 𑀯𑀸 𑀏𑀲𑀸, 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀸 𑀧𑀦;

𑀅𑀦𑀸𑀕𑀢𑁂𑀧𑀺 𑀳𑁄𑀢𑀻𑀢𑀺, 𑀅𑀬𑀫𑀢𑁆𑀣𑁄𑀧𑀺 𑀤𑀺𑀲𑁆𑀲𑀢𑀺.

𑀅𑀧𑁆𑀧𑀘𑁆𑀘𑀓𑁆𑀔𑁂 𑀧𑀭𑁄𑀓𑁆𑀔𑀸𑀬-𑀢𑀻𑀢𑁂 𑀇𑀢𑀺 𑀳𑀺 𑀮𑀓𑁆𑀔𑀡𑁂;

𑀲𑀦𑁆𑀢𑁂𑀧𑁆𑀬𑀢𑀻𑀢𑀕𑁆𑀕𑀳𑀡𑁂, 𑀅𑀦𑀧𑁂𑀓𑁆𑀔𑀺𑀬 𑀢𑀁 𑀇𑀤𑀁.

𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻, 𑀇𑀢𑀺 𑀲𑀼𑀢𑁆𑀢𑀲𑁆𑀲𑀦𑀦𑁆𑀢𑀭𑀁;

𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀘𑀦𑀸, 𑀅𑀦𑀸𑀕𑀢𑀸𑀦𑀼𑀓𑀟𑁆𑀠𑀦𑀁;

𑀢𑀲𑁆𑀫𑀸 𑀅𑀦𑀺𑀬𑀢𑀁 𑀓𑀸𑀮𑀁, 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀁 𑀯𑀺𑀦𑀸.

𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼-𑀧𑁆𑀧𑀦𑁆𑀦𑀺𑀓𑀸𑀳𑀺 𑀯𑀺𑀪𑀢𑁆𑀢𑀺𑀳𑀺;

𑀲𑀢𑁆𑀢𑀫𑀻 𑀲𑀢𑁆𑀢𑀫𑀻𑀬𑁂𑀯, 𑀪𑀯𑀢𑁂 𑀦 𑀢𑀼 𑀅𑀝𑁆𑀞𑀫𑀻.

𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀦𑀁 𑀢𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀬𑀁;

𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑁂𑀢𑀸𑀲𑀁, 𑀫𑀚𑁆𑀛𑁂 𑀙𑀝𑁆𑀞𑀻 𑀦 𑀯𑀼𑀘𑁆𑀘𑀢𑀺.

𑀢𑀣𑀸 𑀧𑀜𑁆𑀘 𑀉𑀧𑀸𑀤𑀸𑀬, 𑀪𑀯𑀺𑀢𑀩𑁆𑀩𑀜𑁆𑀘 𑀙𑀝𑁆𑀞𑀺𑀬𑀸;

𑀧𑀜𑁆𑀘𑀫𑀺𑀬𑀸 𑀢𑀼 𑀲𑀸 𑀏𑀲𑀸, ‘‘𑀙𑀝𑁆𑀞𑀻’’𑀢𑀺 𑀦 𑀲𑀫𑀻𑀭𑀺𑀢𑀸.

𑀙𑀝𑁆𑀞𑀻𑀪𑀸𑀯𑀫𑁆𑀳𑀺 𑀲𑀦𑁆𑀢𑁂𑀧𑀺, ‘‘𑀧𑀜𑁆𑀘𑀫𑀻’’𑀢𑀺 𑀯𑀘𑁄 𑀧𑀦;

𑀧𑀜𑁆𑀘𑀫𑀺𑀬𑀸 𑀯𑀺𑀪𑀢𑁆𑀢𑀺𑀬𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀬𑀁.

𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸;

𑀧𑀜𑁆𑀘𑀫𑀺𑀁 𑀢𑀼 𑀉𑀧𑀸𑀤𑀸𑀬, 𑀲𑀢𑁆𑀢𑀫𑀺𑀬𑀸 𑀯𑀺𑀪𑀢𑁆𑀢𑀺𑀬𑀸.

𑀙𑀝𑁆𑀞𑀺𑀬𑀸 𑀘 𑀪𑀯𑀺𑀢𑀩𑁆𑀩𑀁, 𑀦 𑀲𑀸 ‘‘𑀙𑀝𑁆𑀞𑀻’’𑀢𑀺 𑀈𑀭𑀺𑀢𑀸;

𑀙𑀝𑁆𑀞𑀺𑀁 𑀧𑀦 𑀉𑀧𑀸𑀤𑀸𑀬, ‘‘𑀲𑀢𑁆𑀢𑀫𑀻’’𑀢𑁆𑀯𑁂𑀯 𑀈𑀭𑀺𑀢𑀸.

𑀫𑀚𑁆𑀛𑁂 𑀙𑀝𑁆𑀞𑀺𑀁 𑀅𑀤𑀲𑁆𑀲𑁂𑀢𑁆𑀯𑀸, 𑀏𑀯𑀁 𑀢𑀼 𑀓𑀣𑀦𑀫𑁆𑀧𑀺 𑀘;

𑀲𑀢𑁆𑀢𑀫𑀺𑀬𑀸 𑀯𑀺𑀪𑀢𑁆𑀢𑀺𑀬𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀬𑀁;

𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺, 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑀬𑁂.

𑀲𑀪𑀸𑀯𑁄 𑀳𑁂𑀲 𑀯𑀢𑁆𑀣𑀽𑀦𑀁, 𑀕𑀫𑁆𑀪𑀻𑀭𑀢𑁆𑀣𑁂𑀲𑀼 𑀅𑀢𑁆𑀢𑀦𑁄;

𑀬𑁂𑀦 𑀓𑁂𑀦𑀘𑀸𑀓𑀸𑀭𑁂𑀦, 𑀅𑀥𑀺𑀧𑁆𑀧𑀸𑀬𑀲𑁆𑀲 𑀜𑀸𑀧𑀦𑀁.

𑀬𑀚𑁆𑀚𑁂𑀯𑀁 ¶ 𑀧𑀞𑀫𑀁𑀢𑀻𑀢𑁂-𑀦𑀸𑀕𑀢𑁂 𑀘 𑀯𑀺𑀪𑀢𑁆𑀢𑀺𑀬𑁄;

𑀯𑀢𑁆𑀯𑀸 𑀢𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀓𑀣𑁂𑀢𑀩𑁆𑀩𑀸 𑀯𑀺𑀪𑀢𑁆𑀢𑀺𑀬𑁄.

𑀓𑀘𑁆𑀘𑀸𑀬𑀦𑀯𑁆𑀳𑀬𑁂 𑀕𑀦𑁆𑀣𑁂, 𑀓𑀲𑁆𑀫𑀸 𑀏𑀯𑀁 𑀦 𑀪𑀸𑀲𑀺𑀢𑀸;

𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀬𑁄𑀯, 𑀓𑀲𑁆𑀫𑀸 𑀆𑀤𑀺𑀫𑁆𑀳𑀺 𑀪𑀸𑀲𑀺𑀢𑀸?

𑀬𑀲𑁆𑀫𑀸 𑀯𑀤𑀦𑁆𑀢𑀺 𑀯𑁄𑀳𑀸𑀭-𑀧𑀣𑁂 𑀏𑀢𑀸𑀯 𑀧𑀸𑀬𑀢𑁄;

𑀢𑀲𑁆𑀫𑀸 𑀩𑀳𑀼𑀧𑁆𑀧𑀬𑁄𑀕𑀢𑁆𑀢𑀁, 𑀳𑁄𑀢𑁂𑀢𑀸𑀲𑀁 𑀯𑀺𑀪𑀢𑁆𑀢𑀺𑀦𑀁.

𑀆𑀤𑁄𑀩𑀳𑀼𑀧𑁆𑀧𑀬𑁄𑀕𑁄𑀯, 𑀓𑀣𑁂𑀢𑀩𑁆𑀩𑁄𑀢𑀺 𑀜𑀸𑀬𑀢𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀲𑀫𑁆𑀪𑀽𑀢𑀸, 𑀯𑀺𑀪𑀢𑁆𑀬𑁄𑀯𑀸𑀤𑀺𑀢𑁄 𑀫𑀢𑀸.

𑀅𑀢𑀻𑀢𑀸𑀦𑀸𑀕𑀢𑀁 𑀯𑀢𑁆𑀯𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀢𑀢𑁄 𑀧𑀭𑀁;

𑀬𑀲𑁆𑀫𑀸 𑀯𑀼𑀢𑁆𑀢𑀫𑁆𑀳𑀺 𑀮𑁄𑀓𑀲𑁆𑀫𑀺𑀁, 𑀳𑁄𑀢𑀺 𑀯𑀸𑀘𑀸𑀲𑀺𑀮𑀺𑀝𑁆𑀞𑀢𑀸.

𑀢𑀲𑁆𑀫𑀸 𑀲𑀺𑀮𑀺𑀝𑁆𑀞𑀓𑀣𑀦𑁂, 𑀅𑀢𑀻𑀢𑀸𑀤𑀺𑀫𑀧𑁂𑀓𑁆𑀔𑀺𑀬;

𑀧𑀜𑁆𑀘𑀫𑀻 𑀲𑀢𑁆𑀢𑀫𑀻 𑀘𑁂𑀢𑀸, 𑀯𑀢𑁆𑀢𑀫𑀸𑀦𑀸𑀬𑀦𑀦𑁆𑀢𑀭𑀁;

𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑀓𑁆𑀔𑀸𑀢𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀲𑀼.

𑀏𑀢𑁆𑀣 𑀳𑀺 𑀬𑀣𑀸 ‘‘𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀯𑀼𑀢𑁆𑀢𑁂 𑀲𑀺𑀮𑀺𑀝𑁆𑀞𑀓𑀣𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀯𑀘𑀦𑁂 𑀯𑀺𑀧𑀭𑀺𑀬𑀬𑀁 𑀓𑀢𑁆𑀯𑀸 𑀲𑀫𑀸𑀲𑀯𑀲𑁂𑀦 ‘‘𑀧𑀺𑀢𑀸𑀫𑀸𑀢𑀭𑁄’’𑀢𑀺 𑀯𑀼𑀢𑁆𑀢𑁂 𑀲𑀺𑀮𑀺𑀝𑁆𑀞𑀓𑀣𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀅𑀧𑀽𑀚𑀦𑀻𑀬𑀸, ‘‘𑀧𑀺𑀢𑀸 𑀫𑀸𑀢𑀸 𑀘 𑀫𑁂 𑀤𑀚𑁆𑀚𑀼’’𑀦𑁆𑀢𑀺 𑀧𑀸𑀞𑁄 𑀧𑀦 𑀩𑁆𑀬𑀸𑀲𑀯𑀲𑁂𑀦 𑀬𑀣𑀺𑀘𑁆𑀙𑀺𑀢𑀧𑁆𑀧𑀬𑁄𑀕𑀢𑁆𑀢𑀸 𑀧𑀽𑀚𑀦𑀻𑀬𑁄, 𑀏𑀯𑀫𑁂𑀯 ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀺𑀮𑀺𑀝𑁆𑀞𑀓𑀣𑀦𑀁 𑀳𑁄𑀢𑀺, ‘‘𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑁂 𑀲𑀺𑀮𑀺𑀝𑁆𑀞𑀓𑀣𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀅𑀧𑀽𑀚𑀦𑀻𑀬𑀸 𑀲𑀺𑀬𑀸. ‘‘𑀅𑀢𑀻𑀢𑀸𑀭𑀫𑁆𑀫𑀡𑀸 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀦𑀸𑀕𑀢𑀕𑁄𑀘𑀭𑀸’’𑀢𑀺 𑀯𑀘𑀦𑀁 𑀧𑀦 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀬𑀣𑀺𑀘𑁆𑀙𑀺𑀢𑀧𑁆𑀧𑀬𑁄𑀕𑀢𑁆𑀢𑀸 𑀧𑀽𑀚𑀦𑀻𑀬𑀫𑁂𑀯. 𑀅𑀬𑀫𑁂𑀢𑁆𑀣 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸 𑁋

‘‘𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀘,

‘‘𑀏𑀓𑀸𑀬𑀦𑀁 ¶ 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀅𑀢𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺 𑀘,

‘‘𑀬𑁂 𑀘𑀩𑁆𑀪𑀢𑀻𑀢𑀸 𑀲𑀫𑁆𑀩𑀼𑀤𑁆𑀥𑀸, 𑀬𑁂 𑀘 𑀩𑀼𑀤𑁆𑀥𑀸 𑀅𑀦𑀸𑀕𑀢𑀸;

𑀬𑁂 𑀘𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑀸, 𑀩𑀳𑀽𑀦𑀁 𑀲𑁄𑀓𑀦𑀸𑀲𑀓𑀸.

𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘;

𑀅𑀣𑁄𑀧𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦 𑀥𑀫𑁆𑀫𑀢𑀸’’𑀢𑀺 𑀘

𑀏𑀯𑀫𑀦𑁂𑀓𑁂𑀲𑀼 𑀲𑀤𑁆𑀤𑀧𑁆𑀧𑀬𑁄𑀕𑁂𑀲𑀼. 𑀇𑀥 𑀬𑀣𑀺𑀘𑁆𑀙𑀺𑀢𑀧𑁆𑀧𑀬𑁄𑀕𑀯𑀲𑁂𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸𑀲𑀼 𑀅𑀝𑁆𑀞𑀲𑀼 𑀯𑀺𑀪𑀢𑁆𑀢𑀻𑀲𑀼 𑀢𑀺𑀲𑁆𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸 𑀯𑀺𑀪𑀢𑁆𑀢𑀺𑀬𑁄 𑀆𑀤𑀺𑀫𑁆𑀳𑀺 𑀓𑀣𑀺𑀢𑀸, 𑀢𑀜𑁆𑀘 𑀓𑀣𑀦𑀁 𑀢𑀸𑀲𑀜𑁆𑀜𑁂𑀯 𑀯𑁄𑀳𑀸𑀭𑀧𑀣𑁂 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀺𑀢𑁄 𑀩𑀳𑀼𑀧𑁆𑀧𑀬𑁄𑀕𑀢𑀸𑀜𑀸𑀧𑀦𑀢𑁆𑀣𑀁. 𑀢𑀸𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 ‘‘𑀧𑀜𑁆𑀘𑀫𑀻𑀲𑀢𑁆𑀢𑀫𑀻’’𑀢𑀺𑀲𑀜𑁆𑀜𑀸 𑀲𑀺𑀮𑀺𑀝𑁆𑀞𑀓𑀣𑀦𑀺𑀘𑁆𑀙𑀸𑀬𑀁 𑀓𑀫𑁂𑀦 𑀯𑀢𑁆𑀢𑀩𑁆𑀩𑀸, 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀺𑀓𑀸 𑀯𑀺𑀪𑀢𑁆𑀢𑀺𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑀸. 𑀇𑀘𑁆𑀘𑁂𑀯𑀁

𑀬𑀣𑀺𑀘𑁆𑀙𑀺𑀢𑀧𑁆𑀧𑀬𑁄𑀕𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀬𑁄;

𑀢𑀺𑀥𑀸 𑀓𑀢𑁆𑀯𑀸𑀦 𑀆𑀤𑀺𑀫𑁆𑀳𑀺, 𑀓𑀘𑁆𑀘𑀸𑀦𑁂𑀦 𑀉𑀤𑀻𑀭𑀺𑀢𑀸.

𑀆𑀤𑀺𑀫𑁆𑀳𑀺 𑀓𑀣𑀦𑀁 𑀢𑀜𑁆𑀘, 𑀢𑀸𑀲𑀁 𑀧𑀸𑀬𑁂𑀦 𑀯𑀼𑀢𑁆𑀢𑀺𑀢𑁄;

𑀩𑀳𑀼𑀧𑁆𑀧𑀬𑁄𑀕𑀪𑀸𑀯𑀲𑁆𑀲, 𑀜𑀸𑀧𑀦𑀢𑁆𑀣𑀦𑁆𑀢𑀺 𑀦𑀺𑀤𑁆𑀤𑀺𑀲𑁂.

𑀅𑀢𑀻𑀢𑀸𑀤𑀺𑀫𑀧𑁂𑀓𑁆𑀔𑀺𑀢𑁆𑀯𑀸, 𑀲𑀺𑀮𑀺𑀝𑁆𑀞𑀓𑀣𑀦𑁂 𑀥𑀼𑀯𑀁;

‘‘𑀧𑀜𑁆𑀘𑀫𑀻 𑀲𑀢𑁆𑀢𑀫𑀺’’𑀘𑁆𑀘𑁂𑀯, 𑀤𑁆𑀯𑀺𑀦𑁆𑀦𑀁 𑀦𑀸𑀫𑀁 𑀓𑀢𑀦𑁆𑀢𑀺 𑀘;

𑀓𑀸𑀮𑀸𑀢𑀺𑀧𑀢𑁆𑀢𑀺𑀁 𑀯𑀚𑁆𑀚𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀻𑀭𑀺𑀢𑀁.

𑀬𑀤𑀺 𑀏𑀯𑀁 𑀅𑀬𑀁 𑀤𑁄𑀲𑁄, 𑀆𑀧𑀚𑁆𑀚𑀢𑀺 𑀦 𑀲𑀁𑀲𑀬𑁄;

𑀇𑀢𑀺 𑀘𑁂 𑀓𑁄𑀘𑀺 𑀪𑀸𑀲𑁂𑀬𑁆𑀬, 𑀅𑀢𑁆𑀣𑁂 𑀅𑀓𑀼𑀲𑀮𑁄𑀦𑀭𑁄.

𑀢𑁂𑀓𑀸𑀮𑀺𑀓𑀸𑀔𑁆𑀬𑀸𑀢𑀧𑀤𑁂 ¶ , 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀧𑀦;

𑀅𑀲𑀗𑁆𑀕𑀳𑁄𑀯 𑀳𑁄𑀢𑀻𑀢𑀺, ‘‘𑀢𑀦𑁆𑀦𑀸’’𑀢𑀺 𑀧𑀝𑀺𑀲𑁂𑀥𑀬𑁂.

𑀢𑁂𑀓𑀸𑀮𑀺𑀓𑀸𑀔𑁆𑀬𑀸𑀢𑀧𑀤𑁂, 𑀦 𑀦𑁄 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸;

𑀇𑀝𑁆𑀞𑁄 𑀅𑀲𑀗𑁆𑀕𑀳𑁄 𑀢𑀢𑁆𑀣, 𑀲𑀗𑁆𑀕𑀳𑁄𑀬𑁂𑀯 𑀇𑀘𑁆𑀙𑀺𑀢𑁄.

𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀲𑀜𑁆𑀜𑀸, 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀁 𑀧𑀦;

𑀯𑀺𑀪𑀢𑁆𑀢𑀺𑀫𑀦𑀧𑁂𑀓𑁆𑀔𑀺𑀢𑁆𑀯𑀸, 𑀓𑀢𑀸 𑀇𑀘𑁆𑀘𑁂𑀯 𑀦𑁄 𑀫𑀢𑀺.

𑀦𑀸𑀦𑀸𑀦𑀬𑀁 𑀕𑀳𑁂𑀢𑁆𑀯𑀸𑀦,

𑀧𑀘𑁆𑀘𑁂𑀢𑀩𑁆𑀩𑀁 𑀢𑀼 𑀲𑀸𑀭𑀢𑁄;

𑀬𑀸𑀬 𑀏𑀲𑁄 𑀭𑀼𑀢𑁄 𑀅𑀢𑁆𑀣𑁄,

𑀢𑀲𑁆𑀫𑀸 𑀏𑀲𑀸 𑀦 𑀤𑀼𑀩𑁆𑀩𑀮𑀸.

𑀅𑀢𑁆𑀣𑁄 𑀮𑀩𑁆𑀪𑀢𑀺 𑀧𑀸𑀲𑀁𑀲𑁄,

𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸;

𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄,

𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀦𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 ‘‘𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄’’𑀢𑀺.

𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀲𑀜𑁆𑀜𑀸, 𑀭𑀽𑀴𑁆𑀳𑀻𑀲𑀜𑁆𑀜𑀸𑀢𑀺 𑀓𑁂𑀘𑀦;

𑀦 𑀧𑀦𑁂𑀯𑀁 𑀕𑀳𑁂𑀢𑀩𑁆𑀩𑀁, 𑀅𑀚𑀸𑀦𑀺𑀢𑁆𑀯𑀸 𑀯𑀤𑀦𑁆𑀢𑀺 𑀢𑁂.

𑀦𑁂𑀲𑀸 𑀧𑀼𑀭𑀺𑀲𑀲𑀜𑁆𑀜𑀸𑀤𑀺, 𑀛𑀮 𑀲𑀜𑁆𑀜𑀸𑀤𑀬𑁄 𑀯𑀺𑀬;

𑀭𑀽𑀴𑁆𑀳𑀺𑀬𑀸 𑀪𑀸𑀲𑀺𑀢𑀸 𑀲𑀜𑁆𑀜𑀸, 𑀪𑀽𑀢𑁂𑀦𑀢𑁆𑀣𑁂𑀦 𑀪𑀸𑀲𑀺𑀢𑀸.

𑀉𑀧𑀦𑀺𑀥𑀸𑀬 𑀧𑀜𑁆𑀜𑀢𑁆𑀢𑀺, 𑀏𑀲𑀸 𑀲𑀜𑁆𑀜𑀸 𑀬𑀢𑁄 𑀢𑀢𑁄;

𑀅𑀦𑁆𑀯𑀢𑁆𑀣𑀲𑀜𑁆𑀜𑀸 𑀞𑀧𑀺𑀢𑀸, 𑀧𑁄𑀭𑀸𑀡𑁂𑀳𑀻𑀢𑀺 𑀮𑀓𑁆𑀔𑀬𑁂.

𑀇𑀘𑁆𑀘𑁂𑀯𑀁 𑀓𑀸𑀮𑀙𑀓𑁆𑀓𑀁 𑀢𑀼, 𑀲𑀗𑁆𑀔𑁂𑀧𑁂𑀦 𑀢𑀺𑀥𑀸 𑀫𑀢𑀁;

𑀏𑀢𑀫𑀢𑁆𑀣𑀜𑁆𑀳𑀺 𑀲𑀦𑁆𑀥𑀸𑀬, ‘‘𑀬𑀁 𑀢𑀺𑀓𑀸𑀮’’𑀦𑁆𑀢𑀺 𑀪𑀸𑀲𑀺𑀢𑀁.

𑀅𑀬𑀫𑁂𑀢𑁆𑀣 𑀓𑀸𑀮𑀙𑀓𑁆𑀓𑀲𑀗𑁆𑀕𑀳𑁄.

𑀏𑀯𑀁 ¶ 𑀢𑀺𑀥𑀸 𑀘𑀢𑀼𑀥𑀸 𑀯𑀸, 𑀙𑀥𑀸 𑀯𑀸𑀧𑀺 𑀲𑀼𑀫𑁂𑀥𑀲𑁄;

𑀓𑀸𑀮𑀪𑁂𑀤𑀁 𑀯𑀺𑀪𑀸𑀯𑁂𑀬𑁆𑀬, 𑀓𑀸𑀮𑀜𑁆𑀜𑀽𑀳𑀺 𑀯𑀺𑀪𑀸𑀯𑀺𑀢𑀁.

𑀅𑀢𑀻𑀢𑀸𑀦𑀸𑀕𑀢𑀁 𑀓𑀸𑀮𑀁, 𑀯𑀺𑀲𑀼𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀓𑀁;

𑀕𑀳𑁂𑀢𑁆𑀯𑀸 𑀧𑀜𑁆𑀘𑀥𑀸 𑀳𑁄𑀢𑀺, 𑀏𑀯𑀜𑁆𑀘𑀸𑀧𑀺 𑀯𑀺𑀪𑀸𑀯𑀬𑁂.

𑀏𑀢𑁆𑀣 𑀦𑀬𑁄𑀯 ‘‘𑀅𑀚𑁆𑀛𑀢𑁆𑀢-𑀩𑀳𑀺𑀤𑁆𑀥𑀸 𑀯𑀸’’𑀢𑀺 𑀧𑀸𑀴𑀺𑀬𑀁;

𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀻, 𑀯𑀺𑀪𑀢𑁆𑀢𑀺 𑀲𑀫𑀼𑀤𑀻𑀭𑀺𑀢𑀸.

𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀓𑀸𑀮𑀲𑀗𑁆𑀕𑀳𑁄 𑀲𑀫𑀢𑁆𑀢𑁄.

𑀇𑀤𑀸𑀦𑀺 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀕𑁆𑀕𑀳𑀡𑁂 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀓𑀭𑀡𑀦𑁆𑀢𑀭𑀯𑀲𑁂𑀦𑀧𑀺 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀦𑀁 𑀆𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀺𑀓𑀸𑀦𑀁 ‘‘𑀧𑀜𑁆𑀘𑀫𑀻𑀲𑀢𑁆𑀢𑀫𑀻’’𑀢𑀺𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀧𑀝𑀺𑀧𑀸𑀝𑀺𑀝𑁆𑀞𑀧𑀦𑁂 𑀧𑀓𑀭𑀡𑀲𑀁𑀲𑀦𑁆𑀤𑀦𑀁 𑀓𑀣𑀬𑀸𑀫 𑁋 𑀓𑀸𑀢𑀦𑁆𑀢𑀧𑁆𑀧𑀓𑀭𑀡𑀲𑁆𑀫𑀺𑀜𑁆𑀳𑀺 𑀲𑀓𑁆𑀓𑀢𑀪𑀸𑀲𑀸𑀦𑀼𑀭𑀽𑀧𑁂𑀦 𑀤𑀲𑀥𑀸 𑀆𑀔𑁆𑀬𑀸𑀢𑀯𑀺𑀪𑀢𑁆𑀢𑀺𑀬𑁄 𑀞𑀧𑀺𑀢𑀸, 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀧𑀦 𑀫𑀸𑀕𑀥𑀪𑀸𑀲𑀸𑀦𑀼𑀭𑀽𑀧𑁂𑀦 𑀅𑀝𑁆𑀞𑀥𑀸 𑀞𑀧𑀺𑀢𑀸, 𑀦𑀺𑀭𑀼𑀢𑁆𑀢𑀺𑀬𑀜𑁆𑀘 𑀧𑀦 𑀫𑀸𑀕𑀥𑀪𑀸𑀲𑀸𑀦𑀼𑀭𑀽𑀧𑁂𑀦𑁂𑀯 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀙𑀥𑀸 𑀞𑀧𑀺𑀢𑀸. 𑀢𑁂𑀲𑀼 𑀳𑀺 𑀓𑀸𑀢𑀦𑁆𑀢𑁂 𑀯𑀢𑁆𑀢𑀫𑀸𑀦𑀸, 𑀲𑀢𑁆𑀢𑀫𑀻, 𑀧𑀜𑁆𑀘𑀫𑀻, 𑀳𑀺𑀬𑁆𑀬𑀢𑁆𑀢𑀦𑀻, 𑀅𑀚𑁆𑀚𑀢𑀦𑀻, 𑀧𑀭𑁄𑀓𑁆𑀔𑀸, 𑀲𑁆𑀯𑀸𑀢𑀦𑀻, 𑀆𑀲𑀻, 𑀪𑀯𑀺𑀲𑁆𑀲𑀦𑁆𑀢𑀻, 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺 𑀘𑀸𑀢𑀺 𑀤𑀲𑀥𑀸 𑀯𑀺𑀪𑀢𑁆𑀢𑀸. 𑀓𑀘𑁆𑀘𑀸𑀬𑀦𑁂 𑀧𑀦 𑀯𑀢𑁆𑀢𑀫𑀸𑀦𑀸, 𑀧𑀜𑁆𑀘𑀫𑀻, 𑀲𑀢𑁆𑀢𑀫𑀻, 𑀧𑀭𑁄𑀓𑁆𑀔𑀸, 𑀳𑀺𑀬𑁆𑀬𑀢𑁆𑀢𑀦𑀻, 𑀅𑀚𑁆𑀚𑀢𑀦𑀻, 𑀪𑀯𑀺𑀲𑁆𑀲𑀦𑁆𑀢𑀻, 𑀓𑀸𑀮𑀸𑀢𑀺𑀧𑀢𑁆𑀢𑀺 𑀘𑀸𑀢𑀺 𑀅𑀝𑁆𑀞𑀥𑀸 𑀯𑀺𑀪𑀢𑁆𑀢𑀸. 𑀇𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀓𑀸𑀢𑀦𑁆𑀢𑀓𑀘𑁆𑀘𑀸𑀬𑀦𑁂𑀲𑀼 𑀯𑀺𑀪𑀢𑁆𑀢𑀺𑀬𑁄 𑀯𑀺𑀲𑀤𑀺𑀲𑀸𑀬 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀯𑀺𑀲𑀤𑀺𑀲𑀸 𑀧𑀝𑀺𑀧𑀸𑀝𑀺, 𑀢𑀣𑀸𑀧𑁂𑀢𑀸 𑀦𑀺𑀭𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀸𑀢𑀻𑀢𑀸𑀤𑀺𑀓𑀸𑀮𑀯𑀺𑀪𑀸𑀕𑀯𑀲𑁂𑀦 𑀏𑀓𑀢𑁄 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀞𑀧𑁂𑀢𑁆𑀯𑀸.

𑀓𑀣𑀁 ¶ ? 𑀓𑀸𑀢𑀦𑁆𑀢𑁂 𑀢𑀸𑀯 𑀳𑀺𑀬𑁆𑀬𑀢𑁆𑀢𑀦𑀻 𑀅𑀚𑁆𑀚𑀢𑀦𑀻 𑀧𑀭𑁄𑀓𑁆𑀔𑀸 𑀘𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀏𑀓𑀦𑁆𑀢𑁂𑀦 𑀅𑀢𑀻𑀢𑀓𑀸𑀮𑀺𑀓𑀸, 𑀲𑁆𑀯𑀸𑀢𑀦𑀻 𑀆𑀲𑀻 𑀪𑀯𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀏𑀓𑀦𑁆𑀢𑁂𑀦 𑀅𑀦𑀸𑀕𑀢𑀓𑀸𑀮𑀺𑀓𑀸, 𑀯𑀢𑁆𑀢𑀫𑀸𑀦𑀸 𑀏𑀓𑀸𑀬𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸, 𑀲𑀢𑁆𑀢𑀫𑀻 𑀧𑀦 𑀧𑀜𑁆𑀘𑀫𑀻 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀯𑀲𑁂𑀦 𑀤𑁆𑀯𑀺𑀓𑀸𑀮𑀺𑀓𑀸 ‘‘𑀅𑀚𑁆𑀚 𑀧𑀼𑀜𑁆𑀜𑀁 𑀓𑀭𑁂𑀬𑁆𑀬, 𑀲𑁆𑀯𑁂𑀧𑀺 𑀓𑀭𑁂𑀬𑁆𑀬. 𑀅𑀚𑁆𑀚 𑀕𑀘𑁆𑀙𑀢𑀼, 𑀲𑁆𑀯𑁂 𑀯𑀸 𑀕𑀘𑁆𑀙𑀢𑀽’’𑀢𑀺 𑀧𑀬𑁄𑀕𑀸𑀭𑀳𑀢𑁆𑀢𑀸. 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺 𑀅𑀦𑀺𑀬𑀢𑀓𑀸𑀮𑀺𑀓𑀸 ‘‘𑀲𑁄 𑀘𑁂 𑀳𑀺𑀬𑁆𑀬𑁄 𑀬𑀸𑀦𑀁 𑀅𑀮𑀪𑀺𑀲𑁆𑀲𑀸, 𑀅𑀕𑀘𑁆𑀙𑀺𑀲𑁆𑀲𑀸. 𑀲𑁄 𑀘𑁂 𑀅𑀚𑁆𑀚 𑀅𑀦𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀬𑀸𑀦𑀁 𑀅𑀮𑀪𑀺𑀲𑁆𑀲𑀸, 𑀅𑀕𑀘𑁆𑀙𑀺𑀲𑁆𑀲𑀸. 𑀲𑁄 𑀘𑁂 𑀲𑁆𑀯𑁂 𑀬𑀸𑀦𑀁 𑀅𑀮𑀪𑀺𑀲𑁆𑀲𑀸, 𑀅𑀕𑀘𑁆𑀙𑀺𑀲𑁆𑀲𑀸’’𑀢𑀺 𑀧𑀬𑁄𑀕𑀸𑀭𑀳𑀢𑁆𑀢𑀸. 𑀏𑀯𑀁 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀬𑀫𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀦𑀬𑁄 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀓𑀣𑀁? 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀧𑀭𑁄𑀓𑁆𑀔𑀸𑀲𑁆𑀯𑀸𑀢𑀦𑁆𑀬𑀸𑀲𑀻𑀪𑀯𑀺𑀲𑁆𑀲𑀦𑁆𑀢𑀺𑀯𑀲𑁂𑀦 𑀏𑀓𑀦𑁆𑀢𑀸𑀢𑀻𑀢𑀸𑀦𑀸𑀕𑀢𑀓𑀸𑀮𑀺𑀓𑀸 𑀯𑀺𑀪𑀢𑁆𑀢𑀺𑀬𑁄 𑀙, 𑀯𑀢𑁆𑀢𑀫𑀸𑀦𑀯𑀲𑁂𑀦 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸 𑀯𑀺𑀪𑀢𑁆𑀢𑀺 𑀏𑀓𑀸𑀬𑁂𑀯, 𑀲𑀸 𑀧𑀝𑀺𑀧𑀸𑀝𑀺𑀬𑀸 𑀕𑀡𑀺𑀬𑀫𑀸𑀦𑀸 𑀲𑀢𑁆𑀢𑀫𑀁 𑀞𑀸𑀦𑀁 𑀪𑀚𑀢𑀺. 𑀏𑀯𑀁 𑀏𑀢𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀸𑀲𑀗𑁆𑀔𑀸𑀢𑁂 𑀲𑀢𑁆𑀢𑀫𑀝𑁆𑀞𑀸𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀧𑀭𑀺𑀓𑀧𑁆𑀧𑀓𑀸𑀮𑀺𑀓𑀸’’𑀢𑀺 𑀲𑀗𑁆𑀔𑀁 𑀕𑀢𑀁 𑀲𑀢𑁆𑀣𑀦𑀬𑁂𑀦 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀺𑀓𑀸’’𑀢𑀺𑀯𑀢𑁆𑀢𑀩𑁆𑀩𑀁 𑀏𑀓𑀁 𑀯𑀺𑀪𑀢𑁆𑀢𑀺𑀁 𑀲𑀢𑁆𑀢𑀫𑀻𑀪𑀽𑀢𑀸𑀬 𑀯𑀢𑁆𑀢𑀫𑀸𑀦𑀸𑀬 𑀲𑀫𑀸𑀦𑀝𑁆𑀞𑀸𑀦𑀢𑁆𑀢𑀸 𑀲𑀢𑁆𑀢𑀫𑀻𑀲𑀜𑁆𑀜𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀢𑀢𑁄 𑀧𑀼𑀦𑀤𑁂𑀯 𑀲𑁆𑀯𑀸𑀢𑀦𑁆𑀬𑀸𑀲𑀻𑀪𑀯𑀺𑀲𑁆𑀲𑀦𑁆𑀢𑀺𑀯𑀲𑁂𑀦 𑀏𑀓𑀦𑁆𑀢𑀸𑀦𑀸𑀕𑀢𑀓𑀸𑀮𑀺𑀓𑀸 𑀢𑀺𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀕𑀡𑁂𑀢𑁆𑀯𑀸 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀺𑀓𑀁 ‘‘𑀲𑀢𑁆𑀢𑀫𑀻’’𑀢𑀺 𑀮𑀤𑁆𑀥𑀲𑀜𑁆𑀜𑀁 𑀯𑀺𑀪𑀢𑁆𑀢𑀺𑀁 𑀅𑀦𑀸𑀕𑀢𑀓𑀸𑀮𑀺𑀓𑀪𑀸𑀯𑁂𑀦 𑀢𑀸𑀳𑀺 𑀢𑀻𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀝𑁆𑀞𑀸𑀦𑀢𑁆𑀢𑀸 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀆𑀡𑀢𑁆𑀢𑀺𑀓𑀸𑀮𑀺𑀓𑀸’’𑀢𑀺 𑀲𑀗𑁆𑀔𑀁 𑀕𑀢𑀁 𑀲𑀢𑁆𑀣𑀦𑀬𑁂𑀦 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀏𑀓𑀁 𑀯𑀺𑀪𑀢𑁆𑀢𑀺𑀁 𑀧𑀜𑁆𑀘𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑁂𑀦 𑀧𑀜𑁆𑀘𑀫𑀻𑀲𑀜𑁆𑀜𑀁 𑀓𑀢𑁆𑀯𑀸 𑀞𑀧𑁂𑀲𑀺.

𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀸 ¶ 𑀧𑀦 𑀅𑀦𑀺𑀬𑀢𑀓𑀸𑀮𑀺𑀓𑀢𑁆𑀢𑀸 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀓𑀢𑁄, 𑀲𑁄 𑀘 𑀔𑁄 𑀦𑀺𑀭𑀼𑀢𑁆𑀢𑀺𑀦𑀬𑀁𑀬𑁂𑀯 𑀦𑀺𑀲𑁆𑀲𑀸𑀬. 𑀅𑀬𑀁 𑀢𑀸𑀯 𑀓𑀸𑀢𑀦𑁆𑀢𑁂 𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀦𑀁 𑀲𑀢𑁆𑀢𑀫𑀻𑀧𑀜𑁆𑀘𑀫𑀻𑀦𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀁 𑀇𑀘𑁆𑀙𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀭𑀼𑀘𑀺, 𑀏𑀲𑀸 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀕𑀭𑀽𑀳𑀺 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸 𑀅𑀦𑀼𑀫𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 ‘‘𑀏𑀯𑀫𑁂𑀯𑀁 𑀆𑀯𑀼𑀲𑁄, 𑀏𑀯𑀫𑁂𑀯𑀁 𑀆𑀯𑀼𑀲𑁄’’𑀢𑀺. 𑀯𑁂𑀬𑁆𑀬𑀸𑀓𑀭𑀡𑁂𑀳𑀺𑀧𑀺 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸 𑀅𑀦𑀼𑀫𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 ‘‘𑀏𑀯𑀫𑁂𑀯𑀁 𑀪𑀦𑁆𑀢𑁂, 𑀏𑀯𑀫𑁂𑀯𑀁 𑀪𑀦𑁆𑀢𑁂’’𑀢𑀺. 𑀏𑀯𑀁 𑀲𑀩𑁆𑀩𑁂𑀳𑀺𑀧𑀺 𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀩𑁆𑀪𑀦𑀼𑀫𑁄𑀤𑀺𑀢𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸.

𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀧𑀦 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑁂𑀦 𑀅𑀝𑁆𑀞𑀥𑀸 𑀯𑀺𑀪𑀢𑁆𑀢𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀧𑀜𑁆𑀘𑀫𑀝𑁆𑀞𑀸𑀦𑁂 𑀞𑀺𑀢𑀸. 𑀓𑀣𑀁? 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀺𑀯𑀲𑁂𑀦 𑀏𑀓𑀦𑁆𑀢𑀸𑀢𑀻𑀢𑀸𑀦𑀸𑀕𑀢𑀓𑀸𑀮𑀺𑀓𑀸 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄, 𑀯𑀢𑁆𑀢𑀫𑀸𑀦𑀯𑀲𑁂𑀦 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸 𑀯𑀺𑀪𑀢𑁆𑀢𑀺 𑀏𑀓𑀸𑀬𑁂𑀯, 𑀲𑀸 𑀧𑀝𑀺𑀧𑀸𑀝𑀺𑀬𑀸 𑀕𑀡𑀺𑀬𑀫𑀸𑀦𑀸 𑀧𑀜𑁆𑀘𑀫𑀁 𑀞𑀸𑀦𑀁 𑀪𑀚𑀢𑀺. 𑀏𑀯𑀁 𑀏𑀢𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀸𑀲𑀗𑁆𑀔𑀸𑀢𑁂 𑀧𑀜𑁆𑀘𑀫𑀝𑁆𑀞𑀸𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀆𑀡𑀢𑁆𑀢𑀺𑀓𑀸𑀮𑀺𑀓𑀸’’𑀢𑀺 𑀲𑀗𑁆𑀔𑀁 𑀕𑀢𑀁 ‘‘𑀅𑀦𑀼𑀢𑁆𑀢𑀓𑀸𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀪𑀢𑁆𑀢𑀺𑀁 𑀧𑀜𑁆𑀘𑀫𑀻𑀪𑀽𑀢𑀸𑀬 𑀯𑀢𑁆𑀢𑀫𑀸𑀦𑀸𑀬 𑀲𑀫𑀸𑀦𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀘𑀫𑀻𑀲𑀜𑁆𑀜𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀢𑀢𑁄 𑀧𑀭𑀁 𑀢𑀁 𑀧𑀜𑁆𑀘𑀫𑀁 𑀙𑀝𑁆𑀞𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀭𑁄𑀓𑁆𑀔𑀸 𑀳𑀺𑀬𑁆𑀬𑀢𑁆𑀢𑀦𑀻 𑀅𑀚𑁆𑀚𑀢𑀦𑀻 𑀪𑀯𑀺𑀲𑁆𑀲𑀦𑁆𑀢𑀻 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀫𑀻𑀢𑀺 𑀏𑀯𑀁 𑀕𑀡𑀦𑀸𑀯𑀲𑁂𑀦 𑀙 𑀯𑀺𑀪𑀢𑁆𑀢𑀺𑀬𑁄 𑀉𑀧𑀸𑀤𑀸𑀬 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀧𑀭𑀺𑀓𑀧𑁆𑀧𑀓𑀸𑀮𑀺𑀓𑀸’’𑀢𑀺 𑀲𑀗𑁆𑀔𑀁 𑀕𑀢𑀁 ‘‘𑀅𑀦𑀼𑀢𑁆𑀢𑀓𑀸𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀪𑀢𑁆𑀢𑀺𑀁 𑀲𑀢𑁆𑀢𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑁂𑀦 𑀲𑀢𑁆𑀢𑀫𑀻𑀲𑀜𑁆𑀜𑀁 𑀓𑀢𑁆𑀯𑀸 𑀞𑀧𑁂𑀲𑀺.

𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀧𑀦 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀺𑀓𑀢𑁆𑀢𑀸 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀓𑀢𑁄, 𑀲𑁄 𑀘 𑀔𑁄 𑀦𑀺𑀭𑀼𑀢𑁆𑀢𑀺𑀦𑀬𑀁𑀬𑁂𑀯 𑀦𑀺𑀲𑁆𑀲𑀸𑀬. 𑀅𑀬𑀁 𑀓𑀘𑁆𑀘𑀸𑀬𑀦𑁂 𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀦𑀁 𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀦𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀁 𑀇𑀘𑁆𑀙𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀭𑀼𑀘𑀺, 𑀏𑀲𑀸 𑀘 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀕𑀭𑀽𑀳𑀺 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸 𑀅𑀦𑀼𑀫𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 ¶ ‘‘𑀏𑀯𑀫𑁂𑀯𑀁 𑀆𑀯𑀼𑀲𑁄, 𑀏𑀯𑀫𑁂𑀯𑀁 𑀆𑀯𑀼𑀲𑁄’’𑀢𑀺. 𑀯𑁂𑀬𑁆𑀬𑀸𑀓𑀭𑀡𑁂𑀳𑀺𑀧𑀺 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸 𑀅𑀦𑀼𑀫𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 ‘‘𑀏𑀯𑀫𑁂𑀯𑀁 𑀪𑀦𑁆𑀢𑁂, 𑀏𑀯𑀫𑁂𑀯𑀁 𑀪𑀦𑁆𑀢𑁂’’𑀢𑀺. 𑀏𑀯𑀁 𑀲𑀩𑁆𑀩𑁂𑀳𑀺𑀧𑀺 𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀩𑁆𑀪𑀦𑀼𑀫𑁄𑀤𑀺𑀢𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸.

𑀬𑀲𑁆𑀫𑀸 𑀳𑀺 𑀓𑀸𑀢𑀦𑁆𑀢𑀓𑀘𑁆𑀘𑀸𑀬𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀯𑀺𑀪𑀢𑁆𑀢𑀺𑀓𑁆𑀓𑀫𑀸𑀦𑀺𑀧𑀺 𑀅𑀦𑁆𑀢𑀭𑁂𑀦 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀦𑀺𑀭𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀸𑀢𑀻𑀢𑀸𑀤𑀺𑀓𑀸𑀮𑀯𑀺𑀪𑀸𑀕𑀯𑀲𑁂𑀦𑁂𑀓𑀚𑁆𑀛𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀦𑀬𑀜𑁆𑀜𑁂𑀯 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀻𑀦𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀧𑀭𑀺𑀓𑀧𑁆𑀧𑀦𑁂 𑀅𑀫𑁆𑀳𑀸𑀓𑀁 𑀭𑀼𑀘𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀩𑁆𑀪𑀦𑀼𑀫𑁄𑀤𑀺𑀢𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀸, 𑀢𑀲𑁆𑀫𑀸 𑀏𑀯 𑀬𑁄 𑀓𑁄𑀘𑀺 𑀇𑀫𑀁 𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀅𑀬𑀜𑁆𑀳𑀺 𑀦𑀬𑁄 𑀅𑀢𑀻𑀯 𑀲𑀼𑀔𑀼𑀫𑁄 𑀤𑀼𑀤𑁆𑀤𑀲𑁄 𑀘 𑀧𑀭𑀫𑀸𑀡𑀼𑀭𑀺𑀯, 𑀤𑀼𑀓𑁆𑀔𑁄𑀕𑀸𑀴𑁆𑀳𑁄 𑀘 𑀫𑀳𑀸𑀕𑀳𑀦𑀫𑀺𑀯, 𑀅𑀢𑀺𑀕𑀫𑁆𑀪𑀻𑀭𑁄 𑀘 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀁 𑀲𑀤𑁆𑀤𑀦𑀻𑀢𑀺𑀬𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀸𑀲𑀦𑁄𑀧𑀓𑀸𑀭𑀢𑁆𑀣𑀁 𑀬𑁄𑀕𑁄 𑀲𑀼𑀝𑁆𑀞𑀼 𑀓𑀭𑀡𑀻𑀬𑁄. 𑀢𑀣𑀸 𑀳𑀺 𑀇𑀥 𑀓𑀢𑀬𑁄𑀕𑁂𑀳𑀺 𑀦𑀸𑀫𑀸𑀔𑁆𑀬𑀸𑀢𑀸𑀤𑀻𑀲𑀼 𑀘𑀢𑀽𑀲𑀼 𑀧𑀤𑁂𑀲𑀼 𑀉𑀧𑁆𑀧𑀦𑁆𑀦𑀯𑀸𑀤𑀸 𑀧𑀭𑀯𑀸𑀤𑀺𑀦𑁄 𑀚𑀺𑀢𑀸𑀯 𑀳𑁄𑀦𑁆𑀢𑀺.

𑀫𑀼𑀦𑀺𑀦𑀸 𑀫𑀼𑀦𑀺𑀦𑀸𑀕𑁂𑀦, 𑀤𑀼𑀝𑁆𑀞𑀸 𑀧𑀩𑁆𑀩𑀚𑀺𑀢𑀸 𑀚𑀺𑀢𑀸;

𑀬𑀣𑀸 𑀬𑀣𑀸 𑀅𑀲𑀤𑁆𑀥𑀫𑁆𑀫-𑀧𑀽𑀭𑀡𑀸 𑀧𑀽𑀭𑀡𑀸𑀤𑀬𑁄.

𑀢𑀣𑀸 𑀢𑀣𑀸𑀕𑀢𑀸𑀤𑀸𑀬𑀸-𑀦𑀼𑀕𑀸𑀬𑀁 𑀲𑀤𑁆𑀤𑀦𑀻𑀢𑀺𑀬𑀁;

𑀓𑀢𑀬𑁄𑀕𑁂𑀳𑀺𑀧𑀺 𑀚𑀺𑀢𑀸, 𑀲𑀯𑀦𑁆𑀢𑀺 𑀧𑀭𑀯𑀸𑀤𑀺𑀦𑁄𑀢𑀺.

𑀅𑀬𑀁 𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀦𑀁 𑀧𑀝𑀺𑀧𑀸𑀝𑀺𑀝𑁆𑀞𑀧𑀦𑁂 𑀧𑀓𑀭𑀡𑀲𑀁𑀲𑀦𑁆𑀤𑀦𑀸.

𑀅𑀣 𑀯𑀢𑁆𑀢𑀫𑀸𑀦𑀸𑀤𑀻𑀦𑀁 𑀯𑀘𑀦𑀢𑁆𑀣𑀁 𑀓𑀣𑀬𑀸𑀫 𑁋 𑀢𑀢𑁆𑀣 𑀯𑀢𑁆𑀢𑀫𑀸𑀦𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀢𑁆𑀢𑀫𑀸𑀦𑀸? 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀝𑁆𑀞𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀳𑀺 𑀯𑀢𑁆𑀢𑀢𑀻𑀢𑀺 𑀯𑀢𑁆𑀢𑀫𑀸𑀦𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀭𑀺𑀬𑀸𑀲𑀗𑁆𑀔𑀸𑀢𑁄 𑀓𑀸𑀮𑁄. 𑀢𑀩𑁆𑀩𑀸𑀘𑀓𑀯𑀲𑁂𑀦 𑀯𑀢𑁆𑀢𑀫𑀸𑀦𑁄 𑀓𑀸𑀮𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀬𑀁 𑀢𑀺 𑀅𑀦𑁆𑀢𑀺𑀆𑀤𑀺𑀯𑀺𑀪𑀢𑁆𑀢𑀺 𑀯𑀢𑁆𑀢𑀫𑀸𑀦𑀸. 𑀢𑀣𑀸 ¶ 𑀳𑀺 ‘‘𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄’’𑀢𑀺 𑀏𑀢𑁆𑀣 𑀤𑁂𑀯𑀤𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀫𑀦𑀓𑁆𑀭𑀺𑀬𑀁 𑀯𑀺𑀪𑀢𑁆𑀢𑀺𑀪𑀽𑀢𑁄 𑀢𑀺𑀲𑀤𑁆𑀤𑁄𑀬𑁂𑀯 𑀯𑀤𑀢𑀺, 𑀢𑀲𑁆𑀫𑀸 𑀢𑀩𑁆𑀩𑀸𑀘𑀓𑀯𑀲𑁂𑀦 𑀯𑀢𑁆𑀢𑀫𑀸𑀦𑁄 𑀓𑀸𑀮𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀯𑀢𑁆𑀢𑀫𑀸𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀘𑀫𑀻𑀢𑀺 𑀓𑁂𑀦𑀝𑁆𑀞𑁂𑀦 𑀧𑀜𑁆𑀘𑀫𑀻? 𑀧𑀜𑁆𑀘𑀫𑀁 𑀯𑀢𑁆𑀢𑀫𑀸𑀦𑀝𑁆𑀞𑀸𑀦𑀁 𑀕𑀫𑀦𑀝𑁆𑀞𑁂𑀦, 𑀧𑀜𑁆𑀘𑀦𑁆𑀦𑀜𑁆𑀘 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑀝𑁆𑀞𑁂𑀦. 𑀢𑀣𑀸 𑀳𑀺 𑀦𑀺𑀬𑁄𑀕𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸𑀦𑀁 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀻𑀯𑀢𑁆𑀢𑀫𑀸𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀫𑀦𑁆𑀢𑀭𑁂 𑀧𑀜𑁆𑀘𑀫𑀻𑀪𑀽𑀢𑀸𑀬 𑀯𑀢𑁆𑀢𑀫𑀸𑀦𑀸𑀬 𑀲𑀬𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀪𑀸𑀯𑁂𑀦 𑀲𑀫𑀸𑀦𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀘𑀫𑀁 𑀯𑀢𑁆𑀢𑀫𑀸𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀧𑀜𑁆𑀘𑀫𑀻. 𑀬𑀣𑀸 𑀦𑀤𑀦𑁆𑀢𑀻 𑀕𑀘𑁆𑀙𑀢𑀻𑀢𑀺 𑀦𑀤𑀻. 𑀢𑀣𑀸 𑀦𑀺𑀬𑁄𑀕𑀸 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀺𑀓𑀸 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀻𑀲𑀗𑁆𑀔𑀸𑀢𑀸 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀉𑀧𑀸𑀤𑀸𑀬 𑀲𑀬𑀫𑁆𑀧𑀺 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀯𑀺𑀬 𑀧𑀜𑁆𑀘𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑀻𑀢𑀺 𑀧𑀜𑁆𑀘𑀫𑀻. 𑀲𑀢𑁆𑀢𑀫𑀻𑀢𑀺 𑀓𑁂𑀦𑀝𑁆𑀞𑁂𑀦 𑀲𑀢𑁆𑀢𑀫𑀻? 𑀲𑀢𑁆𑀢𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑀝𑁆𑀞𑁂𑀦. 𑀢𑀣𑀸 𑀳𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀻𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀗𑁆𑀔𑀸𑀢𑀸 𑀙 𑀯𑀺𑀪𑀢𑁆𑀢𑀺𑀬𑁄 𑀉𑀧𑀸𑀤𑀸𑀬 𑀲𑀬𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸 𑀳𑀼𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀧𑀽𑀭𑀡𑀻𑀢𑀺 𑀲𑀢𑁆𑀢𑀫𑀻.

𑀧𑀭𑁄𑀓𑁆𑀔𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑁄𑀓𑁆𑀔𑀸? 𑀧𑀭𑁄𑀓𑁆𑀔𑁂 𑀪𑀯𑀸𑀢𑀺 𑀅𑀢𑁆𑀣𑁂𑀦. 𑀢𑀣𑀸 𑀳𑀺 𑀘𑀓𑁆𑀔𑀸𑀤𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑀲𑁆𑀲 𑀅𑀓𑁆𑀔𑀲𑁆𑀲 𑀧𑀭𑁄 𑀢𑀺𑀭𑁄𑀪𑀸𑀯𑁄 𑀧𑀭𑁄𑀓𑁆𑀔𑀁, 𑀢𑀩𑁆𑀩𑀸𑀘𑀓𑀪𑀸𑀯𑁂𑀦 𑀧𑀭𑁄𑀓𑁆𑀔𑁂 𑀪𑀯𑀸𑀢𑀺 𑀧𑀭𑁄𑀓𑁆𑀔𑀸. 𑀳𑀺𑀬𑁆𑀬𑀢𑁆𑀢𑀦𑀻𑀢𑀺 𑀓𑁂𑀦𑀝𑁆𑀞𑁂𑀦 𑀳𑀺𑀬𑁆𑀬𑀢𑁆𑀢𑀦𑀻? 𑀳𑀺𑀬𑁆𑀬𑁄 𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀪𑀯𑀸 𑀢𑀩𑁆𑀩𑀸𑀘𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁂𑀦. 𑀅𑀚𑁆𑀚𑀢𑀦𑀻𑀢𑀺 𑀓𑁂𑀦𑀝𑁆𑀞𑁂𑀦 𑀅𑀚𑁆𑀚𑀢𑀦𑀻? 𑀅𑀚𑁆𑀚 𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀪𑀯𑀸 𑀢𑀩𑁆𑀩𑀸𑀘𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁂𑀦. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀓𑁂𑀦𑀝𑁆𑀞𑁂𑀦 𑀪𑀯𑀺𑀲𑁆𑀲𑀦𑁆𑀢𑀻? ‘‘𑀏𑀯𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁂𑀦. 𑀓𑀸𑀮𑀸𑀢𑀺𑀧𑀢𑁆𑀢𑀻𑀢𑀺 𑀓𑁂𑀦𑀝𑁆𑀞𑁂𑀦 𑀓𑀸𑀮𑀸𑀢𑀺𑀧𑀢𑁆𑀢𑀺? 𑀓𑀸𑀮𑀲𑁆𑀲𑀸𑀢𑀺𑀧𑀢𑀦𑀯𑀘𑀦𑀝𑁆𑀞𑁂𑀦. 𑀢𑀣𑀸 𑀳𑀺 𑀓𑀸𑀮𑀲𑁆𑀲 𑀅𑀢𑀺𑀧𑀢𑀦𑀁 𑀅𑀘𑁆𑀘𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀺 𑀓𑀸𑀮𑀸𑀢𑀺𑀧𑀢𑁆𑀢𑀺, 𑀮𑀪𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀭𑀳𑀺𑀢𑀁 𑀓𑁆𑀭𑀺𑀬𑀸𑀢𑀺𑀓𑁆𑀓𑀫𑀦𑀁 ¶ . 𑀓𑀸𑀮𑁄𑀢𑀺 𑀘𑁂𑀢𑁆𑀣 𑀓𑁆𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸. 𑀓𑀭𑀡𑀁 𑀓𑀸𑀭𑁄, 𑀓𑀸𑀭𑁄 𑀏𑀯 𑀓𑀸𑀮𑁄 𑀭𑀓𑀸𑀭𑀲𑁆𑀲 𑀮𑀓𑀸𑀭𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑀡𑀯𑀲𑁂𑀦. 𑀅𑀬𑀁 𑀧𑀦 𑀯𑀺𑀪𑀢𑁆𑀢𑀺 𑀢𑀩𑁆𑀩𑀸𑀘𑀓𑀢𑁆𑀢𑀸 𑀓𑀸𑀮𑀸𑀢𑀺𑀧𑀢𑁆𑀢𑀻𑀢𑀺. 𑀅𑀬𑀁 𑀧𑀦 𑀯𑀢𑁆𑀢𑀫𑀸𑀦𑀸𑀤𑀻𑀦𑀁 𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑀸.

𑀯𑀺𑀧𑁆𑀧𑀓𑀺𑀡𑁆𑀡𑀯𑀺𑀯𑀺𑀥𑀦𑀬𑁂, 𑀲𑀁𑀓𑀺𑀡𑁆𑀡𑀮𑀓𑁆𑀔𑀡𑀥𑀭𑀯𑀭𑀲𑀸𑀲𑀦𑁂;

𑀲𑀼𑀫𑀢𑀺𑀫𑀢𑀺𑀯𑀟𑁆𑀠𑀦𑀢𑁆𑀣𑀁, 𑀓𑀣𑀺𑀢𑁄 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. 𑀪𑀽𑀥𑀸𑀢𑀼𑀫𑀬𑀦𑀸𑀫𑀺𑀓𑀭𑀽𑀧𑀯𑀺𑀪𑀸𑀕

‘‘𑀪𑀽 𑀲𑀢𑁆𑀢𑀸𑀬’’𑀦𑁆𑀢𑀺 𑀥𑀸𑀢𑀼𑀲𑁆𑀲, 𑀭𑀽𑀧𑀫𑀸𑀔𑁆𑀬𑀸𑀢𑀲𑀜𑁆𑀜𑀺𑀢𑀁;

𑀢𑁆𑀬𑀸𑀤𑁆𑀬𑀦𑁆𑀢𑀁 𑀮𑀧𑀺𑀢𑀁 𑀦𑀸𑀦-𑀧𑁆𑀧𑀓𑀸𑀭𑁂𑀳𑀺 𑀅𑀦𑀸𑀓𑀼𑀮𑀁.

𑀲𑁆𑀬𑀸𑀤𑁆𑀬𑀦𑁆𑀢𑀁, 𑀤𑀸𑀦𑀺 𑀢𑀲𑁆𑀲𑁂𑀯, 𑀭𑀽𑀧𑀁 𑀦𑀸𑀫𑀺𑀓𑀲𑀯𑁆𑀳𑀬𑀁;

𑀪𑀸𑀲𑀺𑀲𑁆𑀲𑀁 𑀪𑀸𑀲𑀺𑀢𑀢𑁆𑀣𑁂𑀲𑀼, 𑀧𑀝𑀼𑀪𑀸𑀯𑀸𑀬 𑀲𑁄𑀢𑀼𑀦𑀁.

𑀬𑀤𑀢𑁆𑀣𑁂’𑀢𑁆𑀢𑀦𑀺 𑀦𑀸𑀫𑁂𑀢𑀺, 𑀧𑀭’𑀫𑀢𑁆𑀣𑁂𑀲𑀼 𑀯𑀸 𑀲𑀬𑀁;

𑀦𑀫𑀢𑀻𑀢𑀺 𑀢𑀤𑀸𑀳𑀁𑀲𑀼, 𑀦𑀸𑀫𑀁 𑀇𑀢𑀺 𑀯𑀺𑀪𑀸𑀯𑀺𑀦𑁄.

𑀦𑀸𑀫𑀁 𑀦𑀸𑀫𑀺𑀓𑀫𑀺𑀘𑁆𑀘𑀢𑁆𑀭, 𑀏𑀓𑀫𑁂𑀯𑁂𑀢𑁆𑀣𑀢𑁄 𑀪𑀯𑁂;

𑀢𑀤𑁂𑀯𑀁 𑀦𑀸𑀫𑀺𑀓𑀁 𑀜𑁂 𑀬𑁆𑀬𑀁, 𑀲𑀮𑀺𑀗𑁆𑀕𑀁 𑀲𑀯𑀺𑀪𑀢𑁆𑀢𑀺𑀓𑀁.

𑀲𑀢𑁆𑀯𑀸𑀪𑀺𑀥𑀸𑀦𑀁 𑀮𑀺𑀗𑁆𑀕𑀦𑁆𑀢𑀺, 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀁;

𑀯𑀺𑀪𑀢𑁆𑀢𑀻𑀢𑀺𑀥 𑀲𑀢𑁆𑀢𑁂𑀯, 𑀢𑀢𑁆𑀣 𑀘𑀝𑁆𑀞 𑀧𑀯𑀼𑀘𑁆𑀘𑀭𑁂.

𑀧𑀞𑀫𑀸 𑀤𑀼𑀢𑀺𑀬𑀸 𑀢𑀢𑀺𑀬𑀸, 𑀘𑀢𑀼𑀢𑁆𑀣𑀻 𑀧𑀜𑁆𑀘𑀫𑀻 𑀢𑀣𑀸;

𑀙𑀝𑁆𑀞𑀻 𑀘 𑀲𑀢𑁆𑀢𑀫𑀻 𑀘𑀸𑀢𑀺, 𑀳𑁄𑀦𑁆𑀢𑀺 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄.

𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸 𑀲𑀸𑀬𑀁, 𑀪𑀺𑀦𑁆𑀦𑀸 𑀤𑁆𑀯𑁂𑀥𑀸 𑀲𑀺𑀬𑁄 𑀇𑀢𑀺;

𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸 𑀲𑀸𑀧𑀺, 𑀪𑀺𑀦𑁆𑀦𑀸 𑀅𑀁 𑀬𑁄 𑀇𑀢𑀺 𑀤𑁆𑀯𑀺𑀥𑀸.

𑀓𑀭𑀡𑁂 ¶ 𑀢𑀢𑀺𑀬𑀸 𑀲𑀸𑀧𑀺, 𑀪𑀺𑀦𑁆𑀦𑀸 𑀦𑀸 𑀳𑀺 𑀇𑀢𑀺 𑀤𑁆𑀯𑀺𑀥𑀸;

𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻 𑀲𑀸, 𑀪𑀺𑀦𑁆𑀦𑀸 𑀤𑁆𑀯𑁂𑀥𑀸 𑀲 𑀦𑀁 𑀇𑀢𑀺.

𑀅𑀧𑀸𑀤𑀸𑀦𑁂 𑀧𑀜𑁆𑀘𑀫𑀻 𑀲𑀸, 𑀪𑀺𑀦𑁆𑀦𑀸 𑀤𑁆𑀯𑁂𑀥𑀸 𑀲𑁆𑀫𑀸 𑀳𑀺 𑀇𑀢𑀺;

𑀙𑀝𑁆𑀞𑀻 𑀲𑀸𑀫𑀺𑀫𑁆𑀳𑀺 𑀲𑀸 𑀘𑀸𑀧𑀺, 𑀪𑀺𑀦𑁆𑀦𑀸 𑀤𑁆𑀯𑁂𑀥𑀸 𑀲 𑀦𑀁 𑀇𑀢𑀺.

𑀑𑀓𑀸𑀲𑁂 𑀲𑀢𑁆𑀢𑀫𑀻 𑀲𑀸𑀧𑀺, 𑀪𑀺𑀦𑁆𑀦𑀸 𑀤𑁆𑀯𑁂𑀥𑀸 𑀲𑁆𑀫𑀺𑀁𑀲𑀼 𑀇𑀢𑀺;

𑀆𑀫𑀦𑁆𑀢𑀦𑀝𑁆𑀞𑀫𑀻 𑀲𑀸𑀬𑀁, 𑀲𑀺𑀬𑁄𑀬𑁂𑀯𑀸𑀢𑀺 𑀘𑀼𑀤𑁆𑀤𑀲.

𑀯𑀘𑀦𑀤𑁆𑀯𑀬𑀲𑀁𑀬𑀼𑀢𑁆𑀢𑀸, 𑀏𑀓𑁂𑀓𑀸 𑀢𑀸 𑀯𑀺𑀪𑀢𑁆𑀢𑀺𑀬𑁄;

𑀲𑀢𑁆𑀯𑀫𑀺𑀢𑀺𑀳 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀢𑁆𑀣𑁄 𑀲𑁄 𑀤𑀩𑁆𑀩𑀲𑀜𑁆𑀜𑀺𑀢𑁄.

𑀬𑁄 𑀓𑀭𑁄𑀢𑀺𑀲 𑀓𑀢𑁆𑀢𑀸𑀢𑀼, 𑀢𑀁 𑀓𑀫𑁆𑀫𑀁 𑀬𑀁 𑀓𑀭𑁄𑀢𑀺 𑀯𑀸;

𑀓𑀼𑀩𑁆𑀩𑀢𑁂 𑀬𑁂𑀦 𑀯𑀸 𑀢𑀦𑁆𑀢𑀼, 𑀓𑀭𑀡𑀁 𑀇𑀢𑀺 𑀲𑀜𑁆𑀜𑀺𑀢𑀁.

𑀤𑁂𑀢𑀺 𑀭𑁄𑀘𑀢𑀺 𑀯𑀸 𑀬𑀲𑁆𑀲, 𑀲𑀫𑁆𑀧𑀤𑀸𑀦𑀦𑁆𑀢𑀺 𑀢𑀁 𑀫𑀢𑀁;

𑀬𑀢𑁄𑀧𑁂𑀢𑀺 𑀪𑀬𑀁 𑀯𑀸 𑀢𑀁, 𑀅𑀧𑀸𑀤𑀸𑀦𑀦𑁆𑀢𑀺 𑀓𑀺𑀢𑁆𑀢𑀺𑀢𑀁.

𑀬𑀲𑁆𑀲𑀸𑀬𑀢𑁆𑀢𑁄 𑀲𑀫𑀽𑀳𑁄𑀯𑀸, 𑀢𑀁 𑀯𑁂 𑀲𑀸𑀫𑀻𑀢𑀺 𑀤𑁂𑀲𑀺𑀢𑀁;

𑀬𑀲𑁆𑀫𑀺𑀁 𑀓𑀭𑁄𑀢𑀺 𑀓𑀺𑀭𑀺𑀬𑀁, 𑀢𑀤𑁄𑀓𑀸𑀲𑀦𑁆𑀢𑀺 𑀲𑀤𑁆𑀤𑀺𑀢𑀁.

𑀬𑀤𑀸𑀮𑀧𑀢𑀺 𑀢𑀁 𑀯𑀢𑁆𑀣𑀼, 𑀆𑀫𑀦𑁆𑀢𑀦𑀫𑀼𑀤𑀻𑀭𑀺𑀢𑀁;

𑀲𑀤𑁆𑀤𑁂𑀦𑀸𑀪𑀺𑀫𑀼𑀔𑀻𑀓𑀸𑀭𑁄, 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀸 𑀧𑀦.

𑀯𑀺𑀦𑀸 𑀆𑀮𑀧𑀦𑀢𑁆𑀣𑀁 𑀮𑀺𑀗𑁆𑀕𑀢𑁆𑀣𑀸𑀤𑀻𑀲𑀼 𑀧𑀞𑀫𑀸𑀤𑀺𑀯𑀺𑀪𑀢𑁆𑀢𑀼𑀧𑁆𑀧𑀢𑁆𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀫𑁂𑀢𑁆𑀣 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀤𑀝𑁆𑀞𑀩𑁆𑀩𑀁 𑁋 𑀧𑀘𑁆𑀘𑀢𑁆𑀢𑀯𑀘𑀦𑁂 𑀧𑀞𑀫𑀸 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀉𑀧𑀬𑁄𑀕𑀯𑀘𑀦𑁂 𑀤𑀼𑀢𑀺𑀬𑀸 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀓𑀭𑀡𑀯𑀘𑀦𑁂 𑀢𑀢𑀺𑀬𑀸 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀲𑀫𑁆𑀧𑀤𑀸𑀦𑀯𑀘𑀦𑁂 𑀘𑀢𑀼𑀢𑁆𑀣𑀻 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀦𑀺𑀲𑁆𑀲𑀓𑁆𑀓𑀯𑀘𑀦𑁂 𑀧𑀜𑁆𑀘𑀫𑀻 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀲𑀸𑀫𑀺𑀯𑀘𑀦𑁂 𑀙𑀝𑁆𑀞𑀻 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀪𑀼𑀫𑁆𑀫𑀯𑀘𑀦𑁂 𑀲𑀢𑁆𑀢𑀫𑀻 𑀯𑀺𑀪𑀢𑁆𑀢𑀺 𑀪𑀯𑀢𑀺, 𑀆𑀫𑀦𑁆𑀢𑀦𑀯𑀘𑀦𑁂 𑀅𑀝𑁆𑀞𑀫𑀻 𑀯𑀺𑀪𑀢𑁆𑀢𑀺 𑀪𑀯𑀢𑀺. 𑀢𑀢𑁆𑀭𑀼𑀤𑁆𑀤𑀸𑀦𑀁 𑁋

𑀧𑀘𑁆𑀘𑀢𑁆𑀢𑀫𑀼𑀧𑀬𑁄𑀕𑀜𑁆𑀘, 𑀓𑀭𑀡𑀁 𑀲𑀫𑁆𑀧𑀤𑀸𑀦𑀺𑀬𑀁;

𑀦𑀺𑀲𑁆𑀲𑀓𑁆𑀓𑀁 𑀲𑀸𑀫𑀺𑀯𑀘𑀦𑀁, 𑀪𑀼𑀫𑁆𑀫𑀫𑀸𑀮𑀧𑀦𑀝𑁆𑀞𑀫𑀁.

𑀢𑀢𑁆𑀭 ¶ 𑀧𑀘𑁆𑀘𑀢𑁆𑀢𑀯𑀘𑀦𑀁 𑀦𑀸𑀫 𑀢𑀺𑀯𑀺𑀥𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀕𑀢𑀸𑀦𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀸𑀦𑀁 𑀧𑀘𑁆𑀘𑀢𑁆𑀢𑀲𑀪𑀸𑀯𑀦𑀺𑀤𑁆𑀤𑁂𑀲𑀢𑁆𑀣𑁄. 𑀉𑀧𑀬𑁄𑀕𑀯𑀘𑀦𑀁 𑀦𑀸𑀫 𑀬𑁄 𑀬𑀁 𑀓𑀭𑁄𑀢𑀺, 𑀢𑁂𑀦 𑀢𑀤𑀼𑀧𑀬𑀼𑀢𑁆𑀢𑀧𑀭𑀺𑀤𑀻𑀧𑀦𑀢𑁆𑀣𑁄. 𑀓𑀭𑀡𑀯𑀘𑀦𑀁 𑀦𑀸𑀫 𑀢𑀚𑁆𑀚𑀸𑀧𑀓𑀢𑀦𑀺𑀩𑁆𑀩𑀢𑁆𑀢𑀓𑀧𑀭𑀺𑀤𑀻𑀧𑀦𑀢𑁆𑀣𑁄. 𑀲𑀫𑁆𑀧𑀤𑀸𑀦𑀯𑀘𑀦𑀁 𑀦𑀸𑀫 𑀢𑀧𑁆𑀧𑀤𑀸𑀦𑀧𑀭𑀺𑀤𑀻𑀧𑀦𑀢𑁆𑀣𑁄. 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀦𑀸𑀫 𑀢𑀦𑁆𑀦𑀺𑀲𑁆𑀲𑀝𑀢𑀤𑀧𑀕𑀫𑀧𑀭𑀺𑀤𑀻𑀧𑀦𑀢𑁆𑀣𑁄. 𑀲𑀸𑀫𑀺𑀯𑀘𑀦𑀁 𑀦𑀸𑀫 𑀢𑀤𑀺𑀲𑁆𑀲𑀭𑀧𑀭𑀺𑀤𑀻𑀧𑀦𑀢𑁆𑀣𑁄. 𑀪𑀼𑀫𑁆𑀫𑀯𑀘𑀦𑀁 𑀦𑀸𑀫 𑀢𑀧𑁆𑀧𑀢𑀺𑀝𑁆𑀞𑀸𑀧𑀭𑀺𑀤𑀻𑀧𑀦𑀢𑁆𑀣𑁄. 𑀆𑀫𑀦𑁆𑀢𑀦𑀯𑀘𑀦𑀁 𑀦𑀸𑀫 𑀢𑀤𑀸𑀫𑀦𑁆𑀢𑀦𑀧𑀭𑀺𑀤𑀻𑀧𑀦𑀢𑁆𑀣𑁄. 𑀏𑀯𑀁 𑀜𑀢𑁆𑀯𑀸 𑀧𑀬𑁄𑀕𑀸𑀦𑀺 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀪𑀽𑀢𑁄, 𑀪𑀸𑀯𑀓𑁄, 𑀪𑀯𑁄, 𑀅𑀪𑀯𑁄, 𑀪𑀸𑀯𑁄, 𑀅𑀪𑀸𑀯𑁄, 𑀲𑀪𑀸𑀯𑁄, 𑀲𑀩𑁆𑀪𑀸𑀯𑁄, 𑀲𑀫𑁆𑀪𑀯𑁄, 𑀧𑀪𑀯𑁄, 𑀧𑀪𑀸𑀯𑁄, 𑀅𑀦𑀼𑀪𑀯𑁄, 𑀆𑀦𑀼𑀪𑀸𑀯𑁄, 𑀧𑀭𑀸𑀪𑀯𑁄, 𑀯𑀺𑀪𑀯𑁄, 𑀧𑀸𑀢𑀼𑀪𑀸𑀯𑁄, 𑀆𑀯𑀺𑀪𑀸𑀯𑁄, 𑀢𑀺𑀭𑁄𑀪𑀸𑀯𑁄, 𑀯𑀺𑀦𑀸𑀪𑀸𑀯𑁄, 𑀲𑁄𑀢𑁆𑀣𑀺𑀪𑀸𑀯𑁄, 𑀅𑀢𑁆𑀣𑀺𑀪𑀸𑀯𑁄, 𑀦𑀢𑁆𑀣𑀺𑀪𑀸𑀯𑁄𑀢𑀺 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀅𑀪𑀺𑀪𑀯𑀺𑀢𑀸, 𑀧𑀭𑀺𑀪𑀯𑀺𑀢𑀸, 𑀅𑀦𑀼𑀪𑀯𑀺𑀢𑀸, 𑀲𑀫𑀦𑀼𑀪𑀯𑀺𑀢𑀸, 𑀪𑀸𑀯𑀺𑀢𑀸, 𑀧𑀘𑁆𑀘𑀦𑀼𑀪𑀯𑀺𑀢𑀸𑀢𑀺 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀪𑀯𑀁, 𑀧𑀭𑀸𑀪𑀯𑀁, 𑀧𑀭𑀺𑀪𑀯𑀁, 𑀅𑀪𑀺𑀪𑀯𑀁, 𑀅𑀦𑀼𑀪𑀯𑀁, 𑀲𑀫𑀦𑀼𑀪𑀯𑀁, 𑀧𑀘𑁆𑀘𑀦𑀼𑀪𑀯𑀁, 𑀧𑀪𑀯𑀁, 𑀅𑀧𑁆𑀧𑀪𑀯𑀦𑁆𑀢𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀥𑀦𑀪𑀽𑀢𑀺, 𑀲𑀺𑀭𑀺𑀪𑀽𑀢𑀺, 𑀲𑁄𑀢𑁆𑀣𑀺𑀪𑀽𑀢𑀺, 𑀲𑀼𑀯𑀢𑁆𑀣𑀺𑀪𑀽𑀢𑀻𑀢𑀺 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀪𑀸𑀯𑀻, 𑀯𑀺𑀪𑀸𑀯𑀻, 𑀲𑀫𑁆𑀪𑀸𑀯𑀻, 𑀧𑀭𑀺𑀪𑀸𑀯𑀻𑀢𑀺 𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀲𑀬𑀫𑁆𑀪𑀽, 𑀧𑀪𑀽, 𑀅𑀪𑀺𑀪𑀽, 𑀯𑀺𑀪𑀽, 𑀅𑀥𑀺𑀪𑀽, 𑀧𑀢𑀺𑀪𑀽, 𑀕𑁄𑀢𑁆𑀭𑀪𑀽, 𑀯𑀢𑁆𑀭𑀪𑀽, 𑀧𑀭𑀸𑀪𑀺𑀪𑀽, 𑀭𑀽𑀧𑀸𑀪𑀺𑀪𑀽, 𑀲𑀤𑁆𑀤𑀸𑀪𑀺𑀪𑀽, 𑀕𑀦𑁆𑀥𑀸𑀪𑀺𑀪𑀽, 𑀭𑀲𑀸𑀪𑀺𑀪𑀽, 𑀨𑁄𑀝𑁆𑀞𑀩𑁆𑀩𑀸𑀪𑀺𑀪𑀽, 𑀥𑀫𑁆𑀫𑀸𑀪𑀺𑀪𑀽, 𑀲𑀩𑁆𑀩𑀸𑀪𑀺𑀪𑀽𑀢𑀺 𑀊𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁.

𑀇𑀫𑀸𑀦𑁂𑀢𑁆𑀣 𑀙𑀩𑁆𑀩𑀺𑀥𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺.

𑀉𑀓𑀸𑀭𑀦𑁆𑀢𑀁 ¶ 𑀧𑀼𑀮𑁆𑀮𑀺𑀗𑁆𑀕𑀁𑀢𑀼 𑀪𑀽𑀥𑀸𑀢𑀼𑀫𑀬𑀫𑀧𑁆𑀧𑀲𑀺𑀤𑁆𑀥𑀁, 𑀅𑀜𑁆𑀜𑀥𑀸𑀢𑀼𑀫𑀬𑀁 𑀧𑀦𑀼𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀧𑀲𑀺𑀤𑁆𑀥𑀁 ‘‘𑀪𑀺𑀓𑁆𑀔𑀼, 𑀳𑁂𑀢𑀼’’𑀇𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀯𑀺𑀥𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀪𑀸𑀯𑀢𑁄𑀬𑁂𑀯 𑀧𑀼𑀮𑁆𑀮𑀺𑀗𑁆𑀕𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀏𑀢𑁆𑀣 𑀲𑀢𑁆𑀢𑁄𑀢𑀺 𑀅𑀢𑁆𑀣𑀯𑀸𑀘𑀓𑁄 𑀪𑀽𑀢𑀲𑀤𑁆𑀤𑁄𑀬𑁂𑀯 𑀦𑀺𑀬𑁄𑀕𑀸 𑀧𑀼𑀮𑁆𑀮𑀺𑀗𑁆𑀕𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑁄.

𑀬𑁂 𑀧𑀦 ‘‘𑀬𑁄 𑀥𑀫𑁆𑀫𑁄 𑀪𑀽𑀢𑁄, 𑀬𑀸 𑀥𑀫𑁆𑀫𑀚𑀸𑀢𑀺 𑀪𑀽𑀢𑀸, 𑀬𑀁 𑀥𑀫𑁆𑀫𑀚𑀸𑀢𑀁 𑀪𑀽𑀢’’𑀦𑁆𑀢𑀺 𑀏𑀯𑀁 𑀮𑀺𑀗𑁆𑀕𑀢𑁆𑀢𑀬𑁂 𑀬𑁄𑀚𑀦𑀸𑀭𑀳𑀢𑁆𑀢𑀸 𑀅𑀦𑀺𑀬𑀢𑀮𑀺𑀗𑁆𑀕𑀸 𑀅𑀜𑁆𑀜𑁂𑀧𑀺 𑀪𑀽𑀢𑀧𑀭𑀸𑀪𑀽𑀢𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀬𑁄 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀧𑀸𑀯𑀘𑀦𑀯𑀭𑁂, 𑀢𑁂𑀧𑀺 𑀦𑀸𑀦𑁄𑀧𑀲𑀕𑁆𑀕𑀦𑀺𑀧𑀸𑀢𑀧𑀤𑁂𑀳𑀺 𑀬𑁄𑀚𑀦𑀯𑀲𑁂𑀦 𑀲𑀤𑁆𑀤𑀭𑀘𑀦𑀸𑀬𑀁 𑀲𑀼𑀔𑀼𑀫𑀢𑁆𑀣𑀕𑁆𑀕𑀳𑀡𑁂 𑀘 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀁? 𑀪𑀽𑀢𑁄, 𑀧𑀭𑀸𑀪𑀽𑀢𑁄, 𑀲𑀫𑁆𑀪𑀽𑀢𑁄, 𑀯𑀺𑀪𑀽𑀢𑁄, 𑀧𑀸𑀢𑀼𑀪𑀽𑀢𑁄, 𑀆𑀯𑀺𑀪𑀽𑀢𑁄, 𑀢𑀺𑀭𑁄𑀪𑀽𑀢𑁄, 𑀯𑀺𑀦𑀸𑀪𑀽𑀢𑁄, 𑀪𑀩𑁆𑀩𑁄, 𑀧𑀭𑀺𑀪𑀽𑀢𑁄, 𑀅𑀪𑀺𑀪𑀽𑀢𑁄, 𑀅𑀥𑀺𑀪𑀽𑀢𑁄, 𑀅𑀤𑁆𑀥𑀪𑀽𑀢𑁄, 𑀅𑀦𑀼𑀪𑀽𑀢𑁄, 𑀲𑀫𑀦𑀼𑀪𑀽𑀢𑁄, 𑀧𑀘𑁆𑀘𑀦𑀼𑀪𑀽𑀢𑁄, 𑀪𑀸𑀯𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄, 𑀯𑀺𑀪𑀸𑀯𑀺𑀢𑁄, 𑀧𑀭𑀺𑀪𑀸𑀯𑀺𑀢𑁄, 𑀅𑀦𑀼𑀧𑀭𑀺𑀪𑀽𑀢𑁄, 𑀧𑀭𑀺𑀪𑀯𑀺𑀢𑀩𑁆𑀩𑁄, 𑀧𑀭𑀺𑀪𑁄𑀢𑀩𑁆𑀩𑁄, 𑀧𑀭𑀺𑀪𑀯𑀦𑀻𑀬𑁄, 𑀅𑀪𑀺𑀪𑀯𑀺𑀢𑀩𑁆𑀩𑁄, 𑀅𑀪𑀺𑀪𑁄𑀢𑀩𑁆𑀩𑁄, 𑀅𑀪𑀺𑀪𑀯𑀦𑀻𑀬𑁄, 𑀅𑀥𑀺𑀪𑀯𑀺𑀢𑀩𑁆𑀩𑁄, 𑀅𑀥𑀺𑀪𑁄𑀢𑀩𑁆𑀩𑁄, 𑀅𑀥𑀺𑀪𑀯𑀦𑀻𑀬𑁄, 𑀅𑀦𑀼𑀪𑀯𑀺𑀢𑀩𑁆𑀩𑁄, 𑀅𑀦𑀼𑀪𑁄𑀢𑀩𑁆𑀩𑁄, 𑀅𑀦𑀼𑀪𑀯𑀦𑀻𑀬𑁄, 𑀲𑀫𑀦𑀼𑀪𑀯𑀺𑀢𑀩𑁆𑀩𑁄, 𑀲𑀫𑀦𑀼𑀪𑁄𑀢𑀩𑁆𑀩𑁄, 𑀲𑀫𑀦𑀼𑀪𑀯𑀦𑀻𑀬𑁄, 𑀧𑀘𑁆𑀘𑀦𑀼𑀪𑀯𑀺𑀢𑀩𑁆𑀩𑁄, 𑀧𑀘𑁆𑀘𑀦𑀼𑀪𑁄𑀢𑀩𑁆𑀩𑁄, 𑀧𑀘𑁆𑀘𑀦𑀼𑀪𑀯𑀦𑀻𑀬𑁄, 𑀪𑀸𑀯𑁂𑀢𑀩𑁆𑀩𑁄, 𑀪𑀸𑀯𑀦𑀻𑀬𑁄, 𑀲𑀫𑁆𑀪𑀸𑀯𑁂𑀢𑀩𑁆𑀩𑁄, 𑀲𑀫𑁆𑀪𑀸𑀯𑀦𑀻𑀬𑁄, 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀯𑀺𑀪𑀸𑀯𑀦𑀻𑀬𑁄, 𑀧𑀭𑀺𑀪𑀸𑀯𑁂𑀢𑀩𑁆𑀩𑁄, 𑀧𑀭𑀺𑀪𑀸𑀯𑀦𑀻𑀬𑁄, 𑀪𑀯𑀫𑀸𑀦𑁄, 𑀯𑀺𑀪𑀯𑀫𑀸𑀦𑁄, 𑀧𑀭𑀺𑀪𑀯𑀫𑀸𑀦𑁄, 𑀅𑀪𑀺𑀪𑀯𑀫𑀸𑀦𑁄, 𑀅𑀦𑀼𑀪𑀯𑀫𑀸𑀦𑁄, 𑀲𑀫𑀦𑀼𑀪𑀯𑀫𑀸𑀦𑁄, 𑀧𑀘𑁆𑀘𑀦𑀼𑀪𑀯𑀫𑀸𑀦𑁄, 𑀅𑀦𑀼𑀪𑁄𑀦𑁆𑀢𑁄, 𑀲𑀫𑀦𑀼𑀪𑁄𑀦𑁆𑀢𑁄, 𑀧𑀘𑁆𑀘𑀦𑀼𑀪𑁄𑀦𑁆𑀢𑁄, 𑀲𑀫𑁆𑀪𑁄𑀦𑁆𑀢𑁄, 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀪𑀸𑀯𑁂𑀦𑁆𑀢𑁄, 𑀲𑀫𑁆𑀪𑀸𑀯𑁂𑀦𑁆𑀢𑁄, 𑀯𑀺𑀪𑀸𑀯𑁂𑀦𑁆𑀢𑁄 ¶ , 𑀧𑀭𑀺𑀪𑀸𑀯𑁂𑀦𑁆𑀢𑁄, 𑀧𑀭𑀺𑀪𑀯𑀺𑀬𑀫𑀸𑀦𑁄, 𑀧𑀭𑀺𑀪𑀼𑀬𑁆𑀬𑀫𑀸𑀦𑁄, 𑀅𑀪𑀺𑀪𑀯𑀺𑀬𑀫𑀸𑀦𑁄, 𑀅𑀪𑀺𑀪𑀽𑀬𑀫𑀸𑀦𑁄, 𑀅𑀦𑀼𑀪𑀯𑀺𑀬𑀫𑀸𑀦𑁄, 𑀅𑀦𑀼𑀪𑀼𑀬𑁆𑀬𑀫𑀸𑀦𑁄, 𑀲𑀫𑀦𑀼𑀪𑀯𑀺𑀬𑀫𑀸𑀦𑁄, 𑀲𑀫𑀦𑀼𑀪𑀼𑀬𑁆𑀬𑀫𑀸𑀦𑁄, 𑀧𑀘𑁆𑀘𑀦𑀼𑀪𑀯𑀺𑀬𑀫𑀸𑀦𑁄, 𑀧𑀘𑁆𑀘𑀦𑀼𑀪𑀼𑀬𑁆𑀬𑀫𑀸𑀦𑁄𑀢𑀺 𑀇𑀫𑀸𑀦𑀺 𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀮𑀺𑀗𑁆𑀕𑀸𑀦𑀺. 𑀏𑀯𑀫𑁄𑀓𑀸𑀭𑀦𑁆𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀅𑀬𑀁 𑀢𑀸𑀯 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀉𑀤𑀸𑀳𑀭𑀡𑀼𑀤𑁆𑀤𑁂𑀲𑁄.

𑀪𑀸𑀯𑀺𑀓𑀸, 𑀪𑀸𑀯𑀦𑀸, 𑀯𑀺𑀪𑀸𑀯𑀦𑀸, 𑀲𑀫𑁆𑀪𑀸𑀯𑀦𑀸, 𑀧𑀭𑀺𑀪𑀸𑀯𑀦𑀸𑀢𑀺 𑀆𑀓𑀸𑀭𑀦𑁆𑀢𑀇𑀢𑁆𑀣𑀺𑀮𑀺𑀗𑁆𑀕𑀁.

𑀪𑀽𑀫𑀺, 𑀪𑀽𑀢𑀺, 𑀯𑀺𑀪𑀽𑀢𑀺. 𑀇𑀓𑀸𑀭𑀦𑁆𑀢𑀇𑀢𑁆𑀣𑀺𑀮𑀺𑀗𑁆𑀕𑀁.

𑀪𑀽𑀭𑀻, 𑀪𑀽𑀢𑀻, 𑀪𑁄𑀢𑀻, 𑀯𑀺𑀪𑀸𑀯𑀺𑀦𑀻, 𑀧𑀭𑀺𑀯𑀺𑀪𑀸𑀯𑀺𑀦𑀻, 𑀲𑀫𑁆𑀪𑀸𑀯𑀺𑀦𑀻, 𑀧𑀸𑀢𑀼𑀪𑀯𑀦𑁆𑀢𑀻, 𑀧𑀸𑀢𑀼𑀪𑁄𑀦𑁆𑀢𑀻, 𑀧𑀭𑀺𑀪𑀯𑀦𑁆𑀢𑀻, 𑀧𑀭𑀺𑀪𑁄𑀦𑁆𑀢𑀻, 𑀅𑀪𑀺𑀪𑀯𑀦𑁆𑀢𑀻, 𑀅𑀪𑀺𑀪𑁄𑀦𑁆𑀢𑀻, 𑀅𑀥𑀺𑀪𑀯𑀦𑁆𑀢𑀻, 𑀅𑀥𑀺𑀪𑁄𑀦𑁆𑀢𑀻, 𑀅𑀦𑀼𑀪𑀯𑀦𑁆𑀢𑀻, 𑀅𑀦𑀼𑀪𑁄𑀦𑁆𑀢𑀻, 𑀲𑀫𑀦𑀼𑀪𑀯𑀦𑁆𑀢𑀻, 𑀲𑀫𑀦𑀼𑀪𑁄𑀦𑁆𑀢𑀻, 𑀧𑀘𑁆𑀘𑀦𑀼𑀪𑀯𑀦𑁆𑀢𑀻, 𑀧𑀘𑁆𑀘𑀦𑀼𑀪𑁄𑀦𑁆𑀢𑀻, 𑀅𑀪𑀺𑀲𑀫𑁆𑀪𑀯𑀦𑁆𑀢𑀻, 𑀅𑀪𑀺𑀲𑀫𑁆𑀪𑁄𑀦𑁆𑀢𑀻𑀢𑀺 𑀈𑀓𑀸𑀭𑀦𑁆𑀢𑀇𑀢𑁆𑀣𑀺𑀮𑀺𑀗𑁆𑀕𑀁.

𑀪𑀽, 𑀅𑀪𑀽. 𑀊𑀓𑀸𑀭𑀦𑁆𑀢𑀇𑀢𑁆𑀣𑀺𑀮𑀺𑀗𑁆𑀕𑀁.

𑀇𑀫𑀸𑀦𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺.

𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀪𑀽𑀥𑀸𑀢𑀼𑀫𑀬𑀫𑀧𑁆𑀧𑀲𑀺𑀤𑁆𑀥𑀁, 𑀅𑀜𑁆𑀜𑀥𑀸𑀢𑀼𑀫𑀬𑀁 𑀧𑀦 𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀧𑀲𑀺𑀤𑁆𑀥𑀁 ‘‘𑀥𑀸𑀢𑀼, 𑀥𑁂𑀦𑀼’’𑀇𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀯𑀺𑀥𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀑𑀓𑀸𑀭𑀦𑁆𑀢𑀲𑁆𑀲 𑀯𑀸 𑀕𑁄𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀢𑁂𑀦 𑀲𑀤𑁆𑀥𑀺𑀁 𑀙𑀩𑁆𑀩𑀺𑀥𑀸𑀦𑀺𑀧𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀪𑀸𑀯𑀢𑁄𑀬𑁂𑀯𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀏𑀢𑁆𑀣𑀸𑀧𑀺 𑀅𑀦𑀺𑀬𑀢𑀮𑀺𑀗𑁆𑀕𑀸 𑀪𑀽𑀢𑀧𑀭𑀸𑀪𑀽𑀢𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀬𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀬𑀼𑀚𑁆𑀚𑀦𑁆𑀢𑁂.

𑀓𑀣𑀁? 𑀪𑀽𑀢𑀸, 𑀧𑀭𑀸𑀪𑀽𑀢𑀸, 𑀲𑀫𑁆𑀪𑀽𑀢𑀸𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀕𑀳𑁂𑀢𑀩𑁆𑀩𑀁 ‘‘𑀅𑀦𑀼𑀪𑁄𑀦𑁆𑀢𑁄 𑀲𑀫𑀦𑀼𑀪𑁄𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀦𑀯 𑀧𑀤𑀸𑀦𑀺 ¶ 𑀯𑀚𑁆𑀚𑁂𑀢𑁆𑀯𑀸. 𑀢𑀸𑀦𑀺 𑀳𑀺 𑀈𑀓𑀸𑀭𑀦𑁆𑀢𑀯𑀲𑁂𑀦 𑀬𑁄𑀚𑀺𑀢𑀸𑀦𑀺. 𑀇𑀫𑀸𑀦𑀺 𑀦𑀺𑀬𑀢𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀮𑀺𑀗𑁆𑀕𑀸𑀦𑀺. 𑀏𑀯𑀁 𑀆𑀓𑀸𑀭𑀦𑁆𑀢𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀅𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀉𑀤𑀸𑀳𑀭𑀡𑀼𑀤𑁆𑀤𑁂𑀲𑁄.

𑀪𑀽𑀢𑀁, 𑀫𑀳𑀸𑀪𑀽𑀢𑀁, 𑀪𑀯𑀺𑀢𑁆𑀢𑀁, 𑀪𑀽𑀦𑀁, 𑀪𑀯𑀦𑀁, 𑀧𑀭𑀸𑀪𑀯𑀦𑀁, 𑀲𑀫𑁆𑀪𑀯𑀦𑀁, 𑀯𑀺𑀪𑀯𑀦𑀁, 𑀧𑀸𑀢𑀼𑀪𑀯𑀦𑀁, 𑀆𑀯𑀺𑀪𑀯𑀦𑀁, 𑀢𑀺𑀭𑁄𑀪𑀯𑀦𑀁, 𑀯𑀺𑀦𑀸𑀪𑀯𑀦𑀁, 𑀲𑁄𑀢𑁆𑀣𑀺𑀪𑀯𑀦𑀁, 𑀧𑀭𑀺𑀪𑀯𑀦𑀁, 𑀅𑀪𑀺𑀪𑀯𑀦𑀁, 𑀅𑀥𑀺𑀪𑀯𑀦𑀁, 𑀅𑀦𑀼𑀪𑀯𑀦𑀁, 𑀲𑀫𑀦𑀼𑀪𑀯𑀦𑀁, 𑀧𑀘𑁆𑀘𑀦𑀼𑀪𑀯𑀦𑀦𑁆𑀢𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀅𑀢𑁆𑀣𑀯𑀺𑀪𑀸𑀯𑀺, 𑀥𑀫𑁆𑀫𑀯𑀺𑀪𑀸𑀯𑀺. 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀕𑁄𑀢𑁆𑀭𑀪𑀼, 𑀘𑀺𑀢𑁆𑀢𑀲𑀳𑀪𑀼, 𑀦𑀘𑀺𑀢𑁆𑀢𑀲𑀳𑀪𑀼. 𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀪𑀸𑀯𑀢𑁄𑀬𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀏𑀢𑁆𑀣 𑀲𑀢𑁆𑀢𑀪𑀽𑀢𑀭𑀽𑀧𑀯𑀸𑀘𑀓𑁄 𑀪𑀽𑀢𑀲𑀤𑁆𑀤𑁄𑀬𑁂𑀯 𑀦𑀺𑀬𑁄𑀕𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀧𑀺 𑀅𑀦𑀺𑀬𑀢𑀮𑀺𑀗𑁆𑀕𑀸 𑀪𑀽𑀢 𑀧𑀭𑀸𑀪𑀽𑀢 𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀬𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀬𑀼𑀚𑁆𑀚𑀦𑁆𑀢𑁂.

𑀓𑀣𑀁? 𑀪𑀽𑀢𑀁, 𑀧𑀭𑀸𑀪𑀽𑀢𑀁, 𑀲𑀫𑁆𑀪𑀽𑀢𑀁, 𑀯𑀺𑀪𑀽𑀢𑀁. 𑀧𑁂𑀬𑁆𑀬𑀸𑀮𑁄. 𑀲𑀫𑀦𑀼𑀪𑀯𑀫𑀸𑀦𑀁, 𑀧𑀘𑁆𑀘𑀦𑀼𑀪𑀯𑀫𑀸𑀦𑀁, 𑀅𑀦𑀼𑀪𑁄𑀦𑁆𑀢𑀁, 𑀅𑀦𑀼𑀪𑀯𑀦𑁆𑀢𑀁, 𑀲𑀫𑀦𑀼𑀪𑁄𑀦𑁆𑀢𑀁, 𑀲𑀫𑀦𑀼𑀪𑀯𑀦𑁆𑀢𑀁, 𑀧𑀘𑁆𑀘𑀦𑀼𑀪𑁄𑀦𑁆𑀢𑀁, 𑀧𑀘𑁆𑀘𑀦𑀼𑀪𑀯𑀦𑁆𑀢𑀁, 𑀲𑀫𑁆𑀪𑁄𑀦𑁆𑀢𑀁, 𑀲𑀫𑁆𑀪𑀯𑀦𑁆𑀢𑀁, 𑀅𑀪𑀺𑀲𑀫𑁆𑀪𑁄𑀦𑁆𑀢𑀁, 𑀅𑀪𑀺𑀲𑀫𑁆𑀪𑀯𑀦𑁆𑀢𑀁, 𑀧𑀸𑀢𑀼𑀪𑁄𑀦𑁆𑀢𑀁, 𑀧𑀸𑀢𑀼𑀪𑀯𑀦𑁆𑀢𑀁, 𑀧𑀭𑀺𑀪𑁄𑀦𑁆𑀢𑀁, 𑀧𑀭𑀺𑀪𑀯𑀦𑁆𑀢𑀁, 𑀅𑀪𑀺𑀪𑁄𑀦𑁆𑀢𑀁, 𑀅𑀪𑀺𑀪𑀯𑀦𑁆𑀢𑀁, 𑀅𑀥𑀺𑀪𑁄𑀦𑁆𑀢𑀁, 𑀅𑀥𑀺𑀪𑀯𑀦𑁆𑀢𑀁, 𑀪𑀸𑀯𑁂𑀦𑁆𑀢𑀁, 𑀲𑀫𑁆𑀪𑀸𑀯𑁂𑀦𑁆𑀢𑀁, 𑀯𑀺𑀪𑀸𑀯𑁂𑀦𑁆𑀢𑀁, 𑀧𑀭𑀺𑀪𑀸𑀯𑁂𑀦𑁆𑀢𑀁, 𑀧𑀭𑀺𑀪𑀸𑀯𑀺𑀬𑀫𑀸𑀦𑀁, 𑀧𑀭𑀺𑀪𑀼𑀬𑁆𑀬𑀫𑀸𑀦𑀁, 𑀧𑁂𑀬𑁆𑀬𑀸𑀮𑁄. 𑀧𑀘𑁆𑀘𑀦𑀼𑀪𑀯𑀺𑀬𑀫𑀸𑀦𑀁, 𑀧𑀘𑁆𑀘𑀦𑀼𑀪𑀼𑀬𑁆𑀬𑀫𑀸𑀦𑀦𑁆𑀢𑀺 𑀇𑀫𑀸𑀦𑀺 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀮𑀺𑀗𑁆𑀕𑀸𑀦𑀺. 𑀏𑀯𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀧𑀓𑀸𑀲𑀺𑀢𑀸𑀦𑀺 ¶ . 𑀅𑀬𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀉𑀤𑀸𑀳𑀭𑀡𑀼𑀤𑁆𑀤𑁂𑀲𑁄, 𑀏𑀯𑀁 𑀧𑀼𑀮𑁆𑀮𑀺𑀗𑁆𑀕𑀸𑀤𑀺𑀯𑀲𑁂𑀦 𑀮𑀺𑀗𑁆𑀕𑀢𑁆𑀢𑀬𑀁 𑀪𑀽𑀥𑀸𑀢𑀼𑀫𑀬𑀫𑀼𑀤𑁆𑀤𑀺𑀝𑁆𑀞𑀁.

𑀏𑀢𑁆𑀣 𑀫𑁂 𑀅𑀧𑁆𑀧𑀲𑀺𑀤𑁆𑀥𑀸𑀢𑀺, 𑀬𑁂 𑀬𑁂 𑀲𑀤𑁆𑀤𑀸 𑀧𑀓𑀸𑀲𑀺𑀢𑀸;

𑀢𑁂 𑀢𑁂 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼, 𑀫𑀕𑁆𑀕𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀑, 𑀆, 𑀩𑀺𑀦𑁆𑀤𑀼, 𑀇, 𑀈, 𑀉, 𑀊-𑀅𑀦𑁆𑀢𑀺𑀫𑁂 𑀲𑀢𑁆𑀢𑀥𑀸 𑀞𑀺𑀢𑀸;

𑀜𑁂 𑀬𑁆𑀬𑀸 𑀧𑀼𑀮𑁆𑀮𑀺𑀗𑁆𑀕𑀪𑁂𑀤𑀸𑀢𑀺, 𑀦𑀺𑀭𑀼𑀢𑁆𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

𑀆 𑀇𑀯𑀡𑁆𑀡𑁄 𑀘𑀼𑀯𑀡𑁆𑀡𑁄 𑀘, 𑀧𑀜𑁆𑀘 𑀅𑀦𑁆𑀢𑀸 𑀲𑀭𑀽𑀧𑀢𑁄;

𑀇𑀢𑁆𑀣𑀺𑀪𑁂𑀤𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀑𑀓𑀸𑀭𑀦𑁆𑀢𑁂𑀦 𑀙𑀸𑀧𑀺 𑀯𑀸.

𑀩𑀺𑀦𑁆𑀤𑀼, 𑀇, 𑀉-𑀇𑀫𑁂 𑀅𑀦𑁆𑀢𑀸, 𑀢𑀬𑁄 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸;

𑀦𑀧𑀼𑀁𑀲𑀓𑀧𑁆𑀧𑀪𑁂𑀤𑀸𑀢𑀺, 𑀦𑀺𑀭𑀼𑀢𑁆𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

𑀅𑀦𑁆𑀢𑀸 𑀲𑀢𑁆𑀢𑁂𑀯 𑀧𑀼𑀮𑁆𑀮𑀺𑀗𑁆𑀕𑁂, 𑀇𑀢𑁆𑀣𑀺𑀬𑀁 𑀧𑀜𑁆𑀘 𑀯𑀸 𑀙 𑀯𑀸;

𑀦𑀧𑀼𑀁𑀲𑀓𑁂 𑀢𑀬𑁄 𑀏𑀯𑀁, 𑀤𑀲 𑀧𑀜𑁆𑀘𑀳𑀺 𑀙𑀩𑁆𑀩𑀺𑀥𑀸.

𑀬𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀪𑀽𑀢𑁄’’𑀢𑀺𑀆𑀤𑀬𑁄 𑀲𑀤𑁆𑀤𑀸 𑀦𑀺𑀩𑁆𑀩𑀘𑀦𑀸𑀪𑀺𑀥𑁂𑀬𑁆𑀬𑀓𑀣𑀦𑀢𑁆𑀣𑀲𑀸𑀥𑀓𑀯𑀘𑀦𑀧𑀭𑀺𑀬𑀸𑀬𑀯𑀘𑀦𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀇𑀫𑁂𑀲𑀁 𑀦𑀺𑀩𑁆𑀩𑀘𑀦𑀸𑀤𑀻𑀦𑀺 𑀬𑀣𑀸𑀲𑀫𑁆𑀪𑀯𑀁 𑀯𑀓𑁆𑀔𑀸𑀫 𑀯𑀺𑀜𑁆𑀜𑀽𑀦𑀁 𑀢𑀼𑀝𑁆𑀞𑀺𑀚𑀦𑀦𑀢𑁆𑀣𑀜𑁆𑀘𑁂𑀯 𑀲𑁄𑀢𑀸𑀭𑀸𑀦𑀫𑀢𑁆𑀣𑁂𑀲𑀼 𑀧𑀝𑀼𑀢𑀭𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀘. 𑀢𑀢𑁆𑀭 𑀪𑀽𑀢𑁄𑀢𑀺 𑀔𑀦𑁆𑀥𑀧𑀸𑀢𑀼𑀪𑀸𑀯𑁂𑀦 𑀪𑀯𑀢𑀻𑀢𑀺 𑀪𑀽𑀢𑁄, 𑀇𑀤𑀁 𑀢𑀸𑀯 𑀦𑀺𑀩𑁆𑀩𑀘𑀦𑀁. ‘‘𑀪𑀽𑀢𑁄’’𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀲𑀢𑁆𑀢𑁄 𑀯𑀼𑀘𑁆𑀘𑀢𑀺, 𑀇𑀤𑀫𑀪𑀺𑀥𑁂𑀬𑁆𑀬𑀓𑀣𑀦𑀁. ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄. 𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀘 𑀇𑀤𑀫𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀯𑀘𑀦𑀁. 𑀅𑀣 𑀯𑀸 𑀪𑀽𑀢𑁄𑀢𑀺 𑀏𑀯𑀁𑀦𑀸𑀫𑀓𑁄 𑀅𑀫𑀦𑀼𑀲𑁆𑀲𑀚𑀸𑀢𑀺𑀬𑁄 𑀲𑀢𑁆𑀢𑀯𑀺𑀲𑁂𑀲𑁄, 𑀇𑀤𑀫𑀪𑀺𑀥𑁂𑀬𑁆𑀬𑀓𑀣𑀦𑀁. ‘‘𑀪𑀽𑀢𑀯𑀺𑀚𑁆𑀚𑀸, 𑀪𑀽𑀢𑀯𑁂𑀚𑁆𑀚𑁄, 𑀪𑀽𑀢𑀯𑀺𑀕𑁆𑀕𑀳𑀺𑀢𑁄’’𑀢𑀺 𑀘 𑀇𑀤𑀫𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀯𑀘𑀦𑀁. 𑀬𑀜𑁆𑀘 𑀧𑀦 ‘‘𑀲𑀢𑁆𑀢𑁄 𑀫𑀘𑁆𑀘𑁄 𑀧𑀚𑀸’’𑀢𑀺𑀆𑀤𑀺𑀓𑀁 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀁 𑀯𑀘𑀦𑀁, 𑀇𑀤𑀁 𑀲𑀢𑁆𑀢𑁄𑀢𑀺 ¶ 𑀅𑀢𑁆𑀣𑀯𑀸𑀘𑀓𑀲𑁆𑀲 𑀪𑀽𑀢𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀜𑁆𑀘 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀫𑀘𑁆𑀘𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀕𑀼 𑀚𑀦𑁆𑀢𑀼 𑀳𑀺𑀦𑁆𑀤𑀕𑀼 𑀫𑀦𑀼𑀚𑁄’’𑀢𑀺 𑀆𑀕𑀢𑀁, 𑀇𑀤𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀯. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀘𑁆𑀘𑀦𑁆𑀢𑁂 𑁋

𑀲𑀢𑁆𑀢𑁄 𑀫𑀘𑁆𑀘𑁄 𑀚𑀦𑁄 𑀪𑀽𑀢𑁄, 𑀧𑀸𑀡𑁄 𑀳𑀺𑀦𑁆𑀤𑀕𑀼 𑀧𑀼𑀕𑁆𑀕𑀮𑁄;

𑀚𑀦𑁆𑀢𑀼 𑀚𑀻𑀯𑁄 𑀚𑀕𑀼 𑀬𑀓𑁆𑀔𑁄, 𑀧𑀸𑀡𑀻 𑀤𑁂𑀳𑀻 𑀢𑀣𑀸𑀕𑀢𑁄.

𑀲𑀢𑁆𑀢𑀯𑁄 𑀫𑀸𑀢𑀺𑀬𑁄 𑀮𑁄𑀓𑁄, 𑀫𑀦𑀼𑀚𑁄 𑀫𑀸𑀦𑀯𑁄 𑀦𑀭𑁄;

𑀧𑁄𑀲𑁄 𑀲𑀭𑀻𑀭𑀻𑀢𑀺 𑀧𑀼𑀫𑁂, 𑀪𑀽𑀢𑀫𑀺𑀢𑀺 𑀦𑀧𑀼𑀁𑀲𑀓𑁂.

𑀧𑀚𑀸𑀢𑀺 𑀇𑀢𑁆𑀣𑀺𑀬𑀁 𑀯𑀼𑀢𑁆𑀢𑁄, 𑀮𑀺𑀗𑁆𑀕𑀢𑁄, 𑀦 𑀘 𑀅𑀢𑁆𑀣𑀢𑁄;

𑀏𑀯𑀁 𑀢𑀺𑀮𑀺𑀗𑁆𑀕𑀺𑀓𑀸 𑀳𑁄𑀦𑁆𑀢𑀺, 𑀲𑀤𑁆𑀤𑀸 𑀲𑀢𑁆𑀢𑀸𑀪𑀺𑀥𑀸𑀦𑀓𑀸.

𑀬𑁄 𑀲𑁄 𑀚𑀗𑁆𑀖𑀸𑀬 𑀉𑀮𑀢𑀺, 𑀲𑁄 𑀲𑀢𑁆𑀢𑁄 𑀚𑀗𑁆𑀖𑀮𑁄 𑀇𑀥;

𑀧𑀸𑀡𑀤𑁂𑀳𑀸𑀪𑀺𑀥𑀸𑀦𑁂𑀳𑀺, 𑀲𑀢𑁆𑀢𑀦𑀸𑀫𑀁 𑀧𑀧𑀜𑁆𑀘𑀺𑀢𑀁.

𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 ‘‘𑀧𑀭𑀺𑀬𑀸𑀬𑀯𑀘𑀦’’𑀦𑁆𑀢𑀺 𑀘 ‘‘𑀅𑀪𑀺𑀥𑀸𑀦’’𑀦𑁆𑀢𑀺 𑀘 ‘‘𑀲𑀗𑁆𑀔𑀸’’𑀢𑀺𑀆𑀤𑀻𑀦𑀺 𑀘 𑀏𑀓𑀢𑁆𑀣𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀦 𑀪𑀽𑀢𑀲𑀤𑁆𑀤𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀫𑀦𑀼𑀲𑁆𑀲𑀥𑀸𑀢𑀼𑀲𑀲𑁆𑀲𑀢𑀯𑀺𑀚𑁆𑀚𑀫𑀸𑀦𑀔𑀻𑀡𑀸𑀲𑀯𑀲𑀢𑁆𑀢𑀭𑀼𑀓𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺, 𑀢𑀧𑁆𑀧𑀬𑁄𑀕𑁄 𑀉𑀧𑀭𑀺 𑀅𑀢𑁆𑀣𑀢𑁆𑀢𑀺𑀓𑀯𑀺𑀪𑀸𑀕𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀪𑀸𑀯𑀓𑁄𑀢𑀺 𑀪𑀸𑀯𑁂𑀢𑀻𑀢𑀺 𑀪𑀸𑀯𑀓𑁄, 𑀇𑀤𑀁 𑀦𑀺𑀩𑁆𑀩𑀘𑀦𑀁. 𑀬𑁄 𑀪𑀸𑀯𑀦𑀁 𑀓𑀭𑁄𑀢𑀺, 𑀲𑁄 𑀪𑀸𑀯𑀓𑁄. 𑀇𑀤𑀫𑀪𑀺𑀥𑁂𑀬𑁆𑀬𑀓𑀣𑀦𑀁. ‘‘𑀪𑀸𑀯𑀓𑁄 𑀦𑀺𑀧𑀓𑁄 𑀥𑀻𑀭𑁄’’𑀢𑀺 𑀇𑀤𑀫𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀯𑀘𑀦𑀁. ‘‘𑀪𑀸𑀯𑀓𑁄 𑀪𑀸𑀯𑀦𑀸𑀧𑀲𑀼𑀢𑁄 𑀪𑀸𑀯𑀦𑀸𑀧𑀬𑀼𑀢𑁆𑀢𑁄 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀤𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀫𑀸𑀦𑀺 ‘‘𑀪𑀽𑀢𑁄 𑀪𑀸𑀯𑀓𑁄’’𑀢𑀺 𑀤𑁆𑀯𑁂 𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺. 𑀇𑀢𑁄 𑀧𑀭𑀁 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀇𑀤𑀁 𑀦𑀺𑀩𑁆𑀩𑀘𑀦’’𑀦𑁆𑀢𑀺 𑀘 𑀆𑀤𑀻𑀦𑀺 ¶ 𑀅𑀯𑀢𑁆𑀯𑀸 𑀓𑀢𑁆𑀣𑀘𑀺 𑀅𑀢𑁆𑀣𑀲𑀸𑀥𑀓𑀯𑀘𑀦𑀁 𑀧𑀭𑀺𑀬𑀸𑀬𑀯𑀘𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀜𑁆𑀘 𑀬𑀣𑀸𑀭𑀳𑀁 𑀤𑀲𑁆𑀲𑁂𑀲𑁆𑀲𑀸𑀫. 𑀢𑁂𑀲𑀼 𑀳𑀺 𑀲𑀩𑁆𑀩𑀢𑁆𑀣 𑀤𑀲𑁆𑀲𑀺𑀢𑁂𑀲𑀼 𑀕𑀦𑁆𑀣𑀯𑀺𑀢𑁆𑀣𑀸𑀭𑁄 𑀲𑀺𑀬𑀸, 𑀢𑀲𑁆𑀫𑀸 𑀬𑁂𑀲𑀫𑀢𑁆𑀣𑁄 𑀉𑀢𑁆𑀢𑀸𑀦𑁄, 𑀢𑁂𑀲𑀫𑁆𑀧𑀺 𑀧𑀤𑀸𑀦𑀫𑀪𑀺𑀥𑁂𑀬𑁆𑀬𑀁 𑀦 𑀓𑀣𑁂𑀲𑁆𑀲𑀸𑀫, 𑀦𑀺𑀩𑁆𑀩𑀘𑀦𑀫𑀢𑁆𑀢𑀫𑁂𑀯 𑀦𑁂𑀲𑀁 𑀓𑀣𑁂𑀲𑁆𑀲𑀸𑀫. 𑀬𑁂𑀲𑀁 𑀧𑀦 𑀕𑀫𑁆𑀪𑀻𑀭𑁄 𑀅𑀢𑁆𑀣𑁄, 𑀢𑁂𑀲𑀫𑀪𑀺𑀥𑁂𑀬𑁆𑀬𑀁 𑀓𑀣𑁂𑀲𑁆𑀲𑀸𑀫.

𑀪𑀯𑀦𑀁 𑀪𑀯𑁄, 𑀪𑀯𑁄 𑀯𑀼𑀘𑁆𑀘𑀢𑀺 𑀯𑀼𑀤𑁆𑀥𑀺. 𑀪𑀽𑀲𑀤𑁆𑀤𑀲𑁆𑀲 𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑀢𑁄 𑀯𑀟𑁆𑀠𑀦𑁂𑀧𑀺 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀪𑀯𑀦𑀁 𑀯𑀟𑁆𑀠𑀦𑀦𑁆𑀢𑀺 𑀓𑀢𑁆𑀯𑀸. ‘‘𑀪𑀯𑁄 𑀘 𑀭𑀜𑁆𑀜𑁄 𑀅𑀪𑀯𑁄 𑀘 𑀭𑀜𑁆𑀜𑁄’’𑀢𑀺 𑀇𑀤𑀁 𑀯𑀼𑀤𑁆𑀥𑀺𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀣 𑀯𑀸 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺 𑀲𑀲𑁆𑀲𑀢𑀁. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀳𑀺 𑀲𑀲𑁆𑀲𑀢𑀯𑀲𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀢𑀲𑁆𑀫𑀸 𑀪𑀯𑀤𑀺𑀝𑁆𑀞𑀻’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀢𑀣𑀸 𑀪𑀯𑁄𑀢𑀺 𑀪𑀯𑀤𑀺𑀝𑁆𑀞𑀺, 𑀪𑀯𑀢𑀺 𑀲𑀲𑁆𑀲𑀢𑀁 𑀢𑀺𑀝𑁆𑀞𑀢𑀻𑀢𑀺 𑀧𑀯𑀢𑁆𑀢𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺 𑀪𑀯𑀤𑀺𑀝𑁆𑀞𑀺 𑀦𑀸𑀫. 𑀪𑀯𑀤𑀺𑀝𑁆𑀞𑀺 𑀳𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀪𑀯𑁂𑀦 𑀪𑀯𑀲𑁆𑀲 𑀯𑀺𑀧𑁆𑀧𑀫𑁄𑀓𑁆𑀔𑀫𑀸𑀳𑀁𑀲𑀽’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀏𑀢𑁆𑀣𑀸𑀬𑀁 𑀧𑀸𑀴𑀺𑀯𑀘𑀦𑀢𑁆𑀣𑁄 𑁋 𑀏𑀓𑀘𑁆𑀘𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑀤𑀺𑀝𑁆𑀞𑀺𑀬𑀸 𑀯𑀸 𑀓𑀸𑀫𑀪𑀯𑀸𑀤𑀺𑀦𑀸 𑀯𑀸 𑀲𑀩𑁆𑀩𑀪𑀯𑀢𑁄 𑀯𑀺𑀫𑀼𑀢𑁆𑀢𑀺𑀁 𑀲𑀁𑀲𑀸𑀭𑀯𑀺𑀲𑀼𑀤𑁆𑀥𑀺𑀁 𑀓𑀣𑀬𑀺𑀁𑀲𑀽𑀢𑀺. 𑀅𑀣 𑀯𑀸 𑀪𑀯𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀪𑀯𑁄𑀢𑀺 𑀅𑀢𑁆𑀣𑁂𑀦 𑀲𑀫𑁆𑀧𑀢𑁆𑀢𑀺𑀧𑀼𑀜𑁆𑀜𑀸𑀦𑀺 𑀪𑀯𑁄𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. ‘‘𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀏𑀢𑁆𑀣 𑀧𑀦𑀸𑀬𑀁 𑀧𑀸𑀴𑀺𑀯𑀘𑀦𑀢𑁆𑀣𑁄 𑁋 𑀪𑀯𑁄𑀢𑀺 𑀲𑀫𑁆𑀧𑀢𑁆𑀢𑀺, 𑀅𑀪𑀯𑁄𑀢𑀺 𑀯𑀺𑀧𑀢𑁆𑀢𑀺. 𑀢𑀣𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀲𑀲𑁆𑀲𑀢𑀁, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑁄. 𑀪𑀯𑁄𑀢𑀺 𑀧𑀼𑀜𑁆𑀜𑀁, 𑀅𑀪𑀯𑁄𑀢𑀺 𑀧𑀸𑀧𑀁, 𑀢𑀁 𑀲𑀩𑁆𑀩𑀁 𑀯𑀻𑀢𑀺𑀯𑀢𑁆𑀢𑁄𑀢𑀺.

𑀲𑀳𑁄𑀓𑀸𑀲𑀸 ¶ 𑀔𑀦𑁆𑀥𑀸𑀧𑀺 𑀪𑀯𑁄. ‘‘𑀓𑀸𑀫𑀪𑀯𑁄 𑀭𑀽𑀧𑀪𑀯𑁄’’ 𑀇𑀘𑁆𑀘𑁂𑀯𑀫𑀸𑀤𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀏𑀢𑁆𑀣 𑀧𑀦 𑀔𑀦𑁆𑀥𑀸 ‘‘𑀬𑁄 𑀧𑀜𑁆𑀜𑀸𑀬𑀢𑀺, 𑀲𑁄 𑀲𑀭𑀽𑀧𑀁 𑀮𑀪𑀢𑀻’’𑀢𑀺 𑀓𑀢𑁆𑀯𑀸 ‘‘𑀪𑀯𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀲𑀫𑀼𑀤𑀬𑀸 𑀦𑀺𑀭𑀦𑁆𑀢𑀭𑀁 𑀲𑀫𑀼𑀤𑁂𑀢𑀻’’𑀢𑀺 𑀅𑀢𑁆𑀣𑁂𑀦 𑀯𑀸 ‘‘𑀪𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀑𑀓𑀸𑀲𑁄 𑀧𑀦 ‘‘𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀦𑀸𑀫𑀭𑀽𑀧𑀥𑀫𑁆𑀫𑀸 𑀘𑀸’’𑀢𑀺 𑀅𑀢𑁆𑀣𑁂𑀦 ‘‘𑀪𑀯𑁄’’𑀢𑀺. 𑀅𑀧𑀺𑀘 𑀓𑀫𑁆𑀫𑀪𑀯𑁄𑀧𑀺 𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀪𑀯𑁄. ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄 𑀤𑀼𑀯𑀺𑀥𑁂𑀦 𑀅𑀢𑁆𑀣𑀺 𑀓𑀫𑁆𑀫𑀪𑀯𑁄, 𑀅𑀢𑁆𑀣𑀺 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀢𑀢𑁆𑀣 𑀓𑀫𑁆𑀫𑀫𑁂𑀯 𑀪𑀯𑁄 𑀓𑀫𑁆𑀫𑀪𑀯𑁄. 𑀢𑀣𑀸 𑀉𑀧𑀧𑀢𑁆𑀢𑀺 𑀏𑀯 𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀏𑀢𑁆𑀣𑀽𑀧𑀧𑀢𑁆𑀢𑀺 𑀪𑀯𑀢𑀻𑀢𑀺 𑀪𑀯𑁄, 𑀓𑀫𑁆𑀫𑀁 𑀧𑀦 𑀬𑀣𑀸 𑀲𑀼𑀔𑀓𑀸𑀭𑀡𑀢𑁆𑀢𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀪𑀯𑀓𑀸𑀭𑀡𑀢𑁆𑀢𑀸 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀪𑀸𑀯𑀦𑀮𑀓𑁆𑀔𑀡𑀢𑁆𑀢𑀸 𑀪𑀸𑀯𑁂𑀢𑀻𑀢𑀺 𑀪𑀯𑁄. 𑀓𑀺𑀁 𑀪𑀸𑀯𑁂𑀢𑀺? 𑀉𑀧𑀧𑀢𑁆𑀢𑀺𑀁. 𑀇𑀢𑀺 𑀉𑀧𑀧𑀢𑁆𑀢𑀺𑀁 𑀪𑀸𑀯𑁂𑀢𑀻𑀢𑀺 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀸𑀯𑁂𑀢𑀻𑀢𑀺𑀫𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦𑀢𑁆𑀣𑁄. 𑀅𑀣 𑀯𑀸 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀯𑀘𑀦𑀢𑁄 𑀪𑀯𑀢𑀺 𑀏𑀢𑁂𑀦𑀸𑀢𑀺 𑀪𑀯𑁄𑀢𑀺 𑀓𑀫𑁆𑀫𑀪𑀯𑁄 𑀯𑀼𑀘𑁆𑀘𑀢𑀺.

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺

𑀯𑀼𑀢𑁆𑀢𑀮𑀓𑁆𑀔𑀡𑁄 𑀲𑀁𑀲𑀸𑀭𑁄𑀧𑀺 𑀪𑀯𑁄. ‘‘𑀪𑀯𑁂 𑀤𑀼𑀓𑁆𑀔𑀁 𑀪𑀯𑀤𑀼𑀓𑁆𑀔𑀁, 𑀪𑀯𑁂 𑀲𑀁𑀲𑀭𑀦𑁆𑀢𑁄’’𑀢𑀺 𑀇𑀫𑀸𑀦𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀸𑀦𑀺 𑀯𑀘𑀦𑀸𑀦𑀺. 𑀢𑀢𑁆𑀭 𑀓𑁂𑀦𑀝𑁆𑀞𑁂𑀦 𑀲𑀁𑀲𑀸𑀭𑁄 𑀪𑀯𑁄𑀢𑀺 𑀓𑀣𑀻𑀬𑀢𑀺? 𑀪𑀯𑀢𑀺 𑀏𑀢𑁆𑀣 𑀲𑀢𑁆𑀢𑀲𑀫𑁆𑀫𑀼𑀢𑀺 𑀔𑀦𑁆𑀥𑀸𑀤𑀺𑀧𑀝𑀺𑀧𑀸𑀝𑀺𑀲𑀗𑁆𑀔𑀸𑀢𑁂 𑀥𑀫𑁆𑀫𑀧𑀼𑀜𑁆𑀚𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁂𑀦 ¶ . 𑀇𑀤𑀁 𑀪𑀯𑀲𑀤𑁆𑀤𑀲𑁆𑀲 𑀪𑀸𑀯𑀓𑀢𑁆𑀢𑀼𑀓𑀭𑀡𑀸𑀥𑀺𑀓𑀭𑀡𑀲𑀸𑀥𑀦𑀯𑀲𑁂𑀦𑀢𑁆𑀣𑀓𑀣𑀦𑀁.

𑀏𑀢𑁆𑀣 𑀪𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫 𑁋

𑀯𑀼𑀤𑁆𑀥𑀺𑀲𑀫𑁆𑀧𑀢𑁆𑀢𑀺𑀧𑀼𑀜𑁆𑀜𑀸𑀦𑀺, 𑀔𑀦𑁆𑀥𑀸 𑀲𑁄𑀓𑀸𑀲𑀲𑀜𑁆𑀜𑀺𑀢𑀸;

𑀲𑀁𑀲𑀸𑀭𑁄 𑀲𑀲𑁆𑀲𑀢𑀜𑁆𑀘𑁂𑀢𑀁, 𑀪𑀯𑀲𑀤𑁆𑀤𑁂𑀦 𑀲𑀤𑁆𑀤𑀺𑀢𑀁.

𑀪𑀯𑀢𑀡𑁆𑀳𑀸 𑀪𑀯𑀤𑀺𑀝𑁆𑀞𑀺, 𑀉𑀧𑀧𑀢𑁆𑀢𑀺𑀪𑀯𑁄 𑀢𑀣𑀸;

𑀓𑀫𑁆𑀫𑀪𑀯𑁄 𑀘 𑀲𑀩𑁆𑀩𑀦𑁆𑀢𑀁, 𑀪𑀯𑀲𑀤𑁆𑀤𑁂𑀦 𑀲𑀤𑁆𑀤𑀺𑀢𑀁.

𑀪𑀯𑀢𑀡𑁆𑀳𑀸𑀪𑀯𑀤𑀺𑀝𑁆𑀞𑀺-𑀤𑁆𑀯𑀬𑀁 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁;

𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀪𑀯𑀲𑀤𑁆𑀤𑁂𑀦 𑀲𑀤𑁆𑀤𑀺𑀢𑀁.

𑀅𑀪𑀯𑁄𑀢𑀺 𑀦 𑀪𑀯𑁄 𑀅𑀪𑀯𑁄.

𑀯𑀺𑀧𑀢𑁆𑀢𑀺 𑀳𑀸𑀦𑀺 𑀉𑀘𑁆𑀙𑁂𑀤𑁄, 𑀧𑀸𑀧𑀜𑁆𑀘𑁂𑀯 𑀘𑀢𑀼𑀩𑁆𑀩𑀺𑀥𑀸;

𑀇𑀫𑁂 𑀅𑀪𑀯𑀲𑀤𑁆𑀤𑁂𑀦, 𑀅𑀢𑁆𑀣𑀸 𑀯𑀼𑀘𑁆𑀘𑀦𑁆𑀢𑀺 𑀲𑀸𑀲𑀦𑁂.

𑀪𑀸𑀯𑁄𑀢𑀺 𑀅𑀚𑁆𑀛𑀸𑀲𑀬𑁄, 𑀬𑁄 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀣𑀻𑀦𑀁𑀪𑀸𑀯𑁄 𑀤𑀼𑀭𑀸𑀚𑀸𑀦𑁄. 𑀦𑀸𑀫𑀘𑁆𑀘𑁄 𑀭𑀸𑀚𑀪𑀭𑀺𑀬𑀸𑀲𑀼, 𑀪𑀸𑀯𑀁 𑀓𑀼𑀩𑁆𑀩𑁂𑀣 𑀧𑀡𑁆𑀟𑀺𑀢𑁄. 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻’’𑀢𑀺 𑀏𑀯𑀫𑀸𑀤𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 𑀯𑀢𑁆𑀣𑀼𑀥𑀫𑁆𑀫𑁄𑀧𑀺 𑀪𑀸𑀯𑁄. ‘‘𑀪𑀸𑀯𑀲𑀗𑁆𑀓𑁂𑀢𑀲𑀺𑀤𑁆𑀥𑀻𑀦’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁, 𑀘𑀺𑀢𑁆𑀢𑀫𑁆𑀧𑀺 𑀪𑀸𑀯𑁄. ‘‘𑀅𑀘𑁆𑀘𑀸𑀳𑀺𑀢𑀁 𑀓𑀫𑁆𑀫𑀁 𑀓𑀭𑁄𑀲𑀺 𑀮𑀼𑀤𑁆𑀤𑀁, 𑀪𑀸𑀯𑁂 𑀘 𑀢𑁂 𑀓𑀼𑀲𑀮𑀁 𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀓𑁆𑀭𑀺𑀬𑀸𑀧𑀺𑀪𑀸𑀯𑁄. ‘‘𑀪𑀸𑀯𑀮𑀓𑁆𑀔𑀡𑀁 𑀪𑀸𑀯𑀲𑀢𑁆𑀢𑀫𑀻’’𑀢𑀺 𑀘 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 𑀪𑀸𑀯𑁄𑀢𑀺 𑀲𑀢𑁆𑀢𑀯𑁂𑀯𑀘𑀦𑀦𑁆𑀢𑀺 𑀪𑀡𑀦𑁆𑀢𑀺, 𑀥𑀸𑀢𑀼 𑀯𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀅𑀚𑁆𑀛𑀸𑀲𑀬𑁄 𑀘 𑀯𑀢𑁆𑀣𑀼𑀥𑀫𑁆𑀫𑁄 𑀘 𑀘𑀺𑀢𑁆𑀢𑀜𑁆𑀘 𑀲𑀢𑁆𑀢𑁄 𑀘𑀸𑀢𑀺 𑀇𑀫𑁂 𑀪𑀯𑀢𑀻𑀢𑀺 𑀪𑀸𑀯𑁄. 𑀢𑀣𑀸 𑀧𑀦 𑀪𑀸𑀯𑁂𑀢𑀻𑀢𑀺 𑀪𑀸𑀯𑁄, 𑀓𑁆𑀭𑀺𑀬𑀸 ¶ 𑀢𑀼 𑀪𑀯𑀦𑀦𑁆𑀢𑀺 𑀪𑀸𑀯𑁄. 𑀲𑀸 𑀘 𑀪𑀯𑀦𑀕𑀫𑀦𑀧𑀘𑀦𑀸𑀤𑀺𑀯𑀲𑁂𑀦𑀸𑀦𑁂𑀓𑀯𑀺𑀥𑀸. 𑀅𑀧𑀺𑀘 𑀪𑀸𑀯𑀭𑀽𑀧𑀫𑁆𑀧𑀺 𑀪𑀸𑀯𑁄, 𑀬𑀁 𑀇𑀢𑁆𑀣𑀺𑀪𑀸𑀯𑁄 𑀧𑀼𑀫𑁆𑀪𑀸𑀯𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀪𑀯𑀢𑀺 𑀏𑀢𑁂𑀦 𑀘𑀺𑀢𑁆𑀢𑀁 𑀅𑀪𑀺𑀥𑀸𑀦𑀜𑁆𑀘𑀸𑀢𑀺 𑀪𑀸𑀯𑁄.

𑀦𑀢𑁆𑀢𑀦𑁄𑀫𑀢𑀺𑀬𑀸 𑀏𑀢𑀁, 𑀦𑀺𑀩𑁆𑀩𑀘𑀦𑀫𑀼𑀤𑀸𑀳𑀝𑀁;

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀫𑀢𑀁 𑀦𑀺𑀲𑁆𑀲𑀸𑀬 𑀫𑀸𑀳𑀝𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 ‘‘𑀇𑀢𑁆𑀣𑀺𑀬𑀸 𑀪𑀸𑀯𑁄 𑀇𑀢𑁆𑀣𑀺𑀪𑀸𑀯𑁄, 𑀇𑀢𑁆𑀣𑀻𑀢𑀺 𑀯𑀸 𑀪𑀯𑀢𑀺 𑀏𑀢𑁂𑀦 𑀘𑀺𑀢𑁆𑀢𑀁 𑀅𑀪𑀺𑀥𑀸𑀦𑀜𑁆𑀘𑀸𑀢𑀺 𑀇𑀢𑁆𑀣𑀺𑀪𑀸𑀯𑁄’’𑀢𑀺, 𑀢𑀲𑁆𑀫𑀸 𑀧𑀼𑀫𑁆𑀪𑀸𑀯𑁄𑀢𑀺 𑀏𑀢𑁆𑀣𑀸𑀧𑀺 𑀧𑀼𑀫𑀲𑁆𑀲 𑀪𑀸𑀯𑁄 𑀧𑀼𑀫𑁆𑀪𑀸𑀯𑁄, 𑀧𑀼𑀫𑀸𑀢𑀺 𑀯𑀸 𑀪𑀯𑀢𑀺 𑀏𑀢𑁂𑀦 𑀘𑀺𑀢𑁆𑀢𑀁 𑀅𑀪𑀺𑀥𑀸𑀦𑀜𑁆𑀘𑀸𑀢𑀺 𑀧𑀼𑀫𑁆𑀪𑀸𑀯𑁄𑀢𑀺 𑀦𑀺𑀩𑁆𑀩𑀘𑀦𑀁 𑀲𑀫𑀥𑀺𑀕𑀦𑁆𑀢𑀩𑁆𑀩𑀁. 𑀇𑀤𑀁 𑀪𑀸𑀯𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀪𑀸𑀯𑀓𑀭𑀡𑀲𑀸𑀥𑀦𑀯𑀲𑁂𑀦𑀢𑁆𑀣𑀓𑀣𑀦𑀁.

𑀅𑀪𑀸𑀯𑁄𑀢𑀺 𑀦 𑀪𑀸𑀯𑁄𑀢𑀺 𑀅𑀪𑀸𑀯𑁄, 𑀓𑁄 𑀲𑁄? 𑀲𑀼𑀜𑁆𑀜𑀢𑀸 𑀦𑀢𑁆𑀣𑀺𑀢𑀸. 𑀲𑀪𑀸𑀯𑁄𑀢𑀺 𑀅𑀢𑁆𑀢𑀦𑁄 𑀪𑀸𑀯𑁄 𑀲𑀪𑀸𑀯𑁄, 𑀅𑀢𑁆𑀢𑀦𑁄 𑀧𑀓𑀢𑀺 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀣 𑀯𑀸 𑀲𑀪𑀸𑀯𑁄𑀢𑀺 𑀥𑀫𑁆𑀫𑀸𑀦𑀁 𑀲𑀢𑀺 𑀅𑀢𑁆𑀣𑀲𑀫𑁆𑀪𑀯𑁂 𑀬𑁄 𑀓𑁄𑀘𑀺 𑀲𑀭𑀽𑀧𑀁 𑀮𑀪𑀢𑀺, 𑀢𑀲𑁆𑀲 𑀪𑀸𑀯𑁄 𑀮𑀓𑁆𑀔𑀡𑀫𑀺𑀢𑀺 𑀲𑀜𑁆𑀜𑀺𑀢𑁄 𑀦𑀫𑀦𑀭𑀼𑀧𑁆𑀧𑀦𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀆𑀓𑀸𑀭𑁄 𑀇𑀘𑁆𑀘𑁂𑀯𑀢𑁆𑀣𑁄. ‘‘𑀲𑀸𑀫𑀜𑁆𑀜𑀁 𑀯𑀸 𑀲𑀪𑀸𑀯𑁄 𑀯𑀸, 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁 𑀫𑀢’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 𑀲𑀪𑀸𑀯𑁄𑀢𑀺 𑀲𑀮𑀓𑁆𑀔𑀡𑁄 𑀧𑀭𑀫𑀢𑁆𑀣𑀥𑀫𑁆𑀫𑁄. 𑀓𑁂𑀦𑀝𑁆𑀞𑁂𑀦? 𑀲𑀳 𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁂𑀦. 𑀲𑀩𑁆𑀪𑀸𑀯𑁄𑀢𑀺 𑀲𑀢𑀁 𑀪𑀸𑀯𑁄 𑀲𑀩𑁆𑀪𑀸𑀯𑁄, 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀣 𑀯𑀸 𑀅𑀢𑁆𑀢𑀦𑁄 𑀪𑀸𑀯𑁄 𑀲𑀩𑁆𑀪𑀸𑀯𑁄. ‘‘𑀕𑀸𑀳𑀸𑀧𑀬𑀦𑁆𑀢𑀺 𑀲𑀩𑁆𑀪𑀸𑀯’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀲𑀁𑀯𑀺𑀚𑁆𑀚𑀫𑀸𑀦𑁄 𑀯𑀸 𑀪𑀸𑀯𑁄 𑀲𑀩𑁆𑀪𑀸𑀯𑁄. ‘‘𑀏𑀯𑀁 𑀕𑀳𑀡𑀲𑀩𑁆𑀪𑀸𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 ¶ 𑀯𑀘𑀦𑀁. 𑀇𑀤𑀁 𑀲𑀪𑀸𑀯 𑀲𑀩𑁆𑀪𑀸𑀯𑀲𑀤𑁆𑀤𑀸𑀦𑀁 𑀪𑀸𑀯𑀲𑀸𑀥𑀦𑀯𑀲𑁂𑀦𑀢𑁆𑀣𑀓𑀣𑀦𑀁.

𑀲𑀫𑁆𑀪𑀯𑁄𑀢𑀺 𑀲𑀫𑁆𑀪𑀯𑀦𑀁 𑀲𑀫𑁆𑀪𑀯𑁄, 𑀲𑀫𑁆𑀪𑀯𑀦𑀓𑁆𑀭𑀺𑀬𑀸, 𑀬𑀼𑀢𑁆𑀢𑀺 𑀯𑀸. 𑀬𑀼𑀢𑁆𑀢𑀺 𑀳𑀺 𑀲𑀫𑁆𑀪𑀯𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀪𑀯𑁄 𑀕𑀳𑀡𑀲𑁆𑀲 𑀓𑀸𑀭𑀡’’𑀦𑁆𑀢𑀺𑀆𑀤𑀻𑀲𑀼. 𑀅𑀣 𑀯𑀸 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄. 𑀬𑀢𑁄 𑀳𑀺 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀪𑀯𑀢𑀺, 𑀲𑁄 𑀲𑀫𑁆𑀪𑀯𑁄. 𑀧𑀪𑀯𑁄𑀢𑀺 𑀧𑀪𑀯𑀦𑀁 𑀧𑀪𑀯𑁄, 𑀅𑀘𑁆𑀙𑀺𑀦𑁆𑀦𑀢𑀸, 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀯𑀸 𑀧𑀪𑀯𑁄. 𑀬𑀢𑁄 𑀳𑀺 𑀬𑀁 𑀓𑀺𑀜𑁆𑀘𑀺 𑀧𑀪𑀯𑀢𑀺, 𑀲𑁄 𑀧𑀪𑀯𑁄. 𑀇𑀫𑁂 𑀧𑀦 𑀲𑀫𑁆𑀪𑀯𑀧𑀪𑀯𑀲𑀤𑁆𑀤𑀸 𑀓𑀢𑁆𑀣𑀘𑀺 𑀲𑀫𑀸𑀦𑀢𑁆𑀣𑀸 𑀓𑀢𑁆𑀣𑀘𑀺 𑀪𑀺𑀦𑁆𑀦𑀢𑁆𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀲𑀫𑁆𑀪𑀯𑀲𑀤𑁆𑀤𑁄 𑀳𑀺 𑀪𑀯𑀦𑀓𑁆𑀭𑀺𑀬𑀫𑁆𑀧𑀺 𑀯𑀤𑀢𑀺 𑀬𑀼𑀢𑁆𑀢𑀺𑀫𑁆𑀧𑀺 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀲𑀫𑁆𑀪𑀯𑀭𑀽𑀧𑀫𑁆𑀧𑀺 𑀧𑀘𑁆𑀘𑀬𑀢𑁆𑀣𑀫𑁆𑀧𑀺, 𑀧𑀪𑀯𑀲𑀤𑁆𑀤𑁄 𑀧𑀦 𑀪𑀯𑀦𑀓𑁆𑀭𑀺𑀬𑀫𑁆𑀧𑀺 𑀯𑀤𑀢𑀺 𑀦𑀤𑀺𑀧𑁆𑀧𑀪𑀯𑀫𑁆𑀧𑀺 𑀧𑀘𑁆𑀘𑀬𑀢𑁆𑀣𑀫𑁆𑀧𑀺, 𑀢𑀲𑁆𑀫𑀸 𑀧𑀘𑁆𑀘𑀬𑀢𑁆𑀣𑀁 𑀯𑀚𑁆𑀚𑁂𑀢𑁆𑀯𑀸 𑀪𑀺𑀦𑁆𑀦𑀢𑁆𑀣𑀸𑀢𑀺 𑀕𑀳𑁂𑀢𑀩𑁆𑀩𑀸, 𑀧𑀘𑁆𑀘𑀬𑀢𑁆𑀣𑁂𑀦 𑀧𑀦 𑀲𑀫𑀸𑀦𑀢𑁆𑀣𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀘𑁆𑀘𑀬𑁄 𑀳𑁂𑀢𑀼 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀲𑀫𑁆𑀪𑀯𑁄 𑀧𑀪𑀯𑁄𑀢𑀺𑀆𑀤𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦’’𑀦𑁆𑀢𑀺.

‘‘𑀫𑀽𑀮𑀁 𑀳𑁂𑀢𑀼 𑀦𑀺𑀤𑀸𑀦𑀜𑁆𑀘, 𑀲𑀫𑁆𑀪𑀯𑁄 𑀧𑀪𑀯𑁄 𑀢𑀣𑀸;

𑀲𑀫𑀼𑀝𑁆𑀞𑀸𑀦𑀸𑀳𑀸𑀭𑀸𑀭𑀫𑁆𑀫𑀡𑀁, 𑀧𑀘𑁆𑀘𑀬𑁄 𑀲𑀫𑀼𑀤𑀬𑁂𑀦 𑀘𑀸’’𑀢𑀺

𑀅𑀬𑀫𑁆𑀧𑀺 𑀕𑀸𑀣𑀸 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀺𑀓𑀸. 𑀇𑀤𑀁 𑀲𑀫𑁆𑀪𑀯𑀧𑀪𑀯𑀲𑀤𑁆𑀤𑀸𑀦𑀁 𑀪𑀸𑀯𑀸𑀧𑀸𑀤𑀸𑀦𑀲𑀸𑀥𑀦𑀯𑀲𑁂𑀦𑀢𑁆𑀣𑀓𑀣𑀦𑀁.

𑀏𑀯𑀫𑁂𑀢𑁆𑀣 𑀪𑀸𑀯𑀓𑀢𑁆𑀢𑀼𑀓𑀫𑁆𑀫𑀓𑀭𑀡𑀸𑀧𑀸𑀤𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀙 𑀲𑀸𑀥𑀦𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀢𑀸𑀦𑀺 𑀲𑀫𑁆𑀧𑀤𑀸𑀦𑀲𑀸𑀥𑀦𑁂𑀦 𑀲𑀢𑁆𑀢𑀯𑀺𑀥𑀸𑀦𑀺 𑀪𑀯𑀦𑁆𑀢𑀺, 𑀢𑀁 𑀧𑀦 𑀉𑀢𑁆𑀢𑀭𑀺 𑀆𑀯𑀺𑀪𑀯𑀺𑀲𑁆𑀲𑀢𑀺 ‘‘𑀥𑀦𑀫𑀲𑁆𑀲 𑀪𑀯𑀢𑀽𑀢𑀺 𑀥𑀦𑀪𑀽𑀢𑀻’’𑀢𑀺𑀆𑀤𑀺𑀦𑀸. 𑀇𑀘𑁆𑀘𑁂𑀯𑀁 𑀓𑀺𑀢𑀓𑀯𑀲𑁂𑀦 𑀲𑀩𑁆𑀩𑀣𑀸𑀧𑀺 𑀲𑀢𑁆𑀢𑀯𑀺𑀥𑀸𑀦𑀺 𑀲𑀸𑀥𑀦𑀸𑀦𑀺 𑀳𑁄𑀦𑁆𑀢𑀺, 𑀬𑀸𑀦𑀺 ‘‘𑀓𑀸𑀭𑀓𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀇𑀢𑁄 𑀅𑀜𑁆𑀜𑀁 𑀲𑀸𑀥𑀦𑀁 𑀦𑀢𑁆𑀣𑀺. 𑀇𑀥 𑀧𑀬𑁄𑀕𑁂𑀲𑁆𑀯𑀢𑁆𑀣𑁂𑀲𑀼 𑀘 𑀯𑀺𑀜𑁆𑀜𑀽𑀦𑀁 ¶ 𑀧𑀸𑀝𑀯𑀢𑁆𑀣𑀁 𑀲𑀸𑀥𑀦𑀦𑀸𑀫𑀁 𑀧𑀓𑀸𑀲𑀺𑀢𑀁. 𑀢𑀣𑀸 𑀳𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑀸𑀥𑀦𑁂𑀳𑀺 𑀧𑀤𑁂𑀳𑀺 𑀬𑁄𑀚𑀺𑀢𑀸 𑀲𑀤𑁆𑀤𑀧𑁆𑀧𑀬𑁄𑀕𑀸 𑀤𑀼𑀩𑁆𑀩𑁄𑀥𑀢𑁆𑀣𑀸 𑀳𑁄𑀦𑁆𑀢𑀺, 𑀲𑀼𑀦𑀺𑀓𑁆𑀔𑀺𑀢𑁆𑀢𑀲𑀸𑀥𑀦𑁂𑀳𑀺 𑀧𑀦 𑀧𑀤𑁂𑀳𑀺 𑀬𑁄𑀚𑀺𑀢𑀸 𑀲𑀼𑀩𑁄𑀥𑀢𑁆𑀣𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀬𑁄𑀕𑀸𑀲𑀸𑀥𑀦𑀫𑀽𑀮𑀓𑀸, 𑀅𑀢𑁆𑀣𑁄 𑀘 𑀧𑀬𑁄𑀕𑀫𑀽𑀮𑀓𑁄. 𑀧𑀬𑁄𑀕𑀸𑀦𑀼𑀭𑀽𑀧𑀜𑁆𑀳𑀺 𑀅𑀯𑀺𑀧𑀭𑀻𑀢𑀁 𑀓𑀢𑁆𑀯𑀸 𑀅𑀢𑁆𑀣𑀁 𑀓𑀣𑀦𑀲𑀻𑀮𑀸 ‘‘𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀸𑀥𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑁂𑀲𑀼 𑀅𑀢𑁆𑀣𑁂𑀲𑀼, 𑀅𑀜𑁆𑀜𑁂𑀲𑀼 𑀘𑀢𑁆𑀣𑁂𑀲𑀼 𑀧𑀝𑀼𑀢𑀭𑀩𑀼𑀤𑁆𑀥𑀺𑀦𑁄 𑀧𑀡𑁆𑀟𑀺𑀢𑀸𑀬𑁂𑀯 𑀏𑀓𑀦𑁆𑀢𑁂𑀦 𑀪𑀕𑀯𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀥𑀭𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁄 𑀧𑀭𑀁 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀇𑀤𑀁 𑀦𑀸𑀫 𑀲𑀸𑀥𑀦’’𑀦𑁆𑀢𑀺 𑀦 𑀯𑀓𑁆𑀔𑀸𑀫, 𑀓𑁂𑀯𑀮𑀫𑀺𑀥 𑀤𑀲𑁆𑀲𑀺𑀢𑁂𑀲𑀼 𑀧𑀬𑁄𑀕𑁂𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀜𑁆𑀘𑁂𑀯 𑀯𑀺𑀯𑀺𑀥𑀯𑀺𑀘𑀺𑀢𑁆𑀢𑀧𑀸𑀴𑀺𑀕𑀢𑀺𑀓𑁂 𑀯𑀺𑀯𑀺𑀥𑀢𑁆𑀣𑀲𑀸𑀭𑁂 𑀚𑀺𑀦𑀯𑀭𑀯𑀘𑀦𑁂 𑀲𑁄𑀢𑀽𑀦𑀁 𑀩𑀼𑀤𑁆𑀥𑀺𑀯𑀺𑀚𑀫𑁆𑀪𑀦𑀢𑁆𑀣𑀜𑁆𑀘 𑀅𑀢𑁆𑀣𑀲𑀸𑀥𑀓𑀯𑀘𑀦𑀸𑀦𑀺𑀬𑁂𑀯 𑀬𑀣𑀸𑀭𑀳𑀁 𑀲𑀼𑀢𑁆𑀢𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀕𑀸𑀣𑀸𑀤𑀻𑀲𑀼 𑀢𑀢𑁄 𑀢𑀢𑁄 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫.

𑀧𑀪𑀸𑀯𑁄𑀢𑀺 𑀧𑀓𑀸𑀭𑀢𑁄 𑀪𑀯𑀢𑀻𑀢𑀺 𑀧𑀪𑀸𑀯𑁄, 𑀲𑁄𑀬𑀫𑀸𑀦𑀼𑀪𑀸𑀯𑁄𑀬𑁂𑀯. ‘‘𑀧𑀪𑀸𑀯𑀁 𑀢𑁂 𑀦 𑀧𑀲𑁆𑀲𑀸𑀫𑀺, 𑀬𑁂𑀦 𑀢𑁆𑀯𑀁 𑀫𑀺𑀣𑀺𑀮𑀁 𑀯𑀚𑁂’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀦𑀼𑀪𑀯𑁄𑀢𑀺 𑀅𑀦𑀼𑀪𑀯𑀦𑀁 𑀅𑀦𑀼𑀪𑀯𑁄, 𑀓𑀺𑀁 𑀢𑀁? 𑀧𑀭𑀺𑀪𑀼𑀜𑁆𑀚𑀦𑀁. 𑀆𑀦𑀼𑀪𑀸𑀯𑁄𑀢𑀺 𑀢𑁂𑀚𑀼𑀲𑁆𑀲𑀸𑀳𑀫𑀦𑁆𑀢𑀧𑀪𑀽𑀲𑀢𑁆𑀢𑀺𑀬𑁄. ‘‘𑀢𑁂𑀚𑀲𑀗𑁆𑀔𑀢𑁄 𑀉𑀲𑁆𑀲𑀸𑀳𑀫𑀦𑁆𑀢𑀧𑀪𑀽𑀲𑀢𑁆𑀢𑀺𑀲𑀗𑁆𑀔𑀸𑀢𑁄 𑀯𑀸 𑀫𑀳𑀦𑁆𑀢𑁄 𑀆𑀦𑀼𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁.

𑀢𑁂𑀚𑁄 𑀉𑀲𑁆𑀲𑀸𑀳𑀫𑀦𑁆𑀢𑀸 𑀘, 𑀧𑀪𑀽𑀲𑀢𑁆𑀢𑀻𑀢𑀺 𑀧𑀜𑁆𑀘𑀺𑀫𑁂;

𑀆𑀦𑀼𑀪𑀸𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀪𑀸𑀯𑀸𑀢𑀺 𑀘 𑀢𑁂 𑀯𑀤𑁂.

𑀢𑁂𑀚𑀸𑀤𑀺𑀯𑀸𑀘𑀓𑀢𑁆𑀢𑀫𑁆𑀳𑀺, 𑀆𑀦𑀼𑀪𑀸𑀯𑀧𑀤𑀲𑁆𑀲 𑀢𑀼;

𑀅𑀢𑁆𑀣𑀦𑀺𑀩𑁆𑀩𑀘𑀦𑀁 𑀥𑀻𑀭𑁄, 𑀬𑀣𑀸𑀲𑀫𑁆𑀪𑀯𑀫𑀼𑀤𑁆𑀤𑀺𑀲𑁂.

𑀅𑀣 ¶ 𑀯𑀸 𑀆𑀦𑀼𑀪𑀸𑀯𑁄𑀢𑀺 𑀅𑀦𑀼𑀪𑀯𑀺𑀢𑀩𑁆𑀩𑀨𑀮𑀁. ‘‘𑀅𑀦𑀼𑀪𑀯𑀺𑀢𑀩𑁆𑀩𑀲𑁆𑀲 𑀨𑀮𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀧𑀭𑀸𑀪𑀯𑁄𑀢𑀺 𑀧𑀭𑀸𑀪𑀯𑀦𑀁 𑀧𑀭𑀸𑀪𑀯𑁄, 𑀅𑀣 𑀯𑀸 𑀧𑀭𑀸𑀪𑀯𑀢𑀻𑀢𑀺 𑀧𑀭𑀸𑀪𑀯𑁄. ‘‘𑀲𑀼𑀯𑀺𑀚𑀸𑀦𑁄 𑀧𑀭𑀸𑀪𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 ‘‘𑀥𑀫𑁆𑀫𑀤𑁂𑀲𑁆𑀲𑀻 𑀧𑀭𑀸𑀪𑀯𑁄’’𑀢𑀺 𑀧𑀸𑀞𑀸𑀦𑀼𑀭𑀽𑀧𑀢𑁄 𑀧𑀭𑀸𑀪𑀯𑀺𑀲𑁆𑀲𑀢𑀻𑀢𑀺 𑀧𑀭𑀸𑀪𑀯𑁄𑀢𑀺 𑀅𑀦𑀸𑀕𑀢𑀓𑀸𑀮𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀭𑀸𑀪𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀸𑀪𑀯𑁄. 𑀓𑀺𑀁 𑀢𑀁? 𑀥𑀫𑁆𑀫𑀤𑁂𑀲𑁆𑀲𑀺𑀢𑀸𑀤𑀺. ‘‘𑀧𑀞𑀫𑁄 𑀲𑁄 𑀧𑀭𑀸𑀪𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀯𑀺𑀪𑀯𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀪𑀯𑀢𑁄 𑀯𑀺𑀕𑀢𑀢𑁆𑀢𑀸 𑀪𑀯𑀢𑁄 𑀯𑀺𑀕𑀢𑁄𑀢𑀺 𑀯𑀺𑀪𑀯𑁄, 𑀪𑀯𑀲𑁆𑀲 𑀘 𑀢𑀁𑀳𑁂𑀢𑀼 𑀯𑀺𑀕𑀢𑀢𑁆𑀢𑀸 𑀯𑀺𑀕𑀢𑁄 𑀪𑀯𑁄 𑀏𑀢𑀲𑁆𑀫𑀸𑀢𑀺 𑀯𑀺𑀪𑀯𑁄. 𑀯𑀺𑀪𑀯𑀦𑁆𑀢𑀺 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺 𑀇𑀢𑁄 𑀅𑀭𑀺𑀬𑀥𑀦𑀯𑀺𑀮𑁄𑀫𑀓𑀸 𑀓𑀺𑀮𑁂𑀲𑀫𑀳𑀸𑀘𑁄𑀭𑀸𑀢𑀺𑀧𑀺 𑀯𑀺𑀪𑀯𑁄. 𑀯𑀺𑀪𑀯𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀸𑀦𑀸𑀪𑀺𑀥𑀸𑀦𑀢𑁆𑀢𑁂 ‘‘𑀏𑀯𑀁 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂, 𑀯𑀺𑀪𑀯𑁄 𑀇𑀘𑁆𑀙𑀺𑀢𑀩𑁆𑀩𑀓𑁄’’𑀢𑀺 𑀇𑀤𑀫𑁂𑀢𑁆𑀣 𑀲𑀸𑀥𑀓𑀁 𑀯𑀘𑀦𑀁. 𑀇𑀫𑀸𑀦𑀺 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑁋

𑀦𑀺𑀩𑁆𑀩𑀸𑀦𑀁 𑀯𑀺𑀪𑀯𑁄 𑀫𑁄𑀓𑁆𑀔𑁄, 𑀦𑀺𑀭𑁄𑀥𑁄 𑀅𑀫𑀢𑀁 𑀲𑀫𑀁;

𑀲𑀗𑁆𑀔𑀸𑀭𑀽𑀧𑀲𑀫𑁄 𑀤𑀼𑀓𑁆𑀔-𑀦𑀺𑀭𑁄𑀥𑁄 𑀅𑀘𑁆𑀘𑀼𑀢’𑀓𑁆𑀔𑀬𑁄.

𑀯𑀺𑀯𑀝𑁆𑀝’𑀫𑀓𑀢𑀁 𑀅𑀢𑁆𑀣𑀁, 𑀲𑀦𑁆𑀢𑀺𑀧𑀤’𑀫𑀲𑀗𑁆𑀔𑀢𑀁;

𑀧𑀸𑀭𑀁 𑀢𑀡𑁆𑀳𑀸𑀓𑁆𑀔𑀬𑁄 𑀤𑀼𑀓𑁆𑀔-𑀓𑁆𑀔𑀬𑁄 𑀲𑀜𑁆𑀜𑁄𑀚𑀦𑀓𑁆𑀔𑀬𑁄.

𑀬𑁄𑀕𑀓𑁆𑀔𑁂𑀫𑁄 𑀯𑀺𑀭𑀸𑀕𑁄 𑀘,

𑀮𑁄𑀓𑀦𑁆𑀢𑁄 𑀘 𑀪𑀯𑀓𑁆𑀔𑀬𑁄;

𑀅𑀧𑀯𑀕𑁆𑀕𑁄 𑀯𑀺𑀲𑀗𑁆𑀔𑀸𑀭𑁄,

𑀲𑀩𑁆𑀪𑀺 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀘.

𑀯𑀺𑀫𑀼𑀢𑁆𑀬𑀸’𑀧𑀘𑀬𑁄 𑀫𑀼𑀢𑁆𑀢𑀺, 𑀦𑀺𑀩𑁆𑀩𑀼𑀢𑀺 𑀉𑀧𑀥𑀺𑀓𑁆𑀔𑀬𑁄;

𑀲𑀦𑁆𑀢𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼, 𑀤𑀺𑀲𑀸 𑀘 𑀲𑀩𑁆𑀩𑀢𑁄𑀧𑀪𑀁.

𑀯𑀺𑀦𑀸𑀧𑁂𑀢𑀸𑀦𑀺 ¶ 𑀦𑀸𑀫𑀸𑀦𑀺, 𑀯𑀺𑀲𑁂𑀲𑀓𑀧𑀤𑀁 𑀇𑀥;

𑀦𑀺𑀩𑁆𑀩𑀸𑀦𑀯𑀸𑀘𑀓𑀸𑀦𑀻𑀢𑀺, 𑀲𑀮𑁆𑀮𑀓𑁆𑀔𑁂𑀬𑁆𑀬 𑀲𑀼𑀫𑁂𑀥𑀲𑁄.

‘‘𑀢𑀸𑀡𑀁 𑀮𑁂𑀡’’𑀦𑁆𑀢𑀺𑀆𑀤𑀻𑀦𑀺-𑀧𑁂𑀓𑁆𑀔𑀺𑀓𑀸𑀦𑀺 𑀪𑀯𑀦𑁆𑀢𑀺 𑀳𑀺;

𑀯𑀺𑀲𑁂𑀲𑀓𑀧𑀤𑀸𑀦𑀦𑁆𑀢𑀺, 𑀏𑀢𑁆𑀣𑁂𑀢𑀸𑀦𑀺 𑀧𑀓𑀸𑀲𑀬𑁂.

𑀢𑀸𑀡𑀁 𑀮𑁂𑀡’𑀫𑀭𑀽𑀧𑀜𑁆𑀘, 𑀲𑀦𑁆𑀢𑀁 𑀲𑀘𑁆𑀘’𑀫𑀦𑀸𑀮𑀬𑀁;

𑀲𑀼𑀤𑀼𑀤𑁆𑀤𑀲𑀁 𑀲𑀭𑀡𑀜𑁆𑀘, 𑀧𑀭𑀸𑀬𑀡’𑀫𑀦𑀻𑀢𑀺𑀓𑀁.

𑀅𑀦𑀸𑀲𑀯𑀁 𑀥𑀼𑀯𑀁 𑀦𑀺𑀘𑁆𑀘𑀁, 𑀯𑀺𑀜𑁆𑀜𑀸𑀡’𑀫𑀦𑀺𑀤𑀲𑁆𑀲𑀦𑀁;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀺𑀯𑀁 𑀔𑁂𑀫𑀁, 𑀦𑀺𑀧𑀼𑀡𑀁 𑀅𑀧𑀮𑁄𑀓𑀺𑀓𑀁.

𑀅𑀦𑀦𑁆𑀢’𑀫𑀓𑁆𑀔𑀭𑀁 𑀤𑀻𑀧𑁄, 𑀅𑀘𑁆𑀘𑀦𑁆𑀢𑀁 𑀓𑁂𑀯𑀮𑀁 𑀧𑀤𑀁;

𑀧𑀡𑀻𑀢𑀁 𑀅𑀘𑁆𑀘𑀼𑀢𑀜𑁆𑀘𑀸𑀢𑀺, 𑀩𑀳𑀼𑀥𑀸𑀧𑀺 𑀯𑀺𑀪𑀸𑀯𑀬𑁂.

𑀕𑁄𑀢𑁆𑀭𑀪𑀽𑀢𑀺 𑀧𑀤𑀲𑁆𑀲𑀢𑁆𑀣𑀁, 𑀯𑀤𑀦𑁆𑀢𑁂𑀳𑀺 𑀕𑀭𑀽𑀳𑀺 𑀢𑀼;

𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦-𑀫𑀺𑀢𑀺 𑀕𑁄𑀢𑁆𑀢𑀦𑁆𑀢𑀺 𑀪𑀸𑀲𑀺𑀢𑀁.

𑀯𑀺𑀪𑀯𑁄𑀢𑀺 𑀯𑀸 𑀯𑀺𑀦𑀸𑀲𑀲𑀫𑁆𑀧𑀢𑁆𑀢𑀺𑀥𑀦𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀯𑀺𑀦𑀸𑀲𑁄 𑀯𑀺𑀪𑀯𑀦𑀁 𑀉𑀘𑁆𑀙𑀺𑀚𑁆𑀚𑀦𑀁 𑀦𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁂𑀦 𑀯𑀺𑀪𑀯𑁄. ‘‘𑀯𑀺𑀪𑀯𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀘 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀲𑀫𑁆𑀧𑀢𑁆𑀢𑀺 𑀧𑀦 𑀯𑀺𑀲𑁂𑀲𑀢𑁄 𑀪𑀯𑀢𑀻𑀢𑀺 𑀯𑀺𑀪𑀯𑁄. ‘‘𑀭𑀜𑁆𑀜𑁄 𑀲𑀺𑀭𑀺𑀯𑀺𑀪𑀯𑀁 𑀤𑀝𑁆𑀞𑀼𑀓𑀸𑀫𑀸’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀥𑀦𑀁 𑀧𑀦 𑀪𑀯𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀯𑀺𑀪𑀯𑁄. ‘‘𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀇𑀤𑀁 𑀧𑀦 𑀧𑀭𑀺𑀬𑀸𑀬𑀯𑀘𑀦𑀁 𑁋

𑀥𑀦𑀁 𑀲𑀁 𑀯𑀺𑀪𑀯𑁄 𑀤𑀩𑁆𑀩𑀁, 𑀲𑀸𑀧𑀢𑁂𑀬𑁆𑀬𑀁 𑀧𑀭𑀺𑀕𑁆𑀕𑀳𑁄;

𑀑𑀟𑁆𑀟𑀁 𑀪𑀡𑁆𑀟𑀁 𑀲𑀓𑀁 𑀅𑀢𑁆𑀣𑁄, 𑀇𑀘𑁆𑀘𑁂𑀢𑁂 𑀥𑀦𑀯𑀸𑀘𑀓𑀸.

𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀧𑀦 𑀯𑀺𑀪𑀯𑀢𑀺 𑀉𑀘𑁆𑀙𑀺𑀚𑁆𑀚𑀢𑀺 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀧𑀼𑀦 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀦 𑀚𑀸𑀬𑀢𑀻’’𑀢𑀺 𑀕𑀳𑀡𑀢𑁄 𑀯𑀺𑀪𑀯𑁄𑀢𑀺. ‘‘𑀯𑀺𑀪𑀯𑀢𑀡𑁆𑀳𑀸’’𑀢𑀺 ¶ 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀯𑀺𑀪𑀯𑀢𑀡𑁆𑀳𑀸𑀢𑀺 𑀳𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀸𑀬 𑀢𑀡𑁆𑀳𑀸𑀬 𑀦𑀸𑀫𑀁. 𑀏𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑀺 𑁋

𑀥𑀦𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺-𑀯𑀺𑀦𑀸𑀲𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄;

𑀯𑀼𑀢𑁆𑀢𑀸 𑀯𑀺𑀪𑀯𑀲𑀤𑁆𑀤𑁂𑀦, 𑀇𑀢𑀺 𑀯𑀺𑀜𑁆𑀜𑀽 𑀯𑀺𑀪𑀸𑀯𑀬𑁂.

𑀧𑀸𑀢𑀼𑀪𑀸𑀯𑁄𑀢𑀺 𑀧𑀸𑀢𑀼𑀪𑀯𑀦𑀁 𑀧𑀸𑀢𑀼𑀪𑀸𑀯𑁄. 𑀆𑀯𑀺𑀪𑀸𑀯𑁄𑀢𑀺 𑀆𑀯𑀺𑀪𑀯𑀦𑀁 𑀆𑀯𑀺𑀪𑀸𑀯𑁄, 𑀉𑀪𑀺𑀦𑁆𑀦𑀫𑁂𑀢𑁂𑀲𑀁 𑀧𑀸𑀓𑀝𑀢𑀸 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀺𑀭𑁄𑀪𑀸𑀯𑁄𑀢𑀺 𑀢𑀺𑀭𑁄𑀪𑀯𑀦𑀁 𑀢𑀺𑀭𑁄𑀪𑀸𑀯𑁄, 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑁄. 𑀯𑀺𑀦𑀸𑀪𑀸𑀯𑁄𑀢𑀺 𑀯𑀺𑀦𑀸𑀪𑀯𑀦𑀁 𑀯𑀺𑀦𑀸𑀪𑀸𑀯𑁄, 𑀯𑀺𑀬𑁄𑀕𑁄. 𑀲𑁄𑀢𑁆𑀣𑀺𑀪𑀸𑀯𑁄𑀢𑀺 𑀲𑁄𑀢𑁆𑀣𑀺𑀪𑀯𑀦𑀁 𑀲𑁄𑀢𑁆𑀣𑀺𑀪𑀸𑀯𑁄, 𑀲𑀼𑀯𑀢𑁆𑀣𑀺𑀪𑀸𑀯𑁄 𑀲𑀼𑀔𑀲𑁆𑀲 𑀅𑀢𑁆𑀣𑀺𑀢𑀸, 𑀅𑀢𑁆𑀣𑀢𑁄 𑀧𑀦 𑀦𑀺𑀩𑁆𑀪𑀬𑀢𑀸 𑀦𑀺𑀭𑀼𑀧𑀤𑁆𑀤𑀯𑀢𑀸 𑀏𑀯. 𑀅𑀢𑁆𑀣𑀺𑀪𑀸𑀯𑁄𑀢𑀺 𑀅𑀢𑁆𑀣𑀺𑀢𑀸 𑀯𑀺𑀚𑁆𑀚𑀫𑀸𑀦𑀢𑀸 𑀅𑀯𑀺𑀯𑀺𑀢𑁆𑀢𑀢𑀸. 𑀦𑀢𑁆𑀣𑀺𑀪𑀸𑀯𑁄𑀢𑀺 𑀦𑀢𑁆𑀣𑀺𑀢𑀸 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀺𑀯𑀺𑀢𑁆𑀢𑀢𑀸 𑀭𑀺𑀢𑁆𑀢𑀢𑀸 𑀢𑀼𑀘𑁆𑀙𑀢𑀸 𑀲𑀼𑀜𑁆𑀜𑀢𑀸. 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀯𑀺𑀢𑀸, 𑀧𑀭𑀁 𑀅𑀪𑀺𑀪𑀯𑀦𑁆𑀢𑁄 𑀬𑁄 𑀓𑁄𑀘𑀺. 𑀏𑀯𑀁 𑀧𑀭𑀺𑀪𑀯𑀺𑀢𑀸, 𑀅𑀦𑀼𑀪𑀯𑀢𑀻𑀢𑀺 𑀅𑀦𑀼𑀪𑀯𑀺𑀢𑀸, 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀅𑀦𑀼𑀪𑀯𑀦𑁆𑀢𑁄 𑀬𑁄 𑀓𑁄𑀘𑀺. 𑀏𑀯𑀁 𑀲𑀫𑀦𑀼𑀪𑀯𑀺𑀢𑀸. 𑀧𑀘𑁆𑀘𑀦𑀼𑀪𑀯𑀺𑀢𑀸, 𑀏𑀢𑁆𑀣 𑀧𑀦 𑀬𑀣𑀸 ‘‘𑀅𑀫𑀢𑀲𑁆𑀲 𑀤𑀸𑀢𑀸. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’𑀢𑀺𑀆𑀤𑀻𑀲𑀼 ‘‘𑀤𑀸𑀢𑀸’’𑀢𑀺 𑀧𑀤𑀸𑀦𑀁 𑀓𑀢𑁆𑀢𑀼𑀯𑀸𑀘𑀓𑀸𑀦𑀁 ‘‘𑀅𑀫𑀢𑀲𑁆𑀲𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀓𑀫𑁆𑀫𑀯𑀸𑀘𑀓𑁂𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀤𑀺𑀲𑁆𑀲𑀢𑀺, 𑀢𑀣𑀸 𑀇𑀫𑁂𑀲𑀫𑁆𑀧𑀺 𑀧𑀤𑀸𑀦𑀁 ‘‘𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀅𑀪𑀺𑀪𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀭𑀽𑀧𑀸𑀦𑀁 𑀧𑀤𑀸𑀦𑀁. 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀪𑀯𑀢𑀻𑀢𑀺 𑀪𑀯𑀁. 𑀪𑀯𑀺𑀲𑁆𑀲𑀢𑀻𑀢𑀺 𑀯𑀸 𑀪𑀯𑀁, 𑀯𑀟𑁆𑀠𑀫𑀸𑀦𑁄 𑀧𑀼𑀕𑁆𑀕𑀮𑁄. ‘‘𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀺, 𑀲𑀼𑀯𑀺𑀚𑀸𑀦𑁄 𑀧𑀭𑀸𑀪𑀯𑁄. 𑀥𑀫𑁆𑀫𑀓𑀸𑀫𑁄 ¶ 𑀪𑀯𑀁 𑀳𑁄𑀢𑀺, 𑀥𑀫𑁆𑀫𑀤𑁂𑀲𑁆𑀲𑀻 𑀧𑀭𑀸𑀪𑀯𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀣 𑀯𑀸 𑀬𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀺, 𑀲𑁄 ‘‘𑀪𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁄, ‘‘𑀪𑀯𑀁 𑀓𑀘𑁆𑀘𑀸𑀬𑀦𑁄. 𑀪𑀯𑀁 𑀆𑀦𑀦𑁆𑀤𑁄. 𑀫𑀜𑁆𑀜𑁂 𑀪𑀯𑀁 𑀧𑀢𑁆𑀣𑀬𑀢𑀺, 𑀭𑀜𑁆𑀜𑁄 𑀪𑀭𑀺𑀬𑀁 𑀧𑀢𑀺𑀩𑁆𑀩𑀢’’𑀦𑁆𑀢𑀺𑀆𑀤𑀻𑀲𑀼. 𑀏𑀢𑁆𑀣 𑀧𑀦 𑀥𑀸𑀢𑀼𑀅𑀢𑁆𑀣𑁂 𑀆𑀤𑀭𑁄 𑀦 𑀓𑀸𑀢𑀩𑁆𑀩𑁄, 𑀲𑀫𑁆𑀫𑀼𑀢𑀺𑀅𑀢𑁆𑀣𑁂𑀬𑁂𑀯𑀸𑀤𑀭𑁄 𑀓𑀸𑀢𑀩𑁆𑀩𑁄 ‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡’’𑀦𑁆𑀢𑀺 𑀯𑀘𑀦𑀢𑁄. 𑀯𑁄𑀳𑀸𑀭𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀮𑁄𑀓𑀲𑀫𑁆𑀫𑀼𑀢𑀺 𑀏𑀯 𑀧𑀥𑀸𑀦𑀸 𑀅𑀯𑀺𑀮𑀗𑁆𑀖𑀦𑀻𑀬𑀸. 𑀧𑀭𑀸𑀪𑀯𑀢𑀻𑀢𑀺 𑀧𑀭𑀸𑀪𑀯𑀁. 𑀏𑀯𑀁 𑀧𑀭𑀺𑀪𑀯𑀁. 𑀅𑀪𑀺𑀪𑀯𑀁. 𑀅𑀦𑀼𑀪𑀯𑀁. 𑀧𑀪𑀯𑀢𑀺 𑀧𑀳𑁄𑀢𑀺 𑀲𑀓𑁆𑀓𑁄𑀢𑀻𑀢𑀺 𑀧𑀪𑀯𑀁, 𑀧𑀳𑁄𑀦𑁆𑀢𑁄 𑀬𑁄 𑀓𑁄𑀘𑀺. 𑀦 𑀧𑀪𑀯𑀁 𑀅𑀧𑁆𑀧𑀪𑀯𑀁, ‘‘𑀅𑀧𑁆𑀧𑀪𑀯’’𑀦𑁆𑀢𑀺 𑀘 𑀇𑀤𑀁 𑀚𑀸𑀢𑀓𑁂 𑀤𑀺𑀝𑁆𑀞𑀁 𑁋

‘‘𑀙𑀺𑀦𑁆𑀦𑀩𑁆𑀪𑀫𑀺𑀯 𑀯𑀸𑀢𑁂𑀦, 𑀭𑀼𑀡𑁆𑀡𑁄 𑀭𑀼𑀓𑁆𑀔𑀫𑀼𑀧𑀸𑀕𑀫𑀺𑀁;

𑀲𑁄𑀳𑀁 𑀅𑀧𑁆𑀧𑀪𑀯𑀁 𑀢𑀢𑁆𑀣, 𑀲𑀸𑀔𑀁 𑀳𑀢𑁆𑀣𑁂𑀳𑀺 𑀅𑀕𑁆𑀕𑀳𑀺’’𑀦𑁆𑀢𑀺

𑀢𑀢𑁆𑀣 𑀲𑀸𑀥𑀓𑀯𑀘𑀦𑀫𑀺𑀤𑀁. 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀥𑀦𑀪𑀽𑀢𑀻𑀢𑀺 𑀥𑀦𑀫𑀲𑁆𑀲 𑀪𑀯𑀢𑀽𑀢𑀺 𑀥𑀦𑀪𑀽𑀢𑀺. 𑀲𑀺𑀭𑀺𑀪𑀽𑀢𑀻𑀢𑀺 𑀲𑁄𑀪𑀸𑀬 𑀘𑁂𑀯 𑀧𑀜𑁆𑀜𑀸𑀧𑀼𑀜𑁆𑀜𑀸𑀦𑀜𑁆𑀘 𑀅𑀥𑀺𑀯𑀘𑀦𑀁. 𑀲𑀸 𑀅𑀲𑁆𑀲 𑀪𑀯𑀢𑀽𑀢𑀺 𑀲𑀺𑀭𑀺𑀪𑀽𑀢𑀺. 𑀏𑀯𑀁 𑀲𑁄𑀢𑁆𑀣𑀺𑀪𑀽𑀢𑀺, 𑀲𑀼𑀯𑀢𑁆𑀣𑀺𑀪𑀽𑀢𑀺. 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀪𑀸𑀯𑀻𑀢𑀺 𑀪𑀯𑀦𑀲𑀻𑀮𑁄 𑀪𑀸𑀯𑀻, 𑀪𑀯𑀦𑀥𑀫𑁆𑀫𑁄 𑀪𑀸𑀯𑀻, 𑀪𑀯𑀦𑁂 𑀲𑀸𑀥𑀼𑀓𑀸𑀭𑀻 𑀪𑀸𑀯𑀻. 𑀏𑀯𑀁 𑀯𑀺𑀪𑀸𑀯𑀻. 𑀲𑀫𑁆𑀪𑀸𑀯𑀻. 𑀧𑀭𑀺𑀪𑀸𑀯𑀻𑀢𑀺. 𑀢𑀢𑁆𑀭 𑀯𑀺𑀪𑀸𑀯𑀻𑀢𑀺 𑀅𑀢𑁆𑀣𑀯𑀺𑀪𑀸𑀯𑀦𑁂 𑀲𑀫𑀢𑁆𑀣𑁄 𑀧𑀡𑁆𑀟𑀺𑀢𑁄 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀯𑀺𑀤𑁆𑀯𑀸, 𑀯𑀺𑀚𑁆𑀚𑀸𑀕𑀢𑁄, 𑀜𑀸𑀡𑀻𑀢𑀺𑀆𑀤𑀺 𑀧𑀭𑀺𑀬𑀸𑀬𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀪𑀯𑀦𑁆𑀢𑀺 𑀘𑀢𑁆𑀭 𑁋

𑀯𑀺𑀤𑁆𑀯𑀸 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻, 𑀯𑀺𑀪𑀸𑀯𑀻 𑀧𑀡𑁆𑀟𑀺𑀢𑁄 𑀲𑀼𑀥𑀻;

𑀩𑀼𑀥𑁄 𑀯𑀺𑀲𑀸𑀭𑀤𑁄 𑀯𑀺𑀜𑁆𑀜𑀽, 𑀤𑁄𑀲𑀜𑁆𑀜𑀽 𑀯𑀺𑀤𑁆𑀤𑀲𑀼 𑀯𑀺𑀤𑀽.

𑀯𑀺𑀧𑀲𑁆𑀲𑀻 ¶ 𑀧𑀝𑀺𑀪𑀸𑀡𑀻 𑀘, 𑀫𑁂𑀥𑀸𑀯𑀻 𑀦𑀺𑀧𑀓𑁄 𑀓𑀯𑀺;

𑀓𑀼𑀲𑀮𑁄 𑀯𑀺𑀤𑀼𑀭𑁄 𑀥𑀻𑀫𑀸, 𑀕𑀢𑀺𑀫𑀸 𑀫𑀼𑀢𑀺𑀫𑀸 𑀘𑀬𑀁.

𑀘𑀓𑁆𑀔𑀼𑀫𑀸 𑀓𑀡𑁆𑀡𑀯𑀸 𑀤𑀩𑁆𑀩𑁄, 𑀥𑀻𑀭𑁄 𑀪𑀽𑀭𑀺 𑀯𑀺𑀘𑀓𑁆𑀔𑀡𑁄;

𑀲𑀧𑁆𑀧𑀜𑁆𑀜𑁄 𑀩𑀼𑀤𑁆𑀥𑀺𑀫𑀸 𑀧𑀜𑁆𑀜𑁄, 𑀏𑀯𑀁𑀦𑀸𑀫𑀸 𑀯𑀺𑀪𑀸𑀯𑀺𑀦𑁄𑀢𑀺.

𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀲𑀬𑀫𑁆𑀪𑀽𑀢𑀺 𑀲𑀬𑀫𑁂𑀯 𑀪𑀯𑀢𑀻𑀢𑀺 𑀲𑀬𑀫𑁆𑀪𑀽. 𑀓𑁄 𑀲𑁄? 𑀅𑀦𑁆𑀢𑀭𑁂𑀦 𑀧𑀭𑁄𑀧𑀤𑁂𑀲𑀁 𑀲𑀸𑀫𑀁𑀬𑁂𑀯 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀓𑁆𑀬𑀫𑀼𑀦𑀺 𑀪𑀕𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄.

𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀻𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺.

𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀕𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀲𑀬𑀫𑁆𑀪𑀽. 𑀲𑁄 𑀏𑀯𑀁𑀪𑀽𑀢𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄, 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀪𑀺𑀓𑁆𑀔𑀯𑁂 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀲𑁄 𑀏𑀓𑀧𑀼𑀕𑁆𑀕𑀮𑁄 𑀏𑀢𑀭𑀳𑀺 ‘‘𑀲𑀩𑁆𑀩𑀜𑁆𑀜𑀽, 𑀲𑀼𑀕𑀢𑁄’’𑀢𑀺𑀆𑀤𑀻𑀳𑀺 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀦𑀸𑀫𑁂𑀳𑀺 𑀘 𑀧𑀲𑀺𑀤𑁆𑀥𑁄, ‘‘𑀕𑁄𑀢𑀫𑁄 𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺 𑀕𑁄𑀢𑁆𑀢𑀢𑁄 𑀘 𑀧𑀲𑀺𑀤𑁆𑀥𑁄, 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀓𑁄 𑀲𑀓𑁆𑀬𑀫𑀼𑀦𑀺 𑀲𑀓𑁆𑀬𑀲𑀻𑀳𑁄 𑀲𑀓𑁆𑀬𑀧𑀼𑀗𑁆𑀕𑀯𑁄𑀢𑀺 𑀓𑀼𑀮𑀢𑁄 𑀘 𑀧𑀲𑀺𑀤𑁆𑀥𑁄, 𑀲𑀼𑀤𑁆𑀥𑁄𑀤𑀦𑀺𑀫𑀸𑀬𑀸𑀤𑁂𑀯𑀻𑀲𑀼𑀢𑁄𑀢𑀺 ¶ 𑀫𑀸𑀢𑀸𑀧𑀺𑀢𑀺𑀢𑁄 𑀘 𑀧𑀲𑀺𑀤𑁆𑀥𑁄, 𑀲𑀺𑀤𑁆𑀥𑀢𑁆𑀣𑁄𑀢𑀺 𑀕𑀳𑀺𑀢𑀦𑀸𑀫𑁂𑀦 𑀘 𑀧𑀲𑀺𑀤𑁆𑀥𑁄. 𑀪𑀯𑀦𑁆𑀢𑀺 𑀘𑀢𑁆𑀭 𑁋

𑀬𑁄 𑀏𑀓𑀧𑀼𑀕𑁆𑀕𑀮𑁄 𑀆𑀲𑀺, 𑀩𑀼𑀤𑁆𑀥𑁄 𑀲𑁄 𑀯𑀤𑀢𑀁 𑀯𑀭𑁄;

𑀕𑁄𑀢𑁆𑀢𑀢𑁄 𑀕𑁄𑀢𑀫𑁄 𑀦𑀸𑀫, 𑀢𑀣𑁂𑀯𑀸𑀤𑀺𑀘𑁆𑀘𑀩𑀦𑁆𑀥𑀼 𑀘.

𑀲𑀓𑁆𑀬𑀓𑀼𑀮𑁂 𑀧𑀲𑀽𑀢𑀢𑁆𑀢𑀸, 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀓𑁆𑀓𑁄 𑀇𑀢𑀺 𑀘 𑀅𑀯𑁆𑀳𑀺𑀢𑁄, 𑀢𑀣𑀸 𑀲𑀓𑁆𑀬𑀫𑀼𑀦𑀻𑀢𑀺 𑀘.

𑀲𑀩𑁆𑀩𑀢𑁆𑀣 𑀲𑁂𑀝𑁆𑀞𑀪𑀸𑀯𑁂𑀦, 𑀲𑀓𑁆𑀬𑁂 𑀘 𑀲𑁂𑀝𑁆𑀞𑀪𑀸𑀯𑀢𑁄;

𑀲𑀓𑁆𑀬𑀲𑀻𑀳𑁄𑀢𑀺 𑀲𑁄 𑀲𑀓𑁆𑀬-𑀧𑀼𑀗𑁆𑀕𑀯𑁄𑀢𑀺 𑀘 𑀲𑀫𑁆𑀫𑀢𑁄.

𑀲𑀼𑀤𑁆𑀥𑁄𑀤𑀦𑀻𑀢𑀺 𑀧𑀺𑀢𑀺𑀢𑁄, 𑀦𑀪𑁂 𑀘𑀦𑁆𑀤𑁄𑀯 𑀯𑀺𑀲𑁆𑀲𑀼𑀢𑁄;

𑀫𑀸𑀢𑀺𑀢𑁄𑀧𑀺 𑀘 𑀲𑀜𑁆𑀜𑀸𑀢𑁄, 𑀫𑀸𑀬𑀸𑀤𑁂𑀯𑀻𑀲𑀼𑀢𑁄 𑀇𑀢𑀺.

𑀲𑀩𑁆𑀩𑀜𑁆𑀜𑀽 𑀲𑀼𑀕𑀢𑁄 𑀩𑀼𑀤𑁆𑀥𑁄, 𑀥𑀫𑁆𑀫𑀭𑀸𑀚𑀸 𑀢𑀣𑀸𑀕𑀢𑁄;

𑀲𑀫𑀦𑁆𑀢𑀪𑀤𑁆𑀤𑁄 𑀪𑀕𑀯𑀸, 𑀚𑀺𑀦𑁄 𑀤𑀲𑀩𑀮𑁄 𑀫𑀼𑀦𑀺.

𑀲𑀢𑁆𑀣𑀸 𑀯𑀺𑀦𑀸𑀬𑀓𑁄 𑀦𑀸𑀣𑁄,

𑀫𑀼𑀦𑀺𑀦𑁆𑀤𑁄 𑀮𑁄𑀓𑀦𑀸𑀬𑀓𑁄;

𑀦𑀭𑀸𑀲𑀪𑁄 𑀮𑁄𑀓𑀚𑀺𑀦𑁄,

𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑀤𑁂𑀯𑀤𑁂𑀯𑁄 𑀮𑁄𑀓𑀕𑀭𑀼, 𑀥𑀫𑁆𑀫𑀲𑁆𑀲𑀸𑀫𑀻 𑀫𑀳𑀸𑀫𑀼𑀦𑀺;

𑀲𑀫𑀦𑁆𑀢𑀘𑀓𑁆𑀔𑀼 𑀧𑀼𑀭𑀺𑀲-𑀤𑀫𑁆𑀫𑀲𑀸𑀭𑀣𑀺 𑀫𑀸𑀭𑀚𑀺.

𑀥𑀫𑁆𑀫𑀺𑀲𑁆𑀲𑀭𑁄 𑀘 𑀅𑀤𑁆𑀯𑁂𑀚𑁆𑀛-𑀯𑀘𑀦𑁄 𑀲𑀢𑁆𑀣𑀯𑀸𑀳𑀓𑁄;

𑀯𑀺𑀲𑀼𑀤𑁆𑀥𑀺𑀤𑁂𑀯𑁄 𑀤𑁂𑀯𑀸𑀢𑀺-𑀤𑁂𑀯𑁄 𑀘 𑀲𑀫𑀡𑀺𑀲𑁆𑀲𑀭𑁄.

𑀪𑀽𑀭𑀺𑀧𑀜𑁆𑀜𑁄’𑀦𑀥𑀺𑀯𑀭𑁄, 𑀦𑀭𑀲𑀻𑀳𑁄 𑀘 𑀘𑀓𑁆𑀔𑀼𑀫𑀸;

𑀫𑀼𑀦𑀺𑀫𑀼𑀦𑀺 𑀦𑀭𑀯𑀭𑁄, 𑀙𑀴𑀪𑀺𑀜𑁆𑀜𑁄 𑀚𑀦𑁂 𑀲𑀼𑀢𑁄.

𑀅𑀗𑁆𑀕𑀻𑀭𑀲𑁄 𑀬𑀢𑀺𑀭𑀸𑀚𑀸, 𑀮𑁄𑀓𑀩𑀦𑁆𑀥𑀼’𑀫𑀢𑀦𑁆𑀤𑀤𑁄;

𑀯𑀢𑁆𑀢𑀸 𑀧𑀯𑀢𑁆𑀢𑀸 𑀲𑀤𑁆𑀥𑀫𑁆𑀫-𑀘𑀓𑁆𑀓𑀯𑀢𑁆𑀢𑀻 𑀬𑀢𑀺𑀲𑁆𑀲𑀭𑁄.

𑀮𑁄𑀓𑀤𑀻𑀧𑁄 ¶ 𑀲𑀺𑀭𑀻𑀖𑀦𑁄, 𑀲𑀫𑀡𑀺𑀦𑁆𑀤𑁄 𑀦𑀭𑀼𑀢𑁆𑀢𑀫𑁄;

𑀮𑁄𑀓𑀢𑁆𑀢𑀬𑀯𑀺𑀤𑀽 𑀮𑁄𑀓-𑀧𑀚𑁆𑀚𑁄𑀢𑁄 𑀧𑀼𑀭𑀺𑀲𑀼𑀢𑁆𑀢𑀫𑁄.

𑀲𑀘𑁆𑀘𑀤𑀲𑁄 𑀲𑀢𑀧𑀼𑀜𑁆𑀜-𑀮𑀓𑁆𑀔𑀡𑁄 𑀲𑀘𑁆𑀘𑀲𑀯𑁆𑀳𑀬𑁄;

𑀭𑀯𑀺𑀩𑀦𑁆𑀥𑀸’𑀲𑀫𑀲𑀫𑁄, 𑀧𑀜𑁆𑀘𑀦𑁂𑀢𑁆𑀢’𑀕𑁆𑀕𑀧𑀼𑀕𑁆𑀕𑀮𑁄.

𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽, 𑀲𑀘𑁆𑀘𑀦𑀸𑀫𑁄 𑀘 𑀧𑀸𑀭𑀕𑀽;

𑀧𑀼𑀭𑀺𑀲𑀸𑀢𑀺𑀲𑀬𑁄 𑀲𑀩𑁆𑀩-𑀤𑀲𑁆𑀲𑀸𑀯𑀻 𑀦𑀭𑀲𑀸𑀭𑀣𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀢𑀺 𑀲𑁄, 𑀜𑀸𑀢𑁄 𑀲𑀢𑁆𑀢𑀼𑀢𑁆𑀢𑀫𑁄𑀢𑀺 𑀘;

𑀢𑀸𑀤𑀻 𑀯𑀺𑀪𑀚𑁆𑀚𑀯𑀸𑀤𑀻𑀢𑀺, 𑀫𑀳𑀸𑀓𑀸𑀭𑀼𑀡𑀺𑀓𑁄𑀢𑀺 𑀘.

𑀘𑀓𑁆𑀔𑀼𑀪𑀽𑀢𑁄 𑀥𑀫𑁆𑀫𑀪𑀽𑀢𑁄, 𑀜𑀸𑀡𑀪𑀽𑀢𑁄𑀢𑀺 𑀯𑀡𑁆𑀡𑀺𑀢𑁄;

𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀧𑀼𑀭𑀺𑀲𑀸-𑀚𑀜𑁆𑀜𑁄 𑀇𑀢𑀺 𑀘 𑀣𑁄𑀫𑀺𑀢𑁄.

𑀮𑁄𑀓𑀚𑁂𑀝𑁆𑀞𑁄 𑀲𑀬𑀫𑁆𑀪𑀽 𑀘, 𑀫𑀳𑁂𑀲𑀺 𑀫𑀸𑀭𑀪𑀜𑁆𑀚𑀦𑁄;

𑀅𑀫𑁄𑀖𑀯𑀘𑀦𑁄 𑀥𑀫𑁆𑀫-𑀓𑀸𑀬𑁄 𑀫𑀸𑀭𑀸𑀪𑀺𑀪𑀽 𑀇𑀢𑀺.

𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀦𑀸𑀫𑀁 𑀕𑀼𑀡𑁂𑀳𑀺 𑀦𑀺𑀲𑁆𑀲𑀺𑀢𑀁, 𑀓𑁄 𑀓𑀯𑀺𑀦𑁆𑀤𑁄 𑀓𑀣𑁂𑀲𑁆𑀲𑀢𑀺.

𑀢𑀢𑁆𑀭 𑀲𑀩𑁆𑀩𑀜𑁆𑀜𑀼 𑀇𑀘𑁆𑀘𑀸𑀤𑀺-𑀦𑀸𑀫𑀁 𑀲𑀸𑀥𑀸𑀭𑀡𑀁 𑀪𑀯𑁂;

𑀲𑀩𑁆𑀩𑁂𑀲𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁, 𑀕𑁄𑀢𑀫𑁄 𑀇𑀢𑀺𑀆𑀤𑀺 𑀦.

𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘, ‘‘𑀲𑀬𑀫𑁆𑀪𑀽’’𑀇𑀢𑀺 𑀲𑀸𑀲𑀦𑁂;

𑀓𑁂𑀘𑀺 ‘‘𑀩𑁆𑀭𑀳𑁆𑀫𑀸 𑀲𑀬𑀫𑁆𑀪𑀽’’𑀢𑀺, 𑀲𑀸𑀲𑀦𑀸𑀯𑀘𑀭𑀁 𑀦 𑀢𑀁.

‘‘𑀩𑀼𑀤𑁆𑀥𑁄 𑀢𑀣𑀸𑀕𑀢𑁄 𑀲𑀢𑁆𑀣𑀸, 𑀪𑀕𑀯𑀸’’𑀢𑀺 𑀧𑀤𑀸𑀦𑀺 𑀢𑀼;

𑀞𑀸𑀦𑁂𑀦𑁂𑀓𑀲𑀳𑀲𑁆𑀲𑀫𑁆𑀳𑀺, 𑀲𑀜𑁆𑀘𑀭𑀦𑁆𑀢𑀺 𑀅𑀪𑀺𑀡𑁆𑀳𑀲𑁄.

𑀢𑀢𑁆𑀭 𑀘𑀸𑀤𑀺𑀧𑀤𑀁 𑀅𑀦𑁆𑀢-𑀧𑀤𑀜𑁆𑀘𑁂𑀯 𑀇𑀫𑀸𑀦𑀺 𑀢𑀼;

𑀏𑀓𑀢𑁄𑀧𑀺 𑀘𑀭𑀦𑁆𑀢𑀻𑀢𑀺, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀲𑀸𑀭𑀤𑁄.

𑀯𑀺𑀲𑁂𑀲𑀓𑀧𑀤𑀸𑀦𑀁 𑀢𑀼, 𑀅𑀧𑁂𑀓𑁆𑀔𑀓𑀧𑀤𑀸𑀦𑀺 𑀘;

𑀅𑀦𑀧𑁂𑀓𑁆𑀔𑀧𑀤𑀸𑀦𑀻𑀢𑀺, 𑀧𑀤𑀸𑀦𑀺 𑀤𑀼𑀯𑀺𑀥𑀸 𑀲𑀺𑀬𑀼𑀁.

𑀢𑀣𑀸 ¶ 𑀳𑀺 𑀲𑀢𑁆𑀣𑀯𑀸𑀳𑁄 𑀦𑀭𑀯𑀭𑁄 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀁𑀧𑀓𑀸𑀭𑀸𑀦𑀺 𑀅𑀪𑀺𑀥𑀸𑀦𑀧𑀤𑀸𑀦𑀺 𑀯𑀺𑀲𑁂𑀲𑀓𑀧𑀤𑀸𑀧𑁂𑀓𑁆𑀔𑀓𑀸𑀦𑀺. 𑀓𑀣𑀁?

‘‘𑀏𑀯𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑀁, 𑀲𑀢𑁆𑀣𑀯𑀸𑀳𑀁 𑀅𑀦𑀼𑀢𑁆𑀢𑀭𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂,

𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁,

𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲𑀸’’𑀢𑀺,

‘‘𑀙𑀴𑀪𑀺𑀜𑁆𑀜𑀲𑁆𑀲 𑀲𑀸𑀲𑀦’’𑀦𑁆𑀢𑀺 𑀘 𑀏𑀯𑀁 𑀯𑀺𑀲𑁂𑀲𑀓𑀧𑀤𑀸𑀧𑁂𑀓𑁆𑀔𑀓𑀸𑀦𑀺 𑀪𑀯𑀦𑁆𑀢𑀺. 𑀩𑀼𑀤𑁆𑀥𑁄 𑀚𑀺𑀦𑁄 𑀪𑀕𑀯𑀸𑀢𑀺 𑀏𑀯𑀁𑀧𑀓𑀸𑀭𑀸𑀦𑀺 𑀧𑀦 𑀦𑁄 𑀯𑀺𑀲𑁂𑀲𑀓𑀸𑀧𑁂𑀓𑁆𑀔𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀫𑀼𑀦𑀺𑀦𑁆𑀤𑁄 𑀲𑀫𑀡𑀺𑀦𑁆𑀤𑁄 𑀲𑀫𑀡𑀺𑀲𑁆𑀲𑀭𑁄 𑀬𑀢𑀺𑀲𑁆𑀲𑀭𑁄 𑀆𑀤𑀺𑀘𑁆𑀘𑀩𑀦𑁆𑀥𑀼 𑀭𑀯𑀺𑀩𑀦𑁆𑀥𑀽𑀢𑀺 𑀏𑀯𑀁𑀧𑀓𑀸𑀭𑀸𑀦𑀁 𑀇𑀥 𑀯𑀼𑀢𑁆𑀢𑀸𑀦𑀫𑀪𑀺𑀥𑀸𑀦𑀸𑀦𑀁 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀢𑁄 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀅𑀢𑁆𑀣𑀻’’𑀢𑀺. 𑀢𑀦𑁆𑀦, 𑀅𑀪𑀺𑀥𑀸𑀦𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀻𑀬𑀸𑀦𑀪𑀺𑀲𑀗𑁆𑀔𑀭𑀡𑀻𑀬𑀯𑀲𑁂𑀦 𑀅𑀪𑀺𑀲𑀗𑁆𑀔𑀢𑀸𑀪𑀺𑀥𑀸𑀦𑀸𑀦𑀺 𑀅𑀦𑀪𑀺𑀲𑀗𑁆𑀔𑀢𑀸𑀪𑀺𑀥𑀸𑀦𑀸𑀦𑀻𑀢𑀺 𑀤𑁆𑀯𑁂𑀥𑀸 𑀤𑀺𑀲𑁆𑀲𑀦𑀢𑁄. 𑀢𑀣𑀸 𑀳𑀺 𑀓𑀢𑁆𑀣𑀘𑀺 𑀓𑁂𑀘𑀺 ‘‘𑀲𑀓𑁆𑀬𑀲𑀻𑀳𑁄’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀲𑀓𑁆𑀬𑀓𑁂𑀲𑀭𑀻 𑀲𑀓𑁆𑀬𑀫𑀺𑀕𑀸𑀥𑀺𑀧𑁄’’𑀢𑀺𑀆𑀤𑀺𑀦𑀸 𑀦𑀸𑀦𑀸𑀯𑀺𑀯𑀺𑀥𑀫𑀪𑀺𑀥𑀸𑀦𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀧𑀸𑀯𑀘𑀦𑁂𑀧𑀺 𑀳𑀺 ‘‘𑀤𑁆𑀯𑀺𑀤𑀼𑀕𑁆𑀕𑀫𑀯𑀭𑀳𑀦𑀼𑀢𑁆𑀢’𑀫𑀮𑀢𑁆𑀣𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀣𑀸 𑀓𑁂𑀘𑀺 ‘‘𑀥𑀫𑁆𑀫𑀭𑀸𑀚𑀸’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀥𑀫𑁆𑀫𑀤𑀺𑀲𑀫𑁆𑀧𑀢𑀻’’𑀢𑀺𑀆𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. ‘‘𑀲𑀩𑁆𑀩𑀜𑁆𑀜𑀽’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀲𑀩𑁆𑀩𑀤𑀲𑁆𑀲𑀸𑀯𑀻 𑀲𑀩𑁆𑀩𑀤𑀲𑁆𑀲𑀻’’𑀢𑀺𑀆𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, ‘‘𑀲𑀳𑀲𑁆𑀲𑀓𑁆𑀔𑁄’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀤𑀲𑀲𑀢𑀮𑁄𑀘𑀦𑁄’’𑀢𑀺𑀆𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. ‘‘𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀅𑀭𑀯𑀺𑀦𑁆𑀤𑀲𑀳𑀸𑀬𑀩𑀦𑁆𑀥𑀽’’𑀢𑀺𑀆𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. ‘‘𑀅𑀫𑁆𑀩𑀼𑀚’’𑀦𑁆𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀦𑀻𑀭𑀚𑀁 𑀓𑀼𑀜𑁆𑀚’’𑀦𑁆𑀢𑀺𑀆𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀧𑀸𑀯𑀘𑀦𑁂𑀧𑀺 𑀳𑀺 ¶ 𑀬𑀁 𑀧𑀤𑀼𑀫𑀁, 𑀢𑀁 𑀚𑀮𑀚𑀁 𑀦𑀸𑀫𑀸𑀢𑀺 𑀫𑀦𑁆𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀤𑁂𑀲𑀦𑀸𑀯𑀺𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑁄 ‘‘𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑁂 ‘‘𑀚𑀮𑀚𑀼𑀢𑁆𑀢𑀭𑀦𑀸𑀫𑀺𑀦𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀏𑀯𑀁 𑀅𑀪𑀺𑀲𑀗𑁆𑀔𑀢𑀸𑀪𑀺𑀥𑀸𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀅𑀪𑀺𑀥𑀸𑀦𑀸𑀦𑀺 𑀧𑀦 𑀅𑀦𑀪𑀺𑀲𑀗𑁆𑀔𑀢𑀸𑀪𑀺𑀥𑀸𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 ‘‘𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺, 𑀢𑀣𑀸 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸’’𑀢𑀺. 𑀏𑀯𑀁 ‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀅𑀪𑀺𑀥𑀸𑀦𑀸𑀦𑀺 𑀅𑀦𑀪𑀺𑀲𑀗𑁆𑀔𑀢𑀸𑀪𑀺𑀥𑀸𑀦𑀸𑀦𑀺. 𑀦 𑀳𑀺 𑀢𑀸𑀦𑀺 𑀅𑀪𑀺𑀥𑀸𑀦𑀸𑀦𑀺 𑀘𑁂𑀯 ‘‘𑀲𑀢𑁆𑀣𑀸 𑀲𑀼𑀕𑀢𑁄 𑀚𑀺𑀦𑁄’’𑀢𑀺𑀆𑀤𑀻𑀦𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 𑀅𑀪𑀺𑀲𑀗𑁆𑀔𑀢𑀸𑀦𑀺, 𑀦𑀸𑀧𑀺 𑀅𑀜𑁆𑀜𑀸𑀦𑀺 𑀅𑀪𑀺𑀥𑀸𑀦𑀸𑀦𑀺 𑀏𑀢𑀸𑀦𑀺 𑀧𑀝𑀺𑀘𑁆𑀘 𑀅𑀪𑀺𑀲𑀗𑁆𑀔𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸 𑀳𑀺 ‘‘𑀩𑀼𑀤𑁆𑀥𑁄’’𑀢𑀺 𑀅𑀪𑀺𑀥𑀸𑀦𑀁 𑀧𑀝𑀺𑀘𑁆𑀘 ‘‘𑀩𑀼𑀚𑁆𑀛𑀺𑀢𑀸 𑀩𑁄𑀥𑁂𑀢𑀸 𑀩𑁄𑀥𑀓𑁄’’𑀢𑀺𑀆𑀤𑀻𑀦𑀺 𑀦𑀸𑀫𑀸𑀪𑀺𑀥𑀸𑀦𑀸𑀦𑀺 𑀦 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀢𑀣𑀸 ‘‘𑀪𑀕𑀯𑀸 𑀲𑀢𑁆𑀣𑀸 𑀲𑀼𑀕𑀢𑁄’’𑀢𑀺𑀆𑀤𑀻𑀦𑀺 𑀦𑀸𑀫𑀸𑀪𑀺𑀥𑀸𑀦𑀸𑀦𑀺 𑀧𑀝𑀺𑀘𑁆𑀘 ‘‘𑀲𑀫𑁆𑀧𑀦𑁆𑀦𑀪𑀕𑁄 𑀅𑀦𑀼𑀲𑀸𑀲𑀓𑁄 𑀲𑀼𑀦𑁆𑀤𑀭𑀯𑀘𑀦𑁄’’𑀢𑀺𑀆𑀤𑀻𑀦𑀺 𑀦𑀸𑀫𑀸𑀪𑀺𑀥𑀸𑀦𑀸𑀦𑀺 𑀦𑀸𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀏𑀯𑀁 𑀇𑀫𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀼𑀦𑀺𑀦𑁆𑀤𑁄 𑀲𑀫𑀡𑀺𑀦𑁆𑀤𑁄 𑀲𑀫𑀡𑀺𑀲𑁆𑀲𑀭𑁄 𑀬𑀢𑀺𑀲𑁆𑀲𑀭𑁄 𑀆𑀤𑀺𑀘𑁆𑀘𑀩𑀦𑁆𑀥𑀼 𑀭𑀯𑀺𑀩𑀦𑁆𑀥𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀦𑀭𑀼𑀢𑁆𑀢𑀺 𑀅𑀫𑁆𑀳𑁂𑀳𑀺 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀯𑀫𑀜𑁆𑀜𑀢𑁆𑀭𑀸𑀧𑀺 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀪𑀺𑀲𑀗𑁆𑀔𑀢𑀦𑀸𑀫𑀜𑁆𑀘, 𑀦𑀸𑀫𑀜𑁆𑀘𑀸𑀦𑀪𑀺𑀲𑀗𑁆𑀔𑀢𑀁;

𑀤𑁆𑀯𑀺𑀤𑀼𑀕𑁆𑀕𑀫𑀯𑀭𑁄 𑀩𑀼𑀤𑁆𑀥𑁄, 𑀇𑀢𑀺 𑀦𑀸𑀫𑀁 𑀤𑁆𑀯𑀺𑀥𑀸 𑀪𑀯𑁂’’𑀢𑀺.

𑀧𑀪𑀽𑀢𑀺 𑀧𑀭𑀁 𑀧𑀲𑀬𑁆𑀳 𑀪𑀯𑀢𑀻𑀢𑀺 𑀧𑀪𑀽, 𑀇𑀲𑁆𑀲𑀭𑁄. ‘‘𑀅𑀭𑀜𑁆𑀜𑀲𑁆𑀲 𑀧𑀪𑀽 𑀅𑀬𑀁 𑀮𑀼𑀤𑁆𑀤𑀓𑁄’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀅𑀪𑀺𑀪𑀽𑀢𑀺 ¶ 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀽, 𑀅𑀲𑀜𑁆𑀜𑀲𑀢𑁆𑀢𑁄. 𑀓𑀺𑀁 𑀲𑁄 𑀅𑀪𑀺𑀪𑀯𑀺? 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀅𑀭𑀽𑀧𑀺𑀦𑁄. 𑀇𑀢𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀅𑀭𑀽𑀧𑀺𑀦𑁄 𑀅𑀪𑀺𑀪𑀯𑀻𑀢𑀺 𑀅𑀪𑀺𑀪𑀽. 𑀲𑁄 𑀘 𑀔𑁄 𑀦𑀺𑀘𑁆𑀘𑁂𑀢𑀦𑀢𑁆𑀢𑀸 𑀅𑀪𑀺𑀪𑀯𑀦𑀓𑁆𑀭𑀺𑀬𑀸𑀬𑀸𑀲𑀢𑀺 𑀧𑀼𑀩𑁆𑀩𑁂𑀯𑀸’𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀢𑁄 𑀛𑀸𑀦𑀮𑀸𑀪𑀺𑀓𑀸𑀮𑁂 𑀅𑀢𑁆𑀢𑀦𑀸 𑀅𑀥𑀺𑀕𑀢𑀧𑀜𑁆𑀘𑀫𑀚𑁆𑀛𑀸𑀦𑀁 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀪𑀸𑀯𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀅𑀲𑀜𑁆𑀜𑀺𑀪𑀯𑁂 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀅𑀪𑀺𑀪𑀯𑀺𑀢𑀼𑀫𑀸𑀭𑀪𑀺, 𑀢𑀤𑀪𑀺𑀪𑀯𑀦𑀓𑀺𑀘𑁆𑀘𑀁 𑀇𑀤𑀸𑀦𑀺 𑀲𑀺𑀤𑁆𑀥𑀦𑁆𑀢𑀺 𑀅𑀪𑀺𑀪𑀯𑀻𑀢𑀺 𑀅𑀪𑀺𑀪𑀽𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀦𑀺𑀘𑁆𑀘𑁂𑀢𑀦𑀪𑀸𑀯𑁂𑀦 𑀅𑀪𑀺𑀪𑀯𑀦𑀩𑁆𑀬𑀸𑀧𑀸𑀭𑁂 𑀅𑀲𑀢𑀺𑀧𑀺 𑀧𑀼𑀩𑁆𑀩𑁂 𑀲𑀘𑁂𑀢𑀦𑀓𑀸𑀮𑁂 𑀲𑀩𑁆𑀬𑀸𑀧𑀸𑀭𑀢𑁆𑀢𑀸 𑀲𑀘𑁂𑀢𑀦𑀲𑁆𑀲 𑀯𑀺𑀬 𑀦𑀺𑀘𑁆𑀘𑁂𑀢𑀦𑀲𑁆𑀲𑀸𑀧𑀺 𑀲𑀢𑁄 𑀢𑀲𑁆𑀲 𑀉𑀧𑀘𑀸𑀭𑁂𑀦 𑀲𑀩𑁆𑀬𑀸𑀧𑀸𑀭𑀢𑀸𑀯𑀘𑀦𑀁 𑀬𑀼𑀚𑁆𑀚𑀢𑁂𑀯. 𑀤𑀺𑀲𑁆𑀲𑀢𑀺 𑀳𑀺 𑀮𑁄𑀓𑁂 𑀲𑀸𑀲𑀦𑁂 𑀘 𑀲𑀘𑁂𑀢𑀦𑀲𑁆𑀲 𑀯𑀺𑀬 𑀅𑀘𑁂𑀢𑀦𑀲𑁆𑀲𑀧𑀺 𑀉𑀧𑀘𑀸𑀭𑁂𑀦 𑀲𑀩𑁆𑀬𑀸𑀧𑀸𑀭𑀢𑀸𑀯𑀘𑀦𑀁. 𑀢𑀁 𑀬𑀣𑀸? 𑀓𑀽𑀮𑀁 𑀧𑀢𑀺𑀢𑀼𑀓𑀸𑀫𑀁, 𑀏𑀯𑀁 𑀮𑁄𑀓𑁂. 𑀲𑀸𑀲𑀦𑁂 𑀧𑀦 𑁋

‘‘𑀭𑁄𑀤𑀦𑁆𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀕𑁆𑀕𑀸 𑀯𑀺𑀧𑀼𑀮𑀸 𑀤𑀼𑀫𑀸;

𑀲𑀬𑀫𑁂𑀯𑁄𑀦𑀫𑀺𑀢𑁆𑀯𑀸𑀦, 𑀉𑀧𑀕𑀘𑁆𑀙𑀦𑁆𑀢𑀺 𑀤𑀸𑀭𑀓𑁂’’𑀢𑀺 𑀘

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬𑀸’’𑀢𑀺 𑀘 ‘‘𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓’’𑀦𑁆𑀢𑀺 𑀘 𑀆𑀤𑀺. 𑀅𑀪𑀺𑀪𑀽𑀲𑀤𑁆𑀤𑀲𑁆𑀲 𑀅𑀲𑀜𑁆𑀜𑀲𑀢𑁆𑀢𑀸𑀪𑀺𑀥𑀸𑀦𑀢𑁆𑀢𑁂 ‘‘𑀅𑀪𑀺𑀪𑀼𑀁 𑀅𑀪𑀺𑀪𑀼𑀢𑁄 𑀫𑀜𑁆𑀜𑀢𑀻’’𑀢𑀺 𑀇𑀤𑀫𑁂𑀢𑁆𑀣 𑀲𑀸𑀥𑀓𑀁 𑀯𑀘𑀦𑀁. 𑀅𑀣 𑀯𑀸 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀽, 𑀧𑀭𑁂𑀲𑀫𑀪𑀺𑀪𑀯𑀺𑀢𑀸 𑀬𑁄 𑀓𑁄𑀘𑀺. 𑀯𑀺𑀲𑁂𑀲𑀢𑁄 𑀧𑀦 𑀢𑀣𑀸𑀕𑀢𑁄𑀬𑁂𑀯 𑀅𑀪𑀺𑀪𑀽. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀯𑁂 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀅𑀪𑀺𑀪𑀽 𑀦𑀸𑀫 𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸’’𑀢𑀺 𑀯𑀤𑀦𑁆𑀢𑀺.

𑀯𑀺𑀪𑀽𑀢𑀺 𑀯𑀺𑀲𑁂𑀲𑀪𑀽𑀢𑁄𑀢𑀺 𑀯𑀺𑀪𑀽, ‘‘𑀪𑀯𑀲𑁄𑀢𑀁 𑀲𑀘𑁂 𑀩𑀼𑀤𑁆𑀥𑁄, 𑀢𑀺𑀡𑁆𑀡𑁄 𑀮𑁄𑀓𑀦𑁆𑀢𑀕𑀽 𑀯𑀺𑀪𑀽’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 ¶ 𑀯𑀘𑀦𑀁. 𑀯𑀺𑀪𑀽𑀢𑀺 𑀳𑁂𑀢𑁆𑀣 𑀭𑀽𑀧𑀓𑀸𑀬𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀆𑀳 𑀘 𑁋

‘‘𑀤𑀺𑀲𑁆𑀲𑀫𑀸𑀦𑁄𑀧𑀺 𑀢𑀸𑀯𑀲𑁆𑀲, 𑀭𑀽𑀧𑀓𑀸𑀬𑁄 𑀅𑀘𑀺𑀦𑁆𑀢𑀺𑀬𑁄;

𑀅𑀲𑀸𑀥𑀸𑀭𑀡𑀜𑀸𑀡𑀝𑁆𑀞𑁂, 𑀥𑀫𑁆𑀫𑀓𑀸𑀬𑁂 𑀓𑀣𑀸𑀯 𑀓𑀸’’𑀢𑀺.

𑀅𑀥𑀺𑀪𑀽𑀢𑀺 𑀅𑀥𑀺𑀪𑀯𑀢𑀻𑀢𑀺 𑀅𑀥𑀺𑀪𑀽, 𑀇𑀲𑁆𑀲𑀭𑁄.

‘‘𑀢𑀤𑀸 𑀫𑀁 𑀢𑀧𑀢𑁂𑀚𑁂𑀦, 𑀲𑀦𑁆𑀢𑀢𑁆𑀢𑁄 𑀢𑀺𑀤𑀺𑀯𑀸𑀥𑀺𑀪𑀽;

𑀥𑀸𑀭𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀁 𑀯𑀡𑁆𑀡𑀁, 𑀪𑀺𑀓𑁆𑀔𑀸𑀬 𑀫𑀁 𑀉𑀧𑀸𑀕𑀫𑀻’’𑀢𑀺 𑁋

𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀧𑀢𑀺𑀪𑀽𑀢𑀺 𑀧𑀢𑀺𑀪𑀽𑀢𑁄𑀢𑀺 𑀧𑀢𑀺𑀪𑀽, ‘‘𑀕𑁄𑀡𑀲𑁆𑀲 𑀧𑀢𑀺𑀪𑀽’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀕𑁄𑀢𑁆𑀭𑀪𑀽𑀢𑀺 𑀕𑁄𑀢𑁆𑀢𑀲𑀗𑁆𑀔𑀸𑀢𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀽𑀢𑁄𑀢𑀺 𑀕𑁄𑀢𑁆𑀭𑀪𑀽, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀺𑀔𑀸𑀧𑁆𑀧𑀢𑁆𑀢𑀩𑀮𑀯𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀕𑁄𑀢𑁆𑀭𑀪𑀽? 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀦𑀦𑁆𑀢𑀭𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀕𑁄𑀢𑁆𑀭𑀪𑀽’’𑀢𑀺, 𑀇𑀤𑀫𑁂𑀯𑁂𑀢𑁆𑀣 𑀅𑀢𑁆𑀣𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 𑀲𑀫𑀡𑁄𑀢𑀺 𑀕𑁄𑀢𑁆𑀢𑀫𑀢𑁆𑀢𑀫𑀦𑀼𑀪𑀯𑀫𑀸𑀦𑁄 𑀓𑀸𑀲𑀸𑀯𑀓𑀡𑁆𑀞𑀲𑀫𑀡𑁄𑀧𑀺 𑀕𑁄𑀢𑁆𑀭𑀪𑀽. 𑀲𑁄 𑀳𑀺 ‘‘𑀲𑀫𑀡𑁄’’𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑀯𑀢𑀺 𑀯𑀺𑀦𑁆𑀤𑀢𑀺, 𑀦 𑀲𑀫𑀡𑀥𑀫𑁆𑀫𑁂 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀼𑀘𑁆𑀘𑀢𑀺, ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀯𑀢𑁆𑀭𑀪𑀽𑀢𑀺 𑀲𑀓𑁆𑀓𑁄. 𑀲𑁄 𑀳𑀺 𑀫𑀸𑀢𑀸𑀧𑀺𑀢𑀺𑀪𑀭𑀡𑀸𑀤𑀻𑀳𑀺 𑀲𑀢𑁆𑀢𑀳𑀺 𑀯𑀢𑁆𑀢𑁂𑀳𑀺 𑀲𑀓𑁆𑀓𑀢𑁆𑀢𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑁂 𑀤𑁂𑀯𑁂 𑀯𑀢𑁆𑀢𑁂𑀦 𑀅𑀪𑀺𑀪𑀯𑀢𑀻𑀢𑀺 𑀯𑀢𑁆𑀭𑀪𑀽. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 𑀪𑀽𑀥𑀸𑀢𑀼𑀫𑁆𑀳𑀺 𑀮𑀩𑁆𑀪𑀫𑀸𑀦𑀁 𑀧𑀢𑁆𑀢𑀺𑀅𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 ‘‘𑀯𑀢𑁆𑀢𑁂𑀦 𑀅𑀜𑁆𑀜𑁂 𑀅𑀪𑀺𑀪𑀯𑀺𑀢𑁆𑀯𑀸 𑀤𑁂𑀯𑀺𑀲𑁆𑀲𑀭𑀺𑀬𑀁 𑀧𑀢𑁆𑀢𑁄𑀢𑀺 𑀯𑀢𑁆𑀭𑀪𑀽’’𑀢𑀺 ¶ 𑀯𑀼𑀢𑁆𑀢𑀁, ‘‘𑀯𑀢𑁆𑀭𑀦𑀸𑀫𑀓𑀁 𑀯𑀸 𑀅𑀲𑀼𑀭𑀁 𑀅𑀪𑀺𑀪𑀯𑀢𑀻𑀢𑀺 𑀯𑀢𑁆𑀭𑀪𑀽’’𑀢𑀺 𑀘, ‘‘𑀯𑀢𑁆𑀭𑀪𑀽 𑀚𑀬𑀢𑀁𑀧𑀺𑀢𑀸’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀏𑀢𑁆𑀣 𑀳𑀺 𑀯𑀢𑁆𑀭𑀪𑀽𑀢𑀺 𑀯𑀢𑁆𑀭𑀦𑀸𑀫𑀓𑀲𑁆𑀲 𑀅𑀲𑀼𑀭𑀲𑁆𑀲 𑀅𑀪𑀺𑀪𑀯𑀺𑀢𑀸. 𑀚𑀬𑀢𑀁 𑀧𑀺𑀢𑀸𑀢𑀺 𑀚𑀬𑀦𑁆𑀢𑀸𑀦𑀁 𑀧𑀺𑀢𑀸. ‘‘𑀲𑀓𑁆𑀓𑁄 𑀇𑀦𑁆𑀤𑁄 𑀧𑀼𑀭𑀺𑀦𑁆𑀤𑀤𑁄’’ 𑀇𑀘𑁆𑀘𑀸𑀤𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀤𑀁 𑀢𑀼 𑀥𑀸𑀢𑀸𑀥𑀺𑀓𑀸𑀭𑁂 𑀧𑀓𑀸𑀲𑁂𑀲𑁆𑀲𑀸𑀫. 𑀧𑀭𑀸𑀪𑀺𑀪𑀽𑀢𑀺 𑀧𑀭𑀫𑀪𑀺𑀪𑀯𑀢𑀻𑀢𑀺 𑀧𑀭𑀸𑀪𑀺𑀪𑀽. 𑀏𑀯𑀁 𑀭𑀽𑀧𑀸𑀪𑀺𑀪𑀽𑀢𑀺𑀆𑀤𑀻𑀲𑀼𑀧𑀺. 𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀫𑀪𑀺𑀪𑀯𑀺𑀢𑀩𑁆𑀩𑀁 𑀅𑀪𑀺𑀪𑀯𑀢𑀻𑀢𑀺 𑀲𑀩𑁆𑀩𑀸𑀪𑀺𑀪𑀽. 𑀲𑀩𑁆𑀩𑀸𑀪𑀺𑀪𑀽𑀢𑀺 𑀘 𑀇𑀤𑀁 𑀦𑀸𑀫𑀁 𑀢𑀣𑀸𑀕𑀢𑀲𑁆𑀲𑁂𑀯 𑀬𑀼𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺,

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄;

𑀲𑀩𑁆𑀩𑀜𑁆𑀚𑀳𑁄 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄,

𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺.

𑀊𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄𑀬𑀁.

𑀇𑀤𑀸𑀦𑀺 𑀅𑀦𑀺𑀬𑀢𑀮𑀺𑀗𑁆𑀕𑀸𑀦𑀁 𑀦𑀺𑀬𑀢𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀁 𑀪𑀽𑀢𑀧𑀭𑀸𑀪𑀽𑀢 𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀪𑀽𑀢𑁄𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀯𑀻𑀢𑀺 𑀪𑀽𑀢𑁄, 𑀪𑀽𑀢𑁄𑀢𑀺 𑀚𑀸𑀢𑁄 𑀲𑀜𑁆𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀧𑀸𑀢𑀼𑀪𑀽𑀢𑁄, 𑀪𑀽𑀢𑁄𑀢𑀺 𑀯𑀸 𑀮𑀤𑁆𑀥𑀲𑀭𑀽𑀧𑁄 𑀬𑁄 𑀓𑁄𑀘𑀺 𑀲𑀯𑀺𑀜𑁆𑀜𑀸𑀡𑀓𑁄 𑀯𑀸 𑀅𑀯𑀺𑀜𑁆𑀜𑀸𑀡𑀓𑁄 𑀯𑀸. 𑀅𑀣 𑀯𑀸 𑀢𑀣𑀸𑀓𑀸𑀭𑁂𑀦 𑀪𑀯𑀢𑀻𑀢𑀺 𑀪𑀽𑀢𑁄, 𑀪𑀽𑀢𑁄𑀢𑀺 𑀲𑀘𑁆𑀘𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀯𑀺𑀧𑀭𑀻𑀢𑁄 𑀬𑁄 𑀓𑁄𑀘𑀺, 𑀏𑀢𑁆𑀣 𑀬𑁄 𑀪𑀽𑀢𑀲𑀤𑁆𑀤𑁄 𑀲𑀘𑁆𑀘𑀢𑁆𑀣𑁄, 𑀢𑀲𑁆𑀲 ‘‘𑀪𑀽𑀢𑀝𑁆𑀞𑁄’’𑀢𑀺 𑀇𑀤𑀫𑁂𑀢𑁆𑀣 𑀲𑀸𑀥𑀓𑀁 𑀯𑀘𑀦𑀁. 𑀧𑀭𑀸𑀪𑀽𑀢𑁄𑀢𑀺 𑀧𑀭𑀸𑀪𑀯𑀻𑀢𑀺 𑀧𑀭𑀸𑀪𑀽𑀢𑁄. 𑀲𑀼𑀝𑁆𑀞𑀼 𑀪𑀽𑀢𑁄𑀢𑀺 𑀲𑀫𑁆𑀪𑀽𑀢𑁄. 𑀯𑀺𑀲𑁂𑀲𑁂𑀦 𑀪𑀽𑀢𑁄𑀢𑀺 𑀯𑀺𑀪𑀽𑀢𑁄. 𑀯𑀺𑀲𑁆𑀲𑀼𑀢𑁄 𑀪𑀽𑀢𑁄𑀢𑀺 𑀯𑀸 𑀯𑀺𑀪𑀽𑀢𑁄, ‘‘𑀯𑀺𑀪𑀽𑀢𑀸𑀭𑀫𑁆𑀫𑀡’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀯𑀺𑀪𑀯𑀻𑀢𑀺 𑀯𑀸 𑀯𑀺𑀪𑀽𑀢𑁄, 𑀯𑀺𑀦𑀝𑁆𑀞𑁄𑀢𑀺 𑀅𑀢𑁆𑀣𑁄, ‘‘𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸’’𑀢𑀺 ¶ 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀧𑀸𑀓𑀝𑁄 𑀪𑀽𑀢𑁄𑀢𑀺 𑀧𑀸𑀢𑀼𑀪𑀽𑀢𑁄. 𑀆𑀯𑀺 𑀪𑀯𑀢𑀻𑀢𑀺 𑀆𑀯𑀺𑀪𑀽𑀢𑁄. 𑀏𑀯𑀁 𑀢𑀺𑀭𑁄𑀪𑀽𑀢𑁄. 𑀯𑀺𑀦𑀸𑀪𑀽𑀢𑁄. 𑀪𑀯𑀺𑀢𑀼𑀫𑀦𑀼𑀘𑁆𑀙𑀯𑀺𑀓𑁄𑀢𑀺 𑀪𑀩𑁆𑀩𑁄. 𑀧𑀭𑀺𑀪𑀯𑀺𑀬𑀢𑁂 𑀲𑁄𑀢𑀺 𑀧𑀭𑀺𑀪𑀽𑀢𑁄. 𑀬𑁂𑀦 𑀓𑁂𑀦𑀘𑀺 𑀬𑁄 𑀧𑀻𑀴𑀺𑀢𑁄 𑀳𑀻𑀴𑀺𑀢𑁄 𑀯𑀸, 𑀲𑁄 𑀧𑀭𑀺𑀪𑀽𑀢𑁄. 𑀕𑀫𑁆𑀬𑀫𑀸𑀦𑀢𑁆𑀣𑁄 𑀬𑀣𑀸𑀓𑀸𑀫𑀘𑀸𑀭𑀻. 𑀅𑀪𑀺𑀪𑀯𑀺𑀬𑁆𑀬𑀢𑁂 𑀲𑁄𑀢𑀺 𑀅𑀪𑀺𑀪𑀽𑀢𑁄. 𑀅𑀥𑀺𑀪𑀯𑀺𑀬𑀢𑁂 𑀲𑁄𑀢𑀺 𑀅𑀥𑀺𑀪𑀽𑀢𑁄. 𑀏𑀯𑀁 𑀅𑀤𑁆𑀥𑀪𑀽𑀢𑁄. 𑀏𑀢𑁆𑀣 𑀅𑀥𑀺𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀅𑀤𑁆𑀥𑀲𑀤𑁆𑀤𑁄, ‘‘𑀘𑀓𑁆𑀔𑀼 𑀪𑀺𑀓𑁆𑀔𑀯𑁂 𑀅𑀤𑁆𑀥𑀪𑀽𑀢𑀁, 𑀭𑀽𑀧𑀸 𑀅𑀤𑁆𑀥𑀪𑀽𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀤𑁆𑀥𑀪𑀽𑀢’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁, 𑀢𑀣𑀸 ‘‘𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀦 𑀳𑁂𑀯 𑀅𑀦𑀤𑁆𑀥𑀪𑀽𑀢𑀁 𑀅𑀢𑁆𑀢𑀸𑀦𑀁 𑀦 𑀅𑀤𑁆𑀥𑀪𑀸𑀯𑁂𑀢𑀻’’𑀢𑀺 𑀧𑀤𑀫𑁆𑀧𑀺. 𑀢𑀢𑁆𑀣 𑀅𑀦𑀤𑁆𑀥𑀪𑀽𑀢𑀦𑁆𑀢𑀺 𑀤𑀼𑀓𑁆𑀔𑁂𑀦 𑀅𑀦𑀥𑀺𑀪𑀽𑀢𑀁. 𑀤𑀼𑀓𑁆𑀔𑁂𑀦 𑀅𑀦𑀥𑀺𑀪𑀽𑀢𑁄 𑀦𑀸𑀫 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀢𑀁 𑀦 𑀅𑀤𑁆𑀥𑀪𑀸𑀯𑁂𑀢𑀺 𑀦𑀸𑀪𑀺𑀪𑀯𑀢𑀻𑀢𑀺 𑀲𑀼𑀢𑁆𑀢𑀧𑀤𑀢𑁆𑀣𑁄.

𑀅𑀦𑀼𑀪𑀯𑀺𑀬𑀢𑁂 𑀲𑁄𑀢𑀺 𑀅𑀦𑀼𑀪𑀽𑀢𑁄. 𑀏𑀯𑀁 𑀲𑀫𑀦𑀼𑀪𑀽𑀢𑁄. 𑀧𑀘𑁆𑀘𑀦𑀼𑀪𑀽𑀢𑁄. 𑀪𑀸𑀯𑀺𑀢𑁄. 𑀏𑀢𑁆𑀣 𑀪𑀸𑀯𑀺𑀢𑁄𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀔𑁄 𑀓𑀲𑁆𑀲𑀧 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑁄 𑀪𑀸𑀯𑀺𑀢𑁄’’𑀢𑀺𑀆𑀤𑀻𑀲𑀼 𑀕𑀼𑀡𑀻𑀯𑀸𑀘𑀓𑀁 𑀧𑀥𑀸𑀦𑀧𑀤𑀁 𑀲𑀸𑀲𑀦𑁂 𑀤𑀝𑁆𑀞𑀩𑁆𑀩𑀁. 𑀢𑀺𑀢𑁆𑀣𑀺𑀬𑀲𑀫𑀬𑁂 𑀧𑀦 𑀪𑀸𑀯𑀺𑀢𑁄𑀢𑀺 𑀓𑀸𑀫𑀕𑀼𑀡𑁄 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀸𑀴𑀺𑀬𑀁 ‘‘𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑀻’’𑀢𑀺. 𑀢𑀢𑁆𑀭 𑀪𑀸𑀯𑀺𑀢𑀸 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀢𑁂 𑀦 𑀆𑀲𑀻𑀲𑀢𑀺 𑀦 𑀲𑁂𑀯𑀢𑀻𑀢𑀺 𑀲𑀼𑀢𑁆𑀢𑀧𑀤𑀢𑁆𑀣𑁄. 𑀲𑀫𑁆𑀪𑀸𑀯𑀺𑀬𑀢𑁂 𑀲𑁄𑀢𑀺 𑀲𑀫𑁆𑀪𑀸𑀯𑀺𑀢𑁄. 𑀏𑀯𑀁 𑀯𑀺𑀪𑀸𑀯𑀺𑀢𑁄. 𑀧𑀭𑀺𑀪𑀸𑀯𑀺𑀢𑁄. 𑀅𑀦𑀼𑀧𑀭𑀺𑀪𑀽𑀢𑁄. 𑀫𑀦𑀁𑀧𑀭𑀺𑀪𑀽𑀢𑁄𑀢𑀺 𑀫𑀦𑀁 𑀧𑀭𑀺𑀪𑀯𑀺𑀬𑀺𑀢𑁆𑀣 𑀲𑁄𑀢𑀺 𑀫𑀦𑀁𑀧𑀭𑀺𑀪𑀽𑀢𑁄. 𑀏𑀢𑁆𑀣 𑀫𑀦𑀁𑀧𑀭𑀺𑀪𑀽𑀢𑁄𑀢𑀺 𑀈𑀲𑀓𑀁 𑀅𑀧𑁆𑀧𑀢𑁆𑀢𑀧𑀭𑀺𑀪𑀯𑀦𑁄 𑀯𑀼𑀘𑁆𑀘𑀢𑀺. 𑀫𑀦𑀦𑁆𑀢𑀺 𑀳𑀺 𑀦𑀺𑀧𑀸𑀢𑀧𑀤𑀁. ‘‘𑀅𑀢𑀺𑀧𑀡𑁆𑀟𑀺𑀢𑁂𑀦 𑀧𑀼𑀢𑁆𑀢𑁂𑀦, 𑀫𑀦𑀫𑁆𑀳𑀺 𑀉𑀧𑀓𑀽𑀮𑀺𑀢𑁄, 𑀤𑁂𑀯𑀤𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀩𑀼𑀤𑁆𑀥𑀪𑀸𑀯𑁂𑀦 𑀘𑁂𑀯 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀻𑀦𑀜𑁆𑀘 ¶ 𑀅𑀪𑀸𑀯𑁂𑀦 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀣𑁂𑀭𑀻 𑀘 𑀫𑀦𑀁 𑀦𑀸𑀲𑀺𑀢𑁄, 𑀫𑀦𑀁 𑀯𑀼𑀴𑁆𑀳𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 𑀘𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀭 𑀫𑀦𑀁𑀲𑀤𑁆𑀤𑀲𑁆𑀲 𑀓𑀺𑀜𑁆𑀘𑀺 𑀬𑀼𑀢𑁆𑀢𑀺𑀁 𑀯𑀤𑀸𑀫.

𑀫𑀦𑀁𑀲𑀤𑁆𑀤𑁄 𑀤𑁆𑀯𑀺𑀥𑀸 𑀪𑀺𑀦𑁆𑀦𑁄, 𑀦𑀸𑀫𑀁 𑀦𑁂𑀧𑀸𑀢𑀺𑀓𑀜𑁆𑀘𑀺𑀢𑀺;

𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀺, 𑀫𑀦𑀫𑁆𑀳𑀺 𑀉𑀧𑀓𑀽𑀮𑀺𑀢𑁄𑀢𑀺.

𑀧𑀭𑀺𑀪𑀯𑀺𑀢𑀩𑁆𑀩𑁄𑀢𑀺 𑀅𑀜𑁆𑀜𑁂𑀦 𑀧𑀭𑀺𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀧𑀭𑀺𑀪𑀯𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀪𑁄𑀢𑁆𑀢𑀩𑁆𑀩𑁄 𑀧𑀭𑀺𑀪𑀯𑀦𑀻𑀬𑁄. 𑀢𑀩𑁆𑀩𑀧𑀘𑁆𑀘𑀬𑀝𑁆𑀞𑀸𑀦𑁂 𑀳𑀺 𑀲𑀓𑁆𑀓𑀼𑀡𑁂𑀬𑁆𑀬𑀧𑀤𑀬𑁄𑀚𑀦𑀸 𑀤𑀺𑀲𑁆𑀲𑀢𑀺 ‘‘𑀅𑀮𑀤𑁆𑀥𑀁 𑀆𑀭𑀫𑁆𑀫𑀡𑀁 𑀮𑀤𑁆𑀥𑀩𑁆𑀩𑀁 𑀮𑀪𑀦𑀻𑀬𑀁 𑀮𑀤𑁆𑀥𑀼𑀁 𑀯𑀸 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺. 𑀅𑀣 𑀯𑀸 𑀧𑀭𑀺𑀪𑀯𑀦𑀫𑀭𑀳𑀢𑀻𑀢𑀺 𑀧𑀭𑀺𑀪𑀯𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀪𑁄𑀢𑁆𑀢𑀩𑁆𑀩𑁄 𑀧𑀭𑀺𑀪𑀯𑀦𑀻𑀬𑁄. 𑀢𑀣𑀸 𑀳𑀺 𑀢𑀩𑁆𑀩𑀧𑀘𑁆𑀘𑀬𑀝𑁆𑀞𑀸𑀦𑁂 𑀅𑀭𑀳𑀢𑀺𑀧𑀤𑀬𑁄𑀚𑀦𑀸 𑀤𑀺𑀲𑁆𑀲𑀢𑀺 ‘‘𑀧𑀭𑀺𑀲𑀓𑁆𑀓𑀼𑀡𑁂𑀬𑁆𑀬𑀁 𑀮𑀸𑀪𑀫𑀭𑀳𑀢𑀻𑀢𑀺 𑀮𑀤𑁆𑀥𑀩𑁆𑀩’’𑀦𑁆𑀢𑀺. 𑀏𑀢𑁆𑀣 𑀧𑀦 𑀧𑀭𑀺𑀪𑁄𑀢𑁆𑀢𑀩𑁆𑀩𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀔𑀢𑁆𑀢𑀺𑀬𑁄 𑀔𑁄 𑀫𑀳𑀸𑀭𑀸𑀚 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄 𑀦 𑀧𑀭𑀺𑀪𑁄𑀢𑁆𑀢𑀩𑁆𑀩𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀅𑀪𑀺𑀅𑀥𑀺𑀧𑀼𑀩𑁆𑀩𑀸 𑀪𑀽𑀥𑀸𑀢𑀼𑀬𑁄 𑀲𑀫𑀸𑀦𑀢𑁆𑀣𑀸. 𑀲𑁂𑀲𑀸𑀦𑀺 𑀤𑀼𑀓𑀸𑀦𑀺 𑀦𑀬𑀸𑀦𑀼𑀲𑀸𑀭𑁂𑀦 𑀜𑁂𑀬𑁆𑀬𑀸𑀦𑀺. 𑀪𑀫𑀸𑀦𑁄𑀢𑀺 𑀪𑀯𑀢𑀻𑀢𑀺 𑀪𑀫𑀸𑀦𑁄, 𑀫𑀚𑁆𑀛𑁂 𑀯𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀢𑁆𑀢𑀩𑁆𑀩𑀁 𑁋

‘‘𑀓𑀺𑀁 𑀲𑁄 𑀪𑀫𑀸𑀦𑁄 𑀲𑀘𑁆𑀘𑀓𑁄’’, 𑀇𑀘𑁆𑀘𑀢𑁆𑀭 𑀧𑀸𑀴𑀺𑀬𑀁 𑀧𑀦;

𑀭𑀽𑀧𑀁 𑀪𑀯𑀢𑀺𑀥𑀸𑀢𑀼𑀲𑁆𑀲, 𑀯𑀮𑁄𑀧𑁂𑀦𑁂𑀯 𑀤𑀺𑀲𑁆𑀲𑀢𑀺.

𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀓𑀺𑀁 𑀲𑁄 𑀪𑀫𑀸𑀦𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄, 𑀬𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻’’𑀢𑀺. 𑀯𑀺𑀪𑀯𑀫𑀸𑀦𑁄𑀢𑀺 𑀯𑀺𑀪𑀯𑀢𑀻𑀢𑀺 𑀯𑀺𑀪𑀯𑀫𑀸𑀦𑁄. 𑀏𑀯𑀁 𑀧𑀭𑀺𑀪𑀯𑀫𑀸𑀦𑁄𑀢𑀺𑀆𑀤𑀻𑀲𑀼. 𑀢𑀢𑁆𑀣 ‘‘𑀅𑀪𑀺𑀲𑀫𑁆𑀪𑁄𑀦𑁆𑀢𑁄’’𑀢𑀺𑀫𑀲𑁆𑀲 𑀓𑀭𑁄𑀦𑁆𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀇𑀘𑁆𑀘𑁂𑀯𑀢𑁆𑀣𑁄. ‘‘𑀲𑀩𑁆𑀩𑀸𑀦𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀲 𑀭𑀸𑀚𑀯𑀲𑀢𑀺𑀁 𑀯𑀲𑁂’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀬𑀲𑁆𑀫𑀸 𑀧𑀦𑀺𑀫𑀸𑀦𑀺 ¶ ‘‘𑀪𑀯𑀫𑀸𑀦𑁄’’𑀢𑀺𑀆𑀤𑀻𑀦𑀺 𑀯𑀺𑀧𑁆𑀧𑀓𑀢𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺, 𑀢𑀲𑁆𑀫𑀸 𑀲𑀭𑀫𑀸𑀦𑁄 𑀭𑁄𑀤𑀢𑀺, 𑀕𑀘𑁆𑀙𑀦𑁆𑀢𑁄 𑀕𑀡𑁆𑀳𑀸𑀢𑀺, ‘‘𑀕𑀘𑁆𑀙𑀦𑁆𑀢𑁄 𑀲𑁄 𑀪𑀸𑀭𑀤𑁆𑀯𑀸𑀚𑁄, 𑀅𑀤𑁆𑀤𑀲 𑀅𑀘𑁆𑀘𑀼𑀢𑀁 𑀇𑀲𑀺’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀼𑀢𑁆𑀢𑀭𑀓𑁆𑀭𑀺𑀬𑀸𑀧𑀤𑀸𑀦𑀺 𑀓𑀢𑁆𑀯𑀸 𑀭𑀸𑀚𑀸 𑀪𑀯𑀫𑀸𑀦𑁄 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀲𑀭𑀫𑀸𑀦𑁄 𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀳𑀺 ‘‘𑀬𑀸𑀢𑁄 𑀕𑀢𑁄 𑀧𑀢𑁆𑀢𑁄’’𑀢𑀺𑀆𑀤𑀻𑀳𑀺 𑀲𑀤𑀺𑀲𑀸𑀦𑀺 𑀦 𑀳𑁄𑀦𑁆𑀢𑀺, 𑀉𑀢𑁆𑀢𑀭𑀓𑁆𑀭𑀺𑀬𑀸𑀧𑀤𑀸𑀧𑁂𑀓𑁆𑀔𑀓𑀸𑀦𑀺 𑀳𑁄𑀦𑁆𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀧𑀤𑀸𑀦𑀺 𑀯𑀺𑀬𑀸𑀢𑀺.

𑀧𑀭𑀺𑀪𑀯𑀺𑀬𑀫𑀸𑀦𑁄𑀢𑀺 𑀧𑀭𑀺𑀪𑀯𑀺𑀬𑀢𑁂 𑀲𑁄𑀢𑀺 𑀧𑀭𑀺𑀪𑀯𑀺𑀬𑀫𑀸𑀦𑁄. 𑀏𑀯𑀁 𑀧𑀭𑀺𑀪𑀼𑀬𑁆𑀬𑀫𑀸𑀦𑁄𑀢𑀺𑀆𑀤𑀻𑀲𑀼𑀧𑀺. 𑀇𑀫𑀸𑀦𑀺𑀧𑀺 𑀯𑀺𑀧𑁆𑀧𑀓𑀢𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺, 𑀢𑀲𑁆𑀫𑀸 ‘‘𑀭𑀸𑀚𑀧𑀼𑀭𑀺𑀲𑁂𑀳𑀺 𑀦𑀻𑀬𑀫𑀸𑀦𑁄 𑀘𑁄𑀭𑁄 𑀏𑀯𑀁 𑀘𑀺𑀦𑁆𑀢𑁂𑀲𑀻’’𑀢𑀺𑀆𑀤𑀻𑀦𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀼𑀢𑁆𑀢𑀭𑀓𑁆𑀭𑀺𑀬𑀸𑀧𑀤𑀸𑀦𑀺 𑀓𑀢𑁆𑀯𑀸 𑀅𑀜𑁆𑀜𑁂𑀳𑀺 𑀧𑀭𑀺𑀪𑀯𑀺𑀬𑀫𑀸𑀦𑁄 𑀢𑀸𑀡𑀁 𑀕𑀯𑁂𑀲𑀢𑀺. 𑀪𑁄𑀕𑁄 𑀧𑀼𑀕𑁆𑀕𑀮𑁂𑀦𑀸𑀦𑀼𑀪𑀯𑀺𑀬𑀫𑀸𑀦𑁄 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀲𑀩𑁆𑀩𑀢𑁆𑀭 𑀈𑀤𑀺𑀲𑁂𑀲𑀼 𑀯𑀺𑀧𑁆𑀧𑀓𑀢𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀬𑀁 𑀅𑀦𑀺𑀬𑀢𑀮𑀺𑀗𑁆𑀕𑀸𑀦𑀁 𑀦𑀺𑀬𑀢𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀁 𑀪𑀽𑀢 𑀧𑀭𑀸𑀪𑀽𑀢 𑀲𑀫𑁆𑀪𑀽𑀢𑀲𑀤𑁆𑀤𑀸𑀦𑀁 𑀦𑀺𑀤𑁆𑀤𑁂𑀲𑁄. 𑀇𑀘𑁆𑀘𑁂𑀯𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀬𑀣𑀸𑀭𑀳𑀁 𑀦𑀺𑀩𑁆𑀩𑀘𑀦𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀯𑀺𑀪𑀸𑀯𑀺𑀢𑁄.

𑀇𑀤𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀯𑀼𑀘𑁆𑀘𑀢𑀺 𑁋 𑀢𑀢𑁆𑀭 𑀪𑀸𑀯𑀺𑀓𑀸𑀢𑀺 𑀪𑀸𑀯𑁂𑀢𑀻𑀢𑀺 𑀪𑀸𑀯𑀺𑀓𑀸. 𑀬𑀸 𑀪𑀸𑀯𑀦𑀁 𑀓𑀭𑁄𑀢𑀺, 𑀲𑀸 𑀪𑀸𑀯𑀺𑀓𑀸. 𑀪𑀸𑀯𑀦𑀸𑀢𑀺 𑀯𑀟𑁆𑀠𑀦𑀸 𑀩𑁆𑀭𑀽𑀳𑀦𑀸 𑀨𑀸𑀢𑀺𑀓𑀭𑀡𑀁 𑀆𑀲𑁂𑀯𑀦𑀸 𑀩𑀳𑀼𑀮𑀻𑀓𑀸𑀭𑁄. 𑀯𑀺𑀪𑀸𑀯𑀦𑀸𑀢𑀺 𑀧𑀓𑀸𑀲𑀦𑀸 𑀲𑀦𑁆𑀤𑀲𑁆𑀲𑀦𑀸. 𑀅𑀣 𑀯𑀸 𑀯𑀺𑀪𑀸𑀯𑀦𑀸𑀢𑀺 𑀅𑀪𑀸𑀯𑀦𑀸 𑀅𑀦𑁆𑀢𑀭𑀥𑀸𑀧𑀦𑀸. 𑀲𑀫𑁆𑀪𑀸𑀯𑀦𑀸𑀢𑀺 𑀉𑀓𑁆𑀓𑀁𑀲𑀦𑀸 𑀣𑁄𑀫𑀦𑀸. 𑀧𑀭𑀺𑀪𑀸𑀯𑀦𑀸𑀢𑀺 𑀯𑀸𑀲𑀦𑀸, 𑀲𑀫𑀦𑁆𑀢𑀢𑁄 𑀯𑀸 𑀯𑀟𑁆𑀠𑀦𑀸. 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀪𑀽𑀫𑀻𑀢𑀺 𑀲𑀢𑁆𑀢𑀸𑀬𑀫𑀸𑀦𑀸 𑀪𑀯𑀢𑀻𑀢𑀺 𑀪𑀽𑀫𑀺, 𑀅𑀣 𑀯𑀸 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀘𑁂𑀢𑁆𑀣 𑀣𑀸𑀯𑀭𑀸 𑀘 𑀚𑀗𑁆𑀕𑀫𑀸 𑀘𑀸𑀢𑀺 𑀪𑀽𑀫𑀺. 𑀪𑀽𑀫𑀺 𑀯𑀼𑀘𑁆𑀘𑀢𑀺 ¶ 𑀧𑀣𑀯𑀻. ‘‘𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 𑀧𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀪𑀽𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀧𑀦𑀦𑁆𑀥𑀩𑀸𑀮𑀫𑀳𑀸𑀚𑀦𑁂𑀦 𑀯𑀺𑀜𑁆𑀜𑀸𑀢𑀸 𑀧𑀣𑀯𑀻, 𑀢𑀲𑁆𑀲𑀺𑀫𑀸𑀦𑀺 𑀅𑀪𑀺𑀥𑀸𑀦𑀸𑀦𑀺 𑁋

‘‘𑀧𑀣𑀯𑀻 𑀫𑁂𑀤𑀦𑀻 𑀪𑀽𑀫𑀺, 𑀪𑀽𑀭𑀻 𑀪𑀽 𑀧𑀼𑀣𑀼𑀯𑀻 𑀫𑀳𑀻;

𑀙𑀫𑀸 𑀯𑀲𑀼𑀫𑀢𑀻 𑀉𑀩𑁆𑀩𑀻, 𑀅𑀯𑀦𑀻 𑀓𑀼 𑀯𑀲𑀼𑀦𑁆𑀥𑀭𑀸;

𑀚𑀕𑀢𑀻 𑀔𑀺𑀢𑀺 𑀯𑀲𑀼𑀥𑀸, 𑀥𑀭𑀡𑀻 𑀕𑁄 𑀥𑀭𑀸’’𑀇𑀢𑀺.

𑀅𑀢𑁆𑀭 𑀪𑀽 𑀓𑀼 𑀕𑁄𑀲𑀤𑁆𑀤𑀸 𑀧𑀣𑀯𑀻𑀧𑀤𑀢𑁆𑀣𑁂 𑀯𑀢𑁆𑀢𑀦𑁆𑀢𑀻𑀢𑀺 𑀓𑀼𑀢𑁆𑀭 𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺 𑀘𑁂?

𑀯𑀺𑀤𑁆𑀯𑀸 𑀪𑀽𑀧𑀸𑀮 𑀓𑀼𑀫𑀼𑀤-𑀕𑁄𑀭𑀓𑁆𑀔𑀸𑀤𑀺𑀧𑀤𑁂𑀲𑀼 𑀯𑁂;

𑀪𑀽 𑀓𑀼 𑀕𑁄𑀇𑀢𑀺 𑀧𑀣𑀯𑀻, 𑀯𑀼𑀘𑁆𑀘𑀢𑀻𑀢𑀺 𑀯𑀺𑀪𑀸𑀯𑀬𑁂.

𑀪𑀽𑀢𑀻𑀢𑀺 𑀪𑀯𑀦𑀁 𑀪𑀽𑀢𑀺. 𑀯𑀺𑀪𑀽𑀢𑀻𑀢𑀺 𑀯𑀺𑀦𑀸𑀲𑁄, 𑀯𑀺𑀲𑁂𑀲𑀢𑁄 𑀪𑀯𑀦𑀁 𑀯𑀸, 𑀅𑀣 𑀯𑀸 𑀯𑀺𑀲𑁂𑀲𑀢𑁄 𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺 𑀯𑀺𑀪𑀽𑀢𑀺, 𑀲𑀫𑁆𑀧𑀢𑁆𑀢𑀺𑀬𑁂𑀯, ‘‘𑀭𑀜𑁆𑀜𑁄 𑀯𑀺𑀪𑀽𑀢𑀺. 𑀧𑀺𑀳𑀦𑀻𑀬𑀸 𑀯𑀺𑀪𑀽𑀢𑀺𑀬𑁄’’𑀢𑀺 𑀘 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. 𑀇𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀪𑀽𑀭𑀻𑀢𑀺 𑀧𑀣𑀯𑀻. 𑀲𑀸 𑀳𑀺 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀭𑀻𑀢𑀺 𑀯𑀼𑀘𑁆𑀘𑀢𑀺, 𑀪𑀯𑀢𑀺 𑀯𑀸 𑀧𑀜𑁆𑀜𑀸𑀬𑀢𑀺 𑀯𑀟𑁆𑀠𑀢𑀺 𑀘𑀸𑀢𑀺 𑀪𑀽𑀭𑀻, 𑀅𑀣 𑀯𑀸 𑀪𑀽𑀢𑀸𑀪𑀽𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀸 𑀲𑀢𑁆𑀢𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀭𑀻. 𑀧𑀣𑀯𑀻𑀦𑀺𑀲𑁆𑀲𑀺𑀢𑀸 𑀳𑀺 𑀲𑀢𑁆𑀢𑀸 𑀧𑀣𑀯𑀺𑀬𑀁𑀬𑁂𑀯 𑀭𑀫𑀦𑁆𑀢𑀺, 𑀢𑀲𑁆𑀫𑀸 𑀲𑀸 𑀇𑀫𑀺𑀦𑀸𑀧𑀺 𑀅𑀢𑁆𑀣𑁂𑀦 𑀪𑀽𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀪𑀽𑀭𑀻𑀲𑀤𑁆𑀤𑀲𑁆𑀲 𑀧𑀣𑀯𑀻𑀯𑀘𑀦𑁂 ‘‘𑀪𑀽𑀭𑀺𑀧𑀜𑁆𑀜𑁄’’𑀢𑀺 𑀅𑀢𑁆𑀣𑀲𑀸𑀥𑀓𑀁 𑀯𑀘𑀦𑀁. 𑀅𑀧𑀺𑀘 𑀪𑀽𑀭𑀻 𑀯𑀺𑀬𑀸𑀢𑀺 𑀪𑀽𑀭𑀻, 𑀧𑀜𑁆𑀜𑀸, 𑀪𑀽𑀭𑀻𑀢𑀺 𑀧𑀣𑀯𑀻𑀲𑀫𑀸𑀬 𑀯𑀺𑀢𑁆𑀣𑀢𑀸𑀬 𑀧𑀜𑁆𑀜𑀸𑀬 𑀦𑀸𑀫𑀁, ‘‘𑀬𑁄𑀕𑀸 𑀯𑁂 𑀚𑀸𑀬𑀢𑀻 𑀪𑀽𑀭𑀻, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄’’𑀢𑀺 𑀏𑀢𑁆𑀣 𑀅𑀝𑁆𑀞𑀓𑀣𑀸𑀯𑀘𑀦𑀁 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀅𑀣 𑀯𑀸 𑀪𑀽𑀢𑁂 𑀅𑀢𑁆𑀣𑁂 𑀭𑀫𑀢𑀻𑀢𑀺 𑀪𑀽𑀭𑀻, 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁, ‘‘𑀪𑀽𑀭𑀻 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸’’𑀢𑀺 𑀏𑀢𑁆𑀣 ¶ 𑀅𑀝𑁆𑀞𑀓𑀣𑀸𑀯𑀘𑀦𑀁 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀅𑀣 𑀯𑀸 𑀧𑀜𑁆𑀜𑀸𑀬𑁂𑀯 𑀭𑀸𑀕𑀸𑀤𑀬𑁄 𑀥𑀫𑁆𑀫𑁂 𑀅𑀪𑀺𑀪𑀯𑀢𑀻𑀢𑀺 𑀪𑀽𑀭𑀻, 𑀭𑀸𑀕𑀸𑀤𑀺𑀅𑀭𑀬𑁄 𑀅𑀪𑀺𑀪𑀯𑀢𑀻𑀢𑀺𑀧𑀺 𑀪𑀽𑀭𑀻. 𑀢𑀣𑀸 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀸𑀕𑀁 𑀅𑀪𑀺𑀪𑀽𑀬𑀢𑀻𑀢𑀺 𑀪𑀽𑀭𑀻, 𑀧𑀜𑁆𑀜𑀸. 𑀤𑁄𑀲𑀁 𑀫𑁄𑀳𑀁…𑀧𑁂… 𑀭𑀸𑀕𑁄 𑀅𑀭𑀺, 𑀢𑀁 𑀅𑀭𑀺𑀁 𑀫𑀤𑁆𑀤𑀢𑀻𑀢𑀺 𑀪𑀽𑀭𑀻, 𑀧𑀜𑁆𑀜𑀸. 𑀤𑁄𑀲𑁄. 𑀫𑁄𑀳𑁄…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀦𑁄 𑀓𑀫𑁆𑀫𑀸 𑀅𑀭𑀺, 𑀢𑀁 𑀅𑀭𑀺𑀁 𑀫𑀤𑁆𑀤𑀢𑀻𑀢𑀺 𑀪𑀽𑀭𑀻, 𑀧𑀜𑁆𑀜𑀸’’. 𑀏𑀢𑁆𑀣 𑀧𑀦 ‘‘𑀕𑁄𑀢𑁆𑀭𑀪𑀽’’𑀢𑀺 𑀧𑀤𑀫𑀺𑀯 ‘‘𑀅𑀭𑀺𑀪𑀽’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀪𑀽𑀲𑀤𑁆𑀤𑀁 𑀧𑀼𑀩𑁆𑀩𑀦𑀺𑀧𑀸𑀢𑀁 𑀓𑀢𑁆𑀯𑀸 𑀲𑀦𑁆𑀥𑀺𑀯𑀲𑁂𑀦 𑀪𑀽𑀭𑀻𑀢𑀺 𑀧𑀤𑀫𑀼𑀘𑁆𑀘𑀸𑀭𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘 𑀈𑀤𑀺𑀲𑁂𑀲𑀼 𑀦𑀸𑀫𑀺𑀓𑀧𑀤𑁂𑀲𑀼 𑀯𑀺𑀦𑀸𑀧𑀺 𑀉𑀧𑀲𑀕𑁆𑀕𑁂𑀦 𑀅𑀪𑀺𑀪𑀯𑀦𑀸𑀤𑀺𑀅𑀢𑁆𑀣𑀸 𑀮𑀩𑁆𑀪𑀦𑁆𑀢𑀺𑀬𑁂𑀯, 𑀦𑀸𑀔𑁆𑀬𑀸𑀢𑀺𑀓𑀧𑀤𑁂𑀲𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀁 𑀧𑀦 𑀧𑀜𑁆𑀜𑀸𑀬 𑀧𑀭𑀺𑀬𑀸𑀬𑀯𑀘𑀦𑀁 𑁋

𑀧𑀜𑁆𑀜𑀸 𑀧𑀚𑀸𑀦𑀦𑀸 𑀘𑀺𑀦𑁆𑀢𑀸, 𑀯𑀺𑀘𑀬𑁄 𑀉𑀧𑀮𑀓𑁆𑀔𑀡𑀸;

𑀧𑀯𑀺𑀘𑀬𑁄 𑀘 𑀧𑀡𑁆𑀟𑀺𑀘𑁆𑀘𑀁, 𑀥𑀫𑁆𑀫𑀯𑀺𑀘𑀬𑀫𑁂𑀯 𑀘.

𑀲𑀮𑁆𑀮𑀓𑁆𑀔𑀡𑀸 𑀘 𑀓𑁄𑀲𑀮𑁆𑀮𑀁, 𑀪𑀽𑀭𑀻 𑀧𑀘𑁆𑀘𑀼𑀧𑀮𑀓𑁆𑀔𑀡𑀸;

𑀦𑁂𑀧𑀼𑀜𑁆𑀜𑀜𑁆𑀘𑁂𑀯 𑀯𑁂𑀪𑀩𑁆𑀬𑀸, 𑀫𑁂𑀥𑀸 𑀘𑀼𑀧𑀧𑀭𑀺𑀓𑁆𑀔𑀓𑀸.

𑀲𑀫𑁆𑀧𑀚𑀜𑁆𑀜𑀜𑁆𑀘 𑀧𑀭𑀺𑀡𑀸-𑀬𑀺𑀓𑀸 𑀘𑁂𑀯 𑀯𑀺𑀧𑀲𑁆𑀲𑀦𑀸;

𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁, 𑀅𑀫𑁄𑀳𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘;

𑀧𑀢𑁄𑀤𑁄 𑀘𑀸𑀪𑀺𑀥𑀫𑁆𑀫𑀲𑁆𑀫𑀸, 𑀇𑀫𑀸𑀦𑀺 𑀕𑀳𑀺𑀢𑀸𑀦𑀺 𑀫𑁂.

𑀜𑀸𑀡𑀁 𑀧𑀜𑁆𑀜𑀸𑀡𑀫𑀼𑀫𑁆𑀫𑀗𑁆𑀕𑁄, 𑀲𑀢𑁆𑀣𑁄 𑀲𑁄𑀢𑁄 𑀘 𑀤𑀺𑀝𑁆𑀞𑀺 𑀘;

𑀫𑀦𑁆𑀢𑀸 𑀩𑁄𑀥𑁄 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁, 𑀧𑀝𑀺𑀪𑀸𑀦𑀜𑁆𑀘 𑀩𑁄𑀥𑀺𑀢𑀺.

𑀥𑀫𑁆𑀫𑁄 𑀯𑀺𑀚𑁆𑀚𑀸 𑀕𑀢𑀺 𑀫𑁄𑀦𑀁, 𑀦𑁂𑀧𑀓𑁆𑀓𑀁 𑀕𑁄 𑀫𑀢𑀻 𑀫𑀼𑀢𑀺;

𑀯𑀻𑀫𑀁𑀲𑀸 𑀬𑁄𑀦𑀺 𑀥𑁄𑀦𑀸 𑀘, 𑀧𑀡𑁆𑀟𑀸 𑀧𑀡𑁆𑀟𑀺𑀘𑁆𑀘𑀬𑀫𑁆𑀧𑀺 𑀘;

𑀯𑁂𑀤𑁄 𑀧𑀡𑁆𑀟𑀺𑀢𑀺𑀬𑀜𑁆𑀘𑁂𑀯, 𑀘𑀺𑀓𑀺𑀘𑁆𑀙𑀸 𑀫𑀺𑀭𑀺𑀬𑀸𑀧𑀺 𑀘.

‘‘𑀲𑁄𑀢𑁄 𑀩𑁄𑀥𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀜𑀸𑀡𑀦𑀸𑀫𑀤𑁆𑀯𑀬𑀁 𑀇𑀤𑀁;

𑀩𑀼𑀤𑁆𑀥𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥-𑀲𑀸𑀯𑀓𑀸𑀦𑀫𑁆𑀧𑀺 𑀭𑀽𑀳𑀢𑀺.

‘‘𑀅𑀪𑀺𑀲𑀫𑁆𑀩𑁄𑀥𑀺 ¶ 𑀲𑀫𑁆𑀩𑁄𑀥𑀺’’, 𑀇𑀢𑀺 𑀦𑀸𑀫𑀤𑁆𑀯𑀬𑀁 𑀧𑀦;

𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀩𑁆𑀩𑀜𑁆𑀜𑀼-𑀩𑀼𑀤𑁆𑀥𑀸𑀦𑀁𑀬𑁂𑀯 𑀭𑀽𑀳𑀢𑀺.

𑀅𑀪𑀺𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀸, 𑀧𑀭𑀫𑁄𑀧𑀧𑀤𑀸 𑀧𑀦;

𑀜𑀸𑀡𑀧𑀡𑁆𑀡𑀢𑁆𑀢𑀺 𑀲𑀩𑁆𑀩𑀜𑁆𑀜𑀼-𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀭𑀽𑀳𑀢𑀺.

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀸, 𑀅𑀦𑀼𑀢𑁆𑀢𑀭𑀧𑀤𑀸𑀤𑀺𑀓𑀸;

𑀩𑀼𑀤𑁆𑀥𑀸 𑀯𑀸 𑀜𑀸𑀡𑀧𑀡𑁆𑀡𑀢𑁆𑀢𑀺, 𑀲𑀩𑁆𑀩𑀜𑁆𑀜𑀼𑀲𑁆𑀲𑁂𑀯 𑀭𑀽𑀳𑀢𑀺.

‘‘𑀲𑀩𑁆𑀩𑀜𑁆𑀜𑀼𑀢𑀸’’𑀢𑀺 𑀬𑀁 𑀯𑀼𑀢𑁆𑀢𑀁, 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀦𑁄𑀯 𑀢𑀁;

𑀬𑀼𑀚𑁆𑀚𑀢𑁂 𑀅𑀯𑀲𑁂𑀲𑀸 𑀢𑀼, 𑀜𑀸𑀡𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀕𑀸.

𑀜𑀸𑀡𑀪𑀸𑀯𑀫𑁆𑀳𑀺 𑀲𑀦𑁆𑀢𑁂𑀧𑀺, 𑀥𑀫𑁆𑀫𑀘𑀓𑁆𑀔𑀸𑀤𑀺𑀓𑀁 𑀧𑀦;

𑀧𑀬𑁄𑀚𑀦𑀦𑁆𑀢𑀭𑀸𑀪𑀸𑀯𑀸, 𑀦𑀸𑀢𑁆𑀭 𑀲𑀦𑁆𑀤𑀲𑁆𑀲𑀺𑀢𑀁 𑀫𑀬𑀸𑀢𑀺.

𑀪𑀽𑀢𑀻𑀢𑀺 𑀪𑀽𑀢𑀲𑁆𑀲 𑀪𑀭𑀺𑀬𑀸. 𑀬𑀣𑀸 𑀳𑀺 𑀧𑁂𑀢𑀲𑁆𑀲 𑀪𑀭𑀺𑀬𑀸 ‘‘𑀧𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀪𑀽𑀢𑀲𑁆𑀲 𑀪𑀭𑀺𑀬𑀸 ‘‘𑀪𑀽𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀪𑁄𑀢𑀻𑀢𑀺 𑀬𑀸𑀬 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀲𑀸 𑀇𑀢𑁆𑀣𑀻 ‘‘𑀪𑁄𑀢𑀻’’ 𑀇𑀢𑀺 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀤𑁂𑀦 𑀇𑀢𑁆𑀣𑀻 𑀯𑁄𑀳𑀭𑀺𑀬𑀢𑀻𑀢𑀺 𑀘 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀧𑀼𑀭𑀺𑀲𑁄 ‘‘𑀪𑀯𑀁’’ 𑀇𑀢𑀺 𑀯𑁄𑀳𑀭𑀺𑀬𑀢𑀺, 𑀏𑀯𑀫𑁂𑀯 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀇𑀢𑁆𑀣𑀻 ‘‘𑀪𑁄𑀢𑀻’’𑀇𑀢𑀺 𑀯𑁄𑀳𑀭𑀺𑀬𑀢𑀺. ‘‘𑀓𑀼𑀢𑁄 𑀦𑀼 𑀪𑀯𑀁 𑀪𑀸𑀭𑀤𑁆𑀯𑀸𑀚𑁄, 𑀇𑀫𑁂 𑀆𑀦𑁂𑀲𑀺 𑀤𑀸𑀭𑀓𑁂’’𑀢𑀺, ‘‘𑀅𑀳𑀁 𑀪𑁄𑀢𑀺𑀁 𑀉𑀧𑀝𑁆𑀞𑀺𑀲𑁆𑀲𑀁, 𑀫𑀸 𑀪𑁄𑀢𑀻 𑀓𑀼𑀧𑀺𑀢𑀸 𑀅𑀳𑀽’’𑀢𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀅𑀣 𑀯𑀸 𑀇𑀥𑁂𑀓𑀘𑁆𑀘𑁄 𑀲𑀢𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑁄, 𑀲𑁄 ‘‘𑀪𑁄𑀢𑀻’’𑀇𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀤𑁂𑀦 𑀇𑀢𑁆𑀣𑀻𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀮𑀤𑁆𑀥𑀦𑀸𑀫𑀸 𑀅𑀦𑀺𑀢𑁆𑀣𑀻𑀧𑀺 𑀯𑁄𑀳𑀭𑀺𑀬𑀢𑀻𑀢𑀺 𑀘 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀳𑀺 𑀤𑁂𑀯𑀧𑀼𑀢𑁆𑀢𑁄𑀧𑀺 ‘‘𑀤𑁂𑀯𑀢𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑁄𑀳𑀭𑀺𑀢𑀩𑁆𑀩𑀢𑁆𑀢𑀸 𑀤𑁂𑀯𑀢𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀪𑁄𑀢𑀻’’𑀇𑀢𑀺 𑀯𑁄𑀳𑀭𑀺𑀢𑁄, 𑀧𑀕𑁂𑀯 𑀤𑁂𑀯𑀥𑀻𑀢𑀸. 𑀢𑀣𑀸 𑀳𑀺 ‘‘𑀪𑁄𑀢𑀻 𑀘𑀭𑀳𑀺 𑀚𑀸𑀦𑀸𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸’’𑀢𑀺 𑀏𑀢𑁆𑀣 𑀧𑀦 𑀤𑁂𑀯𑀢𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀪𑁄𑀢𑀻’’𑀇𑀢𑀺 𑀇𑀢𑁆𑀣𑀺 𑀮𑀺𑀗𑁆𑀕𑀯𑁄𑀳𑀸𑀭𑁄 𑀓𑀢𑁄. 𑀅𑀢𑁆𑀭𑀸𑀬𑀁 ¶ 𑀲𑀼𑀢𑁆𑀢𑀧𑀤𑀢𑁆𑀣𑁄 ‘‘𑀬𑀤𑀺 𑀲𑁄 𑀓𑀼𑀳𑀓𑁄 𑀥𑀦𑀢𑁆𑀣𑀺𑀓𑁄 𑀢𑀸𑀧𑀲𑁄 𑀦 𑀚𑀸𑀦𑀸𑀢𑀺, 𑀪𑁄𑀢𑀻 𑀤𑁂𑀯𑀢𑀸 𑀧𑀦 𑀚𑀸𑀦𑀸𑀢𑀺 𑀓𑀺’’𑀦𑁆𑀢𑀺. 𑀅𑀧𑀺𑀘 𑁋

‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑁂 𑀢𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫𑀸’’𑀢𑀺 𑁋

𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀢𑁆𑀣𑀼𑀲𑁆𑀫𑀺𑀁 𑀧𑀼𑀮𑁆𑀮𑀺𑀗𑁆𑀕𑀬𑀓𑁆𑀔𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀢𑁆𑀣𑀓𑀸𑀫𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘 𑀤𑁂𑀯𑀢𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀳𑀺𑀢𑀓𑀸𑀫𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀼𑀭𑀺𑀲𑀪𑀽𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻 𑀯𑁄𑀳𑀭𑀺𑀢𑁄. 𑀅𑀜𑁆𑀜𑀢𑁆𑀭𑀸𑀧𑀺 𑀤𑁂𑀯𑀢𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑁄𑀳𑀭𑀺𑀢𑁄 𑁋

‘‘𑀦 𑀢𑁆𑀯𑀁 𑀩𑀸𑀮𑁂 𑀯𑀺𑀚𑀸𑀦𑀸𑀲𑀺, 𑀬𑀣𑀸 𑀅𑀭𑀳𑀢𑀁 𑀯𑀘𑁄’’𑀢𑀺;

‘‘𑀅𑀢𑁆𑀣𑀓𑀸𑀫𑀸𑀲𑀺 𑀫𑁂 𑀅𑀫𑁆𑀫, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂’’𑀢𑀺.

𑀏𑀢𑁆𑀣 𑀧𑀦 ‘‘𑀏𑀳𑀺 𑀩𑀸𑀮𑁂 𑀔𑀫𑀸𑀧𑁂𑀳𑀺, 𑀓𑀼𑀲𑀭𑀸𑀚𑀁 𑀫𑀳𑀩𑁆𑀩𑀮’’𑀦𑁆𑀢𑀺 𑀏𑀢𑁆𑀣 𑀘 𑀇𑀢𑁆𑀣𑀻𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑁄𑀳𑀭𑀺𑀢𑀸, 𑀢𑀲𑁆𑀫𑀸 𑀓𑀢𑁆𑀣𑀘𑀺 𑀇𑀢𑁆𑀣𑀺𑀧𑀼𑀭𑀺𑀲𑀧𑀤𑀢𑁆𑀣𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀮𑀺𑀗𑁆𑀕𑀫𑀢𑁆𑀢𑀫𑁂𑀯𑀸𑀧𑁂𑀓𑁆𑀔𑀺𑀢𑁆𑀯𑀸 𑀪𑁄𑀢𑀻 𑀤𑁂𑀯𑀢𑀸, 𑀪𑁄𑀢𑀻 𑀲𑀺𑀮𑀸, 𑀪𑁄𑀢𑀻 𑀚𑀫𑁆𑀩𑀽, 𑀪𑁄𑀢𑀺𑀁 𑀤𑁂𑀯𑀢𑀦𑁆𑀢𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀢𑁆𑀢𑀯𑀘𑀦𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀢𑁆𑀣𑀘𑀺 𑀧𑀦 𑀮𑀺𑀗𑁆𑀕𑀜𑁆𑀘 𑀅𑀢𑁆𑀣𑀜𑁆𑀘 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀪𑁄𑀢𑀻 𑀇𑀢𑁆𑀣𑀻, 𑀪𑁄𑀢𑀺𑀁 𑀤𑁂𑀯’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀯𑀺𑀪𑀸𑀯𑀺𑀦𑀻𑀢𑀺 𑀯𑀺𑀪𑀸𑀯𑁂𑀢𑀻𑀢𑀺 𑀯𑀺𑀪𑀸𑀯𑀺𑀦𑀻. 𑀏𑀯𑀁 𑀧𑀭𑀺𑀪𑀸𑀯𑀺𑀦𑀻𑀢𑀺𑀆𑀤𑀻𑀲𑀼𑀧𑀺. 𑀈𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀪𑀽𑀢𑀺 𑀲𑀢𑁆𑀢𑀸𑀬𑀫𑀸𑀦𑀸 𑀪𑀯𑀢𑀻𑀢𑀺 𑀪𑀽. 𑀅𑀣 𑀯𑀸 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀸𑀢𑀺 𑀪𑀽. 𑀪𑀽 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀅𑀪𑀽𑀢𑀺 𑀯𑀟𑁆𑀠𑀺𑀯𑀺𑀭𑀳𑀺𑀢𑀸 𑀓𑀣𑀸, 𑀦 𑀪𑀽𑀢𑀧𑀼𑀩𑁆𑀩𑀸𑀢𑀺 𑀯𑀸 𑀅𑀪𑀽, 𑀅𑀪𑀽𑀢𑀧𑀼𑀩𑁆𑀩𑀸 𑀓𑀣𑀸. 𑀦 𑀪𑀽𑀢𑀸𑀢𑀺 𑀯𑀸 𑀅𑀪𑀽, 𑀅𑀪𑀽𑀢𑀸 𑀓𑀣𑀸. ‘‘𑀅𑀪𑀼𑀁 𑀫𑁂 𑀓𑀣𑀁 𑀦𑀼 𑀪𑀡𑀲𑀺, 𑀧𑀸𑀧𑀓𑀁 𑀯𑀢 𑀪𑀸𑀲𑀲𑀻’’𑀢𑀺 𑀇𑀤𑀫𑁂𑀢𑁂𑀲𑀫𑀢𑁆𑀣𑀸𑀦𑀁 ¶ 𑀲𑀸𑀥𑀓𑀁 𑀯𑀘𑀦𑀁. 𑀊𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀦𑀺𑀬𑀢𑀺𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄𑀬𑀁.

𑀅𑀦𑀺𑀬𑀢𑀮𑀺𑀗𑁆𑀕𑀸𑀦𑀁 𑀧𑀦 𑀦𑀺𑀬𑀢𑀺𑀢𑁆𑀣𑀺𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀁 𑀪𑀽𑀢𑀧𑀭𑀸𑀪𑀽𑀢𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁄 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀇𑀘𑁆𑀘𑁂𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀬𑀣𑀸𑀭𑀳𑀁 𑀦𑀺𑀩𑁆𑀩𑀘𑀦𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀯𑀺𑀪𑀸𑀯𑀺𑀢𑁄.

𑀇𑀤𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀯𑀼𑀘𑁆𑀘𑀢𑀺 𑁋 𑀢𑀢𑁆𑀭 𑀪𑀽𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀧𑀣𑀯𑀻𑀥𑀸𑀢𑀼𑀆𑀤𑀺𑀓𑀁 𑀫𑀳𑀸𑀪𑀽𑀢𑀭𑀽𑀧𑀁. 𑀢𑀜𑁆𑀳𑀺 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀪𑀯𑀢𑀻𑀢𑀺 𑀪𑀽𑀢𑀁, 𑀪𑀯𑀢𑀺 𑀯𑀸 𑀢𑀲𑁆𑀫𑀺𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀪𑀽𑀢𑀁. 𑀅𑀣 𑀯𑀸 𑀪𑀽𑀢𑀦𑁆𑀢𑀺 𑀲𑀢𑁆𑀢𑁄 𑀪𑀽𑀢𑀦𑀸𑀫𑀓𑁄 𑀯𑀸. 𑀪𑀽𑀢𑀦𑁆𑀢𑀺 𑀳𑀺 𑀦𑀧𑀼𑀁𑀲𑀓𑀯𑀲𑁂𑀦 𑀲𑀓𑀮𑁄 𑀲𑀢𑁆𑀢𑁄 𑀏𑀯𑀁𑀦𑀸𑀫𑀓𑁄 𑀘 𑀬𑀓𑁆𑀔𑀸𑀤𑀺𑀓𑁄 𑀯𑀼𑀘𑁆𑀘𑀢𑀺. ‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸. 𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀺, 𑀉𑀚𑁆𑀛𑀸𑀧𑁂𑀢𑁆𑀯𑀸𑀦 𑀪𑀽𑀢𑀸𑀦𑀺, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀦𑀧𑀼𑀁𑀲𑀓𑀧𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀸𑀢𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄𑀢𑀺 𑀘𑁂? 𑀢𑀦𑁆𑀦, ‘‘𑀬𑀓𑁆𑀔𑀸𑀤𑀻𑀦𑀺 𑀫𑀳𑀸𑀪𑀽𑀢𑀸𑀦𑀺 𑀬𑀁 𑀕𑀡𑁆𑀳𑀦𑁆𑀢𑀺, 𑀦𑁂𑀯 𑀢𑁂𑀲𑀁 𑀢𑀲𑁆𑀲 𑀅𑀦𑁆𑀢𑁄, 𑀦 𑀩𑀳𑀺 𑀞𑀸𑀦𑀁 𑀉𑀧𑀮𑀩𑁆𑀪𑀢𑀻’’𑀢𑀺 𑀘𑀼𑀡𑁆𑀡𑀺𑀬𑀧𑀤𑀭𑀘𑀦𑀸𑀬𑀫𑁆𑀧𑀺 𑀪𑀽𑀢𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀅𑀯𑀕𑀦𑁆𑀢𑀩𑁆𑀩𑀁. 𑀫𑀳𑀸𑀪𑀽𑀢𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀢𑀼𑀩𑁆𑀩𑀺𑀥𑀁 𑀫𑀳𑀸𑀪𑀽𑀢𑀭𑀽𑀧𑀁. 𑀢𑀲𑁆𑀲 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀫𑀳𑀦𑁆𑀢𑀁 𑀪𑀽𑀢𑀦𑁆𑀢𑀺 𑀫𑀳𑀸𑀪𑀽𑀢𑀁, 𑀫𑀸𑀬𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀫𑀳𑀸𑀪𑀽𑀢𑁂𑀦 𑀲𑀫𑀦𑁆𑀢𑀺𑀧𑀺 𑀫𑀳𑀸𑀪𑀽𑀢𑀁, 𑀬𑀓𑁆𑀔𑀸𑀤𑀻𑀳𑀺 𑀫𑀳𑀸𑀪𑀽𑀢𑁂𑀳𑀺 𑀲𑀫𑀦𑁆𑀢𑀺𑀧𑀺 𑀫𑀳𑀸𑀪𑀽𑀢𑀁, 𑀫𑀳𑀦𑁆𑀢𑁂𑀳𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀧𑀘𑁆𑀘𑀬𑁂𑀳𑀺 𑀪𑀽𑀢𑀁 𑀧𑀯𑀢𑁆𑀢𑀦𑁆𑀢𑀺𑀧𑀺 𑀫𑀳𑀸𑀪𑀽𑀢𑀁, 𑀫𑀳𑀸𑀯𑀺𑀓𑀸𑀭𑀪𑀽𑀢𑀦𑁆𑀢𑀺𑀧𑀺 𑀫𑀳𑀸𑀪𑀽𑀢𑀁. 𑀏𑀯𑀁 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀭𑀺𑀤𑀁 𑀲𑀼𑀝𑁆𑀞𑀼𑀧𑀮𑀓𑁆𑀔𑀺𑀢𑀩𑁆𑀩𑀁 𑁋

𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁄 ¶ 𑀘, 𑀪𑀽𑀢𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀧𑀡𑁆𑀡𑀢𑁆𑀢𑀺𑀬𑀁 𑀕𑀼𑀡𑁂 𑀘𑁂𑀯, 𑀕𑀼𑀡𑁂𑀬𑁂𑀯𑀺𑀢𑁆𑀣𑀺𑀮𑀺𑀗𑁆𑀕𑀓𑁄.

𑀪𑀽𑀢 𑀲𑀫𑁆𑀪𑀽𑀢𑀲𑀤𑁆𑀤𑀸𑀤𑀺-𑀦𑀬𑁂 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀸;

𑀬𑁄𑀚𑁂𑀢𑀩𑁆𑀩𑀸 𑀢𑀺𑀮𑀺𑀗𑁆𑀕𑁂 𑀢𑁂, 𑀇𑀢𑀺 𑀜𑁂 𑀬𑁆𑀬𑀁 𑀯𑀺𑀲𑁂𑀲𑀢𑁄.

‘‘𑀪𑀽𑀢𑁄 𑀢𑀺𑀝𑁆𑀞𑀢𑀺, 𑀪𑀽𑀢𑀸𑀦𑀺, 𑀢𑀺𑀝𑁆𑀞𑀦𑁆𑀢𑀺, 𑀲𑀫𑀡𑁄 𑀅𑀬𑀁;

𑀇𑀤𑀸𑀦𑀺 𑀪𑀽𑀢𑁄, 𑀘𑀺𑀢𑁆𑀢𑀸𑀦𑀺, 𑀪𑀽𑀢𑀸𑀦𑀺 𑀯𑀺𑀫𑀮𑀸𑀦𑀺 𑀢𑀼.

𑀯𑀜𑁆𑀛𑀸 𑀪𑀽𑀢𑀸 𑀯𑀥𑀽 𑀏𑀲𑀸’’, 𑀇𑀘𑁆𑀘𑀼𑀤𑀸𑀳𑀭𑀡𑀸𑀦𑀺𑀫𑁂;

𑀯𑀼𑀢𑁆𑀢𑀸𑀦𑀺 𑀲𑀼𑀝𑁆𑀞𑀼 𑀮𑀓𑁆𑀔𑁂𑀬𑁆𑀬, 𑀲𑀸𑀲𑀦𑀢𑁆𑀣𑀕𑀯𑁂𑀲𑀓𑁄.

𑀪𑀯𑀺𑀢𑁆𑀢𑀦𑁆𑀢𑀺 𑀯𑀟𑁆𑀠𑀺𑀢𑀝𑁆𑀞𑀸𑀦𑀁. 𑀢𑀜𑁆𑀳𑀺 𑀪𑀯𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀯𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, ‘‘𑀚𑀦𑀺𑀢𑁆𑀢𑀁 𑀫𑁂 𑀪𑀯𑀺𑀢𑁆𑀢𑀁 𑀫𑁂, 𑀇𑀢𑀺 𑀧𑀗𑁆𑀓𑁂 𑀅𑀯𑀲𑁆𑀲𑀬𑀺’’𑀦𑁆𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁.

‘‘𑀪𑀯𑀺𑀢𑁆𑀢𑀁’’ 𑀇𑀢𑀺 ‘‘𑀪𑀸𑀯𑀺𑀢𑁆𑀢’’-𑀦𑁆𑀢𑀺 𑀘 𑀧𑀸𑀞𑁄 𑀤𑁆𑀯𑀺𑀥𑀸 𑀫𑀬𑀸;

𑀭𑀲𑁆𑀲𑀢𑁆𑀢𑀤𑀻𑀖𑀪𑀸𑀯𑁂𑀦, 𑀤𑀺𑀝𑁆𑀞𑁄 𑀪𑀕𑁆𑀕𑀯𑀚𑀸𑀢𑀓𑁂.

𑀪𑀽𑀦𑀦𑁆𑀢𑀺 𑀪𑀯𑀦𑀁 𑀪𑀽𑀦𑀁 𑀯𑀤𑁆𑀥𑀺. ‘‘𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲𑀸’’𑀢𑀺, ‘‘𑀪𑀽𑀦𑀳𑀘𑁆𑀘𑀁 𑀓𑀢𑀁 𑀫𑀬𑀸’’𑀢𑀺 𑀘 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁.

𑀪𑀯𑀦𑀦𑁆𑀢𑀺 𑀪𑀯𑀦𑀓𑁆𑀭𑀺𑀬𑀸. 𑀅𑀣 𑀯𑀸 𑀪𑀯𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀦𑀸𑀦𑀸𑀲𑀫𑁆𑀧𑀢𑁆𑀢𑀻𑀳𑀺 𑀘𑀸𑀢𑀺 𑀪𑀯𑀦𑀁 𑀯𑀼𑀘𑁆𑀘𑀢𑀺 𑀕𑁂𑀳𑁄, ‘‘𑀧𑁂𑀢𑁆𑀢𑀺𑀓𑀁 𑀪𑀯𑀦𑀁 𑀫𑀫𑀸’’𑀢𑀺 𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. ‘‘𑀕𑁂𑀳𑁄 𑀖𑀭𑀜𑁆𑀘 𑀆𑀯𑀸𑀲𑁄, 𑀪𑀯𑀦𑀜𑁆𑀘 𑀦𑀺𑀓𑁂𑀢𑀦’’𑀦𑁆𑀢𑀺 𑀇𑀤𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀭𑀸𑀪𑀯𑀦𑀦𑁆𑀢𑀺 𑀅𑀯𑀤𑁆𑀥𑀺𑀫𑀸𑀧𑀚𑁆𑀚𑀦𑀁. 𑀲𑀫𑁆𑀪𑀯𑀦𑀦𑁆𑀢𑀺 𑀲𑀼𑀝𑁆𑀞𑀼 𑀪𑀯𑀦𑀁. 𑀯𑀺𑀪𑀯𑀦𑀦𑁆𑀢𑀺 𑀉𑀘𑁆𑀙𑁂𑀤𑁄 𑀯𑀺𑀦𑀸𑀲𑁄 𑀯𑀸. 𑀧𑀸𑀢𑀼𑀪𑀯𑀦𑀦𑁆𑀢𑀺 𑀧𑀸𑀓𑀝𑀢𑀸 𑀲𑀭𑀽𑀧𑀮𑀸𑀪𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀆𑀯𑀺𑀪𑀯𑀦𑀦𑁆𑀢𑀺 𑀧𑀘𑁆𑀘𑀓𑁆𑀔𑀪𑀸𑀯𑁄. 𑀢𑀺𑀭𑁄𑀪𑀯𑀦𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑁄. 𑀯𑀺𑀦𑀸𑀪𑀯𑀦𑀦𑁆𑀢𑀺 𑀯𑀺𑀦𑀸𑀪𑀸𑀯𑁄. 𑀲𑁄𑀢𑁆𑀣𑀺𑀪𑀯𑀦𑀦𑁆𑀢𑀺 𑀲𑀼𑀯𑀢𑁆𑀣𑀺𑀢𑀸. 𑀧𑀭𑀺𑀪𑀯𑀦𑀦𑁆𑀢𑀺 𑀧𑀻𑀴𑀦𑀸 𑀳𑀻𑀴𑀦𑀸 𑀯𑀸. 𑀅𑀪𑀺𑀪𑀯𑀦𑀦𑁆𑀢𑀺 𑀯𑀺𑀥𑀫𑀦𑀁. 𑀅𑀥𑀺𑀪𑀯𑀦𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀡𑀁 ¶ . 𑀅𑀦𑀼𑀪𑀯𑀦𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑀁. 𑀲𑀫𑀦𑀼𑀪𑀯𑀦𑀦𑁆𑀢𑀺 𑀲𑀼𑀝𑁆𑀞𑀼 𑀧𑀭𑀺𑀪𑀼𑀜𑁆𑀚𑀦𑀁. 𑀧𑀘𑁆𑀘𑀦𑀼𑀪𑀯𑀦𑀦𑁆𑀢𑀺 𑀅𑀥𑀺𑀧𑀢𑀺𑀪𑀸𑀯𑁂𑀦𑀧𑀺 𑀲𑀼𑀝𑁆𑀞𑀼 𑀧𑀭𑀺𑀪𑀼𑀜𑁆𑀚𑀦𑀁. 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀅𑀢𑁆𑀣𑀯𑀺𑀪𑀸𑀯𑀻𑀢𑀺 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀲𑀻𑀮𑀁 𑀘𑀺𑀢𑁆𑀢𑀁 𑀯𑀸 𑀜𑀸𑀡𑀁 𑀯𑀸 𑀓𑀼𑀮𑀁 𑀯𑀸 𑀅𑀢𑁆𑀣𑀯𑀺𑀪𑀸𑀯𑀺. 𑀏𑀯𑀁 𑀥𑀫𑁆𑀫𑀯𑀺𑀪𑀸𑀯𑀺. 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄.

𑀕𑁄𑀢𑁆𑀭𑀪𑀽𑀢𑀺 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀯𑀸 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀓𑀸𑀫𑀸𑀯𑀘𑀭𑀕𑁄𑀢𑁆𑀢𑀫𑀪𑀺𑀪𑀯𑀢𑀺, 𑀫𑀳𑀕𑁆𑀕𑀢𑀕𑁄𑀢𑁆𑀢𑀜𑁆𑀘 𑀪𑀸𑀯𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀕𑁄𑀢𑁆𑀭𑀪𑀽𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀫𑀕𑁆𑀕𑀯𑀻𑀣𑀺𑀬𑀁 𑀧𑀯𑀢𑁆𑀢𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀯𑀢𑁆𑀢𑀁 𑀕𑁄𑀢𑁆𑀭𑀪𑀼𑀜𑀸𑀡𑀁. 𑀢𑁂𑀲𑀼 𑀳𑀺 𑀧𑀞𑀫𑀁 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀫𑀪𑀺𑀪𑀯𑀢𑀺, 𑀅𑀭𑀺𑀬𑀕𑁄𑀢𑁆𑀢𑀜𑁆𑀘 𑀪𑀸𑀯𑁂𑀢𑀺, 𑀕𑁄𑀢𑁆𑀢𑀸𑀪𑀺𑀥𑀸𑀦𑀸 𑀘 𑀦𑀺𑀩𑁆𑀩𑀸𑀦𑀢𑁄 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀪𑀯𑀢𑀻𑀢𑀺 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀼𑀘𑁆𑀘𑀢𑀺, 𑀤𑀼𑀢𑀺𑀬𑀁 𑀧𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁆𑀧𑀺 𑀲𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀨𑀮𑀘𑀺𑀢𑁆𑀢𑀸𑀦𑀺 𑀕𑁄𑀢𑁆𑀢𑀸𑀪𑀺𑀥𑀸𑀦𑁂 𑀦𑀺𑀩𑁆𑀩𑀸𑀦𑀫𑁆𑀳𑀺 𑀪𑀸𑀯𑁂𑀢𑀻𑀢𑀺 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑁋

‘‘𑀕𑁄𑀢𑁆𑀭𑀪𑀼’’𑀇𑀢𑀺 𑀭𑀲𑁆𑀲𑀢𑁆𑀢-𑀯𑀲𑁂𑀦 𑀓𑀣𑀺𑀢𑀁 𑀧𑀤𑀁;

𑀦𑀧𑀼𑀁𑀲𑀓𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀜𑀸𑀡𑀘𑀺𑀢𑁆𑀢𑀸𑀤𑀺𑀧𑁂𑀓𑁆𑀔𑀓𑀁.

‘‘𑀕𑁄𑀢𑁆𑀭𑀪𑀽’’𑀇𑀢𑀺 𑀤𑀻𑀖𑀢𑁆𑀢-𑀯𑀲𑁂𑀦 𑀓𑀣𑀺𑀢𑀁 𑀧𑀦;

𑀧𑀼𑀮𑁆𑀮𑀺𑀗𑁆𑀕𑀫𑀺𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀧𑀼𑀕𑁆𑀕𑀮𑀸𑀤𑀺𑀓𑀧𑁂𑀓𑁆𑀔𑀓𑀁.

𑀤𑀻𑀖𑀪𑀸𑀯𑁂𑀦 𑀯𑀼𑀢𑁆𑀢𑀁 𑀢𑀼, 𑀦𑀧𑀼𑀁𑀲𑀓𑀦𑁆𑀢𑀺 𑀦𑁄 𑀯𑀤𑁂;

𑀩𑀺𑀦𑁆𑀤𑀼𑀯𑀦𑁆𑀢𑀻’𑀢𑀭𑁂 𑀪𑁂𑀤𑀸, 𑀢𑀬𑁄 𑀇𑀢𑀺 𑀳𑀺 𑀪𑀸𑀲𑀺𑀢𑀸.

𑀈𑀓𑀸𑀭𑀦𑁆𑀢𑀸 𑀘 𑀊𑀤𑀦𑁆𑀢𑀸, 𑀭𑀲𑁆𑀲𑀢𑁆𑀢𑀁 𑀬𑀦𑁆𑀢𑀺 𑀲𑀸𑀲𑀦𑁂;

𑀦𑀧𑀼𑀁𑀲𑀓𑀢𑁆𑀢𑀁 𑀧𑀢𑁆𑀯𑀸𑀦, 𑀲𑀳𑀪𑀼 𑀲𑀻𑀖𑀬𑀸𑀬𑀺𑀢𑀺.

𑀘𑀺𑀢𑁆𑀢𑁂𑀦 𑀲𑀳 𑀪𑀯𑀢𑀻𑀢𑀺 𑀘𑀺𑀢𑁆𑀢𑀲𑀳𑀪𑀼, 𑀘𑀺𑀢𑁆𑀢𑁂𑀦 𑀲𑀳 𑀦 𑀪𑀯𑀢𑀻𑀢𑀺 𑀦𑀘𑀺𑀢𑁆𑀢𑀲𑀳𑀪𑀼, 𑀭𑀽𑀧𑀁. 𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄𑀬𑀁.

𑀅𑀦𑀺𑀬𑀢𑀮𑀺𑀗𑁆𑀕𑀸𑀦𑀁 ¶ 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀁 𑀪𑀽𑀢𑀧𑀭𑀸𑀪𑀽𑀢𑀲𑀤𑁆𑀤𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁄 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀇𑀘𑁆𑀘𑁂𑀯𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀬𑀣𑀸𑀭𑀳𑀁 𑀦𑀺𑀩𑁆𑀩𑀘𑀦𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀯𑀺𑀪𑀸𑀯𑀺𑀢𑁄. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀮𑀺𑀗𑁆𑀕𑀢𑁆𑀢𑀬𑀦𑀺𑀤𑁆𑀤𑁂𑀲𑁄 𑀲𑀫𑀢𑁆𑀢𑁄.

𑀉𑀮𑁆𑀮𑀺𑀗𑁆𑀕𑀦𑁂𑀦 𑀯𑀺𑀯𑀺𑀥𑁂𑀦 𑀦𑀬𑁂𑀦 𑀯𑀼𑀢𑁆𑀢𑀁,

𑀪𑀽𑀥𑀸𑀢𑀼𑀲𑀤𑁆𑀤𑀫𑀬𑀮𑀺𑀗𑁆𑀕𑀢𑀺𑀓𑀁 𑀬𑀤𑁂𑀢𑀁;

𑀆𑀮𑀺𑀗𑁆𑀕𑀺𑀬𑀁 𑀧𑀺𑀬𑀢𑀭𑀜𑁆𑀘 𑀲𑀼𑀢𑀁 𑀲𑀼𑀮𑀺𑀗𑁆𑀕𑀁,

𑀧𑁄𑀲𑁄 𑀓𑀭𑁂 𑀫𑀦𑀲𑀺 𑀮𑀺𑀗𑁆𑀕𑀯𑀺𑀤𑀼𑀢𑁆𑀢𑀫𑀺𑀘𑁆𑀙𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀪𑀽𑀥𑀸𑀢𑀼𑀫𑀬𑀸𑀦𑀁 𑀢𑀺𑀯𑀺𑀥𑀮𑀺𑀗𑁆𑀕𑀺𑀓𑀸𑀦𑀁 𑀦𑀸𑀫𑀺𑀓𑀭𑀽𑀧𑀸𑀦𑀁 𑀯𑀺𑀪𑀸𑀕𑁄

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑁫. 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀪𑀽 𑀥𑀸𑀢𑀼𑀢𑁄 𑀧𑀯𑀢𑁆𑀢𑀸𑀦𑀁, 𑀦𑀸𑀫𑀺𑀓𑀸𑀦𑀫𑀺𑀢𑁄 𑀧𑀭𑀁;

𑀦𑀸𑀫𑀫𑀸𑀮𑀁 𑀧𑀓𑀸𑀲𑀺𑀲𑁆𑀲𑀁, 𑀦𑀸𑀫𑀫𑀸𑀮𑀦𑁆𑀢𑀭𑀫𑁆𑀧𑀺 𑀘.

𑀯𑀺𑀧𑁆𑀧𑀓𑀺𑀡𑁆𑀡𑀓𑀣𑀸 𑀏𑀢𑁆𑀣, 𑀏𑀯𑀁 𑀯𑀼𑀢𑁆𑀢𑁂 𑀦 𑀳𑁂𑀲𑁆𑀲𑀢𑀺;

𑀧𑀪𑁂𑀤𑁄 𑀦𑀸𑀫𑀫𑀸𑀮𑀸𑀦𑀁, 𑀧𑀭𑀺𑀧𑀼𑀡𑁆𑀡𑁄𑀯 𑀳𑁂𑀳𑀺𑀢𑀺.

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀢𑀲𑁆𑀫𑀸 𑀇𑀥 𑀫𑀢𑀁 𑀲𑀼𑀢𑀁;

𑀧𑀼𑀭𑁂𑀘𑀭𑀁 𑀓𑀭𑀺𑀢𑁆𑀯𑀸𑀦, 𑀯𑀓𑁆𑀔𑀸𑀫𑀺 𑀲𑀯𑀺𑀦𑀺𑀘𑁆𑀙𑀬𑀁.

𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸. 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁂. 𑀧𑀼𑀭𑀺𑀲𑁂𑀦, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺. 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁. 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀲𑁆𑀫𑀸, 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺. 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁. 𑀧𑀼𑀭𑀺𑀲𑁂, 𑀧𑀼𑀭𑀺𑀲𑀲𑁆𑀫𑀺𑀁, 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑁂𑀲𑀼. 𑀪𑁄 𑀧𑀼𑀭𑀺𑀲, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸.

𑀅𑀬𑀫𑀸𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀓𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀢𑁄 𑀉𑀤𑁆𑀥𑀭𑀺𑀢𑁄 𑀧𑀼𑀭𑀺𑀲𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 ¶ 𑀦𑀸𑀫𑀺𑀓𑀧𑀤𑀫𑀸𑀮𑀸𑀦𑀬𑁄. 𑀢𑀢𑁆𑀭 𑀧𑀼𑀭𑀺𑀲𑀯𑀘𑀦𑀏𑀓𑀯𑀘𑀦𑀧𑀼𑀣𑀼𑀯𑀘𑀦𑁂𑀲𑀼 𑀧𑀘𑁆𑀘𑀢𑁆𑀢𑀯𑀘𑀦𑀸𑀤𑀻𑀦𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀭 𑀧𑀼𑀭𑀺𑀲𑁄𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀲𑁆𑀲𑀢𑀺. 𑀢𑀢𑁆𑀭 𑀧𑀼𑀭𑀺𑀲𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀉𑀧𑀬𑁄𑀕𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀉𑀧𑀬𑁄𑀕𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑁂𑀦 𑀓𑀢𑀁, 𑀧𑀼𑀭𑀺𑀲𑁂𑀳𑀺 𑀓𑀢𑀁, 𑀧𑀼𑀭𑀺𑀲𑁂𑀪𑀺 𑀓𑀢𑀁. 𑀢𑀢𑁆𑀭 𑀧𑀼𑀭𑀺𑀲𑁂𑀦𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀓𑀭𑀡𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀓𑀭𑀡𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀲𑁆𑀲 𑀤𑀻𑀬𑀢𑁂, 𑀧𑀼𑀭𑀺𑀲𑀸𑀦𑀁 𑀤𑀻𑀬𑀢𑁂. 𑀢𑀢𑁆𑀭 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀲𑀫𑁆𑀧𑀤𑀸𑀦𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀦𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀲𑀫𑁆𑀧𑀤𑀸𑀦𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑀲𑁆𑀫𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑀫𑁆𑀳𑀸 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑁂𑀳𑀺 𑀦𑀺𑀲𑁆𑀲𑀝𑀁, 𑀧𑀼𑀭𑀺𑀲𑁂𑀪𑀺 𑀦𑀺𑀲𑁆𑀲𑀝𑀁. 𑀢𑀢𑁆𑀭 𑀧𑀼𑀭𑀺𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺. 𑀧𑀼𑀭𑀺𑀲𑀲𑁆𑀫𑀸𑀢𑀺…𑀧𑁂… 𑀧𑀼𑀭𑀺𑀲𑀫𑁆𑀳𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀧𑀼𑀭𑀺𑀲𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀢𑀢𑁆𑀭 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀲𑀸𑀫𑀺𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀸𑀦𑀦𑁆𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀲𑀸𑀫𑀺𑀯𑀘𑀦𑀁 𑀪𑀯𑀢𑀺.

𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀢𑀢𑁆𑀭 𑀧𑀼𑀭𑀺𑀲𑁂𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀪𑀼𑀫𑁆𑀫𑀯𑀘𑀦𑀁 𑀪𑀯𑀢𑀺, 𑀧𑀼𑀭𑀺𑀲𑀲𑁆𑀫𑀺𑀦𑁆𑀢𑀺…𑀧𑁂… 𑀧𑀼𑀭𑀺𑀲𑀫𑁆𑀳𑀻𑀢𑀺…𑀧𑁂… 𑀧𑀼𑀭𑀺𑀲𑁂𑀲𑀽𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀪𑀼𑀫𑁆𑀫𑀯𑀘𑀦𑀁 𑀪𑀯𑀢𑀺.

𑀪𑁄 ¶ 𑀧𑀼𑀭𑀺𑀲 𑀢𑀺𑀝𑁆𑀞, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀢𑀺𑀝𑁆𑀞𑀣. 𑀢𑀢𑁆𑀭 𑀪𑁄 𑀧𑀼𑀭𑀺𑀲𑀇𑀢𑀺 𑀧𑀼𑀭𑀺𑀲𑀯𑀘𑀦𑁂 𑀏𑀓𑀯𑀘𑀦𑁂 𑀆𑀮𑀧𑀦𑀁 𑀪𑀯𑀢𑀺, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀇𑀢𑀺 𑀧𑀼𑀭𑀺𑀲𑀯𑀘𑀦𑁂 𑀧𑀼𑀣𑀼𑀯𑀘𑀦𑁂 𑀆𑀮𑀧𑀦𑀁 𑀪𑀯𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀬𑀫𑀓𑀫𑀳𑀸𑀣𑁂𑀭𑁂𑀦 𑀓𑀢𑀸𑀬 𑀧𑀦 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀢𑀸𑀤𑀺𑀲𑁄 𑀦𑀬𑁄 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦𑀢𑁆𑀣𑀺, 𑀢𑀣𑀸𑀧𑀺 𑀩𑀳𑀽𑀦𑀫𑀸𑀮𑀧𑀦𑀯𑀺𑀲𑀬𑁂 ‘‘𑀪𑁄 𑀬𑀓𑁆𑀔𑀸’’𑀇𑀢𑀺𑀆𑀤𑀻𑀦𑀁 𑀆𑀮𑀧𑀦𑀩𑀳𑀼𑀯𑀘𑀦𑀸𑀦𑀁 𑀚𑀸𑀢𑀓𑀝𑁆𑀞𑀓𑀣𑀸𑀤𑀻𑀲𑀼 𑀤𑀺𑀲𑁆𑀲𑀦𑀢𑁄 𑀧𑀲𑀢𑁆𑀣𑀢𑀭𑁄𑀯 𑀳𑁄𑀢𑀺 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀜𑁆𑀘, 𑀢𑀲𑁆𑀫𑀸 𑀇𑀫𑀺𑀦𑀸 𑀬𑀫𑀓𑀫𑀳𑀸𑀣𑁂𑀭𑀫𑀢𑁂𑀦𑀧𑀺 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸 𑀧𑀼𑀭𑀺𑀲’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀆𑀫𑀦𑁆𑀢𑀦𑁂 ‘‘𑀪𑁄 𑀧𑀼𑀭𑀺𑀲, 𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀢𑀢𑁆𑀣 𑀧𑀼𑀭𑀺𑀲𑁄𑀢𑀺 𑀧𑀞𑀫𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑀦𑁆𑀢𑀺 𑀤𑀼𑀢𑀺𑀬𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑁂𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑁂𑀦𑀸𑀢𑀺 𑀢𑀢𑀺𑀬𑀸𑀬 𑀏𑀓𑀯𑀘𑀦𑀁. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀺𑀬𑀸 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀲𑁆𑀫𑀸, 𑀧𑀼𑀭𑀺𑀲𑀫𑁆𑀳𑀸𑀢𑀺 𑀢𑀻𑀡𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀸𑀦𑀺. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀙𑀝𑁆𑀞𑀺𑀬𑀸 𑀏𑀓𑀯𑀘𑀦𑀁. 𑀧𑀼𑀭𑀺𑀲𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀁. 𑀧𑀼𑀭𑀺𑀲𑁂, 𑀧𑀼𑀭𑀺𑀲𑀲𑁆𑀫𑀺𑀁, 𑀧𑀼𑀭𑀺𑀲𑀫𑁆𑀳𑀻𑀢𑀺 𑀢𑀻𑀡𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀸𑀦𑀺. 𑀧𑀼𑀭𑀺𑀲𑁂𑀲𑀽𑀢𑀺 𑀩𑀳𑀼𑀯𑀘𑀦𑀁. 𑀪𑁄 𑀧𑀼𑀭𑀺𑀲𑀸𑀢𑀺 𑀅𑀝𑁆𑀞𑀫𑀺𑀬𑀸 𑀏𑀓𑀯𑀘𑀦𑀁. 𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺.

𑀓𑀺𑀜𑁆𑀘𑀸𑀧𑁂𑀢𑁂𑀲𑀼 ‘‘𑀧𑀼𑀭𑀺𑀲𑀸’’𑀢𑀺 𑀇𑀤𑀁 𑀧𑀞𑀫𑀸𑀧𑀜𑁆𑀘𑀫𑀻𑀅𑀝𑁆𑀞𑀫𑀻𑀦𑀁, ‘‘𑀧𑀼𑀭𑀺𑀲𑁂’’𑀢𑀺 𑀇𑀤𑀁 𑀤𑀼𑀢𑀺𑀬𑀸𑀲𑀢𑁆𑀢𑀫𑀻𑀦𑀁, ‘‘𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀻’’𑀢𑀺 𑀢𑀢𑀺𑀬𑀸𑀧𑀜𑁆𑀘𑀫𑀻𑀦𑀁, ‘‘𑀧𑀼𑀭𑀺𑀲𑀸𑀦’’𑀦𑁆𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀏𑀓𑀲𑀤𑀺𑀲𑀁, 𑀢𑀣𑀸𑀧𑀺 𑀅𑀢𑁆𑀣𑀯𑀲𑁂𑀦 𑀅𑀲𑀗𑁆𑀓𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? ‘‘𑀧𑀼𑀭𑀺𑀲𑁄 ¶ 𑀢𑀺𑀝𑁆𑀞𑀢𑀺, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺. 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸.

𑀢𑀢𑁆𑀣 𑀘 𑀪𑁄𑀢𑀺 𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑀦 𑀓𑁂𑀯𑀮𑀁 𑀏𑀓𑀯𑀘𑀦𑀁𑀬𑁂𑀯 𑀳𑁄𑀢𑀺, 𑀅𑀣 𑀔𑁄 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀻𑀢𑀺 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄𑀧𑀺 𑀕𑀳𑀺𑀢𑁄. ‘‘𑀪𑀯𑀦𑁆𑀢𑁄’’𑀢𑀺𑀤𑀁 𑀧𑀦 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 ‘‘𑀧𑀼𑀭𑀺𑀲𑀸’’𑀢𑀺 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀺 𑀬𑀫𑀓𑀫𑀳𑀸𑀣𑁂𑀭𑁂𑀦 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀦𑀺𑀧𑀸𑀢𑀪𑀽𑀢𑁄 𑀪𑁄𑀲𑀤𑁆𑀤𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺. 𑀅𑀢𑁆𑀭𑀺𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑁋 ‘‘𑀅𑀧𑀺 𑀦𑀼 𑀔𑁄 𑀲𑀧𑀭𑀺𑀕𑁆𑀕𑀳𑀸𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑀭𑀺𑀕𑁆𑀕𑀳𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺, 𑀦𑁄 𑀳𑀺𑀤𑀁 𑀪𑁄 𑀕𑁄𑀢𑀫. 𑀅𑀘𑁆𑀙𑀭𑀺𑀬𑀁 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁 𑀪𑁄 𑀆𑀦𑀦𑁆𑀤, 𑀏𑀳𑀺 𑀪𑁄 𑀲𑀫𑀡, 𑀪𑁄 𑀧𑀩𑁆𑀩𑀚𑀺𑀢’’𑀇𑀘𑁆𑀘𑀸𑀤𑀺𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀪𑁄𑀲𑀤𑁆𑀤𑀲𑁆𑀲 𑀏𑀓𑀯𑀘𑀦𑀧𑁆𑀧𑀬𑁄𑀕𑁂 𑀧𑀯𑀢𑁆𑀢𑀺𑀦𑀺𑀤𑀲𑁆𑀲𑀦𑀁, ‘‘𑀢𑁂𑀦 𑀳𑀺 𑀪𑁄 𑀫𑀫𑀧𑀺 𑀲𑀼𑀡𑀸𑀣. 𑀬𑀣𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀦𑀸𑀳𑀁 𑀪𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀸𑀫𑀺, 𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁. 𑀪𑁄 𑀬𑀓𑁆𑀔𑀸 𑀅𑀳𑀁 𑀇𑀫𑀁 𑀢𑀼𑀫𑁆𑀳𑀸𑀓𑀁 𑀪𑀸𑀚𑁂𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀅𑀧𑀭𑀺𑀲𑀼𑀤𑁆𑀥𑁄 𑀧𑀦𑀫𑁆𑀳𑀺, 𑀪𑁄 𑀥𑀼𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀓𑁆𑀭𑀺𑀬𑀸 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺. 𑀲𑁄 𑀢𑁂 𑀧𑀼𑀭𑀺𑀲𑁂 𑀆𑀳 𑀪𑁄 𑀢𑀼𑀫𑁆𑀳𑁂 𑀫𑀁 𑀫𑀸𑀭𑁂𑀦𑁆𑀢𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸𑀯 𑀫𑀸𑀭𑁂𑀣𑀸’’𑀢𑀺 𑀇𑀘𑁆𑀘𑀸𑀤𑀺 𑀧𑀦 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀪𑁄𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁂 𑀧𑀯𑀢𑁆𑀢𑀺𑀦𑀺𑀤𑀲𑁆𑀲𑀦𑀁. 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀧𑀦 ‘‘𑀪𑁄 𑀧𑀼𑀭𑀺𑀲, 𑀪𑁄 𑀧𑀼𑀭𑀺𑀲𑀸’’𑀢𑀺 𑀧𑀤𑀤𑁆𑀯𑀬𑀁 𑀆𑀮𑀧𑀦𑁂𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀬𑀣𑀸 𑀆𑀕𑀫𑁂𑀳𑀺 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀓𑁂𑀘𑀺 ¶ 𑀧𑀦 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀦𑁆𑀢𑀺, 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 𑀧𑀦 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀦𑁆𑀢𑀺. 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀻𑀦𑀜𑁆𑀘 𑀆𑀮𑀧𑀦𑁂 𑀦 𑀓𑀺𑀜𑁆𑀘𑀺 𑀯𑀤𑀦𑁆𑀢𑀺. 𑀢𑀣𑀸 𑀅𑀤𑀽𑀭𑀝𑁆𑀞𑀸𑀬 𑀤𑀽𑀭𑀝𑁆𑀞𑀸𑀬 𑀘 𑀇𑀢𑁆𑀣𑀺𑀬𑀸 𑀆𑀮𑀧𑀦𑁂 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑁂 𑀓𑀣𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀤𑁆𑀥𑀸 𑀢𑁂 𑀏𑀯𑀁 𑀧𑀼𑀝𑁆𑀞𑀸 𑀉𑀢𑁆𑀢𑀭𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀏𑀯𑀫𑁆𑀧𑀺 𑀢𑁂 𑀘𑁂 𑀯𑀤𑁂𑀬𑁆𑀬𑀼𑀁 ‘‘𑀪𑀯𑀦𑁆𑀢𑁄 𑀧𑀼𑀭𑀺𑀲𑀸𑀢𑀺 𑀇𑀫𑀺𑀦𑀸𑀯 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀻’’𑀢𑀺. 𑀢𑀤𑀸 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀇𑀫𑀺𑀦𑀸 𑀅𑀤𑁆𑀯𑁂𑀚𑁆𑀛𑁂𑀦 𑀯𑀘𑀦𑁂𑀦 𑀅𑀤𑀽𑀭𑀝𑁆𑀞𑀸𑀦𑀁 𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀺, 𑀏𑀯𑀁 𑀲𑀦𑁆𑀢𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀧𑀤𑁂𑀦𑀧𑀺 𑀤𑀽𑀭𑀝𑁆𑀞𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲𑀸𑀮𑀧𑀦𑀁 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀅𑀯𑀢𑁆𑀯𑀸 𑀓𑀺𑀫𑀢𑁆𑀣𑀁 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀣, 𑀓𑀺𑀫𑀢𑁆𑀣𑀜𑁆𑀘 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂 ‘‘𑀪𑁄 𑀧𑀼𑀭𑀺𑀲𑀸’’𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀇𑀘𑁆𑀙𑀣.

𑀦𑀦𑀼 ‘‘𑀢𑀕𑁆𑀖 𑀪𑀕𑀯𑀸 𑀩𑁄𑀚𑁆𑀛𑀗𑁆𑀕𑀸, 𑀢𑀕𑁆𑀖 𑀲𑀼𑀕𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀻𑀲𑀼 𑀆𑀮𑀧𑀦𑀧𑀤𑀪𑀽𑀢𑀁 ‘‘𑀪𑀕𑀯𑀸’’𑀇𑀢𑀺 𑀤𑀻𑀖𑀧𑀤𑀁 𑀲𑀫𑀻𑀧𑁂 𑀞𑀺𑀢𑀓𑀸𑀮𑁂𑀧𑀺 𑀤𑀽𑀭𑁂 𑀞𑀺𑀢𑀓𑀸𑀮𑁂𑀧𑀺 𑀩𑀼𑀤𑁆𑀥𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀺𑀢𑀼𑀫𑀭𑀳𑀢𑁂𑀯, 𑀢𑀣𑀸 𑀆𑀮𑀧𑀦𑀧𑀤𑀪𑀽𑀢𑀁 ‘‘𑀲𑀼𑀕𑀢’’𑀇𑀢𑀺 𑀭𑀲𑁆𑀲𑀧𑀤𑀫𑁆𑀧𑀺. 𑀬𑀲𑁆𑀫𑀸 𑀧𑀦𑁂𑀢𑁂𑀲𑀼 ‘‘𑀪𑀕𑀯𑀸’’𑀢𑀺 𑀆𑀮𑀧𑀦𑀧𑀤𑀲𑁆𑀲 𑀦 𑀓𑀢𑁆𑀣𑀘𑀺𑀧𑀺 𑀭𑀲𑁆𑀲𑀢𑁆𑀢𑀁 𑀤𑀺𑀲𑁆𑀲𑀢𑀺, ‘‘𑀲𑀼𑀕𑀢𑀸’’𑀢𑀺 𑀆𑀮𑀧𑀦𑀧𑀤𑀲𑁆𑀲 𑀘 𑀦 𑀓𑀢𑁆𑀣𑀘𑀺𑀧𑀺 𑀤𑀻𑀖𑀢𑁆𑀢𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀻𑀖𑀭𑀲𑁆𑀲𑀫𑀢𑁆𑀢𑀸𑀪𑁂𑀤𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀼𑀭𑀺𑀲’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀧𑀤𑀁 𑀧𑀓𑀢𑀺𑀲𑁆𑀲𑀭𑀯𑀲𑁂𑀦 𑀲𑀫𑀻𑀧𑁂 𑀞𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀫𑀦𑁆𑀢𑀦𑀓𑀸𑀮𑁂 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀢𑀺, 𑀆𑀬𑀢𑀲𑁆𑀲𑀭𑀯𑀲𑁂𑀦 𑀤𑀽𑀭𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀆𑀫𑀦𑁆𑀢𑀦𑀓𑀸𑀮𑁂 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀧𑀤𑀁 𑀪𑀯𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸 ‘‘𑀪𑀯𑀦𑁆𑀢𑁄 𑀧𑀼𑀭𑀺𑀲𑀸, 𑀪𑁄 𑀬𑀓𑁆𑀔𑀸, 𑀪𑁄 𑀥𑀼𑀢𑁆𑀢𑀸’’𑀢𑀺𑀆𑀤𑀻𑀦𑀺 ¶ 𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀆𑀮𑀧𑀦𑀩𑀳𑀼𑀯𑀘𑀦𑀧𑀤𑀸𑀦𑀺𑀧𑀺 𑀧𑀓𑀢𑀺𑀲𑁆𑀲𑀭𑀯𑀲𑁂𑀦 𑀲𑀫𑀻𑀧𑁂 𑀞𑀺𑀢𑀧𑀼𑀭𑀺𑀲𑀸𑀦𑀁 𑀆𑀫𑀦𑁆𑀢𑀦𑀓𑀸𑀮𑁂 𑀅𑀤𑀽𑀭𑀝𑁆𑀞𑀸𑀦𑀫𑀸𑀮𑀧𑀦𑀧𑀤𑀸𑀦𑀺 𑀪𑀯𑀦𑁆𑀢𑀺, 𑀆𑀬𑀢𑀲𑁆𑀲𑀭𑀯𑀲𑁂𑀦 𑀤𑀽𑀭𑁂 𑀞𑀺𑀢𑀧𑀼𑀭𑀺𑀲𑀸𑀤𑀻𑀦𑀁 𑀆𑀫𑀦𑁆𑀢𑀦𑀓𑀸𑀮𑁂 𑀤𑀽𑀭𑀝𑁆𑀞𑀸𑀦𑀫𑀸𑀮𑀧𑀦𑀧𑀤𑀸𑀦𑀺 𑀪𑀯𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀸 𑀓𑀢𑁆𑀣𑀘𑀺 𑀓𑀢𑁆𑀣𑀘𑀺 𑀭𑀲𑁆𑀲𑀝𑁆𑀞𑀸𑀦𑁂𑀧𑀺 𑀤𑀻𑀖𑀝𑁆𑀞𑀸𑀦𑁂𑀧𑀺 𑀆𑀬𑀢𑁂𑀦 𑀲𑀭𑁂𑀦 𑀫𑀚𑁆𑀛𑀺𑀫𑀸𑀬𑀢𑁂𑀦 𑀲𑀭𑁂𑀦 𑀅𑀘𑁆𑀘𑀸𑀬𑀢𑁂𑀦 𑀘 𑀲𑀭𑁂𑀦 𑀯𑁂𑀤𑀁 𑀧𑀞𑀦𑁆𑀢𑀺 𑀮𑀺𑀔𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁂𑀦 𑀕𑀻𑀢𑀲𑁆𑀲𑀭𑁂𑀦 𑀯𑀺𑀬. 𑀇𑀢𑀺 𑀲𑀩𑁆𑀩𑀓𑁆𑀔𑀭𑁂𑀲𑀼𑀧𑀺 𑀆𑀬𑀢𑁂𑀦 𑀲𑀭𑁂𑀦𑀼𑀘𑁆𑀘𑀸𑀭𑀡𑀁 𑀮𑀩𑁆𑀪𑀢𑁂𑀯 𑀮𑀺𑀔𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀁, 𑀢𑀲𑁆𑀫𑀸 𑀅𑀲𑀫𑁆𑀧𑀣𑀫𑀦𑁄𑀢𑀭𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲’’𑀇𑀢𑀺 𑀯𑀘𑀦𑁂𑀦 𑀤𑀽𑀭𑀝𑁆𑀞𑀲𑁆𑀲 𑀘 𑀅𑀤𑀽𑀭𑀝𑁆𑀞𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲𑀸𑀮𑀧𑀦𑀁 𑀪𑀯𑀢𑀺, ‘‘𑀪𑁄 𑀧𑀼𑀭𑀺𑀲𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸’’𑀢𑀺 𑀇𑀫𑁂𑀳𑀺 𑀯𑀘𑀦𑁂𑀳𑀺𑀧𑀺 𑀤𑀽𑀭𑀝𑁆𑀞𑀸𑀦𑀜𑁆𑀘 𑀅𑀤𑀽𑀭𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀫𑀸𑀮𑀧𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀺 𑀤𑀽𑀭𑀝𑁆𑀞𑀲𑁆𑀲 𑀅𑀤𑀽𑀭𑀝𑁆𑀞𑀸𑀦𑀜𑁆𑀘 𑀆𑀬𑀢𑁂𑀦 𑀲𑀭𑁂𑀦 𑀆𑀫𑀦𑁆𑀢𑀦𑀫𑁂𑀯 𑀧𑀫𑀸𑀡𑀁, 𑀦 𑀤𑀻𑀖𑀭𑀲𑁆𑀲𑀫𑀢𑁆𑀢𑀸𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀪𑁄 𑀲𑀢𑁆𑀣, 𑀪𑁄 𑀭𑀸𑀚, 𑀪𑁄 𑀕𑀘𑁆𑀙, 𑀪𑁄 𑀫𑀼𑀦𑀺, 𑀪𑁄 𑀤𑀡𑁆𑀟𑀺, 𑀪𑁄 𑀪𑀺𑀓𑁆𑀔𑀼, 𑀪𑁄 𑀲𑀬𑀫𑁆𑀪𑀼, 𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺 𑀧𑀢𑁆𑀢𑀺, 𑀪𑁄𑀢𑀺 𑀇𑀢𑁆𑀣𑀺, 𑀪𑁄𑀢𑀺 𑀬𑀸𑀕𑀼, 𑀪𑁄𑀢𑀺 𑀯𑀥𑀼, 𑀪𑁄 𑀓𑀼𑀮, 𑀪𑁄 𑀅𑀝𑁆𑀞𑀺, 𑀪𑁄 𑀘𑀓𑁆𑀔𑀼’’𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀧𑀤𑁂𑀳𑀺 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀜𑁆𑀘 𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀜𑁆𑀘 𑀪𑀯𑀢𑀺. ‘‘𑀪𑀯𑀦𑁆𑀢𑁄 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄, 𑀪𑁄𑀢𑀺𑀬𑁄 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄’’𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀧𑀤𑁂𑀳𑀺 𑀅𑀤𑀽𑀭𑀝𑁆𑀞𑀸𑀦𑀜𑁆𑀘𑀸𑀮𑀧𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀜𑁆𑀜𑁄 𑀧𑀼𑀢𑁆𑀢𑀁 𑀅𑀤𑀲𑁆𑀲𑀬𑀼𑀁;

𑀧𑀼𑀢𑁆𑀢𑁄 𑀘 𑀧𑀺𑀢𑀭𑀁 𑀤𑀺𑀲𑁆𑀯𑀸, 𑀤𑀽𑀭𑀢𑁄𑀯𑀚𑁆𑀛𑀪𑀸𑀲𑀣.

𑀆𑀕𑀘𑁆𑀙𑀼 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸,

𑀓𑀸𑀲𑀸𑀯𑀺𑀬𑀸 𑀳𑀦𑁆𑀢𑀼 𑀫𑀫𑀁 𑀚𑀦𑀺𑀦𑁆𑀤;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁,

𑀅𑀧𑀭𑀸𑀥𑁄 𑀓𑁄 𑀦𑁆𑀯𑀺𑀥 𑀫𑀫𑀚𑁆𑀚 𑀅𑀢𑁆𑀣𑀺.

𑀏𑀯𑀁 ¶ 𑀲𑀤𑁆𑀥𑀫𑁆𑀫𑀭𑀸𑀚𑁂𑀦, 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁂;

𑀲𑀼𑀤𑁂𑀲𑀺𑀢𑁂 𑀲𑁄𑀫𑀦𑀲𑁆𑀲-𑀚𑀸𑀢𑀓𑁂 𑀲𑀩𑁆𑀩𑀤𑀲𑁆𑀲𑀺𑀦𑀸.

𑀤𑀽𑀭𑀝𑁆𑀞𑀸𑀦𑁂𑀧𑀺 𑀭𑀲𑁆𑀲𑀢𑁆𑀢𑀁, ‘‘𑀚𑀦𑀺𑀦𑁆𑀤’’𑀇𑀢𑀺 𑀤𑀺𑀲𑁆𑀲𑀢𑀺;

𑀦 𑀓𑀢𑁆𑀣𑀘𑀺𑀧𑀺 𑀤𑀻𑀖𑀢𑁆𑀢𑀁, 𑀇𑀢𑀺 𑀦𑀻𑀢𑀺 𑀫𑀬𑀸 𑀫𑀢𑀸.

𑀇𑀤𑀫𑁆𑀧𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 ‘‘𑀓𑀼𑀢𑁄 𑀦𑀼 𑀪𑁄 𑀇𑀤𑀫𑀸𑀬𑀸𑀢𑀁 ‘𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀁 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑀫𑀺’𑀢𑀺’’? 𑀲𑀤𑁆𑀤𑀲𑀢𑁆𑀣𑀢𑁄. 𑀲𑀤𑁆𑀤𑀲𑀢𑁆𑀣𑀁 𑀦𑀸𑀫 𑀦 𑀲𑀩𑁆𑀩𑀲𑁄 𑀩𑀼𑀤𑁆𑀥𑀯𑀘𑀦𑀲𑁆𑀲𑁄𑀧𑀓𑀸𑀭𑀓𑀁, 𑀏𑀓𑀤𑁂𑀲𑁂𑀦 𑀧𑀦 𑀳𑁄𑀢𑀺.

𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 ‘‘𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀅𑀦𑁂𑀓𑀯𑀘𑀦’’𑀦𑁆𑀢𑀺 𑀯𑀸 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 ‘‘𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀸 ‘‘𑀅𑀦𑁂𑀓𑀯𑀘𑀦’’𑀦𑁆𑀢𑀺 𑀯𑀸 𑀯𑁄𑀳𑀸𑀭𑁄 𑀓𑀸𑀢𑀩𑁆𑀩𑁄, 𑀧𑀼𑀣𑀼𑀯𑀘𑀦𑀁 𑀅𑀦𑁂𑀓𑀯𑀘𑀦𑀦𑁆𑀢𑀺 𑀘 𑀇𑀤𑀁 𑀲𑀸𑀲𑀦𑁂 𑀦𑀺𑀭𑀼𑀢𑁆𑀢𑀜𑁆𑀜𑀽𑀦𑀁 𑀯𑁄𑀳𑀸𑀭𑁄, 𑀇𑀢𑀭𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀦𑀁.

𑀓𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀤𑁆𑀯𑀺𑀯𑀘𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀩𑀼𑀤𑁆𑀥𑀯𑀘𑀦𑁂 𑀯𑀘𑀦𑀢𑁆𑀢𑀬𑀁 𑀅𑀢𑁆𑀣𑀺, 𑀢𑀣𑀸 𑀳𑀺 ‘‘𑀆𑀬𑀲𑁆𑀫𑀸’’𑀢𑀺 𑀇𑀤𑀁 𑀏𑀓𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀤𑁆𑀯𑀺𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀇𑀤𑀁 𑀩𑀳𑀼𑀯𑀘𑀦𑀦𑁆𑀢𑀺? 𑀢𑀦𑁆𑀦, 𑀬𑀤𑀺 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀤𑁆𑀯𑀺𑀯𑀘𑀦𑀁 𑀪𑀯𑁂𑀬𑁆𑀬, ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸’’𑀢𑀺𑀆𑀤𑀻𑀲𑀼 𑀓𑀢𑀭𑀁 𑀤𑁆𑀯𑀺𑀯𑀘𑀦𑀦𑁆𑀢𑀺 𑀯𑀤𑁂𑀬𑁆𑀬𑀸𑀣, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑁂𑀯 𑀳𑀺 𑀲𑀺 𑀬𑁄 𑀅𑀁 𑀬𑁄 𑀦𑀸 𑀳𑀻𑀢𑀺𑀆𑀤𑀺𑀦𑀸 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑁂𑀯 𑀤𑀲𑁆𑀲𑀺𑀢𑀸𑀦𑀻𑀢𑀺.

𑀦𑀦𑀼 𑀘 𑀪𑁄 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀚𑁆𑀚 𑀉𑀧𑁄𑀲𑀣𑁄 𑀧𑀦𑁆𑀦𑀭𑀲𑁄. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺 𑀧𑀸𑀴𑀺𑀬𑀁 𑀤𑁆𑀯𑁂 𑀲𑀦𑁆𑀥𑀸𑀬 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁, ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀧𑀦 𑀧𑀸𑀴𑀻𑀲𑀼 𑀩𑀳𑀯𑁄 𑀲𑀦𑁆𑀥𑀸𑀬 ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀬𑀣𑀸 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺 ¶ , 𑀧𑀭𑀺𑀯𑀸𑀲𑀸𑀤𑀺𑀆𑀭𑁄𑀘𑀦𑁂𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀺𑀜𑁆𑀜𑀸𑀢𑀲𑀼𑀕𑀢𑀸𑀥𑀺𑀧𑁆𑀧𑀸𑀬𑁂𑀳𑀺 ‘‘𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀯𑀺𑀦𑀬𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀯𑀺𑀦𑀬𑁄 𑀩𑀼𑀤𑁆𑀥𑀯𑀘𑀦𑀁, 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀤𑀣𑀸𑀢𑀺? 𑀲𑀘𑁆𑀘𑀁 𑀯𑀺𑀦𑀬𑁄 𑀩𑀼𑀤𑁆𑀥𑀯𑀘𑀦𑀁, 𑀢𑀣𑀸𑀧𑀺 𑀯𑀺𑀦𑀬𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀦 𑀲𑀩𑁆𑀩𑀲𑀸𑀥𑀸𑀭𑀡𑀩𑀳𑀼𑀯𑀘𑀦𑀧𑀭𑀺𑀬𑀸𑀧𑀦𑁆𑀦𑀁. 𑀬𑀤𑀺 𑀳𑀺 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀇𑀤𑀁 𑀤𑁆𑀯𑀺𑀯𑀘𑀦𑀁 𑀲𑀺𑀬𑀸, 𑀢𑀧𑁆𑀧𑀬𑁄𑀕𑀸𑀦𑀺𑀧𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀤𑁆𑀯𑀺𑀯𑀘𑀦𑀸𑀦𑁂𑀯 𑀲𑀺𑀬𑀼𑀁, 𑀢𑀣𑀸𑀭𑀽𑀧𑀸𑀦𑀺𑀧𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀦 𑀲𑀦𑁆𑀢𑀺. 𑀦 𑀳𑀺 𑀅𑀓𑁆𑀔𑀭𑀲𑀫𑀬𑀓𑁄𑀯𑀺𑀤𑁄 𑀛𑀸𑀦𑀮𑀸𑀪𑀻𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀲𑀫𑀯𑁂𑀓𑁆𑀔𑀦𑁆𑀢𑁄 𑀩𑀼𑀤𑁆𑀥𑀯𑀘𑀦𑁂 𑀏𑀓𑀫𑁆𑀧𑀺 𑀓𑁆𑀭𑀺𑀬𑀸𑀧𑀤𑀁 𑀤𑁆𑀯𑀺𑀯𑀘𑀦𑀦𑁆𑀢𑀺 𑀧𑀲𑁆𑀲𑁂𑀬𑁆𑀬, 𑀏𑀯𑀁 𑀓𑁆𑀭𑀺𑀬𑀸𑀧𑀤𑁂𑀲𑀼 𑀤𑁆𑀯𑀺𑀯𑀘𑀦𑀲𑁆𑀲𑀸𑀪𑀸𑀯𑀸 𑀦𑀸𑀫𑀺𑀓𑀧𑀤𑁂𑀲𑀼 𑀤𑁆𑀯𑀺𑀯𑀘𑀦𑀁 𑀦𑀢𑁆𑀣𑀺. 𑀦𑀸𑀫𑀺𑀓𑀧𑀤𑁂𑀲𑀼 𑀢𑀤𑀪𑀸𑀯𑀸𑀧𑀺 𑀓𑁆𑀭𑀺𑀬𑀸𑀧𑀤𑁂𑀲𑀼 𑀢𑀤𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑁆𑀓𑀝𑀪𑀸𑀲𑀸𑀬𑀁 𑀤𑁆𑀯𑀻𑀲𑀼𑀧𑀺 𑀤𑁆𑀯𑀺𑀯𑀘𑀦𑀸𑀦𑀺 𑀲𑀦𑁆𑀢𑀺, 𑀫𑀸𑀕𑀥𑀪𑀸𑀲𑀸𑀬𑀁 𑀧𑀦 𑀦𑀢𑁆𑀣𑀺.

𑀅𑀧𑀺𑀘 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑁄𑀧𑀺 ‘‘𑀩𑀼𑀤𑁆𑀥𑀯𑀘𑀦𑁂 𑀤𑁆𑀯𑀺𑀯𑀘𑀦𑀁 𑀦𑀢𑁆𑀣𑀻’’𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀜𑁆𑀳𑀺 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑀸 𑀤𑁆𑀯𑀺𑀯𑀘𑀦𑀢𑁄 𑀩𑀳𑀼𑀯𑀘𑀦𑀢𑁄 𑀘 𑀯𑀺𑀲𑀼𑀁𑀪𑀽𑀢𑀁 𑀯𑀘𑀦𑀁, 𑀢𑀢𑁆𑀣 𑀯𑀸 𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀫𑀺𑀤𑀁 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑀸 𑀤𑁆𑀯𑀺𑀯𑀘𑀦𑀢𑁄 𑀩𑀳𑀼𑀯𑀘𑀦𑀢𑁄 𑀘 𑀯𑀺𑀲𑀼𑀁𑀪𑀽𑀢𑀁 𑀯𑀘𑀦𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀤𑀁 𑀢𑁂𑀳𑀺 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀤𑁆𑀯𑀺𑀯𑀘𑀦𑀩𑀳𑀼𑀯𑀘𑀦𑁂𑀳𑀺 𑀯𑀺𑀲𑀼𑀁𑀪𑀽𑀢𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀜𑁆𑀘 𑀧𑀦 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀧𑀼𑀣𑀼𑀯𑀘𑀦𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀤𑁆𑀯𑁂 𑀉𑀧𑀸𑀤𑀸𑀬 𑀤𑁆𑀯𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀦 𑀢𑀺𑀘𑀢𑀼𑀧𑀜𑁆𑀘𑀸𑀤𑀺𑀓𑁂 ¶ 𑀩𑀳𑀯𑁄 𑀉𑀧𑀸𑀤𑀸𑀬, 𑀩𑀳𑀯𑁄 𑀧𑀦 𑀉𑀧𑀸𑀤𑀸𑀬 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀦 𑀤𑁆𑀯𑁂 𑀉𑀧𑀸𑀤𑀸𑀬, 𑀅𑀬𑀁 𑀲𑀓𑁆𑀓𑀝𑀪𑀸𑀲𑀸𑀬 𑀯𑀺𑀲𑁂𑀲𑁄. 𑀫𑀸𑀕𑀥𑀪𑀸𑀲𑀸𑀬𑀁 𑀧𑀦 𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀸𑀤𑀺𑀓𑁂 𑀩𑀳𑀯𑁄 𑀉𑀧𑀸𑀤𑀸𑀬 𑀧𑀼𑀣𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀯𑀺𑀲𑀼𑀁𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀦𑁆𑀢𑀺 𑀧𑀼𑀣𑀼𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀫𑀸𑀕𑀥𑀪𑀸𑀲𑀸𑀬 𑀯𑀺𑀲𑁂𑀲𑁄. 𑀢𑀲𑁆𑀫𑀸𑀢𑁆𑀭 𑀧𑀼𑀣𑀼𑀪𑀽𑀢𑀲𑁆𑀲, 𑀧𑀼𑀣𑀼𑀦𑁄 𑀯𑀸 𑀅𑀢𑁆𑀣𑀲𑁆𑀲 𑀯𑀘𑀦𑀁 ‘‘𑀧𑀼𑀣𑀼𑀯𑀘𑀦’’𑀦𑁆𑀢𑀺 𑀅𑀢𑁆𑀣𑁄 𑀲𑀫𑀥𑀺𑀕𑀦𑁆𑀢𑀩𑁆𑀩𑁄.

𑀇𑀤𑀸𑀦𑀺 ‘‘𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸, 𑀧𑀼𑀭𑀺𑀲’’𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀢𑁄 𑀉𑀤𑁆𑀥𑀭𑀺𑀢𑀦𑀬𑀁 𑀦𑀺𑀲𑁆𑀲𑀸𑀬 𑀧𑀓𑀢𑀺𑀭𑀽𑀧𑀪𑀽𑀢𑀲𑁆𑀲 𑀪𑀽𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀪𑀽𑀢𑁄, 𑀪𑀽𑀢𑀸. 𑀪𑀽𑀢𑀁, 𑀪𑀽𑀢𑁂. 𑀪𑀽𑀢𑁂𑀦, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑀸, 𑀪𑀽𑀢𑀲𑁆𑀫𑀸, 𑀪𑀽𑀢𑀫𑁆𑀳𑀸, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑁂, 𑀪𑀽𑀢𑀲𑁆𑀫𑀺𑀁, 𑀪𑀽𑀢𑀫𑁆𑀳𑀺, 𑀪𑀽𑀢𑁂𑀲𑀼. 𑀪𑁄 𑀪𑀽𑀢, 𑀪𑀯𑀦𑁆𑀢𑁄 𑀪𑀽𑀢𑀸.

𑀅𑀣 𑀯𑀸 ‘‘𑀪𑁄 𑀪𑀽𑀢𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀺𑀜𑁆𑀜𑁂𑀬𑁆𑀬𑀁. 𑀬𑀣𑀸 𑀧𑀦𑁂𑀢𑁆𑀣 𑀪𑀽𑀢𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑀺𑀢𑀸, 𑀏𑀯𑀁 𑀪𑀸𑀯𑀓𑀸𑀤𑀻𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀸𑀫 ‘‘𑀩𑀼𑀤𑁆𑀥𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀩𑀼𑀤𑁆𑀥𑀇𑀘𑁆𑀘𑀸𑀤𑀻𑀦𑀺 𑀧𑀓𑀢𑀺𑀭𑀽𑀧𑀸𑀦𑀺.

𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄 𑀫𑀕𑁆𑀕𑁄,

𑀔𑀦𑁆𑀥𑁄 𑀓𑀸𑀬𑁄 𑀓𑀸𑀫𑁄 𑀓𑀧𑁆𑀧𑁄;

𑀫𑀸𑀲𑁄 𑀧𑀓𑁆𑀔𑁄 𑀬𑀓𑁆𑀔𑁄 𑀪𑀓𑁆𑀔𑁄,

𑀦𑀸𑀕𑁄 𑀫𑁂𑀖𑁄 𑀪𑁄𑀕𑁄 𑀬𑀸𑀕𑁄.

𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄,

𑀫𑀓𑁆𑀔𑁄 𑀣𑀫𑁆𑀪𑁄 𑀓𑁄𑀥𑁄 𑀮𑁄𑀪𑁄;

𑀳𑀸𑀲𑁄 𑀯𑁂𑀭𑁄 𑀤𑀸𑀳𑁄 𑀢𑁂𑀚𑁄,

𑀙𑀦𑁆𑀤𑁄 𑀓𑀸𑀲𑁄 𑀲𑀸𑀲𑁄 𑀭𑁄𑀕𑁄.

𑀅𑀲𑁆𑀲𑁄 ¶ 𑀲𑀲𑁆𑀲𑁄 𑀇𑀲𑁆𑀲𑁄 𑀲𑀺𑀲𑁆𑀲𑁄,

𑀲𑀻𑀳𑁄 𑀩𑁆𑀬𑀕𑁆𑀖𑁄 𑀭𑀼𑀓𑁆𑀔𑁄 𑀲𑁂𑀮𑁄;

𑀇𑀦𑁆𑀤𑁄 𑀲𑀓𑁆𑀓𑁄 𑀤𑁂𑀯𑁄 𑀕𑀸𑀫𑁄,

𑀘𑀦𑁆𑀤𑁄 𑀲𑀽𑀭𑁄 𑀑𑀖𑁄 𑀤𑀻𑀧𑁄.

𑀧𑀲𑁆𑀲𑁄 𑀬𑀜𑁆𑀜𑁄 𑀘𑀸𑀕𑁄 𑀯𑀸𑀤𑁄,

𑀳𑀢𑁆𑀣𑁄 𑀧𑀢𑁆𑀢𑁄 𑀲𑁄𑀲𑁄 𑀕𑁂𑀥𑁄;

𑀲𑁄𑀫𑁄 𑀬𑁄𑀥𑁄 𑀕𑀘𑁆𑀙𑁄 𑀅𑀘𑁆𑀙𑁄,

𑀕𑁂𑀳𑁄 𑀫𑀸𑀴𑁄 𑀅𑀝𑁆𑀝𑁄 𑀲𑀸𑀮𑁄.

𑀦𑀭𑁄 𑀦𑀕𑁄 𑀫𑀺𑀕𑁄 𑀲𑀲𑁄,

𑀲𑀼𑀡𑁄 𑀩𑀓𑁄 𑀅𑀚𑁄 𑀤𑀺𑀚𑁄;

𑀳𑀬𑁄 𑀕𑀚𑁄 𑀔𑀭𑁄 𑀲𑀭𑁄,

𑀤𑀼𑀫𑁄 𑀢𑀮𑁄 𑀧𑀝𑁄 𑀥𑀚𑁄.

𑀉𑀭𑀕𑁄 𑀧𑀝𑀕𑁄 𑀯𑀺𑀳𑀕𑁄 𑀪𑀼𑀚𑀕𑁄,

𑀔𑀭𑀪𑁄 𑀲𑀭𑀪𑁄 𑀧𑀲𑀤𑁄 𑀕𑀯𑀚𑁄;

𑀫𑀳𑀺𑀲𑁄 𑀯𑀲𑀪𑁄 𑀅𑀲𑀼𑀭𑁄 𑀕𑀭𑀼𑀴𑁄,

𑀢𑀭𑀼𑀡𑁄 𑀯𑀭𑀼𑀡𑁄 𑀩𑀮𑀺𑀲𑁄 𑀧𑀮𑀺𑀖𑁄.

𑀲𑀸𑀮𑁄 𑀥𑀯𑁄 𑀘 𑀔𑀤𑀺𑀭𑁄,

𑀕𑁄𑀥𑀼𑀫𑁄 𑀲𑀝𑁆𑀞𑀺𑀓𑁄 𑀬𑀯𑁄;

𑀓𑀴𑀸𑀬𑁄 𑀘 𑀓𑀼𑀮𑀢𑁆𑀣𑁄 𑀘,

𑀢𑀺𑀮𑁄 𑀫𑀼𑀕𑁆𑀕𑁄 𑀘 𑀢𑀡𑁆𑀟𑀼𑀮𑁄.

𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄,

𑀲𑀼𑀤𑁆𑀤𑁄 𑀥𑀼𑀢𑁆𑀢𑁄 𑀘 𑀧𑀼𑀓𑁆𑀓𑀼𑀲𑁄;

𑀘𑀡𑁆𑀟𑀸𑀮𑁄 𑀧𑀢𑀺𑀓𑁄 𑀧𑀝𑁆𑀞𑁄,

𑀫𑀦𑀼𑀲𑁆𑀲𑁄 𑀭𑀣𑀺𑀓𑁄 𑀭𑀣𑁄.

𑀧𑀩𑁆𑀩𑀚𑀺𑀢𑁄 ¶ 𑀕𑀳𑀝𑁆𑀞𑁄 𑀘,

𑀕𑁄𑀡𑁄 𑀑𑀝𑁆𑀞𑁄 𑀘 𑀕𑀤𑁆𑀭𑀪𑁄;

𑀫𑀸𑀢𑀼𑀕𑀸𑀫𑁄 𑀘 𑀑𑀭𑁄𑀥𑁄,

𑀇𑀘𑁆𑀘𑀸𑀤𑀻𑀦𑀺 𑀯𑀺𑀪𑀸𑀯𑀬𑁂.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀦𑀦𑀼 𑀪𑁄 ‘𑀑𑀭𑁄𑀥𑀸 𑀘 𑀓𑀼𑀫𑀸𑀭𑀸 𑀘𑀸’𑀢𑀺 𑀧𑀸𑀞𑀲𑁆𑀲 𑀤𑀲𑁆𑀲𑀦𑀢𑁄 𑀑𑀭𑁄𑀥𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄’’𑀢𑀺? 𑀢𑀦𑁆𑀦, 𑀢𑀢𑁆𑀣 𑀳𑀺 ‘‘𑀑𑀭𑁄𑀥𑀸’’𑀢𑀺 𑀇𑀤𑀁 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀫𑁂𑀯, 𑀦𑀸’𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁, 𑀢𑀼𑀫𑁆𑀳𑁂 𑀧𑀦 ‘‘𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀯𑀤𑀣, 𑀦 𑀧𑀦𑀺𑀤𑀁 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁, 𑀅𑀣 𑀔𑁄 ‘‘𑀫𑀸𑀢𑀼𑀕𑀸𑀫𑀸’’𑀢𑀺𑀧𑀤𑀁 𑀯𑀺𑀬 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀫𑀸𑀓𑀸𑀭𑀦𑁆𑀢𑀧𑀤𑀦𑁆𑀢𑀺. 𑀦𑀦𑀼 𑀘 𑀪𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸𑀤𑀻𑀲𑀼 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀧𑀸𑀓𑀝𑀸, 𑀓𑀣𑀦𑁆𑀢𑀺 𑀘𑁂? ‘‘𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀧𑀞𑀫𑀫𑁂𑀯 𑀫𑀦𑀁 𑀧𑀮𑁄𑀪𑁂𑀢𑁆𑀯𑀸 ‘𑀇𑀢𑁄 𑀢𑁂 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀉𑀧𑀝𑁆𑀞𑀸𑀓𑁄 𑀭𑀸𑀚𑀸 𑀫𑀭𑀺𑀲𑁆𑀲𑀢𑀻’𑀢𑀺 𑀲𑀼𑀧𑀺𑀦𑁂 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑁄𑀭𑁄𑀥𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀽’’𑀢𑀺. 𑀏𑀢𑁆𑀣 𑀳𑀺 ‘‘𑀭𑀸𑀚𑁄𑀭𑁄𑀥𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀯 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀧𑀸𑀓𑀝𑀸𑀢𑀺? 𑀢𑀦𑁆𑀦, 𑀅𑀢𑁆𑀣𑀲𑁆𑀲 𑀤𑀼𑀕𑁆𑀕𑀳𑀡𑀢𑁄. 𑀤𑀼𑀕𑁆𑀕𑀳𑀺𑀢𑁄 𑀳𑀺 𑀏𑀢𑁆𑀣 𑀢𑀼𑀫𑁆𑀳𑁂𑀳𑀺 𑀅𑀢𑁆𑀣𑁄, 𑀏𑀢𑁆𑀣 𑀧𑀦 𑀑𑀭𑁄𑀥𑀲𑀤𑁆𑀤𑁂𑀦 𑀇𑀢𑁆𑀣𑀺𑀧𑀤𑀢𑁆𑀣𑀲𑁆𑀲 𑀓𑀣𑀦𑀢𑁄 𑀇𑀢𑁆𑀣𑀺𑀧𑀤𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀸 𑀇𑀢𑁆𑀣𑀺𑀬𑁄’’𑀢𑀺 𑀅𑀬𑀫𑁂𑀯𑀢𑁆𑀣𑁄. 𑀢𑀼𑀫𑁆𑀳𑁂 𑀧𑀦 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀤𑁆𑀥𑀢𑁆𑀢𑀸 𑀆𑀘𑀭𑀺𑀬𑀓𑀼𑀮𑁂 𑀘 𑀅𑀦𑀺𑀯𑀼𑀝𑁆𑀞𑀢𑁆𑀢𑀸 𑀏𑀢𑀁 𑀲𑀼𑀔𑀼𑀫𑀢𑁆𑀣𑀫𑀚𑀸𑀦𑀦𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁 𑀯𑀤𑀣.

𑀪𑀼𑀜𑁆𑀚𑀦𑀢𑁆𑀣𑀁 𑀓𑀣𑀦𑀢𑁆𑀣𑀁, 𑀫𑀼𑀔𑀁 𑀳𑁄𑀢𑀻𑀢𑀺 𑀦𑁄 𑀯𑀤𑁂;

𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁, 𑀯𑀘𑀦𑀁 𑀧𑀡𑁆𑀟𑀺𑀢𑁄 𑀦𑀭𑁄𑀢𑀺.

𑀦 𑀫𑀬𑀁𑀪𑁄 𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀽𑀴𑁆𑀳𑀁 𑀯𑀤𑀸𑀫, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀜𑁆𑀜𑁂𑀯 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀯𑀤𑀸𑀫, 𑀅𑀝𑁆𑀞𑀓𑀣𑀸𑀬𑁂𑀯 𑀅𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁 ¶ , 𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀲𑀤𑁆𑀤𑀳𑀸𑀫𑀸𑀢𑀺. 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀣 𑀯𑀸 𑀫𑀸 𑀯𑀸, 𑀫𑀸 𑀢𑀼𑀫𑁆𑀳𑁂 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀜𑁆𑀜𑁂𑀯 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀯𑀤𑀸𑀫𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂 𑀅𑀩𑁆𑀪𑀸𑀘𑀺𑀓𑁆𑀔𑀣. 𑀦 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀑𑀭𑁄𑀥𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀫𑀢𑁆𑀣𑀺, 𑀢𑀲𑁆𑀫𑀸𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂 𑀅𑀩𑁆𑀪𑀸𑀘𑀺𑀓𑁆𑀔𑀣, 𑀦 𑀬𑀼𑀢𑁆𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀕𑀭𑀽𑀦𑀫𑀩𑁆𑀪𑀸𑀘𑀺𑀓𑁆𑀔𑀦𑀁 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀢𑀢𑁄 𑀅𑀢𑁆𑀢𑀸𑀦𑀜𑁆𑀘 𑀔𑀡𑀢𑀻’’𑀢𑀺.

𑀏𑀯𑀁 𑀅𑀩𑁆𑀪𑀸𑀘𑀺𑀓𑁆𑀔𑀦𑀲𑁆𑀲 𑀅𑀬𑀼𑀢𑁆𑀢𑀢𑀁 𑀲𑀸𑀯𑀚𑁆𑀚𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 𑁋 𑀚𑀸𑀢𑀓𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀆𑀳𑀝𑀉𑀤𑀸𑀳𑀭𑀡𑀲𑀤𑀺𑀲𑀁 𑀉𑀤𑀸𑀳𑀭𑀡𑀫𑀢𑁆𑀣𑀺, 𑀢𑀁 𑀲𑀼𑀡𑀸𑀣. 𑀓𑁄𑀲𑀺𑀬𑀚𑀸𑀢𑀓𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀯𑀢𑁆𑀣𑀺𑀬𑀁 𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭𑁂𑀓𑀲𑁆𑀲 𑀲𑀤𑁆𑀥𑀲𑁆𑀲 𑀧𑀲𑀦𑁆𑀦𑀲𑁆𑀲 𑀉𑀧𑀸𑀲𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀳𑀺 ‘‘𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀫𑀸𑀢𑀼𑀕𑀸𑀫𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄𑀬𑁂𑀯 𑀲𑀺𑀬𑀸, 𑀦 𑀧𑀼𑀮𑁆𑀮𑀺𑀗𑁆𑀕𑁄, 𑀓𑀺𑀫𑀺𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀦 𑀧𑀲𑁆𑀲𑀣, 𑀢𑀤𑁂𑀯 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀲𑁆𑀲𑀣, 𑀓𑀺𑀁 𑀲𑀸 𑀏𑀯 𑀅𑀝𑁆𑀞𑀓𑀣𑀸 𑀢𑀼𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁, 𑀦 𑀢𑀤𑀜𑁆𑀜𑀸𑀢𑀺.

𑀬𑀤𑀺 𑀢𑀸𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀑𑀭𑁄𑀥𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣, 𑀏𑀢𑁆𑀣𑀸𑀧𑀺 𑀲𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣𑀸𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀅𑀧𑁆𑀧𑀝𑀺𑀪𑀸𑀦𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑁂𑀬𑁆𑀬𑀼𑀁. 𑀏𑀢𑁆𑀣𑀸𑀧𑀺 𑀫𑀸𑀢𑀼𑀕𑀸𑀫𑀲𑀤𑁆𑀤𑁂𑀦 𑀇𑀢𑁆𑀣𑀺𑀧𑀤𑀢𑁆𑀣𑀲𑁆𑀲 𑀓𑀣𑀦𑀢𑁄 𑀇𑀢𑁆𑀣𑀺𑀧𑀤𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀸 𑀇𑀢𑁆𑀣𑀻’’𑀢𑀺 𑀅𑀬𑀫𑁂𑀯𑀢𑁆𑀣𑁄. 𑀓𑀢𑁆𑀣𑀘𑀺 ¶ 𑀳𑀺 𑀧𑀥𑀸𑀦𑀯𑀸𑀘𑀓𑁂𑀦 𑀧𑀼𑀮𑁆𑀮𑀺𑀗𑁆𑀕𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀺𑀢𑁆𑀢𑀸𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑁂𑀧𑀺 𑀮𑀺𑀗𑁆𑀕𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀧𑀤𑀢𑁆𑀣𑀫𑁂𑀯𑀸𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? ‘‘𑀇𑀥 𑀯𑀺𑀲𑀸𑀔𑁂 𑀫𑀸𑀢𑀼𑀕𑀸𑀫𑁄 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸 𑀳𑁄𑀢𑀺 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 𑀪𑀢𑁆𑀢𑀼𑀫𑀦𑀸𑀧𑀁 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀻’’𑀢𑀺 𑀘, ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬, 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘. 𑀇𑀥 𑀫𑀮𑁆𑀮𑀺𑀓𑁂 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀓𑁄𑀥𑀦𑀸 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑀸, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀺𑀬𑀢𑀺 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀻’’𑀢𑀺 𑀘, ‘‘𑀢𑀁 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀇𑀢𑁆𑀣𑀺𑀭𑀢𑀦𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻’’𑀢𑀺 𑀘 𑀇𑀫𑁂 𑀧𑀬𑁄𑀕𑀸.

𑀓𑀢𑁆𑀣𑀘𑀺 𑀧𑀦 𑀧𑀥𑀸𑀦𑀯𑀸𑀘𑀓𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀺𑀢𑁆𑀢𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑁂𑀧𑀺 𑀮𑀺𑀗𑁆𑀕𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀭𑀺𑀲𑀧𑀤𑀢𑁆𑀣𑀫𑁂𑀯𑀸𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? ‘‘𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀺 𑀇𑀫𑀲𑁆𑀫𑀺𑀁 𑀇𑀲𑀺𑀕𑀺𑀮𑀺𑀲𑁆𑀫𑀺𑀁 𑀧𑀩𑁆𑀩𑀢𑁂 𑀘𑀺𑀭𑀦𑀺𑀯𑀸𑀲𑀺𑀦𑁄 𑀅𑀳𑁂𑀲𑀼𑀁. 𑀢𑀁 𑀔𑁄 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸’’𑀢𑀺. 𑀓𑀢𑁆𑀣𑀘𑀺 𑀧𑀥𑀸𑀦𑀯𑀸𑀘𑀓𑁂𑀦 𑀮𑀺𑀗𑁆𑀕𑀢𑁆𑀢𑀬𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲 𑀕𑀼𑀡𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀭𑀽𑀧𑀁 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? 𑀲𑀸 𑀇𑀢𑁆𑀣𑀻 ‘‘𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀅𑀝𑁆𑀞𑀳𑀺 𑀔𑁄 𑀦𑀓𑀼𑀮𑀫𑀸𑀢𑁂 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸 𑀫𑀦𑀸𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 ¶ 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄, 𑀲𑀤𑁆𑀥𑀁 𑀓𑀼𑀮𑀁, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳’’𑀦𑁆𑀢𑀺.

𑀲𑁂𑀬𑁆𑀬𑀇𑀢𑀺 𑀲𑀤𑁆𑀤𑁄 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀑𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀮𑀺𑀗𑁆𑀕𑀢𑁆𑀢𑀬𑀸𑀦𑀼𑀓𑀽𑀮𑁄 𑀪𑀯𑀢𑀺 𑀏𑀓𑀸𑀓𑀸𑀭𑁂𑀦𑁂𑀯 𑀢𑀺𑀝𑁆𑀞𑀦𑀢𑁄. 𑀓𑀣𑀁? 𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑀢𑀺𑀬𑀸 𑀉𑀧𑁂𑀢𑁄. 𑀏𑀲𑀸𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄.

‘‘𑀥𑀫𑁆𑀫𑁂𑀦 𑀘 𑀅𑀮𑀸𑀪𑁄 𑀬𑁄,

𑀬𑁄 𑀘 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄;

𑀅𑀮𑀸𑀪𑁄 𑀥𑀫𑁆𑀫𑀺𑀓𑁄 𑀲𑁂𑀬𑁆𑀬𑁄,

𑀬𑀜𑁆𑀘𑁂 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄.

𑀬𑀲𑁄 𑀘 𑀅𑀧𑁆𑀧𑀩𑀼𑀤𑁆𑀥𑀻𑀦𑀁, 𑀯𑀺𑀜𑁆𑀜𑀽𑀦𑀁 𑀅𑀬𑀲𑁄 𑀘 𑀬𑁄;

𑀅𑀬𑀲𑁄𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀦𑀁, 𑀦 𑀬𑀲𑁄 𑀅𑀧𑁆𑀧𑀩𑀼𑀤𑁆𑀥𑀺𑀦𑀁.

𑀤𑀼𑀫𑁆𑀫𑁂𑀥𑁂𑀳𑀺 𑀧𑀲𑀁𑀲𑀸 𑀘, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀘 𑀬𑀸;

𑀕𑀭𑀳𑀸𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺, 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸.

𑀲𑀼𑀔𑀜𑁆𑀘 𑀓𑀸𑀫𑀫𑀬𑀺𑀓𑀁, 𑀤𑀼𑀓𑁆𑀔𑀜𑁆𑀘 𑀧𑀯𑀺𑀯𑁂𑀓𑀺𑀓𑀁;

𑀧𑀯𑀺𑀯𑁂𑀓𑀁 𑀤𑀼𑀓𑁆𑀔𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀓𑀸𑀫𑀫𑀬𑀁 𑀲𑀼𑀔𑀁.

𑀚𑀻𑀯𑀺𑀢𑀜𑁆𑀘 𑀅𑀥𑀫𑁆𑀫𑁂𑀦, 𑀥𑀫𑁆𑀫𑁂𑀦 𑀫𑀭𑀡𑀜𑁆𑀘 𑀬𑀁;

𑀫𑀭𑀡𑀁 𑀥𑀫𑁆𑀫𑀺𑀓𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀅𑀥𑀫𑁆𑀫𑀺𑀓’’𑀦𑁆𑀢𑀺.

𑀏𑀯𑀫𑀬𑀁 𑀲𑁂𑀬𑁆𑀬 𑀇𑀢𑀺 𑀲𑀤𑁆𑀤𑁄 𑀑𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀮𑀺𑀗𑁆𑀕𑀢𑁆𑀢𑀬𑀸𑀦𑀼𑀓𑀽𑀮𑁄 𑀪𑀯𑀢𑀺. 𑀓𑀢𑁆𑀣𑀘𑀺 𑀧𑀦 𑀆𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀼𑀓𑀽𑀮𑁄 𑀤𑀺𑀲𑁆𑀲𑀢𑀺 ‘‘𑀇𑀢𑁆𑀣𑀻𑀧𑀺 𑀳𑀺 𑀏𑀓𑀘𑁆𑀘𑀺𑀬𑀸, 𑀲𑁂𑀬𑁆𑀬𑀸 𑀧𑁄𑀲 𑀚𑀦𑀸𑀥𑀺𑀧𑀸’’𑀢𑀺. 𑀦𑀺𑀕𑁆𑀕𑀳𑀻𑀢𑀦𑁆𑀢𑁄 𑀧𑀦 𑀳𑀼𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀼𑀓𑀽𑀮𑁄 𑀅𑀧𑀲𑀺𑀤𑁆𑀥𑁄. 𑀏𑀯𑀁𑀧𑀓𑀸𑀭𑁂 𑀧𑀬𑁄𑀕𑁂 𑀓𑀺𑀁 𑀢𑀼𑀫𑁆𑀳𑁂 𑀦 𑀧𑀲𑁆𑀲𑀣𑀸𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀘 𑀢𑁂 𑀦𑀺𑀭𑀼𑀢𑁆𑀢𑀭𑀸𑀯 𑀪𑀯𑀺𑀲𑁆𑀲𑀦𑁆𑀢𑀺.

𑀲𑀘𑁂𑀧𑀺 ¶ 𑀢𑁂 𑀏𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 ‘𑀫𑀸𑀢𑀼𑀕𑀸𑀫𑁄’𑀢𑀺 𑀯𑀸 ‘𑀫𑀸𑀢𑀼𑀕𑀸𑀫𑁂𑀦𑀸’𑀢𑀺 𑀯𑀸 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀢𑁄 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀫𑀸𑀢𑀼𑀕𑀸𑀫𑀲𑀤𑁆𑀤𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑁆𑀣𑀺𑀧𑀤𑀢𑁆𑀣𑀫𑁂𑀯 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀸 𑀇𑀢𑁆𑀣𑀻’’𑀢𑀺 𑀇𑀢𑁆𑀣𑀻𑀲𑀤𑁆𑀤𑁂𑀦 𑀲𑀸𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀁 𑀫𑀬𑀁 𑀲𑀫𑁆𑀧𑀝𑀺𑀘𑁆𑀙𑀸𑀫, ‘𑀑𑀭𑁄𑀥𑁄’𑀢𑀺 𑀯𑀸 ‘𑀑𑀭𑁄𑀥𑁂𑀦𑀸’𑀢𑀺 𑀯𑀸 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀲𑁆𑀲 𑀑𑀭𑁄𑀥𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀦 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀢𑁆𑀣𑀁 𑀦 𑀲𑀫𑁆𑀧𑀝𑀺𑀘𑁆𑀙𑀸𑀫𑀸’’𑀢𑀺. 𑀢𑀤𑀸 𑀢𑁂𑀲𑀁 𑀇𑀫𑀸𑀦𑀺 𑀯𑀺𑀦𑀬𑀧𑀸𑀴𑀺𑀬𑀁 𑀆𑀕𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀉𑀤𑁂𑀦𑁄 𑀉𑀬𑁆𑀬𑀸𑀦𑁂 𑀧𑀭𑀺𑀘𑀸𑀭𑁂𑀲𑀺 𑀲𑀤𑁆𑀥𑀺𑀁 𑀑𑀭𑁄𑀥𑁂𑀦, 𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀭𑀸𑀚𑀸𑀦𑀁 𑀉𑀤𑁂𑀦𑀁 𑀏𑀢𑀤𑀯𑁄𑀘𑀸’’𑀢𑀺. 𑀏𑀯𑀁 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀭𑀸𑀫𑁄 𑀦𑀸𑀫 𑀭𑀸𑀚𑀸 𑀓𑀼𑀝𑁆𑀞𑀭𑁄𑀕𑀻 𑀑𑀭𑁄𑀥𑁂𑀳𑀺 𑀘 𑀦𑀸𑀝𑀓𑁂𑀳𑀺 𑀘 𑀚𑀺𑀕𑀼𑀘𑁆𑀙𑀫𑀸𑀦𑁄’’𑀢𑀺 𑀯𑀘𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀕𑀭𑀼𑀓𑀼𑀮𑀫𑀼𑀧𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀲𑀸𑀥𑀼𑀓𑀁 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀉𑀕𑁆𑀕𑀡𑁆𑀳𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀫𑀸𑀢𑀼𑀕𑀸𑀫𑀲𑀤𑁆𑀤𑀸𑀤𑀻𑀲𑀼 𑀓𑀺𑀜𑁆𑀘𑀺 𑀯𑀺𑀦𑀺𑀘𑁆𑀙𑀬𑀁 𑀯𑀤𑀸𑀫 𑁋 𑀫𑀸𑀢𑀼𑀕𑀸𑀫𑀲𑀤𑁆𑀤𑁄 𑀘 𑀑𑀭𑁄𑀥𑀲𑀤𑁆𑀤𑁄 𑀘 𑀤𑀸𑀭𑀲𑀤𑁆𑀤𑁄 𑀘𑀸𑀢𑀺 𑀇𑀫𑁂 𑀇𑀢𑁆𑀣𑀺𑀧𑀤𑀢𑁆𑀣𑀯𑀸𑀘𑀓𑀸𑀧𑀺 𑀲𑀫𑀸𑀦𑀸 𑀏𑀓𑀦𑁆𑀢𑁂𑀦 𑀧𑀼𑀮𑁆𑀮𑀺𑀗𑁆𑀕𑀸 𑀪𑀯𑀦𑁆𑀢𑀺. 𑀢𑁂𑀲𑀼 𑀤𑀸𑀭𑀲𑀤𑁆𑀤𑀲𑁆𑀲 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀩𑀳𑀼𑀯𑀘𑀦𑀓𑀢𑁆𑀢𑀫𑁂𑀯 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀇𑀘𑁆𑀙𑀦𑁆𑀢𑀺, 𑀦 𑀏𑀓𑀯𑀘𑀦𑀓𑀢𑁆𑀢𑀁. 𑀫𑀬𑀁 𑀧𑀦 𑀤𑀸𑀭𑀲𑀤𑁆𑀤𑀲𑁆𑀲 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀯𑀘𑀦𑀓𑀢𑁆𑀢𑀁, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀩𑀳𑀼𑀯𑀘𑀦𑀓𑀢𑁆𑀢𑀁 𑀅𑀦𑀼𑀚𑀸𑀦𑀸𑀫, 𑀩𑀯𑁆𑀳𑀢𑁆𑀣𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀸𑀴𑀺𑀬𑀜𑁆𑀳𑀺 𑀤𑀸𑀭𑀲𑀤𑁆𑀤𑁄 𑀬𑁂𑀪𑀼𑀬𑁆𑀬𑁂𑀦 𑀩𑀳𑀼𑀯𑀘𑀦𑀓𑁄 𑀪𑀯𑀢𑀺, 𑀏𑀓𑀯𑀘𑀦𑀓𑁄 𑀅𑀧𑁆𑀧𑁄. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋

‘‘𑀤𑀸𑀲𑀸 ¶ 𑀘 𑀤𑀸𑀲𑁆𑀬𑁄 𑀅𑀦𑀼𑀚𑀻𑀯𑀺𑀦𑁄 𑀘,

𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀫𑀬𑀜𑁆𑀘 𑀲𑀩𑁆𑀩𑁂;

𑀥𑀫𑁆𑀫𑀜𑁆𑀘𑀭𑀸𑀫𑀧𑁆𑀧𑀭𑀮𑁄𑀓𑀳𑁂𑀢𑀼,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀺𑀬𑁆𑀬𑀭𑁂’’𑀢𑀺 𑀘,

‘‘𑀬𑁄 𑀜𑀸𑀢𑀻𑀦𑀁 𑀲𑀔𑀻𑀦𑀁 𑀯𑀸, 𑀤𑀸𑀭𑁂𑀲𑀼 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀳𑀲𑀸 𑀲𑀫𑁆𑀧𑀺𑀬𑀸𑀬𑁂𑀦, 𑀢𑀁 𑀚𑀜𑁆𑀜𑀸𑀯𑀲𑀮𑁄 𑀇𑀢𑀻’’𑀢𑀺 𑀘,

‘‘𑀲𑁂𑀳𑀺 𑀤𑀸𑀭𑁂𑀳𑀺’𑀲𑀦𑁆𑀢𑀼𑀝𑁆𑀞𑁄, 𑀯𑁂𑀲𑀺𑀬𑀸𑀲𑀼 𑀧𑀤𑀺𑀲𑁆𑀲𑀢𑀺;

𑀤𑀺𑀲𑁆𑀲𑀢𑀺 𑀧𑀭𑀤𑀸𑀭𑁂𑀲𑀼, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀘,

‘‘𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸’’𑀢𑀺 𑀘 𑀩𑁆𑀬𑀸𑀲𑁂, 𑀲𑀫𑀸𑀲𑁂 𑀧𑀦 ‘‘𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀫𑀢𑁆𑀢𑀦𑁄’’𑀢𑀺 𑀘 𑀏𑀯𑀫𑀸𑀤𑀬𑁄 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸 𑀩𑀳𑀯𑁄 𑀪𑀯𑀦𑁆𑀢𑀺.

𑀏𑀓𑀯𑀘𑀦𑀧𑁆𑀧𑀬𑁄𑀕𑀸 𑀧𑀦 𑀅𑀧𑁆𑀧𑀸. 𑀲𑁂𑀬𑁆𑀬𑀣𑀺𑀤𑀁? ‘‘𑀕𑀭𑀽𑀦𑀁 𑀤𑀸𑀭𑁂, 𑀥𑀫𑁆𑀫𑀁 𑀘𑀭𑁂 𑀬𑁄𑀧𑀺 𑀲𑀫𑀼𑀜𑁆𑀚𑀓𑀁 𑀘𑀭𑁂, 𑀤𑀸𑀭𑀜𑁆𑀘 𑀧𑁄𑀲𑀁 𑀤𑀤𑀫𑀧𑁆𑀧𑀓𑀲𑁆𑀫𑀺’’𑀦𑁆𑀢𑀺 𑀘,

‘‘𑀬𑁂 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺 𑀘,

‘‘𑀧𑀭𑀤𑀸𑀭𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀲𑀤𑀸𑀭𑀧𑀲𑀼𑀢𑁄 𑀲𑀺𑀬’’𑀦𑁆𑀢𑀺 𑀘,

‘‘𑀬𑁄 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁, 𑀚𑀸𑀢𑀺𑀁 𑀚𑀸𑀢𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀧𑀭𑀤𑀸𑀭𑀁 𑀯𑀺𑀯𑀚𑁆𑀚𑁂𑀬𑁆𑀬, 𑀥𑁄𑀢𑀧𑀸𑀤𑁄𑀯 𑀓𑀤𑁆𑀤𑀫’’𑀦𑁆𑀢𑀺 𑀘

𑀏𑀯𑀫𑀸𑀤𑀬𑁄 𑀏𑀓𑀯𑀘𑀦𑀧𑁆𑀧𑀬𑁄𑀕𑀸 𑀅𑀧𑁆𑀧𑀸.

𑀲𑀫𑀸𑀳𑀸𑀭𑀮𑀓𑁆𑀔𑀡𑀯𑀲𑁂𑀦 𑀧𑀦𑁂𑀲 𑀤𑀸𑀭𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀓𑀯𑀘𑀦𑁄𑀧𑀺 𑀓𑀢𑁆𑀣𑀘𑀺 𑀪𑀯𑀢𑀺. ‘‘𑀆𑀤𑀸𑀬 𑀧𑀼𑀢𑁆𑀢𑀤𑀸𑀭𑀁. 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄’’𑀇𑀢𑀺 𑀏𑀯𑀁 𑀇𑀥 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀮𑀺𑀗𑁆𑀕𑀜𑁆𑀘 𑀅𑀢𑁆𑀣𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀸’’𑀢𑀺 𑀧𑀯𑀢𑁆𑀢𑀁 𑀧𑀼𑀭𑀺𑀲𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 ¶ 𑀲𑀩𑁆𑀩𑁂𑀲𑀁 ‘‘𑀪𑀽𑀢𑁄 𑀪𑀸𑀯𑀓𑁄 𑀪𑀯𑁄’’𑀢𑀺𑀆𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀅𑀜𑁆𑀜𑁂𑀲𑀜𑁆𑀘𑁄𑀓𑀸𑀭𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀓𑁄𑀲𑀮𑁆𑀮𑀫𑀼𑀧𑁆𑀧𑀸𑀤𑁂𑀢𑀩𑁆𑀩𑀁.

𑀓𑀺𑀁 𑀧𑀦 𑀲𑀩𑁆𑀩𑀸𑀦𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀏𑀓𑀲𑀤𑀺𑀲𑀸𑀦𑁂𑀯 𑀳𑀼𑀢𑁆𑀯𑀸 𑀧𑀯𑀺𑀝𑁆𑀞𑀸𑀦𑀻𑀢𑀺? 𑀦 𑀧𑀯𑀺𑀝𑁆𑀞𑀸𑀦𑀺. 𑀓𑀸𑀦𑀺𑀘𑀺 𑀳𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘, 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘, 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀸𑀦𑁂𑀯. 𑀢𑀢𑁆𑀭 𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘? ‘‘𑀲𑀭𑁄 𑀯𑀬𑁄 𑀘𑁂𑀢𑁄’’𑀢𑀺𑀆𑀤𑀻𑀦𑀺. 𑀲𑀭𑁄𑀇𑀢𑀺 𑀳𑀺 𑀅𑀬𑀁𑀲𑀤𑁆𑀤𑁄 𑀉𑀲𑀼𑀲𑀤𑁆𑀤𑀲𑀭𑀯𑀦𑀅𑀓𑀸𑀭𑀸𑀤𑀺𑀲𑀭𑀯𑀸𑀘𑀓𑁄 𑀘𑁂, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀭𑀳𑀤𑀯𑀸𑀘𑀓𑁄 𑀘𑁂, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀯𑀬𑁄𑀇𑀢𑀺 𑀲𑀤𑁆𑀤𑁄 𑀧𑀭𑀺𑀳𑀸𑀦𑀺𑀯𑀸𑀘𑀓𑁄 𑀘𑁂, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀆𑀬𑀼𑀓𑁄𑀝𑁆𑀞𑀸𑀲𑀯𑀸𑀘𑀓𑁄 𑀘𑁂, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀘𑁂𑀢𑁄 𑀇𑀢𑀺 𑀲𑀤𑁆𑀤𑁄 𑀬𑀤𑀺 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑁄, 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑁄. 𑀬𑀤𑀺 𑀧𑀦 𑀘𑀺𑀢𑁆𑀢𑀯𑀸𑀘𑀓𑁄, 𑀫𑀦𑁄𑀕𑀡𑀧𑀓𑁆𑀔𑀺𑀓𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄. 𑀫𑀦𑁄𑀕𑀡𑁄 𑀘 𑀦𑀸𑀫 𑁋

𑀫𑀦𑁄 𑀯𑀘𑁄 𑀯𑀬𑁄 𑀢𑁂𑀚𑁄,

𑀢𑀧𑁄 𑀘𑁂𑀢𑁄 𑀢𑀫𑁄 𑀬𑀲𑁄;

𑀅𑀬𑁄 𑀧𑀬𑁄 𑀲𑀺𑀭𑁄 𑀙𑀦𑁆𑀤𑁄,

𑀲𑀭𑁄 𑀉𑀭𑁄 𑀭𑀳𑁄 𑀅𑀳𑁄 𑁋

𑀇𑀫𑁂 𑀲𑁄𑀴𑀲.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀫𑀦𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀓𑀣𑀬𑀸𑀫 𑁋

𑀫𑀦𑁄 ¶ , 𑀫𑀦𑀸. 𑀫𑀦𑀁, 𑀫𑀦𑁄, 𑀫𑀦𑁂. 𑀫𑀦𑀲𑀸, 𑀫𑀦𑁂𑀦, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁄, 𑀫𑀦𑀲𑁆𑀲, 𑀫𑀦𑀸𑀦𑀁. 𑀫𑀦𑀸, 𑀫𑀦𑀲𑁆𑀫𑀸, 𑀫𑀦𑀫𑁆𑀳𑀸, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁄, 𑀫𑀦𑀲𑁆𑀲, 𑀫𑀦𑀸𑀦𑀁. 𑀫𑀦𑀲𑀺, 𑀫𑀦𑁂, 𑀫𑀦𑀲𑁆𑀫𑀺𑀁, 𑀫𑀦𑀫𑁆𑀳𑀺, 𑀫𑀦𑁂𑀲𑀼. 𑀪𑁄 𑀫𑀦, 𑀪𑀯𑀦𑁆𑀢𑁄 𑀫𑀦𑀸.

𑀅𑀣 𑀯𑀸 ‘‘𑀪𑁄 𑀫𑀦𑀸’’𑀇𑀢𑀺 𑀩𑀳𑀼𑀯𑀘𑀦𑀫𑁆𑀧𑀺 𑀜𑁂𑀬𑁆𑀬𑀁. 𑀏𑀯𑀁 𑀯𑀘𑁄, 𑀯𑀘𑀸. 𑀯𑀘𑀁, 𑀯𑀘𑁄, 𑀯𑀘𑁂. 𑀯𑀘𑀲𑀸𑀢𑀺𑀆𑀤𑀺𑀦𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀳𑀲𑀤𑁆𑀤𑀲𑁆𑀲 𑀧𑀦 𑀪𑀼𑀫𑁆𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀅𑀳𑀲𑀺, 𑀅𑀳𑁂, 𑀅𑀳𑀲𑁆𑀫𑀺𑀁, 𑀅𑀳𑀫𑁆𑀳𑀺, 𑀅𑀳𑀼, 𑀅𑀳𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀭𑀽𑀧𑀦𑁆𑀢𑀭𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀫𑀦𑀲𑀤𑁆𑀤𑀲𑁆𑀲𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀤𑀸𑀫, 𑀅𑀝𑁆𑀞𑀸𑀦𑁂 𑀅𑀬𑀁 𑀓𑀣𑀺𑀢𑀸𑀢𑀺 𑀦 𑀘𑁄𑀤𑁂𑀢𑀩𑁆𑀩𑀁.

𑀫𑀦𑀁, 𑀫𑀦𑀸𑀦𑀺, 𑀫𑀦𑀸. 𑀫𑀦𑀁, 𑀫𑀦𑀸𑀦𑀺, 𑀫𑀦𑁂. 𑀫𑀦𑁂𑀦, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁆𑀲, 𑀫𑀦𑀲𑁄, 𑀫𑀦𑀸𑀦𑀁. 𑀫𑀦𑀸, 𑀫𑀦𑀲𑁆𑀫𑀸, 𑀫𑀦𑀫𑁆𑀳𑀸, 𑀫𑀦𑁂𑀳𑀺, 𑀫𑀦𑁂𑀪𑀺. 𑀫𑀦𑀲𑁆𑀲, 𑀫𑀦𑀲𑁄, 𑀫𑀦𑀸𑀦𑀁. 𑀫𑀦𑁂, 𑀫𑀦𑀲𑁆𑀫𑀺𑀁, 𑀫𑀦𑀫𑁆𑀳𑀺, 𑀫𑀦𑁂𑀲𑀼. 𑀪𑁄 𑀫𑀦, 𑀪𑀯𑀦𑁆𑀢𑁄 𑀫𑀦𑀸. 𑀅𑀣 𑀯𑀸 ‘‘𑀪𑁄 𑀫𑀦𑀸𑀦𑀺, 𑀪𑁄 𑀫𑀦𑀸’’𑀏𑀯𑀫𑁆𑀧𑀺 𑀩𑀳𑀼𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀦𑀬𑁄.

𑀏𑀢𑁆𑀣 𑀘 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀫𑀦𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀸𑀦𑀺 𑀫𑀦𑁄 𑀫𑀦𑀲𑀸 𑀫𑀦𑀲𑁄 𑀫𑀦𑀲𑀻𑀢𑀺 𑀭𑀽𑀧𑀸𑀦𑀺 𑀞𑀧𑁂𑀢𑁆𑀯𑀸 𑀬𑀸𑀦𑀺 𑀲𑁂𑀲𑀸𑀦𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀘 𑀫𑀦𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺 ‘‘𑀫𑀦𑀁 𑀫𑀦𑀸𑀦𑀻’’𑀢𑀺 𑀭𑀽𑀧𑀸𑀦𑀺 𑀘, 𑀅𑀝𑁆𑀞𑀫𑁆𑀬𑁄𑀧𑀬𑁄𑀕𑀯𑀘𑀦𑀸𑀦𑀁 ‘‘𑀫𑀦𑀁 𑀫𑀦𑀸𑀦𑀻’’𑀢𑀺 𑀭𑀽𑀧𑀤𑁆𑀯𑀬𑀜𑁆𑀘 𑀞𑀧𑁂𑀢𑁆𑀯𑀸 𑀬𑀸𑀦𑀺 𑀲𑁂𑀲𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀓𑀫𑀢𑁄 𑀲𑀫𑀲𑀫𑀸𑀦𑀺.

𑀓𑁂𑀘𑀺 𑀑𑀓𑀸𑀭𑀦𑁆𑀢𑁄 𑀫𑀦𑁄𑀇𑀢𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺 𑀯𑀤𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀬𑀤𑀺 𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀲𑀺𑀬𑀸, 𑀢𑀲𑁆𑀲𑀤𑀺𑀲𑁂𑀳𑀺 𑀯𑀘𑁄 𑀯𑀬𑁄𑀢𑀺𑀆𑀤𑀺𑀲𑀤𑁆𑀤𑁂𑀳𑀺𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑁂𑀯 𑀪𑀯𑀺𑀢𑀩𑁆𑀩𑀁, 𑀦 ‘‘𑀢𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀸’’𑀢𑀺 𑀕𑀭𑀽 𑀯𑀤𑀦𑁆𑀢𑀺, ‘‘𑀧𑀼𑀮𑁆𑀮𑀺𑀗𑁆𑀕𑀸’’𑀇𑀘𑁆𑀘𑁂𑀯 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀘 𑀧𑀸𑀴𑀺𑀬𑀁 ‘‘𑀓𑀸𑀬𑁄 𑀅𑀦𑀺𑀘𑁆𑀘𑁄; 𑀫𑀦𑁄 ¶ 𑀅𑀦𑀺𑀘𑁆𑀘𑁄’’𑀢𑀺 𑀘 ‘‘𑀓𑀸𑀬𑁄 𑀤𑀼𑀓𑁆𑀔𑁄, 𑀫𑀦𑁄 𑀤𑀼𑀓𑁆𑀔𑁄’’𑀢𑀺 𑀘 ‘‘𑀦𑀺𑀘𑁆𑀘𑁄 𑀯𑀸 𑀅𑀦𑀺𑀘𑁆𑀘𑁄 𑀯𑀸𑀢𑀺 𑀅𑀦𑀺𑀘𑁆𑀘𑁄 𑀪𑀦𑁆𑀢𑁂’’𑀢𑀺 𑀘 𑀏𑀯𑀫𑀸𑀤𑀬𑁄 𑀧𑀼𑀮𑁆𑀮𑀺𑀗𑁆𑀕𑀧𑁆𑀧𑀬𑁄𑀕𑀸 𑀩𑀳𑀯𑁄 𑀤𑀺𑀝𑁆𑀞𑀸. 𑀢𑁂𑀦 𑀜𑀸𑀬𑀢𑀺 𑀫𑀦𑁄𑀲𑀤𑁆𑀤𑁄 𑀏𑀓𑀦𑁆𑀢𑁂𑀦 𑀧𑀼𑀮𑁆𑀮𑀺𑀗𑁆𑀕𑁄𑀢𑀺. 𑀬𑀤𑀺 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀲𑀺𑀬𑀸, ‘‘𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄’’𑀢𑀺 𑀏𑀯𑀫𑀸𑀤𑀻𑀦𑀺 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀅𑀦𑁂𑀓𑀧𑀤𑀲𑀢𑀸𑀦𑀺𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑁂𑀯 𑀲𑀺𑀬𑀼𑀁. 𑀦 𑀳𑀺 𑀢𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺, 𑀅𑀣 𑀔𑁄 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀓𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀺. 𑀏𑀯𑀁 𑀫𑀦𑁄𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑀸 𑀧𑀘𑁆𑀘𑁂𑀢𑀩𑁆𑀩𑀸𑀢𑀺, 𑀲𑀘𑁂 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀦 𑀳𑁄𑀢𑀺, 𑀓𑀣𑀁 ‘‘𑀫𑀦𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀭𑀽𑀧𑀁 𑀤𑀺𑀲𑁆𑀲𑀢𑀻𑀢𑀺? 𑀲𑀘𑁆𑀘𑀁 ‘‘𑀫𑀦𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁂𑀯, 𑀢𑀣𑀸𑀧𑀺 𑀫𑀦𑁄𑀕𑀡𑁂 𑀧𑀫𑀼𑀔𑀪𑀸𑀯𑁂𑀦 𑀕𑀳𑀺𑀢𑀲𑁆𑀲𑁄𑀓𑀸𑀭𑀦𑁆𑀢𑀲𑁆𑀲 𑀫𑀦𑀲𑀤𑁆𑀤𑀲𑁆𑀲 𑀭𑀽𑀧𑀁 𑀦 𑀳𑁄𑀢𑀺. 𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀘𑁂? 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀫𑀸𑀦𑀮𑀺𑀗𑁆𑀕𑀲𑁆𑀲 𑀲𑀫𑀸𑀦𑀲𑀼𑀢𑀺𑀢𑁆𑀢𑁂𑀧𑀺 𑀫𑀦𑁄𑀕𑀡𑁂 𑀅𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑁆𑀲𑁂𑀯 𑀫𑀦𑀲𑀤𑁆𑀤𑀲𑁆𑀲 𑀭𑀽𑀧𑀁. 𑀫𑀦𑀲𑀤𑁆𑀤𑁄 𑀳𑀺 𑀧𑀼𑀦𑁆𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺 ‘‘𑀫𑀦𑁄 𑀫𑀦𑀁’’𑀇𑀢𑀺 𑀬𑀣𑀸 ‘‘𑀅𑀚𑁆𑀚𑀯𑁄𑀅𑀚𑁆𑀚𑀯’’𑀦𑁆𑀢𑀺. ‘‘𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺. 𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀻’’𑀢𑀺 𑀳𑀺 𑀧𑀸𑀴𑀺. 𑀬𑀤𑀺 𑀘 𑀲𑁄 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀦 𑀳𑁄𑀢𑀺.

‘‘𑀕𑀭𑀼 𑀘𑁂𑀢𑀺𑀬𑀧𑀩𑁆𑀩𑀢𑀯𑀢𑁆𑀢𑀦𑀺𑀬𑀸,

𑀧𑀫𑀤𑀸 𑀧𑀫𑀤𑀸 𑀧𑀫𑀤𑀸 𑀯𑀺𑀫𑀤𑀁;

𑀲𑀫𑀡𑀁 𑀲𑀼𑀦𑀺𑀲𑀫𑁆𑀫 𑀅𑀓𑀸 𑀳𑀲𑀺𑀢𑀁,

𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺

𑀏𑀢𑁆𑀣 𑀫𑀦𑁄𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄 ‘‘𑀧𑀢𑀺𑀢’’𑀦𑁆𑀢𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀓𑀲𑁆𑀫𑀸 𑀲𑀦𑁆𑀦𑀺𑀳𑀺𑀢𑁄. 𑀬𑀲𑁆𑀫𑀸 𑀘 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀲𑀦𑁆𑀦𑀺𑀳𑀺𑀢𑀁, 𑀢𑀲𑁆𑀫𑀸 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀯𑀲𑁂𑀦 𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺 𑀜𑀸𑀬𑀢𑀻𑀢𑀺? 𑀢𑀦𑁆𑀦, 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀲𑁆𑀲 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀯𑀺𑀲𑁂𑀲𑀸𑀚𑁄𑀢𑀦𑀢𑁄. 𑀬𑀤𑀺 𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀯𑀺𑀲𑁂𑀲𑀁 𑀚𑁄𑀢𑁂𑀬𑁆𑀬, ‘‘𑀘𑀢𑁆𑀢𑀸𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀏𑀢𑁆𑀣𑀸𑀧𑀺 ‘‘𑀘𑀢𑁆𑀢𑀸𑀭𑁄’’𑀢𑀺 ¶ 𑀧𑀤𑀁 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀓𑀭𑁂𑀬𑁆𑀬, 𑀦 𑀘 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑁄 𑀳𑀺 𑀏𑀓𑀦𑁆𑀢𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄. 𑀬𑀤𑀺 𑀢𑀼𑀫𑁆𑀳𑁂 ‘‘𑀧𑀢𑀺𑀢’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀺𑀲𑁆𑀲𑀸𑀬 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀫𑀺𑀘𑁆𑀙𑀣, ‘‘𑀘𑀢𑁆𑀢𑀸𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀏𑀢𑁆𑀣𑀧𑀺 ‘‘𑀘𑀢𑁆𑀢𑀸𑀭𑁄’’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀺𑀲𑁆𑀲𑀸𑀬 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀣𑀸𑀢𑀺. 𑀦 𑀫𑀬𑀁 𑀪𑁄 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀸𑀫, 𑀅𑀣 𑀔𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁𑀬𑁂𑀯 𑀇𑀘𑁆𑀙𑀸𑀫, ‘‘𑀘𑀢𑁆𑀢𑀸𑀭𑁄’’𑀢𑀺 𑀧𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀢𑁆𑀢𑀸 ‘‘𑀘𑀢𑁆𑀢𑀸𑀭𑀻’’𑀢𑀺 𑀕𑀡𑁆𑀳𑀸𑀫, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀅𑀢𑁆𑀣𑀁 𑀥𑀸𑀭𑁂𑀫𑀸𑀢𑀺. 𑀬𑀤𑀺 𑀏𑀯𑀁 ‘‘𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀢𑀺𑀢’’𑀦𑁆𑀢𑀺 𑀧𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀦𑁆𑀢𑀺 𑀫𑀦𑁆𑀢𑁆𑀯𑀸 ‘‘𑀧𑀢𑀺𑀢𑁄’’𑀢𑀺 𑀅𑀢𑁆𑀣𑀁 𑀥𑀸𑀭𑁂𑀣𑀸𑀢𑀺. 𑀦 𑀥𑀸𑀭𑁂𑀫 𑀏𑀢𑁆𑀣 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀲𑁆𑀲 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁄. 𑀬𑀤𑀺 𑀳𑀺 𑀫𑀦𑁄𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄 𑀲𑀺𑀬𑀸, 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 ‘‘𑀧𑀢𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀺𑀫𑀸𑀘𑀭𑀺𑀬𑁄 𑀏𑀯𑀁 𑀯𑀢𑁆𑀢𑀼𑀁 𑀦 𑀚𑀸𑀦𑀺, 𑀚𑀸𑀦𑀫𑀸𑀦𑁄 𑀏𑀯 𑀲𑁄 ‘‘𑀧𑀢𑀺𑀢𑁄’’𑀢𑀺 𑀦𑀸𑀯𑁄𑀘, ‘‘𑀧𑀢𑀺𑀢’’𑀦𑁆𑀢𑀺 𑀧𑀦𑀸𑀯𑁄𑀘, 𑀢𑁂𑀦 𑀜𑀸𑀬𑀢𑀺 ‘‘𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄’’𑀢𑀺. 𑀫𑀸 𑀢𑀼𑀫𑁆𑀳𑁂 𑀏𑀯𑀁 𑀯𑀤𑁂𑀣, 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁 𑀦𑀸𑀫 𑀓𑀢𑁆𑀣𑀘𑀺 𑀧𑀥𑀸𑀦𑀮𑀺𑀗𑁆𑀕𑀫𑀦𑀼𑀯𑀢𑁆𑀢𑀢𑀺, 𑀓𑀢𑁆𑀣𑀘𑀺 𑀦𑀸𑀦𑀼𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦 𑀢𑀁 𑀮𑀺𑀗𑁆𑀕𑀯𑀺𑀲𑁂𑀲𑀚𑁄𑀢𑀦𑁂 𑀏𑀓𑀦𑁆𑀢𑀢𑁄 𑀧𑀫𑀸𑀡𑀁. ‘‘𑀫𑀸𑀢𑀼𑀕𑀸𑀫𑁄, 𑀑𑀭𑁄𑀥𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀏𑀳𑀺 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀻𑀦𑀻’’𑀢𑀺 𑀏𑀯𑀫𑀸𑀤𑀺𑀭𑀽𑀧𑀯𑀺𑀲𑁂𑀲𑁄𑀬𑁂𑀯 𑀧𑀫𑀸𑀡𑀁. 𑀬𑀤𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀬𑁂𑀯 𑀮𑀺𑀗𑁆𑀕𑀯𑀺𑀲𑁂𑀲𑁄 𑀅𑀥𑀺𑀕𑀦𑁆𑀢𑀩𑁆𑀩𑁄 𑀲𑀺𑀬𑀸, ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀻𑀲𑀼 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑀲𑁆𑀫𑀸 𑀏𑀯𑀫𑀸𑀤𑀻𑀲𑀼𑀧𑀺 𑀞𑀸𑀦𑁂𑀲𑀼 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑀳𑁄𑀢𑀺𑀬𑁂𑀯. 𑀓𑀣𑀁? ‘‘𑀘𑀢𑁆𑀢𑀸𑀭𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀁 ‘‘𑀫𑀳𑀸𑀪𑀽𑀢𑀸’’𑀢𑀺 𑀦𑀧𑀼𑀁𑀲𑀓𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀢𑀺𑀢𑀁 𑀅𑀲𑀼𑀪𑁂𑀲𑀼 𑀫𑀼𑀦𑀺𑀲𑁆𑀲 𑀫𑀦𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀢𑀺𑀢’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 ‘‘𑀫𑀦𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀦𑁆𑀢𑀺 𑀯𑀯𑀢𑁆𑀣𑀸𑀦𑀁 𑀪𑀯𑀢𑀻𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀢𑁂 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁄 ¶ 𑀢𑁂𑀲𑀁 𑀢𑀼𑀡𑁆𑀳𑀻𑀪𑀽𑀢𑀸𑀦𑀁 𑀇𑀤𑀁 𑀯𑀢𑁆𑀢𑀩𑁆𑀩𑀁 𑁋 𑀬𑀲𑁆𑀫𑀸 𑀫𑀦𑁄𑀕𑀡𑁂 𑀧𑀯𑀢𑁆𑀢𑀸𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀫𑀦𑁄𑀕𑀡𑁂 𑀧𑀫𑀼𑀔𑀲𑁆𑀲 𑀫𑀦𑁄𑀲𑀤𑁆𑀤𑀲𑁆𑀲𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀯𑀲𑁂𑀦 𑀬𑁄𑀚𑀺𑀢𑀸𑀦𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸 ‘‘𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦, 𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄’𑀧𑀬𑀸𑀢𑀺. 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀦𑁆𑀢𑀺 𑀤𑀼𑀩𑁆𑀩𑀘𑁄. 𑀅𑀯𑀦𑀢𑀁 𑀲𑀺𑀭𑁄 𑀬𑀲𑁆𑀲 𑀲𑁄𑀬𑀁 𑀅𑀯𑀁𑀲𑀺𑀭𑁄, 𑀅𑀧𑁆𑀧𑀓𑀁 𑀭𑀸𑀕𑀸𑀤𑀺 𑀭𑀚𑁄 𑀬𑁂𑀲𑀁 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀭𑀘𑀦𑀁 𑀓𑀼𑀩𑁆𑀩𑀺𑀁𑀲𑀼, 𑀦 𑀧𑀦 𑀢𑁂𑀳𑀺 𑀯𑀘𑁄 𑀲𑀺𑀭𑁄 𑀭𑀚𑁄𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 𑀈𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀓𑀢𑀸, 𑀅𑀣 𑀔𑁄 𑀲𑀺𑀭𑁄𑀫𑀦𑁄𑀲𑀤𑁆𑀤𑀸𑀦𑀁 𑀫𑀦𑁄𑀕𑀡𑁂 𑀧𑀯𑀢𑁆𑀢𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑁆𑀤𑀸𑀦𑀁 𑀓𑀢𑁆𑀣𑀘𑀺𑀧𑀺 𑀈𑀤𑀺𑀲𑀸𑀦𑀺𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑀸𑀦𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀭𑁂𑀲𑀁 𑀚𑀸𑀦𑀸𑀧𑀦𑀸𑀥𑀺𑀧𑁆𑀧𑀸𑀬𑀯𑀢𑀺𑀬𑀸 𑀅𑀦𑀼𑀓𑀫𑁆𑀧𑀸𑀬 𑀯𑀺𑀭𑀘𑀺𑀢𑀸. 𑀏𑀢𑁆𑀣𑀸𑀧𑀺 𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀲𑀢𑀺 𑀯𑀘𑁄 𑀲𑀺𑀭𑁄 𑀇𑀘𑁆𑀘𑀸𑀤𑀬𑁄𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀫𑀸𑀧𑀚𑁆𑀚𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀓𑀺𑀁 𑀧𑀦𑁂𑀢𑁂𑀲𑀫𑁆𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀇𑀘𑁆𑀙𑀣𑀸𑀢𑀺. 𑀅𑀤𑁆𑀥𑀸 𑀢𑁂 𑀇𑀤𑀫𑁆𑀧𑀺 𑀲𑀼𑀢𑁆𑀯𑀸 𑀦𑀺𑀩𑁆𑀩𑁂𑀞𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀢𑁂 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀓𑀸𑀭𑀡𑀁 𑀅𑀧𑀲𑁆𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀬𑀤𑀺 𑀪𑁄 𑀫𑀦𑁄 𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀦 𑀳𑁄𑀢𑀺, 𑀓𑀲𑁆𑀫𑀸 𑀯𑁂𑀬𑁆𑀬𑀸𑀓𑀭𑀡𑀸 ‘𑀫𑀦𑁄𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄’𑀢𑀺 𑀯𑀤𑀦𑁆𑀢𑀻’’𑀢𑀺? 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀬𑀤𑀺 𑀢𑀼𑀫𑁆𑀳𑁂 𑀯𑁂𑀬𑁆𑀬𑀸𑀓𑀭𑀡𑀫𑀢𑀁 𑀕𑀳𑁂𑀢𑁆𑀯𑀸 𑀫𑀦𑁄𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀭𑁄𑀘𑁂𑀣, 𑀦𑀦𑀼 𑀪𑀕𑀯𑀸𑀬𑁂𑀯 𑀮𑁄𑀓𑁂 𑀅𑀲𑀤𑀺𑀲𑁄 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄 𑀫𑀳𑀸𑀧𑀼𑀭𑀺𑀲𑁄 𑀯𑀺𑀲𑀸𑀭𑀤𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑁄. 𑀪𑀕𑀯𑀦𑁆𑀢𑀜𑁆𑀳𑀺 𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸 𑀅𑀫𑁆𑀩𑀝𑁆𑀞𑀫𑀸𑀡𑀯𑀧𑁄𑀓𑁆𑀔𑀭𑀲𑀸𑀢𑀺𑀲𑁄𑀡𑀤𑀡𑁆𑀟𑀸𑀤𑀬𑁄 𑀘 𑀩𑁆𑀭𑀸𑀳𑁆𑀫𑀡𑀸 𑀲𑀘𑁆𑀘𑀓𑀦𑀺𑀕𑀡𑁆𑀞𑀸𑀤𑀬𑁄 𑀘 𑀧𑀭𑀺𑀩𑁆𑀩𑀸𑀚𑀓𑀸 ¶ 𑀯𑀸𑀤𑁂𑀦 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼, 𑀅𑀜𑁆𑀜𑀤𑀢𑁆𑀣𑀼 𑀪𑀕𑀯𑀸𑀬𑁂𑀯 𑀫𑀢𑁆𑀢𑀯𑀸𑀭𑀡𑀕𑀡𑀫𑀚𑁆𑀛𑁂 𑀓𑁂𑀲𑀭𑀲𑀻𑀳𑁄 𑀯𑀺𑀬 𑀅𑀲𑀫𑁆𑀪𑀻𑀢𑁄 𑀦𑁂𑀲𑀁 𑀦𑁂𑀲𑀁 𑀯𑀸𑀤𑀁 𑀫𑀤𑁆𑀤𑁂𑀲𑀺, 𑀫𑀳𑀦𑁆𑀢𑁂 𑀘 𑀦𑁂 𑀅𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀏𑀯𑀁𑀯𑀺𑀥𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀓𑀼𑀲𑀮𑁂𑀦 𑀬𑀲𑁆𑀫𑀸 ‘‘𑀓𑀸𑀬𑁄 𑀅𑀦𑀺𑀘𑁆𑀘𑁄’’𑀢𑀺 𑀘 ‘‘𑀓𑀸𑀬𑁄 𑀤𑀼𑀓𑁆𑀔𑁄, 𑀫𑀦𑁄 𑀅𑀦𑀺𑀘𑁆𑀘𑁄, 𑀫𑀦𑁄 𑀤𑀼𑀓𑁆𑀔𑁄’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑀸 𑀫𑀦𑁄𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀲𑀽𑀘𑀦𑀺𑀓𑀸 𑀩𑀳𑀽 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀦𑁄𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄𑀬𑁂𑀯𑀸𑀢𑀺 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀅𑀧𑁆𑀧𑀝𑀺𑀪𑀸𑀦𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺.

𑀇𑀤𑀸𑀦𑀺 𑀲𑀭𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀲𑁂𑀲𑀢𑁄 𑀯𑀼𑀘𑁆𑀘𑀢𑁂 𑁋

𑀲𑀭𑁄, 𑀲𑀭𑀸. 𑀲𑀭𑀁, 𑀲𑀭𑁂. 𑀲𑀭𑁂𑀦, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀸, 𑀲𑀭𑀲𑁆𑀫𑀸, 𑀲𑀭𑀫𑁆𑀳𑀸, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑁂, 𑀲𑀭𑀲𑁆𑀫𑀺𑀁, 𑀲𑀭𑀫𑁆𑀳𑀺, 𑀲𑀭𑁂𑀲𑀼. 𑀪𑁄 𑀲𑀭, 𑀪𑀯𑀦𑁆𑀢𑁄 𑀲𑀭𑀸.

𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀉𑀲𑀼𑀲𑀤𑁆𑀤𑀲𑀭𑀯𑀦𑀅𑀓𑀸𑀭𑀸𑀤𑀺𑀲𑀭𑀯𑀸𑀘𑀓𑀲𑁆𑀲 𑀲𑀭𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀫𑀦𑁄𑀕𑀡𑀧𑀓𑁆𑀔𑀺𑀓𑀲𑁆𑀲 𑀭𑀳𑀤𑀯𑀸𑀘𑀓𑀲𑁆𑀲 𑀲𑀭𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀲𑀭𑁄, 𑀲𑀭𑀸. 𑀲𑀭𑀁, 𑀲𑀭𑁄, 𑀲𑀭𑁂. 𑀲𑀭𑀲𑀸, 𑀲𑀭𑁂𑀦, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁄, 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀸, 𑀲𑀭𑀲𑁆𑀫𑀸, 𑀲𑀭𑀫𑁆𑀳𑀸, 𑀲𑀭𑁂𑀳𑀺, 𑀲𑀭𑁂𑀪𑀺. 𑀲𑀭𑀲𑁄, 𑀲𑀭𑀲𑁆𑀲, 𑀲𑀭𑀸𑀦𑀁. 𑀲𑀭𑀲𑀺, 𑀲𑀭𑁂, 𑀲𑀭𑀲𑁆𑀫𑀺𑀁, 𑀲𑀭𑀫𑁆𑀳𑀺, 𑀲𑀭𑁂𑀲𑀼. 𑀪𑁄 𑀲𑀭, 𑀪𑀯𑀦𑁆𑀢𑁄 𑀲𑀭𑀸, 𑀪𑁄 𑀲𑀭𑀸 𑀇𑀢𑀺 𑀯𑀸.

𑀯𑀬𑁄, 𑀯𑀬𑀸. 𑀯𑀬𑀁, 𑀯𑀬𑁂. 𑀯𑀬𑁂𑀦, 𑀯𑀬𑁂𑀳𑀺, 𑀯𑀬𑁂𑀪𑀻𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂 𑀬𑁆𑀬𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀧𑀭𑀺𑀳𑀸𑀦𑀺𑀯𑀸𑀘𑀓𑀲𑁆𑀲 𑀯𑀬𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 ¶ 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀫𑀦𑁄𑀕𑀡𑀧𑀓𑁆𑀔𑀺𑀓𑀲𑁆𑀲 𑀆𑀬𑀼𑀓𑁄𑀝𑁆𑀞𑀸𑀲𑀯𑀸𑀘𑀓𑀲𑁆𑀲 𑀯𑀬𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋 𑀯𑀬𑁄, 𑀯𑀬𑀸. 𑀯𑀬𑀁, 𑀯𑀬𑁄, 𑀯𑀬𑁂. 𑀯𑀬𑀲𑀸, 𑀯𑀬𑁂𑀦, 𑀯𑀬𑁂𑀳𑀺, 𑀯𑀬𑁂𑀪𑀻𑀢𑀺 𑀫𑀦𑀦𑀬𑁂𑀦 𑀜𑁂𑀬𑁆𑀬𑁄. 𑀢𑀲𑁆𑀲 𑀘𑁂𑀢𑁄 𑀧𑀝𑀺𑀲𑁆𑀲𑁄𑀲𑀺, 𑀅𑀭𑀜𑁆𑀜𑁂 𑀮𑀼𑀤𑁆𑀤𑀕𑁄𑀘𑀭𑁄. 𑀘𑁂𑀢𑀸 𑀳𑀦𑀺𑀁𑀲𑀼 𑀯𑁂𑀤𑀩𑁆𑀩𑀁.

𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑁂𑀦, 𑀘𑁂𑀢𑁂𑀳𑀺, 𑀘𑁂𑀢𑁂𑀪𑀻𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀅𑀬𑀁 𑀧𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋 𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁄, 𑀘𑁂𑀢𑁂. 𑀘𑁂𑀢𑀲𑀸, 𑀘𑁂𑀢𑁂𑀦, 𑀘𑁂𑀢𑁂𑀳𑀺, 𑀘𑁂𑀢𑁂𑀪𑀻𑀢𑀺 𑀫𑀦𑀦𑀬𑁂𑀦 𑀜𑁂𑀬𑁆𑀬𑁄. 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄, 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁, 𑀬𑀲𑁂𑀦 𑀓𑀼𑀮𑀧𑀼𑀢𑁆𑀢𑁂𑀦𑀸𑀢𑀺 𑀏𑀓𑀯𑀘𑀦𑀯𑀲𑁂𑀦 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸, 𑀏𑀓𑀯𑀘𑀦𑀧𑀼𑀣𑀼𑀯𑀘𑀦𑀯𑀲𑁂𑀦 𑀯𑀸. 𑀏𑀯𑀁 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺, 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑀜𑁆𑀜𑀼𑀦𑁄 𑀳𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑀁 𑀅𑀚𑀸𑀦𑀦𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀭𑁄𑀧𑁂𑀦𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀯𑀺𑀭𑀸𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀏𑀢𑁆𑀣 𑀅𑀫𑁆𑀳𑁂𑀳𑀺 𑀧𑀓𑀸𑀲𑀺𑀢𑁄 𑀯𑀺𑀪𑀸𑀕𑁄, 𑀲𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀓𑁆𑀓𑀘𑁆𑀘𑀫𑀼𑀕𑁆𑀕𑀳𑁂𑀢𑀩𑁆𑀩𑁄. 𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘? 𑀫𑀦𑁄 𑀯𑀘𑁄 𑀢𑁂𑀚𑁄𑀲𑀤𑁆𑀤𑀸𑀤𑀬𑁄 𑀘𑁂𑀯 𑀅𑀬𑁆𑀬𑀲𑀤𑁆𑀤𑁄 𑀘, 𑀢𑀢𑁆𑀭 𑀫𑀦𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀸.

𑀅𑀬𑁆𑀬𑀲𑀤𑁆𑀤𑀲𑁆𑀲 ¶ 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 ‘‘𑀅𑀬𑁆𑀬𑁄, 𑀅𑀬𑁆𑀬𑀸. 𑀅𑀬𑁆𑀬𑀁, 𑀅𑀬𑁆𑀬𑁂’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀯𑀢𑁆𑀯𑀸 𑀆𑀮𑀧𑀦𑀝𑁆𑀞𑀸𑀦𑁂 ‘‘𑀪𑁄 𑀅𑀬𑁆𑀬, 𑀪𑁄 𑀅𑀬𑁆𑀬𑁄’’𑀢𑀺 𑀤𑁆𑀯𑁂 𑀏𑀓𑀯𑀘𑀦𑀸𑀦𑀺, ‘‘𑀪𑀯𑀦𑁆𑀢𑁄 𑀅𑀬𑁆𑀬𑀸, 𑀪𑀯𑀦𑁆𑀢𑁄 𑀅𑀬𑁆𑀬𑁄’’𑀢𑀺 𑀤𑁆𑀯𑁂 𑀩𑀳𑀼𑀯𑀘𑀦𑀸𑀦𑀺 𑀘 𑀯𑀢𑁆𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀅𑀬𑁆𑀬𑁄 𑀇𑀢𑀺 𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀯𑀘𑀦𑀪𑀸𑀯𑁂 𑀏𑀓𑀯𑀘𑀦𑀁, 𑀆𑀮𑀧𑀦𑀯𑀘𑀦𑀪𑀸𑀯𑁂 𑀏𑀓𑀯𑀘𑀦𑀜𑁆𑀘𑁂𑀯 𑀩𑀳𑀼𑀯𑀘𑀦𑀜𑁆𑀘. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 ‘‘𑀅𑀬𑁆𑀬𑁄 𑀓𑀺𑀭 𑀲𑀸𑀕𑀢𑁄 𑀅𑀫𑁆𑀩𑀢𑀺𑀢𑁆𑀣𑀺𑀓𑁂𑀦 𑀦𑀸𑀕𑁂𑀦 𑀲𑀗𑁆𑀕𑀸𑀫𑁂𑀲𑀺, 𑀧𑀺𑀯𑀢𑀼 𑀪𑀦𑁆𑀢𑁂 𑀅𑀬𑁆𑀬𑁄 𑀲𑀸𑀕𑀢𑁄 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀺, ‘‘𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 ‘𑀦𑀸𑀬𑁆𑀬𑁄 𑀲𑁄 𑀪𑀺𑀓𑁆𑀔𑀼 𑀫𑀁 𑀦𑀺𑀧𑁆𑀧𑀸𑀝𑁂𑀲𑀺, 𑀅𑀧𑀺𑀘 𑀅𑀳𑀫𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀕𑀘𑁆𑀙𑀸𑀫𑀺, 𑀅𑀓𑀸𑀭𑀓𑁄 𑀲𑁄 𑀪𑀺𑀓𑁆𑀔𑀼, 𑀕𑀘𑁆𑀙 𑀔𑀫𑀸𑀧𑁂𑀳𑀻’𑀢𑀺’’ 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀆𑀮𑀧𑀦𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀺, ‘‘𑀏𑀣’𑀬𑁆𑀬𑁄 𑀭𑀸𑀚𑀯𑀲𑀢𑀺𑀁, 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀣 𑀫𑁂. 𑀏𑀣 𑀫𑀬𑀁 𑀅𑀬𑁆𑀬𑁄 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀅𑀬𑁆𑀬𑁄𑀲𑀤𑁆𑀤𑀲𑁆𑀲 𑀆𑀮𑀧𑀦𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸𑀦𑀺. 𑀪𑀯𑀢𑀺 𑀘𑀢𑁆𑀭 𑁋

𑀅𑀬𑁆𑀬𑁄 𑀇𑀢𑀺 𑀅𑀬𑀁 𑀲𑀤𑁆𑀤𑁄, 𑀧𑀘𑁆𑀘𑀢𑁆𑀢𑁂𑀓𑀯𑀘𑁄 𑀪𑀯𑁂;

𑀆𑀮𑀧𑀦𑁂 𑀩𑀳𑀼𑀯𑀘𑁄, 𑀪𑀯𑁂 𑀏𑀓𑀯𑀘𑁄𑀧𑀺 𑀘 𑁋

𑀏𑀯𑀁 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀸𑀦𑀺 𑀘 𑀳𑁄𑀦𑁆𑀢𑀺 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑀸𑀦𑀺 𑀘.

𑀓𑀢𑀫𑀸𑀦𑀺 𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀺 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀸𑀦𑀺? 𑀕𑁄𑀲𑀤𑁆𑀤𑁄𑀬𑁂𑀯. 𑀕𑁄𑀲𑀤𑁆𑀤𑀲𑁆𑀲 𑀳𑀺 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼𑀁, 𑀕𑀸𑀯𑀁, 𑀕𑀯𑀁, 𑀕𑀸𑀯𑁄, 𑀕𑀯𑁄. 𑀕𑀸𑀯𑁂𑀦, 𑀕𑀯𑁂𑀦, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑀸, 𑀕𑀸𑀯𑀲𑁆𑀫𑀸, 𑀕𑀸𑀯𑀫𑁆𑀳𑀸, 𑀕𑀯𑀸, 𑀕𑀯𑀲𑁆𑀫𑀸, 𑀕𑀯𑀫𑁆𑀳𑀸, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑁂, 𑀕𑀸𑀯𑀲𑁆𑀫𑀺𑀁, 𑀕𑀸𑀯𑀫𑁆𑀳𑀺, 𑀕𑀯𑁂, 𑀕𑀯𑀲𑁆𑀫𑀺𑀁 ¶ , 𑀕𑀯𑀫𑁆𑀳𑀺, 𑀕𑀸𑀯𑁂𑀲𑀼, 𑀕𑀯𑁂𑀲𑀼, 𑀕𑁄𑀲𑀼. 𑀪𑁄 𑀕𑁄, 𑀪𑀯𑀦𑁆𑀢𑁄 𑀕𑀸𑀯𑁄, 𑀕𑀯𑁄. 𑀅𑀬𑀁 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀦𑀦𑀼 𑀘 𑀪𑁄 𑀕𑁄𑀲𑀤𑁆𑀤𑁄 𑀅𑀢𑁆𑀢𑀦𑀸 𑀲𑀫𑁆𑀪𑀽𑀢𑀕𑁄𑀡𑀲𑀤𑁆𑀤𑀫𑀸𑀮𑀸𑀯𑀲𑁂𑀦 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄 𑀘𑁂𑀯 𑀏𑀓𑀤𑁂𑀲𑁂𑀦 𑀦 𑀧𑀯𑀺𑀝𑁆𑀞𑁄 𑀘𑀸𑀢𑀺? 𑀲𑀘𑁆𑀘𑀁. 𑀕𑁄𑀡𑀲𑀤𑁆𑀤𑁄 𑀕𑁄𑀲𑀤𑁆𑀤𑀯𑀲𑁂𑀦 𑀲𑀫𑁆𑀪𑀽𑀢𑁄𑀧𑀺 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑀝𑀺𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀕𑁄𑀲𑀤𑁆𑀤𑀢𑁄 𑀯𑀺𑀲𑀼𑀁 𑀅𑀫𑁆𑀳𑁂𑀳𑀺 𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀦𑀬𑁂 𑀧𑀓𑁆𑀔𑀺𑀢𑁆𑀢𑁄. 𑀢𑀲𑁆𑀲 𑀳𑀺 𑀯𑀺𑀲𑀼𑀁 𑀕𑀳𑀡𑁂 𑀬𑀼𑀢𑁆𑀢𑀺 𑀤𑀺𑀲𑁆𑀲𑀢𑀺 𑀲𑁆𑀬𑀸𑀤𑀻𑀲𑀼 𑀏𑀓𑀸𑀓𑀸𑀭𑁂𑀦𑁂𑀯 𑀢𑀺𑀝𑁆𑀞𑀦𑀢𑁄, 𑀢𑀲𑁆𑀫𑀸 𑀕𑁄𑀲𑀤𑁆𑀤𑀢𑁄 𑀲𑀫𑁆𑀪𑀽𑀢𑀫𑁆𑀧𑀺 𑀕𑁄𑀡𑀲𑀤𑁆𑀤𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀤𑁆𑀥𑀁 𑀕𑁄𑀲𑀤𑁆𑀤𑀫𑁂𑀯 𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀕𑁄𑀲𑀤𑁆𑀤𑀲𑁆𑀲 𑀅𑀧𑁆𑀧𑀯𑀺𑀝𑁆𑀞𑀢𑀸 𑀯𑀼𑀢𑁆𑀢𑀸.

𑀦𑀦𑀼 𑀘 𑀪𑁄 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁄 𑀕𑁄𑀇𑀢𑀺 𑀲𑀤𑁆𑀤𑁄 𑀧𑀼𑀭𑀺𑀲𑁄𑀢𑀺 𑀲𑀤𑁆𑀤𑁂𑀦 𑀲𑀤𑀺𑀲𑀢𑁆𑀢𑀸 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑁄𑀢𑀺? 𑀢𑀦𑁆𑀦, 𑀕𑁄𑀲𑀤𑁆𑀤𑁄 𑀳𑀺 𑀦𑀺𑀘𑁆𑀘𑀫𑁄𑀓𑀸𑀭𑀦𑁆𑀢𑁄, 𑀦 𑀧𑀼𑀭𑀺𑀲𑀲𑀤𑁆𑀤𑀸𑀤𑀬𑁄 𑀯𑀺𑀬 𑀧𑀞𑀫𑀁 𑀅𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑀤𑁆𑀥𑁄𑀓𑀸𑀭𑀦𑁆𑀢𑀝𑁆𑀞𑁄. 𑀢𑁂𑀦𑁂𑀯 𑀳𑀺 𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂𑀧𑀺 𑀆𑀮𑀧𑀦𑀯𑀘𑀦𑀝𑁆𑀞𑀸𑀦𑁂𑀧𑀺 𑀕𑁄𑀇𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀬𑀤𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀁 𑀧𑀝𑀺𑀘𑁆𑀘 𑀕𑁄𑀲𑀤𑁆𑀤𑀲𑁆𑀲 𑀧𑀼𑀭𑀺𑀲𑀦𑀬𑁂 𑀏𑀓𑀤𑁂𑀲𑁂𑀦 𑀧𑀯𑀺𑀝𑁆𑀞𑀢𑀸 𑀇𑀘𑁆𑀙𑀺𑀢𑀩𑁆𑀩𑀸, ‘‘𑀓𑀸𑀦𑀺𑀘𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀑𑀓𑀸𑀭𑀦𑁆𑀢𑀓𑀣𑀸 𑀓𑀫𑀢𑁆𑀣𑀁 𑀤𑀻𑀧𑁂𑀬𑁆𑀬, 𑀦𑀺𑀧𑁆𑀨𑀮𑀸𑀯 𑀲𑀸 𑀓𑀣𑀸 𑀲𑀺𑀬𑀸, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀬𑀣𑀸𑀯𑀼𑀢𑁆𑀢𑁄 𑀦𑀬𑁄𑀬𑁂𑀯 𑀆𑀬𑀲𑁆𑀫𑀦𑁆𑀢𑁂𑀳𑀺 𑀫𑀦𑀲𑀺 𑀓𑀸𑀢𑀩𑁆𑀩𑁄. 𑀏𑀯𑀁 𑀕𑁄𑀲𑀤𑁆𑀤𑀲𑁆𑀲 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀢𑀸 𑀤𑀝𑁆𑀞𑀩𑁆𑀩𑀸.

𑀓𑁂𑀘𑁂𑀢𑁆𑀣 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 ‘‘𑀕𑁄𑀲𑀤𑁆𑀤𑀲𑁆𑀲 𑀢𑀸𑀯 ‘𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼𑀁, 𑀕𑀸𑀯𑀁, 𑀕𑀯𑀁’ 𑀇𑀘𑁆𑀘𑀸𑀤𑀺𑀦𑀸 𑀦𑀬𑁂𑀦 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀢𑀸 𑀅𑀫𑁆𑀳𑁂𑀳𑀺 𑀜𑀸𑀢𑀸, 𑀚𑀭𑀕𑁆𑀕𑀯 𑀧𑀼𑀗𑁆𑀕𑀯𑀸𑀤𑀺𑀲𑀤𑁆𑀤𑀸 𑀧𑀦 𑀓𑀼𑀢𑁆𑀭 𑀦𑀬𑁂 ¶ 𑀧𑀯𑀺𑀝𑁆𑀞𑀸’’𑀢𑀺? 𑀢𑁂𑀲𑀁 𑀏𑀯𑀁 𑀩𑁆𑀬𑀸𑀓𑀸𑀢𑀩𑁆𑀩𑀁 ‘‘𑀚𑀭𑀕𑁆𑀕𑀯 𑀧𑀼𑀗𑁆𑀕𑀯𑀸𑀤𑀺𑀲𑀤𑁆𑀤𑀸 𑀲𑀩𑁆𑀩𑀣𑀸𑀧𑀺 𑀧𑀼𑀭𑀺𑀲𑀦𑀬𑁂 𑀧𑀯𑀺𑀝𑁆𑀞𑀸’’𑀢𑀺. 𑀢𑀣𑀸 𑀳𑀺 𑀢𑁂𑀲𑀁 𑀕𑁄𑀲𑀤𑁆𑀤𑀢𑁄 𑀅𑀬𑀁 𑀯𑀺𑀲𑁂𑀲𑁄, 𑀚𑀭𑀦𑁆𑀢𑁄 𑀘 𑀲𑁄 𑀕𑁄 𑀘𑀸𑀢𑀺 𑀚𑀭𑀕𑁆𑀕𑀯𑁄. 𑀏𑀢𑁆𑀣 𑀦𑀓𑀸𑀭𑀮𑁄𑀧𑁄 𑀢𑀓𑀸𑀭𑀲𑁆𑀲 𑀘 𑀕𑀓𑀸𑀭𑀢𑁆𑀢𑀁 𑀪𑀯𑀢𑀺 𑀲𑀫𑀸𑀲𑀧𑀤𑀢𑁆𑀢𑀸, 𑀲𑀫𑀸𑀲𑁂 𑀘 𑀲𑀺𑀫𑁆𑀳𑀺 𑀧𑀭𑁂 𑀕𑁄𑀲𑀤𑁆𑀤𑀲𑁆𑀲𑁄𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀯𑀺𑀲𑀸𑀡𑁂𑀦 𑀚𑀭𑀕𑁆𑀕𑀯𑁄’’𑀢𑀺 𑀏𑀓𑀯𑀘𑀦𑀭𑀽𑀧𑀁 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀅𑀜𑁆𑀜𑀢𑁆𑀣 𑀅𑀦𑀼𑀧𑀧𑀤𑀢𑁆𑀢𑀸 𑀕𑀯𑁄𑀇𑀢𑀺 𑀩𑀳𑀼𑀯𑀘𑀦𑀧𑀤𑀁𑀬𑁂𑀯 𑀤𑀺𑀲𑁆𑀲𑀢𑀺. 𑀇𑀥 𑀧𑀦 𑀲𑁄𑀧𑀧𑀤𑀢𑁆𑀢𑀸 𑀲𑀫𑀸𑀲𑀧𑀤𑀪𑀸𑀯𑀫𑀸𑀕𑀫𑁆𑀫 ‘‘𑀚𑀭𑀕𑁆𑀕𑀯𑁄’’𑀢𑀺 𑀏𑀓𑀯𑀘𑀦𑀧𑀤𑀁𑀬𑁂𑀯 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀚𑀭𑀕𑁆𑀕𑀯𑁄𑀢𑀺 𑀏𑀢𑁆𑀣 𑀚𑀭𑀦𑁆𑀢𑀸 𑀘 𑀢𑁂 𑀕𑀯𑁄 𑀘𑀸𑀢𑀺 𑀏𑀯𑀁 𑀩𑀳𑀼𑀯𑀘𑀦𑀯𑀲𑁂𑀦 𑀦𑀺𑀩𑁆𑀩𑀘𑀦𑀻𑀬𑀢𑀸 𑀦 𑀮𑀩𑁆𑀪𑀢𑀺 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀭𑀽𑀴𑁆𑀳𑀢𑁆𑀢𑀸𑀢𑀺. ‘‘𑀚𑀭𑀕𑁆𑀕𑀯𑁄, 𑀚𑀭𑀕𑁆𑀕𑀯𑀸. 𑀚𑀭𑀕𑁆𑀕𑀯𑀁, 𑀚𑀭𑀕𑁆𑀕𑀯𑁂. 𑀚𑀭𑀕𑁆𑀕𑀯𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀲 𑀦𑀬𑁄 𑀧𑀼𑀗𑁆𑀕𑀯𑁄 𑀲𑀓𑁆𑀬𑀧𑀼𑀗𑁆𑀕𑀯𑁄𑀢𑀺𑀆𑀤𑀻𑀲𑀼𑀧𑀺.

𑀢𑀢𑁆𑀭 𑀧𑀼𑀗𑁆𑀕𑀯𑁄𑀢𑀺 𑀕𑀼𑀦𑁆𑀦𑀁 𑀬𑀽𑀣𑀧𑀢𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄. 𑀬𑁄 𑀧𑀸𑀴𑀺𑀬𑀁 ‘‘𑀫𑀼𑀳𑀼𑀢𑁆𑀢𑀚𑀸𑀢𑁄𑀯 𑀬𑀣𑀸 𑀕𑀯𑀁𑀧𑀢𑀺, 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀨𑀼𑀲𑀻 𑀯𑀲𑀼𑀦𑁆𑀥𑀭’’𑀦𑁆𑀢𑀺 𑀘 ‘‘𑀕𑀯𑀜𑁆𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄’’𑀢𑀺 𑀘 𑀆𑀕𑀢𑁄. 𑀈𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀓𑁂𑀘𑀺 ‘‘𑀧𑀼𑀫𑀸 𑀘 𑀲𑁄 𑀕𑁄 𑀘𑀸𑀢𑀺 𑀧𑀼𑀗𑁆𑀕𑀯𑁄’’𑀢𑀺 𑀯𑀘𑀦𑀢𑁆𑀣𑀁 𑀪𑀡𑀦𑁆𑀢𑀺. 𑀫𑀬𑀁 𑀧𑀦 𑀧𑀥𑀸𑀦𑁂 𑀦𑀺𑀭𑀽𑀴𑁆𑀳𑁄 𑀅𑀬𑀁 𑀲𑀤𑁆𑀤𑁄𑀢𑀺 𑀯𑀘𑀦𑀢𑁆𑀣𑀁 𑀦 𑀪𑀡𑀸𑀫. 𑀦 𑀳𑀺 𑀧𑀼𑀗𑁆𑀓𑁄𑀓𑀺𑀮𑁄𑀢𑀺𑀆𑀤𑀺𑀲𑀤𑁆𑀤𑀸𑀦𑀁 𑀓𑁄𑀓𑀺𑀮𑀸𑀤𑀻𑀦𑀁 𑀧𑀼𑀫𑁆𑀪𑀸𑀯𑀧𑁆𑀧𑀓𑀸𑀲𑀦𑀫𑀢𑁆𑀢𑁂 𑀲𑀫𑀢𑁆𑀣𑀢𑀸 𑀯𑀺𑀬 𑀇𑀫𑀲𑁆𑀲 𑀧𑀼𑀫𑁆𑀪𑀸𑀯𑀧𑁆𑀧𑀓𑀸𑀲𑀦𑀫𑀢𑁆𑀢𑁂 𑀲𑀫𑀢𑁆𑀣𑀢𑀸 𑀲𑀫𑁆𑀪𑀯𑀢𑀺, 𑀅𑀣 𑀔𑁄 𑀧𑀥𑀸𑀦𑀪𑀸𑀯𑀧𑁆𑀧𑀓𑀸𑀲𑀦𑁂 𑀘 𑀲𑀫𑀢𑁆𑀣𑀢𑀸 𑀲𑀫𑁆𑀪𑀯𑀢𑀺. 𑀢𑁂𑀦 ‘‘𑀲𑀓𑁆𑀬𑀧𑀼𑀗𑁆𑀕𑀯𑁄’’𑀢𑀺𑀆𑀤𑀻𑀲𑀼 𑀦𑀺𑀲𑀪𑀲𑀗𑁆𑀔𑀸𑀢𑁄 𑀧𑀼𑀗𑁆𑀕𑀯𑁄 𑀯𑀺𑀬𑀸𑀢𑀺 𑀧𑀼𑀗𑁆𑀕𑀯𑁄, 𑀲𑀓𑁆𑀬𑀸𑀦𑀁, 𑀲𑀓𑁆𑀬𑁂𑀲𑀼 ¶ 𑀯𑀸 𑀧𑀼𑀗𑁆𑀕𑀯𑁄 𑀲𑀓𑁆𑀬𑀧𑀼𑀗𑁆𑀕𑀯𑁄𑀢𑀺𑀆𑀤𑀺𑀦𑀸 𑀲𑀫𑀸𑀲𑀧𑀤𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀉𑀢𑁆𑀢𑀭𑀧𑀤𑀢𑁆𑀢𑁂 𑀞𑀺𑀢𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀦𑀸𑀕𑀸𑀤𑀺𑀲𑀤𑁆𑀤𑀸𑀦𑀁 𑀲𑁂𑀝𑁆𑀞𑀯𑀸𑀘𑀓𑀢𑁆𑀢𑀸 ‘‘𑀲𑀓𑁆𑀬𑀧𑀼𑀗𑁆𑀕𑀯𑁄’’𑀢𑀺𑀆𑀤𑀻𑀦𑀁 ‘‘𑀲𑀓𑁆𑀬𑀲𑁂𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑀺 𑀲𑀩𑁆𑀩𑀣𑀸𑀧𑀺 𑀧𑀼𑀭𑀺𑀲𑀦𑀬𑁂 𑀧𑀯𑀢𑁆𑀢𑀦𑀢𑁄 𑀚𑀭𑀕𑁆𑀕𑀯 𑀧𑀼𑀗𑁆𑀕𑀯𑀸𑀤𑀺𑀲𑀤𑁆𑀤𑀸𑀦𑀁 𑀕𑁄𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀢𑁄 𑀯𑀺𑀲𑀤𑀺𑀲𑀧𑀤𑀫𑀸𑀮𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀕𑁄𑀲𑀤𑁆𑀤𑀲𑁆𑀲 𑀧𑀦 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀆𑀧𑀲𑀤𑁆𑀤𑁂 𑀆𑀘𑀭𑀺𑀬𑀸𑀦𑀁 𑀮𑀺𑀗𑁆𑀕𑀯𑀘𑀦𑀯𑀲𑁂𑀦 𑀫𑀢𑀺𑀪𑁂𑀤𑁄 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁𑀫𑀢𑁂𑀦 𑀢𑀲𑁆𑀲 𑀧𑀼𑀭𑀺𑀲𑀦𑀬𑁂 𑀲𑀩𑁆𑀩𑀣𑀸 𑀅𑀧𑁆𑀧𑀯𑀺𑀝𑁆𑀞𑀢𑀸 𑀪𑀯𑀢𑀺. ‘‘𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽’’𑀢𑀺 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀳𑀺𑀬𑀸 𑀧𑀦 𑀦𑀤𑀺𑀬𑀸 𑀉𑀢𑁆𑀢𑀭𑁂𑀦 𑀆𑀧𑁄’’𑀢𑀺 𑀯𑀼𑀢𑁆𑀢𑀁, 𑀝𑀻𑀓𑀸𑀬𑀁 𑀧𑀦 𑀢𑀁 𑀉𑀮𑁆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀫𑀳𑀺𑀬𑀸 𑀦𑀤𑀺𑀬𑀸 𑀆𑀧𑁄 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀉𑀢𑁆𑀢𑀭𑁂𑀦 𑀳𑁄𑀦𑁆𑀢𑀺, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 𑀉𑀢𑁆𑀢𑀭𑀸𑀧𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀆𑀧𑀲𑀤𑁆𑀤𑀲𑁆𑀲 𑀏𑀓𑀦𑁆𑀢𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀩𑀳𑀼𑀯𑀘𑀦𑀢𑀸 𑀘 𑀆𑀘𑀭𑀺𑀬𑁂𑀳𑀺 𑀇𑀘𑁆𑀙𑀺𑀢𑀸, 𑀢𑁂𑀲𑀁 𑀫𑀢𑁂 𑀆𑀧𑁄𑀇𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀞𑀫𑀸𑀩𑀳𑀼𑀯𑀘𑀦𑀭𑀽𑀧𑁂 𑀳𑁄𑀦𑁆𑀢𑁂 𑀤𑀼𑀢𑀺𑀬𑀸𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀦𑀁 𑀩𑀳𑀼𑀯𑀘𑀦𑀭𑀽𑀧𑀸𑀦𑀺 𑀓𑀻𑀤𑀺𑀲𑀸𑀦𑀺 𑀲𑀺𑀬𑀼𑀁. 𑀢𑀣𑀸 𑀳𑀺 ‘‘𑀧𑀼𑀭𑀺𑀲𑁂, 𑀧𑀼𑀭𑀺𑀲𑁂𑀳𑀺 𑀧𑀼𑀭𑀺𑀲𑁂𑀪𑀺 𑀧𑀼𑀭𑀺𑀲𑁂𑀲𑀽’’𑀢𑀺 𑀭𑀽𑀧𑀯𑀢𑁄 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀯𑀺𑀬 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀏𑀓𑀸𑀭𑀏𑀳𑀺 𑀓𑀸𑀭𑀸𑀤𑀺𑀬𑀼𑀢𑁆𑀢𑀸𑀦𑀺 𑀭𑀽𑀧𑀸𑀦𑀺 𑀓𑀢𑁆𑀣𑀘𑀺𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀅𑀢𑁄 𑀢𑁂𑀲𑀁 𑀫𑀢𑁂 𑀧𑀤𑀫𑀸𑀮𑀸𑀦𑀬𑁄 𑀅𑀢𑀻𑀯 𑀤𑀼𑀓𑁆𑀓𑀭𑁄.

𑀆𑀧𑀲𑀤𑁆𑀤𑀲𑁆𑀲 𑀕𑀭𑀯𑁄, 𑀲𑀤𑁆𑀤𑀲𑀢𑁆𑀣𑀦𑀬𑀁 𑀧𑀢𑀺;

𑀩𑀳𑀼𑀯𑀘𑀦𑀢𑀜𑁆𑀘𑀺𑀢𑁆𑀣𑀺-𑀮𑀺𑀗𑁆𑀕𑀪𑀸𑀯𑀜𑁆𑀘 𑀅𑀩𑁆𑀭𑀯𑀼𑀁.

𑀇𑀘𑁆𑀘𑀸𑀧𑀲𑀤𑁆𑀤𑀲𑁆𑀲 ¶ 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀦𑁆𑀢𑀢𑀸 𑀯𑁂𑀬𑁆𑀬𑀸𑀓𑀭𑀡𑀸𑀦𑀁 𑀫𑀢𑀁 𑀦𑀺𑀲𑁆𑀲𑀸𑀬 𑀅𑀦𑀼𑀫𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀆𑀧𑁄 𑀇𑀢𑀺 𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑁄 𑀧𑀬𑁄𑀕𑁄 𑀤𑀺𑀝𑁆𑀞𑁄 ‘‘𑀑𑀫𑀢𑁆𑀢𑀁 𑀧𑀦 𑀆𑀧𑁄 𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑀁 𑀚𑀸𑀢’’𑀦𑁆𑀢𑀺. 𑀚𑀸𑀢𑀓𑀧𑀸𑀴𑀺𑀬𑀁 𑀢𑀼 𑀢𑀲𑁆𑀲𑁂𑀓𑀯𑀘𑀦𑀦𑁆𑀢𑀢𑀸 𑀤𑀺𑀝𑁆𑀞𑀸. 𑀢𑀣𑀸 𑀳𑀺 ‘‘𑀲𑀼𑀘𑀺𑀁 𑀲𑀼𑀕𑀦𑁆𑀥𑀁 𑀲𑀮𑀺𑀮𑀁, 𑀆𑀧𑁄 𑀢𑀢𑁆𑀣𑀸𑀪𑀺𑀲𑀦𑁆𑀤𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀆𑀧𑁄 𑀇𑀢𑀺 𑀲𑀤𑁆𑀤𑁄 𑀏𑀓𑀯𑀘𑀦𑀝𑁆𑀞𑀸𑀦𑁂 𑀞𑀺𑀢𑁄 𑀤𑀺𑀝𑁆𑀞𑁄. 𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀆𑀧𑁄𑀢𑀺 𑀲𑀗𑁆𑀔𑀁 𑀕𑀢𑀁 𑀲𑀮𑀺𑀮𑀁 𑀲𑀼𑀘𑀺 𑀲𑀼𑀕𑀦𑁆𑀥𑀁 𑀳𑀼𑀢𑁆𑀯𑀸 𑀢𑀢𑁆𑀣 𑀅𑀪𑀺𑀲𑀦𑁆𑀤𑀢𑀻𑀢𑀺 𑀲𑀮𑀺𑀮𑀁𑀲𑀤𑁆𑀤𑀯𑀲𑁂𑀦 𑀏𑀓𑀯𑀘𑀦𑀧𑁆𑀧𑀬𑁄𑀕𑁄 𑀓𑀢𑁄, 𑀦 𑀦𑀸𑀫𑀲𑀤𑁆𑀤𑀯𑀲𑁂𑀦. 𑀆𑀧𑀲𑀤𑁆𑀤𑁄 𑀳𑀺 𑀏𑀓𑀦𑁆𑀢𑁂𑀦𑀺𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀦𑁆𑀢𑁄 𑀘. 𑀢𑀣𑀸 𑀳𑀺 ‘𑀆𑀧𑁄 𑀢𑀢𑁆𑀣𑀸𑀪𑀺𑀲𑀦𑁆𑀤𑀦𑁆𑀢𑀻’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀢𑀧𑁆𑀧𑀬𑁄𑀕𑁄 𑀯𑀢𑁆𑀢𑀩𑁆𑀩𑁄𑀧𑀺 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑀢𑀦𑁆𑀦, ‘‘𑀆𑀧𑁄 𑀢𑀢𑁆𑀣𑀸𑀪𑀺𑀲𑀦𑁆𑀤𑀭𑁂’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 ‘‘𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂’’𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸 𑀯𑀺𑀬. 𑀬𑀲𑁆𑀫𑀸 𑀏𑀯𑀁 𑀦 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀘 𑀧𑀦 𑀧𑀸𑀴𑀺𑀬𑀁 ‘‘𑀆𑀧𑁄 𑀮𑀩𑁆𑀪𑀢𑀺, 𑀢𑁂𑀚𑁄 𑀮𑀩𑁆𑀪𑀢𑀺, 𑀯𑀸𑀬𑁄 𑀮𑀩𑁆𑀪𑀢𑀻’’𑀢𑀺 𑀏𑀓𑀯𑀘𑀦𑀧𑁆𑀧𑀬𑁄𑀕𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀆𑀧𑁄’’𑀢𑀺 𑀲𑀤𑁆𑀤𑀲𑁆𑀲 𑀏𑀓𑀯𑀘𑀦𑀦𑁆𑀢𑀢𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀸𑀢𑀺.

𑀅𑀣𑀸𑀧𑀺 𑀘𑁂 𑀯𑀤𑁂𑀬𑁆𑀬𑀼𑀁 𑁋 𑀦𑀦𑀼 𑀧𑀸𑀴𑀺𑀬𑀁𑀬𑁂𑀯 𑀢𑀲𑁆𑀲 𑀩𑀳𑀼𑀯𑀘𑀦𑀦𑁆𑀢𑀢𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀸 ‘‘𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻 𑀘, 𑀢𑁂𑀚𑁄 𑀯𑀸𑀬𑁄 𑀢𑀤𑀸𑀕𑀫𑀼’’𑀦𑁆𑀢𑀺? 𑀢𑀫𑁆𑀧𑀺 𑀦. 𑀏𑀢𑁆𑀣 𑀳𑀺 ‘‘𑀤𑁂𑀯𑀸’’𑀢𑀺 𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀆𑀕𑀫𑀼’’𑀦𑁆𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀓𑀢𑁄, 𑀦 ‘‘𑀆𑀧𑁄’’𑀢𑀺 𑀲𑀤𑁆𑀤𑀁. 𑀬𑀤𑀺 ‘‘𑀆𑀧𑁄’’𑀢𑀺 𑀲𑀤𑁆𑀤𑀁 𑀲𑀦𑁆𑀥𑀸𑀬 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀓𑀢𑁄 𑀲𑀺𑀬𑀸, ‘‘𑀧𑀣𑀯𑀻’’𑀢𑀺 ‘‘𑀢𑁂𑀚𑁄’’𑀢𑀺 ‘‘𑀯𑀸𑀬𑁄’’𑀢𑀺 𑀘 𑀲𑀤𑁆𑀤𑀫𑁆𑀧𑀺 𑀲𑀦𑁆𑀥𑀸𑀬 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀓𑀢𑁄 𑀲𑀺𑀬𑀸 ¶ . 𑀏𑀯𑀁 𑀲𑀦𑁆𑀢𑁂 𑀧𑀣𑀯𑀻 𑀢𑁂𑀚𑁄 𑀯𑀸𑀬𑁄𑀲𑀤𑁆𑀤𑀸𑀧𑀺 𑀩𑀳𑀼𑀯𑀘𑀦𑀓𑀪𑀸𑀯𑀫𑀸𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀧𑀦 𑀆𑀧𑀚𑁆𑀚𑀦𑁆𑀢𑀺. 𑀦 𑀳𑁂𑀢𑁂 𑀩𑀳𑀼𑀯𑀘𑀦𑀓𑀸, 𑀅𑀣 𑀔𑁄 𑀏𑀓𑀯𑀘𑀦𑀓𑀸 𑀏𑀯. 𑀭𑀽𑀴𑁆𑀳𑀻𑀯𑀲𑁂𑀦 𑀢𑁂 𑀧𑀯𑀢𑁆𑀢𑀸 𑀧𑀓𑀢𑀺𑀆𑀧𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀳𑀺 𑀆𑀧𑁄𑀓𑀲𑀺𑀡𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀤𑁂𑀯𑀸 𑀆𑀭𑀫𑁆𑀫𑀡𑀯𑀲𑁂𑀦 ‘‘𑀆𑀧𑁄’’𑀢𑀺𑀆𑀤𑀺𑀦𑀸𑀫𑀁 𑀮𑀪𑀦𑁆𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀦𑀦𑀼 𑀘 𑀪𑁄 ‘𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽’𑀢𑀺 𑀩𑀳𑀼𑀯𑀘𑀦𑀧𑀸𑀴𑀺 𑀤𑀺𑀲𑁆𑀲𑀢𑀻’’𑀢𑀺? 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀅𑀲𑀫𑁆𑀧𑀣𑀫𑀯𑀢𑀺𑀡𑁆𑀡𑀸 𑀢𑀼𑀫𑁆𑀳𑁂, 𑀦 𑀳𑀺 𑀢𑀼𑀫𑁆𑀳𑁂 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀁 𑀚𑀸𑀦𑀸𑀣, ‘‘𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽’’𑀢𑀺 𑀩𑀳𑀼𑀯𑀘𑀦𑀁 𑀧𑀦 ‘‘𑀓𑀼𑀭𑀽𑀲𑀼 𑀅𑀗𑁆𑀕𑁂𑀲𑀼 𑀅𑀗𑁆𑀕𑀸𑀦𑀁 𑀫𑀕𑀥𑀸𑀦’’𑀦𑁆𑀢𑀺𑀆𑀤𑀻𑀦𑀺 𑀩𑀳𑀼𑀯𑀘𑀦𑀸𑀦𑀺 𑀯𑀺𑀬 𑀭𑀽𑀴𑁆𑀳𑀻𑀯𑀲𑁂𑀦 𑀏𑀓𑀲𑁆𑀲𑀸𑀧𑀺 𑀚𑀦𑀧𑀤𑀲𑁆𑀲 𑀯𑀼𑀢𑁆𑀢𑀁, 𑀦 𑀆𑀧𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀦𑁆𑀥𑀸𑀬. ‘‘𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽’’𑀢𑀺 𑀏𑀢𑁆𑀣 𑀳𑀺 𑀆𑀧𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀉𑀧𑀲𑀚𑁆𑀚𑀦𑀻𑀪𑀽𑀢𑁄, 𑀧𑀼𑀮𑁆𑀮𑀺𑀗𑁆𑀕𑀩𑀳𑀼𑀯𑀘𑀦𑁂𑀦 𑀧𑀦 𑀯𑀼𑀢𑁆𑀢𑁄 𑀚𑀦𑀧𑀤𑀲𑀗𑁆𑀔𑀸𑀢𑁄 𑀅𑀢𑁆𑀣𑁄𑀬𑁂𑀯 𑀧𑀥𑀸𑀦𑁄 ‘‘𑀆𑀕𑀢𑀲𑀫𑀡𑁄 𑀲𑀗𑁆𑀖𑀸𑀭𑀸𑀫𑁄’’𑀢𑀺 𑀏𑀢𑁆𑀣 𑀲𑀫𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀉𑀧𑀲𑀚𑁆𑀚𑀦𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀆𑀕𑀢𑀲𑀫𑀡𑀲𑀤𑁆𑀤𑀲𑁆𑀲 𑀲𑀗𑁆𑀖𑀸𑀭𑀸𑀫𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀯𑀺𑀬, 𑀢𑀲𑁆𑀫𑀸 𑀆𑀧𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀬𑁄 𑀅𑀗𑁆𑀕𑀼𑀢𑁆𑀢𑀭𑀸𑀧𑁄 𑀦𑀸𑀫 𑀚𑀦𑀧𑀤𑁄, 𑀢𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀚𑀦𑀧𑀤𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀯𑀺𑀳𑀭𑀢𑀺 𑀆𑀧𑀡𑀁 𑀦𑀸𑀫 𑀅𑀗𑁆𑀕𑀸𑀦𑀁 𑀦𑀺𑀕𑀫𑁄’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀉𑀢𑁆𑀢𑀭𑁂𑀦 𑀫𑀳𑀸𑀫𑀳𑀺𑀬𑀸 𑀦𑀤𑀺𑀬𑀸 𑀆𑀧𑁄 𑀬𑁂𑀲𑀁 𑀢𑁂 𑀉𑀢𑁆𑀢𑀭𑀸𑀧𑀸, 𑀅𑀗𑁆𑀕𑀸 𑀘 𑀢𑁂 𑀉𑀢𑁆𑀢𑀭𑀸𑀧𑀸 𑀘𑀸𑀢𑀺 𑀅𑀗𑁆𑀕𑀼𑀢𑁆𑀢𑀭𑀸𑀧𑀸, 𑀢𑁂𑀲𑀼 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼. 𑀏𑀯𑀁 𑀏𑀓𑀲𑁆𑀫𑀺𑀁 𑀚𑀦𑀧𑀤𑁂𑀬𑁂𑀯 𑀩𑀳𑀼𑀯𑀘𑀦𑀁 𑀦 𑀆𑀧𑀲𑀗𑁆𑀔𑀸𑀢𑁂 𑀅𑀢𑁆𑀣𑁂, 𑀢𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀚𑀦𑀧𑀤𑁂’’𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀢𑀣𑀸𑀧𑀺 𑀬𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀓𑁄𑀘𑀸’’𑀢𑀺. 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀓𑀺𑀁 𑀧𑀝𑀺𑀘𑁆𑀘 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 ‘𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀓𑁄 𑀘𑀸’𑀢𑀺 𑀯𑀤𑀣𑀸’’𑀢𑀺 ¶ ? 𑀢𑁂 𑀏𑀯𑀁 𑀧𑀼𑀝𑁆𑀞𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀗𑁆𑀕𑀸𑀬𑁂𑀯 𑀲𑁄 𑀚𑀦𑀧𑀤𑁄, 𑀫𑀳𑀺𑀬𑀸 𑀧𑀦 𑀦𑀤𑀺𑀬𑀸 𑀉𑀢𑁆𑀢𑀭𑁂𑀦 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀉𑀢𑁆𑀢𑀭𑀸𑀧𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀘 ‘‘𑀫𑀳𑀺𑀬𑀸 𑀧𑀦 𑀦𑀤𑀺𑀬𑀸 𑀆𑀧𑁄 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀉𑀢𑁆𑀢𑀭𑁂𑀦 𑀳𑁄𑀦𑁆𑀢𑀺, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 𑀉𑀢𑁆𑀢𑀭𑀸𑀧𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀘 𑀏𑀯𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑁄 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀓𑁄 𑀘𑀸’’𑀢𑀺 𑀯𑀤𑀸𑀫𑀸𑀢𑀺. 𑀲𑀘𑁆𑀘𑀁 𑀤𑀺𑀲𑁆𑀲𑀢𑀺, 𑀲𑁄 𑀧𑀦 𑀲𑀤𑁆𑀤𑀲𑀢𑁆𑀣𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀁 𑀫𑀢𑀁 𑀕𑀳𑁂𑀢𑁆𑀯𑀸 𑀅𑀪𑀺𑀲𑀗𑁆𑀔𑀢𑁄, 𑀲𑀤𑁆𑀤𑀲𑀢𑁆𑀣𑀜𑁆𑀘 𑀦𑀸𑀫 𑀦 𑀲𑀩𑁆𑀩𑀣𑀸 𑀩𑀼𑀤𑁆𑀥𑀯𑀘𑀦𑀲𑁆𑀲𑁄𑀧𑀓𑀸𑀭𑀓𑀁, 𑀏𑀓𑀤𑁂𑀲𑁂𑀦 𑀧𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀇𑀘𑁆𑀙𑀺𑀢𑀸𑀦𑀺𑀘𑁆𑀙𑀺𑀢𑀲𑀗𑁆𑀕𑀳𑀯𑀺𑀯𑀚𑁆𑀚𑀦𑀁 𑀓𑀸𑀢𑀼𑀁 ‘‘𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺, 𑀮𑀺𑀗𑁆𑀕𑀜𑁆𑀘 𑀦𑀺𑀧𑁆𑀧𑀚𑁆𑀚𑀢𑁂’’𑀢𑀺 𑀮𑀓𑁆𑀔𑀡𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀬𑀤𑀺 𑀘 𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀓𑁄, 𑀓𑀣𑀁 𑀆𑀧𑁄𑀢𑀺 𑀧𑀤𑀁 𑀲𑀺𑀚𑁆𑀛𑀢𑀻𑀢𑀺? 𑀆𑀧𑀲𑀤𑁆𑀤𑀢𑁄 𑀧𑀞𑀫𑀸𑀬𑁄𑀯𑀘𑀦𑀁 𑀓𑀢𑁆𑀯𑀸 𑀢𑀲𑁆𑀲𑁄𑀓𑀸𑀭𑀸𑀤𑁂𑀲𑀜𑁆𑀘 𑀓𑀢𑁆𑀯𑀸 𑀆𑀧𑁄𑀢𑀺 𑀧𑀤𑀁 𑀲𑀺𑀚𑁆𑀛𑀢𑀺 ‘‘𑀕𑀸𑀯𑁄’’𑀢𑀺 𑀧𑀤𑀫𑀺𑀯𑀸𑀢𑀺. 𑀯𑀺𑀲𑀫𑀫𑀺𑀤𑀁 𑀦𑀺𑀤𑀲𑁆𑀲𑀦𑀁, ‘‘𑀕𑀸𑀯𑁄’’𑀢𑀺 𑀧𑀤𑀜𑁆𑀳𑀺 𑀦𑀺𑀘𑁆𑀘𑁄𑀓𑀸𑀭𑀦𑁆𑀢𑁂𑀦 𑀕𑁄𑀲𑀤𑁆𑀤𑁂𑀦 𑀲𑀫𑁆𑀪𑀽𑀢𑀁. 𑀢𑀣𑀸 𑀳𑀺 𑀬𑁄𑀫𑁆𑀳𑀺 𑀧𑀭𑁂 𑀕𑁄𑀲𑀤𑁆𑀤𑀦𑁆𑀢𑀲𑁆𑀲𑀸𑀯𑀸𑀤𑁂𑀲𑀁 𑀓𑀢𑁆𑀯𑀸 𑀢𑀢𑁄 𑀬𑁄𑀦𑀫𑁄𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀕𑀸𑀯𑁄’’𑀢𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀆𑀧𑀲𑀤𑁆𑀤𑁂 𑀧𑀦 𑀤𑁆𑀯𑁂 𑀆𑀤𑁂𑀲𑀸 𑀦 𑀲𑀦𑁆𑀢𑀺. 𑀩𑀼𑀤𑁆𑀥𑀯𑀘𑀦𑀜𑁆𑀳𑀺 𑀧𑀢𑁆𑀯𑀸 𑀆𑀧𑀲𑀤𑁆𑀤𑁄 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄 𑀚𑀸𑀢𑁄, 𑀦 𑀅𑀜𑁆𑀜𑀣𑀸𑀧𑀓𑀢𑀺𑀓𑁄𑀢𑀺.

𑀏𑀯𑀁 𑀯𑀼𑀢𑁆𑀢𑀸𑀧𑀺 𑀢𑁂 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀦𑀸𑀜𑁆𑀜’’𑀦𑁆𑀢𑀺 𑀘𑁂𑀢𑀲𑀺 𑀲𑀦𑁆𑀦𑀺𑀥𑀸𑀬 𑀆𑀥𑀸𑀦𑀕𑁆𑀕𑀸𑀳𑀺𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀪𑀸𑀯𑁂, ‘‘𑀦 𑀯𑀘𑀦𑀧𑀘𑁆𑀘𑀦𑀻𑀓𑀲𑀸𑀢𑁂𑀦 𑀲𑀼𑀯𑀺𑀚𑀸𑀦𑀁 𑀲𑀼𑀪𑀸𑀲𑀺𑀢’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀲𑀸𑀢𑀪𑀸𑀯𑁂 𑀘 𑀞𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀬𑀣𑁂𑀯 𑀕𑀸𑀯𑁄𑀲𑀤𑁆𑀤𑁄, 𑀢𑀣𑁂𑀯 𑀆𑀧𑁄𑀲𑀤𑁆𑀤𑁄 𑀓𑀺𑀁 𑀇𑀢𑁆𑀣𑀺𑀮𑀺𑀗𑁆𑀕𑁄 𑀦 𑀪𑀯𑀺𑀲𑁆𑀲𑀢𑀺 𑀩𑀳𑀼𑀯𑀘𑀦𑀓𑁄 𑀘𑀸’’𑀢𑀺? 𑀢𑀢𑁄 𑀢𑁂𑀲𑀁 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀆𑀧𑀁 𑀆𑀧𑀢𑁄 𑀲𑀜𑁆𑀚𑀸𑀦𑀸𑀢𑀺, 𑀆𑀧𑀁 𑀆𑀧𑀢𑁄 ¶ 𑀲𑀜𑁆𑀜𑀢𑁆𑀯𑀸 𑀆𑀧𑀁 𑀫𑀜𑁆𑀜𑀢𑀺, 𑀆𑀧𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀆𑀧𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀆𑀧𑀁 𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀏𑀯𑀁 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀧𑀦𑁆𑀢𑀺 𑀇𑀤𑀁 𑀓𑀢𑀭𑀯𑀘𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀅𑀤𑁆𑀥𑀸 𑀢𑁂 𑀆𑀧𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀦𑁆𑀢𑀪𑀸𑀯𑀫𑁂𑀯 𑀇𑀘𑁆𑀙𑀫𑀸𑀦𑀸 𑀯𑀓𑁆𑀔𑀦𑁆𑀢𑀺 ‘‘𑀤𑀼𑀢𑀺𑀬𑀸𑀩𑀳𑀼𑀯𑀘𑀦’’𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀦𑀦𑀼 𑀬𑁄𑀯𑀘𑀦𑀁 𑀦 𑀲𑀼𑀬𑁆𑀬𑀢𑀻’’𑀢𑀺? 𑀢𑁂 𑀯𑀤𑁂𑀬𑁆𑀬𑀼𑀁 ‘‘𑀬𑁄𑀯𑀘𑀦𑀁 𑀓𑀢𑀅𑀫𑀸𑀤𑁂𑀲𑀢𑁆𑀢𑀸 𑀦 𑀲𑀼𑀬𑁆𑀬𑀢𑀻’’𑀢𑀺. 𑀬𑀁 𑀬𑀁 𑀪𑁄𑀦𑁆𑀢𑁄 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀫𑀼𑀔𑀸𑀭𑀽𑀴𑁆𑀳𑀁 𑀯𑀤𑀦𑁆𑀢𑀺.

‘‘𑀆𑀧𑀢𑁄’’𑀢𑀺 𑀇𑀤𑀁 𑀧𑀦 𑀓𑀺𑀁 𑀪𑁄𑀦𑁆𑀢𑁄 𑀯𑀤𑀦𑁆𑀢𑀻𑀢𑀺? ‘‘𑀆𑀧𑀢𑁄’’𑀢𑀺 𑀇𑀤𑀫𑁆𑀧𑀺 ‘‘𑀩𑀳𑀼𑀯𑀘𑀦𑀓𑀁 𑀢𑁄𑀧𑀘𑁆𑀘𑀬𑀦𑁆𑀢’’𑀦𑁆𑀢𑀺 𑀯𑀤𑀸𑀫 𑀢𑁄𑀧𑀘𑁆𑀘𑀬𑀲𑁆𑀲 𑀏𑀓𑀢𑁆𑀣𑁂 𑀘 𑀩𑀯𑁆𑀳𑀢𑁆𑀣𑁂 𑀘 𑀧𑀯𑀢𑁆𑀢𑀦𑀢𑁄. 𑀇𑀢𑀺 𑀢𑀼𑀫𑁆𑀳𑁂 𑀩𑀳𑀼𑀯𑀘𑀦𑀓𑀢𑁆𑀢𑀁𑀬𑁂𑀯 𑀇𑀘𑁆𑀙𑀫𑀸𑀦𑀸 ‘‘𑀆𑀧𑁄𑀲𑀤𑁆𑀤𑁄 𑀘 𑀬𑁄𑀯𑀘𑀦𑀦𑁆𑀢𑁄’’𑀢𑀺 𑀪𑀡𑀣, ‘‘𑀆𑀧𑀢𑁄’’𑀢𑀺 𑀇𑀤𑀫𑁆𑀧𑀺 ‘‘𑀩𑀳𑀼𑀯𑀘𑀦𑀓𑀁 𑀢𑁄𑀧𑀘𑁆𑀘𑀬𑀦𑁆𑀢’’𑀦𑁆𑀢𑀺 𑀪𑀡𑀣, ‘‘𑀆𑀧𑀲𑁆𑀫𑀺𑀁 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣 𑀧𑀦 ‘‘𑀆𑀧𑀲𑁆𑀫𑀺’’𑀦𑁆𑀢𑀺𑀤𑀁 𑀓𑀢𑀭𑀯𑀘𑀦𑀦𑁆𑀢𑀁 𑀓𑀢𑀭𑀸𑀤𑁂𑀲𑁂𑀦 𑀲𑀫𑁆𑀪𑀽𑀢𑀦𑁆𑀢𑀺? 𑀅𑀤𑁆𑀥𑀸 𑀢𑁂 𑀏𑀯𑀁 𑀧𑀼𑀝𑁆𑀞𑀸 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀣𑀸 𑀬𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀓𑁄 𑀘𑀸’’𑀢𑀺, 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀬𑀁 𑀆𑀘𑀭𑀺𑀬𑁂𑀳𑀺 𑀯𑁂𑀬𑁆𑀬𑀸𑀓𑀭𑀡𑀫𑀢𑀁 𑀕𑀳𑁂𑀢𑁆𑀯𑀸 ‘𑀬𑀸 𑀆𑀧𑁄’𑀢𑀺 𑀘 ‘𑀢𑀸𑀲’𑀦𑁆𑀢𑀺 𑀘 𑀯𑀼𑀢𑁆𑀢𑀁, 𑀢𑀢𑁆𑀣 ‘𑀓𑀺𑀁 𑀢𑀸𑀲’𑀦𑁆𑀢𑀺 𑀯𑀘𑀦𑁂 ‘𑀆𑀧𑀸𑀦’𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀉𑀤𑀸𑀳𑀼 𑀆𑀧𑀲𑁆𑀲𑀸’’𑀢𑀺? ‘‘𑀆𑀧𑀸𑀦’𑀦𑁆𑀢𑀺 𑀧𑀤𑀫𑀸𑀦𑁂𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀘𑁂, 𑀏𑀯𑀜𑁆𑀘 𑀲𑀢𑀺 ‘‘𑀬𑀸 𑀆𑀧𑀸’’𑀢𑀺 𑀯𑀢𑁆𑀢𑀩𑁆𑀩𑀁 ‘‘𑀬𑀸 𑀓𑀜𑁆𑀜𑀸 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀧𑀤𑀫𑀺𑀯. 𑀅𑀣 ‘‘𑀆𑀧𑀸’’𑀢𑀺 𑀧𑀤𑀁 𑀦𑀸𑀫 𑀦𑀢𑁆𑀣𑀺, ‘‘𑀆𑀧𑁄’’𑀢𑀺 𑀧𑀤𑀁𑀬𑁂𑀯 𑀩𑀳𑀼𑀯𑀘𑀦𑀓𑀦𑁆𑀢𑀺 𑀘𑁂, 𑀏𑀯𑀁 𑀲𑀢𑀺 ‘‘𑀢𑀸𑀲’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀆𑀧𑀲𑁆𑀲𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀆𑀧𑁄’’𑀢𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀩𑀳𑀼𑀯𑀘𑀦𑀢𑁆𑀢𑁂 𑀲𑀢𑀺 ‘‘𑀆𑀧𑀲𑁆𑀲𑀸’’𑀢𑀺 𑀧𑀤𑀫𑁆𑀧𑀺 𑀩𑀳𑀼𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀢𑀸𑀲𑀁𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀼𑀁 𑀬𑀼𑀢𑁆𑀢𑀺𑀢𑁄𑀢𑀺. 𑀏𑀯𑀁 𑀲𑀢𑀺 ‘‘𑀆𑀧𑀸𑀦’’𑀦𑁆𑀢𑀺 ¶ 𑀧𑀤𑀲𑁆𑀲 𑀅𑀪𑀸𑀯𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀧𑀦 ‘‘𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸. 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁂’’𑀢𑀺 𑀘, ‘‘𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼’’𑀦𑁆𑀢𑀺 𑀘 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀪𑀯𑀦𑁆𑀢𑀺, 𑀏𑀯𑀁 ‘‘𑀆𑀧𑁄, 𑀆𑀧𑀸. 𑀆𑀧𑀁, 𑀆𑀧𑁂’’𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀲𑀢𑀺 ‘‘𑀆𑀧𑀲𑀤𑁆𑀤𑁄 𑀩𑀳𑀼𑀯𑀘𑀦𑀓𑁄𑀬𑁂𑀯 𑀳𑁄𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁.

𑀬𑁂 𑀏𑀯𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀲𑀤𑁄𑀲𑀁 𑀤𑀼𑀧𑁆𑀧𑀭𑀺𑀳𑀭𑀡𑀻𑀬𑀁 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑁂 ‘‘𑀆𑀧𑀁 𑀫𑀜𑁆𑀜𑀢𑀺 𑀆𑀧𑀲𑁆𑀫𑀺’’𑀦𑁆𑀢𑀺 𑀏𑀓𑀯𑀘𑀦𑀧𑀸𑀴𑀻𑀦𑀁 𑀤𑀲𑁆𑀲𑀦𑀢𑁄, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀘 ‘‘𑀯𑀺𑀲𑁆𑀲𑀦𑁆𑀤𑀦𑀪𑀸𑀯𑁂𑀦 𑀢𑀁 𑀢𑀁 𑀞𑀸𑀦𑀁 𑀆𑀧𑁄𑀢𑀺 𑀅𑀧𑁆𑀧𑁄𑀢𑀻𑀢𑀺 𑀆𑀧𑁄’’𑀢𑀺𑀆𑀤𑀺𑀓𑀲𑁆𑀲 𑀏𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀲𑁆𑀲 𑀤𑀲𑁆𑀲𑀦𑀢𑁄. 𑀬𑀣𑀸 𑀧𑀦 𑀧𑀸𑀴𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑁂𑀧𑀺 𑀧𑀭𑀺𑀬𑀸𑀧𑀦𑁆𑀦𑁄 𑀕𑁄𑀲𑀤𑁆𑀤𑁄 ‘‘𑀢𑀸 𑀕𑀸𑀯𑁄 𑀢𑀢𑁄 𑀢𑀢𑁄 𑀤𑀡𑁆𑀟𑁂𑀦 𑀆𑀓𑁄𑀝𑁂𑀬𑁆𑀬𑀸’’𑀢𑀺 𑀘 ‘‘𑀅𑀦𑁆𑀦𑀤𑀸 𑀩𑀮𑀤𑀸 𑀘𑁂𑀢𑀸’’𑀢𑀺 𑀘 𑀆𑀤𑀺𑀦𑀸 𑀩𑀯𑁆𑀳𑀢𑁆𑀣𑀤𑀻𑀧𑀓𑁂𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀽𑀢𑁂𑀳𑀺 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀳𑀺 𑀘 𑀅𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀳𑀺 𑀘 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄 𑀤𑀺𑀲𑁆𑀲𑀢𑀺, 𑀦 𑀢𑀣𑀸 𑀧𑀸𑀴𑀺𑀬𑀁 𑀩𑀯𑁆𑀳𑀢𑁆𑀣𑀤𑀻𑀧𑀓𑁂𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀽𑀢𑁂𑀳𑀺 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀳𑀺 𑀯𑀸 𑀅𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀳𑀺 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄 𑀆𑀧𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀬𑀤𑀺 𑀳𑀺 𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀺𑀬𑀸, 𑀓𑀜𑁆𑀜𑀲𑀤𑁆𑀤𑀢𑁄 𑀆𑀧𑀘𑁆𑀘𑀬𑁄 𑀯𑀺𑀬 𑀆𑀧𑀲𑀤𑁆𑀤𑀢𑁄 𑀆𑀧𑀘𑁆𑀘𑀬𑁄 𑀯𑀸 𑀲𑀺𑀬𑀸, 𑀦𑀤𑀲𑀤𑁆𑀤𑀢𑁄 𑀯𑀺𑀬 𑀘 𑀈𑀧𑀘𑁆𑀘𑀬𑁄 𑀯𑀸 𑀲𑀺𑀬𑀸, 𑀉𑀪𑀬𑀫𑁆𑀧𑀺 𑀦𑀢𑁆𑀣𑀺, 𑀉𑀪𑀬𑀸𑀪𑀸𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀥𑀸𑀦𑀁 𑀢𑀢𑁆𑀣 𑀦 𑀮𑀩𑁆𑀪𑀢𑀺, 𑀢𑁂𑀦 𑀜𑀸𑀬𑀢𑀺 ‘‘𑀆𑀧𑀲𑀤𑁆𑀤𑁄 𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑁄’’𑀢𑀺. 𑀦𑀦𑀼 𑀘 𑀪𑁄 𑀕𑁄𑀲𑀤𑁆𑀤𑀢𑁄𑀧𑀺 𑀆𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀢𑀤𑀪𑀸𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀼𑀢𑁆𑀢𑀯𑀺𑀥𑀸𑀦𑀁 𑀦 𑀮𑀩𑁆𑀪𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑁄 𑀳𑁄𑀢𑀺, 𑀦 𑀧𑀦𑀸𑀬𑀁 𑀆𑀧𑀲𑀤𑁆𑀤𑁄𑀢𑀺?

𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀕𑁄𑀲𑀤𑁆𑀤𑁄 𑀦 𑀦𑀺𑀬𑁄𑀕𑀸 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀅𑀣 𑀔𑁄 𑀧𑀼𑀮𑁆𑀮𑀺𑀗𑁆𑀕𑁄𑀯. 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀧𑀦 𑀢𑀫𑁆𑀳𑀸 𑀆𑀧𑀘𑁆𑀘𑀬𑁂 ¶ 𑀅𑀳𑁄𑀦𑁆𑀢𑁂𑀧𑀺 𑀈𑀧𑀘𑁆𑀘𑀬𑁄 𑀯𑀺𑀓𑀧𑁆𑀧𑁂𑀦 𑀳𑁄𑀢𑀺, 𑀅𑀜𑁆𑀜𑀫𑁆𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀼𑀢𑁆𑀢𑀯𑀺𑀥𑀸𑀦𑀁 𑀮𑀩𑁆𑀪𑀢𑀺. 𑀲𑁄 𑀳𑀺 𑀦𑀺𑀘𑁆𑀘𑀫𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 ‘‘𑀕𑁄, 𑀕𑀸𑀯𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀪𑀽𑀢𑁄, 𑀢𑁂𑀦 𑀲𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀪𑀯𑀢𑀺. 𑀆𑀧𑀲𑀤𑁆𑀤𑁂 𑀧𑀦 𑀈𑀧𑀘𑁆𑀘𑀬𑀸𑀤𑀺 𑀦 𑀮𑀩𑁆𑀪𑀢𑀺. 𑀢𑁂𑀦 𑀲𑁄 𑀇𑀢𑁆𑀣𑀺𑀮𑀺𑀗𑁆𑀕𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀣𑀸 𑀯𑀸 𑀕𑁄𑀲𑀤𑁆𑀤𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀁 𑀧𑀝𑀺𑀘𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀉𑀧𑀧𑀚𑁆𑀚𑀢𑀺, 𑀦 𑀢𑀣𑀸 𑀆𑀧𑀲𑀤𑁆𑀤𑀲𑁆𑀲. 𑀆𑀧𑀲𑀤𑁆𑀤𑀲𑁆𑀲 𑀳𑀺 𑀅𑀦𑀸𑀓𑀼𑀮𑀭𑀽𑀧𑀓𑁆𑀓𑀫𑀢𑁆𑀢𑀸 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀦 𑀤𑀺𑀲𑁆𑀲𑀢𑀺, 𑀬𑀸𑀬 𑀏𑀲𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀺𑀬𑀸. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀢𑀣𑀸 𑀬𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀆𑀧𑀲𑀤𑁆𑀤𑁄 𑀲𑀩𑁆𑀩𑀤𑀸 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀩𑀳𑀼𑀯𑀘𑀦𑀓𑁄 𑀘𑀸’’𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀪𑀽𑀢𑀲𑁆𑀲 𑀓𑀜𑁆𑀜𑀸𑀲𑀤𑁆𑀤𑀲𑁆𑀲 𑀧𑀞𑀫𑀁 𑀓𑀜𑁆𑀜𑀇𑀢𑀺 𑀭𑀲𑁆𑀲𑀯𑀲𑁂𑀦 𑀞𑀧𑀺𑀢𑀲𑁆𑀲 𑀆𑀧𑀘𑁆𑀘𑀬𑀢𑁄 𑀧𑀭𑀁 𑀲𑁆𑀫𑀺𑀁𑀯𑀘𑀦𑀁 𑀲𑀭𑀽𑀧𑀢𑁄 𑀦 𑀢𑀺𑀝𑁆𑀞𑀢𑀺, 𑀬𑀁𑀪𑀸𑀯𑁂𑀦 𑀘 𑀬𑀸𑀪𑀸𑀯𑁂𑀦 𑀘 𑀢𑀺𑀝𑁆𑀞𑀢𑀺 ‘‘𑀓𑀜𑁆𑀜𑀸𑀬𑀁, 𑀓𑀜𑁆𑀜𑀸𑀬𑀸’’𑀢𑀺, 𑀦 𑀢𑀣𑀸 ‘‘𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺 𑀢𑀼𑀫𑁆𑀳𑁂𑀳𑀺 𑀕𑀳𑀺𑀢𑀲𑁆𑀲 𑀆𑀧𑁄𑀲𑀤𑁆𑀤𑀲𑁆𑀲 𑀧𑀞𑀫𑀁 𑀆𑀧𑀇𑀢𑀺 𑀭𑀲𑁆𑀲𑀯𑀲𑁂𑀦 𑀞𑀧𑀺𑀢𑀲𑁆𑀲 𑀧𑀭𑀁 𑀲𑁆𑀫𑀺𑀁𑀯𑀘𑀦𑀁 𑀬𑀁𑀪𑀸𑀯𑁂𑀦 𑀘 𑀬𑀸𑀪𑀸𑀯𑁂𑀦 𑀘 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀲𑀭𑀽𑀧𑀢𑁄𑀬𑁂𑀯 𑀢𑀺𑀝𑁆𑀞𑀢𑀺 ‘‘𑀆𑀧𑀲𑁆𑀫𑀺𑀁 𑀫𑀜𑁆𑀜𑀢𑀻’’𑀢𑀺. 𑀬𑀤𑀺 𑀧𑀦 𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀺𑀬𑀸, 𑀲𑁆𑀫𑀺𑀁𑀯𑀘𑀦𑀁 𑀲𑀭𑀽𑀧𑀢𑁄 𑀦 𑀢𑀺𑀝𑁆𑀞𑁂𑀬𑁆𑀬. 𑀬𑀲𑁆𑀫𑀸 𑀘 𑀲𑁆𑀫𑀺𑀁𑀯𑀘𑀦𑀁 𑀲𑀭𑀽𑀧𑀢𑁄 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀆𑀧𑀲𑀤𑁆𑀤𑁄 𑀦 𑀇𑀢𑁆𑀣𑀺𑀮𑀺𑀗𑁆𑀕𑁄. 𑀦 𑀳𑀺 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀲𑀗𑁆𑀕𑀳𑁂𑀲𑀼 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 𑀧𑀞𑀫𑀁 𑀅𑀓𑀸𑀭𑀦𑁆𑀢𑀪𑀸𑀯𑁂𑀦 𑀞𑀧𑁂𑀢𑀩𑁆𑀩𑀸𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀲𑀤𑁆𑀤𑀸𑀦𑀁 𑀧𑀭𑀢𑁄 𑀞𑀺𑀢𑀁 𑀲𑁆𑀫𑀺𑀁𑀯𑀘𑀦𑀁 𑀲𑀭𑀽𑀧𑀢𑁄 𑀢𑀺𑀝𑁆𑀞𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀓𑁂𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀆𑀧𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘𑀑𑀫𑀢𑁆𑀢𑀁 𑀧𑀦 𑀆𑀧𑁄 𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑀁 ¶ 𑀚𑀸𑀢’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀻’’𑀢𑀺? 𑀢𑀦𑁆𑀦, 𑀫𑀦𑁄𑀕𑀡𑁂 𑀧𑀯𑀢𑁆𑀢𑁂𑀳𑀺 𑀢𑀫 𑀯𑀘 𑀲𑀺𑀭𑀲𑀤𑁆𑀤𑀸𑀤𑀻𑀳𑀺 𑀯𑀺𑀬 𑀆𑀧𑀲𑀤𑁆𑀤𑁂𑀦𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀁 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸. 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀜𑁆𑀳𑀺 𑀲𑀤𑁆𑀤𑀭𑀘𑀦𑀸𑀲𑀼 ‘‘𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦, 𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄 𑀧𑀬𑀸𑀢𑀻’’𑀢𑀺 𑀏𑀢𑁆𑀣 ‘‘𑀢𑀫𑁄’’𑀢𑀺𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 ‘‘𑀯𑀺𑀳𑀢’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀤𑀺𑀲𑁆𑀲𑀢𑀺, 𑀢𑀣𑀸 ‘‘𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄’’𑀢𑀺 𑀏𑀢𑁆𑀣 ‘‘𑀯𑀘𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 ‘‘𑀤𑀼𑀓𑁆𑀔’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, ‘‘𑀅𑀯𑀦𑀢𑀁 𑀲𑀺𑀭𑁄 𑀬𑀲𑁆𑀲 𑀲𑁄 𑀅𑀯𑀦𑀢𑀲𑀺𑀭𑁄’’𑀢𑀺 𑀏𑀢𑁆𑀣 ‘‘𑀲𑀺𑀭𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 ‘‘𑀅𑀯𑀦𑀢’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, ‘‘𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑁄 𑀬𑁂𑀲𑀁 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺 𑀏𑀢𑁆𑀣 ‘‘𑀭𑀚𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 ‘‘𑀅𑀧𑁆𑀧’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀤𑀺𑀲𑁆𑀲𑀢𑀺. 𑀦 𑀢𑁂 𑀆𑀘𑀭𑀺𑀬𑀸 𑀢𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀢𑀫𑀯𑀘𑀲𑀺𑀭𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀢𑀣𑀸𑀯𑀺𑀥𑀁 𑀲𑀤𑁆𑀤𑀭𑀘𑀦𑀁 𑀓𑀼𑀩𑁆𑀩𑀺𑀁𑀲𑀼, 𑀅𑀣 𑀔𑁄 ‘‘𑀲𑁄𑀪𑀦𑀁 𑀫𑀦𑁄 𑀢𑀲𑁆𑀲𑀸𑀢𑀺 𑀲𑀼𑀫𑀦𑁄’’𑀢𑀺 𑀏𑀢𑁆𑀣 𑀯𑀺𑀬 𑀫𑀦𑁄𑀕𑀡𑁂 𑀧𑀯𑀢𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀬𑁄𑀕𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁂𑀦𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀸𑀦𑀺 𑀓𑀢𑁆𑀣𑀘𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀼𑀩𑁆𑀩𑀺𑀁𑀲𑀼. 𑀬𑀣𑀸 𑀘 ‘‘𑀯𑀺𑀳𑀢’’𑀦𑁆𑀢𑀺𑀆𑀤𑀺𑀓𑀸 𑀲𑀤𑁆𑀤𑀭𑀘𑀦𑀸 𑀢𑀫𑀯𑀘𑀲𑀺𑀭𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀦 𑀓𑀢𑀸, 𑀢𑀣𑀸 ‘‘𑀑𑀫𑀢𑁆𑀢’’𑀦𑁆𑀢𑀺 𑀘 ‘‘𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑀁 𑀚𑀸𑀢’’𑀦𑁆𑀢𑀺 𑀘 𑀲𑀤𑁆𑀤𑀭𑀘𑀦𑀸𑀧𑀺 𑀆𑀧𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀦 𑀓𑀢𑀸. 𑀬𑀲𑁆𑀫𑀸 𑀧𑀦 𑀫𑀦𑁄𑀕𑀡𑁂 𑀧𑀯𑀢𑁆𑀢𑁂𑀳𑀺 𑀫𑀦𑀲𑀤𑁆𑀤𑀸𑀤𑀻𑀳𑀺 𑀏𑀓𑀤𑁂𑀲𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀆𑀧𑀲𑀤𑁆𑀤𑁂𑀦𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀑𑀫𑀢𑁆𑀢𑀁 𑀧𑀦 𑀆𑀧𑁄 𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑀁 𑀚𑀸𑀢’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀆𑀧𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀓𑀢𑀸. 𑀢𑀣𑀸𑀧𑀺 𑀆𑀧𑀲𑀤𑁆𑀤𑁄 ¶ 𑀫𑀦𑀲𑀤𑁆𑀤𑀸𑀤𑀻𑀳𑀺 𑀏𑀓𑀤𑁂𑀲𑁂𑀦 𑀲𑀫𑀸𑀦𑀕𑀢𑀺𑀓𑁄 𑀲𑀫𑀸𑀲𑀧𑀤𑀢𑁆𑀢𑁂 𑀫𑀚𑁆𑀛𑁄𑀓𑀸𑀭𑀲𑁆𑀲 ‘‘𑀆𑀧𑁄𑀓𑀲𑀺𑀡𑀁, 𑀆𑀧𑁄𑀕𑀢’’𑀦𑁆𑀢𑀺𑀆𑀤𑀺𑀧𑁆𑀧𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 ‘‘𑀑𑀫𑀢𑁆𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀆𑀧𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁, 𑀮𑀺𑀗𑁆𑀕𑀯𑀺𑀧𑀭𑀺𑀬𑀬𑀯𑀲𑁂𑀦 𑀧𑀦 𑀓𑀢𑁆𑀣𑀘𑀺 𑀏𑀯𑀫𑁆𑀧𑀺 𑀲𑀤𑁆𑀤𑀕𑀢𑀺 𑀳𑁄𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀑𑀫𑀢𑁆𑀢𑁄’’𑀢𑀺 𑀘 ‘‘𑀅𑀥𑀺𑀫𑀢𑁆𑀢𑀧𑀣𑀯𑀻𑀕𑀢𑀺𑀓𑁄 𑀚𑀸𑀢𑁄’’𑀢𑀺 𑀘 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀆𑀧𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀲𑀺𑀬𑀸, 𑀲𑀦𑀺𑀓𑀸𑀭𑀸𑀦𑀺’𑀲𑁆𑀲 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀭𑀽𑀧𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀤𑀻𑀲𑀼 𑀯𑀺𑀚𑁆𑀚𑁂𑀬𑁆𑀬𑀼𑀁, 𑀦 𑀢𑀸𑀤𑀺𑀲𑀸𑀦𑀺 𑀲𑀦𑁆𑀢𑀺. 𑀓𑀺𑀜𑁆𑀘𑀺 𑀪𑀺𑀬𑁆𑀬𑁄 𑁋 𑀑𑀓𑀸𑀭𑀦𑁆𑀢𑀁 𑀦𑀸𑀫 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀓𑀢𑁆𑀣𑀘𑀺𑀧𑀺 𑀦𑀢𑁆𑀣𑀺, 𑀦𑀺𑀕𑁆𑀕𑀳𑀻𑀢𑀦𑁆𑀢𑀇𑀓𑀸𑀭𑀦𑁆𑀢 𑀉𑀓𑀸𑀭𑀦𑁆𑀢𑀯𑀲𑁂𑀦 𑀳𑀺 𑀢𑀺𑀯𑀺𑀥𑀸𑀦𑀺𑀬𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺. 𑀢𑁂𑀦 𑀆𑀧𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀦𑀼𑀧𑀧𑀚𑁆𑀚𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀘𑁆𑀘𑁄𑀓𑀸𑀭𑀦𑁆𑀢𑀯𑀲𑁂𑀦 𑀕𑀳𑀺𑀢𑀲𑁆𑀲 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀸 𑀘 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀘 𑀏𑀓𑀦𑁆𑀢𑀢𑁄 𑀦𑀢𑁆𑀣𑀺, 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦 𑀧𑀦 𑀕𑀳𑀺𑀢𑀲𑁆𑀲 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀲𑀺𑀬𑀸 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦 𑀲𑀫𑀼𑀤𑁆𑀤𑁄 𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀆𑀧𑀁 𑀉𑀤𑀓𑀁 𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄. 𑀏𑀢𑁆𑀣 𑀧𑀦𑁂𑀓𑁂 𑀯𑀤𑁂𑀬𑁆𑀬𑀼𑀁 ‘‘𑀬𑀤𑀺 𑀪𑁄 𑀑𑀓𑀸𑀭𑀦𑁆𑀢𑀯𑀲𑁂𑀦 𑀕𑀳𑀺𑀢𑀲𑁆𑀲 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑀢𑀸 𑀦𑀢𑁆𑀣𑀺, 𑀑𑀓𑀸𑀭𑀦𑁆𑀢𑁄 𑀆𑀧𑀲𑀤𑁆𑀤𑁄 𑀓𑀢𑀭𑀮𑀺𑀗𑁆𑀕𑁄’’𑀢𑀺? 𑀧𑀼𑀮𑁆𑀮𑀺𑀗𑁆𑀕𑁄𑀢𑀺 𑀫𑀬𑀁 𑀯𑀤𑀸𑀫𑀸𑀢𑀺.

𑀬𑀤𑀺 𑀘 𑀪𑁄 𑀆𑀧𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄. 𑀬𑀣𑀸 𑀆𑀧𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑀸 𑀧𑀜𑁆𑀜𑀸𑀬𑁂𑀬𑁆𑀬, 𑀦𑀺𑀚𑁆𑀛𑀸𑀦𑀓𑁆𑀔𑀫𑀢𑀸 𑀘 𑀪𑀯𑁂𑀬𑁆𑀬, 𑀢𑀣𑀸 𑀲𑀼𑀢𑁆𑀢𑀁 𑀆𑀳𑀭𑀣𑀸𑀢𑀺. ‘‘𑀆𑀳𑀭𑀺𑀲𑁆𑀲𑀸𑀫𑀺𑀲𑀼𑀢𑁆𑀢𑀁, 𑀦 𑀦𑁄 𑀲𑀼𑀢𑁆𑀢𑀸𑀳𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’’𑀢𑀺 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂𑀲𑀁 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀆𑀧𑁄 𑀉𑀧𑀮𑀩𑁆𑀪𑀢𑀻𑀢𑀺? 𑀆𑀫𑀦𑁆𑀢𑀸. 𑀆𑀧𑀲𑁆𑀲 𑀓𑀢𑁆𑀢𑀸 𑀓𑀸𑀭𑁂𑀢𑀸 𑀉𑀧𑀮𑀩𑁆𑀪𑀢𑀻𑀢𑀺? 𑀦 ¶ 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀅𑀢𑀻𑀢𑁄 𑀆𑀧𑁄 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀆𑀧𑁂𑀦 𑀆𑀧𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀆𑀧𑀁 𑀫𑀜𑁆𑀜𑀢𑀺 𑀆𑀧𑀲𑁆𑀫𑀺𑀁 𑀫𑀜𑁆𑀜𑀢𑀻’’𑀢𑀺 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺.

𑀏𑀢𑁆𑀣 𑀘 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 𑀆𑀧𑀲𑀤𑁆𑀤𑀲𑁆𑀲 𑀏𑀓𑀯𑀘𑀦𑀢𑀸 𑀲𑀺𑀤𑁆𑀥𑀸, 𑀢𑀸𑀬 𑀲𑀺𑀤𑁆𑀥𑀸𑀬 𑀩𑀳𑀼𑀯𑀘𑀦𑀢𑀸𑀧𑀺 𑀲𑀺𑀤𑁆𑀥𑀸𑀬𑁂𑀯. 𑀏𑀓𑀯𑀘𑀦𑀢𑀸𑀬𑁂𑀯 𑀳𑀺 𑀲𑀤𑁆𑀤𑀲𑀢𑁆𑀣𑁂 𑀧𑀝𑀺𑀲𑀺𑀤𑁆𑀥𑀸, 𑀦 𑀩𑀳𑀼𑀯𑀘𑀦𑀢𑀸, 𑀢𑁂𑀦 ‘‘𑀆𑀧𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀦 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀯𑀺𑀕𑀫𑁄 𑀲𑀺𑀤𑁆𑀥𑁄 𑀇𑀢𑁆𑀣𑀺𑀮𑀺𑀗𑁆𑀕𑁂 𑀏𑀦𑀸𑀤𑁂𑀲𑀸𑀪𑀸𑀯𑀢𑁄. ‘‘𑀆𑀧𑀲𑁆𑀲, 𑀆𑀧𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀯𑀺𑀕𑀫𑁄𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑁂 𑀲𑀭𑀽𑀧𑀢𑁄 𑀦𑀸 𑀲𑁆𑀫𑀸 𑀲𑁆𑀫𑀺𑀁 𑀯𑀘𑀦𑀸𑀦𑀫𑀪𑀸𑀯𑀸. ‘‘𑀅𑀢𑀻𑀢𑁄’’𑀢𑀺 𑀇𑀫𑀺𑀦𑀸 𑀇𑀢𑁆𑀣𑀺𑀮𑀺𑀗𑁆𑀕𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑀯𑀺𑀕𑀫𑁄 𑀑𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀅𑀪𑀸𑀯𑀢𑁄, 𑀑𑀓𑀸𑀭𑀦𑁆𑀢𑀲𑁆𑀲 𑀕𑀼𑀡𑀦𑀸𑀫𑀪𑀽𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀘 𑀅𑀪𑀸𑀯𑀢𑁄.

𑀅𑀧𑀺𑀘 𑀩𑀼𑀤𑁆𑀥𑀯𑀘𑀦𑀸𑀤𑀻𑀲𑀼 ‘‘𑀘𑀺𑀢𑁆𑀢𑀸𑀦𑀺, 𑀭𑀽𑀧𑀸𑀦𑀻’’𑀢𑀺𑀆𑀤𑀻𑀦𑀺 𑀯𑀺𑀬 𑀲𑀦𑀺𑀓𑀸𑀭𑀸𑀦𑀁 𑀭𑀽𑀧𑀸𑀦𑀁 𑀅𑀤𑀲𑁆𑀲𑀦𑀢𑁄 𑀑𑀓𑀸𑀭𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑀲𑁆𑀲 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑀯𑀺𑀕𑀫𑁄 𑀅𑀢𑀻𑀯 𑀧𑀸𑀓𑀝𑁄. 𑀅𑀧𑀭𑀫𑁆𑀧𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢𑁄 𑀆𑀧𑁄 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀏𑀢𑁆𑀣 ‘‘𑀅𑀢𑀻𑀢𑁄’’𑀢𑀺 𑀇𑀫𑀺𑀦𑀸 𑀆𑀧𑀲𑀤𑁆𑀤𑀲𑁆𑀲 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸𑀲𑀽𑀘𑀓𑁂𑀦 𑀑𑀓𑀸𑀭𑀦𑁆𑀢𑀧𑀤𑁂𑀦 𑀢𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸𑀬 𑀘 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸𑀬 𑀘 𑀅𑀪𑀸𑀯𑁄 𑀲𑀺𑀤𑁆𑀥𑁄. 𑀢𑀲𑁆𑀲 𑀘 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸𑀬 𑀅𑀪𑀸𑀯𑁂 𑀲𑀺𑀤𑁆𑀥𑁂 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀤𑀽𑀭𑀢𑀭𑁄. 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸𑀬 𑀘 𑀅𑀪𑀸𑀯𑁂 𑀲𑀺𑀤𑁆𑀥𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀪𑀸𑀯𑁄𑀧𑀺 𑀤𑀽𑀭𑀢𑀭𑁄𑀬𑁂𑀯. 𑀇𑀢𑀺 𑀦 𑀓𑀢𑁆𑀣𑀘𑀺𑀧𑀺 𑀑𑀓𑀸𑀭𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑁄 𑀆𑀧𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀯𑀸 𑀪𑀯𑀢𑀺. 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑀧𑀦 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦 𑀆𑀕𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀦 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 ‘‘𑀅𑀢𑀻𑀢𑁄’’𑀢𑀺 ‘‘𑀢𑁂𑀦𑀸’’𑀢𑀺 ¶ 𑀘 𑀇𑀫𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀫𑀦𑀼𑀯𑀢𑁆𑀢𑀸𑀧𑀓𑀲𑁆𑀲 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀪𑀽𑀢𑀲𑁆𑀲 𑀆𑀧𑀲𑀤𑁆𑀤𑀲𑁆𑀲 ‘‘𑀓𑀜𑁆𑀜𑀸𑀬 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀻𑀦𑀁 𑀯𑀺𑀬 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀁 𑀅𑀪𑀸𑀯𑀢𑁄. 𑀅𑀧𑀺𑀘 𑀯𑁄𑀳𑀸𑀭𑀓𑀼𑀲𑀮𑀸 𑀢𑀣𑀸𑀕𑀢𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘, 𑀢𑁂𑀳𑀺𑀬𑁂𑀯 𑀉𑀢𑁆𑀢𑀫𑀧𑀼𑀭𑀺𑀲𑁂𑀳𑀺 𑀯𑁄𑀳𑀸𑀭𑀓𑀼𑀲𑀮𑁂𑀳𑀺 ‘‘𑀅𑀢𑀻𑀢𑁄 𑀆𑀧𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸𑀧𑀺 ‘‘𑀅𑀢𑀻𑀢𑁄’’𑀢𑀺 ‘‘𑀢𑁂𑀦𑀸’’𑀢𑀺 𑀘 𑀇𑀫𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑁄 𑀑𑀓𑀸𑀭𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑁄 𑀆𑀧𑀲𑀤𑁆𑀤𑁄 𑀏𑀓𑀯𑀘𑀦𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀘𑁂𑀯 𑀬𑀣𑀸𑀧𑀬𑁄𑀕𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄 ‘‘𑀆𑀧𑁄, 𑀆𑀧𑀸. 𑀆𑀧𑀁, 𑀆𑀧𑁂’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀢𑁆𑀢𑀸. 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀲𑀯𑀺𑀦𑀺𑀘𑁆𑀙𑀬𑀸𑀦𑀺 𑀲𑀼𑀢𑁆𑀯𑀸 𑀅𑀤𑁆𑀥𑀸 𑀢𑁂 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀢𑀸𑀯𑀸𑀤𑀺𑀦𑁄 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀏𑀢𑁆𑀣 𑀓𑁄𑀘𑀺 𑀯𑀤𑁂𑀬𑁆𑀬 𑁋 𑀧𑀸𑀴𑀺𑀬𑀁 𑀧𑀼𑀮𑁆𑀮𑀺𑀗𑁆𑀕𑀦𑀬𑁄 𑀏𑀓𑀯𑀘𑀦𑀦𑀬𑁄 𑀘 𑀓𑀺𑀁 𑀅𑀝𑁆𑀞𑀓𑀣𑀸𑀝𑀻𑀓𑀸𑀘𑀭𑀺𑀬𑁂𑀳𑀺 𑀦 𑀤𑀺𑀝𑁆𑀞𑁄, 𑀬𑁂 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀢𑁆𑀢𑀁 𑀯𑀡𑁆𑀡𑁂𑀲𑀼𑀦𑁆𑀢𑀺? 𑀦𑁄 𑀦 𑀤𑀺𑀝𑁆𑀞𑁄, 𑀤𑀺𑀝𑁆𑀞𑁄𑀬𑁂𑀯 𑀲𑁄 𑀦𑀬𑁄 𑀢𑁂𑀳𑀺. 𑀬𑀲𑁆𑀫𑀸 𑀧𑀦 𑀢𑁂 𑀦 𑀓𑁂𑀯𑀮𑀁 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂𑀬𑁂𑀯 𑀯𑀺𑀲𑀸𑀭𑀤𑀸, 𑀅𑀣 𑀔𑁄 𑀲𑀓𑀮𑁂𑀧𑀺 𑀲𑀤𑁆𑀤𑀲𑀢𑁆𑀣𑁂 𑀯𑀺𑀲𑀸𑀭𑀤𑀸, 𑀢𑀲𑁆𑀫𑀸 𑀲𑀤𑁆𑀤𑀲𑀢𑁆𑀣𑁂 𑀅𑀢𑁆𑀢𑀦𑁄 𑀧𑀡𑁆𑀟𑀺𑀘𑁆𑀘𑀁 𑀧𑀓𑀸𑀲𑁂𑀢𑀼𑀁, ‘‘𑀲𑀤𑁆𑀤𑀲𑀢𑁆𑀣𑁂 𑀘 𑀈𑀤𑀺𑀲𑁄 𑀦𑀬𑁄 𑀯𑀼𑀢𑁆𑀢𑁄’’𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀜𑁆𑀘 𑀲𑀤𑁆𑀤𑀲𑀢𑁆𑀣𑀦𑀬𑀁 𑀕𑀳𑁂𑀢𑁆𑀯𑀸 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀓𑀢𑁆𑀢𑀁 𑀯𑀡𑁆𑀡𑁂𑀲𑀼𑀦𑁆𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀤𑁄𑀲𑁄. 𑀢𑀣𑀸 𑀳𑀺 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 𑀢𑁂𑀳𑀺𑀬𑁂𑀯 𑀯𑀼𑀢𑁆𑀢𑀁 𑀆𑀧𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑁂𑀓𑀯𑀘𑀦𑀓𑀢𑁆𑀢𑀲𑀽𑀘𑀦𑀓𑀁 ‘‘𑀮𑀓𑁆𑀔𑀡𑀲𑀲𑀫𑁆𑀪𑀸𑀭𑀸𑀭𑀫𑁆𑀫𑀡𑀲𑀫𑁆𑀫𑀼𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀆𑀧𑁄, 𑀢𑁂𑀲𑀽’’𑀢𑀺𑀆𑀤𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀢𑁂𑀲𑀁 𑀤𑁄𑀲𑁄. 𑀧𑀽𑀚𑀸𑀭𑀳𑀸 𑀳𑀺 𑀢𑁂 𑀆𑀬𑀲𑁆𑀫𑀦𑁆𑀢𑁄, 𑀦𑀫𑁄𑀬𑁂𑀯 𑀢𑁂𑀲𑀁 ¶ 𑀓𑀭𑁄𑀫, 𑀦 𑀢𑁂𑀲𑀁 𑀯𑀘𑀦𑀁 𑀘𑁄𑀤𑀦𑀸𑀪𑀸𑀚𑀦𑀁. 𑀬𑁂 𑀧𑀦 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀤𑀴𑁆𑀳𑀫𑁂𑀯 𑀆𑀧𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀩𑀳𑀼𑀯𑀘𑀦𑀢𑁆𑀢𑀁 𑀫𑀫𑀸𑀬𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀯𑀘𑀦𑀁 𑀘𑁄𑀤𑀦𑀸𑀪𑀸𑀚𑀦𑀁. 𑀬𑀲𑁆𑀫𑀸 𑀧𑀦 𑀫𑀬𑀁 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀅𑀦𑁆𑀢𑀤𑁆𑀯𑀬𑀯𑀢𑁄 𑀆𑀧𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘 𑀯𑀺𑀤𑀥𑀸𑀫, 𑀢𑀲𑁆𑀫𑀸 𑀬𑁄 𑀓𑁄𑀘𑀺 𑀇𑀤𑀁 𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀇𑀤𑀜𑁆𑀘 𑀧𑀦 𑀞𑀸𑀦𑀁 𑀫𑀳𑀸𑀕𑀳𑀦𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦, 𑀧𑀭𑀫𑀲𑀼𑀔𑀼𑀫𑀜𑁆𑀘 𑀓𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀧𑀭𑀫𑀲𑀼𑀔𑀼𑀫𑀜𑀸𑀡𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀦𑀻𑀬𑀢𑁆𑀢𑀸. 𑀲𑀩𑁆𑀩𑀫𑀺𑀤𑀜𑁆𑀳𑀺 𑀯𑀘𑀦𑀁 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀕𑁆𑀕𑀳𑀡𑁂 𑀲𑁄𑀢𑀽𑀦𑀁 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀜𑁆𑀘𑁂𑀯 𑀲𑀸𑀲𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀲𑀤𑁆𑀤𑀲𑀢𑁆𑀣𑀫𑀢𑁂𑀦 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀁 𑀲𑀸𑀣𑀮𑀺𑀓𑀸𑀦𑀁 𑀧𑀫𑀸𑀤𑀯𑀺𑀳𑀸𑀭𑀦𑀺𑀲𑁂𑀥𑀦𑀢𑁆𑀣𑀜𑁆𑀘 𑀲𑀸𑀲𑀦𑀲𑁆𑀲𑀸𑀢𑀺𑀫𑀳𑀦𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁, 𑀦 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀢𑁆𑀣𑀦𑁆𑀢𑀺 𑀇𑀫𑀺𑀲𑁆𑀲𑀁 𑀦𑀻𑀢𑀺𑀬𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀬𑁄𑀕𑁄 𑀓𑀭𑀡𑀻𑀬𑁄 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁.

𑀬𑀲𑁆𑀫𑀸 𑀧𑀦 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸 𑀩𑀮𑀯𑀢𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑁂𑀦𑁂𑀯 𑀆𑀧𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀬𑁄𑀚𑁂𑀲𑁆𑀲𑀸𑀫 𑀲𑁄𑀢𑀽𑀦𑀫𑀲𑀫𑁆𑀫𑁄𑀳𑀢𑁆𑀣𑀁, 𑀓𑀺𑀫𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀦𑀬𑁄 𑀓𑀭𑀺𑀲𑁆𑀲𑀢𑀺. 𑀅𑀢𑁆𑀭𑀸𑀬𑀁 𑀉𑀤𑀸𑀦𑀧𑀸𑀴𑀺 ‘‘𑀓𑀺𑀁 𑀓𑀬𑀺𑀭𑀸 𑀉𑀤𑀧𑀸𑀦𑁂𑀦, 𑀆𑀧𑀸 𑀘𑁂 𑀲𑀩𑁆𑀩𑀤𑀸 𑀲𑀺𑀬𑀼’’𑀦𑁆𑀢𑀺.

𑀆𑀧𑁄, 𑀆𑀧𑀸. 𑀆𑀧𑀁, 𑀆𑀧𑁂. 𑀆𑀧𑁂𑀦, 𑀆𑀧𑁂𑀳𑀺, 𑀆𑀧𑁂𑀪𑀺. 𑀆𑀧𑀲𑁆𑀲, 𑀆𑀧𑀸𑀦𑀁. 𑀆𑀧𑀸, 𑀆𑀧𑀲𑁆𑀫𑀸, 𑀆𑀧𑀫𑁆𑀳𑀸, 𑀆𑀧𑁂𑀳𑀺, 𑀆𑀧𑁂𑀪𑀺. 𑀆𑀧𑀲𑁆𑀲, 𑀆𑀧𑀸𑀦𑀁. 𑀆𑀧𑁂, 𑀆𑀧𑀲𑁆𑀫𑀺𑀁, 𑀆𑀧𑀫𑁆𑀳𑀺, 𑀆𑀧𑁂𑀲𑀼. 𑀪𑁄 𑀆𑀧, 𑀪𑀯𑀦𑁆𑀢𑁄 𑀆𑀧𑀸.

𑀲𑀩𑁆𑀩𑀦𑀸𑀫𑀸𑀤𑀻𑀳𑀺𑀧𑀺 𑀬𑁄𑀚𑁂𑀲𑁆𑀲𑀸𑀫 𑁋 𑀬𑁄 𑀆𑀧𑁄, 𑀬𑁂 𑀆𑀧𑀸. 𑀬𑀁 𑀆𑀧𑀁, 𑀬𑁂 𑀆𑀧𑁂. 𑀬𑁂𑀦 𑀆𑀧𑁂𑀦, 𑀲𑁂𑀲𑀁 𑀦𑁂𑀬𑁆𑀬𑀁 ¶ , 𑀲𑁄 𑀆𑀧𑁄, 𑀢𑁂 𑀆𑀧𑀸. 𑀅𑀢𑀻𑀢𑁄 𑀆𑀧𑁄, 𑀅𑀢𑀻𑀢𑀸 𑀆𑀧𑀸. 𑀲𑁂𑀲𑀁 𑀦𑁂𑀬𑁆𑀬𑀁. 𑀇𑀘𑁆𑀘𑁂𑀯𑀁 𑁋

𑀧𑀼𑀭𑀺𑀲𑁂𑀦 𑀲𑀫𑀸 𑀆𑀧-𑀲𑀤𑁆𑀤𑀸𑀤𑀻 𑀲𑀩𑁆𑀩𑀣𑀸 𑀫𑀢𑀸;

𑀦 𑀲𑀩𑁆𑀩𑀣𑀸𑀯 𑀕𑁄𑀲𑀤𑁆𑀤𑁄, 𑀧𑀼𑀭𑀺𑀲𑁂𑀦 𑀲𑀫𑁄 𑀫𑀢𑁄.

𑀫𑀦𑀸𑀤𑀻 𑀏𑀓𑀤𑁂𑀲𑁂𑀦, 𑀧𑀼𑀭𑀺𑀲𑁂𑀦 𑀲𑀫𑀸 𑀫𑀢𑀸;

𑀲𑀭𑀸𑀤𑀻 𑀏𑀓𑀤𑁂𑀲𑁂𑀦, 𑀲𑀩𑁆𑀩𑀣𑀸 𑀯𑀸 𑀲𑀫𑀸 𑀫𑀢𑀸.

𑀬𑁂 𑀧𑀦𑁂𑀢𑁆𑀣 𑀲𑀤𑁆𑀤𑀸 ‘‘𑀫𑀦𑁄𑀕𑀡𑁄’’𑀢𑀺 𑀯𑀼𑀢𑁆𑀢𑀸, 𑀓𑀣𑀁 𑀢𑁂𑀲𑀁 𑀫𑀦𑁄𑀕𑀡𑀪𑀸𑀯𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑀢𑁂𑀲𑀁 𑀫𑀦𑁄𑀕𑀡𑀪𑀸𑀯𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀁 𑁋

𑀫𑀦𑁄𑀕𑀡𑁄 𑀫𑀦𑁄𑀕𑀡𑀸-

𑀤𑀺𑀓𑀸 𑀘𑁂𑀯𑀸’𑀫𑀦𑁄𑀕𑀡𑁄;

𑀇𑀢𑀺 𑀲𑀤𑁆𑀤𑀸 𑀢𑀺𑀥𑀸 𑀜𑁂𑀬𑁆𑀬𑀸,

𑀫𑀦𑁄𑀕𑀡𑀯𑀺𑀪𑀸𑀯𑀦𑁂.

𑀬𑁂 𑀢𑁂 𑀦𑀸 𑀲 𑀲𑁆𑀫𑀺𑀁𑀯𑀺𑀲𑀬𑁂,

𑀲𑀸 𑀲𑁄 𑀲𑁆𑀬𑀦𑁆𑀢𑀸 𑀪𑀯𑀦𑁆𑀢𑀺 𑀘;

𑀲𑀫𑀸𑀲𑀢𑀤𑁆𑀥𑀺𑀢𑀦𑁆𑀢𑀢𑁆𑀢𑁂,

𑀫𑀚𑁆𑀛𑁄𑀓𑀸𑀭𑀸 𑀘 𑀳𑁄𑀦𑁆𑀢𑀺 𑀳𑀺.

𑀲𑁄𑀓𑀸𑀭𑀦𑁆𑀢𑀧𑀬𑁄𑀕𑀸 𑀘, 𑀓𑁆𑀭𑀺𑀬𑀸𑀬𑁄𑀕𑀫𑁆𑀳𑀺 𑀤𑀺𑀲𑁆𑀲𑀭𑁂;

𑀏𑀯𑀁𑀯𑀺𑀥𑀸 𑀘 𑀢𑁂 𑀲𑀤𑁆𑀤𑀸, 𑀜𑁂𑀬𑁆𑀬𑀸 ‘‘𑀫𑀦𑁄𑀕𑀡𑁄’’𑀇𑀢𑀺.

𑀅𑀢𑁆𑀭 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀸𑀦𑀺 𑀧𑀬𑁄𑀕𑀸𑀦𑀺 𑀲𑀸𑀲𑀦𑀢𑁄 𑀘 𑀮𑁄𑀓𑀢𑁄 𑀘 𑀬𑀣𑀸𑀭𑀳𑀫𑀸𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸. 𑀦 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑁄. 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸. 𑀫𑀦𑁄𑀭𑀫𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦, 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀺. 𑀬𑁄 𑀯𑁂 ‘‘𑀤𑀲𑁆𑀲’’𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄. 𑀯𑀘𑀲𑀸 𑀧𑀭𑀺𑀘𑀺𑀢𑀸. 𑀯𑀘𑀲𑁄 𑀯𑀘𑀲𑀺.

𑀯𑀘𑁄𑀭𑀲𑁆𑀫𑀻𑀳𑀺 ¶ 𑀩𑁄𑀥𑁂𑀲𑀺, 𑀯𑁂𑀦𑁂𑀬𑁆𑀬𑀓𑀼𑀫𑀼𑀤𑀜𑁆𑀘𑀺𑀤𑀁;

𑀭𑀸𑀕𑁄 𑀲𑀸𑀭𑀸𑀕𑀭𑀳𑀺𑀢𑁄, 𑀯𑀺𑀲𑀼𑀤𑁆𑀥𑁄 𑀩𑀼𑀤𑁆𑀥𑀘𑀦𑁆𑀤𑀺𑀫𑀸.

𑀓𑀲𑁆𑀲𑀧𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄.

𑀲𑀔𑀸 𑀘 𑀫𑀺𑀢𑁆𑀢𑁄 𑀘 𑀫𑀫𑀸𑀲𑀺 𑀲𑀻𑀯𑀺𑀓, 𑀲𑀼𑀲𑀺𑀓𑁆𑀔𑀺𑀢𑁄 𑀲𑀸𑀥𑀼 𑀓𑀭𑁄𑀳𑀺 𑀫𑁂 𑀯𑀘𑁄. 𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸 𑀲𑀼𑀪𑀤𑁆𑀤. 𑀯𑀬𑀲𑁄, 𑀯𑀬𑀲𑀺, 𑀯𑀬𑁄𑀯𑀼𑀤𑁆𑀥𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺. 𑀚𑀮𑀦𑁆𑀢𑀫𑀺𑀯 𑀢𑁂𑀚𑀲𑀸. 𑀢𑁂𑀚𑀲𑁄, 𑀢𑁂𑀚𑀲𑀺, 𑀢𑁂𑀚𑁄𑀥𑀸𑀢𑀼𑀓𑀼𑀲𑀮𑁄. 𑀢𑁂𑀚𑁄𑀓𑀲𑀺𑀡𑀁. 𑀢𑀧𑀲𑀸 𑀉𑀢𑁆𑀢𑀫𑁄, 𑀢𑀧𑀲𑁄, 𑀢𑀧𑀲𑀺, 𑀢𑀧𑁄𑀥𑀦𑁄, 𑀢𑀧𑁄𑀚𑀺𑀕𑀼𑀘𑁆𑀙𑀸. 𑀓𑀲𑁆𑀫𑀸 𑀪𑀯𑀁 𑀯𑀺𑀚𑀦𑀫𑀭𑀜𑁆𑀜𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀇𑀥 𑀓𑁆𑀭𑀼𑀩𑁆𑀩𑀲𑀺 𑀩𑁆𑀭𑀳𑁆𑀫𑀧𑀢𑁆𑀢𑀺𑀬𑀸. 𑀘𑁂𑀢𑀲𑀸 𑀅𑀜𑁆𑀜𑀸𑀲𑀺, 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀏𑀢𑀫𑀢𑁆𑀣𑀁 𑀘𑁂𑀢𑀲𑀺 𑀲𑀦𑁆𑀦𑀺𑀥𑀸𑀬, 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁, 𑀘𑁂𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀚𑀸𑀦𑀸𑀢𑀺. 𑀢𑀫𑀲𑀸, 𑀢𑀫𑀲𑁄, 𑀢𑀫𑀲𑀺, 𑀢𑀫𑁄𑀦𑀼𑀤𑁄, 𑀢𑀫𑁄𑀳𑀭𑁄. 𑀦𑀯𑀸𑀳𑀫𑁂𑀢𑀁 𑀬𑀲𑀲𑀸 𑀤𑀤𑀸𑀫𑀺. 𑀬𑀲𑀲𑁄, 𑀬𑀲𑀲𑀺, 𑀬𑀲𑁄 𑀪𑁄𑀕𑀲𑀫𑀧𑁆𑀧𑀺𑀢𑁄. 𑀬𑀲𑁄𑀮𑀤𑁆𑀥𑀸𑀔𑁄 𑀧𑀦𑀲𑁆𑀫𑀸𑀓𑀁 𑀪𑁄𑀕𑀸. 𑀬𑀲𑁄𑀥𑀭𑀸 𑀤𑁂𑀯𑀻, 𑀬𑀲𑁄 𑀮𑀤𑁆𑀥𑀸 𑀦 𑀫𑀚𑁆𑀚𑁂𑀬𑁆𑀬. 𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁. 𑀅𑀬𑀲𑁄, 𑀅𑀬𑀲𑀺, 𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁. 𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀅𑀬𑁄𑀧𑀢𑁆𑀢𑁄 ¶ , 𑀅𑀬𑁄𑀫𑀬𑀁, 𑀅𑀬𑁄 𑀓𑀦𑁆𑀢𑀢𑀻𑀢𑀺 𑀅𑀬𑁄𑀓𑀦𑁆𑀢𑁄. 𑀖𑀢𑁂𑀦 𑀯𑀸 𑀪𑀼𑀜𑁆𑀚𑀲𑁆𑀲𑀼 𑀧𑀬𑀲𑀸 𑀯𑀸, 𑀲𑀸𑀥𑀼 𑀔𑀮𑀼 𑀧𑀬𑀲𑁄 𑀧𑀸𑀦𑀁 𑀬𑀜𑁆𑀜𑀤𑀢𑁆𑀢𑁂𑀦, 𑀧𑀬𑀲𑀺 𑀑𑀚𑀸, 𑀧𑀬𑁄𑀥𑀭𑀸, 𑀧𑀬𑁄𑀦𑀺𑀥𑀺. 𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀺. 𑀲𑀺𑀭𑀲𑁄, 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀯𑀦𑁆𑀤𑀺𑀢𑀩𑁆𑀩𑀁 𑀇𑀲𑀺𑀤𑁆𑀥𑀚𑀁. 𑀲𑀺𑀭𑁄𑀭𑀼𑀳𑀸, 𑀲𑀺𑀭𑁄 𑀙𑀺𑀦𑁆𑀤𑀢𑀺. 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸𑀲𑀺𑀭𑁄. 𑀲𑀺𑀭𑁄 𑀢𑁂 𑀯𑀚𑁆𑀛𑀬𑀺𑀢𑁆𑀯𑀸𑀦. 𑀲𑀭𑀲𑀸, 𑀲𑀭𑀲𑁄, 𑀢𑀻𑀡𑀺 𑀉𑀧𑁆𑀧𑀮𑀚𑀸𑀢𑀸𑀦𑀺, 𑀢𑀲𑁆𑀫𑀺𑀁 𑀲𑀭𑀲𑀺 𑀩𑁆𑀭𑀸𑀳𑁆𑀫𑀡. 𑀲𑀭𑁄𑀭𑀼𑀳𑀁. 𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸𑀯𑀸 𑀥𑀦𑁂𑀦𑀯𑀸. 𑀲𑀸𑀯𑀺𑀢𑁆𑀢𑀻 𑀙𑀦𑁆𑀤𑀲𑁄 𑀫𑀼𑀔𑀁. 𑀙𑀦𑁆𑀤𑀲𑀺, 𑀙𑀦𑁆𑀤𑁄𑀯𑀺𑀘𑀺𑀢𑀺, 𑀙𑀦𑁆𑀤𑁄𑀪𑀗𑁆𑀕𑁄, 𑀉𑀭𑀲𑀸 𑀧𑀦𑀼𑀤𑀳𑀺𑀲𑁆𑀲𑀸𑀫𑀺, 𑀉𑀭𑀲𑁄, 𑀉𑀭𑀲𑀺 𑀚𑀸𑀬𑀢𑀺, 𑀉𑀭𑀲𑀺𑀮𑁄𑀫𑁄, 𑀉𑀭𑁄𑀫𑀚𑁆𑀛𑁂 𑀯𑀺𑀚𑁆𑀛𑀺. 𑀭𑀳𑀲𑀸, 𑀭𑀳𑀲𑁄, 𑀭𑀳𑀲𑀺, 𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸. 𑀅𑀳𑀲𑀸, 𑀅𑀳𑀲𑀺. 𑀚𑀸𑀬𑀦𑁆𑀢𑀺 𑀢𑀢𑁆𑀣 𑀧𑀸𑀭𑁄𑀳𑀸, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂𑀢𑀺 𑀇𑀫𑀸𑀦𑀺 𑀧𑀬𑁄𑀕𑀸𑀦𑀺. 𑀏𑀢𑁆𑀣 𑀘 ‘‘𑀫𑀦𑁂𑀦, 𑀫𑀦𑀲𑁆𑀲, 𑀫𑀦𑁂, 𑀫𑀦𑀲𑁆𑀫𑀺𑀁, 𑀫𑀦𑀫𑁆𑀳𑀻’’𑀢𑀺𑀆𑀤𑀻𑀦𑀺 𑀘 ‘‘𑀫𑀦𑀆𑀬𑀢𑀦𑀁 𑀢𑀫𑀧𑀭𑀸𑀬𑀦𑁄 𑀅𑀬𑀧𑀢𑁆𑀢𑁄 𑀙𑀦𑁆𑀤𑀳𑀸𑀦𑀻’’𑀢𑀺𑀆𑀤𑀻𑀦𑀺 𑀘 ‘‘𑀦 𑀫𑀦𑀁 𑀅𑀜𑁆𑀜𑀸𑀲𑀺. 𑀬𑀲𑀁 𑀮𑀤𑁆𑀥𑀸𑀦 𑀤𑀼𑀫𑁆𑀫𑁂𑀥𑁄. ‘‘𑀲𑀺𑀭𑀁 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀻𑀦𑀺 𑀘 𑀭𑀽𑀧𑀸𑀦𑀺 𑀫𑀦𑁄𑀕𑀡𑀪𑀸𑀯𑀧𑁆𑀧𑀓𑀸𑀲𑀓𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀦 𑀤𑀲𑁆𑀲𑀺𑀢𑀸𑀦𑀺, 𑀦 𑀅𑀮𑀩𑁆𑀪𑀫𑀸𑀦𑀯𑀲𑁂𑀦, 𑀢𑀲𑁆𑀫𑀸𑀢𑁆𑀭 𑀇𑀫𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀦𑁄𑀕𑀡𑀪𑀸𑀯𑀯𑀺𑀪𑀸𑀯𑀺𑀦𑀻 𑀕𑀸𑀣𑀸𑀬𑁄 𑀪𑀯𑀦𑁆𑀢𑀺 𑁋

‘‘𑀫𑀦𑀲𑀸 ¶ 𑀫𑀦𑀲𑁄 𑀫𑀦𑀲𑀺’’,

𑀇𑀢𑀺𑀆𑀤𑀺𑀯𑀲𑀸 𑀞𑀺𑀢𑀸;

𑀲𑀸 𑀲𑁄 𑀲𑁆𑀬𑀦𑁆𑀢𑀸 𑀲𑀤𑁆𑀤𑀭𑀽𑀧𑀸,

𑀯𑀼𑀢𑁆𑀢𑀸 ‘‘𑀫𑀦𑁄𑀕𑀡𑁄’’𑀇𑀢𑀺.

𑀫𑀦𑁄𑀥𑀸𑀢𑀼 𑀯𑀘𑁄𑀭𑀲𑁆𑀫𑀺,

𑀯𑀬𑁄𑀯𑀼𑀤𑁆𑀥𑁄 𑀢𑀧𑁄𑀕𑀼𑀡𑁄;

𑀢𑁂𑀚𑁄𑀥𑀸𑀢𑀼 𑀢𑀫𑁄𑀦𑀸𑀲𑁄,

𑀬𑀲𑁄𑀪𑁄𑀕𑀲𑀫𑀧𑁆𑀧𑀺𑀢𑁄.

𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑁄 𑀘, 𑀅𑀬𑁄𑀧𑀢𑁆𑀢𑁄 𑀧𑀬𑁄𑀥𑀭𑀸;

𑀲𑀺𑀭𑁄𑀭𑀼𑀳𑀸 𑀲𑀭𑁄𑀭𑀼𑀳𑀁, 𑀉𑀭𑁄𑀫𑀚𑁆𑀛𑁂 𑀭𑀳𑁄𑀕𑀢𑁄.

𑀙𑀦𑁆𑀤𑁄𑀪𑀗𑁆𑀕𑁄 𑀅𑀳𑁄𑀭𑀢𑁆𑀢𑀁, 𑀫𑀦𑁄𑀫𑀬’𑀫𑀬𑁄𑀫𑀬𑀁;

𑀏𑀯𑀁𑀯𑀺𑀥𑁄 𑀯𑀺𑀲𑁂𑀲𑁄 𑀬𑁄, 𑀮𑀓𑁆𑀔𑀡𑀦𑁆𑀢𑀁 𑀫𑀦𑁄𑀕𑀡𑁂.

‘‘𑀯𑀘𑁄 𑀲𑀼𑀢𑁆𑀯𑀸, 𑀲𑀺𑀭𑁄 𑀙𑀺𑀦𑁆𑀤𑀺, 𑀅𑀬𑁄 𑀓𑀦𑁆𑀢𑀢𑀺’’ 𑀇𑀘𑁆𑀘𑀧𑀺;

𑀉𑀧𑀬𑁄𑀕𑀲𑁆𑀲 𑀲𑀁𑀲𑀺𑀤𑁆𑀥𑀺, 𑀮𑀓𑁆𑀔𑀡𑀦𑁆𑀢𑀁 𑀫𑀦𑁄𑀕𑀡𑁂.

𑀫𑀦𑁄𑀕𑀡𑁂 𑀯𑀼𑀢𑁆𑀢𑀦𑀬𑁄, 𑀇𑀢𑁆𑀣𑀺𑀮𑀺𑀗𑁆𑀕𑁂 𑀦 𑀮𑀩𑁆𑀪𑀢𑀺;

𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀲𑀼, 𑀮𑀩𑁆𑀪𑀢𑁂𑀯 𑀬𑀣𑀸𑀭𑀳𑀁.

𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑁋

𑀲𑀸 𑀲𑁄 𑀲𑁆𑀬𑀦𑁆𑀢𑀸𑀦𑀺 𑀭𑀽𑀧𑀸𑀦𑀺, 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀫𑀦𑁄𑀕𑀡𑁂;

𑀫𑀚𑁆𑀛𑁄𑀓𑀸𑀭𑀦𑁆𑀢𑀭𑀽𑀧𑀸 𑀘, 𑀲𑁄𑀓𑀸𑀭𑀦𑁆𑀢𑀽𑀧𑀬𑁄𑀕𑀢𑀸.

𑀇𑀤𑀁 𑀫𑀦𑁄𑀕𑀡𑀮𑀓𑁆𑀔𑀡𑀁. 𑀏𑀯𑀁 𑀫𑀦𑁄𑀕𑀡𑀮𑀓𑁆𑀔𑀡𑀁 𑀅𑀦𑀸𑀓𑀼𑀮𑀁 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀲𑀫𑀼𑀤𑁆𑀤𑀺𑀝𑁆𑀞𑀁.

𑀅𑀣 𑀫𑀦𑁄𑀕𑀡𑀸𑀤𑀺𑀮𑀓𑁆𑀔𑀡𑀁 𑀓𑀣𑀬𑀸𑀫 𑁋

𑀬𑁂 𑀢𑁂 𑀦𑀸 𑀲𑀲𑁆𑀫𑀺𑀁𑀯𑀺𑀲𑀬𑁂,

𑀲𑀸 𑀲𑁄 𑀲𑁆𑀬𑀦𑁆𑀢𑀸 𑀬𑀣𑀸𑀭𑀳𑀁;

𑀲𑀫𑀸𑀲𑀢𑀤𑁆𑀥𑀺𑀢𑀦𑁆𑀢𑀢𑁆𑀢𑁂,

𑀫𑀚𑁆𑀛𑁄𑀓𑀸𑀭𑁄 𑀦 𑀳𑁄𑀦𑁆𑀢𑀺 𑀢𑀼.

𑀲𑁄𑀓𑀸𑀭𑀦𑁆𑀢𑀽𑀧𑀬𑁄𑀕𑀸 ¶ 𑀘,

𑀓𑁆𑀭𑀺𑀬𑀸𑀬𑁄𑀕𑁂 𑀦 𑀳𑁄𑀦𑁆𑀢𑀺 𑀢𑁂;

𑀲𑀤𑁆𑀤𑀸 𑀏𑀯𑀁𑀯𑀺𑀥𑀸 𑀲𑀩𑁆𑀩𑁂;

𑀫𑀦𑁄𑀕𑀡𑀸𑀤𑀺𑀓𑀸 𑀫𑀢𑀸.

𑀲𑁂𑀬𑁆𑀬𑀣𑀺𑀤𑀁? ‘‘𑀩𑀺𑀮𑀁 𑀧𑀤𑀁 𑀫𑀼𑀔’’𑀫𑀺𑀘𑁆𑀘𑀸𑀤𑀬𑁄. 𑀢𑁂𑀲𑀁 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 𑀩𑀺𑀮𑀲𑀸, 𑀩𑀺𑀮𑀲𑁄, 𑀩𑀺𑀮𑀲𑀺, 𑀩𑀺𑀮𑀕𑀢𑁄, 𑀩𑀺𑀮𑀁 𑀧𑀸𑀯𑀺𑀲𑀺. 𑀧𑀤𑀲𑀸𑀯 𑀅𑀕𑀫𑀸𑀲𑀺, 𑀢𑀻𑀡𑀺 𑀧𑀤𑀯𑀸𑀭𑀸𑀦𑀺, 𑀫𑀸𑀓𑀸𑀲𑀺 𑀫𑀼𑀔𑀲𑀸 𑀧𑀸𑀧𑀁, 𑀫𑀼𑀔𑀕𑀢𑀁 𑀪𑁄𑀚𑀦𑀁 𑀙𑀟𑁆𑀟𑀸𑀧𑁂𑀢𑀺. 𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄. 𑀭𑀲𑀯𑀭𑀁 𑀭𑀲𑀫𑀬𑀁 𑀭𑀲𑀁 𑀧𑀺𑀯𑀻𑀢𑀺. 𑀇𑀤𑀁 𑀫𑀦𑁄𑀕𑀡𑀸𑀤𑀺𑀓𑀮𑀓𑁆𑀔𑀡𑀁.

𑀅𑀧𑀭𑀫𑁆𑀧𑀺 𑀪𑀯𑀢𑀺 𑁋

𑀬𑁂 𑀲𑀫𑀸𑀲𑀸𑀤𑀺𑀪𑀸𑀯𑀫𑁆𑀳𑀺, 𑀫𑀚𑁆𑀛𑁄𑀓𑀸𑀭𑀸𑀯 𑀳𑁄𑀦𑁆𑀢𑀺 𑀢𑀼;

𑀦𑀸 𑀲 𑀲𑁆𑀫𑀺𑀁𑀯𑀺𑀲𑀬𑁂 𑀲𑀸𑀲𑁄-𑀲𑁆𑀬𑀦𑁆𑀢𑀸 𑀧𑀦 𑀦 𑀳𑁄𑀦𑁆𑀢𑀺𑀳𑀺.

𑀲𑁄𑀓𑀸𑀭𑀦𑁆𑀢𑀽𑀧𑀬𑁄𑀕𑀸 𑀘,

𑀓𑁆𑀭𑀺𑀬𑀸𑀬𑁄𑀕𑁂 𑀦 𑀳𑁄𑀦𑁆𑀢𑀺 𑀢𑁂;

𑀲𑀤𑁆𑀤𑀸 𑀏𑀯𑀁𑀯𑀺𑀥𑀸 𑀘𑀸𑀧𑀺,

𑀫𑀦𑁄𑀕𑀡𑀸𑀤𑀺𑀓𑀸 𑀫𑀢𑀸.

𑀲𑁂𑀬𑁆𑀬𑀣𑀺𑀤𑀁? ‘‘𑀆𑀧𑁄 𑀯𑀸𑀬𑁄 𑀲𑀭𑀤𑁄’’𑀇𑀘𑁆𑀘𑁂𑀯𑀫𑀸𑀤𑀬𑁄. 𑀢𑁂𑀲𑀁 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 𑀆𑀧𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼, 𑀆𑀧𑁄𑀓𑀲𑀺𑀡𑀁, 𑀯𑀸𑀬𑁄𑀓𑀲𑀺𑀡𑀁, 𑀆𑀧𑁄𑀫𑀬𑀁, 𑀯𑀸𑀬𑁄𑀫𑀬𑀁, 𑀚𑀻𑀯 𑀢𑁆𑀯𑀁 𑀲𑀭𑀤𑁄𑀲𑀢𑀁, 𑀲𑀭𑀤𑀓𑀸𑀮𑁄. 𑀆𑀧𑁂𑀦, 𑀆𑀧𑀲𑁆𑀲, 𑀆𑀧𑁂, 𑀆𑀧𑀲𑁆𑀫𑀺𑀁, 𑀆𑀧𑀫𑁆𑀳𑀺. 𑀯𑀸𑀬𑁂𑀦, 𑀯𑀸𑀬𑀲𑁆𑀲, 𑀯𑀸𑀬𑁂, 𑀯𑀸𑀬𑀲𑁆𑀫𑀺𑀁, 𑀯𑀸𑀬𑀫𑁆𑀳𑀺. 𑀲𑀭𑀤𑁂𑀦, 𑀲𑀭𑀤𑀲𑁆𑀲, 𑀲𑀭𑀤𑁂, 𑀲𑀭𑀤𑀲𑁆𑀫𑀺𑀁, 𑀲𑀭𑀤𑀫𑁆𑀳𑀺. 𑀆𑀧𑀁 𑀆𑀧𑀢𑁄 𑀲𑀜𑁆𑀚𑀸𑀦𑀸𑀢𑀺. 𑀯𑀸𑀬𑀁 𑀯𑀸𑀬𑀢𑁄 𑀲𑀜𑁆𑀚𑀸𑀦𑀸𑀢𑀺. 𑀲𑀭𑀤𑀁 𑀧𑀢𑁆𑀣𑁂𑀢𑀺, 𑀲𑀭𑀤𑀁 𑀭𑀫𑀡𑀻𑀬𑀸 𑀦𑀤𑀻.

𑀓𑁂𑀘𑀺 ¶ 𑀧𑀦𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀦𑀦𑀼 𑀲𑀸𑀲𑀦𑁂 𑀯𑀸𑀬𑀲𑀤𑁆𑀤𑁄 𑀯𑀺𑀬 𑀯𑀸𑀬𑀼𑀲𑀤𑁆𑀤𑁄𑀧𑀺 𑀫𑀦𑁄𑀕𑀡𑀸𑀤𑀻𑀲𑀼 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋

‘‘𑀯𑀸𑀬𑀼 𑀯𑀸𑀬𑁄’’𑀢𑀺 𑀏𑀢𑁂𑀲𑀼, 𑀧𑀘𑁆𑀙𑀺𑀫𑁄𑀬𑁂𑀯 𑀇𑀘𑁆𑀙𑀺𑀢𑁄;

𑀫𑀦𑁄𑀕𑀡𑀸𑀤𑀻𑀲𑀼 𑀦𑀸𑀤𑀺, 𑀆𑀤𑀺𑀕𑁆𑀕𑀳𑀯𑀲𑁂𑀦𑀺𑀥.

‘‘𑀫𑀦𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼’’, 𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀳𑀺;

𑀅𑀓𑀸𑀭𑀦𑁆𑀢𑀯𑀲𑁂𑀦𑁂𑀯, 𑀫𑀚𑁆𑀛𑁄𑀓𑀸𑀭𑀸𑀦𑀺 𑀲𑀺𑀚𑁆𑀛𑀭𑁂.

𑀯𑀸𑀬𑀼𑀲𑀤𑁆𑀤𑀫𑁆𑀳𑀺 𑀕𑀳𑀺𑀢𑁂, 𑀆𑀤𑀺𑀕𑁆𑀕𑀳𑀯𑀲𑁂𑀦𑀺𑀥;

‘‘𑀯𑀸𑀬𑁄𑀥𑀸𑀢𑀽’’𑀢𑀺 𑀑𑀫𑀚𑁆𑀛𑀁, 𑀭𑀽𑀧𑀫𑁂𑀯 𑀦 𑀳𑁂𑀲𑁆𑀲𑀢𑀺.

𑀬𑀣𑀸 𑀳𑀺 𑀆𑀬𑀼𑀲𑀤𑁆𑀤𑀲𑁆𑀲, 𑀭𑀽𑀧𑀁 𑀤𑀺𑀲𑁆𑀲𑀢𑀺 𑀲𑀸𑀕𑀫𑀁;

‘‘𑀆𑀬𑀼𑀲𑀸 𑀏𑀓𑀧𑀼𑀢𑁆𑀢’’𑀦𑁆𑀢𑀺, 𑀫𑀦𑀲𑀸𑀤𑀺𑀧𑀤𑀁 𑀯𑀺𑀬.

𑀦 𑀢𑀣𑀸 𑀯𑀸𑀬𑀼𑀲𑀤𑁆𑀤𑀲𑁆𑀲, 𑀭𑀽𑀧𑀁 𑀤𑀺𑀲𑁆𑀲𑀢𑀺 𑀲𑀸𑀕𑀫𑀁;

𑀢𑀲𑁆𑀫𑀸 𑀫𑀦𑁄𑀕𑀡𑀸𑀤𑀺𑀫𑁆𑀳𑀺, 𑀢𑀲𑁆𑀲𑁄’𑀓𑀸𑀲𑁄 𑀦 𑀯𑀺𑀚𑁆𑀚𑀢𑀺.

𑀢𑀣𑀸 𑀳𑀺 ‘‘𑀯𑀸𑀬𑀢𑀺 𑀇𑀢𑀺, 𑀯𑀸𑀬𑁄’’ 𑀇𑀢𑀺 𑀕𑀭𑀽 𑀯𑀤𑀼𑀁;

‘‘𑀯𑀸𑀬𑁄𑀥𑀸𑀢𑀽’’𑀢𑀺 𑀏𑀢𑀲𑁆𑀲, 𑀧𑀤𑀲𑁆𑀲𑀢𑁆𑀣𑀁 𑀢𑀳𑀺𑀁 𑀢𑀳𑀺𑀁.

𑀬𑀢𑁆𑀣 𑀧𑀣𑀯𑀻 𑀘 𑀆𑀧𑁄 𑀘, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀏𑀢𑁆𑀣 𑀆𑀧𑀸𑀤𑀺𑀓𑀁 𑀲𑀤𑁆𑀤-𑀢𑁆𑀢𑀺𑀓𑀁 𑀫𑀦𑁄𑀕𑀡𑀸𑀤𑀺𑀓𑁂.

𑀇𑀤𑀫𑁆𑀧𑀺 𑀫𑀦𑁄𑀕𑀡𑀸𑀤𑀺𑀓𑀮𑀓𑁆𑀔𑀡𑀁. 𑀏𑀢𑁆𑀣 𑀫𑀦𑁄𑀕𑀡𑀸𑀤𑀺𑀓𑀸 𑀤𑁆𑀯𑀺𑀥𑀸 𑀪𑀺𑀚𑁆𑀚𑀦𑁆𑀢𑀺 𑀩𑀺𑀮 𑀧𑀤𑀸𑀤𑀺𑀢𑁄 𑀆𑀧𑀸𑀤𑀺𑀢𑁄 𑀘. 𑀏𑀯𑀁 𑀫𑀦𑁄𑀕𑀡𑀸𑀤𑀺𑀓𑀮𑀓𑁆𑀔𑀡𑀁 𑀅𑀦𑀸𑀓𑀼𑀮𑀁 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀲𑀫𑀼𑀤𑁆𑀤𑀺𑀝𑁆𑀞𑀁.

𑀅𑀣 𑀅𑀫𑀦𑁄𑀕𑀡𑀮𑀓𑁆𑀔𑀡𑀁 𑀓𑀣𑀬𑀸𑀫 𑁋

𑀬𑁂 𑀘 𑀦𑀸𑀯𑀺𑀲𑀬𑁂 𑀲𑁄𑀦𑁆𑀢𑀸, 𑀬𑁂 𑀘 𑀲𑁆𑀫𑀸𑀯𑀺𑀲𑀬𑁂 𑀲𑀺𑀬𑀼𑀁;

𑀲𑀤𑁆𑀤𑀸 𑀏𑀯𑀁𑀧𑀓𑀸𑀭𑀸 𑀢𑁂, 𑀅𑀫𑀦𑁄𑀕𑀡𑀲𑀜𑁆𑀜𑀺𑀢𑀸.

𑀓𑁂 ¶ 𑀢𑁂? 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑁆𑀔𑀭𑀲𑀤𑁆𑀤𑀸𑀤𑀬𑁄 𑀘𑁂𑀯 𑀤𑀻𑀖𑁄𑀭𑀲𑀤𑁆𑀤𑀸 𑀘. 𑀏𑀢𑁂𑀲𑀼 𑀳𑀺 𑀅𑀢𑁆𑀣𑀲𑀤𑁆𑀤𑀸𑀤𑀻𑀦𑀁 𑀦𑀸𑀯𑀘𑀦𑀝𑁆𑀞𑀸𑀦𑁂 ‘‘𑀅𑀢𑁆𑀣𑀲𑁄 𑀩𑁆𑀬𑀜𑁆𑀚𑀦𑀲𑁄 𑀅𑀓𑁆𑀔𑀭𑀲𑁄 𑀲𑀼𑀢𑁆𑀢𑀲𑁄 𑀉𑀧𑀸𑀬𑀲𑁄 𑀲𑀩𑁆𑀩𑀲𑁄 𑀞𑀸𑀦𑀲𑁄’’𑀢𑀺𑀆𑀤𑀻𑀦𑀺 𑀲𑁄𑀦𑁆𑀢𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀤𑀻𑀖𑁄𑀭𑀲𑀤𑁆𑀤𑀸𑀦𑀁 𑀧𑀦 𑀲𑁆𑀫𑀸𑀯𑀘𑀦𑀝𑁆𑀞𑀸𑀦𑁂 ‘‘𑀤𑀻𑀖𑀲𑁄 𑀑𑀭𑀲𑁄’’𑀢𑀺 𑀲𑁄𑀦𑁆𑀢𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀇𑀤𑀁 𑀅𑀫𑀦𑁄𑀕𑀡𑀮𑀓𑁆𑀔𑀡𑀁.

𑀅𑀧𑀭𑀫𑁆𑀧𑀺 𑀪𑀯𑀢𑀺 𑁋

𑀲𑀩𑁆𑀩𑀣𑀸 𑀯𑀺𑀦𑀺𑀫𑀼𑀢𑁆𑀢𑀸 𑀬𑁂, 𑀲𑀸 𑀲𑁄 𑀲𑁆𑀬𑀦𑁆𑀢𑀸𑀤𑀺𑀪𑀸𑀯𑀢𑁄;

𑀏𑀯𑀁𑀯𑀺𑀥𑀸𑀧𑀺 𑀢𑁂 𑀲𑀤𑁆𑀤𑀸, 𑀅𑀫𑀦𑁄𑀕𑀡𑀲𑀜𑁆𑀜𑀺𑀢𑀸.

𑀓𑁂 𑀢𑁂? ‘‘𑀧𑀼𑀭𑀺𑀲𑁄 𑀓𑀜𑁆𑀜𑀸 𑀘𑀺𑀢𑁆𑀢’’𑀫𑀺𑀘𑁆𑀘𑀸𑀤𑀬𑁄. 𑀇𑀤𑀫𑁆𑀧𑀺 𑀅𑀫𑀦𑁄𑀕𑀡𑀮𑀓𑁆𑀔𑀡𑀁. 𑀏𑀯𑀁 𑀅𑀫𑀦𑁄𑀕𑀡𑀮𑀓𑁆𑀔𑀡𑀁 𑀅𑀦𑀸𑀓𑀼𑀮𑀁 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀲𑀫𑀼𑀤𑁆𑀤𑀺𑀝𑁆𑀞𑀁.

𑀏𑀯𑀁 𑀤𑀲𑁆𑀲𑀺𑀢𑁂𑀲𑀼 𑀫𑀦𑁄𑀕𑀡𑀮𑀓𑁆𑀔𑀡𑀸𑀤𑀻𑀲𑀼 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀬𑀤𑀺𑀤𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 ‘𑀬𑁂 𑀲𑀫𑀸𑀲𑀸𑀤𑀺𑀪𑀸𑀯𑀫𑁆𑀳𑀺, 𑀫𑀚𑁆𑀛𑁄𑀓𑀸𑀭𑀸𑀯 𑀳𑁄𑀦𑁆𑀢𑀺 𑀢𑀽’𑀢𑀺𑀆𑀤𑀺𑀦𑀸 𑀫𑀦𑁄𑀕𑀡𑀸𑀤𑀺𑀓𑀮𑀓𑁆𑀔𑀡𑀁, 𑀢𑁂𑀦 ‘‘𑀧𑀭𑁄𑀲𑀢𑀁 𑀕𑁄𑀫𑀬𑀁 𑀕𑁄𑀥𑀦𑁄’’𑀇𑀘𑁆𑀘𑀸𑀤𑀻𑀲𑀼 𑀕𑁄𑀧𑀭𑀲𑀤𑁆𑀤𑀸𑀤𑀬𑁄𑀧𑀺 𑀫𑀦𑁄𑀕𑀡𑀸𑀤𑀺𑀓𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀻𑀢𑀺? 𑀦𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑁋

𑀏𑀢𑁆𑀣 𑀫𑀦𑁄𑀕𑀡𑀸𑀤𑀻𑀦𑀁, 𑀅𑀦𑁆𑀢𑀲𑁆𑀲𑁄𑀢𑁆𑀢𑀁 𑀧𑀝𑀺𑀘𑁆𑀘𑀺𑀤𑀁;

‘‘𑀫𑀚𑁆𑀛𑁄𑀓𑀸𑀭𑀸’’𑀢𑀺 𑀯𑀘𑀦𑀁, 𑀯𑀼𑀢𑁆𑀢𑀁 𑀦 𑀢𑁆𑀯𑀸𑀕𑀫𑀸𑀤𑀺𑀓𑀁.

‘‘𑀧𑀭𑁄𑀲𑀢𑀁 𑀕𑁄𑀫𑀬’’𑀦𑁆𑀢𑀺-𑀆𑀤𑀻𑀲𑀼 𑀅𑀫𑀦𑁄𑀕𑀡𑁄;

𑀧𑀼𑀩𑁆𑀩𑀪𑀽𑀢𑀁 𑀧𑀤𑀁 𑀑𑀲𑁆𑀲𑀸-𑀕𑀫𑀢𑁆𑀢𑀸’𑀦𑀺𑀘𑁆𑀘𑀢𑀸𑀬 𑀘.

𑀢𑀲𑁆𑀫𑀸 𑀦𑀸𑀧𑀚𑁆𑀚𑀦𑁆𑀢𑀺. 𑀇𑀢𑀺 𑀲𑀩𑁆𑀩𑀣𑀸𑀧𑀺 𑀅𑀫𑀦𑁄𑀕𑀡𑀮𑀓𑁆𑀔𑀡𑀁 𑀦𑀺𑀲𑁆𑀲𑁂𑀲𑀢𑁄 𑀤𑀲𑁆𑀲𑀺𑀢𑀁. 𑀇𑀘𑁆𑀘𑁂𑀯𑀁 𑀫𑀦𑁄𑀕𑀡𑀯𑀺𑀪𑀸𑀯𑀦𑀸𑀬𑀁 𑀫𑀦𑁄𑀕𑀡𑁄 𑀫𑀦𑁄𑀕𑀡𑀸𑀤𑀺𑀓𑁄 𑀅𑀫𑀦𑁄𑀕𑀡𑁄 𑀘𑀸𑀢𑀺 𑀢𑀺𑀥𑀸 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ¶ 𑀫𑀦𑁄𑀕𑀡𑁂 𑀧𑀭𑀺𑀬𑀸𑀧𑀦𑁆𑀦𑀲𑀤𑁆𑀤𑀸𑀦𑀁 𑀲𑀫𑀸𑀲𑀁 𑀧𑀢𑁆𑀯𑀸 ‘‘𑀅𑀩𑁆𑀬𑀕𑁆𑀕𑀫𑀦𑀲𑁄 𑀦𑀭𑁄, 𑀣𑀺𑀭𑀘𑁂𑀢𑀲𑀁 𑀓𑀼𑀮𑀁, 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸𑀢𑀺𑀆𑀤𑀺𑀦𑀸 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀅𑀜𑁆𑀜𑀣𑀸𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀢𑁆𑀣 𑀧𑀦 𑀓𑁂𑀘𑀺 𑀏𑀯𑀁 𑀯𑀤𑀦𑁆𑀢𑀺 ‘‘𑀬𑀤𑀸 𑀫𑀦𑀲𑀤𑁆𑀤𑁄 𑀲𑀓𑀢𑁆𑀣𑁂 𑀅𑀯𑀢𑁆𑀢𑀺𑀢𑁆𑀯𑀸 ‘𑀅𑀩𑁆𑀬𑀕𑁆𑀕𑁄 𑀫𑀦𑁄 𑀬𑀲𑁆𑀲 𑀲𑁄𑀬𑀁 𑀅𑀩𑁆𑀬𑀕𑁆𑀕𑀫𑀦𑀲𑁄, 𑀅𑀮𑀻𑀦𑁄 𑀫𑀦𑁄 𑀬𑀲𑁆𑀲 𑀲𑁄𑀬𑀁 𑀅𑀮𑀻𑀦𑀫𑀦𑀲𑁄’𑀢𑀺 𑀏𑀯𑀁 𑀅𑀜𑁆𑀜𑀢𑁆𑀣𑁂 𑀯𑀢𑁆𑀢𑀢𑀺, 𑀢𑀤𑀸 𑀧𑀼𑀭𑀺𑀲𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀮𑀩𑁆𑀪𑀢𑀺, 𑀦 𑀫𑀦𑁄𑀕𑀡𑀦𑀬𑁂𑀦𑀸’’𑀢𑀺. 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀉𑀪𑀺𑀦𑁆𑀦𑀫𑁆𑀧𑀺 𑀬𑀣𑀸𑀭𑀳𑀁 𑀮𑀩𑁆𑀪𑀦𑀢𑁄. 𑀢𑀣𑀸 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀔𑀦𑁆𑀢𑀺𑀲𑁄𑀭𑀘𑁆𑀘𑀫𑁂𑀢𑁆𑀢𑀸𑀤𑀺-𑀕𑀼𑀡𑀪𑀽𑀲𑀺𑀢𑀘𑁂𑀢𑀲𑁄. 𑀅𑀚𑁆𑀛𑁂𑀲𑀦𑀁 𑀕𑀳𑁂𑀢𑁆𑀯𑀸𑀦𑀸’’𑀢𑀺 𑀏𑀢𑁆𑀣 𑀫𑀦𑁄𑀕𑀡𑀦𑀬𑁄 𑀤𑀺𑀲𑁆𑀲𑀢𑀺. 𑀢𑀝𑁆𑀝𑀻𑀓𑀸𑀬𑀫𑁆𑀧𑀺 ‘‘𑀅𑀚𑁆𑀛𑁂𑀲𑀺𑀢𑁄 𑀤𑀸𑀞𑀸𑀦𑀸𑀕-𑀢𑁆𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸’’𑀢𑀺 𑀫𑀦𑁄𑀕𑀡𑀦𑀬𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀯𑀤𑀦𑁆𑀢𑀸 𑀘 𑀢𑁂 𑀅𑀩𑁆𑀬𑀕𑁆𑀕𑀫𑀦𑀲𑀤𑁆𑀤𑀸𑀤𑀻𑀦𑀁 𑀅𑀩𑁆𑀬𑀕𑁆𑀕𑀫𑀦𑀲𑀇𑀘𑁆𑀘𑀸𑀤𑀺𑀦𑀸 𑀲𑀓𑀸𑀭𑀦𑁆𑀢𑀧𑀓𑀢𑀺𑀪𑀸𑀯𑁂𑀦 𑀞𑀧𑁂𑀢𑀩𑁆𑀩𑀪𑀸𑀯𑀁 𑀯𑀺𑀩𑁆𑀪𑀦𑁆𑀢𑀫𑀢𑀺𑀯𑀲𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼, 𑀤𑁆𑀯𑀻𑀲𑀼 𑀘 𑀯𑀘𑀦𑁂𑀲𑀼 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀢𑀁 𑀫𑀜𑁆𑀜𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 ‘‘𑀕𑀼𑀡𑀪𑀽𑀲𑀺𑀢𑀘𑁂𑀢𑀲𑁄, 𑀣𑀺𑀭𑀘𑁂𑀢𑀲𑀸’’𑀢𑀺 𑀙𑀝𑁆𑀞𑀻𑀘𑀢𑀼𑀢𑁆𑀣𑀻𑀢𑀢𑀺𑀬𑀸𑀭𑀽𑀧𑀸𑀦𑀺 𑀦𑀲𑀺𑀬𑀼𑀁, 𑀅𑀜𑁆𑀜𑀸𑀦𑀺𑀬𑁂𑀯 𑀅𑀦𑀪𑀺𑀫𑀢𑀸𑀦𑀺 𑀭𑀽𑀧𑀸𑀦𑀺 𑀲𑀺𑀬𑀼𑀁. 𑀬𑀲𑁆𑀫𑀸 𑀲𑀺𑀬𑀼𑀁, 𑀢𑀲𑁆𑀫𑀸 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀬𑀁 𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄.

𑀬𑀢𑁆𑀣 𑀳𑀺 𑀲𑀫𑀸𑀲𑀯𑀲𑁂𑀦 𑀫𑀦𑀲𑀤𑁆𑀤𑁄 𑀘𑁂𑀢𑀲𑀤𑁆𑀤𑀸𑀤𑀬𑁄 𑀘 𑀲𑀓𑀢𑁆𑀣𑁂 𑀅𑀯𑀢𑁆𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣𑁂 𑀯𑀢𑁆𑀢𑀦𑁆𑀢𑀺, 𑀢𑀢𑁆𑀣 𑀲𑀓𑀸𑀭𑀸𑀕𑀫𑀸𑀦𑀁 𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀘 𑀫𑀦𑁄𑀕𑀡𑁂 𑀫𑀦𑀦𑀬𑁂𑀦 𑀘 𑀬𑀣𑀸𑀭𑀳𑀁 𑀮𑀩𑁆𑀪𑀢𑀺. 𑀦𑀺𑀲𑁆𑀲𑀓𑀸𑀭𑀸𑀕𑀫𑀸𑀦𑀁 𑀧𑀦 𑀧𑀼𑀭𑀺𑀲𑀦𑀬𑁂𑀦𑁂𑀯 𑀮𑀩𑁆𑀪𑀢𑀺. 𑀬𑀢𑁆𑀣 𑀧𑀦 𑀲𑀫𑀸𑀲𑀯𑀺𑀲𑀬𑁂𑀬𑁂𑀯 𑀫𑀦𑀸𑀤𑀺𑀲𑀤𑁆𑀤𑀸 𑀲𑀓𑀢𑁆𑀣𑁂 𑀯𑀢𑁆𑀢𑀦𑁆𑀢𑀺, 𑀢𑀢𑁆𑀣 𑀦𑀺𑀲𑁆𑀲𑀓𑀸𑀭𑀸𑀕𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲𑀦𑀬𑁂𑀦 𑀘 𑀫𑀦𑁄𑀕𑀡𑁂 𑀫𑀦𑀦𑀬𑁂𑀦 𑀘 𑀮𑀩𑁆𑀪𑀢𑀺.

𑀇𑀤𑀸𑀦𑀺 ¶ 𑀇𑀫𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁, 𑀲𑀤𑁆𑀤𑀕𑀢𑀻𑀲𑀼 𑀘 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀤𑀸𑀦𑀁 𑀧𑀤𑀫𑀸𑀮𑀸 𑀢𑀺𑀥𑀸 𑀓𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫 𑁋 ‘‘𑀩𑁆𑀬𑀸𑀲𑀢𑁆𑀢𑁄 𑀫𑀦𑁄 𑀬𑀲𑁆𑀲 𑀲𑁄𑀬𑀁 𑀩𑁆𑀬𑀸𑀲𑀢𑁆𑀢𑀫𑀦𑀲𑁄 𑀦𑀭𑁄’’𑀢𑀺 𑀏𑀯𑀫𑀘𑁆𑀘𑀦𑁆𑀢𑀁 𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀓𑀲𑁆𑀲 𑀇𑀫𑀲𑁆𑀲 𑀧𑀤𑀲𑁆𑀲 𑁋

𑀩𑁆𑀬𑀸𑀲𑀢𑁆𑀢𑀫𑀦𑀲𑁄 𑀦𑀭𑁄, 𑀩𑁆𑀬𑀸𑀲𑀢𑁆𑀢𑀫𑀦𑀲𑀸 𑀦𑀭𑀸. 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑁂 𑀦𑀭𑁂. 𑀩𑁆𑀬𑀸𑀲𑀢𑁆𑀢𑀫𑀦𑀲𑀸, 𑀩𑁆𑀬𑀸𑀲𑀢𑁆𑀢𑀫𑀦𑁂𑀦 𑀦𑀭𑁂𑀦, 𑀩𑁆𑀬𑀸𑀲𑀢𑁆𑀢𑀫𑀦𑁂𑀳𑀺, 𑀩𑁆𑀬𑀸𑀲𑀢𑁆𑀢𑀫𑀦𑁂𑀪𑀺 𑀦𑀭𑁂𑀳𑀺. 𑀩𑁆𑀬𑀸𑀲𑀢𑁆𑀢𑀫𑀦𑀲𑁄, 𑀩𑁆𑀬𑀸𑀲𑀢𑁆𑀢𑀫𑀦𑀲𑁆𑀲 𑀦𑀭𑀲𑁆𑀲, 𑀩𑁆𑀬𑀸𑀲𑀢𑁆𑀢𑀫𑀦𑀸𑀦𑀁 𑀦𑀭𑀸𑀦𑀁. 𑀩𑁆𑀬𑀸𑀲𑀢𑁆𑀢𑀫𑀦𑀸, 𑀩𑁆𑀬𑀸𑀲𑀢𑁆𑀢𑀫𑀦𑀲𑁆𑀫𑀸, 𑀩𑁆𑀬𑀸𑀲𑀢𑁆𑀢𑀫𑀦𑀫𑁆𑀳𑀸 𑀦𑀭𑀸, 𑀩𑁆𑀬𑀸𑀲𑀢𑁆𑀢𑀫𑀦𑁂𑀳𑀺, 𑀩𑁆𑀬𑀸𑀲𑀢𑁆𑀢𑀫𑀦𑁂𑀪𑀺 𑀦𑀭𑁂𑀳𑀺. 𑀩𑁆𑀬𑀸𑀲𑀢𑁆𑀢𑀫𑀦𑀲𑁄, 𑀩𑁆𑀬𑀸𑀲𑀢𑁆𑀢𑀫𑀦𑀲𑁆𑀲 𑀦𑀭𑀲𑁆𑀲, 𑀩𑁆𑀬𑀸𑀲𑀢𑁆𑀢𑀫𑀦𑀸𑀦𑀁 𑀦𑀭𑀸𑀦𑀁. 𑀩𑁆𑀬𑀸𑀲𑀢𑁆𑀢𑀫𑀦𑀲𑀺, 𑀩𑁆𑀬𑀸𑀲𑀢𑁆𑀢𑀫𑀦𑁂, 𑀩𑁆𑀬𑀸𑀲𑀢𑁆𑀢𑀫𑀦𑀲𑁆𑀫𑀺𑀁, 𑀩𑁆𑀬𑀸𑀲𑀢𑁆𑀢𑀫𑀦𑀫𑁆𑀳𑀺 𑀦𑀭𑁂, 𑀩𑁆𑀬𑀸𑀲𑀢𑁆𑀢𑀫𑀦𑁂𑀲𑀼 𑀦𑀭𑁂𑀲𑀼. 𑀪𑁄 𑀩𑁆𑀬𑀸𑀲𑀢𑁆𑀢𑀫𑀦𑀲 𑀦𑀭, 𑀪𑀯𑀦𑁆𑀢𑁄 𑀩𑁆𑀬𑀸𑀲𑀢𑁆𑀢𑀫𑀦𑀲𑀸 𑀦𑀭𑀸𑀢𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀏𑀯𑀁 𑀲𑀓𑀸𑀭𑀸𑀕𑀫𑀲𑁆𑀲 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀏𑀢𑁆𑀣 𑀳𑀺 𑀧𑀞𑀫𑀸𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀻𑀦𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀘 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀁 𑀏𑀓𑀯𑀘𑀦𑀝𑁆𑀞𑀸𑀦𑁂 𑀘 𑀬𑀣𑀸𑀭𑀳𑀁 𑀲𑀸𑀕𑀫𑁄 𑀪𑀯𑀢𑀺 𑀆𑀤𑁂𑀲𑀲𑀭𑀯𑀺𑀪𑀢𑁆𑀢𑀺𑀲𑀭𑀧𑀭𑀢𑁆𑀢𑀸. 𑀅𑀬𑀜𑁆𑀘 𑀦𑀬𑁄 𑀲𑀼𑀔𑀼𑀫𑁄 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 ‘‘𑀩𑁆𑀬𑀸𑀲𑀢𑁆𑀢𑁄 𑀫𑀦𑁄 𑀬𑀲𑁆𑀲 𑀲𑁄𑀬𑀁 𑀩𑁆𑀬𑀸𑀲𑀢𑁆𑀢𑀫𑀦𑁄’’𑀢𑀺 𑀏𑀯𑀫𑁆𑀧𑀺 𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀓𑀲𑁆𑀲 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀩𑁆𑀬𑀸𑀲𑀢𑁆𑀢𑀫𑀦𑁄 𑀦𑀭𑁄, 𑀩𑁆𑀬𑀸𑀲𑀢𑁆𑀢𑀫𑀦𑀸 𑀦𑀭𑀸. 𑀩𑁆𑀬𑀸𑀲𑀢𑁆𑀢𑀫𑀦𑀁 𑀦𑀭’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺. 𑀏𑀢𑁆𑀣 𑀧𑀦 𑀲𑀩𑁆𑀩𑀣𑀸𑀧𑀺 𑀲𑀸𑀕𑀫𑁄 𑀦𑀢𑁆𑀣𑀺. 𑀅𑀧𑀭𑁄𑀧𑀺 𑀦𑀬𑁄 𑁋 ‘‘𑀩𑁆𑀬𑀸𑀲𑀢𑁆𑀢𑁄 𑀘 𑀲𑁄 𑀫𑀦𑁄 𑀘𑀸𑀢𑀺 𑀩𑁆𑀬𑀸𑀲𑀢𑁆𑀢𑀫𑀦𑁄’’𑀢𑀺 𑀏𑀯𑀁 𑀘𑀺𑀢𑁆𑀢𑀸𑀧𑁂𑀓𑁆𑀔𑀓𑀲𑁆𑀲𑀧𑀺 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀩𑁆𑀬𑀸𑀲𑀢𑁆𑀢𑀫𑀦𑁄, 𑀩𑁆𑀬𑀸𑀲𑀢𑁆𑀢𑀫𑀦𑀸. 𑀩𑁆𑀬𑀸𑀲𑀢𑁆𑀢𑀫𑀦𑀁, 𑀩𑁆𑀬𑀸𑀲𑀢𑁆𑀢𑀫𑀦𑁂. 𑀩𑁆𑀬𑀸𑀲𑀢𑁆𑀢𑀫𑀦𑀲𑀸, 𑀩𑁆𑀬𑀸𑀲𑀢𑁆𑀢𑀫𑀦𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀦𑁄𑀕𑀡𑁂 𑀫𑀦𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺, 𑀏𑀢𑁆𑀣 𑀧𑀦 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀁 ¶ 𑀏𑀓𑀯𑀘𑀦𑀝𑁆𑀞𑀸𑀦𑁂𑀬𑁂𑀯 𑀲𑀸𑀕𑀫𑁄 𑀪𑀯𑀢𑀺 𑀆𑀤𑁂𑀲𑀲𑀭𑀧𑀭𑀢𑁆𑀢𑀸. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 ‘‘𑀅𑀮𑀻𑀦𑀫𑀦𑀲𑁄 𑀦𑀭𑁄’’𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀢𑀺𑀯𑀺𑀥𑁄 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀓𑀼𑀮𑀁, 𑀩𑁆𑀬𑀸𑀲𑀢𑁆𑀢𑀫𑀦𑀸𑀦𑀺 𑀓𑀼𑀮𑀸𑀦𑀺. 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀓𑀼𑀮𑀁, 𑀩𑁆𑀬𑀸𑀲𑀢𑁆𑀢𑀫𑀦𑀸𑀦𑀺 𑀓𑀼𑀮𑀸𑀦𑀺. 𑀩𑁆𑀬𑀸𑀲𑀢𑁆𑀢𑀫𑀦𑀲𑀸 𑀓𑀼𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀧𑀞𑀫𑀸𑀤𑀼𑀢𑀺𑀬𑀸𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀁 𑀏𑀓𑀯𑀘𑀦𑀝𑁆𑀞𑀸𑀦𑁂𑀬𑁂𑀯 𑀬𑀣𑀸𑀭𑀳𑀁 𑀲𑀸𑀕𑀫𑁄 𑀪𑀯𑀢𑀺 𑀆𑀤𑁂𑀲𑀲𑀭𑀯𑀺𑀪𑀢𑁆𑀢𑀺𑀲𑀭𑀧𑀭𑀢𑁆𑀢𑀸, 𑀅𑀬𑀫𑁆𑀧𑀺 𑀦𑀬𑁄 𑀲𑀼𑀔𑀼𑀫𑁄 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀩𑁆𑀬𑀸𑀲𑀢𑁆𑀢𑀫𑀦𑀲𑀸 𑀇𑀢𑁆𑀣𑀻’’𑀢𑀺 𑀏𑀯𑀁 𑀧𑀞𑀫𑁂𑀓𑀯𑀘𑀦𑀝𑁆𑀞𑀸𑀦𑁂𑀬𑁂𑀯 𑀲𑀸𑀕𑀫𑀁 𑀯𑀢𑁆𑀯𑀸 𑀢𑀢𑁄 ‘‘𑀩𑁆𑀬𑀸𑀲𑀢𑁆𑀢𑀫𑀦𑀸, 𑀩𑁆𑀬𑀸𑀲𑀢𑁆𑀢𑀫𑀦𑀸𑀬𑁄 𑀇𑀢𑁆𑀣𑀺𑀬𑁄. 𑀩𑁆𑀬𑀸𑀲𑀢𑁆𑀢𑀫𑀦𑀁 𑀇𑀢𑁆𑀣𑀺’’𑀦𑁆𑀢𑀺 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. ‘‘𑀏𑀯𑀁 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸, 𑀲𑀤𑁆𑀥𑁂𑀬𑁆𑀬𑀯𑀘𑀸𑀬𑁄 𑀉𑀧𑀸𑀲𑀺𑀓𑀸𑀬𑁄. 𑀲𑀤𑁆𑀥𑁂𑀬𑁆𑀬𑀯𑀘𑀁 𑀉𑀧𑀸𑀲𑀺𑀓’’𑀦𑁆𑀢𑀺𑀆𑀤𑀺𑀦𑀸𑀧𑀺. ‘‘𑀩𑁆𑀬𑀸𑀲𑀢𑁆𑀢𑀫𑀦𑀁 𑀓𑀼𑀮𑀁, 𑀩𑁆𑀬𑀸𑀲𑀢𑁆𑀢𑀫𑀦𑀸 𑀇𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀦 𑀘𑀺𑀢𑁆𑀢𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀲𑀩𑁆𑀩𑀣𑀸𑀧𑀺 𑀲𑀸𑀕𑀫𑁄 𑀦𑀢𑁆𑀣𑀺.

𑀲𑁄𑀢𑀽𑀦𑀁 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀢𑁆𑀣𑀁 𑀅𑀧𑀭𑀸𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀤𑀲𑁆𑀲𑀬𑀺𑀲𑁆𑀲𑀸𑀫 𑀲𑀳𑀦𑀺𑀩𑁆𑀩𑀘𑀦𑁂𑀦 𑁋 𑀫𑀦𑁄 𑀏𑀯 𑀫𑀸𑀦𑀲𑀁, 𑀲𑀫𑀼𑀲𑁆𑀲𑀸𑀳𑀺𑀢𑀁 𑀫𑀸𑀦𑀲𑀁 𑀬𑀲𑁆𑀲 𑀲𑁄𑀬𑀁 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄. ‘‘𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄, 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀸. 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀁, 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁂. 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀲𑀼𑀦𑁆𑀤𑀭𑀸 𑀫𑁂𑀥𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀫𑁂𑀥𑀲𑁄. ‘‘𑀲𑀼𑀫𑁂𑀥𑀲𑁄, 𑀲𑀼𑀫𑁂𑀥𑀲𑀸. 𑀲𑀼𑀫𑁂𑀥𑀲𑀁, 𑀲𑀼𑀫𑁂𑀥𑀲𑁂. 𑀲𑀼𑀫𑁂𑀥𑀲𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦, 𑀏𑀯𑀁 ‘‘𑀪𑀽𑀭𑀺𑀫𑁂𑀥𑀲𑁄’’𑀢𑀺𑀆𑀤𑀻𑀦𑀫𑁆𑀧𑀺. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋

‘‘𑀬𑀁 ¶ 𑀯𑀤𑀦𑁆𑀢𑀺 𑀲𑀼𑀫𑁂𑀥𑁄𑀢𑀺, 𑀪𑀽𑀭𑀺𑀧𑀜𑁆𑀜𑀁 𑀲𑀼𑀫𑁂𑀥𑀲𑀁;

𑀓𑀺𑀁 𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸’’𑀢𑀺.

𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀸 𑀲𑀼𑀫𑁂𑀥𑀲𑀸’’𑀢𑀺 𑀭𑀽𑀧𑀸𑀦𑀺, 𑀦𑀧𑀼𑀁𑀲𑀓𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀁 𑀲𑀼𑀫𑁂𑀥𑀲’’𑀦𑁆𑀢𑀺 𑀭𑀽𑀧𑀸𑀦𑀺, 𑀓𑀜𑁆𑀜𑀸 𑀘𑀺𑀢𑁆𑀢𑀦𑀬𑁂𑀦 𑀏𑀢𑁂𑀲𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀝𑁆𑀞𑀸𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀯𑀺𑀦𑀺𑀘𑁆𑀙𑀬𑁄 𑀦𑀬𑀧𑁆𑀧𑀓𑀸𑀲𑀦𑀢𑁆𑀣𑀁 𑀓𑀢𑁄. 𑀯𑀺𑀲𑁂𑀲𑀢𑁄 𑀳𑀺 𑀑𑀓𑀸𑀭𑀦𑁆𑀢𑀓𑀣𑀸𑀬𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀅𑀧𑀺𑀘 𑀮𑁄𑀓𑁂 𑀦𑀻𑀢𑀺 𑀦𑀸𑀫 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀣𑀺𑀢𑀸 𑀏𑀯 𑀲𑁄𑀪𑀢𑀺, 𑀅𑀬𑀜𑁆𑀘 𑀲𑀸𑀲𑀦𑁂 𑀦𑀻𑀢𑀺, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀣𑀺𑀢𑀸𑀢𑀺.

𑀲𑀩𑁆𑀩𑀸𑀦𑀺 𑀦𑀬𑀢𑁄 𑀏𑀯𑀁, 𑀑𑀓𑀸𑀭𑀦𑁆𑀢𑀧𑀤𑀸𑀦𑀺𑀫𑁂;

𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀧𑀯𑀼𑀢𑁆𑀢𑀸𑀦𑀺, 𑀲𑀸𑀲𑀦𑀢𑁆𑀣𑀁 𑀫𑀳𑁂𑀲𑀺𑀦𑁄.

𑀯𑀺𑀲𑁂𑀲𑁄 𑀢𑁂𑀲𑀼 𑀓𑁂𑀲𑀜𑁆𑀘𑀺, 𑀧𑀸𑀴𑀺𑀬𑀁 𑀬𑁄 𑀧𑀤𑀺𑀲𑁆𑀲𑀢𑀺;

𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂, 𑀧𑀓𑀸𑀲𑁂𑀲𑁆𑀲𑀸𑀫𑀺 𑀢𑀁’𑀥𑀼𑀦𑀸.

‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑁆𑀲𑀺𑀢𑀕𑁆𑀕𑁂’’, 𑀇𑀢𑀺𑀆𑀤𑀺𑀦𑀬𑁂𑀦 𑀳𑀺;

𑀓𑀢𑁆𑀣𑀘𑁄𑀤𑀦𑁆𑀢𑀧𑀼𑀮𑁆𑀮𑀺𑀗𑁆𑀕-𑀭𑀽𑀧𑀸𑀦𑀺 𑀅𑀜𑁆𑀜𑀣𑀸 𑀲𑀺𑀬𑀼𑀁.

𑀧𑀘𑁆𑀘𑀢𑁆𑀢𑀯𑀘𑀦𑀺𑀘𑁆𑀘𑁂𑀯, 𑀢𑀜𑁆𑀘 𑀭𑀽𑀧𑀁 𑀧𑀓𑀸𑀲𑀬𑁂;

‘‘𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄’’, 𑀇𑀢𑀺 𑀪𑀸𑀲𑀦𑁆𑀢𑀺 𑀓𑁂𑀘𑀦.

𑀢𑀢𑁆𑀭 𑀓𑀸𑀦𑀺𑀘𑀺 𑀲𑀼𑀢𑁆𑀢𑀧𑀤𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁂, 𑀦𑀢𑁆𑀣𑀺 𑀧𑀭𑀓𑀸𑀭𑁂, 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂, 𑀧𑀭𑀺𑀬𑀦𑁆𑀢𑀓𑀢𑁂 𑀲𑀁𑀲𑀸𑀭𑁂, 𑀚𑀻𑀯𑁂 𑀲𑀢𑁆𑀢𑀫𑁂, 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂, 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺. 𑀇𑀫𑀸𑀦𑀺 ¶ 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀕𑀳𑁂𑀢𑀩𑁆𑀩𑀸𑀦𑀺. 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀜𑁆𑀘 𑀏𑀓𑀸𑀭𑀸𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁂 𑀧𑀦 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀤𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀯𑀦𑀧𑁆𑀧𑀕𑀼𑀫𑁆𑀩𑁂𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄, 𑀏𑀯𑀜𑁆𑀘 𑀲𑀢𑀺 ‘𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀻’𑀢𑀺 𑀏𑀢𑁆𑀣 𑀯𑀺𑀬 𑀆𑀥𑀸𑀭𑀲𑀼𑀢𑀺𑀲𑀫𑁆𑀪𑀯𑀢𑁄 ‘𑀕𑀺𑀫𑁆𑀳𑀸𑀦 𑀫𑀸𑀲𑁂 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂’𑀢𑀺 𑀇𑀤𑀁 𑀓𑀢𑀭𑀢𑁆𑀣𑀁 𑀚𑁄𑀢𑁂𑀢𑀻’’𑀢𑀺? 𑀢𑁂 𑀯𑀤𑁂𑀬𑁆𑀬𑀼𑀁 ‘‘𑀦 𑀫𑀬𑀁 𑀪𑁄 ‘𑀯𑀦𑀧𑁆𑀧𑀕𑀼𑀫𑁆𑀩𑁂𑀢𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦’𑀦𑁆𑀢𑀺 𑀯𑀤𑀸𑀫, 𑀅𑀣 𑀔𑁄 ‘𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄’𑀢𑀺 𑀯𑀤𑀸𑀫𑀸’’𑀢𑀺. 𑀏𑀯𑀫𑁆𑀧𑀺 𑀤𑁄𑀲𑁄𑀬𑁂𑀯 𑀢𑀼𑀫𑁆𑀳𑀸𑀓𑀁, 𑀦𑀦𑀼 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀻’’𑀢𑀺 𑀏𑀢𑁆𑀣𑀸𑀧𑀺 𑀲𑀫𑁆𑀧𑀤𑀸𑀦𑀯𑀘𑀦𑀲𑁆𑀲 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑁂𑀧𑀺 𑀲𑀗𑁆𑀖𑀲𑁆𑀲 𑀤𑀸𑀦𑀓𑁆𑀭𑀺𑀬𑀸𑀬 𑀆𑀥𑀸𑀭𑀪𑀸𑀯𑀢𑁄 ‘‘𑀲𑀗𑁆𑀖𑁂’’𑀢𑀺 𑀯𑀘𑀦𑀁 𑀲𑀼𑀡𑀦𑁆𑀢𑀸𑀦𑀁 𑀆𑀥𑀸𑀭𑀲𑀼𑀢𑀺 𑀘 𑀆𑀥𑀸𑀭𑀧𑀭𑀺𑀓𑀧𑁆𑀧𑁄 𑀘 𑀳𑁄𑀢𑀺𑀬𑁂𑀯. 𑀦 𑀳𑀺 𑀲𑀓𑁆𑀓𑀸 𑀏𑀯𑀁 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀼𑀁, 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀁 𑀧𑀦 𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄 ‘‘𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲𑀧𑀺 𑀓𑀢𑁆𑀣𑀘𑀺 𑀪𑀼𑀫𑁆𑀫𑀯𑀘𑀦𑀲𑁆𑀲 𑀯𑀺𑀬 𑀭𑀽𑀧𑀁 𑀳𑁄𑀢𑀻’’𑀢𑀺. 𑀏𑀯𑀜𑁆𑀳𑀺 𑀕𑀳𑀺𑀢𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀓𑀼𑀲𑀮𑁄 𑀮𑁄𑀓𑀸𑀦𑀼𑀓𑀫𑁆𑀧𑀓𑁄 𑀪𑀕𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂 𑀲𑀢𑀺 𑀏𑀯𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀮𑁄𑀓𑀲𑁆𑀲 𑀲𑀫𑁆𑀫𑁄𑀳𑀫𑀼𑀧𑁆𑀧𑀸𑀤𑀬𑀦𑁆𑀢𑁄 𑀯𑀺𑀬 𑀓𑀣𑀁 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑀁 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀤𑁆𑀤𑀲𑀸𑀫𑀜𑁆𑀜𑀮𑁂𑀲𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀲𑀤𑁆𑀤𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑀁 𑀇𑀘𑁆𑀙𑀣, ‘‘𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀉𑀧𑀬𑁄𑀕𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸.

𑀅𑀧𑀺𑀘 𑀢𑀣𑁂𑀯 ‘‘𑀅𑀢𑁆𑀢𑀓𑀸𑀭𑁂’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁂 𑀲𑀢𑀺 𑀆𑀥𑀸𑀭𑀲𑀼𑀢𑀺𑀲𑀫𑁆𑀪𑀯𑀢𑁄 ‘‘𑀅𑀢𑁆𑀢𑀓𑀸𑀭𑀲𑁆𑀫𑀺𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦𑀢𑁆𑀣𑀻’’𑀢𑀺 𑀅𑀦𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀲𑀺𑀬𑀸, 𑀦 𑀧𑀦 ‘‘𑀅𑀢𑁆𑀢𑀓𑀸𑀭𑁄 𑀦𑀢𑁆𑀣𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄. ‘‘𑀉𑀧𑀬𑁄𑀕𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺 𑀕𑀳𑀡𑁂𑀧𑀺 𑀉𑀧𑀬𑁄𑀕𑀢𑁆𑀣𑀲𑁆𑀲 𑀦𑀢𑁆𑀣𑀺𑀲𑀤𑁆𑀤𑁂𑀦 ¶ 𑀅𑀯𑀢𑁆𑀢𑀩𑁆𑀩𑀢𑁆𑀢𑀸 𑀤𑁄𑀲𑁄𑀬𑁂𑀯 𑀲𑀺𑀬𑀸, 𑀅𑀢𑁆𑀣𑀺𑀲𑀤𑁆𑀤𑀸𑀤𑀻𑀦𑀁 𑀯𑀺𑀬 𑀧𑀦 𑀦𑀢𑁆𑀣𑀺𑀲𑀤𑁆𑀤𑀲𑁆𑀲𑀧𑀺 𑀧𑀞𑀫𑀸𑀬 𑀬𑁄𑀕𑀢𑁄 ‘‘𑀅𑀢𑁆𑀢𑀓𑀸𑀭𑁂’’𑀢𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 ‘‘𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀸 ‘‘𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀸 𑀕𑀳𑀡𑁂 𑀲𑀢𑀺 ‘‘𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘𑀸’’𑀢𑀺 𑀏𑀢𑁆𑀢𑀓𑀫𑁆𑀧𑀺 𑀯𑀢𑁆𑀢𑀼𑀁 𑀅𑀚𑀸𑀦𑀦𑀤𑁄𑀲𑁄 𑀲𑀺𑀬𑀸, ‘‘𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀤𑀬𑁄𑀕𑀢𑁄 𑀧𑀦 ‘‘𑀩𑀸𑀮𑁂 𑀘𑀸’’𑀢𑀺𑀆𑀤𑀺 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀧𑀦 𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦𑀼𑀘𑁆𑀘𑀸𑀭𑀺𑀢𑁂 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 𑀧𑀤𑁂 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 ‘‘𑀘𑀓𑁆𑀔𑀼𑀁 𑀫𑁂 𑀤𑁂𑀳𑀺 𑀬𑀸𑀘𑀺𑀢𑁄’’𑀢𑀺 𑀏𑀢𑁆𑀣 𑀉𑀧𑀬𑁄𑀕𑀯𑀘𑀦𑁂𑀦 𑀲𑀼𑀢𑀺𑀯𑀲𑁂𑀦 𑀲𑀫𑀸𑀦𑀢𑁆𑀢𑁂𑀧𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄𑀬𑁂𑀯 𑀲𑁄𑀢𑀸𑀭𑁂 𑀧𑀝𑀺𑀪𑀸𑀢𑀺 ‘‘𑀉𑀤𑀧𑀸𑀤𑀻’’𑀢𑀺𑀆𑀔𑁆𑀬𑀸𑀢𑁂𑀦 𑀓𑀣𑀺𑀢𑀢𑁆𑀢𑀸, 𑀦 𑀧𑀦 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀢𑁆𑀣𑀪𑀽𑀢𑁄 𑀉𑀧𑀬𑁄𑀕𑀯𑀘𑀦𑀢𑁆𑀣𑁄 ‘‘𑀉𑀤𑀧𑀸𑀤𑀻’’𑀢𑀺𑀆𑀔𑁆𑀬𑀸𑀢𑁂𑀦 𑀅𑀯𑀘𑀦𑀻𑀬𑀢𑁆𑀢𑀸, ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 𑀳𑀺 𑀪𑀕𑀯𑀢𑀸 𑀯𑀼𑀢𑁆𑀢𑀓𑀸𑀮𑁂 𑀓𑁄 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 𑀧𑀤𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀣𑀫𑀸𑀘𑀺𑀓𑁆𑀔𑀢𑀺, 𑀢𑀣𑀸 ‘‘𑀩𑀸𑀮𑁂 𑀧𑀡𑁆𑀟𑀺𑀢𑁂’’𑀢𑀺𑀆𑀤𑀻𑀦𑀫𑁆𑀧𑀺 𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀁 𑀅𑀧𑀭𑁂𑀳𑀺 ‘‘𑀩𑀸𑀮𑁂 𑀧𑀡𑁆𑀟𑀺𑀢𑁂’’𑀢𑀺𑀆𑀤𑀻𑀳𑀺 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑁂𑀳𑀺 𑀲𑀼𑀢𑀺𑀯𑀲𑁂𑀦 𑀲𑀫𑀸𑀦𑀢𑁆𑀢𑁂𑀧𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄𑀬𑁂𑀯 𑀲𑁄𑀢𑀸𑀭𑁂 𑀧𑀝𑀺𑀪𑀸𑀢𑀺, 𑀦 𑀇𑀢𑀭𑀯𑀘𑀦𑀢𑁆𑀣𑁄 𑀬𑀣𑀸𑀧𑀬𑁄𑀕𑀁 𑀅𑀢𑁆𑀣𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀇𑀢𑀺 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀩𑀸𑀮𑁂, 𑀧𑀡𑁆𑀟𑀺𑀢𑁂’’𑀢𑀺𑀆𑀤𑀻𑀦𑀁 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀜𑁆𑀜𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀲𑀼𑀢𑀺𑀲𑀸𑀫𑀜𑁆𑀜𑁂𑀦 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑀢𑁆𑀢𑀁.

𑀬𑀁 𑀧𑀦𑀸𑀘𑀭𑀺𑀬𑁂𑀦 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑁋

‘‘𑀢𑀬𑁄 𑀕𑀺𑀭𑀺𑀁 𑀢𑀺𑀅𑀦𑁆𑀢𑀭𑀁 𑀓𑀸𑀫𑀬𑀸𑀫𑀺,

𑀧𑀜𑁆𑀘𑀸𑀮𑀸 𑀓𑀼𑀭𑀼𑀬𑁄 𑀓𑁂𑀓𑀓𑁂 𑀘;

𑀢𑀢𑀼𑀢𑁆𑀢𑀭𑀺𑀁 𑀩𑁆𑀭𑀸𑀳𑁆𑀫𑀡 𑀓𑀸𑀫𑀬𑀸𑀫𑀺,

𑀢𑀺𑀓𑀺𑀘𑁆𑀙 𑀫𑀁 𑀩𑁆𑀭𑀸𑀳𑁆𑀫𑀡 𑀓𑀸𑀫𑀦𑀻𑀢’’𑀦𑁆𑀢𑀺 𑁋

𑀇𑀫𑀲𑁆𑀲 ¶ 𑀓𑀸𑀫𑀦𑀻𑀢𑀚𑀸𑀢𑀓𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀁 ‘‘𑀓𑁂𑀓𑀓𑁂 𑀘𑀸𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦 𑀓𑁂𑀓𑀓𑀲𑁆𑀲 𑀭𑀝𑁆𑀞𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀤𑀦𑁆𑀢𑁄 𑀘 𑀲𑁄 ‘‘𑀧𑀼𑀭𑀺𑀲𑁂 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺, ‘‘𑀧𑀲𑁆𑀲𑀸𑀫𑀺 𑀮𑁄𑀓𑁂 𑀲𑀥𑀦𑁂 𑀫𑀦𑀼𑀲𑁆𑀲𑁂’’𑀢𑀺 𑀘 𑀆𑀤𑀻𑀲𑀼 𑀬𑁂𑀪𑀼𑀬𑁆𑀬𑁂𑀦 ‘‘𑀧𑀼𑀭𑀺𑀲𑁂, 𑀮𑁄𑀓𑁂, 𑀲𑀥𑀦𑁂, 𑀫𑀦𑀼𑀲𑁆𑀲𑁂’’𑀢𑀺𑀆𑀤𑀻𑀦𑀁 𑀉𑀧𑀬𑁄𑀕𑀩𑀳𑀼𑀯𑀘𑀦𑀪𑀼𑀫𑁆𑀫𑁂𑀓𑀯𑀘𑀦𑀪𑀸𑀯𑁂𑀦 𑀆𑀕𑀢𑀢𑁆𑀢𑀸 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀩𑀳𑀼𑀯𑀘𑀦𑀪𑀸𑀯𑀲𑁆𑀲 𑀧𑀦 𑀅𑀧𑀸𑀓𑀝𑀢𑁆𑀢𑀸 𑀬𑁂𑀪𑀼𑀬𑁆𑀬𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀇𑀤𑀫𑁆𑀧𑀺 𑀢𑀸𑀤𑀺𑀲𑀫𑁂𑀯𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀯𑀤𑀢𑀺 𑀫𑀜𑁆𑀜𑁂. 𑀆𑀘𑀭𑀺𑀬𑀸 𑀳𑀺 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀣𑁂𑀦𑁆𑀢𑀺. 𑀅𑀬𑀁 𑀧𑀦 𑀅𑀫𑁆𑀳𑀸𑀓𑀁 𑀭𑀼𑀘𑀺 𑁋 ‘‘𑀓𑁂𑀓𑀓𑁂’’𑀢𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀯 ‘‘𑀧𑀜𑁆𑀘𑀸𑀮𑀸, 𑀓𑀼𑀭𑀼𑀬𑁄’’𑀢𑀺 𑀲𑀳𑀚𑀸𑀢𑀧𑀤𑀸𑀦𑀺 𑀯𑀺𑀬, 𑀭𑀝𑁆𑀞𑀯𑀸𑀘𑀓𑀢𑁆𑀢𑀸 𑀧𑀦 ‘‘𑀓𑀼𑀭𑀼𑀬𑁄’’𑀢𑀺 𑀧𑀤𑀫𑀺𑀯 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀪𑀕𑀯𑀸 ‘‘𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄, 𑀯𑁂𑀲𑁆𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀸𑀦𑀯𑀺𑀪𑀢𑁆𑀢𑀻𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂𑀲𑀼 𑀲𑀳𑀚𑀸𑀢𑀧𑀤𑁂𑀲𑀼 𑀧𑀘𑁆𑀙𑀺𑀫𑀁 𑀉𑀧𑀬𑁄𑀕𑀯𑀘𑀦𑀯𑀲𑁂𑀦 𑀦𑀺𑀤𑁆𑀤𑀺𑀲𑁂𑀬𑁆𑀬, 𑀬𑀼𑀢𑁆𑀢𑀺 𑀘 𑀦 𑀤𑀺𑀲𑁆𑀲𑀢𑀺 ‘‘𑀧𑀜𑁆𑀘𑀸𑀮𑀸’’𑀢𑀺, ‘‘𑀓𑀼𑀭𑀼𑀬𑁄’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀢𑁆𑀯𑀸 ‘‘𑀓𑁂𑀓𑀓𑁂’’𑀢𑀺 𑀉𑀧𑀬𑁄𑀕𑀯𑀘𑀦𑀲𑁆𑀲 𑀯𑀘𑀦𑁂, 𑀢𑀲𑁆𑀫𑀸 ‘‘𑀓𑁂𑀓𑀓𑁂’’𑀢𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀯. 𑀢𑀣𑀸 𑀳𑀺 𑀲𑀦𑁆𑀥𑀺𑀯𑀺𑀲𑁄𑀥𑀦𑀯𑀺𑀥𑀸𑀬𑀓𑁄 𑀆𑀘𑀭𑀺𑀬𑁄 𑀢𑀸𑀤𑀺𑀲𑀸𑀦𑀁 𑀧𑀤𑀸𑀦𑀁 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀜𑁆𑀜𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 𑀲𑀸𑀫𑀁 𑀓𑀢𑁂 𑀧𑀓𑀭𑀡𑁂 ‘‘𑀯𑀦𑀧𑁆𑀧𑀕𑀼𑀫𑁆𑀩𑁄 𑀯𑀦𑀧𑁆𑀧𑀕𑀼𑀫𑁆𑀩𑁂, 𑀲𑀼𑀔𑀁 𑀤𑀼𑀓𑁆𑀔𑀁 𑀚𑀻𑀯𑁄, 𑀲𑀼𑀔𑁂 𑀤𑀼𑀓𑁆𑀔𑁂 𑀚𑀻𑀯𑁂’’𑀢𑀺 𑀆𑀳, 𑀝𑀻𑀓𑀸𑀬𑀫𑁆𑀧𑀺 𑀘 𑀢𑁂𑀲𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀯𑀦𑀧𑁆𑀧𑀕𑀼𑀫𑁆𑀩𑁄, 𑀲𑀼𑀔𑀁, 𑀤𑀼𑀓𑁆𑀔𑀁, 𑀚𑀻𑀯𑁄’’𑀢𑀺 𑀲𑀸𑀥𑀦𑀻𑀬𑀁 𑀭𑀽𑀧𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀦𑀺𑀕𑁆𑀕𑀳𑀻𑀢𑀮𑁄𑀧𑀯𑀲𑁂𑀦 𑀅𑀓𑀸𑀭𑁄𑀓𑀸𑀭𑀸𑀦𑀜𑁆𑀘 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀲𑀼𑀔𑁂, 𑀤𑀼𑀓𑁆𑀔𑁂, 𑀚𑀻𑀯𑁂’’𑀢𑀺 𑀭𑀽𑀧𑀦𑀺𑀧𑁆𑀨𑀢𑁆𑀢𑀺𑀫𑀸𑀳. 𑀲𑀸 𑀧𑀸𑀴𑀺𑀦𑀬𑀸𑀦𑀼 𑀓𑀽𑀮𑀸. 𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑁂𑀦𑀧𑀺 𑀧𑀸𑀴𑀺𑀦𑀬𑀁 𑀦𑀺𑀲𑁆𑀲𑀸𑀬 ‘‘𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀧𑀤𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀯𑀼𑀢𑁆𑀢𑀺𑀬𑀁 ‘‘𑀤𑁆𑀯𑁂 𑀧𑀤𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀸𑀦𑀻’’𑀢𑀺. ‘‘𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂’’𑀢𑀺 ¶ 𑀘 𑀇𑀤𑀁 ‘‘𑀅𑀝𑁆𑀞 𑀦𑀸𑀕𑀸𑀯𑀸𑀲𑀲𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀝𑁆𑀞 𑀦𑀸𑀕𑀸𑀯𑀸𑀲𑀲𑀢𑁂’’𑀢𑀺 𑀧𑀤𑀫𑀺𑀯 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 𑀢𑁂𑀲𑀁 𑀪𑀼𑀫𑁆𑀫𑁂𑀓𑀯𑀘𑀦𑀢𑁆𑀢𑀁 𑀇𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀬𑀤𑀺 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂’’𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀁, ‘‘𑀓𑁂𑀓𑀓𑁂’’𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, ‘‘𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂’’𑀢𑀺 𑀏𑀢𑁆𑀣 ‘‘𑀏𑀲𑁂𑀲𑁂’’𑀢𑀺 𑀇𑀫𑀸𑀦𑀺𑀧𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀸𑀦𑀺 𑀯𑀸 𑀲𑀺𑀬𑀼𑀁, 𑀉𑀧𑀬𑁄𑀕𑀯𑀘𑀦𑀸𑀦𑀺 𑀯𑀸. 𑀬𑀣𑁂𑀢𑀸𑀦𑀺 𑀏𑀯𑀁𑀯𑀺𑀥𑀸𑀦𑀺 𑀦 𑀳𑁄𑀦𑁆𑀢𑀺, 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀢𑀣𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀓𑁂𑀓𑀓𑁂’’𑀢𑀺𑀆𑀤𑀻𑀦𑀺𑀧𑀺 𑀢𑀣𑀸𑀯𑀺𑀥𑀸𑀦𑀺 𑀦 𑀳𑁄𑀦𑁆𑀢𑀺, 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀩𑀸𑀮𑁂, 𑀧𑀡𑁆𑀟𑀺𑀢𑁂, 𑀓𑁂𑀓𑀓𑁂’’𑀢𑀺, ‘‘𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂, 𑀅𑀝𑁆𑀞 𑀦𑀸𑀕𑀸𑀯𑀸𑀲𑀲𑀢𑁂, 𑀓𑁂 𑀧𑀼𑀭𑀺𑀲𑁂, 𑀏𑀲𑁂𑀲𑁂’’𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀼𑀭𑀺𑀲𑀮𑀺𑀗𑁆𑀕𑀇𑀢𑁆𑀣𑀺𑀮𑀺𑀗𑁆𑀕𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑀩𑁆𑀩𑀦𑀸𑀫𑀏𑀓𑀯𑀘𑀦𑀅𑀦𑁂𑀓𑀯𑀘𑀦𑀯𑀲𑁂𑀦 𑀲𑀸𑀲𑀦𑀯𑀭𑁂 𑀞𑀺𑀢𑀸𑀦𑀁 𑀧𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀧𑀼𑀣𑀼𑀯𑀘𑀦𑀸𑀦𑀫𑁂𑀓𑀸𑀭𑀸𑀤𑁂𑀲𑀯𑀲𑁂𑀦𑁂𑀯 𑀪𑀯𑀢𑀻𑀢𑀺 𑀅𑀯𑀲𑁆𑀲𑀫𑀺𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀏𑀯𑀁 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀩𑀸𑀮𑁂, 𑀧𑀡𑁆𑀟𑀺𑀢𑁂’’𑀢𑀺𑀆𑀤𑀻𑀦𑀁 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀢𑀸 𑀅𑀢𑀻𑀯 𑀲𑀼𑀔𑀼𑀫𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸, 𑀲𑀤𑁆𑀥𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑀤𑀼𑀧𑀤𑁂𑀲𑀁 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸. 𑀩𑀼𑀤𑁆𑀥𑀯𑀘𑀦𑀲𑁆𑀫𑀺𑀜𑁆𑀳𑀺 𑀲𑀤𑁆𑀤𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀜𑀸𑀡𑀘𑀓𑁆𑀔𑀼𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀪𑀽𑀢𑀸 𑀧𑀸𑀴𑀺𑀦𑀬𑀸 𑀯𑀺𑀯𑀺𑀥𑀸 𑀤𑀺𑀲𑁆𑀲𑀦𑁆𑀢𑀺.

𑀢𑀢𑁆𑀣 𑀲𑀤𑁆𑀤𑀢𑁄 𑀢𑀸𑀯 𑀇𑀤𑀁 𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀁 𑁋 ‘‘𑀯𑀺𑀭𑀢𑁆𑀢𑀸 𑀓𑁄𑀲𑀺𑀬𑀸𑀬𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀘𑁆𑀘𑀢𑁆𑀢𑀯𑀘𑀦𑀁 𑀤𑀺𑀲𑁆𑀲𑀢𑀺, ‘‘𑀓𑁄 𑀧𑀼𑀭𑀺𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑁂 𑀧𑀼𑀭𑀺𑀲𑁂’’𑀢𑀺 𑀲𑀩𑁆𑀩𑀦𑀸𑀫𑀺𑀓𑀧𑀘𑁆𑀘𑀢𑁆𑀢𑀯𑀘𑀦𑀁 𑀤𑀺𑀲𑁆𑀲𑀢𑀺, ‘‘𑀓𑀺𑀦𑁆𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺 𑀲𑀫𑀸𑀲𑀧𑀤𑀁 𑀧𑀼𑀮𑁆𑀮𑀺𑀗𑁆𑀕𑀯𑀺𑀲𑀬𑀁 𑀤𑀺𑀲𑁆𑀲𑀢𑀺. 𑀓𑀺𑀁 𑀦𑀸𑀫𑀁 𑀏𑀢𑀲𑁆𑀲𑀸𑀢𑀺 ¶ 𑀓𑁄𑀦𑀸𑀫𑁄𑀢𑀺 𑀳𑀺 𑀲𑀫𑀸𑀲𑁄. 𑀢𑁂𑀦 ‘‘𑀓𑁄𑀦𑀸𑀫𑀸 𑀇𑀢𑁆𑀣𑀻, 𑀓𑁄𑀦𑀸𑀫𑀁 𑀓𑀼𑀮’’𑀦𑁆𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀕𑀳𑁂𑀢𑀩𑁆𑀩𑁄. ‘‘𑀓𑁆𑀯 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺 𑀏𑀢𑁆𑀣 𑀓𑁆𑀯𑀲𑀤𑁆𑀤𑁂𑀦 𑀈𑀲𑀓𑀁 𑀲𑀫𑀸𑀦𑀲𑀼𑀢𑀺𑀓𑁄 𑀲𑀢𑁆𑀢𑀫𑀺𑀬𑀦𑁆𑀢𑁄 𑀓𑁄𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀓𑁆𑀯 𑀓𑁄𑀲𑀤𑁆𑀤𑀸 𑀳𑀺 𑀅𑀜𑁆𑀜𑀫𑀜𑁆𑀜𑀫𑀻𑀲𑀓𑀲𑀫𑀸𑀦𑀲𑀼𑀢𑀺𑀓𑀸. 𑀢𑀣𑀸 ‘‘𑀇𑀥 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼, 𑀇𑀥 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀲𑀼, 𑀦 𑀢𑁂𑀦𑀢𑁆𑀣𑀁 𑀅𑀩𑀦𑁆𑀥𑀺 𑀲𑁄, 𑀦 𑀢𑁂𑀦𑀢𑁆𑀣𑀁 𑀅𑀩𑀦𑁆𑀥𑀺𑀲𑀽’’𑀢𑀺 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀢𑁆𑀣𑀢𑁄 𑀧𑀦 𑀇𑀤𑀁 𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀁 𑁋 ‘‘𑀬𑀁 𑀦 𑀓𑀜𑁆𑀘𑀦𑀤𑁆𑀯𑁂𑀧𑀺𑀜𑁆𑀙, 𑀅𑀦𑁆𑀥𑁂𑀦 𑀢𑀫𑀲𑀸 𑀕𑀢’’𑀦𑁆𑀢𑀺 𑀏𑀢𑁆𑀣 𑀦𑀓𑀸𑀭𑁄 ‘‘𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀦 𑀓𑀢𑀦𑁆𑀢𑀺 𑀓𑀢𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀦𑀓𑀸𑀭𑁄 𑀉𑀧𑀫𑀸𑀦𑁂 𑀯𑀢𑁆𑀢𑀢𑀺, 𑀦 𑀧𑀝𑀺𑀲𑁂𑀥𑁂.

‘‘𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘,

𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄,

𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺

𑀏𑀯𑀫𑀸𑀤𑀻𑀦𑀺𑀧𑀺 𑀅𑀜𑁆𑀜𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀥𑀺𑀧𑁆𑀧𑀸𑀬𑀢𑁄 𑀇𑀤𑀁 𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀁 𑁋 ‘‘𑀢𑀡𑁆𑀳𑀁 𑀅𑀲𑁆𑀫𑀺𑀫𑀸𑀦𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀤𑁆𑀯𑀸𑀤𑀲𑀸𑀬𑀢𑀦𑀦𑀺𑀲𑁆𑀲𑀺𑀢𑀁 𑀦𑀦𑁆𑀤𑀺𑀭𑀸𑀕𑀜𑁆𑀘 𑀳𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀅𑀦𑀻𑀖𑁄 𑀬𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀢𑀣𑀸 𑀅𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀔𑀢𑁆𑀢𑀺𑀬𑁂;

𑀭𑀝𑁆𑀞𑀁 𑀲𑀸𑀦𑀼𑀘𑀭𑀁 𑀳𑀦𑁆𑀢𑁆𑀯𑀸, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺

𑀯𑀼𑀢𑁆𑀢𑀁.

‘‘𑀯𑀦𑀁 ¶ 𑀙𑀺𑀦𑁆𑀤𑀣 𑀫𑀸 𑀭𑀼𑀓𑁆𑀔𑀁, 𑀯𑀦𑀢𑁄 𑀚𑀸𑀬𑀢𑁂 𑀪𑀬𑀁;

𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀁, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺

𑀏𑀯𑀫𑀸𑀤𑀻𑀦𑀺𑀧𑀺 𑀅𑀜𑁆𑀜𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀩𑀼𑀤𑁆𑀥𑀯𑀘𑀦𑁂 𑀲𑀤𑁆𑀤𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀜𑀸𑀡𑀘𑀓𑁆𑀔𑀼𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀪𑀽𑀢𑀸 𑀧𑀸𑀴𑀺𑀦𑀬𑀸 𑀯𑀺𑀯𑀺𑀥𑀸 𑀤𑀺𑀲𑁆𑀲𑀦𑁆𑀢𑀺. 𑀬𑀣𑀸𑀳 𑁋

‘‘𑀚𑀸𑀦𑀦𑁆𑀢𑀸 𑀅𑀧𑀺 𑀲𑀤𑁆𑀤𑀲𑀢𑁆𑀣𑀫𑀔𑀺𑀮𑀁 𑀫𑀼𑀬𑁆𑀳𑀦𑁆𑀢𑀺 𑀧𑀸𑀞𑀓𑁆𑀓𑀫𑁂,

𑀬𑁂𑀪𑀼𑀬𑁆𑀬𑁂𑀦 𑀳𑀺 𑀮𑁄𑀓𑀦𑀻𑀢𑀺𑀯𑀺𑀥𑀼𑀭𑀸 𑀧𑀸𑀞𑁂 𑀦𑀬𑀸 𑀯𑀺𑀚𑁆𑀚𑀭𑁂;

𑀧𑀡𑁆𑀟𑀺𑀘𑁆𑀘𑀫𑁆𑀧𑀺 𑀧𑀳𑀸𑀬 𑀩𑀸𑀳𑀺𑀭𑀕𑀢𑀁 𑀏𑀢𑁆𑀣𑁂𑀯 𑀢𑀲𑁆𑀫𑀸 𑀩𑀼𑀥𑁄,

𑀲𑀺𑀓𑁆𑀔𑁂𑀬𑁆𑀬𑀸𑀫𑀮𑀥𑀫𑁆𑀫𑀲𑀸𑀕𑀭𑀢𑀭𑁂 𑀦𑀺𑀩𑁆𑀩𑀸𑀦𑀢𑀺𑀢𑁆𑀣𑀽𑀧𑀕𑁂’’𑀢𑀺.

𑀏𑀯𑀁 𑀧𑀸𑀴𑀺𑀦𑀬𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂, 𑀩𑀸𑀮𑁂 𑀘, 𑀧𑀡𑁆𑀟𑀺𑀢𑁂 𑀘𑀸’’𑀢𑀺𑀆𑀤𑀻𑀦𑀁 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀜𑁆𑀜𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀲𑀼𑀢𑀺𑀲𑀸𑀫𑀜𑁆𑀜𑁂𑀦 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑀢𑁆𑀢𑀁 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑁂𑀳𑀺 𑀢𑁂𑀲𑀁 𑀲𑀫𑀸𑀦𑀲𑀼𑀢𑀺𑀓𑀢𑁆𑀢𑁂𑀧𑀺 𑀧𑀘𑁆𑀘𑀢𑁆𑀢𑀚𑁄𑀢𑀓𑀢𑁆𑀢𑀸. 𑀲𑀫𑀸𑀦𑀲𑀼𑀢𑀺𑀓𑀸𑀧𑀺 𑀳𑀺 𑀲𑀤𑁆𑀤𑀸 𑀅𑀢𑁆𑀣𑀧𑁆𑀧𑀓𑀭𑀡𑀮𑀺𑀗𑁆𑀕𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀸𑀤𑀺𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀓𑀸 𑀪𑀯𑀦𑁆𑀢𑀺. 𑀢𑀁 𑀬𑀣𑀸? ‘‘𑀲𑀻𑀳𑁄 𑀕𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁𑀦𑀸𑀫𑀓𑁄 𑀧𑀼𑀭𑀺𑀲𑁄’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀲𑀻𑀳𑁄 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀫𑀺𑀕𑀭𑀸𑀚𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀅𑀢𑁆𑀣𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. 𑀲𑀗𑁆𑀕𑀸𑀫𑁂 𑀞𑀢𑁆𑀯𑀸 ‘‘𑀲𑀺𑀦𑁆𑀥𑀯𑀫𑀸𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑁆𑀲𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀭𑁄𑀕𑀺𑀲𑀸𑀮𑀸𑀬𑀁 𑀧𑀦 ‘‘𑀲𑀺𑀦𑁆𑀥𑀯𑀫𑀸𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀮𑀯𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀧𑀓𑀭𑀡𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. ‘‘𑀇𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁𑀦𑀸𑀫𑀺𑀓𑀸 𑀥𑀫𑁆𑀫𑀚𑀸𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀇𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀅𑀘𑁆𑀙𑀫𑀺𑀕𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀮𑀺𑀗𑁆𑀕𑀯𑀲𑁂𑀦 𑀏𑀓𑀤𑁂𑀲𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 ‘‘𑀤𑁂𑀯𑀤𑀢𑁆𑀢𑀁 𑀧𑀓𑁆𑀓𑁄𑀲 𑀖𑀝𑀥𑀸𑀭𑀓𑀁 ¶ 𑀤𑀡𑁆𑀟𑀥𑀸𑀭𑀓’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀖𑀝𑀤𑀡𑁆𑀟𑀸𑀤𑀻𑀦𑀺 𑀮𑀺𑀗𑁆𑀕𑀁, 𑀢𑀣𑀸𑀧𑀺 𑀲𑀫𑀸𑀦𑀲𑀼𑀢𑀺𑀓𑀸𑀥𑀺𑀓𑀸𑀭𑀢𑁆𑀢𑀸 𑀦 𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀁.

‘‘𑀇𑀲𑁆𑀲𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀘 ‘‘𑀇𑀲𑁆𑀲𑀸 𑀧𑀼𑀭𑀺𑀲𑀫𑀦𑀼𑀩𑀦𑁆𑀥𑀺𑀁𑀲𑀽’’𑀢𑀺 𑀘 𑀯𑀼𑀢𑁆𑀢𑁂 𑀧𑀦 𑀲𑀩𑁆𑀩𑀣𑀸 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. 𑀢𑀣𑀸 ‘‘𑀲𑀻𑀳𑁄 𑀪𑀺𑀓𑁆𑀔𑀯𑁂 𑀫𑀺𑀕𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀺𑀕𑀸𑀥𑀺𑀧𑁄 𑀓𑁂𑀲𑀭𑀲𑀻𑀳𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄, 𑀲𑀻𑀳𑁄 𑀲𑁂𑀦𑀸𑀧𑀢𑀻’’𑀢𑀺 𑀘 𑀯𑀼𑀢𑁆𑀢𑁂 𑀧𑀦 ‘‘𑀲𑀻𑀳𑁄 𑀦𑀸𑀫 𑀲𑀸𑀫𑀡𑁂𑀭𑁄, 𑀲𑀻𑀳𑁄 𑀦𑀸𑀫 𑀲𑁂𑀦𑀸𑀧𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑁆𑀧𑀺 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. ‘‘𑀅𑀤𑁆𑀤𑀲𑀁𑀲𑀼 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑁂’’𑀢𑀺 𑀏𑀯𑀫𑁆𑀧𑀺 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀢𑁆𑀣𑀲𑀗𑁆𑀔𑀸𑀢𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺. 𑀢𑀣𑀸 ‘‘𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸’’𑀢𑀺 𑀏𑀯𑀫𑁆𑀧𑀺 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀆𑀮𑀧𑀦𑀢𑁆𑀣𑀧𑀘𑁆𑀘𑀢𑁆𑀢𑀢𑁆𑀣𑀲𑀗𑁆𑀔𑀸𑀢𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀦𑀁 𑀪𑀯𑀢𑀺, 𑀢𑀲𑁆𑀫𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺𑀆𑀤𑀻𑀦𑀺 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑁂𑀳𑀺 𑀲𑀤𑀺𑀲𑀢𑁆𑀢𑁂𑀧𑀺𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀼𑀤𑁆𑀥𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀁 𑀏𑀯 𑀳𑀺 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 𑀏𑀯𑀁𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑀪𑀼𑀫𑁆𑀫𑁄𑀧𑀬𑁄𑀕𑀯𑀘𑀦𑀸𑀦𑀺 𑀯𑀺𑀬𑀸𑀢𑀺. 𑀦𑀦𑀼 𑀘 𑀪𑁄 𑀏𑀯𑀁𑀯𑀺𑀥𑀸𑀦𑀁 𑀭𑀽𑀧𑀸𑀦𑀁 𑀧𑀸𑀴𑀺𑀬𑀁 𑀤𑀺𑀲𑁆𑀲𑀦𑀢𑁄 ‘𑀏𑀓𑀸𑀭𑀦𑁆𑀢𑀫𑁆𑀧𑀺 𑀧𑀼𑀮𑁆𑀮𑀺𑀗𑁆𑀕𑀁 𑀅𑀢𑁆𑀣𑀻’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁, 𑀑𑀓𑀸𑀭𑀦𑁆𑀢𑀪𑀸𑀯𑁄𑀕𑀥𑀭𑀽𑀧𑀯𑀺𑀲𑁂𑀲𑀢𑁆𑀢𑀸 𑀢𑁂𑀲𑀁 𑀭𑀽𑀧𑀸𑀦𑀁. 𑀆𑀤𑁂𑀲𑀯𑀲𑁂𑀦 𑀳𑀺 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀏𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀯𑀺𑀥𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺.

𑀓𑁂𑀘𑀺 ¶ 𑀧𑀦 𑀯𑀤𑁂𑀬𑁆𑀬𑀼𑀁 ‘‘𑀬𑀸𑀬𑀁 𑀧𑀼𑀭𑀺𑀲𑀲𑀤𑁆𑀤𑀦𑀬𑀁 𑀕𑀳𑁂𑀢𑁆𑀯𑀸 ‘𑀪𑀽𑀢𑁄, 𑀪𑀽𑀢𑀸. 𑀪𑀽𑀢’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀫𑁄𑀓𑀸𑀭𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸, 𑀢𑀢𑁆𑀣 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀓𑀺𑀫𑀢𑁆𑀣𑀁 𑀦 𑀯𑀼𑀢𑁆𑀢𑀸𑀦𑀻’’𑀢𑀺? 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀢𑀸𑀤𑀺𑀲𑀸𑀦𑀺 𑀳𑀺 𑀘𑀢𑀼𑀢𑁆𑀣𑁂𑀓𑀯𑀘𑀦𑀭𑀽𑀧𑀸𑀦𑀺 𑀧𑀸𑀴𑀺𑀦𑀬𑁂 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁂 𑀘 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 ‘‘𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺, 𑀦𑀬𑀦𑀢𑁆𑀣𑀓𑀫𑁆𑀫𑀦𑀺, 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂, 𑀢𑀤𑀢𑁆𑀣𑁂 𑀘𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀇𑀫𑁂𑀲𑀼 𑀘𑀢𑀽𑀲𑀼𑀬𑁂𑀯 𑀞𑀸𑀦𑁂𑀲𑀼, 𑀧𑀪𑁂𑀤𑀢𑁄 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀦𑁆𑀢𑀺. 𑀤𑀸𑀦𑀭𑁄𑀘𑀦𑀥𑀸𑀭𑀡𑀦𑀫𑁄𑀬𑁄𑀕𑀸𑀤𑀺𑀪𑁂𑀤𑁂 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀇𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀦 𑀯𑀼𑀢𑁆𑀢𑀸𑀦𑀻𑀢𑀺. 𑀦𑀦𑀼 𑀤𑀸𑀦𑀓𑁆𑀭𑀺𑀬𑀸𑀬𑁄𑀕𑁂 ‘‘𑀅𑀪𑀺𑀭𑀽𑀧𑀸𑀬 𑀓𑀜𑁆𑀜𑀸 𑀤𑁂𑀬𑁆𑀬𑀸’’𑀢𑀺 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀭𑀽𑀧𑀤𑀲𑁆𑀲𑀦𑀢𑁄 𑀇𑀫𑀲𑁆𑀫𑀺𑀫𑁆𑀧𑀺 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂 ‘‘𑀧𑀼𑀭𑀺𑀲𑀸𑀬, 𑀪𑀽𑀢𑀸𑀬𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀤𑀸𑀦𑀭𑁄𑀘𑀦𑀥𑀸𑀭𑀡𑀦𑀫𑁄𑀬𑁄𑀕𑀸𑀤𑀺𑀪𑁂𑀤𑁂 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀅𑀧𑀸𑀴𑀺𑀦𑀬𑀢𑁆𑀢𑀸. ‘‘𑀅𑀪𑀺𑀭𑀽𑀧𑀸𑀬 𑀓𑀜𑁆𑀜𑀸 𑀤𑁂𑀬𑁆𑀬𑀸’’𑀢𑀺 𑀅𑀬𑀜𑁆𑀳𑀺 𑀲𑀤𑁆𑀤𑀲𑀢𑁆𑀣𑀢𑁄 𑀆𑀕𑀢𑁄 𑀦𑀬𑁄, 𑀦 𑀩𑀼𑀤𑁆𑀥𑀯𑀘𑀦𑀢𑁄. 𑀩𑀼𑀤𑁆𑀥𑀯𑀘𑀦𑀜𑁆𑀳𑀺 𑀧𑀢𑁆𑀯𑀸 ‘‘𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑁂𑀬𑁆𑀬𑀸’’𑀢𑀺 𑀧𑀤𑀭𑀽𑀧𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀦𑀦𑀼 𑀘 𑀪𑁄 𑀦𑀫𑁄𑀬𑁄𑀕𑀸𑀤𑀻𑀲𑀼𑀧𑀺 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑁄 𑀤𑀺𑀲𑁆𑀲𑀢𑀻𑀢𑀺. 𑀲𑀸𑀲𑀦𑀸𑀯𑀘𑀭𑀸𑀧𑀺 𑀳𑀺 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀸 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀦𑁆𑀢𑀺. 𑀓𑁂𑀘𑀺 𑀧𑀦 𑁋

‘‘𑀦𑀫𑁄 𑀩𑀼𑀤𑁆𑀥𑀸𑀬 𑀩𑀼𑀤𑁆𑀥𑀲𑁆𑀲,

𑀦𑀫𑁄 𑀥𑀫𑁆𑀫𑀸𑀬 𑀥𑀫𑁆𑀫𑀺𑀦𑁄;

𑀦𑀫𑁄 𑀲𑀗𑁆𑀖𑀸𑀬 𑀲𑀗𑁆𑀖𑀲𑁆𑀲,

𑀦𑀫𑁄𑀓𑀸𑀭𑁂𑀦 𑀲𑁄𑀢𑁆𑀣𑀺 𑀫𑁂’’𑀢𑀺 𑀘,

‘‘𑀫𑀼𑀔𑁂 ¶ 𑀲𑀭𑀲𑀺 𑀲𑀫𑁆𑀨𑀼𑀮𑁆𑀮𑁂, 𑀦𑀬𑀦𑀼𑀧𑁆𑀧𑀮𑀧𑀗𑁆𑀓𑀚𑁂;

𑀧𑀸𑀤𑀧𑀗𑁆𑀓𑀚𑀧𑀽𑀚𑀸𑀬, 𑀩𑀼𑀤𑁆𑀥𑀸𑀬 𑀲𑀢𑀢𑀁 𑀤𑀤𑁂’’𑀢𑀺 𑀘,

‘‘𑀦𑀭𑁄 𑀦𑀭𑀁 𑀬𑀸𑀘𑀢𑀺 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁, 𑀦𑀭𑁂𑀦 𑀤𑀽𑀢𑁄 𑀧𑀳𑀺𑀢𑁄 𑀦𑀭𑀸𑀬𑀸’’𑀢𑀺 𑀘 𑀕𑀸𑀣𑀸𑀭𑀘𑀦𑀫𑁆𑀧𑀺 𑀓𑀼𑀩𑁆𑀩𑀦𑁆𑀢𑀻𑀢𑀺? 𑀲𑀘𑁆𑀘𑀁, 𑀲𑀸𑀲𑀦𑀸𑀯𑀘𑀭𑀸𑀧𑀺 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀸 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀻𑀦𑀺𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀦𑁆𑀢𑀺, 𑀕𑀸𑀣𑀸𑀭𑀘𑀦𑀫𑁆𑀧𑀺 𑀓𑀼𑀩𑁆𑀩𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂 𑀲𑀤𑁆𑀤𑀲𑀢𑁆𑀣𑁂 𑀓𑀢𑀧𑀭𑀺𑀘𑀬𑀯𑀲𑁂𑀦 𑀲𑀤𑁆𑀤𑀲𑀢𑁆𑀣𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀢𑀣𑀸𑀭𑀽𑀧𑀸 𑀕𑀸𑀣𑀸𑀧𑀺 𑀘𑀼𑀡𑁆𑀡𑀺𑀬𑀧𑀤𑀸𑀦𑀺𑀧𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀦𑁆𑀢𑀺. 𑀬𑁂 𑀧𑀦 𑀲𑀤𑁆𑀤𑀲𑀢𑁆𑀣𑁂 𑀅𑀓𑀢𑀧𑀭𑀺𑀘𑀬𑀸 𑀅𑀦𑁆𑀢𑀫𑀲𑁄 𑀩𑀸𑀮𑀤𑀸𑀭𑀓𑀸, 𑀢𑁂𑀧𑀺 𑀅𑀜𑁆𑀜𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀢𑀧𑀭𑀺𑀘𑀬𑀯𑀲𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀦𑁆𑀢𑀺, ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀸 𑀧𑀦 𑀅𑀧𑁆𑀧𑀓𑀢𑀭𑀸. 𑀓𑀢𑁆𑀣𑀘𑀺 𑀳𑀺 𑀧𑀤𑁂𑀲𑁂 𑀓𑀼𑀫𑀸𑀭𑀓𑁂 𑀅𑀓𑁆𑀔𑀭𑀲𑀫𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀸 𑀕𑀭𑀽 𑀅𑀓𑁆𑀔𑀭𑀸𑀦𑀫𑀸𑀤𑀺𑀫𑁆𑀳𑀺 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀧𑀦 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀸𑀴𑀺𑀦𑀬𑁂 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁂 𑀘 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀞𑀧𑁂𑀢𑁆𑀯𑀸 𑀕𑀢𑁆𑀬𑀢𑁆𑀣𑀓𑀫𑁆𑀫𑀸𑀤𑀺𑀝𑁆𑀞𑀸𑀦𑀘𑀢𑀼𑀓𑁆𑀓𑀁, 𑀧𑀪𑁂𑀤𑀢𑁄 𑀲𑀢𑁆𑀢𑀝𑁆𑀞𑀸𑀦𑀁 𑀯𑀸 𑀤𑀸𑀦𑀭𑁄𑀘𑀦𑀥𑀸𑀭𑀡𑀦𑀫𑁄𑀬𑁄𑀕𑀸𑀤𑀺𑀪𑁂𑀤𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀓𑁂𑀳𑀺𑀘𑀺 𑀅𑀪𑀺𑀲𑀗𑁆𑀔𑀢𑀸𑀦𑀺 ‘‘𑀦𑀫𑁄 𑀩𑀼𑀤𑁆𑀥𑀸𑀬, 𑀩𑀼𑀤𑁆𑀥𑀸𑀬 𑀤𑀸𑀦𑀁 𑀤𑁂𑀦𑁆𑀢𑀻’’𑀢𑀺 𑀧𑀤𑀸𑀦𑀺 𑀧𑀸𑀴𑀺𑀁 𑀧𑀢𑁆𑀯𑀸 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲, 𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀻’’𑀢𑀺 𑀅𑀜𑁆𑀜𑀭𑀽𑀧𑀸𑀦𑀺 𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀧𑀦 𑀧𑀸𑀴𑀺𑀦𑀬𑀅𑀝𑁆𑀞𑀓𑀣𑀸𑀦𑀬𑀸𑀦𑀼𑀭𑀽𑀧𑁂𑀦 𑀆𑀬𑀸𑀤𑁂𑀲𑀲𑁆𑀲 𑀧𑀬𑁄𑀕𑀭𑀘𑀦𑀸 𑁋 ‘‘𑀩𑀼𑀤𑁆𑀥𑀸𑀬 𑀲𑀭𑀡𑀁 𑀕𑀘𑁆𑀙𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀢𑀻’’𑀢𑀺 𑀯𑀸, ‘‘𑀩𑀼𑀤𑁆𑀥𑀸𑀬 𑀦𑀕𑀭𑀁 𑀦𑁂𑀦𑁆𑀢𑀺, 𑀩𑀼𑀤𑁆𑀥𑀁 𑀦𑀕𑀭𑀁 𑀦𑁂𑀦𑁆𑀢𑀻’’𑀢𑀺 𑀯𑀸, ‘‘𑀩𑀼𑀤𑁆𑀥𑀸𑀬 𑀲𑀓𑁆𑀓𑀢𑁄 𑀥𑀫𑁆𑀫𑁄, 𑀩𑀼𑀤𑁆𑀥𑁂𑀦 𑀲𑀓𑁆𑀓𑀢𑁄 𑀥𑀫𑁆𑀫𑁄’’𑀢𑀺 𑀯𑀸, ‘‘𑀩𑀼𑀤𑁆𑀥𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀢𑀺, 𑀩𑀼𑀤𑁆𑀥𑀲𑁆𑀲 𑀅𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀢𑀻’’𑀢𑀺 𑀯𑀸, ‘‘𑀩𑀼𑀤𑁆𑀥𑀸𑀬 𑀅𑀧𑁂𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀩𑀼𑀤𑁆𑀥𑀲𑁆𑀫𑀸 𑀅𑀧𑁂𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸’’𑀢𑀺 𑀯𑀸 ¶ , ‘‘𑀩𑀼𑀤𑁆𑀥𑀸𑀬 𑀥𑀫𑁆𑀫𑀢𑀸, 𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀢𑀸’’𑀢𑀺 𑀯𑀸, ‘‘𑀩𑀼𑀤𑁆𑀥𑀸𑀬 𑀧𑀲𑀦𑁆𑀦𑁄, 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄’’𑀢𑀺 𑀯𑀸 𑀇𑀢𑀺 𑀧𑀪𑁂𑀤𑀢𑁄 𑀇𑀫𑀁 𑀲𑀢𑁆𑀢𑀞𑀸𑀦𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑁋

𑀧𑀸𑀞𑁂 𑀫𑀳𑀸𑀦𑀫𑀓𑁆𑀓𑀸𑀭-𑀲𑀗𑁆𑀔𑀸𑀢𑁂 𑀲𑀸𑀥𑀼𑀦𑀦𑁆𑀤𑀦𑁂;

𑀲𑀫𑁆𑀧𑀤𑀸𑀦𑁂 𑀦𑀫𑁄𑀬𑁄𑀕𑁂, 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺.

𑀏𑀢𑁆𑀣 𑀫𑀳𑀸𑀦𑀫𑀓𑁆𑀓𑀸𑀭𑀧𑀸𑀞𑁄 𑀦𑀸𑀫 ‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀧𑀸𑀞𑁄. 𑀅𑀢𑁆𑀭𑀸𑀧𑀺 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀯𑀫𑁆𑀫𑀺𑀓𑀲𑀼𑀢𑁆𑀢𑁂𑀧𑀺 ‘‘𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸’’𑀢𑀺 𑀏𑀯𑀁 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂𑀧𑀺 ‘‘𑀲𑁄𑀢𑁆𑀣𑀺 𑀪𑀤𑀦𑁆𑀢𑁂 𑀳𑁄𑀢𑀼 𑀭𑀜𑁆𑀜𑁄, 𑀲𑁄𑀢𑁆𑀣𑀺 𑀚𑀦𑀧𑀤𑀲𑁆𑀲’’. 𑀏𑀯𑀁 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺.

‘‘𑀲𑀼𑀧𑁆𑀧𑀩𑀼𑀤𑁆𑀥’’𑀦𑁆𑀢𑀺 𑀧𑀸𑀞𑀲𑁆𑀲, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀧𑀺;

𑀲𑀫𑁆𑀧𑀤𑀸𑀦𑁂 𑀦𑀫𑁄𑀬𑁄𑀕𑁂, 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺

‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀩𑀼𑀤𑁆𑀥𑀕𑀢𑀸 𑀲𑀢𑀻’’𑀢𑀺

𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀕𑀼𑀴𑀁 𑀔𑀺𑀧𑀫𑀸𑀦𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 ‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’𑀢𑀺 𑀯𑀢𑁆𑀯𑀸 𑀕𑀼𑀴𑀁 𑀔𑀺𑀧𑀢𑀻’’𑀢𑀺 𑀆𑀬𑀸𑀤𑁂𑀲𑀯𑀚𑁆𑀚𑀺𑀢𑁄 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀲𑀕𑀸𑀣𑀸𑀯𑀕𑁆𑀕𑀯𑀡𑁆𑀡𑀦𑀸𑀬𑀫𑁆𑀧𑀺 𑀥𑀦𑀜𑁆𑀚𑀸𑀦𑀻𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀢𑁆𑀯𑀁 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀔𑀺𑀧𑀺𑀢𑁆𑀯𑀸𑀧𑀺 𑀓𑀸𑀲𑁂𑀢𑁆𑀯𑀸𑀧𑀺 ‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’𑀢𑀺 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀦𑀫𑀓𑁆𑀓𑀸𑀭𑀁 𑀓𑀭𑁄𑀲𑀻’’𑀢𑀺 𑀆𑀬𑀸𑀤𑁂𑀲𑀯𑀚𑁆𑀚𑀺𑀢𑁄 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀣𑀸 𑀢𑀢𑁆𑀣 𑀢𑀢𑁆𑀣 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺. 𑀢𑀲𑁆𑀲 ¶ 𑀧𑀼𑀭𑀺𑀲𑀲𑁆𑀲 𑀪𑀢𑁆𑀢𑀁 𑀦 𑀭𑀼𑀘𑁆𑀘𑀢𑀺. 𑀲𑀫𑀡𑀲𑁆𑀲 𑀭𑁄𑀘𑀢𑁂 𑀲𑀘𑁆𑀘𑀁, 𑀩𑀼𑀤𑁆𑀥𑀲𑁆𑀲 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀲𑀺𑀮𑀸𑀖𑀢𑁂’’𑀢𑀺𑀆𑀤𑀺𑀦𑀸 𑀆𑀬𑀸𑀤𑁂𑀲𑀯𑀺𑀯𑀚𑁆𑀚𑀺𑀢𑁄 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀏𑀯𑀁 𑀤𑀸𑀦𑀭𑁄𑀘𑀦𑀸𑀤𑀻𑀲𑀼 𑀩𑀳𑀽𑀲𑀼 𑀲𑀫𑁆𑀧𑀤𑀸𑀦𑀯𑀺𑀲𑀬𑁂𑀲𑀼 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀁 𑀭𑀽𑀧𑀁 𑀦 𑀤𑀺𑀲𑁆𑀲𑀢𑀺.

𑀕𑀢𑁆𑀬𑀢𑁆𑀣𑀓𑀫𑁆𑀫𑀸𑀤𑀻𑀲𑀼 𑀧𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀻’’𑀢𑀺 𑀘𑁂𑀢𑁆𑀣 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀳𑀺 ‘‘𑀫𑀽𑀮𑀁 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀅𑀧𑁆𑀧𑁄 𑀲𑀕𑁆𑀕𑀁 𑀕𑀘𑁆𑀙𑀢𑀻’’𑀢𑀺 𑀘 𑀅𑀢𑁆𑀣𑁄. ‘‘𑀧𑀝𑀺𑀓𑀲𑁆𑀲𑁂𑀬𑁆𑀬𑀸’’𑀢𑀺 𑀘𑁂𑀢𑁆𑀣 𑀓𑀲 𑀕𑀢𑀺𑀬𑀦𑁆𑀢𑀺 𑀥𑀸𑀢𑀼𑀲𑁆𑀲 𑀧𑀢𑀺𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸 ‘‘𑀆𑀓𑀟𑁆𑀠𑁂𑀬𑁆𑀬𑀸’’𑀢𑀺 𑀅𑀢𑁆𑀣𑁄 𑀪𑀯𑀢𑀺. ‘‘𑀅𑀬𑀁 𑀧𑀼𑀭𑀺𑀲𑁄 𑀫𑀫 𑀅𑀢𑁆𑀣𑀓𑀸𑀫𑁄, 𑀬𑁄 𑀫𑀁 𑀕𑀳𑁂𑀢𑁆𑀯𑀸𑀦 𑀤𑀓𑀸𑀬 𑀦𑁂𑀢𑀻’’𑀢𑀺 𑀏𑀢𑁆𑀣 𑀦𑀬𑀦𑀢𑁆𑀣𑀓𑀫𑁆𑀫𑀦𑀺 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀳𑀺 𑀫𑀁 𑀉𑀤𑀓𑀁 𑀦𑁂𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀓𑀲𑁄𑀩𑁆𑀪𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫 𑀯𑀘𑀦𑀸𑀬𑀸’’𑀢𑀺 𑀏𑀢𑁆𑀣 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂 𑀤𑀺𑀲𑁆𑀲𑀢𑀺. 𑀫𑀫 𑀯𑀘𑀦𑀢𑁄 𑀯𑀺𑀭𑀫𑀣𑀸𑀢𑀺 𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑁄. ‘‘𑀫𑀳𑀸𑀕𑀡𑀸𑀬 𑀪𑀢𑁆𑀢𑀸 𑀫𑁂’’𑀢𑀺 𑀏𑀢𑁆𑀣𑀸𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂 𑀤𑀺𑀲𑁆𑀲𑀢𑀺. 𑀫𑀫 𑀫𑀳𑀢𑁄 𑀳𑀁𑀲𑀕𑀡𑀲𑁆𑀲 𑀪𑀢𑁆𑀢𑀸𑀢𑀺 𑀳𑀺 𑀲𑀸𑀫𑀺𑀯𑀘𑀦𑀯𑀲𑁂𑀦 𑀅𑀢𑁆𑀣𑁄. 𑀫𑀫 𑀳𑀁𑀲𑀭𑀸𑀚𑀸𑀢𑀺 𑀘𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀲𑀓𑁆𑀓𑀢𑀸 𑀘𑀲𑁆𑀫 𑀥𑀦𑀜𑁆𑀘𑀬𑀸𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂 𑀤𑀺𑀲𑁆𑀲𑀢𑀺. 𑀫𑀬𑀁 𑀥𑀦𑀜𑁆𑀘𑀬𑀲𑁆𑀲 𑀭𑀜𑁆𑀜𑁄 𑀅𑀲𑀓𑁆𑀓𑀢𑀸 𑀘 𑀪𑀯𑀸𑀫𑀸𑀢𑀺 𑀳𑀺 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀣𑀸 𑀳𑀺 ‘‘𑀥𑀦𑀜𑁆𑀘𑀬𑀲𑁆𑀲𑀸’’𑀢𑀺 𑀯𑀸 ‘‘𑀥𑀦𑀜𑁆𑀘𑀬𑁂𑀦𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀏𑀯𑀁 𑀅𑀯𑀢𑁆𑀯𑀸 ‘‘𑀥𑀦𑀜𑁆𑀘𑀬𑀸𑀬𑀸’’𑀢𑀺 𑀲𑀫𑁆𑀧𑀤𑀸𑀦𑀯𑀘𑀦𑀁 𑀤𑀸𑀦𑀓𑁆𑀭𑀺𑀬𑀸𑀤𑀺𑀓𑀲𑁆𑀲 𑀲𑀫𑁆𑀧𑀤𑀸𑀦𑀯𑀺𑀲𑀬𑀲𑁆𑀲 𑀅𑀪𑀸𑀯𑀢𑁄 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀬𑁂𑀯 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀥𑀦𑀜𑁆𑀘𑀬𑀭𑀸𑀚𑁂𑀦 𑀫𑀬𑀁 𑀅𑀲𑀓𑁆𑀓𑀢𑀸 𑀘 𑀪𑀯𑀸𑀫𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀫𑁆𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀝𑁆𑀞𑀸𑀦𑀁 𑀫𑀕𑁆𑀕𑀺𑀢𑀩𑁆𑀩𑀁.

‘‘𑀯𑀺𑀭𑀸𑀕𑀸𑀬 ¶ 𑀉𑀧𑀲𑀫𑀸𑀬 𑀦𑀺𑀭𑁄𑀥𑀸𑀬𑀸’’𑀢𑀺𑀆𑀤𑀻𑀦𑀺 𑀧𑀦 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀲𑀤𑁆𑀤𑀭𑀽𑀧𑀸𑀦𑀺 𑀢𑀤𑀢𑁆𑀣𑁂 𑀧𑀯𑀢𑁆𑀢𑀦𑁆𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀧𑀺 𑀳𑀺 𑀥𑀫𑁆𑀫𑀯𑀺𑀦𑀬𑀲𑀤𑁆𑀤𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀸 ‘‘𑀥𑀫𑁆𑀫𑀸𑀦𑀁 𑀯𑀺𑀦𑀬𑀸𑀬. 𑀅𑀦𑀯𑀚𑁆𑀚𑀥𑀫𑁆𑀫𑀢𑁆𑀣𑀜𑁆𑀳𑁂𑀲 𑀯𑀺𑀦𑀬𑁄, 𑀦 𑀪𑀯𑀪𑁄𑀕𑀸𑀤𑀺𑀅𑀢𑁆𑀣’’𑀦𑁆𑀢𑀺 𑀢𑀤𑀢𑁆𑀣𑀯𑀲𑁂𑀦𑁂𑀯 𑀆𑀬𑀸𑀤𑁂𑀲𑀲𑀳𑀺𑀢𑀁 𑀲𑀤𑁆𑀤𑀭𑀽𑀧𑀁 𑀧𑀬𑀼𑀜𑁆𑀚𑀺𑀁𑀲𑀼, 𑀏𑀯𑀁 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀦𑀬𑀦𑀢𑁆𑀣𑀓𑀫𑁆𑀫𑀦𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂 𑀢𑀤𑀢𑁆𑀣𑁂 𑀘𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼𑀬𑁂𑀯 𑀞𑀸𑀦𑁂𑀲𑀼 𑀤𑀺𑀲𑁆𑀲𑀦𑁆𑀢𑀺, 𑀦 𑀧𑀦 𑀤𑀸𑀦𑀭𑁄𑀘𑀦𑀸𑀤𑀺𑀪𑁂𑀤𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀅𑀢𑁆𑀣𑀸𑀬𑀸𑀢𑀺 𑀲𑀫𑁆𑀧𑀤𑀸𑀦𑀯𑀘𑀦’’𑀦𑁆𑀢𑀺 𑀆𑀬𑀸𑀤𑁂𑀲𑀲𑀳𑀺𑀢𑀁 𑀲𑀤𑁆𑀤𑀭𑀽𑀧𑀁 𑀯𑀼𑀢𑁆𑀢𑀁, 𑀧𑀼𑀭𑀺𑀲𑀲𑀤𑁆𑀤𑀸𑀤𑀺𑀯𑀲𑁂𑀦 𑀧𑀦 𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺 𑀢𑀸𑀤𑀺𑀲𑀸𑀦𑀁 𑀲𑀤𑁆𑀤𑀭𑀽𑀧𑀸𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂𑀧𑀺 𑀳𑀺 ‘‘𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀢𑀽’’𑀢𑀺 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀺𑀬𑀁 ‘‘𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀼𑀭𑀺𑀲𑀸𑀬𑀸’’𑀢𑀺 𑀯𑀸 ‘‘𑀲𑀫𑀡𑀸𑀬𑀸’’𑀢𑀺 𑀯𑀸 ‘‘𑀩𑁆𑀭𑀸𑀳𑁆𑀫𑀡𑀸𑀬𑀸’’𑀢𑀺 𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸 𑁋 𑀦𑀦𑀼 𑀪𑁄 𑀢𑀲𑁆𑀲𑁂𑀯 𑀯𑀼𑀢𑁆𑀢𑀺𑀬𑀁 ‘‘𑀘𑀢𑀼𑀢𑁆𑀣𑀻𑀢𑀺 𑀓𑀺𑀫𑀢𑁆𑀣𑀁 𑀧𑀼𑀭𑀺𑀲𑀲𑁆𑀲 𑀫𑀼𑀔𑀁. 𑀏𑀓𑀯𑀘𑀦𑀲𑁆𑀲𑀸𑀢𑀺 𑀓𑀺𑀫𑀢𑁆𑀣𑀁 𑀧𑀼𑀭𑀺𑀲𑀸𑀦𑀁 𑀤𑀤𑀸𑀢𑀺. 𑀯𑀸𑀢𑀺 𑀓𑀺𑀫𑀢𑁆𑀣𑀁 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀭𑀺𑀲𑀸𑀬 𑀲𑀫𑀡𑀸𑀬 𑀩𑁆𑀭𑀸𑀳𑁆𑀫𑀡𑀸𑀬𑀸’’𑀢𑀺𑀆𑀤𑀻𑀦𑀺 𑀧𑀤𑀭𑀽𑀧𑀸𑀦𑀺 𑀦𑀬𑀢𑁄 𑀤𑀲𑁆𑀲𑀺𑀢𑀸𑀦𑀺, 𑀓𑁂𑀯𑀮𑀁 𑀧𑀦 𑀫𑀼𑀔𑀲𑀤𑁆𑀤𑀬𑁄𑀕𑀢𑁄 𑀩𑀳𑀼𑀯𑀘𑀦𑀪𑀸𑀯𑀢𑁄 𑀯𑀺𑀓𑀧𑁆𑀧𑀦𑀢𑁄 𑀘 ‘‘𑀧𑀼𑀭𑀺𑀲𑀸𑀬𑀸’’𑀢𑀺𑀆𑀤𑀻𑀦𑀺 𑀦 𑀲𑀺𑀚𑁆𑀛𑀦𑁆𑀢𑀺, 𑀫𑀼𑀔𑀲𑀤𑁆𑀤𑀬𑁄𑀕𑀸𑀤𑀺𑀯𑀺𑀭𑀳𑀺𑀢𑁂 𑀧𑀦 𑀞𑀸𑀦𑁂 𑀅𑀯𑀲𑁆𑀲𑀁 𑀲𑀺𑀚𑁆𑀛𑀦𑁆𑀢𑀻𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 ‘‘𑀘𑀢𑀼𑀢𑁆𑀣𑀻𑀢𑀺 𑀓𑀺𑀫𑀢𑁆𑀣𑀁 𑀧𑀼𑀭𑀺𑀲𑀲𑁆𑀲 𑀫𑀼𑀔’’𑀦𑁆𑀢𑀺 𑀯𑀤𑀦𑁆𑀢𑁄 ‘‘𑀲𑀘𑁂 𑀆𑀬𑀸𑀤𑁂𑀲𑁄 𑀪𑀯𑁂𑀬𑁆𑀬 ¶ , 𑀘𑀢𑀼𑀢𑁆𑀣𑀺𑀬𑀸 𑀏𑀯 𑀪𑀯𑀢𑀺, 𑀦 𑀙𑀝𑁆𑀞𑀺𑀬𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀔’’𑀦𑁆𑀢𑀺 𑀧𑀤𑀁 𑀤𑀲𑁆𑀲𑁂𑀲𑀺, 𑀦 𑀘 𑀢𑁂𑀦 ‘‘𑀫𑀼𑀔𑀲𑀤𑁆𑀤𑀝𑁆𑀞𑀸𑀦𑁂 𑀤𑁂𑀢𑀻𑀢𑀺𑀆𑀤𑀺𑀓𑁂 𑀲𑀫𑁆𑀧𑀤𑀸𑀦𑀯𑀺𑀲𑀬𑀪𑀽𑀢𑁂 𑀓𑁆𑀭𑀺𑀬𑀸𑀧𑀤𑁂 𑀞𑀺𑀢𑁂 𑀆𑀬𑀸𑀤𑁂𑀲𑁄 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀯𑀘𑀦𑀲𑁆𑀲𑀸𑀢𑀺 𑀓𑀺𑀫𑀢𑁆𑀣𑀁 𑀧𑀼𑀭𑀺𑀲𑀸𑀦𑀁 𑀤𑀤𑀸𑀢𑀻’’𑀢𑀺 𑀯𑀤𑀦𑁆𑀢𑁄𑀧𑀺 ‘‘𑀏𑀓𑀯𑀘𑀦𑀲𑁆𑀲𑁂𑀯 𑀆𑀬𑀸𑀤𑁂𑀲𑁄 𑀳𑁄𑀢𑀺, 𑀦 𑀩𑀳𑀼𑀯𑀘𑀦𑀲𑁆𑀲𑀸’’𑀢𑀺 𑀤𑀲𑁆𑀲𑁂𑀢𑀺. ‘‘𑀤𑀤𑀸𑀢𑀻’’𑀢𑀺 𑀇𑀤𑀁 𑀧𑀤𑀁 ‘‘𑀧𑀼𑀭𑀺𑀲𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀲𑀫𑁆𑀧𑀤𑀸𑀦𑀯𑀘𑀦𑀢𑁆𑀢𑀁 𑀜𑀸𑀧𑁂𑀢𑀼𑀁 𑀅𑀯𑁄𑀘, 𑀦 𑀘 ‘‘𑀤𑁂𑀢𑀻𑀢𑀺𑀆𑀤𑀺𑀓𑁂 𑀲𑀫𑁆𑀧𑀤𑀸𑀦𑀯𑀺𑀲𑀬𑀪𑀽𑀢𑁂 𑀓𑁆𑀭𑀺𑀬𑀸𑀧𑀤𑁂 𑀲𑀢𑀺 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑁄 𑀳𑁄𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀺. ‘‘𑀯𑀸𑀢𑀺 𑀓𑀺𑀫𑀢𑁆𑀣𑀁 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸’’𑀢𑀺 𑀘 𑀯𑀤𑀦𑁆𑀢𑁄𑀧𑀺 ‘‘𑀲𑀫𑁆𑀧𑀤𑀸𑀦𑁂𑀬𑁂𑀯 𑀯𑀺𑀓𑀧𑁆𑀧𑁂𑀦 𑀆𑀬𑀸𑀤𑁂𑀲𑁄 𑀳𑁄𑀢𑀻’’𑀢𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀤𑀸𑀦𑀸𑀤𑀺𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀆𑀬𑀸𑀤𑁂𑀲𑀯𑀺𑀥𑀸𑀦𑀁 𑀜𑀸𑀧𑁂𑀢𑀺.

𑀬𑀤𑀺 𑀧𑀦 𑀤𑀸𑀦𑀸𑀤𑀺𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀆𑀬𑀸𑀤𑁂𑀲𑀯𑀺𑀥𑀸𑀦𑀁 𑀲𑀺𑀬𑀸, 𑀯𑀼𑀢𑁆𑀢𑀺𑀓𑀸𑀭𑀓𑁂𑀦 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀺𑀬𑀁 𑀫𑀽𑀮𑁄𑀤𑀸𑀳𑀭𑀡𑁂𑀬𑁂𑀯 ‘‘𑀅𑀢𑁆𑀣𑀸𑀬 𑀳𑀺𑀢𑀸𑀬𑀸’’𑀢𑀺 𑀢𑀤𑀢𑁆𑀣𑀧𑀬𑁄𑀕𑀸𑀦𑀺 𑀯𑀺𑀬 ‘‘𑀧𑀼𑀭𑀺𑀲𑀸𑀬 𑀤𑀻𑀬𑀢𑁂’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀩𑀼𑀤𑁆𑀥𑀯𑀘𑀦𑁂 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀘 𑀢𑀸𑀤𑀺𑀲𑀲𑁆𑀲 𑀧𑀬𑁄𑀕𑀲𑁆𑀲 𑀅𑀪𑀸𑀯𑀸. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀳𑀺 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀲𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 ‘‘𑀧𑀼𑀭𑀺𑀲𑀲𑁆𑀲 𑀤𑀻𑀬𑀢𑁂’’𑀢𑀺 𑀆𑀬𑀸𑀤𑁂𑀲𑀭𑀳𑀺𑀢𑀸𑀦𑀺𑀬𑁂𑀯 𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑀺, ‘‘𑀅𑀢𑁆𑀣𑀸𑀬𑀸𑀢𑀺 𑀲𑀫𑁆𑀧𑀤𑀸𑀦𑀯𑀘𑀦’’𑀦𑁆𑀢𑀺 𑀪𑀡𑀦𑁆𑀢𑁄𑀧𑀺 𑀘 𑀣𑁂𑀭𑁄 𑀤𑀸𑀦𑀸𑀤𑀺𑀓𑁆𑀭𑀺𑀬𑀸𑀧𑁂𑀓𑁆𑀔𑀁 𑀅𑀓𑀢𑁆𑀯𑀸 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀁 𑀭𑀽𑀧𑀫𑁂𑀯 𑀦𑀺𑀤𑁆𑀤𑀺𑀲𑀺. 𑀢𑁂𑀦 𑀲𑁄 𑀧𑀬𑁄𑀕𑁄 𑀢𑀤𑀢𑁆𑀣𑀧𑁆𑀧𑀬𑁄𑀕𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀚𑀸𑀦𑀺𑀢𑀩𑁆𑀩𑀁 ‘‘𑀤𑀸𑀦𑀸𑀤𑀺𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀆𑀬𑀸𑀤𑁂𑀲𑀯𑀺𑀥𑀸𑀦𑀁 𑀦 𑀓𑀢’’𑀦𑁆𑀢𑀺. 𑀬𑀚𑁆𑀚𑁂𑀯𑀁 ‘‘𑀅𑀢𑁆𑀣𑀸𑀬 𑀳𑀺𑀢𑀸𑀬𑀸’’𑀢𑀺𑀆𑀤𑀻𑀦𑀺𑀬𑁂𑀯 𑀢𑀤𑀢𑁆𑀣𑀧𑁆𑀧𑀬𑁄𑀕𑀸𑀦𑀺 ‘‘𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀢𑀽’’𑀢𑀺 𑀮𑀓𑁆𑀔𑀡𑀲𑁆𑀲 𑀯𑀺𑀲𑀬𑀸 𑀪𑀯𑁂𑀬𑁆𑀬𑀼𑀁, 𑀦𑀸𑀜𑁆𑀜𑀸𑀦𑀻𑀢𑀺? 𑀢𑀦𑁆𑀦, 𑀅𑀜𑁆𑀜𑀸𑀦𑀺𑀧𑀺 𑀯𑀺𑀲𑀬𑀸𑀬𑁂𑀯 𑀢𑀲𑁆𑀲. 𑀓𑀢𑀫𑀸𑀦𑀺? ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀅𑀧𑁆𑀧𑁄 ¶ 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺, 𑀤𑀓𑀸𑀬 𑀦𑁂𑀢𑀺, 𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫𑀯𑀘𑀦𑀸𑀬, 𑀕𑀡𑀸𑀬 𑀪𑀢𑁆𑀢𑀸’’𑀢𑀺𑀆𑀤𑀻𑀦𑀺. ‘‘𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸’’𑀢𑀺𑀆𑀤𑀻𑀦𑀺 𑀧𑀦 𑀯𑀸𑀥𑀺𑀓𑀸𑀭𑀢𑁆𑀢𑀸 𑀅𑀯𑀺𑀲𑀬𑀸𑀯𑀸𑀢𑀺.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀯𑀼𑀢𑁆𑀢𑀺𑀓𑀸𑀭𑀓𑁂𑀦 𑀫𑀽𑀮𑁄𑀤𑀸𑀳𑀭𑀡𑁂𑀲𑀼 ‘‘𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸’’𑀢𑀺𑀆𑀤𑀻𑀦𑀺𑀧𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀓𑀺𑀫𑀼𑀤𑀸𑀳𑀭𑀡𑁂 𑀧𑀦 ‘‘𑀯𑀸𑀢𑀺 𑀓𑀺𑀫𑀢𑁆𑀣𑀁 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀅𑀯𑀘𑀦𑁂 𑀓𑀸𑀭𑀡𑀫𑀢𑁆𑀣𑀺, 𑀢𑀁 𑀲𑀼𑀡𑀸𑀣 𑁋 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀳𑀺 ‘‘𑀫𑀽𑀮𑀸𑀬, 𑀲𑀕𑁆𑀕𑀸𑀬𑀸’’𑀢𑀺 𑀧𑀤𑀸𑀦𑀺 𑀲𑀼𑀤𑁆𑀥𑀲𑀫𑁆𑀧𑀤𑀸𑀦𑀯𑀘𑀦𑀸𑀦𑀺 𑀦 𑀳𑁄𑀦𑁆𑀢𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀫𑀽𑀮𑁄𑀤𑀸𑀳𑀭𑀡𑁂𑀲𑀼 𑀦 𑀯𑀼𑀢𑁆𑀢𑀸𑀦𑀺. 𑀢𑀣𑀸 ‘‘𑀤𑀓𑀸𑀬 𑀦𑁂𑀢𑀻’’𑀢𑀺 𑀏𑀢𑁆𑀣 ‘‘𑀤𑀓𑀸𑀬𑀸’’𑀢𑀺 𑀧𑀤𑀁 𑀦𑀬𑀦𑀢𑁆𑀣𑀓𑀫𑁆𑀫𑀦𑀺 𑀯𑀢𑁆𑀢𑀦𑀢𑁄 𑀲𑀼𑀤𑁆𑀥𑀲𑀫𑁆𑀧𑀤𑀸𑀦𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀼𑀢𑁆𑀢𑀁. ‘‘𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫 𑀯𑀘𑀦𑀸𑀬𑀸’’𑀢𑀺 𑀏𑀢𑁆𑀣 𑀧𑀦 ‘‘𑀯𑀘𑀦𑀸𑀬𑀸’’𑀢𑀺 𑀧𑀤𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀢𑁆𑀣𑁂 𑀯𑀢𑁆𑀢𑀦𑀢𑁄, ‘‘𑀕𑀡𑀸𑀬 𑀪𑀢𑁆𑀢𑀸’’𑀢𑀺 𑀏𑀢𑁆𑀣 ‘‘𑀕𑀡𑀸𑀬𑀸’’𑀢𑀺 𑀧𑀤𑀁 𑀲𑀸𑀫𑀺𑀯𑀘𑀦𑀢𑁆𑀣𑁂 𑀯𑀢𑁆𑀢𑀦𑀢𑁄, ‘‘𑀅𑀲𑀓𑁆𑀓𑀢𑀸 𑀘𑀲𑁆𑀫 𑀥𑀦𑀜𑁆𑀘𑀬𑀸𑀬𑀸’’𑀢𑀺 𑀏𑀢𑁆𑀣 ‘‘𑀥𑀦𑀜𑁆𑀘𑀬𑀸𑀬𑀸’’𑀢𑀺 𑀧𑀤𑀁 𑀓𑀢𑁆𑀢𑀼𑀯𑀲𑁂𑀦 𑀲𑀸𑀫𑀺𑀅𑀢𑁆𑀣𑁂 𑀯𑀢𑁆𑀢𑀦𑀢𑁄 𑀲𑀼𑀤𑁆𑀥𑀲𑀫𑁆𑀧𑀤𑀸𑀦𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀼𑀢𑁆𑀢𑀁. 𑀓𑀺𑀫𑀼𑀤𑀸𑀳𑀭𑀡𑁂𑀧𑀺 ‘‘𑀲𑀕𑁆𑀕𑀲𑁆𑀲𑀸’’𑀢𑀺 𑀧𑀤𑀁 𑀕𑀫𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀯𑀢𑁆𑀢𑀦𑀢𑁄 𑀲𑀼𑀤𑁆𑀥𑀲𑀫𑁆𑀧𑀤𑀸𑀦𑀯𑀘𑀦𑀁 𑀦 𑀳𑁄𑀢𑀻𑀢𑀺 ‘‘𑀯𑀸𑀢𑀺 𑀓𑀺𑀫𑀢𑁆𑀣𑀁 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀳𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀩𑀼𑀤𑁆𑀥𑀯𑀘𑀦𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀜𑁆𑀘 𑀧𑀢𑁆𑀯𑀸 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀸𑀤𑀻𑀲𑀼 𑀘𑀢𑀽𑀲𑀼𑀬𑁂𑀯 𑀞𑀸𑀦𑁂𑀲𑀼 𑀤𑀺𑀲𑁆𑀲𑀦𑁆𑀢𑀺, 𑀦 𑀧𑀦 𑀤𑀸𑀦𑀭𑁄𑀘𑀦𑀸𑀤𑀺𑀪𑁂𑀤𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀘 𑀪𑁄 ‘‘𑀘𑀦𑁆𑀤𑀦𑀲𑀸𑀭𑀁 𑀚𑁂𑀝𑁆𑀞𑀺𑀓𑀸𑀬 𑀅𑀤𑀸𑀲𑀺 𑀲𑀼𑀯𑀡𑁆𑀡𑀫𑀸𑀮𑀁 𑀓𑀦𑀺𑀝𑁆𑀞𑀸𑀬𑀸’’𑀢𑀺 𑀤𑀸𑀦𑀧𑁆𑀧𑀬𑁄𑀕𑁂 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀭𑀽𑀧𑀤𑀲𑁆𑀲𑀦𑀢𑁄 ‘‘𑀭𑀸𑀚𑀓𑀜𑁆𑀜𑀸𑀬 𑀤𑀻𑀬𑀢𑁂, 𑀭𑀸𑀚𑀓𑀜𑁆𑀜𑀸𑀬 ¶ 𑀭𑀼𑀘𑁆𑀘𑀢𑀺 𑀅𑀮𑀗𑁆𑀓𑀸𑀭𑁄, 𑀭𑀸𑀚𑀓𑀜𑁆𑀜𑀸𑀬 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀭𑀸𑀚𑀓𑀜𑁆𑀜𑀸𑀬 𑀦𑀫𑁄 𑀓𑀭𑁄𑀳𑀺, 𑀭𑀸𑀚𑀓𑀜𑁆𑀜𑀸𑀬 𑀲𑁄𑀢𑁆𑀣𑀺 𑀪𑀯𑀢𑀼, 𑀭𑀸𑀚𑀓𑀜𑁆𑀜𑀸𑀬 𑀲𑀺𑀮𑀸𑀖𑀢𑁂’’𑀢𑀺𑀆𑀤𑀻𑀳𑀺𑀧𑀺 𑀧𑀬𑁄𑀕𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀜𑁆𑀘 𑀧𑀢𑁆𑀯𑀸 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀸𑀤𑀻𑀲𑀼 𑀘𑀢𑀽𑀲𑀼𑀬𑁂𑀯 𑀞𑀸𑀦𑁂𑀲𑀼 𑀤𑀺𑀲𑁆𑀲𑀦𑁆𑀢𑀺, 𑀦 𑀧𑀦 𑀤𑀸𑀦𑀭𑁄𑀘𑀦𑀸𑀤𑀺𑀪𑁂𑀤𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂’’𑀢𑀺 𑀯𑀤𑀣𑀸𑀢𑀺? 𑀉𑀧𑁆𑀧𑀣𑀫𑀯𑀢𑀺𑀡𑁆𑀡𑁄 𑀪𑀯𑀁, 𑀦 𑀳𑀺 𑀪𑀯𑀁 𑀅𑀫𑁆𑀳𑀸𑀓𑀁 𑀯𑀘𑀦𑀢𑁆𑀣𑀁 𑀚𑀸𑀦𑀸𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀫𑁆𑀳𑀸𑀓𑀁 𑀯𑀘𑀦𑀢𑁆𑀣𑁄 𑁋 𑀲𑀩𑁆𑀩𑀸𑀦𑀺𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀏𑀓𑀯𑀘𑀦𑀯𑀲𑁂𑀦 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀧𑀜𑁆𑀘𑀫𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀞𑀸𑀦𑁂𑀲𑀼 𑀲𑀫𑀲𑀫𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀸𑀦𑀺 𑀅𑀲𑀫𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀲𑀼 𑀧𑀼𑀭𑀺𑀲𑀸𑀤𑀺 𑀘𑀺𑀢𑁆𑀢𑀸𑀤𑀺𑀲𑀤𑁆𑀤𑀸𑀦𑀁 𑀅𑀓𑀸𑀭𑀦𑁆𑀢𑀧𑀓𑀢𑀺𑀪𑀸𑀯𑁂 𑀞𑀺𑀢𑀸𑀦𑀁 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀤𑀻𑀲𑀼 𑀤𑀸𑀦𑀭𑁄𑀘𑀦𑀸𑀤𑀺𑀪𑁂𑀤𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂 𑀦 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀦𑁂𑀯 𑀳𑀺 ‘‘𑀫𑀽𑀮𑀸𑀬, 𑀲𑀕𑁆𑀕𑀸𑀬, 𑀤𑀓𑀸𑀬, 𑀯𑀘𑀦𑀸𑀬, 𑀕𑀡𑀸𑀬𑀸’’𑀢𑀺𑀆𑀤𑀻𑀦𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀸𑀤𑀻𑀲𑀼 𑀢𑀻𑀲𑀼 ‘‘𑀅𑀪𑀺𑀜𑁆𑀜𑀸𑀬, 𑀲𑀫𑁆𑀩𑁄𑀥𑀸𑀬, 𑀦𑀺𑀩𑁆𑀩𑀸𑀦𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀧𑀦 𑀅𑀦𑁂𑀓𑀲𑀢𑀸𑀦𑀺 𑀢𑀺𑀮𑀺𑀗𑁆𑀕𑀧𑀤𑀸𑀦𑀺 𑀢𑀤𑀢𑁆𑀣𑁂𑀬𑁂𑀯𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀦𑁆𑀢𑀺. ‘‘𑀤𑁂𑀢𑀺, 𑀭𑁄𑀘𑀢𑀺, 𑀥𑀸𑀭𑁂𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀲𑀼𑀤𑁆𑀥𑀲𑀫𑁆𑀧𑀤𑀸𑀦𑀯𑀺𑀲𑀬𑁂𑀲𑀼 𑀦 𑀤𑀺𑀲𑁆𑀲𑀦𑁆𑀢𑀺. 𑀪𑀯𑀦𑁆𑀢𑀺 𑀘𑀢𑁆𑀭 𑁋

𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲, 𑀆𑀬𑀸𑀤𑁂𑀲𑁂𑀦 𑀲𑀁𑀬𑀼𑀢𑀁;

𑀭𑀽𑀧𑀁 𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁, 𑀞𑀸𑀦𑁂𑀲𑀼 𑀘𑀢𑀼𑀲𑀼𑀝𑁆𑀞𑀺𑀢𑀁.

𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀘𑁂𑀯, 𑀦𑀬𑀦𑀢𑁆𑀣𑀲𑁆𑀲 𑀓𑀫𑁆𑀫𑀦𑀺;

𑀯𑀺𑀪𑀢𑁆𑀢𑀺𑀬𑀸 𑀯𑀺𑀧𑀮𑁆𑀮𑀸𑀲𑁂, 𑀢𑀤𑀢𑁆𑀣𑁂 𑀘𑀸𑀢𑀺 𑀦𑀺𑀤𑁆𑀤𑀺𑀲𑁂.

‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺’’;

𑀏𑀯𑀁 𑀕𑀢𑁆𑀬𑀢𑁆𑀣𑀓𑀫𑁆𑀫𑀲𑁆𑀫𑀺𑀁, 𑀤𑀺𑀝𑁆𑀞𑀫𑀫𑁆𑀳𑁂𑀳𑀺 𑀲𑀸𑀲𑀦𑁂.

‘‘𑀤𑀓𑀸𑀬 ¶ 𑀦𑁂𑀢𑀺’’ 𑀇𑀘𑁆𑀘𑁂𑀯𑀁, 𑀦𑀬𑀦𑀢𑁆𑀣𑀲𑁆𑀲 𑀓𑀫𑁆𑀫𑀦𑀺;

‘‘𑀯𑀘𑀦𑀸𑀬𑀸’’𑀢𑀺 𑀦𑀺𑀲𑁆𑀲𑀓𑁆𑀓𑁂, 𑀯𑀺𑀭𑀫𑀡𑀧𑁆𑀧𑀬𑁄𑀕𑀢𑁄.

‘‘𑀕𑀡𑀸𑀬’’𑀇𑀢𑀺 𑀲𑀸𑀫𑀺𑀲𑁆𑀫𑀺𑀁, ‘‘𑀪𑀢𑁆𑀢𑀸’’𑀢𑀺 𑀲𑀤𑁆𑀤𑀬𑁄𑀕𑀢𑁄;

‘‘𑀥𑀦𑀜𑁆𑀘𑀬𑀸𑀬𑀸’’𑀢𑀺 𑀧𑀤𑀁, 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀲𑀽𑀘𑀓𑀁.

‘‘𑀅𑀲𑀓𑁆𑀓𑀢𑀸’’𑀢𑀺 𑀲𑀤𑁆𑀤𑀲𑁆𑀲, 𑀬𑁄𑀕𑀢𑁄𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀅𑀜𑁆𑀜𑁄 𑀘𑀸𑀧𑀺 𑀯𑀺𑀧𑀮𑁆𑀮𑀸𑀲𑁄, 𑀫𑀕𑁆𑀕𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

‘‘𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬, 𑀦𑀺𑀩𑁆𑀩𑀸𑀦𑀸𑀬𑀸’’𑀢𑀺𑀫𑀸𑀦𑀺 𑀢𑀼;

𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦𑁂𑀯, 𑀢𑀤𑀢𑁆𑀣𑀲𑁆𑀫𑀺𑀁 𑀯𑀺𑀦𑀺𑀤𑁆𑀤𑀺𑀲𑁂.

𑀏𑀯𑀁 𑀧𑀸𑀞𑀸𑀦𑀼𑀮𑁄𑀫𑁂𑀦, 𑀓𑀣𑀺𑀢𑁄 𑀆𑀬𑀲𑀫𑁆𑀪𑀯𑁄;

𑀇𑀤𑀦𑁆𑀢𑀼 𑀲𑀼𑀔𑀼𑀫𑀁 𑀞𑀸𑀦𑀁, 𑀘𑀺𑀦𑁆𑀢𑁂𑀢𑀩𑁆𑀩𑀁 𑀧𑀼𑀦𑀧𑁆𑀧𑀼𑀦𑀁.

𑀑𑀓𑀸𑀭𑀦𑁆𑀢𑀯𑀲𑁂𑀦𑁂𑀯, 𑀦𑀸𑀦𑀸𑀦𑀬𑀲𑀼𑀫𑀡𑁆𑀟𑀺𑀢𑀸;

𑀧𑀤𑀫𑀸𑀮𑀸 𑀫𑀳𑁂𑀲𑀺𑀲𑁆𑀲, 𑀲𑀸𑀲𑀦𑀢𑁆𑀣𑀁 𑀧𑀓𑀸𑀲𑀺𑀢𑀸.

𑀇𑀫𑀫𑀢𑀺𑀫𑀥𑀼𑀭𑀜𑁆𑀘𑁂 𑀘𑀺𑀢𑁆𑀢𑀺𑀓𑀢𑁆𑀯𑀸 𑀲𑀼𑀡𑁂𑀬𑁆𑀬𑀼𑀁,

𑀯𑀺𑀯𑀺𑀥𑀦𑀬𑀯𑀺𑀘𑀺𑀢𑁆𑀢𑀁 𑀲𑀸𑀥𑀯𑁄 𑀲𑀤𑁆𑀤𑀦𑀻𑀢𑀺𑀁;

𑀚𑀺𑀦𑀯𑀭𑀯𑀘𑀦𑁂𑀢𑁂 𑀲𑀤𑁆𑀤𑀢𑁄 𑀚𑀸𑀢𑀓𑀗𑁆𑀔𑀁,

𑀓𑀼𑀫𑀼𑀤𑀫𑀺𑀯’𑀲𑀺𑀦𑀸 𑀯𑁂 𑀲𑀼𑀝𑁆𑀞𑀼 𑀙𑀺𑀦𑁆𑀤𑁂𑀬𑁆𑀬𑀼𑀫𑁂𑀢𑁆𑀣.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀦𑀺𑀘𑁆𑀙𑀬𑁄 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲

𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀅𑀓𑀸𑀭𑀦𑁆𑀢𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑁬. 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑁂𑀲𑀼 𑀅𑀪𑀺𑀪𑀯𑀺𑀢𑀼 𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 ¶ 𑀯𑀓𑁆𑀔𑀸𑀫 𑁋 𑀲𑀢𑁆𑀣𑀸, 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀁, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀺. 𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀺. 𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁. 𑀲𑀢𑁆𑀣𑀭𑀺, 𑀲𑀢𑁆𑀣𑀸𑀭𑁂𑀲𑀼. 𑀪𑁄 𑀲𑀢𑁆𑀣, 𑀪𑁄 𑀲𑀢𑁆𑀣𑀸, 𑀪𑀯𑀦𑁆𑀢𑁄 𑀲𑀢𑁆𑀣𑀸𑀭𑁄.

𑀅𑀬𑀁 𑀬𑀫𑀓𑀫𑀳𑀸𑀣𑁂𑀭𑁂𑀦 𑀓𑀢𑀸𑀬 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀸 𑀆𑀕𑀢𑁄 𑀦𑀬𑁄. 𑀏𑀢𑁆𑀣 𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀓𑀘𑁆𑀘𑀸𑀬𑀦𑁂 𑀘 ‘‘𑀲𑀢𑁆𑀣𑀼𑀦𑀸’’𑀢𑀺 𑀧𑀤𑀁 𑀅𑀦𑀸𑀕𑀢𑀫𑁆𑀧𑀺 𑀕𑀳𑁂𑀢𑀩𑁆𑀩𑀫𑁂𑀯 ‘‘𑀥𑀫𑁆𑀫𑀭𑀸𑀚𑁂𑀦 𑀲𑀢𑁆𑀣𑀼𑀦𑀸’’𑀢𑀺 𑀤𑀲𑁆𑀲𑀦𑀢𑁄. ‘‘𑀲𑀢𑁆𑀣𑀸𑀭𑀸, 𑀲𑀢𑁆𑀣𑀼𑀦𑀸, 𑀲𑀢𑁆𑀣𑀸𑀭𑁂𑀳𑀺, 𑀲𑀢𑁆𑀣𑀸𑀭𑁂𑀪𑀻’’𑀢𑀺 𑀓𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀲𑀢𑀺𑀧𑀺 𑀅𑀢𑁆𑀣𑀯𑀺𑀲𑁂𑀲𑁂 𑀩𑁆𑀬𑀜𑁆𑀚𑀦𑀯𑀺𑀲𑁂𑀲𑀯𑀲𑁂𑀦, 𑀩𑁆𑀬𑀜𑁆𑀚𑀦𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀅𑀢𑁆𑀣𑀦𑀸𑀦𑀢𑁆𑀣𑀢𑀸𑀯𑀲𑁂𑀦 𑀲𑀤𑁆𑀤𑀦𑁆𑀢𑀭𑀲𑀦𑁆𑀤𑀲𑁆𑀲𑀦𑀁 𑀦𑀺𑀭𑀼𑀢𑁆𑀢𑀺𑀓𑁆𑀓𑀫𑁄𑀢𑀺 ‘‘𑀲𑀢𑁆𑀣𑀸’’𑀢𑀺 𑀧𑀤𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 𑀧𑀦 ‘‘𑀲𑀢𑁆𑀣𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀁 𑀦 𑀆𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀆𑀕𑀢𑀁, 𑀢𑀣𑀸𑀧𑀺 ‘‘𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 ‘‘𑀅𑀯𑀺𑀢𑀓𑁆𑀓𑀺𑀢𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀲𑀢𑁆𑀣𑀸’’𑀢𑀺 𑀧𑀤𑀲𑁆𑀲 𑀧𑀞𑀫𑀸𑀩𑀳𑀼𑀯𑀘𑀦𑀢𑁆𑀢𑀁 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀁. 𑀢𑀣𑀸 𑀯𑀢𑁆𑀢𑀸, 𑀥𑀸𑀢𑀸, 𑀕𑀦𑁆𑀢𑀸𑀤𑀻𑀦𑀫𑁆𑀧𑀺 𑀢𑀕𑁆𑀕𑀢𑀺𑀓𑀢𑁆𑀢𑀸. 𑀢𑀣𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀲𑀢𑁆𑀣𑀸𑀭𑁂’’𑀢𑀺 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀜𑁆𑀘 ‘‘𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀸𑀦’’𑀦𑁆𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀘 𑀆𑀕𑀢𑀸𑀦𑀺, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀦 𑀆𑀕𑀢𑀸𑀦𑀺. 𑀢𑀢𑁆𑀣 ‘‘𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺. 𑀪𑀸𑀢𑀭𑁄 𑀅𑀢𑀺𑀓𑁆𑀓𑀫𑀢𑀻’’𑀢𑀺 𑀤𑀲𑁆𑀲𑀦𑀢𑁄 ‘‘𑀲𑀢𑁆𑀣𑀸𑀭𑁂’’𑀢𑀺 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀭𑀽𑀧𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀘𑁆𑀘𑀸𑀬𑀦𑀸𑀤𑀻𑀲𑀼 ‘‘𑀪𑁄 𑀲𑀢𑁆𑀣, 𑀪𑁄 𑀲𑀢𑁆𑀣𑀸’’ 𑀇𑀢𑀺 𑀭𑀲𑁆𑀲𑀤𑀻𑀖𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀪𑁄 𑀲𑀢𑁆𑀣’’ 𑀇𑀢𑀺𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑀯𑀦𑁆𑀢𑁄 𑀲𑀢𑁆𑀣𑀸𑀭𑁄’’𑀢𑀺 𑀆𑀭𑀸𑀤𑁂𑀲𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ¶ ‘‘𑀪𑁄 𑀲𑀢𑁆𑀣’’ 𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄 𑀲𑀢𑁆𑀣𑀸’’ 𑀇𑀢𑀺 𑀤𑀻𑀖𑀯𑀲𑁂𑀦 𑀆𑀮𑀧𑀦𑀩𑀳𑀼𑀯𑀘𑀦𑀁 𑀮𑀧𑀺𑀢𑀁. 𑀲𑀩𑁆𑀩𑀫𑁂𑀢𑀁 𑀆𑀕𑀫𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀢𑁆𑀣𑀼𑀲𑀤𑁆𑀤𑀲𑁆𑀲 𑀬𑀁 𑀭𑀽𑀧𑀦𑁆𑀢𑀭𑀁 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀢𑀁 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀢𑀣𑀸 𑀳𑀺 ‘‘𑀇𑀫𑁂𑀲𑀁 𑀫𑀳𑀸𑀦𑀸𑀫 𑀢𑀺𑀡𑁆𑀡𑀁 𑀲𑀢𑁆𑀣𑀽𑀦𑀁 𑀏𑀓𑀸 𑀦𑀺𑀝𑁆𑀞𑀸 𑀉𑀤𑀸𑀳𑀼 𑀧𑀼𑀣𑀼 𑀦𑀺𑀝𑁆𑀞𑀸’’𑀢𑀺 𑀧𑀸𑀴𑀺𑀬𑀁 ‘‘𑀲𑀢𑁆𑀣𑀽𑀦’’𑀦𑁆𑀢𑀺 𑀧𑀤𑀁 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀢𑁆𑀣𑀼, 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀸𑀦𑀁, 𑀲𑀢𑁆𑀣𑀸𑀭𑀸𑀦𑀁, 𑀲𑀢𑁆𑀣𑀽𑀦’’𑀦𑁆𑀢𑀺. 𑀅𑀪𑀺𑀪𑀯𑀺𑀢𑀸, 𑀅𑀪𑀺𑀪𑀯𑀺𑀢𑀸, 𑀅𑀪𑀺𑀪𑀯𑀺𑀢𑀸𑀭𑁄. 𑀅𑀪𑀺𑀪𑀯𑀺𑀢𑀸𑀭𑀁, 𑀅𑀪𑀺𑀪𑀯𑀺𑀢𑀸𑀭𑁄. 𑀅𑀪𑀺𑀪𑀯𑀺𑀢𑀸𑀭𑀸, 𑀅𑀪𑀺𑀪𑀯𑀺𑀢𑀼𑀦𑀸, 𑀅𑀪𑀺𑀪𑀯𑀺𑀢𑀸𑀭𑁂𑀳𑀺, 𑀅𑀪𑀺𑀪𑀯𑀺𑀢𑀸𑀭𑁂𑀪𑀺. 𑀅𑀪𑀺𑀪𑀯𑀺𑀢𑀼, 𑀅𑀪𑀺𑀪𑀯𑀺𑀢𑀼𑀲𑁆𑀲, 𑀅𑀪𑀺𑀪𑀯𑀺𑀢𑀼𑀦𑁄, 𑀅𑀪𑀺𑀪𑀯𑀺𑀢𑀸𑀦𑀁, 𑀅𑀪𑀺𑀪𑀯𑀺𑀢𑀸𑀭𑀸𑀦𑀁, 𑀅𑀪𑀺𑀪𑀯𑀺𑀢𑀽𑀦𑀁. 𑀅𑀪𑀺𑀪𑀯𑀺𑀢𑀸𑀭𑀸, 𑀅𑀪𑀺𑀪𑀯𑀺𑀢𑀸𑀭𑁂𑀳𑀺, 𑀅𑀪𑀺𑀪𑀯𑀺𑀢𑀸𑀭𑁂𑀪𑀺. 𑀅𑀪𑀺𑀪𑀯𑀺𑀢𑀼, 𑀅𑀪𑀺𑀪𑀯𑀺𑀢𑀼𑀲𑁆𑀲, 𑀅𑀪𑀺𑀪𑀯𑀺𑀢𑀼𑀦𑁄, 𑀅𑀪𑀺𑀪𑀯𑀺𑀢𑀸𑀦𑀁, 𑀅𑀪𑀺𑀪𑀯𑀺𑀢𑀸𑀭𑀸𑀦𑀁. 𑀅𑀪𑀺𑀪𑀯𑀺𑀢𑀭𑀺, 𑀅𑀪𑀺𑀪𑀯𑀺𑀢𑀸𑀭𑁂𑀲𑀼. 𑀪𑁄 𑀅𑀪𑀺𑀪𑀯𑀺𑀢, 𑀪𑁄 𑀅𑀪𑀺𑀪𑀯𑀺𑀢𑀸, 𑀪𑀯𑀦𑁆𑀢𑁄 𑀅𑀪𑀺𑀪𑀯𑀺𑀢𑀸𑀭𑁄. 𑀬𑀣𑀸 𑀧𑀦𑁂𑀢𑁆𑀣 𑀅𑀪𑀺𑀪𑀯𑀺𑀢𑀼 𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀢𑁆𑀣𑀼𑀦𑀬𑁂𑀦 𑀬𑁄𑀚𑀺𑀢𑀸, 𑀏𑀯𑀁 𑀧𑀭𑀺𑀪𑀯𑀺𑀢𑀼𑀆𑀤𑀻𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀢𑁆𑀣𑀼𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀸𑀫 ‘‘𑀯𑀢𑁆𑀢𑀸, 𑀥𑀸𑀢𑀸’’𑀇𑀘𑁆𑀘𑀸𑀤𑀻𑀦𑀁 𑀧𑀤𑀸𑀦𑀁 𑀯𑀢𑁆𑀢𑀼𑀥𑀸𑀢𑀼 𑀇𑀘𑁆𑀘𑀸𑀤𑀻𑀦𑀺 𑀧𑀓𑀢𑀺𑀭𑀽𑀧𑀸𑀦𑀺.

𑀯𑀢𑁆𑀢𑀸 𑀥𑀸𑀢𑀸 𑀕𑀦𑁆𑀢𑀸 𑀦𑁂𑀢𑀸,

𑀤𑀸𑀢𑀸 𑀓𑀢𑁆𑀢𑀸 𑀘𑁂𑀢𑀸 𑀢𑀸𑀢𑀸;

𑀙𑁂𑀢𑁆𑀢𑀸 𑀪𑁂𑀢𑁆𑀢𑀸 𑀳𑀦𑁆𑀢𑀸 𑀫𑁂𑀢𑀸,

𑀚𑁂𑀢𑀸 𑀩𑁄𑀤𑁆𑀥𑀸 𑀜𑀸𑀢𑀸 𑀲𑁄𑀢𑀸.

𑀕𑀚𑁆𑀚𑀺𑀢𑀸 𑀯𑀲𑁆𑀲𑀺𑀢𑀸 𑀪𑀢𑁆𑀢𑀸, 𑀫𑀼𑀘𑁆𑀙𑀺𑀢𑀸 𑀧𑀝𑀺𑀲𑁂𑀥𑀺𑀢𑀸;

𑀪𑀸𑀲𑀺𑀢𑀸 𑀧𑀼𑀘𑁆𑀙𑀺𑀢𑀸 𑀔𑀦𑁆𑀢𑀸, 𑀉𑀝𑁆𑀞𑀸𑀢𑁄𑀓𑁆𑀓𑀫𑀺𑀢𑀸 𑀢𑀢𑀸.

𑀦𑀢𑁆𑀢𑀸 ¶ 𑀧𑀦𑀢𑁆𑀢𑀸 𑀅𑀓𑁆𑀔𑀸𑀢𑀸, 𑀲𑀳𑀺𑀢𑀸 𑀧𑀝𑀺𑀲𑁂𑀯𑀺𑀢𑀸;

𑀦𑁂𑀢𑀸 𑀯𑀺𑀦𑁂𑀢𑀸 𑀇𑀘𑁆𑀘𑀸𑀤𑀻, 𑀯𑀢𑁆𑀢𑀭𑁂 𑀲𑀼𑀤𑁆𑀥𑀓𑀢𑁆𑀢𑀭𑀺.

𑀉𑀧𑁆𑀧𑀸𑀤𑁂𑀢𑀸 𑀯𑀺𑀜𑁆𑀜𑀸𑀧𑁂𑀢𑀸, 𑀲𑀦𑁆𑀤𑀲𑁆𑀲𑁂𑀢𑀸 𑀧𑀩𑁆𑀭𑀽𑀳𑁂𑀢𑀸;

𑀩𑁄𑀥𑁂𑀢𑀸𑀤𑀻 𑀘𑀜𑁆𑀜𑁂 𑀲𑀤𑁆𑀤𑀸, 𑀜𑁂𑀬𑁆𑀬𑀸 𑀳𑁂𑀢𑀼𑀲𑁆𑀫𑀺𑀁 𑀅𑀢𑁆𑀣𑀲𑁆𑀫𑀺𑀁.

𑀓𑀢𑁆𑀢𑀸 𑀔𑀢𑁆𑀢𑀸 𑀦𑁂𑀢𑁆𑀢𑀸 𑀪𑀢𑁆𑀢𑀸, 𑀧𑀺𑀢𑀸 𑀪𑀸𑀢𑀸𑀢𑀺𑀫𑁂 𑀧𑀦;

𑀓𑀺𑀜𑁆𑀘𑀺 𑀪𑀺𑀚𑁆𑀚𑀦𑁆𑀢𑀺 𑀲𑀼𑀢𑁆𑀢𑀲𑁆𑀫𑀺𑀁, 𑀢𑀁 𑀧𑀪𑁂𑀤𑀁 𑀓𑀣𑁂𑀲𑁆𑀲𑀳𑀁.

𑀲𑀢𑁆𑀣𑀸𑀢𑀺𑀆𑀤𑀻𑀲𑀼 𑀓𑁂𑀘𑀺, 𑀉𑀧𑀬𑁄𑀕𑁂𑀦 𑀲𑀸𑀫𑀺𑀦𑀸;

𑀲𑀳𑁂𑀯 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺, 𑀦𑁂𑀯 𑀯𑀢𑁆𑀢𑀦𑁆𑀢𑀺 𑀓𑁂𑀘𑀺 𑀢𑀼.

𑀢𑀢𑁆𑀭 𑀓𑀢𑁆𑀢𑀼𑀲𑀤𑁆𑀤𑀸𑀤𑀬𑁄 𑀭𑀽𑀧𑀦𑁆𑀢𑀭𑀯𑀲𑁂𑀦 𑀲𑀢𑁆𑀣𑀼𑀲𑀤𑁆𑀤𑀢𑁄 𑀓𑀺𑀜𑁆𑀘𑀺 𑀪𑀺𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺 ‘‘𑀉𑀝𑁆𑀞𑁂𑀳𑀺 𑀓𑀢𑁆𑀢𑁂 𑀢𑀭𑀫𑀸𑀦𑁄, 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀁𑀯𑀤𑀸’’𑀢𑀺 𑀏𑀢𑁆𑀣 ‘‘𑀓𑀢𑁆𑀢𑁂’’𑀢𑀺 𑀇𑀤𑀁 𑀆𑀮𑀧𑀦𑁂𑀓𑀯𑀘𑀦𑀭𑀽𑀧𑀁, 𑀏𑀯𑀜𑁆𑀳𑀺 ‘‘𑀪𑁄 𑀓𑀢𑁆𑀢𑀸’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁 𑀦𑀸𑀫. ‘‘𑀢𑁂𑀦 𑀳𑀺 𑀪𑁄 𑀔𑀢𑁆𑀢𑁂 𑀬𑁂𑀦 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀸’’𑀢𑀺 𑀏𑀢𑁆𑀣 ‘‘𑀔𑀢𑁆𑀢𑁂’’𑀢𑀺 𑀇𑀤𑀜𑁆𑀘𑀸𑀮𑀧𑀦𑁂𑀓𑀯𑀘𑀦𑀭𑀽𑀧𑀁. 𑀏𑀯𑀫𑁆𑀧𑀺 ‘‘𑀪𑁄 𑀔𑀢𑁆𑀢𑀸’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁 𑀦𑀸𑀫. ‘‘𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀻’’𑀢𑀺 𑀏𑀢𑁆𑀣 ‘‘𑀦𑁂𑀢𑁆𑀢𑁂’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀭𑀽𑀧𑀁, 𑀏𑀢𑀫𑁆𑀧𑀺 ‘‘𑀦𑁂𑀢𑁆𑀢𑀭𑀻’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁. ‘‘𑀆𑀭𑀸𑀥𑀬𑀢𑀺 𑀭𑀸𑀚𑀸𑀦𑀁, 𑀧𑀽𑀚𑀁 𑀮𑀪𑀢𑀺 𑀪𑀢𑁆𑀢𑀼𑀲𑀽’’𑀢𑀺 𑀏𑀢𑁆𑀣 ‘‘𑀪𑀢𑁆𑀢𑀽𑀲𑀽’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀩𑀳𑀼𑀯𑀘𑀦𑀭𑀽𑀧𑀁. ‘‘𑀪𑀢𑁆𑀢𑀸𑀭𑁂𑀲𑀽’’𑀢𑀺 𑀭𑀽𑀧𑀢𑁄 𑀭𑀽𑀧𑀦𑁆𑀢𑀭𑀁, 𑀅𑀢𑁆𑀭 ‘‘𑀪𑀢𑁆𑀢𑀽𑀲𑀽’’𑀢𑀺 𑀤𑀲𑁆𑀲𑀦𑀢𑁄, ‘‘𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸’’𑀢𑀺 𑀏𑀢𑁆𑀣 ‘‘𑀧𑀺𑀢𑀽𑀲𑀽’’𑀢𑀺 𑀤𑀲𑁆𑀲𑀦𑀢𑁄 𑀘 ‘‘𑀯𑀢𑁆𑀢𑀽𑀲𑀼 𑀥𑀸𑀢𑀽𑀲𑀼 𑀕𑀦𑁆𑀢𑀽𑀲𑀼 𑀦𑁂𑀢𑀽𑀲𑀼 𑀤𑀸𑀢𑀽𑀲𑀼 𑀓𑀢𑁆𑀢𑀽𑀲𑀽’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀅𑀬𑀁 𑀦𑀬𑁄 𑀲𑀢𑁆𑀣𑀼𑀲𑀤𑁆𑀤𑁂𑀧𑀺 𑀇𑀘𑁆𑀙𑀺𑀢𑀩𑁆𑀩𑁄 𑀯𑀺𑀬 𑀅𑀫𑁆𑀳𑁂 𑀧𑀝𑀺𑀪𑀸𑀢𑀺.

𑀧𑀺𑀢𑀸, 𑀧𑀺𑀢𑀸, 𑀧𑀺𑀢𑀭𑁄. 𑀧𑀺𑀢𑀭𑀁, 𑀧𑀺𑀢𑀭𑁄. 𑀧𑀺𑀢𑀭𑀸, 𑀧𑀺𑀢𑀼𑀦𑀸, 𑀧𑁂𑀢𑁆𑀬𑀸, 𑀧𑀺𑀢𑀭𑁂𑀳𑀺, 𑀧𑀺𑀢𑀭𑁂𑀪𑀺, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀼, 𑀧𑀺𑀢𑀼𑀲𑁆𑀲, 𑀧𑀺𑀢𑀼𑀦𑁄 ¶ , 𑀧𑀺𑀢𑀸𑀦𑀁, 𑀧𑀺𑀢𑀭𑀸𑀦𑀁, 𑀧𑀺𑀢𑀽𑀦𑀁. 𑀧𑀺𑀢𑀭𑀸, 𑀧𑁂𑀢𑁆𑀬𑀸, 𑀧𑀺𑀢𑀭𑁂𑀳𑀺, 𑀧𑀺𑀢𑀭𑁂𑀪𑀺, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀼, 𑀧𑀺𑀢𑀼𑀲𑁆𑀲, 𑀧𑀺𑀢𑀼𑀦𑁄, 𑀧𑀺𑀢𑀸𑀦𑀁, 𑀧𑀺𑀢𑀭𑀸𑀦𑀁, 𑀧𑀺𑀢𑀽𑀦𑀁. 𑀧𑀺𑀢𑀭𑀺, 𑀧𑀺𑀢𑀭𑁂𑀲𑀼, 𑀧𑀺𑀢𑀽𑀲𑀼. 𑀪𑁄 𑀧𑀺𑀢, 𑀪𑁄 𑀧𑀺𑀢𑀸, 𑀪𑀯𑀦𑁆𑀢𑁄 𑀧𑀺𑀢𑀭𑁄. 𑀏𑀢𑁆𑀣 𑀧𑀦 ‘‘𑀧𑁂𑀢𑁆𑀬𑀸, 𑀧𑀺𑀢𑀽𑀦’’𑀦𑁆𑀢𑀺 𑀇𑀫𑀁 𑀦𑀬𑀤𑁆𑀯𑀬𑀁 𑀯𑀚𑁆𑀚𑁂𑀢𑁆𑀯𑀸 𑀪𑀸𑀢𑀼𑀲𑀤𑁆𑀤𑀲𑁆𑀲 𑀘 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀢𑁆𑀣 ‘‘𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀓𑀢𑀁 𑀲𑀼𑀲𑀸𑀥𑀼, 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦𑀸’’𑀢𑀺 𑀘 𑀤𑀲𑁆𑀲𑀦𑀢𑁄 𑀧𑀺𑀢𑀼𑀲𑀤𑁆𑀤𑀲𑁆𑀲 ‘‘𑀧𑁂𑀢𑁆𑀬𑀸, 𑀧𑀺𑀢𑀽𑀳𑀺, 𑀧𑀺𑀢𑀽𑀪𑀺. 𑀧𑀺𑀢𑀽𑀦’’𑀦𑁆𑀢𑀺 𑀭𑀽𑀧𑀪𑁂𑀤𑁄 𑀘, ‘‘𑀧𑀺𑀢𑀭𑁄’’ 𑀇𑀘𑁆𑀘𑀸𑀤𑀻𑀲𑀼 𑀭𑀲𑁆𑀲𑀢𑁆𑀢𑀜𑁆𑀘 𑀲𑀢𑁆𑀣𑀼𑀲𑀤𑁆𑀤𑀢𑁄 𑀯𑀺𑀲𑁂𑀲𑁄. 𑀢𑀢𑁆𑀣 𑀘 ‘‘𑀧𑁂𑀢𑁆𑀬𑀸’’𑀢𑀺 𑀇𑀤𑀁 ‘‘𑀚𑀦𑁆𑀢𑀼𑀬𑁄, 𑀳𑁂𑀢𑀼𑀬𑁄, 𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸’’𑀢𑀺 𑀧𑀤𑀸𑀦𑀺 𑀯𑀺𑀬 𑀅𑀘𑀺𑀦𑁆𑀢𑁂𑀬𑁆𑀬𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀘𑁄𑀤𑀦𑀸 𑀲𑁄𑀥𑀦𑀸 𑀘𑀸𑀢𑁆𑀭 𑀪𑀯𑀢𑀺 𑁋 𑀲𑀢𑁆𑀣𑀸 𑀧𑀺𑀢𑀸 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀦𑀺𑀧𑁆𑀨𑀦𑁆𑀦𑀢𑁆𑀢𑀫𑀼𑀧𑀸𑀤𑀸𑀬 𑀆𑀓𑀸𑀭𑀦𑁆𑀢𑀸𑀦𑀻𑀢𑀺 𑀘, 𑀧𑀞𑀫𑀁 𑀞𑀧𑁂𑀢𑀩𑁆𑀩𑀁 𑀧𑀓𑀢𑀺𑀭𑀽𑀧𑀫𑀼𑀧𑀸𑀤𑀸𑀬 𑀉𑀓𑀸𑀭𑀦𑁆𑀢𑀸𑀦𑀻𑀢𑀺 𑀘 𑀢𑀼𑀫𑁆𑀳𑁂 𑀪𑀡𑀣, ‘‘𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁. 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀟𑁆𑀠𑁄. 𑀓𑀢𑁆𑀢𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑁆𑀣𑀸𑀭 𑀇𑀘𑁆𑀘𑀸𑀤𑀻𑀦𑀺 𑀓𑀣𑀁 𑀢𑀼𑀫𑁆𑀳𑁂 𑀪𑀡𑀣𑀸𑀢𑀺? 𑀏𑀢𑀸𑀦𑀺𑀧𑀺 𑀫𑀬𑀁 𑀧𑀓𑀢𑀺𑀭𑀽𑀧𑀫𑀼𑀧𑀸𑀤𑀸𑀬 𑀉𑀓𑀸𑀭𑀦𑁆𑀢𑀸𑀦𑀻𑀢𑀺 𑀪𑀡𑀸𑀫𑀸𑀢𑀺. 𑀦𑀦𑀼 𑀘 𑀪𑁄 𑀏𑀢𑀸𑀦𑀺 𑀅𑀓𑀸𑀭𑀦𑁆𑀢𑀸𑀦𑀻𑀢𑀺? 𑀦, 𑀉𑀓𑀸𑀭𑀦𑁆𑀢𑀸𑀦𑀺𑀬𑁂𑀯 𑀢𑀸𑀦𑀺. 𑀦𑀦𑀼 𑀘 𑀪𑁄 𑀬𑁄 𑀅𑀁 𑀦𑀸𑀤𑀻𑀦𑀺 𑀧𑀭𑀪𑀽𑀢𑀸𑀦𑀺 𑀯𑀘𑀦𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺 𑀬𑁂𑀳𑀺 𑀉𑀓𑀸𑀭𑀦𑁆𑀢𑀲𑀤𑁆𑀤𑀸𑀦𑀫𑀦𑁆𑀢𑀲𑁆𑀲 𑀆𑀭𑀸𑀤𑁂𑀲𑁄 𑀲𑀺𑀬𑀸, 𑀢𑀲𑁆𑀫𑀸 𑀅𑀓𑀸𑀭𑀦𑁆𑀢𑀸𑀦𑀻𑀢𑀺? 𑀦, 𑀈𑀤𑀺𑀲𑁂 𑀞𑀸𑀦𑁂 𑀧𑀭𑀪𑀽𑀢𑀸𑀦𑀁 𑀬𑁄 𑀅𑀁 𑀦𑀸𑀤𑀻𑀦𑀁 𑀯𑀘𑀦𑀸𑀦𑀫𑀦𑁄𑀓𑀸𑀲𑀢𑁆𑀢𑀸. 𑀢𑀣𑀸 𑀳𑀺 𑀲𑀫𑀸𑀲𑀯𑀺𑀲𑀬𑁄 𑀏𑀲𑁄. 𑀲𑀫𑀸𑀲𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄 ‘‘𑀕𑀸𑀫𑀢𑁄 𑀦𑀺𑀓𑁆𑀔𑀫𑀢𑀻’’𑀢𑀺 𑀧𑀬𑁄𑀕𑀲𑁆𑀲 𑀯𑀺𑀬 𑀅𑀲𑀫𑀸𑀲𑀯𑀺𑀲𑀬𑁂 ‘‘𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀻’’𑀢𑀺 𑀦𑀺𑀤𑁆𑀤𑁂𑀲𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀳𑁂𑀢𑀼 ¶ 𑀲𑀢𑁆𑀣𑀸𑀭𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀢𑁆𑀣𑀸𑀭 𑀇𑀘𑁆𑀘𑀸𑀤𑀻𑀦𑀺 𑀅𑀓𑀸𑀭𑀦𑁆𑀢𑀸𑀦𑀻𑀢𑀺 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻𑀢𑀺? 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺 ‘‘𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀉𑀓𑀸𑀭𑀦𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀅𑀲𑀫𑀸𑀲𑀢𑁆𑀢𑁂𑀧𑀺 𑀢𑁄𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀲𑀢𑁆𑀣𑀼𑀲𑀤𑁆𑀤𑀲𑁆𑀲 𑀉𑀓𑀸𑀭𑁄 𑀆𑀭𑀸𑀤𑁂𑀲𑀁 𑀮𑀪𑀢𑀺. 𑀬𑀸𑀦𑀺 𑀧𑀦 𑀢𑀼𑀫𑁆𑀳𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑀦𑀺𑀫𑀺𑀢𑁆𑀢𑀸𑀦𑀺 𑀬𑁄 𑀅𑀁𑀦𑀸𑀤𑀻𑀦𑀺 𑀯𑀘𑀦𑀸𑀦𑀺 𑀇𑀘𑁆𑀙𑀣, 𑀢𑀸𑀦𑀺 𑀈𑀤𑀺𑀲𑁂 𑀞𑀸𑀦𑁂 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀁 𑀦 𑀳𑁄𑀦𑁆𑀢𑀺. 𑀓𑀸𑀦𑀺 𑀧𑀦 𑀳𑁄𑀦𑁆𑀢𑀻𑀢𑀺 𑀘𑁂? 𑀅𑀲𑀫𑀸𑀲𑀯𑀺𑀲𑀬𑁂 𑀢𑁄𑀧𑀘𑁆𑀘𑀬𑁄 𑀘 𑀲𑀫𑀸𑀲𑀯𑀺𑀲𑀬𑁂 𑀧𑀭𑀧𑀤𑀸𑀦𑀺 𑀘 𑀧𑀭𑀧𑀤𑀸𑀪𑀸𑀯𑁂 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀘𑀸𑀢𑀺 𑀇𑀫𑀸𑀦𑁂𑀯 𑀈𑀤𑀺𑀲𑁂 𑀞𑀸𑀦𑁂 𑀏𑀓𑀦𑁆𑀢𑁂𑀦 𑀧𑀫𑀸𑀡𑀁 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬, 𑀜𑀢𑁆𑀢𑀁 𑀩𑀸𑀮𑀲𑁆𑀲 𑀚𑀸𑀬𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄𑀢𑀺 𑀇𑀫𑀲𑁆𑀫𑀺𑀁 𑀧𑀳𑀝𑁂 𑀤𑀡𑁆𑀟𑁄 𑀦𑀢𑁆𑀣𑀻’’𑀢𑀺 𑀏𑀢𑁆𑀣 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄𑀢𑀺 𑀇𑀫𑀲𑁆𑀲 𑀲𑀫𑀸𑀲𑀯𑀺𑀲𑀬𑀢𑁆𑀢𑀸 𑀲𑀺𑀫𑁆𑀳𑀺 𑀧𑀭𑁂 𑀉𑀓𑀸𑀭𑁄 𑀆𑀭𑀸𑀤𑁂𑀲𑀁 𑀮𑀪𑀢𑀺, 𑀢𑀢𑁄 𑀲𑀺𑀲𑁆𑀲 𑀑𑀓𑀸𑀭𑀸𑀤𑁂𑀲𑁄, 𑀇𑀘𑁆𑀘𑁂𑀢𑀁 𑀧𑀤𑀁 𑀧𑀓𑀢𑀺𑀭𑀽𑀧𑀯𑀲𑁂𑀦 𑀉𑀓𑀸𑀭𑀦𑁆𑀢𑀁 𑀪𑀯𑀢𑀺. 𑀦𑀺𑀧𑁆𑀨𑀦𑁆𑀦𑀢𑁆𑀢𑀫𑀼𑀧𑀸𑀤𑀸𑀬 ‘‘𑀧𑀼𑀭𑀺𑀲𑁄, 𑀉𑀭𑀕𑁄’’𑀢𑀺 𑀧𑀤𑀸𑀦𑀺 𑀯𑀺𑀬 𑀑𑀓𑀸𑀭𑀦𑁆𑀢𑀜𑁆𑀘 𑀪𑀯𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 ‘‘𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀸𑀢𑀸𑀧𑀺𑀢𑀭𑁄, 𑀦𑀢𑁆𑀣𑀺 𑀫𑀸𑀢𑀸𑀧𑀺𑀢𑀭𑁄 𑀏𑀢𑀲𑁆𑀲𑀸𑀢𑀺 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄’’𑀢𑀺. 𑀧𑀓𑀢𑀺𑀭𑀽𑀧𑀯𑀲𑁂𑀦 𑀳𑀺 ‘‘𑀦𑀺𑀫𑁆𑀫𑀸𑀢𑀸𑀧𑀺𑀢𑀼’’ 𑀇𑀢𑀺 𑀞𑀺𑀢𑁂 𑀲𑀺𑀯𑀘𑀦𑀲𑁆𑀫𑀺𑀁 𑀧𑀭𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑁄 𑀳𑁄𑀢𑀺. 𑀓𑀢𑁆𑀣𑀘𑀺 𑀧𑀦 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀲𑁄 𑀧𑀦 ‘‘𑀅𑀬𑀁 𑀦𑀺𑀫𑁆𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀧𑀤𑀲𑁆𑀲 𑀅𑀬𑀼𑀢𑁆𑀢𑀢𑀁 𑀫𑀜𑁆𑀜𑀫𑀸𑀦𑁂𑀳𑀺 𑀞𑀧𑀺𑀢𑁄𑀢𑀺 𑀫𑀜𑁆𑀜𑀸𑀫, 𑀦 𑀲𑁄 𑀅𑀬𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀧𑀸𑀞𑁄. 𑀲𑁄 𑀳𑀺 𑀉𑀫𑀗𑁆𑀕𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀏𑀓𑀧𑀺𑀢𑀭𑁄𑀢𑀺 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑀧𑀬𑁄𑀕𑁂𑀦 𑀲𑀫𑁂𑀢𑀺. 𑀢𑀣𑀸 𑀳𑀺 𑁋

‘‘𑀬𑀣𑀸𑀧𑀺 ¶ 𑀦𑀺𑀬𑀓𑁄 𑀪𑀸𑀢𑀸,

𑀲𑀉𑀤𑀭𑀺𑀬𑁄 𑀏𑀓𑀫𑀸𑀢𑀼𑀓𑁄;

𑀏𑀯𑀁 𑀧𑀜𑁆𑀘𑀸𑀮𑀘𑀦𑁆𑀤𑁄 𑀢𑁂,

𑀤𑀬𑀺𑀢𑀩𑁆𑀩𑁄 𑀭𑀣𑁂𑀲𑀪𑀸’’𑀢𑀺

𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁂𑀳𑀺 𑀧𑀸𑀴𑀺𑀦𑀬𑀜𑁆𑀜𑀽𑀳𑀺 𑀕𑀭𑀽𑀳𑀺 ‘‘𑀦𑀺𑀬𑀓𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑁄 𑀏𑀓𑀧𑀺𑀢𑀭𑁄 𑀏𑀓𑀫𑀸𑀢𑀼𑀬𑀸 𑀚𑀸𑀢𑁄’’𑀢𑀺 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑀧𑀬𑁄𑀕𑀭𑀘𑀦𑀸 𑀓𑀢𑀸. 𑀦 𑀓𑁂𑀯𑀮𑀜𑁆𑀘 𑀲𑀺𑀫𑁆𑀳𑀺 𑀆𑀭𑀸𑀤𑁂𑀲𑁂 𑀧𑀼𑀮𑁆𑀮𑀺𑀗𑁆𑀕𑀧𑁆𑀧𑀬𑁄𑀕𑁄𑀬𑁂𑀯𑀫𑁆𑀳𑁂𑀳𑀺 𑀤𑀺𑀝𑁆𑀞𑁄, 𑀅𑀣 𑀔𑁄 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀬𑁄𑀕𑁄𑀧𑀺 𑀲𑀸𑀲𑀦𑁂 𑀤𑀺𑀝𑁆𑀞𑁄. 𑀢𑀣𑀸 𑀳𑀺 𑀯𑀺𑀦𑀬𑀧𑀺𑀝𑀓𑁂 𑀘𑀽𑀴𑀯𑀕𑁆𑀕𑁂 ‘‘𑀅𑀲𑁆𑀲𑀫𑀡𑀻 𑀳𑁄𑀢𑀺 𑀅𑀲𑀓𑁆𑀬𑀥𑀻𑀢𑀭𑀸’’𑀢𑀺 𑀧𑀤𑀁 𑀤𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 ‘‘𑀲𑀓𑁆𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀓𑁆𑀬𑀲𑁆𑀲 𑀪𑀕𑀯𑀢𑁄 𑀥𑀻𑀢𑀸 𑀲𑀓𑁆𑀬𑀥𑀻𑀢𑀭𑀸, 𑀦 𑀲𑀓𑁆𑀬𑀥𑀻𑀢𑀭𑀸 𑀅𑀲𑀓𑁆𑀬𑀥𑀻𑀢𑀭𑀸’’𑀢𑀺. 𑀇𑀥𑀸𑀧𑀺 𑀲𑀺𑀫𑁆𑀳𑀺 𑀧𑀭𑁂 𑀉𑀓𑀸𑀭𑀲𑁆𑀲 𑀆𑀭𑀸𑀤𑁂𑀲𑁄 𑀓𑀢𑁄, 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀆𑀧𑀘𑁆𑀘𑀬𑁄, 𑀢𑀢𑁄 𑀲𑀺𑀮𑁄𑀧𑁄 𑀘 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑀫𑀸𑀲𑀧𑀤𑀢𑁆𑀢𑁂 𑀲𑀢𑁆𑀣𑀼 𑀧𑀺𑀢𑀼 𑀓𑀢𑁆𑀢𑀼𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀯𑀼𑀢𑁆𑀢𑀭𑀽𑀧𑀢𑁄 𑀓𑁄𑀘𑀺 𑀓𑁄𑀘𑀺 𑀭𑀽𑀧𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀅𑀜𑁆𑀜𑁂𑀲𑀫𑁆𑀧𑀺 𑀭𑀽𑀧𑀯𑀺𑀲𑁂𑀲𑁄 𑀦𑀬𑀜𑁆𑀜𑀼𑀦𑀸 𑀫𑀕𑁆𑀕𑀺𑀢𑀩𑁆𑀩𑁄 𑀲𑀼𑀢𑁆𑀢𑀦𑁆𑀢𑁂𑀲𑀼. 𑀓𑁄 𑀳𑀺 𑀦𑀸𑀫 𑀲𑀫𑀢𑁆𑀣𑁄 𑀦𑀺𑀲𑁆𑀲𑁂𑀲𑀢𑁄 𑀩𑀼𑀤𑁆𑀥𑀯𑀘𑀦𑀲𑀸𑀕𑀭𑁂 𑀲𑀁𑀓𑀺𑀡𑁆𑀡𑀸𑀦𑀺 𑀯𑀺𑀘𑀺𑀢𑁆𑀭𑀸𑀦𑀺 𑀧𑀡𑁆𑀟𑀺𑀢𑀚𑀦𑀸𑀦𑀁 𑀳𑀤𑀬𑀯𑀺𑀫𑁆𑀳𑀸𑀧𑀦𑀓𑀭𑀸𑀦𑀺 𑀧𑀤𑀭𑀽𑀧𑀭𑀢𑀦𑀸𑀦𑀺 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀅𑀧𑁆𑀧𑀫𑀢𑁆𑀢𑀓𑀸𑀦𑀺𑀬𑁂𑀯 𑀤𑀲𑁆𑀲𑀺𑀢𑀸𑀦𑀺.

𑀅𑀤𑀦𑁆𑀥𑀚𑀸𑀢𑀺𑀓𑁄 𑀯𑀺𑀜𑁆𑀜𑀼-𑀚𑀸𑀢𑀺𑀓𑁄 𑀲𑀢𑀢𑀁 𑀇𑀥;

𑀬𑁄𑀕𑀁 𑀓𑀭𑁄𑀢𑀺 𑀘𑁂 𑀲𑀢𑁆𑀣𑀼, 𑀧𑀸𑀴𑀺𑀬𑀁 𑀲𑁄 𑀦 𑀓𑀗𑁆𑀔𑀢𑀺.

𑀬𑁂 𑀧𑀦𑀺𑀥 𑀅𑀫𑁆𑀳𑁂𑀳𑀺 ‘‘𑀲𑀢𑁆𑀣𑀸, 𑀅𑀪𑀺𑀪𑀯𑀺𑀢𑀸, 𑀯𑀢𑁆𑀢𑀸, 𑀓𑀢𑁆𑀢𑀸’’𑀤𑀬𑁄 𑀲𑀤𑁆𑀤𑀸 𑀧𑀓𑀸𑀲𑀺𑀢𑀸, 𑀢𑁂𑀲𑀼 𑀓𑁂𑀘𑀺 𑀉𑀧𑀬𑁄𑀕𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺 ‘‘𑀧𑀼𑀘𑁆𑀙𑀺𑀢𑀸, 𑀑𑀓𑁆𑀓𑀫𑀺𑀢𑀸’’𑀇𑀘𑁆𑀘𑀸𑀤𑀬𑁄. 𑀢𑀣𑀸 𑀳𑀺 ‘‘𑀅𑀪𑀺𑀚𑀸𑀦𑀸𑀲𑀺 ¶ 𑀦𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀇𑀫𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸. 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺𑀆𑀤𑀺𑀧𑀬𑁄𑀕𑀸 𑀩𑀳𑀽 𑀤𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀲𑀸𑀫𑀺𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀺 ‘‘𑀅𑀪𑀺𑀪𑀯𑀺𑀢𑀸, 𑀯𑀢𑁆𑀢𑀸’’𑀇𑀘𑁆𑀘𑀸𑀤𑀬𑁄. 𑀢𑀣𑀸 𑀳𑀺 ‘‘𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀅𑀪𑀺𑀪𑀯𑀺𑀢𑀸, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄. 𑀅𑀫𑀢𑀲𑁆𑀲 𑀤𑀸𑀢𑀸. 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲, 𑀉𑀧𑁆𑀧𑀸𑀤𑁂𑀢𑀸 𑀦𑀭𑀼𑀢𑁆𑀢𑀫𑁄’’𑀢𑀺𑀆𑀤𑀺𑀧𑀬𑁄𑀕𑀸 𑀩𑀳𑀽 𑀤𑀺𑀲𑁆𑀲𑀦𑁆𑀢𑀺. 𑀓𑁂𑀘𑀺 𑀧𑀦 𑀉𑀧𑀬𑁄𑀕𑀯𑀘𑀦𑁂𑀦𑀧𑀺 𑀲𑀤𑁆𑀥𑀺𑀁 𑀦𑁂𑀯 𑀯𑀢𑁆𑀢𑀦𑁆𑀢𑀺 𑀦𑀺𑀬𑁄𑀕𑀸 𑀧𑀜𑁆𑀜𑀢𑁆𑀢𑀺𑀬𑀁 𑀧𑀯𑀢𑁆𑀢𑀦𑀢𑁄. 𑀢𑀁 𑀬𑀣𑀸? ‘‘𑀲𑀢𑁆𑀣𑀸, 𑀧𑀺𑀢𑀸, 𑀪𑀸𑀢𑀸, 𑀦𑀢𑁆𑀢𑀸’’𑀇𑀘𑁆𑀘𑀸𑀤𑀬𑁄. 𑀏𑀢𑁆𑀣 𑀧𑀦 ‘‘𑀉𑀧𑀬𑁄𑀕𑀯𑀘𑀦𑁂𑀦 𑀲𑀤𑁆𑀥𑀺𑀁 𑀦𑀺𑀘𑁆𑀘𑀁 𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀓𑀫𑁆𑀫𑀪𑀽𑀢𑀁 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸𑀦𑀁 𑀆𑀓𑀸𑀭𑀦𑁆𑀢𑀧𑀤𑀸𑀦𑀁 𑀧𑀯𑀢𑁆𑀢𑀺𑀁 𑀯𑀺𑀤𑀺𑀢𑁆𑀯𑀸 𑀲𑀤𑁆𑀤𑁂𑀲𑀼 𑀅𑀢𑁆𑀣𑁂𑀲𑀼 𑀘 𑀓𑁄𑀲𑀮𑁆𑀮𑀫𑀺𑀘𑁆𑀙𑀦𑁆𑀢𑁂𑀳𑀺 𑀧𑀼𑀦 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦 ‘‘𑀲𑀢𑁆𑀣𑀸, 𑀲𑀢𑁆𑀣𑁄, 𑀲𑀢𑁆𑀣’’𑀦𑁆𑀢𑀺 𑀢𑀺𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀢𑀢𑁆𑀭 𑀳𑀺 ‘‘𑀲𑀢𑁆𑀣𑀸’’𑀢𑀺 𑀇𑀤𑀁 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀢𑁆𑀣𑁄’’𑀢𑀺 𑀇𑀤𑀁 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀑𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀢𑁆𑀣’’𑀦𑁆𑀢𑀺𑀤𑀁 𑀧𑀦 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀪𑀽𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁. 𑀢𑀢𑁆𑀭 𑀲𑀢𑁆𑀣𑀸𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀸𑀲𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸, 𑀓𑁄 𑀲𑁄? 𑀪𑀕𑀯𑀸. 𑀲𑀢𑁆𑀣𑁄𑀢𑀺 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑀁 𑀕𑀳𑁂𑀢𑁆𑀯𑀸 𑀯𑀸𑀡𑀺𑀚𑁆𑀚𑀸𑀬 𑀤𑁂𑀲𑀦𑁆𑀢𑀭𑀁 𑀕𑀢𑁄 𑀚𑀦𑀲𑀫𑀽𑀳𑁄. 𑀲𑀢𑁆𑀣𑀦𑁆𑀢𑀺 𑀲𑀸𑀲𑀢𑀺 𑀆𑀘𑀺𑀓𑁆𑀔𑀢𑀺 𑀅𑀢𑁆𑀣𑁂 𑀏𑀢𑁂𑀦𑀸𑀢𑀺 𑀲𑀢𑁆𑀣𑀁, 𑀩𑁆𑀬𑀸𑀓𑀭𑀡𑀸𑀤𑀺𑀕𑀦𑁆𑀣𑁄, 𑀅𑀣 𑀯𑀸 𑀲𑀲𑀢𑀺 𑀳𑀺𑀁𑀲𑀢𑀺 𑀲𑀢𑁆𑀢𑁂 𑀏𑀢𑁂𑀦𑀸𑀢𑀺 𑀲𑀢𑁆𑀣𑀁, 𑀅𑀲𑀺𑀆𑀤𑀺. ‘‘𑀲𑀢𑁆𑀣𑀸, 𑀲𑀢𑁆𑀣𑀸, 𑀲𑀢𑁆𑀣𑀸𑀭𑁄. 𑀲𑀢𑁆𑀣𑀸𑀭𑀁, 𑀲𑀢𑁆𑀣𑀸𑀭𑁄’’𑀢𑀺 𑀧𑀼𑀭𑁂 𑀯𑀺𑀬 ¶ 𑀧𑀤𑀫𑀸𑀮𑀸. ‘‘𑀲𑀢𑁆𑀣𑁄, 𑀲𑀢𑁆𑀣𑀸. 𑀲𑀢𑁆𑀣𑀁, 𑀲𑀢𑁆𑀣𑁂’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀧𑀤𑀫𑀸𑀮𑀸. ‘‘𑀲𑀢𑁆𑀣𑀁, 𑀲𑀢𑁆𑀣𑀸𑀦𑀺, 𑀲𑀢𑁆𑀣𑀸. 𑀲𑀢𑁆𑀣𑀁, 𑀲𑀢𑁆𑀣𑀸𑀦𑀺, 𑀲𑀢𑁆𑀣𑁂’’𑀢𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦 𑀘𑀺𑀢𑁆𑀢𑀦𑀬𑁂𑀦 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀢𑀺𑀥𑀸 𑀪𑀺𑀦𑁆𑀦𑀸𑀲𑀼 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀲𑀢𑁆𑀣𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀜𑁆𑀜𑀽, 𑀲𑀢𑁆𑀣𑀸 𑀬𑀦𑁆𑀢𑀺 𑀥𑀦𑀢𑁆𑀣𑀺𑀓𑀸;

𑀲𑀢𑁆𑀣𑀸 𑀅𑀧𑁂𑀢𑀺 𑀧𑀼𑀭𑀺𑀲𑁄, 𑀪𑁄𑀦𑁆𑀢𑁄 𑀲𑀢𑁆𑀣𑀸 𑀤𑀤𑀸𑀣 𑀲𑀁.

𑀏𑀯𑀁 𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀲𑀤𑀺𑀲𑀢𑀸 𑀪𑀯𑀢𑀺.

𑀲𑀢𑁆𑀣𑀁 𑀬𑀁 𑀢𑀺𑀔𑀺𑀡𑀁 𑀢𑁂𑀦, 𑀲𑀢𑁆𑀣𑁄 𑀓𑀢𑁆𑀯𑀸𑀦 𑀓𑀧𑁆𑀧𑀺𑀬𑀁;

𑀨𑀮𑀁 𑀲𑀢𑁆𑀣𑀼𑀲𑁆𑀲 𑀧𑀸𑀤𑀸𑀲𑀺, 𑀲𑀢𑁆𑀣𑀸 𑀢𑀁 𑀧𑀭𑀺𑀪𑀼𑀜𑁆𑀚𑀢𑀺.

𑀏𑀯𑀁 𑀅𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀅𑀲𑀤𑀺𑀲𑀢𑀸 𑀪𑀯𑀢𑀺, 𑀢𑀣𑀸 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦. ‘‘𑀘𑁂𑀢𑀸 𑀘𑁂𑀢𑁄’’𑀢𑀺 𑀘 ‘‘𑀢𑀸𑀢𑀸 𑀢𑀸𑀢𑁄’’𑀢𑀺 𑀘 𑀤𑀼𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 𑀳𑀺 ‘‘𑀘𑁂𑀢𑀸’’𑀢𑀺 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, 𑀢𑀣𑀸 ‘‘𑀢𑀸𑀢𑀸’’𑀢𑀺 𑀧𑀤𑀫𑁆𑀧𑀺. ‘‘𑀘𑁂𑀢𑁄’’𑀢𑀺 𑀇𑀤𑀁 𑀧𑀦 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀑𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, 𑀢𑀣𑀸 ‘‘𑀢𑀸𑀢𑁄’’𑀢𑀺 𑀧𑀤𑀫𑁆𑀧𑀺. 𑀢𑀢𑁆𑀭 𑀘𑁂𑀢𑀸𑀢𑀺 𑀘𑀺𑀦𑁄𑀢𑀺 𑀭𑀸𑀲𑀺𑀁 𑀓𑀭𑁄𑀢𑀻𑀢𑀺 𑀘𑁂𑀢𑀸, 𑀧𑀸𑀓𑀸𑀭𑀘𑀺𑀦𑀦𑀓𑁄 𑀧𑀼𑀕𑁆𑀕𑀮𑁄, 𑀇𑀝𑁆𑀞𑀓𑀯𑀟𑁆𑀠𑀓𑀻𑀢𑀺 𑀅𑀢𑁆𑀣𑁄. 𑀘𑁂𑀢𑁄𑀢𑀺 𑀘𑀺𑀢𑁆𑀢𑀁, 𑀏𑀯𑀁𑀦𑀸𑀫𑀓𑁄 𑀯𑀸 𑀮𑀼𑀤𑁆𑀤𑁄. 𑀏𑀢𑁆𑀣 𑀘 𑀘𑀺𑀢𑁆𑀢𑀁 ‘‘𑀘𑁂𑀢𑀬𑀢𑀺 𑀘𑀺𑀦𑁆𑀢𑁂𑀢𑀻’’𑀢𑀺 𑀅𑀢𑁆𑀣𑀯𑀲𑁂𑀦 𑀘𑁂𑀢𑁄, 𑀮𑀼𑀤𑁆𑀤𑁄 𑀧𑀦 𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀢𑀸𑀢𑀸𑀢𑀺 𑀢𑀸𑀬𑀢𑀻𑀢𑀺 𑀢𑀸𑀢𑀸. ‘‘𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸’’𑀢𑀺𑀲𑁆𑀲 𑀧𑀬𑁄𑀕𑁄. ‘‘𑀢𑀸𑀢𑁄’’𑀢𑀺 𑀏𑀢𑁆𑀣𑀸𑀧𑀺 𑀢𑀸𑀬𑀢𑀻𑀢𑀺 𑀢𑀸𑀢𑁄, 𑀧𑀼𑀢𑁆𑀢𑀸𑀦𑀁 𑀧𑀺𑀢𑀽𑀲𑀼, 𑀧𑀺𑀢𑀭𑀸𑀦𑀁 𑀧𑀼𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀜𑁆𑀘 𑀅𑀜𑁆𑀜𑁂𑀲𑀼 𑀧𑀺𑀬𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀩𑁆𑀩𑀯𑁄𑀳𑀸𑀭𑁄 ¶ 𑀏𑀲𑁄. ‘‘𑀲𑁄 𑀦𑀽𑀦 𑀓𑀧𑀡𑁄 𑀢𑀸𑀢𑁄, 𑀘𑀺𑀭𑀁 𑀭𑀼𑀘𑁆𑀘𑀢𑀺 𑀅𑀲𑁆𑀲𑀫𑁂. 𑀓𑀺𑀘𑁆𑀙𑁂𑀦𑀸𑀥𑀺𑀕𑀢𑀸 𑀪𑁄𑀕𑀸, 𑀢𑁂 𑀢𑀸𑀢𑁄 𑀯𑀺𑀥𑀫𑀁 𑀥𑀫𑀁. 𑀏𑀳𑀺 𑀢𑀸𑀢𑀸’’𑀢𑀺𑀆𑀤𑀻𑀲𑀼 𑀘𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀘𑁂𑀢𑀸, 𑀘𑁂𑀢𑀸, 𑀘𑁂𑀢𑀸𑀭𑁄. 𑀘𑁂𑀢𑀸𑀭𑀁, 𑀘𑁂𑀢𑀸𑀭𑁄’’𑀢𑀺 𑀲𑀢𑁆𑀣𑀼𑀦𑀬𑁂𑀦 𑀧𑀤𑀫𑀸𑀮𑀸. ‘‘𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑀲𑀸, 𑀘𑁂𑀢𑁂𑀦𑀸’’𑀢𑀺 𑀫𑀦𑁄𑀕𑀡𑀦𑀬𑁂𑀦 𑀜𑁂𑀬𑁆𑀬𑀸. 𑀅𑀬𑀁 𑀘𑀺𑀢𑁆𑀢𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀘𑁂𑀢𑁄, 𑀘𑁂𑀢𑀸. 𑀘𑁂𑀢𑀁, 𑀘𑁂𑀢𑁂. 𑀘𑁂𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀘𑁂𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀢𑀸𑀢𑀸, 𑀢𑀸𑀢𑀸, 𑀢𑀸𑀢𑀸𑀭𑁄. 𑀢𑀸𑀢𑀸𑀭’’𑀦𑁆𑀢𑀺 𑀲𑀢𑁆𑀣𑀼𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀢𑀸𑀢𑁄, 𑀢𑀸𑀢𑀸, 𑀢𑀸𑀢’’𑀦𑁆𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀫𑀺𑀫𑀸𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸, 𑀢𑀣𑀸 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦 ‘‘𑀜𑀸𑀢𑀸, 𑀜𑀸𑀢𑁄, 𑀜𑀸𑀢𑀁, 𑀜𑀸𑀢𑀸’’𑀢𑀺 𑀘𑀢𑀼𑀓𑁆𑀓𑀁 𑀓𑀢𑁆𑀯𑀸 𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 𑀳𑀺 ‘‘𑀜𑀸𑀢𑀸’’𑀢𑀺 𑀇𑀤𑀁 𑀧𑀞𑀫𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀆𑀓𑀸𑀭𑀦𑁆𑀢𑀪𑀽𑀢𑀁 𑀧𑀼𑀮𑁆𑀮𑀺𑀗𑁆𑀕𑀁. ‘‘𑀜𑀸𑀢𑁄 𑀜𑀸𑀢’’𑀦𑁆𑀢𑀺 𑀇𑀫𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀁 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑁄𑀓𑀸𑀭𑀦𑁆𑀢𑀦𑀺𑀕𑁆𑀕𑀳𑀻𑀢𑀦𑁆𑀢𑀪𑀽𑀢𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑁂𑀲𑀼 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺. 𑀢𑀣𑀸 𑀳𑀺 ‘‘𑀜𑀸𑀢𑁄 𑀅𑀢𑁆𑀣𑁄 𑀲𑀼𑀔𑀸𑀯𑀳𑁄. 𑀜𑀸𑀢𑀫𑁂𑀢𑀁 𑀓𑀼𑀭𑀗𑁆𑀕𑀲𑁆𑀲𑀸’’𑀢𑀺 𑀦𑁂𑀲𑀁 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺. ‘‘𑀜𑀸𑀢𑀸’’𑀢𑀺 𑀇𑀤𑀁 𑀧𑀦 𑀧𑀞𑀫𑀁 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀬𑀁 𑀞𑀢𑁆𑀯𑀸 𑀧𑀘𑁆𑀙𑀸𑀧𑀺 𑀆𑀓𑀸𑀭𑀦𑁆𑀢𑀪𑀽𑀢𑀁 𑀯𑀸𑀘𑁆𑀘𑀮𑀺𑀗𑁆𑀕𑁂𑀲𑀼 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀢𑀣𑀸 𑀳𑀺 ‘‘𑀏𑀲𑀸 𑀇𑀢𑁆𑀣𑀺𑀫𑀬𑀸 𑀜𑀸𑀢𑀸’’𑀢𑀺 𑀧𑀬𑁄𑀕𑁄. 𑀢𑀢𑁆𑀭 𑀧𑀼𑀮𑁆𑀮𑀺𑀗𑁆𑀕𑀧𑀓𑁆𑀔𑁂 ‘‘𑀚𑀸𑀦𑀸𑀢𑀻𑀢𑀺 𑀜𑀸𑀢𑀸’’𑀢𑀺 𑀓𑀢𑁆𑀢𑀼𑀓𑀸𑀭𑀓𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀧𑀓𑁆𑀔𑁂 ‘‘𑀜𑀸𑀬𑀺𑀢𑁆𑀣𑀸𑀢𑀺 𑀜𑀸𑀢𑀸 𑀜𑀸𑀢𑁄 ¶ 𑀜𑀸𑀢’’𑀦𑁆𑀢𑀺 𑀓𑀫𑁆𑀫𑀓𑀸𑀭𑀓𑀸𑀢𑀻𑀢𑀓𑀸𑀮𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀤𑀝𑁆𑀞𑀩𑁆𑀩𑁄. ‘‘𑀜𑀸𑀢𑀸, 𑀜𑀸𑀢𑀸, 𑀜𑀸𑀢𑀸𑀭𑁄. 𑀜𑀸𑀢𑀸𑀭’’𑀦𑁆𑀢𑀺 𑀲𑀢𑁆𑀣𑀼𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑁄, 𑀜𑀸𑀢𑀸. 𑀜𑀸𑀢’’𑀦𑁆𑀢𑀺 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑀁, 𑀜𑀸𑀢𑀸𑀦𑀺, 𑀜𑀸𑀢𑀸. 𑀜𑀸𑀢𑀁, 𑀜𑀸𑀢𑀸𑀦𑀺, 𑀜𑀸𑀢𑁂’’𑀢𑀺 𑀯𑀓𑁆𑀔𑀫𑀸𑀦𑀘𑀺𑀢𑁆𑀢𑀦𑀬𑁂𑀦 𑀜𑁂𑀬𑁆𑀬𑀸. ‘‘𑀜𑀸𑀢𑀸, 𑀜𑀸𑀢𑀸, 𑀜𑀸𑀢𑀸𑀬𑁄. 𑀜𑀸𑀢𑀁, 𑀜𑀸𑀢𑀸, 𑀜𑀸𑀢𑀸𑀬𑁄’’𑀢𑀺 𑀯𑀓𑁆𑀔𑀫𑀸𑀦𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀫𑀺𑀫𑀸𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀇𑀫𑀺𑀦𑀸 𑀦𑀬𑁂𑀦 𑀲𑀤𑀺𑀲𑀸𑀲𑀤𑀺𑀲𑀢𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀯𑀢𑁆𑀢𑀸 𑀥𑀸𑀢𑀸 𑀕𑀦𑁆𑀢𑀸𑀤𑀻𑀦𑀫𑁆𑀧𑀺 ‘‘𑀯𑀤𑀢𑀻𑀢𑀺 𑀯𑀢𑁆𑀢𑀸, 𑀥𑀸𑀭𑁂𑀢𑀻𑀢𑀺 𑀥𑀸𑀢𑀸, 𑀕𑀘𑁆𑀙𑀢𑀻𑀢𑀺 𑀕𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀦𑀺𑀩𑁆𑀩𑀘𑀦𑀸𑀦𑀺 𑀜𑁂𑀬𑁆𑀬𑀸𑀦𑀺.

𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑁂𑀳𑀺 𑀧𑀓𑀺𑀡𑁆𑀡𑀓𑀯𑀘𑀦𑀁 𑀓𑀣𑀺𑀢𑀁, 𑀢𑀁 ‘‘𑀅𑀝𑁆𑀞𑀸𑀦𑁂 𑀇𑀤𑀁 𑀓𑀣𑀺𑀢’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀅𑀬𑀁 𑀲𑀤𑁆𑀤𑀦𑀻𑀢𑀺 𑀦𑀸𑀫 𑀲𑀤𑁆𑀤𑀸𑀦𑀫𑀢𑁆𑀣𑀸𑀦𑀜𑁆𑀘 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀓𑀢𑀸𑀭𑀫𑁆𑀪𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀁 𑀫𑀸𑀕𑀥𑀯𑁄𑀳𑀸𑀭𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀓𑀣𑀺𑀢𑀸𑀬𑁂𑀯 𑀲𑁄𑀪𑀢𑀺, 𑀦 𑀇𑀢𑀭𑀣𑀸, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀪𑁂𑀤𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀸𑀬 𑀲𑀫𑁆𑀪𑀯𑀢𑁄 ‘‘𑀅𑀝𑁆𑀞𑀸𑀦𑁂 𑀇𑀤𑀁 𑀓𑀣𑀺𑀢’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦𑀸𑀦𑀸𑀉𑀧𑀸𑀬𑁂𑀳𑀺 𑀯𑀺𑀜𑁆𑀜𑀽𑀦𑀁 𑀜𑀸𑀧𑀦𑀢𑁆𑀣𑀁 𑀓𑀢𑀸𑀭𑀫𑁆𑀪𑀢𑁆𑀢𑀸 𑀘 𑀧𑀦 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄𑀧𑁂𑀢𑁆𑀣 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀅𑀜𑁆𑀜𑀤𑀢𑁆𑀣𑀼 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀅𑀬𑀁 𑀲𑀤𑁆𑀤𑀦𑀻𑀢𑀺 𑀧𑀺𑀝𑀓𑀢𑁆𑀢𑀬𑁄𑀧𑀓𑀸𑀭𑀸𑀬 𑀲𑀓𑁆𑀓𑀘𑁆𑀘𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸.

𑀇𑀢𑀺 𑀅𑀪𑀺𑀪𑀯𑀺𑀢𑀸𑀧𑀤𑀲𑀤𑀺𑀲𑀸𑀦𑀺 𑀯𑀢𑁆𑀢𑀸, 𑀥𑀸𑀢𑀸, 𑀕𑀦𑁆𑀢𑀸𑀤𑀻𑀦𑀺 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀇𑀤𑀸𑀦𑀺 𑀅𑀢𑀁𑀲𑀤𑀺𑀲𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋

𑀕𑀼𑀡𑀯𑀸 𑀕𑀡𑀯𑀸 𑀘𑁂𑀯, 𑀩𑀮𑀯𑀸 𑀬𑀲𑀯𑀸 𑀢𑀣𑀸;

𑀥𑀦𑀯𑀸 𑀲𑀼𑀢𑀯𑀸 𑀯𑀺𑀤𑁆𑀯𑀸, 𑀥𑀼𑀢𑀯𑀸 𑀓𑀢𑀯𑀸𑀧𑀺 𑀘.

𑀳𑀺𑀢𑀯𑀸 ¶ 𑀪𑀕𑀯𑀸 𑀘𑁂𑀯, 𑀥𑀺𑀢𑀯𑀸 𑀣𑀸𑀫𑀯𑀸 𑀢𑀣𑀸;

𑀬𑀢𑀯𑀸 𑀘𑀸𑀕𑀯𑀸 𑀘𑀸𑀣, 𑀳𑀺𑀫𑀯𑀺𑀘𑁆𑀘𑀸𑀤𑀬𑁄 𑀭𑀯𑀸.

𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺, 𑀅𑀓𑀸𑀭𑀦𑁆𑀢𑁂𑀳𑀺 𑀧𑀸𑀬𑀢𑁄;

𑀯𑀦𑁆𑀢𑀼𑀲𑀤𑁆𑀤𑁄 𑀧𑀭𑁄 𑀳𑁄𑀢𑀺, 𑀢𑀤𑀦𑁆𑀢𑀸 𑀕𑀼𑀡𑀯𑀸𑀤𑀬𑁄.

𑀲𑀜𑁆𑀜𑀸𑀯𑀸 𑀭𑀲𑁆𑀫𑀺𑀯𑀸 𑀘𑁂𑀯, 𑀫𑀲𑁆𑀲𑀼𑀯𑀸 𑀘 𑀬𑀲𑀲𑁆𑀲𑀺𑀯𑀸;

𑀇𑀘𑁆𑀘𑀸𑀤𑀺𑀤𑀲𑁆𑀲𑀦𑀸𑀧𑁂𑀲𑁄, 𑀆𑀓𑀸𑀭𑀺𑀯𑀡𑁆𑀡𑀼𑀓𑀸𑀭𑀢𑁄;

𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀳𑁄𑀢𑀺, 𑀓𑀢𑁆𑀣𑀘𑀻𑀢𑀺 𑀧𑀓𑀸𑀲𑀬𑁂.

𑀲𑀢𑀺𑀫𑀸 𑀕𑀢𑀺𑀫𑀸 𑀅𑀢𑁆𑀣-𑀤𑀲𑁆𑀲𑀺𑀫𑀸 𑀥𑀺𑀢𑀺𑀫𑀸 𑀢𑀣𑀸;

𑀫𑀼𑀢𑀺𑀫𑀸 𑀫𑀢𑀺𑀫𑀸 𑀘𑁂𑀯, 𑀚𑀼𑀢𑀺𑀫𑀸 𑀳𑀺𑀭𑀺𑀫𑀸𑀧𑀺 𑀘.

𑀣𑀼𑀢𑀺𑀫𑀸 𑀭𑀢𑀺𑀫𑀸 𑀘𑁂𑀯, 𑀬𑀢𑀺𑀫𑀸 𑀩𑀮𑀺𑀫𑀸 𑀢𑀣𑀸;

𑀓𑀲𑀺𑀫𑀸 𑀲𑀼𑀘𑀺𑀫𑀸 𑀥𑀻𑀫𑀸, 𑀭𑀼𑀘𑀺𑀫𑀸 𑀘𑀓𑁆𑀔𑀼𑀫𑀸𑀧𑀺 𑀘.

𑀩𑀦𑁆𑀥𑀼𑀫𑀸 𑀳𑁂𑀢𑀼𑀫𑀸’𑀬𑀲𑁆𑀫𑀸, 𑀓𑁂𑀢𑀼𑀫𑀸 𑀭𑀸𑀳𑀼𑀫𑀸 𑀢𑀣𑀸;

𑀔𑀸𑀡𑀼𑀫𑀸 𑀪𑀸𑀡𑀼𑀫𑀸 𑀕𑁄𑀫𑀸, 𑀯𑀺𑀚𑁆𑀚𑀼𑀫𑀸 𑀯𑀲𑀼𑀫𑀸𑀤𑀬𑁄.

𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸 𑀘𑁂𑀯, 𑀘𑀦𑁆𑀤𑀺𑀫𑀺𑀘𑁆𑀘𑀸𑀤𑀬𑁄𑀧𑀺 𑀘;

𑀅𑀢𑀁𑀲𑀤𑀺𑀲𑀲𑀤𑁆𑀤𑀸𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀇𑀯𑀡𑁆𑀡𑀼𑀓𑀸𑀭𑁄𑀓𑀸𑀭𑁂𑀳𑀺, 𑀫𑀦𑁆𑀢𑀼𑀲𑀤𑁆𑀤𑁄 𑀧𑀭𑁄 𑀪𑀯𑁂;

𑀆𑀓𑀸𑀭𑀦𑁆𑀢𑀸 𑀘𑀺𑀓𑀸𑀭𑀦𑁆𑀢𑀸, 𑀇𑀫𑀦𑁆𑀢𑀽𑀢𑀺 𑀯𑀺𑀪𑀸𑀯𑀬𑁂.

𑀕𑀼𑀡𑀯𑀸, 𑀕𑀼𑀡𑀯𑀸, 𑀕𑀼𑀡𑀯𑀦𑁆𑀢𑁄. 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑁂. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀲𑁆𑀫𑀸, 𑀕𑀼𑀡𑀯𑀦𑁆𑀢𑀫𑁆𑀳𑀸, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀺, 𑀕𑀼𑀡𑀯𑀦𑁆𑀢𑁂, 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑀫𑁆𑀳𑀺, 𑀕𑀼𑀡𑀯𑀦𑁆𑀢𑁂𑀲𑀼. 𑀪𑁄 𑀕𑀼𑀡𑀯𑀸, 𑀪𑀯𑀦𑁆𑀢𑁄 𑀕𑀼𑀡𑀯𑀸, 𑀪𑁄𑀦𑁆𑀢𑁄 𑀕𑀼𑀡𑀯𑀦𑁆𑀢𑁄.

𑀏𑀢𑁆𑀣 ¶ 𑀧𑀦 ‘‘𑀏𑀣 𑀢𑀼𑀫𑁆𑀳𑁂 𑀆𑀯𑀼𑀲𑁄 𑀲𑀻𑀮𑀯𑀸𑀳𑁄𑀣𑀸’’𑀢𑀺 𑀘,

‘‘𑀩𑀮𑀯𑀦𑁆𑀢𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀣𑀸𑀫𑀯𑀦𑁆𑀢𑁄𑀧𑀺 𑀳𑀸𑀬𑀭𑁂;

𑀘𑀓𑁆𑀔𑀼𑀫𑀸 𑀅𑀦𑁆𑀥𑀺𑀓𑀸 𑀳𑁄𑀦𑁆𑀢𑀺, 𑀫𑀸𑀢𑀼𑀕𑀸𑀫𑀯𑀲𑀁 𑀕𑀢𑀸’’𑀢𑀺 𑀘

𑀧𑀸𑀴𑀺𑀬𑀁 ‘‘𑀲𑀻𑀮𑀯𑀸, 𑀘𑀓𑁆𑀔𑀼𑀫𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀕𑀼𑀡𑀯𑀸’’𑀢𑀺 𑀧𑀘𑁆𑀘𑀢𑁆𑀢𑀸𑀮𑀧𑀦𑀝𑁆𑀞𑀸𑀦𑁂 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. ‘‘𑀕𑀼𑀡𑀯𑀸 𑀲𑀢𑀺𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀫𑁆𑀧𑀺 𑀳𑀺 ‘‘𑀕𑀼𑀡𑀯𑀸’’𑀢𑀺 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀸𑀦𑀺 𑀆𑀕𑀢𑀸𑀦𑀺, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀪𑀸𑀯𑁂𑀦𑁂𑀯 𑀆𑀕𑀢𑀁, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 ‘‘𑀪𑁄 𑀕𑀼𑀡𑀯’’𑀇𑀢𑀺 𑀭𑀲𑁆𑀲𑀯𑀲𑁂𑀦 𑀆𑀮𑀧𑀦𑁂𑀓𑀯𑀘𑀦𑀁 𑀆𑀕𑀢𑀁. 𑀫𑀬𑀁 𑀧𑀦 ‘‘𑀢𑀕𑁆𑀖 𑀪𑀕𑀯𑀸 𑀩𑁄𑀚𑁆𑀛𑀗𑁆𑀕𑀸. 𑀓𑀣𑀁 𑀦𑀼 𑀪𑀕𑀯𑀸 𑀢𑀼𑀬𑁆𑀳𑀁 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄’’𑀢𑀺𑀏𑀯𑀫𑀸𑀤𑀻𑀲𑀼 𑀅𑀦𑁂𑀓𑀲𑀢𑁂𑀲𑀼 𑀧𑀸𑀞𑁂𑀲𑀼 ‘‘𑀪𑀕𑀯𑀸’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀻𑀖𑀪𑀸𑀯𑀤𑀲𑁆𑀲𑀦𑀢𑁄 𑀯𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 ‘‘𑀪𑁄 𑀕𑀼𑀡𑀯𑀸’’𑀇𑀘𑁆𑀘𑀸𑀤𑀺 𑀤𑀻𑀖𑀯𑀲𑁂𑀦 𑀯𑀘𑀦𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀫𑀜𑁆𑀜𑀸𑀫, 𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 𑀧𑀦 𑀇𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂 𑀘 ‘‘𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫. 𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫’’𑀇𑀘𑁆𑀘𑀸𑀤𑀻𑀲𑀼 𑀧𑀸𑀴𑀺𑀧𑀤𑁂𑀲𑁂𑀲𑀼 ‘‘𑀘𑀓𑁆𑀔𑀼𑀫’’𑀇𑀘𑁆𑀘𑀸𑀤𑀺𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀭𑀲𑁆𑀲𑀪𑀸𑀯𑀤𑀲𑁆𑀲𑀦𑀢𑁄 ‘‘𑀪𑁄 𑀲𑀢𑀺𑀫, 𑀪𑁄 𑀕𑀢𑀺𑀫’’𑀇𑀘𑁆𑀘𑀸𑀤𑀺 𑀭𑀲𑁆𑀲𑀯𑀲𑁂𑀦 𑀯𑀘𑀦𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀫𑀜𑁆𑀜𑀸𑀫, 𑀅𑀣 𑀯𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀆𑀬𑀲𑁆𑀫𑀸 𑀢𑀺𑀲𑁆𑀲’’ 𑀇𑀢𑀺𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀸𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀪𑀕𑀯𑀸, 𑀆𑀬𑀲𑁆𑀫𑀸’’ 𑀇𑀢𑀺𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑀧𑀤𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂𑀧𑀺 𑀫𑀦𑁆𑀢𑀼𑀧𑀘𑁆𑀘𑀬𑀦𑀬𑁄 𑀦𑁂𑀢𑀩𑁆𑀩𑁄, 𑀫𑀦𑁆𑀢𑀼𑀧𑀘𑁆𑀘𑀬𑀝𑁆𑀞𑀸𑀦𑁂𑀧𑀺 𑀯𑀦𑁆𑀢𑀼𑀧𑀘𑁆𑀘𑀬𑀦𑀬𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀓𑀘𑁆𑀘𑀸𑀬𑀦𑀸𑀤𑀻𑀲𑀼 ‘‘𑀪𑁄 𑀕𑀼𑀡𑀯𑀁, 𑀪𑁄 𑀕𑀼𑀡𑀯, 𑀪𑁄 𑀕𑀼𑀡𑀯𑀸’’𑀇𑀢𑀺 𑀦𑀺𑀕𑁆𑀕𑀳𑀻𑀢𑀭𑀲𑁆𑀲𑀤𑀻𑀖𑀯𑀲𑁂𑀦 𑀢𑀻𑀡𑀺 𑀆𑀮𑀧𑀦𑁂𑀓𑀯𑀘𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀺𑀦𑀸 ‘‘𑀪𑁄 𑀲𑀢𑀺𑀫𑀁, 𑀪𑁄 𑀲𑀢𑀺𑀫, 𑀪𑁄 𑀲𑀢𑀺𑀫𑀸’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀤𑀲𑁆𑀲𑀺𑀢𑁄 ¶ . 𑀧𑀞𑀫𑀸𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀧𑀦 ‘‘𑀕𑀼𑀡𑀯𑀦𑁆𑀢𑁄, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀻’’𑀢𑀺 𑀢𑀻𑀡𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀇𑀫𑀺𑀦𑀸𑀧𑀺 ‘‘𑀲𑀢𑀺𑀫𑀦𑁆𑀢𑁄, 𑀲𑀢𑀺𑀫𑀦𑁆𑀢𑀸, 𑀲𑀢𑀺𑀫𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀤𑀲𑁆𑀲𑀺𑀢𑁄. 𑀢𑁂𑀲𑀼 ‘‘𑀪𑁄 𑀕𑀼𑀡𑀯𑀁 𑀪𑁄 𑀲𑀢𑀺𑀫𑀁, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀏𑀯𑀁𑀕𑀢𑀺𑀓𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀧𑀤𑀸𑀦𑀺 𑀧𑀸𑀴𑀺𑀬𑀁 𑀅𑀧𑁆𑀧𑀲𑀺𑀤𑁆𑀥𑀸𑀦𑀺 𑀬𑀣𑀸 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀧𑀤𑀁 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀬𑀁 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀬𑀜𑁆𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂, 𑀬𑀜𑁆𑀘 𑀓𑀘𑁆𑀘𑀸𑀬𑀦𑀸𑀤𑀻𑀲𑀼, 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀳𑀺 𑀘 𑀲𑀤𑁆𑀥𑀺𑀁 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀅𑀧𑀺𑀘𑁂𑀢𑁆𑀣 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄. 𑀢𑀁 𑀬𑀣𑀸? ‘‘𑀢𑀼𑀬𑁆𑀳𑀁 𑀥𑀻𑀢𑀸 𑀫𑀳𑀸𑀯𑀻𑀭, 𑀧𑀜𑁆𑀜𑀯𑀦𑁆𑀢 𑀚𑀼𑀢𑀺𑀦𑁆𑀥𑀭𑀸’’𑀢𑀺 𑀧𑀸𑀴𑀺𑀬𑀁 ‘‘𑀧𑀜𑁆𑀜𑀯𑀦𑁆𑀢’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄.

‘‘𑀲𑀩𑁆𑀩𑀸 𑀓𑀺𑀭𑁂𑀯𑀁 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺,

𑀬𑀲𑀲𑁆𑀲𑀺 𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳;

𑀬𑀲𑁄 𑀘 𑀮𑀤𑁆𑀥𑀸 𑀧𑀼𑀭𑀺𑀫𑀁 𑀉𑀴𑀸𑀭𑀁,

𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡’’𑀦𑁆𑀢𑀺.

𑀇𑀫𑀺𑀲𑁆𑀲𑀸 𑀚𑀸𑀢𑀓𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀜𑁆𑀜𑀯𑀦𑁆𑀢’’𑀇𑀢𑀺 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 𑀘 ‘‘𑀪𑁄 𑀕𑀼𑀡𑀯𑀦𑁆𑀢, 𑀪𑁄 𑀕𑀼𑀡𑀯𑀦𑁆𑀢𑀸, 𑀪𑁄 𑀲𑀢𑀺𑀫𑀦𑁆𑀢, 𑀪𑁄 𑀲𑀢𑀺𑀫𑀦𑁆𑀢𑀸’’𑀢𑀺𑀆𑀤𑀻𑀦𑀺𑀧𑀺 𑀆𑀮𑀧𑀦𑁂𑀓𑀯𑀘𑀦𑀸𑀦𑀺 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀢𑀺𑀲𑁆𑀲𑀁 𑀧𑀸𑀴𑀺𑀬𑀁 ‘‘𑀬𑀲𑀲𑁆𑀲𑀺 𑀧𑀜𑁆𑀜𑀯𑀦𑁆𑀢’’ 𑀇𑀘𑁆𑀘𑀸𑀮𑀧𑀦𑀯𑀘𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀇𑀘𑁆𑀙𑀦𑁆𑀢𑀺. 𑀦𑀦𑁆𑀢𑀺 𑀳𑀺 𑀧𑀤𑀧𑀽𑀭𑀡𑁂 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀜𑁆𑀜𑀯𑀦𑁆𑀢𑀦𑁆𑀢𑀺 𑀧𑀦 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑀼𑀲𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀯𑀘𑀦𑁂 𑀯𑀦𑁆𑀢𑀼𑀧𑀘𑁆𑀘𑀬𑀸𑀤𑀺𑀲𑀳𑀺𑀢𑀸𑀦𑀁 𑀲𑀤𑁆𑀤𑀸𑀦𑀁 ‘‘𑀪𑀕𑀯𑀸, 𑀆𑀬𑀲𑁆𑀫𑀸, 𑀧𑀜𑁆𑀜𑀯𑀦𑁆𑀢, 𑀘𑀓𑁆𑀔𑀼𑀫, 𑀧𑀸𑀧𑀺𑀫’’𑀇𑀢𑀺𑀤𑀲𑁆𑀲𑀺𑀢𑀦𑀬𑁂𑀦 𑀆𑀮𑀧𑀦𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 ‘‘𑀕𑀗𑁆𑀕𑀸𑀪𑀸𑀕𑀻𑀭𑀣𑀻 𑀦𑀸𑀫, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸’’𑀢𑀺 𑀘 ‘‘𑀓𑀼𑀢𑁄 𑀆𑀕𑀢𑀢𑁆𑀣 𑀪𑀦𑁆𑀢𑁂𑀢𑀺, 𑀳𑀺𑀫𑀯𑀦𑁆𑀢𑀸 𑀫𑀳𑀸𑀭𑀸𑀚𑀸’’𑀢𑀺 𑀘 𑀤𑀲𑁆𑀲𑀦𑀢𑁄 ¶ ‘‘𑀕𑀼𑀡𑀯𑀦𑁆𑀢𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀁 𑀓𑀣𑀺𑀢𑀁. 𑀬𑀣𑀸 𑀕𑀼𑀡𑀯𑀦𑁆𑀢𑀼 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸, 𑀏𑀯𑀁 𑀥𑀦𑀯𑀦𑁆𑀢𑀼𑀩𑀮𑀯𑀦𑁆𑀢𑀸𑀤𑀻𑀦𑀁 𑀲𑀢𑀺𑀫𑀦𑁆𑀢𑀼 𑀕𑀢𑀺𑀫𑀦𑁆𑀢𑀸𑀤𑀻𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀯𑀺𑀤𑁆𑀯𑀸𑀤𑀺𑀧𑀤𑀸𑀦𑀁 𑀕𑀼𑀡𑀯𑀸𑀧𑀤𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀫𑁆𑀧𑀺 𑀲𑁄𑀢𑀽𑀦𑀁 𑀧𑀬𑁄𑀕𑁂𑀲𑀼 𑀲𑀫𑁆𑀫𑁄𑀳𑀸𑀧𑀕𑀫𑀢𑁆𑀣𑀁 𑀏𑀓𑀤𑁂𑀲𑀢𑁄 𑀦𑀺𑀩𑁆𑀩𑀘𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀺𑀤𑁆𑀯𑀦𑁆𑀢𑀼𑀇𑀘𑁆𑀘𑀸𑀤𑀺𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀜𑀸𑀡𑀲𑀗𑁆𑀔𑀸𑀢𑁄 𑀯𑁂𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀤𑁆𑀯𑀸, 𑀧𑀡𑁆𑀟𑀺𑀢𑁄. 𑀏𑀢𑁆𑀣 𑀘 𑀯𑀺𑀤𑁆𑀯𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂’’𑀢𑀺𑀆𑀤𑀺 𑀆𑀳𑀘𑁆𑀘𑀧𑀸𑀞𑁄 𑀦𑀺𑀤𑀲𑁆𑀲𑀦𑀁. 𑀅𑀢𑁆𑀭𑀸𑀬𑀁 𑀧𑀤𑀫𑀸𑀮𑀸 𑁋 𑀯𑀺𑀤𑁆𑀯𑀸, 𑀯𑀺𑀤𑁆𑀯𑀸, 𑀯𑀺𑀤𑁆𑀯𑀦𑁆𑀢𑁄. 𑀯𑀺𑀤𑁆𑀯𑀦𑁆𑀢𑀁, 𑀯𑀺𑀤𑁆𑀯𑀦𑁆𑀢𑁂. 𑀯𑀺𑀤𑁆𑀯𑀢𑀸, 𑀯𑀺𑀤𑁆𑀯𑀦𑁆𑀢𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀯𑁂𑀤𑀦𑀸𑀯𑀸, 𑀯𑁂𑀤𑀦𑀸𑀯𑀸, 𑀯𑁂𑀤𑀦𑀸𑀯𑀦𑁆𑀢𑁄. 𑀯𑁂𑀤𑀦𑀸𑀯𑀦𑁆𑀢𑀁, 𑀯𑁂𑀤𑀦𑀸𑀯𑀦𑁆𑀢𑁂. 𑀯𑁂𑀤𑀦𑀸𑀯𑀢𑀸, 𑀯𑁂𑀤𑀦𑀸𑀯𑀦𑁆𑀢𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀏𑀯𑀁 ‘‘𑀲𑀜𑁆𑀜𑀸𑀯𑀸𑀘𑁂𑀢𑀦𑀸𑀯𑀸 𑀲𑀤𑁆𑀥𑀸𑀯𑀸 𑀧𑀜𑁆𑀜𑀯𑀸 𑀲𑀩𑁆𑀩𑀸𑀯𑀸’’𑀇𑀘𑁆𑀘𑀸𑀤𑀻𑀲𑀼𑀧𑀺. 𑀏𑀢𑁆𑀣 𑀘 ‘‘𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀚𑁆𑀛𑁂𑀤𑀻𑀖𑀜𑁆𑀳𑀺 𑀇𑀤𑀁 𑀧𑀤𑀁. 𑀬𑁂𑀪𑀼𑀬𑁆𑀬𑁂𑀦 𑀧𑀦 ‘‘𑀧𑀜𑁆𑀜𑀯𑀸𑀧𑀜𑁆𑀜𑀯𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀫𑀚𑁆𑀛𑁂𑀭𑀲𑁆𑀲𑀸𑀦𑀺𑀧𑀺 𑀪𑀯𑀦𑁆𑀢𑀺. 𑀬𑀲𑀲𑁆𑀲𑀺𑀦𑁄 𑀧𑀭𑀺𑀯𑀸𑀭𑀪𑀽𑀢𑀸 𑀚𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀯𑀸, 𑀅𑀣 𑀯𑀸 𑀬𑀲𑀲𑁆𑀲𑀻 𑀘 𑀬𑀲𑀲𑁆𑀲𑀺𑀯𑀸 𑀘𑀸𑀢𑀺 𑀬𑀲𑀲𑁆𑀲𑀺𑀯𑀸. 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄𑀬𑀁. ‘‘𑀬𑀲𑀲𑁆𑀲𑀺𑀯𑀸’’𑀢𑀺 𑀧𑀤𑀲𑁆𑀲 𑀧𑀦 𑀅𑀢𑁆𑀣𑀺𑀪𑀸𑀯𑁂 𑁋

‘‘𑀔𑀢𑁆𑀢𑀺𑀬𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀅𑀪𑀺𑀚𑀸𑀢𑁄 𑀬𑀲𑀲𑁆𑀲𑀺𑀯𑀸;

𑀥𑀫𑁆𑀫𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑁂 𑀢𑀯𑀸’’𑀢𑀺

𑀇𑀤𑀁 𑀦𑀺𑀤𑀲𑁆𑀲𑀦𑀁. ‘‘𑀬𑀲𑀲𑁆𑀲𑀺𑀯𑀸, 𑀬𑀲𑀲𑁆𑀲𑀺𑀯𑀸, 𑀬𑀲𑀲𑁆𑀲𑀺𑀯𑀦𑁆𑀢𑁄. 𑀬𑀲𑀲𑁆𑀲𑀺𑀯𑀦𑁆𑀢𑀁’’ 𑀇𑀘𑁆𑀘𑀸𑀤𑀺 𑀦𑁂𑀢𑀩𑁆𑀩𑀁. 𑀅𑀢𑁆𑀣𑁂 𑀤𑀲𑁆𑀲𑀦𑀲𑀻𑀮𑀁 𑀅𑀢𑁆𑀣𑀤𑀲𑁆𑀲𑀺, 𑀓𑀺𑀁 ¶ 𑀢𑀁? 𑀜𑀸𑀡𑀁. 𑀅𑀢𑁆𑀣𑀤𑀲𑁆𑀲𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀤𑀲𑁆𑀲𑀺𑀫𑀸, 𑀏𑀢𑁆𑀣 𑀘 𑁋

‘‘𑀢𑀁 𑀢𑀢𑁆𑀣 𑀕𑀢𑀺𑀫𑀸 𑀥𑀺𑀢𑀺𑀫𑀸, 𑀫𑀼𑀢𑀺𑀫𑀸 𑀅𑀢𑁆𑀣𑀤𑀲𑁆𑀲𑀺𑀫𑀸;

𑀲𑀗𑁆𑀔𑀸𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀯𑀺𑀥𑀼𑀭𑁄 𑀏𑀢𑀤𑀩𑁆𑀭𑀯𑀻’’𑀢𑀺

𑀇𑀤𑀫𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁. ‘‘𑀅𑀢𑁆𑀣𑀤𑀲𑁆𑀲𑀺𑀫𑀸, 𑀅𑀢𑁆𑀣𑀤𑀲𑁆𑀲𑀺𑀫𑀸, 𑀅𑀢𑁆𑀣𑀤𑀲𑁆𑀲𑀺𑀫𑀦𑁆𑀢𑁄. 𑀅𑀢𑁆𑀣𑀤𑀲𑁆𑀲𑀺𑀫𑀦𑁆𑀢𑀁’’ 𑀇𑀘𑁆𑀘𑀸𑀤𑀺 𑀦𑁂𑀢𑀩𑁆𑀩𑀁. 𑀧𑀸𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀧𑀺𑀫𑀸, 𑀅𑀓𑀼𑀲𑀮𑀭𑀸𑀲𑀺𑀲𑀫𑀦𑁆𑀦𑀸𑀕𑀢𑁄 𑀫𑀸𑀭𑁄. 𑀧𑀼𑀢𑁆𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀢𑁆𑀢𑀺𑀫𑀸, 𑀩𑀳𑀼𑀧𑀼𑀢𑁆𑀢𑁄. ‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺 𑀏𑀢𑁆𑀣 𑀳𑀺 𑀩𑀳𑀼𑀧𑀼𑀢𑁆𑀢𑁄 ‘‘𑀧𑀼𑀢𑁆𑀢𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀘𑀦𑁆𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘𑀦𑁆𑀤𑀺𑀫𑀸. 𑀘𑀦𑁆𑀤𑁄𑀢𑀺 𑀘𑁂𑀢𑁆𑀣 𑀘𑀦𑁆𑀤𑀯𑀺𑀫𑀸𑀦𑀫𑀥𑀺𑀧𑁆𑀧𑁂𑀢𑀁, 𑀘𑀦𑁆𑀤𑀯𑀺𑀫𑀸𑀦𑀯𑀸𑀲𑀻 𑀧𑀦 𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑀺𑀫𑀸’’𑀢𑀺. 𑀢𑀣𑀸 𑀳𑀺 ‘‘𑀘𑀦𑁆𑀤𑁄 𑀉𑀕𑁆𑀕𑀢𑁄, 𑀧𑀫𑀸𑀡𑀢𑁄 𑀘𑀦𑁆𑀤𑁄 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑁄, 𑀧𑀭𑀺𑀓𑁆𑀔𑁂𑀧𑀢𑁄 𑀢𑀻𑀳𑀺 𑀬𑁄𑀚𑀦𑁂𑀳𑀺 𑀊𑀦𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑁄’’𑀢𑀺𑀆𑀤𑀻𑀲𑀼 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀁. ‘‘𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁, 𑀘𑀦𑁆𑀤𑀺𑀫𑀸 𑀲𑀭𑀡𑀁 𑀕𑀢𑁄’’𑀢𑀺𑀆𑀤𑀻𑀲𑀼 𑀧𑀦 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑀺𑀫𑀸’’𑀢𑀺. 𑀅𑀧𑀭𑁄 𑀦𑀬𑁄 𑁋 𑀘𑀦𑁆𑀤𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘𑀦𑁆𑀤𑀺𑀫𑀸. 𑀘𑀦𑁆𑀤𑁄𑀢𑀺 𑀘𑁂𑀢𑁆𑀣 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀦𑁆𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀧𑀦 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑀺𑀫𑀸’’𑀢𑀺. 𑀢𑀣𑀸 𑀳𑀺 ‘‘𑀭𑀸𑀳𑀼 𑀘𑀦𑁆𑀤𑀁 𑀧𑀫𑀼𑀜𑁆𑀘𑀲𑁆𑀲𑀼, 𑀘𑀦𑁆𑀤𑁄 𑀫𑀡𑀺𑀫𑀬𑀯𑀺𑀫𑀸𑀦𑁂 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 ‘‘𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑁄.

‘‘𑀬𑁄 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀲𑁄𑀫𑀁𑀮𑁄𑀓𑀁𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺

𑀆𑀤𑀻𑀲𑀼 𑀧𑀦 𑀢𑀦𑁆𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀘𑀦𑁆𑀤𑀯𑀺𑀫𑀸𑀦𑀁 ‘‘𑀘𑀦𑁆𑀤𑀺𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 ‘‘𑀘𑀦𑁆𑀤𑁄’’𑀢𑀺 𑀘 ‘‘𑀘𑀦𑁆𑀤𑀺𑀫𑀸’’𑀢𑀺 𑀘 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑀲𑁆𑀲𑀧𑀺 𑀘𑀦𑁆𑀤𑀯𑀺𑀫𑀸𑀦𑀲𑁆𑀲𑀧𑀺 ¶ 𑀦𑀸𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸 𑀘𑀦𑁆𑀤𑀺𑀫𑀸’’𑀢𑀺 𑀇𑀫𑀸𑀦𑀺 𑀧𑀸𑀧𑀲𑀤𑁆𑀤𑀸𑀤𑀺𑀢𑁄 ‘‘𑀢𑀤𑀲𑁆𑀲𑀢𑁆𑀣𑀺’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀇𑀫𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀲𑀺𑀤𑁆𑀥𑀺𑀫𑀼𑀧𑀸𑀕𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀦𑀦𑀼 𑀘 𑀪𑁄 𑀫𑀦𑁆𑀢𑀼𑀧𑀘𑁆𑀘𑀬𑀯𑀲𑁂𑀦𑁂𑀯 𑀲𑀸𑀥𑁂𑀢𑀩𑁆𑀩𑀸𑀦𑀻𑀢𑀺? 𑀦, 𑀓𑀢𑁆𑀣𑀘𑀺𑀧𑀺 𑀅𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀦𑁄 𑀅𑀪𑀸𑀯𑀸. 𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀸𑀧 𑀧𑀼𑀢𑁆𑀢 𑀘𑀦𑁆𑀤𑀢𑁄 𑀧𑀞𑀫𑀁 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀓𑁆𑀓𑀸 𑀲𑀸𑀥𑁂𑀢𑀼𑀦𑁆𑀢𑀺? 𑀲𑀓𑁆𑀓𑀸 𑀭𑀽𑀧𑀫𑀢𑁆𑀢𑀲𑀺𑀚𑁆𑀛𑀦𑀢𑁄, 𑀦𑀬𑁄 𑀧𑀦 𑀲𑁄𑀪𑀦𑁄 𑀦 𑀳𑁄𑀢𑀺. 𑀢𑀣𑀸 𑀳𑀺 𑀧𑀸𑀧 𑀧𑀼𑀢𑁆𑀢𑀸𑀤𑀺𑀢𑁄 𑀅𑀓𑀸𑀭𑀦𑁆𑀢𑀢𑁄 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀫𑀦𑁆𑀢𑀼𑀧𑀘𑁆𑀘𑀬𑁂 𑀯𑀺𑀥𑀺𑀬𑀫𑀸𑀦𑁂 𑀅𑀜𑁆𑀜𑁂𑀳𑀺 𑀕𑀼𑀡𑀬𑀲𑀸𑀤𑀻𑀳𑀺 𑀅𑀓𑀸𑀭𑀦𑁆𑀢𑁂𑀳𑀺 𑀇𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀫𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀓𑀸𑀢𑀩𑁆𑀩𑀢𑀸𑀧𑀲𑀗𑁆𑀕𑁄 𑀲𑀺𑀬𑀸. 𑀦 𑀳𑀺 𑀅𑀦𑁂𑀓𑁂𑀲𑀼 𑀧𑀸𑀴𑀺𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑁆𑀣𑀘𑀺𑀧𑀺 𑀅𑀓𑀸𑀭𑀦𑁆𑀢𑀢𑁄 𑀕𑀼𑀡 𑀬𑀲𑀸𑀤𑀺𑀢𑁄 𑀇𑀓𑀸𑀭𑀸𑀕𑀫𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀼𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑀺, 𑀅𑀝𑁆𑀞𑀸𑀦𑀢𑁆𑀢𑀸 𑀧𑀦 𑀧𑀸𑀧 𑀧𑀼𑀢𑁆𑀢𑀸𑀤𑀺𑀢𑁄 𑀅𑀓𑀸𑀭𑀦𑁆𑀢𑀢𑁄 𑀇𑀓𑀸𑀭𑀸𑀕𑀫𑀁 𑀅𑀓𑀢𑁆𑀯𑀸 𑀇𑀫𑀦𑁆𑀢𑀼𑀧𑀘𑁆𑀘𑀬𑁂 𑀓𑀢𑁂𑀬𑁂𑀯 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀻𑀢𑀺.

𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 𑀫𑀦𑁆𑀢𑀼𑀧𑀘𑁆𑀘𑀬𑁄𑀯 𑀯𑀼𑀢𑁆𑀢𑁄, 𑀦 𑀇𑀫𑀦𑁆𑀢𑀼𑀧𑀘𑁆𑀘𑀬𑁄𑀢𑀺? 𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀫𑁂𑀯. 𑀓𑀣𑀁 𑀜𑀸𑀬𑀢𑀻𑀢𑀺 𑀘𑁂? 𑀬𑀲𑁆𑀫𑀸 𑀢𑀢𑁆𑀣 ‘‘𑀢𑀧𑀸𑀤𑀺𑀢𑁄 𑀲𑀻, 𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈, 𑀫𑀥𑁆𑀯𑀸𑀤𑀺𑀢𑁄 𑀭𑁄, 𑀕𑀼𑀡𑀸𑀤𑀺𑀢𑁄 𑀯𑀦𑁆𑀢𑀽’’𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺 𑀲𑀦𑁆𑀦𑀺𑀳𑀺𑀢𑀢𑁄𑀤𑀦𑁆𑀢𑀲𑀤𑁆𑀤𑀪𑀸𑀯𑁂𑀦 𑀯𑀢𑁆𑀯𑀸 𑀫𑀚𑁆𑀛𑁂 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀅𑀜𑁆𑀜𑀣𑀸 𑀲𑀼𑀢𑁆𑀢𑀁 𑀯𑀢𑁆𑀯𑀸 𑀢𑀢𑁄 𑀲𑀦𑁆𑀦𑀺𑀳𑀺𑀢𑀢𑁄𑀤𑀦𑁆𑀢𑀯𑀲𑁂𑀦 ‘‘𑀲𑀤𑁆𑀥𑀸𑀤𑀺𑀢𑁄 𑀡𑀸’’𑀢𑀺 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 ‘‘𑀲𑀢𑁆𑀬𑀸𑀤𑀻𑀳𑀺𑀫𑀦𑁆𑀢𑀽’’𑀢𑀺 𑀯𑀺𑀲𑀤𑀺𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀇𑀫𑀦𑁆𑀢𑀼 𑀧𑀘𑁆𑀘𑀬𑁄 𑀘 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀓𑀢𑀺 𑀳𑁂𑀲𑀸𑀘𑀭𑀺𑀬𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁. 𑀏𑀢𑁆𑀣 𑀘 𑀤𑀼𑀢𑀺𑀬𑁄 𑀅𑀢𑁆𑀣𑁄 𑀲𑀭𑀲𑀦𑁆𑀥𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺𑀲𑁆𑀲 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 ¶ 𑀧𑀞𑀫𑁄 𑀅𑀢𑁆𑀣𑁄, ‘‘𑀲𑀢𑁆𑀬𑀸𑀤𑀻𑀳𑀺 𑀇𑀫𑀦𑁆𑀢𑀽’’𑀢𑀺 𑀤𑀼𑀢𑀺𑀬𑁄 𑀅𑀢𑁆𑀣𑁄. 𑀇𑀢𑀺 ‘‘𑀲𑁂𑀢𑁄 𑀥𑀸𑀯𑀢𑀻’’𑀢𑀺 𑀧𑀬𑁄𑀕𑁂 𑀯𑀺𑀬 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀲𑀼𑀢𑁆𑀢𑁂 𑀪𑀺𑀦𑁆𑀦𑀲𑀢𑁆𑀢𑀺𑀲𑀫𑀯𑁂𑀢𑀯𑀲𑁂𑀦 𑀅𑀢𑁆𑀣𑀤𑁆𑀯𑀬𑀧𑀝𑀺𑀧𑀢𑁆𑀢𑀺 𑀪𑀯𑀢𑀺, 𑀢𑀲𑁆𑀫𑀸 𑀧𑀭𑀫𑀲𑀼𑀔𑀼𑀫𑀲𑀼𑀕𑀫𑁆𑀪𑀻𑀭𑀢𑁆𑀣𑀯𑀢𑀸 𑀅𑀦𑁂𑀦 𑀲𑀼𑀢𑁆𑀢𑁂𑀦 𑀓𑀢𑁆𑀣𑀘𑀺 𑀲𑀢𑀺 𑀕𑀢𑀺 𑀲𑁂𑀢𑀼 𑀕𑁄𑀇𑀘𑁆𑀘𑀸𑀤𑀺𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀇𑀘𑁆𑀙𑀺𑀢𑁄. 𑀓𑀢𑁆𑀣𑀘𑀺 𑀲𑀢𑀺 𑀧𑀸𑀧 𑀧𑀼𑀢𑁆𑀢𑀇𑀘𑁆𑀘𑀸𑀤𑀺𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀇𑀘𑁆𑀙𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀲𑀢𑀺𑀲𑀤𑁆𑀤𑁄 𑀫𑀦𑁆𑀢𑀼𑀯𑀲𑁂𑀦 𑀕𑀢𑀺𑀥𑀻𑀲𑁂𑀣𑀼𑀕𑁄 𑀇𑀘𑁆𑀘𑀸𑀤𑀻𑀳𑀺, 𑀇𑀫𑀦𑁆𑀢𑀼𑀯𑀲𑁂𑀦 𑀧𑀸𑀧𑀧𑀼𑀢𑁆𑀢𑀸𑀤𑀻𑀳𑀺 𑀘 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀢𑁂𑀲𑀁 𑀧𑀓𑀸𑀭𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀲𑁆𑀫𑀸 𑀏𑀯𑀁 𑀲𑀼𑀢𑁆𑀢𑀢𑁆𑀣𑁄 𑀪𑀯𑀢𑀺 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀼 𑀲𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀤𑁆𑀤𑁂𑀳𑀺 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀘 𑀬𑀣𑀸𑀭𑀳𑀁 ‘𑀢𑀤𑀲𑁆𑀲𑀢𑁆𑀣𑀺’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 ‘‘𑀲𑀢𑀺𑀫𑀸’’𑀢𑀺 𑀏𑀢𑁆𑀣 𑀲𑀢𑀻𑀢𑀺 𑀇𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 ‘‘𑀕𑀢𑀺𑀫𑀸, 𑀥𑀻𑀫𑀸, 𑀲𑁂𑀢𑀼𑀫𑀸, 𑀕𑁄𑀫𑀸’’𑀢𑀺𑀆𑀤𑀻𑀲𑀼 𑀇𑀓𑀸𑀭𑀦𑁆𑀢 𑀈𑀓𑀸𑀭𑀦𑁆𑀢 𑀉𑀓𑀸𑀭𑀦𑁆𑀢𑀦𑀺𑀘𑁆𑀘𑁄𑀓𑀸𑀭𑀦𑁆𑀢𑀢𑁄 𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀘 ‘‘𑀲𑀢𑀺𑀫𑀸’’𑀢𑀺 𑀏𑀢𑁆𑀣 ‘‘𑀲𑀢𑀻’’𑀢𑀺 𑀇𑀓𑀸𑀭𑀦𑁆𑀢𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 ‘‘𑀕𑀢𑀺𑀫𑀸, 𑀧𑀸𑀧𑀺𑀫𑀸, 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀲𑀼 𑀇𑀓𑀸𑀭𑀦𑁆𑀢 𑀅𑀓𑀸𑀭𑀦𑁆𑀢𑀢𑁄 𑀇𑀫𑀦𑁆𑀢𑀼𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀲𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀤𑁆𑀤𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀫𑀦𑁆𑀢𑀼 𑀇𑀫𑀦𑁆𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀬𑀚𑁆𑀚𑁂𑀯𑀁 𑀧𑀘𑁆𑀘𑀬𑀤𑁆𑀯𑀬𑀯𑀺𑀥𑀸𑀬𑀓𑀁 ‘‘𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈’’𑀢𑀺 𑀲𑀼𑀢𑁆𑀢𑀁 𑀯𑀺𑀬 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀦𑀸𑀯𑁄𑀘𑀸𑀢𑀺? 𑀢𑀣𑀸 𑀅𑀯𑀘𑀦𑁂 𑀓𑀸𑀭𑀡𑀫𑀢𑁆𑀣𑀺. 𑀬𑀤𑀺 𑀳𑀺 ‘‘𑀤𑀡𑁆𑀟𑀸𑀤𑀺𑀢𑁄 𑀇𑀓 𑀈’’𑀢𑀺 𑀲𑀼𑀢𑁆𑀢𑀁 𑀯𑀺𑀬 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀏𑀓𑀓𑁆𑀔𑀡𑁂𑀬𑁂𑀯 𑀇𑀫𑀦𑁆𑀢𑀼 𑀫𑀦𑁆𑀢𑀽𑀦𑀁 𑀯𑀘𑀦𑁂𑀦 𑀤𑀡𑁆𑀟𑀲𑀤𑁆𑀤𑀢𑁄 𑀲𑀫𑁆𑀪𑀽𑀢𑀁 ‘‘𑀤𑀡𑁆𑀟𑀺𑀓𑁄 𑀤𑀡𑁆𑀟𑀻’’𑀢𑀺 𑀭𑀽𑀧𑀤𑁆𑀯𑀬𑀫𑀺𑀯 𑀲𑀢𑀺𑀕𑀢𑀺𑀆𑀤𑀺𑀢𑁄𑀧𑀺 𑀯𑀺𑀲𑀤𑀺𑀲𑀭𑀽𑀧𑀤𑁆𑀯𑀬𑀫𑀺𑀘𑁆𑀙𑀺𑀢𑀩𑁆𑀩𑀁 𑀲𑀺𑀬𑀸, 𑀢𑀜𑁆𑀘 𑀦𑀢𑁆𑀣𑀺, 𑀢𑀲𑁆𑀫𑀸 ¶ ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀦 𑀯𑀼𑀢𑁆𑀢𑀁. 𑀅𑀧𑀺𑀘 𑀢𑀣𑀸 𑀯𑀼𑀢𑁆𑀢𑁂 𑀩𑀯𑁆𑀳𑀓𑁆𑀔𑀭𑀢𑀸𑀬 𑀕𑀦𑁆𑀣𑀕𑀭𑀼𑀢𑀸 𑀲𑀺𑀬𑀸. 𑀬𑀲𑁆𑀫𑀸 𑀘 𑀲𑀼𑀢𑁆𑀢𑁂𑀦 𑀦𑀸𑀫 𑀅𑀧𑁆𑀧𑀓𑁆𑀔𑀭𑁂𑀦 𑀅𑀲𑀦𑁆𑀤𑀺𑀤𑁆𑀥𑁂𑀦 𑀲𑀸𑀭𑀯𑀦𑁆𑀢𑁂𑀦 𑀕𑀽𑀴𑁆𑀳𑀦𑀺𑀦𑁆𑀦𑀬𑁂𑀦 𑀲𑀩𑁆𑀩𑀢𑁄𑀫𑀼𑀔𑁂𑀦 𑀅𑀦𑀯𑀚𑁆𑀚𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀘𑁆𑀘𑀸𑀬𑀦𑁂 𑀘 𑀬𑁂𑀪𑀼𑀬𑁆𑀬𑁂𑀦 𑀢𑀸𑀤𑀺𑀲𑀸𑀦𑀺 𑀕𑀫𑁆𑀪𑀻𑀭𑀢𑁆𑀣𑀸𑀦𑀺 𑀲𑀼𑀯𑀺𑀲𑀤𑀜𑀸𑀡𑀯𑀺𑀲𑀬𑀪𑀽𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀉𑀧𑀸𑀛𑀥𑀺𑀓𑀺𑀲𑁆𑀲𑀭𑀯𑀘𑀦𑁂, 𑀲𑀭𑀸 𑀲𑀭𑁂 𑀮𑁄𑀧’’𑀦𑁆𑀢𑀺𑀆𑀤𑀻𑀦𑀺, 𑀇𑀤𑀫𑁆𑀧𑀺 𑀢𑁂𑀲𑀫𑀜𑁆𑀜𑀢𑀭𑀁, 𑀢𑀲𑁆𑀫𑀸 ‘‘𑀲𑀢𑁆𑀬𑀸𑀤𑀺𑀢𑁄 𑀇𑀫𑀦𑁆𑀢𑀼 𑀫𑀦𑁆𑀢𑀽’’𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀼𑀢𑁆𑀢𑁄𑀧𑀤𑁂𑀲𑁂 𑀅𑀓𑀢𑁂𑀧𑀺 𑀇𑀫𑀦𑁆𑀢𑀼𑀦𑁄𑀧𑀺 𑀕𑀳𑀡𑀢𑁆𑀣𑀁 𑀪𑀺𑀦𑁆𑀦𑀲𑀢𑁆𑀢𑀺𑀲𑀫𑀯𑁂𑀢𑀯𑀲𑁂𑀦 ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 ‘‘𑀢𑀧𑀸𑀤𑀺𑀢𑁄 𑀲𑀻’’𑀢𑀺𑀆𑀤𑀻𑀲𑀼 𑀢𑁄𑀤𑀦𑁆𑀢𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀦𑁆𑀢𑀢𑀸 𑀦 𑀲𑀼𑀝𑁆𑀞𑀼 𑀧𑀸𑀓𑀝𑀸 𑀢𑁄𑀧𑀘𑁆𑀘𑀬𑀲𑁆𑀲 𑀏𑀓𑀢𑁆𑀣𑀩𑀯𑁆𑀳𑀢𑁆𑀣𑁂𑀲𑀼 𑀯𑀢𑁆𑀢𑀦𑀢𑁄, ‘‘𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀽’’𑀢𑀺 𑀏𑀢𑁆𑀣 𑀧𑀦 𑀳𑀺𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀢𑁆𑀣𑀢𑀸 𑀅𑀢𑀻𑀯 𑀧𑀸𑀓𑀝𑀸, 𑀢𑀲𑁆𑀫𑀸 𑀩𑀳𑀼𑀯𑀘𑀦𑀕𑁆𑀕𑀳𑀡𑁂𑀦 𑀇𑀫𑀦𑁆𑀢𑀼 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀪𑁄 𑀯𑀺𑀦𑀸𑀧𑀺 𑀇𑀫𑀦𑁆𑀢𑀼𑀧𑀘𑁆𑀘𑀬𑁂𑀦 𑀧𑀸𑀧𑀫𑀲𑁆𑀲𑀢𑁆𑀣𑀻𑀢𑀺 𑀧𑀸𑀧𑀻, 𑀧𑀸𑀧𑀻 𑀏𑀯 𑀧𑀸𑀧𑀺𑀫𑀸𑀢𑀺 𑀲𑀓𑀢𑁆𑀣𑁂 𑀫𑀸𑀧𑀘𑁆𑀘𑀬𑁂 𑀓𑀢𑁂𑀬𑁂𑀯 ‘‘𑀧𑀸𑀧𑀺𑀫𑀸 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀺 ‘‘𑀙𑀝𑁆𑀞𑀫𑁄 𑀲𑁄 𑀧𑀭𑀸𑀪𑀯𑁄’’𑀢𑀺 𑀏𑀢𑁆𑀣 𑀫𑀧𑀘𑁆𑀘𑀬𑁂𑀦 ‘‘𑀙𑀝𑁆𑀞𑀫𑁄’’𑀢𑀺 𑀧𑀤𑀁 𑀯𑀺𑀬𑀸𑀢𑀺? 𑀅𑀢𑀺𑀦𑀬𑀜𑁆𑀜𑀽 𑀪𑀯𑀁, 𑀅𑀢𑀺𑀦𑀬𑀜𑁆𑀜𑀽 𑀦𑀸𑀫𑀸𑀢𑀺 𑀪𑀯𑀁 𑀯𑀢𑁆𑀢𑀩𑁆𑀩𑁄, 𑀦 𑀧𑀦 𑀪𑀯𑀁 𑀲𑀤𑁆𑀤𑀕𑀢𑀺𑀁 𑀚𑀸𑀦𑀸𑀢𑀺, 𑀲𑀤𑁆𑀤𑀕𑀢𑀺𑀬𑁄 𑀘 𑀦𑀸𑀫 𑀩𑀳𑀼𑀯𑀺𑀥𑀸. 𑀢𑀣𑀸 𑀳𑀺 𑀙𑀝𑁆𑀞𑁄𑀬𑁂𑀯 𑀙𑀝𑁆𑀞𑀫𑁄, ‘‘𑀲𑀼𑀢𑁆𑀢𑀫𑁂𑀯 𑀲𑀼𑀢𑁆𑀢𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺, ‘‘𑀤𑁂𑀯𑁄𑀬𑁂𑀯 𑀤𑁂𑀯𑀢𑀸’’𑀢𑀺𑀆𑀤𑀻𑀲𑀼 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺, ‘‘𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸 𑀲𑀤𑁆𑀤𑀕𑀢𑀺. 𑀏𑀯𑀁𑀯𑀺𑀥𑀸𑀲𑀼 𑀲𑀤𑁆𑀤𑀕𑀢𑀻𑀲𑀼 ‘‘𑀧𑀸𑀧𑀻 𑀏𑀯 𑀧𑀸𑀧𑀺𑀫𑀸’’𑀢𑀺𑀆𑀤𑀺𑀓𑀁 𑀓𑀢𑀭𑀁 𑀲𑀤𑁆𑀤𑀕𑀢𑀺𑀁 𑀯𑀤𑁂𑀲𑀺? ‘‘𑀲𑀢𑁆𑀣𑀸 𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸 𑀲𑀸 𑀧𑀼𑀫𑀸’’𑀢𑀺𑀆𑀤𑀻𑀲𑀼 ¶ 𑀘 𑀓𑀢𑀭𑀁 𑀲𑀤𑁆𑀤𑀕𑀢𑀺𑀁 𑀯𑀤𑁂𑀲𑀺? 𑀓𑀢𑀭𑀲𑀤𑁆𑀤𑀦𑁆𑀢𑁄𑀕𑀥𑀁 𑀓𑀢𑀭𑀸𑀬 𑀘 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀬𑁄𑀚𑁂𑀢𑀩𑁆𑀩𑀁 𑀫𑀜𑁆𑀜𑀲𑀻𑀢𑀺? 𑀲𑁄 𑀏𑀯𑀁 𑀧𑀼𑀝𑁆𑀞𑁄 𑀅𑀤𑁆𑀥𑀸 𑀉𑀢𑁆𑀢𑀭𑀺 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑁄 𑀦𑀬𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀸𑀤𑀺𑀲𑀲𑁆𑀫𑀺𑀜𑁆𑀳𑀺 𑀦𑀬𑁂 ‘‘𑀧𑀸𑀧𑀺𑀫𑀢𑀸 𑀧𑀸𑀧𑀺𑀫𑀢𑁄’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀦 𑀲𑀺𑀚𑁆𑀛𑀦𑁆𑀢𑀺, 𑀇𑀫𑀦𑁆𑀢𑀼𑀧𑀘𑁆𑀘𑀬𑀦𑀬𑁂𑀦 𑀧𑀦 𑀲𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀫𑁂𑀯 𑀦𑀬𑁄 𑀧𑀲𑀢𑁆𑀣𑀢𑀭𑁄 𑀆𑀬𑀲𑁆𑀫𑀦𑁆𑀢𑁂𑀳𑀺 𑀲𑀫𑁆𑀫𑀸 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀦𑀺𑀤𑀲𑁆𑀲𑀦𑀁 𑁋

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁,

𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸,

𑀚𑀬𑀁 𑀢𑀤𑀸 𑀤𑁂𑀯𑀕𑀡𑀸 𑀫𑀳𑁂𑀲𑀺𑀦𑁄’’𑀢𑀺 𑀘,

‘‘𑀲𑀸𑀔𑀸𑀧𑀢𑁆𑀢𑀨𑀮𑀽𑀧𑁂𑀢𑁄, 𑀔𑀦𑁆𑀥𑀺𑀫𑀸𑀯𑀫𑀳𑀸𑀤𑀼𑀫𑁄’’𑀢𑀺 𑀘.

𑀧𑀸𑀧𑀺𑀫𑀸, 𑀧𑀸𑀧𑀺𑀫𑀸, 𑀧𑀸𑀧𑀺𑀫𑀦𑁆𑀢𑁄. 𑀧𑀸𑀧𑀺𑀫𑀦𑁆𑀢𑀁. 𑀲𑁂𑀲𑀁 𑀦𑁂𑀬𑁆𑀬𑀁, 𑀏𑀲 𑀦𑀬𑁄 ‘‘𑀔𑀦𑁆𑀥𑀺𑀫𑀸, 𑀧𑀼𑀢𑁆𑀢𑀺𑀫𑀸’’𑀢𑀺𑀆𑀤𑀻𑀲𑀼𑀧𑀺.

𑀇𑀤𑀸𑀦𑀺 𑀬𑀣𑀸𑀧𑀸𑀯𑀘𑀦𑀁 𑀓𑀺𑀜𑁆𑀘𑀺𑀤𑁂𑀯 𑀳𑀺𑀫𑀯𑀦𑁆𑀢𑀼 𑀲𑀢𑀺𑀫𑀦𑁆𑀢𑀸𑀤𑀻𑀦𑀁 𑀯𑀺𑀲𑁂𑀲𑀁 𑀩𑁆𑀭𑀽𑀫. 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄. 𑀲𑀢𑀺𑀫𑀁 𑀪𑀺𑀓𑁆𑀔𑀼𑀁. 𑀩𑀦𑁆𑀥𑀼𑀫𑀁 𑀭𑀸𑀚𑀸𑀦𑀁. 𑀘𑀦𑁆𑀤𑀺𑀫𑀁 𑀤𑁂𑀯𑀧𑀼𑀢𑁆𑀢𑀁. 𑀲𑀢𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄. 𑀇𑀤𑁆𑀥𑀺𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀏𑀓𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀘𑁆𑀘𑀸𑀤𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀯𑀢𑁆𑀢𑀩𑁆𑀩𑀯𑀘𑀦𑀁, ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀩𑀳𑀽𑀦𑀁 𑀯𑀢𑁆𑀢𑀩𑁆𑀩𑀯𑀘𑀦𑀦𑁆𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀺𑀡𑁆𑀡’’𑀦𑁆𑀢𑀺 𑀘𑁂𑀢𑁆𑀣 𑀓𑀣𑀸𑀲𑀻𑀲𑀫𑀢𑁆𑀢𑀁, 𑀢𑁂𑀦 𑀘𑀢𑀼𑀦𑁆𑀦𑀫𑁆𑀧𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀢𑀺𑀭𑁂𑀓𑀲𑀢𑀸𑀦𑀫𑁆𑀧𑀻𑀢𑀺 𑀤𑀲𑁆𑀲𑀺𑀢𑀁 ¶ 𑀳𑁄𑀢𑀺. 𑀩𑀳𑀯𑁄𑀳𑀺 𑀉𑀧𑀸𑀤𑀸𑀬 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀞𑀧𑀺𑀢𑀸. 𑀢𑀢𑁆𑀣 ‘‘𑀆𑀬𑀲𑁆𑀫𑀦𑁆𑀢𑀸’’𑀢𑀺𑀤𑀁 𑀯𑀺𑀦𑀬𑀯𑁄𑀳𑀸𑀭𑀯𑀲𑁂𑀦 𑀤𑁆𑀯𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀩𑁆𑀩𑀲𑀸𑀥𑀸𑀭𑀡𑀁. 𑀯𑀺𑀦𑀬𑀯𑁄𑀳𑀸𑀭𑀜𑁆𑀳𑀺 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑁄𑀳𑀸𑀭𑁂 𑀦 𑀧𑀯𑀢𑁆𑀢𑀢𑀺. ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺𑀤𑀁 𑀧𑀦 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭 ‘‘𑀳𑀺𑀫𑀯𑀦𑁆𑀢𑁄’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦𑁂𑀓𑀯𑀘𑀦𑀁 𑀪𑀯𑀢𑀺, 𑀓𑀢𑁆𑀣𑀘𑀺 𑀩𑀳𑀼𑀯𑀘𑀦𑀫𑁆𑀧𑀺, 𑀢𑁂𑀦𑀸𑀳 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀣𑁂𑀭𑁄 ‘‘𑀳𑀺𑀫𑀯𑀸 𑀢𑀺𑀝𑁆𑀞𑀢𑀺, 𑀳𑀺𑀫𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺. ‘‘𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄’’𑀢𑀺 𑀅𑀬𑀁 𑀏𑀓𑀯𑀘𑀦𑀦𑀬𑁄 𑀬𑀣𑀸𑀭𑀼𑀢𑀧𑀸𑀴𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀭𑀼𑀢𑀧𑀸𑀴𑀺 𑀘 𑀦𑀸𑀫 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸.

𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀸𑀕𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀅𑀢𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀧𑀼𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑁄.

𑀕𑀢𑀺𑀫𑀦𑁆𑀢𑁄 𑀲𑀢𑀺𑀫𑀦𑁆𑀢𑁄, 𑀥𑀺𑀢𑀺𑀫𑀦𑁆𑀢𑁄 𑀘 𑀲𑁄 𑀇𑀲𑀺;

𑀲𑀤𑁆𑀥𑀫𑁆𑀫𑀥𑀸𑀭𑀓𑁄 𑀣𑁂𑀭𑁄, 𑀆𑀦𑀦𑁆𑀤𑁄 𑀭𑀢𑀦𑀸𑀓𑀭𑁄’’

𑀇𑀘𑁆𑀘𑀸𑀤𑀺. 𑀏𑀢𑁆𑀣 ‘‘𑀧𑀼𑀜𑁆𑀜𑀯𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀩𑀳𑀼𑀯𑀘𑀦𑀪𑀸𑀯𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑀸𑀦𑀺𑀧𑀺 𑀓𑀢𑁆𑀣𑀘𑀺 𑀏𑀓𑀯𑀘𑀦𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀯𑀘𑀦𑀪𑀸𑀯𑁄 𑀘 𑀦𑁂𑀲𑀁 𑀕𑀸𑀣𑀸𑀯𑀺𑀲𑀬𑁂 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀬𑀣𑀸𑀧𑀸𑀯𑀘𑀦𑀁 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀳𑀺𑀫𑀯𑀦𑁆𑀢𑀼𑀲𑀢𑀺𑀫𑀦𑁆𑀢𑀼𑀲𑀤𑁆𑀤𑀸𑀤𑀻𑀦𑀁 𑀯𑀺𑀲𑁂𑀲𑀁 𑀜𑀢𑁆𑀯𑀸 𑀧𑀼𑀦 𑀮𑀺𑀗𑁆𑀕𑀦𑁆𑀢𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑀓𑀧𑀤𑀸𑀦𑀫𑀢𑁆𑀣𑁄 𑀘 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀸.

𑀢𑀢𑁆𑀭 ¶ 𑀳𑀺 ‘‘𑀲𑀺𑀭𑀺𑀫𑀸’’𑀢𑀺 𑀧𑀤𑀁 𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦 𑀮𑀺𑀗𑁆𑀕𑀤𑁆𑀯𑀬𑁂 𑀯𑀢𑁆𑀢𑀦𑀢𑁄 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺. ‘‘𑀲𑀺𑀭𑀺𑀫𑀸 𑀧𑀼𑀭𑀺𑀲𑁄’’𑀢𑀺 𑀳𑀺 𑀅𑀢𑁆𑀣𑁂 𑀆𑀓𑀸𑀭𑀦𑁆𑀢𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀲𑀺𑀭𑀺𑀫𑀸 𑀦𑀸𑀫 𑀤𑁂𑀯𑀻’’𑀢𑀺 𑀅𑀢𑁆𑀣𑁂 𑀆𑀓𑀸𑀭𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀉𑀪𑀬𑀫𑁆𑀧𑁂𑀢𑀁 𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸. 𑀅𑀣 𑀯𑀸 𑀧𑀦 𑀧𑀘𑁆𑀙𑀺𑀫𑀁 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁, 𑀲𑀺𑀭𑀻 𑀬𑀲𑁆𑀲 𑀅𑀢𑁆𑀣𑀺 𑀲𑁄 𑀲𑀺𑀭𑀺𑀫𑀸𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑀘𑀦𑀁, 𑀲𑀺𑀭𑀻 𑀬𑀲𑁆𑀲𑀸 𑀅𑀢𑁆𑀣𑀺 𑀲𑀸 𑀲𑀺𑀭𑀺𑀫𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀅𑀢𑁆𑀭𑀺𑀫𑀸𑀦𑀺 𑀓𑀺𑀜𑁆𑀘𑀸𑀧𑀺 𑀲𑀼𑀢𑀺𑀯𑀲𑁂𑀦 𑀦𑀺𑀩𑁆𑀩𑀘𑀦𑀢𑁆𑀣𑀯𑀲𑁂𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑁆𑀣𑀸𑀦𑀺, 𑀢𑀣𑀸𑀧𑀺 𑀧𑀼𑀭𑀺𑀲𑀧𑀤𑀢𑁆𑀣𑀇𑀢𑁆𑀣𑀺𑀧𑀤𑀢𑁆𑀣𑀯𑀸𑀘𑀓𑀢𑁆𑀢𑀸 𑀪𑀺𑀦𑁆𑀦𑀢𑁆𑀣𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀦𑁆𑀢𑁄. 𑀲𑀺𑀭𑀺𑀫𑀦𑁆𑀢𑀁, 𑀲𑀺𑀭𑀺𑀫𑀦𑁆𑀢𑁂. 𑀲𑀺𑀭𑀺𑀫𑀢𑀸, 𑀲𑀺𑀭𑀺𑀫𑀦𑁆𑀢𑁂𑀦. 𑀕𑀼𑀡𑀯𑀦𑁆𑀢𑀼𑀲𑀤𑁆𑀤𑀲𑁆𑀲𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸𑀬𑁄. 𑀲𑀺𑀭𑀺𑀫𑀁, 𑀲𑀺𑀭𑀺𑀫𑀸, 𑀲𑀺𑀭𑀺𑀫𑀸𑀬𑁄. 𑀲𑀺𑀭𑀺𑀫𑀸𑀬. 𑀯𑀓𑁆𑀔𑀫𑀸𑀦𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀯𑀁 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸𑀦𑀁 𑀲𑀫𑀸𑀦𑀲𑀼𑀢𑀺𑀓𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀲𑀫𑀸𑀦𑀦𑀺𑀩𑁆𑀩𑀘𑀦𑀢𑁆𑀣𑀲𑁆𑀲𑀧𑀺 𑀳𑀺 𑀅𑀲𑀫𑀸𑀦𑀲𑀼𑀢𑀺𑀓𑀲𑁆𑀲 ‘‘𑀲𑀺𑀭𑀺𑀫𑀸’’𑀢𑀺 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀧𑀤𑀸𑀦𑀁 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀸𑀘𑀺𑀧𑀺 𑀲𑀫𑀸𑀦𑀢𑀸 𑀦 𑀮𑀩𑁆𑀪𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀺𑀭𑀺𑀫𑀸’’𑀢𑀺 𑀧𑀤𑀁 𑀤𑁆𑀯𑁂𑀥𑀸, 𑀧𑀼𑀫𑀺𑀢𑁆𑀣𑀻𑀲𑀼 𑀧𑀯𑀢𑁆𑀢𑀺𑀢𑁄;

𑀪𑀺𑀚𑁆𑀚𑀢𑀻𑀢𑀺 𑀯𑀺𑀪𑀸𑀯𑁂𑀬𑁆𑀬, 𑀏𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑀫𑀺𑀘𑁆𑀙𑀺𑀢𑀁.

𑀇𑀢𑀺 𑀅𑀪𑀺𑀪𑀯𑀺𑀢𑀸 𑀧𑀤𑁂𑀦 𑀯𑀺𑀲𑀤𑀺𑀲𑀸𑀦𑀺 𑀕𑀼𑀡𑀯𑀸𑀲𑀢𑀺𑀫𑀸𑀤𑀻𑀦𑀺 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀲𑀤𑁆𑀥𑀺𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀳𑀺. 𑀇𑀤𑀸𑀦𑀺 𑀅𑀧𑀭𑀸𑀦𑀺𑀧𑀺 𑀢𑀩𑁆𑀩𑀺𑀲𑀤𑀺𑀲𑀸𑀦𑀺 𑀧𑀤𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫 𑀲𑀤𑁆𑀥𑀺𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀳𑀺. 𑀲𑁂𑀬𑁆𑀬𑀣𑀺𑀤𑀁?

𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸, 𑀆𑀢𑀼𑀫𑀸 𑀲𑀸 𑀧𑀼𑀫𑀸 𑀭𑀳𑀸;

𑀤𑀴𑁆𑀳𑀥𑀫𑁆𑀫𑀸 𑀘 𑀧𑀘𑁆𑀘𑀓𑁆𑀔-𑀥𑀫𑁆𑀫𑀸 𑀘 𑀯𑀺𑀯𑀝𑀘𑁆𑀙𑀤𑀸.

𑀯𑀢𑁆𑀢𑀳𑀸 ¶ 𑀘 𑀢𑀣𑀸 𑀯𑀼𑀢𑁆𑀢-𑀲𑀺𑀭𑀸 𑀘𑁂𑀯 𑀬𑀼𑀯𑀸𑀧𑀺 𑀘;

𑀫𑀖𑀯 𑀅𑀤𑁆𑀥 𑀫𑀼𑀤𑁆𑀥𑀸𑀤𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀏𑀢𑁆𑀣 ‘‘𑀲𑀸’’𑀢𑀺 𑀧𑀤𑀫𑁂𑀯 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀫𑀸𑀓𑀸𑀭𑀦𑁆𑀢𑀁, 𑀲𑁂𑀲𑀸𑀦𑀺 𑀧𑀦 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀸𑀦𑀺 𑀆𑀓𑀸𑀭𑀦𑁆𑀢𑀸𑀦𑀺.

𑀭𑀸𑀚𑀸, 𑀭𑀸𑀚𑀸, 𑀭𑀸𑀚𑀸𑀦𑁄. 𑀭𑀸𑀚𑀸𑀦𑀁, 𑀭𑀸𑀚𑀁, 𑀭𑀸𑀚𑀸𑀦𑁄. 𑀭𑀜𑁆𑀜𑀸, 𑀭𑀸𑀚𑀺𑀦𑀸, 𑀭𑀸𑀚𑀽𑀳𑀺, 𑀭𑀸𑀚𑀽𑀪𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄, 𑀭𑀜𑁆𑀜𑀁, 𑀭𑀸𑀚𑀽𑀦𑀁, 𑀭𑀸𑀚𑀸𑀦𑀁. 𑀭𑀜𑁆𑀜𑀸, 𑀭𑀸𑀚𑀽𑀳𑀺, 𑀭𑀸𑀚𑀽𑀪𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄, 𑀭𑀜𑁆𑀜𑀁, 𑀭𑀸𑀚𑀽𑀦𑀁, 𑀭𑀸𑀚𑀸𑀦𑀁. 𑀭𑀜𑁆𑀜𑁂, 𑀭𑀸𑀚𑀺𑀦𑀺, 𑀭𑀸𑀚𑀽𑀲𑀼. 𑀪𑁄 𑀭𑀸𑀚, 𑀪𑀯𑀦𑁆𑀢𑁄 𑀭𑀸𑀚𑀸𑀦𑁄, 𑀪𑀯𑀦𑁆𑀢𑁄 𑀭𑀸𑀚𑀸 𑀇𑀢𑀺 𑀯𑀸, 𑀅𑀬𑀫𑀫𑁆𑀳𑀸𑀓𑀁 𑀭𑀼𑀘𑀺.

𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 ‘‘𑀭𑀸𑀚𑀸’’𑀢𑀺 𑀩𑀳𑀼𑀯𑀘𑀦𑀁 𑀦 𑀆𑀕𑀢𑀁, 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀆𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀤𑀻𑀲𑀼 𑀦 𑀆𑀕𑀢𑀁, 𑀢𑀣𑀸𑀧𑀺 ‘‘𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸’’𑀢𑀺 𑀧𑀸𑀴𑀺𑀬𑀁 𑀩𑀳𑀼𑀯𑀘𑀦𑁂𑀓𑀯𑀘𑀦𑀯𑀲𑁂𑀦 ‘‘𑀲𑀔𑀸’’𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀭𑀸𑀚𑀸’’𑀢𑀺 𑀩𑀳𑀼𑀯𑀘𑀦𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀢𑀣𑀸 ‘‘𑀩𑁆𑀭𑀳𑁆𑀫𑀸, 𑀅𑀢𑁆𑀢𑀸’’𑀇𑀘𑁆𑀘𑀸𑀤𑀻𑀦𑀺𑀧𑀺 𑀩𑀳𑀼𑀯𑀘𑀦𑀸𑀦𑀺 𑀢𑀕𑁆𑀕𑀢𑀺𑀓𑀢𑁆𑀢𑀸 𑀯𑀺𑀦𑀸 𑀓𑁂𑀦𑀘𑀺 𑀭𑀽𑀧𑀯𑀺𑀲𑁂𑀲𑁂𑀦.

𑀏𑀢𑁆𑀣 𑀘 ‘‘𑀕𑀳𑀧𑀢𑀺𑀓𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀭𑀸𑀚𑀁 𑀭𑀸𑀚𑀪𑁄𑀕𑀁 𑀩𑁆𑀭𑀸𑀳𑁆𑀫𑀡𑀁 𑀅𑀯𑀲𑁂𑀲𑁄 𑀕𑀳𑀧𑀢𑀺𑀓𑁄 𑀦𑀸𑀫𑀸’’𑀢𑀺 𑀤𑀲𑁆𑀲𑀦𑀢𑁄 𑀭𑀸𑀚𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦 𑀆𑀕𑀢𑀁. ‘‘𑀲𑀩𑁆𑀩𑀤𑀢𑁆𑀢𑁂𑀦 𑀭𑀸𑀚𑀺𑀦𑀸’’𑀢𑀺 𑀤𑀲𑁆𑀲𑀦𑀢𑁄 ‘‘𑀭𑀸𑀚𑀺𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀆𑀭𑀸𑀥𑀬𑀢𑀺 𑀭𑀸𑀚𑀸𑀦𑀁, 𑀧𑀽𑀚𑀁 𑀮𑀪𑀢𑀺 𑀪𑀢𑁆𑀢𑀼𑀲𑀽’’𑀢𑀺 𑀤𑀲𑁆𑀲𑀦𑀢𑁄 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀯𑀲𑁂𑀦 ‘‘𑀭𑀸𑀚𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀘𑁆𑀘𑀸𑀬𑀦𑀭𑀽𑀧𑀲𑀺𑀤𑁆𑀥𑀺𑀕𑀦𑁆𑀣𑁂𑀲𑀼 𑀧𑀦 ‘‘𑀭𑀸𑀚𑁂𑀦, 𑀭𑀸𑀚𑁂𑀳𑀺, 𑀭𑀸𑀚𑁂𑀪𑀺. 𑀭𑀸𑀚𑁂𑀲𑀽’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂𑀲𑀼 𑀢𑀸𑀦𑀺 𑀦𑀸𑀕𑀢𑀸𑀦𑀺, 𑀅𑀦𑀸𑀕𑀢𑀪𑀸𑀯𑁄𑀬𑁂𑀯 𑀢𑁂𑀲𑀁 𑀬𑀼𑀢𑁆𑀢𑀢𑀭𑁄 𑀧𑀸𑀴𑀺𑀬𑀁 𑀅𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 𑀏𑀢𑁆𑀣𑁂𑀢𑀸𑀦𑀺 ¶ 𑀅𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑀸𑀦𑀺. 𑀧𑀸𑀴𑀺𑀦𑀬𑁂 𑀳𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀈𑀤𑀺𑀲𑀸𑀦𑀺 𑀧𑀤𑀸𑀦𑀺 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀧𑀦𑀸𑀜𑁆𑀜𑀢𑁆𑀭, 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋 ‘‘𑀆𑀯𑀼𑀢𑁆𑀣𑀁 𑀥𑀫𑁆𑀫𑀭𑀸𑀚𑁂𑀦𑀸’’𑀢𑀺 𑀘, ‘‘𑀲𑀺𑀯𑀺𑀭𑀸𑀚𑁂𑀦 𑀧𑁂𑀲𑀺𑀢𑁄’’𑀢𑀺 𑀘, ‘‘𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕’’𑀦𑁆𑀢𑀺 𑀘, ‘‘𑀦𑀺𑀓𑁆𑀔𑀫𑀦𑁆𑀢𑁂 𑀫𑀳𑀸𑀭𑀸𑀚𑁂, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁂’’𑀢𑀺 𑀘, 𑀏𑀯𑀁 𑀧𑀸𑀴𑀺𑀦𑀬𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 ‘‘𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀓𑁂𑀯𑀮𑀁 𑀧𑀸𑀴𑀺𑀦𑀬𑁂 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁂𑀧𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀲𑀫𑀸𑀲𑁂𑀬𑁂𑀯 𑀧𑀲𑁆𑀲𑀸𑀫, 𑀦 𑀧𑀦𑀸𑀜𑁆𑀜𑀢𑁆𑀭, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀫𑀺𑀤𑀁 𑀞𑀸𑀦𑀁. 𑀓𑁄 𑀳𑀺 𑀦𑀸𑀫 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑀩𑁆𑀩𑀲𑁄 𑀦𑀬𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑀢𑁆𑀭 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀳𑀺 𑀔𑀻𑀡𑀸𑀲𑀯𑁂𑀳𑀺.

𑀏𑀢𑁆𑀣 𑀘 𑀲𑀫𑀸𑀲𑀦𑁆𑀢𑀕𑀢𑀭𑀸𑀚-𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀤𑁆𑀯𑀺𑀥𑀸 𑀯𑀼𑀘𑁆𑀘𑀦𑁆𑀢𑁂 𑀑𑀓𑀸𑀭𑀦𑁆𑀢𑀸𑀓𑀸𑀭𑀦𑁆𑀢𑀯𑀲𑁂𑀦. 𑀢𑀢𑁆𑀭𑁄𑀓𑀸𑀭𑀦𑁆𑀢𑀸 ‘‘𑀫𑀳𑀸𑀭𑀸𑀚𑁄 𑀬𑀼𑀯𑀭𑀸𑀚𑁄 𑀲𑀺𑀯𑀺𑀭𑀸𑀚𑁄 𑀥𑀫𑁆𑀫𑀭𑀸𑀚𑁄’’𑀇𑀘𑁆𑀘𑁂𑀯𑀫𑀸𑀤𑀬𑁄 𑀪𑀯𑀦𑁆𑀢𑀺. 𑀆𑀓𑀸𑀭𑀦𑁆𑀢𑀸 𑀧𑀦 ‘‘𑀫𑀳𑀸𑀭𑀸𑀚𑀸 𑀬𑀼𑀯𑀭𑀸𑀚𑀸 𑀲𑀺𑀯𑀺𑀭𑀸𑀚𑀸 𑀥𑀫𑁆𑀫𑀭𑀸𑀚𑀸’’𑀇𑀘𑁆𑀘𑁂𑀯𑀫𑀸𑀤𑀬𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀘 ‘‘𑀫𑀳𑀸𑀭𑀸𑀚𑁄’’𑀢𑀺𑀆𑀤𑀻𑀦𑀺 𑀦 𑀲𑀦𑁆𑀢𑀺, 𑀢𑀣𑀸𑀧𑀺 ‘‘𑀲𑀩𑁆𑀩𑀫𑀺𑀢𑁆𑀢𑁄 𑀲𑀩𑁆𑀩𑀲𑀔𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺 𑀧𑀸𑀴𑀺𑀬𑀁 ‘‘𑀲𑀩𑁆𑀩𑀲𑀔𑁄’’𑀢𑀺 𑀤𑀲𑁆𑀲𑀦𑀢𑁄 ‘‘𑀫𑀳𑀸𑀭𑀸𑀚𑁄’’𑀢𑀺𑀆𑀤𑀻𑀦𑀺𑀧𑀺 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀲𑀫𑀸𑀲𑁂𑀲𑀼 ‘‘𑀥𑀫𑁆𑀫𑀭𑀸𑀚𑁂𑀦, 𑀥𑀫𑁆𑀫𑀭𑀸𑀚𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀏𑀢𑀸𑀦𑀺 𑀑𑀓𑀸𑀭𑀦𑁆𑀢𑀭𑀽𑀧𑀸𑀦𑀺 𑀏𑀯, 𑀦𑀸𑀓𑀸𑀭𑀦𑁆𑀢𑀭𑀽𑀧𑀸𑀦𑀺. 𑀫𑀳𑀸𑀭𑀸𑀚𑁄, 𑀫𑀳𑀸𑀭𑀸𑀚𑀸. 𑀫𑀳𑀸𑀭𑀸𑀚𑀁, 𑀫𑀳𑀸𑀭𑀸𑀚𑁂. 𑀫𑀳𑀸𑀭𑀸𑀚𑁂𑀦, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺. 𑀫𑀳𑀸𑀭𑀸𑀚𑀲𑁆𑀲, 𑀫𑀳𑀸𑀭𑀸𑀚𑀸𑀦𑀁. 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺. 𑀫𑀳𑀸𑀭𑀸𑀚𑀲𑁆𑀲, 𑀫𑀳𑀸𑀭𑀸𑀚𑀸𑀦𑀁. 𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀺, 𑀫𑀳𑀸𑀭𑀸𑀚𑁂𑀲𑀼. 𑀪𑁄 𑀫𑀳𑀸𑀭𑀸𑀚, 𑀪𑀯𑀦𑁆𑀢𑁄 𑀫𑀳𑀸𑀭𑀸𑀚𑀸 ¶ . 𑀓𑀘𑁆𑀘𑀸𑀬𑀦𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀬𑁂𑀳𑀺 𑀧𑀦 ‘‘𑀪𑁄 𑀫𑀳𑀸𑀭𑀸𑀚𑀸’’𑀇𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀬𑀣𑀸 ‘‘𑀫𑀳𑀸𑀭𑀸𑀚𑁄’’𑀢𑀺 𑀑𑀓𑀸𑀭𑀦𑁆𑀢𑀧𑀤𑀲𑁆𑀲 𑀯𑀲𑁂𑀦, 𑀏𑀯𑀁 ‘‘𑀲𑀺𑀯𑀺𑀭𑀸𑀚𑁄 𑀥𑀫𑁆𑀫𑀭𑀸𑀚𑁄 𑀤𑁂𑀯𑀭𑀸𑀚𑁄’’𑀢𑀺𑀆𑀤𑀻𑀦𑀫𑁆𑀧𑀺 𑀑𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀲𑁂𑀦 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀅𑀬𑀁 𑀧𑀦𑀸𑀓𑀸𑀭𑀦𑁆𑀢𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀸𑀦𑁄. 𑀫𑀳𑀸𑀭𑀸𑀚𑀸𑀦𑀁, 𑀫𑀳𑀸𑀭𑀸𑀚𑀁, 𑀫𑀳𑀸𑀭𑀸𑀚𑀸𑀦𑁄. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀺𑀦𑀸, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁. 𑀫𑀳𑀸𑀭𑀜𑁆𑀜𑁂, 𑀫𑀳𑀸𑀭𑀸𑀚𑀺𑀦𑀺, 𑀫𑀳𑀸𑀭𑀸𑀚𑀽𑀲𑀼. 𑀪𑁄 𑀫𑀳𑀸𑀭𑀸𑀚, 𑀪𑀯𑀦𑁆𑀢𑁄 𑀫𑀳𑀸𑀭𑀸𑀚𑀸𑀦𑁄.

𑀇𑀥𑀸𑀧𑀺 𑀧𑀓𑀭𑀡𑀤𑁆𑀯𑀬𑀦𑀬𑁂𑀦 ‘‘𑀪𑁄 𑀫𑀳𑀸𑀭𑀸𑀚𑀸’’ 𑀇𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀬𑀣𑀸 𑀘 ‘‘𑀫𑀳𑀸𑀭𑀸𑀚𑀸’’𑀢𑀺 𑀆𑀓𑀸𑀭𑀦𑁆𑀢𑀧𑀤𑀲𑁆𑀲 𑀯𑀲𑁂𑀦, 𑀏𑀯𑀁 ‘‘𑀲𑀺𑀯𑀺𑀭𑀸𑀚𑀸, 𑀥𑀫𑁆𑀫𑀭𑀸𑀚𑀸, 𑀤𑁂𑀯𑀭𑀸𑀚𑀸’’𑀢𑀺𑀆𑀤𑀻𑀦𑀫𑁆𑀧𑀺 𑀆𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀲𑁂𑀦 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀥 𑀅𑀧𑀭𑀸𑀧𑀺 𑀅𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀓𑁆𑀭𑀺𑀬𑀸𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀆𑀓𑀸𑀭𑀦𑁆𑀢𑁄𑀓𑀸𑀭𑀦𑁆𑀢𑀸𑀦𑀁 𑀫𑀺𑀲𑁆𑀲𑀓𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑁄 𑀢𑀺𑀝𑁆𑀞𑀢𑀺, 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑀸 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀸𑀭𑀸𑀚𑀸𑀦𑀁, 𑀫𑀳𑀸𑀭𑀸𑀚𑀁 𑀧𑀲𑁆𑀲𑀢𑀺, 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑁂 𑀧𑀲𑁆𑀲𑀢𑀺. 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀺𑀦𑀸, 𑀫𑀳𑀸𑀭𑀸𑀚𑁂𑀦 𑀓𑀢𑀁, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺, 𑀫𑀳𑀸𑀭𑀸𑀚𑁂𑀳𑀺, 𑀫𑀳𑀸𑀭𑀸𑀚𑁂𑀪𑀺 𑀓𑀢𑀁. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀸𑀚𑀲𑁆𑀲 𑀤𑀻𑀬𑀢𑁂, 𑀫𑀳𑀸𑀭𑀜𑁆𑀜𑀸, 𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸 𑀦𑀺𑀲𑁆𑀲𑀝𑀁, 𑀫𑀳𑀸𑀭𑀸𑀚𑀽𑀳𑀺, 𑀫𑀳𑀸𑀭𑀸𑀚𑀽𑀪𑀺, 𑀫𑀳𑀸𑀭𑀸𑀚𑁂𑀳𑀺 ¶ , 𑀫𑀳𑀸𑀭𑀸𑀚𑁂𑀪𑀺 𑀦𑀺𑀲𑁆𑀲𑀝𑀁. 𑀫𑀳𑀸𑀭𑀜𑁆𑀜𑁄, 𑀫𑀳𑀸𑀭𑀸𑀚𑀺𑀦𑁄, 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀫𑀳𑀸𑀭𑀜𑁆𑀜𑀁, 𑀫𑀳𑀸𑀭𑀸𑀚𑀽𑀦𑀁, 𑀫𑀳𑀸𑀭𑀸𑀚𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀫𑀳𑀸𑀭𑀜𑁆𑀜𑁂, 𑀫𑀳𑀸𑀭𑀸𑀚𑀺𑀦𑀺, 𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚𑀽𑀲𑀼, 𑀫𑀳𑀸𑀭𑀸𑀚𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄 𑀫𑀳𑀸𑀭𑀸𑀚 𑀢𑁆𑀯𑀁 𑀢𑀺𑀝𑁆𑀞, 𑀪𑁄𑀦𑁆𑀢𑁄 𑀫𑀳𑀸𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸𑀢𑀺. 𑀏𑀯𑀁 ‘‘𑀬𑀼𑀯𑀭𑀸𑀚𑀸, 𑀬𑀼𑀯𑀭𑀸𑀚𑁄’’𑀢𑀺𑀆𑀤𑀻𑀲𑀼𑀧𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀓𑀲𑁆𑀫𑀸 𑀧𑀓𑀭𑀡𑀓𑀢𑁆𑀢𑀼𑀦𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀳𑀦𑁆𑀢𑁄 𑀯𑀸𑀬𑀸𑀫𑁄 𑀘 𑀫𑀳𑀦𑁆𑀢𑁄 𑀘 𑀧𑀭𑀓𑁆𑀓𑀫𑁄 𑀓𑀢𑁄, 𑀦𑀦𑁆𑀯𑁂𑀢𑁂𑀲𑀼𑀧𑀺 𑀧𑀤𑁂𑀲𑀼 𑀓𑀸𑀦𑀺𑀘𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀓𑀸𑀦𑀺𑀘𑀺 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺? 𑀯𑀺𑀜𑁆𑀜𑀽𑀳𑀺 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 ‘‘𑀧𑀓𑀭𑀡𑀓𑀢𑁆𑀢𑀸𑀭𑁂𑀦𑁂𑀢𑁆𑀣 𑀲𑁄 𑀘 𑀫𑀳𑀦𑁆𑀢𑁄 𑀯𑀸𑀬𑀸𑀫𑁄 𑀲𑁄 𑀘 𑀫𑀳𑀦𑁆𑀢𑁄 𑀧𑀭𑀓𑁆𑀓𑀫𑁄 𑀲𑀸𑀝𑁆𑀞𑀓𑀣𑁂 𑀦𑀯𑀗𑁆𑀕𑁂 𑀲𑀢𑁆𑀣𑀼𑀲𑀸𑀲𑀦𑁂 𑀲𑀤𑁆𑀤𑁂𑀲𑀼 𑀘 𑀅𑀢𑁆𑀣𑁂𑀲𑀼 𑀘 𑀲𑁄𑀢𑀸𑀭𑀸𑀦𑀁 𑀲𑀼𑀝𑁆𑀞𑀼 𑀓𑁄𑀲𑀮𑁆𑀮𑀼𑀧𑁆𑀧𑀸𑀤𑀦𑁂𑀦 𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀢𑁆𑀣𑀁 𑀓𑀢𑁄, 𑀬𑀸𑀦𑀺 𑀘𑁂𑀢𑀸𑀦𑀺 𑀢𑁂𑀦 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀏𑀢𑁂𑀲𑀼 𑀓𑀸𑀦𑀺𑀘𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀓𑀸𑀦𑀺𑀘𑀺 𑀦 𑀯𑀺𑀚𑁆𑀚𑀦𑁆𑀢𑀺. 𑀏𑀢𑁆𑀣 𑀬𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀯𑀺𑀚𑁆𑀚𑀫𑀸𑀦𑀯𑀲𑁂𑀦 𑀕𑀳𑀺𑀢𑀸𑀦𑀺. 𑀬𑀸𑀦𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑀯𑀲𑁂𑀦 𑀧𑀸𑀴𑀺𑀦𑀬𑀯𑀲𑁂𑀦 𑀘 𑀕𑀳𑀺𑀢𑀸𑀦𑀻’’𑀢𑀺. 𑀅𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀸 𑁋

‘‘𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;

𑀥𑀦𑀼𑀁 𑀢𑀽𑀡𑀺𑀜𑁆𑀘 𑀦𑀺𑀓𑁆𑀔𑀺𑀧𑁆𑀧, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺

𑀇𑀤𑀁 𑀆𑀓𑀸𑀭𑀦𑁆𑀢𑀲𑁆𑀲 𑀫𑀳𑀸𑀭𑀸𑀚𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀬𑀲𑁆𑀫𑀸 ‘‘𑀲𑀩𑁆𑀩𑀲𑀔𑁄’’𑀢𑀺 𑀧𑀸𑀴𑀺 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀦 𑀦𑀬𑁂𑀦 ‘‘𑀫𑀳𑀸𑀭𑀸𑀚𑁄’’𑀢𑀺𑀧𑀺 𑀑𑀓𑀸𑀭𑀦𑁆𑀢𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺 𑀧𑀼𑀭𑀺𑀲𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄 𑀘. 𑀢𑁂𑀦𑁂𑀯 𑀘 ‘‘𑀢𑀫𑀩𑁆𑀭𑀯𑀺 𑀫𑀳𑀸𑀭𑀸𑀚𑀸. 𑀦𑀺𑀓𑁆𑀔𑀫𑀦𑁆𑀢𑁂 𑀫𑀳𑀸𑀭𑀸𑀚𑁂’’𑀢𑀺𑀆𑀤𑀻𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀏𑀯𑀁 ¶ 𑀫𑀳𑀸𑀭𑀸𑀚𑀲𑀤𑁆𑀤𑀲𑁆𑀲 𑀑𑀓𑀸𑀭𑀦𑁆𑀢𑀢𑁆𑀢𑁂 𑀲𑀺𑀤𑁆𑀥𑁂 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸, 𑀫𑀳𑀸𑀭𑀸𑀚𑀫𑁆𑀳𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀜𑁆𑀘 ‘‘𑀫𑀳𑀸𑀭𑀸𑀚𑁂, 𑀫𑀳𑀸𑀭𑀸𑀚𑀲𑁆𑀫𑀺𑀁, 𑀫𑀳𑀸𑀭𑀸𑀚𑀫𑁆𑀳𑀻’’𑀢𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀜𑁆𑀘 𑀲𑀺𑀤𑁆𑀥𑀸𑀦𑀺 𑀏𑀯 𑀳𑁄𑀦𑁆𑀢𑀺 𑀧𑀸𑀴𑀺𑀬𑀁 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸. ‘‘𑀭𑀸𑀚𑁂𑀦, 𑀭𑀸𑀚𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀧𑀦 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀦𑀺 𑀦 𑀳𑁄𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀭𑀸𑀚𑀸 𑀩𑁆𑀭𑀳𑁆𑀫𑀸 𑀲𑀔𑀸 𑀅𑀢𑁆𑀢𑀸’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 ‘‘𑀧𑀼𑀭𑀺𑀲𑁄 𑀉𑀭𑀕𑁄’’𑀢𑀺𑀆𑀤𑀻𑀦𑀺 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀩𑁆𑀩𑀣𑀸 𑀲𑀤𑀺𑀲𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀦𑁂𑀲𑀁 ‘‘𑀭𑀜𑁆𑀜𑀸 𑀩𑁆𑀭𑀳𑁆𑀫𑀼𑀦𑀸 𑀲𑀔𑀺𑀦𑀸 𑀅𑀢𑁆𑀢𑀦𑀸 𑀅𑀢𑁆𑀢𑁂𑀦 𑀲𑀸𑀦𑀸 𑀧𑀼𑀫𑀼𑀦𑀸’’𑀢𑀺𑀆𑀤𑀻𑀦𑀺 𑀯𑀺𑀲𑀤𑀺𑀲𑀸𑀦𑀺𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀦 𑀲𑀓𑁆𑀓𑀸 𑀦𑀬𑀯𑀲𑁂𑀦 𑀚𑀸𑀦𑀺𑀢𑀼𑀁. 𑀏𑀯𑀁 𑀤𑀼𑀚𑁆𑀚𑀸𑀦𑀢𑁆𑀢𑀸 𑀧𑀦 𑀧𑀸𑀴𑀺𑀬𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀘 𑀬𑀣𑀸𑀭𑀼𑀢𑀧𑀤𑀸𑀦𑁂𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀫𑀳𑀸𑀭𑀸𑀚𑀲𑀤𑁆𑀤𑀸𑀤𑀻𑀦𑀁 𑀧𑀦 𑀑𑀓𑀸𑀭𑀦𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀬𑁂𑀯 ‘‘𑀧𑀼𑀭𑀺𑀲𑀦𑀬𑁄𑀕𑀥𑀸 𑀇𑀫𑁂 𑀲𑀤𑁆𑀤𑀸’’𑀢𑀺 𑀦𑀬𑀕𑁆𑀕𑀳𑀡𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀦𑀬𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀬𑀣𑀸 𑀳𑀺 𑁋

‘‘𑀏𑀢𑀜𑁆𑀳𑀺 𑀢𑁂 𑀤𑀼𑀭𑀸𑀚𑀸𑀦𑀁, 𑀬𑀁 𑀲𑁂𑀲𑀺 𑀫𑀢𑀲𑀸𑀬𑀺𑀓𑀁;

𑀬𑀲𑁆𑀲 𑀢𑁂 𑀓𑀟𑁆𑀠𑀫𑀸𑀦𑀲𑁆𑀲, 𑀳𑀢𑁆𑀣𑀸 𑀤𑀡𑁆𑀟𑁄𑀦 𑀫𑀼𑀘𑁆𑀘𑀢𑀻’’𑀢𑀺

𑀏𑀢𑁆𑀣 ‘‘𑀳𑀢𑁆𑀣𑀸’’𑀢𑀺, ‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢’’𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀤𑀡𑁆𑀟𑀸’’𑀢𑀺 𑀘 𑀑𑀓𑀸𑀭𑀦𑁆𑀢𑀲𑁆𑀲 𑀧𑀜𑁆𑀘𑀫𑀺𑀬𑁂𑀓𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀉𑀭𑀕𑀸, 𑀧𑀝𑀗𑁆𑀕𑀸, 𑀯𑀺𑀳𑀕𑀸’’𑀢𑀺𑀆𑀤𑀻𑀦𑀺𑀧𑀺 𑀑𑀓𑀸𑀭𑀦𑁆𑀢𑀸𑀦𑀺 𑀧𑀜𑁆𑀘𑀫𑀺𑀬𑁂𑀓𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 ‘‘𑀤𑀸𑀞𑀺𑀦𑀺 𑀫𑀸𑀢𑀺𑀫𑀜𑁆𑀜𑀯𑁆𑀳𑁄, 𑀲𑀺𑀗𑁆𑀕𑀸𑀮𑁄 𑀫𑀫 𑀧𑀸𑀡𑀤𑁄’’𑀢𑀺 𑀏𑀢𑁆𑀣 ‘‘𑀫𑀜𑁆𑀜𑀯𑁆𑀳𑁄’’𑀢𑀺, ‘‘𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸’’𑀢𑀺 𑀏𑀢𑁆𑀣 𑀧𑀦 ‘‘𑀓𑀧𑁆𑀧𑀬𑀯𑁆𑀳𑁄’’𑀢𑀺 𑀘 𑀓𑁆𑀭𑀺𑀬𑀸𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀕𑀘𑁆𑀙𑀯𑁆𑀳𑁄, 𑀪𑀼𑀜𑁆𑀚𑀯𑁆𑀳𑁄, 𑀲𑀬𑀯𑁆𑀳𑁄’’𑀢𑀺𑀆𑀤𑀻𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀕𑀡𑁆𑀳𑀦𑁆𑀢𑀺 𑀘 𑀢𑀸𑀤𑀺𑀲𑀸𑀦𑀺 𑀧𑀤𑀭𑀽𑀧𑀸𑀦𑀺 𑀲𑀸𑀲𑀦𑁂 𑀲𑀼𑀓𑀼𑀲𑀮𑀸 𑀓𑀼𑀲𑀮𑀸, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺𑀧𑀺 𑀦𑀬𑀕𑁆𑀕𑀸𑀳𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸 ¶ , 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀦𑀬𑀕𑁆𑀕𑀸𑀳𑀯𑀲𑁂𑀦 𑀧𑀦 𑀕𑀳𑀡𑁂 𑀅𑀲𑀢𑀺 𑀓𑀣𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀭𑀺𑀧𑀼𑀡𑁆𑀡𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀢𑀺𑀬𑁂𑀯 𑀢𑀲𑁆𑀫𑀺𑀁 𑀧𑀭𑀺𑀧𑀼𑀡𑁆𑀡𑀸 𑀪𑀯𑀦𑁆𑀢𑀺.

𑀢𑀣𑀸 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀘 𑀧𑀸𑀝𑀺𑀏𑀓𑁆𑀓𑀁 𑀧𑀸𑀝𑀺𑀏𑀓𑁆𑀓𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑀸𑀳𑀺 𑀲𑀢𑁆𑀢𑀳𑀺 𑀅𑀝𑁆𑀞𑀳𑀺 𑀯𑀸 𑀦𑀸𑀫𑀯𑀺𑀪𑀢𑁆𑀢𑀻𑀳𑀺 𑀙𑀦𑁆𑀦𑀯𑀼𑀢𑀺𑀬𑀸 𑀘 𑀆𑀔𑁆𑀬𑀸𑀢𑀺𑀓𑀯𑀘𑀦𑁂𑀳𑀺 𑀬𑁄𑀚𑀺𑀢𑀸𑀦𑀺 𑀦 𑀲𑀦𑁆𑀢𑀺, 𑀦𑀬𑀯𑀲𑁂𑀦 𑀧𑀦 𑀲𑀦𑁆𑀢𑀺𑀬𑁂𑀯, 𑀇𑀢𑀺 𑀦𑀬𑀯𑀲𑁂𑀦 ‘‘𑀫𑀳𑀸𑀭𑀸𑀚𑀸, 𑀫𑀳𑀸𑀭𑀸𑀚𑀲𑁆𑀫𑀸’’𑀢𑀺𑀆𑀤𑀻𑀦𑀺 𑀅𑀫𑁆𑀳𑁂𑀳𑀺 𑀞𑀧𑀺𑀢𑀸𑀦𑀺. ‘‘𑀫𑀳𑀸𑀭𑀸𑀚𑀸 𑀢𑀺𑀝𑁆𑀞𑀦𑁆𑀢𑀺, 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸’’𑀢𑀺 𑀇𑀫𑀸𑀦𑀺 𑀧𑀦 ‘‘𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸 𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀓𑀼𑀫𑁆𑀪𑀡𑁆𑀟𑀲𑁂𑀦𑀸𑀬𑀸’’𑀢𑀺 𑀤𑀲𑁆𑀲𑀦𑀢𑁄,

‘‘𑀘𑀢𑁆𑀢𑀸𑀭𑁄 𑀢𑁂 𑀫𑀳𑀸𑀭𑀸𑀚𑀸, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀤𑀤𑁆𑀤𑀴𑁆𑀳𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺

𑀤𑀲𑁆𑀲𑀦𑀢𑁄 𑀘 𑀯𑀼𑀢𑁆𑀢𑀸𑀦𑀺. ‘‘𑀫𑀳𑀸𑀭𑀸𑀚’’𑀦𑁆𑀢𑀺𑀆𑀤𑀻𑀦𑀺𑀧𑀺 𑀧𑀸𑀴𑀺𑀜𑁆𑀘 𑀧𑀸𑀴𑀺𑀦𑀬𑀜𑁆𑀘 𑀤𑀺𑀲𑁆𑀯𑀸 𑀏𑀯 𑀯𑀼𑀢𑁆𑀢𑀸𑀦𑀺. 𑀅𑀲𑀫𑀸𑀲𑁂 ‘‘𑀭𑀸𑀚𑀁, 𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀦 𑀧𑀲𑁆𑀲𑀸𑀫, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑀫𑀺𑀤𑀁 𑀞𑀸𑀦𑀁. 𑀇𑀤𑀜𑁆𑀳𑀺 𑀤𑀼𑀤𑁆𑀤𑀲𑀁 𑀯𑀻𑀭𑀚𑀸𑀢𑀺𑀦𑀸 𑀚𑀸𑀦𑀺𑀢𑀩𑁆𑀩𑀝𑁆𑀞𑀸𑀦𑀁. 𑀲𑀘𑁂 𑀧𑀦𑀸𑀬𑀲𑁆𑀫𑀦𑁆𑀢𑁄 𑀩𑀼𑀤𑁆𑀥𑀯𑀘𑀦𑁂 𑀯𑀸 𑀧𑁄𑀭𑀸𑀡𑀺𑀓𑀸𑀲𑀼 𑀯𑀸 𑀅𑀝𑁆𑀞𑀓𑀣𑀸𑀲𑀼 𑀅𑀲𑀫𑀸𑀲𑁂 ‘‘𑀭𑀸𑀚𑀁, 𑀭𑀸𑀚𑁂𑀦𑀸’’𑀢𑀺𑀆𑀤𑀻𑀦𑀺 𑀧𑀲𑁆𑀲𑁂𑀬𑁆𑀬𑀸𑀣, 𑀢𑀤𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣. 𑀓𑁄 𑀳𑀺 𑀦𑀸𑀫 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀩𑀼𑀤𑁆𑀥𑀯𑀘𑀦𑁂 𑀯𑁄𑀳𑀸𑀭𑀧𑁆𑀧𑀪𑁂𑀤𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑀢𑁆𑀭 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀳𑀺 𑀫𑀳𑀸𑀔𑀻𑀡𑀸𑀲𑀯𑁂𑀳𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀁, 𑀚𑀜𑁆𑀜𑀸 𑀧𑀼𑀩𑁆𑀩𑀸𑀧𑀭𑀸𑀦𑀺 𑀘𑀸’’𑀢𑀺.

𑀩𑁆𑀭𑀳𑁆𑀫𑀸 ¶ , 𑀩𑁆𑀭𑀳𑁆𑀫𑀸, 𑀩𑁆𑀭𑀳𑁆𑀫𑀸𑀦𑁄. 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀁, 𑀩𑁆𑀭𑀳𑁆𑀫𑀸𑀦𑁄. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺, 𑀩𑁆𑀭𑀳𑁆𑀫𑁂𑀪𑀺, 𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺. 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀼𑀦𑁄, 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀽𑀦𑀁. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺, 𑀩𑁆𑀭𑀳𑁆𑀫𑁂𑀪𑀺, 𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺. 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀼𑀦𑁄, 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀽𑀦𑀁. 𑀩𑁆𑀭𑀳𑁆𑀫𑀦𑀺, 𑀩𑁆𑀭𑀳𑁆𑀫𑁂𑀲𑀼, 𑀪𑁄 𑀩𑁆𑀭𑀳𑁆𑀫, 𑀪𑁄 𑀩𑁆𑀭𑀳𑁆𑀫𑁂, 𑀪𑀯𑀦𑁆𑀢𑁄 𑀩𑁆𑀭𑀳𑁆𑀫𑀸𑀦𑁄.

𑀬𑀫𑀓𑀫𑀳𑀸𑀣𑁂𑀭𑀭𑀼𑀘𑀺𑀬𑀸 ‘‘𑀪𑁄 𑀩𑁆𑀭𑀳𑁆𑀫𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀸. 𑀏𑀢𑁆𑀣 𑀧𑀦 ‘‘𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 𑀤𑁂𑀯𑁂𑀳𑀺 𑀩𑁆𑀭𑀳𑁆𑀫𑀽𑀳𑀻’’𑀢𑀺 𑀝𑀻𑀓𑀸𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄, ‘‘𑀩𑁆𑀭𑀳𑁆𑀫𑀽𑀦𑀁 𑀯𑀘𑀻𑀖𑁄𑀲𑁄 𑀳𑁄𑀢𑀻’’𑀢𑀺 𑀘 ‘‘𑀩𑁆𑀭𑀳𑁆𑀫𑀽𑀦𑀁 𑀯𑀺𑀫𑀸𑀦𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄, ‘‘𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺 𑀆𑀳𑀘𑁆𑀘𑀪𑀸𑀲𑀺𑀢𑀲𑁆𑀲 𑀘 𑀤𑀲𑁆𑀲𑀦𑀢𑁄 ‘‘𑀩𑁆𑀭𑀳𑁆𑀫𑀽𑀳𑀺, 𑀩𑁆𑀭𑀳𑁆𑀫𑀽𑀪𑀺, 𑀩𑁆𑀭𑀳𑁆𑀫𑀽𑀦𑀁, 𑀩𑁆𑀭𑀳𑁆𑀫𑁂’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀓𑀘𑁆𑀘𑀸𑀬𑀦𑁂𑀲𑀼 𑀦 𑀆𑀕𑀢𑀸𑀦𑀺.

𑀲𑀔𑀸, 𑀲𑀔𑀸, 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄. 𑀲𑀔𑀁, 𑀲𑀔𑀸𑀭𑀁, 𑀲𑀔𑀸𑀦𑀁, 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄. 𑀲𑀔𑀺𑀦𑀸, 𑀲𑀔𑀸𑀭𑁂𑀳𑀺, 𑀲𑀔𑀸𑀭𑁂𑀪𑀺, 𑀲𑀔𑁂𑀳𑀺, 𑀲𑀔𑁂𑀪𑀺. 𑀲𑀔𑀺𑀲𑁆𑀲, 𑀲𑀔𑀺𑀦𑁄, 𑀲𑀔𑀻𑀦𑀁, 𑀲𑀔𑀸𑀭𑀸𑀦𑀁, 𑀲𑀔𑀸𑀦𑀁. 𑀲𑀔𑀸𑀭𑀲𑁆𑀫𑀸, 𑀲𑀔𑀺𑀦𑀸, 𑀲𑀔𑀸𑀭𑁂𑀳𑀺, 𑀲𑀔𑀸𑀭𑁂𑀪𑀺, 𑀲𑀔𑁂𑀳𑀺, 𑀲𑀔𑁂𑀪𑀺. 𑀲𑀔𑀺𑀲𑁆𑀲, 𑀲𑀔𑀺𑀦𑁄, 𑀲𑀔𑀻𑀦𑀁, 𑀲𑀔𑀸𑀭𑀸𑀦𑀁, 𑀲𑀔𑀸𑀦𑀁. 𑀲𑀔𑁂, 𑀲𑀔𑁂𑀲𑀼, 𑀲𑀔𑀸𑀭𑁂𑀲𑀼. 𑀪𑁄 𑀲𑀔, 𑀪𑁄 𑀲𑀔𑀸, 𑀪𑁄 𑀲𑀔𑀺, 𑀪𑁄 𑀲𑀔𑀻, 𑀪𑁄 𑀲𑀔𑁂, 𑀪𑀯𑀦𑁆𑀢𑁄 𑀲𑀔𑀺𑀦𑁄, 𑀲𑀔𑀸𑀦𑁄, 𑀲𑀔𑀸𑀬𑁄.

𑀬𑀫𑀓𑀫𑀳𑀸𑀣𑁂𑀭𑀫𑀢𑁂𑀦 ‘‘𑀪𑁄 𑀲𑀔𑀸’’𑀇𑀢𑀺 𑀩𑀳𑀼𑀯𑀘𑀦𑀁 𑀯𑀸. 𑀧𑀸𑀴𑀺𑀬𑀁 𑀧𑀦 𑀲𑀼𑀯𑀡𑁆𑀡𑀓𑀓𑁆𑀓𑀝𑀚𑀸𑀢𑀓𑁂 ‘‘𑀳𑀭𑁂 𑀲𑀔𑀸 𑀓𑀺𑀲𑁆𑀲 𑀦𑀼 𑀫𑀁 𑀚𑀳𑀸𑀲𑀻’’𑀢𑀺 𑀤𑀻𑀖𑀯𑀲𑁂𑀦 𑀯𑀼𑀢𑁆𑀢𑁄 𑀲𑀔𑀸𑀲𑀤𑁆𑀤𑁄 𑀆𑀮𑀧𑀦𑁂𑀓𑀯𑀘𑀦𑀁, 𑀢𑀲𑁆𑀫𑀸 𑀬𑀫𑀓𑀫𑀳𑀸𑀣𑁂𑀭𑀦𑀬𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁂 ¶ ? 𑀦𑁄 𑀦 𑀬𑀼𑀚𑁆𑀚𑀢𑀺. 𑀬𑀲𑁆𑀫𑀸 ‘‘𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸’’𑀢𑀺 𑀫𑀦𑁄𑀚𑀚𑀸𑀢𑀓𑁂 𑀲𑀔𑀸𑀲𑀤𑁆𑀤𑁄 𑀏𑀓𑀯𑀘𑀦𑀫𑁆𑀧𑀺 𑀳𑁄𑀢𑀺 𑀩𑀳𑀼𑀯𑀘𑀦𑀫𑁆𑀧𑀺. 𑀢𑀣𑀸 𑀳𑀺 𑀢𑀢𑁆𑀣 𑀧𑀞𑀫𑀧𑀸𑀤𑁂 𑀩𑀳𑀼𑀯𑀘𑀦𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀦𑁂𑀓𑀯𑀘𑀦𑀁, 𑀢𑀲𑁆𑀫𑀸 𑀬𑀫𑀓𑀫𑀳𑀸𑀣𑁂𑀭𑁂𑀦 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀲𑀔𑀸𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀲𑀩𑁆𑀩𑀫𑀺𑀢𑁆𑀢𑁄 𑀲𑀩𑁆𑀩𑀲𑀔𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺 𑀧𑀸𑀞𑀸𑀦𑀼𑀮𑁄𑀫𑁂𑀦 𑀲𑀫𑀸𑀲𑁂 𑀮𑀩𑁆𑀪𑀫𑀸𑀦𑀲𑁆𑀲 𑀲𑀔𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺 ‘‘𑀲𑀩𑁆𑀩𑀲𑀔𑁄, 𑀲𑀩𑁆𑀩𑀲𑀔𑀸, 𑀲𑀩𑁆𑀩𑀲𑀔𑀁, 𑀲𑀩𑁆𑀩𑀲𑀔𑁂’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦. 𑀢𑀢𑁆𑀭𑀸𑀬𑀁 𑀲𑀫𑀸𑀲𑀯𑀺𑀕𑁆𑀕𑀳𑁄 𑁋 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀲𑀔𑀸, 𑀲𑀩𑁆𑀩𑁂 𑀯𑀸 𑀚𑀦𑀸 𑀲𑀔𑀺𑀦𑁄 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀲𑀔𑁄, 𑀬𑀣𑀸 𑀲𑀩𑁆𑀩𑀯𑁂𑀭𑀻𑀢𑀺.

𑀅𑀢𑁆𑀢𑀸, 𑀅𑀢𑁆𑀢𑀸, 𑀅𑀢𑁆𑀢𑀸𑀦𑁄. 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀁, 𑀅𑀢𑁆𑀢𑀸𑀦𑁄. 𑀅𑀢𑁆𑀢𑀦𑀸, 𑀅𑀢𑁆𑀢𑁂𑀦, 𑀅𑀢𑁆𑀢𑀦𑁂𑀳𑀺, 𑀅𑀢𑁆𑀢𑀦𑁂𑀪𑀺. 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀸, 𑀅𑀢𑁆𑀢𑀦𑁂𑀳𑀺, 𑀅𑀢𑁆𑀢𑀦𑁂𑀪𑀺. 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀺, 𑀅𑀢𑁆𑀢𑀦𑁂𑀲𑀼. 𑀪𑁄 𑀅𑀢𑁆𑀢, 𑀪𑀯𑀦𑁆𑀢𑁄 𑀅𑀢𑁆𑀢𑀸, 𑀪𑁄𑀦𑁆𑀢𑁄 𑀅𑀢𑁆𑀢𑀸𑀦𑁄.

𑀏𑀢𑁆𑀣 𑀧𑀦 𑀅𑀢𑁆𑀢𑀁 𑀦𑀺𑀭𑀗𑁆𑀓𑀢𑁆𑀯𑀸𑀦 𑀧𑀺𑀬𑀸𑀦𑀺 𑀲𑁂𑀯𑀢𑀺.

‘‘𑀲𑀘𑁂 𑀕𑀘𑁆𑀙𑀲𑀺 𑀧𑀜𑁆𑀘𑀸𑀮𑀁, 𑀔𑀺𑀧𑁆𑀧’𑀫𑀢𑁆𑀢𑀁 𑀚𑀳𑀺𑀲𑁆𑀲𑀲𑀺;

𑀫𑀺𑀕𑀁 𑀧𑀦𑁆𑀣𑀸𑀦𑀼𑀧𑀦𑁆𑀦𑀁𑀯, 𑀫𑀳𑀦𑁆𑀢𑀁 𑀪𑀬𑀫𑁂𑀲𑁆𑀲𑀢𑀻’’𑀢𑀺

𑀧𑀸𑀴𑀻𑀲𑀼 ‘‘𑀅𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀦𑀢𑁄 ‘‘𑀅𑀢𑁆𑀢’’𑀦𑁆𑀢𑀺 𑀇𑀥 𑀯𑀼𑀢𑁆𑀢𑀁, ‘‘𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 𑀧𑀦 ‘‘𑀅𑀢𑁆𑀢𑁂𑀦𑀸’’𑀢𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 ‘‘𑀅𑀢𑁆𑀢𑀲𑁆𑀲𑀸’’𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀫𑁂𑀓𑀯𑀘𑀦𑀁 𑀆𑀕𑀢𑀁, 𑀏𑀢𑀁 𑀓𑀘𑁆𑀘𑀸𑀬𑀦𑁂 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀦 𑀤𑀺𑀲𑁆𑀲𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀅𑀢𑁆𑀢𑁂𑀲𑀽’’𑀢𑀺 𑀆𑀕𑀢𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀸𑀝𑁆𑀞𑀓𑀣𑀁 𑀚𑀺𑀦𑀢𑀦𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺.

‘‘𑀆𑀢𑀼𑀫𑀸 ¶ , 𑀆𑀢𑀼𑀫𑀸, 𑀆𑀢𑀼𑀫𑀸𑀦𑁄. 𑀆𑀢𑀼𑀫𑀸𑀦𑀁, 𑀆𑀢𑀼𑀫𑀁, 𑀆𑀢𑀼𑀫𑀸𑀦𑁄. 𑀆𑀢𑀼𑀫𑁂𑀦, 𑀆𑀢𑀼𑀫𑁂𑀳𑀺, 𑀆𑀢𑀼𑀫𑁂𑀪𑀻’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦 𑀯𑀢𑁆𑀯𑀸 ‘‘𑀪𑁄 𑀆𑀢𑀼𑀫, 𑀪𑀯𑀦𑁆𑀢𑁄 𑀆𑀢𑀼𑀫𑀸, 𑀆𑀢𑀼𑀫𑀸𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀢𑁆𑀭 𑀅𑀢𑁆𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑁂 ‘‘𑀪𑀸𑀯𑀺𑀢𑀢𑁆𑀢𑁄, 𑀪𑀸𑀯𑀺𑀢𑀢𑁆𑀢𑀸. 𑀪𑀸𑀯𑀺𑀢𑀢𑁆𑀢𑀁, 𑀪𑀸𑀯𑀺𑀢𑀢𑁆𑀢𑁂. 𑀪𑀸𑀯𑀺𑀢𑀢𑁆𑀢𑁂𑀦, 𑀪𑀸𑀯𑀺𑀢𑀢𑁆𑀢𑁂𑀳𑀺, 𑀪𑀸𑀯𑀺𑀢𑀢𑁆𑀢𑁂𑀪𑀻’’𑀢𑀺 𑀧𑀼𑀭𑀺𑀲𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀲𑀸, 𑀲𑀸, 𑀲𑀸𑀦𑁄. 𑀲𑀸𑀦𑀁, 𑀲𑀸𑀦𑁂. 𑀲𑀸𑀦𑀸, 𑀲𑀸𑀦𑁂𑀳𑀺, 𑀲𑀸𑀦𑁂𑀪𑀺. 𑀲𑀸𑀲𑁆𑀲, 𑀲𑀸𑀦𑀁. 𑀲𑀸𑀦𑀸, 𑀲𑀸𑀦𑁂𑀳𑀺, 𑀲𑀸𑀦𑁂𑀪𑀺. 𑀲𑀸𑀲𑁆𑀲, 𑀲𑀸𑀦𑀁. 𑀲𑀸𑀦𑁂, 𑀲𑀸𑀦𑁂𑀲𑀼. 𑀪𑁄 𑀲𑀸, 𑀪𑀯𑀦𑁆𑀢𑁄 𑀲𑀸𑀦𑁄. 𑀲𑀸 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄.

𑀏𑀢𑁆𑀣 𑀘 ‘‘𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀸𑀯 𑀯𑀸𑀭𑁂𑀦𑁆𑀢𑀺 𑀲𑀽𑀓𑀭’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀓𑁂𑀘𑀺 𑀧𑀦 𑀲𑀸𑀲𑀤𑁆𑀤𑀲𑁆𑀲 𑀤𑀼𑀢𑀺𑀬𑀸𑀢𑀢𑀺𑀬𑀸𑀤𑀻𑀲𑀼 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀢𑀸𑀦𑀺 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀘𑁂𑀯 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀧𑀦 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀯𑀼𑀢𑁆𑀢𑀁 ‘‘𑀲𑀸 𑀢𑀺𑀝𑁆𑀞𑀢𑀺, 𑀲𑀸𑀦𑁄 𑀢𑀺𑀝𑁆𑀞𑀦𑁆𑀢𑀺. 𑀲𑀸𑀦𑀁 𑀧𑀲𑁆𑀲𑀢𑀺, 𑀲𑀸𑀦𑁂 𑀧𑀲𑁆𑀲𑀢𑀺. 𑀲𑀸𑀦𑀸 𑀓𑀢𑀁, 𑀲𑀸𑀦𑁂𑀳𑀺 𑀓𑀢𑀁, 𑀲𑀸𑀦𑁂𑀪𑀺 𑀓𑀢𑀁. 𑀲𑀸𑀲𑁆𑀲 𑀤𑀻𑀬𑀢𑁂, 𑀲𑀸𑀦𑀁 𑀤𑀻𑀬𑀢𑁂. 𑀲𑀸𑀦𑀸 𑀦𑀺𑀲𑁆𑀲𑀝𑀁, 𑀲𑀸𑀦𑁂𑀳𑀺 𑀦𑀺𑀲𑁆𑀲𑀝𑀁, 𑀲𑀸𑀦𑁂𑀪𑀺 𑀦𑀺𑀲𑁆𑀲𑀝𑀁. 𑀲𑀸𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀲𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀲𑀸𑀦𑁂 𑀧𑀢𑀺𑀝𑁆𑀞𑀺𑀢𑀁, 𑀲𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄 𑀲𑀸, 𑀪𑀯𑀦𑁆𑀢𑁄 𑀲𑀸𑀦𑁄’’𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀕𑀳𑁂𑀢𑀩𑁆𑀩𑀸.

𑀅𑀢𑁆𑀭𑀺𑀤𑀁 ¶ 𑀯𑀢𑁆𑀢𑀩𑁆𑀩𑀁 𑁋 𑀬𑀣𑀸 ‘‘𑀲𑁂𑀳𑀺 𑀤𑀸𑀭𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 ‘‘𑀲𑀓𑁄’’𑀇𑀢𑀺 𑀅𑀢𑁆𑀣𑀯𑀸𑀘𑀓𑀲𑁆𑀲 𑀲𑀲𑀤𑁆𑀤𑀲𑁆𑀲 ‘‘𑀅𑀢𑁆𑀢𑀦𑁄 𑀅𑀬𑀦𑁆𑀢𑀺 𑀲𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑁄, 𑀲𑀸. 𑀲𑀁, 𑀲𑁂. 𑀲𑁂𑀦, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀺, 𑀲𑁂𑀲𑀽’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀬𑀣𑀸 𑀯𑀸 ‘‘𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀁 𑀨𑀮𑀁. 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺, 𑀓𑁄𑀲𑀮𑀁 𑀲𑁂𑀦’𑀲𑀦𑁆𑀢𑀼𑀝𑁆𑀞𑀁, 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀻’’𑀢𑀺𑀆𑀤𑀻𑀲𑀼 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀓𑀫𑀺𑀘𑁆𑀘𑀢𑁆𑀣𑀯𑀸𑀘𑀓𑀲𑁆𑀲 𑀲𑀲𑀤𑁆𑀤𑀲𑁆𑀲 ‘‘𑀲𑀁, 𑀲𑀸𑀦𑀺, 𑀲𑀸. 𑀲𑀁, 𑀲𑀸𑀦𑀺, 𑀲𑁂. 𑀲𑁂𑀦, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸, 𑀲𑁂𑀳𑀺, 𑀲𑁂𑀪𑀺. 𑀲𑀲𑁆𑀲, 𑀲𑀸𑀦𑀁. 𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀺, 𑀲𑁂𑀲𑀽’’𑀢𑀺 𑀘𑀺𑀢𑁆𑀢𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑁂𑀳𑀺 𑀆𑀘𑀭𑀺𑀬𑁂𑀳𑀺 𑀤𑀼𑀢𑀺𑀬𑀸𑀢𑀢𑀺𑀬𑀸𑀞𑀸𑀦𑁂 ‘‘𑀲𑀁, 𑀲𑁂. 𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀧𑀜𑁆𑀘𑀫𑀻𑀞𑀸𑀦𑁂 ‘‘𑀲𑀸, 𑀲𑀲𑁆𑀫𑀸, 𑀲𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀁, 𑀲𑀢𑁆𑀢𑀫𑀻𑀞𑀸𑀦𑁂 𑀘 ‘‘𑀲𑁂, 𑀲𑀲𑁆𑀫𑀺𑀁, 𑀲𑀫𑁆𑀳𑀻’’𑀢𑀺 𑀘 𑀯𑀼𑀢𑁆𑀢𑀁? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁, 𑀢𑀓𑁆𑀓𑀕𑀸𑀳𑀫𑀢𑁆𑀢𑁂𑀦 𑀕𑀳𑀺𑀢𑀁 𑀅𑀓𑀸𑀭𑀡𑀁. 𑀲𑀼𑀦𑀔𑀯𑀸𑀘𑀓𑁄 𑀳𑀺 𑀲𑀸𑀲𑀤𑁆𑀤𑁄 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄, 𑀦 𑀧𑀼𑀭𑀺𑀲 𑀘𑀺𑀢𑁆𑀢𑀲𑀤𑁆𑀤𑀸𑀤𑀬𑁄 𑀯𑀺𑀬 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄. 𑀬𑀸𑀬 𑀇𑀫𑀲𑁆𑀲 𑀈𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀲𑀺𑀬𑀼𑀁, 𑀲𑀸 𑀘 𑀧𑀓𑀢𑀺 𑀦𑀢𑁆𑀣𑀺. 𑀦 𑀘𑁂𑀲𑁄 ‘‘𑀭𑀸𑀚𑀸, 𑀩𑁆𑀭𑀳𑁆𑀫𑀸, 𑀲𑀔𑀸, 𑀅𑀢𑁆𑀢𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀯𑀺𑀬 𑀧𑀞𑀫𑀁 𑀅𑀓𑀸𑀭𑀦𑁆𑀢𑀪𑀸𑀯𑁂 𑀞𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑀤𑁆𑀥𑀆𑀓𑀸𑀭𑀦𑁆𑀢𑀢𑀸, 𑀅𑀣 𑀔𑁄 𑀦𑀺𑀘𑁆𑀘𑀫𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄 𑀕𑁄𑀲𑀤𑁆𑀤𑁄 𑀯𑀺𑀬 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑁄. 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀘 𑀏𑀯𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀦 𑀯𑀼𑀢𑁆𑀢𑀸𑀦𑀺. 𑀲𑀘𑁂𑀧𑀺 𑀫𑀜𑁆𑀜𑁂𑀬𑁆𑀬𑀼𑀁 ‘‘𑀅𑀢𑁆𑀢𑀁, 𑀅𑀢𑁆𑀢𑁂𑀦𑀸’𑀢𑀺 ¶ 𑀘 𑀤𑀲𑁆𑀲𑀦𑀢𑁄 ‘𑀲𑀁, 𑀲𑁂𑀦𑀸’𑀢𑀺 𑀇𑀫𑀸𑀦𑀺 𑀧𑀦 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺. 𑀦 𑀕𑀳𑁂𑀢𑀩𑁆𑀩𑀸𑀦𑀺 ‘‘𑀭𑀸𑀚𑀸, 𑀩𑁆𑀭𑀳𑁆𑀫𑀸, 𑀲𑀔𑀸, 𑀅𑀢𑁆𑀢𑀸, 𑀲𑀸, 𑀧𑀼𑀫𑀸’’𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀤𑀫𑀸𑀮𑀸𑀯𑀲𑁂𑀦 𑀯𑀺𑀲𑀤𑀺𑀲𑀢𑁆𑀢𑀸 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀈𑀤𑀺𑀲𑁂 𑀳𑀺 𑀞𑀸𑀦𑁂 𑀦𑀬𑀕𑁆𑀕𑀸𑀳𑀯𑀲𑁂𑀦 𑀕𑀳𑀡𑀁 𑀦𑀸𑀫 𑀲𑀤𑁄𑀲𑀁𑀬𑁂𑀯 𑀲𑀺𑀬𑀸, 𑀢𑀲𑁆𑀫𑀸 𑀦𑀬𑀕𑁆𑀕𑀸𑀳𑀯𑀲𑁂𑀦𑀧𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺.

𑀅𑀧𑀭𑀫𑁆𑀧𑀺 𑀅𑀢𑁆𑀭 𑀯𑀢𑁆𑀢𑀩𑁆𑀩𑀁 𑁋 𑀬𑀣𑀸 𑀳𑀺 ‘‘𑀲𑀸𑀳𑀺 𑀦𑀸𑀭𑀻𑀳𑀺 𑀢𑁂 𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀦𑀸𑀭𑀻’’𑀢𑀺, ‘‘𑀲𑀸 𑀦𑀸𑀭𑀻’’𑀢𑀺 𑀏𑀯𑀁 𑀅𑀢𑁆𑀣𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀓𑀜𑁆𑀜𑀸𑀲𑀤𑁆𑀤𑁂𑀦 𑀲𑀤𑀺𑀲𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 ‘‘𑀲𑀸, 𑀲𑀸, 𑀲𑀸𑀬𑁄. 𑀲𑀁, 𑀲𑀸, 𑀲𑀸𑀬𑁄. 𑀲𑀸𑀬, 𑀲𑀸𑀳𑀺, 𑀲𑀸𑀪𑀺. 𑀲𑀸𑀬, 𑀲𑀸𑀦𑀁. 𑀲𑀸𑀬, 𑀲𑀸𑀳𑀺, 𑀲𑀸𑀪𑀺. 𑀲𑀸𑀬, 𑀲𑀸𑀦𑀁. 𑀲𑀸𑀬, 𑀲𑀸𑀬𑀁, 𑀲𑀸𑀲𑀽’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑀣𑀸 𑀇𑀫𑀲𑁆𑀲 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑁂 𑀆𑀘𑀭𑀺𑀬𑀸 𑀢𑀢𑀺𑀬𑀸𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀘 ‘‘𑀲𑀸𑀳𑀺, 𑀲𑀸𑀪𑀻’’𑀢𑀺 𑀭𑀽𑀧𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀓𑀲𑁆𑀫𑀸 𑀘 𑀲𑀢𑁆𑀢𑀫𑀻𑀩𑀳𑀼𑀯𑀘𑀦𑀝𑁆𑀞𑀸𑀦𑁂 ‘‘𑀲𑀸𑀲𑀽’’𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀸. 𑀓𑀲𑁆𑀫𑀸 𑀘 𑀧𑀦 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀝𑁆𑀞𑀸𑀦𑁂 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀭𑀲𑁆𑀲𑀯𑀲𑁂𑀦 ‘‘𑀲𑀲𑁆𑀲’’𑀇𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀢𑁆𑀢𑀸. 𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀘 𑀲𑀸𑀲𑀤𑁆𑀤𑀲𑁆𑀲 𑀬𑀣𑀸 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀧𑀼𑀭𑀺𑀲𑀲𑀤𑁆𑀤𑀲𑁆𑀲 ‘‘𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀭𑀽𑀧𑀁 𑀪𑀯𑀢𑀺 𑀏𑀯𑀭𑀽𑀧𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑁂𑀯 𑀆𑀬𑀲𑁆𑀫𑀸 𑀓𑀘𑁆𑀘𑀸𑀦𑁄 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀝𑁆𑀞𑀸𑀦𑁂 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀤𑀻𑀖𑀯𑀲𑁂𑀦 ‘‘𑀲𑀸𑀲𑁆𑀲’’𑀇𑀢𑀺 𑀭𑀽𑀧𑀫𑀸𑀳. 𑀓𑀲𑁆𑀫𑀸 𑀘 𑀧𑀦 𑀢𑁂 𑀆𑀘𑀭𑀺𑀬𑀸 𑀘𑀢𑀼𑀢𑁆𑀣𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀲𑀸𑀬’’𑀇𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺? 𑀇𑀤𑀫𑁆𑀧𑀺 𑀅𑀓𑀸𑀭𑀡𑀁, 𑀞𑀧𑁂𑀢𑁆𑀯𑀸 𑀳𑀺 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑁂 𑀖𑀲𑀜𑁆𑀜𑀢𑁄 𑀆𑀓𑀸𑀭𑀢𑁄 𑀧𑀭𑁂𑀲𑀁 𑀦𑀸𑀤𑀻𑀦𑀁 𑀆𑀬𑀸𑀤𑁂𑀲𑀜𑁆𑀘 𑀅𑀓𑀸𑀭𑀦𑁆𑀢𑀢𑁄 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁄 ¶ 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑀜𑁆𑀘 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑁂 𑀅𑀖𑀢𑁄 𑀆𑀓𑀸𑀭𑀦𑁆𑀢𑀢𑁄 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀓𑀢𑁆𑀣𑀘𑀺𑀧𑀺 𑀆𑀬𑀸𑀤𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀢𑀸𑀤𑀺𑀲𑀁 𑀭𑀽𑀧𑀁 𑀦 𑀯𑀼𑀢𑁆𑀢𑀁, 𑀅𑀯𑀘𑀦𑀁𑀬𑁂𑀯 𑀬𑀼𑀢𑁆𑀢𑀢𑀭𑀁 𑀩𑀼𑀤𑁆𑀥𑀯𑀘𑀦𑁂 𑀅𑀝𑁆𑀞𑀓𑀣𑀸𑀤𑀻𑀲𑀼 𑀘 𑀅𑀦𑀸𑀕𑀫𑀦𑀢𑁄. 𑀬𑀸 𑀧𑀦𑀫𑁆𑀳𑁂𑀳𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀯𑀘𑀦𑀜𑁆𑀘 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀢𑁆𑀢𑀸, 𑀲𑀸𑀬𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀦𑀸𑀦𑀸𑀅𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀸𑀦𑀁 𑀮𑀺𑀗𑁆𑀕𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀸 𑀲𑁄 𑀲𑀁𑀇𑀘𑁆𑀘𑁂𑀢𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀼 𑀧𑀤𑀸𑀦𑀁 𑀲𑀤𑀺𑀲𑀸𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀲𑀺𑀬𑀸 𑁋 𑀬𑁄 𑀢𑀼𑀫𑁆𑀳𑁂𑀳𑀺 𑀲𑀸𑀲𑀤𑁆𑀤𑁄 ‘‘𑀢𑀁𑀲𑀤𑁆𑀤𑀢𑁆𑀣𑁂 𑀘 𑀲𑀼𑀦𑀔𑁂 𑀘 𑀲𑀓𑀫𑀺𑀘𑁆𑀘𑀢𑁆𑀣𑁂 𑀘 𑀯𑀢𑁆𑀢𑀢𑀻’’𑀢𑀺 𑀇𑀘𑁆𑀙𑀺𑀢𑁄, 𑀓𑀣𑀁 𑀢𑀁 ‘‘𑀲𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯 ‘‘𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄’’𑀢𑀺 𑀚𑀸𑀦𑀦𑁆𑀢𑀻𑀢𑀺? 𑀦 𑀚𑀸𑀦𑀦𑁆𑀢𑀺, 𑀧𑀬𑁄𑀕𑀯𑀲𑁂𑀦 𑀧𑀦 𑀚𑀸𑀦𑀦𑁆𑀢𑀺 𑀮𑁄𑀓𑀺𑀬𑀚𑀦𑀸 𑀘𑁂𑀯 𑀧𑀡𑁆𑀟𑀺𑀢𑀸 𑀘. 𑀧𑀬𑁄𑀕𑀯𑀲𑁂𑀦 𑀳𑀺 ‘‘𑀲𑀸 𑀫𑀤𑁆𑀤𑀻 𑀦𑀸𑀕𑀫𑀸𑀭𑀼𑀳𑀺, 𑀦𑀸𑀢𑀺𑀩𑀤𑁆𑀥𑀁𑀯 𑀓𑀼𑀜𑁆𑀚𑀭’’𑀦𑁆𑀢𑀺𑀆𑀤𑀻𑀲𑀼 𑀲𑀸𑀲𑀤𑁆𑀤𑀲𑁆𑀲 𑀢𑀁𑀲𑀤𑁆𑀤𑀢𑁆𑀣𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀸𑀲𑀤𑁆𑀤𑁄 𑀢𑀁𑀲𑀤𑁆𑀤𑀢𑁆𑀣𑁂 𑀘 𑀯𑀢𑁆𑀢𑀢𑀺. ‘‘𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀲𑀸𑀚𑀸𑀢𑀺𑀫𑁆𑀧𑀺 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀅𑀫𑀢𑀭𑀲𑀪𑀸𑀕𑀺𑀦𑁄 𑀪𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀸𑀲𑀤𑁆𑀤𑀲𑁆𑀲 𑀲𑀼𑀦𑀔𑀯𑀸𑀘𑀓𑀢𑀸 𑀯𑀺𑀜𑁆𑀜𑀸𑀬𑀢𑀺.

‘‘𑀅𑀦𑁆𑀦𑀁 𑀢𑀯𑁂𑀤𑀁 𑀧𑀓𑀢𑀁 𑀬𑀲𑀲𑁆𑀲𑀺,

𑀢𑀁 𑀔𑀚𑁆𑀚𑀭𑁂 𑀪𑀼𑀜𑁆𑀚𑀭𑁂 𑀧𑀺𑀬𑁆𑀬𑀭𑁂 𑀘;

𑀚𑀸𑀦𑀸𑀲𑀺 𑀫𑀁 𑀢𑁆𑀯𑀁 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀁,

𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀁 𑀮𑀪𑀢𑀁 𑀲𑀧𑀸𑀓𑁄’’𑀢𑀺

𑀏𑀢𑁆𑀣 𑀧𑀦 𑀲𑀸𑀲𑀤𑁆𑀤𑀲𑁆𑀲 𑀭𑀲𑁆𑀲𑀪𑀸𑀯𑀓𑀭𑀡𑁂𑀦 ‘‘𑀲𑀧𑀸𑀓𑁄’’𑀢𑀺 𑀧𑀸𑀴𑀺 𑀞𑀺𑀢𑀸𑀢𑀺 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀸𑀦𑀁 𑀲𑀼𑀦𑀔𑀸𑀦𑀁 𑀇𑀤𑀁 𑀫𑀁𑀲𑀦𑁆𑀢𑀺 𑀲’’𑀫𑀺𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀲𑀁 𑀧𑀘𑀢𑀻𑀢𑀺 𑀲𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀧𑀸𑀓𑁄𑀢𑀺 𑀲𑀧𑀸𑀓𑀘𑀡𑁆𑀟𑀸𑀮𑁄’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀏𑀢𑀤𑁂𑀯𑀢𑁆𑀣𑀁 𑀤𑀻𑀧𑁂𑀢𑀺. 𑀏𑀯𑀁 𑀲𑀸𑀲𑀤𑁆𑀤𑁄 𑀲𑀼𑀦𑀔𑁂 𑀘 𑀯𑀢𑁆𑀢𑀢𑀺. ‘‘𑀲𑀸 𑀤𑀸𑀭𑀸 𑀚𑀦𑁆𑀢𑀽𑀦𑀁 𑀧𑀺𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀓𑀸 𑀤𑀸𑀭𑀸 𑀲𑀢𑁆𑀢𑀸𑀦𑀁 𑀧𑀺𑀬𑀸’’𑀢𑀺 𑀅𑀢𑁆𑀣𑀤𑀻𑀧𑀦𑀯𑀲𑁂𑀦 𑀲𑀸𑀲𑀤𑁆𑀤𑀲𑁆𑀲 𑀲𑀓𑀯𑀸𑀘𑀓𑀢𑀸 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀲𑀸𑀲𑀤𑁆𑀤𑁄 𑀲𑀓𑀫𑀺𑀘𑁆𑀘𑀢𑁆𑀣𑁂 𑀘 𑀯𑀢𑁆𑀢𑀢𑀺. 𑀇𑀢𑀺 𑀲𑀸𑀲𑀤𑁆𑀤𑀁 𑀧𑀬𑁄𑀕𑀯𑀲𑁂𑀦 𑀈𑀤𑀺𑀲𑀢𑁆𑀣𑀲𑁆𑀲 𑀯𑀸𑀘𑀓𑁄𑀢𑀺 𑀚𑀸𑀦𑀦𑁆𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀢𑀁𑀲𑀤𑁆𑀤𑀢𑁆𑀣𑁂 𑀘 𑀲𑀼𑀦𑀔𑁂,

𑀲𑀓𑀲𑁆𑀫𑀺𑀫𑁆𑀧𑀺 𑀘 𑀯𑀢𑁆𑀢𑀢𑀺;

𑀲𑀸𑀲𑀤𑁆𑀤𑁄 𑀲𑁄 𑀘 𑀔𑁄 𑀜𑁂𑀬𑁆𑀬𑁄,

𑀧𑀬𑁄𑀕𑀸𑀦𑀁 𑀯𑀲𑁂𑀦 𑀯𑁂.

𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀻’’𑀢𑀺 𑀏𑀓𑀯𑀘𑀦𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀘,

‘‘𑀅𑀲𑀦𑁆𑀢𑀸 𑀓𑀺𑀭 𑀫𑀁 𑀚𑀫𑁆𑀫𑀸, 𑀢𑀸𑀢 𑀢𑀸𑀢𑀸𑀢𑀺 𑀪𑀸𑀲𑀭𑁂;

𑀭𑀓𑁆𑀔𑀲𑀸 𑀧𑀼𑀢𑁆𑀢𑀭𑀽𑀧𑁂𑀦, 𑀲𑀸𑀯 𑀯𑀸𑀭𑁂𑀦𑁆𑀢𑀺 𑀲𑀽𑀓𑀭’’𑀦𑁆𑀢𑀺

𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀘, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀲𑀸𑀦𑁄’’𑀇𑀘𑁆𑀘𑀸𑀤𑀺𑀤𑀲𑁆𑀲𑀦𑀢𑁄 𑀘 ‘‘𑀲𑀸, 𑀲𑀸, 𑀲𑀸𑀦𑁄. 𑀲𑀸𑀦𑀁, 𑀲𑀸𑀦𑁂. 𑀲𑀸𑀦𑀸’’𑀢𑀺𑀆𑀤𑀺𑀦𑀸 𑀲𑀼𑀦𑀔𑀯𑀸𑀘𑀓𑀲𑁆𑀲 𑀲𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀧𑀼𑀫𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀧𑀼𑀫𑀸, 𑀧𑀼𑀫𑀸, 𑀧𑀼𑀫𑀸𑀦𑁄. 𑀧𑀼𑀫𑀸𑀦𑀁, 𑀧𑀼𑀫𑀸𑀦𑁂. 𑀧𑀼𑀫𑀸𑀦𑀸, 𑀧𑀼𑀫𑀼𑀦𑀸, 𑀧𑀼𑀫𑁂𑀦, 𑀧𑀼𑀫𑀸𑀦𑁂𑀳𑀺, 𑀧𑀼𑀫𑀸𑀦𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀼𑀦𑁄, 𑀧𑀼𑀫𑀸𑀦𑀁. 𑀧𑀼𑀫𑀸𑀦𑀸, 𑀧𑀼𑀫𑀼𑀦𑀸, 𑀧𑀼𑀫𑀸𑀦𑁂𑀳𑀺, 𑀧𑀼𑀫𑀸𑀦𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀼𑀦𑁄, 𑀧𑀼𑀫𑀸𑀦𑀁. 𑀧𑀼𑀫𑀸𑀦𑁂, 𑀧𑀼𑀫𑀸𑀦𑁂𑀲𑀼. 𑀪𑁄 𑀧𑀼𑀫, 𑀪𑀯𑀦𑁆𑀢𑁄 𑀧𑀼𑀫𑀸, 𑀧𑀼𑀫𑀸𑀦𑁄. ‘‘𑀪𑁄 𑀧𑀼𑀫𑀸’’𑀇𑀢𑀺 𑀩𑀳𑀼𑀯𑀘𑀦𑁂 𑀦𑀬𑁄𑀧𑀺 𑀜𑁂𑀬𑁆𑀬𑁄.

𑀏𑀢𑁆𑀣 ¶ 𑀧𑀦 𑁋

‘‘𑀣𑀺𑀬𑁄 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺, 𑀦 𑀧𑀼𑀫𑀸 𑀚𑀸𑀬𑀭𑁂 𑀓𑀼𑀮𑁂;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂’’𑀢𑀺

𑀅𑀬𑀁 𑀧𑀸𑀴𑀺 𑀧𑀼𑀫𑀲𑀤𑁆𑀤𑀲𑁆𑀲 𑀩𑀳𑀼𑀯𑀘𑀦𑀪𑀸𑀯𑀲𑀸𑀥𑀺𑀓𑀸, 𑀓𑀘𑁆𑀘𑀸𑀬𑀦𑁂 ‘‘𑀳𑁂 𑀧𑀼𑀫𑀁’’𑀇𑀢𑀺 𑀲𑀸𑀦𑀼𑀲𑀸𑀭𑀁 𑀆𑀮𑀧𑀦𑁂𑀓𑀯𑀘𑀦𑀁 𑀤𑀺𑀲𑁆𑀲𑀢𑀺. 𑀢𑀤𑀦𑁂𑀓𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀘 𑀅𑀝𑁆𑀞𑀓𑀣𑀸𑀲𑀼 𑀘 𑀲𑀸𑀦𑀼𑀲𑀸𑀭𑀸𑀦𑀁 𑀆𑀮𑀧𑀦𑀯𑀘𑀦𑀸𑀦𑀁 𑀅𑀤𑀲𑁆𑀲𑀦𑀢𑁄 𑀇𑀥 𑀦 𑀯𑀤𑀸𑀫𑀺. 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀁 𑀘𑁂, 𑀕𑀳𑁂𑀢𑀩𑁆𑀩𑀁. ‘‘𑀬𑀲𑀲𑁆𑀲𑀺 𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳𑀸’’𑀢𑀺 𑀏𑀢𑁆𑀣 𑀧𑀦 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀆𑀕𑀫𑀯𑀲𑁂𑀦𑁂𑀯𑀸𑀦𑀼𑀲𑀸𑀭𑁄 𑀳𑁄𑀢𑀺, 𑀦 𑀲𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀫𑀸𑀓𑀸𑀭𑀦𑁆𑀢𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸.

‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁,

𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 𑀢𑀤𑀸;

𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂𑀦,

𑀦𑀺𑀩𑁆𑀩𑀢𑁆𑀢𑁄 𑀅𑀳𑀫𑁂𑀓𑀓𑁄’’𑀢𑀺 𑀘,

‘‘𑀬𑀣𑀸 𑀩𑀮𑀸𑀓𑀬𑁄𑀦𑀺𑀫𑁆𑀳𑀺, 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 𑀲𑀤𑀸;

𑀫𑁂𑀖𑁂𑀲𑀼 𑀕𑀚𑁆𑀚𑀫𑀸𑀦𑁂𑀲𑀼, 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀢𑀸 𑀢𑀤𑀸’’𑀢𑀺 𑀘

𑀧𑀸𑀴𑀺𑀤𑀲𑁆𑀲𑀦𑀢𑁄 𑀧𑀦 𑀑𑀓𑀸𑀭𑀦𑁆𑀢𑀯𑀲𑁂𑀦𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀫𑁄, 𑀧𑀼𑀫𑀸. 𑀧𑀼𑀫𑀁, 𑀧𑀼𑀫𑁂. 𑀧𑀼𑀫𑁂𑀦, 𑀧𑀼𑀫𑁂𑀳𑀺, 𑀧𑀼𑀫𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀸𑀦𑀁. 𑀧𑀼𑀫𑀸, 𑀧𑀼𑀫𑀲𑁆𑀫𑀸, 𑀧𑀼𑀫𑀫𑁆𑀳𑀸, 𑀧𑀼𑀫𑁂𑀳𑀺, 𑀧𑀼𑀫𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀸𑀦𑀁. 𑀧𑀼𑀫𑁂, 𑀧𑀼𑀫𑀲𑁆𑀫𑀺𑀁, 𑀧𑀼𑀫𑀫𑁆𑀳𑀺, 𑀧𑀼𑀫𑁂𑀲𑀼. 𑀪𑁄 𑀧𑀼𑀫, 𑀪𑀯𑀦𑁆𑀢𑁄 𑀧𑀼𑀫𑀸. ‘‘𑀪𑁄 𑀧𑀼𑀫𑀸’’𑀇𑀢𑀺 𑀯𑀸, 𑀏𑀯𑀁 𑀧𑀼𑀫𑀲𑀤𑁆𑀤𑀲𑁆𑀲 𑀤𑁆𑀯𑀺𑀥𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀇𑀤𑀸𑀦𑀺 𑀫𑀺𑀲𑁆𑀲𑀓𑀦𑀬𑁄 𑀯𑀼𑀘𑁆𑀘𑀢𑁂 𑁋

𑀧𑀼𑀫𑀸 ¶ , 𑀧𑀼𑀫𑁄, 𑀧𑀼𑀫𑀸, 𑀧𑀼𑀫𑀸𑀦𑁄. 𑀧𑀼𑀫𑀸𑀦𑀁, 𑀧𑀼𑀫𑀁, 𑀧𑀼𑀫𑀸𑀦𑁂, 𑀧𑀼𑀫𑁂. 𑀧𑀼𑀫𑀸𑀦𑀸, 𑀧𑀼𑀫𑀼𑀦𑀸, 𑀧𑀼𑀫𑁂𑀦, 𑀧𑀼𑀫𑀸𑀦𑁂𑀳𑀺, 𑀧𑀼𑀫𑀸𑀦𑁂𑀪𑀺, 𑀧𑀼𑀫𑁂𑀳𑀺, 𑀧𑀼𑀫𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀼𑀦𑁄, 𑀧𑀼𑀫𑀸𑀦𑀁. 𑀧𑀼𑀫𑀸𑀦𑀸, 𑀧𑀼𑀫𑀼𑀦𑀸, 𑀧𑀼𑀫𑀸, 𑀧𑀼𑀫𑀲𑁆𑀫𑀸, 𑀧𑀼𑀫𑀫𑁆𑀳𑀸, 𑀧𑀼𑀫𑀸𑀦𑁂𑀳𑀺, 𑀧𑀼𑀫𑀸𑀦𑁂𑀪𑀺, 𑀧𑀼𑀫𑁂𑀳𑀺, 𑀧𑀼𑀫𑁂𑀪𑀺. 𑀧𑀼𑀫𑀲𑁆𑀲, 𑀧𑀼𑀫𑀼𑀦𑁄, 𑀧𑀼𑀫𑀸𑀦𑀁. 𑀧𑀼𑀫𑀸𑀦𑁂, 𑀧𑀼𑀫𑁂, 𑀧𑀼𑀫𑀲𑁆𑀫𑀺𑀁, 𑀧𑀼𑀫𑀫𑁆𑀳𑀺, 𑀧𑀼𑀫𑀸𑀦𑁂𑀲𑀼, 𑀧𑀼𑀫𑁂𑀲𑀼. 𑀪𑁄 𑀧𑀼𑀫, 𑀪𑀯𑀦𑁆𑀢𑁄 𑀧𑀼𑀫𑀸𑀦𑁄, 𑀪𑀯𑀦𑁆𑀢𑁄 𑀧𑀼𑀫𑀸. ‘‘𑀪𑁄 𑀧𑀼𑀫𑀸𑀦𑁄, 𑀪𑁄 𑀧𑀼𑀫𑀸’’𑀇𑀢𑀺 𑀯𑀸.

𑀇𑀤𑀸𑀦𑀺 𑀭𑀳𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀭𑀳𑀸 𑀯𑀼𑀘𑁆𑀘𑀢𑀺 𑀧𑀸𑀧𑀥𑀫𑁆𑀫𑁄. 𑀭𑀳𑀸, 𑀭𑀳𑀸, 𑀭𑀳𑀺𑀦𑁄. 𑀭𑀳𑀸𑀦𑀁, 𑀭𑀳𑀸𑀦𑁂. 𑀭𑀳𑀺𑀦𑀸, 𑀭𑀳𑀺𑀦𑁂𑀳𑀺, 𑀭𑀳𑀺𑀦𑁂𑀪𑀺. 𑀭𑀳𑀲𑁆𑀲, 𑀭𑀳𑀸𑀦𑀁. 𑀭𑀳𑀸, 𑀭𑀳𑀸𑀦𑁂𑀳𑀺, 𑀭𑀳𑀸𑀦𑁂𑀪𑀺. 𑀭𑀳𑀲𑁆𑀲, 𑀭𑀳𑀸𑀦𑀁. 𑀭𑀳𑀸𑀦𑁂, 𑀭𑀳𑀸𑀦𑁂𑀲𑀼. 𑀪𑁄 𑀭𑀳, 𑀪𑀯𑀦𑁆𑀢𑁄 𑀭𑀳𑀺𑀦𑁄, 𑀪𑀯𑀦𑁆𑀢𑁄 𑀭𑀳𑀸.

𑀇𑀤𑀸𑀦𑀺 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀤𑀴𑁆𑀳𑀥𑀫𑁆𑀫𑀸, 𑀤𑀴𑁆𑀳𑀥𑀫𑁆𑀫𑀸, 𑀤𑀴𑁆𑀳𑀥𑀫𑁆𑀫𑀸𑀦𑁄. 𑀤𑀴𑁆𑀳𑀥𑀫𑁆𑀫𑀸𑀦𑀁, 𑀤𑀴𑁆𑀳𑀥𑀫𑁆𑀫𑀸𑀦𑁂. 𑀤𑀴𑁆𑀳𑀥𑀫𑁆𑀫𑀺𑀦𑀸, 𑀤𑀴𑁆𑀳𑀥𑀫𑁆𑀫𑁂𑀳𑀺, 𑀤𑀴𑁆𑀳𑀥𑀫𑁆𑀫𑁂𑀪𑀺. 𑀤𑀴𑁆𑀳𑀥𑀫𑁆𑀫𑀲𑁆𑀲, 𑀤𑀴𑁆𑀳𑀥𑀫𑁆𑀫𑀸𑀦𑀁. 𑀤𑀴𑁆𑀳𑀥𑀫𑁆𑀫𑀺𑀦𑀸, 𑀤𑀴𑁆𑀳𑀥𑀫𑁆𑀫𑁂𑀳𑀺, 𑀤𑀴𑁆𑀳𑀥𑀫𑁆𑀫𑁂𑀪𑀺. 𑀤𑀴𑁆𑀳𑀥𑀫𑁆𑀫𑀲𑁆𑀲, 𑀤𑀴𑁆𑀳𑀥𑀫𑁆𑀫𑀸𑀦𑀁. 𑀤𑀴𑁆𑀳𑀥𑀫𑁆𑀫𑁂 𑀤𑀴𑁆𑀳𑀥𑀫𑁆𑀫𑁂𑀲𑀼. 𑀪𑁄 𑀤𑀴𑁆𑀳𑀥𑀫𑁆𑀫, 𑀪𑀯𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀸𑀦𑁄, 𑀪𑀯𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀸. ‘‘𑀪𑁄 𑀤𑀴𑁆𑀳𑀥𑀫𑁆𑀫𑀸𑀦𑁄, 𑀪𑁄 𑀤𑀴𑁆𑀳𑀥𑀫𑁆𑀫𑀸’’𑀇𑀢𑀺 𑀧𑀼𑀣𑀼𑀯𑀘𑀦𑀫𑁆𑀧𑀺 𑀜𑁂𑀬𑁆𑀬𑀁, 𑀏𑀯𑀁 𑀧𑀘𑁆𑀘𑀓𑁆𑀔𑀥𑀫𑁆𑀫𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣 𑀘 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑀸 𑀤𑀴𑁆𑀳𑀥𑀫𑁆𑀫𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀇𑀫𑀺𑀲𑁆𑀲𑀁 𑀧𑀦 𑀧𑀸𑀴𑀺𑀬𑀁 ‘‘𑀤𑀴𑁆𑀳𑀥𑀫𑁆𑀫𑀸’’ 𑀇𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀆𑀕𑀢𑀢𑁆𑀢𑀸 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑁄 𑀆𑀓𑀸𑀭𑀦𑁆𑀢𑁄𑀢𑀺𑀧𑀺 𑀑𑀓𑀸𑀭𑀦𑁆𑀢𑁄𑀢𑀺𑀧𑀺 𑀅𑀧𑁆𑀧𑀲𑀺𑀤𑁆𑀥𑁄 𑀢𑀤𑀦𑁆𑀢𑀸𑀦𑀁 𑀩𑀳𑀼𑀯𑀘𑀦𑀪𑀸𑀯𑁂 𑀢𑀼𑀮𑁆𑀬𑀭𑀽𑀧𑀢𑁆𑀢𑀸. 𑀢𑀣𑀸𑀧𑀺 𑀅𑀫𑁆𑀳𑁂𑀳𑀺 𑀧𑀤𑀫𑀸𑀮𑀸 𑀆𑀓𑀸𑀭𑀦𑁆𑀢𑀯𑀲𑁂𑀦𑁂𑀯 𑀬𑁄𑀚𑀺𑀢𑀸. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑁄 𑀆𑀓𑀸𑀭𑀦𑁆𑀢𑁄𑀢𑀺𑀧𑀺 𑀑𑀓𑀸𑀭𑀦𑁆𑀢𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑁂𑀯 ¶ 𑀅𑀧𑀭𑀺𑀩𑁆𑀬𑀢𑁆𑀢𑀭𑀽𑀧𑀢𑁆𑀢𑀸. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑁂 𑀅𑀢𑀻𑀯 𑀧𑀭𑀺𑀩𑁆𑀬𑀢𑁆𑀢𑁄 𑀳𑀼𑀢𑁆𑀯𑀸 𑀑𑀓𑀸𑀭𑀦𑁆𑀢 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑁄 𑀤𑁆𑀯𑀺𑀥𑀸 𑀤𑀺𑀲𑁆𑀲𑀢𑀺 𑀕𑀼𑀡𑀲𑀤𑁆𑀤𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑀤𑁆𑀤𑀯𑀲𑁂𑀦. 𑀢𑀢𑁆𑀣 ‘‘𑀇𑀲𑁆𑀲𑀢𑁆𑀢𑁂 𑀘𑀲𑁆𑀫𑀺 𑀓𑀼𑀲𑀮𑁄, 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑁄’’𑀢𑀺 𑀏𑀢𑁆𑀣 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑁄 𑀑𑀓𑀸𑀭𑀦𑁆𑀢𑁄 𑀕𑀼𑀡𑀲𑀤𑁆𑀤𑁄. ‘‘𑀩𑀸𑀭𑀸𑀡𑀲𑀺𑀬𑀁 𑀤𑀴𑁆𑀳𑀥𑀫𑁆𑀫𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀻’’𑀢𑀺 𑀏𑀢𑁆𑀣 𑀧𑀦 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑀤𑁆𑀤𑁄. 𑀏𑀯𑀁 𑀑𑀓𑀸𑀭𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀲𑀤𑁆𑀤𑁄 𑀤𑁆𑀯𑀺𑀥𑀸 𑀤𑀺𑀝𑁆𑀞𑁄. 𑀢𑀲𑁆𑀲 𑀧𑀦 ‘‘𑀤𑀴𑁆𑀳𑀥𑀫𑁆𑀫𑁄, 𑀤𑀴𑁆𑀳𑀥𑀫𑁆𑀫𑀸. 𑀤𑀴𑁆𑀳𑀥𑀫𑁆𑀫𑀁, 𑀤𑀴𑁆𑀳𑀥𑀫𑁆𑀫𑁂’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀜𑁂𑀬𑁆𑀬𑀸, 𑀆𑀓𑀸𑀭𑀦𑁆𑀢𑁄𑀓𑀸𑀭𑀦𑁆𑀢𑀸𑀦𑀁 𑀯𑀲𑁂𑀦 𑀫𑀺𑀲𑁆𑀲𑀓𑀧𑀤𑀫𑀸𑀮𑀸 𑀘. 𑀓𑀣𑀁?

𑀤𑀴𑁆𑀳𑀥𑀫𑁆𑀫𑀸, 𑀤𑀴𑁆𑀳𑀥𑀫𑁆𑀫𑁄, 𑀤𑀴𑁆𑀳𑀥𑀫𑁆𑀫𑀸𑀦𑁄, 𑀤𑀴𑁆𑀳𑀥𑀫𑁆𑀫𑀸. 𑀤𑀴𑁆𑀳𑀥𑀫𑁆𑀫𑀸𑀦𑀁, 𑀤𑀴𑁆𑀳𑀥𑀫𑁆𑀫𑀁, 𑀤𑀴𑁆𑀳𑀥𑀫𑁆𑀫𑀸𑀦𑁂, 𑀤𑀴𑁆𑀳𑀥𑀫𑁆𑀫𑁂. 𑀤𑀴𑁆𑀳𑀥𑀫𑁆𑀫𑀺𑀦𑀸, 𑀤𑀴𑁆𑀳𑀥𑀫𑁆𑀫𑁂𑀦, 𑀤𑀴𑁆𑀳𑀥𑀫𑁆𑀫𑁂𑀳𑀺, 𑀤𑀴𑁆𑀳𑀥𑀫𑁆𑀫𑁂𑀪𑀺. 𑀤𑀴𑁆𑀳𑀥𑀫𑁆𑀫𑀲𑁆𑀲, 𑀤𑀴𑁆𑀳𑀥𑀫𑁆𑀫𑀸𑀦𑀁. 𑀤𑀴𑀥𑀫𑁆𑀫𑀺𑀦𑀸, 𑀤𑀴𑁆𑀳𑀥𑀫𑁆𑀫𑀸, 𑀤𑀴𑁆𑀳𑀥𑀫𑁆𑀫𑀲𑁆𑀫𑀸, 𑀤𑀴𑁆𑀳𑀥𑀫𑁆𑀫𑀫𑁆𑀳𑀸, 𑀤𑀴𑁆𑀳𑀥𑀫𑁆𑀫𑁂𑀳𑀺, 𑀤𑀴𑁆𑀳𑀥𑀫𑁆𑀫𑁂𑀪𑀺. 𑀤𑀴𑁆𑀳𑀥𑀫𑁆𑀫𑀲𑁆𑀲, 𑀤𑀴𑁆𑀳𑀥𑀫𑁆𑀫𑀸𑀦𑀁. 𑀤𑀴𑁆𑀳𑀥𑀫𑁆𑀫𑁂, 𑀤𑀴𑁆𑀳𑀥𑀫𑁆𑀫𑀲𑁆𑀫𑀺𑀁, 𑀤𑀴𑁆𑀳𑀥𑀫𑁆𑀫𑀫𑁆𑀳𑀺, 𑀤𑀴𑁆𑀳𑀥𑀫𑁆𑀫𑁂𑀲𑀼. 𑀪𑁄 𑀤𑀴𑁆𑀳𑀥𑀫𑁆𑀫, 𑀪𑀯𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀸𑀦𑁄, 𑀪𑀯𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀸𑀢𑀺. 𑀏𑀯𑀁 𑀧𑀘𑁆𑀘𑀓𑁆𑀔𑀥𑀫𑁆𑀫𑀸, 𑀧𑀘𑁆𑀘𑀓𑁆𑀔𑀥𑀫𑁆𑀫𑁄𑀢𑀺 𑀫𑀺𑀲𑁆𑀲𑀓𑀧𑀤𑀫𑀸𑀮𑀸 𑀘 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀯𑀺𑀯𑀝𑀘𑁆𑀙𑀤𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀯𑀺𑀯𑀝𑀘𑁆𑀙𑀤𑀸, 𑀯𑀺𑀯𑀝𑀘𑁆𑀙𑀤𑀸, 𑀯𑀺𑀯𑀝𑀘𑁆𑀙𑀤𑀸𑀦𑁄. 𑀯𑀺𑀯𑀝𑀘𑁆𑀙𑀤𑀸𑀦𑀁, 𑀯𑀺𑀯𑀝𑀘𑁆𑀙𑀤𑀸𑀦𑁂. 𑀯𑀺𑀯𑀝𑀘𑁆𑀙𑀤𑁂𑀦, 𑀯𑀺𑀯𑀝𑀘𑁆𑀙𑀤𑁂𑀳𑀺, 𑀯𑀺𑀯𑀝𑀘𑁆𑀙𑀤𑁂𑀪𑀺. 𑀯𑀺𑀯𑀝𑀘𑁆𑀙𑀤𑀲𑁆𑀲, 𑀯𑀺𑀯𑀝𑀘𑁆𑀙𑀤𑀸𑀦𑀁. 𑀯𑀺𑀯𑀝𑀘𑁆𑀙𑀤𑀸, 𑀯𑀺𑀯𑀝𑀘𑁆𑀙𑀤𑁂𑀳𑀺, 𑀯𑀺𑀯𑀝𑀘𑁆𑀙𑀤𑁂𑀪𑀺. 𑀯𑀺𑀯𑀝𑀘𑁆𑀙𑀤𑀲𑁆𑀲, 𑀯𑀺𑀯𑀝𑀘𑁆𑀙𑀤𑀸𑀦𑀁. 𑀯𑀺𑀯𑀝𑀘𑁆𑀙𑀤𑁂, 𑀯𑀺𑀯𑀝𑀘𑁆𑀙𑀤𑁂𑀲𑀼. 𑀪𑁄 𑀯𑀺𑀯𑀝𑀘𑁆𑀙𑀤, 𑀪𑀯𑀦𑁆𑀢𑁄 𑀯𑀺𑀯𑀝𑀘𑁆𑀙𑀤𑀸, 𑀪𑀯𑀦𑁆𑀢𑁄 𑀯𑀺𑀯𑀝𑀘𑁆𑀙𑀤𑀸𑀦𑁄.

𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 ‘‘𑀲𑀘𑁂 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑀸’’𑀢𑀺 ¶ 𑀧𑀸𑀴𑀺𑀤𑀲𑁆𑀲𑀦𑀢𑁄 𑀆𑀓𑀸𑀭𑀦𑁆𑀢𑀯𑀲𑁂𑀦 𑀓𑀣𑀺𑀢𑀸. ‘‘𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄’’𑀢𑀺𑀧𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 𑀧𑀦 𑀑𑀓𑀸𑀭𑀦𑁆𑀢𑀯𑀲𑁂𑀦𑀧𑀺 𑀓𑀣𑁂𑀢𑀩𑁆𑀩𑀸 ‘‘𑀯𑀺𑀯𑀝𑀘𑁆𑀙𑀤𑁄, 𑀯𑀺𑀯𑀝𑀘𑁆𑀙𑀤𑀸, 𑀯𑀺𑀯𑀝𑀘𑁆𑀙𑀤𑀁, 𑀯𑀺𑀯𑀝𑀘𑁆𑀙𑀤𑁂’’𑀢𑀺. 𑀫𑀺𑀲𑁆𑀲𑀓𑀯𑀲𑁂𑀦𑀧𑀺 𑀓𑀣𑁂𑀢𑀩𑁆𑀩𑀸 ‘‘𑀯𑀺𑀯𑀝𑀘𑁆𑀙𑀤𑀸, 𑀯𑀺𑀯𑀝𑀘𑁆𑀙𑀤𑁄, 𑀯𑀺𑀯𑀝𑀘𑁆𑀙𑀤𑀸𑀦𑁄, 𑀯𑀺𑀯𑀝𑀘𑁆𑀙𑀤𑀸. 𑀯𑀺𑀯𑀝𑀘𑁆𑀙𑀤𑀸𑀦𑀁, 𑀯𑀺𑀯𑀝𑀘𑁆𑀙𑀤𑀁, 𑀯𑀺𑀯𑀝𑀘𑁆𑀙𑀤𑀸𑀦𑁂, 𑀯𑀺𑀯𑀝𑀘𑁆𑀙𑀤𑁂’’𑀇𑀢𑀺.

𑀇𑀤𑀸𑀦𑀺 𑀯𑀢𑁆𑀢𑀳𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀯𑀢𑁆𑀢𑀳𑀸𑀢𑀺 𑀲𑀓𑁆𑀓𑁄.

𑀯𑀢𑁆𑀢𑀳𑀸, 𑀯𑀢𑁆𑀢𑀳𑀸𑀦𑁄. 𑀯𑀢𑁆𑀢𑀳𑀸𑀦𑀁, 𑀯𑀢𑁆𑀢𑀳𑀸𑀦𑁂. 𑀯𑀢𑁆𑀢𑀳𑀸𑀦𑀸, 𑀯𑀢𑁆𑀢𑀳𑀸𑀦𑁂𑀳𑀺, 𑀯𑀢𑁆𑀢𑀳𑀸𑀦𑁂𑀪𑀺. 𑀯𑀢𑁆𑀢𑀳𑀺𑀦𑁄, 𑀯𑀢𑁆𑀢𑀳𑀸𑀦𑀁. 𑀯𑀢𑁆𑀢𑀳𑀸𑀦𑀸, 𑀯𑀢𑁆𑀢𑀳𑀸𑀦𑁂𑀳𑀺, 𑀯𑀢𑁆𑀢𑀳𑀸𑀦𑁂𑀪𑀺. 𑀯𑀢𑁆𑀢𑀳𑀺𑀦𑁄, 𑀯𑀢𑁆𑀢𑀳𑀸𑀦𑀁. 𑀯𑀢𑁆𑀢𑀳𑀸𑀦𑁂, 𑀯𑀢𑁆𑀢𑀳𑀸𑀦𑁂𑀲𑀼. 𑀪𑁄 𑀯𑀢𑁆𑀢𑀳, 𑀪𑀯𑀦𑁆𑀢𑁄 𑀯𑀢𑁆𑀢𑀳𑀸𑀦𑁄. 𑀅𑀣 𑀯𑀸 ‘‘𑀪𑁄 𑀯𑀢𑁆𑀢𑀳𑀸, 𑀪𑁄 𑀯𑀢𑁆𑀢𑀳𑀸𑀦𑁄’’𑀇𑀘𑁆𑀘𑀧𑀺.

𑀇𑀤𑀸𑀦𑀺 𑀯𑀼𑀢𑁆𑀢𑀲𑀺𑀭𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀯𑀼𑀢𑁆𑀢𑀲𑀺𑀭𑀸, 𑀯𑀼𑀢𑁆𑀢𑀲𑀺𑀭𑀸, 𑀯𑀼𑀢𑁆𑀢𑀲𑀺𑀭𑀸𑀦𑁄. 𑀯𑀼𑀢𑁆𑀢𑀲𑀺𑀭𑀸𑀦𑀁, 𑀯𑀼𑀢𑁆𑀢𑀲𑀺𑀭𑀸𑀦𑁂. 𑀯𑀼𑀢𑁆𑀢𑀲𑀺𑀭𑀸𑀦𑀸, 𑀯𑀼𑀢𑁆𑀢𑀲𑀺𑀭𑀸𑀦𑁂𑀳𑀺, 𑀯𑀼𑀢𑁆𑀢𑀲𑀺𑀭𑀸𑀦𑁂𑀪𑀺. 𑀯𑀼𑀢𑁆𑀢𑀲𑀺𑀭𑀲𑁆𑀲, 𑀯𑀼𑀢𑁆𑀢𑀲𑀺𑀭𑀸𑀦𑀁, 𑀯𑀼𑀢𑁆𑀢𑀲𑀺𑀭𑀸, 𑀯𑀼𑀢𑁆𑀢𑀲𑀺𑀭𑁂𑀳𑀺, 𑀯𑀼𑀢𑁆𑀢𑀲𑀺𑀭𑁂𑀪𑀺. 𑀯𑀼𑀢𑁆𑀢𑀲𑀺𑀭𑀲𑁆𑀲, 𑀯𑀼𑀢𑁆𑀢𑀲𑀺𑀭𑀸𑀦𑀁. 𑀯𑀼𑀢𑁆𑀢𑀲𑀺𑀭𑁂, 𑀯𑀼𑀢𑁆𑀢𑀲𑀺𑀭𑁂𑀲𑀼. 𑀪𑁄 𑀯𑀼𑀢𑁆𑀢𑀲𑀺𑀭, 𑀪𑀸𑀦𑁆𑀢𑁄 𑀯𑀼𑀢𑁆𑀢𑀲𑀺𑀭𑀸𑀦𑁄𑀢𑀺. ‘‘𑀯𑀼𑀢𑁆𑀢𑀲𑀺𑀭𑁄’’𑀢𑀺 𑀑𑀓𑀸𑀭𑀦𑁆𑀢𑀧𑀸𑀞𑁄𑀧𑀺 𑀤𑀺𑀲𑁆𑀲𑀢𑀺.

𑀇𑀤𑀸𑀦𑀺 𑀬𑀼𑀯𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀬𑀼𑀯𑀸, 𑀬𑀼𑀯𑀸, 𑀬𑀼𑀯𑀸𑀦𑁄, 𑀬𑀼𑀯𑀸𑀦𑀸. 𑀬𑀼𑀯𑀸𑀦𑀁, 𑀬𑀼𑀯𑀁, 𑀬𑀼𑀯𑀸𑀦𑁂, 𑀬𑀼𑀯𑁂. 𑀬𑀼𑀯𑀸𑀦𑀸, 𑀬𑀼𑀯𑁂𑀦, 𑀬𑀼𑀯𑀸𑀦𑁂𑀦, 𑀬𑀼𑀯𑀸𑀦𑁂𑀳𑀺, 𑀬𑀼𑀯𑀸𑀦𑁂𑀪𑀺, 𑀬𑀼𑀯𑁂𑀳𑀺, 𑀬𑀼𑀯𑁂𑀪𑀺. 𑀬𑀼𑀯𑀸𑀦𑀲𑁆𑀲, 𑀬𑀼𑀯𑀲𑁆𑀲, 𑀬𑀼𑀯𑀸𑀦𑀸𑀦𑀁, 𑀬𑀼𑀯𑀸𑀦𑀁. 𑀬𑀼𑀯𑀸𑀦𑀸 ¶ , 𑀬𑀼𑀯𑀸𑀦𑀲𑁆𑀫𑀸, 𑀬𑀼𑀯𑀸𑀦𑀫𑁆𑀳𑀸, 𑀬𑀼𑀯𑀸𑀦𑁂𑀳𑀺, 𑀬𑀼𑀯𑀸𑀦𑁂𑀪𑀺, 𑀬𑀼𑀯𑁂𑀳𑀺, 𑀬𑀼𑀯𑁂𑀪𑀺. 𑀬𑀼𑀯𑀸𑀦𑀲𑁆𑀲, 𑀬𑀼𑀯𑀲𑁆𑀲, 𑀬𑀼𑀯𑀸𑀦𑀸𑀦𑀁, 𑀬𑀼𑀯𑀸𑀦𑀁. 𑀬𑀼𑀯𑀸𑀦𑁂, 𑀬𑀼𑀯𑀸𑀦𑀲𑁆𑀫𑀺𑀁, 𑀬𑀼𑀯𑀸𑀦𑀫𑁆𑀳𑀺, 𑀬𑀼𑀯𑁂, 𑀬𑀼𑀯𑀲𑁆𑀫𑀺𑀁, 𑀬𑀼𑀯𑀫𑁆𑀳𑀺, 𑀬𑀼𑀯𑀸𑀦𑁂𑀲𑀼, 𑀬𑀼𑀯𑀸𑀲𑀼, 𑀬𑀼𑀯𑁂𑀲𑀼. 𑀪𑁄 𑀬𑀼𑀯, 𑀬𑀼𑀯𑀸𑀦, 𑀪𑀯𑀦𑁆𑀢𑁄 𑀬𑀼𑀯𑀸𑀦𑀸.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀤𑁂𑀲𑁂𑀦 𑀆𑀓𑀸𑀭𑀦𑁆𑀢𑀦𑀬𑁄 𑀘 𑀲𑀩𑁆𑀩𑀣𑀸 𑀑𑀓𑀸𑀭𑀦𑁆𑀢𑀦𑀬𑁄 𑀘 𑀏𑀓𑀤𑁂𑀲𑁂𑀦 𑀘 𑀑𑀓𑀸𑀭𑀦𑁆𑀢𑀦𑀬𑁄𑀢𑀺 𑀢𑀬𑁄 𑀦𑀬𑀸 𑀤𑀺𑀲𑁆𑀲𑀦𑁆𑀢𑀺.

𑀫𑀖𑀯𑀲𑀤𑁆𑀤𑀲𑁆𑀲𑀧𑀺 ‘‘𑀫𑀖𑀯𑀸, 𑀫𑀖𑀯𑀸, 𑀫𑀖𑀯𑀸𑀦𑁄, 𑀫𑀖𑀯𑀸𑀦𑀸’’𑀢𑀺𑀆𑀤𑀺𑀦𑀸 𑀬𑀼𑀯𑀲𑀤𑁆𑀤𑀲𑁆𑀲𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄𑀚𑀦𑀁 𑀓𑀼𑀩𑁆𑀩𑀦𑁆𑀢𑀺 𑀕𑀭𑀽. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀦 ‘‘𑀫𑀖𑀯𑀸 𑀢𑀺𑀝𑁆𑀞𑀢𑀺, 𑀫𑀖𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺. 𑀫𑀖𑀯𑀦𑁆𑀢𑀁 𑀧𑀲𑁆𑀲𑀢𑀺, 𑀫𑀖𑀯𑀦𑁆𑀢𑁂 𑀧𑀲𑁆𑀲𑀢𑀺. 𑀫𑀖𑀯𑀢𑀸 𑀓𑀢𑀁, 𑀫𑀖𑀯𑀦𑁆𑀢𑁂𑀳𑀺 𑀓𑀢𑀁, 𑀫𑀖𑀯𑀦𑁆𑀢𑁂𑀪𑀺 𑀓𑀢𑀁. 𑀫𑀖𑀯𑀢𑁄 𑀤𑀻𑀬𑀢𑁂, 𑀫𑀖𑀯𑀦𑁆𑀢𑀸𑀦𑀁 𑀤𑀻𑀬𑀢𑁂. 𑀫𑀖𑀯𑀢𑀸 𑀦𑀺𑀲𑁆𑀲𑀝𑀁, 𑀫𑀖𑀯𑀦𑁆𑀢𑁂𑀳𑀺 𑀦𑀺𑀲𑁆𑀲𑀝𑀁, 𑀫𑀖𑀯𑀦𑁆𑀢𑁂𑀪𑀺 𑀦𑀺𑀲𑁆𑀲𑀝𑀁. 𑀫𑀖𑀯𑀢𑁄 𑀧𑀭𑀺𑀕𑁆𑀕𑀳𑁄, 𑀫𑀖𑀯𑀦𑁆𑀢𑀸𑀦𑀁 𑀧𑀭𑀺𑀕𑁆𑀕𑀳𑁄. 𑀫𑀖𑀯𑀢𑀺 𑀧𑀢𑀺𑀝𑁆𑀞𑀺𑀢𑀁, 𑀫𑀖𑀯𑀦𑁆𑀢𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄 𑀫𑀖𑀯𑀸, 𑀪𑀯𑀦𑁆𑀢𑁄 𑀫𑀖𑀯𑀦𑁆𑀢𑁄’’𑀢𑀺 𑀕𑀼𑀡𑀯𑀸𑀧𑀤𑀦𑀬𑁂𑀦 𑀯𑀼𑀢𑁆𑀢𑀁, 𑀢𑀣𑀸 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀫𑁆𑀧𑀺. 𑀢𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. 𑀧𑀸𑀴𑀺𑀬𑀜𑁆𑀳𑀺 ‘‘𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀫𑀖𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 ‘‘𑀫𑀖𑁄𑀢𑀺 𑀦𑀸𑀫𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀖𑀯𑀸’’𑀢𑀺 𑀅𑀢𑁆𑀣𑀺 𑀅𑀢𑁆𑀣𑀯𑀸𑀘𑀓𑀯𑀦𑁆𑀢𑀼𑀧𑀘𑁆𑀘𑀬𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀕𑀼𑀡𑀯𑀦𑁆𑀢𑀼𑀲𑀤𑁆𑀤𑀲𑁆𑀲 𑀯𑀺𑀬 𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀤𑁆𑀥𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀅𑀤𑁆𑀥𑀲𑀤𑁆𑀤𑀲𑁆𑀲 𑀳𑀺 𑀬𑀁 𑀓𑀸𑀮𑁂 𑀫𑀕𑁆𑀕𑁂 𑀘 𑀯𑀢𑁆𑀢𑀫𑀸𑀦𑀲𑁆𑀲 ‘‘𑀅𑀢𑀻𑀢𑁄 𑀅𑀤𑁆𑀥𑀸. 𑀤𑀻𑀖𑁄 𑀅𑀤𑁆𑀥𑀸 𑀲𑀼𑀤𑀼𑀕𑁆𑀕𑀫𑁄’’𑀢𑀺𑀆𑀤𑀻𑀲𑀼 ‘‘𑀅𑀤𑁆𑀥𑀸’’𑀢𑀺 𑀧𑀞𑀫𑀦𑁆𑀢𑀁 𑀭𑀽𑀧𑀁 𑀤𑀺𑀲𑁆𑀲𑀢𑀺, 𑀢𑀁 ‘‘𑀅𑀤𑁆𑀥𑀸 𑀇𑀤𑀁 𑀫𑀦𑁆𑀢𑀧𑀤𑀁 𑀲𑀼𑀤𑀼𑀤𑁆𑀤𑀲’’𑀦𑁆𑀢𑀺𑀆𑀤𑀻𑀲𑀼 𑀏𑀓𑀁𑀲𑀢𑁆𑀣𑁂 ¶ 𑀯𑀢𑁆𑀢𑀫𑀸𑀦𑁂𑀦 ‘‘𑀅𑀤𑁆𑀥𑀸’’𑀢𑀺 𑀦𑀺𑀧𑀸𑀢𑀧𑀤𑁂𑀦 𑀲𑀫𑀸𑀦𑀁. 𑀦𑀺𑀧𑀸𑀢𑀸𑀦𑀁 𑀧𑀦 𑀧𑀤𑀫𑀸𑀮𑀸 𑀦 𑀭𑀽𑀳𑀢𑀺, 𑀦𑀸𑀫𑀺𑀓𑀸𑀦𑀁𑀬𑁂𑀯 𑀭𑀽𑀳𑀢𑀺.

𑀅𑀤𑁆𑀥𑀸, 𑀅𑀤𑁆𑀥𑀸, 𑀅𑀤𑁆𑀥𑀸𑀦𑁄. 𑀅𑀤𑁆𑀥𑀸𑀦𑀁, 𑀅𑀤𑁆𑀥𑀸𑀦𑁂. 𑀅𑀤𑁆𑀥𑀼𑀦𑀸, 𑀅𑀤𑁆𑀥𑀸𑀦𑁂𑀳𑀺, 𑀅𑀤𑁆𑀥𑀸𑀦𑁂𑀪𑀺. 𑀅𑀤𑁆𑀥𑀼𑀦𑁄, 𑀅𑀤𑁆𑀥𑀸𑀦𑀁. 𑀅𑀤𑁆𑀥𑀼𑀦𑀸, 𑀅𑀤𑁆𑀥𑀸𑀦𑁂𑀳𑀺, 𑀅𑀤𑁆𑀥𑀸𑀦𑁂𑀪𑀺. 𑀅𑀤𑁆𑀥𑀼𑀦𑁄, 𑀅𑀤𑁆𑀥𑀸𑀦𑀁. 𑀅𑀤𑁆𑀥𑀦𑀺, 𑀅𑀤𑁆𑀥𑀸𑀦𑁂, 𑀅𑀤𑁆𑀥𑀸𑀦𑁂𑀲𑀼. 𑀪𑁄 𑀅𑀤𑁆𑀥, 𑀪𑀯𑀦𑁆𑀢𑁄 𑀅𑀤𑁆𑀥𑀸, 𑀅𑀤𑁆𑀥𑀸𑀦𑁄.

𑀏𑀢𑁆𑀣 𑀓𑀺𑀜𑁆𑀘𑀺 𑀧𑀬𑁄𑀕𑀁 𑀤𑀲𑁆𑀲𑁂𑀲𑁆𑀲𑀸𑀫 𑁋 𑀢𑀬𑁄 𑀅𑀤𑁆𑀥𑀸. 𑀅𑀤𑁆𑀥𑀸𑀦𑀁 𑀯𑀻𑀢𑀺𑀯𑀢𑁆𑀢𑁄. 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸. 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦. 𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄. 𑀅𑀳𑀽 𑀅𑀢𑀻𑀢𑀫𑀤𑁆𑀥𑀸𑀦𑁂, 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄. 𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀇𑀘𑁆𑀘𑀸𑀤𑀬𑁄 𑀜𑁂𑀬𑁆𑀬𑀸. 𑀅𑀬𑀫𑁆𑀧𑀺 𑀧𑀦𑁂𑀢𑁆𑀣 𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 ‘‘𑀅𑀤𑁆𑀥𑀸𑀦𑀦𑁆𑀢𑀺 𑀤𑀼𑀢𑀺𑀬𑁂𑀓𑀯𑀘𑀦𑀦𑁆𑀢𑀯𑀲𑁂𑀦 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀩𑀳𑀼𑀯𑀘𑀦𑀯𑀲𑁂𑀦 𑀘 𑀯𑀼𑀢𑁆𑀢𑀁 𑀭𑀽𑀧𑀁. ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀤𑀻𑀖𑀫𑀕𑁆𑀕𑀯𑀸𑀘𑀓𑁂𑀦 ‘‘𑀅𑀤𑁆𑀥𑀸𑀦’’𑀦𑁆𑀢𑀺 𑀦𑀧𑀼𑀁𑀲𑀓𑁂𑀦 𑀲𑀤𑀺𑀲𑀁 𑀲𑀼𑀢𑀺𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺.

𑀇𑀤𑀸𑀦𑀺 𑀫𑀼𑀤𑁆𑀥𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀫𑀼𑀤𑁆𑀥𑀸, 𑀫𑀼𑀤𑁆𑀥𑀸, 𑀫𑀼𑀤𑁆𑀥𑀸𑀦𑁄. 𑀫𑀼𑀤𑁆𑀥𑀁, 𑀫𑀼𑀤𑁆𑀥𑁂, 𑀫𑀼𑀤𑁆𑀥𑀸𑀦𑁂. 𑀫𑀼𑀤𑁆𑀥𑀸𑀦𑀸, 𑀫𑀼𑀤𑁆𑀥𑁂𑀳𑀺, 𑀫𑀼𑀤𑁆𑀥𑁂𑀪𑀺. 𑀫𑀼𑀤𑁆𑀥𑀲𑁆𑀲, 𑀫𑀼𑀤𑁆𑀥𑀸𑀦𑀁. 𑀫𑀼𑀤𑁆𑀥𑀸𑀦𑀸, 𑀫𑀼𑀤𑁆𑀥𑁂𑀳𑀺, 𑀫𑀼𑀤𑁆𑀥𑁂𑀪𑀺. 𑀫𑀼𑀤𑁆𑀥𑀲𑁆𑀲, 𑀫𑀼𑀤𑁆𑀥𑀸𑀦𑀁. 𑀫𑀼𑀤𑁆𑀥𑀦𑀺, 𑀫𑀼𑀤𑁆𑀥𑀦𑁂𑀲𑀼. 𑀪𑁄 𑀫𑀼𑀤𑁆𑀥, 𑀪𑀯𑀦𑁆𑀢𑁄 𑀫𑀼𑀤𑁆𑀥𑀸, 𑀫𑀼𑀤𑁆𑀥𑀸𑀦𑁄.

𑀏𑀯𑀁 𑀅𑀪𑀺𑀪𑀯𑀺𑀢𑀸𑀧𑀤𑁂𑀦 𑀯𑀺𑀲𑀤𑀺𑀲𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀇𑀢𑀺 𑀦𑀸𑀦𑀸𑀦𑀬𑁂𑀳𑀺 𑀅𑀪𑀺𑀪𑀯𑀺𑀢𑀸𑀧𑀤𑁂𑀦 𑀲𑀤𑀺𑀲𑀸𑀦𑀺 𑀯𑀢𑁆𑀢𑀸𑀤𑀻𑀦𑀺 𑀯𑀺𑀲𑀤𑀺𑀲𑀸𑀦𑀺 𑀕𑀼𑀡𑀯𑀸𑀤𑀻𑀦𑀺 𑀭𑀸𑀚𑀲𑀸𑀇𑀘𑁆𑀘𑀸𑀤𑀻𑀦𑀺 𑀘 𑀆𑀓𑀸𑀭𑀦𑁆𑀢𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀲𑀤𑁆𑀥𑀺𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀳𑀺.

𑀏𑀢𑁆𑀣 ¶ 𑀬𑁄𑀕𑀁 𑀲𑀘𑁂 𑀧𑁄𑀲𑁄, 𑀓𑀭𑁂 𑀧𑀡𑁆𑀟𑀺𑀢𑀚𑀸𑀢𑀺𑀓𑁄;

𑀢𑀲𑁆𑀲 𑀯𑁄𑀳𑀸𑀭𑀪𑁂𑀤𑁂𑀲𑀼, 𑀯𑀺𑀚𑀫𑁆𑀪𑁂 𑀜𑀸𑀡𑀫𑀼𑀢𑁆𑀢𑀫𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀦𑀺𑀘𑁆𑀙𑀬𑁄 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲

𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄 𑀦𑀸𑀫

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.

𑀉𑀓𑀸𑀭𑀦𑁆𑀢 𑀅𑀯𑀡𑁆𑀡𑀦𑁆𑀢𑀢𑀸𑀧𑀓𑀢𑀺𑀓𑀁

𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑁭. 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀪𑀯𑀦𑁆𑀢 𑀓𑀭𑁄𑀦𑁆𑀢𑀇𑀘𑁆𑀘𑀸𑀤𑀺𑀓𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋

𑀕𑀘𑁆𑀙𑀁 𑀫𑀳𑀁 𑀘𑀭𑀁 𑀢𑀺𑀝𑁆𑀞𑀁, 𑀤𑀤𑀁 𑀪𑀼𑀜𑁆𑀚𑀁 𑀲𑀼𑀡𑀁 𑀧𑀘𑀁;

𑀚𑀬𑀁 𑀚𑀭𑀁 𑀘𑀯𑀁 𑀫𑀻𑀬𑀁, 𑀲𑀭𑀁 𑀓𑀼𑀩𑁆𑀩𑀁 𑀚𑀧𑀁 𑀯𑀚𑀁.

𑀕𑀘𑁆𑀙𑀁, 𑀕𑀘𑁆𑀙𑀦𑁆𑀢𑁄, 𑀕𑀘𑁆𑀙𑀦𑁆𑀢𑀸. 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑁂. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀢𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁂𑀲𑀼. 𑀪𑁄 𑀕𑀘𑁆𑀙𑀁, 𑀪𑁄 𑀕𑀘𑁆𑀙𑀸, 𑀪𑀯𑀦𑁆𑀢𑁄 𑀕𑀘𑁆𑀙𑀦𑁆𑀢𑁄.

𑀕𑀘𑁆𑀙𑀸𑀤𑀻𑀦𑀺 𑀅𑀜𑁆𑀜𑀸𑀦𑀺 𑀘 𑀢𑀁𑀲𑀤𑀺𑀲𑀸𑀦𑀁 𑀏𑀯𑀁 𑀜𑁂𑀬𑁆𑀬𑀸𑀦𑀻𑀢𑀺 𑀬𑀫𑀓𑀫𑀳𑀸𑀣𑁂𑀭𑀫𑀢𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀢𑀢𑀺𑀬𑁂𑀓𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑀸, 𑀕𑀘𑁆𑀙𑀦𑁆𑀢𑀲𑁆𑀫𑀸, 𑀕𑀘𑁆𑀙𑀦𑁆𑀢𑀫𑁆𑀳𑀸, 𑀕𑀘𑁆𑀙𑀦𑁆𑀢𑀲𑁆𑀫𑀺𑀁, 𑀕𑀘𑁆𑀙𑀦𑁆𑀢𑀫𑁆𑀳𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀬𑀫𑀓𑀫𑀳𑀸𑀣𑁂𑀭𑁂𑀦 𑀆𑀮𑀧𑀦𑀯𑀘𑀦𑀝𑁆𑀞𑀸𑀦𑁂𑀬𑁂𑀯 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀢𑁆𑀢𑀁 𑀓𑀣𑀺𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂 ¶ 𑀏𑀓𑀯𑀘𑀦𑀢𑁆𑀢𑀁. 𑀓𑁂𑀳𑀺𑀘𑀺 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑀝𑁆𑀞𑀸𑀦𑁂 𑀏𑀓𑀯𑀘𑀦𑀩𑀳𑀼𑀯𑀘𑀦𑀢𑁆𑀢𑀁, 𑀆𑀮𑀧𑀦𑀯𑀘𑀦𑀝𑁆𑀞𑀸𑀦𑁂 𑀩𑀳𑀼𑀯𑀘𑀦𑀢𑁆𑀢𑀁𑀬𑁂𑀯 𑀓𑀣𑀺𑀢𑀁. ‘‘𑀕𑀘𑁆𑀙𑀁, 𑀫𑀳𑀁, 𑀘𑀭’’𑀦𑁆𑀢𑀺𑀆𑀤𑀻𑀦𑀁 𑀧𑀦 𑀆𑀮𑀧𑀦𑀝𑁆𑀞𑀸𑀦𑁂 𑀏𑀓𑀯𑀘𑀦𑀢𑁆𑀢𑀁. 𑀫𑀬𑀁 𑀧𑀦 𑀩𑀼𑀤𑁆𑀥𑀯𑀘𑀦𑁂 𑀅𑀦𑁂𑀓𑀸𑀲𑀼 𑀘𑀸𑀝𑁆𑀞𑀓𑀣𑀸𑀲𑀼 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸𑀦𑀁 ‘‘𑀕𑀘𑁆𑀙𑀁, 𑀫𑀳𑀁’’𑀇𑀘𑁆𑀘𑀸𑀤𑀻𑀦𑀜𑁆𑀘 𑀲𑀸𑀦𑀼𑀲𑀸𑀭𑀸𑀮𑀧𑀦𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀁 𑀅𑀤𑀲𑁆𑀲𑀦𑀢𑁄 ‘‘𑀕𑀘𑁆𑀙𑀦𑁆𑀢𑁄 𑀪𑀸𑀭𑀤𑁆𑀯𑀸𑀚𑁄. 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺. 𑀫𑀳𑀦𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄’’𑀢𑀺𑀆𑀤𑀻𑀦𑀁 𑀧𑀦 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀧𑁆𑀧𑀬𑁄𑀕𑀸𑀦𑀜𑁆𑀜𑁂𑀯 𑀤𑀲𑁆𑀲𑀦𑀢𑁄 𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀸𑀦𑀺 𑀯𑀺𑀬 𑀫𑀜𑁆𑀜𑀸𑀫. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀘𑁆𑀘𑀢𑁆𑀢𑀸𑀮𑀧𑀦𑀝𑁆𑀞𑀸𑀦𑁂 ‘‘𑀫𑀳𑀦𑁆𑀢𑁄, 𑀪𑀯𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀩𑀳𑀼𑀯𑀘𑀦𑀢𑁆𑀢𑀫𑁂𑀯 𑀓𑀣𑀺𑀢𑀁, 𑀦 𑀏𑀓𑀯𑀘𑀦𑀢𑁆𑀢𑀁. 𑀢𑀣𑀸 𑀳𑀺 𑀢𑀢𑁆𑀣 ‘‘𑀫𑀳𑀁 𑀪𑀯𑀁 𑀘𑀭𑀁 𑀢𑀺𑀝𑁆𑀞’’𑀦𑁆𑀢𑀺 𑀕𑀸𑀣𑀁 𑀯𑀢𑁆𑀯𑀸 ‘‘𑀫𑀳𑀁 𑀢𑀺𑀝𑁆𑀞𑀢𑀺, 𑀫𑀳𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀘, ‘‘𑀪𑁄 𑀫𑀳𑀸, 𑀪𑀯𑀦𑁆𑀢𑁄 𑀫𑀳𑀦𑁆𑀢𑁄’’𑀢𑀺 𑀘, ‘‘𑀪𑀯𑀁 𑀢𑀺𑀝𑁆𑀞𑀢𑀺, 𑀪𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀘 𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀧𑀦 ‘‘𑀪𑀯𑀁, 𑀪𑀯𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀬𑀢𑁆𑀣 ‘‘𑀳𑁄𑀦𑁆𑀢𑁄 𑀳𑁄𑀦𑁆𑀢𑀸’’𑀢𑀺 𑀓𑁆𑀭𑀺𑀬𑀢𑁆𑀣𑀁 𑀦 𑀯𑀤𑀦𑁆𑀢𑀺, 𑀢𑀢𑁆𑀣 ‘‘𑀪𑀯𑀁 𑀓𑀘𑁆𑀘𑀸𑀦𑁄. 𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂 𑀧𑀢𑀦𑀢𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂’’𑀢𑀺 𑀏𑀢𑁆𑀣 ‘‘𑀲𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀯𑀺𑀬 ‘‘𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀢𑁆𑀣 ‘‘𑀅𑀭𑀳𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀯𑀺𑀬 𑀘 ‘‘𑀪𑀯𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀩𑀳𑀼𑀯𑀘𑀦𑀢𑁆𑀢𑀁 𑀦𑀺𑀚𑁆𑀛𑀸𑀦𑀓𑁆𑀔𑀫𑀁. ‘‘𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄, 𑀢𑀺𑀝𑁆𑀞𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀦 𑀩𑀳𑀼𑀯𑀘𑀦𑀢𑁆𑀢𑀁 𑀦 𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀯𑀺𑀬 𑀅𑀫𑁆𑀳𑁂 𑀧𑀝𑀺𑀪𑀸𑀢𑀺. 𑀦 𑀳𑀺 𑀓𑀢𑁆𑀣𑀘𑀺𑀧𑀺 ‘‘𑀲𑀦𑁆𑀢𑁄, 𑀅𑀭𑀳𑀦𑁆𑀢𑁄, 𑀪𑀯𑀦𑁆𑀢𑁄’’𑀢𑀺 𑀧𑀤𑀯𑀚𑁆𑀚𑀺𑀢𑀸𑀦𑀁 ‘‘𑀕𑀘𑁆𑀙𑀦𑁆𑀢𑁄, 𑀫𑀳𑀦𑁆𑀢𑁄, 𑀘𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀅𑀦𑁂𑀓𑀧𑀤𑀲𑀢𑀸𑀦𑀁 𑀩𑀳𑀼𑀯𑀘𑀦𑀦𑁆𑀢𑀢𑀸𑀧𑀬𑁄𑀕𑁂 𑀧𑀲𑁆𑀲𑀸𑀫. 𑀢𑀣𑀸 𑀳𑀺 𑁋

𑀩𑀯𑁆𑀳𑀢𑁆𑀢𑁂 ¶ 𑀓𑀢𑁆𑀣𑀘𑀺 𑀞𑀸𑀦𑁂, ‘‘𑀚𑀸𑀦’’𑀫𑀺𑀘𑁆𑀘𑀸𑀤𑀬𑁄 𑀬𑀣𑀸;

𑀤𑀺𑀲𑁆𑀲𑀦𑁆𑀢𑀺 𑀦𑁂𑀯𑀁 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

𑀩𑀯𑁆𑀳𑀢𑁆𑀢𑁂 𑀓𑀢𑁆𑀣𑀘𑀺 𑀞𑀸𑀦𑁂, ‘‘𑀲𑀦𑁆𑀢𑁄’’ 𑀇𑀘𑁆𑀘𑀸𑀤𑀬𑁄𑀧𑀺 𑀘;

𑀤𑀺𑀲𑁆𑀲𑀦𑁆𑀢𑀺 𑀦𑁂𑀯𑀁 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

‘‘𑀅𑀭𑀳𑀦𑁆𑀢𑁄’’𑀢𑀺 𑀩𑀯𑁆𑀳𑀢𑁆𑀢𑁂, 𑀏𑀓𑀦𑁆𑀢𑁂𑀦𑁂𑀯 𑀤𑀺𑀲𑁆𑀲𑀢𑀺;

𑀦𑁂𑀯𑀁 𑀤𑀺𑀲𑁆𑀲𑀦𑁆𑀢𑀺 𑀩𑀯𑁆𑀳𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’ 𑀇𑀢𑀺𑀆𑀤𑀬𑁄.

𑀅𑀦𑁂𑀓𑀲𑀢𑀧𑀸𑀞𑁂𑀲𑀼, ‘‘𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀻𑀲𑀼;

𑀏𑀓𑀲𑁆𑀲𑀧𑀺 𑀩𑀳𑀼𑀓𑀢𑁆𑀢𑁂, 𑀧𑀯𑀢𑁆𑀢𑀺 𑀦 𑀢𑀼 𑀤𑀺𑀲𑁆𑀲𑀢𑀺.

𑀩𑀳𑀼𑀯𑀘𑀦𑀦𑀬𑁂𑀦, ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀳𑀺;

𑀕𑀳𑀡𑁂 𑀲𑀢𑀺 𑀩𑀳𑀯𑁄, 𑀤𑁄𑀲𑀸 𑀤𑀺𑀲𑁆𑀲𑀦𑁆𑀢𑀺 𑀲𑀘𑁆𑀘𑀢𑁄.

𑀬𑀣𑁂𑀓𑀫𑁆𑀳𑀺 𑀖𑀭𑁂 𑀤𑀟𑁆𑀠𑁂, 𑀤𑀟𑁆𑀠𑀸 𑀲𑀸𑀫𑀻𑀧𑀺𑀓𑀸 𑀖𑀭𑀸;

𑀢𑀣𑀸 𑀩𑀯𑁆𑀳𑀢𑁆𑀢𑀯𑀸𑀘𑀺𑀢𑁆𑀢𑁂, ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀧𑀤𑀲𑁆𑀲 𑀢𑀼.

‘‘𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀻𑀦𑀁, 𑀩𑀯𑁆𑀳𑀢𑁆𑀢𑀯𑀸𑀘𑀺𑀢𑀸 𑀲𑀺𑀬𑀸;

𑀭𑀽𑀧𑀦𑀬𑁄 𑀅𑀦𑀺𑀝𑁆𑀞𑁄 𑀘, 𑀕𑀳𑁂𑀢𑀩𑁆𑀩𑁄 𑀅𑀦𑁂𑀓𑀥𑀸.

𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 ‘‘𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀁 𑀦𑀸𑀫 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀫𑀳𑀸𑀔𑀻𑀡𑀸𑀲𑀯𑁂𑀦 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀓𑀢’’𑀦𑁆𑀢𑀺 𑀮𑁄𑀓𑁂 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀇𑀤𑀁 𑀞𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀣𑁂𑀭𑁂 𑀕𑀸𑀭𑀯𑁂𑀦 𑀏𑀯𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀧𑀸𑀴𑀺𑀦𑀬𑀁 𑀕𑀭𑀼𑀁 𑀓𑀢𑁆𑀯𑀸 𑀤𑀺𑀝𑁆𑀞𑁂𑀦𑁂𑀓𑀯𑀘𑀦𑀦𑀬𑁂𑀦 𑀅𑀤𑀺𑀝𑁆𑀞𑁄 𑀩𑀳𑀼𑀯𑀘𑀦𑀦𑀬𑁄 𑀙𑀟𑁆𑀟𑁂𑀢𑀩𑁆𑀩𑁄. 𑀏𑀯𑀁 𑀲𑀢𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑁂𑀲𑀼 𑀦𑀬𑁄 𑀲𑁄𑀪𑀦𑁄 𑀪𑀯𑀢𑀺. 𑀅𑀬𑀁 𑀧𑀦 𑀅𑀫𑁆𑀳𑀸𑀓𑀁 𑀭𑀼𑀘𑀺 𑁋

‘‘𑀪𑀯𑀁 𑀓𑀭𑀁 𑀅𑀭𑀳𑀁 𑀲𑀁, 𑀫𑀳𑀁’’ 𑀇𑀢𑀺 𑀧𑀤𑀸𑀦𑀺 𑀢𑀼;

𑀯𑀺𑀲𑀤𑀺𑀲𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀮𑀓𑁆𑀔𑀬𑁂.

‘‘𑀕𑀘𑁆𑀙𑀁 𑀘𑀭𑀁 𑀤𑀤𑀁 𑀢𑀺𑀝𑁆𑀞𑀁, 𑀘𑀺𑀦𑁆𑀢𑀬𑀁 𑀪𑀸𑀯𑀬𑀁 𑀯𑀤𑀁;

𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀺, 𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀢𑀢𑁆𑀭 ‘‘𑀚𑀸𑀦’’𑀦𑁆𑀢𑀺𑀆𑀤𑀻𑀦𑀺, 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀭𑁂;

𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦-𑀯𑀲𑁂𑀦𑀸𑀢𑀺 𑀯𑀺𑀪𑀸𑀯𑀬𑁂.

𑀢𑀢𑁆𑀭 ¶ 𑀢𑀸𑀯 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑀺 𑁋 𑀪𑀯𑀁𑀲𑀤𑁆𑀤𑁄 𑀳𑀺 ‘‘𑀯𑀟𑁆𑀠𑀦𑁆𑀢𑁄, 𑀳𑁄𑀦𑁆𑀢𑁄’’𑀢𑀺 𑀅𑀢𑁆𑀣𑁂𑀧𑀺 𑀯𑀤𑀢𑀺. 𑀢𑁂𑀲𑀁 𑀯𑀲𑁂𑀦 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀪𑀯𑀁, 𑀪𑀯𑀦𑁆𑀢𑁄, 𑀪𑀯𑀦𑁆𑀢𑀸. 𑀪𑀯𑀦𑁆𑀢𑀁, 𑀪𑀯𑀦𑁆𑀢𑁂. 𑀪𑀯𑀦𑁆𑀢𑁂𑀦, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁. 𑀪𑀯𑀦𑁆𑀢𑀸, 𑀪𑀯𑀦𑁆𑀢𑀲𑁆𑀫𑀸, 𑀪𑀯𑀦𑁆𑀢𑀫𑁆𑀳𑀸, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁. 𑀪𑀯𑀦𑁆𑀢𑁂, 𑀪𑀯𑀦𑁆𑀢𑀲𑁆𑀫𑀺𑀁, 𑀪𑀯𑀦𑁆𑀢𑀫𑁆𑀳𑀺, 𑀪𑀯𑀦𑁆𑀢𑁂𑀲𑀼. 𑀳𑁂 𑀪𑀯𑀦𑁆𑀢, 𑀳𑁂 𑀪𑀯𑀦𑁆𑀢𑀸.

𑀢𑀢𑁆𑀣 ‘‘𑀪𑀯𑀁, 𑀪𑀯𑀦𑁆𑀢𑁄’’𑀢𑀺𑀆𑀤𑀻𑀦𑀁 ‘‘𑀯𑀟𑁆𑀠𑀦𑁆𑀢𑁄𑀳𑁄𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀺. 𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀺. 𑀭𑀸𑀚𑀸 𑀪𑀯𑀦𑁆𑀢𑁄 𑀦𑀸𑀦𑀸𑀲𑀫𑁆𑀧𑀢𑁆𑀢𑀻𑀳𑀺 𑀫𑁄𑀤𑀢𑀺. 𑀓𑀼𑀴𑀻𑀭𑀤𑀳𑁄 𑀕𑀗𑁆𑀕𑀸𑀬 𑀏𑀓𑀸𑀩𑀤𑁆𑀥𑁄, 𑀕𑀗𑁆𑀕𑀸𑀬 𑀧𑀽𑀭𑀡𑀓𑀸𑀮𑁂 𑀕𑀗𑁆𑀕𑁄𑀤𑀓𑁂𑀦 𑀧𑀽𑀭𑀢𑀺, 𑀉𑀤𑀓𑁂 𑀫𑀦𑁆𑀤𑀻 𑀪𑀯𑀦𑁆𑀢𑁂 𑀤𑀳𑀢𑁄 𑀉𑀤𑀓𑀁 𑀕𑀗𑁆𑀕𑀸𑀬 𑀑𑀢𑀭𑀢𑀻’’𑀢𑀺 𑀧𑀬𑁄𑀕𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀸. 𑀏𑀢𑁆𑀣 𑀪𑀯𑀁𑀲𑀤𑁆𑀤𑀫𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀫𑀸𑀦𑀘𑀭𑀫𑀸𑀦𑀲𑀤𑁆𑀤𑀸𑀤𑀻𑀲𑀼 𑀯𑀺𑀬 𑀪𑀯𑀦𑁆𑀢𑀲𑀤𑁆𑀤𑁂 ‘‘𑀪𑀯𑀦𑁆𑀢𑁄, 𑀪𑀯𑀦𑁆𑀢𑀸’’𑀢𑀺 𑀧𑀼𑀭𑀺𑀲𑀦𑀬𑁄𑀧𑀺 𑀮𑀩𑁆𑀪𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀪𑀯𑀦𑁆𑀢𑀁, 𑀪𑀯𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄𑀧𑀺 𑀮𑀩𑁆𑀪𑀢𑀺. 𑀏𑀯𑀁 𑀯𑀟𑁆𑀠𑀦𑀪𑀯𑀦𑀢𑁆𑀣𑀯𑀸𑀘𑀓𑀲𑁆𑀲 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀜𑁆𑀘 𑀯𑀺𑀲𑁂𑀲𑁄 ‘‘𑀪𑀯𑀦𑁆𑀢𑁄’’𑀢𑀺 𑀧𑀤𑀁 𑀯𑀟𑁆𑀠𑀦𑀪𑀯𑀦𑀢𑁆𑀣𑀢𑁄 𑀅𑀜𑁆𑀜𑀢𑁆𑀣𑁂 𑀯𑀢𑁆𑀢𑀫𑀸𑀦𑀁 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀺, 𑀬𑀣𑀸 ‘‘𑀪𑀯𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀯𑀟𑁆𑀠𑀦𑀪𑀯𑀦𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀁 𑀏𑀓𑀯𑀘𑀦𑀫𑁂𑀯. 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀪𑀯𑀦𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀫𑀡𑁂𑀦 𑀦𑀸𑀫 𑀈𑀤𑀺𑀲𑁂𑀲𑀼 𑀓𑀫𑁆𑀫𑁂𑀲𑀼 𑀅𑀩𑁆𑀬𑀸𑀯𑀝𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀯𑀦𑁆𑀢𑁄 𑀳𑀺 𑀲𑀫𑀡𑁄 𑀲𑀼𑀲𑀫𑀡𑁄 𑀅𑀲𑁆𑀲𑀸’’𑀢𑀺. ‘‘𑀪𑀯𑀁’’ 𑀇𑀢𑀺 𑀧𑀤𑀁 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀏𑀓𑀯𑀘𑀦𑀫𑁂𑀯, 𑀢𑀲𑁆𑀫𑀸 ¶ 𑀇𑀤𑀸𑀦𑀺 ‘‘𑀪𑀯𑀁 𑀆𑀦𑀦𑁆𑀤𑁄. 𑀪𑀯𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀺, 𑀅𑀧𑁆𑀧𑀲𑀤𑁆𑀤𑀸 𑀪𑀯𑀦𑁆𑀢𑁄 𑀳𑁄𑀦𑁆𑀢𑀼, 𑀫𑀸 𑀪𑁄𑀦𑁆𑀢𑁄 𑀲𑀤𑁆𑀤𑀫𑀓𑀢𑁆𑀣𑀸’’𑀢𑀺 𑀏𑀯𑀫𑀸𑀤𑀺𑀧𑀬𑁄𑀕𑀤𑀲𑁆𑀲𑀦𑀯𑀲𑁂𑀦 𑀯𑁄𑀳𑀸𑀭𑀯𑀺𑀲𑁂𑀲𑁂 𑀧𑀯𑀢𑁆𑀢𑀁 𑀅𑀜𑁆𑀜𑀁 𑀅𑀢𑁆𑀣𑀁 𑀧𑀝𑀺𑀘𑁆𑀘 𑀅𑀧𑀭𑀸𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀪𑀯𑀁, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄. 𑀪𑀯𑀦𑁆𑀢𑀁, 𑀪𑀯𑀦𑁆𑀢𑁂. 𑀪𑀯𑀢𑀸, 𑀪𑁄𑀢𑀸, 𑀪𑀯𑀦𑁆𑀢𑁂𑀦, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀢𑁄, 𑀪𑁄𑀢𑁄, 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁, 𑀪𑀯𑀢𑀁. 𑀪𑀯𑀢𑀸, 𑀪𑁄𑀢𑀸, 𑀪𑀯𑀦𑁆𑀢𑁂𑀳𑀺, 𑀪𑀯𑀦𑁆𑀢𑁂𑀪𑀺. 𑀪𑀯𑀢𑁄, 𑀪𑁄𑀢𑁄, 𑀪𑀯𑀦𑁆𑀢𑀲𑁆𑀲, 𑀪𑀯𑀦𑁆𑀢𑀸𑀦𑀁, 𑀪𑀯𑀢𑀁. 𑀪𑀯𑀢𑀺, 𑀪𑀯𑀦𑁆𑀢𑁂, 𑀪𑀯𑀦𑁆𑀢𑀲𑁆𑀫𑀺𑀁, 𑀪𑀯𑀦𑁆𑀢𑀫𑁆𑀳𑀺, 𑀪𑀯𑀦𑁆𑀢𑁂𑀲𑀼. 𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄 𑀇𑀢𑀺.

𑀏𑀢𑁆𑀣 𑀧𑀦 ‘‘𑀪𑁄’’𑀇𑀘𑁆𑀘𑀸𑀤𑀻𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀬𑀲𑁆𑀫𑀸 𑀯𑁄𑀳𑀸𑀭𑀯𑀺𑀲𑁂𑀲𑀧𑀯𑀢𑁆𑀢𑀸𑀦𑀺 𑀆𑀮𑀧𑀦𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀯𑀼𑀲𑁄, 𑀪𑀦𑁆𑀢𑁂’’𑀢𑀺 𑀧𑀤𑀸𑀦𑀺 𑀯𑀺𑀬 𑀪𑁄𑀲𑀤𑁆𑀤𑀸𑀤𑀺𑀉𑀧𑀧𑀤𑀯𑀦𑁆𑀢𑀸𑀦𑀺 𑀦 𑀪𑀯𑀦𑁆𑀢𑀺, ‘‘𑀪𑁄 𑀧𑀼𑀭𑀺𑀲, 𑀪𑀯𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀸, 𑀪𑁄𑀦𑁆𑀢𑁄 𑀲𑀫𑀡𑀸, 𑀪𑁄 𑀭𑀸𑀚’’𑀇𑀘𑁆𑀘𑀸𑀤𑀻𑀲𑀼 𑀳𑀺 𑀧𑀼𑀭𑀺𑀲𑀲𑀤𑁆𑀤𑀸𑀤𑀬𑁄𑀬𑁂𑀯 𑀪𑁄𑀲𑀤𑁆𑀤𑀸𑀤𑀺 𑀉𑀧𑀧𑀤𑀯𑀦𑁆𑀢𑁄 𑀪𑀯𑀦𑁆𑀢𑀺. 𑀇𑀥 𑀘 ‘‘𑀪𑀯𑀁 𑀆𑀦𑀦𑁆𑀤𑁄’’𑀢𑀺 𑀏𑀢𑁆𑀣 𑀪𑀯𑀁𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀸𑀦𑀺 ‘‘𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀧𑀦 ‘‘𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀪𑀯𑀁𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀸𑀦𑀺. 𑀧𑀞𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀯𑀟𑁆𑀠𑀦𑀢𑁆𑀣𑀯𑀲𑁂𑀦 ‘‘𑀪𑁄 𑀪𑀯𑀦𑁆𑀢, 𑀪𑀯𑀦𑁆𑀢𑁄 𑀪𑀯𑀦𑁆𑀢𑀸, 𑀪𑁄𑀦𑁆𑀢𑁄 𑀪𑀯𑀦𑁆𑀢𑀸’’𑀢𑀺 𑀪𑁄𑀲𑀤𑁆𑀤𑀸𑀤𑀬𑁄 𑀆𑀮𑀧𑀦𑀧𑀤𑀸𑀦𑀁 𑀉𑀧𑀧𑀤𑀸𑀦𑀺 𑀪𑀯𑀦𑁆𑀢𑀺, 𑀦 𑀤𑀼𑀢𑀺𑀬𑀲𑁆𑀫𑀺𑀁 𑀦𑀬𑁂. 𑀆𑀫𑁂𑀟𑀺𑀢𑀯𑀲𑁂𑀦 𑀧𑀦 ‘‘𑀪𑁄 𑀪𑁄, 𑀪𑀯𑀦𑁆𑀢𑁄 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄 𑀪𑁄𑀦𑁆𑀢𑁄’’𑀢𑀺 𑀧𑀤𑀸𑀦𑀺 𑀪𑀯𑀦𑁆𑀢𑀺 𑀬𑀣𑀸 ‘‘𑀪𑀦𑁆𑀢𑁂 𑀪𑀦𑁆𑀢𑁂’’𑀢𑀺.

𑀅𑀢𑁆𑀭𑀺𑀤𑀁 𑀪𑀽𑀥𑀸𑀢𑀼𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀦𑀺𑀤𑀲𑁆𑀲𑀦𑀁 𑁋 𑀓𑀲𑁆𑀫𑀸 𑀪𑀯𑀁 𑀯𑀺𑀚𑁆𑀚𑀦𑀫𑀭𑀜𑁆𑀜𑀦𑀺𑀲𑁆𑀲𑀺𑀢𑁄. 𑀓𑀣𑀁 𑀧𑀦𑀸𑀳𑀁 𑀪𑁄 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀺. 𑀏𑀯𑀁 𑀪𑁄𑀢𑀺 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸. 𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣. 𑀇𑀫𑀁 𑀪𑁄𑀦𑁆𑀢𑁄 𑀦𑀺𑀲𑀸𑀫𑁂𑀣. 𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸 𑀇𑀘𑁆𑀘𑁂𑀯𑀫𑀸𑀤𑀺. 𑀏𑀢𑁆𑀣 ‘‘𑀪𑀯𑀁’’𑀇𑀘𑁆𑀘𑀸𑀤𑀻𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀦𑀸𑀫𑀧𑀤𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀧𑀺𑀘 𑀢𑁂𑀲𑀼 ‘‘𑀪𑁄, 𑀪𑀯𑀦𑁆𑀢𑁄, 𑀪𑁄𑀦𑁆𑀢𑁄’’𑀢𑀺 𑀇𑀫𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. ‘‘𑀪𑁄 𑀧𑀼𑀭𑀺𑀲𑀸’’𑀢𑀺𑀆𑀤𑀻𑀲𑀼 𑀢𑁂𑀲𑀁 𑀦𑀺𑀧𑀸𑀢𑀸𑀦𑀺𑀧𑀸𑀢𑀪𑀸𑀯𑁂 𑀯𑀺𑀯𑀸𑀤𑁄 𑀦 𑀓𑀭𑀡𑀻𑀬𑁄. 𑀓𑀘𑁆𑀘𑀸𑀬𑀦𑀲𑁆𑀫𑀺𑀜𑁆𑀳𑀺 ‘‘𑀪𑁄 𑀕𑁂 𑀢𑀽’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀧𑀦 ‘‘𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀫𑀜𑁆𑀚𑀽𑀲𑀸𑀬𑀁 𑀯𑀼𑀢𑁆𑀢𑀁 ‘‘𑀪𑁄𑀢𑀺𑀤𑀁 𑀆𑀫𑀦𑁆𑀢𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑀦 𑀓𑁂𑀯𑀮𑀁 𑀏𑀓𑀯𑀘𑀦𑀫𑁂𑀯 𑀳𑁄𑀢𑀺, 𑀅𑀣 𑀔𑁄 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀻𑀢𑀺 ‘𑀪𑁄 𑀧𑀼𑀭𑀺𑀲𑀸’𑀢𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄𑀧𑀺 𑀕𑀳𑀺𑀢𑁄. ‘𑀪𑀯𑀦𑁆𑀢𑁄’𑀢𑀺 𑀧𑀤𑀁 𑀧𑀦 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 ‘𑀧𑀼𑀭𑀺𑀲𑀸’𑀢𑀺 𑀧𑀼𑀦 𑀯𑀼𑀢𑁆𑀢’’𑀦𑁆𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀅𑀝𑁆𑀞𑀓𑀣𑀸𑀲𑀼 𑀘 𑀦𑀺𑀧𑀸𑀢𑀪𑀽𑀢𑁄 𑀪𑁄𑀲𑀤𑁆𑀤𑁄 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀤𑀺𑀲𑁆𑀲𑀢𑀺, 𑀇𑀢𑀭𑁂 𑀧𑀦 𑀩𑀳𑀼𑀯𑀘𑀦𑀯𑀲𑁂𑀦𑁂𑀯 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀲𑀁 𑀢𑀼 𑀦𑀺𑀧𑀸𑀢𑀧𑀤𑀢𑁆𑀢𑁂 𑀭𑀽𑀧𑀦𑀺𑀧𑁆𑀨𑀸𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀲𑀼 𑀪𑁄𑀲𑀤𑁆𑀤𑀲𑁆𑀲 𑀦𑀺𑀧𑀸𑀢𑀧𑀤𑀢𑁆𑀢𑀸 𑀆𑀳𑀘𑁆𑀘𑀪𑀸𑀲𑀺𑀢𑁂 𑀦𑀺𑀚𑁆𑀚𑀻𑀯𑀸𑀮𑀧𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁄 ‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂, 𑀧𑀭𑀺𑀧𑁆𑀮𑀯 𑀪𑁄 𑀧𑀼𑀣𑀼𑀲𑀺𑀮𑁂’’𑀢𑀺 𑀧𑀬𑁄𑀕𑁄𑀧𑀺 𑀤𑀺𑀲𑁆𑀲𑀢𑀺. 𑀅𑀢𑁆𑀭𑀺𑀫𑀸 𑀪𑁄𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑀦𑀻 𑀕𑀸𑀣𑀸𑀬𑁄 𑁋

‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁’’;

𑀏𑀯𑀫𑀸𑀤𑀻𑀲𑀼 𑀪𑁄𑀲𑀤𑁆𑀤𑁄, 𑀏𑀓𑀯𑀘𑀦𑀓𑁄 𑀫𑀢𑁄.

‘‘𑀧𑀲𑁆𑀲𑀣 𑀪𑁄 𑀇𑀫𑀁 𑀓𑀼𑀮-𑀧𑀼𑀢𑁆𑀢’’𑀫𑀺𑀘𑁆𑀘𑁂𑀯𑀫𑀸𑀤𑀺𑀲𑀼;

𑀩𑀳𑀼𑀯𑀘𑀦𑀓𑁄 𑀏𑀲𑁄, 𑀪𑁄𑀲𑀤𑁆𑀤𑁄𑀢𑀺 𑀯𑀺𑀪𑀸𑀯𑀬𑁂.

𑀧𑀼𑀕𑁆𑀕𑀮𑀸𑀮𑀧𑀦𑁂 ¶ 𑀘𑁂𑀯, 𑀥𑀫𑁆𑀫𑀲𑁆𑀲𑀸𑀮𑀧𑀦𑁂𑀧𑀺 𑀘;

𑀦𑀺𑀚𑁆𑀚𑀻𑀯𑀸𑀮𑀧𑀦𑁂 𑀘𑀸𑀢𑀺, 𑀪𑁄𑀲𑀤𑁆𑀤𑁄 𑀢𑀻𑀲𑀼 𑀤𑀺𑀲𑁆𑀲𑀢𑀺.

𑀢𑀢𑁆𑀭 𑀥𑀫𑁆𑀫𑀸𑀮𑀧𑀦𑀫𑁆𑀳𑀺, 𑀏𑀓𑀯𑀘𑁄𑀯 𑀮𑀩𑁆𑀪𑀢𑀺;

𑀇𑀢𑀭𑁂𑀲𑀼 𑀲𑀺𑀬𑀸 𑀤𑁂𑀓-𑀯𑀘𑁄 𑀩𑀳𑀼𑀯𑀘𑁄𑀧𑀺 𑀘.

𑀦𑀺𑀘𑁆𑀙𑀺𑀢𑀩𑁆𑀩𑀁 𑀕𑀼𑀡𑀻𑀧𑀤𑀁, 𑀥𑀫𑁆𑀫𑀲𑁆𑀲𑀸𑀮𑀧𑀦𑁂 𑀥𑀼𑀯𑀁;

‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄’’𑀢𑀺, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀇𑀘𑁆𑀙𑀺𑀢𑀩𑁆𑀩𑀁 𑀕𑀼𑀡𑀻𑀧𑀤𑀁, 𑀧𑀼𑀕𑁆𑀕𑀮𑀸𑀮𑀧𑀦𑁂 𑀧𑀦;

‘‘𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺’’, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀕𑀼𑀡𑀻𑀧𑀤𑀁 𑀅𑀲𑀦𑁆𑀢𑀫𑁆𑀧𑀺, 𑀧𑀼𑀕𑁆𑀕𑀮𑀸𑀮𑀧𑀦𑀫𑁆𑀳𑀺 𑀢𑀼;

𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀧𑀸𑀯𑀤𑁂, 𑀅𑀢𑁆𑀣𑀁 ‘‘𑀪𑁄 𑀏𑀳𑀺’’𑀆𑀤𑀺𑀲𑀼.

𑀖𑀝𑀸𑀤𑀻𑀦𑀁 𑀆𑀮𑀧𑀦𑀁, 𑀦𑀺𑀚𑁆𑀚𑀻𑀯𑀸𑀮𑀧𑀦𑀁 𑀪𑀯𑁂;

𑀚𑀻𑀯𑀁𑀯 𑀮𑁄𑀓𑀺𑀬𑀸 𑀮𑁄𑀓𑁂, 𑀆𑀮𑀧𑀦𑁆𑀢𑀺 𑀓𑀤𑀸𑀘𑀺 𑀢𑀼.

𑀦𑀺𑀚𑁆𑀚𑀻𑀯𑀸𑀮𑀧𑀦𑀁 𑀅𑀧𑁆𑀧𑀁, 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁂 𑀲𑀺𑀬𑀸;

‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂’’, 𑀇𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁.

𑀏𑀢𑁆𑀣 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁, 𑀓𑁂𑀘𑀺 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑁂𑀲𑀁 𑀫𑀢𑁂𑀦 𑀪𑁄𑀢𑀻𑀢𑀺, 𑀮𑀺𑀗𑁆𑀕𑀁 𑀯𑀺𑀧𑀭𑀺𑀡𑀸𑀫𑀬𑁂.

𑀅𑀣 𑀯𑀸 𑀧𑀦 𑀪𑁄𑀲𑀤𑁆𑀤𑁄, 𑀦𑀺𑀧𑀸𑀢𑁄 𑀲𑁄𑀧𑀤𑀁 𑀯𑀺𑀬;

𑀢𑀲𑁆𑀫𑀸 𑀯𑀺𑀭𑁄𑀥𑀢𑀸 𑀦𑀸𑀲𑁆𑀲, 𑀢𑀺𑀮𑀺𑀗𑁆𑀕𑁂 𑀯𑀘𑀦𑀤𑁆𑀯𑀬𑁂.

𑀏𑀯𑀁 𑀲𑀦𑁆𑀢𑁂𑀧𑀺 𑀪𑁄𑀲𑀤𑁆𑀤𑁄, 𑀤𑁆𑀯𑀺𑀮𑀺𑀗𑁆𑀕𑁂𑀬𑁂𑀯 𑀧𑀸𑀬𑀢𑁄;

𑀬𑀲𑁆𑀫𑀸 𑀤𑀺𑀝𑁆𑀞𑁄 𑀢𑀢𑁄 𑀯𑀺𑀜𑁆𑀜𑀽, 𑀤𑁆𑀯𑀺𑀮𑀺𑀗𑁆𑀕𑁂𑀬𑁂𑀯 𑀢𑀁 𑀯𑀤𑁂.

𑀇𑀢𑁆𑀣𑀺𑀮𑀺𑀗𑁆𑀕𑀫𑁆𑀳𑀺 𑀲𑀫𑁆𑀧𑀢𑁆𑀢𑁂, ‘‘𑀪𑁄’’𑀢𑀺 𑀇𑀢𑀺 𑀧𑀬𑁄𑀚𑀬𑁂;

𑀏𑀯𑀁𑀯𑀺𑀥𑀁 𑀧𑀬𑁄𑀕𑀜𑁆𑀳𑀺, 𑀲𑀼𑀧𑁆𑀧𑀬𑁄𑀕𑀁 𑀩𑀼𑀥𑀸𑀩𑁆𑀭𑀯𑀼𑀁.

𑀬𑀚𑁆𑀚𑁂𑀯𑀁 ¶ 𑀤𑀼𑀧𑁆𑀧𑀬𑁄𑀕𑀁𑀯, 𑀲𑀺𑀬𑀸 𑀢𑀼𑀫𑁆𑀳𑁂𑀳𑀺 𑀤𑀲𑁆𑀲𑀺𑀢𑀁;

‘‘𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂’’, 𑀇𑀘𑁆𑀘𑀸𑀳𑀘𑁆𑀘𑀧𑀤𑀦𑁆𑀢𑀺 𑀘𑁂.

𑀤𑀼𑀧𑁆𑀧𑀬𑁄𑀕𑀁 𑀦 𑀢𑀁 𑀬𑀲𑁆𑀫𑀸, 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁂;

𑀚𑀺𑀦𑁂𑀦 𑀪𑀸𑀲𑀺𑀢𑁂 𑀥𑀫𑁆𑀫𑁂, 𑀤𑀼𑀧𑁆𑀧𑀬𑁄𑀕𑀸 𑀦 𑀯𑀺𑀚𑁆𑀚𑀭𑁂.

𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀯𑀺𑀲𑀬𑁂, 𑀪𑁄𑀢𑀺𑀲𑀤𑁆𑀤𑀧𑁆𑀧𑀬𑁄𑀚𑀦𑀁;

𑀓𑀯𑀻𑀦𑀁 𑀧𑁂𑀫𑀦𑀻𑀬𑀦𑁆𑀢𑀺, 𑀫𑀬𑀸 𑀏𑀯𑀫𑀼𑀤𑀻𑀭𑀺𑀢𑀁.

𑀏𑀯𑀁 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸 𑀯𑀟𑁆𑀠𑀦𑀪𑀯𑀦𑀢𑁆𑀣𑀢𑀤𑀜𑁆𑀜𑀢𑁆𑀣𑀯𑀲𑁂𑀦.

𑀓𑀭𑁄𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 𑁋

𑀓𑀭𑀁, 𑀓𑀭𑁄𑀦𑁆𑀢𑁄, 𑀓𑀭𑁄𑀦𑁆𑀢𑀸. 𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑁂. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑁂𑀦, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀲𑁆𑀫𑀸, 𑀓𑀭𑁄𑀦𑁆𑀢𑀫𑁆𑀳𑀸, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀲𑁆𑀫𑀺𑀁, 𑀓𑀭𑁄𑀦𑁆𑀢𑀫𑁆𑀳𑀺, 𑀓𑀭𑁄𑀦𑁆𑀢𑁂𑀲𑀼. 𑀪𑁄 𑀓𑀭𑁄𑀦𑁆𑀢, 𑀪𑀯𑀦𑁆𑀢𑁄 𑀓𑀭𑁄𑀦𑁆𑀢𑀸𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

‘‘𑀓𑀭𑁄𑀢𑁄 𑀦 𑀓𑀭𑀺𑀬𑀢𑀺 𑀧𑀸𑀧’’𑀦𑁆𑀢𑀺 𑀇𑀤𑀫𑁂𑀢𑁆𑀣 𑀓𑀭𑁄𑀢𑁄𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸𑀦𑀺𑀤𑀲𑁆𑀲𑀦𑀁. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀓𑀭𑁄𑀦𑁆𑀢𑀻, 𑀓𑀭𑁄𑀦𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑁋

𑀅𑀭𑀳𑀁, 𑀅𑀭𑀳𑀦𑁆𑀢𑁄. 𑀅𑀭𑀳𑀦𑁆𑀢𑀁, 𑀅𑀭𑀳𑀦𑁆𑀢𑁂. 𑀅𑀭𑀳𑀢𑀸, 𑀅𑀭𑀳𑀦𑁆𑀢𑁂𑀦, 𑀅𑀭𑀳𑀦𑁆𑀢𑁂𑀳𑀺, 𑀅𑀭𑀳𑀦𑁆𑀢𑁂𑀪𑀺. 𑀅𑀭𑀳𑀢𑁄, 𑀅𑀭𑀳𑀦𑁆𑀢𑀲𑁆𑀲, 𑀅𑀭𑀳𑀦𑁆𑀢𑀸𑀦𑀁, 𑀅𑀭𑀳𑀢𑀁. 𑀅𑀭𑀳𑀢𑀸, 𑀅𑀭𑀳𑀦𑁆𑀢𑀸, 𑀅𑀭𑀳𑀦𑁆𑀢𑀲𑁆𑀫𑀸, 𑀅𑀭𑀳𑀦𑁆𑀢𑀫𑁆𑀳𑀸, 𑀅𑀭𑀳𑀦𑁆𑀢𑁂𑀳𑀺, 𑀅𑀭𑀳𑀦𑁆𑀢𑁂𑀪𑀺. 𑀅𑀭𑀳𑀢𑁄, 𑀅𑀭𑀳𑀦𑁆𑀢𑀲𑁆𑀲, 𑀅𑀭𑀳𑀦𑁆𑀢𑀸𑀦𑀁, 𑀅𑀭𑀳𑀢𑀁. 𑀅𑀭𑀳𑀦𑁆𑀢𑁂, 𑀅𑀭𑀳𑀦𑁆𑀢𑀲𑁆𑀫𑀺𑀁 ¶ , 𑀅𑀭𑀳𑀦𑁆𑀢𑀫𑁆𑀳𑀺, 𑀅𑀭𑀳𑀦𑁆𑀢𑁂𑀲𑀼. 𑀪𑁄 𑀅𑀭𑀳𑀦𑁆𑀢, 𑀪𑀯𑀦𑁆𑀢𑁄 𑀅𑀭𑀳𑀦𑁆𑀢𑁄 𑀇𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀅𑀬𑀁 𑀕𑀼𑀡𑀯𑀸𑀘𑀓𑀲𑁆𑀲 𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. ‘‘𑀅𑀭𑀳𑀸, 𑀅𑀭𑀳𑀦𑁆𑀢𑁄, 𑀅𑀭𑀳𑀦𑁆𑀢𑀸’’𑀇𑀢𑀺 𑀘. 𑀏𑀢𑀜𑁆𑀳𑀺 𑀭𑀽𑀧𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀝𑁆𑀞𑀸𑀦𑁂 𑀤𑀺𑀲𑁆𑀲𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀴𑀺𑀬𑀁 𑀧𑀦 ‘‘𑀫𑀬𑀜𑁆𑀘𑀫𑁆𑀳𑀸 𑀅𑀦𑀭𑀳𑀦𑁆𑀢𑁄’’𑀢𑀺 𑀧𑀤𑀁 𑀤𑀺𑀲𑁆𑀲𑀢𑀺. 𑀅𑀭𑀳𑀦𑁆𑀢𑀁, 𑀅𑀭𑀳𑀦𑁆𑀢𑁂. 𑀅𑀭𑀳𑀢𑀸, 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀲𑁆𑀲 𑀅𑀭𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀢𑀣𑀸 𑀳𑀺 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂. 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀅𑀭𑀳𑀁𑀲𑀤𑁆𑀤𑀸𑀤𑀬𑁄 𑀕𑀼𑀡𑀯𑀸𑀘𑀓𑀸. ‘‘𑀅𑀭𑀳𑀸 𑀅𑀳𑁄𑀲𑀺. 𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂. 𑀏𑀓𑁄 𑀅𑀭𑀳𑀸, 𑀏𑀓𑀲𑀝𑁆𑀞𑀺 𑀅𑀭𑀳𑀦𑁆𑀢𑁄 𑀮𑁄𑀓𑁂 𑀅𑀳𑁂𑀲𑀼𑀁.

𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁.

𑀫𑀬𑀜𑁆𑀘𑀫𑁆𑀳𑀸 𑀅𑀦𑀭𑀳𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀅𑀭𑀳𑀸𑀲𑀤𑁆𑀤𑀸𑀤𑀬𑁄 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀥 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀦𑀬𑁄 𑀅𑀧𑁆𑀧𑀲𑀺𑀤𑁆𑀥𑁄. 𑀬𑀤𑀺 𑀏𑀯𑀁 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸 𑀇𑀢𑁆𑀣𑀻 𑀓𑀣𑀁 𑀯𑀢𑁆𑀢𑀩𑁆𑀩𑀸, 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀁 𑀘𑀺𑀢𑁆𑀢𑀁 𑀓𑀣𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀇𑀢𑁆𑀣𑀻 𑀢𑀸𑀯 ‘‘𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 ‘‘𑀅𑀭𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀸 𑀕𑀼𑀡𑀯𑀲𑁂𑀦, 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀧𑀦 ‘‘𑀇𑀢𑁆𑀣𑀻 𑀅𑀭𑀳𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀸. 𑀘𑀺𑀢𑁆𑀢𑀁 𑀧𑀦 𑀕𑀼𑀡𑀯𑀲𑁂𑀦𑁂𑀯 ‘‘𑀅𑀭𑀳𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀲𑀦𑁆𑀢𑀲𑀤𑁆𑀤𑀲𑁆𑀲 ¶ 𑁋

𑀲𑀁, 𑀲𑀦𑁆𑀢𑁄, 𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀢𑀸, 𑀲𑀦𑁆𑀢𑁂𑀦, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺, 𑀲𑀩𑁆𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀦𑁆𑀢𑀸𑀦𑀁, 𑀲𑀢𑀁, 𑀲𑀢𑀸𑀦𑀁. 𑀲𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀲𑁆𑀫𑀸, 𑀲𑀦𑁆𑀢𑀫𑁆𑀳𑀸, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺, 𑀲𑀩𑁆𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀦𑁆𑀢𑀸𑀦𑀁, 𑀲𑀢𑀁, 𑀲𑀢𑀸𑀦𑀁. 𑀲𑀢𑀺, 𑀲𑀦𑁆𑀢𑁂, 𑀲𑀦𑁆𑀢𑀲𑁆𑀫𑀺𑀁, 𑀲𑀦𑁆𑀢𑀫𑁆𑀳𑀺, 𑀲𑀦𑁆𑀢𑁂𑀲𑀼. 𑀪𑁄 𑀲𑀦𑁆𑀢, 𑀪𑀯𑀦𑁆𑀢𑁄 𑀲𑀦𑁆𑀢𑁄𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀏𑀢𑁆𑀣 𑀧𑀦 ‘‘𑀅𑀤𑁆𑀥𑀸 𑀳𑀺 𑀢𑀸𑀢 𑀲𑀢𑀦𑁂𑀲 𑀥𑀫𑁆𑀫𑁄’’𑀢𑀺 𑀚𑀬𑀤𑁆𑀤𑀺𑀲𑀚𑀸𑀢𑀓𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀲𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀲𑀢𑀦𑁂𑀲𑀸𑀢𑀺 𑀲𑀢𑀸𑀦𑀁 𑀏𑀲𑀸𑀢𑀺 𑀙𑁂𑀤𑁄, 𑀭𑀲𑁆𑀲𑀢𑁆𑀢𑀦𑀺𑀕𑁆𑀕𑀳𑀻𑀢𑀲𑀭𑀮𑁄𑀧𑀯𑀲𑁂𑀦 𑀘 𑀭𑀽𑀧𑀦𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 ‘‘𑀅𑀤𑁆𑀥𑀸 𑀏𑀓𑀁𑀲𑁂𑀦 𑀏𑀲 𑀢𑀸𑀢 𑀲𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀥𑀫𑁆𑀫𑁄 𑀲𑀪𑀸𑀯𑁄’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀬𑀁 𑀬𑁂 𑀮𑁄𑀓𑁂 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀘 ‘‘𑀅𑀭𑀺𑀬𑀸’’𑀢𑀺 𑀘 ‘‘𑀧𑀡𑁆𑀟𑀺𑀢𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀯𑀸𑀘𑀓𑀲𑁆𑀲 𑀲𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀢𑀧𑁆𑀧𑀝𑀺𑀲𑁂𑀥𑀲𑁆𑀲 𑀧𑀦 𑀅𑀲𑀁, 𑀅𑀲𑀦𑁆𑀢𑁄, 𑀓𑀢𑁆𑀣𑀘𑀺 𑀅𑀲𑀦𑁆𑀢𑀸 𑀇𑀘𑁆𑀘𑀧𑀺. 𑀢𑀣𑀸 𑀳𑀺 ‘‘𑀅𑀲𑀦𑁆𑀢𑀸 𑀓𑀺𑀭 𑀫𑀁 𑀚𑀫𑁆𑀫𑀸, 𑀢𑀸𑀢 𑀢𑀸𑀢𑀸𑀢𑀺 𑀪𑀸𑀲𑀭𑁂’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. ‘‘𑀅𑀲𑀁, 𑀅𑀲𑀦𑁆𑀢𑀁, 𑀅𑀲𑀦𑁆𑀢𑁂. 𑀅𑀲𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑀦𑁆𑀢𑁄, 𑀅𑀲𑀦𑁆𑀢𑁄’’𑀢𑀺𑀫𑀸𑀦𑀺 𑀩𑀳𑀼𑀯𑀘𑀦𑀓𑀸𑀦𑀺𑀬𑁂𑀯 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀏𑀓𑀯𑀘𑀦𑀓𑀸𑀦𑀺. 𑀓𑀲𑁆𑀫𑀸? 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀢𑁆𑀢𑀸. 𑀅𑀜𑁆𑀜𑀢𑁆𑀭 𑀧𑀦 ‘‘𑀲𑀦𑁆𑀢𑁄, 𑀤𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀏𑀓𑀯𑀘𑀦𑀸𑀦𑀺𑀬𑁂𑀯 𑀞𑀧𑁂𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀸𑀘𑀓𑀲𑀦𑁆𑀢𑁄𑀲𑀤𑁆𑀤𑀁, 𑀓𑀲𑁆𑀫𑀸? 𑀅𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀧𑀡𑁆𑀡𑀢𑁆𑀢𑀺𑀯𑀸𑀘𑀓𑀸𑀦𑀁 𑀢𑁂𑀲𑀁 𑀓𑀸𑀦𑀺𑀘𑀺 𑀧𑀬𑁄𑀕𑀸𑀦𑀺 𑀓𑀣𑀬𑀸𑀫 𑁋

𑀲𑀫𑁂𑀢𑀺 ¶ 𑀅𑀲𑀢𑀸 𑀅𑀲𑀁. 𑀬𑀁 𑀬𑀜𑁆𑀳𑀺 𑀭𑀸𑀚 𑀪𑀚𑀢𑀺, 𑀲𑀦𑁆𑀢𑀁 𑀯𑀸 𑀬𑀤𑀺 𑀯𑀸 𑀅𑀲𑀁. 𑀦 𑀲𑀸 𑀲𑀪𑀸 𑀬𑀢𑁆𑀣 𑀦 𑀲𑀦𑁆𑀢𑀺 𑀲𑀦𑁆𑀢𑁄. 𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸. 𑀅𑀲𑀦𑁆𑀢𑁂 𑀦𑁄𑀧𑀲𑁂𑀯𑁂𑀬𑁆𑀬, 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬 𑀧𑀡𑁆𑀟𑀺𑀢𑁄. 𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣. 𑀲𑀢𑀁 𑀥𑀫𑁆𑀫𑁄 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀬𑁄 𑀧𑀦𑀫𑁆𑀳𑁂𑀳𑀺 𑀧𑀤𑀫𑀸𑀮𑀸𑀬𑀁 ‘‘𑀲𑀩𑁆𑀪𑀻’’𑀢𑀺 𑀅𑀬𑀁 𑀲𑀤𑁆𑀤𑁄 𑀢𑀢𑀺𑀬𑀸𑀧𑀜𑁆𑀘𑀫𑀻𑀩𑀳𑀼𑀯𑀘𑀦𑀯𑀲𑁂𑀦 𑀬𑁄𑀚𑀺𑀢𑁄, 𑀲𑁄 𑀘 𑀔𑁄 𑀲𑀦𑁆𑀢𑀇𑀢𑀺 𑀅𑀓𑀸𑀭𑀦𑁆𑀢𑀧𑀓𑀢𑀺𑀯𑀲𑁂𑀦, 𑀅𑀜𑁆𑀜𑀢𑁆𑀣 𑀧𑀦 ‘‘𑀲𑀩𑁆𑀪𑀻’’𑀢𑀺 𑀇𑀓𑀸𑀭𑀦𑁆𑀢𑀧𑀓𑀢𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀲𑀩𑁆𑀪𑀻𑀢𑀺 𑀲𑀧𑁆𑀧𑀼𑀭𑀺𑀲𑁄 𑀦𑀺𑀩𑁆𑀩𑀸𑀦𑀜𑁆𑀘, 𑀲𑀼𑀦𑁆𑀤𑀭𑀸𑀥𑀺𑀯𑀘𑀦𑀁 𑀯𑀸 𑀏𑀢𑀁 𑀲𑀩𑁆𑀪𑀻𑀢𑀺. 𑀲𑀩𑁆𑀩𑁄 𑀘𑀸𑀬𑀫𑀢𑁆𑀣𑁄 𑀲𑀸𑀝𑁆𑀞𑀓𑀣𑀸𑀬 ‘‘𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀇𑀫𑀸𑀬 𑀘 𑀤𑀻𑀧𑁂𑀢𑀩𑁆𑀩𑁄.

𑀆𑀮𑀧𑀦𑁂 𑀘 𑀧𑀘𑁆𑀘𑀢𑁆𑀢𑁂, 𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀼 𑀘;

𑀲𑀫𑀸𑀲𑀫𑁆𑀳𑀺 𑀘 𑀬𑁄𑀚𑁂𑀬𑁆𑀬, 𑀲𑀩𑁆𑀪𑀺𑀲𑀤𑁆𑀤𑀁 𑀲𑀼𑀫𑁂𑀥𑀲𑁄.

𑀅𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀪𑁄 𑀲𑀩𑁆𑀪𑀺 𑀢𑀺𑀝𑁆𑀞, 𑀲𑀩𑁆𑀪𑀺 𑀢𑀺𑀝𑁆𑀞𑀢𑀺, 𑀲𑀩𑁆𑀪𑀺 𑀲𑀳 𑀕𑀘𑁆𑀙𑀢𑀺, 𑀲𑀩𑁆𑀪𑀺 𑀅𑀧𑁂𑀳𑀺, 𑀅𑀲𑀩𑁆𑀪𑀺𑀭𑀽𑀧𑁄 𑀧𑀼𑀭𑀺𑀲𑁄. 𑀬𑀲𑁆𑀫𑀸 𑀧𑀦𑀸𑀬𑀁 𑀲𑀸𑀲𑀦𑀸𑀦𑀼𑀓𑀽𑀮𑀸, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸 𑀢𑀤𑀦𑀼𑀓𑀽𑀮𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥 𑀲𑀸𑀲𑀦𑀢𑁄 𑀧𑀬𑁄𑀕𑁂 𑀤𑀲𑁆𑀲𑁂𑀲𑁆𑀲𑀸𑀫 𑀅𑀢𑀓𑁆𑀓𑀸𑀯𑀘𑀭𑁂 𑀯𑀺𑀘𑀺𑀢𑁆𑀢𑁂 𑀲𑀼𑀕𑀢𑀧𑀸𑀴𑀺𑀦𑀬𑁂 𑀲𑁄𑀢𑀽𑀦𑀁 𑀯𑀺𑀲𑀸𑀭𑀤𑀫𑀢𑀺𑀧𑀝𑀺𑀮𑀸𑀪𑀢𑁆𑀣𑀁. 𑀢𑀁 𑀬𑀣𑀸? 𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤, 𑀬𑀁 𑀢𑀁 𑀯𑀸𑀮𑀥𑀺𑀦𑀸’𑀪𑀺𑀧𑀽𑀚𑀬𑀸𑀫. 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁. 𑀬𑀁 𑀲𑀸𑀮𑀯𑀦𑀲𑁆𑀫𑀺𑀁 𑀲𑁂𑀦𑀓𑁄, 𑀧𑀸𑀧𑀓𑀫𑁆𑀫𑀫𑀓𑀭𑀺 𑀅𑀲𑀩𑁆𑀪𑀺𑀭𑀽𑀧𑀁. 𑀆𑀩𑀸𑀥𑁄𑀬𑀁 𑀅𑀲𑀩𑁆𑀪𑀺𑀭𑀽𑀧𑁄. 𑀅𑀲𑀫𑁆𑀫𑁄𑀤𑀓𑁄 𑀣𑀤𑁆𑀥𑁄 𑀅𑀲𑀩𑁆𑀪𑀺𑀭𑀽𑀧𑁄’’𑀢𑀺 ¶ . 𑀢𑀢𑁆𑀣 𑀆𑀮𑀧𑀦𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀧𑀘𑁆𑀘𑀢𑁆𑀢𑀯𑀘𑀦𑀁 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀣𑀸 𑀓𑀭𑀡𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀲𑀫𑀸𑀲𑁂 𑀲𑀤𑁆𑀤𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 𑀩𑁆𑀬𑀸𑀲𑁂 𑀲𑀤𑁆𑀤𑀭𑀽𑀧𑀁 𑀬𑀣𑀸𑀲𑀫𑁆𑀪𑀯𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀞𑀧𑁂𑀢𑁆𑀯𑀸 ‘‘𑀳𑁂𑀢𑀼𑀲𑀢𑁆𑀣𑀸𑀭𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀦𑀺. 𑀢𑀢𑁆𑀣 𑀘 𑀦𑀺𑀩𑁆𑀩𑀸𑀦𑀯𑀸𑀘𑀓𑁄 𑀘𑁂, 𑀲𑀩𑁆𑀪𑀺𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀦𑁆𑀢𑀺𑀯𑀺𑀲𑀼𑀤𑁆𑀥𑀺 𑀦𑀺𑀩𑁆𑀩𑀼𑀢𑀺𑀲𑀤𑁆𑀤𑀸 𑀯𑀺𑀬, 𑀲𑁄 𑀘 𑀬𑀫𑀓𑀫𑀳𑀸𑀣𑁂𑀭𑀫𑀢𑁂 𑀭𑀢𑁆𑀢𑀺𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑁂𑀲𑀫𑀺𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀲𑀸𑀥𑀸𑀭𑀡𑁄 𑀳𑀺 𑀲𑁄 𑀦𑀬𑁄. 𑀲𑀼𑀦𑁆𑀤𑀭𑀢𑁆𑀣𑀯𑀸𑀘𑀓𑁄 𑀘𑁂, 𑀅𑀕𑁆𑀕𑀺 𑀭𑀢𑁆𑀢𑀺 𑀅𑀝𑁆𑀞𑀺𑀦𑀬𑁂𑀳𑀺 𑀬𑁄𑀚𑁂𑀢𑀩𑁆𑀩𑁄 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸. ‘‘𑀲𑀩𑁆𑀪𑀺𑀥𑀫𑁆𑀫𑀪𑀽𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑀺 𑀲𑀼𑀦𑁆𑀤𑀭𑀥𑀫𑁆𑀫𑀪𑀽𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀸𑀴𑀺𑀦𑀬𑀯𑀲𑁂𑀦 𑀆𑀮𑀧𑀦𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀩𑁆𑀪𑀺𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀼𑀦 𑀅𑀝𑁆𑀞𑀓𑀣𑀸𑀦𑀬𑀯𑀲𑁂𑀦𑀧𑀺 𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀬𑀲𑁆𑀫𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀦𑁆𑀢𑁄 ‘𑀲𑀩𑁆𑀪𑀻𑀳𑀺 𑀲𑀤𑁆𑀥𑀺𑀁 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻’𑀢𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀲𑀩𑁆𑀪𑀻𑀳𑀻’’𑀢𑀺 𑀳𑀺𑀯𑀘𑀦𑀯𑀲𑁂𑀦 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀲𑀩𑁆𑀪𑀺𑀲𑀤𑁆𑀤𑁄 𑀲𑀩𑁆𑀩𑁂𑀲𑀼𑀧𑀺 𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀤𑀸𑀫 𑁋

𑀕𑀭𑀽 ‘‘𑀲𑀩𑁆𑀪𑀻𑀳𑀺 𑀲𑀤𑁆𑀥𑀺’’𑀦𑁆𑀢𑀺, 𑀅𑀢𑁆𑀣𑀁 𑀪𑀸𑀲𑀺𑀁𑀲𑀼 𑀧𑀸𑀴𑀺𑀬𑀸;

𑀬𑀢𑁄 𑀢𑀢𑁄 𑀲𑀩𑁆𑀪𑀺𑀲𑀤𑁆𑀤𑀁, 𑀥𑀻𑀭𑁄 𑀲𑀩𑁆𑀩𑀢𑁆𑀣 𑀬𑁄𑀚𑀬𑁂.

‘‘𑀅𑀲𑀩𑁆𑀪𑀺𑀭𑀽𑀧𑁄’’𑀇𑀢𑀺𑀧𑀺, 𑀲𑀫𑀸𑀲𑀯𑀺𑀲𑀬𑁂 𑀲𑀼𑀢𑀁;

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀩𑁆𑀪𑀺𑀲𑀤𑁆𑀤𑀁, 𑀯𑀺𑀜𑁆𑀜𑀽 𑀲𑀩𑁆𑀩𑀥𑀺 𑀬𑁄𑀚𑀬𑁂.

‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬 ¶ , 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂’’𑀢𑀺 𑀏𑀢𑁆𑀣 𑀧𑀦 ‘‘𑀅𑀲𑀩𑁆𑀪𑀸’’𑀢𑀺𑀧𑀤𑀁 𑀯𑀺𑀘𑀺𑀢𑁆𑀭𑀯𑀼𑀢𑁆𑀢𑀻𑀲𑀼 𑀢𑀤𑁆𑀥𑀺𑀢𑀧𑀘𑁆𑀘𑀬𑁂𑀲𑀼 𑀡𑁆𑀬𑀧𑀘𑁆𑀘𑀬𑀯𑀲𑁂𑀦 𑀦𑀺𑀧𑁆𑀨𑀢𑁆𑀢𑀺𑀫𑀼𑀧𑀸𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀬𑁂𑀪𑀼𑀬𑁆𑀬𑁂𑀦 𑀅𑀲𑀩𑁆𑀪𑀻𑀲𑀼 𑀪𑀯𑀁 𑀅𑀲𑀩𑁆𑀪𑀁. 𑀓𑀺𑀁 𑀢𑀁? 𑀅𑀓𑀼𑀲𑀮𑀁, 𑀢𑀢𑁄 𑀅𑀲𑀩𑁆𑀪𑀸 𑀅𑀓𑀼𑀲𑀮𑀥𑀫𑁆𑀫𑀸 𑀦𑀺𑀯𑀸𑀭𑀬𑁂 𑀘, 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀅𑀫𑁆𑀳𑁂 𑀅𑀲𑀩𑁆𑀪𑀸𑀳𑀺 𑀯𑀸𑀘𑀸𑀳𑀺 𑀯𑀺𑀓𑁆𑀓𑁄𑀲𑀫𑀸𑀦𑀸 𑀢𑀺𑀩𑁆𑀩𑀸𑀳𑀺 𑀲𑀢𑁆𑀢𑀻𑀳𑀺 𑀳𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀢𑀼 𑀅𑀲𑀩𑁆𑀪𑀻𑀦𑀁 𑀏𑀢𑀸𑀢𑀺 𑀅𑀲𑀩𑁆𑀪𑀸, 𑀦 𑀯𑀸 𑀲𑀩𑁆𑀪𑀻𑀦𑀁 𑀏𑀢𑀸𑀢𑀺𑀧𑀺 𑀅𑀲𑀩𑁆𑀪𑀸𑀢𑀺 𑀦𑀺𑀩𑁆𑀩𑀘𑀦𑀁, 𑀡𑁆𑀬𑀧𑀘𑁆𑀘𑀬𑀯𑀲𑁂𑀦 𑀘 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀘 𑀧𑀦𑁂𑀢𑁆𑀣 𑀅𑀫𑁆𑀳𑁂𑀳𑀺 𑀲𑀦𑁆𑀢𑀲𑀤𑁆𑀤𑀲𑁆𑀲 ‘‘𑀲𑀁, 𑀲𑀦𑁆𑀢𑁄. 𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀤𑀫𑀸𑀮𑀸 𑀤𑀲𑁆𑀲𑀺𑀢𑀸, 𑀢𑀢𑁆𑀣 ‘‘𑀲𑀫𑁂𑀢𑀺 𑀅𑀲𑀢𑀸 𑀅𑀲’’𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀅𑀲’’𑀦𑁆𑀢𑀺 𑀧𑀤𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲’’𑀦𑁆𑀢𑀺 𑀧𑀤𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀬𑀼𑀕𑀴𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑀸𑀭𑀳𑀢𑁆𑀢𑀸. 𑀏𑀯𑀁 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀅𑀲’’𑀦𑁆𑀢𑀺 𑀏𑀢𑁆𑀣 𑀦 𑀲𑀁 𑀅𑀲𑀦𑁆𑀢𑀺 𑀲𑀫𑀸𑀲𑀯𑀺𑀕𑁆𑀕𑀳𑀯𑀲𑁂𑀦𑀸𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 ‘‘𑀲’’𑀫𑀺𑀢𑀺 𑀧𑀤𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀏𑀯𑀫𑀜𑁆𑀜𑀢𑁆𑀭𑀸𑀧𑀺 𑀦𑀬𑁄. 𑀢𑀢𑁆𑀭 𑀲𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑁄. 𑀅𑀲𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑁄. 𑀇𑀢𑁆𑀣𑀺𑀮𑀺𑀗𑁆𑀕𑁂𑀯𑀢𑁆𑀢𑀩𑁆𑀩𑁂 ‘‘𑀅𑀲𑀢𑀻, 𑀅𑀲𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. ‘‘𑀅𑀲𑀢𑀻, 𑀅𑀲𑀢𑀻, 𑀅𑀲𑀢𑀺𑀬𑁄, 𑀅𑀲𑀸. 𑀅𑀲𑀢𑀺𑀁, 𑀅𑀲𑀢𑀻, 𑀅𑀲𑀢𑀺𑀬𑁄. 𑀅𑀲𑀸𑀬, 𑀅𑀲𑀢𑀺𑀬𑀸, 𑀅𑀲𑀢𑀻𑀳𑀺, 𑀅𑀲𑀢𑀻𑀪𑀺. 𑀅𑀲𑀢𑀺𑀬𑀸, 𑀅𑀲𑀢𑀻𑀦’’𑀦𑁆𑀢𑀺 𑀯𑀓𑁆𑀔𑀫𑀸𑀦 𑀇𑀢𑁆𑀣𑀺𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣 𑀧𑀦 ‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺. 𑀫𑀸 𑀘 𑀯𑀲𑀁 𑀅𑀲𑀢𑀻𑀦𑀁 𑀦𑀺𑀕𑀘𑁆𑀙𑁂’’𑀢𑀺𑀆𑀤𑀻𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀅𑀲𑀸𑀢𑀺 𑀘𑁂𑀢𑁆𑀣 𑀅𑀲𑀢𑀻𑀢𑀺 𑀘 𑀲𑀫𑀸𑀦𑀢𑁆𑀣𑀸, 𑀅𑀲𑀦𑁆𑀢𑀚𑀸𑀢𑀺𑀓𑀸𑀢𑀺 𑀳𑀺 𑀢𑁂𑀲𑀁 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀅𑀲𑀸𑀢𑀺 𑀅𑀲𑀢𑀺𑀬𑁄 𑀮𑀸𑀫𑀺𑀓𑀸, 𑀅𑀣 𑀯𑀸 𑀲𑀸𑀢𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀢𑀸𑀲𑀼 𑀦𑀢𑁆𑀣𑀺, 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀦𑀁 𑀅𑀲𑀸𑀢𑀫𑁂𑀯 𑀤𑁂𑀦𑁆𑀢𑀻𑀢𑀺𑀧𑀺 𑀅𑀲𑀸 ¶ , 𑀤𑀼𑀓𑁆𑀔𑀸, 𑀤𑀼𑀓𑁆𑀔𑀯𑀢𑁆𑀣𑀼𑀪𑀽𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁, 𑀢𑀲𑁆𑀫𑀸 𑀲𑀸𑀢𑀁 𑀦𑀢𑁆𑀣𑀺 𑀏𑀢𑀺𑀲𑁆𑀲𑀦𑁆𑀢𑀺 𑀅𑀲𑀸𑀢𑀺 𑀅𑀢𑁆𑀣𑁂 ‘‘𑀅𑀲𑀸’’𑀢𑀺 𑀧𑀤𑀲𑁆𑀲 𑀬𑀣𑀸 𑀭𑀺𑀢𑁆𑀢𑁄 𑀅𑀲𑁆𑀲𑀸𑀤𑁄 𑀏𑀢𑁆𑀣𑀸𑀢𑀺 𑀭𑀺𑀢𑁆𑀢𑀲𑁆𑀲𑀦𑁆𑀢𑀺𑀧𑀤𑀲𑁆𑀲 𑀮𑀼𑀢𑁆𑀢𑀼𑀢𑁆𑀢𑀭𑀓𑁆𑀔𑀭𑀲𑁆𑀲 ‘‘𑀭𑀺𑀢𑁆𑀢𑀲𑁆𑀲𑀁, 𑀭𑀺𑀢𑁆𑀢𑀲𑁆𑀲𑀸𑀦𑀺. 𑀭𑀺𑀢𑁆𑀢𑀲𑁆𑀲’’𑀦𑁆𑀢𑀺 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸, 𑀢𑀣𑀸 ‘‘𑀅𑀲𑀸, 𑀅𑀲𑀸, 𑀅𑀲𑀸𑀬𑁄. 𑀅𑀲𑀁, 𑀅𑀲𑀸, 𑀅𑀲𑀸𑀬𑁄. 𑀅𑀲𑀸𑀬𑀸’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣 𑀘 𑀬𑁄 𑀅𑀫𑁆𑀳𑁂𑀳𑀺 ‘‘𑀲𑀦𑁆𑀢𑁄’’𑀇𑀢𑀺 𑀲𑀤𑁆𑀤𑁄 𑀤𑀲𑁆𑀲𑀺𑀢𑁄. 𑀲𑁄 𑀓𑀢𑁆𑀣𑀘𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀪𑀸𑀯𑁂𑀦 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀲𑁆𑀲𑀢𑁆𑀣𑀫𑁆𑀧𑀺 𑀯𑀤𑀢𑀺, 𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀲𑀦𑁆𑀢𑁄, 𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀢𑀸, 𑀲𑀦𑁆𑀢𑁂𑀦, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀢𑀁, 𑀲𑀦𑁆𑀢𑀸𑀦𑀁. 𑀲𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀲𑁆𑀫𑀸, 𑀲𑀦𑁆𑀢𑀫𑁆𑀳𑀸, 𑀲𑀦𑁆𑀢𑁂𑀳𑀺, 𑀲𑀦𑁆𑀢𑁂𑀪𑀺. 𑀲𑀢𑁄, 𑀲𑀦𑁆𑀢𑀲𑁆𑀲, 𑀲𑀢𑀁, 𑀲𑀦𑁆𑀢𑀸𑀦𑀁. 𑀲𑀢𑀺, 𑀲𑀦𑁆𑀢𑁂, 𑀲𑀦𑁆𑀢𑀲𑁆𑀫𑀺𑀁, 𑀲𑀦𑁆𑀢𑀫𑁆𑀳𑀺, 𑀲𑀦𑁆𑀢𑁂𑀲𑀼. 𑀪𑁄 𑀲𑀦𑁆𑀢, 𑀪𑀯𑀦𑁆𑀢𑁄 𑀲𑀦𑁆𑀢𑁄, 𑀪𑀯𑀦𑁆𑀢𑁄 𑀲𑀦𑁆𑀢𑀸.

𑀏𑀢𑁆𑀣 𑀧𑀦 ‘‘𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀅𑀝𑁆𑀞𑀫𑁄 𑀪𑀤𑁆𑀤𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁. 𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺. 𑀪𑀯𑁂 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀧𑀬𑁄𑀕𑀸𑀦𑀺 𑀪𑀯𑀦𑁆𑀢𑀺. ‘‘𑀲𑀗𑁆𑀔𑀸𑀭𑁂𑀲𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀲𑀤𑁆𑀤𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀞𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀢𑀢𑁆𑀭 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀤𑁆𑀯𑀺𑀥𑀸 𑀞𑀺𑀢𑁂𑀲𑀼 𑀲𑀦𑁆𑀢𑁄𑀲𑀤𑁆𑀤𑁂𑀲𑀼 𑀩𑀳𑀼𑀯𑀘𑀦𑀲𑀦𑁆𑀢𑁄𑀲𑀤𑁆𑀤𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀫𑀸𑀦𑀲𑀤𑁆𑀤𑀲𑁆𑀲𑀢𑁆𑀣𑀫𑁆𑀧𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀦𑁆𑀢𑁄𑀢𑀺 𑀲𑀫𑀸𑀦𑁄, 𑀲𑀦𑁆𑀢𑀸𑀢𑀺 𑀲𑀫𑀸𑀦𑀸’’𑀢𑀺𑀆𑀤𑀺𑀦𑀸 ¶ 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄. 𑀲𑀫𑀸𑀦𑁄𑀢𑀺 𑀇𑀫𑀲𑁆𑀲 𑀘 ‘‘𑀳𑁄𑀦𑁆𑀢𑁄’’𑀢𑀺 𑀅𑀢𑁆𑀣𑁄 ‘‘𑀧𑀳𑀼 𑀲𑀫𑀸𑀦𑁄 𑀯𑀺𑀧𑀼𑀮𑀢𑁆𑀣𑀘𑀺𑀦𑁆𑀢𑀻, 𑀓𑀺𑀁 𑀓𑀸𑀭𑀡𑀸 𑀫𑁂 𑀦 𑀓𑀭𑁄𑀲𑀺 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀬𑁄𑀕𑀸𑀦𑀺 𑀧𑀦 𑁋

‘‘𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺

𑀏𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀅𑀧𑀺𑀘 𑀲𑀦𑁆𑀢𑁄𑀲𑀤𑁆𑀤𑁄 𑀬𑀲𑁆𑀫𑀸 ‘‘𑀓𑀺𑀮𑀦𑁆𑀢𑁄’’𑀢𑀺 𑀘 ‘‘𑀉𑀧𑀲𑀦𑁆𑀢𑁄’’𑀢𑀺 𑀘 ‘‘𑀦𑀺𑀭𑀼𑀤𑁆𑀥𑁄’’𑀢𑀺 𑀘 𑀅𑀢𑁆𑀣𑀁 𑀯𑀤𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀲𑀦𑁆𑀢𑀲𑀤𑁆𑀤𑀲𑁆𑀲 ‘‘𑀲𑀦𑁆𑀢𑁄, 𑀲𑀦𑁆𑀢𑀸. 𑀲𑀦𑁆𑀢𑀁, 𑀲𑀦𑁆𑀢𑁂. 𑀲𑀦𑁆𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 ‘‘𑀲𑀦𑁆𑀢𑁄 𑀢𑀲𑀺𑀢𑁄. 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁. 𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻. 𑀲𑀦𑁆𑀢𑁄 𑀦𑀺𑀭𑀼𑀤𑁆𑀥𑁄 𑀅𑀢𑁆𑀣𑀗𑁆𑀕𑀢𑁄 𑀅𑀩𑁆𑀪𑀢𑁆𑀣𑀗𑁆𑀕𑀢𑁄’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀦𑁆𑀢𑀁, 𑀲𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀲𑀸 𑀘 ‘‘𑀲𑀁𑀯𑀺𑀚𑁆𑀚𑀫𑀸𑀦𑀁 𑀲𑀫𑀸𑀦𑀁 𑀓𑀺𑀮𑀦𑁆𑀢𑀁 𑀉𑀧𑀲𑀦𑁆𑀢𑀁 𑀦𑀺𑀭𑀼𑀤𑁆𑀥’’𑀫𑀺𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 ‘‘𑀉𑀧𑀸𑀤𑀸𑀦𑁂 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀦𑀧𑀼𑀁𑀲𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀢𑁆𑀣𑀯𑀸𑀘𑀓𑀢𑁆𑀢𑁂 𑀢𑀢𑀺𑀬𑀸𑀧𑀜𑁆𑀘𑀫𑀻𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀞𑀸𑀦𑁂 ‘‘𑀲𑀢𑀸, 𑀲𑀢𑁄, 𑀲𑀢𑀁, 𑀲𑀢𑀻’’𑀢𑀺 𑀧𑀤𑀸𑀦𑀺 𑀅𑀥𑀺𑀓𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀲𑁂𑀲𑀸𑀦𑀺 𑀘𑀺𑀢𑁆𑀢𑀦𑀬𑁂𑀦 𑀜𑁂𑀬𑁆𑀬𑀸𑀦𑀺. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀦𑁆𑀢𑀸, 𑀲𑀦𑁆𑀢𑀸, 𑀲𑀦𑁆𑀢𑀸𑀬𑁄. 𑀲𑀦𑁆𑀢𑀁, 𑀲𑀦𑁆𑀢𑀸, 𑀲𑀦𑁆𑀢𑀸𑀬𑁄. 𑀲𑀦𑁆𑀢𑀸𑀬𑀸’’𑀢𑀺 𑀓𑀜𑁆𑀜𑀸𑀦𑀬𑁂𑀦 𑀘, 𑀲𑀦𑁆𑀢𑀻, 𑀲𑀦𑁆𑀢𑀻, 𑀲𑀦𑁆𑀢𑀺𑀬𑁄 ¶ . 𑀲𑀦𑁆𑀢𑀺𑀁, 𑀲𑀦𑁆𑀢𑀻, 𑀲𑀦𑁆𑀢𑀺𑀬𑁄. 𑀲𑀦𑁆𑀢𑀺𑀬𑀸’’𑀢𑀺 𑀇𑀢𑁆𑀣𑀺𑀦𑀬𑁂𑀦 𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀢𑀸𑀲𑀼 𑀧𑀞𑀫𑀸 ‘‘𑀲𑀁𑀯𑀺𑀚𑁆𑀚𑀫𑀸𑀦𑀸 𑀓𑀺𑀮𑀦𑁆𑀢𑀸 𑀉𑀧𑀲𑀦𑁆𑀢𑀸 𑀦𑀺𑀭𑀼𑀤𑁆𑀥𑀸’’𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻, 𑀏𑀢𑁆𑀣 𑀧𑀬𑁄𑀕𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯. 𑀤𑀼𑀢𑀺𑀬𑀸 𑀧𑀦 ‘‘𑀲𑀁𑀯𑀺𑀚𑁆𑀚𑀫𑀸𑀦𑀸 𑀲𑀫𑀸𑀦𑀸’’𑀢𑀺 𑀅𑀢𑁆𑀣𑀤𑀻𑀧𑀓𑀸𑀧𑀤𑀯𑀢𑀻. 𑀢𑀣𑀸 𑀳𑀺 ‘‘𑀲𑀦𑁆𑀢𑀻 𑀆𑀧𑀢𑁆𑀢𑀺 𑀆𑀯𑀺𑀓𑀸𑀢𑀩𑁆𑀩𑀸’’𑀢𑀺 𑀏𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀸 ‘‘𑀲𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀸𑀬 𑀫𑀸𑀢𑀼 𑀪𑀢𑁄 𑀧𑁄𑀲𑁄,

𑀇𑀫𑀁 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺;

𑀢𑀫𑁆𑀧𑀺 𑀧𑀸𑀡𑀤𑀤𑀺𑀁 𑀲𑀦𑁆𑀢𑀺𑀁,

𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺

𑀏𑀢𑁆𑀣 𑀧𑀦 𑀲𑀫𑀸𑀦𑀸 ‘‘𑀲𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀻𑀲𑀤𑁆𑀤𑀲𑁆𑀲 𑀳𑀺 𑀲𑀁𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀢𑁆𑀣𑀯𑀸𑀘𑀓𑀢𑁆𑀢𑁂 ‘‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀢𑁆𑀢𑀫𑀻𑀞𑀸𑀦𑁂 ‘‘𑀲𑀢𑀺, 𑀲𑀢𑀺𑀬𑀸, 𑀲𑀢𑀺𑀬𑀁, 𑀲𑀦𑁆𑀢𑀺𑀬𑀸, 𑀲𑀦𑁆𑀢𑀺𑀬𑀁, 𑀲𑀦𑁆𑀢𑀻𑀲𑀽’’𑀢𑀺 𑀭𑀽𑀧𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀲𑁂𑀲𑀸𑀦𑀺 𑀇𑀢𑁆𑀣𑀺𑀦𑀬𑁂𑀦 𑀜𑁂𑀬𑁆𑀬𑀸𑀦𑀺. 𑀅𑀬𑀁 𑀢𑀢𑀺𑀬𑀸, 𑀏𑀢𑁆𑀣 𑀘 ‘‘𑀅𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺 ‘‘𑀲𑀦𑁆𑀢𑀺𑀬𑀸’’𑀇𑀘𑁆𑀘𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑁂 𑀦𑀺𑀤𑀲𑁆𑀲𑀦𑀁. 𑀅𑀧𑀭𑁄 𑀦𑀬𑁄 𑁋 𑀲𑀢𑀻𑀲𑀤𑁆𑀤𑀲𑁆𑀲 ‘‘𑀲𑀫𑀸𑀦𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀬𑀸 𑀢𑁆𑀯𑀁 𑀯𑀲𑀲𑀺 𑀚𑀺𑀡𑁆𑀡𑀲𑁆𑀲, 𑀏𑀯𑀁 𑀤𑀳𑀭𑀺𑀬𑀸 𑀲𑀢𑀻’’𑀢𑀺 𑀘 ‘‘𑀬𑁂 𑀢𑀁 𑀚𑀺𑀡𑁆𑀡𑀲𑁆𑀲 𑀧𑀸𑀤𑀁𑀲𑀼, 𑀏𑀯𑀁 𑀤𑀳𑀭𑀺𑀬𑀁 𑀲𑀢𑀺’’𑀦𑁆𑀢𑀺 𑀘 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀲𑀢𑀻, 𑀲𑀢𑀻, 𑀲𑀢𑀺𑀬𑁄. 𑀲𑀢𑀺𑀁, 𑀲𑀢𑀻, 𑀲𑀢𑀺𑀬𑁄. 𑀲𑀢𑀺𑀬𑀸’’𑀢𑀺𑀆𑀤𑀻𑀦𑀺𑀧𑀺 𑀭𑀽𑀧𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀲𑀁𑀬𑁄𑀕𑁂 𑀦𑀓𑀸𑀭𑀮𑁄𑀧𑀯𑀲𑁂𑀦 𑀯𑀸.

𑀇𑀤𑀸𑀦𑀺 ‘‘𑀲𑀦𑁆𑀢𑁄, 𑀲𑀦𑁆𑀢𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀧𑀬𑁄𑀕𑀦𑀺𑀘𑁆𑀙𑀬𑀁 𑀓𑀣𑀬𑀸𑀫 𑀧𑀬𑁄𑀕𑁂𑀲𑀼 𑀲𑁄𑀢𑀽𑀦𑀁 𑀅𑀲𑀫𑁆𑀫𑀽𑀴𑁆𑀳𑀪𑀸𑀯𑀸𑀬. 𑀢𑀣𑀸 𑀳𑀺 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀯𑀸 ‘‘𑀧𑀡𑁆𑀟𑀺𑀢𑀸’’𑀢𑀺 𑀯𑀸 𑀩𑀳𑀼𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 ¶ 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀤𑀦𑁆𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀏𑀓𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀁𑀯𑀺𑀚𑁆𑀚𑀫𑀸𑀦𑁄’’𑀢𑀺 𑀏𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄’’𑀢𑀺 𑀏𑀓𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺, ‘‘𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺 𑀘 𑀏𑀯𑀁 𑀯𑀼𑀢𑁆𑀢𑀩𑀳𑀼𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀯𑀸 ‘‘𑀲𑀦𑁆𑀢𑀸’’𑀢𑀺 𑀯𑀸 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, ‘‘𑀓𑀺𑀮𑀦𑁆𑀢𑁄’’𑀢𑀺 𑀯𑀸 ‘‘𑀲𑀫𑀸𑀦𑁄’’𑀢𑀺 𑀯𑀸 ‘‘𑀉𑀧𑀲𑀦𑁆𑀢𑁄’’𑀢𑀺 𑀯𑀸 ‘‘𑀦𑀺𑀭𑀼𑀤𑁆𑀥𑁄’’𑀢𑀺 𑀯𑀸 𑀏𑀓𑀯𑀘𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀩𑀳𑀼𑀯𑀘𑀦𑀲𑀤𑀺𑀲𑀁 ‘‘𑀲𑀦𑁆𑀢𑁄’’𑀢𑀺 𑀏𑀓𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. 𑀢𑁂𑀬𑁂𑀯𑀢𑁆𑀣𑁂 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀼𑀓𑀸𑀫𑁂𑀦 𑀧𑀦 ‘‘𑀲𑀦𑁆𑀢𑀸 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺, 𑀓𑁄 𑀦𑁂 𑀳𑀢𑁆𑀣𑁂 𑀕𑀳𑁂𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀲𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀁 𑀯𑀢𑁆𑀢𑀩𑁆𑀩𑀁. 𑀅𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀇𑀤𑀜𑁆𑀳𑀺 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑀁. 𑀅𑀬𑀫𑁆𑀧𑀺 𑀧𑀦𑁂𑀢𑁆𑀣 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀢𑀺𑀮𑀺𑀗𑁆𑀕𑀢𑁆𑀣𑁂 𑀘 𑀏𑀓𑀢𑁆𑀣𑁂, 𑀩𑀯𑁆𑀳𑀢𑁆𑀣𑁂𑀧𑀺 𑀘 𑀤𑀺𑀲𑁆𑀲𑀢𑀺;

𑀲𑀢𑁆𑀢𑀫𑁆𑀬𑀦𑁆𑀢𑁄 𑀲𑀢𑀺𑀲𑀤𑁆𑀤𑁄, 𑀯𑀺𑀧𑀮𑁆𑀮𑀸𑀲𑁂 𑀩𑀳𑀼𑀫𑁆𑀳𑀺 𑀲𑁄’’𑀢𑀺.

𑀇𑀤𑀸𑀦𑀺 𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀫𑀳𑀁, 𑀫𑀳𑀸, 𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑁂. 𑀫𑀳𑀢𑀸, 𑀫𑀳𑀦𑁆𑀢𑁂𑀦, 𑀫𑀳𑀦𑁆𑀢𑁂𑀳𑀺, 𑀫𑀳𑀦𑁆𑀢𑁂𑀪𑀺. 𑀫𑀳𑀢𑁄, 𑀫𑀳𑀦𑁆𑀢𑀲𑁆𑀲, 𑀫𑀳𑀦𑁆𑀢𑀸𑀦𑀁, 𑀫𑀳𑀢𑀁. 𑀫𑀳𑀢𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀲𑁆𑀫𑀸, 𑀫𑀳𑀦𑁆𑀢𑀫𑁆𑀳𑀸, 𑀫𑀳𑀦𑁆𑀢𑁂𑀳𑀺, 𑀫𑀳𑀦𑁆𑀢𑁂𑀪𑀺. 𑀫𑀳𑀢𑁄, 𑀫𑀳𑀦𑁆𑀢𑀲𑁆𑀲, 𑀫𑀳𑀦𑁆𑀢𑀸𑀦𑀁, 𑀫𑀳𑀢𑀁. 𑀫𑀳𑀢𑀺, 𑀫𑀳𑀦𑁆𑀢𑁂, 𑀫𑀳𑀦𑁆𑀢𑀲𑁆𑀫𑀺𑀁, 𑀫𑀳𑀦𑁆𑀢𑀫𑁆𑀳𑀺, 𑀫𑀳𑀦𑁆𑀢𑁂𑀲𑀼. 𑀪𑁄 𑀫𑀳, 𑀪𑁄 𑀫𑀳𑀸, 𑀪𑀯𑀦𑁆𑀢𑁄 𑀫𑀳𑀦𑁆𑀢𑁄𑀢𑀺 𑀅𑀬𑀫𑀫𑁆𑀳𑀸𑀓𑀁 𑀭𑀼𑀘𑀺.

𑀏𑀢𑁆𑀣 ‘‘𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑁂. 𑀫𑀳𑀦𑁆𑀢𑁂𑀦𑀸’’𑀢𑀺 𑀧𑀼𑀭𑀺𑀲𑀦𑀬𑁄𑀧𑀺 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸’’𑀢𑀺 𑀆𑀮𑀧𑀦𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ¶ ‘‘𑀫𑀳𑀦𑁆𑀢𑀁, 𑀫𑀳𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄𑀧𑀺 𑀮𑀩𑁆𑀪𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀫𑀳𑀢𑀻, 𑀫𑀳𑀢𑀻, 𑀫𑀳𑀢𑀺𑀬𑁄. 𑀫𑀳𑀢𑀺𑀁, 𑀫𑀳𑀢𑀻, 𑀫𑀳𑀢𑀺𑀬𑁄. 𑀫𑀳𑀢𑀺𑀬𑀸, 𑀫𑀳𑀢𑀻𑀳𑀺 𑀫𑀳𑀢𑀻𑀪𑀻’’𑀢𑀺 𑀇𑀢𑁆𑀣𑀺𑀦𑀬𑁄𑀧𑀺 𑀮𑀩𑁆𑀪𑀢𑀺. ‘‘𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬𑀸’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀅𑀧𑀭𑁄𑀧𑀺 ‘‘𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄. 𑀫𑀳𑀦𑁆𑀢’’𑀦𑁆𑀢𑀺 𑀓𑀜𑁆𑀜𑀸𑀦𑀬𑁄𑀧𑀺 𑀮𑀩𑁆𑀪𑀢𑀺, ‘‘𑀫𑀳𑀦𑁆𑀢𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀓𑀘𑁆𑀘𑀸𑀬𑀦𑁂 𑀧𑀦 ‘‘𑀫𑀳𑀦𑁆𑀢𑀻’’𑀇𑀢𑀺 𑀧𑀤𑀁 𑀤𑀺𑀝𑁆𑀞𑀁. 𑀢𑀁 ‘‘𑀕𑀼𑀡𑀯𑀦𑁆𑀢𑀻, 𑀓𑀼𑀮𑀯𑀦𑁆𑀢𑀻’’𑀇𑀘𑁆𑀘𑀸𑀤𑀻𑀦𑀺 𑀯𑀺𑀬 𑀧𑀸𑀴𑀺𑀬𑀁 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀦𑀦𑀼 𑀪𑁄 𑀬𑀲𑁆𑀫𑀸 𑀲𑀸𑀲𑀦𑁂𑀧𑀺 ‘‘𑀕𑀘𑁆𑀙𑀦𑁆𑀢𑀻, 𑀘𑀭𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀘 ‘‘𑀇𑀤𑁆𑀥𑀺𑀫𑀦𑁆𑀢𑀻’’𑀢𑀺 𑀘 𑀧𑀤𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀫𑀳𑀦𑁆𑀢𑀻, 𑀕𑀼𑀡𑀯𑀦𑁆𑀢𑀻’’𑀢𑀺𑀆𑀤𑀻𑀦𑀺𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦 𑀪𑀯𑀺𑀢𑀩𑁆𑀩𑀁 𑀢𑀣𑀸𑀭𑀽𑀧𑀲𑁆𑀲 𑀦𑀬𑀲𑁆𑀲 𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸, ‘‘𑀫𑀳𑀢𑀻, 𑀕𑀼𑀡𑀯𑀢𑀻’’𑀇𑀘𑁆𑀘𑀸𑀤𑀺𑀦𑀬𑀲𑁆𑀲𑁂𑀯 𑀤𑀲𑁆𑀲𑀦𑀢𑁄 𑀘. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑀻 𑀦𑀗𑁆𑀕𑀮𑀲𑀻𑀲𑀸, 𑀇𑀢𑁆𑀣𑀻 𑀲𑀺𑀬𑀸 𑀭𑀽𑀧𑀯𑀢𑀻, 𑀲𑀸 𑀘 𑀲𑀻𑀮𑀯𑀢𑀻 𑀲𑀺𑀬𑀸. 𑀲𑀢𑀺𑀫𑀢𑀻 𑀘𑀓𑁆𑀔𑀼𑀫𑀢𑀻. 𑀇𑀤𑁆𑀥𑀺𑀫𑀢𑀻 𑀧𑀢𑁆𑀢𑀺𑀫𑀢𑀻’’𑀢𑀺 𑀘 ‘‘𑀫𑀳𑀢𑀺𑀁 𑀲𑁂𑀦𑀁 𑀤𑀺𑀲𑁆𑀯𑀸 𑀫𑀳𑁄𑀲𑀥𑀲𑁂𑀦𑀸 𑀫𑀦𑁆𑀤𑀸, 𑀅𑀬𑀁 𑀅𑀢𑀺𑀯𑀺𑀬 𑀫𑀳𑀢𑀻 𑀲𑁂𑀦𑀸 𑀤𑀺𑀲𑁆𑀲𑀢𑀻’’𑀢𑀺 𑀘 𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀦 ‘‘𑀫𑀳𑀦𑁆𑀢𑀻, 𑀭𑀽𑀧𑀯𑀦𑁆𑀢𑀻’’𑀇𑀘𑁆𑀘𑀸𑀤𑀻𑀦𑀺.

𑀓𑁂𑀘𑀺 𑀧𑀦 ‘‘𑀫𑀳𑀸𑀇𑀢𑀺 𑀲𑀤𑁆𑀤𑁄 𑀩𑁆𑀬𑀸𑀲𑁂 𑀦 𑀮𑀩𑁆𑀪𑀢𑀺, 𑀲𑀫𑀸𑀲𑁂𑀬𑁂𑀯 𑀮𑀩𑁆𑀪𑀢𑀺 ‘𑀫𑀳𑀸𑀧𑀼𑀭𑀺𑀲𑁄’𑀢𑀺 𑀏𑀢𑁆𑀣 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀫𑀳𑀸 𑀢𑁂 𑀉𑀧𑀸𑀲𑀓 𑀧𑀭𑀺𑀘𑁆𑀘𑀸𑀕𑁄. 𑀫𑀳𑀸 𑀯𑀢𑀸𑀬𑀁 𑀪𑀦𑁆𑀢𑁂 𑀪𑀽𑀫𑀺𑀘𑀸𑀮𑁄. 𑀖𑁄𑀲𑁄 𑀘 𑀯𑀺𑀧𑀼𑀮𑁄 𑀫𑀳𑀸. 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸. 𑀲𑁂𑀦𑀸 𑀲𑀸𑀤𑀺𑀲𑁆𑀲𑀢𑁂 𑀫𑀳𑀸’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄. 𑀏𑀯𑀁 𑀩𑁆𑀬𑀸𑀲𑁂𑀧𑀺 𑀮𑀩𑁆𑀪𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀫𑀳𑀁, 𑀫𑀳𑀸, 𑀫𑀳𑀦𑁆𑀢𑁄, 𑀫𑀳𑀦𑁆𑀢𑀸. 𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁂, ‘‘𑀫𑀳𑀦𑁆𑀢𑀁, 𑀫𑀳𑀸, 𑀫𑀳𑀦𑁆𑀢𑀸𑀦𑀺. 𑀪𑁄 𑀫𑀳𑀦𑁆𑀢, 𑀪𑀯𑀦𑁆𑀢𑁄 𑀫𑀳𑀦𑁆𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂, ‘‘𑀫𑀳𑀦𑁆𑀢𑀸, 𑀫𑀳𑀸, 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄. 𑀪𑁄𑀢𑀺 𑀫𑀳𑀦𑁆𑀢𑁂, 𑀪𑁄𑀢𑀺𑀬𑁄 𑀫𑀳𑀦𑁆𑀢𑀸, 𑀫𑀳𑀦𑁆𑀢𑀸𑀬𑁄’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀲𑀩𑁆𑀩𑀁 𑀲𑀫𑁆𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀸𑀲𑁂 𑀧𑀦 ‘‘𑀫𑀳𑀸𑀲𑀢𑁆𑀢𑁄 𑀫𑀳𑀸𑀉𑀧𑀸𑀲𑀓𑁄 𑀫𑀳𑀸𑀉𑀧𑀸𑀲𑀺𑀓𑀸 𑀫𑀳𑀩𑁆𑀩𑀮𑁄 𑀫𑀳𑀸𑀯𑀦𑀁 𑀫𑀳𑀕𑁆𑀕𑀢𑀁 𑀫𑀳𑀧𑁆𑀨𑀮𑀁 𑀫𑀳𑀩𑁆𑀪𑀬’’𑀦𑁆𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀤𑁆𑀥𑀺𑀢𑁂 ‘‘𑀫𑀳𑀢𑁆𑀢𑀦𑁄 𑀫𑀳𑀢𑁆𑀢𑀁 𑀫𑀳𑀦𑁆𑀢𑀢𑁆𑀢𑀁 𑀫𑀳𑀦𑁆𑀢𑀢𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 ‘‘𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸’’𑀢𑀺 𑀭𑀽𑀧𑀸𑀦𑀺 𑀯𑀢𑁆𑀯𑀸 𑀲𑁂𑀲𑀸𑀦𑀺 𑀫𑀳𑀦𑁆𑀢𑀲𑀤𑁆𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 ‘‘𑀕𑀘𑁆𑀙𑀦𑁆𑀢𑁄, 𑀕𑀘𑁆𑀙𑀦𑁆𑀢𑀸’’𑀢𑀺 𑀧𑀼𑀭𑀺𑀲𑀦𑀬𑁄 𑀘 ‘‘𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀻’’𑀢𑀺 𑀘𑀺𑀢𑁆𑀢𑀦𑀬𑁄 𑀘 ‘‘𑀕𑀘𑁆𑀙𑀦𑁆𑀢𑀻, 𑀕𑀘𑁆𑀙𑀦𑁆𑀢𑀻, 𑀕𑀘𑁆𑀙𑀦𑁆𑀢𑀺𑀬𑁄’’𑀢𑀺 𑀇𑀢𑁆𑀣𑀺𑀦𑀬𑁄 𑀘 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 ‘‘𑀘𑀭𑀁 𑀘𑀭𑀦𑁆𑀢𑁄 𑀘𑀭𑀦𑁆𑀢𑀁 𑀘𑀭𑀦𑁆𑀢𑀻, 𑀤𑀤𑀁 𑀤𑀤𑀦𑁆𑀢𑁄 𑀤𑀤𑀦𑁆𑀢𑀁 𑀤𑀤𑀦𑁆𑀢𑀻’’𑀢𑀺𑀆𑀤𑀻𑀦𑀁 𑀅𑀦𑁂𑀓𑀧𑀤𑀲𑀳𑀲𑁆𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀬𑁂 𑀧𑀦𑀸𑀘𑀭𑀺𑀬𑀸 ‘‘𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀘𑁆𑀘𑀢𑁆𑀢𑀸𑀮𑀧𑀦𑀩𑀳𑀼𑀯𑀘𑀦𑀢𑁆𑀢𑀜𑁆𑀘 ‘‘𑀕𑀘𑁆𑀙𑀁’’𑀇𑀘𑁆𑀘𑀸𑀤𑀻𑀦𑀁 𑀆𑀮𑀧𑀦𑁂𑀓𑀯𑀘𑀦𑀢𑁆𑀢𑀜𑁆𑀘 𑀇𑀘𑁆𑀙𑀦𑁆𑀢𑀺, 𑀢𑁂 𑀲𑀫𑀫𑁆𑀳𑁂𑀳𑀺 𑀧𑀬𑁄𑀕𑁄 𑀲𑀸𑀲𑀦𑁂 𑀦 𑀤𑀺𑀝𑁆𑀞𑁄 𑀦𑀬𑀯𑀲𑁂𑀦𑀸𑀕𑀳𑁂𑀢𑀩𑁆𑀩𑀢𑁆𑀢𑀸. 𑀢𑀲𑁆𑀫𑀸 𑀢𑀸𑀦𑀺 𑀏𑀢𑁆𑀣 𑀦 𑀯𑀤𑀸𑀫. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀤𑀺𑀝𑁆𑀞𑁄. 𑀲𑁂𑀬𑁆𑀬𑀣𑀺𑀤𑀁?

‘‘𑀕𑀘𑁆𑀙𑀁 𑀯𑀺𑀥𑀫’’𑀫𑀺𑀘𑁆𑀘𑀸𑀤𑀺-𑀧𑀤𑀸𑀦𑀺 𑀫𑀼𑀦𑀺𑀲𑀸𑀲𑀦𑁂;

𑀓𑀢𑁆𑀣𑀘𑀸𑀔𑁆𑀬𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀧𑀦 𑀦𑀸𑀫𑀺𑀓𑀸.

‘‘𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑁂 𑀕𑀘𑁆𑀙𑀁,

𑀲𑁄 𑀫𑁂 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺;

𑀯𑀺𑀥𑀫𑀁 𑀤𑁂𑀯 𑀢𑁂 𑀭𑀝𑁆𑀞𑀁,

𑀧𑀼𑀢𑁆𑀢𑁄 𑀯𑁂𑀲𑁆𑀲𑀦𑁆𑀢𑀭𑁄 𑀢𑀯.

𑀅𑀥𑀫𑁆𑀫𑀁 ¶ 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀜𑁆𑀘𑁂 𑀢𑁆𑀯𑀁 𑀦𑀺𑀓𑁆𑀔𑀦𑀁 𑀯𑀦𑁂’’;

𑀇𑀘𑁆𑀘𑁂𑀯𑀫𑀸𑀤𑀬𑁄 𑀜𑁂𑀬𑁆𑀬𑀸, 𑀧𑀬𑁄𑀕𑀸 𑀏𑀢𑁆𑀣 𑀥𑀻𑀫𑀢𑀸.

‘‘𑀕𑀘𑁆𑀙𑀺𑀲𑁆𑀲𑀸𑀫𑀺 𑀯𑀺𑀥𑀫𑀻’’𑀢𑀺-𑀆𑀤𑀺𑀦𑀸 𑀚𑀺𑀦𑀲𑀸𑀲𑀦𑁂;

𑀦𑀸𑀦𑀸𑀓𑀸𑀮𑀧𑀼𑀭𑀺𑀲𑀸𑀦𑀁, 𑀯𑀲𑁂𑀦𑀢𑁆𑀣𑀁 𑀯𑀤𑁂 𑀯𑀺𑀤𑀽.

𑀦𑀸𑀫𑀢𑁆𑀢𑁂 𑀧𑀦 ‘‘𑀕𑀘𑁆𑀙𑀦𑁆𑀢𑁄, 𑀯𑀺𑀥𑀫𑀦𑁆𑀢𑁄’’𑀢𑀺𑀆𑀤𑀺𑀦𑀸;

‘‘𑀕𑀘𑁆𑀙’’𑀫𑀺𑀘𑁆𑀘𑁂𑀯𑀫𑀸𑀤𑀻𑀦-𑀫𑀢𑁆𑀣𑀫𑀢𑁆𑀣𑀯𑀺𑀤𑀽 𑀯𑀤𑁂.

𑀇𑀤𑀸𑀦𑀺 𑀲𑀫𑀕𑀢𑀺𑀓𑀢𑁆𑀢𑁂𑀧𑀺 ‘‘𑀚𑀸𑀦𑀁, 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀯𑀲𑁂𑀦 𑀬𑁄 𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀁 𑀯𑀤𑀸𑀫. 𑀢𑀣𑀸 𑀳𑀺 ‘‘𑀲𑀸 𑀚𑀸𑀦𑀁𑀬𑁂𑀯 𑀆𑀳 𑀦 𑀚𑀸𑀦𑀸𑀫𑀻𑀢𑀺, 𑀧𑀲𑁆𑀲𑀁𑀬𑁂𑀯 𑀆𑀳 𑀦 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀚𑀸𑀦𑀁 𑀧𑀲𑁆𑀲𑀁 𑀲𑀤𑁆𑀤𑀸𑀦𑀁 ‘‘𑀚𑀸𑀦𑀦𑁆𑀢𑀻 𑀧𑀲𑁆𑀲𑀦𑁆𑀢𑀻’’𑀢𑀺 𑀮𑀺𑀗𑁆𑀕𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 ‘‘𑀕𑀘𑁆𑀙𑀁’’𑀇𑀢𑀺 𑀲𑀤𑁆𑀤𑀲𑁆𑀲𑀧𑀺 𑀬𑀣𑀸𑀧𑀬𑁄𑀕𑀁 ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀢𑁆𑀣𑀺𑀬𑀸 𑀓𑀣𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀦 ‘‘𑀕𑀘𑁆𑀙𑀦𑁆𑀢𑁄’’𑀢𑀺 𑀲𑀤𑁆𑀤𑀲𑁆𑀲 ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀢𑁆𑀣𑀺𑀬𑀸 𑀓𑀣𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀣𑀸’’𑀢𑀺 𑀏𑀢𑁆𑀣 ‘‘𑀚𑀸𑀦𑀦𑁆𑀢𑀸 𑀧𑀲𑁆𑀲𑀦𑁆𑀢𑀸’’𑀢𑀺 𑀯𑀘𑀦𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀧𑀦 ‘‘𑀕𑀘𑁆𑀙𑀁’’𑀇𑀢𑀺 𑀲𑀤𑁆𑀤𑀲𑁆𑀲𑀧𑀺 𑀬𑀣𑀸𑀧𑀬𑁄𑀕𑀁 ‘‘𑀕𑀘𑁆𑀙𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀦 ‘‘𑀕𑀘𑁆𑀙𑀦𑁆𑀢𑁂’’𑀢𑀺 𑀲𑀤𑁆𑀤𑀲𑁆𑀲 ‘‘𑀕𑀘𑁆𑀙𑀦𑁆𑀢𑀸’’𑀢𑀺 𑀩𑀳𑀼𑀯𑀘𑀦𑀢𑁆𑀣𑁄 𑀮𑀩𑁆𑀪𑀢𑀺 𑀢𑁂𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀉𑀢𑁆𑀢𑀭𑀢𑁆𑀭𑀸𑀧𑀺. ‘‘𑀪𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭’’𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑁆𑀲𑀭𑀁𑀲𑀤𑁆𑀤𑀲𑁆𑀲 ‘‘𑀅𑀦𑀼𑀲𑁆𑀲𑀭𑀦𑁆𑀢𑀸’’𑀢𑀺 𑀯𑀘𑀦𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. ‘‘𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 𑀏𑀢𑁆𑀣 𑀲𑀭𑀁𑀲𑀤𑁆𑀤𑀲𑁆𑀲 𑀲𑀭𑀦𑁆𑀢𑁂𑀦𑀸𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. ‘‘𑀨𑀼𑀲𑀁 𑀪𑀽𑀢𑀸𑀦𑀺 𑀲𑀡𑁆𑀞𑀸𑀦𑀁, 𑀫𑀦𑀲𑀸 𑀕𑀡𑁆𑀳𑀢𑁄 ¶ 𑀬𑀣𑀸’’𑀢𑀺 𑀏𑀢𑁆𑀣 𑀨𑀼𑀲𑀁𑀲𑀤𑁆𑀤𑀲𑁆𑀲𑀧𑀺 ‘‘𑀨𑀼𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. 𑀢𑀣𑀸 ‘‘𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄’’𑀢𑀺 𑀏𑀢𑁆𑀣𑀸𑀧𑀺 𑀬𑀸𑀘𑀁𑀲𑀤𑁆𑀤𑀲𑁆𑀲 ‘‘𑀬𑀸𑀘𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀪𑀢𑁆𑀢𑀦𑁆𑀢𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. 𑀬𑀸𑀘𑀦𑁆𑀢𑀺 𑀯𑀸 𑀬𑀸𑀘𑀺𑀢𑀩𑁆𑀩𑀁 𑀥𑀦𑀁, 𑀇𑀫𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 ‘‘𑀪𑀯𑀁𑀓𑀭’’𑀦𑁆𑀢𑀺𑀆𑀤𑀻𑀦𑀁 𑀯𑀺𑀲𑀤𑀺𑀲𑀧𑀤𑀫𑀸𑀮𑀸 𑀘 ‘‘𑀕𑀘𑁆𑀙𑀁, 𑀘𑀭’’𑀦𑁆𑀢𑀺𑀆𑀤𑀻𑀦𑀁 𑀲𑀤𑀺𑀲𑀧𑀤𑀫𑀸𑀮𑀸 𑀘 ‘‘𑀚𑀸𑀦𑀁, 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀯𑀲𑁂𑀦 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀅𑀬𑀁 𑀢𑀺𑀯𑀺𑀥𑁄𑀧𑀺 𑀆𑀓𑀸𑀭𑁄 𑀆𑀔𑁆𑀬𑀸𑀢𑀺𑀓𑀧𑀤𑀢𑁆𑀣𑀯𑀺𑀪𑀸𑀯𑀦𑀸𑀬 𑀲𑀤𑁆𑀥𑀺𑀁 𑀓𑀣𑀺𑀢𑁄 𑀧𑀸𑀯𑀘𑀦𑀯𑀭𑁂 𑀲𑁄𑀢𑀽𑀦𑀁 𑀲𑀤𑁆𑀤𑁂𑀲𑁆𑀯𑀢𑁆𑀣𑁂𑀲𑀼 𑀘 𑀯𑀺𑀲𑀸𑀭𑀤𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀣𑀁. 𑀲𑀩𑁆𑀩𑀫𑁂𑀢𑀜𑁆𑀳𑀺 𑀲𑀦𑁆𑀥𑀸𑀬 𑀇𑀫𑀸 𑀕𑀸𑀣𑀸 𑀯𑀼𑀢𑁆𑀢𑀸 𑁋

‘‘𑀪𑀯𑀁 𑀓𑀭𑀁 𑀅𑀭𑀳𑀁 𑀲𑀁, 𑀫𑀳𑀁’’𑀇𑀢𑀺 𑀧𑀤𑀸𑀦𑀺 𑀢𑀼;

𑀯𑀺𑀲𑀤𑀺𑀲𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀮𑀓𑁆𑀔𑀬𑁂.

‘‘𑀕𑀘𑁆𑀙𑀁 𑀘𑀭𑀁 𑀤𑀤𑀁 𑀢𑀺𑀝𑁆𑀞𑀁, 𑀘𑀺𑀦𑁆𑀢𑀬𑀁 𑀪𑀸𑀯𑀬𑀁 𑀯𑀤𑀁;

𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺𑀆𑀤𑀻𑀦𑀺, 𑀲𑀫𑀸𑀦𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀢𑀢𑁆𑀭 ‘‘𑀚𑀸𑀦’’𑀦𑁆𑀢𑀺𑀆𑀤𑀻𑀦𑀁, 𑀓𑀢𑁆𑀣𑀘𑀺 𑀧𑀭𑀺𑀯𑀢𑁆𑀢𑀦𑀁;

𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦-𑀦𑁆𑀢𑀭𑀢𑁄 𑀧𑀦 𑀤𑀺𑀲𑁆𑀲𑀢𑀻𑀢𑀺.

𑀅𑀧𑀺𑀘 𑀅𑀬𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀤𑁆𑀯𑀻𑀲𑀼 𑀮𑀺𑀗𑁆𑀕𑁂𑀲𑀼 𑀙𑀲𑀼 𑀯𑀺𑀪𑀢𑁆𑀢𑀻𑀲𑀼 𑀢𑁂𑀭𑀲𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁. 𑀅𑀬𑀫𑁆𑀧𑀺 𑀧𑀦𑁂𑀢𑁆𑀣 𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀕𑀘𑁆𑀙𑀁 𑀘𑀭’’𑀦𑁆𑀢𑀺𑀆𑀤𑀻𑀦𑀺, 𑀯𑀺𑀧𑁆𑀧𑀓𑀢𑀯𑀘𑁄 𑀲𑀺𑀬𑀼𑀁;

‘‘𑀕𑀘𑁆𑀙𑀫𑀸𑀦𑁄 𑀘𑀭𑀫𑀸𑀦𑁄’’, 𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀘.

‘‘𑀫𑀳𑀁 𑀪𑀯’’𑀦𑁆𑀢𑀺 𑀏𑀢𑀸𑀦𑀺, 𑀯𑀺𑀧𑁆𑀧𑀓𑀢𑀯𑀘𑁄𑀧𑀺 𑀘;

𑀅𑀯𑀺𑀧𑁆𑀧𑀓𑀢𑀯𑀘𑁄 𑀘, 𑀲𑀺𑀬𑀼𑀁 𑀅𑀢𑁆𑀣𑀸𑀦𑀼𑀭𑀽𑀧𑀢𑁄.

‘‘𑀅𑀭𑀳𑀁 ¶ 𑀲’’𑀦𑁆𑀢𑀺 𑀏𑀢𑀸𑀦𑀺, 𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀲𑀩𑁆𑀩𑀣𑀸;

𑀆𑀓𑀸𑀭𑀁 𑀢𑀺𑀯𑀺𑀥𑀫𑁆𑀧𑁂𑀢𑀁, 𑀓𑀭𑁂 𑀘𑀺𑀢𑁆𑀢𑁂 𑀲𑀼𑀫𑁂𑀥𑀲𑁄𑀢𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀆𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀥𑀦𑀪𑀽𑀢𑀺𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑀁 𑀯𑀓𑁆𑀔𑀸𑀫𑀺 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸.

𑀅𑀕𑁆𑀕𑀺, 𑀅𑀕𑁆𑀕𑀻, 𑀅𑀕𑁆𑀕𑀬𑁄. 𑀅𑀕𑁆𑀕𑀺𑀁, 𑀅𑀕𑁆𑀕𑀻, 𑀅𑀕𑁆𑀕𑀬𑁄. 𑀅𑀕𑁆𑀕𑀺𑀦𑀸, 𑀅𑀕𑁆𑀕𑀻𑀳𑀺, 𑀅𑀕𑁆𑀕𑀻𑀪𑀺. 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀺𑀦𑁄, 𑀅𑀕𑁆𑀕𑀻𑀦𑀁. 𑀅𑀕𑁆𑀕𑀺𑀦𑀸, 𑀅𑀕𑁆𑀕𑀻𑀳𑀺, 𑀅𑀕𑁆𑀕𑀻𑀪𑀺. 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀺𑀦𑁄, 𑀅𑀕𑁆𑀕𑀻𑀦𑀁. 𑀅𑀕𑁆𑀕𑀺𑀲𑁆𑀫𑀺𑀁, 𑀅𑀕𑁆𑀕𑀺𑀫𑁆𑀳𑀺, 𑀅𑀕𑁆𑀕𑀻𑀲𑀼. 𑀪𑁄 𑀅𑀕𑁆𑀕𑀺, 𑀪𑁄 𑀅𑀕𑁆𑀕𑀻, 𑀪𑀯𑀦𑁆𑀢𑁄 𑀅𑀕𑁆𑀕𑀬𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀅𑀕𑁆𑀕𑀺𑀲𑁆𑀫𑀸, 𑀅𑀕𑁆𑀕𑀺𑀫𑁆𑀳𑀸’’𑀢𑀺 𑀇𑀫𑀸𑀦𑀺 𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺. ‘‘𑀅𑀕𑁆𑀕𑀺𑀦𑀸, 𑀅𑀕𑁆𑀕𑀺𑀲𑁆𑀫𑀸, 𑀅𑀕𑁆𑀕𑀺𑀫𑁆𑀳𑀸’’𑀢𑀺 𑀓𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀥𑀦𑀪𑀽𑀢𑀺, 𑀥𑀦𑀪𑀽𑀢𑀻, 𑀥𑀦𑀪𑀽𑀢𑀬𑁄. 𑀥𑀦𑀪𑀽𑀢𑀺𑀁, 𑀥𑀦𑀪𑀽𑀢𑀻, 𑀥𑀦𑀪𑀽𑀢𑀬𑁄. 𑀥𑀦𑀪𑀽𑀢𑀺𑀦𑀸, 𑀥𑀦𑀪𑀽𑀢𑀻𑀳𑀺, 𑀥𑀦𑀪𑀽𑀢𑀻𑀪𑀺. 𑀥𑀦𑀪𑀽𑀢𑀺𑀲𑁆𑀲, 𑀥𑀦𑀪𑀽𑀢𑀺𑀦𑁄, 𑀥𑀦𑀪𑀽𑀢𑀻𑀦𑀁. 𑀥𑀦𑀪𑀽𑀢𑀺𑀦𑀸, 𑀥𑀦𑀪𑀽𑀢𑀺𑀲𑁆𑀫𑀸, 𑀥𑀦𑀪𑀽𑀢𑀺𑀫𑁆𑀳𑀸, 𑀥𑀦𑀪𑀽𑀢𑀻𑀳𑀺, 𑀥𑀦𑀪𑀽𑀢𑀻𑀪𑀺. 𑀥𑀦𑀪𑀽𑀢𑀺𑀲𑁆𑀲, 𑀥𑀦𑀪𑀽𑀢𑀺𑀦𑁄, 𑀥𑀦𑀪𑀽𑀢𑀻𑀦𑀁. 𑀥𑀦𑀪𑀽𑀢𑀺𑀲𑁆𑀫𑀺𑀁, 𑀥𑀦𑀪𑀽𑀢𑀺𑀫𑁆𑀳𑀺, 𑀥𑀦𑀪𑀽𑀢𑀻𑀲𑀼. 𑀪𑁄 𑀥𑀦𑀪𑀽𑀢𑀺, 𑀪𑁄 𑀥𑀦𑀪𑀽𑀢𑀻, 𑀪𑀯𑀦𑁆𑀢𑁄 𑀥𑀦𑀪𑀽𑀢𑀬𑁄.

𑀲𑀺𑀭𑀺𑀪𑀽𑀢𑀺 𑀲𑁄𑀢𑁆𑀣𑀺𑀪𑀽𑀢𑀺, 𑀲𑀼𑀯𑀢𑁆𑀣𑀺𑀪𑀽𑀢𑀺 𑀅𑀕𑁆𑀕𑀺𑀦𑀺;

𑀕𑀺𑀦𑀺 𑀚𑁄𑀢𑀺 𑀤𑀥𑀺 𑀧𑀸𑀡𑀺, 𑀇𑀲𑀺 𑀲𑀦𑁆𑀥𑀺 𑀫𑀼𑀦𑀺 𑀫𑀡𑀺.

𑀩𑁆𑀬𑀸𑀥𑀺 ¶ 𑀕𑀡𑁆𑀞𑀺 𑀭𑀯𑀺 𑀫𑀼𑀝𑁆𑀞𑀺, 𑀓𑀯𑀺 𑀕𑀺𑀭𑀺 𑀓𑀧𑀺 𑀦𑀺𑀥𑀺;

𑀓𑀼𑀘𑁆𑀙𑀺 𑀯𑀢𑁆𑀣𑀺 𑀯𑀺𑀥𑀺 𑀲𑀸𑀮𑀺, 𑀯𑀻𑀳𑀺 𑀭𑀸𑀲𑀺 𑀅𑀳𑀺 𑀫𑀲𑀺.

𑀲𑀸𑀢𑀺 𑀓𑁂𑀲𑀺 𑀓𑀺𑀫𑀺 𑀩𑁄𑀦𑁆𑀤𑀺, 𑀩𑁄𑀥𑀺 𑀤𑀻𑀧𑀺 𑀧𑀢𑀺 𑀳𑀭𑀺;

𑀅𑀭𑀺 𑀥𑀦𑀺 𑀢𑀺𑀫𑀺 𑀓𑀮𑀺, 𑀲𑀸𑀭𑀣𑁆𑀬𑀼𑀤𑀥𑀺 𑀅𑀜𑁆𑀚𑀮𑀺,

𑀅𑀥𑀺𑀧𑀢𑀺 𑀦𑀭𑀧𑀢𑀺, 𑀅𑀲𑀺 𑀜𑀸𑀢𑀺 𑀦𑀺𑀭𑀽𑀧𑀥𑀺;

𑀲𑀫𑀸𑀥𑀺 𑀚𑀮𑀥𑀺𑀘𑁆𑀘𑀸𑀤𑀻, 𑀥𑀦𑀪𑀽𑀢𑀺𑀲𑀫𑀸 𑀫𑀢𑀸.

𑀅𑀣 𑀯𑀸 𑀏𑀢𑁂𑀲𑀼 𑀅𑀥𑀺𑀧𑀢𑀺𑀲𑀤𑁆𑀤𑀲𑁆𑀲 ‘‘𑀅𑀥𑀺𑀧𑀢𑀺𑀬𑀸 𑀲𑀢𑁆𑀢𑀸’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀅𑀥𑀺𑀧𑀢𑀺𑀬𑀸’’𑀢𑀺 𑀲𑀢𑁆𑀢𑀫𑀻𑀭𑀽𑀧𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀅𑀧𑀺𑀘 ‘‘𑀅𑀲𑀸𑀭𑁂 𑀲𑀸𑀭𑀫𑀢𑀺𑀦𑁄’’𑀢𑀺 𑀧𑀸𑀴𑀺𑀬𑀁 𑀇𑀓𑀸𑀭𑀦𑁆𑀢𑀲𑀫𑀸𑀲𑀧𑀤𑀢𑁄 𑀬𑁄𑀯𑀘𑀦𑀲𑁆𑀲 𑀦𑁄𑀆𑀤𑁂𑀲𑀤𑀲𑁆𑀲𑀦𑀢𑁄 𑀓𑁆𑀯𑀘𑀺 𑀅𑀥𑀺𑀧𑀢𑀺𑀇𑀘𑁆𑀘𑀸𑀤𑀻𑀦𑀁 𑀇𑀓𑀸𑀭𑀦𑁆𑀢𑀲𑀫𑀸𑀲𑀧𑀤𑀸𑀦𑀁 ‘‘𑀅𑀥𑀺𑀧𑀢𑀺𑀦𑁄’’𑀢𑀺𑀆𑀤𑀺𑀦𑀸𑀧𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀭𑀽𑀧𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺 𑀈𑀓𑀸𑀭𑀦𑁆𑀢𑀸𑀦𑀁 𑀤𑀡𑁆𑀟𑀻𑀲𑀤𑁆𑀤𑀸𑀤𑀻𑀦𑀁 ‘‘𑀤𑀡𑁆𑀟𑀺𑀦𑁄’’𑀢𑀺𑀆𑀤𑀻𑀦𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀭𑀽𑀧𑀸𑀦𑀺 𑀯𑀺𑀬. 𑀕𑀳𑀧𑀢𑀺𑀚𑀸𑀦𑀺𑀧𑀢𑀺𑀲𑀤𑁆𑀤𑀸𑀤𑀻𑀦𑀁 𑀧𑀦 𑀲𑀫𑀸𑀲𑀧𑀤𑀸𑀦𑀫𑁆𑀧𑀺 𑀏𑀯𑀭𑀽𑀧𑀸𑀦𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀭𑀽𑀧𑀸𑀦𑀺 𑀦 𑀇𑀘𑁆𑀙𑀺𑀢𑀩𑁆𑀩𑀸𑀦𑀺 ‘‘𑀕𑀳𑀧𑀢𑀬𑁄 𑀚𑀸𑀦𑀺𑀧𑀢𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀣𑀸𑀧𑀸𑀯𑀘𑀦𑀁 𑀕𑀳𑁂𑀢𑀩𑁆𑀩𑀭𑀽𑀧𑀢𑁆𑀢𑀸. 𑀇𑀲𑀺 𑀫𑀼𑀦𑀺𑀲𑀤𑁆𑀤𑀸𑀦𑀁 𑀧𑀦𑀸𑀮𑀧𑀦𑀝𑁆𑀞𑀸𑀦𑁂 ‘‘𑀇𑀲𑁂, 𑀫𑀼𑀲𑁂’’𑀢𑀺 𑀭𑀽𑀧𑀦𑁆𑀢𑀭𑀫𑁆𑀧𑀺 𑀕𑀳𑁂𑀢𑀩𑁆𑀩𑀁 ‘‘𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂. 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑁂’’𑀢𑀺 𑀤𑀲𑁆𑀲𑀦𑀢𑁄.

𑀬𑁂 𑀧𑀦𑁂𑀢𑁆𑀣 𑀅𑀫𑁆𑀳𑁂𑀳𑀺 𑀅𑀕𑁆𑀕𑀺𑀦𑀺 𑀕𑀺𑀦𑀺𑀲𑀤𑁆𑀤𑀸 𑀯𑀼𑀢𑁆𑀢𑀸, 𑀢𑀢𑁆𑀭𑁂𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀅𑀕𑁆𑀕𑀺𑀦𑀺𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀪𑀸𑀯𑁂𑀬𑁂𑀯 𑀮𑀩𑁆𑀪𑀢𑀺, 𑀦 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀪𑀸𑀯𑁂 𑀉𑀧𑀬𑁄𑀕𑀪𑀸𑀯𑀸𑀤𑀻𑀲𑀼 𑀯𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀧𑀸𑀴𑀺𑀬𑀁 𑀅𑀕𑁆𑀕𑀺𑀦𑀺𑀲𑀤𑁆𑀤𑁄 𑀦𑀸𑀫 𑀦𑀢𑁆𑀣𑀺, 𑀕𑀺𑀦𑀺𑀲𑀤𑁆𑀤𑁄𑀬𑁂𑀯 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀕𑀺𑀦𑀺𑀲𑀤𑁆𑀤𑁄 𑀦𑀸𑀫 𑀦𑀢𑁆𑀣𑀺, 𑀅𑀕𑁆𑀕𑀺𑀦𑀺𑀲𑀤𑁆𑀤𑁄𑀬𑁂𑀯𑀢𑁆𑀣𑀻’’𑀢𑀺 ¶ 𑀯𑀤𑀦𑁆𑀢𑀺. 𑀲𑀩𑁆𑀩𑀫𑁂𑀢𑀁 𑀦 𑀬𑀼𑀚𑁆𑀚𑀢𑀺 𑀅𑀕𑁆𑀕𑀺𑀦𑀺 𑀕𑀺𑀦𑀺𑀲𑀤𑁆𑀤𑀸𑀦𑀫𑀼𑀧𑀮𑀩𑁆𑀪𑀦𑀢𑁄, 𑀲𑀩𑁆𑀩𑀸𑀲𑀼𑀧𑀺 𑀯𑀺𑀪𑀢𑁆𑀢𑀻𑀲𑀼 𑀤𑁆𑀯𑀻𑀲𑀼 𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁄 𑀘. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑁂 𑁋

‘‘𑀦 𑀳𑀺 𑀯𑀕𑁆𑀕𑀼 𑀯𑀤𑀦𑁆𑀢𑀺 𑀯𑀤𑀦𑁆𑀢𑀸,

𑀦𑀸𑀪𑀺𑀚𑀯𑀦𑁆𑀢𑀺 𑀦 𑀢𑀸𑀡𑀫𑀼𑀧𑁂𑀦𑁆𑀢𑀺;

𑀅𑀗𑁆𑀕𑀸𑀭𑁂 𑀲𑀦𑁆𑀣𑀢𑁂 𑀲𑁂𑀦𑁆𑀢𑀺,

𑀅𑀕𑁆𑀕𑀺𑀦𑀺𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀻’’𑀢𑀺

𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀅𑀕𑁆𑀕𑀺𑀦𑀺’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 𑀤𑀺𑀲𑁆𑀲𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 ‘‘𑀅𑀕𑁆𑀕𑀺𑀦𑀺𑀁 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄𑀚𑀸𑀮𑀁 𑀲𑀩𑁆𑀩𑀤𑀺𑀲𑀸𑀲𑀼 𑀘 𑀲𑀫𑁆𑀧𑀚𑁆𑀚𑀮𑀺𑀢𑀫𑀕𑁆𑀕𑀺’’𑀦𑁆𑀢𑀺. 𑀢𑀢𑁆𑀭𑁂𑀯 𑀘 𑀲𑀼𑀢𑁆𑀢𑀦𑀺𑀧𑀸𑀢𑁂 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑁂 𑁋

‘‘𑀅𑀣 𑀮𑁄𑀳𑀫𑀬𑀁 𑀧𑀦 𑀓𑀼𑀫𑁆𑀪𑀺𑀁,

𑀅𑀕𑁆𑀕𑀺𑀦𑀺𑀲𑀜𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀺;

𑀧𑀘𑁆𑀘𑀦𑁆𑀢𑀺 𑀳𑀺 𑀢𑀸𑀲𑀼 𑀘𑀺𑀭𑀭𑀢𑁆𑀢𑀁,

𑀅𑀕𑁆𑀕𑀺𑀦𑀺𑀲𑀫𑀸𑀲𑀼 𑀲𑀫𑀼𑀧𑁆𑀮𑀯𑀸𑀢𑁂’’𑀢𑀺

𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀲𑀫𑀸𑀲𑀯𑀺𑀲𑀬𑀢𑁆𑀢𑀸 𑀅𑀕𑁆𑀕𑀺𑀦𑀺𑀲𑀜𑁆𑀚𑀮𑀺𑀢𑀦𑁆𑀢𑀺 𑀅𑀕𑁆𑀕𑀺𑀦𑀻𑀳𑀺 𑀲𑀜𑁆𑀚𑀮𑀺𑀢𑀦𑁆𑀢𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀣𑀸 𑀅𑀕𑁆𑀕𑀺𑀦𑀺𑀲𑀫𑀸𑀲𑀽𑀢𑀺 𑀅𑀕𑁆𑀕𑀺𑀦𑀻𑀳𑀺 𑀲𑀤𑀺𑀲𑀸𑀲𑀽𑀢𑀺 𑀅𑀢𑁆𑀣𑁄𑀧𑀺. 𑀏𑀯𑀁 𑀲𑀫𑀸𑀲𑀯𑀺𑀥𑀸𑀦𑀫𑀼𑀔𑁂𑀦 ‘‘𑀅𑀕𑁆𑀕𑀺𑀦𑀻𑀳𑀻’’𑀢𑀺 𑀓𑀭𑀡𑀯𑀘𑀦𑀫𑁆𑀧𑀺 𑀤𑀺𑀲𑁆𑀲𑀢𑀺.

𑀕𑀺𑀦𑀺𑀲𑀤𑁆𑀤𑁄𑀧𑀺 𑀘 𑀧𑀸𑀴𑀺𑀬𑀁 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀢𑀫𑁂𑀯 𑀓𑀝𑁆𑀞𑀁 𑀤𑀳𑀢𑀺, 𑀬𑀲𑁆𑀫𑀸 𑀲𑁄 𑀚𑀸𑀬𑀢𑁂 𑀕𑀺𑀦𑀻’’𑀢𑀺 𑀘𑀽𑀴𑀩𑁄𑀥𑀺𑀘𑀭𑀺𑀬𑀸𑀬𑀁 𑀕𑀺𑀦𑀺𑀲𑀤𑁆𑀤𑁄 𑀤𑀺𑀝𑁆𑀞𑁄. 𑀓𑁂𑀘𑀺 𑀧𑀦𑁂𑀢𑁆𑀣 𑀲𑀦𑁆𑀥𑀺𑀯𑀲𑁂𑀦 𑀅𑀓𑀸𑀭𑀮𑁄𑀧𑀁 𑀲𑀜𑁆𑀜𑁄𑀕𑀸𑀤𑀺𑀲𑁆𑀲 𑀘 𑀕𑀓𑀸𑀭𑀲𑁆𑀲 𑀮𑁄𑀧𑀁 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀫𑀸𑀢𑀺 ¶ 𑀬𑀢𑁄 𑀓𑀝𑁆𑀞𑀸. 𑀕𑀺𑀦𑀻𑀢𑀺 𑀅𑀕𑁆𑀕𑀻’’𑀢𑀺 𑀏𑀯𑀁 𑀕𑀺𑀦𑀺𑀲𑀤𑁆𑀤𑀲𑁆𑀲 𑀉𑀮𑁆𑀮𑀺𑀗𑁆𑀕𑁂𑀢𑁆𑀯𑀸 𑀯𑀘𑀦𑀢𑁄. 𑀢𑀣𑀸 ‘‘𑀙𑀦𑁆𑀦𑀸 𑀓𑀼𑀝𑀺 𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀇𑀫𑀲𑁆𑀲 𑀥𑀦𑀺𑀬𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀳𑀺𑀢𑁄𑀢𑀺 𑀆𑀪𑀢𑁄 𑀚𑀸𑀮𑀺𑀢𑁄 𑀯𑀸. 𑀕𑀺𑀦𑀻𑀢𑀺 𑀅𑀕𑁆𑀕𑀻’’𑀢𑀺 𑀯𑀘𑀦𑀢𑁄, 𑀢𑀣𑁂𑀯 𑀘 ‘‘𑀫𑀳𑀸𑀕𑀺𑀦𑀺 𑀧𑀚𑁆𑀚𑀮𑀺𑀢𑁄, 𑀅𑀦𑀸𑀳𑀸𑀭𑁄𑀧𑀲𑀫𑁆𑀫𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀣𑁂𑀭𑀕𑀸𑀣𑀸𑀬 𑀲𑀁𑀯𑀡𑁆𑀡𑀦𑀸𑀬𑀁 ‘‘𑀕𑀺𑀦𑀻𑀢𑀺 𑀅𑀕𑁆𑀕𑀻’’𑀢𑀺 𑀯𑀘𑀦𑀢𑁄. 𑀬𑀤𑀺 𑀳𑀺 𑀕𑀺𑀦𑀺𑀲𑀤𑁆𑀤𑁄 𑀯𑀺𑀲𑀼𑀁 𑀦 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀚𑀸𑀬𑀢𑁂 𑀕𑀺𑀦𑀻’’𑀢𑀺𑀆𑀤𑀻𑀦𑀺 ‘‘𑀚𑀸𑀬𑀢𑁂 𑀅𑀕𑁆𑀕𑀺𑀦𑀻’’𑀢𑀺𑀆𑀤𑀺𑀦𑀸 𑀧𑀤𑀘𑁆𑀙𑁂𑀤𑀯𑀲𑁂𑀦 𑀅𑀢𑁆𑀣𑀁 𑀯𑀤𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀏𑀯𑀁 𑀦 𑀯𑀤𑀺𑀁𑀲𑀼, ‘‘𑀕𑀺𑀦𑀻𑀢𑀺 𑀅𑀕𑁆𑀕𑀻’’𑀢𑀺 𑀧𑀦 𑀯𑀤𑀺𑀁𑀲𑀼, 𑀢𑁂𑀦 𑀜𑀸𑀬𑀢𑀺 ‘‘𑀕𑀺𑀦𑀺𑀲𑀤𑁆𑀤𑁄𑀧𑀺 𑀯𑀺𑀲𑀼𑀁 𑀅𑀢𑁆𑀣𑀻’’𑀢𑀺. 𑀬𑁂 ‘‘𑀕𑀺𑀦𑀺𑀲𑀤𑁆𑀤𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯 𑀲𑀸𑀲𑀦𑁂 𑀕𑀺𑀦𑀺𑀲𑀤𑁆𑀤𑀲𑁆𑀲𑀼𑀧𑀮𑀩𑁆𑀪𑀦𑀢𑁄. 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀙𑀦𑁆𑀦𑀸 𑀓𑀼𑀝𑀺 𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀧𑀸𑀞𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀫𑁂𑀯 ‘‘𑀢𑁂𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺𑀦𑀺 ‘𑀕𑀺𑀦𑀻’𑀢𑀺 𑀯𑁄𑀳𑀭𑀺𑀬𑀢𑀻’’𑀢𑀺 𑀢𑀲𑁆𑀲 𑀅𑀪𑀺𑀥𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀬𑀫𑁂𑀢𑁆𑀣 𑀕𑀸𑀣𑀸𑀭𑀘𑀦𑀁 𑀓𑀭𑀺𑀲𑁆𑀲𑀸𑀫 𑁋

𑀯𑀺𑀤𑁂𑀳𑀭𑀝𑁆𑀞𑀫𑀚𑁆𑀛𑀫𑁆𑀳𑀺, 𑀬𑀁 𑀢𑀁 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑀁;

𑀭𑀝𑁆𑀞𑀁 𑀧𑀩𑁆𑀩𑀢𑀭𑀝𑁆𑀞𑀦𑁆𑀢𑀺, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁.

𑀥𑀫𑁆𑀫𑀓𑁄𑀡𑁆𑀟𑀯𑁆𑀳𑀬𑀁 𑀢𑀢𑁆𑀣, 𑀦𑀕𑀭𑀁 𑀅𑀢𑁆𑀣𑀺 𑀲𑁄𑀪𑀦𑀁;

𑀢𑀫𑁆𑀳𑀺 𑀞𑀸𑀦𑁂 𑀫𑀦𑀼𑀲𑁆𑀲𑀸𑀦𑀁, 𑀪𑀸𑀲𑀸 𑀏𑀯 𑀕𑀺𑀦𑀺𑀘𑁆𑀘𑀬𑀁.

‘‘𑀕𑀺𑀦𑀺 𑀕𑀺𑀦𑀻 𑀕𑀺𑀦𑀬𑁄’’𑀢𑀺-𑀆𑀤𑀺𑀦𑀸 𑀧𑀯𑀤𑁂 𑀯𑀺𑀤𑀽;

𑀧𑀤𑀫𑀸𑀮𑀁 𑀬𑀣𑀸 𑀅𑀕𑁆𑀕𑀺-𑀲𑀤𑁆𑀤𑀲𑁆𑀲𑁂𑀯 𑀲𑀼𑀫𑁂𑀥𑀲𑁄.

𑀇𑀢𑀺 𑀅𑀮𑀸𑀩𑀼 𑀮𑀸𑀩𑀼𑀲𑀤𑁆𑀤𑀸 𑀯𑀺𑀬 𑀅𑀕𑁆𑀕𑀺𑀦𑀺 𑀕𑀺𑀦𑀺𑀲𑀤𑁆𑀤𑀸𑀧𑀺 𑀪𑀕𑀯𑀢𑁄 𑀧𑀸𑀘𑀦𑁂 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀧𑀦 𑀅𑀕𑁆𑀕𑀺𑀦𑀺𑀲𑀤𑁆𑀤𑀲𑁆𑀲 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀤𑁆𑀯𑀻𑀲𑀼 𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑀢𑀸 𑀲𑀺𑀤𑁆𑀥𑀸, 𑀢𑀣𑀸 𑀕𑀺𑀦𑀺𑀲𑀤𑁆𑀤𑀲𑁆𑀲𑀧𑀺 𑀲𑀺𑀤𑁆𑀥𑀸𑀯 𑀳𑁄𑀢𑀺. 𑀢𑀲𑁆𑀫𑀸𑀢𑁆𑀭 𑁋

𑀅𑀕𑁆𑀕𑀺𑀦𑀺 ¶ , 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀁, 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀦𑀸, 𑀅𑀕𑁆𑀕𑀺𑀦𑀻𑀳𑀺, 𑀅𑀕𑁆𑀕𑀺𑀦𑀻𑀪𑀺. 𑀅𑀕𑁆𑀕𑀺𑀦𑀺𑀲𑁆𑀲, 𑀅𑀕𑁆𑀕𑀺𑀦𑀻𑀦𑀁. 𑀅𑀕𑁆𑀕𑀺𑀦𑀺𑀦𑀸, 𑀅𑀕𑁆𑀕𑀺𑀦𑀺𑀲𑁆𑀫𑀸, 𑀅𑀕𑁆𑀕𑀺𑀦𑀺𑀫𑁆𑀳𑀸, 𑀅𑀕𑁆𑀕𑀺𑀦𑀻𑀳𑀺, 𑀅𑀕𑁆𑀕𑀺𑀦𑀻𑀪𑀺. 𑀅𑀕𑁆𑀕𑀺𑀦𑀺𑀲𑁆𑀲, 𑀅𑀕𑁆𑀕𑀺𑀦𑀻𑀦𑀁. 𑀅𑀕𑁆𑀕𑀺𑀦𑀺𑀲𑁆𑀫𑀺𑀁, 𑀅𑀕𑁆𑀕𑀺𑀦𑀺𑀫𑁆𑀳𑀺, 𑀅𑀕𑁆𑀕𑀺𑀦𑀻𑀲𑀼. 𑀪𑁄 𑀅𑀕𑁆𑀕𑀺𑀦𑀺, 𑀪𑀯𑀦𑁆𑀢𑁄 𑀅𑀕𑁆𑀕𑀺𑀦𑀻, 𑀪𑀯𑀦𑁆𑀢𑁄 𑀅𑀕𑁆𑀕𑀺𑀦𑀬𑁄.

‘‘𑀕𑀺𑀦𑀺, 𑀕𑀺𑀦𑀻, 𑀕𑀺𑀦𑀬𑁄. 𑀕𑀺𑀦𑀺𑀁, 𑀕𑀺𑀦𑀻, 𑀕𑀺𑀦𑀬𑁄, 𑀕𑀺𑀦𑀺𑀦𑀸’’𑀢𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀢𑀺 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀅𑀕𑁆𑀕𑀺𑀦𑀺 𑀕𑀺𑀦𑀺𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸. 𑀅𑀣 𑀯𑀸 𑀬𑀣𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀲𑀢𑁆𑀯 𑀧𑀤𑁆𑀥𑀲𑁆𑀯𑀸𑀫𑀺𑀦𑀻𑀢𑀺 𑀲𑀜𑁆𑀜𑁄𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀲𑀤𑁆𑀤𑀸𑀦𑀁 𑀫𑀸𑀕𑀥𑀪𑀸𑀲𑀁 𑀧𑀢𑁆𑀯𑀸 𑀲𑀢𑁆𑀢𑀯𑀧𑀤𑀼𑀫𑀲𑀼𑀯𑀸𑀫𑀺𑀦𑀻𑀢𑀺 𑀦𑀺𑀲𑁆𑀲𑀜𑁆𑀜𑁄𑀕𑀯𑀲𑁂𑀦 𑀉𑀘𑁆𑀘𑀸𑀭𑀺𑀢𑀸 𑀧𑀸𑀴𑀺 𑀤𑀺𑀲𑁆𑀲𑀢𑀺 ‘‘𑀢𑁆𑀯𑀜𑁆𑀘 𑀉𑀢𑁆𑀢𑀫𑀲𑀢𑁆𑀢𑀯𑁄’’𑀢𑀺𑀆𑀤𑀺𑀦𑀸, 𑀢𑀣𑀸 𑀲𑀓𑁆𑀓𑀝𑀪𑀸𑀲𑀸𑀬𑀁 𑀅𑀕𑁆𑀦𑀻𑀢𑀺 𑀲𑀜𑁆𑀜𑁄𑀕𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀫𑀸𑀕𑀥𑀪𑀸𑀲𑀁 𑀧𑀢𑁆𑀯𑀸 ‘‘𑀅𑀕𑁆𑀕𑀺𑀦𑀻’’𑀢𑀺 𑀲𑀜𑁆𑀜𑁄𑀕𑀦𑀓𑀸𑀭𑀯𑀲𑁂𑀦 𑀉𑀘𑁆𑀘𑀸𑀭𑀺𑀢𑀸 𑀧𑀸𑀴𑀺 𑀤𑀺𑀲𑁆𑀲𑀢𑀺 ‘‘𑀅𑀕𑁆𑀕𑀺𑀦𑀺𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀻’’𑀢𑀺𑀆𑀤𑀺𑀓𑀸. 𑀬𑀣𑀸 𑀘 𑀯𑁂𑀬𑁆𑀬𑀸𑀓𑀭𑀡𑁂𑀳𑀺 𑀲𑀓𑁆𑀓𑀝𑀪𑀸𑀲𑀸𑀪𑀽𑀢𑁄 𑀅𑀕𑁆𑀦𑀺𑀲𑀤𑁆𑀤𑁄 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀢𑀻𑀲𑀼 𑀯𑀘𑀦𑁂𑀲𑀼 𑀬𑁄𑀚𑀺𑀬𑀢𑀺, 𑀢𑀣𑀸 𑀫𑀸𑀕𑀥𑀪𑀸𑀲𑀸𑀪𑀽𑀢𑁄 𑀅𑀕𑁆𑀕𑀺𑀦𑀺𑀲𑀤𑁆𑀤𑁄𑀧𑀺 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀤𑁆𑀯𑀻𑀲𑀼 𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑁄𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀇𑀥𑀫𑁆𑀳𑁂𑀳𑀺 𑀬𑁄𑀚𑀺𑀬𑀢𑀺, 𑀕𑀺𑀦𑀺𑀲𑀤𑁆𑀤𑁄𑀧𑀺 𑀅𑀕𑁆𑀕𑀺𑀦𑀺𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸, 𑀈𑀲𑀓𑀜𑁆𑀘 𑀲𑀭𑀽𑀧𑀢𑁆𑀢𑀸 𑀢𑀣𑁂𑀯 𑀬𑁄𑀚𑀺𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀅𑀕𑁆𑀕𑀺𑀦𑀺𑀲𑀤𑁆𑀤𑁄 𑀲𑀩𑁆𑀩𑁂𑀲𑀼 𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑁄, 𑀅𑀣 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑁂 ‘‘𑀅𑀕𑁆𑀕𑀺𑀲𑁆𑀲𑀺𑀦𑀻’’𑀢𑀺 𑀮𑀓𑁆𑀔𑀡𑁂𑀦 𑀲𑀺𑀫𑁆𑀳𑀺 𑀧𑀭𑁂 𑀅𑀕𑁆𑀕𑀺𑀲𑀤𑁆𑀤𑀦𑁆𑀢𑀲𑁆𑀲 𑀇𑀦𑀺𑀆𑀤𑁂𑀲𑁄 𑀤𑀲𑁆𑀲𑀺𑀢𑁄𑀢𑀺? 𑀲𑀘𑁆𑀘𑀁, 𑀬𑀣𑀸 𑀦𑀯𑀓𑁆𑀔𑀢𑁆𑀢𑀼𑀁 𑀞𑀧𑁂𑀢𑁆𑀯𑀸 𑀓𑀢𑁂𑀓𑀲𑁂𑀲𑀲𑁆𑀲 𑀤𑀲𑀲𑀤𑁆𑀤𑀲𑁆𑀲 𑀬𑁄𑀯𑀘𑀦𑀫𑁆𑀳𑀺 𑀦𑀯𑀸𑀤𑁂𑀲𑀁 𑀓𑀢𑁆𑀯𑀸 𑀬𑁄𑀯𑀘𑀦𑀲𑁆𑀲 𑀉𑀢𑀺𑀆𑀤𑁂𑀲𑀁 𑀓𑀲𑁆𑀫𑀸 ‘‘𑀦𑀯𑀼𑀢𑀻’’𑀢𑀺 𑀭𑀽𑀧𑁂 𑀦𑀺𑀧𑁆𑀨𑀦𑁆𑀦𑁂 𑀧𑀼𑀦 ‘‘𑀦𑀯𑀼𑀢𑀻’’𑀢𑀺 𑀧𑀓𑀢𑀺𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀦𑀁𑀯𑀘𑀦𑀁 𑀓𑀢𑁆𑀯𑀸 ‘‘𑀦𑀯𑀼𑀢𑀻𑀦’’𑀦𑁆𑀢𑀺 𑀭𑀽𑀧𑀁 𑀦𑀺𑀧𑁆𑀨𑀸𑀤𑀺𑀢𑀁 ¶ . 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀦 𑀦𑀸𑀤𑀺𑀏𑀓𑀯𑀘𑀦𑀸𑀦𑀺 𑀓𑀢𑁆𑀯𑀸 𑀢𑁂𑀲𑀁 𑀬𑀸𑀆𑀤𑁂𑀲𑀁 𑀓𑀢𑁆𑀯𑀸 ‘‘𑀦𑀯𑀼𑀢𑀺𑀬𑀸’’𑀢𑀺 𑀭𑀽𑀧𑀁 𑀦𑀺𑀧𑁆𑀨𑀸𑀤𑀺𑀢𑀁. 𑀢𑀣𑀸 𑀳𑀺 ‘‘𑀙𑀦𑁆𑀦𑀯𑀼𑀢𑀻𑀦𑀁 𑀧𑀸𑀲𑀡𑁆𑀟𑀸𑀦𑀁 𑀥𑀫𑁆𑀫𑀸𑀦𑀁 𑀧𑀯𑀭𑀁 𑀬𑀤𑀺𑀤𑀁 𑀲𑀼𑀕𑀢𑀯𑀺𑀦𑀬𑀁 𑀦𑀯𑀼𑀢𑀺𑀬𑀸 𑀳𑀁𑀲𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸 𑀲𑀺𑀫𑁆𑀳𑀺 𑀅𑀕𑁆𑀕𑀺𑀲𑀤𑁆𑀤𑀦𑁆𑀢𑀲𑁆𑀲 𑀇𑀦𑀺𑀆𑀤𑁂𑀲𑀓𑀭𑀡𑀯𑀲𑁂𑀦 ‘‘𑀅𑀕𑁆𑀕𑀺𑀦𑀻’’𑀢𑀺 𑀭𑀽𑀧𑁂 𑀦𑀺𑀧𑁆𑀨𑀦𑁆𑀦𑁂𑀧𑀺 𑀧𑀼𑀦 ‘‘𑀅𑀕𑁆𑀕𑀺𑀦𑀻’’𑀢𑀺 𑀧𑀓𑀢𑀺𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀬𑁄𑀅𑀁𑀦𑀸𑀤𑀬𑁄 𑀯𑀺𑀪𑀢𑁆𑀢𑀺𑀬𑁄 𑀓𑀢𑁆𑀯𑀸 ‘‘𑀅𑀕𑁆𑀕𑀺𑀦𑀺, 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀁, 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀦𑀸’’𑀢𑀺𑀆𑀤𑀻𑀦𑀺 𑀓𑀣𑀁 𑀦 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀇𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀪𑀸𑀯𑀻 𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀅𑀜𑁆𑀜𑁂𑀲𑀜𑁆𑀘 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸.

𑀤𑀡𑁆𑀟𑀻, 𑀤𑀡𑁆𑀟𑀻, 𑀤𑀡𑁆𑀟𑀺𑀦𑁄. 𑀤𑀡𑁆𑀟𑀺𑀁, 𑀤𑀡𑁆𑀟𑀻, 𑀤𑀡𑁆𑀟𑀺𑀦𑁄. 𑀤𑀡𑁆𑀟𑀺𑀦𑀸, 𑀤𑀡𑁆𑀟𑀻𑀳𑀺, 𑀤𑀡𑁆𑀟𑀻𑀪𑀺. 𑀤𑀡𑁆𑀟𑀺𑀲𑁆𑀲, 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀻𑀦𑀁. 𑀤𑀡𑁆𑀟𑀺𑀦𑀸, 𑀤𑀡𑁆𑀟𑀻𑀳𑀺, 𑀤𑀡𑁆𑀟𑀻𑀪𑀺. 𑀤𑀡𑁆𑀟𑀺𑀲𑁆𑀲, 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀻𑀦𑀁. 𑀤𑀡𑁆𑀟𑀺𑀲𑁆𑀫𑀺𑀁, 𑀤𑀡𑁆𑀟𑀺𑀫𑁆𑀳𑀺, 𑀤𑀡𑁆𑀟𑀻𑀲𑀼. 𑀪𑁄 𑀤𑀡𑁆𑀟𑀺, 𑀪𑁄 𑀤𑀡𑁆𑀟𑀻, 𑀪𑀯𑀦𑁆𑀢𑁄 𑀤𑀡𑁆𑀟𑀺𑀦𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀤𑀡𑁆𑀟𑀺𑀦’’𑀦𑁆𑀢𑀺 𑀉𑀧𑀬𑁄𑀕𑁂𑀓𑀯𑀘𑀦𑀜𑁆𑀘 ‘‘𑀤𑀡𑁆𑀟𑀺𑀲𑁆𑀫𑀸, 𑀤𑀡𑁆𑀟𑀺𑀫𑁆𑀳𑀸’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘 ‘‘𑀤𑀡𑁆𑀟𑀺𑀦𑀻’’𑀢𑀺 𑀪𑀼𑀫𑁆𑀫𑁂𑀓𑀯𑀘𑀦𑀜𑁆𑀘 𑀦𑀸𑀕𑀢𑀁, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀲𑁆𑀲 𑀧𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀫𑁂𑀯.

‘‘𑀪𑀡 ¶ 𑀲𑀫𑁆𑀫 𑀅𑀦𑀼𑀜𑁆𑀜𑀸𑀢𑁄, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀓𑁂𑀯𑀮𑀁;

𑀲𑀦𑁆𑀢𑀺 𑀳𑀺 𑀤𑀳𑀭𑀸 𑀧𑀓𑁆𑀔𑀻, 𑀧𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑀸’’𑀢𑀺

𑀧𑀸𑀴𑀺𑀬𑀁 ‘‘𑀧𑀓𑁆𑀔𑀻’’𑀇𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 𑀧𑀦 ‘‘𑀤𑀡𑁆𑀟𑀻’’𑀇𑀢𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀸𑀯𑀻, 𑀪𑀸𑀯𑀻, 𑀪𑀸𑀯𑀺𑀦𑁄. 𑀪𑀸𑀯𑀺𑀁, 𑀪𑀸𑀯𑀺𑀦𑀁, 𑀪𑀸𑀯𑀻, 𑀪𑀸𑀯𑀺𑀦𑁄. 𑀪𑀸𑀯𑀺𑀦𑀸, 𑀪𑀸𑀯𑀻𑀳𑀺, 𑀪𑀸𑀯𑀻𑀪𑀺. 𑀪𑀸𑀯𑀺𑀲𑁆𑀲, 𑀪𑀸𑀯𑀺𑀦𑁄, 𑀪𑀸𑀯𑀻𑀦𑀁. 𑀪𑀸𑀯𑀺𑀦𑀸, 𑀪𑀸𑀯𑀺𑀲𑁆𑀫𑀸, 𑀪𑀸𑀯𑀺𑀫𑁆𑀳𑀸, 𑀪𑀸𑀯𑀻𑀳𑀺, 𑀪𑀸𑀯𑀻𑀪𑀺. 𑀪𑀸𑀯𑀺𑀲𑁆𑀲, 𑀪𑀸𑀯𑀺𑀦𑁄, 𑀪𑀸𑀯𑀻𑀦𑀁. (𑀪𑀸𑀯𑀺𑀦𑀺) 𑀪𑀸𑀯𑀺𑀲𑁆𑀫𑀺𑀁, 𑀪𑀸𑀯𑀺𑀫𑁆𑀳𑀺, 𑀪𑀸𑀯𑀻𑀲𑀼. 𑀪𑁄 𑀪𑀸𑀯𑀺, 𑀪𑁄 𑀪𑀸𑀯𑀻, 𑀪𑀯𑀦𑁆𑀢𑁄 𑀪𑀸𑀯𑀺𑀦𑁄.

𑀏𑀯𑀁 𑀯𑀺𑀪𑀸𑀯𑀻 𑀲𑀫𑁆𑀪𑀸𑀯𑀻, 𑀧𑀭𑀺𑀪𑀸𑀯𑀻 𑀥𑀚𑀻 𑀕𑀡𑀻;

𑀲𑀼𑀔𑀻 𑀭𑁄𑀕𑀻 𑀲𑀲𑀻 𑀓𑀼𑀝𑁆𑀞𑀻, 𑀫𑀓𑀼𑀝𑀻 𑀓𑀼𑀲𑀮𑀻 𑀩𑀮𑀻.

𑀚𑀝𑀻 𑀬𑁄𑀕𑀻 𑀓𑀭𑀻 𑀬𑀸𑀦𑀻, 𑀢𑁄𑀫𑀭𑀻 𑀫𑀼𑀲𑀮𑀻 𑀨𑀮𑀻;

𑀤𑀦𑁆𑀢𑀻 𑀫𑀦𑁆𑀢𑀻 𑀲𑀼𑀥𑀻 𑀫𑁂𑀥𑀻, 𑀪𑀸𑀕𑀻 𑀪𑁄𑀕𑀻 𑀦𑀔𑀻 𑀲𑀺𑀔𑀻.

𑀥𑀫𑁆𑀫𑀻 𑀲𑀗𑁆𑀖𑀻 𑀜𑀸𑀡𑀻 𑀅𑀢𑁆𑀣𑀻, 𑀳𑀢𑁆𑀣𑀻 𑀘𑀓𑁆𑀔𑀻 𑀧𑀓𑁆𑀔𑀻 𑀤𑀸𑀞𑀻;

𑀭𑀝𑁆𑀞𑀻 𑀙𑀢𑁆𑀢𑀻 𑀫𑀸𑀮𑀻 𑀘𑀫𑁆𑀫𑀻, 𑀘𑀸𑀭𑀻 𑀘𑀸𑀕𑀻 𑀓𑀸𑀫𑀻 𑀲𑀸𑀫𑀻.

𑀫𑀮𑁆𑀮𑀓𑀸𑀭𑀻 𑀧𑀸𑀧𑀓𑀸𑀭𑀻, 𑀲𑀢𑁆𑀢𑀼𑀖𑀸𑀢𑀻 𑀤𑀻𑀖𑀚𑀻𑀯𑀻;

𑀥𑀫𑁆𑀫𑀯𑀸𑀤𑀻 𑀲𑀻𑀳𑀦𑀸𑀤𑀻, 𑀪𑀽𑀫𑀺𑀲𑀸𑀬𑀻 𑀲𑀻𑀖𑀬𑀸𑀬𑀻.

𑀯𑀚𑁆𑀚𑀤𑀲𑁆𑀲𑀻 𑀘 𑀧𑀸𑀡𑀻 𑀘, 𑀬𑀲𑀲𑁆𑀲𑀺𑀘𑁆𑀘𑀸𑀤𑀬𑁄𑀧𑀺 𑀘;

𑀏𑀢𑁂𑀲𑀁 𑀓𑁄𑀘𑀺 𑀪𑁂𑀤𑁄 𑀢𑀼, 𑀏𑀓𑀤𑁂𑀲𑁂𑀦 𑀯𑀼𑀘𑁆𑀘𑀢𑁂.

𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀧𑀤𑁂𑀲𑀼 𑀳𑀺 ‘‘𑀯𑀚𑁆𑀚𑀤𑀲𑁆𑀲𑀻, 𑀧𑀸𑀡𑀻’’𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀉𑀧𑀬𑁄𑀕𑀪𑀼𑀫𑁆𑀫𑀯𑀘𑀦𑀝𑁆𑀞𑀸𑀦𑁂 ‘‘𑀯𑀚𑁆𑀚𑀤𑀲𑁆𑀲𑀺𑀦𑀁, 𑀧𑀸𑀡𑀺𑀦𑁂’’𑀢𑀺𑀆𑀤𑀻𑀦𑀺𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀢𑁆𑀣 𑀘 𑁋

‘‘𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘, 𑀅𑀥𑀺𑀯𑀢𑁆𑀢𑀦𑁆𑀢𑀺 𑀧𑀸𑀡𑀺𑀦𑁂.

𑀲𑀫𑀼𑀧𑀕𑀘𑁆𑀙𑀢𑀺 ¶ 𑀲𑀲𑀺𑀦𑀺 𑀕𑀕𑀦𑀢𑀮𑀁.

𑀉𑀧𑀳𑀘𑁆𑀘 𑀫𑀦𑀁 𑀫𑀚𑁆𑀛𑁄, 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;

𑀉𑀘𑁆𑀙𑀺𑀦𑁆𑀦𑁄 𑀲𑀳 𑀭𑀝𑁆𑀞𑁂𑀦, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀼.

𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀯𑁂𑀭𑀺𑀦𑁂𑀲𑀼 𑀅𑀯𑁂𑀭𑀺𑀦𑁄’’𑀢𑀺

𑀏𑀯𑀫𑀸𑀤𑀬𑁄 𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀬𑀁 𑀦𑀬𑁄 𑀤𑀡𑁆𑀟𑀻𑀧𑀤𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑀡𑁆𑀟𑀻𑀧𑀤𑀸𑀤𑀻𑀦𑀁 𑀯𑀚𑁆𑀚𑀤𑀲𑁆𑀲𑀻𑀧𑀤𑀸𑀤𑀻𑀳𑀺. 𑀢𑀲𑁆𑀫𑀸 𑀉𑀧𑀬𑁄𑀕𑀝𑁆𑀞𑀸𑀦𑁂 ‘‘𑀤𑀡𑁆𑀟𑀺𑀁, 𑀤𑀡𑁆𑀟𑀺𑀦𑀁, 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀺𑀦𑁂’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀪𑀼𑀫𑁆𑀫𑀝𑁆𑀞𑀸𑀦𑁂 ‘‘𑀤𑀡𑁆𑀟𑀺𑀲𑁆𑀫𑀺𑀁, 𑀤𑀡𑁆𑀟𑀺𑀫𑁆𑀳𑀺, 𑀤𑀡𑁆𑀟𑀺𑀦𑀺, 𑀤𑀡𑁆𑀟𑀺𑀦𑁂, 𑀤𑀡𑁆𑀟𑀻𑀲𑀼, 𑀤𑀡𑁆𑀟𑀺𑀦𑁂𑀲𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀕𑀸𑀫𑀡𑀻 𑀲𑁂𑀦𑀸𑀦𑀻𑀇𑀘𑁆𑀘𑀸𑀤𑀻𑀦𑀺 𑀯𑀚𑁆𑀚𑁂𑀢𑁆𑀯𑀸 𑀬𑀣𑀸𑀭𑀳𑀁 𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑁂𑀲𑀼 𑀦𑁂𑀢𑀩𑁆𑀩𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀈𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀁 𑀉𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀅𑀜𑁆𑀜𑁂𑀲𑀁 𑀉𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀯𑀲𑁂𑀦 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀧𑀽𑀭𑁂𑀲𑁆𑀲𑀸𑀫. 𑀓𑀢𑀫𑀸𑀦𑀺 𑀢𑀸𑀦𑀺? ‘‘𑀪𑀺𑀓𑁆𑀔𑀼 𑀳𑁂𑀢𑀼 𑀲𑁂𑀢𑀼 𑀓𑁂𑀢𑀼 𑀭𑀸𑀳𑀼 𑀪𑀸𑀡𑀼 𑀔𑀸𑀡𑀼 𑀲𑀗𑁆𑀓𑀼 𑀉𑀘𑁆𑀙𑀼 𑀯𑁂𑀴𑀼 𑀫𑀘𑁆𑀘𑀼 𑀚𑀦𑁆𑀢𑀼 𑀲𑀺𑀦𑁆𑀥𑀼 𑀩𑀦𑁆𑀥𑀼 𑀭𑀼𑀭𑀼 𑀦𑁂𑀭𑀼 𑀲𑀢𑁆𑀢𑀼 𑀩𑀩𑁆𑀩𑀼 𑀧𑀝𑀼 𑀩𑀺𑀦𑁆𑀤𑀼 𑀕𑀭𑀼’’𑀇𑀘𑁆𑀘𑀸𑀤𑀻𑀦𑀺.

𑀪𑀺𑀓𑁆𑀔𑀼, 𑀪𑀺𑀓𑁆𑀔𑀽, 𑀪𑀺𑀓𑁆𑀔𑀯𑁄. 𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀽, 𑀪𑀺𑀓𑁆𑀔𑀯𑁄. 𑀪𑀺𑀓𑁆𑀔𑀼𑀦𑀸, 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽𑀪𑀺. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑁄, 𑀪𑀺𑀓𑁆𑀔𑀽𑀦𑀁. 𑀪𑀺𑀓𑁆𑀔𑀼𑀦𑀸, 𑀪𑀺𑀓𑁆𑀔𑀼𑀲𑁆𑀫𑀸, 𑀪𑀺𑀓𑁆𑀔𑀼𑀫𑁆𑀳𑀸, 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽𑀪𑀺. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑁄, 𑀪𑀺𑀓𑁆𑀔𑀽𑀦𑀁. 𑀪𑀺𑀓𑁆𑀔𑀼𑀲𑁆𑀫𑀺𑀁, 𑀪𑀺𑀓𑁆𑀔𑀼𑀫𑁆𑀳𑀺, 𑀪𑀺𑀓𑁆𑀔𑀽𑀲𑀼. 𑀪𑁄 𑀪𑀺𑀓𑁆𑀔𑀼, 𑀪𑀯𑀦𑁆𑀢𑁄 𑀪𑀺𑀓𑁆𑀔𑀽, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀯𑁄. 𑀪𑀺𑀓𑁆𑀔𑀼𑀆𑀤𑀻𑀦𑀺 𑀅𑀜𑁆𑀜𑀸𑀦𑀺 𑀘 𑀢𑀁𑀲𑀤𑀺𑀲𑀸𑀦𑀺 𑀏𑀯𑀁 𑀜𑁂𑀬𑁆𑀬𑀸𑀦𑀺.

𑀅𑀬𑀫𑁆𑀧𑀺 ¶ 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑀜𑁂𑀬𑁆𑀬𑁄 𑁋 𑀳𑁂𑀢𑀼, 𑀳𑁂𑀢𑀽, 𑀳𑁂𑀢𑀼𑀬𑁄, 𑀳𑁂𑀢𑀯𑁄. 𑀳𑁂𑀢𑀼𑀁, 𑀳𑁂𑀢𑀽, 𑀳𑁂𑀢𑀼𑀬𑁄, 𑀳𑁂𑀢𑀯𑁄. 𑀪𑁄 𑀳𑁂𑀢𑀼, 𑀪𑀯𑀦𑁆𑀢𑁄 𑀳𑁂𑀢𑀽, 𑀳𑁂𑀢𑀯𑁂, 𑀳𑁂𑀢𑀯𑁄. 𑀲𑁂𑀲𑀁 𑀪𑀺𑀓𑁆𑀔𑀼𑀲𑀫𑀁.

𑀅𑀣 𑀯𑀸 ‘‘𑀳𑁂𑀢𑀼𑀬𑀸’’𑀢𑀺𑀆𑀤𑀻𑀦𑀁 𑀤𑀲𑁆𑀲𑀦𑀢𑁄 ‘‘𑀥𑁂𑀦𑀼𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑁂𑀦 𑀲𑀤𑀺𑀲𑀁 ‘‘𑀳𑁂𑀢𑀼𑀬𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀫𑁆𑀧𑀺 𑀲𑀢𑁆𑀢𑀫𑀻𑀞𑀸𑀦𑁂 𑀇𑀘𑁆𑀙𑀺𑀢𑀩𑁆𑀩𑀁. 𑀓𑀸𑀦𑀺𑀘𑀺 𑀳𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺 𑀓𑁂𑀳𑀺𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑁂𑀳𑀺 𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? ‘‘𑀉𑀝𑁆𑀞𑁂𑀳𑀺 𑀓𑀢𑁆𑀢𑁂 𑀢𑀭𑀫𑀸𑀦𑁄. 𑀏𑀳𑀺 𑀩𑀸𑀮𑁂𑀔𑀫𑀸𑀧𑁂𑀳𑀺, 𑀓𑀼𑀲𑀭𑀸𑀚𑀁 𑀫𑀳𑀩𑁆𑀩𑀮𑀁. 𑀪𑀸𑀢𑀭𑀸 𑀫𑀸𑀢𑀭𑀸 𑀅𑀥𑀺𑀧𑀢𑀺𑀬𑀸 𑀭𑀢𑁆𑀢𑀺𑀬𑀸 𑀳𑁂𑀢𑀼𑀬𑁄 𑀥𑁂𑀦𑀼𑀬𑁄 𑀫𑀢𑁆𑀬𑀸 𑀧𑁂𑀢𑁆𑀬𑀸’’𑀢𑀺 𑀏𑀯𑀁 𑀦𑀬𑀤𑀲𑁆𑀲𑀦𑁂𑀦 ‘‘𑀳𑁂𑀢𑀼𑀬𑀸 𑀢𑀻𑀡𑀺. 𑀅𑀥𑀺𑀧𑀢𑀺𑀬𑀸 𑀲𑀢𑁆𑀢. 𑀉𑀝𑁆𑀞𑁂𑀳𑀺 𑀓𑀢𑁆𑀢𑁂’’𑀢𑀺𑀆𑀤𑀻𑀲𑀼 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀘𑀺𑀦𑁆𑀢𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸.

𑀚𑀦𑁆𑀢𑀼, 𑀚𑀦𑁆𑀢𑀽, 𑀚𑀦𑁆𑀢𑀼𑀬𑁄, 𑀚𑀦𑁆𑀢𑀼𑀦𑁄, 𑀚𑀦𑁆𑀢𑀯𑁄. 𑀚𑀦𑁆𑀢𑀼𑀁, 𑀚𑀦𑁆𑀢𑀽, 𑀚𑀦𑁆𑀢𑀼𑀬𑁄, 𑀚𑀦𑁆𑀢𑀼𑀦𑁄, 𑀚𑀦𑁆𑀢𑀯𑁄. 𑀪𑁄 𑀚𑀦𑁆𑀢𑀼, 𑀪𑀯𑀦𑁆𑀢𑁄 𑀚𑀦𑁆𑀢𑀽, 𑀚𑀦𑁆𑀢𑀯𑁂 𑀚𑀦𑁆𑀢𑀯𑁄. 𑀲𑁂𑀲𑀁 𑀪𑀺𑀓𑁆𑀔𑀼𑀲𑀫𑀁.

𑀕𑀭𑀼, 𑀕𑀭𑀽, 𑀕𑀭𑀯𑁄, 𑀕𑀭𑀼𑀦𑁄. 𑀕𑀭𑀼𑀁, 𑀕𑀭𑀽, 𑀕𑀭𑀯𑁄, 𑀕𑀭𑀼𑀦𑁄. 𑀪𑁄 𑀕𑀭𑀼, 𑀪𑀯𑀦𑁆𑀢𑁄 𑀕𑀭𑀽, 𑀕𑀭𑀯𑁄, 𑀕𑀭𑀼𑀦𑁄. 𑀲𑁂𑀲𑀁 𑀪𑀺𑀓𑁆𑀔𑀼𑀲𑀫𑀁. 𑀏𑀢𑁆𑀣 𑀧𑀦 ‘‘𑀪𑀢𑁆𑀢𑀼 𑀘 𑀕𑀭𑀼𑀦𑁄 𑀲𑀩𑁆𑀩𑁂, 𑀧𑀝𑀺𑀧𑀽𑀚𑁂𑀢𑀺 𑀧𑀡𑁆𑀟𑀺𑀢𑀸’’𑀢𑀺𑀧𑀸𑀴𑀺𑀦𑀺𑀤𑀲𑁆𑀲𑀦𑀁. 𑀢𑀢𑁆𑀭 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀫𑀦𑁆𑀢𑀦𑀧𑀤𑀁 𑀘𑀼𑀡𑁆𑀡𑀺𑀬𑀧𑀤𑁂𑀲𑁆𑀯𑁂𑀯 𑀤𑀺𑀲𑁆𑀲𑀢𑀺, 𑀦 𑀕𑀸𑀣𑀸𑀲𑀼. ‘‘𑀪𑀺𑀓𑁆𑀔𑀯𑁄’’𑀢𑀺 𑀧𑀘𑁆𑀘𑀢𑁆𑀢𑀧𑀤𑀁 𑀕𑀸𑀣𑀸𑀲𑀼𑀬𑁂𑀯 𑀤𑀺𑀲𑁆𑀲𑀢𑀺, 𑀦 𑀘𑀼𑀡𑁆𑀡𑀺𑀬𑀧𑀤𑁂𑀲𑀼, 𑀅𑀧𑀺𑀘 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀫𑀦𑁆𑀢𑀦𑀧𑀤𑀁 𑀲𑀸𑀯𑀓𑀲𑁆𑀲 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀺𑀬𑀁 𑀲𑀦𑁆𑀥𑀺𑀯𑀺𑀲𑀬𑁂𑀬𑁂𑀯 𑀤𑀺𑀲𑁆𑀲𑀢𑀺, 𑀦 𑀅𑀲𑀦𑁆𑀥𑀺𑀯𑀺𑀲𑀬𑁂, 𑀩𑀼𑀤𑁆𑀥𑀲𑁆𑀲 𑀧𑀦 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀺𑀬𑀁 𑀲𑀦𑁆𑀥𑀺𑀯𑀺𑀲𑀬𑁂𑀧𑀺 𑀅𑀲𑀦𑁆𑀥𑀺𑀯𑀺𑀲𑀬𑁂𑀧𑀺 𑀤𑀺𑀲𑁆𑀲𑀢𑀺. ‘‘𑀪𑀺𑀓𑁆𑀔𑀯𑁄’’𑀢𑀺 𑀆𑀫𑀦𑁆𑀢𑀦𑀧𑀤𑀁 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀺𑀬𑀁 𑀕𑀸𑀣𑀸𑀲𑀼 𑀘 𑀤𑀺𑀲𑁆𑀲𑀢𑀺 ¶ , 𑀘𑀼𑀡𑁆𑀡𑀺𑀬𑀧𑀤𑁂𑀲𑀼 𑀘 𑀲𑀦𑁆𑀥𑀺𑀯𑀺𑀲𑀬𑁂𑀬𑁂𑀯 𑀤𑀺𑀲𑁆𑀲𑀢𑀺. 𑀲𑀸𑀯𑀓𑀲𑁆𑀲 𑀧𑀦 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀺𑀬𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀅𑀬𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺𑀆𑀤𑀻𑀲𑀼 ‘‘𑀪𑀺𑀓𑁆𑀔𑀯𑁂’’𑀢𑀺 𑀧𑀤𑀁 𑀘𑀼𑀡𑁆𑀡𑀺𑀬𑀧𑀤𑁂𑀲𑁆𑀯𑁂𑀯 𑀤𑀺𑀝𑁆𑀞𑀁. ‘‘𑀪𑀺𑀓𑁆𑀔𑀯𑁄 𑀢𑀺𑀲𑀢𑀸 𑀇𑀫𑁂, 𑀬𑀸𑀘𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸’’𑀢𑀺𑀆𑀤𑀻𑀲𑀼 ‘‘𑀪𑀺𑀓𑁆𑀔𑀯𑁄’’𑀢𑀺 𑀧𑀘𑁆𑀘𑀢𑁆𑀢𑀧𑀤𑀁 𑀕𑀸𑀣𑀸𑀲𑀼𑀬𑁂𑀯 𑀤𑀺𑀝𑁆𑀞𑀁. ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀸𑀯𑀓𑀲𑁆𑀲 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀻𑀲𑀼 𑀲𑀦𑁆𑀥𑀺𑀯𑀺𑀲𑀬𑁂𑀬𑁂𑀯 ‘‘𑀪𑀺𑀓𑁆𑀔𑀯𑁂’’𑀢𑀺 𑀧𑀤𑀁 𑀤𑀺𑀝𑁆𑀞𑀁. ‘‘𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀲𑁄𑀢𑀼𑀓𑀸𑀫𑀢𑁆𑀣 𑀪𑀺𑀓𑁆𑀔𑀯𑁂’’𑀢𑀺 ‘‘𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 𑀧𑀦 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀻𑀲𑀼 𑀲𑀦𑁆𑀥𑀺𑀯𑀺𑀲𑀬𑀸𑀯𑀺𑀲𑀬𑁂𑀲𑀼 ‘‘𑀪𑀺𑀓𑁆𑀔𑀯𑁂’’𑀢𑀺 𑀧𑀤𑀁 𑀤𑀺𑀝𑁆𑀞𑀁. ‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂𑀯 𑀪𑀺𑀓𑁆𑀔𑀯𑁄’’𑀢𑀺 ‘‘𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀪𑀺𑀓𑁆𑀔𑀯𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑀦𑀧𑀸𑀴𑀻𑀲𑀼 ‘‘𑀪𑀺𑀓𑁆𑀔𑀯𑁄’’𑀢𑀺 𑀆𑀫𑀦𑁆𑀢𑀦𑀧𑀤𑀁 𑀕𑀸𑀣𑀸𑀲𑀼 𑀘 𑀤𑀺𑀝𑁆𑀞𑀁, 𑀘𑀼𑀡𑁆𑀡𑀺𑀬𑀧𑀤𑁂𑀲𑀼 𑀘 𑀲𑀦𑁆𑀥𑀺𑀯𑀺𑀲𑀬𑁂𑀬𑁂𑀯 𑀤𑀺𑀝𑁆𑀞𑀁. 𑀇𑀘𑁆𑀘𑁂𑀯𑀁 𑁋

𑀘𑀼𑀡𑁆𑀡𑀺𑀬𑁂𑀯 𑀧𑀤𑁂 𑀤𑀺𑀝𑁆𑀞𑀁, ‘‘𑀪𑀺𑀓𑁆𑀔𑀯𑁂’’𑀢𑀺 𑀧𑀤𑀁 𑀤𑁆𑀯𑀺𑀥𑀸;

𑀬𑀢𑁄 𑀧𑀯𑀢𑁆𑀢𑀢𑁂 𑀲𑀦𑁆𑀥𑀺-𑀯𑀺𑀲𑀬𑀸𑀯𑀺𑀲𑀬𑁂𑀲𑀼 𑀢𑀁.

‘‘𑀪𑀺𑀓𑁆𑀔𑀯𑁄’’𑀢𑀺 𑀧𑀤𑀁 𑀤𑀺𑀝𑁆𑀞𑀁, 𑀕𑀸𑀣𑀸𑀬𑀜𑁆𑀘𑁂𑀯 𑀘𑀼𑀡𑁆𑀡𑀺𑀬𑁂;

𑀧𑀤𑀲𑁆𑀫𑀺𑀫𑁆𑀧𑀺 𑀘 𑀲𑀦𑁆𑀥𑀺𑀲𑁆𑀲, 𑀯𑀺𑀲𑀬𑁂𑀯𑀸𑀢𑀺 𑀦𑀺𑀤𑁆𑀤𑀺𑀲𑁂𑀢𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀉𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀉𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀧𑀦 𑀲𑀬𑀫𑁆𑀪𑀽𑀇𑀘𑁆𑀘𑁂𑀢𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀢𑀁𑀲𑀤𑀺𑀲𑀸𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀁 𑀓𑀣𑀬𑀸𑀫 𑁋

𑀲𑀬𑀫𑁆𑀪𑀽 ¶ , 𑀲𑀬𑀫𑁆𑀪𑀽, 𑀲𑀬𑀫𑁆𑀪𑀼𑀯𑁄. 𑀲𑀬𑀫𑁆𑀪𑀼𑀁, 𑀲𑀬𑀫𑁆𑀪𑀽, 𑀲𑀬𑀫𑁆𑀪𑀼𑀯𑁄. 𑀲𑀬𑀫𑁆𑀪𑀼𑀦𑀸, 𑀲𑀬𑀫𑁆𑀪𑀽𑀳𑀺, 𑀲𑀬𑀫𑁆𑀪𑀽𑀪𑀺. 𑀲𑀬𑀫𑁆𑀪𑀼𑀲𑁆𑀲, 𑀲𑀬𑀫𑁆𑀪𑀼𑀦𑁄, 𑀲𑀬𑀫𑁆𑀪𑀽𑀦𑀁. 𑀲𑀬𑀫𑁆𑀪𑀼𑀦𑀸, 𑀲𑀬𑀫𑁆𑀪𑀼𑀲𑁆𑀫𑀸, 𑀲𑀬𑀫𑁆𑀪𑀼𑀫𑁆𑀳𑀸, 𑀲𑀬𑀫𑁆𑀪𑀽𑀳𑀺, 𑀲𑀬𑀫𑁆𑀪𑀽𑀪𑀺. 𑀲𑀬𑀫𑁆𑀪𑀼𑀲𑁆𑀲, 𑀲𑀬𑀫𑁆𑀪𑀼𑀦𑁄, 𑀲𑀬𑀫𑁆𑀪𑀽𑀦𑀁. 𑀲𑀬𑀫𑁆𑀪𑀼𑀲𑁆𑀫𑀺𑀁, 𑀲𑀬𑀫𑁆𑀪𑀼𑀫𑁆𑀳𑀺, 𑀲𑀬𑀫𑁆𑀪𑀽𑀲𑀼. 𑀪𑁄 𑀲𑀬𑀫𑁆𑀪𑀼, 𑀪𑁄 𑀲𑀬𑀫𑁆𑀪𑀽, 𑀪𑀯𑀦𑁆𑀢𑁄 𑀲𑀬𑀫𑁆𑀪𑀽, 𑀲𑀬𑀫𑁆𑀪𑀼𑀯𑁄. 𑀏𑀯𑀁 𑀧𑀪𑀽 𑀅𑀪𑀺𑀪𑀽𑀯𑀺𑀪𑀽 𑀇𑀘𑁆𑀘𑀸𑀤𑀻𑀦𑀺𑀧𑀺.

𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀼𑀦𑁄. 𑀲𑀩𑁆𑀩𑀜𑁆𑀜𑀼𑀁, 𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀼𑀦𑁄. 𑀪𑁄 𑀲𑀩𑁆𑀩𑀜𑁆𑀜𑀼, 𑀪𑀯𑀦𑁆𑀢𑁄 𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀼𑀦𑁄, 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀤𑀸𑀦𑀺 𑀪𑀺𑀓𑁆𑀔𑀼𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺, 𑀏𑀯𑀁 𑀯𑀺𑀤𑀽 𑀯𑀺𑀜𑁆𑀜𑀽 𑀓𑀢𑀜𑁆𑀜𑀽 𑀫𑀕𑁆𑀕𑀜𑁆𑀜𑀽 𑀥𑀫𑁆𑀫𑀜𑁆𑀜𑀽 𑀅𑀢𑁆𑀣𑀜𑁆𑀜𑀽 𑀓𑀸𑀮𑀜𑁆𑀜𑀽 𑀭𑀢𑁆𑀢𑀜𑁆𑀜𑀽 𑀫𑀢𑁆𑀢𑀜𑁆𑀜𑀽 𑀯𑀤𑀜𑁆𑀜𑀽 𑀅𑀯𑀤𑀜𑁆𑀜𑀽 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀭 ‘‘𑀬𑁂 𑀘 𑀮𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸’’𑀢𑀺 𑀏𑀢𑁆𑀣 ‘‘𑀯𑀤𑀜𑁆𑀜𑀽’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 𑀲𑀬𑀫𑁆𑀪𑀽 𑀲𑀩𑁆𑀩𑀜𑁆𑀜𑀽 𑀇𑀘𑁆𑀘𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀩𑀳𑀼𑀯𑀘𑀦𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 ‘‘𑀯𑀺𑀤𑀽, 𑀯𑀺𑀜𑁆𑀜𑀽’’𑀢𑀺𑀆𑀤𑀻𑀲𑀼 ‘‘𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀤𑀲𑁆𑀲𑀦𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀤𑀼𑀦𑀻, 𑀯𑀺𑀤𑀼𑀦𑀻, 𑀯𑀺𑀤𑀼𑀦𑀺𑀬𑁄. 𑀯𑀺𑀤𑀼𑀦𑀺𑀁, 𑀯𑀺𑀤𑀼𑀦𑀻, 𑀯𑀺𑀤𑀼𑀦𑀺𑀬𑁄. 𑀯𑀺𑀤𑀼𑀦𑀺𑀬𑀸’’𑀢𑀺 𑀇𑀢𑁆𑀣𑀺𑀦𑀬𑁂𑀦 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀢𑀣𑀸 ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀜𑁆𑀜𑀽’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀤𑀲𑁆𑀲𑀦𑀢𑁄 ‘‘𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘, 𑀧𑀺𑀲𑀼𑀡𑀸 𑀫𑀺𑀢𑁆𑀢𑀪𑁂𑀤𑀺𑀓𑀸’’𑀢𑀺 𑀏𑀢𑁆𑀣 𑀘 ‘‘𑀅𑀓𑀢𑀜𑁆𑀜𑀽’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀤𑀲𑁆𑀲𑀦𑀢𑁄𑀧𑀺 ‘‘𑀯𑀺𑀜𑁆𑀜𑀽, 𑀯𑀺𑀜𑁆𑀜𑀽, 𑀯𑀺𑀜𑁆𑀜𑀼𑀬𑁄. 𑀯𑀺𑀜𑁆𑀜𑀼𑀁, 𑀯𑀺𑀜𑁆𑀜𑀽, 𑀯𑀺𑀜𑁆𑀜𑀼𑀬𑁄. 𑀯𑀺𑀜𑁆𑀜𑀼𑀬𑀸’’𑀢𑀺 𑀘 ‘‘𑀓𑀢𑀜𑁆𑀜𑀽, 𑀓𑀢𑀜𑁆𑀜𑀽, 𑀓𑀢𑀜𑁆𑀜𑀼𑀬𑁄. 𑀓𑀢𑀜𑁆𑀜𑀼𑀁, 𑀓𑀢𑀜𑁆𑀜𑀽, 𑀓𑀢𑀜𑁆𑀜𑀼𑀬𑁄, 𑀓𑀢𑀜𑁆𑀜𑀼𑀬𑀸𑀢𑀺 𑀘 𑀚𑀫𑁆𑀩𑀽𑀦𑀬𑁂𑀦 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀏𑀯𑀁 ‘‘𑀫𑀕𑁆𑀕𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽’’𑀇𑀘𑁆𑀘𑀸𑀤𑀻𑀲𑀼𑀧𑀺. ‘‘𑀲𑀬𑀫𑁆𑀪𑀽’’𑀢𑀺 𑀧𑀤𑁂 𑀧𑀦 ¶ ‘‘𑀲𑀬𑀫𑁆𑀪𑀼 𑀜𑀸𑀡𑀁 𑀕𑁄𑀢𑁆𑀭𑀪𑀼 𑀘𑀺𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀦𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀯𑀢𑁆𑀢𑀩𑁆𑀩𑁂 ‘‘𑀲𑀬𑀫𑁆𑀪𑀼, 𑀲𑀬𑀫𑁆𑀪𑀽, 𑀲𑀬𑀫𑁆𑀪𑀽𑀦𑀺. 𑀲𑀬𑀫𑁆𑀪𑀼𑀁, 𑀲𑀬𑀫𑁆𑀪𑀽, 𑀲𑀬𑀫𑁆𑀪𑀽𑀦𑀻’’𑀢𑀺 𑀦𑀧𑀼𑀁𑀲𑀓𑁂 𑀆𑀬𑀼𑀦𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀕𑀳𑁂𑀢𑀩𑁆𑀩𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀊𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀊𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀊𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀢𑀺 𑀲𑀩𑁆𑀩𑀣𑀸𑀧𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲

𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄 𑀲𑀫𑀢𑁆𑀢𑁄.

𑀬𑀲𑁆𑀫𑀸 𑀧𑀦𑀸𑀬𑀁 𑀲𑀫𑀢𑁆𑀢𑁄𑀧𑀺 𑀧𑀸𑀯𑀘𑀦𑀸𑀤𑀻𑀲𑀼 𑀬𑀁 𑀬𑀁 𑀞𑀸𑀦𑀁 𑀲𑁄𑀢𑀽𑀦𑀁 𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑁄𑀢𑀽𑀦𑀫𑀦𑀼𑀕𑁆𑀕𑀳𑀸𑀬 𑀘𑁄𑀤𑀦𑀸𑀲𑁄𑀥𑀦𑀸𑀯𑀲𑁂𑀦 𑀲𑀁𑀲𑀬𑀁 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀧𑀼𑀦 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀺 𑀧𑀤𑁂𑀲𑀫𑁂𑀢𑁆𑀣 𑀓𑀣𑀬𑀸𑀫.

𑀬𑀁 𑀓𑀺𑀭 𑀪𑁄 𑀧𑀸𑀴𑀺𑀬𑀁 ‘‘𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄, 𑀅𑀧𑀘𑁂 𑀩𑁆𑀭𑀳𑁆𑀫𑀘𑀸𑀭𑀬𑁄’’𑀢𑀺 𑀘 𑀭𑀽𑀧𑀁 𑀇𑀓𑀸𑀭𑀦𑁆𑀢𑀲𑁆𑀲 𑀅𑀕𑁆𑀕𑀺𑀲𑀤𑁆𑀤𑀲𑁆𑀲 ‘‘𑀅𑀕𑁆𑀕𑀬𑁄’’𑀢𑀺 𑀭𑀽𑀧𑀫𑀺𑀯 𑀯𑀼𑀢𑁆𑀢𑀁, 𑀢𑀁 𑀢𑀣𑀸 𑀅𑀯𑀢𑁆𑀯𑀸 𑀈𑀓𑀸𑀭𑀦𑁆𑀢𑀲𑁆𑀲 𑀤𑀡𑁆𑀟𑀻𑀲𑀤𑁆𑀤𑀲𑁆𑀲 ‘‘𑀤𑀡𑁆𑀟𑀺𑀦𑁄’’𑀢𑀺 𑀭𑀽𑀧𑀫𑀺𑀯 ‘‘𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀢𑀢𑁆𑀣 ‘‘𑀩𑁆𑀭𑀳𑁆𑀫𑀁 𑀘𑀭𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀺 𑀬𑀣𑀸 𑀫𑀼𑀦𑀸𑀢𑀻𑀢𑀺 𑀫𑀼𑀦𑀻’’𑀢𑀺 𑀏𑀯𑀁 𑀇𑀓𑀸𑀭𑀦𑁆𑀢𑀯𑀲𑁂𑀦 𑀇𑀘𑁆𑀙𑀺𑀢𑀢𑁆𑀢𑀸. ‘‘𑀫𑀼𑀦𑀬𑁄 𑀅𑀕𑁆𑀕𑀬𑁄’’𑀢𑀺 𑀭𑀽𑀧𑀸𑀦𑀺 𑀯𑀺𑀬 ‘‘𑀩𑁆𑀭𑀳𑁆𑀫𑀘𑀸𑀭𑀬𑁄’’𑀢𑀺 𑀭𑀽𑀧𑀁 𑀪𑀯𑀢𑀺. 𑀅𑀜𑁆𑀜𑀢𑁆𑀣 𑀧𑀦 ‘‘𑀩𑁆𑀭𑀳𑁆𑀫𑀁 𑀘𑀭𑀡𑀲𑀻𑀮𑁄𑀢𑀺 𑀩𑁆𑀭𑀳𑁆𑀫𑀘𑀸𑀭𑀻, 𑀬𑀣𑀸 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀓𑀭𑀡𑀲𑀻𑀮𑁄𑀢𑀺 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻’’𑀢𑀺 𑀏𑀯𑀁 𑀢𑀲𑁆𑀲𑀻𑀮𑀢𑁆𑀣𑀁 𑀕𑀳𑁂𑀢𑁆𑀯𑀸 𑀈𑀓𑀸𑀭𑀦𑁆𑀢𑀯𑀲𑁂𑀦 𑀕𑀳𑀡𑁂 ‘‘𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀺𑀦𑁄’’𑀢𑀺 𑀭𑀽𑀧𑀫𑀺𑀯 ‘‘𑀤𑀡𑁆𑀟𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀤𑀡𑁆𑀟𑀻’’𑀢𑀺 𑀈𑀓𑀸𑀭𑀦𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 ‘‘𑀤𑀡𑁆𑀟𑀺𑀦𑁄’’𑀢𑀺 𑀭𑀽𑀧𑀫𑀺𑀯 𑀘 ‘‘𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀭𑀽𑀧𑀁 𑀪𑀯𑀢𑀺. 𑀢𑀣𑀸 𑀳𑀺 ‘‘𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 ¶ 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀏𑀯𑀁 𑀇𑀓𑀸𑀭𑀦𑁆𑀢𑀯𑀲𑁂𑀦 ‘‘𑀩𑁆𑀭𑀳𑁆𑀫𑀘𑀸𑀭𑀬𑁄’’𑀢𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀁 𑀬𑀼𑀚𑁆𑀚𑀢𑀺, 𑀧𑀼𑀦 𑀈𑀓𑀸𑀭𑀦𑁆𑀢𑀯𑀲𑁂𑀦 ‘‘𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀫𑁆𑀧𑀺 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀩𑁆𑀭𑀳𑁆𑀫𑀘𑀸𑀭𑀺, 𑀩𑁆𑀭𑀳𑁆𑀫𑀘𑀸𑀭𑀻, 𑀩𑁆𑀭𑀳𑁆𑀫𑀘𑀸𑀭𑀬𑁄’’𑀢𑀺 𑀅𑀕𑁆𑀕𑀺𑀦𑀬𑁂𑀦, ‘‘𑀩𑁆𑀭𑀳𑁆𑀫𑀘𑀸𑀭𑀻, 𑀩𑁆𑀭𑀳𑁆𑀫𑀘𑀸𑀭𑀻, 𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀤𑀡𑁆𑀟𑀻𑀦𑀬𑁂𑀦 𑀘 𑀧𑀤𑀫𑀸𑀮𑀸 𑀕𑀳𑁂𑀢𑀩𑁆𑀩𑀸.

𑀬𑀁 𑀧𑀦 𑀆𑀬𑀲𑁆𑀫𑀸 𑀩𑀼𑀤𑁆𑀥𑀖𑁄𑀲𑁄 ‘‘𑀬𑀣𑀸 𑀲𑁄𑀪𑀦𑁆𑀢𑀺 𑀬𑀢𑀺𑀦𑁄, 𑀲𑀻𑀮𑀪𑀽𑀲𑀦𑀪𑀽𑀲𑀺𑀢𑀸’’𑀢𑀺 𑀏𑀢𑁆𑀣 𑀬𑀢𑀺𑀲𑀤𑁆𑀤𑀲𑁆𑀲 𑀇𑀓𑀸𑀭𑀦𑁆𑀢𑀲𑁆𑀲 𑀅𑀕𑁆𑀕𑀺𑀲𑀤𑁆𑀤𑀲𑁆𑀲 ‘‘𑀅𑀕𑁆𑀕𑀬𑁄’’𑀢𑀺 𑀭𑀽𑀧𑀁 𑀯𑀺𑀬 ‘‘𑀬𑀢𑀬𑁄’’𑀢𑀺 𑀭𑀽𑀧𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀈𑀓𑀸𑀭𑀦𑁆𑀢𑀲𑁆𑀲 𑀤𑀡𑁆𑀟𑀻𑀲𑀤𑁆𑀤𑀲𑁆𑀲 ‘‘𑀤𑀡𑁆𑀟𑀺𑀦𑁄’’𑀢𑀺 𑀭𑀽𑀧𑀁 𑀯𑀺𑀬 ‘‘𑀬𑀢𑀺𑀦𑁄’’𑀢𑀺 𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀦𑀦𑁆𑀯𑁂𑀲𑀸 𑀧𑀫𑀸𑀤𑀮𑁂𑀔𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀣𑀸 𑀳𑀺 ‘‘𑀓𑀼𑀓𑁆𑀓𑀼𑀝𑀸 𑀫𑀡𑀬𑁄 𑀤𑀡𑁆𑀟𑀸 𑀲𑀺𑀯𑀬𑁄 𑀤𑁂𑀯 𑀢𑁂 𑀓𑀼𑀤𑁆𑀥𑀸’’𑀢𑀺 𑀧𑀸𑀴𑀺𑀕𑀢𑀺𑀬𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸𑀬 ‘‘𑀬𑀢𑀬𑁄’’𑀢𑀺 𑀭𑀽𑀧𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀇𑀓𑀸𑀭𑀦𑁆𑀢𑀢𑁆𑀢𑀸𑀢𑀺? 𑀦𑀸𑀬𑀁 𑀧𑀫𑀸𑀤𑀮𑁂𑀔𑀸. ‘‘𑀯𑀤𑀦𑀲𑀻𑀮𑁄 𑀯𑀸𑀤𑀻’’𑀢𑀺 𑀏𑀢𑁆𑀣 𑀯𑀺𑀬 𑀢𑀲𑁆𑀲𑀻𑀮𑀢𑁆𑀣𑀁 𑀕𑀳𑁂𑀢𑁆𑀯𑀸 𑀈𑀓𑀸𑀭𑀦𑁆𑀢𑀯𑀲𑁂𑀦 𑀬𑁄𑀚𑀦𑁂 𑀦𑀺𑀤𑁆𑀤𑁄𑀲𑀢𑁆𑀢𑀸, 𑀢𑀲𑁆𑀫𑀸 ‘‘𑀬𑀢𑀦𑀲𑀻𑀮𑁄 𑀬𑀢𑀻’’𑀢𑀺 𑀏𑀯𑀁 𑀢𑀲𑁆𑀲𑀻𑀮𑀢𑁆𑀣𑀁 𑀘𑁂𑀢𑀲𑀺 𑀲𑀦𑁆𑀦𑀺𑀥𑀸𑀬 𑀈𑀓𑀸𑀭𑀦𑁆𑀢𑀯𑀲𑁂𑀦 ‘‘𑀬𑀢𑀺𑀦𑁄’’𑀢𑀺 𑀲𑀫𑁆𑀧𑀤𑀸𑀦𑀲𑀸𑀫𑀻𑀦𑀫𑁂𑀓𑀯𑀘𑀦𑀲𑀤𑀺𑀲𑀁 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀭𑀽𑀧𑀁 𑀪𑀤𑀦𑁆𑀢𑁂𑀦 𑀩𑀼𑀤𑁆𑀥𑀖𑁄𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀫𑁆𑀧𑀺 𑀢𑀸𑀤𑀺𑀲𑀫𑁂𑀯.

𑀬𑀢𑁆𑀣 𑀧𑀦 𑀢𑀲𑁆𑀲𑀻𑀮𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀬𑀢𑀢𑀺 𑀯𑀻𑀭𑀺𑀬𑀁 𑀓𑀭𑁄𑀢𑀻𑀢𑀺 𑀬𑀢𑀻’’𑀢𑀺 𑀓𑀢𑁆𑀢𑀼𑀓𑀸𑀭𑀓𑀯𑀲𑁂𑀦 𑀇𑀓𑀸𑀭𑀦𑁆𑀢𑀪𑀸𑀯𑁄 𑀕𑀬𑁆𑀳𑀢𑀺. 𑀢𑀢𑁆𑀣 ‘‘𑀫𑀼𑀦𑀬𑁄 𑀫𑀡𑀬𑁄 𑀲𑀺𑀯𑀬𑁄’’𑀢𑀺 𑀬𑁄𑀓𑀸𑀭𑀦𑁆𑀢𑀭𑀽𑀧𑀸𑀦𑀺 𑀯𑀺𑀬 ‘‘𑀬𑀢𑀬𑁄’’𑀢𑀺 𑀬𑁄𑀓𑀸𑀭𑀦𑁆𑀢𑀁 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀭𑀽𑀧𑀜𑁆𑀘 ¶ 𑀉𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀜𑁆𑀘 𑀪𑀯𑀢𑀺, 𑀏𑀯𑀁 𑀈𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀬𑁄𑀓𑀸𑀭𑀦𑁆𑀢𑀸𑀦𑁂𑀯 𑀭𑀽𑀧𑀸𑀦𑀺 𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀏𑀯𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀲𑀸𑀭𑀫𑀢𑀺 𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀚𑀺𑀭𑀩𑀼𑀤𑁆𑀥𑀺 𑀲𑀤𑁆𑀤𑀸𑀤𑀻 𑀓𑀣𑀦𑁆𑀢𑀺? 𑀏𑀢𑁂𑀲𑀁 𑀧𑀦 𑀇𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀫𑁆𑀧𑀺 𑀲𑀫𑀸𑀲𑀧𑀤𑀢𑁆𑀢𑀸 𑀅𑀕𑁆𑀕𑀺𑀦𑀬𑁂 𑀅𑀝𑁆𑀞𑀢𑁆𑀯𑀸 𑀬𑀣𑀸𑀲𑀫𑁆𑀪𑀯𑀁 𑀤𑀡𑁆𑀟𑀻𑀦𑀬𑁂 𑀢𑀺𑀝𑁆𑀞𑀦𑀢𑁄 𑀦𑁄𑀓𑀸𑀭𑀦𑁆𑀢𑀸𑀦𑁂𑀯 𑀭𑀽𑀧𑀸𑀦𑀺. 𑀢𑀣𑀸 𑀳𑀺 ‘‘𑀅𑀲𑀸𑀭𑁂 𑀲𑀸𑀭𑀫𑀢𑀺𑀦𑁄’’𑀢𑀺 𑀦𑁄𑀓𑀸𑀭𑀦𑁆𑀢𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀧𑀸𑀴𑀺 𑀤𑀺𑀲𑁆𑀲𑀢𑀺, 𑀉𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀫𑁆𑀧𑀺 𑀢𑀸𑀤𑀺𑀲𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀪𑁄 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑁂 ‘‘𑀅𑀢𑁆𑀣𑁂 𑀯𑀺𑀲𑀸𑀭𑀤𑀫𑀢𑀬𑁄’’𑀢𑀺 𑀏𑀢𑁆𑀣 𑀲𑀫𑀸𑀲𑀧𑀤𑀲𑁆𑀲 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀬𑁄𑀓𑀸𑀭𑀦𑁆𑀢𑀲𑁆𑀲 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀧𑀸𑀞𑀲𑁆𑀲 𑀤𑀲𑁆𑀲𑀦𑀢𑁄 𑀲𑀸𑀭𑀫𑀢𑀺𑀲𑀤𑁆𑀤𑀸𑀤𑀻𑀦𑀫𑁆𑀧𑀺 ‘‘𑀯𑀺𑀲𑀸𑀭𑀤𑀫𑀢𑀬𑁄’’𑀢𑀺 𑀭𑀽𑀧𑁂𑀦 𑀯𑀺𑀬 𑀬𑁄𑀓𑀸𑀭𑀦𑁆𑀢𑁂𑀳𑀺 𑀭𑀽𑀧𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦𑀧𑀺 𑀪𑀯𑀺𑀢𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑁂 𑀲𑀫𑀸𑀲𑀧𑀤𑀸𑀦𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 ‘‘𑀯𑀺𑀲𑀸𑀭𑀤𑀫𑀢𑀬𑁄’’𑀢𑀺 𑀭𑀽𑀧𑀲𑀤𑀺𑀲𑀲𑁆𑀲 𑀭𑀽𑀧𑀲𑁆𑀲 𑀅𑀤𑀲𑁆𑀲𑀦𑀢𑁄𑀢𑀺.

𑀦𑀦𑀼 𑀘 𑀪𑁄 𑀩𑀼𑀤𑁆𑀥𑀯𑀘𑀦𑁂 ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸. 𑀢𑁂 𑀳𑁄𑀦𑁆𑀢𑀺 𑀚𑀸𑀦𑀺𑀧𑀢𑀬𑁄, 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀁𑀯𑀤𑀸’’𑀢𑀺 𑀲𑀫𑀸𑀲𑀧𑀤𑀸𑀦𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 ‘‘𑀯𑀺𑀲𑀸𑀭𑀤𑀫𑀢𑀬𑁄’’𑀢𑀺 𑀭𑀽𑀧𑀲𑀤𑀺𑀲𑀸𑀦𑀺 𑀬𑁄𑀓𑀸𑀭𑀦𑁆𑀢𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦𑁂 𑀲𑀫𑀸𑀲𑀧𑀤𑀸𑀦𑀁 𑀇𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 ‘‘𑀯𑀺𑀲𑀸𑀭𑀤𑀫𑀢𑀬𑁄’’𑀢𑀺 𑀭𑀽𑀧𑀲𑀤𑀺𑀲𑀲𑁆𑀲 𑀬𑁄𑀓𑀸𑀭𑀦𑁆𑀢𑀲𑁆𑀲 𑀭𑀽𑀧𑀲𑁆𑀲 𑀅𑀤𑀲𑁆𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀯𑀺𑀲𑀤𑀺𑀲𑀢𑁆𑀢𑀁 𑀧𑀝𑀺𑀘𑁆𑀘. 𑀕𑀳𑀧𑀢𑀺𑀲𑀤𑁆𑀤𑀸𑀤𑀻𑀲𑀼 𑀳𑀺 𑀬𑀲𑁆𑀫𑀸 𑀧𑀢𑀺𑀲𑀤𑁆𑀤𑁄 𑀲𑀪𑀸𑀯𑁂𑀦𑁂𑀯 𑀧𑀼𑀮𑁆𑀮𑀺𑀗𑁆𑀕𑁄, 𑀦 𑀢𑀼 𑀲𑀫𑀸𑀲𑀢𑁄 𑀧𑀼𑀩𑁆𑀩𑁂 𑀇𑀢𑁆𑀣𑀺𑀮𑀺𑀗𑁆𑀕𑀧𑀓𑀢𑀺𑀓𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 ‘‘𑀕𑀳𑀧𑀢𑀬𑁄, 𑀚𑀸𑀦𑀺𑀧𑀢𑀬𑁄’’𑀢𑀺 𑀬𑁄𑀓𑀸𑀭𑀦𑁆𑀢𑀸𑀦𑀺, ‘‘𑀲𑁂𑀦𑀸𑀧𑀢𑀬𑁄, 𑀲𑁂𑀦𑀸𑀧𑀢𑀺𑀦𑁄’’𑀢𑀺 𑀬𑁄 𑀦𑁄𑀓𑀸𑀭𑀦𑁆𑀢𑀸𑀦𑀺 ¶ 𑀘 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑀣𑀸 𑀳𑀺 ‘‘𑀢𑀢𑁆𑀢𑀓𑀸 𑀲𑁂𑀦𑀸𑀧𑀢𑀺𑀦𑁄’’𑀢𑀺 𑀅𑀝𑁆𑀞𑀓𑀣𑀸𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀲𑀸𑀭𑀫𑀢𑀺 𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀚𑀺𑀭𑀩𑀼𑀤𑁆𑀥𑀺 𑀲𑀤𑁆𑀤𑀸𑀤𑀻𑀲𑀼 𑀫𑀢𑀺𑀤𑀺𑀝𑁆𑀞𑀺𑀲𑀤𑁆𑀤𑀸𑀤𑀬𑁄 𑀲𑀫𑀸𑀲𑀢𑁄 𑀧𑀼𑀩𑁆𑀩𑁂 𑀇𑀢𑁆𑀣𑀺𑀮𑀺𑀗𑁆𑀕𑀧𑀓𑀢𑀺𑀓𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑀯𑀲𑁂𑀦 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀧𑁆𑀧𑀢𑁆𑀢𑀸, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 ‘‘𑀲𑀸𑀭𑀫𑀢𑀺𑀦𑁄 𑀲𑀼𑀤𑁆𑀥𑀤𑀺𑀝𑁆𑀞𑀺𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄 𑀯𑀚𑀺𑀭𑀩𑀼𑀤𑁆𑀥𑀺𑀦𑁄’’𑀢𑀺𑀆𑀤𑀻𑀦𑀺’𑀦𑁄𑀓𑀸𑀭𑀦𑁆𑀢𑀸𑀦𑀺𑀬𑁂𑀯 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀲𑀫𑁆𑀧𑀤𑀸𑀦𑀲𑀸𑀫𑀻𑀦𑀫𑁂𑀓𑀯𑀘𑀦𑁂𑀳𑀺 𑀲𑀤𑀺𑀲𑀸𑀦𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁.

𑀲𑁂𑀝𑁆𑀞𑀺 𑀲𑀸𑀭𑀣𑀺𑀘𑀓𑁆𑀓𑀯𑀢𑁆𑀢𑀺𑀲𑀸𑀫𑀺𑀇𑀘𑁆𑀘𑁂𑀢𑁂𑀲𑀼 𑀓𑀣𑀦𑁆𑀢𑀺? 𑀏𑀢𑁆𑀣 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀢𑁆𑀣𑀘𑀺 𑀧𑀸𑀞𑁂 ‘‘𑀲𑁂𑀝𑁆𑀞𑀻 𑀲𑀸𑀭𑀣𑀻 𑀘𑀓𑁆𑀓𑀯𑀢𑁆𑀢𑀻 𑀲𑀸𑀫𑀻’’𑀢𑀺 𑀅𑀦𑁆𑀢𑀓𑁆𑀔𑀭𑀲𑁆𑀲 𑀤𑀻𑀖𑀢𑁆𑀢𑀁 𑀤𑀺𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀧𑀦 ‘‘𑀲𑁂𑀝𑁆𑀞𑀺 𑀲𑀸𑀭𑀣𑀺 𑀘𑀓𑁆𑀓𑀯𑀢𑁆𑀢𑀺 𑀲𑀸𑀫𑀺’’𑀇𑀢𑀺 𑀅𑀦𑁆𑀢𑀓𑁆𑀔𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀤𑀺𑀲𑁆𑀲𑀢𑀺. 𑀓𑀺𑀜𑁆𑀘𑀸𑀧𑀺 𑀭𑀲𑁆𑀲𑀢𑁆𑀢𑀫𑁂𑀢𑁂𑀲𑀁 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀢𑁆𑀢𑀯𑀘𑀦𑀸𑀤𑀺𑀪𑀸𑀯𑁂𑀦 ‘‘𑀲𑁂𑀝𑁆𑀞𑀺𑀦𑁄 𑀲𑀸𑀭𑀣𑀺𑀦𑁄’’𑀢𑀺𑀆𑀤𑀺𑀧𑀬𑁄𑀕𑀤𑀲𑁆𑀲𑀦𑀢𑁄 𑀭𑀲𑁆𑀲𑀁 𑀓𑀢𑁆𑀯𑀸 𑀏𑀢𑀸𑀦𑀺 𑀉𑀘𑁆𑀘𑀸𑀭𑀺𑀬𑀦𑁆𑀢𑀻𑀢𑀺 𑀜𑀸𑀬𑀢𑀺, 𑀢𑀲𑁆𑀫𑀸 𑀏𑀯𑀁 𑀦𑀺𑀩𑁆𑀩𑀘𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑁋 𑀲𑁂𑀝𑁆𑀞𑀁 𑀥𑀦𑀲𑀸𑀭𑀁, 𑀞𑀸𑀦𑀦𑁆𑀢𑀭𑀁 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑁂𑀝𑁆𑀞𑀻. 𑀅𑀲𑁆𑀲𑀤𑀫𑁆𑀫𑀸𑀤𑀬𑁄 𑀲𑀸𑀭𑀡𑀲𑀻𑀮𑁄𑀢𑀺 𑀲𑀸𑀭𑀣𑀻. 𑀘𑀓𑁆𑀓𑀁 𑀧𑀯𑀢𑁆𑀢𑀦𑀲𑀻𑀮𑁄𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀸𑀫𑀻𑀢𑀺. 𑀅𑀲𑁆𑀲𑀢𑁆𑀣𑀺𑀓𑀢𑀲𑁆𑀲𑀻𑀮𑀢𑁆𑀣𑀲𑀤𑁆𑀤𑀸 𑀳𑀺 𑀦𑁄𑀓𑀸𑀭𑀦𑁆𑀢𑀭𑀽𑀧𑀯𑀲𑁂𑀦 𑀲𑀫𑀸𑀦𑀕𑀢𑀺𑀓𑀸 𑀪𑀯𑀦𑁆𑀢𑀺 𑀬𑀣𑀸 ‘‘𑀤𑀡𑁆𑀟𑀺𑀦𑁄 𑀪𑀽𑀫𑀺𑀲𑀸𑀬𑀺𑀦𑁄’’𑀢𑀺. 𑀅𑀧𑀭𑁄𑀧𑀺 𑀦𑀺𑀩𑁆𑀩𑀘𑀦𑀢𑁆𑀣𑁄 𑀈𑀓𑀸𑀭𑀦𑁆𑀢𑀯𑀲𑁂𑀦 𑀅𑀲𑁆𑀲𑀤𑀫𑁆𑀫𑀸𑀤𑀬𑁄 𑀲𑀸𑀭𑁂𑀢𑀻𑀢𑀺 𑀲𑀸𑀭𑀣𑀻. 𑀢𑀣𑀸 𑀳𑀺 ‘‘𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀏𑀯𑀁 𑀓𑀢𑁆𑀢𑀼𑀓𑀸𑀭𑀓𑀯𑀲𑁂𑀦 𑀈𑀓𑀸𑀭𑀦𑁆𑀢𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀮𑀩𑁆𑀪𑀫𑀸𑀦𑀫𑁆𑀧𑀺 𑀇𑀓𑀸𑀭𑀦𑁆𑀢𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑁂𑀦 ‘‘𑀲𑀸𑀭𑀣𑀺𑀦𑁄 ¶ 𑀘𑀓𑁆𑀓𑀯𑀢𑁆𑀢𑀺𑀦𑁄’’𑀢𑀺𑀆𑀤𑀻𑀦𑀺 𑀦𑁄𑀓𑀸𑀭𑀦𑁆𑀢𑀭𑀽𑀧𑀸𑀦𑀺 𑀕𑀳𑁂𑀢𑁆𑀯𑀸 𑀤𑀡𑁆𑀟𑀻𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺 ‘‘𑀤𑀡𑁆𑀟𑀺𑀦𑀻’’𑀢𑀺𑀆𑀤𑀺𑀓𑀁 𑀯𑀚𑁆𑀚𑀺𑀢𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸. 𑀏𑀯𑀁 ‘‘𑀲𑁂𑀝𑁆𑀞𑀺𑀦𑁄 𑀲𑀸𑀭𑀣𑀺𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀸𑀫𑀺𑀦𑁄’’𑀢𑀺𑀆𑀤𑀻𑀦𑀺 𑀦𑁄𑀓𑀸𑀭𑀦𑁆𑀢𑀸𑀦𑀺𑀬𑁂𑀯 𑀭𑀽𑀧𑀸𑀦𑀺 𑀜𑁂𑀬𑁆𑀬𑀸𑀦𑀺.

𑀅𑀢𑁆𑀭 𑀓𑀺𑀜𑁆𑀘𑀺 𑀧𑀬𑁄𑀕𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀓𑀣𑀬𑀸𑀫. ‘‘𑀢𑀸𑀢 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑀸’’𑀢𑀺 𑀘 ‘‘𑀢𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 ‘𑀫𑀳𑀸𑀲𑁂𑀝𑁆𑀞𑀺𑀦𑁄 𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺 𑀯𑀤𑀺𑀁𑀲𑀽’’𑀢𑀺 𑀘 ‘‘𑀲𑀸𑀭𑀣𑀺𑀦𑁄 𑀆𑀳𑀁𑀲𑀽’’𑀢𑀺 𑀘 ‘‘𑀤𑁆𑀯𑁂 𑀘𑀓𑁆𑀓𑀯𑀢𑁆𑀢𑀺𑀦𑁄’’𑀢𑀺 𑀘 𑀏𑀯𑀫𑀸𑀤𑀻𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀢𑁆𑀣𑀘𑀺 ‘‘𑀲𑁂𑀝𑁆𑀞𑀺 𑀲𑀸𑀭𑀣𑀺’’𑀇𑀘𑁆𑀘𑀸𑀤𑀺 𑀭𑀲𑁆𑀲𑀢𑁆𑀢𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀲𑁄 𑀲𑀪𑀸𑀯𑁂𑀦 𑀭𑀲𑁆𑀲𑀢𑁆𑀢𑀪𑀸𑀯𑁄 𑀧𑀸𑀞𑁄 𑀦 𑀳𑁄𑀢𑀺, 𑀤𑀻𑀖𑀲𑁆𑀲 𑀭𑀲𑁆𑀲𑀢𑁆𑀢𑀓𑀭𑀡𑀧𑀸𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀫𑀸𑀮𑀸 𑀘𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀫𑀳𑁂𑀲𑀻𑀢𑀺 𑀏𑀢𑁆𑀣 𑀓𑀣𑀦𑁆𑀢𑀺? ‘‘𑀫𑀳𑁂𑀲𑀻’’𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀫𑀳𑁂𑀲𑀻𑀲𑀤𑁆𑀤𑁄 𑀈𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀬𑀢𑀺, 𑀢𑀣𑀸𑀧𑀺 𑀇𑀲𑀺𑀲𑀤𑁆𑀤𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀇𑀲𑀺𑀲𑀤𑁆𑀤𑀲𑁆𑀲 𑀅𑀕𑁆𑀕𑀺𑀲𑀤𑁆𑀤𑁂𑀦 𑀲𑀫𑀸𑀦𑀧𑀤𑀫𑀸𑀮𑀢𑁆𑀢𑀸 𑀅𑀕𑁆𑀕𑀺𑀦𑀬𑁂𑀦 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀦𑀦𑀼 𑀘 𑀪𑁄 𑀏𑀢𑁆𑀣 𑀢𑀲𑁆𑀲𑀻𑀮𑀢𑁆𑀣𑁄 𑀤𑀺𑀲𑁆𑀲𑀢𑀺 ‘‘𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑁂 𑀏𑀲𑀦𑀲𑀻𑀮𑁄𑀢𑀺 𑀫𑀳𑁂𑀲𑀻’’𑀢𑀺, 𑀢𑀲𑁆𑀫𑀸 ‘‘𑀪𑀽𑀫𑀺𑀲𑀸𑀬𑀻’’𑀢𑀺 𑀧𑀤𑀲𑁆𑀲 𑀯𑀺𑀬 𑀤𑀡𑁆𑀟𑀻𑀦𑀬𑁂𑀦𑁂𑀯 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸𑀢𑀺? 𑀦 𑀓𑀸𑀢𑀩𑁆𑀩𑀸 𑀢𑀲𑁆𑀲𑀻𑀮𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀇𑀫𑀲𑁆𑀲 𑀳𑀺 ‘‘𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑁂 𑀏𑀲𑀺 𑀕𑀯𑁂𑀲𑀺 𑀏𑀲𑀺𑀢𑁆𑀯𑀸 𑀞𑀺𑀢𑁄𑀢𑀺 𑀫𑀳𑁂𑀲𑀻’’𑀢𑀺 𑀅𑀢𑀲𑁆𑀲𑀻𑀮𑀢𑁆𑀣𑁄 𑀏𑀯 𑀬𑀼𑀚𑁆𑀚𑀢𑀺. 𑀓𑀢𑀓𑀭𑀡𑀻𑀬𑁂𑀲𑀼 𑀩𑀼𑀤𑁆𑀥𑀸𑀤𑀻𑀲𑀼 𑀅𑀭𑀺𑀬𑁂𑀲𑀼 𑀧𑀯𑀢𑁆𑀢𑀦𑀸𑀫𑀢𑁆𑀢𑀸. 𑀇𑀲𑀺𑀲𑀤𑁆𑀤𑁂𑀦 𑀘𑀸𑀬𑀁 𑀲𑀤𑁆𑀤𑁄 𑀈𑀲𑀓𑀁 𑀲𑀫𑀸𑀦𑁄 𑀓𑁂𑀯𑀮𑀁 𑀲𑀫𑀸𑀲𑀧𑀭𑀺𑀬𑁄𑀲𑀸𑀦𑁂 𑀤𑀻𑀖𑀯𑀲𑁂𑀦 𑀉𑀘𑁆𑀘𑀸𑀭𑀺𑀬𑀢𑀺, 𑀭𑀲𑁆𑀲𑀯𑀲𑁂𑀦 𑀧𑀦 ‘‘𑀫𑀳𑀸 𑀇𑀲𑀺 𑀫𑀳𑁂𑀲𑀻’’𑀢𑀺 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 ¶ . 𑀬𑀲𑁆𑀫𑀸 𑀭𑀲𑁆𑀲𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀤𑀫𑀸𑀮𑀸𑀓𑀭𑀡𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑁂𑀲𑀬𑁄’’𑀢𑀺 𑀇𑀓𑀸𑀭𑀦𑁆𑀢𑀭𑀽𑀧𑀁 𑀤𑀺𑀲𑁆𑀲𑀢𑀺. 𑀦 𑀳𑀺 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀓𑀢𑁆𑀣𑀘𑀺𑀧𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀭𑀽𑀧𑀁 𑀯𑀺𑀬 ‘‘𑀫𑀳𑁂𑀲𑀺𑀦𑁄’’𑀢𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀩𑀳𑀼𑀯𑀘𑀦𑀭𑀽𑀧𑀁 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀈𑀓𑀸𑀭𑀦𑁆𑀢𑀯𑀲𑁂𑀦 𑀉𑀘𑁆𑀘𑀸𑀭𑀺𑀢𑀲𑁆𑀲𑀧𑀺 𑀲𑀢𑁄 𑀭𑀲𑁆𑀲𑀯𑀲𑁂𑀦 𑀉𑀘𑁆𑀘𑀸𑀭𑀺𑀢𑀲𑁆𑀲 𑀯𑀺𑀬 ‘‘𑀫𑀳𑁂𑀲𑀺, 𑀫𑀳𑁂𑀲𑀻, 𑀫𑀳𑁂𑀲𑀬𑁄. 𑀫𑀳𑁂𑀲𑀺𑀁, 𑀫𑀳𑁂𑀲𑀻, 𑀫𑀳𑁂𑀲𑀬𑁄. 𑀫𑀳𑁂𑀲𑀺𑀦𑀸’’𑀢𑀺 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀅𑀧𑀺𑀘 𑀫𑀳𑁂𑀲𑀻𑀲𑀤𑁆𑀤𑁄 𑀬𑀢𑁆𑀣 𑀭𑀸𑀚𑀕𑁆𑀕𑀼𑀩𑁆𑀩𑀭𑀺𑀯𑀸𑀘𑀓𑁄, 𑀢𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑁄 𑀳𑁄𑀢𑀺, 𑀢𑀩𑁆𑀩𑀲𑁂𑀦 𑀧𑀦 ‘‘𑀫𑀳𑁂𑀲𑀻, 𑀫𑀳𑁂𑀲𑀻, 𑀫𑀳𑁂𑀲𑀺𑀬𑁄. 𑀫𑀳𑁂𑀲𑀺𑀁, 𑀫𑀳𑁂𑀲𑀻, 𑀫𑀳𑁂𑀲𑀺𑀬𑁄. 𑀫𑀳𑁂𑀲𑀺𑀬𑀸’’𑀢𑀺 𑀘 𑀯𑀓𑁆𑀔𑀫𑀸𑀦𑀇𑀢𑁆𑀣𑀻𑀦𑀬𑁂𑀦 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸. 𑀳𑀢𑁆𑀣𑀻𑀲𑀤𑁆𑀤𑁂 𑀓𑀣𑀦𑁆𑀢𑀺? 𑀳𑀢𑁆𑀣𑀻𑀲𑀤𑁆𑀤𑀲𑁆𑀲 𑀧𑀦 𑀳𑀢𑁆𑀣𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀯𑀁 𑀈𑀓𑀸𑀭𑀦𑁆𑀢𑀯𑀲𑁂𑀦 𑀕𑀳𑀡𑁂 ‘‘𑀳𑀢𑁆𑀣𑀺𑀦𑁄’’𑀢𑀺 𑀭𑀽𑀧𑀁 𑀪𑀯𑀢𑀺. 𑀢𑀣𑀸 𑀳𑀺 ‘‘𑀯𑀦𑁂 𑀳𑀢𑁆𑀣𑀺𑀦𑁄’’𑀢𑀺 𑀧𑀬𑁄𑀕𑁄 𑀤𑀺𑀲𑁆𑀲𑀢𑀺. 𑀢𑀲𑁆𑀲𑁂𑀯 𑀢𑀲𑁆𑀫𑀺𑀁𑀬𑁂𑀯𑀢𑁆𑀣𑁂 𑀭𑀲𑁆𑀲𑀁 𑀓𑀢𑁆𑀯𑀸 𑀕𑀳𑀡𑁂 ‘‘𑀳𑀢𑁆𑀣𑀬𑁄’’𑀢𑀺 𑀭𑀽𑀧𑀁 𑀪𑀯𑀢𑀺. 𑀢𑀣𑀸 𑀳𑀺 𑁋

‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀳𑀢𑁆𑀣𑀬𑁄 𑀧𑀲𑀤𑀸 𑀫𑀺𑀕𑀸;

𑀲𑀩𑁆𑀩𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺, 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸.

𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀤𑀳𑀭𑁄 𑀘𑁂𑀧𑀺 𑀧𑀜𑁆𑀜𑀯𑀸;

𑀲𑁄𑀧𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀦𑁂𑀯 𑀩𑀸𑀮𑁄 𑀲𑀭𑀻𑀭𑀯𑀸’’𑀢𑀺

𑀇𑀫𑀲𑁆𑀫𑀺𑀁 𑀓𑁂𑀴𑀺𑀲𑀻𑀮𑀚𑀸𑀢𑀓𑁂 ‘‘𑀳𑀢𑁆𑀣𑀬𑁄’’𑀢𑀺 𑀆𑀳𑀘𑁆𑀘𑀧𑀤𑀁 𑀤𑀺𑀲𑁆𑀲𑀢𑀺. 𑀏𑀯𑀫𑀲𑁆𑀲 𑀤𑀡𑁆𑀟𑀻𑀦𑀬𑁂𑀦 𑀘 𑀅𑀕𑁆𑀕𑀺𑀦𑀬𑁂𑀦 𑀘 𑀤𑁆𑀯𑀺𑀥𑀸 𑀧𑀤𑀫𑀸𑀮𑀸, 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸 𑀦𑀬𑁂𑀦 𑀅𑀯𑀼𑀢𑁆𑀢𑁂𑀲𑀼𑀧𑀺 𑀞𑀸𑀦𑁂𑀲𑀼 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑁂𑀦 ¶ 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀼𑀭𑀽𑀧𑁂𑀦 𑀘 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 𑀪𑀽𑀥𑀸𑀢𑀼𑀫𑀬𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀤𑁆𑀥𑀺𑀁 𑀮𑀺𑀗𑁆𑀕𑀦𑁆𑀢𑀭𑁂𑀳𑀺 𑀲𑀤𑁆𑀤𑀦𑁆𑀢𑀭𑁂𑀳𑀺 𑀅𑀢𑁆𑀣𑀦𑁆𑀢𑀭𑁂𑀳𑀺 𑀘 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑀺𑀢𑀸.

𑀇𑀫𑀁 𑀲𑀤𑁆𑀤𑀦𑀻𑀢𑀺𑀁 𑀲𑀼𑀦𑀻𑀢𑀺𑀁 𑀯𑀺𑀘𑀺𑀢𑁆𑀢𑀁,

𑀲𑀧𑀜𑁆𑀜𑁂𑀳𑀺 𑀲𑀫𑁆𑀫𑀸 𑀧𑀭𑀻𑀧𑀸𑀮𑀦𑀻𑀬𑀁;

𑀲𑀤𑀸 𑀲𑀼𑀝𑁆𑀞𑀼 𑀘𑀺𑀦𑁆𑀢𑁂𑀢𑀺 𑀯𑀸𑀘𑁂𑀢𑀺 𑀬𑁄 𑀲𑁄,

𑀦𑀭𑁄 𑀜𑀸𑀡𑀯𑀺𑀢𑁆𑀣𑀺𑀦𑁆𑀦𑀢𑀁 𑀬𑀸𑀢𑀺 𑀲𑁂𑀝𑁆𑀞𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀦𑀺𑀘𑁆𑀙𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀤𑀺𑀧𑀼𑀮𑁆𑀮𑀺𑀗𑁆𑀕𑀸𑀦𑀁

𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀲𑀩𑁆𑀩𑀣𑀸𑀧𑀺 𑀧𑀼𑀮𑁆𑀮𑀺𑀗𑁆𑀕𑀁 𑀲𑀫𑀢𑁆𑀢𑀁.

𑁮. 𑀇𑀢𑁆𑀣𑀺𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀇𑀢𑁆𑀣𑀺𑀮𑀺𑀗𑁆𑀕𑁂𑀲𑀼 𑀆𑀓𑀸𑀭𑀦𑁆𑀢𑀲𑁆𑀲 𑀪𑀽𑀥𑀸𑀢𑀼𑀫𑀬𑀲𑁆𑀲 𑀧𑀓𑀢𑀺𑀭𑀽𑀧𑀪𑀽𑀢𑀲𑁆𑀲 𑀪𑀸𑀯𑀺𑀓𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 𑀯𑀢𑁆𑀢𑀩𑁆𑀩𑀸𑀬𑀫𑁆𑀧𑀺 𑀧𑀲𑀺𑀤𑁆𑀥𑀲𑁆𑀲 𑀢𑀸𑀯 𑀓𑀜𑁆𑀜𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋

𑀓𑀜𑁆𑀜𑀸, 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄. 𑀓𑀜𑁆𑀜𑀁, 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀳𑀺, 𑀓𑀜𑁆𑀜𑀸𑀪𑀺. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀦𑀁. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀳𑀺, 𑀓𑀜𑁆𑀜𑀸𑀪𑀺. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀦𑀁. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀬𑀁, 𑀓𑀜𑁆𑀜𑀸𑀲𑀼. 𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺𑀬𑁄 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄. 𑀅𑀬𑀫𑀫𑁆𑀳𑀸𑀓𑀁 𑀭𑀼𑀘𑀺.

𑀏𑀢𑁆𑀣 ¶ ‘‘𑀓𑀜𑁆𑀜𑀸’’𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑁄 𑀦𑀬𑁄 𑀦𑀢𑁆𑀣𑀺. 𑀢𑀣𑀸 𑀳𑀺 𑀢𑀢𑁆𑀣 ‘‘𑀲𑀤𑁆𑀥𑀸 𑀢𑀺𑀝𑁆𑀞𑀢𑀺, 𑀲𑀤𑁆𑀥𑀸𑀬𑁄 𑀢𑀺𑀝𑁆𑀞𑀦𑁆𑀢𑀺. 𑀲𑀤𑁆𑀥𑀁 𑀧𑀲𑁆𑀲𑀢𑀺, 𑀲𑀤𑁆𑀥𑀸𑀬𑁄 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, ‘‘𑀲𑀤𑁆𑀥𑀸’’𑀢𑀺 𑀩𑀳𑀼𑀯𑀘𑀦𑀁 𑀦 𑀆𑀕𑀢𑀁. 𑀓𑀺𑀜𑁆𑀘𑀸𑀧𑀺 𑀦𑀸𑀕𑀢𑀁, 𑀢𑀣𑀸𑀧𑀺 ‘‘𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁, 𑀲𑀺𑀯𑀺𑀓𑀜𑁆𑀜𑀸 𑀲𑀫𑀸𑀕𑀢𑀸. 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’’𑀢𑀺𑀆𑀤𑀺𑀧𑀸𑀴𑀺𑀤𑀲𑁆𑀲𑀦𑀢𑁄 𑀩𑀸𑀳𑀸𑀓𑀜𑁆𑀜𑀸 𑀲𑀜𑁆𑀜𑀸𑀲𑀤𑁆𑀤𑀸𑀤𑀻𑀦𑀁 𑀩𑀳𑀼𑀯𑀘𑀦𑀢𑀸 𑀕𑀳𑁂𑀢𑀩𑁆𑀩𑀸. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ‘‘𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺 𑀓𑀜𑁆𑀜𑀸’’𑀢𑀺 𑀤𑁆𑀯𑁂 𑀏𑀓𑀯𑀘𑀦𑀸𑀦𑀺 𑀯𑀢𑁆𑀯𑀸 ‘‘𑀪𑁄𑀢𑀺𑀬𑁄 𑀓𑀜𑁆𑀜𑀸𑀬𑁄’’𑀢𑀺 𑀏𑀓𑀁 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀦 ‘‘𑀪𑁄𑀢𑀺 𑀲𑀤𑁆𑀥𑀸’’𑀢𑀺 𑀏𑀓𑀯𑀘𑀦𑀁 𑀯𑀢𑁆𑀯𑀸 ‘‘𑀪𑁄𑀢𑀺𑀬𑁄 𑀲𑀤𑁆𑀥𑀸𑀬𑁄’’𑀢𑀺 𑀏𑀓𑀁 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀫𑀬𑀁 𑀧𑀦𑁂𑀢𑁆𑀣 ‘‘𑀏𑀳𑀺 𑀩𑀸𑀮𑁂 𑀔𑀫𑀸𑀧𑁂𑀳𑀺, 𑀓𑀼𑀲𑀭𑀸𑀚𑀁 𑀫𑀳𑀩𑁆𑀩𑀮𑀁. 𑀨𑀼𑀲𑁆𑀲𑀢𑀻 𑀯𑀭𑀯𑀡𑁆𑀡𑀸𑀪𑁂. 𑀏𑀳𑀺 𑀕𑁄𑀥𑁂 𑀦𑀺𑀯𑀢𑁆𑀢𑀲𑁆𑀲𑀽’’𑀢𑀺𑀆𑀤𑀺𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺𑀬𑁄 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄’’𑀢𑀺 𑀏𑀯𑀁𑀧𑀓𑀸𑀭𑀸𑀦𑀺𑀬𑁂𑀯 𑀆𑀮𑀧𑀦𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀇𑀘𑁆𑀙𑀸𑀫. 𑀏𑀢𑁆𑀣 ‘‘𑀪𑁄𑀢𑀺 𑀓𑀜𑁆𑀜𑁂’’𑀢𑀺 𑀅𑀬𑀁 𑀦𑀬𑁄 𑀅𑀫𑁆𑀫𑀸𑀤𑀻𑀲𑀼 𑀫𑀸𑀢𑀸𑀤𑀻𑀲𑀼 𑀘 𑀦 𑀮𑀩𑁆𑀪𑀢𑀺.

𑀪𑀸𑀯𑀺𑀓𑀸, 𑀪𑀸𑀯𑀺𑀓𑀸, 𑀪𑀸𑀯𑀺𑀓𑀸𑀬𑁄. 𑀪𑀸𑀯𑀺𑀓𑀁, 𑀪𑀸𑀯𑀺𑀓𑀸, 𑀪𑀸𑀯𑀺𑀓𑀸𑀬𑁄. 𑀪𑀸𑀯𑀺𑀓𑀸𑀬, 𑀪𑀸𑀯𑀺𑀓𑀸𑀳𑀺, 𑀪𑀸𑀯𑀺𑀓𑀸𑀪𑀺. 𑀪𑀸𑀯𑀺𑀓𑀸𑀬, 𑀪𑀸𑀯𑀺𑀓𑀸𑀦𑀁. 𑀪𑀸𑀯𑀺𑀓𑀸𑀬, 𑀪𑀸𑀯𑀺𑀓𑀸𑀳𑀺, 𑀪𑀸𑀯𑀺𑀓𑀸𑀪𑀺. 𑀪𑀸𑀯𑀺𑀓𑀸𑀬, 𑀪𑀸𑀯𑀺𑀓𑀸𑀦𑀁. 𑀪𑀸𑀯𑀺𑀓𑀸𑀬, 𑀪𑀸𑀯𑀺𑀓𑀸𑀬𑀁, 𑀪𑀸𑀯𑀺𑀓𑀸𑀲𑀼. 𑀪𑁄𑀢𑀺 𑀪𑀸𑀯𑀺𑀓𑁂, 𑀪𑁄𑀢𑀺𑀬𑁄 𑀪𑀸𑀯𑀺𑀓𑀸, 𑀪𑀸𑀯𑀺𑀓𑀸𑀬𑁄.

𑀏𑀯𑀁 𑀳𑁂𑀝𑁆𑀞𑀼𑀤𑁆𑀤𑀺𑀝𑁆𑀞𑀸𑀦𑀁 𑀲𑀩𑁆𑀩𑁂𑀲𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 ‘‘𑀪𑀸𑀯𑀦𑀸 𑀯𑀺𑀪𑀸𑀯𑀦𑀸’’𑀇𑀘𑁆𑀘𑁂𑀯𑀫𑀸𑀤𑀻𑀦𑀁𑀆𑀓𑀸𑀭𑀦𑁆𑀢𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘𑀸𑀓𑀸𑀭𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑀸𑀦𑀺 𑀆𑀓𑀸𑀭𑀦𑁆𑀢𑀧𑀤𑀸𑀦𑀺 𑀦𑀸𑀫 𑀲𑀤𑁆𑀥𑀸𑀤𑀻𑀦𑀺.

𑀲𑀤𑁆𑀥𑀸 ¶ 𑀫𑁂𑀥𑀸 𑀧𑀜𑁆𑀜𑀸 𑀯𑀺𑀚𑁆𑀚𑀸, 𑀘𑀺𑀦𑁆𑀢𑀸 𑀫𑀦𑁆𑀢𑀸 𑀢𑀡𑁆𑀳𑀸’𑀪𑀺𑀚𑁆𑀛𑀸;

𑀇𑀘𑁆𑀙𑀸 𑀧𑀼𑀘𑁆𑀙𑀸 𑀚𑀸𑀬𑀸 𑀫𑀸𑀬𑀸, 𑀫𑁂𑀢𑁆𑀢𑀸 𑀫𑀢𑁆𑀢𑀸 𑀲𑀺𑀓𑁆𑀔𑀸 𑀲𑀗𑁆𑀔𑀸.

𑀚𑀗𑁆𑀖𑀸 𑀩𑀸𑀳𑀸 𑀕𑀻𑀯𑀸 𑀚𑀺𑀯𑁆𑀳𑀸, 𑀯𑀸𑀘𑀸 𑀙𑀸𑀬𑀸 𑀕𑀗𑁆𑀕𑀸 𑀦𑀸𑀯𑀸;

𑀦𑀺𑀤𑁆𑀤𑀸 𑀓𑀦𑁆𑀢𑀸 𑀲𑀸𑀮𑀸 𑀫𑀸𑀮𑀸, 𑀯𑁂𑀮𑀸 𑀯𑀻𑀡𑀸 𑀪𑀺𑀓𑁆𑀔𑀸 𑀮𑀸𑀔𑀸.

𑀕𑀸𑀣𑀸 𑀲𑁂𑀦𑀸 𑀮𑁂𑀔𑀸’𑀧𑁂𑀓𑁆𑀔𑀸, 𑀆𑀲𑀸 𑀧𑀽𑀚𑀸 𑀏𑀲𑀸 𑀓𑀗𑁆𑀔𑀸;

𑀅𑀜𑁆𑀜𑀸 𑀫𑀼𑀤𑁆𑀤𑀸 𑀔𑀺𑀟𑁆𑀟𑀸 𑀪𑀲𑁆𑀲𑀸, 𑀪𑀸𑀲𑀸 𑀓𑀻𑀴𑀸 𑀲𑀢𑁆𑀢𑀸 𑀘𑁂𑀢𑀸.

𑀧𑀺𑀧𑀸𑀲𑀸 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀢𑀲𑀺𑀡𑀸 𑀧𑀚𑀸;

𑀤𑁂𑀯𑀢𑀸 𑀯𑀝𑁆𑀝𑀓𑀸 𑀕𑁄𑀥𑀸, 𑀩𑀮𑀸𑀓𑀸 𑀯𑀲𑀼𑀥𑀸 𑀲𑀪𑀸.

𑀉𑀓𑁆𑀓𑀸 𑀲𑁂𑀨𑀸𑀮𑀺𑀓𑀸 𑀲𑀺𑀓𑁆𑀓𑀸, 𑀲𑀮𑀸𑀓𑀸 𑀯𑀸𑀮𑀺𑀓𑀸 𑀲𑀺𑀔𑀸;

𑀓𑀸𑀭𑀡𑀸 𑀯𑀺𑀲𑀺𑀔𑀸 𑀲𑀸𑀔𑀸, 𑀯𑀘𑀸 𑀯𑀜𑁆𑀛𑀸 𑀚𑀝𑀸 𑀖𑀝𑀸.

𑀧𑀻𑀴𑀸 𑀲𑁄𑀡𑁆𑀟𑀸 𑀯𑀺𑀢𑀡𑁆𑀟𑀸 𑀘, 𑀓𑀭𑀼𑀡𑀸 𑀯𑀦𑀺𑀢𑀸 𑀮𑀢𑀸;

𑀓𑀣𑀸 𑀦𑀺𑀦𑁆𑀤𑀸 𑀲𑀼𑀥𑀸 𑀭𑀸𑀥𑀸, 𑀯𑀸𑀲𑀦𑀸 𑀲𑀺𑀁𑀲𑀧𑀸 𑀧𑀧𑀸.

𑀧𑀪𑀸 𑀲𑀻𑀫𑀸 𑀔𑀫𑀸 𑀏𑀚𑀸,

𑀔𑀢𑁆𑀢𑀺𑀬𑀸 𑀲𑀓𑁆𑀔𑀭𑀸 𑀲𑀼𑀭𑀸;

𑀤𑁄𑀮𑀸 𑀢𑀼𑀮𑀸 𑀲𑀺𑀮𑀸 𑀮𑀻𑀮𑀸,

𑀮𑀸𑀮𑁂’𑀴𑀸 𑀫𑁂𑀔𑀮𑀸 𑀓𑀮𑀸.

𑀯𑀴𑀯𑀸 𑀲𑀼𑀡𑀺𑀲𑀸 𑀫𑀽𑀲𑀸, 𑀫𑀜𑁆𑀚𑀽𑀲𑀸 𑀲𑀼𑀮𑀲𑀸 𑀤𑀺𑀲𑀸;

𑀦𑀸𑀲𑀸 𑀚𑀼𑀡𑁆𑀳𑀸 𑀕𑀼𑀳𑀸 𑀈𑀳𑀸, 𑀮𑀲𑀺𑀓𑀸 𑀧𑀭𑀺𑀲𑀸 𑀦𑀺𑀲𑀸;

𑀫𑀸𑀢𑀺𑀓𑀺𑀘𑁆𑀘𑀸𑀤𑀬𑁄 𑀘𑁂𑀯, 𑀪𑀸𑀯𑀺𑀓𑀸𑀧𑀤𑀲𑀸𑀤𑀺𑀲𑀸.

𑀅𑀫𑁆𑀫𑀦𑁆𑀦𑀫𑁆𑀩𑀸 𑀘 𑀢𑀸𑀢𑀸 𑀘, 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸 𑀲𑀺𑀬𑀼𑀁;

𑀫𑀸𑀢𑀸 𑀥𑀻𑀢𑀸 𑀧𑀦𑀢𑁆𑀢𑀸𑀤𑀻, 𑀧𑀼𑀣𑀕𑁂𑀯 𑀇𑀢𑁄 𑀲𑀺𑀬𑀼𑀁.

𑀧𑀭𑀺𑀲𑀸𑀲𑀤𑁆𑀤𑀲𑁆𑀲 𑀧𑀦 𑀲𑀢𑁆𑀢𑀫𑀻𑀞𑀸𑀦𑁂 ‘‘𑀧𑀭𑀺𑀲𑀸𑀬, 𑀧𑀭𑀺𑀲𑀸𑀬𑀁, 𑀧𑀭𑀺𑀲𑀢𑀺, 𑀧𑀭𑀺𑀲𑀸𑀲𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀏𑀓𑀫𑀺𑀤𑀁 𑀪𑁄 𑀕𑁄𑀢𑀫 𑀲𑀫𑀬𑀁 𑀢𑁄𑀤𑁂𑀬𑁆𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀢𑀺 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑀻’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄. 𑀅𑀫𑁆𑀫𑀸𑀤𑀻𑀦𑀁 𑀧𑀦 ‘‘𑀅𑀫𑁆𑀫𑀸, 𑀅𑀫𑁆𑀫𑀸, 𑀅𑀫𑁆𑀫𑀸𑀬𑁄’’𑀢𑀺𑀆𑀤𑀺𑀦𑀸 ¶ 𑀓𑀜𑁆𑀜𑀸𑀦𑀬𑁂𑀦 𑀯𑀢𑁆𑀯𑀸 𑀅𑀯𑀲𑀸𑀦𑁂 ‘‘𑀪𑁄𑀢𑀺 𑀅𑀫𑁆𑀫, 𑀪𑁄𑀢𑀺 𑀅𑀫𑁆𑀫𑀸, 𑀪𑁄𑀢𑀺𑀬𑁄 𑀅𑀫𑁆𑀫𑀸, 𑀅𑀫𑁆𑀫𑀸𑀬𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀫𑀸𑀢𑀸, 𑀫𑀸𑀢𑀸, 𑀫𑀸𑀢𑀭𑁄. 𑀫𑀸𑀢𑀭𑀁, 𑀫𑀸𑀢𑀭𑁄. 𑀫𑀸𑀢𑀭𑀸, 𑀫𑀸𑀢𑀼𑀬𑀸, 𑀫𑀢𑁆𑀬𑀸, 𑀫𑀸𑀢𑀽𑀳𑀺, 𑀫𑀸𑀢𑀽𑀪𑀺. 𑀫𑀸𑀢𑀼, 𑀫𑀸𑀢𑀼𑀬𑀸, 𑀫𑀢𑁆𑀬𑀸, 𑀫𑀸𑀢𑀭𑀸𑀦𑀁, 𑀫𑀸𑀢𑀸𑀦𑀁, 𑀫𑀸𑀢𑀽𑀦𑀁. 𑀫𑀸𑀢𑀭𑀸, 𑀫𑀸𑀢𑀼𑀬𑀸, 𑀫𑀢𑁆𑀬𑀸, 𑀫𑀸𑀢𑀽𑀳𑀺, 𑀫𑀸𑀢𑀽𑀪𑀺. 𑀫𑀸𑀢𑀼, 𑀫𑀸𑀢𑀼𑀬𑀸, 𑀫𑀢𑁆𑀬𑀸, 𑀫𑀸𑀢𑀭𑀸𑀦𑀁, 𑀫𑀸𑀢𑀸𑀦𑀁, 𑀫𑀸𑀢𑀽𑀦𑀁. 𑀫𑀸𑀢𑀭𑀺, 𑀫𑀸𑀢𑀼𑀬𑀸, 𑀫𑀢𑁆𑀬𑀸, 𑀫𑀸𑀢𑀼𑀬𑀁, 𑀫𑀢𑁆𑀬𑀁, 𑀫𑀸𑀢𑀽𑀲𑀼. 𑀪𑁄𑀢𑀺 𑀫𑀸𑀢𑀸, 𑀪𑁄𑀢𑀺𑀬𑁄 𑀫𑀸𑀢𑀸, 𑀫𑀸𑀢𑀭𑁄.

𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀧𑀸𑀴𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀲𑀓𑀸𑀭𑀦𑁆𑀢𑀸𑀦𑀺 𑀭𑀽𑀧𑀸𑀦𑀺 𑀏𑀳𑀺 𑀏𑀪𑀺 𑀏𑀲𑀼𑀓𑀸𑀭𑀦𑁆𑀢𑀸𑀤𑀻𑀦𑀺 𑀘 𑀏𑀦𑀦𑁆𑀢𑀸𑀤𑀻𑀦𑀺 𑀘 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀓𑁂𑀳𑀺𑀘𑀺 𑀯𑀼𑀢𑁆𑀢𑀸𑀦𑀺𑀧𑀺 ‘‘𑀫𑀸𑀢𑀼𑀲𑁆𑀲 𑀫𑀸𑀢𑀭𑁂𑀳𑀻’’𑀢𑀺𑀆𑀤𑀻𑀦𑀺 𑀦 𑀯𑀼𑀢𑁆𑀢𑀸𑀦𑀺, 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. ‘‘𑀬𑀁𑀓𑀺𑀜𑁆𑀘𑀺𑀢𑁆𑀣𑀺𑀓𑀢𑀁 𑀧𑀼𑀜𑁆𑀜𑀁, 𑀫𑀬𑁆𑀳𑀜𑁆𑀘 𑀫𑀸𑀢𑀼𑀬𑀸 𑀘 𑀢𑁂. 𑀅𑀦𑀼𑀜𑁆𑀜𑀸𑀢𑁄 𑀅𑀳𑀁 𑀫𑀢𑁆𑀬𑀸’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 𑀧𑀦 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀝𑁆𑀞𑀸𑀦𑁂 ‘‘𑀫𑀸𑀢𑀼𑀬𑀸, 𑀫𑀢𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀢𑁂𑀲𑀁 𑀯𑀘𑀦𑀸𑀦𑀁. 𑀢𑀣𑀸 𑀳𑀺 𑀉𑀫𑁆𑀫𑀸𑀤𑀦𑁆𑀢𑀺𑀚𑀸𑀢𑀓𑁂 ‘‘𑀫𑀢𑁆𑀬𑀸’’𑀢𑀺 𑀧𑀤𑀁 𑀧𑀜𑁆𑀘𑀫𑀻𑀢𑀢𑀺𑀬𑁂𑀓𑀯𑀘𑀦𑀯𑀲𑁂𑀦 𑀆𑀕𑀢𑀁, 𑀬𑀣𑀸 𑀧𑀦 ‘‘𑀔𑀢𑁆𑀢𑀺𑀬𑀸’’𑀢𑀺 𑀧𑀤𑀁 𑀫𑀚𑁆𑀛𑀲𑀭𑀮𑁄𑀧𑀯𑀲𑁂𑀦 ‘‘𑀔𑀢𑁆𑀬𑀸’’𑀢𑀺 𑀪𑀯𑀢𑀺, 𑀢𑀣𑀸 ‘‘𑀫𑀸𑀢𑀼𑀬𑀸 𑀫𑀸𑀢𑀼𑀬’’𑀦𑁆𑀢𑀺 𑀘 𑀧𑀤𑀁 ‘‘𑀫𑀢𑁆𑀬𑀸, 𑀫𑀢𑁆𑀬’’𑀦𑁆𑀢𑀺 𑀪𑀯𑀢𑀺, 𑀅𑀬𑀁 𑀦𑀬𑁄 𑀥𑀻𑀢𑀼𑀲𑀤𑁆𑀤𑀸𑀤𑀻𑀲𑀼 𑀦 𑀮𑀩𑁆𑀪𑀢𑀺.

𑀥𑀻𑀢𑀸, 𑀥𑀻𑀢𑀸, 𑀥𑀻𑀢𑀭𑁄. 𑀥𑀻𑀢𑀁, 𑀥𑀻𑀢𑀭𑀁, 𑀥𑀻𑀢𑀭𑁄. 𑀥𑀻𑀢𑀼𑀬𑀸, 𑀥𑀻𑀢𑀽𑀳𑀺, 𑀥𑀻𑀢𑀽𑀪𑀺. 𑀥𑀻𑀢𑀼, 𑀥𑀻𑀢𑀼𑀬𑀸, 𑀥𑀻𑀢𑀭𑀸𑀦𑀁, 𑀥𑀻𑀢𑀸𑀦𑀁, 𑀥𑀻𑀢𑀽𑀦𑀁. 𑀥𑀻𑀢𑀭𑀸, 𑀥𑀻𑀢𑀼𑀬𑀸, 𑀥𑀻𑀢𑀽𑀳𑀺, 𑀥𑀻𑀢𑀽𑀪𑀺. 𑀥𑀻𑀢𑀼, 𑀥𑀻𑀢𑀼𑀬𑀸, 𑀥𑀻𑀢𑀭𑀸𑀦𑀁, 𑀥𑀻𑀢𑀸𑀦𑀁, 𑀥𑀻𑀢𑀽𑀦𑀁. 𑀥𑀻𑀢𑀭𑀺, 𑀥𑀻𑀢𑀼𑀬𑀸, 𑀥𑀻𑀢𑀼𑀬𑀁, 𑀥𑀻𑀢𑀽𑀲𑀼. 𑀪𑁄𑀢𑀺 𑀥𑀻𑀢𑀼, 𑀪𑁄𑀢𑀺 𑀥𑀻𑀢𑀸, 𑀪𑁄𑀢𑀺𑀬𑁄 𑀥𑀻𑀢𑀸, 𑀥𑀻𑀢𑀭𑁄. 𑀏𑀢𑁆𑀣 𑀧𑀦.

‘‘𑀚𑀸𑀮𑀺𑀁 ¶ 𑀓𑀡𑁆𑀳𑀸𑀚𑀺𑀦𑀁 𑀥𑀻𑀢𑀁, 𑀫𑀤𑁆𑀤𑀺𑀤𑁂𑀯𑀺𑀁 𑀧𑀢𑀺𑀩𑁆𑀩𑀢𑀁;

𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸’’𑀢𑀺

𑀧𑀸𑀴𑀺𑀬𑀁 ‘‘𑀥𑀻𑀢’’𑀦𑁆𑀢𑀺 𑀤𑀲𑁆𑀲𑀦𑀢𑁄 𑀉𑀧𑀬𑁄𑀕𑀯𑀘𑀦𑀝𑁆𑀞𑀸𑀦𑁂 ‘‘𑀥𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀤𑀁 𑀲𑀸𑀭𑀢𑁄 𑀕𑀳𑁂𑀢𑀩𑁆𑀩𑀁, 𑀢𑀣𑀸 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀫𑀡𑀻 𑀳𑁄𑀢𑀺 𑀅𑀲𑀓𑁆𑀬𑀥𑀻𑀢𑀭𑀸’’𑀢𑀺 𑀲𑀫𑀸𑀲𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀢𑀢𑀺𑀬𑁂𑀓𑀯𑀘𑀦𑀦𑁆𑀢𑀧𑀤𑀲𑀤𑀺𑀲𑀁 ‘‘𑀲𑁂𑀝𑁆𑀞𑀺𑀥𑀻𑀢𑀭𑀸’’𑀢𑀺𑀆𑀤𑀺𑀓𑀁 𑀧𑀞𑀫𑁂𑀓𑀯𑀘𑀦𑀦𑁆𑀢𑀫𑁆𑀧𑀺 𑀲𑀫𑀸𑀲𑀧𑀤𑀁 𑀕𑀳𑁂𑀢𑀩𑁆𑀩𑀫𑁂𑀯, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀦 ‘‘𑀫𑀸𑀢𑀸 𑀥𑀻𑀢𑀸’’𑀢𑀺 𑀧𑀤𑀤𑁆𑀯𑀬𑀁 𑀲𑀤𑁆𑀥𑀸𑀦𑀬𑁂 𑀧𑀓𑁆𑀔𑀺𑀢𑁆𑀢, 𑀢𑀫𑀫𑁆𑀳𑁂𑀳𑀺 ‘‘𑀲𑀤𑁆𑀥𑀸𑀬𑀸’’𑀢𑀺 𑀧𑀤𑀲𑁆𑀲 𑀯𑀺𑀬 ‘‘𑀫𑀸𑀢𑀸𑀬𑀸’’𑀢𑀺𑀆𑀤𑀻𑀦𑀁 𑀧𑀸𑀴𑀺𑀆𑀤𑀻𑀲𑀼 𑀩𑁆𑀬𑀸𑀲𑁂 𑀅𑀤𑀲𑁆𑀲𑀦𑀢𑁄 𑀯𑀺𑀲𑀼𑀁 𑀕𑀳𑀺𑀢𑀁 𑀲𑀫𑀸𑀲𑁂𑀬𑁂𑀯 𑀳𑀺 𑀈𑀤𑀺𑀲𑀺𑀁 𑀲𑀤𑁆𑀤𑀕𑀢𑀺𑀁 𑀧𑀲𑁆𑀲𑀸𑀫 ‘‘𑀭𑀸𑀚𑀫𑀸𑀢𑀸𑀬 𑀭𑀸𑀚𑀥𑀻𑀢𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬𑀸’’𑀢𑀺. 𑀏𑀯𑀁 𑀓𑀜𑁆𑀜𑀸𑀦𑀬𑁄𑀧𑀺 𑀏𑀓𑀤𑁂𑀲𑁂𑀦 𑀮𑀩𑁆𑀪𑀢𑀺, 𑀢𑀣𑀸 ‘‘𑀅𑀘𑁆𑀙𑀭𑀺𑀬𑀁 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁 𑀦𑀦𑁆𑀤𑀫𑀸𑀢𑁂’’𑀢𑀺 𑀧𑀸𑀴𑀺𑀬𑀁 ‘‘𑀦𑀦𑁆𑀤𑀫𑀸𑀢𑁂’’𑀢𑀺 𑀤𑀲𑁆𑀲𑀦𑀢𑁄 ‘‘𑀪𑁄𑀢𑀺 𑀭𑀸𑀚𑀫𑀸𑀢𑁂, 𑀪𑁄𑀢𑀺 𑀭𑀸𑀚𑀥𑀻𑀢𑁂’’𑀢𑀺 𑀏𑀯𑀫𑀸𑀤𑀺𑀦𑀬𑁄𑀧𑀺 𑀮𑀩𑁆𑀪𑀢𑀺, 𑀢𑀢𑁆𑀭 𑀦𑀦𑁆𑀤𑀫𑀸𑀢𑁂𑀢𑀺 𑀦𑀦𑁆𑀤𑀲𑁆𑀲 𑀫𑀸𑀢𑀸 𑀦𑀦𑁆𑀤𑀫𑀸𑀢𑀸, 𑀪𑁄𑀢𑀺 𑀦𑀦𑁆𑀤𑀫𑀸𑀢𑁂, 𑀏𑀯𑀁 𑀲𑀫𑀸𑀲𑁂𑀬𑁂𑀯 𑀈𑀤𑀺𑀲𑀻 𑀲𑀤𑁆𑀤𑀕𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀸𑀲𑀧𑀤𑀢𑁆𑀢𑁂 ‘‘𑀫𑀸𑀢𑀼 𑀥𑀻𑀢𑀼 𑀤𑀼𑀳𑀺𑀢𑀼’’𑀇𑀘𑁆𑀘𑁂𑀢𑁂𑀲𑀁 𑀧𑀓𑀢𑀺𑀭𑀽𑀧𑀸𑀦𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀕𑀳𑁂𑀢𑀩𑁆𑀩𑀸 𑀧𑀞𑀫𑀁 𑀤𑀲𑁆𑀲𑀺𑀢𑀭𑀽𑀧𑀓𑁄𑀝𑁆𑀞𑀸𑀲𑁄 𑀘 𑀓𑀜𑁆𑀜𑀸𑀦𑀬𑁄 𑀭𑀽𑀧𑀓𑁄𑀝𑁆𑀞𑀸𑀲𑁄 𑀘𑀸𑀢𑀺. 𑀦𑀢𑁆𑀢𑀸𑀤𑀻𑀦𑀺 𑀧𑀤𑀸𑀦𑀺 𑀦 𑀓𑁂𑀯𑀮𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀅𑀣 𑀔𑁄 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺𑀧𑀺. 𑀢𑀣𑀸 𑀳𑀺 ‘‘𑀯𑀺𑀲𑀸𑀔𑀸𑀬 𑀦𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺. 𑀘𑀢𑀲𑁆𑀲𑁄 𑀫𑀽𑀲𑀺𑀓𑀸 𑀕𑀸𑀥𑀁 𑀓𑀢𑁆𑀢𑀸, 𑀦𑁄 𑀯𑀲𑀺𑀢𑀸’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀲𑀸𑀲𑀦𑁂 𑀤𑀺𑀲𑁆𑀲𑀦𑁆𑀢𑀺.

𑀦𑀢𑁆𑀢𑀸, 𑀦𑀢𑁆𑀢𑀸, 𑀦𑀢𑁆𑀢𑀸𑀭𑁄. 𑀦𑀢𑁆𑀢𑀁, 𑀦𑀢𑁆𑀢𑀸𑀭𑀁, 𑀦𑀢𑁆𑀢𑀸𑀭𑁄. 𑀦𑀢𑁆𑀢𑀸𑀭𑀸, 𑀦𑀢𑁆𑀢𑀼𑀬𑀸, 𑀦𑀢𑁆𑀢𑀽𑀳𑀺, 𑀦𑀢𑁆𑀢𑀽𑀪𑀺. 𑀦𑀢𑁆𑀢𑀼, 𑀦𑀢𑁆𑀢𑀼𑀬𑀸, 𑀦𑀢𑁆𑀢𑀸𑀭𑀸𑀦𑀁 ¶ 𑀦𑀢𑁆𑀢𑀸𑀦𑀁, 𑀦𑀢𑁆𑀢𑀽𑀦𑀁. 𑀦𑀢𑁆𑀢𑀸𑀭𑀸, 𑀦𑀢𑁆𑀢𑀼𑀬𑀸, 𑀦𑀢𑁆𑀢𑀽𑀳𑀺, 𑀦𑀢𑁆𑀢𑀽𑀪𑀺. 𑀦𑀢𑁆𑀢𑀼, 𑀦𑀢𑁆𑀢𑀼𑀬𑀸, 𑀦𑀢𑁆𑀢𑀸𑀭𑀸𑀦𑀁, 𑀦𑀢𑁆𑀢𑀸𑀦𑀁, 𑀦𑀢𑁆𑀢𑀽𑀦𑀁. 𑀦𑀢𑁆𑀢𑀭𑀺, 𑀦𑀢𑁆𑀢𑀼𑀬𑀸, 𑀦𑀢𑁆𑀢𑀼𑀬𑀁, 𑀦𑀢𑁆𑀢𑀽𑀲𑀼. 𑀪𑁄𑀢𑀺 𑀦𑀢𑁆𑀢, 𑀪𑁄𑀢𑀺 𑀦𑀢𑁆𑀢𑀸, 𑀪𑁄𑀢𑀺𑀬𑁄 𑀦𑀢𑁆𑀢𑀸, 𑀦𑀢𑁆𑀢𑀸𑀭𑁄.

𑀏𑀯𑀁 ‘‘𑀓𑀢𑁆𑀢𑀸 𑀯𑀲𑀺𑀢𑀸 𑀪𑀸𑀲𑀺𑀢𑀸’’ 𑀇𑀘𑁆𑀘𑀸𑀤𑀻𑀲𑀼𑀧𑀺 𑀲𑀫𑀸𑀲𑀧𑀤𑀢𑁆𑀢𑁂 𑀧𑀦 ‘‘𑀭𑀸𑀚𑀫𑀸𑀢𑀸𑀬 𑀦𑀦𑁆𑀤𑀫𑀸𑀢𑁂’’𑀢𑀺𑀆𑀤𑀻𑀦𑀺 𑀯𑀺𑀬 ‘‘𑀭𑀸𑀚𑀦𑀢𑁆𑀢𑀸𑀬, 𑀭𑀸𑀚𑀦𑀢𑁆𑀢𑁂’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀆𑀓𑀸𑀭𑀦𑁆𑀢𑀼𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀆𑀓𑀸𑀭𑀦𑁆𑀢𑀼𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁

𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀪𑀽𑀫𑀺𑀧𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀭𑀢𑁆𑀢𑀺, 𑀭𑀢𑁆𑀢𑀻, 𑀭𑀢𑁆𑀢𑀺𑀬𑁄. 𑀭𑀢𑁆𑀢𑀺𑀁, 𑀭𑀢𑁆𑀢𑀻, 𑀭𑀢𑁆𑀢𑀺𑀬𑁄. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀳𑀺, 𑀭𑀢𑁆𑀢𑀻𑀪𑀺. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀦𑀁. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀳𑀺, 𑀭𑀢𑁆𑀢𑀻𑀪𑀺. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀦𑀁. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀺𑀬𑀁, 𑀭𑀢𑁆𑀢𑀻𑀲𑀼. 𑀪𑁄𑀢𑀺 𑀭𑀢𑁆𑀢𑀺, 𑀪𑁄𑀢𑀺𑀬𑁄 𑀭𑀢𑁆𑀢𑀺𑀬𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

‘‘𑀪𑀽𑀫𑀺, 𑀪𑀽𑀫𑀻, 𑀪𑀽𑀫𑀺𑀬𑁄. 𑀪𑀽𑀫𑀺𑀁, 𑀪𑀽𑀫𑀻, 𑀪𑀽𑀫𑀺𑀬𑁄’’𑀢𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀏𑀯𑀁 ‘‘𑀪𑀽𑀢𑀺 𑀲𑀢𑁆𑀢𑀺 𑀧𑀢𑁆𑀢𑀺 𑀯𑀼𑀢𑁆𑀢𑀺 𑀫𑀼𑀢𑁆𑀢𑀺 𑀓𑀺𑀢𑁆𑀢𑀺 𑀔𑀦𑁆𑀢𑀺 𑀢𑀺𑀢𑁆𑀢𑀺 𑀲𑀺𑀤𑁆𑀥𑀺 𑀇𑀤𑁆𑀥𑀺 𑀯𑀼𑀤𑁆𑀥𑀺 𑀲𑀼𑀤𑁆𑀥𑀺 𑀩𑀼𑀤𑁆𑀥𑀺 𑀩𑁄𑀥𑀺 𑀧𑀻𑀢𑀺 𑀦𑀦𑁆𑀤𑀺 𑀫𑀢𑀺 𑀅𑀲𑀦𑀺 𑀯𑀲𑀦𑀺 𑀲𑀢𑀺 𑀕𑀢𑀺 𑀯𑀼𑀟𑁆𑀠𑀺 𑀬𑀼𑀯𑀢𑀺 𑀅𑀗𑁆𑀕𑀼𑀮𑀺 𑀩𑁄𑀦𑁆𑀤𑀺 𑀤𑀺𑀝𑁆𑀞𑀺 𑀢𑀼𑀝𑁆𑀞𑀺 𑀦𑀸𑀪𑀺’’ 𑀇𑀘𑁆𑀘𑀸𑀤𑀻𑀦𑀫𑁆𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀧𑀺𑀘 ‘‘𑀭𑀢𑁆𑀬𑁄 𑀅𑀫𑁄𑀖𑀸 𑀕𑀘𑁆𑀙𑀦𑁆𑀢𑀺. 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀳𑀭𑀦𑁆𑀢𑀺 𑀬𑁂 𑀩𑀮𑀺𑀁. 𑀦 𑀪𑀽𑀫𑁆𑀬𑀸 𑀘𑀢𑀼𑀭𑀗𑁆𑀕𑀼𑀮𑁄. 𑀲𑁂𑀢𑀺 𑀪𑀽𑀫𑁆𑀬𑀸 𑀅𑀦𑀼𑀢𑁆𑀣𑀼𑀦𑀁. 𑀪𑀽𑀫𑁆𑀬𑀸 𑀲𑁄 𑀧𑀢𑀺𑀢𑀁 𑀧𑀸𑀲𑀁. 𑀕𑀻𑀯𑀸𑀬 𑀧𑀝𑀺𑀫𑀼𑀜𑁆𑀘𑀢𑀺. 𑀇𑀫𑀸 𑀘 𑀦𑀪𑁆𑀬𑁄 𑀲𑀢𑀭𑀸𑀚𑀺𑀘𑀺𑀢𑁆𑀢𑀺𑀢𑀸. 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀧𑁆𑀧𑀪𑀸𑀲𑀭𑁂’’𑀢𑀺 𑀏𑀯𑀫𑀸𑀤𑀻𑀦𑀁 ¶ 𑀧𑀬𑁄𑀕𑀸𑀦𑀁 𑀤𑀲𑁆𑀲𑀦𑀢𑁄 𑀭𑀢𑁆𑀢𑀺 𑀪𑀽𑀫𑀺 𑀦𑀸𑀪𑀺𑀲𑀤𑁆𑀤𑀸𑀤𑀻𑀦𑀁 𑀅𑀬𑀫𑁆𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁?

𑀭𑀢𑁆𑀢𑀺, 𑀭𑀢𑁆𑀢𑀻, 𑀭𑀢𑁆𑀢𑀺𑀬𑁄, 𑀭𑀢𑁆𑀬𑁄. 𑀭𑀢𑁆𑀢𑀺𑀁, 𑀭𑀢𑁆𑀢𑀻, 𑀭𑀢𑁆𑀢𑀺𑀬𑁄, 𑀭𑀢𑁆𑀬𑁄. 𑀭𑀢𑁆𑀢𑀺𑀬𑀸, 𑀭𑀢𑁆𑀬𑀸, 𑀭𑀢𑁆𑀢𑀻𑀳𑀺, 𑀭𑀢𑁆𑀢𑀻𑀪𑀺. 𑀭𑀢𑁆𑀢𑀺𑀬𑀸, 𑀭𑀢𑁆𑀬𑀸, 𑀭𑀢𑁆𑀢𑀻𑀦𑀁. 𑀭𑀢𑁆𑀢𑀺𑀬𑀸, 𑀭𑀢𑁆𑀬𑀸, 𑀭𑀢𑁆𑀢𑀻𑀳𑀺, 𑀭𑀢𑁆𑀢𑀻𑀪𑀺. 𑀭𑀢𑁆𑀢𑀺𑀬𑀸, 𑀭𑀢𑁆𑀬𑀸, 𑀭𑀢𑁆𑀢𑀻𑀦𑀁. 𑀭𑀢𑁆𑀢𑀺𑀬𑀸, 𑀭𑀢𑁆𑀬𑀸, 𑀭𑀢𑁆𑀢𑀺𑀬𑀁 𑀭𑀢𑁆𑀬𑀁, 𑀭𑀢𑁆𑀢𑁄, 𑀭𑀢𑁆𑀢𑀻𑀲𑀼. 𑀪𑁄𑀢𑀺 𑀭𑀢𑁆𑀢𑀺, 𑀪𑁄𑀢𑀺𑀬𑁄 𑀭𑀢𑁆𑀢𑀻, 𑀭𑀢𑁆𑀢𑀺𑀬𑁄, 𑀭𑀢𑁆𑀬𑁄.

𑀏𑀢𑁆𑀣 ‘‘𑀭𑀢𑁆𑀢𑁄’’𑀢𑀺 𑀭𑀽𑀧𑀦𑀬𑀁 𑀯𑀚𑁆𑀚𑁂𑀢𑁆𑀯𑀸 ‘‘𑀪𑀽𑀫𑀺, 𑀪𑀽𑀫𑀻, 𑀪𑀽𑀫𑀺𑀬𑁄, 𑀪𑀽𑀫𑁆𑀬𑁄’’𑀢𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁.

𑀦𑀸𑀪𑀺, 𑀦𑀸𑀪𑀻, 𑀦𑀸𑀪𑀺𑀬𑁄, 𑀦𑀪𑁆𑀬𑁄. 𑀦𑀸𑀪𑀺𑀁, 𑀦𑀸𑀪𑀻, 𑀦𑀸𑀪𑀺𑀬𑁄, 𑀦𑀪𑁆𑀬𑁄. 𑀦𑀸𑀪𑀺𑀬𑀸, 𑀦𑀪𑁆𑀬𑀸, 𑀦𑀸𑀪𑀻𑀳𑀺, 𑀦𑀸𑀪𑀻𑀪𑀺. 𑀦𑀸𑀪𑀺𑀬𑀸, 𑀦𑀪𑁆𑀬𑀸, 𑀦𑀸𑀪𑀻𑀦𑀁. 𑀦𑀸𑀪𑀺𑀬𑀸, 𑀦𑀪𑁆𑀬𑀸, 𑀦𑀸𑀪𑀻𑀳𑀺, 𑀦𑀸𑀪𑀻𑀪𑀺. 𑀦𑀸𑀪𑀺𑀬𑀸, 𑀦𑀪𑁆𑀬𑀸, 𑀦𑀸𑀪𑀻𑀦𑀁. 𑀦𑀸𑀪𑀺𑀬𑀸, 𑀦𑀪𑁆𑀬𑀸, 𑀦𑀸𑀪𑀺𑀬𑀁, 𑀦𑀪𑁆𑀬𑀁, 𑀦𑀸𑀪𑀻𑀲𑀼. 𑀪𑁄𑀢𑀺 𑀦𑀸𑀪𑀺, 𑀪𑁄𑀢𑀺𑀬𑁄 𑀦𑀸𑀪𑀻, 𑀦𑀸𑀪𑀺𑀬𑁄, 𑀦𑀪𑁆𑀬𑁄.

𑀩𑁄𑀥𑀺, 𑀩𑁄𑀥𑀻, 𑀩𑁄𑀥𑀺𑀬𑁄, 𑀩𑁄𑀚𑁆𑀛𑁄. 𑀩𑁄𑀥𑀺𑀁, 𑀩𑁄𑀥𑀺𑀬𑀁, 𑀩𑁄𑀚𑁆𑀛𑀁, 𑀩𑁄𑀥𑀻, 𑀩𑁄𑀥𑀺𑀬𑁄, 𑀩𑁄𑀚𑁆𑀛𑁄. 𑀩𑁄𑀥𑀺𑀬𑀸, 𑀩𑁄𑀚𑁆𑀛𑀸, 𑀩𑁄𑀥𑀻𑀳𑀺, 𑀩𑁄𑀥𑀻𑀪𑀺. 𑀩𑁄𑀥𑀺𑀬𑀸, 𑀩𑁄𑀚𑁆𑀛𑀸, 𑀩𑁄𑀥𑀻𑀦𑀁. 𑀩𑁄𑀥𑀺𑀬𑀸, 𑀩𑁄𑀚𑁆𑀛𑀸, 𑀩𑁄𑀥𑀻𑀳𑀺, 𑀩𑁄𑀥𑀻𑀪𑀺. 𑀩𑁄𑀥𑀺𑀬𑀸, 𑀩𑁄𑀚𑁆𑀛𑀸, 𑀩𑁄𑀥𑀻𑀦𑀁. 𑀩𑁄𑀥𑀺𑀬𑀸, 𑀩𑁄𑀚𑁆𑀛𑀸, 𑀩𑁄𑀥𑀺𑀬𑀁, 𑀩𑁄𑀚𑁆𑀛𑀁, 𑀩𑁄𑀥𑀻𑀲𑀼. 𑀪𑁄𑀢𑀺 𑀩𑁄𑀥𑀺, 𑀪𑁄𑀢𑀺𑀬𑁄 𑀩𑁄𑀥𑀻, 𑀩𑁄𑀥𑀺𑀬𑁄, 𑀩𑁄𑀚𑁆𑀛𑁄.

𑀏𑀢𑁆𑀣 𑀧𑀦 ‘‘𑀩𑀼𑀚𑁆𑀛𑀲𑁆𑀲𑀼 𑀚𑀺𑀦 𑀩𑁄𑀥𑀺𑀬𑀁. 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀸 𑀢𑀧𑀲𑀸’’𑀢𑀺 𑀯𑀺𑀘𑀺𑀢𑁆𑀭𑀧𑀸𑀴𑀺𑀦𑀬𑀤𑀲𑁆𑀲𑀦𑀢𑁄 𑀯𑀺𑀘𑀺𑀢𑁆𑀭𑀦𑀬𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀢𑁆𑀢𑀸. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀇𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀇𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀇𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁

𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 ¶ 𑀪𑀽𑀭𑀻𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀇𑀢𑁆𑀣𑀻, 𑀇𑀢𑁆𑀣𑀻, 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀺𑀁, 𑀇𑀢𑁆𑀣𑀻, 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀳𑀺, 𑀇𑀢𑁆𑀣𑀻𑀪𑀺. 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀦𑀁. 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀳𑀺, 𑀇𑀢𑁆𑀣𑀻𑀪𑀺. 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀦𑀁. 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀺𑀬𑀁, 𑀇𑀢𑁆𑀣𑀻𑀲𑀼. 𑀪𑁄𑀢𑀺 𑀇𑀢𑁆𑀣𑀺, 𑀪𑁄𑀢𑀺𑀬𑁄 𑀇𑀢𑁆𑀣𑀺𑀬𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

‘‘𑀪𑀽𑀭𑀻, 𑀪𑀽𑀭𑀻, 𑀪𑀽𑀭𑀺𑀬𑁄. 𑀪𑀽𑀭𑀺𑀁, 𑀪𑀽𑀭𑀻, 𑀪𑀽𑀭𑀺 𑀬𑁄’’𑀢𑀺 𑀇𑀢𑁆𑀣𑀺𑀬𑀸 𑀲𑀫𑀁. 𑀏𑀯𑀁 𑀪𑀽𑀢𑀻 𑀪𑁄𑀢𑀻 𑀯𑀺𑀪𑀸𑀯𑀺𑀦𑀻 𑀇𑀘𑁆𑀘𑀸𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀈𑀓𑀸𑀭𑀦𑁆𑀢𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣𑀜𑁆𑀜𑁂 𑀈𑀓𑀸𑀭𑀦𑁆𑀢𑀲𑀤𑁆𑀤𑀸 𑀦𑀸𑀫 𑁋

‘‘𑀫𑀸𑀢𑀼𑀮𑀸𑀦𑀻 𑀘 𑀪𑀕𑀺𑀦𑀻, 𑀪𑀺𑀓𑁆𑀔𑀼𑀦𑀻 𑀲𑀸𑀫𑀼𑀕𑀻 𑀅𑀚𑀻;

𑀯𑀸𑀧𑀻 𑀧𑁄𑀓𑁆𑀔𑀭𑀡𑀻 𑀤𑁂𑀯𑀻, 𑀦𑀸𑀕𑀻 𑀬𑀓𑁆𑀔𑀺𑀦𑀻 𑀭𑀸𑀚𑀺𑀦𑀻.

𑀤𑀸𑀲𑀻 𑀘 𑀩𑁆𑀭𑀸𑀳𑁆𑀫𑀡𑀻 𑀫𑀼𑀝𑁆𑀞-𑀲𑁆𑀲𑀢𑀺𑀦𑀻 𑀲𑀻𑀖𑀬𑀸𑀬𑀺𑀦𑀻;

𑀲𑀸𑀓𑀺𑀬𑀸𑀦𑀻’’𑀢𑀺 𑀘𑀸𑀤𑀻𑀦𑀺, 𑀧𑀬𑁄𑀕𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀢𑀢𑁆𑀭 ‘‘𑀧𑁄𑀓𑁆𑀔𑀭𑀡𑀻 𑀤𑀸𑀲𑀻, 𑀩𑁆𑀭𑀸𑀳𑁆𑀫𑀡𑀺’’𑀘𑁆𑀘𑀸𑀤𑀺𑀦𑀁 𑀕𑀢𑀺;

𑀅𑀜𑁆𑀜𑀣𑀸𑀧𑀺 𑀲𑀺𑀬𑀸 𑀕𑀸𑀣𑀸-𑀘𑀼𑀡𑁆𑀡𑀺𑀬𑁂𑀲𑀼 𑀬𑀣𑀸𑀭𑀳𑀁.

‘‘𑀓𑀼𑀲𑀸𑀯𑀢𑀻’’𑀢𑀺𑀆𑀤𑀻𑀦𑀁, 𑀕𑀸𑀣𑀸𑀲𑁆𑀯𑁂𑀯 𑀯𑀺𑀲𑁂𑀲𑀢𑁄;

𑀭𑀽𑀧𑀸𑀦𑀺 𑀅𑀜𑁆𑀜𑀣𑀸 𑀳𑁄𑀦𑁆𑀢𑀺, 𑀏𑀓𑀯𑀘𑀦𑀢𑁄 𑀯𑀤𑁂.

‘‘𑀓𑀸𑀲𑀻 𑀅𑀯𑀦𑁆𑀢𑀻’’𑀇𑀘𑁆𑀘𑀸𑀤𑀻, 𑀩𑀳𑀼𑀯𑀘𑀦𑀢𑁄 𑀯𑀤𑁂;

‘‘𑀘𑀦𑁆𑀤𑀯𑀢𑀻’’𑀢𑀺𑀆𑀤𑀻𑀦𑀺, 𑀧𑀬𑁄𑀕𑀲𑁆𑀲𑀸𑀦𑀼𑀭𑀽𑀧𑀢𑁄.

𑀢𑀣𑀸 𑀳𑀺 ‘‘𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀫𑀸𑀧𑀺𑀢𑀸. 𑀢𑀸 𑀘 𑀲𑀢𑁆𑀢𑀲𑀢𑀸 𑀪𑀭𑀺𑀬𑀸, 𑀤𑀸𑀲𑁆𑀬𑁄 𑀲𑀢𑁆𑀢𑀲𑀢𑀸𑀦𑀺 𑀘. 𑀤𑀸𑀭𑀓𑁂 𑀘 𑀅𑀳𑀁 𑀦𑁂𑀲𑁆𑀲𑀁 ¶ , 𑀩𑁆𑀭𑀸𑀳𑁆𑀫𑀡𑁆𑀬𑀸 𑀧𑀭𑀺𑀘𑀸𑀭𑀓𑁂. 𑀦𑀚𑁆𑀚𑁄 𑀲𑀦𑁆𑀤𑀦𑁆𑀢𑀺. 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂. 𑀮𑀓𑁆𑀔𑁆𑀬𑀸 𑀪𑀯 𑀦𑀺𑀯𑁂𑀲𑀦𑀁.

𑀩𑀸𑀭𑀸𑀡𑀲𑁆𑀬𑀁 𑀫𑀳𑀸𑀭𑀸𑀚, 𑀓𑀸𑀓𑀭𑀸𑀚𑀸 𑀦𑀺𑀯𑀸𑀲𑀓𑁄;

𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑁂𑀳𑀺, 𑀲𑀼𑀧𑀢𑁆𑀢𑁄 𑀧𑀭𑀺𑀯𑀸𑀭𑀺𑀢𑁄.

𑀭𑀸𑀚𑀸 𑀬𑀣𑀸 𑀯𑁂𑀲𑁆𑀲𑀯𑀡𑁄 𑀦𑀴𑀺𑀜𑁆𑀜’’𑀦𑁆𑀢𑀺

𑀏𑀯𑀫𑀸𑀤𑀻𑀦𑀁 𑀧𑀸𑀴𑀻𑀦𑀁 𑀤𑀲𑁆𑀲𑀦𑀢𑁄 𑀧𑁄𑀓𑁆𑀔𑀭𑀡𑀻 𑀇𑀘𑁆𑀘𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀲𑀯𑀺𑀲𑁂𑀲𑀸 𑀬𑁄𑀚𑁂𑀢𑀩𑁆𑀩𑀸. 𑀓𑀣𑀁? ‘𑀧𑁄𑀓𑁆𑀔𑀭𑀡𑀻, 𑀧𑁄𑀓𑁆𑀔𑀭𑀡𑀻, 𑀧𑁄𑀓𑁆𑀔𑀭𑀡𑀺𑀬𑁄, 𑀧𑁄𑀓𑁆𑀔𑀭𑀜𑁆𑀜𑁄. 𑀧𑁄𑀓𑁆𑀔𑀭𑀡𑀺’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀺𑀯𑀘𑀦𑀝𑁆𑀞𑀸𑀦𑁂 ‘‘𑀧𑁄𑀓𑁆𑀔𑀭𑀡𑀺𑀬𑀸, 𑀧𑁄𑀓𑁆𑀔𑀭𑀜𑁆𑀜𑀸’’𑀢𑀺 𑀏𑀓𑀯𑀘𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀪𑀼𑀫𑁆𑀫𑀯𑀘𑀦𑀝𑁆𑀞𑀸𑀦𑁂 𑀧𑀦 ‘‘𑀧𑁄𑀓𑁆𑀔𑀭𑀡𑀺𑀬𑀸, 𑀧𑁄𑀓𑁆𑀔𑀭𑀜𑁆𑀜𑀸, 𑀧𑁄𑀓𑁆𑀔𑀭𑀡𑀺𑀬𑀁, 𑀧𑁄𑀓𑁆𑀔𑀭𑀜𑁆𑀜’’𑀦𑁆𑀢𑀺 𑀘 𑀏𑀓𑀯𑀘𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀲𑀩𑁆𑀩𑀢𑁆𑀣 𑀘 𑀧𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀢𑀣𑀸 ‘‘𑀤𑀸𑀲𑀻, 𑀤𑀸𑀲𑀻, 𑀤𑀸𑀲𑀺𑀬𑁄, 𑀤𑀸𑀲𑁆𑀬𑁄. 𑀤𑀸𑀲𑀺𑀁, 𑀤𑀸𑀲𑀺𑀬𑀁, 𑀤𑀸𑀲𑀻, 𑀤𑀸𑀲𑀺𑀬𑁄, 𑀤𑀸𑀲𑁆𑀬𑁄’’𑀢𑀺 𑀯𑀢𑁆𑀯𑀸 𑀓𑀭𑀡𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀤𑀸𑀲𑀺𑀬𑀸, 𑀤𑀸𑀲𑁆𑀬𑀸’’𑀢𑀺 𑀏𑀓𑀯𑀘𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀪𑀼𑀫𑁆𑀫𑀯𑀘𑀦𑀝𑁆𑀞𑀸𑀦𑁂 𑀧𑀦 ‘‘𑀤𑀸𑀲𑀺𑀬𑀸, 𑀤𑀸𑀲𑁆𑀬𑀸, 𑀤𑀸𑀲𑀺𑀬𑀁, 𑀤𑀸𑀲𑁆𑀬’’𑀦𑁆𑀢𑀺 𑀘 𑀏𑀓𑀯𑀘𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀲𑀩𑁆𑀩𑀢𑁆𑀣 𑀧𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀧𑀦 ‘‘𑀬𑀝𑁆𑀞𑀺𑀬𑀸 𑀧𑀝𑀺𑀓𑁄𑀝𑁂𑀢𑀺, 𑀖𑀭𑁂 𑀚𑀸𑀢𑀁𑀯 𑀤𑀸𑀲𑀺𑀬𑀁. 𑀨𑀼𑀲𑀺𑀲𑁆𑀲𑀸𑀫𑀺 𑀯𑀺𑀫𑀼𑀢𑁆𑀢𑀺𑀬’’𑀦𑁆𑀢𑀺 𑀧𑀬𑁄𑀕𑀸𑀦𑀁 𑀤𑀲𑁆𑀲𑀦𑀢𑁄 𑀅𑀁𑀯𑀘𑀦𑀲𑁆𑀲 𑀬𑀫𑀸𑀤𑁂𑀲𑀯𑀲𑁂𑀦 ‘‘𑀤𑀸𑀲𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀘 ‘‘𑀖𑀭𑁂 𑀚𑀸𑀢𑀁𑀯 𑀤𑀸𑀲𑀺𑀬’’𑀦𑁆𑀢𑀺 𑀏𑀢𑁆𑀣 𑀅𑀁𑀯𑀘𑀦𑀲𑁆𑀲 𑀬𑀫𑀸𑀤𑁂𑀲𑀢𑁄 𑀅𑀜𑁆𑀜𑁄𑀧𑀺 𑀲𑀤𑁆𑀤𑀦𑀬𑁄 𑀮𑀩𑁆𑀪𑀢𑀺. 𑀓𑀣𑀁? 𑀬𑀣𑀸 𑀤𑀳𑀭𑀻 𑀏𑀯 ‘‘𑀤𑀳𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀤𑀸𑀲𑀻 𑀏𑀯 ‘‘𑀤𑀸𑀲𑀺𑀬𑀸’’𑀢𑀺.

𑀏𑀢𑁆𑀣 𑀧𑀦 ‘‘𑀧𑀲𑁆𑀲𑀸𑀫𑀺 𑀯𑁄𑀳𑀁 𑀤𑀳𑀭𑀺𑀁, 𑀓𑀼𑀫𑀸𑀭𑀺𑀁 𑀘𑀸𑀭𑀼𑀤𑀲𑁆𑀲𑀦’’𑀦𑁆𑀢𑀺 𑀘 ‘‘𑀬𑁂 𑀢𑀁 𑀚𑀺𑀡𑁆𑀡𑀲𑁆𑀲 𑀧𑀸𑀤𑀁𑀲𑀼, 𑀏𑀯𑀁 𑀤𑀳𑀭𑀺𑀬𑀁 𑀲𑀢𑀺’’𑀦𑁆𑀢𑀺 𑀘 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁 ¶ , 𑀉𑀧𑀬𑁄𑀕𑀯𑀘𑀦𑀺𑀘𑁆𑀙𑀸𑀬 ‘‘𑀤𑀸𑀲𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀫𑀲𑁆𑀫𑀺𑀁 𑀧𑀦𑀸𑀥𑀺𑀧𑁆𑀧𑀸𑀬𑁂 ‘‘𑀤𑀸𑀲𑀺𑀬𑀸, 𑀤𑀸𑀲𑀺𑀬𑀸, 𑀤𑀸𑀲𑀺𑀬𑀸𑀬𑁄. 𑀤𑀸𑀲𑀺𑀬𑀁, 𑀤𑀸𑀲𑀺𑀬𑀸, 𑀤𑀸𑀲𑀺𑀬𑀸𑀬𑁄. 𑀤𑀸𑀲𑀺𑀬𑀸𑀬𑀸’’𑀢𑀺 𑀓𑀜𑁆𑀜𑀸𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺 ‘‘𑀓𑀼𑀫𑀸𑀭𑀺𑀬𑀸’’𑀢𑀺 𑀲𑀤𑁆𑀤𑀲𑁆𑀲𑁂𑀯. 𑀢𑀣𑀸 𑀳𑀺 ‘‘𑀓𑀼𑀫𑀸𑀭𑀺𑀬𑁂 𑀉𑀧𑀲𑁂𑀦𑀺𑀬𑁂’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀣𑀸 ‘‘𑀧𑀼𑀧𑁆𑀨𑀯𑀢𑀺𑀬𑀸, 𑀧𑀼𑀧𑁆𑀨𑀯𑀢𑀺𑀬𑀁, 𑀧𑀼𑀧𑁆𑀨𑀯𑀢𑀺𑀬𑀸𑀬, 𑀧𑀼𑀧𑁆𑀨𑀯𑀢𑀺𑀬𑀸𑀬𑀁, 𑀪𑁄𑀢𑀺 𑀧𑀼𑀧𑁆𑀨𑀯𑀢𑀺𑀬𑁂’’𑀢𑀺 𑀓𑀜𑁆𑀜𑀸𑀦𑀬𑀦𑀺𑀲𑁆𑀲𑀺𑀢𑁂𑀦 𑀏𑀓𑀯𑀘𑀦𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀏𑀢𑁆𑀣 𑀧𑀦 ‘‘𑀅𑀢𑀻𑀢𑁂 𑀅𑀬𑀁 𑀩𑀸𑀭𑀸𑀡𑀲𑀻 𑀧𑀼𑀧𑁆𑀨𑀯𑀢𑀺𑀬𑀸 𑀦𑀸𑀫 𑀅𑀳𑁄𑀲𑀺. 𑀭𑀸𑀚𑀸𑀲𑀺 𑀮𑀼𑀤𑁆𑀤𑀓𑀫𑁆𑀫𑁄, 𑀏𑀓𑀭𑀸𑀚𑀸 𑀧𑀼𑀧𑁆𑀨𑀯𑀢𑀺𑀬𑀸𑀬𑀁. 𑀉𑀬𑁆𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸𑀬𑀸’’𑀢𑀺 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸𑀧𑀸𑀞𑁄 𑀘 𑀦𑀺𑀤𑀲𑁆𑀲𑀦𑀁. 𑀅𑀧𑀭𑁄 𑀦𑀬𑁄 𑁋 ‘‘𑀤𑀸𑀲𑀺𑀬𑀸 𑀤𑀳𑀭𑀺𑀬𑀸 𑀓𑀼𑀫𑀸𑀭𑀺𑀬𑀸’’𑀢𑀺𑀆𑀤𑀻𑀲𑀼 𑀓𑀓𑀸𑀭𑀲𑁆𑀲 𑀬𑀓𑀸𑀭𑀸𑀤𑁂𑀲𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀩𑁆𑀭𑀸𑀳𑁆𑀫𑀡𑀻𑀲𑀤𑁆𑀤𑀲𑁆𑀲 𑀢𑀼 ‘‘𑀩𑁆𑀭𑀸𑀳𑁆𑀫𑀡𑀻, 𑀩𑁆𑀭𑀸𑀳𑁆𑀫𑀡𑀻, 𑀩𑁆𑀭𑀸𑀳𑁆𑀫𑀡𑀺𑀬𑁄, 𑀩𑁆𑀭𑀸𑀳𑁆𑀫𑀡𑁆𑀬𑁄. 𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀓𑀭𑀡𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀩𑁆𑀭𑀸𑀳𑁆𑀫𑀡𑀺𑀬𑀸, 𑀩𑁆𑀭𑀸𑀳𑁆𑀫𑀡𑁆𑀬𑀸’’𑀢𑀺 𑀏𑀓𑀯𑀘𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀲𑀩𑁆𑀩𑀢𑁆𑀣 𑀘 𑀧𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀦𑀤𑀻𑀲𑀤𑁆𑀤𑀲𑁆𑀲 ‘‘𑀦𑀤𑀻, 𑀦𑀤𑀻, 𑀦𑀤𑀺𑀬𑁄, 𑀦𑀚𑁆𑀚𑁄. 𑀦𑀤𑀺’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 ‘‘𑀦𑀤𑀺𑀬𑀸, 𑀦𑀚𑁆𑀚𑀸’’𑀢𑀺 𑀘 ‘‘𑀦𑀤𑀺𑀬𑀁, 𑀦𑀚𑁆𑀚’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀁, 𑀲𑀩𑁆𑀩𑀢𑁆𑀣 𑀘 𑀧𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀇𑀢𑁆𑀣𑀺𑀮𑀺𑀗𑁆𑀕𑁂𑀲𑀼 𑀳𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀉𑀧𑀬𑁄𑀕𑀩𑀳𑀼𑀯𑀘𑀦𑀁 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀢𑀣𑀸 𑀉𑀧𑀬𑁄𑀕𑀩𑀳𑀼𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁 𑀅𑀦𑀸𑀕𑀢𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀸𑀦𑀫𑁆𑀧𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑀺𑀝𑁆𑀞𑁂𑀬𑁂𑀯 𑀅𑀜𑁆𑀜𑀢𑀭𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 ‘‘𑀤𑀸𑀲𑀸 𑀘 𑀤𑀸𑀲𑁆𑀬𑁄 𑀅𑀦𑀼𑀚𑀻𑀯𑀺𑀦𑁄 𑀘𑀸’’𑀢𑀺 𑀏𑀢𑁆𑀣 ‘‘𑀤𑀸𑀲𑁆𑀬𑁄’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀅𑀧𑀭𑀫𑁆𑀧𑀺 ‘‘𑀤𑀸𑀲𑁆𑀬𑁄’’𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁 𑀢𑀁𑀲𑀤𑀺𑀲𑀢𑁆𑀢𑀸 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺.

‘‘𑀲𑀓𑁆𑀓𑁄 ¶ 𑀘 𑀫𑁂 𑀯𑀭𑀁 𑀤𑀚𑁆𑀚𑀸, 𑀲𑁄 𑀘 𑀮𑀩𑁆𑀪𑁂𑀣 𑀫𑁂 𑀯𑀭𑁄;

𑀏𑀓𑀭𑀢𑁆𑀢𑀁 𑀤𑁆𑀯𑀺𑀭𑀢𑁆𑀢𑀁 𑀯𑀸, 𑀪𑀯𑁂𑀬𑁆𑀬𑀁 𑀅𑀪𑀺𑀧𑀸𑀭𑀓𑁄;

𑀉𑀫𑁆𑀫𑀸𑀤𑀦𑁆𑀢𑁆𑀬𑀸 𑀭𑀫𑀺𑀢𑁆𑀯𑀸𑀦, 𑀲𑀺𑀯𑀺𑀭𑀸𑀚𑀸 𑀢𑀢𑁄 𑀲𑀺𑀬’’𑀦𑁆𑀢𑀺

𑀏𑀢𑁆𑀣 ‘‘𑀉𑀫𑁆𑀫𑀸𑀤𑀦𑁆𑀢𑁆𑀬𑀸’’𑀢𑀺 𑀓𑀭𑀡𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀢𑀁𑀲𑀤𑀺𑀲𑀸𑀦𑀺 𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. ‘‘𑀩𑁆𑀭𑀸𑀳𑁆𑀫𑀡𑁆𑀬𑀸 𑀧𑀭𑀺𑀘𑀸𑀭𑀓𑁂’’𑀢𑀺 𑀏𑀢𑁆𑀣 ‘‘𑀩𑁆𑀭𑀸𑀳𑁆𑀫𑀡𑁆𑀬𑀸’’𑀢𑀺 𑀲𑀸𑀫𑀺𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀢𑀁𑀲𑀤𑀺𑀲𑀸𑀦𑀺 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀪𑀼𑀫𑁆𑀫𑀯𑀘𑀦𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. ‘‘𑀲𑁂𑀢𑀺 𑀪𑀽𑀫𑁆𑀬𑀸 𑀅𑀦𑀼𑀢𑁆𑀣𑀼𑀦’’𑀦𑁆𑀢𑀺 𑀏𑀢𑁆𑀣 ‘‘𑀧𑀣𑀩𑁆𑀬𑀸 𑀘𑀸𑀭𑀼𑀧𑀼𑀩𑁆𑀩𑀗𑁆𑀕𑀻’’𑀢𑀺 𑀏𑀢𑁆𑀣 𑀘 ‘‘𑀪𑀽𑀫𑁆𑀬𑀸, 𑀧𑀣𑀩𑁆𑀬𑀸’’𑀢𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀢𑀁𑀲𑀤𑀺𑀲𑀸𑀦𑀺 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀺𑀯𑀘𑀦𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. ‘‘𑀩𑀸𑀭𑀸𑀡𑀲𑁆𑀬𑀁 𑀫𑀳𑀸𑀭𑀸𑀚𑀸’’𑀢𑀺 𑀏𑀢𑁆𑀣 ‘‘𑀩𑀸𑀭𑀸𑀡𑀲𑁆𑀬’’𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑁂 𑀤𑀺𑀝𑁆𑀞𑁂𑀬𑁂𑀯 𑀢𑀁𑀲𑀤𑀺𑀲𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 ‘‘𑀩𑁆𑀭𑀸𑀳𑁆𑀫𑀡𑁆𑀬𑀁 𑀏𑀓𑀸𑀤𑀲𑁆𑀬𑀁 𑀧𑀜𑁆𑀘𑀫𑁆𑀬’’𑀦𑁆𑀢𑀺𑀆𑀤𑀻𑀦𑀺 𑀪𑀼𑀫𑁆𑀫𑀯𑀘𑀦𑀸𑀦𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀳𑁄𑀦𑁆𑀢𑀺.

𑀕𑀡𑁆𑀳𑀦𑁆𑀢𑀺 𑀘 𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑀸𑀧𑀺 𑀕𑀸𑀣𑀸𑀪𑀺𑀲𑀗𑁆𑀔𑀭𑀡𑀯𑀲𑁂𑀦. 𑀲𑀸𑀲𑀦𑁂𑀧𑀺 𑀧𑀦 𑀏𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀕𑀸𑀣𑀸𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀺.

𑀓𑀼𑀲𑀸𑀯𑀢𑀻. 𑀓𑀼𑀲𑀸𑀯𑀢𑀺𑀁. 𑀓𑀼𑀲𑀸𑀯𑀢𑀺𑀬𑀸, 𑀓𑀼𑀲𑀸𑀯𑀢𑁆𑀬𑀸. 𑀓𑀼𑀲𑀸𑀯𑀢𑀺𑀬𑀁, 𑀓𑀼𑀲𑀸𑀯𑀢𑁆𑀬𑀁. 𑀪𑁄𑀢𑀺 𑀓𑀼𑀲𑀸𑀯𑀢𑀺.

𑀩𑀸𑀭𑀸𑀡𑀲𑀻. 𑀩𑀸𑀭𑀸𑀡𑀲𑀺𑀁. 𑀩𑀸𑀭𑀸𑀡𑀲𑀺𑀬𑀸, 𑀩𑀸𑀭𑀸𑀡𑀲𑁆𑀬𑀸. 𑀩𑀸𑀭𑀸𑀡𑀲𑀺𑀬𑀁, 𑀩𑀸𑀭𑀸𑀡𑀲𑁆𑀬𑀁, 𑀩𑀸𑀭𑀸𑀡𑀲𑁆𑀲𑀁 𑀇𑀘𑁆𑀘𑀧𑀺, 𑀪𑁄𑀢𑀺 𑀩𑀸𑀭𑀸𑀡𑀲𑀺.

𑀦𑀴𑀺𑀦𑀻. 𑀦𑀴𑀺𑀦𑀺𑀁. 𑀦𑀴𑀺𑀦𑀺𑀬𑀸, 𑀦𑀴𑀺𑀜𑁆𑀜𑀸. 𑀦𑀴𑀺𑀦𑀺𑀬𑀁, 𑀦𑀴𑀺𑀜𑁆𑀜𑀁. 𑀪𑁄𑀢𑀺 𑀦𑀴𑀺𑀦𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀕𑀸𑀣𑀸𑀯𑀺𑀲𑀬𑀁 𑀧𑀦 𑀧𑀢𑁆𑀯𑀸 ‘‘𑀓𑀼𑀲𑀸𑀯𑀢𑀺𑀫𑁆𑀳𑀺, 𑀩𑀸𑀭𑀸𑀡𑀲𑀺𑀫𑁆𑀳𑀺, 𑀦𑀴𑀺𑀦𑀺𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀭𑀽𑀧𑀸𑀦𑀺𑀧𑀺𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀓𑀼𑀲𑀸𑀯𑀢𑀺𑀫𑁆𑀳𑀺’’𑀆𑀤𑀻𑀦𑀺 𑀫𑁆𑀳𑀺𑀬𑀦𑁆𑀢𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺 𑀕𑀸𑀣𑀸𑀲𑀼𑀬𑁂𑀯 ¶ 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀘𑀼𑀡𑁆𑀡𑀺𑀬𑀧𑀤𑀭𑀘𑀦𑀸𑀬𑀁. 𑀅𑀓𑁆𑀔𑀭𑀲𑀫𑀬𑁂 𑀧𑀦 𑀢𑀸𑀤𑀺𑀲𑀸𑀦𑀺 𑀭𑀽𑀧𑀸𑀦𑀺 𑀅𑀦𑀺𑀯𑀸𑀭𑀺𑀢𑀸𑀦𑀺 ‘‘𑀦𑀤𑀺𑀫𑁆𑀳𑀸 𑀘𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀲𑀼 𑀘𑀼𑀡𑁆𑀡𑀺𑀬𑀧𑀤𑀭𑀘𑀦𑀸𑀬𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑁆𑀳𑀻’’𑀢𑀺𑀆𑀤𑀺𑀓𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀁 𑀤𑀺𑀲𑁆𑀲𑀢𑀺, 𑀢𑀁 𑀅𑀓𑁆𑀔𑀭𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀘𑀼𑀡𑁆𑀡𑀺𑀬𑀧𑀤𑀝𑁆𑀞𑀸𑀦𑁂 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀲𑀼𑀕𑀢𑀺𑀬𑀁 𑀤𑀼𑀕𑁆𑀕𑀢𑀺𑀬’’𑀦𑁆𑀢𑀺𑀆𑀤𑀺𑀤𑀲𑁆𑀲𑀦𑀢𑁄. 𑀅𑀬𑀁 𑀧𑀦𑁂𑀢𑁆𑀣 𑀦𑀺𑀬𑀫𑁄 𑀲𑀼𑀕𑀢𑀲𑀸𑀲𑀦𑁂 𑀕𑀸𑀣𑀸𑀬𑀁 𑀘𑀼𑀡𑁆𑀡𑀺𑀬𑀧𑀤𑀝𑁆𑀞𑀸𑀦𑁂 𑀘 ‘‘𑀓𑀜𑁆𑀜𑀸 𑀭𑀢𑁆𑀢𑀺 𑀇𑀢𑁆𑀣𑀻 𑀬𑀸𑀕𑀼 𑀯𑀥𑀽’’𑀢𑀺 𑀏𑀯𑀁 𑀧𑀜𑁆𑀘𑀦𑁆𑀢𑁂𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀦𑀸 𑀲 𑀲𑁆𑀫𑀸 𑀲𑁆𑀫𑀺𑀁 𑀫𑁆𑀳𑀸 𑀫𑁆𑀳𑀺𑀇𑀘𑁆𑀘𑁂𑀢𑁂 𑀲𑀤𑁆𑀤𑀸 𑀲𑀭𑀽𑀧𑀢𑁄 𑀧𑀭𑀢𑁆𑀢𑀁 𑀦 𑀬𑀦𑁆𑀢𑀺. 𑀫𑁆𑀳𑀺𑀲𑀤𑁆𑀤𑁄 𑀧𑀦 𑀕𑀸𑀣𑀸𑀬𑀁 𑀇𑀯𑀡𑁆𑀡𑀦𑁆𑀢𑁂𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀧𑀭𑀢𑁆𑀢𑀁 𑀬𑀸𑀢𑀺. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀕𑀸𑀣𑀸𑀬𑀁 𑀘𑀼𑀡𑁆𑀡𑀺𑀬𑁂 𑀘𑀸𑀧𑀺, 𑀦𑀸 𑀲𑀲𑁆𑀫𑀸𑀤𑀻 𑀲𑀭𑀽𑀧𑀢𑁄;

𑀦𑀸𑀓𑀸𑀭𑀦𑁆𑀢𑀇𑀯𑀡𑁆𑀡𑀦𑁆𑀢-𑀇𑀢𑁆𑀣𑀻𑀢𑀺 𑀧𑀭𑀢𑀁 𑀕𑀢𑀸.

𑀫𑁆𑀳𑀺𑀲𑀤𑁆𑀤𑁄 𑀧𑀦 𑀕𑀸𑀣𑀸𑀬𑀁, 𑀇𑀯𑀡𑁆𑀡𑀦𑁆𑀢𑀺𑀢𑁆𑀣𑀺𑀪𑀻 𑀲𑀳;

𑀬’𑀢𑁄 𑀧𑀭𑀢𑁆𑀢𑀫𑁂𑀢𑀲𑁆𑀲, 𑀧𑀬𑁄𑀕𑀸𑀦𑀺 𑀪𑀯𑀦𑁆𑀢𑀺 𑀳𑀺.

𑀬𑀣𑀸 𑀩𑀮𑀸𑀓𑀬𑁄𑀦𑀺𑀫𑁆𑀳𑀺, 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 𑀲𑀤𑀸;

𑀓𑀼𑀲𑀸𑀯𑀪𑀺𑀫𑁆𑀳𑀺 𑀦𑀕𑀭𑁂, 𑀭𑀸𑀚𑀸 𑀆𑀲𑀺 𑀫𑀳𑀻𑀧𑀢𑀻’’𑀢𑀺.

𑀏𑀯𑀁 𑀓𑀼𑀲𑀸𑀯𑀢𑀻 𑀇𑀘𑁆𑀘𑀸𑀤𑀻𑀦𑀺 𑀅𑀜𑁆𑀜𑀣𑀸 𑀪𑀯𑀦𑁆𑀢𑀺, 𑀦𑀕𑀭𑀦𑀸𑀫𑀢𑁆𑀢𑀸 𑀧𑀦𑁂𑀓𑀯𑀘𑀦𑀸𑀦𑀺𑀧𑀺, 𑀦 𑀚𑀦𑀧𑀤𑀦𑀸𑀫𑀸𑀦𑀺 𑀯𑀺𑀬 𑀩𑀳𑀼𑀯𑀘𑀦𑀸𑀦𑀺. ‘‘𑀓𑀸𑀲𑀻, 𑀓𑀸𑀲𑀺𑀬𑁄. 𑀓𑀸𑀲𑀻𑀳𑀺, 𑀓𑀸𑀲𑀻𑀪𑀺. 𑀓𑀸𑀲𑀻𑀦𑀁. 𑀓𑀸𑀲𑀻𑀲𑀼. 𑀪𑁄𑀢𑀺𑀬𑁄 𑀓𑀸𑀲𑀺𑀬𑁄. 𑀏𑀯𑀁 𑀅𑀯𑀦𑁆𑀢𑀻 𑀅𑀯𑀦𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀜𑁆𑀜𑀸𑀦𑀺𑀧𑀺 𑀧𑀤𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀓𑀸𑀲𑀻𑀇𑀘𑁆𑀘𑀸𑀤𑀻𑀦𑀺 𑀚𑀦𑀧𑀤𑀦𑀸𑀫𑀢𑁆𑀢𑀸 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀼𑀯𑀘𑀦𑀸𑀦𑁂𑀯 𑀪𑀯𑀦𑁆𑀢𑀺 𑀅𑀢𑁆𑀣𑀲𑁆𑀲 𑀏𑀓𑀢𑁆𑀢𑁂𑀧𑀺.

𑀘𑀦𑁆𑀤𑀯𑀢𑀻, 𑀘𑀦𑁆𑀤𑀯𑀢𑀺𑀁, 𑀘𑀦𑁆𑀤𑀯𑀢𑀺𑀬𑀸, 𑀘𑀦𑁆𑀤𑀯𑀢𑀺𑀬𑀁, 𑀪𑁄𑀢𑀺 𑀘𑀦𑁆𑀤𑀯𑀢𑀺, 𑀏𑀯𑀁 𑀏𑀓𑀯𑀘𑀦𑀯𑀲𑁂𑀦 𑀯𑀸, 𑀘𑀦𑁆𑀤𑀯𑀢𑀺𑀬𑁄, 𑀘𑀦𑁆𑀤𑀯𑀢𑀺𑀬𑁄, 𑀘𑀦𑁆𑀤𑀯𑀢𑀻𑀳𑀺, 𑀘𑀦𑁆𑀤𑀯𑀢𑀻𑀪𑀺, 𑀘𑀦𑁆𑀤𑀯𑀢𑀻𑀦𑀁, 𑀘𑀦𑁆𑀤𑀯𑀢𑀻𑀲𑀼, 𑀪𑁄𑀢𑀺𑀬𑁄 ¶ 𑀘𑀦𑁆𑀤𑀯𑀢𑀺𑀬𑁄, 𑀏𑀯𑀁 𑀩𑀳𑀼𑀯𑀘𑀦𑀯𑀲𑁂𑀦 𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀜𑁆𑀜𑀸𑀦𑀺𑀧𑀺 𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀘𑀦𑁆𑀤𑀯𑀢𑀻’’𑀇𑀘𑁆𑀘𑀸𑀤𑀻𑀦𑀺 𑀳𑀺 𑀏𑀓𑀺𑀲𑁆𑀲𑀸 𑀩𑀳𑀽𑀦𑀜𑁆𑀘𑀺𑀢𑁆𑀣𑀻𑀦𑀁 𑀧𑀡𑁆𑀡𑀢𑁆𑀢𑀺𑀪𑀸𑀯𑀢𑁄 𑀧𑀬𑁄𑀕𑀸𑀦𑀼𑀭𑀽𑀧𑁂𑀦 𑀏𑀓𑀯𑀘𑀦𑀯𑀲𑁂𑀦 𑀯𑀸 𑀩𑀳𑀼𑀯𑀘𑀦𑀯𑀲𑁂𑀦 𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺 𑀪𑀯𑀦𑁆𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀈𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀈𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀈𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀁 𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 𑀅𑀜𑁆𑀜𑁂𑀦 𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀁 𑀧𑀽𑀭𑁂𑀲𑁆𑀲𑀸𑀫 𑁋

𑀬𑀸𑀕𑀼, 𑀬𑀸𑀕𑀽, 𑀬𑀸𑀕𑀼𑀬𑁄. 𑀬𑀸𑀕𑀼𑀁, 𑀬𑀸𑀕𑀽, 𑀬𑀸𑀕𑀼𑀬𑁄. 𑀬𑀸𑀕𑀼𑀬𑀸, 𑀬𑀸𑀕𑀽𑀳𑀺, 𑀬𑀸𑀕𑀽𑀪𑀺. 𑀬𑀸𑀕𑀼𑀬𑀸, 𑀬𑀸𑀕𑀽𑀦𑀁. 𑀬𑀸𑀕𑀼𑀬𑀸, 𑀬𑀸𑀕𑀽𑀳𑀺, 𑀬𑀸𑀕𑀽𑀪𑀺. 𑀬𑀸𑀕𑀼𑀬𑀸, 𑀬𑀸𑀕𑀽𑀦𑀁. 𑀬𑀸𑀕𑀼𑀬𑀸, 𑀬𑀸𑀕𑀼𑀬𑀁, 𑀬𑀸𑀕𑀽𑀲𑀼. 𑀪𑁄𑀢𑀺 𑀬𑀸𑀕𑀼, 𑀪𑁄𑀢𑀺𑀬𑁄 𑀬𑀸𑀕𑀽, 𑀬𑀸𑀕𑀼𑀬𑁄.

𑀏𑀯𑀁 ‘‘𑀥𑀸𑀢𑀼 𑀥𑁂𑀦𑀼 𑀓𑀸𑀲𑀼 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀚𑁆𑀚𑀼’’𑀇𑀘𑁆𑀘𑀸𑀤𑀻𑀦𑀺. 𑀢𑀢𑁆𑀭 𑀥𑀸𑀢𑀼𑀲𑀤𑁆𑀤𑁄 𑀭𑀲𑀭𑀼𑀥𑀺𑀭𑀫𑀁𑀲𑀫𑁂𑀤𑀦𑁆𑀳𑀸𑀭𑀼𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀲𑀼𑀓𑁆𑀓𑀲𑀗𑁆𑀔𑀸𑀢𑀥𑀸𑀢𑀼𑀯𑀸𑀘𑀓𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀲𑀪𑀸𑀯𑀯𑀸𑀘𑀓𑁄 𑀧𑀦 𑀲𑀼𑀕𑀢𑀸𑀤𑀻𑀦𑀁 𑀲𑀸𑀭𑀻𑀭𑀺𑀓𑀯𑀸𑀘𑀓𑁄 𑀮𑁄𑀓𑀥𑀸𑀢𑀼𑀯𑀸𑀘𑀓𑁄 𑀘 𑀘𑀓𑁆𑀔𑀸𑀤𑀺𑀯𑀸𑀘𑀓𑁄 𑀘 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀪𑀽 𑀳𑀽 𑀓𑀭𑀧𑀘𑀸𑀤𑀺𑀲𑀤𑁆𑀤𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄𑀘𑁂𑀯 𑀧𑀼𑀮𑁆𑀮𑀺𑀗𑁆𑀕𑁄 𑀘. 𑀅𑀢𑁆𑀭 𑀧𑀦𑀺𑀢𑁆𑀣𑀺𑀮𑀺𑀗𑁆𑀕𑁄 𑀅𑀥𑀺𑀧𑁆𑀧𑁂𑀢𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀉𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀉𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀪𑀽𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀚𑀫𑁆𑀩𑀽, 𑀚𑀫𑁆𑀩𑀽, 𑀚𑀫𑁆𑀩𑀼𑀬𑁄. 𑀚𑀫𑁆𑀩𑀼𑀁, 𑀚𑀫𑁆𑀩𑀽, 𑀚𑀫𑁆𑀩𑀼𑀬𑁄. 𑀚𑀫𑁆𑀩𑀼𑀬𑀸, 𑀚𑀫𑁆𑀩𑀽𑀳𑀺, 𑀚𑀫𑁆𑀩𑀽𑀪𑀺. 𑀚𑀫𑁆𑀩𑀼𑀬𑀸, 𑀚𑀫𑁆𑀩𑀽𑀦𑀁. 𑀚𑀫𑁆𑀩𑀼𑀬𑀸, 𑀚𑀫𑁆𑀩𑀽𑀳𑀺, 𑀚𑀫𑁆𑀩𑀽𑀪𑀺. 𑀚𑀫𑁆𑀩𑀼𑀬𑀸 ¶ , 𑀚𑀫𑁆𑀩𑀽𑀦𑀁. 𑀚𑀫𑁆𑀩𑀼𑀬𑀸, 𑀚𑀫𑁆𑀩𑀼𑀬𑀁, 𑀚𑀫𑁆𑀩𑀽𑀲𑀼. 𑀪𑁄𑀢𑀺 𑀚𑀫𑁆𑀩𑀼, 𑀪𑁄𑀢𑀺𑀬𑁄 𑀚𑀫𑁆𑀩𑀽, 𑀚𑀫𑁆𑀩𑀼𑀬𑁄. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀚𑀫𑁆𑀩𑀽𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁 ‘‘𑀅𑀫𑁆𑀩𑀸 𑀲𑀸𑀮𑀸 𑀘 𑀚𑀫𑁆𑀩𑀼𑀬𑁄’’𑀢𑀺𑀆𑀤𑀺𑀦𑀸 𑀧𑀲𑀺𑀤𑁆𑀥𑀁. ‘‘𑀇𑀫𑁂 𑀢𑁂 𑀚𑀫𑁆𑀩𑀼𑀓𑀸 𑀭𑀼𑀓𑁆𑀔𑀸’’𑀢𑀺 𑀏𑀢𑁆𑀣 𑀧𑀦 𑀭𑀼𑀓𑁆𑀔𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀚𑀫𑁆𑀩𑀼𑀓𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀚𑀫𑁆𑀩𑀽𑀢𑀺 𑀓𑀣𑁂𑀢𑀩𑁆𑀩𑀸𑀢𑀺 𑀚𑀫𑁆𑀩𑀼𑀓𑀸. 𑀓𑁂 𑀭𑁂 𑀕𑁂 𑀲𑀤𑁆𑀤𑁂𑀢𑀺 𑀥𑀸𑀢𑀼. 𑀅𑀣 𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀚𑀫𑁆𑀩𑀽 𑀏𑀯 𑀚𑀫𑁆𑀩𑀼𑀓𑀸, 𑀚𑀫𑁆𑀩𑀼𑀓𑀸 𑀘 𑀢𑀸 𑀭𑀼𑀓𑁆𑀔𑀸 𑀘𑀸𑀢𑀺 𑀚𑀫𑁆𑀩𑀼𑀓𑀸𑀭𑀼𑀓𑁆𑀔𑀸, 𑀬𑀣𑀸 𑀮𑀗𑁆𑀓𑀸𑀤𑀻𑀧𑁄, 𑀧𑀼𑀮𑁆𑀮𑀺𑀗𑁆𑀕𑀧𑀓𑁆𑀔𑁂 𑀯𑀸 𑀲𑀫𑀸𑀲𑀯𑀲𑁂𑀦 ‘‘𑀚𑀫𑁆𑀩𑀼𑀓𑀭𑀼𑀓𑁆𑀔𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀯𑀺𑀲𑀬𑀢𑁆𑀢𑀸 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀤𑀻𑀖𑀁 𑀓𑀢𑁆𑀯𑀸 ‘‘𑀚𑀫𑁆𑀩𑀼𑀓𑀸𑀭𑀼𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁 ‘‘𑀲𑀭𑀡𑀸𑀕𑀫𑀦𑁂 𑀓𑀜𑁆𑀘𑀻’’𑀢𑀺 𑀏𑀢𑁆𑀣 𑀯𑀺𑀬.

𑀪𑀽, 𑀪𑀽, 𑀪𑀼𑀬𑁄. 𑀪𑀼𑀁, 𑀪𑀽, 𑀪𑀼𑀬𑁄. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀼𑀬𑀁, 𑀪𑀽𑀲𑀼. 𑀪𑁄𑀢𑀺 𑀪𑀼, 𑀪𑁄𑀢𑀺𑀬𑁄 𑀪𑀽, 𑀪𑀼𑀬𑁄.

𑀏𑀯𑀁 ‘‘𑀅𑀪𑀽, 𑀅𑀪𑀽, 𑀅𑀪𑀼𑀬𑁄. 𑀅𑀪𑀼𑀁, 𑀅𑀪𑀽, 𑀅𑀪𑀼𑀬𑁄. 𑀅𑀪𑀼𑀬𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀢𑁆𑀭 ‘‘𑀅𑀪𑀼𑀁 𑀫𑁂 𑀓𑀣𑀁 𑀦𑀼 𑀪𑀡𑀲𑀺, 𑀧𑀸𑀧𑀓𑀁 𑀯𑀢 𑀪𑀸𑀲𑀲𑀻’’𑀢𑀺 𑀦𑀺𑀤𑀲𑁆𑀲𑀦𑀧𑀤𑀁.

‘‘𑀯𑀥𑀽 𑀘 𑀲𑀭𑀪𑀽 𑀘𑁂𑀯, 𑀲𑀭𑀩𑀽 𑀲𑀼𑀢𑀦𑀽 𑀘𑀫𑀽;

𑀯𑀸𑀫𑀽𑀭𑀽 𑀦𑀸𑀕𑀦𑀸𑀲𑀽𑀭𑀽’’, 𑀇𑀘𑁆𑀘𑀸𑀤𑀻 𑀚𑀫𑁆𑀩𑀼𑀬𑀸 𑀲𑀫𑀸.

𑀇𑀤𑀁 𑀧𑀦 𑀲𑀼𑀔𑀼𑀫𑀁 𑀞𑀸𑀦𑀁 𑀲𑀼𑀝𑁆𑀞𑀼 𑀫𑀦𑀲𑀺 𑀓𑀸𑀢𑀩𑁆𑀩𑀁. ‘‘𑀯𑀤𑀜𑁆𑀜𑀽, 𑀯𑀤𑀜𑁆𑀜𑀽, 𑀯𑀤𑀜𑁆𑀜𑀼𑀬𑁄. 𑀯𑀤𑀜𑁆𑀜𑀼𑀁, 𑀯𑀤𑀜𑁆𑀜𑀽, 𑀯𑀤𑀜𑁆𑀜𑀼𑀬𑁄. 𑀯𑀤𑀜𑁆𑀜𑀼𑀬𑀸’’𑀢𑀺 𑀚𑀫𑁆𑀩𑀽𑀲𑀫𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 ‘‘𑀫𑀕𑁆𑀕𑀜𑁆𑀜𑀽 𑀥𑀫𑁆𑀫𑀜𑁆𑀜𑀽 𑀓𑀢𑀜𑁆𑀜𑀽’’𑀇𑀘𑁆𑀘𑀸𑀤𑀻𑀲𑀼𑀧𑀺.

𑀦𑀦𑀼 𑀘 𑀪𑁄 𑁋

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺

𑀏𑀯𑀫𑀸𑀤𑀺𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀯𑀤𑀜𑁆𑀜𑀽𑀲𑀤𑁆𑀤𑀸𑀤𑀻𑀦𑀁 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀧𑀲𑀺𑀤𑁆𑀥𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀇𑀥 𑀇𑀢𑁆𑀣𑀺𑀮𑀺𑀗𑁆𑀕𑀦𑀬𑁄 𑀤𑀲𑁆𑀲𑀺𑀢𑁄𑀢𑀺? 𑀯𑀤𑀜𑁆𑀜𑀽𑀇𑀘𑁆𑀘𑀸𑀤𑀻𑀦𑀁 𑀏𑀓𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀸𑀪𑀸𑀯𑀢𑁄 𑀤𑁆𑀯𑀺𑀮𑀺𑀗𑁆𑀕𑀸𑀦𑀺 𑀢𑁂𑀲𑀁 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸. 𑀢𑀣𑀸 𑀳𑀺 𑁋

‘‘𑀲𑀸𑀳𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀲𑀗𑁆𑀖𑁂 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀘,

‘‘𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘𑀸’’𑀢𑀺 𑀘 𑀇𑀢𑁆𑀣𑀺𑀮𑀺𑀗𑁆𑀕𑀧𑀬𑁄𑀕𑀺𑀓𑀸 𑀩𑀳𑀽 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀦𑀻𑀢𑀺 𑀅𑀫𑁆𑀳𑁂𑀳𑀺 𑀞𑀧𑀺𑀢𑀸.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀊𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀊𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀊𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀑𑀓𑀸𑀭𑀦𑁆𑀢𑀧𑀤𑀁 𑀪𑀽𑀥𑀸𑀢𑀼𑀫𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀫𑀧𑁆𑀧𑀲𑀺𑀤𑁆𑀥𑀁, 𑀅𑀜𑁆𑀜𑀁 𑀧𑀦𑁄𑀓𑀸𑀭𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀲𑀺𑀤𑁆𑀥𑀁.

𑀑𑀓𑀸𑀭𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀕𑁄𑀲𑀤𑁆𑀤𑁄𑀢𑀺 𑀯𑀺𑀪𑀸𑀯𑀬𑁂;

𑀕𑁄𑀲𑀤𑁆𑀤𑀲𑁆𑀲𑁂𑀯 𑀧𑀼𑀮𑁆𑀮𑀺𑀗𑁆𑀕𑁂, 𑀭𑀽𑀧𑀫𑀲𑁆𑀲𑀸𑀳𑀼 𑀓𑁂𑀘𑀦;

𑀢𑀣𑀸 𑀳𑀺 𑀓𑁂𑀘𑀺 ‘‘𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀯𑀺𑀬 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀫𑀢𑁂 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀸𑀦𑀁 𑀯𑀡𑁆𑀡𑀯𑀺𑀲𑁂𑀲𑀸𑀪𑀸𑀯𑁄 𑀯𑀺𑀬 𑀭𑀽𑀧𑀯𑀺𑀲𑁂𑀲𑀸𑀪𑀸𑀯𑀢𑁄 𑀕𑁄𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀧𑀝𑀺𑀧𑀸𑀤𑀦𑀁 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀁. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 ‘‘𑀫𑀸𑀢𑀼𑀕𑀸𑀫𑁄, 𑀫𑀸𑀢𑀼𑀕𑀸𑀫𑀸. 𑀫𑀸𑀢𑀼𑀕𑀸𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁆𑀯𑁂 𑀧𑀤𑀫𑀸𑀮𑀸 𑀓𑀢𑁆𑀯𑀸 𑀏𑀓𑀸 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀧𑀤𑀫𑀸𑀮𑀸, 𑀏𑀓𑀸 𑀇𑀢𑁆𑀣𑀺𑀮𑀺𑀗𑁆𑀕𑀧𑀤𑀫𑀸𑀮𑀸𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀬 𑀇𑀤𑀁 𑀯𑀘𑀦𑀁 𑀅𑀫𑁆𑀳𑁂 𑀧𑀝𑀺𑀪𑀸𑀢𑀺, 𑀢𑀲𑁆𑀫𑀸 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀁.

𑀅𑀧𑀺𑀘 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑁂𑀲𑀼 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑁂𑀳𑀺 𑀲𑀫𑁂𑀲𑀼 𑀲𑀦𑁆𑀢𑁂𑀲𑀼 𑀓𑀣𑀁 𑀕𑁄𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 ¶ 𑀲𑀺𑀬𑀸? 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀣𑀸 𑀳𑀺 𑀭𑀢𑁆𑀢𑀺 𑀅𑀕𑁆𑀕𑀺 𑀅𑀝𑁆𑀞𑀺𑀲𑀤𑁆𑀤𑀸𑀦𑀁 𑀇𑀓𑀸𑀭𑀦𑁆𑀢𑀪𑀸𑀯𑁂𑀦 𑀲𑀫𑀢𑁆𑀢𑁂𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀫𑀦𑀧𑀼𑀁𑀲𑀓𑀮𑀺𑀗𑁆𑀕𑀮𑀓𑁆𑀔𑀡𑀪𑀽𑀢𑁄 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀬𑀣𑀸 𑀧𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀦 𑀢𑀣𑀸 𑀢𑁂𑀳𑀸𑀘𑀭𑀺𑀬𑁂𑀳𑀺 𑀅𑀪𑀺𑀫𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀬𑀣𑀸 𑀧𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀪𑀯𑀢𑀺, 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀕𑁄𑀲𑀤𑁆𑀤𑀸𑀦𑀁 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸 𑀘 𑀤𑁆𑀯𑀺𑀦𑁆𑀦𑀁 𑀆𑀬𑀼𑀲𑀤𑁆𑀤𑀸𑀦𑀁 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀣𑀸 𑀤𑁆𑀯𑀺𑀦𑁆𑀦𑀁 𑀕𑁄𑀲𑀤𑁆𑀤𑀸𑀦𑀁 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀯𑀺𑀲𑁂𑀲𑀢𑁆𑀢𑁂 𑀲𑀢𑀺 𑀓𑀣𑀁 𑀢𑁂𑀲𑀁 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑀲𑀺𑀬𑀸, 𑀓𑀣𑀜𑁆𑀘 𑀯𑀺𑀲𑀤𑀸𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀲𑀺𑀬𑀸. 𑀇𑀤𑀁 𑀞𑀸𑀦𑀁 𑀅𑀢𑀻𑀯 𑀲𑀡𑁆𑀳𑀲𑀼𑀔𑀼𑀫𑀁 𑀧𑀭𑀫𑀕𑀫𑁆𑀪𑀻𑀭𑀁 𑀫𑀳𑀸𑀕𑀳𑀦𑀁 𑀦 𑀲𑀓𑁆𑀓𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀽𑀮𑀪𑀸𑀲𑀸𑀪𑀽𑀢𑀸𑀬 𑀲𑀩𑁆𑀩𑀜𑁆𑀜𑀼𑀚𑀺𑀦𑁂𑀭𑀺𑀢𑀸𑀬 𑀫𑀸𑀕𑀥𑀺𑀓𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀦𑀬𑀁 𑀲𑀫𑁆𑀫𑀸 𑀅𑀚𑀸𑀦𑀦𑁆𑀢𑁂𑀦 𑀅𑀓𑀢𑀜𑀸𑀡𑀲𑀫𑁆𑀪𑀸𑀭𑁂𑀦 𑀓𑁂𑀦𑀘𑀺 𑀅𑀚𑁆𑀛𑁄𑀕𑀸𑀳𑁂𑀢𑀼𑀁 𑀯𑀸 𑀯𑀺𑀚𑀝𑁂𑀢𑀼𑀁 𑀯𑀸, 𑀅𑀫𑁆𑀳𑀸𑀓𑀁 𑀧𑀦 𑀫𑀢𑁂 𑀤𑁆𑀯𑀺𑀦𑁆𑀦𑀁 𑀕𑁄𑀲𑀤𑁆𑀤𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁄 𑀘𑁂𑀯 𑀤𑀺𑀲𑁆𑀲𑀢𑀺, 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀜𑁆𑀘 𑀤𑀺𑀲𑁆𑀲𑀢𑀺, 𑀯𑀺𑀲𑀤𑀸𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀤𑀺𑀲𑁆𑀲𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀢𑀤𑀼𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀤𑀺𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀫𑀁 𑀦𑀻𑀢𑀺𑀁 𑀞𑀧𑁂𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂 𑀧𑀝𑀺𑀧𑀦𑁆𑀦𑀓𑀸 𑀦𑀺𑀓𑁆𑀓𑀗𑁆𑀔𑀪𑀸𑀯𑁂𑀦 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺. 𑀏𑀢𑁆𑀣 𑀢𑀸𑀯 𑀅𑀢𑁆𑀣𑀕𑁆𑀕𑀳𑀡𑁂 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑀢𑀺𑀲𑁆𑀲𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀓𑀣𑁂𑀲𑁆𑀲𑀸𑀫 𑁋 𑀲𑁂𑀬𑁆𑀬𑀣𑀺𑀤𑀁?

𑀕𑀸𑀯𑀻, 𑀕𑀸𑀯𑀻, 𑀕𑀸𑀯𑀺𑀬𑁄. 𑀕𑀸𑀯𑀺𑀁, 𑀕𑀸𑀯𑀻, 𑀕𑀸𑀯𑀺𑀬𑁄. 𑀕𑀸𑀯𑀺𑀬𑀸, 𑀕𑀸𑀯𑀻𑀳𑀺, 𑀕𑀸𑀯𑀻𑀪𑀺. 𑀕𑀸𑀯𑀺𑀬𑀸, 𑀕𑀸𑀯𑀻𑀦𑀁. 𑀕𑀸𑀯𑀺𑀬𑀸, 𑀕𑀸𑀯𑀻𑀳𑀺, 𑀕𑀸𑀯𑀻𑀪𑀺. 𑀕𑀸𑀯𑀺𑀬𑀸 ¶ , 𑀕𑀸𑀯𑀻𑀦𑀁. 𑀕𑀸𑀯𑀺𑀬𑀸, 𑀕𑀸𑀯𑀺𑀬𑀁, 𑀕𑀸𑀯𑀻𑀲𑀼. 𑀪𑁄𑀢𑀺 𑀕𑀸𑀯𑀺, 𑀪𑁄𑀢𑀺𑀬𑁄 𑀕𑀸𑀯𑀻, 𑀕𑀸𑀯𑀺𑀬𑁄.

𑀅𑀬𑀁 𑀕𑁄𑀲𑀤𑁆𑀤𑀢𑁄 𑀯𑀺𑀳𑀺𑀢𑀲𑁆𑀲 𑀈𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀲𑁆𑀲 𑀇𑀢𑁆𑀣𑀺𑀯𑀸𑀘𑀓𑀲𑁆𑀲 𑀈𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑀸𑀯𑀻𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀕𑁄, 𑀕𑀸𑀯𑁄, 𑀕𑀯𑁄. 𑀕𑀸𑀯𑀼𑀁, 𑀕𑀸𑀯𑀁, 𑀕𑀯𑀁, 𑀕𑀸𑀯𑁄, 𑀕𑀯𑁄. 𑀕𑀸𑀯𑁂𑀦, 𑀕𑀯𑁂𑀦, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑀸, 𑀕𑀸𑀯𑀲𑁆𑀫𑀸, 𑀕𑀸𑀯𑀫𑁆𑀳𑀸, 𑀕𑀯𑀸, 𑀕𑀯𑀲𑁆𑀫𑀸, 𑀕𑀯𑀫𑁆𑀳𑀸, 𑀕𑁄𑀳𑀺, 𑀕𑁄𑀪𑀺. 𑀕𑀸𑀯𑀲𑁆𑀲, 𑀕𑀯𑀲𑁆𑀲, 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑁂, 𑀕𑀸𑀯𑀲𑁆𑀫𑀺𑀁, 𑀕𑀸𑀯𑀫𑁆𑀳𑀺, 𑀕𑀯𑁂, 𑀕𑀯𑀲𑁆𑀫𑀺𑀁, 𑀕𑀯𑀫𑁆𑀳𑀺, 𑀕𑀸𑀯𑁂𑀲𑀼, 𑀕𑀯𑁂𑀲𑀼, 𑀕𑁄𑀲𑀼. 𑀪𑁄 𑀕𑁄, 𑀪𑀯𑀦𑁆𑀢𑁄 𑀕𑀸𑀯𑁄, 𑀕𑀯𑁄.

𑀅𑀬𑀁 𑀧𑀼𑀫𑀯𑀸𑀘𑀓𑀲𑁆𑀲 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄. 𑀕𑀸𑀯𑀁, 𑀕𑀯𑀁, 𑀕𑀸𑀯𑀺𑀁, 𑀕𑀸𑀯𑁄, 𑀕𑀸𑀯𑀻 𑀕𑀯𑁄. 𑀕𑁄𑀳𑀺, 𑀕𑁄𑀪𑀺. 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑁄𑀳𑀺, 𑀕𑁄𑀪𑀺. 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑁄𑀲𑀼. 𑀪𑁄𑀢𑀺 𑀕𑁄, 𑀪𑁄𑀢𑀺𑀬𑁄 𑀕𑀸𑀯𑁄, 𑀕𑀸𑀯𑀻, 𑀕𑀯𑁄. 𑀅𑀬𑀁 𑀧𑀼𑀫𑀺𑀢𑁆𑀣𑀺𑀯𑀸𑀘𑀓𑀲𑁆𑀲 𑀑𑀓𑀸𑀭𑀦𑁆𑀢𑀲𑁆𑀲𑀺𑀢𑁆𑀣𑀺𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀦𑀸𑀫𑀺𑀓𑀧𑀤𑀫𑀸𑀮𑀸.

𑀏𑀢𑁆𑀣 𑀧𑀦 ‘‘𑀕𑀸𑀯𑀼’’𑀦𑁆𑀢𑀺 𑀧𑀤𑀁 𑀏𑀓𑀦𑁆𑀢𑀧𑀼𑀫𑀯𑀸𑀘𑀓𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀓𑀦𑁆𑀢𑀧𑀼𑀫𑀯𑀸𑀘𑀓𑀢𑁆𑀢𑀜𑁆𑀘𑀲𑁆𑀲 𑀆𑀳𑀘𑁆𑀘𑀧𑀸𑀴𑀺𑀬𑀸 𑀜𑀸𑀬𑀢𑀺 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀇𑀢𑁆𑀣𑀻 𑀦𑀺𑀫𑀦𑁆𑀢𑁂𑀲𑀺 ‘𑀏𑀳𑀺 𑀪𑀦𑁆𑀢𑁂, 𑀳𑀺𑀭𑀜𑁆𑀜𑀁 𑀯𑀸 𑀢𑁂 𑀤𑁂𑀫𑀺, 𑀲𑀼𑀯𑀡𑁆𑀡𑀁 𑀯𑀸 𑀢𑁂 𑀤𑁂𑀫𑀺, 𑀔𑁂𑀢𑁆𑀢𑀁 𑀯𑀸 𑀢𑁂 𑀤𑁂𑀫𑀺, 𑀯𑀢𑁆𑀣𑀼𑀁 𑀯𑀸 𑀢𑁂 𑀤𑁂𑀫𑀺, 𑀕𑀸𑀯𑀼𑀁 𑀯𑀸 𑀢𑁂 𑀤𑁂𑀫𑀺, 𑀕𑀸𑀯𑀺𑀁 𑀯𑀸 𑀢𑁂 𑀤𑁂𑀫𑀺. 𑀤𑀸𑀲𑀁 𑀯𑀸 𑀢𑁂 𑀤𑁂𑀫𑀺, 𑀤𑀸𑀲𑀺𑀁 𑀯𑀸 𑀢𑁂 𑀤𑁂𑀫𑀺, 𑀥𑀻𑀢𑀭𑀁 𑀯𑀸 𑀢𑁂 𑀤𑁂𑀫𑀺 𑀪𑀭𑀺𑀬𑀢𑁆𑀣𑀸𑀬, 𑀅𑀳𑀁 𑀯𑀸 𑀢𑁂 𑀪𑀭𑀺𑀬𑀸 𑀳𑁄𑀫𑀺, 𑀅𑀜𑁆𑀜𑀁 𑀯𑀸 𑀢𑁂 𑀪𑀭𑀺𑀬𑀁 𑀆𑀦𑁂𑀫𑀻’𑀢𑀺’’ 𑀏𑀯𑀁 𑀆𑀳𑀘𑁆𑀘𑀧𑀸𑀴𑀺𑀬𑀸 𑀜𑀸𑀬𑀢𑀺.

𑀏𑀢𑁆𑀣 ¶ 𑀳𑀺 ‘‘𑀕𑀸𑀯𑀼’’𑀦𑁆𑀢𑀺 𑀯𑀘𑀦𑁂𑀦 𑀧𑀼𑀫𑀸 𑀯𑀼𑀢𑁆𑀢𑁄, ‘‘𑀕𑀸𑀯𑀺’’𑀦𑁆𑀢𑀺 𑀯𑀘𑀦𑁂𑀦 𑀇𑀢𑁆𑀣𑀻, 𑀬𑀁 𑀧𑀦 𑀇𑀫𑀺𑀲𑁆𑀲𑀁 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀧𑀤𑀫𑀸𑀮𑀸𑀬𑀁 ‘‘𑀕𑀸𑀯𑀻’’𑀢𑀺 𑀧𑀤𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁, 𑀢𑀁 ‘‘𑀓𑀜𑁆𑀜𑀸’’𑀢𑀺 𑀧𑀤𑀁 𑀯𑀺𑀬 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸𑀯𑀺𑀜𑁆𑀜𑀸𑀧𑀦𑁂 𑀲𑀫𑀢𑁆𑀣𑀁 𑀳𑁄𑀢𑀺. 𑀦 𑀳𑀺 𑀇𑀢𑀭𑁂𑀲𑀼 𑀮𑀺𑀗𑁆𑀕𑁂𑀲𑀼 𑀲𑀫𑀸𑀦𑀲𑀼𑀢𑀺𑀓𑀪𑀸𑀯𑁂𑀦 𑀘𑀢𑀼𑀓𑁆𑀔𑀢𑁆𑀢𑀼𑀁 𑀆𑀕𑀢𑀧𑀤𑀁 𑀏𑀓𑀫𑁆𑀧𑀺 𑀅𑀢𑁆𑀣𑀺, ‘‘𑀕𑀸𑀯𑀻 𑀕𑀸𑀯𑀺’’𑀦𑁆𑀢𑀺 𑀘 𑀇𑀫𑁂𑀲𑀁 𑀲𑀤𑁆𑀤𑀸𑀦𑀁 𑀓𑀢𑁆𑀣𑀘𑀺 𑀞𑀸𑀦𑁂 𑀇𑀢𑁆𑀣𑀺𑀧𑀼𑀫𑁂𑀲𑀼 𑀲𑀸𑀫𑀜𑁆𑀜𑀯𑀲𑁂𑀦 𑀧𑀯𑀢𑁆𑀢𑀺𑀁 𑀉𑀧𑀭𑀺 𑀓𑀣𑀬𑀺𑀲𑁆𑀲𑀸𑀫. 𑀬𑀸 𑀧𑀦𑀫𑁆𑀳𑁂𑀳𑀺 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄. 𑀕𑀸𑀯𑀁, 𑀕𑀯𑀁, 𑀕𑀸𑀯𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀫𑀸𑀮𑀸 𑀓𑀢𑀸, 𑀢𑀢𑁆𑀣 𑀕𑁄𑀲𑀤𑁆𑀤𑀢𑁄 𑀲𑀺𑀬𑁄𑀦𑀁 𑀈𑀓𑀸𑀭𑀸𑀤𑁂𑀲𑁄 𑀅𑀁𑀯𑀘𑀦𑀲𑁆𑀲 𑀘 𑀇𑀁𑀓𑀸𑀭𑀸𑀤𑁂𑀲𑁄 𑀪𑀯𑀢𑀺, 𑀢𑁂𑀦 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 ‘‘𑀕𑀸𑀯𑀻 𑀕𑀸𑀯𑀻 𑀕𑀸𑀯𑀺’’𑀦𑁆𑀢𑀺 𑀭𑀽𑀧𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀣𑀸 𑀳𑀺 𑀫𑀼𑀔𑀫𑀢𑁆𑀢𑀤𑀻𑀧𑀦𑀺𑀬𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀼𑀦𑀸 𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀦𑀺𑀭𑀼𑀢𑁆𑀢𑀺𑀦𑀬𑁂 𑀓𑁄𑀲𑀮𑁆𑀮𑀯𑀲𑁂𑀦 𑀕𑁄𑀲𑀤𑁆𑀤𑀢𑁄 𑀬𑁄𑀦𑀫𑀻𑀓𑀸𑀭𑀸𑀤𑁂𑀲𑁄 𑀯𑀼𑀢𑁆𑀢𑁄. 𑀬𑀣𑀸 𑀧𑀦 𑀕𑁄𑀲𑀤𑁆𑀤𑀢𑁄 𑀬𑁄𑀦𑀫𑀻𑀓𑀸𑀭𑀸𑀤𑁂𑀲𑁄 𑀪𑀯𑀢𑀺, 𑀢𑀣𑀸 𑀲𑀺𑀲𑁆𑀲𑀻𑀓𑀸𑀭𑀸𑀤𑁂𑀲𑁄 𑀅𑀁𑀯𑀘𑀦𑀲𑁆𑀲 𑀘 𑀇𑀁𑀓𑀸𑀭𑀸𑀤𑁂𑀲𑁄 𑀪𑀯𑀢𑀺. 𑀅𑀢𑁆𑀭𑀺𑀫𑀸 𑀦𑀬𑀕𑁆𑀕𑀸𑀳𑀧𑀭𑀺𑀤𑀻𑀧𑀦𑀺𑀬𑁄 𑀕𑀸𑀣𑀸 𑁋

𑀈𑀧𑀘𑁆𑀘𑀬𑀸 𑀲𑀺𑀤𑁆𑀥𑁂𑀲𑁆𑀯𑀧𑀺, ‘‘𑀕𑀸𑀯𑀻 𑀕𑀸𑀯𑀻’’𑀢𑀺𑀆𑀤𑀺𑀲𑀼;

𑀧𑀞𑀫𑁂𑀓𑀯𑀘𑀦𑀸𑀤𑀺-𑀅𑀦𑁆𑀢𑁂𑀲𑀼 𑀚𑀺𑀦𑀲𑀸𑀲𑀦𑁂.

𑀯𑀤𑀢𑀸 𑀬𑁄𑀦𑀫𑀻𑀓𑀸𑀭𑀁, 𑀕𑁄𑀲𑀤𑁆𑀤𑀲𑁆𑀲𑀺𑀢𑁆𑀣𑀺𑀬𑀁 𑀧𑀦;

𑀅𑀯𑀺𑀲𑀤𑀢𑁆𑀢𑀫𑀓𑁆𑀔𑀸𑀢𑀼𑀁, 𑀦𑀬𑁄 𑀤𑀺𑀦𑁆𑀦𑁄𑀢𑀺 𑀦𑁄 𑀭𑀼𑀘𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀝𑁆𑀞𑀓𑀣𑀸𑀲𑀼 𑀘 𑁋

‘‘𑀕𑀸𑀯𑁄’’𑀢𑀺 𑀯𑀢𑁆𑀯𑀸 ‘‘𑀕𑀸𑀯𑀺’’𑀦𑁆𑀢𑀺-𑀯𑀘𑀦𑁂𑀦 𑀧𑀦𑀺𑀢𑁆𑀣𑀺𑀬𑀁;

𑀅𑀯𑀺𑀲𑀤𑀢𑁆𑀢𑀫𑀓𑁆𑀔𑀸𑀢𑀼𑀁, 𑀦𑀬𑁄 𑀤𑀺𑀦𑁆𑀦𑁄𑀢𑀺 𑀦𑁄 𑀭𑀼𑀘𑀺.

𑀢𑀣𑀸 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀤𑀻𑀲𑀼 𑀅𑀝𑁆𑀞𑀓𑀣𑀸𑀲𑀼 ‘‘𑀙𑁂𑀓𑁄 𑀳𑀺 𑀕𑁄𑀧𑀸𑀮𑀓𑁄 𑀲𑀓𑁆𑀔𑀭𑀸𑀬𑁄 𑀉𑀘𑁆𑀙𑀗𑁆𑀕𑁂𑀦 𑀕𑀳𑁂𑀢𑁆𑀯𑀸 𑀭𑀚𑁆𑀚𑀼𑀤𑀡𑁆𑀟𑀳𑀢𑁆𑀣𑁄 𑀧𑀸𑀢𑁄𑀯 𑀯𑀚𑀁 𑀕𑀦𑁆𑀢𑁆𑀯𑀸 𑀕𑀸𑀯𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀮𑀺𑀖𑀣𑀫𑁆𑀪𑀫𑀢𑁆𑀣𑀓𑁂 ¶ 𑀦𑀺𑀲𑀺𑀦𑁆𑀦𑁄 𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁 𑀕𑀸𑀯𑀺𑀁 ‘𑀏𑀓𑁄 𑀤𑁆𑀯𑁂’𑀢𑀺 𑀲𑀓𑁆𑀔𑀭𑀁 𑀔𑀺𑀧𑀺𑀢𑁆𑀯𑀸 𑀕𑀡𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀕𑀸𑀯𑁄’’𑀢𑀺 𑀯𑀢𑁆𑀯𑀸 ‘‘𑀕𑀸𑀯𑀺’’𑀦𑁆𑀢𑀺 𑀯𑀘𑀦𑁂𑀦 𑀇𑀢𑁆𑀣𑀺𑀧𑀼𑀫𑀯𑀸𑀘𑀓𑀲𑁆𑀲 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀯𑀺𑀳𑀺𑀢𑀸. ‘‘𑀕𑀸𑀯𑁄’’𑀢𑀺 𑀳𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀢𑁄 𑀇𑀢𑁆𑀣𑀺𑀧𑀼𑀫𑀪𑀽𑀢𑀸 𑀕𑁄𑀡𑀸 𑀕𑀳𑀺𑀢𑀸, 𑀢𑀣𑀸 ‘‘𑀕𑀸𑀯𑀺’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀇𑀢𑁆𑀣𑀺𑀪𑀽𑀢𑁄 𑀧𑀼𑀫𑀪𑀽𑀢𑁄 𑀘 𑀕𑁄𑀡𑁄. 𑀏𑀯𑀁 ‘‘𑀕𑀸𑀯𑁄’’𑀢𑀺 𑀘 ‘‘𑀕𑀸𑀯𑀺’’𑀦𑁆𑀢𑀺 𑀘 𑀇𑀫𑁂 𑀲𑀤𑁆𑀤𑀸 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀦𑀺𑀭𑀼𑀢𑁆𑀢𑀺𑀦𑀬𑀓𑀼𑀲𑀮𑀢𑀸𑀬 𑀲𑀫𑀸𑀦𑀮𑀺𑀗𑁆𑀕𑀯𑀲𑁂𑀦 𑀏𑀓𑀲𑁆𑀫𑀺𑀁𑀬𑁂𑀯 𑀧𑀓𑀭𑀡𑁂 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸𑀓𑁆𑀬𑁂 𑀧𑀺𑀡𑁆𑀟𑀻𑀓𑀢𑀸. 𑀬𑀤𑀺 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 𑀇𑀢𑁆𑀣𑀺𑀧𑀼𑀫𑀯𑀸𑀘𑀓𑀲𑁆𑀲 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀸𑀬𑀁 ‘‘𑀕𑀸𑀯𑀻 𑀕𑀸𑀯𑀺’’𑀫𑀺𑀘𑁆𑀘𑁂𑀢𑀸𑀦𑀺 𑀭𑀽𑀧𑀸𑀦𑀺 𑀦 𑀮𑀩𑁆𑀪𑁂𑀬𑁆𑀬𑀼𑀁, 𑀅𑀝𑁆𑀞𑀓𑀣𑀸𑀬𑀁 ‘‘𑀕𑀸𑀯𑁄’’𑀢𑀺 𑀯𑀢𑁆𑀯𑀸 ‘‘𑀕𑀸𑀯’’𑀦𑁆𑀢𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, ‘‘𑀕𑀸𑀯𑀺’’𑀦𑁆𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀘 𑀧𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀕𑀸𑀯𑁄’’𑀢𑀺 𑀇𑀢𑁆𑀣𑀺𑀧𑀼𑀫𑀯𑀲𑁂𑀦 𑀲𑀩𑁆𑀩𑁂𑀲𑀁 𑀕𑀼𑀦𑁆𑀦𑀁 𑀲𑀗𑁆𑀕𑀸𑀳𑀓𑀯𑀘𑀦𑀁 𑀯𑀢𑁆𑀯𑀸 𑀢𑁂𑀬𑁂𑀯 𑀕𑀸𑀯𑁄 𑀲𑀦𑁆𑀥𑀸𑀬 𑀧𑀼𑀦 ‘‘𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁 𑀕𑀸𑀯𑀺’’𑀦𑁆𑀢𑀺 𑀲𑀤𑁆𑀤𑀭𑀘𑀦𑀁 𑀓𑀼𑀩𑁆𑀩𑀺𑀁𑀲𑀼, 𑀢𑀲𑁆𑀫𑀸 ‘‘𑀕𑀸𑀯𑀺’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀁 𑀇𑀤𑀁 𑀕𑀸𑀯𑀻𑀲𑀤𑁆𑀤𑁂𑀦 𑀇𑀢𑁆𑀣𑀺𑀬𑀸𑀬𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸𑀢𑀺 𑀘𑁂? 𑀦, 𑀧𑀓𑀭𑀡𑀯𑀲𑁂𑀦 𑀅𑀢𑁆𑀣𑀦𑁆𑀢𑀭𑀲𑁆𑀲 𑀯𑀺𑀤𑀺𑀢𑀢𑁆𑀢𑀸. 𑀦 𑀳𑀺 𑀲𑀩𑁆𑀩𑀯𑀚𑁂𑀲𑀼 ‘‘𑀇𑀢𑁆𑀣𑀺𑀬𑁄𑀬𑁂𑀯 𑀯𑀲𑀦𑁆𑀢𑀺, 𑀦 𑀧𑀼𑀫𑀸𑀦𑁄’’𑀢𑀺 𑀘, ‘‘𑀧𑀼𑀫𑀸𑀦𑁄𑀬𑁂𑀯 𑀯𑀲𑀦𑁆𑀢𑀺, 𑀦 𑀇𑀢𑁆𑀣𑀺𑀬𑁄’’𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀧𑀺𑀘 ‘‘𑀕𑀸𑀯𑀺𑀫𑁆𑀧𑀺 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀺 ‘𑀪𑀺𑀓𑁆𑀔𑀽’𑀢𑀺 𑀫𑀜𑁆𑀜𑀫𑀸𑀦𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺, 𑀏𑀢𑁆𑀣𑀸𑀧𑀺 ‘‘𑀕𑀸𑀯𑀺’’𑀦𑁆𑀢𑀺 𑀯𑀘𑀦𑁂𑀦 𑀇𑀢𑁆𑀣𑀺𑀪𑀽𑀢𑁄 𑀧𑀼𑀫𑀪𑀽𑀢𑁄 𑀘 𑀲𑀩𑁆𑀩𑁄 𑀕𑁄 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀣𑀸 ‘‘𑀇𑀢𑁆𑀣𑀺𑀪𑀽𑀢𑁄𑀬𑁂𑀯 𑀕𑁄 𑀪𑀺𑀓𑁆𑀔𑀽𑀢𑀺 𑀫𑀜𑁆𑀜𑀺𑀢𑀩𑁆𑀩𑁄’’𑀢𑀺 𑀆𑀧𑀚𑁆𑀚𑀢𑀺. 𑀇𑀢𑀺 𑀧𑀸𑀴𑀺𑀦𑀬𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀫𑁆𑀳𑀸 𑀇𑀢𑁆𑀣𑀺𑀧𑀼𑀫𑀯𑀸𑀘𑀓𑀲𑁆𑀫𑀸 𑀕𑁄𑀲𑀤𑁆𑀤𑀢𑁄 𑀅𑀁𑀯𑀘𑀦𑀲𑁆𑀲 𑀇𑀁𑀓𑀸𑀭𑀸𑀤𑁂𑀲𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦𑀧𑀺 ¶ 𑀕𑁄𑀲𑀤𑁆𑀤𑀢𑁄 𑀈𑀧𑀘𑁆𑀘𑀬𑁂 𑀓𑀸𑀢𑀩𑁆𑀩𑁂𑀧𑀺 𑀅𑀓𑀢𑁆𑀯𑀸 𑀬𑁄𑀦𑀫𑀻𑀓𑀸𑀭𑀸𑀤𑁂𑀲𑁄 𑀓𑀢𑁄. 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑀏𑀯𑀁 𑀲𑀺𑀬𑀸 𑀕𑁄𑀲𑀤𑁆𑀤𑀢𑁄 𑀈𑀧𑀘𑁆𑀘𑀬𑁂 𑀓𑀢𑁂 𑀲𑀢𑀺 𑀈𑀧𑀘𑁆𑀘𑀬𑀯𑀲𑁂𑀦 ‘‘𑀕𑀸𑀯𑀻’’𑀢𑀺 𑀦𑀺𑀧𑁆𑀨𑀦𑁆𑀦𑀲𑀤𑁆𑀤𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀲𑀬𑁂 ‘‘𑀫𑀺𑀕𑀻 𑀫𑁄𑀭𑀻 𑀓𑀼𑀓𑁆𑀓𑀼𑀝𑀻’’𑀇𑀘𑁆𑀘𑀸𑀤𑀬𑁄 𑀯𑀺𑀬 𑀇𑀢𑁆𑀣𑀺𑀯𑀸𑀘𑀓𑁄𑀬𑁂𑀯 𑀲𑀺𑀬𑀸, 𑀦 𑀓𑀢𑁆𑀣𑀘𑀺𑀧𑀺 𑀇𑀢𑁆𑀣𑀺𑀧𑀼𑀫𑀯𑀸𑀘𑀓𑁄, 𑀢𑀲𑁆𑀫𑀸 𑀲𑀸𑀲𑀦𑀸𑀦𑀼𑀓𑀽𑀮𑀧𑁆𑀧𑀬𑁄𑀕𑀯𑀲𑁂𑀦 𑀬𑁄𑀦𑀫𑀻𑀓𑀸𑀭𑀸𑀤𑁂𑀲𑁄 𑀓𑀸𑀢𑀩𑁆𑀩𑁄𑀢𑀺. 𑀇𑀢𑀺 𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑀫𑀢𑁂 𑀕𑁄𑀲𑀤𑁆𑀤𑀢𑁄 𑀬𑁄𑀦𑀁 𑀈𑀓𑀸𑀭𑀸𑀤𑁂𑀲𑁄 𑀳𑁄𑀢𑀻𑀢𑀺 𑀜𑀸𑀬𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀕𑀸𑀯𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀭𑀘𑀺𑀢𑀸𑀬 ‘‘𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁 𑀕𑀸𑀯𑀺𑀁 ‘𑀏𑀓𑁄 𑀤𑁆𑀯𑁂’𑀢𑀺 𑀲𑀓𑁆𑀔𑀭𑀁 𑀔𑀺𑀧𑀺𑀢𑁆𑀯𑀸 𑀕𑀡𑁂𑀢𑀻’’𑀢𑀺 𑀯𑀘𑀦𑀧𑀭𑀺𑀬𑁄𑀲𑀸𑀦𑀸𑀬 𑀲𑀤𑁆𑀤𑀭𑀘𑀦𑀸𑀬𑀁 ‘‘𑀏𑀓𑁄 𑀕𑀸𑀯𑀻, 𑀤𑁆𑀯𑁂 𑀕𑀸𑀯𑀻’’𑀢𑀺 𑀅𑀢𑁆𑀣𑀬𑁄𑀚𑀦𑀸𑀦𑀬𑁄 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, ‘‘𑀕𑀸𑀯𑀺’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀜𑁆𑀘 𑀤𑀺𑀲𑁆𑀲𑀢𑀺. 𑀇𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑁂 𑀕𑁄𑀲𑀤𑁆𑀤𑀢𑁄 𑀲𑀺𑀬𑁄𑀦𑀫𑀻𑀓𑀸𑀭𑀸𑀤𑁂𑀲𑁄 𑀅𑀁𑀯𑀘𑀦𑀲𑁆𑀲 𑀇𑀁𑀓𑀸𑀭𑀸𑀤𑁂𑀲𑁄 𑀳𑁄𑀢𑀻𑀢𑀺 𑀜𑀸𑀬𑀢𑀺. 𑀢𑀲𑁆𑀫𑀸𑀬𑁂𑀯𑀫𑁆𑀳𑁂𑀳𑀺 𑀬𑀸 𑀲𑀸 𑀑𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄, 𑀕𑀸𑀯𑀁, 𑀕𑀸𑀯𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀫𑀸𑀮𑀸 𑀞𑀧𑀺𑀢𑀸, 𑀲𑀸 𑀧𑀸𑀴𑀺𑀦𑀬𑀸𑀦𑀼𑀓𑀽𑀮𑀸 𑀅𑀝𑁆𑀞𑀓𑀣𑀸𑀦𑀬𑀸𑀦𑀼𑀓𑀽𑀮𑀸 𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑀫𑀢𑀁 𑀕𑀳𑁂𑀢𑁆𑀯𑀸 𑀧𑀤𑀦𑀺𑀧𑁆𑀨𑀢𑁆𑀢𑀺𑀚𑀦𑀓𑀲𑁆𑀲 𑀕𑀭𑀼𑀦𑁄 𑀘 𑀫𑀢𑀸𑀦𑀼𑀓𑀽𑀮𑀸, ‘‘𑀕𑀸𑀯𑀻’’𑀢𑀺 𑀧𑀤𑀲𑁆𑀲 𑀘𑀢𑀼𑀓𑁆𑀔𑀢𑁆𑀢𑀼𑀁 𑀆𑀕𑀢𑀢𑁆𑀢𑀸 𑀧𑀦 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑁆𑀢𑀜𑁆𑀘 𑀲𑀸𑀥𑁂𑀢𑀺. 𑀇𑀘𑁆𑀘𑁂𑀲𑀸 𑀧𑀸𑀴𑀺𑀦𑀬𑀸𑀤𑀻𑀲𑀼 𑀜𑀸𑀡𑁂𑀦 𑀲𑀫𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂𑀲𑀼 𑀅𑀢𑀻𑀯 𑀬𑀼𑀚𑁆𑀚𑀢𑀺, 𑀦𑀢𑁆𑀣𑁂𑀢𑁆𑀣 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀤𑁄𑀲𑁄. 𑀏𑀢𑁆𑀣 𑀧𑀦 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀸𑀦𑀁 𑀩𑀳𑀼𑀯𑀘𑀦𑀝𑁆𑀞𑀸𑀦𑁂 ‘‘𑀕𑀸𑀯𑀺𑀬𑁄’’𑀢𑀺 𑀧𑀤𑀜𑁆𑀘 𑀓𑀭𑀡𑀲𑀫𑁆𑀧𑀤𑀸𑀦𑀦𑀺𑀲𑁆𑀲𑀓𑁆𑀓𑀲𑀸𑀫𑀻𑀦𑀫𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀕𑀸𑀯𑀺𑀬𑀸’’𑀢𑀺 𑀧𑀤𑀜𑁆𑀘 𑀓𑀭𑀡𑀦𑀺𑀲𑁆𑀲𑀓𑁆𑀓𑀸𑀦𑀁 𑀩𑀳𑀼𑀯𑀘𑀦𑀝𑁆𑀞𑀸𑀦𑁂 ‘‘𑀕𑀸𑀯𑀻𑀳𑀺 𑀕𑀸𑀯𑀻𑀪𑀻’’𑀢𑀺 𑀧𑀤𑀸𑀦𑀺 𑀘 𑀲𑀫𑁆𑀧𑀤𑀸𑀦𑀲𑀸𑀫𑀻𑀦𑀁 ¶ 𑀩𑀳𑀼𑀯𑀘𑀦𑀝𑁆𑀞𑀸𑀦𑁂 ‘‘𑀕𑀸𑀯𑀻𑀦’’𑀦𑁆𑀢𑀺 𑀧𑀤𑀜𑁆𑀘 𑀪𑀼𑀫𑁆𑀫𑀯𑀘𑀦𑀝𑁆𑀞𑀸𑀦𑁂 ‘‘𑀕𑀸𑀯𑀺𑀬𑀸, 𑀕𑀸𑀯𑀺𑀬𑀁, 𑀕𑀸𑀯𑀻𑀲𑀽’’𑀢𑀺 𑀧𑀤𑀸𑀦𑀺 𑀘𑀸𑀢𑀺 𑀇𑀫𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀲𑁄𑀴𑀲 𑀧𑀤𑀸𑀦𑀺 𑀏𑀓𑀦𑁆𑀢𑁂𑀦 𑀈𑀧𑀘𑁆𑀘𑀬𑀯𑀲𑁂𑀦 𑀲𑀺𑀤𑁆𑀥𑀢𑁆𑀢𑀸 𑀏𑀓𑀦𑁆𑀢𑀺𑀢𑁆𑀣𑀺𑀯𑀸𑀘𑀓𑀢𑁆𑀢𑀸 𑀘 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀬𑀁 𑀧𑀦𑁂𑀢𑁆𑀣 𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑁂 𑀲𑁄𑀢𑀽𑀦𑀁 𑀦𑀺𑀓𑁆𑀓𑀗𑁆𑀔𑀪𑀸𑀯𑀸𑀬 𑁋 𑀇𑀢𑁆𑀣𑀺𑀮𑀺𑀗𑁆𑀕𑀧𑀤𑁂𑀲𑀼 𑀳𑀺 ‘‘𑀕𑀸𑀯𑀻 𑀕𑀸𑀯𑀺’’𑀦𑁆𑀢𑀺 𑀇𑀫𑀸𑀦𑀺 𑀈𑀧𑀘𑁆𑀘𑀬𑀯𑀲𑁂𑀦 𑀯𑀸 𑀈𑀓𑀸𑀭𑀺𑀁𑀓𑀸𑀭𑀸𑀤𑁂𑀲𑀯𑀲𑁂𑀦 𑀯𑀸 𑀲𑀺𑀚𑁆𑀛𑀦𑁆𑀢𑀺. 𑀏𑀢𑁂𑀲𑀼 𑀧𑀘𑁆𑀙𑀺𑀫𑀦𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀧𑀼𑀩𑁆𑀩𑀦𑀬𑁄 𑀅𑀜𑁆𑀜𑀢𑁆𑀣. 𑀢𑀣𑀸 ‘‘𑀕𑀸𑀯𑀻 𑀕𑀸𑀯𑀺’’𑀦𑁆𑀢𑀺 𑀇𑀫𑀸𑀦𑀺 𑀈𑀧𑀘𑁆𑀘𑀬𑀯𑀲𑁂𑀦𑀧𑀺 𑀲𑀺𑀤𑁆𑀥𑀢𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀯𑀸𑀘𑀓𑀸𑀦𑀺 𑀪𑀯𑀦𑁆𑀢𑀺 𑀈𑀓𑀸𑀭𑀺𑀁𑀓𑀸𑀭𑀸𑀤𑁂𑀲𑀯𑀲𑁂𑀦𑀧𑀺 𑀲𑀺𑀤𑁆𑀥𑀢𑁆𑀢𑀸. 𑀓𑀢𑁆𑀣𑀘𑀺 𑀏𑀓𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀇𑀢𑁆𑀣𑀺𑀧𑀼𑀫𑀯𑀸𑀘𑀓𑀸𑀦𑀺 𑀪𑀯𑀦𑁆𑀢𑀺. 𑀏𑀢𑁂𑀲𑀼𑀧𑀺 𑀧𑀘𑁆𑀙𑀺𑀫𑁄𑀬𑁂𑀯 𑀦𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀧𑀼𑀩𑁆𑀩𑀦𑀬𑁄 𑀅𑀜𑁆𑀜𑀢𑁆𑀣. ‘‘𑀕𑀸𑀯𑀺𑀬𑁄. 𑀕𑀸𑀯𑀺𑀬𑀸, 𑀕𑀸𑀯𑀻𑀳𑀺, 𑀕𑀸𑀯𑀻𑀪𑀺. 𑀕𑀸𑀯𑀻𑀦𑀁. 𑀕𑀸𑀯𑀺𑀬𑀁, 𑀕𑀸𑀯𑀻𑀲𑀽’’𑀢𑀺 𑀏𑀢𑀸𑀦𑀺 𑀧𑀦 𑀈𑀧𑀘𑁆𑀘𑀬𑀯𑀲𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀲𑀩𑁆𑀩𑀣𑀸𑀧𑀺 𑀇𑀢𑁆𑀣𑀻𑀦𑀁𑀬𑁂𑀯 𑀯𑀸𑀘𑀓𑀸𑀦𑀺 𑀪𑀯𑀦𑁆𑀢𑀺. 𑀇𑀢𑁆𑀣𑀺𑀪𑀽𑀢𑁂𑀲𑁆𑀯𑁂𑀯 𑀕𑁄𑀤𑀩𑁆𑀩𑁂𑀲𑀼 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀯𑀺𑀲𑁂𑀲𑀢𑁄 𑀧𑀯𑀢𑁆𑀢𑀢𑁆𑀢𑀸 𑀏𑀓𑀦𑁆𑀢𑀢𑁄 𑀇𑀢𑁆𑀣𑀺𑀤𑀩𑁆𑀩𑁂𑀲𑀼 𑀧𑀯𑀢𑁆𑀢𑀸𑀦𑀺 ‘‘𑀫𑀺𑀕𑀻 𑀫𑁄𑀭𑀻 𑀓𑀼𑀓𑁆𑀓𑀼𑀝𑀻’’𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀯𑀺𑀬. 𑀓𑀺𑀜𑁆𑀘𑀸𑀧𑀺 𑀧𑀦 ‘‘𑀦𑀤𑀻 𑀫𑀳𑀻’’𑀇𑀘𑁆𑀘𑀸𑀤𑀻𑀦𑀺𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀈𑀧𑀘𑁆𑀘𑀬𑀯𑀲𑁂𑀦𑁂𑀯 𑀲𑀺𑀤𑁆𑀥𑀸𑀦𑀺, 𑀢𑀣𑀸𑀧𑀺 𑀢𑀸𑀦𑀺 𑀅𑀯𑀺𑀜𑁆𑀜𑀸𑀡𑀓𑀢𑁆𑀢𑀸 𑀢𑀤𑀢𑁆𑀣𑀸𑀦𑀁 𑀇𑀢𑁆𑀣𑀺𑀤𑀩𑁆𑀩𑁂𑀲𑀼 𑀯𑀢𑁆𑀢𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀺. 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀪𑀸𑀯𑀭𑀳𑀺𑀢𑀸 𑀳𑀺 𑀢𑀤𑀢𑁆𑀣𑀸. 𑀬𑀲𑁆𑀫𑀸 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑁂 𑀕𑁄𑀲𑀤𑁆𑀤𑁂 𑀏𑀦𑀬𑁄𑀕𑁄 𑀏𑀲𑀼𑀓𑀸𑀭𑁄 𑀘 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀕𑀸𑀯𑁂𑀦 𑀕𑀯𑁂𑀦 𑀕𑀸𑀯𑁂𑀲𑀼 𑀕𑀯𑁂𑀲𑀽’’𑀢𑀺 𑀧𑀤𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀘 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀕𑁄𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀲𑀲𑁆𑀫𑀸𑀲𑁆𑀫𑀺𑀁𑀯𑀘𑀦𑀸𑀦𑀺 𑀲𑀭𑀽𑀧𑀢𑁄 𑀧𑀭𑀢𑁆𑀢𑀁 𑀦 𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀕𑀸𑀯𑀲𑁆𑀲 𑀕𑀯𑀲𑁆𑀲 𑀕𑀸𑀯𑀲𑁆𑀫𑀸 𑀕𑀯𑀲𑁆𑀫𑀸 𑀕𑀸𑀯𑀲𑁆𑀫𑀺𑀁 𑀕𑀯𑀲𑁆𑀫𑀺’’𑀦𑁆𑀢𑀺 𑀧𑀤𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀘 𑀢𑀢𑁆𑀣 𑀲𑁆𑀫𑀸𑀯𑀘𑀦𑀲𑁆𑀲 𑀆𑀤𑁂𑀲𑀪𑀽𑀢𑁄 𑀆𑀓𑀸𑀭𑁄 𑀘 𑀫𑁆𑀳𑀸𑀓𑀸𑀭𑁄 𑀘 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀕𑀸𑀯𑀸 𑀕𑀯𑀸 𑀕𑀸𑀯𑀫𑁆𑀳𑀸 𑀕𑀯𑀫𑁆𑀳𑀸’’𑀢𑀺 𑀧𑀤𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀘 𑀲𑁆𑀫𑀺𑀁𑀯𑀘𑀦𑀲𑁆𑀲 𑀆𑀤𑁂𑀲𑀪𑀽𑀢𑁄 𑀏𑀓𑀸𑀭𑁄 ¶ 𑀘 𑀫𑁆𑀳𑀺𑀓𑀸𑀭𑁄 𑀘 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀕𑀸𑀯𑁂 𑀕𑀯𑁂 𑀕𑀸𑀯𑀫𑁆𑀳𑀺 𑀕𑀯𑀫𑁆𑀳𑀻’’𑀢𑀺 𑀧𑀤𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺. 𑀅𑀧𑀺𑀘 ‘‘𑀬𑀸𑀬 𑀢𑀸𑀬𑀸’’𑀢𑀺𑀆𑀤𑀻𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀬𑁄𑀚𑁂𑀢𑀼𑀁 𑀅𑀬𑀼𑀢𑁆𑀢𑀢𑁆𑀢𑀸𑀧𑀺 ‘‘𑀕𑀸𑀯𑁂𑀦 𑀕𑀯𑁂𑀦𑀸’’𑀢𑀺𑀆𑀤𑀻𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 𑀦 𑀯𑀼𑀢𑁆𑀢𑀸𑀦𑀺. 𑀢𑀣𑀸 𑀳𑀺 ‘‘𑀬𑀸𑀬 𑀢𑀸𑀬’’𑀇𑀘𑁆𑀘𑀸𑀤𑀻𑀳𑀺 𑀲𑀤𑁆𑀥𑀺𑀁 ‘‘𑀕𑀸𑀯𑁂𑀦 𑀕𑀯𑁂𑀦𑀸’’𑀢𑀺𑀆𑀤𑀻𑀦𑀺 𑀦 𑀬𑁄𑀚𑁂𑀢𑀩𑁆𑀩𑀸𑀦𑀺 𑀏𑀓𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀢𑁆𑀢𑀸.

𑀓𑁂𑀘𑀺 𑀧𑀦𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 𑁋 𑀬𑀸 𑀢𑀼𑀫𑁆𑀳𑁂𑀳𑀺 𑀑𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀫𑀸𑀮𑀸 𑀞𑀧𑀺𑀢𑀸, 𑀲𑀸 ‘‘𑀫𑀸𑀢𑀼𑀕𑀸𑀫𑁄 𑀇𑀢𑁆𑀣𑀻 𑀫𑀸𑀢𑀼𑀕𑀸𑀫𑀸 𑀇𑀢𑁆𑀣𑀺𑀬𑁄’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀸 𑀘 𑀳𑁄𑀢𑀻𑀢𑀺? 𑀢𑀦𑁆𑀦. 𑀫𑀸𑀢𑀼𑀕𑀸𑀫𑀇𑀢𑁆𑀣𑀻𑀲𑀤𑁆𑀤𑀸 𑀳𑀺 𑀦𑀸𑀦𑀸𑀮𑀺𑀗𑁆𑀕𑀸 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂𑀦, 𑀦𑀸𑀦𑀸𑀥𑀸𑀢𑀼𑀓𑀸 𑀘 𑀕𑀫𑀼 𑀇𑀲𑀼𑀥𑀸𑀢𑀼𑀯𑀲𑁂𑀦, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀕𑁄 𑀕𑀸𑀯𑀻𑀲𑀤𑁆𑀤𑀸 𑀏𑀓𑀮𑀺𑀗𑁆𑀕𑀸 𑀇𑀢𑁆𑀣𑀺 𑀮𑀺𑀗𑁆𑀕𑀪𑀸𑀯𑁂𑀦, 𑀏𑀓𑀥𑀸𑀢𑀼𑀓𑀸 𑀘 𑀕𑀫𑀼𑀥𑀸𑀢𑀼𑀯𑀲𑁂𑀦𑀸𑀢𑀺. 𑀬𑀚𑁆𑀚𑁂𑀯𑀁 𑀕𑁄𑀡𑀲𑀤𑁆𑀤𑀲𑁆𑀲 𑀕𑁄𑀲𑀤𑁆𑀤𑀲𑁆𑀲𑀸𑀤𑁂𑀲𑀯𑀲𑁂𑀦 𑀓𑀘𑁆𑀘𑀸𑀬𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀤𑁂𑀲𑀢𑁆𑀢𑀁 𑀏𑀓𑀥𑀸𑀢𑀼𑀓𑀢𑁆𑀢𑀜𑁆𑀘𑀸𑀕𑀫𑁆𑀫 𑀢𑁂𑀦𑀸𑀧𑀺 𑀲𑀤𑁆𑀥𑀺𑀁 𑀫𑀺𑀲𑁆𑀲𑁂𑀢𑁆𑀯𑀸 𑀧𑀤𑀫𑀸𑀮𑀸 𑀯𑀢𑁆𑀢𑀩𑁆𑀩𑀸𑀢𑀺? 𑀦, 𑀕𑁄𑀡𑀲𑀤𑁆𑀤𑀲𑁆𑀲 𑀅𑀘𑁆𑀘𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀸 𑀅𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀢𑁆𑀢𑀸 𑀘. 𑀢𑀣𑀸 𑀳𑀺 𑀲𑁄 𑀯𑀺𑀲𑀼𑀁 𑀧𑀼𑀮𑁆𑀮𑀺𑀗𑁆𑀕𑀝𑁆𑀞𑀸𑀦𑁂 𑀉𑀤𑁆𑀤𑀺𑀝𑁆𑀞𑁄. 𑀅𑀬𑀁 𑀧𑀦 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄’’𑀢𑀺𑀆𑀤𑀺𑀓𑀸 𑀧𑀤𑀫𑀸𑀮𑀸 𑀑𑀓𑀸𑀭𑀻𑀓𑀸𑀭𑀦𑁆𑀢𑀧𑀤𑀸𑀦𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸, 𑀅𑀣 𑀔𑁄 𑀯𑀺𑀓𑀧𑁆𑀧𑁂𑀦 𑀕𑁄𑀲𑀤𑁆𑀤𑀢𑁄 𑀧𑀭𑁂𑀲𑀁 𑀲𑀺 𑀬𑁄 𑀅𑀁𑀯𑀘𑀦𑀸𑀦𑀁 𑀈𑀓𑀸𑀭𑀺𑀁𑀓𑀸𑀭𑀸𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀧𑀤𑀯𑀦𑁆𑀢𑀢𑁆𑀢𑀸 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀧𑀤𑀫𑀸𑀮𑀸 𑀇𑀘𑁆𑀘𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀕𑁄𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀲𑀸𑀥𑀓𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀮𑁄𑀓𑀺𑀓𑀧𑁆𑀧𑀬𑁄𑀕𑀸𑀦𑀺 𑀘 𑀓𑀣𑀬𑀸𑀫 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂 𑀓𑀺𑀝𑁆𑀞𑀲𑀫𑁆𑀩𑀸𑀥𑁂 𑀕𑁄𑀧𑀸𑀮𑀓𑁄 ¶ 𑀕𑀸𑀯𑁄 𑀭𑀓𑁆𑀔𑁂𑀬𑁆𑀬, 𑀢𑀸 𑀕𑀸𑀯𑁄 𑀢𑀢𑁄 𑀢𑀢𑁄 𑀤𑀡𑁆𑀟𑁂𑀦 𑀆𑀓𑁄𑀝𑁂𑀬𑁆𑀬.

𑀅𑀦𑁆𑀦𑀤𑀸 𑀩𑀮𑀤𑀸 𑀘𑁂𑀢𑀸, 𑀯𑀡𑁆𑀡𑀤𑀸 𑀲𑀼𑀔𑀤𑀸 𑀘 𑀢𑀸;

𑀏𑀢𑀫𑀢𑁆𑀣𑀁 𑀯𑀲𑀁 𑀜𑀢𑁆𑀯𑀸, 𑀦𑀸𑀲𑁆𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂.

𑀲𑀩𑁆𑀩𑀸 𑀕𑀸𑀯𑁄 𑀲𑀫𑀸𑀳𑀭𑀢𑀺. 𑀕𑀫𑀺𑀲𑁆𑀲𑀦𑁆𑀢𑀺 𑀪𑀦𑁆𑀢𑁂 𑀕𑀸𑀯𑁄 𑀯𑀘𑁆𑀙𑀕𑀺𑀤𑁆𑀥𑀺𑀦𑀺𑀬𑁄’’𑀢𑀺 𑀇𑀫𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺. ‘‘𑀕𑁄𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄’’𑀢𑀺𑀆𑀤𑀻𑀦𑀺 𑀧𑀦 𑀮𑁄𑀓𑀺𑀓𑀧𑁆𑀧𑀬𑁄𑀕𑀸𑀦𑀺. 𑀇𑀢𑀺 𑀕𑁄𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄𑀧𑀺 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀯𑀺𑀬 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄.

𑀢𑀢𑁆𑀭 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄’’𑀢𑀺𑀆𑀤𑀻𑀦𑀺 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀣𑀸𑀧𑀺 𑀬𑀣𑀸𑀧𑀬𑁄𑀕𑀁 ‘‘𑀧𑀚𑀸 𑀤𑁂𑀯𑀢𑀸’’𑀢𑀺𑀧𑀤𑀸𑀦𑀺 𑀯𑀺𑀬 𑀇𑀢𑁆𑀣𑀺𑀧𑀼𑀭𑀺𑀲𑀯𑀸𑀘𑀓𑀸𑀦𑁂𑀯 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀲𑀸 𑀕𑁄’’𑀢𑀺 𑀯𑀸 ‘‘𑀢𑀸 𑀕𑀸𑀯𑁄’’𑀢𑀺 𑀯𑀸 𑀯𑀼𑀢𑁆𑀢𑁂 𑀇𑀢𑁆𑀣𑀺𑀧𑀼𑀫𑀪𑀽𑀢𑀸 𑀲𑀩𑁆𑀩𑁂𑀧𑀺 𑀕𑁄𑀡𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀈𑀤𑀺𑀲𑁂 𑀞𑀸𑀦𑁂 𑀏𑀓𑀦𑁆𑀢𑀢𑁄 𑀮𑀺𑀗𑁆𑀕𑀁 𑀧𑀥𑀸𑀦𑀁, 𑀅𑀢𑁆𑀣𑁄𑀬𑁂𑀯 𑀧𑀥𑀸𑀦𑁄. ‘‘𑀯𑀚𑁂𑀕𑀸𑀯𑁄 𑀤𑀼𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 ‘‘𑀕𑀸𑀯𑁄’’𑀢𑀺 𑀅𑀬𑀁 𑀲𑀤𑁆𑀤𑁄 𑀧𑀼𑀫𑁂𑀧𑀺 𑀯𑀢𑁆𑀢𑀢𑀺, 𑀢𑀣𑀸𑀧𑀺 𑀤𑀼𑀳𑀦𑀓𑁆𑀭𑀺𑀬𑀸𑀬 𑀧𑀼𑀫𑁂 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀯𑀲𑁂𑀦 𑀇𑀢𑁆𑀣𑀺𑀬𑁄 𑀜𑀸𑀬𑀦𑁆𑀢𑁂. ‘‘𑀕𑀸𑀯𑀻 𑀤𑀼𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀮𑀺𑀗𑁆𑀕𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 𑀘 𑀯𑀘𑀦𑀢𑁄 𑀓𑁄 𑀲𑀁𑀲𑀬𑀫𑀸𑀧𑀚𑁆𑀚𑀺𑀲𑁆𑀲𑀢𑀺 𑀯𑀺𑀜𑁆𑀜𑀽. ‘‘𑀢𑀸 𑀕𑀸𑀯𑁄 𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀘𑀦𑀢𑁄 𑀓𑀤𑀸𑀘𑀺 𑀓𑀲𑁆𑀲𑀘𑀺 𑀲𑀁𑀲𑀬𑁄 𑀲𑀺𑀬𑀸 ‘‘𑀦𑀦𑀼 𑀇𑀢𑁆𑀣𑀺𑀬𑁄’’𑀢𑀺, 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀧𑀦 ‘‘𑀢𑁂 𑀕𑀸𑀯𑁄 𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀁𑀲𑀬𑁄 𑀦𑀢𑁆𑀣𑀺, 𑀇𑀢𑁆𑀣𑀺𑀬𑁄 𑀘 𑀧𑀼𑀫𑀸𑀦𑁄 𑀘 𑀜𑀸𑀬𑀦𑁆𑀢𑁂 𑀧𑀼𑀮𑁆𑀮𑀺𑀗𑁆𑀕𑀩𑀳𑀼𑀯𑀘𑀦𑁂𑀦 𑀓𑀢𑁆𑀣𑀘𑀺 𑀇𑀢𑁆𑀣𑀺𑀧𑀼𑀫𑀲𑁆𑀲 𑀕𑀳𑀺𑀢𑀢𑁆𑀢𑀸. ‘‘𑀅𑀣𑁂𑀢𑁆𑀣 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀘𑀸’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀕𑀸𑀯𑀻 𑀘𑀭𑀢𑀻’’𑀢𑀺 𑀘 ‘‘𑀕𑀸𑀯𑀺𑀁 𑀧𑀲𑁆𑀲𑀢𑀻’’𑀢𑀺 𑀘 𑀯𑀼𑀢𑁆𑀢𑁂 𑀇𑀢𑁆𑀣𑀻 𑀯𑀺𑀜𑁆𑀜𑀸𑀬𑀢𑁂 𑀕𑀸𑀯𑀻𑀲𑀤𑁆𑀤𑁂𑀦 𑀇𑀢𑁆𑀣𑀺𑀬𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 ¶ . 𑀮𑁄𑀓𑀺𑀓𑀧𑁆𑀧𑀬𑁄𑀕𑁂𑀲𑀼 𑀳𑀺 𑀲𑀸𑀲𑀦𑀺𑀓𑀧𑁆𑀧𑀬𑁄𑀕𑁂𑀲𑀼 𑀘 𑀕𑀸𑀯𑀻𑀲𑀤𑁆𑀤𑁂𑀦 𑀇𑀢𑁆𑀣𑀻 𑀕𑀬𑁆𑀳𑀢𑀺. 𑀏𑀓𑀘𑁆𑀘𑀁 𑀧𑀦 𑀲𑀸𑀲𑀦𑀺𑀓𑀧𑁆𑀧𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀕𑀸𑀯𑀻’’𑀢𑀺, ‘‘𑀕𑀸𑀯𑀺’’𑀦𑁆𑀢𑀺 𑀘 ‘‘𑀇𑀢𑁆𑀣𑀺𑀧𑀼𑀭𑀺𑀲𑀲𑀸𑀥𑀸𑀭𑀡𑀯𑀘𑀦𑀫𑀯𑁄𑀘𑀼𑀫𑁆𑀳. 𑀢𑀣𑀸 𑀳𑀺 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀘𑀢𑀼𑀫𑀳𑀸𑀧𑀣𑁂 𑀩𑀺𑀮𑀲𑁄 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀘 ‘‘𑀕𑀸𑀯𑁄’’𑀢𑀺 𑀇𑀢𑁆𑀣𑀺𑀧𑀼𑀫𑀲𑀸𑀥𑀸𑀭𑀡𑀁 𑀲𑀤𑁆𑀤𑀭𑀘𑀦𑀁 𑀓𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀇𑀢𑁆𑀣𑀺𑀧𑀼𑀫𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁 𑀕𑀸𑀯𑀺’’𑀦𑁆𑀢𑀺 𑀭𑀘𑀺𑀢𑀸 𑀲𑀤𑁆𑀤𑀭𑀘𑀦𑀸 𑀤𑀺𑀲𑁆𑀲𑀢𑀺.

𑀏𑀢𑁆𑀣 𑀳𑀺 𑀕𑁄𑀚𑀸𑀢𑀺𑀬𑀁 𑀞𑀺𑀢𑀸 𑀇𑀢𑁆𑀣𑀻𑀧𑀺 𑀧𑀼𑀫𑀸𑀧𑀺 ‘‘𑀕𑀸𑀯𑀻’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀯𑀺𑀲𑁂𑀲𑀢𑁄 𑀧𑀦 ‘‘𑀕𑀸𑀯𑀻’’𑀢𑀺 𑀇𑀤𑀁 𑀇𑀢𑁆𑀣𑀺𑀬𑀸 𑀅𑀥𑀺𑀯𑀘𑀦𑀁. 𑀢𑀣𑀸 𑀳𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀧𑁆𑀧𑀤𑁂𑀲𑀸𑀤𑀻𑀲𑀼 ‘‘𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀩𑀸𑀳𑀺𑀬𑀁 𑀤𑀸𑀭𑀼𑀘𑀻𑀭𑀺𑀬𑀁 𑀕𑀸𑀯𑀻 𑀢𑀭𑀼𑀡𑀯𑀘𑁆𑀙𑀸 𑀅𑀥𑀺𑀧𑀢𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻’’𑀢𑀺, ‘‘𑀕𑀸𑀯𑀼𑀁 𑀯𑀸 𑀢𑁂 𑀤𑁂𑀫𑀺, 𑀕𑀸𑀯𑀺𑀁 𑀯𑀸 𑀢𑁂 𑀤𑁂𑀫𑀻’’𑀢𑀺 𑀘 ‘‘𑀢𑀺𑀡𑀲𑀻𑀳𑁄 𑀓𑀧𑁄𑀢𑀯𑀡𑁆𑀡𑀕𑀸𑀯𑀻𑀲𑀤𑀺𑀲𑁄’’𑀢𑀺 𑀘 𑀧𑀬𑁄𑀕𑀤𑀲𑁆𑀲𑀦𑀢𑁄 𑀇𑀢𑁆𑀣𑀻 𑀓𑀣𑀺𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀕𑁄𑀲𑀤𑁆𑀤𑁂𑀦 𑀧𑀦 ‘‘𑀕𑁄𑀤𑀼𑀳𑀦𑀁. 𑀕𑀤𑁆𑀤𑀼𑀳𑀦𑀁. 𑀕𑁄𑀔𑀻𑀭𑀁 𑀕𑁄𑀥𑀦𑁄 𑀕𑁄𑀭𑀽𑀧𑀸𑀦𑀺 𑀘𑀸’’𑀢𑀺 𑀤𑀲𑁆𑀲𑀦𑀢𑁄 𑀇𑀢𑁆𑀣𑀻𑀧𑀺 𑀧𑀼𑀫𑀸𑀧𑀺 𑀓𑀣𑀺𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀇𑀤𑀸𑀦𑀺 𑀑𑀓𑀸𑀭𑀦𑁆𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀸𑀬𑀁 𑀧𑀸𑀴𑀺𑀦𑀬𑀸𑀤𑀺𑀦𑀺𑀲𑁆𑀲𑀺𑀢𑁄 𑀅𑀢𑁆𑀣𑀬𑀼𑀢𑁆𑀢𑀺𑀦𑀬𑁄 𑀯𑀼𑀘𑁆𑀘𑀢𑁂 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑁋

𑀲𑀸 𑀕𑁄 𑀕𑀘𑁆𑀙𑀢𑀺, 𑀲𑀸 𑀕𑀸𑀯𑀻 𑀕𑀘𑁆𑀙𑀢𑀺, 𑀢𑀸 𑀕𑀸𑀯𑁄, 𑀕𑀸𑀯𑀻, 𑀕𑀯𑁄 𑀕𑀘𑁆𑀙𑀦𑁆𑀢𑀺. 𑀢𑀁 𑀕𑀸𑀯𑀁, 𑀕𑀸𑀯𑀺𑀁, 𑀕𑀯𑀁 𑀧𑀲𑁆𑀲𑀢𑀺, 𑀢𑀸 𑀕𑀸𑀯𑁄, 𑀕𑀸𑀯𑀻, 𑀕𑀯𑁄 𑀧𑀲𑁆𑀲𑀢𑀺. 𑀢𑀸𑀳𑀺 𑀕𑁄𑀳𑀺, 𑀕𑁄𑀪𑀺 𑀓𑀢𑀁. 𑀢𑀸𑀲𑀁 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁 𑀤𑁂𑀢𑀺. 𑀢𑀸𑀳𑀺 𑀕𑁄𑀳𑀺, 𑀕𑁄𑀪𑀺 𑀅𑀧𑁂𑀢𑀺. 𑀢𑀸𑀲𑀁 𑀕𑀯𑀁 ¶ , 𑀕𑀼𑀦𑁆𑀦𑀁, 𑀕𑁄𑀦𑀁 𑀲𑀺𑀗𑁆𑀕𑀸𑀦𑀺. 𑀢𑀸𑀲𑀼 𑀕𑁄𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀪𑁄𑀢𑀺 𑀕𑁄 𑀢𑁆𑀯𑀁 𑀢𑀺𑀝𑁆𑀞, 𑀪𑁄𑀢𑀺𑀬𑁄 𑀕𑀸𑀯𑁄 𑀕𑀸𑀯𑀻, 𑀕𑀯𑀸 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣.

𑀅𑀧𑀭𑁄𑀧𑀺 𑀯𑀼𑀘𑁆𑀘𑀢𑁂 𑁋

𑀲𑀸 𑀕𑁄 𑀦𑀤𑀺𑀁 𑀢𑀭𑀦𑁆𑀢𑀻 𑀕𑀘𑁆𑀙𑀢𑀺, 𑀲𑀸 𑀕𑀸𑀯𑀻 𑀦𑀤𑀺𑀁 𑀢𑀭𑀦𑁆𑀢𑀻 𑀕𑀘𑁆𑀙𑀢𑀺, 𑀢𑀸 𑀕𑀸𑀯𑁄, 𑀕𑀸𑀯𑀻, 𑀕𑀯𑁄 𑀦𑀤𑀺𑀁 𑀢𑀭𑀦𑁆𑀢𑀻𑀬𑁄 𑀕𑀘𑁆𑀙𑀦𑁆𑀢𑀺. 𑀢𑀁 𑀕𑀸𑀯𑀁, 𑀕𑀸𑀯𑀺𑀁, 𑀕𑀯𑀁 𑀦𑀤𑀺𑀁 𑀢𑀭𑀦𑁆𑀢𑀺𑀁 𑀧𑀲𑁆𑀲𑀢𑀺, 𑀢𑀸 𑀕𑀸𑀯𑁄, 𑀕𑀸𑀯𑀻, 𑀕𑀯𑁄 𑀦𑀤𑀺𑀁 𑀢𑀭𑀦𑁆𑀢𑀺𑀬𑁄 𑀧𑀲𑁆𑀲𑀢𑀺. 𑀢𑀸𑀳𑀺 𑀕𑁄𑀳𑀺, 𑀕𑁄𑀪𑀺 𑀦𑀤𑀺𑀁 𑀢𑀭𑀦𑁆𑀢𑀻𑀳𑀺 𑀓𑀢𑀁. 𑀢𑀸𑀲𑀁 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁 𑀦𑀤𑀺𑀁 𑀢𑀭𑀦𑁆𑀢𑀻𑀦𑀁 𑀤𑁂𑀢𑀺. 𑀢𑀸𑀳𑀺 𑀕𑁄𑀳𑀺, 𑀕𑁄𑀪𑀺 𑀦𑀤𑀺𑀁 𑀢𑀭𑀦𑁆𑀢𑀻𑀳𑀺 𑀅𑀧𑁂𑀢𑀺. 𑀢𑀸𑀲𑀁 𑀕𑀯𑀁, 𑀕𑀼𑀦𑁆𑀦𑀁, 𑀕𑁄𑀦𑀁 𑀦𑀤𑀺𑀁 𑀢𑀭𑀦𑁆𑀢𑀻𑀦𑀁 𑀲𑀦𑁆𑀢𑀓𑀁. 𑀢𑀸𑀲𑀼 𑀕𑁄𑀲𑀼 𑀦𑀤𑀺𑀁 𑀢𑀭𑀦𑁆𑀢𑀻𑀲𑀼 𑀧𑀢𑀺𑀝𑁆𑀞𑀺𑀢𑀦𑁆𑀢𑀺.

𑀢𑀢𑁆𑀭 𑀬𑀸 𑀲𑀸 ‘‘𑀕𑁄, 𑀕𑀸𑀯𑀻, 𑀕𑀸𑀯𑁄, 𑀕𑀸𑀯𑀻, 𑀕𑀯𑁄’’𑀢𑀺𑀆𑀤𑀺𑀦𑀸 𑀑𑀓𑀸𑀭𑀦𑁆𑀢𑀲𑁆𑀲𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀸 𑀞𑀧𑀺𑀢𑀸, 𑀲𑀸 ‘‘𑀕𑁄, 𑀕𑀸𑀯𑁄 𑀕𑀯𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀸𑀢𑁄 𑀲𑀯𑀺𑀲𑁂𑀲𑀸 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀝𑁆𑀞𑀸𑀦𑁂 𑀘𑀢𑀼𑀦𑁆𑀦𑀁 𑀓𑀜𑁆𑀜𑀸𑀲𑀤𑁆𑀤𑀸𑀦𑀁 𑀯𑀺𑀬 𑀕𑀸𑀯𑀻𑀲𑀤𑁆𑀤𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀬𑀲𑁆𑀫𑀸 𑀧𑀦𑀸𑀬𑀁 𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀇𑀫𑀲𑁆𑀲 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀅𑀜𑁆𑀜𑁂𑀲𑀫𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀯𑀺𑀬 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸, 𑀦 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀯𑀺𑀬 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸, 𑀦𑀸𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀯𑀺𑀬 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀏𑀢𑁆𑀣 𑀦𑀺𑀘𑁆𑀙𑀬𑀓𑀭𑀡𑀻 𑀕𑀸𑀣𑀸 𑀯𑀼𑀘𑁆𑀘𑀢𑀺 𑁋

𑀤𑀼𑀯𑀺𑀦𑁆𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁, 𑀬𑀣𑀸 𑀤𑀺𑀲𑁆𑀲𑀢𑀺 𑀦𑀸𑀦𑀢𑀸;

𑀕𑁄𑀲𑀤𑁆𑀤𑀸𑀦𑀁 𑀢𑀣𑀸 𑀤𑁆𑀯𑀺𑀦𑁆𑀦𑀁, 𑀇𑀘𑁆𑀙𑀺𑀢𑀩𑁆𑀩𑀸𑀯 𑀦𑀸𑀦𑀢𑀸.

𑀢𑀣𑀸 𑀳𑀺 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸?

𑀥𑀸𑀢𑀼 ¶ , 𑀥𑀸𑀢𑀽, 𑀥𑀸𑀢𑀯𑁄. 𑀥𑀸𑀢𑀼𑀁, 𑀥𑀸𑀢𑀽, 𑀥𑀸𑀢𑀯𑁄. 𑀥𑀸𑀢𑀼𑀦𑀸, 𑀥𑀸𑀢𑀽𑀳𑀺, 𑀥𑀸𑀢𑀽𑀪𑀺. 𑀥𑀸𑀢𑀼𑀲𑁆𑀲, 𑀥𑀸𑀢𑀽𑀦𑀁. 𑀥𑀸𑀢𑀼𑀲𑁆𑀫𑀸, 𑀥𑀸𑀢𑀼𑀫𑁆𑀳𑀸, 𑀥𑀸𑀢𑀽𑀳𑀺, 𑀥𑀸𑀢𑀽𑀪𑀺. 𑀥𑀸𑀢𑀼𑀲𑁆𑀲, 𑀥𑀸𑀢𑀽𑀦𑀁. 𑀥𑀸𑀢𑀼𑀲𑁆𑀫𑀺𑀁, 𑀥𑀸𑀢𑀼𑀫𑁆𑀳𑀺, 𑀥𑀸𑀢𑀽𑀲𑀼. 𑀅𑀬𑀁 𑀧𑀼𑀮𑁆𑀮𑀺𑀗𑁆𑀕𑀯𑀺𑀲𑁂𑀲𑁄.

𑀥𑀸𑀢𑀼, 𑀥𑀸𑀢𑀽, 𑀥𑀸𑀢𑀼𑀬𑁄. 𑀥𑀸𑀢𑀼𑀁, 𑀥𑀸𑀢𑀽, 𑀥𑀸𑀢𑀼𑀬𑁄. 𑀥𑀸𑀢𑀼𑀬𑀸, 𑀥𑀸𑀢𑀽𑀳𑀺, 𑀥𑀸𑀢𑀽𑀪𑀺. 𑀥𑀸𑀢𑀼𑀬𑀸, 𑀥𑀸𑀢𑀽𑀦𑀁. 𑀥𑀸𑀢𑀼𑀬𑀸, 𑀥𑀸𑀢𑀽𑀳𑀺, 𑀥𑀸𑀢𑀽𑀪𑀺. 𑀥𑀸𑀢𑀼𑀬𑀸, 𑀥𑀸𑀢𑀽𑀦𑀁. 𑀥𑀸𑀢𑀼𑀬𑀸, 𑀥𑀸𑀢𑀼𑀬𑀁, 𑀥𑀸𑀢𑀽𑀲𑀼. 𑀅𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀯𑀺𑀲𑁂𑀲𑁄.

𑀬𑀣𑀸 𑀘 𑀤𑁆𑀯𑀺𑀦𑁆𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑁄 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑁄𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑁄 𑀧𑀜𑁆𑀜𑀸𑀬𑀢𑁂𑀯. 𑀬𑀣𑀸 𑀘 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀬𑀼𑀲𑀤𑁆𑀤𑀸𑀦𑀁 ‘‘𑀆𑀬𑀼, 𑀆𑀬𑀽, 𑀆𑀬𑀯𑁄’’𑀢𑀺𑀆𑀤𑀺𑀦𑀸, ‘‘𑀆𑀬𑀼, 𑀆𑀬𑀽, 𑀆𑀬𑀽𑀦𑀻’’𑀢𑀺𑀆𑀤𑀺𑀦𑀸 𑀘 𑀯𑀺𑀲𑁂𑀲𑁄 𑀧𑀜𑁆𑀜𑀸𑀬𑀢𑀺, 𑀬𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑁄𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑁄 𑀧𑀜𑁆𑀜𑀸𑀬𑀢𑁂𑀯. 𑀢𑀣𑀸 𑀳𑀺 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀧𑀼𑀮𑁆𑀮𑀺𑀗𑁆𑀕𑀁, 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀇𑀤𑀸𑀦𑀺 𑀇𑀫𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀓𑀣𑀬𑀸𑀫 𑁋 𑀧𑀼𑀭𑀺𑀲𑁄𑀢𑀺 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄, 𑀓𑀜𑁆𑀜𑀸𑀢𑀺 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄, 𑀭𑀽𑀧𑀦𑁆𑀢𑀺 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑁄. 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺, 𑀓𑀜𑁆𑀜𑀸 𑀢𑀺𑀝𑁆𑀞𑀢𑀺, 𑀓𑀜𑁆𑀜𑀸 𑀢𑀺𑀝𑁆𑀞𑀦𑁆𑀢𑀺, 𑀓𑀜𑁆𑀜𑀸 𑀧𑀲𑁆𑀲𑀢𑀺, 𑀪𑁄𑀢𑀺𑀬𑁄 𑀓𑀜𑁆𑀜𑀸 𑀢𑀺𑀝𑁆𑀞𑀣, 𑀏𑀢𑁆𑀣𑁂𑀓𑀧𑀤𑀫𑀲𑀫𑀁, 𑀘𑀢𑁆𑀢𑀸𑀭𑀺 𑀲𑀫𑀸𑀦𑀺. 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀼𑀭𑀺𑀲𑀸 𑀦𑀺𑀲𑁆𑀲𑀝𑀁, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀕𑀘𑁆𑀙𑀣. 𑀓𑀜𑁆𑀜𑀸𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀓𑀜𑁆𑀜𑀸𑀬𑁄 𑀧𑀲𑁆𑀲𑀢𑀺, 𑀪𑁄𑀢𑀺𑀬𑁄 𑀓𑀜𑁆𑀜𑀸𑀬𑁄 𑀕𑀘𑁆𑀙𑀣, 𑀢𑀻𑀡𑀺 𑀢𑀻𑀡𑀺 𑀲𑀫𑀸𑀦𑀺. 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀓𑀜𑁆𑀜𑀁 𑀧𑀲𑁆𑀲𑀢𑀺, 𑀤𑁆𑀯𑁂 𑀅𑀲𑀫𑀸𑀦𑀺. 𑀧𑀼𑀭𑀺𑀲𑁂 𑀧𑀲𑁆𑀲𑀢𑀺, 𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢𑀁, 𑀤𑁆𑀯𑁂 𑀲𑀫𑀸𑀦𑀺. 𑀢𑁂𑀦 𑀧𑀼𑀭𑀺𑀲𑁂𑀦 𑀓𑀢𑀁, 𑀢𑀸𑀬 𑀓𑀜𑁆𑀜𑀸𑀬 𑀓𑀢𑀁, 𑀢𑀸𑀬 𑀓𑀜𑁆𑀜𑀸𑀬 𑀤𑁂𑀢𑀺, 𑀢𑀸𑀬 𑀓𑀜𑁆𑀜𑀸𑀬 ¶ 𑀅𑀧𑁂𑀢𑀺, 𑀢𑀸𑀬 𑀓𑀜𑁆𑀜𑀸𑀬 𑀲𑀦𑁆𑀢𑀓𑀁, 𑀢𑀸𑀬 𑀓𑀜𑁆𑀜𑀸𑀬 𑀧𑀢𑀺𑀝𑁆𑀞𑀺𑀢𑀁, 𑀏𑀓𑀫𑀲𑀫𑀁, 𑀧𑀜𑁆𑀘 𑀲𑀫𑀸𑀦𑀺. 𑀏𑀯𑀁 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀤𑀺𑀲𑁆𑀲𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀤𑀺𑀲𑁆𑀲𑀢𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀧𑀦 ‘‘𑀭𑀽𑀧𑀁, 𑀭𑀽𑀧𑀸𑀦𑀺, 𑀭𑀽𑀧𑀸. 𑀭𑀽𑀧𑀁, 𑀭𑀽𑀧𑀸𑀦𑀺, 𑀭𑀽𑀧𑁂. 𑀪𑁄 𑀭𑀽𑀧, 𑀪𑀯𑀦𑁆𑀢𑁄 𑀭𑀽𑀧𑀸𑀦𑀺, 𑀭𑀽𑀧𑀸’’𑀢𑀺 𑀏𑀯𑀁 𑀢𑀻𑀲𑀼 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀸𑀮𑀧𑀦𑀝𑁆𑀞𑀸𑀦𑁂𑀲𑀼 𑀲𑀦𑀺𑀓𑀸𑀭𑀸𑀬 𑀯𑀺𑀲𑁂𑀲𑀸𑀬 𑀭𑀽𑀧𑀫𑀸𑀮𑀸𑀬 𑀯𑀲𑁂𑀦 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸 𑀤𑀺𑀲𑁆𑀲𑀢𑀺, 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀦𑀺𑀓𑀸𑀭𑀸𑀦𑀺 𑀭𑀽𑀧𑀸𑀦𑀺 𑀲𑀩𑁆𑀩𑀤𑀸 𑀦 𑀲𑀦𑁆𑀢𑀺, 𑀇𑀢𑀺 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀧𑀼𑀮𑁆𑀮𑀺𑀗𑁆𑀕𑀁, 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀦𑀬𑁄 ‘‘𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻, 𑀬𑀸 𑀇𑀢𑁆𑀣𑀻 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀧𑀳𑀽𑀢𑀁 𑀲𑀤𑁆𑀥𑀁 𑀧𑀝𑀺𑀬𑀢𑁆𑀢𑀁, 𑀲𑀤𑁆𑀥𑀁 𑀓𑀼𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀸𑀦𑀲𑀼𑀢𑀺𑀓𑀲𑀤𑁆𑀤𑁂𑀲𑀼𑀧𑀺 𑀧𑀤𑀫𑀸𑀮𑀸𑀯𑀲𑁂𑀦 𑀮𑀩𑁆𑀪𑀢𑁂𑀯. 𑀬𑀸 𑀘 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀯𑀼𑀢𑁆𑀢𑀸, 𑀲𑀸 𑀏𑀓𑀘𑁆𑀘𑁂𑀲𑀼𑀧𑀺 𑀲𑀗𑁆𑀔𑁆𑀬𑀸𑀲𑀤𑁆𑀤𑁂𑀲𑀼 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀯𑀻𑀲𑀢𑀺𑀆𑀤𑀬𑁄 𑀦𑀯𑀼𑀢𑀺𑀧𑀭𑀺𑀬𑀦𑁆𑀢𑀸 𑀲𑀤𑁆𑀤𑀸 𑀏𑀓𑀯𑀘𑀦𑀦𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀢𑀺 𑀯𑀼𑀢𑁆𑀢𑀸, 𑀏𑀢𑁆𑀣 ‘‘𑀯𑀻𑀲𑀢𑀺𑀬𑀸’’𑀢𑀺 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁, 𑀢𑀣𑀸 ‘‘𑀢𑀺𑀁𑀲𑀸𑀬𑀸’’𑀢𑀺𑀆𑀤𑀻𑀦𑀁 ‘‘𑀦𑀯𑀼𑀢𑀺𑀬𑀸’’𑀢𑀺 𑀧𑀤𑀧𑀭𑀺𑀬𑀦𑁆𑀢𑀸𑀦𑀁, 𑀏𑀯𑀁 𑀯𑀻𑀲𑀢𑀺𑀆𑀤𑀻𑀦𑀁 𑀓𑀜𑁆𑀜𑀸𑀲𑀤𑁆𑀤𑀲𑁆𑀲𑁂𑀯 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀮𑀩𑁆𑀪𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀢𑀺𑀘𑀢𑀼𑀲𑀤𑁆𑀤𑁂𑀲𑀼 𑀓𑀣𑀦𑁆𑀢𑀺? 𑀢𑀺𑀘𑀢𑀼𑀲𑀤𑁆𑀤𑀸 𑀧𑀦 𑀬𑀲𑁆𑀫𑀸 ‘‘𑀢𑀬𑁄 𑀢𑀺𑀲𑁆𑀲𑁄 𑀢𑀻𑀡𑀺, 𑀘𑀢𑁆𑀢𑀸𑀭𑁄 𑀘𑀢𑀼𑀭𑁄 𑀘𑀢𑀲𑁆𑀲𑁄 𑀘𑀢𑁆𑀢𑀸𑀭𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀽𑀧𑀸𑀦𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀕𑀪𑀢𑁆𑀢𑀸 𑀬𑀣𑀸𑀲𑀓𑀮𑀺𑀗𑁆𑀕𑀯𑀲𑁂𑀦 ‘‘𑀧𑀼𑀭𑀺𑀲𑀸 𑀓𑀜𑁆𑀜𑀸𑀬𑁄 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀻𑀳𑀺 𑀯𑀺𑀲𑀤𑀸𑀯𑀺𑀲𑀤𑁄𑀪𑀬𑀭𑀳𑀺𑀢𑀸𑀓𑀸𑀭𑀯𑁄𑀳𑀸𑀭𑀲𑀗𑁆𑀔𑀸𑀢𑁂𑀳𑀺 𑀲𑀤𑁆𑀤𑁂𑀳𑀺 𑀬𑁄𑀕𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑁂𑀓𑀮𑀺𑀗𑁆𑀕𑀯𑀲𑁂𑀦 𑀯𑀺𑀲𑀤𑀸𑀯𑀺𑀲𑀤𑁄𑀪𑀬𑀭𑀳𑀺𑀢𑀸𑀓𑀸𑀭𑀯𑁄𑀳𑀸𑀭𑀸𑀢𑀺 𑀯𑀢𑁆𑀢𑀼𑀫𑀭𑀳𑀦𑁆𑀢𑀺.

𑀲𑀩𑁆𑀩𑀦𑀸𑀫𑁂𑀲𑀼𑀧𑀺 ¶ 𑀅𑀬𑀁 𑀢𑀺𑀯𑀺𑀥𑁄 𑀆𑀓𑀸𑀭𑁄 𑀮𑀩𑁆𑀪𑀢𑀺 𑀭𑀽𑀧𑀯𑀺𑀲𑁂𑀲𑀬𑁄𑀕𑀢𑁄. 𑀓𑀣𑀁? 𑀧𑀼𑀦𑁆𑀦𑀧𑀼𑀁𑀲𑀓𑀯𑀺𑀲𑀬𑁂 ‘‘𑀢𑀲𑁆𑀲 𑀓𑀲𑁆𑀲’’ 𑀇𑀘𑁆𑀘𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀸𑀦𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀺𑀬𑀦𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁂 ‘‘𑀢𑀲𑁆𑀲𑀸 𑀓𑀲𑁆𑀲𑀸’’ 𑀇𑀘𑁆𑀘𑀸𑀤𑀻𑀦𑀺 𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀸𑀦𑀺 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀧𑀜𑁆𑀘𑀫𑀻𑀙𑀝𑁆𑀞𑀻𑀲𑀢𑁆𑀢𑀫𑀺𑀬𑀦𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀦𑀸𑀫𑀢𑁆𑀢𑁂𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀏𑀓𑀦𑁆𑀢𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀲𑀼𑀮𑀪𑀸𑀦𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀺 𑀅𑀦𑀸𑀳𑀭𑀺𑀢𑁆𑀯𑀸 𑀲𑀼𑀤𑀼𑀮𑁆𑀮𑀪𑀪𑀸𑀯𑁂𑀦 𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀭𑀽𑀧𑀸𑀦𑀺 𑀲𑀸𑀲𑀦𑀢𑁄 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀦𑀺𑀓𑁆𑀓𑀗𑁆𑀔𑀪𑀸𑀯𑁂𑀦 𑀲𑁄𑀢𑀽𑀦𑀁 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀸𑀥𑀺𑀕𑀫𑀢𑁆𑀣𑀁. 𑀢𑀁 𑀬𑀣𑀸? ‘‘𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀲𑀸 𑀓𑀼𑀫𑀸𑀭𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀻𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻’’𑀢𑀺. 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀢𑀢𑀺𑀬𑀸𑀬 𑀭𑀽𑀧𑀁, ‘‘𑀢𑀲𑁆𑀲𑀸’’𑀢𑀺 𑀢𑀢𑀺𑀬𑀸𑀬 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲𑀩𑁆𑀩𑀲𑁆𑀲𑀸 𑀓𑀢𑀭𑀺𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀢𑀢𑀺𑀬𑀸𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺𑀧𑀺𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀤𑀺𑀝𑁆𑀞𑁂𑀦 𑀘 𑀅𑀤𑀺𑀝𑁆𑀞𑀲𑁆𑀲𑀧𑀺 𑀬𑀼𑀢𑁆𑀢𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸. ‘‘𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻’’𑀢𑀺 𑀏𑀢𑁆𑀣 ‘‘𑀓𑀲𑁆𑀲𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀭𑀽𑀧𑀁, ‘‘𑀓𑀲𑁆𑀲𑀸’’𑀢𑀺 𑀧𑀜𑁆𑀘𑀫𑀺𑀬𑀸 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲𑀩𑁆𑀩𑀲𑁆𑀲𑀸 𑀓𑀢𑀭𑀺𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀧𑀜𑁆𑀘𑀫𑀺𑀬𑀸 𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫. ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀘 𑀏𑀢𑁆𑀣 ‘‘𑀢𑀲𑁆𑀲𑀸 𑀅𑀜𑁆𑀜𑀢𑀭𑀺𑀲𑁆𑀲𑀸’’𑀢𑀺 𑀘 𑀲𑀢𑁆𑀢𑀫𑀺𑀬𑀸 𑀭𑀽𑀧𑀁, 𑀢𑀲𑁆𑀫𑀺𑀁 𑀤𑀺𑀝𑁆𑀞𑁂𑀬𑁂𑀯 ‘‘𑀲𑀩𑁆𑀩𑀲𑁆𑀲𑀸 𑀓𑀢𑀭𑀺𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀲𑀢𑁆𑀢𑀫𑀺𑀬𑀸 𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫𑀸𑀢𑀺.

𑀦𑀦𑀼 ¶ 𑀘 𑀪𑁄 ‘‘𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺’’𑀦𑁆𑀢𑀺 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, ‘‘𑀢𑀸𑀬𑀸’’𑀢𑀺 𑀳𑀺𑀲𑁆𑀲 𑀅𑀢𑁆𑀣𑁄, 𑀢𑀣𑀸 ‘‘𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻’’𑀢𑀺 𑀇𑀤𑀫𑁆𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. ‘‘𑀓𑀸𑀬𑀸’’𑀢𑀺 𑀳𑀺𑀲𑁆𑀲 𑀅𑀢𑁆𑀣𑁄. ‘‘𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀜𑁆𑀜𑀢𑀭𑀺𑀲𑁆𑀲𑀸’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀜𑁆𑀜𑀢𑀭𑀺𑀲𑁆𑀲’’𑀦𑁆𑀢𑀺 𑀳𑀺𑀲𑁆𑀲 𑀅𑀢𑁆𑀣𑁄𑀢𑀺? 𑀢𑀦𑁆𑀦, 𑀈𑀤𑀺𑀲𑁂𑀲𑀼 𑀘𑀼𑀡𑁆𑀡𑀺𑀬𑀧𑀤𑀯𑀺𑀲𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀲𑁆𑀲 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀦𑀦𑀼 𑀘 𑀪𑁄 𑀘𑀼𑀡𑁆𑀡𑀺𑀬𑀧𑀤𑀯𑀺𑀲𑀬𑁂𑀧𑀺 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀻’’𑀢𑀺𑀆𑀤𑀻𑀲𑀼 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀢𑁆𑀣𑀁 𑀯𑀤𑀦𑁆𑀢𑀺 𑀕𑀭𑀽𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀤𑁆𑀯𑁂 𑀅𑀥𑀺𑀧𑁆𑀧𑀸𑀬𑀸 𑀪𑀯𑀦𑁆𑀢𑀺 𑀆𑀥𑀸𑀭𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑁂𑀦 𑀪𑀼𑀫𑁆𑀫𑀲𑀫𑁆𑀧𑀤𑀸𑀦𑀸𑀦𑀫𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀢𑀣𑀸 𑀳𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀲𑀢𑁄 ‘‘𑀲𑀗𑁆𑀖𑁂 𑀤𑁂𑀣𑀸’’𑀢𑀺 𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀬𑀼𑀚𑁆𑀚𑀢𑀺𑀬𑁂𑀯. 𑀢𑀣𑀸 ‘‘𑀲𑀗𑁆𑀖𑁂 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀓𑀸𑀫𑀲𑁆𑀲𑀧𑀺 𑀲𑀢𑁄 ‘‘𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀯𑀘𑀦𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺, 𑀬𑀼𑀚𑁆𑀚𑀢𑀺𑀬𑁂𑀯, 𑀬𑀣𑀸 𑀧𑀦 𑀅𑀮𑀸𑀩𑀼 𑀮𑀸𑀩𑀼𑀲𑀤𑁆𑀤𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 ‘‘𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸 𑀧𑁆𑀮𑀯𑀦𑁆𑀢𑀻’’𑀢𑀺 𑀏𑀢𑁆𑀣 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀓𑀸𑀭𑀮𑁄𑀧𑁄 𑀳𑁄𑀢𑀻𑀢𑀺 𑀅𑀓𑁆𑀔𑀭𑀮𑁄𑀧𑁄 𑀩𑀼𑀤𑁆𑀥𑀺𑀬𑀸 𑀓𑀭𑀺𑀬𑀢𑀺. 𑀢𑀣𑀸 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀻’’𑀢𑀺𑀆𑀤𑀻𑀲𑀼𑀧𑀺 𑀩𑀼𑀤𑁆𑀥𑀺𑀬𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀭𑀺𑀓𑀧𑁆𑀧𑀦𑀁 𑀓𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀢𑁆𑀣𑀫𑀺𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀲𑁆𑀫𑀸 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺. 𑀯𑁂𑀲𑁆𑀲𑀦𑁆𑀢𑀭𑁂 𑀯𑀭𑀁 𑀤𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀬𑀼𑀢𑁆𑀢𑁄 ‘‘𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬𑀸’’𑀢𑀺𑀆𑀤𑀻𑀲𑀼 𑀧𑀦 𑀦 𑀬𑀼𑀢𑁆𑀢𑁄, 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀘 𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 ‘‘𑀦𑁂𑀯 𑀤𑀸𑀦𑀁 𑀯𑀺𑀭𑀫𑀺𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀕𑀸𑀣𑀸𑀲𑀼 𑀇𑀘𑁆𑀙𑀺𑀢𑀩𑁆𑀩𑁄.

𑀢𑀣𑀸𑀧𑀺 𑀯𑀤𑁂𑀬𑁆𑀬 𑀬𑀸 𑀲𑀸 𑀢𑀼𑀫𑁆𑀳𑁂𑀳𑀺 ‘‘𑀢𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀧𑀸𑀴𑀺 𑀆𑀪𑀢𑀸, 𑀦 𑀲𑀸 𑀲𑀢𑁆𑀢𑀫𑀻𑀧𑀬𑁄𑀕𑀸. ‘‘𑀢𑀲𑁆𑀲𑀸’’𑀢𑀺 ¶ 𑀳𑀺 𑀇𑀤𑀁 𑀙𑀝𑁆𑀞𑀺𑀬𑀦𑁆𑀢𑀧𑀤𑀁 ‘‘𑀢𑀲𑁆𑀲𑀸𑀫𑀓𑁆𑀓𑀝𑀺𑀬𑀸𑀅𑀗𑁆𑀕𑀚𑀸𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺? 𑀢𑀦𑁆𑀦, 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲𑀸𑀢𑀺 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀝𑁆𑀞𑀓𑀣𑀸𑀬𑀁𑀬𑁂𑀯 ‘‘𑀢𑀲𑁆𑀲𑀸 𑀘 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀢𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀺𑀓𑁆𑀔𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀢𑀲𑁆𑀲𑀸’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀦𑀦𑀼 𑀘 𑀪𑁄 𑀢𑀢𑁆𑀣𑀸𑀧𑀺 ‘‘𑀢𑀲𑁆𑀲𑀸’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺? ‘‘𑀅𑀢𑀺𑀯𑀺𑀬 𑀢𑁆𑀯𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀦𑀬𑁂 𑀓𑀼𑀲𑀮𑁄𑀲𑀺, 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀺𑀓𑁄 𑀦𑀸𑀫𑀸’’𑀢𑀺 𑀪𑀯𑀁 𑀯𑀢𑁆𑀢𑀩𑁆𑀩𑁄. 𑀬𑁄 𑀢𑁆𑀯𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀯𑀼𑀢𑁆𑀢𑀧𑀸𑀴𑀺𑀫𑁆𑀧𑀺 𑀉𑀮𑁆𑀮𑀗𑁆𑀖𑀲𑀺, 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀉𑀮𑁆𑀮𑀗𑁆𑀖𑀲𑀺, 𑀅𑀧𑀭𑀫𑁆𑀧𑀺 𑀢𑁂 𑀦𑀺𑀤𑁆𑀤𑁂𑀲𑀧𑀸𑀴𑀺𑀁 𑀆𑀳𑀭𑀺𑀲𑁆𑀲𑀸𑀫. 𑀲𑀘𑁂 𑀢𑁆𑀯𑀁 𑀧𑀡𑁆𑀟𑀺𑀢𑀚𑀸𑀢𑀺𑀓𑁄, 𑀲𑀜𑁆𑀜𑀢𑁆𑀢𑀺𑀁 𑀕𑀫𑀺𑀲𑁆𑀲𑀲𑀺. 𑀲𑀘𑁂 𑀅𑀧𑀡𑁆𑀟𑀺𑀢𑀚𑀸𑀢𑀺𑀓𑁄, 𑀅𑀢𑁆𑀢𑀦𑁄 𑀕𑀸𑀳𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀫𑀺𑀲𑁆𑀲𑀢𑀺, 𑀲𑀸𑀲𑀦𑁂 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀲𑀼𑀡𑁄𑀳𑀻𑀢𑀺. ‘‘𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀽’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀲𑀢𑁆𑀣𑀼𑀓𑀧𑁆𑀧𑁂𑀦 𑀅𑀕𑁆𑀕𑀲𑀸𑀯𑀓𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 ‘‘𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂’’𑀢𑀺 𑀏𑀯𑀁 ‘‘𑀇𑀫𑀺𑀲𑁆𑀲𑀸’’𑀢𑀺 𑀧𑀤𑀁 𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 ‘‘𑀇𑀥𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀸𑀘𑀓𑀢𑁆𑀢𑀸 𑀲𑀢𑁆𑀢𑀫𑀺𑀬𑀸 𑀭𑀽𑀧𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀢𑀺 ‘‘𑀇𑀫𑀺𑀲𑁆𑀲𑀸’’𑀢𑀺 𑀲𑀢𑁆𑀢𑀫𑀺𑀬𑀸 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲𑀩𑁆𑀩𑀲𑁆𑀲𑀸 𑀓𑀢𑀭𑀺𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀲𑀢𑁆𑀢𑀫𑀺𑀬𑀸 𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫.

𑀅𑀧𑀭𑀫𑁆𑀧𑀺 𑀢𑁂 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀆𑀳𑀘𑁆𑀘𑀪𑀸𑀲𑀺𑀢𑀁 𑀧𑀸𑀴𑀺𑀁 𑀆𑀳𑀭𑀺𑀲𑁆𑀲𑀸𑀫, 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀲𑀼𑀡𑁄𑀳𑀺, ‘‘𑀅𑀝𑁆𑀞𑀸𑀦𑀫𑁂𑀢𑀁 𑀪𑀺𑀓𑁆𑀔𑀯𑁂 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 ¶ 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁆𑀣 ‘‘𑀏𑀓𑀺𑀲𑁆𑀲𑀸’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀭𑀽𑀧𑀁. 𑀏𑀯𑀁 ‘‘𑀏𑀓𑀺𑀲𑁆𑀲𑀸’’𑀢𑀺 𑀲𑀢𑁆𑀢𑀫𑀺𑀬𑀸 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀲𑀩𑁆𑀩𑀲𑁆𑀲𑀸 𑀓𑀢𑀭𑀺𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀲𑀢𑁆𑀢𑀫𑀺𑀬𑀸 𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺𑀧𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫. 𑀦 𑀳𑀺 𑀲𑀩𑁆𑀩𑀣𑀸𑀧𑀺 𑀯𑁄𑀳𑀸𑀭𑀸 𑀲𑀭𑀽𑀧𑀢𑁄 𑀧𑀸𑀴𑀺𑀆𑀤𑀻𑀲𑀼 𑀤𑀺𑀲𑁆𑀲𑀦𑁆𑀢𑀺, 𑀏𑀓𑀘𑁆𑀘𑁂 𑀤𑀺𑀲𑁆𑀲𑀦𑁆𑀢𑀺, 𑀏𑀓𑀘𑁆𑀘𑁂 𑀦 𑀤𑀺𑀲𑁆𑀲𑀦𑁆𑀢𑀺𑀬𑁂𑀯. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀲𑁆𑀲𑀸’’𑀇𑀘𑁆𑀘𑀸𑀤𑀬𑁄 𑀲𑀤𑁆𑀤𑀸, ‘‘𑀢𑀸𑀬’’𑀇𑀘𑁆𑀘𑀸𑀤𑀬𑁄 𑀯𑀺𑀬;

𑀜𑁂𑀬𑁆𑀬𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼, 𑀢𑀢𑀺𑀬𑀸𑀤𑀻𑀲𑀼 𑀥𑀻𑀫𑀢𑀸.

𑀢𑀺𑀡𑁆𑀡𑀦𑁆𑀦𑀁 𑀧𑀦 𑀦𑀸𑀤𑀻𑀦𑀁, 𑀳𑁄𑀢𑀺 𑀲𑀩𑁆𑀬𑀧𑀤𑁂𑀲𑀢𑁄;

‘‘𑀢𑀲𑁆𑀲𑀸 𑀓𑀲𑁆𑀲𑀸’’𑀢𑀺𑀆𑀤𑀻𑀦𑀺, 𑀪𑀯𑀦𑁆𑀢𑀺 𑀢𑀢𑀺𑀬𑀸𑀤𑀺𑀲𑀼.

𑀅𑀢𑁆𑀭 𑀧𑀦𑀸𑀬𑀁 𑀧𑀸𑀴𑀺𑀦𑀬𑀯𑀺𑀪𑀸𑀯𑀦𑀸 𑀅𑀝𑁆𑀞𑀓𑀣𑀸𑀦𑀬𑀯𑀺𑀪𑀸𑀯𑀦𑀸 𑀘 𑁋 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀓𑀢𑀁, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀤𑁂𑀢𑀺, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀅𑀧𑁂𑀢𑀺, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀅𑀬𑀁 𑀓𑀜𑁆𑀜𑀸 𑀳𑀻𑀦𑀸, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀅𑀬𑀁 𑀓𑀜𑁆𑀜𑀸 𑀅𑀥𑀺𑀓𑀸, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀲𑀦𑁆𑀢𑀓𑀁, 𑀢𑀲𑁆𑀲𑀸 𑀓𑀜𑁆𑀜𑀸𑀬 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀤𑀼𑀮𑁆𑀮𑀪𑀸𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀬𑀸𑀦𑀼𑀲𑀸𑀭𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀜𑀸𑀢𑀩𑁆𑀩𑀸.

𑀏𑀯𑀁 𑀧𑀦 𑀜𑀢𑁆𑀯𑀸 𑀯𑀺𑀜𑁆𑀜𑀼𑀚𑀸𑀢𑀺𑀦𑀸 ‘‘𑀤𑁆𑀯𑀺𑀦𑁆𑀦𑀁 𑀕𑁄𑀲𑀤𑁆𑀤𑀸𑀦𑀁 𑀭𑀽𑀧𑀫𑀸𑀮𑀸𑀯𑀺𑀲𑁂𑀲𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀁 𑀳𑁄𑀢𑀻’’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁. 𑀕𑁄𑀲𑀤𑁆𑀤𑁄 𑀳𑀺 ‘‘𑀧𑀼𑀭𑀺𑀲𑁄 𑀫𑀸𑀢𑀼𑀕𑀸𑀫𑁄 𑀑𑀭𑁄𑀥𑁄 𑀆𑀧𑁄 𑀲𑀢𑁆𑀣𑀸’’𑀢𑀺𑀆𑀤𑀬𑁄 𑀯𑀺𑀬 𑀦 𑀦𑀺𑀬𑁄𑀕𑀸 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄, 𑀦𑀸𑀧𑀺 ‘‘𑀓𑀜𑁆𑀜𑀸 𑀭𑀢𑁆𑀢𑀺 𑀇𑀢𑁆𑀣𑀻’’𑀢𑀺𑀆𑀤𑀬𑁄 𑀯𑀺𑀬 𑀦𑀺𑀬𑁄𑀕𑀸 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄. 𑀢𑀣𑀸 𑀳𑀺 𑀅𑀬𑀁 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂 𑀥𑀸𑀢𑀼𑀲𑀤𑁆𑀤𑁄 𑀯𑀺𑀬 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄, 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 ¶ . 𑀇𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀲𑁄𑀢𑀽𑀦𑀁 𑀜𑀸𑀧𑀦𑁂𑀦 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀧𑁆𑀧𑀝𑀺𑀮𑀸𑀪𑀢𑁆𑀢𑀁 ‘‘𑀕𑁄, 𑀕𑀸𑀯𑀻 𑀕𑀸𑀯𑁄. 𑀕𑀸𑀯𑀺𑀁, 𑀕𑀯𑁄’’𑀢𑀺𑀆𑀤𑀺𑀦𑀸 𑀑𑀓𑀸𑀭𑀦𑁆𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀆𑀯𑁂𑀡𑀺𑀓𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀢𑁆𑀢𑀸. 𑀏𑀢𑁆𑀣 𑀧𑀦 ‘‘𑀕𑀸𑀯𑀺’’𑀦𑁆𑀢𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀁, ‘‘𑀕𑁄 𑀕𑁄𑀳𑀻’’𑀢𑀺𑀆𑀤𑀻𑀦𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀕𑀸𑀯𑁄 𑀕𑀸𑀯𑀻 𑀕𑀸𑀯’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁, ‘‘𑀕𑀸𑀯𑀺𑀬𑀸’’𑀢𑀺 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀏𑀯𑀫𑁂𑀢𑁆𑀣 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀆𑀕𑀢𑀧𑀤𑀸𑀦𑀁 𑀯𑀲𑁂𑀦 𑀅𑀯𑀺𑀲𑀤𑀸𑀓𑀸𑀭𑁄 𑀤𑀺𑀲𑁆𑀲𑀢𑀻𑀢𑀺 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀫𑀜𑁆𑀳𑀺 𑀦𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀢𑁆𑀣𑀺 𑀅𑀜𑁆𑀜𑁄 𑀦𑀬𑁄 𑀬𑁂𑀦 𑀕𑁄𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀲𑀺𑀬𑀸. 𑀢𑀲𑁆𑀫𑀸 𑀇𑀤𑀫𑁂𑀯 𑀅𑀫𑁆𑀳𑀸𑀓𑀁 𑀫𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀕𑁄𑀲𑀤𑁆𑀤𑀸𑀦𑀁 𑀭𑀽𑀧𑀫𑀸𑀮𑀸𑀬 𑀦𑀺𑀩𑁆𑀩𑀺𑀲𑁂𑀲𑀢𑀁 𑀯𑀤𑀦𑁆𑀢𑀸𑀦𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑁂𑀦 𑀕𑁄𑀲𑀤𑁆𑀤𑁂𑀦𑀺’𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀭𑀽𑀧𑀫𑀸𑀮𑀸𑀬 𑀲𑀤𑀺𑀲𑀢𑁆𑀢𑁂 𑀲𑀢𑀺 𑀫𑀸𑀢𑀼𑀕𑀸𑀫𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀲𑀫𑀁 𑀬𑁄𑀚𑁂𑀢𑁆𑀯𑀸 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀧𑀭𑀺𑀓𑀧𑁆𑀧𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑀏𑀢𑁆𑀣 𑀧𑀦 𑀓𑀺𑀜𑁆𑀘𑀺 𑀮𑀺𑀗𑁆𑀕𑀲𑀁𑀲𑀦𑁆𑀤𑀦𑀁 𑀓𑀣𑀬𑀸𑀫 𑁋 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 ‘‘𑀕𑀸𑀯𑀼𑀁 𑀕𑀸𑀯𑀁 𑀕𑀸𑀯𑁂𑀦𑀸’’𑀢𑀺𑀆𑀤𑀻𑀦𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀸𑀦𑀺, ‘‘𑀕𑁄 𑀕𑁄𑀳𑀻’’𑀢𑀺𑀆𑀤𑀻𑀦𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀕𑀸𑀯𑁄 𑀕𑀯𑁄 𑀕𑀯’’𑀦𑁆𑀢𑀺 𑀇𑀫𑀸𑀦𑀺 𑀧𑀦 ‘‘𑀲𑀢𑁆𑀣𑀸 𑀭𑀸𑀚𑀸’’𑀢𑀺𑀆𑀤𑀻𑀦𑀺 𑀯𑀺𑀬 𑀢𑀺𑀓𑁆𑀔𑀢𑁆𑀢𑀼𑀁, 𑀘𑀢𑀼𑀓𑁆𑀔𑀢𑁆𑀢𑀼𑀁 𑀯𑀸 𑀧𑀦𑁂𑀢𑁆𑀣 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀸 𑀆𑀕𑀢𑀧𑀤𑀸𑀦𑀺 𑀦 𑀲𑀦𑁆𑀢𑀺. 𑀢𑀤𑀪𑀸𑀯𑀢𑁄 𑀯𑀺𑀲𑀤𑀸𑀓𑀸𑀭𑁄 𑀤𑀺𑀲𑁆𑀲𑀢𑀺. 𑀧𑀼𑀭𑀺𑀲𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀫𑁆𑀧𑀺 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲’’𑀦𑁆𑀢𑀺𑀆𑀤𑀻𑀦𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀸𑀦𑀺, ‘‘𑀧𑀼𑀭𑀺𑀲𑁂’’𑀢𑀺𑀆𑀤𑀻𑀦𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀧𑀼𑀭𑀺𑀲𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁. 𑀏𑀯𑀁 𑀯𑀺𑀲𑀤𑀸𑀓𑀸𑀭𑁄 𑀤𑀺𑀲𑁆𑀲𑀢𑀺. 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀧𑀦 ‘‘𑀓𑀜𑁆𑀜’’𑀦𑁆𑀢𑀺𑀆𑀤𑀻𑀦𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀸𑀦𑀺, ‘‘𑀓𑀜𑁆𑀜𑀸𑀳𑀻’’𑀢𑀺𑀆𑀤𑀻𑀦𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀓𑀜𑁆𑀜𑀸𑀬𑁄’’𑀢𑀺𑀆𑀤𑀻𑀦𑀺 𑀢𑀺𑀓𑁆𑀔𑀢𑁆𑀢𑀼𑀁, ‘‘𑀓𑀜𑁆𑀜𑀸’’𑀢𑀺 𑀇𑀤𑀁 𑀘𑀢𑀼𑀓𑁆𑀔𑀢𑁆𑀢𑀼𑀁, ‘‘𑀓𑀜𑁆𑀜𑀸𑀬𑀸’’𑀢𑀺 𑀇𑀤𑀁 𑀧𑀦 𑀧𑀜𑁆𑀘𑀓𑁆𑀔𑀢𑁆𑀢𑀼𑀁. 𑀏𑀯𑀁 𑀅𑀯𑀺𑀲𑀤𑀸𑀓𑀸𑀭𑁄 𑀤𑀺𑀲𑁆𑀲𑀢𑀺. 𑀆𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀲𑁆𑀲𑀢𑀼 ‘‘𑀲𑀢𑁆𑀣𑀭𑀻’’𑀢𑀺𑀆𑀤𑀻𑀦𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀸𑀦𑀺, ‘‘𑀲𑀢𑁆𑀣𑀽’’𑀢𑀺𑀆𑀤𑀻𑀦𑀺 ¶ 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀲𑀢𑁆𑀣𑀸’’𑀢𑀺𑀆𑀤𑀻𑀦𑀺 𑀢𑀺𑀓𑁆𑀔𑀢𑁆𑀢𑀼𑀁, 𑀏𑀯𑀁 𑀯𑀺𑀲𑀤𑀸𑀓𑀸𑀭𑁄 𑀤𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀲𑀼𑀧𑀺 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀧𑀤𑀫𑀸𑀮𑀸𑀲𑀼 𑀯𑀺𑀲𑀤𑀸𑀓𑀸𑀭𑁄 𑀘 𑀅𑀯𑀺𑀲𑀤𑀸𑀓𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑀁 ‘‘𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀻𑀦𑀺 𑀏𑀓𑀓𑁆𑀔𑀢𑁆𑀢𑀼𑀫𑀸𑀕𑀢𑀸𑀦𑀺, ‘‘𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, ‘‘𑀘𑀺𑀢𑁆𑀢𑀸𑀦𑀻’’𑀢𑀺 𑀇𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑀁. 𑀅𑀝𑁆𑀞𑀺 𑀆𑀬𑀼𑀲𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑁄 𑀤𑀺𑀲𑁆𑀲𑀢𑀺. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀸 𑀆𑀕𑀢𑀧𑀤𑀸𑀦𑀁 𑀅𑀪𑀸𑀯𑀢𑁄 𑀯𑀺𑀲𑀤𑀸𑀓𑀸𑀭𑁄 𑀉𑀧𑀮𑀩𑁆𑀪𑀫𑀸𑀦𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 ‘‘𑀘𑀺𑀢𑁆𑀢𑀁 𑀅𑀝𑁆𑀞𑀺 𑀆𑀬𑀽’’𑀢𑀺𑀆𑀤𑀻𑀦𑀺 𑀦𑀧𑀼𑀁𑀲𑀓𑀸𑀦𑀺 ‘‘𑀕𑀘𑁆𑀙𑀁 𑀅𑀕𑁆𑀕𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀦𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀦𑀬𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄 𑀯𑀺𑀲𑀤𑀸𑀓𑀸𑀭𑀜𑁆𑀘, ‘‘𑀭𑀢𑁆𑀢𑀺 𑀬𑀸𑀕𑀽’’𑀢𑀺𑀆𑀤𑀻𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀦𑀬𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄 𑀅𑀯𑀺𑀲𑀤𑀸𑀓𑀸𑀭𑀜𑁆𑀘 𑀉𑀪𑀬𑀫𑀦𑀼𑀧𑀕𑀫𑁆𑀫 𑀯𑀺𑀲𑁂𑀲𑀢𑁄 ‘‘𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑀸. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀲𑀦𑀺𑀓𑀸𑀭𑀸𑀬 𑀭𑀽𑀧𑀫𑀸𑀮𑀸𑀬 𑀭𑀽𑀧𑀯𑀦𑁆𑀢𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀫𑀸𑀓𑀸𑀭𑁄 𑀉𑀪𑀬𑀫𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀺𑀯𑀺𑀥𑁄𑀧𑀸𑀬𑀁 𑀆𑀓𑀸𑀭𑁄 𑀲𑀓𑁆𑀓𑀝𑀪𑀸𑀲𑀸𑀲𑀼 𑀦 𑀮𑀩𑁆𑀪𑀢𑀺. 𑀢𑁂𑀦𑁂𑀲 𑀲𑀩𑁆𑀩𑁂𑀲𑀼𑀧𑀺 𑀩𑁆𑀬𑀸𑀓𑀭𑀡𑀲𑀢𑁆𑀣𑁂𑀲𑀼 𑀦 𑀯𑀼𑀢𑁆𑀢𑁄. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀦 𑀫𑀽𑀮𑀪𑀸𑀲𑀸𑀪𑀽𑀢𑀸𑀬 𑀚𑀺𑀦𑁂𑀭𑀺𑀢𑀸𑀬 𑀫𑀸𑀕𑀥𑀺𑀓𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀅𑀬𑀁 𑀦𑀺𑀭𑀼𑀢𑁆𑀢𑀺𑀫𑀜𑁆𑀚𑀽𑀲𑀸𑀬𑀁 𑀯𑀼𑀢𑁆𑀢𑁄 𑁋

𑀓𑀺𑀁 𑀧𑀦𑁂𑀢𑀁 𑀮𑀺𑀗𑁆𑀕𑀁 𑀦𑀸𑀫? 𑀓𑁂𑀘𑀺 𑀢𑀸𑀯 𑀯𑀤𑀦𑁆𑀢𑀺 𑁋

‘‘𑀣𑀦𑀓𑁂𑀲𑀯𑀢𑀻 𑀇𑀢𑁆𑀣𑀻, 𑀫𑀲𑁆𑀲𑀼𑀯𑀸 𑀧𑀼𑀭𑀺𑀲𑁄 𑀲𑀺𑀬𑀸. 𑀉𑀪𑀺𑀦𑁆𑀦𑀫𑀦𑁆𑀢𑀭𑀁 𑀏𑀢𑀁, 𑀇𑀢𑀭𑁄’𑀪𑀬𑀫𑀼𑀢𑁆𑀢𑀓𑁄’𑀢𑀺

𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀺𑀝𑁆𑀞𑀸 𑀣𑀦𑀓𑁂𑀲𑀸𑀤𑀬𑁄 𑀮𑀺𑀗𑁆𑀕’’𑀦𑁆𑀢𑀺, 𑀏𑀢𑀁 𑀦 𑀲𑀩𑁆𑀩𑀢𑁆𑀣, 𑀕𑀗𑁆𑀕𑀸𑀲𑀸𑀮𑀸𑀭𑀼𑀓𑁆𑀔𑀸𑀤𑀻𑀦𑀁 𑀣𑀦𑀸𑀤𑀺𑀦𑀸 𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄.

𑀅𑀧𑀭𑁂 ¶ 𑀯𑀤𑀦𑁆𑀢𑀺 𑁋 ‘‘𑀦 𑀮𑀺𑀗𑁆𑀕𑀁 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀮𑁄𑀓𑀲𑀗𑁆𑀓𑁂𑀢𑀭𑀽𑀴𑁆𑀳𑁄 𑀧𑀦 𑀯𑁄𑀳𑀸𑀭𑁄 𑀮𑀺𑀗𑁆𑀕𑀁 𑀦𑀸𑀫𑀸’’𑀢𑀺. 𑀇𑀤𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀲𑀩𑁆𑀩𑀮𑀺𑀗𑁆𑀕𑀺𑀓𑁄𑀧𑀺 𑀲𑀤𑁆𑀤𑁄 𑀳𑁄𑀢𑀺 𑀢𑀝𑀁 𑀢𑀝𑀻 𑀢𑀝𑁄𑀢𑀺. 𑀬𑀤𑀺 𑀘 𑀧𑀭𑀫𑀢𑁆𑀣𑀢𑁄 𑀮𑀺𑀗𑁆𑀕𑀁 𑀦𑀸𑀫 𑀲𑀺𑀬𑀸, 𑀓𑀣𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀁 𑀢𑁂𑀲𑀁 𑀏𑀓𑀢𑁆𑀣 𑀲𑀫𑀸𑀯𑁂𑀲𑁄 𑀪𑀯𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀧𑀼𑀮𑁆𑀮𑀺𑀗𑁆𑀕𑀁, 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀏𑀢𑁆𑀣 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀗𑁆𑀔𑀸𑀢𑀧𑀩𑀦𑁆𑀥𑀯𑀲𑁂𑀦𑁂𑀯 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀢𑀸 𑀕𑀳𑁂𑀢𑀩𑁆𑀩𑀸, 𑀦 𑀏𑀓𑁂𑀓𑀧𑀤𑀯𑀲𑁂𑀦. 𑀢𑀣𑀸 𑀳𑀺 ‘‘𑀓𑀜𑁆𑀜𑀸 𑀧𑀼𑀭𑀺𑀲𑁄 𑀘𑀺𑀢𑁆𑀢’’𑀦𑁆𑀢𑀺 𑀘, ‘‘𑀓𑀜𑁆𑀜𑀸𑀬𑁄 𑀧𑀼𑀭𑀺𑀲𑀸 𑀘𑀺𑀢𑁆𑀢𑀸𑀦𑀻’’𑀢𑀺 𑀘 𑀏𑀯𑀫𑀸𑀤𑀺𑀓𑀲𑁆𑀲 𑀏𑀓𑁂𑀓𑀧𑀤𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀢𑀸 𑀦 𑀤𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀧𑀩𑀦𑁆𑀥𑀯𑀲𑁂𑀦 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀪𑀸𑀯𑁂 𑀲𑀺𑀤𑁆𑀥𑁂𑀬𑁂𑀯 𑀲𑀫𑀼𑀤𑀸𑀬𑀸𑀯𑀬𑀯𑀢𑁆𑀢𑀸 𑀏𑀓𑁂𑀓𑀧𑀤𑀲𑁆𑀲𑀧𑀺 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀢𑀸 𑀲𑀺𑀚𑁆𑀛𑀢𑁂𑀯.

𑀓𑁂𑀘𑀺 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸𑀲𑀗𑁆𑀔𑀸𑀢𑀁 𑀧𑀩𑀦𑁆𑀥𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 𑀏𑀓𑁂𑀓𑀧𑀤𑀯𑀲𑁂𑀦𑁂𑀯 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀓𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀏𑀓𑁂𑀓𑀧𑀤𑀲𑁆𑀲𑁂𑀯 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀢𑀸 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 ‘𑀓𑀜𑁆𑀜𑀸 𑀧𑀼𑀭𑀺𑀲𑀸 𑀲𑀢𑁆𑀣𑀸 𑀕𑀼𑀡𑀯𑀸 𑀭𑀸𑀚𑀸’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀆𑀓𑀸𑀭𑀲𑀼𑀢𑀺𑀯𑀲𑁂𑀦, ‘𑀧𑀼𑀭𑀺𑀲𑁄 𑀲𑀢𑁆𑀣𑀸𑀭𑁄 𑀓𑀜𑁆𑀜𑀸𑀬𑁄’𑀢𑀺𑀆𑀤𑀻𑀦𑀁 𑀧𑀦 𑀑𑀓𑀸𑀭𑀲𑀼𑀢𑀺𑀯𑀲𑁂𑀦, ‘𑀘𑀺𑀢𑁆𑀢𑀁 𑀧𑀼𑀭𑀺𑀲𑀁 𑀓𑀜𑁆𑀜’𑀦𑁆𑀢𑀺𑀆𑀤𑀻𑀦𑀁 𑀅𑀦𑀼𑀲𑀸𑀭𑀲𑀼𑀢𑀺𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀲𑀼𑀢𑀺𑀲𑀫𑁆𑀪𑀯𑀸 𑀓𑀣𑀁 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀢𑀸 𑀲𑀺𑀬𑀸’’𑀢𑀺? 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀲𑀺𑀬𑀸 𑀏𑀯, 𑀦𑀸𑀦𑀢𑁆𑀢𑀁 𑀧𑀦 𑀢𑁂𑀲𑀁 𑀤𑀼𑀧𑁆𑀧𑀝𑀺𑀯𑁂𑀥’’𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀫𑀸 𑀢𑀼𑀫𑁆𑀳𑁂 𑀏𑀯𑀫𑀯𑀘𑀼𑀢𑁆𑀣, 𑀤𑀼𑀚𑁆𑀚𑀸𑀦𑀢𑀭𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀓𑀣𑀦𑀲𑀫𑀢𑁆𑀣𑀁 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀤𑁂𑀣𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ¶ 𑀢𑀢𑁄 𑀉𑀢𑁆𑀢𑀭𑀺 𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀩𑁄𑀥𑀺𑀲𑀤𑁆𑀤𑁄 𑀆𑀬𑀼𑀲𑀤𑁆𑀤𑁄 𑀘 𑀓𑀢𑀭𑀮𑀺𑀗𑁆𑀕𑁄’’𑀢𑀺. 𑀢𑁂 𑀚𑀸𑀦𑀦𑁆𑀢𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 ‘‘𑀩𑁄𑀥𑀺𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀧𑀼𑀮𑁆𑀮𑀺𑀗𑁆𑀕𑁄 𑀘, 𑀆𑀬𑀼𑀲𑀤𑁆𑀤𑁄 𑀘 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀘 𑀧𑀼𑀮𑁆𑀮𑀺𑀗𑁆𑀕𑁄 𑀘𑀸𑀢𑀺 𑀤𑁆𑀯𑀺𑀮𑀺𑀗𑁆𑀕𑀸 𑀏𑀢𑁂 𑀲𑀤𑁆𑀤𑀸’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀩𑁄𑀥𑀺𑀲𑀤𑁆𑀤𑁄 𑀘 𑀆𑀬𑀼𑀲𑀤𑁆𑀤𑁄 𑀘 𑀤𑁆𑀯𑀺𑀮𑀺𑀗𑁆𑀕𑀸 𑀏𑀢𑁂 𑀲𑀤𑁆𑀤𑀸, 𑀏𑀯𑀁 𑀲𑀦𑁆𑀢𑁂 𑀤𑁆𑀯𑀺𑀦𑁆𑀦𑀁 𑀩𑁄𑀥𑀺𑀲𑀤𑁆𑀤𑀸𑀦𑀁 𑀏𑀓𑀧𑀤𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀦𑀁 𑀅𑀘𑁆𑀘𑀦𑁆𑀢𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀓𑀣𑀁 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀲𑀺𑀬𑀸, 𑀓𑀣𑀜𑁆𑀘 𑀧𑀦 𑀤𑁆𑀯𑀺𑀦𑁆𑀦𑀁 𑀆𑀬𑀼𑀲𑀤𑁆𑀤𑀸𑀦𑀁 𑀏𑀓𑀧𑀤𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀦𑀁 𑀅𑀘𑁆𑀘𑀦𑁆𑀢𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀢𑀸 𑀘 𑀲𑀺𑀬𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑀸 𑀢𑁂 𑀅𑀤𑁆𑀥𑀸 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀅𑀧𑀲𑁆𑀲𑀦𑁆𑀢𑀸 𑀦𑀺𑀭𑀼𑀢𑁆𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 𑀲𑀤𑁆𑀤𑀲𑀢𑁆𑀣𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺 𑁋

‘‘𑀏𑀲𑁂’𑀲𑀸 𑀏𑀢’𑀫𑀺𑀢𑀺 𑀘,

𑀧𑀲𑀺𑀤𑁆𑀥𑀺 𑀅𑀢𑁆𑀣𑁂𑀲𑀼 𑀬𑁂𑀲𑀼 𑀮𑁄𑀓𑀲𑁆𑀲;

‘𑀣𑀻𑀧𑀼𑀫𑀦𑀧𑀼𑀁𑀲𑀓𑀸𑀦𑀻’𑀢𑀺,

𑀯𑀼𑀘𑁆𑀘𑀦𑁆𑀢𑁂 𑀢𑀸𑀦𑀺 𑀦𑀸𑀫𑀸𑀦𑀻’’𑀢𑀺.

𑀢𑁂𑀲𑀁 𑀓𑀺𑀭 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀏𑀲𑁄 𑀧𑀼𑀭𑀺𑀲𑁄, 𑀏𑀲𑁄 𑀫𑀸𑀢𑀼𑀕𑀸𑀫𑁄, 𑀏𑀲𑁄 𑀭𑀸𑀚𑀸, 𑀏𑀲𑀸 𑀇𑀢𑁆𑀣𑀻, 𑀏𑀲𑀸 𑀮𑀢𑀸, 𑀏𑀢𑀁 𑀦𑀧𑀼𑀁𑀲𑀓𑀁, 𑀏𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀼𑀭𑀺𑀲𑀸𑀤𑀻𑀲𑀼 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀮𑁄𑀓𑀲𑁆𑀲 ‘‘𑀏𑀲𑁄 𑀏𑀲𑀸 𑀏𑀢’’𑀦𑁆𑀢𑀺 𑀘 𑀧𑀲𑀺𑀤𑁆𑀥𑀺 𑀳𑁄𑀢𑀺, 𑀢𑁂𑀲𑀼 𑀅𑀢𑁆𑀣𑁂𑀲𑀼 𑀢𑀸𑀦𑀺 𑀦𑀸𑀫𑀸𑀦𑀺 ‘‘𑀧𑀼𑀫𑀺𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀤𑁆𑀯𑀸𑀭𑁂𑀦 𑀅𑀜𑁆𑀜𑀸𑀦𑀺𑀧𑀻𑀢𑀺. 𑀏𑀯𑀁 𑀯𑀤𑀦𑁆𑀢𑁂𑀳𑀺 𑀢𑁂𑀳𑀺 ‘‘𑀇𑀫𑀺𑀦𑀸 𑀦𑀸𑀫 𑀆𑀓𑀸𑀭𑁂𑀦 ‘𑀏𑀲𑁄 𑀏𑀲𑀸 𑀏𑀢’𑀦𑁆𑀢𑀺 𑀦𑀸𑀫𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀧𑀼𑀮𑁆𑀮𑀺𑀗𑁆𑀕𑀸𑀤𑀺𑀦𑀸𑀫𑀁 𑀮𑀪𑀦𑁆𑀢𑀻’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀦 𑀤𑀲𑁆𑀲𑀺𑀢𑁄, 𑀲𑀤𑁆𑀥𑀫𑁆𑀫𑀦𑀬𑀜𑁆𑀜𑀽𑀳𑀺 𑀧𑀦 𑀦𑁂𑀭𑀼𑀢𑁆𑀢𑀺𑀓𑁂𑀳𑀺 𑀤𑀲𑁆𑀲𑀺𑀢𑁄 ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸.

𑀓𑁂𑀘𑀺 ¶ 𑀧𑀦 ‘‘𑀅𑀯𑀺𑀲𑀤𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀅𑀯𑀺𑀲𑀤𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀏𑀯𑀁 𑀲𑀦𑁆𑀢𑁂 𑀫𑀸𑀢𑀼𑀕𑀸𑀫𑀓𑀮𑀢𑁆𑀢𑀓𑀦𑁆𑀢𑀓𑀡𑁆𑀝𑀓𑀕𑀼𑀫𑁆𑀩𑀸𑀤𑀬𑁄𑀧𑀺 𑀯𑁄𑀳𑀸𑀭𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁 𑀅𑀯𑀺𑀲𑀤𑀸𑀓𑀸𑀭𑀢𑁆𑀢𑀸 𑀢𑀤𑀢𑁆𑀣𑀸𑀦𑀁. 𑀬𑀤𑀺 𑀧𑀦 𑀯𑀺𑀲𑀤𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀧𑀼𑀮𑁆𑀮𑀺𑀗𑁆𑀕𑀁, 𑀏𑀯𑀁 𑀲𑀦𑁆𑀢𑁂 ‘‘𑀤𑁂𑀯𑀢𑀸 𑀲𑀤𑁆𑀥𑀸 𑀜𑀸𑀡’’𑀫𑀺𑀘𑁆𑀘𑀸𑀤𑀬𑁄𑀧𑀺 𑀯𑁄𑀳𑀸𑀭𑀸 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁 𑀯𑀺𑀲𑀤𑀸𑀓𑀸𑀭𑀢𑁆𑀢𑀸 𑀢𑀤𑀢𑁆𑀣𑀸𑀦𑀁. 𑀅𑀣 𑀯𑀸 𑀬𑀤𑀺 𑀅𑀯𑀺𑀲𑀤𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀯𑀺𑀲𑀤𑀸𑀓𑀸𑀭𑀸𑀦𑀁 𑀧𑀦𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀧𑀼𑀮𑁆𑀮𑀺𑀗𑁆𑀕𑀁, 𑀏𑀯𑀁 𑀲𑀦𑁆𑀢𑁂 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀏𑀓𑀓𑁆𑀔𑀡𑁂 𑀤𑁆𑀯𑀻𑀳𑀺 𑀮𑀺𑀗𑁆𑀕𑁂𑀳𑀺 𑀦 𑀯𑀢𑁆𑀢𑀩𑁆𑀩𑀢𑀸 𑀲𑀺𑀬𑀸 𑁋

‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑁂 𑀢𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫𑀸’’𑀢𑀺.

𑀬𑀤𑀺 𑀘 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑁄 𑀯𑁄𑀳𑀸𑀭𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀏𑀯𑀁 𑀲𑀦𑁆𑀢𑁂 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀸𑀦𑀁 𑀅𑀢𑁆𑀣𑀸𑀦𑀁 𑀢𑀺𑀡𑀭𑀼𑀓𑁆𑀔𑀸𑀤𑀻𑀲𑀼 ‘‘𑀇𑀤𑀁 𑀦𑀸𑀫𑀸’’𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀮𑀺𑀗𑁆𑀕𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀲𑀺𑀬𑀸. 𑀅𑀧𑀺𑀘 ‘‘𑀧𑀜𑁆𑀜𑀸𑀭𑀢𑀦𑀁. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀸𑀯𑀓𑀬𑀼𑀕’’𑀦𑁆𑀢𑀺 𑀘 𑀆𑀤𑀺𑀦𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀘𑀦𑁂𑀦 𑀢𑀤𑀢𑁆𑀣𑀸𑀦𑀫𑁆𑀧𑀺 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀅𑀧𑀺𑀘 𑀏𑀓𑀫𑁆𑀧𑀺 𑀢𑀻𑀭𑀁 ‘‘𑀢𑀝𑀁 𑀢𑀝𑀻 𑀢𑀝𑁄’’𑀢𑀺 𑀢𑀻𑀳𑀺 𑀮𑀺𑀗𑁆𑀕𑁂𑀳𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀓𑀫𑁆𑀧𑀺 𑀘 𑀜𑀸𑀡𑀁 ‘‘𑀧𑀜𑁆𑀜𑀸𑀡𑀁 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀅𑀫𑁄𑀳𑁄’’𑀢𑀺𑀆𑀤𑀺𑀦𑀸 𑀢𑀻𑀳𑀺 𑀮𑀺𑀗𑁆𑀕𑁂𑀳𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀢𑀁 𑀦𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀦𑀬𑁄 𑀕𑀳𑁂𑀢𑀩𑁆𑀩𑁄.

𑀮𑁄𑀓𑀲𑁆𑀫𑀺𑀜𑁆𑀳𑀺 𑀇𑀢𑁆𑀣𑀻𑀦𑀁 𑀳𑁂𑀝𑁆𑀞𑀺𑀫𑀓𑀸𑀬𑁄 𑀯𑀺𑀲𑀤𑁄 𑀳𑁄𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀅𑀯𑀺𑀲𑀤𑁄, 𑀉𑀭𑀫𑀁𑀲𑀁 𑀅𑀯𑀺𑀲𑀤𑀁, 𑀕𑀫𑀦𑀸𑀤𑀻𑀦𑀺𑀧𑀺 𑀅𑀯𑀺𑀲𑀤𑀸𑀦𑀺 ¶ . 𑀇𑀢𑁆𑀣𑀺𑀬𑁄 𑀳𑀺 𑀕𑀘𑁆𑀙𑀫𑀸𑀦𑀸 𑀅𑀯𑀺𑀲𑀤𑀁 𑀕𑀘𑁆𑀙𑀦𑁆𑀢𑀺, 𑀢𑀺𑀝𑁆𑀞𑀫𑀸𑀦𑀸 𑀦𑀺𑀧𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀫𑀸𑀦𑀸 𑀔𑀸𑀤𑀫𑀸𑀦𑀸 𑀪𑀼𑀜𑁆𑀚𑀫𑀸𑀦𑀸 𑀅𑀯𑀺𑀲𑀤𑀁 𑀪𑀼𑀜𑁆𑀚𑀦𑁆𑀢𑀺. 𑀧𑀼𑀭𑀺𑀲𑀫𑁆𑀧𑀺 𑀳𑀺 𑀅𑀯𑀺𑀲𑀤𑀁 𑀤𑀺𑀲𑁆𑀯𑀸 ‘‘𑀫𑀸𑀢𑀼𑀕𑀸𑀫𑁄 𑀯𑀺𑀬 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀧𑀚𑁆𑀚𑀢𑀺 𑀦𑀺𑀲𑀻𑀤𑀢𑀺 𑀔𑀸𑀤𑀢𑀺 𑀪𑀼𑀜𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀬𑀣𑀸 𑀇𑀢𑁆𑀣𑀺𑀬𑁄 𑀬𑁂𑀪𑀼𑀬𑁆𑀬𑁂𑀦 𑀅𑀯𑀺𑀲𑀤𑀸𑀓𑀸𑀭𑀸, 𑀢𑀣𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀬𑁂 𑀯𑁄𑀳𑀸𑀭𑀸 𑀬𑁂𑀪𑀼𑀬𑁆𑀬𑁂𑀦 𑀅𑀯𑀺𑀲𑀤𑀸𑀓𑀸𑀭𑀸, 𑀢𑁂𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀦𑀸𑀫 𑀪𑀯𑀦𑁆𑀢𑀺. 𑀢𑀁 𑀬𑀣𑀸? ‘‘𑀓𑀜𑁆𑀜𑀸 𑀤𑁂𑀯𑀢𑀸 𑀥𑀻𑀢𑀮𑀺𑀓𑀸 𑀤𑀼𑀩𑁆𑀩𑀸 𑀲𑀤𑁆𑀥𑀸 𑀭𑀢𑁆𑀢𑀺 𑀇𑀢𑁆𑀣𑀻 𑀬𑀸𑀕𑀼 𑀯𑀥𑀽’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺. 𑀧𑀼𑀭𑀺𑀲𑀸𑀦𑀁 𑀧𑀦 𑀳𑁂𑀝𑁆𑀞𑀺𑀫𑀓𑀸𑀬𑁄 𑀅𑀯𑀺𑀲𑀤𑁄 𑀳𑁄𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀯𑀺𑀲𑀤𑁄, 𑀉𑀭𑀫𑀁𑀲𑀁 𑀯𑀺𑀲𑀤𑀁, 𑀕𑀫𑀦𑀸𑀤𑀻𑀦𑀺𑀧𑀺 𑀯𑀺𑀲𑀤𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀭𑀺𑀲𑀸 𑀳𑀺 𑀕𑀘𑁆𑀙𑀫𑀸𑀦𑀸 𑀯𑀺𑀲𑀤𑀁 𑀕𑀘𑁆𑀙𑀦𑁆𑀢𑀺, 𑀢𑀺𑀝𑁆𑀞𑀫𑀸𑀦𑀸 𑀦𑀺𑀧𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀫𑀸𑀦𑀸 𑀔𑀸𑀤𑀫𑀸𑀦𑀸 𑀪𑀼𑀜𑁆𑀚𑀫𑀸𑀦𑀸 𑀯𑀺𑀲𑀤𑀁 𑀪𑀼𑀜𑁆𑀚𑀦𑁆𑀢𑀺. 𑀇𑀢𑁆𑀣𑀺𑀫𑁆𑀧𑀺 𑀳𑀺 𑀕𑀫𑀦𑀸𑀤𑀻𑀦𑀺 𑀯𑀺𑀲𑀤𑀸𑀦𑀺 𑀓𑀼𑀭𑀼𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀧𑀼𑀭𑀺𑀲𑁄 𑀯𑀺𑀬 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀇𑀢𑀺 𑀬𑀣𑀸 𑀧𑀼𑀭𑀺𑀲𑀸 𑀬𑁂𑀪𑀼𑀬𑁆𑀬𑁂𑀦 𑀯𑀺𑀲𑀤𑀸𑀓𑀸𑀭𑀸, 𑀢𑀣𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀬𑁂 𑀯𑁄𑀳𑀸𑀭𑀸 𑀬𑁂𑀪𑀼𑀬𑁆𑀬𑁂𑀦 𑀯𑀺𑀲𑀤𑀸𑀓𑀸𑀭𑀸, 𑀢𑁂𑀬𑁂𑀯 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀦𑀸𑀫 𑀪𑀯𑀦𑁆𑀢𑀺. 𑀢𑀁 𑀬𑀣𑀸? ‘‘𑀧𑀼𑀭𑀺𑀲𑁄 𑀫𑀸𑀢𑀼𑀕𑀸𑀫𑁄 𑀑𑀭𑁄𑀥𑁄 𑀆𑀧𑁄 𑀭𑀼𑀓𑁆𑀔𑁄 𑀫𑁄𑀳𑁄 𑀲𑀢𑁆𑀣𑀸’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺. 𑀬𑀣𑀸 𑀘 𑀧𑀦 𑀦𑀧𑀼𑀁𑀲𑀓𑀸 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀸, 𑀢𑀣𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀯𑀺𑀜𑁆𑀜𑀸𑀡𑀓𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀬𑁂 𑀯𑁄𑀳𑀸𑀭𑀸 𑀉𑀪𑀬𑀫𑀼𑀢𑁆𑀢𑀸𑀓𑀸𑀭𑀸, 𑀢𑁂𑀬𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀦𑀸𑀫 𑀪𑀯𑀦𑁆𑀢𑀺. 𑀢𑀁 𑀬𑀣𑀸? ‘‘𑀘𑀺𑀢𑁆𑀢𑀁 𑀭𑀽𑀧𑀁 𑀇𑀢𑁆𑀣𑀸𑀕𑀸𑀭𑀁 𑀓𑀮𑀢𑁆𑀢𑀁 𑀦𑀸𑀝𑀓𑀁 𑀭𑀢𑀦𑀁 𑀜𑀸𑀡𑀁 𑀅𑀝𑁆𑀞𑀺 𑀆𑀬𑀼’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺. 𑀇𑀘𑁆𑀘𑁂𑀯𑀁 𑀦𑀸𑀫𑀺𑀓𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀯𑁄𑀳𑀸𑀭𑀸𑀦𑀁 𑁋

𑀯𑀺𑀲𑀤𑀸𑀯𑀺𑀲𑀤𑀸𑀓𑀸𑀭𑀸, 𑀆𑀓𑀸𑀭𑁄’𑀪𑀬𑀫𑀼𑀢𑁆𑀢𑀓𑁄;

𑀮𑀺𑀗𑁆𑀕𑀲𑁆𑀲 𑀮𑀓𑁆𑀔𑀡𑀁 𑀏𑀢𑀁, 𑀜𑁂𑀬𑁆𑀬𑀁 𑀲𑁆𑀬𑀸𑀤𑀺𑀧𑁆𑀧𑀩𑀦𑁆𑀥𑀢𑁄.

𑀇𑀤𑀁 ¶ 𑀞𑀸𑀦𑀁 𑀤𑀼𑀩𑁆𑀩𑀺𑀦𑀺𑀯𑀺𑀚𑁆𑀛𑀁 𑀫𑀳𑀸𑀯𑀦𑀕𑀳𑀦𑀁 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀇𑀢𑀺 𑀲𑀩𑁆𑀩𑁂𑀲𑀁 𑀦𑀸𑀫𑀺𑀓𑀧𑀤𑀸𑀦𑀁 𑀧𑀩𑀦𑁆𑀥𑀦𑀺𑀲𑁆𑀲𑀺𑀢𑁂𑀦 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀪𑀸𑀯𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀪𑀸𑀯𑀲𑁆𑀲 𑀲𑀫𑁆𑀪𑀯𑀢𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑁄𑀲𑀤𑁆𑀤𑀸𑀦𑀁 𑀧𑀩𑀦𑁆𑀥𑀦𑀺𑀲𑁆𑀲𑀺𑀢𑁂𑀦 𑀅𑀯𑀺𑀲𑀤𑀸𑀓𑀸𑀭𑀯𑁄𑀳𑀸𑀭𑀸𑀤𑀺𑀪𑀸𑀯𑁂𑀦 𑀬𑀣𑀸𑀲𑀓𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀑𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀑𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀏𑀯𑀁 𑀲𑀩𑁆𑀩𑀣𑀸𑀧𑀺 𑀆𑀓𑀸𑀭𑀦𑁆𑀢 𑀇𑀯𑀡𑁆𑀡𑀦𑁆𑀢 𑀉𑀯𑀡𑁆𑀡𑀦𑁆𑀢𑁄𑀓𑀸𑀭𑀦𑁆𑀢𑀯𑀲𑁂𑀦 𑀙𑀩𑁆𑀩𑀺𑀥𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺. 𑀏𑀢𑁂𑀲𑀼 𑀧𑀦 𑀓𑁂𑀲𑀜𑁆𑀘𑀺 𑀆𑀓𑀸𑀭𑀦𑁆𑀢𑀸𑀦𑀁 𑀈𑀓𑀸𑀭𑀦𑁆𑀢𑀸𑀦𑀜𑁆𑀘 𑀓𑀢𑁆𑀣𑀘𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 𑀬𑁄 𑀧𑀪𑁂𑀤𑁄 𑀤𑀺𑀲𑁆𑀲𑀢𑀺, 𑀲𑁄 𑀇𑀤𑀸𑀦𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑁋

‘‘𑀦 𑀢𑁆𑀯𑀁 𑀭𑀸𑀥 𑀯𑀺𑀚𑀸𑀦𑀸𑀲𑀺, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂;

𑀅𑀩𑁆𑀬𑀬𑀢𑀁 𑀯𑀺𑀮𑀧𑀲𑀺, 𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂’’𑀢𑀺

𑀇𑀫𑀲𑁆𑀫𑀺𑀁 𑀭𑀸𑀥𑀚𑀸𑀢𑀓𑁂 ‘‘𑀯𑀺𑀭𑀢𑁆𑀢𑀸’’𑀢𑀺 𑀆𑀓𑀸𑀭𑀦𑁆𑀢𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 ‘‘𑀯𑀺𑀭𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀓𑁄𑀲𑀺𑀬𑀸𑀬𑀦𑀻’’𑀢𑀺 𑀈𑀓𑀸𑀭𑀦𑁆𑀢𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 ‘‘𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 ‘‘𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂𑀢𑀺 𑀫𑀸𑀢𑀸 𑀦𑁄 𑀓𑁄𑀲𑀺𑀬𑀸𑀬𑀦𑀻 𑀩𑁆𑀭𑀸𑀳𑁆𑀫𑀡𑀻 𑀯𑀺𑀭𑀢𑁆𑀢𑀸 𑀅𑀫𑁆𑀳𑀸𑀓𑀁 𑀧𑀺𑀢𑀭𑀺 𑀦𑀺𑀧𑁆𑀧𑁂𑀫𑀸 𑀚𑀸𑀢𑀸’’𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀺. 𑀦𑀦𑀼 𑀘 𑀪𑁄 𑀧𑀸𑀴𑀺𑀬𑀁 ‘‘𑀯𑀺𑀭𑀢𑁆𑀢𑁂’’𑀢𑀺, ‘‘𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀘 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀏𑀓𑀸𑀭𑀦𑁆𑀢𑀫𑁆𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 𑀆𑀓𑀸𑀭𑀻𑀓𑀸𑀭𑀦𑁆𑀢𑁄𑀕𑀥𑀭𑀽𑀧𑀯𑀺𑀲𑁂𑀲𑀢𑁆𑀢𑀸 𑀢𑁂𑀲𑀁 𑀭𑀽𑀧𑀸𑀦𑀁. 𑀆𑀤𑁂𑀲𑀯𑀲𑁂𑀦 ¶ 𑀳𑀺 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀏𑀓𑀸𑀭𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀬𑀣𑀸𑀯𑀼𑀢𑁆𑀢𑀸 𑀙𑀩𑁆𑀩𑀺𑀥𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸.

𑀇𑀘𑁆𑀘𑁂𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁, 𑀧𑀓𑀺𑀡𑁆𑀡𑀦𑀬𑀲𑀸𑀮𑀺𑀦𑀻;

𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸 𑀫𑁂, 𑀲𑀸𑀲𑀦𑀢𑁆𑀣𑀁 𑀲𑀬𑀫𑁆𑀪𑀼𑀦𑁄.

𑀲𑀤𑁆𑀤𑀦𑀻𑀢𑀺𑀲𑀽𑀭𑀺𑀬𑁄𑀬𑀁,

𑀅𑀦𑁂𑀓𑀲𑀼𑀯𑀺𑀦𑀺𑀘𑁆𑀙𑀬𑀭𑀲𑁆𑀫𑀺𑀓𑀮𑀸𑀧𑁄;

𑀲𑀁𑀲𑀬𑀦𑁆𑀥𑀓𑀸𑀭𑀦𑀼𑀤𑁄,

𑀓𑀲𑁆𑀲 𑀫𑀢𑀺𑀧𑀤𑀼𑀫𑀁 𑀦 𑀯𑀺𑀓𑀸𑀲𑁂.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁯. 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀣 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 ‘‘𑀪𑀽𑀢𑀁’’𑀇𑀘𑁆𑀘𑀸𑀤𑀺𑀓𑀲𑁆𑀲 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑁋

𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺. 𑀘𑀺𑀢𑁆𑀢𑁂𑀦, 𑀘𑀺𑀢𑁆𑀢𑁂𑀳𑀺, 𑀘𑀺𑀢𑁆𑀢𑁂𑀪𑀺. 𑀘𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀸𑀦𑀁. 𑀘𑀺𑀢𑁆𑀢𑀸, 𑀘𑀺𑀢𑁆𑀢𑀲𑁆𑀫𑀸, 𑀘𑀺𑀢𑁆𑀢𑀫𑁆𑀳𑀸, 𑀘𑀺𑀢𑁆𑀢𑁂𑀳𑀺, 𑀘𑀺𑀢𑁆𑀢𑁂𑀪𑀺. 𑀘𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀸𑀦𑀁. 𑀘𑀺𑀢𑁆𑀢𑁂, 𑀘𑀺𑀢𑁆𑀢𑀲𑁆𑀫𑀺𑀁, 𑀘𑀺𑀢𑁆𑀢𑀫𑁆𑀳𑀺, 𑀘𑀺𑀢𑁆𑀢𑁂𑀲𑀼. 𑀪𑁄 𑀘𑀺𑀢𑁆𑀢, 𑀪𑁄 𑀘𑀺𑀢𑁆𑀢𑀸, 𑀪𑀯𑀦𑁆𑀢𑁄 𑀘𑀺𑀢𑁆𑀢𑀸𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀘𑀺𑀢𑁆𑀢𑀸’’𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁 ‘‘𑀘𑀺𑀢𑁆𑀢𑁂’’𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀜𑁆𑀘 𑀅𑀦𑀸𑀕𑀢𑀁, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀅𑀜𑁆𑀜𑁂𑀲𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀭𑀽𑀧𑀸𑀦𑀁 𑀤𑀲𑁆𑀲𑀦𑀢𑁄 𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀘 ‘‘𑀙 𑀘𑀺𑀢𑁆𑀢𑀸 𑀅𑀩𑁆𑀬𑀸𑀓𑀢𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀫𑁂𑀯 ¶ , 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑀸. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑁂’’𑀢𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀦𑀜𑁆𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀓𑀢𑁆𑀣𑀘𑀺 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀯𑀺𑀬 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑀺 𑀪𑀯𑀦𑁆𑀢𑀺. 𑀢𑀸𑀦𑀺 𑀘 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀸 𑀲𑀮𑀺𑀗𑁆𑀕𑁂𑀦 𑀯𑀸 𑀅𑀮𑀺𑀗𑁆𑀕𑁂𑀦 𑀯𑀸 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀳𑀼𑀢𑁆𑀯𑀸 𑀓𑁂𑀯𑀮𑀸𑀦𑀺 𑀯𑀸 𑀧𑀸𑀯𑀘𑀦𑁂 𑀲𑀜𑁆𑀘𑀭𑀦𑁆𑀢𑀺. 𑀅𑀢𑁆𑀭 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺𑀫𑀁. 𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸. 𑀢𑀻𑀡𑀺𑀦𑁆𑀤𑁆𑀭𑀺𑀬𑀸. 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸. 𑀤𑀲𑀺𑀦𑁆𑀤𑁆𑀭𑀺𑀬𑀸. 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀫𑀳𑀸𑀪𑀽𑀢𑀸, 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸, 𑀘𑀢𑀼𑀭𑁄 𑀅𑀗𑁆𑀕𑁂 𑀅𑀥𑀺𑀝𑁆𑀞𑀸𑀬, 𑀲𑁂𑀫𑀺 𑀯𑀫𑁆𑀫𑀺𑀓𑀫𑀢𑁆𑀣𑀓𑁂, 𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸. 𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀅𑀦𑁂𑀓𑀲𑀢𑀸 𑀧𑀸𑀴𑀺𑀧𑁆𑀧𑀤𑁂𑀲𑀸 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀧𑀞𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄. ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀻𑀦𑀺𑀬𑁂𑀯 𑀧𑀦 𑀧𑀤𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺 𑀦𑀺𑀬𑁄𑀕𑀸 𑀦𑀺𑀕𑁆𑀕𑀳𑀻𑀢𑀦𑁆𑀢𑁂𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄𑀢𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 𑁋 𑀦𑀦𑀼 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 ¶ 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 ‘‘𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀧𑀞𑀫𑁂𑀓𑀯𑀘𑀦𑀝𑁆𑀞𑀸𑀦𑁂 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀞𑀺𑀢𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀏𑀓𑀦𑁆𑀢𑀢𑁄 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀅𑀦𑀼𑀫𑀢𑀸, 𑀦𑀦𑀼 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼𑀧𑀺 ‘‘𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀬𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀢𑀺? 𑀦 𑀯𑀢𑁆𑀢𑀩𑁆𑀩𑀸, 𑀓𑀲𑁆𑀫𑀸𑀢𑀺 𑀘𑁂? ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀢𑀺𑀧𑀝𑁆𑀞𑀸𑀦𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁄. 𑀢𑀢𑁆𑀣 𑀳𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀥𑀫𑁆𑀫𑀲𑀤𑁆𑀤𑁂𑀦 𑀬𑁄𑀚𑁂𑀢𑀼𑀁 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 𑀥𑀫𑁆𑀫𑀸𑀧𑁂𑀓𑁆𑀔𑀁 𑀓𑀢𑁆𑀯𑀸 ‘‘𑀲𑀢𑀺𑀧𑀝𑁆𑀞𑀸𑀦𑁄, 𑀘𑀺𑀢𑁆𑀢𑁄, 𑀘𑀺𑀢𑁆𑀢𑀸’’𑀢𑀺 𑀘 𑀅𑀪𑀸𑀲𑀺. 𑀓𑁂𑀯𑀮𑀸 𑀳𑀺 𑀲𑀢𑀺𑀧𑀝𑁆𑀞𑀸𑀦 𑀘𑀺𑀢𑁆𑀢𑀲𑀤𑁆𑀤𑀸𑀤𑀬𑁄 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁂𑀦 𑀓𑀢𑁆𑀣𑀘𑀺𑀧𑀺 𑀬𑁄𑀚𑀺𑀢𑀸 𑀦 𑀲𑀦𑁆𑀢𑀺, 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀪𑀸𑀯𑁂𑀦 𑀧𑀦 𑀬𑁄𑀚𑀺𑀢𑀸 𑀲𑀦𑁆𑀢𑀺.

𑀢𑀣𑀸 𑀳𑀺 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀧𑀼𑀮𑁆𑀮𑀺𑀗𑁆𑀕𑀕𑀳𑀧𑀢𑀺𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑁂 𑀧𑀯𑀢𑁆𑀢𑀁 𑀘𑀺𑀢𑁆𑀢𑀦𑀸𑀫𑀁 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀧𑀼𑀕𑁆𑀕𑀮𑁂 𑀆𑀭𑁄𑀧𑁂𑀢𑁆𑀯𑀸 𑀧𑀼𑀕𑁆𑀕𑀮𑀯𑀸𑀘𑀓𑀁 𑀓𑀢𑁆𑀯𑀸 ‘‘𑀘𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀫𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, ‘‘𑀘𑀺𑀢𑁆𑀢’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑁂𑀬𑁆𑀬. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄 𑀲𑀸𑀧𑁂𑀓𑁆𑀔𑀢𑁆𑀢𑀸 𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀧𑀤𑀸𑀦𑀺 𑀦 𑀲𑀦𑁆𑀢𑀺, 𑀬𑁂𑀳𑀺 𑀢𑁂 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀻𑀦𑀺𑀬𑁂𑀯 𑀧𑀤𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺, 𑀲𑀩𑁆𑀩𑀸𑀦𑀺, 𑀏𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸 ¶ , 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀓𑁂𑀘𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦𑀺𑀓𑀸𑀭𑀮𑁄𑀧𑀁 𑀇𑀘𑁆𑀙𑀦𑁆𑀢𑀺 ‘‘𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂, 𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀬. 𑀅𑀤𑀲𑁆𑀲𑀦𑀜𑁆𑀳𑀺 𑀮𑁄𑀧𑁄, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺, 𑀲𑀩𑁆𑀩𑀸𑀦𑀺 𑀫𑀸𑀮𑀸𑀦𑀻’𑀢𑀺𑀆𑀤𑀺𑀓𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀓𑁂𑀘𑀺 𑀧𑀦 ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀏𑀢𑁆𑀣 𑀫𑀸𑀮𑀸𑀲𑀤𑁆𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀲𑀩𑁆𑀩𑁂𑀲𑀤𑁆𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀲𑀩𑁆𑀩𑀸 𑀫𑀸𑀮𑀸’’𑀢𑀺 𑀅𑀢𑁆𑀣𑀁 𑀓𑀣𑁂𑀦𑁆𑀢𑀺. 𑀢𑀁 𑀓𑀺𑀜𑁆𑀘𑀸𑀧𑀺 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀲𑁄 𑀪𑀕𑀯𑀸 𑀮𑀺𑀗𑁆𑀕𑀁 𑀦𑀜𑁆𑀜𑀸𑀲𑀺, 𑀦 𑀘 ‘‘𑀲𑀩𑁆𑀩𑀸 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀤𑁆𑀯𑁂 𑀧𑀤𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺. 𑀬𑁄 𑀏𑀯𑀁 𑀯𑀺𑀲𑀤𑀺𑀲𑀮𑀺𑀗𑁆𑀕𑀸𑀦𑀺 𑀧𑀤𑀸𑀦𑀺 𑀉𑀘𑁆𑀘𑀸𑀭𑁂𑀲𑀺. 𑀚𑀸𑀦𑀦𑁆𑀢𑁄𑀬𑁂𑀯 𑀧𑀦 𑀪𑀕𑀯𑀸 𑀯𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀬𑁂𑀯 𑀘 ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀯𑀺𑀲𑀤𑀺𑀲𑀮𑀺𑀗𑁆𑀕𑀸𑀦𑀺 𑀧𑀤𑀸𑀦𑀺 𑀉𑀘𑁆𑀘𑀸𑀭𑁂𑀲𑀺, 𑀢𑀲𑁆𑀫𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑀁 𑀲𑀩𑁆𑀩𑁂𑀲𑀤𑁆𑀤𑀁 ‘‘𑀲𑀩𑁆𑀩𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 ‘‘𑀢𑀻𑀡𑀺𑀦𑁆𑀤𑁆𑀭𑀺𑀬𑀸’’𑀢𑀺 𑀧𑀤𑀁 𑀯𑀺𑀬 𑀮𑀼𑀢𑁆𑀢𑀦𑀺𑀓𑀸𑀭𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀫𑀸𑀮𑀸𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀲𑀩𑁆𑀩𑀸𑀦𑀺 𑀫𑀸𑀮𑀸𑀦𑀻’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀓𑀢𑁆𑀣𑀘𑀺 ‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀻’’𑀢𑀺 𑀏𑀢𑁆𑀣 𑀯𑀺𑀬. 𑀏𑀢𑁆𑀣 𑀳𑀺 𑀬𑀲𑁆𑀲 𑀏𑀢𑀸𑀦𑀺 𑀥𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑁂𑀢𑁆𑀣 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀁. 𑀫𑀸𑀮𑀸𑀲𑀤𑁆𑀤𑁄 𑀤𑁆𑀯𑀺𑀮𑀺𑀗𑁆𑀕𑁄 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦. 𑀢𑀺𑀝𑁆𑀞𑀢𑀼 𑀢𑀲𑁆𑀲𑀺𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀦𑀧𑀼𑀁𑀲𑀓𑀢𑁆𑀢𑁂 𑀧𑀦 𑀢𑀻𑀡𑀺 𑀫𑀸𑀮𑀸𑀦𑀺. ‘‘𑀫𑀸𑀮𑁂𑀳𑀺 𑀘 𑀕𑀦𑁆𑀥𑁂𑀳𑀺 𑀘 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀽𑀚𑁂𑀦𑁆𑀢𑀻’’𑀢𑀺𑀆𑀤𑀬𑁄 𑀦𑀧𑀼𑀁𑀲𑀓𑀧𑁆𑀧𑀬𑁄𑀕𑀸𑀦𑀺𑀧𑀺 𑀩𑀳𑀽 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺.

𑀬𑀤𑀺 𑀧𑀦 𑀪𑁄 𑀫𑀸𑀮𑀲𑀤𑁆𑀤𑁄 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑁄, ‘‘𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫’’𑀦𑁆𑀢𑀺 𑀏𑀢𑁆𑀣 𑀫𑀸𑀮𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑀧𑀭𑀺𑀓𑀧𑁆𑀧𑀦𑁂 𑀓𑁄 𑀤𑁄𑀲𑁄 𑀅𑀢𑁆𑀣𑀻𑀢𑀺? 𑀅𑀢𑁆𑀣𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀲𑀤𑁆𑀤𑀲𑁆𑀲 ¶ 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁂𑀦 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲𑀸𑀪𑀸𑀯𑀢𑁄, 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲 𑀧𑀦 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁂𑀦 𑀲𑀩𑁆𑀩𑀦𑀸𑀫𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀉𑀧𑀮𑀩𑁆𑀪𑀦𑀢𑁄. 𑀢𑁂𑀦𑁂𑀯 𑀘 ‘‘𑀏𑀢𑁂 𑀥𑀦𑀸’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀧𑀸𑀯𑀘𑀦𑁂 𑀩𑀳𑀼𑀥𑀸 𑀤𑀺𑀝𑁆𑀞𑀸. 𑀏𑀢𑁆𑀣𑀸𑀧𑀺 𑀧𑀦 𑀯𑀤𑁂𑀬𑁆𑀬𑀼𑀁 ‘‘𑀥𑀦𑀸𑀢𑀺𑀆𑀤𑀻𑀦𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀼𑀮𑁆𑀮𑀺𑀗𑁆𑀕𑀸𑀦𑀺𑀬𑁂𑀯 ‘‘𑀏𑀢𑁂’’𑀢𑀺𑀆𑀤𑀻𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀬𑁄𑀚𑀺𑀢𑀢𑁆𑀢𑀸’’𑀢𑀺. 𑀦, 𑀦𑀧𑀼𑀁𑀲𑀓𑀸𑀦𑀺𑀬𑁂𑀯𑁂𑀢𑀸𑀦𑀺. 𑀬𑀤𑀺 𑀳𑀺 ‘‘𑀥𑀦𑀸’’𑀢𑀺𑀆𑀤𑀻𑀦𑀺 𑀧𑀼𑀮𑁆𑀮𑀺𑀗𑁆𑀕𑀸𑀦𑀺 𑀲𑀺𑀬𑀼𑀁, 𑀓𑀢𑁆𑀣𑀘𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀏𑀲𑁄’’𑀢𑀺𑀆𑀤𑀻𑀳𑀺 𑀑𑀓𑀸𑀭𑀦𑁆𑀢𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑁂𑀳𑀺 𑀬𑁄𑀚𑀺𑀢𑀸 𑀑𑀓𑀸𑀭𑀦𑁆𑀢𑀥𑀦𑀲𑀤𑁆𑀤𑀸𑀤𑀬𑁄 𑀲𑀺𑀬𑀼𑀁. 𑀢𑀣𑀸𑀭𑀽𑀧𑀸𑀦𑀁 𑀅𑀪𑀸𑀯𑀢𑁄 𑀧𑀦 ‘‘𑀥𑀦𑀸 𑀇𑀦𑁆𑀤𑁆𑀭𑀺𑀬𑀸 𑀯𑀺𑀜𑁆𑀜𑀸𑀡𑀸’’𑀢𑀺𑀆𑀤𑀬𑁄 𑀲𑀤𑁆𑀤𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀅𑀬𑀁 𑀦𑀬𑁄 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀝𑁆𑀞𑀸𑀦𑁂𑀬𑁂𑀯 𑀮𑀩𑁆𑀪𑀢𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀳𑀺 𑀯𑀺𑀲𑀤𑀸𑀓𑀸𑀭𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑁂𑀳𑀺𑀧𑀺 𑀲𑀤𑁆𑀥𑀺𑀁 𑀘𑀭𑀦𑁆𑀢𑀺, 𑀦𑀧𑀼𑀁𑀲𑀓𑀸 𑀯𑀺𑀬 𑀧𑀼𑀭𑀺𑀲𑀯𑁂𑀲𑀥𑀸𑀭𑀺𑀦𑁄 𑀧𑀼𑀭𑀺𑀲𑁂𑀳𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁.

𑀅𑀣𑀸𑀧𑀺 𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀘𑀦𑀁 𑀧𑀼𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑁄, 𑀘𑀺𑀢𑁆𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀸 𑀬𑀣𑀸 ‘‘𑀲𑀤𑁆𑀥𑁄, 𑀲𑀤𑁆𑀥𑀸’’𑀢𑀺 𑀏𑀯𑀁 𑀅𑀲𑁆𑀲𑀢𑁆𑀣𑀻𑀢𑀺 𑀅𑀢𑁆𑀣𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀦𑀺𑀘𑁆𑀙𑀺𑀢𑀩𑁆𑀩𑁄, ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 𑀧𑀦 𑀏𑀯𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀅𑀕𑁆𑀕𑀳𑁂𑀢𑀩𑁆𑀩𑀢𑁄 ‘‘𑀲𑀢𑀺𑀧𑀝𑁆𑀞𑀸𑀦𑀁 𑀥𑀫𑁆𑀫𑁄, 𑀘𑀺𑀢𑁆𑀢𑀁 𑀥𑀫𑁆𑀫𑁄, 𑀘𑀺𑀢𑁆𑀢𑀸𑀦𑀺 𑀥𑀫𑁆𑀫𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺? 𑀢𑀦𑁆𑀦, ‘‘𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺𑀆𑀤𑀻𑀲𑀼 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀘 𑀘𑀺𑀢𑁆𑀢𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀸𑀤𑀻𑀦𑀁 𑀕𑀳𑀧𑀢𑀺 𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀦𑀯𑀲𑁂𑀦 𑀦𑀺𑀘𑁆𑀘𑀁 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸.

𑀢𑀣𑀸 ¶ 𑀳𑀺 𑀏𑀓𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀧𑀺 𑀧𑀼𑀜𑁆𑀜𑀲𑀤𑁆𑀤𑁄 𑀅𑀪𑀺𑀲𑀗𑁆𑀔𑀸𑀭𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀧𑀼𑀜𑁆𑀜𑁄 𑀅𑀪𑀺𑀲𑀗𑁆𑀔𑀸𑀭𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁄 𑀚𑀸𑀢𑁄, 𑀢𑀣𑀸 𑀏𑀓𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀧𑀺 𑀧𑀤𑀼𑀫 𑀫𑀗𑁆𑀕𑀮𑀲𑀤𑁆𑀤𑀸𑀤𑀬𑁄 𑀅𑀜𑁆𑀜𑀲𑁆𑀲𑀢𑁆𑀣𑀲𑁆𑀲𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀧𑀤𑀼𑀫𑁄 𑀪𑀕𑀯𑀸, 𑀧𑀤𑀼𑀫𑀸 𑀤𑁂𑀯𑀻, 𑀫𑀗𑁆𑀕𑀮𑁄 𑀪𑀕𑀯𑀸, 𑀫𑀗𑁆𑀕𑀮𑀸 𑀇𑀢𑁆𑀣𑀻’’𑀢𑀺 𑀘 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀸 𑀚𑀸𑀢𑀸. 𑀏𑀓𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀸𑀧𑀺 𑀳𑀢𑁆𑀣𑀺𑀯𑀺𑀲𑁂𑀲𑀯𑀸𑀘𑀓𑀸 𑀓𑀸𑀮𑀸𑀯𑀓 𑀕𑀗𑁆𑀕𑁂𑀬𑁆𑀬𑀲𑀤𑁆𑀤𑀸𑀤𑀬𑁄 𑀓𑀼𑀮𑀸𑀧𑁂𑀓𑁆𑀔𑀦𑀯𑀲𑁂𑀦 ‘‘𑀓𑀸𑀮𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸 𑀚𑀸𑀢𑀸. 𑀢𑀤𑀧𑁂𑀓𑁆𑀔𑀦𑀯𑀲𑁂𑀦 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀸𑀮𑀸𑀯𑀓𑁄 𑀘 𑀕𑀗𑁆𑀕𑁂𑀬𑁆𑀬𑁄’’𑀢𑀺𑀆𑀤𑀺 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀏𑀯𑀁 𑀢𑀁𑀢𑀤𑀢𑁆𑀣𑀸𑀦𑀫𑀧𑁂𑀓𑁆𑀔𑀦𑀯𑀲𑁂𑀦 𑀢𑀁𑀢𑀁𑀧𑀓𑀢𑀺𑀮𑀺𑀗𑁆𑀕𑀁 𑀦𑀸𑀲𑁂𑀢𑁆𑀯𑀸 𑀅𑀧𑀭𑀁 𑀮𑀺𑀗𑁆𑀕𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺, 𑀦 𑀘 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀮𑀺𑀗𑁆𑀕𑀸𑀦𑀺 𑀢𑀤𑁆𑀥𑀺𑀢𑀯𑀲𑁂𑀦 𑀅𑀜𑁆𑀜𑀮𑀺𑀗𑁆𑀕𑀸𑀦𑀺 𑀚𑀸𑀢𑀸𑀦𑀺, 𑀅𑀣 𑀔𑁄 𑀕𑀳𑀧𑀢𑀺𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀦𑀯𑀲𑁂𑀦𑁂𑀯 𑀅𑀜𑁆𑀜𑀮𑀺𑀗𑁆𑀕𑀸𑀦𑀺 𑀚𑀸𑀢𑀸𑀦𑀺, 𑀢𑀲𑁆𑀫𑀸 ‘‘𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀺, 𑀔𑀸𑀤𑀫𑀸𑀦𑀸 𑀢𑀼𑀯𑀁 𑀧𑀼𑀭𑁂. 𑀲𑀺𑀯𑀺𑀧𑀼𑀢𑁆𑀢𑀸𑀦𑀺 𑀘𑀯𑁆𑀳𑀬. 𑀏𑀯𑀁 𑀥𑀫𑁆𑀫𑀸𑀦𑀺 𑀲𑀼𑀢𑁆𑀯𑀸𑀦, 𑀯𑀺𑀧𑁆𑀧𑀲𑀻𑀤𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺𑀆𑀤𑀻𑀲𑀼𑀬𑁂𑀯 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀅𑀦𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸 𑀯𑀼𑀢𑁆𑀢𑀥𑀫𑁆𑀫𑀲𑀤𑁆𑀤𑀸𑀤𑀻𑀦𑀁, 𑀦 𑀧𑀦 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀘𑀺𑀢𑁆𑀢𑀸 𑀇𑀢𑁆𑀣𑀻, 𑀲𑀢𑀺𑀧𑀝𑁆𑀞𑀸𑀦𑁄 𑀥𑀫𑁆𑀫𑁄, 𑀘𑀺𑀢𑁆𑀢𑁄 𑀥𑀫𑁆𑀫𑁄, 𑀘𑀺𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀲𑀤𑁆𑀤𑀸𑀤𑀻𑀦𑀁 𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀕𑀳𑀧𑀢𑀺 𑀥𑀫𑁆𑀫𑀸𑀤𑀻𑀦𑀁 𑀅𑀧𑁂𑀓𑁆𑀔𑀓𑀢𑁆𑀢𑀸 𑀢𑁂𑀲𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁, 𑀇𑀤𑀜𑁆𑀘 𑀏𑀓𑀘𑁆𑀘𑀸𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀅𑀬𑀁 𑀦𑀻𑀢𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀻 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁄 𑀧𑀦 ‘‘𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 ¶ ‘𑀧𑀤𑀸 𑀅𑀓𑁆𑀔𑀭𑀸 𑀩𑁆𑀬𑀜𑁆𑀚𑀦𑀸’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀏𑀢𑁆𑀣𑀸𑀧𑀺 𑀫𑀬𑀁 ‘‘𑀧𑀤𑀸’’𑀢𑀺 𑀇𑀤𑀁 ‘‘𑀇𑀦𑁆𑀤𑁆𑀭𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀻𑀦𑀺 𑀯𑀺𑀬 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁂𑀯𑀸𑀢𑀺 𑀯𑀤𑀸𑀫 𑀑𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀪𑀸𑀯𑀸𑀪𑀸𑀯𑀢𑁄, 𑀇𑀢𑀭𑀤𑁆𑀯𑀬𑀁 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑁆𑀢𑀺𑀧𑀺 𑀧𑀼𑀮𑁆𑀮𑀺𑀗𑁆𑀕𑀦𑁆𑀢𑀺𑀧𑀺 𑀕𑀳𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑁄𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀪𑀸𑀯𑀲𑁆𑀲𑀽𑀧𑀮𑀩𑁆𑀪𑀦𑀢𑁄. 𑀢𑀣𑀸 𑀳𑀺 ‘‘𑀧𑀼𑀢𑁆𑀢𑀸𑀦𑀺 𑀮𑀢𑀸𑀦𑀺 𑀧𑀩𑁆𑀩𑀢𑀸𑀦𑀺 𑀥𑀫𑁆𑀫𑀸𑀦𑀻’’𑀢𑀺𑀆𑀤𑀻𑀦𑀁𑀬𑁂𑀯 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀢𑀸𑀬 𑀅𑀦𑀼𑀧𑀮𑀤𑁆𑀥𑀺𑀢𑁄, 𑀢𑁂𑀲𑀜𑁆𑀘𑁄𑀓𑀸𑀭𑀦𑁆𑀢𑀸𑀓𑀸𑀭𑀦𑁆𑀢𑀯𑀲𑁂𑀦 𑀧𑀞𑀫𑁂𑀓𑀯𑀘𑀦𑀦𑁆𑀢𑀢𑀸𑀤𑀲𑁆𑀲𑀦𑀢𑁄. ‘‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻’’𑀢𑀺 𑀇𑀤𑀁 𑀧𑀦 𑀅𑀜𑁆𑀜𑀧𑀤𑀢𑁆𑀣𑀯𑀲𑁂𑀦 𑀦𑀧𑀼𑀁𑀲𑀓𑀁 𑀚𑀸𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀽𑀢𑀁, 𑀪𑀽𑀢𑀸𑀦𑀺, 𑀪𑀽𑀢𑀸. 𑀪𑀽𑀢𑀁, 𑀪𑀽𑀢𑀸𑀦𑀺, 𑀪𑀽𑀢𑁂. 𑀪𑀽𑀢𑁂𑀦, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑀸, 𑀪𑀽𑀢𑀲𑁆𑀫𑀸, 𑀪𑀽𑀢𑀫𑁆𑀳𑀸, 𑀪𑀽𑀢𑁂𑀳𑀺, 𑀪𑀽𑀢𑁂𑀪𑀺. 𑀪𑀽𑀢𑀲𑁆𑀲, 𑀪𑀽𑀢𑀸𑀦𑀁. 𑀪𑀽𑀢𑁂, 𑀪𑀽𑀢𑀲𑁆𑀫𑀺𑀁, 𑀪𑀽𑀢𑀫𑁆𑀳𑀺, 𑀪𑀽𑀢𑁂𑀲𑀼. 𑀪𑁄 𑀪𑀽𑀢, 𑀪𑀯𑀦𑁆𑀢𑁄 𑀪𑀽𑀢𑀸𑀦𑀺, 𑀪𑀯𑀦𑁆𑀢𑁄 𑀪𑀽𑀢𑀸. 𑀏𑀯𑀁 𑀘𑀺𑀢𑁆𑀢𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀇𑀫𑀺𑀦𑀸 𑀦𑀬𑁂𑀦 ‘‘𑀫𑀳𑀸𑀪𑀽𑀢𑀁 𑀪𑀯𑀺𑀢𑁆𑀢𑀁 𑀪𑀽𑀦𑀁 𑀪𑀯𑀦’’𑀫𑀺𑀘𑁆𑀘𑀸𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 ‘‘𑀯𑀢𑁆𑀢’’𑀫𑀺𑀘𑁆𑀘𑀸𑀤𑀻𑀦𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀢𑁆𑀢𑀁 𑀭𑀽𑀧𑀁 𑀲𑁄𑀢𑀁 𑀖𑀸𑀦𑀁, 𑀤𑀼𑀓𑁆𑀔𑀁 𑀧𑀼𑀧𑁆𑀨𑀁 𑀛𑀸𑀦𑀁 𑀜𑀸𑀡𑀁;

𑀤𑀸𑀦𑀁 𑀲𑀻𑀮𑀁 𑀧𑀼𑀜𑁆𑀜𑀁 𑀧𑀸𑀧𑀁, 𑀯𑀚𑁆𑀚𑀁 𑀲𑀘𑁆𑀘𑀁 𑀬𑀸𑀦𑀁 𑀙𑀢𑁆𑀢𑀁.

𑀲𑀓𑀝𑀁 𑀓𑀦𑀓𑀁 𑀢𑀕𑀭𑀁 𑀦𑀕𑀭𑀁, 𑀢𑀭𑀡𑀁 𑀘𑀭𑀡𑀁 𑀥𑀭𑀡𑀁 𑀫𑀭𑀡𑀁;

𑀦𑀬𑀦𑀁 𑀯𑀤𑀦𑀁 𑀓𑀭𑀡𑀁 𑀮𑀯𑀦𑀁, 𑀯𑀲𑀦𑀁 𑀧𑀯𑀦𑀁 𑀪𑀯𑀦𑀁 𑀕𑀕𑀦𑀁.

𑀅𑀫𑀢𑀁 𑀧𑀼𑀴𑀺𑀦𑀁 𑀫𑀸𑀮𑀁, 𑀆𑀲𑀦𑀁 𑀲𑀯𑀦𑀁 𑀫𑀼𑀔𑀁;

𑀧𑀤𑀼𑀫𑀁 𑀉𑀧𑁆𑀧𑀮𑀁 𑀯𑀲𑁆𑀲𑀁, 𑀮𑁄𑀘𑀦𑀁 𑀲𑀸𑀥𑀦𑀁 𑀲𑀼𑀔𑀁.

𑀢𑀸𑀡𑀁 ¶ 𑀫𑀽𑀮𑀁 𑀥𑀦𑀁 𑀓𑀽𑀮𑀁, 𑀫𑀗𑁆𑀕𑀮𑀁 𑀦𑀴𑀺𑀦𑀁 𑀨𑀮𑀁;

𑀳𑀺𑀭𑀜𑁆𑀜𑀁 𑀅𑀫𑁆𑀩𑀼𑀚𑀁 𑀥𑀜𑁆𑀜𑀁, 𑀚𑀸𑀮𑀁 𑀮𑀺𑀗𑁆𑀕𑀁 𑀧𑀤𑀁 𑀚𑀮𑀁.

𑀅𑀗𑁆𑀕𑀁 𑀧𑀡𑁆𑀡𑀁 𑀲𑀼𑀲𑀸𑀦𑀁 𑀲𑀁, 𑀆𑀯𑀼𑀥𑀁 𑀳𑀤𑀬𑀁 𑀯𑀦𑀁;

𑀲𑁄𑀧𑀸𑀦𑀁 𑀘𑀻𑀯𑀭𑀁 𑀧𑀸𑀡𑀁, 𑀅𑀮𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀓𑀼𑀮𑀁.

𑀮𑁄𑀳𑀁 𑀓𑀡𑀁 𑀩𑀮𑀁 𑀧𑀻𑀞𑀁, 𑀅𑀡𑁆𑀟𑀁 𑀆𑀭𑀫𑁆𑀫𑀡𑀁 𑀧𑀼𑀭𑀁;

𑀅𑀭𑀜𑁆𑀜𑀁 𑀢𑀻𑀭𑀫𑀲𑁆𑀲𑀢𑁆𑀣-𑀫𑀺𑀘𑁆𑀘𑀸𑀤𑀻𑀦𑀺 𑀲𑀫𑀼𑀤𑁆𑀥𑀭𑁂.

𑀇𑀫𑀸𑀦𑀺 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀩𑁆𑀩𑀣𑀸𑀧𑀺 𑀲𑀤𑀺𑀲𑀸𑀦𑀺, 𑀇𑀫𑀸𑀦𑀺 𑀧𑀦 𑀯𑀺𑀲𑀤𑀺𑀲𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋

‘‘𑀘𑀫𑁆𑀫𑀁 𑀯𑁂𑀲𑁆𑀫’’𑀦𑁆𑀢𑀺𑀆𑀤𑀻𑀦𑀺, 𑀏𑀓𑀥𑀸𑀬𑁂𑀯 𑀪𑀺𑀚𑁆𑀚𑀭𑁂;

‘‘𑀓𑀫𑁆𑀫𑀁 𑀣𑀸𑀫𑀁 𑀕𑀼𑀡𑀯’’𑀦𑁆𑀢𑀺-𑀆𑀤𑀻𑀦𑀺 𑀢𑀼 𑀅𑀦𑁂𑀓𑀥𑀸.

𑀓𑀣𑀁?

𑀘𑀫𑁆𑀫𑁂, 𑀘𑀫𑁆𑀫𑀲𑁆𑀫𑀺𑀁, 𑀘𑀫𑁆𑀫𑀫𑁆𑀳𑀺, 𑀘𑀫𑁆𑀫𑀦𑀺, 𑀯𑁂𑀲𑁆𑀫𑁂, 𑀯𑁂𑀲𑁆𑀫𑀲𑁆𑀫𑀺𑀁, 𑀯𑁂𑀲𑁆𑀫𑀫𑁆𑀳𑀺, 𑀯𑁂𑀲𑁆𑀫𑀦𑀺, 𑀖𑀫𑁆𑀫𑁂, 𑀖𑀫𑁆𑀫𑀲𑁆𑀫𑀺𑀁, 𑀖𑀫𑁆𑀫𑀫𑁆𑀳𑀺, 𑀖𑀫𑁆𑀫𑀦𑀺. 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀓𑀫𑁆𑀫𑀁, 𑀓𑀫𑁆𑀫𑀸𑀦𑀺, 𑀓𑀫𑁆𑀫𑀸. 𑀓𑀫𑁆𑀫𑀁, 𑀓𑀫𑁆𑀫𑀸𑀦𑀺, 𑀓𑀫𑁆𑀫𑁂. 𑀓𑀫𑁆𑀫𑁂𑀦, 𑀓𑀫𑁆𑀫𑀼𑀦𑀸, 𑀓𑀫𑁆𑀫𑀦𑀸, 𑀓𑀫𑁆𑀫𑁂𑀳𑀺, 𑀓𑀫𑁆𑀫𑁂𑀪𑀺. 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀼𑀦𑁄, 𑀓𑀫𑁆𑀫𑀸𑀦𑀁. 𑀓𑀫𑁆𑀫𑀲𑁆𑀫𑀸, 𑀓𑀫𑁆𑀫𑀫𑁆𑀳𑀸, 𑀓𑀫𑁆𑀫𑀼𑀦𑀸, 𑀓𑀫𑁆𑀫𑁂𑀳𑀺, 𑀓𑀫𑁆𑀫𑁂𑀪𑀺. 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀼𑀦𑁄, 𑀓𑀫𑁆𑀫𑀸𑀦𑀁. 𑀓𑀫𑁆𑀫𑁂, 𑀓𑀫𑁆𑀫𑀲𑁆𑀫𑀺𑀁, 𑀓𑀫𑁆𑀫𑀫𑁆𑀳𑀺, 𑀓𑀫𑁆𑀫𑀦𑀺, 𑀓𑀫𑁆𑀫𑁂𑀲𑀼. 𑀪𑁄 𑀓𑀫𑁆𑀫, 𑀪𑀯𑀦𑁆𑀢𑁄 𑀓𑀫𑁆𑀫𑀸𑀦𑀺, 𑀪𑀯𑀦𑁆𑀢𑁄 𑀓𑀫𑁆𑀫𑀸.

𑀣𑀸𑀫𑀲𑀤𑁆𑀤𑀲𑁆𑀲 𑀧𑀦 𑀢𑀢𑀺𑀬𑁂𑀓𑀯𑀘𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀣𑀸𑀫𑁂𑀦, 𑀣𑀸𑀫𑀼𑀦𑀸, 𑀣𑀸𑀫𑀲𑁆𑀲, 𑀣𑀸𑀫𑀼𑀦𑁄’’𑀢𑀺 𑀘, ‘‘𑀣𑀸𑀫𑀸, 𑀣𑀸𑀫𑀲𑁆𑀫𑀸, 𑀣𑀸𑀫𑀫𑁆𑀳𑀸, 𑀣𑀸𑀫𑀼𑀦𑀸’’𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁.

𑀯𑀦𑁆𑀢𑀼 𑀫𑀦𑁆𑀢𑀼 𑀇𑀫𑀦𑁆𑀢𑀼𑀧𑀘𑁆𑀘𑀬𑀯𑀢𑀁 𑀧𑀦 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑀤𑁆𑀤𑀸𑀦𑀁 ‘‘𑀕𑀼𑀡𑀯𑀁 𑀘𑀺𑀢𑁆𑀢𑀁, 𑀭𑀼𑀘𑀺𑀫𑀁 𑀧𑀼𑀧𑁆𑀨𑀁, 𑀧𑀸𑀧𑀺𑀫𑀁 𑀓𑀼𑀮𑀁’’ 𑀇𑀘𑁆𑀘𑀸𑀤𑀺𑀧𑀬𑁄𑀕𑀯𑀲𑁂𑀦 𑁋

𑀕𑀼𑀡𑀯𑀁 ¶ , 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀺. 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑁂 𑀕𑀼𑀡𑀯𑀦𑁆𑀢𑀺. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀲𑁆𑀫𑀸, 𑀕𑀼𑀡𑀯𑀦𑁆𑀢𑀫𑁆𑀳𑀸, 𑀕𑀼𑀡𑀯𑀦𑁆𑀢𑁂𑀳𑀺, 𑀕𑀼𑀡𑀯𑀦𑁆𑀢𑁂𑀪𑀺. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲, 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀺, 𑀕𑀼𑀡𑀯𑀦𑁆𑀢𑁂, 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑀫𑁆𑀳𑀺, 𑀕𑀼𑀡𑀯𑀦𑁆𑀢𑁂𑀲𑀼. 𑀪𑁄 𑀕𑀼𑀡𑀯, 𑀪𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑀸𑀦𑀺, 𑀕𑀼𑀡𑀯𑀦𑁆𑀢𑀺.

𑀏𑀯𑀁 ‘‘𑀭𑀼𑀘𑀺𑀫𑀁, 𑀭𑀼𑀘𑀺𑀫𑀦𑁆𑀢𑀸𑀦𑀺, 𑀭𑀼𑀘𑀺𑀫’’𑀦𑁆𑀢𑀺𑀇𑀘𑁆𑀘𑀸𑀤𑀺𑀦𑀸, ‘‘𑀧𑀸𑀧𑀺𑀫𑀁, 𑀧𑀸𑀧𑀺𑀫𑀦𑁆𑀢𑀸𑀦𑀺, 𑀧𑀸𑀧𑀺𑀫’’𑀦𑁆𑀢𑀺 𑀇𑀘𑁆𑀘𑀸𑀤𑀺𑀦𑀸 𑀘 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 ‘‘𑀕𑀼𑀡𑀯𑀁 𑀩𑀮𑀯𑀁 𑀬𑀲𑀯𑀁 𑀲𑀢𑀺𑀫𑀁 𑀕𑀢𑀺𑀫𑀁’’𑀇𑀘𑁆𑀘𑀸𑀤𑀺𑀦𑀸 𑀧𑀬𑁄𑀕𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀓𑀭𑁄𑀦𑁆𑀢𑀲𑀤𑁆𑀤𑀲𑁆𑀲 ‘‘𑀓𑀭𑁄𑀦𑁆𑀢𑀁 𑀘𑀺𑀢𑁆𑀢𑀁, 𑀓𑀭𑁄𑀦𑁆𑀢𑀁 𑀓𑀼𑀮’’𑀦𑁆𑀢𑀺 𑀧𑀬𑁄𑀕𑀯𑀲𑁂𑀦 𑁋

𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀺. 𑀓𑀭𑁄𑀦𑁆𑀢𑀁, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀺. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑁂𑀦, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀸, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀲𑁆𑀫𑀸, 𑀓𑀭𑁄𑀦𑁆𑀢𑀫𑁆𑀳𑀸, 𑀓𑀭𑁄𑀦𑁆𑀢𑁂𑀳𑀺, 𑀓𑀭𑁄𑀦𑁆𑀢𑁂𑀪𑀺. 𑀓𑀭𑁄𑀢𑁄, 𑀓𑀭𑀢𑁄, 𑀓𑀭𑁄𑀦𑁆𑀢𑀲𑁆𑀲, 𑀓𑀭𑁄𑀦𑁆𑀢𑀸𑀦𑀁, 𑀓𑀭𑁄𑀢𑀁. 𑀓𑀭𑁄𑀢𑀺, 𑀓𑀭𑁄𑀦𑁆𑀢𑁂, 𑀓𑀭𑁄𑀦𑁆𑀢𑀲𑁆𑀫𑀺𑀁, 𑀓𑀭𑁄𑀦𑁆𑀢𑀫𑁆𑀳𑀺, 𑀓𑀭𑁄𑀦𑁆𑀢𑁂𑀲𑀼. 𑀪𑁄 𑀓𑀭𑁄𑀦𑁆𑀢, 𑀪𑀯𑀦𑁆𑀢𑁄, 𑀓𑀭𑁄𑀦𑁆𑀢𑀸𑀦𑀺, 𑀓𑀭𑁄𑀦𑁆𑀢𑀸, 𑀓𑀭𑁄𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑁆𑀲 𑀢𑀼 ‘‘𑀕𑀘𑁆𑀙𑀦𑁆𑀢𑀁 𑀘𑀺𑀢𑁆𑀢𑀁, 𑀕𑀘𑁆𑀙𑀦𑁆𑀢𑀁 𑀓𑀼𑀮’’𑀦𑁆𑀢𑀺 𑀧𑀬𑁄𑀕𑀯𑀲𑁂𑀦 𑁋

𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑀸. 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑁂. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑁂𑀳𑀺, 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀸, 𑀕𑀘𑁆𑀙𑀦𑁆𑀢𑀸, 𑀕𑀘𑁆𑀙𑀦𑁆𑀢𑀲𑁆𑀫𑀸, 𑀕𑀘𑁆𑀙𑀦𑁆𑀢𑀫𑁆𑀳𑀸, 𑀕𑀘𑁆𑀙𑀦𑁆𑀢𑁂𑀳𑀺 ¶ , 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄, 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀁. 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁂, 𑀕𑀘𑁆𑀙𑀦𑁆𑀢𑀲𑁆𑀫𑀺𑀁, 𑀕𑀘𑁆𑀙𑀦𑁆𑀢𑀫𑁆𑀳𑀺, 𑀕𑀘𑁆𑀙𑀦𑁆𑀢𑁂𑀲𑀼. 𑀪𑁄 𑀕𑀘𑁆𑀙𑀁, 𑀪𑁄 𑀕𑀘𑁆𑀙𑀦𑁆𑀢𑀸, 𑀪𑀯𑀦𑁆𑀢𑁄 𑀕𑀘𑁆𑀙𑀦𑁆𑀢𑀸𑀦𑀺, 𑀕𑀘𑁆𑀙𑀦𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀁 ‘‘𑀘𑀭𑀦𑁆𑀢𑀁 𑀤𑀤𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀁 𑀘𑀺𑀦𑁆𑀢𑀬𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀧𑀦 𑀓𑁄𑀘𑀺 𑀪𑁂𑀤𑁄, 𑀢𑀣𑀸 𑀳𑀺 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸’’𑀢𑀺 𑀏𑀯𑀁 ‘‘𑀫𑀳𑀸’’𑀇𑀢𑀺 𑀦𑀧𑀼𑀁𑀲𑀓𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀫𑀳𑀦𑁆𑀢𑀁, 𑀫𑀳𑀸, 𑀫𑀳𑀦𑁆𑀢𑀸𑀦𑀺, 𑀫𑀳𑀦𑁆𑀢𑀸. 𑀫𑀳𑀦𑁆𑀢𑀁, 𑀫𑀳𑀦𑁆𑀢𑀸𑀦𑀺, 𑀫𑀳𑀦𑁆𑀢𑁂. 𑀫𑀳𑀢𑀸’’𑀢𑀺 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀘𑀺𑀢𑁆𑀢𑀲𑀤𑁆𑀤𑁂𑀦 𑀯𑀺𑀲𑀤𑀺𑀲𑀸𑀦𑀺.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀅𑀯𑀡𑁆𑀡𑀼𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀁

𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀢𑀲𑁆𑀲𑀻𑀮𑀢𑁆𑀣𑀲𑁆𑀲 𑀓𑀢𑀭𑀲𑁆𑀲𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀺 𑀇𑀘𑁆𑀘𑁂𑀢𑀲𑁆𑀲 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀅𑀝𑁆𑀞𑀺, 𑀅𑀝𑁆𑀞𑀻, 𑀅𑀝𑁆𑀞𑀻𑀦𑀺. 𑀅𑀝𑁆𑀞𑀺𑀁, 𑀅𑀝𑁆𑀞𑀻, 𑀅𑀝𑁆𑀞𑀻𑀦𑀺. 𑀅𑀝𑁆𑀞𑀺𑀦𑀸, 𑀅𑀝𑁆𑀞𑀻𑀳𑀺, 𑀅𑀝𑁆𑀞𑀻𑀪𑀺. 𑀅𑀝𑁆𑀞𑀺𑀲𑁆𑀲, 𑀅𑀝𑁆𑀞𑀺𑀦𑁄, 𑀅𑀝𑁆𑀞𑀻𑀦𑀁. 𑀅𑀝𑁆𑀞𑀺𑀦𑀸, 𑀅𑀝𑁆𑀞𑀻𑀳𑀺, 𑀅𑀝𑁆𑀞𑀻𑀪𑀺. 𑀅𑀝𑁆𑀞𑀺𑀲𑁆𑀲, 𑀅𑀝𑁆𑀞𑀺𑀦𑁄, 𑀅𑀝𑁆𑀞𑀻𑀦𑀁. 𑀅𑀝𑁆𑀞𑀺𑀲𑁆𑀫𑀺𑀁, 𑀅𑀝𑁆𑀞𑀺𑀫𑁆𑀳𑀺, 𑀅𑀝𑁆𑀞𑀻𑀲𑀼. 𑀪𑁄 𑀅𑀝𑁆𑀞𑀺, 𑀪𑀯𑀦𑁆𑀢𑁄 𑀅𑀝𑁆𑀞𑀻, 𑀪𑀯𑀦𑁆𑀢𑁄 𑀅𑀝𑁆𑀞𑀻𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀅𑀝𑁆𑀞𑀺𑀲𑁆𑀫𑀸, 𑀅𑀝𑁆𑀞𑀺𑀫𑁆𑀳𑀸’’𑀢𑀺 𑀧𑀤𑀸𑀦𑀺 𑀅𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀸 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀣𑀸 𑀧𑀦 𑀅𑀝𑁆𑀞𑀺𑀲𑀤𑁆𑀤𑀲𑁆𑀲, 𑀏𑀯𑀁 ‘‘𑀲𑀢𑁆𑀣𑀺 𑀤𑀥𑀺 𑀯𑀸𑀭𑀺 𑀅𑀓𑁆𑀔𑀺 𑀅𑀘𑁆𑀙𑀺’’𑀇𑀘𑁆𑀘𑀸𑀤𑀻𑀦𑀫𑁆𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀅𑀢𑁆𑀣𑀯𑀺𑀪𑀸𑀯𑀺 ¶ , 𑀅𑀢𑁆𑀣𑀯𑀺𑀪𑀸𑀯𑀻, 𑀅𑀢𑁆𑀣𑀯𑀺𑀪𑀸𑀯𑀻𑀦𑀺. 𑀅𑀢𑁆𑀣𑀯𑀺𑀪𑀸𑀯𑀺𑀁, 𑀅𑀢𑁆𑀣𑀯𑀺𑀪𑀸𑀯𑀻, 𑀅𑀢𑁆𑀣𑀯𑀺𑀪𑀸𑀯𑀻𑀦𑀺. 𑀅𑀢𑁆𑀣𑀯𑀺𑀪𑀸𑀯𑀺𑀦𑀸, 𑀅𑀢𑁆𑀣𑀯𑀺𑀪𑀸𑀯𑀻𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀪𑀺. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀲, 𑀅𑀢𑁆𑀣𑀯𑀺𑀪𑀸𑀯𑀺𑀦𑁄, 𑀅𑀢𑁆𑀣𑀯𑀺𑀪𑀸𑀯𑀻𑀦𑀁. 𑀅𑀢𑁆𑀣𑀯𑀺𑀪𑀸𑀯𑀺𑀦𑀸, 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀫𑀸 𑀅𑀢𑁆𑀣𑀯𑀺𑀪𑀸𑀯𑀺𑀫𑁆𑀳𑀸, 𑀅𑀢𑁆𑀣𑀯𑀺𑀪𑀸𑀯𑀻𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀪𑀺. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀲, 𑀅𑀢𑁆𑀣𑀯𑀺𑀪𑀸𑀯𑀺𑀦𑁄, 𑀅𑀢𑁆𑀣𑀯𑀺𑀪𑀸𑀯𑀻𑀦𑀁. 𑀅𑀢𑁆𑀣𑀯𑀺𑀪𑀸𑀯𑀺𑀲𑁆𑀫𑀺𑀁, 𑀅𑀢𑁆𑀣𑀯𑀺𑀪𑀸𑀯𑀺𑀫𑁆𑀳𑀺, 𑀅𑀢𑁆𑀣𑀯𑀺𑀪𑀸𑀯𑀻𑀲𑀼. 𑀪𑁄 𑀅𑀢𑁆𑀣𑀯𑀺𑀪𑀸𑀯𑀺, 𑀪𑀯𑀦𑁆𑀢𑁄 𑀅𑀢𑁆𑀣𑀯𑀺𑀪𑀸𑀯𑀻, 𑀪𑀯𑀦𑁆𑀢𑁄 𑀅𑀢𑁆𑀣𑀯𑀺𑀪𑀸𑀯𑀻𑀦𑀺.

𑀏𑀯𑀁 ‘‘𑀥𑀫𑁆𑀫𑀯𑀺𑀪𑀸𑀯𑀺, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀼𑀔𑀓𑀸𑀭𑀺’’𑀇𑀘𑁆𑀘𑀸𑀤𑀻𑀦𑀺𑀧𑀺. 𑀢𑀢𑁆𑀣 𑀅𑀝𑁆𑀞𑀺 𑀲𑀢𑁆𑀣𑀺𑀆𑀤𑀻𑀦𑀺 𑀧𑀥𑀸𑀦𑀮𑀺𑀗𑁆𑀕𑀸𑀦𑀺 𑀅𑀦𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸, 𑀅𑀢𑁆𑀣𑀯𑀺𑀪𑀸𑀯𑀺 𑀥𑀫𑁆𑀫𑀯𑀺𑀪𑀸𑀯𑀺𑀆𑀤𑀻𑀦𑀺 𑀅𑀧𑁆𑀧𑀥𑀸𑀦𑀮𑀺𑀗𑁆𑀕𑀸𑀦𑀺 𑀅𑀜𑁆𑀜𑀸𑀧𑁂𑀓𑁆𑀔𑀓𑀢𑁆𑀢𑀸.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀇𑀯𑀡𑁆𑀡𑀦𑁆𑀢𑀢𑀸𑀧𑀓𑀢𑀺𑀓𑀁 𑀇𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀓𑀢𑀭𑀲𑁆𑀲𑀲𑁆𑀲 𑀕𑁄𑀢𑁆𑀭𑀪𑀼 𑀇𑀘𑁆𑀘𑁂𑀢𑀲𑁆𑀲 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀯𑀓𑁆𑀔𑀸𑀫 𑀧𑀼𑀩𑁆𑀩𑀸𑀘𑀭𑀺𑀬𑀫𑀢𑀁 𑀧𑀼𑀭𑁂𑀘𑀭𑀁 𑀓𑀢𑁆𑀯𑀸 𑁋

𑀆𑀬𑀼, 𑀆𑀬𑀽, 𑀆𑀬𑀽𑀦𑀺. 𑀆𑀬𑀼𑀁, 𑀆𑀬𑀽, 𑀆𑀬𑀽𑀦𑀺. 𑀆𑀬𑀼𑀦𑀸, 𑀆𑀬𑀽𑀳𑀺, 𑀆𑀬𑀽𑀪𑀺. 𑀆𑀬𑀼𑀲𑁆𑀲, 𑀆𑀬𑀼𑀦𑁄, 𑀆𑀬𑀽𑀦𑀁. 𑀆𑀬𑀼𑀦𑀸, 𑀆𑀬𑀽𑀳𑀺, 𑀆𑀬𑀽𑀪𑀺. 𑀆𑀬𑀼𑀲𑁆𑀲, 𑀆𑀬𑀼𑀦𑁄, 𑀆𑀬𑀽𑀦𑀁. 𑀆𑀬𑀼𑀲𑁆𑀫𑀺𑀁, 𑀆𑀬𑀼𑀫𑁆𑀳𑀺, 𑀆𑀬𑀽𑀲𑀼. 𑀪𑁄 𑀆𑀬𑀼, 𑀪𑀯𑀦𑁆𑀢𑁄 𑀆𑀬𑀽, 𑀪𑀯𑀦𑁆𑀢𑁄 𑀆𑀬𑀽𑀦𑀺. 𑀬𑀫𑀓𑀫𑀳𑀸𑀣𑁂𑀭𑀫𑀢𑀁.

𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀲𑁆𑀲𑀓𑁆𑀓𑀯𑀘𑀦𑀝𑁆𑀞𑀸𑀦𑁂 ‘‘𑀆𑀬𑀼𑀲𑁆𑀫𑀸, 𑀆𑀬𑀼𑀫𑁆𑀳𑀸’’𑀢𑀺 𑀧𑀤𑀸𑀦𑀺 𑀅𑀦𑀸𑀕𑀢𑀸𑀦𑀺, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀢𑀁𑀲𑀤𑀺𑀲𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀆𑀬𑀼𑀲𑀤𑁆𑀤𑁄 𑀧𑀼𑀁𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀢𑀲𑁆𑀲 𑀤𑁆𑀯𑀺𑀮𑀺𑀗𑁆𑀕𑀢𑀸 ¶ 𑀤𑀺𑀲𑁆𑀲𑀢𑀺. ‘‘𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲. 𑀆𑀬𑀼 𑀘𑀲𑁆𑀲𑀸 𑀧𑀭𑀺𑀓𑁆𑀔𑀻𑀡𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 𑀳𑀺 𑀆𑀬𑀼𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀢𑀩𑁆𑀩𑀲𑁂𑀦 ‘‘𑀆𑀬𑀼, 𑀆𑀬𑀽, 𑀆𑀬𑀯𑁄’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀦𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀅𑀕𑁆𑀕𑀁 𑀆𑀬𑀼 𑀘 𑀯𑀡𑁆𑀡𑁄 𑀘. 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲 𑀆𑀬𑀽’’𑀢𑀺𑀆𑀤𑀻𑀲𑀼 𑀧𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀢𑀩𑁆𑀩𑀲𑁂𑀦 ‘‘𑀆𑀬𑀼, 𑀆𑀬𑀽, 𑀆𑀬𑀽𑀦𑀻’’𑀢𑀺 𑀬𑁄𑀚𑀺𑀢𑀸.

𑀕𑁄𑀢𑁆𑀭𑀪𑀼, 𑀕𑁄𑀢𑁆𑀭𑀪𑀽, 𑀕𑁄𑀢𑁆𑀭𑀪𑀽𑀦𑀺. 𑀕𑁄𑀢𑁆𑀭𑀪𑀼𑀁, 𑀕𑁄𑀢𑁆𑀭𑀪𑀽, 𑀕𑁄𑀢𑁆𑀭𑀪𑀽𑀦𑀺. 𑀕𑁄𑀢𑁆𑀭𑀪𑀼𑀦𑀸, 𑀕𑁄𑀢𑁆𑀭𑀪𑀽𑀳𑀺, 𑀕𑁄𑀢𑁆𑀭𑀪𑀽𑀪𑀺. 𑀕𑁄𑀢𑁆𑀭𑀪𑀼𑀲𑁆𑀲, 𑀕𑁄𑀢𑁆𑀭𑀪𑀼𑀦𑁄, 𑀕𑁄𑀢𑁆𑀭𑀪𑀽𑀦𑀁. 𑀕𑁄𑀢𑁆𑀭𑀪𑀼𑀦𑀸, 𑀕𑁄𑀢𑁆𑀭𑀪𑀼𑀲𑁆𑀫𑀸, 𑀕𑁄𑀢𑁆𑀭𑀪𑀼𑀫𑁆𑀳𑀸, 𑀕𑁄𑀢𑁆𑀭𑀪𑀽𑀳𑀺, 𑀕𑁄𑀢𑁆𑀭𑀪𑀽𑀪𑀺. 𑀕𑁄𑀢𑁆𑀭𑀪𑀼𑀲𑁆𑀲, 𑀕𑁄𑀢𑁆𑀭𑀪𑀼𑀦𑁄, 𑀕𑁄𑀢𑁆𑀭𑀪𑀽𑀦𑀁. 𑀕𑁄𑀢𑁆𑀭𑀪𑀼𑀲𑁆𑀫𑀺𑀁, 𑀕𑁄𑀢𑁆𑀭𑀪𑀼𑀫𑁆𑀳𑀺, 𑀕𑁄𑀢𑁆𑀭𑀪𑀽𑀲𑀼. 𑀪𑁄 𑀕𑁄𑀢𑁆𑀭𑀪𑀼, 𑀪𑀯𑀦𑁆𑀢𑁄 𑀕𑁄𑀢𑁆𑀭𑀪𑀽, 𑀪𑀯𑀦𑁆𑀢𑁄 𑀕𑁄𑀢𑁆𑀭𑀪𑀽𑀦𑀺. 𑀪𑁄 𑀕𑁄𑀢𑁆𑀭𑀪𑀽, 𑀪𑁄 𑀕𑁄𑀢𑁆𑀭𑀪𑀽𑀦𑀺, 𑀏𑀯𑀁 𑀩𑀳𑀼𑀯𑀘𑀦𑀁 𑀯𑀸. 𑀅𑀬𑀫𑀫𑁆𑀳𑀸𑀓𑀁 𑀫𑀢𑀁, 𑀏𑀯𑀁 ‘‘𑀘𑀺𑀢𑁆𑀢𑀲𑀳𑀪𑀼’’𑀇𑀘𑁆𑀘𑀸𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀉𑀓𑀸𑀭𑀦𑁆𑀢𑀲𑀤𑁆𑀤𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀢𑀁𑀲𑀤𑀺𑀲𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀯𑀸𑀘𑀓𑁄 𑀧𑀦 𑀊𑀓𑀸𑀭𑀦𑁆𑀢𑁄 𑀕𑁄𑀢𑁆𑀭𑀪𑀽𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀽𑀦𑀬𑁂 𑀧𑀯𑀺𑀝𑁆𑀞𑁄. 𑀢𑀢𑁆𑀭𑀜𑁆𑀜𑁂 𑀲𑀤𑁆𑀤𑀸 𑀦𑀸𑀫 ‘‘𑀘𑀓𑁆𑀔𑀼 𑀯𑀲𑀼 𑀥𑀦𑀼 𑀤𑀸𑀭𑀼 𑀢𑀺𑀧𑀼 𑀫𑀥𑀼 𑀲𑀺𑀗𑁆𑀕𑀼 𑀳𑀺𑀗𑁆𑀕𑀼 𑀘𑀺𑀢𑁆𑀢𑀕𑀼’’𑀇𑀘𑁆𑀘𑀸𑀤𑀬𑁄.

𑀲𑀯𑀺𑀦𑀺𑀘𑁆𑀙𑀬𑁄𑀬𑀁 𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄.

𑀉𑀯𑀡𑁆𑀡𑁄𑀓𑀸𑀭𑀦𑁆𑀢𑀢𑀸𑀧𑀓𑀢𑀺𑀓𑀁

𑀉𑀓𑀸𑀭𑀦𑁆𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀏𑀯𑀁 𑀦𑀺𑀕𑁆𑀕𑀳𑀻𑀢𑀦𑁆𑀢 𑀇𑀓𑀸𑀭𑀦𑁆𑀢 𑀉𑀓𑀸𑀭𑀦𑁆𑀢𑀯𑀲𑁂𑀦 𑀢𑀺𑀯𑀺𑀥𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑁂𑀲𑀼 𑀓𑁂𑀲𑀜𑁆𑀘𑀺 ¶ 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀦𑀁 𑀓𑁆𑀯𑀘𑀺 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀩𑀳𑀼𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀯𑀲𑁂𑀦 𑀪𑁂𑀤𑁄 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀲𑀼𑀔𑁂 𑀤𑀼𑀓𑁆𑀔𑁂. 𑀏𑀓𑀽𑀦𑀧𑀜𑁆𑀜𑀸𑀲 𑀆𑀚𑀻𑀯𑀓𑀲𑀢𑁂 𑀏𑀓𑀽𑀦𑀧𑀜𑁆𑀜𑀸𑀲 𑀧𑀭𑀺𑀩𑁆𑀩𑀸𑀚𑀓𑀲𑀢𑁂’’𑀇𑀘𑁆𑀘𑁂𑀯𑀫𑀸𑀤𑀺. 𑀦𑀦𑀼 𑀪𑁄 𑀏𑀯𑀁𑀯𑀺𑀥𑀸𑀦𑀁 𑀭𑀽𑀧𑀸𑀦𑀁 𑀧𑀸𑀴𑀺𑀬𑀁 𑀤𑀲𑁆𑀲𑀦𑀢𑁄 ‘‘𑀏𑀓𑀸𑀭𑀦𑁆𑀢𑀫𑁆𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑁄𑀕𑀥𑀭𑀽𑀧𑀯𑀺𑀲𑁂𑀲𑀢𑁆𑀢𑀸 𑀢𑁂𑀲𑀁 𑀭𑀽𑀧𑀸𑀦𑀁. 𑀆𑀤𑁂𑀲𑀯𑀲𑁂𑀦 𑀳𑀺 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀏𑀓𑀸𑀭𑀦𑁆𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀬𑀣𑀸𑀯𑀼𑀢𑁆𑀢𑀸 𑀢𑀺𑀯𑀺𑀥𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺.

𑀦𑀧𑀼𑀁𑀲𑀓𑀸𑀦𑀫𑀺𑀘𑁆𑀘𑁂𑀯𑀁, 𑀮𑀺𑀗𑁆𑀕𑀸𑀦𑀁 𑀦𑀬𑀲𑀸𑀮𑀺𑀦𑀻;

𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸 𑀫𑁂, 𑀲𑀸𑀲𑀦𑀢𑁆𑀣𑀁 𑀫𑀳𑁂𑀲𑀺𑀦𑁄.

𑀬𑀲𑁆𑀲𑁂𑀲𑀸 𑀧𑀕𑀼𑀡𑀸 𑀲𑀤𑁆𑀤-𑀦𑀻𑀢𑀺𑀭𑁂𑀲𑀸 𑀲𑀼𑀪𑀸𑀯𑀺𑀢𑀸;

𑀲𑀸𑀲𑀦𑁂 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀲𑀭𑀡𑀁 𑀲𑁄 𑀧𑀭𑀸𑀬𑀡𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀓𑀢𑀺𑀭𑀽𑀧𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁦. 𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑀦𑀸𑀫𑀺𑀓𑀧𑀤𑀫𑀸𑀮𑀸

𑀅𑀥𑀺𑀓𑀽𑀦𑀓𑀢𑁄 𑀘𑁂𑀓-𑀓𑁆𑀔𑀭𑀢𑁄 𑀘 𑀇𑀢𑁄 𑀧𑀭𑀁;

𑀢𑀻𑀡𑀺 𑀮𑀺𑀗𑁆𑀕𑀸𑀦𑀺 𑀫𑀺𑀲𑁆𑀲𑁂𑀢𑁆𑀯𑀸, 𑀧𑀤𑀫𑀸𑀮𑀫𑀦𑀸𑀓𑀼𑀮𑀁.

𑀦𑀸𑀦𑀸𑀲𑀼𑀔𑀼𑀫𑀲𑀗𑁆𑀓𑁂𑀢-𑀕𑀢𑁂𑀲𑁆𑀯𑀢𑁆𑀣𑁂𑀲𑀼 𑀯𑀺𑀜𑁆𑀜𑀼𑀦𑀁;

𑀕𑀫𑁆𑀪𑀻𑀭𑀩𑀼𑀤𑁆𑀥𑀺𑀘𑀸𑀭𑀢𑁆𑀣𑀁, 𑀧𑀯𑀓𑁆𑀔𑀸𑀫𑀺 𑀬𑀣𑀸𑀩𑀮𑀁.

𑀇𑀢𑁆𑀣𑀻 𑀣𑀻 𑀘 𑀧𑀪𑀸 𑀪𑀸 𑀘, 𑀕𑀺𑀭𑀸 𑀭𑀸 𑀧𑀯𑀦𑀁 𑀯𑀦𑀁;

𑀉𑀤𑀓𑀜𑁆𑀘 𑀤𑀓𑀁 𑀓𑀜𑁆𑀘, 𑀯𑀺𑀢𑀓𑁆𑀓𑁄 𑀇𑀢𑀺 𑀘𑀸𑀤𑀬𑁄.

𑀪𑀽 ¶ 𑀪𑀽𑀫𑀺 𑀘𑁂𑀯 𑀅𑀭𑀜𑁆𑀜𑀁, 𑀅𑀭𑀜𑁆𑀜𑀸𑀦𑀻𑀢𑀺 𑀘𑀸𑀤𑀬𑁄;

𑀧𑀜𑁆𑀜𑀸 𑀧𑀜𑁆𑀜𑀸𑀡𑀁 𑀜𑀸𑀡𑀜𑁆𑀘, 𑀇𑀘𑁆𑀘𑀸𑀤𑀻 𑀘 𑀢𑀺𑀥𑀸 𑀲𑀺𑀬𑀼𑀁.

𑀓𑁄 𑀯𑀺 𑀲𑀸 𑀘𑁂𑀯 𑀪𑀸 𑀭𑀸 𑀘, 𑀣𑀻 𑀥𑀻 𑀓𑀼 𑀪𑀽 𑀢𑀣𑁂𑀯 𑀓𑀁;

𑀔𑀁 𑀕𑁄 𑀫𑁄 𑀫𑀸 𑀘 𑀲𑀁 𑀬𑀁 𑀢𑀁, 𑀓𑀺𑀫𑀺𑀘𑁆𑀘𑀸𑀤𑀻 𑀘 𑀏𑀓𑀺𑀓𑀸𑀢𑀺.

𑀅𑀬𑀁 𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀉𑀤𑁆𑀤𑁂𑀲𑁄. 𑀢𑀢𑁆𑀭 𑀇𑀢𑁆𑀣𑀻, 𑀇𑀢𑁆𑀣𑀻, 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀺𑀁…𑀧𑁂… 𑀪𑁄𑀢𑀺𑀬𑁄 𑀇𑀢𑁆𑀣𑀺𑀬𑁄.

𑀣𑀻 𑀣𑀻, 𑀣𑀺𑀬𑁄. 𑀣𑀺𑀁, 𑀣𑀻, 𑀣𑀺𑀬𑁄. 𑀣𑀺𑀬𑀸, 𑀣𑀻𑀳𑀺, 𑀣𑀻𑀪𑀺. 𑀣𑀺𑀬𑀸, 𑀣𑀻𑀦𑀁. 𑀣𑀺𑀬𑀸, 𑀣𑀻𑀳𑀺, 𑀣𑀻𑀪𑀺. 𑀣𑀺𑀬𑀸, 𑀣𑀻𑀦𑀁. 𑀣𑀺𑀬𑀸, 𑀣𑀺𑀬𑀁, 𑀣𑀻𑀲𑀼. 𑀪𑁄𑀢𑀺 𑀣𑀺, 𑀪𑁄𑀢𑀺𑀬𑁄 𑀣𑀻, 𑀪𑁄𑀢𑀺𑀬𑁄 𑀣𑀺𑀬𑁄. 𑀏𑀢𑁆𑀣 𑁋

‘‘𑀓𑀼𑀓𑁆𑀓𑀼𑀝𑀸 𑀫𑀡𑀬𑁄 𑀤𑀡𑁆𑀟𑀸, 𑀣𑀺𑀬𑁄 𑀘 𑀧𑀼𑀜𑁆𑀜𑀮𑀓𑁆𑀔𑀡𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀧𑀸𑀧𑀲𑁆𑀲, 𑀓𑀢𑀧𑀼𑀜𑁆𑀜𑀲𑁆𑀲 𑀚𑀦𑁆𑀢𑀼𑀦𑁄;

𑀣𑀺𑀬𑀸 𑀕𑀼𑀬𑁆𑀳𑀁 𑀦 𑀲𑀁𑀲𑁂𑀬𑁆𑀬; 𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄’’𑀢𑀺

𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀧𑀪𑀸, 𑀧𑀪𑀸, 𑀧𑀪𑀸𑀬𑁄. 𑀧𑀪𑀁…𑀧𑁂… 𑀪𑁄𑀢𑀺𑀬𑁄 𑀧𑀪𑀸𑀬𑁄.

𑀪𑀸, 𑀪𑀸, 𑀪𑀸𑀬𑁄. 𑀪𑀁, 𑀪𑀸, 𑀪𑀸𑀬𑁄. 𑀪𑀸𑀬, 𑀪𑀸𑀳𑀺, 𑀪𑀸𑀪𑀺. 𑀪𑀸𑀬, 𑀪𑀸𑀦𑀁. 𑀪𑀸𑀬, 𑀪𑀸𑀳𑀺, 𑀪𑀸𑀪𑀺. 𑀪𑀸𑀬, 𑀪𑀸𑀦𑀁. 𑀪𑀸𑀬, 𑀪𑀸𑀬𑀁, 𑀪𑀸𑀲𑀼. 𑀪𑁄𑀢𑀺 𑀪𑁂, 𑀪𑁄𑀢𑀺𑀬𑁄 𑀪𑀸, 𑀪𑁄𑀢𑀺𑀬𑁄 𑀪𑀸𑀬𑁄. 𑀏𑀢𑁆𑀣 𑀘 ‘‘𑀪𑀸𑀓𑀭𑁄 𑀪𑀸𑀦𑀼’’𑀇𑀘𑁆𑀘𑀸𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀕𑀺𑀭𑀸 ¶ , 𑀕𑀺𑀭𑀸, 𑀕𑀺𑀭𑀸𑀬𑁄. 𑀕𑀺𑀭𑀁…𑀧𑁂… 𑀪𑁄𑀢𑀺𑀬𑁄 𑀕𑀺𑀭𑀸𑀬𑁄. ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄. 𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀸𑀳𑀺 𑀅𑀦𑀼𑀧𑀼𑀩𑁆𑀩𑀲𑁄’’𑀢𑀺 𑀇𑀫𑀸𑀦𑀺 𑀕𑀺𑀭𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀲𑀼𑀯𑀡𑁆𑀡𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀇𑀥 𑀧𑀦 𑀲𑀤𑁆𑀤𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄.

𑀭𑀸, 𑀭𑀸, 𑀭𑀸𑀬𑁄. 𑀭𑀁, 𑀭𑀸, 𑀭𑀸𑀬𑁄. 𑀭𑀸𑀬, 𑀭𑀸𑀳𑀺, 𑀭𑀸𑀪𑀺. 𑀭𑀸𑀬, 𑀭𑀸𑀦𑀁. 𑀭𑀸𑀬, 𑀭𑀸𑀳𑀺, 𑀭𑀸𑀪𑀺. 𑀭𑀸𑀬, 𑀭𑀸𑀦𑀁. 𑀭𑀸𑀬, 𑀭𑀸𑀬𑀁, 𑀭𑀸𑀲𑀼. 𑀪𑁄𑀢𑀺 𑀭𑁂, 𑀪𑁄𑀢𑀺𑀬𑁄 𑀭𑀸, 𑀪𑁄𑀢𑀺𑀬𑁄 𑀭𑀸𑀬𑁄.

𑀭𑀸 𑀯𑀼𑀘𑁆𑀘𑀢𑀺 𑀲𑀤𑁆𑀤𑁄. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀝𑀻𑀓𑀸𑀬𑀜𑁆𑀳𑀺 ‘‘𑀭𑀸 𑀲𑀤𑁆𑀤𑁄 𑀢𑀺𑀬𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀭𑀢𑁆𑀢𑀺, 𑀲𑀢𑁆𑀢𑀸𑀦𑀁 𑀲𑀤𑁆𑀤𑀲𑁆𑀲 𑀯𑀽𑀧𑀲𑀫𑀓𑀸𑀮𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀭𑀸𑀲𑀤𑁆𑀤𑀲𑁆𑀲 𑀲𑀤𑁆𑀤𑀯𑀸𑀘𑀓𑀢𑁆𑀢𑁂 ‘‘𑀭𑀢𑁆𑀢𑀻’’𑀢𑀺 𑀧𑀤𑀁 𑀦𑀺𑀤𑀲𑁆𑀲𑀦𑀁.

𑀧𑀯𑀦𑀁, 𑀧𑀯𑀦𑀸𑀦𑀺, 𑀧𑀯𑀦𑀸. 𑀧𑀯𑀦𑀁, 𑀧𑀯𑀦𑀸𑀦𑀺, 𑀧𑀯𑀦𑁂.

𑀯𑀦𑀁, 𑀯𑀦𑀸𑀦𑀺, 𑀯𑀦𑀸. 𑀯𑀦𑀁, 𑀯𑀦𑀸𑀦𑀺, 𑀯𑀦𑁂. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁.

𑀧𑀯𑀦 𑀯𑀦𑀲𑀤𑁆𑀤𑀸 𑀓𑀤𑀸𑀘𑀺 𑀲𑀫𑀸𑀦𑀢𑁆𑀣𑀸 𑀓𑀤𑀸𑀘𑀺 𑀪𑀺𑀦𑁆𑀦𑀢𑁆𑀣𑀸. 𑀢𑁂 𑀳𑀺 𑀅𑀭𑀜𑁆𑀜𑀯𑀸𑀘𑀓𑀢𑁆𑀢𑁂 𑀲𑀫𑀸𑀦𑀢𑁆𑀣𑀸 ‘‘𑀢𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀧𑀯𑀦𑀁 𑀧𑀸𑀯𑀺𑀲𑀺𑀁 𑀢𑀤𑀸. 𑀲𑀧𑀼𑀢𑁆𑀢𑁄 𑀧𑀸𑀯𑀺𑀲𑀺𑀁 𑀯𑀦’’𑀦𑁆𑀢𑀺𑀆𑀤𑀻𑀲𑀼. 𑀬𑀣𑀸𑀓𑁆𑀓𑀫𑀁 𑀧𑀦 𑀢𑁂 𑀯𑀸𑀬𑀼𑀢𑀡𑁆𑀳𑀸𑀯𑀦𑀯𑀸𑀘𑀓𑀢𑁆𑀢𑁂 𑀪𑀺𑀦𑁆𑀦𑀢𑁆𑀣𑀸 ‘‘𑀧𑀭𑀫𑀤𑀼𑀕𑁆𑀕𑀦𑁆𑀥𑀧𑀯𑀦𑀯𑀺𑀘𑀭𑀺𑀢𑁂. 𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀁, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺𑀆𑀤𑀻𑀲𑀼.

𑀉𑀤𑀓𑀁, 𑀉𑀤𑀓𑀸𑀦𑀺, 𑀉𑀤𑀓𑀸. 𑀉𑀤𑀓𑀁, 𑀉𑀤𑀓𑀸𑀦𑀺, 𑀉𑀤𑀓𑁂.

𑀤𑀓𑀁, 𑀤𑀓𑀸𑀦𑀺, 𑀤𑀓𑀸. 𑀤𑀓𑀁, 𑀤𑀓𑀸𑀦𑀺, 𑀤𑀓𑁂. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁.

‘‘𑀅𑀫𑁆𑀩𑀧𑀓𑁆𑀓𑀁 ¶ 𑀤𑀓𑀁 𑀲𑀻𑀢𑀁. 𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. ‘‘𑀦𑀻𑀮𑁄𑀤𑀁 𑀯𑀦𑀫𑀚𑁆𑀛𑀢𑁄. 𑀫𑀳𑁄𑀤𑀥𑀺. 𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀻’’𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀧𑀦 𑀲𑀫𑀸𑀲𑀦𑁆𑀢𑀕𑀢𑀦𑀸𑀫𑀢𑁆𑀢𑀸 𑀉𑀤𑀲𑀤𑁆𑀤𑁂𑀦𑁂𑀯 𑀉𑀤𑀓𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀭𑀺𑀢𑁆𑀢𑀲𑁆𑀲𑀸𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑁂 ‘‘𑀭𑀺𑀢𑁆𑀢𑀲𑁆𑀲’’𑀦𑁆𑀢𑀺 𑀲𑀤𑁆𑀤𑁂𑀦 𑀭𑀺𑀢𑁆𑀢𑀲𑁆𑀲𑀸𑀤𑀢𑁆𑀣𑁄 𑀯𑀺𑀬. 𑀧𑀸𑀴𑀺𑀬𑀜𑁆𑀳𑀺 𑀓𑁂𑀯𑀮𑁄 𑀉𑀤𑀲𑀤𑁆𑀤𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀅𑀢𑁆𑀣𑀺 𑀘𑁂, 𑀲𑀼𑀝𑁆𑀞𑀼 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀓𑀁, 𑀓𑀸𑀦𑀺, 𑀓𑀸. 𑀓𑀁, 𑀓𑀸𑀦𑀺, 𑀓𑁂. 𑀓𑁂𑀦, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑀸, 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑁂, 𑀓𑀲𑁆𑀫𑀺𑀁, 𑀓𑀫𑁆𑀳𑀺, 𑀓𑁂𑀲𑀼. 𑀪𑁄 𑀓, 𑀪𑀯𑀦𑁆𑀢𑁄 𑀓𑀸, 𑀪𑀯𑀦𑁆𑀢𑁄 𑀓𑀸𑀦𑀺. 𑀪𑁄𑀲𑀤𑁆𑀤𑁂𑀦 𑀯𑀸 𑀩𑀳𑀼𑀯𑀘𑀦𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀪𑁄 𑀓𑀸𑀦𑀺, 𑀪𑁄 𑀓𑀸’’𑀢𑀺.

𑀏𑀢𑁆𑀣 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁 𑀲𑀻𑀲𑀁 𑀲𑀼𑀔𑀜𑁆𑀘. 𑀅𑀢𑁆𑀭 ‘‘𑀓𑀦𑁆𑀢𑀸𑀭𑁄 𑀓𑀦𑁆𑀤𑀭𑁄 𑀓𑁂𑀯𑀝𑁆𑀝𑀸 𑀓𑁂𑀲𑀸 𑀓𑀭𑀼𑀡𑀸 𑀦𑀸𑀓𑁄’’𑀢𑀺𑀆𑀤𑀻𑀦𑀺 𑀧𑀬𑁄𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀭 𑀓𑀦𑁆𑀢𑀸𑀭𑁄𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀢𑀭𑀺𑀢𑀩𑁆𑀩𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑀧𑁆𑀧𑀤𑁂𑀲𑁄. 𑀘𑁄𑀭𑀓𑀦𑁆𑀢𑀸𑀭𑀦𑁆𑀢𑀺𑀆𑀤𑀻𑀲𑀼 𑀧𑀦 𑀭𑀽𑀴𑁆𑀳𑀺𑀬𑀸 𑀤𑀼𑀕𑁆𑀕𑀫𑀦𑀝𑁆𑀞𑀸𑀦𑁂𑀧𑀺 𑀓𑀦𑁆𑀢𑀸𑀭𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀦𑁆𑀤𑀭𑁄𑀢𑀺 𑀏𑀢𑁆𑀣𑀸𑀧𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑁄 𑀪𑀺𑀦𑁆𑀦𑁄𑀢𑀺 𑀓𑀦𑁆𑀤𑀭𑁄. 𑀓𑁂𑀯𑀝𑁆𑀝𑀸𑀢𑀺𑀆𑀤𑀻𑀲𑀼 𑀧𑀦 𑀓𑁂 𑀉𑀤𑀓𑁂 𑀯𑀢𑁆𑀢𑀦𑀢𑁄 𑀕𑀳𑀡𑀢𑁆𑀣𑀁 𑀧𑀯𑀢𑁆𑀢𑀦𑀢𑁄 𑀓𑁂𑀯𑀝𑁆𑀝𑀸. 𑀓𑁂 𑀲𑀻𑀲𑁂 𑀲𑁂𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑁂𑀲𑀸. 𑀓𑀁 𑀲𑀼𑀔𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀦𑀸𑀓𑁄𑀢𑀺 𑀲𑀕𑁆𑀕𑁄. 𑀓𑀦𑁆𑀢𑀺 𑀳𑀺 𑀲𑀼𑀔𑀁, 𑀦 𑀓𑀁 𑀅𑀓𑀁, 𑀤𑀼𑀓𑁆𑀔𑀁, 𑀢𑀁 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀦𑀸𑀓𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ¶ . 𑀬𑀣𑁂𑀢𑁆𑀣 𑀇𑀢𑁆𑀣𑀻𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸, 𑀏𑀯𑀁 ‘‘𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀆𑀪𑀸 𑀧𑀤𑀻𑀧𑁄’’𑀢𑀺𑀆𑀤𑀻𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀪𑀽, 𑀪𑀽, 𑀪𑀼𑀬𑁄. 𑀪𑀼𑀁, 𑀪𑀽, 𑀪𑀼𑀬𑁄. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀽𑀳𑀺, 𑀪𑀽𑀪𑀺. 𑀪𑀼𑀬𑀸, 𑀪𑀽𑀦𑀁. 𑀪𑀼𑀬𑀸, 𑀪𑀼𑀬𑀁, 𑀪𑀽𑀲𑀼. 𑀪𑁄𑀢𑀺 𑀪𑀼, 𑀪𑁄𑀢𑀺𑀬𑁄 𑀪𑀽, 𑀪𑁄𑀢𑀺𑀬𑁄 𑀪𑀼𑀬𑁄. 𑀏𑀢𑁆𑀣 𑀘 ‘‘𑀪𑀽𑀭𑀼𑀳𑁄 𑀪𑀽𑀧𑀸𑀮𑁄 𑀪𑀽𑀪𑀼𑀚𑁄 𑀪𑀽𑀢𑀮’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀪𑀽𑀫𑀺, 𑀪𑀽𑀫𑀻, 𑀪𑀽𑀫𑀺𑀬𑁄; 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁;

𑀅𑀭𑀜𑁆𑀜𑀁, 𑀅𑀭𑀜𑁆𑀜𑀸𑀦𑀺, 𑀅𑀭𑀜𑁆𑀜𑀸; 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀭𑀜𑁆𑀜𑀸𑀦𑀻 𑀯𑀼𑀘𑁆𑀘𑀢𑀺 𑀫𑀳𑀸𑀅𑀭𑀜𑁆𑀜𑀁, ‘‘𑀕𑀳𑀧𑀢𑀸𑀦𑀻’’𑀢𑀺 𑀧𑀤𑀫𑀺𑀯 𑀇𑀦𑀻𑀧𑀘𑁆𑀘𑀬𑀯𑀲𑁂𑀦 𑀲𑀸𑀥𑁂𑀢𑀩𑁆𑀩𑀁 𑀧𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘. ‘‘𑀅𑀭𑀜𑁆𑀜𑀸𑀦𑀻’’𑀢𑀺 𑀳𑀺 𑀅𑀝𑁆𑀞𑀓𑀣𑀸𑀧𑀸𑀞𑁄𑀧𑀺 𑀤𑀺𑀲𑁆𑀲𑀢𑀺.

𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀺𑀬𑁄. 𑀅𑀭𑀜𑁆𑀜𑀸𑀦𑀺𑀁, 𑀅𑀭𑀜𑁆𑀜𑀸𑀦𑀻, 𑀅𑀭𑀜𑁆𑀜𑀸𑀦𑀺𑀬𑁄. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀳𑀺, 𑀅𑀭𑀜𑁆𑀜𑀸𑀦𑀻𑀪𑀺. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀦𑀁. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀳𑀺, 𑀅𑀭𑀜𑁆𑀜𑀸𑀦𑀻𑀪𑀺. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀻𑀦𑀁. 𑀅𑀭𑀜𑁆𑀜𑀸𑀦𑀺𑀬𑀸, 𑀅𑀭𑀜𑁆𑀜𑀸𑀦𑀺𑀬𑀁, 𑀅𑀭𑀜𑁆𑀜𑀸𑀦𑀻𑀲𑀼. 𑀪𑁄𑀢𑀺 𑀅𑀭𑀜𑁆𑀜𑀸𑀦𑀺, 𑀪𑁄𑀢𑀺𑀬𑁄 𑀅𑀭𑀜𑁆𑀜𑀸𑀦𑀻, 𑀪𑁄𑀢𑀺𑀬𑁄 𑀅𑀭𑀜𑁆𑀜𑀸𑀦𑀺𑀬𑁄.

𑀬𑀣𑁂𑀢𑁆𑀣 𑀉𑀢𑁆𑀢𑀭𑀸𑀥𑀺𑀓𑀯𑀲𑁂𑀦 𑀬𑁄𑀚𑀺𑀢𑀸, 𑀏𑀯𑀁 ‘‘𑀲𑀪𑀸, 𑀲𑀪𑀸𑀬’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀲𑀪𑀸𑀬𑀦𑁆𑀢𑀺 𑀲𑀪𑀸 𑀏𑀯 ¶ , 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑀯𑀲𑁂𑀦 𑀧𑀦 𑀏𑀯𑀁 𑀯𑀼𑀢𑁆𑀢𑀁. ‘‘𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀧𑀸𑀴𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀧𑀜𑁆𑀜𑀸, 𑀧𑀜𑁆𑀜𑀸, 𑀧𑀜𑁆𑀜𑀸𑀬𑁄. 𑀧𑀜𑁆𑀜𑀁, 𑀧𑀜𑁆𑀜𑀸, 𑀧𑀜𑁆𑀜𑀸𑀬𑁄. 𑀧𑀜𑁆𑀜𑀸𑀬.

𑀧𑀜𑁆𑀜𑀸𑀡𑀁, 𑀧𑀜𑁆𑀜𑀸𑀡𑀸𑀦𑀺, 𑀧𑀜𑁆𑀜𑀸𑀡𑀸. 𑀧𑀜𑁆𑀜𑀸𑀡𑀁, 𑀧𑀜𑁆𑀜𑀸𑀡𑀸𑀦𑀺, 𑀧𑀜𑁆𑀜𑀸𑀡𑁂. 𑀧𑀜𑁆𑀜𑀸𑀡𑁂𑀦.

‘‘𑀢𑀣𑀸 𑀳𑀺 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀻𑀮𑀧𑀜𑁆𑀜𑀸𑀡𑀁. 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄’’𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀜𑀸𑀡𑀁, 𑀜𑀸𑀡𑀸𑀦𑀺, 𑀜𑀸𑀡𑀸. 𑀜𑀸𑀡𑀁, 𑀜𑀸𑀡𑀸𑀦𑀺, 𑀜𑀸𑀡𑁂. 𑀜𑀸𑀡𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. ‘‘𑀅𑀕𑁆𑀕𑀺 𑀅𑀕𑁆𑀕𑀺𑀦𑀺 𑀕𑀺𑀦𑀺’’𑀇𑀘𑁆𑀘𑀸𑀤𑀻𑀲𑀼𑀧𑀺 𑀉𑀢𑁆𑀢𑀭𑀸𑀥𑀺𑀓𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀓𑁄 𑀯𑀻 𑀲𑀸𑀤𑀻𑀲𑀼𑀧𑀺 𑀏𑀓𑀓𑁆𑀔𑀭𑁂𑀲𑀼 𑀓𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀸 𑀯𑀸𑀢𑁄 𑀘 𑀲𑀭𑀻𑀭𑀜𑁆𑀘, 𑀢𑀲𑁆𑀲 𑀢𑀩𑁆𑀩𑀸𑀘𑀓𑀢𑁆𑀢𑁂 𑀇𑀫𑁂 𑀧𑀬𑁄𑀕𑀸. 𑀲𑁂𑀬𑁆𑀬𑀣𑀺𑀤𑀁?

‘‘𑀚𑀺𑀦𑁂𑀦 𑀬𑁂𑀦 𑀆𑀦𑀻𑀢𑀁, 𑀮𑁄𑀓𑀲𑁆𑀲 𑀅𑀫𑀺𑀢𑀁 𑀳𑀺𑀢𑀁;

𑀢𑀲𑁆𑀲 𑀧𑀸𑀤𑀫𑁆𑀩𑀼𑀚𑀁 𑀯𑀦𑁆𑀤𑁂, 𑀓𑀫𑁄𑀴𑀺𑀅𑀮𑀺𑀲𑁂𑀯𑀺𑀢𑀁.

𑀓𑀓𑀼𑀥𑀭𑀼𑀓𑁆𑀔𑁄. 𑀓𑀭𑀚𑀓𑀸𑀬𑁄’’ 𑀇𑀘𑁆𑀘𑁂𑀯𑀫𑀸𑀤𑀬𑁄. 𑀢𑀢𑁆𑀣 𑀓𑀫𑁄𑀴𑀺𑀅𑀮𑀺𑀲𑁂𑀯𑀺𑀢𑀦𑁆𑀢𑀺 𑀯𑀦𑁆𑀤𑀦𑁆𑀢𑀸𑀦𑀁 𑀅𑀦𑁂𑀓𑀲𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀫𑁄𑀴𑀺𑀪𑀫𑀭𑀲𑁂𑀯𑀺𑀢𑀦𑁆𑀢𑀺 𑀓𑀯𑀬𑁄 𑀇𑀘𑁆𑀙𑀦𑁆𑀢𑀺. 𑀓𑀓𑀼𑀥𑀭𑀼𑀓𑁆𑀔𑁄𑀢𑀺 𑀏𑀢𑁆𑀣 𑀧𑀦 𑀓𑁄 𑀯𑀼𑀘𑁆𑀘𑀢𑀺 𑀯𑀸𑀢𑁄, 𑀢𑀲𑁆𑀲 𑀬𑁄 𑀓𑀼𑀚𑁆𑀛𑀢𑀺, 𑀯𑀸𑀢𑀭𑁄𑀕𑀸𑀧𑀦𑀬𑀦𑀯𑀲𑁂𑀦 𑀢𑀁 𑀦𑀺𑀯𑀸𑀭𑁂𑀢𑀺, 𑀢𑀲𑁆𑀫𑀸 𑀲𑁄 𑀭𑀼𑀓𑁆𑀔𑁄 𑀓𑀓𑀼𑀥𑁄𑀢𑀺 𑀯𑀼𑀘𑁆𑀘𑀢𑀻𑀪𑀺 𑀆𑀘𑀭𑀺𑀬𑀸. 𑀓𑀭𑀚𑀓𑀸𑀬𑁄𑀢𑀺 𑀏𑀢𑁆𑀣 𑀢𑀼 𑀓𑁄 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀢𑀢𑁆𑀣 𑀧𑀯𑀢𑁆𑀢𑁄 𑀭𑀚𑁄 𑀓𑀭𑀚𑁄. 𑀓𑀺𑀁 𑀢𑀁 ¶ ? 𑀲𑀼𑀓𑁆𑀓𑀲𑁄𑀡𑀺𑀢𑀁. 𑀢𑀜𑁆𑀳𑀺 ‘‘𑀭𑀸𑀕𑁄 𑀭𑀚𑁄, 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀭𑀸𑀕𑀭𑀚𑀨𑀮𑀢𑁆𑀢𑀸 𑀲𑀭𑀻𑀭𑀯𑀸𑀘𑀓𑁂𑀦 𑀓𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀨𑀮𑀯𑁄𑀳𑀸𑀭𑁂𑀦 ‘‘𑀓𑀭𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑀲𑀗𑁆𑀔𑀸𑀢𑁂𑀦 𑀓𑀭𑀚𑁂𑀦 𑀲𑀫𑁆𑀪𑀽𑀢𑁄 𑀓𑀸𑀬𑁄 𑀓𑀭𑀚𑀓𑀸𑀬𑁄𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 ‘‘𑀓𑀸𑀬𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄’’𑀢𑀺 𑀯𑀼𑀢𑁆𑀢𑁄, 𑀫𑀳𑀸𑀅𑀲𑁆𑀲𑀧𑀽𑀭𑀲𑀼𑀢𑁆𑀢𑀝𑀻𑀓𑀸𑀬𑀁 𑀧𑀦 ‘‘𑀓𑀭𑀺𑀬𑀢𑀺 𑀕𑀩𑁆𑀪𑀸𑀲𑀬𑁂 𑀔𑀺𑀧𑀺𑀬𑀢𑀻𑀢𑀺 𑀓𑀭𑁄, 𑀲𑀫𑁆𑀪𑀯𑁄. 𑀓𑀭𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀆𑀤𑀻𑀦𑀁 𑀲𑀡𑁆𑀞𑀸𑀧𑀦𑀯𑀲𑁂𑀦 𑀓𑀭𑀢𑁄 𑀚𑀸𑀢𑁄𑀢𑀺 𑀅𑀧𑀭𑁂, 𑀉𑀪𑀬𑀣𑀸𑀧𑀺 𑀓𑀭𑀚𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑀢𑁆𑀣𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀓𑀲𑀤𑁆𑀤𑀸𑀥𑀺𑀓𑀸𑀭𑀢𑁆𑀢𑀸.

𑀓𑁄, 𑀓𑀸. 𑀓𑀁, 𑀓𑁂. 𑀓𑁂𑀦, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑀸, 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀸𑀦𑀁. 𑀓𑁂, 𑀓𑀲𑁆𑀫𑀺𑀁, 𑀓𑀫𑁆𑀳𑀺, 𑀓𑁂𑀲𑀼. 𑀪𑁄 𑀓, 𑀪𑀯𑀦𑁆𑀢𑁄 𑀓𑀸.

𑀢𑀢𑁆𑀭 𑀯𑀺 𑀯𑀼𑀘𑁆𑀘𑀢𑀺 𑀧𑀓𑁆𑀔𑀻. 𑀢𑀣𑀸 𑀳𑀺 𑀧𑀓𑁆𑀔𑀻𑀦𑀁 𑀇𑀲𑁆𑀲𑀭𑁄 𑀲𑀼𑀧𑀡𑁆𑀡𑀭𑀸𑀚𑀸 𑀯𑀺𑀦𑁆𑀤𑁄𑀢𑀺 𑀓𑀣𑀺𑀬𑀢𑀺. 𑀏𑀢𑀫𑀢𑁆𑀣𑀜𑁆𑀳𑀺 𑀲𑀦𑁆𑀥𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑁂𑀦𑀧𑀺 𑀅𑀬𑀁 𑀕𑀸𑀣𑀸 𑀪𑀸𑀲𑀺𑀢𑀸 𑁋

‘‘𑀲𑀤𑁆𑀥𑀸𑀦𑀢𑁂 𑀫𑀼𑀤𑁆𑀥𑀦𑀺 𑀲𑀡𑁆𑀞𑀧𑁂𑀫𑀺, 𑀫𑀼𑀦𑀺𑀦𑁆𑀤 𑀦𑀺𑀦𑁆𑀤𑀸𑀧𑀕𑀢𑀁 𑀢𑀯𑀕𑁆𑀕𑀁;

𑀤𑁂𑀯𑀺𑀦𑁆𑀤𑀦𑀸𑀕𑀺𑀦𑁆𑀤𑀦𑀭𑀺𑀦𑁆𑀤𑀯𑀺𑀦𑁆𑀤-𑀦 𑀢𑀁 𑀯𑀺𑀪𑀺𑀦𑁆𑀦𑀁 𑀘𑀭𑀡𑀸𑀭𑀯𑀺𑀦𑁆𑀤’’𑀦𑁆𑀢𑀺.

𑀢𑀢𑁆𑀣 𑀯𑀻𑀦𑀁 𑀇𑀦𑁆𑀤𑁄𑀢𑀺 𑀯𑀺𑀦𑁆𑀤𑁄, 𑀧𑀓𑁆𑀔𑀺𑀚𑀸𑀢𑀺𑀬𑀸 𑀚𑀸𑀢𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀭𑀸𑀚𑀸𑀢𑀺 𑀅𑀢𑁆𑀣𑁄.

𑀯𑀺𑀁, 𑀯𑀻, 𑀯𑀬𑁄. 𑀯𑀺𑀁, 𑀯𑀻, 𑀯𑀬𑁄. 𑀯𑀺𑀦𑀸, 𑀯𑀻𑀳𑀺, 𑀯𑀻𑀪𑀺. 𑀯𑀺𑀲𑁆𑀲, 𑀯𑀺𑀦𑁄, 𑀯𑀻𑀦𑀁. 𑀯𑀺𑀦𑀸, 𑀯𑀺𑀲𑁆𑀫𑀸, 𑀯𑀺𑀫𑁆𑀳𑀸, 𑀯𑀻𑀳𑀺, 𑀯𑀻𑀪𑀺. 𑀯𑀺𑀲𑁆𑀲, 𑀯𑀺𑀦𑁄, 𑀯𑀻𑀦𑀁. 𑀯𑀺𑀲𑁆𑀫𑀺𑀁, 𑀯𑀺𑀫𑁆𑀳𑀺, 𑀯𑀻𑀲𑀼. 𑀪𑁄 𑀯𑀺, 𑀪𑀯𑀦𑁆𑀢𑁄 𑀯𑀬𑁄.

𑀲𑀸 ¶ 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄, ‘‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀧𑀦 𑀲𑀸𑀲𑀤𑁆𑀤𑁄 𑀲𑀩𑁆𑀩𑀦𑀸𑀫𑀺𑀓𑀧𑀭𑀺𑀬𑀸𑀧𑀦𑁆𑀦𑁄 𑀧𑀭𑀫𑁆𑀫𑀼𑀔𑀯𑀘𑀦𑁄 𑀢𑀲𑀤𑁆𑀤𑁂𑀦 𑀲𑀫𑁆𑀪𑀽𑀢𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀲𑀤𑁆𑀤𑀲𑁆𑀲 𑀪𑀸 𑀭𑀸 𑀣𑀻 𑀪𑀽 𑀓𑀲𑀤𑁆𑀤𑀸𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸.

𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀏𑀢𑁆𑀣 𑀘 ‘‘𑀅𑀫𑀘𑁆𑀘𑁂 𑀢𑀸𑀢 𑀚𑀸𑀦𑀸𑀳𑀺, 𑀥𑀻𑀭𑁂 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁂’’𑀢𑀺. ‘‘𑀥𑀻𑀫𑀸, 𑀥𑀻𑀫𑀢𑀺, 𑀲𑀼𑀥𑀻, 𑀲𑀼𑀥𑀺𑀦𑀻, 𑀥𑀻𑀬𑀼𑀢𑁆𑀢’’𑀦𑁆𑀢𑀺 𑀘 𑀆𑀤𑀻𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀥𑀻, 𑀥𑀻, 𑀥𑀺𑀬𑁄. 𑀥𑀺𑀁, 𑀥𑀻, 𑀥𑀺𑀬𑁄. 𑀥𑀺𑀬𑀸, 𑀥𑀻𑀳𑀺, 𑀥𑀻𑀪𑀺. 𑀥𑀺𑀬𑀸, 𑀥𑀻𑀦𑀁. 𑀥𑀺𑀬𑀸, 𑀥𑀻𑀳𑀺, 𑀥𑀻𑀪𑀺. 𑀥𑀺𑀬𑀸, 𑀥𑀻𑀦𑀁. 𑀥𑀺𑀬𑀸, 𑀥𑀺𑀬𑀁, 𑀥𑀻𑀲𑀼. 𑀪𑁄𑀢𑀺 𑀥𑀺, 𑀪𑁄𑀢𑀺𑀬𑁄 𑀥𑀻, 𑀪𑁄𑀢𑀺𑀬𑁄 𑀥𑀺𑀬𑁄.

𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀏𑀢𑁆𑀣 𑀘 ‘‘𑀓𑀼𑀤𑀸𑀮𑁄. 𑀓𑀼𑀫𑀼𑀤𑀁. 𑀓𑀼𑀜𑁆𑀚𑀭𑁄’’𑀢𑀺 𑀇𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀭 𑀓𑀼𑀁 𑀧𑀣𑀯𑀺𑀁 𑀤𑀸𑀮𑀬𑀢𑀺 𑀧𑀤𑀸𑀮𑁂𑀢𑀺 𑀪𑀺𑀦𑁆𑀤𑀢𑀺 𑀏𑀢𑁂𑀦𑀸𑀢𑀺 𑀓𑀼𑀤𑀸𑀮𑁄. 𑀓𑀼𑀬𑀁 𑀧𑀣𑀯𑀺𑀬𑀁 𑀫𑁄𑀤𑀢𑀻𑀢𑀺 𑀓𑀼𑀫𑀼𑀤𑀁. 𑀓𑀼𑀁 𑀚𑀭𑀢𑀻𑀢𑀺 𑀓𑀼𑀜𑁆𑀚𑀭𑁄. 𑀢𑀣𑀸 𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀓𑀼𑀁 𑀧𑀣𑀯𑀺𑀁 𑀢𑀤𑀪𑀺𑀖𑀸𑀢𑁂𑀦 𑀚𑀭𑀬𑀢𑀻𑀢𑀺 𑀓𑀼𑀜𑁆𑀚𑀭𑁄’’𑀢𑀺.

𑀓𑀼, 𑀓𑀽, 𑀓𑀼𑀬𑁄. 𑀓𑀼𑀁, 𑀓𑀽, 𑀓𑀼𑀬𑁄. 𑀓𑀼𑀬𑀸, 𑀓𑀽𑀳𑀺, 𑀓𑀽𑀪𑀺. 𑀓𑀼𑀬𑀸, 𑀓𑀽𑀦𑀁. 𑀓𑀼𑀬𑀸, 𑀓𑀽𑀳𑀺, 𑀓𑀽𑀪𑀺. 𑀓𑀼𑀬𑀸, 𑀓𑀽𑀦𑀁. 𑀓𑀼𑀬𑀸, 𑀓𑀼𑀬𑀁, 𑀓𑀽𑀲𑀼. 𑀪𑁄𑀢𑀺 𑀓𑀼, 𑀪𑁄𑀢𑀺𑀬𑁄 𑀓𑀽, 𑀪𑁄𑀢𑀺𑀬𑁄 𑀓𑀼𑀬𑁄.

𑀔’𑀫𑀺𑀦𑁆𑀤𑁆𑀭𑀺𑀬𑀁 𑀧𑀓𑀣𑀺𑀢𑀁, 𑀔’𑀫𑀸𑀓𑀸𑀲𑀫𑀼𑀤𑀻𑀭𑀺𑀢𑀁;

𑀲𑀕𑁆𑀕𑀝𑁆𑀞𑀸𑀦𑀫𑁆𑀧𑀺 𑀔𑀁 𑀯𑀼𑀢𑁆𑀢𑀁, 𑀲𑀼𑀜𑁆𑀜𑀢𑁆𑀢𑀫𑁆𑀧𑀺 𑀘 𑀔𑀁 𑀫𑀢𑀁.

𑀢𑀢𑁆𑀭𑀺𑀦𑁆𑀤𑁆𑀭𑀺𑀬𑀁 ¶ 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀕𑀢𑀺𑀦𑀺𑀯𑀸𑀲𑀪𑀸𑀯𑀢𑁄 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀆𑀓𑀸𑀲𑀁 𑀯𑀺𑀯𑀺𑀢𑁆𑀢𑀝𑁆𑀞𑁂𑀦. 𑀲𑀕𑁆𑀕𑁄 𑀓𑀢𑀲𑀼𑀘𑀭𑀺𑀢𑁂𑀳𑀺 𑀏𑀓𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀢𑀸𑀬 ‘‘𑀔’’𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. ‘‘𑀔𑀕𑁄 𑀬𑀣𑀸 𑀳𑀺 𑀭𑀼𑀓𑁆𑀔𑀕𑁆𑀕𑁂, 𑀦𑀺𑀮𑀻𑀬𑀦𑁆𑀢𑁄𑀯 𑀲𑀸𑀔𑀺𑀦𑁄. 𑀲𑀸𑀔𑀁 𑀖𑀝𑁆𑀝𑁂𑀢𑀻’’𑀢𑀺 𑀘, ‘‘𑀔𑁂 𑀦𑀺𑀫𑁆𑀫𑀺𑀢𑁄 𑀅𑀘𑀭𑀺 𑀅𑀝𑁆𑀞𑀲𑀢𑀁 𑀲𑀬𑀫𑁆𑀪𑀽’’𑀢𑀺 𑀘 𑀆𑀤𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀔𑀁, 𑀔𑀸𑀦𑀺, 𑀔𑀸. 𑀔𑀁, 𑀔𑀸𑀦𑀺, 𑀔𑁂. 𑀔𑁂𑀦, 𑀔𑁂𑀳𑀺, 𑀔𑁂𑀪𑀺. 𑀔𑀲𑁆𑀲, 𑀔𑀸𑀦𑀁. 𑀔𑀸, 𑀔𑀲𑁆𑀫𑀸, 𑀔𑀫𑁆𑀳𑀸, 𑀔𑁂𑀳𑀺, 𑀔𑁂𑀪𑀺. 𑀔𑀲𑁆𑀲, 𑀔𑀸𑀦𑀁. 𑀔𑁂, 𑀔𑀲𑁆𑀫𑀺𑀁, 𑀔𑀫𑁆𑀳𑀺, 𑀔𑁂𑀲𑀼. 𑀪𑁄 𑀔, 𑀪𑀯𑀦𑁆𑀢𑁄 𑀔𑀸𑀦𑀺, 𑀪𑀯𑀦𑁆𑀢𑁄 𑀔𑀸.

𑀕𑁄𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋

𑀕𑁄 𑀕𑁄𑀡𑁂 𑀘𑀺𑀦𑁆𑀤𑁆𑀭𑀺𑀬𑁂 𑀪𑀽𑀫𑁆𑀬𑀁, 𑀯𑀘𑀦𑁂 𑀘𑁂𑀯 𑀩𑀼𑀤𑁆𑀥𑀺𑀬𑀁;

𑀆𑀤𑀺𑀘𑁆𑀘𑁂 𑀭𑀲𑁆𑀫𑀺𑀬𑀜𑁆𑀘𑁂𑀯, 𑀧𑀸𑀦𑀻𑀬𑁂𑀧𑀺 𑀘 𑀯𑀢𑁆𑀢𑀢𑁂;

𑀢𑁂𑀲𑀼 𑀅𑀢𑁆𑀣𑁂𑀲𑀼 𑀕𑁄𑀡𑁂 𑀣𑀺-𑀧𑀼𑀫𑀸 𑀘 𑀇𑀢𑀭𑁂 𑀧𑀼𑀫𑀸.

𑀢𑀣𑀸 𑀳𑀺 ‘‘𑀕𑁄𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄. 𑀕𑁄𑀧𑀜𑁆𑀘𑀫𑁄’’𑀢𑀺𑀆𑀤𑀻𑀲𑀼 𑀕𑁄𑀲𑀤𑁆𑀤𑁄 𑀕𑁄𑀡𑁂 𑀯𑀢𑁆𑀢𑀢𑀺. 𑀕𑁄𑀘𑀭𑁄𑀢𑀺 𑀏𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀧𑀺 𑀯𑀢𑁆𑀢𑀢𑀺 𑀕𑀸𑀯𑁄 𑀘𑀓𑁆𑀔𑀸𑀤𑀻𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄. 𑀢𑀣𑀸 𑀳𑀺 𑀧𑁄𑀭𑀸𑀡𑀸 𑀓𑀣𑀬𑀺𑀁𑀲𑀼 ‘‘𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬 𑀕𑁄𑀘𑀭𑁄, 𑀅𑀪𑀺𑀡𑁆𑀳𑀁 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀕𑀸𑀯𑁄𑀯𑀸𑀘𑀓𑁆𑀔𑀸𑀤𑀻𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀳𑀺 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁 𑀕𑁄𑀘𑀭𑁄’’𑀢𑀺. ‘‘𑀕𑁄𑀫𑀢𑀺𑀁 𑀕𑁄𑀢𑀫𑀁 𑀦𑀫𑁂’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑀧𑀦 𑀧𑀣𑀯𑀺𑀬𑀁 𑀯𑀢𑁆𑀢𑀢𑀺. ‘‘𑀪𑀽𑀭𑀺𑀧𑀜𑁆𑀜𑀁 𑀕𑁄𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁𑀯𑀦𑁆𑀤𑀸𑀫𑀻’’𑀢𑀺 𑀳𑀺 𑀅𑀢𑁆𑀣𑁄. 𑀢𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀧𑁆𑀧𑀤𑁂𑀲𑁂 ‘‘𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀁, 𑀓𑀲𑀺𑀭𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻 𑀳𑀺 ‘‘𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑁂𑀤𑁄 𑀘 𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀕𑁄𑀢𑁆𑀢𑀯𑀲𑁂𑀦 ¶ 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀢𑀼 𑀯𑀘𑀦𑁂 𑀩𑀼𑀤𑁆𑀥𑀺𑀬𑀜𑁆𑀘 𑀯𑀢𑁆𑀢𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀕𑀁 𑀯𑀘𑀦𑀁 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀢𑀣𑀸 𑀳𑀺 𑀢𑀁𑀕𑁄𑀢𑁆𑀢𑀚𑀸𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀤𑀬𑁄𑀧𑀺 𑀕𑁄𑀢𑀫𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀪𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀦𑀁 ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄 𑀕𑁄𑀢𑀫 𑀢𑀣𑀸𑀕𑀢𑀸’’𑀢𑀺 𑀅𑀯𑁄𑀘. 𑀯𑁂𑀲𑁆𑀲𑀯𑀡𑁄𑀧𑀺 𑀫𑀳𑀸𑀭𑀸𑀚𑀸 𑀪𑀕𑀯𑀦𑁆𑀢𑀁 ‘‘𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫’’𑀦𑁆𑀢𑀺 𑀅𑀯𑁄𑀘, 𑀆𑀬𑀲𑁆𑀫𑀸𑀧𑀺 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 ‘‘𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺 𑀅𑀯𑁄𑀘. 𑀏𑀯𑀁 𑀇𑀤𑀁 𑀲𑀸𑀫𑀜𑁆𑀜𑀭𑀽𑀧𑀁 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀕𑁄𑀢𑀫𑀕𑁄𑀢𑁆𑀢𑀓𑀲𑁆𑀲𑀧𑀕𑁄𑀢𑁆𑀢𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀁.

𑀢𑀣𑀸 𑀕𑁄𑀲𑀤𑁆𑀤𑁄 𑀆𑀤𑀺𑀘𑁆𑀘𑁂 𑀯𑀢𑁆𑀢𑀢𑀺. ‘‘𑀕𑁄𑀕𑁄𑀢𑁆𑀢𑀁 𑀕𑁄𑀢𑀫𑀁 𑀦𑀫𑁂’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁, 𑀆𑀤𑀺𑀘𑁆𑀘𑀩𑀦𑁆𑀥𑀼𑀁 𑀕𑁄𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀘𑁆𑀘𑁄𑀧𑀺 𑀳𑀺 𑀕𑁄𑀢𑀫𑀕𑁄𑀢𑁆𑀢𑁂 𑀚𑀸𑀢𑁄 𑀪𑀕𑀯𑀸𑀧𑀺, 𑀏𑀯𑀁 𑀢𑁂𑀦 𑀲𑀫𑀸𑀦𑀕𑁄𑀢𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 ‘‘𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀣𑁄𑀫𑀦𑀸 𑀤𑀺𑀲𑁆𑀲𑀢𑀺 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀻’’𑀢𑀺 𑀘, ‘‘𑀯𑀦𑁆𑀤𑁂 𑀚𑁂𑀢𑀯𑀦𑀁 𑀦𑀺𑀘𑁆𑀘𑀁, 𑀯𑀺𑀳𑀸𑀭𑀁 𑀭𑀯𑀺𑀩𑀦𑁆𑀥𑀼𑀦𑁄’’𑀢𑀺 𑀘, ‘‘𑀮𑁄𑀓𑁂𑀓𑀩𑀦𑁆𑀥𑀼’𑀫𑀭𑀯𑀺𑀦𑁆𑀤𑀲𑀳𑀸𑀬𑀩𑀦𑁆𑀥𑀼’’𑀦𑁆𑀢𑀺 𑀘. ‘‘𑀉𑀡𑁆𑀳𑀕𑀽’’𑀢𑀺 𑀏𑀢𑁆𑀣 𑀧𑀦 𑀕𑁄𑀲𑀤𑁆𑀤𑁄 𑀭𑀲𑁆𑀫𑀺𑀬𑀁 ¶ 𑀯𑀢𑁆𑀢𑀢𑀺. 𑀉𑀡𑁆𑀳𑀸 𑀕𑀸𑀯𑁄 𑀭𑀲𑁆𑀫𑀺𑀬𑁄 𑀏𑀢𑀲𑁆𑀲𑀸𑀢𑀺 𑀉𑀡𑁆𑀳𑀕𑀽, 𑀲𑀽𑀭𑀺𑀬𑁄. 𑀧𑀼𑀩𑁆𑀩𑀸𑀘𑀭𑀺𑀬𑀸𑀧𑀺 𑀳𑀺 𑀙𑀦𑁆𑀤𑁄𑀯𑀺𑀘𑀺𑀢𑀺𑀲𑀢𑁆𑀣𑁂 𑀇𑀫𑀫𑁂𑀯𑀢𑁆𑀣𑀁 𑀩𑁆𑀬𑀸𑀓𑀭𑀺𑀁𑀲𑀼.

‘‘𑀕𑁄𑀲𑀻𑀢𑀘𑀦𑁆𑀤𑀦’’𑀦𑁆𑀢𑀺 𑀏𑀢𑁆𑀣 𑀧𑀸𑀦𑀻𑀬𑁂 𑀯𑀢𑁆𑀢𑀢𑀺. 𑀕𑁄𑀲𑀤𑁆𑀤𑁂𑀦 𑀳𑀺 𑀚𑀮𑀁 𑀯𑀼𑀘𑁆𑀘𑀢𑀺. 𑀕𑁄 𑀯𑀺𑀬 𑀲𑀻𑀢𑀁 𑀘𑀦𑁆𑀤𑀦𑀁, 𑀢𑀲𑁆𑀫𑀺𑀁 𑀧𑀦 𑀉𑀤𑁆𑀥𑀦𑀢𑁄 𑀉𑀤𑁆𑀥𑀭𑀺𑀢𑀧𑀓𑁆𑀓𑀼𑀣𑀺𑀢𑀢𑁂𑀮𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁂 𑀢𑀗𑁆𑀔𑀡𑀜𑁆𑀜𑁂𑀯 𑀢𑀁 𑀢𑁂𑀮𑀁 𑀲𑀼𑀲𑀻𑀢𑀮𑀁 𑀳𑁄𑀢𑀺.

𑀏𑀢𑁆𑀣𑁂𑀓𑁂 𑀯𑀤𑀦𑁆𑀢𑀺 ‘‘𑀓𑀲𑁆𑀫𑀸 𑀪𑁄 ‘𑀕𑁄𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀕𑁄𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘𑁂𑀯 𑀧𑀼𑀮𑁆𑀮𑀺𑀗𑁆𑀕𑁄 𑀘𑀸’𑀢𑀺 𑀯𑀤𑀣, 𑀓𑀲𑁆𑀫𑀸 𑀘 𑀧𑀦 ‘𑀇𑀦𑁆𑀤𑁆𑀭𑀺𑀬𑀧𑀣𑀯𑀻𑀯𑀘𑀦𑀩𑀼𑀤𑁆𑀥𑀺𑀲𑀽𑀭𑀺𑀬𑀭𑀲𑁆𑀫𑀺𑀧𑀸𑀦𑀻𑀬𑁂𑀲𑀼 𑀯𑀢𑁆𑀢𑀫𑀸𑀦𑁄 𑀧𑀼𑀮𑁆𑀮𑀺𑀗𑁆𑀕𑁄’𑀢𑀺 𑀯𑀤𑀣, 𑀏𑀢𑁂𑀲𑀼 𑀲𑀽𑀭𑀺𑀬𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀧𑀼𑀮𑁆𑀮𑀺𑀗𑁆𑀕𑁄 𑀳𑁄𑀢𑀼, 𑀦𑀦𑀼 𑀇𑀦𑁆𑀤𑁆𑀭𑀺𑀬𑀯𑀘𑀦𑀧𑀸𑀦𑀻𑀬𑁂𑀲𑀼 𑀯𑀢𑁆𑀢𑀫𑀸𑀦𑁂𑀦 𑀧𑀦 𑀕𑁄𑀲𑀤𑁆𑀤𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀣𑀯𑀻𑀩𑀼𑀤𑁆𑀥𑀺𑀭𑀲𑁆𑀫𑀻𑀲𑀼 𑀯𑀢𑁆𑀢𑀫𑀸𑀦𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀪𑀯𑀺𑀢𑀩𑁆𑀩𑀁 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀣𑀯𑀸𑀤𑀺𑀧𑀤𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀸𑀦𑀁 𑀇𑀦𑁆𑀤𑁆𑀭𑀺𑀬𑀲𑀤𑁆𑀤𑀸𑀤𑀺𑀧𑀣𑀯𑀻𑀲𑀤𑁆𑀤𑀸𑀤𑀻𑀦𑀁 𑀦𑀧𑀼𑀁𑀲𑀓𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑀲𑁆𑀲 𑀤𑀲𑁆𑀲𑀦𑀢𑁄’’𑀢𑀺? 𑀢𑀦𑁆𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀇𑀢𑁆𑀣𑀺𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀳𑀺 𑀲𑀢𑁄 𑀓𑀲𑁆𑀲𑀘𑀺 𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀑𑀭𑁄𑀥𑁄’’𑀢𑀺. 𑀧𑀼𑀭𑀺𑀲𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀘 𑀲𑀢𑁄 𑀓𑀲𑁆𑀲𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺, 𑀬𑀣𑀸 ‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂’’𑀢𑀺. 𑀇𑀢𑁆𑀣𑀺𑀧𑀼𑀭𑀺𑀲𑀧𑀤𑀢𑁆𑀣𑁂𑀲𑀼 𑀧𑀦 𑀅𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀲𑀢𑀁 𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 𑀜𑀸𑀡𑀸𑀤𑀺𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀸𑀦𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀧𑀜𑁆𑀜𑀸 𑀅𑀫𑁄𑀳𑁄 𑀜𑀸𑀡’’𑀦𑁆𑀢𑀺, ‘‘𑀢𑀝𑀁𑀢𑀝𑀻𑀢𑀝𑁄’’𑀢𑀺 𑀘. 𑀢𑀣𑀸 𑀳𑀺 𑀅𑀦𑀺𑀢𑁆𑀣𑀺𑀪𑀽𑀢𑁄𑀧𑀺 𑀲𑀫𑀸𑀦𑁄 ‘‘𑀫𑀸𑀢𑀼𑀮𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀭𑀼𑀓𑁆𑀔𑁄𑀧𑀺 ¶ 𑀦𑀸𑀫𑀁 𑀮𑀪𑀢𑀺, 𑀢𑀩𑁆𑀩𑀲𑁂𑀦 𑀦𑀕𑀭𑀫𑁆𑀧𑀺. 𑀢𑁂𑀦𑀸𑀳 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀝𑀻𑀓𑀸𑀬𑀁 ‘‘𑀫𑀸𑀢𑀼𑀮𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀏𑀓𑁄 𑀭𑀼𑀓𑁆𑀔𑁄, 𑀢𑀸𑀬 𑀆𑀲𑀦𑁆𑀦𑀧𑁆𑀧𑀤𑁂𑀲𑁂 𑀫𑀸𑀧𑀺𑀢𑀢𑁆𑀢𑀸 𑀦𑀕𑀭𑀫𑁆𑀧𑀺 ‘𑀫𑀸𑀢𑀼𑀮𑀸’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑀫𑀸𑀢𑀼𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂’’𑀢𑀺.

𑀕𑁄𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸.

𑀫𑁄 𑀯𑀼𑀘𑁆𑀘𑀢𑀺 𑀘𑀦𑁆𑀤𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀸 𑀯𑀼𑀘𑁆𑀘𑀢𑀺 𑀘𑀦𑁆𑀤𑁄’’𑀢𑀺 𑀆𑀓𑀸𑀭𑀦𑁆𑀢𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀑𑀓𑀸𑀭𑀦𑁆𑀢𑀧𑀸𑀞𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩𑀁 𑀲𑀓𑁆𑀓𑀝𑀪𑀸𑀲𑀸𑀬 𑀏𑀓𑀓𑁆𑀔𑀭𑀓𑁄𑀲𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀫𑁄 𑀲𑀺𑀯𑁄 𑀘𑀦𑁆𑀤𑀺𑀫𑀸 𑀘𑁂𑀯𑀸’’𑀢𑀺 𑀑𑀓𑀸𑀭𑀦𑁆𑀢𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀏𑀢𑁆𑀣 𑀘 𑀑𑀓𑀸𑀭𑀦𑁆𑀢𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀫𑀲𑀤𑁆𑀤𑀲𑁆𑀲 𑀘𑀦𑁆𑀤𑀯𑀸𑀘𑀓𑀢𑁆𑀢𑁂 ‘‘𑀧𑀼𑀡𑁆𑀡𑀫𑀻, 𑀧𑀼𑀡𑁆𑀡𑀫𑀸’’𑀢𑀺 𑀘 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀧𑀼𑀡𑁆𑀡𑁄 𑀫𑁄 𑀏𑀢𑁆𑀣𑀸𑀢𑀺 𑀧𑀼𑀡𑁆𑀡𑀫𑀻, 𑀏𑀯𑀁 𑀧𑀼𑀡𑁆𑀡𑀫𑀸, 𑀭𑀢𑁆𑀢𑀸𑀧𑁂𑀓𑁆𑀔𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀘𑀦𑀁. 𑀏𑀢𑁆𑀣 𑀧𑀦 ‘‘𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀏𑀢𑁆𑀣 𑀲𑀺𑀬𑀸 𑁋 𑀬𑀤𑀺 ‘‘𑀧𑀼𑀡𑁆𑀡𑀫𑀸’’𑀢𑀺 𑀅𑀬𑀁𑀲𑀤𑁆𑀤𑁄 𑀭𑀢𑁆𑀢𑀸𑀧𑁂𑀓𑁆𑀔𑁄 𑀇𑀢𑁆𑀣𑀺𑀮𑀺𑀗𑁆𑀕𑁄.

‘‘𑀧𑀼𑀡𑁆𑀡𑀫𑀸𑀬𑁂 𑀬𑀣𑀸 𑀘𑀦𑁆𑀤𑁄, 𑀧𑀭𑀺𑀲𑀼𑀤𑁆𑀥𑁄 𑀯𑀺𑀭𑁄𑀘𑀢𑀺;

𑀢𑀣𑁂𑀯 𑀢𑁆𑀯𑀁 𑀧𑀼𑀡𑁆𑀡𑀫𑀦𑁄, 𑀯𑀺𑀭𑁄𑀘 𑀤𑀲𑀲𑀳𑀲𑁆𑀲𑀺𑀬𑀁.

𑀅𑀦𑁆𑀯𑀤𑁆𑀥𑀫𑀸𑀲𑁂 𑀧𑀦𑁆𑀦𑀭𑀲𑁂, 𑀧𑀼𑀡𑁆𑀡𑀫𑀸𑀬𑁂 𑀉𑀧𑁄𑀲𑀣𑁂;

𑀧𑀘𑁆𑀘𑀬𑀁 𑀦𑀸𑀕𑀫𑀸𑀭𑀼𑀬𑁆𑀳, 𑀤𑀸𑀦𑀁 𑀤𑀸𑀢𑀼𑀫𑀼𑀧𑀸𑀕𑀫𑀺’’𑀦𑁆𑀢𑀺

𑀆𑀤𑀻𑀲𑀼 𑀓𑀣𑀁 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀧𑀤𑀲𑀺𑀤𑁆𑀥𑀻𑀢𑀺? 𑀬𑀓𑀸𑀭𑀲𑁆𑀲 𑀬𑁂𑀓𑀸𑀭𑀸𑀤𑁂𑀲𑀯𑀲𑁂𑀦. 𑀥𑀫𑁆𑀫𑀺𑀲𑁆𑀲𑀭𑁂𑀦 𑀳𑀺 𑀪𑀕𑀯𑀢𑀸 ‘‘𑀧𑀼𑀡𑁆𑀡𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁂 𑀢𑁆𑀢𑀸𑀓𑀸𑀭𑀲𑁆𑀲 𑀞𑀸𑀦𑁂 𑀢𑁆𑀢𑁂𑀓𑀸𑀭𑁄 ¶ 𑀯𑀺𑀬, 𑀦𑀻𑀓𑀸𑀭𑀲𑁆𑀲 𑀞𑀸𑀦𑁂 𑀦𑁂𑀓𑀸𑀭𑁄 𑀯𑀺𑀬 𑀘. 𑀢𑀣𑀸 𑀳𑀺 𑀬𑀣𑀸 ‘‘𑀅𑀩𑁆𑀬𑀬𑀢𑀁 𑀯𑀺𑀮𑀧𑀲𑀺 𑀯𑀺𑀭𑀢𑁆𑀢𑁂 𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀇𑀫𑀲𑁆𑀫𑀺𑀁 𑀭𑀸𑀥𑀚𑀸𑀢𑀓𑁂 ‘‘𑀯𑀺𑀭𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀭𑀢𑁆𑀢𑁂’’𑀢𑀺 𑀯𑀤𑀦𑁆𑀢𑁂𑀦 𑀢𑁆𑀢𑀸𑀓𑀸𑀭𑀲𑁆𑀲 𑀞𑀸𑀦𑁂 𑀢𑁆𑀢𑁂𑀓𑀸𑀭𑁄 𑀧𑀞𑀺𑀢𑁄, ‘‘𑀓𑁄𑀲𑀺𑀬𑀸𑀬𑀦𑀻’’𑀢𑀺 𑀘 𑀯𑀢𑁆𑀢𑀩𑁆𑀩𑁂 ‘‘𑀓𑁄𑀲𑀺𑀬𑀸𑀬𑀦𑁂’’𑀢𑀺 𑀯𑀤𑀦𑁆𑀢𑁂𑀦 𑀦𑀻𑀓𑀸𑀭𑀲𑁆𑀲 𑀞𑀸𑀦𑁂 𑀦𑁂𑀓𑀸𑀭𑁄 𑀧𑀞𑀺𑀢𑁄. 𑀏𑀯𑀁 ‘‘𑀧𑀼𑀡𑁆𑀡𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀡𑁆𑀡𑀫𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄. 𑀬𑀣𑀸 𑀘 ‘‘𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀧𑁆𑀧𑀤𑁂𑀲𑁂 ‘‘𑀤𑀓𑁆𑀔𑀺𑀢𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑀓𑁆𑀔𑀺𑀢𑀸𑀬𑁂’’𑀢𑀺 𑀯𑀤𑀢𑀸 𑀬𑀓𑀸𑀭𑀲𑁆𑀲 𑀞𑀸𑀦𑁂 𑀬𑁂𑀓𑀸𑀭𑁄 𑀧𑀞𑀺𑀢𑁄, 𑀏𑀯𑀫𑀺𑀥𑀸𑀧𑀺. 𑀬𑀣𑀸 𑀧𑀦 ‘‘𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸’’𑀢𑀺 𑀏𑀢𑁆𑀣 ‘‘𑀲𑀪𑀸𑀬’’𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑀯𑀲𑁂𑀦 𑀲𑀪𑀸 𑀯𑀼𑀢𑁆𑀢𑀸, 𑀦 𑀢𑀣𑀸 𑀇𑀥 ‘‘𑀧𑀼𑀡𑁆𑀡𑀫𑀸𑀬’’𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀧𑀼𑀡𑁆𑀡𑀫𑀸 𑀯𑀼𑀢𑁆𑀢𑀸, 𑀅𑀣 𑀔𑁄 ‘‘𑀧𑀼𑀡𑁆𑀡𑀫𑀸’’𑀢𑀺 𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀣𑀸 𑀳𑀺 ‘‘𑀧𑀼𑀡𑁆𑀡𑀫𑀸𑀬𑁄’’𑀢𑀺 𑀧𑀤𑀁 𑀬𑀓𑀸𑀭𑀝𑁆𑀞𑀸𑀦𑁂 𑀬𑁂𑀓𑀸𑀭𑀼𑀘𑁆𑀘𑀸𑀭𑀡𑀯𑀲𑁂𑀦 𑀲𑀫𑁆𑀪𑀽𑀢𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀸 𑀯𑀼𑀘𑁆𑀘𑀢𑀺 𑀲𑀺𑀭𑀻. 𑀢𑀣𑀸 𑀳𑀺 𑀯𑀺𑀤𑁆𑀯𑀫𑀼𑀔𑀫𑀡𑁆𑀟𑀦𑀝𑀻𑀓𑀸𑀬𑀁 ‘‘𑀫𑀸𑀮𑀺𑀦𑀻’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀤𑀢𑀸 ‘‘𑀫𑀸 𑀯𑀼𑀘𑁆𑀘𑀢𑀺 𑀮𑀓𑁆𑀔𑀻, 𑀅𑀮𑀺𑀦𑀻 𑀪𑀫𑀭𑀻’’𑀢𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀻𑀲𑀤𑁆𑀤𑁄 𑀘 𑀲𑀺𑀭𑀻𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄, 𑀢𑁂𑀦 ‘‘𑀫𑀸 𑀯𑀼𑀘𑁆𑀘𑀢𑀺 𑀲𑀺𑀭𑀻’’𑀢𑀺 𑀅𑀢𑁆𑀣𑁄 𑀅𑀫𑁆𑀳𑁂𑀳𑀺 𑀅𑀦𑀼𑀫𑀢𑁄, 𑀢𑀣𑀸 𑀧𑁄𑀭𑀸𑀡𑁂𑀳𑀺𑀧𑀺 ‘‘𑀫𑀁 𑀲𑀺𑀭𑀺𑀁 𑀥𑀸𑀭𑁂𑀢𑀺 𑀯𑀺𑀤𑀥𑀸𑀢𑀺 𑀘𑀸𑀢𑀺 𑀫𑀦𑁆𑀥𑀸𑀢𑀸’’𑀢𑀺 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 ‘‘𑀫𑀸𑀮𑀺𑀦𑀻 𑀫𑀦𑁆𑀥𑀸𑀢𑀸’’𑀢𑀺 𑀘 𑀇𑀫𑀸𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀭 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀢𑀸𑀯 𑀫𑀲𑀤𑁆𑀤𑀲𑁆𑀲 𑀅𑀬𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑁄, 𑀫𑀸. 𑀫𑀁, 𑀫𑁂. 𑀫𑁂𑀦, 𑀫𑁂𑀳𑀺, 𑀫𑁂𑀪𑀺. 𑀫𑀲𑁆𑀲, 𑀫𑀸𑀦𑀁. 𑀫𑀸, 𑀫𑀲𑁆𑀫𑀸, 𑀫𑀫𑁆𑀳𑀸, 𑀫𑁂𑀳𑀺, 𑀫𑁂𑀪𑀺. 𑀫𑀲𑁆𑀲, 𑀫𑀸𑀦𑀁. 𑀫𑁂, 𑀫𑀲𑁆𑀫𑀺𑀁, 𑀫𑀫𑁆𑀳𑀺, 𑀫𑁂𑀲𑀼. 𑀪𑁄 𑀫, 𑀪𑀯𑀦𑁆𑀢𑁄 𑀫𑀸.

𑀅𑀬𑀁 ¶ 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀫𑀸𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀫𑀸, 𑀫𑀸, 𑀫𑀸𑀬𑁄. 𑀫𑀁, 𑀫𑀸, 𑀫𑀸𑀬𑁄. 𑀫𑀸𑀬, 𑀫𑀸𑀳𑀺, 𑀫𑀸𑀪𑀺. 𑀫𑀸𑀬, 𑀫𑀸𑀦𑀁. 𑀫𑀸𑀬, 𑀫𑀸𑀳𑀺, 𑀫𑀸𑀪𑀺. 𑀫𑀸𑀬, 𑀫𑀸𑀦𑀁. 𑀫𑀸𑀬, 𑀫𑀸𑀬𑀁, 𑀫𑀸𑀲𑀼. 𑀪𑁄𑀢𑀺 𑀫𑁂, 𑀪𑁄𑀢𑀺𑀬𑁄 𑀫𑀸𑀬𑁄.

𑀏𑀢𑁆𑀣 𑀧𑀦 𑀲𑀺𑀭𑀻𑀯𑀸𑀘𑀓𑁄 𑀫𑀸𑀲𑀤𑁆𑀤𑁄 𑀘 𑀲𑀤𑁆𑀤𑀯𑀸𑀘𑀓𑁄 𑀭𑀸𑀲𑀤𑁆𑀤𑁄 𑀘𑀸𑀢𑀺 𑀇𑀫𑁂 𑀲𑀫𑀸𑀦𑀕𑀢𑀺𑀓𑀸 𑀏𑀓𑀓𑁆𑀔𑀭𑀢𑁆𑀢𑀸 𑀦𑀺𑀘𑁆𑀘𑀫𑀸𑀓𑀸𑀭𑀦𑁆𑀢𑀧𑀓𑀢𑀺𑀓𑀢𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀸 𑀘.

𑀢𑀢𑁆𑀭 𑀲𑀁 𑀯𑀼𑀘𑁆𑀘𑀢𑀺 𑀲𑀦𑁆𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁄. 𑀬𑀁 𑀮𑁄𑀓𑁂 ‘‘𑀲𑀧𑁆𑀧𑀼𑀭𑀺𑀲𑁄’’𑀢𑀺 𑀘, ‘‘𑀅𑀭𑀺𑀬𑁄’’𑀢𑀺 𑀘, ‘‘𑀧𑀡𑁆𑀟𑀺𑀢𑁄’’𑀢𑀺 𑀘 𑀯𑀤𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 ‘‘𑀲’’𑀦𑁆𑀢𑀺. 𑀏𑀯𑀁 𑀲𑀧𑁆𑀧𑀼𑀭𑀺𑀲𑀸𑀭𑀺𑀬𑀧𑀡𑁆𑀟𑀺𑀢𑀯𑀸𑀘𑀓𑀲𑁆𑀲 𑀲𑀁𑀲𑀤𑁆𑀤𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀯𑀲𑁂𑀦 𑀅𑀢𑁆𑀣𑀺𑀪𑀸𑀯𑁂 ‘‘𑀲𑀫𑁂𑀢𑀺 𑀅𑀲𑀢𑀸 𑀅𑀲’’𑀦𑁆𑀢𑀺 𑀇𑀤𑀁 𑀧𑀬𑁄𑀕𑀦𑀺𑀤𑀲𑁆𑀲𑀦𑀁. 𑀏𑀢𑁆𑀣 𑀳𑀺 ‘‘𑀦 𑀲𑀁 𑀅𑀲’’𑀦𑁆𑀢𑀺 𑀲𑀫𑀸𑀲𑀘𑀺𑀦𑁆𑀢𑀸𑀬 𑀲𑀧𑁆𑀧𑀼𑀭𑀺𑀲𑀸𑀲𑀧𑁆𑀧𑀼𑀭𑀺𑀲𑀧𑀤𑀢𑁆𑀣𑀸 𑀲𑀁 𑀅𑀲𑀁𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸𑀢𑀺 𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀧𑁆𑀧𑀼𑀭𑀺𑀲𑀧𑀤𑀢𑁆𑀣𑁄 𑀧𑀘𑁆𑀘𑀢𑁆𑀢𑀯𑀘𑀦𑁂𑀦 𑀲𑀁𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁. 𑀬𑁂 ‘‘𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁. 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀦𑀲𑁆𑀲 ‘‘𑀲𑀁, 𑀲𑀦𑁆𑀢𑀁, 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸. 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀲𑀁 𑀯𑀼𑀘𑁆𑀘𑀢𑀺 𑀥𑀦𑀁, ‘‘𑀫𑀦𑀼𑀲𑁆𑀲𑀲𑁆𑀲𑀁. 𑀧𑀭𑀲𑁆𑀲𑀁. 𑀲𑀩𑁆𑀩𑀲𑁆𑀲𑀁. 𑀲𑀩𑁆𑀩𑀲𑁆𑀲𑀳𑀭𑀡𑀁. 𑀧𑀭𑀲𑁆𑀲𑀳𑀭𑀡’’𑀦𑁆𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀲𑁆𑀲 𑀲𑀁 𑀫𑀦𑀼𑀲𑁆𑀲𑀲𑁆𑀲𑀁. 𑀏𑀯𑀁 𑀧𑀭𑀲𑁆𑀲 𑀲𑀁 𑀧𑀭𑀲𑁆𑀲𑀁. 𑀲𑀩𑁆𑀩𑀲𑁆𑀲 𑀲𑀁 𑀲𑀩𑁆𑀩𑀲𑁆𑀲𑀁. 𑀢𑀲𑁆𑀲 𑀳𑀭𑀡𑀁 𑀧𑀭𑀲𑁆𑀲𑀳𑀭𑀡𑀁 𑀲𑀩𑁆𑀩𑀲𑁆𑀲𑀳𑀭𑀡𑀦𑁆𑀢𑀺 𑀲𑀫𑀸𑀲𑁄. 𑀢𑀣𑀸 𑀲𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁 𑀲𑀦𑁆𑀢𑀺 𑀘. 𑀯𑀼𑀢𑁆𑀢𑀜𑁆𑀳𑀺 𑀢𑀩𑁆𑀩𑀸𑀘𑀓𑀢𑁆𑀢𑀁 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑁋

‘‘𑀤𑁂𑀯𑀤𑁂𑀯𑁄 ¶ 𑀲𑀁𑀤𑁂𑀳𑀻 𑀦𑁄, 𑀳𑀻𑀦𑁄 𑀤𑁂𑀯𑀸𑀢𑀺𑀤𑁂𑀳𑀢𑁄;

𑀳𑀢𑁄𑀧𑀧𑀸𑀢𑀲𑀁𑀲𑀸𑀭𑁄, 𑀲𑀸𑀭𑁄 𑀲𑀁 𑀤𑁂𑀢𑀼 𑀤𑁂𑀳𑀺𑀦’’𑀦𑁆𑀢𑀺.

𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀕𑀸𑀣𑀸, ‘‘𑀲𑀓𑀮𑀮𑁄𑀓𑀲𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄’’𑀢𑀺 𑀏𑀢𑁆𑀣 ‘‘𑀲𑀗𑁆𑀓𑀭𑁄’’𑀢𑀺 𑀧𑀤𑀜𑁆𑀘𑀦𑀺𑀤𑀲𑁆𑀲𑀦𑀁. ‘‘𑀲𑀁, 𑀲𑀸𑀦𑀺, 𑀲𑀸. 𑀲𑀁, 𑀲𑀸𑀦𑀺, 𑀲𑁂. 𑀲𑁂𑀦’’𑀇𑀘𑁆𑀘𑀸𑀤𑀺 𑀧𑀼𑀩𑁆𑀩𑁂 𑀧𑀓𑀸𑀲𑀺𑀢𑀦𑀬𑁂𑀦 𑀜𑁂𑀬𑁆𑀬𑀁. 𑀏𑀢𑁆𑀣 𑀘 𑀲𑁄𑀢𑀽𑀦𑀁 𑀲𑀼𑀕𑀢𑀫𑀢𑀯𑀭𑁂 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀲𑀫𑀸𑀲𑀦𑁆𑀢𑀕𑀢𑀲𑁆𑀲 𑀲𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀓𑀣𑀬𑀸𑀫 𑁋

𑀫𑀦𑀼𑀲𑁆𑀲𑀲𑁆𑀲𑀁, 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑀸. 𑀫𑀦𑀼𑀲𑁆𑀲𑀲𑁆𑀲𑀁, 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑁂. 𑀫𑀦𑀼𑀲𑁆𑀲𑀲𑁆𑀲𑁂𑀦, 𑀫𑀦𑀼𑀲𑁆𑀲𑀲𑁆𑀲𑁂𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀪𑀺. 𑀫𑀦𑀼𑀲𑁆𑀲𑀲𑁆𑀲𑀲𑁆𑀲, 𑀫𑀦𑀼𑀲𑁆𑀲𑀲𑁆𑀲𑀸𑀦𑀁. 𑀫𑀦𑀼𑀲𑁆𑀲𑀲𑁆𑀲𑀸, 𑀫𑀦𑀼𑀲𑁆𑀲𑀲𑁆𑀲𑀲𑁆𑀫𑀸, 𑀫𑀦𑀼𑀲𑁆𑀲𑀲𑁆𑀲𑀫𑁆𑀳𑀸, 𑀫𑀦𑀼𑀲𑁆𑀲𑀲𑁆𑀲𑁂𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀪𑀺. 𑀫𑀦𑀼𑀲𑁆𑀲𑀲𑁆𑀲𑀲𑁆𑀲, 𑀫𑀦𑀼𑀲𑁆𑀲𑀲𑁆𑀲𑀸𑀦𑀁. 𑀫𑀦𑀼𑀲𑁆𑀲𑀲𑁆𑀲𑁂, 𑀫𑀦𑀼𑀲𑁆𑀲𑀲𑁆𑀲𑀲𑁆𑀫𑀺𑀁, 𑀫𑀦𑀼𑀲𑁆𑀲𑀲𑁆𑀲𑀫𑁆𑀳𑀺, 𑀫𑀦𑀼𑀲𑁆𑀲𑀲𑁆𑀲𑁂𑀲𑀼. 𑀪𑁄 𑀫𑀦𑀼𑀲𑁆𑀲𑀲𑁆𑀲, 𑀪𑁄𑀦𑁆𑀢𑁄 𑀫𑀦𑀼𑀲𑁆𑀲𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀲𑁆𑀲𑀸. 𑀏𑀲 𑀦𑀬𑁄 ‘‘𑀧𑀭𑀲𑁆𑀲𑀁 𑀲𑀩𑁆𑀩𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼𑀧𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀤𑀸𑀦𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀬𑀁 𑀢𑀁 𑀓𑀺𑀫𑀺𑀢𑀺𑀲𑀤𑁆𑀤𑀸𑀦𑀁, 𑀦𑀸𑀫𑀫𑀸𑀮𑀁 𑀧𑀦𑀢𑁆𑀢𑀭𑀺;

𑀲𑀩𑁆𑀩𑀦𑀸𑀫𑀧𑀭𑀺𑀘𑁆𑀙𑁂𑀤𑁂, 𑀧𑀓𑀸𑀲𑀺𑀲𑁆𑀲𑀁 𑀢𑀺𑀮𑀺𑀗𑁆𑀕𑀢𑁄.

𑀇𑀘𑁆𑀘𑁂𑀯𑀁 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑀸𑀦𑀁 𑀓𑁄 𑀯𑀺 𑀲𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀤𑁆𑀥𑀺𑀁 𑀅𑀢𑁆𑀣𑀦𑁆𑀢𑀭𑀦𑀺𑀤𑀲𑁆𑀲𑀦𑀧𑀤𑁂𑀳𑀺 𑀯𑀺𑀪𑀢𑁆𑀢𑀸. 𑀢𑀢𑁆𑀭𑀺𑀤𑀁 𑀮𑀺𑀗𑁆𑀕𑀯𑀯𑀢𑁆𑀣𑀸𑀦𑀁 𑁋

𑀓𑁄 𑀯𑀺 𑀲𑀸 𑀳𑁄𑀦𑁆𑀢𑀺 𑀧𑀼𑀮𑁆𑀮𑀺𑀗𑁆𑀕𑁂, 𑀪𑀸 𑀭𑀸 𑀣𑀻 𑀥𑀻 𑀓𑀼 𑀪𑀽 𑀣𑀺𑀬𑀁;

𑀓𑀁 𑀔𑀁 𑀦𑀧𑀼𑀁𑀲𑀓𑁂 𑀕𑁄 𑀢𑀼, 𑀧𑀼𑀫𑁂 𑀘𑁂𑀯𑀺𑀢𑁆𑀣𑀺𑀮𑀺𑀗𑁆𑀕𑀓𑁂.

𑀫𑁄 𑀧𑀼𑀫𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀫𑀸, 𑀲𑀁 𑀧𑀼𑀫𑁂 𑀘 𑀦𑀧𑀼𑀁𑀲𑀓𑁂;

𑀬𑀁 𑀢𑀁 𑀓𑀺𑀫𑀺𑀢𑀺 𑀲𑀩𑁆𑀩𑀢𑁆𑀭, 𑀮𑀺𑀗𑁆𑀕𑁂𑀲𑁆𑀯𑁂𑀯 𑀧𑀯𑀢𑁆𑀢𑀭𑁂.

𑀇𑀢𑁄 𑀅𑀜𑁆𑀜𑀸𑀦𑀺𑀧𑀺 𑀏𑀓𑀓𑁆𑀔𑀭𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀯𑀁 ¶ 𑀯𑀺𑀜𑁆𑀜𑀽𑀦𑀁 𑀦𑀬𑀜𑁆𑀜𑀽𑀦𑀁 𑀲𑀤𑁆𑀤𑀭𑀘𑀦𑀸𑀯𑀺𑀲𑀬𑁂 𑀧𑀭𑀫𑀯𑀺𑀲𑀼𑀤𑁆𑀥𑀯𑀺𑀧𑀼𑀮𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀣𑀁 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀢𑁆𑀣𑁂𑀲𑀼 𑀧𑀬𑁄𑀕𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀼𑀯𑀡𑁆𑀡𑀢𑀮𑁂 𑀲𑀻𑀳𑀯𑀺𑀚𑀫𑁆𑀪𑀦𑁂𑀦 𑀓𑁂𑀲𑀭𑀻𑀲𑀻𑀳𑀲𑁆𑀲 𑀯𑀺𑀚𑀫𑁆𑀪𑀦𑀫𑀺𑀯 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀜𑀸𑀡𑀯𑀺𑀚𑀫𑁆𑀪𑀦𑁂𑀦 𑀯𑀺𑀚𑀫𑁆𑀪𑀦𑀢𑁆𑀣𑀜𑁆𑀘 𑀅𑀥𑀺𑀓𑀽𑀦𑁂𑀓𑀓𑁆𑀔𑀭𑀯𑀲𑁂𑀦 𑀮𑀺𑀗𑁆𑀕𑀢𑁆𑀢𑀬𑀁 𑀫𑀺𑀲𑁆𑀲𑁂𑀢𑁆𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸.

𑀲𑀤𑁆𑀤𑁂 𑀪𑀯𑀦𑁆𑀢𑀺 𑀓𑀼𑀲𑀮𑀸 𑀦 𑀢𑀼 𑀓𑁂𑀘𑀺 𑀅𑀢𑁆𑀣𑁂,

𑀅𑀢𑁆𑀣𑁂 𑀪𑀯𑀦𑁆𑀢𑀺 𑀓𑀼𑀲𑀮𑀸 𑀦 𑀢𑀼 𑀓𑁂𑀘𑀺 𑀲𑀤𑁆𑀤𑁂.

𑀓𑁄𑀲𑀮𑁆𑀮𑀫𑁂𑀯 𑀧𑀭𑀫𑀁 𑀤𑀼𑀪𑀬𑀢𑁆𑀣 𑀢𑀲𑁆𑀫𑀸,

𑀬𑁄𑀕𑀁 𑀓𑀭𑁂𑀬𑁆𑀬 𑀲𑀢𑀢𑀁 𑀫𑀢𑀺𑀫𑀸 𑀯𑀭𑀦𑁆𑀢𑀺.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼

𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁧. 𑀯𑀸𑀘𑁆𑀘𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀤𑀺𑀧𑀭𑀺𑀤𑀻𑀧𑀦𑀦𑀸𑀫𑀺𑀓𑀧𑀤𑀫𑀸𑀮𑀸

𑀯𑀸𑀘𑁆𑀘𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀤𑀺-𑀯𑀲𑁂𑀦𑀧𑀺 𑀇𑀢𑁄 𑀧𑀭𑀁;

𑀪𑀸𑀲𑀺𑀲𑁆𑀲𑀁 𑀧𑀤𑀫𑀸𑀮𑀸𑀬𑁄, 𑀪𑀸𑀲𑀺𑀢𑀲𑁆𑀲𑀸𑀦𑀼𑀭𑀽𑀧𑀢𑁄.

𑀢𑀢𑁆𑀣 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀻𑀢𑀺 𑀅𑀧𑁆𑀧𑀥𑀸𑀦𑀮𑀺𑀗𑁆𑀕𑀸𑀦𑀺, 𑀕𑀼𑀡𑀦𑀸𑀫𑀲𑀗𑁆𑀔𑀸𑀢𑀸𑀦𑀺 𑀯𑀸 𑀮𑀺𑀗𑁆𑀕𑀸𑀦𑀺. 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀻𑀢𑀺 𑀧𑀥𑀸𑀦𑀮𑀺𑀗𑁆𑀕𑀸𑀦𑀺, 𑀕𑀼𑀡𑀻𑀧𑀤𑀲𑀗𑁆𑀔𑀸𑀢𑀸𑀦𑀺 𑀯𑀸 𑀮𑀺𑀗𑁆𑀕𑀸𑀦𑀺. 𑀬𑀲𑁆𑀫𑀸 𑀧𑀦 𑀢𑁂𑀲𑀼 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀺 𑀦𑀸𑀫 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀯𑀢𑁆𑀢𑀓𑀸𑀦𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀪𑀽𑀥𑀸𑀢𑀼𑀫𑀬𑀸𑀦𑀺 𑀘 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀼𑀭𑀽𑀧𑀢𑁄 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀪𑀽𑀥𑀸𑀢𑀼𑀫𑀬𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀺 𑀲𑀭𑀽𑀧𑀢𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀬 𑀅𑀬𑁄𑀚𑀺𑀢𑀸𑀦𑀺𑀧𑀺 𑀢𑀢𑁆𑀣 𑀢𑀢𑁆𑀣 𑀦𑀬𑀢𑁄 𑀬𑁄𑀚𑀺𑀢𑀸𑀦𑀺 ¶ , 𑀢𑀲𑁆𑀫𑀸 𑀦 𑀤𑀸𑀦𑀺 𑀤𑀲𑁆𑀲𑁂𑀲𑁆𑀲𑀸𑀫. 𑀅𑀪𑀽𑀥𑀸𑀢𑀼𑀫𑀬𑀸𑀦𑀺𑀧𑀺 𑀓𑀺𑀜𑁆𑀘𑀸𑀧𑀺 𑀦𑀬𑀢𑁄 𑀬𑁄𑀚𑀺𑀢𑀸𑀦𑀺, 𑀢𑀣𑀸𑀧𑀺 𑀲𑁄𑀢𑀸𑀭𑀸𑀦𑀁 𑀧𑀬𑁄𑀕𑁂𑀲𑀼 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀓𑀣𑀬𑀸𑀫, 𑀦𑀸𑀫𑀺𑀓𑀧𑀤𑀫𑀸𑀮𑀜𑁆𑀘 𑀦𑁂𑀲𑀁 𑀤𑀲𑁆𑀲𑁂𑀲𑁆𑀲𑀸𑀫 𑀓𑀺𑀜𑁆𑀘𑀺 𑀧𑀬𑁄𑀕𑀁 𑀯𑀤𑀦𑁆𑀢𑀸.

𑀤𑀻𑀖𑁄 𑀭𑀲𑁆𑀲𑁄 𑀦𑀻𑀮𑁄 𑀧𑀻𑀢𑁄,

𑀲𑀼𑀓𑁆𑀓𑁄 𑀓𑀡𑁆𑀳𑁄 𑀲𑁂𑀝𑁆𑀞𑁄 𑀧𑀸𑀧𑁄;

𑀲𑀤𑁆𑀥𑁄 𑀲𑀼𑀤𑁆𑀥𑁄 𑀉𑀘𑁆𑀘𑁄 𑀦𑀻𑀘𑁄,

𑀓𑀢𑁄𑀢𑀻𑀢𑁄 𑀇𑀘𑁆𑀘𑀸𑀤𑀻𑀦𑀺.

𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑀁.

𑀤𑀻𑀖𑁄, 𑀤𑀻𑀖𑀸. 𑀤𑀻𑀖𑀁, 𑀤𑀻𑀖𑁂. 𑀤𑀻𑀖𑁂𑀦, 𑀤𑀻𑀖𑁂𑀳𑀺, 𑀤𑀻𑀖𑁂𑀪𑀺. 𑀤𑀻𑀖𑀲𑁆𑀲, 𑀤𑀻𑀖𑀸𑀦𑀁. 𑀤𑀻𑀖𑀸, 𑀤𑀻𑀖𑀲𑁆𑀫𑀸, 𑀤𑀻𑀖𑀫𑁆𑀳𑀸, 𑀤𑀻𑀖𑁂𑀳𑀺, 𑀤𑀻𑀖𑁂𑀪𑀺. 𑀤𑀻𑀖𑀲𑁆𑀲, 𑀤𑀻𑀖𑀸𑀦𑀁. 𑀤𑀻𑀖𑁂, 𑀤𑀻𑀖𑀲𑁆𑀫𑀺𑀁, 𑀤𑀻𑀖𑀫𑁆𑀳𑀺, 𑀤𑀻𑀖𑁂𑀲𑀼. 𑀪𑁄 𑀤𑀻𑀖, 𑀪𑀯𑀦𑁆𑀢𑁄 𑀤𑀻𑀖𑀸. ‘‘𑀤𑀻𑀖𑀸𑀢𑀺 𑀫𑀁 𑀧𑀓𑁆𑀓𑁄𑀲𑁂𑀬𑁆𑀬𑀸𑀣𑀸’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀤𑀻𑀖𑀸, 𑀤𑀻𑀖𑀸, 𑀤𑀻𑀖𑀸𑀬𑁄. 𑀤𑀻𑀖𑀁, 𑀤𑀻𑀖𑀸, 𑀤𑀻𑀖𑀸𑀬𑁄. 𑀤𑀻𑀖𑀸𑀬. 𑀲𑁂𑀲𑀁 𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀁.

𑀤𑀻𑀖𑀁, 𑀤𑀻𑀖𑀸𑀦𑀺, 𑀤𑀻𑀖𑀸. 𑀤𑀻𑀖𑀁, 𑀤𑀻𑀖𑀸𑀦𑀺, 𑀤𑀻𑀖𑁂. 𑀤𑀻𑀖𑁂𑀦. 𑀲𑁂𑀲𑀁 𑀘𑀺𑀢𑁆𑀢𑀦𑀬𑁂𑀦 𑀜𑁂𑀬𑁆𑀬𑀁. 𑀭𑀲𑁆𑀲𑀸𑀤𑀻𑀦𑀺 𑀘 𑀏𑀯𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀅𑀬𑀁 𑀯𑀸𑀘𑁆𑀘𑀮𑀺𑀗𑁆𑀕𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸, ‘‘𑀕𑀼𑀡𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀪𑀺𑀥𑁂𑀬𑁆𑀬𑀓𑀮𑀺𑀗𑁆𑀕𑁂𑀲𑀼, 𑀲𑀯𑀺𑀲𑁂𑀲𑀸𑀦𑀺 𑀬𑀸𑀦𑀺 𑀳𑀺;

𑀢𑁂𑀲𑀁 𑀤𑀸𑀦𑀺 𑀬𑀣𑀸𑀧𑀸𑀴𑀺𑀁, 𑀧𑀤𑀫𑀸𑀮𑀁 𑀓𑀣𑁂𑀲𑁆𑀲𑀳𑀁.

𑀓𑀢𑀫𑀸𑀦𑀺 𑀢𑀸𑀦𑀺 𑀧𑀤𑀸𑀦𑀺, 𑀬𑀸𑀦𑀺 𑀲𑀯𑀺𑀲𑁂𑀲𑀸𑀦𑀺?

𑀪𑀯𑀸𑀪𑀯𑀸𑀤𑀺𑀓𑀁 𑀮𑀗𑁆𑀓𑀸-𑀤𑀻𑀧𑁄 𑀇𑀘𑁆𑀘𑀸𑀤𑀺𑀓𑀸𑀦𑀺 𑀘;

𑀩𑁄𑀥𑀺 𑀲𑀦𑁆𑀥𑀻𑀢𑀺 𑀘𑀸𑀤𑀻𑀦𑀺, 𑀲𑀯𑀺𑀲𑁂𑀲𑀸𑀦𑀺 𑀳𑁄𑀦𑁆𑀢𑀺 𑀢𑀼.

𑀏𑀢𑁂𑀲𑀼 ¶ 𑀳𑀺 𑁋

𑀪𑀯𑀸𑀪𑀯𑀧𑀤𑀁 𑀤𑁂𑀓-𑀯𑀘𑁄 𑀩𑀳𑀼𑀯𑀘𑁄 𑀓𑁆𑀯𑀘𑀺;

𑀲𑀫𑀸𑀲𑁂 𑀅𑀲𑀫𑀸𑀲𑁂𑀧𑀺, 𑀲𑀫𑁆𑀪𑀯𑁄 𑀢𑀲𑁆𑀲 𑀇𑀘𑁆𑀙𑀺𑀢𑁄.

𑀯𑀺𑀕𑁆𑀕𑀳𑀜𑁆𑀘 𑀧𑀤𑀢𑁆𑀣𑀜𑁆𑀘, 𑀯𑀢𑁆𑀯𑀸 𑀧𑀤𑀲𑁆𑀲𑀺𑀫𑀲𑁆𑀲 𑀫𑁂;

𑀯𑀼𑀘𑁆𑀘𑀫𑀸𑀦𑀫𑀯𑀺𑀓𑁆𑀔𑀺𑀢𑁆𑀢𑀸, 𑀧𑀤𑀫𑀸𑀮𑀁 𑀦𑀺𑀩𑁄𑀥𑀣.

𑀪𑀯𑁄 𑀘 𑀅𑀪𑀯𑁄 𑀘 𑀪𑀯𑀸𑀪𑀯𑀁. 𑀅𑀣 𑀯𑀸 𑀪𑀯𑁄 𑀘 𑀅𑀪𑀯𑁄 𑀘 𑀪𑀯𑀸𑀪𑀯𑀸𑀦𑀺, 𑀅𑀬𑀁 𑀯𑀺𑀕𑁆𑀕𑀳𑁄. 𑀢𑀢𑁆𑀭 𑀪𑀯𑁄𑀢𑀺 𑀔𑀼𑀤𑁆𑀤𑀓𑁄 𑀪𑀯𑁄. 𑀅𑀪𑀯𑁄𑀢𑀺 𑀫𑀳𑀦𑁆𑀢𑁄 𑀪𑀯𑁄. 𑀯𑀼𑀤𑁆𑀥𑀢𑁆𑀣𑀯𑀸𑀘𑀓𑁄 𑀳𑁂𑀢𑁆𑀣 𑀅𑀓𑀸𑀭𑁄. 𑀏𑀢𑁆𑀣 𑀘 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀳𑀻𑀦𑀧𑀡𑀻𑀢𑀯𑀲𑁂𑀦 𑀘 𑀔𑀼𑀤𑁆𑀤𑀓𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺. 𑀅𑀪𑀯𑁄𑀢𑀺 𑀅𑀯𑀼𑀤𑁆𑀥𑀺. 𑀅𑀬𑀁 𑀧𑀤𑀢𑁆𑀣𑁄. 𑀅𑀬𑀁 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑁋

𑀪𑀯𑀸𑀪𑀯𑀁, 𑀪𑀯𑀸𑀪𑀯𑀁, 𑀪𑀯𑀸𑀪𑀯𑁂𑀦, 𑀪𑀯𑀸𑀪𑀯𑀲𑁆𑀲, 𑀪𑀯𑀸𑀪𑀯𑀸, 𑀪𑀯𑀸𑀪𑀯𑀲𑁆𑀫𑀸, 𑀪𑀯𑀸𑀪𑀯𑀫𑁆𑀳𑀸, 𑀪𑀯𑀸𑀪𑀯𑀲𑁆𑀲, 𑀪𑀯𑀸𑀪𑀯𑁂, 𑀪𑀯𑀸𑀪𑀯𑀲𑁆𑀫𑀺𑀁, 𑀪𑀯𑀸𑀪𑀯𑀫𑁆𑀳𑀺, 𑀪𑁄 𑀪𑀯𑀸𑀪𑀯. 𑀇𑀢𑀺 𑀪𑀯𑀸𑀪𑀯𑀧𑀤𑀁 𑀏𑀓𑀯𑀘𑀦𑀓𑀁 𑀪𑀯𑀢𑀺. 𑀤𑀺𑀲𑁆𑀲𑀢𑀺 𑀘 𑀢𑀲𑁆𑀲𑁂𑀓𑀯𑀘𑀦𑀢𑀸 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑁋

‘‘𑀅𑀢𑀻𑀢𑀓𑀧𑁆𑀧𑁂 𑀘𑀭𑀺𑀢𑀁, 𑀞𑀧𑀬𑀺𑀢𑁆𑀯𑀸 𑀪𑀯𑀸𑀪𑀯𑁂;

𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀭𑀺𑀢𑀁, 𑀧𑀯𑀓𑁆𑀔𑀺𑀲𑁆𑀲𑀁 𑀲𑀼𑀡𑁄𑀳𑀺 𑀫𑁂’’

𑀇𑀢𑀺 𑀯𑀸,

‘‘𑀏𑀯𑀁 𑀩𑀳𑀼𑀯𑀺𑀥𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀢𑁆𑀢𑀺𑀜𑁆𑀘 𑀩𑀳𑀽𑀯𑀺𑀥𑀁;

𑀪𑀯𑀸𑀪𑀯𑁂 𑀅𑀦𑀼𑀪𑀯𑀺𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁’’

𑀇𑀢𑀺 𑀯𑀸 𑀏𑀯𑀁 𑀧𑀸𑀴𑀺𑀬𑀁 𑀪𑀯𑀸𑀪𑀯 𑀧𑀤𑀲𑁆𑀲 𑀏𑀓𑀯𑀘𑀦𑀢𑀸 𑀤𑀺𑀝𑁆𑀞𑀸.

𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ¶ 𑁋

‘‘𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀬𑀁,

𑀪𑀯𑀸𑀪𑀯𑀁 𑀕𑀘𑁆𑀙𑀢𑀺 𑀚𑀻𑀯𑀮𑁄𑀓𑁄;

𑀦𑀫𑁄 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮-

𑀯𑀺𑀤𑁆𑀥𑀁𑀲𑀺𑀦𑁄 𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲𑀸’’𑀢𑀺

𑀏𑀯𑀁 𑀢𑀲𑁆𑀲𑁂𑀓𑀯𑀘𑀦𑀢𑀸 𑀤𑀺𑀝𑁆𑀞𑀸.

𑀪𑀯𑀸𑀪𑀯𑀸𑀦𑀺, 𑀪𑀯𑀸𑀪𑀯𑀸, 𑀪𑀯𑀸𑀪𑀯𑀸𑀦𑀺, 𑀪𑀯𑀸𑀪𑀯𑁂, 𑀪𑀯𑀸𑀪𑀯𑁂𑀳𑀺, 𑀪𑀯𑀸𑀪𑀯𑁂𑀪𑀺, 𑀪𑀯𑀸𑀪𑀯𑀸𑀦𑀁, 𑀪𑀯𑀸𑀪𑀯𑁂𑀳𑀺, 𑀪𑀯𑀸𑀪𑀯𑁂𑀪𑀺, 𑀪𑀯𑀸𑀪𑀯𑀸𑀦𑀁, 𑀪𑀯𑀸𑀪𑀯𑁂𑀲𑀼, 𑀪𑀯𑀦𑁆𑀢𑁄 𑀪𑀯𑀸𑀪𑀯𑀸𑀦𑀺. 𑀇𑀢𑀺 𑀪𑀯𑀸𑀪𑀯𑀧𑀤𑀁 𑀩𑀳𑀼𑀯𑀘𑀦𑀓𑀫𑁆𑀧𑀺 𑀪𑀯𑀢𑀺. 𑀤𑀺𑀲𑁆𑀲𑀢𑀺 𑀘 𑀢𑀲𑁆𑀲 𑀩𑀳𑀼𑀯𑀘𑀦𑀓𑀢𑀸 𑀧𑀸𑀴𑀺𑀬𑀁 ‘‘𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂. 𑀧𑀓𑀧𑁆𑀧𑀺𑀓𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀽’’𑀢𑀺. 𑀉𑀪𑀬𑀫𑁆𑀧𑀺 𑀦𑀬𑀁 𑀯𑁄𑀫𑀺𑀲𑁆𑀲𑁂𑀢𑁆𑀯𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀓𑀣𑀁? ‘‘𑀪𑀯𑀸𑀪𑀯𑀁, 𑀪𑀯𑀸𑀪𑀯𑀸𑀦𑀺. 𑀪𑀯𑀸𑀪𑀯𑀁, 𑀪𑀯𑀸𑀪𑀯𑀸𑀦𑀺. 𑀪𑀯𑀸𑀪𑀯𑁂𑀦, 𑀪𑀯𑀸𑀪𑀯𑁂𑀳𑀺, 𑀪𑀯𑀸𑀪𑀯𑁂𑀪𑀺’’𑀇𑀘𑁆𑀘𑁂𑀯𑀫𑀸𑀤𑀺𑀦𑀸 𑀘𑀺𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀦𑀧𑀼𑀁𑀲𑀓𑁂𑀓𑀯𑀘𑀦-𑀩𑀳𑀼𑀯𑀘𑀦𑀓𑀸 𑀇𑀫𑀸;

𑀧𑀤𑀫𑀸𑀮𑀸 𑀲𑀫𑀸𑀲𑀢𑁆𑀢𑁂, 𑀓𑀢𑀸𑀢𑀺 𑀧𑀭𑀺𑀤𑀻𑀧𑀬𑁂.

𑀲𑀫𑀸𑀲𑀓𑀧𑀤𑀜𑁆𑀘𑁂𑀯, 𑀅𑀲𑀫𑀸𑀲𑀓𑀫𑁂𑀯 𑀘;

𑀪𑀯𑀸𑀪𑀯𑀧𑀤𑀁 𑀤𑁆𑀯𑁂𑀥𑀸, 𑀇𑀢𑀺 𑀯𑀺𑀤𑁆𑀯𑀸 𑀯𑀺𑀪𑀸𑀯𑀬𑁂.

𑀦𑀧𑀼𑀁𑀲𑀓𑀁 𑀲𑀫𑀸𑀲𑀢𑁆𑀢𑁂, 𑀧𑀼𑀮𑁆𑀮𑀺𑀗𑁆𑀕𑀫𑀺𑀢𑀭𑀢𑁆𑀢𑀦𑁂;

𑀦𑀧𑀼𑀁𑀲𑀓𑀁 𑀢𑀼 𑀧𑀸𑀬𑁂𑀦, 𑀏𑀓𑀯𑀘𑀦𑀓𑀁 𑀯𑀤𑁂.

‘‘𑀪𑀯𑁄 𑀘 𑀅𑀪𑀯𑁄 𑀘𑀸’’𑀢𑀺, 𑀲𑀫𑀸𑀲𑀢𑁆𑀣𑀁 𑀯𑀤𑁂 𑀩𑀼𑀥𑁄;

‘‘𑀪𑀯𑀢𑁄 𑀪𑀯’’𑀫𑀺𑀘𑁆𑀘𑀢𑁆𑀣𑀁, 𑀅𑀲𑀫𑀸𑀲𑀲𑁆𑀲 𑀪𑀸𑀲𑀬𑁂.

𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀫𑁆𑀳𑀺 𑀲𑁄 𑀜𑁂𑀬𑁆𑀬𑁄, 𑀦𑀺𑀲𑁆𑀲𑀓𑁆𑀓𑀉𑀧𑀬𑁄𑀕𑀢𑁄;

𑀏𑀯𑀁 𑀯𑀺𑀲𑁂𑀲𑀢𑁄 𑀚𑀜𑁆𑀜𑀸, 𑀪𑀯𑀸𑀪𑀯𑀧𑀤𑀁 𑀯𑀺𑀤𑀽.

𑀬𑀣𑀸 ¶ 𑀘𑁂𑀢𑁆𑀣 𑀪𑀯𑀸𑀪𑀯𑀧𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑀺𑀢𑀸, 𑀏𑀯𑀁 ‘‘𑀓𑀫𑁆𑀫𑀸𑀓𑀫𑁆𑀫𑀁 𑀨𑀮𑀸𑀨𑀮’’𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀢𑁆𑀣𑁄𑀧𑀺 𑀦𑁂𑀲𑀁 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄. 𑀬𑁂𑀪𑀼𑀬𑁆𑀬𑁂𑀦𑁂𑀢𑀸𑀦𑀺 𑀏𑀓𑀯𑀘𑀦𑀓𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀢𑀸𑀯 𑀪𑀯𑀸𑀪𑀯𑀧𑀤𑀸𑀤𑀻𑀦𑀁 𑀯𑀺𑀲𑁂𑀲𑀯𑀦𑁆𑀢𑀢𑀸 𑀤𑀝𑁆𑀞𑀩𑁆𑀩𑀸.

𑀮𑀗𑁆𑀓𑀸𑀤𑀻𑀧𑁄, 𑀮𑀗𑁆𑀓𑀸𑀤𑀻𑀧𑀁, 𑀮𑀗𑁆𑀓𑀸𑀤𑀻𑀧𑁂𑀦, 𑀮𑀗𑁆𑀓𑀸𑀤𑀻𑀧𑀲𑁆𑀲, 𑀮𑀗𑁆𑀓𑀸𑀤𑀻𑀧𑀸, 𑀮𑀗𑁆𑀓𑀸𑀤𑀻𑀧𑀲𑁆𑀫𑀸, 𑀮𑀗𑁆𑀓𑀸𑀤𑀻𑀧𑀫𑁆𑀳𑀸, 𑀮𑀗𑁆𑀓𑀸𑀤𑀻𑀧𑀲𑁆𑀲, 𑀮𑀗𑁆𑀓𑀸𑀤𑀻𑀧𑁂, 𑀮𑀗𑁆𑀓𑀸𑀤𑀻𑀧𑀲𑁆𑀫𑀺𑀁, 𑀮𑀗𑁆𑀓𑀸𑀤𑀻𑀧𑀫𑁆𑀳𑀺, 𑀪𑁄 𑀮𑀗𑁆𑀓𑀸𑀤𑀻𑀧. 𑀅𑀬𑀁 𑀲𑀫𑀸𑀲𑀢𑁆𑀢𑁂 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀅𑀲𑀫𑀸𑀲𑀢𑁆𑀢𑁂𑀧𑀺 𑀧𑀦 𑀬𑁄𑀚𑁂𑀢𑀩𑁆𑀩𑀸.

𑀮𑀗𑁆𑀓𑀸 𑀤𑀻𑀧𑁄, 𑀮𑀗𑁆𑀓𑀁 𑀤𑀻𑀧𑀁, 𑀮𑀗𑁆𑀓𑀸𑀬 𑀤𑀻𑀧𑁂𑀦, 𑀮𑀗𑁆𑀓𑀸𑀬 𑀤𑀻𑀧𑀲𑁆𑀲, 𑀮𑀗𑁆𑀓𑀸𑀬 𑀤𑀻𑀧𑀸, 𑀮𑀗𑁆𑀓𑀸𑀬 𑀤𑀻𑀧𑀲𑁆𑀫𑀸, 𑀮𑀗𑁆𑀓𑀸𑀬 𑀤𑀻𑀧𑀫𑁆𑀳𑀸, 𑀮𑀗𑁆𑀓𑀸𑀬 𑀤𑀻𑀧𑀲𑁆𑀲, 𑀮𑀗𑁆𑀓𑀸𑀬 𑀤𑀻𑀧𑁂, 𑀮𑀗𑁆𑀓𑀸𑀬 𑀤𑀻𑀧𑀲𑁆𑀫𑀺𑀁, 𑀮𑀗𑁆𑀓𑀸𑀬 𑀤𑀻𑀧𑀫𑁆𑀳𑀺, 𑀪𑁄𑀢𑀺 𑀮𑀗𑁆𑀓𑁂 𑀤𑀻𑀧. 𑀅𑀬𑀁 𑀩𑁆𑀬𑀸𑀲𑁂 𑀦𑀸𑀫𑀺𑀓𑀧𑀤𑀫𑀸𑀮𑀸. 𑀅𑀬𑀁 𑀦𑀬𑁄 ‘‘𑀚𑀫𑁆𑀩𑀼𑀤𑀻𑀧𑁄’’𑀢𑀺 𑀏𑀢𑁆𑀣 𑀦 𑀮𑀩𑁆𑀪𑀢𑀺 𑀓𑁂𑀯𑀮𑁂𑀦 𑀚𑀫𑁆𑀩𑀽𑀲𑀤𑁆𑀤𑁂𑀦 𑀚𑀫𑁆𑀩𑀼𑀤𑀻𑀧𑀲𑁆𑀲 𑀅𑀓𑀣𑀦𑀢𑁄, 𑀬𑀣𑀸 𑀓𑁂𑀯𑀮𑁂𑀦 𑀮𑀗𑁆𑀓𑀸𑀲𑀤𑁆𑀤𑁂𑀦 𑀮𑀗𑁆𑀓𑀸𑀤𑀻𑀧𑁄 𑀓𑀣𑀺𑀬𑀢𑀺. 𑀅𑀬𑀁 𑀧𑀦 𑀩𑁆𑀬𑀸𑀲𑁂 𑀧𑀤𑀫𑀸𑀮𑀸𑀦𑀬𑁄 𑀯𑀺𑀲𑁂𑀲𑀢𑁄 𑀓𑀩𑁆𑀩𑀭𑀘𑀦𑀸𑀬𑀁 𑀓𑀯𑀻𑀦𑀁 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺 𑀲𑀸𑀲𑀦𑀲𑁆𑀲𑀸𑀧𑀺. 𑀢𑀣𑀸 𑀳𑀺 𑀩𑁆𑀬𑀸𑀲𑀯𑀲𑁂𑀦 𑀧𑁄𑀭𑀸𑀡𑀓𑀯𑀺𑀭𑀘𑀦𑀸 𑀤𑀺𑀲𑁆𑀲𑀢𑀺 𑁋

‘‘𑀯𑀦𑁆𑀤𑀸𑀫𑀺 𑀲𑁂𑀮𑀫𑁆𑀳𑀺 𑀲𑀫𑀦𑁆𑀢𑀓𑀽𑀝𑁂,

𑀮𑀗𑁆𑀓𑀸𑀬 𑀤𑀻𑀧𑀲𑁆𑀲 𑀲𑀺𑀔𑀸𑀬𑀫𑀸𑀦𑁂;

𑀆𑀯𑀸𑀲𑀪𑀽𑀢𑁂 𑀲𑀼𑀫𑀦𑀸𑀫𑀭𑀲𑁆𑀲,

𑀩𑀼𑀤𑁆𑀥𑀲𑁆𑀲 𑀢𑀁 𑀧𑀸𑀤𑀯𑀴𑀜𑁆𑀚𑀫𑀕𑁆𑀕’’𑀦𑁆𑀢𑀺.

𑀲𑀸𑀲𑀦𑁂𑀧𑀺 𑀩𑁆𑀬𑀸𑀲𑀯𑀲𑁂𑀦 ‘‘𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑀼, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄’’𑀢𑀺𑀆𑀤𑀺𑀓𑀸 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀬𑀣𑀸 ¶ 𑀧𑀦 ‘‘𑀚𑀫𑁆𑀩𑀼𑀤𑀻𑀧𑁄’’𑀢𑀺 𑀏𑀢𑁆𑀣 𑀅𑀬𑀁 𑀦𑀬𑁄 𑀦 𑀮𑀩𑁆𑀪𑀢𑀺, 𑀢𑀣𑀸 ‘‘𑀦𑀸𑀕𑀤𑀻𑀧𑁄’’𑀢𑀺𑀆𑀤𑀻𑀲𑀼𑀧𑀺 𑀓𑁂𑀯𑀮𑁂𑀦 𑀚𑀫𑁆𑀩𑀽𑀲𑀤𑁆𑀤𑁂𑀦 𑀚𑀫𑁆𑀩𑀼𑀤𑀻𑀧𑀲𑁆𑀲 𑀅𑀓𑀣𑀦𑀫𑀺𑀯 𑀓𑁂𑀯𑀮𑁂𑀦 𑀦𑀸𑀕𑀲𑀤𑁆𑀤𑀸𑀤𑀺𑀦𑀸 𑀦𑀸𑀕𑀤𑀻𑀧𑀸𑀤𑀻𑀦𑀁 𑀅𑀓𑀣𑀦𑀢𑁄𑀢𑀺. 𑀦𑀦𑀼 𑀘 𑀪𑁄 ‘‘𑀩𑀼𑀤𑁆𑀥𑀲𑁆𑀲 𑀚𑀫𑁆𑀩𑀼𑀦𑀤𑀭𑀁𑀲𑀺𑀦𑁄 𑀢𑀁, 𑀤𑀸𑀞𑀁 𑀫𑀬𑀁 𑀚𑀫𑁆𑀩𑀼𑀦𑀭𑀸 𑀦𑀫𑀸𑀫𑀸’’𑀢𑀺 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑀚𑀫𑁆𑀩𑀽𑀲𑀤𑁆𑀤𑁂𑀦 𑀚𑀫𑁆𑀩𑀼𑀤𑀻𑀧𑁄 𑀯𑀼𑀢𑁆𑀢𑁄 ‘‘𑀚𑀫𑁆𑀩𑀼𑀤𑀻𑀧𑀦𑀭𑀸’’𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺? 𑀲𑀘𑁆𑀘𑀁 ‘‘𑀚𑀫𑁆𑀩𑀼𑀤𑀻𑀧𑀦𑀭𑀸’’𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀓𑁂𑀯𑀮𑁂𑀦 𑀧𑀦 𑀚𑀫𑁆𑀩𑀽𑀲𑀤𑁆𑀤𑁂𑀦 𑀚𑀫𑁆𑀩𑀼𑀤𑀻𑀧𑀢𑁆𑀣𑀁 𑀦 𑀯𑀤𑀢𑀺, 𑀓𑀺𑀦𑁆𑀢𑀼 ‘‘𑀚𑀫𑁆𑀩𑀼𑀤𑀻𑀧𑀦𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀯𑀺𑀲𑀬𑀢𑁆𑀢𑀸 𑀅𑀥𑀺𑀓𑀓𑁆𑀔𑀭𑀤𑁄𑀲𑀁 𑀧𑀭𑀺𑀯𑀚𑁆𑀚𑀦𑁆𑀢𑁂𑀦 𑀤𑀻𑀧𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀚𑀫𑁆𑀩𑀼𑀦𑀭𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀼𑀢𑁆𑀢𑁄 𑀚𑀫𑁆𑀩𑀼𑀲𑀤𑁆𑀤𑁄 𑀦𑀭𑀲𑀤𑁆𑀤𑀁 𑀧𑀝𑀺𑀘𑁆𑀘 𑀲𑀫𑀸𑀲𑀩𑀮𑁂𑀦 ‘‘𑀚𑀫𑁆𑀩𑀼𑀤𑀻𑀧𑀦𑀭𑀸’’𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀲𑀫𑀢𑁆𑀣𑁄 𑀳𑁄𑀢𑀺, 𑀦 𑀓𑁂𑀯𑀮𑁄 𑀩𑁆𑀬𑀸𑀲𑀓𑀸𑀮𑁂, 𑀢𑀣𑀸 𑀳𑀺 ‘‘𑀚𑀫𑁆𑀩𑀽’’𑀢𑀺 𑀯𑀼𑀢𑁆𑀢𑁂 𑀚𑀫𑁆𑀩𑀼𑀤𑀻𑀧𑁄 𑀦 𑀜𑀸𑀬𑀢𑀺, 𑀅𑀣 𑀔𑁄 𑀚𑀫𑁆𑀩𑀼𑀭𑀼𑀓𑁆𑀔𑁄𑀬𑁂𑀯 𑀜𑀸𑀬𑀢𑀺.

𑀓𑀺𑀁 𑀧𑀦 𑀪𑁄 ‘‘𑀓𑀸𑀓𑁄 𑀤𑀸𑀲𑁄, 𑀓𑀸𑀓𑀁 𑀤𑀸𑀲𑀁, 𑀓𑀸𑀓𑁂𑀦 𑀤𑀸𑀲𑁂𑀦𑀸’’𑀢𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺, 𑀦 𑀮𑀩𑁆𑀪𑀢𑀻𑀢𑀺? 𑀮𑀩𑁆𑀪𑀢𑀺, 𑀓𑀸𑀓𑀲𑀤𑁆𑀤𑁂𑀦 𑀓𑀸𑀓𑀦𑀸𑀫𑀓𑀲𑁆𑀲 𑀤𑀸𑀲𑀲𑁆𑀲 𑀓𑀣𑀦𑀁 𑀳𑁄𑀢𑀺. 𑀬𑀤𑀺 𑀏𑀯𑀁 ‘‘𑀚𑀫𑁆𑀩𑀼𑀤𑀻𑀧𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀚𑀫𑁆𑀩𑀼𑀦𑀸𑀫𑀓𑁄 𑀤𑀻𑀧𑁄’’𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀚𑀫𑁆𑀩𑀽 𑀤𑀻𑀧𑁄, 𑀚𑀫𑁆𑀩𑀼𑀁 𑀤𑀻𑀧𑀁, 𑀚𑀫𑁆𑀩𑀼𑀬𑀸 𑀤𑀻𑀧𑁂𑀦𑀸’’𑀢𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀻𑀢𑀺? 𑀦 𑀮𑀩𑁆𑀪𑀢𑀺 𑀚𑀫𑁆𑀩𑀽𑀲𑀤𑁆𑀤𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀤𑀻𑀧𑁂 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀚𑀫𑁆𑀩𑀽𑀲𑀤𑁆𑀤𑁄 𑀳𑀺 𑀭𑀼𑀓𑁆𑀔𑁂𑀬𑁂𑀯 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀤𑀻𑀧𑁂. 𑀬𑀣𑀸 𑀧𑀦 𑀘𑀺𑀢𑁆𑀢𑀯𑁄𑀳𑀸𑀭𑁄 𑀘𑀺𑀢𑁆𑀢𑀦𑀸𑀫𑀓𑁂 𑀕𑀳𑀧𑀢𑀺𑀫𑁆𑀳𑀺𑀧𑀺 𑀫𑀦𑁂𑀧𑀺 𑀧𑀯𑀢𑁆𑀢𑀢𑀺 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺. 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲’’𑀦𑁆𑀢𑀺𑀆𑀤𑀻𑀲𑀼. 𑀬𑀣𑀸 𑀘 𑀓𑀼𑀲𑀯𑁄𑀳𑀸𑀭𑁄 𑀓𑀼𑀲𑀦𑀸𑀫𑀓𑁂 𑀭𑀜𑁆𑀜𑁂𑀧𑀺 𑀓𑀼𑀲𑀢𑀺𑀡𑁂𑀧𑀺 𑀧𑀯𑀢𑁆𑀢𑀢𑀺 𑁋

‘‘𑀧𑀪𑀸𑀯𑀢𑀺𑀜𑁆𑀘 ¶ 𑀆𑀤𑀸𑀬, 𑀫𑀡𑀺𑀁 𑀯𑁂𑀭𑁄𑀘𑀦𑀁 𑀓𑀼𑀲𑁄;

𑀓𑀼𑀲𑀸𑀯𑀢𑀺𑀁 𑀓𑀼𑀲𑀭𑀸𑀚𑀸, 𑀅𑀕𑀫𑀸𑀲𑀺 𑀫𑀳𑀩𑁆𑀩𑀮𑁄;

𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀻’’𑀢𑀺

𑀆𑀤𑀻𑀲𑀼, 𑀢𑀣𑀸 𑀓𑀸𑀓𑀲𑀤𑁆𑀤𑁄𑀧𑀺 𑀯𑀸𑀬𑀲𑁂, 𑀏𑀯𑀁𑀦𑀸𑀫𑀓𑁂 𑀤𑀸𑀲𑁂𑀧𑀺 𑀧𑀯𑀢𑁆𑀢𑀢𑀺 ‘‘𑀓𑀸𑀓𑁄 𑀭𑀯𑀢𑀺, 𑀓𑀸𑀓𑁄 𑀦𑀸𑀫 𑀤𑀸𑀲𑁄 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼. 𑀚𑀫𑁆𑀩𑀽𑀲𑀤𑁆𑀤𑁄 𑀧𑀦 𑀕𑀳𑀧𑀢𑀺𑀫𑀦𑀸𑀤𑀻𑀲𑀼 𑀘𑀺𑀢𑁆𑀢 𑀓𑀼𑀲 𑀓𑀸𑀓𑀲𑀤𑁆𑀤𑀸 𑀯𑀺𑀬 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀤𑀻𑀧𑀲𑁆𑀫𑀺𑀁 𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀦𑀬𑁄 𑀫𑀦𑀲𑀺𑀓𑀭𑀡𑀻𑀬𑁄.

𑀬𑀣𑀸 𑀧𑀦𑁂𑀢𑁆𑀣 ‘‘𑀮𑀗𑁆𑀓𑀸𑀤𑀻𑀧𑁄’’𑀢𑀺 𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀫𑀸𑀲𑀯𑀲𑁂𑀦 𑀩𑁆𑀬𑀸𑀲𑀯𑀲𑁂𑀦 𑀘 𑀬𑁄𑀚𑀺𑀢𑀸, 𑀏𑀯𑀁 ‘‘𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑁄, 𑀅𑀧𑀭𑀕𑁄𑀬𑀸𑀦𑀤𑀻𑀧𑁄, 𑀉𑀢𑁆𑀢𑀭𑀓𑀼𑀭𑀼𑀤𑀻𑀧𑁄, 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑀁, 𑀘𑀺𑀢𑁆𑀭𑀫𑀸𑀲𑁄, 𑀯𑁂𑀲𑁆𑀲𑀦𑁆𑀢𑀭𑀭𑀸𑀚𑀸, 𑀲𑁂𑀢𑀯𑀢𑁆𑀣𑀁, 𑀤𑀺𑀩𑁆𑀩𑀭𑀣𑁄’’𑀢𑀺𑀆𑀤𑀻𑀦𑀫𑁆𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀫𑀸𑀲𑀯𑀲𑁂𑀦 𑀩𑁆𑀬𑀸𑀲𑀯𑀲𑁂𑀦 𑀘 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀩𑁆𑀩𑀯𑀺𑀤𑁂𑀳𑀸𑀤𑀺𑀲𑀤𑁆𑀤𑁂𑀳𑀺 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀸𑀤𑀻𑀦𑀁 𑀓𑀣𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. ‘‘𑀤𑀺𑀩𑁆𑀩𑀭𑀣𑁄’’𑀢𑀺𑀆𑀤𑀻𑀦𑀁 𑀲𑀫𑀸𑀲𑀕𑀢𑀧𑀤𑀸𑀦𑀁 𑀧𑀬𑁄𑀚𑀦𑁂 𑀲𑀢𑀺 𑀩𑁆𑀬𑀸𑀲𑀯𑀲𑁂𑀦 𑀯𑀺𑀲𑀼𑀁 𑀓𑀢𑁆𑀢𑀩𑁆𑀩𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀩𑁆𑀬𑀸𑀲𑀯𑀲𑁂𑀦 ‘‘𑀤𑀺𑀩𑁆𑀩𑁄 𑀭𑀣𑁄’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀧𑀘𑁆𑀘𑁂𑀓𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀪𑀸𑀯𑁂 𑀲𑀢𑀺 𑀕𑀸𑀣𑀸𑀲𑀼 𑀯𑀼𑀢𑁆𑀢𑀺𑀧𑀸𑀮𑀦𑀲𑀼𑀔𑀼𑀘𑁆𑀘𑀸𑀭𑀡𑀕𑀼𑀡𑁄 𑀪𑀯𑀢𑀺. 𑀲𑁄 𑀘 𑀲𑀸𑀲𑀦𑀸𑀦𑀼𑀓𑀽𑀮𑁄 𑀳𑀺 𑀅𑀬𑀁 𑀦𑀬𑁄 𑀞𑀧𑀺𑀢𑁄. 𑀢𑀣𑀸 𑀳𑀺 𑀧𑀸𑀯𑀘𑀦𑁂 ‘‘𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑀼, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀩𑀳𑀽 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀮𑀗𑁆𑀓𑀸𑀤𑀻𑀧𑀸𑀤𑀺𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑀢𑀸 𑀪𑀯𑀢𑀺.

𑀇𑀤𑀸𑀦𑀺 𑀩𑁄𑀥𑀺𑀲𑀦𑁆𑀥𑀺𑀆𑀤𑀻𑀦𑀁 𑀯𑀺𑀲𑁂𑀲𑀯𑀦𑁆𑀢𑀢𑀸 𑀯𑀼𑀘𑁆𑀘𑀢𑀺 𑁋

𑀩𑁄𑀥𑀺 𑀲𑀦𑁆𑀥𑀺 𑀯𑀺𑀪𑀢𑁆𑀢𑀸’𑀬𑀼, 𑀥𑀸𑀢𑀼𑀬𑁂𑀯 𑀧𑀚𑀸𑀧𑀢𑀺;

𑀤𑀸𑀫𑀸 𑀤𑀸𑀫𑀁 𑀢𑀣𑀸 𑀲𑀤𑁆𑀥𑀸, 𑀲𑀤𑁆𑀥𑀁 𑀢𑀝𑀁 𑀢𑀝𑀻 𑀢𑀝𑁄.

𑀩𑁆𑀬𑀜𑁆𑀚𑀦𑀁 ¶ 𑀩𑁆𑀬𑀜𑁆𑀚𑀦𑁄 𑀅𑀢𑁆𑀣𑁄, 𑀅𑀢𑁆𑀣𑀫𑀓𑁆𑀔𑀭𑀫𑀓𑁆𑀔𑀭𑁄;

𑀅𑀚𑁆𑀚𑀯𑀁 𑀅𑀚𑁆𑀚𑀯𑁄 𑀘𑁂𑀯, 𑀢𑀣𑀸 𑀫𑀤𑁆𑀤𑀯𑀕𑀸𑀭𑀯𑀸.

𑀯𑀘𑁄 𑀯𑀘𑀻𑀢𑀺 𑀘𑀸𑀤𑀻𑀦𑀺, 𑀲𑀫𑀭𑀽𑀧𑀸 𑀲𑀭𑀽𑀧𑀢𑁄;

𑀤𑁆𑀯𑀺𑀢𑁆𑀢𑀺𑀮𑀺𑀗𑁆𑀕𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀬𑀣𑀸𑀲𑀫𑁆𑀪𑀯𑀫𑀼𑀤𑁆𑀤𑀺𑀲𑁂.

𑀏𑀢𑁂𑀲𑀼 𑀳𑀺 𑀩𑁄𑀥𑀺𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑁄𑀥𑀺 𑀭𑀸𑀚𑀓𑀼𑀫𑀸𑀭𑁄’’𑀢𑀺 𑀘, ‘‘𑀅𑀭𑀺𑀬𑀲𑀸𑀯𑀓𑁄 ‘𑀩𑁄𑀥𑀻’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀘 𑀏𑀯𑀁 𑀧𑀼𑀕𑁆𑀕𑀮𑀯𑀘𑀦𑀲𑁆𑀲 ‘‘𑀩𑁄𑀥𑀺, 𑀩𑁄𑀥𑀻, 𑀩𑁄𑀥𑀬𑁄. 𑀩𑁄𑀥𑀺𑀁, 𑀩𑁄𑀥𑀻, 𑀩𑁄𑀥𑀬𑁄. 𑀩𑁄𑀥𑀺𑀦𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁂 𑀅𑀕𑁆𑀕𑀺𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀭𑀼𑀓𑁆𑀔𑀫𑀕𑁆𑀕𑀦𑀺𑀩𑁆𑀩𑀸𑀦𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀯𑀘𑀦𑀲𑁆𑀲 𑀧𑀦 ‘‘𑀩𑁄𑀥𑀺, 𑀩𑁄𑀥𑀻, 𑀩𑁄𑀥𑀺𑀬𑁄. 𑀩𑁄𑀥𑀺𑀁, 𑀩𑁄𑀥𑀻, 𑀩𑁄𑀥𑀺𑀬𑁄. 𑀩𑁄𑀥𑀺𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀭𑀢𑁆𑀢𑀺𑀦𑀬𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀓𑁂𑀘𑀺 𑀧𑀦 ‘‘𑀭𑀼𑀓𑁆𑀔𑀯𑀘𑀦𑁄 𑀩𑁄𑀥𑀺𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀆𑀕𑀫𑁂𑀦 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀦𑀢𑁄 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀆𑀕𑀫𑁂 𑀭𑀼𑀓𑁆𑀔𑀯𑀘𑀦𑀲𑁆𑀲 𑀩𑁄𑀥𑀺𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀧𑀼𑀕𑁆𑀕𑀮𑀯𑀘𑀦𑀲𑁆𑀲 𑀧𑀦 𑀤𑀺𑀲𑁆𑀲𑀢𑀺. 𑀬𑀤𑀺 𑀘 ‘‘𑀲𑀸𑀮𑁄 𑀥𑀯𑁄 𑀔𑀤𑀻𑀭𑁄’’𑀢𑀺𑀆𑀤𑀻𑀦𑀁 𑀯𑀺𑀬 𑀭𑀼𑀓𑁆𑀔𑀯𑀘𑀦𑀲𑁆𑀲 𑀩𑁄𑀥𑀺𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀺𑀬𑀸, 𑀚𑀫𑁆𑀩𑀽 𑀲𑀺𑀫𑁆𑀩𑀮𑀻 𑀧𑀸𑀝𑀮𑀻𑀲𑀤𑁆𑀤𑀸𑀤𑀻𑀦𑀁 𑀭𑀼𑀓𑁆𑀔𑀯𑀸𑀘𑀓𑀢𑁆𑀢𑀸 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀺𑀬𑀸, 𑀦 𑀢𑁂𑀲𑀁 𑀇𑀫𑀲𑁆𑀲 𑀘 𑀭𑀼𑀓𑁆𑀔𑀯𑀸𑀘𑀓𑀢𑁆𑀢𑁂𑀧𑀺 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀳𑀺 𑀭𑀼𑀓𑁆𑀔𑀯𑀘𑀦𑁄 𑀩𑁄𑀥𑀺𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀏𑀯𑀁 𑀲𑀦𑁆𑀢𑁂 𑀦𑀺𑀩𑁆𑀩𑀸𑀦𑀯𑀘𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀯𑀘𑀦𑁄 𑀘 𑀩𑁄𑀥𑀺𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀲𑀺𑀬𑀸 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀦𑀺𑀩𑁆𑀩𑀸𑀦𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀓𑀣𑀦𑀢𑁄.

𑀬𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀭𑀼𑀓𑁆𑀔𑀯𑀘𑀦𑁄 𑀩𑁄𑀥𑀺𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄’’𑀢𑀺, 𑀢𑁂 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀁 𑀏𑀢𑁆𑀣 𑀪𑀕𑀯𑀸 𑀧𑀢𑁆𑀢𑁄𑀢𑀺 ¶ 𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀘𑁂𑀢𑀲𑀺 𑀲𑀦𑁆𑀦𑀺𑀥𑀸𑀬 ‘‘𑀩𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀩𑁄𑀥𑀻’’𑀢𑀺 𑀦𑀺𑀩𑁆𑀩𑀘𑀦𑀯𑀲𑁂𑀦 ‘‘𑀓𑀺𑀁 𑀭𑀼𑀓𑁆𑀔𑀯𑀘𑀦𑁄 𑀩𑁄𑀥𑀺𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺 𑀫𑀜𑁆𑀜𑁂. 𑀦𑁂𑀯𑀁 𑀤𑀝𑁆𑀞𑀩𑁆𑀩𑀁, 𑀏𑀯𑀜𑁆𑀘 𑀧𑀦 𑀤𑀝𑁆𑀞𑀩𑁆𑀩𑀁, ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀁 𑀏𑀢𑁆𑀣 𑀪𑀕𑀯𑀸 𑀧𑀢𑁆𑀢𑁄𑀢𑀺 𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑁂𑀳𑀺 𑀕𑀭𑀽𑀳𑀺 𑀜𑀸𑀡𑀯𑀘𑀦𑀁 𑀇𑀢𑁆𑀣𑀺 𑀮𑀺𑀗𑁆𑀕𑀪𑀽𑀢𑀁 𑀩𑁄𑀥𑀻𑀢𑀺 𑀜𑀸𑀡𑀲𑁆𑀲 𑀦𑀸𑀫𑀁 𑀧𑀡𑁆𑀡𑀢𑁆𑀢𑀺𑀅𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑁂𑀦𑀢𑁆𑀣𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁂𑀦 𑀩𑀼𑀚𑁆𑀛𑀦𑀝𑁆𑀞𑀸𑀦𑀪𑀽𑀢𑁂 𑀭𑀼𑀓𑁆𑀔𑁂 𑀆𑀭𑁄𑀧𑁂𑀢𑁆𑀯𑀸 𑀭𑀼𑀓𑁆𑀔𑁄 ‘‘𑀩𑁄𑀥𑀻’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀘𑀦𑁂 𑀆𑀤𑀭𑁄 𑀦 𑀓𑀸𑀢𑀩𑁆𑀩𑁄. 𑀦 𑀳𑀺 ‘‘𑀩𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀩𑁄𑀥𑀻’’𑀢𑀺 𑀦𑀺𑀩𑁆𑀩𑀘𑀦𑀓𑀭𑀡𑀁 𑀭𑀼𑀓𑁆𑀔𑀯𑀘𑀦𑀲𑁆𑀲 𑀩𑁄𑀥𑀺𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀲𑀗𑁆𑀓𑁂𑀢𑀲𑀺𑀤𑁆𑀥𑀢𑁆𑀢𑀸 𑀯𑁄𑀳𑀸𑀭𑀲𑁆𑀲, 𑀢𑀲𑁆𑀫𑀸 𑀭𑀼𑀓𑁆𑀔𑀁 𑀲𑀬𑀁 𑀅𑀩𑁄𑀥𑀺𑀫𑁆𑀧𑀺 𑀲𑀫𑀸𑀦𑀁 𑀩𑁄𑀥𑀺𑀬𑀸 𑀧𑀝𑀺𑀮𑀸𑀪𑀝𑁆𑀞𑀸𑀦𑀢𑁆𑀢𑀸 𑀲𑀗𑁆𑀓𑁂𑀢𑀲𑀺𑀤𑁆𑀥𑁂𑀦 ‘‘𑀩𑁄𑀥𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑁄𑀳𑀸𑀭𑁂𑀦 𑀯𑁄𑀳𑀭𑀦𑁆𑀢𑀺 𑀲𑀸𑀲𑀦𑀺𑀓𑀸, 𑀩𑁄𑀥𑀺𑀬𑀸 𑀯𑀸 𑀓𑀸𑀭𑀡𑀢𑁆𑀢𑀸 𑀨𑀮𑀯𑁄𑀳𑀸𑀭𑁂𑀦. 𑀏𑀢𑀫𑀢𑁆𑀣𑀁𑀬𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀁 𑀏𑀢𑁆𑀣 𑀪𑀕𑀯𑀸 𑀧𑀢𑁆𑀢𑁄𑀢𑀺 𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀯𑀁 ‘‘𑀩𑁄𑀥𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀭𑀼𑀓𑁆𑀔𑀦𑀸𑀫𑀁 𑀧𑀯𑀢𑁆𑀢𑀢𑀻𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀦𑀼𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀻 𑀯𑁄𑀳𑀸𑀭𑀓𑀼𑀲𑀮𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑁄𑀳𑀸𑀭𑁂𑀦 ‘‘𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺. 𑀅𑀧𑀺𑀘 𑀢𑀢𑁆𑀣 𑀢𑀢𑁆𑀣 ‘‘𑀩𑁄𑀥𑀺𑀬𑀸 𑀲𑀸𑀔𑀸’’𑀢𑀺 𑀘, ‘‘𑀓𑁂𑀦𑀝𑁆𑀞𑁂𑀦 𑀫𑀳𑀸𑀩𑁄𑀥𑀺, 𑀓𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻 𑀘 𑀲𑀸’’𑀢𑀺 𑀘,

‘‘𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑀸 𑀲𑀸, 𑀅𑀲𑀻𑀢𑀺𑀭𑀢𑀦𑀁 𑀦𑀪𑀁;

𑀉𑀕𑁆𑀕𑀦𑁆𑀢𑁆𑀯𑀸𑀦 𑀢𑀤𑀸 𑀫𑀼𑀜𑁆𑀘𑀺, 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀲𑀼𑀪𑀸’’𑀢𑀺 𑀘

𑀏𑀯𑀫𑀸𑀤𑀬𑁄 ¶ 𑀭𑀼𑀓𑁆𑀔𑀯𑀸𑀘𑀓𑀲𑁆𑀲 𑀩𑁄𑀥𑀺𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺.

𑀅𑀣 𑀯𑀸 𑀭𑀼𑀓𑁆𑀔𑀯𑀸𑀘𑀓𑁄 𑀩𑁄𑀥𑀺𑀲𑀤𑁆𑀤𑁄 𑀤𑁆𑀯𑀺𑀮𑀺𑀗𑁆𑀕𑁄 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦. 𑀢𑀣𑀸 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬𑀁 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀧𑀸𑀴𑀺𑀦𑀬𑀯𑀺𑀤𑀼𑀦𑁄 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀲𑁆𑀲 𑀏𑀯𑀁 𑀲𑀤𑁆𑀤𑀭𑀘𑀦𑀸 𑀤𑀺𑀲𑁆𑀲𑀢𑀺 ‘‘𑀲𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁 𑀢𑀸𑀢 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀦𑀸 𑀲𑀤𑁆𑀥𑀺𑀁 𑀅𑀬𑁆𑀬𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀆𑀦𑁂𑀢𑀼’’𑀦𑁆𑀢𑀺 𑀘, ‘‘𑀲𑀸𑀧𑀺 𑀔𑁄 𑀫𑀳𑀸𑀩𑁄𑀥𑀺𑀲𑀫𑀸𑀭𑀽𑀴𑁆𑀳𑀸 𑀦𑀸𑀯𑀸 𑀧𑀲𑁆𑀲𑀢𑁄 𑀫𑀳𑀸𑀭𑀸𑀚𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀧𑀓𑁆𑀔𑀦𑁆𑀤𑀸’’𑀢𑀺 𑀘 𑀢𑀲𑁆𑀲 𑀭𑀼𑀓𑁆𑀔𑀯𑀸𑀘𑀓𑀲𑁆𑀲 𑀩𑁄𑀥𑀺𑀲𑀤𑁆𑀤𑀲𑁆𑀲 ‘‘𑀩𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀩𑁄𑀥𑀻’’𑀢𑀺 𑀦𑀺𑀩𑁆𑀩𑀘𑀦𑀯𑀲𑁂𑀦 ‘‘𑀩𑁄𑀥𑀺, 𑀩𑁄𑀥𑀻, 𑀩𑁄𑀥𑀬𑁄. 𑀩𑁄𑀥𑀺𑀁, 𑀩𑁄𑀥𑀻, 𑀩𑁄𑀥𑀬𑁄. 𑀩𑁄𑀥𑀺𑀦𑀸’’𑀢𑀺𑀆𑀤𑀺𑀦𑀸 𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀼𑀓𑁆𑀔𑀯𑀸𑀘𑀓𑀲𑁆𑀲𑁂𑀯 𑀧𑀦 𑀢𑀲𑁆𑀲 𑀜𑀸𑀡𑁂 𑀧𑀯𑀢𑁆𑀢𑀺𑀢𑁆𑀣𑀺𑀮𑀺𑀗𑁆𑀕𑀯𑁄𑀳𑀸𑀭𑁂𑀦 𑀲𑀗𑁆𑀓𑁂𑀢𑀲𑀺𑀤𑁆𑀥𑁂𑀦 𑀭𑀽𑀴𑁆𑀳𑀢𑁆𑀣𑀤𑀻𑀧𑀓𑁂𑀦 ‘‘𑀩𑁄𑀥𑀺, 𑀩𑁄𑀥𑀻, 𑀩𑁄𑀥𑀺𑀬𑁄. 𑀩𑁄𑀥𑀺𑀁, 𑀩𑁄𑀥𑀻, 𑀩𑁄𑀥𑀺𑀬𑁄. 𑀩𑁄𑀥𑀺𑀬𑀸’’𑀢𑀺𑀆𑀤𑀺𑀦𑀸 𑀧𑀤𑀫𑀸𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀘𑁆𑀘𑁂𑀯𑀁 𑁋

𑀧𑀼𑀕𑁆𑀕𑀮𑀯𑀸𑀘𑀓𑁄 𑀩𑁄𑀥𑀺-𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑀺𑀓𑁄 𑀪𑀯𑁂;

𑀜𑀸𑀡𑀸𑀤𑀺𑀯𑀸𑀘𑀓𑁄 𑀇𑀢𑁆𑀣𑀺-𑀮𑀺𑀗𑁆𑀕𑁄𑀬𑁂𑀯 𑀲𑀺𑀬𑀸 𑀲𑀤𑀸.

𑀩𑁄𑀥𑀺𑀧𑀸𑀤𑀧𑀯𑀘𑀦𑁄, 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀺𑀓𑁄 𑀪𑀯𑁂;

𑀏𑀯𑀁 𑀲𑀦𑁆𑀢𑁂𑀧𑀺 𑀏𑀢𑀲𑁆𑀲, 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑁂𑀯 𑀢𑀼;

𑀇𑀘𑁆𑀙𑀺𑀢𑀩𑁆𑀩𑀢𑀭𑀁 𑀬𑀲𑁆𑀫𑀸, 𑀥𑀫𑁆𑀫𑀲𑁂𑀦𑀸𑀧𑀢𑀻𑀭𑀺𑀢𑀁.

𑀲𑀦𑁆𑀥𑀺𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀦𑀬𑀸𑀦𑀼𑀲𑀸𑀭𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀦𑁆𑀥𑀺𑀲𑀤𑁆𑀤𑁄 𑀳𑀺 𑀲𑀭𑀲𑀦𑁆𑀥𑀺𑀆𑀤𑀺𑀯𑀸𑀘𑀓𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀧𑀝𑀺𑀲𑀦𑁆𑀥𑀺𑀬𑀸𑀤𑀺𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 ‘‘𑀲𑀦𑁆𑀥𑀺𑀦𑁄. 𑀲𑀦𑁆𑀥𑀺𑀬𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄. 𑀯𑀺𑀪𑀢𑁆𑀢𑀺𑀲𑀤𑁆𑀤𑁄 𑀯𑀺𑀪𑀚𑀦𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 ¶ , 𑀲𑁆𑀬𑀸𑀤𑀺𑀯𑀸𑀘𑀓𑁄 𑀧𑀼𑀮𑁆𑀮𑀺𑀗𑁆𑀕𑁄 𑀘𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑁄 𑀘 ‘‘𑀯𑀺𑀪𑀢𑁆𑀢𑀺𑀲𑁆𑀲. 𑀯𑀺𑀪𑀢𑁆𑀢𑀺𑀬𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄.

𑀆𑀬𑀼𑀲𑀤𑁆𑀤𑁄 𑀧𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀸𑀘𑀓𑁄𑀬𑁂𑀯 𑀳𑀼𑀢𑁆𑀯𑀸 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁄, ‘‘𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺 ‘‘𑀏𑀢𑁆𑀢𑀓𑀁𑀬𑁂𑀯 𑀢𑁂 𑀆𑀬𑀼, 𑀘𑀯𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘 𑀤𑀲𑁆𑀲𑀦𑀢𑁄.

𑀥𑀸𑀢𑀼𑀲𑀤𑁆𑀤𑁄 𑀲𑀪𑀸𑀯𑀸𑀤𑀺𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀓𑀭𑀧𑀘𑀸𑀤𑀺𑀯𑀸𑀘𑀓𑁄 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑁄 ‘‘𑀘𑀓𑁆𑀔𑀼𑀥𑀸𑀢𑀼𑀬𑀸. 𑀓𑀭𑁄𑀢𑀺𑀲𑁆𑀲 𑀥𑀸𑀢𑀼𑀲𑁆𑀲. 𑀥𑀸𑀢𑀼𑀬𑁄 𑀥𑀸𑀢𑀼𑀬𑀸’’𑀢𑀺 𑀤𑀲𑁆𑀲𑀦𑀢𑁄.

𑀧𑀚𑀸𑀧𑀢𑀺𑀲𑀤𑁆𑀤𑁄 𑀤𑁂𑀯𑀯𑀺𑀲𑁂𑀲𑀯𑀸𑀘𑀓𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀓𑀮𑀢𑁆𑀢𑀚𑀺𑀦𑀫𑀸𑀢𑀼𑀘𑁆𑀙𑀸𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 ‘‘𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣’’, ‘‘𑀅𑀢𑁆𑀢𑀦𑁄 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀫𑀳𑀸𑀧𑀚𑀸𑀧𑀢𑀺𑀬𑀸’’𑀢𑀺 𑀘 𑀤𑀲𑁆𑀲𑀦𑀢𑁄.

𑀤𑀸𑀫𑀸 𑀤𑀸𑀫𑀁 𑀲𑀤𑁆𑀤𑀸 𑀫𑀸𑀮𑀢𑀻𑀤𑀸𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀏𑀓𑀲𑁆𑀲 𑀯𑀢𑁆𑀣𑀼𑀲𑁆𑀲 𑀬𑀣𑀸𑀓𑁆𑀓𑀫𑀁 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀸. 𑀢𑀣𑀸 𑀳𑀺 ‘‘𑀫𑀸𑀮𑀢𑀻𑀤𑀸𑀫𑀸 𑀮𑁄𑀮𑀸𑀴𑀺𑀗𑁆𑀕𑀮𑀻𑀮𑀸. 𑀫𑀸𑀮𑀢𑀻𑀤𑀸𑀫𑀁. 𑀲𑀺𑀗𑁆𑀖𑀺𑀢𑀁 𑀤𑀸𑀫𑀁 𑀪𑀫𑀭𑁂𑀳𑀺. 𑀭𑀢𑀦𑀤𑀸𑀫𑀸. 𑀭𑀢𑀦𑀤𑀸𑀫’’𑀦𑁆𑀢𑀺 𑀘 𑀤𑁆𑀯𑀺𑀮𑀺𑀗𑁆𑀕𑀪𑀸𑀯𑁂 𑀮𑁄𑀓𑀺𑀓𑀧𑁆𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑀸𑀦𑀼𑀓𑀽𑀮𑀸.

𑀲𑀤𑁆𑀥𑀁 𑀲𑀤𑁆𑀥𑀸𑀲𑀤𑁆𑀤𑀸 𑀧𑀦 𑀪𑀺𑀦𑁆𑀦𑀯𑀢𑁆𑀣𑀽𑀦𑀁 𑀯𑀸𑀘𑀓𑀸 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀸, 𑀲𑀤𑁆𑀥𑀸𑀲𑀤𑁆𑀤𑁄 𑀧𑀲𑀸𑀤𑀮𑀓𑁆𑀔𑀡𑀯𑀸𑀘𑀓𑁄 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀲𑀤𑁆𑀥𑀁𑀲𑀤𑁆𑀤𑁄 𑀫𑀢𑀓𑀪𑀢𑁆𑀢𑀯𑀸𑀘𑀓𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 ‘‘𑀲𑀤𑁆𑀥𑀸 𑀲𑀤𑁆𑀤𑀳𑀦𑀸. 𑀫𑀬𑀫𑀲𑁆𑀲𑀼𑀪𑁄 𑀕𑁄𑀢𑀫𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀤𑀸𑀦𑀸𑀦𑀺 𑀤𑁂𑀫 𑀲𑀤𑁆𑀥𑀸𑀦𑀺 𑀓𑀭𑁄𑀫𑀸’’𑀢𑀺 𑀤𑀲𑁆𑀲𑀦𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 ‘‘𑀲𑀤𑁆𑀥𑁄 𑀧𑀼𑀭𑀺𑀲𑁄 ¶ , 𑀲𑀤𑁆𑀥𑀸 𑀇𑀢𑁆𑀣𑀻, 𑀲𑀤𑁆𑀥𑀁 𑀓𑀼𑀮’’𑀦𑁆𑀢𑀺 𑀇𑀫𑀸𑀦𑀺 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀢𑀝𑀁 𑀢𑀝𑀻 𑀢𑀝𑁄𑀢𑀺𑀫𑁂 𑀲𑀤𑁆𑀤𑀸 𑀢𑀻𑀭𑀲𑀗𑁆𑀔𑀸𑀢𑁂 𑀏𑀓𑀲𑁆𑀫𑀺𑀁𑀬𑁂𑀯𑀢𑁆𑀣𑁂 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸.

𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀉𑀧𑀲𑁂𑀘𑀦𑀮𑀺𑀗𑁆𑀕𑀯𑀸𑀓𑁆𑀬𑀸𑀯𑁂𑀡𑀺𑀓𑀲𑀭𑀻𑀭𑀸𑀯𑀬𑀯𑀯𑀸𑀘𑀓𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀅𑀓𑁆𑀔𑀭𑀯𑀸𑀘𑀓𑁄 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑁄. 𑀢𑀢𑁆𑀭𑀼𑀧𑀲𑁂𑀘𑀦𑁂 ‘‘𑀲𑀽𑀧𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸’’𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀣𑀸 𑀮𑀺𑀗𑁆𑀕𑁂 ‘‘𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀼𑀭𑀺𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀯𑀸𑀓𑁆𑀬𑁂 ‘‘𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀆𑀯𑁂𑀡𑀺𑀓𑁂 ‘‘𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑀭𑀻𑀭𑀸𑀯𑀬𑀯𑁂 ‘‘𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀏𑀯𑀁 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀏𑀢𑁆𑀣 𑀳𑀺 𑀅𑀦𑀼𑀩𑁆𑀬𑀜𑁆𑀚𑀦𑀁 𑀦𑀸𑀫 𑀳𑀢𑁆𑀣𑀧𑀸𑀤𑀲𑀺𑀢𑀳𑀲𑀺𑀢𑀓𑀣𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑁄 𑀆𑀓𑀸𑀭𑁄. 𑀲𑁄 𑀏𑀯 ‘‘𑀲𑀭𑀻𑀭𑀸𑀯𑀬𑀯𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀓𑁆𑀔𑀭𑁂 ‘‘𑀩𑁆𑀬𑀜𑁆𑀚𑀦𑁄. 𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀘 𑀧𑀼𑀦𑁆𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑀅𑀢𑁆𑀣𑀲𑀤𑁆𑀤𑁄 𑀦𑀺𑀩𑁆𑀩𑀸𑀦𑀯𑀘𑀦𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀅𑀪𑀺𑀥𑁂𑀬𑁆𑀬𑀥𑀦𑀓𑀸𑀭𑀡𑀧𑀬𑁄𑀚𑀦𑀦𑀺𑀯𑀢𑁆𑀬𑀸𑀪𑀺𑀲𑀦𑁆𑀥𑀸𑀦𑀸𑀤𑀺𑀯𑀘𑀦𑁄 𑀧𑀦 𑀧𑀼𑀮𑁆𑀮𑀺𑀗𑁆𑀕𑁄. 𑀢𑀣𑀸 𑀳𑀺 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 ‘‘𑀅𑀢𑁆𑀣𑀢𑁆𑀣𑀫𑁆𑀳𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 ‘‘𑀅𑀢𑁆𑀣𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁂𑀦 𑀅𑀢𑁆𑀣𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀇𑀢𑀺 𑀅𑀢𑁆𑀣𑀲𑀤𑁆𑀤𑁄 𑀤𑁆𑀯𑀺𑀮𑀺𑀗𑁆𑀕𑁄.

𑀅𑀓𑁆𑀔𑀭𑀲𑀤𑁆𑀤𑁄 𑀘 ‘‘𑀬𑁄 𑀧𑀼𑀩𑁆𑀩𑁄 𑀅𑀓𑁆𑀔𑀭𑁄 𑀅𑀓𑁆𑀔𑀭𑀸𑀦𑀻’’𑀢𑀺 𑀘 𑀤𑀲𑁆𑀲𑀦𑀢𑁄. 𑀅𑀧𑀺𑀘 𑀅𑀓𑁆𑀔𑀭𑀲𑀤𑁆𑀤𑁄 𑀦𑀺𑀩𑁆𑀩𑀸𑀦𑀯𑀘𑀦𑁄 𑀦𑀸𑀫𑀧𑀡𑁆𑀡𑀢𑁆𑀢𑀺𑀯𑀘𑀦𑁄 𑀘 𑀲𑀩𑁆𑀩𑀤𑀸𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀪𑀯𑀢𑀺 ‘‘𑀧𑀤𑀫𑀘𑁆𑀘𑀼𑀢𑀫𑀓𑁆𑀔𑀭𑀁, 𑀫𑀳𑀸𑀚𑀦𑀲𑀫𑁆𑀫𑀢𑁄𑀢𑀺 ¶ 𑀔𑁄 𑀯𑀸𑀲𑁂𑀝𑁆𑀞 ‘𑀫𑀳𑀸𑀲𑀫𑁆𑀫𑀢𑁄’𑀢𑁆𑀯𑁂𑀯 𑀧𑀞𑀫𑀁 𑀅𑀓𑁆𑀔𑀭𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼. ‘‘𑀅𑀓𑁆𑀔𑀭𑀸𑀬 𑀤𑁂𑀲𑁂𑀢𑀺, 𑀅𑀓𑁆𑀔𑀭𑀓𑁆𑀔𑀭𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀏𑀢𑁆𑀣 𑀧𑀦 𑀧𑀼𑀮𑁆𑀮𑀺𑀗𑁆𑀕𑁄𑀢𑀺𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺𑀧𑀺 𑀯𑀢𑁆𑀢𑀩𑁆𑀩𑁄, 𑀇𑀢𑁆𑀣𑀺𑀮𑀺𑀗𑁆𑀕𑁄𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑁄. 𑀅𑀬𑀜𑁆𑀳𑀺 ‘‘𑀅𑀲𑀓𑁆𑀓𑀢𑀸 𑀘𑀲𑁆𑀫 𑀥𑀦𑀜𑁆𑀘𑀬𑀸𑀬. 𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫𑀯𑀘𑀦𑀸𑀬𑀸’’𑀢𑀺𑀆𑀤𑀻𑀲𑀼 ‘‘𑀥𑀦𑀜𑁆𑀘𑀬𑀸𑀬, 𑀯𑀘𑀦𑀸𑀬𑀸’’𑀢𑀺 𑀲𑀤𑁆𑀤𑀸 𑀯𑀺𑀬 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑁄, 𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑀸𑀢𑀺.

𑀅𑀚𑁆𑀚𑀯 𑀫𑀤𑁆𑀤𑀯 𑀕𑀸𑀭𑀯𑀲𑀤𑁆𑀤𑀸 𑀧𑀦 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸. ‘‘𑀅𑀚𑁆𑀚𑀯𑁄 𑀘 𑀫𑀤𑁆𑀤𑀯𑁄 𑀘. 𑀅𑀚𑁆𑀚𑀯𑀫𑀤𑁆𑀤𑀯𑀁. 𑀕𑀸𑀭𑀯𑁄 𑀘 𑀦𑀺𑀯𑀸𑀢𑁄 𑀘. 𑀲𑀳 𑀆𑀯𑀚𑁆𑀚𑀺𑀢𑁂 𑀣𑀽𑀧𑁂, 𑀕𑀸𑀭𑀯𑀁 𑀳𑁄𑀢𑀺 𑀫𑁂 𑀢𑀤𑀸’’𑀢𑀺 𑀘 𑀆𑀤𑀺𑀤𑀲𑁆𑀲𑀦𑀢𑁄.

𑀯𑀘𑁄𑀯𑀘𑀻𑀲𑀤𑁆𑀤𑀸 𑀧𑀦 𑀖𑀝𑁄𑀖𑀝𑀻𑀲𑀤𑁆𑀤𑀸 𑀯𑀺𑀬 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀸, 𑀢𑀢𑁆𑀣 𑀯𑀘𑀻𑀲𑀤𑁆𑀤𑀲𑁆𑀲 ‘‘𑀯𑀘𑀻, 𑀯𑀘𑀻, 𑀯𑀘𑀺𑀬𑁄. 𑀯𑀘𑀺𑀁, 𑀯𑀘𑀻, 𑀯𑀘𑀺𑀬𑁄. 𑀯𑀘𑀺𑀬𑀸’’𑀢𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀓𑁂𑀘𑀺 ‘‘𑀤𑀼𑀘𑁆𑀘𑀭𑀺𑀢𑀧𑀬𑁄𑀕𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀸𑀤𑀻𑀲𑀼 𑀧𑀭𑁂𑀲𑀼 𑀯𑀘𑀲𑀤𑁆𑀤𑀲𑁆𑀲𑀦𑁆𑀢𑁄 𑀈𑀓𑀸𑀭𑁄 𑀳𑁄𑀢𑀺, 𑀢𑁂𑀦 ‘‘𑀯𑀘𑀻𑀤𑀼𑀘𑁆𑀘𑀭𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀯𑀘𑀲𑀤𑁆𑀤𑀢𑁄 𑀯𑀺𑀲𑀼𑀁 𑀯𑀘𑀻𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀢𑁄. 𑀅𑀢𑁆𑀭𑀺𑀫𑀸𑀦𑀺 𑀧𑀸𑀴𑀺𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. ‘‘𑀯𑀘𑀻 𑀯𑀘𑀻𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀯𑀘𑀻, 𑀯𑀘𑀺𑀜𑁆𑀘 𑀯𑀘𑀻𑀲𑀗𑁆𑀔𑀸𑀭𑁂 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀦 𑀘𑁂𑀯 𑀯𑀘𑀻, 𑀦 𑀘 𑀯𑀘𑀻𑀲𑀗𑁆𑀔𑀸𑀭𑁄. 𑀕𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂’’𑀢𑀺 𑀇𑀫𑀸𑀦𑀺 𑀧𑀸𑀴𑀺𑀢𑁄 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. ‘‘𑀘𑁄𑀧𑀦𑀲𑀗𑁆𑀔𑀸𑀢𑀸 𑀯𑀘𑀻 𑀏𑀯 𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀯𑀘𑀺𑀬𑀸 𑀪𑁂𑀤𑁄 𑀯𑀘𑀻𑀪𑁂𑀤𑁄’’𑀢𑀺 𑀇𑀫𑀸𑀦𑀺 𑀅𑀝𑁆𑀞𑀓𑀣𑀸𑀢𑁄 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀲𑀭𑀽𑀧𑀸𑀲𑀭𑀽𑀧𑀧𑀤𑀸𑀦𑀁 ¶ 𑀬𑀣𑀸𑀭𑀳𑀁 𑀤𑁆𑀯𑀺𑀢𑀺𑀮𑀺𑀗𑁆𑀕𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀏𑀯𑀁 𑀅𑀪𑀺𑀥𑁂𑀬𑁆𑀬𑀓𑀮𑀺𑀗𑁆𑀕𑁂𑀲𑀼 𑀲𑀯𑀺𑀲𑁂𑀲𑀸𑀦𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀓𑀢𑁆𑀣𑀘𑀺 𑀯𑀸𑀘𑁆𑀘𑀮𑀺𑀗𑁆𑀕𑀪𑀽𑀢𑀸𑀦𑀁 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀜𑁆𑀘 𑀢𑀤𑁆𑀥𑀺𑀪𑀦𑁆𑀢𑀮𑀺𑀗𑁆𑀕𑀸𑀦𑀜𑁆𑀘 𑀥𑀫𑁆𑀫𑀸𑀤𑀺𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂. 𑀢𑀣𑀸 𑀳𑀺 𑁋

𑀥𑀫𑁆𑀫𑀪𑁄 𑀧𑀼𑀕𑁆𑀕𑀮𑀸 𑀘𑁂𑀯, 𑀥𑀫𑁆𑀫𑀧𑀼𑀕𑁆𑀕𑀮𑀢𑁄𑀧𑀺 𑀘;

𑀏𑀓𑀦𑁆𑀢𑀥𑀫𑁆𑀫𑀢𑁄 𑀘𑁂𑀯, 𑀢𑀣𑁂𑀯𑁂𑀓𑀦𑁆𑀢𑀧𑀼𑀕𑁆𑀕𑀮𑀸.

𑀧𑀤𑀫𑀸𑀮𑀸 𑀲𑀺𑀬𑀼𑀁 𑀢𑀸𑀲𑀼, 𑀧𑀘𑁆𑀘𑀢𑁆𑀢𑀸𑀤𑀺𑀯𑀲𑁂𑀦 𑀢𑀼;

𑀧𑀤𑀁 𑀲𑀫𑀁 𑀯𑀺𑀲𑀫𑀜𑁆𑀘, 𑀚𑀜𑁆𑀜𑀸 𑀲𑀩𑁆𑀩𑀲𑀫𑀫𑁆𑀧𑀺 𑀘.

𑀓𑀣𑀁? ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀻’’ 𑀇𑀘𑁆𑀘𑁂𑀢𑁂𑀲𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸’’𑀢𑀺 𑀏𑀯𑀁 𑀥𑀫𑁆𑀫𑀢𑁄, ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀸’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑀢𑁄, ‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀧𑀼𑀕𑁆𑀕𑀮𑀢𑁄, ‘‘𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑀸𑀬𑁄. 𑀫𑀺𑀘𑁆𑀙𑀸𑀯𑀸𑀘𑀁, 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀯𑀸𑀘𑀸𑀬𑁄. 𑀫𑀺𑀘𑁆𑀙𑀸𑀯𑀸𑀘𑀸𑀬’’ 𑀏𑀯𑀁 𑀏𑀓𑀦𑁆𑀢𑀥𑀫𑁆𑀫𑀢𑁄, ‘‘𑀫𑀺𑀘𑁆𑀙𑀸𑀯𑀸𑀘𑁄, 𑀫𑀺𑀘𑁆𑀙𑀸𑀯𑀸𑀘𑀸. 𑀫𑀺𑀘𑁆𑀙𑀸𑀯𑀸𑀘𑀁, 𑀫𑀺𑀘𑁆𑀙𑀸𑀯𑀸𑀘𑁂. 𑀫𑀺𑀘𑁆𑀙𑀸𑀯𑀸𑀘𑁂𑀦’’ 𑀏𑀯𑀁 𑀏𑀓𑀦𑁆𑀢𑀧𑀼𑀕𑁆𑀕𑀮𑀢𑁄, ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓’’𑀦𑁆𑀢𑀺 𑀏𑀯𑀫𑁆𑀧𑀺 𑀏𑀓𑀦𑁆𑀢𑀧𑀼𑀕𑁆𑀕𑀮𑀢𑁄, ‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀻, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀺𑀦𑁄. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀺’’𑀦𑁆𑀢𑀺 𑀏𑀯𑀫𑁆𑀧𑀺 𑀏𑀓𑀦𑁆𑀢𑀧𑀼𑀕𑁆𑀕𑀮𑀢𑁄 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺. 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀯𑀘𑀦𑀸𑀤𑀺𑀯𑀲𑁂𑀦 𑀧𑀦 𑀧𑀤𑀁 𑀲𑀤𑀺𑀲𑀁 𑀯𑀺𑀲𑀤𑀺𑀲𑀁 𑀲𑀩𑁆𑀩𑀣𑀸 𑀲𑀤𑀺𑀲𑀫𑁆𑀧𑀺 𑀘 𑀪𑀯𑀢𑀺. 𑀏𑀲 𑀦𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺.

𑀅𑀢𑁆𑀭𑀺𑀫𑁂 ¶ 𑀆𑀳𑀘𑁆𑀘𑀪𑀸𑀲𑀺𑀢𑀸 𑀧𑀬𑁄𑀕𑀸 𑁋 𑀅𑀯𑀺𑀚𑁆𑀚𑀸𑀕𑀢𑀲𑁆𑀲 𑀪𑀺𑀓𑁆𑀔𑀯𑁂 𑀅𑀯𑀺𑀤𑁆𑀤𑀲𑀼𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀸 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀯𑀸𑀘𑀲𑁆𑀲 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑁄 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀫𑀺𑀘𑁆𑀙𑀸𑀲𑀢𑀺 𑀧𑀳𑁄𑀢𑀺. 𑀫𑀺𑀘𑁆𑀙𑀸𑀲𑀢𑀺𑀲𑁆𑀲 𑀫𑀺𑀘𑁆𑀙𑀸𑀲𑀫𑀸𑀥𑀺 𑀧𑀳𑁄𑀢𑀻𑀢𑀺. 𑀯𑀺𑀚𑁆𑀚𑀸𑀕𑀢𑀲𑁆𑀲 𑀪𑀺𑀓𑁆𑀔𑀯𑁂 𑀯𑀺𑀤𑁆𑀤𑀲𑀼𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀳𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻𑀢𑀺 𑀯𑀺𑀢𑁆𑀣𑀸𑀭𑁄, 𑀏𑀯𑀁 𑀓𑀢𑁆𑀣𑀘𑀺 𑀯𑀸𑀘𑁆𑀘𑀮𑀺𑀗𑁆𑀕𑀪𑀽𑀢𑀸𑀦𑀁 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀜𑁆𑀘 𑀢𑀤𑁆𑀥𑀺𑀢𑀦𑁆𑀢𑀮𑀺𑀗𑁆𑀕𑀸𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀲𑀧𑁆𑀧𑀬𑁄𑀕𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀦𑁂𑀯𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀲𑁆𑀲 𑀪𑀯𑀺𑀢𑀩𑁆𑀩𑀲𑀤𑁆𑀤𑀲𑁆𑀲 𑀘 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀦𑀁 𑀲𑁄𑀢𑁆𑀣𑀺 𑀲𑀼𑀯𑀢𑁆𑀣𑀺 𑀲𑀤𑁆𑀤𑀸𑀦𑀜𑁆𑀘 𑀯𑀸𑀘𑁆𑀘𑀮𑀺𑀗𑁆𑀕𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀲𑁆𑀲 𑀅𑀩𑁆𑀪𑀼𑀢𑀲𑀤𑁆𑀤𑀲𑁆𑀲 𑀘 𑀯𑀸𑀘𑁆𑀘𑀮𑀺𑀗𑁆𑀕𑀲𑁆𑀲 𑀅𑀪𑀽𑀢𑀲𑀤𑁆𑀤𑀲𑁆𑀲𑀘𑀸𑀢𑀺 𑀇𑀫𑁂𑀲𑀁 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀓𑀣𑀬𑀸𑀫, 𑀦𑀸𑀫𑀺𑀓𑀧𑀤𑀫𑀸𑀮𑀜𑁆𑀘 𑀬𑀣𑀸𑀭𑀳𑀁 𑀬𑁄𑀚𑁂𑀲𑁆𑀲𑀸𑀫. 𑀏𑀢𑁂𑀲𑀼 𑀳𑀺 𑀪𑀯𑀺𑀢𑀩𑁆𑀩𑀲𑀤𑁆𑀤𑁄 𑀏𑀓𑀦𑁆𑀢𑀪𑀸𑀯𑀯𑀸𑀘𑀓𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀏𑀓𑀯𑀘𑀦𑀦𑁆𑀢𑁄𑀬𑁂𑀯 𑀳𑁄𑀢𑀺. 𑀢𑀢𑀺𑀬𑀦𑁆𑀢𑀧𑀤𑁂𑀳𑀺 𑀏𑀯𑀁𑀲𑀤𑁆𑀤 𑀦𑀲𑀤𑁆𑀤𑀸𑀤𑀻𑀳𑀺 𑀘 𑀬𑁄𑀚𑁂𑀢𑀩𑁆𑀩𑁄 𑀘 𑀳𑁄𑀢𑀺. 𑀦𑀸𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀮𑀩𑁆𑀪𑀢𑀺, 𑀅𑀢𑁆𑀭𑀺𑀫𑁂 𑀘 𑀧𑀬𑁄𑀕𑀸 ‘‘𑀲𑀤𑁆𑀥𑀫𑁆𑀫𑀕𑀭𑀼𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁄 𑀆𑀫𑀺𑀲𑀕𑀭𑀼𑀓𑁂𑀦, 𑀇𑀫𑀺𑀦𑀸 𑀘𑁄𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀫𑁂𑀳𑀺 𑀘𑁄𑀭𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀇𑀫𑀸𑀬 𑀘𑁄𑀭𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀇𑀫𑀸𑀳𑀺 𑀘𑁄𑀭𑀻𑀳𑀺 𑀪𑀯𑀺𑀢𑀩𑁆𑀩𑀁, 𑀅𑀦𑁂𑀦 𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀫𑁂𑀳𑀺 𑀘𑀺𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀪𑀯𑀺𑀢𑀩𑁆𑀩𑀧𑀤𑀁 𑀦𑀺𑀘𑁆𑀘𑀁, 𑀲𑀩𑁆𑀩𑀜𑁆𑀜𑀼𑀯𑀭𑀲𑀸𑀲𑀦𑁂;

𑀧𑀞𑀫𑁂𑀓𑀯𑀘𑁄 𑀪𑀸𑀯-𑀯𑀸𑀘𑀓𑀜𑁆𑀘 𑀦𑀧𑀼𑀁𑀲𑀓𑀁.

𑀢𑀢𑀺𑀬𑀦𑁆𑀢𑀧𑀤𑁂𑀳𑁂𑀯𑀁-𑀲𑀤𑁆𑀤𑀸𑀤𑀻𑀳𑀺 ¶ 𑀘 𑀥𑀻𑀫𑀢𑀸;

𑀬𑁄𑀚𑁂𑀢𑀩𑁆𑀩𑀁𑀯 𑀲𑀫𑁆𑀪𑁄𑀢𑀺, 𑀇𑀢𑀺 𑀯𑀺𑀤𑁆𑀯𑀸 𑀯𑀺𑀪𑀸𑀯𑀬𑁂.

𑀅𑀬𑀁 ‘‘𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀤𑀲𑁆𑀲 𑀯𑀺𑀲𑁂𑀲𑁄.

𑀲𑁄𑀢𑁆𑀣𑀺 𑀪𑀤𑁆𑀤𑀦𑁆𑀢𑁂 𑀳𑁄𑀢𑀼 𑀭𑀜𑁆𑀜𑁄, 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺 𑀦𑁆𑀳𑀸𑀧𑀺𑀢𑁄. 𑀲𑁄𑀢𑁆𑀣𑀺𑀦𑀸𑀫𑁆𑀳𑀺 𑀲𑀫𑀼𑀝𑁆𑀞𑀺𑀢𑁄. 𑀲𑀼𑀯𑀢𑁆𑀣𑀺, 𑀲𑀼𑀯𑀢𑁆𑀣𑀺𑀁, 𑀲𑀼𑀯𑀢𑁆𑀣𑀺𑀦𑀸, 𑀅𑀬𑀁 𑀥𑀲𑀸𑀢𑁆𑀣𑀺𑀲𑀤𑁆𑀤𑀸𑀤𑀻𑀦𑀁 𑀯𑀺𑀲𑁂𑀲𑁄.

𑀅𑀬𑀁 𑀧𑀦 ‘‘𑀅𑀩𑁆𑀪𑀼𑀢𑀁 𑀅𑀪𑀽𑀢’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄. 𑀪𑀽𑀲𑀤𑁆𑀤𑀲𑁆𑀲 𑀩𑁆𑀪𑀽, 𑀲𑀁𑀬𑁄𑀕𑀧𑀭𑁂 𑀧𑀝𑀺𑀲𑁂𑀥𑀢𑁆𑀣𑀯𑀢𑀺 𑀅𑀇𑀢𑀺𑀦𑀺𑀧𑀸𑀢𑁂 𑀉𑀧𑀧𑀤𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀭𑀲𑁆𑀲𑀢𑁆𑀢𑀫𑀼𑀧𑀬𑀸𑀢𑀺. 𑀓𑁆𑀯𑀢𑁆𑀣𑁂? ‘‘𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢’’𑀦𑁆𑀢𑀺𑀆𑀤𑀻𑀲𑁆𑀯𑀢𑁆𑀣𑁂𑀲𑀼. 𑀢𑀣𑀸𑀯𑀺𑀥𑁂 𑀅𑀲𑀜𑁆𑀜𑁄𑀕𑀧𑀭𑁂 𑀭𑀲𑁆𑀲𑀢𑁆𑀢𑀁 𑀦 𑀉𑀧𑀬𑀸𑀢𑀺. 𑀓𑁆𑀯𑀢𑁆𑀣𑁂? ‘‘𑀅𑀲𑀘𑁆𑀘’’𑀦𑁆𑀢𑀺𑀆𑀤𑀻𑀲𑁆𑀯𑀢𑁆𑀣𑁂𑀲𑀼. 𑀢𑀣𑀸 𑀳𑀺 ‘‘𑀅𑀩𑁆𑀪𑀼𑀢’’𑀦𑁆𑀢𑀺 𑀧𑀤𑀲𑁆𑀲 ‘‘𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀅𑀩𑁆𑀪𑀼𑀢𑀓𑀭𑀡’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺. ‘‘𑀅𑀪𑀽𑀢’’𑀦𑁆𑀢𑀺 𑀧𑀤𑀲𑁆𑀲 𑀧𑀦 ‘‘𑀅𑀲𑀘𑁆𑀘’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀅𑀚𑀸𑀢’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺. 𑀢𑀢𑁆𑀭 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄 𑀅𑀩𑁆𑀪𑀼𑀢𑀁 𑀯𑀢 𑀪𑁄. 𑀅𑀘𑁆𑀙𑁂𑀭𑀁 𑀯𑀢 𑀮𑁄𑀓𑀲𑁆𑀫𑀺𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁’’ 𑀇𑀘𑁆𑀘𑁂𑀯𑀫𑀸𑀤𑀬𑁄 ‘‘𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢’’𑀦𑁆𑀢𑀺 𑀅𑀢𑁆𑀣𑁂 𑀧𑀬𑁄𑀕𑀸.

‘‘𑀢𑁆𑀯𑀁 𑀫𑀁 𑀦𑀸𑀕𑁂𑀦 𑀆𑀮𑀫𑁆𑀧,

𑀅𑀳𑀁 𑀫𑀡𑁆𑀟𑀽𑀓𑀙𑀸𑀧𑀺𑀬𑀸;

𑀳𑁄𑀢𑀼 𑀦𑁄 𑀅𑀩𑁆𑀪𑀼𑀢𑀁 𑀢𑀢𑁆𑀣,

𑀆𑀲𑀳𑀲𑁆𑀲𑁂𑀳𑀺 𑀧𑀜𑁆𑀘𑀳𑀻’’𑀢𑀺

𑀇𑀘𑁆𑀘𑁂𑀯𑀫𑀸𑀤𑀬𑁄 𑀅𑀩𑁆𑀪𑀼𑀢𑀓𑀭𑀡𑀢𑁆𑀣𑁂 𑀧𑀬𑁄𑀕𑀸. 𑀏𑀯𑀁 𑀭𑀲𑁆𑀲𑀯𑀲𑁂𑀦, 𑀤𑀻𑀖𑀯𑀲𑁂𑀦 𑀧𑀦 𑀦𑀺𑀲𑁆𑀲𑀁𑀬𑁄𑀕𑁂 ‘‘𑀅𑀪𑀽𑀢𑀁 𑀅𑀢𑀘𑁆𑀙𑀁. 𑀅𑀢𑀣𑀁’’𑀇𑀘𑁆𑀘𑁂𑀯𑀫𑀸𑀤𑀬𑁄 ¶ 𑀅𑀲𑀘𑁆𑀘𑀢𑁆𑀣𑁂 𑀧𑀬𑁄𑀕𑀸, ‘‘𑀅𑀪𑀽𑀢𑀁 𑀅𑀚𑀸𑀢𑀁 𑀅𑀲𑀜𑁆𑀚𑀸𑀢’’𑀦𑁆𑀢𑀺 𑀇𑀘𑁆𑀘𑁂𑀯𑀫𑀸𑀤𑀬𑁄 𑀅𑀚𑀸𑀢𑀢𑁆𑀣𑁂 𑀧𑀬𑁄𑀕𑀸. 𑀪𑀯𑀦𑁆𑀢𑀺 𑀘𑀢𑁆𑀭 𑁋

‘‘𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢’’𑀦𑁆𑀢𑀺, 𑀅𑀢𑁆𑀣𑀲𑁆𑀫𑀺𑀁 𑀅𑀩𑁆𑀪𑀼𑀢𑀦𑁆𑀢𑀺𑀤𑀁;

𑀧𑀤𑀁 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀭𑀲𑁆𑀲𑀪𑀸𑀯𑁂𑀦 𑀲𑀡𑁆𑀞𑀺𑀢𑀁.

𑀅𑀩𑁆𑀪𑀼𑀢𑀓𑀭𑀡𑀢𑁆𑀣𑁂𑀧𑀺, 𑀅𑀩𑁆𑀪𑀼𑀢𑀦𑁆𑀢𑀺 𑀧𑀤𑀁 𑀢𑀣𑀸;

𑀲𑀡𑁆𑀞𑀺𑀢𑀁 𑀭𑀲𑁆𑀲𑀪𑀸𑀯𑁂𑀦, 𑀇𑀢𑀺 𑀯𑀺𑀤𑁆𑀯𑀸 𑀯𑀺𑀪𑀸𑀯𑀬𑁂.

𑀅𑀪𑀽𑀢𑀫𑀺𑀢𑀺 𑀤𑀻𑀖𑀢𑁆𑀢-𑀯𑀲𑁂𑀦 𑀓𑀣𑀺𑀢𑀁 𑀧𑀦;

𑀧𑀤𑀁 𑀲𑀫𑀥𑀺𑀕𑀦𑁆𑀢𑀩𑁆𑀩-𑀫𑀲𑀘𑁆𑀘𑀸𑀚𑀸𑀢𑀯𑀸𑀘𑀓𑀁.

𑀅𑀩𑁆𑀪𑀼𑀢𑀁, 𑀅𑀩𑁆𑀪𑀼𑀢𑀸𑀦𑀺. 𑀘𑀺𑀢𑁆𑀢𑀦𑀬𑁂𑀦, 𑀅𑀩𑁆𑀪𑀼𑀢𑁄, 𑀅𑀩𑁆𑀪𑀼𑀢𑀸. 𑀅𑀩𑁆𑀪𑀼𑀢𑀁, 𑀧𑀼𑀭𑀺𑀲𑀦𑀬𑁂𑀦, 𑀅𑀩𑁆𑀪𑀼𑀢𑀸, 𑀅𑀩𑁆𑀪𑀼𑀢𑀸, 𑀅𑀩𑁆𑀪𑀼𑀢𑀸𑀬𑁄. 𑀅𑀩𑁆𑀪𑀼𑀢𑀁. 𑀓𑀜𑁆𑀜𑀸𑀦𑀬𑁂𑀦 𑀜𑁂𑀬𑁆𑀬𑀁. 𑀏𑀯𑀁 𑀪𑀽𑀢𑀲𑀤𑁆𑀤𑀲𑁆𑀲𑀧𑀺 𑀦𑀸𑀫𑀺𑀓𑀧𑀤𑀫𑀸𑀮𑀸 𑀢𑀺𑀥𑀸 𑀕𑀳𑁂𑀢𑀩𑁆𑀩𑀸. 𑀅𑀢𑁆𑀭 ‘‘𑀅𑀩𑁆𑀪𑀼𑀢’’𑀫𑀺𑀢𑀺 𑀧𑀤𑀁 𑀯𑀸𑀘𑁆𑀘𑀮𑀺𑀗𑁆𑀕𑀫𑁆𑀧𑀺 𑀪𑀯𑀢𑀺 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀫𑁆𑀧𑀺. ‘‘𑀅𑀪𑀽𑀢’’𑀫𑀺𑀢𑀺 𑀧𑀤𑀁 𑀧𑀦 𑀯𑀸𑀘𑁆𑀘𑀮𑀺𑀗𑁆𑀕𑀁 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀫𑁆𑀧𑀺 𑀯𑀸 𑀲𑀘𑁆𑀘𑀲𑀤𑁆𑀤𑁄 𑀯𑀺𑀬 𑀓𑀢𑁆𑀣𑀘𑀺. 𑀇𑀢𑀺𑀲𑁆𑀲 𑀬𑀣𑀸𑀭𑀳𑀁 𑀅𑀬𑀫𑁆𑀧𑀺 𑀲𑀧𑁆𑀧𑀬𑁄𑀕𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀆𑀕𑀫𑀺𑀓𑀸𑀦𑀁 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀤𑀲𑀫𑁄𑀥𑀸𑀦𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀩𑀼𑀤𑁆𑀥𑁄 𑀪𑀕𑀯𑀸, 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁, 𑀩𑀼𑀤𑁆𑀥𑁂 𑀪𑀕𑀯𑀦𑁆𑀢𑁂. 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸, 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀤𑀫𑀸𑀮𑀸 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀜𑁂𑀬𑁆𑀬𑀸.

𑀤𑁂𑀯𑀸 𑀢𑀸𑀯𑀢𑀺𑀁𑀲𑀸. 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂. 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀩𑀳𑀼𑀯𑀘𑀦𑀯𑀲𑁂𑀦 𑀜𑁂𑀬𑁆𑀬𑀸 𑀧𑀤𑀫𑀸𑀮𑀸.

𑀲𑁄 ¶ 𑀪𑀕𑀯𑀸 𑀚𑀸𑀦𑀁 𑀧𑀲𑁆𑀲𑀁 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀁 𑀪𑀕𑀯𑀦𑁆𑀢𑀁 𑀚𑀸𑀦𑀦𑁆𑀢𑀁 𑀧𑀲𑁆𑀲𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀢𑀲𑁆𑀲 𑀪𑀕𑀯𑀢𑁄 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀓𑀯𑀘𑀦𑀯𑀲𑁂𑀦 𑀜𑁂𑀬𑁆𑀬𑀸 𑀧𑀤𑀫𑀸𑀮𑀸.

𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑁄, 𑀭𑀸𑀚𑀸𑀦𑀁 𑀲𑀼𑀤𑁆𑀥𑁄𑀤𑀦𑀁, 𑀭𑀜𑁆𑀜𑀸 𑀲𑀼𑀤𑁆𑀥𑁄𑀤𑀦𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀭𑀸𑀚𑀸 𑀧𑀲𑁆𑀲𑁂𑀦𑀤𑀻 𑀓𑁄𑀲𑀮𑁄, 𑀭𑀸𑀚𑀸𑀦𑀁 𑀧𑀲𑁆𑀲𑁂𑀦𑀤𑀺𑀁 𑀓𑁄𑀲𑀮𑀁, 𑀭𑀜𑁆𑀜𑀸 𑀧𑀲𑁆𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄, 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁, 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄, 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁, 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻, 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸𑀢𑀺 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀫𑀳𑀸𑀧𑀚𑀸𑀧𑀢𑀺𑀬𑀁 𑀕𑁄𑀢𑀫𑀺𑀬𑀁, 𑀪𑁄𑀢𑀺 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀺.

𑀫𑀓𑁆𑀔𑀮𑀺 𑀕𑁄𑀲𑀸𑀮𑁄. 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁. 𑀫𑀓𑁆𑀔𑀮𑀺𑀦𑀸 𑀕𑁄𑀲𑀸𑀮𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀸𑀯𑀓𑀬𑀼𑀕𑀁. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀸𑀯𑀓𑀬𑀼𑀕𑀁, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀲𑀸𑀯𑀓𑀬𑀼𑀕𑁂𑀦, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 ¶ 𑀲𑀸𑀯𑀓𑀬𑀼𑀕𑀲𑁆𑀲. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑀩𑁆𑀩𑀸𑀧𑁂𑀢𑀸 𑀧𑀤𑀫𑀸𑀮𑀸 𑀏𑀓𑀯𑀘𑀦𑀯𑀲𑁂𑀦 𑀜𑁂𑀬𑁆𑀬𑀸. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀅𑀕𑁆𑀕𑀲𑀸𑀯𑀓𑀸, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀅𑀕𑁆𑀕𑀲𑀸𑀯𑀓𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀩𑀳𑀼𑀯𑀘𑀦𑀯𑀲𑁂𑀦 𑀜𑁂𑀬𑁆𑀬𑀸. 𑀇𑀢𑁄 𑀅𑀜𑁆𑀜𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑁄 𑀤𑀸𑀭𑁄, 𑀲𑀸 𑀤𑀸𑀭𑀸. 𑀲𑀁 𑀤𑀸𑀭𑀁, 𑀲𑁂 𑀤𑀸𑀭𑁂. 𑀲𑁂𑀦 𑀤𑀸𑀭𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑀸 𑀦𑀸𑀭𑀻, 𑀲𑀸 𑀦𑀸𑀭𑀺𑀬𑁄. 𑀲𑀁 𑀦𑀸𑀭𑀺𑀁, 𑀲𑀸 𑀦𑀸𑀭𑀺𑀬𑁄. 𑀲𑀸𑀬 𑀦𑀸𑀭𑀺𑀬𑀸. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑀁 𑀓𑀫𑁆𑀫𑀁, 𑀲𑀸𑀦𑀺 𑀓𑀫𑁆𑀫𑀸𑀦𑀺. 𑀲𑁂𑀦 𑀓𑀫𑁆𑀫𑁂𑀦. 𑀲𑀁 𑀨𑀮𑀁, 𑀲𑀸𑀦𑀺 𑀨𑀮𑀸𑀦𑀺. 𑀲𑁂𑀦 𑀨𑀮𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀧𑀞𑀫𑀁 𑀛𑀸𑀦𑀁, 𑀧𑀞𑀫𑀁 𑀛𑀸𑀦𑀁, 𑀧𑀞𑀫𑁂𑀦 𑀛𑀸𑀦𑁂𑀦, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀘𑀢𑀼𑀢𑁆𑀣𑀻 𑀤𑀺𑀲𑀸, 𑀘𑀢𑀼𑀢𑁆𑀣𑀺𑀁 𑀤𑀺𑀲𑀁, 𑀘𑀢𑀼𑀢𑁆𑀣𑀺𑀬𑀸 𑀤𑀺𑀲𑀸𑀬.

𑀥𑀫𑁆𑀫𑀻 𑀓𑀣𑀸, 𑀥𑀫𑁆𑀫𑀺𑀁 𑀓𑀣𑀁, 𑀥𑀫𑁆𑀫𑀺𑀬𑀸 𑀓𑀣𑀸𑀬, 𑀥𑀫𑁆𑀫𑀺𑀬𑀁 𑀓𑀣𑀸𑀬𑀁. 𑀏𑀯𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸, 𑀏𑀯𑀭𑀽𑀧𑀻 𑀓𑀣𑀸. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀧𑀤𑀲𑀫𑁄𑀥𑀸𑀦𑀯𑀲𑁂𑀦 𑀮𑀺𑀗𑁆𑀕𑀢𑁄 𑀘 𑀅𑀦𑁆𑀢𑀢𑁄 𑀘 𑀯𑀘𑀦𑀢𑁄 𑀘 𑀅𑀧𑁂𑀓𑁆𑀔𑀺𑀢𑀩𑁆𑀩𑀁. 𑀧𑀤𑀢𑁄 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀏𑀓𑀧𑁆𑀧𑀓𑀸𑀭𑀸𑀦𑀁 𑀲𑀤𑁆𑀤𑀸𑀦𑀁 𑀮𑀺𑀗𑁆𑀕𑀅𑀦𑁆𑀢𑀯𑀲𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀬𑀸𑀤𑀺𑀲𑁄, 𑀬𑀸𑀤𑀺𑀲𑀻, 𑀬𑀸𑀤𑀺𑀲𑀁. 𑀢𑀸𑀤𑀺𑀲𑁄, 𑀢𑀸𑀤𑀺𑀲𑀻, 𑀢𑀸𑀤𑀺𑀲𑀁. 𑀏𑀢𑀸𑀤𑀺𑀲𑁄, 𑀏𑀢𑀸𑀤𑀺𑀲𑀻, 𑀏𑀢𑀸𑀤𑀺𑀲𑀁. 𑀓𑀻𑀤𑀺𑀲𑁄, 𑀓𑀻𑀤𑀺𑀲𑀻, 𑀓𑀻𑀤𑀺𑀲𑀁. 𑀈𑀤𑀺𑀲𑁄, 𑀈𑀤𑀺𑀲𑀻, 𑀈𑀤𑀺𑀲𑀁. 𑀏𑀤𑀺𑀲𑁄 ¶ , 𑀏𑀤𑀺𑀲𑀻, 𑀏𑀤𑀺𑀲𑀁. 𑀲𑀤𑀺𑀲𑁄, 𑀲𑀤𑀺𑀲𑀻, 𑀲𑀤𑀺𑀲𑀁. 𑀓𑀤𑀸𑀘𑀺 𑀧𑀦 ‘‘𑀬𑀸𑀤𑀺𑀲𑀸 𑀢𑀸𑀤𑀺𑀲𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺𑀧𑀺 𑀪𑀯𑀦𑁆𑀢𑀺. 𑀦𑀸𑀫𑀺𑀓𑀧𑀤𑀫𑀸𑀮𑀸 𑀦𑁂𑀲𑀁 𑀧𑀼𑀭𑀺𑀲 𑀇𑀢𑁆𑀣𑀻 𑀘𑀺𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀲𑀫𑀸𑀲𑀢𑀤𑁆𑀥𑀺𑀢𑀧𑀤𑀪𑀽𑀢𑀸𑀦𑀁 𑀅𑀫𑀫𑀲𑀤𑁆𑀤𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀅𑀫𑀫𑁄, 𑀅𑀫𑀫𑀸, 𑀅𑀫𑀫𑀁, 𑀅𑀫𑀫𑁂. 𑀅𑀫𑀫𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀫𑀬𑁆𑀳𑀓𑁄, 𑀫𑀬𑁆𑀳𑀓𑀸. 𑀫𑀬𑁆𑀳𑀓𑀁, 𑀫𑀬𑁆𑀳𑀓𑁂. 𑀫𑀬𑁆𑀳𑀓𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀆𑀫𑀸, 𑀆𑀫𑀸, 𑀆𑀫𑀸𑀬𑁄. 𑀆𑀫𑀁, 𑀆𑀫𑀸, 𑀆𑀫𑀸𑀬𑁄. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀢𑀢𑁆𑀭 𑀅𑀫𑀫𑁄𑀢𑀺 𑀦𑀢𑁆𑀣𑀺 𑀢𑀡𑁆𑀳𑀸𑀫𑀫𑀢𑁆𑀢𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘 𑀏𑀢𑀲𑁆𑀲𑀸𑀢𑀺 𑀅𑀫𑀫𑁄, 𑀓𑁄 𑀲𑁄, 𑀅𑀭𑀳𑀸𑀬𑁂𑀯𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀺𑀘 𑀬𑁂𑀲𑀢𑀡𑁆𑀳𑀸𑀧𑀺 𑀲𑀤𑀺𑀝𑁆𑀞𑀻𑀧𑀺 ‘‘𑀫𑀫 𑀇𑀤’’𑀦𑁆𑀢𑀺 𑀫𑀫𑀢𑁆𑀢𑀁 𑀦 𑀓𑀭𑁄𑀦𑁆𑀢𑀺, 𑀢𑁂𑀧𑀺 𑀅𑀫𑀫𑀸𑀬𑁂𑀯. 𑀏𑀢𑁆𑀣 𑀘 ‘‘𑀫𑀦𑀼𑀲𑁆𑀲𑀸 𑀢𑀢𑁆𑀣 𑀚𑀸𑀬𑀦𑁆𑀢𑀺, 𑀅𑀫𑀫𑀸 𑀅𑀧𑀭𑀺𑀕𑁆𑀕𑀳𑀸’’𑀢𑀺 𑀇𑀤𑀁 𑀲𑀸𑀲𑀦𑀢𑁄 𑀦𑀺𑀤𑀲𑁆𑀲𑀦𑀁. ‘‘𑀅𑀫𑀫𑁄 𑀦𑀺𑀭𑀳𑀗𑁆𑀓𑀸𑀭𑁄’’𑀢𑀺 𑀇𑀤𑀁 𑀧𑀦 𑀮𑁄𑀓𑀢𑁄 𑀦𑀺𑀤𑀲𑁆𑀲𑀦𑀁. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀅𑀫𑀫𑀸, 𑀅𑀫𑀫𑀸, 𑀅𑀫𑀫𑀸𑀬𑁄’’𑀢𑀺 𑀧𑀤𑀫𑀸𑀮𑀸. 𑀦𑀧𑀼𑀁𑀲𑀓𑁂 𑀯𑀢𑁆𑀢𑀩𑁆𑀩𑁂 ‘‘𑀅𑀫𑀫𑀁, 𑀅𑀫𑀫𑀸𑀦𑀻’’𑀢𑀺 𑀧𑀤𑀫𑀸𑀮𑀸. 𑀢𑀢𑁆𑀭 𑀫𑀬𑁆𑀳𑀓𑁄𑀢𑀺 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁 𑀇𑀤𑀫𑁆𑀧𑀺 𑀫𑀬𑁆𑀳’’𑀦𑁆𑀢𑀺 𑀯𑀺𑀧𑁆𑀧𑀮𑀧𑀢𑀻𑀢𑀺 𑀫𑀬𑁆𑀳𑀓𑁄, 𑀏𑀓𑁄 𑀧𑀓𑁆𑀔𑀺𑀯𑀺𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀚𑀸𑀢𑀓𑁂 𑁋

‘‘𑀲𑀓𑀼𑀡𑁄 𑀫𑀬𑁆𑀳𑀓𑁄 𑀦𑀸𑀫, 𑀕𑀺𑀭𑀺𑀲𑀸𑀦𑀼𑀤𑀭𑀻𑀘𑀭𑁄;

𑀧𑀓𑁆𑀓𑀁 𑀧𑀺𑀧𑁆𑀨𑀮𑀺𑀫𑀸𑀭𑀼𑀬𑁆𑀳, ‘𑀫𑀬𑁆𑀳𑀁 𑀫𑀬𑁆𑀳’𑀦𑁆𑀢𑀺 𑀓𑀦𑁆𑀤𑀢𑀻’’𑀢𑀺.

𑀇𑀢𑁆𑀣𑀺𑀮𑀺𑀗𑁆𑀕𑁂 𑀯𑀢𑁆𑀢𑀩𑁆𑀩𑁂 ‘‘𑀫𑀬𑁆𑀳𑀓𑀻, 𑀫𑀬𑁆𑀳𑀓𑀻, 𑀫𑀬𑁆𑀳𑀓𑀺𑀬𑁄’’𑀢𑀺 𑀧𑀤𑀫𑀸𑀮𑀸. 𑀢𑀢𑁆𑀭 𑀆𑀫𑀸𑀢𑀺 ‘‘𑀆𑀫 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀤𑀸𑀲𑀻’’𑀢𑀺 𑀏𑀯𑀁 𑀤𑀸𑀲𑀺𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀫𑀸. 𑀕𑁂𑀳𑀤𑀸𑀲𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀚𑀸𑀢𑀓𑁂𑀲𑀼 ¶ ‘‘𑀬𑀢𑁆𑀣 𑀤𑀸𑀲𑁄 𑀆𑀫𑀚𑀸𑀢𑁄, 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀕𑀘𑁆𑀙𑀢𑀻’’𑀢𑀺 𑀘, ‘‘𑀆𑀫𑀸𑀬 𑀤𑀸𑀲𑀸𑀧𑀺 𑀪𑀯𑀦𑁆𑀢𑀺 𑀮𑁄𑀓𑁂’’𑀢𑀺 𑀘, 𑀢𑀲𑁆𑀫𑀸 𑀇𑀫𑀸𑀦𑁂𑀯𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀇𑀤𑀸𑀦𑀺 𑀓𑀢𑀺 𑀓𑀢𑀺𑀧𑀬 𑀓𑀢𑀺𑀫𑀻𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑁂 𑀬𑀣𑀸𑀭𑀳𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀘. 𑀢𑀢𑁆𑀭 𑀓𑀢𑀺𑀫𑀻𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀦 𑀮𑀩𑁆𑀪𑀢𑀺 ‘‘𑀅𑀚𑁆𑀚 𑀪𑀦𑁆𑀢𑁂 𑀓𑀢𑀺𑀫𑀻’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀯𑀲𑁂𑀦 𑀆𑀕𑀢𑀫𑀢𑁆𑀢𑀢𑁄. 𑀓𑀢𑀺 𑀓𑀢𑀺𑀧𑀬𑀲𑀤𑁆𑀤𑀸𑀦𑀁 𑀧𑀦 𑀮𑀩𑁆𑀪𑀢𑁂𑀯, 𑀲𑀸 𑀘 𑀩𑀳𑀼𑀯𑀘𑀦𑀺𑀓𑀸. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 𑀓𑀢𑀺𑀧𑀬𑀲𑀤𑁆𑀤𑁄 𑀏𑀓𑀯𑀘𑀦𑀺𑀓𑁄 𑀯𑀼𑀢𑁆𑀢𑁄. 𑀓𑀢𑀺 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺, 𑀓𑀢𑀺 𑀧𑀼𑀭𑀺𑀲𑁂 𑀧𑀲𑁆𑀲𑀢𑀺. 𑀓𑀢𑀺 𑀇𑀢𑁆𑀣𑀺𑀬𑁄, 𑀓𑀢𑀺 𑀓𑀼𑀮𑀸𑀦𑀺. 𑀓𑀢𑀺 𑀮𑁄𑀓𑀲𑁆𑀫𑀺𑀁 𑀙𑀺𑀤𑁆𑀤𑀸𑀦𑀺 𑀬𑀢𑁆𑀣 𑀘𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀺. 𑀓𑀢𑀺 𑀓𑀼𑀲𑀮𑀸. 𑀓𑀢𑀺 𑀥𑀸𑀢𑀼𑀬𑁄. 𑀓𑀢𑀺 𑀆𑀬𑀢𑀦𑀸𑀦𑀺. 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀓𑀢𑀺𑀳𑀸𑀬𑀢𑀦𑁂𑀳𑀺 𑀓𑀢𑀺𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀁. 𑀓𑀢𑀺𑀪𑀺 𑀭𑀚𑀫𑀸𑀦𑁂𑀢𑀺, 𑀓𑀢𑀺𑀪𑀺 𑀧𑀭𑀺𑀲𑀼𑀚𑁆𑀛𑀢𑀺. 𑀓𑀢𑀺𑀧𑀬𑀸 𑀧𑀼𑀭𑀺𑀲𑀸, 𑀓𑀢𑀺𑀧𑀬𑀸 𑀇𑀢𑁆𑀣𑀺𑀬𑁄, 𑀓𑀢𑀺𑀧𑀬𑀸𑀦𑀺 𑀘𑀺𑀢𑁆𑀢𑀸𑀦𑀺. 𑀇𑀫𑀸 𑀧𑀦 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀓𑀢𑀺. 𑀓𑀢𑀺𑀳𑀺, 𑀓𑀢𑀺𑀪𑀺. 𑀓𑀢𑀺𑀦𑀁. 𑀓𑀢𑀺𑀲𑀼.

𑀓𑀢𑀺𑀧𑀬𑀸. 𑀓𑀢𑀺𑀧𑀬𑁂𑀳𑀺, 𑀓𑀢𑀺𑀧𑀬𑁂𑀪𑀺. 𑀓𑀢𑀺𑀧𑀬𑀸𑀦𑀁. 𑀓𑀢𑀺𑀧𑀬𑁂𑀲𑀼. 𑀓𑀢𑀺𑀧𑀬𑀸𑀬𑁄. 𑀓𑀢𑀺𑀧𑀬𑀸𑀳𑀺, 𑀓𑀢𑀺𑀧𑀬𑀸𑀪𑀺. 𑀓𑀢𑀺𑀧𑀬𑀸𑀦𑀁. 𑀓𑀢𑀺𑀧𑀬𑀸𑀲𑀼. 𑀓𑀢𑀺𑀧𑀬𑀸𑀦𑀺. 𑀓𑀢𑀺𑀧𑀬𑁂. 𑀓𑀢𑀺𑀧𑀬𑁂𑀳𑀺, 𑀓𑀢𑀺𑀧𑀬𑁂𑀪𑀺. 𑀓𑀢𑀺𑀧𑀬𑀸𑀦𑀁. 𑀓𑀢𑀺𑀧𑀬𑁂𑀲𑀽𑀢𑀺. 𑀲𑀩𑁆𑀩𑀸𑀧𑁂𑀢𑀸 𑀲𑀢𑁆𑀢𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀲𑁂𑀦 𑀜𑁂𑀬𑁆𑀬𑀸, 𑀲𑀫𑀸𑀲𑀯𑀺𑀥𑀺𑀫𑁆𑀳𑀺𑀧𑀺 𑀓𑀢𑀺 ¶ 𑀓𑀢𑀺𑀧𑀬𑀲𑀤𑁆𑀤𑀸 𑀩𑀳𑀼𑀯𑀘𑀦𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸. ‘‘𑀓𑀢𑀺𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀢𑀺𑀧𑀬𑀚𑀦𑀓𑀢’’𑀦𑁆𑀢𑀺𑀆𑀤𑀻𑀲𑀼 𑀳𑀺 ‘‘𑀓𑀢𑀺 𑀓𑀺𑀢𑁆𑀢𑀓𑀸 𑀲𑀗𑁆𑀕𑀸 𑀓𑀢𑀺𑀲𑀗𑁆𑀕𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀤𑀸 𑀩𑀳𑀼𑀯𑀘𑀦𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄.

𑀇𑀤𑀸𑀦𑀺 𑀭𑀽𑀴𑁆𑀳𑀻𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋 𑀇𑀥 𑀭𑀽𑀴𑁆𑀳𑀻𑀲𑀤𑁆𑀤𑀸 𑀦𑀸𑀫 𑀬𑁂𑀯𑀸𑀧𑀦𑀓𑀲𑀤𑁆𑀤𑀸𑀤𑀬𑁄. 𑀬𑁂𑀯𑀸𑀧𑀦𑀓𑁄, 𑀬𑁂𑀯𑀸𑀧𑀦𑀓𑀸. 𑀬𑁂𑀯𑀸𑀧𑀦𑀓𑀁. 𑀬𑁂𑀯𑀸𑀧𑀦𑁄, 𑀬𑁂𑀯𑀸𑀧𑀦𑀸. 𑀬𑁂𑀯𑀸𑀧𑀦𑀁. 𑀬𑀁𑀯𑀸𑀧𑀦𑀓𑀁, 𑀬𑀁𑀯𑀸𑀧𑀦𑀓𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁆𑀭 𑀬𑁂𑀯𑀸𑀧𑀦𑀓𑁄𑀢𑀺 ‘‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀲𑀭𑀽𑀧𑀢𑁄 𑀅𑀯𑀢𑁆𑀯𑀸 ‘‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀁 ‘‘𑀬𑁂𑀯𑀸𑀧𑀦𑀸’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑁄 𑀬𑁂𑀯𑀸𑀧𑀦𑀓𑁄, 𑀏𑀯𑀁 ‘‘𑀬𑁂𑀯𑀸𑀧𑀦𑁄’’𑀢𑀺 𑀏𑀢𑁆𑀣𑀸𑀧𑀺. 𑀢𑀣𑀸 ‘‘𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧’’𑀦𑁆𑀢𑀺 𑀏𑀯𑀁 ‘‘𑀬𑀁𑀯𑀸𑀧𑀦𑀸’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑀁 𑀬𑀁𑀯𑀸𑀧𑀦𑀓𑀁. 𑀏𑀲 𑀦𑀬𑁄 𑀬𑀣𑀸𑀭𑀳𑀁 𑀬𑀲𑁆𑀲𑀓𑀁 𑀬𑀢𑁆𑀣𑀓𑀦𑁆𑀢𑀺𑀆𑀤𑀻𑀲𑀼𑀧𑀺 𑀦𑁂𑀢𑀩𑁆𑀩𑁄.

𑀏𑀢𑁆𑀣 𑀲𑀺𑀬𑀸 𑁋 𑀦𑀦𑀼 𑀘 𑀪𑁄 𑀧𑀦𑀲𑀤𑁆𑀤𑁄 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀸𑀦𑀜𑁆𑀘 𑀅𑀩𑁆𑀬𑀬𑀪𑀸𑀯𑁄 𑀲𑀺𑀤𑁆𑀥𑁄 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀲𑀩𑁆𑀩𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀘 𑀯𑀬𑀸𑀪𑀸𑀯𑀢𑁄, 𑀲𑁄 𑀓𑀲𑁆𑀫𑀸 ‘‘𑀬𑁂𑀯𑀸𑀧𑀦𑁄’’𑀢𑀺 𑀑𑀓𑀸𑀭𑀦𑁆𑀢𑁄 𑀚𑀸𑀢𑁄𑀢𑀺? 𑀲𑀘𑁆𑀘𑀁 𑀧𑀦𑀲𑀤𑁆𑀤𑁄 𑀦𑀺𑀧𑀸𑀢𑁄, 𑀲𑁄 𑀘 𑀔𑁄 ‘‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸, ‘‘𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻’’𑀢𑀺 𑀯𑀸, ‘‘𑀩𑁆𑀭𑀸𑀳𑁆𑀫𑀡𑀸 𑀧𑀦𑀸’’𑀢𑀺 𑀯𑀸 𑀏𑀯𑀫𑀸𑀤𑀻𑀲𑀼 𑀦𑀺𑀧𑀸𑀢𑁄, ‘‘𑀬𑁂𑀯𑀸𑀧𑀦𑀓𑁄’’𑀢𑀺 𑀯𑀸, ‘‘𑀬𑁂𑀯𑀸𑀧𑀦𑁄’’𑀢𑀺 𑀯𑀸 𑀏𑀯𑀫𑀸𑀤𑀻𑀲𑀼 𑀦𑀺𑀧𑀸𑀢𑁄 𑀦𑀸𑀫 𑀦 𑀳𑁄𑀢𑀺. 𑀅𑀦𑀼𑀓𑀭𑀡𑀫𑀢𑁆𑀢𑀜𑁆𑀳𑁂𑀢𑀁, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀧𑀦𑀲𑀤𑁆𑀤𑀲𑀳𑀺𑀢𑀸 𑀧𑀬𑁄𑀕𑀸 𑀭𑀽𑀴𑁆𑀳𑀻𑀲𑀤𑁆𑀤𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀬𑀚𑁆𑀚𑁂𑀯𑀁 𑀓𑀲𑁆𑀫𑀸 𑀦𑀺𑀩𑁆𑀩𑀘𑀦𑀫𑀼𑀤𑀸𑀳𑀝𑀦𑁆𑀢𑀺? 𑀅𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁.

𑀢𑀬𑁄𑀥𑀫𑁆𑀫𑀚𑀸𑀢𑀓𑀁 ¶ . 𑀢𑀬𑁄𑀥𑀫𑁆𑀫𑀚𑀸𑀢𑀓𑀁. 𑀢𑀬𑁄𑀥𑀫𑁆𑀫𑀚𑀸𑀢𑀓𑁂𑀦. 𑀢𑀬𑁄𑀥𑀫𑁆𑀫𑀚𑀸𑀢𑀓𑀲𑁆𑀲. 𑀢𑀬𑁄𑀥𑀫𑁆𑀫𑀚𑀸𑀢𑀓𑀸, 𑀢𑀬𑁄𑀥𑀫𑁆𑀫𑀚𑀸𑀢𑀓𑀲𑁆𑀫𑀸. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀢𑀬𑁄𑀲𑀗𑁆𑀔𑀸𑀭𑀸. 𑀢𑀬𑁄𑀲𑀗𑁆𑀔𑀸𑀭𑁂. 𑀢𑀬𑁄𑀲𑀗𑁆𑀔𑀸𑀭𑁂𑀳𑀺, 𑀢𑀬𑁄𑀲𑀗𑁆𑀔𑀸𑀭𑁂𑀪𑀺. 𑀢𑀬𑁄𑀲𑀗𑁆𑀔𑀸𑀭𑀸𑀦𑀁. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀘𑀢𑁆𑀢𑀸𑀭𑀺𑀧𑀼𑀭𑀺𑀲𑀬𑀼𑀕𑁄 𑀲𑀗𑁆𑀖𑁄. 𑀘𑀢𑁆𑀢𑀸𑀭𑀺𑀧𑀼𑀭𑀺𑀲𑀬𑀼𑀕𑀁 𑀲𑀗𑁆𑀖𑀁. 𑀘𑀢𑁆𑀢𑀸𑀭𑀺𑀧𑀼𑀭𑀺𑀲𑀬𑀼𑀕𑁂𑀦 𑀲𑀗𑁆𑀖𑁂𑀦. 𑀘𑀢𑁆𑀢𑀸𑀭𑀺𑀧𑀼𑀭𑀺𑀲𑀬𑀼𑀕𑀲𑁆𑀲 𑀲𑀗𑁆𑀖𑀲𑁆𑀲. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀲𑀢𑁄𑀓𑀸𑀭𑀻, 𑀲𑀢𑁄𑀓𑀸𑀭𑀻, 𑀲𑀢𑁄𑀓𑀸𑀭𑀺𑀦𑁄. 𑀲𑀢𑁄𑀓𑀸𑀭𑀺𑀁, 𑀲𑀢𑁄𑀓𑀸𑀭𑀻, 𑀲𑀢𑁄𑀓𑀸𑀭𑀺𑀦𑁄. 𑀲𑀢𑁄𑀓𑀸𑀭𑀺𑀦𑀸, 𑀲𑀢𑁄𑀓𑀸𑀭𑀻𑀳𑀺, 𑀲𑀢𑁄𑀓𑀸𑀭𑀻𑀪𑀺. 𑀲𑀢𑁄𑀓𑀸𑀭𑀺𑀲𑁆𑀲. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀢𑁆𑀣 𑀲𑀢𑁄𑀓𑀸𑀭𑀻𑀢𑀺 𑀲𑀭𑀢𑀻𑀢𑀺 𑀲𑀢𑁄, 𑀲𑀢𑁄 𑀏𑀯 𑀳𑀼𑀢𑁆𑀯𑀸 𑀓𑀭𑀡𑀲𑀻𑀮𑁄𑀢𑀺 𑀲𑀢𑁄𑀓𑀸𑀭𑀻.

𑀅𑀧𑀭𑁂𑀲𑀫𑁆𑀧𑀺 𑀭𑀽𑀴𑁆𑀳𑀻𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑀲𑀤𑁆𑀥𑀺𑀫𑀢𑁆𑀣𑀯𑀺𑀪𑀸𑀯𑀦𑀸𑀬. 𑀅𑀗𑁆𑀕𑀸. 𑀅𑀗𑁆𑀕𑁂. 𑀅𑀗𑁆𑀕𑁂𑀳𑀺, 𑀅𑀗𑁆𑀕𑁂𑀪𑀺. 𑀅𑀗𑁆𑀕𑀸𑀦𑀁. 𑀅𑀗𑁆𑀕𑁂𑀳𑀺, 𑀅𑀗𑁆𑀕𑁂𑀪𑀺. 𑀅𑀗𑁆𑀕𑀸𑀦𑀁. 𑀅𑀗𑁆𑀕𑁂𑀲𑀼. 𑀪𑁄𑀦𑁆𑀢𑁄 𑀅𑀗𑁆𑀕𑀸.

𑀅𑀗𑁆𑀕𑀸 𑀚𑀦𑀧𑀤𑁄. 𑀅𑀗𑁆𑀕𑁂 𑀚𑀦𑀧𑀤𑀁. 𑀅𑀗𑁆𑀕𑁂𑀳𑀺, 𑀅𑀗𑁆𑀕𑁂𑀪𑀺 𑀚𑀦𑀧𑀤𑁂𑀦. 𑀅𑀗𑁆𑀕𑀸𑀦𑀁 𑀚𑀦𑀧𑀤𑀲𑁆𑀲. 𑀅𑀗𑁆𑀕𑁂𑀳𑀺, 𑀅𑀗𑁆𑀕𑁂𑀪𑀺 𑀚𑀦𑀧𑀤𑀲𑁆𑀫𑀸. 𑀅𑀗𑁆𑀕𑀸𑀦𑀁 𑀚𑀦𑀧𑀤𑀲𑁆𑀲. 𑀅𑀗𑁆𑀕𑁂𑀲𑀼 𑀚𑀦𑀧𑀤𑁂. 𑀪𑁄𑀦𑁆𑀢𑁄 𑀅𑀗𑁆𑀕𑀸 𑀚𑀦𑀧𑀤. 𑀏𑀯𑀁 𑀫𑀕𑀥𑀓𑁄𑀲𑀮𑀸𑀤𑀻𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀇𑀢𑁆𑀣𑀺𑀮𑀺𑀗𑁆𑀕𑁂 𑀓𑀸𑀲𑀻, 𑀓𑀸𑀲𑀺𑀬𑁄, 𑀓𑀸𑀲𑀻, 𑀓𑀸𑀲𑀺𑀬𑁄. 𑀓𑀸𑀲𑀻𑀳𑀺, 𑀓𑀸𑀲𑀻𑀪𑀺. 𑀓𑀸𑀲𑀻𑀦𑀁. 𑀓𑀸𑀲𑀻𑀳𑀺, 𑀓𑀸𑀲𑀻𑀪𑀺. 𑀓𑀸𑀲𑀻𑀦𑀁. 𑀓𑀸𑀲𑀻𑀲𑀼. 𑀪𑁄𑀢𑀺𑀬𑁄 𑀓𑀸𑀲𑀺𑀬𑁄. 𑀅𑀢𑁆𑀭𑀸𑀬𑀫𑀢𑁆𑀣𑀯𑀺𑀪𑀸𑀯𑀦𑀸 𑁋 𑀓𑀸𑀲𑀻, 𑀓𑀸𑀲𑀺𑀬𑁄 𑀚𑀦𑀧𑀤𑁄. 𑀓𑀸𑀲𑀻, 𑀓𑀸𑀲𑀺𑀬𑁄 𑀚𑀦𑀧𑀤𑀁 ¶ . 𑀓𑀸𑀲𑀻𑀳𑀺, 𑀓𑀸𑀲𑀻𑀪𑀺 𑀚𑀦𑀧𑀤𑁂𑀦. 𑀓𑀸𑀲𑀻𑀦𑀁 𑀚𑀦𑀧𑀤𑀲𑁆𑀲. 𑀓𑀸𑀲𑀻𑀳𑀺, 𑀓𑀸𑀲𑀻𑀪𑀺 𑀚𑀦𑀧𑀤𑀲𑁆𑀫𑀸. 𑀓𑀸𑀲𑀻𑀦𑀁 𑀚𑀦𑀧𑀤𑀲𑁆𑀲. 𑀓𑀸𑀲𑀻𑀲𑀼 𑀚𑀦𑀧𑀤𑁂. 𑀪𑁄𑀢𑀺𑀬𑁄 𑀓𑀸𑀲𑀺𑀬𑁄 𑀚𑀦𑀧𑀤. 𑀏𑀯𑀁 𑀅𑀯𑀦𑁆𑀢𑀻𑀘𑁂𑀢𑀻 𑀯𑀚𑁆𑀚𑀻 𑀇𑀘𑁆𑀘𑁂𑀢𑁂𑀲𑀫𑁆𑀧𑀺 𑀧𑀤𑀸𑀦𑀁 𑀬𑁄𑀚𑁂𑀢𑀩𑁆𑀩𑀸. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀓𑀼𑀭𑀽𑀲𑀼 𑀚𑀦𑀧𑀤𑁂’’𑀢𑀺. 𑀏𑀯𑀁 𑀅𑀗𑁆𑀕𑀸𑀤𑀻𑀦𑀺 𑀅𑀢𑁆𑀣𑀲𑁆𑀲 𑀏𑀓𑀢𑁆𑀢𑁂𑀧𑀺 𑀚𑀦𑀧𑀤𑀦𑀸𑀫𑀢𑁆𑀢𑀸 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀼𑀯𑀘𑀦𑀸𑀦𑁂𑀯 𑀪𑀯𑀦𑁆𑀢𑀺. 𑀢𑀣𑀸 𑀳𑀺 𑀢𑀢𑁆𑀣 𑀢𑀢𑁆𑀣 ‘‘𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀺. 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺𑀆𑀤𑀺𑀦𑀸, ‘‘𑀅𑀗𑁆𑀕𑀸𑀦𑀁 𑀫𑀕𑀥𑀸𑀦𑀁 𑀓𑀸𑀲𑀻𑀦𑀁 𑀓𑁄𑀲𑀮𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀩𑀳𑀼𑀯𑀘𑀦𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀭𑀽𑀴𑁆𑀳𑀻𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀦𑁆𑀢𑀺.

𑀇𑀤𑀸𑀦𑀺 𑀅𑀧𑀭𑀸𑀧𑀺 𑀇𑀢𑁄 𑀲𑀯𑀺𑀲𑁂𑀲𑀢𑀭𑀸 𑀲𑀤𑁆𑀤𑀪𑁂𑀤𑁂 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀓𑀸𑀭𑀺𑀓𑀸 𑀧𑀭𑀫𑀲𑀼𑀔𑀼𑀫𑀜𑀸𑀡𑀸𑀯𑀳𑀸 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀓𑀣𑀬𑀸𑀫 𑀲𑁄𑀢𑀽𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂 𑀧𑀭𑀫𑀓𑁄𑀲𑀮𑁆𑀮𑀲𑀫𑁆𑀧𑀸𑀤𑀦𑀢𑁆𑀣𑀁. 𑀢𑀸 𑀘 𑀔𑁄 ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀺. 𑀓𑀲𑁆𑀲𑀓𑁄 𑀧𑀝𑀺𑀚𑀸𑀦𑀸𑀲𑀺. 𑀉𑀧𑀸𑀲𑀓𑁄 𑀧𑀝𑀺𑀚𑀸𑀦𑀸𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀬𑁄 𑀧𑀸𑀴𑀺𑀦𑀬𑁂 𑀦𑀺𑀲𑁆𑀲𑀸𑀬𑁂𑀯. 𑀢𑀢𑁆𑀣 𑀲𑀫𑁆𑀩𑀼𑀤𑁆𑀥𑁄𑀧𑀝𑀺𑀚𑀸𑀦𑀸𑀲𑀻𑀢𑀺 ‘‘𑀢𑁆𑀯𑀁 ‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀝𑀺𑀚𑀸𑀦𑀸𑀲𑀻’’𑀢𑀺 𑀇𑀢𑀺𑀲𑀤𑁆𑀤𑀮𑁄𑀧𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 ‘‘𑀓𑀲𑁆𑀲𑀓𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺𑀆𑀤𑀻𑀲𑀼𑀧𑀺. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺 𑀏𑀢𑁆𑀣 𑀧𑀦 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀢𑀯𑀸𑀢𑀺 𑀏𑀯𑀁 𑀇𑀢𑀺𑀲𑀤𑁆𑀤𑀮𑁄𑀧𑀬𑁄𑀚𑀦𑀸𑀯𑀲𑁂𑀦 𑀅𑀜𑁆𑀜𑁄 𑀲𑀤𑁆𑀤𑀲𑀦𑁆𑀦𑀺𑀯𑁂𑀲𑁄 𑀢𑁂𑀦𑁂𑀯 𑀅𑀜𑁆𑀜𑁄 𑀅𑀢𑁆𑀣𑀧𑀝𑀺𑀯𑁂𑀥𑁄 𑀘 𑀪𑀯𑀢𑀺. ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺’’𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 ¶ 𑀏𑀯𑀁 𑀧𑀝𑀺𑀚𑀸𑀦𑀢𑁄 𑀢𑀯𑀸𑀢𑀺 𑀬𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀲𑁄𑀧𑀺 𑀬𑀣𑀸𑀤𑀲𑁆𑀲𑀺𑀢𑁄 𑀅𑀢𑁆𑀣𑁄𑀬𑁂𑀯. 𑀏𑀯𑀁𑀧𑀓𑀸𑀭𑀁 𑀜𑀢𑁆𑀯𑀸 𑀧𑀡𑁆𑀟𑀺𑀢𑀚𑀸𑀢𑀺𑀬𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀅𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑀸 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’𑀢𑀺 𑀢𑁆𑀯𑀁 𑀧𑀝𑀺𑀚𑀸𑀦𑀸𑀲𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀓𑁆𑀭𑀺𑀬𑀸𑀧𑀤𑀸 𑀅𑀬𑀁 𑀧𑀤𑀫𑀸𑀮𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸 𑁋

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁆𑀯𑀁 𑀧𑀝𑀺𑀚𑀸𑀦𑀁 𑀢𑀺𑀝𑁆𑀞𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀢𑀁 𑀧𑀝𑀺𑀚𑀸𑀦𑀦𑁆𑀢𑀁 𑀧𑀲𑁆𑀲𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑁂 𑀧𑀝𑀺𑀚𑀸𑀦𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀤𑀻𑀬𑀢𑁂. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀫𑀸 𑀢𑀬𑀸 𑀧𑀝𑀺𑀚𑀸𑀦𑀢𑀸 𑀅𑀧𑁂𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀥𑀫𑁆𑀫𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀫𑀺𑀁 𑀢𑀬𑀺 𑀧𑀝𑀺𑀚𑀸𑀦𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺. 𑀢𑀣𑀸 ‘‘𑀔𑀻𑀡𑀸𑀲𑀯𑁄 𑀢𑁆𑀯𑀁 𑀧𑀝𑀺𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺. 𑀇𑀤𑁆𑀥𑀺𑀫𑀦𑁆𑀢𑁄 𑀪𑀺𑀓𑁆𑀔𑀽 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀅𑀬𑀫𑁆𑀧𑀺 𑀲𑀓𑁆𑀭𑀺𑀬𑀸𑀧𑀤𑀸 𑀧𑀤𑀫𑀸𑀮𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸 𑁋

𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑁄 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑁄 𑀪𑀺𑀓𑁆𑀔𑀼 𑀢𑀺𑀝𑁆𑀞𑀢𑀺, 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀸 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀸 𑀪𑀺𑀓𑁆𑀔𑀽 𑀢𑀺𑀝𑁆𑀞𑀦𑁆𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀁 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑁂 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑁂 𑀪𑀺𑀓𑁆𑀔𑀽 𑀧𑀲𑁆𑀲𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑁂𑀦 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑁂𑀳𑀺 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀲𑁆𑀲 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀻𑀬𑀢𑁂. 𑀲𑁂𑀲𑀁 ¶ 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀪𑁄 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢 𑀪𑀺𑀓𑁆𑀔𑀼 𑀢𑁆𑀯𑀁 𑀥𑀫𑁆𑀫𑀁 𑀤𑁂𑀲𑁂𑀳𑀺, 𑀪𑁄𑀦𑁆𑀢𑁄 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀸 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀸 𑀢𑀼𑀫𑁆𑀳𑁂 𑀥𑀫𑁆𑀫𑀁 𑀤𑁂𑀲𑁂𑀣𑀸𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑁂𑀯𑀝𑁆𑀝𑀲𑀼𑀢𑁆𑀢𑀁 𑀲𑀸𑀥𑀓𑀁. ‘‘𑀇𑀥 𑀓𑁂𑀯𑀝𑁆𑀝 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺, 𑀆𑀯𑀺𑀪𑀸𑀯𑀁…𑀧𑁂… 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀲𑁆𑀲𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀁 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀁 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢’’𑀦𑁆𑀢𑀺 𑀇𑀤𑀁 𑀓𑁂𑀯𑀝𑁆𑀝𑀲𑀼𑀢𑁆𑀢𑀁.

𑀏𑀓𑁄𑀏𑀓𑀸𑀬 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑀢𑀺, 𑀏𑀓𑁄𑀏𑀓𑀸𑀬 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑀸 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀦𑁆𑀢𑀺. 𑀏𑀓𑁄𑀏𑀓𑀸𑀬 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀏𑀓𑁄𑀏𑀓𑀸𑀬 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑁂 𑀪𑀺𑀓𑁆𑀔𑀽 𑀧𑀲𑁆𑀲𑀢𑀺. 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀢𑁆𑀣 𑀧𑀦 ‘‘𑀦 𑀢𑁆𑀯𑁂𑀯 𑀏𑀓𑁄𑀏𑀓𑀸𑀬, 𑀫𑀸𑀢𑀼𑀕𑀸𑀫𑁂𑀦 𑀲𑀮𑁆𑀮𑀧𑁂’’𑀢𑀺𑀆𑀤𑀺𑀓𑀁 𑀧𑀸𑀴𑀺𑀧𑀤𑀁 𑀲𑀸𑀥𑀓𑀁. 𑀏𑀢𑁆𑀣 𑀳𑀺 𑀏𑀓𑁄𑀏𑀓𑀸𑀬𑀸𑀢𑀺 𑀇𑀤𑀁 𑀅𑀩𑁆𑀬𑀬𑀧𑀤𑀲𑀤𑀺𑀲𑀁 𑀭𑀽𑀴𑁆𑀳𑀻𑀧𑀤𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀲𑀤𑁆𑀤𑀲𑁆𑀲 𑀯𑀺𑀬 𑀘 𑀏𑀓𑀧𑀤𑀢𑁆𑀢𑀽𑀧𑀕𑀫𑀦𑀜𑁆𑀘𑀲𑁆𑀲 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼 𑀯𑀺𑀦𑀸 𑀤𑀼𑀢𑀺𑀬𑁂𑀦 𑀲𑀬𑀁 𑀏𑀓𑁄 𑀳𑀼𑀢𑁆𑀯𑀸 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀏𑀓𑁄𑀏𑀓𑀸𑀬𑀸’’𑀢𑀺 𑀇𑀤𑀁 𑀧𑀤𑀁 𑀦 𑀭𑀽𑀴𑁆𑀳𑀻𑀧𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀦 ‘‘𑀏𑀓𑁄’’𑀢𑀺 𑀲𑀤𑁆𑀤𑁄 ‘‘𑀪𑀺𑀓𑁆𑀔𑀽’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄. 𑀬𑀤𑀺 𑀲𑀫𑀸𑀦𑀸𑀥𑀺𑀓𑀭𑀡𑁄 𑀲𑀺𑀬𑀸, ‘‘𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢’’𑀦𑁆𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. ‘‘𑀏𑀓𑀸𑀬𑀸’’𑀢𑀺 𑀲𑀤𑁆𑀤𑁄𑀧𑀺 𑀦 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁂𑀦 ‘‘𑀇𑀢𑁆𑀣𑀺𑀬𑀸’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄. 𑀬𑀤𑀺 𑀲𑀫𑀸𑀦𑀸𑀥𑀺𑀓𑀭𑀡𑁄 𑀲𑀺𑀬𑀸, ‘‘𑀫𑀸𑀢𑀼𑀕𑀸𑀫𑁂𑀦𑀸’’𑀢𑀺 ¶ 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀯𑀺𑀲𑁂𑀲𑀸𑀪𑀸𑀯𑀢𑁄 𑀤𑁆𑀯𑀺𑀭𑀼𑀢𑁆𑀢𑀪𑀸𑀯𑀸𑀧𑀚𑁆𑀚𑀦𑀢𑁄 𑀘. 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘‘𑀫𑀸𑀢𑀼𑀕𑀸𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀏𑀓𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀓𑀦𑁆𑀢𑀢𑁄 𑀧𑀦 ‘‘𑀏𑀓𑁄𑀏𑀓𑀸𑀬𑀸’’𑀢𑀺 𑀇𑀤𑀁 𑀧𑀤𑀁 𑀧𑀼𑀫𑀺𑀢𑁆𑀣𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀅𑀧𑁂𑀓𑁆𑀔𑀢𑀺, 𑀦 𑀲𑀫𑀸𑀦𑀸𑀥𑀺𑀓𑀭𑀡𑀧𑀤𑀁, 𑀢𑀲𑁆𑀫𑀸 ‘‘𑀤𑁆𑀯𑁂 𑀚𑀸𑀦𑀺𑀧𑀢𑀬𑁄 𑀅𑀜𑁆𑀜𑀫𑀜𑁆𑀜𑀁 𑀲𑀮𑁆𑀮𑀧𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀧𑀤𑀲𑁆𑀲 𑀯𑀺𑀬 𑀘 ‘‘𑀏𑀓𑁄𑀏𑀓𑀸𑀬𑀸’’𑀢𑀺 𑀇𑀫𑀲𑁆𑀲 𑀏𑀓𑀧𑀤𑀢𑁆𑀢𑀜𑁆𑀘 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀲𑁂𑀲𑀦𑀢𑁆𑀢𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀲𑁆𑀲𑀁 𑀦𑀺𑀲𑀚𑁆𑀚𑀓𑁆𑀭𑀺𑀬𑀸𑀬𑀁 𑀪𑀺𑀓𑁆𑀔𑀼𑀧𑀺 𑀏𑀓𑁄𑀯 𑀳𑁄𑀢𑀺, 𑀇𑀢𑁆𑀣𑀻𑀧𑀺 𑀏𑀓𑀸𑀯. 𑀲𑀸 𑀓𑁆𑀭𑀺𑀬𑀸 𑀭𑀽𑀴𑁆𑀳𑀻𑀯𑀲𑁂𑀦 ‘‘𑀏𑀓𑁄𑀏𑀓𑀸𑀬𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀤𑀺𑀲𑀸𑀬 𑀏𑀓𑁄𑀏𑀓𑀸𑀬 𑀦𑀺𑀲𑀚𑁆𑀚𑀓𑁆𑀭𑀺𑀬𑀸𑀬 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀦𑁆𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀭𑀽𑀴𑁆𑀳𑀻𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑀣𑀸𑀧𑀬𑁄𑀕𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀇𑀘𑁆𑀘𑁂𑀯𑀁 𑀯𑀸𑀘𑁆𑀘𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀓𑀸𑀲𑀺𑀢𑀸.

𑀲𑀼𑀫𑀥𑀼𑀭𑀢𑀭𑀲𑀤𑁆𑀤𑀦𑀺𑀢𑀺𑀁 𑀇𑀫𑀁,

𑀧𑀝𑀼𑀢𑀭𑀫𑀢𑀺𑀢𑀁 𑀲𑀼𑀲𑀺𑀔𑁂 𑀯𑀭𑀁;

𑀯𑀺𑀤𑀼𑀯𑀺𑀫𑀢𑀺𑀢𑀫𑁄𑀧𑀳𑀭𑀺𑀁 𑀭𑀯𑀺𑀁,

𑀫𑀢𑀺𑀓𑀼𑀫𑀼𑀤𑀧𑀩𑁄𑀥𑀺𑀦𑀺𑀲𑀸𑀧𑀢𑀺𑀁.

𑀓𑀢𑀯𑀺𑀜𑁆𑀜𑀽𑀚𑀦𑀲𑁆𑀲𑀸𑀲-𑀲𑀸𑀲𑀦𑀲𑁆𑀲𑀸𑀪𑀺𑀯𑀼𑀤𑁆𑀥𑀺𑀬𑀸;

𑀥𑀺𑀬𑀸 𑀦𑀻𑀢𑀺𑀫𑀺𑀫𑀁 𑀲𑀸𑀥𑀼, 𑀲𑀸𑀥𑀼𑀓𑀜𑁆𑀜𑁂𑀯 𑀮𑀓𑁆𑀔𑀬𑁂.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀯𑀸𑀘𑁆𑀘𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸𑀤𑀺𑀧𑀭𑀺𑀤𑀻𑀧𑀦𑁄 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀢𑁆𑀢𑀸𑀯𑀢𑀸 ¶ 𑀪𑀽𑀥𑀸𑀢𑀼𑀫𑀬𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀜𑁆𑀘 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑀣𑀸𑀭𑀳𑀁 𑀮𑀺𑀗𑁆𑀕𑀦𑁆𑀢𑀭𑁂𑀳𑀺 𑀲𑀤𑁆𑀤𑀦𑁆𑀢𑀭𑁂𑀳𑀺 𑀅𑀢𑁆𑀣𑀦𑁆𑀢𑀭𑁂𑀳𑀺 𑀘 𑀲𑀤𑁆𑀥𑀺𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑀺𑀢𑀸. 𑀲𑀩𑁆𑀩𑀦𑀸𑀫𑀸𑀦𑀺 𑀳𑀺 𑀞𑀧𑁂𑀢𑁆𑀯𑀸 𑀦𑀬𑀢𑁄 𑀅𑀜𑁆𑀜𑀸𑀦𑀺 𑀓𑀸𑀦𑀺𑀘𑀺 𑀦𑀸𑀫𑀸𑀦𑀺 𑀅𑀕𑁆𑀕𑀳𑀺𑀢𑀸𑀦𑀺 𑀦𑀸𑀫 𑀦𑀢𑁆𑀣𑀺.

𑁧𑁨. 𑀲𑀩𑁆𑀩𑀦𑀸𑀫𑀢𑀁𑀲𑀤𑀺𑀲𑀦𑀸𑀫𑀦𑀸𑀫𑀺𑀓𑀧𑀤𑀫𑀸𑀮𑀸

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀦𑀸𑀫𑀜𑁆𑀘 𑀢𑀲𑁆𑀲𑀫𑀁;

𑀦𑀸𑀫𑀜𑁆𑀘 𑀬𑁄𑀚𑀺𑀢𑀁 𑀦𑀸𑀦𑀸-𑀦𑀸𑀫𑁂𑀳𑁂𑀯 𑀯𑀺𑀲𑁂𑀲𑀢𑁄.

𑀬𑀸𑀦𑀺 𑀳𑁄𑀦𑁆𑀢𑀺 𑀢𑀺𑀮𑀺𑀗𑁆𑀕𑀸𑀦𑀺, 𑀅𑀦𑀼𑀓𑀽𑀮𑀸𑀦𑀺 𑀬𑀸𑀦𑀺 𑀘;

𑀢𑀺𑀮𑀺𑀗𑁆𑀕𑀸𑀦𑀁 𑀯𑀺𑀲𑁂𑀲𑁂𑀦, 𑀧𑀤𑀸𑀦𑁂𑀢𑀸𑀦𑀺 𑀦𑀸𑀫𑀢𑁄.

‘‘𑀲𑀩𑁆𑀩𑀲𑀸𑀥𑀸𑀭𑀡𑀓𑀸𑀦𑀺, 𑀦𑀸𑀫𑀸𑀦𑀺’’𑀘𑁆𑀘𑁂𑀯 𑀅𑀢𑁆𑀣𑀢𑁄;

𑀲𑀩𑁆𑀩𑀦𑀸𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀢𑁆𑀢𑀯𑀻𑀲𑀢𑀺 𑀲𑀗𑁆𑀔𑀢𑁄.

𑀢𑁂𑀲𑀼 𑀓𑀸𑀦𑀺𑀘𑀺 𑀭𑀽𑀧𑁂𑀳𑀺, 𑀲𑁂𑀲𑀸𑀜𑁆𑀜𑁂𑀳𑀺 𑀘 𑀬𑀼𑀚𑁆𑀚𑀭𑁂;

𑀓𑀸𑀦𑀺𑀘𑀺 𑀧𑀦 𑀲𑀳𑁂𑀯, 𑀏𑀢𑁂𑀲𑀁 𑀮𑀓𑁆𑀔𑀡𑀁 𑀇𑀤𑀁.

𑀏𑀢𑀲𑁆𑀫𑀸 𑀮𑀓𑁆𑀔𑀡𑀸 𑀫𑀼𑀢𑁆𑀢𑀁, 𑀦 𑀧𑀤𑀁 𑀲𑀩𑁆𑀩𑀦𑀸𑀫𑀺𑀓𑀁;

𑀢𑀲𑁆𑀫𑀸𑀢𑀻𑀢𑀸𑀤𑀬𑁄 𑀲𑀤𑁆𑀤𑀸, 𑀕𑀼𑀡𑀦𑀸𑀫𑀸𑀦𑀺 𑀯𑀼𑀘𑁆𑀘𑀭𑁂.

𑀲𑀩𑁆𑀩𑀦𑀸𑀫𑀸𑀦𑀺 𑀦𑀸𑀫 𑁋 𑀲𑀩𑁆𑀩 𑀓𑀢𑀭 𑀓𑀢𑀫 𑀉𑀪𑀬 𑀇𑀢𑀭𑀅𑀜𑁆𑀜 𑀅𑀜𑁆𑀜𑀢𑀭 𑀅𑀜𑁆𑀜𑀢𑀫 𑀧𑀼𑀩𑁆𑀩 𑀧𑀭 𑀅𑀧𑀭 𑀤𑀓𑁆𑀔𑀺𑀡 𑀉𑀢𑁆𑀢𑀭 𑀅𑀥𑀭𑀬𑀢 𑀏𑀢 𑀇𑀫 𑀅𑀫𑀼𑀓𑀺𑀁 𑀏𑀓 𑀉𑀪 𑀤𑁆𑀯𑀺𑀢𑀺 𑀘𑀢𑀼 𑀢𑀼𑀫𑁆𑀳 𑀅𑀫𑁆𑀳 𑀇𑀘𑁆𑀘𑁂𑀢𑀸𑀦𑀺 𑀲𑀢𑁆𑀢𑀯𑀻𑀲.

𑀏𑀢𑁂𑀲𑀼 𑀲𑀩𑁆𑀩𑀲𑀤𑁆𑀤𑁄 𑀲𑀓𑀮𑀢𑁆𑀣𑁄, 𑀲𑁄 𑀘 𑀲𑀩𑁆𑀩𑀲𑀩𑁆𑀩𑀸𑀤𑀺𑀯𑀲𑁂𑀦 𑀜𑁂𑀬𑁆𑀬𑁄. 𑀓𑀢𑀭 𑀓𑀢𑀫𑀲𑀤𑁆𑀤𑀸 𑀧𑀼𑀘𑁆𑀙𑀦𑀢𑁆𑀣𑀸. 𑀉𑀪𑀬𑀲𑀤𑁆𑀤𑁄 𑀤𑁆𑀯𑀺𑀅𑀯𑀬𑀯𑀲𑀫𑀼𑀤𑀸𑀬𑀯𑀘𑀦𑁄. 𑀇𑀢𑀭𑀲𑀤𑁆𑀤𑁄 𑀯𑀼𑀢𑁆𑀢𑀧𑀝𑀺𑀬𑁄𑀕𑀻𑀯𑀘𑀦𑁄. 𑀅𑀜𑁆𑀜𑀲𑀤𑁆𑀤𑁄 𑀅𑀥𑀺𑀕𑀢𑀸𑀧𑀭𑀯𑀘𑀦𑁄. 𑀅𑀜𑁆𑀜𑀢𑀭 𑀅𑀜𑁆𑀜𑀢𑀫𑀲𑀤𑁆𑀤𑀸 𑀅𑀦𑀺𑀬𑀫𑀢𑁆𑀣𑀸. 𑀧𑀼𑀩𑁆𑀩𑀸𑀤𑀬𑁄 𑀉𑀢𑁆𑀢𑀭𑀧𑀭𑀺𑀬𑀦𑁆𑀢𑀸 𑀤𑀺𑀲𑀸𑀓𑀸𑀮𑀸𑀤𑀺𑀯𑀯𑀢𑁆𑀣𑀸𑀯𑀘𑀦𑀸. 𑀢𑀣𑀸 𑀳𑀺 𑀧𑀼𑀩𑁆𑀩 ¶ 𑀧𑀭𑀸 𑀧𑀭 𑀤𑀓𑁆𑀔𑀺𑀡𑀼𑀢𑁆𑀢𑀭𑀲𑀤𑁆𑀤𑀸 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑁂 𑀬𑀣𑀸𑀭𑀳𑀁 𑀓𑀸𑀮𑀤𑁂𑀲𑀸𑀤𑀺𑀯𑀘𑀦𑀸, 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑁂 𑀤𑀺𑀲𑀸𑀤𑀺𑀯𑀘𑀦𑀸, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀞𑀸𑀦𑀸𑀤𑀺𑀯𑀘𑀦𑀸. 𑀅𑀥𑀭𑀲𑀤𑁆𑀤𑁄𑀧𑀺 𑀳𑁂𑀝𑁆𑀞𑀺𑀫𑀢𑁆𑀣𑀯𑀸𑀘𑀓𑁄 𑀯𑀯𑀢𑁆𑀣𑀸𑀯𑀘𑀦𑁄𑀬𑁂𑀯, 𑀲𑁄 𑀘 𑀢𑀺𑀮𑀺𑀗𑁆𑀕𑁄 ‘‘𑀅𑀥𑀭𑁄 𑀧𑀢𑁆𑀢𑁄. 𑀅𑀥𑀭𑀸 𑀅𑀭𑀡𑀻, 𑀅𑀥𑀭𑀁 𑀪𑀸𑀚𑀦’’𑀫𑀺𑀢𑀺, 𑀬𑀁𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀢𑀁𑀲𑀤𑁆𑀤𑁄 𑀧𑀭𑀫𑁆𑀫𑀼𑀔𑀸𑀯𑀘𑀦𑁄. 𑀏𑀢𑀲𑀤𑁆𑀤𑁄 𑀲𑀫𑀻𑀧𑀯𑀘𑀦𑁄. 𑀇𑀫𑀲𑀤𑁆𑀤𑁄 𑀅𑀘𑁆𑀘𑀦𑁆𑀢𑀲𑀫𑀻𑀧𑀯𑀘𑀦𑁄. 𑀅𑀫𑀼𑀲𑀤𑁆𑀤𑁄 𑀤𑀽𑀭𑀯𑀘𑀦𑁄. 𑀓𑀺𑀁𑀲𑀤𑁆𑀤𑁄 𑀧𑀼𑀘𑁆𑀙𑀦𑀢𑁆𑀣𑁄. 𑀏𑀓𑀲𑀤𑁆𑀤𑁄 𑀲𑀗𑁆𑀔𑀸𑀤𑀺𑀯𑀘𑀦𑁄. 𑀯𑀼𑀢𑁆𑀢𑀜𑁆𑀳𑀺 𑁋

𑀏𑀓𑀲𑀤𑁆𑀤𑁄 𑀅𑀜𑁆𑀜𑀢𑁆𑀣𑀲𑁂𑀝𑁆𑀞𑀅𑀲𑀳𑀸𑀬𑀲𑀗𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺, 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 𑀲𑁂𑀝𑁆𑀞𑁂. ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀅𑀲𑀳𑀸𑀬𑁂. ‘‘𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀗𑁆𑀔𑀸𑀬𑀦𑁆𑀢𑀺.

𑀬𑀢𑁆𑀣𑁂𑀲 𑀲𑀗𑁆𑀔𑀸𑀯𑀘𑀦𑁄, 𑀢𑀢𑁆𑀣𑁂𑀓𑀯𑀘𑀦𑀦𑁆𑀢𑁄𑀯. 𑀉𑀪𑀲𑀤𑁆𑀤𑁄 𑀤𑁆𑀯𑀺𑀲𑀤𑁆𑀤𑀧𑀭𑀺𑀬𑀸𑀬𑁄. 𑀤𑁆𑀯𑀺𑀢𑀺𑀘𑀢𑀼𑀲𑀤𑁆𑀤𑀸 𑀲𑀗𑁆𑀔𑀸𑀯𑀘𑀦𑀸, 𑀲𑀩𑁆𑀩𑀓𑀸𑀮𑀁 𑀩𑀳𑀼𑀯𑀘𑀦𑀦𑁆𑀢𑀸𑀯. 𑀢𑀼𑀫𑁆𑀳𑀲𑀤𑁆𑀤𑁄 𑀬𑁂𑀦 𑀓𑀣𑁂𑀢𑀺, 𑀢𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑀯𑀘𑀦𑀁. 𑀅𑀫𑁆𑀳𑀲𑀤𑁆𑀤𑁄 𑀅𑀢𑁆𑀢𑀦𑀺 𑀯𑀢𑁆𑀢𑀩𑁆𑀩𑀯𑀘𑀦𑀁.

𑀇𑀤𑀸𑀦𑀺 𑀢𑁂𑀲𑀁 𑀦𑀸𑀫𑀺𑀓𑀧𑀤𑀫𑀸𑀮𑀁 𑀓𑀣𑀬𑀸𑀫 𑁋

𑀲𑀩𑁆𑀩𑁄, 𑀲𑀩𑁆𑀩𑁂. 𑀲𑀩𑁆𑀩𑀁, 𑀲𑀩𑁆𑀩𑁂. 𑀲𑀩𑁆𑀩𑁂𑀦, 𑀲𑀩𑁆𑀩𑁂𑀳𑀺, 𑀲𑀩𑁆𑀩𑁂𑀪𑀺. 𑀲𑀩𑁆𑀩𑀲𑁆𑀲, 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀲𑀸𑀦𑀁. 𑀲𑀩𑁆𑀩𑀲𑁆𑀫𑀸, 𑀲𑀩𑁆𑀩𑀫𑁆𑀳𑀸, 𑀲𑀩𑁆𑀩𑁂𑀳𑀺, 𑀲𑀩𑁆𑀩𑁂𑀪𑀺. 𑀲𑀩𑁆𑀩𑀲𑁆𑀲, 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀲𑀸𑀦𑀁. 𑀲𑀩𑁆𑀩𑀲𑁆𑀫𑀺𑀁, 𑀲𑀩𑁆𑀩𑀫𑁆𑀳𑀺, 𑀲𑀩𑁆𑀩𑁂𑀲𑀼. 𑀪𑁄 𑀲𑀩𑁆𑀩, 𑀪𑀯𑀦𑁆𑀢𑁄 𑀲𑀩𑁆𑀩𑁂.

𑀢𑀢𑁆𑀭 ¶ ‘‘𑀲𑀩𑁆𑀩𑁄 𑀪𑀽𑀢𑁄, 𑀲𑀩𑁆𑀩𑁂 𑀪𑀽𑀢𑀸’’𑀢𑀺𑀆𑀤𑀺𑀦𑀸, ‘‘𑀲𑀩𑁆𑀩𑁄 𑀧𑀼𑀭𑀺𑀲𑁄, 𑀲𑀩𑁆𑀩𑁂 𑀧𑀼𑀭𑀺𑀲𑀸’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀲𑀩𑁆𑀩𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀦𑀸𑀫𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀬𑀸𑀦𑀺 𑀧𑀦 𑀬𑀫𑀓𑀫𑀳𑀸𑀣𑁂𑀭𑁂𑀦 𑀧𑀼𑀦𑁆𑀦𑀧𑀼𑀁𑀲𑀓𑀯𑀺𑀲𑀬𑁂 𑀲𑀩𑁆𑀩 𑀓𑀢𑀭 𑀓𑀢𑀫𑀸𑀤𑀻𑀦𑀁 𑀅𑀜𑁆𑀜𑀸𑀦𑀺𑀧𑀺 𑀭𑀽𑀧𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀁 𑀬𑀣𑀸?

‘‘𑀲𑀩𑁆𑀩𑀸’’ 𑀇𑀘𑁆𑀘𑀸𑀤𑀺𑀓𑀁 𑀭𑀽𑀧𑀁, 𑀦𑀺𑀲𑁆𑀲𑀓𑁆𑀓𑁂 𑀪𑀼𑀫𑁆𑀫𑀓𑁂 𑀧𑀦;

‘‘𑀲𑀩𑁆𑀩𑁂’’ 𑀇𑀘𑁆𑀘𑀸𑀤𑀺𑀓𑀁 𑀭𑀽𑀧𑀁, 𑀬𑀫𑀓𑁂𑀦 𑀧𑀓𑀸𑀲𑀺𑀢𑀁.

𑀢𑀜𑁆𑀘𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀬𑀼𑀢𑁆𑀢𑀁 𑀕𑀡𑁆𑀳𑀦𑁆𑀢𑀼 𑀬𑁄𑀕𑀺𑀦𑁄;

𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀜𑁆𑀳𑀺, 𑀯𑀺𑀯𑀺𑀥𑀁 𑀤𑀼𑀩𑁆𑀩𑀼𑀥𑀁 𑀬𑀢𑁄.

𑀲𑀩𑁆𑀩𑀸, 𑀲𑀩𑁆𑀩𑀸, 𑀲𑀩𑁆𑀩𑀸𑀬𑁄. 𑀲𑀩𑁆𑀩𑀁, 𑀲𑀩𑁆𑀩𑀸, 𑀲𑀩𑁆𑀩𑀸𑀬𑁄. 𑀲𑀩𑁆𑀩𑀸𑀬, 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀸𑀳𑀺, 𑀲𑀩𑁆𑀩𑀸𑀪𑀺. 𑀲𑀩𑁆𑀩𑀸𑀬, 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀸𑀲𑀁. 𑀲𑀩𑁆𑀩𑀸𑀬, 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀸𑀳𑀺, 𑀲𑀩𑁆𑀩𑀸𑀪𑀺. 𑀲𑀩𑁆𑀩𑀸𑀬, 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀸𑀲𑀁. 𑀲𑀩𑁆𑀩𑀸𑀬𑀁, 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀲𑁆𑀲𑀁, 𑀲𑀩𑁆𑀩𑀸𑀲𑀼. 𑀪𑁄𑀢𑀺 𑀲𑀩𑁆𑀩𑁂, 𑀪𑁄𑀢𑀺𑀬𑁄 𑀲𑀩𑁆𑀩𑀸, 𑀲𑀩𑁆𑀩𑀸𑀬𑁄. 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑁂 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀏𑀢𑁆𑀣 ‘‘𑀲𑀩𑁆𑀩𑀸 𑀪𑀸𑀯𑀺𑀓𑀸, 𑀲𑀩𑁆𑀩𑀸 𑀪𑀸𑀯𑀺𑀓𑀸𑀬𑁄’’𑀢𑀺, ‘‘𑀲𑀩𑁆𑀩𑀸 𑀓𑀜𑁆𑀜𑀸, 𑀲𑀩𑁆𑀩𑀸 𑀓𑀜𑁆𑀜𑀸𑀬𑁄’’𑀢𑀺 𑀘 𑀆𑀤𑀺𑀦𑀸 𑀇𑀢𑁆𑀣𑀺𑀮𑀺𑀗𑁆𑀕𑀲𑀩𑁆𑀩𑀦𑀸𑀫𑀸𑀦𑀺 𑀲𑀩𑁆𑀩𑁂𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀲𑁆𑀲𑀸’’𑀢𑀺 𑀧𑀤𑀁 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀧𑀜𑁆𑀘𑀫𑀻𑀙𑀝𑁆𑀞𑀻𑀲𑀢𑁆𑀢𑀫𑀻𑀯𑀲𑁂𑀦 𑀧𑀜𑁆𑀘𑀥𑀸 𑀯𑀺𑀪𑀢𑁆𑀢𑀁 ‘‘𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺’’𑀦𑁆𑀢𑀺 𑀓𑀭𑀡𑀧𑁆𑀧𑀬𑁄𑀕𑀸𑀤𑀺𑀤𑀲𑁆𑀲𑀦𑀢𑁄. 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀓𑀢𑀁. 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀤𑁂𑀢𑀺. 𑀅𑀬𑀁 𑀓𑀜𑁆𑀜𑀸 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀳𑀻𑀦𑀸 𑀯𑀺𑀭𑀽𑀧𑀸. 𑀅𑀬𑀁 𑀓𑀜𑁆𑀜𑀸 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀉𑀢𑁆𑀢𑀫𑀸 𑀅𑀪𑀺𑀭𑀽𑀧𑀸. 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀅𑀧𑁂𑀢𑀺, 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀥𑀦𑀁. 𑀲𑀩𑁆𑀩𑀲𑁆𑀲𑀸 𑀓𑀜𑁆𑀜𑀸𑀬 𑀧𑀢𑀺𑀝𑁆𑀞𑀺𑀢𑀁.

𑀲𑀩𑁆𑀩𑀁, 𑀲𑀩𑁆𑀩𑀸𑀦𑀺. 𑀲𑀩𑁆𑀩𑀁, 𑀲𑀩𑁆𑀩𑀸𑀦𑀺. 𑀲𑀩𑁆𑀩𑁂𑀦, 𑀲𑀩𑁆𑀩𑁂𑀳𑀺, 𑀲𑀩𑁆𑀩𑁂𑀪𑀺. 𑀲𑀩𑁆𑀩𑀲𑁆𑀲, 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀲𑀸𑀦𑀁. 𑀲𑀩𑁆𑀩𑀲𑁆𑀫𑀸, 𑀲𑀩𑁆𑀩𑀫𑁆𑀳𑀸, 𑀲𑀩𑁆𑀩𑁂𑀳𑀺, 𑀲𑀩𑁆𑀩𑁂𑀪𑀺 ¶ . 𑀲𑀩𑁆𑀩𑀲𑁆𑀲, 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀲𑀸𑀦𑀁. 𑀲𑀩𑁆𑀩𑀲𑁆𑀫𑀺𑀁, 𑀲𑀩𑁆𑀩𑀫𑁆𑀳𑀺, 𑀲𑀩𑁆𑀩𑁂𑀲𑀼. 𑀪𑁄 𑀲𑀩𑁆𑀩, 𑀪𑀯𑀦𑁆𑀢𑁄 𑀲𑀩𑁆𑀩𑀸𑀦𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀦𑀸𑀫𑀺𑀓𑀧𑀤𑀫𑀸𑀮𑀸.

𑀏𑀢𑁆𑀣 ‘‘𑀲𑀩𑁆𑀩𑀁 𑀪𑀽𑀢𑀁, 𑀲𑀩𑁆𑀩𑀸𑀦𑀺 𑀪𑀽𑀢𑀸𑀦𑀺. 𑀲𑀩𑁆𑀩𑀁 𑀘𑀺𑀢𑁆𑀢𑀁, 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀘 𑀆𑀤𑀺𑀦𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑀩𑁆𑀩𑀦𑀸𑀫𑀸𑀦𑀺 𑀲𑀩𑁆𑀩𑁂𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀲𑀩𑁆𑀩𑀲𑀤𑁆𑀤𑀲𑁆𑀲 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀧𑀤𑀫𑀸𑀮𑀸 𑀪𑀯𑀢𑀺.

𑀇𑀤𑀸𑀦𑀺𑀲𑁆𑀲 𑀧𑀭𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀩𑁆𑀩𑀲𑀸𑀥𑀸𑀭𑀡𑁄 𑀲𑀩𑁆𑀩𑀯𑁂𑀭𑀻’’𑀇𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁄 𑀲𑀩𑁆𑀩𑀲𑀸𑀥𑀸𑀭𑀡𑁄. 𑀲𑀩𑁆𑀩𑁂𑀲𑀁 𑀯𑁂𑀭𑀻, 𑀲𑀩𑁆𑀩𑁂 𑀯𑀸 𑀯𑁂𑀭𑀺𑀦𑁄 𑀬𑀲𑁆𑀲 𑀲𑁄𑀬𑀁 𑀲𑀩𑁆𑀩𑀯𑁂𑀭𑀻𑀢𑀺 𑀲𑀫𑀸𑀲𑀯𑀺𑀕𑁆𑀕𑀳𑁄. 𑀬𑀣𑀸 𑀧𑀦 𑀲𑀩𑁆𑀩𑀲𑀤𑁆𑀤𑀲𑁆𑀲 𑀧𑀤𑀫𑀸𑀮𑀸 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀬𑁄𑀚𑀺𑀢𑀸, 𑀏𑀯𑀁 𑀓𑀢𑀭𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀅𑀥𑀭𑀲𑀤𑁆𑀤𑀧𑀭𑀺𑀬𑀦𑁆𑀢𑀸𑀦𑀁 𑀬𑁄𑀚𑁂𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀉𑀪𑀬𑀲𑀤𑁆𑀤𑀯𑀚𑁆𑀚𑀺𑀢𑁄 𑀧𑀼𑀮𑁆𑀮𑀺𑀗𑁆𑀕𑀧𑁂𑀬𑁆𑀬𑀸𑀮𑁄 𑁋

𑀓𑀢𑀭𑁄, 𑀓𑀢𑀭𑁂. 𑀓𑀢𑀭𑀁…𑀧𑁂… 𑀪𑁄 𑀓𑀢𑀭, 𑀪𑀯𑀦𑁆𑀢𑁄 𑀓𑀢𑀭𑁂. 𑀓𑀢𑀫𑁄, 𑀓𑀢𑀫𑁂. 𑀇𑀢𑀭𑁄, 𑀇𑀢𑀭𑁂. 𑀅𑀜𑁆𑀜𑁄, 𑀅𑀜𑁆𑀜𑁂. 𑀅𑀜𑁆𑀜𑀢𑀭𑁄, 𑀅𑀜𑁆𑀜𑀢𑀭𑁂. 𑀅𑀜𑁆𑀜𑀢𑀫𑁄, 𑀅𑀜𑁆𑀜𑀢𑀫𑁂. 𑀧𑀼𑀩𑁆𑀩𑁄, 𑀧𑀼𑀩𑁆𑀩𑁂. 𑀧𑀭𑁄, 𑀧𑀭𑁂. 𑀅𑀧𑀭𑁄, 𑀅𑀧𑀭𑁂. 𑀤𑀓𑁆𑀔𑀺𑀡𑁄, 𑀤𑀓𑁆𑀔𑀺𑀡𑁂. 𑀉𑀢𑁆𑀢𑀭𑁄, 𑀉𑀢𑁆𑀢𑀭𑁂. 𑀅𑀥𑀭𑁄, 𑀅𑀥𑀭𑁂…𑀧𑁂… 𑀪𑁄 𑀅𑀥𑀭, 𑀪𑀯𑀦𑁆𑀢𑁄 𑀅𑀥𑀭𑁂𑀢𑀺.

𑀅𑀬𑀁 𑀧𑀦 𑀉𑀪𑀬𑀲𑀤𑁆𑀤𑀲𑀳𑀺𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀧𑁂𑀬𑁆𑀬𑀸𑀮𑁄 𑁋

𑀓𑀢𑀭𑀁, 𑀓𑀢𑀭𑀸𑀦𑀺. 𑀓𑀢𑀭𑀁…𑀧𑁂… 𑀪𑁄 𑀓𑀢𑀭, 𑀪𑀯𑀦𑁆𑀢𑁄 𑀓𑀢𑀭𑀸𑀦𑀺. 𑀓𑀢𑀫𑀁. 𑀉𑀪𑀬𑀁. 𑀇𑀢𑀭𑀁. 𑀅𑀜𑁆𑀜𑀁. 𑀅𑀜𑁆𑀜𑀢𑀭𑀁. 𑀅𑀜𑁆𑀜𑀢𑀫𑀁. 𑀧𑀼𑀩𑁆𑀩𑀁. 𑀧𑀭𑀁. 𑀅𑀧𑀭𑀁. 𑀤𑀓𑁆𑀔𑀺𑀡𑀁. 𑀉𑀢𑁆𑀢𑀭𑀁. 𑀅𑀥𑀭𑀁, 𑀅𑀥𑀭𑀸𑀦𑀺. 𑀅𑀥𑀭𑀁…𑀧𑁂… 𑀪𑁄 𑀅𑀥𑀭, 𑀪𑀯𑀦𑁆𑀢𑁄 𑀅𑀥𑀭𑀸𑀦𑀻𑀢𑀺.

𑀇𑀤𑀸𑀦𑀺 ¶ 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀁 𑀧𑀭𑀲𑀤𑁆𑀤𑀸𑀤𑀻𑀦𑀁 𑀭𑀽𑀧𑀦𑁆𑀢𑀭𑀦𑀺𑀤𑁆𑀤𑁂𑀲𑁄 𑀯𑀼𑀘𑁆𑀘𑀢𑀺. 𑀓𑀘𑁆𑀘𑀸𑀬𑀦𑀲𑁆𑀫𑀺𑀜𑁆𑀳𑀺 ‘‘𑀧𑀼𑀭𑀺𑀲𑀸’’𑀢𑀺 𑀯𑀺𑀬 ‘‘𑀧𑀭𑀸’’𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀁 𑀤𑀺𑀲𑁆𑀲𑀢𑀺. 𑀏𑀯𑀭𑀽𑀧𑁄 𑀦𑀬𑁄 𑀅𑀧𑀭𑀲𑀩𑁆𑀩𑀓𑀢𑀭𑀸𑀤𑀻𑀲𑀼 𑀅𑀜𑁆𑀜𑀢𑀫𑀧𑀭𑀺𑀬𑁄𑀲𑀸𑀦𑁂𑀲𑀼 𑀦𑀯𑀲𑀼 𑀅𑀧𑁆𑀧𑀲𑀺𑀤𑁆𑀥𑁄, 𑀮𑀩𑁆𑀪𑀫𑀸𑀦𑁄 𑀧𑀼𑀩𑁆𑀩𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀥𑀭𑁂𑀲𑀼 𑀘𑀢𑀽𑀲𑀼 𑀮𑀩𑁆𑀪𑁂𑀬𑁆𑀬. 𑀢𑀣𑀸 ‘‘𑀧𑀼𑀭𑀺𑀲𑁂’’𑀢𑀺 𑀯𑀺𑀬 𑀧𑀸𑀴𑀺𑀆𑀤𑀻𑀲𑀼 ‘‘𑀧𑀼𑀩𑁆𑀩𑁂’’𑀢𑀺 𑀲𑀘𑁆𑀘𑀲𑀗𑁆𑀔𑁂𑀧𑁂 ‘‘𑀇𑀢𑀭𑁂’’𑀢𑀺, 𑀓𑀘𑁆𑀘𑀸𑀬𑀦𑁂 𑀘 ‘‘𑀧𑀭𑁂’’𑀢𑀺 𑀲𑀢𑁆𑀢𑀫𑀻𑀏𑀓𑀯𑀘𑀦𑀁 𑀤𑀺𑀲𑁆𑀲𑀢𑀺. 𑀏𑀯𑀭𑀽𑀧𑁄 𑀦𑀬𑁄 𑀲𑀩𑁆𑀩 𑀅𑀜𑁆𑀜𑀲𑀤𑁆𑀤𑁂𑀲𑀼 𑀅𑀧𑁆𑀧𑀲𑀺𑀤𑁆𑀥𑁄, 𑀮𑀩𑁆𑀪𑀫𑀸𑀦𑁄 𑀓𑀢𑀭𑀓𑀢𑀫𑀸𑀤𑀻𑀲𑀼 𑀲𑁂𑀲𑁂𑀲𑀼 𑀅𑀥𑀭𑀧𑀭𑀺𑀬𑁄𑀲𑀸𑀦𑁂𑀲𑀼 𑀤𑁆𑀯𑀸𑀤𑀲𑀲𑀼 𑀮𑀩𑁆𑀪𑁂𑀬𑁆𑀬. 𑀢𑀣𑀸 ‘‘𑀧𑀼𑀭𑀺𑀲𑀸’’𑀢𑀺 𑀯𑀺𑀬 𑀲𑀩𑁆𑀩𑀸 𑀓𑀢𑀭𑀸 𑀇𑀘𑁆𑀘𑀸𑀤𑀺 𑀧𑀜𑁆𑀘𑀫𑀻𑀏𑀓𑀯𑀘𑀦𑀦𑀬𑁄 𑀧𑀸𑀴𑀺𑀆𑀤𑀻𑀲𑀼 𑀅𑀧𑁆𑀧𑀲𑀺𑀤𑁆𑀥𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀬𑀁 𑀦𑀬𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑁄 𑀘𑁂, 𑀕𑀳𑁂𑀢𑀩𑁆𑀩𑁄.

𑀅𑀬𑀁 𑀧𑀦 𑀉𑀪𑀬𑀲𑀤𑁆𑀤𑀲𑀳𑀺𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀧𑁂𑀬𑁆𑀬𑀸𑀮𑁄 𑁋

𑀓𑀢𑀭𑀸, 𑀓𑀢𑀭𑀸, 𑀓𑀢𑀭𑀸𑀬𑁄. 𑀓𑀢𑀭𑀁…𑀧𑁂… 𑀪𑁄𑀢𑀺 𑀓𑀢𑀭𑁂, 𑀪𑁄𑀢𑀺𑀬𑁄 𑀓𑀢𑀭𑀸, 𑀓𑀢𑀭𑀸𑀬𑁄. 𑀓𑀢𑀫𑀸. 𑀉𑀪𑀬𑀸. 𑀇𑀢𑀭𑀸. 𑀅𑀜𑁆𑀜𑀢𑀭𑀸. 𑀅𑀜𑁆𑀜𑀢𑀫𑀸. 𑀧𑀼𑀩𑁆𑀩𑀸. 𑀧𑀭𑀸. 𑀅𑀧𑀭𑀸. 𑀤𑀓𑁆𑀔𑀺𑀡𑀸. 𑀉𑀢𑁆𑀢𑀭𑀸. 𑀅𑀥𑀭𑀸, 𑀅𑀥𑀭𑀸, 𑀅𑀥𑀭𑀸𑀬𑁄. 𑀅𑀥𑀭𑀁…𑀧𑁂… 𑀪𑁄𑀢𑀺 𑀅𑀥𑀭𑁂, 𑀪𑁄𑀢𑀺𑀬𑁄 𑀅𑀥𑀭𑀸, 𑀅𑀥𑀭𑀸𑀬𑁄𑀢𑀺.

𑀬𑀲𑁆𑀫𑀸 𑀧𑀦𑁂𑀢𑁂𑀲𑀼 𑀇𑀢𑀭 𑀅𑀜𑁆𑀜 𑀅𑀜𑁆𑀜𑀢𑀭 𑀅𑀜𑁆𑀜𑀢𑀫𑀸𑀦𑀁 𑀧𑀸𑀴𑀺𑀬𑀸𑀤𑀻𑀲𑀼 ‘‘𑀇𑀢𑀭𑀺𑀲𑁆𑀲𑀸’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄 𑀓𑁄𑀘𑀺 𑀪𑁂𑀤𑁄 𑀯𑀢𑁆𑀢𑀩𑁆𑀩𑁄 ¶ , 𑀢𑀲𑁆𑀫𑀸 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀏𑀓𑀯𑀘𑀦𑀝𑁆𑀞𑀸𑀦𑁂 ‘‘𑀇𑀢𑀭𑀺𑀲𑁆𑀲𑀸, 𑀇𑀢𑀭𑀸𑀬, 𑀅𑀜𑁆𑀜𑀺𑀲𑁆𑀲𑀸, 𑀅𑀜𑁆𑀜𑀸𑀬. 𑀅𑀜𑁆𑀜𑀢𑀭𑀺𑀲𑁆𑀲𑀸, 𑀅𑀜𑁆𑀜𑀢𑀭𑀸𑀬, 𑀅𑀜𑁆𑀜𑀢𑀫𑀺𑀲𑁆𑀲𑀸, 𑀅𑀜𑁆𑀜𑀢𑀫𑀸𑀬𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 𑀢𑀢𑀺𑀬𑀸𑀧𑀜𑁆𑀘𑀫𑀻𑀦𑀫𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁. 𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻’’𑀢𑀺 𑀓𑀭𑀡𑀦𑀺𑀲𑁆𑀲𑀓𑁆𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 𑀲𑀢𑁆𑀢𑀫𑀺𑀬𑀸 𑀧𑀦𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀇𑀢𑀭𑀺𑀲𑁆𑀲𑀸, 𑀇𑀢𑀭𑀺𑀲𑁆𑀲𑀁, 𑀇𑀢𑀭𑀸𑀬, 𑀇𑀢𑀭𑀸𑀬𑀁, 𑀅𑀜𑁆𑀜𑀺𑀲𑁆𑀲𑀸, 𑀅𑀜𑁆𑀜𑀺𑀲𑁆𑀲𑀁, 𑀅𑀜𑁆𑀜𑀸𑀬, 𑀅𑀜𑁆𑀜𑀸𑀬𑀁, 𑀅𑀜𑁆𑀜𑀢𑀭𑀺𑀲𑁆𑀲𑀸, 𑀅𑀜𑁆𑀜𑀢𑀭𑀺𑀲𑁆𑀲𑀁, 𑀅𑀜𑁆𑀜𑀢𑀭𑀸𑀬, 𑀅𑀜𑁆𑀜𑀢𑀭𑀸𑀬𑀁, 𑀅𑀜𑁆𑀜𑀢𑀫𑀺𑀲𑁆𑀲𑀸, 𑀅𑀜𑁆𑀜𑀢𑀫𑀺𑀲𑁆𑀲𑀁, 𑀅𑀜𑁆𑀜𑀢𑀫𑀸𑀬, 𑀅𑀜𑁆𑀜𑀢𑀫𑀸𑀬’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄.

𑀢𑀢𑁆𑀭 𑀲𑀩𑁆𑀩𑀲𑀤𑁆𑀤𑁄 𑀲𑀩𑁆𑀩𑀲𑀩𑁆𑀩𑀁, 𑀧𑀤𑁂𑀲𑀲𑀩𑁆𑀩𑀁, 𑀆𑀬𑀢𑀦𑀲𑀩𑁆𑀩𑀁, 𑀲𑀓𑁆𑀓𑀸𑀬𑀲𑀩𑁆𑀩𑀦𑁆𑀢𑀺 𑀘𑀢𑀽𑀲𑀼 𑀯𑀺𑀲𑀬𑁂𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄. 𑀢𑀣𑀸 𑀳𑁂𑀲 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀲𑀩𑁆𑀩𑀲𑁆𑀫𑀺𑀁 𑀆𑀕𑀢𑁄. ‘‘𑀲𑀩𑁆𑀩𑁂𑀲𑀁 𑀯𑁄 𑀲𑀸𑀭𑀺𑀧𑀼𑀢𑁆𑀢𑀸 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀺…𑀧𑁂… 𑀓𑀢𑀫𑀜𑁆𑀘 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘𑀸’’𑀢𑀺 𑀏𑀢𑁆𑀣 𑀆𑀬𑀢𑀦𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀲𑀩𑁆𑀩𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 𑀲𑀓𑁆𑀓𑀸𑀬𑀲𑀩𑁆𑀩𑀲𑁆𑀫𑀺𑀁. 𑀢𑀢𑁆𑀣 𑀲𑀩𑁆𑀩𑀲𑀩𑁆𑀩𑀲𑁆𑀫𑀺𑀁 𑀆𑀕𑀢𑁄 𑀦𑀺𑀧𑁆𑀧𑀤𑁂𑀲𑁄, 𑀇𑀢𑀭𑁂𑀲𑀼 𑀢𑀻𑀲𑀼 𑀲𑀧𑁆𑀧𑀤𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀘𑁆𑀘𑁂𑀯𑀁 𑁋

𑀲𑀩𑁆𑀩𑀲𑀩𑁆𑀩𑀧𑀤𑁂𑀲𑁂𑀲𑀼 ¶ , 𑀅𑀣𑁄 𑀆𑀬𑀢𑀦𑁂𑀧𑀺 𑀘;

𑀲𑀓𑁆𑀓𑀸𑀬𑁂 𑀘𑀸𑀢𑀺 𑀘𑀢𑀽𑀲𑀼, 𑀲𑀩𑁆𑀩𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀓𑀢𑀭 𑀓𑀢𑀫𑀲𑀤𑁆𑀤𑁂𑀲𑀼 𑀓𑀢𑀭𑀲𑀤𑁆𑀤𑁄 𑀅𑀧𑁆𑀧𑁂𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀪𑀺𑀬𑁆𑀬𑁄 𑀯𑀸 𑀅𑀧𑁆𑀧𑀫𑀼𑀧𑀸𑀤𑀸𑀬 𑀯𑀢𑁆𑀢𑀢𑀺. 𑀓𑀢𑀫𑀲𑀤𑁆𑀤𑁄 𑀩𑀳𑀽𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀩𑀳𑀼𑀁 𑀯𑀸 𑀉𑀧𑀸𑀤𑀸𑀬 𑀯𑀢𑁆𑀢𑀢𑀺. 𑀓𑀢𑀭𑀲𑀤𑁆𑀤𑁄 𑀳𑀺 𑀅𑀧𑁆𑀧𑀯𑀺𑀲𑀬𑁄, 𑀓𑀢𑀫𑀲𑀤𑁆𑀤𑁄 𑀩𑀳𑀼𑀯𑀺𑀲𑀬𑁄. 𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 ‘‘𑀓𑀢𑀭𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀫𑀼𑀤𑁆𑀤𑁄 𑀓𑀢𑀭𑁄 𑀅𑀬𑀁. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺. 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀢𑀸, 𑀇𑀫𑀸𑀬𑁄, 𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸’’. 𑀇𑀘𑁆𑀘𑁂𑀯𑀫𑀸𑀤𑀬𑁄 𑀪𑀯𑀦𑁆𑀢𑀺. 𑀉𑀪𑀬𑁄. 𑀉𑀪𑀬𑀁. 𑀉𑀪𑀬𑁄. 𑀉𑀪𑀬𑁂𑀦. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑁂 𑀲𑀩𑁆𑀩𑀲𑀤𑁆𑀤𑀲𑀫𑀁. 𑀉𑀪𑀬𑁄 𑀚𑀦𑀸 𑀢𑀺𑀝𑁆𑀞𑀦𑁆𑀢𑀺. 𑀉𑀪𑀬𑁄 𑀚𑀦𑁂 𑀧𑀲𑁆𑀲𑀢𑀺. 𑀬𑀣𑀸 𑀉𑀪𑁄 𑀧𑀼𑀢𑁆𑀢𑀸. 𑀉𑀪𑁄 𑀧𑀼𑀢𑁆𑀢𑁂𑀢𑀺. ‘‘𑀉𑀪𑀬𑁄’’𑀢𑀺 𑀳𑀺 𑀧𑀤𑀁 ‘‘𑀉𑀪𑁄’’𑀢𑀺 𑀧𑀤𑀫𑀺𑀯 𑀩𑀳𑀼𑀯𑀘𑀦𑀦𑁆𑀢𑀪𑀸𑀯𑁂𑀦 𑀧𑀲𑀺𑀤𑁆𑀥𑀁, 𑀦 𑀢𑁆𑀯𑁂𑀓𑀯𑀘𑀦𑀦𑁆𑀢𑀪𑀸𑀯𑁂𑀦. 𑀏𑀢𑁆𑀣 𑀳𑀺 𑁋

‘‘𑀏𑀓𑀭𑀢𑁆𑀢𑁂𑀦 𑀉𑀪𑀬𑁄, 𑀢𑀼𑀯𑀜𑁆𑀘 𑀥𑀦𑀼𑀲𑁂𑀔 𑀘;

𑀅𑀦𑁆𑀦𑀫𑁂𑀯𑀸𑀪𑀺𑀦𑀦𑁆𑀤𑀦𑁆𑀢𑀺, 𑀉𑀪𑀬𑁄 𑀤𑁂𑀯𑀫𑀸𑀦𑀼𑀲𑀸’’

‘‘𑀉𑀪𑀬𑁄 𑀢𑁂 𑀧𑀺𑀢𑀸𑀪𑀸𑀢𑀭𑁄’’𑀢𑀺 𑀢𑀤𑀢𑁆𑀣𑀲𑀸𑀥𑀓𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀤𑀸 𑀧𑀦𑀸𑀬𑀲𑁆𑀫𑀦𑁆𑀢𑁄 ‘‘𑀉𑀪𑀬𑁄’’𑀢𑀺 𑀏𑀓𑀯𑀘𑀦𑀦𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀣, 𑀢𑀤𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣. 𑀓𑁄 𑀳𑀺 𑀲𑀫𑀢𑁆𑀣𑁄 𑀅𑀦𑀦𑁆𑀢𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀚𑀺𑀦𑀲𑀸𑀲𑀦𑁂 𑀦𑀺𑀭𑀯𑀲𑁂𑀲𑀢𑁄 𑀦𑀬𑀁 𑀤𑀝𑁆𑀞𑀼𑀁 ¶ 𑀤𑀲𑁆𑀲𑁂𑀢𑀼𑀜𑁆𑀘 𑀅𑀜𑁆𑀜𑀢𑁆𑀭 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑁂𑀦 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦. 𑀇𑀤𑀜𑁆𑀘𑁂𑀢𑁆𑀣𑀼𑀧𑀮𑀓𑁆𑀔𑀺𑀢𑀩𑁆𑀩𑀁 𑁋

𑀅𑀜𑁆𑀜𑀲𑀤𑁆𑀤𑁄 𑀧𑀼𑀩𑁆𑀩𑀲𑀤𑁆𑀤𑁄, 𑀤𑀓𑁆𑀔𑀺𑀡𑁄 𑀘𑀼𑀢𑁆𑀢𑀭𑁄 𑀧𑀭𑁄;

𑀲𑀩𑁆𑀩𑀦𑀸𑀫𑁂𑀲𑀼 𑀕𑀬𑁆𑀳𑀦𑁆𑀢𑀺, 𑀅𑀲𑀩𑁆𑀩𑀦𑀸𑀫𑀺𑀓𑁂𑀲𑀼𑀧𑀺.

𑀏𑀢𑁂𑀲𑀜𑁆𑀳𑀺 𑀲𑀩𑁆𑀩𑀦𑀸𑀫𑁂𑀲𑀼 𑀲𑀗𑁆𑀕𑀳𑁄 𑀯𑀺𑀪𑀸𑀯𑀺𑀢𑁄𑀯.

𑀇𑀤𑀸𑀦𑀺 𑀅𑀲𑀩𑁆𑀩𑀦𑀸𑀫𑁂𑀲𑀼 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 𑀅𑀜𑁆𑀜𑀲𑀤𑁆𑀤𑁄 𑀢𑀸𑀯 𑀬𑀤𑀸 𑀩𑀸𑀮𑀯𑀸𑀘𑀓𑁄, 𑀢𑀤𑀸 𑀲𑀩𑁆𑀩𑀦𑀸𑀫𑀁 𑀦𑀸𑀫 𑀦 𑀳𑁄𑀢𑀺. 𑀅𑀲𑀩𑁆𑀩𑀦𑀸𑀫𑀢𑁆𑀢𑀸 𑀘 𑀲𑀩𑁆𑀩𑀣𑀸𑀧𑀺 𑀧𑀼𑀭𑀺𑀲 𑀓𑀜𑁆𑀜𑀸 𑀘𑀺𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄, 𑀩𑀸𑀮𑁄 𑀧𑀼𑀭𑀺𑀲𑁄. 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀸, 𑀩𑀸𑀮𑀸 𑀇𑀢𑁆𑀣𑀻. 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀁, 𑀩𑀸𑀮𑀁 𑀓𑀼𑀮𑀦𑁆𑀢𑀺 𑀯𑀘𑀦𑀢𑁆𑀣𑁄. 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀅𑀜𑁆𑀜𑁄, 𑀅𑀜𑁆𑀜𑀸. 𑀅𑀜𑁆𑀜𑀁, 𑀅𑀜𑁆𑀜𑁂’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀦𑀬𑁂𑀦𑁂𑀯 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀅𑀜𑁆𑀜𑀸, 𑀅𑀜𑁆𑀜𑀸, 𑀅𑀜𑁆𑀜𑀸𑀬𑁄’’𑀢𑀺𑀆𑀤𑀺𑀦𑀸 𑀓𑀜𑁆𑀜𑀸𑀦𑀬𑁂𑀦𑁂𑀯, 𑀦𑀧𑀼𑀁𑀲𑀓𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀅𑀜𑁆𑀜𑀁, 𑀅𑀜𑁆𑀜𑀸𑀦𑀻’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸.

𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑁂 𑀩𑀸𑀮𑀚𑀦𑁂 𑀯𑀢𑁆𑀢𑀼𑀓𑀸𑀫𑁂𑀦 ‘‘𑀅𑀜𑁆𑀜𑀸 𑀚𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀜𑁆𑀜𑁂 𑀚𑀦𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀢𑀁 𑀯𑀘𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀅𑀜𑁆𑀜𑀣𑀸 𑀅𑀢𑁆𑀣𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀢𑀣𑀸 ‘‘𑀅𑀜𑁆𑀜𑀸𑀦𑀁 𑀚𑀦𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀅𑀜𑁆𑀜𑁂𑀲𑀁 𑀚𑀦𑀸𑀦𑀁, 𑀅𑀜𑁆𑀜𑁂𑀲𑀸𑀦𑀁 𑀚𑀦𑀸𑀦’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀢𑀲𑁆𑀲 𑀢𑀁 𑀯𑀘𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀦 𑀲𑀸𑀥𑁂𑀢𑀺. 𑀢𑀣𑀸 ‘‘𑀅𑀜𑁆𑀜𑀸𑀦𑀁 𑀇𑀢𑁆𑀣𑀻𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀅𑀜𑁆𑀜𑀸𑀲𑀁 𑀇𑀢𑁆𑀣𑀻𑀦’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺, ‘‘𑀅𑀜𑁆𑀜𑀸𑀦𑀁 𑀓𑀼𑀮𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀅𑀜𑁆𑀜𑁂𑀲𑀁 𑀓𑀼𑀮𑀸𑀦𑀁, 𑀅𑀜𑁆𑀜𑁂𑀲𑀸𑀦𑀁 𑀓𑀼𑀮𑀸𑀦’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺. 𑀲𑀩𑁆𑀩𑀦𑀸𑀫𑀺𑀓𑀯𑀲𑁂𑀦 𑀧𑀦 𑀅𑀥𑀺𑀕𑀢𑀸𑀧𑀭𑀯𑀘𑀦𑀺𑀘𑁆𑀙𑀸𑀬𑀁 ‘‘𑀅𑀜𑁆𑀜𑁂 𑀚𑀦𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁, 𑀦 ‘‘𑀅𑀜𑁆𑀜𑀸 𑀚𑀦𑀸’’𑀢𑀺𑀆𑀤𑀺𑀦𑀸. 𑀢𑀣𑀸 𑀳𑀺 ‘‘𑀅𑀜𑁆𑀜𑀸 𑀚𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀅𑀜𑁆𑀜𑀣𑀸 𑀅𑀢𑁆𑀣𑀲𑁆𑀲 ¶ 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀇𑀢𑀺 𑀬𑀢𑁆𑀣 ‘‘𑀅𑀜𑁆𑀜𑀸 𑀚𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀉𑀧𑀧𑀚𑁆𑀚𑀢𑀺, ‘‘𑀅𑀜𑁆𑀜𑁂 𑀚𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀦𑀼𑀧𑀧𑀚𑁆𑀚𑀢𑀺, 𑀬𑀢𑁆𑀣 𑀧𑀦 ‘‘𑀅𑀜𑁆𑀜𑁂 𑀚𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀉𑀧𑀧𑀚𑁆𑀚𑀢𑀺, ‘‘𑀅𑀜𑁆𑀜𑀸 𑀚𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀦𑀼𑀧𑀧𑀚𑁆𑀚𑀢𑀺. 𑀬𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑀯𑀺𑀲𑁂𑀲𑁂 𑀲𑀮𑁆𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀅𑀬𑀁 𑀦𑀻𑀢𑀺𑀬𑀸 𑀫𑀕𑁆𑀕𑁄 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑁂 𑀳𑁂𑀢𑀼𑀢𑁆𑀢𑀸, 𑀮𑁄𑀓𑀲𑁆𑀫𑀺𑀜𑁆𑀳𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀦𑀻𑀢𑀻𑀢𑀺 𑀯𑀼𑀢𑁆𑀢𑀸. 𑀲𑀸 𑀘 𑀯𑀺𑀦𑀸 𑀧𑀜𑁆𑀜𑀸𑀬 𑀦 𑀲𑀺𑀚𑁆𑀛𑀢𑀺. 𑀏𑀯𑀁 𑀅𑀜𑁆𑀜𑀲𑀤𑁆𑀤𑁄 𑀅𑀲𑀩𑁆𑀩𑀦𑀸𑀫𑀺𑀓𑁄𑀧𑀺 𑀪𑀯𑀢𑀺.

𑀧𑀼𑀩𑁆𑀩 𑀤𑀓𑁆𑀔𑀺𑀡𑀼𑀢𑁆𑀢𑀭 𑀧𑀭𑀲𑀤𑁆𑀤𑁂𑀲𑀼 𑀧𑀼𑀩𑁆𑀩𑀲𑀤𑁆𑀤𑁄 𑀬𑀢𑁆𑀣 𑀧𑀥𑀸𑀦𑀯𑀸𑀘𑀓𑁄, 𑀬𑀢𑁆𑀣 𑀘 ‘‘𑀲𑁂𑀫𑁆𑀳𑀁 𑀧𑀼𑀩𑁆𑀩𑁄’’𑀢𑀺𑀆𑀤𑀻𑀲𑀼 𑀮𑁄𑀳𑀺𑀢𑀓𑁄𑀧𑀚𑀯𑀸𑀘𑀓𑁄, 𑀢𑀢𑁆𑀣 𑀅𑀲𑀩𑁆𑀩𑀦𑀸𑀫𑀺𑀓𑁄. 𑀧𑀞𑀫𑀢𑁆𑀣𑁂 𑀢𑀺𑀮𑀺𑀗𑁆𑀕𑁄, 𑀤𑀼𑀢𑀺𑀬𑀢𑁆𑀣𑁂 𑀏𑀓𑀮𑀺𑀗𑁆𑀕𑁄. 𑀉𑀢𑁆𑀢𑀫𑀢𑁆𑀣𑀯𑀸𑀘𑀓𑁄 𑀧𑀦 𑀉𑀢𑁆𑀢𑀭𑀲𑀤𑁆𑀤𑁄 𑀘 𑀧𑀭𑀲𑀤𑁆𑀤𑁄 𑀘 𑀅𑀲𑀩𑁆𑀩𑀦𑀸𑀫𑀺𑀓𑁄 𑀢𑀺𑀮𑀺𑀗𑁆𑀕𑁄𑀬𑁂𑀯. 𑀢𑀣𑀸 ‘‘𑀤𑀓𑁆𑀔𑀺𑀡𑀲𑁆𑀲𑀸 𑀯𑀳𑀦𑁆𑀢𑀺𑀫’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀲𑀼𑀲𑀺𑀓𑁆𑀔𑀺𑀢𑀢𑁆𑀣𑀘𑀢𑀼𑀭𑀢𑁆𑀣𑀯𑀸𑀘𑀓𑁄 𑀤𑀓𑁆𑀔𑀺𑀡𑀲𑀤𑁆𑀤𑁄. ‘‘𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸’’𑀢𑀺𑀆𑀤𑀻𑀲𑀼 𑀧𑀦 𑀤𑁂𑀬𑁆𑀬𑀥𑀫𑁆𑀫𑀯𑀸𑀘𑀓𑁄 𑀤𑀓𑁆𑀔𑀺𑀡𑀸𑀲𑀤𑁆𑀤𑁄 𑀦𑀺𑀬𑁄𑀕𑀸 𑀇𑀢𑁆𑀣𑀺𑀮𑀺𑀗𑁆𑀕𑁄 𑀅𑀲𑀩𑁆𑀩𑀦𑀸𑀫𑀺𑀓𑁄𑀬𑁂𑀯. 𑀏𑀯𑀁 𑀅𑀜𑁆𑀜 𑀧𑀼𑀩𑁆𑀩 𑀤𑀓𑁆𑀔𑀺𑀡𑀼𑀢𑁆𑀢𑀭 𑀧𑀭𑀲𑀤𑁆𑀤𑀸 𑀅𑀲𑀩𑁆𑀩𑀦𑀸𑀫𑀺𑀓𑀸𑀧𑀺 𑀲𑀦𑁆𑀢𑀻𑀢𑀺 𑀢𑁂𑀲𑀁 𑀲𑀩𑁆𑀩𑀦𑀸𑀫𑁂𑀲𑀼𑀧𑀺 𑀅𑀲𑀩𑁆𑀩𑀦𑀸𑀫𑁂𑀲𑀼𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀓𑀢𑀭𑀲𑀤𑁆𑀤𑀸𑀤𑀻𑀦𑀁 𑀧𑀭𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑁄 𑀦𑀻𑀬𑀢𑁂 ‘‘𑀓𑀢𑀭𑀕𑀸𑀫𑀯𑀸𑀲𑀻 𑀓𑀢𑀫𑀕𑀸𑀫𑀯𑀸𑀲𑀻. 𑀉𑀪𑀬𑀕𑀸𑀫𑀯𑀸𑀲𑀺𑀦𑁄, 𑀇𑀢𑀭𑀕𑀸𑀫𑀯𑀸𑀲𑀻 𑀅𑀜𑁆𑀜𑀢𑀭𑀕𑀸𑀫𑀯𑀸𑀲𑀻, 𑀧𑀼𑀩𑁆𑀩𑀤𑀺𑀲𑀸, 𑀧𑀭𑀚𑀦𑁄, 𑀤𑀓𑁆𑀔𑀺𑀡𑀤𑀺𑀲𑀸, 𑀉𑀢𑁆𑀢𑀭𑀤𑀺𑀲𑀸, 𑀅𑀥𑀭𑀧𑀢𑁆𑀢𑁄’’𑀢𑀺. 𑀢𑀢𑁆𑀭 ‘‘𑀓𑀢𑀭𑁄 𑀕𑀸𑀫𑁄 𑀓𑀢𑀭𑀕𑀸𑀫𑁄, 𑀓𑀢𑀫𑁄 𑀕𑀸𑀫𑁄 𑀓𑀢𑀫𑀕𑀸𑀫𑁄, 𑀉𑀪𑀬𑁄 𑀕𑀸𑀫𑀸 𑀉𑀪𑀬𑀕𑀸𑀫𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀲𑀫𑀸𑀲𑀯𑀺𑀕𑁆𑀕𑀳𑁄, 𑀓𑀢𑀭𑀲𑀤𑁆𑀤𑀲𑁆𑀲 𑀧𑀦 𑀓𑀢𑀫𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑀁 𑀇𑀘𑁆𑀙𑀦𑁆𑀢𑀺 𑀤𑁆𑀯𑀺𑀥𑀸 𑀘 𑀭𑀽𑀧𑀸𑀦𑀺 𑀕𑀭𑀽 ‘‘𑀓𑀢𑀭𑁄 𑀘 𑀓𑀢𑀫𑁄 𑀘 𑀓𑀢𑀭𑀓𑀢𑀫𑁂 𑀓𑀢𑀭𑀓𑀢𑀫𑀸 𑀯𑀸’’𑀢𑀺 ¶ . 𑀢𑀲𑁆𑀫𑀸 𑀲𑀩𑁆𑀩𑀦𑀸𑀫𑀺𑀓𑀦𑀬𑁂𑀦 𑀲𑀼𑀤𑁆𑀥𑀦𑀸𑀫𑀺𑀓𑁂𑀲𑀼 𑀧𑀼𑀭𑀺𑀲𑀦𑀬𑁂𑀦 𑀘 𑀓𑀢𑀭 𑀓𑀢𑀫𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸, 𑀢𑁂𑀦𑀲𑁆𑀲 𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀝𑁆𑀞𑀸𑀦𑁂𑀲𑀼 ‘‘𑀓𑀢𑀭𑀓𑀢𑀫𑁂𑀲𑀁, 𑀓𑀢𑀭𑀓𑀢𑀫𑁂𑀲𑀸𑀦𑀁, 𑀓𑀢𑀭𑀓𑀢𑀫𑀸𑀦’’𑀦𑁆𑀢𑀺 𑀢𑀻𑀡𑀺 𑀭𑀽𑀧𑀸𑀦𑀺 𑀲𑀺𑀬𑀼𑀁 ‘‘𑀓𑀢𑀭𑀸 𑀘 𑀓𑀢𑀫𑀸 𑀘 𑀓𑀢𑀭𑀓𑀢𑀫𑀸’’𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀓𑀢𑀲𑀫𑀸𑀲𑁂 𑀧𑀦 𑀲𑀩𑁆𑀩𑀦𑀸𑀫𑀺𑀓𑀦𑀬𑁂𑀦, 𑀲𑀼𑀤𑁆𑀥𑀦𑀸𑀫𑀺𑀓𑁂𑀲𑀼 𑀓𑀜𑁆𑀜𑀸𑀦𑀬𑁂𑀦 𑀘 𑀬𑁄𑀚𑁂𑀢𑀩𑁆𑀩𑀸. ‘‘𑀓𑀢𑀭𑀜𑁆𑀘 𑀓𑀢𑀫𑀜𑁆𑀘 𑀓𑀢𑀭𑀓𑀢𑀫𑀸𑀦𑀻’’𑀢𑀺 𑀏𑀯𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀓𑀢𑀲𑀫𑀸𑀲𑁂 𑀲𑀩𑁆𑀩𑀦𑀸𑀫𑀺𑀓𑀦𑀬𑁂𑀦, 𑀲𑀼𑀤𑁆𑀥𑀦𑀸𑀫𑀺𑀓𑁂𑀲𑀼 𑀘𑀺𑀢𑁆𑀢𑀦𑀬𑁂𑀦 𑀘 𑀬𑁄𑀚𑁂𑀢𑀩𑁆𑀩𑀸.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄𑀧𑀺 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀩𑁆𑀩𑀸𑀧𑀭𑀸𑀤𑀺𑀲𑀤𑁆𑀤𑀸 𑀤𑁆𑀯𑀦𑁆𑀤𑀲𑀫𑀸𑀲𑀸𑀤𑀺𑀯𑀺𑀥𑀺𑀁 𑀧𑀢𑁆𑀯𑀸 𑀲𑁂𑀳𑀺 𑀭𑀽𑀧𑁂𑀳𑀺 𑀭𑀽𑀧𑀯𑀦𑁆𑀢𑁄 𑀦 𑀳𑁄𑀦𑁆𑀢𑀺, 𑀢𑀁 𑀬𑀣𑀸? 𑀧𑀼𑀩𑁆𑀩𑀸𑀧𑀭𑀸, 𑀅𑀥𑀭𑀼𑀢𑁆𑀢𑀭𑀸, 𑀫𑀸𑀲𑀧𑀼𑀩𑁆𑀩𑀸 𑀧𑀼𑀭𑀺𑀲𑀸, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀧𑀼𑀭𑀺𑀲𑀸, 𑀢𑀣𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀸 𑀲𑀸𑀯𑀓𑀸, 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑁂 𑀧𑀞𑀫𑀸𑀩𑀳𑀼𑀯𑀘𑀦𑀭𑀽𑀧𑀁. 𑀏𑀢𑁆𑀣𑁂𑀓𑀸𑀭𑁄 𑀆𑀤𑁂𑀲𑀪𑀽𑀢𑁄 𑀦 𑀤𑀺𑀲𑁆𑀲𑀢𑀺. 𑀧𑀼𑀩𑁆𑀩𑀸𑀧𑀭𑀸𑀦𑀁 𑀅𑀥𑀭𑀼𑀢𑁆𑀢𑀭𑀸𑀦𑀁, 𑀫𑀸𑀲𑀧𑀼𑀩𑁆𑀩𑀸𑀦𑀁 𑀧𑀼𑀭𑀺𑀲𑀸𑀦𑀁, 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑁂 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀩𑀳𑀼𑀯𑀘𑀦𑀭𑀽𑀧𑀁. 𑀏𑀢𑁆𑀣 𑀲𑀁 𑀲𑀸𑀦𑀫𑀺𑀘𑁆𑀘𑁂𑀢𑁂 𑀆𑀤𑁂𑀲𑀪𑀽𑀢𑀸 𑀦 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀁 𑀲𑀸𑀯𑀓𑀸𑀦𑀁, 𑀢𑀣𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀁 𑀲𑀸𑀯𑀺𑀓𑀸𑀦𑀁, 𑀓𑀼𑀮𑀸𑀦𑀁 𑀯𑀸, 𑀇𑀤𑀁 𑀢𑀺𑀮𑀺𑀗𑁆𑀕𑀢𑁆𑀢𑁂 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀩𑀳𑀼𑀯𑀘𑀦𑀭𑀽𑀧𑀁. 𑀏𑀢𑁆𑀣𑀸𑀧𑀺 𑀲𑀁 𑀲𑀸𑀦𑀫𑀺𑀘𑁆𑀘𑁂𑀢𑁂 𑀆𑀤𑁂𑀲𑀪𑀽𑀢𑀸 𑀦 𑀤𑀺𑀲𑁆𑀲𑀦𑁆𑀢𑀺. 𑀫𑀸𑀲𑀧𑀼𑀩𑁆𑀩𑀸𑀬𑀁 𑀫𑀸𑀲𑀧𑀼𑀩𑁆𑀩𑀸𑀬, 𑀧𑀺𑀬𑀧𑀼𑀩𑁆𑀩𑀸𑀬𑀁 𑀧𑀺𑀬𑀧𑀼𑀩𑁆𑀩𑀸𑀬, 𑀇𑀤𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑁂 𑀲𑀢𑁆𑀢𑀫𑀻𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀏𑀓𑀯𑀘𑀦𑀭𑀽𑀧𑀁. 𑀏𑀢𑁆𑀣𑀸𑀤𑁂𑀲𑀪𑀽𑀢𑀸 𑀲𑀁 𑀲𑀸 𑀦 𑀤𑀺𑀲𑁆𑀲𑀦𑁆𑀢𑀺. 𑀫𑀸𑀲𑀧𑀼𑀩𑁆𑀩𑀸𑀦𑀁 𑀇𑀢𑁆𑀣𑀻𑀦𑀁, 𑀧𑀺𑀬𑀧𑀼𑀩𑁆𑀩𑀸𑀦𑀁 𑀇𑀢𑁆𑀣𑀻𑀦𑀁, 𑀇𑀤𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑁂 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀩𑀳𑀼𑀯𑀘𑀦𑀭𑀽𑀧𑀁. 𑀏𑀢𑁆𑀣 𑀧𑀦𑀸𑀤𑁂𑀲𑀪𑀽𑀢𑁄 𑀲𑀫𑀺𑀘𑁆𑀘𑁂𑀲𑁄 𑀦 𑀤𑀺𑀲𑁆𑀲𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀧𑀼𑀩𑁆𑀩𑀸𑀧𑀭𑀸𑀤𑀻𑀦𑀁 𑀲𑀫𑀸𑀲𑀯𑀺𑀕𑁆𑀕𑀳𑀁 𑀲𑀫𑀸𑀲𑀧𑀭𑀺𑀘𑁆𑀙𑁂𑀤𑁂 𑀧𑀓𑀸𑀲𑁂𑀲𑁆𑀲𑀸𑀫.

𑀇𑀤𑀸𑀦𑀺 ¶ 𑀬𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀬𑁄, 𑀬𑁂. 𑀬𑀁, 𑀬𑁂. 𑀬𑁂𑀦, 𑀬𑁂𑀳𑀺, 𑀬𑁂𑀪𑀺. 𑀬𑀲𑁆𑀲, 𑀬𑁂𑀲𑀁, 𑀬𑁂𑀲𑀸𑀦𑀁. 𑀬𑀲𑁆𑀫𑀸, 𑀬𑀫𑁆𑀳𑀸, 𑀬𑁂𑀳𑀺, 𑀬𑁂𑀪𑀺. 𑀬𑀲𑁆𑀲, 𑀬𑁂𑀲𑀁, 𑀬𑁂𑀲𑀸𑀦𑀁. 𑀬𑀲𑁆𑀫𑀺𑀁, 𑀬𑀫𑁆𑀳𑀺, 𑀬𑁂𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁. 𑀬𑀁, 𑀬𑀸𑀦𑀺. 𑀬𑀁, 𑀬𑀸𑀦𑀺. 𑀬𑁂𑀦. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀅𑀣 𑀯𑀸 𑀬𑀁, 𑀬𑀸𑀦𑀺, 𑀬𑀸. 𑀬𑀁, 𑀬𑀸𑀦𑀺, 𑀬𑁂. 𑀬𑁂𑀦. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀓𑀢𑁆𑀣𑀘𑀺 𑀳𑀺 𑀦𑀺𑀓𑀸𑀭𑀮𑁄𑀧𑁄 𑀪𑀯𑀢𑀺. 𑀅𑀣 𑀯𑀸 𑀧𑀦 𑀦𑀺𑀓𑀸𑀭𑀲𑁆𑀲 𑀆𑀓𑀸𑀭𑁂𑀓𑀸𑀭𑀸𑀤𑁂𑀲𑀸𑀧𑀺 𑀕𑀸𑀣𑀸𑀯𑀺𑀲𑀬𑁂.

‘‘𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂;

𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂’’𑀢𑀺 𑀘,

‘‘𑀓𑀺𑀁 𑀫𑀸𑀡𑀯𑀲𑁆𑀲 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀬𑁂 𑀢𑀁 𑀚𑀺𑀦𑀦𑁆𑀢𑁄 𑀳𑀭𑁂 𑀅𑀓𑁆𑀔𑀥𑀼𑀢𑁆𑀢𑁄’’𑀢𑀺 𑀘 𑀇𑀤𑀫𑁂𑀢𑁆𑀣 𑀧𑀸𑀴𑀺𑀦𑀺𑀤𑀲𑁆𑀲𑀦𑀁. 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀬𑀸, 𑀬𑀸, 𑀬𑀸𑀬𑁄. 𑀬𑀁, 𑀬𑀸, 𑀬𑀸𑀬𑁄. 𑀬𑀸𑀬, 𑀬𑀸𑀳𑀺, 𑀬𑀸𑀪𑀺. 𑀬𑀸𑀬, 𑀬𑀲𑁆𑀲𑀸, 𑀬𑀸𑀲𑀁. 𑀬𑀸𑀬, 𑀬𑀸𑀳𑀺, 𑀬𑀸𑀪𑀺. 𑀬𑀸𑀬, 𑀬𑀲𑁆𑀲𑀸, 𑀬𑀸𑀲𑀁. 𑀬𑀲𑁆𑀲𑀁, 𑀬𑀸𑀬𑀁, 𑀬𑀸𑀲𑀼. 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀏𑀯𑀁 𑀬𑀁𑀲𑀤𑁆𑀤𑀲𑁆𑀲 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀧𑀤𑀫𑀸𑀮𑀸 𑀪𑀯𑀢𑀺. 𑀏𑀢𑁆𑀣𑀸𑀮𑀧𑀦𑀧𑀤𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀢𑀁𑀲𑀤𑁆𑀤𑀸𑀤𑀻𑀦𑀁 𑀧𑀤𑀫𑀸𑀮𑀸𑀤𑀻𑀲𑀼𑀧𑀺.

𑀏𑀢𑁆𑀣 𑀧𑀦 𑀬𑀦𑁆𑀢𑀺 𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀬𑀦𑁆𑀢𑀺 𑀲𑀤𑁆𑀤𑁄 ‘‘𑀬𑀁 𑀫𑁂 𑀪𑀦𑁆𑀢𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀆𑀭𑁄𑀘𑁂𑀫𑀺 𑀢𑀁 𑀪𑀦𑁆𑀢𑁂 𑀪𑀕𑀯𑀢𑁄’’𑀢𑀺𑀆𑀤𑀻𑀲𑀼 𑀧𑀘𑁆𑀘𑀢𑁆𑀢𑀯𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀬𑀦𑁆𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼 𑀉𑀧𑀬𑁄𑀕𑀯𑀘𑀦𑁂. ‘‘𑀅𑀝𑁆𑀞𑀸 𑀦𑀫𑁂𑀢𑀁 𑀪𑀺𑀓𑁆𑀔𑀯𑁂 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 𑀓𑀭𑀡𑀯𑀘𑀦𑁂. ‘‘𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀮𑁄𑀓𑁂 𑀉𑀤𑀧𑀸𑀤𑀻’’𑀢𑀺𑀆𑀤𑀻𑀲𑀼 𑀪𑀼𑀫𑁆𑀫𑀯𑀘𑀦𑁂 𑀤𑀺𑀲𑁆𑀲𑀢𑀺. 𑀏𑀢𑁆𑀣𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑁂 𑀘, 𑀪𑀼𑀫𑁆𑀫𑁂 𑀘 𑀓𑀭𑀡𑁂𑀧𑀺 𑀘;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀞𑀸𑀦𑁂𑀲𑀼, 𑀬𑀦𑁆𑀢𑀺 𑀲𑀤𑁆𑀤𑁄 𑀧𑀯𑀢𑁆𑀢𑀢𑀻’’𑀢𑀺.

𑀧𑀭𑀧𑀤𑁂𑀦 𑀲𑀤𑁆𑀥𑀺𑀁 𑀬𑀁𑀲𑀤𑁆𑀤𑀲𑁆𑀲 𑀲𑀫𑀸𑀲𑁄𑀧𑀺 𑀯𑁂𑀤𑀺𑀢𑀩𑁆𑀩𑁄 ‘‘𑀬𑀁𑀔𑀦𑁆𑀥𑀸𑀤𑀺, 𑀬𑀁𑀕𑀼𑀡𑀸, 𑀬𑀕𑁆𑀕𑀼𑀡𑀸’’𑀢𑀺. 𑀢𑀢𑁆𑀣 𑀬𑁄 𑀔𑀦𑁆𑀥𑀸𑀤𑀺 𑀬𑀁𑀔𑀦𑁆𑀥𑀸𑀤𑀺, 𑀬𑁂 𑀕𑀼𑀡𑀸 𑀬𑀁𑀕𑀼𑀡𑀸𑀢𑀺 𑀲𑀫𑀸𑀲𑀯𑀺𑀕𑁆𑀕𑀳𑁄. 𑀢𑀣𑀸 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀬𑀁𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀜𑁆𑀘𑁂𑀢𑀁 𑀦𑀸𑀫𑀁, 𑀢𑁂𑀲𑀁 𑀕𑀼𑀡𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 ‘‘𑀬𑁂 𑀕𑀼𑀡𑀸 𑀬𑀁𑀕𑀼𑀡𑀸, 𑀬𑀁𑀕𑀼𑀡𑀸 𑀏𑀯 𑀦𑀺𑀫𑀺𑀢𑁆𑀢𑀁 𑀬𑀁𑀕𑀼𑀡𑀦𑀺𑀫𑀺𑀢𑁆𑀢𑀁, 𑀢𑀢𑁄 𑀚𑀸𑀢𑀁 ‘𑀪𑀕𑀯𑀸’𑀢𑀺 𑀇𑀤𑀁 𑀦𑀸𑀫𑀦𑁆𑀢𑀺 𑀬𑀁𑀕𑀼𑀡𑀦𑁂𑀫𑀺𑀢𑁆𑀢𑀺𑀓’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀫𑀺𑀘𑁆𑀙𑀺𑀢𑀩𑁆𑀩𑀁. 𑀬𑀕𑁆𑀕𑀼𑀡𑀸𑀢𑀺 𑀏𑀢𑁆𑀣 𑀧𑀦 ‘‘𑀬𑀲𑁆𑀲 𑀕𑀼𑀡𑀸 𑀬𑀕𑁆𑀕𑀼𑀡𑀸’’𑀢𑀺 𑀦𑀺𑀩𑁆𑀩𑀘𑀦𑀁. 𑀢𑀣𑀸 𑀳𑀺 𑁋

‘‘𑀅𑀧𑀺 𑀲𑀩𑁆𑀩𑀜𑁆𑀜𑀼𑀢𑀸 𑀧𑀜𑁆𑀜𑀸, 𑀬𑀕𑁆𑀕𑀼𑀡𑀦𑁆𑀢𑀁 𑀦 𑀚𑀸𑀦𑀺𑀬𑀸;

𑀅𑀣 𑀓𑀸 𑀢𑀲𑁆𑀲 𑀯𑀺𑀚𑀜𑁆𑀜𑀸, 𑀢𑀁 𑀩𑀼𑀤𑁆𑀥𑀁 𑀪𑀽𑀕𑀼𑀡𑀁 𑀦𑀫𑁂’’𑀢𑀺

𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 ‘‘𑀬𑀲𑁆𑀲 𑀕𑀼𑀡𑀸 𑀬𑀕𑁆𑀕𑀼𑀡𑀸’’𑀢𑀺 𑀦𑀺𑀩𑁆𑀩𑀘𑀦𑀫𑀺𑀘𑁆𑀙𑀺𑀢𑀩𑁆𑀩𑀁.

𑀬𑀲𑀤𑁆𑀤𑀲𑁆𑀲 𑀲𑀫𑀸𑀲𑀫𑁆𑀳𑀺, 𑀲𑀤𑁆𑀥𑀺𑀁 𑀧𑀭𑀧𑀤𑁂𑀳𑀺 𑀯𑁂;

𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀯𑀸𑀣, 𑀤𑁆𑀯𑀺𑀪𑀸𑀯𑁄 𑀯𑀸 𑀲𑀺𑀬𑀸 𑀤𑁆𑀯𑀺𑀥𑀸.

𑀏𑀯𑀁 𑀬𑀲𑀤𑁆𑀤𑀲𑁆𑀲 𑀲𑀫𑀸𑀲𑁄 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀲𑁄, 𑀢𑁂. 𑀦𑀁, 𑀢𑀁, 𑀦𑁂, 𑀢𑁂. 𑀦𑁂𑀦, 𑀢𑁂𑀦, 𑀦𑁂𑀳𑀺, 𑀢𑁂𑀳𑀺, 𑀦𑁂𑀪𑀺, 𑀢𑁂𑀪𑀺. 𑀅𑀲𑁆𑀲, 𑀦𑀲𑁆𑀲, 𑀢𑀲𑁆𑀲, ‘𑀦𑁂𑀲𑀁, 𑀢𑁂𑀲𑀁 (𑀆𑀲𑀁). 𑀅𑀲𑁆𑀫𑀸, 𑀦𑀲𑁆𑀫𑀸, 𑀢𑀲𑁆𑀫𑀸, 𑀦𑀫𑁆𑀳𑀸, 𑀢𑀫𑁆𑀳𑀸, 𑀦𑁂𑀳𑀺, 𑀢𑁂𑀳𑀺, 𑀦𑁂𑀪𑀺, 𑀢𑁂𑀪𑀺. 𑀅𑀲𑁆𑀲, 𑀦𑀲𑁆𑀲, 𑀢𑀲𑁆𑀲, 𑀦𑁂𑀲𑀁, 𑀢𑁂𑀲𑀁 (𑀆𑀲𑀁). 𑀅𑀲𑁆𑀫𑀺𑀁, 𑀦𑀲𑁆𑀫𑀺𑀁, 𑀢𑀲𑁆𑀫𑀺𑀁, 𑀅𑀫𑁆𑀳𑀺, 𑀦𑀫𑁆𑀳𑀺, 𑀢𑀫𑁆𑀳𑀺, 𑀢𑁆𑀬𑀫𑁆𑀳𑀺, 𑀦𑁂𑀲𑀼, 𑀢𑁂𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁. 𑀏𑀢𑁆𑀣 ¶ 𑀘 𑀆𑀲𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀦𑁂𑀯𑀸𑀲𑀁 𑀓𑁂𑀲𑀸 𑀤𑀺𑀲𑁆𑀲𑀦𑁆𑀢𑀺, 𑀳𑀢𑁆𑀣𑀧𑀸𑀤𑀸 𑀘 𑀚𑀸𑀮𑀺𑀦𑁄’’𑀢𑀺 𑀕𑀸𑀣𑀸 𑀦𑀺𑀤𑀲𑁆𑀲𑀦𑀁, 𑀲𑁄 𑀘 𑀢𑀺𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀢𑁆𑀬𑀫𑁆𑀳𑀻𑀢𑀺 𑀧𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 𑁋

‘‘𑀬𑀤𑀸𑀲𑁆𑀲 𑀲𑀻𑀮𑀁 𑀧𑀜𑁆𑀜𑀜𑁆𑀘, 𑀲𑁄𑀘𑁂𑀬𑁆𑀬𑀜𑁆𑀘𑀸𑀥𑀺𑀕𑀘𑁆𑀙𑀢𑀺;

𑀅𑀣 𑀯𑀺𑀲𑁆𑀲𑀸𑀲𑀢𑁂 𑀢𑁆𑀬𑀫𑁆𑀳𑀺, 𑀕𑀼𑀬𑁆𑀳𑀜𑁆𑀘𑀲𑁆𑀲 𑀦 𑀭𑀓𑁆𑀔𑀢𑀻’’𑀢𑀺

𑀅𑀬𑀁 𑀕𑀸𑀣𑀸 𑀦𑀺𑀤𑀲𑁆𑀲𑀦𑀁. 𑀅𑀬𑀫𑁂𑀢𑁆𑀣 𑀭𑀽𑀧𑀯𑀺𑀲𑁂𑀲𑁄 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑁄 𑁋 𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸. 𑀏𑀲𑁂 𑀲𑁂 𑀏𑀓𑁂 𑀏𑀓𑀝𑁆𑀞𑁂𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀓𑀸𑀦𑀫𑁂𑀢 𑀢𑀲𑀤𑁆𑀤𑀸𑀦𑀁 𑀏𑀓𑀸𑀭𑀦𑁆𑀢𑀦𑀺𑀤𑁆𑀤𑁂𑀲𑁄𑀧𑀺 𑀤𑀺𑀲𑁆𑀲𑀢𑀻𑀢𑀺.

𑀏𑀢𑁆𑀣 𑀧𑀦 𑀢𑁂𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀢𑁂𑀲𑀤𑁆𑀤𑁄 ‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦’’𑀦𑁆𑀢𑀺𑀆𑀤𑀻𑀲𑀼 𑀢𑀁𑀲𑀤𑁆𑀤𑀲𑁆𑀲 𑀯𑀲𑁂𑀦 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑁂 𑀆𑀕𑀢𑁄, ‘‘𑀢𑁂 𑀦 𑀧𑀲𑁆𑀲𑀸𑀫𑀺 𑀤𑀸𑀭𑀓𑁂’’𑀢𑀺𑀆𑀤𑀻𑀲𑀼 𑀉𑀧𑀬𑁄𑀕𑀩𑀳𑀼𑀯𑀘𑀦𑁂. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫. 𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀽’’𑀢𑀺 𑀘 𑀆𑀤𑀻𑀲𑀼 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀯𑀲𑁂𑀦 𑀲𑀫𑁆𑀧𑀤𑀸𑀦𑁂, 𑀢𑀼𑀬𑁆𑀳𑀦𑁆𑀢𑀺 𑀅𑀢𑁆𑀣𑁄𑀢𑀺 𑀯𑀤𑀦𑁆𑀢𑀺. ‘‘𑀓𑀺𑀦𑁆𑀢𑁂 𑀤𑀺𑀝𑁆𑀞𑀁 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀉𑀧𑀥𑀻 𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑀸, 𑀆𑀲𑀯𑀸 𑀢𑁂 𑀧𑀤𑀸𑀮𑀺𑀢𑀸’’𑀢𑀺 𑀘 𑀆𑀤𑀻𑀲𑀼 𑀓𑀭𑀡𑁂. ‘‘𑀓𑀺𑀦𑁆𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺𑀆𑀤𑀻𑀲𑀼 𑀲𑀸𑀫𑀺𑀅𑀢𑁆𑀣𑁂, 𑀢𑀯𑀸𑀢𑀺 𑀅𑀢𑁆𑀣𑁄𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑁂 𑀘, 𑀓𑀭𑀡𑁂 𑀲𑀫𑁆𑀧𑀤𑀸𑀦𑀺𑀬𑁂;

𑀲𑀸𑀫𑀺𑀫𑁆𑀳𑀺 𑀘𑀸𑀢𑀺 𑀢𑁂𑀲𑀤𑁆𑀤𑁄, 𑀧𑀜𑁆𑀘𑀲𑁆𑀯𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺.

𑀢𑀁, 𑀢𑀸𑀦𑀺. 𑀢𑀁, 𑀢𑀸𑀦𑀺. 𑀦𑁂𑀦, 𑀢𑁂𑀦 𑀇𑀘𑁆𑀘𑀸𑀤𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀲𑀸 ¶ , 𑀢𑀸, 𑀢𑀸𑀬𑁄. 𑀦𑀁, 𑀢𑀁, 𑀦𑀸, 𑀢𑀸, 𑀦𑀸𑀬𑁄, 𑀢𑀸𑀬𑁄. 𑀦𑀸𑀬, 𑀢𑀸𑀬, 𑀦𑀸𑀳𑀺, 𑀢𑀸𑀳𑀺, 𑀦𑀸𑀪𑀺, 𑀢𑀸𑀪𑀺. 𑀅𑀲𑁆𑀲𑀸, 𑀦𑀲𑁆𑀲𑀸, (𑀢𑀺𑀲𑁆𑀲𑀸,) 𑀢𑀲𑁆𑀲𑀸, 𑀦𑀸𑀬, 𑀢𑀸𑀬, 𑀦𑀸𑀲𑀁, 𑀢𑀸𑀲𑀁, 𑀲𑀸𑀦𑀁, 𑀆𑀲𑀁. 𑀅𑀲𑁆𑀲𑀸, 𑀦𑀲𑁆𑀲𑀸, 𑀢𑀲𑁆𑀲𑀸, 𑀦𑀸𑀬, 𑀢𑀸𑀬, 𑀦𑀸𑀳𑀺, 𑀢𑀸𑀳𑀺, 𑀦𑀸𑀪𑀺, 𑀢𑀸𑀪𑀺. 𑀅𑀲𑁆𑀲𑀸, 𑀦𑀲𑁆𑀲𑀸, (𑀢𑀺𑀲𑁆𑀲𑀸,) 𑀢𑀲𑁆𑀲𑀸, 𑀦𑀸𑀬, 𑀢𑀸𑀬, 𑀦𑀸𑀲𑀁, 𑀢𑀸𑀲𑀁, 𑀲𑀸𑀦𑀁, 𑀆𑀲𑀁. 𑀦𑀸𑀬, 𑀢𑀸𑀬, 𑀅𑀲𑁆𑀲𑀁, 𑀦𑀲𑁆𑀲𑀁, 𑀢𑀺𑀲𑁆𑀲𑀁, 𑀢𑀲𑁆𑀲𑀁, 𑀦𑀸𑀬𑀁, 𑀢𑀸𑀬𑀁, 𑀦𑀸𑀲𑀼, 𑀢𑀸𑀲𑀼, 𑀢𑁆𑀬𑀸𑀲𑀼. 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁.

𑀏𑀢𑁆𑀣 𑀧𑀦 ‘‘𑀅𑀪𑀺𑀓𑁆𑀓𑀫𑁄 𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀔𑀺𑀟𑁆𑀟𑀸 𑀧𑀡𑀺𑀳𑀺𑀢𑀸 𑀢𑁆𑀬𑀸𑀲𑀼, 𑀭𑀢𑀺 𑀢𑁆𑀬𑀸𑀲𑀼 𑀧𑀢𑀺𑀝𑁆𑀞𑀺𑀢𑀸. 𑀩𑀻𑀚𑀸𑀦𑀺 𑀢𑁆𑀬𑀸𑀲𑀼 𑀭𑀼𑀳𑀦𑁆𑀢𑀻’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀲𑀸𑀦𑀁 𑀆𑀲𑀁 𑀢𑁆𑀬𑀸𑀲𑀽’’𑀢𑀺 𑀇𑀫𑀸𑀦𑀺 𑀯𑀼𑀢𑁆𑀢𑀸𑀦𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀜𑀸𑀡𑀘𑀓𑁆𑀔𑀼𑀲𑀫𑁆𑀫𑀼𑀬𑁆𑀳𑀦𑀝𑁆𑀞𑀸𑀦𑀪𑀽𑀢𑀸𑀦𑀺. 𑀏𑀯𑀁 𑀧𑀭𑀫𑁆𑀫𑀼𑀔𑀯𑀘𑀦𑀲𑁆𑀲 𑀢𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀏𑀢𑁆𑀣 𑀘 𑀇𑀤𑀁 𑀯𑀢𑁆𑀢𑀩𑁆𑀩𑀁 𑁋

‘‘𑀢𑀁 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀬𑀸𑀘𑀲𑁆𑀲𑀼’’, 𑀇𑀘𑁆𑀘𑀸𑀤𑀻𑀲𑀼 𑀧𑀤𑀺𑀲𑁆𑀲𑀭𑁂;

𑀆𑀤𑁄 𑀢𑀁 𑀢𑁂𑀢𑀺𑀆𑀤𑀻𑀦𑀺, 𑀦𑀦𑁆𑀢𑀺𑀆𑀤𑀻𑀦𑀺 𑀦𑁄 𑀢𑀣𑀸.

𑀦𑀁 𑀦𑁂 𑀦𑁂𑀦𑀸𑀢𑀺𑀆𑀤𑀻𑀦𑀺, 𑀯𑁄 𑀦𑁄𑀇𑀘𑁆𑀘𑀸𑀤𑀬𑁄 𑀯𑀺𑀬;

𑀧𑀤𑀢𑁄 𑀧𑀭𑀪𑀸𑀯𑀫𑁆𑀳𑀺, 𑀤𑀺𑀝𑁆𑀞𑀸𑀦𑀺 𑀚𑀺𑀦𑀲𑀸𑀲𑀦𑁂.

‘‘𑀅𑀣 𑀦𑀁 𑀅𑀣 𑀦𑁂 𑀆𑀳, 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀺’’;

𑀇𑀘𑁆𑀘𑀸𑀤𑀻𑀦𑀺 𑀧𑀬𑁄𑀕𑀸𑀦𑀺, 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸.

𑀓𑁄 𑀘𑁂𑀢𑁆𑀣 𑀯𑀤𑁂𑀬𑁆𑀬 𑁋

‘‘𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺

𑀏𑀢𑁆𑀣 ¶ 𑁋

𑀧𑀤𑀢𑁄 𑀅𑀧𑀭𑀢𑁆𑀢𑁂𑀧𑀺, 𑀦𑀸𑀲𑀁𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀸;

𑀆𑀤𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀯, 𑀦𑀁 𑀦𑁂𑀇𑀘𑁆𑀘𑀸𑀤𑀬𑁄 𑀇𑀢𑀺.

𑀲𑁄 𑀧𑀦𑁂𑀯𑀦𑁆𑀢𑀼 𑀯𑀢𑁆𑀢𑀩𑁆𑀩𑁄, ‘‘𑀢𑀯 𑀯𑀸𑀤𑁂 𑀦 𑀮𑀩𑁆𑀪𑀢𑀺;

𑀦𑀸𑀲𑀁𑀲𑀤𑁆𑀤𑁄 𑀦𑀲𑀤𑁆𑀤𑁄 𑀘, 𑀆𑀲𑀁𑀲𑀤𑁆𑀤𑁄 𑀘 𑀮𑀩𑁆𑀪𑀭𑁂.

𑀢𑀲𑁆𑀫𑀸 ‘𑀆𑀲𑀁 𑀦 𑀓𑀼𑀚𑁆𑀛𑀦𑁆𑀢𑀺, 𑀇𑀢𑁆𑀣𑀻𑀦𑀁 𑀧𑀡𑁆𑀟𑀺𑀢𑀸’𑀇𑀢𑀺;

𑀅𑀢𑁆𑀣𑁄𑀯 𑀪𑀯𑀢𑁂 𑀏𑀯𑀁, 𑀲𑀼𑀝𑁆𑀞𑀼 𑀥𑀸𑀭𑁂𑀳𑀺 𑀧𑀡𑁆𑀟𑀺𑀢𑀸’’𑀢𑀺.

𑀅𑀣 𑀯𑀸 𑀬𑀲𑁆𑀫𑀸 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀦𑀁 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺, 𑀦𑁂 𑀧𑀼𑀭𑀺𑀲𑁂 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀤𑀢𑁄 𑀅𑀧𑀭𑀢𑁆𑀢𑁂𑀧𑀺 ‘‘𑀦𑀁, 𑀦𑁂’’ 𑀇𑀘𑁆𑀘𑀸𑀤𑀻𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀢𑁂𑀦𑀸𑀧𑀺 𑀦𑀬𑁂𑀦 𑀧𑀤𑀢𑁄 𑀅𑀧𑀭𑀸𑀦𑀺𑀧𑀺 𑀢𑀸𑀦𑀺 𑀓𑀤𑀸𑀘𑀺 𑀲𑀺𑀬𑀼𑀁. 𑀫𑀬𑀁 𑀧𑀦 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀢𑁂𑀲𑀁 𑀧𑀯𑀢𑁆𑀢𑀺𑀁 𑀯𑀤𑀸𑀫, 𑀇𑀤𑀁 𑀞𑀸𑀦𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀏𑀢𑁆𑀣 𑀧𑀦 𑀢𑀲𑀤𑁆𑀤𑀲𑁆𑀲 𑀧𑀭𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑀸𑀲𑁄𑀧𑀺 𑀯𑁂𑀤𑀺𑀢𑀩𑁆𑀩𑁄 ‘‘𑀢𑀁𑀧𑀼𑀢𑁆𑀢𑁄, 𑀢𑀁𑀲𑀤𑀺𑀲𑁄, 𑀢𑀦𑁆𑀦𑀺𑀦𑁆𑀦𑁄, 𑀢𑀧𑁆𑀧𑁄𑀡𑁄, 𑀢𑀧𑁆𑀧𑀩𑁆𑀪𑀸𑀭𑁄, 𑀢𑀩𑁆𑀪𑀽𑀢𑁄, 𑀢𑀕𑁆𑀕𑀼𑀡𑁄, 𑀢𑀲𑁆𑀲𑀤𑀺𑀲𑁄’’𑀢𑀺.

𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑀫𑁆𑀳𑀺, 𑀲𑀤𑁆𑀥𑀺𑀁 𑀧𑀭𑀧𑀤𑁂𑀳𑀺 𑀯𑁂;

𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀧𑀼𑀩𑁆𑀩-𑀧𑀤𑁂 𑀤𑁆𑀯𑀺𑀢𑁆𑀢𑀦𑁆𑀢𑀼 𑀧𑀘𑁆𑀙𑀺𑀫𑁂.

𑀏𑀯𑀁 𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑁄 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀏𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀏𑀲𑁄, 𑀏𑀢𑁂. 𑀏𑀢𑀁, 𑀏𑀢𑁂. 𑀏𑀢𑁂𑀦, 𑀏𑀢𑁂𑀳𑀺, 𑀏𑀢𑁂𑀪𑀺. 𑀏𑀢𑀲𑁆𑀲, 𑀏𑀢𑁂𑀲𑀁, 𑀏𑀢𑁂𑀲𑀸𑀦𑀁. 𑀏𑀢𑀲𑁆𑀫𑀸, 𑀏𑀢𑀫𑁆𑀳𑀸, 𑀏𑀢𑁂𑀳𑀺, 𑀏𑀢𑁂𑀪𑀺. 𑀏𑀢𑀲𑁆𑀲, 𑀏𑀢𑁂𑀲𑀁, 𑀏𑀢𑁂𑀲𑀸𑀦𑀁. 𑀏𑀢𑀲𑁆𑀫𑀺𑀁, 𑀏𑀢𑀫𑁆𑀳𑀺, 𑀏𑀢𑁂𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁.

𑀏𑀢𑀁, 𑀏𑀢𑀸𑀦𑀺. 𑀏𑀢𑀁, 𑀏𑀢𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁, 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀏𑀲𑀸 ¶ , 𑀏𑀢𑀸, 𑀏𑀢𑀸𑀬𑁄. 𑀏𑀢𑀁, 𑀏𑀢𑀸, 𑀏𑀢𑀸𑀬𑁄. 𑀏𑀢𑀸𑀬, 𑀏𑀢𑀸𑀳𑀺, 𑀏𑀢𑀸𑀪𑀺. 𑀏𑀢𑀸𑀬, 𑀏𑀢𑀺𑀲𑁆𑀲𑀸, 𑀏𑀢𑀺𑀲𑁆𑀲𑀸𑀬, 𑀏𑀢𑀸𑀲𑀁. 𑀏𑀢𑀸𑀬, 𑀏𑀢𑀸𑀳𑀺, 𑀏𑀢𑀸𑀪𑀺. 𑀏𑀢𑀸𑀬, 𑀏𑀢𑀺𑀲𑁆𑀲𑀸, 𑀏𑀢𑀺𑀲𑁆𑀲𑀸𑀬, 𑀏𑀢𑀸𑀲𑀁. 𑀏𑀢𑀸𑀬, 𑀏𑀢𑀺𑀲𑁆𑀲𑀁, 𑀏𑀢𑀸𑀲𑀼. 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀏𑀯𑀁 𑀏𑀢𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀧𑀭𑀧𑀤𑁂𑀦𑁂𑀢𑁆𑀣 𑀲𑀤𑁆𑀥𑀺𑀁 𑀲𑀫𑀸𑀲𑁄𑀧𑀺𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 ‘‘𑀏𑀢𑀤𑀢𑁆𑀣𑀸𑀬 𑀮𑁄𑀓𑀲𑁆𑀫𑀺𑀁, 𑀦𑀺𑀥𑀺 𑀦𑀸𑀫 𑀦𑀺𑀥𑀺𑀬𑁆𑀬𑀢𑀺. 𑀏𑀢𑀧𑁆𑀧𑀭𑀫𑀸𑀬𑁂𑀯 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼.

𑀲𑀫𑀸𑀲𑁂 𑀏𑀢𑀲𑀤𑁆𑀤𑀲𑁆𑀲, 𑀲𑀤𑁆𑀥𑀺𑀁 𑀧𑀭𑀧𑀤𑁂𑀳𑀺 𑀯𑁂;

𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀧𑀼𑀩𑁆𑀩-𑀧𑀤𑁂 𑀳𑁄𑀢𑀺 𑀦 𑀳𑁄𑀢𑀺 𑀘.

𑀇𑀤𑀸𑀦𑀺 𑀇𑀤𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀅𑀬𑀁, 𑀇𑀫𑁂. 𑀇𑀫𑀁, 𑀇𑀫𑁂. 𑀅𑀦𑁂𑀦, 𑀇𑀫𑀺𑀦𑀸, 𑀏𑀳𑀺, 𑀏𑀪𑀺, 𑀇𑀫𑁂𑀳𑀺, 𑀇𑀫𑁂𑀪𑀺. 𑀅𑀲𑁆𑀲, 𑀇𑀫𑀲𑁆𑀲, 𑀏𑀲𑀁, 𑀏𑀲𑀸𑀦𑀁, 𑀇𑀫𑁂𑀲𑀁, 𑀇𑀫𑁂𑀲𑀸𑀦𑀁. 𑀅𑀲𑁆𑀫𑀸, 𑀇𑀫𑀲𑁆𑀫𑀸, 𑀇𑀫𑀫𑁆𑀳𑀸, 𑀏𑀳𑀺, 𑀏𑀪𑀺, 𑀇𑀫𑁂𑀳𑀺, 𑀇𑀫𑁂𑀪𑀺. 𑀅𑀲𑁆𑀲, 𑀇𑀫𑀲𑁆𑀲, 𑀏𑀲𑀁, 𑀏𑀲𑀸𑀦𑀁, 𑀇𑀫𑁂𑀲𑀁, 𑀇𑀫𑁂𑀲𑀸𑀦𑀁. 𑀅𑀲𑁆𑀫𑀺𑀁, 𑀇𑀫𑀲𑁆𑀫𑀺𑀁, 𑀅𑀫𑁆𑀳𑀺, 𑀇𑀫𑀫𑁆𑀳𑀺, 𑀏𑀲𑀼, 𑀇𑀫𑁂𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁.

𑀇𑀤𑀁, 𑀇𑀫𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀅𑀬𑀁, 𑀇𑀫𑀸, 𑀇𑀫𑀸𑀬𑁄. 𑀇𑀫𑀁, 𑀇𑀫𑀸, 𑀇𑀫𑀸𑀬𑁄. 𑀇𑀫𑀸𑀬, 𑀇𑀫𑀸𑀳𑀺, 𑀇𑀫𑀸𑀪𑀺. 𑀅𑀲𑁆𑀲𑀸, 𑀅𑀲𑁆𑀲𑀸𑀬, 𑀇𑀫𑀺𑀲𑁆𑀲𑀸, 𑀇𑀫𑀺𑀲𑁆𑀲𑀸𑀬, 𑀇𑀫𑀸𑀬, 𑀇𑀫𑀸𑀲𑀁. 𑀅𑀲𑁆𑀲𑀸, 𑀇𑀫𑀺𑀲𑁆𑀲𑀸, 𑀇𑀫𑀸𑀬, 𑀇𑀫𑀸𑀳𑀺, 𑀇𑀫𑀸𑀪𑀺. 𑀅𑀲𑁆𑀲𑀸, 𑀅𑀲𑁆𑀲𑀸𑀬, 𑀇𑀫𑀺𑀲𑁆𑀲𑀸, 𑀇𑀫𑀺𑀲𑁆𑀲𑀸𑀬, 𑀇𑀫𑀸𑀬, 𑀇𑀫𑀸𑀲𑀁. 𑀅𑀲𑁆𑀲𑀁, 𑀇𑀫𑀺𑀲𑁆𑀲𑀁, 𑀇𑀫𑀸𑀬, 𑀇𑀫𑀸𑀬𑀁, 𑀇𑀫𑀸𑀲𑀼. 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀏𑀯𑀁 𑀇𑀤𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺.

𑀓𑀘𑁆𑀘𑀸𑀬𑀦𑁂 𑀢𑀼 ‘‘𑀇𑀫𑀲𑁆𑀲𑀺𑀤𑀫𑀁𑀲𑀺𑀲𑀼 𑀦𑀧𑀼𑀁𑀲𑀓𑁂’’𑀢𑀺 𑀇𑀫𑀲𑀤𑁆𑀤𑁄𑀬𑁂𑀯 𑀧𑀓𑀢𑀺𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀇𑀥 𑀧𑀦 𑀇𑀤𑀁𑀲𑀤𑁆𑀤𑁄𑀬𑁂𑀯 ‘‘𑀇𑀤𑀧𑁆𑀧𑀘𑁆𑀘𑀬𑀢𑀸’’𑀢𑀺 𑀏𑀢𑁆𑀣 ‘‘𑀇𑀤’’𑀦𑁆𑀢𑀺 𑀧𑀓𑀢𑀺𑀬𑀸 𑀤𑀲𑁆𑀲𑀦𑀢𑁄. 𑀢𑀣𑀸 ¶ 𑀳𑀺 ‘‘𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀢𑀸𑀲𑀤𑁆𑀤𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀦𑁆𑀢𑀭𑀁 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸𑀢𑀺. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀲𑀫𑀽𑀳𑀢𑁆𑀣𑀁 𑀢𑀸𑀲𑀤𑁆𑀤𑀫𑀸𑀳 𑀬𑀣𑀸 𑀚𑀦𑀸𑀦𑀁 𑀲𑀫𑀽𑀳𑁄 𑀚𑀦𑀢𑀸𑀢𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀘 𑀇𑀤𑀁𑀲𑀤𑁆𑀤𑁄𑀬𑁂𑀯 𑀧𑀓𑀢𑀺𑀪𑀸𑀯𑁂𑀦 𑀯𑀼𑀢𑁆𑀢𑁄.

𑀲𑀫𑀸𑀲𑁂 𑀇𑀤𑀁𑀲𑀤𑁆𑀤𑀲𑁆𑀲, 𑀲𑀤𑁆𑀥𑀺𑀁 𑀧𑀭𑀧𑀤𑁂𑀦 𑀯𑁂;

𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑁆𑀯𑁂𑀯, 𑀭𑀽𑀧𑀁 𑀤𑁆𑀯𑀺𑀢𑁆𑀢𑀁 𑀲𑀺𑀬𑀼𑀢𑁆𑀢𑀭𑁂.

𑀇𑀤𑀸𑀦𑀺 𑀅𑀫𑀼𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀅𑀲𑀼, 𑀅𑀫𑀼, 𑀅𑀫𑀽. 𑀅𑀫𑀼𑀁, 𑀅𑀫𑀽. 𑀅𑀫𑀼𑀦𑀸, 𑀅𑀫𑀽𑀳𑀺, 𑀅𑀫𑀽𑀪𑀺. 𑀅𑀫𑀼𑀲𑁆𑀲, 𑀤𑀼𑀲𑁆𑀲, 𑀅𑀫𑀽𑀲𑀁, 𑀅𑀫𑀽𑀲𑀸𑀦𑀁. 𑀅𑀫𑀼𑀲𑁆𑀫𑀸, 𑀅𑀫𑀼𑀫𑁆𑀳𑀸, 𑀅𑀫𑀽𑀳𑀺, 𑀅𑀫𑀽𑀪𑀺. 𑀅𑀫𑀼𑀲𑁆𑀲, 𑀤𑀼𑀲𑁆𑀲, 𑀅𑀫𑀽𑀲𑀁, 𑀅𑀫𑀽𑀲𑀸𑀦𑀁. 𑀅𑀫𑀼𑀲𑁆𑀫𑀺𑀁, 𑀅𑀫𑀼𑀫𑁆𑀳𑀺, 𑀅𑀫𑀽𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁.

𑀅𑀤𑀼𑀁, 𑀅𑀫𑀽𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀅𑀲𑀼, 𑀅𑀫𑀼, 𑀅𑀫𑀽, 𑀅𑀫𑀼𑀬𑁄. 𑀅𑀫𑀽𑀁, 𑀅𑀫𑀽, 𑀅𑀫𑀼𑀬𑁄. 𑀅𑀫𑀼𑀬𑀸, 𑀅𑀫𑀽𑀳𑀺, 𑀅𑀫𑀽𑀪𑀺. 𑀅𑀫𑀼𑀲𑁆𑀲𑀸, 𑀅𑀫𑀼𑀬𑀸, 𑀅𑀫𑀽𑀲𑀁, 𑀅𑀫𑀽𑀲𑀸𑀦𑀁. 𑀅𑀫𑀼𑀬𑀸, 𑀅𑀫𑀽𑀳𑀺, 𑀅𑀫𑀽𑀪𑀺. 𑀅𑀫𑀼𑀲𑁆𑀲𑀸, 𑀅𑀫𑀼𑀬𑀸, 𑀅𑀫𑀽𑀲𑀁, 𑀅𑀫𑀽𑀲𑀸𑀦𑀁. 𑀅𑀫𑀼𑀬𑀸, 𑀅𑀫𑀼𑀬𑀁, 𑀅𑀫𑀼𑀲𑁆𑀲𑀁, 𑀅𑀫𑀽𑀲𑀼. 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀏𑀯𑀁 𑀅𑀫𑀼𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺, 𑀲𑀫𑀸𑀲𑁄 𑀧𑀦 𑀅𑀧𑁆𑀧𑀲𑀺𑀤𑁆𑀥𑁄.

𑀢𑀢𑁆𑀭 ‘‘𑀤𑀼𑀲𑁆𑀲 𑀫𑁂 𑀔𑁂𑀢𑁆𑀢𑀧𑀸𑀮𑀲𑁆𑀲, 𑀭𑀢𑁆𑀢𑀺𑀪𑀢𑁆𑀢𑀁 𑀅𑀧𑀸𑀪𑀢’’𑀦𑁆𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀤𑀼𑀲𑁆𑀲𑀸’’𑀢𑀺 𑀧𑀤𑀫𑀫𑁆𑀳𑁂𑀳𑀺 𑀞𑀧𑀺𑀢𑀁. 𑀓𑀓𑀸𑀭𑀸𑀕𑀫𑀯𑀲𑁂𑀦 𑀅𑀜𑁆𑀜𑀸𑀦𑀺𑀧𑀺 𑀅𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑁂𑀲𑀁 ¶ 𑀯𑀲𑁂𑀦 𑀅𑀬𑀁 𑀮𑀺𑀗𑁆𑀕𑀢𑁆𑀢𑀬𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

‘‘𑀅𑀲𑀼𑀓𑁄, 𑀅𑀲𑀼𑀓𑀸. 𑀅𑀲𑀼𑀓𑀁, 𑀅𑀲𑀼𑀓𑁂’’𑀢𑀺𑀆𑀤𑀺𑀦𑀸, ‘‘𑀅𑀫𑀼𑀓𑁄, 𑀅𑀫𑀼𑀓𑀸. 𑀅𑀫𑀼𑀓𑀁, 𑀅𑀫𑀼𑀓𑁂’’𑀢𑀺𑀆𑀤𑀺𑀦𑀸 𑀘 𑀧𑀼𑀭𑀺𑀲𑀦𑀬𑁄𑀧𑀺 𑀮𑀩𑁆𑀪𑀢𑀺. ‘‘𑀅𑀲𑀼𑀓𑀸, 𑀅𑀲𑀼𑀓𑀸𑀬𑁄’’𑀢𑀺𑀆𑀤𑀺𑀦𑀸, ‘‘𑀅𑀫𑀼𑀓𑀸, 𑀅𑀫𑀼𑀓𑀸𑀬𑁄’’𑀢𑀺𑀆𑀤𑀺𑀦𑀸 𑀘 𑀓𑀜𑁆𑀜𑀸𑀦𑀬𑁄𑀧𑀺 𑀮𑀩𑁆𑀪𑀢𑀺. ‘‘𑀅𑀲𑀼𑀓𑀁, 𑀅𑀲𑀼𑀓𑀸𑀦𑀻’’𑀢𑀺𑀆𑀤𑀺𑀦𑀸, ‘‘𑀅𑀫𑀼𑀓𑀁, 𑀅𑀫𑀼𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀘 𑀘𑀺𑀢𑁆𑀢𑀦𑀬𑁄𑀧𑀺 𑀮𑀩𑁆𑀪𑀢𑀺. 𑀇𑀫𑀸𑀦𑁂𑀢𑁆𑀣 𑀧𑀤𑀸𑀦𑀺 𑀅𑀲𑀩𑁆𑀩𑀦𑀸𑀫𑀺𑀓𑀸𑀦𑀺𑀧𑀺 𑀓𑀓𑀸𑀭𑀸𑀕𑀫𑀯𑀲𑁂𑀦 𑀦𑀸𑀦𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺.

𑀇𑀤𑀸𑀦𑀺 𑀓𑀺𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀓𑁄, 𑀓𑁂. 𑀓𑀁, 𑀓𑁂. 𑀓𑁂𑀦, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀺𑀲𑁆𑀲, 𑀓𑁂𑀲𑀁. 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑁂𑀳𑀺, 𑀓𑁂𑀪𑀺. 𑀓𑀲𑁆𑀲, 𑀓𑀺𑀲𑁆𑀲, 𑀓𑁂𑀲𑀁. 𑀓𑀲𑁆𑀫𑀺𑀁, 𑀓𑀺𑀲𑁆𑀫𑀺𑀁, 𑀓𑀫𑁆𑀳𑀺, 𑀓𑀺𑀫𑁆𑀳𑀺, 𑀓𑁂𑀲𑀼. 𑀇𑀤𑀁 𑀧𑀼𑀮𑁆𑀮𑀺𑀗𑁆𑀕𑀁.

𑀭𑀽𑀧𑀯𑀺𑀲𑁂𑀲𑁄𑀧𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄 ‘‘𑀓𑁂 𑀕𑀦𑁆𑀥𑀩𑁆𑀩𑁂 𑀘 𑀭𑀓𑁆𑀔𑀲𑁂 𑀦𑀸𑀕𑁂, 𑀓𑁂 𑀓𑀺𑀫𑁆𑀧𑀼𑀭𑀺𑀲𑁂 𑀘 𑀫𑀸𑀦𑀼𑀲𑁂, 𑀓𑁂 𑀧𑀡𑁆𑀟𑀺𑀢𑁂 𑀲𑀩𑁆𑀩𑀓𑀸𑀫𑀤𑀤𑁂, 𑀤𑀻𑀖𑀁 𑀭𑀢𑁆𑀢𑀁 𑀪𑀢𑁆𑀢𑀸 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑁂 𑀘 𑀙𑀯𑁂 𑀧𑀸𑀣𑀺𑀓𑀧𑀼𑀢𑁆𑀢𑁂, 𑀓𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀆𑀲𑀸𑀤𑀦𑀸’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄. 𑀬𑀲𑁆𑀫𑀸 𑀧𑀦 𑀓𑁂 𑀕𑀦𑁆𑀥𑀩𑁆𑀩𑁂 𑀘 𑀭𑀓𑁆𑀔𑀲𑁂 𑀦𑀸𑀕𑁂 𑀇𑀢𑀺𑀆𑀤𑀻𑀲𑀼 𑀧𑀸𑀴𑀻𑀲𑀼 ‘‘𑀓𑁂’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 𑀏𑀓𑀸𑀭𑀦𑁆𑀢𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀓𑁂’’𑀢𑀺 𑀭𑀽𑀧𑀪𑁂𑀤𑁄 𑀘𑁂𑀢𑁆𑀣 𑀜𑁂𑀬𑁆𑀬𑁄. 𑀢𑀣𑀸 ‘‘𑀓𑀺𑀲𑁆𑀲𑀲𑁆𑀲 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫. 𑀓𑀺𑀲𑁆𑀫𑀺𑀁 𑀫𑁂 𑀲𑀺𑀯𑀬𑁄 𑀓𑀼𑀤𑁆𑀥𑀸. 𑀓𑀫𑁆𑀳𑀺 𑀓𑀸𑀮𑁂 𑀢𑀬𑀸 𑀯𑀻𑀭, 𑀧𑀢𑁆𑀣𑀺𑀢𑀸 𑀩𑁄𑀥𑀺𑀫𑀼𑀢𑁆𑀢𑀫𑀸’’𑀢𑀺𑀆𑀤𑀻𑀦𑀺 𑀘 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑀜𑁂𑀬𑁆𑀬𑀸𑀦𑀺. 𑀅𑀧𑀺𑀘 𑁋

‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚’’, 𑀇𑀢𑀺𑀆𑀤𑀻𑀲𑀼 𑀧𑀸𑀴𑀺𑀲𑀼;

𑀓𑁆𑀯𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀢𑀻𑀢𑀺, 𑀜𑁂𑀬𑁆𑀬𑀸 𑀓𑁄 𑀇𑀘𑁆𑀘𑀬𑀁 𑀲𑀼𑀢𑀺.

𑀧𑁂𑀢𑀁 ¶ 𑀢𑀁 𑀲𑀸𑀫𑀫𑀤𑁆𑀤𑀓𑁆𑀔𑀺𑀁, 𑀓𑁄 𑀦𑀼 𑀢𑁆𑀯𑀁 𑀲𑀸𑀫 𑀚𑀻𑀯𑀲𑀺;

𑀇𑀢𑀺 𑀧𑀸𑀞𑁂 𑀓𑀣𑀁𑀲𑀤𑁆𑀤𑀸-𑀪𑀺𑀥𑁂𑀬𑁆𑀬𑁂 𑀯𑀢𑁆𑀢𑀢𑀻𑀢𑀺 𑀘.

𑀏𑀢𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼, 𑀤𑀺𑀝𑁆𑀞𑁄 𑀓𑁄 𑀇𑀘𑁆𑀘𑀬𑀁 𑀭𑀯𑁄;

𑀦𑀺𑀧𑀸𑀢𑁄𑀢𑀺 𑀕𑀳𑁂𑀢𑀩𑁆𑀩𑁄, 𑀲𑀼𑀢𑀺𑀲𑀸𑀫𑀜𑁆𑀜𑀢𑁄 𑀭𑀼𑀢𑁄.

𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀓𑀁, 𑀓𑀸𑀦𑀺. 𑀓𑀁, 𑀓𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀣 𑀯𑀸 ‘‘𑀓𑀺𑀁 𑀘𑀺𑀢𑁆𑀢𑀁. 𑀓𑀺𑀁 𑀭𑀽𑀧𑀁. 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁. 𑀓𑀺𑀁 𑀇𑀘𑁆𑀙𑀲𑀻’’𑀢𑀺𑀆𑀤𑀺𑀧𑀬𑁄𑀕𑀤𑀲𑁆𑀲𑀦𑀢𑁄 𑀧𑀦 ‘‘𑀓𑀺𑀁, 𑀓𑀸𑀦𑀺. 𑀓𑀺𑀁, 𑀓𑀸𑀦𑀻’’𑀢𑀺 𑀯𑀢𑁆𑀯𑀸 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀬𑀼𑀢𑁆𑀢𑀢𑀭𑁄, 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀓𑀸, 𑀓𑀸, 𑀓𑀸𑀬𑁄. 𑀓𑀁, 𑀓𑀸, 𑀓𑀸𑀬𑁄. 𑀓𑀸𑀬, 𑀓𑀸𑀳𑀺, 𑀓𑀸𑀪𑀺. 𑀓𑀸𑀬, 𑀓𑀲𑁆𑀲𑀸, 𑀓𑀸𑀲𑀁, 𑀓𑀸𑀲𑀸𑀦𑀁. 𑀓𑀸𑀬, 𑀓𑀲𑁆𑀲𑀸, 𑀓𑀸𑀳𑀺, 𑀓𑀸𑀪𑀺. 𑀓𑀸𑀬, 𑀓𑀲𑁆𑀲𑀸, 𑀓𑀸𑀲𑀁 𑀓𑀸𑀲𑀸𑀦𑀁. 𑀓𑀸𑀬, 𑀓𑀲𑁆𑀲𑀸, 𑀓𑀸𑀬𑀁, 𑀓𑀲𑁆𑀲𑀁, 𑀓𑀸𑀲𑀼.

𑀏𑀢𑁆𑀣 𑀧𑀦 𑀓𑀸𑀬𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀓𑀸𑀬𑁄 𑀅𑀫𑁄𑀖𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀏𑀯𑀁 𑀓𑀺𑀁𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀯𑀢𑀺. 𑀏𑀢𑁆𑀣𑁂𑀢𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀓𑀺𑀁 𑀲𑀤𑁆𑀤𑁄 ‘‘𑀓𑀺𑀁 𑀭𑀸𑀚𑀸 𑀬𑁄 𑀮𑁄𑀓𑀁 𑀦 𑀭𑀓𑁆𑀔𑀢𑀺. 𑀓𑀺𑀁 𑀦𑀼 𑀔𑁄 𑀦𑀸𑀫 𑀢𑀼𑀫𑁆𑀳𑁂 𑀫𑀁 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑀣𑀸’’𑀢𑀺𑀆𑀤𑀻𑀲𑀼 𑀕𑀭𑀳𑀦𑁂 𑀆𑀕𑀢𑁄. ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼 𑀅𑀦𑀺𑀬𑀫𑁂. ‘‘𑀓𑀺𑀦𑁆𑀢𑁂 𑀯𑀓𑁆𑀓𑀮𑀺 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄 𑀯𑀓𑁆𑀓𑀮𑀺 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀦𑀺𑀧𑁆𑀧𑀬𑁄𑀚𑀦𑀢𑀸𑀬𑀁. ‘‘𑀓𑀺𑀁 𑀦 𑀓𑀸𑀳𑀸𑀫𑀺 𑀢𑁂 𑀯𑀘𑁄’’𑀢𑀺𑀆𑀤𑀻𑀲𑀼 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀬𑀁, 𑀧𑀼𑀘𑁆𑀙𑀸 𑀘 𑀦𑀸𑀫 𑀓𑀸𑀭𑀡𑀧𑀼𑀘𑁆𑀙𑀸𑀤𑀺𑀯𑀲𑁂𑀦 ¶ 𑀅𑀦𑁂𑀓𑀯𑀺𑀥𑀸, 𑀅𑀢𑁄 𑀓𑀸𑀭𑀡𑀧𑀼𑀘𑁆𑀙𑀸𑀤𑀺𑀯𑀲𑁂𑀦𑀧𑀺 𑀓𑀺𑀁𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑀺𑀢𑁆𑀣𑀸𑀭𑀢𑁄 𑀜𑁂𑀬𑁆𑀬𑀸. 𑀢𑀣𑀸 𑀳𑀺 𑀅𑀬𑀁 ‘‘𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀡𑀲𑀺 𑀲𑀸𑀭𑀣𑀺. 𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺. 𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄’’𑀢𑀺𑀆𑀤𑀻𑀲𑀼 𑀓𑀸𑀭𑀡𑀧𑀼𑀘𑁆𑀙𑀸𑀬𑀁 𑀯𑀢𑁆𑀢𑀢𑀺. ‘‘𑀓𑀺𑀁 𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀓𑀺𑀘𑁆𑀘𑀧𑀼𑀘𑁆𑀙𑀸𑀬𑀁. ‘‘𑀓𑀺𑀁 𑀲𑀻𑀮𑀁. 𑀓𑁄 𑀲𑀫𑀸𑀥𑀻’’𑀢𑀺𑀆𑀤𑀻𑀲𑀼 𑀲𑀭𑀽𑀧𑀧𑀼𑀘𑁆𑀙𑀸𑀬𑀁. ‘‘𑀓𑀺𑀁 𑀔𑀸𑀤𑀲𑀺. 𑀓𑀺𑀁 𑀧𑀺𑀯𑀲𑀻’’𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀧𑀼𑀘𑁆𑀙𑀸𑀬𑀁. ‘‘𑀔𑀸𑀤𑀲𑀺 𑀓𑀺𑀁 𑀧𑀺𑀯𑀲𑀺 𑀓𑀺’’𑀦𑁆𑀢𑀺𑀆𑀤𑀻𑀲𑀼 𑀓𑁆𑀭𑀺𑀬𑀸𑀧𑀼𑀘𑁆𑀙𑀸𑀬𑀁 𑀯𑀢𑁆𑀢𑀢𑀺. 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸𑀢𑀺 𑀏𑀯𑀫𑀸𑀤𑀺𑀓𑀸 𑀧𑀦 𑀧𑀜𑁆𑀘𑀯𑀺𑀥𑀸 𑀧𑀼𑀘𑁆𑀙𑀸 𑀓𑀺𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀦𑀸𑀳𑀭𑀺𑀢𑀩𑁆𑀩𑀢𑁆𑀢𑀸 𑀅𑀦𑀸𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀕𑀭𑀳𑀸𑀬𑀁 𑀅𑀦𑀺𑀬𑀫𑁂, 𑀦𑀺𑀧𑁆𑀧𑀬𑁄𑀚𑀦𑀢𑀸𑀬 𑀘;

𑀲𑀫𑁆𑀧𑀝𑀺𑀘𑁆𑀙𑀦𑀧𑀼𑀘𑁆𑀙𑀸𑀲𑀼, 𑀓𑀺𑀁𑀲𑀤𑁆𑀤𑁄 𑀲𑀫𑁆𑀧𑀯𑀢𑁆𑀢𑀢𑀺.

𑀧𑀭𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑁄𑀧𑀺𑀲𑁆𑀲 𑀯𑁂𑀤𑀺𑀢𑀩𑁆𑀩𑁄 ‘‘𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀯𑁂𑀤𑀦𑁄, 𑀓𑀺𑀁𑀲𑀜𑁆𑀜𑁄𑀚𑀦𑁄’’𑀢𑀺. 𑀏𑀢𑁆𑀣 ‘‘𑀓𑁄, 𑀓𑁂. 𑀓𑀸, 𑀓𑀸, 𑀓𑀸𑀬𑁄. 𑀓𑀺𑀁, 𑀓𑀸𑀦𑀻’’𑀢𑀺 𑀏𑀯𑀁 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺 𑀓𑀺𑀁𑀲𑀤𑁆𑀤𑀫𑀬𑀸𑀦𑀺 𑀧𑀤𑀸𑀦𑀺 𑀲𑀫𑀸𑀲𑀧𑀤𑀢𑁆𑀢𑁂 𑀧𑀼𑀦 𑀓𑀺𑀫𑀺𑀢𑀺 𑀧𑀓𑀢𑀺𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀦𑀸𑀫𑀲𑀤𑁆𑀤𑁂𑀦 𑀧𑀦 𑀲𑀫𑀸𑀲𑁂 𑀢𑁂𑀲𑀁 𑀤𑁆𑀯𑀺𑀥𑀸 𑀕𑀢𑀺 𑀤𑀺𑀲𑁆𑀲𑀢𑀺 ‘‘𑀓𑀺𑀦𑁆𑀦𑀸𑀫𑁄, 𑀓𑁄𑀦𑀸𑀫𑁄’’𑀢𑀺. 𑀲𑀩𑁆𑀩𑀸𑀦𑀺 𑀧𑀦𑁂𑀢𑀸𑀦𑀺 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀩𑀳𑀼𑀯𑀘𑀦𑀯𑀲𑁂𑀦 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀓𑀺𑀁𑀲𑀤𑁆𑀤𑀲𑁆𑀲 𑀲𑀫𑀸𑀲𑀫𑁆𑀳𑀺, 𑀲𑀤𑁆𑀥𑀺𑀁 𑀦𑀸𑀫𑀭𑀯𑁂𑀦 𑀯𑁂;

‘‘𑀓𑀺𑀦𑁆𑀦𑀸𑀫𑁄’’ 𑀇𑀢𑀺 ‘‘𑀓𑁄𑀦𑀸𑀫𑁄’’, 𑀇𑀢𑀺 𑀘𑁂𑀯𑀁 𑀕𑀢𑀺 𑀤𑁆𑀯𑀺𑀥𑀸.

‘‘𑀓𑁄𑀦𑀸𑀫𑁄 ¶ 𑀢𑁂 𑀉𑀧𑀚𑁆𑀛𑀸𑀬𑁄’’, 𑀇𑀘𑁆𑀘𑀸𑀤𑁂𑀢𑁆𑀣 𑀦𑀺𑀤𑀲𑁆𑀲𑀦𑀁;

𑀲𑀳𑀜𑁆𑀜𑁂𑀦 𑀲𑀫𑀸𑀲𑀫𑁆𑀳𑀺, ‘‘𑀓𑀺𑀁 𑀓𑀺𑀁’’𑀇𑀘𑁆𑀘𑁂𑀯 𑀲𑀼𑀬𑁆𑀬𑀢𑁂.

𑀢𑀣𑀸 𑀳𑀺 ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼. 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻’’𑀢𑀺𑀆𑀤𑀻𑀲𑀼 𑀓𑀺𑀁𑀲𑀤𑁆𑀤𑁄 𑀲𑀭𑀽𑀧𑀫𑀯𑀺𑀚𑀳𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀳𑀺 𑀓𑀺𑀁𑀘𑀺𑀢𑁆𑀢𑀁 𑀬𑀲𑁆𑀲 𑀲𑁄 𑀓𑀺𑀁𑀘𑀺𑀢𑁆𑀢𑁄. ‘‘𑀓𑀺𑀁 𑀓𑀭𑁄𑀫𑀺 𑀲𑀸𑀫𑀻’’𑀢𑀺 𑀏𑀯𑀁 𑀓𑀺𑀦𑁆𑀢𑀺 𑀓𑀸𑀭𑁄 𑀓𑀭𑀡𑀁 𑀲𑀤𑁆𑀤𑀦𑀺𑀘𑁆𑀙𑀸𑀭𑀡𑀁 𑀓𑀺𑀁𑀓𑀸𑀭𑁄, 𑀢𑀁 𑀧𑀝𑀺𑀲𑁆𑀲𑀸𑀯𑁂𑀢𑀻𑀢𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻𑀢𑀺𑀆𑀤𑀺 𑀦𑀺𑀩𑁆𑀩𑀘𑀦𑀫𑀺𑀘𑁆𑀙𑀺𑀢𑀩𑁆𑀩𑀁. ‘‘𑀓𑀺𑀦𑁆𑀦𑀭𑁄. 𑀓𑀺𑀁𑀧𑀓𑁆𑀓𑀫𑀺𑀯 𑀪𑀓𑁆𑀔𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀦𑀺𑀩𑁆𑀩𑀘𑀦𑀫𑀧𑁆𑀧𑀲𑀺𑀤𑁆𑀥𑀁, 𑀓𑀺𑀁𑀲𑀤𑁆𑀤𑁄𑀬𑁂𑀯 𑀧𑀤𑀸𑀯𑀬𑀯𑀪𑀸𑀯𑁂𑀦 𑀲𑀼𑀢𑁄. 𑀢𑀣𑀸 𑀳𑀺 𑀲𑁄 𑀓𑀢𑁆𑀣𑀘𑀺 𑀧𑀤𑀸𑀯𑀬𑀯𑀪𑀸𑀯𑁂𑀦 𑀓𑀢𑁆𑀣𑀘𑀺 𑀦𑀼 𑀲𑀼 𑀦𑀼𑀔𑁄 𑀓𑀸𑀭𑀡𑀸𑀤𑀺𑀲𑀤𑁆𑀤𑁂𑀳𑀺 𑀲𑀳𑀘𑀸𑀭𑀺𑀪𑀸𑀯𑁂𑀦 𑀘 𑀲𑀼𑀬𑁆𑀬𑀢𑀺. 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋 𑀏𑀲𑀸 𑀢𑁂 𑀇𑀢𑁆𑀣𑀻 𑀓𑀺𑀁 𑀳𑁄𑀢𑀺. 𑀏𑀢𑁂 𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀳𑁄𑀦𑁆𑀢𑀺. 𑀓𑀺𑀫𑁆𑀧𑀼𑀭𑀺𑀲𑀸𑀦𑀼𑀘𑀺𑀡𑁆𑀡𑁄. 𑀓𑀺𑀁 𑀦𑀼 𑀪𑀻𑀢𑁄𑀯 𑀢𑀺𑀝𑁆𑀞𑀲𑀺. 𑀓𑀺𑀁𑀲𑀼𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺. 𑀓𑀺𑀁 𑀦𑀼𑀔𑁄 𑀓𑀸𑀭𑀡𑀁. 𑀓𑀺𑀁 𑀓𑀸𑀭𑀡𑀸 𑀅𑀫𑁆𑀫 𑀢𑀼𑀯𑀁 𑀧𑀫𑀚𑁆𑀚𑀲𑀺, 𑀓𑀺𑀜𑁆𑀳𑀺 𑀦𑀸𑀫 𑀘𑀚𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀅𑀤𑀤𑀫𑀧𑁆𑀧𑀓𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀺𑀲𑀼𑀁 𑀧𑀤𑀸𑀯𑀬𑀯𑁄 𑀯𑀸, 𑀳𑀼𑀢𑁆𑀯𑀸 𑀦𑁆𑀯𑀸𑀤𑀻𑀳𑀺 𑀯𑀸 𑀧𑀦;

𑀬𑀼𑀢𑁆𑀢𑁄 𑀲𑀤𑁆𑀤𑁂𑀳𑀺 𑀓𑀺𑀁𑀲𑀤𑁆𑀤𑁄, 𑀤𑀺𑀝𑁆𑀞𑁄 𑀲𑀼𑀕𑀢𑀲𑀸𑀲𑀦𑁂.

𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦, 𑀲𑁂𑀲𑀸𑀦𑀁 𑀲𑀫𑁆𑀪𑀯𑁄𑀧𑀺 𑀘;

𑀜𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺 𑀲𑀤𑁆𑀥𑀫𑁆𑀫-𑀦𑀬𑀜𑁆𑀜𑀽𑀳𑀺 𑀧𑀪𑁂𑀤𑀢𑁄’’𑀢𑀺.

𑀇𑀤𑀸𑀦𑀺 ¶ 𑀲𑀩𑁆𑀩𑀦𑀸𑀫𑀺𑀓𑀪𑀸𑀯𑁂 𑀞𑀺𑀢𑁂𑀳𑀺 𑀓𑁄 𑀓𑀁𑀲𑀤𑁆𑀤𑁂𑀳𑀺 𑀲𑀫𑀸𑀦𑀲𑀼𑀢𑀺𑀓𑀸𑀦𑀁 𑀅𑀜𑁆𑀜𑁂𑀲𑀁 𑀓𑁄 𑀓𑀁𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀳𑁂𑀝𑁆𑀞𑀸 𑀮𑀺𑀗𑁆𑀕𑀢𑁆𑀢𑀬𑀫𑀺𑀲𑁆𑀲𑀓𑀧𑀭𑀺𑀘𑁆𑀙𑁂𑀤𑁂 𑀯𑀼𑀢𑁆𑀢𑁄. 𑀅𑀲𑀩𑁆𑀩𑀦𑀸𑀫𑀺𑀓𑀢𑁆𑀢𑀸 𑀧𑀦 𑀧𑀼𑀭𑀺𑀲 𑀘𑀺𑀢𑁆𑀢𑀦𑀬𑁂𑀦𑁂𑀯 𑀯𑀺𑀪𑀢𑁆𑀢𑁄. 𑀢𑀣𑀸 𑀳𑀺 𑀬𑀤𑀸 𑀓𑁄𑀲𑀤𑁆𑀤𑁄 𑀩𑁆𑀭𑀳𑁆𑀫𑀯𑀸𑀢𑀓𑀸𑀬𑀢𑁆𑀣𑀯𑀸𑀘𑀓𑁄, 𑀓𑀁𑀲𑀤𑁆𑀤𑁄 𑀧𑀦 𑀲𑀺𑀭𑁄𑀚𑀮𑀲𑀼𑀔𑀢𑁆𑀣𑀯𑀸𑀘𑀓𑁄, 𑀢𑀤𑀸 𑀢𑀸𑀦𑀺 𑀧𑀤𑀸𑀦𑀺 𑀅𑀲𑀩𑁆𑀩𑀦𑀸𑀫𑀺𑀓𑀸𑀦𑀺, 𑀓𑀲𑁆𑀫𑀸? 𑀅𑀓𑀺𑀁𑀲𑀤𑁆𑀤𑀫𑀬𑀢𑁆𑀢𑀸 𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀲𑀗𑁆𑀔𑀸𑀢𑁂𑀳𑀺 𑀅𑀲𑀸𑀥𑀸𑀭𑀡𑀭𑀽𑀧𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀧𑀼𑀘𑁆𑀙𑀢𑁆𑀣𑀢𑁄 𑀅𑀢𑁆𑀣𑀦𑁆𑀢𑀭𑀯𑀸𑀘𑀓𑀢𑁆𑀢𑀸 𑀘. 𑀏𑀢𑁆𑀣 𑀧𑀦 𑀲𑀫𑀸𑀦𑀲𑀼𑀢𑀺𑀯𑀲𑁂𑀦 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀓𑁄𑀲𑀤𑁆𑀤𑁄 𑀓𑀁𑀲𑀤𑁆𑀤𑁄𑀢𑀺 𑀘 𑀯𑀼𑀢𑁆𑀢𑀁, 𑀏𑀓𑀦𑁆𑀢𑀢𑁄 𑀧𑀦 𑀲𑀩𑁆𑀩𑀦𑀸𑀫𑀺𑀓𑀢𑁆𑀢𑁂 𑀓𑀺𑀁𑀲𑀤𑁆𑀤𑁄𑀬𑁂𑀯, 𑀲𑀼𑀤𑁆𑀥𑀦𑀸𑀫𑀢𑁆𑀢𑁂 𑀓𑀲𑀤𑁆𑀤𑁄𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀘𑁆𑀘𑁂𑀯𑀁 𑁋

𑀓𑀸𑀬𑁂 𑀩𑁆𑀭𑀳𑁆𑀫𑀦𑀺 𑀯𑀸𑀢𑁂 𑀘, 𑀲𑀻𑀲𑁂 𑀚𑀮𑀲𑀼𑀔𑁂𑀲𑀼 𑀘;

𑀓𑀲𑀤𑁆𑀤𑁄 𑀯𑀢𑁆𑀢𑀢𑀻 𑀢𑀻𑀲𑀼, 𑀧𑀼𑀫𑀸 𑀢𑀻𑀲𑀼 𑀦𑀧𑀼𑀁𑀲𑀓𑁄.

𑀏𑀯𑀁 𑀲𑀩𑁆𑀩𑀦𑀸𑀫𑀪𑀽𑀢𑀸𑀦𑀁 𑀓𑀺𑀁𑀓𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀥 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁, 𑀅𑀢𑁆𑀣𑀸𑀦𑀁 𑀤𑀸𑀦𑀺 𑀲𑀗𑁆𑀕𑀳𑁄;

𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀓𑀭𑀡𑁄, 𑀏𑀓𑀤𑁂𑀲𑁂𑀦 𑀯𑀼𑀘𑁆𑀘𑀢𑁂.

𑀓𑀺𑀁 𑀓𑀺𑀁𑀧𑀓𑁆𑀓𑁂𑀦 𑀲𑀤𑀺𑀲𑀁, 𑀓𑀸𑀬𑁄 𑀓𑀺𑀁𑀧𑀪𑀯𑁄 𑀯𑀤;

𑀓𑀺𑀁𑀧𑀓𑁆𑀓𑀲𑀤𑀺𑀲𑁄 𑀓𑀸𑀫𑁄, 𑀓𑀸𑀬𑁄 𑀢𑀡𑁆𑀳𑀸𑀤𑀺𑀲𑀫𑁆𑀪𑀯𑁄.

𑀉𑀡𑁆𑀳𑀓𑀸𑀮𑁂 𑀓’𑀫𑀺𑀘𑁆𑀙𑀦𑁆𑀢𑀺, 𑀓’𑀫𑀺𑀘𑁆𑀙𑀦𑁆𑀢𑀺 𑀧𑀺𑀧𑀸𑀲𑀺𑀢𑀸;

𑀧𑀘𑁆𑀘𑀸𑀫𑀺𑀢𑁆𑀢𑀸 𑀓’𑀫𑀺𑀘𑁆𑀙𑀦𑁆𑀢𑀺, 𑀓’𑀫𑀺𑀘𑁆𑀙𑀦𑁆𑀢𑀺 𑀤𑀼𑀔𑀝𑁆𑀝𑀺𑀢𑀸.

𑀓𑀸𑀬𑀲𑁆𑀲 𑀓𑀲𑁆𑀲 𑀓𑁄 𑀆𑀬𑁄,

𑀓𑁄 𑀦𑀸𑀣𑁄 𑀓𑀲𑁆𑀲 𑀪𑀽𑀢𑀮𑁂;

𑀓𑀲𑁆𑀲 𑀓𑀁 𑀛𑀸𑀦𑀚𑀁 𑀲𑀸𑀢𑀁,

𑀓𑀲𑁆𑀲𑀗𑁆𑀕𑁂𑀲𑀼 𑀘 𑀓𑀁 𑀧𑀭𑀦𑁆𑀢𑀺.

𑀬𑀸 ¶ 𑀧𑀦 𑀢𑀸 𑀳𑁂𑀝𑁆𑀞𑀸 𑀅𑀫𑁆𑀳𑁂𑀳𑀺 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀓𑀺𑀁𑀲𑀤𑁆𑀤𑀲𑁆𑀲 𑀲𑀩𑁆𑀩𑀦𑀸𑀫𑀺𑀓𑀲𑀜𑁆𑀜𑀺𑀢𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀺𑀪𑀢𑁆𑀢𑀸, 𑀏𑀢𑀸𑀲𑀼 𑀧𑀼𑀮𑁆𑀮𑀺𑀗𑁆𑀕𑀦𑀧𑀼𑀁𑀲𑀓𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀓𑁂𑀪𑀺, 𑀓𑀺𑀲𑁆𑀲, 𑀓𑀲𑁆𑀫𑀸, 𑀓𑀫𑁆𑀳𑀸, 𑀓𑀫𑁆𑀳𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀧𑀳𑀸𑀬 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀓𑀸𑀬𑁄, 𑀓𑀸𑀪𑀺, 𑀓𑀸𑀲𑀸𑀦𑀁, 𑀓𑀸𑀬𑀁, 𑀓𑀲𑁆𑀲’’𑀦𑁆𑀢𑀺 𑀇𑀫𑀸𑀦𑀺 𑀘 𑀧𑀤𑀸𑀦𑀺 𑀧𑀳𑀸𑀬 𑀢𑀢𑁄 𑀢𑀢𑁄 𑀲𑁂𑀲𑀧𑀤𑀢𑁄 𑀬𑀣𑀸𑀲𑀫𑁆𑀪𑀯𑀁 𑀘𑀺𑀲𑀤𑁆𑀤𑀁 𑀘𑀦𑀲𑀤𑁆𑀤𑀁 𑀘𑀦𑀁𑀲𑀤𑁆𑀤𑀜𑁆𑀘 𑀦𑀺𑀧𑀸𑀢𑁂𑀢𑁆𑀯𑀸 𑀏𑀯𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁?

𑀓𑁄𑀘𑀺, 𑀓𑁂𑀘𑀺, 𑀓𑁂𑀘𑀦. 𑀓𑀺𑀜𑁆𑀘𑀺, 𑀓𑀺𑀜𑁆𑀘𑀦𑀁, 𑀓𑁂𑀘𑀺, 𑀓𑁂𑀘𑀦. 𑀓𑁂𑀦𑀘𑀺, 𑀓𑁂𑀳𑀺𑀘𑀺. 𑀓𑀲𑁆𑀲𑀘𑀺, 𑀓𑁂𑀲𑀜𑁆𑀘𑀺. 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀁 𑀊𑀦𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸. 𑀓𑁂𑀳𑀺𑀘𑀺. 𑀓𑀲𑁆𑀲𑀘𑀺, 𑀓𑁂𑀲𑀜𑁆𑀘𑀺. 𑀓𑀲𑁆𑀫𑀺𑀜𑁆𑀘𑀺, 𑀓𑀺𑀲𑁆𑀫𑀺𑀘𑀺, 𑀓𑁂𑀲𑀼𑀘𑀺. 𑀧𑀼𑀮𑁆𑀮𑀺𑀗𑁆𑀕𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀢𑁆𑀭 𑀓𑀺𑀲𑁆𑀫𑀺𑀘𑀻𑀢𑀺 𑀅𑀦𑀼𑀲𑀸𑀭𑀮𑁄𑀧𑀯𑀲𑁂𑀦 𑀯𑀼𑀢𑁆𑀢𑀁.

𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀦 𑀓𑀸𑀘𑀺 𑀇𑀢𑁆𑀣𑀻, 𑀓𑀸𑀘𑀺 𑀇𑀢𑁆𑀣𑀺𑀬𑁄. 𑀓𑀸𑀘𑀺, 𑀓𑀸𑀘𑀺. 𑀓𑀺𑀜𑁆𑀘𑀺, 𑀓𑀸𑀘𑀺. 𑀓𑀸𑀬𑀘𑀺, 𑀓𑀸𑀳𑀺𑀘𑀺. 𑀓𑀸𑀬𑀘𑀺, 𑀓𑀲𑁆𑀲𑀸𑀘𑀺, 𑀓𑀸𑀲𑀜𑁆𑀘𑀺. 𑀓𑀸𑀬𑀘𑀺, 𑀓𑀸𑀳𑀺𑀘𑀺. 𑀓𑀸𑀬𑀘𑀺, 𑀓𑀲𑁆𑀲𑀸𑀘𑀺, 𑀓𑀸𑀲𑀜𑁆𑀘𑀺. 𑀓𑀸𑀬𑀘𑀺, 𑀓𑀸𑀲𑀼𑀘𑀻𑀢𑀺 𑀭𑀽𑀧𑀸𑀦𑀺.

𑀏𑀢𑁆𑀣 ‘‘𑀇𑀢𑀺 𑀪𑀸𑀲𑀦𑁆𑀢𑀺 𑀓𑁂𑀘𑀦, 𑀦 𑀦𑀁 𑀳𑀺𑀁𑀲𑀸𑀫𑀺 𑀓𑀺𑀜𑁆𑀘𑀦’’𑀦𑁆𑀢𑀺𑀆𑀤𑀬𑁄 𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀓𑁄𑀘𑀺 𑀓𑀸𑀘𑀺 𑀓𑀺𑀜𑁆𑀘𑀻𑀢𑀺𑀆𑀤𑀻𑀦𑀺 𑀅𑀧𑁆𑀧𑀫𑀢𑁆𑀢𑀓𑀸𑀦𑀁 𑀲𑀗𑁆𑀕𑀸𑀳𑀓𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀼𑀦𑁂𑀢𑀸𑀦𑀺𑀬𑁂𑀯 𑀬𑀣𑀸𑀭𑀳𑀁 𑀬𑀁𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫𑀺 𑁋

𑀬𑁄 𑀓𑁄𑀘𑀺, 𑀬𑁂 𑀓𑁂𑀘𑀺. 𑀬𑀁 𑀓𑀺𑀜𑁆𑀘𑀺, 𑀬𑁂 𑀓𑁂𑀘𑀺. 𑀬𑁂𑀦 𑀓𑁂𑀦𑀘𑀺, 𑀬𑁂𑀳𑀺 𑀓𑁂𑀳𑀺𑀘𑀺. 𑀬𑀲𑁆𑀲 𑀓𑀲𑁆𑀲𑀘𑀺, 𑀬𑁂𑀲𑀁 𑀓𑁂𑀲𑀜𑁆𑀘𑀺. 𑀬𑀲𑁆𑀫𑀸 𑀓𑀲𑁆𑀫𑀸𑀘𑀺, 𑀬𑁂𑀳𑀺 𑀓𑁂𑀳𑀺𑀘𑀺. 𑀬𑀲𑁆𑀲 𑀓𑀲𑁆𑀲𑀘𑀺, 𑀬𑁂𑀲𑀁 𑀓𑁂𑀲𑀜𑁆𑀘𑀺. 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺, 𑀬𑁂𑀲𑀼 𑀓𑁂𑀲𑀼𑀘𑀺.

𑀏𑀢𑁆𑀣 ¶ ‘‘𑀬𑁄 𑀓𑁄𑀘𑀺 𑀫𑀁 𑀅𑀝𑁆𑀞𑀺 𑀓𑀢𑁆𑀯𑀸 𑀲𑀼𑀡𑁂𑀬𑁆𑀬. 𑀬𑁂 𑀓𑁂𑀘𑀺𑀫𑁂 𑀅𑀢𑁆𑀣𑀺 𑀭𑀲𑀸 𑀧𑀣𑀩𑁆𑀬𑀸, 𑀲𑀘𑁆𑀘𑀁 𑀢𑁂𑀲𑀁 𑀲𑀸𑀥𑀼𑀢𑀭𑀁 𑀭𑀲𑀸𑀦’’𑀦𑁆𑀢𑀺𑀆𑀤𑀬𑁄 𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀬𑀁 𑀓𑀺𑀜𑁆𑀘𑀺, 𑀬𑀸𑀦𑀺 𑀓𑀸𑀦𑀺𑀘𑀺. 𑀬𑀁 𑀓𑀺𑀜𑁆𑀘𑀺, 𑀬𑀸𑀦𑀺 𑀓𑀸𑀦𑀺𑀘𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀏𑀢𑁆𑀣 ‘‘𑀬𑀁 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀺, 𑀥𑀢𑀭𑀝𑁆𑀞𑀦𑀺𑀯𑁂𑀲𑀦𑁂. 𑀬𑀁 𑀓𑀺𑀜𑁆𑀘𑀺 𑀯𑀺𑀢𑁆𑀢𑀁 𑀇𑀥 𑀯𑀸 𑀳𑀼𑀭𑀁 𑀯𑀸. 𑀬𑀸𑀦𑀺 𑀓𑀸𑀦𑀺𑀘𑀺 𑀭𑀽𑀧𑀸𑀦𑀻’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺.

𑀬𑀸 𑀓𑀸𑀘𑀺 𑀇𑀢𑁆𑀣𑀻, 𑀬𑀸 𑀓𑀸𑀘𑀺 𑀇𑀢𑁆𑀣𑀺𑀬𑁄. 𑀬𑀁 𑀓𑀺𑀜𑁆𑀘𑀺, 𑀬𑀸 𑀓𑀸𑀘𑀺. 𑀬𑀸𑀬 𑀓𑀸𑀬𑀘𑀺, 𑀬𑀸𑀳𑀺 𑀓𑀸𑀳𑀺𑀘𑀺. 𑀬𑀸𑀬 𑀓𑀸𑀬𑀘𑀺, 𑀬𑀸𑀲𑀁 𑀓𑀸𑀲𑀜𑁆𑀘𑀺. 𑀬𑀸𑀬 𑀓𑀸𑀬𑀘𑀺, 𑀬𑀸𑀳𑀺 𑀓𑀸𑀳𑀺𑀘𑀺. 𑀬𑀸𑀬 𑀓𑀸𑀬𑀘𑀺, 𑀬𑀸𑀲𑀁 𑀓𑀸𑀲𑀜𑁆𑀘𑀺. 𑀬𑀸𑀬 𑀓𑀸𑀬𑀘𑀺, 𑀬𑀸𑀲𑀼 𑀓𑀸𑀲𑀼𑀘𑀺.

𑀏𑀢𑁆𑀣 ‘‘𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺. 𑀇𑀢𑀺 𑀮𑀺𑀗𑁆𑀕𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀬𑁄 𑀓𑁄𑀘𑀺, 𑀬𑀸 𑀓𑀸𑀘𑀺, 𑀬𑀁 𑀓𑀺𑀜𑁆𑀘𑀻𑀢𑀺𑀆𑀤𑀻𑀦𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀦 𑀦𑀺𑀧𑀸𑀢𑀧𑀤𑀸𑀦𑀺, 𑀦𑀺𑀧𑀸𑀢𑀧𑀢𑀺𑀭𑀽𑀧𑀓𑀸 𑀲𑀤𑁆𑀤𑀕𑀢𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀤𑀺 𑀦𑀺𑀧𑀸𑀢𑀧𑀤𑀸𑀦𑀺 𑀲𑀺𑀬𑀼𑀁, 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀲𑀢𑁆𑀢𑀲𑀼 𑀯𑀺𑀪𑀢𑁆𑀢𑀻𑀲𑀼 𑀏𑀓𑀸𑀓𑀸𑀭𑁂𑀦 𑀢𑀺𑀝𑁆𑀞𑁂𑀬𑁆𑀬𑀼𑀁, 𑀦 𑀘 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀦 𑀦𑀺𑀧𑀸𑀢𑀧𑀤𑀸𑀦𑀺, 𑀦𑀺𑀧𑀸𑀢𑀧𑀢𑀺𑀭𑀽𑀧𑀓𑀸 𑀲𑀤𑁆𑀤𑀕𑀢𑀺𑀬𑁄𑀬𑁂𑀯.

𑀅𑀧𑀺𑀘 𑀬 𑀢 𑀓𑀺𑀁 𑀏𑀢𑀇𑀘𑁆𑀘𑁂𑀢𑁂𑀳𑀺 𑀲𑀩𑁆𑀩𑀦𑀸𑀫𑁂𑀳𑀺 𑀮𑀺𑀗𑁆𑀕𑀸𑀦𑀼𑀭𑀽𑀧𑀢𑁄 𑀢𑁆𑀢𑀓𑀢𑁆𑀢𑀺𑀓𑀧𑀘𑁆𑀘𑀬𑁂 𑀓𑀢𑁆𑀯𑀸 𑀯𑀢𑁆𑀢𑀺𑀘𑁆𑀙𑀸𑀬𑀁 𑀬𑀸𑀦𑀺 𑀧𑀤𑀸𑀦𑀺 𑀲𑀺𑀚𑁆𑀛𑀦𑁆𑀢𑀺, 𑀢𑀸𑀦𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀸𑀦𑀺 𑀅𑀲𑀩𑁆𑀩𑀦𑀸𑀫𑀺𑀓𑀸𑀦𑀺𑀬𑁂𑀯 𑀪𑀯𑀦𑁆𑀢𑀺. 𑀢𑁂𑀲𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀧𑀼𑀭𑀺𑀲 𑀘𑀺𑀢𑁆𑀢 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀢𑀁 𑀬𑀣𑀸?

𑀬𑀢𑁆𑀢𑀓𑁄 ¶ 𑀚𑀦𑁄, 𑀬𑀢𑁆𑀢𑀓𑀁 𑀘𑀺𑀢𑁆𑀢𑀁, 𑀬𑀢𑁆𑀢𑀺𑀓𑀸 𑀇𑀢𑁆𑀣𑀻. 𑀢𑀢𑁆𑀢𑀓𑁄, 𑀢𑀢𑁆𑀢𑀓𑀁, 𑀢𑀢𑁆𑀢𑀺𑀓𑀸. 𑀓𑀺𑀢𑁆𑀢𑀓𑁄, 𑀓𑀺𑀢𑁆𑀢𑀓𑀁, 𑀓𑀺𑀢𑁆𑀢𑀺𑀓𑀸. 𑀏𑀢𑁆𑀢𑀓𑁄, 𑀏𑀢𑁆𑀢𑀓𑀁, 𑀏𑀢𑁆𑀢𑀺𑀓𑀸𑀢𑀺. 𑀇𑀫𑀸𑀦𑀺 𑀧𑀤𑀸𑀦𑀺 𑀅𑀲𑀩𑁆𑀩𑀦𑀸𑀫𑀺𑀓𑀸𑀦𑀺𑀧𑀺 𑀧𑀘𑁆𑀘𑀬𑀯𑀲𑁂𑀦 𑀲𑀫𑁆𑀪𑀽𑀢𑀢𑁆𑀣𑀦𑁆𑀢𑀭𑁂𑀲𑀼 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀸𑀦𑀺.

𑀇𑀤𑀸𑀦𑀺 𑀲𑀗𑁆𑀔𑀸𑀤𑀺𑀯𑀘𑀦𑀲𑁆𑀲 𑀏𑀓𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀏𑀓𑀲𑀤𑁆𑀤𑁄 𑀳𑀺 𑀲𑀗𑁆𑀔𑀸𑀯𑀘𑀦𑁄 𑀘 𑀳𑁄𑀢𑀺 𑀅𑀲𑀤𑀺𑀲𑀯𑀘𑀦𑁄 𑀘 𑀅𑀲𑀳𑀸𑀬𑀯𑀘𑀦𑁄 𑀘 𑀏𑀓𑀘𑁆𑀘𑀯𑀘𑀦𑁄 𑀘 𑀫𑀺𑀲𑁆𑀲𑀻𑀪𑀽𑀢𑀯𑀘𑀦𑁄 𑀘. 𑀬𑀤𑀸 𑀲𑀗𑁆𑀔𑀸’𑀲𑀤𑀺𑀲𑀸’𑀲𑀳𑀸𑀬𑀯𑀘𑀦𑁄, 𑀢𑀤𑀸 𑀏𑀓𑀯𑀘𑀦𑀓𑁄 𑀪𑀯𑀢𑀺.

𑀏𑀓𑁄, 𑀏𑀓𑀁, 𑀏𑀓𑁂𑀦, 𑀏𑀓𑀲𑁆𑀲, 𑀏𑀓𑀲𑁆𑀫𑀸, 𑀏𑀓𑀫𑁆𑀳𑀸, 𑀏𑀓𑀲𑁆𑀲, 𑀏𑀓𑀲𑁆𑀫𑀺𑀁, 𑀏𑀓𑀫𑁆𑀳𑀻𑀢𑀺. 𑀏𑀯𑀁 𑀲𑀗𑁆𑀔𑀸𑀤𑀺𑀯𑀘𑀦𑁄 𑀏𑀓𑀲𑀤𑁆𑀤𑁄 𑀏𑀓𑀯𑀘𑀦𑀓𑁄. 𑀢𑀣𑀸 𑀳𑀺 ‘‘𑀏𑀓𑁄 𑀤𑁆𑀯𑁂 𑀢𑀬𑁄’’𑀢𑀺 𑀲𑀗𑁆𑀔𑀸𑀯𑀺𑀲𑀬𑁂 𑀏𑀓𑀲𑀤𑁆𑀤𑁄 𑀏𑀓𑀯𑀘𑀦𑀓𑁄𑀯. ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀏𑀓𑁄 𑀭𑀸𑀚 𑀦𑀺𑀧𑀚𑁆𑀚𑀸𑀫𑀻’’𑀢𑀺 𑀅𑀲𑀤𑀺𑀲𑀸𑀲𑀳𑀸𑀬𑀓𑀣𑀦𑁂𑀧𑀺 𑀏𑀓𑀯𑀘𑀦𑀓𑁄𑀯. 𑀅𑀬𑀁 𑀏𑀓𑀯𑀘𑀦𑀺𑀓𑀸 𑀲𑀩𑁆𑀩𑀦𑀸𑀫𑀺𑀓𑀧𑀤𑀫𑀸𑀮𑀸.

𑀬𑀤𑀸 𑀧𑀦 𑀲𑀗𑁆𑀔𑀢𑁆𑀣𑀸 𑀘 𑀅𑀲𑀳𑀸𑀬𑀸 𑀘 𑀩𑀳𑀽 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀢𑀤𑀸 𑀏𑀓𑀲𑀤𑁆𑀤𑀢𑁄 𑀓𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀏𑀓𑀓𑀸, 𑀏𑀓𑀓𑁂, 𑀏𑀓𑀓𑁂𑀳𑀺, 𑀏𑀓𑀓𑁂𑀪𑀺. 𑀧𑀼𑀭𑀺𑀲𑀦𑀬𑁂 𑀩𑀳𑀼𑀯𑀘𑀦𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀣𑀸 𑀳𑀺 𑀲𑀗𑁆𑀔𑀢𑁆𑀣𑀸𑀧𑀺 𑀩𑀳𑀽 𑀳𑁄𑀦𑁆𑀢𑀺. ‘‘𑀘𑀢𑁆𑀢𑀸𑀭𑁄 𑀏𑀓𑀓𑀸 𑀲𑀺𑀬𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀲𑀳𑀸𑀬𑀸𑀧𑀺 𑀩𑀳𑀽 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀅𑀬𑀫𑁆𑀧𑀺 𑀕𑀳𑀧𑀢𑀺 𑀏𑀓𑁄𑀯 𑀆𑀕𑀢𑁄, 𑀅𑀬𑀫𑁆𑀧𑀺 𑀏𑀓𑁄𑀯 𑀆𑀕𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀇𑀫𑁂 𑀕𑀳𑀧𑀢𑀬𑁄 𑀏𑀓𑀓𑀸 𑀆𑀕𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸 𑀤𑀺𑀲𑁆𑀲𑀢𑀺. 𑀅𑀬𑀁 𑀦𑀬𑁄 𑀲𑀩𑁆𑀩𑀦𑀸𑀫𑀺𑀓𑀧𑀓𑁆𑀔𑀁 𑀦 𑀪𑀚𑀢𑀺 𑀅𑀲𑀸𑀥𑀸𑀭𑀡𑀭𑀽𑀧𑀸𑀪𑀸𑀯𑀢𑁄, 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀧𑀦 𑀯𑀼𑀢𑁆𑀢𑁄.

𑀬𑀤𑀸 ¶ 𑀏𑀓𑀘𑁆𑀘𑀯𑀘𑀦𑁄, 𑀢𑀤𑀸 ‘‘𑀏𑀓𑁂, 𑀏𑀓𑁂, 𑀏𑀓𑁂𑀳𑀺, 𑀏𑀓𑁂𑀪𑀺 𑀏𑀓𑁂𑀲𑀁, 𑀏𑀓𑁂𑀳𑀺, 𑀏𑀓𑁂𑀪𑀺, 𑀏𑀓𑁂𑀲𑀁, 𑀏𑀓𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀩𑀳𑀼𑀯𑀘𑀦𑀺𑀓𑀸 𑀲𑀩𑁆𑀩𑀦𑀸𑀫𑀺𑀓𑀧𑀤𑀫𑀸𑀮𑀸. 𑀏𑀢𑁆𑀣 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀤𑀸 𑀧𑀦 𑀫𑀺𑀲𑁆𑀲𑀻𑀪𑀽𑀢𑀯𑀘𑀦𑁄, 𑀢𑀤𑀸 ‘‘𑀏𑀓𑀸, 𑀏𑀓𑁂, 𑀏𑀓𑁂𑀳𑀺, 𑀏𑀓𑁂𑀪𑀺, 𑀏𑀓𑀸𑀦’’𑀦𑁆𑀢𑀺 𑀧𑀼𑀭𑀺𑀲𑀦𑀬𑁂 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁. ‘‘𑀧𑀜𑁆𑀘𑀸𑀮𑁄 𑀘 𑀯𑀺𑀤𑁂𑀳𑁄 𑀘, 𑀉𑀪𑁄 𑀏𑀓𑀸 𑀪𑀯𑀦𑁆𑀢𑀼 𑀢𑁂’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀅𑀬𑀁 𑀦𑀬𑁄 𑀲𑀩𑁆𑀩𑀦𑀸𑀫𑀺𑀓𑀧𑀓𑁆𑀔𑀁 𑀦 𑀪𑀚𑀢𑀺 𑀅𑀲𑀸𑀥𑀸𑀭𑀡𑀭𑀽𑀧𑀸𑀪𑀸𑀯𑀢𑁄, 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀧𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀏𑀓𑀸 𑀪𑀯𑀦𑁆𑀢𑀽𑀢𑀺 𑀏𑀓𑀻𑀪𑀯𑀦𑁆𑀢𑀼 𑀫𑀺𑀲𑁆𑀲𑀻𑀪𑀯𑀦𑁆𑀢𑀼, 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀦𑁆𑀢𑀼 𑀲𑀫𑁂𑀦𑁆𑀢𑀽𑀢𑀺 𑀯𑀘𑀦𑀢𑁆𑀣𑁄.

𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀯𑀺𑀪𑀸𑀕𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀲𑀤𑁆𑀤𑀲𑁆𑀲 𑀲𑀩𑁆𑀩𑀦𑀸𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀤𑁆𑀤𑀲𑁆𑀲 𑀯𑀺𑀬 𑀦𑀸𑀫𑀺𑀓𑀧𑀤𑀫𑀸𑀮𑀁 𑀬𑁄𑀚𑁂𑀦𑁆𑀢𑀺. 𑀓𑀣𑀁?

𑀏𑀓𑁄, 𑀏𑀓𑁂. 𑀏𑀓𑀁, 𑀏𑀓𑁂. 𑀏𑀓𑁂𑀦, 𑀏𑀓𑁂𑀳𑀺, 𑀏𑀓𑁂𑀪𑀺. 𑀏𑀓𑀲𑁆𑀲, 𑀏𑀓𑁂𑀲𑀁, 𑀏𑀓𑁂𑀲𑀸𑀦𑀁. 𑀏𑀓𑀲𑁆𑀫𑀸, 𑀏𑀓𑀫𑁆𑀳𑀸, 𑀏𑀓𑁂𑀳𑀺, 𑀏𑀓𑁂𑀪𑀺. 𑀏𑀓𑀲𑁆𑀲, 𑀏𑀓𑁂𑀲𑀁, 𑀏𑀓𑁂𑀲𑀸𑀦𑀁. 𑀏𑀓𑀲𑁆𑀫𑀺𑀁, 𑀏𑀓𑀫𑁆𑀳𑀺, 𑀏𑀓𑁂𑀲𑀽𑀢𑀺. 𑀅𑀬𑀁 𑀲𑀩𑁆𑀩𑀦𑀸𑀫𑀺𑀓𑀧𑀤𑀫𑀸𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑁂𑀘𑀺 ‘‘𑀏𑀓𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀢𑀼𑀮𑁆𑀬𑀸𑀲𑀳𑀸𑀬𑀜𑁆𑀜𑀯𑀘𑀦𑁄. 𑀬𑀤𑀸 𑀲𑀗𑁆𑀔𑁆𑀬𑀸𑀯𑀘𑀦𑁄, 𑀢𑀤𑀸 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀦𑁆𑀢𑁄𑀯, 𑀅𑀜𑁆𑀜𑀢𑁆𑀣 𑀩𑀳𑀼𑀯𑀘𑀦𑀦𑁆𑀢𑁄𑀧𑀺, 𑀏𑀓𑁄 𑀏𑀓𑀸 𑀏𑀓𑀁 𑀇𑀘𑁆𑀘𑀸𑀤𑀺 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑀤𑁆𑀤𑀲𑀫𑀁. 𑀲𑀁𑀲𑀸𑀲𑁆𑀯𑁂𑀯 𑀯𑀺𑀲𑁂𑀲𑁄’’𑀢𑀺 𑀮𑀺𑀗𑁆𑀕𑀢𑁆𑀢𑀬𑁂 𑀬𑁄𑀚𑀦𑀸𑀦𑀬𑀁 𑀯𑀤𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑀸 𑀘 𑀢𑁂 𑀯𑀺𑀪𑀸𑀕𑀁 𑀅𑀤𑀲𑁆𑀲𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀫𑀬𑀁 𑀧𑀦 𑀲𑁄𑀢𑀽𑀦𑀁 𑀧𑀬𑁄𑀕𑁂𑀲𑀼 𑀓𑁄𑀲𑀮𑁆𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀯𑀤𑀸𑀫.

𑀅𑀧𑀺𑀘𑁂𑀢𑁆𑀣 ¶ 𑀅𑀬𑀁 𑀯𑀺𑀲𑁂𑀲𑁄𑀧𑀺 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑁄 ‘‘𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂’𑀢𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀲𑁆𑀲 𑀏𑀓𑀲𑀤𑁆𑀤𑀲𑁆𑀲 𑀏𑀓𑀸𑀭𑀦𑁆𑀢𑀦𑀺𑀤𑁆𑀤𑁂𑀲𑁄𑀧𑀺 𑀤𑀺𑀲𑁆𑀲𑀢𑀻’’𑀢𑀺. 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑀁, 𑀏𑀓𑀸𑀦𑀺. 𑀏𑀓𑀁, 𑀏𑀓𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀢𑀢𑁆𑀣 𑀏𑀓𑀸𑀦𑀻𑀢𑀺 𑀏𑀓𑀘𑁆𑀘𑀸𑀦𑀺. 𑀏𑀲 𑀦𑀬𑁄 𑀲𑁂𑀲𑀩𑀳𑀼𑀯𑀘𑀦𑁂𑀲𑀼𑀧𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑀸, 𑀏𑀓𑀸, 𑀏𑀓𑀸𑀬𑁄. 𑀏𑀓𑀁, 𑀏𑀓𑀸, 𑀏𑀓𑀸𑀬𑁄. 𑀏𑀓𑀸𑀬, 𑀏𑀓𑀸𑀳𑀺, 𑀏𑀓𑀸𑀪𑀺. 𑀏𑀓𑀸𑀬, 𑀏𑀓𑀺𑀲𑁆𑀲𑀸, 𑀏𑀓𑀸𑀲𑀁. 𑀏𑀓𑀸𑀬, 𑀏𑀓𑀸𑀳𑀺, 𑀏𑀓𑀸𑀪𑀺. 𑀏𑀓𑀸𑀬, 𑀏𑀓𑀺𑀲𑁆𑀲𑀸, 𑀏𑀓𑀸𑀲𑀁. 𑀏𑀓𑀸𑀬, 𑀏𑀓𑀸𑀬𑀁, 𑀏𑀓𑀺𑀲𑁆𑀲𑀁, 𑀏𑀓𑀸𑀲𑀼. 𑀏𑀢𑁆𑀣 𑀩𑀳𑀼𑀯𑀘𑀦𑀝𑁆𑀞𑀸𑀦𑁂 𑀏𑀓𑀸𑀢𑀺 𑀏𑀓𑀘𑁆𑀘𑀸, 𑀏𑀓𑀸𑀳𑀻𑀢𑀺 𑀏𑀓𑀘𑁆𑀘𑀸𑀳𑀺, 𑀏𑀓𑀸𑀲𑀦𑁆𑀢𑀺 𑀏𑀓𑀘𑁆𑀘𑀸𑀦𑀁 𑀏𑀓𑀸𑀲𑀽𑀢𑀺 𑀏𑀓𑀘𑁆𑀘𑀸𑀲𑀼. 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀩𑁆𑀩𑀦𑀸𑀫𑀸𑀦𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀅𑀧𑀺𑀘 𑀏𑀓𑀲𑀤𑁆𑀤𑁂 𑀯𑀺𑀘𑁆𑀙𑀸𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀢𑁆𑀢𑀬𑀭𑀽𑀧𑀸𑀦𑀺 𑀏𑀓𑀯𑀘𑀦𑀸𑀦𑁂𑀯 𑀪𑀯𑀦𑁆𑀢𑀺. 𑀓𑀣𑀁?

𑀏𑀓𑁂𑀓𑁄, 𑀏𑀓𑁂𑀓𑀁, 𑀏𑀓𑁂𑀓𑁂𑀦, 𑀏𑀓𑁂𑀓𑀲𑁆𑀲, 𑀏𑀓𑁂𑀓𑀲𑁆𑀫𑀸, 𑀏𑀓𑁂𑀓𑀫𑁆𑀳𑀸, 𑀏𑀓𑁂𑀓𑀲𑁆𑀲, 𑀏𑀓𑁂𑀓𑀲𑁆𑀫𑀺𑀁, 𑀏𑀓𑁂𑀓𑀫𑁆𑀳𑀻𑀢𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑁂𑀓𑀁, 𑀏𑀓𑁂𑀓𑀁. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁, 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺. 𑀏𑀓𑁂𑀓𑀸, 𑀏𑀓𑁂𑀓𑀁, 𑀏𑀓𑁂𑀓𑀸𑀬, 𑀏𑀓𑁂𑀓𑀺𑀲𑁆𑀲𑀸, 𑀏𑀓𑁂𑀓𑀸𑀬, 𑀏𑀓𑁂𑀓𑀺𑀲𑁆𑀲𑀸, 𑀏𑀓𑁂𑀓𑀸𑀬𑀁, 𑀏𑀓𑁂𑀓𑀺𑀲𑁆𑀲𑀁. 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺.

𑀲𑀩𑁆𑀩𑀸𑀦𑁂𑀢𑀸𑀦𑀺 𑀯𑀺𑀘𑁆𑀙𑀸𑀲𑀩𑁆𑀩𑀦𑀸𑀫𑀸𑀦𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀩𑀳𑀼𑀯𑀘𑀦𑀸𑀦𑀺 𑀧𑀦𑁂𑀢𑁆𑀣 𑀦 𑀲𑀦𑁆𑀢𑀺 𑀧𑀬𑁄𑀕𑀸𑀪𑀸𑀯𑀢𑁄. 𑀇𑀢𑀺 𑀇𑀫𑁂𑀲𑀼 𑀯𑀺𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀮𑀺𑀗𑁆𑀕𑀢𑁆𑀢𑀬𑀭𑀽𑀧𑁂𑀲𑀼 𑀲𑀫𑀸𑀲𑀘𑀺𑀦𑁆𑀢𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸 𑀅𑀦𑀺𑀩𑁆𑀩𑀘𑀦𑀻𑀬𑀢𑁆𑀢𑀸 𑀯𑀺𑀘𑁆𑀙𑀸𑀲𑀤𑁆𑀤𑀸𑀦𑀁. 𑀢𑀣𑀸 𑀳𑀺 ‘‘𑀧𑀩𑁆𑀩𑀁 𑀧𑀩𑁆𑀩𑀁 ¶ 𑀲𑀦𑁆𑀥𑀺 𑀲𑀦𑁆𑀥𑀺 𑀑𑀥𑀺 𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸 𑀯𑀺𑀬 𑀢𑀝𑀢𑀝𑀸𑀬𑀦𑁆𑀢𑀸 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀧𑀩𑁆𑀩𑀧𑀩𑁆𑀩𑀲𑀤𑁆𑀤𑀸𑀤𑀻𑀦𑀁 𑀲𑀫𑀸𑀲𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀘𑀦𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀦 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀘 𑀯𑀺𑀘𑁆𑀙𑀸𑀬𑀁 𑀯𑀢𑁆𑀢𑀫𑀸𑀦𑀸𑀦𑀁 𑀤𑁆𑀯𑀺𑀭𑀼𑀢𑁆𑀢𑀺 𑀮𑁄𑀓𑀢𑁄 𑀏𑀯 𑀲𑀺𑀤𑁆𑀥𑀸, 𑀦 𑀮𑀓𑁆𑀔𑀡𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀲𑀫𑀸𑀲𑀘𑀺𑀦𑁆𑀢𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸.

𑀇𑀤𑀸𑀦𑀺 𑀏𑀓𑀘𑁆𑀘 𑀏𑀓𑀢𑀺𑀬 𑀏𑀓𑀘𑁆𑀘𑀺𑀬𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀯𑀼𑀘𑁆𑀘𑀦𑁆𑀢𑁂 𑁋 𑀧𑀼𑀮𑁆𑀮𑀺𑀗𑁆𑀕𑁂 𑀢𑀸𑀯 𑀏𑀓𑀘𑁆𑀘𑁄, 𑀏𑀓𑀘𑁆𑀘𑁂. 𑀏𑀓𑀘𑁆𑀘𑀁, 𑀏𑀓𑀘𑁆𑀘𑁂. 𑀲𑁂𑀲𑀁 𑀧𑀼𑀭𑀺𑀲𑀲𑀤𑁆𑀤𑀲𑀫𑀁. 𑀏𑀢𑁆𑀣 𑀏𑀓𑀘𑁆𑀘𑁂𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀫𑁂𑀯 𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀲𑀫𑀁 𑀅𑀲𑀸𑀥𑀸𑀭𑀡𑀭𑀽𑀧𑀢𑁆𑀢𑀸. ‘‘𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄. 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀏𑀓𑀢𑀺𑀬𑁄, 𑀏𑀓𑀢𑀺𑀬𑁂. 𑀏𑀓𑀢𑀺𑀬𑀁, 𑀏𑀓𑀢𑀺𑀬𑁂. 𑀲𑁂𑀲𑀁 𑀧𑀼𑀭𑀺𑀲𑀲𑀤𑁆𑀤𑀲𑀫𑀁. 𑀇𑀥𑀸𑀧𑀺 𑀏𑀓𑀢𑀺𑀬𑁂𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀫𑁂𑀯 𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀲𑀫𑀁 𑀅𑀲𑀸𑀥𑀸𑀭𑀡𑀭𑀽𑀧𑀢𑁆𑀢𑀸. 𑀏𑀓𑀢𑀺𑀬𑁂 𑀫𑀦𑀼𑀲𑁆𑀲𑀸.

‘‘𑀦 𑀯𑀺𑀲𑁆𑀲𑀲𑁂 𑀏𑀓𑀢𑀺𑀬𑁂𑀲𑀼 𑀏𑀯,

𑀅𑀕𑀸𑀭𑀺𑀲𑀼 𑀧𑀩𑁆𑀩𑀚𑀺𑀢𑁂𑀲𑀼 𑀘𑀸𑀧𑀺;

𑀲𑀸𑀥𑀽𑀧𑀺 𑀳𑀼𑀢𑁆𑀯𑀸𑀦 𑀅𑀲𑀸𑀥𑀼 𑀳𑁄𑀦𑁆𑀢𑀺;

𑀅𑀲𑀸𑀥𑀼 𑀳𑀼𑀢𑁆𑀯𑀸 𑀧𑀼𑀦 𑀲𑀸𑀥𑀼 𑀳𑁄𑀦𑁆𑀢𑀻’’𑀢𑀺

𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀏𑀓𑀘𑁆𑀘𑀺𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸𑀬𑀁 𑀧𑀦 𑁋

‘‘𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀼, 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄, 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄.

𑀏𑀓𑀘𑁆𑀘𑀺𑀬𑀁 𑀆𑀳𑀸𑀭’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀏𑀓𑀘𑁆𑀘𑀺𑀬𑁄, 𑀏𑀓𑀘𑁆𑀘𑀺𑀬𑀸. 𑀏𑀓𑀘𑁆𑀘𑀺𑀬𑀁, 𑀏𑀓𑀘𑁆𑀘𑀺𑀬𑁂𑀢𑀺 𑀲𑀩𑁆𑀩𑀣𑀸𑀧𑀺 𑀧𑀼𑀭𑀺𑀲𑀦𑀬𑁄. 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑀘𑁆𑀘𑀁 ¶ , 𑀏𑀓𑀘𑁆𑀘𑀸𑀦𑀺. 𑀏𑀓𑀘𑁆𑀘𑀁, 𑀏𑀓𑀘𑁆𑀘𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀏𑀓𑀢𑀺𑀬𑀁, 𑀏𑀓𑀢𑀺𑀬𑀸𑀦𑀺. 𑀏𑀓𑀢𑀺𑀬𑀁, 𑀏𑀓𑀢𑀺𑀬𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀏𑀓𑀘𑁆𑀘𑀺𑀬𑀁, 𑀏𑀓𑀘𑁆𑀘𑀺𑀬𑀸𑀦𑀺. 𑀏𑀓𑀘𑁆𑀘𑀺𑀬𑀁, 𑀏𑀓𑀘𑁆𑀘𑀺𑀬𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺.

‘‘𑀏𑀓𑀘𑁆𑀘𑀸, 𑀏𑀓𑀘𑁆𑀘𑀸, 𑀏𑀓𑀘𑁆𑀘𑀸𑀬𑁄’’𑀢𑀺 𑀓𑀜𑁆𑀜𑀸𑀦𑀬𑁂𑀦, 𑀢𑀣𑀸 ‘‘𑀏𑀓𑀢𑀺𑀬𑀸, 𑀏𑀓𑀢𑀺𑀬𑀸, 𑀏𑀓𑀢𑀺𑀬𑀸𑀬𑁄. 𑀏𑀓𑀢𑀺𑀬’’𑀦𑁆𑀢𑀺 𑀘, ‘‘𑀏𑀓𑀘𑁆𑀘𑀺𑀬𑀸, 𑀏𑀓𑀘𑁆𑀘𑀺𑀬𑀸, 𑀏𑀓𑀘𑁆𑀘𑀺𑀬𑀸𑀬𑁄. 𑀏𑀓𑀘𑁆𑀘𑀺𑀬’’𑀦𑁆𑀢𑀺 𑀘 𑀓𑀜𑁆𑀜𑀸𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺.

𑀇𑀤𑀸𑀦𑀺 𑀏𑀓𑀸𑀓𑀻 𑀏𑀓𑀸𑀓𑀺𑀬𑀲𑀤𑁆𑀤𑀯𑀲𑁂𑀦 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀦𑁆𑀢𑁂 𑁋

𑀏𑀓𑀸𑀓𑀻, 𑀏𑀓𑀸𑀓𑀻, 𑀏𑀓𑀸𑀓𑀺𑀦𑁄. 𑀏𑀓𑀸𑀓𑀺𑀁, 𑀏𑀓𑀸𑀓𑀻, 𑀏𑀓𑀸𑀓𑀺𑀦𑁄. 𑀤𑀡𑁆𑀟𑀻𑀦𑀬𑁂𑀦 𑀜𑁂𑀬𑁆𑀬𑀸. 𑀏𑀓𑀸𑀓𑀺𑀬𑁄, 𑀏𑀓𑀸𑀓𑀺𑀬𑀸. 𑀏𑀓𑀸𑀓𑀺𑀬𑀁, 𑀏𑀓𑀸𑀓𑀺𑀬𑁂. 𑀏𑀓𑀸𑀓𑀺𑀬𑁂𑀦. 𑀧𑀼𑀭𑀺𑀲𑀦𑀬𑁂𑀦 𑀜𑁂𑀬𑁆𑀬𑀁. 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑀸𑀓𑀺 𑀓𑀼𑀮𑀁, 𑀏𑀓𑀸𑀓𑀻, 𑀏𑀓𑀸𑀓𑀻𑀦𑀺. 𑀏𑀓𑀸𑀓𑀺𑀁, 𑀏𑀓𑀸𑀓𑀻, 𑀏𑀓𑀸𑀓𑀻𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀏𑀓𑀸𑀓𑀺𑀬𑀁, 𑀏𑀓𑀸𑀓𑀺𑀬𑀸𑀦𑀺. 𑀏𑀓𑀸𑀓𑀺𑀬𑀁, 𑀏𑀓𑀸𑀓𑀺𑀬𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀤𑀺𑀲𑀁. 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺.

𑀏𑀓𑀸𑀓𑀺𑀦𑀻, 𑀏𑀓𑀸𑀓𑀺𑀦𑀻, 𑀏𑀓𑀸𑀓𑀺𑀦𑀺𑀬𑁄. 𑀏𑀓𑀸𑀓𑀺𑀦𑀺𑀁, 𑀏𑀓𑀸𑀓𑀺𑀦𑀻, 𑀏𑀓𑀸𑀓𑀺𑀦𑀺𑀬𑁄. 𑀏𑀓𑀸𑀓𑀺𑀦𑀺𑀬𑀸𑀢𑀺 𑀇𑀢𑁆𑀣𑀻𑀲𑀤𑀺𑀲𑀁. 𑀏𑀓𑀸𑀓𑀺𑀬𑀸, 𑀏𑀓𑀸𑀓𑀺𑀬𑀸, 𑀏𑀓𑀸𑀓𑀺𑀬𑀸𑀬𑁄. 𑀏𑀓𑀸𑀓𑀺𑀬𑀁, 𑀏𑀓𑀸𑀓𑀺𑀬𑀸, 𑀏𑀓𑀸𑀓𑀺𑀬𑀸𑀬𑁄. 𑀏𑀓𑀸𑀓𑀺𑀬𑀸𑀬𑀸𑀢𑀺 𑀓𑀜𑁆𑀜𑀸𑀲𑀤𑀺𑀲𑀁. 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺. 𑀲𑀩𑁆𑀩𑀸𑀦𑀺 𑀧𑀦𑁂𑀢𑀸𑀦𑀺 𑀅𑀲𑀩𑁆𑀩𑀦𑀸𑀫𑀺𑀓𑀭𑀽𑀧𑀸𑀦𑀺 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀤𑁆𑀯𑀺𑀲𑀤𑁆𑀤𑀧𑀭𑀺𑀬𑀸𑀬𑀲𑁆𑀲 𑀲𑀤𑀸 𑀩𑀳𑀼𑀯𑀘𑀦𑀦𑁆𑀢𑀲𑁆𑀲 𑀲𑀩𑁆𑀩𑀦𑀸𑀫𑀺𑀓𑀧𑀤𑀲𑁆𑀲 𑀉𑀪𑀲𑀤𑁆𑀤𑀲𑁆𑀲 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

‘‘𑀉𑀪𑁄 ¶ , 𑀉𑀪𑁄, 𑀉𑀪𑁄𑀳𑀺, 𑀉𑀪𑁄𑀪𑀺, 𑀉𑀪𑀺𑀦𑁆𑀦𑀁, 𑀉𑀪𑁄𑀳𑀺, 𑀉𑀪𑁄𑀪𑀺, 𑀉𑀪𑀺𑀦𑁆𑀦𑀁, 𑀉𑀪𑁄𑀲𑀽’’𑀢𑀺 𑀅𑀬𑀁 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑁂𑀦 𑀯𑀼𑀢𑁆𑀢𑀧𑀤𑀫𑀸𑀮𑀸. 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋 𑀉𑀪𑁄 𑀓𑀼𑀫𑀸𑀭𑀸 𑀦𑀺𑀓𑁆𑀓𑀻𑀢𑀸. 𑀉𑀪𑁄 𑀇𑀢𑁆𑀣𑀺𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀉𑀪𑁄 𑀘𑀺𑀢𑁆𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀉𑀪𑁄 𑀧𑀼𑀢𑁆𑀢𑁂 𑀅𑀤𑀸𑀲𑀺. 𑀉𑀪𑁄 𑀓𑀜𑁆𑀜𑀸𑀬𑁄 𑀧𑀲𑁆𑀲𑀢𑀺. 𑀉𑀪𑁄 𑀧𑀸𑀤𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀲𑀜𑁆𑀜𑀫𑀺𑀲𑁆𑀲𑀸𑀫𑀺 𑀯𑁄 𑀅𑀳𑀁. 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺. 𑀉𑀪𑁄𑀳𑀺 𑀩𑀸𑀳𑀸𑀳𑀺, 𑀉𑀪𑁄𑀳𑀺 𑀘𑀺𑀢𑁆𑀢𑁂𑀳𑀺, 𑀉𑀪𑀺𑀦𑁆𑀦𑀁 𑀚𑀦𑀸𑀦𑀁, 𑀉𑀪𑀺𑀦𑁆𑀦𑀁 𑀇𑀢𑁆𑀣𑀻𑀦𑀁, 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁, 𑀉𑀪𑁄𑀲𑀼 𑀧𑀼𑀭𑀺𑀲𑁂𑀲𑀼, 𑀉𑀪𑁄𑀲𑀼 𑀇𑀢𑁆𑀣𑀻𑀲𑀼, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀽𑀢𑀺, 𑀅𑀬𑀫𑀲𑁆𑀫𑀸𑀓𑀁 𑀭𑀼𑀘𑀺. 𑀆𑀘𑀭𑀺𑀬𑀸 𑀧𑀦 ‘‘𑀉𑀪𑁂𑀳𑀺, 𑀉𑀪𑁂𑀪𑀺, 𑀉𑀪𑁂𑀲𑀽’’𑀢𑀺𑀧𑀺 𑀇𑀘𑁆𑀙𑀦𑁆𑀢𑀺. 𑀓𑀘𑁆𑀘𑀸𑀬𑀦𑁂𑀧𑀺 𑀳𑀺 ‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀺𑀬𑁂𑀯. 𑀉𑀪𑀲𑀤𑁆𑀤𑀲𑁆𑀲 𑀲𑀫𑀸𑀲𑁄 𑀅𑀧𑁆𑀧𑀲𑀺𑀤𑁆𑀥𑁄. 𑀮𑀺𑀗𑁆𑀕𑀢𑁆𑀢𑀬𑀲𑀸𑀥𑀸𑀭𑀡𑀭𑀽𑀧𑀸𑀦𑀺.

𑀇𑀤𑀸𑀦𑀺 𑀲𑀗𑁆𑀔𑀸𑀯𑀘𑀦𑀸𑀦𑀁 𑀤𑁆𑀯𑀺𑀢𑀺 𑀘𑀢𑀼𑀲𑀤𑁆𑀤𑀸𑀦𑀁 𑀲𑀤𑀸 𑀩𑀳𑀼𑀯𑀘𑀦𑀦𑁆𑀢𑀸𑀦𑀁 𑀲𑀩𑁆𑀩𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀬𑁄 𑀯𑀼𑀘𑁆𑀘𑀦𑁆𑀢𑁂 𑁋

𑀤𑁆𑀯𑁂, 𑀤𑁆𑀯𑁂, 𑀤𑁆𑀯𑀻𑀳𑀺, 𑀤𑁆𑀯𑀻𑀪𑀺, 𑀤𑁆𑀯𑀺𑀦𑁆𑀦𑀁, 𑀤𑀼𑀯𑀺𑀦𑁆𑀦𑀁, 𑀤𑁆𑀯𑀻𑀳𑀺, 𑀤𑁆𑀯𑀻𑀪𑀺, 𑀤𑁆𑀯𑀺𑀦𑁆𑀦𑀁, 𑀤𑀼𑀯𑀺𑀦𑁆𑀦𑀁, 𑀤𑁆𑀯𑀻𑀲𑀼. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 ‘‘𑀤𑁆𑀯𑀺𑀦𑁆𑀦𑀦𑁆𑀦’’𑀦𑁆𑀢𑀺 𑀧𑀤𑀫𑀸𑀮𑀸 𑀆𑀕𑀢𑀸. 𑀇𑀫𑀸𑀦𑀺 𑀅𑀳𑀁𑀲𑀤𑁆𑀤𑀸𑀤𑀻𑀦𑀺 𑀯𑀺𑀬 𑀇𑀢𑁆𑀣𑀺 𑀮𑀺𑀗𑁆𑀕𑀸𑀤𑀺𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸𑀦𑀺𑀧𑀺 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀬𑀼𑀚𑁆𑀚𑀦𑁆𑀢𑁂 ‘‘𑀤𑁆𑀯𑁂 𑀧𑀼𑀭𑀺𑀲𑀸, 𑀤𑁆𑀯𑁂 𑀇𑀢𑁆𑀣𑀺𑀬𑁄, 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺’’𑀇𑀘𑁆𑀘𑁂𑀯𑀫𑀸𑀤𑀺𑀦𑀸. 𑀇𑀫𑀸𑀦𑀺𑀧𑀺 𑀮𑀺𑀗𑁆𑀕𑀢𑁆𑀢𑀬𑀲𑀸𑀥𑀸𑀭𑀡𑀸𑀦𑀺 𑀭𑀽𑀧𑀸𑀦𑀺.

‘‘𑀤𑁆𑀯𑁂’’𑀢𑀺 𑀭𑀽𑀧𑀁 𑀤𑁆𑀯𑀺𑀲𑀤𑁆𑀤𑀲𑁆𑀲, 𑀬𑀁 𑀲𑀫𑀸𑀲𑀫𑁆𑀳𑀺 𑀢𑀁 𑀪𑀯𑁂;

𑀤𑁆𑀯𑀺𑀢𑀺𑀧𑁆𑀧𑀓𑀢𑀺𑀓𑀁𑀬𑁂𑀯, 𑀦𑀸𑀦𑀸𑀤𑁂𑀲𑁂𑀳𑀺 𑀲𑀸 𑀲𑀺𑀬𑀸.

𑀤𑁆𑀯𑀺𑀪𑀸𑀯𑁄 𑀘𑁂𑀯 𑀤𑁆𑀯𑁂𑀪𑀸𑀯𑁄, 𑀤𑁆𑀯𑀺𑀭𑀢𑁆𑀢𑀜𑁆𑀘 𑀤𑀼𑀯𑀲𑁆𑀲𑀓𑁄;

𑀤𑁄𑀳𑀴𑀺𑀦𑀻 𑀤𑀼𑀧𑀢𑁆𑀢𑀜𑁆𑀘, 𑀢𑀤𑁆𑀥𑀺𑀢𑀢𑁆𑀢𑁂 𑀤𑁆𑀯𑀬𑀁 𑀤𑁆𑀯𑀬𑀁.

𑀢𑀬𑁄 ¶ , 𑀢𑀬𑁄, 𑀢𑀻𑀳𑀺, 𑀢𑀻𑀪𑀺, 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀳𑀺, 𑀢𑀻𑀪𑀺, 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀲𑀼. 𑀇𑀫𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀢𑀺𑀲𑁆𑀲𑁄, 𑀢𑀺𑀲𑁆𑀲𑁄, 𑀢𑀻𑀳𑀺, 𑀢𑀻𑀪𑀺, 𑀢𑀺𑀲𑁆𑀲𑀦𑁆𑀦𑀁, 𑀢𑀻𑀳𑀺, 𑀢𑀻𑀪𑀺, 𑀢𑀺𑀲𑁆𑀲𑀦𑁆𑀦𑀁, 𑀢𑀻𑀲𑀼. 𑀇𑀫𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 ‘‘𑀢𑀺𑀲𑁆𑀲𑀦𑁆𑀦𑀦𑁆𑀦’’𑀦𑁆𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀩𑀳𑀼𑀯𑀘𑀦𑀫𑀸𑀕𑀢𑀁, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀦 ‘‘𑀢𑀺𑀡𑁆𑀡𑀦𑁆𑀦’’𑀦𑁆𑀢𑀺. 𑀢𑀸𑀦𑀺 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂, 𑀕𑀳𑁂𑀢𑀩𑁆𑀩𑀸𑀦𑀺.

𑀢𑀻𑀡𑀺, 𑀢𑀻𑀡𑀺, 𑀢𑀻𑀳𑀺, 𑀢𑀻𑀪𑀺, 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀳𑀺, 𑀢𑀻𑀪𑀺, 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀲𑀼. 𑀇𑀫𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺. 𑀓𑀢𑁆𑀣𑀘𑀺 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑁂 𑀢𑀻𑀡𑀺𑀲𑀤𑁆𑀤𑀲𑁆𑀲 𑀡𑀺𑀓𑀸𑀭𑀮𑁄𑀧𑁄𑀧𑀺 𑀪𑀯𑀢𑀺 ‘‘𑀤𑁆𑀯𑁂 𑀯𑀸𑀢𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀻’’𑀢𑀺. ‘‘𑀢𑀺𑀡𑁆𑀡𑀦𑁆𑀦𑀁 𑀔𑁄 𑀪𑀺𑀓𑁆𑀔𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑀪𑀺𑀓𑁆𑀔𑀼𑀦𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸’’𑀢𑀺 𑀇𑀤𑀁 ‘‘𑀢𑀺𑀡𑁆𑀡𑀦𑁆𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 𑀦𑀺𑀤𑀲𑁆𑀲𑀦𑀁.

𑀬𑀸𑀦𑀺 𑀭𑀽𑀧𑀸𑀦𑀺 𑀯𑀼𑀢𑁆𑀢𑀸𑀦𑀺, ‘‘𑀢𑀺𑀲𑁆𑀲𑁄 𑀢𑀻𑀡𑀺 𑀢𑀬𑁄’’𑀇𑀢𑀺;

𑀲𑀫𑀸𑀲𑀯𑀺𑀲𑀬𑁂 𑀢𑀸𑀦𑀺, 𑀢𑀺𑀢𑀺𑀧𑁆𑀧𑀓𑀢𑀺𑀓𑀸 𑀲𑀺𑀬𑀼𑀁.

𑀬𑀲𑁆𑀫𑀸 𑀢𑀺𑀲𑁆𑀲 𑀲𑀫𑀸𑀲𑀫𑁆𑀳𑀺, 𑀲𑀤𑁆𑀥𑀺𑀁 𑀧𑀭𑀧𑀤𑁂𑀦 𑀯𑁂;

‘‘𑀢𑀺𑀯𑁂𑀤𑀦𑀁 𑀢𑀺𑀘𑀺𑀢𑁆𑀢’’𑀦𑁆𑀢𑀺, ‘‘𑀢𑀺𑀮𑁄𑀓’’𑀦𑁆𑀢𑀺 𑀘 𑀦𑀺𑀤𑁆𑀤𑀺𑀲𑁂.

𑀏𑀢𑁆𑀣 𑀦𑀧𑀼𑀁𑀲𑀓𑀢𑁆𑀢𑀁𑀯, 𑀧𑀸𑀲𑀁𑀲𑀁 𑀧𑀸𑀬𑀯𑀼𑀢𑁆𑀢𑀺𑀢𑁄;

𑀧𑀼𑀫𑀢𑁆𑀢𑀫𑁆𑀧𑁂𑀢𑁆𑀣 𑀇𑀘𑁆𑀙𑀦𑁆𑀢𑀺, ‘‘𑀢𑀺𑀪𑀯𑁄 𑀔𑀸𑀬𑀢𑁂’’𑀇𑀢𑀺.

𑀘𑀢𑁆𑀢𑀸𑀭𑁄, 𑀘𑀢𑀼𑀭𑁄, 𑀘𑀢𑁆𑀢𑀸𑀭𑁄, 𑀘𑀢𑀼𑀭𑁄, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼. 𑀇𑀫𑀸𑀦𑀺 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀺.

𑀘𑀢𑀲𑁆𑀲𑁄 ¶ , 𑀘𑀢𑀲𑁆𑀲𑁄, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀲𑁆𑀲𑀦𑁆𑀦𑀁, 𑀘𑀢𑀼𑀦𑁆𑀦𑀁, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀲𑁆𑀲𑀦𑁆𑀦𑀁, 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼. 𑀇𑀫𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀸𑀦𑀺. 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀘𑀢𑀼𑀦𑁆𑀦’’𑀦𑁆𑀢𑀺 𑀧𑀤𑀁 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀤𑀲𑁆𑀲𑀦𑀢𑁄 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀝𑁆𑀞𑀸𑀦𑁂 ‘‘𑀘𑀢𑀼𑀦𑁆𑀦’’𑀦𑁆𑀢𑀺 𑀆𑀕𑀢𑀁, 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 ‘‘𑀘𑀢𑀼𑀦𑁆𑀦𑀁 𑀓𑀜𑁆𑀜𑀸𑀦’’𑀦𑁆𑀢𑀺 𑀆𑀕𑀢𑀁. 𑀧𑀸𑀴𑀺𑀬𑀁 𑀧𑀦 𑀲𑁄𑀡𑀤𑀦𑁆𑀢𑀲𑀼𑀢𑁆𑀢𑀸𑀤𑀻𑀲𑀼 ‘‘𑀲𑀫𑀡𑁄 𑀕𑁄𑀢𑀫𑁄 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄’’𑀢𑀺 𑀆𑀕𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀘 𑀧𑀦 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 ‘‘𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄’’𑀢𑀺 𑀆𑀕𑀢𑀁. 𑀲𑀢𑁆𑀢𑀺𑀮𑀗𑁆𑀖𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀆𑀘𑀭𑀺𑀬𑁄 𑀧𑀦𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑁆𑀢𑀻𑀦𑀁 𑀮𑀗𑁆𑀖𑀦𑀁 𑀲𑀺𑀧𑁆𑀧𑀁 𑀚𑀸𑀦𑀸𑀢𑀻’’𑀢𑀺 𑀆𑀕𑀢𑀁.

𑀘𑀢𑁆𑀢𑀸𑀭𑀺, 𑀘𑀢𑁆𑀢𑀸𑀭𑀺, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀳𑀺, 𑀘𑀢𑀽𑀪𑀺, 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼. 𑀇𑀫𑀸𑀦𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀭𑀽𑀧𑀸𑀦𑀺.

‘‘𑀘𑀢𑁆𑀢𑀸𑀭𑁄’’𑀢𑀺 ‘‘𑀘𑀢𑀲𑁆𑀲𑁄’’𑀢𑀺, ‘‘𑀘𑀢𑁆𑀢𑀸𑀭𑀻’’𑀢𑀺 𑀘 𑀲𑀤𑁆𑀤𑀺𑀢𑀁;

𑀭𑀽𑀧𑀁 𑀲𑀫𑀸𑀲𑀪𑀸𑀯𑀫𑁆𑀳𑀺, 𑀘𑀢𑀼𑀧𑁆𑀧𑀓𑀢𑀺𑀓𑀁 𑀪𑀯𑁂.

𑀦𑀺𑀤𑀲𑁆𑀲𑀦𑀧𑀤𑀸𑀦𑁂𑀢𑁆𑀣, 𑀓𑀫𑀢𑁄 𑀓𑀫𑀓𑁄𑀯𑀺𑀤𑁄;

‘‘𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀲𑁆𑀲𑀸𑀮𑀁, 𑀘𑀢𑀼𑀲𑀘𑁆𑀘’’𑀦𑁆𑀢𑀺 𑀦𑀺𑀤𑁆𑀤𑀺𑀲𑁂.

𑀇𑀫𑀸𑀦𑀺 𑀤𑁆𑀯𑁂𑀆𑀤𑀺𑀓𑀸𑀦𑀺 𑀲𑀩𑁆𑀩𑀦𑀸𑀫𑀺𑀓𑀸𑀦𑀺 𑀩𑀳𑀼𑀯𑀘𑀦𑀸𑀦𑀺𑀬𑁂𑀯 𑀪𑀯𑀦𑁆𑀢𑀺, 𑀦 𑀏𑀓𑀯𑀘𑀦𑀸𑀦𑀺. 𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 ‘‘𑀘𑀢𑀲𑁆𑀲𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑀇𑀤𑀸𑀦𑀺 𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀦𑁆𑀢𑁂, 𑀢𑁂𑀲𑀼 𑀬𑁂𑀦 𑀓𑀣𑁂𑀢𑀺, 𑀢𑀲𑁆𑀲𑀸𑀮𑀧𑀦𑁂 𑀢𑀼𑀫𑁆𑀳𑀯𑀘𑀦𑀸𑀦𑀺 𑀪𑀯𑀦𑁆𑀢𑀺.

𑀢𑁆𑀯𑀁, 𑀢𑀼𑀯𑀁, 𑀢𑀼𑀫𑁆𑀳𑁂. 𑀢𑀁, 𑀢𑀼𑀯𑀁, 𑀢𑁆𑀯𑀁, 𑀢𑀯𑀁, 𑀢𑀼𑀫𑁆𑀳𑁂. 𑀢𑀬𑀸, 𑀢𑁆𑀯𑀬𑀸, 𑀢𑀼𑀫𑁆𑀳𑁂𑀳𑀺, 𑀢𑀼𑀫𑁆𑀳𑁂𑀪𑀺. 𑀢𑀼𑀬𑁆𑀳𑀁, 𑀢𑀯, 𑀢𑀼𑀫𑁆𑀳𑀁, 𑀢𑀼𑀫𑁆𑀳𑀸𑀓𑀁. 𑀢𑀬𑀸, 𑀢𑁆𑀯𑀬𑀸, 𑀢𑀼𑀫𑁆𑀳𑁂𑀳𑀺, 𑀢𑀼𑀫𑁆𑀳𑁂𑀪𑀺. 𑀢𑀼𑀬𑁆𑀳𑀁, 𑀢𑀯, 𑀢𑀼𑀫𑁆𑀳𑀁, 𑀢𑀼𑀫𑁆𑀳𑀸𑀓𑀁. 𑀢𑀬𑀺, 𑀢𑁆𑀯𑀬𑀺, 𑀢𑀼𑀫𑁆𑀳𑁂𑀲𑀼 ¶ . 𑀢𑀢𑁆𑀭 ‘‘𑀢𑁆𑀯𑀁 𑀧𑀼𑀭𑀺𑀲𑁄, 𑀢𑁆𑀯𑀁 𑀇𑀢𑁆𑀣𑀻, 𑀢𑁆𑀯𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀢𑁆𑀢𑀬𑁄𑀕𑁂 𑀅𑀫𑁆𑀳𑀯𑀘𑀦𑀸𑀦𑀺 𑀪𑀯𑀦𑁆𑀢𑀺.

𑀅𑀳𑀁, 𑀅𑀳𑀓𑀁, 𑀫𑀬𑀁, 𑀅𑀫𑁆𑀳𑁂. 𑀫𑀁, 𑀫𑀫𑀁, 𑀅𑀫𑁆𑀳𑁂. 𑀫𑀬𑀸, 𑀅𑀫𑁆𑀳𑁂𑀳𑀺, 𑀅𑀫𑁆𑀳𑁂𑀪𑀺. 𑀫𑀬𑁆𑀳𑀁, 𑀫𑀫, 𑀅𑀫𑁆𑀳𑀁, 𑀅𑀫𑁆𑀳𑀸𑀓𑀁, 𑀅𑀲𑁆𑀫𑀸𑀓𑀁. 𑀫𑀬𑀸, 𑀅𑀫𑁆𑀳𑁂𑀳𑀺, 𑀅𑀫𑁆𑀳𑁂𑀪𑀺. 𑀫𑀬𑁆𑀳𑀁, 𑀫𑀫, 𑀅𑀫𑁆𑀳𑀁, 𑀅𑀫𑁆𑀳𑀸𑀓𑀁, 𑀅𑀲𑁆𑀫𑀸𑀓𑀁. 𑀫𑀬𑀺, 𑀅𑀫𑁆𑀳𑁂𑀲𑀼, 𑀅𑀲𑁆𑀫𑁂𑀲𑀼.

𑀏𑀢𑁆𑀣 𑀧𑀦 ‘‘𑀓𑀣𑀁 𑀅𑀫𑁆𑀳𑁂 𑀓𑀭𑁄𑀫𑀲𑁂’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀢𑀼𑀫𑁆𑀳𑁂’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀯𑀺𑀬 ‘‘𑀅𑀫𑁆𑀳𑁂’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲𑀧𑀺 𑀅𑀢𑁆𑀣𑀺𑀢𑀸 𑀯𑁂𑀤𑀺𑀢𑀩𑁆𑀩𑀸, ‘‘𑀅𑀳𑀓’’𑀦𑁆𑀢𑀺 𑀭𑀽𑀧𑀦𑁆𑀢𑀭𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 ‘‘𑀅𑀳𑀓𑀜𑁆𑀘 𑀘𑀺𑀢𑁆𑀢𑀯𑀲𑀸𑀦𑀼𑀕𑀸 𑀪𑀸𑀲𑀺𑀲𑁆𑀲’’𑀦𑁆𑀢𑀺 𑀏𑀲𑀸 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀏𑀢𑁆𑀣 𑀳𑀺 𑀅𑀳𑀓𑀦𑁆𑀢𑀺 𑀅𑀳𑀁 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀢𑁆𑀭 ‘‘𑀅𑀳𑀁 𑀧𑀼𑀭𑀺𑀲𑁄, 𑀅𑀳𑀁 𑀓𑀜𑁆𑀜𑀸, 𑀅𑀳𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀇𑀫𑀸𑀦𑀺𑀧𑀺 𑀮𑀺𑀗𑁆𑀕𑀢𑁆𑀢𑀬𑀲𑀸𑀥𑀸𑀭𑀡𑀭𑀽𑀧𑀸𑀦𑀺.

𑀓𑀘𑁆𑀘𑀸𑀬𑀦𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂𑀲𑀼 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀘 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀓𑀘𑁆𑀘𑀸𑀬𑀦𑁂 ‘‘𑀢𑀼𑀫𑁆𑀳𑀸𑀦𑀁 𑀅𑀫𑁆𑀳𑀸𑀦’’𑀦𑁆𑀢𑀺 𑀘 𑀧𑀞𑀫𑀸𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀁, ‘‘𑀢𑀼𑀫𑁆𑀳𑀁 𑀅𑀫𑁆𑀳’’𑀦𑁆𑀢𑀺 𑀘 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑀁, 𑀧𑀞𑀫𑀸𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀜𑁆𑀘 𑀯𑀼𑀢𑁆𑀢𑀁, 𑀘𑀽𑀴𑀦𑀺𑀭𑀼𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀧𑀦 ‘‘𑀢𑀼𑀫𑁆𑀳𑀁 𑀅𑀫𑁆𑀳’’𑀦𑁆𑀢𑀺 𑀘 𑀤𑀼𑀢𑀺𑀬𑁂𑀓𑀯𑀘𑀦𑀁 𑀯𑀼𑀢𑁆𑀢𑀁, ‘‘𑀢𑀼𑀫𑁆𑀳𑁂 𑀅𑀫𑁆𑀳𑁂’’𑀢𑀺 𑀘 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀏𑀢𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀸𑀝𑁆𑀞𑀓𑀣𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀤𑀺𑀲𑁆𑀲𑀦𑁆𑀢𑀺 𑀘𑁂, 𑀕𑀳𑁂𑀢𑀩𑁆𑀩𑀸𑀦𑀺.

𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑀸𑀦𑀁 𑀧𑀦 𑀧𑀭𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑀸𑀲𑁂 ‘‘𑀫𑀁𑀤𑀻𑀧𑀸’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀢𑀣𑀸𑀕𑀢𑀸𑀤𑀺𑀫𑀼𑀔𑀢𑁄 𑀲𑀫𑁆𑀪𑀯𑀦𑁆𑀢𑀺. ‘‘𑀏𑀢𑁂 𑀕𑀸𑀫𑀡𑀺 𑀫𑀁𑀤𑀻𑀧𑀸 𑀫𑀁𑀮𑁂𑀡𑀸 𑀫𑀁𑀲𑀭𑀡𑀸’’𑀢𑀺 𑀳𑀺 𑀢𑀣𑀸𑀕𑀢𑀫𑀼𑀔𑀢𑁄, ‘‘𑀢𑀬𑁆𑀬𑁄𑀕𑁄 𑀫𑀬𑁆𑀬𑁄𑀕𑁄’’𑀢𑀺 𑀦𑀺𑀭𑀼𑀢𑁆𑀢𑀜𑁆𑀜𑀼𑀫𑀼𑀔𑀢𑁄, 𑀓𑀸𑀩𑁆𑀬𑀸𑀤𑀸𑀲𑁂 𑀘 ‘‘𑀢𑁆𑀯𑀁𑀫𑀼𑀔𑀁 𑀓𑀫𑀮𑁂𑀦𑁂𑀯, 𑀢𑀼𑀮𑁆𑀬𑀁 𑀦𑀸𑀜𑁆𑀜𑁂𑀦 ¶ 𑀓𑁂𑀦𑀘𑀻’’𑀢𑀺 𑀘 ‘‘𑀘𑀦𑁆𑀤𑁂𑀦 𑀢𑁆𑀯𑀁𑀫𑀼𑀔𑀁 𑀢𑀼𑀮𑁆𑀬’’𑀦𑁆𑀢𑀺 𑀘 𑀓𑀯𑀺𑀫𑀼𑀔𑀢𑁄.

𑀢𑀢𑁆𑀣 𑀳𑀺 𑀅𑀳𑀁 𑀤𑀻𑀧𑁄 𑀏𑀢𑁂𑀲𑀦𑁆𑀢𑀺 𑀫𑀁𑀤𑀻𑀧𑀸, 𑀅𑀳𑀁 𑀮𑁂𑀡𑀁 𑀏𑀢𑁂𑀲𑀦𑁆𑀢𑀺 𑀫𑀁𑀮𑁂𑀡𑀸, 𑀏𑀯𑀁 𑀫𑀁𑀲𑀭𑀡𑀸. 𑀢𑀼𑀫𑁆𑀳𑁂𑀦 𑀬𑁄𑀕𑁄 𑀢𑀬𑁆𑀬𑁄𑀕𑁄, 𑀢𑀼𑀫𑁆𑀳𑀲𑀤𑁆𑀤𑁂𑀦 𑀬𑁄𑀕𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀫𑁆𑀳𑁂𑀦 𑀬𑁄𑀕𑁄 𑀫𑀬𑁆𑀬𑁄𑀕𑁄, 𑀅𑀫𑁆𑀳𑀲𑀤𑁆𑀤𑁂𑀦 𑀬𑁄𑀕𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀯 𑀫𑀼𑀔𑀁 𑀢𑁆𑀯𑀁𑀫𑀼𑀔𑀁. 𑀩𑀳𑀼𑀯𑀘𑀦𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀻𑀬𑀁 ‘‘𑀢𑀼𑀫𑁆𑀳𑀸𑀓𑀁 𑀫𑀼𑀔𑀁 𑀢𑁆𑀯𑀁𑀫𑀼𑀔’’𑀦𑁆𑀢𑀺. 𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀫𑀁𑀤𑀻𑀧𑀸’’𑀇𑀘𑁆𑀘𑀸𑀤𑀺𑀤𑀲𑁆𑀲𑀦𑀢𑁄 ‘‘𑀢𑁆𑀯𑀁𑀤𑀻𑀧𑀸’’𑀢𑀺𑀆𑀤𑀻𑀦𑀺 𑀓𑀸𑀩𑁆𑀬𑀸𑀤𑀸𑀲𑁂 𑀘 ‘‘𑀢𑁆𑀯𑀁𑀫𑀼𑀔’’𑀦𑁆𑀢𑀺 𑀤𑀲𑁆𑀲𑀦𑀢𑁄 𑀢𑁆𑀯𑀁𑀯𑀡𑁆𑀡𑁄, 𑀢𑁆𑀯𑀁𑀲𑀭𑁄, 𑀫𑀁𑀫𑀼𑀔𑀁, 𑀫𑀁𑀯𑀡𑁆𑀡𑁄, 𑀫𑀁𑀲𑀭𑁄𑀆𑀤𑀻𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀢𑁆𑀯𑀁 𑀤𑀻𑀧𑁄 𑀏𑀢𑁂𑀲𑀦𑁆𑀢𑀺 𑀢𑁆𑀯𑀁𑀤𑀻𑀧𑀸, 𑀢𑀼𑀫𑁆𑀳𑁂 𑀯𑀸 𑀤𑀻𑀧𑀸 𑀏𑀢𑁂𑀲𑀦𑁆𑀢𑀺 𑀢𑁆𑀯𑀁𑀤𑀻𑀧𑀸, 𑀢𑀯 𑀯𑀡𑁆𑀡𑁄 𑀢𑁆𑀯𑀁𑀯𑀡𑁆𑀡𑁄. 𑀫𑀫 𑀫𑀼𑀔𑀁 𑀫𑀁𑀫𑀼𑀔𑀁, 𑀅𑀫𑁆𑀳𑀸𑀓𑀁 𑀯𑀸 𑀫𑀼𑀔𑀁 𑀫𑀁𑀫𑀼𑀔𑀦𑁆𑀢𑀺 𑀦𑀺𑀩𑁆𑀩𑀘𑀦𑀸𑀦𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼.

𑀲𑀫𑀸𑀲𑁂 𑀢𑀼𑀫𑁆𑀳𑀅𑀫𑁆𑀳𑀸𑀓𑀁, 𑀳𑁄𑀦𑁆𑀢𑀺 𑀧𑀭𑀧𑀤𑁂𑀳𑀺 𑀯𑁂;

‘‘𑀢𑁆𑀯𑀁𑀫𑀼𑀔’’𑀦𑁆𑀢𑀺 𑀘 ‘‘𑀫𑀁𑀤𑀻𑀧𑀸, 𑀢𑀬𑁆𑀬𑁄𑀕𑁄 𑀫𑀬𑁆𑀬𑁄𑀕𑁄’’𑀢𑀺 𑀘.

𑀏𑀢𑁆𑀣𑀸𑀳 ‘‘𑀓𑀺𑀁 𑀏𑀢𑁆𑀢𑀓𑀫𑁂𑀯 𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑀸𑀦𑀁 𑀭𑀽𑀧𑀁, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻’’𑀢𑀺? 𑀅𑀢𑁆𑀣𑀺 ‘‘𑀢𑁂 𑀫𑁂’’ 𑀇𑀘𑁆𑀘𑀸𑀤𑀻𑀦𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀤𑀫𑀸𑀮𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀢𑀺? 𑀅𑀯𑀘𑀦𑁂 𑀓𑀸𑀭𑀡𑀫𑀢𑁆𑀣𑀺. 𑀅𑀢𑁆𑀭𑀺𑀤𑀁 𑀓𑀸𑀭𑀡𑀁 𑁋

‘‘𑀢𑁂 𑀫𑁂 𑀯𑁄 𑀦𑁄’’𑀢𑀺 𑀭𑀽𑀧𑀸𑀦𑀺, 𑀧𑀭𑀸𑀦𑀺 𑀧𑀤𑀢𑁄 𑀬𑀢𑁄;

𑀢𑀢𑁄 𑀦𑀸𑀫𑀺𑀓𑀧𑀦𑁆𑀢𑀻𑀲𑀼, 𑀦 𑀢𑀼 𑀯𑀼𑀢𑁆𑀢𑀸𑀦𑀺 𑀢𑀸𑀦𑀺 𑀫𑁂.

𑀏𑀢𑁆𑀣 𑀘 𑀫𑀬𑀁 𑀫𑁂 𑀯𑁄 𑀦𑁄𑀲𑀤𑁆𑀤𑀸𑀦𑀫𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀢𑁂𑀲𑀤𑁆𑀤𑀲𑁆𑀲 𑀧𑀦 𑀯𑀼𑀢𑁆𑀢𑁄𑀯. 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀫𑀬𑀁𑀲𑀤𑁆𑀤𑀝𑁆𑀞𑀸𑀦𑁂𑀧𑀺 𑀫𑀬𑀸𑀲𑀤𑁆𑀤𑁄, 𑀫𑀬𑀸𑀲𑀤𑁆𑀤𑀝𑁆𑀞𑀸𑀦𑁂𑀧𑀺 𑀘 𑀫𑀬𑀁𑀲𑀤𑁆𑀤𑁄 𑀇𑀘𑁆𑀘𑁂𑀯 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀫𑀬𑀫𑁆𑀧𑀺 𑀢𑀣𑁂𑀯 𑀯𑀤𑀸𑀫. 𑀫𑀬𑀁𑀲𑀤𑁆𑀤𑁄 ‘‘𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑀸, 𑀢𑁂𑀯𑀺𑀚𑁆𑀚𑀸𑀫𑀬𑀫𑀲𑁆𑀫𑀼𑀪𑁄’’𑀢𑀺𑀆𑀤𑀻𑀲𑀼 𑀅𑀲𑁆𑀫𑀤𑀢𑁆𑀣𑁂 𑀆𑀕𑀢𑁄 ¶ . ‘‘𑀫𑀬𑀁 𑀦𑀺𑀲𑁆𑀲𑀸𑀬 𑀳𑁂𑀫𑀸𑀬, 𑀚𑀸𑀢𑀸 𑀫𑀦𑁆𑀤𑁄𑀲𑀺𑀲𑀽𑀧𑀕𑀸’’𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸’’𑀢𑀺𑀆𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁂. 𑀩𑀸𑀳𑀺𑀭𑁂𑀦 𑀧𑀘𑁆𑀘𑀬𑁂𑀦 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸𑀢𑀺 𑀫𑀦𑁄𑀫𑀬𑀸. ‘‘𑀬𑀁𑀦𑀽𑀦𑀸𑀳𑀁 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀓𑀁 𑀓𑀭𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀓𑀸𑀭𑀢𑁆𑀣𑁂. ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺𑀆𑀤𑀻𑀲𑀼 𑀧𑀤𑀧𑀽𑀭𑀡𑀫𑀢𑁆𑀢𑁂. ‘‘𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭’’𑀦𑁆𑀢𑀺 𑀏𑀢𑁆𑀣 𑀯𑀺𑀓𑀸𑀭𑀢𑁆𑀣𑁂 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀳𑀺 𑀲𑀼𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀦𑁆𑀢𑀺 𑀅𑀬𑀫𑀢𑁆𑀣𑁄, 𑀢𑀤𑀸 𑀲𑀼𑀯𑀡𑁆𑀡𑀲𑁆𑀲 𑀯𑀺𑀓𑀸𑀭𑁄 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀯𑀺𑀓𑀸𑀭𑀢𑁆𑀣𑁂 𑀫𑀬𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀸 𑀧𑀦 𑀲𑀼𑀯𑀡𑁆𑀡𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑁄𑀯𑀡𑁆𑀡𑀦𑁆𑀢𑀺 𑀅𑀬𑀫𑀢𑁆𑀣𑁄, 𑀢𑀤𑀸 𑀲𑁄𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀫𑀬𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀫𑁂𑀲𑀤𑁆𑀤𑁄 ‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀓𑀭𑀡𑁂 𑀆𑀕𑀢𑁄. 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀢𑀲𑁆𑀲 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 𑀲𑀫𑁆𑀧𑀤𑀸𑀦𑁂, 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄𑀢𑀺 𑀯𑀤𑀦𑁆𑀢𑀺. ‘‘𑀧𑀼𑀩𑁆𑀩𑁂𑀯 𑀫𑁂 𑀪𑀺𑀓𑁆𑀔𑀯𑁂 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀅𑀢𑁆𑀣𑁂, 𑀫𑀫𑀸𑀢𑀺 𑀅𑀢𑁆𑀣𑁄𑀢𑀺 𑀘 𑀯𑀤𑀦𑁆𑀢𑀺. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀓𑀭𑀡𑁂 𑀲𑀫𑁆𑀧𑀤𑀸𑀦𑁂 𑀘, 𑀲𑀸𑀫𑀺𑀅𑀢𑁆𑀣𑁂 𑀘 𑀆𑀕𑀢𑁄;

𑀫𑁂𑀲𑀤𑁆𑀤𑁄 𑀇𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀯𑀺𑀜𑁆𑀜𑀼𑀦𑀸 𑀦𑀬𑀤𑀲𑁆𑀲𑀺𑀦𑀸.

𑀏𑀢𑁆𑀣 ¶ 𑀧𑀦 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀓𑀢𑁂 𑀢𑁂 𑀫𑁂𑀲𑀤𑁆𑀤𑀸𑀦𑀫𑀢𑁆𑀣𑀯𑀺𑀯𑀭𑀡𑁂 𑀯𑀺𑀦𑀺𑀘𑁆𑀙𑀬𑀁 𑀩𑁆𑀭𑀽𑀫 𑀢𑁂𑀲𑀫𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀯𑀲𑁂𑀦 𑀲𑁄𑀢𑀽𑀦𑀁 𑀲𑀁𑀲𑀬𑀲𑀫𑀼𑀕𑁆𑀖𑀸𑀝𑀦𑀢𑁆𑀣𑀁. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀢𑁂𑀫𑁂𑀲𑀤𑁆𑀤𑀸𑀦𑀁 𑀲𑀫𑁆𑀧𑀤𑀸𑀦𑀢𑁆𑀣𑀯𑀲𑁂𑀦 ‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁, 𑀲𑀸𑀫𑀺𑀅𑀢𑁆𑀣𑀯𑀲𑁂𑀦 𑀧𑀦 ‘‘𑀢𑀯 𑀫𑀫𑀸’’𑀢𑀺. 𑀏𑀯𑀁 𑀬𑁆𑀯𑀸𑀬𑀁 𑀢𑁂𑀳𑀺 𑀅𑀲𑀗𑁆𑀓𑀭𑀢𑁄 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄, 𑀲𑁄 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀓𑀼𑀢𑁄 𑀮𑀩𑁆𑀪𑀸. 𑀢𑀣𑀸 𑀳𑀺 𑀢𑁂𑀫𑁂𑀲𑀤𑁆𑀤𑀢𑁆𑀣𑀯𑀸𑀘𑀓𑀸 𑀢𑀼𑀬𑁆𑀳𑀁 𑀫𑀬𑁆𑀳𑀁𑀲𑀤𑁆𑀤𑀸 𑀢𑀯 𑀫𑀫𑀲𑀤𑁆𑀤𑀸 𑀘 𑀲𑀫𑁆𑀧𑀤𑀸𑀦𑀲𑀸𑀫𑀺𑀅𑀢𑁆𑀣𑁂𑀲𑀼 𑀅𑀦𑀺𑀬𑀫𑀢𑁄 𑀧𑀯𑀢𑁆𑀢𑀦𑁆𑀢𑀺.

𑀢𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋 𑀇𑀤𑀁 𑀢𑀼𑀬𑁆𑀳𑀁 𑀤𑀤𑀸𑀫𑀺. 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀺. 𑀢𑀼𑀬𑁆𑀳𑀁 𑀫𑀁𑀲𑁂𑀦 𑀫𑁂𑀤𑁂𑀦, 𑀫𑀢𑁆𑀣𑀓𑁂𑀦 𑀘 𑀩𑁆𑀭𑀸𑀳𑁆𑀫𑀡, 𑀆𑀳𑀼𑀢𑀺𑀁 𑀧𑀕𑁆𑀕𑀳𑁂𑀲𑁆𑀲𑀸𑀫𑀺. 𑀏𑀲 𑀳𑀺 𑀢𑀼𑀬𑁆𑀳𑀁 𑀧𑀺𑀢𑀸 𑀦𑀭𑀲𑀻𑀳𑁄. 𑀢𑀼𑀬𑁆𑀳𑀁 𑀧𑀦 𑀫𑀸𑀢𑀸 𑀓𑀳𑀦𑁆𑀢𑀺. 𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁, 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁. 𑀦 𑀫𑀬𑁆𑀳𑀁 𑀪𑀭𑀺𑀬𑀸 𑀏𑀲𑀸. 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁. 𑀢𑀸𑀢 𑀫𑀬𑁆𑀳𑀁 𑀫𑀸𑀢𑀼 𑀫𑀼𑀔𑀁 𑀅𑀜𑁆𑀜𑀸𑀤𑀺𑀲𑀁, 𑀢𑀼𑀫𑁆𑀳𑀸𑀓𑀁 𑀅𑀜𑁆𑀜𑀸𑀤𑀺𑀲𑀁. 𑀫𑀬𑁆𑀳𑀁 𑀲𑀸𑀫𑀺𑀓𑁄 𑀇𑀤𑀸𑀦𑀺 𑀫𑀭𑀺𑀲𑁆𑀲𑀢𑀺. 𑀢𑀯 𑀤𑀻𑀬𑀢𑁂, 𑀢𑀯 𑀲𑀺𑀮𑀸𑀖𑀢𑁂, 𑀫𑀫 𑀲𑀺𑀮𑀸𑀖𑀢𑁂, 𑀧𑀩𑁆𑀩𑀚𑁆𑀚𑀸 𑀫𑀫 𑀭𑀼𑀘𑁆𑀘𑀢𑀺. 𑀢𑀯 𑀧𑀼𑀢𑁆𑀢𑁄. 𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀫𑀸𑀢𑀺 𑀏𑀯𑀁 𑀅𑀦𑀺𑀬𑀫𑀢𑁄 𑀧𑀯𑀢𑁆𑀢𑀦𑁆𑀢𑀺.

𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀜𑁆𑀳𑀺 𑀬𑀫𑀓𑀫𑀳𑀸𑀣𑁂𑀭𑁂𑀦 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀅𑀦𑀜𑁆𑀜𑀭𑀽𑀧𑀢𑁆𑀢𑀁 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀲𑀩𑁆𑀩𑀢𑁆𑀣 𑀅𑀦𑀜𑁆𑀜𑀁, 𑀢𑀢𑀺𑀬𑀸𑀧𑀜𑁆𑀘𑀫𑀻𑀦𑀁 𑀩𑀳𑀼𑀯𑀘𑀦𑀜𑁆𑀘𑀸’’𑀢𑀺 ¶ . 𑀬𑀤𑀺 𑀏𑀯𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜. 𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀽’𑀢𑀺𑀆𑀤𑀻𑀲𑀼 𑀢𑀼𑀬𑁆𑀳𑀁𑀲𑀤𑁆𑀤𑀲𑁆𑀲 𑀯𑀲𑁂𑀦 𑀲𑀫𑁆𑀧𑀤𑀸𑀦𑁂, 𑀢𑀼𑀬𑁆𑀳𑀦𑁆𑀢𑀺 𑀳𑀺 𑀅𑀢𑁆𑀣𑁄. ‘𑀓𑀺𑀦𑁆𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬’𑀦𑁆𑀢𑀺𑀆𑀤𑀻𑀲𑀼 𑀲𑀸𑀫𑀺𑀅𑀢𑁆𑀣𑁂, 𑀢𑀯𑀸𑀢𑀺 𑀳𑀺 𑀅𑀢𑁆𑀣𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 ‘‘𑀅𑀬𑀼𑀢𑁆𑀢𑀁 𑀲𑀁𑀯𑀡𑁆𑀡𑀦𑀁 𑀲𑀁𑀯𑀡𑁆𑀡𑁂𑀲𑀼’’𑀦𑁆𑀢𑀺𑀧𑀺, ‘‘𑀧𑀲𑁆𑀲𑀺𑀢𑀩𑁆𑀩𑀁 𑀦 𑀧𑀲𑁆𑀲𑀺𑀁𑀲𑀽’’𑀢𑀺𑀧𑀺 𑀆𑀧𑀚𑁆𑀚𑀦𑁆𑀢𑀻𑀢𑀺? 𑀬𑀼𑀢𑁆𑀢𑀁𑀬𑁂𑀯 𑀢𑁂 𑀲𑀁𑀯𑀡𑁆𑀡𑀬𑀺𑀁𑀲𑀼, 𑀧𑀲𑁆𑀲𑀺𑀢𑀩𑁆𑀩𑀜𑁆𑀘 𑀧𑀲𑁆𑀲𑀺𑀁𑀲𑀼. 𑀢𑀣𑀸 𑀳𑀺 𑀢𑁂 ‘‘𑀲𑀤𑁆𑀤𑀲𑀢𑁆𑀣𑀫𑁆𑀧𑀺 𑀏𑀓𑀤𑁂𑀲𑀢𑁄 𑀲𑀸𑀲𑀦𑀸𑀦𑀼𑀓𑀽𑀮𑀁 𑀳𑁄𑀢𑀻’’𑀢𑀺 𑀧𑀭𑁂𑀲𑀫𑀦𑀼𑀓𑀫𑁆𑀧𑀸𑀬 𑀲𑀤𑁆𑀤𑀲𑀢𑁆𑀣𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀲𑀫𑁆𑀧𑀤𑀸𑀦𑀢𑁆𑀣𑀯𑀲𑁂𑀦 𑀢𑁂 𑀫𑁂𑀲𑀤𑁆𑀤𑀸𑀦𑀁 ‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑀬𑀺𑀁𑀲𑀼, 𑀲𑀸𑀫𑀺𑀅𑀢𑁆𑀣𑀯𑀲𑁂𑀦 𑀧𑀦 ‘‘𑀢𑀯 𑀫𑀫𑀸’’𑀢𑀺. 𑀲𑀤𑁆𑀤𑀲𑀢𑁆𑀣𑁂 𑀳𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀺 𑀲𑀩𑁆𑀩𑀣𑀸 𑀯𑀺𑀲𑀤𑀺𑀲𑀸𑀦𑀺, 𑀲𑀸𑀲𑀦𑁂 𑀧𑀦 𑀲𑀤𑀺𑀲𑀸𑀦𑀺. 𑀢𑀲𑁆𑀫𑀸 𑀲𑀸𑀲𑀦𑁂 𑀲𑀸𑀫𑀜𑁆𑀜𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀺 𑀲𑀤𑁆𑀤𑀲𑀢𑁆𑀣𑁂 𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑁂𑀳𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀦𑀺 𑀓𑀢𑁆𑀯𑀸 𑀧𑀭𑁂𑀲𑀫𑀦𑀼𑀓𑀫𑁆𑀧𑀸𑀬 𑀲𑀫𑁆𑀧𑀤𑀸𑀦𑀢𑁆𑀣𑁂 𑀢𑀼𑀬𑁆𑀳𑀁 𑀫𑀬𑁆𑀳𑀁𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀺𑀦𑀺𑀬𑀫𑁄, 𑀲𑀸𑀫𑀺𑀅𑀢𑁆𑀣𑁂 𑀘 𑀢𑀯 𑀫𑀫𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀺𑀦𑀺𑀬𑀫𑁄 𑀤𑀲𑁆𑀲𑀺𑀢𑁄. 𑀬𑀲𑁆𑀫𑀸 𑀧𑀦 𑀧𑀭𑁂𑀲𑀫𑀦𑀼𑀓𑀫𑁆𑀧𑀸𑀬 𑀅𑀬𑀁 𑀦𑀺𑀬𑀫𑁄, 𑀢𑀲𑁆𑀫𑀸 𑀓𑀭𑀼𑀡𑀸𑀬𑁂𑀯𑀸𑀬𑀁𑀧𑀭𑀸𑀥𑁄, 𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁. 𑀢𑀸𑀬 𑀏𑀯 𑀳𑀺 𑀢𑁂𑀳𑀺 𑀏𑀯𑀁 𑀲𑀁𑀯𑀡𑁆𑀡𑀦𑀸 𑀓𑀢𑀸𑀢𑀺.

𑀓𑁂𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 𑀦𑀦𑀼 𑀘 𑀪𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 𑀢𑁂 𑀫𑁂𑀲𑀤𑁆𑀤𑀸𑀦𑀁 𑀲𑀸𑀫𑀺𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀸𑀦𑀁 ‘‘𑀢𑀯 𑀫𑀫𑀸’’𑀢𑀺 𑀅𑀢𑁆𑀣𑀯𑀘𑀦𑁂𑀦 ‘‘𑀢𑀼𑀬𑁆𑀳𑀁 𑀫𑀁𑀲𑁂𑀦 𑀫𑁂𑀤𑁂𑀦, 𑀦 𑀫𑀬𑁆𑀳𑀁 𑀪𑀭𑀺𑀬𑀸 𑀏𑀲𑀸’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀯𑀺𑀲𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀣𑀸 𑀲𑀤𑁆𑀤𑀦𑀬𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀢𑁂 𑀫𑁂𑀲𑀤𑁆𑀤𑀸𑀦𑀁 𑀲𑀫𑁆𑀧𑀤𑀸𑀦𑀢𑁆𑀣𑁂 𑀯𑀢𑁆𑀢𑀫𑀸𑀦𑀸𑀦𑀁 ¶ ‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀅𑀢𑁆𑀣𑀯𑀘𑀦𑁂𑀦 ‘‘𑀪𑀢𑁆𑀢𑀁 𑀢𑀯 𑀦 𑀭𑀼𑀘𑁆𑀘𑀢𑀺. 𑀧𑀩𑁆𑀩𑀚𑁆𑀚𑀸 𑀫𑀫 𑀭𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀲𑀫𑁆𑀧𑀤𑀸𑀦𑀯𑀺𑀲𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺? 𑀦 𑀲𑀓𑁆𑀓𑀸, 𑀕𑀸𑀣𑀸𑀲𑀼 𑀯𑀺𑀬 𑀘𑀼𑀡𑁆𑀡𑀺𑀬𑀧𑀤𑀝𑁆𑀞𑀸𑀦𑁂𑀧𑀺 𑀢𑀼𑀬𑁆𑀳𑀁 𑀫𑀬𑁆𑀳𑀁 𑀢𑀯 𑀫𑀫𑀲𑀤𑁆𑀤𑀸𑀦𑀁 𑀅𑀦𑀺𑀬𑀫𑁂𑀦 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀧𑀯𑀢𑁆𑀢𑀦𑀢𑁄. 𑀦 𑀳𑀺 𑀈𑀤𑀺𑀲𑁂 𑀞𑀸𑀦𑁂 𑀕𑀸𑀣𑀸𑀬𑀁 𑀯𑀸 𑀘𑀼𑀡𑁆𑀡𑀺𑀬𑀧𑀤𑀝𑁆𑀞𑀸𑀦𑁂 𑀯𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄. ‘‘𑀢𑀲𑁆𑀲 𑀭𑀚𑁆𑀚𑀲𑁆𑀲𑀳𑀁 𑀪𑀻𑀢𑁄. 𑀓𑀺𑀁 𑀦𑀼 𑀔𑁄 𑀅𑀳𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀪𑀸𑀬𑀸𑀫𑀻’’𑀢𑀺𑀆𑀤𑀻𑀲𑀼𑀬𑁂𑀯 𑀧𑀦 𑀞𑀸𑀦𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑁄.

𑀬𑀤𑀺 𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 ‘‘𑀢𑀼𑀬𑁆𑀳𑀁 𑀫𑀁𑀲𑁂𑀦 𑀫𑁂𑀤𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀲𑀺𑀬𑀸, ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀺𑀬𑀧𑀼𑀢𑁆𑀢𑀤𑀸𑀦𑀁 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀺𑀢𑀸 𑀅𑀤𑀸𑀲𑀻’’𑀢𑀺𑀆𑀤𑀻𑀲𑀼𑀧𑀺 𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 ‘‘𑀩𑁆𑀭𑀸𑀳𑁆𑀫𑀡𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀢𑁆𑀣𑁄 𑀯𑀘𑀦𑀻𑀬𑁄 𑀲𑀺𑀬𑀸 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀁 𑀲𑀢𑁆𑀣𑁂 𑀯𑀺𑀲𑀼𑀁 𑀯𑀘𑀦𑀢𑁄. 𑀏𑀯𑀜𑁆𑀘 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀘𑁂? 𑀅𑀢𑁆𑀣𑁂𑀯 𑀤𑁄𑀲𑁄, 𑀬𑀲𑁆𑀫𑀸 𑀤𑀸𑀦𑀬𑁄𑀕𑁂 𑀯𑀸 𑀦𑀫𑁄𑀬𑁄𑀕𑁂 𑀯𑀸 𑀆𑀬𑀸𑀤𑁂𑀲𑀲𑀳𑀺𑀢𑀸𑀦𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀺 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀢𑁆𑀣𑀯𑀘𑀦𑁂 𑀅𑀬𑀁 𑀤𑁄𑀲𑁄 𑀬𑀤𑀺𑀤𑀁 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀁. 𑀬𑀲𑁆𑀫𑀸 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀓𑀭𑀡𑀁 𑀲𑀸𑀯𑀚𑁆𑀚𑀁, 𑀢𑀲𑁆𑀫𑀸 ‘‘𑀢𑀼𑀬𑁆𑀳𑀁 𑀫𑀁𑀲𑁂𑀦 𑀫𑁂𑀤𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄.

𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀭𑀽𑀧𑀸𑀦𑀺 𑀳𑀺 𑀅𑀦𑀜𑁆𑀜𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀧𑀼𑀭𑀺𑀲𑀲𑁆𑀲 𑀅𑀤𑀸𑀲𑀺, 𑀧𑀼𑀭𑀺𑀲𑀲𑁆𑀲 𑀥𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀸𑀲𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀢𑀓’’𑀦𑁆𑀢𑀺. 𑀢𑀣𑀸 𑀳𑀺 𑀧𑀸𑀯𑀘𑀦𑁂 𑀲 𑀦𑀁𑀲𑀤𑁆𑀤𑀸 𑀲𑀫𑁆𑀧𑀤𑀸𑀦𑀲𑀸𑀫𑀺𑀅𑀢𑁆𑀣𑁂𑀲𑀼 𑀲𑀸𑀫𑀜𑁆𑀜𑁂𑀦 ¶ 𑀧𑀯𑀢𑁆𑀢𑀦𑁆𑀢𑀺, 𑀢𑀧𑁆𑀧𑀯𑀢𑁆𑀢𑀺 ‘‘𑀅𑀕𑁆𑀕𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻’’𑀢𑀺𑀆𑀤𑀻𑀳𑀺 𑀧𑀬𑁄𑀕𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. ‘‘𑀅𑀕𑁆𑀕𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻’’𑀢𑀺 𑀏𑀢𑁆𑀣 𑀳𑀺 ‘‘𑀅𑀕𑁆𑀕𑀲𑁆𑀲𑀸’’𑀢𑀺 𑀅𑀬𑀁 𑀲𑀤𑁆𑀤𑁄 𑀬𑀤𑀸 𑀓𑁆𑀭𑀺𑀬𑀸𑀧𑀝𑀺𑀕𑁆𑀕𑀳𑀡𑀁 𑀧𑀝𑀺𑀘𑁆𑀘 𑀲𑀫𑁆𑀧𑀤𑀸𑀦𑀢𑁆𑀣𑁂 𑀧𑀯𑀢𑁆𑀢𑀢𑀺, 𑀢𑀤𑀸 ‘‘𑀅𑀕𑁆𑀕𑀲𑁆𑀲 𑀭𑀢𑀦𑀢𑁆𑀢𑀬𑀲𑁆𑀲 𑀤𑀸𑀢𑀸’’𑀢𑀺 𑀅𑀢𑁆𑀣𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑁂 𑀲𑀸𑀫𑀺𑀅𑀢𑁆𑀣𑁂 𑀧𑀯𑀢𑁆𑀢𑀢𑀺, 𑀢𑀤𑀸 ‘‘𑀅𑀕𑁆𑀕𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀢𑀸’’𑀢𑀺 𑀅𑀢𑁆𑀣𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀯𑀺𑀧𑀮𑁆𑀮𑀸𑀲𑁄 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀦 𑀳𑁄𑀢𑀻𑀢𑀺. 𑀢𑀣𑀸 𑀲𑀤𑁆𑀤𑀦𑀬𑀁 𑀦𑀺𑀲𑁆𑀲𑀸𑀬 ‘‘𑀲𑀫𑁆𑀧𑀤𑀸𑀦𑀯𑀘𑀦’’𑀦𑁆𑀢𑀺 𑀢𑀼𑀫𑁆𑀳𑁂𑀳𑀺 𑀤𑀴𑁆𑀳𑀁 𑀕𑀳𑀺𑀢𑀲𑁆𑀲 𑀫𑀬𑁆𑀳𑀁𑀲𑀤𑁆𑀤𑀲𑁆𑀲 𑀲𑀸𑀫𑀺𑀅𑀢𑁆𑀣𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀬𑀁 𑀤𑀲𑁆𑀲𑀦𑀢𑁄 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀦 𑀳𑁄𑀢𑁂𑀯. 𑀢𑀣𑀸 𑀳𑀺 𑁋

‘‘𑀲𑀓𑀼𑀡𑁄 𑀫𑀬𑁆𑀳𑀓𑁄 𑀦𑀸𑀫, 𑀕𑀺𑀭𑀺𑀲𑀸𑀦𑀼𑀤𑀭𑀻𑀘𑀭𑁄;

𑀧𑀓𑁆𑀓𑀁 𑀧𑀺𑀧𑁆𑀨𑀮𑀺𑀫𑀸𑀭𑀼𑀬𑁆𑀳, ‘𑀫𑀬𑁆𑀳𑀁 𑀫𑀬𑁆𑀳’𑀦𑁆𑀢𑀺 𑀓𑀦𑁆𑀤𑀢𑀻’’𑀢𑀺

𑀏𑀢𑁆𑀣 𑀫𑀬𑁆𑀳𑀓𑁄𑀢𑀺 𑀏𑀓𑀸𑀬 𑀲𑀓𑀼𑀡𑀚𑀸𑀢𑀺𑀬𑀸 𑀦𑀸𑀫𑀁. 𑀲𑁄 𑀳𑀺 𑀮𑁄𑀮𑀼𑀧𑁆𑀧𑀘𑀸𑀭𑀺𑀢𑀸𑀬 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁, 𑀇𑀤𑀫𑁆𑀧𑀺 𑀫𑀬𑁆𑀳’’𑀦𑁆𑀢𑀺 𑀓𑀸𑀬𑀢𑀺 𑀭𑀯𑀢𑀻𑀢𑀺 𑀫𑀬𑁆𑀳𑀓𑁄𑀢𑀺 𑀯𑀼𑀘𑁆𑀘𑀢𑀺 𑀫𑀬𑁆𑀳𑀲𑀤𑁆𑀤𑀽𑀧𑀧𑀤𑀲𑁆𑀲 𑀓𑁂 𑀭𑁂 𑀕𑁂 𑀲𑀤𑁆𑀤𑁂𑀢𑀺 𑀥𑀸𑀢𑀼𑀲𑁆𑀲 𑀯𑀲𑁂𑀦.

𑀅𑀢𑁆𑀭𑀸𑀬𑀁 𑀧𑀤𑀲𑁄𑀥𑀦𑀸 𑁋 𑀬𑀤𑀺 𑀢𑀼𑀬𑁆𑀳𑀁 𑀫𑀬𑁆𑀳𑀁𑀲𑀤𑁆𑀤𑀸 𑀥𑀼𑀯𑀁 𑀲𑀫𑁆𑀧𑀤𑀸𑀦𑀢𑁆𑀣𑁂, 𑀢𑀯 𑀫𑀫𑀲𑀤𑁆𑀤𑀸 𑀘 𑀲𑀸𑀫𑀺𑀅𑀢𑁆𑀣𑁂 𑀪𑀯𑁂𑀬𑁆𑀬𑀼𑀁, 𑀏𑀯𑀁 𑀲𑀦𑁆𑀢𑁂 𑀮𑁄𑀓𑀯𑁄𑀳𑀸𑀭𑀓𑀼𑀲𑀮𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀢𑀲𑁆𑀲 𑀲𑀓𑀼𑀡𑀲𑁆𑀲 ‘‘𑀫𑀬𑁆𑀳𑀓𑁄’’𑀢𑀺 𑀧𑀡𑁆𑀡𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 𑀅𑀦𑀦𑁆𑀢𑁄𑀕𑀥𑀲𑀫𑁆𑀧𑀤𑀸𑀦𑀢𑁆𑀣𑀢𑁆𑀢𑀸, 𑀅𑀦𑁆𑀢𑁄𑀕𑀥𑀲𑀸𑀫𑁆𑀬𑀢𑁆𑀣𑀢𑁆𑀢𑀸 𑀧𑀦 ‘‘𑀫𑀫𑀓𑁄’’ 𑀇𑀘𑁆𑀘𑁂𑀯 𑀧𑀜𑁆𑀜𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀏𑀢𑁆𑀣𑀧𑀺 ‘‘𑀫𑀬𑁆𑀳𑀓𑁄’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀧𑀡𑁆𑀡𑀢𑁆𑀢𑀺𑀯𑀺𑀲𑀬𑁂 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀲𑁆𑀲 𑀅𑀝𑁆𑀞𑀸𑀦𑀢𑁆𑀢𑀸 𑀅𑀦𑀯𑀓𑀸𑀲𑀢𑁆𑀢𑀸.

𑀅𑀧𑀺𑀘𑁂𑀢𑁆𑀣 𑀫𑀬𑁆𑀳𑀁𑀲𑀤𑁆𑀤𑁄 𑀲𑀭𑀽𑀧𑀢𑁄 𑀯𑀺𑀪𑀢𑁆𑀬𑀦𑁆𑀢𑀪𑀸𑀯𑁂𑀦 𑀢𑀺𑀝𑁆𑀞𑀢𑀺 𑀓𑀲𑀤𑁆𑀤𑁂𑀦 𑀏𑀓𑀧𑀤𑀢𑁆𑀢𑀽𑀧𑀕𑀫𑀦𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀫𑀬𑁆𑀳𑀓𑁄’’𑀢𑀺 ¶ 𑀅𑀬𑀁 𑀲𑀓𑀼𑀡𑀯𑀺𑀲𑁂𑀲𑀯𑀸𑀘𑀓𑁄 𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀯𑀘𑀦𑀪𑀸𑀯𑁂 𑀞𑀺𑀢𑁄𑀬𑁂𑀯 𑀈𑀲𑀓𑀁 𑀲𑀸𑀫𑀺𑀅𑀢𑁆𑀣𑀫𑁆𑀧𑀺 𑀚𑁄𑀢𑀬𑀢𑀺 𑀲𑀼𑀚𑀫𑁆𑀧𑀢𑀺 𑀭𑀸𑀚𑀧𑀼𑀭𑀺𑀲𑀲𑀤𑁆𑀤𑀸 𑀯𑀺𑀬. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀦 𑀳𑁄𑀢𑀺. 𑀇𑀢𑀺 ‘‘𑀫𑀬𑁆𑀳𑀓𑁄’’𑀢𑀺 𑀧𑀡𑁆𑀡𑀢𑁆𑀢𑀺𑀬𑀁 𑀯𑀢𑁆𑀢𑀫𑀸𑀦𑀲𑁆𑀲 𑀧𑀤𑀸𑀯𑀬𑀯𑀪𑀽𑀢𑀲𑁆𑀲 𑀫𑀬𑁆𑀳𑀲𑀤𑁆𑀤𑀲𑁆𑀲 𑀅𑀯𑀺𑀧𑀮𑁆𑀮𑀸𑀲𑀯𑀘𑀦𑀮𑁂𑀲𑁂𑀦 𑀢𑀼𑀬𑁆𑀳𑀁 𑀢𑀯 𑀫𑀫𑀲𑀤𑁆𑀤𑁂𑀲𑀼𑀧𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀲𑀫𑁆𑀧𑀤𑀸𑀦𑀲𑀸𑀫𑀺𑀅𑀢𑁆𑀣𑁂𑀲𑀼 𑀲𑀸𑀫𑀜𑁆𑀜𑁂𑀦 𑀧𑀯𑀢𑁆𑀢𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁 𑀢𑀼𑀬𑁆𑀳𑀁 𑀫𑀬𑁆𑀳𑀁 𑀢𑀯 𑀫𑀫𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀬𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀭𑁂𑀲𑀫𑀦𑀼𑀓𑀫𑁆𑀧𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄𑀢𑀺 𑀅𑀯𑀕𑀦𑁆𑀢𑀩𑁆𑀩𑀁. 𑀇𑀘𑁆𑀘𑁂𑀯𑀁 𑁋

‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺𑀫𑁂 𑀲𑀤𑁆𑀤𑁂, 𑀲𑀫𑁆𑀧𑀤𑀸𑀦𑁂 𑀕𑀭𑀽 𑀯𑀤𑀼𑀁;

‘‘𑀢𑀯 𑀫𑀫𑀸’’𑀢𑀺 𑀲𑀸𑀫𑀺𑀫𑁆𑀳𑀺, 𑀦𑀬𑀫𑀸𑀤𑀸𑀬 𑀲𑀢𑁆𑀣𑀢𑁄.

𑀏𑀯𑀁 𑀲𑀦𑁆𑀢𑁂𑀧𑀺 𑀏𑀢𑁂𑀲𑀁, 𑀦𑀺𑀬𑀫𑁄 𑀦𑀢𑁆𑀣𑀺 𑀧𑀸𑀴𑀺𑀬𑀁;

𑀓𑁄𑀘𑀺 𑀢𑁂𑀲𑀁 𑀯𑀺𑀲𑁂𑀲𑁄 𑀘, 𑀤𑀺𑀝𑁆𑀞𑁄 𑀅𑀫𑁆𑀳𑁂𑀳𑀺 𑀢𑀁 𑀲𑀼𑀡.

𑀲𑀸𑀫𑁆𑀬𑀢𑁆𑀣𑀲𑀫𑁆𑀧𑀤𑀸𑀦𑀢𑁆𑀣𑀸, 𑀲𑀫𑁆𑀪𑀯𑀦𑁆𑀢𑀺 𑀬𑀳𑀺𑀁 𑀤𑀼𑀯𑁂;

‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺𑀫𑁂 𑀲𑀤𑁆𑀤𑀸, 𑀢𑁂 𑀧𑀬𑁄𑀕𑀸 𑀦 𑀤𑀼𑀮𑁆𑀮𑀪𑀸.

‘‘𑀢𑀯 𑀫𑀫𑀸’’𑀢𑀺𑀫𑁂 𑀲𑀤𑁆𑀤𑀸, 𑀧𑀸𑀬𑀸 𑀲𑀸𑀫𑀺𑀫𑁆𑀳𑀺 𑀯𑀢𑁆𑀢𑀭𑁂;

𑀲𑀫𑁆𑀧𑀤𑀸𑀦𑁂 𑀬𑀳𑀺𑀁 𑀳𑁄𑀦𑁆𑀢𑀺, 𑀢𑁂 𑀧𑀬𑁄𑀕𑀸 𑀧𑀦𑀧𑁆𑀧𑀓𑀸.

𑀢𑀯𑀢𑁄 𑀫𑀫𑀢𑁄 𑀢𑀼𑀬𑁆𑀳𑀁-𑀫𑀬𑁆𑀳𑀁𑀲𑀤𑁆𑀤𑀸𑀯 𑀲𑀸𑀲𑀦𑁂;

𑀧𑀸𑀞𑁂 𑀦𑁂𑀓𑀲𑀳𑀲𑁆𑀲𑀫𑁆𑀳𑀺, 𑀲𑀸𑀫𑀺𑀅𑀢𑁆𑀣𑁂 𑀧𑀯𑀢𑁆𑀢𑀭𑁂𑀢𑀺.

𑀲𑀩𑁆𑀩𑀸𑀧𑀺 𑀇𑀫𑀸 𑀦𑀻𑀢𑀺𑀬𑁄 𑀧𑀭𑀫𑀲𑀼𑀔𑀼𑀫𑀸 𑀲𑀼𑀤𑀼𑀤𑁆𑀤𑀲𑀸 𑀯𑀻𑀭𑀚𑀸𑀢𑀺𑀦𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀯𑁄 𑀦𑁄𑀲𑀤𑁆𑀤𑁂𑀲𑀼 𑀧𑀦 𑀯𑁄𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀉𑀧𑀬𑁄𑀕𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀧𑀤𑀧𑀽𑀭𑀡𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀓𑀘𑁆𑀘𑀺 𑀯𑁄 ¶ 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸’’𑀢𑀺𑀆𑀤𑀻𑀲𑀼 𑀳𑀺 𑀧𑀘𑁆𑀘𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀕𑀘𑁆𑀙𑀣 𑀪𑀺𑀓𑁆𑀔𑀯𑁂 𑀧𑀡𑀸𑀫𑁂𑀫𑀺 𑀯𑁄’’𑀢𑀺𑀆𑀤𑀻𑀲𑀼 𑀉𑀧𑀬𑁄𑀕𑁂. ‘‘𑀦 𑀯𑁄 𑀫𑀫 𑀲𑀦𑁆𑀢𑀺𑀓𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀓𑀭𑀡𑁂. ‘‘𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀲𑀫𑁆𑀧𑀤𑀸𑀦𑁂. ‘‘𑀲𑀩𑁆𑀩𑁂𑀲𑀁 𑀯𑁄 𑀲𑀸𑀭𑀺𑀧𑀼𑀢𑁆𑀢𑀸 𑀲𑀼𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀲𑀸𑀫𑀺𑀯𑀘𑀦𑁂. ‘‘𑀬𑁂 𑀳𑀺 𑀯𑁄𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑁂 𑀘, 𑀓𑀭𑀡𑁂 𑀲𑀫𑁆𑀧𑀤𑀸𑀦𑀺𑀬𑁂;

𑀲𑀸𑀫𑀺𑀲𑁆𑀲 𑀯𑀘𑀦𑁂 𑀘𑁂𑀯, 𑀢𑀣𑁂𑀯 𑀧𑀤𑀧𑀽𑀭𑀡𑁂;

𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼, 𑀯𑁄𑀲𑀤𑁆𑀤𑁄 𑀲𑀫𑁆𑀧𑀯𑀢𑁆𑀢𑀢𑀺’’.

𑀦𑁄𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀸𑀯𑀥𑀸𑀭𑀡𑀦𑀼𑀲𑀤𑁆𑀤𑀢𑁆𑀣𑁂𑀲𑀼 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑀫𑀢𑁆𑀢𑁂 𑀘 𑀯𑀢𑁆𑀢𑀢𑀺. 𑀅𑀬𑀜𑁆𑀳𑀺 ‘‘𑀕𑀸𑀫𑀁 𑀦𑁄 𑀕𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀫𑀸 𑀦𑁄 𑀅𑀚𑁆𑀚 𑀯𑀺𑀓𑀦𑁆𑀢𑀺𑀁𑀲𑀼, 𑀭𑀜𑁆𑀜𑁄 𑀲𑀽𑀤𑀸 𑀫𑀳𑀸𑀦𑀲𑁂’’𑀢𑀺𑀆𑀤𑀻𑀲𑀼 𑀉𑀧𑀬𑁄𑀕𑁂. ‘‘𑀦 𑀦𑁄 𑀯𑀺𑀯𑀸𑀳𑁄 𑀦𑀸𑀕𑁂𑀳𑀺, 𑀓𑀢𑀧𑀼𑀩𑁆𑀩𑁄 𑀓𑀼𑀤𑀸𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀓𑀭𑀡𑁂. ‘‘𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦𑀸’’𑀢𑀺𑀆𑀤𑀻𑀲𑀼 𑀲𑀫𑁆𑀧𑀤𑀸𑀦𑁂. ‘‘𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀯𑀘𑀦𑁂. ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸’’𑀢𑀺 𑀏𑀢𑁆𑀣 𑀅𑀯𑀥𑀸𑀭𑀡𑁂. ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀲𑀼 𑀦𑀼𑀲𑀤𑁆𑀤𑀢𑁆𑀣𑁂, 𑀧𑀼𑀘𑁆𑀙𑀸𑀬𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀲𑀼𑀪𑀸𑀲𑀺𑀢𑀜𑁆𑀜𑁂𑀯 𑀪𑀸𑀲𑁂𑀬𑁆𑀬, 𑀦𑁄 𑀘 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑁂’’𑀢𑀺𑀆𑀤𑀻𑀲𑀼 𑀧𑀝𑀺𑀲𑁂𑀥𑁂. ‘‘𑀦 𑀦𑁄 𑀲𑀪𑀸𑀬𑀁 𑀦 𑀓𑀭𑁄𑀦𑁆𑀢𑀺 𑀓𑀺𑀜𑁆𑀘𑀻’’𑀢𑀺𑀆𑀤𑀻𑀲𑀼 𑀦𑀺𑀧𑀸𑀢𑀫𑀢𑁆𑀢𑁂. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀧𑀘𑁆𑀘𑀢𑁆𑀢𑁂 ¶ 𑀘𑀼𑀧𑀬𑁄𑀕𑁂 𑀘, 𑀓𑀭𑀡𑁂 𑀲𑀫𑁆𑀧𑀤𑀸𑀦𑀺𑀬𑁂;

𑀲𑀸𑀫𑁆𑀬𑀸𑀯𑀥𑀸𑀭𑀡𑁂 𑀘𑁂𑀯, 𑀦𑀼𑀲𑀤𑁆𑀤𑀢𑁆𑀣𑁂 𑀦𑀺𑀯𑀸𑀭𑀡𑁂;

𑀢𑀣𑀸 𑀦𑀺𑀧𑀸𑀢𑀫𑀢𑁆𑀢𑀫𑁆𑀳𑀺, 𑀦𑁄𑀲𑀤𑁆𑀤𑁄 𑀲𑀫𑁆𑀧𑀯𑀢𑁆𑀢𑀢𑀺.

𑀇𑀤𑀸𑀦𑀺 𑀲𑀩𑁆𑀩𑀦𑀸𑀫𑀸𑀦𑀁 𑀬𑀣𑀸𑀭𑀳𑀁 𑀲𑀁𑀔𑀺𑀢𑁆𑀢𑁂𑀦 𑀫𑀺𑀲𑁆𑀲𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀬𑁄 𑀲𑁄, 𑀬𑁂 𑀢𑁂. 𑀬𑀁 𑀢𑀁, 𑀬𑁂 𑀢𑁂. 𑀬𑁂𑀦 𑀢𑁂𑀦. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀬𑀸 𑀲𑀸, 𑀬𑀸 𑀢𑀸. 𑀬𑀁 𑀢𑀁, 𑀬𑀸 𑀢𑀸. 𑀬𑀸𑀬 𑀢𑀸𑀬. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀬𑀁 𑀢𑀁, 𑀬𑀸𑀦𑀺 𑀢𑀸𑀦𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀮𑀺𑀗𑁆𑀕𑀢𑁆𑀢𑀬𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀏𑀲𑁄 𑀲𑁄, 𑀏𑀢𑁂 𑀢𑁂. 𑀅𑀬𑀁 𑀲𑁄, 𑀇𑀫𑁂 𑀢𑁂. 𑀲𑁄 𑀅𑀬𑀁 𑀢𑁂 𑀇𑀫𑁂’’𑀢𑀺𑀆𑀤𑀺𑀦𑀸 𑀬𑀣𑀸𑀧𑀬𑁄𑀕𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀣𑀸 𑀳𑀺 ‘‘𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄. 𑀏𑀢𑁂 𑀢𑁂 𑀪𑀺𑀓𑁆𑀔𑀯𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸. 𑀅𑀬𑀁 𑀲𑁄 𑀲𑀸𑀭𑀣𑀺 𑀏𑀢𑀻’’𑀢𑀺 𑀏𑀯𑀫𑀸𑀤𑀬𑁄 𑀯𑀺𑀘𑀺𑀢𑁆𑀢𑀧𑁆𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀲𑀩𑁆𑀩𑀦𑀸𑀫𑀺𑀓𑀧𑀤𑀸𑀦𑀁 𑀫𑀺𑀲𑁆𑀲𑀓𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀫𑀬𑀸 𑀲𑀩𑁆𑀩𑀢𑁆𑀣𑀲𑀺𑀤𑁆𑀥𑀲𑁆𑀲, 𑀲𑀸𑀲𑀦𑁂 𑀲𑀩𑁆𑀩𑀤𑀲𑁆𑀲𑀺𑀦𑁄;

𑀲𑀩𑁆𑀩𑀢𑁆𑀣 𑀲𑀸𑀲𑀦𑁂 𑀲𑀼𑀝𑁆𑀞𑀼, 𑀓𑁄𑀲𑀮𑁆𑀮𑀢𑁆𑀣𑀸𑀬 𑀲𑁄𑀢𑀼𑀦𑀁.

𑀅𑀲𑀩𑁆𑀩𑀦𑀸𑀫𑀦𑀸𑀫𑁂𑀳𑀺, 𑀲𑀩𑁆𑀩𑀦𑀸𑀫𑀧𑀤𑁂𑀳𑀺 𑀯𑁂;

𑀲𑀳 𑀲𑀩𑁆𑀩𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀲𑀩𑁆𑀩𑀦𑀸𑀫𑀸𑀦𑀺 𑀧𑀦𑁆𑀢𑀺𑀢𑁄.

𑀏𑀢𑁂𑀲𑀼 𑀓𑀢𑀬𑁄𑀕𑀸𑀦𑀁, 𑀲𑀼𑀔𑀼𑀫𑀢𑁆𑀣𑀯𑀺𑀚𑀸𑀦𑀦𑀁;

𑀅𑀓𑀺𑀘𑁆𑀙𑀧𑀝𑀺𑀯𑁂𑀥𑁂𑀦, 𑀪𑀯𑀺𑀲𑁆𑀲𑀢𑀺 𑀦 𑀲𑀁𑀲𑀬𑁄.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀩𑁆𑀩𑀦𑀸𑀫𑀢𑀁𑀲𑀤𑀺𑀲𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄 𑀦𑀸𑀫

𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁩. 𑀲𑀯𑀺𑀦𑀺𑀘𑁆𑀙𑀬𑀲𑀗𑁆𑀔𑁆𑀬𑀸𑀦𑀸𑀫𑀦𑀸𑀫𑀺𑀓𑀧𑀤𑀫𑀸𑀮𑀸

𑀇𑀢𑁄 ¶ 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑀗𑁆𑀔𑁆𑀬𑀸𑀦𑀸𑀫𑀺𑀓𑀧𑀦𑁆𑀢𑀺𑀬𑁄;

𑀪𑀽𑀥𑀸𑀢𑀼𑀚𑁂𑀳𑀺 𑀭𑀽𑀧𑁂𑀳𑀺, 𑀅𑀜𑁆𑀜𑁂𑀳𑀺 𑀘𑀼𑀧𑀬𑁄𑀚𑀺𑀢𑀼𑀁.

𑀬𑀸 𑀳𑀺 𑀲𑀸 𑀳𑁂𑀝𑁆𑀞𑀸 𑀅𑀫𑁆𑀳𑁂𑀳𑀺 𑀏𑀓 𑀤𑁆𑀯𑀺𑀢𑀺 𑀘𑀢𑀼𑀇𑀘𑁆𑀘𑁂𑀢𑁂𑀲𑀁 𑀲𑀗𑁆𑀔𑁆𑀬𑀸𑀲𑀩𑁆𑀩𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀓𑀣𑀺𑀢𑀸, 𑀢𑀁 𑀞𑀧𑁂𑀢𑁆𑀯𑀸 𑀇𑀥 𑀅𑀲𑀩𑁆𑀩𑀦𑀸𑀫𑀸𑀦𑀁 𑀧𑀜𑁆𑀘 𑀙 𑀲𑀢𑁆𑀢𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀪𑀽𑀥𑀸𑀢𑀼𑀫𑀬𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀭𑀽𑀧𑁂𑀳𑀺 𑀬𑁄𑀚𑀦𑀢𑁆𑀣𑀁 𑀯𑀼𑀘𑁆𑀘𑀢𑁂 𑁋

𑀧𑀜𑁆𑀘, 𑀧𑀜𑁆𑀘𑀳𑀺, 𑀧𑀜𑁆𑀘𑀪𑀺, 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀲𑀼. 𑀲𑀢𑁆𑀢𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀲𑁂𑀦 𑀜𑁂𑀬𑁆𑀬𑀁. ‘‘𑀧𑀜𑁆𑀘 𑀪𑀽𑀢𑀸, 𑀧𑀜𑁆𑀘 𑀅𑀪𑀺𑀪𑀯𑀺𑀢𑀸𑀭𑁄, 𑀧𑀜𑁆𑀘 𑀧𑀼𑀭𑀺𑀲𑀸, 𑀧𑀜𑁆𑀘 𑀪𑀽𑀫𑀺𑀬𑁄, 𑀧𑀜𑁆𑀘 𑀓𑀜𑁆𑀜𑀸𑀬𑁄, 𑀧𑀜𑁆𑀘 𑀪𑀽𑀢𑀸𑀦𑀺, 𑀧𑀜𑁆𑀘 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀙, 𑀙𑀳𑀺, 𑀙𑀪𑀺, 𑀙𑀦𑁆𑀦𑀁, 𑀙𑀲𑀼, 𑀙𑀲𑁆𑀲𑀼 𑀇𑀢𑀺𑀧𑀺. ‘‘𑀙𑀲𑁆𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑁆𑀲𑀼 𑀓𑁆𑀭𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 𑀳𑀺 𑀧𑀸𑀴𑀺. 𑀲𑀢𑁆𑀢, 𑀲𑀢𑁆𑀢𑀳𑀺, 𑀲𑀢𑁆𑀢𑀪𑀺, 𑀲𑀢𑁆𑀢𑀦𑁆𑀦𑀁, 𑀲𑀢𑁆𑀢𑀲𑀼. 𑀅𑀝𑁆𑀞, 𑀅𑀝𑁆𑀞𑀳𑀺, 𑀅𑀝𑁆𑀞𑀪𑀺, 𑀅𑀝𑁆𑀞𑀦𑁆𑀦𑀁, 𑀅𑀝𑁆𑀞𑀲𑀼. 𑀦𑀯, 𑀦𑀯𑀳𑀺, 𑀦𑀯𑀪𑀺, 𑀦𑀯𑀦𑁆𑀦𑀁, 𑀦𑀯𑀲𑀼. 𑀤𑀲, 𑀤𑀲𑀳𑀺, 𑀤𑀲𑀪𑀺, 𑀤𑀲𑀦𑁆𑀦𑀁, 𑀤𑀲𑀲𑀼. 𑀏𑀯𑀁 𑀏𑀓𑀸𑀤𑀲. 𑀤𑁆𑀯𑀸𑀤𑀲, 𑀩𑀸𑀭𑀲. 𑀢𑁂𑀭𑀲, 𑀢𑁂𑀤𑀲, 𑀢𑁂𑀴𑀲. 𑀘𑀢𑀼𑀤𑁆𑀤𑀲, 𑀘𑀼𑀤𑁆𑀤𑀲. 𑀧𑀜𑁆𑀘𑀤𑀲, 𑀧𑀦𑁆𑀦𑀭𑀲. 𑀲𑁄𑀴𑀲. 𑀲𑀢𑁆𑀢𑀭𑀲. 𑀅𑀝𑁆𑀞𑀸𑀭𑀲, 𑀅𑀝𑁆𑀞𑀸𑀭𑀲𑀳𑀺, 𑀅𑀝𑁆𑀞𑀸𑀭𑀲𑀪𑀺, 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀅𑀝𑁆𑀞𑀸𑀭𑀲𑀲𑀼. 𑀲𑀩𑁆𑀩𑀫𑁂𑀢𑀁 𑀩𑀳𑀼𑀯𑀘𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁.

𑀏𑀓𑀽𑀦𑀯𑀻𑀲𑀢𑀺, 𑀏𑀓𑀽𑀦𑀯𑀻𑀲𑀁 𑀇𑀘𑁆𑀘𑀸𑀤𑀺𑀧𑀺. 𑀏𑀓𑀽𑀦𑀯𑀻𑀲𑀸𑀬, 𑀏𑀓𑀽𑀦𑀯𑀻𑀲𑀸𑀬𑀁, 𑀏𑀓𑀽𑀦𑀯𑀻𑀲 𑀪𑀺𑀓𑁆𑀔𑀽 𑀢𑀺𑀝𑁆𑀞𑀦𑁆𑀢𑀺, 𑀏𑀓𑀽𑀦𑀯𑀻𑀲𑀁 𑀪𑀺𑀓𑁆𑀔𑀽 𑀧𑀲𑁆𑀲𑀢𑀺, 𑀏𑀯𑀁 ‘‘𑀓𑀜𑁆𑀜𑀸𑀬𑁄 𑀘𑀺𑀢𑁆𑀢𑀸𑀦𑀻’’𑀢𑀺 𑀘 𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀏𑀓𑀽𑀦𑀯𑀻𑀲𑀸𑀬 𑀓𑀜𑁆𑀜𑀸𑀳𑀺 𑀓𑀢𑀁, 𑀏𑀓𑀽𑀦𑀯𑀻𑀲𑀸𑀬 𑀘𑀺𑀢𑁆𑀢𑁂𑀳𑀺 𑀓𑀢𑀁, 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀓𑀜𑁆𑀜𑀸𑀦𑀁 𑀥𑀦𑀁 𑀤𑁂𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀘𑀺𑀢𑁆𑀢𑀸𑀦𑀁 𑀭𑀼𑀘𑁆𑀘𑀢𑀺, 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀳𑀺 𑀅𑀧𑁂𑀢𑀺 ¶ . 𑀏𑀯𑀁 𑀓𑀜𑁆𑀜𑀸𑀳𑀺 𑀘𑀺𑀢𑁆𑀢𑁂𑀳𑀺. 𑀏𑀓𑀽𑀦𑀯𑀻𑀲𑀸𑀬 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀓𑀁, 𑀏𑀯𑀁 𑀓𑀜𑁆𑀜𑀸𑀦𑀁 𑀘𑀺𑀢𑁆𑀢𑀸𑀦𑀁. 𑀏𑀓𑀽𑀦𑀯𑀻𑀲𑀸𑀬𑀁 𑀪𑀺𑀓𑁆𑀔𑀽𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀏𑀯𑀁 ‘‘𑀓𑀜𑁆𑀜𑀸𑀲𑀼 𑀘𑀺𑀢𑁆𑀢𑁂𑀲𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀽𑀦𑀯𑀻𑀲𑀢𑀺, 𑀏𑀓𑀽𑀦𑀯𑀻𑀲𑀢𑀺𑀁, 𑀏𑀓𑀽𑀦𑀯𑀻𑀲𑀢𑀺𑀬𑀸, 𑀏𑀓𑀽𑀦𑀯𑀻𑀲𑀢𑀺𑀬𑀁.

𑀯𑀻𑀲𑀢𑀺, 𑀯𑀻𑀲𑀢𑀺𑀁, 𑀯𑀻𑀲𑀢𑀺𑀬𑀸, 𑀯𑀻𑀲𑀢𑀺𑀬𑀁. 𑀯𑀻𑀲, 𑀯𑀻𑀲𑀁, 𑀯𑀻𑀲𑀸𑀬, 𑀯𑀻𑀲𑀸𑀬𑀁. 𑀢𑀣𑀸 𑀏𑀓𑀯𑀻𑀲 𑀤𑁆𑀯𑀸𑀯𑀻𑀲 𑀩𑀸𑀯𑀻𑀲 𑀢𑁂𑀯𑀻𑀲 𑀘𑀢𑀼𑀯𑀻𑀲 𑀇𑀘𑁆𑀘𑀸𑀤𑀻𑀲𑀼𑀧𑀺. 𑀢𑀺𑀁𑀲, 𑀢𑀺𑀁𑀲𑀁, 𑀢𑀺𑀁𑀲𑀸𑀬, 𑀢𑀺𑀁𑀲𑀸𑀬𑀁. 𑀘𑀢𑁆𑀢𑀸𑀮𑀻𑀲, 𑀘𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀮𑀻𑀲𑀸𑀬, 𑀘𑀢𑁆𑀢𑀸𑀮𑀻𑀲𑀸𑀬𑀁. 𑀘𑀢𑁆𑀢𑀸𑀭𑀻𑀲 𑀇𑀘𑁆𑀘𑀸𑀤𑀺𑀧𑀺. 𑀧𑀜𑁆𑀜𑀸𑀲, 𑀧𑀜𑁆𑀜𑀸𑀲𑀁, 𑀧𑀜𑁆𑀜𑀸𑀲𑀸𑀬, 𑀧𑀜𑁆𑀜𑀸𑀲𑀸𑀬𑀁. 𑀧𑀡𑁆𑀡𑀸𑀲, 𑀧𑀡𑁆𑀡𑀸𑀲𑀁, 𑀧𑀡𑁆𑀡𑀸𑀲𑀸𑀬, 𑀧𑀡𑁆𑀡𑀸𑀲𑀸𑀬𑀁. 𑀲𑀝𑁆𑀞𑀺, 𑀲𑀝𑁆𑀞𑀺𑀁, 𑀲𑀝𑁆𑀞𑀺𑀬𑀸, 𑀲𑀝𑁆𑀞𑀺𑀬𑀁. 𑀲𑀢𑁆𑀢𑀢𑀺, 𑀲𑀢𑁆𑀢𑀢𑀺𑀁, 𑀲𑀢𑁆𑀢𑀢𑀺𑀬𑀸, 𑀲𑀢𑁆𑀢𑀢𑀺𑀬𑀁. 𑀲𑀢𑁆𑀢𑀭𑀺 𑀇𑀘𑁆𑀘𑀸𑀤𑀺𑀧𑀺. 𑀅𑀲𑀻𑀢𑀺, 𑀅𑀲𑀻𑀢𑀺𑀁, 𑀅𑀲𑀻𑀢𑀺𑀬𑀸, 𑀅𑀲𑀻𑀢𑀺𑀬𑀁. 𑀦𑀯𑀼𑀢𑀺. 𑀦𑀯𑀼𑀢𑀺𑀁, 𑀦𑀯𑀼𑀢𑀺𑀬𑀸, 𑀦𑀯𑀼𑀢𑀺𑀬𑀁.

𑀇𑀢𑁆𑀣𑀜𑁆𑀘 𑀅𑀜𑁆𑀜𑀣𑀸𑀧𑀺 𑀲𑀗𑁆𑀔𑁆𑀬𑀸𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀓𑀽𑀦𑀯𑀻𑀲𑁂𑀳𑀺, 𑀏𑀓𑀽𑀦𑀯𑀻𑀲𑀸𑀦𑀁, 𑀏𑀓𑀽𑀦𑀯𑀻𑀲𑁂𑀲𑀼. ‘‘𑀙𑀦𑁆𑀦𑀯𑀼𑀢𑀻𑀦’’𑀦𑁆𑀢𑀺 𑀘 𑀆𑀤𑀺𑀦𑀸𑀧𑀺 𑀲𑀗𑁆𑀔𑁆𑀬𑀸𑀭𑀽𑀧𑀸𑀦𑀁 𑀓𑀢𑁆𑀣𑀘𑀺 𑀤𑀲𑁆𑀲𑀦𑀢𑁄 𑀓𑁂𑀘𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀊𑀦𑀯𑀻𑀲𑀢𑀺𑀲𑀤𑁆𑀤𑀁 𑀲𑀩𑁆𑀩𑀤𑀸𑀧𑀺 𑀏𑀓𑀯𑀘𑀦𑀦𑁆𑀢𑀫𑀺𑀢𑁆𑀣𑀺𑀮𑀺𑀗𑁆𑀕𑀫𑁂𑀯 𑀧𑀬𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 ‘‘𑀯𑀻𑀲𑀢𑀺𑀆𑀤𑀬𑁄 𑀆𑀦𑀯𑀼𑀢𑀺 𑀏𑀓𑀯𑀘𑀦𑀦𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦𑀸𑀳𑀼 𑁋

‘‘𑀲𑀤𑁆𑀤𑀸 𑀲𑀗𑁆𑀔𑁆𑀬𑁂𑀬𑁆𑀬𑀲𑀗𑁆𑀔𑀸𑀲𑀼, 𑀏𑀓𑀢𑁆𑀢𑁂 𑀯𑀻𑀲𑀢𑀸𑀤𑀬𑁄;

𑀲𑀗𑁆𑀔𑀢𑁆𑀣𑁂 𑀤𑁆𑀯𑀺𑀩𑀳𑀼𑀢𑁆𑀢𑀫𑁆𑀳𑀺, 𑀢𑀸 𑀢𑀼 𑀘𑀸𑀦𑀯𑀼𑀢𑀺𑀢𑁆𑀣𑀺𑀬𑁄’’𑀢𑀺.

𑀏𑀢𑁆𑀣 𑀤𑁆𑀯𑀺𑀯𑀘𑀦𑀁 𑀙𑀟𑁆𑀟𑁂𑀢𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑁂 𑀢𑀤𑀪𑀸𑀯𑀢𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀘 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀓𑀺𑀜𑁆𑀘𑀺 𑀧𑀸𑀴𑀺𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀬𑀼𑀚𑁆𑀚𑀢𑀺, 𑀓𑀺𑀜𑁆𑀘𑀺 𑀧𑀦 𑀧𑀢𑁆𑀯𑀸 𑀦 𑀬𑀼𑀚𑁆𑀚𑀢𑀺 𑀯𑀻𑀲𑀢𑀺𑀯𑀻𑀲𑀁𑀢𑀺𑀁𑀲𑀁𑀇𑀘𑁆𑀘𑀸𑀤𑀻𑀦𑀜𑁆𑀳𑀺 𑀲𑀗𑁆𑀔𑀢𑁆𑀣𑀸𑀦𑀁 𑀲𑀤𑁆𑀤𑀸𑀦𑀁 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀯𑀲𑁂𑀦𑀧𑀺 𑀧𑀸𑀴𑀺𑀬𑀁 𑀤𑀲𑁆𑀲𑀦𑀢𑁄 ¶ , 𑀓𑀘𑁆𑀘𑀸𑀬𑀦𑁂 𑀘 𑀬𑁄𑀯𑀘𑀦𑀲𑀫𑁆𑀪𑀽𑀢𑀭𑀽𑀧𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀬𑀣𑀸𑀧𑀸𑀯𑀘𑀦𑀜𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀢𑁂𑀲𑀫𑁂𑀓𑀯𑀘𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀯𑀺𑀬.

𑀅𑀢𑁆𑀣𑀺𑀦𑀢𑁆𑀣𑀺𑀲𑀤𑁆𑀤𑀸 𑀳𑀺 𑀦𑀺𑀧𑀸𑀢𑀢𑁆𑀢𑀸 𑀏𑀓𑀢𑁆𑀢𑁂𑀧𑀺 𑀩𑀳𑀼𑀢𑁆𑀢𑁂𑀧𑀺 𑀧𑀯𑀢𑁆𑀢𑀦𑁆𑀢𑀺 ‘‘𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀫𑁆𑀫𑀢𑁆𑀣𑀺. 𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁. 𑀦𑀢𑁆𑀣𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼. 𑀅𑀮𑀺𑀗𑁆𑀕𑀢𑁆𑀢𑁂𑀧𑀺 𑀧𑀦𑁂𑀢𑁂𑀲𑀁 𑀓𑀢𑁆𑀣𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀤𑀺𑀝𑁆𑀞𑁄. 𑀅𑀪𑀺𑀥𑀫𑁆𑀫𑁂 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀅𑀦𑀼𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺𑀦𑀸 𑀯𑁄𑀳𑀸𑀭𑀓𑀼𑀲𑀮𑁂𑀦 𑀯𑁄𑀳𑀸𑀭𑀓𑀼𑀲𑀮𑀲𑀸𑀥𑀓𑁂𑀦 ‘‘𑀅𑀢𑁆𑀣𑀺𑀬𑀸 𑀦𑀯. 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺 𑀏𑀓𑀯𑀘𑀦𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀯𑀻𑀲𑀢𑀺𑀯𑀻𑀲𑀢𑀺𑀫𑀺𑀘𑁆𑀘𑀸𑀤𑀻𑀦𑀫𑁆𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑀣𑀸𑀧𑀸𑀯𑀘𑀦𑀜𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂 𑀏𑀓𑀯𑀘𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣𑁂𑀓𑁂 ‘‘𑀳𑁂𑀢𑀼𑀬𑀸 𑀅𑀥𑀺𑀧𑀢𑀺𑀬𑀸’’𑀢𑀺 𑀘 𑀇𑀤𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀕𑀳𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑀫𑁆𑀫𑀢𑀺𑀯𑀲𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀅𑀥𑀺𑀧𑀢𑀺𑀫𑁆𑀳𑀻’’𑀢𑀺 𑀧𑀼𑀮𑁆𑀮𑀺𑀗𑁆𑀕𑀪𑀸𑀯𑁄 𑀧𑀝𑀺𑀧𑀸𑀤𑁂𑀢𑀩𑁆𑀩𑁄, ‘‘𑀳𑁂𑀢𑀼𑀧𑀘𑁆𑀘𑀬𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑁂’’ 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀣 𑀯𑀸 ‘‘𑀳𑁂𑀢𑀼𑀬𑀸 𑀅𑀥𑀺𑀧𑀢𑀺𑀬𑀸’’𑀢𑀺 𑀤𑁆𑀯𑀬𑀫𑀺𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀧𑀝𑀺𑀪𑀸𑀕𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀁 ‘‘𑀳𑁂𑀢𑀼𑀬𑁄 𑀚𑀦𑁆𑀢𑀼𑀬𑁄’’𑀢𑀺𑀆𑀤𑀻𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀭𑀽𑀧𑀧𑀝𑀺𑀪𑀸𑀕𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀭𑀽𑀧𑀸𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, ‘‘𑀅𑀢𑁆𑀣𑀺𑀬𑀸 𑀦𑀢𑁆𑀣𑀺𑀬𑀸’’𑀢𑀺 𑀇𑀤𑀁 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀅𑀮𑀺𑀗𑁆𑀕𑀪𑁂𑀤𑀢𑁆𑀢𑀸. 𑀦 𑀳𑀺 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑁄𑀕𑀥𑀸. 𑀏𑀢𑁂𑀲𑀼 𑀳𑀺 𑀅𑀢𑁆𑀣𑀺𑀲𑀤𑁆𑀤𑁄 𑀆𑀔𑁆𑀬𑀸𑀢𑀦𑀺𑀧𑀸𑀢𑀯𑀲𑁂𑀦 𑀪𑀺𑀚𑁆𑀚𑀢𑀺 ‘‘𑀅𑀢𑁆𑀣𑀺 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀢𑀺. 𑀅𑀢𑁆𑀣𑀺𑀔𑀻𑀭𑀸 𑀩𑁆𑀭𑀸𑀳𑁆𑀫𑀡𑀻’’𑀢𑀺𑀆𑀤𑀻𑀲𑀼 ¶ , 𑀦𑀢𑁆𑀣𑀺𑀲𑀤𑁆𑀤𑁄 𑀧𑀦 𑀦𑀺𑀧𑀸𑀢𑁄𑀬𑁂𑀯. 𑀇𑀘𑁆𑀘𑁂𑀯𑀁 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀦𑀺𑀧𑀸𑀢𑀸𑀦𑀜𑁆𑀘 𑀮𑀺𑀗𑁆𑀕𑀯𑀘𑀦𑀯𑀲𑁂𑀦 𑀓𑀣𑀦𑀁 𑀬𑀼𑀚𑁆𑀚𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀯𑀲𑁂𑀦 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼, 𑀲𑀩𑁆𑀩𑀸𑀲𑀼 𑀘 𑀯𑀺𑀪𑀢𑁆𑀢𑀺𑀲𑀼;

𑀯𑀘𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀬𑀁 𑀦 𑀩𑁆𑀬𑁂𑀢𑀺 𑀢𑀤𑀩𑁆𑀬𑀬’’𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸 𑁋 𑀦𑀦𑀼 𑀘 𑀪𑁄 ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀸’’𑀢𑀺 𑀯𑀘𑀦𑀢𑁄 𑀅𑀢𑁆𑀣𑀺𑀲𑀤𑁆𑀤𑁄 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀬𑀼𑀢𑁆𑀢𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺𑀲𑀤𑁆𑀤𑁄 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀬𑀼𑀢𑁆𑀢𑁄, 𑀢𑀣𑀸 𑀦𑀢𑁆𑀣𑀺𑀲𑀤𑁆𑀤𑁄 𑀅𑀢𑁆𑀣𑀺𑀲𑀤𑁆𑀤𑀲𑁆𑀲 𑀯𑀘𑀦𑀮𑁂𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀬𑀼𑀕𑀴𑀧𑀤𑀢𑁆𑀢𑀸 𑀘. 𑀇𑀤𑀁 𑀧𑀦 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺𑀯𑀘𑀦𑀁 𑀉𑀧𑀲𑀕𑁆𑀕𑀦𑀺𑀧𑀸𑀢𑀲𑀗𑁆𑀔𑀸𑀢𑁂 𑀅𑀲𑀗𑁆𑀔𑁆𑀬𑀸𑀲𑀤𑁆𑀤𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀏𑀓𑁂𑀓𑀫𑀲𑀗𑁆𑀔𑁆𑀬𑀸𑀲𑀤𑁆𑀤𑀁 𑀲𑀦𑁆𑀥𑀸𑀬. 𑀢𑀣𑀸 𑀳𑀺 ‘‘𑀅𑀲𑀗𑁆𑀔𑁆𑀬𑀸’’𑀢𑀺 𑀘 ‘‘𑀅𑀩𑁆𑀬𑀬𑀸’’𑀢𑀺 𑀘 𑀮𑀤𑁆𑀥𑀯𑁄𑀳𑀸𑀭𑁂𑀲𑀼 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀲𑀼 𑀉𑀧𑀲𑀕𑁆𑀕𑀸 𑀲𑀩𑁆𑀩𑁂𑀧𑀺 𑀲𑀩𑁆𑀩𑀯𑀺𑀪𑀢𑁆𑀢𑀺𑀯𑀘𑀦𑀓𑀸. 𑀦𑀺𑀧𑀸𑀢𑀸𑀦𑀁 𑀧𑀦 𑀏𑀓𑀘𑁆𑀘𑁂 𑀧𑀞𑀫𑀸𑀤𑀻𑀲𑀼 𑀬𑀣𑀸𑀭𑀳𑀁 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸, 𑀏𑀓𑀘𑁆𑀘𑁂 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸. 𑀢𑀢𑁆𑀣 𑀬𑁂 𑀬𑀤𑀕𑁆𑀕𑁂𑀦 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸, 𑀢𑁂 𑀢𑀤𑀕𑁆𑀕𑁂𑀦 𑀢𑀩𑁆𑀩𑀘𑀦𑀓𑀸. 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀲𑀼 𑀳𑀺 𑀧𑀘𑁆𑀘𑁂𑀓𑀁 ‘‘𑀇𑀤𑀁 𑀦𑀸𑀫 𑀯𑀘𑀦’’𑀦𑁆𑀢𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸, 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 ‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀽’’𑀢𑀺𑀆𑀤𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁. 𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑁂𑀦𑀧𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀆𑀯𑀼𑀲𑁄𑀲𑀤𑁆𑀤𑀢𑁄 𑀲𑀩𑁆𑀩𑀸𑀧𑀺 𑀯𑀺𑀪𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀅𑀣 𑀔𑁄 𑀆𑀮𑀧𑀦𑀢𑁆𑀣𑀯𑀸𑀘𑀓𑀢𑁆𑀢𑀸 𑀏𑀓𑀯𑀘𑀦𑀺𑀓𑀅𑀦𑁂𑀓𑀯𑀘𑀦𑀺𑀓𑀸 𑀧𑀞𑀫𑀸𑀯𑀺𑀪𑀢𑁆𑀢𑀺𑀬𑁄𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀅𑀬𑀫𑀲𑁆𑀫𑀸𑀓𑀁 𑀔𑀦𑁆𑀢𑀺.

𑀓𑁂𑀘𑀺 ¶ 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀦𑀺𑀧𑀸𑀢𑁂𑀳𑀺 𑀲𑀩𑁆𑀩𑀯𑀺𑀪𑀢𑁆𑀢𑀺𑀮𑁄𑀧𑀁 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬. 𑀤𑀺𑀯𑀸 𑀪𑀺𑀬𑁆𑀬𑁄 𑀦𑀫𑁄 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬 𑀘 𑀤𑀼𑀢𑀺𑀬𑀸𑀬 𑀘𑀸’’𑀢𑀺𑀆𑀤𑀺𑀯𑀘𑀦𑀢𑁄, 𑀧𑀤𑀧𑀽𑀭𑀡𑀫𑀢𑁆𑀢𑀸𑀦𑀜𑁆𑀘 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀅𑀣 𑀔𑀮𑀼 𑀯𑀢 𑀯𑀣 𑀇𑀘𑁆𑀘𑀸𑀤𑀻𑀦𑀁 𑀦𑀺𑀧𑀸𑀢𑀸𑀦𑀁 𑀯𑀘𑀦𑀢𑁄. 𑀏𑀢𑁆𑀣𑀸𑀧𑀺 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀫𑁆𑀧𑀺 𑀦𑀺𑀧𑀸𑀢𑀸𑀦𑀁 𑀲𑀫𑁆𑀪𑀯𑀢𑁄 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄, 𑀅𑀣 𑀓𑀺𑀫𑀢𑁆𑀣𑀁 ‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’𑀢𑀺 𑀲𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺? 𑀲𑀩𑁆𑀩𑀣𑀸 𑀯𑀺𑀪𑀢𑁆𑀢𑀻𑀳𑀺 𑀯𑀺𑀦𑀸 𑀅𑀢𑁆𑀣𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀢𑀺.

𑀬𑀤𑀺 𑀏𑀯𑀁 ‘‘𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀸’’𑀢𑀺 𑀯𑀘𑀦𑀢𑁄 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀮𑀼𑀢𑁆𑀢𑀸𑀬 𑀧𑀞𑀫𑀸𑀬 𑀯𑀺𑀪𑀢𑁆𑀢𑀺𑀬𑀸 𑀯𑀲𑁂𑀦 𑀧𑀞𑀫𑀸𑀯𑀺𑀪𑀢𑁆𑀢𑀺𑀓𑀸𑀬𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀏𑀯𑀫𑀓𑀢𑁆𑀯𑀸 𑀓𑀲𑁆𑀫𑀸 𑀲𑀢𑁆𑀢𑀫𑁆𑀬𑀦𑁆𑀢𑀯𑀲𑁂𑀦 ‘‘𑀅𑀢𑁆𑀣𑀺𑀬𑀸 𑀦𑀢𑁆𑀣𑀺𑀬𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸𑀢𑀺? 𑀲𑀘𑁆𑀘𑀁, 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸 𑀧𑀞𑀫𑀸𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀬𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀢𑀣𑀸𑀧𑀺 ‘‘𑀅𑀢𑁆𑀣𑀺𑀧𑀘𑁆𑀘𑀬𑁂 𑀦𑀯, 𑀦𑀢𑁆𑀣𑀺𑀧𑀘𑁆𑀘𑀬𑁂 𑀦𑀯𑀸’’𑀢𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀧𑀭𑀺𑀤𑀻𑀧𑀦𑁂 𑀧𑀞𑀫𑀸𑀬 𑀑𑀓𑀸𑀲𑁄 𑀦𑀢𑁆𑀣𑀺, 𑀲𑀢𑁆𑀢𑀫𑀺𑀬𑀸𑀬𑁂𑀯 𑀧𑀦 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀅𑀢𑁆𑀣𑀺𑀬𑀸𑀦𑀢𑁆𑀣𑀺𑀬𑀸𑀲𑀤𑁆𑀤𑀸𑀦𑀁 𑀲𑀢𑁆𑀢𑀫𑁆𑀬𑀦𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀬𑁂𑀯 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀧𑀜𑁆𑀘𑀫𑀻𑀙𑀝𑁆𑀞𑀺𑀬𑀦𑁆𑀢𑀪𑀸𑀯𑁄𑀧𑀺 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀅𑀢𑁆𑀣𑀺𑀪𑀸𑀯𑁄 𑀅𑀢𑁆𑀣𑀺𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑀺𑀬𑀸 𑀪𑀸𑀯𑁄 𑀅𑀢𑁆𑀣𑀺𑀪𑀸𑀯𑁄, 𑀦𑀢𑁆𑀣𑀺𑀬𑀸 𑀪𑀸𑀯𑁄 𑀦𑀢𑁆𑀣𑀺𑀪𑀸𑀯𑁄, 𑀅𑀢𑁆𑀣𑀺𑀬𑀸 𑀪𑀸𑀯𑁄 𑀅𑀢𑁆𑀣𑀺𑀢𑀸𑀪𑀺𑀆𑀤𑀺𑀦𑀸 𑀲𑀫𑀸𑀲𑀢𑀤𑁆𑀥𑀺𑀢𑀯𑀺𑀕𑁆𑀕𑀳𑁄 𑀅𑀯𑀲𑁆𑀲𑀫𑀺𑀘𑁆𑀙𑀺𑀢𑀩𑁆𑀩𑁄. 𑀬𑀤𑀺𑀤𑀫𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀁 ‘‘𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺.

𑀏𑀯𑀁 𑀳𑁄𑀢𑀼, 𑀓𑀲𑁆𑀫𑀸 𑀪𑁄 ‘‘𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀦𑀺𑀧𑀸𑀢𑁄𑀧𑀲𑀕𑁆𑀕𑀸 𑀅𑀮𑀺𑀗𑁆𑀕𑀪𑁂𑀤𑀸𑀢𑀺? 𑀲𑀘𑁆𑀘𑀁, 𑀇𑀤𑀁 𑀧𑀦 𑀞𑀸𑀦𑀁 𑀅𑀢𑀻𑀯 𑀲𑀼𑀔𑀼𑀫𑀁, 𑀢𑀣𑀸𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀜𑁆𑀜𑁂𑀯 ¶ 𑀦𑀺𑀲𑁆𑀲𑀸𑀬 𑀯𑀺𑀦𑀺𑀘𑁆𑀙𑀬𑀁 𑀩𑁆𑀭𑀽𑀫. 𑀬𑀣𑀸 𑀳𑀺 𑀯𑀻𑀲𑀢𑀺𑀇𑀘𑁆𑀘𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 𑀲𑀭𑀽𑀧𑀢𑁄 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑁂𑀧𑀺 𑀤𑀩𑁆𑀩𑀯𑀸𑀘𑀓𑀸𑀦𑀁 𑀮𑀢𑀸𑀫𑀢𑀺𑀭𑀢𑁆𑀢𑀺𑀇𑀢𑁆𑀣𑀻 𑀬𑀸𑀕𑀼𑀯𑀥𑀽𑀲𑀤𑁆𑀤𑀸𑀦𑀁 𑀯𑀺𑀬 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 𑀅𑀦𑀼𑀫𑀢𑁄, 𑀏𑀯𑀁 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑁂𑀧𑀺 𑀅𑀢𑁆𑀣𑀺 𑀦𑀢𑁆𑀣𑀺𑀲𑀤𑁆𑀤𑀸𑀦𑀁 𑀓𑀢𑁆𑀣𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁄 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀅𑀦𑀼𑀫𑀢𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀢𑁆𑀣𑀺𑀬𑀸 𑀦𑀯, 𑀦𑀢𑁆𑀣𑀺𑀬𑀸 𑀦𑀯𑀸’’𑀢𑀺. 𑀅𑀣 𑀯𑀸 ‘‘𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀇𑀫𑀸𑀦𑀺 𑀮𑀺𑀗𑁆𑀕𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸𑀦𑀺 𑀲𑀢𑁆𑀢𑀫𑀺𑀬𑀦𑁆𑀢𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀻𑀢𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀦 𑀏𑀢𑁆𑀣 𑀘𑁄𑀤𑁂𑀢𑀩𑁆𑀩𑀁, 𑀏𑀯𑀭𑀽𑀧𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀦 𑀲𑀦𑁆𑀢𑀺, 𑀢𑀲𑁆𑀫𑀸 𑀙𑀟𑁆𑀟𑁂𑀢𑀩𑁆𑀩𑀫𑀺𑀤𑀁 𑀯𑀘𑀦𑀦𑁆𑀢𑀺.

𑀧𑀸𑀯𑀘𑀦𑀲𑁆𑀫𑀺𑀜𑁆𑀳𑀺 𑀕𑀭𑀽𑀳𑀺 𑀅𑀦𑀺𑀤𑁆𑀤𑀺𑀝𑁆𑀞𑀸𑀦𑀺𑀧𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀦𑀺𑀧𑀸𑀢𑀧𑀤𑀸𑀦𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀸𑀧𑀺 ‘‘𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸, 𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 ‘‘𑀅𑀧𑀲𑀤𑁆𑀤𑀸 𑀇𑀫𑁂’’𑀢𑀺 𑀯𑀺𑀭𑁄𑀥𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀦 𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁂𑀦 𑀧𑀸𑀭𑀫𑀺𑀢𑀸𑀧𑀼𑀜𑁆𑀜𑁂𑀦 𑀦𑀺𑀧𑁆𑀨𑀦𑁆𑀦𑁂𑀦 𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑀁 𑀜𑁂𑀬𑁆𑀬𑀫𑀡𑁆𑀟𑀮𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀲𑁆𑀲𑀢𑁄 𑀩𑀼𑀤𑁆𑀥𑀲𑁆𑀲 𑀯𑀘𑀦𑁂 𑀅𑀜𑁆𑀜𑁂𑀲𑀁 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄 𑀅𑀯𑀲𑁆𑀲𑀁 𑀮𑀩𑁆𑀪𑀢𑀻𑀢𑀺. 𑀦𑀦𑀼 𑀘 𑀪𑁄 ‘‘𑀳𑁂𑀢𑀼𑀬𑀸, 𑀅𑀥𑀺𑀧𑀢𑀺𑀬𑀸, 𑀅𑀢𑁆𑀣𑀺𑀬𑀸, 𑀦𑀢𑁆𑀣𑀺𑀬𑀸’’𑀢𑀺 𑀘 𑀇𑀤𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀘𑀦𑀁 𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀢𑀣𑀸𑀕𑀢𑁂𑀦 𑀳𑀺 𑀢𑀸𑀯𑀢𑀺𑀁𑀲𑀪𑀧𑀦𑁂 𑀤𑁂𑀲𑀺𑀢𑀓𑀸𑀮𑁂 𑀇𑀫𑀸𑀦𑀺 𑀧𑀤𑀸𑀦𑀺 𑀦 𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀤𑀣𑀸𑀢𑀺? 𑀩𑀼𑀤𑁆𑀥𑀯𑀘𑀦𑀁𑀬𑁂𑀯 𑀦𑀸𑀫. 𑀆𑀬𑀲𑁆𑀫𑀢𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀢𑀣𑀸𑀕𑀢𑁂𑀦 𑀦𑀬𑁄 𑀤𑀺𑀦𑁆𑀦𑁄, 𑀢𑁂𑀦𑀧𑀺 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀲𑀢𑁆𑀣𑀼𑀓𑀧𑁆𑀧𑁂𑀦 𑀅𑀕𑁆𑀕𑀲𑀸𑀯𑀓𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀦𑀬𑀁 𑀮𑀪𑀺𑀢𑁆𑀯𑀸 𑀩𑁆𑀬𑀜𑁆𑀚𑀦𑀁 𑀲𑀼𑀭𑁄𑀧𑀺𑀢𑀁 𑀓𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑀅𑀭𑀺𑀬𑀸 𑀤𑀼𑀦𑁆𑀦𑀺𑀭𑀼𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀧𑀪𑁂𑀤𑀲𑁆𑀫𑀺𑀁 𑀲𑀼𑀓𑀼𑀲𑀮𑀢𑁆𑀢𑀸, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀫𑀯𑀺𑀲𑀬𑁄 𑀏𑀲 𑀅𑀭𑀺𑀬𑀸𑀦𑀁 𑀯𑁄𑀳𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 ¶ 𑀲𑀢𑀸𑀤𑀻𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸 𑀯𑀼𑀘𑁆𑀘𑀢𑁂 𑁋

𑀲𑀢𑀁, 𑀲𑀢𑀸𑀦𑀺, 𑀲𑀢𑀸. 𑀲𑀢𑀁, 𑀲𑀢𑀸𑀦𑀺, 𑀲𑀢𑁂. 𑀲𑀢𑁂𑀦, 𑀲𑀢𑁂𑀳𑀺, 𑀲𑀢𑁂𑀪𑀺. 𑀲𑀢𑀲𑁆𑀲, 𑀲𑀢𑀸𑀦𑀁. 𑀲𑀢𑀸, 𑀲𑀢𑀲𑁆𑀫𑀸, 𑀲𑀢𑀫𑁆𑀳𑀸, 𑀲𑀢𑁂𑀳𑀺, 𑀲𑀢𑁂𑀪𑀺. 𑀲𑀢𑀲𑁆𑀲, 𑀲𑀢𑀸𑀦𑀁. 𑀲𑀢𑁂, 𑀲𑀢𑀲𑁆𑀫𑀺𑀁, 𑀲𑀢𑀫𑁆𑀳𑀺, 𑀲𑀢𑁂𑀲𑀼. 𑀏𑀯𑀁 𑀲𑀳𑀲𑁆𑀲𑀁, 𑀲𑀳𑀲𑁆𑀲𑀸𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀲𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀤𑀲𑀲𑀢𑀲𑀳𑀲𑁆𑀲𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀬𑁄𑀕𑁄 ‘‘𑀲𑀢𑀁 𑀪𑀺𑀓𑁆𑀔𑀽, 𑀲𑀢𑀁 𑀇𑀢𑁆𑀣𑀺𑀬𑁄, 𑀲𑀢𑀁 𑀘𑀺𑀢𑁆𑀢𑀸𑀦𑀺. 𑀪𑀺𑀓𑁆𑀔𑀽𑀦𑀁 𑀲𑀢𑀁, 𑀇𑀢𑁆𑀣𑀻𑀦𑀁 𑀲𑀢𑀁, 𑀘𑀺𑀢𑁆𑀢𑀸𑀦𑀁 𑀲𑀢𑀁. 𑀲𑀳𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑁆𑀣𑀜𑁆𑀘 𑀅𑀜𑁆𑀜𑀣𑀸𑀧𑀺 𑀲𑀤𑁆𑀤𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀓𑁄𑀝𑀺, 𑀓𑁄𑀝𑀻, 𑀓𑁄𑀝𑀺𑀬𑁄. 𑀭𑀢𑁆𑀢𑀺𑀦𑀬𑁂𑀦 𑀜𑁂𑀬𑁆𑀬𑀁.

𑀏𑀓𑀧𑁆𑀧𑀪𑀼𑀢𑀺𑀢𑁄 𑀬𑀸𑀯, 𑀤𑀲𑀓𑀸 𑀬𑀸 𑀧𑀯𑀢𑁆𑀢𑀢𑀺;

𑀲𑀗𑁆𑀔𑁆𑀬𑀸 𑀢𑀸𑀯 𑀲𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸𑀢𑀺 𑀕𑀭𑀽 𑀯𑀤𑀼𑀁.

𑀯𑀻𑀲𑀢𑀺𑀢𑁄 𑀬𑀸𑀯 𑀲𑀢𑀸, 𑀬𑀸 𑀲𑀗𑁆𑀔𑁆𑀬𑀸 𑀢𑀸𑀯 𑀲𑀸 𑀧𑀦;

𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸𑀢𑀺 𑀘 𑀯𑀡𑁆𑀡𑀬𑀼𑀁.

𑀅𑀧𑀺𑀘 𑁋

𑀯𑀻𑀲𑀢𑁄 𑀬𑀸𑀯 𑀓𑁄𑀝𑀺𑀬𑀸, 𑀲𑀗𑁆𑀔𑁆𑀬𑀸 𑀢𑀸𑀯 𑀳𑀺 𑀲𑀸 𑀔𑀮𑀼;

𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑁂𑀬𑁆𑀬-𑀧𑁆𑀧𑀥𑀸𑀦𑀸 𑀘𑀸𑀢𑀺 𑀦𑀺𑀤𑁆𑀤𑀺𑀲𑁂.

𑀢𑀣𑀸 𑀳𑀺 ‘‘𑀅𑀲𑀻𑀢𑀺 𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀳𑀺𑀭𑀜𑁆𑀜𑀲𑁆𑀲𑀸𑀧𑀺 𑀧𑀩𑁆𑀩𑀚𑀺’’𑀦𑁆𑀢𑀺, ‘‘𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄’’𑀢𑀺 𑀘 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀩𑁆𑀩𑁂𑀲𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀭𑀽𑀧𑀸𑀦𑀁 𑀧𑀸𑀓𑀝𑀻𑀓𑀭𑀡𑁂𑀦 𑀯𑀺𑀜𑁆𑀜𑀽𑀦𑀁 𑀲𑀼𑀔𑀼𑀫𑀜𑀸𑀡𑀧𑀝𑀺𑀮𑀸𑀪𑀢𑁆𑀣𑀁 𑀲𑀸𑀝𑁆𑀞𑀓𑀣𑀁 𑀉𑀤𑀸𑀦𑀧𑀸𑀴𑀺𑀧𑁆𑀧𑀤𑁂𑀲𑀁 𑀅𑀜𑁆𑀜𑀜𑁆𑀘 𑀧𑀸𑀴𑀺𑀧𑁆𑀧𑀤𑁂𑀲𑀫𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫𑀺 𑁋

‘‘𑀬𑁂𑀲𑀁 ¶ 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺, 𑀬𑁂𑀲𑀁 𑀦𑀯𑀼𑀢𑀺 𑀧𑀺𑀬𑀸𑀦𑀺, 𑀦𑀯𑀼𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺. 𑀬𑁂𑀲𑀁 𑀅𑀲𑀻𑀢𑀺…𑀧𑁂… 𑀬𑁂𑀲𑀁 𑀲𑀢𑁆𑀢𑀢𑀺. 𑀬𑁂𑀲𑀁 𑀲𑀝𑁆𑀞𑀺. 𑀬𑁂𑀲𑀁 𑀧𑀜𑁆𑀜𑀸𑀲𑀁, 𑀬𑁂𑀲𑀁 𑀘𑀢𑁆𑀢𑀸𑀭𑀻𑀲𑀁, 𑀬𑁂𑀲𑀁 𑀢𑀺𑀁𑀲𑀁. 𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀯𑀻𑀲𑀁 𑀧𑀺𑀬𑀸𑀦𑀺, 𑀯𑀻𑀲𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺. 𑀬𑁂𑀲𑀁 𑀤𑀲. 𑀬𑁂𑀲𑀁 𑀦𑀯. 𑀬𑁂𑀲𑀁 𑀅𑀝𑁆𑀞. 𑀬𑁂𑀲𑀁 𑀲𑀢𑁆𑀢. 𑀬𑁂𑀲𑀁 𑀙. 𑀬𑁂𑀲𑀁 𑀧𑀜𑁆𑀘. 𑀬𑁂𑀲𑀁 𑀘𑀢𑁆𑀢𑀸𑀭𑀺. 𑀬𑁂𑀲𑀁 𑀢𑀻𑀡𑀺. 𑀬𑁂𑀲𑀁 𑀤𑁆𑀯𑁂. 𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀢𑁂𑀲𑀁 𑀏𑀓𑀁 𑀤𑀼𑀓𑁆𑀔’’𑀦𑁆𑀢𑀺.

𑀢𑀢𑁆𑀣 𑀲𑀢𑀁 𑀧𑀺𑀬𑀸𑀦𑀻𑀢𑀺 𑀲𑀢𑀁 𑀧𑀺𑀬𑀸𑀬𑀺𑀢𑀩𑁆𑀩𑀯𑀢𑁆𑀣𑀽𑀦𑀺. ‘‘𑀲𑀢𑀁 𑀧𑀺𑀬’’𑀦𑁆𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀏𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲, 𑀢𑀸𑀯 𑀲𑀗𑁆𑀔𑁆𑀬𑀸𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸, 𑀢𑀲𑁆𑀫𑀸 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀺, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀓𑁂𑀘𑀺 𑀧𑀦 ‘‘𑀬𑁂𑀲𑀁 𑀤𑀲 𑀧𑀺𑀬𑀸𑀦𑀁, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀲𑁆𑀫𑀸 𑀧𑀦 𑀯𑀻𑀲𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀢𑀁, 𑀢𑀸𑀯 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀸 𑀘, 𑀢𑀲𑁆𑀫𑀸 𑀢𑀢𑁆𑀣𑀸𑀧𑀺 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀬𑁂𑀲𑀁 𑀔𑁄 𑀯𑀺𑀲𑀸𑀔𑁂 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀆𑀕𑀢𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀘 𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀏𑀓𑀁 𑀢𑁂𑀲𑀁 𑀤𑀼𑀓𑁆𑀔𑀦𑁆𑀢𑀺 𑀧𑀸𑀞𑁄, 𑀦 𑀧𑀦 𑀤𑀼𑀓𑁆𑀔𑀲𑁆𑀲𑀸𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀧𑀤𑀓𑁆𑀓𑀫𑁂 𑀏𑀓𑀭𑀲𑀸𑀯 𑀪𑀕𑀯𑀢𑁄 𑀤𑁂𑀲𑀦𑀸 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑀸𑀯 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀲𑀸𑀝𑁆𑀞𑀓𑀣𑁄 𑀉𑀤𑀸𑀦𑀧𑀸𑀴𑀺𑀧𑁆𑀧𑀤𑁂𑀲𑁄.

𑀇𑀤𑀸𑀦𑀺 𑀅𑀜𑁆𑀜𑁄 𑀧𑀸𑀴𑀺𑀧𑁆𑀧𑀤𑁂𑀲𑁄 𑀅𑀝𑁆𑀞𑀓𑀣𑀸𑀧𑀸𑀞𑀧𑁆𑀧𑀤𑁂𑀲𑁄 𑀘 𑀦𑀻𑀬𑀢𑁂 𑁋

‘‘𑀲𑀢𑀁 ¶ 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸 𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀲𑀢𑀁 𑀳𑀢𑁆𑀣𑀻’’𑀢𑀺𑀆𑀤𑀻𑀦𑀺 𑀯𑀺𑀲𑁂𑀲𑀺𑀢𑀸𑀦𑀺, ‘‘𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 𑀲𑀢𑀁𑀲𑀤𑁆𑀤𑀁 𑀲𑀳𑀲𑁆𑀲𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀳𑀢𑁆𑀣𑀻’’𑀢𑀺𑀆𑀤𑀻𑀦𑀺 𑀧𑀦 𑀉𑀧𑀧𑀤𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀳𑀢𑁆𑀣𑀻 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀅𑀲𑁆𑀲𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀅𑀲𑁆𑀲𑀢𑀭𑀻𑀭𑀣𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸 𑀓𑀜𑁆𑀜𑀸 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀇𑀤𑀁 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀯𑀲𑁂𑀦𑀢𑁆𑀣𑀕𑀳𑀡𑀁. 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀯𑀲𑁂𑀦 𑀧𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ‘‘𑀳𑀢𑁆𑀣𑀻𑀦𑀁 𑀲𑀢𑀲𑀳𑀲𑁆𑀲𑀁, 𑀅𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀅𑀲𑁆𑀲𑀢𑀭𑀻𑀭𑀣𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀦𑀁 𑀓𑀜𑁆𑀜𑀸𑀦𑀁 𑀲𑀢𑀲𑀳𑀲𑁆𑀲’’𑀦𑁆𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. ‘‘𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄’’𑀢𑀺 𑀅𑀬𑀫𑀝𑁆𑀞𑀓𑀣𑀸𑀧𑀸𑀞𑁄. 𑀏𑀢𑁆𑀣 ‘‘𑀧𑀜𑁆𑀘𑀸’’𑀢𑀺 𑀲𑀤𑁆𑀤𑀁 𑀲𑀢𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 ‘‘𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀻’’𑀢𑀺 𑀏𑀢𑁆𑀣 𑀯𑀺𑀬 𑀳𑀺𑀫𑀯𑀸 𑀧𑀩𑁆𑀩𑀢𑁄 𑀬𑁄𑀚𑀦𑀸𑀦𑀁 𑀧𑀜𑁆𑀘 𑀲𑀢𑀸𑀦𑀺 𑀉𑀘𑁆𑀘𑁄𑀢𑀺 𑀲𑀗𑁆𑀔𑁆𑀬𑀸𑀧𑁆𑀧𑀥𑀸𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀧𑀜𑁆𑀘 𑀲𑀢𑀸𑀦𑀻’’𑀢𑀺 𑀘 𑀅𑀤𑁆𑀥𑀼𑀦𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀲𑀢𑀫𑀺𑀢𑀺 𑀲𑀤𑁆𑀤𑁄 ‘‘𑀲𑀢𑀁 𑀳𑁄𑀫𑀺, 𑀲𑀳𑀲𑁆𑀲𑀁 𑀳𑁄𑀫𑀻’’𑀢𑀺𑀆𑀤𑀻𑀲𑀼 𑀏𑀓𑀯𑀘𑀦𑁄. ‘‘𑀅𑀣𑁂𑀢𑁆𑀣𑁂𑀓𑀲𑀢𑀁 𑀔𑀢𑁆𑀬𑀸, 𑀅𑀦𑀼𑀬𑀦𑁆𑀢𑀸 𑀬𑀲𑀲𑁆𑀲𑀺𑀦𑁄’’𑀢𑀺𑀆𑀤𑀻𑀲𑀼 𑀩𑀳𑀼𑀯𑀘𑀦𑁄. 𑀏𑀯𑀁 𑀲𑀳𑀲𑁆𑀲𑀸𑀤𑀻𑀦𑀫𑁆𑀧𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀢𑀸 𑀮𑀩𑁆𑀪𑀢𑀺. 𑀢𑀣𑀸 𑀳𑀺 ‘‘𑀪𑀺𑀬𑁆𑀬𑁄 𑀦𑀁 𑀲𑀢𑀲𑀳𑀲𑁆𑀲𑀁, 𑀬𑀓𑁆𑀔𑀸𑀦𑀁 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺 𑀏𑀢𑁆𑀣 ‘‘𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀏𑀓𑀯𑀘𑀦𑀁. ‘‘𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀲𑀳𑀲𑁆𑀲𑀦𑁆𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀓𑀧𑁆𑀧𑁂 ¶ 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀅𑀫𑀭𑀁 𑀦𑀸𑀫 𑀦𑀕𑀭𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀢𑀲𑁆𑀫𑀸 ‘‘𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁 𑀫𑀢𑁆𑀣𑀓𑁂’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, ‘‘𑀫𑀢𑁆𑀣𑀓𑁂’’𑀢𑀺 𑀘𑁂𑀢𑁆𑀣 𑀯𑀘𑀦𑀲𑁂𑀲𑁄. ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁 𑀫𑀢𑁆𑀣𑀓𑁂’’𑀇𑀘𑁆𑀘𑁂𑀯𑀢𑁆𑀣𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀏𑀢𑁆𑀣𑀦𑁆𑀢𑀭𑁂 𑀬𑀁 𑀘𑀭𑀺𑀢𑀁, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀓𑀧𑁆𑀧𑁂’’𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. ‘‘𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑁂’’𑀢𑀺 𑀓𑀧𑁆𑀧𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 𑀘𑀸𑀬𑀁 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀘. 𑀲𑀫𑀸𑀦𑀸𑀥𑀺𑀓𑀭𑀡𑀜𑁆𑀳𑀺 𑀇𑀤𑀁 𑀓𑀧𑁆𑀧𑀲𑀤𑁆𑀤𑁂𑀦. ‘‘𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂’’𑀢𑀺 𑀅𑀘𑁆𑀙𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑀺. 𑀓𑀲𑁆𑀲 𑀧𑀦 𑀅𑀲𑀗𑁆𑀔𑀺𑀬𑁂𑀢𑀺? 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀓𑀧𑁆𑀧𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀓𑀭𑀡𑀢𑁄 ‘‘𑀓𑀧𑁆𑀧𑀸𑀦’’𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯. 𑀦 𑀳𑀺 𑀯𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀘𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 ‘‘𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀢𑀲𑀳𑀲𑁆𑀲𑁂 𑀘 𑀫𑀳𑀸𑀓𑀧𑁆𑀧𑁂’’𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀖𑀝𑀸𑀦𑁂𑀓𑀲𑀳𑀲𑁆𑀲𑀸𑀦𑀺, 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽’’𑀢𑀺 𑀧𑀸𑀴𑀺. 𑀏𑀢𑁆𑀣 𑀖𑀝𑀸𑀢𑀺 𑀖𑀝𑀸𑀦𑀁. 𑀲𑀸𑀫𑀺𑀅𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. ‘‘𑀖𑀝𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀸𑀦𑀺’’ 𑀇𑀘𑁆𑀘𑁂𑀯𑀢𑁆𑀣𑁄. 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽𑀢𑀺 𑀅𑀦𑁂𑀓𑀸𑀦𑀺 𑀘 𑀓𑀼𑀫𑁆𑀪𑀻𑀦𑀁 𑀲𑀢𑀸𑀦𑀺. 𑀏𑀢𑁆𑀣 𑀦𑀺𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁 ¶ , 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑁄, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑁄’’𑀢𑀺

𑀧𑀸𑀴𑀺. 𑀏𑀢𑁆𑀣 𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀦𑁆𑀢𑀺 𑀤𑀲𑀲𑀳𑀲𑁆𑀲𑀸𑀦𑀁 𑀯𑀻𑀲𑀲𑀳𑀲𑁆𑀲𑀸𑀦𑀜𑁆𑀘. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀏𑀓𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑀻𑀲𑀫𑀢𑁆𑀢𑀓𑀣𑀦𑀁, 𑀢𑁂𑀦 ‘‘𑀏𑀓𑀲𑁆𑀲 𑀘𑁂𑀯 𑀤𑁆𑀯𑀺𑀦𑁆𑀦𑀜𑁆𑀘 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁…𑀧𑁂… 𑀤𑀲𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸’’𑀢𑀺

𑀧𑀸𑀴𑀺. 𑀏𑀢𑁆𑀣 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀇𑀤𑀁 𑀮𑀺𑀗𑁆𑀕𑀪𑁂𑀤𑀯𑀲𑁂𑀦 ‘‘𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀁. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬 𑀯𑀸𑀘𑀓𑁄𑀧𑀺 𑀲𑀤𑁆𑀤𑁄 𑀦𑀧𑀼𑀁𑀲𑀓𑁄𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀘 ‘‘𑀙𑀴𑀪𑀺𑀜𑁆𑀜𑀸’’𑀢𑀺 𑀘 ‘‘𑀫𑀳𑀺𑀤𑁆𑀥𑀺𑀓𑀸’’𑀢𑀺 𑀘 𑀏𑀢𑀁 𑀧𑀤𑀢𑁆𑀢𑀬𑀁 𑀲𑀫𑀸𑀦𑀸𑀥𑀺𑀓𑀭𑀡𑀁. 𑀅𑀣 𑀯𑀸 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸𑀢𑀺 𑀙𑀴𑀪𑀺𑀜𑁆𑀜𑀸𑀦𑀁 𑀫𑀳𑀤𑁆𑀥𑀺𑀓𑀸𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀅𑀬𑀁 𑀲𑀗𑁆𑀔𑁆𑀬𑀸𑀯𑀘𑀦𑁄 𑀪𑀯𑀢𑀺. ‘‘𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄. ‘‘𑀢𑀸 𑀘 𑀲𑀢𑁆𑀢 𑀲𑀢𑀸 𑀪𑀭𑀺𑀬𑀸, 𑀤𑀸𑀲𑁆𑀬𑁄 𑀲𑀢𑁆𑀢 𑀲𑀢𑀸𑀦𑀺 𑀘𑀸’’𑀢𑀺 𑀧𑀸𑀴𑀺. 𑀏𑀢𑁆𑀣 𑀲𑀢𑀸𑀢𑀺 ‘‘𑀲𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦. ‘‘𑀲𑀢𑀸’’𑀢𑀺 𑀳𑀺 ‘‘𑀧𑀜𑁆𑀘 𑀘𑀺𑀢𑁆𑀢𑀸 𑀯𑀺𑀧𑀸𑀓𑀸’’𑀢𑀺𑀆𑀤𑀻𑀦𑀺 𑀯𑀺𑀬 𑀦𑀧𑀼𑀁𑀲𑀓𑀭𑀽𑀧𑀁. 𑀇𑀢𑁆𑀣𑀺𑀮𑀺𑀗𑁆𑀕𑀪𑀽𑀢𑀸 𑀳𑀺 𑀲𑀢𑀲𑀤𑁆𑀤𑁄 𑀦𑀢𑁆𑀣𑀺, 𑀢𑀣𑀸 𑀧𑀼𑀮𑁆𑀮𑀺𑀗𑁆𑀕𑀪𑀽𑀢𑁄. 𑀬𑀤𑀺 𑀘 𑀤𑁆𑀯𑀺𑀮𑀺𑀗𑁆𑀕𑁄 𑀲𑀢𑀲𑀤𑁆𑀤𑁄 𑀲𑀺𑀬𑀸 ¶ , 𑀏𑀯𑀜𑁆𑀘 𑀲𑀢𑀺 ‘‘𑀧𑀼𑀭𑀺𑀲𑁄, 𑀓𑀜𑁆𑀜𑀸’’𑀢𑀺 𑀘 𑀑𑀓𑀸𑀭𑀦𑁆𑀢𑀧𑀼𑀮𑁆𑀮𑀺𑀗𑁆𑀕𑀆𑀓𑀸𑀭𑀦𑁆𑀢𑀺𑀢𑁆𑀣𑀺𑀭𑀽𑀧𑁂𑀳𑀺𑀧𑀺𑀪𑀯𑀺𑀢𑀩𑁆𑀩𑀁. 𑀭𑀽𑀧𑀤𑁆𑀯𑀬𑀫𑁆𑀧𑀺 𑀲𑀢𑀲𑀤𑁆𑀤𑀲𑁆𑀲 𑀦𑀢𑁆𑀣𑀺, 𑀢𑁂𑀦 𑀜𑀸𑀬𑀢𑀺 ‘‘𑀲𑀢𑀲𑀤𑁆𑀤𑁄 𑀏𑀓𑀦𑁆𑀢𑀦𑀧𑀼𑀁𑀲𑀓𑁄’’𑀢𑀺.

𑀦𑀦𑀼 𑀘 𑀪𑁄 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸’’𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻𑀢𑀺? 𑀦, 𑀦𑀧𑀼𑀁𑀲𑀓𑁄𑀬𑁂𑀯𑀸𑀢𑀺. 𑀦𑀦𑀼 𑀘 𑀪𑁄 𑀤𑁂𑀯𑀢𑀸𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄𑀢𑀺? 𑀲𑀘𑁆𑀘𑀁 𑀲𑀫𑀸𑀦𑀸𑀥𑀺𑀓𑀭𑀡𑁄, 𑀢𑀣𑀸𑀧𑀺 𑀦𑀧𑀼𑀁𑀲𑀓𑁄𑀬𑁂𑀯. 𑀈𑀤𑀺𑀲𑁂𑀲𑀼 𑀳𑀺 𑀲𑀗𑁆𑀔𑁆𑀬𑀸𑀯𑀺𑀲𑀬𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀅𑀧𑁆𑀧𑀫𑀸𑀡𑁄. 𑀢𑀣𑀸 𑀳𑀺 ‘‘𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀺 𑀇𑀫𑀲𑁆𑀫𑀺𑀁 𑀇𑀲𑀺𑀕𑀺𑀮𑀺𑀲𑁆𑀫𑀺𑀁 𑀧𑀩𑁆𑀩𑀢𑁂 𑀘𑀺𑀭𑀯𑀸𑀲𑀺𑀦𑁄 𑀅𑀳𑁂𑀲𑀼’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀧𑀼𑀮𑁆𑀮𑀺𑀗𑁆𑀕𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀢𑁆𑀢𑀲𑀢𑀸𑀦𑀻’’𑀢𑀺 𑀦𑀧𑀼𑀁𑀲𑀓𑀪𑀸𑀯𑁄𑀬𑁂𑀯𑀸𑀢𑀺 𑀅𑀯𑀕𑀦𑁆𑀢𑀩𑁆𑀩𑁄. ‘‘𑀲𑀢𑁆𑀢 𑀳𑀢𑁆𑀣𑀺𑀲𑀢𑁂 𑀤𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀢𑀲𑀤𑁆𑀤𑁄 𑀦𑀧𑀼𑀁𑀲𑀓𑁄𑀬𑁂𑀯. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀻’’𑀢𑀺 𑀧𑀸𑀴𑀺. 𑀏𑀢𑁆𑀣 ‘‘𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺 𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀻’’𑀢𑀺 𑀯𑀸 𑀲𑀗𑁆𑀔𑁆𑀬𑁂𑀬𑁆𑀬𑀲𑀗𑁆𑀔𑁆𑀬𑀸𑀧𑀥𑀸𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑀧𑀸𑀴𑀺. 𑀏𑀢𑁆𑀣 ‘‘𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀻’’𑀢𑀺 𑀓𑀸𑀮𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁. 𑀢𑀣𑀸 ‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭’𑀫𑀚𑁆𑀛 𑀲𑁄 𑀯𑀲𑀻’’𑀢𑀺 𑀧𑀸𑀴𑀺𑀬𑀫𑁆𑀧𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀇𑀢𑁄 ¶ 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄’’𑀢𑀺 𑀧𑀸𑀴𑀺, ‘‘𑀏𑀓𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂’’𑀢𑀺 𑀧𑀸𑀴𑀺 𑀘. 𑀏𑀢𑁆𑀣 𑀲𑀢𑀲𑀳𑀲𑁆𑀲𑀫𑁆𑀳𑀺 𑀓𑀧𑁆𑀧𑁂𑀢𑀺 𑀲𑀢𑀲𑀳𑀲𑁆𑀲𑀸𑀦𑀁 𑀓𑀧𑁆𑀧𑀸𑀦𑀁 𑀫𑀢𑁆𑀣𑀓𑁂. 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂𑀢𑀺 𑀏𑀓𑀦𑀯𑀼𑀢𑀺𑀬𑀸 𑀓𑀧𑁆𑀧𑀸𑀦𑀁 𑀫𑀢𑁆𑀣𑀓𑁂𑀢𑀺 𑀪𑀼𑀫𑁆𑀫𑀯𑀘𑀦𑀲𑁆𑀲 𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀪𑀼𑀫𑁆𑀫𑀯𑀘𑀦𑀲𑁆𑀲 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂’’𑀢𑀺 𑀲𑀸𑀫𑀺𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑀺𑀢𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀬𑀤𑀺 𑀢𑀢𑁆𑀣 𑀲𑀳𑀲𑁆𑀲𑀸𑀦𑀺, 𑀲𑀢𑀸𑀦𑀺 𑀦𑀳𑀼𑀢𑀸𑀦𑀺 𑀘;

𑀦𑁂𑀯𑀫𑁆𑀳𑀸𑀓𑀁 𑀪𑀬𑀁 𑀓𑁄𑀘𑀺, 𑀯𑀦𑁂 𑀯𑀸𑀴𑁂𑀲𑀼 𑀯𑀺𑀚𑁆𑀚𑀢𑀻’’𑀢𑀺

𑀧𑀸𑀴𑀺. 𑀅𑀬𑀫𑁂𑀢𑀲𑁆𑀲𑀸 𑀅𑀢𑁆𑀣𑁄 𑁋 𑀢𑀢𑁆𑀣 𑀯𑀦𑁂 𑀯𑀸𑀴𑀸𑀦𑀁 𑀲𑀳𑀲𑁆𑀲𑀸𑀦𑀺 𑀘 𑀲𑀢𑀸𑀦𑀺 𑀘 𑀦𑀳𑀼𑀢𑀸𑀦𑀺 𑀘 𑀬𑀤𑀺 𑀯𑀺𑀚𑁆𑀚𑀦𑁆𑀢𑀺. 𑀅𑀣 𑀯𑀸 𑀲𑀳𑀲𑁆𑀲𑀸𑀦𑀺 𑀲𑀢𑀸𑀦𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀯𑀸𑀴𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺 𑀘 𑀦𑀳𑀼𑀢𑀸𑀦𑀺 𑀘 𑀬𑀤𑀺 𑀯𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀯𑀺𑀚𑁆𑀚𑀦𑁆𑀢𑁂𑀲𑀼𑀧𑀺 𑀯𑀸𑀴𑁂𑀲𑀼 𑀓𑁄𑀘𑀻𑀢𑀺 𑀓𑁆𑀯𑀘𑀺. 𑀓𑁄𑀘𑀺𑀲𑀤𑁆𑀤𑁄 𑀳𑀺 ‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺 𑀏𑀢𑁆𑀣 𑀓𑁄𑀲𑀤𑁆𑀤𑁄 𑀯𑀺𑀬 𑀓𑁆𑀯𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀢𑀺, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀢𑁂𑀦 ‘‘𑀓𑁄𑀘𑀺 𑀓𑁆𑀯𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀸𑀴𑁂 𑀏𑀓𑀲𑁆𑀲𑀧𑀺 𑀯𑀸𑀴𑀫𑀺𑀕𑀲𑁆𑀲 𑀓𑀸𑀭𑀡𑀸 𑀦𑁂𑀯𑀫𑁆𑀳𑀸𑀓𑀁 𑀪𑀬𑀁 𑀯𑀺𑀚𑁆𑀚𑀢𑀻’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀓𑁄𑀘𑀻𑀢𑀺 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀏𑀢𑁆𑀣 𑀧𑀦 ‘‘𑀯𑀸𑀴𑁂𑀲𑀽’’𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀯𑀸𑀴𑀸𑀦𑀁 𑀓𑀸𑀭𑀡𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀫𑁆𑀳𑀸𑀓𑀁 𑀪𑀬𑀁 𑀦 𑀯𑀺𑀚𑁆𑀚𑀢𑀻𑀢𑀺. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀲𑀩𑁆𑀩𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲𑀧𑀭𑀺𑀫𑀡𑁆𑀟𑀮𑀁;

𑀤𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘𑀸’’𑀢𑀺

𑀅𑀝𑁆𑀞𑀓𑀣𑀸𑀧𑀸𑀞𑁄 ¶ . 𑀏𑀢𑁆𑀣 𑀬𑀲𑁆𑀫𑀸 𑀲𑀤𑁆𑀤𑀢𑁄 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦𑀸𑀦𑀁 𑀧𑀤𑀸𑀦𑀁 𑀅𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑀺𑀗𑁆𑀕𑀯𑀘𑀦𑀸𑀦𑀁 𑀯𑀸 𑀅𑀢𑁆𑀣𑀢𑁄 𑀧𑀦 𑀲𑀫𑀸𑀦𑀸𑀦𑀁 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀏𑀓𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀇𑀢𑀭𑁂𑀲𑀁 𑀲𑀫𑀻𑀧𑁂 𑀞𑀺𑀢𑀸𑀦𑀫𑁆𑀧𑀺 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩’’𑀦𑁆𑀢𑀺𑀤𑀁 ‘‘𑀧𑀭𑀺𑀫𑀡𑁆𑀟𑀮’’𑀦𑁆𑀢𑀺𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀙𑀢𑁆𑀢𑀺𑀁𑀲𑀸’’𑀢𑀺 𑀇𑀤𑀁 𑀧𑀦 ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸’’𑀢𑀺

𑀅𑀝𑁆𑀞𑀓𑀣𑀸𑀧𑀸𑀞𑁄. 𑀏𑀢𑁆𑀣 ‘‘𑀤𑀼𑀯𑁂’’𑀢𑀺 𑀯𑀺𑀲𑁂𑀲𑀦𑀁, ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀢𑀣𑀸 ‘‘𑀘𑀢𑁆𑀢𑀸𑀭𑀻’’𑀢𑀺 𑀯𑀺𑀲𑁂𑀲𑀦𑀁, ‘‘𑀦𑀳𑀼𑀢𑀸𑀦𑀻’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑀢𑀲𑀳𑀲𑁆𑀲𑀸𑀦𑀺 𑀦𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑀸𑀦𑀺 ‘‘𑀤𑀼𑀯𑁂 𑀘𑀢𑁆𑀢𑀸𑀭𑀻’’𑀢𑀺 𑀇𑀫𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑀺𑀲𑀢𑀲𑀳𑀲𑁆𑀲𑀁 𑀘𑀢𑀼𑀦𑀳𑀼𑀢’’𑀦𑁆𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀤𑀼𑀯𑁂’’𑀇𑀘𑁆𑀘𑀸𑀤𑀻𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 ‘‘𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀻𑀳𑀺 𑀲𑀗𑁆𑀔𑁆𑀬𑀸𑀲𑀤𑁆𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀬𑀣𑀸 ‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸. 𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀮𑀩𑁆𑀪𑀢𑀺 𑀤𑀩𑁆𑀩𑀯𑀸𑀘𑀓𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑀸𑀦𑀁, 𑀦 𑀢𑀣𑀸 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀻𑀲𑀼 𑀅𑀤𑀩𑁆𑀩𑀯𑀸𑀘𑀓𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀧𑀤𑀸𑀦𑀁, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸 𑀬𑀼𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀬𑀤𑀺 𑀏𑀯𑀁 ‘‘𑀓𑀼𑀲𑀮𑀸, 𑀭𑀽𑀧𑀁, 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀻𑀦𑀁 𑀯𑀺𑀬 𑀇𑀫𑁂𑀲𑀫𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀭𑀳𑀺𑀢𑀸 𑀲𑀺𑀬𑀸𑀢𑀺? 𑀦, 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀬𑀚𑁆𑀚𑁂𑀯𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀮𑀤𑁆𑀥𑀩𑁆𑀩𑁄𑀢𑀺? 𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀏𑀓𑀦𑁆𑀢𑁂𑀦 𑀳𑀺 ¶ 𑀕𑀼𑀡𑀕𑀼𑀡𑀻𑀦𑀁𑀬𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄, 𑀦 𑀇𑀢𑀭𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑁂𑀧𑀺.

𑀢𑀢𑁆𑀣 ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀫𑀸𑀡𑀯𑀘𑀦𑀁. ‘‘𑀩𑀳𑀮𑀢𑁆𑀢𑁂𑀦𑀸’’𑀢𑀺 𑀯𑀺𑀲𑁂𑀲𑀦𑁂 𑀢𑀢𑀺𑀬𑀸. 𑀉𑀪𑀬𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀬𑀁 𑀯𑀲𑀼𑀦𑁆𑀥𑀭𑀸 𑀩𑀳𑀮𑀢𑁆𑀢𑁂𑀦 𑀬𑁄𑀚𑀦𑀸𑀦𑀁 𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘 𑀏𑀢𑁆𑀢𑀓𑀁 𑀲𑀗𑁆𑀔𑀸𑀢𑀸’’𑀢𑀺. ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀤𑀲𑁆𑀲 𑀘 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑁂𑀳𑀺 𑀯𑀸 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸. 𑀏𑀢𑁆𑀢𑀓𑀦𑁆𑀢𑀺 𑀳𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀬𑀁 𑀲𑀤𑁆𑀤𑀲𑀢𑁆𑀣𑁂 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 ‘‘𑀏𑀢𑁆𑀢𑀓𑁂𑀦 𑀧𑀫𑀸𑀡𑁂𑀦’’𑀇𑀘𑁆𑀘𑁂𑀯𑀢𑁆𑀣𑁄. 𑀅𑀧𑀺𑀘 ‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦 𑀳𑀼𑀢𑀸𑀦𑀺 𑀘𑀸’’𑀢𑀺 𑀇𑀫𑁂𑀲𑀫𑁆𑀧𑀺 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀪𑀺𑀓𑁆𑀔𑀽𑀦𑀁 𑀲𑀢’’𑀦𑁆𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑀲𑁆𑀲 𑀯𑀺𑀬 𑀲𑀗𑁆𑀔𑁆𑀬𑀸𑀯𑀘𑀦𑀫𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 ‘‘𑀏𑀢𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀗𑁆𑀔𑀸𑀢𑀸’’𑀢𑀺 𑀧𑀦 ‘‘𑀅𑀬’’𑀦𑁆𑀢𑀺 𑀘 𑀇𑀫𑁂𑀲𑀁 ‘‘𑀯𑀲𑀼𑀦𑁆𑀥𑀭𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀮𑀩𑁆𑀪𑀢𑀺. 𑀲𑀩𑁆𑀩𑁄𑀧𑀸𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀤𑀲𑁂𑀢𑁆𑀣 𑀭𑀸𑀚𑀺𑀬𑁄 𑀲𑁂𑀢𑀸, 𑀤𑀲𑁆𑀲𑀦𑀻𑀬𑀸 𑀫𑀦𑁄𑀭𑀫𑀸;

𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲, 𑀳𑀮𑀺𑀤𑁆𑀤𑀸 𑀢𑀸 𑀘𑀢𑀼𑀤𑁆𑀤𑀲𑀸’’𑀢𑀺

𑀧𑀸𑀴𑀺. 𑀏𑀢𑁆𑀣 𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲𑀸𑀢𑀺 𑀙 𑀘 𑀧𑀦𑁆𑀦𑀭𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀧𑀺𑀗𑁆𑀕𑀮𑀸 𑀭𑀸𑀚𑀺𑀬𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀣𑀸 𑁋

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, ‘𑀏𑀓𑀦𑀸𑀫𑀸’𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸’’𑀢𑀺

𑀧𑀸𑀴𑀺 ¶ . 𑀏𑀢𑁆𑀣 𑀧𑀦 ‘‘𑀏𑀓𑀦𑀯𑀼𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀲𑀻𑀢𑀺 𑀤𑀲 𑀏𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑀺𑀢𑁆𑀭𑀲𑀤𑁆𑀤𑀭𑀘𑀦𑀜𑁆𑀳𑀺 𑀧𑀸𑀯𑀘𑀦𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀢𑀺𑀁𑀲𑀧𑀼𑀭𑀺𑀲𑀦𑀸𑀯𑀼𑀢𑁆𑀬𑁄, 𑀲𑀩𑁆𑀩𑁂𑀯𑁂𑀓𑁂𑀓𑀦𑀺𑀘𑁆𑀘𑀺𑀢𑀸;

𑀬𑁂𑀲𑀁 𑀲𑀫𑀁 𑀦 𑀧𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀫𑀳𑀺’𑀫𑀁 𑀘𑀭’’𑀦𑁆𑀢𑀺

𑀧𑀸𑀴𑀺. 𑀏𑀢𑁆𑀣 ‘‘𑀧𑀼𑀭𑀺𑀲𑀸𑀦𑀁 𑀢𑀺𑀁𑀲𑀲𑀳𑀲𑁆𑀲𑀸𑀦𑀺 𑀦𑀯𑀼𑀢𑀺 𑀘 𑀲𑀢𑀸𑀦𑀺 𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀢𑀺𑀁𑀲𑀲𑀤𑁆𑀤𑀢𑁄 𑀲𑀳𑀲𑁆𑀲𑀲𑀤𑁆𑀤𑀲𑁆𑀲 𑀦𑀯𑀼𑀢𑀺𑀲𑀤𑁆𑀤𑀢𑁄 𑀘 𑀲𑀢𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀕𑀳𑀡𑁂 𑀲𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀏𑀤𑀺𑀲𑀻 𑀲𑀤𑁆𑀤𑀭𑀘𑀦𑀸 𑀓𑀸𑀢𑀩𑁆𑀩𑀸 𑀲𑀺𑀬𑀸, 𑀓𑀢𑀸𑀬 𑀘 𑀏𑀤𑀺𑀲𑀸𑀬 𑀲𑀤𑁆𑀤𑀭𑀘𑀦𑀸𑀬 𑀅𑀢𑁆𑀣𑀸𑀯𑀕𑀫𑁄 𑀯𑀺𑀦𑀸 𑀉𑀧𑀤𑁂𑀲𑁂𑀦 𑀲𑀼𑀡𑀦𑁆𑀢𑀸𑀦𑀁 𑀦 𑀲𑀺𑀬𑀸, 𑀢𑀲𑁆𑀫𑀸 𑀦𑁂𑀯𑀁 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑀁 𑁋 ‘‘𑀢𑀺𑀁𑀲 𑀦𑀸𑀯𑀼𑀢𑁆𑀬𑁄’’𑀢𑀺 𑀇𑀤𑀁 𑀮𑁄𑀓𑀲𑀗𑁆𑀓𑁂𑀢𑀭𑀽𑀴𑁆𑀳𑀁 𑀯𑀘𑀦𑀁, 𑀲𑀗𑁆𑀓𑁂𑀢𑀭𑀽𑀴𑁆𑀳𑀲𑁆𑀲 𑀧𑀦 𑀯𑀘𑀦𑀲𑁆𑀲𑀢𑁆𑀣𑁄 𑀬𑀲𑁆𑀫𑀸 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀳𑀺 𑀲𑀼𑀢𑁆𑀯𑀸 𑀜𑀸𑀬𑀢𑁂, 𑀦 𑀉𑀧𑀤𑁂𑀲𑀢𑁄, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀭𑀜𑁆𑀜𑀸 𑀯𑀼𑀢𑁆𑀢𑀓𑀸𑀮𑁂𑀧𑀺 𑀲𑀢𑁆𑀣𑀸𑀭𑀸 𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀓𑀸𑀮𑁂𑀧𑀺 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀯𑀺𑀦𑀸𑀧𑀺 𑀉𑀧𑀤𑁂𑀲𑁂𑀦 𑀯𑀘𑀦𑀢𑁆𑀣𑀁 𑀚𑀸𑀦𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀺𑀁𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀦𑀯𑀼𑀢𑀺 𑀘 𑀲𑀢𑀸𑀦𑀺 𑀢𑀼;

𑀢𑀺𑀁𑀲 𑀦𑀸𑀯𑀼𑀢𑀺𑀬𑁄 𑀦𑀸𑀫, 𑀯𑀼𑀢𑁆𑀢𑀸 𑀉𑀫𑀗𑁆𑀕𑀚𑀸𑀢𑀓𑁂.

𑀬𑀲𑁆𑀫𑀸 𑀧𑀸𑀯𑀘𑀦𑁂 𑀲𑀦𑁆𑀢𑀺, 𑀦𑀬𑀸 𑀘𑁂𑀯 𑀅𑀘𑀺𑀦𑁆𑀢𑀺𑀬𑀸;

𑀯𑁄𑀳𑀸𑀭𑀸 𑀘 𑀲𑀼𑀕𑀼𑀴𑁆𑀳𑀢𑁆𑀣𑀸, 𑀤𑀬𑀸𑀧𑀦𑁆𑀦𑁂𑀦 𑀤𑁂𑀲𑀺𑀢𑀸.

𑀢𑀲𑁆𑀫𑀸 𑀲𑀸𑀝𑁆𑀞𑀓𑀣𑁂 𑀥𑀻𑀭𑁄, 𑀕𑀫𑁆𑀪𑀻𑀭𑁂 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑀕𑀭𑀽𑀧𑀤𑁂𑀲𑀳𑀻𑀦𑁄 𑀳𑀺, 𑀅𑀢𑁆𑀣𑀲𑀸𑀭𑀁 𑀦 𑀯𑀺𑀦𑁆𑀤𑀢𑀺;

𑀅𑀢𑁆𑀣𑀲𑀸𑀭𑀯𑀺𑀳𑀻𑀦𑁄 𑀲𑁄, 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺.

𑀕𑀭𑀽𑀧𑀤𑁂𑀲𑀮𑀸𑀪𑀻 ¶ 𑀘, 𑀅𑀢𑁆𑀣𑀲𑀸𑀭𑀲𑀫𑀸𑀬𑀼𑀢𑁄;

𑀲𑀤𑁆𑀥𑀫𑁆𑀫𑀁 𑀧𑀭𑀺𑀧𑀸𑀮𑁂𑀦𑁆𑀢𑁄, 𑀲𑀤𑁆𑀥𑀫𑁆𑀫𑀲𑁆𑀫𑀸 𑀦 𑀳𑀸𑀬𑀢𑀺.

𑀲𑀤𑁆𑀥𑀫𑁆𑀫𑀢𑁆𑀣𑀸𑀬 𑀫𑁂 𑀢𑀲𑁆𑀫𑀸, 𑀲𑀗𑁆𑀔𑁆𑀬𑀸𑀫𑀸𑀮𑀸𑀧𑀺 𑀪𑀸𑀲𑀺𑀢𑀸;

𑀲𑀧𑁆𑀧𑀬𑁄𑀕𑀸 𑀬𑀣𑀸𑀬𑁄𑀕𑀁, 𑀲𑀳𑁂𑀯𑀢𑁆𑀣𑀯𑀺𑀦𑀺𑀘𑁆𑀙𑀬𑀸.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀯𑀺𑀦𑀺𑀘𑁆𑀙𑀬𑁄 𑀲𑀗𑁆𑀔𑁆𑀬𑀸𑀦𑀸𑀫𑀸𑀦𑀁 𑀦𑀸𑀫𑀺𑀓𑀧𑀤𑀫𑀸𑀮𑀸𑀯𑀺𑀪𑀸𑀕𑁄

𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁪. 𑀅𑀢𑁆𑀣𑀢𑁆𑀢𑀺𑀓𑀯𑀺𑀪𑀸𑀕

𑀪𑀽𑀥𑀸𑀢𑀼 𑀢𑀸𑀬 𑀦𑀺𑀧𑁆𑀨𑀦𑁆𑀦-𑀭𑀽𑀧𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁;

𑀓𑀢𑁆𑀯𑀸 𑀧𑀥𑀸𑀦𑀫𑀫𑁆𑀳𑁂𑀳𑀺, 𑀲𑀩𑁆𑀩𑀫𑁂𑀢𑀁 𑀧𑀧𑀜𑁆𑀘𑀺𑀢𑀁.

𑀪𑀯𑀢𑀺𑀲𑁆𑀲 𑀯𑀲𑀸 𑀤𑀸𑀦𑀺, 𑀯𑀓𑁆𑀔𑀸𑀫𑀢𑁆𑀣𑀢𑁆𑀢𑀺𑀓𑀁 𑀯𑀭𑀁;

𑀅𑀢𑁆𑀣𑀼𑀤𑁆𑀥𑀸𑀭𑁄 𑀢𑀼𑀫𑀦𑁆𑀢𑀜𑁆𑀘, 𑀢𑁆𑀯𑀸𑀤𑀺𑀬𑀦𑁆𑀢𑀁 𑀢𑀺𑀓𑀁 𑀇𑀥.

𑀢𑀲𑁆𑀫𑀸 𑀢𑀸𑀯 𑀪𑀽𑀥𑀸𑀢𑀼𑀢𑁄 𑀧𑀯𑀢𑁆𑀢𑀲𑁆𑀲 𑀪𑀽𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂 𑁋

𑀔𑀦𑁆𑀥𑀲𑀢𑁆𑀢𑀸𑀫𑀦𑀼𑀲𑁆𑀲𑁂𑀲𑀼, 𑀯𑀺𑀚𑁆𑀚𑀫𑀸𑀦𑁂 𑀘 𑀥𑀸𑀢𑀼𑀬𑀁;

𑀔𑀻𑀡𑀸𑀲𑀯𑁂 𑀭𑀼𑀓𑁆𑀔𑀸𑀤𑀺𑀫𑁆𑀳𑀺, 𑀪𑀽𑀢𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀉𑀧𑁆𑀧𑀸𑀤𑁂 𑀘𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀪𑀽𑀢𑀲𑀤𑁆𑀤𑁄 𑀯𑀺𑀪𑀸𑀯𑀺𑀦𑀸;

𑀯𑀺𑀧𑀼𑀮𑁂 𑀲𑁄𑀧𑀲𑀕𑁆𑀕𑁄𑀬𑀁, 𑀳𑀻𑀴𑀦𑁂 𑀯𑀺𑀥𑀫𑁂𑀧𑀺 𑀘;

𑀧𑀭𑀸𑀚𑀬𑁂 𑀯𑁂𑀤𑀺𑀬𑀦𑁂, 𑀦𑀸𑀫𑁂 𑀧𑀸𑀓𑀝𑀢𑀸𑀬 𑀘.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 𑀪𑀽𑀢𑀲𑀤𑁆𑀤𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀫𑀦𑀼𑀲𑁆𑀲𑀥𑀸𑀢𑀼𑀯𑀺𑀚𑁆𑀚𑀫𑀸𑀦𑀔𑀻𑀡𑀸𑀲𑀯𑀲𑀢𑁆𑀢𑀭𑀼𑀓𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀪𑀽𑀢𑀫𑀺𑀤𑀦𑁆𑀢𑀺 𑀪𑀺𑀓𑁆𑀔𑀯𑁂 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 𑀳𑀺 𑀅𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀬𑀸𑀦𑀻𑀥 ¶ 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻’’𑀢𑀺 𑀏𑀢𑁆𑀣 𑀅𑀫𑀦𑀼𑀲𑁆𑀲𑁂. ‘‘𑀘𑀢𑁆𑀢𑀸𑀭𑁄 𑀔𑁄 𑀪𑀺𑀓𑁆𑀔𑀼 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀏𑀢𑁆𑀣 𑀥𑀸𑀢𑀽𑀲𑀼. ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂. ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑁂. ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑁂. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 𑀏𑀢𑁆𑀣 𑀭𑀼𑀓𑁆𑀔𑀸𑀤𑀻𑀲𑀽𑀢𑀺. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀝𑁆𑀞𑀓𑀣𑀸𑀬 𑀯𑀘𑀦𑀁 𑀇𑀤𑀁. 𑀝𑀻𑀓𑀸𑀬𑀫𑀸𑀤𑀺𑀲𑀤𑁆𑀤𑁂𑀦 𑀉𑀧𑁆𑀧𑀸𑀤𑀸𑀤𑀻𑀦𑀺 𑀕𑀬𑁆𑀳𑀭𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢’’𑀦𑁆𑀢𑀺𑀆𑀤𑀻𑀲𑀼 𑀪𑀽𑀢𑀲𑀤𑁆𑀤𑁄 𑀉𑀧𑁆𑀧𑀸𑀤𑁂 𑀤𑀺𑀲𑁆𑀲𑀢𑀺. 𑀲𑀉𑀧𑀲𑀕𑁆𑀕𑁄 𑀧𑀦 ‘‘𑀧𑀪𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀧𑀼𑀮𑁂. ‘‘𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑀽𑀢𑀭𑀽𑀧𑁄’’𑀢𑀺𑀆𑀤𑀻𑀲𑀼 𑀳𑀻𑀴𑀦𑁂. ‘‘𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑁄 𑀲𑀗𑁆𑀕𑀸𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀥𑀫𑀦𑁂. ‘‘𑀧𑀭𑀸𑀪𑀽𑀢𑀭𑀽𑀧𑁄𑀔𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀭𑀸𑀚𑀬𑁂. ‘‘𑀅𑀦𑀼𑀪𑀽𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑁂𑀤𑀺𑀬𑀦𑁂. ‘‘𑀯𑀺𑀪𑀽𑀢𑀁 𑀧𑀜𑁆𑀜𑀸𑀬𑀸’’𑀢𑀺𑀆𑀤𑀻𑀲𑀼 𑀧𑀸𑀓𑀝𑀻𑀓𑀭𑀡𑁂 𑀤𑀺𑀲𑁆𑀲𑀢𑀺, 𑀢𑁂 𑀲𑀩𑁆𑀩𑁂 ‘‘𑀭𑀼𑀓𑁆𑀔𑀸𑀤𑀻𑀲𑀽’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺.

𑀇𑀤𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀪𑀯𑀺𑀢𑀼𑀁, 𑀉𑀩𑁆𑀪𑀯𑀺𑀢𑀼𑀁, 𑀲𑀫𑀼𑀩𑁆𑀪𑀯𑀺𑀢𑀼𑀁, 𑀧𑀪𑀯𑀺𑀢𑀼𑀁, 𑀧𑀭𑀸𑀪𑀯𑀺𑀢𑀼𑀁, 𑀅𑀢𑀺𑀪𑀯𑀺𑀢𑀼𑀁, 𑀲𑀫𑁆𑀪𑀯𑀺𑀢𑀼𑀁, 𑀯𑀺𑀪𑀯𑀺𑀢𑀼𑀁, 𑀪𑁄𑀢𑀼𑀁, 𑀲𑀫𑁆𑀪𑁄𑀢𑀼𑀁, 𑀯𑀺𑀪𑁄𑀢𑀼𑀁, 𑀧𑀸𑀢𑀼𑀪𑀯𑀺𑀢𑀼𑀁, 𑀧𑀸𑀢𑀼𑀩𑁆𑀪𑀯𑀺𑀢𑀼𑀁 𑀯𑀸, 𑀧𑀸𑀢𑀼𑀪𑁄𑀢𑀼𑀁. 𑀇𑀫𑀸𑀦𑀺 𑀅𑀓𑀫𑁆𑀫𑀓𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺.

𑀧𑀭𑀺𑀪𑁄𑀢𑀼𑀁 ¶ 𑀧𑀭𑀺𑀪𑀯𑀺𑀢𑀼𑀁, 𑀅𑀪𑀺𑀪𑁄𑀢𑀼𑀁 𑀅𑀪𑀺𑀪𑀯𑀺𑀢𑀼𑀁, 𑀅𑀥𑀺𑀪𑁄𑀢𑀼𑀁 𑀅𑀥𑀺𑀪𑀯𑀺𑀢𑀼𑀁, 𑀅𑀢𑀺𑀪𑁄𑀢𑀼𑀁 𑀅𑀢𑀺𑀪𑀯𑀺𑀢𑀼𑀁, 𑀅𑀦𑀼𑀪𑁄𑀢𑀼𑀁 𑀅𑀦𑀼𑀪𑀯𑀺𑀢𑀼𑀁, 𑀲𑀫𑀦𑀼𑀪𑁄𑀢𑀼𑀁 𑀲𑀫𑀦𑀼𑀪𑀯𑀺𑀢𑀼𑀁, 𑀅𑀪𑀺𑀲𑀫𑁆𑀪𑁄𑀢𑀼𑀁 𑀅𑀪𑀺𑀲𑀫𑁆𑀪𑀯𑀺𑀢𑀼𑀁. 𑀇𑀫𑀸𑀦𑀺 𑀲𑀓𑀫𑁆𑀫𑀓𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀭𑀺 𑀪𑀯𑀦𑁆𑀢𑀺.

‘‘𑀪𑀸𑀯𑁂𑀢𑀼𑀁, 𑀧𑀪𑀸𑀯𑁂𑀢𑀼𑀁, 𑀲𑀫𑁆𑀪𑀸𑀯𑁂𑀢𑀼𑀁, 𑀯𑀺𑀪𑀸𑀯𑁂𑀢𑀼𑀁, 𑀧𑀭𑀺𑀪𑀸𑀯𑁂𑀢𑀼𑀁’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀳𑁂𑀢𑀼𑀓𑀢𑁆𑀢𑀭𑀺 𑀢𑀼𑀫𑀦𑁆𑀢𑀧𑀤𑀸𑀦𑀺, 𑀲𑀩𑁆𑀩𑀸𑀦𑀺𑀧𑀺 𑀳𑁂𑀢𑀼𑀓𑀢𑁆𑀢𑀭𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀲𑀓𑀫𑁆𑀫𑀓𑀸𑀦𑀺𑀬𑁂𑀯 𑀪𑀯𑀦𑁆𑀢𑀺. 𑀉𑀤𑁆𑀤𑁂𑀲𑁄𑀬𑀁.

𑀢𑀢𑁆𑀭 𑀲𑀫𑀸𑀦𑀢𑁆𑀣𑀧𑀤𑁂𑀲𑀼 𑀏𑀓𑀫𑁂𑀯𑀸𑀤𑀺𑀧𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄 𑁋 𑀪𑀯𑀺𑀢𑀼𑀦𑁆𑀢𑀺 𑀳𑁄𑀢𑀼𑀁 𑀯𑀺𑀚𑁆𑀚𑀺𑀢𑀼𑀁 𑀧𑀜𑁆𑀜𑀸𑀬𑀺𑀢𑀼𑀁 𑀲𑀭𑀽𑀧𑀁 𑀮𑀪𑀺𑀢𑀼𑀁. 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑀼𑀫𑀦𑁆𑀢𑀸𑀦𑀁 𑀦𑀺𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄, 𑀲𑀩𑁆𑀩𑀸𑀦𑀺 𑀢𑀼𑀫𑀦𑁆𑀢𑀧𑀤𑀸𑀦𑀺 𑀘𑀢𑀼𑀢𑁆𑀣𑀺𑀬𑀢𑁆𑀣𑁂 𑀯𑀢𑁆𑀢𑀦𑁆𑀢𑀺 ‘‘𑀢𑁆𑀯𑀁 𑀫𑀫 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑁂𑀢𑁆𑀢𑀁 𑀬𑀸𑀘𑀺𑀢𑀼𑀫𑀸𑀕𑀢𑁄’’𑀢𑀺 𑀏𑀢𑁆𑀣 𑀯𑀺𑀬. 𑀬𑀸𑀘𑀺𑀢𑀼𑀦𑁆𑀢𑀺 𑀳𑀺 𑀬𑀸𑀘𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀪𑀯𑀺𑀢𑀼𑀦𑁆𑀢𑀺𑀆𑀤𑀻𑀦𑀫𑁆𑀧𑀺 ‘‘𑀪𑀯𑀦𑀢𑁆𑀣𑀸𑀬𑀸’’𑀢𑀺 𑀯𑀸 ‘‘𑀪𑀯𑀦𑀢𑁆𑀣’’𑀦𑁆𑀢𑀺 𑀯𑀸 ‘‘𑀪𑀯𑀦𑀸𑀬𑀸’’𑀢𑀺 𑀯𑀸 𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀧𑀺𑀘 ‘‘𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺 𑀏𑀢𑁆𑀣 ‘‘𑀤𑀝𑁆𑀞𑀼’’𑀦𑁆𑀢𑀺 𑀧𑀤𑀲𑁆𑀲 ‘‘𑀤𑀺𑀲𑁆𑀯𑀸’’𑀢𑀺 𑀅𑀢𑁆𑀣𑀤𑀲𑁆𑀲𑀦𑀢𑁄 𑀬𑀣𑀸𑀭𑀳𑀁 𑀢𑀼𑀫𑀦𑁆𑀢𑀸𑀦𑀺 𑀢𑁆𑀯𑀸𑀲𑀤𑁆𑀤𑀦𑁆𑀢𑀧𑀤𑀢𑁆𑀣𑀯𑀲𑁂𑀦𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀢𑀸𑀦𑀺 𑀘 𑀦𑀺𑀧𑀸𑀢𑀧𑀤𑁂𑀲𑀼 𑀲𑀗𑁆𑀕𑀳𑀁𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀦𑀺𑀧𑀸𑀢𑀧𑀤𑀧𑀭𑀺𑀘𑁆𑀙𑁂𑀤𑁂 ‘‘𑀢𑀼𑀁 𑀇𑀢𑀺 𑀘𑀢𑀼𑀢𑁆𑀣𑀺𑀬𑀸’’𑀢𑀺. 𑀢𑀢𑁆𑀭𑀸𑀬𑀫𑀢𑁆𑀣𑁄 ‘‘𑀢𑀼𑀁 𑀇𑀢𑀺 𑀏𑀢𑀤𑀦𑁆𑀢𑁄 𑀦𑀺𑀧𑀸𑀢𑁄 𑀘𑀢𑀼𑀢𑁆𑀣𑀺𑀬𑀸 𑀅𑀢𑁆𑀣𑁂 𑀯𑀢𑁆𑀢𑀢𑀻’’𑀢𑀺.

𑀢𑀼𑀫𑀦𑁆𑀢𑀓𑀣𑀸 𑀲𑀫𑀢𑁆𑀢𑀸.

𑀇𑀤𑀸𑀦𑀺 ¶ 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀪𑀯𑀺𑀢𑁆𑀯𑀸, 𑀪𑀯𑀺𑀢𑁆𑀯𑀸𑀦, 𑀪𑀯𑀺𑀢𑀼𑀦, 𑀪𑀯𑀺𑀬, 𑀪𑀯𑀺𑀬𑀸𑀦. 𑀉𑀩𑁆𑀪𑀯𑀺𑀢𑁆𑀯𑀸, 𑀉𑀩𑁆𑀪𑀯𑀺𑀢𑁆𑀯𑀸𑀦, 𑀉𑀩𑁆𑀪𑀯𑀺𑀢𑀼𑀦, 𑀉𑀩𑁆𑀪𑀯𑀺𑀬, 𑀉𑀩𑁆𑀪𑀯𑀺𑀬𑀸𑀦. 𑀏𑀲 𑀦𑀬𑁄 ‘‘𑀲𑀫𑀼𑀩𑁆𑀪𑀯𑀺𑀢𑁆𑀯𑀸, 𑀧𑀭𑀸𑀪𑀯𑀺𑀢𑁆𑀯𑀸, 𑀲𑀫𑁆𑀪𑀯𑀺𑀢𑁆𑀯𑀸, 𑀯𑀺𑀪𑀯𑀺𑀢𑁆𑀯𑀸, 𑀧𑀸𑀢𑀼𑀩𑁆𑀪𑀯𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀇𑀫𑀸𑀦𑀺 𑀅𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺.

𑀪𑀼𑀢𑁆𑀯𑀸, 𑀪𑀼𑀢𑁆𑀯𑀸𑀦, 𑀧𑀭𑀺𑀪𑀯𑀺𑀢𑁆𑀯𑀸, 𑀧𑀭𑀺𑀪𑀯𑀺𑀢𑁆𑀯𑀸𑀦, 𑀧𑀭𑀺𑀪𑀯𑀺𑀢𑀼𑀦, 𑀧𑀭𑀺𑀪𑀯𑀺𑀬, 𑀧𑀭𑀺𑀪𑀯𑀺𑀬𑀸𑀦, 𑀧𑀭𑀺𑀪𑀼𑀬𑁆𑀬. 𑀅𑀪𑀺𑀪𑀯𑀺𑀢𑁆𑀯𑀸, 𑀅𑀪𑀺𑀪𑀯𑀺𑀢𑁆𑀯𑀸𑀦, 𑀅𑀪𑀺𑀪𑀯𑀺𑀢𑀼𑀦, 𑀅𑀪𑀺𑀪𑀯𑀺𑀬, 𑀅𑀪𑀺𑀪𑀯𑀺𑀬𑀸𑀦, 𑀅𑀪𑀺𑀪𑀼𑀬𑁆𑀬. 𑀏𑀲 𑀦𑀬𑁄 ‘‘𑀅𑀥𑀺𑀪𑀯𑀺𑀢𑁆𑀯𑀸, 𑀅𑀢𑀺𑀪𑀯𑀺𑀢𑁆𑀯𑀸, 𑀅𑀦𑀼𑀪𑀯𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀇𑀤𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. ‘‘𑀢𑀫𑀯𑁄𑀘 𑀭𑀸𑀚𑀸 𑀅𑀦𑀼𑀪𑀯𑀺𑀬𑀸𑀦 𑀢𑀫𑁆𑀧𑀺, 𑀏𑀬𑁆𑀬𑀸𑀲𑀺 𑀔𑀺𑀧𑁆𑀧𑀁 𑀅𑀳𑀫𑀧𑀺 𑀧𑀽𑀚𑀁 𑀓𑀲𑁆𑀲’’𑀦𑁆𑀢𑀺. 𑀅𑀦𑀼𑀪𑀼𑀢𑁆𑀯𑀸, 𑀅𑀦𑀼𑀪𑀼𑀢𑁆𑀯𑀸𑀦. 𑀅𑀥𑀺𑀪𑁄𑀢𑁆𑀯𑀸, 𑀅𑀥𑀺𑀪𑁄𑀢𑁆𑀯𑀸𑀦.

‘‘𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀅𑀜𑁆𑀜𑁂 𑀤𑁂𑀯𑁂 𑀅𑀥𑀺𑀪𑁄𑀢𑁆𑀯𑀸, 𑀇𑀲𑁆𑀲𑀭𑀁 𑀓𑀸𑀭𑀬𑀺𑀲𑁆𑀲𑀢𑀻’’𑀢𑀺

𑀇𑀤𑀫𑁂𑀢𑁆𑀣 𑀧𑀸𑀴𑀺𑀦𑀺𑀤𑀲𑁆𑀲𑀦𑀁, 𑀇𑀫𑀸𑀦𑀺 𑀲𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀤𑁆𑀥𑀓𑀢𑁆𑀢𑀭𑀺𑀬𑁂𑀯 𑀪𑀯𑀦𑁆𑀢𑀺.

‘‘𑀪𑀸𑀯𑁂𑀢𑁆𑀯𑀸, 𑀪𑀸𑀯𑁂𑀢𑁆𑀯𑀸𑀦. 𑀧𑀪𑀸𑀯𑁂𑀢𑁆𑀯𑀸, 𑀧𑀪𑀸𑀯𑁂𑀢𑁆𑀯𑀸𑀦. 𑀲𑀫𑁆𑀪𑀸𑀯𑁂𑀢𑁆𑀯𑀸, 𑀲𑀫𑁆𑀪𑀸𑀯𑁂𑀢𑁆𑀯𑀸𑀦. 𑀯𑀺𑀪𑀸𑀯𑁂𑀢𑁆𑀯𑀸, 𑀯𑀺𑀪𑀸𑀯𑁂𑀢𑁆𑀯𑀸𑀦. 𑀧𑀭𑀺𑀪𑀸𑀯𑁂𑀢𑁆𑀯𑀸, 𑀧𑀭𑀺𑀪𑀸𑀯𑁂𑀢𑁆𑀯𑀸𑀦’’𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀲𑀓𑀫𑁆𑀫𑀓𑀸𑀦𑀺 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀳𑁂𑀢𑀼𑀓𑀢𑁆𑀢𑀭𑀺𑀬𑁂𑀯 𑀪𑀯𑀦𑁆𑀢𑀺. 𑀉𑀤𑁆𑀤𑁂𑀲𑁄𑀬𑀁.

𑀢𑀢𑁆𑀭 𑀲𑀫𑀸𑀦𑀢𑁆𑀣𑀧𑀤𑁂𑀲𑀼 𑀏𑀓𑀫𑁂𑀯𑀸𑀤𑀺𑀧𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄 𑁋 𑀪𑀯𑀺𑀢𑁆𑀯𑀸𑀢𑀺 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀢𑁆𑀯𑀸 𑀲𑀭𑀽𑀧𑀁 𑀮𑀪𑀺𑀢𑁆𑀯𑀸. 𑀏𑀯𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 ¶ 𑀪𑀼𑀢𑁆𑀯𑀸𑀢𑀺 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀼𑀢𑁆𑀯𑀸𑀢𑀺 𑀲𑀓𑀫𑁆𑀫𑀓𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀪𑀼𑀢𑁆𑀯𑀸 𑀅𑀦𑀼𑀪𑀼𑀢𑁆𑀯𑀸𑀢𑀺 𑀇𑀫𑁂𑀲𑀜𑁆𑀳𑀺 𑀲𑀫𑀸𑀦𑀢𑁆𑀣𑀢𑀁 𑀲𑀤𑁆𑀥𑀫𑁆𑀫𑀯𑀺𑀤𑀽 𑀇𑀘𑁆𑀙𑀦𑁆𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀪𑀼𑀢𑁆𑀯𑀸 𑀪𑀼𑀢𑁆𑀯𑀸𑀦’’𑀇𑀘𑁆𑀘𑁂𑀢𑁂, ‘‘𑀅𑀦𑀼𑀪𑀼𑀢𑁆𑀯𑀸’’𑀢𑀺𑀫𑀲𑁆𑀲 𑀳𑀺;

𑀅𑀢𑁆𑀣𑀁 𑀲𑀽𑀘𑁂𑀦𑁆𑀢𑀺 ‘‘𑀳𑀼𑀢𑁆𑀯𑀸’’𑀢𑀺, 𑀧𑀤𑀲𑁆𑀲 𑀧𑀦 𑀦𑁂𑀯 𑀢𑁂.

𑀓𑁂𑀘𑀺 ‘‘𑀪𑀽𑀢𑁆𑀯𑀸’’𑀢𑀺 𑀤𑀻𑀖𑀢𑁆𑀢𑀁, 𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀲𑀦𑁂;

𑀤𑀻𑀖𑀢𑀸 𑀭𑀲𑁆𑀲𑀢𑀸 𑀘𑁂𑀯, 𑀤𑁆𑀯𑀬𑀫𑁆𑀧𑁂𑀢𑀁 𑀧𑀤𑀺𑀲𑁆𑀲𑀢𑀺.

𑀲𑀤𑁆𑀤𑀲𑀢𑁆𑀣𑁂 𑀘 ‘‘𑀪𑀽𑀢𑁆𑀯𑀸’’𑀢𑀺, 𑀤𑀻𑀖𑀢𑁆𑀢𑀲𑀜𑁆𑀳𑀺𑀢𑀁 𑀧𑀤𑀁;

‘‘𑀪𑀯𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁, 𑀤𑀻𑀧𑁂𑀢𑀺 𑀦 𑀢𑀼 𑀲𑀸𑀲𑀦𑁂.

‘‘𑀳𑀼𑀢𑁆𑀯𑀸’’𑀇𑀢𑀺 𑀧𑀤𑀁𑀬𑁂𑀯, 𑀤𑀻𑀧𑁂𑀢𑀺 𑀚𑀺𑀦𑀲𑀸𑀲𑀦𑁂;

‘‘𑀪𑀯𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁, 𑀦𑀢𑁆𑀣𑀺 𑀅𑀜𑁆𑀜𑀢𑁆𑀣 𑀢𑀁 𑀧𑀤𑀁.

𑀇𑀘𑁆𑀘𑁂𑀯𑀁 𑀲𑀯𑀺𑀲𑁂𑀲𑀦𑁆𑀢𑀼, 𑀯𑀘𑀦𑀁 𑀲𑀸𑀭𑀤𑀲𑁆𑀲𑀺𑀦𑀸;

𑀲𑀸𑀲𑀦𑁂 𑀲𑀤𑁆𑀤𑀲𑀢𑁆𑀣𑁂 𑀘, 𑀯𑀺𑀜𑁆𑀜𑀼𑀦𑀸 𑀧𑁂𑀓𑁆𑀔𑀺𑀢𑀩𑁆𑀩𑀓𑀁.

𑀏𑀯𑀁 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑁂 𑀧𑀯𑀢𑁆𑀢𑀸𑀦𑀺 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺𑀧𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀲𑀩𑁆𑀩𑀸𑀦𑁂𑀢𑀸𑀦𑀺 𑀅𑀯𑀺𑀪𑀢𑁆𑀢𑀺𑀓𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑁂 𑀳𑀺 𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁂 𑀅𑀯𑀺𑀪𑀢𑁆𑀢𑀺𑀓𑀸𑀦𑀺 𑀓𑀢𑁆𑀯𑀸 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀤𑁆𑀤𑀢𑁆𑀣𑀯𑀺𑀤𑀽𑀦𑀁 𑀧𑀦 𑀫𑀢𑁂 𑀧𑀞𑀫𑀸𑀤𑀺𑀯𑀺𑀪𑀢𑁆𑀢𑀺𑀯𑀲𑁂𑀦 𑀲𑀯𑀺𑀪𑀢𑁆𑀢𑀺𑀓𑀸𑀦𑀺 𑀪𑀯𑀦𑁆𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀢𑁆𑀯𑀸𑀤𑀺𑀬𑀦𑁆𑀢𑀸𑀥𑀺𑀓𑀸𑀭𑁂 𑀇𑀤𑀜𑁆𑀘𑀼𑀧𑀮𑀓𑁆𑀔𑀺𑀢𑀩𑁆𑀩𑀁 𑁋 𑀪𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀪𑀼𑀢𑁆𑀯𑀸 𑀕𑀢𑁄, 𑀪𑀼𑀢𑁆𑀯𑀸 𑀕𑀫𑀺𑀲𑁆𑀲𑀲𑀺, 𑀓𑀲𑀺𑀢𑁆𑀯𑀸 𑀯𑀧𑀢𑀺. 𑀉𑀫𑀗𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑁂𑀤𑁂𑀳𑁄 𑀦𑀸𑀯𑀫𑀸𑀭𑀼𑀳𑀺. 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼 𑀇𑀘𑁆𑀘𑀸𑀤𑀻 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀥𑀸𑀢𑀽𑀦𑀁 𑀧𑀼𑀩𑁆𑀩𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑀸. ‘‘𑀪𑀼𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀳𑀺 ‘‘𑀪𑀼𑀢𑁆𑀯𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀁. ‘‘𑀕𑀘𑁆𑀙𑀢𑀻’’𑀢𑀺 𑀇𑀤𑀁 𑀧𑀦 𑀉𑀢𑁆𑀢𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀺 𑀘𑁂𑀢𑀸𑀦𑀺 𑀧𑀤𑀸𑀦𑀺 𑀏𑀓𑀓𑀢𑁆𑀢𑀼𑀓𑀸𑀦𑀁 𑀓𑁆𑀭𑀺𑀬𑀸𑀦𑀁 𑀯𑀸𑀘𑀓𑀢𑁆𑀢𑀸. 𑀢𑀣𑀸 𑀳𑁂𑀢𑁆𑀣 𑀬𑁄 𑀕𑀫𑀦𑀓𑁆𑀭𑀺𑀬𑀸𑀬 ¶ 𑀓𑀢𑁆𑀢𑀸, 𑀲𑁄 𑀏𑀯 𑀪𑀼𑀜𑁆𑀚𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

‘‘𑀅𑀦𑁆𑀥𑀓𑀸𑀭𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀉𑀤𑀺𑀢𑁄𑀬𑀁 𑀤𑀺𑀯𑀸𑀓𑀭𑁄;

𑀯𑀡𑁆𑀡𑀁 𑀧𑀜𑁆𑀜𑀸𑀯𑀪𑀸𑀲𑁂𑀳𑀺, 𑀑𑀪𑀸𑀲𑁂𑀢𑁆𑀯𑀸 𑀲𑀫𑀼𑀕𑁆𑀕𑀢𑁄’’

𑀇𑀘𑁆𑀘𑀸𑀤𑀻𑀦𑀺𑀧𑀺 𑀧𑀦 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀲𑀫𑀸𑀦𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑀸. 𑀏𑀢𑁆𑀣 𑀳𑀺 ‘‘𑀦𑀺𑀳𑀦𑁆𑀢𑁆𑀯𑀸𑀦𑀸’’𑀢𑀺 𑀧𑀤𑀁 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀁. ‘‘𑀉𑀤𑀺𑀢𑁄’’𑀢𑀺 𑀇𑀤𑀁 𑀧𑀦 𑀉𑀢𑁆𑀢𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀬 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀫𑀸𑀬𑁂𑀯 𑀲𑀫𑀸𑀦𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

𑀓𑁂𑀘𑀺 𑀧𑀦 ‘‘𑀫𑀼𑀔𑀁 𑀩𑁆𑀬𑀸𑀤𑀸𑀬 𑀲𑀬𑀢𑀺, 𑀅𑀓𑁆𑀔𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑀻’’𑀢𑀺 𑀉𑀤𑀸𑀳𑀭𑀦𑁆𑀢𑀺. 𑀅𑀧𑀭𑁂 ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺. 𑀢𑀢𑁆𑀣 𑀩𑁆𑀬𑀸𑀤𑀸𑀦𑀧𑀭𑀺𑀯𑀢𑁆𑀢𑀦𑀼𑀢𑁆𑀢𑀭𑀓𑀸𑀮𑁄 𑀩𑁆𑀬𑀸𑀤𑀸𑀦𑀽𑀧𑀲𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑀓𑁆𑀭𑀺𑀬𑀸𑀬 𑀮𑀓𑁆𑀔𑀺𑀬𑀢𑀺. ‘‘𑀦𑀺𑀲𑀚𑁆𑀚 𑀅𑀥𑀻𑀢𑁂, 𑀞𑀢𑁆𑀯𑀸 𑀓𑀣𑁂𑀢𑀻’’𑀢𑀺 𑀘 𑀲𑀫𑀸𑀦𑀓𑀸𑀮𑀢𑀸𑀬𑀧𑀺 𑀅𑀚𑁆𑀛𑁂𑀦𑀓𑀣𑀦𑁂𑀳𑀺 𑀧𑀼𑀩𑁆𑀩𑁂𑀧𑀺 𑀦𑀺𑀲𑀚𑁆𑀚𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀧𑀼𑀩𑁆𑀩𑀼𑀢𑁆𑀢𑀭𑀓𑀸𑀮𑀢𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀺. 𑀉𑀤𑀬𑀲𑀫𑀓𑀸𑀮𑀫𑁂𑀯 𑀳𑀺 𑀢𑀦𑁆𑀦𑀺𑀯𑀢𑁆𑀢𑀦𑀻𑀬𑀦𑀺𑀯𑀢𑁆𑀢𑀦𑀦𑁆𑀢𑀺.

‘‘𑀤𑁆𑀯𑀸𑀭𑀫𑀸𑀯𑀭𑀺𑀢𑁆𑀯𑀸 𑀧𑀯𑀺𑀲𑀢𑀺’’𑀇𑀘𑁆𑀘𑀸𑀤𑀺 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀅𑀧𑀭𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀯𑀺𑀲𑀦𑀓𑁆𑀭𑀺𑀬𑀸 𑀧𑀼𑀭𑀺𑀫𑀸, 𑀆𑀯𑀭𑀡𑀓𑁆𑀭𑀺𑀬𑀸 𑀧𑀦 𑀧𑀘𑁆𑀙𑀺𑀫𑀸, 𑀢𑀲𑁆𑀫𑀸 ‘‘𑀆𑀯𑀭𑀺𑀢𑁆𑀯𑀸’’𑀢𑀺 𑀇𑀤𑀁 𑀅𑀧𑀭𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀯𑀺𑀲𑀢𑀻’’𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀓𑀁 𑀧𑀤𑀦𑁆𑀢𑀺. 𑀅𑀬𑀁 𑀦𑀬𑁄 ¶ 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄. 𑀅𑀧𑀭𑁂 ‘‘𑀥’𑀦𑁆𑀢𑀺 𑀓𑀘𑁆𑀘 𑀧𑀢𑀺𑀢𑁄 𑀤𑀡𑁆𑀟𑁄’’𑀢𑀺 𑀉𑀤𑀸𑀳𑀭𑀡𑀦𑁆𑀢𑀺. 𑀅𑀪𑀺𑀖𑀸𑀢𑀪𑀽𑀢𑀲𑀫𑀸𑀬𑁄𑀕𑁂 𑀧𑀦 𑀅𑀪𑀺𑀖𑀸𑀢𑀚𑀲𑀤𑁆𑀤𑀲𑁆𑀲 𑀲𑀫𑀸𑀦𑀓𑀸𑀮𑀢𑀸 𑀏𑀢𑁆𑀣 𑀮𑀩𑁆𑀪𑀢𑀻𑀢𑀺 𑀇𑀥𑀸𑀧𑀺 𑀧𑀼𑀭𑀺𑀫𑀸𑀦𑀺𑀬𑁂𑀯 𑀉𑀤𑀸𑀳𑀭𑀡𑀸𑀦𑀺 𑀬𑀼𑀢𑁆𑀢𑀸𑀦𑀻𑀢𑀺.

‘‘𑀧𑀺𑀲𑀸𑀘𑀁 𑀤𑀺𑀲𑁆𑀯𑀸 𑀘𑀲𑁆𑀲 𑀪𑀬𑀁 𑀳𑁄𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀇𑀘𑁆𑀘𑀸𑀤𑀺 𑀅𑀲𑀫𑀸𑀦𑁂 𑀓𑀢𑁆𑀢𑀭𑀺 𑀧𑀬𑁄𑀕𑁄. 𑀏𑀢𑁆𑀣 𑀳𑀺 𑀧𑀺𑀲𑀸𑀘𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀲𑁆𑀲 𑀪𑀬𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸. 𑀏𑀯𑀁 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀥𑀸𑀢𑀽𑀦𑀁 𑀦 𑀮𑀩𑁆𑀪𑀢𑀺 𑀤𑀲𑁆𑀲𑀦𑀓𑁆𑀭𑀺𑀬𑀸𑀬 𑀧𑀼𑀭𑀺𑀲𑁂𑀲𑀼 𑀧𑀯𑀢𑁆𑀢𑀦𑀢𑁄, 𑀪𑀯𑀦𑀸𑀤𑀺𑀓𑁆𑀭𑀺𑀬𑀸𑀬 𑀘 𑀪𑀬𑀸𑀤𑀻𑀲𑀼 𑀧𑀯𑀢𑁆𑀢𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑁂𑀢𑀩𑁆𑀩𑁄.

𑀇𑀤𑀫𑁆𑀧𑀺 𑀧𑀦𑁂𑀢𑁆𑀣 𑀉𑀧𑀮𑀓𑁆𑀔𑀺𑀢𑀩𑁆𑀩𑀁 ‘‘𑀅𑀧𑁆𑀧𑀢𑁆𑀯𑀸 𑀦𑀤𑀺𑀁 𑀧𑀩𑁆𑀩𑀢𑁄, 𑀅𑀢𑀺𑀓𑁆𑀓𑀫𑁆𑀫 𑀧𑀩𑁆𑀩𑀢𑀁 𑀦𑀤𑀻’’𑀇𑀘𑁆𑀘𑀸𑀤𑀺 𑀧𑀭𑀸𑀧𑀭𑀬𑁄𑀕𑁄. ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀺, 𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀚𑀸𑀬𑀢𑁂, ‘𑀥’𑀦𑁆𑀢𑀺 𑀓𑀢𑁆𑀯𑀸 𑀤𑀡𑁆𑀟𑁄 𑀧𑀢𑀺𑀢𑁄’’𑀇𑀘𑁆𑀘𑀸𑀤𑀺 𑀮𑀓𑁆𑀔𑀡𑀳𑁂𑀢𑀼𑀆𑀤𑀺𑀧𑁆𑀧𑀬𑁄𑀕𑁄. ‘‘𑀦𑁆𑀳𑀢𑁆𑀯𑀸 𑀕𑀫𑀦𑀁, 𑀪𑀼𑀢𑁆𑀯𑀸 𑀲𑀬𑀦𑀁. 𑀉𑀧𑀸𑀤𑀸𑀬 𑀭𑀽𑀧’’𑀫𑀺𑀘𑁆𑀘𑀸𑀧𑀺 𑀩𑁆𑀬𑀢𑁆𑀢𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀧𑁆𑀧𑀬𑁄𑀕𑁄𑀢𑀺.

𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀥𑀸𑀢𑀽𑀦𑀁 𑀧𑀼𑀩𑁆𑀩𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀲𑀫𑀸𑀦𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀅𑀧𑀭𑀓𑀸𑀮𑁂 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀅𑀲𑀫𑀸𑀦𑀓𑀢𑁆𑀢𑀼𑀓𑀸𑀦𑀁 𑀢𑁆𑀯𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄, 𑀧𑀭𑀸𑀧𑀭𑀬𑁄𑀕𑁄 ¶ , 𑀮𑀓𑁆𑀔𑀡𑀳𑁂𑀢𑀼𑀆𑀤𑀺𑀧𑁆𑀧𑀬𑁄𑀕𑁄, 𑀩𑁆𑀬𑀢𑁆𑀢𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀧𑁆𑀧𑀬𑁄𑀕𑁄𑀢𑀺 𑀲𑀢𑁆𑀢𑀥𑀸 𑀢𑁆𑀯𑀸𑀤𑀺𑀬𑀦𑁆𑀢𑀸𑀦𑀁 𑀧𑀤𑀸𑀦𑀁 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀓𑀘𑁆𑀘𑀸𑀬𑀦𑁂 ‘‘𑀧𑀼𑀩𑁆𑀩𑀓𑀸𑀮𑁂𑀓𑀓𑀢𑁆𑀢𑀼𑀓𑀸𑀦𑀁 𑀢𑀼𑀦 𑀢𑁆𑀯𑀸𑀦 𑀢𑁆𑀯𑀸 𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑁂𑀬𑁂𑀯 𑀏𑀓𑀓𑀢𑁆𑀢𑀼𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺? 𑀬𑁂𑀢𑀼𑀬𑁆𑀬𑁂𑀦 𑀢𑁆𑀯𑀸𑀤𑀺𑀬𑀦𑁆𑀢𑀸𑀦𑀁 𑀧𑀤𑀸𑀦𑀁 𑀧𑀼𑀭𑀺𑀫𑀓𑀸𑀮𑀓𑁆𑀭𑀺𑀬𑀸𑀤𑀻𑀧𑀦𑀢𑁄. 𑀓𑀘𑁆𑀘𑀸𑀬𑀦𑁂 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀧𑀼𑀩𑁆𑀩𑀓𑀸𑀮𑁂𑀓𑀓𑀢𑁆𑀢𑀼𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 ‘‘𑀇𑀢𑀺 𑀓𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀳𑁂𑀢𑀼𑀅𑀢𑁆𑀣𑀯𑀲𑁂𑀦𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄, 𑀢𑀲𑁆𑀫𑀸 ‘‘𑀪𑀯𑀺𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀪𑀽𑀥𑀸𑀢𑀼𑀫𑀬𑀸𑀦𑀁 𑀢𑁆𑀯𑀸𑀤𑀺𑀲𑀤𑁆𑀤𑀦𑁆𑀢𑀸𑀦𑀁 𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 ‘‘𑀧𑀘𑀺𑀢𑁆𑀯𑀸’’𑀢𑀺𑀆𑀤𑀻𑀦𑀁 𑀬𑀣𑀸𑀧𑀬𑁄𑀕𑀁 ‘‘𑀪𑀯𑀦𑀳𑁂𑀢𑀼 𑀧𑀘𑀦𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀳𑁂𑀢𑀼𑀢𑁆𑀣𑁂𑀧𑀺 𑀬𑀢𑁄 𑀳𑁄𑀦𑁆𑀢𑀺, 𑀲𑀤𑁆𑀤𑀸 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑀓𑀸;

𑀢𑀲𑁆𑀫𑀸 𑀳𑁂𑀢𑀼𑀯𑀲𑁂𑀦𑀸𑀧𑀺, 𑀯𑀤𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄.

‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀲𑀤𑁆𑀤𑀲𑁆𑀲, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀲𑀼 𑀳𑀺;

‘‘𑀇𑀢𑀺 𑀓𑀭𑀡𑀳𑁂𑀢𑀽’’𑀢𑀺, 𑀅𑀢𑁆𑀣𑁄 𑀥𑀻𑀭𑁂𑀳𑀺 𑀕𑀬𑁆𑀳𑀢𑀺.

‘‘𑀕𑀘𑁆𑀙𑀸𑀫𑀺 𑀤𑀸𑀦𑀺 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺’’;

𑀇𑀢𑀺 𑀧𑀸𑀞𑁂𑀧𑀺 𑀳𑁂𑀢𑀼𑀢𑁆𑀣𑁄, 𑀕𑀬𑁆𑀳𑀢𑁂 𑀧𑀼𑀩𑁆𑀩𑀯𑀺𑀜𑁆𑀜𑀼𑀪𑀺.

‘‘𑀬𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀕𑀫𑀦-𑀳𑁂𑀢𑀽’’𑀢𑀺 𑀳𑀺 𑀓𑀣𑀻𑀬𑀢𑁂;

𑀳𑁂𑀢𑀼𑀢𑁆𑀣𑁂𑀯𑀁 𑀬𑀣𑀸𑀬𑁄𑀕-𑀫𑀜𑁆𑀜𑀢𑁆𑀭𑀸𑀧𑀺 𑀅𑀬𑀁 𑀦𑀬𑁄.

𑀏𑀯𑀁 𑀪𑀽𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀘 𑀢𑀼𑀫𑀦𑁆𑀢𑀧𑀤𑀜𑁆𑀘 𑀢𑁆𑀯𑀸𑀤𑀺𑀬𑀦𑁆𑀢𑀧𑀤𑀜𑁆𑀘𑀸𑀢𑀺 𑀅𑀢𑁆𑀣𑀢𑁆𑀢𑀺𑀓𑀁 𑀯𑀺𑀪𑀢𑁆𑀢𑀁.

𑀬𑁄 ¶ 𑀇𑀫𑀫𑀢𑁆𑀣𑀢𑀺𑀓𑀁 𑀲𑀼𑀯𑀺𑀪𑀢𑁆𑀢𑀁,

𑀓𑀡𑁆𑀡𑀭𑀲𑀸𑀬𑀦𑀫𑀸𑀕𑀫𑀺𑀓𑀸𑀦𑀁;

𑀥𑀸𑀭𑀬𑀢𑁂 𑀲 𑀪𑀯𑁂 𑀕𑀢𑀓𑀗𑁆𑀔𑀸,

𑀧𑀸𑀯𑀘𑀦𑀫𑁆𑀳𑀺 𑀕𑀢𑁂 𑀲𑀼𑀔𑀼𑀫𑀢𑁆𑀣𑁂.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀅𑀢𑁆𑀣𑀢𑁆𑀢𑀺𑀓𑀯𑀺𑀪𑀸𑀕𑁄 𑀦𑀸𑀫

𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀪𑀽𑀥𑀸𑀢𑀼𑀭𑀽𑀧𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀧𑀤𑀫𑀸𑀮𑀸 𑀦𑀺𑀝𑁆𑀞𑀺𑀢𑀸.